﻿Ishipa.
24.
Vishipa vu Dawuda. Iɗika i Vuzavaguɗu i ɗa, n ili na yi punu dem, aduniyan a̱ ni a ɗa, n aza a na i punu ida̱shi dem. 
Adama a na u maꞋa ta̱ a ɗa a gaɗi vu mala, u varai kumiꞋi ku ni a gaɗi vu mini. 
Yayi u yawai u kumba kusan ku Vuzavaguɗu? Yayi u yawai u uwa a̱ Ma̱va̱li mo oɓolo ma̱ ni? 
Sai vuza na ulinga we ekiye a̱ ni u ciɗa u ɗa, kpamu ka̱ɗu ka̱ ni ki ta̱ ciɗa, n vuza na u tsu tono oboci ba, ko u yaꞋan akucina a uwa ba. 
Vuzavaguɗu wi ta̱ a kuzuwaka yi una̱singai. Ka̱shile kawawi ka̱ ni ki ta̱ a ku isa yi. 
IcuꞋu i uma a nanlo a ɗa, a̱ tsu la̱nsa̱ e yeve Ka̱shile, aza a na a tsu bana e kelime ka̱ Ka̱shile ka Yakubu. Kuvuka 
Ɓa̱yuwa̱i utsutsu wa n wanshi, ɓa̱yuwa̱i utsutsu u cau, Adama a na mogono ma gbayin mi ta̱ a kuꞋuwa punu. 
Yayi mogono ma gbayin ma nampa? A̱yi ɗa Vuzavaguɗu, vuza vu utsura m MalaꞋimili, Vuzavaguɗu ɗa kalyaꞋi ko kuvon. 
Ɓa̱yuwa̱i utsutsu wa n wanshi, ɓa̱yuwa̱i utsutsu u cau, Adama a na mogono ma gbayin mi ta̱ a kuꞋuwa, 
Yayi mogono ma gbayin ma nampa? A̱yi ɗa Vuzavaguɗu, vuza vu utsura MalaꞋimili, a̱yi ɗa mogono ma gbayin ma. Kuvuka 
