﻿SAUMU.
60.
Tawi nymerohpyry, inekarohpyry eremiaketõ tuisary a. Ritonõpo, turumekase yna oya, typoremãkase roropa ynanase oya. Yna zehno mexiase, yrome seromaroro eramako ropa yna a! 
Nono tykytyky tykamexipose oya; iiryhmatopõpyry tõ ikurãkako ropa, kywyh kywyh karyke ro. 
Opoetory tõ tyrohmanohpose oya itamurume; eukuru jehnahpyry mekaroase yna a, toetỹse exiketõ sã ytoytõko ynanase. 
Õmiry omipona exiketõ enaroximatohme pãteira tanỹse oya, toto epatohme, osenahkara toto ehtohme. 
Yna ipynanohko ajamitunuru ke; yna otururu oya etako opoetory tõ pynanohtohme, toto pyno oexiryke. 
Tytapyĩ tao ynara tykase Ritonõpo: “Typoremãkase toto ahtao Xikẽ patary apiakãko ase, jakanahmã Sukote roropa apiakãko ase ypoetory tõ esaryme ehtohme. 
Kireate ynonoryme mana, Manase roropa; Eparaĩ ykyryryme mana, kapasete samo. Juta roropa ypoetory tuisaryme mana. 
Yrome Moape exĩko ypaxihãme ekurikatohme; ysãtajã tõ emãko ase Etõ pona, esẽme jehtoh enetupuhpotohme. Pirixteu tõ roropa ynyporemãkahpyryme exĩko mã toto.” 
Ritonõpo, onoky jarõko nae pata jamihmã taka, towomase ahtao apuru konõto ke? Onoky jarõko nae Etõ pona? 
Ekaropoxi: kurumekase nymyry? Ytopyra ropa mahno yna soutatu tõ maro? 
Yna akorehmako yna zehnotokõ poremãkatohme; ahno a takorehmase ahtao toiparo rokẽ mana. 
Ritonõpo kymaro xine ahtao orẽpyra exĩko sytatose, kyzehnotokõ poremãkapõko sytatose. 
