﻿Ishipa.
18.
Kadanshi a kubana u vuza vu kelime vi ishipa: Vishipa vu Dawuda. N ciga wu ta̱ Vuzavaguɗu, avu ɗa utsura u va̱. 
Vuzavaguɗu, avu ɗa katali ke kusheɗeku ka̱ va̱, mashilya ma̱ va̱ n kishi ka̱ va̱, Ka̱shile kaꞋa katali ke kusheɗeku ka̱ va̱, wa̱ a̱ ni u ɗa n tsu sheɗeku. ma̱ra̱ga̱ ma̱ va̱ n kishi ka̱ va̱, ubuta̱ u kusheɗeku u va̱ kpamu. 
N tsu ɗeke ta̱ Vuzavaguɗu, a̱yi na u yotsoi kucikpa, kpamu u tsu wawa mu ta̱ ekiye a irala i va̱. 
Ukpa̱ u shiya mu ta̱ kpankpaꞋan n awin a̱ ni, ka gbani-gbani ka aya ta̱ ali ka laꞋi utsura u va̱. 
Kasaun ka shiya mu ta̱ n awin a̱ ni, ukpa̱ u zuwaka mu ta̱ maza. 
A̱ ka̱tsuma̱ ka atakaci a̱ va̱, n ɗeke ta̱ Vuzavaguɗu, N ɗeke ta̱ Ka̱shile ka̱ va̱ adama a̱ kula̱nsa̱ uɓa̱nki, A̱Ꞌisa̱ a gbayin a̱ ni u panai ka̱la̱ka̱tsu ka̱ va̱, ma̱shi ma̱ va̱ ma uwa ta̱ atsuvu a̱ ni. 
Aduniyan ejeꞋi ali a̱ gba̱ɗa̱i, ɗa a̱miꞋin a nsasan ejeꞋi ɗa a̱ gba̱ɗa̱i, adama a wupa u Ka̱shile. 
Ka̱nga̱ ka̱ ka̱na̱i ku uta̱ a̱ vunu vi ni, melentsu ma akina n a̱ga̱ruwa̱shi a̱ ku uta̱ una̱ u ni, 
U ɓa̱yuwa̱i gaɗi, ɗa u cipa̱i a iɗika, eleshu a̱ lima̱ ka̱u a ɗaka vu ene a̱ ni. 
U kumbai gaɗi ve evelyu i Corobi u imkpai, a̱ kucipa̱ n ilaɗi. 
U zuwai ka̱yimbi ko okpoi kapalatsu ka̱ ni, u sheɗeki eleshu a̱ lima̱. 
Ɗa ulaɗi wu uta̱i eleshu a̱ ni, ɗa mini ma atali n melentsu ma akina, uta̱i e kelime ka̱ ni. 
Vuzavaguɗu u lapai ɗe kakpanga gaɗi, ɗa a panai ka̱la̱ka̱tsu ka MalaꞋimili. 
U tawai ayaꞋa a̱ ni, u wacuwai irala ni, n ulaɗi u ni u ɗa u lokoi le. 
A palukpai kumiꞋi ku mala e keteshe, kumiꞋi ka aduniyan ku uta̱i e keteshe, ana vu ɓarangi irala i va̱, Vuzavaguɗu, ana kpamu vu ɓarangi le n wupa. 
Vuzavaguɗu u ba̱rukpa̱i kukiye ku ni ɗe gaɗi u ɗikai mu, wu utuka̱i mu a̱ mini mu uga̱vi. 
Wu isa mu ekiye a irala i va̱ yi utsura, n wa aza a na o kovoi mu, adama a na a laꞋa ta̱ utsura u va̱. 
A kanna ka atakaci a̱ va̱, ɗa a̱ ta̱wa̱i a̱ shilika̱i nu mpa, ama ɗa vuzavaguɗu u wawai mu. 
Wu utuka̱i mu a̱ ka̱tsuma̱ ka atakaci, ɗa wi isai mu adama a na wi ta̱ a kupana uyoꞋo u va̱. 
Vuzavaguɗu u tsu tsupa mu ta̱, adama a na mpa vuza vu usuɓi ɗa, ɗa u zuwakai mu una̱singai adama a usuɓi u va̱. 
N tono ta̱ uye u Vuzavaguɗu, n ka̱sukpa̱ Vuzaguɗu Ka̱shile ka̱ va̱, adama a kuyaꞋan ka gbani-gbani ba. 
N tono ta̱ wila̱ u ni ra̱ka̱, n kpa̱ɗa̱ kutono ili i na u dansai ba. 
Ɗa mo okpoi vuza vu babu unushi a̱ ubuta̱ ni. Ɗa kpamu me erei ka̱ci ka̱ va̱ a̱ ubuta̱ u kuyaꞋan unushi. 
Adama a nannai ɗa Vuzavaguɗu u nekei mu katsupu adama a usuɓi u va̱, adama a na u yeve ta̱ mi na unushi a̱ ni ba. 
Vuzavaguɗu avu vuza vu uneki u ka̱ɗu ɗa, wa aza a na e nekei u a̱ɗu, vuza vu ma̱riki ɗa kpamu wa aza a̱ ma̱riki. 
Wa aza a̱ɗu a ciɗa, vu tsu yotsongu le ta̱ vi ta̱ ciɗa, ama vi ta̱ a tsurala n aza a ka gbani-gbani. 
Vu tsu isa ta̱ aza a na o goyoi ka̱ci ka̱ le, ama vu tsu goyo ta̱ aza a̱ra̱ɗi. 
Vuzavaguɗu, avu ɗa vu tsu neke mu kutashi, avu ɗa vu lokoi ka̱yimbi ka̱ va̱. 
N utsura u nu, mi ta̱ a ku una ka̱tsura̱ ko osoji, n utsura u Ka̱shile ka̱ va̱ mi ta̱ a kupasa mashilya dem. 
Uye u Ka̱shile wi ta̱ derere, uzuwakpani u Vuzavaguɗu mayun ɗa. a̱yi ma̱ra̱ga̱ maꞋa wa aza a na e sheɗeki wa̱ a̱ ni. 
Vuzavaguɗu koci, a̱yi ɗa Ka̱shile, Ka̱shile kaꞋa koci ubuta̱ u kusheɗeku u tsu. 
A̱yi ɗa Ka̱shile ka na ke ci neke mu utsura u ka̱ɗu, u tsu ere mu ta̱ a uye wu nwalu n va̱. 
U tsu zuwa mu ta̱ n wala n ilaɗi ko ma̱ta̱ɗa̱, tsu mesheun e kere mu a gaɗi vu nsasan. 
U tsu gbara mu adama o kuvon, ciya̱ n fuɗa kuyaꞋan ulinga n utan u viyum vi shili. 
Vuzavaguɗu vu ere mu ta̱, ɗa vu isai mu, mo okpoi vuzagbayin, adama a na vu la̱na̱ mu ta̱, utsura u nu kpamu we erei mu, 
Vu zuwa mu ta̱ a̱ ubuta̱ u na wi n ma̱ta̱ɗa̱ ba, n saꞋwa kuyikpa̱ ba. 
N guvai irala i va̱ ali n remei le, mi a kushamgba ba sai mu una le ra̱ka̱. 
Ɗa n lapai le ali a iɗika, a fuɗa a̱ ɗa̱nga̱ ba, a̱ yikpa̱i a ɗaka vu ene a̱ va̱. 
Avu ɗa vu nekei mu utsura u kuyaꞋan kuvon, vu zuwai irala i va̱ a ɗaka vu va̱. 
Vu zuwai irala i va̱ a kpatalai a sumai, ɗa mu unai aza a na i a tsurala nu mpa. 
A̱ shika̱i, ama babu vuza na wa ku isa le, e ɗekei Vuzavaguɗu, ama ɗa u kpa̱ɗa̱i ku ushuku le. 
Ɗa n lapai le luɓa̱ luɓa̱ ali okpoi tsu kubuta̱, n dasai le tsu kolyoꞋo ku uye. 
Vu isai mu a̱ ubuta̱ wa aza a ugbamiwasuvu, vu zuwai mu mo okpo vuza vu kelime vu uduniyan, uma a na n saꞋwai kuyeve ba, okpoi aza a ulinga a̱ va̱. 
Ɗa baci a panai ukuna u va̱, o tsu tono mu ta̱. Omoci a̱ kuta̱wa̱ n e nekei mu tsugbayin, 
a nambai utsura u ka̱ɗu, n kujeꞋe ki ikyamba ɗa a̱ uta̱i a̱ ubuta̱ u na e sheɗeki. 
Vuzavaguɗu wi ta̱ n wuma, una̱singai u katali ke kusheɗeku ka̱ va̱, ucikpi a kubana a̱ Ka̱shile kishi ka̱ va̱. 
A̱yi ɗa Ka̱shile ka na ka kutsupaka mu, a̱yi ɗa u zuwai uduniya wo okpoi ɗaka vu va̱, 
u tsu isa mu ta̱ e kiye a irala i va̱. u tsu neke mu ta̱ tsugbayin a̱ ubuta̱ wi irala i va̱, u tsu isa mu ta̱ ekiye a uma a kavama. 
Adama a nannai, Vuzavaguɗu, mi ta̱ a kucikpa wu a̱ ka̱tsuma̱ ku uduniyan, mi ta̱ a kuyaꞋan ishipa n cikpa kula ku nu. 
Makyan dem Ka̱shile ke ci neke ta̱ mogono ma na u zagbai ulyaꞋi, u tsu yotsongu ta̱ ucigi u na u tsu sabaꞋa ba u mazagbi ma̱ ni, u Dawuda nu ntsukaya n ni ko wannai. 
