﻿Ishipa.
28.
Vishipa vu Dawuda. Vuzavaguɗu avu ɗa mi a kuɗeke, katali ke kusheɗeku ku va̱, pana ma̱shi ma̱ va̱, vu ushuku mu baci ba, mi ta̱ o kokpo a̱ ka̱tsuma̱ ka aza a na a̱ gida̱la̱i a kubana ukpisa̱. 
Panaka mu, a makyan ma na mi a̱ ma̱shi a̱ kula̱nsa̱ uɓa̱nki, ɗa baci n ɗa̱ngusa̱i ekiye a̱ va̱, a kindana A̱Ꞌisa̱ a gbayin a̱ nu. 
Ka̱ta̱ vu una mu n uma a gbani-gbani ba, koɓolo n aza a na a ci yaꞋan ka gbani-gbani ba, aza a na kadanshi ke le adanshi ka̱ ma̱ta̱na̱ kaꞋa, ama a̱ɗu e le i ta̱ tukpa n tsurala. 
Tsupa le derere ci ili i na a yaꞋin, takacika le tsu ka gbani-gbani ke le, neke le i na yi untsai le derere. 
A zuwaka n ulinga u na Vuzavaguɗu u yaꞋin ba, n ili i na ekiye a̱ ni a yaꞋin ba, adama a nannai wi ta̱ a kutakacika le, wu una le ra̱ka̱. 
Cikpai Vuzavaguɗu, adama a na u pana ta̱ ma̱shi ma̱ kula̱nsa̱ uɓa̱nki ma̱ va̱. 
Vuzavaguɗu ɗa utsura u va̱, n ma̱ra̱ga̱ ma̱ va̱, n zuwa ta̱ ka̱ɗu ka̱ va̱ wa̱ a̱ ni, u ɓa̱nka̱ mu ta̱, n yaꞋan ta̱ ma̱za̱nga̱, n vishipa vu va̱ ɗa n kucikpa yi. 
Vuzavaguɗu ɗa katsura ka uma a̱ ni, mashilya ma wishi maꞋa u mogono ma na u zagbai. 
Isa uma a̱ nu Vuzavaguɗu, vu zuwaka uma a̱ uka̱ni a̱ nu una̱singai. vu okpo maguɓi me le, vu la̱na̱ le ko wannai. 
