﻿Wila̱.
33.
Nava ɗaɗa una̱singai u na Musa vuma vu Ka̱shile u yaꞋankai aza a Isaraila kafu u kuwa̱. 
Ɗa u danai, <<Vuzavaguɗu wu uta̱ ta̱ a kusan ku Sinai ɗa u cipa̱i tsu na kanna ka̱ tsu uta̱ a Siyaru, ka̱ta̱ kutashi ku ni ku akana ɗe a kusan ku Param. U ta̱wa̱ ta̱ n ka̱bunda̱i ka aza a ciɗa, m melentsu ma akina a kakambu ku usingai ka̱ ni. 
Mayun a̱yi ɗa vuza na wi a kuciga uma a̱ ni, uma a ciɗa ra̱ka̱ i ta̱ ekiye a̱ ni. E kelime ke ene a̱ ni a ɗa kpamu a̱ tsu kuɗa̱ngu, wa̱ ni u ɗa kpamu i a̱ kuciya̱ odoki. 
Wila̱ u na Musa u nekei tsu, ili yu uka̱ni i kumaci ku Yakubu i ɗa. 
Vuzavaguɗu wo okpoi mogono ma aza a Jeshuru a makyan ma na nkoshi m gba̱ra̱-gba̱ra̱ o ɓolongi koɓolo n kumaci ka aza a Isaraila.>> 
Musa u dansai ukuna u nampa adama a Ruben, <<YaꞋan Ruben u yaꞋan n wuma ka̱ta̱ u kuwa̱ ba, ama uma a̱ ni o okpo kenu.>> 
Ɗa u dansai kakuna adama a Yahuda, <<Vuzavaguɗu pana ma̱shi ma aza a Yahuda, ka̱ta̱ vu ɓolongu le okpo una̱ u te, ka̱ta̱ kpamu vu neke yi utsura we ekiye adama o kuvon, ɓa̱nka̱ yi adama a irala i ni.>> 
Adama a kumaci ka aza e Levi tamkpamu ɗa u danai, <<Tumi koɓolo n Yurim i ɗa̱, i vuza na i ɓa̱nka̱i ɗa. I kondoi ta̱ a Masaha, i shilika̱i n a̱yi a mini ma kuyene ku Mariba. 
U danai esheku a̱ ni n a̱na̱ku, <Mpa n ci cikpa le ba.> U ciga a̱ za̱ a̱ ni ba be le u keɓece muku n ni. Ama u ɓa̱na̱ ta̱ kadanshi ka̱ nu, ɗa kpamu ka̱na̱i uzuwakpani u nu. 
Ɗa o yotsongi Yakubu ukuna u nu, n wila̱ u nu wa aza Isaraila, ɗa e nekei nu kuneꞋe ki ili i ma̱gula̱ni, n alyuka o kusongu a katalikalyuka ka̱ nu. 
Zuwaka kuyeve ku ni ra̱ka̱ una̱singai, ka̱ta̱ vu cikala ulinga we ekiye u ni. Una utsura wi irala i le, n utsura u ni sapu a̱ kuwa̱ ka̱ta̱ a̱ kpa̱ɗa̱ kuɗa̱nga̱ kpamu.>> 
Adama a Bayami tamkpamu, ɗa u danai, <<Ka̱sukpa̱ macigi ma Vuzavaguɗu mo yongo m ma̱ta̱na̱ mayin wa̱ ni, adama na Vuzavaguɗu u kanza le ta̱ kanna dem, a̱yi ɗa vuza na ucigi u Vuzavaguɗu u da̱sa̱ngi avangatsu a̱ ni.>> 
Adama a̱ Isufu kpamu ɗa u danai, YaꞋan Vuzavaguɗu u zuwaka iɗika i ni una̱singai, n kuneꞋe ku singai n ciza, m mini ma na mi punu a ɗaka vi iɗika, 
n ili i kashina i singai i na kanna ka̱ tsu ɓa̱nka̱ ka̱ta̱ i matsa mayin, koɓolo n i singai i na a̱ ci ciya̱ o wotoi dem, 
koɓolo n kuneꞋe ku singai ku umaci wu nsansa n ayin a cau, n una̱singai wa̱ a̱bunda̱i u na u tsu uta̱ a̱ ubuta̱ wa aginda a na o kukotso ba, 
Koɓolo n kuneꞋe ku singai ki iɗika tsu na i ɗa yi gbaga vi ni, koɓolo n kasingai ka vuza na wi ida̱shi a maɗanga ma na mi a kulyaꞋa n akina. Ka̱sukpa̱ una̱singai u nampa ra̱ka̱ u cipa̱ a kaci ka Isufu, a̱ cipa̱ u vuza na a zagbai mogono a̱ ka̱tsuma̱ ka̱ aza a̱ ni. 
Tsugbayin ci Isufu ci ta̱ an kobomburon ka na a̱ gita̱i kumatsa, avana a̱ ni, i ta̱ tsa avana a kyanci. N ele ɗa u kusuwa̱n uduniyan, ali n aza a na i a uteku wa aduniyan. Ta ka̱bunda̱i ka̱ a̱kpa̱n kupa ka aza a Ifirayimu ki nannai, n ka̱bunda̱i ka̱ a̱kpa̱n ka aza a Manasa. 
Adama a Zabalun tamkpamu ɗa u danai, yaꞋan ma̱za̱nga̱ avu Zabalun a nwalu n nu, ka̱ta̱ avu tamkpamu Isaka vu yongo m ma̱ta̱na̱ a̱ a̱va̱li a̱ nu. 
I ta̱ e kuɗeke uma a kubana a kusan, ka̱ta̱ ɗe a yaꞋan alyuka a usuɓi, adama a na i ta̱ a̱ kuciya̱ uciyi a̱ ubuta̱ u mala, n uciyi u na wi usokongi a kayala. 
Adama a Gadu kpamu ɗa u danai, <<Vuza vu una̱singai u ɗa a̱yi na u doki Gadu ka̱bunda̱i ki iɗika. Ɗa Gadu u da̱sa̱ngi ɗe an kawu, adama a na u saza ekiye ali a kubana o moko ma kaci. 
U zagbakai ka̱ci ka̱ ni iɗika i singai, adama a na ta ɗe a zuwakai vuzagbayin ugboku u ni. Ana aza e kelime a uma o ɓolongi, ɗa u yaꞋin ukuna wu usuɓi u Vuzavaguɗu, ɗa u tonoi wila̱ u na e nekei aza a Isaraila.>> 
Adama a Dan kpamu ɗa u danai, <<Dan wi ta̱ tsu maku ma kawu a kaɗikpangusu a Bashan.>> 
Adama a Nafutali kpamu ɗa u danai, <<Avu Nafutali, vi ta̱ tukpa n kasingai ka Vuzavaguɗu, kpamu vi ta̱ tukpa n una̱singai u ni, vi ta̱ a kulyaꞋa uka̱ni wu ukambu u ɗaka ali a kubana a mala ma̱ Ga̱lili.>> 
Adama Ashera kpamu ɗa u danai, Ashera a̱yi ɗa maku ma na ma laꞋi n una̱singai a̱ ka̱tsuma̱ ka aza a̱ ni dem, ka̱sukpa̱ wo okpo macigi ma̱ aza ni, ka̱sukpa̱ yi u kuma ene a̱ ni m maniꞋin. 
YaꞋan utsutsu u likuci i nu u yaꞋan utsura tsu viyum n viyum vi shili. Ka̱ta̱ utsura u nu wo okpo derere n ayin a wuma u nu. 
<<Babu vuza yoku uteku tsu Ka̱shile ka Jeshuru, a̱yi na u tsu uta̱ gaɗi adama na u ɓa̱nka̱ ɗa̱, a̱yi na u tsu uta̱ gaɗi n tsugbayin ci ni. 
Ka̱shile ku Uba̱nga̱ri a̱yi ɗa ubuta̱ wi ida̱shi u nu, kpamu utsura u babu uteku u ni wi ta̱ a̱ kuɓa̱nka̱ wu, wi ta̱ o kulokoko wu irala i nu, ka̱ta̱ u dana, <Unai le.> 
Uteku tsu nampa tsu ɗa uma a Isaraila a̱ kuda̱sa̱ngu m ma̱ta̱na̱, ka̱ta̱ tsukaya ci Yakubu ci ciya̱ ukanji, a iɗika i na yi n ishina m ma̱kya̱n ma savu, a̱ ubuta̱ u na gaɗi u tsu matsa ciza. 
Una̱singai u ɗa, a̱ɗa̱ aza Isaraila yayi wi tsu ɗa̱, a̱ɗa̱ uma a na Vuzavaguɗu wi isai? A̱yi ɗa ma̱ra̱ga̱ ma̱ ɗa̱ n ka̱ɓa̱nki ka̱ ɗa̱, n kotokobi ka tsugbayin ka̱ ni. Irala i ɗa̱ yi ta̱ a kukuɗa̱nku ɗa̱, ka̱ta̱ a̱ɗa̱ i dasa le.>> 
