﻿SAUMU.
61.
Tawi nymerohpyry, inekarohpyry eremiaketõ tuisary a. Ritonõpo, okohmary ya etako, etuarimãko ase. Jotururu oya etako. 
Tapotũkehse ywy; ameke roropa ytapyĩ tae okohmãko ase! Kuaroko topuimo pona, jewomatoh taka, ymotye kuhse mase jamihme. 
Omoro mase jewomaneme exiryke, jamitu mase, jewomane, ypoko pyra yzehnotokõ ehtohme. 
Amaro ehxi atapyĩ tao jũme joorikyry ponãmero. Osewomaxi ãporiry zopikoxi. 
Ritonõpo jomihpyry metase: tymõkomoke exiketõ tymõkomory nomõko mã toto typoenõ mõkomoryme. Moro sã mã Õmiry omipona exiketõ ehtoh kurã mekaroase ya. 
Tuhke jeimamyry ekaroko ya okynahxo isene jehtohme. 
Ritonõpo, mokyro akorehmako zae tuisame aexiry poko oneneryme jũme. Ewomako ipyno oehtoh ke, anamonohpyra roropa oehtoh ke. 
Morarame eremiãko ase oeahmaryme, zae oehtoh poko jũme. Kokoro rokẽ ynekarory ekarõko ase oya jomihpyry ae ro. 
