﻿Ishipa.
7.
A yaꞋan vu ɗa n ka̱la̱ka̱tsu ka Shigiyonotu. Vishipa vu Dawuda vu na u yaꞋankai Vuzavaguɗu adama a̱ Kushi vuza vu aza a Bayami. Vuzavaguɗu Ka̱shile ka̱ va̱, wa̱ a̱ nu u ɗa mi a̱ kula̱nsa̱ ubuta̱ u kusheɗeku, Wawa mu ka̱ta̱ vu isa mu ekiye aza a na i a̱ kula̱nsa̱ wuma u va̱, 
Ta baci nannai ba, i ta̱ a kubanka mu a̱ ubuta̱ u na babu vuza na u ku isa mu. Ta ɗe a ku sazasa mu tsu na kawu u tsu saza vuma. 
Vuzavaguɗu Ka̱shile ka̱ va̱, ɗa baci n yaꞋin ili i ite a̱ ka̱tsuma̱ ki ili i nampa, ali a̱ ciya̱ mu n unushi, 
ko n yaꞋankai ka̱ja̱Ꞌa̱ ka̱ va̱ ka gbani-gbani, ko ɗa baci n lyaꞋi utsura u vurala vu va̱ babu unushi. 
YaꞋan Irala i va̱ i guva mu ali a̱ ka̱na̱ mu, ka̱ta̱ a dasa mu a iɗika, a̱ ka̱sukpa̱ mu punu a iɗika ya ukpa̱. Kuvuka 
Vuzavaguɗu, ɗa̱nga̱ n wupa u nu, vu yaꞋan tsurala n wupa wu irala i va̱. Ɗa̱nga̱ vu isa mu, vu yaꞋan afada a usuɓi. 
YaꞋan o ɓolongu uduniyan ra̱ka̱ wa̱ a̱ nu, vu lyaꞋa tsugono tsu le ɗe gaɗi. 
Vuzavaguɗu avu ɗa vu ci yaꞋanka uma afada, Vuzavaguɗu yaꞋanka mu afada tsu usuɓi u va̱ adama a na mi n unushi ba, mi ta̱ kpamu n ma̱riki. 
Avu Ka̱shile ka ciɗa, avu na vu tsu la̱na̱ kusheshe ku vuma n ka̱ɗu ka̱ ni. Vu shamgbatangu ka gbani-gbani ka uma, ka̱ta̱ vu zuwa uma a̱ usuɓi a tsurukpa. 
Ka̱shile kaꞋa ma̱ra̱ga̱ ma̱ va̱, u tsu isa ta̱ aza a na o tsu tono yi. 
Ka̱shile kayaꞋinkafada ka̱ usuɓi kaꞋa, u tsu takacika ta̱ uma a gbani-gbani makyan dem. 
Ɗa baci uma a̱ kpa̱ɗa̱i kushika̱ unushi u le, Ka̱shile ki ta̱ e ku temgbe kotokobi ka̱ ni. u lapula ta̱ ɗe utan u ni. 
U foɓuso ta̱ ɗe ucanuku u kuvon u ni u tsukono, Ɗa u gisanki ayaꞋa akina a̱ ni. 
La̱na̱ tsu na uma a gbani-gbani e kusheshe a̱ɗu e le, O kufoɓuso ukuna wa atakaci kpamu a kuyaꞋan aꞋuwa. 
A̱ ga̱va̱ ta̱ kpenle ku uga̱vi, ɗa a kucikpa a̱ yikpa̱i punu. 
O foɓusokoi aza o yoku kawuya, ama ɗa ko bonoi a kaci ke le. o foɓusoi vishili, ɗanna vu bonoi a kaci ke le. 
N cikpa ta̱ Vuzavaguɗu adama afada e mejege a̱ ni, mi ta̱ a kuyaꞋan ishipa i kucikpa u Vuzavaguɗu MalaꞋimili. 
