﻿Mark.
10.
Jesus Jordan Ilpay-angkwarr artarnpenhek, apmer Judea-warl alhek. Akngerr akarrirrek ikwer-warl. Ra renh-rnem ingkerrenh akaltyilek. 
Pharisee-rnem ikwer-warl apetyek, renh arrkernetyek. Rernem renh ayernek, “Mwerrang artwel anew ikwerenh iwetyek?” Rernem iterrenh renh arrkernetyek, ra apmwel-areth angketyek, rernem renh angka ilkwewarl akngetyek. 
Jesus-el renh-rnem ayernek, “Ilek-angkwarrarl Moses-kenh angkan aynteyel?” 
Rernem renh ilek, “Moses-kenh angka nhenh aynteyel: ‘Artwa pip-warl itna ingkwernelhemel, arelh ikwerenh pip renh anthemel, arelh renh iwetyek.’” 
Jesus angkek, “Moses-el arrenhantherr iterl-arenh, arrantherrarl apmwel-areth aneyel, ikwer-angkwarr-anem arrenhantherr law renh anthek. 
Arrantherr iterl-aremer Akngeyel angka nhenh anwekantherr anthek, atharl arrenhantherr ileyel. Akngeyel arelh-then artwethen arrernek, ahern nhenh-warl, ratherr intem iteng anetyek. 
Ra artwel amikw-then aynikw-then ipmem-anem ra arnkentyel-anem aneyel itengerrey-alentyan. 
Akngeyel renh-atherr itengilemel anthek artwa renh. Nthakenh ratherr iwerreyang, intem-antey ratherr anetyek. 
Nthakenh ingwerel renh-atherr akngakey-angenh.” 
Jesus warl kwen-warl aylpenhek, kwertengerl ikwerenh-rnem-akert. Rernem Jesus renh ayernek, “Nthakenharl ntwa Pharisee-rnem ilek?” 
Jesus angkek, “Arelh ngkwenh ntwa iwem, ntwa arelh ingwer-rnemarl ikngwetyek, ntwa ilenh iwem apmwel-aretharl. 
Arelh anyentel arrkarikw ikwerenh iwerl-alpem, artwa ingwer-warl-anemarl alhemel, apmwel-aretharl.” 
Akngerr Jesus-warl alhek, ampa ikwer-rnem-kenh-akert, ra akapwert renh-rnem arnetyek. Jesus-kenh kwertengerl-rnemel ampa renh-rnem irrentek. 
Jesus-el arek kwertengerl ikwerenh-rnem ampernemarl irrentek. Ra ahelirrek, angkemel, “Ampernem menty apetyey atyeng-warl! Alakenh ikwer-rnem arrkngert angkey-angenh! Ayeng arlkwenteyel, ampernem ingkerrenh atyeng-warl apetyetyek. Akngey arlkwenteyel, ra Ingkart ikwer-rnemek anetyek. 
Atha arrenhantherr ileyel. Ampernem-apeny arrantherr akarrirretyek Akngey-warl, ikwer awelhetyek, Akngey Atyetyart arrekantherrenh anem.” 
Jesus rap ampernem atnyeney-ayntek-anem. Rap akapwert iltyel renh-rnem arnek. Jesus rap ayernek Akngey, ra ampa ingkerrenh atnyeneyek. 
Jesus rarl anperl-alhek-warl, artwa man akngerr-akert anyentan Jesus ikwer-warl anterrey-alhekarl. Ra arrernelhek kwenirremel, Jesus-itwel angkemel, “Akalty-anthenh-anthenhay, ngan artwa mwerran. Nthakenh ayeng iteth intem anetyek?” 
Jesus-el renh ilek, “Nthakenharl ayenh mwerran ntwa ileyel? Akngeyantarl ntwa mwerran iletyek. 
Ntwa Moses-kenh angka renh iterl-areyelarl, ntwa ingwerenty ipmek atwetyekarl arrangkwarl. Ingwer-kenh anewikw nthakenh ikngwey-angenh. Ampwal-rnem nthakenh irrtyertel iney-angenh. Ingwer-rnemek irrtywerremel iley-angenh, inngant ntwa iletyek. Akngeyek-then ameyek-then awelhetyek.” 
Artwel Jesus renh ilek, “Ingkartay, ayengan law ilenh-angkwarr anek awey akelyank.” 
Jesus inkwerelhek ikwer, renh awemel, rarl ikwer ilelhek. Jesus-el renh ilek, “Artwa ilenh-rnem, irrepern-rnem, man-weny-rnem ntwa man ingkerrenh-then ampwal-rnem-then renh-rnem antheyna! Ikwer-penhan Akngeyel-anem ngenh arntarnt-arem, ngenh atnyenem. Man antheynenty-penh atyeng-angkwarrant-anem apetya!” 
Artwa man-akert ra iterrek man-then ampwal-rnem-then ingkerrenh ra menty impen anterrkwetyek. Artwa ra amperrngirrek, “Nthakenh-angkwarr ayeng iteth intem-antey aneyenh, man akngerr-akert, ampwal akngerr-akert?” 
Jesus-el kwertengerl ikwerenh-rnem ilek, “Man-areny ilenh-rneman rernem Akngey-angkwarr anetyek arrangkwarl. Rernem manantarl apenteyel.” 
Kwertengerl ikwerenh-rnem ywarn iterrek. Rerneman iterrenh Akngeyelang man akngerran man-areny ilenh-rnem anthentyek-athen. 
Jesus angkek, “Kamwerlan neyl altywer akely-angkwarran nthakenh aylpenhey-angenh, arrangkwarl. Kamwerlan altywer akely-angkwarr aylpey-angenh-apeny, man akngerr-akert-rneman Akngeyel nthakenh anyentiley-angenh ikwerenh-rnem-warl.” 
Kwertengerl ikwerenh-rnem ywarn iterrek. Rernem renh ayernek, “Ilek-apeny-rnemant Akngeyel ikwerenh-rnem-warl anyentiletyek?” 
Jesus angkek, “Akngey rantarl iterl-areyel ikwerenh-rnem-warl anyentiletyek, ahern-arenyel-rnem iterl-areyang arrangkw.” 
Peter-el renh ilek, “Anwernantherr-alew? Kwertengerl anwernantherran ampwal-rnem menty-anem ipmek, ngenhant-anem apenteyel. Akngeyel anwernenhantherr anyentilem, ikwerenh-rnem-warl?” 
Jesus-el renh-rnem ilek, “Artwa anyentarl alhem, angka atyenh-akert ikwerenh-rnem iwerl-alhemel, angka Akngey-kenh ingwer-rnem ilerl-alpetyek, Akngeyel renh aleth-antey arntarnt-arem. Artwa ra alhentyelan, ahern ikwerenharlap ra iwerl-alheman, ikwerenh-rnem-then, warl ikwerenh-then, Akngeyel renh arntarnt-areyenh, intem-antey. Akngey ra ingwer-rnem renh anthem ilkwatherr, warl ingwer-rnem-then. Apmwernem arrkernelherl-aneyenh, apmwangkwarr apentetyek-arrpantey, rernem-anem arlkarirremel atweyenh. Ra iteth intem-antey aneyenh. 
Akngerr ilkelheyel Akngey-angkwarr apentetyek. Akngerr ilkelheyel Atyetyart arrwekel anetyek, warrkenh iylpareth-rnem-they. Rernem ingkern-they apetyeyenh, warrkenh iylpareth-rnem-warl.” 
Jesus kwertengerl ikwerenh-rnem-akert Jerusalem-warl alhek. Kwertengerl ikwerenh-rnemel renh apentek. Akngerrelan renh-rnem apentek ingkern-theyarl. Rernem aterirrek, ingwer-rnemel Jesus renh atwekerr apmer Jerusalem-itwek. Jesus arlkek kwertengerl ikwerenh-rnemek, rernem rtnetyek. 
Ra ilelhek kwertengerl ikwerenh-rnemek, “Awelhenherr-arey atyeng! Rlengk apmer Jerusalem-warl anwantherr alhem. Ayeng Akngey-kenh Artwa Impenan. Anwantherrarl Jerusalem-el aney-alhem. Ahelengkw-rnemel ayenh anterrkweyenh ikwer-anem. Ayenh rernem akngeyenh, atyetyart tyaty-areny ilkwernem-warl, atyetyart ilkwa Moses-kenh angka akalty-anthenh-anthenh-rnem-warl. Rernem ayenh ahayiwetyek, alethang ahelengkw-rnem-warl, rernem ayenh ipmek atwey-alenty. 
Rernem ayenh irrwaremel whip-el-tangkwel atweyenh, ayenh rernem ipmek atwey-alenty. Ingwa atherr-penh ayeng ipmepenh itethirreyenh.” 
Artwamp Zebedee-kenh alerikw-atherr, James-akerr, John-akerr. Ratherr Jesus renh ayernek, “Ingkartay, aylern ngenh ayernetyek apetyek.” 
Jesus-el renh-atherr ayernek, “Ya, ilekekay?” 
Ratherr renh ayernek, “Nga Atyetyart ilkwa aneyenh, kwertengerl ngkwenh-atherr, aylern apekanap Atyetyart ilkwa arrpemarl aneyenh, ngay? Ntwan aylernenh arraty-antey ilay.” 
Jesus-el renh-atherr ilek, “Mpwel atyeng mwerranty awelhenherr-atherr. Ahelengkw-rnemel ayenh artewentyel irrwampetyek atweyenh. Mpwel-alew? Ahelengkw-rnemel mpwelenh artewentyel irrwampetyek atweyenh arrpemarl?” 
Ratherr ilelhek Jesus ikwer-warl, “Ya, menty ahelengkw-rnemel aylernenh irrwampetyek atwey!” 
Jesus-el renh-atherr ilek, “Inpa, athan iterl-arey-angenharl. Akngeyelantarl iterl-areyel, angwenharl ingweran Atyetyart ilkwa atyeng-apeny aneyenh, atyetyart ilkwan ingkerrenhek aneyenh, ayeng-apeny.” 
Kwertengerl ingwer-rnem kwertengerl ikwer-atherr arlkarirrek ratherrarl Atyetyart ilkwa anetyek arlkwentek, Jesus-apeny. 
Kwertengerl ikwerenh-rnem Jesus ra ilek, “Atyetyart ilkwernem apmer arrpanenh aneyel-rnem-apeny-wenyarl arrantherr mwerrant-arey anenherr-arey. Rernem atyetyart awerr ingkerr. Ingwer atyenh-rnem Atyetyart ilkwa anem, mwerr-angkwarr ingkerrenh arntarnt-aretyek. 
Arrantherr Atyetyart ilkwa anem, arrantherr renh-rnem arntarnt-aretyek, warrkenh iylpareth awelheyel-apeny. 
Akngey-kenh Artwa Impen anyent kel apetyek ahern nhenh-warl, ingkerrenh mwerr-angkwarr arntarnt-aretyek iylparethel, warrkenh-rnem iylpareth awelheyel-apeny.” 
Jesus kwertengerl ikwerenh-rnem-akert apmer Jericho-warl alhek. Akngerrel renh-rnem apentek. Artwa aparrng Bartimaeus, Timaeus-kenh alerikw iwerr impalthel anenh. Rap ingwer-rnem ayerneyam-ayntenh renh-rnem ngkweltyek arlkarewemel. 
Ra awek ingwerentyelarl renh ilek, “Jesus Nazareth-areny apetyem nhangkwarr kwertengerl ikwerenh-rnem-akert.” Artwa aparrng arlkek Jesus ikwer, “Jesus, David-kenh alerikw, atyeng amperrngirra!” 
Akngerrel artwa aparrng renh ilek, “Akater ana! Jesus renh arlkareweyang!” Aparrng artewentyel arlkek Jesus ikwer arrpemarl, “Artwa David-kenh! Annga ayenh mwerrila, atha aretyek!” 
Jesus rtnek, artwa ingwer-rnemek angkemel, “Atnwenhey-alhenherr-arey atyeng-warl, artwa aparrng ilenh!” Rernem artwa aparrng renh ilek, “Aterirrey-angenh, Jesus ikwer-warl apetya!” 
Artwa aparrng kwet ikwerenh iwemel, Jesus ikwer-warl atnarnpenhek, inkwerelhemel. 
Jesus-el renh ayernek, “Nthakenh atha ngenh ilem?” Artwa aparrng Jesus-warl angkek, “Ingkartay, annga ayenh mwerrila, aremel arrpemarl ayeng anetyek!” 
Jesus-el artwa renh ilek, “Kel, ntwa ayenh iterl-areyel, ayengan mwerriley-angker. Kel ntwa mwerr arleng aremel-anem nga anem.” Artwa aparrng kel mwerr arleng aremel-anem, Jesus-anem apentek. 
