﻿Genesis.
37.
Jacob ra apmer Canaan-itwek anenh, aynikw ikwerenharl Isaac anenh-itwek. Angka nhenh Jacob-kenh-rnem-akert. Joseph aherrety 17-anem anenh. Yep-yep-rnem-then nanikwet-rnem-then arntarnt-arenh, atherrk-warl ra akngenh, apmer Shechem-itwek. Kakey ikwerenhel-rnem. Aynikwel Joseph thwenek awayengkw-rnem-warl, “Alha yep-yep-rnem arntarnt-arayntetyek.” Joseph awayikwel-rnem-then yep-yep-rnem arntarnt-arek. Amikw ingwer atherr-kenh Bilhah-kenh-rnem, Zilpah-kenh-rnem. Jacob-kenh anew atherr-kenh. Joseph-el aynikw ikwerenh angka apmwa ikwer-rnem ilenh. 
Jacob Joseph-ekant inkwerelhek alerikw ingwer-rnem-theyan, rarl ingkerneny ikwerenh. Arnkwa arlkeny ingwerek-ingwer-akert aylpey-angker ra anthek. 
Joseph-kenh awayikw-rnem ikwer ahelirrek, ikwerantarl aynikw inkwerelhenh-kety, arnkwa mwerr-angker anthek-kety. Rernem ikwer-itwek angka mwerr angkerrey-angenh-anem. 
Ingwer-ingerelan Joseph-el altyerr-anem arek. Ra awayikw-rnem ilek, rarl altyerr arek. Rernem ikwer ahelirrek. 
Joseph angkek, “Atyeng arringkerr awelhenherr-arey. Anwingkerr atherrk weyt-rnem arlwarey-arlwarey akwetyemel arertneynenh, ataperrelemel arraty rnkernemel. Atherrk ntang weyt-akert ataperr arlwa atyenh arraty rtnek. Ataperr arrekingkerrenhan ikwer kwenirrekarl, atyetyartekarl kwenirrem-apeny.” 
Awayikw-rnem ingkerrenh-antey ikwer angkek, “Nganang ngay Atyetyart anwekingkerrenh aneyel?” Rernem ikwer ahel-anem irrek, rarl angka renh ilekek, ntang weyt-penh. 
Joseph-el altyerr ingwer-anem arek. Ra awayikw-rnem angka ilek, rarl altyerr arek, “Ingkeny-then alkent-then antyarr 11-pel, rernem atyeng kwenirrek Atyetyartek-apeny.” Joseph-el ikwer-rnem anayntiley-angenh-antey. 
Ra aynikw ilek, rarl altyerr renh arek. Aynikw ikwer ahelirrek. “Ilekarlap ran alakenh aynteyel? Ayeng amengkw awayengkw-rnem-then ngkweng kwenirretyek Atyetyart-apeny?” 
Awayikw-rnem ikwer ahelirrek. Aynikw ikwerenh aleth-antey iterrenh, ywarn-antey, rarl angka renh ilekek. 
Awayikw-rnem alhek, yep-yep-rnem-then nanikwet-rnem-then arntarnt-aretyek, apmer Shechem-itwek. Aynikwel Joseph thwenek, “Awayengkw-rnem-warl alha.” Joseph-el renh ilek, “Kel, mwerr.” 
Aynikwel renh ilek, “Awayengkw-rnem arerl-alpa, iley-alpemel atyeng-warl, mwerr yep-yep-rnem rernem arntarnt-areyel.” Ra renh thwenek Hebron arterterr-they apwert irrkerrel-atherr ayntek, ahern arterterr ampepel aynteyneyel. Joseph apmer Shechem-warl alhenh amern weyt-angketyarr-angkwarr. 
Artwa anyentel renh ayernek, “Ilekek nga nthwerl-alpeyel?” 
Joseph-el ilek, “Ayeng nthwerl-apeyel awayaty atyenh-rnemek. Ntwa apek arek renh-rnem? Nthenh-angkwarr rernem alhekan yep-yep-rnem-akert?” Artwel ilek, “Rernem anper-antey alhek. 
Apmer nhenh arrangkw-anem. Atha renh-rnem awek, rernemarl angkerrenh apmer Dothan ikwer-warl alhetyek.” Joseph-el awayikw ikwerenh-rnem arek apmer Dothan ikwer-itwek. 
Awayikwel-rnem renh arnarek, rernem ikwer angkerrek, renh atwetyek. 
“Yanh ra apetyeyel altyerr arey-angker, tnakelherl-aney-angker. Atyetyart ilelherl-aney-angker! Mpa, anwingkerr ywerrelhemel atwey! 
Anwingkerr renh irrkwewarl iwey, ingwer-rnem-warl ilerl-anemel atnwenth ahelengkwel renh arlkwenty-arrpantey. Ran ilwentyel, rap atyetyart aney-angenh-anemarl!” 
Reuben ra awek rernemarl ikwer angkerrenh atwetyek. Ra arrkernelhek renh-rnem iletyek menty ra anetyek, atwey-angenh. 
Ra angkek, “Apmer arlpaw-warl renh akngey, irrka ilkwewarl renh iwetyek.” Ra ikwer iterrenh aynikw-warl akngeynetyek-antey irrkewarl iwenty-penh, renh ayerrpiletyek. 
Joseph awayikw-warl apetyek. Rernem arnkwa arlkeny-angketyarr lhelhek, 
Irrka ilkwewarl renh iwek. 
Joseph-kenh awayikw-rnemel amern-anem arlkwenh. Rernem arek Ishmael-areny-rnem apetyenty apmer Gilead-they. Kamwerl-rnemel ampwal ilek-ilek akngetyenh Egypt-warl. 
Judah-el ilek, “Ilekek anwingkerr aytey anwekingkerrenh atwerl-ayntem? 
Anwingkerr tharlemiley weker-rnem-warl kamwerl-angketyarr yanh-rnem-warl, weker-rnem-warl.” 
Joseph-kenh awayikw-rnemel renh tharlemiletyek weker-rnem-warl. Irrkethey tyerrek. Weker-rnemel renh payemelek, ngkwelty 20-pel-ek. Rernem Joseph renh akngek apmer Egypt-warl. 
Reuben irrkewarl apetyek, ra arrangkw-anem arey-alhek. Arnkwanem ikwerenh ilterrek, arralty-anek. 
Ra awayikw ingwer-rnemek angkek, “Awey ra ywerrek irrkethey. Nthakenh-anem ayeng irreman?” 
Joseph-kenh awayikw-rnemel nanikwet atwek, arrkngewarl-anem pwerlpewek, arnkwa arlkeny-angketyarr renhan. 
Arnkwa arlkeny-angketyarr renh rernem aynikw-warl akngeynek, arrkngenp. “Arnkwa nhenh aray! Alerengkw akely ngkwenh-kenh apek!” 
Artwamp Jacob ra alhengk-arek, “Alerey atyenh-kenh yanhan! Arnkwa arlkeny-angketyarr atharl alhengk-areyel, atnwenth ahelengkwel renh arlkwek apek!” 
Apmer-itwek amperrngirrek arleng-alenty, ra arnkwa ikwerenh ilterrek. Ra arnkwa apmwel-anem aylpek, amperrngirremel. 
Rernem ywarn-antey arternpiletyek ikwer arrkernelhenh. Artwamp ilelhek, “Ayeng aleth ikwer artnayntem ilwetyek-atwety.” Aleth-antey artnenh. 
Weker-rnemel Joseph renh tharlemilek, artwa Potiphar-warl. Potiphar Atyetyart anek artwa ahelengkw Egypt-areny-rnemek. ... 
