﻿ܡܙܡܘܪ̈ܐ.
104.
ܒܲܪܸܟ݂ܝ، ܝܵܐ ܓܵܢܝܼ، ܠܡܵܪܝܵܐ، ܡܵܪܝܵܐ ܐܲܠܵܗ‌ܝܼ ܓܘܼܪܵܐ ܝܘܸܬ ܪܵܒܵܐ، ܙܲܗܝܘܼܬܵ‌ܐ ܘܣܸܩܠܵܐ ܠܒ݂ܝܼܫ ܠܘܼܟ݂. 
ܟܹܐ ܩܵܛܹܒ݂ ܒܲܗܪܵܐ ܐܲܝܟ݂ ܥܵܒܵܝܬܵ‌ܐ، ܟܹܐ ܡܵܬܹܚ ܫܡܲܝܵܐ ܐܲܝܟ݂ ܣܸܬܪܵܐ. 
ܟܹܐ ܒܵܢܹܐ ܥܲܠܔ ܡ̈ܝܼܵܐ ܥܸܠܝܼܵܬܘܼ̈ܗ‌ܝ، ܟܹܐ ܥܵܒܹܕ ܥܲܝܒ݂ܵܬܹ̈‌ܐ ܡܲܪܟܲܒ݂ܬܹܗ، ܟܹܐ ܚܵܕܹܪ ܥܲܠܔ ܓܘܼܠܦܵܢܹ̈ܐ ܕܦܵܘܚܵܐ. 
ܟܹܐ ܥܵܒܹܕ ܡܲܠܲܐܟ݂ܘܼ̈ܗ‌ܝ ܦܵܘܚܹ̈ܐ، ܡܫܲܡܫܵܢܘܼ̈ܗ‌ܝ ܢܘܼܪܵܐ ܠܵܗܝܵܢܵܐ. 
ܡܘܼܩܘܹܐ ܠܹܗ ܐܲܪܥܵܐ ܥܲܠܔ ܫܲܬܐܸܣܬܘܼܗ̇، ܠܹܐ ܫܵܥܫܵܐ ܠܥܵܠܲܡ ܥܵܠܡܝܼܢ. 
ܒܬܗܘܿܡܵܐ ܐܲܝܟ݂ ܠܒܼܝܼܫܬܵ‌ܐ ܟܘܼܣܹܐ ܠܘܼܟ݂ ܐܸܠܘܼܗ̇، ܥܲܠܔ ܛܘܼܪ̈ܵܢܹܐ ܟܠܹܐ ܠܗܘܿܢ ܡ̈ܝܼܵܐ. 
ܡ̣ܢ ܢܓ̰ܵܘܬܘܼܟ݂ ܥܪܝܼܩ ܠܗܘܿܢ، ܡ̣ܢ ܩܵܠܵܐ ܕܪܲܥܡܘܼܟ݂ ܡܘܼܠܝܸܙ ܠܗܘܿܢ ܠܸܥܪܵܩܵܐ. 
ܐܣܝܼܩ ܠܗܘܿܢ ܛܘܼܪ̈ܵܢܹܐ، ܨܠܹܐ ܠܗܘܿܢ ܪ̈ܵܘܘܿܠܹܐ، ܠܕܘܼܟܵܐ ܕܫܘܼܬܐܸܣ ܠܘܼܟ݂ ܐܸܠܵܝܗ‌ܝ. 
ܬܚܘܼܡܵܐ ܡܘܼܬܸܒ݂ ܠܘܼܟ݂ ܕܠܵܐ ܥܵܒ݂ܪܝܼ، ܠܵܐ ܕܵܝܪܝܼ ܠܟܲܣܘܼܝܘܼܗ̇ ܐܲܪܥܵܐ. 
ܟܹܐ ܫܲܕܸܪ ܥܲܝܢܵܬܹ̈‌ܐ ܓܵܘ ܪ̈ܵܘܘܿܠܹܐ، ܒܹܝܠܔ ܛܘܼܪ̈ܵܢܹܐ ܟܹܐ ܓ̰ܵܪܝܼ. 
ܟܹܐ ܡܲܫܬ‌ܝܼ ܠܟܠܵܝܗ‌ܝ ܗܲܝܘܵܢܹ̈ܐ ܕܕܸܫܬܵ‌ܐ، ܚܡܵܪܹ̈ܐ ܕܒܲܪܝܼܵܐ ܟܹܐ ܡܲܬܪܝܼ ܨܲܗܘܵܝܗ‌ܝ. 
ܠܟܸܣܠܵܝܗ‌ܝ ܛܲܝܪܹ̈ܐ ܕܫܡܲܝܵܐ ܟܹܐ ܪܵܝܦܝܼ، ܡ̣ܢ ܓܵܘܵܐ ܕܦܲܥܘܵܢܹ̈ܐ ܟܹܐ ܡܲܪܡܝܼ ܩܵܠܵܐ. 
ܟܹܐ ܡܲܫܬܹ‌ܐ ܛܘܼܪ̈ܵܢܹܐ ܡ̣ܢ ܥܸܠܝܼܵܬܘܼ̈ܗ‌ܝ، ܡ̣ܢ ܛܥܘܼܢܝܵܬܹ̈‌ܐ ܕܦܘܼܠܚܵܢܘܼ̈ܟ݂ ܒܸܬ ܣܵܒ݂ܥܵܐ ܐܲܪܥܵܐ. 
ܟܹܐ ܡܲܓ̰ܝܸܢ ܓܸܠܵܐ ܩܵܐ ܪܸܣܩܵܐ، ܘܝܲܪܩܵܐ ܩܵܐ ܡܲܦܠܲܚܬܵ‌ܐ ܕܒܲܪܢܵܫܵܐ، ܘܠܦܲܠܘܼܛܹܐ ܬܘܼܪܣܵܝܵܐ ܡ̣ܢ ܐܲܪܥܵܐ، 
ܘܚܲܡܪܵܐ ܕܟܹܐ ܡܲܚܕܹܐ ܠܸܒܵܐ ܕܐܢܵܫܵܐ، ܡܸܫܚܵܐ ܠܡܲܒܪܘܼܩܹܐ ܦܵܬܘܵܬܹ̈‌ܐ، ܘܠܲܚܡܵܐ ܕܟܹܐ ܣܵܢܹܕ ܠܸܒܵܐ ܕܐܢܵܫܵܐ. 
ܟܹܐ ܣܵܒ݂ܥܝܼ ܐܝܼܠܵܢܹ̈ܐ ܕܡܵܪܝܵܐ، ܐܲܪ̈ܙܹܐ ܕܠܸܒ݂ܢܵܢ ܕܢܨܝܼܒ݂ ܠܹܗ، 
ܕܬܵܡܵܐ ܛܲܝܪܹ̈ܐ ܟܹܐ ܬܲܪܨܝܼ ܩܸܢܵܬܹ̈‌ܐ، ܠܲܩܠܵܩ ܒܲܝܬܘܼܗ̇ ܒܫܲܪ̈ܘܲܝܢܹܐ. 
ܛܘܼܪ̈ܵܢܹܐ ܪ̈ܵܡܹܐ ܩܵܐ ܕܲܝܨܹ̈ܐ، ܩܵܝܹ̈ܐ ܣܸܬܵܪܵܐ ܠܝܲܪ̈ܒܘܼܥܹܐ. 
ܥܒ݂ܝܼܕ ܠܹܗ ܣܲܗܪܵܐ ܠܘܲܥܕܹ̈ܐ، ܫܸܡܫܵܐ ܟܹܐ ܝܵܕܹܥ ܓܢܵܝܬܹܗ. 
ܟܹܐ ܡܲܬܒܸܬ ܚܸܫܟܵܐ ܘܟܹܐ ܗܵܘܹܐ ܠܲܝܠܹܐ، ܒܓܵܘܹܗ ܟܹܐ ܚܵܕܪܝܼ ܗܲܝܘܵܢܹ̈ܐ ܕܡܲܝܫܵܐ. 
ܓܘܼܪ̈ܝܹܐ ܕܐܲܪ̈ܝܹܐ ܟܹܐ ܓܲܪܓܸܡܝܼ ܥܲܠܔ ܨܲܝܕܵܝܗ‌ܝ، ܠܸܛܠܵܒܵܐ ܡ̣ܢ ܐܲܠܵܗܵܐ ܡܹܐܟ݂ܘܼܠܬܵܝܗ‌ܝ. 
ܒܙܪܵܩܵܐ ܕܫܸܡܫܵܐ ܟܹܐ ܓ̰ܵܡܥܝܼ، ܘܓܵܘ ܒܹܝܬ ܡܲܥܡܪܵܝܗ‌ܝ ܟܹܐ ܕܵܡܟ݂ܝܼ. 
ܟܹܐ ܦܵܠܹܛ ܒܲܪܢܵܫܵܐ ܠܫܘܼܠܹܗ، ܘܠܦܘܼܠܚܵܢܹܗ ܗܲܠܔ ܪܲܡܫܵܐ. 
ܟܡܵܐ ܪܵܒܵܐ ܝܢܵܐ ܥܒ݂ܵܕܘܼ̈ܟ݂، ܝܵܐ ܡܵܪܝܵܐ، ܟܠܵܝܗ‌ܝ ܒܚܸܟ݂ܡܬܵ‌ܐ ܥܒ݂ܝܼܕ ܠܘܼܟ݂، ܡܠܹܐ ܠܵܗ̇ ܐܲܪܥܵܐ ܡ̣ܢ ܥܘܼܬܪܘܼܟ݂. 
ܐܵܗܵܐ ܝܵܡܵܐ ܓܘܼܪܬܵ‌ܐ ܘܪܘܝܼܚܬܵ‌ܐ، ܬܵܡܵܐ ܐܝܼܬ ܪ̈ܲܚܫܹܐ ܕܠܵܐ ܡܸܢܝܵܢܵܐ، ܚܲܝܘܵܬܹ̈‌ܐ ܙܥܘܿܪܹ̈ܐ ܥܲܡ ܓܘܼܪܹ̈ܐ. 
ܬܵܡܵܐ ܓܵܡܝܼܹ̈ܐ ܟܹܐ ܚܵܕܪܝܼ، ܘܠܹܘܝܵܬܵܢ ܕܒܪܹܐ ܠܘܼܟ݂ ܠܛܲܐܘܼܠܹܐ ܓܵܘܘܼܗ̇. 
ܟܠܵܝܗ‌ܝ ܐܸܠܘܼܟ݂ ܟܹܐ ܣܵܒܪܝܼ، ܠܝܼܵܗܒ݂ܵܐ ܡܹܐܟ݂ܘܼܠܬܵܝܗ‌ܝ ܒܥܕܵܢܘܼܗ̇. 
ܟܹܐ ܝܵܗܒܹܬ ܐܸܠܵܝܗ‌ܝ، ܟܹܐ ܟܲܦܫܝܼ، ܟܹܐ ܦܵܬܚܹܬ ܐܝܼܕܘܼܟ݂، ܟܹܐ ܣܵܒ݂ܥܝܼ ܒܛܵܒ݂ܬܵ‌ܐ. 
ܟܹܐ ܛܲܫܹܝܬ ܦܵܬܘܼܟ݂، ܟܹܐ ܦܵܝܫܝܼ ܫܓ݂ܝܼܫܹܐ، ܟܹܐ ܫܵܩܠܹܬ ܪܘܼܚܵܝܗ‌ܝ، ܟܹܐ ܦܵܝܫܝܼ ܛܠܝܼܩܹܐ، ܘܠܥܲܦܪܵܝܗ‌ܝ ܟܹܐ ܕܵܝܪܝܼ. 
ܟܹܐ ܫܲܕܪܸܬ ܪܘܼܚܘܼܟ݂، ܟܹܐ ܦܵܝܫܝܼ ܒܸܪܝܹܐ، ܘܟܹܐ ܚܲܕܸܬܸܬ ܦܵܬܵ‌ܐ ܕܐܲܪܥܵܐ. 
ܗܵܘܹܐ ܚܸܩܪܵܐ ܕܡܵܪܝܵܐ ܠܥܵܠܲܡ، ܚܵܕܹܐ ܡܵܪܝܵܐ ܒܦܘܼܠܚܵܢܘܼ̈ܗ‌ܝ. 
ܟܹܐ ܚܵܐܹܪ ܒܐܲܪܥܵܐ ܘܟܹܐ ܪܲܬܪܸܬܵ‌ܐ، ܟܹܐ ܕܵܩܹܪ ܒܛܘܼܪ̈ܵܢܹܐ ܘܟܹܐ ܬܲܢܬܸܢܝܼ. 
ܒܸܬ ܫܲܒܚܸܢ ܠܡܵܪܝܵܐ ܒܚܲܝܝܼ̈، ܒܸܬ ܙܵܡܪܹܢ ܠܐܲܠܵܗ‌ܝܼ ܟܡܵܐ ܕܝܼܘܸܢ. 
ܗܵܘܝܵܐ ܒܲܣܝܼܡܬܵ‌ܐ ܐܸܠܹܗ ܗܲܓܲܝܬ‌ܝܼ، ܐܵܢܵܐ ܒܸܬ ܚܵܕܹܝܢ ܒܡܵܪܝܵܐ. 
ܬܵܝܡܝܼ ܚܲܛܵܝܹ̈ܐ ܡ̣ܢ ܦܵܬܵ‌ܐ ܕܐܲܪܥܵܐ، ܘܪ̈ܲܫܝܼܥܹܐ ܐܚܹܪܢܵܐ ܠܵܐ ܗܵܘܝܼ. ܒܲܪܸܟ݂ܝ، ܝܵܐ ܓܵܢܝܼ، ܠܡܵܪܝܵܐ. ܗܲܠܸܠܘܼܝܵܐ 
