﻿Ishipa.
31.
Kadanshi a kubana u vuza vu kelime vi ishipa: Vishipa vu Dawuda. N ta̱wa̱ ta̱ wa̱ a̱ nu Vuzavaguɗu, adama a na vu ere mu, ka̱ta̱ vu ka̱sukpa̱ a̱ ciya̱ ulyaꞋi a̱ va̱ ba, avu Ka̱shile ka usuɓi kaꞋa, wawa mu mi ta̱ ufolu u nu. 
Pana ka mu, vu wawa mu gogo na, vu okpo ubuta̱ u kusheɗeku u va̱, mashilya ma utsura, ma na ma ku isa mu. 
Avu ɗa ubuta̱ u kusheɗeku u va̱, n mashilya ma̱ va̱, tono nu mpa tsu na vu yaꞋin uzuwakpani. 
Ere mu a maza ma na a zuwakai mu, adama a na avu ɗa ubuta̱ u kusheɗeku u va̱. 
Ekiye a̱ nu a ɗa n zuwai wuma u va̱, avu ɗa vu shiba̱i mu, Vuzavaguɗu, Ka̱shile ku usuɓi. 
N iwan ta̱ aza a na i o kutono a̱ma̱li, ama n mpa n zuwa ta̱ ka̱ɗu u Vuzavaguɗu. 
Mi ta̱ a kuyaꞋan ma̱za̱nga̱, adama a ucigi u nu u na u tsu sabaꞋa ba, vu ene ta̱ atakaci a̱ va̱, Vu yeve ta̱ mɓa̱la̱ n va̱. 
Vu neke mu ekiye irala i va̱ ba. ama vu zuwa mu ta̱ a ubuta̱ u singai. 
Vuzavaguɗu pana asuvayali a̱ va̱, adama a na mi ta̱ a̱ ka̱tsuma̱ ka atakaci. a̱shi a̱ va̱ a shitasa ta̱ adama a̱ ma̱shi, wuma u va̱ n ikyamba yi oꞋwoi yo okpoi luɓa̱. 
Una̱mgbuka̱tsuma̱ u jebe ta̱ ayin a̱ va̱, ma̱shi kpamu me jebe ta̱ a̱ya̱ a̱ va̱, utsura u va̱ u kotso ta̱, adama a̱ ka̱bunda̱i atakaci a̱ va̱, ali etele a̱ va̱ a̱ kuwa̱i. 
Ɗa mo okpoi ili ma̱ka̱n, e kelime ki irala i va̱, ili i kugoyi a̱ ubuta̱ wa aza a na ci ida̱shi ɗeɗevu, ili i wovon wa aza na e yevei mu, ene mu baci a uye, ka̱ta̱ a suma. 
A cinukpai nu mpa tsu vuza na u kuwa̱i, mo okpoi ci ili i na a variki. 
M pana ta̱ irala i va̱ a̱ kuyun, ɗa wovon u ka̱ra̱Ꞌi mu, e kusheshe adama a na a una mu. 
Ama mpa n zuwa ta̱ ka̱ɗu ka̱ va̱ wa̱ nu, Vuzavaguɗu, <<Avu ɗa Ka̱shile ka̱ va̱.>> 
Makyan dem vi ta̱ a̱ kula̱na̱ mu, vu isa mu ta̱ a̱ ubuta̱ wi irala i va̱, ekiye aza a na i a kutakacika mu. 
Mpa kagbashi ka̱ nu kaꞋa, indana mu n a̱shi a singai, isa mu adama a ucigi u nu u na u tsu sabaꞋa ba. 
Ka̱ta̱ vu ka̱sukpa̱ m pana wono ba, Vuzavaguɗu, adama a na n ɗeke wu ta̱. zuwa uma a gbani-gbani a pana wono, a̱ gida̱la̱ n ka̱bini a kubana a̱ ubuta̱ wa̱ a̱kpisa̱. 
Kuya̱ngu una̱ wa aza aꞋuwa, aza o kugoyi ra̱ka̱ n aza a̱ra̱ɗi, a na i a kuyaꞋanka aza a usuɓi kadanshi ko kugoyi. 
Ka̱bunda̱i ka̱ yiɗa̱i a kugisanku n kasingai ka̱ nu, kasingai ka na vu yaꞋankai aza a na i a kupana wovon u nu, kasingai ka na vu yaꞋin a̱ a̱shi a uma, wa aza a na i a̱ kula̱nsa̱ ubuta̱ u kusheɗeku wa̱ a̱ nu. 
Vu tsu sokongu le ta̱ a̱ ubuta̱ u nu, a nsata n uma. Vu tsu zuwa le ta̱ m ma̱ta̱na̱ a̱ ubuta̱ wi ida̱shi i nu. ka̱ta̱ a pana ishikushi i uma ba. 
Cikpai Vuzavaguɗu, adama a na u yotsongu mu ta̱ ucigi u ni, ucigi u ni u na u tsu sabaꞋa ba a makyan ma na a kanji mu n kuvon, 
M panai wovon, mpa n sheshe ta̱ vu loko mu ta̱ wa̱ a̱ nu, Ama ɗa vu panai ma̱shi ma̱ va̱, a makyan ma na n ɗekei nu kula̱nsa̱ uɓa̱nki, 
Cigai Vuzavaguɗu, a̱ɗa̱ uma a usuɓi a̱ ni, Vuzavaguɗu wi ta̱ e kere aza a usuɓi, ama u tsu takacika ta̱ aza a̱ra̱ɗi. 
tsurukpai ka̱ta̱ i gbama asuvu, ra̱ka̱ vu ɗa̱ na i keɗei a̱pa̱Ꞌa̱ u Vuzavaguɗu. 
