﻿Ishipa.
10.
Vuzavaguɗu yiɗa̱i i zuwai vu shamgbai daꞋin? Yiɗa̱i i zuwai ɗa vu sokongi ka̱ci ka̱ nu a makyan ma na ci atakaci? 
Uma a gbani-gbani i ta̱ a̱ra̱ɗi a kutakacika aza a unambi, zuwa ka gbani-gbani ka na o foɓusoi ko bono a kaci ke le. 
Uma a gbani-gbani a̱ra̱ɗi n kawuya ka na e sheshei a̱ɗu e le, aza a ulyopi a tsu shika ta̱ Vuzavaguɗu, kpamu o tsu goyo yi ta̱. 
Uma a gbani-gbani i ta̱ ugbamukaci, a tsu ciɓa n Ka̱shile ba. E kusheshe ku le dem, a tsu dana ta̱, <<Ka̱shile kilo ba.>> 
Uma a gbani-gbani a ci lyaꞋa ta̱ kelime a ili i na i a kuyaꞋan dem. E kuyeve afada a̱ Ka̱shile ba, o tsu goyo ta̱ irala i le. 
E kusheshe ku le a tsu dana ta̱, <<Kawuya ka̱ kuciya̱ tsu ba, ci tana a kutakacika ba.>> 
Una̱ u le wi ta̱ tukpa n ishikushi, n aꞋuwa n mavura, elentsu e le i ta̱ n ufa̱ka̱ u kadanshi ka gbani-gbani n kavama. 
O tsu bopo ta̱ a n likuci n wawaꞋa, una aza a babu unushi. A̱shi e le i ta̱ a̱ ubuta̱ wa aza a babu utsura. 
A tsu vana ta̱ a̱ ubuta̱ u na o bopoi tsu kawu, a kuvana aza a babu utsura, n ayakuru e le a ɗa a̱ tsu ka̱na̱ aza a babu utsura, ka̱ta̱ a laza n e le. 
A tsu dasa ta̱ aza a babu utsura e kpete le, o yotsongu le utsura ali a lyaꞋa le. 
E ci sheshe ta̱ a dana, <<Kabura Ka̱shile ba, u pala ta̱ a̱shi a̱ ni wi e kene tsu ba.>> 
Vuzavaguɗu, ta̱wa̱ vu wawa mu, Ka̱shile, ka̱ta̱ vu cinukpa n aza a na i a kutakacika ba. 
Yiɗa̱i i zuwai ɗa uma a gbani-gbani o ogoyoi Ka̱shile? Ali i e kusheshe n a danai, <<Wi a kutakacika tsu ba.>> 
Ama Vuzavaguɗu vi ta̱ e kene, vi ta̱ kpamu a̱ kula̱na̱ aza atakaci n aza a una̱mgbi u ka̱tsuma̱, a makyan dem vi ta̱ ufoɓushi vu ɓa̱nka̱. Wa̱ a̱ nu u ɗa aza a babu utsura a tsu zuwa a̱ɗu, avu ɗa vu tsu ɓa̱nka̱ mkpaꞋan. 
Jebe utsura u uma a gbani-gbani, takacika le adama a unushi u na a yaꞋin, ali uta̱ka̱ ka gbani-gbani ke le e keteshe. 
Vuzavaguɗu, mogono maꞋa ko wannai. uduniyan u na u tonoi a̱ma̱li, i ta̱ a ku una le a iɗika ya. 
Vuzavaguɗu, pana ma̱shi ma aza a babu utsura, pana avasa e le, vu neke le utsura u ka̱ɗu. 
Vu pana ta̱ ma̱shi ma mkpaꞋan n aza na i n utsura ba, vu yaꞋanka le afada a usuɓi, adama a na ka̱ta̱ uma o doku e neke le wovon ba. 
