﻿SAUMU.
58.
Tawi nymerohpyry, inekarohpyry eremiaketõ tuisary a. Tuisa tomo, kowenu poko erohketomo, zae imehnõ apiakãko matou inyrihpyry emetakame? Zae nymyry ahno apiakãko matou? 
Arypyra. Popyra ehtoh riry poko rokẽ osenetupuhnõko matose, imehnõ ryhmãko roropa matose sero nono po. 
Tonurutopõpyry poe ro popyra exiketõ zae pyra ehtoh poko mã toto; ajohpe omiãko mã toto tonurutopõpyry poe ro. 
Opi orihmato ke pehme mã toto, okoi orihmatõ samo. Typanarykõ apurũko mã toto, okoi saaro, otato pyra toehtohme, 
mokyro okoi emepane omiry etary se pyra toexiryke, emese kure etoryhtao ro. 
Ritonõpo, popyra exiketõ zery itahkako! Ritonõpo yna Esemy, mokaro zery touko, reão tõ mokaro, imehnõ esekananomo! 
Ah mokaro popyra exiketõ tonahkasẽme nexĩ toto, tuna samo tukuãse ahtao nono pona! Ah takurihmose nexĩ toto otyro sã, ahtaryhtao osema tao! 
Mokaro kue sã tyripoko toto, tuname samo ikurepato htao. Poeto sã tyripoko toto tonuruse ahtao toorihse, saereme ehtoh onenepitopyra aexihpyry! 
Tuaro pyra ro toto ahtao, mokaro popyra exiketõ ãtarykahmã sã tysahkasẽme exĩko mã toto; isene ro toto ahtao, mokaro zehno toexiryke, toto aropõko Ritonõpo mana tyryrykane ke. 
Tãkye exĩko zae ehtoh poko exiketõ mana popyra exiketõ wãnopyry eneryhtao tyya xine; tupupurukõ kurikãko zae exiketõ mana imunurukõ ke. 
Imehnõ ynara ãko: “Ajohpe pyra, zae ehtoh poko exiketõ kurã ke topehmase mã toto. Ritonõpo nae rahkene sero nono põkõ apiakane.” 
