﻿SAUMU.
67.
Saumu, eremiatoh tokarose eremiaketõ tuisary a. Ritonõpo, yna onuãnohpyra exiko, kure rokẽ yna tyriko! Yna pyno exiko, 
tyriry se oehtoh waro sero nono põkõ ehtohme, emero; typynanopyrykõ se oexiry waro imeimehnõ nono põkõ ehtohme porehme. 
Ritonõpo, oeahmary se ase imehnõ nonory põkomo a! Emero nono põkomo a oeahmary se ase! 
Imehnõ ahno tãkye exiry se ase, eremiatohme atãkyemaryme zae ahno apiakaryke oya, zae sero nono põkõ aroneme roropa oexiryke. 
Ritonõpo, oeahmary se ase imehnõ nonory põkomo a! Emero nono põkomo a oeahmary se ase! 
Tykyrysã zamaro nono exiryke tonahsã itamurume toehse. Ritonõpo, Kuesẽkomo a kure rokẽ tyrise sytatose. 
Eya kure rokẽ tyrise sytatose; ahno tõ emero, sero nono põkomo Ritonõpo waro toto ehtohme aomipona ehtohme roropa! 
