﻿1 Samaila.
2.
Ɗa Hanatu u yaꞋin kavasa u danai, <<Vuzavaguɗu u zuwai ka̱ɗu ka̱ va̱ kashanai m ma̱za̱nga̱, mi ta̱ a̱ ma̱za̱nga̱ adama a ili i na u yaꞋin. Mi ta̱ o kuzoꞋoso irala i va̱, mi ta̱ m ma̱za̱nga̱ ma̱ a̱bunda̱i adama a na Ka̱shile ka isa mu ta̱. 
<<Vuza wi lo ciɗa tsu Vuzavaguɗu ba. Vuza wi lo kpamu uteku ci ni ba, babu ubuta̱ u kusheɗeku tsu Ka̱shile ka̱ tsu. 
Ka̱sukpa̱i kuyaꞋan kadanshi n a̱ra̱ɗi, ko kuyaꞋan kadanshi n i ka̱ga̱i, adama a na Vuzavaguɗu a̱yi ɗa Ka̱shile, a̱yi ɗa kpamu keyevi, a̱yi ɗa kpamu u kukondo ulinga u uma dem. 
Vuzavaguɗu, avu ɗa vu koɗosoi utan wu osoji a utsura, ɗa vu zuwai aza a babu utsura a tsurukpai. 
Aza a na ishi n ucuwi ka̱u gogo na ele ɗa o okpoi a kuyaꞋan ulinga a̱ ciya̱ ili i na a kulyaꞋa, ama aza a na ishi n kambulu, gogo na ele ɗa okpoi aza a ucuwi. Vuka vu na wi ishi madari, gogo na wo okpoi vuza muku n cindere. Ama vuza na wi ishi m muku n a̱bunda̱i, ɗa u kucukpa wo okpoi lekeɗi. 
Vuzavaguɗu a̱yi ɗa u tsu una, ka̱ta̱ kpamu u neke wuma, u tsu banka ta̱ uma ukpisa̱, ka̱ta̱ kpamu u ɗa̱ngusa̱ le. 
Vuzavaguɗu u tsu zuwa ta̱ aza a yoku o okpo aza unambi, ka̱ta̱ kpamu u zuwa aza a yoku o okpo aza a uciyi. U tsu zuwa ta̱ aza a yoku a̱ ciya̱ ugoyi, ka̱ta̱ kpamu u ɗa̱ngusa̱ aza a yoku. 
U tsu ɗa̱ngusa̱ ta̱ aza a unambi a̱ ka̱tsuma̱ ku unambi u le, ka̱ta̱ u zuwa aza a na i a iɗika a̱ ɗa̱nga̱. U zuwa le a lyaꞋa koɓolo n muku mu ngono ka̱ta̱ a̱ da̱sa̱ngu a kakuba ko tsugono, adama a na ugiti wa aduniyan u ɗaɗa Vuzavaguɗu ta punu ta na u zuwai aduniyan a. 
<<Wi ta̱ a kinda nwalu n uma a̱ usuɓi a̱ ni, ama aza a gbani-gbani i ta̱ a̱ kuna̱mgba̱ a̱ ka̱yimbi, utsura u vuma u ɗa u tsu zuwa vuza u ciya̱ ulyaꞋi ba. 
Aza a na i a tsurala n Vuzavaguɗu i ta̱ a kuyaꞋan wuni, u tsu lapa ta̱ kakpanga ɗe gaɗi adama a na u ɓarangu le. Vuzavaguɗu wi ta̱ a kuyaꞋanka aduniyan dem afada. wi ta̱ kpamu e kuneke mogono ma na u zagbai utsura, wi ta̱ a kuzuwa mogono ma na u zagbai ma̱ ciya̱ ulyaꞋi.>> 
Ɗa Elikana n limata i ni a lazai o kubono a kpaꞋa ku le a Rama. Ama ɗa maku mo kolobo ma, ma lyaꞋi kelime n kuyaꞋanka Vuzavaguɗu tsugbashi ekiye e Eli ganu. 
Muku mo olobo n Eli i n usuɓi ba, o tono kadanshi ka Vuzavaguɗu ba. 
Tsu na anan ganu koɓolo n uma a ci yaꞋansa ɗaɗa, a ayin a na baci vuza u nekei alyuka, a makyan ma na inyama ya yi a̱ kupuna̱sa̱ o mogbodo, kagbashi ka ganu ka wi ta̱ a̱ kuta̱wa̱ n kaya ka̱ a̱jivu a tatsu, 
ka̱ta̱ u sapa kaya ka o mogbodo, vinyama vu na baci kaya ka ka sapai vu okpo ta̱ vu ganu. Ta a̱ ka̱na̱i kuyaꞋansaka uma a Isaraila nannai dem, aza a na a bankai alyuka a Shilo. 
Ubuta̱ u yoku kafu o songu ushuma wa, kagbashi ka ganu ki ta̱ a̱ kuta̱wa̱ ka̱ta̱ ka dana vuza na wi a kuyaꞋan alyuka a, <<NeꞋe ganu inyama i yoku u zungu, adama a na wi a kisa inyama yu usuꞋwin wa̱ nu ba, sai ita̱ku.>> 
Vuza va u dana yi baci, <<YaꞋan biꞋi tsu songu ushuma wa, ka̱ta̱ yeve vi ɗika tsu na va kufuɗa,>> wi ta̱ a kudana, <<A̱Ꞌa̱, Neke mu gogo na, vi neke mu baci ba mi ta̱ a kuɗika n utsura.>> 
Unushi u muku n Eli u doku u yinkpasakai ka̱u a̱ ubuta̱ u Vuzavaguɗu, adama a na o goyo ta̱ kuneꞋe ka. 
Ama maku ma nanlo Samaila, u lyaꞋi kelime n kuyaꞋan ulinga a kpaꞋa ku Vuzavaguɗu u uki m motogu ma ucaꞋi ma efodu. 
A̱na̱ku a̱ ci jilya̱ka̱ yi ta̱ motogu me kenu a̱ ka̱ya̱ dem u banka yi. A ayin a na baci a̱yi n vali vi ni a banai a Shilo adama a na a yaꞋan alyuka a̱ ka̱ya̱ dem. 
Ka̱ta̱ Eli u zuwaka Elikana n vuka vi ni una̱singai, u dana, <<Vuzavaguɗu u neke wu muku n yoku n vuka vu nampa adama a na a shatangu una̱ u maku ma nampa ma, ma na i nekei Vuzavaguɗu.>> Ka̱ta̱ a laza o kubono a kpaꞋa ku le. 
Ɗa Vuzavaguɗu u la̱na̱i Hanatu u zuwakai ni una̱singai, ɗa u doku u matsai muku mo olobo n tatsu ni nkere n re. A̱yi Samaila u gbonguroi a kuyaꞋanka Vuzavaguɗu ulinga. 
Gogo na Eli u kutsa ta̱ ka̱u. Wi ta̱ kpamu a kupana ili i na kpamu muku n ni mi a kuyaꞋanka uma a Isaraila n uteku u na kpamu i a kuvaku n a̱ma̱ci a na i a kuyaꞋan ulinga a̱ utsutsu u Ma̱va̱li mo Oɓolo. 
Ɗa u yaꞋankai le kadanshi ɗa u danai,<<Yiɗa̱i i zuwai ɗa yi a kuyaꞋan ili tsu nampa? Uma n a̱bunda̱i i ta̱ a kadanshi ki ili wasasa i na yi a kuyaꞋansa. 
A̱Ꞌa̱, muku n va̱, ka̱sukpa̱i kuyaꞋan nannai! Uma a Vuzavaguɗu i ta̱ a kadanshi adama a ili i gbani-gbani i nampa. 
Vuza yoku u nusaka baci toku, Ka̱shile ki ta̱ a kushamgba adama a̱ ni, ama vuza u nusaka baci Vuzavaguɗu, yayi u kushamgba adama a vuza vu nanlo?>> Ama a tsu panaka esheku e le ba, adama a na Vuzavaguɗu u ciga ta̱ wa kuna le. 
Ɗa kolobo ka nanlo Samaila u ka̱na̱i kugbonguro n ciya̱i mapasa ma singai u Vuzavaguɗu kpamu. 
Kanna ke te keneki ka Vuzavaguɗu ka̱ ta̱wa̱i u Eli ɗa u nekei ni akaka a nampa u danai, <<Ili i na Vuzavaguɗu u danai i ɗanna, <A ayin a na akaya a̱ɗa̱ Haruna m muku n ni i a kuyaꞋanka FiriꞋauna tsugbashi a Masar, n yotsongu ta̱ ka̱ci ka̱ va̱ wa̱ ni. 
Ɗa kpamu n zagbai limata i ni a̱ ka̱tsuma̱ ka kumaci ka aza a Isaraila ra̱ka̱ adama a na o kpo anan ganu vu va̱, a̱ ka̱na̱ kuyaꞋan ulinga a katalikalyuka n o songi ili i ma̱gula̱ni, ka̱ta̱ a ɗika efodu adama a̱ kula̱nsa̱ kuyeve ku va̱. Mu ushuku le ta̱ kpamu a̱ ciya̱ka̱ una u le alyuka a na o songi a katalikalyuka ka. 
Yiɗa̱i i zuwai ɗa vu goyoi alyuka a na n danai uma a̱ va̱ a yaꞋanka mu? Avu Eli yiɗa̱i i zuwai ɗa vi a kucikpa muku n nu, u laꞋi tsu na vi a kucikpa mu? Ɗa vu ka̱sukpa̱i le i kulyaꞋa ugboku u na u laꞋi n kugaꞋan wa alyuka a uma a̱ va̱ aza a Isaraila?> 
Mpa Vuzavaguɗu Ka̱shile ka aza a Isaraila, mi ishi ta̱ n yaꞋan uzuwakpani n danai, <Avu m muku n nu n kumaci ku nu, yi ta̱ a kuyaꞋanka mu ulinga u tsuganu ali uteku.> Ama gogo na n dana ta̱, <Mi a̱ kushuku n ili i nanlo ba. Aza a na i e kuneke mu tsugbayin, mi ta̱ e kuneke le tsugbayin, aza a na o goyoi mu mpa feu mi ta̱ o kugoyo le. 
Pana, ayin i ta̱ lo a̱ kuta̱wa̱ a na ma ku una muku mo olobo a kpaꞋa ku nu n kpaꞋa ki ikaya i nu, tsu na o doku a̱ ciya̱ vuza na u kulaꞋaka n wuma ali wokpo mokoshi a kumaci ku nu ba. 
Vi ta̱ o kokpo n atakaci n wupa, e kene una̱singai u na mi a kuzuwaka Isaraila, ama a kumaci ku nu a kusaꞋwa kuciya̱ vuza na u kuciya̱ wuma ali u kutsa ba. 
Mi ta̱ a̱ kuka̱sukpa̱ vuza te a̱ ka̱tsuma̱ ka kumaci ku nu n wuma, wi ta̱ a kuyaꞋanka mu ulinga u tsuganu, ama wi ta̱ a̱ kuyimba̱na̱ ka̱ta̱ u takpa ka̱ɗu a̱ ubuta̱ wi ili ra̱ka̱. Kumaci ku nu ra̱ka̱ ku na ku buwai kpamu ki ta̱ a kubana ukpa̱ wu utsura. 
Ayin a na baci muku n re n nu Hofini n Finehas a̱ kukuwa̱ a kanna ke te, ɗaɗa u kuyotsongu i na n danai dem mayun ɗa i kokpo. 
Mi ta̱ a kuzagba ganu vu usuɓi vi yoku, vuza na u kuyaꞋanka mu tsugbashi tsu na n cigai n ka̱ɗu ka̱ va̱. Mi ta̱ e kuneke yi ntsukaya n na n kuyaꞋansuka mogono ma na n zagbai tsugbashi. 
A̱ ka̱tsuma̱ ka vuza na u buwai va wi ta̱ a kubana u ganu vu usuɓi vu nanlo, ka̱ta̱ u folono ikebe n ilikulyaꞋa, <<Ka̱ta̱ kpamu u folono ko a̱ kuka̱sukpa̱ yi u yaꞋan ulinga u tsuganu adama a na u ciya̱ i na u kulyaꞋa.>> > >> 
