﻿ܡܙܡܘܪ̈ܐ.
44.
ܝܵܐ ܐܲܠܵܗܵܐ ܒܢܵܬܝܵܬܲܢ̈ ܫܡܝܼܥ ܠܲܢ، ܐܲܒ݂ܵܗܵܬܲܢ̈ ܗܘܼܩܹܐ ܠܗܘܿܢ ܐܸܠܲܢ، ܒܘܼܬ ܦܘܼܠܚܵܢܹ̈ܐ ܕܦܠܝܼܚ ܠܘܼܟ݂ ܒܝܵܘܡܵܢܵܝ̈ܗ‌ܝ، ܒܝܵܘܡܵܢܹ̈ܐ ܩܲܕܝܼܡܵܝܹ̈ܐ. 
ܐܲܢ݇ܬ ܒܐܝܼܕܘܼܟ݂ ܛܪܝܼܕܵܝ ܠܘܼܟ݂ ܐܸܡܘܵܬܹ̈‌ܐ ܘܢܨܝܼܒ݂ܵܝ ܠܘܼܟ݂ ܐܲܒ݂ܵܗܵܬܲܢ̈، ܥܒ݂ܝܼܕ ܠܘܼܟ݂ ܣܪܝܼܬܵ‌ܐ ܠܥܲܡܡܹ̈ܐ ܘܡܘܼܦܪܸܣܵܝ ܠܘܼܟ݂ ܐܲܒ݂ܵܗܵܬܲܢ̈. 
ܣܵܒܵܒ ܠܹܐ ܝܗܘܵܐ ܒܣܲܝܦܵܝܗ‌ܝ ܕܩܵܡ ܝܵܪܬ‌ܝܼ ܠܵܗ̇ ܐܲܪܥܵܐ، ܐܵܦܠܵܐ ܕܪܲܥܢܵܝܗ‌ܝ ܩܵܡ ܦܲܪܸܩ ܠܗܘܿܢ، ܐܸܠܵܐ ܝܲܡܝܼܢܘܼܟ݂ ܘܕܪܲܥܢܘܼܟ݂ ܘܒܲܗܪܵܐ ܕܦܵܬܘܼܟ݂، ܣܵܒܵܒ ܒܣܝܼܡ ܠܵܗ̇ ܠܘܼܟ݂ ܒܝܼܵܝܗ‌ܝ. 
ܐܲܢ݇ܬ ܝܼܘܸܬ ܡܲܠܟܝܼ، ܝܵܐ ܐܲܠܵܗܵܐ، ܦܩܘܿܕ ܦܘܼܪܩܵܢܵܐ ܕܝܲܥܩܘܿܒ݂. 
ܒܝܼܘܼܟ݂ ܒܸܬ ܡܵܚܲܚ ܠܡܲܠܝܸܨܵܢܲܢ̈، ܒܫܸܡܘܼܟ݂ ܒܸܬ ܕܲܫܕܸܫܲܚ ܠܩܵܝܡܵܢܹ̈ܐ ܕܥܲܠܲܢ. 
ܣܵܒܵܒ ܒܩܸܫܬ‌ܝܼ ܠܹܐ ܦܵܝܫܹܢ ܒܣܲܒ݂ܪܵܐ، ܘܣܲܝܦܝܼ ܠܹܐ ܦܲܪܸܩ ܠܝܼ. 
ܣܵܒܵܒ ܐܲܢ݇ܬ ܩܵܡ ܦܲܪܩܸܬ ܠܲܢ ܡ̣ܢ ܡܲܠܝܸܨܵܢܲܢ̈، ܘܣܵܢܝܵܢܲܢ̈ ܡܘܼܢܟܸܦܵܝ ܠܘܼܟ݂. 
ܒܐܲܠܵܗܵܐ ܫܘܼܒܸܚ ܠܲܢ ܟܠܹܗ ܝܵܘܡܵܐ، ܘܠܫܸܡܘܼܟ݂ ܗܲܠܔ ܥܵܠܲܡ ܒܸܬ ܫܲܟܪܲܚ. ܣܹܠܵܗ 
ܐܝܼܢܵܐ ܡܘܼܚܦܸܠܔ ܠܘܼܟ݂ ܘܡܘܼܢܟܸܦ ܠܘܼܟ݂ ܐܸܠܲܢ، ܘܠܹܐ ܦܵܠܛܹܬ ܥܲܡ ܚܲܝܠܵܘܵܬܲܢ̈. 
ܡܘܼܕܸܪܘܼܟ݂ ܐܸܠܲܢ ܠܒܵܬܪܵܐ ܡ̣ܢ ܩܲܕܡ ܕܸܫ̃ܡܸܢ، ܘܣܵܢܝܵܢܲܢ̈ ܣܠܝܼܒ ܠܗܘܿܢ ܩܵܐ ܓܵܢܵܝܗ‌ܝ. 
ܩܵܡ ܝܵܗܒܹܬ ܠܲܢ ܐܲܝܟ݂ ܥܸܪ̈ܒܹܐ ܕܦܵܝܫܲܚ ܐܟ݂ܝܼܠܹܐ، ܘܓܵܘ ܐܸܡܘܵܬܹ̈‌ܐ ܩܵܡ ܒܵܙܩܹܬ ܠܲܢ. 
ܙܘܼܒܸܢܘܼܟ݂ ܠܥܲܡܘܼܟ݂ ܪܵܒܵܐ ܐܲܪܙܵܢ، ܘܠܵܐ ܩܢܹܐ ܠܘܼܟ݂ ܒܛܝܼܡܵܝ̈ܗ‌ܝ. 
ܩܵܡ ܥܵܒ݂ܕܹܬ ܠܲܢ ܠܵܘܡܵܐ ܠܫܒ݂ܵܒܲܢ̈، ܡܲܣܚܲܪܬܵ‌ܐ ܘܠܵܘܡܵܐ ܠܐܵܢܝܼ ܕܝܼܢܵܐ ܚܵܕܸܪ̈ܘܵܢܲܢ. 
ܩܵܡ ܥܵܒ݂ܕܹܬ ܠܲܢ ܡܲܬܠܵܐ ܓܵܘ ܐܸܡܘܵܬܹ̈‌ܐ، ܥܸܠܬܵ‌ܐ ܕܫܥܵܫܬܵ‌ܐ ܕܪܹܝܫܵܐ ܓܵܘ ܥܲܡܡܹ̈ܐ. 
ܟܠܹܗ ܝܵܘܡܵܐ ܢܟܸܦܬ‌ܝܼ ܩܲܕܡܝܼ ܝܠܵܗ̇، ܘܢܟܸܦܬܵ‌ܐ ܕܦܵܬ‌ܝܼ ܩܵܡ ܟܲܣܝܵܐ ܠܝܼ. 
ܡ̣ܢ ܥܸܠܬܵ‌ܐ ܕܩܵܠܵܐ ܕܠܵܝܡܵܢܵܐ ܘܓܵܕܦܵܢܵܐ، ܡ̣ܢ ܩܲܕܡ ܕܸܫ̃ܡܸܢ ܘܫܵܩܠܵܢܵܐ ܕܬܘܼܥܠܵܐ. 
ܟܠܵܗ̇ ܐܵܗܵܐ ܐܬܹ‌ܐ ܠܵܗ̇ ܥܲܠܲܢ ܘܠܵܐ ܢܫܹܐ ܠܲܢ ܐܸܠܘܼܟ݂، ܘܠܵܐ ܕܘܼܓܸܠܔ ܠܲܢ ܠܘܲܥܕܘܼܟ݂. 
ܠܵܐ ܕܝܼܪܹܗ ܠܒܵܬܪܵܐ ܠܸܒܲܢ، ܐܵܦܠܵܐ ܩܠܝܼܒ ܠܗܘܿܢ ܦܵܣܘܿܥܝܵܬܲܢ̈ ܡ̣ܢ ܐܘܼܪܚܘܼܟ݂. 
ܐܝܼܢܵܐ ܩܵܡ ܛܵܒ݂ܚܹܬ ܠܲܢ ܒܐܲܪܥܵܐ ܕܟ̰ܲܩܵܠܹ̈ܐ، ܘܩܵܡ ܡܲܟܣܸܬ ܠܲܢ ܒܛܸܠܵܢܝܼܬܵ‌ܐ ܕܡܵܘܬܵ‌ܐ. 
ܐܸܢ ܗܵܘܲܚ ܢܸܫܝܹܗ ܫܸܡܵܐ ܕܐܲܠܵܗܲܢ، ܘܦܪܝܼܣܵܝ ܐܝܼܕܵܬܲܢ̈ ܠܟܸܣ ܐܲܠܵܗܵܐ ܢܘܼܟ݂ܪܵܝܵܐ؛ 
ܗܵܐ، ܠܹܐ ܒܵܚܹܪ ܐܲܠܵܗܵܐ ܠܐܵܗܵܐ؟ ܣܵܒܵܒ ܗ̇ܘ ܟܹܐ ܝܵܕܹܥ ܡܸܢܕܝܼ ܛܸܫܝܵܐ ܕܠܸܒܵܐ. 
ܐܝܼܢܵܐ ܒܘܼܬ ܕܝܼܘܼܟ݂ ܦܝܵܫܵܐ ܝܘܲܚ ܩܛܝܼܠܹܐ ܟܠܹܗ ܝܵܘܡܵܐ، ܦܝܼܫ ܠܲܢ ܚܘܼܫܒܸܢܹܐ ܐܲܝܟ݂ ܥܸܪ̈ܒܹܐ ܠܦܪܵܡܬܵ‌ܐ. 
ܪܥܘܿܫ، ܩܵܡܘܿܕܝܼ ܛܵܠܥܹܬ، ܝܵܐ ܡܵܪܝܵܐ؟ ܦܘܼܫ ܪܥܝܼܫܵܐ، ܠܵܐ ܪܲܦܹܝܬ ܠܲܢ ܠܥܵܠܲܡ. 
ܩܵܡܘܿܕܝܼ ܛܲܫܹܝܬ ܠܵܗ̇ ܦܵܬܘܼܟ݂، ܘܢܵܫܹܝܬ ܥܵܘܩܵܢܲܢ̈ ܘܐܘܼܠܨܵܢܲܢ̈؟ 
ܣܵܒܵܒ ܟܝܼܦ ܠܵܗ̇ ܠܥܲܦܪܵܐ ܓܵܢܲܢ، ܛܦܹܐ ܠܵܗ̇ ܠܐܲܪܥܵܐ ܟܹܪ݇ܣܲܢ. 
ܩܘܼܡ ܠܗܲܝܲܪܬܵ‌ܐ ܐܸܠܲܢ، ܘܦܲܪܸܩ ܠܲܢ ܒܘܼܬ ܛܲܝܒܘܼܬܘܼܟ݂. 
