﻿Ishipa.
16.
Vishipa vu Dawuda. Ere mu Ka̱shile, adama a na avu ɗa ubuta̱ u kusheɗeku u va̱. 
Ɗa n danai Vuzavaguɗu, <<Avu ɗa Vuzavaguɗu vu va̱, ili i singai i na mi n i ɗa ra̱ka̱, wa̱ a̱ nu u ɗa yi uta̱i.>> 
Adama aza a ciɗa a iɗika ya, ele ɗa i n tsugbayin, ele ɗa a zuwai mu ma̱za̱nga̱. 
Aza a na a zagbai o tono a̱ma̱li o yoku, o tsu ronoko ta̱ ka̱ci ka̱ le atakaci ka̱u. Mi o kuɓolongu n e le, a̱ ubuta̱ u kuyaꞋan ka alyuka ba. Mi a kucikpa a̱ma̱li e le ba. 
Vuzavaguɗu avu ɗa ili i na mi n i ɗa koci, avu ɗa vu nekei mu ili i na n cigai dem, wuma u va̱ wi ta̱ ekiye a̱ nu. 
KuneꞋe ku na vu yaꞋankai mu, ki ta̱ n ugain ka̱u, mayun ku singai ku ɗa. 
N cikpa ta̱ Vuzavaguɗu, a na wi o kutono nu mpa, n kayin kpamu ka̱ɗu ka̱ va̱ ke ci neke mu ta̱ kadanshi. 
N yeve ta̱ makyan dem Vuzavaguɗu wi ta̱ nu mpa. Adama a na wi ta̱ e kukiye ku singai ku va̱, mi a̱ kurikpa̱ ba. 
Adama a nannai ka̱ɗu ka̱ va̱ ki ta̱ m ma̱za̱nga̱, wuma u va̱ kpamu wi ta̱ a̱ ma̱za̱nga̱, ikyamba i va̱ feu yi ta̱ a kuyongo babu koyoku. 
Adama a na va̱ ku ka̱sukpa̱ mu, n yongo a kasaun ba, ko vu ka̱sukpa̱ vuza vu usuɓi u shama ba. 
Vi ta̱ a̱ ku yotsongu mu uye, uye u na u kubana a̱ ubuta̱ u wuma, kuyongo ku nu koɓolo nu mpa ili i ma̱za̱nga̱ i ɗa, ida̱shi e kukiye ku usingai ku nu, uyoꞋo u ɗa ko wannai. 
