﻿Ishipa.
21.
Kadanshi a kubana u vuza vu kelime vi ishipa: Vishipa vu Dawuda. Vuzavaguɗu, adama a utsura u nu, mogono ma yaꞋan ta̱ a̱ ma̱za̱nga̱, wi ta̱ a̱ ma̱za̱nga̱ n a̱bunda̱i adama a na vu neke yi ta̱ ulyaꞋi. 
Vu neke yi ta̱ ili i na ka̱ɗu ka̱ ni ka cigai, vu kpa̱ɗa̱ ku ushuku yi ufolu u ni ba. Kuvuka 
Vu tuka̱i ni n ili i singai n a̱bunda̱i, ɗa vu zuwakai ni oroliko azanariya a kaci ka̱ ni. 
U folono wu ta̱ wuma, ɗa vu nekei ni wuma, n wuma wu ugaɗi. 
Adama a̱ uɓa̱nki u nu, u ciya̱ ta̱ ucikpi u gbayin ucikpi n tsugbayin tsu na vu nekei ni. 
Vu zuwai ni wo okpoi vuza una̱singai ko wannai, kuyongo ku nu n a̱yi u tsu zuwa yi ta̱ ma̱za̱nga̱. 
Adama a na mogono ma, ma zuwa ta̱ ka̱ɗu wa̱ a̱ ni, Vuzavaguɗu MalaꞋimili. Adama a ucigi u nu u na u tsu sabaꞋa ba, wi ta̱ o ko okpo mogono ko wannai. 
Kukiye ku nu ki ta̱ e kureme irala i nu ra̱ka̱, kukiye ku usingai ku nu ki ta e kureme aza a na a iwain nu. 
Vi ta̱ a kulyaꞋa le tsu melentsu ma akina, ayin a na baci vu yotsongi ka̱ci ka̱ nu, Vuzavaguɗu. vi ta̱ a ku una le a̱ ka̱tsuma̱ ka wupa u nu, akina i ta̱ o kusongu le ra̱ka̱. 
Mogono mi ta̱ a ku una ntsukaya n le aduniyan ra̱ka̱, n muku n le a̱ ka̱tsuma̱ ku uduniyan. 
Ko ishi baci e sheshe kuyaꞋanka wu ka gbani-gbani, ko o foɓusoi kuyaꞋanka wu kawuya, i a̱ kuciya̱ ulyaꞋi ba. 
Adama a na vi ta̱ a kuzuwa le a kpatala a suma, a makyan ma na baci vu taɗuki ayaꞋa a̱ nu. 
YaꞋan a cikpa wu adama a utsura u nu, Vuzavaguɗu. Ci ta̱ a kuyaꞋan ishipa tsu cikpa utsura u nu. 
