﻿Ishipa.
22.
Kadanshi a kubana u vuza vu kelime vi ishipa: Vishipa vu Dawuda. Ka̱shile ka̱ va̱, Ka̱shile ka̱ va̱, yiɗa̱i i zuwai ɗa vu ka̱sukpa̱i mu? N shika̱ ta̱ ka̱u adama a̱ kula̱nsa̱ uɓa̱nki, ama ali n gogo na vu ta̱wa̱ ba. 
Ka̱shile ka̱ va̱ n ɗeke wu ta̱ n kanna, vu ushuku mu ba, n ɗeke wu ta̱ n kayin, n nannai dem asuvu a̱ va̱ i a̱ ida̱shi ba. 
Ama n nannai dem avu vuza ciɗa ɗa, vuza na aza a Isaraila i a kucikpa. 
Ikaya i tsu a zuwa ta̱ a̱ɗu ele wa̱ a̱ nu, a zuwa ta̱ a̱ɗu e le wa̱ a̱ nu, ɗa tana vu wawai le. 
A banka ta̱ n ma̱shi me le wa̱ a̱ nu, ɗa vu wawai le, wa̱ a̱ nu u ɗa a zuwai a̱ɗu e le, tana vu neke le wono ba. 
Ama mpa vuma ɗa ba, mpa kazun kaꞋa koci, mu okpoi ili yi izoshi n ili i ma̱ka̱n u yaba dem. 
Vuza na baci wu enei mu dem, ka̱ta̱ u bonoko mu ili yi izoshi. o tsu goyo mu ta̱ n a̱ gba̱ɗa̱i aci e le, 
a dana,<<Vu zuwa ta̱ ka̱ɗu ka̱ nu u Vuzavaguɗu ba̱ya̱? YaꞋan wi isa wu, yaꞋan Vuzavaguɗu u wawa wu, wi baci a kupana uyoꞋo u nu.>> 
N nannai dem avu ɗa vu utuka̱i mu a̱ ka̱tsuma̱ ka̱ a̱na̱ku a̱ va̱, avu ɗa vu zuwai n yongoi n ma̱ta̱na̱ ali mpa a ku apa mani. 
Ili i na i ɗikai a kanna ka na a matsai mu, ɗa mi a kuzuwa ka̱ɗu ka̱ va̱ wa̱ a̱ nu, avu ɗa Ka̱shile ka̱ va̱, ali a kanna ka na a̱na̱ku a̱ va̱ a matsai mu. 
Ka̱ta̱ vu yaꞋan daꞋangi nu mpa ba, adama a na atakaci i ta̱ ɗevu, kpamu ko ka̱ɓa̱nki ki lo ba. 
Irala i va̱ i ka̱ra̱Ꞌa̱ mu ta̱ tsu obomburon, a na obomburon a utsura a iɗika i Bashan. 
Apukai una̱ u le a na i kawu, ci i kawu i na yi a̱ yura̱ a̱ kula̱nsa̱ mu, adama a na a karasa mu. 
Utsura u va̱ u kotsoi, mo okpoi tsu mini ma na ma̱ va̱ma̱i a iɗika, etele a̱ va̱ dem a̱ shirikpa̱ ta̱, ka̱ɗu ka va̱ ke derikpei a na abashi ishigi 
Gboroli vu va̱ vu ɗekpe ta̱ tsu kubuta̱, kelentsu ka̱ va̱ ka paɗai punu a kalakpani ka̱ va̱. Vu ka̱sukpa̱i mu ukpa̱ a iɗika. 
Ka̱tsura̱ ki irala i va̱ ka̱ ka̱ra̱Ꞌi mu, tsu koɓolo ke nsheꞋe, ɗa e wejelei ekiye a̱ va̱ n ene a̱ va̱. 
Ali etele dem okpoi e keteshe. Irala i va̱ i goyo mu ta̱, ɗa a zuwakai mu a̱shi. 
Ɗa a yaꞋin kazagba n akashi a̱ va̱, ɗa e pecekei ka̱ci ke le akashi a̱ va̱. 
Vuzavaguɗu, ka̱ta̱ vu shamgba daꞋin nu mpa ba ta̱wa̱ gogoꞋo vi isa mu, avu kawawi ka̱ va̱. 
Wawa a̱ ubuta̱ u kotokobi, isa a̱ ubuta̱ wu nsheꞋe n nampa. 
Isa mu ekiye a irala i va̱, isa mu adama a na i ta̱ a̱ kusuwa̱n mu n avana e le tsu njuma. 
Mi ta̱ a kudana uma a̱ va̱ ili i na vu yaꞋin, mi ta̱ a kucikpa wu a̱ ka̱tsuma̱ ko koɓolo ka uma. 
Cikpai ni, a̱ɗa̱ na yi a kupana wovon u Vuzavaguɗu, nekei ni tsugbayin a̱ɗa̱ kumaci ku Yakubu, cikpai ni, a̱ɗa̱ aza a Isaraila ra̱ka̱. 
Adama a na u goyo aza a unambi wu utsura ba, ko u kpa̱ɗa̱ kula̱na̱ le ba. U zuwaka le kucina̱ ba, ama u tsu ushuku le ta̱ ɗa baci e ɗekei ni. 
Mi ta̱ a ku cikpa wu e kelime ko koɓolo ka uma adama ili i na vu yaꞋin. E kelime ka aza na i o kutono wu ra̱ka̱, Ka̱ta̱ n shatangu uzuwakpani u na n yaꞋin. 
Aza a unambi i ta̱ a kulyaꞋa ali a̱ cuwa̱. Aza a na i a̱ kula̱nsa̱ Vuzavaguɗu i ta̱ a kucikpa yi, a̱ɗu e le i ta̱ a̱ okpo m ma̱za̱nga̱, ko wannai. 
Aduniyan i ta̱ a kuciɓa, i ta̱ o kubono a̱ ubuta̱ u Vuzavaguɗu, kumaci ku uma ra̱ka̱ i ta̱ a kucikpa yi. 
adama a na tsugono tsu Vuzavaguɗu tsu ɗa, Wi ta̱ o tsugono tsu uma ra̱ka̱. 
Aza a uciyi ra̱ka̱ i ta̱ a̱ ku kuɗa̱nki, n aza a na i o kubono kubuta̱ ki iɗika, n aza a na a kufuɗa kuɓa̱na̱ wuma u le ba, i ta̱ a̱ ku kuɗa̱ngu kelime ka̱ni. 
kumaci ku na ka̱ kuta̱wa̱ ki ta̱ a kucikpa yi. Ntsukaya n na mi a̱ kuta̱wa̱ i ta̱ a kupana arabali a Vuzavaguɗu. 
ele feu ta̱ a kusala ukuna u Vuzavaguɗu, wa aza a na ka̱ta̱ a matsai ba i ta̱ a kudana le, Vuzavaguɗu ɗa u wawai uma a̱ ni. 
