﻿إِنْجِيلُ لُوقَا.
1.
على حْساب اللي كايَن بَزّاف اللي دارو حْكاية على الحاجات اللي صْراو عَندنا، 
على حْساب واش قالولنا اللي كانو من البَدية شاهدين ووَلاّو خَدّامين للكَلمة، 
بانلي مْليح أنا تاني، بَعدما تَبَّعت كُل شي بالتَدقيق من الأوَّل لو كان نَكتَبلَك حْكاية مْرَتبة، يا العْزيز تاوفيلَس، 
باش تَعرَف الصَح فالشي اللي سْمَعت بيه. 
كان في زْمان هيرودَس سَلطان اليَهودِيّة، مُقَدَّم واسمو زَكَريّا، من جْماعة أبِيّا، مَرتو من بْنات هارون وواسمها أليصابات. 
كانو في زوج صالحين قُدّام الله، ويْتَبّعو كيما لازَم كامَل الفْرايَض والأحكام مْتاع الرَب، 
وما كانش عَندهُم الدْراري خاطَر أليصابات كانَت عاڤرة وكانو في زوج كْبار فالعْمَر. 
كي لَحقَت دالَة جْماعتو فالمَعبَد، كان زَكَريّا يَخدَم خَدَّمتو قُدّام الله، 
وطاحَت فيه القُرعة على حْساب عادة الكَهَنوت باش يَدخُل لمَعبَد الله ويْبَخَّر. 
كان كامَل الشَعب يْصَلّي بَرّا في وَقت البْخور. 
ضْهَرلو مْلاك الرَب واقَف على يْمين مَدبَح البْخور، 
وكي شافو زَكَريّا نَخلَع وخاف. 
قاللو المْلاك: "ما تْخافش يا زَكَريّا خاطَر الله سْتَجاب لصْلاتَك، ومَرتَك أليصابات رايحة تَولَدلَك وْلَد وتْسَمّيه يوحَنّا، 
يْجيبلَك الفَرح والسَعد، وبَزّاف اللي يَفَّرحو بزْيادتو، 
خاطَر يْكون كْبير قُدّام الرَب، ما يَشرَب لا شْراب لا حاجة تْسَكَّر، ويَتعَمَّر بالروح القُدّوس وهُوَ مازالو في كَرش يَمّاه، 
ويْرَجَّع بَزّاف من وْلاد إسرائيل للرَب إلَههُم، 
يَمشي قُدّام الرَب بروح وقُدرة النَبي إلِيّا، باش يَرَجَّع قْلوب الوالدين لوْلادهُم والعاصيين لعْقَل الصالحين، باش يْهَيّي للرَب شَعب واجَد". 
قال زَكَريّا للمْلاك: "كيفاش نَعرَف باللي يَصرا هاد الشي؟ خاطَر أنا شيخ ومَرتي كْبيرة فالعْمَر"، 
جاوَب المْلاك وقاللو: "أنا جَبرائيل الواقَف قُدّام الله، جيت مَبعوت باش نْكَلّمَك ونْجيبلَك هاد البْشايَر، 
رايَح تْتْبَكَّم، وما تَقدَرش تَهدَر حَتّى لليوم اللي يَصراو فيه هاد الحاجات خاطَر ما آمَنتش كْلامي اللي رايَح يَتحَقَّق في وَقتو." 
والشَعب كان يَستَنّا في زَكَريّا، وحارو كي بْطا فالمَعبَد. 
كي خْرَج، ما كانش قادَر يَهدَر مْعاهُم، وفَهمو باللي شاف رُؤيا فالمَقدَس، وهُوَ كان يْديرلهُم فالإشارات وبْقا مْبَكَّم. 
وكي خْلاصو يامات خَدَّمتو وَلاّ لدارو. 
بَعد هَدوك اليامات، رَفدَت أليصابات مَرتو الجوف وتْخَبّات خَمس شْهور وقالَت: 
"هَكدا دارلي الرَب نْهار شاف لِيَّ باش يْنَحّي عاري ما بين الناس" 
وكي كانَت في شْهَرها السادَس، بْعَت الرَب المْلاك جَبرائيل لواحَد المْدينة من الجْليل واسَمها الناصرة، 
عَند واحَد العاتَق مَخطوبة لراجَل من دار داوَد واسمو يوسَف. وآسَم العاتَق مَريَم. 
دْخَل ليها المْلاك وقال: "السْلام ليك يا اللي الرَب نْعَم عليك، الرَب مْعاك." 
تْفَرفشَت من كْلامو وبْقات تْخَمَّم واش يْكون المَعنى مْتاع هاد السْلام. 
قالَلها المْلاك: "ما تْخافيش يا مَريَم خاطَر راكي لْقيتي نَعمة عَند الرَب، 
رايْحة تَرَّفدي الجوف وتَوَّلدي وْلَد وتْسَمّيه يَسوع، 
هاد الوْلَد يْكون كْبير ويْسَمّيوَه بْن العالي، ويَعطيلو الرَب الإلَه عَرش داوَد باباه، 
ويَملَك على دار يَعقوب للدْوام وما يْكونش للمَلك مْتاعو حَد". 
قالَت مَريَم للمْلاك: "كيفاش يْصير هاد الشي وأنا ما تْدَنّا لِيَّ حَتّى راجَل؟" 
جاوَب المْلاك وقالَلها: "يْجي عليك الروح القُدّوس وقُدرة العالي تْضَلَّل عليك، وعلى هَدا القُدّوس اللي يْزيد عَندَك يَتسَمّا بْن الله، 
وهاي أليصابات اللي تْكونلَك هِيَ تاني راهي رَفدَت الجوف بوْلَد في كْبُرها، واللي تْسَمّات عاڤرة راهي في شْهَرها السادَس، 
خاطَر حاجة ماهي مُحال عَند الله". 
قالَت مَريَم: "هاني أنا خْديمة الرَب، واللي قُلتو هَداك هُوَ اللي يْصيرلي". وراح المْلاك من عَندها. 
في هَدوك اليامات، ناضَت مَريَم وراحَت بالخَف للجْبال، لواحَد المْدينة في يَهودا، 
ودَخلَت لدار زَكَريّا، وسَلّمَت على أليصابات. 
كي سَمعَت أليصابات سْلام مَريَم، نَڤَّز الصْغير في كَرشها وتْعَمّرَت بالروح القُدّوس، 
وعَيّطَت بالزور: "مْباركة أنتِ ما بين النْسا ومْبارَك الصْغير اللي يْزيد من كَرشَك، 
كيفاش حَتّى نَلت باش تْجيني يَمّاة رَبّي؟ 
كي جا صوت سْلامَك في وَدنيَّ، نَڤَّز الصْغير من الفَرحة في كَرشي. 
يا سَعدها اللي آمنَت خاطَر رايَح يَصرا كامَل واش تْقالَلها من عَند الرَب". 
وقالَت مَريَم: 
"نَفسي تْعَضَّم الرَب، وروحي تَفرَح بالله اللي يْسَلَّكني، 
خاطَر شاف لضَعف خْديمتو. ومن دُرك كامَل الجْيال يْقولو يا سَعدها. 
خاطَر القَادر دارلي حاجات كْبار، قُدّوس آسمو، 
ورَحَّمتو للي يْخافوه من جيل لجيل. 
بَيَّن قُوّة دْراعو، زَربَع اللي عندهُم في قْلوبهُم تَخمام المَتكَبّرين، 
نَزَّل الحُكّام من عْروشهُم ورْفَع المَتواضعين، 
فَيَّض الخير على الجيعانين، ورَد المْرَفّهين بيَدّيهُم فارغين، 
سَلَّك إسرائيل خْديمو وتْفَكَّر رَحَّمتو، 
لإبراهيم ودَريّتو للدْوام، كيما قال لجْدودنا". 
قَعدَت مَريَم واحَد التَلت شْهور عَند أَليصابات أومبَعد وَلاّت لدارها. 
وْصَل وَقت أَليصابات باش تْزَيَّد وجابَت وْلَد. 
سَمعو جيرانها ومْواليها باللي رَبّي فَيَّض عليها رَحَّمتو وفَرحو معاها. 
فاليوم التامَن جاو باش يْخَتّنو الصْغير وحَبّو يْسَمّيوَه "زَكَريّا" على آسَم باباه، 
بَصَّح جاوبَت يَمّاه وقالَت: "لالا، يَتسَمّا يوحَنّا." 
قالولها: "واحَد من مْواليك ما تْسَمٌّا بهاد الآسَم"، 
سَقساو باباه بالإشارات كيفاش حَب الوْلَد يَتسَمّا، 
طْلَب لوحة وكْتَب يْقول: "يَتسَمّا يوحَنّا"، وكامَل نْدَهشو. 
تَم تَم، نْحَل فَمّو وتْسَرَّح لْسانو وتْكَلَّم وبارَك الله. 
طاح الخوف على كامَل جيرانهُم، ووْصَل هاد الشي لكامَل جْبال اليَهودِيّة. 
وكامَل اللي سَمعو بهاد الشي خَلاّوَه في قْلوبهُم وقالو: "يا دْرا واش رايَح يْوَلّي هاد الوْلَد"، وكانَت قُدرة الرَب معاه. 
تْعَمَّر زَكَريّا باباه بالروح القُدّوس وتْنَبَّأ وقال: 
"مْبارَك الرَب إلَه إسرائيل خاطَر فاقَد شَعبو وفْداه، 
دارَلنا سَلاّك كْبير في دار داوَد خْديمو، 
على حْساب كْلامو اللي قالوهُلنا الأنبيا القَدّيسين مْتاع زْمان: 
سْلاك من عَدياننا ومن يَد كامَل اللي يَكَّرهونا. 
هَكدا بَيَّن رَبّي رَحَّمتو لجْدودنا وتْفَكَّر عَهدو المْقَدَّس، 
على حْساب اليْمين اللي حْلَف بيه لجَدنا إبراهيم، 
بَعدما يْسَلَّكنا من يَد عَدياننا، نَقَّدرو نَعَّبدوه بلا خوف، 
ماشيين قُدّامو فالقَداسة والصْلاح طول حْياتنا. 
وأنتَ يا وْلَد، رايَح تَتسَمَّا نَبي العالي، خاطَر تْسير قُدّام الرَب باش تْوَجَّد طُرقانو، 
باش تْعَلَّم شَعبو باللي السْلاك يْكون بغُفران دْنوبهُم، 
على جال حْنان الرَحمة مْتاع إلَهنا اللي فاقَدنا بيها النور اللي شْرَق علينا من الفوق، 
باش يْضَوّي على اللي راهُم قاعدين فالضَلمة وضَل الموت، باش يَهدي خَطوَتنا لطْريق السْلام". 
والصْغبر كان يَكبَر ويَتقَوّا بالروح وبْقا فالخْلا حَتّى لليوم اللي بان فيه لبْني إسرائيل. 
