﻿Ishipa.
35.
Vishipa vu Dawuda. Vuzavaguɗu, yaꞋan vu shilika̱ n aza a na i a̱ vishili nu mpa, yaꞋan kuvon n aza a na i o kuvon nu mpa. 
Vu ɗika ma̱ra̱ga̱ n ucanuku u kuvon u nu, vu ta̱wa̱ vu ɓa̱nka̱ mu. 
Ɗa̱ngusa̱ masara ma̱ nu n kabata, vu shilika̱ n aza a na i a ku guva mu! yaꞋan m panaka wu a kudana, <<Mpa ɗa kishi ka̱ nu.>> 
YaꞋan aza a na i a̱ kula̱nsa̱ wuma u va̱, a pana wono, zuwa aza a na i a kuyaꞋanka mu nsata a lukanasa le okpo n wono a̱ ripula̱. 
Zuwa le okpo kopo ka na wunla̱i u tsu pura̱, tsu aza a na kalingata ka Vuzavaguɗu ki o kuloko. 
YaꞋan uye u le wo okpo ka̱yimbi, wo okpo n kederi, a makyan ma na kalingata ka Vuzavaguɗu ki a ku guva le. 
Adama a na babu unushi ɗa a zuwakai mu maza, a̱ ga̱va̱ka̱i mu kpenle ku uga̱vi, adama a na n yikpa̱ punu. 
YaꞋan atakaci a cinika le babu uyevi. Ka̱sukpa̱ maza ma na azuki ma aza le. ka̱ta̱ kpamu a̱ yikpa̱ punu e kpenle ka ali a ukpisa̱. 
Ka̱ta̱ n yaꞋan ma̱za̱nga̱ adama a Vuzavaguɗu, mi ta̱ a kuyaꞋan ma̱za̱nga̱ adama a na wi isa mu ta̱. 
N ka̱ɗu kete mi ta̱ a kudana Vuzavaguɗu, <<Vuza wi lo tsu nu ba, vu tsu wawa ta̱ aza a unambi wa aza a utsura, aza a unambi n ofoloni ekiye aza a na i o kudoro le.>> 
Uma a gbani-gbani a kuyaꞋan aꞋuwa adama a̱ va̱, a bankai n kadanshi ka unushi u na n yevei ba. 
A kutsupa kasingai ka̱ va̱ n ka gbani-gbani, ali ɗa n nambai i na n kuyaꞋan n wuma. 
Ama a makyan ma na i a mɓa̱la̱, mpa n tsu uka ta̱ akashi a kpalu, n iwain kulyaꞋa ilikulyaꞋa, n vasai n kaci ka̱ va̱ uza̱liki, 
tsu na n kuyaꞋanka ka̱ja̱Ꞌa̱ ko vuza va̱ avasa, mu uta̱i a̱shi u la̱nga̱shi adama a una̱mgbi u ka̱tsuma̱, tsu vuza na wi a̱ ma̱shi ma̱ a̱na̱ku a̱ ni. 
Ama ɗa baci n ta̱ɗa̱tsa̱i, o ɓolongu a̱ ma̱za̱nga̱, irala i va̱ o ɓolongi ka̱ci ke le adama a̱ va̱ n yeve ba, a̱ ka̱na̱i ku zoꞋoso mu babu kuka̱sukpa̱. 
Tsu aza a na i kupana wovon u Ka̱shile ba, a yaꞋankai mu ma̱ka̱n ka̱u, n a lunganai mu, adama tsurala tsu na i a tsu ɗa nu mpa. 
Vuzavaguɗu, ali wannai ɗa va̱ ka̱na̱ kinda le koci? Isa mu ekiye e le, wawa wuma u va̱ a̱ ubuta̱ wi ikawu i nampa. 
Ka̱ta̱ n cikpa wu o koɓolo ka uma ka̱ a̱bunda̱i, e kelime ka uma a̱bunda̱i mi ta̱ a kucikpa wu. 
Ka̱ta̱ vu ka̱sukpa̱ irala i va̱, aza aꞋuwa a nan lo, ene uyikpi uva̱ ba. ka̱ta̱ vu ka̱sukpa̱ irala i va̱ i babu unushi, n cigipi tsu a̱shi a yaꞋan ma̱za̱nga̱, a pana uyoꞋo adama atakaci a̱ va̱ ba. 
A ci yaꞋan kadanshi kasingai ba, ama ka̱ta̱ a kucikpa a yaꞋan kadanshi ka aꞋuwa wa aza a na i a̱ ida̱shi i ma̱ta̱na̱. 
Ɗa a shikai mu a danai, <<Ehen! Ehen tsu ene wu ta̱ n a̱shi a̱ tsu.>> 
Ama avu Vuzavaguɗu vu ene ta̱ ili nampa, adama a nannai, ka̱ta̱ vu ka̱sukpa̱ le ba. Vuzavaguɗu ka̱ta̱ vu bana daꞋangi nu mpa ba. 
Vuzavaguɗu ɗa̱nga̱, vu ere mu, Ka̱shile ka̱ va̱, isa ka mu ili i na yi i va̱. 
Avu vuza vu usuɓi ɗa, Vuzavaguɗu yotsongu le unambi wu unushi u va̱, ka̱ta̱ vu ka̱sukpa̱ irala i va̱, a yaꞋan ma̱za̱nga̱ adama a̱ va̱ ba. 
Ka̱ta̱ vu ka̱sukpa̱ le a danaka ka̱ci ke le, <<Ehen! ili i na tsu cigai i ɗanna.>> Ka̱ta̱ vu ka̱sukpa̱ le a dana, <<Tsu fuɗa yi ta̱.>> 
Ka̱sukpa̱ yaba dem na u yaꞋin ma̱za̱nga̱ adama atakaci a̱ va̱, a fuɗa le ali a̱ ripula̱, yaꞋan aza a na i a kuɗika a laꞋa mu ta̱, okpo n wono n kugoyi. 
YaꞋan aza a na i a̱ ma̱za̱nga̱ adama a wishi u va̱, a sala m ma̱za̱nga̱, n a danai, <<Vuzavaguɗu vuza gbayin ɗa! wi ta̱ a̱ ma̱za̱nga̱ adama ulyaꞋi u kagbashi ka̱ ni.>> 
Ka̱ta̱ n sala ukuna wu usuɓi u nu, kanna lakam mi ta̱ a kucikpa wu. 
