GEN 1:1 Yama nagkamchakug, Apajuík nayaimpin nugkajai najanauwai.
GEN 1:2 Nugka niimeg atsau, ayatak nayants kuna, suwe ijiamu aajakui. Nuna awanken Apajuín Wakani buchitu au.
GEN 1:3 Nuadui Apajuí chichaak: “¡Tsaaptin weti!” tusa tamawaik, tsaaptin wajasui.
GEN 1:4 Nuna Apajuí diis “tsaaptin aku ima pegkejai”, tusa tsaaptinun suwenmayan akankauwai.
GEN 1:5 Duwi tsaaptinun adaikauwai “tsawai”, tuja suwen adaikauwai “kashi” juna takas ejeyuwai makichik tsawantan.
GEN 1:6 Nuigtu Apajuí chichaak: “Agkaju múun wajasti, nuniak yumin akanjati”, tiuwai. Tamawaik imanisag uminkauwai.
GEN 1:7 Dutika Apajuí agkajun najana, yumi nugkaya atinun tuja yakiya atinjai akankauwai.
GEN 1:8 Dutika Apajuí agkajua nuna adaikauwai “nayaim”. Juna umik kintamag tsawak jimag tsawantan ejeyuwai.
GEN 1:9 Nuna ashimak Apajuí chichaak: “Nayaimpi nugkaan yumi ayá juka makichik ijunbaunmag ijunjati, nunitai buku wantinkati”, tiuwai. Tamawaik imanisag uminkauwai.
GEN 1:10 Yumi makichik ijunbaunmak ijunjamtai buku juwakua nuna Apajuí adaikauwai “nugka”, untsu yumi piyajua nuna adaikauwai “nayants”. Nuna Apajuí shiig pegkeg diisui.
GEN 1:11 Nuna umika Apajuí chichaak: “Ashí nugkanum dekas ajak aidau, dupa nejen aidaush, nuigtush numi nejen aidaushkam tsapakti”, tiuwai. Tamawaik imanisag uminkauwai.
GEN 1:12 Nugkanmak ashí ajak aidau tsapakui, dupa nejen aidaush antsag numi nejen aidaushkam, nejenak mantamsawag ijuntsauwai. Nuna Apajuí shiig pegkeg diisui.
GEN 1:13 Juna aatus kampatum tsawanta duwi umikui.
GEN 1:14 Tuja nuigtushkam Apajuí chichaak: “Agkaju múun wigka weaja juiyash, etsantug nugkan tsaapmitkau aidau aitnume, nunú etsantak akankati tsaaptinun suwenmayan, dutikam tsawan, nantu, mijan aina nunú dekaapatain iwainau agtinun.
GEN 1:15 Nunú nayaimpin agkajujin nanamsag etsantuinak ashí nugkan tsaapmitkau agtinme”, tiuwai. Tamawaik imanisag uminkauwai.
GEN 1:16 Nuadui Apajuí dekas jimag etsantin agtinun najanauwai: Tsawai etsanjatnun ima muuntan najanak, kashi etsanjatnunak yaijan najanauwai. Nuigtushkam yaya aidaunashkam najankauwai.
GEN 1:17 Dutika Apajuí nugkan tsawai kashijai tsaapmitkatnun, etsantin aina nuna apusauwai agkaju múun wigka weaja nuwi. Nuna Apajuí shiig pegkeg diisui.
GEN 1:19 Juna taka takakua kintamag, ipak usumta juu tsawantan ejeyuwai.
GEN 1:20 Nuna ashí umiku asa, Apajuí chichaak: “Namaka batsamsatin aidaush ditashkam yujaktinme, nuniagtai nugka awanken, nayaimpin agkajuji aina juwi yujasagtin aidaushkam, chigki wegantu aidaush yujaktinme”, tiuwai. Tamawaik imanisag uminkauwai.
GEN 1:21 Nuigtushkam Apajuí najankauwai nayantsanmaya kuntin dekas múun aina nuna, nuigtushkam tikich namak yaig aidaun nagkamas ashí najankauwai. Chigki wegantu aidaunashkam imatiksag najankauwai. Nuna Apajuí shiig pegkeg diisui.
GEN 1:22 Juna najanak Apajuí pegkegnum yumigkiak: “Yujaktajum imaniakjum nayantsanum piaktajum, tuja chigki wegantu aidautigmeshkam imanisjumek yujaktajum, imaniakjum ashí nugka jamagtajum” tiuwai.
GEN 1:23 Makichik uwejan amua tsawanta duwi junak najanauwai.
GEN 1:24 Nuigtushkam Apajuí chichaak: “Nugkanmashkam yujakti kuntin maki makichik niimtin aina nunú, kuntin tagkumtai aidau, tagkumchatai aidaujai, tuja tikich kuntin japiinas yujau aidaushkam”, tiuwai. Tamawaik imanisag uminkauwai.
GEN 1:25 Apajuí juju kuntin aidaun najankauwa nunak, ashí pegkeg diisui.
GEN 1:26 Ashí juna umik chichaak: “Yamai aents iina niimejai betek najanami, nii nugkanum pujusmatai, namak nayantsanmaya aidaush, nanamtin aidaush, kuntin aidaush, kuntin japiinas yujau aina dushakam ima niinak umigtinme” tiuwai.
GEN 1:27 Apajuí aentsun najadauwa nunak niina niimejai betek, aishmagkun nuwajai najanauwai.
GEN 1:28 Dutika pegkegnum yumigkiak: “Yujaktajum, nuniakjum nugkak ashí jamagtajum, tuja nayantsanmaya namak aidauk ashí atum kuitamkatajum, tuja agkajunum chigki nanamin aidaush, kuntin wegantu nugkanum yujaka dushakam ashí atumin umigtamtinme”, tiuwai.
GEN 1:29 Tusa Apajuí chichaak: “Yamai atum shiig antuktajum; ashí ajak juju nugkanmaya nejen aina nunak, numi neje yujutai aina nujai, atum yuwatnun umigkajime.
GEN 1:30 Unstu, ashí kuntin nugkanum ayá nunash, chigki wegantu aidaunashkam, japiinas yujau aina nujai, ashí pujutji ajamu aina nunak, ashí dupa samekbau aina nuna dita yuwatnujin umigkajai”, tiuwai. Tamawaik imanisag uminkauwai.
GEN 1:31 Apajuí ashí nii najankamujin ijumag diis tiki pegkeg wakejumain diisui. Juna najanak ashimak juinia uwejan makichik ijuk tsawantan ejeyuwai.
GEN 2:1 Juna Apajuí aatus nayaimpin, ashí nayaimpinum ayá nujai najana, nugkanash ashí nugkanum ayá nujai najanak ashimkauwai.
GEN 2:2 Ashí najanak umik, tsawan sieteya juwi Apajuík ayamjauwai.
GEN 2:3 Nuadui nunú tsawantan Apajuí etegkauwai, tsawan pegkejam tuke takashtai, ayamtai atin ati tusa.
GEN 2:4 Jujuwai Apajuí nayaimpin nugkajai najanamua nunú pachisa augbattsamu. Apajuí nayaimpin nugkajai najanauwa nunú tsawantaik,
GEN 2:5 makichik numikesh, dupagkesh tsapaichu aajakui. Wagki eke Apajuí yumin yutumtikchau asamtai. Nuigtushkam aents nuna takai ajakmamainkesh atsujakui.
GEN 2:6 Ayatak nugka initkenia yumi bukuiti jiinki nugkan ukatujakui.
GEN 2:7 Nuwiyan Apajuí, nugka yukukuntun juki aentsun najanauwai. Dutika najana aepes, dujinum umpua mayain egketuk, aents iwaku ema inankiuwai.
GEN 2:8 Nuna dutika, Apajuí etsa minitaijiya atú Edén nugkanum yujagken ajatuauwai, dutika nuwi nii aents najanamujin apusauwai.
GEN 2:9 Apajuí ashí numi pegkeg aidaun yujág yutai aidaunash uyujkauwai. Untsu nuna ejapeen ajatuawai jimag ajakan. Makichik ajak nuna neje yuwakuik tuke jachatai tabaun, tikich ajakan neje yujuaik, pegkejash pegkegchaujai dekatai tabaujai.
GEN 2:10 Nunú nugka Edégnum makichik namak jiiniuwai ajak aidaun ukatkatin. Nunik nuwiya ipak usumta imajin namak tsegkejui.
GEN 2:11 Makichik tsegkeakun daaji Pisón tutai aajakui. Nunú namakak nugka Havilá tutai dekas oro pujamua nuna tentea apajakui.
GEN 2:12 Nuiya oro ima shiig pegkejai. Nuanuig ayawai numi bedelio daagtin puwaji kugkuin, tuja kaya ónice tutaishkam ayawai.
GEN 2:13 Tuja tikich tsegkeakbaun daajiyai Guihón tutai. Nunú Cus nugkan ashí tentea apajakui.
GEN 2:14 Kampatuma nunuwai namaka daaji Tigris. Duka Asiria nugka, etsa minitaiya nuni awa aatus nagkaemakui. Untsu ipak usumta nuna daajiyai namak Eufrates.
GEN 2:15 Apajuí aentsun Edégnum: “Juwi pujusam takakum ajakmata, dutikakjum kuitamkata ashí wi najankag juka”, tusa apusauwai.
GEN 2:16 Dutika chichajak: “Ashí yujág juju ajanum ayá juka yuwata.
GEN 2:17 Untsu yujág pegkeg, pegkegchaujai dekatai ajá ejapeen waja duka yuwawaipa, nunú yuwakmek dekas jakattame”, tiuwai.
GEN 2:18 Nuna tusa Apajuí chichaak: Aishmag ima nigki pujakug pegkegchauwai, dekas niijai tsanias pujusa yainimainun najanatjai, tiuwai.
GEN 2:19 Apajuí ashí nugkanmaya kuntin aidaun najankauwai, ashí chigki wegantu aidaunashkam najanak aentsun juki itan awajus: Ame maki makichik kuntin aina juna daajig adaijata, tusa tima nii imatiksag adaijauwai.
GEN 2:20 Ashí kuntinu daaji aidaunak, chigki wegantu aina nunashkam nii adaijamua nunisag juajui. Nuna aents dutika takak pujakushkam, niijai atuesa yainimainjinak igkugchauwai.
GEN 2:21 Nuadui Apajuí aishmagkun kaján ipatuk senchi ikanag niina pagaen makichik jujukiuwai, dutika agkau tepeamtai nigki esamtikauwai.
GEN 2:22 Nunú aishmagkun pagae jujukbauwai Apajuí nuwan najanauwai, dutika aishmagkun ejetiuwai.
GEN 2:23 Nuna wainak aishmag chichaak: “Juka mina iyashjuiya pagae juki najanamui, nuadui niina daajig nuwa tutai atatui, wagki Apajuí aishmagnumian juki najadau asamtai.”
GEN 2:24 Nuadui aishmag nuwenkug makichik iyashik weawai. Nuniau asa apajinak niina dukujijai ukuak ima niina nuwejaig pujumainai.
GEN 2:25 Aishmagkuk, niina nuwejai mai wisu batsamajaku ainawai, tujash nuniakush datsaamájakchaju ainawai.
GEN 3:1 Apajuí ashí kuntin tagkumchatai aidaun najankauwa nuwiya, dapi ima senchi kajinkachu, tsanumtan yacha asa, nuwan tajua iniak: “¿Apajuísh wajinjutpagmae, juju yujág aina duka makichkish yuwawaigpajum tujamiagmaka?” tau.
GEN 3:2 Tama nuwa ayaak: “Yujagkek ashí yumainaitji.
GEN 3:3 Untsu Apajuí iina chichagtamak, tikich yujág ejapeen waja auna nejeg yuwawaigpa, antiitkesh antigkaigpa, auna neje yuwakjumek jakattajume, tusa tujamaji” tau.
GEN 3:4 Tutai dapi nuwan chichajak: “Auk wainak tujamne, jakashtatjume.
GEN 3:5 Apajuí shiig dekawai, au yujág yuwakjumek, atum wajukua ainagme nunú wainmamkajum Apajuíjai betek wajasjum, pegkeg, pegkegchaujai dekamainaitjum nuadui aunak tujabiugme”, tiuwai.
GEN 3:6 Tama nuwa yujagken diistakama shiig senchi wakejukui. Nuniak dekas yuwatjai, nunikan Apajuí wainbau yacha iman atajai tusa, akaka juki yuwauwai. Nunik aishinashkam susam, niishkam juki yuwauwai.
GEN 3:7 Nuna yuwawag wajanbauwaik, mai wisu wajamun wainmamkajui, nunikag makichik ajak higuera tutaya nuna dukeen apajag itipjuawajui.
GEN 3:8 Nunikag batsatai aagkú dase dasenbaunum Apajuí wekagun antukag, waipakai tusag tupikakiag numi ijunbaunum uumkajui.
GEN 3:9 Tujash Apajuí aishmagkun untsuka iniak: “¿Tuwi amesh pujame?” tau.
GEN 3:10 Tama nii ayaak: “Wika ame minamun antukan ishamkajame, núnikan wisu pujau asan uumjukjame”, tau.
GEN 3:11 Tutai Apajuí aishmagkun chichajak: “¿Ya ame wisu pujamunash dekamtijamame? ¿Wagka wi amina yujág yuwawaipa timajam dusha yuwamume?”
GEN 3:12 Tama aishmag Apajuín ayaak: “Ame wijai tsaniasa pujusa yainikti tusam nuwa sujusmaum nunú yujagken sujusmatai, wika yuwamjai” tau.
GEN 3:13 Tutai Apajuí nuwan iniak: “¿Amesh wagka dutikamume?” Tama nuwa ayaak: “Minak dapi tsanujamtai, yujagken yuwamjai”, tiuwai.
GEN 3:14 Timatai Apajuí dapin chichajak: “Amek juju dutikau asam, ashí kuntin aidaun nagkaesau tikima shiig pegkegchau atinaitme. Yamai nagkamsamek japiintsam wekaesam nugka yukukuntu yuu wekaetinaitme.
GEN 3:15 Amek yamai nagkamsamek nuwajaig tuke shiwag atinaitme, nuadui amina uchijum wegantu agtina dusha, nuwa uchiji wegantu agtina nujaish tuke shiwajak agtinai. Nuwiya makichik amina buukmin dekenjamkatnai, tujash amek ayatak niina sagkani esattinaitme”, tiuwai.
GEN 3:16 Nuna tusa nuwan chichajak: “Amek ejapjukmesh najaimakum senchi waittsam uchigbau atinaitme. Imanika waitiakmesh tuke amina aishjumjai pujutak waketinaitme, nuniakmeshkam amina aishjum tabau tuke umigtinaitme”, tiuwai.
GEN 3:17 Tusa aishmagnashkam chichajak: “¿Wagka nuwemin chichame antugkumesh, wi juju yujág yuwawaipa tusa timajam dusha yuwamume? Ame umishtaimin yamai nagkamsag nugkak shiig pegkegchau wajastatui. Amek nuwiya waittsam ajakmam yuwatnaitme, ima imaniakuam ame jakum ukuktinaitme.
GEN 3:18 Nugkanmak jagki, ashí numi, dupa jagkigtin aidaush yujaktatui. Imanikmatai ikamia ajak aidau yutinaitme.
GEN 3:19 Amina senchigmin takasa yuwa pujusam ataktu nugka najaneakum ukuktinaitme, wagki amek nugka najanamu asam. Nuadui ame jakmeshkam nugka juki najanamu asam, nunismek nugka najaneatnaitme”, tiuwai.
GEN 3:20 Tusa tima Adán niina nuwe daajin adaikauwai Eva: Nii ashí aentsun dukuji atin asamtai.
GEN 3:21 Tuja Apajuí dita nugkujagtinun kuntinu duwapen najatua anujauwai.
GEN 3:22 Dutika Apajuí chichaak: “Yamaik aentsuk jutii ainag nujai betekmamtin wajasaje, iman asag ditashkam pegkejan pegkegchaujai dekainawai. Nuniau asag yamai nagkamsag yujág pujutan sukagtina auna yuwawag, tuke jatsuk pujusainum tajai”, tiuwai.
GEN 3:23 Nuadui Apajuí aentsun Edégnum pujaun jiiki juki yamaik nugka najanamua juwi takasa yuwa pujustinme tusa apusauwai.
GEN 3:24 Dutika jiiki ajapeak, Apajuí niina aentsjin querubin aidaun etsa minitaiya aatuni awaantauwai. Dutikak yujág pujuta sukagtina nuna waya yuwawainum tusa puyag kegaun apujtusui. Nunú Edégkan tentea apajakui.
GEN 4:1 Adánka nuwe Eva ejapjukui, nunik pujus tsawanji jegajim aishmagkun uchigmakui, nunik adaikauwai Caín. Nunak: “Makichik uchin aishmagkun uchigmakjai, junak Apajuí minak sujuse”, taku tiuwai.
GEN 4:2 Duwi pujus Eva tikichin uchin Abelan Caígka yachin uchigmakui. Abelak uwijan kuitamajakui, untsu Caín ajakan ajakbau aajakui.
GEN 4:3 Kuashat tsawan nagkaemakiu ai, makichik tsawantai, Caín Apajuí anentag susatnun ajaka nejen juuka juki ejentauwai.
GEN 4:4 Tuja Abelchakam makichik uwig yama nagkamchak petsakbau shiig duwegman achika juki Apajuín emematak ejetiuwai. Dutikamtai Apajuí Abelnak shiig anenjauwai, nuadui Abeldaunak shiig anentus jukiuwai.
GEN 4:5 Untsu Caígnak shiig anenjachui, tuja nii anentag susamunashkam shiig anentsag jujukchauwai. Dutikam Caín senchi kajekui, nunik kajekbautak wekagu.
GEN 4:6 Nunittaman Apajuí chichajak: “¿Wagka imanika kajekmesh wekaeme?
GEN 4:7 Amesh pegkeg takakmek, shiig aneasam wekaemainaitme, amek nuniatsum duwi amina tudaujum wagagtamkittak awagtamui. Tujash amek tudauwa duka depetmainaitme”, tiuwai.
GEN 4:8 Makichik tsawantai Caín yachin chichajak: “Ajanum wemi” tusa yachin juki weuwai. Nunik atushat akanak yachi Abelan mauwai.
GEN 4:9 Dutika yachin maamtai, Apajuí Caígkan chichajak: “¿Dusha amina yatsum Abelash wajukame?” tusa tama, Caín ayaak: “Achah, wikaitag mina yatsuju kuitamnun”, tiuwai.
GEN 4:10 Tutai Apajuí chichajak: “¿Wagka yatsumesh aikaume? Ame yatsum maakum numpe nugkanum ukagbauwa nunú mina untsujui, suwimak susata tusa.
GEN 4:11 Nuadui amek shiig pegkegchaunum juwaktatme, juju nugka yatsumi numpe ukagbaun uwaja nunú nugkanmak amek pujuschattame.
GEN 4:12 Ajakak ajattame, tujash tsapaishtatui. Emetnaja pujamugmek atsugtamtinai, ayatak wainkam tikich nugkanum wekaetinaitme, imaniakmesh ame pujusa ayamainuk igkugchatnaitme”, tiuwai.
GEN 4:13 Tusa tama Caín Apajuín ayaak: “Mina suwimkajuk shiig katsunmainchawap atatua.
GEN 4:14 Yamaik juju nugkanmak ajapjame, nuadui wi amijai pujamunak idaikun, tikich nugkanum machikish ayamtsuk wainkan wekaetatjai, nuni wekagai mina yaki igkunkat nunú minak mantuatin ati”, tiuwai.
GEN 4:15 Tutai Apajuí chichajak: “Aents amina mantamuk, sieteya imania suwimkan jukiagtinai”, tiuwai. Nuna tusa Apajuí Caígka iyashin maam amainchau apujtus akupkauwai.
GEN 4:16 Dutikam nii pujusa Apajuíjai chichasbaunak ukuak Nod nugkanum wee pujusui. Nod nugkak Edégnum wajasa diismak etsa minitaiya nuni aajakui.
GEN 4:17 Caígka nuwe ejapjuk aishmagkun uchigmakui, dutika Enoc adaikauwai. Dutikamtai Caín nuwi yaaktan najana niina uchiji daajin Enoc adaikauwai.
GEN 4:18 Tuja Enoc akiauwai Irad. Irad akiauwai Mehujael, Mehujael akiauwai Metusael, Metusael akiauwai Lámec.
GEN 4:19 Lámec jimag nuwan: Adá daagtinun, Silá daagtinjai nuwatkauwai.
GEN 4:20 Adá uchigmakui Jabalan. Tuja Jabal wegantu aidauk aakchinum batsamin, tagkun kuitamin aajaku ainawai.
GEN 4:21 Jabala yachi aajakui Jubal. Nuna uchiji wegantu aidauk arpan awatin, pigkui umpuin aajaku ainawai.
GEN 4:22 Siláshkam uchigmakui Tubal-caín. Nigka jiju bronce, hierro aina nuna najanajaku aidaun apaji aajakui. Tubal-caígka umayi aajakui Naamá.
GEN 4:23 Lámec niina nuwe aidaun chichajak: “Mina duwag aidauwah, antuktajum: Makichik aents mantuatag tusa ijutkui wi maamjai.
GEN 4:24 Caígka mauk sieteya imania suwimka jukitnai tibauwai. Tuja mina mantauk setenta y sieteya imania suwimkanak jukitnai”, tiuwai.
GEN 4:25 Adánka nuwe ataktu ejapjuk uchi aishmagkun uchigmakui, dutika adaikauwai Set. Nunak: “Mina uchig Abelan Caín mauwa duwi minak juna Apajuí sujuse”, taku tiuwai.
GEN 4:26 Setchakam makichik uchin akia adaikauwai Enós. Duwi nagkamas aents aidauk Apajuín emematuinak niina daajin adaitus segajaku ainawai.
GEN 5:1 Juju ainawai Adán wegantu aidaun daaji agatkamua duka. Apajuí yama nagkamas aentsun najankug niina niimejai betekmamtinun najanauwai.
GEN 5:2 Aishmagkun nuwajai najanauwai. Dutika yama najanbauwaik shiig yumi yumigkis juna daajig aents ainawai, tuu adaikauwai.
GEN 5:3 Dutikam Adán ciento treinta mijan ejeyi pujus akiauwai Set, niijai betekmamtinun.
GEN 5:4 Nuna akia pujusui ochocientos mijan, tuja nuigtushkam tikich uchiji aishmag aidaun, nuwa aidaujai akigkui.
GEN 5:5 Ashí ijumjamak novecientos treinta mijan pujus jakauwai.
GEN 5:6 Set ciento cinco mijan ejeyi pujus uchiji aishmagkun Enósan akiauwai.
GEN 5:7 Nuna akia pujusui ochocientos siete mijan, tuja nuigtushkam uchiji aishmag aidaun, nuwa aidaujai akigkui.
GEN 5:8 Ashí ijumjamak, novecientos doce mijan pujus jakauwai.
GEN 5:9 Enós noventa mijan ejeyi pujus uchiji aishmagkun Cainágkan akiauwai.
GEN 5:10 Nuna akia pujusui ochocientos quince mijan, tuja nuigtushkam tikich uchiji aishmag aidaun, nuwa aidaujai akigkui.
GEN 5:11 Ashí ijumjamak, novecientos cinco mijan pujus jakauwai.
GEN 5:12 Cainán setenta mijan ejeyi pujus uchiji aishmagkun Mahalaleelan akiauwai.
GEN 5:13 Nuna akia pujusui ochocientos cuarenta mijan, tuja nuigtushkam tikich uchiji aishmag aidaun, nuwa aidaujai akigkui.
GEN 5:14 Ashí ijumjamak novecientos diez mijan ejeyi pujus jakauwai.
GEN 5:15 Mahalaleel sesenta y cinco mijan ejeyi pujus uchiji aishmagkun Jéredtan akiauwai.
GEN 5:16 Nuna akia pujusui ochocientos treinta mijan, tuja nuigtushkam tikich uchiji aishmag aidaun, nuwa aidaujai akigkui.
GEN 5:17 Ashí ijumjamak ochocientos noventa y cinco mijan ejeyi pujus jakauwai.
GEN 5:18 Jéredtak ciento sesenta y dos mijan ejeyi pujus uchiji aishmagkun Enokan akiauwai.
GEN 5:19 Nuna akia pujusui ochocientos mijan, tuja nuigtushkam tikich uchiji aishmag aidaun, nuwa aidaujai akigkui.
GEN 5:20 Ashí ijumjamak novecientos sesenta y dos mijan ejeyi pujus jakauwai.
GEN 5:21 Enoc sesenta y cinco mijan ejeyi pujus uchiji aishmagkun Matusalégkan akiauwai.
GEN 5:22 Nuna akia pujus Enoc trescientos mijan Apajuí wakegamun takajak pujusui. Tuja nuigtushkam tikich uchiji aishmag aidaun, nuwa aidaujai akigkui.
GEN 5:23 Ashí ijumjamak trescientos sesenta y cinco mijan pujusui.
GEN 5:24 Enokak Apajuí wakegamun takak pujau, makichik tsawantai ayatak megkaekauwai. Apajuí niinak jukiuwai.
GEN 5:25 Matusalén ciento ochenta y siete mijan ejeyi pujus uchiji aishmagkun Lámekan akiauwai.
GEN 5:26 Nuna akia pujusui setecientos ochenta y dos mijan, tuja nuigtushkam tikich uchiji aishmag aidaun, nuwa aidaujai akigkui.
GEN 5:27 Ashí ijumjamak novecientos sesenta y nueve mijan ejeyi pujus jakauwai.
GEN 5:28 Lámec ciento ochenta y dos mijan ejeyi pujus makichik uchiji aishmagkun akiauwai.
GEN 5:29 Dutika adaikauwai Noé. Nunak: “Apajuí nugkan pegkegchaunum yumigjau asamtai, shiig senchi takainaku waituinag nunak, juju uchi ayamtijamjattawai”, taku tiuwai.
GEN 5:30 Noé akiinamtai nuigtushkam Lámec pujusui quinientos noventa y cinco mijan. Tuja nuigtushkam tikich uchiji aishmag aidaun, nuwa aidaujai akigkui.
GEN 5:31 Ashí ijumjamak setecientos setenta y siete mijan ejeyi pujus, jakauwai.
GEN 5:32 Noék niina uchiji: Sem, Cam Jafet aatus aajaku aina nunak quinientos mijanan ejeyi pujus akigkui.
GEN 6:1 Aents ashí nugkanum kuashat kaweagtai, nawanji aidaushkam akiinkauwai.
GEN 6:2 Nunú nuwa shigmauch aidaun, Apajuín uchiji aidau nuna diisag etegkeg dita wakejamun nuwatkaju ainawai.
GEN 6:3 Nuniagtai Apajuí chichaak: “Aentsuk ayatak tudauk asag yamai nagkamsag tuke pujuschatin ainawai, ayatak ciento veinte mijan pujusa jagtinai”, tiuwai.
GEN 6:4 Tuja Apajuí uchiji aidau, aentsu nawanji aidaun nuwatuk uchi akiamu aidau gigante senchi maanin wajasu aajaku ainawai.
GEN 6:5 Aents aidau nugkanum batsamas senchi tunamainak, ima pegkegchaunak anentaimtus yujajuidaun Apajuí wainkauwai.
GEN 6:6 Imaniagtai Apajuí wake besemag anentaimak, najanmainchaunas najanawabiagtaih, tusa awake anentaimjauwai.
GEN 6:7 Nuna tusa Apajuí chichaak: “Ashí aents aidaun wi najanawaitag nunak, aentsnum nagkamsan, kuntinnash, tuja japiinas yujau aina nunash, chigkinash ashí betekmasan ijinatjai. Najanmainchaunas najanawabiagtai, tusan awake anentaimjai”, tiuwai.
GEN 6:8 Tujash Apajuík Noénak ima nigki puyatjusa umigbau asa, shiig anenjauwai.
GEN 6:9 Jujuwai Noé pachisa augmattsamu. Noé aajakui aents shiig pegkeg, ima Apajuí wakejamunak takajaku, tuja tikich aents batsamajakua nujai ijumjamash niig dekas pegkejam aajakui.
GEN 6:10 Noé akiauwai kampatum uchiji aishmagkun, duka: Sem, Cam, Jafet aatus aajakui.
GEN 6:11 Tujash nugkanmak Apajuí diismak ayatak tudauk, pegkegchau takat aina duke piyak aajakui.
GEN 6:12 Ashí aents aidauk ayatak pegkegchaunak taka batsatun Apajuí wainkauwai.
GEN 6:13 Nunik Apajuí Noén chichajak: “Yamaik ashí nugkanum aents batsata nunak ijinatasan anentaimtugjai. Ditá pegkegchaujin kuashat maaniamu ayawai. Duwi ditanak ashí tikich nugkanum ayá nujai ijinattajai.
GEN 6:14 Nuadui numi puwagtin aina nunú dakajam arca najanata, dutikam tesaka umikta. Tuja nuigtushkam yumi wayawai arca tuntupe, tuja initkenishkam ashí pegkaejata.
GEN 6:15 Arca najankumek jujai betek dekapam najanata: Esanti ciento treinta y cinco dekapamu atatui, untsu wegkanti veintidos dekapamu nuigtu jimaituk atatui, antsag yakintig trece dekapamu nuigtu jimaituk atatui.
GEN 6:16 Tuja kampatuma imajin ekenim najanata. Untsu arcan jeega nuna nugkaan jimaituk dekapam makichik niimtai ujaittame, aikasmek nuna yantamen makichik waiti ujaita.
GEN 6:17 Wi yumin yutumtijattajai, dutika ai nunú ashí nugkanum piyagtatui, nuniak nugkanum pujutji ajamu batsataina nunak ashí ijinattawai.
GEN 6:18 Tujash amejaig chichaman umiktatjai. Tuja amek, amina nuwem, uchijum aidau, uchigmi nuwe aidau, aatsajum arcanmak chimpimattagme.
GEN 6:19 Tuja kuntin ashí nugkanmaya aidau, aishmag nuwajai arcanum chimpiattame, ditashkam jinutsuk amejai betek uwemkatnume.
GEN 6:20 Ashí chigki wegantu aina duka, kuntin tagkumtai wegantu aina dushakam, japiinas yujau aina nujai, jima jimagchik apatdayas amejai arcanum chimpimattawai. Ame uwemtai ditashkam uwemjatnume.
GEN 6:21 Nuigtushkam ashí yutai aidau juukam ijumjata, nuna kuntinush yuwatnume, tuja atumshakam nuwiyag yuwattagme”, tiuwai.
GEN 6:22 Tusa tima Noé Apajuí tibaunak imatiksag umikui.
GEN 7:1 Apajuí Noén chichajak: “Ashí tikich aents aidaujai diismash, amek ima wi wakegamua duke umiakum pujame. Nuadui ame amina pataim uchijum aidaujai arcanum egkematajum.
GEN 7:2 Nuniakjum kuntin pegkeg aina nunú siete aishmag, siete nuwa aajam yajuakam chimpiata, untsu kuntin yuchatai aina duka makichik aishmag, makichik nuwa aajam egkeattame.
GEN 7:3 Nuigtushkam chigki wegantu aina dushakam jinaa megkaejai siete aishmag, siete nuwa aaja yajuakam chimpiata.
GEN 7:4 Siete tsawan asan yumin yutumtijattajai. Duka cuarenta tsawan, nuigtu cuarenta kashi yutugtatui. Wi najankamu aidau nugká batsata nunak ashí ijinattajai”, tiuwai.
GEN 7:5 Tusa tima Apajuí tibaunak imatiksag Noé umikui.
GEN 7:6 Yumi ashí nugka utuja piyajua nunak Noénak seiscientos mijanji ajai nunikui.
GEN 7:7 Tsawan yumi yutugtin jegamtai, nujagken uwemtugtasag Noé, niina nuwe, uchiji aidau, uchiji nuwe aidau aatus arcanum chimpimauwai.
GEN 7:8 Nunitai kuntin pegkeg aidaush, kuntin yuchatai aidaujai, tuja chigki aidaushkam, nugká japiinas yujau aidaujai,
GEN 7:9 Noé egkemamtai ditashkam nunisag Apajuí tibaunak imanisag jima jimagchik arcanum aishmag nuwajai chimpimauwai.
GEN 7:10 Arcanum chimpima siete tsawan wegai, nagkamdauwai yumi yutug dujajua nugkanum pimutan.
GEN 7:11 Noé seiscientos mijan ejeyu ai, jimag nantu taka, diesisiete tsawan wegai, yumi nagkamna nayaimpinmaya senchi yutau. Imaniai, initkanmaya yumi piyag teenak aushkam, ashí nugkanum pukuni shiig múun jiinjajui.
GEN 7:12 Nunik cuarenta tsawan, nuigtu cuarenta kashi tuke yutuu au.
GEN 7:13 Nunú tsawantinig Noé niina uchiji Sem, Cam, Jafet aatus aajakua nujai, tuja niina nuwe, nuigtu kampatum niina uchiji nuwe aidau aatus arcanum egkemawajui.
GEN 7:14 Nuigtushkam kuntin tagkumtai aidau, kuntin tagkumchatai aidau, japiinas yujau aidau, chigki wegantu aidau aatus ditajai betek chimpimauwai.
GEN 7:15 Tuja Noé arcanum egkemtai, ashí kuntin aina duka ditashkam jimag apa apatdayas chimpimauwai.
GEN 7:16 Ashí kuntin aidauk aishmag nuwajai apatdayas chimpimamtai, Apajuí Noén dutikata tusa tibaunak imatiksag umikui. Nunik ashí chimpimamtai Apajuí arca waitijin epeniuwai.
GEN 7:17 Nunikmatai, yumi nagkamna cuarenta tsawan, cuarenta kashi mijamtsuk tuke yutuu au. Imaniau asa nujag dujajua nugkanum pimak, arca kukag tepaun inanmiuwai.
GEN 7:18 Nujagkek neetsuk ayatak dujaju au. Imanik dujajak arcanak aan yakí takuiniuwai.
GEN 7:19 Imanik dujajiu asa, ashí nugkanum muja tsakaku aidaunak yutua emegkakui.
GEN 7:20 Ashí yutua emegkak, nuigtushkam sieteya imajin yakintin ewagak piyajui.
GEN 7:21 Imaniku asamtai aents nugkanum batsatuk ashí jinawajui, tuja chigki wegantu, kuntin tagkumtai wegantu, kuntin tagkumchatai aidaushkam, kuntin japiinas yujau aidaujaí ashí jinauwai.
GEN 7:22 Pujutji ajamu aidau nugkanum batsatuk ashí jinauwai.
GEN 7:23 Ima Noék, tikich niijai arcanum chimpimau aina nujaig uwemjauwai. Untsu arcanum egkemachaju aina duka ashí jinauwai. Aents, kuntin tagkumtai wegantu, chigki wegantu aidaushkam, kuntin japiinas yujau aina nujai ashí jinauwai.
GEN 7:24 Nujagkek ashí nugkanum piyag kuyutsuk ciento cincuenta tsawan asauwai.
GEN 8:1 Imanik tsawan atai, Apajuí Noén ashí kuntin niijai arcanum chimpijaidaujai wait anenjauwai. Nuadui Apajuí abau kuyuati tusa dasen nugká ajunjauwai, dutikam nunú umpuam kuyutan nagkamdauwai.
GEN 8:2 Tuja nugkanum waa múun ujanjamtai, yumi initkanmaya jiinaidaushkam ashí epennajui. Antsag nayaimpinmaya yumi senchi yutaushkam ashí mijaakui.
GEN 8:3 Nunikmatai duwi diipas kuyutan nagkamdauwai. Nunik ciento cincuenta tsawan ejegak nuni senchi kuyuau.
GEN 8:4 Nunik siete nantu taka nuigtu diecisiete tsawan wegai, muja Araratnum arca patamiuwai.
GEN 8:5 Tuja nujagkek tuke kuyu aig, diez nantu taka nuigtu makichik tsawan tsawaju ai, muja shiig múun aidaun titiji wantinjauwai.
GEN 8:6 Tuja cuarenta tsawan nagkaemai, arcanum egkemsa niimtain Noé ujainiuwai.
GEN 8:7 Dutika cuervon juki akupkauwai, tujash ekemainji atsau asamtai, kuyuati tusa dakak ayatak nanaak wainak wekagu.
GEN 8:8 Nuna dutika duwi pujus, kuyua buku weatsuash tusa dekatatus makichik pauman akupkauwai.
GEN 8:9 Tujash nugkak eke buku wantinchau asamtai, paumak nii ekemsa ayamainjin wainkachu asa wakitki arcanum tauwai. Nunikmatai Noé uwejen awentun pauman juki arcanum awayauwai.
GEN 8:10 Dutika ataktu siete tsawan dakasui, nunik awentsag pauman akupkauwai.
GEN 8:11 Dutikamu etsa akagai, olivo dukeen tsujig apas tauwai. Nunikmatai Noé anentaimas, dekas nugkak bukuap weawa tiuwai.
GEN 8:12 Tuja nuigtushkam siete tsawan dakasui, nunik awentsag pauman akupkauwai; tujash paumak ataktu wakitkig tachui.
GEN 8:13 Tuja nujag kuyua buku wajasua nunak Noék mijanjinak seiscientos ejeyi nuigtu makichik mijanan achiku ai nunikui. Mijan nagkamnamu yama nagkamchak nantu taka makichik tsawan tsawaju ai, Noé arca jeen chigkainiuwai. Dutika diikma kuyua nugka buku wajasun wainkauwai.
GEN 8:14 Tuja jimag nantua nuna achika veinti siete tsawan wegai, namakak shiig kuyua buku wajasui.
GEN 8:15 Ashí kuyua buku wajasmatai Apajuí Noén chichajak:
GEN 8:16 “Arcanum ame, amina nuwem, uchijum aidau, uchigmin nuwe aidaujai chimpigjum nunú ashí jiinjatajum.
GEN 8:17 Tuja ashí kuntin: chigki aidau, kuntin tagkumtai aidau, kuntin japiinas yujau aidau amejai chimpija dushakam ashí jiigta. Dutikawamin ashí yantamnum shiyaktinme, nunik yujaktinme, nuniak ashí nugkanum piyaktinme”, tiuwai.
GEN 8:18 Tusa tima Noé jiinak niina nuwen, niina uchiji aidaun, tuja uchijin nuwe aidaun aatus ashí jiijui.
GEN 8:19 Tuja ashí kuntin aidaushkam, tuja kuntin tagkumtai aidaush, tagkumchatai aidaujai, kuntin japiinas yujau aidaushkam, chigki aidaushkam ashí jiinjauwai.
GEN 8:20 Noé arcanmaya jiinki kuntin patasa apeaku Apajuí ememattinun kaya ekenag najanauwai. Dutika kuntin aidaun, chigki aidaujai Apajuí diisam pegkeg aidaun yajuak nuna nejen ashí apeak Apajuín emematiuwai.
GEN 8:21 Nunú Apajuín shiig awagmakui. Nuadui Apajuí chichaak: “Yamai nagkamsanuk aents aidaun tudaujinig nugkanak ataktuk pegkegchaunmak yumigjashtatjai, wagki aents aidauk yama datsameamuik pegkegchau takatnak anentaimtin ainawai. Tuja nuigtushkam ataktu awagkinuk yamai ijinag aikanuk pujutji ajamu aina nunak ijinashtinaitjai.
GEN 8:22 “Juju nugka awa junisag aigkik, ajakma yutak tuke atinai, tuja nimpain, tsetsek, yumi tepeau, esat, tsawai, kashi aina duka ashí imanisag atinai”, tiuwai.
GEN 9:1 Apajuí Noén niina uchiji aidaujai pegkegnum yumigkiak aatus tiuwai: “Yujaktajum, imaniakjum nugka pampankajum pimutkatajum.
GEN 9:2 Ashí kuntin nugkanum batsamin aidauk atumin ishamjamainak kujaitin ainawai. Chigki wegantush, kuntin aidaush, nayantsanmaya aidaushkam atumnak ashí umigtamiagtinai.
GEN 9:3 Nuadui atumek ashí kuntin aidau, nuigtu dupa duke yujutai aina dushakam atum wakegamu yutinaitjume. Nunú aidaunak wi atumin ashí amaajime.
GEN 9:4 Untsu kuntin maa yuwakjumesh numpe yuwawaigpajum, wagki numpanum pujut au asamtai.
GEN 9:5 Aentsnak aishmagnash, tuja nuwanash wijai betekmamtinun najanauwaitjai. Nuadui makichik aentskesh tikich aentsun maunak niinashkam dutiksag maawagtinai, tuja kuntinkesh atumin mantamuk dushakam dutiksaik maam agtinai.
GEN 9:6 “Tuja makichkikesh tikich aentsun maunak, niinashkam dutiksag maatin ainawai, wagki aentsuk wijai betekmamtin najanamu asamtai.
GEN 9:7 Tujash atumek uchi akigjum yujaktajum, nuniakjum ditajai ashí nugkanum piyaktajum”, tiuwai.
GEN 9:8 Tuja nuigtushkam Apajuí Noén niina uchiji aidaujai chichajak:
GEN 9:9 “Wi yamai atumjai chichaman umiktatag duka, atakea duish atumi uchijum wegantu agtina nujaishkam tuke asatnun umiktatjai.
GEN 9:10 Nunak ashí kuntin atumjai arcanum chimpiju jiinjau aidau: Chigki wegantu, kuntin tagkumtai aidau, kuntin tagkumchatai aidau, ashí kuntin nugkanmaya aidaujaish umiajai.
GEN 9:11 Atumjai wi chichaman umikag duka makichkish yapajinashtinai, nuadui atak awagkinuk aentsnak, tuja kuntin aina nunashkam yumin yutumtijanuk ijinashtinaitjai. Atakea duish yumi yutujag nugkanmayanak ijinashtinai”, tiuwai.
GEN 9:12 Tusa Apajuí chichaak: “Jujuwai chicham tuke atinun, wi atumjai, tuja kuntin aidaujaishkam umikbau iwainamua nunú.
GEN 9:13 Yujagminum apusajai arco iris, juju diisjum adeagtinaitjume wi chichaman nugkanmaya aidaujai umikag duka.
GEN 9:14 Wi nugkan yujagkim ematai, nuwi arco iris wantintinai.
GEN 9:15 Nuna wainkun wi atumjai, tuja kuntin aidaujaishkam chichaman umikag nuna tuke aneetnaitjai. Nuadui ataktu awenag yumi yutug piyajag ijipachagtinai.
GEN 9:16 Nunú arco iris yujagminum wantinkui, wi waintinaitjai, nuniakun ashí aents aidaujai, tuja kuntin ashí nugkanum batsataina nujaishkam chicham tuke atinun umikag nuna tuke aneasnuke atinaitjai.
GEN 9:17 Chicham tuke atinun ashí aents aidaujai, tuja kuntin aidau nugkanum batsataina nujaishkam umikag, nunú iwainamuk arco irisa jujuwai”, tusa aatus Apajuí Noéjai chichasui.
GEN 9:18 Noé uchiji arcanmaya jiinjau aina duka: Sem, Cam, Jafet aatus aajakui. Cam aajakui Canaágka apaji.
GEN 9:19 Juju kampatuma nunú aajaku ainawai Noé uchiji aidau. Juna uchiji wegantu aidau atak nagkamawag dita ashí nugkan pampantuk batsamsau ainawai.
GEN 9:20 Noé ataktu ajakmatan nagkama uva numijin ajakui.
GEN 9:21 Tuja makichik tsawantai, Noé uva yumiji najanamun vinon uwag nampekui. Nunik niina aakji ejapeen wisu iyan kanag tepesui.
GEN 9:22 Nunik wisu tepettaman, Cam Canaágka apaji aajakua nunú wainak ukuak, weuwai yachi jimag agá batsatun ujaktatus. Tusa ujakam,
GEN 9:23 Sem Jafetjai, nugkutaijin yakayin awagkek, apaji wisu tepaun wainkaig tusa, ukunmataik jegantag apajin dukukajui.
GEN 9:24 Dutika ukukim tepa tepakua nampekbaujin sakapag shintaag, niina uchiji ekeu Cam dutika ukukbaun dekauwai.
GEN 9:25 Nuna dekaa pegkegchaunum yumigkiak: “Canaágkak yachi jimaja nuna inake atinai”, tiuwai.
GEN 9:26 Tusa nuigtu chichaak: “Semnak mina Apajuíjua nunú shiig anentinai. Dutikamu asa nii inatnai Canaágnak.
GEN 9:27 Apajuí Jafetan shiig kuashat nugkentin emati, dutikam nigka tajimtamea Sem aakmagbaunum pujú atatui. Untsu Canaán niina inake atinai”, tiuwai.
GEN 9:28 Tuja yumi yutug aentsun ijinauwa duwi nagkamas Noé trescientos cincuenta mijan pujusui.
GEN 9:29 Aatus ashí ijumjamak novecientos cincuenta mijan pujus jakauwai.
GEN 10:1 Noé uchiji, Sem, Cam, Jafet aina nunú, yumi yutug nugkanum piyag aentsun ijinauwa duwi pujus uchin akigkaju aina nuna daaji aidauk juju ainawai:
GEN 10:2 Jafeta uchiji aidauk: Gómer, Magog, Madai, Javán, Tubal, Mésec, Tirás, aatus aajakui.
GEN 10:3 Gómeran uchiji aidaushkam: Asquenaz, Rifat, Togarmá, aatus aajakui.
GEN 10:4 Javánka uchiji aidaushkam: Elisa, Tarsis, Quitim, Rodanim, aatus aajakui.
GEN 10:5 Juu aajaku ainawai Jafeta uchiji wegantu aidau, juka maki makichik tikich chichaman chichaku aajakajui. Nunidau asag dita patayi aidaujaig etegdayag, nayantsa pakajin nugka muunnum, tuja ajuntainmashkam batsamsaju ainawai.
GEN 10:6 Cam aajakua nuna uchiji juju aajaku ainawai: Cus, Mizraim, Fut, Canaán aatus.
GEN 10:7 Cus aajakua nuna uchiji aidaushkam: Sebá, Havilá, Sabta, Raamá, Sabteca aatus aajaku ainawai. Untsu Raamá uchiji aajakui Sebá, Dedán aatus.
GEN 10:8 Cusak nuigtushkam uchijin Nimrotan akiauwai. Duka apu ashí nugkanum nigki wagaku aajakui.
GEN 10:9 Nimrotak Apajuí yayamu asa senchi kuntinu main aajakui. Nuwiya chicham jiinkiun chichainak: “Nimrod Apajuí yayasam, kuntinu main wajasu aajakua imanai”, tinu ainawai.
GEN 10:10 Nii apu pujusmataig yaaktak juju aajaku ainawai: Babel, Erec, Acad, Calné aatus. Juju yaakat aina juka Sinar nugkanum aajaku ainawai.
GEN 10:11 Nunú nugkanum pujau juwaki, Asiria nugkanum weuwai. Nunik jegaa nuwi yaaktan najankauwai. Nuna daaji aidauk: Nínive, Rehobot-ir, Quélah aatus aajakui.
GEN 10:12 Nuigtushkam najanauwai yaakat dekas múun, Resen tutaya nuna. Duka yaakat Nínive Quélahjai niniaku aajakua nuna ejapeen aajakui.
GEN 10:13 Untsu Misraím aents wegantunmaya jiinjauwai: ludeo aidau, anameo aidau, lehabita aidau, naftuhíta aidau,
GEN 10:14 patruseo aidau, casluhíta aidau, caftorita aidau. Untsu juwiya jiinjauwai filisteo aidau.
GEN 10:15 Untsu Canaán niina uchiji aishmagkun iwain Sidógkan akiauwai, duwi pujus Het aajakua nuna akiauwai.
GEN 10:16 Tuja Canaán wegantunmaya jiinjauwai: Jebús aents aidau, amorreo aidau, gergeseo aidau,
GEN 10:17 heveo aidau, araceo aidau, sineo aidau,
GEN 10:18 arvadeo aidau, semareo aidau, nuigtu amateo aidaushkam. Juju Canaán nugkanum aents aidau dita patayi aidaujai pampagkajui.
GEN 10:19 Cananeo aents aidaun nugkeg yaakat Sidón nagkamna nugka Guerar tutaya nuni juwaki, yaakat Gazanum nagkatkau aajakui. Tuja nuwi nagkamna yaakat Sodoma, Gomorra, Admá, Seboím aatus aajakua, nuni juwaki yaakat Lesa tutaya imanui nagkatkau aajakui.
GEN 10:20 Cam aajakua nuna uchiji wegantu aidauk juju ainawai. Ditak maki makichik nugkentin, nuigtushkam maki makichik chichamtin aajaku ainawai. Nuadui ditá patayi aidaujaig etegdayag batsamajaku ainawai.
GEN 10:21 Jafetan yachi iwai Sem aajakua dushakam uchijinak akigkui. Tuja Heber aajakua nuna uchiji aidauk Sem wegantu aajaku ainawai.
GEN 10:22 Seman uchiji aidauk: Elam, Asur, Arfaxad, Lud, Aram aatus aajakui.
GEN 10:23 Araman uchiji aidauk: Us, Hul, Guéter, Mas aatus aajaku ainawai.
GEN 10:24 Arfaxad aajakui Sélah apaji, untsu Sélah aajakui Heberan apaji.
GEN 10:25 Heberak jimag uchijin akiauwai. Nuwiya makichik Péleg daagtin aajakui. Nunak nii pujusmatai, ashí aents aidau pampagkag maki makichik nugkentin wajasajua duwi tuu adaikau ainawai. Tuja niina yachig Joctán aajakui.
GEN 10:26 Joctánkan uchiji aidauk: Almodad, Sélef, Hazar-Mavet, Jérah,
GEN 10:27 Hadoram, Uzal, Diclá,
GEN 10:28 Obal, Abimael, Sebá,
GEN 10:29 Ofir, Havilá, Jobab aatus aajaku ainawai.
GEN 10:30 Dita batsamsamu aidauk nugka Mesá tawa nuwi nagkamnas Sefar nugka aajakua imanui nagkatkau aajakui. Duka etsa minitaiya nuni nugka múun aajakua nuwiya ainawai
GEN 10:31 Seman uchiji wegantu aidauk maki makichik nugkentin, maki makichik chichamtin aajaku ainawai. Nunidau asag ditá ditak patayi aidaujaig etegdayag batsamsaju ainawai.
GEN 10:32 Juju adaijag nunú ainawai Apajuí yumin yutumtikag aentsun ijinawa duwi batsamas Noé uchiji wegantu akigbau aina duka. Nuniayatak ditash kanakag tikich nugkanum pampagkag batsamsaju ainawai.
GEN 11:1 Nunú tsawantin ashí aents batsamajaku aina duka makichik chichamnak chichajaku ainawai.
GEN 11:2 Etsa minitaijiya nuni batsatu jiinag shima shimakua Sinar nugka pakajin wainkag nuwi batsamsajui.
GEN 11:3 Makichik tsawantai ditá ditak chichainak: “Ladrillo najanka jinum jiya inagkagmi”, tusag kayajai takamainnak idayinak ladrillon ekenag takainak, cemento pachimja takamain atsau asamtai, pegkae jukiag nujai achimtikag ekenag takaidau.
GEN 11:4 Dutikainak: “¡Kaunatajum yaakat najanawagmi, dutikaku kumpin jiika, nuwi eke ekenkawa nayaimpinum iwakmi! ¡Ibau umiku asaja, eme anentsa diitai atin amí! Tuja pampagka tikich nugkanmak shimutsuk juwig tuke batsamsatin agmi”, tuidau.
GEN 11:5 Tujash Apajuí Tuke Pujuu nugkanum taa diikma aents aidau yaaktamawag, kumpin muuntan apujawag batsamtiagtatman wainkauwai.
GEN 11:6 Nunik anentaimas: “Ditak makichik wegantu ainawai, antsag chichamnash makichik chichaman chichaaku ainawai, nuadui juna nagkama ijuntujag takainawai, tuja juna idaimitkamainuk shiig atsawai, tusa,
GEN 11:7 dekas akaetukmi, dutika ditá chichame pachimjukmi, dutika ajin pempeentunikiag antugdaimainchau wajastinme”, tiuwai.
GEN 11:8 Aatus tusa, Tuke Pujuu chichaman pachimjuk, ashí nugkanum dapampaak ishiakui. Dutikamu asag yaakat najantanak idaisaju ainawai.
GEN 11:9 Nuadui nunú yaaktanak Babel adaikau ainawai. Wagki nunú nugkanum Tuke Pujuu aents aidaun chichaman pachimjuk dapampaak ashí nugkanum ishiaku asamtai.
GEN 11:10 Juju aajaku ainawai Sema uchiji wegantu aidau. Apajuí yumin yutumtikag aents aidaun ijinauwa nunú jimag mijan nagkaemai, Sem niina mijanjin cien ejeyi pujus akiauwai niina uchijin Arfaxad.
GEN 11:11 Nuna akia nuigtushkam quinientos mijan pujusui. Tuja nuigtushkam uchiji aishmag aidaun, nuwa aidaujai akigkui.
GEN 11:12 Arfaxad treinta y cinco mijanjin ejeyi pujus akiauwai Sélah.
GEN 11:13 Nuna akia nuigtushkam cuatrocientos tres mijan pujusui. Tuja nuigtushkam tikich uchiji aishmag aidaun, nuwa aidaujai akigkui.
GEN 11:14 Sélah treinta mijanjin ejeyi pujus akiauwai Heber.
GEN 11:15 Nuna akia nuigtushkam cuatrocientos tres mijan pujusui. Tuja nuigtushkam tikich uchiji aishmag aidaun, nuwa aidaujai akigkui.
GEN 11:16 Heber treinta y cuatro mijanjin ejeyi pujus akiauwai Péleg.
GEN 11:17 Nuna akia nuigtushkam pujusui cuatrocientos treinta mijan. Tuja nuigtushkam tikich uchiji aishmag aidaun, nuwa aidaujai akigkui.
GEN 11:18 Péleg treinta mijanjin ejeyi pujus akiauwai uchiji aishmagkun Reú.
GEN 11:19 Nuna akia nuigtushkam pujusui doscientos nueve mijan. Tuja nuigtushkam tikich uchiji aishmag aidaun, nuwa aidaujai akigkui.
GEN 11:20 Reú treinta y dos mijanjin ejeyi pujus akiauwai uchiji aishmagkun Serug.
GEN 11:21 Nuna akia nuigtushkam pujusui doscientos siete mijan. Tuja nuigtushkam tikich uchiji aishmag aidaun, nuwa aidaujai akigkui.
GEN 11:22 Serug treinta mijanjin ejeyi pujus akiauwai uchiji aishmagkun Nacor.
GEN 11:23 Nuna akia nuigtushkam pujusui doscientos mijan. Tuja nuigtushkam tikich uchiji aishmag aidaun, nuwa aidaujai akigkui.
GEN 11:24 Nacor veintinueve mijanjin ejeyi pujus akiauwai uchiji aishmagkun Térah.
GEN 11:25 Nuna akia nuigtushkam pujusui ciento diecinueve mijan. Tuja nuigtushkam tikich uchiji aishmag aidaun, nuwa aidaujai akigkui.
GEN 11:26 Térah uchiji aidauk: Abram, Nacor, Harán aatus aajakui. Junak sesenta mijanjin ejeyi pujus akigkui.
GEN 11:27 Juju aajaku ainawai Térah uchiji wegantu aidauk: Térah akiauwai Abram, Nacor, Harán aatus. Untsu Harán akiauwai Lotan.
GEN 11:28 Harágkak Caldea nugkanum yaakat Ur tutai nii akiinamua nuwi pujus, apaji Térah eke iwaku pujaig niyá jakauwai.
GEN 11:29 Untsu Abram Sarain nuwatkauwai. Tuja Nacor nuwenauwai Milcájai. Milcák Harágkan nawanji iwai, Iscá tawa nuna kai aajakui.
GEN 11:30 Untsu Saraik kaga asa uchigtuchu aajakui.
GEN 11:31 Térah caldeo aents aidau nugken yaakat Ur tutainum pujau ukuki Canaán nugkanum weuwai. Nuwi weak uchiji Abragkan, niina tijaji Lotjai ayauwai. Tuja nuigtushkam niina uchiji nuwen Sarain ayauwai. Tujash eke Canaán nugkanmak jegatsuk, yaakat Harán jegawag nuwi batsamsajui.
GEN 11:32 Nuwig batsamas Térah doscientos cinco mijanjin ejeyi pujus jakauwai.
GEN 12:1 Makichik tsawantai Apajuí Abragkan chichajak: “¡Amina nugkem, pataim aidau, apa jeshkam ukukta, nunikam wi ame pujustinun nugkan inaktustatjam nuwi wetá!
GEN 12:2 Ame uchijum wegantu aidaunak wi shiig kuashat uyujkatnaitjai, dutika ai shiig kuashat agtinai. Wi aminak pegkegnum yumigsattagme, tuja nuigtush eme anentsa chichagtai atatme, nuadui aminiyan tikich aidaush pegkeg yumigkin jukiagtinai.
GEN 12:3 ¡Amina pegkegnum yumigtamaidaunak wishakam dutiksanuk pegkegnum yumigsagtinaitjai! ¡Untsu amina pegkegchaunum yumigtamunak wishakam dutiksanuk pegkegchaunum yumigjatnaitjai! Nuadui ashí nugka muunnumia aidaunash amina daagmin pegkegnum yumigsagtinaitjai”, tiuwai.
GEN 12:4 Tusa tima nuna umiak Abragkak Harán pujau nuwi juwaki weuwai. Abram Canaán nugkanum weuwa nunak setenta y cinco mijanji ajujakui
GEN 12:5 Nunik weak niina nuwe Sarain, nuigtu niina yachi uchijin Lotan ayauwai. Nunik shimuinak ashí ditá wajiji aidaunak tagkuji aidaujai yajuakajui. Tuja aents inataiji aidau Harágnumia sumakbau aidaunashkam yajuakui. Nunik wea weakua Canaán nugkanum jegauwai.
GEN 12:6 Nunik jegaa, nuwi juwaki tikich nugkan amaka nagkagag wea weakua yaakat Siquemnum jegaa Moré tutainum numi encina ayaunum amamak, canaágnumia aents aidau batsatbaunmak niishkam nuwi pujusui.
GEN 12:7 Nuwi pujaun Tuke Pujuu Abragkan wantintuk chichajak: “Amina uchijum wegantu aidaun juju nugkanak susagtinaitjai”, tiuwai. Tusa tima Abram Tuke Pujuu emematku kuntin maa patasa apeatnun kaya ekenag najanauwai, wagki nuwi Tuke Pujuu wantintukbau asa.
GEN 12:8 Nuwi juwaki muja tepaju yaakat Betel tutaya nuna yantamen etsa minitaijiya nuni shiyakajui. Nuwi jegaa niina aakjin aakmakui. Abram pujusua nuwi pujusa diyamak Betelak etsa akaetaijiya nuni aajakui, untsu yaakat Hai tawa nunú etsa jiintaijiya nuni aajakui. Tuja nuishkam kuntin maa patasa apeaku Apajuí ememattinun kaya ekenag ataktu najanauwai. Dutika Tuke Pujuu daajin adaitus untsuka segauwai.
GEN 12:9 Nunik nuwi pujau Néguev nugkanum wegak aakjin tegaja yajuak, diipas jintá kanag waja wajakua weuwai.
GEN 12:10 Nunú tsawantin ashí nugkanum senchi yapajut tepeauwai. Nuadui Abram niina patayi aidaujai Egipto nugkanum pujustatus weuwai, wagki nii pujamunmag makichik yumainkesh shiig atsau asamtai.
GEN 12:11 Egipto nugkanum jegattak wesa, Abram niina nuwe Sarain chichajak: “Antukta nijah, amek nuwauch shigmauchitam nunak wika shiig dekajai,
GEN 12:12 nuadui egiptunmaya aents waipakag chichainak: ‘Juka nuwak juna nuwegai’ tusag, mina mantuinak aminak jujamain ainawai.
GEN 12:13 Nuadui amina inimpainakuish, wait aneasam mina ubajui tujutta, amina shigmatjumin mina mantuawainum, wisha utugchat atsaunum jegatjai”, tiuwai.
GEN 12:14 Tusa Egipto nugkanum jegawagmatai, nuwiya aents aidau Sarai shigmauch wajaknun wainkajui.
GEN 12:15 Antsag faraógkan atuwe aidaushkam wainkajui, nunik nuwa shigmauch tae tusa faraógkan ujakagtatus wejiajui. Dutika ujakag nuadui Sarain jukiajui faraógka jeen.
GEN 12:16 Sarai shigmauch asamtai, faraón wakejuk juwak Abragkan shiig awagmakui. Dutikak susauwai uwig aidaun, baka aidaun, burro aidaun, camello aidaunashkam, tuja nuigtushkam inak aishmag aidaun nuwa aidaujai susauwai.
GEN 12:17 Tujash Sarai jukimunum Apajuí faraógkan ashí niina patayi aidaujai suwimkan suwak, jata ishamainun ajunjauwai.
GEN 12:18 Dutikam waitiak, faraón Abragkan untsuka itan chichajak: “¿Wagka minash jusha jutijuaume? ¿Wagka juju nuwa jusha mina duwajui tusamesh tujutchamume?
GEN 12:19 Ame chichaakum mina ubajui tichamkum, tau asamin wi jukin nuwatmain awajkashjak. Jujuwai nuwemek, ¡Juju jukim wamak wetá!” tiuwai.
GEN 12:20 Nuna aatus tusa faraón niina aentsji aidaun ishitkauwai, Abram nuwejai Egipto nugkanum puja duka, ashí niina wajiji aidaujai jiiki awematajum, weti tusa.
GEN 13:1 Abram niina nuwejai Egipto nugkanum pujau Néguev nugkanum wakitkiuwai. Nuwi weak ashí niina wajijinak yajuak weuwai. Nunik weak niina yachi uchijin Lotan ayauwai.
GEN 13:2 Abragkak shiig wiakuch aajakui. Niinak ajujakui oro, jiju plata tutai najanamu aidau, tuja nuigtushkam niina tagkuji aidauk ¡shiig kuashat! ajujakui.
GEN 13:3 Néguev pujau wakitki diipas jintá kanag waja wajakua jegauwai yaakat Betelnum. Tuja nuwi juwaki yaunchuk nii pujujakbau yaakat Betelan nagkaiki, yaakat Hai tawa nuwi jegatsuk ejapeen aajakua nuwi weuwai.
GEN 13:4 Nunú nugkanum yaunchuk Abram Apajuín emematak kuntin maa patasa apeatnun altaran najanauwai. Nuwi Apajuí daajin adaitus segauwai.
GEN 13:5 Tuja Lotchakam antsag shiig wiakuch aajakui. Niina apaji yachi Abragjai betek ¡shiig kuashat! uwigji, bakajishkam imanisag, tuja niina inake aidaushkam ¡shiig kuashat! ajujakui.
GEN 13:6 Nuadui nugka dita batsatbaunmag kuntin piyakui, nuniak yutaiji ayugmain atsau asamtai, nuwig ijunja pujumainchau aajakui.
GEN 13:7 Nuigtushkam aents Abragkan tagkujin kuitamin aidau, Lotan tagkujin kuitamin aidaujai maanijaku ainawai. Tuja canaágnumia aents aidaush, ferezeo aents aidaujai nuwig ditashkam batsamajaku ainawai.
GEN 13:8 Nuadui makichik tsawantai, Abram Lotan chichajak: “¡Amek mina yatsujun uchijiyaitme, nuadui iik pempeentunikik kajegdaimaitsuji! Tuja amina tagkugmin kuitamin aidaush, mina tagkujun kuitamin aina nujaig kajegdaya yujamaitsui.
GEN 13:9 Juju nugka múun weaja nunú diisam ame wakegamu etegkam, wait aneasam kanakta. Ame tsumunum weakminig, wi nujinum wetajai. Untsu ame nujinum weakminig, wi tsumunum wetajai”, tiuwai.
GEN 13:10 Tusa tama Lot namak Jordágkan pakaji weajun diikma pegkeg yumi kuashat ayau, nugka piipich Sóar tutai aajakua imanui jegaku, nugka Edén pegkeg aajakua iman, nuigtush Egipto nugka pegkeg aajakua nujai betekmamtinun wainkauwai. (Juka iman aajakui Apajuí yaakat Sodoman Gomorrajai eke tsayatsaig)
GEN 13:11 Imanun Lot wainak ashí namak Jordágkan pakajinak nii etegkauwai. Dutikau asa dita batsatbaun ukuak etsa minitaijiya nuni weuwai. Aatus Abram Lotjai kanakajui.
GEN 13:12 Abragkak Canaán nugkanum juwakui. Untsu Lot Jordágka pakajin yaakat Sodomanum jegattak pujusui.
GEN 13:13 Nunú yaakat sodomanmaya aentsuk shiig pegkegchau, Tuke Pujuu dakitamun ayatak katsek aina nuna takajaku ainawai.
GEN 13:14 Lot weu ai, Apajuí Abragkan chichajak: “Ame anú wajam nuwi nagkamam nujiya aatu, tsumunma aatu, etsa minitaijiya aatu, tuja etsa akaetaiya aatushkam shiig diista.
GEN 13:15 Juju ashí nugka ame wainam junak wi amina amastatjai, juka aminu, tuja amina uchijum wegantu agtina nudau tuke atinai.
GEN 13:16 Amina uchijum wegantu aidaunak nugka yukukuntujai betek awajsattajai. Nugka yukukuntu dekapamainchawa iman amina uchijum wegantushkam dekapamainchau agtinai.
GEN 13:17 ¡Wajakim weme juju nugka juna esanti wegkantijai ashí diista, junak ashí amina amastatjame!” tiuwai.
GEN 13:18 Tusa tima Abram aakjin tegaja yajuak makichik aents Mamre daagtindau ikam encinar tutai, yaakat Hebrógnum jegattak awa nuwi pujusui. Nuwi pujus kuntin maa apeaku Tuke Pujuu ememattinun altaran najanauwai.
GEN 14:1 Nunú tsawantin Amrafel aajakui Sinar nugka apuji, untsu Arioc aajakui Elasar nugka apuji, tuja Quedorlaómer aajakui Elam nugka apuji, nuigtushkam Tidal aajakui Goím nugka apuji.
GEN 14:2 Nunú apu aidau: Bera Sodoman apuji, Birsa Gomorran apuji, Sinab Admán apuji, Seméber Seboíman apuji, Bela Sóar tuuta awagtaya nuna apuji aatus aajaku aina nujai maaniamun aepjuniawajui.
GEN 14:3 Makichik uwejan amua apu aina juju ashí dita suntaji aidaun nugka Sidiman pakajin nayants yapaku tutaiya nuwi ijumjajui.
GEN 14:4 Tuja doce mijanai, apu Quedorlaómer ditan depetuk pujuju. Tujash trece mijan wegai, makichik uweja amua apu aidau ataktu apu Quedorlaómerjai maanitan nagkamawajui.
GEN 14:5 Tikich mijanan achiak, apu Quedorlaómer niina suntajijai, nuigtu tikich kampatum apu niijai atunidau, nugka Astarot Carnaim tawa nuwi maaniawagtatus shiyakajui. Nuwi refaita aents aidaun depetuk amukajui. Tuja nuigtushkam zuzita aents yaakat Ham tutaya nuwiyan depetkau ainawai. Tuja nuigtushkam emita aents aidaun nugka paka Save-quiriataim tawa nuwi batsatun depetkau ainawai.
GEN 14:6 Untsu horeo aents aidaun muja Seírnum batsatun depetkau ainawai. Dutikawag pisagmatai pataetukag yaakat El-Parán tutai uwegshun ijus awa imanui wakajui.
GEN 14:7 Nuwiya apu Quedorlaómer nii ijunja yujamujijai waketak, yaakat En-mispat tutai Cades tuuta awagmatia nuwi jegawajui. Nunik nuwi juwakiag wenak Amalec aents aidau batsamtainian, amorreo aents aidau batsamtainian, tuja Hasesón-tamar tawa nuna batsamtaijinianashkam ashí dita wainbaunak tsaikajui.
GEN 14:8 Dutikiagtai Sodoma, Gomorra, Admá, Seboím, Bera Sóar tutaya nuwiya apu aidau ijunag chichaman umikag, Sidiman pakajin shiyakajui.
GEN 14:9 Nuwi makichik uwejan amua apu aina nunú apu Quedorlaómerjai Elam nugka apuji, Tidal Goím nugka apuji, Amrafel Sinar nugka apuji, Arioc Elasar nugka apuji aina nujai maaniau ainawai.
GEN 14:10 Dutika maaniamunum Sidima pakajin waa ayaunum nuwi pegkae pimasua weakunum Sodoman apuji Gomorran apujijai pisakma chimpimawajui. Nuniai tikich apu aidauk mujá pisajajui.
GEN 14:11 Nunikagmatai, ipak usumat apu depetmakaju aidau ditá suntaji aidaujai, Sodomanmayan, Gomorranmayajai yutaiji aidaun, wajiji aidaujai ashí yajutkag ukukiajui.
GEN 14:12 Nuninak Abragka yachi uchiji Lotnashkam Sodomanum pujuttaman achikag ashí wajijinak tagkujijai jukiag shiyakajui.
GEN 14:13 Lotan dutika jukiagmatai, makichik aents maaniamunum uwemjau Abragkan hebreo aentsua nuna jegajua ujakui. Abragkak Mamre nugke ikam encinas tutai, amorreo aentsu nugke aajakua nuwi pujujakui. Mamren yachi aidauk Escol, Aner aatus aajakui. Juju aidau Abraman atuidau.
GEN 14:14 Abram niina yachi uchijin achika jukiagbaun dekaa, ashí niina inake niijai yujas akiidau kajittsa anentai aidaun ipaa, trescientos dieciocho aentsun ijumjauwai. Dutika ditajai atuegak apu aidaun pataetuk yaakat Dan tawa nuwi jegawajui.
GEN 14:15 Nunikag kashi pachiachbau Abram niina aentsjijai jetekag ipisig yaakat Hobá tutai yaakat Damasco nujiin awa nuwi ejegawajui.
GEN 14:16 Dutikainak ashí waji yajuakbaujinak awagtujajui. Aatus Abram Lotan ayamjuk agkanmitkauwai, dutika ashí niina wajiji aidaunak imatiksag awagtujui. Dutikak nuwa aidaunashkam ayamjukui. Tuja aikasag niina aentsji tikich aidaunashkam ayamjukui.
GEN 14:17 Abram apu Quedorlaómeran tikich apu aidaujai ashí depetuk waketak, nugka paka Save tutai apu nugke tuuta awagmatia nuwi minittaman igkug kumpamatatus Sodomanmaya apu, jiintukiuwai.
GEN 14:18 Dutika igkug juki inimtatman Melquisedec yaakat Saleman apuji, sacerdote niig Apajuí nayaimpinum pujuuwa nunú etegkamu pujau pagkan vinojai juki,
GEN 14:19 Abragkan igkug pegkegnum yumigkiak aatus tiuwai: “Abragkah, Apajuí nayaimpinum pujuuwa nunú pegkegnum yumigtamsatin ati.
GEN 14:20 Apajuí nayaimpinum pujuuwa nunú amina shiwajumin depetmitkagmaka nunú tuke ememattai ati”, tiuwai. Tusa tima Abram maania depetmak maki makichik waji yajuakbaunmayan diezmon susauwai.
GEN 14:21 Dutikamtai Sodomanmaya apu Abragkan chichajak: “Aents aina anka mina sujusta, untsu waji aina duka ame jukita”, tiuwai.
GEN 14:22 Tusa tama Abram niina ayaak: “Wika Tuke Pujuu yakí nayaimpinum pujuuwa nunú nayaimpin nugkajai najanauwa nuna wi dutikatnujun juni dutikattajai tusan ujakjai.
GEN 14:23 Tiu asan aminunak makichik hilonakesh, sapat jigkataichinakesh ashí amina wajijum wegantunak jukishtatjai. Atakea duikish ame mina chichagtakmek: ‘Wi Abragnak wiakchamtikawabiajai’, tusamek tujutchatnaitme.
GEN 14:24 Wika wajiinak shiig dakitajai, untsu mina inakeg aidau yutain yuwawaja duka maake, untsu mina uyuntuidau Aner, Escol, Mamre aatus yuja nunú ditanu amainun jukiagtatui”, tiuwai.
GEN 15:1 Nunú ashí nagkaemaju ai, Apajuí Abragkan wakanmantun wajantun chichajak: “¡Abragkah, ishamjukaipa, witjai amina kuitamnunuk! Amek shiig kuashat wajigtin atatme”, tiuwai.
GEN 15:2 Tusa tama Abram ayaak: “Apu Tuke Pujuuwah, ¿wisha nunash itugkatnunak ibaunash waketaja? Amek, mina uchig atsugta duka shiig dekame. Amek minak makichik uchikesh sujuschaume, nuadui ashí mina wajiig aidaunak, nugkajai nagkamas, wi tsakapagbau Eliezer Damasconmayaya nudau atinai” tiuwai.
GEN 15:4 Tutai Tuke Pujuu ayaak: “Antukta nijah, juju ashí amina wajijum aina duka amina uchigminu atinai, tikich aents amina uchigmichuk jukishtinai”, tiuwai.
GEN 15:5 Nuna tusa Abragkan agá jiiki chichajak: “Yamai nayaim shiig diista, dutikam yaya ayá nunú ame dekapamainaitkumek dekapagta. Juju dekapamainkait, iman atinai amina uchijum wegantu aidauk”, tiuwai.
GEN 15:6 Tusa tama Abragkak Tuke Pujuuwai kajinas anentaimu asa dekaskeap tujutua tiuwai. Nuadui Apajuí Abragnak aents ima pegkegnak takauwa iman diisui.
GEN 15:7 Tuja nuigtushkam chichajak: “Witjai Tuke Pujuunuk, wi aminak yaakat Urnum caldeo aents aidaujai pujaumin, juju nugkan ame wegantu agtina nudau tuke atinun amastasan jiikbaijame”, tiuwai.
GEN 15:8 Tusa tama: “Tujash, Apu Tuke Pujuuwah ¿wisha wajuk shiijash dekamainaitja, wi wegantu aidauwap juju nugkanum batsamsatin ainawa tusanush?” tusa aatus Abram aikui.
GEN 15:9 Tusa tama nii ayaak: “Makichik baka tsakat, makichik cabra, makichik uwig aishmag, kampatum mijanji ajamu aidau, nuigtushkam makichik yampits, makichik paum tsakat aajam itagtuata”, tiuwai.
GEN 15:10 Tusa tima Abram ashí nuna yajuak Apajuín ejetuauwai, dutika jimai jimaituk dakaja igkumtikjattak batsakui, untsu chigkinak dakagchauwai.
GEN 15:11 Dutika pujai chuwag, kuntin dakaja batsasbaun kakeetiagtai, nuna yuwawai tusa Abram jiyaka ishimu.
GEN 15:12 Dutiká pujujai, etsa akaegak suwe wegau, nunitai Abram senchi kanag tepesui. Nuniaig shiig senchi suwe wajasmatai, senchi ishamkauwai.
GEN 15:13 Imanik suwe wajasbaunum Tuke Pujuu Abragkan chichajak: “Juju yamai shiig antukta, ame uchijum wegantu agtina duka nugken ukukiag, tikich nugkanum batsamas wainka inaku waitkam cuatrocientos mijan waitu batsamtin ainawai.
GEN 15:14 Tujash tuu nugkanmayag nunash inakush waitkastin ainawa, nunak wi ditanashkam suwimkan susatnaitjai, duwi ame uchijum wegantu aidauk waitu batsatu agkanmagawag, shiig wiakuch wajasag jiinjagtinai.
GEN 15:15 Tuja untsu amek shiig muumpakim agkan pegkegnum jakattame. Nunikamin amina uchijum aidau ukugmasagtinai.
GEN 15:16 Tuja amina uchijum wegantu akiinak, nuna tijaji aidaush, nuigtush nuna tijaji aidaush akiinkatna nunú, juju nugka juwi waketug kaunatin ainawai. Wagki amorreo aents aidaushkam nunú tsawantinig tikima shiig katsekak achagtinai”, tiuwai.
GEN 15:17 Imanik suwe wajasu ai, ichinkanmaya jii bukuitau wantinkauwai, nunú wantinai shijikap ayai ekemakbauwa nunin kegak kuntin dakaja batsasbaunum ejapeena nagkaemattaman Abram wainkauwai.
GEN 15:18 Nunú tsawantai, Tuke Pujuu Abragjai chichaman umikui. Nunak aatus tiuwai: “Juju nugka junak amina uchijum wegantu aidaun susatnaitjai. Tuja namak Egipto nugkanum awa nuwi nagkamsan, namak múun Eufratesa aatsan susattajai.
GEN 15:19 Tuja juju nugka juka quenita aents aidaun, quenizita aents aidaun, cadmoneo aents aidaun,
GEN 15:20 hitita aents aidaun, ferezeo aents aidaun, refaita aents aidaun,
GEN 15:21 amorreo aents aidaun, cananeo aents aidaun, gergeseo aents aidaun, Jebús aents aidaun nugke ainawai. Tujash wi nunak ashí amastatjame”, tiuwai.
GEN 16:1 Sarai kaga asa niina aishi Abragkan uchijin ejapjumainchau aajakui, untsu niina jeen inake Egipto nugkanmaya nuwa Agar daagtin pujujakui.
GEN 16:2 Nunik pujai Sarai Abraman chichajak: “Nijah, amek Apajuí mina uchigmachu ati tusa tujutiuwa duka shiig dekame. Nuadui wait aneasam mina inakeg Agar puja au jukita. Nunikamin nuwi uchi akiinamtai, wi nuna jukin uchijimachainjash”, tiuwai. Tusa tama Abram niina nuwe tabaun antujus, ayu, tiuwai.
GEN 16:3 Nunik pujus Sarai Agaran juki Abragkai sujukui. Nunak Canaán nugkanum jegawag diez mijan pujusua duwi dutikauwai.
GEN 16:4 Abram Agaran juki pujus ejapmitkakui, dutikam pujus, Sarai ejapjuchu asamtai, dushikiak chichaman umigchau.
GEN 16:5 Nunitai, Sarai Abragkan chichajak: “¡Mina inakeg Agar dushiktak chichaman umigtatsu duka utugchatak aminui! Wi amina nuwem ati tusan amasbaijame, dutikamaitak, yamai amina uchigmin ejapjuk mina nagkaetasu ememawai. Tujash ima Apajuíya duke tujamti, yakita juna utugchatan apujush wiyashitag, atsa ameashitam”, tiuwai.
GEN 16:6 Tusa tama Abram ayaak: “Yamai nagkamsanuk amina inakminak amina idaitajame, ame itugkatag tame, dutikata”, tiuwai. Tusa tima Sarai Agaran shiig senchi inak waitkau, imatika waitkam Agar tupikakiuwai.
GEN 16:7 Nunik tupikaki Shur nugkanum wetainum uwegshunum jintá yumi pukuni jiinbaunum ayaumas pujuttaman, Apajuí ángela nunin wajas wantintukui.
GEN 16:8 Dutika iniak: “Agar Sarain inakegah, ¿amesh tuwiyamea miname? ¿Tuu weakmea aniame?” tau. Tama nii ayaak: “Sarain wi takagnaitag nunú dakitjugmatai tupikajai”, tiuwai.
GEN 16:9 Tusa tutai, Apajuí ángel tumain chichajak: “Wakitkita amina takagtaigmin, nunika jegaam Saraiyai sumimkata”, tiuwai.
GEN 16:10 Nuna tusa nuigtushkam chichajak: “Amina uchijum wegantunash shiig kuashat ikauntuktinaitjame, dutika ai makichkish dekapamainchau atinai.
GEN 16:11 Nijah, juju uchi ejapjukum nunú uchigmakam, adaikattame Ismael, wagki ame wekaesa waitiakum wake besemag anentaima wekaegam nuna wi antugkajam duwi.
GEN 16:12 Tuja niig kakajus yunumtukchamin, caballo unuinakchamua iman atinai, iman asa ashí aentsjai maanitnai, nunitai niina shiwaaji aidauk ima niijaig maaniagtinai. Niina yachi aidaujaishkam shiwag atinai, nuniau asa ima niina nugkenig pujustinai”, tiuwai.
GEN 16:13 Tusa tima, Apajuíjai chichasu asa, dekas amek “Apajuí wainbauwaitme” tusa puyatuk nigki anentaimas: “¡Apajuínap wainkaja, imanun wainkanush jakachjapi, iwaakjapi!” tiuwai.
GEN 16:14 Nuadui nuwi yumi piyag aajakua nuna “Iwaku pujuuwa nunú mina waita nunuwai” tuu adaikauwai. Nunú yumi piyajua duka yaakat Cades Béredjai niniaku awa nuna ejapeen awai.
GEN 16:15 Agar tsawanji jegajim uchi aishmagkun Abragka uchijin uchigmakui, nunikmatai Abram uchi daajin Ismael adaikauwai.
GEN 16:16 Agar niina uchiji Ismaelan uchigmakua nunak Abragnak ochenta y siete mijan ajujakui.
GEN 17:1 Abragkan noventa y nueve mijanji ajai, Tuke Pujuu wantintuk chichajak: “Antukta nijah, witjai Apajuí ashí senchigtinnuk. Nuadui amek mina emtijuig pegkegchau takamtsuk pujusta.
GEN 17:2 Wi amijai yamajam chichaman umiktatjai. Tuja amina uchijum wegantunak shiig kuashat ikaugkatnaitjai”, tiuwai.
GEN 17:3 Tusa tama Abram Apajuín eme anentus tsuntsuma nijayin nugkan antig pujusmatai, Apajuí chichajak:
GEN 17:4 “Jujuwai wi amejai chichaman umiag duka. Amek kuashat aents aidaun muunji atinaitme.
GEN 17:5 Nuadui amek Abram tamak achattame. Tuja yamai nagkamsamek Abraham tama atatme, wagki wi aminak kuashat aents aidaun muunji awajsatnaitjame.
GEN 17:6 Amina uchijum wegantu aidaunak shiig kuashat ikaugkattajai. Nuadui ame wegantunmaya apu agtinai, tuja ame wegantu aidau kuashat aents nugka muunnum yujakagtinai.
GEN 17:7 Nuadui wi amejai chichaman umikag duka ajumaya duish ame wegantu aidaujaish tuke atinai. Wika tuké amina Apajuíjum, tuja amina uchijum wegantu aidaunashkam Apajuíji atinaitjai.
GEN 17:8 Juju nugka Canaágka juwi ame pujam nunak ashí amina, nuigtu ame wegantu agtina nudaun tuke atinun amastatjai, tuja wi ditá Apajuíjig atinaitjai”, tiuwai.
GEN 17:9 Tuja nuigtu Apajuí Abragkan chichajak: “Juna wi chichaman umikag duka imatiksamek umikta, tuja amina uchijum wegantu agtina dushakam umikagtin atinme.
GEN 17:10 Amejai chichaman umikag duka jujuwai: Ashí amina uchijum wegantu aidaush ima junak umikagtinai. Ashí aishmag aidau atumjai batsatuk tsupigkamu agtatui.
GEN 17:11 Tuja ashí atum aishmag aidautigminuk tsupimamainaitjume, nuni iwainmamkattagme wi atumjai chichaman umikag nunú.
GEN 17:12 Yamai nagkamsagmek, ashí uchi aishmag aina duka ocho tsawan akiina wegauk katiuchiji chuchuke tsupigkattajume. Tuja amina wainka inataijum amina jemin akiinau aidaush, kuichik kayai tikich nugkanmaya sumakbaushkam tsupigkatajum.
GEN 17:13 Ashí uchi aishmag aidauk makichkish idaitsuk tsupigkamu agtatui. Wi chichaman umikag nunú iwainamu aatus atumi iyashin juwaktatui tuke atinun.
GEN 17:14 Tujash makichik aishmagkesh nuna tsupimatan dakitauk atumjai ijunjag pujumaitsui. Duka ayatak jiiki ajapeam atatui, wagki wi chicham umikbaun ajaantus diyachu asa”, tiuwai.
GEN 17:15 Tuja nuigtushkam Apajuí Abrahaman chichajak: “Amina nuwemi daajig Sarai tamak achattawai, yamai nagkamsag niina daajig Sara atatui.
GEN 17:16 Niina pegkegnum yumigsattajai, dutikakun niyai makichik uchin amastatjai. Dekaskenum wi niinak pegkegnum yumigsattajai. Nuadui kuashat aents nugka múun aidaunmayan dukuji atinai. Tuja ame uchijum wegantushkam nugka múun aidaun apuji agtinai”, tiuwai.
GEN 17:17 Tusa tama Abraham tsuntsuma nijayin nugka antig pujus, niina anentainig chichas: “¿Aents cien mijanji ajamush uchinash akiimainashit? ¿Sarash noventa mijanji aja ibaush ejapjumainkait?” tusa dushiau.
GEN 17:18 Nuna tusa Abraham Apajuín chichajak: “¡Untsu utusamek Ismael kajimatjuttsuk ame pegkegnum yumigtugsam tajai!” tau.
GEN 17:19 Tama Apajuí Abrahaman ayaak: “Amina nuwem Sara uchigmin uchigmaktatui tusan timagme, nunikmatai ame niina daaji Isaac adaikattame. Nunú akiinamtai wi amina anagkuajam duka uminkattawai. Tuja nii uchiji wegantu agtina nujaishkam wi chicham umikbauwa nunak tuké yapajiashtinaitjai.
GEN 17:20 Ame mina Ismael pachisam tujutam nunashkam antugkajame, nuniku asan wi pegkegnum yumigsattajai. Niina uchijish kuashat atinai, tuja niina uchiji wegantunmayanash kuashat uyujkatnaitjai. Ismaelak doce apu agtina nuna apaji atinai. Aatus nugka muunnum batsamsatin ainawai.
GEN 17:21 Untsu wi chichaman umikag nunak amina nuwem Sara yamai nagkamas tikich mijan jegatta duwi Isaakan uchigmatjamkatta nujai umiktatjai”, tiuwai.
GEN 17:22 Nuna aatus Apajuí Abrahamjai chichas ashimak, wakitkiuwai.
GEN 17:23 Nunik Apajuí wakitkimtai, nunú tsawantinig Abraham niina uchiji Ismaelan juki, ashí niina inake niijai batsamas akiinau aidaunash, tuja kuichik kayai sumakbau aidaujai, ashí aishmag niina aakjin batsamin aidaunak betekmas yajuak tsupijauwai, Apajuí tibaun imatiksag umiak.
GEN 17:24 Abrahamak noventa y nueve mijanji ajamu asa tsupimakui.
GEN 17:25 Untsu Ismaelnak trece mijanji ajamun tsupigkauwai.
GEN 17:26 Aatus tsupimatai ati tibaun Abraham umiak, nunú tsawantaik niina uchiji Ismaeljai tsupimakajui.
GEN 17:27 Ashí aishmag niina aakjin akiinkau aidauk, tikich nugkanmaya kuichik kayai sumakbau aidaujaí, betekmasag tsupimajajui.
GEN 18:1 Makichik tsawantai Abraham Mamrenum ikam encinar tutainum niina aakji waitijin etsa tajiajai eketun Tuke Pujuu wantintukui.
GEN 18:2 Abraham pagkas niimsatakama kampatum aents ijunun wainkauwai. Nunik wainmawaik wamak wejiuwai igkug jukitatus. Nunik jegantun tikishmag nijayin nugkan antig pujusa,
GEN 18:3 chichajak: “Mina Apujuh, wi amina eme anentsan tajame, wait aneasam wamak wepa.
GEN 18:4 Atumnash shiig awajtamkuig, yumi itagtuatajum tusan dawemin dijajatjime, dutikamtai numi wakenti bikintua juwi pujusjum machik ayamjatajum.
GEN 18:5 Atumek dekas wi atumin inakmin pujag nuwi taugme. Nuniku asagmin atum yuwatnun wi amastajime. Nunú yuwajum ichichmamjajum wetajum”, tiuwai. Tama dita aínak: “Ayu, ame tame duke ati”, tiajui.
GEN 18:6 Tusa tiagmatai Abraham niina aakjin waya nuwe Saran chichajak: “¡Harina pegkeg diisam veinte kilo jukim wamkesam pag najanata!” tiuwai.
GEN 18:7 Tusa ukuak, tupikaki toro tsakat batsatun jegantun duwegman etegka, niina inake aidaun chichajak: “Juju maajum wamak inagtujuatajum”, tusa tima ditashkam imatiksag umikajui.
GEN 18:8 Dutikawagmatai Abraham baka muntsuji ijugbaun, kantekujai, neje inajuamun aatus juki ejeentun apujtusui. Dutikam nuna numi wakentin pujusag yuwagtai, dakak pujau.
GEN 18:9 Nuna yuwawag inagnakag Abrahaman iniinak: “¿Amina nuwem Sarash tuwi pujawa?” tama Abraham ayaak: “Au aaka awi pujawai” tau.
GEN 18:10 Tusa timatai nuwiya makichik chichaak: “Tikich mijan atata duwi ataktu tajuan ijagsattajame, tujash nunú tsawantinig amina nuwem Sara uchiji ajittawai”, tiuwai. Tusa tutai Sara aaknum Abrahaman ukujin waitinum wajasa, antu wajau.
GEN 18:11 Tuja Abrahamak Sarajaig shiig muumpakiaju ainawai, nuadui Sarak nantutin nuwauch jau aina nunash nagkankau aajakui.
GEN 18:12 Nunin asa dita chichainamun Sara antuk, nigki anentaimas dushiak: “¿Wi mina aishjujai shiig múuntuch wajasag nunash, wajuk mina aishjujaish wakejunikan pujusnuk uchigmaktaja?” tau.
GEN 18:13 Tusa tabaun Tuke Pujuu antuk Abrahaman chichajak: “¿Wagka Sarash dushiawa? ¿Nigka dekaskeap tawa, tuja wi múuntuch ataish, Apajuíyap sujustatua tumainchauk dekapea?
GEN 18:14 ¿Apajuí makichik waji tujinka dutiktsuk idaimainush awak? Tikich mijan atata duwi amina ijagsatasan ataktu tajuattajame. Nunú tsawantin Sara uchiji ajittawai”, tiuwai.
GEN 18:15 Tusa tutai nuna Sara antuk senchi ishamkauwai, nuniak dekas tsanugtajai tusa chichaak: “Wika dushigchamjai”, tau. Tusa tutai Apajuí ayaak: “Wika dekajai ame dushiamunak”, tiuwai.
GEN 18:16 Nuna tusag ijag aidau Sodomanum shimutai, Abrahamshakam ditan kumpama ishiaktatus uyuniuwai.
GEN 18:17 Nunitai Tuke Pujuu anentaimas: “Dekas wi dutikattag nuna pachisan Abrahaman ujaktajai,
GEN 18:18 wagki niig dekas kuashat aents agtina nuna apaji atatui. Nuigtushkam wi niinak, aents ashí nugkanmaya aidaunmayash ima niinig pegkegnum yumigkiam atinme tusan anagkuawaitjai.
GEN 18:19 Wi niinak etegkauwaitjai, ashí niina uchiji wegantu aidaunash mina chichamjun jintintuati, dutikam minák umigtuktinme, nuninak ima pegkeja nunak takastinme tusan. Nuna aatus uminakui, wi anagkuawaitag nunak imatiksanuk umiktatjai”, tiuwai.
GEN 18:20 Nuna tusa Tuke Pujuu chichaak: “Aents yaakat Sodomanmaya, nuigtu Gomorranmaya aidauk ayatak pegkegchauk tikima shiig katsek ainawai tabaun antajai.
GEN 18:21 Nuadui wi yamai wejitjai ditan, núnikan dekaatjai ditá pegkegchauji shiig múuntai tabau minai wajuta dusha dekaskeashit”, tau.
GEN 18:22 Tusa jimag aents Sodoman wejutai, Abraham Apajuíjai ukuunum juwakui.
GEN 18:23 Nunik Apajuín jegantun iniak: “¿Aents pegkegchaun takau aina nunú ijinkumesh, pegkejan takau aina nujai ijinattamek?
GEN 18:24 Tuja namputchawame cincuenta aents pegkegchaun takaschau aidau yaaktanum batsatkuish, ¿nunú batsataigkik yaaktash tsaiktatam, atsa tsagkujashtatmek?
GEN 18:25 ¡Aents pegkegchaun takaschau aidauk, pegkegchau takasu aina nujai ijumjamek pegkegchaun takasua numamtukek ijinmaitsume! ¡Dekas wait aneasam dutikawaipa! Amek Apu chicham epegkin asam ashí nugkanmaya apu aina nuna Apujiyaitme, nuadui, ¿aents pegkegchaun takaschau aina duka ayamjukchattamek?” tiuwai.
GEN 18:26 Tusa tama Tuke Pujuu Abrahaman ayaak: “Cincuenta aents pegkeg yaakat Sodomanum pujaun wainkanuk, dita tsagkujakun ashí tikich aidaunash tsagkujattajai”, tiuwai.
GEN 18:27 Tusa timatai, ataktushkam Abraham Apajuín chichajak: “¡Wait aneasam tsagkugtugta! Amek Apajuíyaitme nuniaminig wika aents wainkauchitkun juna iniajame.
GEN 18:28 Tujash namputchawame cuarenta y cinco aents pegkejam akuish, ¿ashí yaaktash tsaiktatmek?” tama Apajuí ayaak: “Atsa, cuarenta y cinco aents pegkejam akuishkam ijinashtatjai”, tiuwai.
GEN 18:29 Awentsag Abraham Apajuín iniak: “Namputchawame ¿ima cuarentak akuish itugkattame?” tau. Tusa tama Apajuí ayaak: “Atsa cuarenta pegkejam pujakuish tsaikchattajai”, tiuwai.
GEN 18:30 Tujash Abraham ataktu awentsag iniak: “Apuh, wi kuashat iniimkuish, wait aneasam kajegtukaipa. Tujash ¿treinta aentskesh pegkeg akuish, itugkattame?” tau. Tama nii ayaak: “Treinta aents pegkeg yaaktanum pujakuishkam yaaktanak tsagkujattajai”, tiuwai.
GEN 18:31 Tusa timatai nuigtushkam awentsag iniak: “Mina Apujuh, wika aents wainkauchitkun aajan iniajame. Tujash, ¿ayatak veinte aents pegkeg akuish itugkattame, tsaiktatmek?” tau. Tama nii ayaak: “Veinte aents pegkeg akuishkam, yaaktanak tsaikchattajai”, tiuwai.
GEN 18:32 Tuja nuigtu iniak: “Mina apujuh, wait aneasam kajegtukaipa, yamaik inagnamun iniastatjame, nuigtu awagkin iniaknuk waitkaschattajame. ¿Tujash ayatak diez aents pegkeg akuish itugkattame?” tau. Tama nii ayaak: “Diez aents pegkeg akuishkam, yaaktanak tsaikchattajai”, tiuwai.
GEN 18:33 Juna aatus Apajuí Abrahamjai chichas ukuak, weuwai. Nunikmatai Abrahamshakam niina aakjin wakitkiuwai.
GEN 19:1 Etsa akagai Apajuín aentsji nayaimpinmaya jimag yaakat Sodomanum jegawajui. Tuja Lotchakam yaakat tentea apakbaunum nuna waitijin, aents ijunajaku aina nuwi eketu. Nunik eketu niimsatakama jimag aents minidaun wainkauwai. Nunik wajaki wejiuwai igkugtatus. Nunik jegantun tsuntsuma nijayin nugkan antig pujusui.
GEN 19:2 Nunik chichaak: “Mina apug aidauwah, wika atumin inakegaitjai, nuadui wait aneasjum mina jegajui wayatajum, nunikagmin wi dawemin dijajatjime, dutikamtai mina jegajui kanagjum, kashin kashikmasjum wetajum” tau. Tama dita ayaak: “Atsah, nunikchattaji, juwi agá pujusa tsawagtatji”, tuidau.
GEN 19:3 Tusa tiagtaishkam: “Atsah, wait aneasjum tiigpa”, tusa imatjau niina jeen awayatatus. Tusa imatjam ayu tusag Lota jeen wayawajui. Nuwi wayawagmatai, Lot inamjamtai yutai pegkejan umikajui dita yuwatnun. Dutikak levadurajai pachimtsuk pag inajuamun yuwawajui.
GEN 19:4 Nuna yuwawag eke kajinatsaig, Sodomanmaya ashí aents aishmag aidau, datsa aidaunum nagkamas múuntuch ai aidaujai, jeganak tenteawajui.
GEN 19:5 Imanikag senchi pampaidau, imatuinak: “¿Tuwi batsatua aents amina jemin utsaanama dusha? ¡Wamak jiikta! ¡Dita aikatasa wakegaji!” wajaidau.
GEN 19:6 Tusa imatiagtai ditajai chichastatus Lot jiintuki, waitin shiig epeni tuntupek wajas,
GEN 19:7 ditan chichajak: “Mina kumpag aidauh, wait aneasjum atum anentaimjum duka dutikawaigpa, shiig pegkegchauwai.
GEN 19:8 Juwi mina nawantug jimag aentsun takashtai pujawai, auna jiigkitjime, dutikamtai atum wakegamu umiktajum. Tujash juju aents aidauk aikawaigpajum, wagki ditak wi ipaamu ainawai”, tau.
GEN 19:9 Tusa tutai dita aínak: “¡Amek menasta! Ame iina apuji najaneamek juka aikawaigpa tusamek tikich nugkanmayayaitkumek tukagtumaitsume. ¡Yamaik, amina dita dutikmainaitag nuni senchi dutikattajame!” tusag Lotnak suwimaidau waitijin tegagkatag tusag.
GEN 19:10 Imatikiagtai jimag aents nayaimpinmaya Lota jeen waya pujau waitin ujainiag kuntujin etsaptiag Lotnak japiki waitin ujati awayak waitin epeniuwai.
GEN 19:11 Dutika agá ijununak ashí datsa aidaunum nagkamas múuntuch aidaujai wainmachu emakui, dutikawajam waitin wainkatatus egai egainakua yawekajui.
GEN 19:12 Nuna dutikawag, nunú ijag aidau Lotan chichajuinak: “¿Tikich pataim aidaush juwish ajutjamtsumek? Nuniakuig amina uchijum aidau, nawanjum aidau, nuigtu nawanjumin aishi atin aidaushkam, ashí aminu aidau juju yaaktanum atsuak duka ashí yajuakam atushat tupikakta.
GEN 19:13 Juju nugka juka tsaiktatji, juju yaaktanmaya aents aina juna pegkegchaujig shiig kuashtai, iman asamtai Tuke Pujuu awetamaji tsaiktajum tusa”, tiuwai.
GEN 19:14 Tusa tima Lot niina nawanji aishi agtinun ujaktatus weuwai, nunik ditan chichajak: “¡Wamak nantagjum juju yaaktanum pujutsuk jiinjatajum, juju yaaktanak Apajuí tsaiktatui!” tau. Tusa tamaitak, wainkas tuu wekagatai tuidau asag antugkachaju ainawai.
GEN 19:15 Nuniaig tsawau asamtai, Apajuí aentsji ángel nayaimpinmaya aidau Lotan chichajak: “¡Wamkesam nantakim amina nuwem nuigtu jimag nawanjumea nujai jukita! Juju yaaktanmaya aidau suwimak suwaku tsayajin atumesh jakatag tachakjumek”, tau.
GEN 19:16 Tusa tamaitak Lot emetnatai, ángel aidau, Tuke Pujuu niina wait anenjau asamtai, japikiag jiikiajui. Tuja nuwenashkam nawanji aidaujai jukiag jiikiajui, wagki yaaktan ukumtikiag uwemtijatag tau asag.
GEN 19:17 Dutikawag yaaktan ukumtikiag makichik ángel chichajak: “¡Wamak tupikakum uwemjata! Ukuujum diisaipa, tuja juju paka aina juigkik makichkish wajatash wajantaipa, ayatak mujanum wetá jakatasam wakegashkumek”, tiuwai.
GEN 19:18 Tusa tama Lot chichaak: “¡Atsah, mina apug aidauwah, tikima nunak nunikchattajai, wait aneasam antugtukta!
GEN 19:19 Atum minak wait anenjugjum jakai tusajum jiigkiugme, tujash wika tikima mujanmak wemaitsujai, wagki nuni wekagai juju yaakat tsayamu minash amaintuk mantuawai tajai.
GEN 19:20 Untsu tikijua juwi yaakat piipich awa atú tupikaumainaitjai. ¡Wait aneasam ayu tujutta, yaakat piipichia awi pujusan uwemjatjai!” tau.
GEN 19:21 Tusa tutai nuwiya makichik ángel ayaak: “Ame segatam nunak antugkajame duka imanisag uminkati. Nuadui au yaaktanak tsaikchattajai.
GEN 19:22 Tujash ¡wamak wetá! ¡Juwi pujutsuk ame tame nuwi wetá! Wagki ame eke jegatsminkik juju nugkanak tsaikchattajai”, tiuwai. Nuadui nunú yaaktan daajinak Sóar adaikauwai.
GEN 19:23 Tuja tsawak etsa puwau jiinai, Lot Sóarnum jegau ai,
GEN 19:24 Tuke Pujuu nayaimpinmayan jii azufre tawa nujai pachimjamun yaakat Sodomanum Gomorranmashkam yutumtijauwai.
GEN 19:25 Dutika, ashí aents nunú yaaktanum batsataidaunak ijinauwai, nuigtushkam nugka paka weajunum batsatun ashí ajak aidaujai ijinauwai.
GEN 19:26 Untsu Lota nuweshkam niig wegayatak, ukujin ayampas diikma, wee najanea wajasui.
GEN 19:27 Nuna Apajuí tsaiku ai kashikmas Abraham nii Tuke Pujuujai chichaaku wajasbaunum weuwai.
GEN 19:28 Nunik nuwi jegan wajas Sodoman Gomorrajai diistakama ashí nugka paka aidauk yaakat aidaujai nagkamas ekemaka tsaikbau asa, senchi bukuiti jiinak yujagkim akijua atatman wainkauwai.
GEN 19:29 Aatus Apajuí yaakat nugka pakanum aajaku aina nuwi Lot pujujakua nunak ashí tsaikui. Tujash Apajuík Abrahamnak kajimatkichui. Nuadui niina yachi uchiji Lotan jiiki uwemtikjauwai.
GEN 19:30 Lot Sóarnum pujutan ishamak jiinki mai nawanjin juki mujá weuwai. Nunik nuwi waa pagkakunum kampatuma duka nunisag utsanawag batsamsauwai.
GEN 19:31 Nuwi pujus makichik tsawantai Lota nawanji emkau kai ekeun chichajak: “Iina apajig muumpakni, tuja tuke nunitai asamtai aishmag nuwan nuwatin aina dutika iina nuwatjamainuk juwig makichik aishmagkesh shiig atsawai.
GEN 19:32 Nuniau asamtai dekas iina apaji enamkami, dutika enamka niijai ankami. Nunika iina apaji uchiji jukimi”, tiuwai.
GEN 19:33 Nuadui nunú kashia duik apajin vinon aajag enampek aepes, nawanji emkau iyanti niina apajijaig ankauwai. Tujash apajig nawanji tepesa nantaki wegaunakesh machikish dekapjachui.
GEN 19:34 Nunik tsawag, kai emkau ekeun chichajak: “Wi yamai kashi iina apajijai ankamjai, tuja yamai kashia duwi ataktu enamkami, dutika ameshkam niijai ankata; aatsa mai iina apaji uchiji jukishpash”, tau.
GEN 19:35 Tusag nunú kashia duwi ataktu enamkag aepes, nawanji ekeu iyanti niishkam niina apajijai anik ukukiuwai. Tujash Lotak nawanji tepes nantaki wegaunakesh machikish dekapjachui.
GEN 19:36 Nunik batsamas Lota nawanji mai ejapjukui, niina apajinunak.
GEN 19:37 Emkau uchigmakui uchi aishmagkun, dutika adaikauwai Moab. Nuwiya jiinjauwai Moab aents aina duka.
GEN 19:38 Tuja ekeushkam uchigmakui aishmagkun dutika adaikauwai Ben-amí. Nuwiya jiinjauwai Amón aents aina nunú.
GEN 20:1 Abraham nii pujamun ukuak Néguev nugkanum weuwai. Nunik nuwi jegaa yaakat Cades, Shur nugkajai niinis awa nuwi ejapena yaakat Guerar tawa nuwi pujusui.
GEN 20:2 Nuwi jegaa pujus niina nuwen, juka mina ubajui, tiuwai. Timatai Abimelec Guerar nugkan Apuji niina aentsjin awemauwai, Sara utugtitajum wi nuwatkatjai tusa.
GEN 20:3 Tusa timatai itajuawajui, dutikawagmatai kanittaman kajanum Apajuí chichajak: “Anú nuwa jukium duka aishintin jukiume, nuadui amek jakattame”, tiuwai.
GEN 20:4 Tusa tama eke nuwajaig tsanigchau asa, chichaak: “Mina Apujuh, ¿eke wi nuwan dutikachu aigkik mantuatag tame?
GEN 20:5 Abraham chichaak juka mina ubajui tujutmae, nuwashkam dutiksag mina ubajui timae, nuadui uyumat aneakas wika jukimjai, tujash pegkegchaunak dutikachjai”, tiuwai.
GEN 20:6 Tutai Apajuí kajanmak ayaak: “Wika shiig dekajai ame pegkegchau dutikachum nunak. Nuadui ame nuwa antigkam mina emtijui tunamajaim tusan wika aminak idaitsugme.
GEN 20:7 Tujash yamaik, anú nuwak awagkim aishi susata, wagki niig mina etsegtugkati tusa etegkamui. Nuniau asa amina pachipas mina segatti jatsuk pujusminum. Untsu awagtutsuk pujakmek duka dekas ashí aents amina jemin batsata nujai jinattagme”, tiuwai.
GEN 20:8 Tusa Apajuí ujakam, kashikmas Abimelec nantaki niina inake aidaun untsuka ikaunman, niina kajanum tibaunak ashí ujakui. Nuna antukag senchi ishamkajui.
GEN 20:9 Nuna etsejuk Abrahaman untsuka itan chichajak: “¿Amesh wagka jutikagtame? ¿Wisha aminash wajinma pegkegchau awajkamu asamea mina jegajuish tudaush ibaush itagtuaume? Juka tikima jutikdaichatia”, tusa
GEN 20:10 awentsag chichajak: “¿Waji anentaiyaiya jusha jutikagtame?” tau.
GEN 20:11 Tama Abraham ayaak: “Wika juiyag makichkish Apajuí nemagchaus ainawa timajai. Tau asan ishamkagtakun mina nuwajui tichamjai, wagki mina mantuinak duwajun jujutkinum tusan.
GEN 20:12 Tujash auk dekas minak ubajui. Wagki niig mina apaju nawanji asa, tujash mina dukujuig akiinachui, nuadui wika nuwatkauwaitjai.
GEN 20:13 Apajuí chichagtak: ‘Amina apa jeen pujam duka jiinkim wetá’ tujutmatai, Saran chichagkun makichik yaaktanmakesh jegakuik mina ubajui tujutta tusan tiuwaitjai”, tiuwai.
GEN 20:14 Tusa tutai, Abimelec Saran awagtuki susauwai. Dutikak nuigtushkam uwig aidaun, baka aidaun, aents wainka inatai aishmag aidaun, nuwa aidaujai susauwai.
GEN 20:15 Dutika chichajak: “Nijah, juju nugka juka ashí mina nugkajui. Tuwi ame ima shiig pujumain dekapeame, nunú etegkam nuwi pujusta”, tiuwai.
GEN 20:16 Nuna tusa Saranashkam chichajak: “Wi amina umaimin susag duka mil kuichik plata najanamu akikega imanun susajai. Nunuwai ii pegkegchau takaschamunum tikich aents aidaunmash ayamjumaktina duka. Tuja makichik aentskesh pegkegchaun chichagtamainuk atsutnai”, tiuwai.
GEN 20:17 Nuadui Abraham Abimelekan pachis Apajuín tsagkujata tusa segauwai. Tusa tima Apajuí Abimelekan etsagag, niina nuween, nuigtushkam niina inake nuwa aidau, nuwi batsatunak uchi uchigbau atinme tusa ashí etsagakui.
GEN 20:18 Wagki Apajuí Sara jukimunum niina ayamjak, ashí nuwa Abimelekan jeen batsamin aidaunak uchin uchigmakchamin emaku asa, nunak etsagaak ataktu uchigbau emakui.
GEN 21:1 Apajuí Saran anagkuamunak imatiksag umikui.
GEN 21:2 Nuadui Sara ejapjukui. Nunik muumpatnum Abrahaman uchijin aishmagkun uchigmatkauwai. Uchik Apajuí chichaak nunú tsawantin akiinattawai tibaunak imanisag akiinauwai.
GEN 21:3 Nunikmatai Abraham uchiji daajin adaikauwai Isaac.
GEN 21:4 Nunú uchi akiina ocho tsawan ejematai, Apajuí tibaun umiak uchiji katiuchijin chuchuken tsupigkauwai.
GEN 21:5 Abragnak cien mijan ajamu ai niina uchiji Isaac akiinauwai.
GEN 21:6 Nunikmatai Sara anentaimas: “Apajuí minak dushimtijuje shiig aneasti tusa, nuadui wi uchigmakbaun ashí aents aidau dekawajag shiig aneenak dushijagtin ainawai”, tiuwai.
GEN 21:7 Tuja nuigtushkam Sara anentaimas: “Makichik aentskesh minak Abrahamnap uchin uchigmatkattawa tusa tujutiuk atsawai. Tujash yamaik muumpatnum uchigmatkajai, niishkam múuntuch wajasu ai”, tiuwai.
GEN 21:8 Isaac muumpak muntsun tsujagkauwai. Nunikmatai Abraham yutain kuashat umika uchijin jiistamjuauwai.
GEN 21:9 Nuna imatikiagtai, Abragkan uchiji egiptunmaya nuwanum akiinauwa nunú Isaakan kajejak, pegkegchaun chichajun Sara antukui.
GEN 21:10 Nunik Abrahaman chichajak: “¡Juju nuwa inaka juka uchijijai jiiki awemata! wagki uchi inaknum akiinauwa duka mina uchijua jujai betekak amina wajijum aina nunak jumaitsui”, tiuwai.
GEN 21:11 Tusa tama Abraham senchi wake besemag anentaimsauwai, wagki dushakam niina uchiji asamtai.
GEN 21:12 Tujash Apajuí niina chichajak: “Juju uchia nuig, tuja nuwa inaka anuishkam imanikmek anentaimsaipa. Sara tujama duke umikta, wagki amina uchijum Isaakai uchi akiinak weagtina nunú ame wegantuk agtinai.
GEN 21:13 Tujash amina uchijum inaknum akiinauwa nuwiyanashkam amina uchijum asamtai, kuashat ikauntuka ai yaakat múun wajastinai”, tiuwai.
GEN 21:14 Tusa tima Abraham tsawag kashikmas, pagkan juki nuigtu duwap apagbaunum yumin aimjuk Agaran susauwai. Agaran aentsek, uchiji Ismaelnashkam susa kumpama, awemauwai. Dutikam Agarchakam niina uchijijai uwejush Beersheba nugka jega atsamunum wainak wagaka wekagu.
GEN 21:15 Nuwi wekagas yumi jukimujin amuekamtai, uchijinak numi wakentin awayag aipkiuwai.
GEN 21:16 Dutika aepeak, nigka tupaan ekemas anentaimas: Mina uchig jau waintanak dakitajai, tau. Nunik eketai uchijishkam buutu.
GEN 21:17 Nunik uchi buutun Apajuí antugkauwai. Nunik Apajuí ángel tumain Agaran chichajak: “¿Wagka Agarah amesh aniame? Ishamkaipa, Apajuí uchi buutun antuke.
GEN 21:18 Nuadui wamak weme uchi jukim akuptsuk takusta, wagki anú uchia anuiyan wi kuashat aentsun uyujkatnaitjai, dutika ai shiig kuashat agtinai”, tiuwai.
GEN 21:19 Nuna tusa Apajuí Agaran yumi pukini jiinun iwaintukui. Dutikam Agarchakam yumi aimtai duwap apagbaun juwakug weji yumin aimak itanta, uchin aajui.
GEN 21:20 Aatus Apajuí uchinak yaigkui. Dutikamu asa tsakaja uwegshunum nugka Parán tutaya nuwi pujusui. Nunik nunú uwegshunum pujaun niina dukuji egiptunmaya nuwan egatuk nuweauwai. Tuja nigka shigki apunbaunum shigki etsakamu ekenka nagkimtain shiig yacha aajakui.
GEN 21:22 Nunú tsawan aajakua duwi Abimelec niina suntaji aidaun apuji Ficol aajakua nujai uyunis Abrahamjai chichastatus weuwai. Nunik jegawag Abimelec Abrahaman chichajak: “Ame ashí takam nunak Apajuí yaimpa duka dekaji.
GEN 21:23 Nuadui, Apajuísh antugtamai minash tujutta. Juju nugka juwi mina uchig aidaush, ame uchijum wegantu aidaush wi amijai shiig awagdayag aiksamek shiig awajkatnujum pachisam tujutta”, tiuwai.
GEN 21:24 Tusa tama Abraham ayaak: “Ayu, Apajuísh shiig waitui, wika ame tujutam nunak imatiksanuk umiktatjai.
GEN 21:25 “Dutikatin asamtai ame amina inakem aidau yumigmatan jukiu aina nunú awagtugkita”, tusa tiuwai.
GEN 21:26 Tama Abimelec ayaak: “Achah, wika nunak makichkish dekatsjai, amek minak: Juka mina yumigmatjui, tusamkesh tujutchauwaitme. Wika yaki yumigmatnash jukiuwaita nunak yamaikish dekatsjai”, tiuwai.
GEN 21:27 Timatai Abraham uwig aidaun, baka aidaujai juki Abimelekan susauwai. Dutika nunú tsawantinig mai chichaman umikajui.
GEN 21:28 Nuna umikag Abraham siete uwijan juki akanak awajsauwai.
GEN 21:29 Nuna dutikamtai Abimelec iniak: “¿Wagka jusha siete uwig akankam ijumjaum dusha aikaume?” tau.
GEN 21:30 Tama Abraham ayaak: “Juju siete uwijan amaajam nunú jukim dekattame wi juna yumigmatan tainiuwaitag duka”, tiuwai.
GEN 21:31 Nuadui nunú dutikamunum nuna nugka daajin Bersheba adaikauwai, wagki nunú nugkanum chichaman umikaju asag.
GEN 21:32 Dutika chichaman bershebanum umikag, Abimelec Ficoljai filisteo aents aidaun nugken wakitkiajui.
GEN 21:33 Nunik wakitkiagmatai Abraham numi tamarisco tutain bershebanum ajauwai. Dutika nuwi Apajuí Tuke Pujuuwa nuna daajin adaitus emematiuwai.
GEN 21:34 Aatus nuwi filisteo aents aidaun nugken Abraham kuashat tsawan pujusui.
GEN 22:1 Kuashat tsawan asa, Apajuí Abrahaman niiyai kajinas anentaimak dekaskeapi tabaujin dekapsatatus niina daajin adaitus untsukui. Tusa untsuam nii ayaak: “Juwi pujajai”, tiuwai.
GEN 22:2 Tutai Apajuí chichajak: “¡Amina uchijum makichkiuch asamtai, senchi aneam nunú jukim niijai Moria nugkanum wetá! Nuwi jegam wi mujan iwaintuktatjam nuwi uchijum maa apeakum mina emematjita”, tiuwai.
GEN 22:3 Tusa tima tsawak shiig kashikmas nantaki, nii ekemi wetinun burronum patai umika ukuak, chigkimin jigka umik nunú burronum pataja jukiag Apajuí nuwi wetá tibaunum niina uchiji Isaakan juki, nuigtu jimag inaken juki weuwai.
GEN 22:4 Nunik we wenakua kampatuma juna tsawampag wesa diikma, atushat nii jegatnujin wainkauwai.
GEN 22:5 Dutika nuna wainak, Abraham niina inake aidaun chichajak: “Atumek juwi burro kuitamkujum juwaktajum. Nuniagmin wi mina uchigjai wetajai, núnikan niijai Apajuín emematin ukuakun taatjai, nunikmatai wakitkiagmi”, tiuwai.
GEN 22:6 Nuna tusa Abraham chigkimin niina uchijin aentsek tuja ekemaktinun jii akaamun kuchiijai nii juki, niina uchijijai weuwai.
GEN 22:7 Nunik wesag, Isaac apajin iniak: “¡Apawah!” tiuwai. Tama nii ayaak: “¿Waji wakegame uchuchih?” tau. Tusa tama Isaac chichaak: “Jii juki, chigkimish umika wegaji. Tujash ¿tuwi pujawa uwig aishmag tsakat maa apeaku Apajuí ememattinush?” tau.
GEN 22:8 Tutai Abraham ayaak: “Apajuí uwig aishmag tsakatan sujamsattawai, nunú maa apeaku nigka ememattatji”, tiuwai. Aatus tusa uchijijai tsanias wegau.
GEN 22:9 Nunik Apajuí tibaunum jegantag, nuwi Abraham kaya ekenag najanauwai kuntin patasa apeaku Apajuí ememattinun. Dutika chigkimin patag nuadui niina uchiji Isaakan achika jigkag juki patainiuwai.
GEN 22:10 Dutika patai uchijin maatatus kuchiijin jutatman,
GEN 22:11 Apajuí ángel tumain nayaimpinum pujus untsuak: “¡Abraham! ¡Abraham!” Tama nii ayaak: “Juwi pujajai”, tiuwai.
GEN 22:12 Tutai nii chichajak: “Uchigmek makichkish antigkaipa. Ame Apajuí ima senchi umijam nunak yamaik dekajuajame, wagki, amina uchijum makichkiuch aigkish, sujimtsuk mina sujustasam umiku asamin”, tiuwai.
GEN 22:13 Tusa tima niimsatakama, uwig tsakat aishmag numi kanawen niina kachujin tutinak wajaun wainkauwai. Nunik uchijin maatag tabaun idayak, nuna weji achika juki maa nuna nejen ashí apeak Apajuín emematiuwai.
GEN 22:14 Nuna dutikau asa Abraham nunú nugka daajin: “Apajuík atsumamun sukagtawai” tuu adaikauwai. Nunú tibaunum yamayajuikish: “Apajuík mujanum atsumamun sukagtawai”, tinu ainawai.
GEN 22:15 Tuja awentsag Apajuí ángel tumain nayaimpinmaya Abrahaman untsuka,
GEN 22:16 chichajak: “Tuke Pujuu chichaak juna timae: ‘Amek wi tabau umiakum amina uchijum makichkiuch aigkish sujitjukchau asamin, wiki wi chicham umiktinjun tumamjai’ tujamui.
GEN 22:17 Aminak dekas pegkegnum yumigsattajame: Ame uchijum wegantuk yaya nayaimpinum ayá iman, nuigtu kayam nayantsanum ayá iman agtinai. Ditak shiwaajinash tuke depetin agtinai.
GEN 22:18 Aents ashí nugkanmaya aidauk ame uchijum wegantu agtina nuna daajin pegkegnum yumigkiam agtinai, wagki ame wi tabau intimjuttsuk umiku asamin”, tiuwai.
GEN 22:19 Tusa tima Abraham Isaakjai wakitkiuwai niina inake batsakbaunum. Nunik jegantag ditajai betek waketug bershebanum jegawajui. Nunik nuwi Abrahamak pujusui.
GEN 22:20 Nuwi kuashat tsawan pujus, Abraham niina yachi Nacoran nuwe Milcá, niina aishinak kuashat uchin uchigmatkauwai tabaun dekauwai.
GEN 22:21 Iwaijig Us daagtinai, nuwi patatkauwai Buz, nuwi patatkauk Quemuel, tuja nunuwai Araman apaji.
GEN 22:22 Untsu Quemuelai patatkau aidauk Quésed, Hasó, Pildas, Idlaf, Betuel aatus ainawai.
GEN 22:23 Betuelan nawanjiyai Rebeca. Juju ainawai Abrahaman yachi Nacor niina nuwe Milcáyai ocho uchin akiinkauwa nunú.
GEN 22:24 Tuja nuigtushkam niina ikaa nuwe Reumá aajakua nuwishkam akiauwai: Teba, Gáham, Tahas, Maacá, aatus, tusa tabaun dekauwai.
GEN 23:1 Sara cientoveintisiete mijan pujusui.
GEN 23:2 Nunik yaakat Quiriat-arbá, Hebrón tuuta awagmatia nuwi Canaán nugkanum pujus jakauwai. Nunikmatai Abraham Saran aneak buutiuwai, nunik kuashat tsawan anentaimak pujusui.
GEN 23:3 Nunik nuwe jakamtai aepes pujau ukuak, hitita aents aidaun apujijai chichastatus weuwai.
GEN 23:4 Nunik jegaa ditajai chichaak: “Wika atum wegantuchuitjai, nuniaigkish wait aneasjum makichik ukumatai sujustajum sumaktajai, dutikan nuwi mina duwajun ukustajai”, tiuwai.
GEN 23:5 Tusa tama makichik nuwiya ayaak:
GEN 23:6 “¡Apuh, wait aneasam antugkagtukta! Jutii ainag nuwiyamek ametme dekas Apajuí etegkamumek. Nuadui iina ukumataiji dekas pegkeg aina nuwi nuwemik ukusta. Makichkish jutii ainag juwiyag ukumatain sujitjamainuk shiig atsawai”, tiuwai.
GEN 23:7 Tutai Abraham wajaki hitita aents aidau emtin ditan eme anentus tsuntsuma wajas pagkainiuwai.
GEN 23:8 Nunik chichaak: “Atumesh mina duwag jaka nuna ukusti tusa wakegakjumek Efrón Sóharan uchijiya nuna ukumatai awa nunú segatjitajum.
GEN 23:9 Tuja Macpelánum waa niina nugke nagkatkamunum awa nuna sujusti. Wi nuna akikenak ashí akiktajai. Dutikau asamtai, juju nugka juwi makichik waa ukumatai midaush ajuttí tajai”, tiuwai.
GEN 23:10 Tutai Efrón hitita aents nii nuwi pachitkau asa, nii wegantu aidaush ijunbaunum, ashí aents yaaktan waitijin utsaanaidaush betek antuinamunum chichaak:
GEN 23:11 “¡Atsah, mina apujuh, wait aneasam antugtukta! Wi yamaik ashí mina pataag aidaush antuinamunum tajame: Au nugkak ame jukita amina amaajame, tuja waaya aushkam aminu ati, nuwi amina nuwem ukusta”, tiuwai.
GEN 23:12 Tusa tima Abraham aents nugkentin ijunbaunmanini ataktu tsuntsuma pagkainiuwai,
GEN 23:13 nunik dita emtin Efrógkan chichajak: “¡Wait aneasam antugtukta! Wi kuichkin nugka akiken amaag duka wait aneasam jukita. Dutikawamin wisha anentag mina duwag jajutka nunash ukustajai”, tau.
GEN 23:14 Tama Efrón Abrahaman ayaak:
GEN 23:15 “¡Mina apujuh antugtukta! Nugkak akikai cuatrocientos plata najanamu. Tujash juna akikega duka chichamjuk pujuchmi. Dekas nuwem jaka duka ukusta”, tiuwai.
GEN 23:16 Tima nunak antusag Abraham Efrón hitita aents aidaun emtin imaan akikai tibaunak imatiksag kuichkin juki akikmakui.
GEN 23:17 Dutikau asa, Efrógkan nugke Macpelá Mamrenum etsa minitaiya nuni awa nunak ashí niinu emauwai. Tuja nuigtushkam nunú nugkanum waa aunak, ashí numi múun aidaujai,
GEN 23:18 ashí Abrahamdauk wajasui. Tuja Abraham nugkan sumakua nunak hitita aents aidau emtin nuigtushkam tikich aents nunú yaaktanum utsanaidaush antuinamunum sumakui.
GEN 23:19 Nuna ashí umika, Abraham niina nuwe jakaun juki, Mamrenum wajasa diyam etsa minitainini Hebrón tutai Canaán nugkanum waa Macpelánum awa nuwi ukusui.
GEN 23:20 Aatus nunú nugkak, waajai, hitita aentsun nugke aajakun, Abraham sumakua duka, niina ukumatai wajasui.
GEN 24:1 Abrahamak shiig múuntuch wajasui. Tuke Pujuu niinak ashí pegkegnum yainkui.
GEN 24:2 Makichik tsawantai Abraham niina inake chichintan, ashí niina wajiji aidaunash kuitamin atinaitme tusa tibaun untsuka chichajak: “Amina uwejum mina bakuju wakentin yununkata, wagki ame chicham umiktinjum dekaskenum tujuttin asam,
GEN 24:3 nunikam Tuke Pujuu Apajuí nayaimpinum nugkanmashkam inamna nunú antugtamai, ame chicham umiakum mina uchig canaágnum wi pujag juwiya nuwan nuwatkai tusam kuitamkatnujum pachisam tujutta.
GEN 24:4 Juwiya nuwak egattsuk, mina nugkajui weme mina pataajuiya Isaaka nuwe atin egatkata”, tiuwai.
GEN 24:5 Tusa tama niina inake ayaak: “Ayu, tujash nuwa wijai minitan dakitakuish ¿wisha utugmainaitja? ¿Amina uchigmin jukinuap ame pujaum ukukiuwaitam nuwi eman nuweattaja?” tau.
GEN 24:6 Tama Abraham ayaak: “¡Atsah, mina uchijuk awi jukimek emaipa!
GEN 24:7 Tuke Pujuu Apajuí nayaimpinmayaya nunú mina pataju nugkeen mina apaju jeen pujai jiijak, mina, tuja mina uchijun uchiji wegantu agtina nunú batsamsatnun susatjai tusa juju nugkan anagtuauwa nunú Apajuí niina aentsjin nayaimpinmayan emtikak awemattawai. Nuadui mina uchijun nuwe atinuk nii yaimpasmatai juki itaattame.
GEN 24:8 Untsu nuwa amijai minitan dakitakuig, wi tajam duka amek agkan juwaktatme. Tujash ¡makichkish mina uchijuk awi jukimek emaipa!” tiuwai.
GEN 24:9 Tusa tima nunú inak niina apuji Abrahaman bakui wakentin uwejen yununak pujus chichaak: “Dekas ame mina tujutam nunak imatiksanuk umiktajai”, tiuwai.
GEN 24:10 Nuna tusa niina apuji wajiji aidaunmayan, shiig pegkeg aidaun etegkeg nuwa susatnun, tuja nuwa patayi aidau susatnunashkam jukiuwai. Dutikak nuigtushkam niina apuji tagkujinian diez camellon jukiuwai. Dutika juki Mesopotamia nugkanum Nacora yaaktajin weuwai.
GEN 24:11 Nunik wea weakua yaaktanum jegauwai, tujash eke wayatsaig etsa akagu. Nuniai nuwiya nuwa aidau yumin aimainak yumigmatnum shimuidau. Nuninai nunú inakshakam camello aidaun ayamtikak yumigmatnum ayaunas batsasui.
GEN 24:12 Dutika nuwi wajas Apajuín aujak: “Mina apujun Abrahaman ememattai Apajuí Tuke Pujuuwah, wait aneasam yamai mina apug Abraham wait anenjata, dutikakum minash shiig pegkegnum wekaegas wakitkiti tusam yainkata.
GEN 24:13 Tuja juwiya nuwauch aidau yumin shikinak mininai, juju yumigmata juwi ayaumsan pujustajai.
GEN 24:14 Nunikan pujai nuwauch yumin shikika waketkui: ‘Wait aneasam anú yumi aimka juki weam nunú apusam shikisam ajampusta uwagtajai’ tai, nii aijak: ‘Pai uwagta, nuniakmin amina camellojum aidaunash aaktajai, tusa tujuttata nunú, dekas Isaaka nuwe atin ame etegkamu ati. Nunú betek uminkamtai, ame mina apug wait anentamunak shiig wika dekattajai’ ”, tiuwai.
GEN 24:15 Tusa Apajuí augbaun eke ashimtsaig, makichik nuwauch yumi aimtain yanas minaun wainkauwai. Duka Rebeca Betuela nawanji aajakui. Betuelak Abrahama yachi Nacoran uchiji Milcáyai akiamu aajakui.
GEN 24:16 Rebecak shigmauch, nuigtush makichik aentskesh takaschamu aajakui. Nunú nuwa yumi shikitaijin apujus yumi aimak wakitki wetatman,
GEN 24:17 Abrahama inakeshkam tupikatki jegantun chichajak: “Wait aneasam, minash yumi machik ajampusta uwagtajai”, tiuwai.
GEN 24:18 Tusa tama: “Ayu uwagta apuh”, tiuwai. Nuna takug yumi aimtaijin apujus susauwai, dutikam niishkam uwajui.
GEN 24:19 Nunikmatai Rebeca chichajak: “Amina camellojum aidaunash yumin shikikan susatjai dita wakegamun uwagtinme” tiuwai.
GEN 24:20 Tusa waujus yumi aimka takakbaujinak tagku amutainum yajatua ukuak, tupikaki kuashta yumin shikika ashí tagku aidau umumainun aimjukui.
GEN 24:21 Imanitai inakak takamtak wajas dii wajau, dekas juwashit Tuke Pujuu etegkamush tusa nuna ejetatus.
GEN 24:22 Camello yumin uwakagmatai, makichik oro dujinum nenatai najanamun seis gramo kijinji ajamun juki Rebecan detuauwai. Dutika nuigtushkam jimag kuntunum patakumtain oro najanamun cien gramo kijinji ajamun juki nunashkam susauwai.
GEN 24:23 Nuna susa iniak: “Wait aneasam tujutiah ¿amesh yana nawanjiyaitpa? ¿Amina apa jenish agkanchaukai wi mina aentsug aidaujai kanumainush?” tau.
GEN 24:24 Tusa tama nii ayaak: “Wika Nacor Milcáyai Betuelan akiauwa nuna nawanjiyaitjai.
GEN 24:25 Iina jenig atum kanumainuk awai, nuigtushkam chijichi camello yumainchakam kuashat awai”, tiuwai.
GEN 24:26 Tusa timatai nii Apajuí segamunak ashí imanisag uminkamtai, tikishmag pujus Tuke Pujuun emematak:
GEN 24:27 “¡Tuke Pujuu mina apug Abrahama Apajuíjig pegkegnum chichagtai atin ati! Dekas amek mina apug wait anentau asam anagkuamugmek umitskek idaisachume. Ame minashkam jinta inaktugsam, mina apug Abrahama patayin itajuaume”, tiuwai.
GEN 24:28 Aatus inak Apajuíjai chichaak pujai, Rebeca tupikaki niina dukuji jeen jegaa nuna pachis dukujin ashí ujakui.
GEN 24:29 Tusa etsegkamtai Rebeca umayi iwai Labán nunú aents yumi aimtainum ayaumas pujaun wainkatatus tupikaki weuwai,
GEN 24:30 wagki niina umayi kuntunum patakumtain dujinum nenataijai ayatak orok najanamu susamun wainkau asa. Tuja nuigtushkam Rebeca chichaak: “Nunú aents minak aatus tujutmae”, tusa etsejun antuku asa, nunú aents yumi aimtainum ayaumas camellojin batsas pujaun shiig wainkatatus wejiuwai.
GEN 24:31 Nunik jegantun, chichajak: “¿Wagka agaash pujame? Amek Tuke Pujuu pegkegnum yumigjamuitme, anui pujutsuk wegajai mina jegajui wemi. ¡Wi ame kanumainnak amina camellojum batsamsatin aidaujai umikmajai!”, tiuwai.
GEN 24:32 Tusa tima ayu tusa jega weuwai. Nunik jegamtai, camellonum waji aidau pataja ejegamun ashí Labán akaja ijumag duwi camellon ayujauwai. Tuja nuigtushkam yumin shikika nunú inakan, niijai yujaujai susauwai nawen nijaktinme tusa.
GEN 24:33 Nuna dutika, yutain inajuk umika apujtusui. Dutikamtai Abrahaman inake chichaak: “Eke wi chichaman tumain ajuta nuna amina ujatskek yumaitsujai”, tiuwai. Tama: “Ayu, waji tame tita”, tiuwai.
GEN 24:34 Timatai inak chichaak: “Wika Abrahaman inakegaitjai.
GEN 24:35 Mina Apug Abrahamnak Tuke Pujuu shiig kuashat pegkegnum yaigkui. Dutikak uwijan, bakan, platanash, oronash, inak aishmag aidaun, inak nuwa aidaujai, nuigtu camellon, burro aidaun aatus ashí susa wiakuch awajsae.
GEN 24:36 Tuja niina nuwe Sarashkam muumpatnum uchin uchigmatkabi. Mina apujuk niina wajiji aidaunak, juka mina uchigdau agtinai tiuwai.
GEN 24:37 Nunú mina apug wi chicham umiktinun chichagtak: ‘Mina uchiju nuwe atinuk Canaán nugkanum wi pujag juwiya nuwak egatkaipa,
GEN 24:38 juwiyag egattsuk dekas mina apaju patayin wetá, nunikam nuwiya mina uchiju nuwe amainuk egatkata’, tusa tujutmae.
GEN 24:39 Tujutkui wi ayaakun: ‘Mina apujuh, ¿tujash nuwa wijai minitan dakitakuish itugkattajah?’ timajai.
GEN 24:40 Tusa tai nii mina aijak: ‘¡Apajuín wi emematkun umijag nunú, niina aentsji nayaimpinmayan emtika awemattawai, wagki nii uyuntamsamtai pegkegnum wekaesamnum tusa! Duwi amek mina uchiju nuwe atinuk yupichu mina apaju patayinia jukittame.
GEN 24:41 Untsu ame mina pataajui jegaam nuwa sumamin sujitjamkagmataig, wi ame chicham umiktinun tajam duka agkan juwaktatme’, tujutmae.
GEN 24:42 “Tusa tujutiu asamtai, yamai yumi aimtainum taa wajasan, Tuke Pujuu mina apujun Apajuíjiya nuna augkun: “ ‘¡Amesh dekas minash shiig pegkegnum wekagas nii dutikatag tabaunak betek umika wakitkiti tujutkumek yainkata!
GEN 24:43 Tuja nunú betek uminkuig wi yamai juju yumi aimtainum wajag juwi wajasan, nuwauch yumi shikik waketkui wi chichagkun: “Wait aneasam yumi shikikam machik ajampusta, uwagtajai”, tusan tai,
GEN 24:44 nii aijak: “Ayu, uwagta, nunikamin camellojum uwagtinnash shikigkatjai”, tusa tujuttata nunú dekas ati ame mina apujun uchiji nuwe atin egatkamuk’, tusan timajai.
GEN 24:45 Tusan Apajuíjai chichamunak eke ashimtsaig, Rebeca yumi aimtaijin yanaki midaun wainkamjai. Nunik yumi akaetuki shikika iwakmatai, wi niina chichagkun: ‘Minash wait aneasam yumi ajampusia uwagtajai’, timajai.
GEN 24:46 Tusa tai ayu tusa, yumi aimka juwamujin akaki apujus chichagtak: ‘Amea uwagta, nunikamin amina camellojum aidaunash yumin shikigkan aaktajai’, tusa mina yumin sujus idaitak, mina camellog aidaunashkam dutiksag susame,
GEN 24:47 dutikamtai duwi wi niina iniakun: ‘¿Amesh yana nawanjiyaitpa?’ tusan tai nii aijak: ‘Wika Nacoran uchiji Betuel Milcáyai akiinauwa nuna nawanjiyaitjai’, tujutmae. Timatai niina nujiin nenatain detuamjai, tuja nuigtu jimajan kuntunum patakumtain patakuamjai.
GEN 24:48 Nuna dutikan nuwig tikishmaja pujusan Tuke Pujuun emematmajai, wagki Apajuí mina apug Abrahaman ememattaiya nunú minak jintan inaktujus, mina apug Abrahama uchiji nuwe atinun niina patayi nawanji pujamunum itajuau asamtai.
GEN 24:49 Nuadui yamai atumesh dekaskenum tsanumtsuk mina apug Abraham tibaun ujajim nunú tujuttajum. Untsu atsa dutikmaitsujai takugminig wi anentaimsatjai wajinak dutikatja”, tiuwai.
GEN 24:50 Tutai Labán Betueljai niina ayaak: “Juka ashí Tuke Pujuu wakegamua nunuwai, nuadui iik ayu tusaikish, nuniachkuish atsa tusaikish tumaitsuji.
GEN 24:51 Pai nijah, juwai Rebecak, juju jukijum wetajum. Amina apugmi uchijiya nuna nuwe ati. Tuke Pujuu wakegamua nunisag uminkati”, tiuwai.
GEN 24:52 Tusa tutai Abrahaman inake tikishmag nijayin nugkan antig pujusui Tuke Pujuun emematak.
GEN 24:53 Apajuín ememati idayak, kuashat waji takatai akik aidaun, plata najanamu aidaun, oro najanamu aidaun, tuja jáanch nugkutai aidaunashkam juki Rebecan susauwai. Dutika nuigtushkam niina umayin niina dukujin aatus waji aidaun susauwai.
GEN 24:54 Nuna dutikai aents niijai uyuunis yujauk betek ijuntujag yutain yuwawag, umutnash uwajag kajigkajui. Nunik tsawainak nantakiag nunú inak chichaak: “Wisha yamai wakitkitjai mina apuju pujutaijin”, tiuwai.
GEN 24:55 Tutai Rebeca umayi dukujijai chichainak: “Eke yamaikik Rebecak jukipa, dakasta jutijai diez tsawan pujusti, nunik duwi atumjai weti”, tuidau.
GEN 24:56 Tujash inak ditan ayaak: “Nuigtuk minak emetjuawaigpajum. Tuke Pujuu minak pegkegnum wekaesati tusa tujutbaunum shiig umikjai, nuadui wika mina apuju pujutaijin wakitkitag tajai”, tau.
GEN 24:57 Tusa tutai dita aínak: “Jasta, Rebeca untsuka dekajuami wajintig”, tuidau.
GEN 24:58 Tusag Rebecan untsukag itan iniinak: “¿Amesh juju aentsjai wetasamesh wakegamek?” tama, nii aimak: “Ehe wetatjai”, tiuwai.
GEN 24:59 Tusa timatai Abrahama inake shimamunum Rebecan, tuja nuwa nii uchuch asamtai kui kuitamkawa tsakapajua nujai akupkajui.
GEN 24:60 Dutikainak, Rebecan pegkegnum yumigkinak aatus tiajui: “Iina umayi yamai akupkami: ‘Chah, ubajuh, ¡Amek shiig kuashat aentsun dukujimtai atin ata! ¡Nuigtushkam amina uchijum wegantu aidauk, ditá shiwaajin depetkatin atinme!’ tusa wakegaji”, tiajui.
GEN 24:61 Aatsa pegkegnum yumigjam, Rebeca niina inake nuwa aidaujai camellonum pekamiag, Abrahaman inake wetai niijai shiyakajui. Aatus Abrahama inake Rebecan juki wakitkiuwai.
GEN 24:62 Tuja Isaakak Néguev nugkanum pujujakui. Nuniayatak makichik tsawantai yumigmat “Iwaku pujuuwa nunú minak waitui” tutainum weuwai.
GEN 24:63 Nunak nunikui wagki tuke ayamak Apajuín aujak wekaesatatus. Nuwi wekagu pagkas niimsatakama camello miniagtatman wainkauwai.
GEN 24:64 Tuja Rebecashkam niimkama wainkauwai Isaakan, nunik camellonum eketu akaikiuwai.
GEN 24:65 Nunik akaiki inakan iniak: “¿Aush yaita ikama awiya ii weamunmanini mina dusha?” Tusa iniam, inak ayaak: “Auk mina apujui”, tiuwai. Tima jáanchin juki dukumak yapiin ejaka wajasui.
GEN 24:66 Nuniai inak Isaakan igkug nii wekaesa dutikamujinak ashí ujakui.
GEN 24:67 Dutikam Isaac Rebecan juki niina dukuji aajakua nuna aakjin awayauwai, dutika nuwi nuwatkauwai. Aatus Isaakak dukuji jakamtai, wake besemag pujau Rebecan aneak anentain ichichiajui.
GEN 25:1 Abraham tikich nuwa Cetura daagtinun jukiuwai.
GEN 25:2 Dutika nunú nuwanum imajin uchijin akigkui: Zimrám, Jocsán, Medán, Madián, Isbac, Súah, aatus.
GEN 25:3 Jocsán akiauwai Sebánkan Dedánjai. Untsu Dedánkan uchiji wegantu aidauk: Asureo, letuseo, leumeo aatus aajakui.
GEN 25:4 Tuja Madiágka uchijishkam: Efá, Éfer, Hanoc, Abidá, Eldaá aatus aajakui. Ashí juju aina juka Cetura uchiji wegantu aajakui.
GEN 25:5 Tujash Abrahamak niina wajiji aidaunak ashí niina uchiji Isaakan susauwai.
GEN 25:6 Tuja tikich nuwanum akigbau aidaunak ayatak anenjauch wajichin susa, Isaac pujamun ukumtiki atushat ishiakui. Tuja nigka nuwig pujayatak nugka etsa jiintaiya nuni ishiakui.
GEN 25:7 Abrahamak ashí ijumjamak ciento setenta y cinco mijan pujusui.
GEN 25:8 Nunik shiig múuntuch wajas, jakauwai. Nunikmatai ukusaju ainawai.
GEN 25:9 Nunik jakamtai, niina uchiji aidau Isaac Ismaeljai jukiag Efrógka nugke Macpelá Mamrenum etsa minitaiya nuni awa nuwi ukusajui.
GEN 25:10 Nunú nugkanak Abraham hitita aents aidaun nugken sumakua nuwi niina nuwe Sara ukusbaunmak ayaunas ukusajui.
GEN 25:11 Abraham jakamtai, niina uchiji Isaac yumigmatan daaji “iwaku pujuuwa nunú minak waitui” tutainum ayaumas pujaun, Apajuí pegkegnum yumigjauwai.
GEN 25:12 Sara inake egiptunmaya nuwa Agar aajakua nuwi Abraham Ismaelan akiauwa nuna uchiji wegantu aidauk:
GEN 25:13 Nebaiot aajakui iwaiji, nuwi patatkau ainawai: Quedar, Adbeel, Mibsam,
GEN 25:14 Misma, Duma, Masá,
GEN 25:15 Hadar, Temá, Jetur, Nafis, Quedmá aatus.
GEN 25:16 Juju ainawai Ismaelan uchiji doce aajakua duka. Juju aina juka maki makichik nugkentin aakan aakmajag yaaktamkajui. Dutikawag nunú yaakta daajinashkam dita daajinak adaijau ainawai. Dutikawag maki makichik dita yaaktajin apuji wajasaju ainawai.
GEN 25:17 Ismaelak ciento treinta y siete mijan pujus, jakauwai, nunik jakamtai ukusajui.
GEN 25:18 Nunikmatai nii wegantu aidauk nugka Havilá tutai, Shurjai niniaku awa nuna ejapeen, jinta asirianum juwaki Egipto wetaya nuwi ditá yachi aidau dakitamaitak batsamsajui.
GEN 25:19 Jujuwai Abrahama uchiji Isaac pachisa augmattsamu.
GEN 25:20 Isaac cuarenta mijanji ajamu asa, Betuela nawanji Rebeca Labágka umayi arameo aents aidau, Padán-aram batsamajaku aina nuwiyan nuwatkauwai.
GEN 25:21 Rebeca kaga asamtai, uchi akiatjai tusa Isaac Apajuín senchi segauwai. Tusa segam Apajuí Isaakan antugkauwai, nuadui Rebeca ejapjukui.
GEN 25:22 Tuja jimag uchi asa initak egkemsag maanidau. Imaniagtai Rebeca nigki anentaimas: “Juju imaninakui, wika iwaku pujutnak dakitajai. ¿Wagka minash jusha jutijawa?” tusa Apajuín iniasui.
GEN 25:23 Tusa iniam Tuke Pujuu ayaak: “Amina ampugminig jimag uchi egketui, nunú akiinawag atakea duwi yujakag maaniawagtinai. Nuadui uchik eke akiintsuk initak egkemsag maaninawai. Tikichia nuna aentsji ima kuashat agtinai. Untsu iwaiya nunú yachi awanin umigtinai. Nuni kanakagtin asag imatijamainawai”, tiuwai.
GEN 25:24 Tusa tima pujus tsawan nii uchigmaktin jegamtai jimajan uchigmakui.
GEN 25:25 Yama nagkamchak uchi jiinkiuwa duka intashi kapantu uje wajakin akiinauwai. Nuna adaikauwai Esaú.
GEN 25:26 Nuniai tikishchakam patatkau, niina yachi Esaú sagkanin achitkau akiinauwai. Nuniku asamtai, nunak Jacob adaikauwai. Juju uchi aidaun jimagma Rebeca uchigmakua nunak, Isaakan mijanji sesenta ai uchigmakui.
GEN 25:27 Nunú uchi aidauk mai muumpajajui. Esaú kuntin mautan yacha aajakui, untsu Jacob batajuch aajakui, niinak ayatak jega pujut shiig awagmajakui.
GEN 25:28 Isaakak Esaún ima senchi anejakui, wagki egakbaun yuu asa, untsu Rebeca Jacopan ima senchi anejakui.
GEN 25:29 Makichik tsawantai Jacob yutain inajak pujai, Esaú kuntinun maatatus weu pimpiki minau.
GEN 25:30 Nunik minis Jacob inajak pujaun wainak chichajak: “¡Wait aneasam minash anú yutai pachimjam kapantu emam inajam nunú ajamjusta, nujantai jajai!” tiuwai. Nuadui Esaú tawa nunak kapantu taku, tawai.
GEN 25:31 Tusa segam Jacob Esaún chichajak: “¡Kame amesh yapajakmek, eke yutain amatsaig ame iwai asam jumainaitam nunú mina ashí sujusta!” tiuwai.
GEN 25:32 Tusa tama Esaú chichaak: “¡Nijah, wi iwai asan jumainaitag dusha, waji pegkegnumak yainkati! ¡Nuna sujimaknuk nujantai jakattag jama! ¡Duka dekas ame jukitin ata!” tiuwai.
GEN 25:33 Timatai Jacob ayaak: “Dekas takumek yamaikiuchia juwik ame tame nunú umiktinjum chichaakum: ‘Duka dekas ame jukitin ata’ tusam tujutta”, tau. Tusa tama Esaú chichaak: “Nunak dekas tajai”, tiuwai. Nuni susauwai Jacopan ashí nii iwai asa jumain aidaunak.
GEN 25:34 Tusa tima Jacob, Esaún pagkan lenteja pachimja inagkamujai susauwai. Dutikam nuna yuwa, umutainashkam uwag uminak weuwai. Tuja nii iwai asa jumainjinak puyatjachu asa, dutika sujuk niig wainak juwakui.
GEN 26:1 Yaunchuk Abraham iwaku pujai, yapajut tepeauwa nuna nagkaesau, Isaac pujusmataishkam yapajut tepeauwai. Nunikmatai Isaac yaakat Guerar filisteo aents aidaun apuji, apu Abimelec pujamunum weuwai.
GEN 26:2 Nuwi jegaa pujaun, Tuke Pujuu wantintuk chichajak: “Egiptunmak wepa, dekas wi amina titatjam nuwi weme pujusta.
GEN 26:3 Tuja yamaikik juju nugka juwig pujusta, wi aminak kuitamkattagme. Wi aminak pegkegnum yumigsattagme. Tuja amina uchijum wegantu aidaun ashí juju nugka aina juna susattajai. Wi amina apa Abrahaman anagkuawaitag nunak, nuni umiktatjai.
GEN 26:4 Amina uchijum wegantu aidaunak nayaimpinum yaya dekapamainchauwa iman awajsattajai. Dutikakun juju nugka junash ashí ditanak susattajai. Tuja nuigtushkam, ashí tikich nugkanmaya aidaush amina uchijum wegantu aidaunum yunumas pegkeg yumigkin jukiagtinai.
GEN 26:5 Nunak dutikattajai, wagki wi Abrahaman mina chichameg, wi jintinjam jujai betek umikta tusa tibaunak imatiksag umigtuku asamtai”, tiuwai.
GEN 26:6 Tusa tima Isaac Guerarnumak pujusui.
GEN 26:7 Nunik pujaun nuwiya aents aidau Rebecan pachis: “¿Jusha yaita?” tusa inidau. Tusa iniam Isaac mina nuwajui tutan ishamak: “Mina ubajui”, tiuwai. Nunak tiuwai wagki Rebecak shigmauch asamtai niina shigmatin juinak mantuawainum tusa.
GEN 26:8 Kuashat tsawan nagkaemai Abimelec makichik tsawantai niina jeen wajasa niimtainum niimkama Isaac niina nuwe Rebecan achika wasugtatman wainkauwai.
GEN 26:9 Dutika wainak Abimelec Isaakan untsuka itan chichajak: “Dekas au nuwa amina nuwemiapih. Nuniaish, ¿wagka mina ubajui timaume?” tau. Tama, Isaac ayaak: “Niina juinak mantuawainum tusan timajai” tiuwai.
GEN 26:10 Tutai Abimelec chichajak: “¿Wagka jusha jutikagtame? Mina aentsug aina nuwiya makichkikesh amina nuwemin aikauwaitkuig, amek jutiik pegkegchau takasua iman ekagtumain awajkagtukume”, tiuwai.
GEN 26:11 Nuna tusa ashí niina aentsji aidaun chichajak: “¡Juju aentsun waitkauk, tuja niina nuwenakesh waitkauk mantamnattawai!” tiuwai.
GEN 26:12 Tuja nunú mijantin Isaac Guerar nugkanum pujus ajakan ajakbauwai, dutika Apajuí yayasam ¡shiig kuashat! juukui.
GEN 26:13 Imatikau asa ¡shiig kuashat wajigtin! wiakuch wajasui.
GEN 26:14 Uwigjish, bakajish kuashat, nuigtush inake aidaush shiig kuashat ajujakui, iman asamtai, filisteo aents aidau kajejuidau.
GEN 26:15 Dutikaidau asag Abraham pujusmatai, niina inake aidau yumigmat aidaun taimu aina nuna yututkajui.
GEN 26:16 Tuja Abimelecshakam Isaakan chichajak: “¡Wetá juwi pujam duka, amek jutii nagkaekagtasu shiig wiakuch wajasume!” tiuwai.
GEN 26:17 Tusa tima Isaac jiinag Guerar nugka pakajin shiyakag nuwi batsamsauwai.
GEN 26:18 Nuwi niina apaji iwaku pujusa yumigmat aidaun tainiuwa nuna apaji jakamtai, filisteo aents aidau yutukagbaun ataktu tai iwajauwai. Dutika iwajug, nii apaji adaikamu aajakunak dutiksag niishkam adaikauwai.
GEN 26:19 Makichik tsawantai Isaaka inake aidau nugka pakanum yumigmatan tau batsamkamá yumi pukuni jiinun ejeyu ainawai.
GEN 26:20 Tujash nuna wainkagmatai, Guerarnumia aents uwijan kuitamin aidau, Isaaka uwigjin kuitamin aidaujai: Juka yumik iinui tusag maanitkajui. Nuadui Isaac nuna adaikauwai “Esek”, wagki nuna maanitkaju asag.
GEN 26:21 Nunikag Isaaka inake aidau, tikichin yumigmatan tainiajui, dutikawagmatai nunashkam dutiksag maanitkajui. Untsu Isaac nuna adaikauwai “Sitna”. Nunak “shiwagmagat” taku tawai.
GEN 26:22 Dutika ukuak Isaac atushat weuwai, nunik nuwi tikich yumigmatan tainiajui. Tujash nunak maanitkachaju asag, adaikajui, “Rehobot”. Nunak “agkanmagamu” taku tawai. Nunak “yamaik Tuke Pujuu agkanmitkagmae juju nugka juwi takainak emkatnume” taku tuu adaikauwai.
GEN 26:23 Nuna ashí umika nuwi pujau, Isaac bershebanum pujustatus weuwai.
GEN 26:24 Tuja nunú kashia duik Tuke Pujuu Isaakan wantintuk chichajak: “¡Witjai amina apa Abrahama Apajuíjinuk, makichkish ishamkagtukaipa, wi aminak kuitamjame! Abraham mina chichamjun umigtukua duwi aminash aikasnuk pegkegnum yumigsan, amina uchigmin uchiji wegantu agtinashkam ikauntuktatjame”, tiuwai.
GEN 26:25 Aatsa tima kuntin maa patasa apeaku Apajuí ememattinun nuwi najanauwai, dutika nuwi Apajuín niina daajin adaitus emematiuwai. Dutika nuwi aakmag pujusajui. Tuja nuwi niina inake aidau tikich yumigmatan tainiajui.
GEN 26:26 Makichik tsawantai Abimelec Guerar pujau Isaakjai chichastatus weuwai. Nuwi wetai niina kumpaji Ahuzat, Ficol suntajan apuji aajakua nujai uyuuniajui.
GEN 26:27 Nunik kaunawagmatai Isaac chichajak: “Atum mina dakitjakjum, atumin nugkemin pujai jiigkijum ajapjuamujum dusha, ¿wagka wijai chichastasagmesh minagme?” tau.
GEN 26:28 Tusa tama dita aínak: “Iik dekaji Apajuí amina kuitamjama duka, nuadui anentaimsa dekas iish amijai mai ikdaisa chicham umigdaikatna nunú chichasmi tusa minaji. Tuja ii tabauk jujuwai:
GEN 26:29 Amesh jutiish pegkegchau awajkagtukaipa, wagki iik amek waitkatsuk, ayatak pegkegnum kuitamka apusa jiyakuish utugchat atsaunum agkan jiiki awemabiagme. Tuja aminak yamai Apajuí pegkegnum yumigtamsae”, tiuwai.
GEN 26:30 Tusa aatus chichasag, Isaac yutain umikmatai nuna yuwinak, umutain umuinak jiistamawajui.
GEN 26:31 Nunik tsawajag kashikmas Isaac, ditajai mai ikdaikag chicham umigdaikagtinun chichasag umikajui. Dutika umikag Isaac ditan kumpamak awakjauwai.
GEN 26:32 Tuja nunú tsawantinig Isaaka inake aidau yumigmatan tagak batsatu yumin chigkawag, yumi chigkaji tusag ujaktatus kautuawajui.
GEN 26:33 Nunikagmatai Isaac nunú yumigmata daajin Sebá adaikauwai. Nuadui nunú yaakta daajig Beersheba tama awai.
GEN 26:34 Esaú cuarenta mijanji ejeyi pujus, hitita aents Beerí aajakua nuna nawanjin Juditan nuwatkauwai. Nunik pujus tikich nuwa Basemat daagtin tikich hitita aents Elón aajakua nuna nawanjinashkam nuwatkauwai.
GEN 26:35 Juju jimag nuwa aina nuna pujutji pegkegchau asagmatai nuna diisag, Isaac Rebecajai shiig pujuschamin wake besemag pujujakajui.
GEN 27:1 Isaakak shiig muumpakiu asa wainmatnash wainmamainchau wajas pujujakui. Nunik pujau makichik tsawantai niina uchiji iwain untsuka chichajak: “¡Uchuchih!” tau. Tusa untsuam nii ayaak: “Juwi pujajai apawah, waji tame, tujutta”, tiuwai.
GEN 27:2 Tama nii ayaak: “Nijah, wika yamaik shiig muumpakjai, pachiachbaunum jamainaitjai.
GEN 27:3 ¡Nuadui kuntin mautaijum jukim ikam weme kuntin maam,
GEN 27:4 shiig pachimjam, mina yutaijuama nunú yutai pegkeg inagkam itagtuata, yuwatjai! Nuna yuwakun wi eke jatsug duwik amina pegkegnum yumigsatjame”, tiuwai.
GEN 27:5 Nuna aatus Isaac tabaun Rebeca antukui. Nunik Esaú apaji yuwatnun kuntinun egak wematai,
GEN 27:6 uchiji ekeu Jacopan chichajak: “Antukta nijah, amina apa yamai amina yatsumjai chichaak:
GEN 27:7 ‘Kuntin maata, dutikam yutai pegkeg pachimja inagkam itagtuata, nuna yuwan, eke jatsuk Tuke Pujuush antai amina pegkegnum yumigsatjame’ taun antukmajai.
GEN 27:8 Nuadui uchuchi wi titatjam nunú shiig antukta:
GEN 27:9 Wamak tagku batsamtain weme, jimag chivo tsakat pegkeg jukim itagtuata, wi wamak maan amina apa yaitaijiyama nuna pachimjan inagtuktajai.
GEN 27:10 Dutikamtai ame jukim ejetuata nuna yuwati, nuna yuwa nii dekas iwaaka awik, amina pegkegnum yumigtamsati”, tiuwai.
GEN 27:11 Tusa tama Jacob dukujin ayaak: “Tujash mina yatsug Esaún iyashig uje wajasuwe, wika aannuchuitjai.
GEN 27:12 Namputkama mina apag achigkama dekapjug, dushiktakpap jutijawa tusa, pegkegnum yumigtutsuk pegkegchaunum yumigtujai tajai”, tiuwai.
GEN 27:13 Tusa tutai dukuji ayaak: “¡Uchuchi amina pegkegchaunum yumigtamjamtaish duka minai juwakti! ¡Amek ayatak wi tajam duke umikta, nuniakum wamkesam weme, jimag chivo tsakat jukim itagtuata!” tau.
GEN 27:14 Tusa tima ayu tusa weji, jimag chivo tsakatan juki dukujin itajuauwai. Dutika itajuam nuna maa Isaakan yaitaijin imatiksag pachimag yutai pegkejan inagtukui.
GEN 27:15 Dutika umika, Esaú nugkutaiji jáanch dekas shiig pegkeg jegaa atatman juki, niina uchiji ekeun Jacopan anugjauwai.
GEN 27:16 Dutika nuigtushkam chivo duwapen juki, niina kuntujin pempenjauwai, dutikak, kuntujenchakam uje atsuju asamtai, nuwishkam anugjauwai.
GEN 27:17 Dutika nii yutai pachimja pegkeg inagkamun pagjai juki apajin susati tusa susauwai.
GEN 27:18 Dutikam nuna juki niina apaji pujamunum waya, chichajak: “¡Apawah!” tiuwai. Tama: “Juwi pujajai, ¿yaa uchijuitpa amesh?” tusa Isaac iniasui.
GEN 27:19 Tusa iniam Jacob ayaak: “Wika amina uchijum iwai Esaúwaitjai. Ame mina segatmaum nunak umikjai. ¡Wait aneasam nantakim juwi ekemsam yuwata wi kuntin maamua nunú, núnikam pegkegnum yumigtugta!” tiuwai.
GEN 27:20 Tusa tama, Isaac uchijin iniak: “¿Uchuchi itugsamea kuntinush wamkesmesh wakemkaume?” tau. Tama Jacob ayaak: “¡Tuke Pujuu Apajuí ame emematnum nunú minak yainkamtai, wamak igkugmajai!” tiuwai.
GEN 27:21 Tujash Isaac niina chichajak: “Ayu, ame dekas mina uchig Esaúwaitkumek adijtukta achikan dekapsatjame”, tiuwai.
GEN 27:22 Tusa tama Jacob apajin jegaantauwai, achijuk dekapjusti tusa. Nuna achika dekapes, Isaac chichajak: “Chichamjumek Jacopan chichamejai betekai, tujash untsu kuntujum Esaún kuntujiyai”, tiuwai.
GEN 27:23 Niina kuntujinig niina yachi Esaún kuntujijai betek uje wajakin asamtai, dekapjachui. Tujash pegkegnum yumigjattak,
GEN 27:24 ataktu awena iniak: “¿Dekas amesh mina uchig Esaúkaitam?” tau. Tama nii ayaak: “Ehe witjai, Esaúwaitjai”, tiuwai.
GEN 27:25 Tusa timatai niina apaji chichajak: “¡Ayu uchuchih, ame kuntin maa inagkamu sujusta yuwatjai, nuna yuwan pegkegnum yumigsatjame!” tiuwai. Tama Jacob ayu tusa yutai umikbaun juki apajin susauwai. Dutikak nuigtushkam umutai vino uva najanamun ejetuauwai. Dutikam Isaac nuna yuwa umutainashkam uwajui.
GEN 27:26 Nunik chichaak: “¡Uchuchih, juwi tantam kugkuntsata!” tiuwai.
GEN 27:27 Tama Jacob niina apajin kugkuastatus jegaantam, Isaac niina uchiji Esaún jáanchji kugkuntin dekapjujui. Nuna dekapjug pegkegnum yumigkiak: “Juju juni kugkua juka mina uchig emkaun kugkuntiyai. Ikaman kugkuntijai betekai, Tuke Pujuu aan yumigjamu asa.
GEN 27:28 ¡Uchuchi aminak Apajuí yumi nayaimpinmayan amastí, dutijamamtai amek nugkanum ajakmamesh trigo shiig kuashat juutnaitme, tuja vinoshkam umumain kuashat ajutjamtinai!
GEN 27:29 ¡Kuashat aents aidau aminak takagtamiagtinai, nuigtushkam nugka muunnumia aidaush ima aminak antugtamainak umigtamiagtinai! ¡Ame apu wajasamin, yatsumshakam amina umigtamtinai! ¡Amina pegkegchaunum yumigtamaidauk, ditashkam dutiksaik pegkegchaunum yumigkiam agtinai! ¡Untsu amina pegkegnum yumigtamaidauk, ditashkam dutiksaik pegkegnum yumigkiam agtinai!” tuu yumigjauwai.
GEN 27:30 Tusa pegkegnum yumigjam Jacob apajin pujau jiinki wegaig, Esaúshkam kuntinun maatatus weu tauwai.
GEN 27:31 Nunik niishkam apaji yaitaijin, yutai pegkejan pachimag inajuk, juki jegan apajin chichajak: “¡Apawah, nantakim, wi kuntinun maa inagtukjam nunú yuwata, núnikam pegkegnum yumigtusta!” tiuwai.
GEN 27:32 Tusa tama Isaac iniak: “¿Yaitpa amesh?” Tama: “Wika amina uchijum iwai Esaúwaitjai”, tiuwai.
GEN 27:33 Tutai, Isaac anentai jegagchauwai, nunik kujakjatun chichaak: “Tujash ¿ya minash kuntinun maa yutain umikash itagtuame? Nuna wika ame eke tatsminig ashí yuwamjai. Dutikan niina ashí pegkegnum yumigjamjai. Nuadui nii yamaik pegkegnum yumigjamu juwake”, tiuwai.
GEN 27:34 Tusa apaji tutai Esaú antuk, kajeka buutak: “¡Apawah, minash wait aneasam pegkegnum yumigtujiah!” tau.
GEN 27:35 Tusa tama Isaac ayaak: “Amina yatsum tajutua, tsanujug aminu pegkeg yumig atinuwe nunak ashí jujutjamkine”, tiu.
GEN 27:36 Tutai Esaú chichaak: “¡Awis niina daajinak Jacob adaikau ainatai! ¡Aniau asa jimajá tsanumag midau amainun atanjukne! Nagkamchakush wi iwai asa jumainun atanjukmae, tuja yamaish wi pegkegnum yumignamainjun nigki atanjukne. ¿Tujash mina yumigtumainuk makichkish ukugtuschaumek?” tau.
GEN 27:37 Tama Isaac Esaún ayaak: “Antukta nijah, wi Jacopan amina apujum ati tusan tijai, dutikakun ashí niina patayi aidaushkam niina umijin atinme, timajai. Nuigtushkam trigo aidaush, umutai vino aina nujai kuashat ajiti, timajai. ¿Tujash uchuchi yamaish aminash, itugkatjamki?” tau.
GEN 27:38 Tusa tama Esaú atak awagki segaak: “¿Apawah, makichkiuchikesh mina yumigtumainuk shiig atsugtamuak? ¡Minash apawah, pegkegnum yumigtujiah!” tusa senchi buutu.
GEN 27:39 Imattai Isaac niina chichajak: “¡Antukta nijah, amek atushat weme, juju nugka pegkeja juka ukuakum, nugka pegkegchaunum yumish yutachbaunum pujustinaitme!
GEN 27:40 Amek amina puyaajumjai depetmasam pujakum amina yatsum umigtinaitme, tujash ame senchijinkum nii umiju pujaum agkanmagatnaitme”, tiuwai.
GEN 27:41 Jacob kasagkamu asa, Esaú niina senchi kajegkauwai, wagki nii yumignamainun, apaji Jacopan susau asamtai. Nunik anentaimas: “Mina apajuk jatanak namput wajaschae, nii jakamtai agkan wajasan mina yatsug Jacobnak maatjai”, tiuwai.
GEN 27:42 Tusa chichaman umiamun Rebeca dekaa, Jacopan untsuka itan chichajak: “Antukta nijah, amina yatsum Esaú mantamatag tawai, ame nii yumignamainji atankiu asamin.
GEN 27:43 Nuadui uchuchi yamai antugtukta: Amek yamaik yaakat Harágnum tupikakta, núnikam mina ubag Labágka jeen jegata.
GEN 27:44 Nunikam amina yatsum kajegtamka nuna sakapai, nuwi niijai pujusta.
GEN 27:45 Ame atankim kajegtamka nuna tsagkugmatai, duwi wi chichaman akuptuktatjame, dutikamtai nunú dekaam wakitkim taamnum. ¡Dakitajai mina uchig maaninak mai jaka megkaekai! tusan”, tau.
GEN 27:46 Nuna tii idayak, Rebeca Isaakan chichajak: “Hitita nuwa, Esaún nuwe aina nuna pegkegchaujin shiig aneasan pujumainchau, jamain dekapeajai. Tuja juju hitita nuwa aidau Canaágnum pujuina juninjai Jacob nuwenkuig, wika jakatjastai”, tiuwai.
GEN 28:1 Nuna aatus Rebeca timatai, Isaac Jacopan untsuka pegkegnum yumigkig, nii umiktinjin chichajak: “¡Juju nugka Canaágka juwiya nuwajaig makichkish nuwenatin aipa!
GEN 28:2 Dekas Padán-aram amina apachjum Betuela jeen wetá. ¡Nunikam nuwi pujusam duku umayi iwai Labágka nawanji nuwatkata!
GEN 28:3 Apajuí ashí senchigtina nunú pegkegnum yumigtamsati, dutijamak nigki ame uchijum wegantunash shiig kuashat uyujkati. Imatikam nugka múun aidaunum batsamsagtin atinme.
GEN 28:4 Nuigtushkam Abrahaman pegkegnum yumigkiak anagkuauwa nuna amina amastí, tuja amina uchijum wegantu aidaunashkam dutiksag susati. Nuadui ii yamai juju nugkanum iina nugke ukuaku kauna batsatag juwig pujustin atinme, wagki Apajuí Abrahaman juju nugkan anagkuau asamtai”, tiuwai.
GEN 28:5 Aatus Isaac Jacopan chichajuk nugka Padán-aramnum akupkauwai. Dutikam Jacob niina dukuji umayi Labán pujamunum atushat weuwai. Labágkak arameo aents Betuelan uchiji aajakui.
GEN 28:6 Isaac Jacopan pegkegnum yumigkiak: Makichkish canaágnumia nuwajaig nuwenatin aipa, dekas Padán-aram weme nuwenata tusa tima,
GEN 28:7 niina apaji dukujijai tibaun umiak Jacob Padán-aramnum webaun Esaú dekauwai.
GEN 28:8 Aatus Esaú niina apaji canaágnumia nuwan dakitamun dekauwai.
GEN 28:9 Nuadui Abrahama uchiji Ismael pujamunum weuwai. Nunik nuwi jegaa, canaágnumia nuwa aidaun jimajan ayakiatak, Ismaela nawanji Mahalat Nebaiotan umayi aajakua nuna nuwatkauwai.
GEN 28:10 Jacob Beershebanum pujau jiinki Harán nugkanum weuwai.
GEN 28:11 Nunik wesa eke jegatsuk jintá etsa akaetai kanagtatus, kaya juki nuna atamjuk tepesui.
GEN 28:12 Nunik kanukma kajanum, watai jigkaka najanamu nugkanum awaja juki nayaimpinum iwakbaunum, nuwi Apajuín aentsji nayaimpinmaya aidau, nugka akagag, yaki wajag ataktu nugka akagag wajaidaun wainkauwai.
GEN 28:13 Tuja apu Tuke Pujuushkam niiyai ayaumas wajaun wainkauwai. Nunik wajas chichajak: “¡Witjai Tuke Pujuu, Apajuínuk, amina apachjum Abraham, nuigtu amina apa Isaac emematujaku aina nunuwaitjai! ¡Juju nugka juwi ame tepam junak amina, tuja amina uchigmin uchiji wegantu agtina nudau atinun amastatjai!
GEN 28:14 Dita aidauk kuashat yujakag, nugka yukukuntu dekapamainchauwa iman agtinai. Iman asag ashí nugka pampankag etsa minitaiya aatus, etsa akaetaijiya ajashkam, tsumujiya aatus, nujinmaninishkam ashí yujakagtin ainawai. Ashí aents nugkanum batsatuk aminí, nuigtu ame uchijum aidau wegantu agtina nuwishkam, pegkeg yumigkin jukiagtinai.
GEN 28:15 Untsu wi amijaig pujajai. Nuniau asan tuwig wekaetam nuniakminish wi kuitamkattagme, dutikakun awagkin juju nugka juwi itattajame. ¡Makichkish wi amina anagkuajam nunak umitskek idaisashtatjai!” tiuwai.
GEN 28:16 Tusa Apajuí tima Jacob shintaag, anentaimas: “¡Dekas Tuke Pujuuk juimpap pujawa, nuniaigkiap wika nunak dekachmaja!” tiuwai.
GEN 28:17 Nuna tusa senchi ishamkauwai, nunik anentaimas: “¡Juju nugka juka Apajuí etegkamu dekas shiig pegkegmai, juwi dekas Apajuí jeeg awai! ¡Juwi dekas nayaimpin waitijiya duka awai!” tiuwai.
GEN 28:18 Nunik kanag tsawak kashikmas nantaki, kaya nii atamjukbaujin juki inantai apujus, aceiten juki ukatuk, juka Apajuínu atin ati, tusa ukukiuwai.
GEN 28:19 Nunú nugkanum aajakui yaakat Luz daagtin, nuna Jacob yapagtua Betel adayak ukukiuwai.
GEN 28:20 Nunú nugkanum Jacob nii umiktinjin juna aatus tiuwai: “Apajuí mina uyuuntakug, wi yamai wetatag duwish nigki kuitamjak, wi yuwatnunash sujus, wi nugkumainnashkam sujustatui.
GEN 28:21 Tuja wi iwaku jatsuk pegkeg ataktu wakitkin mina apaju jeen taanuk, Apajuíya nuna emematkun umigkattajai.
GEN 28:22 Wi juna kayan awajain apusag juka, atakea duwish Apajuín jee tama atinai. Tuja Apajuíjuh, ame mina sujustinaitam nuwiyanak aminu atinun diezmon tuke amasnuke atinaitjai”, tiuwai.
GEN 29:1 Jacob Betelnum pujau ukuki, etsa minitaiya nuni weuwai.
GEN 29:2 Nunik wesa yumigmat taimunum ayaumas kampatum aents uwigjintin aidau, uwig nuwiyan yumin umin asagmatai, maki makichik ditá uwigji aidaun ijumag ayamainak batsatun wainkauwai. Nunú yumigmatak kaya múuntai dukukbau aajakui.
GEN 29:3 Tuja nuwi ashí uwig aidau tuwakmatai, uwijan kuitamin aidau nuna kayan ujakag yumin shikik dita uwigjin aajag, nuadui ataktu kaya juki dukukag ukujaku ainawai.
GEN 29:4 Nunú uwija kuitamin aidau nuwi batsatun Jacob wainak iniak: “¿Mina kumpag aidauh, atumesh tuwiya ainagme?” tau. Tama dita aínak: “Jutiik yaakat Harágnumia ainaji”, tuidau.
GEN 29:5 Tiagtai Jacob ataktu ditan iniak: “¿Atumesh Labán Nacoran uchijiya dusha wainchaukujum?” tau. Tama nii ayaak: “Ehe wainnuji”, tuidau.
GEN 29:6 Tusa tiagtai Jacob ataktu iniak: “¿Niish pegkejak puja?” tau. Tama uwija kuitamin aidau: “Ehe, Labágkak pegkeg pujawai. Nijah diisia, juwi Raquel niina nawanji uwijan yajuak minawai”, tiajui.
GEN 29:7 Tiagtai Jacob chichaak: “Etsa atushat awa nuniaigkik uwijak chimpia epenik ukumaitsui. ¿Wagka yumi aakjum duwi yajuakjum ataktu chijichin egakag yuwatnume tatsugme?” tau.
GEN 29:8 Tama dita chichainak: “Atsa dutikmaitsuji. Eke dakaji ashí uwig tuwakmatai, nuna kuitamin aidaushkam kaunamtai, duwi yumigmat kaya múuntai dukukmawa nunú ijuntuja shitaki ekeka, uwig yumi aaka nuadui shiyaktatji”, tuidau.
GEN 29:9 Aatus Jacob ditajai chichaak ijunai, Raquel niina apaji uwigji aidaun kuitamjin asa, uwijan saas tantauwai.
GEN 29:10 Nunik tatatman wainmawaik, Jacob yumigmatan jegantun, kaya múun apujtuam aun, shitaki eketuk, nigki yumi shikijuk niina dukuji umayi tagkujin aakui.
GEN 29:11 Nuna dutika Jacob Raquelan jegantun niina yapiin kugkuas kumpama shiig aneamunum buutiuwai.
GEN 29:12 Tuja Jacob chichaak: “Wika Rebeca uchiji Labágka awegaitjai”, tusa Raquelan ujakui. Tusa ujakam, Raquel tupikaki weuwai niina jeen apajin ujaktatus.
GEN 29:13 Nuna Labán antuk, niina umayi Rebecan uchiji asamtai, tupikatki jiintukiuwai kumpamatatus, nunik igkug pagkuk yapinum kugkuas kumpama duwi niina jeen jukiuwai. Dutikam Jacob niina diichjin ashí nii wajukaya tupikaki wekaewa nunak betek ujakui.
GEN 29:14 Dutika ashí ujakam Labán niina chichajak: “Amek dekas minak shiig pataajuitme”, tiuwai. Jacob makichik nantu Labágkai pujusui.
GEN 29:15 Nunik pujusmatai Labán Jacopan chichajak: “Amek mina pataag akumesh, tikima wainkamek takagtuk pujumaitsume. ¿Wajupa akigkati tusamea wakegame? nunú tujutta”, tiuwai.
GEN 29:16 Tuja Labágka nawanjig jimag aajakui: iwai daajig Lea aajakui, untsu ekeu daaji Raquel aajakui.
GEN 29:17 Leak imanikag shigmachu aajakui, untsu Raquel ashí niina iyashijai shigmauch aajakui.
GEN 29:18 Jacob Raquelan senchi wakejuku asa, chichaak: “Wika amina nawanjum ekeuwa nuna jukitag tau asan, takagsatjame siete mijadai”, tiuwai.
GEN 29:19 Tusa tutai Labán niina ayaak: “Tikich aentsun sumainaitag nuna dekas amina amastajai. Amesh jutijai pujustin ata”, tiuwai.
GEN 29:20 Tusa tima Jacob Raquelan jukitag tau asa siete mijan takasui. Tujash imaan mijan takakush niig Raquelan senchi wakegau asa, ujumchik tsawanta nunin diisui.
GEN 29:21 Nuna mijanan ejeyi Jacob Labágkan chichajak: “¡Yamai nawanjum sujusta, nuwatkatjai! Wi niina jukitasan imaan mijan takastajai tibaunak betek ejejai”, tiuwai.
GEN 29:22 Tusa tima Labán ayu tusa, ashí aents nuwiya aidaun ipauwai nawanji aishinbaunum jiistamatag tusa.
GEN 29:23 Tujash Labágkak kashi niina nawanji Lean juki ejetiuwai. Dutikam Jacob juki niijai kanajui.
GEN 29:24 Dutika nuigtushkam niina inataiji aidaun makichik Zilpá daagtinun Lean susauwai niina yaigtinun.
GEN 29:25 Nunik Jacob kanag tsawak, wainkauwai Leajai kanagbaun. Nuadui kajeka Labágkan chichajak: “¿Wagka minash jutijame? ¿Wi Raquelan jukitag tau asan amina takagsachmakjam? Dutikamu ayatkumesh ¿Wagka minash tsanujaume?” tiuwai.
GEN 29:26 Tusa tama Labán ayaak: “Juwiya aidautik iina nawanji iwai aishintsaigkik ekeuwa duka sujuchu ainaji.
GEN 29:27 Kame ii nuwenku tuke nunitaiya nunú makichik semana ejeta. Nunikamin ame siete mijan nuigtushkam takastajai takuminig, Raquelnashkam amastajai”, tiuwai.
GEN 29:28 Tusa tama Jacob ayu tusa makichik semanan ejeyuwai. Nunikmatai Labán Raquelnashkam susauwai.
GEN 29:29 Dutika nawanji Raquelan sujuk, nii inagtinun nuwa Bilhá daagtinun susauwai, niina yaigtinun.
GEN 29:30 Aatus Jacob Raquelan nuwatkauwai. Nunik niina ima senchi, Lean nagkesau aneau. Nunik pujus nuigtushkam siete mijan Raquel jukimunum Labágkan takajak pujusui.
GEN 29:31 Jacob Lean imatikas aneachun Tuke Pujuu wainkauwai. Nuadui Leanak Apajuí uchi uchigbau awajsauwai, untsu Raquelan uchigmachu ema apusauwai.
GEN 29:32 Tuja Lea ejapjuk aishmagkun uchigmakui. Dutika Rubén adaikauwai, wagki nuna uchigmak chichaak: “Wi wake besemag pujamun Apajuí waitkau asa wait anenjuje. Nuadui yamaik mina aishjuk anentatui”, tiuwai.
GEN 29:33 Nunik pujus ataktushkam patasag uchigmakui, dutika adaikauwai Simeón. Nuna uchigmak chichaak: “Tuke Pujuu mina dakitjuinamun dekau asa, minak tikich uchinash sujuse”, tiuwai.
GEN 29:34 Tuja nuigtushkam ejapjuk uchigmakui, dutika adaikauwai Leví. Nunak: “Yamaik mina aishjuk wijai ijunag pujuttawai, wagki kampatum uchin uchigmatkag duwi”, taku tiuwai.
GEN 29:35 Nuigtushkam ipak usumta nuna ejapjuk uchigmakui, dutika adaikauwai Judá. Nuna uchigmak chichaak: “Yamaik Tuke Pujuun ememattatjai”, taku tiuwai. Tuja Leak nunák uchigmak nagkankauwai.
GEN 30:1 Raquel Jacopa uchijin uchigmatchau asa, niina kai Lea uchigmatu asamtai kajejujakui, nuadui niina aishin chichajak: “Minash uchi sujusta, sujachkuminig jakattajai”, tiuwai.
GEN 30:2 Tusa tama Jacob Raquelan kajejuk chichajak: “¿Wikaitag Apajuín? Apajuí aminak uchinak amatsui”, tiuwai.
GEN 30:3 Tusa tama nii ayaak: “Nijah, untsu mina inakeg Bilhá nuwatkata; dutikawamin nii uchigmakmatai, nuna wi uchigmakmawa dutikan uchijimatjai”, tiuwai.
GEN 30:4 Tusa Raquel Jacopan niina inake Bilhájai nuweauwai, ikaa nuwe atinun. Dutikam Jacob Bilhán nuwatuk,
GEN 30:5 pujus ejapmitkakui, dutikam pujus Jacopa uchijin uchigmakui.
GEN 30:6 Nunikmatai Raquel chichaak: “Apajuín wi segamag nuna antugtuk pegkegchau takachbaun diigtus juna uchin midau atinun sujuse. Nuadui juju uchi daajig Dan atatui”, tiuwai.
GEN 30:7 Tuja ataktushkam Bilhá ejapjuk jimaja juna Jacopan uchigmatkauwai.
GEN 30:8 Nunikmatai Raquel chichaak: “Mina kaijun depetkatag tusan maa maaniakuan yamaik depetkajai, nuadui juju uchik Neftalí atatui”, tiuwai.
GEN 30:9 Tuja Leashkam uchin uchigbauwaitak, uchigmamainchau dekapeak, niina inake Zilpán Jacopan susauwai, niina ikaa nuwe atinun.
GEN 30:10 Dutikam pujus Zilpáshkam ejapjuk Jacopan uchigmatkauwai.
GEN 30:11 Nunikmatai Lea chichaak: “¡Yajau jukichjai! Nuadui juju uchi daajig Gad atatui”, tiuwai.
GEN 30:12 Nuigtushkam tikichin uchin Jacopan uchigmatkauwai.
GEN 30:13 Nunik uchigmakmatai Lea chichaak: “¡Chah, shiig aneajai! Yamaik tikich nuwa aidau chichagtuinakush, Leak shiig aneas pujawai tujutiagtinai. Nuadui juju uchi daajig Asher atatui”, tiuwai.
GEN 30:14 Tsawan trigo juutai jegamunum, makichik tsawantai Rubén ikam weuwai, nunik nuwi wekagas yujág mandrágora tutain wainak juuka niina dukuji Lean itajuauwai. Nuna Raquel wainak Lean chichajak: “Minash wait aneasam uchijum mandrágoran juuka itagtama nunú ajampusta”, tiuwai.
GEN 30:15 Tusa tama Lea ayaak: “Ame mina aishjuk atanjukmayum duke nagkanmainchauk, ¡yamaish mina uchig yujág mandrágoran juuka itaa dusha atanjuktag tame!” tau. Tama Raquel ayaak: “Kame amina uchijum yujág mandrágoran juuka itaa anú minash sujusta, juju kashia duwi amesh Jacobjai kanagminum”, tiuwai.
GEN 30:16 Tusa tima, nunú kashia duwi Jacob ikam weu wakitki minittaman, Lea jiintuki igkug chichajak: “Yamaik amek wijai kanagtatme, wagki mina uchig mandrágoran juuka itagtuamtai nujai sumakjame”, tiuwai. Tusa tima Jacob Leajai kanajui.
GEN 30:17 Nunik nii Apajuí segamunak betek antugkamu asa ejapjuk, cinco uchia nuna uchigmakui.
GEN 30:18 Nuna uchigmak Lea chichaak: “Juju uchia juna daajig Isacar atatui, wagki wi mina aishjun mina inakjujai nuweamag, duwi minak Apajuí juju uchin sujuse”, taku tiuwai.
GEN 30:19 Tuja nuigtushkam Lea Jacopan seis uchia nuna uchigmatkauwai.
GEN 30:20 Nunik chichaak: “Junak Apajuí minak shiig anenjus wainkauch sujuse. Nuadui yamai mina aishjuk ima shiig eme anenjittawai, wagki seis uchin uchigmatkag duwi. Nuadui juju uchia juka Sabulón atatui”, tiuwai.
GEN 30:21 Duwi pujus Lea inagnamun makichik nuwauchin uchigmakui, dutika Dina adaikauwai.
GEN 30:22 Tujash Apajuík Raquelnashkam kajimatkig idaisachui, nuadui nii segamunashkam antugkau asa uchin susauwai.
GEN 30:23 Dutikam uchigmachu pujau uchigmak chichaak: “Uchi uchigmachkun datsaama wekaenuweg nunak datsannak Apajuí emegkatjuke.
GEN 30:24 Ataktush Tuke Pujuuk tikich uchinash sujumainapi tajai”, tau. Nuadui uchi daajin José adaikauwai.
GEN 30:25 Raquel Josén uchigmakmatai pujus. Jacob Labágkan chichajak: “Minash wait aneasam agkan idaitusta, mina nugkajui wakitkitjai.
GEN 30:26 Mina uchig aidau, tuja duwag aidaushkam sujusta, wika ditan jukitag tau asan amina takagsamjame, nuadui minash agkan idaitusta, wakitkitjai. Amek shiig dekame, wi wajuk amina takagsajame duka”, tiuwai.
GEN 30:27 Tusa tama Labán ayaak: “Wait aneasam wetsuk jutijaig pujusta. Ame pujau asamin, Tuke Pujuu minash pegkegnum yainkae, nunak wika makichik aents anentaimas dekamin tujutmatai dekajai”, tau.
GEN 30:28 Tusa nuigtu chichajak: “Untsu tujutta wajupa akigkati tusamea wakegame, nuna akiktajame”, tiuwai.
GEN 30:29 Tusa tama Jacob niina chichajak: “Wi wajuk amina takagsajame, tuja nuigtush wajuk amina kuntinjumnash kuitamjukjame dushakam amek shiig dekame.
GEN 30:30 Tuja wi juwi tatsaigkik tagkugmek kuashtachu ayi, tujash wi taa pujusa kuitamam kuashat tagkujum kawenjamkae. Tuke Pujuu aminak yaimpake; tujash ¿wajutiya wisha mina uchigdau agtinnash takastatja?” tiuwai.
GEN 30:31 Tutai nii ayaak: “¿Tujash wajupa akigkati tusamea wakegame?” tusa ataktu awagki iniasui. Tama nii ayaak: “Minak makichkish akigkaipa. Untsu wi amina titatjam nunú ayu takuminig, wisha amina uwigjumin kuitamjuktatjame.
GEN 30:32 Dutikatin asan wi ame takagsamunum akigmainaitam nuna dekas amina uwigjum batsata nuwi yamai wenu uwig tsakat aidaun, chivo tsakat aidaujai bukusea aidaun, tuja bukusea apujtugbau aidaunashkam, nuigtu utsak aidaujai ashí ijumjan jukitjai.
GEN 30:33 Tuja wi nuna uwig tsakat bukusea aidaun, nuigtu chivo tsakat utsak aidaujai ijumjamtai, nunú diisam dekaskeapi tujuttatme, untsu nunú diikman, nuninchaukesh pachitkau wainkamek kasagtukeapi tujutta”, tiuwai.
GEN 30:34 Tusa tama Labán: “Ayu, ame tame duka nunisag ati”, tiuwai.
GEN 30:35 Tujash nunú tsawantaik Labán chivo painch aidaun, utsak aidaujai, nuigtushkam chivo nuwa utsak aidaunak, tuja bukusea apujtugbau aidaujai, nuigtu uwig bukusea aidaun aatus yajuak ijumag niina uchiji aidaun tinamkauwai kuitamkatajum, tusa.
GEN 30:36 Nuna dutika idayak, niina uchiji aidaujai, Jacopak eke dekatsaig, ashí nuna yajuakag uumak jiinkiag, kampatum tsawan atushat shiyakajui. Nuna Labágkak dutikak wekagai, Jacopak tikich uwig Labágdau aidaun kuitamak pujau.
GEN 30:37 Nunik pujus numi álamo, almendro, castaño kanawen tsupig yajuak, saepenak ashí pakatsuk, ayatak piipichin tsentsaja yajutkauwai painch wajasti tusa.
GEN 30:38 Dutika umika kuntinun batsamtain nuwi yumi amutaiji aunum nuna ijus ajigkui. Dutikamunum nuwi entsamjunidau asagmatai, uchiji painch aidau, bukusea apujtugbau aidaujai, nuigtu utsak aidau aatus akiinaidau.
GEN 30:40 Nunik Labágka uwigji petsainamu utsak aidau, bukusea aidau aatus akiinaidaunak Jacob yajuak niinu atinun akanak ijumjauwai. Dutika yajuak niishkam kuashat kuntinjintin wajasui. Nuadui Labágdaunash akanak ijumag, niinunashkam akanak ijumjauwai.
GEN 30:41 Dutika nuigtushkam uwig dekas duwejam aidau entsamjuniagtaik, nunú entsamjuninak wainkatnume tusa Jacob payagkun juki, uwig aidau yumi umuinak ijuntaijin aepjujakui.
GEN 30:42 Tujash uwig watsaju minitaik, payagnak aepjujakchauwai. Nuadui kuntin watsaku aidauk Labágdau aajaku ainawai, untsu kuntin duwejam aidau Jacobdau aajaku ainawai.
GEN 30:43 Dutika yaju yajumkawa Jacopak shiig wiakuch wajasui. Niig kuashat uwigjintin, tuja inake aishmag aidaush, nuwa aidaush shiig kuashat, tuja camellojishkam imanisag, burrojishkam ¡shiig kuashat aajakui!
GEN 31:1 Labágka uchiji aidau Jacopan pachis augmatuinak: “Jacopak, iina apajinu aajakua nuna ashí yajuaku asa, imanik shiig wiakuch wajase” tusa chichaidaun dekauwai.
GEN 31:2 Tuja Jacobshakam Labán niina yaunchuk shiig anentujakua nunak, imanis shiig awagmachbaun wainkauwai.
GEN 31:3 Nuadui Tuke Pujuu Jacopan chichajak: “Amina apa nugken pataim aidau batsata nuwi wakitkita, wi aminak uyuntsattajame”, tiuwai.
GEN 31:4 Tusa tima Jacob niina inaken awemauwai Raquel, Leajai ujakam itagtuatajum, wi uwija kuitamkun pujag juwi kaunatnume tusa.
GEN 31:5 Tusa timatai ujakam, nuwe aidau kaunamtai chichajak: “Atumin apa yaunchuk mina shiig anenjuya nuniachun wainjai; tujash mina apaju Apajuíjiya nunú tuke minak uyuntawai.
GEN 31:6 Atumek shiig dekajume, wi atumi apanun shiig kuitamsan pegkejan takagsauwaitag duka.
GEN 31:7 Imatika takagmaitak, nii minak imaan akiktajame tujutbaunak tsanujug, nuna yapajia midau amainnak sujatsui. Tujash nii dutijutaishkam, Apajuíya duka minak tukek idaituschae, Labán pegkegchau awajkai tusa.
GEN 31:8 Nuadui Labán chichaak: aminak kuntin bukusea apujtugbau aidaun petsagtata nuna akiktajame tusa tujuttaik, ashí kuntin nuwa aidauk imanisag bukusea apujtugbaun petsagmayi; nuniagtai ataktu yapajia chichaak: yamaik dekas kuntin painchin petsagtata nuna akiktajame tusa tujuttaishkam imanisag petsagmayi.
GEN 31:9 Nunak Apajuí Labágka kuntinjin atantug mina sujustatus dutikmayi.
GEN 31:10 “Makichik tsawantai uwig entsamjunit jegamunum, kajanum wainkabiajai kuntin aishmag painch aidau, bukusea apujtugbau aidau, nuigtu utsak aidau aatus uwig nuwa aidaun entsamjuidaun.
GEN 31:11 Nuna dii wajai, Apajuí ángel tumain kajanum mina daajun adayak untsugkabi, tujutkui wi ayaakun: ‘Juwi pujajai’ tibaijai.
GEN 31:12 “Tusan tai nunú ángel chichagtak: ‘Yamai juu shiig diista, ashí kuntin aishmag nuwan entsamjuina duka bukusea apujtugbau aidau, painch aidau, nuigtu utsak aidau aatsam wainkattame. Wi junak amina Labán shiig akigmatsu nuna wainu asan jutikajai’, tujutmayi. Tusa nuigtu chichagtak:
GEN 31:13 ‘Witjai Apajuí, amina Betelnum wantintukmaijam nunú, nuwi ame kaya jukim juka Apajuínu ati tusa timayume. Dutikakum ame umiktin aidaushkam anagtuabiume. ¡Wamkesam juju nugka juka ukuakum ame akiinamugmia nuwi wakitkita!’ tusa tujutmae”, tiuwai Jacob.
GEN 31:14 Tusa tutai Raquel Leajai ayaak: “Iik iina apaji jakush niinu aina aunakesh juju atumdau ati tusa ukugtamkimtaig jukishtin ainaji.
GEN 31:15 Iina apajig tikich nugkanmaya nuwa amaina anin yamaik anenjamji. ¡Iina sujupakush, waji akik sujutia dutika sujupaku asa, ame takagsam niig pujawai!
GEN 31:16 Nuadui dekas Apajuí ashí iina apajinun yajutuk amina amasa auk iinu ainawai, tuja iina uchijinu aidaujai, nuadui amina Apajuí wajinjutpame duka dutiksamek ashí umikta”, tiajui.
GEN 31:17 Aatus nuwe aidau tiagmatai, duwi Jacob umintsauwai, niina apaji Isaac Canaán pujujakua nuwi wakitkitatus. Nunik weak niina uchiji aidaun, nuwe aidaujai, camellonum pekainiuwai, tuja wajiji aidaunashkam ashí jukiuwai, nunik Padán-aram pujusa takaku kuntin jukimu aidaun yajuak jintanum amanag ashí umikui wetatus.
GEN 31:19 Tuja Labágkak tikich yantamnum uwija ujen tsupijatatus weu ai, Raquel niina apaji apajuímtaiji dakumka najanamu atatman kasamak juki ukukiuwai.
GEN 31:20 Aatus Jacopak Labán amorreo aents aajakua nuna wika tupikatsjai tusa tsanug ukukiuwai.
GEN 31:21 Nunik weak ashí niina wajiji aidaunak yajuak tupikakiuwai. Nunik shiig wamak, namak Eufratesan nagkaiki muja Galaad tutaya nuni weuwai.
GEN 31:22 Nunik Jacob tupikaki kampatum tsawan wegai Labán dekauwai.
GEN 31:23 Nunik niina patayi aidaun ipaa pataetuk wea weakua siete tsawanta duwi muja Galaadnum batsamtatman amaigkauwai.
GEN 31:24 Tujash nunú kashia duwi Apajuí kajanum Labán arameo aentsua nuna wantintuk chichajak: “¡Antukta nijah, Jacob augkumesh pegkegnum ausata, wainkam pegkegchauk chichagkaipa!” tusa tiuwai.
GEN 31:25 Tusa tima wea weakua muja Galaadnum aakan aakmajag batsamtatman amaigkauwai. Dutika niishkam nuanuig ashí niina patayi aidaujai aakan aakmakag pujusajui.
GEN 31:26 Nunik nuwi Labán Jacopan chichajak: “¿Wagka amesh jusha juniame? ¿Wagka minash tsanujaume? ¡Amek mina nawantug aidauk nuwa maaniaku bisatkama yajumtaya numamtuk awajkaume!
GEN 31:27 ¿Wagka tsanujamesh uumjutkamesh mina aujtuskesh tupikakiume? Wi dekauwaitkunuk, shiig anentsan kantamjukin tampujan arpajai awatuinakui, shiig jiistamjuan akupmain awajkashjamek.
GEN 31:28 Amek minak niish nawanjinash, niina tijaji aidaujaí shiig kugkuas kumpama akupkati tusamesh dakagsachume. ¡Duka nunitsuk aents anentainkachu wajukmaina numamtuk wajakume!
GEN 31:29 Nuadui wika atumnak pegkegchau awagmamainaitkun, amina apa Apajuíjiya nunú kajanum chichagtak: ‘Jacob augkumesh shiig ausata, wainkam pegkegchau chichagkaipa’ tujutma nuadui pegkegnum augjame.
GEN 31:30 Amek yaunchuk nagkamsam amina apa jeen wakitkitasam wakemaum duwi miniume, tujash nunika minakmesh ¿wagka mina apajuímtaig aidaush kasagtukmesh miniume?” tau.
GEN 31:31 Tusa tama Jacob Labágkan ayaak: “Wika amina ujamainnash, namputchawame niina nawanjin japiki emetjutuawai tusan ishamkagtakun ujakchamjame.
GEN 31:32 Untsu amina apajuímtaijum aidau kasamkaume tujutam dusha ya takakuk wainkatam, dutikawaminig duka, ¡mantamnati! Iina patayi aidau ijunas waipainai, wisha wajina aminunash jujukjame nunú egakam jukita”, tiuwai. Nunak Jacopak Raquel niina apaji apajuímtaiji kasagkamunak dekachu asa tiuwai.
GEN 31:33 Aatus Jacob timatai, Labán Jacopa aakji carpa aakmakbaunum waya egaka, nuigtu Lea aakjin waya egaka, tuja jimag nuwa inak aidau aakjinchakam ashí egakui. Tujash imatika egakush wainkachui. Nunik ashí egaka wainkacha Lea aakjin pujau jiinki wayauwai Raquela aakjin.
GEN 31:34 Nunik apaji waitai, Raquel dakumka najanamu jukimujin camello tuntupen patai nuwi waka nuna ekeemtuk ekemsauwai. Nunik eketai Labágkak ashí egakui, tujash makichkish wainkachui.
GEN 31:35 Nuna egak wekagun Raquel chichajak: “Apawah, kajekaipa, wi juwi eketag nuna akaikin kumpamtsujam nunak, mina tsawanjui jau asan aniajai”, tiuwai. Tuja Labágkak imatika egakushkam niina apajuímtaijinak wainkachui.
GEN 31:36 Nunikmatai Jacob kajeka niina chichajak: “¿Wajina wisha pegkegchaunash dutikaja? ¿Tuna wisha pegkegchaunash takamsamtaiya imanikmesh wakeketash pataetugkaume?
GEN 31:37 Ame mina aakjui wayam mina wajiig aidau ashí diisum duwish, ¿amina wajijum aidau jukimush tuu wainkaume? ¡Nunú wainkamek amina pataim ijuna juna emtin juwi itantam aepsata, tuja mina pataag ijuna nuna emtinishkam! Nuna wainak dita titinme yaki waitjawa, ameash waitjam, atsa wiyash waitjag nuna.
GEN 31:38 “Wi amina veinte mijadai takagsamjam nuaduik, amina uwigjum aidauk tuja cabrajum aidaukesh makichkish uchijinak pegkegchaun petsakag ajapachui; tuja wikish makichik uwig tsakatchinakesh maanuk aminunak yuwachuitjai.
GEN 31:39 Nuigtushkam makichik kuntinjumnakesh ikamyawa maamunak itajuachuitjame, tuja kuntin megkaekuish, nunak wi akiyajame; tuja tsawaigkish nuniachkush kashikesh kuntinun kasamkagmataish, mina segatkumin wi akiyajame.
GEN 31:40 Tsawai takaknush etsayai jamain dekapiajai; tuja kashi takaknushkam tsetsekai waitiajai, ¡imaniakun shiig aneasa kanumainchau dekapiajai!
GEN 31:41 Imanikan waitiaknush veinte mijan amina jemin takakun pujusuitag duika ¿mina jutik akijam? Amina nawanjum jimaja juna jukitasan takagsawaitjame catorce mijadai; tuja amina kuntinjumin kuitamkunchakam seis mijan takagsawaitjame. Imaniaish amek imaan akiktagme tusa anagtuawaitkum betek akigtsayume.
GEN 31:42 Abrahama Apajuíjin, mina apag Isaac emematia nunú mina yainchakuig, amek minak dekas wi takasbaunmak makichkish akigtsuk akupjumain awajtukume. Tujash wi senchi takaku wake besemag pujamun Apajuí waitjuku asa, aminak nii kajanum jiyapakume”, tiuwai.
GEN 31:43 Tusa tama Labán Jacopan ayaak: “Juju jimag nuwa aina juka mina nawantug ainawai; tuja uchi aina jushakam mina tijagkig ainawai; tuja uwig aina jushakam midau ainawai, nuadui ¡ame ashí juju wainam juka midau ainawai! Tujash ¿wisha mina nawantug ainakuish, nuigtu mina tijagkig ainakuish itugkatjaki? wika emetmaitsujai.
GEN 31:44 Nuadui amesh taata, núnikamin juwi amejai chicham umikmi, ii umigdaikatna nunú”, tiuwai.
GEN 31:45 Tusa timatai Jacob kaya juki inantai apujus,
GEN 31:46 niina patayi aidaun chichajak: “¡Kaya juuktajum!” tusa tima kaya juukag ijumag tsakapiajui, dutikawag nunú kaya ijumja tsakapimunum ayaumas pujusag dita chicham umikbaun iwainainak yutain yuwawajui.
GEN 31:47 Nunik nagkanainak Labán nunú nugka daajin adaikauwai niina chichamen “Jegar Sahadutá”, tuja Jacobshakam niina chichamen adaikauwai “Galaad”. Nunak kaya ijumjamu taku tiuwai.
GEN 31:48 Nuna dutika inagnakag Labán chichaak: “Ii yamai chicham umikag juka juju kaya ijumjamua nunú wainku tuke aneasaiki atinaitji”, tiuwai. Nuna taku nunú nugkanak Galaad adaikau ainawai.
GEN 31:49 Tusa nuigtushkam “Mispá” ati tiuwai, wagki nunak Labán chichaak: “ ‘Apajuí iina mai atushat pujajinchakam diigmaku ati’ taku tiuwai.
GEN 31:50 Tuja ame mina nawantug shiig kuitamtsuk waitkamunash, nuniachkumesh dita ayakiatkum tikich nuwa aidaujai nuwenmin amina waipak etsegtugmamain atsutaish, ima Apajuíya duke nii waipau asa ame wajuk pujuttame nunak ashí nigki dekaatin ati”, tiuwai.
GEN 31:51 Nuna tusa nuigtushkam ataktu awena Jacopan chichajak: “Antukta nijah, juju kaya ijumjamu aina nunú, tuja tikichin kayan inantain apusag juju
GEN 31:52 nagkaikimek amesh wayashtinaitme, tuja wishakam antsanuk juna nagkaikinuk wayashtinaitjai, nunú nuniakuik waitkanimain asamtai.
GEN 31:53 Amina apachjum Abrahaman Apajuíjiya nunú, nuigtu mina apachug Nacoran Apajuíjiya nunú ii umikag nunak diistin atinme”, tiuwai. Tusa Labán timatai, Jacob niina apaji Isaac Apajuín emematujakua nuna pachis nii umiktinjin niishkam dutiksag: “Aatus ati”, tiuwai.
GEN 31:54 Nuna umika, nuadui, Jacob kuntinun maa nunú mujanum nuna apeak Apajuín emematiuwai. Dutika nuna nejen ashí apeachu asa patayi aidaun ipaa ashí ijuntujag yuwawajui, nunikag nunú mujanmak kajigkajui.
GEN 31:55 Nunik kajigkag tsawamunum, Labán kashikmas nantaki, niina nawanji aidaun tijaji aidaujai yapinum kugkuas kumpamak, pegkegnum yumigkig nuadui niina nugken wakitkiuwai.
GEN 32:1 Nunik Labán wakitkimtai Jacob nuwi nagkaemaki wegau. Nunik wetatman Apajuín aentsji ángel aidau jiintujajui niina igkugtatus.
GEN 32:2 Nunik minidaun Jacob wainak chichaak: “Juka Apajuín suntaji ainawai”, tiuwai. Nuadui nunú nugka daajin adaikauwai Mahanaim.
GEN 32:3 Dutika ukuak nuwi juwaki wesa niina yachi Esaú nugka Seír tutai Edom nugkanum awa nuwi pujuttaman, yatsum minawai tusajum ujatjuktajum tusa, niina aentsji chichama etsejin aidaun ishitkauwai.
GEN 32:4 Dutika ishimak aatus akatmamjauwai: “Wika nii tabaun umiktasan, kuashat tsawan Labágkai pujaun ukukin minajai.
GEN 32:5 Tuja baka aidau, burro aidau, uwig aidau, nuigtu iinak aishmag aidau, nuwa aidaushkam kuashat ajutui, juna susatjai dutika ai mina apug wait anenjugmatai, niijai kumpamdayatjai tajai”, tiuwai.
GEN 32:6 Tusa akatja ishiakam chichama etsejin aidaushkam shimutuk Esaún ujaka ukuinak, waketug kaunawag, Jacopan chichajuinak: “Amina yatsum Esaúk ame akatmamjamum duka imatiksaik ujakmaji, dutika ujaka ajin, ayu igkugtajai tusa, cuatrocientos aentsun yajuak minitjamae”, tiajui.
GEN 32:7 Tusa ujakam Jacob senchi ishamkauwai, nunik kuashat anentaimu. Nuniak aents niijai yujaidaun jimajan akanak ijumjauwai, dutikak uwig aidaun, baka aidaun, camello aidaunashkam dutiksag akanag ijumjauwai.
GEN 32:8 Nunak nii anentaimas: “Yaja aneas Esaú jetepataish, juju aents aidau akanka ijumjamua nunú maaniaimpap, tikich aina au tupikakiag uwemain ainawa”, tusa dutikauwai.
GEN 32:9 Nuna dutika Apajuín segaak: “Tuke Pujuuwah, mina apachug Abrahaman, tuja mina apag Isaakan Apajuíjiyah, ame mina chichagtakum, amina nugkemin pataim batsata nuwi wakitkita, wi yaigtatjame tujutmaume.
GEN 32:10 Wika tikima wainkauch aig, ame minak wait anenjau asam yainkaume. Yaunchkek wika juju namak Jordágka junak ima mina ushujutaignak takusan katigkabiajai, tujash yamaik ame yaintsamin kuashat aents aidaush ajutui, tuja kuntin aidaushkam imanisag ajutui, nuadui kuashat asamtai, jimajan akankan ijumjajai.
GEN 32:11 ¡Wait aneasam agkanmitkajuata mina yatsug Esaú mantuawai! Wika ishamajai, mina jetetak ashí mina duwag aidaun, mina uchig aidaujaí amutkai tusan, tajame.
GEN 32:12 Ame chichaakum, wi aminak kuitamkattagme, dutikakun amina uchijum wegantunak nayantsa kamatkaji dekapamainchauwa iman awagsatnaitjai tujutmayume”, tiuwai.
GEN 32:13 Jacob nuna aatus Apajuín segaa kiitai, nuwig tepes kanajui, nunik tsawag, niina tagkuji aidaunmayan akanjauwai yachi Esaú susatnun.
GEN 32:14 Dutikak doscientos chivo nuwa aidaun, veinte chivo aishmag aidaun, doscientos uwijan, nuigtu veinte uwig tsakat aidaun,
GEN 32:15 treinta camello nuwa yama petsaku aidaun ashí uchijijai, cuarenta baka, diez toro aidaun, veinte burro nuwa aidaun, nuigtu diez burro aishmag aidaun aatus akanag ijumjauwai.
GEN 32:16 Dutika duwi niina inake aidaun, maki makichik kuntin akanjamun tinamkauwai, dutika chichajak: “Atum emkatajum, tujash betek ijutkau wetsuk, makichik kuntinun ujuikimtai, duwi tikich kuntin aidaushkam saaktajum”, tiuwai.
GEN 32:17 Nuna tusa aents eemak wetinun chichajak: “Mina yatsug Esaú amina igkumpak: ‘¿Yaita amina apugmesh? ¿Tuja tuu weakmea aniame? ¿Juju tagku yajuaka minam jusha yanau ainawa?’
GEN 32:18 Tusa tujamkuig ame ayaakum: “ ‘Apujuh Esaú, juju kuntin aina juka aminu ainawai, junak Jacob amina inakmea nunú awetugmame. Tuja niishkam iina ukujin minime’ tusam ujakta”, tiuwai.
GEN 32:19 Nuna tusa, tikich aidau kuntinun yajuak wedaunashkam chichajak: “Atumshakam Esaú igkumpakuig dutiksagmek chichaktajum.
GEN 32:20 Tuja nuigtushkam: ‘Amina inakem Jacob iina ukujin minime’ tusajum titajum”, tiuwai. Nuna tiuwa nunak Jacob anentaimas, dekas kuntinun emtikan ishitkatjai dutikan nii kajekbaujin etsagjan, nuadui wisha niijai wainiaktajai. Namputchawame nuna wainkash shiig anenjus jujukchaintash, tusa dutikauwai.
GEN 32:21 Aatus ashí emtika ishiak, nigka wetsuk niina aakjinig kanajui.
GEN 32:22 Nunú kashia duik, Jacob nantaki, niina nuwen mai juki tuja jimag nuwa inake aajakua nunashkam mai juki, uchiji once aajakua nujai ashí yajuak namak Jaboc tawa nuna amain ikatiajui.
GEN 32:23 Dutikak, ashí niina wajiji aidaujai ijumag ikatiajui.
GEN 32:24 Nuna ashí ikatiag nigki juwak pujai, makichik aents tajuam niijai maa maaniakua tuke tsawampau;
GEN 32:25 nunik tsawautai nunú aents Jacopan depetmainchau dekapeak, nantagnum awati manchamitkakui.
GEN 32:26 Dutika chichajak: “¡Akupjukta tsawawai!”, tau. Tusa tama Jacob ayaak: “¡Ame mina pegkegnum yumigtatsminigkik akupkashtatjame!” tiuwai. Tusa tama nunú aents Jacopan iniak:
GEN 32:27 “¿Amina daagmesh yaita?” tau. Tama: “Wika Jacopaitjai”, tiuwai.
GEN 32:28 Tutai nunú aents chichajak: “Amek yamai nagkamsamek Jacob tutaig achattame. Amina daagmek Israel atatui, wagki amek Apajuíjai maaniakmesh, tuja aentsjai maaniakmesh, depetmaku asam”, tiuwai.
GEN 32:29 Tusa timatai Jacob niina iniak: “¿Amina daagmesh yaita?” tau. Tusa iniam nunú aents ayaak: “¿Wagka mina daag dekaatasamesh wakegame?” tau. Aatus tusa nunú aents Jacopan pegkegnum yumigjauwai.
GEN 32:30 Dutika ukukim, Jacob nunú nugka daajin Penuel adaikauwai, nunak: “Dekas Apajuínak shiig paantap wainkaja, imanun wainkanush jakachjapi iwakuap pujaja” taku tiuwai.
GEN 32:31 Tusa ukuak Penuelan nagkaiki wegai etsa jiiniuwai; tujash niina nantajen najaimak shutus wegau.
GEN 32:32 Nuadui Israel wegantu aidauk yamaya juikish baku wajakbaunum neje achitka nunak yuchau ainawai, wagki nuwi Jacopan awati manchamitkakbau asamtai.
GEN 33:1 Nunik wesa Jacob wainkauwai niina yachi Esaú cuatrocientos aentsun yajuak minittaman. Nunik wainak niina uchiji aidaun yajuak, niina nuwe Leayai, Raquelai, nuigtu jimag nuwa inak aajakua nuwi aatus yununjauwai.
GEN 33:2 Dutika jimag nuwa inake aidaun uchiji aidaujai emtikauwai, dutika nuna ukuujin Lean niina uchijijai awantauwai, untsu inagnamunum Lea ukujin Raquelan Joséjai awantauwai.
GEN 33:3 Nuna dutika ijumag ukuak nii eemak wajan, sieteya imania tikishmag tsuntsuma nijayin nugka antig waja wakakua yachi midaun jegantauwai.
GEN 33:4 Tujash Esaúk tupikaki yachin igkug kuntujen achik kajut pagkuk kugkuasui. Nunik wajasag eganijajui.
GEN 33:5 Nunik Esaú niimkama nuwa aidau uchijijai ijunun wainak Jacopan iniak: “Jusha ¿ya ainawa?” tau. Tutai nii ayaak: “Aanka amina inakmin Apajuí uchin susauwa nunú ainawai”, tiuwai.
GEN 33:6 Timatai nuwa inak aidau uchijijai tikishmag tsuntsuma nijayin nugka antig pujusajui Esaún eme anentus.
GEN 33:7 Nunikagmatai Leashkam niina uchiji aidaujai Esaún jegantag ditashkam nunisag pujusajui. Nunú nuninai inagnamunum José Raqueljai jeganta ditashkam nunisag pujusajui.
GEN 33:8 Nuniagtai Esaú Jacopan iniak: “¿Wajuk anentaimsamea juju tagku aidaush emtikamesh ishiakmaume, dutikamunash wisha wai wainkawanush minaja?” tau. Tutai nii ayaak: “Juju aina juna juwak tsagkugtugti tusan ishitkamjame”, tiuwai.
GEN 33:9 Tama Esaú chichaak: “¡Atsa yatsuju, minak kuashat tagkuk ajutui, aminu aina duka aantsag aminuk agtinme, sujusaipa!” tiuwai.
GEN 33:10 Tutai Jacob ayaak: “¡Atsa, tutsuk wait aneasam jukita. Wika ame shiig aneasa jujukiu asamin, Apajuí wainka anentaimaina iman dekapeajai!
GEN 33:11 Nuniau asamtai, wait aneasam wi ikautuajam juka jukita, Apajuí minak yaintsamtai wiakuch wajasjai, nuadui makichik atsumamukesh atsugtawai”, tiuwai. Tusa imatjam Esaúshkam ayu tusa jukiuwai.
GEN 33:12 Nuna juki Esaú Jacopan chichajak: “Ayu wemi, wi emkatjai”, tau.
GEN 33:13 Tusa tama Jacob ayaak: “Yatsuju mina aneetaijuh, amek shiig dekame uchi piipich aina juka kakakchau ainawai, tuja nuigtush uwig aidau, baka aidau yama petsaju asag uchiji piipichin saakuaske aina nuna puyatju wajajai; wagki wi senchi wetaik makichik tsawantaik uwig aidauk ashí jinumainai.
GEN 33:14 Nunimain asamtai mina apujuh, amek emkata, wika diipasan mina tagkug aidaun, mina uchig aina nujai saasan mina minakuan ame pujamunum Seírnum taatjai”, tiuwai.
GEN 33:15 Tutai Esaú ayaak: “Ayu dekas tame, untsu wi aentsun saakag juna akankan amina yaimpaktinun ukugkitjame”, tiuwai. Tutai Jacob ayaak: “¡Atsa, wait aneasam tsagkugtugta! Yamaik imanikmek puyatjutkaipa”, tiuwai.
GEN 33:16 Tutai ayu tusa ukuak, nunú tsawantaik Esaú Seírnum wakitkiuwai.
GEN 33:17 Yachi wakitkimtai Jacobshakam Seírnumak wetsuk, nugka Sucot tawa nuwi weuwai. Nunik nuwi jegaa niina jeen jegamak, nuigtushkam kuntin aidau aakjinashkam aakmatjauwai. Nuna dutikau asa nunú nugka daajin Sucot adaikauwai.
GEN 33:18 Jacob Padán-aram pujau wakitki Canaán nugkanum jegauwai pegkeg, jamamtuchu utugchat atsaunum, nunik nuwi yaakat Siquem tawa nujai niinis pujusui.
GEN 33:19 Nuwi pujus Hamor Siquema apaji aajakua nuna uchiji aidaun nugken cien kuichik plata najanamun akikmak sumakui. Dutika nuwi niina jeen jegamag yaaktamauwai.
GEN 33:20 Nuwi pujus, Apajuí emematku kuntin maa patasa apeatnun altaran najanauwai. Dutika adaikauwai El-elohé-Israel. Nunak Israelan Apajuíji taku tiuwai.
GEN 34:1 Jacob Leayai akiamu Dina, makichik tsawantai niina jeen pujau nunú yaaktanmaya nuwauch aidaun ijagsatatus weuwai.
GEN 34:2 Nunittaman nunú yaaktan apuji Hamor heveo aents aajakua nuna uchiji Siquem wainak dakimaunak waitkas achika juki niina jeen awaya nuwi ikanak pegkegchau awajkauwai.
GEN 34:3 Dutikauwaitak senchi wakejuku asa, niina wakemitkaktatus shiig pegkegchin ausauwai.
GEN 34:4 Dutika niina apaji Hamoran chichajak: “Juju nuwan nuwatkatasan wakegajai, ame weme sumagtukta”, tiuwai.
GEN 34:5 Nuna Jacob niina nawanji Dinan Siquem pegkegchau awajkamun dekauwai. Dutika dekaayatak niina uchiji aidau tagkun kuitamainak ikam batsatu asamtai, dita kaunawagmatai chichastajai tusa pachikchauwai.
GEN 34:6 Nunik pujai, Siquema apaji Hamor Jacobjai chichastatus weuwai.
GEN 34:7 Nuniai Jacopa uchiji aidau tagkun kuitamak batsatu kaunkama, Siquem Jacopa nawanjin pegkegchau awajkae tabaun dekawajui. Nunik senchi kajekajui, wagki Israelan dushikiak Siquem makichkish nunimainchaun dutikau asamtai.
GEN 34:8 Tuja Hamor ditajai chichaak: “Mina uchig Siquem atumi umayin senchi wakejuke; nuniau asamtai segajime, wait aneasjum umaim sujimkaigpajum mina uchigjai aishinati.
GEN 34:9 Nunik mina uchig nuwenamtaig atumesh jutii patayi waigtajum. Aatsa ii aidautish atumi nawanji aidaujai nuwenawagmi, tuja atumshakam iina nawanji aidaujai nuwenamnujum.
GEN 34:10 Nuniakjum atumesh jutijai batsamsatajum. Nugkak atumdau atatui, nuwi pujusjum takasjum sujuktajum, nuniakjum atumdau nugka sumaktajum”, tiuwai.
GEN 34:11 Tusa tutai, Siquemshakam Dina apajin, niina umayi aidaujai ijunun chichajak: “Minash wi sumamua nunú umigtuktajum, wisha atum wajig segattajum nunak imatiksanuk umigkatjime.
GEN 34:12 Atum wi nuwan juwakui wajupa akigkati tujutmainaitjume, nunashkam imatiksanuk umiktajai, untsu nuwak idaitugsatajum wijai aishinati”, tau.
GEN 34:13 Tusa tutai Jacopan uchiji aidau Siqueman niina apaji Hamorjai, umayi pegkegchau awajtukbau asa tsanuinak,
GEN 34:14 juna aatus tiajui: “Jutiik iina umayig aishmag tsupimakchau aidauk sumaitsuji, duka iniig shiig pegkegchau datsan amain asamtai.
GEN 34:15 Untsu atumesh jutijai betek atag takugmek, ashí aishmag aidautijum tsupimagtajum.
GEN 34:16 Nunikagmin duwi jutii nawanji aidaush atumjaish aishinmain ainawai, tuja ii aidautishkam atumi nawanjumjaish nuwenmain ainaji. Nunikaja dekas atumjaish nunú wegantu aidauk yaaktamawag ijunas batsamaina nunin amainaitji.
GEN 34:17 Tuja atum nunú dakitakjuminig iina umayig juki yaja wetatji”, tiajui.
GEN 34:18 Tusa tama Hamor niina uchiji Siquemjai chichainak: “Ayu, kame duke ati” tiajui.
GEN 34:19 Tusa tiajam nunú datsauchik Jacopan nawanjin senchi wakejuku asa, waugtus tsupimakui. Niina apaji jenig Siquem aajakui dekas eme anentsa diitai.
GEN 34:20 Nuna nunika niina apaji Hamorjai yaakta waitijin aents aidau ijunag chichatainum jegantag ditan chichajuinak:
GEN 34:21 “Juju aents aina juka iina kumpaji ainawai, nunin asag ditak juju nugka juwi batsamas takasa nuwiyan jukiag sujiagtatui. Dita batsamainuk nugkak shiig múuntai, tuja ii aidauti dita nawanji aidau nuwatkagtatji, nuniajin ditashkam iina nawanji aidaun nuwatkagtatui.
GEN 34:22 Nuigtushkam ditajai ijunja makichik yaaktakea nunin wajasa pujusmi tama ayu tuinawai. Nuniktin asajin dita chichainak ashí iinia aishmag aidauk, tsupimagtinme tujamainawai, dita wajuku ainawa nuninuk amí tusag.
GEN 34:23 Tuja ditá wajiji aidauk kuntinji aina nujai iinu agtatui. Nuadui yamaikik nii segapamua duke umigkagmi, aatus ditashkam jutijai juwakag batsamsatnume”, tuidau.
GEN 34:24 Tusa Hamor niina uchiji Siquemjai tiagtai, tikich aidaushkam, ayu duke ati tusag aimkajui. Tiagmatai ashí aishmag suntagbaemain aidauk tsupimajaju ainawai.
GEN 34:25 Tujash kampatum tsawanta duwi, Jacopa uchiji Dina umayi aidau: Simeón Levíjai puyagjin jukiag yaaktanum wayawag ashí aents tsupimajaju aidau nuna najaimainak ayamjumamainchau wajas batsatun ashí kajegkajui.
GEN 34:26 Dutikainak Hamornashkam Siquemjai apatuk puyajai ijuag maawajui. Dutikawag Dina Siquema jeen pujuttaman juki ukukiajui.
GEN 34:27 Dutikawaju ai Jacopan uchiji tikich aidau kauna shimutuk aents jinaa batsatbaunum utsanawag dita umayi pegkegchau awajkamunum aents jinau aina nuna wajiji aidaunak ashí yajuakajui.
GEN 34:28 Dutikainak nuigtushkam yaaktan ukuki uwig aidaun, baka aidaun, burro aidaun aatus ashí tikich waji ayaunak yajuakajui.
GEN 34:29 Tuja nuigtushkam waji jegaya aidaunash kasamkajui, dutikainak uchi aidaun nuwa aidaujai achija yajuakajui.
GEN 34:30 Dutikawagmatai Jacob Simeógkan Levíjai chichajak: “Atum minak utugchat itagtuaugme. Nuadui yamai cananeo aents, ferezeo aents aina nunú minak kajegtukagtatui, dutijuinak mina aentsug aidauk kuashtachua duwi dita ijunag mina mantuinak mina uchig aidaujai mantumain ainawai”, tiuwai.
GEN 34:31 Tutai dita aimainak: “Tujash ¿wagka niish iina umayinash, nuwa wainka takatai itugmaina dutikae? Nuadui iishkam aikaji”, tiajui.
GEN 35:1 Apajuí Jacopan chichajak: “Wetá Betelnum, núnikam nuwi jegam pujusta. Nuwi pujusam amina yatsum Esaú mantamatag takui tupikamin, Apajuí wantintugmakua nunú emematku kuntin maa patasa apeatin altar najanata”, tiuwai.
GEN 35:2 Tusa tima Jacob niina nuwe aidaun, uchiji aidaun, niina aentsji aidaujaí ijumag chichajak: “Atumi apajuímtaijum dakumka najanamu ajutjamaina duka ashí utsagtajum, dutikajum maijum tikich jáanch nugkugtajum.
GEN 35:3 Nunikagmin wamak Betelnum shiyakagmi, nuwi jegaan, wi wake besemag wekagai, Apajuí mina yainkauwa nunú emematku kuntin maa patasa apeatnun altaran najanatjai. Nii mina yaja wekagaish uyuuntusmatai wekaesauwaitag nuadui”, tiuwai.
GEN 35:4 Tusa tiajam ditashkam ayu tusag, dakumka najanamu apajuímtai ajuinamunak, kuishnum akiitai aidaujai yajuakag ashí Jacopan susajui. Dutikam nii juki numi Encina tutai, Siquem nugkanum jegattak wajaunum nuna wajautin yutua ukukiuwai.
GEN 35:5 Dutika ukuak jiinag shimutai, nuwiya aents aidaun Apajuí senchi sapigmitkakui ditan pataetukainum tusa. Dutikamu asag Jacob niina uchiji aidaujai shimutaish pataetukchajui.
GEN 35:6 Nunik we wenakua ashí niijai aents aidau yujaunak imanisag yaakat Almendro tutai tuja Betel tuuta awagmatia nunú Canaán nugkanum awa nuwi jegawajui.
GEN 35:7 Nunik nuwi jegawag kuntin maa patasa apeaku Apajuí ememattinun altaran Jacob najanauwai. Dutika nunú nugkan El-Betel adaikauwai. Yachi maatag tama tupikaki wesa kanittaman Apajuí wantintukua nuwi.
GEN 35:8 Nunú nugkanum Débora Rebecan kuitamajakua nunú jakauwai. Nunikmatai Betel jegattak numi Encina wakentin ukusajui. Dutika Jacob nunú nugkan, “Encinanum buutbau” adaikauwai.
GEN 35:9 Tuja Jacob Padán-aram pujau wakettatman Apajuí ataktu wantintuk pegkegnum yumigjauwa nunak,
GEN 35:10 aatus tiuwai: “Amek Jacopaitme, tujash tuke Jacob tamak achattame; yamai nagkamsamek ‘Israel’ tutai atatme”, tiuwai. Nuna tusa Jacopan daajin Apajuí yapagtua ataktushkam
GEN 35:11 chichajak: “Witjai dekas Apajuí ashí senchigtinnuk; amek kuashat uchigtin atatme, nuadui ame wegantu aidaush imanisag agtinai. Nuadui ame wegantu aidau nugka muuntan yaaktamawag batsamsagtinai. Tuja ame uchijum wegantunmaya apu waigkagtin ainawai.
GEN 35:12 Wi Abrahaman Isaakjai nugkan susauwaitag nunak amina yamaik amaajai, untsu ame jakamin amina uchijum wegantu aidaun susatnaitjai”, tiuwai.
GEN 35:13 Aatus Apajuí Jacobjai chichas ukuak wakitkimtai,
GEN 35:14 nuwig Jacob kayan juki inantai apujus aceiten vinojai juki ukatkauwai, juju nugkak Apajuínu atin ati tusa.
GEN 35:15 Nuna dutika ashimak Jacob nunú nugkan Betel adaikauwai.
GEN 35:16 Jacob Betelnum pujau jiinki Efrata jegattak wegai, Raquel uchin najaima shiig senchi waitus uchigmakui.
GEN 35:17 Nunik uchigmak ashí jaka tepaun, uchi uchigmitkau chichajak: “Ishamkaipa, jushakam aishmag uchigmakume”, tau.
GEN 35:18 Tusa tima ashí jaka tepes niina uchiji daajin Ben-oní adayak jakauwai. Dutika adaikamu aig, apaji dekas Benjamín ati tusa adaikauwai.
GEN 35:19 Aatus Raquelak jakauwai. Nunik jakamtai Efrata jintanum yamai yaakat Belén taji nuwi ukusajui.
GEN 35:20 Jacob nuwen ukusa pempeenak kaya muuntan juki eketi ukukiuwai. Nunú kaya eketi ukukmawa nunuwai yamaikish, juwi Raquelak ukusbauwai tutai awa nunú.
GEN 35:21 Israel nuwen ukus ukuak jiinki, kumpin jiikbau Eder tawa nuna ukuki weuwai. Nunik nuwi jeen jegamag pujusui.
GEN 35:22 Nuwi Israel jegaa pujai, Rubén niina apaji awan nuwe Bilhájai ikagmakui. Nuna dekaa Israel senchi kajekui. Jacopa uchijig doce aajakui.
GEN 35:23 Leayai akiamuk: Rubén aajakui iwai, nuigtu Simeón, Leví, Judá, Isacar, Sabulón aatus aajakui.
GEN 35:24 Raquelai akiamuk: José Benjamígjai aajakui.
GEN 35:25 Raquela inake Bilhá aajakua nuwi akiamuk: Dan, Neftalíjai aajakui.
GEN 35:26 Untsu Lea inake Zilpá aajakua nuwi akiamuk: Gad, Asher aatus aajakui. Juju ainawai Jacopan uchiji Padán-aramnum pujusa akigbau aidauk.
GEN 35:27 Nuwi pujau niina apaji Isaakan Mamrenum yaakta daaji Arbá tuuta Hebrón tuuta awagmatia nuwi Abraham yaunchuk pujujakbaunum pujau asamtai, niina wainkatatus weuwai.
GEN 35:28 Nuwi Isaakak ciento ochenta mijan ejeyi pujus jakauwai.
GEN 35:29 Nunik shiig múuntuch wajas jakamtai, niina uchiji Esaú Jacobjai jukiag ukusajui.
GEN 36:1 Juju aajaku ainawai Esaú, Edom tutaya nuna uchiji wegantu aidauk.
GEN 36:2 Esaú jimag nuwan Canaán nugkanmaya aidaun nuwatkauwai. Jeteke aajakui Adá, hitita aents Elón aajakua nuna nawanji, untsu awan nuwe aajakui Oholibamá, Aná nawanji heveo aents Sibón aajakua nuna tijaji.
GEN 36:3 Nuigtushkam Ismaela nawanjin Nabaiota umayi Basemat aajakua nuna nuwatkauwai.
GEN 36:4 Adá Esaún uchigmatkauwai uchi aishmagkun Elifazan, untsu Basemat uchigmatkauwai uchi aishmagkun Reuel.
GEN 36:5 Tuja Oholibamá uchigmatkauwai uchi aishmag aidaun: Jeús, Jaalam, Coré aatus. Juju aajaku ainawai Esaú uchiji nii Canaán pujusmatai akiinkaju aidau.
GEN 36:6 Canaán pujau Esaú niina nuwe aidaun, uchiji aidaun, nawanji aidaujai ashí aents niina jeen batsamin aidaunashkam imatiksag yajuak weuwai tikich nugkanum niina yachi Jacobjai pujamun ukuki kanak pujustatus. Nuigtushkam niina tagkuji aidaun Canaán pujusa uyugkamunak wajijijai ashí yajuak weuwai.
GEN 36:7 Ditak kuashat tagkugtin asag, nunú nugkanmakek mai pujumainchau aajakui; nuigtushkam nunú nugkanmak tagku ayugmainchakam atsujakui.
GEN 36:8 Nuniau asamtai, Esaú Edom tutaya duka, nugka Seír tawa nuna mujajin pujustatus weuwai.
GEN 36:9 Juju aajaku ainawai Esaú wegantu aidau, edomnumia aents aajaku aina nuna apaji. Ditak nugka Seír tawa nuna mujajin batsamajakajui.
GEN 36:10 Tuja Esaú uchiji aajaku aina nuna daaji aidauk juju ainawai: Elifaz Adáyai akiidau, Reuel Basematai akiidau.
GEN 36:11 Tuja Elifazan uchiji aidauk: Temán, Omar, Sefó, Gatam, Quenaz aatus aajaku ainawai.
GEN 36:12 Elifaz tikichin ikaa nuwen Timná daagtinun nuwatkauwai. Dutika nuwi akiauwai makichik uchi aishmagkun dutika adaikauwai Amalec. Juju aajaku ainawai Esaún nuwe Adá aajakua nuna uchiji wegantu aidau.
GEN 36:13 Untsu Reuelan uchiji aidauk: Náhat, Zérah, Shamá, Misá aatus aajaku. Tuja juju aina juka Esaún nuwe Basemat aajakua nuna uchiji wegantu ainawai.
GEN 36:14 Tuja Esaún tikich nuwe Oholibamá Aná nawanji, Sibógkan tijaji aajakua nuwi uchi akiinkau aidauk: Jeús, Jaalam, Coré aatus aajakui.
GEN 36:15 Tuja Esaún uchiji aidaunmaya apu aajaku aina duka juju ainawai: Esaú uchiji iwai Elifaza uchiji wegantu aidaunmaya apu aajaku aina duka juju ainawai: Temán, Omar, Sefón, Quenaz,
GEN 36:16 Coré, Gatam, Amalec aatus. Juju aajaku ainawai Elifaz wegantunum akiinau aina nuna apuji, Edom nugkanum batsamajaku aina nunú. Juju aina juka ashí Adá wegantu ainawai.
GEN 36:17 Untsu Esaún tikich uchiji Reuel aajakua nuna uchiji apu aidauk: Náhat, Zérah, Shamá, Misá, aatus aajakui. Juju ainawai Reuel wegantunum akiinau aina nuna apuji Edom nugkanmaya. Juju aina juka ashí Basemat wegantu aajakui.
GEN 36:18 Untsu Esaú nuwe Oholibamá Aná nawanji aajakua nuna uchiji aidaun apujig: Jeús, Jaalam, Coré aatus aajakui.
GEN 36:19 Esaú Edom tutaya nuna uchiji wegantu aidaun apuji aajaku aina duka juju ainawai.
GEN 36:20 Tuja Seír horeo aents aajakua nuna uchiji aidauk: Lotán, Sobal, Sibón, Aná,
GEN 36:21 Disón, Éser, Disán aatus aajakui. Juju aajaku ainawai Seíra uchiji wegantu aidau horeo aents wegaunum akiinau aina nuna apuji aidau Edom nugkanum batsamsau aina nunú.
GEN 36:22 Tuja Lotánka uchiji aidauk: Horí, Hemamjai aajakui. Untsu Timná aajakui Lotánkan umayi.
GEN 36:23 Tuja Sobala uchiji aidauk: Alván, Manáhat, Ebal, Sefó, Onam aatus aajakui.
GEN 36:24 Sibógka uchiji aidauk: Aiá, Aná aatus aajakui. Nunú Aná mujanum niina apaji Sibógka burrojin kuitamak uwegshunum wekaekama yumi pukuni initkanmaya jiinun ejeyuwai.
GEN 36:25 Aná uchijishkam: Disón, nuigtu nawanji Oholibamá aatus aajakui.
GEN 36:26 Disónkan uchiji aidaushkam: Hemdán, Esbán, Itrán, Querán aatus aajakui.
GEN 36:27 Tuja Ésera uchiji aidaushkam: Bilhán, Zaaván, Acán aatus aajakui.
GEN 36:28 Disánka uchiji aidaushkam: Us, Aránjai aajakui.
GEN 36:29 Tuja horeo aentsun apuji aidauk: Lotán, Sobal, Sibón, Aná,
GEN 36:30 Disón, Éser, Disán aatus aajakui. Juju aajaku ainawai horeo aents aidaun apuji, maki makichik wegantu aidau Seír nugkanum batsamsau aina nunú.
GEN 36:31 Nunú apu aajaku aina nuu, inamajaku ainawai Edom nugkanum, Israel aents aidaunmayag eke apu atsau asamtai.
GEN 36:32 Beoran uchiji Bela aajakui Edoma apuji. Tuja niina yaaktajig Dinhaba aajakui.
GEN 36:33 Bela jakamtai, Jobab Zérah uchiji yaakat Boshránmaya aajakua nunú apu wajas inamjauwai.
GEN 36:34 Untsu Jobab jakamtai, Husam Temán nugkanmaya aajakua nunú apu wajas inamjauwai.
GEN 36:35 Husam jakamtai, Hadad Bedatan uchiji madiágnumia aents aidaun Moabnum amukua nunú apu wajas inamjauwai. Nigka yaakat Avit tawa nuwiya aajakui.
GEN 36:36 Hadad jakamtai, Samlá Masrecánmaya aajakua nunú apu wajas inamjauwai.
GEN 36:37 Samlá jakamtai, Saúl yaakat Rehobot tutai namak Eufratesa ijus awa nuwiya apu wajas inamjauwai.
GEN 36:38 Saúl jakamtai, Baal-hanán Acbora uchiji aajakua nunú apu wajas inamjauwai.
GEN 36:39 Untsu Baal-hanán jakamtai, Hadad yaakat Pau tawa nuwiya apu wajas inamjauwai. Hadata nuwe aajakui Mehetabel, Matred aajakua nuna nawanji, tuja Mezaapa tijaji.
GEN 36:40 Tuja Esaú wegantu aidau maki makichik daagtin patayi aidaujai juunik ditash nugkentin batsamsaju aina duka juju ainawai: Timná, Alvá, Jetet,
GEN 36:41 Oholibamá, Elá, Pinón,
GEN 36:42 Quenaz, Temán, Mibsar,
GEN 36:43 Magdiel, Iram aatus. Tuja Esaún tikich daajig Edom aajakui. Juju ainawai Edoman apuji aajaku aidau, maki makichik ditash nugkentin batsamajaku aina nunisag apumeak inamjau aina nunú.
GEN 37:1 Jacopak niina apaji Canaán pujujakua nuwi pujusui.
GEN 37:2 Juju agagbauwa juka Jacopan patayi aidau pachisa augmattsamui. Josék diecisiete mijan ajamaitak, niina apaji ikaa nuwe aidau Bilhá Zilpájai aajakua nuwi niina yachi akiinau aidaujai ijunas uwijan kuitamajakui. Nuniau asa niina yachi aidau pegkegchau wajagtai apajin jegajua ujajakui.
GEN 37:3 Tuja Israelak Josén ima senchi tikich yachi aidaun nagkaesau anejakui, nii múuntuch wajas pujayatak akiau asa, José nugkugtinun jáanchin shiig pegkejan najatua susauwai.
GEN 37:4 Tujash José yachi aidauk, iina apajig Josén ima senchi aneak iinak imatikas anempainatsji tuidau asag, kajejuinak makichkish kumpamainachu.
GEN 37:5 Dutikam pujus José kajanum kajamjauwai. Nunik wagkanuk juni kanagja tusa yachi aidaun ujakui. Dutika ujakam nuna antukag, nuni senchi kajegkajui.
GEN 37:6 Dutikainam José ditan chichajak: “¡Antuktajum, wi kajanum kajamjag nuna ujaktajime!
GEN 37:7 Kajanum ii aidauti ashí ajá ejapeen trigo tsupija jigkaka ijumku batsamaji. Nuniajin wi jigka aepsamua nunú nantaki tutupit wajasmae; nunikmatai untsu atum jigkamu aidau nantajag nunú midau wajattaman tentea apakag eme anentuinak tsuntsuma ijuntsagmae”, tau.
GEN 37:8 Tusa ujakam, yachi aidau niina chichajuinak: “¿Amekaitam iina apuji wajasam inajajatnum?” tuidau. Nuna tusag nuni senchi kajegkajui, wagki nii kajamjamujin imatiksag ujakajam.
GEN 37:9 Dutikam pujus ataktushkam tikichin kajamjauwai, nunik nunashkam yachi aidaun ujaak: “Antuktajum tikichnashkam ataktu kajamjajai. Kajanum wainkamjai etsan, nantun, nuigtu once yayan. Nunú aidau mina tententuawag eme anenjusag tsuntsumjutiagmae”, tau.
GEN 37:10 Tusa niina apajin, yachi aidaujai ujakui, tusa uchiji ujaam apaji chichajak: “¿Wajimpaya dusha nunin kajabaush? ¿Wika amina dukujai, ashí yatsum aina nunú aatsan amina tikishmatjan ememattinaitjam?” tiuwai.
GEN 37:11 Nuadui niina yachi aidau senchi kajejuidau. Tujash niina apajig wajuk asag nunash nuni kajamjae tusa kuashat anentaimu.
GEN 37:12 Makichik tsawantai José yachi aidau ditá apaji uwigji ayujatnun chijichin egainak Siquemnum shiyakajui.
GEN 37:13 Nunik shiyakmatai pujusa Israel Josén chichajak: “Amina yatsum aidau uwijan kuitamainak Siquem batsata nunú wejim diista”, tiuwai. Tama José ayaak: “Ayu apawah, ame tame nunak imatiksanuk umiktajai” tiuwai.
GEN 37:14 Timatai Israel: “Ayu wetá, nunika jegaam yatsumesh wajuk batsatainawak nunú diista, nuniakum uwig aidaushkam diista. Dutikam ditash wajintuk chichainawa nunú minash taam ujatkata”, tiuwai. Tusa, José Hebrógka pakajin pujaun Israel akupkauwai, dutika akupkam Siquem wekama,
GEN 37:15 wagaka wainak wekaetatman makichik aents wekagu wainak iniak: “¿Waji egakmea amesh wekaeme?” tiuwai. Tama José ayaak:
GEN 37:16 “Wika mina yatsug aidaun egajai” tiuwai. Tusa nuna iniak: “Wait aneasam minash ujatkata tuwi dekaskesh uwijan kuitamkush batsatua”, tau.
GEN 37:17 Tama nunú aents ayaak: “Amina yatsumik juwig atsuinawai, juwi batsatu ukuak shiyakmae, tuja dita chichainak, Dotágnum weagmi tuidaun antukmajai”, tiuwai. Tusa tima Joséshkam yachi aidaun egak yaakat Dotágnum jegauwai, nunik nuwi yachi aidau batsatun wainkauwai.
GEN 37:18 Nuwi jegattak wegaun, yachi aidau wainkag, maami tusag eke jegatsaig chichaman umigkaju ainawai.
GEN 37:19 Dutika umigkaju asag chichainak: “¡Diisjua au kajamkagtinuwe nunú minawai!” tuidau.
GEN 37:20 Nuna tusag: “Kaunatajum maami, dutika waanum egkea ajapami. Dutika iina apaji jegaji ujakuishkam, ikamia kuntin yuwae timi. ¡Dutika ajinish nii kajamkagtugbauji aidaush wajuk uminkatig!” tuidau.
GEN 37:21 Tusa tuidaun Rubén antuk ayamjuktajai tusa chichaak: “Dekas tikima mautak maachmi”, tau.
GEN 37:22 Nuna tusa nuigtu chichaak: “Ayatak mautsuk, juju uwegshunum waa awa juwi egkeatajum, tujash makichkish awattsuk egkeatajum”, tiuwai. Rubén juna tiuwa nunak niina yachin uwemtikag juki apajin awagkitatau asa tiuwai.
GEN 37:23 Tusa imatu batsatai Joséshkam niina yachi aidau batsatbaunum jegantui, nunittaman jáanch nugkuagbaujin awituk jujukiag,
GEN 37:24 achika jukiag waa yumi atsamunum egkeawajui.
GEN 37:25 Dutika waanum egkea idayinak, yutain yuwinak batsatu, nunik batsatu niimsatakama Ismael aents aidau Galaad nugkanmaya camelloji aidaunum kugkuin bálsamo tutain, kugkuin mirra tutai aidaun aatus yajuakag Egipto nugkanum shimuidaun wainkajui.
GEN 37:26 Nuna wainak Judá niina yachi aidaun chichajak: “¿Waji imana jukittaji iina yachi, maa uuka idaikuish?
GEN 37:27 Dekas ayatak juki Ismael aents shima au sumakta tusa sujukmi, dutikaku tikima mautak maachmi, iina yachiya jamah”, tiuwai. Tusa tama tikich yachi aidaushkam duke ati tusag tiajui.
GEN 37:28 Nuadui Madián aents waji sujin aidau nagkaemainai, Josén yachi aidau waanmayan jiiki jukiag diitai sujukajui veinte kuichik plata najanamun juwinak. Dutikawagmatai dita sumak jukiag Egipto nugkanum ejegawajui.
GEN 37:29 Dutika sujuk awemaju ai, Rubén wakitki taa waanum José egkeamun jegantun diikma atsaun wainkauwai, nunik jáanchjin japiki ichigkui wake besemag dekapeamunum.
GEN 37:30 Nunik wakitki yachi aidaun chichajak: “¡Uchik atsawai! ¿Yamaish wisha wajukatjaki?” tau.
GEN 37:31 Tusa tutaish pachitsuk idayinak, José jáanchji awitka jujukbaun jukiag, chivo tsakatan maawag nuna numpejai jáanchin numpeajajui.
GEN 37:32 Nuna dutikawag ditá apajin akuptukajui, dutikamun juki ejetuawag chichajuinak: “Juju wainkaji ame shiig diista, amina uchigmi jáanchjichuashit”, tiajui.
GEN 37:33 Tama Jacob diistakama niina uchiji nugkutaijin wainkauwai, nunik chichaak: “¡Ehe juju jáanchia juka mina uchigdauwai!” tiuwai. Tusa chichaak: “¡Kuntin kajen pegkegchau aina nunú yuwae imatika shiig ichiajana!” tau.
GEN 37:34 Nuna tusa Jacob niina jáanchjin japiki ichigkui, nunik wake besemag dekapeaku nugkutain nugkujui. Nunik pujus uchijin aneak kuashat tsawantai tuke buutú pujau.
GEN 37:35 Imani pujutai ashí niina uchiji aidau, nawanji aidaujai anentain ichichtuinak kautuawajui. Tujash nigka dakitau anentaijun ichichtujatnume tusag. Nuniau asa: “¡Wika tuke buu buutkawa jakan niijai wainiakun, duwi wake besemag dekapeamugnak nagkaankattajai!”, tiuwai.
GEN 37:36 Tuja Madián aents aidauk dita sumaku ainayatak, Egipto nugkanum ejegawag suntag yaaktan utuawainum tusa kuitamin aidaun apuji faraógka atuwe Potifar aajakua nuwi sujukajui.
GEN 38:1 Tikich tsawantai Judá niina yachin ukuak weuwai makichik aents Hirá daagtin yaakat adulamnumia aajakua nuna jeen pujustatus
GEN 38:2 Nuwi jegaa pujus canaágnumia aents Súa aajakua nuna nawanjin wainak nujai nuwenauwai. Nunik pujusa,
GEN 38:3 ejapmitkakui, dutikam pujus tsawanji jegajim aishmagkun uchigmakui. Nunikmatai Judá uchiji daajin Er adaikauwai.
GEN 38:4 Nuna uchigmak pujus ataktu ejapjuk uchigmakmatai nunak Onán adaikauwai.
GEN 38:5 Nuigtushkam ataktu ejapjuk uchigmak nuna untsu Selá adaikauwai. Nunak Judák yaakat Quezib pujai uchigmakui.
GEN 38:6 Nuwi pujus Judá niina uchiji iwai Er aajakua nuna nuwa Tamar daagtinjai nuweauwai.
GEN 38:7 Tujash Era pujutjig Apajuí emtinig shiig pegkegchau aajakui, nuniau asamtai, Apajuí niina pujutjinak jujukiuwai.
GEN 38:8 Dutika jujukim jakamtai Judá Onágkan chichajak: “Ame yatsumin nuwe wajemea au jukim, yatsum uchi akiitsuk jaka nunú uchi akiintuata, dutikam aminiya niina uchiji wegantu aidaush yujakti”, tiuwai.
GEN 38:9 Tujash Onágkak nii uchi akiamua duka niinuchu agtinun dekau asa, yachi nuwe wajejai tsaniakush ejapmitkakaig tusa kuitamamajakui. Nunak nii akiamunmaya yachi uchiji wegantu aidau yujakai tusa dakitak nuníjakui.
GEN 38:10 Nunittaman Apajuí wainak shiig pegkegchau diisui, dutikau asa niinashkam dutiksag wamak pujutin jujukiuwai.
GEN 38:11 Dutikam jakamtai, Judá niina uchiji nuwe Tamar aajakua nuna chichajak: “Yamaik wajemeaume, junismek amina apa jeen weme pujusta, mina uchig Selá tsakagti”, tiuwai. Tusa tima Tamarshakam niina apaji jeen wee pujusui. Nunak Judá anentaimas tikich yachi aidau jakaja nunik jusha jakachaintash, tau asa tiuwai.
GEN 38:12 Tuja kuashat tsawan nagkaemakiu ai, Judá nuwe Súa nawanji aajakua nunú jakauwai. Nunik nuwe jakamtai wake besemag pujamun sakapag niina kumpaji Hirá adulam aents uyuuntsam yaakat Timnatnum niina uwigji ujen tsupijuinak batsatbaunum weuwai.
GEN 38:13 Tuja Tamarchakam niina aishi aajakua nuna apaji yaakat Timnatnum niina uwigji ujen tsupijak wee tabaun dekauwai.
GEN 38:14 Nunik dekaa waje nugkutai nugkuagbaujin awimak ukuak, waitkainum tusa jáanchin juki dukumak yapin ejak, jinta Timnat wetainum ayaumas yaakat Enaim awa nuna waitaijin ekemsauwai. Nunak Selá tsakaju aigkiap awi nemakta tusagkesh tujutchae tusa nunikui.
GEN 38:15 Nunik ekemtatman Judá wainak, yapiin dukuka eketu asamtai, juka nuwak wainka takatai aina nuwapi tiuwai.
GEN 38:16 Nuadui niina uchiji nuwe aajakua nuwapi tachau asa jegantun chichajak: “¿Minash wi amijai aankatjai taish ayu tujutmainchaukaitam?” tiuwai. Tusa tama nii ayaak: “¿Tujash ame mina dutijakmesh waji minash sujustatme?” tiuwai.
GEN 38:17 Tusa tama Judá ayaak: “Makichik chivo tsakatan awetitjame”, tau. Tama nuwa ayaak: “Ayu, dekas takumek makichik waji ukugtukta, ame nunú chivo tsakat awetujiamin nuna juwakun awagtuktagme”, tau.
GEN 38:18 Tusa tama Judá iniak: “¿Tujash wajina ukugtukti tusamea wakegame?” tau. Tama nuwa ayaak: “Ame patakumtaijum, nugkutaijum, nuigtu numi amina ushujutaigmia nunú aatsa ukugtukta”, tiuwai. Tama Judá ayu tusa ashí susa nuadui niijai tsanigkui, dutikam Judá uchijin ejapjukui.
GEN 38:19 Nunik Tamar wakitki jeen jegaa, jáanch dukumakbaujin juki ukuak, wajemea nugkutain nugkug pujusui.
GEN 38:20 Nunik pujai Judá niina kumpaji adulam aentsun chichajak: “Ame makichik chivo tsakatan amasmatai jukim nuwa ejetuam suwakum, mina wajig aidaun susan ukukmayag nunú segam itagtuata”, tusa awemauwai. Tusa tima niina kumpaji nuwan jegajua susatakama wainkachui.
GEN 38:21 Dutika wainkacha nuwiya aents aidaun iniak: “¿Tuwi pujawa nuwa wainka takatai Enaimnumia jintá ayaumas pujuma dusha?” tau. Tama dita aínak: “Juwig nuwa wainka takataig makichkish shiig atsawai”, tiajui.
GEN 38:22 Tusa tima Judá pujamunum wakitki jegaa chichajak: “Nuwanak shiig wainkachmajai, awiya aents aidaushkam juwig nuwa wainka takataig shiig atsuwe tujutiagmae”, tau.
GEN 38:23 Tusa ujaam Judá ayaak: “Nunú waji aidauk niini juwakti, tikima shiig dushikiam aig; wika chivo tsakatan amastajai tibaugnak awetijai, tujash amesh wainkachu asam susachume”, tusa idaisauwai.
GEN 38:24 Nunik idayas pujus kampatum nantu nagkaemai, Judán kautuawag chichaman ujainak: “Tamar amina uchigmi nuwe aajakua duka wainak aentsjai takama wekaekama ejapjuke”, tiajui. Tusa tama Judá senchi untsumak chichaak: “¡Nuwak jiiki jukijum apeatajum!” tiuwai.
GEN 38:25 Tusa timatai jegaji juwam, niina aishi aajaku apajin chichaman akuptak: “Wika juju wajiin takakag judaun ejapjukjai. ¿Amesh juju diisiah, jusha patakumtai, nugkutai, numi ushujutain wi takakag jusha yanawaita?” tiuwai.
GEN 38:26 Nuna dekaa nuigtu niina wajijin wainak wajaka Judá chichaak: “Niig dekas shiig anentaimui, midauwai utugchata duka, wagki wi mina uchig Selájai nuweachbau asa junak jutijuae”, tusa ayatak idaisauwai. Nuadui ataktu awagkig nuwanak makichkish wejichui.
GEN 38:27 Duwi pujus Tamar uchigmati jegamtai, jimag uchi aishmagkun uchigmakui.
GEN 38:28 Dutika uchigmam makichik uchi uwejen eemtika jiikiuwai. Dutikamtai uchí uchigmitkau uwegnum hilo kapantun tsujig juki jigkauwai. Dutika chichaak: “Juju dekatkauk akiinae”, tiuwai.
GEN 38:29 Tujash nunú uchik niyá akiinachui ayatak kuntujin awagkiuwai, nuniai niina yachi tikich eemak akiinauwai. Nunikmatai uchí uchigmitkau chichaak: “¿Amesh wajuk eteemamea jiinkiume?” taku nuna daajin Fares adaikauwai.
GEN 38:30 Nunú akiinamtai uchi uwegnum jigkamushkam akiinauwai. Nunikmatai nunak Zérah adaikauwai.
GEN 39:1 Josén Ismael aents aidau sumakag Egipto nugkanum ejegawajui, dutikawagmatai nuwiya aents Potifar daagtin sumakui. Potifarak suntag yaakta utuawainum tusa kuitamin aidaun apuji, faraógkan atuwe aajakui.
GEN 39:2 Tujash Josénak Tuke Pujuu kuitamajakui. Dutikamu asa nii egiptunmaya aentsu jeen pujus takasua duwik pegkeg pujusui.
GEN 39:3 Nuadui niina apujishkam anentaimas, Tuke Pujuuwap junak dekas yayawa dutikamu asampap takat susamash shiig umika emawa tiuwai.
GEN 39:4 Nuadui Josék apu shiig anentam asauwai, duwi Josénak ame dekas mina jegajuiya aina nunú kuitamin ata tusa ashí niina wajiji aidaunak susa idaisauwai.
GEN 39:5 Apu Potifar ashí niinu aidaunak Josén ame yamaik diista tusa susamunum nagkamas, Tuke Pujuu Potifaran pegkegnum yaigkui, dutikak niina jenianash, ajajinianashkam aikasag kuashat ikauntukui.
GEN 39:6 Imatikamu asa, Potifarak shiig kajitus, Josénak ashí niinu aidaunak idaitusui. Dutikau asa niig ayatak yuwatnujinak anentaimtujakui. Josék shiig iwajamu, yantsaptin wajakin aajakui.
GEN 39:7 Iman asamtai, tikich tsawantai apu Potifaran nuwe Josén senchi wakejukui, nunik makichik tsawantai chichajak: “¡Iijai kanagmi!”, tiuwai.
GEN 39:8 Tujash Josék dakitau asa niina chichajak: “Amesh anentaimsata, mina apug shiig kajitjus ashí niina jenia aidaunak mina idaitugsau asa, nigka makichkish puyatjutsuk shiig aneas pujawai.
GEN 39:9 Tuja juju jega juwig tikich aents mina nagkaetasuk atsawai; makichik wajigkesh wi takamainchauk atsawai, ima ameketme wi atimainchauk, wagki niina nuwe asam. Nunin aish, ¿wisha wajukeaknuk amejai kanaknush Apajuí emtinish pegkegchaunash takastaja?” tiuwai.
GEN 39:10 Tusa tamashkam nuwak Josénak antugtsuk kashi kashinig iijai kanagmi tusa waitkau. Imatjamashkam Josék nuwa chichamenak antugkachui.
GEN 39:11 Tujash makichik tsawantai José niina takatji aidaun umiktatus jegaa wayauwai. Nunik wayaun makichik aentskesh nuwig atsau asamtai,
GEN 39:12 nuwa Josén jáanchjin achika emetua chichajak: “¡Iijai kanagmi!” tau. Tujash Josék dakitau asa tupikaki jiinak, niina jáanchjin awimak ukukiuwai.
GEN 39:13 Dutika jáanchin awimak ukukmatai, nuwashkam nunú jáanchin juki wajan,
GEN 39:14 nunú jeganum tikich inak aidau batsatun untsuka ikaunman chichajak: “¡Diistajum atumesh, mina aishug hebreo aentsun juwi itagtamama nunú, iina dushiktamak mina jutijawai! Juwi tajutua iijai kanagmi tujutkui, wi dakitakun senchi untsumajai.
GEN 39:15 Tusa imatai ¡tupikak jáanchjin awimak ukuak jiinki wemae!” tau.
GEN 39:16 Tusa ashí etsejuk idayak, José jáanchjin juki ukus pujai niina aishi, José apuji aajakua nunú tauwai.
GEN 39:17 Nunikmatai nii tikich aentsun ujaak chichakbaujinak, imatiksag aishinashkam ujaak: “Ame hebreo aents inagtajai tusam itamum nunú mina kanutaijui wainjua waitkagsae.
GEN 39:18 Tujash wi senchi jiika untsumai, tupikaki jiinak niina jáanchjin awimak juwi ukukmae.
GEN 39:19 “Juna aatus amina inakem waitkagsae”, tau. Tusa ujakam José apujishkam niina nuwe chichaak aatus waitkagsae tabaun dekaa senchi kajekui.
GEN 39:20 Nunik kajeka Josén achik juki aents achika chimpitainum apu inake aidau achikam chimpijunum egkeauwai.
GEN 39:21 Dutika egkeawagmataishkam Tuke Pujuu Josénak tuke kuitamu, nuadui achijatka chimpitai kuitamnun apujishkam niinak shiig anenjauwai.
GEN 39:22 Dutikak aents achika chimpitainak, ashí aents achikam chimpijujai Josén ame ashí kuitamkata tusa idaitusui. Dutikamu asa nuwi chimpimas takajaku aina nunak José diijakui.
GEN 39:23 Aents achika chimpitain apujig Josén ashí idaitusu asa, nigka nunak puyatjujakchauwai. Wagki Josénak Tuke Pujuu kuitamajakui. Nuadui niina takatjig shiig pegkeg aajakui.
GEN 40:1 José achikam pujai, faraón uwagtinun vinon shikika su aidaun apuji, pagka najanin aidaun apujijai faraógka chichamen betek umigkachajui.
GEN 40:2 Nunikagmatai faraón uwagtinun shikika suu aidaun apujin, pagka najanin aidaun apujijai mai kajejuk,
GEN 40:3 achika apu Potifara jeen aents achika chimpitainum, José achikam egketunum, nuwi ditanashkam chimpiauwai.
GEN 40:4 Tuja aents achika chimpitain apuji Josén chichajak: “Apu faraógkan inake aidaun achika egkeag juju ame ashí diista”, tusa niina idaitusui. Dutikamu asag kuashat tsawan nuwi pujusajui.
GEN 40:5 Nuwi pujusag, faraógkan umutain shikika suu aidaun apuji, pagka najanin aidaun apujijai mai kajamjajui maki makichik dita wajukawagtinuk ayanme nuna.
GEN 40:6 Nunik kajamag tsawajag batsatai, José kashikmas weji diikma wake besek pekajun wainkauwai.
GEN 40:7 Dutika wainak ditan iniak: “¿Wagka wake besekjumesh pekagjume?” tau.
GEN 40:8 Tusa tama dita aínak: “Kajamkagtugji, nunika wajukatnuk aannush kajamjaji, yaki ujapakainta tusa anentaimku pekagji”, tuidau. Tiagtai José ayaak: “¿Dekas Apajuíchukai atum aan kajamjaujum nuna ujapamainuk? Wajuk atum kajamjaugme duka mina ujatkatajum”, tiuwai.
GEN 40:9 Tusa tima apu uwagtinun shikika suu aidaun apuji, nii kajamjamun ujaak: “Wi kajanum makichik uva numiji uva numiji tsapai wajaun wainkamjai.
GEN 40:10 Tuja nuna kanaweg kampatum ajime. Nunú kanawe aina nuwi jeeka yagkujime, nuniak niina yagkujiya duke neje najanea tsamame.
GEN 40:11 Nuniai wi faraógka umutaijin takusa wajasan uvan juukan apu shikika sutainum nuna ijujan jukin wiki apu faraógkan sumajai”, tusa ujakui.
GEN 40:12 Tusa ujakam José chichajak: “Ame kajanum kampatum kanawe wainkaum duka, kampatum tsawan atina nunú kajamjaume.
GEN 40:13 Tuja kampatum tsawan asa, apu faraón atumin itugchatjumin diigtamsattawai, nunik aminak ame takataigminig ataktu awaintamattawai, dutijamamtai ame yaunchuk apu faraón niina umutaiji umigkam suyum dutiksamek sutatme.
GEN 40:14 Tuja wi tajam nunú betek uminkamtaig, minash wait aneasam anenjata kajimatkim idaitutsuk, nuniakum mina pachittsamesh faraón ujakta minash jiigkiti.
GEN 40:15 Wika hebreo aentsuitjai nuniaig minak kasamjukag imajui itajuawagmayi, dutijuawagmatai pujai, makichik pegkegchaunakesh takamsachu aig, juwi egketuawagmatai pujajai”, tiuwai.
GEN 40:16 Nuna aatus José tikichin betek ujakmatai, pagkan najannun apujishkam Josén nii kajamjamujin ujaak: “Wishakam kajanum kampatum chagkin yaignum pag puju aidau aimkamun yajuakan mina buukeajui ekenjamjai.
GEN 40:17 Nunú chagkin kampatum mina buukjui ekenbauwa nuwiya pag shiig pegkeg yumimitu najankamu faraógdau chimpijun chigki aidau kaunak yuwagmae”, tusa ujakui.
GEN 40:18 Tusa ujakam José ayaak: “Ame kajanum kampatum chagkin yaijuch aidaun mina buukeajui ekenjai tame duka, kampatum tsawan atina nunú kajamjaume.
GEN 40:19 Kampatum tsawan asa faraón amina itugchatjumin diigtamsattawai, nunik jiigmaki numi muunnum aminak jigka detama buukmin tsupigtamak mantamattawai, dutijamamtai amina iyashminak chigki aidau yuwawagtatui”, tiuwai.
GEN 40:20 Tusa ujakajam batsamas kampatum tsawantan ejegainai, faraón nii akiinamuji tsawan tsawagmatai, ipaama yutain umika yuwinak batsamas, ashí nii ipaamu aidau emtin makichik aentsun awemauwai nii uwagtinun shikika suu aidaun apuji, pagka najanin aidaun apujijai, achikam chimpija nunú jiikjum utitajum tusa. Tusa akupkam jegajua jiiki juki itajuauwai.
GEN 40:21 Dutika itajuam nii uwagtinun shikika su aidaun apujinak ataktu yaunchuk takajakbaujinig awayauwai. Dutikam niig faraógka shikijuk suwak wekagu.
GEN 40:22 Untsu pagka najanin aidaun apujinak suwenum jigkajum numinum nenajum maatajum tusa tiuwai. Tusa timatai dutiksag maawajui, José tibaunak imatiksag.
GEN 40:23 Tujash umutain shikika apun su aidaun apujig José akatjamunak kajimatki pachitsuk idaisauwai.
GEN 41:1 Faraógka umutain shikijuk su aidaun apuji achikam pujaun jiikiajua duwi nagkamas jimag mijan wegai, makichik tsawantai, faraón niishkam kajanum namak Nilonum uwet wajamujin kajamjauwai.
GEN 41:2 Nunú namakia siete baka duwejam pegkeg aidau jiinag chijichi namaka tugkitkenian yuwinak ijunun kajamjauwai.
GEN 41:3 Nuniai tikich siete baka aidau watsaku pegkegchau tsumain aidau jiinag, tikich baka duwejam aidau chijichin yuwinak ijunbaunum jegantatak nuna ukujin namaka tugkitken ijuntsauwai.
GEN 41:4 Tuja nunú siete baka watsaku pegkegchau tsumain aidau, tikich siete baka duwejam pegkeg aidau ijuntatman shiig wamak yuwa amukajui. Nunú nunidaun faraón wainak shintajui.
GEN 41:5 Nunik shintaag tepau ataktu kanukma tikichin kajamjauwai: Untsu duwi wainkauwai trigo makichik numitak sieteya imajin nejen nejeka mantamas wakemain wajas wajattaman.
GEN 41:6 Tuja nuna ukujin tikich trigo sieteya imajin nejentin tujash dase umputai asa neje tsejegkush kagaku aidau jiiniajui.
GEN 41:7 Nunik dasen umputai asa kagaku tsejegkush aidau, tikich trigo pegkeg siete nejen mantamas wajaun wamkes yuwa amukui. Dutiktatman dii pujau shintaag, kajanmap junikja tiuwai.
GEN 41:8 Nunik nuna kajanum wainak puyatuk ane anentaimkawa tsawag kashikmas, Egipto nugkanmaya anentaimas dekamin aidaun yacha aidaujai untsuka ashí ikaunmauwai. Nunik kaunamtai faraón nii kajamjamujin ditan ashí ujakui, tujash makichkish nunú nuniktin aan kanajume tusag ujakchaju ainawai.
GEN 41:9 Dutika tujinkagmatai apu uwagtinun umijuk su aina nuna apuji, faraógkan chichajak: “Yamai wi umikchamujun adeajag nuna ujaktajame.
GEN 41:10 Ame apuh, kajekam pagkan najannun apuji wijai achigkam apu Potifara jeen aents achika chimpitainum mai egkejatuawamin pujusa,
GEN 41:11 kanamunum pagka najanin aidaun apuji kajamkagtujabi, nuniai wishakam antsanuk nunú kashia duwik kajamkagtujamiajai, nunú jimag kajamkagtugbauwa duka maki makichik nagkaemaktinji ajuyi.
GEN 41:12 Nunika kajamja, yaki ujapaka tusa pujajin nuwi makichik datsauch hebreo aents, aents achika chimpitain kuitamin aidaun apuji inaku waitkatai aajakua nunú achikam pujau waipakmatai, nii ujakabiaji. Dutika ajin wajukatnuk dusha aan kajamjabiaji nuna nii betek ujapakabi.
GEN 41:13 Tuja nii tujabauk imanisag uminkabi, duwi wika ataktu mina takatug aajakunmak wayamiajai. Untsu tikichnak suwenum jigka nená maawagmayi”, tusa ujakui.
GEN 41:14 Tusa ujakam faraón chichaak: “José utitajum” tusa awemauwai. Dutikam jegajua José achikam egketun wamkesag jiikiag awajajui. Dutikawag jáanch pegkejan yapagmamamtai jukiag faraógkai ejegawajui.
GEN 41:15 Dutika ejegawagmatai faraón chichajak: “Wi kajamkagtujan, wajukatnunak juni kajamkagtugja tusan ashí inimsajai, tujash makichkish ujatuinatsui. Nunika pujai amina au kajanmayan shiig etsegmayi tujamainakui untsukjame”, tiuwai.
GEN 41:16 Tusa tama José ayaak: “Apuh, wika wikik tumaitsujai, ¡Apajuí minai pujau asa nii dekaskea nuna ujapakti!” tiuwai.
GEN 41:17 Tusa tima faraón nii kajamjamujin Josén ujaak: “Kajanum namak Nilonum uwet wajamjai,
GEN 41:18 nuniai nunú namakia siete baka dekas pegkeg duwejam aidau jiinag namaka tugkitkenia chijichi ayaun yuwinak ijunun wainmajai.
GEN 41:19 Nuniai tikich siete baka tsumain watsaku aidau jiinag, nunú baka duwejam ijunbaunum nuna ukujin ijuntsame. ¡Wika yaunchkesh makichkish ashí Egipto nugka juwiyanak baka watsaju ibau tsumainnak wainkachuitjai!
GEN 41:20 Nunú siete baka tsumain watsaku aidau, baka duwejam pegkeg aidaun wamkesag ashí yuwawag amukagmae.
GEN 41:21 Dutika yuwawajash yuwachua nunik yama jiinainak tsumain watsaku aajakbaunak nunisag ijuniagmae. “Nuna wainkan paantapi tukaman shintagmajai.
GEN 41:22 Untsu ataktu kanukman tikichin kajamkun, wainkamjai makichik trigonmayag sieteya imajin nejek nejen mantamas wakejumain wajas wajaun.
GEN 41:23 Untsu tikich nuna ukuujin dushakam sieteya imajin nejekuwe, tujash dasen umputai asa neje tsejegkush kagaku aidau jiinag asagmae.
GEN 41:24 Nunú kagaku aidau tikich dekas pegkeg nejen mantamas wajaun wamkes yuwa amukagmae. Nuna pachisan dekamin aidaun ashí ujakmajai, tujash makichkish nunú nuniktin aan kajamjaume tusag ujatkachaje”, tau.
GEN 41:25 Tusa ujaam José faraógkan ayaak: “Apuh, ame jimag kajanum kajamjaum duka makichkia duke. Nunak Apajuí nii dutikatnujin aminak iwaintugmake.
GEN 41:26 Siete baka pegkeg duwejam aidau kajamjaum duka siete mijan atin kajamjaume, tuja siete trigo pegkeg kajamjaum dushakam nunisagke.
GEN 41:27 Tuja siete baka watsaku tsumain aidau baka duwejam aidau ukujin jiinag ijuntsau wainkaum dushakam siete mijan atin kajamjaume. Tuja makichik trigonmaya sieteya imajin nejentin tujash dasen umputai asa neje kagaku aidau wainkaum dushakam siete mijana nunuwai. Juwai siete mijanai nujan tepeatta nunú.
GEN 41:28 “Tuja wi amina tijam nunak betek Apajuí nii dutikatnujin amina iwaintugmake.
GEN 41:29 Siete mijanai ashí Egipto nugka juwig kuashat ajakma juwamu atatui.
GEN 41:30 Untsu nunú mijan nagkaemaig, nuigtushkam siete mijana imajin nujan tepeattawai. Nunikmatai nujantai senchi waitiamu atatui. Nuniau asamtai, ashí Egipto nugkanum tajimat batsamajaku aidaush senchi waitiagtatui, wagki ashí nugkanum yumain atsau asamtai.
GEN 41:31 Imanik shiig senchi yapajut tepeau asamtai, yaunchuk ajakma yuujakbauwa duka shiig atsuttawai.
GEN 41:32 Mina apujuh, ame mai numamtinuk kajamjaum nunak Apajuí nii umiktata nuna dekas aik iwaintugmake. ¡Duka imanisag shiig wamak uminkattawai!
GEN 41:33 “Nunú nuniktin asamtai, mina apujuh, ame aents yacha shiig anentaimkau diisam etegkam Egipto nugka juwi apusata nuna diistin.
GEN 41:34 Nuadui mina apujuh, ame juju aatsa umikta: Adaijata nugká apuji aidau, dutikam dita ashí Egipto nugkanum yujasag ajak juukbaunmayan cinco saco aimkamu ataik makichik, tuja dieznumian jimajan aatus yaju yajumainakua, jeganum utuaktinme siete mijana duwi.
GEN 41:35 Trigo senchi nejet mijan atata nuadui juukag ashí yaakat aina nuwi ijumjatnume. Duka amina chichamjuminig kuitamkamu ati, yapajut tepeamtaish nuwiya juki aents aidau ayugnatin asamtai.
GEN 41:36 Aatus trigo ijumjamu asamtai, Egipto nugkanum siete mijadai yapajut tepeamtaish nuwiya juki, juju nugka juwiya aents aidau ayugnati nujantai jinawainum”, tiuwai.
GEN 41:37 Tusa José timatai, faraón niina inake aidaujai nuna antukag shiig wakejukajui.
GEN 41:38 Nunik faraón niina inake aidaun chichajak: “¿Juju aentsun Apajuín Wakani aja imajush tikich aentsush igkumainkait?” tiuwai.
GEN 41:39 Tusa Josén chichajak: “Amina Apajuí yaimpasmatai yachaitam imanuk tikich aentsuk juwig shiig atsuinawai.
GEN 41:40 Ame wi pujusa inamtaijui pujusa inamjata, nuniamin ashí mina aentsug aidauk ame tabaun umigtamkatnume. Untsu ima wiki apu ekemtaijin eketu asan amina wagagkau atatjai”, tiuwai.
GEN 41:41 Nuna tusa: “¡Nijah, wi amina juju nugka Egiptua juna apuji ati tusan adaijame!” tiuwai.
GEN 41:42 Nuna tusa apu faraón niina patakumtaijin juki Josén patakuauwai. Dutika patakua chichaak: “¡Jáanch shiig pegkeg lino najanamu jukijum apegatajum!” tima dutiksag apegawajui. Dutikak nugkutai oro najanamunashkam anujajui.
GEN 41:43 Dutikawagmatai niina tikich carrojin ekeniuwai, dutika ekeni aents aidaun chichajak: “José eme anentakjum tikishmaja pujusjum senchi untsumkajum: ‘¡Yamaik iina apujig juwai!’ titajum”, tiuwai. Tusa tiajam ashí aents aidauk tikishmag pujusag untsumaidau. Aatus faraón Josénak apu adaikauwai, dutikam nii Egipto nugkanum inamjauwai.
GEN 41:44 Tuja duwi pujus faraón Josén chichajak: “Witjai dekas apu faraón chichame antugtainuk, tujash yamaik ashí Egipto nugkanmaya aidauk amina chichamjumin antugtamiagtatui, makichik aentskesh intimjutpakchagtatui”, tiuwai.
GEN 41:45 Tusa faraón José daajin yapagtua amek yamaik Safenat-panéah ata tusa adaikauwai. Dutika sacerdote Potifera yaakat On tawa nuwiya aajakua nuna nawanji Asenat aajakua nujai nuweauwai. Dutikam nuadui José ashí Egipto nugkanum wekagas inamjauwai.
GEN 41:46 Josén jukiag faraón pujamunum ejegawaju aina nunak treinta mijanji ajai dutikau ainawai. Dutika apu adaikam faraón pujamunum pujau jiinki, Egipto nugkanum yaakat aidaun diyak weuwai.
GEN 41:47 Tuja siete mijanai ajak aidauk shiig kuashat nejeauwai,
GEN 41:48 imaniku asamtai, José ashí nugkanum trigo juukbau aidaun siete mijanai yaju yajumkawa maki makichik yaakat aidaunum ijumjauwai.
GEN 41:49 Josék trigonak nayantsa kamatkajijai betek ijumjauwai. Imatikamu asa dekapamainchau asamtai dekapachui.
GEN 41:50 Tuja eke yapajut nagkamnatsaig José jimag uchin niina nuwe Asenatai akiauwai.
GEN 41:51 Yama nagkamchaku akiamujinak Manasés adaikauwai “wi waitiamugnak Apajuí ashí mina pataag aidaujai sakapitkajuae” taku tuu adaikauwai.
GEN 41:52 Untsu tikich uchiji ekeun Efraín adaikauwai. Nunak “juju nugka juwi pujusan waittsawaitag nunú nugkanmak pujaig, Apajuí minak jimag uchin sujuse” taku tuu adaikauwai.
GEN 41:53 Tuja siete mijanai Egipto nugkanum ajak aidau kuashat nejek nagkaemakiu ai,
GEN 41:54 nuigtu siete mijanai nujan tepeattawai tusa José tibaunak imanisag uminkauwai. Nuadui ashí nugka aidaunmak nujan tepeauwai, untsu Egipto nugkanmak yumainuk aajakui.
GEN 41:55 Tuja egiptunmaya aents aidaushkam dita yumainjin amukag faraógkan jegajiag yutain segaidau, dutikam ditan chichajak: “Joséyai wetajum, nunikjum nii wajinjutpatig duke umiktajum”, tiuwai.
GEN 41:56 Ashí nugkanum yapajut tepeau asamtai, aents aidauk senchi waituidau, imaniagtai José trigo ijumjamun ashí ujainiuwai egiptunmaya aidau sumaktinme tusa, yapajut aan senchi tepea wegau asamtai.
GEN 41:57 Tuja ashí tikich nugkanmaya aents aidaush José trigo ijumjamu sumakmi tusag Egipto nugkanum shimujakui, wagki ashí tikich nugkanmakesh yutaig shiig atsau asamtai.
GEN 42:1 Egipto nugkanum trigo ayawai tabaun Jacob dekaa, niina uchiji aidaun chichajak: “¿Atumesh wajukeakjumea pempeentunikjumesh ayatkesh niinish batsatjume?
GEN 42:2 Mina yamai ujatkaje Egipto nugkanum trigo kuashat ayawai tusa. Aan batsamtsuk atumesh wejum trigo sumakjum utitajum, dutikawagmin nunú, iish yuwami tikima nujantai jinawaig”, tiuwai.
GEN 42:3 Tusa tima Josén yachi diez aajaku aina nunú Egipto nugkanum trigon sumakagtatus shiyakajui.
GEN 42:4 Nunik shimiagtaish Jacopak Benjamín José yachi aajakua nunak akupkachui, wagki jusha José megkaekauwa antsag megkaekai tau asa.
GEN 42:5 Tuja ashí Canaág nugkanmag nujan tepeau asamtai, Israela uchiji aidauk tikich aents aidaujai ijunag Egipto nugkanum trigon sumakagtatus shiyakajui.
GEN 42:6 Josék Egipto nugka apuji aajakui, nuniau asa aents tikich nugkanmaya trigon sumaktatus kauntaik nii sujujakui. Nuna sujak pujai, niina yachi aidaushkam jegawajui, nunikag José emtin tikishmajag nijayin nugka antig pujusajui.
GEN 42:7 Nuniagtai José diikma niina yachi aidaun wainkauwai, dutika wainkayatak dekachu utugmaina numamtuk senchi chichajuk: “¿Atumesh tuwiyatigmea minagme?” tiuwai. Tusa tama dita ainak: “Iik canaágnumiati trigo sumaktasa mininaji”, tiajui.
GEN 42:8 Tuja Josék niina yachi aidaunak shiig wainkauwai, untsu ditak juka mina yatsujuapita tichajui.
GEN 42:9 Nuadui José niina yachi aidau emematam atinun kajamjamun adeajui, nunik chichajak: “Atumek dekamin ainagme, nunin asajum wajuk utuaik jetemainaita tusajum, dekamatasa yujagme”, tiuwai.
GEN 42:10 Tama dita aínak: “¡Atsa apuh! Ii amina inakem aidautik duka nuniatsji, ayatak trigo sumaktasa yujaji”, tiajui.
GEN 42:11 Tusag: “Ashí ii ainag jutiik makichik aishmagkuk akiamu ainaji. Iik aents pegkeg ainaji, tuja dekamati tusa awemataigkesh ainatsji”, tuidau.
GEN 42:12 Tiagtai José chichajak: “Atsa, wainkajum tajume, atumek wajuk utuaik jetemainaita tusajum dekamatasa yujagme”, tiuwai.
GEN 42:13 Tusa tama dita aimainak: “Jutii amina inakem aidautinak, iina apajig doce akimpakui, tuja iik Canaán nugkanum batsamin ainaji. Tuja makichik iina yachi ekeu iina apajijai juwakmae, untsu tikich iina yachi aajakua duka atsawai, jakauwai”, tuidau.
GEN 42:14 Nuna aatus tiagtai José ataktu ditan chichajak: “¡Nijah, juwi tajime! Atumek dekas dekamin ainagme,
GEN 42:15 tuja yamai dekapsatjime atumesh dekaskeash chichajum: Junak faraógka daajin atum umiktinun tajime. Atum chichaakjum, yatsug ekeu pujawai tajum nunú tatsaigkik juwi pujajum duka shiyakchattagme.
GEN 42:16 Yamai atum ainajum anuiya makichik akupkatajum, yatsum ekeun utiti. Untsu tikich aidautigmek juwi achinkajum batsamsattajume, nuni dekajuattajime atumesh dekaskeash chichajum nunak. Untsu nunú dekaskechuitkuig, dekamin aidauwap tuu yujawa titatjime. ¡Junak dekas faraógka daajin tajai!” tau.
GEN 42:17 Nuna tusa aents achika chimpitainum chimpia kampatum tsawan batsasui.
GEN 42:18 Dutika nunú kampatum tsawan nagkaemai ditan chichajak: “Wika Apajuínak ishamajai, nuadui atumesh wi tajim nunú betek umiktajum, nunikagmin wishakam tsagkujan mautsuk idaisattajime.
GEN 42:19 Atum dekas aents pegkeg ainakjumek, makichik atumi yatsum juwi ukuktajum, untsu tikich aidautigmek trigo jukijum wetajum atumi patayi aidau yuwatnume.
GEN 42:20 Nunikjum atumi yatsum ekeu pujawai tajum nunú itagtuatajum, dutikawagmin dekaskeash chichajum nunú dekaami. Untsu nunú dekaskechuitkuig atumek mantamnattagme”, tiuwai. Tusa tama ditashkam ayu duke ati tiajui.
GEN 42:21 Nuna tusag diták pempeentunikiag chichagdayinak: “Juka iik iina yachi sujukuitag nuadui jutikam aji. Iina yachi buutak, wait anenjugtajum tusa imatjutpakuish, antugtsuk sujukuitag nuadui juju utugchata juka igkuaji”, tuidau.
GEN 42:22 Tiagtai Rubén ditan chichajak: “Wika juna aneasan uchi maawaigpajum tusa tamaitkujum, minash antugtukchau ayugme; yamai nii maamunum jutika waitkam ainaji, nunú umiaku aatsa dekapjagmi”, tiuwai.
GEN 42:23 Nuna tusa chichainakush Josék ii chichamunak antawapi tuinachu, wagki nii chichamunak tikich aents etsegtuidau asamtai.
GEN 42:24 Aatus dita chichainamun antuk, Josék tikich yantamnum wee buutiuwai. Nunik ataktu wakitki niina yachi batsatbaunum jeganta dita wainbaunum Simeógkan etegka juki egkeatajum tima egkea emetuauwai.
GEN 42:25 Nuna dutika José niina aentsji aidaun inajui: “Tikich aina auk ditá costaljin trigo aimjugtajum, dutikakjum dita kuichkijishkam jukijum awagtukjum, dita trigo chimpia juwamujin egketuatajum. Tuja jintá wenak yuwawagtinchakam dutiksagmek susatajum”, tiuwai. Tusa inajam imatiksag umikajui.
GEN 42:26 Dutika umigkam ditá burrojin trigo aimjamun patag jukiag shiyakajui.
GEN 42:27 Nunik we wenakua dita kajigtinnum jegantag, makichik burrojin ayujatatus costaljin atia diikma wainkauwai trigo sumaku kuichik akikmakbauk imanisag awantak egkemtatman.
GEN 42:28 Dutika wainak, yachi aidaun chichajak: “¡Antuktajum, wi kuichkin akikmakmag nunak awagtugkine! ¡Nijah mina costaljui egketana!” tau. Tutai ashí wainkag senchi puyatuk kujainak pempeentunikiag tudayinak: “¿Wagka Apajuísh junash jutijamae?” tuidau.
GEN 42:29 Nuna tusag we wenakua ditá apaji Canaán pujamunum jegawajui. Nunikag dita wekaesa wainkamujinak ashí ujakajui, nuna ujakag nuadui apajin chichajuinak:
GEN 42:30 “Apu Egipto nugká apuji pujuma nunú iinak shiig senchi chichagtamkame, dutijamak: ‘Atumek dekamin ainagme’, tusa tujamae.
GEN 42:31 Tusa tujamkui ii ayaaku: ‘Atsa, iik aents pegkeg ainaji, dekamnukesh ainatsji’, tusa timaji.
GEN 42:32 Tuja nuigtushkam chichagku: ‘Jutiik ashí ijumjamak makichik aents akigbautik doce aayaji; nuniamu makichik megkaekauwai, untsu tikich ekeuwa duka amina aujai Canaágnum pujume’, timaji.
GEN 42:33 “Tusa tajin nii chichagtamak: ‘Ayu, dekas aents pegkejash ainajum dekapsatjime, juwi makichik yatsum ukuktajum nunikjum ujumak trigo jukijum atumi pataim yuwatin ejetuatajum.
GEN 42:34 Tujash nunú susa ukuakjum atumi yatsum ekeu tajum nunú itagtuatajum. Dutikawagmin duwi wisha aents pegkejap ainawa titajime. Nunú itawagmin wainkan, juju yatsum ukuajum nunashkam jiiktajai, dutikamtai atumesh shiig agkan juju nugka juwish yujasminjum’ tujamae”, tuidau.
GEN 42:35 Aatus apajin ujakag idayinak nuadui, maki makichik ditá costaljin atija diikma kuichik ijiamu aajakuk imanisag chimpimtatman wainkajui. Dutika kuichkin wainkag ditá apajijai senchi ishamkajui.
GEN 42:36 Nuna wainak Jacob chichaak: “Minak atumek shiig uchigtuchu ukugjume. Josésh megkaetugkauwai, Simeógshakam antsag wakitkig taache. ¡Yamai juju mina uchig Benjamín jujutkittagme! ¡Wika mina uchignak megkaejan wegag jama!” tau.
GEN 42:37 Tutai Rubén apajin chichajak: “Apawa mina idaitugsata, wi Benjamígnak ayan kuitamsan awagkin itajuatjame. Untsu wi awagki itachmataig, mina uchig jimaja au maata”, tiuwai.
GEN 42:38 Tusa tama Jacob ayaak: “Mina uchijuk atumjaig makichkish wechattawai. Niina yachi José jakamtai ima nigki juwake. Namputchawame jintá weagmin mina uchig megkaekamtai, wi múuntuch wajasa pujag nuna wake besemag dekapeakun buu buutkawa jakuig, duka atumi utugchatji atatui”, tiuwai.
GEN 43:1 Tuja aan nagkaemas nujan tepea wegau asamtai,
GEN 43:2 yutai sumaka ikaunmamu ashí amuekamtai, Jacob niina uchiji aidaun chichajak: “Ataktu wejum trigo sumakjum utitajum, yumain atsugtamji”, tiuwai.
GEN 43:3 Tutai Judá apajin ayaak: “Tujash apu iina chichagtamak: ‘Atumi yatsum ekeu tajum nunú itachiatkugmek, juwi ataktu taagmek waitkaigpa’ tujamayi.
GEN 43:4 Tujabiu asamtai iina yachi ekeuwa anú jutijai akupeakminig, shiyaka trigo sumaka ikaunmamainaitji.
GEN 43:5 Untsu ame iina yachi ekeuwa anú awemashkuminig, iishkam yutai sumakuik wechattaji. Apu iina chichagtamak yatsum ekeu itachiatkugmek, juwi ataktu taagmek waitkaigpa tusa tujamayi”, tau.
GEN 43:6 Tusa tama Israel chichaak: “¿Wagka minash ibau pegkegchaush itagtuaugme? “¿Wagka nunú apush, tikich iina yachi ekeu ajutjamji tusagmesh ujakmaijume?” tiuwai.
GEN 43:7 Tama dita ainak: “Iishkam ujamainchawaitku, nii iina patayi aidaun pachis inimpakui ujakmaiji. Dutika ajin nii inimpak: ‘¿Atumin apash pujawak? tusa ataktu inimpak, ¿tikich yatsumish pujatsuak?’ tusa inimpakui, aus yatsum ekeu itaata tujamti tachau asa ujakmaiji”, tiajui.
GEN 43:8 Nuna tusag Judá niina apaji Israelan chichajak: “Apawah, uchik mina idaitugsata nii juki wegagmi, nuniashkuik ashí iina uchiji aidaujai nuigtu, ame aatsa nujantai jinattaji.
GEN 43:9 Wi niinak kuitamkattajai. Tuja jintá weamunum utugchat nagkaemakmataish, wi nunak umiktajai. Wi juna tiuwaitkun awagkin juwi itashmataig, ashí nunú utugchatak minai juwakti.
GEN 43:10 Ame sujimá pujachkuminig iik jimajakesh yutai sumaka ikaunmamain wajaji”, tiuwai.
GEN 43:11 Tusa tama apaji ditan ayaak: “Ayu, duka nunisag uminkati, tuja nuniktin asamtai, iina nugkenia dekas waji shiig pegkeg aina nunú apu susatin etegja jukitajum: Ujumak bálsamo, ujumak dapa yumiji, kugkuin mirra, nueces, almendra aaja tinamjajum jukitajum.
GEN 43:12 Nuigtushkam jukitajum kuichik yama nagkamchaku jukibiujum nuni kuashat. Dutikajum kuichkin awagtugmakiagma nujai ijumjajum susatajum, namputchawame dewaka egkeachajiawash.
GEN 43:13 ¡Ayu yamaik yatsum ekeuwa dushakam jukijum ataktu wetajum nunú aentsjai chichaakjum.
GEN 43:14 Apajuí ashí senchigtina nunú atumnak yaimpaktinme, dutijamamtai apu wait anenjamag yatsumin Simeógkan agkanmitka, yatsum Benjamígnash emettsuk awagkiti. Untsu namputchawame nuna awakeachkuish, wika uchigtuchukesh juwaktin atajai!” tiuwai.
GEN 43:15 Aatus timatai Jacopa uchiji aidau waji apu susatin aidaun yajuakag nuigtushkam kuichkin yaunchuk jukimun nagkaesau jukiag, Benjamígnashkam jukiag Egipto nugkanum shiyakajui. Nunikag José pujamunum jegawagmatai,
GEN 43:16 José Benjamígkan niina yachi aidaujai wajaun wainak, aents José jenian kuitamnun chichajak: “Juju aents aina juju yajuakam mina jegajui ejegata, dutikam baka maam inagkata. Yamaik ditak etsa tutupit ai, wijai yujumkan yuwawagtatui”, tiuwai.
GEN 43:17 Tusa tima niina inake waji kuitamnuk imatiksag umikui. Dutika nigki aents aidaunashkam yajuak José jeen emauwai.
GEN 43:18 Tuja yajuaka José jeen emam senchi ishamkajui nunik diták pempeentunikiag chichainak: “¡Junak anagtamak aikagmawai! Ii kuichik akikmakbaun awagtugmakbau egketu wainkabiag nuadui jutijamji, niina inake etami, ashí iina tagkuji aidaujai waitkagmastatus”, tuidau.
GEN 43:19 Nuna tusag jegaa eke waittsuk José wajijin kuitamnun jegaantajui niijai chichastatus.
GEN 43:20 Nunik jegantag chichajuinak: “¡Apujuh tsagkugtugta! Ii yaunchuk taamiag duka trigo sumaktasa taamiaji.
GEN 43:21 Tujash nunú sumaku kuichik akikmakmayag nunú ii kanagtinum jeganta costal atia diikma, kuichik ii akikmakbau aajakuk imanisag egketaidau wainkabiaji. Dutika wainkau asa yamai awagkitasa itaaji.
GEN 43:22 Tuja nuigtushkam trigo sumaktasa kuichik nuni kuashat itaaji. Untsu yaki kuichkinash awagkish egketjamayawa duka dekatsji”, tuidau.
GEN 43:23 Tiagtai nunú inak ditan ayaak: “Wainkajum puyatkaigpajum, aunak Apajuí atumi apa Apajuíjiya dutsu costaljuminig egketjamayatai, wi atum akikmakbaunak ashí jukimiajai”, tiuwai. Nuna tusa idayak Simeógkan jiiki juki dita batsatbaunum ejentauwai.
GEN 43:24 Nuna dutika ashí yajuak José jeen utsauwai, dutika yumin juki susauwai nawen dijagtinme tusa, nuigtushkam dita burroji aidaunashkam yutain juki ayugtukui.
GEN 43:25 Tuja etsa tutupit ai yujumkan yuwak José taatin asamtai, ditashkam nuwi yuwatnunak dekainau asag dakak batsamas niina anentag susatnun umikajui.
GEN 43:26 Dutikau asag José taamtai, anentag susatin itaamu aidaun jukiag susajui. Nuna suwinak tikishmatjag tsuntsumawag nijayin nugkan antig pujusajui emematuinak.
GEN 43:27 Nuniagtai José ditan iniak: “¿Atumesh pegkejak yujajum?” tau. Tusa ataktu iniak: “¿Atum chichaakjum iina apajig múuntuch wajas pujawai timaijum dusha pegkejak pujuma?” tau.
GEN 43:28 Tusa iniam eme anentus tsuntsuma chichajainak: “Iina apaji amina inakmea duka eke jatsui, pegkeg pujume”, tuidau.
GEN 43:29 Tusa tiagtai José ditan diistakama niina yachi Benjamín nunú nuwanmak akiinauwa nunú wajattaman wainak chichaak: “¿Jukait atum chichaakjum iina yachi ekeu pujawai timaijum nunú?” tau. Tusa: “¡Uchuchih, Apajuí pegkegnum yumigtamsati!” tiuwai. Juna aatus tusa,
GEN 43:30 José niina yachin wainak senchi wake besemag buutmain dekapeak, ukuki niina kanutaijin tupikaki waya buutiuwai.
GEN 43:31 Nunik buuti nagkanak yumin juki yapin niijai ataktu jegan niina wajijin kuitamnun chichajak: “¡Yutai pekastajum!” tusa inamjauwai.
GEN 43:32 Tusa timatai inak aidaushkam Josénak makichik mesanum ekettsajui, dutikak Jacopa uchiji aidau yuwatnunashkam tikich mesanum ekettsajui. Tuja egiptunmaya aents aidaushkam aantsag ditash kanakag yuwidau. Wagki egiptunmaya aentsuk Hebreo aentsjaig tsanigkag yumainchau asamtai, dutikau ainawai.
GEN 43:33 Tuja José yachi aidau mesanum pekamainakug iwaiyá ekemsamtai, ekeu aidaushkam nunisag ekemsag pekaamak tsakatnum nagkankauwai, José nuni pekamsati tibaunak imanisag. Nuwi pekamsag anentai jegashmin dekapenak pempeentunikiag niinidau.
GEN 43:34 Yutai aidaunashkam dutiksag maki makichik pekattsauwai. Untsu Benjamígkan ima kuashat tikich aidaun nagkaesau aimjuk ekettsauwai. Aatus ashí ijunas shiig yuwawag, umutnashkam uwajag, dakunkut nagkankajui.
GEN 44:1 Nuna yuwawag, nuadui José niina inake niina wajijin kuitamnun juna aatus inajui: “Juju aents aidau jukiagtin dita costaljin trigo aimjugta, dutikam maki makichik ditá costaljin awantak kuichik egketuata.
GEN 44:2 Nunú dutikakum mina shikika umutaig plata najanamua nunú jukim, dita yachi ekeu trigon sumak kuichkin akikmakma nujai apatkam niina costaljin awantak egketuata”, tiuwai. Tusa tima José jenia waji aidaun kuitamnushkam imatiksag umikui.
GEN 44:3 Dutika ashí umigkagmatai, wetajum tusa José tima, kashikmas etsa yama jiinai burrojin yajuak shiyakajui.
GEN 44:4 Nunik yaaktan ukukiag atushat kuwagainatsaig, José niina inaken chichajak: “Aents shiyakagma nunú pataetuktajum, dutikajum amaigkajum, juju aatsa titajum: ‘¿Wagka atumesh shiig kuitamkamaitkugmesh pegkegchaunmash iikagtagme? ¿Wagka shikika umutai plata najanamush kasamkaugme
GEN 44:5 mina apug duwi uumak dekamnuwe dusha? Juka atumek shiig pegkegchau ankaugme’, tusajum titajum”, tiuwai.
GEN 44:6 Tusa tima Josén inake ditan pataetuk amainag, apu José tibaunak imatiksag tiuwai.
GEN 44:7 Tusa tama dita aimainak: “¿Wagka amesh ajamesh jutiish tukagtame? ¡Iik makichkish kasamchau ainaji!” tuidau. Nuna tusag:
GEN 44:8 “Iik kasachu asa iina costalji canaágnum jegaa ujaka diikma, kuichik chimpiju wainkaish juki awagtuki itajua sumag aikayatkuish, ¿wagkaik wainkaish iina apuji jeniash, kuichkish, orokesh kasamka jukish ukuktaji?
GEN 44:9 Untsu ame inakem ainag juwiyash yana costaljin egketuk wainkatam duka mantamnati, nunikmatai tikich aidautik apu inake wajasagmi”, tuidau.
GEN 44:10 Tusa tiagtai inak ditan chichajak: “Ayu, atum tajum duka nunisag uminkati. Tujash yana costaljin egketuk wainkatag duke mina inakjuk atatui. Untsu tikich aidautigmek agkan juwaktatjume”, tiuwai.
GEN 44:11 Tusa timatai maki makichik ditá costaljin nugká apusag jigkakbaun atijag ijumjajui.
GEN 44:12 Dutikawagmatai inak ditá yachi iwainum nagkama diya diyakua dekas ekeunum ejekama Benjamígka costaljin apu shikika umutaiji egketun wainkauwai.
GEN 44:13 Dutika wainkamtai, puyatkag wake besemag dekapeamunum jáanchjin japiki ichigkag ataktu dita costaljinak burrojin patag yajuakag waketug yaakat jegawajui.
GEN 44:14 Nunik Judá niina yachi aidaujai waketug José niina jeen pujai jegawajui. Nunikag tikishmatjag nijayin nugka antig pujusajui.
GEN 44:15 Nuniagtai José ditan chichajak: “¿Wagka atumesh anísh yujagme? ¿Atumek dekatsjumek aents witag juninuk anentaimas dekagmamaina duka?” tau.
GEN 44:16 Tusa tutai Judá ayaak: “¡Ii tumainuk makichkish atsugtamji! ¿Iik takamsachji takuish wajuk ejetajiki? Apajuí iina pegkegchaujinak waitjamkaji. Nuadui ii aidautik ame shikika umutaigmin takaku wainnaka nujai, ashí amina inakem waigkagtatji”, tiuwai.
GEN 44:17 Tusa tama José chichaak: “¡Atsa duka makichkish nunikchattawai, ima mina shikika umutaijun takaku wainnaka duke mina inataijuk atatui! ¡Untsu tikich aidautigmek shiig aneasjum agkan atumi apa pujamunum shiyaktatjume, makichkish atumin waitkagmamainuk atsawai!” tiuwai.
GEN 44:18 Tuja Judá Josén jegantun chichajak: “Mina apujuh, wait aneasam kajegtukaipa, wisha makichik chichaman ima amek antamin titajame. Amek dekas faraógkajai betekaitme.
GEN 44:19 Ame jutii inijatkum, atumi apash pujawak, tuja tikich yatsumish atsuak tukagtakmin,
GEN 44:20 ii ayaaku, iina apajig shiig muumpakiu pujugtamji, tuja iina yachi tsakat pujawai iina apaji muumpakiu ai akiinauwa nunú. Tuja nunak iina apajig shiig senchi aneenuwe, wagki nunú nuwanmak jimag akiinau tikich jakamtai, makichik juwaku asamtai, timaiji.
GEN 44:21 Tusa tajin ame chichaakum: ‘Nunú itagtuatajum wainkatjai’ tusam segajatmayume,
GEN 44:22 tusa takumin ii ayaaku: ‘Nunú uchik apajin ukukig minimaitsui, wagki ukuamak apaji jamain asamtai’, timaiji.
GEN 44:23 Tujash ame chichagkagtakum: ‘Nunú yatsum ayasam minachkugminig, makichkish awayashtatjime’, tukagtibiume.
GEN 44:24 “Tusa tukagtiamin iina apaji jegajua juna aatus tujamaji tusa, ashí imatiksaik ujakmaiji.
GEN 44:25 Nunika pujajin iina apaji chichagtamak: ‘Ataktush wejum trigo sumaka utitajum’, tusa tujamaji.
GEN 44:26 Tusa tujamkui ii chichaaku: ‘Apawah, iina yachi ekeuwa nunú jutijai minachkuig iikik wemaitsuji, wagki nii minichmataig, nunú apua duka makichkish jegajuaik waimaitsuji’, timaiji.
GEN 44:27 “Tusa tajin iina apaji chichagtamak: ‘Atumek dekagme mina duwag jimagchik uchin uchigmakua duka;
GEN 44:28 nuwiya tikichia duka ayatak megkaekauwai, nuniku asamtai, yamaikish waintsujai. Wika dekas kuntin ikamia kajenuap yuwawaita tiuwaitjai.
GEN 44:29 Tuja juju niina yachi wijai puja nunú jukijum namputchawame megkaekamtaig duka atumi utugchatji atatui, wi muumpakin pujag nuna wake besemag anentaimkun buu buutkawan jataik’, tujutmayi.
GEN 44:30 “Tusa tujutiu asamtai, juna uchin ukukin wiki jegamtaig, juju ima senchi aneetaiji asamtai,
GEN 44:31 iina apajig uchijin wainkachag jamainai. Nunik jakamtaig ii utugchatji amainai, wagki múuntuch wajasu asa senchi ane anentaimkawa jamain asamtai.
GEN 44:32 Nuadui wi mina apajun chichagkun: ‘Apawah, wi uchinak kuitamkan itatjai, wi juna tiuwaitkun awagkin juwi itashmataig, ashí nunú utugchatak minai juwakti’, tibaijai.
GEN 44:33 “Nuadui apuh wi amina tajame, wait aneasam antugtukta juju uchia nunú amina inakem amaina nuna wi juwaktajai. Nuniai nigka tikich yatsug aidaujai wakitkiti.
GEN 44:34 ¿Wagkanuk uchí ukuknush wikish mina apag pujamunmash jegatja? Wi uchí ukuki jega ai, mina apag anentaimak waitiakui diitan dakitajai”, tusa Josén tiuwai.
GEN 45:1 José ugmamá pujumainchau dekapeak, niina inake aidau emtin tumainchau asa, senchi untsumak, tikich aidautigmek ashí jiinjajum shiyaktajum tima, jiinag ukukiajui. Nunikagmatai niina yachi aidaun chichajak: “¡Wika atumi yatsum Joséyaitjai!” tusa etsegtumakui.
GEN 45:2 Nuna tusa Josék shiig senchi jiika buutu, imatu asamtai kuashat aents egiptunmaya aidau antukajui, tuja faraógka pujusa inamtaijinchakam dekawajui.
GEN 45:3 Tuja José niina yachi aidaun chichajak: “¡Witjai Josénuk! ¿Mina apajush iwakuk puja?” tau. Tama ditak ishamkag aimkashmin wajas ijuntsajui.
GEN 45:4 Nuniagtai José ditan chichajak: “¡Aantsuk wait aneasjum juwi minai kaunatajum!” tau. Tusa tama jegantagmatai yachi aidaun chichajak: “Witjai atumi yatsum Josénuk, atum Egipto nugkanum sujutkauwaitjum nunú.
GEN 45:5 Tujash wainkajum wake besemag anentaimkujum atumek pempeentunikjum kajegdaikaigpajum, mina sujutkauwaitjum duka atum dutijatsjuminig, Apajuí pujutan ayamjuktin ati tusa juni awetiuwai.
GEN 45:6 Juju nugka juwig nujan tepea jimag mijan weawai, tuja nuigtushkam cinco mijana imajin ajak ajakmamash tsapaishtatui.
GEN 45:7 Nuniktin asamtai Apajuí juni akupkata tujamaidau asagmatai, minak atumek juni sujutkau ainagme. Nii yutai aidaun ijumjatin ati dutikamtai nuna yuwinak iwaku atum wegantush juju nugkanum batsamsatnume tau asa.
GEN 45:8 “Atumchauwaitjume mina juju nugkanum awetiutigmek. Apajuíyai mina juwi itajua faraógka chichajin ema apujtusa duka, nuadui minak ashí niina jenia aina nunak amina chichamjumin batsasta dutikakum ashí Egipto nugkashkam amek kuitamkata tujutiuwai.
GEN 45:9 Yamaik wamkesjum mina apag pujamunum wetajum, nunika jegajum juju aatsa ujaktajum: Juna aatus amina uchijum tawai: Apajuí minak ashí egiptunmaya aentsun apuji eti apujtuse. Dutijuau asamtai megkaetsuk wamkesam juwi taam waitkata.
GEN 45:10 Núnikam nugka Gosén tutaya juwi ame uchijum aidaujai, tijajum aidau, tagkujum aidau, nuigtu ashí amina wajijum aidau yajuaka kaunam wi pujag juwi tikiju pujusta.
GEN 45:11 Juwi pujusamin wi amina pataim aidaun tuja amejai aents yujau aidaush yuwawagtinun yutain amastajai nujantai waittsaijum; nujan tepea nunak cinco mijan atatui, titajum.
GEN 45:12 “Tuja wi taja nunak mina yatsug Benjamígkash atumjai wajas antamunum tajai.
GEN 45:13 Juju aatsajum mina apag wi Egipto nugkanum apu wajasan pujag nunú ujaktajum, tuja nuigtu tikich juwiya wainkaujum dushakam ujaktajum. ¡Wamak wejum mina apag utitajum!” tiuwai.
GEN 45:14 Nuna tusa yachi Benjamígkan pagkuk buutu. Nunitai Benjamígshakam Josén pagkuk wajas buutiuwai.
GEN 45:15 Nunik duwi tikich yachi aidaunashkam pagkuk yapinum kugkuak buutiuwai. Nunikag duwi José yachi aidau niijai shiig chichasajui.
GEN 45:16 Nunú José yachi aidau kaunawaje tabau faraógka pujusa inamtaijin antuekauwai, nuna antuka faraón niina atuwe aidaujai shiig aneasajui.
GEN 45:17 Nunik faraón Josén chichajak: “Amina yatsum aidau kauna nunú trigon aimjag burrojin pataja jukiag Canaán nugkanum wetinme,
GEN 45:18 nunik jegawag dita apajin, patayi aidaujai yajuakag juwi itatnume. Dutikawagmatai wi dekas dita pujustinnak nugka pegkeg Egipto nugkanum awa nuna susatjai, dutikawajam nuwi pujusag shiig yuwawag pujustinme, tajai.
GEN 45:19 Ame juwiya carreta aidau ishitkata, nuwi ditá nuwe aidaun uchiji aidaujai yajumainak, atumi apanashkam jukiag itatnume.
GEN 45:20 Dita wajiji aina nunak puyatjukainmegka, wagki egiptunmaya dekas waji pegkeg aina nunú ditanuk agtin asamtai”, tiuwai.
GEN 45:21 Tusa tima Israela uchiji aidaushkam, ayu duke ati tiajui. Tiagmatai José nii ishitkauwai carreta aidaun faraón tibaunak imatiksag, dutikak nuigtu jintá weaku yuwatnujinashkam susauwai.
GEN 45:22 Nuigtushkam dita nugkugtinun maki makichik jáanchin tinamiuwai. Untsu Benjamígkan cinco jáanchin nugkutain susauwai, dutikak nuigtushkam trescientos kuichik plata najanamun susauwai.
GEN 45:23 Tuja apajinashkam waji shiig pegkeg egiptunmaya aidaun etegkeg yajuak diez burronum patag akuptukui, nuigtu tikich diez burronum yutai trigon pagjai patatug nii jintá minisa yuwatnujin ishitkauwai.
GEN 45:24 Dutika ashí susam nuna jukiag shimiagtai José niina yachi aidaun chichajak: “¡Jinta wesajum wainkajum maani yujaigpajum!” tiuwai.
GEN 45:25 Tusa tima egiptunmaya jiinkiag Canaán nugkanum ditá apaji Jacob pujamunum jegawajui.
GEN 45:26 Nunik jegawag, Jacopan ujainak: “Josék yamaikish iwaku pujawai, nuniu asa nii Egipto nugkan apuji wajas pujume”, tusa ujaam puyatuk anentaimak dekaskeash tujutuina tusa dita tuinamunak antugmainchau dekapjauwai.
GEN 45:27 Nunitai dita Joséjai chichasbaunak imatiksag ujakajui. Tusa tamash utujimiatak, José carreta aidau niina jukiti tusa ishitkamun wainak shiig aneasui.
GEN 45:28 Nunik Jacob chichaak: “¡Make yamaik mina uchig José iwaku pujamun dekajai! ¡Nuniku asan wisha wenu iwaku pujag juajuik mina uchijun waipaktajai!” tiuwai.
GEN 46:1 Israel niina wajiji aidaun niina tagkuji aidaujai yajuak wea weakua bershebanum jegauwai, nuwi jegaa Apajuí niina apaji Isaaka Apajuíjin emematak kuntinun maa nuna nejen ujumak apeauwai.
GEN 46:2 Dutika nuwi kanittaman Apajuí kajanum wantintuk niina daajin adaitus untsukui. Tusa untsuam nii ayaak: “Juwi pujajai, Apujuh”, tiuwai.
GEN 46:3 Tutai Apajuí chichajak: “Witjai Apajuí amina apa Apajuíjinuk. Egipto nugkanum wetak ishamkaipa, awi pujusamin wi ame uchijum wegantunak shiig kuashat ikauntuktatjame.
GEN 46:4 Nuadui ame Egipto weam nunak wi uyuntsattajame, tuja wiki ame wegantu aidaunashkam Egipto batsatunak jiijan awagkitnaitjai. Tuja nuigtushkam ame eke jatsminig José kuitamjamkamtai pujusam jakattame”, tiuwai.
GEN 46:5 Tusa tima kanag tsawag, Jacob bershebanmaya jiinki weuwai. Nunik wenak Israela uchiji aidau, niina apajin, ditá uchiji aidaun nuwe aidaujai aatus faraón carreta ditan yajuakti tusa ishitkamunum pekamiag shiyakajui.
GEN 46:6 Nunik shimak Jacob ashí yajumakui, nuniak nuigtushkam baka aidaunash, uwig aidaujaí Canaán pujusa uyujkamu aidaunak ashí yajuak Egipto nugkanum weuwai.
GEN 46:7 Tuja niina uchiji aidaush, nawanji aidaush, tijaji aishmag aidaush, nuigtu tijaji nuwa aidaushkam Jacob wetai ashí shiyakajui.
GEN 46:8 Juju ainawai Israel aents aidau Egipto nugkanum shiyakajua duka: Jacob niina uchiji aidaujai. Tuja Rubén aajakui iwai.
GEN 46:9 Untsu Rubénka uchiji aidauk: Hanoc, Falú, Hesrón, Carmí aatus aajakui.
GEN 46:10 Tuja Simeógka uchiji aidauk: Jemuel, Jamín, Ohad, Jaquín, Sóhar, nuigtu Saúl canaágnumia nuwanum akiinauwa nunú aatus aajakui.
GEN 46:11 Untsu Leví uchiji aidauk: Guersón, Quehat, Merarí aatus aajakui.
GEN 46:12 Tuja Judá uchiji aidauk: Er, Onán, Selá, Fares, Zérah aatus aajakui. Tuja Er Onágjai Canaán nugkanum jakauwai. Untsu Faresa uchiji aidauk, Hesrón, Hamul aatus aajakui.
GEN 46:13 Isacara uchiji aidauk: Tolá, Puvá, Job, Simrón aatus aajakui.
GEN 46:14 Untsu Sabulógka uchiji aidauk: Séred, Elón, Jahleel aatus aajakui.
GEN 46:15 Jacob niina nuwe Leayai Padán-aram nugkanum pujusa uchin akigkua duka, juju aajaku ainawai. Tuja niina nawanji Dinashkam. Nuwa aishmag aidaujai ashí ijumjamak, nii wegantu aidauk treinta y tres aents aajaku ainawai.
GEN 46:16 Tuja Gad uchiji aidauk: Sefón, Haguí, Esbón Suní, Erí, Arodí, Arelí aatus aajakui.
GEN 46:17 Untsu Asera uchiji aidauk: Imná, Isvá, Ishví, Berián nuigtu ditá umayi Sérah aatus aajakui. Untsu Beriá uchiji aidauk: Heber, Malquiel, aatus aajakui.
GEN 46:18 Tuja juju aajaku ainawai Jacob Zilpáyai uchi akigbau aina duka. Zilpá aajakui Labágka inake, nuna niina nawanji Lean susauwa nunú. Niina uchiji wegantu aidauk ashí ijumjamak dieciseis aajakui.
GEN 46:19 Jacob niina nuwe Raquelai uchi akiamu aidauk: José, Benjamín aatus aajakui.
GEN 46:20 José niina nuwe Asenatai Egipto nugkanum pujusa uchi akiamuk: Manasés, Efraín aatus aajakui. Asenatak aajakui sacerdote Potifera Onnumia aajakua nuna nawanji.
GEN 46:21 Tuja Benjamígka uchiji aidauk: Bela, Béquer, Asbel, Guerá, Naamán, Ehi, Ros, Mupim, Hupim, Ard aatus aajakui.
GEN 46:22 Juju aajaku ainawai Jacob Raquelai akiamu aina nuna uchiji wegantu aidauk. Ashí ijumjamak catorce aajakui.
GEN 46:23 Untsu Danka uchiji aidauk: Husim aajakui.
GEN 46:24 Tuja Neftalí uchiji aidauk: Jahseel, Guní, Jezer, Silem aatus aajakui.
GEN 46:25 Juju aajaku ainawai Jacob Bilháyai uchi akigbau aajakua duka. Bilhá aajakui Labágka inake, nuna niina nawanji Raquelan susauwa nunú. Niina uchiji wegantu aidau ashí ijumjamak, siete aents aajakui.
GEN 46:26 Ashí aents Egipto nugkanum Jacobjai ijunag kaunau aina nuwiya ditá nuwe aidau dekapatsuk, aishmag aidauk dekaapamak sesenta y seis aents aajakui, ima dita wegantu aidauk.
GEN 46:27 José Egipto nugkanum pujusa uchi akiamua duka jimagchik aajakui, tuja nujai ashí ijumjamak Jacob wegantu aidauk setenta aents Egipto nugkanmak jegawajui.
GEN 46:28 Nunik wesag Jacob, José ujakta nugka Goségnum pujai igkunkati tusa emtika Judán awemauwai. Nunik Goségnum jegawajun dekaa,
GEN 46:29 José niina inake aidaun inajui nii egkemja wetinjin carro umiktajum mina apajun igkugtajai tusa. Tusa tima umikagmatai, nuwi egkemag weuwai, nunik niina apajin minittaman igkugkui. Dutika igkug pagkuk wajas senchi buutú wajau.
GEN 46:30 Imanitai Israel Josén chichajak: “¡Jakautskait tuwamjame, tujash iwaku pujamin paan wainkajame, nuniku asan yamaik jaknush maak anentaimsan jakatjai!” tiuwai.
GEN 46:31 Tusa tima José niina yachi aidaun niina apaji patayi aidaujai chichajak: “Wika yamaik wenu faraógka jegajuan, mina yatsug aidau nuigtu mina apag niina patayi aidaujai Canaágnum batsatu wijai pujustag tusag kaunawaje.
GEN 46:32 Nunik mininak ditá uwigji aidaun baka aidaujai, ashí ditá wajiji aidaunak yajuakag kaunawaje, ditak tuke uwijan kuitamin, nuigtu baka tsakapau ainawai tusan ujaktajai.
GEN 46:33 Tusa ujaka ai faraón untsugmakag: ‘¿Atumesh waji takata takau ainagme?’ tusa inimpakuig:
GEN 46:34 ‘Ii aidautik uwig tsakapau ainaji, iina apachjishkam tagku tsakapajaku asagmatai’, titajum. Nuadui atumesh juju nugka Goségka juwi batsamsamnujum, wagki egiptunmaya aents aidauk tagkun tsakapau aina nujai ijunja pujutnak dakitin ainawai”, tiuwai.
GEN 47:1 Nuna tusa ukuak José faraógkan ujaktatus weuwai. Nunik jegaa faraógkan ujaak: “Mina apag mina yatsug aidaujai Canaán nugkanum batsatu uwig aidaun, baka aidaun, nuigtu ashí tikich ditá wajiji aidaunashkam yajuakag, Gosén nugkanum kaunawaje”, tiuwai.
GEN 47:2 Tusa ujaka ukuak niina yachi aidaun cinco etegkeg juki, faraón wainkati tusa ejegauwai.
GEN 47:3 Dutikamtai faraón José yachi aidaun iniak: “¿Atumesh waji takata takau ainagme?” tau. Tusa tama dita aimainak: “Jutii amina inakem aidautik uwig kuitamin ainaji, iina apachji aajaku aidaush tuké tagkunak kuitamajaku asagmatai.
GEN 47:4 Tuja nujan tepeau asa canaágnumak chijichi uwig ayugmainush atsau asamtai, juwi batsamsatasa kaunaji”, tuidau. Nuna tusag: “¡Apuh, wait aneasam nugka Gosén tutaya au sukagtusta, iish awi batsamsagmi!” tiajui.
GEN 47:5 Tusa tiagtai faraón Josén chichajak: “Amina apa, amina yatsum aidau amejai ijunag pujusagtatus kaunawaje.
GEN 47:6 Juju Egipto nugka juka ame diyame, nuniau asam amina apa yatsum aidaujai nugka pegkeg Goségka au susata, dutikam, nuwi batsamsatnume. Tuja dita aina awiya tagku kuitamin yacha akuig, nunú jukim mina tagkuju kuitamjutuina nuna apuji adaikata”, tiuwai.
GEN 47:7 Tusa timatai, José niina apajinashkam juki faraón wainkati tusa ejentauwai. Dutikam Jocobshakam faraógkan eme anentus kumpamauwai.
GEN 47:8 Dutikam faraón Jacopan iniak: “¿Aminash wajupa mijana ajutjamua?” tau.
GEN 47:9 Tusa tama Jacob ayaak: “Wika junika wekae wekaekawan ciento treinta mijan ejejai. Mina mijanjuk ujumchiki, wika mina apag batsamajakajua imaniknuk ejechajai”, tiuwai.
GEN 47:10 Nuna tusa Jacob faraógkan kumpama ukuak jiinki weuwai.
GEN 47:11 Nunikmatai José niina apajin niina yachi aidaujai faraón tibaunak imatiksag, nugka múun Ramsés tutai aajakua nuwi batsasui. Dutikam ditashkam nuwi nugkeenawag batsamsauwai.
GEN 47:12 Tuja nuigtushkam José niina apaji, niina yachi aidaujai ashí ditá patayi aidaujaí ijumag, yutai aidaun sujakui nujantai waittsainum tusa.
GEN 47:13 Ashí nugka aidaunmak makichik trigokesh atsujakui, nuadui nujantak aan senchi wegau. Nuniau asamtai, egiptunmaya aents aidauk canaágnumia aidaushkam nujantai jinuidau.
GEN 47:14 Tuja Josék egiptunmaya aents, canaágnumia aents aidaujai yutain sumagtai kuichkijai yapa yapajiakua dita kuichkijinak ashí yajutuk faraógka jeen ijumjauwai. Dutika yajutuk kuichkigtinchau emakui.
GEN 47:15 Dutikamu asa Egipto nugkanmash, Canaán nugkanmash kuichik shiig atsutai, wajiyaik akikmakash yutainash sumaktinme nuninak egiptunmaya aents aidau Josén jegaji chichajuinak: “¡Wait aneasam yutai sukagtusta! ¿Kuichik atsujui nujantai jinatnume tusamek idaikagtustatam?” tuidau.
GEN 47:16 Tusa tama José ditan chichajak: “Kuichkijum atsugtamainakuig atumi tagkujum itaatajum, dutikawagmin nuna juwakun trigon amastajime”, tiuwai.
GEN 47:17 Tusa tima egiptunmaya aents aidauk ditá caballojin, uwigjin, bakajin, burrojin aatus yajuakag Josén ikautuawajui. Dutikawagmatai José nuna yajumak makichik mijadai trigon suu pujau.
GEN 47:18 Tujash nunú mijan nagkaemakmatai, yutain amukag waituinak, ataktu Josén kautuawag chichajuinak: “Apujuh, iik dekas kuichkik shiig ashimkaji, tuja iina tagkuji aidaushkam ashí aminu wajase. Ii tikich sujaku yutai yapagmainuk atsugtamji, ima aentsti aidautik iina nugkejaig juwakji.
GEN 47:19 Nuniau asamtai trigo sukagtakum dekas jutiishkam iina nugkejai sumajatkata, dutikagtuawamin iishkam faraógka inake wajasa iina nugkeenig nii takajainaku ajak sukagtusamin nunú ajakma nuwiya yuwawagmi. Tuja ¿amesh wagkamek jutiish dita nugken ajakma yutsuk batsamas jinaati tusamesh idaikagtustame?” tuidau.
GEN 47:20 Tusa imatiagtai José nugka egiptunmaya aidaunak ashí sumakui faraógdau atinun, nunak egiptunmaya aents aidau nujantai jinak dita nugken sujukajui. Dutikamuk duka ashí faraógdau juwakui.
GEN 47:21 Nuna dutikawag egiptunmaya aents aidauk nugkenchau juwakag, apu inake wajasajui.
GEN 47:22 Untsu ima sacerdote nugkenak sumakchauwai, ditak faraón trigo susam nuna yuwa batsatu asagmatai. Nuadui ditak nugkenak sujukchajui wagki faraón susam yuwa batsatu asag.
GEN 47:23 Duwi pujus José aents aidaun chichajak: “Wi atumnak sumakjime, dutikamu asajum atumek yamaik atumi nugkejaí faraógdau wajasugme. Nuadui juju ajak ajakmatin jukitajum, dutikajum ajakmatajum.
GEN 47:24 Tujash nunú ajakma juwakjumek ujumak akankajum faraón susatajum, dutikakjum ipak usumta imajin juwaktata duka ajaatin, nuigtu atum uchijum aidaujai yuwatin, tuja atumjai batsatu aidau yuwatnujai jukitajum”, tiuwai.
GEN 47:25 Tama dita aimainak: “Amek dekas jutiik shiig wait anenkagtame, nuniau asam ii nujantai jamainush uwemtikagtame. ¡Nuadui jutii aidautik faraógkan inake amí tuinaji!” tiajui.
GEN 47:26 Juna aatus José chichaman umikui. Nuadui ashí aents egiptunmaya aidauk ajakmamujinian ujumak akanak faraógka suu atinme tusa tiuwai. Nunú chicham umikbau aajakua duka yamaikish nunisag awai. Tuja untsu ima sacerdote aidauk dita nugkenak faraógkan susachaju asag, tuke akikmachu ainawai.
GEN 47:27 Israel aents aidauk Egipto nugka Goségnum batsamsajui. Nunik nuwi batsamas shiig kuashat yujakajui.
GEN 47:28 Tuja Jocopak Egipto nugkanum jegag diecisiete mijan pujusui, nujai ijumjamak ciento cuarenta y siete mijan ejeyuwai.
GEN 47:29 Israel shiig muumpaki nii jakatnujin dekapmamag, niina uchiji Josén untsuka chichajak: “Wi titatjam nunú umigtuktinaitkumek, amina uwejum mina bakuju wakentin yununkata, dutikam dekas ame segatam nunak umiktatjai tusam tujutta. ¡Wait aneasam wi jakamtaig Egipto nugka juwigkik ukugsaipa!
GEN 47:30 Wi mina apag wegantu jinawajua núnikan jakamtaish, wi wegantu ukumasbau aina nuwig ukugsata”, tiuwai. Tusa tama, José ayaak: “¡Apawah, ame tame nunak dutiksanuk umiktajai!” tiuwai.
GEN 47:31 Tama Jacob uchijin chichajak: “¡Dekas nunak umiktatjai! tusam yamaya juwik tujutta”, tiuwai. Tusa tama José ayaak: “¡Nunak dekas umiktatjai!” tiuwai. Tusa timatai Israel niina pegakji chaiken tsuntsuma tepes, Josén see tusa Apajuín emematiuwai.
GEN 48:1 Nuna ti ukuki dukap tsawan pujatsaig, Josén tajuawag amina apak jamae tusag ujakajui. Tusa ujakam José weak niina uchiji Manasésan Efraígjai juki weuwai.
GEN 48:2 Nunik jegamtai uchijum José amina waipaktatus tae tusa Jacopan ujakajui, tusa ujakam niina pegakjin tepau katsuntus nantaki ekemsauwai.
GEN 48:3 Nunik ekemas Josén chichajak: “Apajuí ashí senchigtina nunú Canaán nugkanum yaakat Luz tutai awa nuwi mina wantintujuk, pegkegnum yumigtak,
GEN 48:4 aatus tujutiabi: ‘Antukta nijah, wi aminak kuashat uchin uyujtuktatjame, dutika ai ame wegantu aidauk kuashat kawegkag nugka muunnum yaaktamak batsamsagtinai. Tuja nuigtushkam ame wegantu aidaun juju nugkanak susatnaitjai. Nuadui ajumaish tuke ditanu atinai’.
GEN 48:5 “Tuja, wi eke Egipto nugkanum taatsaig, amina uchijum Efraín Manasésjai akiinau aina duka mina uchig agtatui. Ditak mina shiig uchig Rubén Simeógjai aina nujai betek agtatui.
GEN 48:6 Untsu nuwi nagkama wi juwi taa pujai akiinau aina nunú amina uchigmik agtatui, tuja dushakam Efraígkan Manasésjai yachi asag, ditashkam wajiinak nugkajai betek jukiagtin ainawai.
GEN 48:7 “Wi Padán-aram pujaun wakitkin wegai canaágnum yaakat Efratanum jegattak amina duku Raquelak jakauwai, nunikmatai nunú jintanmak yamai Belén tutaya nuwi ukusan ukukiuwaitjai”, tiuwai.
GEN 48:8 Tusa Israel José uchiji aidaun wainak iniak: “¿Jusha ya ainawa?” tau. Tusa iniam,
GEN 48:9 José ayaak: “Junak wi Egipto nugkanum pujai Apajuí uchin sujusua nunú ainawai” tau. Tusa tutai niina apaji chichajak: “Wait aneasam juwi minai itanta, dutikawamin wi pegkegnum yumigsatjai”, tiuwai.
GEN 48:10 Tuja Israelak múuntuch wajasu asa shiig wainmachu asamtai, José niina uchiji aidaun juki apajin ejentuntui, dutikam pagkuk kugkuasui.
GEN 48:11 Nuna dutika Israel Josén chichajak: “Wika aminak jutikanus wainkatja tusankesh anentaimjachuitjai. Tujash Apajuí juni tiu asamtai wainkajame, dutikan amina uchijum aidaunashkam wainkajai”, tiuwai.
GEN 48:12 Tusa timatai José niina uchiji aidaun juki emenaas awajak, niina apajin eme anentus tikishmatug tsuntsuma nijayin nugka antig pujusui.
GEN 48:13 Nunik nagkanak, mai uchijin achikui. Efraígkan untsugnum achiak, Manasésan menanum achikui, dutika niina apajin ejentuntui. Dutikamu asa Efraín Jacopa menajin juwatai untsu Manasés untsugnum juwakui.
GEN 48:14 Tujash Israelak niina uweje untsuja duwi Efraígka buuken achikui. Untsu menajiya duwi Manasésa buuken achikui. Nunak nigka iwai aig, makichik anentaimtugbau au asamtai dutikauwai.
GEN 48:15 Nuna dutika Josén pegkegnum yumigkiak aatus tiuwai: “Mina apachug Abraham, Isaac Apajuín umijujaku aina nunú wi yama nagkamchakun akiinawaitag duwi nagkamas yamaikish tuke kuitamja nunú,
GEN 48:16 tuja Apajuí ángel tumain nayaimpinmaya pegkegchau aidaunmash ashí agkanmitkajuauwa dushakam, ¡juju uchi aidaunak pegkegnum yumigsati! ¡Nuadui mina daajush, mina apachug aidau, Abraham, Isaakan daajish, ditá daajin atakea duwish tuke pachitai atinme! ¡Ditak kuashat uchigtin atinme, nuninak shiig kuashat yujaktinme!”
GEN 48:17 Tusa tutai José diikma Efraín ekeuwa nuna buuken untsujin achiaun wainak makchau diisui, nuniak apaji uweje untsuja nuna achijuk juki uchiji emkau Manasésa buuken achimtikatag tiuwai,
GEN 48:18 Dutikak: “¡Atsa apawah aikawaipa! ¡Juwai emkauwa duka, juna buuken uwejum untsugmea nuadui achikta!” tiuwai.
GEN 48:19 Tusa tamashkam apajig uchijinak antugtsuk chichajak: “¡Ehe, uchuchih nunak dekajai! ¡Niishkam kuashat yujaka nugka muunnum yaaktamak batsamsatnai! ¡Tujash, niina yachi ekeuwa nunú ima senchigtin atinai! ¡Nuadui nii wegantu aidauk shiig kuashat agtinai!” tiuwai.
GEN 48:20 Nuna tusa nunú tsawantaik Jacob ditan pegkegnum yumigkiak aatus tiuwai: “Tikich aidaush pegkeg yumigkia nuna jukitag tusag atumin pachipasag: “¡Apajuí Efraígkan Manasésjai yaigkua dutika iinash yaimpakti tiagtinai!” tau. Nuna aatus tusa Israel Manasésan buuken niina uweje untsuja duwi achimainun idayak Efraígka buuken achikui.
GEN 48:21 Nuna dutika Israel Josén chichajak: “¡Antukta nijah, wika jakattajai; tujash Apajuí atumjaig pujuttawai! Nuniau asa atumi apachjumi nugkeenig awagtamkiagtinai.
GEN 48:22 Tuja aminak yatsum aina nuna nagkaesau pegkeg yumigkin amaajai: Wi amorreo aents aidau depetka jujukbau, nugka Siquem tutaya nuna amaajai, nunú jukitin ata”, tiuwai.
GEN 49:1 Nuna tusa ashimak niina uchiji aidaun untsuka ikaunman chichajak: “Juwi tantatajum, nunikagmin atakesh wajukatnuk ainagme nuna pachisan ujaktajime:
GEN 49:2 ¡Jacopan uchiji aidauwah, juwi tanta ijuntsajum atumin apa Israel tawa nunú antuktajum!
GEN 49:3 “Rubénkah, ametme mina uchig iwaimek, wi aminak nagkamchakun datsa asan akiauwaitjame, nuadui amek ajantusa diitai senchigtin wajasuitme.
GEN 49:4 Tujash imankek achatnaitme, shiig emetja anentaimchau, yumi tsukati waketama nujai betek asam, tuja mina eme anenjusa diigchau asam, mina duwagjaish ikagmakuitam nuadui.
GEN 49:5 “Simeógkak niina yachi Levíjai betek ajankachu ishamain ainawai.
GEN 49:6 ¡Ajumaish wika atumjai ijunja pujutnak dakitajai! wagki atumi kajetinig aents aidau maakjum, kuntinu kagkajish kupijajum uku yujau aidau asagmin.
GEN 49:7 ¡Atumek pegkegchau, dekas shiig pegkegchau! Atumi kajetjumik kuntin ikamia kajena ibauwai. ¡Nuadui wi atumnak ashí Israel nugkanum dapampaaktinaitjime!
GEN 49:8 “Untsu Judá aminak, yatsum aidauk pempeentugmakiag emematjamtin ainawai. Nuadui yatsumin waitkaidaush ame depetkam ayamjuktinaitme, tuja amina yatsum aidau emematjamainak tikishmatjamiagtinai.
GEN 49:9 ¡Judá, mina uchijuh! Amek leónka uchijijai betekaitme. León nejen yuwa ejemag wajas tsuntsuma ayamak múuntsukaitai tumain nugka tepegama numamtuk atinaitme. ¿Yaki aminash imanminash waitkagmasti?
GEN 49:10 Makichkish Judá senchijinak atankichagtinai, tuja nii apu wee inabaujinashkam. Untsu niina nagkaesau dekas apu taamtai, nuna ashí aents aidau niina chichamen umijuinak wedau asagmatai ukuktinaitme.
GEN 49:11 Niina burrojinash uva numijin tuja uva daekjinig jigkatnai, dutikak niina jáanchjinash ¡vino uva yumiji najanamua duwik nijatnai!
GEN 49:12 Niina jiig uva yumiji vino bukuseaya aan nagkaemas bukuseayai; tuja niina naíshkam leche pujua aan nagkaemas pujui.
GEN 49:13 “Sabulógkak nayantsanum uwet dekas lancha múun aidau anumtaiji aidaunum pujustinai. Tuja niina nugke nagkatkamuk Sidón nugka aatus atinai.
GEN 49:14 “Isacarak burro senchigtin kijinun yanau, niina wenuken waya tepesa dakimakug inanmainchawama numamtinai.
GEN 49:15 Niig nugka pegkeg ayamainjin wainak nuna tsuntsumtitnai niina tuntupen kijinun patai jukitatus, nuniak chichamjumatsuk tikima wainka tikichi inatai atinai.
GEN 49:16 “Dagkak Israel wegantu aidaujai betek nii wegantu aidaun apuji atinai.
GEN 49:17 Dagkak dapi jintá dakamak tepes caballo minittaman sagkannum esai ajiyama iman atinai.
GEN 49:18 “¡Chah Tuke Pujuuwah, uwemtijugti tusan amina dakajame!
GEN 49:19 “Gaadnak shiwag aidau jetetnai, tujash nii wajantak depetuk ipistinai.
GEN 49:20 “Asera nugkeg shiig pegkeg asamtai, yutai aidauk pegkeg shiig kuashat ajitnai, iman asamtai nuwiyan apunashkam tuké sutinai.
GEN 49:21 “Neftalík japa agkan wekagas uchijin shiig pegkejuch aidaun petsama numamtinai.
GEN 49:22 “Josék numi namaka uwet wajas shiig kagkapena kanawe múun waig senchi nejegama imanai.
GEN 49:23 Nagki akenin aidau kajejuinawai, nuniak nagki aketuinawai, dutikainak tuké waitkainawai.
GEN 49:24 Tujash José kuntujig senchi wajaknai, iman asa tuke depetmawai. ¡See kuashat Jacopa Apajuíji senchigtinuh! ¡Apajuí Israelan kuitamna nuna daajin see kuashat!
GEN 49:25 ¡See kuashat, Apajuí amina apa Apajuíjiya nunú yaimpakti; Apajuí dekas ashí senchigtina nunú aminak pegkegnum yumigtamsatin ati! ¡Nayaimpinmaya pegkeg jutai aina nuwiyanash! ¡Nayantsa initkenia pegkeg jutai aina nuwiyanash! Tuja ¡uchi akia shiig tsakapaktinnashkam, dutiksag yaimpakti!
GEN 49:26 Mina apag pegkegnum yumigtujua nuna nagkaesan wika aminak pegkegnum yumigkiajame. Wi yumigkiajam juka, nugka nain aidau tuke megkaekashtina iman atinai. Juju pegkeg yumigkia juka Josénu atinai, wagki niyai yachi aina nuwiyan Apajuí etegkamua duka.
GEN 49:27 “¡Benjamígkak lobo kajen yukagtin kashikmas neje yuwa ajum agkuantai ampinjaun tinamkagtina imanai!”
GEN 49:28 Juju doce aina juwai Israela uchiji aidau. Juna aatus ditá apaji maki makichik yumigjauwai.
GEN 49:29 Makichik tsawantai Jacob niina uchiji aidaun juna aatus tiuwai: “Wi jakatnuk namput wajaschae. Wi jakamtaig mina apag ukusbau aina nuwi waa umikbau Efrógnum hitita aentsu nugken awa nuwi ukugsatajum.
GEN 49:30 Canaán nugkanum waa Macpelá Mamrejai niinis awa nuna mina apachug Abraham ashí Efrógka nugken sumak, juka mina pataaju ukumatai ati tiuwa nuwi ukugsatajum.
GEN 49:31 Nuwi ukusajui Abrahaman niina nuwe Sarajai, nuigtushkam nuwig ukusajui mina apag Isaakan niina nuwe Rebecajai, tuja wishakam nuwig Lean ukusuitjai.
GEN 49:32 Nunú nugka duka, ashí waa aidaujai hitita aentsu nugke aajaku sumakbauwai.”
GEN 49:33 Juna aatus Jacob niina uchiji aidau umikagtinun ujaka ashimak, pegajin ataktu tepesui, nunik nuwig jakauwai.
GEN 50:1 Nunik niina apaji jakamtai, José niina apajin pagkuk buutak kugkuasui.
GEN 50:2 Nuna dutika ampijatin aidaun José chichajak: Ampi iyash kaushtaiyai ukatjajum umiktajum wamak kaujai, tiuwai. Tusa timatai imatiksag José apaji Israela iyashin ukatuk umikajui.
GEN 50:3 Dutika uka ukatuinakua cuarenta tsawan ejeyajui, nunú dutikakuik tuke imaan tsawan umitai asamtai. Tuja egiptunmaya aents aidaushkam Israel jakamtai, setenta tsawantai buutiaju ainawai.
GEN 50:4 Nunú buutbaun mijaakag, José faraógka inake aidaun chichajak: “Atumesh minash dekaskenum wait anenjakjumek faraón jegajuajum ujatjuktajum:
GEN 50:5 ‘Mina apag jakattak tepesa chichagtak: Juju makichkish ewaetsuk wi jakamtaig, Canaán nugkanum wi ukumastinjun waan tainiuwaitag nuwi ukugsatajum tujutiuwa nuna imatiksanuk umiktag tajai. Wait aneasam tsawan sujusta wisha nuwi wenu mina apajun ukusan ukuakun taatjai’, tujamui tusa ujaktajum”, tiuwai.
GEN 50:6 Tuja nuna faraón dekaa ditan ayaak: “Dekas tawai, niina apaji wajintiuwaita nunak dutiksag ukusa ukuak taati”, tiuwai.
GEN 50:7 Tusa tima José weuwai apajin ukustatus. Nunik wetai faraógka atuwe chicham antugtai egiptunmaya aidauk ashí uyuniajui.
GEN 50:8 Nuniagtai José jenia aidauk ashí, tuja niina apaji jenia aidaushkam niina yachi aidaujai betekmasag shiyakajui. Nunik ashí shimak Goségnumak ima uchi aidaunak ditá tagkuji aidaujai ukukiajui.
GEN 50:9 Nuigtushkam tikich aents aidaushkam carretanum, caballonum aatus José wetai uyunainak pataetukajui. Imanidau asag shiig kuashat aentsuk aajakui.
GEN 50:10 Nunik shiyakag, namak Jordágka yantamen etsa minitaiya nuni nugka Goren-ha-atad awa nuwi jegawajui. Nuwi jegawag shiig kuashat tuwakag buutuidau, imadiagtai Joséshkam apaji jakamunum wake besemag dekapeak siete tsawan pujusui.
GEN 50:11 Nunú imatuidaun canaágnumia aents nuwi batsamin aidau wainkag chichainak: “¡Aunak egiptunmaya aents aidau jakaun ukuinak imatuinawai!” tuidau. Nuadui nunú nugka Jordágka yantamen etsa minitaiya nuni awa nunak Abel-mizraim adaikajui.
GEN 50:12 Jacopa uchiji aidauk niina apaji tibaunak imatiksag umijuinak,
GEN 50:13 Canaán nugkanum ejegawag Macpelánum Efrón hitita aents aajakua nudau waa taimun Abraham sumak juka iina ukumataiji ati tibau aajakua nuwi ukusajui. Nunú nugkak waa taimu aajakua nujai mai, Mamre nugkanum etsa minitaiya nuni awai.
GEN 50:14 Dutika ukusa ukuak Josék niina yachi aidaujai, nuigtu tikich aents niina uyuniaju aidaujai ashí betek Egipto nugkanum waketjajui.
GEN 50:15 Nunik Jacob jakamtai José yachi aidau diták anentaimas chichainak: “Namputchawame José kajegtamtsuash, nuniakug ii pegkegchau awajkauwaitag duwi nuna umiak iina iiktamainai”, tusag
GEN 50:16 aentsun akateg akuptuinak: “Amina apa eke jatsuk tepesa José ujaktajum tusa,
GEN 50:17 juna aatus iina akaatamak: ‘¡Wi amina segajame, wait aneasam amina yatsum waitkagmasu aina nuna tudauji tsagkujata! tajame’ tujamayi. Aatus iina apaji tujabiu asamtai, iishkam ataktu pataka sumaku: Iina pegkegchauji tsagkugtamjati taji, wagki iik amina apa Apajuíjiya nuna inake aidau asaja”, tiajui. Tusa akatja ishiakam, chichama etsejin aidau jegajua ujakajui dutikam José nuna antuk buutiuwai.
GEN 50:18 Nuniai niina yachi aidaushkam kautuawag, niina emtin tikishmag nugkan nijayin antig pujusag chichajuinak: “¡Juwi pujaji, yamaik iik amina inakem ainaji!” tuidau.
GEN 50:19 Tujash José ditan ayaak: “Ishamkagtukaigpajum, wika Apajuíchuitjai atumin suwimkan amastinnuk.
GEN 50:20 Atumek pegkegchau awajkami tujutiuwaitjume, tujash Apajuí nunú pegkegchauwa nunak pegkegnum yapajiauwai, yamai wainag juna jutikatin asamtai, tuja aents aidau pujutjin uwemtikati tujutu asa.
GEN 50:21 Nuadui ishamkagtukaigpajum. Wi atum yuwatnunak uchijum aidau yuwatnujai amastatjime”, tiuwai. Aatus tusa anentain ichichtukui, dutikak shiig anentus ausauwai.
GEN 50:22 Josék niina apaji patayi aidaujai betek ijunas Egipto nugkanum pujusui. José pujusui ciento diez mijan,
GEN 50:23 imaan mijan pujau asa Efraín akiamua nuna uchiji akiinaunash, ama tijajinashkam wainkauwai. Manasésa uchiji Maquir aajakua nuna uchijinashkam nii yajuak tsakapakui.
GEN 50:24 Makichik tsawantai José niina yachi aidaun chichajak: “Wi jakatnuk namput wajaschae, tujash Apajuí atumnak tuke yaimpakagtatui. Dutijamak juju nugka juwi batsatjum nunashkam nigki jiigmaki Abrahaman, Isaakan, Jacopan aatus nugkan amastinaitjime tusa anagkuawa nuwi ejetamawagtin atinme”, tiuwai.
GEN 50:25 Nuna tusa José Israela uchiji aidau umikagtinun chichajak: “Dekas tajime, atumnak Apajuí yaimpakagtinai. Dutijamainakuig mina ukunchjush juwi ukugtutsuk jukitin atajum”, tusa yachi aidaun akatjauwai.
GEN 50:26 Tuja Josék ciento diez mijanji ajamu Egipto nugkanum pujus jakauwai. Nunikmatai iyashi wamak kaujai tusa kugkuinai ukatuk, aents jakau egketainum egkeawag ukusajui.
EXO 1:1 Israel, tikich daaji Jacob aajakua nuna uchiji aidau maki makichik ashí ditá uchijijai Egipto nugkanum utsanawaju aina nuna daajig juju ainawai:
EXO 1:2 Rubén, Simeón, Leví, Judá,
EXO 1:3 Isacar, Sabulón, Benjamín,
EXO 1:4 Dan, Neftalí, Gad, Asher aatus.
EXO 1:5 Jacopan uchiji wegantu aidau ashí ijumjamak setenta aents aajakui. Tuja niina uchiji Josék Egipto nugkanum pujujakui.
EXO 1:6 Josék niina yachi aidaujai, tikich aents aidau nunú tsawantin batsamajaku aina nujai nuwi batsamas ashí jinawaju ainawai.
EXO 1:7 Nunikagmataish dita uchiji aidauk kuashat akiinak wedau asag, shiig kuashat yujakajui. Imaanidau asag ditash senchigtin wajasag nugka dita batsatbaunmak piyakajui.
EXO 1:8 Imanikaju ai kuashat mijan asa Egipto nugka apuji yamajam, José niina patayi aidaun ayamjak dutikauwa nuna makichkish dekachu ekemiuwai. Nunú egiptunmaya aidaun chichajak:
EXO 1:9 “Israela uchiji aidauk iina nagkaetamsau yujakaje, tuja ditak iina nagkaetamsau senchigtin ainawai.
EXO 1:10 Nuadui, aan kuashat yujakainum tusaish utugmainaita nunú chicham umikagmi. Wagki namputchawame maaniamukesh ataik iina shiwaajijai atuekag jutiin pempeentugmakiag depetamak, juwi batsata nuna jiinag shiyakainum”, tiuwai.
EXO 1:11 Nuna tusa Israel aents aidaun takat katsugmanum takamtikainak waitkasagtinun, apu aidaun adaitujajui. Dutikamu asag, faraón yutai aidaun ijumajakua nuna jimag yaaktan, Pitón, Ramsés aatus najanawajui.
EXO 1:12 Tujash Israel aents aidauk imatika waitkainamash nuni senchi yujak wedau. Imaaniagtai egiptunmaya aidauk senchi ishamainak kajejuinau.
EXO 1:13 Nuninak, Israel aents aidaunak ditá inake emakag shiig senchi inainak waitkajaku ainawai.
EXO 1:14 Imatikainak takat katsugmanum nugka namukag ladrillon najankatnume tusag batsasajui, dutikainak ajanmash imatiksag takamtikainak tikima shiig senchi waitkaidau.
EXO 1:15 Nuigtushkam hebreo nuwa aidaun uchigmitkau, Sifrá, Fúa aajakua nujai, faraón tutai chichajak:
EXO 1:16 “¡Atum hebreo nuwa aidau uchigmitkakjum diistajum wajukuk akiinat! ¡Tuja aishmag akiinkuig maatajum, untsu nuwaitkuig idaisatajum!” tiuwai.
EXO 1:17 Tujash uchí uchigmitkau aidauk Apajuín ishamaidau asag, faraón tutai tibaunak umikchajui. Nuadui aishmag akiintaish mautsuk idayinau.
EXO 1:18 Nuniagtai Egipto nugka apuji ditan chichajak: “¿Wagka uchi aishmag akiinush mautskesh idaijume?” tau.
EXO 1:19 Tama dita aínak: “¡Hebrea nuwa aidauk egiptunmaya nuwajaig betekchau ainawai, ditak senchigtin aina ibau asag, eke ii jegatsjinig diták uchigmainawai!” tuidau.
EXO 1:20 Dutika idaibau asag, Israel aidauk kuashat akiinak wedau. Imaanidau asag aan nagkaemas senchigtin wedau. Tuja uchigmitkagtin aidauk Apajuín ishamainak uchin maachaju asagmatai, Apajuí ditanashkam kuashat uchigtin atinme tusa yaigkui.
EXO 1:22 Imanik Israel aents aidau kawedau asagmatai, Egipto nugka apuji ashí niina aentsji aidaun chichajak: “¡Yamai nagkamsagmek hebreo aents aidaun uchiji aishmag akiinuk ashí namaka utsaitajum, untsu nuwa akiinkuig idaisatajum!” tiuwai.
EXO 2:1 Makichik aents Leví wegantunmaya, tuja nuwashkam nunú wegantunmayajaig nuwenauwai.
EXO 2:2 Tuja uchi aishmag aidauk mantamnati tusa apu umiku ai, nuna nuwe nunú tsawantin ejapjuk uchi aishmagkun uchigmakui. Nunik uchigmak, uchi pegkejuch asamtai, dukuji uuka kampatum nantu apusauwai.
EXO 2:3 Tujash dukap tsawan uuka pujumainchau dekapeak, chagkin kajis kanumá najanamun juki, yumi wayawai tusa pegkagag, nuwi uchin egkea dukuka namak Nilo tutainum ajug ukukiuwai.
EXO 2:4 Nuna dutika, uchish wajukatig ikaa wajasa diyaku ata tusa, niina nawanjin akupkauwai.
EXO 2:5 Dutikau ai faraógka nawanji maitatus namaka akaikiuwai. Tuja nuwa niina inake aidauk namaka uwet yujai nii maak pujau tugkitak kajis tsapaku ayaunum chagkin kajis najanamu nanatun wainkauwai. Dutika wainak, niina inaken makichik awemauwai utita tusa.
EXO 2:6 Tusa tima weji juki itanmatai, ujaka diikma uchi buutu egketun wainak wait anenmain diisui. Nunik chichaak: “Juka hebreo uchi”, tiuwai.
EXO 2:7 Nuna dutiktai uchí umayi apu nawanjin jegantun chichajak: “Amesh wakegakminig, hebrea nuwa yamá uchí uchigmaku puja nuna wi ujaktajai, nunú nii amuntsuak kuitamkati”, tiuwai.
EXO 2:8 Tama nii ayaak: “¡Ayu, untsu weme nunú nuwa ujakta!” tiuwai. Tusa tima nuwauchik nunú uchí dukuji pujamunum weuwai.
EXO 2:9 Nunik ujak itanmatai, faraógka nawanji nunú nuwan chichajak: “¡Juju uchi amina jemin jukim tsakapatjugta, wi amina uchi kuitabaunum akiktajame!” tiuwai. Tusa tima uchinak niina dukujig juki kuitamak muumpitkajui.
EXO 2:10 Nunik muumpagmatai apu nawanjin susauwai. Dutikam juki nii uchijima niina daajin Moisés adaikauwai. Nunak: “wi yuminmayan jiikmaijai” taku tiuwai.
EXO 2:11 Moisés tsakaja múun wajas pujau, makichik tsawantai nii wegantunmayan niina yachi aidaun ijagsatatus weuwai. Nunik jegakma takat shiig senchi katsugman takainak batsatun wainkauwai. Nunik diistakama egiptunmaya aents niina yachi hebreo aentsun suwimtatman wainkauwai.
EXO 2:12 Dutika wainak ashí ayampa niimas, makichik aentskesh atsutai, egiptunmaya aentsun maa kayamnum yutua, ukukiuwai.
EXO 2:13 Nuna dutika kashinia duwi ataktushkam weuwai, nunik jegakma jimag aents mai Israel aentsuk pempeentunikiag maanidaun wainkauwai. Nunik wainak senchi suwimkagtaun chichajak: “¿Wagka ame wegantukesh pempeentukmesh suwime?” tau.
EXO 2:14 Tama nii ayaak: “¿Ya aminash apu chichama epegkin ati tusash adaitamkash iniish apujtamsame? ¿Egiptunmaya aents maamum dutika minash mantuatag tusamek tujutam?” tau. Tama Moisés nuna antuk senchi ishamkauwai, nunik anentaimas, dekas egiptunmaya aentsun wi maamag nunak dekawajeapi, tiuwai.
EXO 2:15 Tusa nii anentaimsamunak imatiksag faraón dekauwai. Nunik Moisés egakjum maatajum tusa inamjauwai. Tujash Moisésak tupikaki Madián nugkanum pujustatus weuwai. Nunik jegaa yumigmatnum ayaumas ekemsauwai.
EXO 2:16 Nunik eketai Reuel, tikich daaji Jetro sacerdote Madiágnumia aajakua nuna nawanji siete aajaku aina nunú, ditashkam nunú tsawantin kuntin amutai aidaunum yumi shikik aimkag ditá apaji uwigji aidaun aajagtatus yumigmatnum shiyakajui.
EXO 2:17 Nunik jegawag batsatun tikich uwija kuitamin aidau ujumak yumigmatnum kaunawag, nuwauch aidaun shiyaktajum tusa ishimiagtai, Moisés nuwi eketu asa wajatki ayamjuk yumi shikika aimak uwig aidaun aakui.
EXO 2:18 Dutikamtai nuwauch aidau wamak waketug apaji pujamunum kaunamtai, apaji iniak: “¿Wagka yamaish imanikjumesh wamkesh waketjaugme?” tau.
EXO 2:19 Tama dita ainak: “Uwija kuitamin aidau yumigmatnum kaunawag shiyaktajum tusa ajapjamiagtai, egiptunmaya aents nuwi eketu ayamjutpak yumin shikika uwig aidaunashkam aakmae”, tuidau.
EXO 2:20 Tusa tiagtai Reuel niina nawanji aidaun chichajak: “¿Tuwi dusha aentsush pujume? ¿Wagka nigkish ukukmaugme? ¡Wejum ujaktajum, taa yujumkan yuwati!” tiuwai.
EXO 2:21 Tusa timatai wejiag ujakajui, dutika ujakam jegaa taamtai, yujumak yuwamunum Jetro niina chichajak: “Juwi pujusta jutijai”, tiuwai. Tusa tama Moisés ayu tusa pujusui. Nunik pujaun Jetro niina nawanji Séforajai nuweauwai.
EXO 2:22 Nunik nuwena pujus niina nuwe Séforan ejapmitkakui, dutikam uchi aishmagkun uchigmakui, nunikmatai Moisés nunú uchi daajin Guersón adaikauwai. Nunak: “Wika juwiyachuitjai tikich nugkanmayayaitjai”, taku tuu adaikauwai.
EXO 2:23 Tuja kuashat tsawan nagkaemai faraón jakauwai. Nunik jakamtaishkam Israel aents aidauk imanisag senchi waitu batsatu. Imaanik waituidau asa, yaki ayamjutpak agkanmitkagmawa wajaidau. Nuna tusa imatuidaun Apajuí antukui.
EXO 2:24 Nunik Abrahamjai, Isaakjai, Jacobjai, nii chichaman umikua nuna adeajui.
EXO 2:25 Nunik Israel aents aidau senchi waituinamun diijus wait anenjauwai.
EXO 3:1 Moisésak niina wegaji sacerdote Madián nugkanmaya Jetro aajakua nuna uwigjin kuitamjin aajakui. Tuja makichik tsawantai Moisés uwijan yajuak uwegshun nagkaiki weuwai, nunik muja Horeb Apajuí mujaji tutainum wakauwai.
EXO 3:2 Nuwi Apajuí ángela nunin wajas numi piipich zarza kegamunum nuna ejapeen wantintukui. Nuna Moisés shiig diikma numi piipich kegayatak esaka amuechaun wainkauwai.
EXO 3:3 Nunik anentaimas: “¿Aush wajig aniawa? ¡Numi piipich kegayatak esaka amuetsu dusha wagkag aniawa, wejin diistajai!” tiuwai.
EXO 3:4 Tusa nuna diistatus jegantattak wegaun Tuke Pujuu wainak, numi piipich kegamunmaya untsuak: “¡Moisés! ¡Moisés!” tama, nii ayaak: “Juwi pujajai”, tiuwai.
EXO 3:5 Tutai, Apajuí chichajak: “Imajuig tantaipa. Sapatjum ukuimakta, wagki ame wajam aanka dekas nugka Apajuí etegkamu pegkegmai”,
EXO 3:6 tusa nuigtushkam chichajak: “Witjai Apajuínuk, amina apachjum Abraham, Isaac, Jacob aidau emematujaku aina nunuwaitjai”, tiuwai. Tutai nuna antuk Moisés ishamak Apajuín diimainchau dekapeak, yapin dukukui.
EXO 3:7 Tujash Tuke Pujuu ataktu chichajak: “Wika mina aentsug aidau Egipto nugkanum batsamas senchi waituina nunak shiig wainjai. Tuja takata apuji aidau takat katsugmanum takamtikainam waituinak pampaina nunashkam antukjai. Tuja dita waituina nunashkam shiig dekajai.
EXO 3:8 Nuadui egiptunmaya aents aidau waitkaina nuna uwemtikatasan juwi taajai. Wi ditanak jiija yajuakan nugka múun pegkeg ajak shiig tsapau, tagkush shiig muumpau, yumi aidaush ayaunum ejegawagtatjai. Nunú nugka duka Canaán aents, hitita aents, amorreo aents, ferezeo aents, heveo aents, Jebús aents aidaun batsamtai ainawai.
EXO 3:9 Antukta nijah: Wika mina aentsug Israel ame wegantu aidau senchi waituinak pampaina nunak shiig antukjai, tuja egiptunmaya aents aidau shiig senchi waitkaina nunashkam wainjai.
EXO 3:10 Nuadui umintsata, wi aminak Egipto apuji pujamunum jegaam, mina aentsug ame wegantu aidau batsata nunú jiigminum tusan akupeajame”, tiuwai.
EXO 3:11 Tusa tama Moisés Apajuín ayaak: “¿Wisha wainkauchitag juninnush Egipto apuji pujamunum jeganush, Israel aents wi wegantu aidau nuwi batsata nunash jiimainkaitag?” tiuwai.
EXO 3:12 Tutai Apajuí ayaak: “Wi aminak uyuuntsattagme. Mina aentsug ame wegantu aidau Egipto nugkanum batsata nunú jiija yajuakam, ashí atum aidautijum juju muja juwi emematjitnaitjume. Nunú betek uminkui dekattame wi amina awemajam nunú”, tiuwai.
EXO 3:13 Tutai Moisés Apajuín ayaak: “Tujash wi jegaan ditá chichagkun: ‘Atumin apachjum Abraham, Isaac, Jacob Apajuín emematujaku aina nunú atumin agkanmitkati tusa awetime’ tai dita mina aijuinak: ‘¿Dusha yaita daajish?’ tusa tujutainakuish, wisha ditanash ¿wajintu aikagtatja?” tiuwai.
EXO 3:14 Tutai Apajuí ayaak: “Mina daajuk: ‘Tuke Pujuuwai’ Juju mina aentsug aidau ujaakum: ‘Tuke Pujuu’ minak atuminig awetime, titatme”, tiuwai.
EXO 3:15 Tuja nuigtushkam Apajuí Moisésan chichajak: “Juju aatsa mina aentsug aidau ujakta. Wika Apajuí, Tuke Pujuun atumi apachjum Abraham, Isaac, Jacob emematujaku aina nunuwaitjai. Jujuwai mina daag yaunchkesh tuke asauwa nunú. Jujuwai mina daajun ajumaish tuke adaititin aina duka.
EXO 3:16 Nuadui wetá nunika jegaam Israel aentsu apuji múun aidau ijumja chichagkum: ‘Apajuí, Tuke Pujuu tutaya nuna, atumi apachjum Abraham, Isaac, Jacob emematujaku aina nunú mina wantintujuk chichagtak: Wika ditanak kajimatchau asan, egiptunmaya aents aidau waitkam batsata nunak wainjai.
EXO 3:17 Nuadui Egipto nugkanum waitkam batsata nunak ankanmitkattajai dutikan Canaán aents, hitita aents, amorreo aents, ferezeo aents, Jebús aents, heveo aents aina nuna nugke nugka pegkeg ajak shiig tsapau, tagkush shiig muumpau, yumishkam imanisag ayá nuwi yajuakan ejegattajai tujamui’, titatme.
EXO 3:18 “Tusa tamin Israel aentsu apuji múun aidau antugtamkagtatui. Nunikagmatai ditajai faraón jegajua chichagkum: ‘Tuke Pujuu, Apajuí hebreo aents aidau Apajuíji jutii aidauti emematin ainag nunú wantintugmakji. Nuniku asamtai idaikagtusta kampatum tsawan mujá shiyakaja, nuwi kuntin maa apeaku Tuke Pujuu iina Apajuíjiya nunú emematmi taji’ titatme.
EXO 3:19 “Tusa taminish, faraógkak shiyaktajum tujamchatta nunak shiig dekajai. Tujash wi niinak waitkastatjai, shiyaktajum tujamti tusan.
EXO 3:20 Dutikakun wi mina senchigjai egiptunmaya aents aidaun suwimka suwakun wainchatai ishamain aidaun iwainagtatjai. Nuadui faraón atumnak shiyaktinme tusa idaitamsagtatui.
EXO 3:21 Nuigtushkam wi egiptunmaya aents aidaunak ditá wajiji aidaun anentag shiig anenjamas amastinme titatjai. Nuadui atumek jiinja shimakjumesh uwegmatak shimutsuk wajiigtin wajasjum shiyaktatjume.
EXO 3:22 Tuja Israel nuwa aina duka maki makichik egiptunmaya nuwa pujamunum ijus pujuidauk, nuniachkush pachiinak pujaushkam jiju plata tutayai dakumka najanamu aidaun, orojai najanamu aidaun, jáanch nugkutai aidaun, aatus segagtatui. Dutikawag nuna ditá uchiji aidaun nawanji aidaujai anujagtatui. Dutika ditá wajiji ashí yajutkamu asag, egiptunmaya aidauk makichkish wajigtuchu juwakagtatui”, tiuwai.
EXO 4:1 Tutai Moisés ayaak: “Tujash minak dekaskeap tawa tujutchagtatui, nuninak wi taishkam antugtutsuk Tuke Pujuu wantintugmakchau aig, tuu wekaeme, tujutiagtatui”, tiuwai.
EXO 4:2 Tutai Tuke Pujuu niina chichajak: “¿Waji aancha takakme?” tama: “Ushujutaijun takakjai”, tau.
EXO 4:3 Tutai: “¡Nugka aepsata!” tau. Tama nugká aepsauwai. Dutikamuik dapi najaneauwai, nunikmatai Moisés nuna ishamak tupikau.
EXO 4:4 Nunitai Tuke Pujuu Moisésan chichajak: “Ujuknum achikta” tau. Tama Moisés achikui; dutikam ataktu ushujutai wajasui. Nunikmatai chichajak:
EXO 4:5 “¡Amesh jutiksamek iwaintukta! Juna wainkag dekas iina muunji Abraham, Isaac, Jacob aajaku aina nuna Apajuíjimpap wantintuke tujamiagtatui”, tusa
EXO 4:6 ataktu chichajak: “¡Jáanchjum inuam detsepem achikta!” Tama Moisés inua detsepen achikui. Nunik uwejen jiiki diikma jata lepra achikam shiig puju wajasun wainkauwai.
EXO 4:7 Nunikmatai Apajuí chichajak: “Ataktushkam dutiksamek detsepem achikta.” Tama ataktushkam inua detsepen achikui, dutika uwejen jiiki diikma yaunchuk iyashi aajakbaunak imanuk pegkeg wajasui.
EXO 4:8 Nunikmatai Tuke Pujuu chichajak: “Yama nagkamchaku iwainamugmin dekaskeapi tusa antugtamainashkush, yamai iwaintukjam juju iwaintamin dekaskeap tawa tusag antugtamkagtatui.
EXO 4:9 Tujash juju mai iwaintamash dekaskeapi tusa antugtamainashkuig, namakia yumi shikika jukim nugká ukagta, dutikam yumi ukagbauwa nunú numpa wajastatui”, tiuwai.
EXO 4:10 Tama Moisés Tuke Pujuun ayaak: “¡Chah, Tuke Pujuuwah! Wika shiig jintiaja chichamainchau dekapnujai, junak yaunchuk nagkamsan, yamai ame augtakminish nunisnuk chichajai”, tau.
EXO 4:11 Tutai Tuke Pujuu ayaak: “¿Ya aentsu weninash najatuawaita? ¿Ya najanauwaita chichachu, antuchu, wainmachu, wainbau aidaunash? ¿Wichaukaitag Tuke Pujuu, nuna dutiknunuk?
EXO 4:12 Nuadui wetá, wi aminak chichamtikattajame, wiki ame anentaimja chichaktinnash jintintuattagme”, tiuwai.
EXO 4:13 Tama Moisés ataktu chichaak: “¡Chah, Tuke Pujuuwah, wait aneasam dekas tikich awemata!” tau.
EXO 4:14 Tutai Tuke Pujuu Moisésan kajejuk chichajak: “¡Awi amina yatsum Aarón Leví wegantu shiig chichau puja nuna wi wainag jamah! Nuigtushkam nii amina igkumpaktatus minawai. Tuja amina waipak shiig aneas jujamkittawai.
EXO 4:15 Dutijamamtai niijai chichasta, nuniakum wi amina tajam nunú ashí ujakta, dutikam ame tumaina nuna nii Israel aents aidaun ujakti. Tuja wi niinak yaigtatjai, dutikakun atum dutikatnunashkam jintintuattajime.
EXO 4:16 Ame Aarógkak wi tumainaitag aikasmek tita, tuja nii ame tumainaitam dutiksag aents aidaun ujakti.
EXO 4:17 Tuja ¡anú ushujutaijum jukim wetá, núnikam aanjai kuashat wainchatai aidau iwainagtatme!” tiuwai.
EXO 4:18 Tusa tima Moisés wakitki niina wegaji Jetro jeen jegauwai, nunik chichaak: “Wisha mina pataag Egipto nugkanum batsata nuwi wakitkitjai. Nunikan iwakuash batsata diistajai”, tau. Tutai niina wegaji Jetro ayaak: “¡Ayu, shiig kuitamamsam wetá!” tiuwai.
EXO 4:19 Moisés eke Madián nugkanum pujuttaman Tuke Pujuu chichajak: “¡Egipto nugkanum wakitkita, amina mantamatatus egapagmaya duka ashí jinawaje!” tiuwai.
EXO 4:20 Tusa tima Moisés niina nuwen uchiji aidaujai burronum pekai, Egipto nugkanum wakitkiuwai. Nuniak ushujutaijin Tuke Pujuu, jujai wainchatai aidaush iwainagtatme, tibaun juki weuwai.
EXO 4:21 Nunik wetatman Tuke Pujuu Moisésan chichajak: “¡Egipto nugkanum jegamek, Wi amina iwaintukjam duka faraógka emtinish imatiksamek mina senchiju amaag nujai iwaintukta! Wi niinak antakchau emattajai, dutikamu asa kakajus wetinme tujamchagtatui.
EXO 4:22 Nuniakuish ame nii chichagkum: ‘Juna aatus Tuke Pujuu chichaak: Israel aents aidauk mina uchig iwai amaina numamtinai.
EXO 4:23 Nunin asamtai, agkan idaitugsata mina uchig aidau jiinjag emematjitnume timajame, tusa tamash dakitau asamin, wi amina uchijum iwaiya nuna mantuattajame’, tujamui tusam tita”, tiuwai.
EXO 4:24 Tusa tima wee wenakua jintá kajittaman Tuke Pujuu Moisésan wantintuk maatag tiuwai.
EXO 4:25 Nunitai Séfora kuchii kaya najanamun juki, uchiji katiuchiji chuchuken tsupigkauwai. Dutika nuna juki Moisésa nawen antigkui, dutika chichajak: “¡Amek mina uchiju numpen yamaikish mina aishjuitme!” tiuwai.
EXO 4:26 Nuna aatus nuwe dutikamtai, Tuke Pujuushkam mautsuk weti tusa idaisauwai. Nunikmatai Séfora chichaak: Moisésak mina uchiju numpen yamaikish mina aishjui, tiuwai.
EXO 4:27 Nuna nuniai Tuke Pujuu Aarógkan chichajak: “¡Uwegshunum weme Moisés igkugkam utita!” tiuwai. Tima niishkam weji “muja Tuke Pujuu etegkamu pegkejam” tutainum waka igkug kumpamak yapiin kugkuasui.
EXO 4:28 Dutika igkugkam Tuke Pujuu titatme tibaunak imatiksag Moisés Aarógkan ashí ujakui. Tuja nunú dutikattame tusa Tuke Pujuu tibaunashkam imatiksag ujakui.
EXO 4:29 Nuna dutika nuadui Moisés Aarógjai, Israel aentsu apuji múun aidau ijumjatatus wegajui.
EXO 4:30 Dutika ijumag Tuke Pujuu Moisésan titatjume tibaunak Aarón imatiksag ashí ditan ujakui. Dutikamtai Moisés Tuke Pujuu senchijin wainchatai aidau iwainagta tibaunak imatiksag dita wainainamunum ashí iwainajui.
EXO 4:31 Nuna wainkag Israel aents aidauk: Dekas Tuke Pujuuwap awemae tiajui. Tuja Israel aents aidau waituina nunak wainjai, tuja waitkam batsata nunashkam dekajai Tuke Pujuu timae tabaun antukag, tikishmag pujusag niina emematuidau.
EXO 5:1 Nuna dutika ukuinak Moisés niina yachi Aarógjai faraógkan jegajuawag chichajuinak: “Israel aents aidauti emematin ainag nunú Apajuí, Tuke Pujuuwa nu chichaak: “ ‘Mina aentsug aina nunú idaitugsata, dutikam uwegshunum shiyakag, awi ijunag mina emematjuinak jiistamatnume’ tawai”, tuidau.
EXO 5:2 Tutai faraón ayaak: “¿Yaita dusha Tuke Pujuush, wi niina chichamen antugkan, Israel aents aidaun shiyaktajum tusa idaisatnunash? ¡Wika Tuke Pujuunak wainchaujai, nuigtushkam Israel aents aidaunak shiyaktinme tusanuk idaisashtatjai!” tau.
EXO 5:3 Tutai dita ainak: “Apajuí, Tuke Pujuu tutai, hebreo aents aidauti emematin ainag nunú wantintugmakji. Nuniku asamtai, uwegshunum kampatum tsawantai jegatainum wetatji. Nuwi jegaa kuntin maa apeaku Tuke Pujuu iina Apajuíji emematiagmi taji. Tuja nunú ii nunishtaik niina suwimke, jatakesh jutiin iyanjamainai, nuniachkush shiwagkesh maaniamunum amupamainai”, tuidau.
EXO 5:4 Tama faraón ditan ayaak: “¿Wagka Moisésa amesh Aarógjaish aents aidau takaidaush nunú takugmesh tsawantash emegkagme? Nunú tuu yujatsuk wakitkijum takastajum”, tau.
EXO 5:5 Tuja nuigtushkam faraón ditan chichajak: “Juju nugka juwi batsamas Israel aents aidau shiig kuashat yujakag takainak batsata nunidauk, takasaigpajum tusagmek tsawantak emegkaumaitsugme”, tiuwai.
EXO 5:6 Nuna tusa nunú tsawantaik faraón niina aentsji apu aidaun, nuigtu Israel aents aidau takata takagtai diistin adaijamu aidaujai ijumag chichajak:
EXO 5:7 “Yamai nagkamsagmek Israel aents aidauk ladrillon pachimag najanatnume tusagmek trigo numiji tsupigbauk susaigpajum, diták wejiag yajuaktinme.
EXO 5:8 Tujash yaunchuk najanin agma imatiksag najanatnume tusajum inagtajum, machikish awagtukigpajum. Ditak daki asag mujá shiyakaja kuntin maa apeaku Tuke Pujuu emematmi tusag imatuinawai.
EXO 5:9 Nuadui yamaik nuni senchi takamtiksatajum. Imaatikamu asag wait chicham antumainji tsawan atsugtinme”, tau.
EXO 5:10 Tusa tiajam faraógka aentsji apu aidau, Israel aents aidau takata takagtai diistin adaijamu aidaujai jiinag Israel aents aidaun ujainak: “Faraón chichaak: ‘¡Yamai nagkamsagmek trigo tsupigbauk susaigpajum tujabiu asamtai, yamaik amaschattaji!
EXO 5:11 Atum tuwiya jumainaitjume nunú atumek wejijum jukitajum. ¡Tujash nuniakjumesh najannujum duka imatiksagmek najanattagme!’ tujamui”, tuidau.
EXO 5:12 Tusa tiajam Israel aents aidauk trigo tsupigmaujai pachimja ladrillo najanmain atsau asamtai, trigo tsupija yajumku ampigbau aidaun yajuakag nujai ladrillon najanatag tuidau asag Egipto nugkanak ashí pampankag egaidau.
EXO 5:13 Tuja kashi kashinig Egipto apuji niina aentsji apu aidau Israel aents aidau takata takagtai diistin adaijamu aidaun chichajuinak: “¡Yaunchuk trigo tsupija suwamu asajum makichik tsawantaik wajupa najanmaijume duka imatiksagmek najanatajum!” tusag imatjuidau.
EXO 5:14 Tuidau asag faraón niina aentsji apu adaijamu aidau Israel aents takata takagtai diistin adaijamu aidaun asutidau. Dutikainak: “Yaunchuk najanmaijum imatiksagmekek yaug najanachmaugme, tuja yamaishkam nunisjumek umiatsjum dusha ¿wagka aniagme?” tuidau.
EXO 5:15 Imatikainam Israel aents takata takagtai diistinme tusa adaijamu aidau, faraógkan jegajuawag chichajuinak: “¿Wagka amina inakem ainajinish imatikagmesh waitkagkagtame?
EXO 5:16 Nuigtushkam trigo tsupigbaunash amina aentsjum aidauk amina inakem aidautinak sukagtuinatsui, nuninayatak: ‘¡Wamak ladrillo najanatajum!’ tusa jiyajatuinawai. Nuigtushkam asutkagtuinawai. Ii wamak umiatsug duka amina aentsjum aina nuna utugchatjiyai”, tuidau.
EXO 5:17 Tusa tiagtai nii ayaak: “Atumek daki ainagme, nunin asajum idaikagtustajum imau wee kuntin maa apeaku Tuke Pujuu emematiagmi tuu yujagme.
EXO 5:18 Tutsuk takakjum shiyaktajum, trigo tsupigbaun amainashkuish, yaunchuk trigo suwamu asajum najanmaijum imatiksagmek ladrillok najantatjume”, tau.
EXO 5:19 Tusa tiajam Israel aents aidau takata takaidaun diistinme tusa adaijamu aidau shiig utugchat diisajui.
EXO 5:20 Nuna aatus faraógkan aujus jiinkama, Moisés Aarógjai agá dakamainak batsatun wainkajui.
EXO 5:21 Nunik ditan chichajuinak: “Atumi utugchatjin ii waitiag duwi Tuke Pujuu atumnak suwimkan amastinme. Atumi tuu wekaetin faraón niina atueka takatai aidaujai shiig kajegtamkaje. Atumek tuke aneasjum egiptunmaya aidau wai waitkainakua ijinatnume tusajum jutikagtagme”, tuidau.
EXO 5:22 Tusa tiagtai Moisés Tuke Pujuun aujak: “¿Apujuh, wagka juju amina aentsjum aidaush pegkegchaunmash waitkame? ¿Wagka minash awetibiume jutika waitkastinaitkumesh?
EXO 5:23 Wi yama nagkamchakun amina daagmin pachisan faraógkajai chichasmayag duwi nagkamas yamaikish amina aentsjum aidaunak nuni senchi waitkainawai, ¡tujash amek amina aentsjum aidauk eke agkanmitkachume!” tiuwai.
EXO 6:1 Tusa tama Tuke Pujuu Moisésan ayaak: “¡Yamai wi faraógkan itugkattaja nunú wainkattame! ¡Wi mina senchijun iwaintuktatjai, dutika ai nii dekas atumnak jiinjatajum tusa tujamiagtatui!” tiuwai.
EXO 6:2 Tuja Tuke Pujuu Moisésan ataktu chichajak: “Witjai Tuke Pujuunuk.
EXO 6:3 Wika Abrahaman, Isaakan, Jacopan wantintukuitag nuaduik: ‘Apajuí ashí senchigtinaitjai’ tuu iwainmamkauwaitjai. Tujash dekas mina daag ‘Tuke Pujuu’ tutaya nunak ujakchau ainajai.
EXO 6:4 Nuigtushkam ditajai chichama umiakun: ‘Nugka Canaágkan amastajime’ tiuwaitjai. Tujash ditak nuwig ijagka numamtin batsamsaju ainawai.
EXO 6:5 Tuja Israel aents aidau Egipto nugkanum inaku waitkainam batsamas chichaina nuna yamai antukjai. Nunikan adeagjai ditá muunji aajaku aina nujai chichaman umikuitag nuna.
EXO 6:6 “Nuadui Israel aents aidau tita: ‘¡Witjai Tuke Pujuunuk! Nuniau asan egiptunmaya aents aidau waitkainam batsatjum nunak egiptunmaya aidaun suwimka suwakun jiigtatjime. Tuja takat katsugmanum takamtijamainakui waituinajum nunashkam dutiksanuk agkanmitkattajime. Wi mina senchigjai ayamjukan jiigtatjime.
EXO 6:7 Dutikan mina aentsug atinme titatjai, tuja wika Tuke Pujuu atumi ememattai atatjai. Duwi dekajuawagtinai, iina Apajuíji Tuke Pujuu tutaya nunuwap egiptunmaya aents aidau inaku waitkatai batsatutin agkanmitkagbauwaita tusag.
EXO 6:8 Nuadui wi Abrahaman, Isaakan, Jacopan chichagkun: “Nugka amastajime” tusan dekas umiktinjun anagkuawaitag nuwi ejegattajime, dutikan nuna amastatjime atumdau tuke atina nuna. Wi Tuke Pujuu tutayaitag imanun nunak tajai’ tita”, tiuwai.
EXO 6:9 Tusa tima Moisés dutiksag Israel aents aidaun ataktu ujakui. Tujash ditak antugkachaju ainawai, wagki Moisésa tuu wekaetin shiig senchi takamtijamainak waitkagmainawai tuidau asag.
EXO 6:10 Dutika antugchagtai, Tuke Pujuu Moisésan chichajak:
EXO 6:11 “¡Wetá faraón pujamunum! núnikam Israel aents aidau Egipto batsata duka, idaisata jiinjati, tita”, tiuwai.
EXO 6:12 Tama Moisés Tuke Pujuun ayaak: “Israel aents aidaukesh mina antugtuinatsu nunash ¿wajuk faraógkash antugtuktigki wi shiig jintiaja chichatsug nuniaish?” tau.
EXO 6:13 Tutai Tuke Pujuu Moisésan Aarógjai akateak: “Israel aents aidau faraógjai chichagkujum: ‘¡Tuke Pujuu Israel aents aidaun jiigtinme!’ tujamae titajum”, tiuwai.
EXO 6:28 Tuke Pujuu Moisésan Egipto nugkanum ausauwa nunak,
EXO 6:29 aatus tiuwai: “Witjai Tuke Pujuu tutai. Wi amina titatjam duka ashí imatiksamek faraón ujakta”, tiuwai.
EXO 6:30 Tusa tama Moisés Tuke Pujuun ayaak: “Tujash wi shiig jintiaja chichatsug nuniaish faraógkash ¿wajuk minash antugtuktigki?” tiuwai.
EXO 7:1 Tutai Tuke Pujuu Moisésan chichajak: “Amek faraógka emtinig wijai betek atatme. Tuja amina yatsum Aarón ame chichamun etsegtugmaktatui.
EXO 7:2 Wi titatjam nunú ame Aarón ashí ujakta; dutikam nii faraógkan chichajak: Israel aents aidau juwi batsata duka idaisata jiinjatnume tusa titatui.
EXO 7:3 Tujash wi faraógnak antakchaujai betek emattajai, dutikakun mina senchigjai ashí Egipto nugkanmak kuashat wainchatai ishamain aidaun iwainagtatjai.
EXO 7:4 Nuna wainkush faraógkak antugtamkachagtatui. Tujash wi mina senchigjai egiptunmaya aidaun suwimka suwakun, mina aentsug Israel aents aidau Egipto batsata nuna ayamjukan jiigtatjai.
EXO 7:5 Dutikakun wi mina senchijun ashí Egipto nugkanum iwainakan Israel aents aidau batsata nuna jiitai, egiptunmaya aidauk, wi Apajuí Tuke Pujuu tutayaitag nuna dekajuawagtatui”, tiuwai.
EXO 7:6 Tusa tima Moisés Aarógjai Tuke Pujuu dutikatajum tibaunak imatiksag umikajui.
EXO 7:7 Dita faraógjai chichasaju aina nunú tsawantaik, Moisésnak ochenta mijan ajujakui. Untsu Aarógnak ochenta y tres mijan ajujakui.
EXO 7:8 Tuke Pujuu Moisésan, Aarógjai chichajak:
EXO 7:9 “Wainchatai iwainakta tusa faraón tujamkuig, amina ushujutaijum jukim Aarón susata, dutikawamin faraógkash wainai nugká aepsati, dutikam dapi najaneati”, tiuwai.
EXO 7:10 Tusa tima Moisés Aarógjai faraón pujamunum weajui. Nunikag Tuke Pujuu dutikatajum tibaunak imatiksag dutikawajui. Tuja faraón niina atueka takataiji aidaujai wainainamunum Aarón ushujutain juki nugká aepsauwai, dutikam dapi najaneauwai.
EXO 7:11 Nunikmatai faraógshakam tunchi aidaun untsukui. Dutikam ditashkam dita dekamujijai dutiksag iwainakajui.
EXO 7:12 Maki makichik ditá ushujutaijin nugká aepsajui, dutikam dushakam dapi najaneakui. Tujash Aarógka ushujutaiji dapi najaneauwa nunú ditanunak ashí yuwa amukui.
EXO 7:13 Dutikamtaish faraógkak antakchau wajas ditanak antugkachajui, Tuke Pujuu nuniktatui tibaunak imanisag.
EXO 7:14 Nunikmatai Tuke Pujuu Moisésan chichajak: “Faraógkak antakchau wajasu asa, Israel aents aidaunak shiyaktinme tusag idaitsui.
EXO 7:15 Tujash kashin kashikmasam nii namaka weakui wejita, núnikam namaka uwet wajasam dakasta. Nuwi weakum ushujutaijum dapi najaneama nunú jukita.
EXO 7:16 Nuwi wajamin taamtai chichagkum: “ ‘Hebreo aents aidauti Apajuí Tuke Pujuu tutai emematin ainag nunú amina ujakti tusa awetine. Nuniak aatus tujamui: “Mina aentsug aidau uwegshunum shiyakag mina emematjitnume agkan idaisata timagme. Tujash antugtatsme”, tujamui.
EXO 7:17 Nuniau asamin juna aatus Tuke Pujuu chichaak: “ ‘ “Yamai dekaattame wi Apajuí Tuke Pujuuwaitag nunú”, tujamui. Nuadui wi ushujutain takakag juwi namakan awattatjai, dutika ai yumi numpa wajastatui.
EXO 7:18 Nunikmatai namak aidau jinaamtai yumi mejettawai, nunitai egiptunmaya aidauk nuna tsumainak yuminak uwagchagtatui’ tawai tita”, tiuwai.
EXO 7:19 Nuna tusa ataktushkam Tuke Pujuu Moisésan chichajak: “Aarón ujakta ushujutaijin juki namak aidau, entsa aidau, kucha aidau, yumi shikika aimtai cisterna aidau Egipto nugkanum ayá nuni, tuja ashí yumi piyaju aidau ayá aatus takui awentati, dutikam yumi aidauk numpa wajasti. ¡Aatus ashí yumi shikitai numi najanamu, nuigtu kaya najanamu aidaunmashkam yumi piyag ayauk numpa waigtatui!” tiuwai.
EXO 7:20 Tusa tima Moisés Aarógjai Tuke Pujuu dutikatajum tibaunak imatiksag dutikawajui. Tuja faraón niijai atueka takatai aidaujai wainainamunum Aarón nii ushujutaiyai yumin awatiuwai; dutikam ashí yumi aidauk numpa wajasui.
EXO 7:21 Imanikmatai namak aidauk jinauwai, nuniku asa yumi shiig senchi mejeau asamtai, egiptunmaya aidauk yuminak umuinachu. Tuja Egipto nugkanum yumi ayauk ashí numpa wajasui.
EXO 7:22 Tuja egiptunmaya tunchi aidaushkam dita dekamujijai yumin numpa awajsajui, nuna dutikawagmatai faraógkak nuni senchi antakchau wajasui. Nuniau asa Moisés Aarógjai tuinamunak antugchau, Tuke Pujuu nuniktatui tibaunak imanisag.
EXO 7:23 Nuadui faraógkak puyatjusagkesh diitsuk ukuak nii pujusa inamtaijin wakitkiuwai.
EXO 7:24 Imanik namak numpa wajasu asamtai, ashí egiptunmaya aidauk yumi pegkeg piyagmatai uwagmi tusag namaka uwet yumigmatan taukajui. Wagki namakia yumik umumainchau asamtai.
EXO 7:25 Tuke Pujuu namakan numpa emauwa nunú siete tsawan nagkaemakiu ai,
EXO 8:1 Tuke Pujuu Moisésan chichajak: “Faraón pujamunum wetá, nunika chichagkum: “ ‘¡Mina aentsug aina nunú agkan idaitugsata, jiinag shiyakag mina emematjitnume! tujamui.
EXO 8:2 Tusa ujamaitkum ame jiinjati tusa idaichakminig, wi suwimka amaakun ashí Egipto nugkanum takashun ishitkattagme,
EXO 8:3 dutika ai takash namakia jiinag ame pujusa inamtaigminig, kanutaigmin, pegakjuminish, amejai atueka takau aina nuna jenish, ashí amina aentsjum aina nuna jenishkam, tuja pag inagtaigminish, pag najanatasa namutainmash ashí utsaaniagtatui.
EXO 8:4 Imaanidau asag amina tuja ame atueka takataijum aina nuna, nuigtu amina aentsjum aina nunashkam ashí takash pemjujag waitkasagtatui’ tita”, tiuwai.
EXO 8:5 Nuna tusa Tuke Pujuu Moisésan ataktu chichajak: “Aarón ujakta ushujutaijin juki namakanini, entsa ayá nuni, kucha aidaunmanini awentati, dutikam nuwiya takash jiinag ashí Egipto nugkanak akijuati”, tiuwai.
EXO 8:6 Tusa tima Aarón egiptunmaya namak ayamunmanini awentau, dutikam takash jiinag ashí Egipto nugkanak pimutkau.
EXO 8:7 Nunikmatai tunchi aidaushkam dutiksag dita dekamujijai takashun Egipto nugkanum ikaunmakajui.
EXO 8:8 Imanikmatai, faraón Moisésan, Aarógjai untsuka itan chichajak: “Apajuí, Tuke Pujuu tutai, minash segatjitajum, takash mina, nuigtu mina aentsug aidaunash waitkagmaina nuna emegkagti. Dutikamtai wisha niina aentsji aidaunash kuntinu maa apeenak Tuke Pujuun ememattinme tusan idaitustajai”, tiuwai.
EXO 8:9 Tusa tutai Moisés niina ayaak: “Amina, tuja amejai atuegak takau aina nuna, tuja amina aentsjum aina nujai takash aidau waitkagmaina nunú shiyakti, nunikag namaka utsaanatnume tusanush, wajutiya nunash segattatjame nunú ame tujutta”, tau.
EXO 8:10 Tama nii ayaak: “Kashin dutikata”, tiuwai. Tutai Moisés ayaak: “Ame tame duka betek uminkattawai, nunikmatai amesh dekaata iina ememattai Apajuí, Tuke Pujuuwa, imanuk tikichik atsa nunú.
EXO 8:11 Takash aidau amina waitkagmaina duka shiyaktatui, nunik namaka utsaanattawai. Nuadui aminak waitkagmaschattawai, tuja amejai atueka takataijum aidaunash, tuja amina aentsjum aidaunashkam ataktu awagkig waitkaschattawai”, tiuwai.
EXO 8:12 Tusa Moisés Aarógjai faraógka aujus ukuinak jiinkiajui. Nunik Moisés Tuke Pujuun segauwai, takash faraón ishitkamua nuna awakeagti tusa.
EXO 8:13 Tusa segam Tuke Pujuu Moisésan antugkauwai, nunik takash jegaa, agá, ajanum aatus ayaunak ashí ijinauwai.
EXO 8:14 Nunikmatai aents aidau takash jinaun yajuak iju ijuma emakajui, dutikam ashí nugkanum pegkegchau mejeg akijuauwai.
EXO 8:15 Tujash faraón nunú utugchatan agkan wajasa, ataktu antakchau wajas Israel aents aidau jiinjainum tau asa awake dakitau. Nuniau asa Moisés Aarógjai tabaunak antugkachui, Tuke Pujuu nuniktatui tibaunak imanisag.
EXO 8:16 Tuke Pujuu Moisésan chichajak: “Aarón niina ushujutaijiya duwi nugka yukukuntu awatta tita, dutikam tetee najaneak, ashí Egipto nugkanmak piyakti”, tau.
EXO 8:17 Tusa tima nuna uminak Aarón ushujutaiyai nugka yukukuntun awatiuwai, dutikam ashí Egipto nugkanum nugka yukukuntu aidau ayauk tetee najaneak, Egipto nugkanak akijuauwai. Imaniku asa aents aidaunak, kuntin aidaujai senchi waitkaidau.
EXO 8:18 Nunitai tunchi aidaushkam dita dekamujin teteen najankatag tukama tujinkajui, nuninai teteek aentsnak, kuntinnak shiig kuashat waitkaidau.
EXO 8:19 Nunik tujinkag tunchi aidau faraógkan chichajuinak: “Juka dekas Apajuí senchijiyai”, tuidau. Tamashkam faraógkak antakchau wajas Moisés Aarógjai tabaunak antugkachui, Tuke Pujuu nuniktatui tibaunak imaanisag.
EXO 8:20 Nunitai Tuke Pujuu Moisésan chichajak: “Kashin kashikmas faraón namaka jegattawai, nuniktin asamtai, ameshkam kashikmasa nantakim jegaantata, núnikam Apajuí chichaak: ‘¡Mina aentsug aina nunak agkan idaitugsati, dutikam jiinag mina emematjitnume!
EXO 8:21 Tuja ame mina aentsug aidau jiinjatnume tusa idaichakminig, wi aminak, amejai atuegak takau aina nuna, tuja amina aentsjum aina nunashkam anchi wegantu aidaun ishitkattagme. Dutika ai egiptunmaya aidau jenig, nugkeenish ayatak anchig piyaktatui.
EXO 8:22 Tujash nunú imaniakuish, mina aentsug Egipto nugkanum Gosén batsata nunak wi kuitamkattajai, nuadui dita batsatbaunmak makichik anchigkesh atsuttawai. Nunú wainkum dekaattame wi Apajuí Tuke Pujuu tutain mina senchigjai juju nugka juwi dutikag nunú.
EXO 8:23 Wi mina aentsug aidaunak agkanmitkakun, amina aentsjum aidaunak suwimka susattajai. Tuja duka kashin uminkattawai’ tujamui, tita”, tiuwai.
EXO 8:24 Aatus Tuke Pujuu anchi aidaun faraógka pujusa inamtaijin, niijai atueka takatai aidau jenish ashí shiig kuashat anchin ishitkauwai, dutikam ashí Egipto nugkanmak ayatak anchig piyakmatai pegkegchau wajas asauwai.
EXO 8:25 Imanikmatai faraón Moisésan, Aarógjai untsuka chichajak: “Wetajum, tujash atushat wetsuk atum batsatjum nuwig kuntin maa apeakjum atumin Apajuíji ememattajum”, tau.
EXO 8:26 Tama Moisés ayaak: “Juwi pujusa dutikamuk shiig awajtamtsuji. Nunú kuntin maa apeamua duka egiptunmaya diismak shiig pegkegchauwai. Nuadui ii kuntin maa apeaku Tuke Pujuu emematjin egiptunmaya aidau waipakag, ditak kuntinu emematin asag kayai tuku tukugmainakua mantamain ainawai.
EXO 8:27 Nunin asamtai iik kampatum tsawantai weaja uwegshunum jegaa kuntin maa apeaku nii tujamauwa dutiksaik iina Apajuíji Tuke Pujuu tutaya nunú ememattag taji”, tau.
EXO 8:28 Tusa tutai faraón chichaak: “Untsu takugmek uwegshunum wejum Tuke Pujuu atum emematin ainajum nunú kuntin maa apeakjum ememattajum. ¡Nuniakjum mina pachittsagmesh segatjitajum! Tujash shiig atushtak shiyakaigpajum”, tau.
EXO 8:29 Tusa tama Moisés ayaak: “Israel aents aidau shiyakag kuntinun maa apeenak Tuke Pujuu ememattag tuina nunú wegpajum tusa tichatnaitkuminig, wi amijai juwi chichag nuna jiinkin, Tuke Pujuun segattatjame amina jemin, ame atueka takataijum aidau jeen nuigtu aentsjum aidau jenishkam anchi waitkagmaina duka kashin megkaejatnume tusan”, tiuwai.
EXO 8:30 Nuna tusa Moisés faraógka jeen pujau agá jiinki Tuke Pujuun segauwai.
EXO 8:31 Tusa segam Tuke Pujuu Moisés sumamunak imatiksag umikui. Nuadui faraógka jeen, nii atueka takataiji aidau jenish, tuja ashí niina aentsji aidau jenishkam makichik anchigkesh atsusui.
EXO 8:32 Nunikmatai faraón antakchau wajas, Israel aents aidauk dekas jiinjashtinme tiuwai.
EXO 9:1 Nunikmatai Tuke Pujuu Moisésan chichajak: “Faraón jegajua chichagkum: ‘Tuke Pujuu Apajuí, Hebreo aents aidauti emematin ainag nunú chichaak: Mina aentsug aina nuna jiigti, dutikam mina emematjitnume’, tawai.
EXO 9:2 Tusa tamaitkum jiinjatnume tutsuk ayatak eme emeteakua wegau asamin,
EXO 9:3 amina tagkujum aidau ajagmin batsata nuna Tuke Pujuu niina senchijin jata ishamainun awetittawai. Dutikam caballo aidau, burro aidau, camello aidau, baka aidau, uwig aidau ashí jinattawai.
EXO 9:4 Tujash Israel aents aidau tagkujig makichkish jakashti tusa Tuke Pujuu kuitamjuktatui, untsu egiptunmaya aidau tagkujinak ijituattawai.
EXO 9:5 Nuigtushkam Tuke Pujuu tsawantan mamikia chichaak: “ ‘¡Wi kashin nunak dutikattajai!’ tawai”, tiuwai.
EXO 9:6 Nuna tusa idayas tsawamunum egiptunmaya aidaun tagkujinak Tuke Pujuu ashí ijituauwai. Tujash Israel aents aidau tagkujig makichkish jakachui.
EXO 9:7 Nunikmatai faraón niina aentsji aidaun ishiakui Israel aents aidau tagkujish jinacheash diisa ukutajum tusa. Nunú waketug kauna Israel aents aidau tagkujig makichkish jakachmae tusa ujakajui. Nuna dekaash faraógkak antakchau wajas, Israel aents aidaunak jiinjatnume tichauwai.
EXO 9:8 Nunikmatai Tuke Pujuu Moisésan, Aarógjai chichajak: “Pag inagtainum yuku awa nunú uwegmin atsaakijum jukitajum, dutikajum faraón wainai Moisésa ame yaki nagkimata.
EXO 9:9 Dutikam nunú nugká iyaak yukukuntu najanea ashí Egipto nugkanum jamagti, nuniak ashí aents aidaunak tagku aidaujaí kuchap amuati”, tiuwai.
EXO 9:10 Tusa tima pag inagtainum yuku aun jukiag faraón pujamunum jegawajui, nuwi Moisés yukuun yaki nagkimauwai. Dutikam aents aidaunak, tagku aidaujai kuchap amuauwai.
EXO 9:11 Nuna tunchi aidaushkam achiimag tikich aents aidaujai betek jinuidau asag, ataktu awagkig makichkish Moisésjaig dekapdaimainchau wajasui.
EXO 9:12 Tujash faraógnak Tuke Pujuu antakchau emauwai, nuadui Moisés Aarógjai tabaunak makichkish antugchau, Tuke Pujuu Moisésan chichajak nuniktatui tibaunak imanisag.
EXO 9:13 Nunikmatai Tuke Pujuu Moisésan chichajak: “Kashin kashikmasa nantakim faraón pujamunum wetá, nunika chichagkum: ‘Tuke Pujuu, Apajuí Hebreo aents aidauti emematin ainag nunú chichaak: Idaisati mina aentsug aina nuna; dutikam mina emematjitnume.
EXO 9:14 Tuja nunú dutikachkuminig yamai nagkamsanuk mina suwimkajun amina, nuigtu amejai atueka takataijum aidaun, tuja ashí amina aentsjum egiptunmaya aina nuwishkam ishitkattajame. Dutikamtai dekattame ashí nugkanmak tikich witag imajuk makichkish atsa nunú.
EXO 9:15 Wika aminak, amina aentsjum aidaujaí suwimka amaakun mina senchigjai yaunchuk ijinan juju nugka juwig emegkaumain awajkajime.
EXO 9:16 Tujash dutikachjime wagki mina senchijun atumin iwaintuka ai, ashí tikich nugkanmaya aidaush dekajuatnume tau asan.
EXO 9:17 “ ‘Dutika idaimaitkum mina aentsug aidau jiinjatnume tutsuk ayatak eme emeteakuam weame.
EXO 9:18 Nuadui kashin kashikmasan bicha múun aidaun yaunchuk nagkamsash imanuk Egipto nugkanmag wainajakchamun yutumtijattajai.
EXO 9:19 Imaniktin asamtai tagkujum ajanum batsatuk ashí yajuakjum jegá utsatajum, nunú dutikachaminig, bicha múun aidau kakegak ashí aents aidau ajanum batsatunak, kuntin aidaujai ijinattawai’ tawai Tuke Pujuu”, tiuwai.
EXO 9:20 Tusa ujakam faraógka atuwe aidau Tuke Pujuu tibaun ishamaidauk, ditá inake aidaun, tagkuji aidaujai jegaa utsawajui.
EXO 9:21 Untsu tikich aidau Tuke Pujuu tibaun puyatjus anentaimtuinachuk, ditá inake aidaunak tagkuji aidaujaig jegag utsachajui.
EXO 9:22 Nunik batsatai Tuke Pujuu Moisésan chichajak: “¡Uwejum nayaimpinmanini takuita, dutikam bicha yutugti, nuniak ashí Egipto nugkanum kuntin aidau, aents aidau, ashí ajak aidaush ayá nuna ijinati!” tiuwai.
EXO 9:23 Tusa tama Moisés niina kuntujin nayaimpinmanini takuiniuwai, dutikamtai Tuke Pujuu chaagpin, peeman ajunjauwai, dutikak bicha múun aidaun ashí Egipto nugkanum yutumtijauwai.
EXO 9:24 Tuja chaajip patauk, peem peetuk, bicha kakegush makichkish mijamtsuk tuke imani au; yaunchkesh Egipto nugkanmag ibau wainajakchamu wantinjauwai.
EXO 9:25 Ibau kakegu asa Egipto nugkanum ayaunak ashí tsaikui: aents aidaun, kuntin aidaun, ajak aidaujai ashí ijinauwai, dutikak numi aidau kanawenak ashí kupijauwai.
EXO 9:26 Nunú imaniakush nugka Gosén Israel aents aidau batsatbaunmak makichik bichakesh iyaagchauwai.
EXO 9:27 Imanitai faraón Moisésan Aarógjai untsuka chichajak: “Dekas wi pegkegchaun takasag nunak dekagmamjai. Juna imajun itugchata igkugka waitiag duka Tuke Pujuu itugchatjinigkish waitiatsjai, juka mina pegkegchaujui, nuigtu mina aentsug aina nuna pegkegchaujin waitiajai.
EXO 9:28 Wait aneasjum jutiish Tuke Pujuu segatkagtitajum, chaajip patak ishamain waja nunú, bicha yuta nujai mijaakti. Nunikmatai wisha atumnak emettsuk shiyaktajum tusan idaisatjime”, tau.
EXO 9:29 Tusa tama Moisés ayaak: “Wi juju yaaktanum pujag nuna jiinmawaik, mina uwejun takuin Tuke Pujuun segattajai, dutikai chaagpik megkaekattawai, tuja bicha yuta dushakam megkaekattawai. Nunikmatai dekattame nugkak dekas Apajuínuapi tusam.
EXO 9:30 Tujash iman ishamain wainkumesh amek, amina atueka takataijum aina nujai, Tuke Pujuu yamaikish ishamatsjum nunak wika shiig dekajai”, tau.
EXO 9:31 Tuja bicha yutak ajak lino ajakbau yagkujuku aidau, nuigtu cebada ajakbau aidau nejekunak ashí ijinauwai.
EXO 9:32 Untsu trigo aidau, centeno aidau ajakbauk makichkish wajukachajui eke tsapainachu asag.
EXO 9:33 Moisés faraógjai chichasa yaaktanmaya jiinmawaik uwejen takui Tuke Pujuun segauwai, dutikamuik wamak chaajip ishamain wajauk, bicha yutauk, yumi yutaushkam mijaakui.
EXO 9:34 Nunik mijakmatai faraógkak ataktushkam pegkegchaun takasui. Nuniak niijai atueka takataiji aidaujai anentainkachu wajasui.
EXO 9:35 Nuniau asa Israel aents aidaunak jiinjatnume tusag idaisachui, Tuke Pujuu yaunchuk Moisésan ujaak nuniktatui tibaunak imaanisag.
EXO 10:1 Tuke Pujuu Moisésan chichajak: “¡Faraón pujamunum wetá! Wi niinak, niijai atueka takataiji aina nujai antakchau emattajai, wagki mina senchigjai wainchatai ishamain aidaun iwaintuktag tau asan.
EXO 10:2 Tuja nunú wainchatai ishamainun egiptunmaya aidaun iwaintuktatag nunú wainkau asajum, amina uchijum aidau, tijajum aidau nunú pachisa ujakminum tau asan dutikattajai. Nunú wainkau asajum wi Apajuí Tuke Pujuu tutayaitag nunú dekattagme”, tiuwai.
EXO 10:3 Tusa tima Moisés Aarógjai faraógka jegajuawag chichajuinak: “Tuke Pujuu Apajuí, Hebreo aents aidauti emematin ainag nunú aatus tawai: ‘¿Wajupa asamea emematjum idaikumesh wi tabaush umiktatme? Idaisata mina aentsug aidau, jiinjag mina emematjitnume.
EXO 10:4 Tujash emeteakminig, kashin manchin ishitkattajame amina nugkemin.
EXO 10:5 Nunú manchi nugkanak akijuattawai, imanikmatai nugka wainmainchau wajastatui. Imanidau asag ajak bicha ijinam ujumak ampinjaunak amuktatui, tuja nuigtushkam numi aidaunashkam yuwa amuktatui.
EXO 10:6 Imanidau asa ame pujusa inamtaigminig, amejai atueka takatai aidau jenish, ashí egiptunmaya aents aina juna jenish imanisag manchi piyaktatui. Duka amina apakesh, apachjum aidaukesh nuniachkush yamaikish imanuk wainkachbau wainkattame’ tujamui”, tusa ujaka ukuak jiinkiuwai.
EXO 10:7 Nuna tusa waketjamtai, faraógka atueka takataiji aidau niina jegantag tuidau: “¡Au aents aina duka kuashta utugchata apujtugmas waitkagmainawai! Nuniau asamtai, dekas shiyaktajum nunikjum atumi Apajuí Tuke Pujuuwa nunú ememattajum, tita. ¿Amek waintsumek Egipto nugka tsainak patamsa duka?” tuidau.
EXO 10:8 Tusa tima faraón Moisésan Aarógjai ataktu untsuka chichajak: “¡Wetajum, nunikjum Apajuí Tuke Pujuu atum emematin ainajum nunú ememattajum! Tujash eke wetsuk tujuttajum, ¿ya aidauwa miniagtatua?” tau.
EXO 10:9 Tusa tama Moisés ayaak: “¡Jutii aidautik ashí iina uchiji piipich aidau, múuntuch aidau, iina nawanji aidau, iina uchiji aishmag aidau aatsa ashí yajuaka, nuigtu iina uwigji, baka aidaujaí yajuaka shiyaktatji! ¡Nunú atatui dekas jutii Tuke Pujuu emematuinaku shiig aneasa jiistamauwa nunú!” tiuwai.
EXO 10:10 Tusa tutai faraón ditan tuke aneas dushikiak: “¿Ayu duka nuniktajum, atumi Apajuíjum Tuke Pujuuwa nunú uyuntamsatnume tusa tujutchaintash tatsugmek? ¡Waitju yujagme! ¿Wi anentainchaukaitag uchijum yajuaka shiyaktajum tusa idaisatnun? Atumek duka pegkegchau anentaiyai tuu yujagme.
EXO 10:11 Duka nunikchattagme. Ayatak aishmag múun aidautigmek wejum Apajuí ememattajum, nunú nuniktasa wakegau asajum”, tiuwai. Nuna tusa juju wamak jiiki ishiaktajum tima jiiki ishiakajui.
EXO 10:12 Dutikamtai Tuke Pujuu Moisésan chichajak: “Uwejum takuita dutikawamin Egipto nugka juwi manchi kaunak ajak ayá nuna, tuja bicha ijinam ampinjau aina nujai amukti”, tiuwai.
EXO 10:13 Tima Moisés ushujutaijin juki Egipto nugkanum takuiniuwai, dutikam dase etsa minitaiya nuwiya shiig senchi tsawai, kashish dasenkau. Nunik tuke dase dasenkawa tsawak manchin ikaunmakui.
EXO 10:14 Dutikam nunú manchi Egipto nugkanmak piyak asauwai, yaunchuk nagkamsash imanijakchamun tuja atakesh imani achatnun.
EXO 10:15 Imanik manchik ashí nugkanum piyaku asa shuwin wajas asauwai. Imaniku asa bicha ijinam ajak ampinag juwaku aidaunak ashí amukui. Dutika ashí amukbau asa makichik numi dukendukesh Egipto nugkanmak shiig atsusui.
EXO 10:16 Imanitai faraón puyatuk wamkes Moisésan Aarógjai untsuka chichajak: “Atum Tuke Pujuu Apajuí emematin ainajum nuna emtin, tuja atumi emtinishkam pegkegchaun takasjai.
EXO 10:17 Tujash wait aneasjum mina tudaujush tsagkugtugtajum nuniakjum segatjitajum atumi Apajuíjum Tuke Pujuu emematin ainajum nunú, dutikam manchi ajaka amuina nunú megkaejati”, tau.
EXO 10:18 Tusa tima Moisés faraógka jenia jiinki Tuke Pujuun segauwai.
EXO 10:19 Tusa segam Tuke Pujuu dasen etsa akaetaiya nuwiyan awemauwai, dutikam shiig senchi dasentak manchinak tajak yajuak nayants kajis ain tutainum utsauwai. Makichik manchikesh Egipto nugkanmak juwakchauwai.
EXO 10:20 Tujash Tuke Pujuu faraógnak antakchau awagsauwai, dutikamu asa Israel aents aidaunak jiinjati tusag idaisachui.
EXO 10:21 Dutikamtai Tuke Pujuu Moisésan chichajak: “¡Uwejum nayaimpinmanini takuita! Dutikam ashí Egipto nugkanmak shiig kanchi achikaish dekapmain wajasti”, tau.
EXO 10:22 Tama Moisés uwejen nayaimpinmanini takuiniuwai, dutikaig ashí Egipto nugkanmak shiig kanchi wajasui.
EXO 10:23 Imaanikmatai, nii pujamu yantamen pujaujaish wainitsuk, nuigtush yajakesh wekaemainchau wajasag kampatum tsawan nuwig batsatu. Tujash Israel aents batsatbaunmak tsawai au.
EXO 10:24 Nunikmatai faraón Moisésan untsuka chichajak: “Yamaik ashí uchijum aidaushkam yajuakjum wetajum, nunikjum atumi Apajuíjum Tuke Pujuu ememattajum. Tujash uwigjum, bakajum aina duka ukuktatjume”, tiuwai.
EXO 10:25 Tusa tama Moisés ayaak: “Duka makichkish nunikchattawai, atumetjume tagku sukagtumaintigmek.
EXO 10:26 Tuja nuigtushkam iina tagkuji aidauk ashí yajuaktatji, makichkish juwakchattawai, wagki nuwiya etegja juki maa apeaku iina Apajuíji Tuke Pujuu emematta tuidau asaja. Tuja ii Apajuí ememattinnum eke jegaskek, Apajuí emematta takuish wajig atsumtaji duka dekamaitsui”, tau.
EXO 10:27 Tujash Tuke Pujuu faraógnak antakchau awajsauwai, dutikamu asa Israel aents aidaunak jiinjati tusag idaisachui.
EXO 10:28 Tuja nuigtushkam faraón kajeka Moisésan chichajak: “¡Jiinkim wetá ataktu wakitkimek tajutuawaipa! ¡Ataktu wakitki juwi takminig maattajame!” tiuwai.
EXO 10:29 Tama Moisés ayaak: “¡Dekas tame, ataktuk makichkish tajuashtatjame!” tiuwai.
EXO 11:1 Tuke Pujuu Moisésan chichajak: “Faraógnak, niina aentsji egiptunmaya aina nujai tikich suwimkan awetittajai. Dutika ai atumnak wetajum tusa idaitamsattawai. ¡Tuja niina nugken batsatjum nunak ajumaish wakitki taashtinun jiipag ishipaktatui!
EXO 11:2 Nuadui Israel aents aishmag aidau, nuwa aidau ashí ujakta umintsatnume, nuninak egiptunmaya aidau ditajai ijutkau batsata nuna jiju plata tutayai nugkutai, patakumtai najanamu aidaun, tuja orojai najanamu aidaunashkam segatnume”, tiuwai.
EXO 11:3 Tuja egiptunmaya aidau Israel aents aidaun eme anentus diitnume tusa Tuke Pujuu tibau asamtai, ditanak eme anentus diidau. Tuja Moisésnashkam faraógka atuwe aidaushkam eme anentus diidau, antsag ashí egiptunmaya aidaushkam Moisésan eme anentujaku ainawai.
EXO 11:4 Tuja Moisés faraógkan chichajak: “Tuke Pujuu aehaet ai Egipto nugkanum nagkaemaktatjai, tujamui.
EXO 11:5 Nuniai ashí egiptunmaya uchi iwai aidau jinattawai. Faraógka uchiji iwai apu ati timauwa nuwi nagkamnas, niina inataiji ajak juukbaun dekegka najanin aina nuna iwaijishkam jinattawai. Tuja ashí kuntin yama nagkamchaku petsakbau aidaushkam jinattawai.
EXO 11:6 Nunikmatai ashí egiptunmak yaunchkesh imanishtain, tuja ajumaish nunikchatnun senchi buutuinak pampaidiagtatui.
EXO 11:7 Tujash Israel aents aidaun uchiji iwai aidauk makichkish jakashtatui. Tuja tagkuji yama nagkamchaku petsakbau aidaukesh jinashtatui. Nunik agkan batsatu asamtai, makichik yawá shinaukesh antuekashtatui. Duwi dekattagme Apajuí egiptunmaya aidaun suwimka suwak Israel aents aidaunak kuitama nunú.
EXO 11:8 Juju aatus nagkaemakmatai amina atueka takataijum aina nunú ashí tajutuawag tikishmag segatuinak: ‘Aentsjum aidau ashí yajuakam wetajum’, tujutiagtatui. Untsu nuna tujutainachkuig wechattajai”, tiuwai. Nuna tusa faraógka pujusa inamtaijin pujau Moisés kajeka jiinkiuwai.
EXO 11:9 Nunikmatai Tuke Pujuu Moisésan chichajak: “Faraógkak tusa tamash antugtamkashtatui, nuniakush wi aan senchi ishamain aidaun ashí Egipto nugkanum iwainagtatjai”, tiuwai.
EXO 11:10 Tuja Moisés Aarógjai faraógkan nunú ishamain aidaun ashí iwaintukui. Dutikamash faraógkak Tuke Pujuu antakchau emamu asa, Israel aents aidau Egipto batsatunak jiinjati tusag idaisachui.
EXO 12:1 Moisés Aarógjai eke Egipto nugkanum pujaun Tuke Pujuu chichajak:
EXO 12:2 “Juju nantu taka juju atatui mijan nagkamnamu. Juju makichkish kajimattsuk puyatjusjum aneaku atatjume.
EXO 12:3 Nuadui ashí Israel aents aidau wi yamai tajim nunú ujaktajum: Juju nantutin tsawan diez tsawagtata duwi maki makichik múun uchigtin aidau uwig aishmag tsakatan, dutikachkush chivo aishmag tsakatan achiktinme.
EXO 12:4 Untsu ujumchik uchiji ajamu aidauk tikich múun uchiji ujumchik ajamujai ijunag makichik kuntinun maa maki makichik aentsush wajupaun yumainaita dutiksag tinamdaegak yuwatnume.
EXO 12:5 Nunú kuntinuk makichik mijan ajamu aishmag makichkish jamamtuchu pegkeg atatui. Duka uwig tsakat, nuniashkush chivo tsakatkesh atatui.
EXO 12:6 “Tuja nunú kuntin achikbau pujutta nunak, juju nantutin tsawan catorce tsawag agkuantai ashí Israel aents aidau maawagtatui.
EXO 12:7 Dutika maawag nuna numpen jukiag jega dita ijunag yuwawagtata nuna waitiji atin, numi jimag ajiamua nuna, nuigtu yakí minamua nujai ashí ukatkatnume.
EXO 12:8 Dutikawag nunú kashia nuaduik kuntinu neje pegka inajuamun dupa yapau yutai aina nujai, nuigtu pag levadurajai pachimtsuk inajuamujai yuwatnume.
EXO 12:9 Untsu kuntin aina nuna neje uduuk, nuniachkush painka inagkamuk makichkish yuwawaigpajum, ayatak pegka inajuamu yuwatajum. Tuja buuke, nawe, anentai, akapé aina dushakam pegka inajuajum yuwatajum.
EXO 12:10 “Untsu tsawaja yuwatnuk ukukigpajum, tuja neje ampinjamtaig jiinum apeatajum.
EXO 12:11 Tuja neje yuwakjumek shiig yapagmamajum, sapat wegamakjum, ushujutaijum takusa wajasjum waugsajum yuwatajum, wagki wi atumi ayamjukan uwemtikattajim nunú tsawan asamtai, mina emematjakjum tuke dutiksagmek yutinaitjume.
EXO 12:12 “Tuja nunú kashia duwi wi ashí Egipto nugkanum nagkaemakun uchi iwai egiptunmaya aidaunak ashí ijinattajai. Dutikakun kuntinu uchiji yama nagkamchaku petsakbau aidaunashkam ashí ijinattajai. Tuja egiptunmaya aidau apajuímtaiji aina nunashkam ashí tsaigkattajai. Ima wikitjai Apajuí Tuke Pujuunuk, tikichik atsawai.
EXO 12:13 “Tuja nunú numpai ukatkatajum duka atum tuu jeganum pujagme nuna iwainaktatui, nunú numpa wainkun atumnak agkan nagkaikittajime. Nuadui egiptunmaya aents aidaun wi ijintaish, atuminig makichik jamukesh atsuttawai.
EXO 12:14 “¡Juju tsawantak tuke kajimatkishtin atajum! Juju tsawantin ijunjajum mina emematjakjum tuke jiistamtinaitjume. Junak uchi akiinak wedaushkam tuke dutiktin agtinme.
EXO 12:15 Tuja tsawan catorcetin kuntin maa yuwattajum, duwi nagkamsajum siete tsawantai pag levadurajai pachimtsuk inajuamu yuwattagme. Nuadui nunú tsawantin nagkamas atumi jeminig makichkish levadurak atsuttawai. Tuja makichik aentskesh pagkan levadurajai pachimag inajua siete tsawan aina nunú tsawantin yuwauk, jiiki ajapeam atatui. Dutikamu asa Israel aents aidaujaig ijunjag pujuschatnai.
EXO 12:16 Tuja tsawan jiista nagkamnamua duik, ashí ijunjajum mina emematjitnaitjume. Tuja jiista amuebau tsawan sieteya duwishkam nunisjumek ashí ijunjajum mina emematjitnaitjume. Nunú tsawantinig makichkish atumi takatjumek takaschattagme, untsu atum yuwatin umiktatjum duke dutikattagme.
EXO 12:17 Nunú jiistaya duka, atum Egipto pujautigmin wi nunú tsawantai jiiktatjim nuadui tuke jiistamtin atajum. Junak uchi akiinak wedaushkam tuke dutiktin agtinme:
EXO 12:18 Juju yama nagkamchak mijan nagkamnamu nantu taka juju atatui pag levadurajai pachimtsuk inajuamu yutai, juka tsawan catorcetin aagkú nagkamajum; veintiunotin aagkú inagnattagme.
EXO 12:19 Siete tsawantai atumi jeminig levadura atsuttawai. Tuja siete tsawan aina nunú tsawantin pag levadurajai pachimja inajuamun yuwauk, Israel aentschaukesh, tuja Israel aents akushkam jiiki ajapeam atatui.
EXO 12:20 Nuadui pag levadurajai pachimja inajuamuk makichkish yuwawaigpajum. ¡Atum tuwi pujuttagme! nuniakjumesh nunú jiistatinig pag levadurajai pachimtsuk inajuamu yuwatajum”, tiuwai Apajuí.
EXO 12:21 Juna aatus Apajuí timatai, Moisés Israel aents aidau apuji múun aidaun ashí ijumag chichajak: “Wejum uwig aishmag tsakat achiktajum, tuja dutikachkugmesh chivo tsakatkesh achikjum maki makichik atumi jemin maatajum. Dutikawagmin nunú yuwaku Apajuí iina jiipag agkanmitkagmatta nunú tsawan Pascua jiistamawagmi.
EXO 12:22 Untsu numpak pinignum jukitajum, dutikajum ajak hisopo tutaya nuna titiji kupika jukijum, numpai uchupjajum waiti nujamkatin numi ajiamu aina nunú, tuja nuna yakin minamua nujai ashí ukatkatajum. Nunú dutikagmesh eke tsawatsaigkik makichkish jiinkigpa.
EXO 12:23 Egiptunmaya aents aidau uchiji iwai aidaun ijituatatus Tuke Pujuu nagkaemak waiti nujamtai jimag numi awa nunú, yakin minamua nujai numpai ukatkamun wainak ikaa nagkaemaktatui. Nuniak niina aentsji nayaimpinmaya magkagtina nuna atumi jeminig wayashti titatui. Nuadui atumi uchijum iwai aidauk makichkish jakachagtatui.
EXO 12:24 “Juju dutikatajum tujabi duka betek umiktin atajum, tuja atumi uchijum wegantu aidaushkam tuke dutiktin agtinme.
EXO 12:25 Apajuí nugkan anagtabauwa nuwi jegagmesh, juka tuke jutikin atinaitjume.
EXO 12:26 Tuja uchijum inimpainak: ‘¿Wagka jusha jutikaji?’ tusa inimpainakuig,
EXO 12:27 atum ayaakjum: ‘Juju kuntin tuké maag juka Apajuí niina aentsji makagtinun awemamu nagkaemak egiptunmaya aentsu uchiji iwai aidaun ijitak, Israel aents aidauti jenig waittsuk, ikaa nagkaemak ijipachua nunú anentaimtusa jutikaji’ titajum”, tiuwai. Aatus Moisés chichaka inagnakmatai, Israel aents aidauk ashí tikishmag pujusag Tuke Pujuun emematuidau.
EXO 12:28 Nunik wakitkiag, Tuke Pujuu Moisésan Aarógjai akatjamunak imatiksag betek umikajui.
EXO 12:29 Nuniamunum aehaet Tuke Pujuu aentsji nayaimpinmaya magkagtin nagkaemak egiptunmaya uchi iwai aidaunak, faraógka uchiji iwai apu atin tibau niina apaji pujusa inamtaijin pujujakua nuwi nagkamas, aents achikam chimpijun uchiji iwai aidaunashkam, tuja kuntinu uchiji yama nagkamchaku petsakbau aidaujaí ijinauwai.
EXO 12:30 Dutikamtai nunú kashia duwi faraón niijai atueka takataiji aidaujai, nuigtu ashí aents Egipto nugkanum batsamin aidauk nantajag shiig senchi buutuinak ashí egiptunmak pampaidau. Makichik jeganmakesh iwai iwaaku pujauk shiig atsusui.
EXO 12:31 Nunikmatai nunú kashia duwik, faraón Moisésan Aarógjai untsuka chichajak: “¡Shiyaktajum, nuniakjum Israel aents aidau ashí yajuaktajum, nunikjum atum timaujum dutiksagmek atumi Apajuíjum Tuke Pujuu ememattajum!
EXO 12:32 Nunika shimakjum atum mina segatmaujum duka dutiksagmek uwig aidau, baka aidau yajuakjum wetajum. ¡Nuniakjum minash Apajuí Tuke Pujuu segatjitajum!” tau.
EXO 12:33 Tuja Israel aents aidau iina nugken batsata nuna wamak shimuinachkuig, ashí jinawaig tuidau asag, egiptunmaya aents aidau ditan waugmitkaidau wamak shiyaktinme tusag.
EXO 12:34 Dutikainam ditashkam harina nanegbau levadurajai pachimjachbaun, harina namutaijai ijumag ditá jáanchjin pempeajag yanakiag jukiajui.
EXO 12:35 Dutikainak Moisés ditan akatjamunak imatiksag Israel aents aidauk egiptunmaya aidau wajiji jiju plata tutayai najanamu aidaun, orojai najanamu aidaun, tuja jáanch nugkutai aidaunashkam segaidau.
EXO 12:36 Dutikainam egiptunmaya aidauk ashí dita sumamunak imatiksag susajui, wagki Israel aents aidaun eme anentus diitnume tusa Tuke Pujuu dita anentain antinkamu asag. Dutika dita wajiji aidaunak ashí susag wajigtuchu juwakajui.
EXO 12:37 Tuja Israel aents aidauk yaakat Ramsés batsatu jiinag shiyakajui Sucot nugkanum. Tuja nuwa aidau, uchi aidau dekapatsuk ayatak aishmag wajiu maanimain aidauk dekapamak seiscientos mil aajakui.
EXO 12:38 Israel aents aidau jiinag shimuinakug uwig aidaun, baka aidaun, shiig kuashat yajuakajui. Nunik shimiagtai aents tikich nugkanmaya aidaushkam shiig kuashat ditajai ijunag shiyakajui.
EXO 12:39 Nunik shimuinak, yujumak inagmain tsawan atsutai yumainun inagkachaju asag harina levadurajai pachimtsuk nanegbau egiptunmaya jukimujin nuna pagkan najanak inagkajui.
EXO 12:40 Tuja Israel aents aidauk Egipto nugkanmak cuatrocientos treinta mijan batsamsaju ainawai.
EXO 12:41 Tuja cuatrocientos treinta mijan jegau ai, nunú tsawantaik Egipto nugkanum batsatu ashí jiinjaju ainawai.
EXO 12:42 Tuja Tuke Pujuu niina aentsji Israel aidaun Egipto nugkanum batsatun jiigtatus nunú kashia duwi ditan kuitamak wekaetau. Nuadui atakea duish Israela uchiji aidaush Tuke Pujuun emematuinak nunú kashia duwi kanutsuk tsawaidiagtin ainawai.
EXO 13:1 Tuke Pujuu Moisésan chichajak:
EXO 13:2 “Uchi iwai aina nunú midau agtin akaantugkata, wagki ashí Israel aents aidau uchiji aishmag iwai akiinuk, tagku yama nagkamchaku petsakbau aina nujai ¡ashí midau ainawai!” tiuwai.
EXO 13:3 Tusa tima Moisés nii wegantu Israel aents aidaun chichajak: “¡Atum Egipto nugkanum batsamsajum waitu batsatutigmin, Tuke Pujuu niina senchijijai juju tsawantin jiipaja nunú tsawan aneaku atajum! Nuniakjum nunú tsawantinig pag levadurajai pachimja inajuamuk yuwawaigpajum.
EXO 13:4 Atumek juju tsawanta juwi, nantu Abibtin jiinjume.
EXO 13:5 Atumi muunjum aajaku aina nuna Tuke Pujuu anagkuak: ‘Canaán aents, hitita aents, amorreo aents, heveo aents, Jebús aents aina nuna nugke shiig pegkeg, ajak shiig tsapau, tagkush shiig muumpaina nuna atumi uchijum aidaunak susagtinaitjai’ tiuwa nuwi ejetamawagmatai, batsamsagmesh juju nantua juwi ijunjajum Tuke Pujuu tuké ememattin atajum.
EXO 13:6 Tuja siete tsawantai pag levadurajai pachimtsuk inajuajum yutinaitjume, untsu tsawan sieteya duwi ijuntsajum Tuke Pujuu emematkujum jiistamattagme.
EXO 13:7 Siete tsawantai pag levadurajai pachimtsuk inajuamu yuwatajum, nunú tsawan aina nuaduik levadurak tuja pag levadurajai pachimja inajuamukesh atum pujamunmak shiig atsuttawai.
EXO 13:8 Tuja nunú tsawantin uchijum aidau chichagkujum: ‘Juka ii Egipto nugkanum waitkam batsatutin Tuke Pujuu jiipajua nunú anentaimtusa jutikaji’ titinaitjume.
EXO 13:9 Nunak Tuke Pujuu midau atinme tusa atumin uwegmin, dijaimin agatjamkau amainaitjum numamtuk asamtai, chicham umiktin agagbaun Tuke Pujuu umiktajum tujabauwa duka kajimattsuk aneaku atatjume. Wagki Egipto nugkanum waitkam batsatutigmin niina senchijin jiigmajaju asamtai.
EXO 13:10 ¡Nuadui maki makichik mijantin tsawan mamikiamua duwi shiig aneasa ijunjajum Tuke Pujuu tuké ememattajum!
EXO 13:11 “Tuke Pujuu atumi muunjum aajaku aina nuna, tuja atumnashkam canaágnumia aents aidau nugken amastajime tusa anagtabauwa nuna amasmataig,
EXO 13:12 ashí uchi iwai aishmag akiinaidauk, kuntinu uchiji yama nagkamchak aishmag petsakbauwa nujai Tuke Pujuu idaitustajum, wagki duka niinu asagmatai.
EXO 13:13 Tuja uwija uchiji aishmag atsugtamkuig, burro yama nagkamchaku petsakbauwa nunú maatajum. Untsu uwig tsakat ajutjamkuig, tuja chivo tsakatkesh ajutjamkuig, nunú Tuke Pujuu suwakjum burrok mautsuk idaisatajum. Tuja atumi uchijum aishmag iwai aidau Tuke Pujuu sumaina nunú tikich waji anentag Tuke Pujuu suwakum uchijum uwemtijatajum.
EXO 13:14 Tuja tikich tsawantai uchijum inimpak: ‘¿Wagka jusha jutikame?’ tujamkuig, ame ayaakum: ‘Ii aidauti Egipto nugkanum batsamsa inaku waitkatai batsatutin Tuke Pujuu niina senchijin jiigmag agkanmitkagmauwa nunú tsawan asamtai jutikaji.
EXO 13:15 Tuja faraón antakchau wajas iina jiipatan dakittai, Tuke Pujuu egiptunmaya uchi aishmag iwai aidaun, kuntinu uchiji yama nagkamchaku petsakbau aishmag aidaujaí ijituawa nuadui, kuntin yama nagkamchak petsakbau maa apeaku Tuke Pujuu emematji, wagki jutii uchiji aishmag iwai aidau jatsuk uwemkaju aina duwi.
EXO 13:16 Nuadui kuntin iinu atin kuntunum, dijainum agatjamu amaina numamtuk atum kuntin maa apeamua nunú tuké anemtijamsagke atinai, atum Egipto nugkanum pujautigmin Tuke Pujuu niina senchijin jiigmajajua nunú’ ”, tiuwai Moisés.
EXO 13:17 Faraón Israel aents aidaun shiyaktinme tusa idaisamtaish, Apajuík filisteo batsata nuni jinta tutupit jegá aatu wetinme tusag tichauwai. Wagki filisteo aents aidau jinta epetam ditajai maaninak ishamak awake anentaimag Egipto nugkanum ataktu waketjainum tau asa.
EXO 13:18 Nuadui dekas jinta uwegshun tentea wea nuni nayants kajis ain tutaya aatus wetinme tiuwai. Nuadui Israel aents aidauk Egipto nugkanum batsatu jiinag shimak, suntag maaniatatus shimumaina imaanik shiyakajui.
EXO 13:19 Nunik wenak Moisés José ukunchin jukiuwai. Nunak dutikauwai wagki José iwaku pujusa niina patayi Israel aents aidaun chichajak: ¡Apajuí atumnak jiigmajagtin ainawai; dutijamainakuig mina ukunchjuk ukutsuk jukitin atajum! tibau asag.
EXO 13:20 Nunikag nugka Sucot tutainum batsatu jiinag uwegshunum jegantatak, Etam nugkanum jegawag aakmajag batsamsajui.
EXO 13:21 Tuja tsawai dita shimamunum nuna emtin Tuke Pujuu yujagminum pachitkau eemak wejakui, untsu kashi jii kegaunum pachitkau eemak wegau, nuna diisag tsawaish, kashish shiyaktinme tusa.
EXO 13:22 Tuja tsawai shimiagtaik yujagkim awaantamu eemak wajantun wejakui, antsag kashi shimiagtaishkam jii keeka eem wajantun wejakui.
EXO 14:1 Israel aents aidau Etam nugkanum batsatai, Tuke Pujuu Moisésan chichajak:
EXO 14:2 “Israel aents aidau ujakta, waketug Migdol nugka nayantsajai niniaku awa nuna ejapeen yaakat Pi-hahirot tikich yaakat Baal-zefonjai awa, nujai niinis nayantsanum uwet aakmag batsamsatnume.
EXO 14:3 Faraón anentaimas: ‘Israel aents aidauk wajuk wetinmeki nunak dekainatsui. Nuadui, auk uwegshunum wagaja yujatai’ titatui.
EXO 14:4 Tuja atumin pataetugmaktinme tusan wi niinak ataktu antakchau awajsattajai. Dutika ai pataetugmakui, niina, tuja niina suntaji aidaujaí wi mina senchijun iwaintuktatjai. Dutika ai egiptunmaya aidauk, wi Apajuí Tuke Pujuu tutayaitag nuna dekajuawagtatui”, tiuwai. Tusa tiajam Israel aents aidauk Tuke Pujuu tibaun betek uminak nuwi aakmajag batsamsajui.
EXO 14:5 Nuninai faraógshakam Israel aents aidauk shiyakaje tabaun dekauwai. Nunik niijai atueka takatai aidaujai awake anentaimag kajekag chichainak: “¿Wagka Israel aents aidau iina takagtamainak batsatush jiinag shiyaktinme tusaish timaji?” tuidau.
EXO 14:6 Tusag, carro maaniaku wetai aidau umiktajum tusa faraón timatai, imatiksag umikajui, dutikawagmatai niina suntajin ijumjauwai.
EXO 14:7 Dutika seiscientos carro dekas pegkeg aidaun yajuak, nuigtushkam egiptunmaya carro aidaunak ashí yajuakag nuwi maki makichik suntaja apuji aidau pekamiag shimutkajui.
EXO 14:8 Tuke Pujuu faraógka shiig antakchau awagsauwai, dutikamu asa Israel aents aidauk Tuke Pujuun senchijijai jiinag shimuidaun dekainayatak pataetukajui.
EXO 14:9 Nuninak ashí suntag aidauk, carronum, caballonum aatus pataetukag, nayantsanum uwet yaakat Pi-hahirot tikich yaakat Baal-zefonjai niinis awa nuwi aakmag batsamtatman amainaidau.
EXO 14:10 Nuna wainkag, Israel aents aidauk shiig senchi ishamkajui, nuninak Tuke Pujuu ayamjutpakti tusag segaidau.
EXO 14:11 Nuniayatak Moisésan chichajuinak: “¿Egipto nugkanmak ukumataig atsau asamtaig, imajui uwegshunum jinatnume tusamesh jiijatjamum? ¿Wagka jusha jutikagtame? ¿Wagka Egipto nugkanum pujajinish jiijatkimume?
EXO 14:12 Juju aneasa Egipto batsamsa chichaaku: Idaikagtustajum waitiakuish egiptunmaya aidau takajuinaku batsamsagmi ¿tichamkaijim? ¿Nunisaik batsatkuik, imajui uwegshunum jinumainkaitag?” wajaidau.
EXO 14:13 Imatiagtai Moisés ditan ayaak: “¡Ishamkagtutsuk anentaim ichichiagtajum! ¡Nuniakjum Tuke Pujuu iina ayamjutpak dutikatta nunú wainkatajum! Yamai atum egiptunmaya aidau wainjum duka ataktu awagkigmek wainkashtinaitjume.
EXO 14:14 ¡Atumek uyumakaigpa, Tuke Pujuu iina ayamjutpak maaniattawai!” tiuwai.
EXO 14:15 Tusa tutai Tuke Pujuu Moisésan chichajak: “¿Wagka minash yainkata tusamesh segatme? ¡Anui wajasam mina segatú wajatsuk Israel aents aidauk weajum antsagmek wetajum tita!
EXO 14:16 Tuja ¡ame ushujutaijum takakam nunú takuim nayantsanmanini awentata! Dutikawamin nayants jimaituk kanaka ejapeen buku wajastatui, nunikmatai Israel aents aidau bukunum katiagtinme.
EXO 14:17 Wi egiptunmaya aidaunak antakchau ema ai pataetugmakagtatui. Nuninakui ashí nii suntaji, carroji, caballoji aidau minina nuna ijinkun mina senchijun iwainaktatjai.
EXO 14:18 Nuna dutikamtai ¡egiptunmaya aents aidauk dekajuawagtatui dekas wi Apajuí Tuke Pujuu tutayaitag nuna!” tiuwai.
EXO 14:19 Nuna tusa inagnaig, Apajuí ángel tumain nayaimpinmaya Israel aents aidau shimamunum yujagminum pachitkau eemak wegau ukuunum juwakui, nunitai yujagmishkam antsag ukuunum asauwai.
EXO 14:20 Nunú yujagkim egiptunmaya suntag aidau shimamunum nuna emtin wajantui, nuniaig suwe wajasui, untsu Israel aents aidau shimamunmak yujagkim etsantug tsaaptin wajasui. Nuadui nunú kashi aajakua duik Israel aents aidaunak amaigkachaju ainawai.
EXO 14:21 Nuninai Moisés niina uwejen nayantsanmanini awentauwai, dutikamtai etsa minitaiya nuwiyan Tuke Pujuu makichik kashi shiig senchi dasenmitkakui. Imatika umpuamu asa nayantsak jimaituk kanakui. Aatus Tuke Pujuu nayantsa ejapeen buku awagsauwai.
EXO 14:22 Nunik nayants ejapeen buku wajasa, mai yantamenig yumik muja iman wajas ai, Israel aents aidauk utsanawag katiajajui.
EXO 14:23 Nuniagtai faraógshakam niina suntaji aidaujai carro maanitai aidaunum, caballo maanitai aidaunum pekamiag, pataetukag nayants buku wajasbaunum utsanawag ejapeantajui.
EXO 14:24 Tuja aents maanitan yacha aidau Israel aents aidaun pataetukag shimuidau. Nunik shimuinai tsawamunum Tuke Pujuu Israel aents shimamunum eemak yujagminum tuja jii kegamunum wejakua nunú egiptunmaya aidaun ayampatua diisui. Dutikam ishamainak utujimkag waugtuinak wechamin wajasajui.
EXO 14:25 Tuja carro kagketaiji aidaushkam kushatuk ukuinidau. Nuniagtai juwimainchau dekapenak untsumaidau. Nuninak ditak pempeentunikiag chichainak: “¡Auk Tuke Pujuu Israel aents aidaun ayamjak jutijai maaniak jutijamui, dekas pisajagmi!”, tuidau.
EXO 14:26 Tusa imatiagtai Tuke Pujuu Moisésan chichajak: “¡Uwejum nayantsanmanini awentata, dutikamin yumi waketak egiptunmaya aents aidaun, ditá carroji aidaun, caballoji aina nujai yutua ijinati!” tiuwai.
EXO 14:27 Tama Moisés niina uwejen nayantsanmanini awentauwai. Dutika uwejen awentamtai, nayants ejapeen buku wajas auk, tsawak yaunchuk aajakbaunak imanisag piyag asauwai. Tuja egiptunmaya aents aidauk pisagtakama nayantsanmak egkemkajui. Aatus Tuke Pujuu egiptunmaya aidaunak nayantsanum aepá ijinauwai.
EXO 14:28 Nuadui nayants yaunchuk aajakbaunak imanisag weak faraón niina suntaji aidaujai carro aidaunum, caballo aidaunum, Israel aents aidaun pataetukag nayantsanum utsaadau aidaunak ashí yutua ijinauwai. ¡Tuja faraógkan suntaji aidaunmayag makichkikesh uwemjachui!
EXO 14:29 Untsu Israel aents aidauk nayants buku wajasa, mai yantamen yumi muja iman wajas aunum ditá eemak, shiig katiajaju ainawai.
EXO 14:30 Aatus Tuke Pujuu Israel aents aidaunak egiptunmaya aents waitkam batsatun ayamjuk uwemtikjauwai. Dutikamu asag nayantsa tugkitken yujakma egiptunmaya aents jinaun nayants tsukatak tugkitak anugkam batsatun wainkajui.
EXO 14:31 Nuna Tuke Pujuu imatika niina senchijin egiptunmaya aidaun ijinamun wainkag, Tuke Pujuun eme anentus diidau. Nuadui ima Apajuíyaig kajinas anentaimainak, niina inake Moisésnashkam dutiksag kajitus anentaimtuidau.
EXO 15:1 Tuke Pujuu ayamjuka uwemtikjam, Moisés nii wegantu Israel aents aidaujai Niina emematuinak juna aatus kantamawajui: “Tuke Pujuun, eme anentsan kantamjuatjai, wagki niina senchijin ashí depetmak, shiwag caballojin entsatkau aidaun nayantsanum ijinau asamtai.
EXO 15:2 Tuke Pujuu minak senchimtijawai, niyai mina ayamjumataijuk, nuadui wika niina kantamjajai. Niiyai dekas mina Apajuíjuk, nuadui shiig aneasan ememattatjai. Niiyai dekas mina apajun Apajuíji, nuadui wika tuke niina etsagjatnaitjai.
EXO 15:3 Tuke Pujuuwa nunuwai dekas maanitan yachak. Niina daajig dekas Tuke Pujuu tutayai.
EXO 15:4 “Faraógka carrojinak, ashí niina suntaji aidaujai, nuigtu suntaja apuji dekas yacha etegjamu aidaunashkam Tuke Pujuu nayantsanum aepá ijinae.
EXO 15:5 Nuadui ditak nayantsa kunajin shiig initak kayajai betek tepeawaje.
EXO 15:6 “Chah, Tuke Pujuuwah, amina senchigmijai iina shiwaajig ijinamume,
EXO 15:7 Amina senchigmijai, shiwaajum aidauk depetnaitme. Iman asam ame kajekbaugmin chijichi kagaku apemaina numamtuk ijina emegkagmaume.
EXO 15:8 Ame dase awemamu nayantsan umpui jimaituk akankae. Dutikamu asa yaakat peejamua iman wajasmae. Nayantsa initkenish yumik buchittsuk asae.
EXO 15:9 Iina shiwaaji anentaimas: ‘¡Pataetukagmi! Dutika amainagkaja ijinku wajiji yajutka tinamdaekagmi’ tiaje.
EXO 15:10 Tujash ame dase senchi dasenmikakam nayantsa ejapeen aepá emegkakmaume. Nuadui plomo ajugkam tepegama numamtuk tepeawagmae.
EXO 15:11 “¡Chah, Tuke Pujuuwah! ¡Aents aidau apajuímtaiji aina duka kuashtai! ¿Tujash amejai betek amainush tikichish aintash? ¡Ima ameketme pegkejam muunmek! ¡Ameketme ashí senchigtinmek! ¡Ameketme wainchatai aidau ishamain iwainam ibaumek! ¡Ameketme ememattaimek!
EXO 15:12 Amina senchijum iwainakume, dutikawamin nugka ujani egiptunmaya aidaunak kujag emegkaje.
EXO 15:13 Amek amina aentsjum aidau shiig senchi aneau asam, amina senchigmin uwemtikjaume; nuadui amina senchigminig uyunkagtusam ekagtame nugka pegkeg anagkagtuawaitam nuwi jegatnume tusam.
EXO 15:14 Juna aents tikich nugkanmaya aidau antukag senchi ishamainak kujainiagtatui; tuja filisteo aidaushkam sapigmainak najaimaku wajukmaina numamtuk tuni tunija iyainiagtatui.
EXO 15:15 Tuja Edom nugkanmaya suntaja apuji aidauk, ishamkag wakan wajasagtatui. Tuja Moab nugka apuji aidaushkam ishamainak kujainiagtatui. Nuninai Canaán nugkanum batsamin aidaushkam ishamkag wainkauch dekapmamiagtinai.
EXO 15:16 ¡Chah, Tuke Pujuuwah, aatus sapigmainak anentaimjatnume! Amina senchijum iwainam juna dekainak kaya buchitmainchauwa nunin wajastinme, nunikmatai amina aentsjum ame uwemtijamu aina juka ame nugka anagkuawaitam nuwi shiig utsaanatnume.
EXO 15:17 ¡Chah, Tuke Pujuuwah, jukagtukim aminu atin muja etegkamua nuwi pujustinme tusam ejekagtuata! ¡Ame nuwi pujustinme tusam etegkauwaitme, tuja duka amina jem ame pujustin emtikam umikuitme!
EXO 15:18 ¡Chah, Tuke Pujuuwah, amek yamaish, kashinish, ajumaya duish tuke inama pujutnaitme!” tiuwai.
EXO 15:19 Faraógka carroji maanitai aidaunum, caballo maanitai aidaunum suntag aidau pekamiag nayants buku wajasmatai utsaanawag shimuidaun, Tuke Pujuu yumin awakeak yutua emegkajui. Tujash Israel aents aidauk bukunum shiig katiajajui.
EXO 15:20 Nunikagmatai Tuke Pujuu chichamen etsegtin María, Aarógka umayi, panderetan juki awatak kantamtai, ashí nuwa aidauk ditashkam panderetan awaituinak nantsemaidau.
EXO 15:21 Imaniagtai María ditajai ijunag kantamak: “¡Tuke Pujuu eme anentsajum kantamjuatajum, shiwag caballonum maanin aidau entsatkau minidaun nayantsanum aepá ijinak depetmaku asamtai!” waja wajas kantamu.
EXO 15:22 Moisés nii wegantu Israel aents aidaujai nayants kajis ain tutainum batsatu juwakiag, uwejush Shur tutainum kampatum tsawan yumi atsamunum shimu batsatu.
EXO 15:23 Nunik shima shimakua yumi aunum jegawajui, tujash nunú yumik yapau asamtai uwagchajui. Nuadui nunú nugka daajinak “Mará” adaikajui.
EXO 15:24 Nuadui Israel aents aidau, Moisésa kajejuk pegkegchaun chichajuinak: “¿Yamaish iish wajig uwagtaji?” tusa imatjuinau.
EXO 15:25 Imatjuinam Moisés Tuke Pujuu yainkati tusa segauwai. Tusa segam, Tuke Pujuu Moisésan inaktusui numi uchuchiji wajaun. Nuna Moisés tsupik juki yuminum ajugkui, dutikam yumi sakam pegkeg wajasui. Tuja nunú nugkanum Tuke Pujuu ditan dekapsauwai, dutika nuadui dita chicham umikagtinun susauwai.
EXO 15:26 Dutika chichajak: “¡Wi Tuke Pujuu atumi Apajuígmetag nunú tabau puyatjusa antukjum wi wakegamu takakjum, chicham umiktinun wi amasuitjim nunú betek umiakjuminig, egiptunmaya aidaun jata awetiuwaitag dutikanuk atumnak makichkish awetishtatjime! ¡Witjai Tuke Pujuu atumi etsagaumainnuk!” tiuwai.
EXO 15:27 Tusa tiajam shimui shimuinakua Elim tutainum, doce yumi pukuni jiinu, nuigtu setenta palmera aidau ijununum jegawajui, nunikag pukuni jiinainamunum ayaumas aakmajag batsamsajui.
EXO 16:1 Israel aents aidau Elimnum batsatu ashí jiinag juwakiag shima shimakua Elim muja Sinaíjai niniaku awa nuwi uwejush Sin tutainum jegawajui. Nunak egiptunmaya jiinjauwa duwi nagkamas makichik nantu asa jegawajui.
EXO 16:2 Nunú uwegshunum Israel aents aidau Moisésan Aarógjai chichaman patatuidau.
EXO 16:3 Tusa chichainak: “¡Atumek nujantai jinatnume tusajum juju muja juwi itajatuaugme! ¡Awi batsamsaik waitiakuish, neje ollanum bete painka inagkamu shiig yuwa ejemaja pujuyaji, dekas Egipto nugkanum pujajinig Tuke Pujuu ijipati tumainus tichayagtai!” wajaidau.
EXO 16:4 Imatiagtai Tuke Pujuu Moisésan chichajak: “¡Dita yuwatnunak nayaimpinmayan yumijai betek wi yutumtijattajai! Dutika ai makichik tsawantai yuwatnujin juuktinme. Nuadui dekattajai yaki dekas wi dutikatajum taja nunash betekash umikat, tuja yaki umikchat nunashkam.
EXO 16:5 Untsu tsawan seisa duwi yuwatin juwakjumek, jimag tsawantai yuwatin asamtai, makichik tsawantai yuwatin juuttajum aan kuashat juuktatjume”, tiuwai.
EXO 16:6 Tusa tima Moisés Aarógjai Israel aents aidaun ujainak: “Yamai agkuantai dekattagme, atum Egipto nugkanum batsatutigmin Tuke Pujuu jiipagmaya nunú.
EXO 16:7 Atum chicham patatjum nuna antugtamkaje. Nuadui kashin kashikmas niina imanjin iwaintugmaktata nunú wainkattagme. ¿Wagka atumesh jutiish augmatkagtagme? ¿Iikaitag atum atsumamu sumainti?”
EXO 16:8 Tusa ataktu Moisés chichaak: “Atum yuwatnun Tuke Pujuu nejen ajum aagkú amastatui, untsu kashikmas pagkan shiig kuashat amastatui. Nunak dutikattawai atum chicham patatbaun antugtamkau asa. ¿Iish ya ainaji? Atum chicham patatkagtajum duka jutiik tukagtatsjume, Tuke Pujuu patatku tajume”, tiuwai.
EXO 16:9 Nuna tusa Moisés Aarógkan chichajak: “¡Israel aents aidau ashí ujakta Tuke Pujuu emtin ijunjatnume! Nunikag antuktinme dita chichaman pataina duwish, Tuke Pujuush wajintig”, tiuwai.
EXO 16:10 Tusa tima Aarón Israel aents aidaun ijumag chichaak wajai, uwegshunmanini niimsatakama, yujagkim winchamtinnum Tuke Pujuu wantintatman wainkajui.
EXO 16:11 Nunú yujagminmaya Tuke Pujuu Moisésan chichajak:
EXO 16:12 “Israel aents aidau chichaman pataina nuna antukjai. Nuadui juju aajam dita aidau ujakta: ‘Ajum agkuantai neje yuwattagme. Untsu kashikmasjum pag shiig kuashat yuwattagme tujamui. Aatus dekawagtatui wi Apajuí Tuke Pujuu tutayaitag nuna’ tawai”, tiuwai.
EXO 16:13 Tusa timatai nunú tsawantin agkuantai aakmaja batsatbaunum codorniz shiig kuashat kaunauwai. Nuniku ai kashikmas yumi sajatuk nugkan uchupkauwai.
EXO 16:14 Nunú yumi sajatuk nagkaemakmatai jiinkiag diikma jegashik dukanum ekemag aama numamtin tujash katsujam, uwegshunum nenentu yaijuch aidau eketag weajun wainkajui.
EXO 16:15 Nunikag nuna dekainachu asag tudayinak: “¿Jusha wajimpaya?” Tiagtai Moisés ditan ayaak: “Junak Tuke Pujuu pagkan yuwatnume tusa amasa nunuwai.
EXO 16:16 Juna amaak aatus tujamjume: Maki makichikitijum wajupa yumainaitjume nunú betek jukitajum, tuja wajupa aents jeminish pujuinawa nunú dekaapajum maki makichik aentsdau ichinak jimag litro yajatainum aimkajum jukittagme tujamjume”, tiuwai.
EXO 16:17 Tusa tima Israel aents aidauk dutiksag juukajui; tuja nii ima dukap juwai tikich ujumak juwaushkam asajui.
EXO 16:18 Dutik jukitajum tibaunak betek jukiaju asagmatai kuashat jukiuwa nudaush ampinjachui, tuja ujumchik jukiushkam etagagchajui. Maki makichik dita wajupa yuwawagtatua nuna betek dekapa jukiajui.
EXO 16:19 Dutikawagmatai Moisés ditan chichajak: “¡Makichkitigmekesh kashin yuwatnuk ampigjumek ukukigpajum!” tiuwai.
EXO 16:20 Tusa tibau aig Moisésnak antugtsuk, kashin yuwami tusa ampijag ukuidaushkam asajui, tujash duka aka pimutkam kauja mejedau. Nuna dutikawagmatai Moisés ditan kajegkauwai.
EXO 16:21 Duwi nagkamas maki makichik dita yuwatnujin kashi kashinig yajumainau. Tuja etsa etsantak sukuam yumimea megkagu asamtai, kashikmas jiintujag yajumajaku ainawai.
EXO 16:22 Untsu tsawan seistinig jimag ichinkanum aimak yajumainau. Dutikiagtai Israel aents aidaun apuji aidau Moisésan jegajuawag ujaidau.
EXO 16:23 Tama Moisés ditan chichajak: “Aunak Tuke Pujuu dutikatnume tusa timae”, tiuwai. Nuna tusa: “Kashin tsawan ayamtai atinun, Tuke Pujuu etegkamu tsawagtin asamtai, inagmain akuig yamaik inagkatajum, tuja ukuumain akuishkam yamaik ukuukatajum. Untsu yumain ampinjatta duka kashin yuwatin ukuktajum”, tiuwai.
EXO 16:24 Aatus Moisés tibaunak imatiksag yutai ampinjaunak kashin yuwatnujin ukukiajui. Tujash nunak akakesh ikiachui, tuja mejetnakesh mejeachu.
EXO 16:25 Nuadui Moisés ditan chichajak: “Atum yau ukukbaujum nunú yamai yuwatajum. Juju tsawanta juka Tuke Pujuu etegkamu ayamtai tsawaje. Nunin asamtai, ¡juju tsawanta juwi yutai agá ayauk wainkashtatjume!
EXO 16:26 Nuadui ayatak seis tsawanta duwi atum yuwatnuk juuktatjume. Untsu tsawan ayamtai Tuke Pujuu etegkamua nunú tsawantinig yutai juwamuk atsuttawai”, tiuwai.
EXO 16:27 Tusa tiu aig, tsawan ayamtai tsawagmataish jiinki egaidaush asajui, tujash makichkish wainkachajui.
EXO 16:28 Nuniagtai Tuke Pujuu Moisésan chichajak: “Wi atumi jintinkun, juju umiktajum timajim dusha ¿wajupa chichagkama atumesh umiktatjume?
EXO 16:29 Tsawan seistin yuwatnun kuashat amaajim nunak, tsawan sieteya duwi ayamsatin asagmin dutikajai. ¡Nunú tsawantinig makichkish jiintsuk ditá jenig batsamsagtatui!” tiuwai.
EXO 16:30 Tibau asa Israel aents aidauk nunú tsawan jegatai ayamaidau.
EXO 16:31 Israel aents aidau yutai kakekaun juujaku aina duka shawi jigkayiya numamtin, niime puju; dapa yumiji pagjai pachimjamu yumimitu pegkejan kugkuwama iman aajakui. Nuna Israel aents aidau adaikau ainawai “maná”.
EXO 16:32 Tuja duwi pujus Moisés tiuwai: “Tuke Pujuu juna aatus chichaak: ‘Atum Egipto nugkanum batsatutigmin wi jiija yajuakan uwegshunum yutain amasuitag nuna atak atumi uchijum akiinak wedaush wainkagtina nunú maná makichik ichinkanum aimkajum ukustajum’, tujamjume”, tiuwai.
EXO 16:33 Nuna tusa Moisés Aarógkan chichajak: “Makichik ichinkanum maná aimkata, dutikam jega pegkegma nuwi awayam Tuke Pujuu emtin apusata, atak atumi uchijum wegantu agtina dusha wainkagtin atinme”, tiuwai.
EXO 16:34 Tuke Pujuu Moisésan tibaunak imatiksag Aarón maná ichinkanum chimpiamun juki, chicham umiktin agagbau arcanum egkeam aunum ejegan nujai niimtikas apusauwai.
EXO 16:35 Israel aents aidauk ima manának yusag cuarenta mijan yujasui, ima nunak yusa yujasag jegawajui Canaán nugka nagkatkamunum.
EXO 16:36 Israel aents aidau manán dekapainakug jimag litro dekapatai “gomer” tawa nujai dekapajaku ainawai. Tuja “efa” tawa nunú aajakui veinte litro dekapatai.
EXO 17:1 Israel aents aidau uwejush Sin tutainum batsatu ashí jiinag diipas jintá kanui kanuinakua Tuke Pujuu chichamen antujus Refidim nugkanum jegawag aakmajag batsamsajui. Tujash yumi dita umumainuk atsujakui.
EXO 17:2 Nuadui Moisésan jegajuawag chichajuinak: “¡Yumi sukagtusta uwajagmi!” tusa imatjuidau. Tusa imatjam Moisés ditan chichajak: “¿Wagka minash segatjume? ¿Wagka Tuke Pujuu senchigtuchua nunin chichagkugmesh ekajeagme?” tau.
EXO 17:3 Tujash Israel aents aidauk senchi kitamaidau asag Moisésan kajejuk chichajuinak: “¿Wagka Egipto batsamsatnume tutsukesh jiijatjamiume? ¿Uchiji aidaujaí, tagkuji aidaujaí kitakai jinaati tusamek jiijatjamium?” wajaidau.
EXO 17:4 Imatiagtai Moisés Tuke Pujuun segaak: “¿Utugkattaja juju aents imatjutuina nunash? ¡Jukea akug kayai tuku tukujuinakua mantuawagtatui!” tau.
EXO 17:5 Tama Tuke Pujuu Moisésan ayaak: “Israel aents aidau ashí yajuaka weakum ditá apuji múun aina nunú ujumak jukim emka wetá. Nuniakum ame namak awatiuwaitam nunú ushujutaijum jukita.
EXO 17:6 Tuja wika muja Horebnum kaya awa nuwi dakastatjame, nuwi taam ¡nunú kaya awatta! dutikamin yumi jiinkittawai. Nunikmatai ashí aents aidau uwagtinme”, tiuwai. Tusa tima Moisés Israel aentsu apuji múun aidau wainainamunum kayan awatiuwai.
EXO 17:7 Tuja Israel aents aidau yumi atsutai Tuke Pujuu emtin kajekag Moisésan pegkegchaun chichagkaju asagmatai, nuna nugka daajin adaikauwai “Meribá”. Tuja nuigtushkam adaikauwai “Masá”. Nunak Israel aents aidau chichainak: ¿Dekas Tuke Pujuush jutijaish pujawash? tusag utujimkaju asagmatai tuu adaikauwai.
EXO 17:8 Israel aents Refidim batsatun Amalec aents aidau ditajai maaniawagtatus shimutkajui.
EXO 17:9 Nuniagtai Moisés Josuén chichajak: “¡Aents aidau etegjam Amalec aents aidaujai kashin maaniata! Nuniamin wi mujanum wakan ushujutain Apajuí sujusbauwa nuna takusan pujuttajai”, tiuwai.
EXO 17:10 Tusa tima nuna betek umiak, Amalec aents aidaujai maaniatatus jiintukiuwai. Nuniai Moisés, Aarón, nuigtu Hur aatus muja titijin wakajui.
EXO 17:11 Nuwi waka batsamas Moisés uwejen yakí takutai, Israel aents aidauk Amalec aents aidaun depetuidau, untsu uwejen awaktai, Amalec aents aidau Israel aents aidaun depetuinau.
EXO 17:12 Moisés niina kuntuji yawetai awakeau asamtai, kaya jukiag apujtusam nuwi ekemsauwai. Nunikmatai Aarón, Hurjai Moisésa kuntujin mai takujiag emetjuawajui. Dutikam nunisag pujai, etsashkam akaikiuwai.
EXO 17:13 Nuadui Josué niina aentsji aidaujai Amalec aents aidaun depetuk amukui.
EXO 17:14 Dutikamtai Tuke Pujuu Moisésan chichajak: “¡Juju maaniamua juu pachisam papiinum agagta, ajumaish kajimatkishtin ati! Tuja Josué ujakta, Amalec aents aina nunak wi ashí ijinan emegkagtatjai”, tiuwai.
EXO 17:15 Tusa tima Moisés nuwi kaya yajuak ijumag altaran najana nuna daajin “Tuke Pujuu Nisi” adaikauwai. Nunak “Tuke Pujuuwai, bandera jiikbaujai betekmamtin depetmata sukagtinuk” taku tawai.
EXO 17:16 Nuna tusa: “¡Tuke Pujuuwa nuna depetmataig jutiyai awai, nuadui Tuke Pujuu Amalec aents aidaunak ijinattawai, dutikak ditá uchiji wegantu aidaunashkam ijinatnai!” tiuwai Moisés.
EXO 19:1 Israel aents aidau Egipto nugkanum batsatu jiinjau aina duwi nagkamas, kampatum nantua nuna achiak, makichik tsawan tsawajua nunú tsawantin muja Sinaí nagkatkamu uwegshunum jegawajui.
EXO 19:2 Tuja Sinaínum jegawajua nunak Refidim batsatu juwakiag jegawajui. Nunikag nuwi mujá ijus uwegshunum aakmajag batsamsajui.
EXO 19:3 Nuwi pujus Moisés Apajuíjai chichastatus mujanum wakauwai. Nunikmatai Tuke Pujuu nunú mujanmaya Moisésan untsuka chichajak: “Jacob tikich daaji Israel aajakua nuna uchiji wegantu Israel aents aina nunú ujakta:
EXO 19:4 Egiptunmaya aents aidaun wi itugkauwaitja duka atumek shiig wainkauwaitjume. Tuja wi atumin, ukukui niina nanapen uchiji aidaun pataja yajumaina numamtuk kuitamkan wi pujag juwi ikaunmajim dushakam shiig dekagme.
EXO 19:5 “Tuja ashí nugka aina duka ashí aents aina nujai midau ainawai. Nunin aig wi atumin mina aentsug atinme tusan etegkauwaitjime. Nuadui wi chichaman tajim nunú antukjum umiakjumek atum dekas atatjume mina aentsug tikich aents aina nuna nagkaesau.
EXO 19:6 Atum Israel aents aidautigmek dekas sacerdote aidau ima wi wakegamunak takagtin aina nujai betek ima wi wakegamuk takau atatjume. Juna wi taja juju Israel aents aidau ujakta”, tiuwai.
EXO 19:7 Tusa tima Moisés wakitki jegaa, Israel aentsu apuji múun aidaun untsuka, ijumag ashí dita antuinamunum Tuke Pujuu tita tibaunak betek etsegkauwai.
EXO 19:8 Tusa timatai dita shiyakag Israel aents aidau batsatun ujakajui. Dutikawajam ashí betek aimainak: “¡Tuke Pujuu tujama duka ashí umikagmi!” tuidau. Tusa tiagmatai Moisés nuna dutiksag Tuke Pujuun ujakui.
EXO 19:9 Tusa ujakam Tuke Pujuu Moisésan chichajak: “Nijah, wi amejai chichamun aents aidau antukag, dekaskeap tawa tusag, tuké antugtamin atinme tau asan, yujagminum pachiinkan wantintuktatjame”, tiuwai. Tusa timatai, Moisés Israel aents aidau tibaunak imatiksag ataktu awagki Tuke Pujuun ujakui.
EXO 19:10 Tusa ujakam Tuke Pujuu Moisésan chichajak: “¡Wakitki jegaam aents aidau ujakta! Yamai, tuja kashinchakam ashí shiig umintsatnume, mina emematjiagtin asag. Nuninak jáanchjin nijaktinme,
EXO 19:11 nunikag shiig uminas batsatai, tsawan kampatuma duwi aents aidau ashí waituinamunum muja Sinaínum akaikittajai.
EXO 19:12 “Nuniktin asamtai, aents aidau muja adijkainum dita ijuntsatin mamiktuata: ‘¡Mujanmak wakaigpajum, tuja nuigtush mamikiamua nuwig nagkaemakigpajum! ¡Antiitkesh antigkaigpajum! Nuna antiauk jakattawai’, tita.
EXO 19:13 Untsu makichik aentskesh, tuja kuntinkesh nuna dajagtata duka achikaigpajum ayatak kayai tukua tukuakuajum maatajum. Untsu dutikachkugmesh nagkiikesh maatajum. Duka kuntin akush, aents akush tuké dutika maam atatui. Untsu uwija kachuji senchi umpuamun antuinak mujanmak wamain ainawai”, tiuwai.
EXO 19:14 Tusa tima Moisés nunú mujanmaya wakitki, Israel aents aidau batsatbaunum taa chichaak: “¡Umintsatajum Apajuí emematiagmi!” tusa tiajam, ditashkam shiig umintsajui.
EXO 19:15 Nunikagmatai Moisés ditan chichajak: “¡Kashin pujus tsawak Tuke Pujuu wantintugmaktin asamtai, nuwemjaig tsanitsuk umintsajum dakamsatajum!” tiuwai.
EXO 19:16 Tusa tiyajam, dakamainak batsatai, tsawan kampatuma nunú tsawamunum kashikmas ipamat ishamain wajau, imaniak peemshakam senchi peetu. Imaniamunum nunú mujanum yujagkim suwe wajas aunum, uwija kachuji umpuamu shiig senchi shinaun antukag, Israel aents aidau aaknum batsatuk shiig senchi ishamak kujainau.
EXO 19:17 Imaniagtai Moisés ditá aakjin batsatun jiija yajuak Apajuíjai igkumtikatatus muja najatamunum ijumjauwai.
EXO 19:18 Nuninai nunú mujanum jii kegaunum pachitkau Tuke Pujuu akaikiuwai. Nunikmatai muja Sinaík ashí bukuitau. Nuadui nunú mujak aja apeam esaak bukuituwama imaniau. Imaniai nunú mujak shiig senchi uuju.
EXO 19:19 Tuja uwija kachuji shinamushkam Apajuí mujanum taattak minitai nuni senchi shinau. Tuja Moisés aujam, Apajuí ayaamuk ipamat wajukeama imatu.
EXO 19:20 Aatus Tuke Pujuu nayaimpinmaya muja Sinaí titijin yaki tauwai. Nunik taa Moisésan wakata tusa untsukui. Tusa untsukam Moisés wakauwai.
EXO 19:21 Nunikmatai Tuke Pujuu chichajak: “¡Wakitkita, nunikam aents aidau ujakta dita ijuntsatin mamiktuamua nuna nagkaiki mina diigsatatus wakainmegka! Nuna nunidauk jakagtatui.
EXO 19:22 ¡Tuja sacerdote minai tamain aina dukesh junisagkek tantainmeka, dekatkauk pegkeetnume! Nuninachkug ditashkam jinumain ainawai”, tiuwai.
EXO 19:23 Tusa tutai Moisés Tuke Pujuun ayaak: “Aents aidauk juju muja juwig wakachagtatui. Wagki juju muja duka aminu pegkejam asamtai, nuwi aents aidau wakainum tusam, dita ijuntsatin muja najatamunum mamiktuata timaum duka betek uminkae”, tiuwai.
EXO 19:24 Tutai Tuke Pujuu Moisésan chichajak: “Wakitkim jegata. Nunikam Aarógjai wakata. Untsu sacerdote aina duka Israel aidaujaig nugka mamiktuamua nuna nagkaikiajag wi pujag juwig makichkish wakainmegka. Nuna nuninakug wi ¡suwimka susa ai jinawagtatui!” tiuwai.
EXO 19:25 Tusa tima Moisés wakitki jegaa Tuke Pujuu tibaunak imatiksag Israel aents aidaun ujakui.
EXO 20:1 Apajuí chichaak juna aatus ashí tiuwai:
EXO 20:2 “Witjai Tuke Pujuu atumi Apajuígminuk. Wi atumnak Egipto nugkanum inaku waitkatai batsatutigmin jiijuitjime.
EXO 20:3 “Tikich aina duka makichkish apajuímawaigpajum.
EXO 20:4 “Tuja yakiya, nugkaya, namaka initkenia aina duka makichkish dakumka najanagmek emematigpa.
EXO 20:5 “Nunú aidau eme anentsajum Apajuíjai betek anentaimtu yujaigpajum. Witjai Tuke Pujuu Apajuí atum emematin ainajum duka. Wika Apajuí akasmauwaitjai. Nuniau asan aents aidau mina dakitjuinak pegkegchaun takaina nuna suwimka suwakun, nuna uchiji aidaunash, tijaji aidaunash, ama tijaji aina imanuiyanash suwimkan suwaitjai.
EXO 20:6 Tujash mina anentuinak, chichamjun betek umigtuidaunak ashí niina uchiji wegantu agtina nujai shiig anentsan tuké kuitamnaitjai.
EXO 20:7 “¡Tuja Tuke Pujuu atumi ememattaijum Apajuíya nuna daaji wainka adaya yujaigpa! Nuna núnidaunak Apajuík suwimka sutsukek idaisashtinai.
EXO 20:8 “¡Tsawan ayamtai Apajuí etegkamua nunú kajimatkitin aigpajum!
EXO 20:9 Takamain aina duka seis tsawanta duwi ashí takastajum.
EXO 20:10 Untsu tsawan sieteya duka Tuke Pujuuu, amina Apajuíjum etegkamu asamtai amina uchigmekesh, nawanjumkesh, tuja wainka inataijum aidaukesh, tagkugmekesh, tikich nugkanmaya ijagtamak taa pujaukesh, takatnak takaschagtatui.
EXO 20:11 Wagki Tuke Pujuu Apajuík seis tsawantai nayaimpin, nugkan, nayantsan tuja ashí nuwi ayá nujai najankauwai. Dutika tsawan sieteya duwi ayamjauwai. Nuadui nunú tsawanta nunak tuke ayamtai atinun Tuke Pujuu etegkauwai.
EXO 20:12 “Amina apa, dukujai eme anentsam diita. Dutikakum yaigta. Nunú dutikakum Tuke Pujuu Apajuí amina nugkan amastata nuwi jegagmesh, dukap tsawan pujusminjum.
EXO 20:13 “¡Magkagtuawaipa!
EXO 20:14 “¡Ikagmakaipa!
EXO 20:15 “¡Kasamkaipa!
EXO 20:16 “¡Tikich aentsush wainka tsanumjujaipa!
EXO 20:17 “Tikichi jee wakejusam diisaipa. Tuja niina nuwegkesh, nuwa wainka inataijigkesh, aishmag aidaukesh, nuigtu tagkuji baka, burro aidaush, tuja ashí tikich niinu aidau wajig ayawa dukesh wakejusmek diisaipa”, tiuwai.
EXO 20:18 Nuna aatus Apajuí chichai ipamat, peem, chaajip, nuigtu bukuitak mujanak ejakui. Nuna ashí Israel aents aidauk wainkajui. Tuja uwija kachuji shinaunashkam antuidau. Nuna ishamainak ikaa ijunas dii ijunu.
EXO 20:19 Nuninak Moisésan chichajuinak: “Ame dekas Apajuíjai chichasam ujajatkata. Nunú antuka umikagmi. Untsu Apajuík jutijaig ataktu awagkig chichasaigka, jinawaig taji”, tuidau.
EXO 20:20 Tiagtai Moisés ditan ayaak: “¡Ishamkaigpa! Apajuí junak niina senchijin atumi iwaintugmak juniawai. Juna wainkag ataktuk tudaunak takaschatnume tujamu asa”, tiuwai.
EXO 20:21 Tusa tiajam nuwi ikaa ijunaig yujagkim bukusea wajas aunum Moisés jegantui Apajuí pujamunum.
EXO 20:22 Nunikmatai Tuke Pujuu Moisésan chichajak: “Israel aents aidau ujakta: ‘Yamaik wi nayaimpinum pujusan ditan aujag nuna antukaje,
EXO 20:23 nuniku asag ¡mina emematjumaina numamtukek oro, plata aina nujai dakumak najanawajag emematinmeka!
EXO 20:24 ¡Mina emematjuinakug, nugka ijumjag kuntinu maawag nuna nejen nuwi patai ashí apeenak emematjitnume! Tuja dita tsagkugnagbaunum anentag itainakush tuja uwig, baka aidaun apeenakush wi tuwi dutikatajum titatja ima nuwig dutikatnume. Nuna betek uminakuig wishakam pegkegnum yumigsagtatjai.
EXO 20:25 “ ‘Tuja kuntin patai apeatnun kayan ijumainakush jimaituk dakatsuk takamchaun ijumjatnume. Untsu kayan jimaituk dakainakug chichaman intimainak dutikawagtatui.
EXO 20:26 Tuja mina emematjaku kuntin maa patai apeatin najanamua nuwi najami watai atinuk najanawaigpa. ¡Wagki nuwi waaku wisu weagmin waipakainum!’ tawai Tuke Pujuu”, tiuwai Moisés.
EXO 24:1 Tuke Pujuu Moisésan chichajak: “Ame, Aarón, Nadab, Abiú, nuigtu Israel aents aidaun apuji múun aidau setenta aatsajum wi pujamunum wakatajum. ¡Nunikjumesh ikaag tikishmagjum pujustajum!
EXO 24:2 Untsu ima amek mina adijtuktatme. Tikich aidauk adijtukainmegka. ¡Tuja tikich aents aidau wakeen ijuna duka makichkish amejaig wakainmegka!” tiuwai.
EXO 24:3 Tusa tima Moisés aents aidaun Tuke Pujuu nuniktajum tibaun ujakui. Tama aents aidau ashí pampajag: “¡Duka dutiksaik umigkagmi!” tiajui.
EXO 24:4 Tusa tiagmatai Moisés Tuke Pujuu chichamunak ashí agajui. Dutika kashin tsawamunum kashikmas nantaki kuntin maa patasa apeaku Apajuí ememattinun altaran najanauwai. Dutika doce kayan yajuak, Jacopa uchiji doce aajakua dutiksag batsakui.
EXO 24:5 Nuna dutika Tuke Pujuu ditan ayamjuk agkanmitkamunum toro tsakatan maa ashí apeawagtinun, nuigtu tudau tsagkugtugti tusa toro tsakat aidaun maawag nuna nejen ujumak apeawagtinun Israel aents datsauch aidaun ujumak etegjauwai.
EXO 24:6 Nuna numpen jimaituk akanak Moisés juki tsapa aidaunum yajakui, dutika tikich jimaitukea nunak kuntin patai apetai najanamun ukatkauwai.
EXO 24:7 Dutika idayak chicham umiktin agagbaun juki, ashí Israel aents aidau antuinamunum ausauwai. Dutikamtai dita aimainak: “¡Tuke Pujuu dutikatajum tujama duka ashí imatiksaik umikagmi!” tuidau.
EXO 24:8 Tusa tiagmatai Moisés numpa juki aents aidau ijunbaunum pegashmak: “Juju numpa juka Apajuí atumjai chichaman umika duka dekaske taku jutikaji”, tiuwai.
EXO 24:9 Nuna tusa Moisés, Aarón, Nadab, Abiú, nuigtu setenta Israel aents aidaun apuji múun aidaujai mujanum wakauwai.
EXO 24:10 Nunikag nuwi Israel aents aidau Apajuíji: Nawe najama wajamujig kaya safiro tutai wigkaya imadai ukatkamunmas winchamtinnum wajatai tumain nayaim wigkaya iman wajas atatman wainkajui.
EXO 24:11 Tuja Apajuík nunú apu aidaunak waitkatnume tiu asamtai wainkajui. Dutika wainkamash ditanak ijinachajui. Aatus niina emtin yutain yuwawag, umutnash uwajajui.
EXO 24:12 Nunikagmatai Tuke Pujuu Moisésan chichajak: “¡Mujanum wi pujamunum wakam dakagsata, nuniamin kayanum chicham umiktinun wi atumin jintintuatasan agajag nuna amastajai!” tiuwai.
EXO 24:13 Tusa tima Moisés niina yain Josuéjai mujá weuwai.
EXO 24:14 Nunik weak Israel aentsu apuji múun aidaun chichajak: “¡Juwi atumek dakamsatajum nuniagmin tattaji! Tuja Aarón, Hurjai, atumjaig pujuttawai. ¡Utugchat ajutjamkujaish dita ujaktajum!” tau.
EXO 24:15 Nuna tusa ukuak Moisésak mujanum wakauwai, nuniai yujagkim mujan ijiauwai.
EXO 24:16 Tuke Pujuu imanji Sinaínum tauwai. Nunikmatai seis tsawanta imajin yujagkim ijia asauwai. Nunú yujagminmaya tsawan sieteya duwi Tuke Pujuu Moisésan untsukui.
EXO 24:17 Tuke Pujuu imanji wantinbau Israel aents aidau diismak yakí mujá titijin jii kegak wajukeama iman aajakui.
EXO 24:18 Nunú yujagkim suwe wajas aunum Moisés waigkui. Nunik nunú mujanum cuarenta tsawan, nuigtu cuarenta kashi pujusui.
EXO 31:18 Tuke Pujuu Moisésjai muja Sinaínum chichasa ashimak, jimag kaya pakama najanamunum chicham umiktinun, nii agatug susauwai.
EXO 32:1 Moisés muja Sinaínum wee megkaekamtai, Israel aents aidau ijunag Aarógkan chichajuinak: “¡Moisés jutiinak Egipto nugkanum batsatjin jiipajui! ¡Tujash dusha wajukaes, megkaetumkae! Nuniku asamtai dekas ¡ame ii apajuímatin najanata, nunú iina uyuntamsamtai shiyakagmi!” tuidau.
EXO 32:2 Tusa tiagtai Aarón ditan ayaak: “¡Takugmek atumi nuwemdau, uchigminu, nawanjumdau akiitaiji oro aina nunú ukuitjajum juwi itatajum!” tiuwai.
EXO 32:3 Tusa tiajam oro najanamu ditá kuishin nenau aidauk yajuakag Aarógkan ejetuawajui.
EXO 32:4 Dutikawagmatai Aarón nuna yajuak ukuiyag, toro tsakatan dakumak najanauwai. Dutikamtai dita chichainak: “¡Egipto nugkanum inaku waitkatai batsatjin Apajuí jiipakiuwa duka jujuwai!” tuidau.
EXO 32:5 Nuna Aarón antuk, toro tsakat dakumka najana apusamunum, nuna yantamen ayaunas altaran najanauwai. Dutika senchi untsumak chichaak: “Kashin ijunja Tuke Pujuu emematuinaku jiistamawagtatji”, tau.
EXO 32:6 Tusa tiu asamtai tsawainak kashikmas nantajag Apajuí agkanmitkagmauwai tusag nuna anentag suwinak kuntinun maidau, tuja tudau tsagkugnagtin tusashkam kuntinun maidau. Nuna dutikawag yujumkan yuwawag, umutan umuinak nantsemaidau.
EXO 32:7 Nuniagtai Tuke Pujuu Moisésan chichajak: “¡Mujá pujam duka wakitkita, amina aentsjum aidau Egipto nugkanum batsatu jiigmayum duka pegkegchaun takainak wi dutikatajum tibaunak uminatsui!
EXO 32:8 ¡Wi umigtuktajum tibaunak shiig wamak kajimatkiaje! Nuninak oro ukuijag toro tsakatan dakumak najanawag nuna emematuinak kuntinu maa apenawai. Dutikainak: “ ‘¡Egipto nugkanum inaku waitkatai batsatjin Apajuí jiipakiuwa duka jujuwai!’ tuinawai”, tau.
EXO 32:9 Tusa Tuke Pujuu ataktu Moisésan chichajak: “Wi ditanak diyakjai, nuniau asan dekajai ditak dekas shiig antakchau ainawai.
EXO 32:10 ¡Nuadui amek makichkish ayamjukaipa! ¡Wika shiig senchi kajekjai, nuniku asan ditanak ashí ijinattajai! Tujash ame wegantu aidaunak shiig kuashat ikauntuktatjame”, tiuwai.
EXO 32:11 Tusa tima Moisés Apajuí tsagkugti tusa chichajak: “¡Tuke Pujuu mina Apajuíjuh! ¡Imanikmek kajekaipa! Ameku amina senchigmin amina aentsjum aidau Egipto batsatu jiigmayume.
EXO 32:12 Nuadui ame dutikawaminig egiptunmaya aents aidau chichagtamainak: ‘¡Apajuí ditanak tsanuja yajuak, mujá uyujus ijina emegkajui!’ tusa dushiktamain ainawai. Nuadui dekas ¡kajegkau akumesh tsagkujata!
EXO 32:13 Amina inakem aidau Abraham, Isaac, Jacob aajaku aina nujai ame umiktinjum chichaakum: ‘Atumi uchijum wegantu aidaunak shiig kuashat ikauntukan, yaya nayaimpinum ayá iman awajsatnaitjai tusam, ¡juju nugka junak atumi uchijum wegantu agtina nudau tuke atinun amastatjime!’ tiuwaitam nunú adeagta”, tiuwai.
EXO 32:14 Tusa tima, Tuke Pujuu ditan kajejuk ijinatjai tiuwaitak, anentain yapajia dutikachui.
EXO 32:15 Nunikmatai Moisés mujá pujau waketak, jimag kaya pakama najanamunum chicham umiktin mai yantamen agagbaun juki ejegauwai.
EXO 32:16 Nunú kayanak Apajuí najanauwai, tuja nunú kayanum chicham agagbau aajakua nunashkam Apajuík agajui.
EXO 32:17 Nunú chicham agagbaun jukimtai wakitkiag shimukma, aents aidau pampaidaun Josué antuk Moisésan chichajak: “¡Aents aidau batsata nuwimpash maaniamunum pampainak wajukeama imatuinani antajai!” tau.
EXO 32:18 Tutai Moisés ayaak: “Nunak depetmakbaunum shiig aneenakugkesh imatainatsui. Tuja nuniachkush tikich depetkam wake besemag dekapenakugkesh imatainatsui, ¡auk nunak nampeja batsamas imat batsatui!” tiuwai.
EXO 32:19 Imatu batsatai Moisés jegakma aents aidau nantsemainak batsatun wainkauwai. Nunik diikma toro tsakat dakumka najanamu atatman wainak, senchi kajeka chicham umiktin kayanum agagbau takakbaunak nagkima ajuag tsaikui.
EXO 32:20 Nuna dutika toro tsakat dakumka najanamun juwakug nagkima jii kegamunum jiya tsaika yukukuntu ema yuminum chimpia pachimag, Israel aents aidaun chichajak: “Yamai juju uwagtajum” tusa aakui.
EXO 32:21 Nuna dutika Aarógkan chichajak: “¿Juju aents aidaush itugtamkau asamtaiya, amesh ibau pegkegchau takamtikakmesh tunamitkame?” tau.
EXO 32:22 Tutai Aarón ayaak: “¡Apujuh, minak kajegtukaipa, amek shiig dekame, juju aents aina juka ayatak pegkegchau takatnak wakeyin ainawai!
EXO 32:23 Minak dita chichagtuinak jutii aidauti Egipto nugkanum batsatjin Moisés jiipagmaya duka wajukaes megkaekae. Nuniku asamtai, ii shimajin uyuuntamsatin makichik apajuímtai najatkagtuata tujutuinakui,
EXO 32:24 wi ditá ayaakun: ‘Akiitaiji oro ajamu aidauk ikaunmatnume’ ti ai, ikaunmawagmatai wi jinum jiyamjai. Dutika ai juju toro tsakat najaneame”, tiuwai.
EXO 32:25 Tuja Israel aents aidauk Aarón kuitamkacham batsamas pegkegchaun takainak, wainak yujaidau asamtai, ditá shiwaaji aidau dushikiam amainun Moisés anentaimas diisui.
EXO 32:26 Nunik aakmaja yaaktamamunum waitainum Moisés wajas chichaak: “¡Tuke Pujuun dekaskeapi tuidauk wijai ijunjatnume!” tiuwai. Tusa timatai Leví wegantu aidau Moisésjai ashí ijunjajui.
EXO 32:27 Nunikagmatai Moisés ditan chichajak: “Tuke Pujuu Israel aents aidaun Apajuíjiya nunú juna aatus chichaak: ‘Maki makichik puyagjin jukiag aents aidau batsata nuna shimutuk maki makichik jegan utuawag ashí aents pegkegchaun takamsau aina nuna dita yachi aidaunum nagkamas kumpaji aidaun, tuja ditajai ijunag pujuidaun aatus kajegtinme’ tujamui”, tiuwai.
EXO 32:28 Tusa tiajam Leví wegantu aidauk Moisés dutikatajum tibaun umiinak nunú tsawanta duwi tres mil aentsun ijinawajui.
EXO 32:29 Dutikawagmatai Moisés chichaak: “¡Yamai atumnak Tuke Pujuu pegkegnum yumigtamsag chichame antugtai etamiugme! Wagki atumek Tuke Pujuu umiju asajum atumi yatsum aidau, uchijum aidau pegkegchaun takaidau ijinau asajum”, tiuwai.
EXO 32:30 Tuja kashinia duwi Moisés aents aidaun chichajak: “Atumek shiig pegkegchau takasugme. Nuadui wi yamai mujá wetatjai Tuke Pujuu pujamunum, niish tsagkugtamainashit nuna dekaatag tusan”, tiuwai.
EXO 32:31 Nuna tusa ukuak, Moisésak mujá Tuke Pujuu pujamunum wakitkiuwai. Nunik waka Tuke Pujuun chichajak: “¡Israel aents aidauk Apajuí tusag oron najanawag batsamtuidau asag dekaskenum shiig pegkegchaun takamsaje!
EXO 32:32 ¡Wait aneasam ditá tudauji tsagkujata! tusan wi segajame. Tuja tsagkugmaichakmek, mina daag amina aentsjum aidaun daaji agatkamua nuwi agatjujuitam duka esakatjugta”, tiuwai.
EXO 32:33 Tusa tutai Tuke Pujuu ayaak: “¡Wika ima mina chichamjun intimjutuina nuna daaji aidaunak esakatjattajai!
EXO 32:34 ¡Tuja amek wakitkim Israel aents aidau yajuakam wi nugka amastajime tusan anagkuawaitjim nuwi wetá! Mina aentsug nayaimpinmaya uyuuntamsattawai. Tujash tsawan dita suwimak jukitnuji jegakui, duwi suwimkanak susattajai”, tiuwai.
EXO 32:35 Tuja Aarón toro tsakatan dakumak najanamun Israel aents aidau emamatiaju asagmatai, Apajuí suwimka suwak jata ishamainun ajunjauwai.
EXO 33:1 Tuke Pujuu Moisésan chichajak: “Abrahaman, Isaakan, Jacopan uchiji wegantu aidaun nugka susatnaitjai tusan wi tiuwaitag nuwi Israel aents aidau Egipto nugkanum batsatu ame jiigmayum nunú yajuakam wetá.
EXO 33:2 Amina uyuntamsatnun mina aentsug nayaimpinmayan awemattajai. Tuja Canaán aents, amorreo aents, hitita aents, ferezeo aents, heveo aents, Jebús aents aidau Canaán nugkanum batsata nunak jiijan utsagtatjai.
EXO 33:3 ¡Nuadui nugka pegkeg, ajakash shiig tsapaun amastatjim nuwi atumek wetajum! “Tujash wika atumnak uyuntsashtatjime wagki intimkiu ainajum duwi. Nuadui kuitamamkatajum jintá weagmin shiwag amupakainum”, tiuwai.
EXO 33:4 Tusa Tuke Pujuu timatai nuna antukag, Israel aents aidauk wake besemag dekapenak iwagmamku patakumtai aidaunak patakumachaju ainawai. Tuja nugkutaiji aidaunash nugkugchaju ainawai.
EXO 33:5 Tuja Tuke Pujuu Moisésan chichajak: “Israel aents aidau juju ujakta: Atumek antakchau ainagme. Nunin asagmin wi atumjai ijutkau pujaknuk wamak ijinan utsaumainaitjime. Nuadui atum iwagmamku nugkutaijum, patakumtai aidaujai ajutjamaina duka yamaikiuch yajuaka ukuktajum. Dutikawagmin anentaimsatjai atumnash itugkatjimki nuna”, tiuwai.
EXO 33:6 Tusa tiajam ashí awimag ukukiaju asag, muja Horebnum nagkamas iwagmamku nugkutai aidaunak ataktuk nugkugchaju ainawai.
EXO 33:7 Apajuí tibaun umiak Moisés carpan juki aents batsatbaun ukuki imau agkan Apajuíjai chichastasa waitain aakmakui. Dutika nuna adaikauwai “Apajuíjai igkunika chichatai”. Tuja makichik aents Tuke Pujuujai chichastatus wakegauk, nuwi waya Tuke Pujuun aujujakui.
EXO 33:8 Nunú aaknum Moisés Apajuíjai chichastatus wetai, ashí aents aidauk maki makichik ditá aakji waitinum ijunas dii ijunaig, nunú aaknum Moisés waijakui.
EXO 33:9 Nunik wayamtai Tuke Pujuu niijai chichai yujagkim yakiya aaka waitijin wajantun au.
EXO 33:10 Nuna aents aidau wainainak, maki makichik dita Apajuín wajuk emamatin ainawa nunisag ditá aakjin waitinum tikishmajag pujujaku ainawai.
EXO 33:11 Tuja nunú carpa aakmakbaunum Moisés wayamtai, Tuke Pujuu Moisésjai igkunia niina kumpajijai chichamaina imanis chichau. Nunik chichasmatai, Moisés Israel aents aidau batsatbaunum waketujakui. Untsu Nun aajakua nuna uchiji Josué Moisésa yain aajakua duka nunú aakan kuitamak jiintsuk nuwig pujujakui.
EXO 33:12 Moisés Tuke Pujuun chichajak: “Ame minak juju aents aina juju yajuakam emata tujutme. Tujutiatkum yaki minash atutkati duka eke tujuttsume. Nuniayatkum: ‘Aneajame, nuniau asan kajittsan anentaimtajame’ tujutmayume.
EXO 33:13 Nunú dekasketkuig wajina dutikatjai tusamea anentaime nunú ujatkata, wisha nuna dekaan dekas yaimpaktatuapi titajai. Ame etegkagtujuitme mina aentsug atinme tusam. Nuadui idaikagtutsuk uyunkagtusta”, tiuwai.
EXO 33:14 Tusa tama Tuke Pujuu ayaak: “¡Wi aminak uyuntsattagme, dutikakun agkan uyumat aneakas pujusti tusan kuitamkattagme!” tiuwai.
EXO 33:15 Tusa tama Moisés ayaak: “¡Ame uyunkagtuschatnaitkumek, wetajum tusamek tukagtipa!
EXO 33:16 ¿Ame uyunkagtushtaish itusag tikich aents aidaush amina aentsjum aina nunash tuja minash dekas Apajuíyap kuitamua tusash tujamtinme? Ame uyunkagtau asamin, tikich aents aidau diismash dita nagkaesau agtatji”, tiuwai.
EXO 33:17 Tusa tutai Tuke Pujuu Moisésan ayaak: “¡Aminak kajittsa anentaimtau asan, ame segatam nunak umiktatjai, tuja aminak shiig anentsan diyagme!” tiuwai.
EXO 33:18 Tusa tama Moisés niina chichajak: “¡Untsu takumek dekas tikijuch paan wantintugkata!” tusa segauwai.
EXO 33:19 Tutai Tuke Pujuu niina ayaak: “Wi ame wajamunum nagkaemaktatjai, nuniakui ame mina pegkegmajua nunú wainkamnum tusan. Nuniakun mina daag Tuke Pujuuwa nuna ujaktatjame. Wika yana wait anentasa wakegaja, nuna wait anennaitjai.
EXO 33:20 ¡Tujash amek mina niimjuk wainkashtatme, mina waitkauk makichkish iwakuk pujumaitsui!” tiuwai.
EXO 33:21 Tusa nuigtushkam chichaak: “Nijah, minai ayaumas buchig awa juwi wajaim wajasta.
EXO 33:22 Nuniamin wi aminí ayaumsan nagkaemakun aminak buchig waanum egkeattagme. Dutikakun mina uwejui jiimin ejatkan nagkaemaktatjai.
EXO 33:23 Nunikan mina uwejun jukittajai, dutikamtai ima mina tuntupjuk wainkattame. Tujash mina niimjuk wainkashtatme”, tiuwai.
EXO 34:1 Tuke Pujuu Moisésan chichajak: “¡Jimag kaya tsupikam yaunchuk aajakua nujai betek pakama najanata! Dutikawamin nuwi chicham umiktin yama nagkamchaku agagbau ame ajiaja tsaikmayum nujai betekan ataktu agagtajai.
EXO 34:2 Tuja nuigtushkam ¡kashin kashikmasam muja Sinaínum wakatin asam umintsata! ¡Nuwi wakam dekas muja titijin mina emtijui tantata!
EXO 34:3 Untsu makichik aentskesh mujanmak amejaig wakaigka, tuja juju muja juwi wekaguk makichkish wainnakchati, nuigtush uwig aidau, baka aidau chijichin yuwak wekagush atsuti”, tiuwai.
EXO 34:4 Tusa tima Moisés jimag kayan tsupik yaunchuk aajakua nujai betek pakama najanauwai. Dutika najana kashinia duwi kashikmas Tuke Pujuu tibaun umiak nuna juki muja Sinaínum wakauwai.
EXO 34:5 Nunikmatai Tuke Pujuu yujagminum pachitkau akaikiuwai, nunik nuwi Moisésjai pujus niina daajin Tuke Pujuu tutaiya nuna ujakui.
EXO 34:6 Nunika Moisés wajamunum nagkaemak senchi jiika chichaak: “¡Witjai Apajuí TUKE PUJUU tutain, wika kakagchauch, wait anenkagtin, wamak kajechu, anenkaji múun, dekaskenum chichauwaitjai!
EXO 34:7 Mina anenkajuk yaunchuk auwa nunisag tuke atinai, nuadui aents aidau mina dakitjuinak pegkegchaun takainak, wijai shiwagmagainakuish, tsagkugkagtinaitjai. ¡Dutikayatkun dita pegkegchau takamsamujin suwimka suwakun ditá uchiji aidaunash tijaji aidaunash, ama tijaji aidaunash suwimkan suwaitjai!” tiuwai.
EXO 34:8 Tusa timatai Moisés tikishmag tsuntsuma nijayin nugka antig pujus Tuke Pujuun emematak,
EXO 34:9 aatus tiuwai: “¡Tuke Pujuuwah, dekaskenum mina anenkumek uyunkagtusta! Iik dekas antakchau ainaji, tujash tsagkugkagtujam amina aentsjum ekagtita”, tiuwai.
EXO 34:10 Tuke Pujuu Moisésan chichajak: “Juju shiig antukta. Wi yamai ashí amina aentsjum aidaujai chichaman umiktatjai, dutikakun tikich nugkanmash makichkish wainchatai aidaun kuashat iwainagtatjai. Nuna tikich aents aidau atum pujamunum pujuidaush ashí wainkagtatui.
EXO 34:11 “Wi yamai juna tajim juka imatiksagmek umiktajum. Nuniakjumin wi atumesh wainbaunum amorreo aents, cananeo aents, hitita aents, ferezeo aents, heveo aents, Jebús aents aidau batsata nunak jiija utsaakun dita nugke aina nunak atumin amastatjime.
EXO 34:12 “Tuja nunú nugkanum jegagmesh, nuwiya aents aidaujaig makichkish chichamak umikaigpajum, tsanupajag pegkegchau takatnum ajumpawainum.
EXO 34:13 Duka nunitsuk dekas ditá apajuímtaijin emematuinak patasa apetai altar aidau, tuja kayan emematin aina nunú, numin emematin aina nujai ¡ashí tsaikjum utsankatajum!”
EXO 34:14 “¡Makichkish tikichik apajuímawaigpajum, ima midauk atajum! ¡Wika Tuke Pujuu akasmauwaitjai! Mina daajuk Apajuí akasmau tutayai.
EXO 34:15 “Makichkish nuwiya aents aidaujaig dutik takasmi tusagmek chichamak umikaigpajum, wagki ditá apajuímtaiji aidaun emematuinak kuntin maamun yuwami tusa ipapainakui atumesh nunú yuwawaijum.
EXO 34:16 Tuja namputchawame atumi uchijum aidaun ditá nawanji aidaujai nuweami tusashkam tumain ainawai, dutikamak nunú nuwa aidau ditá apajuímtaijin emematuinak atumi uchijum aidaunash pegkegchaun takamtikmain ainawai.
EXO 34:17 “¡Tuja jiju ukuijajum atum ememattin dakumkagmek makichkish najanawaigpa!”
EXO 34:18 “Pag levadurajai pachimtsuk inajuamu yutai tsawan jegakuig, wi dutikatajum tibauwa duka dutiksagmeg siete tsawantai yuwatajum. Tuja mijan achiamu marzo jimaituk nagkamna, abrilan ikak amuga nunú nantutin, tsawan mamikiamua duwi atumek duka dutikattagme, wagki nunú nantutin Egipto nugkanum batsatutijum jiinjau asajum.
EXO 34:19 “Uchi aishmag iwai akiinuk ashí midau agtatui, tuja baka, uwig, cabra aina nuna uchiji aishmag yama nagkamchaku petsakbau aidaushkam midau agtatui.
EXO 34:20 Burro uchiji yama nagkamchaku petsakbau mina sujumaina nunú idaikum uwig tsakat, tuja chivo tsakatkesh sujustatjume. Tujash nunú dutika sujumain atsakuig, burro kuntuje kupigka maatajum. Tuja atumi uchijum aishmag iwai aina nunú anentag sujumainaitjum nunú idaikujum mina anentag sujustin tikich jukijum minitajum. Untsu mina anentag sujumain atsugbauk, makichkish wi pujamunmak tantainmeka.
EXO 34:21 “Atumek seis tsawantai takastajum. Untsu tsawan sieteya nuaduik ajakmamain akuish tuja ajak juumain akuish idaikujum ayamjatajum.
EXO 34:22 “Trigo ajakmamu yama nagkamchaku juuktatjum nuna jiista daaji ‘semana aidau’ tutaya duwi, tuja mijan amuebaunum ajak juuktatjum nuna daaji, ‘ajak juut’ tutaya duwishkam Apajuí emematkujum tuke jiistamtajum.
EXO 34:23 “Nuadui ashí aishmag múun aidauk makichik mijanai kampatuma imania wi pujamunum taawag mina emematjitnume. ¡Witjai Tuke Pujuu atumi Apajuígminuk!
EXO 34:24 Atumesh wainjumin tikich aents aidaunak jiija utsakun, nunú nugkanak atumin amastatjime. Nuadui makichkish nugkanak atanjamkichagtin ainawai. Nuwi agkan batsamsajum wi Tuke Pujuu Israel aents aidaun Apajuíjiyaitag nunú emematjakjum maki makichik mijantin kampatuma imania ijunjajum jiistamtinaitjume.
EXO 34:25 “Mina emematjaku kuntin maa apeamua nuna numpeg, pag levadurajai pachimja inajuamujai jukigmek itagtuawaigpa. Tuja jiista pascuatin Apajuí ememattasa kuntin maamua nuna neje ampinjamtaish kashinia duwi yuwatnuk ukukigpajum.
EXO 34:26 “¡Yujág yama nagkamchak nejeku dekas shiig pegkeg aina iman mina jegajuig itagtuatajum! ¡Tuja chivo maajum inagkugmesh dukuji muntsuji ijugbaunum egkeagmek inagkaigpajum! tawai Apajuí”, tiuwai Moisés.
EXO 34:27 Nuna tusa Tuke Pujuu Moisésan chichajak: “¡Chicham umiktin aidaun wi yamai tajam nunú agagta! Wagki jujuwai ame Israel aents aidaujai umiktina nunú”, tiuwai.
EXO 34:28 Aatus Moisés mujanum cuarenta tsawan, nuigtu cuarenta kashi yujumkan yutsuk, umutnash umutsuk Tuke Pujuujai pujusui. Nuwi pujus kaya tsupika pakama najanamunum diez chicham umiktinun agajui.
EXO 34:29 Nuna dutika muja Sinaínum pujau waketak nunú chicham umiktin agagbaun juki wakitkiuwai. Tuja Tuke Pujuujai igkunia chichasu asa niina yapinig winchamtin wajasui. Tujash nunak niig wainmamchau.
EXO 34:30 Moisés minittaman Aarón niina patayi Israel aents aidaujai diikma yapiin winchamtin wajas midaun wainkag, senchi ishamainak jegantachaju ainawai.
EXO 34:31 Nuniagtai Moisés Israel aentsu apuji aidaun untsukui ditajai chichastatus. Dutikawajam Aarón Israel aents aidaun apuji aidaujai Moisésan jegaantajui. Nunikagmatai Moisés ditajai chichasui.
EXO 34:32 Nunik chichas nagkanainaig aents aidauk ashí jegaantajui. Nunikagmatai chicham umiktin aidaun Tuke Pujuu Moisésan muja Sinaínum susamunak, imatiksag dita umikagtinun ashí ujakui.
EXO 34:33 Nuna ditajai chichas ashimak, nuadui jáanchi juki niina yapiin dukumakui.
EXO 34:34 Tuja Tuke Pujuujai chichastatus weakug nunú jáanchnak ukuak waya, chichas jiinki Tuke Pujuu aents aidau ujakta tibaun betek ujajakui.
EXO 34:35 Tuja Moisésak niina yapi winchamtinun Israel aents aidau wainainau asagmatai, jáanchi dukumak pujujakui. Untsu Tuke Pujuujai chichastatus wayakug jáanchnak juki ukujakui.
EXO 40:16 Tuke Pujuu tibaunak Moisésak ashí betek umikui.
EXO 40:17 Tuja Egipto nugkanum batsatu jiinjajua duwi nagkama mijan jimaja nunú achiamunum nantu yama nagkamchak taka makichik tsawan tsawaju ai, Apajuíjai chichatain carpan aakmak ashimkajui.
EXO 40:18 Nuna Moisés aakmakug juni nagkabauwai: Yama nagkamchakug jiju dupajam taumi najanamu aidaun batsaka umikui. Dutika nunú jijunum numi dupajam dakagbau aidaun awajug umika, nuna ichichiagtinun numi tsejeg dakagbau aidaun minanjauwai. Dutika duwi aaka bakuin ajigka umikui.
EXO 40:19 Dutika nuwi carpan aakmakui, Tuke Pujuu dutikata tibaunak imatiksag. Aatus aakmatkauwai Tuke Pujuujai chichastasa waitai pegkejam umikbau aajakua nuna.
EXO 40:20 Dutika ashimak kaya pakama najanamunum chicham umiktin aidau agagbaun juki arcanum egkeauwai. Dutika dukutai shiig pegkeg najanamujai dukuka nunú yanaki jukitnun jimag numin wegaji apusauwai.
EXO 40:21 Dutika Apajuíjai chichastasa waitai aakmakbaunum, tesaamu “shiig pegkejam” tutainum nunú arcan awayauwai. Dutika awaya jáanch wegkagman juki ejatuauwai, Tuke Pujuu dutikata tibaunak imatiksag.
EXO 40:22 Nuna umika duwi mesa najanamun juki carpa aakmakbaunum, tesaamu jáanch detuamua nuwi jegatsuk, dekatkau tesaamu pegkejam tutainum awaya untsuja nuni apusauwai.
EXO 40:23 Dutika pagkan yajuak Tuke Pujuu wainai nunú mesanum shiig pataja umikui, Tuke Pujuu dutikata tibaunak imatiksag.
EXO 40:24 Tuja nuigtushkam jii ekemaka pekatai ayatak oro najanamu candelabron juki mesa pujaun niimtikas menanmanini apusauwai.
EXO 40:25 Dutika aceite yajakbaun juki, nuwi pekai ekemag ukukiuwai, Tuke Pujuu dutikata tibaunak imatiksag.
EXO 40:26 Untsu Apajuí emematku patasa apetai altar oro najanamun juki, jáanch ejamunum ejentattak apusauwai.
EXO 40:27 Nuna dutika Tuke Pujuu tibaun umiak kugkuin incienso tutain juki nuwi patai apeauwai.
EXO 40:28 Nuna ashí dutika inagnak, nunú aakmakbauwa nuna waitijin jáanchin detua ukukiuwai.
EXO 40:29 Dutika ajuma duwi kuntin maa patasa apetai altar bronce najanamun juki, agá aaka waitijin igkuas apusauwai. Dutika Tuke Pujuu tibaun umiak kuntinun maa nuna nejen nuwi patai ashí apeauwai. Tuja ajak juukbaun Apajuín anentag suwak nunashkam dutiksag apeuwai.
EXO 40:30 Nuna dutika yumi yajaa ikigmatai palangana bronce najanamu pujaun juki Apajuíjai chichatai carpa aakmakbau aajakua nujai niniaku altar pujaunum nuna ejapeen apusauwai. Dutika nuwi yumi ikigmagtinun yajauwai.
EXO 40:31 Nuna Moisés Aarógjai tuja Aarógka uchiji aidau aatus ditá ikigmagtinun, nawe dijajagtinjin nuwiyan shikika jujaku ainawai.
EXO 40:32 Tuja nunú aaknum wayatag tuinakug nunú yumi aimkamua nuna tuké ikigmag waijaku ainawai, Tuke Pujuu tibaunak imatiksag.
EXO 40:33 Nuna ashí umika inagnak, aak carpa aakmakbau aajakua nuna agájin ashí tanishmag ashimak, jáanchi juki waitinum detua ukukiuwai.
EXO 40:34 Aak pegkejam carpa aakmakbaun yujagkim ijiuwai. Nuniamunum Tuke Pujuu imanji pegkegma nunú aakan akijuauwai.
EXO 40:35 Tuke Pujuu imanji pegkegma nunú yujagmijai betek aakan ijiau asamtai, Moisés waimainchau dekapjauwai.
EXO 40:36 Tuja nunú yujagkim aak pegkegman ijia aajakua nunú yaki takuntai, Israel aents aidauk ditá aakji aidaun tegaka jukiag shimujakui.
EXO 40:37 Untsu yujagkim yakí takunchataik, yakí takunti tusag dakak nuwig aakmag batsamajakajui.
EXO 40:38 Tuja aak pegkejam carpa aakmakbaun yujagkim tsawai tuke ijia aajakua nunú, kashishkam keejakua duka, Israel aents aidau shimamunmak nunisag au asamtai, dita nuna shiig wainajaku ainawai.
LEV 10:1 Aarógka uchiji Nadab Abiújai kugkuin incienso chimpia apetain jukiag, nuwi jii ekemakag incienson chimpiawag Tuke Pujuu dutikatajum tichamu aig, aak pegkejam Apajuíjai chichatai aakmakbaunum wayawag nuna apeawajui.
LEV 10:2 Dutikiagtai chicham umiktin agagbau Apajuínu egketunmaya jii keeka jiinak apeam mai jakajui.
LEV 10:3 Nunikagmatai Moisés Aarógkan chichajak: “Juna pachis Tuke Pujuu chichaak: “ ‘Wi pujamunum taidaunak mina pegkegmajun iwaintukagtatjai. Tuja ashí Israel aents aina nunak mina imanjun iwaintukagtatjai’ tujamayi”, tiuwai. Nuna Aarón antuk, chichatsuk wajasui.
LEV 10:4 Nuna tusa Moisés Aarógka apaji yachi Usiel aajakua nuna uchiji aidaun: Misaelan Elzafánjai untsuka chichajak: “Atumi yatsum aidau aak pegkegmanum wayawag jinawaja nunú jiikjum, ii batsatag nunú ukumtikijum imau ejeentajum ukuktajum”, tiuwai.
LEV 10:5 Tusa tima shimutuk jiiki jukiag Moisés tibaunak imatiksag dita batsatbaun ukumtikiag imau ejegan ukukiajui.
LEV 16:1 Nunik Aarógka uchiji Tuke Pujuu pujamunum waikma jakagmatai, nuna pachis Tuke Pujuu Moisésan chichajak:
LEV 16:2 “Aaknum tesaamu pegkejam tutaiya nuwi nunú tsawantai wayati tusa mamikiachbau aigkik, makichkish wayawaipa tusam amina yatsum Aarón ujakta. Wagki wika chicham umiktin agagbau arcanum egkeamu puja nuna dukutaijin pujajai, nuniau asan nuwi wi yujagminum wantintai jakai.
LEV 16:3 “Tuja Aarón nuwi wayakug apeaku tudau tsagkugnagtinun toro tsakatan juki wayati, untsu mina anentag sujamun uwig tsakat aishmagkun juki waya, nuna apeak emematjiti.
LEV 16:4 Aarón nuwi wayatatus weakug dekatkauk maíti, nunik nuadui jáanch esajam lino apagbau sacerdote nugkutain nugkug, nuigtu wegamatai lino apagbaun wegamak, akachumtain akachuma, nuigtu atsejutai lino najanamun atsejuk wayati. Jujuwai jáanch dekas etegjamu Tuke Pujuujai chichastasa wayaku iwagmamtai aidauk.
LEV 16:5 “Tuja ashí Israel aents aina nuna tudauji tsagkugnagtinun Aarón maa apeati tusa jimag chivon susagtatui. Tuja Apajuí anentag suwamua nuna makichik uwig tsakat aishmagkun Aarón maa nuna nejen ashí apeati.
LEV 16:6 Nuna dutika inagnak, nuadui Aarón niina tudauji nuigtu niina nuwe, uchiji aina nuna tudauji aidaujai tsagkugnagtinun toro tsakatan maa apeati.
LEV 16:7 Tuja nunú jimag chivon aishmagkun juki aak pegkejam aakmakbauwa nuna agaaji peeja tenteamua nuwi waya aaka waitijin jegantatak Tuke Pujuu emtin ejentati.
LEV 16:8 “Dutikamtai chivo jimaja nuwiyash tuki midaush ati tuja Azazeldaush tuki ati nuna kaya jimajan juki nujai dekaati.
LEV 16:9 Tuja nunú chivo midau atata nunak tudau tsagkugnagtinnum Aarón maa apeati.
LEV 16:10 Untsu chivo Azazeldau atata nunak mautsuk iwakun juki tudaun tsagkugtamjati tusag Apajuí emtin ejentattawai. Nuna dutika nuadui jiiki uwegshunum Azazel pujamunum awemattawai.
LEV 16:11 “Nuna Aarón niina tudauji nuigtu niina nuwe, uchiji aina nuna tudaujijai tsagkugnagtinun toro tsakatan suwenum tsupik maa apeati.
LEV 16:12 Nuna dutika Apajuíjai chichaaku waitai aak pegkejam aakmakbaunum, dekatkau wayamua nunú ‘pegkejam’ tutaya nuwi kugkuin incienso chimpia apetainum jii kaiji kuntin apetainmaya yajuaka chimpiamu eketa nuna jukiti. Dutika nuigtushkam kugkuin incienson atsaaki juki nunú aaknum tesaamu jáanch ejatuamua nunú ‘shiig pegkejam’ tutaya nuwi awayati.
LEV 16:13 Dutika wisha wainai jii kegamunum kugkuin incienson utsaati. Dutikam nunú bukuitamu arca dukutain ijiati. Nunú bukuituk ijia ejaku asamtai, wi nuwi wantintaishkam Aarógkak jakashtatui.
LEV 16:14 “Tuja nuigtushkam toro tsakata numpen ujumak juki, tsajam uwejen inua, arca dukutaiji yantamen makichkia pegashmag ukatkati, dutika tikich yantame eem awa nuna sieteya imania pegashmag ukatkati.
LEV 16:15 Nuna dutika aents aina nuna tudauji tsagkugnagtinun chivon maattawai. Dutika nuna numpen juki aak pegkejam Apajuíjai chichatainum tesaamu shiig pegkegma nuwi awayattawai. Nuwi awaya arca dukutaiji tuntupen ukatuk, nuadui eemshakam ukatkattawai, yaunchuk toro tsakata numpegai ukatkama dutiksag.
LEV 16:16 Nuna dutika Israel aents aidau pegkegchau takamsamuji aidau tsagkugnagmatai, nuadui nunú aak pegkejam Apajuíjai chichatai aakmakbau, dita katseken pegkegchau wajas awa nuna iwajattawai.
LEV 16:17 “Tuja tudau tsagkugnagtinnum takak, aak pegkegma nuwi Aarón waya pujau eke jiintsaigkik, makichik aentskesh aak pegkegma nuwi jegantag pujusainmegka. Nuna dutika Aarón niinu, niina nuwenu, niina uchiji aidaunu, nuigtu ashí Israel aents aina nunú pegkegchau takasbauji aidau tsagkugnagtinun ashí umika,
LEV 16:18 jiinki Apajuí emematku patasa apetai najanamu altar puja nuna iwajatatus wetatui. Nunik toro tsakata numpen chivo numpejai ujumak juki incienso patai apetaiya nuna tsakaji ipak usumat wagaku aina nuna ukatkattawai.
LEV 16:19 Tuja altar puja nuna niina tsajam uwejen numpan inua sieteya imania ukatkati. Aatus Israel aents aidau pegkegchau takasbaujin altar pegkegchau wajas awa nuna iwajattawai.
LEV 16:20 “Dutika aak pegkejam Apajuíjai chichataiya nuna, altar puja nujai Aarón ashí iwajug, nuadui chivo iwaku ukukbau utitajum tima itawagmatai jukittawai.
LEV 16:21 Dutika nuna kuntinu buuken achika pujus, Israel aents aidau pegkegchau takasbaujin tuja Apajuí antugtsuk intimjukbau aidaun aatus ashí etsegtumagtatui. Dutika ashí pegkegchau aina nunak chivo buuken utuatkattawai, dutikamtai makichik aents nuna juki uwegshunum ejegan atia akupkati.
LEV 16:22 Dutikam nunú chivo uwejush aents atsamunum megkagak, ashí ditá pegkegchauji aidaunak yajuak ajapattawai.
LEV 16:23 “Nuna dutika nunú aak pegkejam aakmakbaunum Aarón waya jáanch lino apagbau nugkuagbaujin awimak ukuktatui. Wagki nunú jáanchik nuwi tuke ukutai asamtai.
LEV 16:24 Dutika nuwig yuminum nijamag sacerdote nugkutai jáanch shiig iwajamun nugkuja, nuna agájin jiinki niina tudauji tsagkugnagtinnum, tuja Israel aents aidau tudauji tsagkugnagtinjai kuntinun maa nuna nejen ashí apeak emematjittawai. Nuna dutikamtai ditá tudaujig tsagkugnagtatui.
LEV 16:25 Tudaun tsagkugtugti tusa kuntin maa apeamua nuna wiyajinak altarnum patai apeati.
LEV 16:26 “Aents chivon juki, uwegshunum akupkatatus weuwa duka aakmaja batsatbaunmak eke tatsuk, jáanchjin dijag niishkam, mai, nuadui wayati.
LEV 16:27 “Tuja tudau tsagkugtugti tusa toro tsakat chivojai maa apeaku nuna numpe juki, aak pegkegma nuwi awayamua nunak, duwape, neje beseku aina nujai ijumag juki aents batsatbaun ukumtiki apeatnume.
LEV 16:28 Aents nuna apeatta duka jáanchjin dijag niishkam mai, nuadui aents batsatbaunum wayati.
LEV 16:29 “Tuja jujuwai dekas atum chicham umiktin tuke atina nunú. Nantu sieteya nunú taka, tsawan diez tsawagtata nuadui, atumek ijagmajum yujumak yutsuk pujustajum, nuniakjum takatjumesh takatsuk ashí idaisatajum. Atum nuniagmin aents tikich nugkanmaya aidau atumjai pujuidauk ditashkam dutiksag umiktinme.
LEV 16:30 Nunú tsawantai sacerdote wi pujamunum taa, atum pegkegchau takamsamunum tsagkugnagtinun segattatui, nuadui tsagkugnagjum agkan juwaktatjume.
LEV 16:31 Juju chicham umiktina juka tuke asatnai, nuniau asamtai, nunú tsawanta nuaduik atumek ayamkujum ijagmajum yujumak yutsuk pujuttagme.
LEV 16:32 “Tuja atumi apa sumo sacerdoteya nujai yapajinatnunak wi etegkattajai. Tuja atumi tudaujum tsagkugnagtinnumash wajina dutikattawa nunashkam betekmas umikti tusan, wi niinak inajai. Tuja nii sacerdote nugkutaiji jáanch puju lino apagbaun nugkugtatui.
LEV 16:33 Nuna nugkuja aak pegkegmanum waya, tikich tesaamu shiig pegkegma nuna iwajug pegkeg awajsattawai. Dutikak altarnashkam iwajug pegkeg awajsattawai. Sacerdote dutikatta nunú dita pegkegchau takamsamujinak, tuja ashí Israel aents aidau pegkegchau takamsamujinashkam tsagkugnajagtatui.
LEV 16:34 Pegkegchau takasbaunum tsagkugnagtag tuinakug, juju chicham umiktina juna umiak maki makichik mijanai makichkia dutikatnume”, tiuwai. Aatus Apajuí Moisésan tibaunak imatiksag Aarón umikui.
LEV 19:1 Tuke Pujuu Moisésan chichajak:
LEV 19:2 “Israel aents aidau juju ujakta: “¡Wika Tuke Pujuu atumi Apajuígminuk pegkegmaitjai, nuadui atumshakam pegkejam atajum!
LEV 19:3 “Maki makichik ditá apajin, dukujijai eme anentus diitnume. “Nuigtushkam tsawan ayamtain wi etegkauwaitag nunú eme anentsajum diitajum. ¡Witjai Tuke Pujuu Apajuí atum emematin ainajum nunú!
LEV 19:4 “Dakumka najanamu aina duka emematigpa, tuja nuigtush atum apajuímatnuk jiju ukuija dakumkagmek najanawaigpa. ¡Witjai Tuke Pujuu Apajuí atum emematin ainajum nunú!
LEV 19:5 “Agkan pegkeg pujustasajum kuntin maa Apajuí anentag suwajum duka tuke dutiktajum, nunú dutikakjumek Tuke Pujuun shiig awagmamain dutikatajum.
LEV 19:6 “Nunú kuntin maamua duka nunú tsawantaik yuwatajum, tuja kashinia duwishkam yumainaitjume, untsu tsawan kampatuma duwi yumain ampinjatta duka apeatajum.
LEV 19:7 Nunú kuntinu neje ampinjaun kampatum tsawan tsawaju ai yuwauk tsumain diyam atatui, nuadui nunú aentsnak Apajuí idaisattawai.
LEV 19:8 Nuna yuwauk suwimkan ijutmamjattawai, tuja nuigtushkam ashí Israel aents aina nuwiya jiiki yaja ajapeam atatui, Tuke Pujuu tibaun intimjuki umikchau asamtai.
LEV 19:9 “Ajak juut tsawan jegamtai juwakjumesh ashí juukaigpajum, tuja ampinjau aina dukesh waketjukmek juukaigpa.
LEV 19:10 “Uva juukbaunmaya ampinjauk waketjuki egakmek juukaipa, nuigtush kakekaukesh yajuakaipa; duka idaisata ujudauch aidau tikich nugkanmaya aidaujai yuwatnume. ¡Witjai Tuke Pujuu, atumi Apajuígminuk!”
LEV 19:11 “Kasamkaigpajum. “Waitjuawaigpajum, atumek pempeentunikjumesh tsanunijaigpajum.
LEV 19:12 “Umikchatnaitkum mina daag pachisa tsanumjaipa, duka amina Apajuígmin daaji dushikiakum tame. ¡Witjai Tuke Pujuunuk!”
LEV 19:13 “Tikichish wainka takamtikakum waitkasaipa, niinu aina duka kasagkaipa. Nii takasbaujinia akiktina duka kashin akiktagme tusa emetjuamek waitkasaipa.
LEV 19:14 “Aents empeku dushikiakum pegkegchau chichagkaipa. Aents wainmachuk makichkish tsanujaipa. ¡Witjai Tuke Pujuunuk!”
LEV 19:15 “Utugchat epegkeakjumesh tsanumtsuk shiig epegkeatajum. Ujudauch akuish, wiakuch akuish, takamsamuji diigsajum suwimkak betek susatajum.
LEV 19:16 “Wainkam amejai ijutkau batsata nuwi chicham tsuwapa wekayipa. Tikich aentsush maatnume tusamek tsanumjuja sujukaipa. ¡Witjai Tuke Pujuunuk!”
LEV 19:17 “Initak kajegkagtinuk aipa. Dekas ame chichagkatag takumek igkuam chichagkata. Nunú dutikachkumek, ameshkam pegkegchaun takasua iman wajastatme.
LEV 19:18 “Amina pegkegchau awajtamainakuish, dutiksamkek iikaipa, tuja amina aentsjum aina dusha kajejin aipa. Duka nunitsuk amek anenmamsam tikichish aneeta. ¡Witjai Tuke Pujuunuk!”
LEV 19:19 “Chicham umiktinun wi tajim nunú ewaetsuk betek umiktajum. Atumi tagkujum aidauk tikich kuntin aidaujaig entsamtikaigpa. Ajagmin ajakmakmesh tikich ajakjai pachimjamek ajakmawaigpa. Tuja nuigtushkam jáanch pachimja najanamuk nugkujaigpa.
LEV 19:20 “Nuwa wainka inaku waitkatai makichik aentsjai aishinatatus pujaun, tikich aents nuna dekayatak nujai tsanijinuk, aents nuwatkatjai tiuwa nuna akiktatui, nii akikmak sumak niinu ema agkanmitkachu ataishkam. Tujash tikima mautnak maachagtatui ayatak suwimkan mai susagtatui. Wagki nunú nuwak eke sumaka agkanmitkachbau asamtai.
LEV 19:21 Aents tsanijinauwa nunú nii pegkegchau takasbaunum tsagkugnagtinjin Tuke Pujuun suwakug makichik uwig tsakatan juki aak pegkejam Apajuíjai chichatai aakmakbauwa nuna waitijin ejentati.
LEV 19:22 Nuna sacerdote maa apeak aents pegkegchau takasa nunú tsagkujata tusa mina segattatui. Nunú dutikamua duwi niina pegkegchaujig tsagkujam atatui.
LEV 19:23 “Tuja wi nugka anagkuawaitjim nuwi jegajum, yujág ajakmattajum nuna neje aidauk yutsuk kampatum mijan idaisatajum.
LEV 19:24 Tuja mijan ipak usumta duwi yujág nejektata duka midau atatui, nuadui shiig aneasa jiistamkujum nunú yujág aidau mina sujustatjume.
LEV 19:25 Untsu mijan cincotin nejektata duwi nagkamajum atum yuwattajume. Nunú betek umiagmin aan kuashat yujág nejektatui. ¡Witjai Tuke Pujuu, atumi Apajuígminuk!”
LEV 19:26 “Kuntin numpennukek makichkish yuwawaigpajum. Anentaimsa dekamjai tinu aina nuninuk makichkish takasaigpajum, tuja tunchi takatai aina dukesh takasaigpa.
LEV 19:27 “Aents jakamtai atumi intashim wainka tsupi yujaigpajum, tuja susugmi titijigkesh tsupikaigpa. Nuigtushkam atumi iyashinig tsupimá yujaigpajum, tuja atumi iyashinig makichkish dakumkaigpajum. ¡Witjai Tuke Pujuunuk!”
LEV 19:29 “Atumi nawanjum aina duka akika wainka takatai ati tusa inakjumek waitkasaigpajum. Dita pegkegchau takainamua nunú yujakmatai, atumi nugke shiig pegkegchau wajasai.
LEV 19:30 “Tsawan ayamtai atinun wi etegkauwaitag nunú ajaantusjum diistajum. Nuigtushkam mina pujutaig pegkejam aakmakmauwa dushakam ajaantusjum diistajum. ¡Witjai Tuke Pujuunuk!”
LEV 19:31 “Tunchinmak makichkish inamajaigpajum. Tuja anentaimsa dekamji tinu aina dushakam makichkish yujagsaigpajum. Nunin yujagkujum pegkegchau wajasaijum. ¡Witjai Tuke Pujuu atumi Apajuígminuk!”
LEV 19:32 “Aents múun aina duka ajantusjum diistajum. Duka dutikatajum mina umigtau asajum. ¡Witjai Tuke Pujuu atumi Apajuígminuk!”
LEV 19:33 “Aents tikich nugkanmaya atumjai pujau, wainka inaku waitkasaigpajum.
LEV 19:34 Duka dutiktsuk atum wegantu kuitamainaitjum dutiksagmek kuitamkujum, atumek anenmamsajum aneetajum. Atumshakam tikich nugkanmaya ainayatkujum, Egipto nugkanum batsamajaku ainagme. ¡Witjai Tuke Pujuu atumi Apajuígminuk!”
LEV 19:35 “Dekapataiyai dekapakjumesh tsanumtsuk shiig dekapatajum, nuigtu kijin dekapataiyai dekapakjumesh, tuja yumi wegantu dekapakjumshakam kasamtsuk shiig betek dekapatajum.
LEV 19:36 Betek ewaetsuk dekapatai balanza aina nunú, tuja kijin dekapataish, metro esajam dekapataishkam, ashí ajutjamtinme. ¡Witjai Tuke Pujuu, atumi Apajuíjum, Egipto batsatutigmin jiijuitjim nunú!
LEV 19:37 Juju chicham umiktin aidaun wi tajim duka imatiksagmek umiktajum. ¡Witjai Tuke Pujuunuk!”
LEV 23:1 Tuke Pujuu Moisésan chichajak:
LEV 23:2 “Juju Israel aents aidau ujakta: Tsawan Apajuínu atin etegjamua duka ‘Apajuí emematku ijuntai’ tutai atatui. Duka juju ainawai:
LEV 23:3 “Atumek seis tsawantai takastatjume. Untsu tsawan sieteya nuaduik makichkish takaschattagme. Nunú tsawanta duka ayatak ijunja ayamku Apajuí ememattai atinai. Duka atum tuwi pujuttagme nuniakjumesh nunú tsawanta duik Tuke Pujuu emematkujum tuke ayamtinaitjume.
LEV 23:4 “Nunú tsawan etegjamu aina duwi atumek Tuke Pujuu emematkujum tuke ijuntinaitjume:
LEV 23:5 “Mijan nagkamnamu yama nagkamchak nantu takatta duwi tsawan catorcetin agkuantai ijunjajum, nunú tsawantak atum jiinja agkanmagamu Pascua tutaya duwi shiig aneasa jiistamkujum Tuke Pujuu ememattajum.
LEV 23:6 “Tuja nunú nantutinig tsawan quincetin pag levadurajai pachimtsuk inajuamu tutai asamtai, Tuke Pujuu emematkujum ijunjajum jiistamatajum. Tuja siete tsawantai pag levadurajai pachimtsuk inajuamu yuwattagme.
LEV 23:7 Jiista nagkamnamu yama nagkamchak tsawagtata nuaduik takatak takatsuk ayatak ijunjajum Tuke Pujuu ememattajum.
LEV 23:8 Tuja siete tsawantai Apajuí anentag suwamua nunú apeattagme. Tuja tsawan sieteya nuaduik atumi takatjig makichkish takasaigpajum, ayatak ijunjajum Tuke Pujuu ememattajum.”
LEV 23:9 Tuke Pujuu Moisésan chichajak:
LEV 23:10 “Juju Israel aents aidau ujakta: Wi atumin nugká amastatjim nuwi jegajum trigo ajaktatjum nuwiya yama nagkamchaku juuktatjum nunú jigka jukijum sacerdote ejetuatajum.
LEV 23:11 Nuna sacerdote juki tsawan ayamtain nagkaiki tsawaitta nuadui Tuke Pujuun segaak iwaintuktatui nii atumi takatjumin shiig anenjamsati tusa.
LEV 23:12 Nunú tsawantinig uwig tsakat aishmag pegkeg makichik mijan ajamun sacerdote juki, Apajuín anentag suwak maa nuna nejen ashí apeattawai.
LEV 23:13 Tuja nuigtushkam nunú tsawantaik Apajuí anentag suwaku apeatin kugkuin pegkeg ipak usumat nuigtu jimaituk kilo dekapamu harina aceitejai pachimja nanegbau itaattagme. Nuigtushkam ayatak ukagtina nunú vino makichik litro itaattagme.
LEV 23:14 Atumek Apajuínua nunú eke anentag sutsukek, pag, trigo duwikbau, tuja samek juukbauk aidaukesh yuwashtatjume. Jujuwai atum tuwi pujuttagme, nuniakjumesh chicham tuke umiktina duka. Junak uchi akiinak wedaushkam tuke dutiktin ainawai.
LEV 23:15 “Tsawan ayamtai kintamag tsawagtata duwi atum mina anentag sujakjum trigo tsupija jigkamu itagtuatajum, nunú tsawantin nagkama dekapajum siete semana ejetatjume.
LEV 23:16 Duka tsawan ayamtai tsawagmatai, kashinia duwi nagkama dekapajum tsawan cincuenta jegak, ayamtai tsawan tsawagtata duwi trigo yamá nagkamchaku juukbau anentag sujustatjume.
LEV 23:17 Nunú Apajuí anentag suwamua duka atumi jenia yama nagkamchaku trigo juuka dekegbau harina shiig pegkeg levadurajai pachimja jimag pag maki makichik ipak usumat kilo ajamu aidau inajuamu itattajume.
LEV 23:18 Tuja nuigtushkam ashí aents aidautijum ijunjajum siete uwig tsakat aishmag makichik mijanji ajamu pegkeg aidau, nuigtu makichik toro tsakat, jimag chivo, nuigtu trigo, cebada, vino, aatsa jukijum sacerdote susatajum. Dutikam mina emematjak nuna ashí apeati, nuna kugkunti mina shiig awajtau asamtai.
LEV 23:19 Tuja nuigtushkam atumi tudaujum tsagkugnagtinnum makichik chivo sujustatjume. Tuja agkan pegkeg pujutan sujusti tujutkugmek, jimag uwig tsakat aishmag makichik mijanji ajamu sujustatjume.
LEV 23:20 Nunú atum anentag mina sujamun, pagkan jimag uwig aishmag tsakat aidaujai, sacerdote juki mina itagtuattawai. Nuna sacerdote juki mina eme anenjus segatak iwaintugkattawai. Dutika nunak dita yuwawagtatui.
LEV 23:21 “Nunú tsawanta nuaduik atumi takatjumek makichkish takasaigpajum, ayatak ijunjajum Apajuí ememattajum. Jujuwai atum tuwi pujuttagme nuniakjumesh tuke umiktina nunú. Junak uchi akiinak wedaushkam tuke dutiktin ainawai.
LEV 23:22 “Ajak ajakmamu juut tsawan jegamtai, juwakjumesh ashí jukaigpajum, tuja ampinjau aina dukesh waketjukmek jukaigpa. Duka idaisatajum ujudauch aidau aents tikich nugkanmaya aidaujai yuwatnume. ¡Witjai Tuke Pujuu atumi Apajuígminuk!”
LEV 23:23 Tuke Pujuu Moisésan chichajak:
LEV 23:24 “Juju Israel aents aidau ujakta: Nantu sieteya nunú taka tsawan makichik tsawaitta nunú ayamtai tsawan asamtai, takatjumek takatsuk ijunjajum jiistamkujum Tuke Pujuu ememattajum. Nuniakjum Tuke Pujuu yaimpamua nunú anentaimtusjum uwija kachuji umpuagtajum.
LEV 23:25 Tuja nunú tsawantai Apajuí eme anentsa anentag suwamua nunú apeattagme. Nunú tsawantinig makichik takatjumkesh takaschattagme”, tita tiuwai.
LEV 23:26 Tuke Pujuu Moisésan chichajak:
LEV 23:27 “Nantu sieteya duwi tsawan diez tsawaitta nunú atatui tsagkugnatai tsawan. Nunú tsawantin ijagmajum yujumak yutsuk pujusjum, Tuke Pujuu emematkujum kuntin maa apeatajum.
LEV 23:28 Nunú tsawantinig makichkish takatjumek takaschattagme, wagki duka tsagkugnatai tsawan asamtai, Tuke Pujuu Apajuí atumi pegkegchaujin tsagkugtamjagtatui.
LEV 23:29 Untsu nunú tsawantin makichik aentskesh ijagmatsuk yujumka yuwaunak, Israel aents aina nuna ukumtikiag yaja jiiki ajapeam atatui.
LEV 23:30 Tuja nunú tsawantai aents takatjin takaushkam dushakam dutiksaik jiiki ajapeam atatui.
LEV 23:31 “Nunú tsawantinig makichik takatkesh takasaigpajum. Jujuwai atum tuwi pujuttagme nuniakjumesh tuke umiktina nunú. Junak uchi akiinak wedaushkam tuke dutiktin ainawai.
LEV 23:32 Nunú tsawantin atum ayamkujum ijagma yujumak yutsuk pujustatjume. Duka nantu sieteya duwi tsawan nuevetin aagkú nagkamna tsawag kashinia duwi agkuantai nagkantatui.”
LEV 23:33 Tuke Pujuu Moisésan chichajak:
LEV 23:34 “Israel aents aidau juju ujakta: Yaunchuk numi kanawe aakmajag batsamsaju aina nunú anentaimtusjum, numi kanawe aakmagjum juju nantu sieteya duwi tsawan quincetin nagkamajum ijunjajum, siete tsawantai Tuke Pujuu eme anentsa ememattajum.
LEV 23:35 Jiista nagkamnamu yama nagkamchak tsawan tsawagtata nuaduik makichik takatkesh takaschattagme.
LEV 23:36 Untsu siete tsawantai Tuke Pujuu eme anentsajum nii anentag suwamu apeattagme. Tuja tsawan ochotin ayatak ayamku ijunjajum Apajuí anentag suwamu nii emematkujum apeatajum. Nunú tsawanta duka Apajuí tsawanji asamtai, makichik takatkesh takasaigpajum.”
LEV 23:37 “Juju tsawan aina nunuwai Apajuí emematku ijuntai atina duka. Nuadui nunú tsawan aina duka pegkejam takat takashtai, ayatak ijunja Tuke Pujuu ememattai awajsatnaitjume. Tuja nunú tsawan aina duwi atum Apajuí anentag suwamu aidau apeamu, kuntin maa nuna neje ashí apeamu, trigo cebadajai juukbau anentag suwamu, pegkeg agkan pujutan sujusti tusa kuntin maa apeamu, vino anentag suwamu aina nunú maki makichik waji tsawantin dutikati tibauwaita duka betek dutikattagme.
LEV 23:38 Nuigtushkam tsawan ayamtain ijunja mina emematjajum duka betek dutikayatkujum, juju tsawan aina juwishkam emematjittagme. Atum mina anentag sujustatjum nunú, nuigtu midau atin anagtuawaitjum nujai sujakjum emematjittagme.
LEV 23:39 Ajak juuka ashí ashimkajum nantu sieteya duwi tsawan quincetin Tuke Pujuu emematkujum ijunjatajum. Atumek jiista nagkamnamu tsawan tsawaitta duwi ayamjattagme. Tuja tsawan ochotinchakam nunisjumek ayamjattagme.
LEV 23:40 Jiista nagkamnamu tsawan tsawaitta duwi yujág pegkeg aidau juukjum, palmera duke aidau, tuja tikich numi kuashat dukentin aidau, álamo namaka uwet ayá nuna dukee aidau tsupija aakmaktasajum yanaki juki shimittagme. Nunú dutikajum siete tsawantai Tuke Pujuu, atumi Apajuígmi emtin shiig aneetnaitjume.
LEV 23:41 Duka maki makichik mijantin nantu sieteya duwi siete tsawantai Tuke Pujuu eme anentsa emematkujum ijunjattajume. Junak uchi akiinak wedaushkam tuke dutiktin ainawai.
LEV 23:42 Nunú siete tsawan aina duwi ashí atum Israel aents wegantunum akiidau aidautigmek, numi kanawe tsupija aakmakbaunum pujustatjume.
LEV 23:43 Juka atum Egipto nugkanum waitkam batsatutigmin wi jiija ai, numi kanawe dukentin tsupigjum aakmaja batsamsauwaitjum nuna atakea duwi atum wegantu aidau dekawagtin aina nunuwai. ¡Witjai Tuke Puju atum Apajuí emematin ainajum nunú!” tiuwai.
LEV 23:44 Juna aatus Moisés Tuke Pujuu emematku ijuntai tsawan etegjamun pachis Israel aents aidaun ujakui.
NUM 6:22 Tuke Pujuu Moisésan chichajak:
NUM 6:23 “Aarón niina uchiji aidaujai Israel aents aidaun pegkegnum yumigkiakug aatus titinme:
NUM 6:24 “ ‘¡Atum aidautigminak Tuke Pujuu pegkegnum yumigtamsatnume, dutijamak nigki kuitamjamkatnume;
NUM 6:25 Tuke Pujuu atumnak shiig anenjamas kuitamjamkatnume;
NUM 6:26 Tuke Pujuu atumin anempau asa, shiig agkan pujustinme tusa kuitamjamkatin ati!’
NUM 6:27 “Juna aatus sacerdote aidau mina daajun adayas Israel aents aidaun tiagtatui. Nuadui wi ditanak pegkegnum yumigsagtatjai”, tiuwai.
NUM 9:15 Chicham umiktin egkemsatnun aak pegkegman carpan aakmak ashimkaju ai, nunú tsawantaik aakan yujagkim ijiauwai. Nunik au agkuantai nagkamas jii keegama imanik aak pegkegmanum keeka au tsawak megkagajakui.
NUM 9:16 Duka tuké nuníjakui: Tsawaig aaknak yujagkim ijia aajakui, untsu kashi jiijai betek keeka aajakui.
NUM 9:17 Yujagkim nunú aakan ijia aajakua nunú yaki takuntai, Israel aents aidauk yajumakag shimujaku ainawai. Untsu yujagkim wegau tuwi jasa asattawa, nunitaik ditashkam nuwi aakmag batsamajaku ainawai.
NUM 9:18 Israel aents aidauk Tuke Pujuu yujagmin emtikak ematai, nuna diisag shimujaku ainawai. Tuja yujagkim wegau jasa ataik, nuwi aakmag batsamajaku ainawai. Aak pegkejam carpa aakmakbaun yujagkim ijia au takuni wechataik dita batsatbaunmag batsamajakajui.
NUM 9:19 Tuja yujagkim aak pegkejam aakmakbaun ijia kuashat tsawan ataik, Tuke Pujuu wetá tachamu asag, nuwi aakmajag batsamajaku ainawai.
NUM 9:20 Tuja yujagkim ujumak tsawan ataishkam, nuwig dita batsatbaunmak batsamajakajui. Tuke Pujuu wetajum tama shimujakajui, tuja juwaktajum tutaik nuwi juwakag batsamajakajui.
NUM 9:21 Untsu yujagkim nii nuniktatkug takuni wetsuk, nuwig jasa makichik kashi aajakui. Nunik au tsawak kashikmas takuni wetai shimujakajui. Tuja kashikesh, nuniachkush tsawaigkish yujagkim takuni wetaik, ditashkam shimujakajui.
NUM 9:22 Aak pegkejam aakmakbaun yujagkim jimag tsawan, nuniachkush makichik nantu, atsa makichik mijankesh ataik, shimutsuk nuwig aakmajag batsamajaku ainawai. Untsu yujagkim takuni eemak wetai nuadui shimujakajui.
NUM 9:23 Tuke Pujuu wetajum tama shimujakajui, untsu juwaktajum tutaik nuwi aakmag batsamajaku ainawai. Nunak Tuke Pujuu Moisésan akateak nunú umiktajum tibaun umiinak nuníjaku ainawai.
NUM 10:11 Israel aents aidauk Egipto nugkanum inaku waitkatai batsatun Apajuí jiijua duwi nagkama jimag mijana nuna achikag, nantu jimaja nunú takau ai, tsawan veintetin aak pegkejam carpa aakmakbau aajakua nuna yujagkim ijia au yaki takuniuwai.
NUM 10:12 Nunikmatai Israel aents aidau muja Sinaínum batsatu jiinag shiyakajui. Nunik shimui shimuinakua Parán nugkanum yujagkim jasa asamtai nuwi batsamsajui.
NUM 10:33 Aatus muja Sinaínmaya juwakiag kampatum tsawan jegawajui. Nunik shimak chicham umiktin agagbau egketun arcan Leví wegantu aidau yanaki jukiag eemak wedau, tuwig yujagkim jasa asat, nuwi ayamsagtin asag.
NUM 10:34 Kashikmas nantajag eke uminainaig yujagmik takuni dita shiyaktinnum wajantun wegau.
NUM 10:35 Tuja chicham umiktin agagbau egketun yanaki juwagtai Moisés chichaak: “¡Tuke Pujuuwah, pai nantakta! ¡Nunikam amina shiwaajum aidau dapampaakam utsagta! ¡Dutikawamin nuna diisag amina kajegtamin aina duka ishamjamkag pisagtinme!” tau.
NUM 10:36 Untsu nunú chicham umiktin agagbau egkeamun yanaki juki wedau apujiagtai Moisés chichaak: “¡Tuke Pujuuwah, amina aentsjum Israel aents shiig kuashat aina nunú ame taam kuitamkata!” tau.
NUM 11:1 Makichik tsawantai Israel aents aidau senchi waituinak, Tuke Pujuun pegkegchaun chichajuidau. Nuna Tuke Pujuu antuk senchi kajeka ditan ijinatatus jii kegaun dita batsatbaun tentea ajunjauwai.
NUM 11:2 Dutikam nuna ishamainak Moisés ayamjutpakti tusag untsuidau. Imatiagtai Moisés ditá pachis Tuke Pujuun segauwai. Dutikam jii kegau kajinkauwai.
NUM 11:3 Nuadui nunú nugka daajig Taberá adaikamu aajakui, wagki nunú nugkanum Tuke Pujuu ditá ijinatatus jii kegaun ajunjau asamtai.
NUM 11:4 Tuja Israel aents aidaujai tikich aents aidau pachiinak yujaidauk ayatak yutanak anentaimtujaku ainawai. Nuniagtai Israel aents aidaushkam ditajai betek buu buuttajai pegkegchaun chichainak: “¡Yaki nejenash ii yuwatnunash amastí!
NUM 11:5 ¡Egipto batsamsaik namak akikchau yuyag nunú anentaimtaji! Nuigtushkam pepino aidau, melón aidau, puerro aidau, cebolla aidau, ajo aidau yuu ayaji.
NUM 11:6 Tujash yamaik juwig nujantai jinaji, tikich yutaigkesh atsawai ¡ima maná yusaik yujaji!” wajaidau.
NUM 11:7 Nunú manák culantron jigkayijai betekmamtin aajakui, untsu niimeg culantro puwaji pauja numamtin aajakui.
NUM 11:8 Maná kugkuntig harina aceitejai pachimja torta najanamun kugkuntijai betek aajakui. Nuna Israel aents aidau agá jiinag juukag dekegkag pagjai betekmamtinun inajujaku ainawai.
NUM 11:9 Tuja duka dita aakmaja batsatbaunum kashi yumi sajatbaunum kakegajakui.
NUM 11:10 Israel aents aidau maki makichik uchiji aidaujai ditá jeen waitinum batsamas buutuidaun Moisés antukui. Nuniagtai Tuke Pujuu senchi kajekui. Tuja Moiséschakam chicham patatbau asa, ditá apuji atanak dakitjauwai.
NUM 11:11 Nunik Tuke Pujuun chichajak: “¿Wisha itugkamu asamea wi amina inakmetag nunin aish, imatikamesh waitkajame? ¿Wagka juju aents aidaush minai sujuamesh ame yajuaka emata tusamesh waitkajame?
NUM 11:12 Uchi piipich muntsuaku minaaki jutayama numamtuk jukim, dita apachji aajaku aina nunú nugka anagkuawaitam nuwi ame ejegata tujutminum tusanuk wika ditá apajigkesh, tuja ditá dukujigkesh atsujai.
NUM 11:13 ¿Wisha tuwiyanak neje jukinush juju aents aidau yuwawagtinnash susagtaja? Mina tajutuawag buu buuttajai chichagtuinak: ‘Neje ii yuwatin sukagtusta’, tujutuinawai.
NUM 11:14 “Tuja wika mina senchigjaigkik juju aents aina nuna yajuaknuk wemaitsujai, wagki juka takatak shiig múuntai.
NUM 11:15 Tuja jutika waitkaju pujutnaitkumek, waitu pujuti tujuttsuk dekaskenum minash wait anenjakmek mina pujutjuk jujutkita. Dutijuawamin waitu pujumainaitag nuna dekas ayamsatjai”, tiuwai.
NUM 11:16 Tusa tutai Tuke Pujuu niina ayaak: “Israel aentsu apuji múun aidau ame wainbau chichame antugtai aidau setenta aents yajuakam aak Apajuíjai chichatai carpa aakmakbauwa nuwi ikaunmam dakagsata.
NUM 11:17 Nuwi wi taan amejai chichastajai, nuniakun mina Wakanig aminí awa nuna Israel aents aidaun apuji aidaunash susatjai, dutikam dita aents aidau kuitabaunum yaimpaktinme. Nuadui amekek waittsashtatme.
NUM 11:18 Tuja aents aidau ujakta kashin nejen yuwawagtatui, nuniktin asag yamai ditá pegkegchaujin iwagmamkatnume. Dita buu buuttajai chichainak: ¡Nejesh akuig yumainaitji! ¡Egipto nugkanum ima shiig pujuyaji! wajainawai. “Imatuidau asagmatai, nejen yuwatnume tusan kashin susagtatjai.
NUM 11:19 Wika ditanak makichik tsawantai, jimag tsawantai, cinco tsawantai, diez tsawantai, nuniachkush veinte tsawantai yumainnakek susashtatjai.
NUM 11:20 Ditak makichik nantu nejenak yuu batsamiagtatui, imatika yuu batsatu asag yawetug tsumiagtatui, wagki wi kuitamsam yujayatak dakitjujag mina emtijui buu buuttajai chichainak: ‘Egipto nugkanum batsatuti jiinjauwaitag duwi nagkamsa yaunchuk Egipto batsamsa waitin aayag nuni senchi waitiaji’ wajaidau asagmatai”, tiuwai.
NUM 11:21 Tusa tutai Moisés Apajuín ayaak: “Aents múun maanimain aidau wijai yuja duka seicientos mil ainawai. Imania dusha ¿Amesh itugkamea makichik nantuish nejesh ayujush pujuttame?
NUM 11:22 ¿Tuwi ayawa uwig aidaush, baka aidaush, nunú maa aents aidau ashí ayugmainush? Nayantsanmaya namak aidau ashí yajuaka suwakuish makichkish ejemaitsu imanush”, tiuwai.
NUM 11:23 Tutai Tuke Pujuu ayaak: “¿Amek mina senchijuk piipichik diyam? ¡Tuja wi taja dusha uminkatpash, atsa uminkashtimpash duka yamai wainkattame!” tiuwai.
NUM 11:24 Tusa timatai Moisés agá jiinki, Tuke Pujuu tibaun imatiksag aents aidaun ujakui. Dutika nuadui Israel aentsu apuji múun aidaun setenta, aak pegkejam aakmakbaun tentea ijumjauwai.
NUM 11:25 Dutika ijumjamtai Tuke Pujuu yujagminum pachitkau akaiki Moisésjai chichasui. Nunik duwi Wakani Pegkeji Moisésai aun ujumak juki, setenta aents Israel aentsu apuji múun aidaun tinamkauwai. Dutikam Apajuí Wakani ditai pujugsam profetajai betek chichatan nagkamawajui. Tujash duka makichkia nunik nagkaemakiuwai ataktuk nunikchauwai.
NUM 11:26 Setenta aentsun Moisés etegkauwa nuwiya jimag Eldad daagtin Medad daagtinjai, ditak aak pegkegmanmak wetsuk, dita batsatbaunum juwakajui. Nuwi batsatunak Apajuí Wakani egkemtujam ditashkam profeta chichamaina betek chichainau.
NUM 11:27 Nunik chichagtai makichik uchi tupikaki, Moisésan ujaktatus weuwai. Nunik ujaak: “Eldad Medadjai dita batsatbaunmak pujusag profetajai betek chichagmae”, tau.
NUM 11:28 Tusa tutai Nun aajakua nuna uchiji Josué datsauch asag Moisésan yaijakua nunú chichaak: “¡Mina apujuh Moisésah, chichakainmegka tusam tita!” tiuwai.
NUM 11:29 Tusa tama Moisés ayaak: “¡Minak akasmatjukaipa! Dekas itugkag ashí aents aina nuna Apajuí niina Wakanin susa, dutikawajam ashí profeta aanum tajai”, tiuwai.
NUM 11:30 Nuna tusa Moisés Israel aentsu apuji múun aidaujai waketug ditá batsamtaijin shiyakajui.
NUM 11:31 Nayantsanmayan Tuke Pujuu dasen dasenmikakui, dutikam nunú dase codornisan shiig kuashat ikaunmakui. Nunú dita aakmaja batsatbaunum tentea nuna yantamen nagkamas kakegak makichik tsawantai jegamainnum nagkankauwai. Imaniku asa makichik metro tumainun dupai asauwai.
NUM 11:32 Imaniku asamtai nunú tsawantin nagkamawag, kashish, tsawajash codornisnak juu batsatu. Tuja ashí aents aidau juukajui. Imatikaidau asag dieza imajin ijumjag utuakajui, dutikawag dita batsatbau yantamen batsakajui jujukti tusag.
NUM 11:33 Nuna codornisa yuwawag eke amuinachunak Tuke Pujuu ditan kajejuk suwimka susa shiig kuashat ijinauwai.
NUM 11:34 Dutika Tuke Pujuu ijinau asamtai, nunú nugka daajin Quibrot-hataavá adaikau ainawai. Wagki aents aidau ayatak yutanak anentaimtujaku aidau jinawagmatai, nunú nugkanum ukusaju asag.
NUM 11:35 Tuja Israel aents aidauk Quibrot-hataavá batsatu jiinag shima shimakua Hazerot jegawajui. Nunikag nuwi batsamsajui.
NUM 12:1 Moisés Etiopía nugkanmaya nuwan nuwatkauwai. Nunikmatai María Aarógjai chichaman patatuidau.
NUM 12:2 Dutikainak: “¡Tuke Pujuuk ima Moisésjaigkik chichatsui, auk jutijaishkam chichawai!” tuidau. Tusa tiagtatman Tuke Pujuu antugkauwai.
NUM 12:3 Tuja aents ashí nugkanmaya aidaujai apatka diismash Moisésak dekas kakagchauch ima Tuke Pujuu wakegamunak umijin aajakui.
NUM 12:4 Nuadui Tuke Pujuu Moisésan, Aarógkan, Marían aatus chichajak: “Atum kampatumtijum aak pegkejam aakmakbauwa nuwi wetajum”, tiuwai. Tusa tima shiyakajui.
NUM 12:5 Nunikagmatai Tuke Pujuu yujagminum pachitkau akaiki aaka waitijin wajanta Aarógkan Maríajai untsukui. Tusa untsuam ditashkam jegantajui,
NUM 12:6 nunik jegantagmatai Tuke Pujuu ditan chichajak: “¡Antuktajum wi titatjim nunú! Atum ainajum anuiyan wi makichik profeta apusamua nujaig wika ayatak wakanmanta wajantan, tuja kajanum aajan chichajai.
NUM 12:7 Untsu Moisés mina inakjua nujaig aajanuk chichatsjai. Niyai dekas ashí tikich mina inakeg aina nuna nagkaesau ima minak jikatjus umigta duka.
NUM 12:8 Nuadui niijaig paan igkunian chichajai. Tuja nii mina igkuntua waita nuniaush, ¿wajukeakjumea atumesh mina inakeg Moisésash pegkegchaush chichagjume?” tiuwai.
NUM 13:1 Tuke Pujuu Moisésan chichajak:
NUM 13:2 “Ujumak aents yajuakam ishiakta wi atumin Canaán nugkan amastatag nuna dekaa ukuutinme. Israela uchiji doce wegantu aina nuwiya aents wajiu, chichame antugtai aidau maki makichik etegjam ishiakta”, tiuwai.
NUM 13:3 Tusa tima Moisés Tuke Pujuu tibaun umiak, Parán nugkanum pujus aentsun ishiakui. Nunú aents aidauk wajiu chichame antugtai aajaku ainawai.
NUM 13:25 Dutika ishiakbau cuarenta tsawan yujasag nugka dekaawag waketug, Parán nugkanum uwejush aajakua nuwi
NUM 13:26 yaakat Cades kaunawajui. Nunikag nuwi Moisés, Aarón, ashí Israel aents aidau aatus batsatun dita yujasa wainkamu aidaun ujakajui. Dutikawag nunú nugkanmaya yujág juki ejegamunashkam iwaintukajui.
NUM 13:27 Nuadui Moisésan chichajuinak: “Nugka dekaatajum tusa ame tukagtiamin wemaji. Nunika jegaa wainkamji. Dekas nugkak shiig pegkeje, ajakash shiig tsapagmae, tagkush shiig muumpagmae, nuwiya yujág juki itaaji”, tusa iwaintuidau.
NUM 13:28 “Tujash nunú nugkanum aents batsata duka senchigtin agmae. Yaakat aidaushkam shiig múun makichkish utumainchau peeja apakbau agmae. Tuja nuigtushkam gigante Anac aajakua nunú wegantu aidau batsatu wainkamji.
NUM 13:29 Untsu Néguev nugkanum Amalec aents aidau batsaamae. Tuja hitita aents aidau, Jebús aents aidau, amorreo aents aidau mujanum batsaamae. Untsu nayantsanmanini, tuja namak Jordágnum canaágnumia aents aidau batsaamae”, tuidau.
NUM 13:30 Nuna antukag Israel aents aidau Moisésjai ijunag batsamas pampaidaun Caleb antuk itatmikak chichajak: “¡Tutsuk dekas shiyakagmi, nunika maania depetmaka nunú nugka ii jukimi! ¡Dekas iik depetmaktatji!” tau.
NUM 13:31 Tusa tutai niijai shiyaku aidau chichainak: “¡Atsa, iik nunú aents aina nujaig maanimaitsuji, wagki ditak iina nagkaetamsau senchigtin ainawai!” tuidau.
NUM 13:32 Tusag Israel aents aidaun chichajuinak: “Auk ii nugka dekaami tusa shiyakmayag duka pegkegchauyi. Tuja nunú nugkanmaya aidauk nuwiya aents aidaunash main ainawai. Nuigtushkam nuwiya aents aidauk múun esajam ishamain agmayi.
NUM 13:33 Tuja nuigtushkam gigante Anac aajakua nunú wegantu aidau batsatu wainkabiaji. Ditajai apatkamak iik manchia nunin wantinbaiji, tuja ditashkam nuninuk diijatiagmayi”, tuidau.
NUM 14:1 Nuna antukag Israel aents aidauk untsumainak tuke buu buutainakua tsawagkajui.
NUM 14:2 Nunikag ashí dita aidau Moisésan Aarógjai chichaman patatuinak: “¡Egipto nugkanum batsamsa jinumainus imajui uwegshunum yujasa jinaatin asa jiinjayagtai!
NUM 14:3 ¡Tuke Pujuu imajuig itagmamainchaunas itagmayatai! ¡Ii aidautik iina shiwaajijai maaniawaja jinawagtatji! Tuja shiwag aidau iina nuwe aidaun, iina uchiji aidaujai achija yajuakagtatui. ¡Dekas Egipto nugkanum atak waketmainus aniagtai!” wajaidau.
NUM 14:4 Nuna tusag diták pempeentunikiag chichainak: “¡Dekas iina apuji atin adaika Egipto nugkanum waketjami!” tuidau.
NUM 14:5 Imatiagtai Moisés Aarógjai dita emtin tsuntsumawag nijayin nugka antig pujusajui.
NUM 14:6 Nuniagtai nugka dekatatus shiyakajua nuwiya Josué Calebjai anentai inagmak jáanchjin japiki ichigkajui.
NUM 14:7 Nunikag Israel aents aidaun chichajainak: “¡Ii nugka dekatasa wemayag duka dekas shiig pegkejayi!
NUM 14:8 Tuja Tuke Pujuu iina wait anenjamkug nii yaimpasmatai, nunú nugkanmak wayattaji. Tuja nunú nugkak dekas shiig pegkejayi, ajak aidaush shiig tsapagmayi.
NUM 14:9 Nuadui Tuke Pujuujaig dekas shiwagmagawaigpa, nuwiya aents aina dusha ishamkaigpajum, wagki ditak jutijaig shiig wainkaush ainawai. Dita yaimainuk shiig atsawai, untsu iinak Tuke Pujuu yaimpawai. ¡Nuniau asamtai ishamkaigpajum!” tiuwai.
NUM 14:10 Tusa tamaitak aents aidauk kayai tukua tukuakua maatag tuidau. Nuninai Tuke Pujuu imanjiya nunú Apajuíjai chichatai carpa aakmakbaunum wantinkauwai Israel aents aidaush ashí wainainamunum.
NUM 14:11 Nunik Moisésan chichajak: “¿Juju aents aina dusha wajupa kuashta intimjutush yujagtatua? Waji wainchatai aidaun kuashat wi iwaintukajan kuitamka emamash juju aents aina duka dekaskeapi tujutuinatsui.
NUM 14:12 Nunin asagmatai wi ditanak jata ishamainun awetittajai, dutika ai jinawag wi nugka pegkejan anagkuawaitag nuwig wayashtinme tusan. Tujash aminiyanak kuashat aentsun uyujkatnaitjai, dutika ai Israel aents aidaun nagkaesau kuashat, senchigtin agtinai”, tiuwai.
NUM 14:13 Tusa tutai Moisés Tuke Pujuun ayaak: “Juju aents aidauk Egipto nugkanum batsatu amina senchigmin jiigmayum nuna egiptunmaya aidauk dekainawai. Nuadui ame kuitamtsuk idaisaminig, egiptunmaya aidau nuna dekawagtatui.
NUM 14:14 Nunikag Canaán nugkanum aents batsamin aina nuna ujakagtatui. Wagki ditashkam ame jutijai pujam nunak dekawaju ainawai. Tuja wishakam ame paan waitkati tujutiu asamin wainkajame, nuadui ame jutijaig tuke pujame. Tuja ame jutii uyunkagtakum tsawai yujagkim wajanbaunum, kashi jii keeka wajanbaunum emka weam nunashkam dita aidauk shiig dekainawai.
NUM 14:15 Nuadui juju aents aidau wamak ijinawaminig, aents tikich nugkanmaya ame imanjumin dekagtamin aidau chichainak:
NUM 14:16 “ ‘Tuke Pujuu Israel aents aidaun nugka amastajime tusa anagkuawa nuwi ejemainchau dekapeak, uwegshunum ijinae’, tujamiagtatui.
NUM 14:17 Nuadui ame anagkuakum dutikatjai tiuwaitam nunú umiakum senchijum iwainakta. Tuja ame chichaakum:
NUM 14:18 ‘Wika wamkek kajechuitjai. Aents aidaunak senchi aneajai, nuniau asan dita pegkegchaun takainak mina shiwagmatuinakuish tsagkujajai, untsu dita pegkegchaujinig tuké suwimkan suwajai dutikakun ditá uchijinash, tijajinash, ama tijajinash ditá apaji pegkegchau takamsamunum suwimkan suwajai’, tame.
NUM 14:19 Nuadui amina anenkagmek múunta ibau asamtai, juju aents aina nuna pegkegchaujig tsagkujata, wagki ditak Egipto nugkanum batsatu jiija yajuakam ame kuitamsam imajui ikaunbau asam”, tiuwai.
NUM 14:20 Tusa tama Tuke Pujuu Moisésan ayaak: “Ayu, ame segatam nunak imatiksanuk tsagkujattajai.
NUM 14:21 Wika dekas tuke pujuuwaitjai. Mina imanjunak dekas ashí nugkanum dekainawai. Au aents aidauk wi dita muunji aidaun nugka anagkuawaitag nunak dekas wainkachagtinai.
NUM 14:22 Wagki wi mina imanjui wainchatai ishamain aidaun Egipto nugkanum tuja uwegshunmashkam iwainamun wainkau ainayatak, dekapjustasag mina umigtutan dakitjau aina nuadui.
NUM 14:23 Tuja wi ditá muunji aajaku aina nuna nugka amastajime tusan anagkuawaitag nunak ditak wainkachagtatui. Mina dakitjujaju aina dushakam makichkish nunú nugkanak wainkachagtinai.
NUM 14:24 “Untsu Caleb mina inakjua duka tikich aina nujaig betekchauwai, wagki nigka ima minak umigtau asa. Nuadui nii nugká dekatatus weuwa nuwi niinak awayattajai. Dutika ai nii wegantu aidaushkam nuwi batsamsagtin ainawai.
NUM 14:25 Tuja Amalec aents aidauk canaágnumia aents aidaujai nugka pakanum batsatui. Nuadui atumek kashin kashikmasjum uwejush atum kaunamua nuni waketjajum nayants kapantu tutaya aatsajum shiyaktajum”, tiuwai.
NUM 14:26 Tusa Tuke Pujuu Moisésan Aarógjai chichajak:
NUM 14:27 “Israel aents aidau pegkegchau asag, wainak chichá yuja nunash ¿wajupa kuashtak tsagkujatja? Dita mina pegkegchau chichagtuinamun antukjai.
NUM 14:28 Nuniku asan wi yamai atumin titatjim nunú ujaktajum: ‘Atum aidautijum chichamugmin antugkajim duka nunisag uminkati, junak dekas uminkatnun Wi Tuke Pujuun tajai.
NUM 14:29 Tuja ashí aents veinte mijanji ajamu daaji agatkamu aidau mina pegkegchaun chichagtukajuk ashí jinawagtatui, nunikagmatai ditá iyashig juju uwegshunum utsankattawai.
NUM 14:30 Wi nugkan amastajime tusa anagkuawaitjim nuwig atumek makichkish wayashtatjume. Untsu ima Caleb Josuéjaig wayawagtatui.
NUM 14:31 “ ‘Tuja atum chichaakjum: Iina shiwaaji aidau mantamainak iina uchiji aidaun yajuakagtatui tusajum timaujum duka nunikchattawai. Wi atumi uchijum aidaunak yajuakan atum nugka dakitjaujum nuwi ejegawagtatjai, dutika ai ditak nuwi ajakmawag yuwinak shiig aneas batsamsagtin ainawai.
NUM 14:32 Tuja atumi iyashig uwegshunum utsankattawai.
NUM 14:33 Untsu atumi uchijum aidau atum pegkegchau takasbaun umiinak uwija kuitamin waigkag uwegshunum cuarenta mijan waitu yujagtinai, atum aidau jinaati tusa.
NUM 14:34 “ ‘Atum nugka dekaatag tusajum cuarenta tsawan yujasuitjum antsag, ditashkam cuarenta mijan dita pegkegchau takasbaujin umiinak yujasagtatui. Makichik tsawanta nuna makichik mijan yujagtatui. Aatus mina pegkegchau chichagtukbaunum yujasag waituinak dekawagtatui.
NUM 14:35 Juju aents pegkegchau aina nunak mina pegkegchau chichagtukaju asagmatai dutikattajai. ¡Nuadui ditak juju uwegshunum yujasag jinawagtatui! ¡Witjai Tuke Pujuunuk, nunak dekas uminkatnun tajai!’ Tusa Apajuí tujamui”, tiuwai Moisés.
NUM 14:36 Nugka dekaatnume tusa Moisés aents aidaun ishiakua nunú waketug kaunawag, nugkak pegkegchauwe tusag Israel aents aidaun ujakajam nuna antukag Moisésan chichaman patatuidau.
NUM 14:37 Tuja nugkak pegkegchauwe tusa tiaju aina nunak Apajuí suwimka susa ijinauwai.
NUM 14:38 Untsu Caleb ima Josuéjaig jakachajui.
NUM 14:39 Tuke Pujuu tibaun Moisés Israel aents aidaun ujakui. Dutikawajam nuna dekawag wake besemag dekapjajui.
NUM 14:40 Nunikag kashinia duwi kashikmas jiinag ataktu waketug mujá shiyakajui, nunik nuwi wakag chichainak: “¡Yamaik imajui kaunaji! Ii Tuke Pujuu intimjuki pegkegchau wajakag duka shiig dekaji, nuniku akuish Tuke Pujuu iina nugka anagtabauwa nuwi shiyakagmi”, tuidau.
NUM 14:41 Tusa tiagtai Moisés ditan chichajak: “¿Wagka tujash atumesh Tuke Pujuu chichamesh intimjagme? ¡Atum tajum duka tuké umikchattagme!
NUM 14:42 Nuadui shiyakaigpajum, wagki yamaik atumnak Tuke Pujuuk uyuuntamainatsui. Nuniau asamtai atumnak shiwag aidau amupakagtatui.
NUM 14:43 Atum weajum nuwi Amalec aents aidau, canaágnumia aents aidaujai dakagmainawai atumin amupakagtatus. Tuke Pujuuk atum idaisamu asa yamaik atumnak uyuuntamainatsui”, tiuwai.
NUM 14:44 Tusa tamashkam nunak antutsuk dekas mujá wakami tusag shiyakajui. Nunik shimakush arcanak jukichajui, tuja Moiséschakam wechauwai, ayatak dita batsatbaunmak juwakajui.
NUM 14:45 Nunik jiinag shimittaman nunú nugkanum batsamin Amalec aents aidau canaágnumia aents aidaujai jiintujag pataetukag Hormá nugkanum amainagkag nuwi Israel aents aidaun depetuk amukajui.
NUM 20:1 Mijan nagkamnamu makichik nantu takau ai, uwejush Sin tutainum Israel aents aidau jegawajui. Nunikag nuwi Cadesnum ujumak tsawan pujusajui. Nuwi batsatai María jakauwai, nunikmatai nuwig ukusajui.
NUM 20:2 Tuja nuwi yumi umumain atsau asamtai, Moisésan jiyakagtatus aents aidau ashí ijunjajui.
NUM 20:3 Nunik ijunag Moisésan Aarógjai chichajuinak: “¡Tuke Pujuu tikich Israel aents aidaun ijinawabia nunú nugkanmak iinash ijipamainnas aikagmayatai!
NUM 20:4 ¿Wagka atumesh Tuke Pujuu aentsji aidautish imajuish uwegshunmash itajatuaugme? ¿Tagkuji aidaujaí ashí jinatnume tukagtatsjumek?
NUM 20:5 ¿Wagka Egipto nugkanmaya jiijatkigmesh, juju nugka shiig pegkegchauwa imagnumash itajatuaugme? Juju nugka juwig makichkish ajakmamaitsui. Tuja higuerakesh, uvakesh, munchigkesh juwig shiig atsawai. Nuigtush ¡yumi umumainush shiig atsawai!” wajaidau.
NUM 20:6 Imatiagtai Moisés Aarógjai aents aidaun ukukiag Apajuíjai chichatai aak aakmakbaunum nuna waitijin jegantag nuwi tsuntsumawag nijayin nugka antig pujusajui. Nunik pujuinai Tuke Pujuu niina imanjijai wantinkauwai.
NUM 20:7 Nunik Moisésan chichajak:
NUM 20:8 “Ushujutaijum jukim Aarón yaimpasmatai aents aidau ijumjata. Dutika ijumjam ditá emtin kaya chichagkum: Yumi sukagtusta tita. Tusa tamin nunú kayanmaya yumi jiinkittawai, nunikmatai dita umuinak tagkujinash agtinme”, tiuwai.
NUM 20:9 Tusa tima nuna betek umiak, Moisés niina ushujutaiji Tuke Pujuu emtin atatman jukiuwai.
NUM 20:10 Dutika juki Aarógjai aents aidaun kayanum ijumag chichajak: “Antuktajum, chichama intimkiu aidauwah: ¿Juju kaya juwiyan yumin jiikiag amasmatai, uwajagmi tusagmeka imatjum?”
NUM 20:11 Tusa Moisés niina ushujutaijin juki kayan jimajá awatiuwai. Dutikam kuashat yumi jiinkiuwai. Nunikmatai Israel aents aidauk nuna umuinak ditá tagkujinash aakajui.
NUM 20:12 Tujash Tuke Pujuu Moisésan Aarógjai chichajak: “Atumek minai kajintsa anentaimtsuk, tuja mina pegkegmajua dushakam Israel aents aidaunum iwainakchau asajum, wi nugka anagkuawaitjim nuwig juju aents aidau yajuakjumek wechattagme”, tiuwai.
NUM 20:13 Nuadui nunú nugka daajin Meribá adaikajui. Nuwi Israel aents aidau Apajuín yumi sukagtusta tusa chichamjukaju asagmatai. Tusa segam Tuke Pujuu niina pegkegmajin ditan iwaintukui.
NUM 20:14 Cadesnum batsamas Moisés aents chichama etsejin aidaun Edoma apuji pujamunum ishimak, juna aatus akatmamtujui: “Amina yatsum Israel aents aidau juna aatus tujamainawai: Amek shiig dekame ii utugchatnum batsatuti jiinja yujag duka.
NUM 20:15 Iina apachji aidau Egipto nugkanum shiyakag awi kuashat tsawan batsamsajui, tujash egiptunmaya aidau iina apachjin waitkasu aina dutiksag jutinashkam waitkagmayanume.
NUM 20:16 Imatijamainakui Tuke Pujuu yaimpakti tusa segabiaji. Dutika ajin ii sumamun antugtamak, niina aentsji nayaimpinmaya ángel makichik awetugmabi, dutikam nunú Egipto nugkanum batsatutin jiipaju asamtai, yamai juju amina nugkem nagkatkamunum yaakat Cadesnum kauna batsatji.
NUM 20:17 “Nuniau asa wait anenkagtugta, amina nugkemea nuni nagkaemakiagmi tusa taji. Nunika nagkaemakuish, ajak ajakmamunmak, tuja uva ayamunmash nagkaemakchattaji, tuja ame yumi umutaigmekesh uwagchattaji. Jinta wetaya duke yajash tsegketsuk amina nugkem nagkaikitasa wetatji tujamui”, tiajui.
NUM 20:18 Tusa ujaam Edoma apuji ditan ayaak: “¡Mina nugkajua junig makichkish nagkaemakigpa, tuja antutsuk nagkaemakjuminig, mina suntajujai jiintuktatjime atumjai maaniatasan!” tiuwai.
NUM 20:19 Tusa tutai chichama etsejin aidau ataktu awena shiig ujainak: “Jinta wetaya duke wetatji, untsu nuniamunum iikish atsa nuniashkush iina tagkujigkesh yumi amina umutaigmin umuinakuig nunak akiktajame. Iik ayatak nagkaemaktasa wakegaji”, tuidau.
NUM 20:20 Tusa tiagtai, Edoma apuji chichaak: “¡Tujash junig nagkaemakchattagme!” tiuwai. Nuna tusa Israel aents aidaujai maaniatatus niina suntaji maanitan yacha aidaujai shiig uminas jiintukiuwai.
NUM 20:21 Dutika nagkaemamainchau emam, Israel aents aidauk pempeenag yaja tikich yantamnum shiyakajui.
NUM 20:22 Israel aents aidauk Cades batsatu ashí jiinag muja Hor tutainum shiyakajui.
NUM 20:23 Nunikag Edoma nugke nagkatkamunum jegawagmatai, nuwi Tuke Pujuu Moisésan Aarógjai chichajak:
NUM 20:24 “Aarógkak jakattawai, nuniktin asa wi Israel aents aidaun nugka anagkuawaitag nuwig wayashtatui, wagki atumek Meribánum yumi awa nuwi wi umikta tibau umikchau ainagme.
NUM 20:25 Tuja Moisésah, ame Aarón niina uchiji Eleazarjai jukim, muja Hornum nuna titijin wakata.
NUM 20:26 Nuwi wakam Aarón sacerdote nugkutaijin nugkuaja nunú awitka jukim niina uchiji Eleazar apegata. Nuwi Aarógkak jakattawai”, tiuwai.
NUM 20:27 Tusa tima Moisés Tuke Pujuu tibaunak imatiksag umikui. Nunak ashí Israel aents aidau wainbaunum muja Hornum weuwai.
NUM 20:28 Nunik waka nuwi Moisés Aarógka jáanchjin awituk jujuki Eleazaran apegauwai. Tuja Aarógkak nunú mujá titijiya nuwi jakauwai. Nunikmatai Moisés Eleazarjai mujanum batsatu waketug kaunauwai.
NUM 20:29 Tuja Aarón jakamun Israel aents aidau dekawag, treinta tsawantai buutiaju ainawai.
NUM 21:1 Canaágnumia aents aidaun apuji yaakat Arad tawa nuwiya Néguev nugkanum pujujakua nunú Atarim jinta nuni Israel aents aidau mininawai tabaun dekauwai. Nunik ditajai maaniatatus niina suntaji aidaujai jiintujajui. Nunik maaninak Israel aents aidaun ujumak achika yajuakui.
NUM 21:2 Dutikawajam Israel aents aidau Tuke Pujuun segainak: “Ame yaijatkamin nugka utuakuik, nuwi batsamin aina duka ashí ijinku yaaktajijai tsaikmi taji”, tiajui.
NUM 21:3 Tusa tiagtai, kame dutikatajum tusa Tuke Pujuu tiuwai. Nuadui Israel aents aidau canaágnumia aents aidaun amuktinme tusa Tuke Pujuu yaigkui. Dutikamu asa nuna amuinak yaaktajijai tsaikajui. Nuadui nunú nugka daajin Hormá adaikau ainawai.
NUM 21:4 Israel aents aidauk muja Hornum batsatu jiinag Edoma nugke utuawaig tusag, nuna tentea nayants kapantu tutaya nuni shiyakajui. Nunik jintá shimamunum atsanmainchau dekapenak waugkamin anentaimtan jukiajui.
NUM 21:5 Nuadui Apajuín Moisésjai chichaman patatuinak: “¿Wajukatnume tusagmea Egipto nugkanum batsatjinish jiijatkimiugme? ¿Imajui uwegshunum jinaati tusagmek jiijatkimiujum? Yumi umumainush atsawai, tuja yumainush shiig atsugtamji. ¡Tuja nuigtush yutai junin yuwi yuwinakua yawetkaji!” tuidau.
NUM 21:6 Imatiagtai, Israel aents aidaun esaitnume tusa Tuke Pujuu dapin ishitkauwai. Nuadui nunú dapi esaim kuashat jinawaju ainawai.
NUM 21:7 Nunik jinuinak Moisésan jegajuawag chichajuinak: “¡Tuke Pujuu chicham patatku, ameshkam chicham patatkau asaja pegkegchau wajasji! ¡Apajuí segata dapi iina waitkagma nuna yaja ishiakti!” tuidau. Tusa tiagtai, Moisés Apajuín segauwai ditan tsagkujati tusa.
NUM 21:8 Tusa segam Tuke Pujuu Moisésan chichajak: “Anú dapi aina nunin dakumka makichik najanata. Dutikam numi esajam ajiam nuna titijin pempegka Dutikam numi esajam ajiam nuna titijin pempeajam yakí jiikta. Tuja makichik aentskesh dapi esaimak, nunú dapi najanamua nuna diistinme, nuninak tsagajagtatui”, tiuwai.
NUM 21:9 Tusa tima Moisés broncen juki, dapi dakumak najanauwai. Dutika numin ajia nuwi pempeg awagkek yakí jiika ukukiuwai. Tuja dapi esaimak nuna diisag tsagajaku ainawai.
NUM 22:1 Tuja Israel aents aidauk shima shimakua Moab nugka pakaji namak Jordágka tsumujin yaakat Jericójai niniaku awa nuwi jegawag batsamsajui.
NUM 22:2 Israel aents aidau amorreo aents aidaun depetuk amuke tabaun Siporan uchiji Balac Moab nugka apuji antukui.
NUM 22:3 Tuja moabnumia aents aidaushkam Israel aents aidau shiig kuashat asagmatai, nuna wainkag senchi ishamkajui.
NUM 22:4 Nunikag moabnumia aidau madiágnumia apu aidaun chichajuinak: “Au aents aina duka baka chijichin yuwa amuwama numamtuk iinak iina nugkejaí amupakagtatui”, tuidau. Tuja nunú tsawantinig Balac aajakui Moab nugka apuji.
NUM 22:5 Balac nigki maaniakug Israel aents aidaunak depetmainchau asa, Balaam Beora uchiji yaakat Petor tutainum namak eufratesnum ijus nugka Amav tutainum pujaun untsukui. Balac chichama etsejin aidaun Balaam ujaktajum tusa ishimak, juna aatus akatmamak: “Egiptunmaya aents aidau kaunawag juju nugka junak ashí batsamtukaje, nuninak tikima wi pujamunmash kaunawaje. Imaniku asamtai,
NUM 22:6 wamak taata, nunikam juju aents aidau pegkegchaunum yumigjata, wagki ditak iina nagkaetamsau kuashat, senchigtin ainawai. Ame pegkegchaunum yumigjamin, wi depetkan juju nugka juwi batsata nuna jiijan ishiakchainjash, wagki ame pegkegnum yumigkiamuk tuja pegkegchaunum yumigkiamushkam betek uminna nuna wika dekau asan tajai, tujamui titajum”, tiuwai.
NUM 22:7 Tusa akatjam moabnumia apu aidau madiágnumia aidaujai Israel aents aidau yumigkiamunum akikmaktinun kuichki jukiag shiyakajui. Nunik Balaam pujamunum jegawag Balac akatmamjamun ujakajui.
NUM 22:8 Tusa ujakam Balaam ditan chichajak: “Juwi kajigtajum nuniagmin Tuke Pujuush wajinjuttig nuna dekaan ujaktajime”, tiuwai. Tusa tiyajam moabnumia apu aidauk nuwi niijai juwakajui.
NUM 22:9 Nunik batsatai Apajuí Balaaman wantintuk iniak: “¿Anú aents amejai batsata dusha ya ainawa?” tau.
NUM 22:10 Tusa tama Balaam Apajuín ayaak: “Balac Sipora uchiji Moab nugkan apuji aents aidaun ishiake, mina chichaman ujatkatnume tusa.
NUM 22:11 Kuashat aents egiptunmaya jiinag ashí nugkanum pampagke. Imaniku asamtai, Balac wakegawai mina awi wamak jegaa nunú aents aina nuna pegkegchaunum yumigjati tusa. Dutika ai niina nugken batsata nuna nii depetuk jiija ishiaktag tau asa”, tiuwai.
NUM 22:12 Tusa tutai Apajuí Balaaman chichajak: “Anú aents aina nujaig wepa, tuja nunú aents aina dushakam pegkegchaunmak yumigjaipa, wagki ditak wi pegkegnum yumigjamu ainawai”, tiuwai.
NUM 22:13 Tusa tima tsawak kashikmas nantaki, Balac ishiakbau apu aidaun chichajak: “Tuke Pujuu wakegatsui atumjai weti tusag, nuniau asamtai, atumi nugkemin waketjatajum”, tiuwai.
NUM 22:14 Tusa tiyajam apu moabnumia aidauk waketug Balac pujamunum jegawag ujainak: “Balaamak jutijai minitnak dakitmae”, tuidau.
NUM 22:15 Tusa ujakmashkam antutsuk yama nagkamchak ishiakua nuni kuashat dekas apu chichame antugtai aidaun ataktu ishiakui.
NUM 22:16 Dutika ishiakam Balaaman jegajuawag ujainak: “Balac Sipora uchijiya nunú chichagtamak: ‘Wait aneasam juwi minitak dakiajaipa.
NUM 22:17 Wi aminak shiig kuashat akiktatjame. Tuja nuigtushkam ame segatbaunak imatiksanuk umigkatjame. Nuadui wait aneasam juju aents aina nunú pegkegchaunum yumigjata’ tujamae”, tiajui.
NUM 22:18 Tusa ujamashkam Balaam ditan ayaak: “Balac niina pujusa inamtaijin oro aidau, plata aidau piyak atsuash nuna ashí sujakuish, wika makichkish imannak tuja imanchaunakesh Tuke Pujuu Apajuí dutikawaipa tujutbaunak dutikmaitsujai.
NUM 22:19 Untsu wainkagmekesh juwi pujusjum kanagtajum, tuja yamaish Tuke Pujuush wajinjuttig, nuna dekaan ujaktajime”, tiuwai.
NUM 22:20 Tuja nunú kashia duwi Apajuí Balaaman wantintuk chichajak: “¡Anú aents aidau amina jujamkitatus kaunawaja nujaig wetá! Tujash nunika wemesh wi amina wajintatjame duke umiktatme”, tiuwai.
NUM 22:21 Tusa tima tsawag nii ekemsa wetinjin burro tuntupen patai umika, nuwi ekemi moabnumia apu aidaujai weuwai.
NUM 22:22 Nunik ekemi wetai aents nii tsakapakbau aidau jimag uyuniajui. Tuja Balaam wetai Apajuí kajejuk, nii weamun jintanum ángelchawashit tumaina wee wajasui.
NUM 22:23 Nunik nunú ángel jinta ejapeen akijua puyaja takus wajaun burro wainkauwai. Nuna wainak tsegkeki ikamnum akumkauwai. Nunik akumtai Balaam jintanum awagkitatus asutiauwai.
NUM 22:24 Dutika asuttai nunú ángel ukuki uva ajakbaunum jinta menaku mai yantamen kaya peejamunum wajasui.
NUM 22:25 Nuwi ángel wajaun burro wainak, jinta kaya peejamunum atuumi tepak Balaama bakuin chanuntua tepesui. Nunitai Balaam ataktu burron asutiauwai.
NUM 22:26 Dutiktai nunú ángel ukuki niyá eemak jinta shiig menaku makichkish ayampa waketmainchaunum wajasui.
NUM 22:27 Nunik wajaun burro wainak nugká tepesui, nunikmatai Balaam kajeka numi juki asutiauwai.
NUM 22:28 Dutiktai Tuke Pujuu burron chichamtikauwai. Dutikam burro Balaaman chichajak: “¿Wisha aminash itujeagme? ¿Tsuwah, kampatuma imania asuutam jama?” tiuwai.
NUM 22:29 Tusa tama Balaam ayaak: “¡Amek mina dushiktakum tujutme! ¡Kuchiin takakkunuk yamaikiuch maumainaitjame!” tau.
NUM 22:30 Tusa tama burro ayaak: “Wika burruitjai, ame tuké entsamka wekaetaigmetjai. Wi amina chichaman intimjuchuitjam duka amek shiig dekame”, tiuwai. Tusa tama Balaam ayaak: “Duka dekas tame”, tiuwai.
NUM 22:31 Tusa timatai Tuke Pujuu nunú ángel puyaja takusa jintá waja nuna Balaam wainkati tiuwai. Nuna Balaam wainak eme anentus tsuntsuma nijayin nugka antig pujusui.
NUM 22:32 Nunitai Apajuí ángel tumain wajas chichajak: “¿Wagka amina burrogmesh kampatuma imanish asutiaume? Ame weam nunú mina shiig awajtachu asamtai, wi jintanak akigtagme.
NUM 22:33 Amina burrojum mina waituk kampatuma tsegkeki menanjuse. Nunikchauwaitkuig burronak iwaku akupeakun aminak maumain awajkajame”, tiuwai.
NUM 22:34 Tusa tama Balaam ayaak: “Niints awi pujusa jinta akigtujua tachau asan pegkegchaun takasjai. Tuja wi weag nunú amina shiig awagtamchakuig dekas wakitkitjai”, tiuwai.
NUM 22:35 Tusa tutai Apajuí ángel tumain wajas ayaak: “¡Anú aents aina nujai weam duka wetá! ¡Tujash amek ayatak wi titatag duke chichaktatme!” tiuwai.
NUM 22:36 Balaam minawai tabaun Balac dekaa Moapa nugke nagkatkamunum namak Arnón tutainum makichik yaakat awa nuwi jegajua igkug jukitatus wejiuwai.
NUM 22:37 Dutika igkug chichajak: “Kuashta untsuakun waitkasjame. ¿Wagka juwi minitash dakitmaume? ¿Wi amina shiig kuashat akimainaitjam duka dekatsmek?” tau.
NUM 22:38 Tusa tama Balaam ayaak: “Kame yamaik juwi taajai amejai chichastasan. Tujash wika mina senchigjaikik chichamaitsujai, Apajuí wajinjuttig nuna wika titatjai”, tiuwai.
NUM 22:39 Nuna tusa Balaam Balacjai yaakat Quiriat-husot weuwai.
NUM 22:40 Nuwi jegamtai Balac Apajuín anentag suwak baka aidaun, uwig aidaun kajegkui. Nuna nejen Balaam niina uyunainak apu yujaidaujai yuwawajui.
NUM 22:41 Nuna dutika kashinia duwi kashikmas Balac Balaaman juki muja Bamot-baal tutainum wajasa diyam Israel aents aidau batsatbau shiig waindau asamtai, nuna iwaintuktatus weuwai.
NUM 23:1 Nuwi waka Balaam Balakan chichajak: “Juwi kuntin maa patasa apeaku Apajuí ememattin sieteya imajin najatjuata. Dutikam siete toro tsakat, nuigtu siete uwig tsakat aishmag aidau umigtukta”, tiuwai.
NUM 23:2 Tusa tima Balac imatiksag umikui. Dutikamtai jimagtukag siete toro tsakat aidaun, siete uwig tsakat aishmag aidaujai maawajui, dutika kuntin patai apetai siete najanamunum nuwi maki makichik patajag apeawajui.
NUM 23:3 Tuja Balaam Balakan chichajak: “Kuntin maa patagbauwa juwi pujumata, nuniamin Tuke Pujuush wajinjuttig nuna dekaan ujaktajame”, tusa ukuak muja naintin weuwai.
NUM 23:4 Nuwi waka pujaun Apajuí wantintukam Balaam Apajuín chichajak: “Kuntinu maa patasa apeakun amina ememattasan sieteya imajin najanajai. Dutikan nuwi makichik toro tsakatan, nuigtu makichik uwig aishmag tsakatan aatsa patajan umikjai”, tau.
NUM 23:5 Tusa tima Balaam chichaktinjin Tuke Pujuu ujakui. Dutika chichajak: “Wakitkita Balac pujamunum, nunikam wi amina tajam nunú betek tita”, tiuwai.
NUM 23:6 Tusa tima Balaam wakitki, Balakak apu moabnumia aidaujai kuntin maa patagbaunum nuna yantamen ijunai jegantui.
NUM 23:7 Nunik jeganta Apajuí tibaun etsejak: “Etsa minitainmanini muja ayá nuwi, Aram nugkanum pujai, Moabnumia aents aidaun apuji Balac chichama akuptujak: ‘Taata, nunikam Jacopa uchiji wegantu aidau pegkegchaunum yumigjata’, tujutmae.
NUM 23:8 Tujash wisha Apajuí pegkegnum yumigjamunash ¿wajuk pegkegchaunmash yumigjatjaki? ¿Wisha itugkanuk Apajuí dakitamunash, utugchat ajiti tusanush ditanash titaja?
NUM 23:9 Au aents aina duka, tikich aents aina nuna pujutjijaig betekchau, ditash kanakag batsamin ainawai. Nunú aidaun juju mujanum wajasan wainjai.
NUM 23:10 Dita aidauk shiig kuashat nugka yukukuntu dekapamainchauwa iman ainawai. ¿Ibau kuashta nunash yaki dekapajainta? Ditak pegkeg asag jainakush, shiig aneas jau aina nujai betek wishakam shiig aneasan jakatasan wakegajai”, tiuwai.
NUM 23:11 Nuna antuk, Balac kajeka Balaaman chichajak: “¿Wajuk takumea tame? Wika aminak mina shiwag aina nuna pegkegchaunum yumigjati tusan itaamjame. ¡Dutikamaitkum amek pegkegnum yumigkiame!” tiuwai.
NUM 23:12 Tusa tama Balaam ayaak: “Wika amejai chichaakun, Tuke Pujuush tunak tujutit nuna wika titatjai timagme”, tiuwai.
NUM 23:13 Tusa tamashkam Balac ataktu chichajak: “Wegajai, tikich yantama awi wemi, nunika awi diyam Israel aents aidau ujumak kanaka batsata nunú pegkegchaunum yumigtujata”, tiuwai.
NUM 23:14 Tusa Balac Balaaman juki muja Pisgá nainti Sofim tutainum ejegauwai. Dutika nuwi kuntin maa patasa apeatnun sieteya imajin najana nuwi toro tsakat aidaun, uwig aishmag tsakat aidaujai kajegka maki makichik pataja umikui. Dutikamtai nuna Balaam apeak Apajuín emematiuwai.
NUM 23:15 Nuwi Balaam Balakan chichajak: “Juju kuntin maa patagbauwa juwi pujumata, nuniamin wi wenu Tuke Pujuujai chichastajai niish wajinjuttig”, tusa ukuak weuwai.
NUM 23:16 Nunik jeganmatai Tuke Pujuu Balaama wantintuk nii chichaktinjin ujakui, dutika chichajak: “Wakitkita Balac pujamunum, nunikam wi amina tajam nunú betek ujakta”, tiuwai.
NUM 23:17 Tusa tima Balaam wakitki kuntin maa patagbaunum nuna yantamen Balac apu moabnumia aidaujai ijunai jegantui. Nunik jeganmatai Balac iniak: “¿Tuke Pujuush wajinjutpame?” tau.
NUM 23:18 Tusa iniam, Balaam Apajuí tibaun etsejak aatus tiuwai: “Balac Sipora uchijiyah, wi amina titatjam nunú shiig antukta.
NUM 23:19 Apajuík aentschauwa nunin asa nigka waitjuchui, tuja chichakbaujinash yapajichui. Nii nuna dutikatjai takug imatiksag uminai, tuja nii anagkagtuamunashkam imatiksag uminai.
NUM 23:20 Nuniau asa Israel aents aidau pegkegnum yumigjata tusa Apajuí tujutne. Nuadui Apajuí pegkegnum yumigkiamunak wika pegkegchaunmak yumigmaitsujai.
NUM 23:21 Tuja nuigtush makichik aentskesh Israel aents aidau waitjutaijinak dekagchau ainawai, pegkegchau takamtaijinakesh dekauk shiig atsawai. Tuja ditanak Tuke Pujuu ditá Apajuíjiya nunú kuitamui. Tuja ditashkam: ‘¡Jujuwai iina apujig!’ tuinawai.
NUM 23:22 Nuadui búfalo niina kachujin ayamjumama numamtuk Israel aents aidau ayamjumataijig Apajuí dita Egipto nugkanum batsatun jiijua nunuwai.
NUM 23:23 Jacopa uchiji wegantu aina nuna wi pegkegchaunum yumigkiaknush, wainka dutikmainaitjai. Israel aents aina nunak tunchikesh wawemaitsui. Wi yamai Israel aents aidaun tajai: ‘¡Apajuí atumnak dekas shiig pegkegnum yaimpakaje!’
NUM 23:24 Juju aents aina duka, Leónjai betek nantaki niina shiwaaji aidaun jeteakug, ayamtsuk ashí amuka, nuna numpen uwag duwi shiig ayamak tepena iman ainawai”, tiuwai.
NUM 23:25 Tusa tutai Balac Balaaman chichajak: “¡Au aents aina nunú pegkegchaunum yumigmainchau dekapeau asam, pegkegnumak yumigjaipa!” tiuwai.
NUM 23:26 Tusa tutai Balaam ayaak: “¿Wi amina chichagkug, Tuke Pujuush tunak tujutit nuna titatjame tichamkajam?” tiuwai.
NUM 23:27 Tusa timatai Balac chichajak: “Wegajai tikich yantama awi wemi. Awi jegantaminish, Apajuísh Israel aents aidau pegkegchaunum yumigjata tujamchaintash”, tiuwai.
NUM 23:28 Tusa Balac Balaaman juki muja Peor tutai naintin emauwai. Nuwi wajasa diyam ashí uwejush aidau waintainum emauwai.
NUM 23:29 Nuwi jeganta Balaam Balakan chichajak: “Juwi kuntin maa patasa apeaku Apajuí ememattin sieteya imajin najatjuata. Dutikam siete toro tsakat, nuigtu siete uwig tsakat aishmag aidau juki umigtukta”, tiuwai.
NUM 23:30 Tusa tima Balac imatiksag umikui. Dutika umikmatai Balaam toro tsakat aidaun, uwig aishmag tsakat aidaujai kajegka kuntin patai apetai sieteya imajin najanamunum maki makichik pataja apeak Apajuín emematiuwai.
NUM 24:1 Balaamak Apajuí Israel aents aidaun pegkegnum yumigkiau asamtai, nuigtu awagkig Israel aents aidau pegkegchaunum yumigmainun dekaatasag wakekachui. Tuja yaunchuk Tuke Pujuu segajakbaujinak idayak uwegshunum Israel aents aidau batsatbaunmanini ayampa niimsauwai.
NUM 24:2 Nuniak Israel aents aidau maki makichik wegantu doce aajakua nunú batsatun diittaman Apajuí Wakani ekemtujui.
NUM 24:3 Dutika egkemtujam atakea duwi atinun juna aatus tiuwai: “Witjai Balaam Beoran uchiji, wika Apajuí wakega nunak shiig dekajai. Wi chicham etsegbau antuktajum.
NUM 24:4 Wika Apajuí Wakani egkemjutjamtai tikishmaja pujusan, paan wainjai. Tuja Apajuí ashí senchigtina nunú mina nii wakegamujin iwaintujak, chicham etsegkatnun suja nuna ima shiig paan dekajai.
NUM 24:5 ¡Jacopa uchiji wegantu aidauwah, atumi aakjum aidauk shiig pegkeg ainawai! ¡Israel aents aidauwah, atum batsatjum duka shiig pegkejai!
NUM 24:6 Palmera shiig kuashat tepajua imanai, ajak ajakbau namaka uwet aiyama imanai, ajak Apajuí ajakbau aiyama iman, ¡setug namaka uwet ayau shiig pegkejama imanaitme!
NUM 24:7 Israel aents aidau uwagtinuk yumi shiig kuashat aitnai. Tuja dita ajak ajakma ukatkatnushkam imanisag aittawai. Ditá apujig tikich apu Agag daagtinun depetkatnai. Tuja ditá senchijig shiig múun atinai.
NUM 24:8 Apajuí Israel aents aidau Egipto nugkanum batsatun jiijua nunuwai búfalo ayamjumatai kachujiya numamtin. Nuadui Israel aents aidauk ditá shiwaaji aidaunash amuktinai. Dutikak nagkí iju mainak, ukunchin kupijagtinai.
NUM 24:9 Israel aents aidau ayamak tepakug, león tepegama nujai betek tepenawai. Iman asamtai, jegaantag ishintaumainchau dekapenawai. ¡Amina pegkegchaunum yumigtamaidauk, ditashkam dutiksaik pegkegchaunum yumigkiam agtinai, untsu amina pegkegnum yumigtamaidauk, ditashkam dutiksaik pegkegnum yumigkiam agtinai!” tiuwai.
NUM 24:10 Nuna antuk Balac Balaaman senchi kajegkauwai. Nunik uwejen awati chichaak: “Wika aminak mina shiwag aina nunú pegkegchaunum yumigjata tusa untsukmagme, dutikamaitkum amek au aents aina nunú kampatuma imania pegkegnum yumigkiame.
NUM 24:11 Nuniau asam ¡dekas jemin wakitkita! Wika aminak shiig kuashat akiktagme timajai. Tujash Tuke Pujuu dakittin, amek wainka juwakume”, tiuwai.
NUM 24:12 Tusa tama Balaam Balakan ayaak: “Wika amina aentsjum chichama etsejin aidaun ujaakun,
NUM 24:13 ame pujusa inamtaigmin oro aidau, plata aidau piyak atsuash nunú mina ashí sujakminish, wika Apajuí tujutbaun intimjuknuk makichkish imannak tuja imanchaunakesh mina senchigjaig dutikmaitsujai. Ayatak Tuke Pujuu tujutbaunak tumainaitjai, tibaijai.
NUM 24:14 Untsu dekas mina nugkajui wakitkitjai. Tujash eke wetsuk, au aents aina dusha amina aentsjum aidaunash atakea duwish itugkatnuk ainawa nuna ujaktajame”, tiuwai.
NUM 24:15 Nuna tusa Balaam juna atak atinun etsejak aatus tiuwai: “Witjai Balaam Beoran uchijinuk, wika shiig dekajai Apajuí wakegamua nunak. Tuja wi chicham etsegbau antuktajum.
NUM 24:16 Wika Apajuí Wakani egkemjutjamtai tikishmaja pujusan, shiig paan wainjai Tuke Pujuu ashí senchigtina nunú nii wakegamujin mina iwaintujak, chichaman etsegkatnun sujawai.
NUM 24:17 Makichik aentsun atushat wainjai. Tuja makichik waji atushat aun wainjai: Duka Jacob wegantunmaya makichik yaya wantinui, nunuwai Israel aents aidaun apujig. Nunú apua duka Moab aents aidaun depetuk amuka, nuigtushkam Set wegantu aidaunash dutiksag amuktinai.
NUM 24:18 Tuja Edom aents aidaunashkam depetkatnai. Seír nugkanum ditá shiwaaji batsata nunash depetuk, nugken atankiag dita jukiagtinai. Israel aents aidauk Edom aents aidaun depetuk dita senchijin iwainmamkagtinai.
NUM 24:19 Jacob wegantunmaya makichik senchigtin depetbau atinai, nunú yaakat aidaunum ujumak juwakag pujuidaun amuktinai”, tiuwai.
NUM 24:20 Nuna tusa Balaam Amalec aents aidau nugken ayampa wajas chichaak: “Amalec aents aidauk senchigtin ajantusa diitai ainawai. Tujash ashí tsaika emegkam atinai”, tiuwai.
NUM 24:21 Nuna tusa idayak Balaam quenita aents aidau nugken diisa chichaak: “Atum Caín wegantu aidautigmek ayamjumataijum shiig umikbau akuish, tuja kaya múun aidaunum pishak pasugken ekenag kuitamama numamtuk umikuitkugmesh,
NUM 24:22 suntag asirianmaya aidau, achigmajag yajupainak nunú pasugkem aina nunak tsaika jiiyai apeawag utsagkagtinai”, tiuwai.
NUM 24:23 Tuja inagnak Balaam atak tikich tsawantai nagkaemagtinun pachis juna aatus tiuwai: “¡Chah! ¿Apajuí nuna dutiktata duwish, yaki eke iwakush pujustinaita?
NUM 24:24 Chiprenmaya lancha nayantsanum suntajan yajuak minawai. Nunú asirianmaya aidaun, Hebernumia aidaujai amukagtinai, dutikawag ditashkam jinawagtinai”, tiuwai.
NUM 24:25 Nuna tusa ashí etsejuk Balaam jiinki weuwai niina jeen waketak. Nunikmatai Balakshakam niina pujusa inamtaijin wakitkiuwai.
NUM 27:12 Nunik kuashat tsawan nagkaemakiu ai, Tuke Pujuu Moisésan chichajak: “Juju muja Abarim tutaya juwi wakata, nunikam Israel aents aidaun wi nugka susatjai tusa anagkuawaitag nunú diista.
NUM 27:13 Nunú nugka wainkam, duwi amina yatsum Aarón jakauwa nunismek, ameshkam jakattame.
NUM 27:14 Atumek yumi umumain atsutai, Israel aents aidau chichamjuinakui, wi nunú dutikatajum tusan uwejush Sin tutainum tiuwaitjim nunú umikchauwaitjume. Nuwi Israel aents aidau yumi sumainakui, atum ditá emtin mina eme anenjuschauwaitjume”, tiuwai. Tuja nunak uwejush Sin tutainum yaakat Cades awa nuwi yumi pukuni jiinu Meribá tutaya nuna pachis tawai.
NUM 27:15 Tusa tama Moisés Tuke Pujuun chichajak:
NUM 27:16 “Ashí aents aina nuna Apajuíji Tuke Pujuuwah, ame amina aentsjum aina nuna apuji atin makichik apu adaikata,
NUM 27:17 nunú yajuak emati, uwig kuitamkachbau wainak yujama nunikainum”, tiuwai.
NUM 27:18 Tusa tutai Tuke Pujuu Moisésan ayaak: “Josué Nun tutain uchijiya nunuwai wi etegkamu, wajiu, mina umigtau. Nunú untsuka jukim amina uwegmin niina buuken achikta.
NUM 27:19 Dutikam sacerdote Eleazar pujamunum ejegam, nuadui ashí Israel aents aidau wainbaunum apu adaikata.
NUM 27:20 Dutikam nuadui ame takasuitam dutika takastinji ujakta. Dutikamu asamtai, ashí Israel aents aidauk niina chichamen umigkatnume.
NUM 27:21 Untsu Josué nigki sacerdote Eleazarai weti. Nuwi jegamtai Eleazar mina inintsattawai. Tusa ininkui wi Urimnum wajuk iwainaktatja nuna Josuén ujaktatui. Dutikamu asa nii Israel aents aidau apuji wajasa Israel aents aidaun yajuak emati”, tiuwai.
NUM 27:22 Tusa tima Moisés Tuke Pujuu timaunak imatiksag umikui. Dutikak Josuén juki sacerdote Eleazar pujamunum ejegauwai, tuja nuigtushkam ashí Israel aents aidau batsatbaunmashkam ejega iwainakui.
NUM 27:23 Nuna dutika Moisés Tuke Pujuu tibaun umiak, Josué buuken achika Apajuín segati apu emauwai.
DEU 1:1 Juna Moisés namak Jordágka amain etsa minitaiya nuni uwejush awa nuwi pujus, Israel aents aidaun ujakui. Nunú uwegshuk Arabá nugkanum awai. Tuja duka yaakat Suf tawa nujai niniaku nugka Parán, Tótel, Labán, Haserot, Dizahab aatus aajaku aina nuwi awai.
DEU 1:2 Tuja Cades-barnea jegamuk Horebnum juwaki jinta Seírnum wetaya duke wea weakua once tsawanta imajin jegawai.
DEU 1:3 Tuke Pujuu Moisésan Israel aents aidau ujakta tusa tima ujakua nunak,
DEU 1:4 amorreo aents aidaun apuji Sejón Hesbón nugkanum pujaun, tuja Basán nugka apuji Og aajakua nujai depetuk amuka, nuigtu Astarot nugkanum yaakat Edrei tawa nuwiyanashkam depetuk amukua duwi pujus, cuarenta mijan jegá, once nantu taka makichik tsawan tsawaju ai, Moisés Apajuí tibaunak imatiksag Israel aents aidaun ujakui.
DEU 1:5 Nunak Israel aents aidauk namak Jordágka tsumujin Moab nugkanum batsatun, Moisés dita umikagtinun juna aatus chichajak:
DEU 1:6 “Muja Horebnum batsatjin Tuke Pujuu iina Apajuíji juna aatus chichagtamak: ‘Atumek juju muja juwig kuashat tsawan batsamsaugme.
DEU 1:7 Nuadui aakjum aidau tegakjum, wajijum yajuakjum amorreo aents aidau batsatbaunum mujá wetajum. Nunikjum nuna yantamen tikich nugka ayá nuwi batsamsatajum. Duka nugkak juju ainawai: Arabá nugka, ikam tepaju, nugka paka weaju, Néguev nugká, nugka nayantsa pakaji, canaágnumia aents aidau nugke, nuigtu Líbano nugka, namak shiig múun Eufratesa aatus jegawai.
DEU 1:8 Wi nunú nugka aina nunak atumin amaajime. Wetajum nunikjum nunú nugka jukitajum, nunak atumi apachjum Abraham, Isaac, Jacob aajaku aina nuna uchiji wegantu aidaun susatnaitjai tusan anagkuawaitjai’, tujutmayi” tiuwai Moisés.
DEU 4:1 “Mina pataag Israel aents aidauwah, chicham umiktina nuna wi jintintuawaitjim nunú yamai antukjum betek umiktajum. Nuniakjum iwaku pujusjum Tuke Pujuu atumi apachjum aajaku aidaun Apajuíji, nugka amastajime tusa anagtamauwa nunú nugkanum jegajum batsamsamnujum.
DEU 4:2 Chicham umiktina nuna wi tajim duka makichkish ewaetsuk, tuja esakagjumkesh emegkautsuk betek umiktajum. Tuke Pujuu atumi Apajuíjiya nuna chichame umiktin agagbauwa nuna wi tajim nunú betek umiktajum.
DEU 4:3 Atumek shiig dekagme iina patayi aidau muja Baal-peor tutainum batsamas, nuwiya aents aidau apajuímtaiji Baal aajakua nuna emematu yujatai, Tuke Pujuu kajejuk ijinauwai.
DEU 4:4 Tujash atum aidautijum Tuke Pujuu atumi Apajuíjiya nunú eme anentsajum niina chichame umigkau aidautigmek yamai juwi ashí iwaku pujagme.
DEU 4:5 “Tuja Tuke Pujuu mina Apajuíg atumin nugka amasua nuwi atum pujusjum, chicham umiktinun nii tujutbaunak imatiksanuk ashí jintintuajime.
DEU 4:6 Nunú chichama duka ashí betek umiktajum. Nuniagmin aents nunú nugkanmaya aidaush, yachamet unuimatjai atumin awa nuna dekawagtatui. Nunú atum betek umiamugmin wainkag, dita chichainak: ‘¡Israel aents aidauk shiig yacha ainawai!’ tujamiagtinai.
DEU 4:7 Wagki aents tikich nugkanmaya aina duka ditá apajuímtaiji yayachbau asag, iina Apajuíji Tuke Pujuu ii segamak betek yaimpau asamtai, senchigtin ainag imanuk makichkish atsawai.
DEU 4:8 Tuja nuigtushkam iinu chicham umiktin aidau shiig pegkeg ajutjamu asamtai, senchigtin ainag ibauk makichkish tikich aents aidauk atsuinawai. Wagki ditanuk iinu chicham pegkeg umiktin aidau ajutjama nunin atsugbau asag. Nunú chichaman wi atumin jintintuan yamai amaajime.
DEU 4:9 Nuadui kuitamamkatajum Apajuí atumin yaimpau asa, kuashat waji wainchatai aidaun iwainamu wainkauwaitjum nunú kajimatkijum. Tuja wi atumin jintinjim dushakam makichkish kajimatkigpa. Kajimattsuk atumi uchijum aidau, tijajum aidau, nunú pachisjum jintintuatajum”, tiuwai.
DEU 4:10 “Atum aidautijum muja Horebnum Tuke Pujuu atumi Apajuíji emtin pujuyujum nuadui Tuke Pujuu chichagtak: ‘Israel aents aidau ijumjata mina chichamjun antukag unuimagtinme. Nunikag mina tuké umigtuktinme, nuninak dita uchiji aidaunash jintintuatnume. Dutikam ditashkam dutiksag umiktin atinme’, tujutiabi.
DEU 4:11 “Tusa tujutai atumek muja najatamunum ijunjabiugme. Nunika ijunjajumin nunú mujanmaya jii kegak bukuiti yaki takuni yujagkim najanea shiig suwe wajasabi.
DEU 4:12 Nunú kegamunmaya Tuke Pujuu Apajuí atumin chichagtamu antukuitjume. Tujash atumek chichame antakjumesh niina niimeg makichkish wainkachuitjume.
DEU 4:13 Tuja nunú mujanum jimag kaya pakama najanamunum diez chicham umiktin aidau agagbaun Tuke Pujuu amasabi. Dutika amaak juju ashí betek umiktajum tusa tujabiuwai.
DEU 4:14 Nuadui Apajuí nugka amastata nuwi batsamsajum nunú chicham umiktina nuna atumin jintintuati tusa Tuke Pujuu mina inatjauwai.
DEU 4:15 “Muja Horebnum jii kegamunum Tuke Pujuu atumjai chichasua duwikish atumek makichkish niina niimeg wainkachuitjume. Nuadui kuitamamkatajum,
DEU 4:16 wainkajum dakumka najana ememattai aina nunú aishmagkesh, nuwakesh dakumka najanagmek emematigpa pegkegchau wajasaijum.
DEU 4:17 Tuja kuntinkesh, chigkikesh,
DEU 4:18 japiinas yujau aina dukesh, namakia aina dukesh ememattinuk dakumkagmek makichkish najanawaigpa.
DEU 4:19 Tuja nayaim diyakjumesh, etsa, nantu, yaya aidau, nuigtu tikich agkajunum etsantin ayá dukesh wakemain diyakjum emematigpa. Wagki nunú aidaunak juju nugkanum tikich aents aidau batsata nunú ememattinme, tusa Tuke Pujuu tiuwai. Tujash ii Israel aents aidautik Tuke Pujuu Apajuí ii emematin ainag ima duke emematiagmi.
DEU 4:20 “Atumnak jiju ukuijatasa hornonum jitayama numamtuk Egipto nugkanum waitkam batsatutigmin Tuke Pujuu jiipag niinu etamiuwai.
DEU 4:21 Dutijamawaitak atumi pegkegchaujin Tuke Pujuu mina kajegtuke. Nuadui amek namak Jordágkak katitkashtatme tujutne. Tuja nuigtushkam nugka atumdau atinun amastata nuwig jegashtatme tusa tujutne.
DEU 4:22 Tujutiu asamtai wika namak Jordágnak katittsuk juu nugka juwig pujusan jakattajai. “Untsu atum aidautijum Jordán katitkajum nugka pegkeja nunú jukittagme.
DEU 4:23 Tujash kuitamamkatajum atum chicham umiktinum Tuke Pujuu atumi Apajuíjum amasua nunú kajimatkijum. Nuadui dakumka najana apajuímtai aidaun, Tuke Pujuu Apajuí dutikawaigpa tusa tujabiuwa duka makichkish dutikawaigpa.
DEU 4:24 Wagki Tuke Pujuu atumi Apajuíjiya duka dekas, Apajuí akasmauwai. Iman asa niig jii kegak apea emegkaina imanai.
DEU 4:25 “Tuja nunú nugkanum batsamsajum uchijinkajum, tijajinkajum múuntuch wajasa pujakjumesh, Apajuí emematut idaikujum dakumka najana ememattai aina nuninuk emematigpajum, Tuke Pujuu atumi Apajuíjum kajegtamkainum.
DEU 4:26 Tuja atum Jordágka amain katigjum Apajuí nugka amasua nuwi pujusjum dakumkamu emematu yujakjumek, nunú nugkanmak dukap tsawan pujutsuk ijina emegkam atinaitjume. Duka tuke uminkatta nuna wi yamai nayaimpin nugkajai adaisan tajai.
DEU 4:27 “Tuja nuigtushkam Tuke Pujuu jiipag ashí nugkanum utsampaktatjume, dutijamawagmatai nunú nugkanmak ujumchik juwakag pujusagtinai.
DEU 4:28 Dutika utsampakmatai tikich nugkanum yujasjum nuwiya aidaun apajuímtaiji numi najanamu, kaya najanamu antuchu, wainmachu, yuchau, mayatchau aina nunú ememattinaitjume.
DEU 4:29 Nunika tikich nugkanum batsamsajum waitiakjum, Tuke Pujuu atumi Apajuíjiya nunú, ashí anentaimijai, wakanmijai segaakjum antujam atinaitjume.
DEU 4:30 Atum tikich nugkanum batsamsajum dakumkamu emematkujum waitu pujautijum idaikujum, ataktu Tuke Pujuu atumi Apajuíjum umigjuminig,
DEU 4:31 niig wait anenkagtina iman asa atumnakek idaitamsashtinai. Ijipatnash ijipashtinai, nuigtushkam nii atumi muunjum aidaujai chichaman umikua nunak kajimatkishtinai, wagki nunak tuké umiktinaitjai tiu asa.
DEU 4:32 “Atumesh anentaimsatajum: Apajuí yama nagkamchak aentsun najanauwa duwi nagkamsash, tuja ashí nugka najatawa imanuish, Apajuí iina yaimpau asa pegkeg aidaun yamai iwaina aika iwainakui tabaush makichkish antukukaitjum.
DEU 4:33 ¿Jii kegamunum Apajuí atumin chichagtabau antakjumesh, jinachuitjum nuninush tikich aents aidaush ainawash?
DEU 4:34 Ii aidautinak Apajuí etegtamjauwai. Dutijabau asa iina ayamjutpak, jutii makichkish wainajakchamun ishamain aidaun Tuke Pujuu iwainag egiptunmaya aidaun senchi sapigmitkakua nunú atumek shiig wainkauwaitjume. Tuja tikich apajuímtai aina duka makichkish imanun iwainamainuk shiig atsawai.
DEU 4:35 Nunak dutikauwai Tuke Pujuu senchigtina imanuk, tikich Apajuík shiig atsa nuna ashí aents aidau dekatnume tusa.
DEU 4:36 Apajuí atumi pujutjumin esetamatag tau asa, nayaimpinum pujusa chichagtamkauwai. Tuja nugkaashkam jii kegaun iwaintugmakui. Nunú jii kegamunmaya niina chichame antukuitjume.
DEU 4:37 Tuja atumi apachjum aajaku aina nunashkam Apajuí aneau asa dita wegantunmayan etegjauwai. Dutikau asa Egipto nugkanum waitkam batsatun niina senchijijai jiija agkanmitkauwai.
DEU 4:38 “Nuadui tikich aents atumi nagkaetamsau kuashat, nuigtush senchigtin aidaun atumesh wainjumin Apajuí jiija utsagke, wagki yamai atum juju nugka jukitin asagmin.
DEU 4:39 “Nuniau asamtai Tuke Pujuu Apajuí nayaimpinash, nugkanash apujiya nunú shiig antukjum kajimattsuk aneaku atajum. Wagki Apajuíya imanuk tikichik atsawai.
DEU 4:40 Nuadui niina chichame umiktajum tibauwa nuna wi yamai juju tsawanta juwi amaajim nunú betek umiktin atajum. Nunú betek umiakjumek, Tuke Pujuu Apajuí atumdau nugka tuke atinun amastata nuwi kuashat mijan pujustinaitjume”, tiuwai.
DEU 6:1 Moisés Israel aents aidaun chichajak: “Tuke Pujuu atumi Apajuíjum nugka anagtabauwa nuwi jegajum pujusjum, chicham agagbauwa nunú atum umiktin aidaun jintintuati tusa, Apajuí mina inatjauwa duka jujuwai:
DEU 6:2 ‘Tuke Pujuu Atumi Apajuíjiya duke ememattajum. Dutikakjum niina chichame umiktin aidau agagbauwa nunú atum, atumi uchijum aidau, tijajum aidau aatus umiktinun wi jintinjim nunú betek umiktajum. Nuniakjum kuashat mijan iwaku pujustinaitjume.
DEU 6:3 Nuadui Israel aents aidauwah, chicham umiktin aina nunú betek umiktajum. Nunú betek umiakjumek, nugka pegkeg ajak shiig tsapaun amastinaitjime tusa Tuke Pujuu atumi Apajuíjum atumi apachjum aidaun anagkuawa nuwi pujusjum shiig kuashat yujaktinaitjume.’
DEU 6:4 “Antuktajum Israel aents aidauwah: Tuke Pujuuwa nunuwai iina Apajuíjig; Tuke Pujuuk ima makichkiuchi.
DEU 6:5 Tuke Pujuu amina Apajuígmea nunú amina anentaimijai, wakanmijai, senchigmijai aneeta.
DEU 6:6 Nuniakum wi yamai tajim nunú shiig atukjum kajimattsuk aneaku atajum.
DEU 6:7 Nunikjum atumi uchijum aidau kashi kashinig jintintajum. Dutikakjum atumi jeminish, tuja jintá wekaekugmesh, kashi kanakjumesh, tsawaku nantakjumesh, chicham umiktin aina nunú uchijum aidau jintintuatajum.
DEU 6:8 Atumek Apajuí etegkamu ainajum nunú iwainmamkujum chicham agagbau umiktin aina nunú kuntugmin patakumajum, atsejukjum yujastajum.
DEU 6:9 Tuja nuigtushkam shugku aidaunum, nuigtu atumi jee aina nuna waitijinchakam agaja anujkatajum.
DEU 6:10 “Atumi apachjum Abraham, Isaac, Jacob aajaku aina nuna nugka amastajime tusa Tuke Pujuu atumi Apajuíjum anagkuawa nuwi atumnak ejetamawagtatui. Nunú nugka nuwig yaakat múun shiig pegkeg aidau atumkesh yaaktamkachbau,
DEU 6:11 jega aidaunum waji pegkeg aidau pimasua weaku atum ipiakchamu, yumigmat aidaush atum taichbau yaunchuk tai umikbau aidau, tuja uva ajakbau aidau, aceituna ajakbau atum ajakmachbau aidau, yaunchuk ajaka umikbau aina nuwiya shiig yuwajum pujustinaitjume.
DEU 6:12 Nunú iman ayaunum jegagmesh, Tuke Pujuu Apajuí atum Egipto nugkanum inaku waitkatai batsatutigmin agkanmitkagmauwa nunú kajimatkigpa.
DEU 6:13 ¡Tuke Pujuu atumi Apajuíjiya duke ememattajum! ¡Nuniakjum ima nigki eme anentsajum umigkatajum! ¡Tuja atum umiktin dekas takugmek ima Apajuí daajinig titajum!
DEU 6:14 “Tuja tikich aents aidau apajuímtaiji aina duka emematigpa,
DEU 6:15 wagki Tuke Pujuu atumi Apajuíjiya duka, dekas Apajuí akasmauwa, nuniau asa atum wainka apajuímtai aina nunú emematu yujataik, nii kajegtamak ashí ijipamainai.
DEU 6:16 “Tuja Masá nugkanum pujusjum Tuke Pujuu atumi Apajuíjum dekapsauwaitjum numamtuk ataktu dekapsatasagmek wakeyigpajum.
DEU 6:17 ¡Tuke Pujuu atumi Apajuíjiya nuna chichame umiktin agagbauwa nunú umiktajum tusa tujamauwa duka ewaetsuk betek umiktajum!
DEU 6:18 Atumi apachjum aajaku aina nunú umikagtinun Tuke Pujuu anagkuawa nuwi jegajum shiig pujustag takugmek Tuke Pujuu wakegamu pegkeg aina duke takastajum.
DEU 6:19 Nuniagmin nii tibauwa nuna imatiksag atumi shiwaajum aidaunak atumjai maaniawai tusa uwakek ipisjattawai.
DEU 6:20 “Tuja atakea duwi atumi uchijum aidau inimpainak: ‘¿Juju chicham umiktin agagbau aina nuna Tuke Pujuu iina Apajuíji umiktajum tujabiuwa nunash wajina taku tiuwaita?’
DEU 6:21 Tujamainakuig atum ayaakjum: ‘Ii aidautik Egipto nugkanum batsamsa faraógka inaku waitkatai ayaji. Nuni batsatjin Tuke Pujuu niina senchijijai jiipagmayi.
DEU 6:22 Tuja faraógkan, niina nuwen, niina uchijin aatus Tuke Pujuu suwimka suwak wainchatai ishamain aidaun iwainajua nunú ii wainkauwaitji.
DEU 6:23 Untsu jutiinak nuwi batsatutin nii jiipag jujamki iina apachji aajaku aina nuna anagkuak nugka amastajame tiuwa nuwi itagmae. Dutijama nunú nugkan iina amase.
DEU 6:24 Dutika amasu asa Tuke Pujuu iina Apajuíji chichagtamak: Juju chicham umiktin aidau agagbauwa nunú umiktajum, nuniakjum ajaantusjum diitajum, tusa tujamui. Wagki nunú betek uminaku yamai iwaku shiig batsatag junika batsamsatag tau asaja.
DEU 6:25 Tuja chicham umiktin agagbauwa nunú umiktajum tusa Tuke Pujuu iina Apajuíji tujabiuwa nunú betek umiajinig, dekas atumek pegkeg takagme tujamtatji’ titatjum”, tiuwai Moisés.
DEU 7:1 “Tuke Pujuu atumi Apajuíjum, atum batsamsatnun nugka amastata nuwi ejetamawagtatui. Dutijama nuwiya aents aidau siete nugka múun aidaunmaya maki makichik chichamtin, atumi nagkaetamsau senchigtin, shiig kuashat batsamin: hitita aents aidau, gergeseo aents aidau, amorreo aents aidau, cananeo aents aidau, ferezeo aents aidau, heveo aents aidau, Jebús aents aidau batsata nunak atumesh wainjumin Tuke Pujuu jiija utsagtatui.
DEU 7:2 Tuja nunú aents aina nuna depetkatnume tusa Tuke Pujuu atumi Apajuíjum senchimtijamamtai, depetkajum utuagmek wait anenjaigpajum, tuja nuigtush ditajaigkish chichamak umikaigpajum, ayatak ijina utsagtajum.
DEU 7:3 Tuja nuigtushkam atumek nuwiya nuwa aidaujaig nuwenawaigpajum, atumi uchijum aidaush, nawanjum aidaushkam nuwiya aents aidaujaig nuweawaigpajum.
DEU 7:4 Wagki ditá aishin umijuinak aishi apajuímtaiji aidaun uchijum aidau, nawanjum aidau emematuinak Tuke Pujuu ememattan kajimatkinum. Dita nuniagtai Tuke Pujuu atumin kajegtamak shiig wamak ijipamain asamtai.
DEU 7:5 “Nuadui dita apajuímtaijin emematuinak kuntinun patasa apetai aidau najankamu ajuina duka tsaigkatajum. Dutikakjum dita apajuímtai kaya aidau, numi kampujam tsupikbau, Asherá daagtin aidaun aatus dita emematuina duka ashí tsaigkatajum. Tuja nuigtushkam ashí tikich dakumka najanamu aina dushakam dutiksagmek tsaigka apeajum utsankatajum.
DEU 7:6 Wagki atumek ima Apajuí Tuke Pujuu tutaya nudau atinme tusa etegjamu ainagme. Nuadui atumnak ima niinuk atinun ashí aents nugkanmaya aina nuwiyan etegtamjauwai.”
DEU 7:7 “Tuke Pujuu atumi Apajuíjiya nunú etegtamjauwa nunak, aents tikich nugkanmaya aina nuna nagkaesau ima kuashat asagminigkish etegtamjachui. Atumek dekas tikich aina nujai apatkamak imanchaush ainagme, nunin ajuminig etegtamjauwai.
DEU 7:8 Tujash ¿wagkag nunash etegtamjabi? Nunak Tuke Pujuu atumin anempau asa, atumi apachjum aajaku aidaun anagkuawa nuna umiktag tau asa, Egipto nugkanum batsamsajum faraógka inaku waitkatai batsatutigmin niina senchijijai jiigmajui.
DEU 7:9 Nuadui Tuke Pujuu atumi Apajuíjiya duka aents aidau niina aneak umijuinamak, nii umiktajai tibaujinak ewaetsuk, ditá uchiji wegantu aidaunmashkam tuke umina nunú dekaskeapi titajum.
DEU 7:10 Tuja niina betek umigtsuk kajejuina nunak nii suwimka susa wamak ijina utsainai. Nunin aina nunak kuashat tsawannakesh sutsuk shiig wamak ijina utsainai.
DEU 7:11 Nuniau asamtai yamai wi atum aidautigmin chicham umiktin agagbau aidaun umiktajum tajim duka betek umiktajum”, tiuwai.
DEU 7:12 “Juju chicham umiktin aidau agagbauwa nunú antukjum betek umiagminig, atumi apachjum aidaun Tuke Pujuu atumi Apajuíjum ditan anagkuawa nuna betek umiktatui.
DEU 7:13 Dutikak ima atumnak anempatnai. Nuadui pegkegnum yumigtamag atumi uchijum aidaunash pegkegnum yumigkig kuashat ikauntugmaktinai. Tuja ajakma juutnumash, trigogminash, vino, nuigtu aceite aidaunash, tuja baka aidau, uwig aidau tsakapatnumash atumi apachjum aidaun anagkuauwa nunak imatiksag amasagtatui.
DEU 7:14 “Atum atinaitjume dekas tikich aents aidaun nagkaesau pegkegnum yumigsamu. Nuadui nuwa kaga aidaush atsutnai. Tuja aishmag aidaushkam uchi akiichuk atsutnai. Tagkujum nuwa aidau petsachuk, tuja aishmag uchi akiichush atsutnai.
DEU 7:15 Egiptunmaya aents aidaun jata ishamainun Tuke Pujuu ajuntug atumesh wainjumin ijinauwa annuk atum batsatmaunmak shiig atsutnai. Apajuí nunak emegkaktinai. Iman jata aina duka atumnak waitkagmaschagtinai, untsu tikich aents atumi shiwaajum aina nuna waitkasagtinai.
DEU 7:16 “Tuja tikich aents aina nunú ijinatajum tusa Tuke Pujuu atumi Apajuíjum tujamkuig, wait anentsuk ijinatajum. Tuja ditá apajuímtaijiya dukesh emematigpajum. Nunú nuniakjumek waitut igkugjum suugtatjume.
DEU 7:17 “Tuja namputchawame, atum anentaimsajum, juju aents aina nunú iina nagkaetamsau kuashat aina imajush ¿itugkaik jiijaish utsagtaji? tumainaitjume.
DEU 7:18 ¡Tujash ishamkaigpajum! Tuke Pujuu atumi Apajuíjum faraógkan egiptunmaya aents aidaujai itujuk ijinauwaita nunú adeagtajum.
DEU 7:19 Atum Egipto nugkanum batsatutigmin Tuke Pujuu atumi Apajuíjum niina senchijin kuashat wainchatai aidaun atumesh wainjumin iwainag jiipajajua nunú anentaimtustajum. Tuja atumi shiwaajum kuashat asamtai ishamajum nunashkam Tuke Pujuu ijinattawai.
DEU 7:20 “Tuja nunú aents aidau atum ijinjumin ujumak uwemjau, tuja tupikaki uumkaju aina nunashkam ijinati tusa Tuke Pujuu ete múun aidaun ishitkattawai.
DEU 7:21 Nuadui nunú aents aina duka ishamkaigpajum. Atumnak Tuke Pujuu atumi Apajuíjum senchigtina nunú uyuntamjume.
DEU 7:22 Nunú aents aina nunak Tuke Pujuu diipas utsa utsakua emegkagtatui. Atumek juu tamawaikik, waamkek utsagkaigpa, dutika ajuminig nugka ankan wajasmatai, kuntin ikamia aina nunú yujaka waitkagmasainum.
DEU 7:23 Tujash Tuke Pujuu atumi Apajuígmia nunú aents aina nunak atumin idaitugmastatui. Dutikau asa diipas utsa utsakua ashí emegkagtatui.
DEU 7:24 Dutika utsagkam ditá apuji aina duka atumin yunumjagtatui, nuninakui atum ashí ijinajum emegkaktinaitjume. Dutikamu asa makichkish ayamjumainjig shiig atsujiagtinai. Nuadui atum ashí amuktinaitjume.
DEU 7:25 “Tuja ditá apajuímtaiji aina dushakam apea utsankatajum. Untsu nunú tsayakjumesh wainkajum oro aidau, plata aidau ayá nunú wakejukjum jukigpajum, nunú atumin waittan itagtamamtai waittsaijum. Wagki nunú aina nunak Tuke Pujuuk tsuumawai.
DEU 7:26 Nuniau asamtai, Apajuí diisam, waji pegkegchau aina nuninuk atumi jeminig awayawaigpa, Apajuí atumnashkam ijipawainum. Wagki nunú waji aina duka shiig pegkegchau asamtai, tsaika utsagbau atatui.”
DEU 8:1 “Tuja wi atum aidautigmin chicham umiktin agagbauwa nunú umiktajum tusan yamai tajim duka betek umiktajum. Nunú umiakjum iwaku batsamsajum kuashat yujaktinaitjume. Nuniakjum atumi apachjum aidaun Tuke Pujuu nugka amastajime tusa anagkuawa nuwi jegajum batsamsamnujum.
DEU 8:2 “Atum Egipto nugkanum batsatutigmin Tuke Pujuu atumi Apajuíjum jiipag jujamki cuarenta mijan uwegshunum awekapasua nunú makichkish kajimatkigpajum. Imaan mijan awekapasua nunak, ememataiji aidaun idaisatnume tusa, tuja nuigtu imanik waituinakush dekas mina chichamjunash umigtumainash aina tusa dekapjamak, dutijamauwai.
DEU 8:3 Tuja kuashat tsawan nujantai waitiagminish, maná atumi wainchatain tuja atumi apachjum aajaku aina dukesh wainajakchamun Tuke Pujuu ayugtamauwai. Nunak dutikauwai wagki aentsuk ima yujumkanak yusagkek iwaku pujutsuk, Tuke Pujuu chichamejai pujumaina nuna jintinjamak.
DEU 8:4 Cuarenta mijan yujasuitjum duwikish atumi jaanchjumek mamukchajui. Tuja atumi nawe aidaukesh iyagchajui.
DEU 8:5 “Nuadui Tuke Pujuu atumi Apajuíjum makichik múun niina uchijin jintintama numamtuk jintinjamawajua nunú anentaimtusjum diistajum.
DEU 8:6 Nuniakjum niina chichame umiktin agagbauwa nunú betek umiakjum, Apajuí eme anentsajum diitajum. Tuja nii jintinjamamua dushakam imatiksagmek umiktajum.
DEU 8:7 “Wagki atumnak Tuke Pujuu atumi Apajuíjum jujamki nugka pegkeg paka tepetpetu ikamnum, entsa aidau, yumi pukuni jiinaidau, yumi initkanmaya aidau shiig kuashat ayaunum ejetamawagtatui.
DEU 8:8 Nunú nugkanmak trigo, cebada, uva ajakbau, higuera aidau, munchi aidau, olivo aidau, dapa yumiji aidau aatus ayawai.
DEU 8:9 Nunú nugkanmak atumek wajinak yuwatja tusagmek puyatchattagme. Tuja tikich waji aina dukesh puyatjukchattagme. Kaya aidaunmaya wainkatnaitjume hierro aidau, nuigtushkam mujanmaya taijum jiju cobre yajumtinaitjume.
DEU 8:10 Tuja yutai yuwajum ejemagjum shiig aneasa pujakjumek, Tuke Pujuu atumi Apajuíjum kajimattsuk see titajum, nii nugka pegkejan amasu asamtai.”
DEU 8:11 “Kuitamamkatajum Tuke Pujuu atumi Apajuíjiya nunú kajimatkijum. Niina chichame umiktin agagbauwa nuna wi jintintuajim nunú umitsuk idaisaigpajum.
DEU 8:12 Tuja yutai yuwajum ejemagjum shiig aneasjum jega pegkeg jegamkamunum pujakjumesh,
DEU 8:13 nuigtu uwigjum aidau, bakajum aidau, oro aidau, plata aidau, nuigtu tikich wajijum aidau aatus kuashat kawegku wainkugmesh,
DEU 8:14 ememakjum Tuke Pujuu atumi Apajuíjiya nunú atum Egipto nugkanum inaku waitkatai batsatutigmin jiipag,
DEU 8:15 jujamkiag uwejush ishamain dapi aidau, titig aidau ayaunum kuitamjamak, yumi atsutaish nii kayanmayan yumi jiiki uwagtinme tusa amasajua nunú kajimatkigpajum.
DEU 8:16 Tuja nuigtushkam atumi ememataigmin idaimitkagmastatus, tuja nuigtu dekas mina chichamjunash umigtumainash aina tusa dekapjamak atumi wainchatain, tuja atumi muunjum aajaku aina dukesh wainajakchamun uwegshunum manán ayugtabauwai. Nunak nii dekapjamas pegkegnum yaimpaktag tau asa dutijamawajui.
DEU 8:17 “Wainka anentaimsajum: ‘¡Juju waji aina junak mina senchigjai imatikatsjash!’ tiigpajum.
DEU 8:18 Nunak Tuke Pujuu atumi Apajuíjum atumi muunjum aajaku aina nuna anagkuamun umiak, jamamtuchu pegkeg batsamas takastinme tujabiu asamtai, pegkeg pujusa takakjum wajijinau asajum. Nuadui Tuke Pujuu atumi Apajuíjiya duka kajimatkigpajum.
DEU 8:19 “Untsu atum Tuke Pujuu atumi Apajuíjiya nunú umigtsuk, tikich apajuímtai aina nunú emematkugmek, duka ashí ijina utsam atatjume. Junak dekas uminkatnun tajime.
DEU 8:20 Atum Tuke Pujuu atumi Apajuígmin chichame umigtsugminig, nii atumi shiwaajum aidaun ijinatta dutiksag atumnashkam ijipattawai.”
DEU 9:1 “Israel aents aidauwah, antuktajum: Namak Jordán katitkajum atumi shiwaajum aidau senchigtin, atum ainajum aan kuashat, yaaktajish múun peeja apakbau utumainchau aina nunú utuajum depetkatnuk tsawantak jegawai.
DEU 9:2 Nuwiya aents aidauk múun esajam gigante Anac aajakua nunú wegantujai betek aidau batsatui. Tuja atumek dekagme yaunchuk aaja timauwa nunú: ¿Gigante Anac aajakua iman aents aina nunash yaki depetkainta?
DEU 9:3 “Tujash atumnak Tuke Pujuu atumi Apajuíjiya nunú kuitamjamsamtai shimajum nunú shiig dekau amainaitjume. Niig jii kegak ikagnamainchau ashí apeka weama iman asa, nunú aents aina nunak atumesh wainjumin ijinattawai. Tuke Pujuu atumi Apajuíjum tujabiuwa duka imatiksagmek utugchat atsau, nunú aents aidauk shiig wamak jiija utsaakjum ijinattagme.
DEU 9:4 “Tuke Pujuu atumi Apajuíjiya nunú atumi shiwaajum aidaun jiija utsaak nugka amasmataish: ‘See kuashat, ii ima pegkeg ainag duwi Tuke Pujuu juna nugkan amase’, tiigpajum. Wagki Tuke Pujuuk nunú aents aidaunak ditá pegkegchaujin utsagtatui.
DEU 9:5 Tuja atum ima pegkeg asagminkish, atsa nuniachkush atum dekas ima shiig takau asagminkish wait anenjamu asag, nunú aents aina nunak jiijag utsagchattawai. Nunak ditá pegkegchaujin, nuigtushkam atumin apachjum Abraham, Isaac, Jacob aajaku aidaun anagkuawa nuna umiak dutikattawai.
DEU 9:6 Juju shiig dekatajum: ¡Tuke Pujuu atumi Apajuíjiya nunú nugka pegkejan amastata nunak, atum ima pegkeg takau asagminkish amaschattawai! Atumek dekas chicham umichu intimkiu ainagme.”
DEU 9:7 “Uwegshunum batsamsajum Tuke Pujuu atumi Apajuíjiya nuna chichame intimjukiu ainajum nunú kajimatkitin aigpajum. Atumek Egipto nugkanum batsatutigmin Tuke Pujuu jiipajajua duwi nagkamsajum yamaishkam tuke intimjakjum ikaje yujagme.
DEU 9:8 Nuigtushkam muja Horeb pujusjumesh pegkegchau takakjum Tuke Pujuu ikajkauwaitjume. Nuadui Tuke Pujuu atumin senchi kajegtamak ijipamain awagtamkabi.
DEU 9:9 Tuja chicham umiktin agagbaun jukitasan wi mujá weamiajai. Nunikan yujumka yutsuk, umutnash umutsuk cuarenta tsawan nuigtu cuarenta kashi pujuyajai.
DEU 9:10 “Nunika pujai, atumesh ijunjajum diyagmin jii kegamunmaya atum chicham umiktinun Tuke Pujuu ujapakabi. Nunú chichaman jimag kaya pakamamunum nii agagbaun juki sujusabi.
DEU 9:11 Nuwi cuarenta tsawan nuigtu cuarenta kashi ejeyi ai, Tuke Pujuu jimag kaya pakama najanamunum chicham umiktin aidau agagbaun sujusami.
DEU 9:12 Nuna sujusa chichagtak: ‘Amina aentsjum aidau Egipto nugkanum batsatu jiigmayum duka wainak yujawai. Nuniau asamtai wamak wakitkita, wi dita aidaun juju umiktajum tusa tibaunak kajimatkiag idayinak jiju ukuijag nujai dita ememattinum najanawag batsamtuinawai’, tujutiabi.
DEU 9:13 Tuja nuigtu chichagtak: ‘Juju aents aina junak shiig wainkagjai, ditak dekas chichaman shiig intimkiu ainawai.
DEU 9:14 Nunin asagmatai amek dita aidauk chichamjukaipa, wi ditanak ijinan utsagtatjai. Dutika ai nugkanmak makichkish juwakchatnai. Tujash aminiyanak dita aina nuna nagkaesau kuashat aentsun ikaugkattajai’, tujutiabi.
DEU 9:15 “Tujutmatai jii kegamunum mujá pujaun waketkun, chicham umiktin agagbaun jukiamiajai.
DEU 9:16 Nunika atum batsatbaunum jegakman, Tuke Pujuu umiktajum tujabau umitsuk wamak kajimatki idaikujum, jiju ukuijajum nujai toro tsakat dakumka najanajum batsamtautigmin wainkabiajime.
DEU 9:17 Nunika kajekan, jimag kaya pakama najanamunum chicham umiktin aidau agagbau takakbaujun atumesh wainjumin nagkima ajiajan tsaikamiajai.
DEU 9:18 “Nuna dutikan atum yaunchuk pegkegchau takakjum Tuke Pujuu ikajkagmin, wi niina segaakun cuarenta tsawan nuigtu cuarenta kashi yujumka yutsuk umutnash umutsuk pujuyag imanisnuk ataktushkam Tuke Pujuu segaaku pujuyajai.
DEU 9:19 Nuniakun atum aidautigmin nii senchi kajegtamak ijipatag takui puyatiajai. “Tujash Tuke Pujuu wi ataktu segamun antugtuku asa ijipachabi.
DEU 9:20 Tuja Aarógnashkam Tuke Pujuu kajejuk maatag takui, wait aneasam maawaipa tusan ayamjukamiajai.
DEU 9:21 Nuna dutikan nuadui, atum pegkegchau takakjum toro tsakat dakumka najanamugmin jukin jii kegamunum nagkiman patakamiajai. Dutika ai kuwigmatai, dekegka tsaika yukukuntu eman, nunú mujanmaya entsa akagunum ajugka ajapawamiajai.
DEU 9:22 “Tuja nuigtushkam Taberá nugka, Masá nugka, Quibrot-hataavá nugka aina nuwi pujusjumeshkam pegkegchau takakjum Tuke Pujuu ikajkauwaitjume.
DEU 9:23 Atum Cades-barnea pujagmin Tuke Pujuu chichagtamak: ‘Wi nugka amasuitjim nuwi wetajum’, tusa tujamkuish atumek antugtsuk, nuigtush niiyai kajintsa anentaimchau asajum, nii tujabau umigkachuitjume.
DEU 9:24 ¡Atumek yaunchuk nagkamsagmesh intimkiu, Tuke Pujuu umigchau ainajum nunak wika dekajime!
DEU 9:25 “Nunin asagmin Tuke Pujuu ijipatag takui, wi cuarenta tsawan nuigtu cuarenta kashi makichkish ayamtsuk shiig senchi Tuke Pujuu segaakun pujusamiajai.
DEU 9:26 Nuwi pujusan niina senchi segaakun: ‘Tuke Pujuu Apajuíyah, ame tujinmainuk makichkish atsawai. ¡Nuadui juju amina aentsjum aidau, Egipto nugkanum batsatu amina senchigmijai jiijuitam duka, wait aneasam ijinawaipa!
DEU 9:27 Tuja adeagta amina inakem Abraham, Isaac, Jacob aatus aajaku aina nunú. Nuniakum juju aents aina nuna umishtaiji, tuja dita pegkegchauji aina nujai tsagkujam wait anenjata.
DEU 9:28 Wagki Israel aents aina juju ame ijinawaminig, egiptunmaya aents aidau chichagtamainak: “Apajuí Israel aents aidaun kajejau asa Egipto nugkanum batsatun jiija yajuak, nii nugka anagkuawa nuwi ejetsuk jintá uwegshunum ijina utsagke”, tujamain ainawai.
DEU 9:29 ¡Tujash Israel aents aidauk amina aentsjum ainawai! Nuniau asamtai amina senchigmin Egipto nugkanum batsatu jiigmayume’, tusan tiyamiajai” tiuwai Moisés.
DEU 10:1 Tusa tai Tuke Pujuu chichagtak: “Jimag kaya pakamamu yama nagkamchak aajakua nujai betek tsupika umikta. Dutikam nuigtushkam chicham umiktin agagbau egkeatin arca najanata. Dutika nunú jukim mujá wakata wijai chichastasam,
DEU 10:2 nunikamin wi nunú kaya pakama najanamua nuwi chicham umiktin yama nagkamchaku agagbau ame ajiaja tsaikabium nujai betekan agagtajai. Dutikamtai arca numi najanamunum egkeam kuitamkattame”, tujutiabi.
DEU 10:3 Tusa tujutmatai numi acacia tutaiyai arcan najanawabiajai. Tuja nuigtushkam jimag kaya pakamamun tsupika jukin mujá weamiajai.
DEU 10:4 Nunika waka ai Tuke Pujuu nunú kaya pakama najanamunum diez chicham umiktin aidaun yama nagkamchak atumesh wainjumin ashí tuwaka ijunbaunum jii kegamunum tujabiuwa nuna imatiksag agag sujusabi.
DEU 10:5 Dutika sujusmatai nuna jukin mujá pujaun wakitkiamiajai. Nunika jegaan arca najanamunum Tuke Pujuu dutikata tujutbaunak imatiksanuk egkeawabiajai. Duka yamaikish nuwi awai.
DEU 10:10 Tuja wi yama nagkamchaku pujusamiag imanisnuk mujá cuarenta tsawan, nuigtu cuarenta kashi pujusamiajai, nunika pujusan Tuke Pujuu segabiajai, ijinawaipa tusan. Tusa sega ai yaunchuk antugtukua nunisag ataktushkam Tuke Pujuu mina antugtuku asa ijipachabi.
DEU 10:11 Untsu ayatak mina chichagtak: “¡Wamak wakitkita, nunikam umintsam Israel aents aidau yajuakam, wi ditá apachji aajaku aina nuna nugka anagkuawaitag nuwi emata!” tujutmayi.
DEU 10:12 Israel aents aidauwah, atumnash Tuke Pujuu atumi Apajuígmish yamaish ¿wajina segapainawa? Ima nigki eme anentsajum nii tabau betek umiktajum, dutikakjum aneetajum, nuniakjum atumi anentaimijai, wakanmijai ememattajum.
DEU 10:13 Apajuí wakegawai chicham umiktin agagbauwa nuna umiktinme, nuninak shiig batsamsatnume tusa.
DEU 10:14 Tuja nayaim aina duka, nayaimpi yakintin ayá dushakam, nuigtu nugka, tuja nugkanum ayá nujai ashí Tuke Pujuu atumi Apajuíjiya nudau aina nunú dekaatajum.
DEU 10:15 Nunú imanuk ayaig, nuna etegmainaitak, atumi apachjum aajaku aina nuna aneau asa etegkauwai. Nuigtushkam kuashat aents tikich nugkanum ayau dekag nuwiyan etegmainaitak, atumi apachjum wegantunmaya aidautigmin mina aentsug atinme tusa etegtamjauwai.
DEU 10:16 Nuniau asamtai anentainkachu atsuk, Tuke Pujuu atumjai chichaman umikua nunú shiig antukjum kajimattsuk aneaku atajum.
DEU 10:17 Wagki Tuke Pujuu atumi Apajuíjiya duka tikich apajuímtai aina nuna nagkaesau, ashí apu aidaun Apujiyai. Niig dekas Apajuí múuntai, senchigtinai, tuja ishamainai, niig aents aidaunak etegka idaitsuk ashí betek kuitamnai, nuigtushkam wait anenjugti tusa akiamkesh amaitsui.
DEU 10:18 Niig bitaik aidaun, waje aidaun wait anentau asa kuitamui, tuja nuigtushkam tikich nugkanmaya aidau atum batsatbaunum pujuina nunashkam aneau asa, yutain, nugkutaijai suwawai.
DEU 10:19 Nuadui atumek aents tikich nugkanmaya aina nunú aneetajum, wagki atumshakam egiptunmayachuitkujum Egipto nugkanum batsamajakuitjume.
DEU 10:20 Tuke Pujuu atumi Apajuígmia duke ememattajum, nuniakjum ima nigki umigkatajum. Tuja atum umiktina nunú dekas takugmek ima Niina daajinig titajum.
DEU 10:21 Wagki Apajuík dekas múuntai. Iman asamtai, ima nigki emematuinaji. Niyai atumi Apajuíjig, nuniau asa atum aidautigmin ayamjutpak, wainchatai ishamain aidaun iwainajua nunú wainkauwaitjume.
DEU 10:22 Atumi apachjum aidau Egipto nugkanum jegawaju aina duka setenta aentsuk aajaku ainawai. Tujash yamaik, Tuke Pujuu atumi Apajuíjiya nunú shiig kuashat ikauntamak, yaya nayaimpinum ayá ibau kuashat awajtamsaugme.
DEU 12:1 “Atumi apachjum aajaku aina nuna nugken Tuke Pujuu atumi Apajuíjum amastata nuwi jegá pujusjum, chicham tuke umiktina duka juju ainawai.
DEU 12:2 “Nunú nugkanmaya aents aidau atum utuajum depetkattajum nuna ememattaiji aidau muja aidaunum, nain aidaunum, nuigtu numi múun dukentin aidaun wakentin ayá nujai ashí tsaigkajum utsankatajum.
DEU 12:3 Tuja dita apajuímtaijin emematuinak kuntin maa patasa apetai dita najankamu aina duka tsaigkatajum. Nuigtu kaya aidau, numi múun kampujam tsupikbau aidaun aatus dita emematuina duka ashí tsaigkatajum. Tuja nuigtushkam dakumka najanamu ditá apajuímtaiji aina dushakam dutiksagmek tsaika utsankatajum. Dutikamu asa makichkish atsusti.
DEU 12:4 Tikich aents aidau ditá apajuímtaijin emematuinak wajina dutikin ainawa, nujai betekak atumek Tuke Pujuu atumi Apajuíjum emematkugmek dutikawaigpa.
DEU 12:5 “Tuja atum maki makichik wegantu ainajum nuna nugke aina nuwiyan Tuke Pujuu makichik etegkattawai nii pujustinun. Dutikamtai nuwi wejum Apajuí ememattajume.
DEU 12:6 Nuwi kuntin maajum nuna neje ashí apeakjum Apajuí ememattatjume. Tuja nuwi weakjumek, diezmo, tuja atum Apajuí susatasa anagkuamu, tuja atumek anentaimsajum anentag Apajuí suwamu, nuigtu baka uchiji yama nagkamchaku petsakbau, uwija uchiji yama nagkamchaku petsakbau aatus jukijum wetajum.
DEU 12:7 “Nunika nuwi jegajum Tuke Pujuu atumi Apajuígmi emtin yutai yuwattagme. Tuja Tuke Pujuu atumi Apajuíjum yaimpasmatai atumi ajakjum aidaush, tagkujum aidaush kuashat kawegku asamtai, nunú yuwakjum pataim aidaujai ijunjajum shiig aneastinaitjume.
DEU 12:8 “Tuja Tuke Pujuu makichik nugká etegkatta nuanuig, yamai atum wakegamu takajum duka dutikashtatjume.
DEU 12:9 Tujash Tuke Pujuu atumi Apajuíjum nugka pegkeg agkan atum pujustinun amastata nuwig eke jegatsjume.
DEU 12:10 Tuke Pujuu atumi Apajuíjum nugkan amastata nuwi namak Jordán katitki jegajum pujuttajum nuwig, atumi shiwaajum yamai waitkagmaina dutika waitkamak achattagme. Nuadui atumek ishamkagtutsuk pujutnaitjume.
DEU 12:11 Nuniau asamtai wi Apajuí tibaun yamai tajim juka jega pegkejam jegamkatnun Tuke Pujuu atumi Apajuíjum nugka etegkatta nuwi betek umiktatjum duka juju ainawai: Apajuí emematku kuntin maa nuna neje ashí apeamu, diezmo aidau, tuja Tuke Pujuun susatjai tusa etegjamu aidau aatus.
DEU 12:12 Nunú umiakjum Tuke Pujuu atumi Apajuígmia nuna emtin atumi uchijum aidaujai, inakem aidaujai, Leví wegantu aidau nugkenchau atumjai batsata nujai ijunjajum shiig aneakjum dakujustajum.
DEU 12:13 “Kuitamamkatajum, tikich yantamnum yujasjum Apajuí emematji tusajum kuntin maa apé yujaijum.
DEU 12:14 Duka nunitsuk Apajuí atum wegantu aina nuna nugkenian makichik etegkatta nuwi, wi yamai atumi tajim duka dutikattagme.
DEU 12:15 Untsu atumi yaaktajin pujusjum neje yuwatag tusa wakegakjumek, kuntin atumdau aina nunú maajum japa nejejai betek yumainaitjume. Apajuí atum aidautigmin kuntin ikamian, nuniachkush tagkumtai aidaun amastata duka sacerdote Apajuín sega pegkemtijuamtai yuwatjai tusajum dakatsuk, pegkemtikachbau akugmesh, atum wakegakjumek maajum yuwatajum.
DEU 12:16 Untsu kuntinu numpe aina duka yuwawaigpajum, ayatak yumi ukaja ajaptayama dutika ajapatajum.
DEU 12:17 “Untsu trigo, vino, aceite aina nuwiya diezmo Apajuí susatin jukimu aina duka atumi yaaktagmin pujusjumek yuwawaigpajum, nuigtushkam baka aidau, uwig aidau yama nagkamchaku petsakbau aina dushakam yuwawaigpajum. Tuja Apajuí anagkuamu aidau nuniachkush Apajuín anentag susatjai timau aina atumi yaaktagmin pujusjumek dushakam yuwawaigpajum.
DEU 12:18 Untsu Tuke Pujuu atumi Apajuíjum nugka etegkatta nuwi niina emtin atumi uchijum aidaujai, inakem aidaujai, Leví wegantu atumjai batsata nujai aatus ijunjajum nunú yuwattajume. Tuja Apajuí yaimpasmatai atumi ajakjum aidaush, tagkujum aidaush kuashat kawegku asamtai, shiig aneasjum dakujustajum.
DEU 12:19 Apajuí nugkan amastata nuwi batsamsagmesh, Leví wegantu aidau makichkish kajimatki idaisaigpajum.
DEU 12:20 “Tuke Pujuu atumi Apajuíjum nugka muuntan amastinaitjime tusa tujabiuwa nuna imatiksag amasmatai pujusjum, neje yuwatag tusa wakegakjumek, puyatjutsuk atum wakegamu yuwatajum.
DEU 12:21 Tuja Tuke Pujuu atumi Apajuíjum emematku ijuntai atinun nii nugkan etegkatta nunú atushtaitkuig, atumdau baka aidau, uwig aidau, Apajuí amasbau aina duka atum batsatbaunmak maajum nuwig pujusjum, wi atumin timajim dutiksagmek atum wakegamu yuwatajum.
DEU 12:22 Sacerdote Apajuín sega pegkeemtijuamtai yuwatjai tusajum dakatsuk, dutikachbau akugmesh japa neje yumaina dutiksagmek yuwattagme.
DEU 12:23 Untsu kuntinu numpe aina duka makichkish yuwawaigpajum, wagki numpanum pujut au asamtai. Nunin asamtai, pujuta duka nejejai apatkaik yumaitsui.
DEU 12:24 Nuadui yumi nugká ukaja ajaptayama dutika ukaja ajapatajum.
DEU 12:25 Nunú numpa yutsuk idaikugmek, Apajuí emtin pegkeg takau asajum, atumi uchijum aidaujaí shiig pujustinaitjume.
DEU 12:26 “Tuja Apajuín anentag susatjai tusa anentaimtugbau aina nunú, nii susatin anagkuamu aina nujai jukijum Apajuí emematku ijuntai etegkamua nuwi ejegatajum.
DEU 12:27 Dutika ejegajum nuwi kuntin maajum nuna neje altarnum pataijum ashí apeakjum Apajuí ememattajum. Kuntin aidaun numpega duka altar ukatkatajum. Untsu nuna nejega duka yuwatajum.
DEU 12:28 “¡Wi atumin inajim nunú shiig antukjum betek umiktajum, nunú nuniakjum Apajuí emtin pegkeg takau asajum, atumi uchijum aidaujaí shiig pujusminjum!” tiuwai.
DEU 12:29 Moisés Israel aents aidaun ataktu chichajak: “Tuke Pujuu atumi Apajuíjum nugkan amastata nuwiya aents aidaun ijina nugkan amasmatai jegajum pujusjumesh,
DEU 12:30 nuwiya aents aidau ditá apajuímtaijin wajuk emematin ainawa nunú dekatag tusagmek ¡atumek makichkish inima yujaigpajum! Nuní yujasjum atumshakam nunú emematijum.
DEU 12:31 Tikich aidau apajuí emematji tusag dakumak najanawag emematuina dutikagmek Tuke Pujuu atumi Apajuíjiya duka emematigpa, wagki nunin aina duka ditá apajuímtaijin emematuinak, ditá uchiji aidaun maawag jinum apen ainawai. Nunú dutikamua duka Apajuí diismak shiig pegkegchauwai.
DEU 12:32 “Wi juna tajim duka atumek nuwi ekekjumkesh ematsuk, tuja nuigtush esakagjumkesh emegkautsuk, betek umiktajum”, tiuwai.
DEU 13:1 “Namputchawame atum ainajum anuiya makichik aentskesh Apajuí chichamen etsegjai tusa kajanmayan dekau wekagas chichagtamak: ‘Wika dekajai wainchatai aidau atak nagkaemagtata nunak’ tusa tujabauwa,
DEU 13:2 nunú betek imaanisag umintai chichagtamak: ‘Atumi wainchatai, tikich apajuí aina nunú emematmi’, tusa tujamainakuish,
DEU 13:3 duka antugkaigpajum. Wagki nunak Tuke Pujuu atumi Apajuíjiya nunú, dekas minash ashí ditá anentaijijai, wakanijai anentuinawash tusa dekapjamsatatus dutijamawagtatui.
DEU 13:4 Tuke Pujuu atumi Apajuíjiya duke nemagkujum ajaantusjum diitajum. Nuniakjum chicham umiktajum tusa tujamauwa nunú betek umigkatajum. Niina chichame antugkajum umigkatajum, nuniakjum ima niiyaig sumitkau atajum.
DEU 13:5 Tuja nunú aents Apajuí chichamen etsegjai tusa, kajanmayan dekau wekaga duka maatajum, wagki atum Egipto nugkanum waitkam batsatutigmin Tuke Pujuu atumi Apajuíjum agkanmitkagmawajua nujai shiwagmitkagmatatus wakegau asamtai. Nunú aentsua duka Tuke Pujuu atumi Apajuíjum chicham umiktajum tujamauwa nuna datumtijamatag tiuwai. Nunin asamtai nunú aents pegkegchau aidau atumjai batsata duka ijina emegkagtajum.
DEU 13:6 “Amina yatsumkesh, amina uchigmekesh, nawanjumkesh, atsa amina nuwem aneetaigmekesh, nuniachkush amina shiig kumpagmekesh wakenmataik chichagtamak: ‘Apajuímtai tikich aidau ame wainchatain, tuja amina apakesh wainajakchamun emematmi’ tusa,
DEU 13:7 nuwiya aents aina nuna apajuímtaiji aidau atum pujamunum tikiju, nuniachkush atushat ashí tikich nugka aidaunmash ayá nuninun pachis wakenmataik tujamainakui,
DEU 13:8 nunú antugkajum umigkaigpajum. Duka makichkish wait anenjaigpajum. Tuja waittsai tusagmesh puyatjukaigpajum, nuigtush uukaigpajum.
DEU 13:9 Duka dutiktsuk maatajum. Tuja dekatkauk, amea kayai tukua tukuakua maattame. Dutikawamin tikich aidaushkam dutiksag maawagtatui.
DEU 13:10 Apajuí Egipto nugkanum inaku waitkatai batsatutigmin jiigmajajua nujai datumtamain awagtamkau asamtai, duka kayai tukua tukuakuajum maatajum.
DEU 13:11 ¡Nunú dutika ajumin ashí Israel aents aidauk nuna dekawag ishamkagtatui, nunikag ataktu awagkig nunin pegkegchau aina nunak takaschagtatui!”
DEU 18:14 Moisés Israel aents aidaun chichajak: “Atum nugka jukittajum nuwiya aents aina duka anentaimsa atak atinun dekajai tinu aina nuna antuju yujau ainawai. Tujash atumnak Apajuík nuninun takasainum tusa dakitawai.
DEU 18:15 Nuadui Tuke Pujuu atumi Apajuíjiya nunú atum wegantu ainajum nuwiyan makichik profeta witag imajun etegkattawai. Dutikamtai nunú umigkattagme.
DEU 18:16 Atum aidautijum muja Horebnum ijunja batsamsajum Tuke Pujuu segaakjum: ‘Tuke Pujuu iina Apajuíji ataktu chichaakui antutak ishamaji, nuigtushkam jii kega ibau waintash dakitaji jinawaig tuidau asa’ tuyugme.
DEU 18:17 Tusa tajumin Tuke Pujuu mina chichagtak: ‘Dita tuina duka dekas pegkejai.
DEU 18:18 “ ‘Wi dita aina nuwiyan makichik mina chichamjun etsejin amejai betekan dita wegantunmayan etegkattajai. Dutikan wiki nii chichaktinnak jintintuattajai. Nuadui wi tabaun juki etsegtatui.
DEU 18:19 Tuja nuna chichamen antugkachaju aidaunak wi suwimkan susattajai.
DEU 18:20 “ ‘Tuja chichama etsejin wi inagchamaitak, wainak mina daajun pachis chichaushkam, mantamnattawai. Tuja tikich apajuímtai aina nuna daajin wekagas chichaman etsejushkam nunisag mantamnattawai.’
DEU 18:21 “Atum anentaimsajum: ‘Tujash dekas Tuke Pujuu tibaunash etseja tusaish ¿wajuk dekamainaita?’ tusa takugmek juju dekatin atajum.
DEU 18:22 Nunú wekagas atak atinun etsegkatta nunú betek uminchakuig, dekas Tuke Pujuu awemachmawaitkumpap ememak tuu wekaewa tusajum dekattagme. Nuadui nunú aina duka ishamkaigpajum”, tiuwai.
DEU 19:15 “Makichik aents wi wainkamjai takuig dekaskeapi tiigpajum. Untsu jimagkesh, nuniachkush kampatumkesh, ii pegkegchaun takau wainkamji tusa tuinakui, nuadui nunú aents pegkegchau takamsauwa duka suwimak sumainaitjume.
DEU 19:16 “Makichik aents wait wekagas, tikichin chichajak: ‘Juju aents pegkegchaun takase’ tusa tsanumjakuig,
DEU 19:17 duka mai jukijum aak Apajuíjai chichatainum sacerdote aidau, apu chichama epegkin aidau aatus batsata nuwi ejegatajum.
DEU 19:18 Dutika ajumin, chichama epegkin aidau emamkemas shiig dekajuawagtatui. Dutika dekajam dekaskenum jegachmataig,
DEU 19:19 tsanumjuja ai suwimka susatnume tukama tsanumjauwa nunú nigki suwimkanak jukittawai. Aatsa dutikakjum aents pegkegchau aidau atumjai batsata duka ijina emegkagtajum.
DEU 19:20 Nuna dekaawag tikich aidaushkam ishamainak tsanumat pegkegchau aina nunak idaisagtatui.
DEU 19:21 Nunú aents aina duka atumek wait anenjaigpajum. Aents magkagtauk atumshakam dutiksagmek maatajum. Aents tikichi jiin emestauk atumshakam dutiksagmek emestugtajum. Aents tikichi naín emestauk atumshakam dutiksagmek emestugtajum. Aents tikichi uwejen tsupijuk atumshakam dutiksagmek tsupigkatajum. Aents tikichi nawen tsupijuk atumshakam dutiksagmek tsupigkatajum” tawai Apajuí.
DEU 24:1 “Makichik aents nuwena pujau niina nuwe shiig pujachbaun dekajua ajapatag takug, ajapdayatag tusa umitain papii umika nuwen susa idaimainai.
DEU 24:2 “Dutika ajapamak tikich aentsjai aishinmainai.
DEU 24:3 Tuja tikich aents nuna juki pujau dakitak ajapatag takug, dakitajai tusa, papiin umika susa idaimainai. Untsu nunú aishi jakamtaig,
DEU 24:4 yama nagkamchak nuwatkauwa duka ataktu awagkig nuwatmaitsui, wagki nuwa pegkegmachu asamtai. Nunú nuniamua nunak Tuke Pujuu dakitawai. Nuniau asamtai atum aidautigmek nuninuk takasaigpajum. Atum nuniakjum Tuke Pujuu atumi Apajuíjum nugka amastata nunú pegkegchau emaijum.”
DEU 24:5 “Makichik aents yama nuwena pujauk maaniamunmak wechattawai. Nuigtushkam tikich takat aina nunashkam takatsuk makichik mijan pujustatui. Aatus niina nuwejai shiig aneas, yainiak shiig agkan niina jeen pujuttawai.
DEU 24:6 “Atumin diwimjamkatag takuish, trigo chimpia dekeetai kaya ajutjama nunú sujusta, akigkumin awagtuktagme tusagmek jujukigpajum. Nunú dutikakjumek niina pujutji atanmaina numamtin asamtai.
DEU 24:7 “Makichik aents Israel aentskesh nii wegantunak pempeentuki achika juki, niina inaku waitkataiji ematatus, nuniachkush tikich nugkanum sujuktatus wekagu wainkugmek, duka maatajum. Dutikajum aents nuninun takau aidau atumjai batsata duka ijina emegkagtajum.
DEU 24:8 “Tuja lepra achiimakjum jakjumek, sacerdote Leví wegantu aidau wajinjutpatig nunú betek umiktajum. Nuniakjum wi atum umiktinun jintintuawaitjim duka ashí betek umiktajum.
DEU 24:9 Atum Egipto nugkanum waitkam batsatutijum jiinjajum shimagmin, jintá Tuke Pujuu atumi Apajuíjum Marían suwimka suwak itugkauwaita nunú aneaku atajum: Niig Apajuíjai shiwagmagau asa, suwimkan juwak lepran achiimakui.
DEU 24:10 “Tuja atum ijutkamunmaya kuichik tsagkatkugmesh, wi kuichkin tsagkatjam nunú akigkumin awagtuktagme tusajum niina jeen wayagmek niina wajijig jujukigpajum.
DEU 24:11 Ayatak agá wajasjum dakastajum, nuniagmin nii juki amastí.
DEU 24:12 “Tuja aents ujudauch kuichik tsagkatjukta tusa niina jáanchjin amastata duka kashin awagtuktagme tusagmek emetjuawaigpa.
DEU 24:13 Duka dutiktsuk nunú tsawantaik etsa akagai wamak awagtuktajum. Dutikam nuna asepak kanagti. Nuniak nii Apajuín segatjamtatui atumin yaimpakti tusa, aatsa atum dutikamua nunú Apajuín shiig awagbau asamtai.
DEU 24:14 “Aents ujudauch aidau, atumi pataim aidaukesh, nuniachkush tikich nugkanmaya atumi yaaktaji aina nuwi pujuidauk wainka akitsuk takamtikkujum waitkasaigpa.
DEU 24:15 Duka dutiktsuk nunú tsawantaik nii takasbaujiniag akiktajum, wagki niig ujudauch asa sumak yuwatatus atsumawai. Untsu nunú betek umiatsjuminig, nii Tuke Pujuun segattawai atumin suwimkan amastinme tusa.
DEU 24:16 “Múun uchigtin aina duka, niina uchiji aidau pegkegchau takamsamujinig maamak amaitsui, tuja uchi aina dushakam ditá apaji aidau pegkegchau takamsamujinig maamak amaitsui, ayatak maki makichik dita pegkegchau takasbaujin maam agtatui.
DEU 24:17 “Bitaik aidaush, tikich nugkanmaya aidaush wainka waitkasaigpajum. Duka dutiktsuk dita atsumainakuig yaigtajum. “Tuja waje kuichik tsagkatkugmesh, akigkumin awagtuktagme tusagmek niina jáanchjig jujukigpajum.
DEU 24:18 “Atum Egipto nugkanum makichkish ayamjumamainchau inaku waitkatai batsatutigmin Tuke Pujuu atumi Apajuíjum jiipajua nunú kajimattsuk aneaku atajum. Nuadui wi atum aidautigminak juju ashí umiktajum tusan tajime.
DEU 24:19 “Tuja trigo juwamunum makichik trigo jigkamu kajimatkigmesh waketjukmek jukigpajum. Duka idaisatajum aents tikich nugkanmaya aidau, waje aidau, bitaik aidau nuna juki yuwatnume. Aatsa dutikagmin Tuke Pujuu atumi Apajuíjum takatjumin pegkegnum yumigtamsattawai.
DEU 24:20 Olivon neje juwaakjumesh, kanawen ampinjau juwaktata duka waketjukmek juukaigpajum. Duka idaisatajum aents tikich nugkanmaya aidau, waje aidau, bitaik aidau nuna juuká yuwatnume.
DEU 24:21 Uva ajakbaunmaya nuna neje uva juwaakjumesh, ampinjau juwaktata duka waketjukmek juukaigpajum. Duka idaisatajum aents tikich nugkanmaya aidau, waje aidau, bitaik aidau nuna juuká yuwatnume.
DEU 24:22 Wagki atumshakam Egipto nugkanum inaku waitkatai batsamajakuitjum nunú aneaku atajum. Nuadui wi atum aidautigminak juju chicham ashí umiktajum tusan tajime.”
DEU 25:1 “Aents utugchatjin diták epegmainchau dekapenakug, chicham epegkeaku ijuntainum suwimka jukiagtatus weagtatui, nunikmatai chichama epegkin shiig dekajua, yakita utugchatjinnush nuna suwimka suwak tikichnak akupkattawai.
DEU 25:2 Aents utugchatji aja nunú asutnati takug, chichama epegkin aidau nugká aepsatajum tusa tima aepsagmatai, nii pegkegchau takamsamujin diijus suwimka suwinak asutiawagtatui.
DEU 25:3 Tujash nunú aents utugchatji aja nunak cuarentaya nuna ewaekag asutiachagtatui, wagki imatika asutiamak suwimak shiig múun asamtai, atumi pataim datsan diimain asajum.
DEU 25:4 “Tuja toro trigon dajag akaak wekaeta nuna wenig jigkatuawaigpa yuwati.”
DEU 25:5 Jimag uchi akiamu makichik nugkanmak pujuidau niina yachi nuweena uchin akiitsuk jakamtaig, wajea duka tikich aentsjaig aishinmaitsui, ima niina wajejiya duke niinak nuwatmainai. Dutika nuwatuk uchin akia, niina yachi uchijiya nunin emattawai.
DEU 25:6 Nuadui yama nagkamchak nuwa uchi aishmagkun uchigmaktata nunak niina yachi daaji aajakua nuna adaikattawai, wagki nuna daaji Israel aents aidaunum megkaekai tau asa.
DEU 25:7 Untsu nuwatkashtatjame tusa niina wajeji dakitamak, chicham epegkeaku ijuntainum jeganta Israel aents aidaun apuji aidaun chichajak: “Mina wajejuk niina yachi daajiya nunú Israel aents aidaunum megkaekai tutan dakitawai. Nuniau asa mina nuwatjutan dakitawai”, tumainai.
DEU 25:8 Tusa timatai apu aidau nuna untsukag, niijai chichamain ainawai. Untsu tusa tama, nii chichaak: “Wika niinak nuwatkashtatjai”, tusa tutaik,
DEU 25:9 Israel aents aidaun apuji aidau wainbaunum, nuwa niina wajejin jegantun sapat wegamakbaujin makichik jujuktatui, dutika yapinum usukia chichajak: “¡Aaja jutiktaya aents wajejin juki niina yachi uchiji atinun akiitan dakitauk!” titatui.
DEU 25:10 Dutikamu asamtai nuna patayi niina jeen batsata duka Israel aents aidaunmak “sapatji atankimu” tutai agtinai.
DEU 26:1 Tuke Pujuu atumi Apajuíjum nugka atumdau atinun amasagtata nuwi jegajum pujusjum,
DEU 26:2 ajak ajakmattajum nunú nejekmatai, yama nagkamchaku juuktatjum nunú makichik chagkinnum chimpia jukijum Apajuí ememattai atinun nii etegkauwa nuwi ejegatajum.
DEU 26:3 Dutikajum sacerdote puja nunú chichagkujum: “Wi mina Apajuíju emtin titatag nuna ashí tikich aidaush antuktinme: wika yamaik mina apachug aajaku aina nuna Tuke Pujuu Apajuí chichajak: Ame wegantu aidaun nugka susatnaitjai tusa anagkuawa nuwi taa pujajai”, titatme.
DEU 26:4 Tusa tiyamin nunú chagkinnum aimka ejeentamun sacerdote juki altarnum ejeenta nuna niimtika apusattawai.
DEU 26:5 Dutikamtai Tuke Pujuu amina Apajuígmi emtin ame chichaakum: “Mina apachug arameo aents aajaku aina duka kuashtachu, nuigtush nugkenchau yujajaku ainawai. Nunik yuja yujakua Egipto nugkanum shiyakag nuwi batsamsajui. Nuwi kuashat tsawan batsamas shiig kuashat yujakag senchigtin wajasajui.
DEU 26:6 Tujash egiptunmaya aents aidau shiig kuashat waitkagmasu ainawai. Dutijamainak wainka inatai etamiag waitkagmasajui.
DEU 26:7 Imatijamainakui Tuke Pujuu iina apachji aajaku aina nuna Apajuíji yaimpakti tusa segayaji. Nunú ii sumamun antugtamak, nuigtushkam inapainakui takainaku kuashat waituinamun waipaku asa,
DEU 26:8 niina senchijijai ishamain wainchatai aidaun iwainag, Egipto nugkanum batsatutin jiipagmayi.
DEU 26:9 Dutika jiipag jujamki imajui itagmauwai. Dutika itagma juju nugka pegkeg ajak shiig tsapaa imajun amase.
DEU 26:10 Nunú nugkan Tuke Pujuu Apajuí sujusua nuwi ajakmamunmayan yama nagkamchaku juukbaun juki itaajai”, titatme. Tusa tamawaik chagkinnum ajak juuka aimkamu pujau jukim altarnum ejeentam apusattame. Dutikam nuwi Tuke Pujuu amina Apajuígmi emtin tikishmaja pujustatme nii emematkum.
DEU 26:11 Nunika emematim, amina pataim aidaujai, Tuke Pujuu amina Apajuíjum atumin amasbau aina nunú anentaimtusam shiig aneakum jiistamata. Nuniamin Leví aents aidau, tuja aents tikich nugkanmaya atumjai batsata dushakam, atumjai ijunag jiistamatnume.
DEU 26:12 “Mijan kampatuma nunú jegamunum Tuke Pujuu susatin diezmo jukitajum tusa timauwa duka, ashí ame ajak ajakmamua nuwiya akanja umikta. Dutikam Leví wegantu aidau, aents tikich nugkanmaya aidau atumjai batsatu, tuja bitaik aidau, waje aidau aatus atumi yaaktaji aidaunum batsamas, dita wakegamun yuwatnume tusam ashí susata.
DEU 26:13 Dutikam Tuke Pujuu amina Apajuígmi emtin chichaakum: ‘Wi ajakmamu aina nuwiya juuka ijumjamunmayanak, diezmo Tuke Pujuu susatnun akankajai. Nuna Leví wegantu aidaun, tikich nugkanmaya jutijai batsata nuna, bitaik aidaun, waje aidaun aatsan ashí tinamkajai, ame umikta tujutbauwa nunak ewaetsuk, nuigtush makichkish kajimattsuk.
DEU 26:14 Tuja nunú diezmo akankamua nunak jakamunum buutku pujaknush, pegkegchau wajasa pujusnukesh, makichkish yuwachmajai. Tuja jakau aina nunakesh anagkuachmajai. Tuke Pujuu mina Apajuíjuh, wika ame umikta tujutbaunak betek ashí umikjai.
DEU 26:15 Amek nayaimpinum amina pujutaijum pegkegma nuwi pujusam, amina aentsjum Israel aents aidau ame nugka pegkeg shiig ajak tsapau susamua nuwi batsata nunú pegkegnum yumigkiakum, iina apachji aajaku aina nunú anagkuawaitam dutiksamek kuitamkagtukta’ titatme”, tiuwai.
DEU 26:16 “Tuke Pujuu atumi Apajuíjiya nunú chicham umiktin aina nuna umiktajum tusa yamai tujamainawai. Nunú betek atumi anentaimjai, wakanmijai umiktajum.
DEU 26:17 Apajuík dekas iina Apajuíjiyai. Nuadui atum chichaakjum: ‘Nii tujabauwa duka betek umikagmi, nuniaku niina chichame umiktin agagbauwa dushakam tuke umiktin agmi’, tusajum yamai tiugme.
DEU 26:18 Nuadui Tuke Pujuushkam nii anagtamauwa nunak imatiksag yamai chichaak: ‘Israel aents aidauk tikichdauk amaitsui, ima mina aentsjuk ainawai’, tujamui. Nuadui niina chichame umiktin agagbauwa duka betek umiktajum
DEU 26:19 Tuja atum ima nigki umigkugmek, tikich aents aidau nii najankamu batsata nuna nagkaesau shiig kuashat, senchigtin, ajaantusa diitai atatjume, tusa Tuke Pujuu atumi Apajuíjum tujamui.”
DEU 30:1 Moisés Israel aents aidaun chichajak: “Atum Tuke Pujuu atumi Apajuíjum umigjuminig, nii pegkegnum yumigtamsagtinai. Untsu atum nii umigtsugminig, pegkegchaunum yumigtamjagtatui. Tuja atum betek umigtsugminig, atumi nugken ukumtijamki atushat tikich nugkanum ajapjamawagtatui. Dutijamawagmatai nuwi pujusjumesh, wi yaunchuk tibaijim nunú yamai tajim nujai adeagtin atajum. Nuniakjum,
DEU 30:2 pegkegchau takatak idaikujum wi tajim dutiksagmek, atum aidautijum uchijum aidaujai betek ataktu Tuke Pujuu atumi anentaimijai, wakanmijai umigkatajum.
DEU 30:3 Nuniagmin Tuke Pujuu atumi Apajuíjiya nunú suwimka amamainun wait anenjamag pegkegnum yaimpakagtinai. Nuadui Apajuí atumin suwimkan amaak, shiwag depetuk yajuaktinme tibau umintai, depetamak yajupakagmatai, tikich nugkanum batsatutigminash Tuke Pujuu awagtamkiag nii nugkan amasua nuwi itagmawagtinai.
DEU 30:4 Tuja atumi shiwaajum aidau depetamak yajupakagmatai pampagjum, tikich nugkanum shiig atushat batsatutigminash, Tuke Pujuu atumi Apajuíjiya nunú yajupak,
DEU 30:5 atumi apachjum batsamajakua nuwi ataktu awagtamki itagmawagtinai. Dutijamawagmatai atum yaunchuk batsamajakuitjum nuwig batsamsatnaitjume. Nuwi batsamsajum Tuke Pujuu yaimpasmatai, takatjumin emkatnaitjume. Nuniakjum atumi apachjum uchigtin aajaku aina nuna nagkaesau kuashat uchigtin atinaitjume.
DEU 30:6 Tuke Pujuu atumi Apajuíjum atumjai, tuja atum wegantu agtinjai chichaman umikua nunú kajimattsuk aneaku atajum. Nuniakjum atumi anentaimijai, wakanmijai Apajuí aneau asajum iwaku pujusminjum.
DEU 30:7 “Tuja atumi shiwaajum aidau kajegtamainak, aintamiagtina nunú waittsatnume tusa Tuke Pujuu atumi Apajuíjum ditan pegkegchaunum yumigjatnai.
DEU 30:8 Dutikamtai atumek Tuke Pujuuwai ataktu wakitkijum nii umigkatnaitjume. Nuniakjum chicham umiktin agagbauwa nuna wi yamai umiktajum tajim nunú ashí umiktin atajum.
DEU 30:9 Nuniagmin Apajuí atumi takatjumnash, uchigminash, tagku tsakapatnumash, ajak ajakma juutnumash kuashat ikauntugmaktinai. Nuna Tuke Pujuu atumi Apajuíjum diisa shiig aneastinai, wagki yaunchuk atumi apachjum aajaku aina nuna yaigkua dutiksag atumnashkam yaimpau asa.
DEU 30:10 Aatus shiig anenjusti takugmek, Tuke Pujuu atumi Apajuíjum nemagkujum niina chichame umiktin papiinum agagbauwa nunú umiktajum. Nunú umiakjum atumi anentaimijai, wakanmijai ima nigki ememattajum.
DEU 30:11 “Juju chicham umiktin agagbauwa juna yamai wi amaajim duka, atuminig imanikag utugchatchauwai. Nuniau asamtai, shiig antuka umimainchaukesh atsui, wagki atushtakesh achau asa.
DEU 30:12 Tuja chicham umiktin agagbauwa duka nayaimpinmakesh atsui. Nuadui atumek: ‘¿Yaki nayaimpinum waka, chicham umiktin agagbauwa nuna juki itaa ujapakui antuka umikag?’ tumaitsugme.
DEU 30:13 Nuniachkush nayantsa amainigkish atsui. Atum chichaakjum: ‘¿Yaki nayantsa amain chicham umiktin agagbau awa nuna katituk juki itaa ujapakui antuka umikag?’ tumaitsugme.
DEU 30:14 Chicham umiktin agagbauwa duka atumin awai. Nuadui wi atumin umiktajum tiuwaitjim nunú antukjum unuimaju asajum, utugchat akuish betek umiktajum.
DEU 30:15 “Tuja yamai atum etegkatajum tuu wakegagme nunú. Shiig pujutak wakegajum, atsa waitiamua duka wakegajum. Iwaku pujuta duka wakegajum, atsa jaka megkaetak wakegajum.
DEU 30:16 Wi yamai atum aidautigmin umiktajum tusan tajim duka Tuke Pujuu atumi Apajuíjum aneau asajum betek umiakjum, nii nemagkujum chicham umiktajum tusa agagbauwa nunú betek umiakjumek, iwaaku pujusjum, uchi uyujkattagme. Nuigtushkam Tuke Pujuu atumi Apajuíjum pegkegnum yumigtamsagtinai, nii nugka amasua nuwi shiig pujustinme tusa.
DEU 30:17 Untsu atum nunú ashí umitsuk idaikujum wainka apajuímtai aidau tikishmatjajum emematu yujakjumek,
DEU 30:18 namak Jordán katitkajum Apajuí nugkan amastata nuwi jegagmesh, kuashat tsawan pujutsuk jinaatin ainagme, wi tajim duka ewaetsuk.
DEU 30:19 “Wi atumin chichagkun: ‘Shiig pujutak wakegajum, atsa waitiamua duka wakegajum, tuja iwaku pujutak wakegajum, atsa jaka megkaetak wakegajum, nunú atum etegkatajum’ timajim nunú tuké uminkatnun yamai wi taja nunak nayaim nugkajai antamunum tajime. Duka dekas etegkatajum iwaku pujuta nunú, atum wegantu agtina dushakam iwaku pujustin atinme.
DEU 30:20 Tuke Pujuu atumi Apajuíjiya nunú ima aneetajum. Nuniakjum nii umigkatajum. Tuja nii tabauwa nunú betek umigkatajum. Nunú betek umiakjumek, atumi apachjum Abraham, Isaac, Jacob aatus aajaku aina nuna Tuke Pujuu atumi Apajuíjum nugkan amastinaitjime tusa anagkuawa nuwi jegajum kuashat tsawan pujustinaitjume”, tiuwai.
DEU 31:1 Moisés Israel aents aidaun ataktu chichajak, juna aatus tiuwai:
DEU 31:2 “Wika yamaik ciento veinte mijan ejejai, nuniku asan atushat wetag takunush kakaumainchau dekapeajai. Nuigtushkam minak Tuke Pujuu chichagtak, amek namak Jordágkak katitkashtatme tusa tujutmayi.
DEU 31:3 Tujash atumek Tuke Pujuu atumi Apajuíjiya nunú eemak wegak uyuuntamsamtai wetatjume. Tuja atum shimamunum shiwaajum ayaunashkam nii depetuk ijinattawai. Dutikamtai dita nugke aina duka atum jukittagme. Atumnak Josué apu wajasu asa, nii yajupak etamtatui Tuke Pujuu atumi Apajuíjum tibauwa nunak dutiksag.
DEU 31:4 “Atumi shiwaajum aidaunak Tuke Pujuu yaunchuk amorreo aents aidau apuji, Sihón, Og, aatus ashí dita aentsjijai ijinauwa dutiksag ijinattawai.
DEU 31:5 Nunú aents aina nuna depetkatnume tusa nii tujamatai depeteakjumek, wi dutikatajum tusan tajim duka dutiksagmek umiktajum.
DEU 31:6 Mijamtsuk wajiu wajastajum. Atumi shiwaajum aina nujai maaniakjumesh ishamkagtukaigpa, wagki Tuke Pujuu atumi Apajuíjum atumnak kuitamjamui, nuniau asa ima atumnakek kajimatjamkig idaitamsashtatui”, tiuwai.
DEU 31:7 Nuna tusa Josuén untsuka Israel aents aidau antuinamunum chichajak: “Amek mijamtsuk wajiu wajasta, ametme juju aents aina nunú yajuakam Tuke Pujuu nugka amastinaitjime tusa amina apachjum aajaku aina nuna anagkuawa nuwi ejegatnumek. Nuadui Israel aents aina duka ame yajuakam nunú nugka nuwig utsattame.
DEU 31:8 Tuke Pujuu aminak uyuuntamak, nigki kuitamjamkattawai. Nuniau asa ima aminakek kajimatjamkig idaitamsashtatui. Nuadui amek ishamkagtukaipa tuja sapigmatash sapigmakaipa”, tiuwai.
DEU 31:9 Juju chicham umiktin aina nunak Moisés agajui. Tuja sacerdote Leví wegantu aidau Tuke Pujuu chichame umiktin agagbau egkeamun arcan yanakiag shimujakajua nuna ashí Israel aents aidau dita apuji aidaujai kuitamkatnume tusa susauwai.
DEU 31:10 Nuna susa chichajak: “Mijan sieteya nunú diwimdaikamu aidau tsagkugdaitai jegatta duwi, ashí Israel aents aidautijum ijunjajum tsawan numi kanawe tsupija aakmaja batsamsamua nunú tsawantin jiistamatajum.
DEU 31:11 Nuadui ashí Israel aents aidau Apajuíjai chichatai aak pegkejam carpa aakmakbauwa nuwi tuwakag antuinamunum chicham umiktin agagbauwa nuna ausattawai.
DEU 31:12 Ashí aents aidau: Aishmag, nuwa, uchi, aents tikich nugkanmaya atumjai batsatu aidaushkam ijunjatnume. Nunikag chicham umiktin agagbauwa nunú augbaun antukag Tuke Pujuu Apajuí eme anentsa diitan unuimagtinme. Nuninak wajintu agagbauwaita nuna ashí betek umiktinme.
DEU 31:13 Atumi uchijum aidau juju chicham umiktina nuna dekachu aidaush antukag, Apajuí nugkan amasagtata nuwi namak Jordán katitkajum batsamsattajum, nuwi batsamsash kajimattsuk Tuke Pujuu Apajuí eme anentsa diitan unuimagtinme”, tiuwai.
DEU 31:14 Nuna tusa inagnaku ai, Tuke Pujuu Moisésan chichajak: “Ame jakatnuk tsawantak jegawai. Nuniau asamtai Josué untsukam niijai aak pegkejam aakmakbauwa nuwi tantatajum. Nunikagmin wi atum dutikatnun jintintuatjime”, tiuwai. Tusa tima Moisés Josuéjai aak pegkejam Apajuíjai chichatai aakmakbaunum weajui.
DEU 31:15 Nunik jegawagmatai Tuke Pujuu nuwi yujagminum pachitkau wantintuk, nunú aak pegkejam aakmakbau waitijin wajantun asauwai.
DEU 31:16 Nuwi Apajuí Moisésan chichajak: “Ame jakatnuk namput wajaschae. Nunika jakamin juju aents aina duka nugkan jukiagtata nuwi jegawag, nuwa aishin ukuak tikichjai weama numamtuk nuwiya aents aidau apajuímtai aina nuna emematuinak minak kajimatjukiag, wi ditajai chichaman umikuitag nunashkam umikchagtinai.
DEU 31:17 Nunidau asagmatai wishakam senchi kajegkan makichkish puyatjutsuk idaisagtinaitjai. Dutika ai shiig senchi waitu batsatu asa makichik tsawantai chichainak: ‘Ii senchi waituinag duka Tuke Pujuu iina Apajuíji idaitamsa nuadui imanika waituinaji’, tiagtinai.
DEU 31:18 Nuna tusa tuinakuish, wika ditanak antugtsuk idaisagtinaitjai, wagki pegkegchaun takainak tikich apajuímtai aidaun ememetiaju asagmatai”, tiuwai.
DEU 31:19 Nuna tusa Moisésan chichajak: “Juju kantamtaiya nunú yamai agagta. Dutikam Israel aents aidau jintintuata. Nuna unuimajag, kantamainak chicham umiachkugminig, wi suwimka amastinaitjime, tusa tiuwaitag nuna tuke adeagtin atinme.
DEU 31:20 Wagki wi dita apachji aajaku aina nuna anagkuakun, nugka pegkeg ajak shiig tsapaun amastinaitjime tusa tiuwaitag nuwi yajuakan ejegawaja ai batsamas, shiig yuwawag ejemakag duwekag tikich apajuímtai aidaun emematuinak mina kajimatjukiag, wi ditajai chichaman umikuitag nunak umikchagtinai.
DEU 31:21 Nunik batsamas kuashat waituinak, juju kantamtainum agagbau chichaak: ‘Atum mina umigtachkugminig tuke suwimkan amastinaitjime’ tiuwaitag nuna adeagtin atinme. Tuja dita wegantu aidaushkam nunú kantamtaiya nunak kajimattsuk kantamtin ainawai. Wi nugka amastajime tusa tiuwaitag nuwi eke ejetsaig, nuwi jegawag dita pegkegchau takastinjinak emtika anentaimtuina nunak wika shiig dekajai”, tiuwai.
DEU 31:22 Tusa tima, nunú tsawantaik, Moisés kantamtain agajui. Dutika agag Israel aents aidaun jintintuauwai unuimagtinme tusa.
DEU 31:23 Tuja Josuén Tuke Pujuu juna aatus chichajak: “Mijamtsuk wajiu wajasta, ametme juju aents aina nunú yajuakam wi nugka amastinaitjime tusan anagkuawaitjim nuwi ejegatnumek. Tuja wi aminak kuitamkattagme”, tiuwai.
DEU 31:24 Tuja chicham umiktin aidaun Moisés papiinum agag ashimak,
DEU 31:25 sacerdote Leví wegantu aidau Tuke Pujuu chichame umiktin agagbau egketun arcan yanakiag shimujakajua nuna chichajak:
DEU 31:26 “Juju chicham umiktin agagbauwa nunú jukijum Apajuí chichaman atumjai umikua nunú agagbau egkeamu arca puja nuwi ayauntsa apusatajum. Juju agagbauwa nunú atum Tuke Pujuu atumi Apajuíjum umigchakjum waittsatnaitjum nuna anemtijamjatnai.
DEU 31:27 Wagki atumek aents antakchau intimkiu ainajum nunak wika shiig dekajai. Wi atumjai iwaku pujag duikish atumek Tuke Pujuujai shiwagmaejume. Nunin aidautigmesh ¿wajukatnuk ainagme wi jakamtaish?
DEU 31:28 “Leví aents aidautijum, Israel aents aidaun apuji aina nunú, tuja nuigtu maki makichik wegantu aina nuna apuji múun aidaujai, ashí untsukjum ijumjatajum. Dutikawagmin wi atum aidautigmin jintintuajim dutiksanuk ditanash shiig ujakagtajai. Dutikakun nayaimpin nugkajai pachisan dita antuinamunum dekas uminkatna nuna titajai.
DEU 31:29 Wagki wi jakamtaig pegkegchaun takainak wi dutikatajum tiuwaitag nuna idaisagtina nunak wika dekajai. Nuigtush atak tikich tsawan atina duwi Apajuí emtin pegkegchaun taka batsamas Tuke Pujuu kajegka suwimak susam kuashat waittsagtina nunashkam dekajai”, tiuwai Moisés.
DEU 31:30 Nuna tusa Israel aents aidau ashí tuwakag antuinamunum yama nagkamchaku agagbaunum nagkama juna aatus Moisés kantamauwai:
DEU 32:1 “¡Nayaimpih, nugkah, wi chichaktatag nunú shiig antuktajum!
DEU 32:2 Wi jintinkagtamua duka yumijai betek yutugtatui, Mina chichamjuk yumi sajatama nujai betek atatui. Yumi ujumak yutug chijichin uchupiama nujai betek atatui. Yumi senchi yutak dupan uchupiama nujai betekai.
DEU 32:3 Tuke Pujuu daaji pachisan nigka pegkejai, múuntai tusan etsegkatjai. ¡Atumshakam, iina Apajuíjiya duka dekas múuntai titajum!
DEU 32:4 Niyai iina kuitamjamnuk. Nii takamujiya duka betek uminnai. Niig Apajuí dekaskenum chichauwai. Niig pegkegchaunak takachui. ¡Niig pegkegmai, tuja nuigtush waitjuchui!
DEU 32:5 “Israel aents aidauwah, atumek pegkegchau ainagme. Pegkegchau takakjum Apajuí ikajin ainagme. Nunin asajum Apajuí uchijig amaitsugme.
DEU 32:6 Tuke Pujuu atumin kuitamjama duwika ¿aan iikuajum? Atumek yachachu, anentainkachu ainagme. ¿Apajuíchukai atumi apa najapauwa nunú? ¡Apajuíyai amina najapa uyujtamak senchimtijamauwa duka!
DEU 32:7 Ataktu awagkijum anentaimsatajum, nuniakjum adeagtajum yaunchuk aajakua nunú. Tuja atumi apaji aidau, tikich múun aidaujai yaunchkesh pujutash wajuku ayi tusajum iniastajum.
DEU 32:8 Apajuí aents aidaunak akanag maki makichik chichamtin, nugkentin emak batsasui; tujash atum Israel aents aidautigminak Apajuí makichik nugkanmak ijupag kuitamjamui.
DEU 32:9 Apajuík Jacopa uchiji wegantunmaya aidautin etegtamjauwai niinu agtinun.
DEU 32:10 “Nuadui, uwejush nugka buku, yumi atsau, dase umputainum batsatjin, nii kuitamjamak jintinjamauwai. Dutijamak makichik aents niina jiin shiig kuitamama imatikas kuitamjamkauwai.
DEU 32:11 Apajuík ukukui niina nanapen uchijin dukuka kuitamama numamtuk iinak kuitamjamnai. Apajuík, ukukui niina uchijin kuitamak niina nanapen pataja juwama numamtuk kuitamjamak ishamainnumian uwemtijamjauwai.
DEU 32:12 “Tuke Pujuuwa nunuwai iina uyuntamsauwa duka, tikichik atsawai. ¡Tikich wainka apajuímtai aina duka makichkish yaimpakchauwai!
DEU 32:13 Apajuí depetmitkagmak jujamki nugka pegkeg ajak shiig tsapau, nain aidaun sujamsaje. Nuwiya dapa yumiji buchignum ayaun amasaje uwagtinme tusa. Nuwiya ajak aina nunashkam amasaje yuwatnume tusa. Tuja nugka kuashat kayagkamunum olivo ayá nuna aceitejinchakam amasaje.
DEU 32:14 Tuja baka aidau muntsuji ijugbau kantemtikamu aidau, tuja uwija muntsuji ijugbau aidau kuashat ajutjamiugme. Tuja uwig duwejam aidau, uwig tsakat duwejam aidau, nuigtu cabra shiig kuashat Basán nugkanum aijakua nuna neje yuuyugme. Nuigtushkam trigo shiig pegkeg yuuyugme, niniakjum uva yumiji ijugbau kapantu umuyugme.
DEU 32:15 “Tujash Jesurún aidautigmek kuashat tagkugtin, kuashat ajakjintin wajasjum nunú yuwakjum duwekugme. Imanika duweku asajum, kuntin uduejam niina ujen winchamtin wajas pempeentuki niina kuitamnun tukumama numamtuk Apajuí shiwagmauwaitjume. Apajuíyai atumi najapauwa duka. Nunin aig atum dakitakjum idaisauwaitjume. Apajuíyai atumin kuitamjamak uwemtijamjauwa duka. Nunin aig atumek kajegkauwaitjume.
DEU 32:16 Atumek dakumka najanamu aidaun Apajuí dakita nunú emematkujum, Apajuí senchi ikajkauwaitjume.
DEU 32:17 Nuadui Apajuí emematmaina nunú idaikujum, wainka apajuímtai aina nunú ememattag tusajum kuntin maajum apejakuitjume. Atumi apachjum aajaku aina dukesh wainajakchamu, tuja ememattanakesh emematchaju aina nunú, atumek yama wainmawaik emematjume.
DEU 32:18 Israel aents aidauwah, atumek atumi Apajuíjum kuitamjamna duka kajimatkiugme. Apajuí pujutan amasua nunú kajimatkiugme.
DEU 32:19 Nuadui Tuke Pujuu atumnak, niina uchiji nawanji ajuminig idaitamsaje.”
DEU 32:20 Nuadui Apajuí chichaak: “Atumek aents pegkegchau ainagme. Atumnak kajittsa diimainchau dekapeajime. Nunin asagmin atumnak nuigtuk yaigchattajime. Wajukatagmek nuna dakastajime.
DEU 32:21 “Atum aidautijum wainka apajuímtai kakakchau, dekachu aina nunú emematkujum mina kajemtijakjum akasmau etagme. Nuadui Israel aentschau aidau chichagmash makichkish antakchau aina nuna wi yayaakui, atumek kajeakjum waittsattagme.
DEU 32:22 Mina kajetjua duka jiijai betek kegawai. Iman asa ashí nugka najatamunum kegak nugkanak ajak aidaujai apea emegkaktatui. Nuniak muja aidaunmashkam keettawai.
DEU 32:23 Wi atum aidautigminak ashí pegkegchau aina nuna ishitkattajime waittsatnume tusan.
DEU 32:24 Dutika ai nujantai, nuigtu tsuweakjum jinattagme. Tuja jata ishamain iyanjamag ijipattawai. Nuigtushkam kuntin kajen aidaun, dapi aidaun ishitkattajime.
DEU 32:25 Atumi uchijum aidauk jintá maa aepeam agtinai. Tuja atumi jeminia aidaushkam senchi sapigmagtinai. Imaaninak uchi tsakat aidau, nuwauch tsakat aidau, múuntuch aidau, uchi muntsu muntsuaku aidaush jinawagtinai.
DEU 32:26 “Tuja wi anentaimsan, tikich nugkanum dapampaakan utsagtajai, dutika ai dita wegantu aidau megkaejamtai, pachisaish augmatchatai juwaktin ati tusan anentaimsabiajai.
DEU 32:27 Tujash nuna dutika ai shiwag aidau mina pegkegchau chichagtuinakui, antutan dakitakun dutikachmaijai. Wi dutika ai mina shiwag aidau ememas chichainak: ‘Tuke Pujuu Israel aents aidaunak jiijag utsagchabi, jutii aidauti iina senchijijai jiija utsagmaiji’, tumain asagmatai idaisabiajai.
DEU 32:28 Israel aents aidauk pegkegchau shiig anentainkachu ainawai.
DEU 32:29 Atumesh shiig anentaimkau ainakjumek, wi suwimkan amastinaitjime tusan tiuwaitjim nunú shiig dekau amainaitjume.
DEU 32:30 Atumesh anentaimsagmesh diyagmek, ¿atumi shiwaajum aina nuwiya suntag ima makichkitak mil suntag Israel aents aidaun ipisig ishiakua dusha? ¿Tuja atumi shiwaajum jimagchik suntajaitak, diez mil suntag Israel aents aidaun ipisjauwa dusha? Nunak Tuke Pujuu atumi kuitamjamna nunú, shiwag aidau depetuk amuktinme tusa tiu asamtai dutijamau ainawai”, tiuwai.
DEU 32:31 Iina shiwaaji aina nuna apajuímtaiji aina duka iina Apajuíjiya nujaig betekchauwa nunak ditak shiig dekainawai.
DEU 32:32 Dita aidauk sodomanmaya aents, gomorranmaya aents aajaku aina nujai betek ainawai, nuadui dita aidauk uva pegkegchau yapau yuwa jamainun nejemaina nujai betek ainawai.
DEU 32:33 Nunú vino dita umutaiji aina dushakam dapi tsagke magkagtina nujai betek ainawai.
DEU 32:34 Tuja Apajuí chichaak: “Wi Israel aents aidaun ayamjakun dita shiwaaji aidaun tsaiktinaitag nunak etsegkashtatjai. Duka makichik waji akik uukam egkemama numamtinai.
DEU 32:35 Witjai suwimka sukagtinnuk, nuniau asan tsawan jegakui, wi suwimkanak susatnaitjai, wagki nii waittsatna duka tsawantak jegawai. Tuja nii suwimak jukitnuji umigkamua duka tsawantak uminui”, tiuwai Apajuí.
DEU 32:36 Tuke Pujuu niina aentsji aidau kakaag ayamjumamainchaun wainu asa ayamjuktatui. Ditan ashí amuinak aents inaku waitkatai, tuja agkan batsamin aina nujai amukam kakaumainchau dekapeagtai, Apajuí wait anentug,
DEU 32:37 chichajak: “¿Ii apajuímtaiji aina juju ayamjutpaktatui tusajum,
DEU 32:38 nunú emematkujum kuntin maa apeamua nuna wiyaji yuwakjum, umutai vino nii anagkuamu umuyujum dusha tuwi batsatua? ¡Nunú nantajag atum waitiajum nuna ayamjutpaktinme! ¡Nunú kaunawag kuitamjamkatnume!
DEU 32:39 Ima Wikitjai Apajuínuk. Tikich Apajuík makichkish atsawai. Witjai pujuta sukagtinnuk, tuja wikitjai pujuta ataínnuk. Witjai suwimka sukagtinnuk, tuja wikitjai tsagkugkagtinnuk. ¡Mina suwimkajua nuna uwemtumainuk makichkish atsawai!
DEU 32:40 Mina uwejun nayaimpinum takuajai, nunikan wika Tuke Pujuu asan, wi dutikatnujun pachisan tajai.
DEU 32:41 Mina puyagjun winchamtinun etsaka jukin, ya aidauwa pegkegchaun takainak mina shiwagmatuinak kajegtuinawa nuna ijinatasan nagkamattajai.
DEU 32:42 Dutikan kuashat aentsun ijinkun mina puyagjunak numpeagtatjai. ¡Makichkish uwemjachagtatui! ¡Shiwag ijinku nuna apuji aidau achija yajuakbau aina nunashkam ashí ijinattajai!
DEU 32:43 “Nuadui ashí tikich aents judíochu aidautigmesh Apajuí aentsji aina nujai ijunjajum dakujustajum. Apajuí niina takajin aidau ijituamunum atumi shiwaajum aidaunak ijinattawai. Dutikak niina aentsji aidaunak wait anentug ditá tudaujinak tsagkujattawai”, tiuwai.
DEU 32:44 Moisés Josuéjai Israel aents aidau batsatbaunum jeganta dita antuinamunum yama nagkamchak agagbaunum nagkama kantama amukui.
DEU 32:45 Nuna ashí kantama inagnak,
DEU 32:46 nuadui Israel aents aidaun chichajak: “Wi atumin jintintuajim nunú shiig antuka jukitajum. Nunikjum atumi uchijum aidau jintintuatajum, dutikawajam ditashkam chicham umiktin agagbauwa nuna ashí betek umiktinme.
DEU 32:47 Tuja juju chicham umiktin agagbauwa nunú wainkaya nunin diyakjum umitsuk idaisaigpajum. Juju chicham umiktina nunú atumnak pujutan amawai. Nuniau asamtai, Apajuí nugka anagtamauwa nunú namak Jordágka amain awa nuwi jegagmesh, nunú umiakjum kuashat tsawan pujustinaitjume”, tiuwai.
DEU 32:48 Nunú tsawantin Tuke Pujuu Moisésan wantintuk chichajak:
DEU 32:49 “Muja Abarim tutaya nuwi wetá, nunikam muja Nebo tutai Moab aents aidau nugken yaakat Jericójai niinis awa nuwi wakata. Nunikam, nuwi wajasam Canaán nugkan wi Israel aents aidaun susattag nunú diista.
DEU 32:50 “Nunú mujanum wakattam nuwi amek amina yatsum Aarón Hor nugkanum jakauwa nunismek jakattame.
DEU 32:51 Atumek yumi pukuni jiinbau Meribá-cades tutaya nuwi Israel aents aidau yumi umumain atsutai chichamjuinakui, wi nunú dutikatajum tusan uwejush Sin tutainum tiuwaitjim nunú umikchauwaitjume. Nunú nugkanum Israel aents aidau yumin sumainakui atum mina eme anenjamu ditá emtin iwainakchau ainagme.
DEU 32:52 Nuadui wi Israel aents aidaun nugka susattag duka amek ayatak ikaa wajasam wainkattame. Tujash amek nuwig wayashtatme”, tiuwai Apajuí.
DEU 33:1 Apajuí inake Moisés, nii jakatnuji jegamtai pujusa, Israel aents aidaun pegkegnum yumigkiak,
DEU 33:2 juna aatus tiuwai: “Tuke Pujuu jutijai pujustatus muja Sinaínum tauwai, tuja nugka Seírnum nagkamas niina tsaaptinjig etsanjabi. Nunik etsantug yaakat Parágnum nagkamas uyuuntamsabi, tuja diez mil ángel aidaujai weak, niina uweje untsujiya duwi chicham umiktin agagbaun takakuyi.
DEU 33:3 Tuke Pujuuk niina aentsji aidaunak aneawai, tuja niinu etegjamu aidaunak kuitamui, nunú aidau Apajuín emematuinawai, nuninak nii umiktajum tibaun uminawai.
DEU 33:4 Moisés chicham umiktin Jacob wegantunum tuke asatna nuna Apajuí susamun juki amasajui.
DEU 33:5 Apajuík Jesurúnkan apuji wajasui. Apajuík Israel aents aidaun apuji aidaun apuji, tuja Israela uchiji maki makichik wegantu aidau ijunjajua nuna apuji wajasui”, tiuwai.
DEU 33:6 Tuja Rubén wegantun pachis Moisés juna aatus chichajak: “¡Rubén wegantu aidauk tuke batsamsatin agtinai! ¡Aishmag ujumak ataish, jinaa megkaejashtin ainawai!” tiuwai.
DEU 33:7 Tuja Judá wegantun pachis Moisés juna aatus chichajak: “Tuke Pujuuwah, Judá wegantu aidau amina segapainakuig antugkata. Ataktu awagkim tikich aents Israel wegantu aidau batsatbaunum ijumjata. Amina senchigmijai ayamjukta, dutikakum yaigta niina shiwaajinish ayamjumakti tusam”, tiuwai.
DEU 33:8 Tuja Leví wegantu aidaun pachis Moisés juna aatus chichajak: “Tumim Urim aina duka aminu ainawai. Nunú Leví wegantu amina sacerdotejum aidau ame tabaun betek umigtamin aina nunú susauwaitme. Tuja Masá nugkanum ame dita dekapsauwaitme, dutikakum Meribá nugkanmashkam amina aentsjum aidau yumi susauwaitam nuwi senchi jiyakuitme.
DEU 33:9 Leví wegantu aina duka ame chicham umiktajum tiuwaitam nuna puyatjus uminawai, nuninak kakanmamainawai ame chicham tibauwa nuna betek umikagtatus. Nuna ima senchi dita patayin nagkaesau eme anentuinawai. Nunidau asag ditá apaji aidaun dukuji aidaujai chichajuinak: ‘Atumnak wika dekatsjime’ tuinawai; tuja dita yachi iwai aidaun, umayi iwai aidaun, tsakat aidaunashkam chichajuinak: ‘Wika atumnak dekatsjime’ tuinawai; tuja ditá uchiji aidaun nawanji aidaujai chichajuinak: ‘Dekatsjime yatsu ainajum’ tuinawai, wagki ditak ashí Apajuí umigtan idaisaju asagmatai.
DEU 33:10 Dita ainawai amina chichamem umiktin agagbau aina nuna Jacob wegantun jintintuina duka. Dita ainawai kugkuin incienson kuntin maa apeamujai jukiag, aak pegkejam aakmakbaunum nunú patasa apetai puja nuwi pataina nunú.
DEU 33:11 Nuadui Tuke Pujuuwah, dita amina umigtamainak puyatjusag takaina nunú pegkegnum yumigsata. Dutikakum dita shiwaaji aina dushakam ame ijinata, tuja ditan kajejin aina dushakam ataktu wakitkig waitkaschatin atinme”, tiuwai.
DEU 33:12 Tuja Benjamín wegantun pachis Moisés juna aatus chichajak: “Tuke Pujuuwah, amek Benjamín wegantu aina duka aneame. Nuadui ditak shiig aneasag batsatui. Amek múun ashí senchigtinaitam ibau asam tuke kuitamtinaitme. ¡Nuadui ame kuitamsam batsamsagtinai!” tiuwai.
DEU 33:13 Tuja José wegantu aidaun pachis Moisés juna aatus chichajak: “Tuke Pujuu niina nugkenak pegkegnum yumigsatin ati, dutikamu asamtai, nayaimpinmaya yumi yutak, tuja nugka initkeniash yumi pukuni jiinainak niina nugkenak tuke uchupsagke atinai.
DEU 33:14 José wegantu aidauk dita ajakmamujinian maki makichik mijantin ajak juut nantu jegatai, shiig kuashat juuka yuwagtinai.
DEU 33:15 Dita wegantu aidau ajakmamujig, ikam aidau, muja aidau ayá iman aidaun juwagtinai. Tuja muja makichkish megkaechauwa iman tuke atinai dita ajakmamu aina duka.
DEU 33:16 Dita nugkenig yujág shiig pegkeg aidau piyaktinai. Nuadui nii wegantu agtina nudaushkam imanisag ajiti tusam yaigta. Wagki ame mina zarza kegamunmaya wantintugkam, amina aentsjum aidaun yajuak emati tusam etegtuawaitam, dutiksamek ame Josék niina yachi iwai aidaun, ekeu aidaun apuji ati tusam etegkauwaitme.
DEU 33:17 Tuja Efraín wegantunmayag suntajak shiig kuashat agtinai, tuja Manasésnumiashkam aents maanin aidauk shiig kuashat agtinai. Nunú aina duka toro uchiji yama nagkamchak petsakbau pegkejama iman, búfalo senchigtinama iman agtinai. Iman asag ashí aents tikich nugkanmaya aidaunash, ditá senchijijai depetkatin ainawai”, tiuwai.
DEU 33:18 Tuja Sabulón wegantun Isacar wegantujai pachis Moisés juna aatus chichajak: “Sabulón wegantu aidautigmek shiig aneastajum, atumek nayantsanum yujasjum tikich nugkanum waji sujitin asajum. Untsu Isacar wegantu aidautigmek aakchinmak batsamsajum, kuntin tagkumajum shiig kuashat uyugkajum shiig aneasjum batsamsagtinaitjume.
DEU 33:19 Nunik batsamas tikich Israel aents aidaun ipaa mujanum yajuak iwajagtinai. Dutikawag nuwi batsamas, ame dutikatajum tusa timauwa nuna uminak kuntinun maawag apeagtinai. Tuja nayantsanum waji pegkeg kuashat ayá nuna tikich nugkanum yujasag sujiagtinai. Nuninak nayantsanmaya yutai aidaun yuwagtinai”, tiuwai.
DEU 33:20 Tuja Gad wegantun juna aatus Moisés chichajak: “¡Apajuíyah, ame Gad wegantu aidauk nugka múun susatnaitme, nuadui amina see tujamainak emematjamtin ainawai! Gad wegantunmaya aidauk león dakamama numamtuk dakamak aentsun maakug kuntujin tsupijug, buuken tsupijug ukutnai.
DEU 33:21 Israela uchiji aidau maki makichik wegantu aina nuna apuji aidau Canaán nugkan tesagdayagtaish, Gad wegantu aidau ima muuntan jukitnai apu aidau juinamujai betekak. Dita aidauk ame dutikata timauwa nuna umikagtin ainawai. Dita aidauk pegkegnum chichajam agtinai, wagki ame Israel aents aidau umiktajum timauwa nuna umidau asag”, tiuwai.
DEU 33:22 Tuja Dan wegantun Moisés juna aatus chichajak: “Dan wegantu aidauk león tsakat kuntinu tsekentama nujai betekai, iman asa niina shiwaajin jeteakug, nugka Basánnum nagkamas tsekenti jiintawai”, tiuwai.
DEU 33:23 Tuja Neftalí wegantu aidaun Moisés juna aatus chichajak: “Neftalí wegantu aidaunak Tuke Pujuu shiig anentus diyawai, Ame Apajuíyah, ditak kuashat pegkeg aidaunum yumigsauwaitme. ¡Nuadui kucha múun Galilea tutaya duka nujinum nagkamas tsumujiya aatus ditanu atinai!” tiuwai.
DEU 33:24 Tuja Asher wegantu aidaun Moisés juna aatus chichajak: “Apajuíyah, ame Aserak Jacopa uchiji tikich aina nuna nagkaesau pegkegnum yumigsata. Dutikamu asamtai, niina yachi aidau eme anentsa diitai ati. Tuja kuashat olivogtin asa aceitejishkam imanisag ajitin ati.
DEU 33:25 Niina yaaktaji aidauk, tuja jee aidaushkam kuashat waitigtin atinai. Tuja nunú waiti aidauk jiju hierro, bronce aina nujai najanamu asamtai, niina shiwaajish kakajus utumainchau atinai”, tiuwai.
DEU 33:26 “Jesurúman Apajuíji atumin yaimpaktatus niina senchijijai yujagminum egkemak minina imanuk tikichik atsawai.
DEU 33:27 Apajuí Tuke Pujuuwa nunuwai amina ayamjumataigmek. Niig tuke senchigtina iman asa amina yaimpawai. Ame wainminig amina shiwajumnak uwakek ipisiak ijinata tusa amina inapawai.
DEU 33:28 Israelak ishamkagtutsuk kajinas pujustinai. Nii wegantu aidaushkam agkan utugchat atsaunum batsamsatin ainawai. Niina nugke aidaunmash trigo aidauk shiig kuashat aitnai, tuja uva ajakmaushkam imanisag aitnai, tuja yumishkam tuke yutitnai, nuniau asamtai, yuminak atsumchatnai.
DEU 33:29 ¡Israel aents aidautigmek shiig aneastajum, wagki atum kuashat asajum eme anentai ainajum imanuk tikich aents aidauk atsawai! Atumnak Tuke Pujuuwa nunú uwemtijamjaugme. Nii atumnak kuitamjamui. Tuja nigki ayamjutpaktatui. Atumi shiwaajum aidaujai maaniagminish, niyai depetmitkagbauk. Nuadui shiwag aidauk atumiin yunumjagtinai. Nuninakui atum wagagkijum ijinatin ainagme”, tiuwai Moisés.
DEU 34:1 Nuna tusa inagnak, nuadui Moisésak uwejush Moab nugkanum pujau juwaki, muja Pisgá tutai Jericójai niinis awa nuna titijin Nebo tutainum wakauwai. Nuwi wakamtai Galaad nugka múunta nuna wainkati tusa Tuke Pujuu iwaintukui. Tuja Danka nugkenashkam iwaintukui.
DEU 34:2 Nuigtushkam Neftalí, Efraín, Manasés aina nuna nugke aidaun iwaintukui. Dutikak Judá nugke nayants Mediterraneo tutaya aatus awa nunashkam ashí iwaintukui.
DEU 34:3 Tuja nuigtushkam Néguev nugkan, Jordágka pakajin, yaakat Jericó palmera ain tuuta awagmatia nuna, tuja yaakat Sóar tutaya imanui iwaintukui.
DEU 34:4 Dutika duwi, Tuke Pujuu Moisésan chichajak: “Au nugka auwai, wi Abraham, Isaac, Jacob aajaku aina nuna, atum wegantu aidaun nugkan susatnaitjai tusa tiuwaitag duka. Wi aminak au nugka awi wayashtinaitkush, wainkati tusan wakegau asan iwaintukjame”, tiuwai.
DEU 34:5 Aatus Moisés Apajuín inakega duka Moab nugkanum jakauwai, Tuke Pujuu tibaunak imatiksag.
DEU 34:6 Nunik jakamtai Moab nugka pakaji, Bet-peor tutaya nujai niinis awa nuwi ukusbauwai. Tujash dekas tuwig ukusbauwaita nunak yamaikish dekainatsui.
DEU 34:7 Moisésak ciento veinte mijan ajamu, wajiu, wainmatnash shiig wainbau, jamantuchu pujayatak jakauwai.
DEU 34:8 Moisés jakamtai Israel aents aidau Moab nugkanum uwejush batsamas treinta tsawantai buutiaju ainawai. Aatus nii jakamtai buutuinak, aents jakamtai buutku iman tsawan pujutainak betek ejeyajui.
DEU 34:9 Moisés eke iwaku pujusa Josué buuken achika Apajuín segatiuwai, Israel aents aidaun yajuakash wajuk ematki nuna Apajuí dekamtikati tusa. Dutikamu asamtai Tuke Pujuu Josuén antugkatnume tusa Moisésan tibauwa nunak imatiksag Israel aents aidauk Josué tabaun umikajui.
DEU 34:10 Tujash Tuke Pujuu Moisésjai igkunia chichajakua imanuk tikichik Israel aents aidaunmaya Apajuí chichamen etsejin profetak makichkish atsujakui.
DEU 34:11 Tuja wainchatai ishamain aidaun iwainagti tusa Tuke Pujuu tibau asa, Moisés Egipto nugkanum faraógka emtin niina atuwe aidaush wainainai iwainajua imanuk tikich aentsuk makichkish atsujakui.
DEU 34:12 Tuja Moisésak senchigtin asa, wainchatai ishamain aidaun atum Israel aents aidautijum wainjumin iwainajua imatika iwainamainuk tikichik makichkish atsujakui.
JOS 1:1 Tuke Pujuun takajin Moisés jakamtai, Nun aajakua nuna uchiji Josué Moisésan yaijakua nujai Tuke Pujuu chichaak:
JOS 1:2 “Mina inakeg Moisésak jakae. Nuniku asamtai, ame yamaik Israel aents aidau ashí yajuakam, wi atumin nugkan amastatjim nuwi weakum namak Jordágnum ikatiagtatme.
JOS 1:3 Wi nugka amastinaitjime tusan Moisésan anagkuawaitag nunak, imatiksanuk nugkanak ashí amastatjime.
JOS 1:4 Nunú nugkak muja Néguev tutaya nuwi nagkamas, muja Líbano tutaya aatus, namak shiig múun Eufratesa imanui nagkamas, hitita aents aidaun nugkega nuna ashí, tuja nayants Mediterraneo tutai etsa akaetaiya nuni awa imanuishkam ashí atumin amastatjime.
JOS 1:5 Aminak makichkish depetamkashtin ainawai. Moisésan kuitamajakuitag dutiksanuk wi aminak kajimatki idaitsuk tuke kuitamkattagme.
JOS 1:6 Nuadui kakajam, wajiu wajasta, wagki wi atumi muunjum aajaku aina nuna anagkuakun nugkan amastajime tiuwaitag duka ame Israel aents aidauk tinamkattame.
JOS 1:7 Wika aminak, ¡wajiu kakajam ata! tusan ima nunak segajame. ¡Nuniakum chicham umiktinun mina inakeg Moisés amasua nunú ashí betek umikta! ¡Nunú wajintu agagbauwaita duka imatiksamek ashí umikta! ¡Nunú ashí umiau asamin, ame takamugmesh ashí pegkeg atatui!
JOS 1:8 Chicham umiktin agagbauwa duka tuke ausamke ata. Nuniakum tsawaish, kashish tuke ima nuwig anentaimta, wajintu agagbauwaita nunú umiktag tau asam. ¡Nunú betek umiakmek, ame takamugmesh ashí pegkeg atatui!
JOS 1:9 “¡Aishmag wajasta! Wi aminak inajan awemagme. ¡Ishamkagtukaipa, awakesh anentaimjaipa, wagki witjai Tuke Pujuu amina Apajuígminuk! Tuja ame tuwi wekaetatme nuwi wika amejai pujuttajai”, tiuwai.
JOS 1:10 Tusa tima Josué Israel aentsu apuji aidaun chichajak:
JOS 1:11 “Aents aidau batsata nuwi shiyakjum, ashí etsegkatajum, jintá weaku yuwatnun umiktinme. Tuke Pujuu iina Apajuíjiya nunú nugka amastata nuwi weaku kashin pujusa tsawaku namak Jordán katitkattaji”, tiuwai.
JOS 1:12 Aatus akateg ishimak nuigtushkam Rubén wegantu aidaun, Gad wegantu aidaun, Manasés wegantu jimaituk aidaun akatmamtak:
JOS 1:13 “Atumesh nugkentin agkan batsamsatnun, Tuke Pujuu atumin Apajuígmia nunú juju nugka juna amastatjume tusa Apajuín inake Moisés tiuwa nuna aneaku atinme, tujamui.
JOS 1:14 Nuadui juju nugka namak Jordágka amain ii pujag juna Moisés atumin amasua juwi, atumi nuwe aidau, uchijum aidau, tagkujum aidaujai batsaktajum. Untsu ashí aents maanimain aidautigmek maaniaku jutai aidaun yajuaka umintsajum, Jordágka amain katiagjum atumi yatsum aidau maaninakui atuktajum.
JOS 1:15 Dutika atukjum, Apajuí atumin nugkan amasua dutiksag, ditanashkam agkan batsamsatnum nugkan susatta nuna shiig emetjagmatai, waketjajum juju nugka Jordágka juni awa juna, Moisés atumin amasua juwi kaunajum tuke batsamsatnaitjume, tawai tita”, tiuwai.
JOS 1:16 Tusa tima ditashkam imatiksag ujakajui. Nuna antukag dita aimainak: “Ame tame duka imatiksaik ashí umikagmi. Tuja ame tuwi wetajum tukagtittame nuwi shiyakagmi.
JOS 1:17 Yaunchuk Moisés tujamkui umijujakuitag, dutiksaik ame tabaushkam tuké umiktinaitji. Tuja iik wakegaji: ¡Apajuí Moisésan kuitamajakua dutiksag aminash kuitamjamkati! tusa.
JOS 1:18 Tuja ashí aents amina chichamjumin intimki umigtamchauk mantamnati. ¡Iik wakegaji ame kakajam, wajiu ati! tusa” tiajui.
JOS 2:1 Sitim nugkanum batsamas, aents uumak yujas dekamatin aidaun jimag aentsun etegka Josué ishimak: “¡Wetajum, nunikjum nugkash wajukukita nunú yaakat Jericójai diistajum!” tiuwai. Tusa tima shiyakag Jericónum jegawajui. Nunikag nuwa akika dutiktai Rahab pujaunum nuna jeen jegawajui, nuwi kajigkagtatus.
JOS 2:2 Nunikagmatai aents nuna wainkau Jericó apujin jegajua ujaak: “Ujumak aents Israel aents aidau dekamatatus yamai kashi kaunawagmae”, tiuwai.
JOS 2:3 Tusa ujakam Jericó apuji niina suntaji aidaun Rahab ujaktajum tusa ishimak: “¡Aents aidau amina ijagtamainak amina jemin kauna batsata nunú jiija ishiakta, wagki ditak iina nugken dekatatus yujawai!” tusa akatmamtujui. Tusa tima shiyakag imatiksag ujakajui.
JOS 2:4 Tusa ujakmash jiija ishimtsuk uuka batsas chichaak: “Nunú aents aidauk dekas mina ijagtuinak kaunawagmae. Tujash dekachmajai tuwiyas agma.
JOS 2:5 Juwi batsatu kiitai jiinag shiyakagmae. Wagki nuniai yaaktanum waitain waitin epenin agma duwi. Tujash tutsu wegagma nunak dekachmajai. Yamaik pataetakjumek amainamain ainagme”, tiuwai.
JOS 2:6 Tujash nunak niina jeen tuntupe pakamamunum, lino juuka jigkaka ujugkatasa ijumjamunum nuwi, yakí uuka batsasuitak tiuwai.
JOS 2:7 Nuwi batsataig, apu ishiakbau aidauk shiyakeapi tuidau asag, pataetukag namak Jordágnumanini shimutuk katitainum jegawajui. Nunik suntag jiinag shimaig, yaakta waitijinak epeniu ainawai.
JOS 2:8 Nunik pataetuk shiyakagmatai, nunú aents dekamatatus yujau eke kanuinatsaig, Rahab wajuka ditan chichajak:
JOS 2:9 “Tuke Pujuu atum aidautigmin juna nugka amasaja nunak wika dekajai, wagki atumin senchi ishamjamkatnume tusa Apajuí tine. Nuadui ashí aents juju nugkanmaya aidauk atumin ishamjamainak sapijai jinuinawai.
JOS 2:10 Atum Egipto nugkanum batsatutijum jiinjagmin nayantsa amain katiagtinme tusa Tuke Pujuu nayants kapantun ukuyuauwa nunú iik dekaji. Tuja nuigtushkam atum aidautijum amorreo nugkanmayaapu aidau Sijón, Og aatus Jordágka amain batsatu ashí ijinawaitjum dushakam shiig dekaji.
JOS 2:11 Nunú dekau asaja, shiig senchi ishamkagtuinaji. Tuja atumjai maaniatjai tumainuk makichkish shiig atsawai. Wagki Tuke Pujuu atumi Apajuíjum atum emematjum nunuwai nayaimpinash, nugkanash ima nigki Apajuíjiya duka.
JOS 2:12 Nuadui wi atumin wait anenjan kuitamkajim, dutiksagmek mina pataag aidaush wait anenjatnaitkugmek dekaskenum wait anenjattaji tusajum Tuke Pujuu daajin tujuttajum.
JOS 2:13 Tuja atum maania depetmakjum juju nugka atumdau emakjumesh minash, mina apag, mina dukug, mina ubag, mina kaig aina duka ashí dita patayi aidaujai ijijattsuk kuitamkagtuktajum. ¡Nunuwai dekas pegkegnum yainiamua duka!” tiuwai.
JOS 2:14 Tusa tama dita chichajuinak: “Juju nugka juwi kauna maaniamunum amina pataim aidau jakamtaig, Apajuí iina suwimkan amastí. Tujash ameshkam juju pachismek makichkish etsegkaipa. Tuke Pujuu juju nugkan iina amasmataig, amek amina pataim aidaujai shiig kuitamnaktatme”, tiajui.
JOS 2:15 Tusa tiagmatai yaakat peegmaja apakbaunum nuna ejapeen jega jegamkamunum pujau asa, nunú aents jiinaidaun wainkainum tusa niimtai ujaimunum daekan aganini detua nuni jiig ishiakui.
JOS 2:16 Dutika ishimak: “¡Suntag aidau egapainak yujaina nunú waipakainum mujá wetajum! ¡Nunikjum nuwi kampatum tsawan uumkajum pujagmin, suntag aidau atumi egapainak shiyaka nunú waketug kaunamtai duwi shiyaktajum!” tiuwai.
JOS 2:17 Tusa tama dita chichainak: “Ame segajatkumin, ii umiktin dekas umiktatji tusa Apajuí daajin timag duka imatiksaik umiktatji.
JOS 2:18 Untsu ii juju nugka juwi wayamu wainkumek, juju daek kapantua juwi ii akaikittag nunú aganini nenata. Dutikam nuadui juju amina jemea juwi amina apa, duku, umaim aidau, kaim aidau, amina apa patayi aidaujai utsaatajum.
JOS 2:19 Tuja makichik aentskesh amina jemin pujayatak, jiinki wekaekama mantamnakug duka niinu atatui. Untsu amina jemin pujaunak utua mainakuig duka utugchatak iinu atatui.
JOS 2:20 Tuja ii chichag nunú ame etsegkaminig, ii umiktin Apajuí daajin taji duka umikchattaji”, tiajui.
JOS 2:21 Tusa tama: “¡Ayu, atum tajum duke ati!” tiuwai. Aatus ashí ditajai chichas ishiakui. Dutikam shiyakmatai nuadui niimtai ujaimunum aganini daek kapantun nená idaisauwai.
JOS 2:22 Tuja nunú aents dekamin aidauk mujá shiyakag kampatum tsawan uumak batsamsajui. Nunik batsatai suntag aidauk ashí yantamnum egai egainakua wainkachag waketug Jericó jegawajui.
JOS 2:23 Nunik waketjamtai, ditashkam mujá batsatu akaejag Jordágkan katitkiag Josué pujamunum jegawajui. Nunik jegawag dita yujasbaun pachis niina ashí ujakajui.
JOS 2:24 Tusa ujainak: “Au nugkanak Tuke Pujuu ashí iinu atinun idaitugmase. Dutikamu asamtai nuwiya aents aidauk iina ishamjamainak sapijai jinime”, tiajui.
JOS 3:1 Aents uumak yujas nugka dekatatus shiyaku waketug kaunawag etsegkagmatai, kashinia duwi shiig kashikmas Josué Israel aents aidaujai Sitim nugkanum batsatu ashí jiinag shiyakajui. Nunik shimui shimuinakua jegawajui namak Jordágnum. Nunikag eke atú amain katitsuk nuwi aakmag batsamsajui.
JOS 3:2 Nuwi batsamas kampatum tsawan nagkaemai, suntaja apuji aidau Israel aents aidau batsatun shimutkag
JOS 3:3 ujainak aatus tuidau: “Leví wegantu aina nunú chicham umiktin agagbau egkeamun arcan yanaki juki wedau wainkugmek, atumi aakjum aidau tegaka jukijum wetajum.
JOS 3:4 Nuniakjum dekattagme itug wetatjume nunú, wagki atumek yaunchkesh juju nugkanmak wekaechau ainajum duwi wajuk wetaigkita duka dekatsjume. Tujash chicham umiktin agagbau egkeamun arcan yanaki juki wena nunú ijusa wetsuk makichik kilómetro tumain ukuunum wetajum”, tiajui.
JOS 3:5 Tusa ujakagmatai Josué ditan chichajak: “Tuke Pujuu iina yaimpaktin asa kashin wainchatain iwainaktatui. Nuniktin asamtai, ¡pegkeejum umintsa dakamsatajum!” tiuwai.
JOS 3:6 Nuna tusa sacerdote aidaun chichajak: “¡Chicham umiktin agagbau egkeamu arca yanaki jukijum emka wetajum!” tiuwai. Tusa tiajam nuna yanaki jukiag eemak wegajui.
JOS 3:7 Nunik shimai, Tuke Pujuu Josuén chichajak: “Wi yamai dutikattag nuna wainkag, Israel aents aina duka dekaskeap Apajuí jutii apuji atinun etegkauwaita tujamiagtatui. Aatus dekawagtatui wi Moisésan kuitamajakuitag dutiksanuk aminashkam kuitamja nuna.
JOS 3:8 Untsu sacerdote aidau chicham umiktin agagbau egketun arcan juki wena nunú ame chichagkum: ‘Namak Jordágnum jegagmek wajaajum ijuntsatajum’ tita”, tiuwai.
JOS 3:9 Tusa tima Josué Israel aents aidaun chichajak: “Juwi kaunatajum, nunikagmin Tuke Pujuu iina Apajuíji ii emematin ainag nunú mina tujuti nuna ujaktajime.
JOS 3:10 Apajuí Tuke Pujuu tutaya nunú iina kuitamjamsamtai shimag duka, hitita aents aidau, heveo aents aidau, ferezeo aents aidau, gergeseo aents aidau, amorreo aents aidau, Jebús aents aidau aatus, Canaán nugkanum batsamin aina nunú ii shimaku Apajuí senchijin depetka ijina wetatag duwi dekattaji.
JOS 3:11 Antuktajum nijah, Tuke Pujuu ashí aents aidaun Apajuíjiya nuna chichame umiktin agagbau egkeamu arcan sacerdote aidau yanaki jukiag atum wainjumin namak Jordágkan katitkiagtatui.
JOS 3:12 Nunikagmatai Israel aents aidautijum maki makichik wegantu ainajum nuwiya doce aents etegjatajum.
JOS 3:13 Tuja Tuke Pujuu ashí aents aidaun Apajuíjiya nuna chichame umiktin agagbau egkeamu arcan sacerdote aidau yanaki jukiag yuminum wajawagtatui. Nuniagtai, namakak jimaituk tesana buku wajas katigtatui. Nunitai yumi nujinmaya minaush, jasa muja iman wajas asattawai”, tiuwai.
JOS 3:14 Tusa timatai Israel aents aidau namak Jordágka katitkagtatus jiinag shimai, sacerdote aidau chicham umiktin agagbau egketun arcan yanaki juki eemak wedau.
JOS 3:15 Tuja ajak juutai tsawan jegataik, namak shiig senchi dujajin asa namakak dujajua piyag aajakui. Imanik ai sacerdote aidau namaka jegawag tugkitak wajawajui.
JOS 3:16 Nuninaig namakak kuyua buku wajas asauwai. Duka peegmagbau Saretag tutai awa nujai niiniaku yaakat Adam tutai awa imanui nagkamas namak tsujina yumi nujinum pimutai, tsumujin namak juwakuk sae saekawa nayants jakau tutainum nagkankauwai. Aatus Apajuí namakan akanak ukuyuamtai, Israel aents aidauk yaakat Jericón igkuas katiajajui.
JOS 3:17 Sacerdote aidau chicham umiktin agagbau egkeamun arcan yanaki juki wedauk nuna yanasag namak Jordán kuyua buku wajasbaunum ejapeen ijunai, Israel aents aidauk bukunum shiig katiajaju ainawai.
JOS 4:1 Ashí Israel aents aidau namak Jordágnum katiajagmatai, Tuke Pujuu Josuén chichajak:
JOS 4:2 “Israel wegantu aina nuwiya maki makichik etegjam doce aents yajuakta.
JOS 4:3 Dutikam ishiakta namaka ejapeen, sacerdote ijuna nuwiyan doce kayan yajuaktinme. Dutikawag yamai dita tuwi kajigtatua nuwi ijumjatnume”, tiuwai.
JOS 4:4 Tusa tima Josué doce aents etegjamu aidaun untsuka ijumag
JOS 4:5 chichajak: “Namak kuyua buku wajasa nuna ejapeen Tuke Pujuu atumi Apajuíjiya nuna chichame umiktin agagbau egkeamu puja nuwi wetajum. Nunikjum maki makichik kaya jukitajum. Tuja ashí ijumjamak doce kaya atatui.
JOS 4:6 Nunú kaya ijumjattajum nunú atatui atumi uchijum aidau atakea duwi inimpainak: ‘¿Wagka jusha kayash jutikaish ijumjamuita?’ tujamainakui,
JOS 4:7 atum ayaakjum: ‘¡Chicham umiktin agagbau egketun arcan sacerdote aidau yanaki jukiag namak Jordágnum wajawagmatai, namak jimaituk kanaka buku wajasbaunum ii katiajuitag nuna anemtijamjatin auk ijumjamui!’ titinaitjume”, tiuwai.
JOS 4:8 Tusa tima Josué tibaunak imatiksag umikajui. Dutikainak Israel wegantu doce aajakua dutiksag doce kaya jukiag dita batsatbaunum ejegawajui. Dutikawag Tuke Pujuu Josuén chichajak, dutikatnume tibaunak imatiksag doce kayan ijumjajui.
JOS 4:9 Tuja Josué niishkam dutiksag namak kuyua buku wajasbaunum, nuna ejapeen sacerdote aidau chicham umiktin egkeamun arcan yanasa ijunbaunum, nuwi doce kayan yajuak ijumjauwai. Duka yamaikish awai.
JOS 4:10 Tuja sacerdote aidau chicham umiktin agagbau egketun arcan yanaki jukiag wedauk namak Jordán kuyua buku wajasmatai nuna ejapeen ijunai, Israel aents aidauk Tuke Pujuu Josuén akateak juna umiktinme tibaunak imatiksag umikajui. Tuja Josuéshkam Moisés akatjamunak imatiksag umikui. Nunikmatai aents aidauk shiig wamak katiajajui.
JOS 4:11 Nunik ashí katiajagmatai, nuadui sacerdote aidau chicham umiktin agagbau egketun yanaki ijunu ditashkam katiajajui, nunikag dita emkajui.
JOS 4:12 Tuja nuigtushkam maanitan yacha Rubén wegantu aidau, Gad wegantu aidau, Manasés wegantu jimaituk maaniaku jutai aidaun yajuakag uminas tikich Israel wegantu aidau shimamunum eemak, Moisés nuniktajum tibaunak imanisag shimuidau.
JOS 4:13 Nunú aidauk shiig uminas cuarenta mil aents tumain jiinjag chicham umiktin agagbau egketun juki wegagtai nuwi ichichmamjag, nugka paka tepajunum yaakat Jericónmanini shiyakajui.
JOS 4:14 Tuja nunú tsawantai Tuke Pujuu ashí Israel aents aidaun, Josuén eme anentus diitnume tiu asamtai, Moisés iwaku pujusmatai, eme anentus diijaku aina dutiksag Josuénashkam eme anentus diidau.
JOS 4:15 Nuadui Apajuí Josuén chichajak:
JOS 4:16 “Sacerdote aidau chicham umiktin agagbau egketun arcan yanaki ijuna nunú katiagtajum tita”, tiuwai.
JOS 4:17 Tusa timatai, katigtajum tusa tiuwai.
JOS 4:18 Tusa tiyajam ditashkam katiajag kukag jiinainaig, namakak bete wajas yaunchuk aajakbaunak imanisag asauwai.
JOS 4:19 Israel aents aidau Jordágnum katiaju aina nunak mijan nagkamnamu yama nagkamchak nantu taka tsawan diez tsawaju ai katiajajui. Nunikag yaakat Jericó yantamen etsa minitaiya nuni nugka Guilgal tutainum aakmajag batsamsajui.
JOS 4:20 Nunik batsamas doce kaya Jordágnumia yajuakbaun Josué nuwi ijumjauwai.
JOS 4:21 Dutika ijumag Israel aents aidaun chichajak: “Atakea duwi atumi uchijum aidau inimpainak: ‘¿Wagka jusha kayash ijumjamuita?’ tusa tujamainakuig:
JOS 4:22 ‘Israel aents aidauti namak Jordán kuyua buku wajasmatai ii katiajag’, nunú pachisjum ujaktajum.
JOS 4:23 Tuja nuigtushkam Tuke Pujuu atumi Apajuíjum yaunchuk nayants kapantun katitkatnume tusa ukuyuauwa dutiksag, yamaishkam namak Jordágkan katitkatnume tusa ukuyua buku awajsamtai katiajujum nunú pachisjum ujaktajum.
JOS 4:24 Nuna aatus ashí nugkanmaya aents aidau Apajuí senchigtina nuna dekawagtinai. Untsu atumek Tuke Pujuu atumi Apajuígmia nunú tuke ememattinaitjume”, tiuwai.
JOS 5:1 Israel aents aidau katiagtinme tusa Tuke Pujuu namak Jordágkan ukuyua buku awajsae tabaun amorreo aents aidaun apuji aidau Jordágka amain etsa akaetaiya nuni batsamin aidau dekawajui. Tuja canaágnumia aents aidaun apuji aidau nayants Mediterraneonum batsamin aidaushkam dekawajui. Nunikag senchi ishamkag Israel aents aidaujaig kakaja maaniachmin dekapedau.
JOS 5:2 Nuninai Tuke Pujuu Josuén chichajak: “Kaya aina anú ujumak kuchii najankata. Dutikam nuadui Israel aents aishmag aina nuna kati chuchuke ashí tsupijata”, tiuwai.
JOS 5:3 Tusa tima Josué kuchiin najankauwai. Dutika Israel aents aishmag aidaun ashí tsupijauwai. Nunak muja Aralot tutaya nuwi dutikauwai.
JOS 5:4 Nunak dutikauwai wagki ashí aishmag wajiu maanimain aidau Egipto nugkanum batsatu jiinjau aina duka uwegshunum yujas jinawaju asagmatai.
JOS 5:5 Tuja Israel aents aishmag aidau Egipto nugkanum batsamajaku aina duka, nuwi batsatuk ashí tsupijamu aajaku ainawai. Dutikamu ainaig Egipto nugkanum batsatu jiinag shimak, uwegshunum cuarenta mijan yujasu aina duwi uchi aishmag akiinkau aina nunú eke tsupijashbau asamtai, dutikauwai.
JOS 5:6 Tuja aishmag wajiu maanimain aidau Egipto batsatu jiinjau aina duka cuarenta mijan uwegshunum yujasu aina duwi ashí jinawajui. Nunú aents aidauk Apajuín chichamen umigkachaju ainawai. Nuadui Apajuí ditan chichajak: “Atumi muunjum aajaku aina nuna anagkuakun, atum wegantun nugka pegkeg ajak shiig tsapaun, tagkush shiig muumpaina nuna susatnaitjai, tusan anagkuawaitag duka atumek wainkashtinaitjume”, tiuwai. Nunik jinawaju asagmatai, namak Jordágnum katiajaju aina duka tsupimakchau aajaku ainawai
JOS 5:7 Nuadui Josué nunú aents aidaun uchiji aajaku aina nuna tsupijauwai. Wagki, ditá apaji jinawaju asagmatai, Tuke Pujuu atum nugka jukitajum tibau asa waujus shimuinak tsupimagchaju asagmatai.
JOS 5:8 Dutika ashí tsupijajam nuna esamawagtatus dita batsatbaunmak juwakajui. Nunik batsamas ashí tsagagkajui.
JOS 5:9 Nuwi batsataig Tuke Pujuu Josuén chichajak: “Israel aents aidau Egipto nugkanum wainka inaku waitkatai asag datsaamajaku aina nunak, yamai nagkamsan dita datsantinak emegkatjajai”, tiuwai. Nuadui nunú nugka daajiya duka Guilgal tibau aajakui. Duka yamaikish tuu daagtinai.
JOS 5:10 Israel aents aidauk Guilgal nugka yaakat Jericónmanini awa nuwi batsamsauwai. Nuwi batsamas mijan nagkamnamu yama nagkamchak nantu taka, tsawan catorcetin Pascua pag levadurajai pachimtsuk inajuamu yutai tsawan asamtai, agkuantai ijunag jiistamaidau.
JOS 5:11 Nunú tsawantai pag levadurajai pachimtsuk inajuamun trigo duwikbaujai yuwawajui. Untsu kashinia duwi nunú nugkanmaya ajak aidaun juukag yuwawajui.
JOS 5:12 Nuna yuwidau asagmatai, maná kakebaunak nunú tsawantin megkaekauwai. Nuniku asamtai ataktu awagkig, Israel aents aidauk manának yuwachaju ainawai. Tuja nunú mijantinig Canaán nugkanmaya ajak aidaun juukag yuujaku ainawai.
JOS 5:13 Makichik tsawantai Josué yaakat Jericónum jegattak pujusa aents puyajan takus wajattaman wainkauwai. Nunik jegantun iniak: “¿Amesh ii ainag nuwiyagkaitam, atsa iina shiwaaji aina nuwiyachukaitam?” tau.
JOS 5:14 Tusa iniam nii ayaak: “Ame jimag adayam nuwiyagkesh atsujai. Wika Tuke Pujuun suntaji aina nuna apujiyaitjai”, tiuwai. Tusa tutai Josué niina eme anentus tsuntsuma nijayin nugka antig pujusa iniak: “Wajina dutikati tame nunú tujutta, nuna betek umiktajai”, tau.
JOS 5:15 Tusa tutai nii ayaak: “¡Sapatjum ukuimakta, wagki ame wajam aanka dekas nugka Apajuí etegkamu shiig pegkegmai!”, tiuwai. Tusa tama Josué sapatjin ukuimakui.
JOS 6:1 Israel aents aidau utsaantugmawag amupakainum ayamjumakmi tuidau asag, yaakat Jericó waitiji aidaunak shiig epenjaju ainawai. Dutikamu asamtai makichik aentskesh waimainchau, tuja agaagkesh jiinmainchau aajakui.
JOS 6:2 Tujash Tuke Pujuu Josuén chichajak: “Jericó apujin niina suntaji aidaujaí depetuk ijinati tusan amina idaitusjame.
JOS 6:3 Tuja atum suntag Israel aents aidautijum ¡makichik tsawantai makichkia Jericó tentea ukutajum! Duti dutikakuajum seis tsawan ejetajum.
JOS 6:4 Tuja yama nagkamchakug siete sacerdote aidau maki makichik umputai uwig aishmagku kachuji najanamun takus emkatnume. Nunikag tikich sacerdote aidau chicham umiktin agagbau egketun arcan jukiag ukunum wenai dita eemak shimittawai. Nuninai suntag aidauk nuna ukujin shimittawai. Untsu tsawan sietetin sieteya imania yaakat tenteattagme. Tuja siete sacerdote aidau uwija kachujin takakuina nunú yaaktan tentea shimuinak umpuiniagtatui.
JOS 6:5 Nunú uwija kachuji umpuamun yapajia nuni senchi umpuinakui senchi untsumkatajum. Imatjumin yaakat peejamua nunú kupinak iyattawai. Nunikmatai pisajajum yaakat Jericó utsantuattagme”, tiuwai.
JOS 6:6 Tusa tima Josué sacerdote aidaun untsuka ijumag chichajak: “Atum chicham umiktinun Tuke Pujuu amasbau egkeamu arca yanaki jukijum Jericó tenteajum wetajum. Untsu atuminia siete aents aidau maki makichik uwija kachujin takus emkatnume”, tiuwai.
JOS 6:7 Aatus tusa ukuak, suntag Israel aents aidaun ashí ijumag chichajak: “Atum aidautigmeshkam wetajum. Nunikjum yaakat tenteatajum. Tuja aents maanitan yacha aina nunú sacerdote aidau arcan yanaki juki wena nuna emtin shimiagtatui”, tiuwai.
JOS 6:8 Tusa timatai imatiksag umikajui. Nuadui siete sacerdote aidau maki makichik uwija kachujin jukiag umpui umpuinakua shimuidau. Nunik shimuinai nuna ukujin tikich sacerdote aidau arcan yanaki jukiag shimuidau.
JOS 6:9 Tuja aents maanitan yacha aidauk sacerdote aidau shimamu emtin shimuidau. Nuninai untsu tikich suntag aidauk, sacerdote chicham umiktin agagbau egketun juki wena nuna ukujin shimuidau. Nuninai sacerdote uwija kachujin takaku aidauk umpui umpuinakua shimuidau.
JOS 6:10 Israel aents suntag aidau eke jiinag shimatsaig Josué ditan chichajak: “¡Makichkish chichatsuk takamtak wetajum, wi untsumkatajum takui shiig senchi untsumkatin asajum!”, tiuwai.
JOS 6:11 Sacerdote aidau arcan yanaki juki wena nunú yaaktan makichkia tenteatnume tusa Josué tiuwai. Tusa tima shiyakag makichkia tenteawag ukuinak waketug ditá batsatbaunum kaunawag nuwi kajigkajui.
JOS 6:12 Nunikag kashinia duwi Josué kashikmas nantakmatai, Israel aents aidaushkam ashí nantajajui. Nunikagmatai sacerdote aidau arcan yanaki jukiajui.
JOS 6:13 Nunik shimiagtai aents maanitan yacha aidau eemag shimuidau. Untsu ditá ukujin sacerdote aidau uwija kachujin makichkish ayamtsuk umpui umpuinakua shimujakajui. Tuja nuna ukujin sacerdote arcan yanaki jukiag shimuinai, nuna ukujin inagnamunum suntag aidau shimuidau. Tuja kachu umpuamuk tuke shinu au.
JOS 6:14 Kashinia duishkam dutiksag yaaktan tenteawag ukuinak dita batsatbaunum waketjajui. Duti dutikainakua seis tsawantan ejeyajui.
JOS 6:15 Untsu tsawan sieteya duwi sacerdote aidau suntag aidaujai ejampek nantajag yaunchuk dutikamunak betek yaaktan tenteawag shimuidau. Untsu nunú tsawantin sieteya imania tenteawajui.
JOS 6:16 Tuja sacerdote aidau sieteya imania uwija kachujin umpuiniagtai, Josué aents aidaun chichajak: “¡Senchi untsumkatajum! ¡Wagki Tuke Pujuu juju yaaktanak depetuk tsaiktinme tusa iina idaitugmase!
JOS 6:17 Au yaakta duka ashí nuwi wajig ayawa nujai tsainkattawai, wagki Tuke Pujuu nunikti tiu asamtai. Untsu nuwa akika dutiktai Rahab ashí tikich aidaujai niina jeen batsamiagtata duka makichkish maawaigpa, wagki aents dekamatnume tusa wi ishiakbau aidaun nii uuka ayamjuku asamtai.
JOS 6:18 Tuja atumshakam kuitamamkatajum, wainka nuwiya waji aina duka makichkish jukigpa. Nuigtush achitkesh achikaigpa, wagki nunú aidaunak Apajuí ashí tsaiktinme tujabiuwai. Untsu nunú atum umishtaik, Apajuí iina yaaktajin tsaigtamainai. Nuna dutikamtaig utugchatak iinu amainai.
JOS 6:19 Untsu oro, plata, tuja ashí waji bronce, hierro aatus najankamu aina duka Tuke Pujuu anagkuamu atatui. Nunú aina duka yajuaka, waji akik Apajuínu aidau egketainum egkenattawai”, tiuwai.
JOS 6:20 Nuna aatus Josué Israel aents aidaun ujaka inagnakmatai, sacerdote aidau uwija kachujin umpuajajui. Nuna antuinamuik Israel aents suntag aidauk senchi untsumaidau. Imatuinai yaakat peejamu kupinak iyauwai. Nunikmatai pisajug yaaktan utuawajui. Nunikag yaaktan utsantuawag aents aidaun depetuk ijinawag, yaaktanak dita atainiajui.
JOS 6:21 Dutikawag nuadui aents aishmag aidaun, nuwa aidaun, datsauch aidaun, múuntuch aidaun, ashí ijinawajui. Dutikainak buey aidaun, uwig aidaun, burro aidaunashkam ashí ijinawajui.
JOS 6:22 Dutikawag nuadui aents nugka dekatatus yujasu aidaun Josué chichajak: “¡Nuwa akika dutiktai puja nuna jeen wetajum. Nunikjum nii jiyakjum tikich aidau niijai batsatushkam ashí jiigtajum, atum wajintu nii anagkuawaitjume dutiksagmek!” tiuwai.
JOS 6:23 Tusa tiajam wayawag Rahab, niina apaji, dukuji, umayi aidau, kai aidau, nuigtu niina patayi aidaujai batsatun ashí jiijajui. Dutikawag ditá batsamtaijin ukumtikiag agkan ishamain atsaunum batsasu ainawai.
JOS 6:24 Nuna dutikainai suntag aidau yaaktanak ekemakag ashí apeawajui. Untsu oro, plata, tuja waji bronce, hierro najankamu aidaunak apeachajui. Nunak ayatak jukiag waji akik Tuke Pujuunu aidau egketainum egkeawajui.
JOS 6:25 Nuna imatika ashí ijinkush, Josuék Rahabnak niina patayi aidaujai maachui, wagki aents nugkan dekatnume tusa Jericó ishiakbau aidaun maawainum tusa uuka uwemtikjau asamtai. Dutika maachbau asag, Rahab wegantu aidauk yamaikish Israel wegantu aidaujai batsamin ainawai.
JOS 6:26 Nuna ashí dutika atakea duish tuke uminkatnun pachis Josué juna aatus tiuwai: “Makichik aentskesh yaakat Jericó tsaikbauwa nuna ataktu jegamjatjai tusa takug, niina uchiji iwai mantamnattawai. Nunikmatai takatan takau aidau nuna iyashin aepawag nuwi ekeniag jegamjagtinai. Tuja niina uchiji ekeushkam nunisag mantamnattawai. Nunikmatai nuna iyashinashkam aepawag nuwi ekeniag yaakta waitijin najanawagtinai”, tiuwai.
JOS 6:27 Josuénak Apajuí yaigkui, nuadui ashí aents tikich nugkanum batsamin aidaush niina wajiujinak shiig dekajujaku ainawai.
JOS 10:1 Josué Israel aents aidaujai Jericón tsaikajua dutiksag tikich yaakat Ai tutainashkam tsaikajui. Dutikawagmatai yaakat Gabaógnumia aidauk ishamainak Israel aents aidaujaig maaniachmi tusag chichaman umikaju asag, ditajai ijunag batsatui tabaun Adonisédec Jerusalégkan apuji dekauwai.
JOS 10:2 Nunik dekaa yaakat Gabaógkak tikich yaakat Ai tutain Israel aents aidau tsaikajua nuna nagkaesau múun, kuashat apugtin tuja nuigtushkam suntag aidaush maanitan yacha aidau asagmatai, niina aentsji aidaujai shiig senchi ishamkajui.
JOS 10:3 Nuadui Adonisédec yaakat Hebrógka apujin Hohaman, yaakat Jarmutan apujin Piraman, yaakat Laquisha apujin Jafían, yaakat Eglógka apujin Debiran aatus chichaman akuptukui. Dutikawajam chichama etsejin aidau ditan ujainak:
JOS 10:4 “Apu Adonisédec chichaak: ‘Gabaón aents aidauk maanitsuk agkan batsamsagmi tusag Josuéjai, tuja Israel aents aidaujaishkam chichaman umikaje. Nuniku asagmatai ipajime kaunatajum. Nunikjum Gabaón aents aidaujai maaniamu atutkatajum’ ”, tiuwai.
JOS 10:5 Tusa tiajam cinco apu amorreo aents aidaun apuji aidau: Yaakat Jerusalégnumia, Hebrógnumia, Jarmutnumia, Laquishnumia, Eglógnumia aatus ijunag dita suntaji aidaujai Gabaón jetekmi tusag shiyakajui.
JOS 10:6 Nuna Gabaón aents aidau dekawag ditashkam Josué Guilgal pujaun chichaman akuptuinak aatus tiajui: “Ii atumjai chicham umiaku: ‘atumi inake agmi’, timaiji. Nuniau asamtai atum jutiik ayamkagtumainaitjume. Nuadui amina suntajum aidaujai kaunajum ayamkagtuktajum, wagki amorreo aents aina nuna apuji aidau mujanum batsamin aina duka ashí ijunjaje jetepakagtatus”, tiuwai.
JOS 10:7 Nuna antuk Josué Guilgal pujau niina suntaji maanitan yacha wajiu aidaun yajuak ijumjauwai.
JOS 10:8 Dutika umikmatai eke wegachunak Tuke Pujuu Josuén chichajak: “Amorreo aents aina duka ishamkaipa, amina idaitusjame, nii depetuk ijinati tusan. Nuadui makichik aentskesh dita aina nuwiyag amejai igkunia maanimainuk shiig atsuttawai”, tiuwai.
JOS 10:9 Tusa tima Josué Guilgal pujau Israel aents aidaujai jiinag kashi shima shimakua jegawajui. Nunik amorreo aents aidau gabaógnumia aidaun jetektatus anutujag batsamtaun pachiachbaunum jetekajui.
JOS 10:10 Tuja amorreo aents aidaunak Tuke Pujuu Israel aents aidau jetenam ishamkatnume tiuwai. Tusa tibau asamtai Josué amorreo aents aidaun Gabaógnum shiig kuashat amukui. Dutika amuam jinta Bet-horón wetainum pisatai pataetukag mai mainakua, yaakat Azecá yaakat Maquedájai aajakua imanui jegawajui.
JOS 10:11 Tuja tikich aents amorreo aidauk Israel aents aidaun ishamak yaakat Bet-horón jegattak shimittaman, Tuke Pujuu bichan kayajai betek akaketuk Israel aents aidau puyajai ijinau aina nuna nagkaesau ijinauwai.
JOS 10:12 Tuke Pujuu amorreo aents aidaunak Israel aents aidau amuktinme tibau asag amukajua nunú tsawantin Josué niina suntaji aidau emtin Tuke Pujuun segaak aatus tiuwai: “¡Etsayah, Gabaón mamiksam jasa ekemsata! ¡Nantuh, ameshkam nain ségaju Aialón tutaya nunú mamiksam jasa ekemsata!”
JOS 10:13 Tusa tima etsa nantujai jasa asauwai, nunikmatai Israel aents aidau dita shiwaajinak ashí depetuk amukajui. Tuja Israel aents aidaush wajuk nunash yujasajamkiyi duka imatiksaik papii Jasher tawa nuwi agagbau aajakui. Tuja etsak akaetsuk makichik tsawan tumain jasa asauwai.
JOS 10:14 Nunak yaunchuk aents aidau Tuke Pujuun segajaku aina duikish dutikashbaun nunú tsawantin dutikauwai. Nunú tsawantai Tuke Pujuu Israel aents aidaun ayamjak shiig paan maaniauwai.
JOS 10:15 Tuja Josuék nunik depetmak Israel aents aidaujai dita batsamtaijin Guilgalnum wakitkiuwai.
JOS 24:1 Yaakat Siquemnum Josué Israel aents aidaun ashí ijumjauwai. Nuwi Israel aentsu apuji múun aidau, apu chichama epegkin aidau, suntaja apuji aidau aatus, aak pegkejam Apajuíjai chichatai aakmakbaunum niinis ijunjajui.
JOS 24:2 Nunik ashí ijunjamtai Josué chichajak: “Tuke Pujuu atumi Apajuíjum juna aatus tujamainawai: ‘Yaunchuk atumi muunjum aajaku aidau: Térah niina uchiji Abraham, Nacor, aatus namak Eufratesa amain batsamas dita apajuímtaijin emematujaku ainawai.
JOS 24:3 Nuni batsatun wi Abrahaman jiiki jukin juju Canaán nugka juwi itaan awekasuitjai. Tuja nuigtushkam nii wegantun kuashat ikauntukuitjai. Yama nagkamchaknuk susauwaitjai niina uchijin, Isaakan.
JOS 24:4 Tuja Isaakan susauwaitjai jimag uchijin: Jacopan, Esaújai. Tuja Esaún susauwaitjai muja ikam tepau Seír tutain. Untsu Jacob niina uchiji aidaun yajuak Egipto nugkanum weuwai.
JOS 24:5 “ ‘Nunika nuwi kuashat mijan batsatai, wi Moisésan Aarógjai akuptukuitjai ditan yaigtinme tusan. Dutikan egiptunmaya aents aidaunak shiig senchi suwimka susan waitkasan atumi muunjum aidau nuwi batsatun jiijuitjai.
JOS 24:6 Tuja atumi muunjum aidau Egipto nugkanum batsatu jiinjamtai, nuwiya aents aidau carro maanitai aidaun caballo aidaujai yajuakag pataetukag nayants kapantunum ejegawajui.
JOS 24:7 Dutikainam, yainkata tusag mina untsugkajabi. Tujutuinakui egiptunmaya aidau shimamu emtin, tuja Israel aents aidau batsatbau ukujin suwe awajsamiajai. Tuja nayants buku wajasbaunum katidaun yumi pimak ijinati tusa ti ai, egiptunmaya aidau nayants yutuam jinawabi. Wi nuna Egipto nugkanum dutikauwaitag duka atumek shiig wainkauwaitjume. “ ‘Nunikjum kuashat mijan uwegshunum yujasuitjume,
JOS 24:8 nunika yujautigmin yajuakan namak Jordágka amain etsa minitaiya nuni amorreo aents aidau batsamtaijin ikaunmawaitjime. Dutika ai amorreo aents aidau atumjai maaniawajabi. Tujash wi ditan ijinatnume tiu asamtai, atum depetkajum ijinauwaitjume. Dutikajum dita nugke aidauk atum jukiuwaitjume.
JOS 24:9 “ ‘Tuja tikich tsawantai Balac Sipora uchiji Moab aents aidau apuji atumjai maaniatatus kautjamkajui. Nunik chichama etsejin aidaun akateg Balaam Beora uchiji ujaktajum, dutikam nii atumin pegkegchaunum yumigtamjatnume tusa tiuwai.
JOS 24:10 Tujash Balaam pegkegnum yumigtamjatnume tusan wi ti ai, pegkegnum yumigtamjajabi. Dutikan ayamjukuitjime.
JOS 24:11 Dutika ayamjukbau asajum namak Jordán katitkajum Jericó kaunawaitjume. Tuja Jericónum batsamin amorreo aents aidau, Canaán aents aidau, hitita aents aidau, gergeseo aents aidau, heveo aents aidau, Jebús aents aidau aatus atumjai maaniawajui. Tujash wi ditanak atumin idaitusuitjime. Nuadui atum depetka amukuitjume.
JOS 24:12 Tuja atum aidautijum amorreo aents aidaun apuji jimag aajakua nunú dita aentsji aidaujai depetkauwaitjume. Tujash duka atum ima senchigtin asagmekesh, atsa atum maanit ima yacha asagmekesh dutikachuitjume. Nunú depetkauwaitjum nunak wi atumin ishamjamkatnume tibau asag, ishamjamaidau asagmatai depetkauwaitjume. Nuadui atumek eke jegatsjuminig, ishamjamak pisaju aina nunak nuniku ainawai.
JOS 24:13 Nuadui yamai atumek tikich aents aidau jegamjamunum batsatjume. Tuja uva aidau, oliva aidau ajakmakbau juuka yuwajum dushakam dita ajakbaunmaya yuwagme. Wagki wi juju nugkanum ayá nunak ashí nugkajai atumin amasuitjime’, tawai Apajuí”, tusa Josué tiuwai. Tuja nuigtu Josué chichaak:
JOS 24:14 “Nunú ashí anentaimtusjum Tuke Pujuu eme anentsa emematkujum dekaskenum umigkatajum. Tuja yaunchuk atumi muunjum aidau namak Eufratesa amain etsa minitaiya nuni batsamas ditá apajuímtai aidaun emematujaku aina duka idaisatajum. ¡Nunikjum ima Tuke Pujuuk umigkatajum!
JOS 24:15 Tuja atum Tuke Pujuu umigkatasa wakegashkugmek, yamai titajum ya umigkatag tajume nunú. Yaunchuk atumi muunjum aidau namak eufratesnum batsamas dita apajuímtaiji aidaun emematujaku aina duka ememattag tajum, atsa nuniachkugmesh amorreo aents juju nugkanum batsamin aina nuna ememattai aina duka ememattag tajum, nunú titajum. Tuja atum Tuke Pujuu emematut dakitakjuminish, ¡wika mina pataag aidaujai Tuke Pujuun umigkun ememattatjai!” tiuwai.
JOS 24:16 Tusa tutai Israel aents aidau chichainak: “¡Wainka apajuímtai aina duka ememattsuk ima Tuke Pujuuwa duke emematuinaku umigkagmi taji!
JOS 24:17 Ii aidautin iina muunji aajaku aina nujai Egipto nugkanum inaku waitkatai batsatutin jiipajua duka Tuke Pujuu iina Apajuíjiyai. Niiyai wainchatai aidaun iish wainjin iwainajua nunú. Tuja nuigtushkam jiinja shimaku kuashat aents aidau batsatbaunum shimajinish nii kuitamjamu asa ayamjutpakui.
JOS 24:18 Ii shimamunum tikich aents aidau ayaunash nii jiija ishiakui. Amorreo aents aidau juju nugka juwi batsamin aajaku aina nunashkam nigki jiija utsagkui. Nunú anentaimtusa ¡Tuke Pujuu umigkagmi taji, wagki niyai iina Apajuíjiya duka!”, tuidau.
JOS 24:19 Tusa tiagtai Josué ditan chichajak: “Atumek Tuke Pujuuk kakajus umigmain dekapeatsjume, wagki Apajuík pegkegmai, akasmatnash akasmauwai. Iman asa atum niijai shiwagmaekujum pegkegchau takamugminak atsanjagkesh idaitugmamaitsui.
JOS 24:20 “Atum aidautijum nii umigtsuk kajimatki idaikujum, tikich wainka apajuímtai aina nunú emematu yujagminig, wait anenjamag ayamjutpak uwemtijamjau akush, tuke suwimkanak amasagtinai”, tiuwai.
JOS 24:21 Tusa tutai Israel aents aidau chichainak: “¡Duka nunikchattawai, iik ima Tuke Pujuuk umigkagmi taji!” tuidau.
JOS 24:22 Tusa tiagtai Josué chichaak: “Tuke Pujuu umigkagmi tusa tajum duka kame atumesh dekas umigmain asagmes tajumtai”, tiuwai. Tusa tama dita aimainak: “¡Iishkam ame tame dutiksaik anentaimji!” tiajui.
JOS 24:23 Tusa tiagtai Josué ditan chichajak: “Nunú takugmek anú wainka apajuímtai aidau atum pujamunum ayá nunú utsagtajum. Dutikajum Tuke Pujuu atumi Apajuíjum, atumi anentaimijai ememattajum”, tiuwai.
JOS 24:24 Tusa timatai Israel aents aidau aimainak: “¡Ii aidautik Tuke Pujuu iina Apajuíjiya duke emematku, nii tujabauwa duke umigkami taji!” tuidau.
JOS 24:25 Tusa tiagmatai yaunchuk Apajuí Moisésjai chichaman umikua dutiksag, Josué ashí Israel aents aidaujai nunú tsawantinig yaakat Siquemnum Apajuíjai chichaman umikajui. Nunú chicham umikbaun ditan susauwai umiktinme tusa.
JOS 24:26 Dutika nuadui Apajuí chichame umiktin agatainum agajui. Duwi kaya muuntan juki aak pegkejam Apajuíjai chichatai aakmakbau aajakua nuna yantamen numi encina tutai wajaunum nuna wakentin apusauwai.
JOS 24:27 Dutika apujus ashí Israel aents aidaun chichajak: “Atumek dekagme ii umiktin pachisa chicham taji nuna makichik tuké anta nunú. Nunú chicham ii umiamun aents wajas antauwa numamtin atata duka juju kaya nunuwai, wagki yamaya juwi atum aidautigmin Tuke Pujuu tujamiaja nunú umiktin pachisjum titin asagmin. Juju wainkujum Tuke Pujuu umijin amí tusa tajum nunú tuke aneasjumke atinaitjume”, tiuwai.
JOS 24:28 Nuna ashí tusa inagnak Josué Israel aents aidaun waketjatajum tusa maki makichik dita nugken ishiakui.
JOS 24:29 Dutika ishiak kuashat tsawan weatsaig, Josué Tuke Pujuun inake aajakua duka ciento diez mijanan ejeyi pujus jakauwai.
JOS 24:30 Nunikmatai muja Gaash tutai awa nuwi niina nugke Timnat-Sérah daagtin Efraígka nugken awa nuwi ukusajui.
JOS 24:31 Tuja Josué pujusmataig Israel aents aidauk ima Tuke Pujuunak umijujaku ainawai. Tuja Israel aents aidaun yayaak kuashat waji wainchatai aidaun Apajuí iwainajua nuna apu múun aidau wainkau aina nunú batsamsamtaishkam ima Israel aents aidauk Apajuínak umijujaku ainawai.
JOS 24:32 Israel aents aidau Egipto nugkanum batsatu jiinag shimak José ukunchin jukiaju aina nuna yaakat Siquemnum ukusajui. Nunak Hamor Siquem aajakua nuna apaji nugken Jacob cien kuichik jiju plata tutai najanamui akikmak sumakua nuwi ukusajui. Nunú nugkanak José wegantu aidau jukiu ainawai.
JOS 24:33 Eleazar Arónka uchiji jakamtai, Efraín nugkanum niina uchiji Fineesa nugke mujá aajakua nuwi ukusajui.
JDG 2:1 Apajuí ángel tumain Guilgalnumia juwaki Boquimnum weuwai. Nunik jegaa Israel aents aidaun chichajak: “Atumnak Egipto nugkanum batsatutigmin wi jiigmaijime. Dutikan juju nugka juna atumi muunjum aidaun anagkuakun, atumi uchijum wegantu aidaun susatnaitjai, tiuwaitag nuwi itajime. Ditan chichajuinakun: ‘Wi atumjai chichaman umikag nunak tuké umiktinaitjai’, tiuwaitjai.
JDG 2:2 “ ‘Tuja untsu atum aidautigmek juju nugkanmaya aents aina nujaig makichkish chichamak umikaigpa. Ayatak dita apajuímtaiji dakumkamu aina nunú tsaigka utsankatajum’, tiuwaitjime. Tujash atumek duka umigtukchauwaitjume. ¡Yamaikish juju umikugmek, aniau asajum umigtukchau ainagme!
JDG 2:3 Nuadui yamai tajime: ‘Au aents aidau atumjai batsata nunak jiignuk utsagchattajai. Nuadui dita apajuímtai aidaujai atumin tsanupajagtatui’ ”, tiuwai.
JDG 2:4 Tusa nunú Apajuí ángel tumain chichaka inagnakmatai, ashí Israel aents aidauk shiig senchi buutuidau.
JDG 2:5 Nuadui nunú nugka daajin Boquim adaikau ainawai. Tuja nuwi kuntinun maawag apeenak Tuke Pujuun emematiajui.
JDG 2:6 Nuna Josué tusa inagnakmatai, Israel aents aidau maki makichik ditá nugken waketjajui.
JDG 2:7 Tuja Josué pujusmataig Israel aents aidauk ima Tuke Pujuunak umijujaku ainawai. Nuigtushkam Israel aentsu apuji múun aidau Tuke Pujuu ditan yayaak kuashat dutikauwa nuna wainajaku aidau batsamsamtaishkam, ima Apajuínak umijujaku ainawai.
JDG 2:8 Tuja Josuék ciento diez mijan ejeyi pujus jakauwai.
JDG 2:9 Nunik jakamtai, muja Gaash tutainum, Efraígka nugken niina nugke Timnat-Sérah tutai awa, nuwi ukusajui.
JDG 2:10 Tuja Josuéjai betek batsamajaku aina dushakam múun waigkag jinawajui. Nunú jinawaju ai batsamas akiinkau aidauk Tuke Pujuunak dekajakchau ainawai. Tuja Apajuí ditan ayamjak wainchatai aidaun kuashat iwainajua nunakesh dekachaju ainawai.
JDG 2:11 Israel aents aidaun uchiji aidauk Tuke Pujuu diismak shiig pegkegchaun takajaku ainawai. Nuniau asag wainka apajuímtai Baal aajakua nuna emematujaku ainawai.
JDG 2:12 Nuninak ditá muunji aidau Egipto nugkanum batsatun Tuke Pujuu jiijua nunak kajimatki idaisajui. Nuninak nuwiya aentsu apajuímtai aidaun emematuidau. Nuniagtai Tuke Pujuu ditan senchi kajegkauwai.
JDG 2:13 Aatus Israel aents aidauk Baal, Astartéjai dakumka najanamu aidaun emematuinak Apajuí ememattanak kajimatki idaisajui.
JDG 2:14 Nuadui Tuke Pujuu Israel aents aidaun kajejuk dita wajiji aidaun shiwag aidau kasajug yajutkatnume tusa idaisauwai. Nuigtushkam Israel aents aidau batsatbaunum nuna yantamen ditá shiwaaji aidau batsata nunú jetekag depetuk amuktinme tusa idaisauwai. Nuadui Israel aents aidauk ayamjumamainchau wajasui.
JDG 2:15 Tuja maaniawagtatus shimiagtaish, Tuke Pujuu ditanak yaijakchauwai. Dutika yayachbau asag maaninakush depetmajakchau ainawai, Apajuí tibaunak imatiksag. Tuke Pujuu ditanak maaninakush kakaag iikmamainchau awajsauwai,
JDG 2:16 nuna dutikakush Israel aents aidaun kasajuidaun ayamjuktinun apu chichama epegkin aidaun adaitujui.
JDG 2:17 Tujash Israel aents aidauk apu chichama epegkin aidau adaijamunash umigkachaju ainawai. Nunidau asag Apajuínak umigtsuk tikich wainka apajuímtai aidaun emematujaku ainawai. Untsu ditá muunji aajaku aina duka Apajuí chichamen umijujaku ainawai. Tujash ditak Tuke Pujuu chichame umigtanak dakitug idaisau ainawai.
JDG 2:18 Tuke Pujuu apu chichama epegkin atinun adaikag tuké yaijakui. Nunú apu aidau batsamsamtaig, Israel aents aidaunak ditá shiwaaji waitkagtaish Tuke Pujuu ayamjujakui, wagki waituinak chichainamun antuju asa.
JDG 2:19 Untsu nunú apu adaikamu aidau jakamtaig, ataktushkam nunisag Apajuí ememattan kajimatkiag wainka apajuímtai aidaun emematujaku ainawai. Ditak yaunchuk ditá apachji aajaku aina nuna nagkaesau pegkegchau aajaku ainawai. Nunidau asag aents antakchaujai betek ima pegkegchaunak takajaku ainawai.
JDG 2:20 Nuadui Tuke Pujuu ditan kajejuk chichajak: “Juju aents aina juka wi yaunchuk ditá apachji aidaujai chichaman umikuitag nunak uminatsui. Nunidau asag minak umigtuinatsui.
JDG 2:21 Nuadui juju nugkanmaya aents aidaun Josué jiija utsag emau nii jak ukukbau batsata nunak wishakam jiignuk utsagchattajai”, tiuwai.
JDG 2:22 Nuna tiuwa nunak: “Juna antukajash yaunchuk ditá muunji aidau Tuke Pujuun emematujaku aina nunisag ditash Tuke Pujuun emematchajaintash tusa dekapsatatus”, tiuwai.
JDG 2:23 Nuna tau asa nuwiya aents aidaun Josué eke jiigchauwa nunak Tuke Pujuushkam jiigchauwai, ayatak idaisauwai batsamsatnume tusa.
JDG 4:1 Ehud jakamtai pujusag Israel aents aidauk Tuke Pujuun umigtsuk ataktushkam pegkegchaun takaidau.
JDG 4:2 Nuniagtai Jabín canaágnumia aents aidaun apuji, yaakat Hasornum inamajakua nunú, Israel aents aidaun depetuk amuktinme tusa Tuke Pujuu idaisauwai. Jabígkan suntaji aidaun apuji aajakui Sísara. Duka Haróset-goím tutainum pujujakui.
JDG 4:3 Jabígnak ajujakui novecientos carro hierro najanamu aidau. Nuadui Israel aents aidaunak veinte mijanai waitka batsamtuidau. Imatika waitka batsamtam ditashkam Tuke Pujuu yaimpakti tusag senchi segau ainawai.
JDG 4:4 Tuja Israel aents aidaun waitkajaku aina nunú tsawantinig Lapidot aajakua nuna nuwe Débora, Apajuí chichamen etsejujakua nunú, apu chichama epegkin aajakui Israel aents aidaunum.
JDG 4:5 Déborak palmera wajautin tuké ekemajakui. Nuadui aents aidau nunú palmeran “Débora palmeraji” tiu ainawai. Duka Efraígka mujaji tutainum yaakat Ramá Beteljai niniaku aajakua nuna ejapeen aajakui. Nuwi Débora pujau asamtai, Israel aents aidau shimutujaku ainawai, chichaman epegtujuati tusag.
JDG 4:6 Tuja makichik tsawantai Abinoáma uchiji Barac Neftalí wegantu aidau nugken yaakat Quedesnum pujuttaman, ujaka utitajum tusa Débora makichik aentsun akuptukui. Dutika ujakam taamtai chichajak: “Tuke Pujuu Israel aents aidau emematin aina nunú Apajuí juna aatus chichaak: ‘Muja Tabornum weti. Nunik nuwi Neftalí wegantu aidaun Sabulón wegantu aidaujai ipaa diez mil aentsun ijumjati.
JDG 4:7 Tuja Jabígka suntaji aina nuna apuji Sísara, atumin jetepaktatus niina carroji aidaunum namak Quisónnum kaunatnume titatjai. Nunikmatai wi atumin idaitustatjime depetuk ijinatnume’, tusa Tuke Pujuu tujamui”, tiuwai.
JDG 4:8 Tutai nii ayaak: “Wika amejai wetatjai. Untsu ame minachkuminig wikik wechattajai”, tiuwai.
JDG 4:9 Tutai Débora ayaak: “Wika amejai wetatjai. Wagki Tuke Pujuu Sísaranak nuwa maati titatui. Nuadui juju maaniamunum ame nagkamatin akumesh Barac maania depetmake, tamak achattame”, tiuwai. Nuna tusa Baracjai yaakat Quedesnum weuwai.
JDG 4:10 Nuwi Barac jegaa Sabulón wegantu aidaun Neftalí wegantu aidaujai untsuka diez mil aentsun ijumjauwai. Nunik wetai Déborashkam Baracjai weuwai.
JDG 4:11 Untsu Moisésa wegaji Hobab aajakua nunú wegantu quenita aents aajaku aina nuwiya makichik Heber daagtin niish kanak, yaakat Quedes jegattak nugka Saanaim numi encina ayamunum pujujakui.
JDG 4:12 Tuja Barac niina suntaji aidaujai muja Tabornum wakae tabaun Sísara dekauwai.
JDG 4:13 Nunik novecientos carro hierro najanamu aidaun yajuak niina suntaji aidaujai ijunjauwai. Dutika ditajai yaakat Haróset-goím batsatu jiinag shima shimakua jegawajui entsa Quisónnum.
JDG 4:14 Nunikagmatai Débora Barakan chichajak: “¡Pai, yamai maaniata, Tuke Pujuu Sísaranak amina idaitugmase! ¡Amina suntajum aidau shimamunmak Tuke Pujuu eemak weawai!” tiuwai. Tusa tima Barac muja Tabor pujau niina suntaji aidaun diez mil yajuak akaikiuwai.
JDG 4:15 Nunikag igkuniawag maaninamunum Sísara suntaji aidauk carronum yujas maanin aidaujai Baraka puyagjin ishamkajui. Nunak Tuke Pujuu nuniktinme tiu asamtai, imanisag ishamak maanimainchau dekapenak pisajajui. Tuja niina suntaji aidau pisagtai, Sísarashkam niina carrojin egketu akaiki tupikakiuwai.
JDG 4:16 Nunik Sísara tupikakmatai, suntag aidauk tikich suntag carronum yujas maanin aidaujai pisaidau. Nunittaman Barac niina suntaji aidaujai pataetuk ma maakua Haróset-goím ejegawajui. Nuna maaniawajua nuaduik Sísara suntaji aidauk ashí ijinamu asa makichik iwakukesh juwakchauwai.
JDG 4:17 Tuja Jabín, Hasoran apuji aajakua duka, quenita aents Heberan patayi aidaujaig maaninachu asagmatai, nuwi Sísarak Hebera nuwe Jael pujamunum tupikaki jegauwai.
JDG 4:18 Nunikmatai Jael jiintuki igkug chichajak: “¡Mina apujuh, ishamkagtutsuk juwi wayata!” tiuwai. Tusa tima wayamtai, jáanch dupagman juki dukuka uukui.
JDG 4:19 Dutikam pujusa senchi kitamak yumin uwagtatus Jaelan segauwai. Tusa segam duwap apagbaunum leche yajaa ukukbaun ujaka juki susauwai. Dutika susam nuna uwagmatai, ataktu dukuk idaisauwai.
JDG 4:20 Dutikam Sísara niina chichajak: “Waitinum pujusta, nuniamin makichik aentskesh inimpak juwi pujatsuak tujamkuig, atsawai tita”, tiuwai.
JDG 4:21 Nuna tusa Sísarak yaweju asa, shiig senchi kanag tepesui. Nunikmatai Jael martillon juki aak jigkatasa numi tsupija etsakamun juki, takamtak jegantun kajashkinum iju nugkajai ijumag achiauwai. Dutikam Sísarak jakauwai.
JDG 4:22 Tuja Baracshakam Sísaran egá egakua Jaela jeen jegauwai. Nunikmatai Jael jiintuki igkug chichajak: “¡Wayata, ame egaku wekaetam nuna iwaintuktagme!” tau. Tusa tama waya diikma, Sísarak yaunchuk buuknum iju chigkam jaka tepaun wainkauwai.
JDG 4:23 Aatus Apajuí Israel aents aidau wainainamunum, Jabín canaágnumia aents aidaun apuji aajakua nunak niina suntaji aidaujai depetkauwai.
JDG 4:24 Duwi nagkamas Israel aents aidau Jabígnak nuni senchi jetedau. Ima imatikainakua ashí ijinawag idaisajui.
JDG 5:1 Nunú tsawantin Débora, Baracjai juna aatus kantamau ainawai:
JDG 5:2 “Tuke Pujuu ashí ememattajum, wagki Israel aents aidaunmak aents maaniatatus wakeyin aidaush ayawai. Tuja nuigtushkam ditá apuji aidau maaniawagmi tusa tamak utujimkas, ayu tinu aidau batsatui.
JDG 5:3 ¡Apu aidauwah, yamai wi taja nunú antuktajum! ¡Apu atuwe aidauwah, antugtuktajum! ¡Wi yamai Tuke Pujuun kantamjuattajai! ¡Israel aents aidau Tuke Pujuun emematin aina nuna kantamjuattajai!
JDG 5:4 “Tuke Pujuuwah, Seír Edom nugkanum aajakua nuwi ame kuitamkagtusamin yujajin, nugka uugmayi, tuja yumishkam senchi yutujabi.
JDG 5:5 Tuke Pujuu Israel aents aidaun Apajuíji ememattayah, ame wainmin muja aidau uujiagmayi. Tuja muja Sinaíshkam senchi uugkauwai.
JDG 5:6 Samgar Anatan uchiji pujujakua nuaduik, tuja Jael pujujakua duishkam, jinta aidaunmak ishamain wekaemainchau asamtai, ditá shiwaaji aidau mantuawainum tau asag, yaja menantag jintachunum yujajaku ainawai.
JDG 5:7 Nunidau asag Israel aents aidauk kanajag batsamas apugtuchu kajimatkim batsatun, wi Déboran ditá ayamjuktasan, makichik nuwa uchijin ayamjuwama numamtuk wejibiajai.
JDG 5:8 Ashí Israel aents aidauk wainka apajuímtai aidaun emematiagmayi, nuniau asamtai, ame ditá maaniatnume tusam dita shiwaaji aidau ishitkabiume. Tujash ditak cuarenta mil suntag nagkigtin, tantaajintin ainakush sapigmaidau asag, maanimainji atsugbau wajukmaina nuniagmayi.
JDG 5:9 See tajame amina Tuke Pujuuwah, tuja Israel aents aidaun apuji aina nunashkam shiig anentuinajai, wagki ujumak wajiu aina nunú maaniawaju asagmatai. ¡Nuadui Tuke Pujuu ashí ememattajum!
JDG 5:10 Atum wiakuch aidautijum burro nuwa pujunum entsamka yujau aidautigmesh, tuja ujudauch dawenum yujau aidautigmesh, Apajuí kantamjuatajum, wagki nii depetmatan amasu asamtai.
JDG 5:11 ¡Tagku kuitamin aidautigmesh, tuja ujudauch yaaktanum batsamchau aidautigmesh, Tuke Pujuu, Israel aents aidaun ayamjuk agkanmitkau asamtai, platillo aidau awatkujum Tuke Pujuu kantamjuatajum!
JDG 5:12 “¡Débora mijaakaipa! ¡Wajiu wajasta! ¡Nuniakum kantamata! ¡Barac Abinoáma uchijiyah, ameshkam mijamtsuk, aents maaniaku achigbau aidau yajuakam chimpiata!
JDG 5:13 “Tusa kantaman inagnai, Israel aents aidauk wi ipaamu asag, shiwag maanitan yacha aidaujai, maaniawagtatus shiyakajui.
JDG 5:14 Tuja Efraín wegantu ujumak aents Amalec aents aidaun nugkenia juwakiag akaejabi. Untsu Benjamín wegantu aidau nuna ukuujin shiyakagmayi. Tuja Maquir wegantun- mayashkam apu aidau shimutkabi. Tuja Sabulón wegantu aidaushkam apu aidau shimutkabi.
JDG 5:15 Nuninai Déboranashkam apu Isacar wegantu aidau uyuniagmayi. Nuigtushkam Barakan Isacar wegantu aidau uyuniagmayi. Untsu Rubén wegantu aidauk apu wajiu ainayatak,
JDG 5:16 ditá uwigji aidaun puyatjuinak batsamas: ¿Maaniatjiash, atsa maaniashtajiash? waja batsatui. Rubén wegantu aidauk múun ainayatak sapig ainawai.
JDG 5:17 Tuja Galaad wegantu aidauk Jordágka amain yaaktamak batsamsaje. Untsu Dan wegantu aidauk Asher wegantu aidaujai, nayantsa pakaji wegajunum lanchagtin waigkag batsamsaje.
JDG 5:18 Untsu Sabulón wegantu aidau, Neftalí wegantu aidaujai maaninak ishamainnum yujasu ainawai.
JDG 5:19 “Tuja Canaán nugkanmaya apu aidau yaakat Meguidon ijus namak awa nuwi yaakat Taanac kaunawajui, nunikag nuwi maaniawajui, tujash depetmakchajui. Nunikaju asag makichik wajinakesh jutsuk waketkiajui.
JDG 5:20 Israel aents aidau Sísarajai maaninakug, yaya nayaimpinum ayá nujai ijunjas maaninatai tumainun maaniawagmayi.
JDG 5:21 Iina shiwaaji aidau entsa Quisónkan katitkatag titatman, yumi yutug dujajak tajaka utsagke. ¡Ame shiwag senchigtin aidau depetkam, iikmak chichakchamin awajsattame!
JDG 5:22 ¡Caballo aidau ishamkagtukag shiig senchi pisainak tutugtau antuewai!
JDG 5:23 Apajuí ángeltsukaita tumain chichaman etsejak: ‘¡Yaakat Meroznum aents batsata nuwi suwimak iyagti tajai!’ tiuwai. Nunak tiuwai wagki dita aidauk wajiu ainayatak, Israel aents aidau maaniagtai yaigchaju asagmatai.
JDG 5:24 “¡Heberan nuwe Jael quenita nuwa duka, tikich nuwa Israel aents aina nuna nagkaesau pegkegnum chichagtai atinai! Tuja nuigtushkam nii pujamunum nuwa aidau pujuina nuna nagkaesau shiig anentam atinai.
JDG 5:25 Sísara kitamak yumi segam, Jael lechen juki susauwai. ¡Leche kanteku shiig pegkejan pinignum yajaa juki susauwai!
JDG 5:26 Dutikam nuna uwag kanag tepesmatai, numi etsakamun juki martillowai kajashkinum iju nugkajai ijumag achia maabi.
JDG 5:27 Dutika ijum tadae tadaekawa nuwig jaka tepesmayi.
JDG 5:28 “Tuja Sísara dukujig uchiji megkaekamtai puyatki, jeganum niimtai ujaimunum tsapui niimas atsutai chichaak: ‘¿Wagka mina uchijush imanikash megkaekae? ¿Wagka mina uchiju carroji maanitai agma dusha megkaejae?’ timayi.
JDG 5:29 Tuja niina inake nuwa yacha aidau chichagtai, Sísara dukujishkam dutiksag chichaak:
JDG 5:30 ‘Maaniawag depetmakajas, nuwa inak aidau achigbaun, suntag aidau maki makichik, atsa nuniachkush jimagnakesh akantunikag yajumainak megkaejatai. Tuja Sísaranun jáanch pegkeg agatkamu aidaun: makichik jáanchin, tuja nuigtu jimag jáanch agatka apijamu aents depetmakun kuntujen anugtai aidaun aatus yajumainakus batsatatai’, tuidau.
JDG 5:31 “Tuke Pujuuwah, amina shiwaajum aina duka ame ashí ijinata. ¡Untsu amina anempaina duka etsa tajiag etsantama iman atinme!” aatus tusa Débora Baracjai kantama inagnakui. Nuna maaniau aina duwi nagkamas cuarenta mijan maanitsuk batsamsau ainawai.
JDG 6:1 Tuja Israel aents aidauk Tuke Pujuun intimjukiag ataktushkam pegkegchaun takajaku ainawai. Nuniagtai nii madiágnumia aents aidau siete mijanai waitkastinme tusa idaisauwai.
JDG 6:2 Imatika waitkainamu asag ishamainak mujá waa aidaunum uumak kakajus wainmainchau batsamajaku ainawai.
JDG 6:3 Nunik batsatai Madián aents aidau, Amalec aents aidau, nuigtu aents etsa minitaiya nuni batsamin aidau aatus Israel aents aidau ajajin utsantuawag kasajuidau.
JDG 6:4 Nunikag nuwi Israel aents aidau nugken aakmajag batsamas, ajak ajakmamu aidaunak Israel aents aidau yumainnak makichkish ukugtsuk ashí ijituinak, nuigtushkam uwigji aidaun, buey aidaun, burro aidaun aatus ashí yajutuidau. Dutikainak Israel aents aidau yumainnak makichkish ukujainachu.
JDG 6:5 Nunú shiwag aidauk, ditá aakjin tagkuji aidaujai yajuakag, Israel aents aidau nugken utsanawag piyakag nunú nugkanum ayaunak ashí tsaikag ijituinau. Imaaninak camellojijai shiig kuashat manchi ajaka amuktatus miniyama imanik minituidau.
JDG 6:6 Imatika waitkamu asag ditá yumainji atsujam shiig senchi waituidau. Imanik waituinak Tuke Pujuun segau ainawai yaijatkata tusag.
JDG 6:7 Nuna Tuke Pujuu antujuk,
JDG 6:8 makichik profetan awetiuwai. Dutikamu nunú ditan chichajak: “Tuke Pujuu Apajuí Israel aents aidau emematin aina nunú juna aatus tawai: Atumi muunjum aidau Egipto nugkanum inaku waitkatai batsatun wi jiijabiajai.
JDG 6:9 Tuja Egipto nugkanum batsatutigmin agkanmitkauwaitjim nunakek dutikachuitjime, tikich aents aidau waitkagmaidaunashkam atumesh wainjuminig jiija utsagkan dita nugke aidaun atumin amasbaijime.
JDG 6:10 Nuadui atumi chichagkun: ‘Witjai Tuke Pujuu Apajuí atum emematin ainajum duka. Nuniau asamtai, amorreo aents aina nuna ememattai aidau dakumka najanamu aina duka ishamkaigpajum’, tiuwaitjime. Tujash atumek minak umigtukchaugme tawai Apajuí”, tusa profeta tiuwai.
JDG 6:11 Nuna tiu ai Apajuí ángel tumain yaakat Ofránum taa numi encina wajaunum nuna wajautin ekemsauwai. Nunú numik Joás Abiezer wegantu aajakua nudau aajakui. Tuja nunú tsawantinig Gedeón Joása uchiji Madián aents aidau waitkainum tusa, uumak vino najanatasa uva najatainum pujus trigon awatug akaak pujau.
JDG 6:12 Nuna pujujun Apajuí ángeltsukaita tumain wantintuk chichajak: “¡Aents wajiu senchigtinuh, Apajuí amejaig pujawai!” tau.
JDG 6:13 Tusa tama Gedeón ayaak: “Tsagkugtugta Apujuh, tujash Apajuí jutijai pujaish, ¿wagka imanikaish waituinaji? Iina muunji aidau ujapainak, Apajuí wainchatai ishamain aidaun iwainag Egipto nugkanum batsatutin jiipajui tusa tujamin agma dusha ¿wajukauwaita? Apajuí iinak idaitamsau asamtai, madiágnumia aents aidau waitkagmainawai”, tiuwai.
JDG 6:14 Tusa tutai Tuke Pujuu niina pempeentuki chichajak: “Israel aents aidaun Madián aents waitkaina duka ame ayamjuktatme. Wi aminak awemajame”, tiuwai.
JDG 6:15 Tusa tamashkam ataktu Gedeón ayaak: “Chah Apujuh, wait aneasam tsagkugtugta. Wisha Israel aents aidaunash ¿wajuk ayamjuktajaki? Mina patag wegantu aina duka Manasés wegantu aidaujai apatkamak wainkauch kakakchau ainawai. Tuja mina yatsug aina nujai ijumjamash wika shiig wainkauchitjai”, tiuwai.
JDG 6:16 Tusa tutai Tuke Pujuu ayaak: “Wi amejai pujau asamtai, duka dutikattame. Nuadui Madián aents aidauk makichik aents depetmaina numamtuk depetkam ijinattame”, tiuwai.
JDG 6:17 Tusa tama Gedeón chichaak: “Dekaskenum minash Apajuíya ame aujtakmek wainchatai iwaintugkata, nuna wainkan dekas Apajuíyap tujutua titagme.
JDG 6:18 Tuja wait aneasam wepa, juwi pujumata nuniamin amina ajamsatnun utitjai”, tiuwai. Tusa tama nii ayaak: “Ayu juwi dakastajame, nuniai weme taata”, tiuwai.
JDG 6:19 Timatai ukuak, niina jeen weuwai. Nunik makichik chivo tsakatan maa inagkauwai. Nuigtu veinte kilo harinan juki pagkan levadurajai pachimtsuk inajuauwai. Dutika neje inajuamun chagkinnum egkea nuna yumijin ollanum yajaa juki numi encina tutai wajamunum ejentauwai.
JDG 6:20 Dutikamtai: “Anú neje inajuamua nunú pagjai kayanum patagta. Dutikam nuna yumijiyai ukatkata”, tusa nunú ángel tiuwai. Tusa tima imatiksag umikmatai,
JDG 6:21 neje pagjai patagbaun ushujutai takakbauwai nuna titijin nunú ángel antigkui. Dutikam nunú kayanmaya jii kegak nuna apea emegkakui. Nuna dutika Gedeógkan iwaintuk ayatak megkaekauwai. Nunikmatai ataktu awagkig Gedeógkak wainkachui.
JDG 6:22 Nunik megkaekamtai anentaimas, dekas Tuke Pujuu ángeljai betek wantinkaujaimpap chichasja tiuwai. Nunik chichaak: “¡Chah, Tuke Pujuuwah, amina ángeljai betek paan wainkajam duwish jakashtajash!” tiuwai.
JDG 6:23 Tutai Tuke Pujuu ayaak: “¡Ishamkaipa, jakashtatme! Wi aminak agkan pujutan amastasan tajuagme”, tiuwai.
JDG 6:24 Tusa tima Gedeón Tuke Pujuu emematak nuwi kaya ekenag najanauwai. Dutika nuna “Apajuí agkan pujutan sukagtin” tuu adaikauwai. Duka yamaikish Abiezeran patayi aidaun batsamtai yaakat Ofrá tutaya nuwi awai.
JDG 6:25 Tuja nunú kashia duwik Tuke Pujuu Gedeógkan chichajak: “Amina apa toroji jimaja nuwiya makichik siete mijan ajamu jukita. Dutikam amina apa ememattai Baal dakumka najanamu awa nunú tsaigkata. Dutikakum nuna yantamen wainka apajuímtai Asherá dakumka najanamu numi waja dushakam tsaigkata.
JDG 6:26 Nunú dutikam Tuke Pujuu amina Apajuíjum emematku kuntin maa patai apetai kaya aidau ekenjam yakí jiikam najanata. Dutika umikam toro maam nuna neje nuwi patai ashí apeakum emematjita. Tuja nunú apeakmek numi Asherá dakumka najanamu tsaiktatam nujai apeattame”, tiuwai.
JDG 6:27 Tusa tima Gedeón niina inake aidaun diez yajuak, Tuke Pujuu dutikata tibaunak imatiksag ashí umikui. Tujash nunak tsawai dutikachui, kashi dutikauwai, wagki niina apaji patayi aidaun, tikich aents nunú yaaktanum batsamin aidaunashkam ishamau asa.
JDG 6:28 Nuna dutikau ai tsawak nunú yaaktanmaya aents aidau nantajag diikma, Baal dakumka najanamu numi Asherá dakumka najanamujai mai tsaikbaun wainkajui. Tuja nuigtushkam yamajam altar kaya ekenja najanamunum kuntin maa ashí apeamun wainkajui.
JDG 6:29 Nuna wainkag pempeentunikiag iniininak: ¿Yaki junash jutikame? tusag, nuna ejetatus kuashta egakag, inimtanashkam imanisag inim yujakma, Gedeón Joása uchiji dutikau tabaun dekawajui. Nunik Joásan jegajuawag chichajuinak:
JDG 6:30 “¡Amina uchijum jiikta, maami! ¡Wagki Baal dakumka najanamuwe nuna, tuja tikich nuna yantamen numi Asherá dakumka najanamu wajama nujai nii tsaike!” tuidau.
JDG 6:31 Tusa tiagtai Joás ditan ayaak: “¡Atumek Baal ayamjakjumek maanimaitsugme! ¡Tuja Baala ayamjauk eke tsawatsaig mantamnati! Tuu yujatsuk idaisatajum. Baal dekas Apajuíyaitkug, niina niime dakumka najanamua duka niinu asamtai nigki ayamjumakti”, tiuwai.
JDG 6:32 Aatus Gedeón Baal dakumka najanamu ememattai wajattaman tsaiku asamtai, Israel aents aidau niina daajin yapagtuawag Jerubaal adaikau ainawai, wagki Joás chichaak: Baalak nigki ayamjumakti tiu asamtai.
JDG 6:33 Nunú nagkaemakiu ai Madián aents aidau, Amalec aents aidau, nuigtu aents etsa minitaiya nuni batsamin aidaujai ijunag namak Jordágka amain katiajajui. Nunikag nuwi Jezreela nugke ségaju weajunum aakmajag batsamsajui.
JDG 6:34 Tujash Gedeógkak Apajuí Wakani egkemtujam Abiezera patayi aidau wijai ijunjatnume tusa uwig aishmagku kachujin umpuajui.
JDG 6:35 Tuja nuigtushkam Manasés wegantu aidau ujaktajum ijunag atujatkatnume tusa, chichama etsejin aidaun ishiakui. Nuigtushkam Asher wegantu aidau, Sabulón wegantu aidau, Neftalí wegantu aidau ujaktajum tusa ishiakui. Dutikamu nunú ujakajam ditashkam Gedeógjai atuniktatus shiyakajui.
JDG 6:36 Nunik ijunjamtai Gedeón Apajuín chichajak: “Israel aents aidau ayamjukta tusa tujutmaum nuna umikti tusa yainkatnaitkumek,
JDG 6:37 uwija duwape uje wajasun trigo akatainum aipkittag nunú kashikmas nugkak buku aig nunú duwap chupijun wainkatjai. Nuna wainkan dekaattajai dekas ame Israel aents aidaun ayamjukti tujutbaunak. Nunikan dekaskeap Apajuí yainkattawa titatjai”, tiuwai.
JDG 6:38 Nunú tibauk imanisag uminkauwai. Nuadui Gedeón kashikmas duwapen diikma chupig aun wainak juki ijuja makichik pinignum yumin aimkauwai.
JDG 6:39 Nuna wainkau ayatak ataktushkam Gedeón Apajuín chichajak: “Wait aneasam wi ataktu iniimkuish kajegtukaipa. Yamaik ima junak segajame. Ataktush tikich iwainakta. Yamai duwap chupitna juju buku wetai nugka chupigti”, tiuwai.
JDG 6:40 Gedeón tusa tibaunak nunú kashi aajakua duwi Apajuí betek dutikauwai. Nuadui kashinia duwi diyam duwapek buku aig nugka chupika asauwai.
JDG 7:1 Gedeón tikich daajin Israel aents aidau Jerubaal adaikau aina nunú kashikmas nantakmatai, suntag niijai yujau aidaushkam ashí nantajajui. Nunikag shima shimakua yumi pukuni jiinu Harot tutainum jegawajui. Nunikag nuwi aakmajag batsamsajui. Nuwi pujusmak Madián aents aidauk nujinum muja Moré tutai najatamunum batsamajakui.
JDG 7:2 Tuja Tuke Pujuu Gedeógkan chichajak: “Aents kuashat yajuaka wegam duwi dita Madián aents aidaun depetkajag, Apajuí yaimpasmatai depetmakji tutsuk, kuashat ainag duwi depetmakji tumain ainawai.
JDG 7:3 Nuadui aents aidau ishamkagtuidauk jemin waketjatajum tita”, tiuwai. Tusa tima Gedeón aents aidaun: ¡Ya ishamkagtawa duka dita jeen waketjati! tusa iniasui. Tusa iniam veintidos mil aents waketjajui. Nunikagmatai diez mil aents juwakajui.
JDG 7:4 Nunikmataishkam Tuke Pujuu ataktu Gedeógkan chichajak: “Anú juwakaja dushakam shiig kuashtai. Nuniau asamtai namaka yajuaka emata, dutikawamin wi awi dekapsattajai. Dutika dekapsan duwi ujaktagme, wajupak amejaish shiyaktinme nuna”, tiuwai.
JDG 7:5 Tusa tima Gedeón aents aidaun yajuak namaka yumin uwagtinme tusa ejegauwai. Dutikamtai Tuke Pujuu chichajak: “Tikishmatug tekemtuawag yumi umuinai, tikich aidau uwejen shikikag yawá umau wajagtata nunú etegjata”, tiuwai.
JDG 7:6 Tuja uwejen yumi shikikag yawajai betek umuidauk trescientos aents aajakui. Tuja tikich aidauk tikishmatug tekemtuawag uwajaju ainawai.
JDG 7:7 Nunikagmatai Tuke Pujuu Gedeógkan chichajak: “Juju trescientos aents aina jujaig Madián aents aidaunak ijinattajai atumi ayamjakun. Untsu tikich aina duka ashí waketjatnume”, tiuwai.
JDG 7:8 Tusa timatai Gedeón tikich aidaunak waketjatajum tusa awakjauwai. Untsu eke waketuinatsaig dita uwagtin yajaka jukimu aidaun kachu aidaujai ashí atanjauwai. Nunú waketjamtai ayatak trescientos aents etegjamu aidaujaig Madián aents aidau tsumunum batsatai nuna nujiin jegajuawajui.
JDG 7:9 Nunikagmatai nunú kashia duwi Tuke Pujuu Gedeógkan chichajak: “Nantakim jetekta, wi ame depetkati tusan idaitustatjame.
JDG 7:10 Untsu jetet ishamakmek, amina inakem Purájai atuekam shiwag batsata nunú anutukta.
JDG 7:11 Nuwi jeganta pujusam wajintuk chichakajat nunú antukta. Nunú antukam ichichmamjam jetektatme”, tiuwai. Tusa tima niina inake Purájai weuwai. Nunik jegauwai nunú shiwag aakmag batsatbaunum.
JDG 7:12 Tuja Madián aents aidaushkam Amalec aents aidaujai, nuigtu tikich aents etsa minitaiya nuni batsamin aidaujai aatus ijunag nugka dita batsatbaun pampantuk, manchi ajaka ijinatatus wajukmaina imanidau. Tuja dita camellojishkam shiig kuashat nayantsa kamatkajijai betek aajakui.
JDG 7:13 Tuja Gedeógkak Purájai nunú shiwag batsatbaunum anumak pujus antukui makichik suntag kumpajin nii kajamjamujin pachis ujaak: “Kajanmash makichik pag sebada najanamu kagkegak, ii batsatag juwi taak makichik aakan tukume. Dutikak aaknak tegaka ajuime”, tau.
JDG 7:14 Tusa ujaam, niina kumpaji ayaak: “Auk duka tikichkesh aan kajamjachume. Duka Joása uchiji Gedeón suntag Israel aents aidaun apujiya nunú aan kajamjaume. Apajuí senchijin Gedeón iina depetamkatta nunú aan kajamjaume”, tau.
JDG 7:15 Nunú dekas uminkatnun niina kumpaji ujaun Gedeón antuk Tuke Pujuun emematiuwai. Nunik wakitkiuwai dita batsatbaunum. Nuwi jegaa Israel aents aidaun chichajak: “¡Umintsatajum maaniawagmi, Madián aents aidaunak depetuk amuktinme tusa Tuke Pujuu iina idaitugmastatui!” tiuwai.
JDG 7:16 Nuna tusa trescientos aents aina nuwiyan kampatuma imajin betek akanag ijumjauwai. Dutika uwija kachuji aidaun tinamak, nuigtushkam yumi aimtainum nuwi ekematain yajaka ekemag tinamkauwai.
JDG 7:17 Dutika chichajak: “Mina diigkau atajum, wi shiwag batsata nuna yantamen jegakun wajukattaja nuniakuig atumshakam betek nuniktajum.
JDG 7:18 Tuja wi mina uyuntuina nujai kachu umpuakuig, atumshakam dutiksagmek shiwag batsata nunú tenteajum umpuagtajum. Dutika umpuakjum senchi untsumkajum: ‘¡Tuke Pujuu daajin, Gedeógka daajin!’ titajum”, tiuwai.
JDG 7:19 Nuna tusa Gedeógkak cien aentsun yajuak, shiwag aidau jinta niimainak batsatu, kashi aehaet tikich aidaujai yapajinatatus uminainai jegantauwai. Nunik jegantun kachun umpuinak, cántaro yumi yajaa jutai takakbau aidaun tsaikajui.
JDG 7:20 Dita umpuiniagtai tikich akanka ishiakbau aidaushkam betek umpuajajui. Nuninak yumi aimtai takakbaunashkam dutiksag tsaikajui. Jii ekemakbaunak menajin takusag, tuja kachunak untsujin takus ijunas untsumainak: “¡Tuke Pujuu daajin, Gedeógka daajin! ¡Jetektajum!” wajaidau.
JDG 7:21 Tuja Israel aents aidauk Madián aents aidau batsatun tenteawag jasa batsatu. Nunik batsataig senchi untsumaidaun antukag ishamak, eke jeteachmaitak sapigmakag pisainak pampaidau.
JDG 7:22 Tuja trescientos Israel aents aidauk kachun umpú batsataig, Madián aents aidauk ditak pempeentunikiag maaniatnume, nuninak pisajag yaakat Sererá wetaiya nuni shiyakag yaakat Bet-sitá jegatnume. Nuninai tikich aidauk yaakat Abel-meholá yaakat Tabatnum ijus awa imanui jegatnume, tiuwai Tuke Pujuu.
JDG 7:23 Timau asag pisajagmatai, Neftalí wegantu aidaun, Asher wegantu aidaun, Manasés wegantu aidaun aatus Gedeón ashí untsukui, Madián aents aidau pisaja nuna pataetuktinme tusa.
JDG 7:24 Nuna tusa Efraígka nugke muja ikam weajunum batsamin aina nunú ujaktajum tusa chichama etsejin aidaun Gedeón ishimak: “Kaunawag Madián aents aidaujai maaniatnume. Nunikag Madián aents aidau eke nugka agkannum yujasag namak Jordágkan katitkag yaakat Bet-bará tutaya nuwi jegainatsaig, nunú nugkan dita batsamtuk akijuatnume”, tusa akatmamjauwai. Tusa tiajam Efraín wegantu aidaushkam Gedeón tibaunak imatiksag umikajui.
JDG 7:25 Dutikainak nuigtushkam Madián aents aidaun apuji Oreb, Zeeb aatus achikajui. Dutikawag Orebnak yamai kaya Oreb tutai awa nuwi maawajui. Untsu Zeeb aajakua nunak vino najanatasa uva chimpia najatai aajakua nunú yamai Zeeb tutaya nuwi maawajui. Nuadui nunú uva chimpia najatai aajakua duka niina daajin namkauwai. Aatus Madián aents aidaun ai aintuinakua Jordágka amain Gedeón pujaunum waketuinak, Orepa buuken Zeepa buukejai tsupijuk jujukiajui.
JDG 8:1 Gedeón Madián aents aidaujai maaniatatus, tikich Israel aents aidaunak chichama akuptuk ujayatak, Efraín wegantu aidaunak ujakchauwai. Dutikayatak imapam ujakui shiwajan pataetuktinme tusa. Nuadui kajekag Gedeógjai jiyaniku ainawai.
JDG 8:2 Tusa tiagtai Gedeón ditan ayaak: “¿Atum dekas mina nagkaetasu dutikaujum duka dekatsjumek? Atum aidautijum ujumak dutikaujum duka ii aidauti kuashat dutikamua nuna nagkaesauwai.
JDG 8:3 Apajuí atumnak Madián aents aidaun apuji aidau Orepan, Zeebjai achiktinme tujabiu asamtai achikugme. Tuja wika atum dutikaujum imannakesh dutikachjai”, tiuwai Gedeón. Aatus timatai nuna Efraín wegantu aidau antukag kajekbaujin tsagkujajui.
JDG 8:4 Nunikagmatai Gedeógkak niina suntaji trescientos aidaujai shiwajan aintuinak pimpikiaju ainayatak, namak Jordágnum jegawag atú amain katiaju ainawai.
JDG 8:5 Nunikag yaakat Sucot tutainum jegawag, Gedeón nuwiya aents aidaun chichajak: “Wait aneasjum aents wijai yuja nunú yutai ajamjuttsatajum, ditak pimpiki yawekag mininawai. Iik Madiágnumia apu aidau Zébah Salmunájai achiktasa ainku yujaji”, tiuwai.
JDG 8:6 Tutai Sucotnumia apu aidau chichajuinak: “Amina aentsjum aina duka yujumkak ajamsashtatji, wagki eke Zébah Salmunájaig achikchaugme”, tuidau.
JDG 8:7 Tusa tiagtai Gedeón ditan ayaak: “¡Apajuí yaintsamtai Zébah Salmunájai achika waketkun, numi jagkigtin aidaun zarza aidaujai uwegshunum ayá nuna yajuakan atumnak asutkattajime!” tiuwai.
JDG 8:8 Aatus tusa nuwiya juwakiag jegawajui yaakat Penuelnum. Nunikag nuwishkam yaakat Sucotnum sumakbaunak dutiksag yutain sumakui. Tujash Penuelnumia aidaushkam Sucotnumiajai betek tiajui.
JDG 8:9 Nuadui Gedeón ditan chichajak: “¡Juju yaaktanum kumpin jiikbau waja junak wi depetmaka waketkun ajaka ajuattajai!” tiuwai.
JDG 8:10 Zébah Salmunájai yaakat Carcornum atú amain etsa minitaiya nuni quince mil suntag aidaujai batsatu, wagki ciento veinte mil suntag maaniamunum jinawaju asamtai.
JDG 8:11 Nunik batsatai Gedeógkak niina suntaji aidaujai jinta uwegshunmanini wegaunum yaakat Nóvah nuigtu Jogbehá aatus aajakua nuna yantamen etsa akaetaiya nuni shimutkauwai. Nunik jegajuawag anenjas batsatun jetekajui.
JDG 8:12 Dutika jeteam Zébah Salmunájai jiinki tupikakiajui. Nunikmatai Gedeón pataetuk amayag mai achikui. Nuna dutikamtai shiwag aidauk shiig senchi ishamkajui.
JDG 8:13 Nunik Gedeón maania depetmak nugka yaijuch Heres tutai aajakua nuni wakitkiuwai.
JDG 8:14 Nunik wenak nunú nugkanum makichik datsauch yaakat Sucotnumia pujaun achika juki kuashat iniasui. Tusa iniam Sucotnumia apu setenta y siete aajaku aina nuna daajin ashí adaitujui.
JDG 8:15 Tusa ujakam Gedeón nuna dekaa Sucotnum weuwai. Nunik jegaa nuwiya aents aidaun chichajak: “¿Atumesh aneakjumek Zébah Salmunájai achikchaugme tusajum dushiktibiujum dusha? Tuja ¿atumesh aneakjumek Zébah Salmunájai achikchaugme tusajum mina aentsug aidau yaweja pimpiki minidau dekayaitkujum yutai ajamsachbaijum dusha? ¡Pai yamaik achikan juwi itaajai!” tiuwai.
JDG 8:16 Nuna tusa Gedeón apu Sucotnumia aidaun suwimka suwak jagki aidau, zarza aidaujai uwegshunmaya yajuakbauwai asutkauwai.
JDG 8:17 Tuja nuigtushkam kumpin jiikbau yaakat Penuelnum wajattaman ajak ajuauwai. Nuwiya aents aidaunashkam kajegkui.
JDG 8:18 Dutika Zéban Salmunájai iniak: “¿Atum muja Tabornumia aents aidau amukuitjum dusha wajuku aajabi?” tau. Tusa tama dita aimainak: “Amejai betek agmayi. Maki makichik aents aidauk apu tumain agmayi”, tuidau.
JDG 8:19 Tusa tiagtai Gedeón senchi untsumak: “¡Mina yatsug emkau aidau! ¡Dekas mina yatsug emkau aidau kajegkuitjume! Nuadui Tuke Pujuu daajin tajime, atum dita maachuitkugminig, wisha atumnak yamaik maubaitsujime”, tiuwai.
JDG 8:20 Nuna tusa inagnamuik niina uchiji emkau Jéter aajakua nuna ame maata tusa inajui. Tujash Jéterak eke tsakatuch asa ishamak maumainchau dekapjauwai.
JDG 8:21 Nunitai Zébah Salmunájai Gedeógkan chichajak: “¡Amek dekas mai mantuata! ¡Aentsuk niina wajiujin dekatia!” tuidau. Tiagtai Gedeón jegantun mauwai. Dutika Zébah camelloji Salmuná camellojijai kuntujen waji pegkeg apeekamu aidaun yajutkauwai.
JDG 8:22 Dutikamtai Israel aents aidau Gedeógkan chichajuinak: “Madián aents aidau waitkagmaidau ame ayamkagtukam agkanmitkagtuau asam ame, tuja ame wegantu aidaujai iina apuji atajum”, tiajui.
JDG 8:23 Tusa tama Gedeón ditan ayaak: “Wika atumi apujig achattajai. Tuja mina uchigkesh atumi apujig achattawai. Atumin apujig Tuke Pujuu atatui.
JDG 8:24 “Untsu atum shiwag aidau maakjum ditá patakumtaiji aidau yajutkaujum nuna segajime mina sujustinme tusan”, tiuwai. Tuja nunú suntag aidauk uwegshunum batsamin asag patakumtai oro najanamun tuke patakumajaku ainawai.
JDG 8:25 Tusa timatai Israel aents aidauk jáanchin nugká ainak nuwi patakumtai yajuakbaun batsasajui. Dutikawag Gedeógkan chichajuinak: “Pai, juju jukita”, tiajui.
JDG 8:26 Nunú patakumtai oro najanamu aidauk diecinueve kilo tumain aajakui. Untsu apu aidaun iwagmamtaiji, nugkutaiji nuigtu jáanch yamakaitkau aidau aatus duka dekapachbau aajakui. Tuja camello anujamu aidaushkam dekapachbau aajakui.
JDG 8:27 Nunú oro yajuakbauwai Gedeón sacerdote nugkutain dakumak najanauwai. Dutika niina yaaktajin Ofrá ejegauwai. Nuna Israel aents aidau ashí emematuinak Tuke Pujuu ememattan idaisau ainawai. Tuja Gedeógkak pegkegnap dutikaja tukama, nuna niina patayi aidaushkam emematuidau asamtai, niinishkam pegkegchau aajakui.
JDG 8:28 Dutika depetkamu asag Madián aents aidauk Israel aents aidaunum yunumag batsamajaku ainawai. Nuadui yaunchuk aajakbaunak betekchau tiki wainkauch juwakajui. Tuja Gedeón iwaku pujusmataig, nunú nugkanmak cuarenta mijan maanitsuk batsamsau ainawai.
JDG 8:29 Gedeón Jerubaal tuuta awagmatai aajakua duka niina jeen wakitki pujusui. Nuwi pujus setenta uchin akigkui, tuja niina nuweshkam kuashat aajakui.
JDG 8:31 Tuja niina ikaa nuwe Siquem pujujakua dushakam makichik uchin uchigmakui. Dutikamtai Gedeón nunú uchi daajin Abimelec adaikauwai.
JDG 8:32 Gedeógkak shiig muumpaki jakauwai. Nunik jakamtai, niina apaji Joása ukumataiji Abiesel wegantu aidau batsamtai yaakat Ofrá aajakua nuwi ukusajui.
JDG 8:33 Gedeón jakamtai batsamas Israel aents aidauk Baal dakumka najanamu aidaun emematuinak Apajuí ememattanak ataktu idaisajui. Tuja dita apajuímawagtinnak Baal-berit aajakua nuna etegkawag nuna emematujaku ainawai.
JDG 8:34 Nunidau asag ditan shiwag waitkagtai Tuke Pujuu Apajuí ayamjukua nunak kajimatki idaisajui.
JDG 8:35 Gedeón tikich daaji Jerubaal aajakua nunú ditan ayamjak kuashat takasu aig, niina patayi aidaunash wait anenjachu ainawai.
JDG 9:1 Jerubaalan uchiji Abimelec niina dukuji wegantu aidau Siquemnum batsatu asamtai, ditajai chichastatus weuwai. Nunik jegaa ditan chichajak:
JDG 9:2 “Iik pataa ainaji, nuadui tajime. Jerubaala uchiji setenta aina duka ashí apu amain ainatsui, ima makichik apu amainai tajai. Nuniau asamtai juwi tikich aents aidau batsata nujai nunú pachisjum shiig chichasjum antumtikatajum”, tiuwai.
JDG 9:3 Tusa timatai Abimelekan patayi asag, niina atuinak, Siquemnumia aidaujai chichastatus shiyakajui.
JDG 9:4 Nuigtushkam apajuímtai Baal-berit dakumka najanamu jegamjukbaunum kuichik plata najanamu atatman setenta jukiajui. Dutika Abimelekan susajui. Dutikam nuna akikmak, Abimelec aents magkagtin aidaun yajuakui. Dutika nunú aents aidaujai,
JDG 9:5 yaakat Ofrá niina apaji Jerubaal pujujakbaunum weuwai. Nunik wegak niina yachi setenta aajaku aina nuna makichik kaya múun pujaunum nuwi ashí kajegkui. Untsu niina yachi Jotam awan aajakua nunú uumkau asa, ima nigki uwemjauwai.
JDG 9:6 Dutika niina yachi aidaun ashí amukmatai, Siquemnumia aents aidau, nuna yantamen Bet-miló aajakua nuwi batsamin aidaujai Siquemnum numi encina tutai wajaunum kaya pegkejam tutai pujaunum nuwi ijunjajui. Nunikag nuwi Abimelekan apu adaikajui.
JDG 9:7 Abimelec apu wajase tabaun Jotam dekaa, muja Guerizim tutainum wakauwai. Nunik nuwi wajas Siquemnumia atuktinme tusa senchi untsumak chichaak: “¡Siquemnumia aidauwah, wi titatag nunú shiig antuktajum! ¡Atumnash Apajuí antugtamkachajaintash!
JDG 9:8 “Makichik tsawantai numi aidau apugtin amí tusag wakekajui. Nuadui olivon chichajuinak: ‘¡Ame iina apuji ata!’ tiajui.
JDG 9:9 Tusa tama: ‘Wika tikich numi aidaun apuji atag takunuk, aents aidau Apajuín emematuinak mina aceitejun juki takau aina nuna, tuja ditanu atinnashkam mina aceitignak juki takau aina nuna idaikun apu amainaitjai’, tusa dakitjauwai.
JDG 9:10 “Tusa timatai higueran chichajuinak: ‘¡Untsu ame iina apuji ata!’ tusag segajui.
JDG 9:11 Tusa tama higuera chichaak: ‘Wika numi aina nuna apuji atag takunuk, mina yujagkeg higo shiig pegkeg yumimitun nejenaitag nuna idaikun apu amainaitjai’, tusa dakitjauwai.
JDG 9:12 “Tusa timatai numi aidau uva numijin chichajuinak: ‘¡Untsu ame iina apuji ata!’ tusag segajui.
JDG 9:13 Tusa tama uva numiji chichaak: ‘Wika numi aina nuna apuji atag takunuk, Apajuín emematuinak tuja dita aidaushkam minaiya vino najanamun umuinak shiig aneen aina nuna idaikun apu amainaitjai’, tusa dakitjauwai.
JDG 9:14 “Tusa timatai inagnamua nuna numi jagkigtinun chichajuinak: ‘¡Untsu ame iina apuji ata!’ tusa segaidau.
JDG 9:15 Tusa tama jagki chichaak: ‘Dekaskenum atumi apuji ati tusajum wakegakjumek, wi dukuka ijiam nuna wakentin batsamsatajum. Untsu atum dakitakjuminig, minaiya jii keeka muja Líbano tutainum setug múun ayá nuna apea ijinattawai’ tiuwai jagki”, tiuwai Jotam.
JDG 9:16 Nuna tusa inagnak: “Tuja yamai wi atumin tajime: ¿Atum Abimelec apu adaikabiujum dusha pegkejak dutikaujum? ¿Tuja mina apag Jerubaal atum aidautigmin shiig kuitamjamkau aina dutikagmek, atumesh niina patayi aidaush shiig kuitamkaujum?
JDG 9:17 Atumek Madián aents aidau waitkatai batsatutigmin, mina apag atumi ayamjutpak maaniak jamain wajakui.
JDG 9:18 Tujash atumek duka aneetsuk, mina apaju patayi aidaujai shiwagmagajum niina uchiji setenta aajakua nunú makichik kayanmak ijinaugme. Tujash ima dukek dutikachugme, nuigtush Abimelec atumi patayi asamtai, Siquema apuji ati tusajum adaikaugme.
JDG 9:19 Tujash yamai wi tajime: Atum aidautijum mina apag Jerubaal aajakua nunú niina patayi aidaujai pegkeg anentaiyai kuitamkau ainakjumek, Abimelecjai shiig aneasjum pujustajum. Nuniagmin niishkam atumin shiig anenjamsatnume.
JDG 9:20 Untsu atum shiig kuitamkachu ataik, Abimelecnumia jii kegak Siquemnumia aidaun Bet-milónnumia aidaujai apea ijinati. ¡Tuja nunú jimag yaakta nuwiya jii kegak Abimelekan apea maati!” tiuwai.
JDG 9:21 Nuna Jotam aatus tusa ukuak, tupikaki yaakat Beernum wee pujusui. Nunak nunikui wagki niina yachi Abimelekan ishamak.
JDG 9:22 Tuja Abimelekak Israel aents aidaun apuji wajas kampatum mijan inamjauwai.
JDG 9:23 Tuja nuadui Jotam tibaunak imanisag umigkauwai. Nuadui ashí aents aidaunum shiig pegkegchau, senchi waitiamu ati tusa Apajuí tiuwai. Nunú umintai, pempeentunikig tsainika ainawai.
JDG 13:1 Israel aents aidauk Tuke Pujuu umigtan kajimatkiag ataktushkam pegkegchaun takaidau. Nuniagtai Tuke Pujuu ditan idaisauwai. Dutikamtai filisteo aidau cuarenta mijan waitkasu ainawai.
JDG 13:2 Tuja nunú tsawantin makichik aents Dan wegantu Manoa daagtin yaakat Soránum pujujakui. Niina nuweg uchi uchigmachu asamtai uchijig atsujakui.
JDG 13:3 Makichik tsawantai Apajuí ángeltsukaita tumain nayaimpinmaya nunú nuwan wantintuk chichajak: “Amek yaunchuk nagkamsam uchigmachuitme. Tujash yamai ejapjuktatme, nunikam uchi aishmag uchigmaktatme.
JDG 13:4 Nuadui umutai vino nuniachkush tikich uwaja nampetai aidauk makichkish uwajaipa. Tuja Tuke Pujuu dakitamu aina dushakam yuwawaipa,
JDG 13:5 wagki uchi aishmag uchigmaktatam duka atatui Nazareo. Nunú uchi intashig awagchamu atatui, wagki nii múun wajasa filisteo aidau Israel aents aidaun waitkaina nuna ayamjuk agkanmitkattawai”, tiuwai.
JDG 13:6 Tusa tima aishin ujaktatus wejiuwai. Nunik jegaa ujaak: “Apajuí ángeljai betek wi pujamunum tajutuame. Nuniakui senchi puyatkamjai, wagki Apajuí ángeljai betek asamtai. Yaitpa tusanuk wikish iniaschamjai, tuja niishkam niina daajinak tujutchame.
JDG 13:7 Untsu uchi uchigmaktatme tusa tujutmae. Nuna tusa, yamai nagkamsamek vino uwajaipa, tuja tikich uwaja nampetai aina dukesh uwajaipa, tujutmae. Nuigtush pegkegchau aina duka yuwawaipa. Tuja ame uchi uchigmaktatam duka uchi eke akiintsaig Apajuínu etegkamu asa, wika pegkegchau aina nunak takaschatjai tumamiu asa pegkegchaunak takatsuk, jau aina numamtin uchik atatui, tujutmae”, tiuwai.
JDG 13:8 Tusa ujakam Manoa Tuke Pujuun segaak aatus tiuwai: “Apujuh, ame aents awemaum nunú ataktu awekagtita tusan segajame, nunú taa uchi akiinkuish itugkattaji nuna ujapakti taji”, tiuwai.
JDG 13:9 Tusa segam Apajuí Manoa sumamunak betek umikui. Nuniak nuwa ajanum wekaetatman Apajuí ángeljai betek ataktu wantintukui. Tuja Manoa niijai wekaechau asamtai,
JDG 13:10 tupikaki weuwai ujaktatus. Nunik ujaak: “¡Aentsun wi wainkabiag nunú ataktu wantintugkae!” tiuwai.
JDG 13:11 Tusa ujakam Manoa niina nuwejai nunú aents pujamunum weuwai. Nunik jegantun iniak: “¿Ameka tikich tsawantin mina duwagjai chichasmayum?” Tusa tama nii ayaak: “Ehe, witjai”, tiuwai.
JDG 13:12 Tusa tutai Manoa chichajak: “Ame mina duwag tium nunú uminkuish ¿wajuk uchish kuitamainaitji? ¿Tuja uchish itugkattaji?” tau.
JDG 13:13 Tusa tutai ángel tumain wantinkauwa nunú Manoan ayaak: “Wi amina nuwemin timag nunak imatiksag umikti.
JDG 13:14 Vino najanamun uwajaigka. Tuja tikich umutai uvanmaya najanamu aidaunash uwajaigka, nuigtushkam tikich umutai kajiau aidaunashkam uwajaigka. Tuja tikich yutai aidaun Apajuí dakita nunak yuwawaigka. Wi tibaunak Imatiksag umikti”, tau.
JDG 13:15 Tusa tama, Apajuíyap ángeljai betek wantintujuk tujutua tachau asa chichajak: “Wait aneasam juwi jutijai juwakta, nunikamin chivo tsakatan maa inajuamtai yuwami”, tau. Tusa tama nunú ángeljai beteka nunú niina ayaak: “Wi juwi juwaknush amina yutaigminak amejai jimagtuknuk yumaitsujai. Untsu chivo tsakat maam nuna neje ashí apeakum Tuke Pujuu emematta”, tiuwai.
JDG 13:17 Tusa tama Manoa niina chichajak: “Untsu amina daagmesh yaita dukesh ujajatkata, nuna dekau asan ame tukagtam nunú uminkui see kuashat titagme”, tiuwai.
JDG 13:18 Tutai Apajuí ángeljai betek wantinkauwa nunú niina ayaak: “¿Wagka mina daajush dekatasamesh wakegame? Mina daajuk shiig pegkeja ibau asa kakajus dekamaitsui. Nuadui uukbaujai betekai”, tiuwai.
JDG 13:19 Tusa timatai chivo tsakatan, ajak aidaun neje juukbaujai ijumag juki, kayanum patai nuna ashí apeak Tuke Pujuun emematiuwai. Nuna dutikamtai Tuke Pujuu Manoan niina nuwejai wainchatai pegkeg aidaun iwaintukui.
JDG 13:20 Tuja Manoa niina nuwejai chivon maa apeauwa nunú bukuitamunum Apajuí ángeljai betek nuwi pachitkau yaki waun wainkajui. Nuna wainkag tsuntsumawag nijayin nugka antig pujusajui.
JDG 13:21 Nuna Manoa wainak anentaimjauwai, dekas Tuke Pujuuwap ángeljai betek wantinkaun wainkaja tiuwai. Duwi nagkamsag niinak tuja niina nuwenakesh ataktuk wantintukchauwai.
JDG 13:22 Nuna wainkau asa niina nuwen chichajak: “Iik dekas Apajuí wainkau asa jakattaji”, tiuwai.
JDG 13:23 Tutai niina nuwe ayaak: “Tuke Pujuu iina mantamatag takug, ii kuntin maa nuna neje ashí apeaku, ajak juukbaujai apeag nuna dakitmain wajake. Tuja iina iwaintugmaka nunashkam iwaintugmamainchau awajtamkae. Nuigtushkam iina ujapaka nunash ujapamainchau awajtamkae”, tiuwai.
JDG 13:24 Duwi pujus niina nuwe ejapjuk uchi aishmagkun uchigmakui. Nunikmatai adaikauwai Sansón. Nunú uchi muumpatai Tuke Pujuu pegkegnum yaijakui.
JDG 13:25 Tuja makichik tsawantai yaakat Sorá Estaoljai niiniaku aajakua nuna ejapeen Danka nugke aajakua nuwi Sansón pujaun Apajuín Wakani egkemtujui.
JDG 14:1 Makichik tsawantai Sansón weuwai yaakat Timnat. Nunik nuwi filisteo nuwa pujuttaman wainak wakejukui.
JDG 14:2 Nunik niina jeen wakitki apajin dukujijai ujaak: “Yaakat Timnatnum filisteo nuwa pujaun wainkamag nujai nuwenatag tajai. Nuadui wait aneasjum nuwenatasa umitai aina nunú ashí umiktajum”, tiuwai.
JDG 14:3 Tusa tutai niina apaji dukujijai ayaak: “¿Wagkamek filisteo aents Apajuín umigchau aina nuninjaish nuwenatame? ¿Iina patayi aina nuwiyag nuwak atsawak? atsa nuniachkush ¿ashí Israel aents aina nuwiya nuwak makichkish atsawak?” tiuwai. Tusa tama Sansón ayaak: “Wika nuna nuwan wakegajai. Dekas nunú nuwa sumagtuktajum nujai nuwenatjai”, tiuwai.
JDG 14:4 Tuja Tuke Pujuu yaunchuk emtika nuniktin ati tusa tibaunak niina apajig dukujijaig dekajakchau ainawai. Tuja nunú tsawantin Israel aents aidaun filisteo aidau waitkaidau asamtai, wajuk waintuanuk filisteo aents aidaun ijinkun Israel aents aidaun agkanmitkawag tau asa tiuwai.
JDG 14:5 Nuadui Sansógkak niina apaji, dukuji aatus yaakat Timnat weuwai. Nunik wegau niina apajin dukujijai ukuak tsegkeki uvan egak weuwai. Nunik wegaun león yama tsakaju senchi kajeau jetekui.
JDG 14:6 Dutiktai Apajuí Wakani Sansógkan egkemtujui. Dutikam leónkan achika chivo tsakatuch maumaina dutika mauwai. Nuna dutikash apajinak dukujijaig ujakchauwai.
JDG 14:7 Tuja Timnatnum jegawag Sansógkak nii nuwa wakejukbau pujaunum weuwai. Nunik niijai chichasui.
JDG 14:8 Nunik dukap tsawan pujusa nii nuwenatnuji tsawan jegamtai, wenak yaunchuk nii león maamujin diistatus tsegkeki weuwai. Nunik jegan diikma leónka iyashi sakajunum dapa jegamak yumijina egketun wainkauwai.
JDG 14:9 Dutika wainak ashí juki duka dukakua weuwai. Nunik niina apaji dukujijai pujaunum jegan, ditanashkam akaantuk susauwai, dutikam ditashkam nuna dukawajui. Tujash Sansógkak león maa ukukbaunmayan jukimjai tusag ujakchauwai.
JDG 14:10 Nunik jegawag Sansógka apajig uchiji nuwe atinun wainkatatus wejiuwai. Tuja datsauch nuwenuk nuna dutikin ati tibaun umiak Sansón nii nuwenbaunum jiistamatatus ipamauwai.
JDG 14:11 Tujash filisteo aidauk ishamkagtuidau asag, treinta datsauchin ipauwai, Sansón nuwentai uyunainak batsamsatin aidaun.
JDG 14:12 Nunú treinta aents aidaun Sansón chichajak: “Makichik anentaimsa aimtain iniastajime. Dutikamtai nuwenbau siete tsawan asa atata duwi ujatkatajum wajina takunua taja nunú. Nunú betek ujatkagminig maki makichik jáanch shiig pegkeg lino najanamun, nuigtu nuwenbaunum weaku nugkutai aidaujai amastajime.
JDG 14:13 Untsu nunú betek aimkachjumek, jáanch shiig pegkeg lino najanamu, nuigtu jáanch nuwenbaunum weaku nugkutai aidaujai mina sujustatjume”, tiuwai. Tusa tama dita aimainak: “Ame waji tame nunú tita antukmi nunika aimkagmi”, tuidau.
JDG 14:14 Tusa tiagmatai Sansón aatus tiuwai: “Yukagtinnumia yutai pegkeg jiinkiuwai, senchigtinnumia yumimitu jiinkiuwai”, tiuwai. Timatai, nunash wajina takug tawa tusa kampatum tsawan batsamtakush ejechajui.
JDG 14:15 Tuja ejechamin dekapenak tsawan ipak usumta duwi Sansógka nuwen chichajuinak: “Iina tujabi nunash wajina takug timae nunú aishjum dekajuata. Nunikam amina ujapakmatai ujajatkata. Unstu nunú dekajuachaminig, aminak, amina apa patayi aidaujai apeattajime. ¡Wagki atumek dekas iina jáanchji aina nunú atankimi tusajum ipajatuaugme!” tiajui.
JDG 14:16 Tusa tiagmatai Sansógjai chichastatus weuwai. Nunik jegajua buutki chichajak: “¡Amek minak anentsume! ¡Amek minak kajegtame! Nuniau asam mina pataag aina nunú anentaimsa aimtai iniasume, tujash amek minak dusha waji takumea tiume duka ujattsume”, tiuwai. Tusa tama Sansón ayaak: “Mina apagnakesh, tuja mina dukugnakesh ujatsug nunash aminash wagkanuk ujaktagme”, tiuwai.
JDG 14:17 Tusa tamashkam ujatkati tusa niyai ayaumas pujus nii nuwenku jiistabau siete tsawan aajakua imanisag siete tsawan buutú pujau. Imatika waitka pujujam tsawan sieteya duwi nunash wajina takug tiyawa nuna ujakui. Tusa ujakam niina patayi aidau batsatun jegajua niishkam ujakui.
JDG 14:18 Dutika ujakajam tsawan sieteya duwi eke etsa akaetsaig Sansógka jegajuawag chichajuinak: “Dapa yumiji yumimitun nagkaesauk tikichik atsawai. Tuja Leónka nagkaesau senchigtinuk tikichik atsawai”, tuidau. Tusa tiagmatai Sansón ditan chichajak: “Mina duwag ujapakchamtaig, atumek nunap tawa tusagmek ejemainchau ainagme”, tiuwai.
JDG 14:19 Nuna taig Tuke Pujuu Wakani egkemtug Sansógkan senchimtikauwai. Dutikam weuwai yaakat Ascalón, nunik nuwi treinta filisteo aidaun mauwai. Dutika nuna jáanchji aidaun yajutuk akikmakui. Nuna dutika senchi kajeka niina apaji jeen wakitkiuwai.
JDG 14:20 Nunikmatai Sansón nuwenbaunum aents aidau pujusu aina nuwiyajai Sansógka nuwen tikich aentsnum sujutkajui.
JDG 15:1 Tuja kuashat tsawan nagkaemakiu ai, trigo juut jegamunum Sansón niina nuwen ijagsatatus wegak chivo tsakatan juki weuwai. Nunik jegaa chichaak: “Mina kanutaijui wayan mina duwagjai chichastajai” tusa wayatag titatman niina wegaji dakitjauwai.
JDG 15:2 Nunik chichajak: “Wika dakitakus idaisayatai tibaijai. Tau asan amina kumpagmín nuwemnak sujukmaijai. Tujash tikich mina nawantug ekeu niina nagkaesau shigmauch puja nunú nuwatkata”, tiuwai.
JDG 15:3 Tusa tama Sansón ayaak: “Yamai atum filisteo aidautigminak wi ijinattajime. Dutika ai wagka aikae tujutmainuk atsuttawai”, tiuwai.
JDG 15:4 Nuna tusa ukuak niina nuwe sujutkamunum iikmaktatus, trescientos amich nuwa aidaun achika ijumjauwai. Dutika apa apatuk ujuknum jigkakui. Dutika jimag amich apatka jigkakbaunum nuna ujuken ekematain anug jigkakui.
JDG 15:5 Dutika nuna ekemak amichan atia filisteo aidau ajaji aidaunum ishiakui. Nunú shimak trigo juuka ijumjamu aidaun eke juukchamu aidaujai ashí apekui. Dutikak nuigtushkam uva ajakbaun, olivo ajakbaujai ashí apeka ijinauwai.
JDG 15:6 Dutika ijituam filisteo aidauk: ¿Yaki aikae? tusa inimainak yujakma: Auk Sansógka wegaji niina nuwen atanki, niina kumpajinig sujutkam, nuna iikmak aikae tabaun dekawajui. Nunik dekawag nuna shimutuk nunú nuwanak apajijai apeawag maawajui.
JDG 15:7 Dutikawagmatai Sansón chichaak: “Atum aniau asagmin, nuna iikmakun makichkish idaitsuk ashí amuktatjime. ¡Nunak dekas wi umiktinjun tajai!” tiuwai.
JDG 15:8 Tusa senchi kajeku asa filisteo aidaun jeteka shiig kuashat ijinauwai. Dutika ukuak Etamnum kaya múun waa au asamtai, nuwi uumak pujustatus weuwai.
JDG 15:9 Nunik weu ai filisteo aidaushkam Sansógkan egainak Judá nugken shiyakajui. Nunikag jegawag nuwi nagkamas batsamak nugka Lehi tutaiya imanui jegantajui.
JDG 15:10 Imanikagmatai Judá wegantu aidau ditan iniinak: “¿Wagka jutijai maaniatasagmesh atumesh kaunaugme?” tuidau. Tusa tama dita aimainak: “Sansón iina pegkegchau awagtamkau asamtai, achika juki iishkam dutiksaik iikami tusa yujaji”, tuidau.
JDG 15:11 Tusa tiagmatai nuna antukag, tres mil aents Judá wegantu aidau Etamnum kaya múun waa aunum nuwi Sansón pujau asamtai shimutkauwai. Nunik jegawag nuwi pujuttaman wainkag chichajuinak: “¿Amek dekatsmek filisteo aents aidau iina nagkaetamsau senchigtin aina duka? ¿Wagka jutikamesh utugchatash itagkagtuaume?” tuidau. Tusa tama Sansón ditan ayaak: “Wika dita pegkegchau takasbaujin dutiksanuk iikamjai”, tiuwai.
JDG 15:12 Tusa timatai dita chichajuinak: “Iik ame achika juki filisteo aidaunum sujukmi tusa kaunaji”, tuidau. Tusa tama Sansón ayaak: “Atum mantuashtinaitkugmek, dekas mashtatjame tusa tujuttajum”, tiuwai.
JDG 15:13 Tusa tutai dita ainak: “Atsa, ii aidautik mashtatjame, ayatak achika juki filisteo aidau susami tusa taji”, tuidau. Aatus tusag jimag soga yamagmai jigkajajui. Dutikawag uumak pujaun jiikiag jukiajui.
JDG 15:14 Dutikawag we wenakua Lehin nugkanum jegawajui. Nunikagmatai filisteo aidauk shiig aneenak untsumkiag jiintujajui. Dutikiagtai Apajuí Wakani Sansógkan senchimtikauwai. Dutikam sogayai niina kuntujin, uwejen jigkagbaunak hilo lino najanamu apeamu tsujinmaina numamtuk tsujiajui.
JDG 15:15 Dutika nuadui burro jagke eke shiig sakamchau atatman juki, duwi awatug mil filisteo aidaun kajegkui.
JDG 15:16 Dutika chichaak: “Makichik burro jagkenig mil aentsun kajegkan ijumsawa emakjai”, tiuwai.
JDG 15:17 Nuna tusa burro jagke takakbaun nagkima ajapauwai. Nuadui nunú nugka daajig Ramat-lehi adaikamui.
JDG 15:18 Tuja Sansón senchi kitaag Tuke Pujuun segaak: “¡Ame minak shiwag shiig kuashat aina nuna depetkati tusam yainkaume! Nuadui ¡yumi umumain atsutai juju aents amina umigtamchau batsata nuwi kitakai jakati, nunikmatai niina iyashin dushikjatnume tusamek idaitumaitsume!” tiuwai.
JDG 15:19 Tusa timatai Apajuí yumi initkanmayan jiikiuwai. Dutikamtai Sansón nuna uwajui. Nuna uwag ataktu wajiu wajasui. Nuadui nunú yumi pukuni jiinkiuwa nuna daajin adaikauwai En-acore. Duka yamaikish nugka Lehin tutainum awai.
JDG 15:20 Sansógkak veinte mijan Israel aents aidaun yaigkui. Nunak filisteo aidau nunú tsawantin Israel aents aidaun ashí depetuk waitkajaku aina nunú tsawantin niig takasui.
JDG 16:1 Makichik tsawantai Sansón yaakat Gazanum weuwai. Nunik nuwi makichik nuwa akiaku dutiktai pujuttaman wainak, nuna jeen waya niijai kanajui.
JDG 16:2 Nuwi pujai filisteo aidaushkam Sansón tae tabaun antukag, nunú yaaktanmaya aidau Sansón pujamun tenteawajui. Dutikawag yaakta waitijin kuitamainak makichik tsawan batsamtau asa, kiitai kashin tsawaku maami tusag dakainak jasa takamtak batsatu.
JDG 16:3 Tujash Sansógkak ejampek shintaag waiti aidaunak numijijaí tegajui. Dutika jiju minantuamunashkam ukuinag ashí yanaki yajuak, yaakat Hebrógjai niiniaku muja jiitkaunum iwaka nagkimak utsagkui.
JDG 16:4 Duwi pujus, nuwa Dalila daagtin Sorec nugka pakajin pujuttaman jukitatus ausauwai.
JDG 16:5 Dutikamtai filisteon apuji aidau Dalilajai chichastatus shiyakajui. Nunik jegajuawag chichajuinak: “Sansógkash wagkag ibau senchigtinaita tsanuja dekajuata. Dutikawamin itugkaik depetmainaitji nunú ejemi. Nunú dekajua achika jigkaja apusami. Tuja ame dekajuawaminig, ii aidauti maki makichik mil cien kuichik plata najanamu amastatji”, tiajui.
JDG 16:6 Tusa tima Dalila Sansógkan chichajak: “Wagka ibau senchigtinaitme nunú minash wait aneasam ujatkata. ¿Wajigmin jigkapajagmataiya ayamjumainchaush amainaitme?” tau.
JDG 16:7 Tusa tama nii ayaak: “Siete daek samek aidauwai jigkatjagmataig, tikich aents aina nujai betek senchigtuchu amainaitjai”, tiuwai.
JDG 16:8 Tusa timatai Dalila filisteo apuji aidaun ujakui. Tusa ujakajam daek samek aidaun siete jukiag Dalilan susajui. Dutikam nuna juki Sansógkan jigkajui.
JDG 16:9 Dutika jigkaja, aents aidaun yaunchuk niina kanutaijin uuka batsasu asa, untsumak: “¡Sansógka, filisteo aidau jetepainawai!” tau. Tusa tutai Sansón nantak nunú daeknak apeamujai betek tsujiajui. Dutikamtai filisteo aidauk wagkag ibau senchigtinaita nunak dekamainchau dekapjajui.
JDG 16:10 Tuja Dalila Sansógkan chichajak: “¡Tsanujaume! ¡Amek minak dushiktakum tujutiume! Tujash dekas yamaik wait aneasam tujutta, itugkaya emetmainush amainaitme nunú”, tiuwai.
JDG 16:11 Tusa tutai Sansón ayaak: “Soga yamajam makichkish takashtaiyai jigkatjagmataig, tikich aents senchigtuchu aina nujai betek amainaitjai”, tiuwai.
JDG 16:12 Tusa timatai yaunchuk aents aidaun niina kanutaijin uuka batsasua dutiksag batsasu asa, Dalila soga yamagman juki Sansógkan jigkaja, untsumak: “¡Sansógka, filisteo aidau jetepainawai!” tau. Tusa tama Sansón nantak, hilo tsejegkush tsujimaina imatika soganak tsujiajui.
JDG 16:13 Dutikamtai Dalila niina chichajak: “¿Wagka ima tsanugme? ¡Amek minak tuke tsanugme! ¡Itugkaya emetmainush amainaitme nunú tujutta!” tau. Tusa tama Sansón ayaak: “Kakaumainchau wajasti tujutkumek, mina intashig siete chapikmagmawa nunú jáanchjai ijumjam jáanch apataiyai apijam, nuadui numi ajiam nuwi jigkamainaitme. Dutikawamin tikich aents senchigtuchu aina nujai betek amainaitjai”, tiuwai. Tusa timatai Dalila Sansógkan ikanag aepes intashi siete chapikmagbaun ijumag jáanch apataiyai apijauwai.
JDG 16:14 Dutika numi juki ajia jigka emetua untsumak: “¡Sansógka, filisteo aidau jetepainawai!” tau. Tusa tama nantak intashi jigkatuamunak japiki juwak jáanch apigtainak numi ajiamujai tsujiajui.
JDG 16:15 Dutikamtai Dalila chichajak: “¡Amek waitaitme! Nuniayatkum aneajame tusa tujutmaume. Amek mina dushiktau asam, kampatuma imania tsanujaume. Tujash tuwi senchigmesh ajutjamua duka eke ujattsume”, tau.
JDG 16:16 Tusa kashi kashinig iniak waitkamu asa yawetug dakitak, dekas jakatjai tiuwai.
JDG 16:17 Tau asa, wagkag ibau senchigtinush ayi nuna Dalilan ujaak: “Wika nazareowaitjai. Mina intashjunak makichkish tsupigtuchu ainawai, wagki minak eke akiintsaig Apajuínu ati tusa etegkamu asan, pegkegchaun takaschati tibauwaitjai. Tuja mina intashjun tsupigtukagmataig, tikich aents senchigtuchu aina nujai betek amainaitjai”, tiuwai.
JDG 16:18 Tusa etsegtumakmatai, yamaik dekas ujatkae tusa filisteo apuji aidaun ujaktajum tusa chichaman akuptak: “¡Yamaik Sansógkak wagkag ibau senchigtinaita nunak ashí ujatkae, nuniau asamtai kaunatajum!” tiuwai. Tusa timatai ame dekajuawaminig, akiktatjame tiu asag, kuichki jukiag Dalila pujamunum wegajui.
JDG 16:19 Dalilak niina bakuin Sansógkan patas ikanjauwai. Nunik kanagmatai niina intashi siete chapikmagbaun tsupijati tusa makichik aentsun untsukui. Nunú jegantun ashí tsupijauwai.
JDG 16:20 Dutika tsupijamtai Dalila untsumak: “¡Sansógka, filisteo aidau jetepainawai!” tau. Tusa tama Sansógkak Tuke Pujuu niina idaisamunak dekachu asa, kanag tepau nantak tuke ayamjubau asa nuniktakama nunimainchau wajasui.
JDG 16:21 Nunik kakaumainchau wajasmatai, filisteo aidau achikag jiin mai ukuitkajui. Dutikawag yaakat Gazanum emajui. Dutika nuwi ejegawag cadena bronce najanamui jigkajag, aents achika chimpitainum trigon dekeak pujusti tusa apusajui.
JDG 16:22 Dutikam pujai niina intashi ataktu tsakajauwai.
JDG 16:23 Filisteo aents aidaun apuji aidau Sansógka achiku asag depetmakji tusag, shiig aneenak ditá apajuímtaiji Dagón aajakua nuna emematuinak, kuntinun maawag apeawagtatus ijunjajui. Nunik batsamas kantamainak: “Iina apajuíji yaimpasmatai, iina shiwaaji Sansón depetkaji” wajaidau.
JDG 16:24 Tuja tikich aents filisteo aidaushkam nuna wainkag dita apajuímtaijin emematus kantamainak: “Iina apajuíji yaimpasmatai, iina shiwaaji Sansón ii ajakmamu aidaun ijitjamak aents aidaun kuashat ijinnuwe nunú depetkaji”, wajaidau.
JDG 16:25 Imatuidau asag shiig aneenak Sansón achikam egketa nunú jiiki itatajum tima, jiiki itawagmatai senchi dushikinau. Dutikainak jega jegamku ajigbau jimag wajaunum nuna ejapeen awajsajui.
JDG 16:26 Dutikam wajasa uchi niina egkesa ejeentaun chichajak: “Juju jega jegamku ajigbau aina nunú jimag atsuak nuwi ejentunta, achimka wajasan ayamjatjai”, tiuwai.
JDG 16:27 Tuja filisteo aidaun apuji aidauk nunú jeganum ashí nuwa nuwajaima ijunag piyak batsatu. Nuninai tikich aidaushkam nuna yakin ekenja jegamkamunum tres mil aents tumain Sansógkan dushikiagtai nuna diinak batsatu.
JDG 16:28 Imatu batsatai Sansón senchi untsumak Tuke Pujuun segaak: “¡Tuke Pujuu Apajuí ashí senchigtinuh, wait aneasam ima juke inagnamu yainkata! Filisteo aidau mina jiijun mai ukuitjukajag dushiktuina nuna iikmaktajai. ¡Senchijum sujusta!” tiuwai.
JDG 16:29 Nuna tusa jega jegamku ajiamu ejapeen jimag wajaun nuna mai achikui.
JDG 16:30 Nunik achika wajas untsumak: “¡Filisteo aidautigmek yamai wijai jinaattagme!” tiuwai. Tusa tamawaik ashí niina senchijijai shitakiuwai, dutikam kupinak jega iyak filisteo apuji aidaunak, tikich nuwi batsatujai ashí yutua ijinauwai. Nii iwaku pujusa aentsun ijinauwa nuni kuashat nii jak ijinauwai.
JDG 16:31 Nunik Sansón jakamtai, niina yachi aidau patayi aidaujai kaunawag iyashin jukiag, yaakat Sorá Estaoljai awa nuwi niina apaji Manoa ukusbaunum ukusajui. Sansógkak Israel aents aidaun yayaak veinte mijan takasui.
RUT 1:1 Israel aents aidaunmak eke apu adaijachbau asamtai, ayatak makichik aents Apajuí etegkamu ayamjukam batsamajaku aina, nunú tsawantin ditá nugken ashí nujan tepeauwai. Nunikmatai makichik aents Elimélec daagtin, Judá nugken yaakat Belégnum pujau, Moab nugkanum ujumak tsawan pujustatus weuwai. Nunik wegak niina nuwe Noemí nuigtu niina uchiji jimag: Mahlón, Quilión aatus juki weuwai. Dita aidauk Belégkanmaya ainayatak, Belégkan tikich daaji Efrata tutai asamtai, Efrata aents tutai aajaku ainawai. Nunik shiyakag Moab nugkanum jegawag nuwi batsamsajui.
RUT 1:3 Nuwi batsatai Noemí aishi Elimélec jakauwai. Nunikmatai niina uchiji jimag aajakua nujai Noemí juwakui.
RUT 1:4 Nunik batsamas nunú uchi aidauk Moabnumia nuwa aidaujai mai nuwenawajui. Nunú nuwa aidaun daajig Orfa, Rut aatus aajakui. Nunik nuwenawag diez mijan tumain batsamas
RUT 1:5 ditashkam mai jakauwai. Nunik uchiji jinaamtai, Noemík uchigtuchu, nuigtush aishinchau nigkiuch juwakui.
RUT 1:6 Nunik pujus Tuke Pujuu niina aentsji Israel aents aidaunak wait anenjae, dutikau asamtai, ajak ajakmamuji aidauk shiig tsapai kuashat nejenawai. Nuadui yamaik nujantaik waituinatsui tabaun Noemí Moab nugkanum pujus dekauwai.
RUT 1:7 Nunik dekaa Judá nugkanum waketak, niina uchiji nuwe aajaku aidaujai uminas jiinkiuwai.
RUT 1:8 Nunik jintá wesag Noemí ditan chichajak: “Atumi duku pujamunum wakitkitajum, atum mina, tuja mina uchig aidaujai shiig kuitamkagtukuitjum dutiksag atumnash Tuke Pujuu kuitamjamkatnume.
RUT 1:9 Tuja nuigtush ataktu aishinawag shiig batsamsatnume tusa yaimpaktinme”, tiuwai. Aatus tusa yapinum kugkuasui kumpama ishiaktatus. Dutikam dita buutuidau.
RUT 1:10 Nuninak: “¡Atsa wakitkishtatji! ¡Iik amejai amina nugkemin minittaji!” tuidau.
RUT 1:11 Tusa tiagtai Noemí ditan ataktu chichajak: “¡Nawantug aidauh, tutsuk shiyaktajum! ¿Wagka wijaish wetag tajume? wika muumpakiu asan, atum aishinmainnak uchi aishmagnak nuigtuk uchigmamaitsujai.
RUT 1:12 Tutsuk atumi jemin waketjatajum. Wika shiig múuntuch wajasjai, ataktuk aishinmaitsujai. Tuja yamai kashia duik aishinan uchi aishmagkun uchigmakaintagtaih, ¡nunikmataish atumek tsakagmatai, aishinatjai tusa dakakjumek pujumaitsugme! ¡Nunú tsakagti tusajum dakakjumek, aishintsuk jamain ainagme! Nawantug aidauh, atumek wijaig pujumaitsugme. Minak Tuke Pujuu waittsati tusa tujutmatai waitiag, nuna nagkaesau atum waitiamun diisan atumin wait anentakun waitmainaitjai”, tiuwai.
RUT 1:14 Tusa tutai ataktushkam buutuidau. Tusa jimajá timatai, Orfak niina tsatsajin kumpama kugkuas ukuak wakitkiuwai. Untsu Rutak tsatsajijai juwakui.
RUT 1:15 Nunik juwakmatai Noemí niina chichajak: “Antukta nijah, amina wajegmi nuwe niina nugken, niina apajuímtaiji ayá nuwi waketui. Nuniau asamtai, ¡ameshkam niijai wetá!” tiuwai.
RUT 1:16 Tusa tama Rut ayaak: “¡Ukugkita tusamek tujutipa! Ame tuwi wetatme nuwi wishakam minittajai. Tuja ame tuwi pujuttame, nuwi wishakam amejai pujuttajai. Ame wegantu aina duka wi wegantu agtatui. Tuja amina Apajuígmeshkam mina Apajuíg atatui.
RUT 1:17 Ame tuwi jakatnaitme nuwig wisha jakatnaitjai, nunika ai nuwig ukugsagtin atinme tajai. ¡Jaka megkaechayatkun, wi amina ukuakun yaja wetaik, Tuke Pujuu suwimkan sujustin ati tajai!” tiuwai.
RUT 1:18 Tusa imattai, Noemí anentaimas, dekas mina uyuuntus wekaesatasampap tawa tusa ataktu awagkig wakitkita tusag tichauwai.
RUT 1:19 Nunik mai juwakag we wenakua Belén jegawajui. Nunik jegawagmatai aents aidauk senchi pampaidau shiig aneenak. Imatiagtai nuwa aidauk: “¡Noemí tae, Noemí tae!” wajaidau.
RUT 1:20 Tusa imatiagtai Noemí ditan chichajak: “¡Noemí tujutigpajum, Mará tujuttajum! Wagki, minak Tuke Pujuu ashí senchigtina nunú kajegtuk waittsati tujutmatai waittsajai.
RUT 1:21 Wi juwi pujaun weuwaitag nunak kuashat yajumakan wegabiajai. Tujash yamaik wainkan uwegmatak wakitkijai, wagki Tuke Pujuu aatus wakekau asamtai. Nuadui minak Noemí tujutigpa, wagki Tuke Pujuu ashí senchigtina nunú minak waittsati tujutmatai waittsajai”, tiuwai.
RUT 1:22 Aatus Noemí Moab nugkanum pujau, Rut niina uchiji nuwe Moabnumia aentsu nawanji aajakua nujai wakitki, cebada ajakbau juutai tsawan jegamunum, Belén jegauwai.
RUT 2:1 Noemí aishi Elimélec aajakua nuna patayi Booz daagtin shiig wiakuch eme anentsa diitai, nunú tsawantin nuwi pujujakui.
RUT 2:2 Makichik tsawantai Rut Noemín chichajak: “Wisha aja aina nuwi wetajai. Nunikan nuwi wekaesa takakun ajagtin juwaak nagkaejamu aidaun ukunum wekaetusan juukchainjash”, tiuwai. Tutai Noemí ayaak: “¡Ayu, wetá nawanta!” tiuwai.
RUT 2:3 Tusa tima ajanum jeganta nagkaejamu aidaun juwaak wekagu. Niig tikichi ajajinis wekaeja tukama, dekas Noemí aishi Elimélec aajakua nuna patayi Booza ajajin wekagu.
RUT 2:4 Nunik juwaak wekagai Booz Belén pujau niina ajajin weuwai. Nunik jeganta ajaka juu aidaun kumpamak aatus tiuwai: “¡Tuke Pujuu atumnash kuitamjamkatnume!” tiuwai. Tusa tama dita ainak: “¡Tuke Pujuu aminashkam pegkegnum yumigtamsati!” tiajui.
RUT 2:5 Tusa tiagmatai, Booz ajaka juu aidau apujin iniak: “¿Juju nuwauch wekaga jusha yana patayimpaita?” tau.
RUT 2:6 Tutai nii ayaak: “Juka Moabnumia nuwa Noemíjai taama nunuwai.
RUT 2:7 Nunú juwi taa, wisha ajaka juwaak yuja nunú nagkaikimu aidaun ukunum wekaesan juuktajai tusa mina segatkui ayu timajai. Tuja yama nagkamchak taama duwi nagkamas yamaikish taka wekagu, ame taum duwi machik ayamui”, tiuwai.
RUT 2:8 Tusa timatai Booz Rutan jegantun chichajak: “Nawanta, wi tajam nunú shiig antukta. Wainka tikich aja aina nuwi wekeasamek makichkish juukaipa. Nuwa mina tsakatkeg aidau ajaka juwaak juwi batsata nujai pujusta.
RUT 2:9 Nunika pujusam ajaka juu aidau tuwi takagtatua nuniakui nuwi ameshkam wetá. Tuja mina tsakatkeg aina nunak amina waitkagmasainum tusan shiig ujakagjai. Tuja ame kitamakmek, yumi aimjamu batsata nuna dita umuina nuwiya uwagta”, tiuwai.
RUT 2:10 Tusa tama Rut niina eme anentus tsuntsuma nugkanum nijayin antig pujusa Boozan iniak: “¿Wagka wi tikich nugkanmayayaitag nunin aish, imatika puyatjuttsamesh waitash anenjujume?” tau.
RUT 2:11 Tusa tama Booz ayaak: “Amina aishjum jakamtai nagkamsam, niina dukuji wajuk kuitamkaume nuna wika shiig dekajai. Tuja nuigtushkam amina apa, amina duku, amina nugkem aaja ukukim ii amina wainchatai aidautijai ijunja pujustasa taum nunashkam shiig dekajai”, tiuwai.
RUT 2:12 Nuna tusa ataktu chichajak: “¡Atashu uchiji dukuji nanapen waigka ayamjumama numamtuk, amina kuitamjamkatna nunú Tuke Pujuu Apajuí Israel aents aidaun Apajuíjiya nuwi yunumkaume! ¡Nuadui wi niina segajai, ame kuashat takasum nuna akigmakti tusan!” tiuwai.
RUT 2:13 Tusa tama nii ayaak: “Apujuh, ame minak wait anenjujume. Ame tujutam nunú mina anentaignak ichichtujui. Wika amina tsakatkem aina nujaig makichkish betekchauwaitjai, nuniaig ame minak shiig anenjusam aujtusume”, tiuwai.
RUT 2:14 Tusa timatai yujumak yuwamunum Booz Rutan untsuka itan chichajak: “¡Juwi tantam, juju pag puuka jukim ayaka yutai chujuin umikbauwa nuwi uchupjata!” tiuwai. Tusa tima ajaka juu aidau pekagbaunum jeganta ekemsauwai. Nunikmatai Booz cebada duwikbaun juki susauwai. Dutikam nuna yuwa ejemag nuigtushkam ampijui.
RUT 2:15 Nuna dutika ukuak ataktu ajakan juuktatus wetai, Booz ajaka juu aidaun chichajak: “Cebada tsupija jigkaka ijumjamu aina nunú sujittsut susatajum, jukiti.
RUT 2:16 Tuja atum cebada juuka jigkaka ijumjamunmaya akagag kakeguk duka idaitustajum nii yajuakti”, tiuwai.
RUT 2:17 Tuja Rutak Booza ajajinian ajakan juwaak wekagai, etsa akaetai nii juukbaujin akaja ijumag dekapa diikma veinte kilo amainun nagkagas jukiuwai.
RUT 2:18 Nuna yanaki juki Belén niina tsatsaji Noemí pujamunum jegauwai. Nunik cebada juukbaujin, nuigtu yutai ampija jukimujijai Noemín susauwai.
RUT 2:19 Dutikam Noemí Rutan iniak: “¿Tuwi yamaish takasume? ¿Tuwiya imatikamesh juukume? ¡Amina yaimpaka nunak Apajuí pegkegnum yumigsati!” tiuwai. Tusa timatai, yana ajajinig takasabi, nuna Rut niina tsatsajin ujaak: “Wika aents Booz daagtinu ajajin takasmajai”, tiuwai.
RUT 2:20 Tusa timatai Noemí ayaak: “¡Tuke Pujuu niinash pegkegnum yumigsati! Tuja nii iinashkam yaunchuk aents batsamajaku aina nuna yaigkua dutiksag yamai yaimpawai. Nunú aentsua duka mina aishug ayá nuna patayiyai. Nuadui iinak nii kuitamjamainai”, tiuwai.
RUT 2:21 Tusa timatai Rut ataktu chichaak: “Nuigtushkam nunú aents chichagtak, mina tsakatkeg aidau takaina nujai takasta, nunikam ajak ashí juunkamtai idaisata tusa tujutmae”, tiuwai.
RUT 2:22 Tusa timatai Noemí Rutan chichajak: “Ayu nawanta, nunikta, wainka tikichi ajajin wekaemin waitkagmasainum, dekas niina tsakatke aina nujai takasta”, tiuwai.
RUT 2:23 Tusa tima Rutak Booza tsakatke aidau cebadan trigojai juwagtai, niishkam nuna juwa juwakua ashí ashimdaekamtai idaisauwai. Nunak niina tsatsajijai uyunis pujusa takajakui.
RUT 3:1 Makichik tsawantai Noemí Rutan chichajak: “Nawantah, ame aishina shiig pujumainun egatkatjame”, tiuwai. Tusa chichajak:
RUT 3:2 “Nijah nawantah, Booz mina aishju patayiya nuna tsakatke aidaujai ame ijunja takasmaum nunú, trigon cebadajai akagtatus yamai kashi niina ajajin wetatui.
RUT 3:3 Nuniktin asamtai, yamai wi titatjam nunú umikta: ¡Maita, nunikam kugkuin ukatmamkam jáanch pegkeg nugkugta! Nunikam Booz niina ajajin takak pujamunum wetá. Tujash eke yujumkan yuwa umutnash uwag umintsaigkik wantintukaipa.
RUT 3:4 Ayatak uumka pujusam tuwig kanajat nunú diyaku ata. Nunikam nii kanagmatai jegantam, nawenia jáanch pajantukam nuwi ayaumsam tepesta. Nunika tepamin, ame wajukattame nuna nii tujamtatui”, tiuwai.
RUT 3:5 Tusa tama Rut ayaak: “Ayu, ame tujutam nunak imatiksanuk umiktajai”, tiuwai.
RUT 3:6 Aatus tusa Rut ajanum weuwai. Nunik jeganta niina aishi aajakun dukuji tibaunak imatiksag umikui.
RUT 3:7 Tuja Boozak yujumkan yuwa, umutnash uwag shiig aneasui. Nunik nuadui kanagtatus ajak juuka ijumjamunum ayaumas tepesui. Nuwi kanak tepai Rutak takamtak jeganta Booza nawen ayaumas tepesui.
RUT 3:8 Tuja Boozak kanag tepau ejampek shintaag ayanteagtakama, dekapjauwai makichik nuwa niina nawen ayaumas kanag tepaun.
RUT 3:9 Nunik iniak: “¿Yaitpa amesh?” tau. Tusa tama nii ayaak: “Wika amina inakem Rutaitjai. Amek mina aishug ayá nuna shiig patayiyaitme, nuniau asam ame minak kuitamjumainaitme. Nuadui ame nuwatjukta tajame”, tiuwai.
RUT 3:10 Tusa tama Booz ayaak: “¡Nawanjuh, Tuke Pujuu pegkegnum yumigtamsati! Amek dekas amina aishjum aajakua duka shiig umigme. Nuadui tikich aents datsauch, ujunakesh nuniachkush wiakchakesh mina nagkaetasu aidau egamainaitkum, mina egatkaume.
RUT 3:11 Nuadui nawanta ishamkagtukaipa, ame nuwa pegkejaitam nunak mina yaaktajuig ashí dekainawai. Nuadui ame segatam nunak imatiksanuk umiktajai.
RUT 3:12 “Tujash wika amina aishjum aajakua nuna patayiyaitkunush, tikima shiig patayichuitjai, dekas niina shiig patayi aidauk batsatui.
RUT 3:13 Tuja yamaikik juwi kanagta, kashin amina aishjum aajakua nuna shiig patayi puja dusha, wi kuitamkatjai tujamtimpash nunú dekaami. Untsu nii dakitakuig, wi kuitamkatjame. Nunak Tuke Pujuu daajin umiktinjun tajai. ¡Tuja yamaik juwi shiig kanaja tsawagta!” tiuwai.
RUT 3:14 Tusa tima Rutak Boozai ayaumas tepes kanajui. Nunik tsawak eke shiig pan weatsaig nantakiuwai, wagki Booz chichaak: “Juju nuwa ajanum tanta nunak makichkish wainkashtinme”, tiu asamtai.
RUT 3:15 Nunik pujuttaman Booz chichajak: “Jáanchjum atiam wegkukam shiig emetuata.” Tusa tima achika emetuamtai, cebadan cuarenta kilo nagkagas yajatuauwai. Dutika jigkatua aenskam Belén wakitkiuwai.
RUT 3:16 Nunik niina tsatsaji pujamunum jegamtai, iniak: “¡Nawanta wajuk wekaesaume!” tau. Tama Rut Booz tibaun imatiksag ashí ujakui.
RUT 3:17 Tuja ataktushkam chichaak: “Juna cebadan sujusa chichagtak: ‘Amina aishjumi dukuji puja nuwig uwegmatkek waketmaitsume’ tujutmae”, tiuwai.
RUT 3:18 Tusa timatai Noemí niina chichajak: “¡Nawanta waugtutsuk pujusam dakasta wajukatig! Auk niig kajimatkig idaisashtatui, tuké wamak chichas epegkea idaisattawai”, tiuwai.
RUT 4:1 Etsa agkuantai Booz yaakta waitijin aents aidau ijunajaku aina nuwi weuwai. Nunik nuwi jegan eketu. Nunik eketu Rutan aishi aajakua nuna shiig patayi nagkaemattaman wainak untsuka chichajak: “Juwi tanta ekemsata, chicham awa nunú chichasmi”, tiuwai. Tusa tima jegan ekemsauwai.
RUT 4:2 Nunikmatai nunú yaaktanmaya apu eme anentsa diitai aidaun diez ipauwai. Dutikam ditashkam nuwi jegantag ekemsajui. Nunikagmatai,
RUT 4:3 dita antuinamunum Booz niina patayin chichajak: “Noemí Moab nugkanum pujau wakitki tae. Nunik iina patayi Elimélecka nugke aajakua nuna sujuktag tawai.
RUT 4:4 Nuniau asamtai, amina nii dekati, nunik sumaktag takug yamaikiuch juju apu aina dusha antuinai, sumaktajai tusa titi tajame. Ame Eliméleckan shiig patayi asam, niina nugkega duka dekas sumamainaitme. Untsu ame sumakchatnaitkumek ujatkata. Ame dakitakminig, wi sumaktajai”, tiuwai. Tusa tama nii ayaak: “Nugkanak wi sumaktajai”, tiuwai.
RUT 4:5 Tusa tutai Booz niina chichajak: “Shiig anentaimsata nijah, ame nunú nugka sumakmek, waje Moabnumia nuwa puja nujai nuwenattame. Wagki, nunú nugka yanau aajakuita duka nunisag niina daaji megkaetsuk asati tusam”, tiuwai.
RUT 4:6 Tusa tama nii chichaak: “Nuninaitkuig wika nunú nugkanak sumamaitsujai, wagki mina uchig aidau nugkenchau wainak juwamain asagmatai. Untsu ame sumaktag takumek dekas ame sumakta, wi sumamainun amina idaitajame”, tiuwai.
RUT 4:7 Tuja nunú tsawantinig Israel aents aidauk makichik aentskesh niinu amainun tikichi suwakug, niina sapatjin juinia yantamen ukuimak nunú aents sumaun sujaku ainawai. Nuna betek umiak,
RUT 4:8 niina sapatjin ukuimak Boozan susauwai. Dutika chichaak: “Ame nugkak sumakta”, tiuwai.
RUT 4:9 Tusa tima Booz apu aidau, nuigtu tikich Israel aents aidau aatus nuwi batsatun chichajak: “Wi Noemí aishi Elimélec tuja uchiji Quilión, Mahlón aatus aajaku aina nuna nugkenak yamai atum antagmin sumajai.
RUT 4:10 Tuja wi Rut Moabnumia nuwa wajea nuna nuwatkattag dushakam dekagme. Nunak dutikattajai, wagki niina aishi Mahlón aajakua nuna daaji megkaekai tau asan. Nuadui Mahlónka daajig, tuja nii wegantu aidaushkam juju yaaktanmak megkaekashtinai. Atum dekamunum junak tajai”, tiuwai.
RUT 4:11 Tusa timatai apu múun aidau tikich aents aidaujai nuwi batsatu chichainak: “¡Ehe, duka dekas iishkam wakegaji! ¡Nunú nuwa amina jemin wayatta nunak Tuke Pujuu yaigti, dutikam Raquel Leajai iina dukuji aajaku aina nujai betek atin ati! ¡Untsu amek Efrata, tikich daaji Belén tuuta awagmatia nuanuig, eme anentsa ajantusa diitai atatme!
RUT 4:12 ¡Tuke Pujuu yaimpasmatai, juju nuwa jujai kuashat uchijinatin ata! Tuja wakegaji Judá Tamarai akiamu Fares shiig kuashat uchigtin aajakua, iman ati tusa”, tiajui.
RUT 4:13 Aatus Booz Rutjai nuwenauwai. Nunik pujaun Apajuí Rutan ejapjukti tima, ejapjuk uchi aishmagkun uchigmakui.
RUT 4:14 Nunik uchigmakmatai, nuwiya nuwa aidau Noemín chichajuinak: “¡Tuke Pujuu emematiagmi, wagki nii yamai amina kuitamjamkatnun tijajumin amasu asamtai! ¡Itusag amina tijajumek Israel wegantu aidaunmak eme anentsa diitai ah! taji.
RUT 4:15 Ame muumpakiaminish nii shiig anemtijamsatnai, wagki amina uchigmi nuwe amina senchi anempa nuna uchiji asa. Nuadui Rutak, amina uchijum siete amaina, nuna nagkaesau atinai”, tiajui.
RUT 4:16 Tusa tiajam Noemí uchin juki tsakapajui.
RUT 4:17 Nunú uchin Noemí pagkus wajaun nuwa aidau wainkag chichainak: “¡Noemís uchigmakatai tumain anentaji!” tuidau. Nuna tuidau asag uchi daajin adaikajui Obed. Nunú aajakui Jesé apaji Davitan apachji aajakua nunú.
RUT 4:18 Juju aajaku ainawai Fares wegantu aidau: Fares aajakui Hesrógka apaji.
RUT 4:19 Hesrón aajakui Ramá apaji. Ram aajakui Aminadapa apaji.
RUT 4:20 Aminadab aajakui Nahasógka apaji. Nahasón aajakui Salmónka apaji.
RUT 4:21 Salmón aajakui Booza apaji. Booz aajakui Obeta apaji.
RUT 4:22 Obed aajakui Jesé apaji. Tuja Jesé aajakui Davita apaji.
1SA 1:1 Efraígka mujajin yaakat Ramánum makichik aents Elcaná daagtin, Jerohama uchiji Eliú tijaji pujujakui. Duka Suf Efraín wegantu aajakua nuna uchiji Tohu aajakua nuna ama tijaji aajakui.
1SA 1:2 Elcanák jimag nuwentin aajakui: Jeteke daajig Ana aajakui, untsu awan nuwe daaji Peniná aajakui. Peniná aajakui uchigtin, untsu Ana uchigtuchu aajakui.
1SA 1:3 Maki makichik mijantin Elcaná nii pujamujin ukuki yaakat Silónum wejakui, nuwi kuntinu maa apeak Tuke Pujuu ashí senchigtina nuna ememattatus. Tuja sacerdote Elí uchiji jimag: Hofní Fineesjai, ditashkam sacerdote asag, Tuke Pujuun takajuinak nuwi batsamajaku ainawai.
1SA 1:4 Tuja Elcaná kuntinun maa apea Apajuín emematkug nuna nejenak niina nuwe Peninán, niina uchiji aidaun, nawanji aidaujai aatus betek akanag tinamajakui.
1SA 1:5 Untsu Ananak Tuke Pujuu uchigmakchatin ati tibau aigkishkam senchi aneau asa, neje dekas pegkejan juki sujakui.
1SA 1:6 Dutiktai Peniná Anan kajejin asa, Tuke Pujuu uchin uchigmachu ati tibau asamtai, pegkegchaun chichajak dushikiak waitkau.
1SA 1:7 Maki makichik mijantin Tuke Pujuu jeen Niina ememattatus shimujakua duik Peniná Anan tuke dushikijakui. Imatika waitkamu asa yujumkan yutsuk pujus ayatak buutujakui.
1SA 1:8 Nunitai niina aishi chichajak: “¿Wagka buutme Ana? ¿Wagka yujumak yutsukesh wake besekmesh pujame? Wichaukaitag amina uchijum diez amaina nuna nagkaesau”, tiuwai.
1SA 1:9 Tusa tima Ana Silónum pujus yujumkan yuwa umutnash uwag nuadui Apajuí jee pegkegmanum nuna waitijin sacerdote Elí eketbaunum jegantui.
1SA 1:10 Nunik jeganta nii kajekbaujin buutki Tuke Pujuun segaak,
1SA 1:11 juna aatus nii umiktinjin tiuwai: “Tuke Pujuu ashí senchigtinuh, wika amina inakmetjai. Wi wake besemag wekagag duka amek dekame. Minash kajimatjuki idaitutsuk wait anenjakmek uchi sujusta. Dutijuawaminig wika amina takagtamin ati titinaitjai. Dutikau asan, nuna betek umiakun makichkish uchi intashinak tsupigkashtinaitjai”, tiuwai.
1SA 1:12 Aatus Ana Tuke Pujuun initkak segaak wenin umuchiaun Elí diistakama wainkauwai.
1SA 1:13 Tuja Anak initkak Apajuín segau asa wenin umuchiau asamtai, Elí antukchauwai. Nuadui Elí anentaimas nampekampas aan eketatai tusa,
1SA 1:14 chichajak: “¿Wagka ima nampetash wekaetame? ¡Nampet wekaetutsuk idaisata!” tiuwai.
1SA 1:15 Tusa tama nii ayaak: “Vinonakesh, tuja tikich uwaja nampetainakesh uwagchamjai. Shiig senchi wake besemag dekapeamu ajutu asamtai, wi waitiamujun pachisan ashí Tuke Pujuun ujaakun eketjai.
1SA 1:16 Wainkam nuwa pegkegchauwa nunin diigsaipa, wika uyumamu ajutu asamtai, wake besemag dekapeakun nuna pachisan Tuke Pujuun augkun eketjai”, tiuwai.
1SA 1:17 Tusa tutai Elí ayaak: “¡Agkan, shiig aneasam wetá! Ame waji segaume nunak, Israel aents aidau Apajuín emematin aina nunú amastatui”, tiuwai.
1SA 1:18 Tusa tima ayu tusa ukuak, niina jeen shiig aneas wakitkiuwai. Nunik jegaa yujumkan yuwauwai. Duwi nagkamsag wake besemag pujamujig atsugsauwai.
1SA 1:19 Tuja kashinia duwi kashikmas Elcaná niina nuwe aidaun yajuak Apajuín jee pegkejam aajakua nuwi Tuke Pujuun ememattatus weuwai. Nunik nuwi jegaa Tuke Pujuun ememati ukuak, niina jeen yaakat Ramá wakitkiuwai. Nunik wakitki jegaa Elcaná niina nuwe Anajai kanajui. Aatus Tuke Pujuu Anan wait anenjauwai.
1SA 1:20 Nuadui Ana ejapjuk pujus tsawanji jegamtai, uchi aishmagkun uchigmakui. Dutika adaikauwai Samuel. Nunak “Apajuí segamu” taku tawai.
1SA 1:21 Duwi pujus Tuke Pujuu ememattai mijan jegamtai, Elcaná niina nuwe Peninán niina uchiji aidaujai yajuak, nii Tuke Pujuu anagkuamun umiak kuntinun maa apeak Tuke Pujuun ememattatus yaakat Silónum weuwai.
1SA 1:22 Untsu Anak ditajaig wechauwai, ayatak aishin chichajak: “Wika minishtatjai, uchi yujumkan nigki yumain wajasmatai, niina jukin, jega pegkegmanum Apajuín ejetuattajai, nuwi tuke pujustin ati tusan”, tiuwai.
1SA 1:23 Tusa tutai niina aishi ayaak: “¡Ame wajuk wakegame nunú umikta! ¡Amejai uchik pujus muntsun tsujakti! Ame tame nunak Tuke Pujuu umikti”, tiuwai. Tusa timatai Anak niina uchijijai juwakui. Nunik pujai uchi muntsu tsujaka yujumkan nigki yumain wajasui.
1SA 1:24 Nunikmatai Ana uchijin juki yaakat Silónum Apajuí jee pegkegmanum emauwai. Tuja nuigtushkam makichik toro tsakatan kampatum mijan ajamun, trigo veinti dos kilo, nuigtu duwap apagbaunum vinon yajaa aimak, aatus yajuak weuwai.
1SA 1:25 Dutika ejegamtai Elcaná niina nuwe Anajai nuna apeak Tuke Pujuun emematiajui. Dutikawag uchí jukiag sacerdote Elí pujamunum ejeentajui.
1SA 1:26 Dutika Ana chichaak: “Mina apujuh, wait aneasam antugtukta. Yaunchuk juwi wi aminí ayaumsa pujusan Tuke Pujuun segaakun pujubiajai,
1SA 1:27 juna uchin sujusti tusan. Nuadui Tuke Pujuu juna uchin sujuse.
1SA 1:28 Nuadui yamaik wishakam Tuke Pujuunu ati tusan niina idaitajai, ima niinak takagsatin ati tusan”, tiuwai. Tusa timatai, Elí Tuke Pujuun emematak tsuntsuma nijayin nugka antig pujusui.
1SA 2:1 Ana kantamak aatus Apajuín tiuwai: “Tuke Pujuuwah, wika aminí shiig aneajai, wagki ame senchimtijau asamin. Yamaik mina shiwag aidaujaish ainikan tudaimain wajasjai, wagki ame yainkau asamin. ¡Yamaik shiig aneasan pujujai!
1SA 2:2 ¡Tuke Pujuuwah, ame pegkegmaitam imanuk tikichik atsawai! ¡Ame jutii Apajuíji asam kuitamkagtam, imatikas kuitamkagtauk tikichik makichkish atsawai! ¡Amina nagkaetamsauk tikichik atsawai!
1SA 2:3 Makichkish ememasag chichamain ainatsui. Tuja ima nigki eme anenmamuk makichkish atsuti. Tuke Pujuuwai ashí yacha duka. Tuja Tuke Pujuuwai maki makichik aents pegkegchau takasbaujin diijus suwimkan suwa duka.
1SA 2:4 Apajuíyai aents senchigtin aina nuna senchigtuchu emak, aents senchigtuchu aina nuna senchimtiknuk.
1SA 2:5 “Yaunchuk yumainji kuashat ajujakbauk, yamai makichik pag yuwatag tabaunum takak waituinawai. Tuja yaunchuk nujantai waitujaku aidau, yamai waituinatsui. Nuwa uchigmachu aajakushkam, nuwa uchigbau aidaun nagkaesau sieteya imagnia uchigmainawai. Untsu yaunchuk uchiji kuashat ajujakagbauk, uchigmamainchau wajasaje.
1SA 2:6 Tuke Pujuuwai pujutan sukagtinuk. Ima nigki jakati tusashkam tukagtauk. Nunika jaka ajin iina patayi aidau ukumatainum ukugmasagmataish, ataktu inantamki pujutan amastina nunú.
1SA 2:7 “Tuke Pujuuwa nunuwai ujuuna ekagtinuk. Tuke Pujuuwai wiakuch ekagtinuk. Nii amasbaun atanjamkish, nigki ataktushkam imatiksag sukagtinai.
1SA 2:8 Nii aents ujunauchin wiakchamtiknai. Tuja aents yumainji atsugbaun, egaka yuu wekagun juki, aents eme anentai aidaujai betek emauwai, dutika nunú aents eme anentsa diitai aidaun ekemtain ekentsatatus. Tuke Pujuuwai ashí nugka aina nuna najanak, nugka patami asatnunashkam umikua duka.
1SA 2:9 Tuke Pujuuk ya niina shiig umijua nuna kuitamui. Untsu aents pegkegchau aidauk jinuinawai, nunikag suwimkanum shimuinawai. Wagki makichik aentsuk niina senchijinigkik ayamjumamaitsui.
1SA 2:10 Tuke Pujuuk nayaimpinum pujus niina shiwaaji aidaun chaagpin ajuntug ijinattawai. Ashí aents nugkanum batsata nunak Tuke Pujuu dita takasbaujin diijus suwimkan susattawai. Untsu apu atinun nii etegkamunak aan nagkaemas senchigtin emattawai”, tiuwai.
1SA 2:11 Tusa kantama inagnakmatai, Elcaná Anajai niina jeen yaakat Ramá wakitkiuwai. Tuja uchik Tuke Pujuun takagsatatus sacerdote Elíjai juwakui.
1SA 2:12 Elí uchiji aidauk pegkegchau aidau asag, Tuke Pujuunak ajantus diijakchau ainawai.
1SA 2:13 Nunidau asag makichik aentskesh Apajuín emematak kuntinun maa apeamun antukajag dita inaken akupejaku ainawai. Dutikamu nunú tenedor múun wajaknun takaku jegawag ajantsuk kuntinun neje yama najaunak,
1SA 2:14 nunú tenedorai iju jiijag yajumaidau. Dutikainak Israel aents aidau yaakat Siló jegawag Apajuín ememattag tuidaunak waitkaidau.
1SA 2:15 Tuja kuntinu wiyajin eke apeatatus pujugtatmanash sacerdote inake jegantun chichajak: “¡Sacerdotenu neje atinuk uduu mina sujusta wi jukin inagtuatjai, wagki sacerdotek neje inajuamunak dakitawai!” tau.
1SA 2:16 Tusa tama aents ayaak: “Jasta, dekatkauk kuntinu wiyajin apeatjai. Dutikamtai ame wakegamu jukita.” Tama nii chichajak: “¡Tutsuk yamaikiuch sujusta! ¡Sujachkuminig wiki atankittagme!” tau.
1SA 2:17 Elí uchiji aidauk shiig pegkegchau Tuke Pujuunash umijujakchau ainawai. Nunin asag Tuke Pujuu anentag suwamunash ajaantus diitsuk dita wakegamun takajaku ainawai.
1SA 2:18 Untsu uchi Samuelak Tuke Pujuunak shiig umijujakui. Nuniau asa nigka sacerdote nugkutai lino apagbau efod tutain nugkujakui.
1SA 2:19 Tuja maki makichik mijantin niina dukuji apajijai Apajuí jee pegkegmanum jegawag kuntinun maa apeenak Apajuín ememattatus weakug niina uchiji Samuel nugkugtin jáanch apagbaujin juki wejakui.
1SA 2:20 Nuniau asamtai Elí, Elcanán Anajai pegkegnum yumigkiak: “Juju uchin Ana Tuke Pujuun anentag susa duwi, Tuke Pujuu Anayai nuni kuashat uchijum aidaun amastí”, tiuwai. Tusa tima dita jeen waketjajui.
1SA 2:21 Nuadui Anak Tuke Pujuu pegkegnum yumigkiamu asa, kampatum uchi aishmagkun, jimag nuwan aatus uchigmakui. Tuja Samuelak Tuke Pujuu kuitabau asa, nuwig niina takajak pujusa tsakau.
1SA 2:22 Tuja Elík múuntuch aajakui, tujash niina uchiji aidau Israel aents aidaun waitkainawai tabaun ashí dekauwai. Tuja Apajuíjai chichatai jega pegkejam jegamkamua nuna waitijin nuwa aidau kuitamin aina nujaishkam kanuinawai tabaun dekauwai.
1SA 2:23 Nunik dekaa ditan chichajak: “Atum pegkegchau takainamun ashí aents aidau ujatkaje. ¿Wagka dusha anísh batsatjume?
1SA 2:24 Mina uchig aidauwah, atum aniajum duka shiig pegkegchauwai. Atum aniakjum tikich aents Tuke Pujuun nemajin aidau bakuagme, wagki atum pegkegchau dutikamun tikich aents aidau nuna augmatu yujaidaun antukjai.
1SA 2:25 Makichik aents tikichin kajejaunak, Apajuí diisa ayamjumainai. Untsu aents Tuke Pujuun kajejaun ayamjumainuk makichkish atsawai”, tiuwai. Tusa tamash, ditak apaji chichamenak antugkachajui, wagki Tuke Pujuu ditanak jinaati tibau asag.
1SA 2:26 Untsu Samuelak nuni senchi muumpau. Nunitai Tuke Pujuu shiig anentau, tuja aents aidaushkam shiig anentuidau.
1SA 2:27 Tuja nunú tsawantin Apajuí chichame etsejin Elín ijagsatatus jegajuauwai. Nunik jegajua chichajak: “Amina apachjum aidau Egipto nugkanum faraógka inaku waitkatai batsatun wi mina senchijun ditan iwaintukuitag nuna dekati Tuke Pujuu tujamui.
1SA 2:28 Israel aents aina nuwiyan Leví wegantu aidaun etegkauwaitjai mina sacerdoteg agtinme tusan. Dutika ai mina emematjuinak kuntinu maawag nuna nejen ashí apeatnume, tuja kugkuin incienson apeatnume, jáanch sacerdote nugkutainashkam nugkugtinme tusan. Tuja Israel aents aidau anentag sujusbau aidaun mina emematjuinak apeena nunashkam yuwatnume tusan amina apachjum aajaku aina nuna tiuwaitjai.
1SA 2:29 Nunin aish, ¿wagka wi dutikatajum timawa nunú dutiktsukesh dakitjagmesh idaisaugme? Amek amina uchijum aidau mina nagkaetasu puyatjau asam, Israel aents aidau mina anentag sujuinamua nunú jukim ayu ayugkawam uduekume.
1SA 2:30 “Dutikau asamin Tuke Pujuu Israel aents aidaun Apajuíji mina takagtin atinme tusa tujabiuwa nunú chichaak: ‘Wi atumnak mina takagtustinme tusan etegkauwaitjime. Tujash duka yamaik makichkish uminkashtatui. Wika mina eme anenjuina nuna eme anentatjai. Untsu mina dakitjuina nunak wishakam dutiksanuk dakitjattajai.
1SA 2:31 Amina uchijum aina duka yamai nagkamsag sacerdote achagtatui. Nuadui ame wegantu aina duka múuntuch wetsuk datsaitak jinawagtatui.
1SA 2:32 Untsu amek tikich Israel aents aina nuna wi yayaakui nunú diisam ame waitiakum dita kajegtinaitme.
1SA 2:33 Tuja ame wegantu aina nuwiyan sacerdote atinme tusan wi ujumak apusamu akushkam, duka wainmachujai betek tikich aidau takagtai nuna diisag kajenak wake besemag dekapenak buutiagtinai. Tuja ame wegantu aidauk múuntuch wetsuk datsaitak jinawagtatui.
1SA 2:34 “ ‘Tuja amina uchijum aidau Hofní, Fineesjai makichik tsawantaik mai jakattawai. Nunikmatai dekaattame dekaskeap tujutne tusam.
1SA 2:35 “ ‘Nuadui tikich wegantunmayan wi kajittsa anentamujun, tuja mina chichamjun betek umiktinun, sacerdote atinun makichik etegkattajai. Dutikan niina uchiji wegantu aidaunash megkaejainum tusan kuitamkattajai. Nuadui ditak wamak jinutsuk kuashat tsawan batsatu asa apu wi etegkamua nunú tabaun umigkatnume titatjai.
1SA 2:36 “ ‘Nuadui ame wegantu jinaachu aidauk nunú sacerdoten jegajuawag ujumak kuichkin, yutaijai segainak tikishmatiagtinai. Nuninak, minash takat sujusta wisha takasan yumainun sumapaktajai wajagtinai’, tujamui Apajuí”, tusa tiuwai.
1SA 3:1 Samuelak tsakataitak nagkamas sacerdote Elí takatai yayaak pujus Apajuín umijujakui. Nunú tsawantinig Tuke Pujuuk kakajus aentsnak wantintujakchauwai. Nuadui makichik aentsnakesh chichama etsegtugkati tusag ujajakchauwai.
1SA 3:2 Elík muumpakiu asa shiig wainmamainchau dekapeak niina kanutaijin kanak tepejakui.
1SA 3:3 Nuniai Samuelak Apajuí jee pegkegmanum chicham umiktin agagbau egkeamu arca pujujakua nuwi niishkam kanak tepai, nunú jeganum jii ekemakbauk eke kajintsaig,
1SA 3:4 Tuke Pujuu niina untsuak: “¡Samuel, Samuel!” tama nii ayaak: “Juwi pujajai”, tiuwai.
1SA 3:5 Tusa nantaki tupikaki Elí pujamunum jegantui. Nunik jeganta chichajak: “Pai taajai, ¿wagka untsugme?” tau. Tama Elí ayaak: “Wika aminak untsuatsjame, wakitkim kanagta”, tiuwai. Tusa tima wakitki tepesui.
1SA 3:6 Nunik tepaun Tuke Pujuu ataktu untsuak: “¡Samuel, Samuel!” tusa untsuam, nantaki Elí pujamunum jeganta chichajak: “Pai taajai, ¿wagka untsugme?” tau. Tama Elí ayaak: “Wika uchuchi aminak untsuatsjame, weme kanagta”, tiuwai.
1SA 3:7 Samuelak Tuke Pujuunak makichkish wainchau tuja niina chichamenash antuchu asa yaki untsujua, tiuwai.
1SA 3:8 Tujash Tuke Pujuu ataktu kampatuma juna untsukui. Tusa untsuam nantaki Elí pujamunum jeganta chichajak: “Juwi taajai, ¿wagka untsugme?” tau. Tutai Elí anentaimas dekas Tuke Pujuu untsuamap tawa tiuwai.
1SA 3:9 Nuadui chichajak: “Wakitkim tepesta, nuniamin ataktu untsugmakuig: ‘Mina Apujuh, amina inakminuk juwi pujajai, waji tame tujutta’ tita”, tiuwai. Tusa tima Samuel wakitki tepesui.
1SA 3:10 Nunik tepettaman, Tuke Pujuu ataktu jegantun yaunchuk untsukbaunak dutiksag untsuak: “¡Samuel! ¡Samuel!” tama nii ayaak: “¡Mina Apujuh, waji tame tujutta, amina inakminuk juwi pujajai!” tiuwai.
1SA 3:11 Tusa tama Tuke Pujuu niina chichajak: “Israel aents aidaunum makichik ishamainun iwainaktatjai. Nuna aents aidau wainkag ishamainak kujaidiagtatui.
1SA 3:12 Tuja wi Elí patayi aidaun pachisa timag nunak nunú tsawantin makichkish ewaetsuk umiktatjai.
1SA 3:13 Wi niina ujaakun, amina uchijum aidauk mina umigtutsuk pegkegchaun takasaju asagmatai, suwimkan susattajai timag nunak nigka shiig dekawai. Wagki, niina uchiji aidau mina pegkegchaun chichagtiagtaish, makichkish jintintuachu asamtai.
1SA 3:14 Nuadui Elí patayi aidauk Apajuí tudaun tsagkugtamjati tusag kuntinu maa apenakush, makichkish dita tudaujig tsagkujam achagtatui. ¡Wi nunak dekas nuniktinun tajai!” tiuwai.
1SA 3:15 Tusa tima Samuel ataktu tepesui, nunik kanag tsawag, kashikmas nantaki Apajuí jee pegkegma nuna waitijin ujainiuwai. Tujash Samuelak Tuke Pujuu tibauwa nuna Elí ujatan ishamau.
1SA 3:16 Nunitai Elí untsuka chichajak: “¡Uchuchi Samuela!” tau. Tama nii ayaak: “¡Juwi pujajai!” tiuwai.
1SA 3:17 Timatai Elí niina iniak: “¿Tuke Pujuush wajinjutpame? ¡Wait aneasam ugtukaipa! ¡Apajuí tujamauwa nunú ame mina ugtutaik nii suwimkan amastatui!” tiuwai.
1SA 3:18 Tusa tama Samuel Apajuí tibaunak uugtsuk ashí niina ujakui. Tusa ujakam Elí senchi untsumak: “¡Aminak dekas Tuke Pujuu tujamne! ¡Nii tawa nunak imatiksag umikti!” tiuwai.
1SA 3:19 Samuelak nuwig pujus tsakajui. Tuja Tuke Pujuu niinak yaigkui, nuadui Apajuí tibaun nii etsegkauwa duka imanisag ashí uminkauwai.
1SA 3:20 Tuke Pujuu mina chichamjun etsegtugkati tusa Samuelan etegkae tabaun Israel aents aidauk, Dan wegantu aidau nugken nagkamas, yaakat Beersheba tutaya imanui ashí dekawajui.
1SA 3:21 Tuja Samuelak yaakat Silónum Apajuí jee pegkejam aajakua nuwi pujau asamtai, Tuke Pujuu nuwi tuke niijai chichau asa ataktushkam chichaman ujakui.
1SA 4:1 Dutika ujakam Samuel ashí Israel aents aidaun Apajuí tibaunak imatiksag ujajakui. Nunú mijan aajaku aina nuadui makichik tsawantai filisteo suntag aidau Israel aents aidaujai maaniawagtatus ijunjajui. Nunik shimutkag nugka segau Afec tutainum nuwi aakmajag batsamsajui. Nuninai Israel aents aidaushkam ditajai maaniawagtatus jiinjag nugka segau Eben-ézer tutainum jegattak aakmag batsamsajui.
1SA 4:2 Nuwi batsamas filisteo suntag aidau Israel aents aidaun jetekajui. Dutikawag maaninamunum filisteo aidau Israel aents aidaun depetuk cuatro mil aentsun ijinawajui.
1SA 4:3 Dutikam Israel aents aidau waketug ditá aakjin jegawagmatai, apu aidau ditan iniinak: “¿Wagka Tuke Pujuush iinash filisteo aents aidau ijinatnume tusash idaitamsae? Dekas yaakat Siló shiyakagmi, nunikaja arcanum chicham umiktin agagbau egketa nunú utiagmi. Dutika ajin Tuke Pujuu iinash ayamjutpakti”, tuidau.
1SA 4:4 Nuna tusag ujumak suntag aidaun ishiakajui yaakat Silónum arca utitnume tusa. Dutikam shiyakag arcan juki itawajui. Nunú arca dukutaijin jimag ángel querubin dakumkamu aunum nuwi Apajuí ashí senchigtina nunú pujujakui. Tuja Elí uchiji aidaushkam, Hofní Fineesjai nuwi takaidau asag ditashkam kaunawajui.
1SA 4:5 Arcan juki dita batsatbaunum itawagmatai, ashí Israel aents aidauk shiig aneenak senchi untsumaidau. Nunú imatuinamu nugkan umuchkauwai.
1SA 4:6 Imatuidaun filisteo aidau antukag inimainak: “¿Israel aents aidau batsata nuwish wagka imanikash pampainawa?” tuidau. Tukama dekawajui Israel aents aidau arcan dita batsatbaunum itawaje tabaun.
1SA 4:7 Nuna dekawag senchi ishamak chichainak: “¡Apajuí Israel aents aidau batsamtain tae! ¡Jaucha iish yamaish wajukatjiki, yaunchkesh anijakchamun yamai Apajuí iina shiwaaji nugken tae!” wajaidau.
1SA 4:8 “¡Apajuí ashí senchigtina nunú iina suwimka amataish, yaki iinash ayamjutpakti! ¡Niyai egiptunmaya aidaun jata ishamain aidauwai suwimkan susa ijinauwa duka!
1SA 4:9 ¡Nuniau asamtai, hebreo aidau atumi inake aajaku aina nujai betek ditá inake atumesh atag tachakjumek, suntag filisteo aidautijum umintsatajum, nunikjum aishmag wajasjum senchi maaniatajum!” tuidau.
1SA 4:10 Tusa tiajam Israel aents aidaun jetekag maaniawag depetkajui. Dutikainak dawé yujasag maanin aina nuna treinta mil suntag aidaun amukajui.
1SA 4:11 Tuja nuigtushkam arcanum chicham umiktinun Apajuí Israel aents aidaun susauwa nunú egketun jukiajui. Dutikainak Elí uchiji Hofnín, Fineesjai mai maawajui.
1SA 4:12 Untsu makichik suntag Benjamín wegantunmaya maaniamunum wekagu tupikaki nunú tsawantaik yaakat Siló jegauwai. Nunik tupikak wake besemag dekapeamunum jáanchjin japiki ichigka, niina buukenishkam nugkan yukumag ayatak nugkak wajas weuwai.
1SA 4:13 Nunik jegakma, chicham umiktin agagbau egketun jukiaju asagmatai, Elí nuna puyatjak waitinum ayaumas ekemas jintanum niimak eketai jegauwai. Nunik jegá yaaktanum waya, nuwi aents batsatunum chichama etsegkauwai. Nuna antukag ashí aents aidauk senchi buutuidau.
1SA 4:14 Imatuidaun Elí antuk iniimak: “Nunash ¿wagka imatuinawa?” tau. Tusa tai suntag tupikaki jegauwa nunú waujus Elí pujamunum jeganta, ashí chichaman ujakui.
1SA 4:15 Tuja Elík noventa y ocho mijan ajamu asa múuntuch wainmamainchau wajas pujau.
1SA 4:16 Nuna jegantun chichajak: “Maaniamunum wekagun tupikakin yamai taajai”, tau. Tama Elí iniak: “¿Wajukawagmae tujash, uchuchih?” tau.
1SA 4:17 Tusa tama nii ayaak: “Filisteo suntag aidau, jutii aidautin depetamak, chicham umiktin agagbau egketunak atanjamkiagmae, nuigtu kuashat suntag aidaun ijinawagmae. Tuja amina uchigminashkam mai maawagmae”, tiuwai.
1SA 4:18 Elík shiig múuntuch kakaumainchau wajasu asa, chicham umiktin agagbaun Apajuí amasua nunak jukiagmae tusa ujakam, nuna antuk puyatuk sillanum eketu dakagá iyaak kuntujen akagak jakauwai. Elík Israel aents aidaunmak cuarenta mijan takasui.
1SA 4:19 Tuja Elí uchiji nuweshkam ejamtin uchigmatnak wajas pujau asa, filisteo aents aidau chicham umiktin agagbau egketun arcan jukiagmae, tuja amina aishjumnash maawagmae, nuigtushkam amina aishjumi apajish jakae tabaun antukui. Nunik puyatuk uchin najaima uchigmakui.
1SA 4:20 Nunik uchigmak jakauwai. Nunik eke jatsaig uchi uchigmitkau aidau chichajuinak: “Ishamkaipa, uchik aishmag uchigmakume”, tiajui. Tusa tamash nigka chichakchauwai, wagki jakau asa.
1SA 4:21 Untsu eke jatsuk uchiji daajin Icabod adaikauwai. Nunak: “Israel aents aidauk chicham umiktin atankimu asag yamaik shiig wainak juwakaje”, taku tawai. Nunak niina aishi jakau, tuja aishi apajishkam jakau asamtai, tiuwai.
1SA 5:1 Chicham umiktin egketun arcan filisteo aidau jukiag muja Eben-ézer tutaya nuni akaikiag ditá yaaktajin Ashdod ejegawajui.
1SA 5:2 Dutikawag ditá apajuímtaiji dakumka najanamu Dagón tutai aajakua nunú jegamjukbaunum awayawag, Dagónkan ayaunas ekentsajui.
1SA 5:3 Dutikawaju ai kashinia duwi kashikmasag Ashdodnumia aents aidau waya diikma, dita apajuímtaiji dakumka najanamu Dagón nagkima nugká ajiajam, chicham umiktin Apajuínu arca eketu emtin tepaun wainkajui. Dutika wainkag inanki jukiag yaunchuk aajakbaunmak ukukiajui.
1SA 5:4 Dutikawag tsawainak kashikmas nantakiag wayawag diikma, ataktushkam nagkima ajuajam tepaun wainkajui. Tujash ayatak iyajag tepachu, buuke akagak uweje aidauk kupinag, ima iyashig takamchau tepaun wainkajui.
1SA 5:5 Nuadui sacerdote Dagónkan emematin aidauk nunú jeganum wainakug, Dagónkan buuke kuntujejai kupinag batsamsauwa nunak najatsuk chikai nagkayin ainawai.
1SA 5:6 Tuja duwi pujus filisteo aents aidau yaakat Ashdodnum batsamin aidaunak Tuke Pujuu suwimkan suwak jata tumor tutain ajunjauwai. Antsag tikich yaakat nuwi ayaumas aushkam nunú jatai shiig senchi waituidau.
1SA 5:7 Imanik waituidau asag Ashdodnumia aents aidau chichainak: “Israel aents aidaun Apajuíjiya nunú iinak Dagón iina apajuímtaijiya nujai ijumag senchi suwimkan amase. Nuadui juju chicham umiktin agagbau Israel aents aidaun Apajuíjinua duka juwig jutiyaig amaitsui”, tuidau.
1SA 5:8 Nuna tuidau asag, filisteo apuji aidaun untsuka itantag iniinak: “¿Israel aents aidaun Apajuíjiya nuna chichame umiktin agagbau egketa dusha itugkattaji?” tuidau. Tama dita aimainak: “Yaakat Gadnum jukijum ejegatajum”, tiajui. Tusa tiajam ditashkam dutiksag juki ejegawajui.
1SA 5:9 Tujash dutika juki ejegawaju ai, yaakat Gadnumia aidaun Tuke Pujuu suwimka suwak imum ishamainun ajunjauwai. Dutikam múun aidauk, uchi aidauk, nuna utsumajag senchi waituidau.
1SA 5:10 Imaniagtai, chicham umiktin egkeamu arca Gadnum ejegamun filisteo aidau jukiag tikich yaakat Ecrón tutainum ejegawajui. Dutika ejegawagmatai nuwiya aents aidau untsumainak: “¡Jinatnume tusa Israel aents aidaun Apajuíjiya nuna chichame umiktin agagbau egketun arcan juki itagtamawaje!” wajaidau.
1SA 5:11 Gadnumia aents aidaun Apajuí suwimka suwak jata ishamainun ajunjae tabaun ashí tikich yaaktanmaya aidau antukajui. Nunikag filisteo apuji aidaun untsuka ijumag chichajuinak: “¡Juju chicham umiktin Israel aents aidaunu arcanum egkeamua nunú jukijum itaujum duka, tuwi au jukimugme dutiksagmek wamak awagkitajum! Wagki Apajuí ashí ijipawai taji”, tuidau.
1SA 5:12 Tusa imatuinak untsumainamuk nayaimpinmash antuegu. Tuja aents iwaku batsatuk imum amuam shiig senchi waituidau.
1SA 6:1 Filisteo aidau arcan jukiajua duka siete nantu dita nugken asauwai.
1SA 6:2 Nuwi aig sacerdote aidaun, anentaimas dekamin aidaujai iniasagtatus untsukag ijumjajui. Dutika iniinak: “¿Chicham umiktin arcanum egketa dusha itugkattaji? Tuja wajuk awagkittaji nunú titajum”, tuidau.
1SA 6:3 Tusa tama dita aimainak: “Chicham umiktin egketa nunú arca awakeakjumek, Apajuí tsagkugtugti tusajum waji anentag awetitajum. Nunú dutikajum atum jata achiimagjum waitiajum duka tsagagtatjume. Nunikjum duwi dekattagme wagkag suwimkanash Apajuísh amasaje nunú”, tiajui.
1SA 6:4 Tusa tiajam dita aimainak: “Tujash ¿ii pegkegchau takamsamunum kajegtamak suwimka amasai tusaish wajig sumainaitji?” tuidau. Tusa tiagtai sacerdote aidau aimainak: “Atumi apujum cinco aina dutiksagmek oro jukijum imumjai betek dakumkajum cinco najanatajum. Tuja nuigtu cinco katip dakumkajum dushakam orojai najanamu awetitajum, wagki atumek atumi apuji aina nujai jinuidau asajum.
1SA 6:5 Nuadui imum katipjai dakumkajum najanatajum, wagki nunú aidau iina nugken emestugbau asamtai. Dutik etsagjatajum Israel aents aidau Apajuíji. Dutikawagminish tsagkugtamag suwimkan amatsuk, atumi apajuímtaiji aina nunash tuja atumi nugke aidaunash agkan idaisachaintash”, tuidau.
1SA 6:6 Nuna tusag: “¿Wagkamek atumesh egiptunmaya aents aidau ditá apuji aidaujai antakchau asag, Israel aents aidaun jiija ishimain aig dutikchagtai, Apajuí suwimak susam waituinak jiija ishiakua numamtinush atagme?
1SA 6:7 “Duka nunitsuk makichik carreta yamajam najanatajum. Dutikajum atumdau jimag baka makichkish takamtikchatai yama petsaku aidau jukijum carretanum jigkajum ukuktajum, dutikakjum dita uchiji aidauk jujuki ukuktajum, dita wenak carretan japiki jukitnume.
1SA 6:8 Dutikajum nuadui chicham umiktin egkeamu arca jukijum carretanum juinia yantamen egkeatajum. Dutikajum atum Apajuí tsagkugtugti tusajum anentag susatin orojai najanamu aidau nuna yantamen chimpiatajum. Dutikawagmin nunú baka wenak carretan japiki juki wetinme.
1SA 6:9 “Tujash diyaku atajum baka aidaush nuna japikish itug wegagtig. Tuja Israel aentsu batsamtai yaakat Bet-shemesh iina nugke nagkatkamunum awa nuwi chicham umiktin agagbau egkeamu arca nuni weakuig, duwi dekattaji dekas Apajuíyap suwimkanak amasaje tusaja. Untsu baka uchiji batsata nuni japiki shimakuig, Apajuí suwimkechuapi shiig jatap aikagmawa, titatji” tuidau.
1SA 6:10 Tusa tiajam imatiksag betek umikajui. Nuadui jimag baka yama petsakun jukiag, daekai anawag carretanum jigkawajui. Untsu uchiji aidaunak baka egketai peejamunum egkeauwai.
1SA 6:11 Dutikawag arcan jukiag, imum dakumka najanamu aidaun, katip dakumka najanamu aidaujai carretanum chimpiawajui.
1SA 6:12 Dutikawagmatai baka aidau shimak carretan japiki juki, makichkish yaja wetsuk tutupit shinukmaikia yaakat Bet-shemesh wetainum wegajui. Nunik shimutai filisteo apuji aidaushkam pataetukag yaakat Bet-shemesh nagkatkamunum jegantajui.
1SA 6:13 Tuja Israel aents aidauk nunú yaaktanum batsamin aidau yaakat jegattak waken ditá ajajin trigon juwak yujaidau. Nunik yujaidau niimsatakama arca carretanum egkeamun baka japiki inimaidaun wainkajui. Nunik wainak shiig aneasajui.
1SA 6:14 Nunú jimag baka carretan japiki we wenakua Josué Bet-shemesh pujujakua nuna ajajin jeganta nuwi ijuntsauwai. Nunikmatai carretan dakajag kaya shiig múun pujaunum nuwi patajag bakan mai maawag nuna nejen ashí apeenak Tuke Pujuun emematiajui.
1SA 6:15 Nuna dutikainatsaig Leví wegantu aidau arcanak jiiki jukiajui. Dutikainak tikich waji orojai najanamu aidaunashkam jiikiajui. Dutikawag nunú kaya shiig múun pujaunum patajajui. Tuja nunú tsawantin aents Bet-shemesh batsamin aidauk Tuke Pujuun emematuinak baka aidaun maawag nuna nejen ashí apeawajui. Dutikainak tikich kuntin aidaunashkam apeawajui.
1SA 6:16 Tuja filisteo aidaun apuji cinco aajakua duka nuna dutikaidaun diisag ukuinak nunú tsawantaik yaakat Ecrón waketjauwai.
1SA 6:17 Tuke Pujuu ii pegkegchau takasbaunum tsagkugtamjati tusa filisteo aidau imuman dakumak cinco orojai najadau aina nunak, dita yaaktaji aidau: Ashdod, Gaza, Ascalón, Gad, Ecrón aatus aajakua nuna daajin maki makichik najadau ainawai.
1SA 6:18 Tuja katip dakumka orojai najadau aidauk filisteon yaaktaji aidau peeja apakbau, nuigtu peejachbaujai ijumjam cinco aajakua dutiksaik najanamu aajakui. Tuja chicham umiktin egketun arcan kaya shiig múun pujaunum ekentsaju aina duka yamaikish nunú kajak Josué ajaji yaakat Bet-shemesh aajakua nuwi awai.
1SA 6:19 Untsu Israel aents yaakat Bet-shemesh batsamin aidau arca initken diisu aidaunak Apajuí ijinauwai. Ashí ijumjamak setenta aentsun ijinauwai. Imatika Tuke Pujuu ijinamtai, nuwiya aents aidauk kuashat buutiaju ainawai.
1SA 6:20 Nuna wainkaju asag chichainak: “¿Tuke Pujuu Apajuí pegkejam ashí senchigtina nuna emtinish yaki nigkish ayamjumakainta? Dekas Apajuí kajegtamak ijipawai tikich yaaktanum awemami”, tuidau.
1SA 6:21 Nuna tuidau asag Israel aents aidau yaakat Quiriat-jearim batsamin aidaun chichaman aatus akatmamtug akuptukajui: “Filisteo aents aidau chicham umiktin egketun arcan jukiajua nunak awagkiag itawaje. ¡Dutikawaju asamtai nunú taajum jukitajum!” tusa tiajui.
1SA 7:1 Tusa ujakajam Quiriat-jearimnumia aents aidau wejiag arcan juki itawajui. Dutikawag Abinadapa jee nainnum aajakua nuwi awayag, nuna kuitamkatnun Abinadapa uchiji Eleazaran etegkawag Tuke Pujuun segatiajui.
1SA 7:2 Arcan jukiag Quiriat-jearimnum ejegawajua duwi nagkamas Israel aents aidauk veinte mijanai Tuke Pujuun segainak buutú batsatu, shiwag waitkagmaina nuna agkanmitkagmati tusag.
1SA 7:3 Imaniagtai Samuel ditan chichajak: “Atum dekas Tuke Pujuu atumi anentaimijai emematkujum ima nigki umigkatag takugmek, ¡tikich nugkanmaya apajuímtai aina duka Astarté dakumka najanamua nujai utsagtajum! ¡Dutikajum ima Tuke Pujuu takagsatajum! ¡Nuniakjum ima nigki ememattajum! Dutikagmin nii filisteo waitkagmaina nunak agkanmitkagmawagtatui”, tiuwai.
1SA 7:4 Tusa tiajam Israel aents aidauk Baal dakumka najanamu aidaunak, Astarté dakumka najanamu aidaujaí ashí utsagkajui. Dutikawag ima Tuke Pujuunak emematuidau.
1SA 7:5 Nunik batsatun Samuel ditan chichajak: “Ashí Israel aents aidautijum yaakat Mispá ijunjatajum. Nunikagmin wi atumin pachisan Tuke Pujuun segattajime”, tiuwai.
1SA 7:6 Tusa tiajam nunú yaaktanum ashí ijunjajui. Nunikag wake besemag pujamujin iwainainak yumi shikikag Tuke Pujuun anentag suwinak ukajajui. Dutikawag yujumka yutsuk batsamas, Tuke Pujuu emtin pegkegchau takamsamujin etsegtumakajui. Tuja nunú nugkanum Samuel Israel aents aidaun utugchatjin epegtin wajasui. Nunik duwi nii takamujin nagkamauwai.
1SA 7:7 Israel aents aidau Mispá ijunag batsatui tabaun filisteo aidau dekawajui. Nunikag apu aidau dita suntaji aidaun yajuakag shimutkajui. Nuna dekawag Israel aents aidauk senchi ishamaidau.
1SA 7:8 Nuadui Samuelan chichajuinak: “¡Amek mijamtsuk Tuke Pujuu iina Apajuíji segaa pujuta, nii ayamjutpakti filisteo aidau amupakainum!” tuidau.
1SA 7:9 Tusa imatiagtai Samuel uwig tsakat aishmagkun juki takamchaun patai ashí apeak Tuke Pujuun emematiuwai. Nuna dutika Tuke Pujuun segauwai Israel aents aidau kuitamkata tusa. Tusa segam Tuke Pujuu ayu tiuwai.
1SA 7:10 Samuel uwig aishmag tsakatan maa nuna nejen ashí apeak pujai, filisteo aidauk Israel aents aidaun jetekagtatus jegajuawajui. Nuniagtai Tuke Pujuu ipamtan shiig senchi ajuntug uwakauwai. Dutikamtai Israel aents aidau filisteo aidaun depetuk amuku ainawai.
1SA 7:11 Dutikawag tikich aidau pisagmatai, Mispánmaya juwakiag pataetuk shima shimakua, amaigkag mai mainakua yaakat Bet-car tutaya nuna tsumujin jegawajui.
1SA 7:12 Tuja nunú ashí nagkaankamtai, Samuel makichik kaya múunta juki Mispá, Sen aatus awa nuna ejapeen apusauwai. Dutika nuna adaikauwai Eben-ézer. Nuna adayak chichaak: “Tuke Pujuuk yamaikish yaimpawai”, tiuwai.
1SA 7:13 Dutika depetkamu asag filisteo aidauk ataktu awagkig Israel aents aidau nugken waintuag waitkaschau ainawai. Tuja Samuel iwaku pujusmataig, Apajuík filisteo aidaunak tuké ijinajakui.
1SA 7:14 Nuadui Israel aentsu nugken filisteo aidau Ecrógnum nagkama Gatan nugke aajakua aatus jujukiu aina duka ataktu ditá nugke wajasui. Aatus Israel aents aidauk, filisteo aidau ditá nugken jujukiu aina nunak ataktu awagkiajui. Nuadui ditak amorreo aents aidaujaig maanitsuk agkan batsamajaku ainawai.
1SA 7:15 Tuja Samuelak Israel aents aidaun utugchatjin epegtin aajakua nunisag pujus jakauwai.
1SA 7:16 Nii pujus Israel aents aidau utugchatjin epegtak maki makichik mijadai yaakat Betel, Guilgal, Mispá aatus wekagajakui.
1SA 7:17 Nunik wekae wekaekawa nii pujutaijin yaakat Ramá waketujakui. Nunik nuwi pujus Israel aents aidaunak yaijakui. Tuja nuigtushkam nunú yaaktanum Tuke Pujuu emematku kuntin maa patai apetain altaran najanauwai.
1SA 8:1 Samuelak múuntuch wajasu asa, niina uchiji aidaun Israel aentsu apuji atinme tusa adaijauwai.
1SA 8:2 Niina uchiji iwai Joel, tuja nuwi patatkau Abías aajakua nujai yaakat Beersheban apuji aajaku ainawai.
1SA 8:3 Tujash ditá apaji Samuel shiig takasua nujai betekak takaschajui. Tikich aidaunak wait anentsuk ima ditanunak anenmamajaku ainawai. Nunin asagmatai aents aidauk suwimkan sujusainum tuidau asag kuichkin akijaku ainawai.
1SA 8:4 Nuniagtai Israel aentsu apuji múun aidau ashí ijunjag Samuel Ramá pujau asamtai, niijai chichastasag shimutkajui.
1SA 8:5 Nunik jegawag chichajuinak: “Amek yamaik múuntuch wajasume. Tuja amina uchijum aidaushkam ame shiig takasuitam nujai betekak takainatsui. Nuniau asamtai ¡tikich aents aidau apugtin aina nujai betek iina apuji atin, ame adaikata!” tiajui.
1SA 8:6 Tujash nunú Samuelan shiig awagmakchauwai. Nuadui nuna pachis nii Tuke Pujuu segauwai.
1SA 8:7 Tusa segam Tuke Pujuu niina chichajak: “Dita wajina segapagtatua duka betek umigkata. Nunak amina dakitjamak tujamainatsui, ¡wi dita apuji atinun etegkeag duwi mina dakitjuinak tuinawai!
1SA 8:8 Yamai amina tujamaina antsag wi ditan egiptunmayan jiijuitag duwi nagkamas yamaikish minak tuke tujutin ainawai. Aanidau asag wainka apajuímtai aidaun emematuinak minak kajimatjukiaje.
1SA 8:9 ¡Nuadui amina segapaina duka umigkata! Untsu ditá apuji atata dusha ditajaish wajuk takastigki nunú shiig ujakta”, tiuwai.
1SA 8:10 Tusa tima nuna imatiksag Samuel ditan ujakui.
1SA 8:11 Dutika chichajak: “Atumi apujum atin sumajum duka juna dutikattawai: Atumi uchijum aidaun yajuak carronum yujas maaniatin aidaun, caballonum entsamak yujas maaniatin aidaun, tuja niina kuitamkagtin aidaun, aatus akanjattawai.
1SA 8:12 Dutikak nuigtushkam mil suntag aidaun apuji agtinun, nuigtu cincuenta suntag aidaun apuji agtinnashkam adaijattawai. Tuja tikich aidaunak ajaka ajakbau emaktinai. Untsu tikich aidauk nunú apu yuwatnun ajakan juu agtinai. Untsu tikich aidauk apu carroji maanitai aidaun najanin agtinai.
1SA 8:13 “Tuja atumi nawanjum aidaunashkam niina inake emaktinai. Dutikam kugkuin aidaun najanin, yujumka inajin, pagka najanin agtinai.
1SA 8:14 Tuja nuigtushkam nugka pegkeg aidaun yajuak ashí niinu emaktatui. Dutikak uva ajakbau, olivo ajakbaujai atumdau shiig pegkeg aina nunashkam niinu emaktatui. Nuna yajuak niijai atueka takatai aidaun tinamkattawai.
1SA 8:15 Tuja atumdau ajak juukbau aidaunashkam, uva juukbau aidaujai ujumak akanak juki niijai atueka takataiji aidaun, suntaja apuji aidaujai tinamtinai.
1SA 8:16 Tuja nuigtushkam atumi tsakatke aishmag aidaun, nuwa aidaun, buey aidaun, burro aidaun atanjamag niinu emak takamtiktinai.
1SA 8:17 Nuigtushkam atumi tagkujum aidaun akanak yajutjamkatnai. Atumshakam niina inake atatjume.
1SA 8:18 Atum apu etegkamua nunú imatika waitkagmainakui chichagminish, Tuke Pujuuk antugtamkashtatui”, tusa ujakui.
1SA 8:19 Tusa ujamashkam aents aidauk dekaskeapi tutsuk aimainak: “Iik duka puyatjatsji, ayatak apugtin atag tusa wakegaji.
1SA 8:20 Tikich aents aidau apugtin aina nujai betek agmi taji. Nunú iina apuji etegkamu asa, iina nugken inamak iina shiwaaji aidaujai maaniamunmash nii chichamjutpakti, taji”, tuidau.
1SA 8:21 Tusa tiagtai nuna ashí antujuk imatiksag Samuel Tuke Pujuun ujakui.
1SA 8:22 Tusa ujakam Tuke Pujuu ayaak: “¡Dita sumamua duka ayu tusam apu adaitukta!” tiuwai. Tusa tima Samuel Israel aents aidaun chichajak: “¡Maki makichik atumi yaaktagmin waketjatajum!” tusa ishiakui.
1SA 9:1 Makichik aents Quish daagtin Abiela uchiji, Zerora tijaji Benjamín wegantunmaya aajakui. Niina apajin apachjig Afíah uchiji Becorat aajakui. Quishak eme anentsa diitai aajakui.
1SA 9:2 Niina uchiji datsa makichik yantsaptin shiijam Saúl daagtin aajakui. Tuja nii shiijam aajakua imanuk tikichik Israel aentsuk makichkish atsujakui, nuigtush niina esantijai betekak tikichik atsujakui.
1SA 9:3 Tuja makichik tsawantai Quisha burroji aidau megkaejauwai. Nunikmatai niina uchiji Saúlan chichajak: “Makichik inak juki weme, burro megkaeja nunú egakta”, tiuwai.
1SA 9:4 Tusa tima Saúl inaka juki burro egak Efraígka nugken mujanum weuwai. Nunik jegauwai Salisá nugkanum; tujash burronak wainkachui. Nuwi nagkaemaki weuwai Saalim nugkanum, nunik Benjamígka nugkenishkam jegauwai, tujash burro megkaejaunak wainkachui.
1SA 9:5 Nunik wainkacha ukuak Suf nugkanum jegaa inakan chichajak: “Wakitkimi mina apajuk burro megkaeja nuna nagkaesaus iina puyatjutpatai”, tiuwai.
1SA 9:6 Tusa tama nunú inak ayaak: “Juju yaakta juwi makichik aents Apajuí chichame etsejin pujawai, nunak nii tibau betek uminu asamtai, ashí aents aidau eme anentus diin ainawai. Nunú jegajua iniasmi, tuwig burrosh batsatua nuna ujapakchaintash”, tau.
1SA 9:7 Tusa tama Saúl ayaak: “Ayu untsu wemi, ¿tujash nii iniakuish wajig susatji? Makichik pagkesh nii sumainuk shiig atsugtamji”, tau.
1SA 9:8 Tusa tutai inak ayaak: “Wi takakjai plata piipichin, nunú Apajuí chichame etsejin suwaku dekajuami, burrosh itug batsatuaki nuna ujapakti”, tau.
1SA 9:9 (Initaikik makichik Israel aentskesh Apajuín inias dekatag takug: “Aents anentaimas ejenun iniasan dekatjai” tujaku ainawai. Nunak yamai ii profeta taji nuna taku tujaku ainawai.)
1SA 9:10 Tusa tutai, ayu wemi tusa mai juwakiag yaaktanum Apajuí chichame etsejin pujamunum weajui.
1SA 9:11 Nunik yaakat jegattak wekama nuwauch aidau yumi shikiktatus shimuidaun igkugkag iniinak: “¿Aents anentaimas dekamnush juwig puja?” tuidau.
1SA 9:12 Tutai ditá ainak: “Ehe, tujash imau yaakta nagkaiki pujawai. Wamak wejitajum, kuntinu maa, Apajuí emematak nainnum apeatatus yamai yaaktanum wakame.
1SA 9:13 Nuwi yujumka yuwatatus eke weatsaig wejitajum. Wagki Apajuí emematku kuntin maamua nuna nii jegaa Apajuí segamtai yuwami tusa aents aidau dakainawai. Nuadui wamak wetajum, nuniakjum igkugtatjume”, tiajui.
1SA 9:14 Tusa tiajam ditashkam yaaktanum shiyakajui. Nunik jegattak wenai, Samuelchakam kuntinu maa apeatatus wegak dita shimamunmanini jiinki minaun wainkajui.
1SA 9:15 Tuja Saúl kashinia duwi jegatin ai Tuke Pujuu Samuelan ujaak:
1SA 9:16 “Kashin, yamai etsa eketa juniai Benjamígka nugkenian makichik aentsun awetittajame, nunú mina aentsug Israel aents aina nuna apuji atin asamtai. Ame aceiteyai buuken nijaktatme. Nii mina aentsug Israel aents aidaun filisteo aidau waitkaina nuna ayamjuk agkanmitkattawai, wagki dita waituinak mina segatuinamunak wi antugkau asamtai”, tiuwai.
1SA 9:17 Nuadui Samuel Saúlan wainkamtai, Tuke Pujuu chichajak: “Wi makichik aentsu pachisan amina timajam duka anuwai. Anú mina aentsug Israel aents aina nuna apuji atatui”, tiuwai.
1SA 9:18 Nuniai Saúl Samuelan jegantun chichajak: “¿Tuwi awa anentaimas dekamnu jeesh? nunú minash wait aneasam inaktugsata”, tau.
1SA 9:19 Tusa tama nii ayaak: “Witjai anentaimas dekamnunuk. Wegajai Apajuí jee pegkegmanum, awi wijai yujumak yuwata. Tuja ame waji dekaatag tusa wakegame nunak kashin kashikmasan ujaktagme, dutikamtai duwi wakitkita.
1SA 9:20 Tuja burrojum megkagag kampatum tsawan wega duka puyatjukaipa, nunak wainkaje. Tuja nuigtushkam Israel aents aidaun nugken waji pegkeg ayá duka ashí aminu nuigtu amina pataiminujai atatui”, tiuwai.
1SA 9:21 Tusa tama Saúl ayaak: “¡Tujash wika tikich Israel aents wegantu kuashat aina imanchau Benjamín wegantunmaya ujumchik aina nuwiyayaitjai! Nuigtushkam Benjamín wegantu aina nunú ashí ijumjamash mina pataajuk tiki wainkauch ainawai. ¿Nunin aish wagka minash dusha tujutme?” tiuwai.
1SA 9:22 Tusa timatai, Samuel Saúlan niina inakejai juki yujumak yuwaku ijuntainum awayauwai. Dutika treinta aents eme anentsa diitai aidau pekagbaun nagkaesau dekas shiig pegkegnum ekentsauwai.
1SA 9:23 Dutika Samuel yujumka inagnun chichajak: “Wi neje amaakun juka akanka ukukta timajam nunú itaata”, tiuwai.
1SA 9:24 Tusa tima ayu tusa kuntinu bakuin juki Samuelan ekettsauwai. Dutikamtai Samuel Saúlan chichajak: “Wi aents aidaun ipau asan, ditajai ijunag yuwati tusan anna akankan amina ukugkimjame, anú yuwata”, tiuwai. Tusa tima nunú tsawanta duwi Saúl Samueljai jimagtuk yuwawajui.
1SA 9:25 Nunikag Apajuí jee pegkegmanum batsatu juwakiag, Samuela jeen yaakat jegamtai, Saúl kanagtinun jega tuntupen pegakan umigkajui.
1SA 9:26 Dutikam nuwi kanajui. Nunikmatai kashinia duwi Samuel Saúl yakí pujaun untsuka chichajak: “Nantakim wakitkita”, tau. Tusa tima nantaki wetatus uminas Samueljai agá jiinkiajui.
1SA 9:27 Nunikag yaakta ukukiag Samuel Saúlan chichajak: “Inakem amejai wekaga nunú emtikam awemata. Untsu amek machik ukuunum juwakta, nunikamin Apajuí tujutma nuna ujaktagme”, tiuwai.
1SA 10:1 Samuel aceite juki Saúla buuken nijakui. Dutika yapinum kugkuak aatus tiuwai: “Tuke Pujuu amina Israel aents aidaun apuji ati tusa yamai etegtamae. Ame pujusam inamkum shiwag waitkaina nunú agkanmitkattame. Tuja amina Apajuí etegtama duka juju aidau wainkum dekaskeapi titatme.
1SA 10:2 Tuja yamai weakum Benjamígka nugken yaakat Selsah Raquel ukusbaunum jegantatak, jimag aents minidau igkugtatme. Nunú inimpak: ‘¿Burro megkaejamtai egaku wemaum dusha wainkaumek? Amina apak burronak puyatjichmae, amina ima senchi puyatjupame, nuniak mina uchijush inakjaish wajukawagmaki tusa dekatatus iniimak wekaemae’, tujamiagtatui.
1SA 10:3 “Nunú nagkaiki weakum, numi encina tutai yaakat Tabornum waja nuwi jegakum, kampatum aentsua nuwiya, makichkia nunú kampatum chivon jukimtai, tikichik kampatum pagkan juki, tuja tikich duwap apagbaunum vino aimkamun jukiag Apajuín ememattatus yaakat Betelnum shimuidau igkugtatme.
1SA 10:4 Dutikawagmin kumpamjamawag jimag pagkan amainakuig dakittsuk jukita.
1SA 10:5 “Nunika wea weakum, yaakat Guibeá Apajuínu tutainum filisteo suntag aidau batsamtai awa nuwi jegattame. Nunika jegakmam wainkattame aents kantamin aidau: pandero aidaun, arpa aidaun awatkiag, pigkui aidaun umpukmaikia, nuna ukujin profeta aidau Apajuí jee pegkegma nuwiya jiinjag Apajuí tibaun etsegkamaikia akagaidau wainkattame.
1SA 10:6 “Nuniamin Tuke Pujuu Wakani amina wainjamattawai, nuniakui profeta chichagtata nujai betek ameshkam chichattame. Duwi nagkamas amina pujutjumek yapajinattawai.
1SA 10:7 Tuja nunú ashí uminkamtai, ame waji takasta tame nunú dutikata. Apajuí aminak yaimpaktatui.
1SA 10:8 “Tuja amek emkam yaakat Guilgal wetá. Nunikam awi siete tsawan dakagmin wi tattajai. Nunikan Apajuí daajin kuntinu maan nuna nejen ashí apeakun, nuigtu agkan pujutan Apajuí amastí tusan niina anentag susattajai. Dutikan duwi ujaktatjame ame wajuk takastatme nuna”, tiuwai.
1SA 10:9 Tusa tima nunú tsawantaik Samuel tibauk imanisag uminkauwai. Nuadui Saúl Samuelan kumpama ukuak weuwai. Aatus Apajuí Saúla pujutjin yapagtuauwai.
1SA 10:10 Nunik Saúl niina inakejai yaakat Guibeá jegawajui. Nunik jegattaman profeta aidau untsumkiag jiinjajui Saúlan igkuinak. Nuninai Apajuí Wakani Saúlan egkemtujui. Dutikam niishkam profeta aidaujai betek wajasui.
1SA 10:11 Nuniagtai yaunchuk Saúla wainin aidau pempeentunikiag tudayinak: “¿Quisha uchijish wagka aniawa? ¿Tuja au profeta aina dusha tuwiya jiinjae? ¡Tsuwah, Saúlash profeta wajasu diyajai!” tuidau.
1SA 10:12 Tiagtai nuwiya makichik chichaak: “¿Yana jintintai ainawa aush?” tau. Nuna aatus tiaju asagmatai, nuwiya chicham jiinak: “¡Saúlchakam profeta wajase!” tibau juwakui.
1SA 10:13 Nuna nunik nagkaanak Saúl niina inakejai nuwi nagkaemaki, we wenakua Apajuí emematku kuntin maa apetai nain aajakua nuwi wakauwai.
1SA 10:14 Nunikmatai niina apaji yachi Saúlan niina inakejai iniak: “¿Tuu wemaijume?” tau. Tusa iniam Saúl ayaak: “Burro megkaejamtai egaku wemaiji. Nunika wainkacha Samuel pujamunum wemaiji”, tau.
1SA 10:15 Tusa tama Saúla apaji yachi niina ayaak: “¿Samuelash wajinjutpame? nunú minash wait aneasam ujatkata”, tau.
1SA 10:16 Tutai Saúl niina apaji yachin ayaak: “Burro aidau megkaejaunak wainkaje, tusa ujapakmae”, tiuwai. Tujash Samuel niina chichajak: “Ame Israel aents aidaun apuji atatme”, tusa tibaunak ujakchauwai.
1SA 10:17 Duwi pujus Samuel Israel aents aidaun untsuka, yaakat Mispá ijumjauwai, Tuke Pujuu emematiagmi tusa.
1SA 10:18 Dutika ijumag chichajak: “Tuke Pujuu Israel aents aidaun Apajuíjiya nunú chichaak: ‘Atum Israel aents aidautijum Egipto nugkanum batsamsajum waitkam batsatutigmin wi jiijan agkanmitkawabiajime.
1SA 10:19 Tuja wi atumi Apajuíjum asan yayajim duka dekayaitkujum, mina idaitakjum iish apugtin amí tusajum sumagme. Tujash nunak puyatjatsjai. Atum sumajum nunak betek umiktatjai, nuadui mina emtijui maki makichik wegantu ainajum duka ashí ijunjatajum’ tusa Tuke Pujuu tujamui”, tiuwai.
1SA 10:20 Tusa tiajam maki makichik wegantu aidau ashí ijunjauwai. Nunikmatai Samuel kaya juki yana daajig jiinkiti tusa diyam Benjamín wegantunmaya jiinkiuwai.
1SA 10:21 Nunikmatai Benjamígkan patayi aina nuwiyash yana daajig jiinkit tusa dekapsauwai. Dutika diyam Matrí patayinia jiinkiuwai. Nunikmatai ataktu awagkiag dekapsajui, dutikam Saúla daaji jiinkiuwai. Nunikmatai Saúlan wainkatakama emegkakajui.
1SA 10:22 Nunikmatai Tuke Pujuun iniasajui Saúlash juwig puja tusa. Tusa iniam Tuke Pujuu ayaak: “Waji ijumjamu aina nuwi uumak pujawai”, tiuwai.
1SA 10:23 Tusa timatai uumak pujaun jukitatus shimutkajui. Dutika jukim Israel aents aidau ijunag batsatbaunum wegajui. Nunik jegamtai diikma tikich niina nagkaekauk esagmak atsaun wainkajui.
1SA 10:24 Nunikmatai Samuel Israel aents aidaun ashí ijumag chichajak: “¡Tuke Pujuu juna atumi apuji atinun etegka nunú ashí diistajum! ¡Niijai betek amainuk tikichik Israel aentsuk atsawai!” tiuwai. Tusa timatai dita shiig aneas aimainak: “¡Nii iina apujig ati tusa wakegaji!” tuidau.
1SA 10:25 Tusa tiagmatai, Samuel apu takatjish wajuk atatua nuna pachis Israel aents aidaun ujakui. Nuna ujaka papiinum agag juki Apajuí jee pegkegmanum awayauwai. Dutika nuadui ashí aents aidaun jemin waketjatajum tusa ishiakui.
1SA 10:26 Dutikamtai Saúlchakam yaakat Guibeánum niina jeen wakitkiuwai. Nunik wetai Apajuí niina uyuntsatnun ujumak aents wajiu aidaun etegtujui.
1SA 10:27 Nunik wematai aents pegkegchau aidau chichaman patatuinak: “¡Aush annush iinash ayamjutpaktatuak!”, tusa tuidau asag apu wajasmataish makichik wajinakesh susachajui. Dutikamashkam Saúlak nuna chichamjutan dakitak idaisauwai.
1SA 11:1 Galaad nugkanum yaakat Jabes aajakua nuna jetektatus amonita aents aidaun apuji Nahas aajakua nunú shiig uminas suntaja yajuak weuwai. Nuna dekawag nuwiya aents aidau Nahasan chichama akuptuinak: “Jutijaig maaniawaipa, ayatak chicham umikmi, nunika amina inakem agmi taji” tuidau.
1SA 11:2 Tusa tiagmatai Nahas ditan ayaak: “Ayu, untsu chicham umikmi takugminig, wi atumi jii untsuja nuna ashí ukuitjatjime. Dutika ai atum Israel aents aidautijum dushiktai datsan juwakminjum”, tiuwai.
1SA 11:3 Tusa timatai Jabesnumia apu aidau chichainak: “Kame siete tsawan sukagtusta, tikich Israel aents aidau batsata nunú chicham akuptuka dekanati. Untsu iina yaimpamain atsakuig, ame tame duke ati”, tuidau.
1SA 11:4 Nuna tusa chichama etsejin aidaun yaakat Guibeánum Saúl pujujakua nuwi ishiakui. Dutikam jegawag Nahas tibaunak imatiksag nuwiya aents aidaun ujakui. Nuna antukag kajekag buutiajui.
1SA 11:5 Nuninai Saúl niina ajajinia buey aidaun yajuak minikma buutuidaun antuk iniimak: “¿Wagka imatuinawa? ¿Wagka buutuinawa?” Tutai: “Jabesnumia aents aidau kaunawag chichama etsegkamtai nuna antukag buutuinawai”, tuidau.
1SA 11:6 Tiagtai Saúl nuna antak wajai, Apajuí Wakani niina egkemtujui, dutikam shiig senchi kajekui.
1SA 11:7 Nunik jimag bueyen achika juki tsupig mauwai. Dutika nunú aents yujaun tinamak Israel aents aidau batsatbaunum ashí ishiakui. Dutika ishimak juju etsegkatajum tusa chichama etsejin aidaun akateak: “Aents wijai, tuja Samueljai ijunag maanitan dakituidauk, tagkuji buey aidauk jutiksaik tsupija ijitam agtinme”, tiuwai. Tusa timatai nuna antukag Israel aents aidauk shiig senchi ishamkajui. Nuninak Saúljai atuniktatus makichik aents amaina numamtuk jiinjajui.
1SA 11:8 Nunik shiyakag ijunjajui yaakat Bézec. Nunikmatai Saúl dekapajui, dutikam Israel aents aidauk trescientos mil aents ijunjauwai. Tuja Judá wegantunmaya aidau treinta mil aents ijunjauwai.
1SA 11:9 Nunik ijunjamtai Saúl chichama etsejin aidaun chichajak: “Waketjajum Jabesnumia aents aidau ujaktajum, kashin etsa tajimai agkanmitkawagtatjai”, tiuwai. Tusa tima jegawag Jabesnumia aents aidaun nuna ashí ujakajui. Nuna antukag shiig aneasajui.
1SA 11:10 Nunikag Nahas ujaktajum tusa chichama etsejin aidaun akuptuinak: “Kashin ame wakegamu umikta tusa minittaji”, tiajui.
1SA 11:11 Tuja kashinia duwi Saúl niina suntaji aidaun akanag kampatum ijumjauwai. Dutika eke etsa jiintsaig shimutuk shiwag amonita aents aidau batsatbaunum jegawajui. Nunikag mai mainakua etsan tajipiajui. Dutika amuam iwaku juwaku aidauk maki makichik pisaja megkaejauwai.
1SA 11:12 Nunikagmatai nuwi aents yujau aidau Samuelan chichajuinak: “¡Israel aents aidau Saúlak iina apujig amaitsui tusa tiagma duka kajegmi!” tiajui. Tuidau asag, nunú aents aidauk idaisatajum ii kajegmi tusa sumaidau.
1SA 11:13 Tusa tiagtai Saúl chichaak: “Yamai tsawanta duik makichik aentskesh jakashtatui, wagki Tuke Pujuu yamai Israel aents aidaun ayamjuku asamtai”, tiuwai.
1SA 11:14 Tusa timatai Samuel ashí aents aidaun chichajak: “Yaakat Guilgalnum shiyakagmi, awi Saúl apu wajas inabaun nagkamati”, tiuwai.
1SA 11:15 Timatai aents aidauk ashí yaakat Guilgal shiyakajui. Nuwi jegawag Apajuí emtin Saúlan apu adaikajui, dutika chichainak: “¡Saúlai iina apujig!” tuidau. Nuna ashí umikag nuadui agkan maanitsuk pujustinun Tuke Pujuu amastí tusag kuntinu maa apeenak Tuke Pujuun emamatiajui. Nuadui Saúl Israel aents aidaujai ashí ijunag shiig aneasajui.
1SA 12:1 Nunú nagkaemakmatai Samuel ashí Israel aents aidau antamunum chichaak: “Antuktajum nijah, wika atum aidautijum segatbaunak ashí umigkajime. Dutikau asan atumi apujinash adaitukjime.
1SA 12:2 Nuadui yamai nagkamsag juju apu atuminig inamjattawai. Tuja wika yamaik múuntuch intashi puju wajasjai. Atumek dekagme mina uchig aidau atumjai batsatainawai. “Wika datsauch asanuk atumi yayaakun taka takakuan yamai tsawantan ejejai.
1SA 12:3 Nuadui wisha wajuk atumjaish takasja nunú namputchawame wi atumdau buey aidaunakesh, nuniachkunush atumi burrojum aidaunakesh atankimu akugmek, tuja tikichnakesh waitkasu akuig tujuttajum. Tuja chichama iwagtujati tusagmekesh akigkau akugmeshkam, yamai Tuke Pujuu emtin, juju apu Apajuí etegkamua nuna emtinchakam tujuttajum. Nunú tujutiagmin nuna akikmaktajai”, tiuwai.
1SA 12:4 Tusa tutai dita aimainak: “Amek makichkish kasagkagtukchauwaitme, nuigtush tsanujatjachuitme, nuigtush chichama iwagtugtagme tusamkesh makichkish kuichkik segajatchauwaitme”, tiajui.
1SA 12:5 Tusa tiagtai Samuel chichaak: “Tuke Pujuu emtinish, tuja apu aina nuna emtinish mina utugchatjuk makichkish ejetugchaugme”, tiuwai. Tusa tutai ditá ainak: “Ame tame duka dekaske”, tuidau.
1SA 12:6 Tusa tiagmatai Samuel Israel aents aidaun chichajak: “Atumi apachjum aidau Egipto nugkanum waitkam batsatun, jiija yajuak, juju nugka juwi ikaunmati tusa Tuke Pujuu Moisésan Aarógjai awetiuwai.
1SA 12:7 Nuadui umintsatajum, wagki wi yamai atumin iwaintuktatjime, atum aidautijum ima Tuke Pujuuwaig kajintsa anentaimtsuk, apugtin amí tusa sumakjum pegkegchau takamsaujum nuna. Tuja atumi apachjum aajaku aina nuna uwemtikatatus Apajuí dutikauwa nuna yamai dekamtikattajime.
1SA 12:8 “Atumi apachjum aajaku aina nunú Jacob niina uchiji wegantu aidaujai Egipto nugkanum shiyakag batsatun, nuwiya aents waitkasu ainawai. Imatika waitkainam Tuke Pujuu yaimpakti tusag segajaku ainawai. Nuna antujuk Tuke Pujuu Moisésan Aarógjai awetiuwai. Dutikam iina apachji aidaun jiija yajuak juju nugka juwi ikaunmauwai.
1SA 12:9 “Dutika ikaunmam batsamsash ima Tuke Pujuu dita Apajuíjinak umigtsuk kajimatkiu ainawai. Nunidau asagmatai dita shiwaaji aidau depetkatnume tusa Tuke Pujuu timatai, Hasornumia suntag aidaun apuji Sísara aajakua nunú niina suntaji aidaujai depetuk amukajui. Tuja nuigtushkam filisteo aidau, moabnumia aents aidau aatus ditanak depetuk amuku ainawai.
1SA 12:10 “Dutika depetkam wajantag nuadui Apajuín adeajag segainak: ‘Dekas iik Baal dakumkamu Astartéjai emematku tunamagji’, tiu ainawai. Nuna tusag iina shiwaaji waitkagmaina nuna ayamjutpakti tusa Tuke Pujuun segainak: ‘Ame ayamkagtukaminig, ima amek emematiagmi taji’ tiajui.
1SA 12:11 “Nuna antujuk Tuke Pujuu Jerubaalan Barakan, Jefté aajakua nuna, tuja minashkam aatus awetugmauwai, atumin shiwaajum aidau waitkagmaina nuna ayamjutpakti tusa. Aatus iina apachji aajaku aina duka dita ayamjukam shiig batsamsau ainawai. Tuja yamai atumshakam kuashat tsawantai atumi shiwaajum waitkascham shiig batsatjume.
1SA 12:12 “Tujash atumek amonita aidaun apuji Nahas aajakua nunú jetepaktag tabau antukjum, iish apugtin amí, nunú iinash yaimpakti tusajum, Tuke Pujuu atumi Apajuíjiya nunú dekayaitkujum sumakmaijume.
1SA 12:13 “Nuadui atum apu sumakbaujum duka jujuwai. Juna Tuke Pujuu atum sumakbaun amasaje.
1SA 12:14 Nuadui atumek atumi apujijai yamai juju umiktatjume: Tuke Pujuu eme anentsajum nigki ememattajum, dutikakjum nii tabau umiktajum. Nii dutikata tujabau takastajum, tuja nii wakegamu umigkujum pujustajum. Nunú dutikakjum shiig pujustatjume.
1SA 12:15 Untsu nii umiktajum tabau umitsuk idaijuminig, Tuke Pujuu atumnak atumi apugmijai suwimkan amastatjume.
1SA 12:16 “Nuniau asamtai titu batsamsatajum, Tuke Pujuu atum aidautigmin wainchatai aidaun iwaintugmakagtata nunú wainkamnujum.
1SA 12:17 Tuja yamai tsawan aina duka trigo juut asamtai, yumi yutatsu nunú wainjume. Nunik aun wi Tuke Pujuu sega ai, nii ipa ipamtajai yumin yutumtijattawai. Dutikamtai atum aidautijum apu sumakujum duka Tuke Pujuu diismak pegkegchau dutikaujum nunú dekattagme”, tiuwai.
1SA 12:18 Nuna tusa inagnamuik Samuel Tuke Pujuu segauwai. Dutikamuik Tuke Pujuu ipamtan yumijai ajunjauwai. Dutikamtai ashí aents aidauk Tuke Pujuun Samueljai ishamkajui.
1SA 12:19 Nuadui aents aidau Samuelan chichajuinak: “Amina aentsjum aidauti pachijattsam Tuke Pujuu amina Apajuíjum segata, wagki jinawaig tusa ishamaji. Iik apu sumá yujasa nuni senchi iina tudauji ikauntumakji”, tuidau.
1SA 12:20 Imatiagtai Samuel ditan chichajak: “Ishamkaigpa, Tuke Pujuuk mantamachagtatui. Dekaske atum pegkegchau takasujum duka. Tujash nuniku akugmesh Tuke Pujuuwaig kanakaigpa. Duka nunitsuk ima nigki atumi anentaimijai ememattajum.
1SA 12:21 Tuja tikich apajuímtai aina nunú atumi ayamjutpak uwemtijamainchau aina nuninuk yujagsaigpa. Duka wainak ainawai.
1SA 12:22 “Atum aidautijum ima nigki eme anentsajum emematjuminig atumnakek idaitamsashtatui, wagki niig mina aentsug atinme tusa etegtamjau asa.
1SA 12:23 “Untsu wika atumnak mijattsuk Tuke Pujuun segattatjime, nuna dutikashkunuk pegkegchaun takakun nunimainaitjai. Nuigtushkam aents pegkeg atinme tusan jintintuattajime. Duka juju ainawai:
1SA 12:24 “Atumek ima Tuke Pujuuwa duke ajantusjum diitajum, dutikakjum nii umigkujum dekaskenum atumi anentaimijai ememattajum. Tuja Apajuí atumi yaimpak kuashat dutikauwa nunú aneaku atajum.
1SA 12:25 Untsu pegkegchau takat aidau idaitsuk duke pujugkugmek, atumek atumi apugmijaí ijina utsam atatjume”, tiuwai.
1SA 13:1 Saúl apu wajas Israel aents aidaunum inabaun nagkamauwa nunak tsakaja pujus nagkamauwai. Nunik apu wajas inamak ujumak mijan pujau,
1SA 13:2 makichik tsawantai tres mil suntag Israel aents aidaun etegjauwai. Nuwiya dos mil suntag niijai Betelnum jegattak mujanum yaakat Micmas juwakajui. Nuninai tikich aidauk Benjamígka nugken yaakat Guibeá Jonatágjai juwakajui. Untsu tikich aidaunak jemin waketjatajum tusa Saúl ishiakui.
1SA 13:3 Tuja suntag filisteo aidau ditá nugken Guibeánum batsatunak, Jonatán niina suntajijai amukui. Dutika amuke tabaun tikich filisteo aidau dekawajui. Tuja Saúlchakam dekauwai. Nunik inamjauwai Israel aents aina nuna nugken ashí uwija kachujin umpuagtinme, nuna antukag umintsagmatai maaniawagmi tusa.
1SA 13:4 Tuja Guibeánum suntag batsatunak Saúl amuke, dutikamtai filisteo aidau Israel aents aidaun kajegkaje tabaun ashí Israel aents aidau dekawajui. Nuadui suntag aidau yaakat Guilgalnum Saúljai ijunjajui.
1SA 13:5 Nuninai filisteo aidaushkam Israel aents aidaujai maaniawagtatus ijunjajui. Tuja filisteo aidaunuk treinta mil carro maanitai aidau, seis mil suntag caballonum maanitan yacha aidau, nuigtu dawenum yujas maanitan yacha aidau aatus nayantsa kamatkajijai betek tumain aajakui. Imaanik ijunag shiyakag yaakat Bet-avén jegawag, nujai niinis yaakat Micmas aakmajag batsamsajui.
1SA 13:6 Ibau kuashat jetenam ishamainak Israel aents aidauk waa aidaunum, japagau initak aidaunum, kaya pagkaku aidaunum, nugka taimu aidaunum, yumigmat taimu aidaunum uumjajui.
1SA 13:7 Nuninai nuigtushkam kuashat aents pisajag, Jordágkan katitkag Gad nugkanum, tuja Galaad nugkanmashkam shiyakajui. Untsu Saúlak yaakat Guilgalnum juwakui. Nunikmatai suntag niijai yujauk ishamainak senchi kujaidau.
1SA 13:8 Tuja Saúlak nuwi pujus siete tsawan Samuelan dakasui, imaan tsawan dakagsattame tibau asa. Samuel tachatai daka daka aents aidauk wakettan nagkamaidau.
1SA 13:9 Nuniagtai Saúl chichaak: “Apajuí daajin kuntin maa nuna neje ashí apeatnuwe nunú, tuja agkan pujutan Apajuí amastí tusa anentag susatnuwe nujai itagtuatajum”, tiuwai. Tusa timatai juki ejetuam nii nuna maa apeak Apajuín emematiuwai.
1SA 13:10 Nuna dutika inagnai Samuel tauwai. Nunik taamtai Saúl jiintukiuwai igkug kumpamatatus.
1SA 13:11 Tujash Samuelak eke Saúlan kumpamtsuk chichajak: “¿Wagka amesh dutikata tichamaitkumesh, kuntin maamesh apeaume?” tau. Tusa tama Saúl ayaak: “Ame taatin tsawan nagkaemaki wetai aents aidau waketuinakui, tuja nuigtushkam filisteo aidau Micmas jutijai maaniatatus batsatu asamtai,
1SA 13:12 eke wi Tuke Pujuun segan umintsaig, filisteo aidau kauna jetepakchajaintash tusan, kuntinu maan nuna nejen ashí apeakun Tuke Pujuu ememattajai tusan jutikajai”, tiuwai.
1SA 13:13 Tusa timatai Samuel ayaak: “Ame aikaum duka makichkish dutikmainchau aikaume. ¡Tuke Pujuu amina Apajuíjum dutikata tujamauwa nunú betek umikaminig, Israel aents aidaun apuji tuke atin ati tusa Tuke Pujuu tujamain awajtamkae!
1SA 13:14 Tujash yamaik ame apu wajasa inabaugmek tuke achattawai. Yamaik Tuke Pujuu nii wakegamun betek umiaun makichik etegkattawai. Dutika Israel aents aidaun apuji ati tusa adaikattawai, wagki amek Tuke Pujuu tujabau umigkachume”, tiuwai.
1SA 13:15 Nuna tusa ukuak Guilgal pujau jiinki weuwai. Nunikmatai suntag nuwi juwakaju aidauk Saúljai shiyakajui, filisteo aidaujai igkunia maaniawagtatus. Guilgalnumia shiyakag Benjamígka nugken yaakat Guibeá jegawajui. Nunik jegawag nuwi Saúl seiscientos suntajan ijumjauwai.
1SA 13:16 Dutika Saúlak niina uchiji Jonatágjai, nuigtu suntag niijai yujau aidaujai aatus filisteo aidauk Micmas batsatai, ditak yaakaat Guibeánum Benjamígka nugken juwakajui.
1SA 13:17 Nuwi batsatai filisteo aents maanitan yacha emak shimin kampatum akanka ijumjamu aidau, dita batsatbaunmaya makichik eemak wegak tikich aidaun yajuakui. Nunik yaakat Ofránmanini Shual aajakua nuna nugkeen shiyakajui.
1SA 13:18 Untsu tikich aidauk yaakat Bet-horón aajakua nuni shiyakajui. Nuniagtai kampatuma nunú Seboíma mujajin uwegshunum shiyakajui.
1SA 13:19 Tuja Israel aents aidauk makichik aentskesh nagki aidaun jiju hierrojai najannuk atsujakui, wagki filisteo aidau dekainayatak jintintuachbau asag. Nunak jintintuachajui wagki unuimajag puyajan, nagkin aatus najankag jutijai maaniawainum tuidau asag.
1SA 13:20 Nuadui Israel aents aidauk kuchii, jacha, azadón, pico aidau etsakmainkesh atsugbau asag filisteo aents aidaun segajaku ainawai.
1SA 13:21 Dutika segam nunú etsakeamunum jimag kuichkin akikmajaku ainawai. Tuja jacha etsakeamunmak, jiju etsaktai aguijada aidau iwagbaujai makichik kuichkin segajaku ainawai.
1SA 13:22 Nuadui suntag aidau Saúlan Jonatágjai uyunajaku aina duka puyaajinchau, nagkigtinchau aajaku ainawai. Untsu ima Saúlak Jonatágjai takaku aajaku ainawai.
1SA 13:23 Nuninai filisteo aidauk Israel aents aidaun yaakat Micmasnumanini shimutkajui.
1SA 14:1 Makichik tsawantai Saúla uchiji Jonatán nii maaniaku jutaijin niina kumpaji takujus wekagajakua nuna chichajak: “Namak katitka suntag filisteo aidau batsata nunú jetekmi”, tiuwai. Tusa weakush niina apajinak ujakchauwai.
1SA 14:2 Niina apaji Saúlak Gabaanum yaakat Migrón aajakua nuwi munchi ayaunum nuna wakentin niina suntaji seiscientos aidaujai batsatai nunikui.
1SA 14:3 Tuja makichik sacerdote yaakat Silónum pujus Tuke Pujuun umijujakua dushakam Saúljai pujau. Nuna daajig Ahías aajakui. Nunú sacerdote nugkutai lino apagbau efod tutain takujakui. Tuja Ahíasak Icabotan yachi Ahitub aajakua nuna uchiji aajakui. Untsu niina apachjig Elí uchiji Finees aajakui. Tikich Israel aents aidaushkam Jonatán niina kumpajijai webaunak dekachaju ainawai.
1SA 14:4 Jonatágkak niina kumpajijai filisteo aidau batsatbaunum jegatatus wedau. Dita shimamunmanini jimag kaya múun Bosés daagtin Senéjai aajakui.
1SA 14:5 Tikichia nunú nujinmanini yaakat Micmasjai niniaku aajakui. Untsu tikichia nunú tsumunmanini yaakat Guibeájai niniaku aajakui.
1SA 14:6 Nuwi wesag Jonatán niina kumpajin, chichajak: “Weajai au nagkaiki atú amainia awi aents pegkegchaun takau aidau batsata nunú jegajua Tuke Pujuu yaimpasmatai maaniami, wagki kuashat akuish, nuniachkuish ujumchik akuish, iik Tuke Pujuu yaimpasmatai depetmainaitji”, tau.
1SA 14:7 Tusa tutai niina kumpaji ayaak: “Ayu, ame anentaimam duka betek umikta. Wika ame tujutbaun umiktasa wekaejai”, tiuwai.
1SA 14:8 Timatai Jonatán niina chichajak: “Weajai atú amainia awi filisteo aidau batsata nunú jegajua wantintukmi.
1SA 14:9 Dutika wantintuka ajin dita chichainak: ‘Anuig wajastajum, nuniagmin ii kaunawagmi’ tuinakuig wejutsuk nuwig wajasa dakasmi.
1SA 14:10 Untsu ‘wakatajum’ tujamkuig wajukmi. Nuni dekaattaji Tuke Pujuu ditan depetkatnume tusa tujabau”, tiuwai.
1SA 14:11 Nuadui mai juwakiag filisteo aidau batsatbaunum jegantag wantintukajui. Nuniagtai ditan wainak chichainak: “Nijah, au hebreo aents aidau waanum uumak batsatu jiinjajana”, tuidau.
1SA 14:12 Tusa tuinai aents aidau Jonatán niina kumpajijai wajattaman untsuinak: “¡Juwi wakatajum, nunikagmin wajuk maanitaimpaita nuna jintintuatjime!”, tuidau. Tusa tiagtai Jonatán niina kumpajin chichajak: “Wi emka weakui mina ukujui minita, auk Tuke Pujuu iina amase, depetuk amuktinme tusa”, tiuwai.
1SA 14:13 Nuna tusa Jonatágkak nunú kayanum achimki, achimki, niina kumpajijai mai wakauwai. Nunik waka suntag filisteo aidaunak achika nagki nagkima ajiau. Dutiktai niina kumpaji patagas wegak nuna iju iju kajeau.
1SA 14:14 Dutika yama nagkamchak Jonatán niina kumpajijai jetekajua nuaduik juu tamawaik veinte aentsun kajegkajui.
1SA 14:15 Nuna antukag suntag filisteo aidau aaknum batsatuk tuja suntag ujumak maanitan yacha eemak shimin aidaushkam senchi ishamkajui. Tuja nuigtushkam nugka senchi uujak filisteo aidaunak shiig senchi uwakauwai.
1SA 14:16 Nuna ishamkag wakan wajasag pisainak pachimdagaidau. Imanidaun Saúla suntaji yaakta kuitamin aidau Benjamígka nugken Guibeánum pujuidau wainkajui.
1SA 14:17 Imaniagtai suntag niijai yujaun Saúl chichajak: “Ashí diistajum betekash batsatag nunú dekaami”, tau. Tusa tiajam, ashí diikma Jonatán niina kumpajijai megkaekauwai.
1SA 14:18 Nunikmatai Saúl Ahíasan chichajak: “Chicham umiktinun Apajuí amasbau egketa nunú arca itaata”, tiuwai. Nunak tiuwai wagki chicham umiktinuk tikich yantamnum au asamtai.
1SA 14:19 Tusa Saúl sacerdote Ahíasjai eke chichaak wajai, filisteo aidauk aan nagkaemas waugtukag pachimdagainak senchi chajuatuinau. Imaniagtai Saúl Ahíasan chichajak: “Dekas arcak itawaipa”, tiuwai.
1SA 14:20 Tusa ukuak Saúlak niina suntaji aidaujai ijunjauwai filisteo aidaujai maaniatatus. Nunik diikma filisteo aidauk shiwagtsukaita tusa dita ditak pempeentunikiag maanidaun wainkauwai.
1SA 14:21 Nuniagtai untsu hebreo aidau yaunchuk nagkamas filisteo inatai batsamin aidaushkam Israel aents aidaujai maaniatajum tima uminas batsatiatak, jiinag ukukiag Israel aents aidau Saúljai, Jonatágjai aatus ijunag batsatbaunum nuwi ditajai ijunjajui.
1SA 14:22 Tuja tikich Israel aents ishamkagtuinak Efraígka nugken uumkaju aidaunashkam, filisteo aidau pisainawai tabaun antukag ditashkam jiinag maaniawagtatus pataetukajui.
1SA 14:23 Nunik pataetukag mai mainakua Bet-avén jegawajui. Aatus nunú tsawantin Tuke Pujuu Israel aents aidaun ayamjuk agkanmitkauwai.
1SA 14:24 Israel aents aidauk yujumkan yutsuk maaniawaju asag, shiig senchi pimpikiajui. Nunak Saúl chichaak: “Shiwag aidau eke depeteatsjinig, yutain yuwauk mantamnati” tusa chichaman umiku asamtai, nuna umiinak nunikajui.
1SA 14:25 Tujash nunú tsawantin aents aidau maaninak yujasag dapa ayaunum jegantajui.
1SA 14:26 Nunik ikam akumak diikma dapa yumiji shiig kuashat ayaun wainkajui. Dutika wainkajash piipichinakesh dukachajui, wagki nuna nuniauk mantamnati tibau asamtai, nuna ishamainau asag.
1SA 14:27 Untsu Jonatágkak niina apaji chicham umiamun dekachu asa, numi takakbauwai nuna titijin, dapa yumiji saegun antig dukauwai. Dutika pimpiki wekaebaun ichichmamjauwai.
1SA 14:28 Nunikmatai suntag aidaunmaya makichik niina chichajak: “Amina apa chichama umiak: ‘Makichik aentskesh juju tsawanta duwi yutain yuwauk mantamnati’ tiu asamtai, iik senchi pimpikiatku makichik yutaigkesh yuwatsji”, tiuwai.
1SA 14:29 Tusa tutai Jonatán chichaak: “Mina apag chichaman umika nunak tumainchaun tine. Wika dapa yumijin dukaan pimpiki wekaebaujun ichichmamjajai.
1SA 14:30 Tuja tikich Israel aents aidaush iina shiwaaji aidau depetka, yutai atankimua nuna yuwawajag, ditash aan nagkaemas senchigtin wemain wajakaje. ¡Nunikagmatai filisteo aidauk wamak amumain awajkaji!” tiuwai.
1SA 14:31 Tuja Israel aents aidauk nunú tsawantin filisteo aidaunak, yaakat Micmas nagkamas mai mainakua yaakat Aialón ejegawajui. Tujash Israel aents aidauk shiig senchi pimpikiajui.
1SA 14:32 Imanik pimpikiaju asag, yapajuinak uwig aidau, baka aidau, toro tsakat aidau, filisteo yajutkamu aidaun maawag neje numpemtin uduunak yuwawajui.
1SA 14:33 Nuna nuniagtai nuwiya makichik Saúlan jegajua chichajak: “Tuke Pujuu: Neje numpemtin yuwawaigpajum, tusa tujamiuwa nuna umitsuk, neje uduun numpejai yuwinak tunamainawai”, tau. Tusa ujakam Saúl chichaak: “¡Atumek Apajuí tujabauwa duka umitsuk intimjukiugme! Nuniku asajum kaya múun jukijum juwi itagtuatajum”, tiuwai.
1SA 14:34 Nuna tusa, tikich Israel aents aina dushakam ashí ujaktajum: “Maki makichik toron, nuniachkush uwijan itaatnume. Dutikawag juju kaya múun puja juwi patai maatnume, dutikam nuna numpe saeki utsankamtai, duwi shiig numpe atsaun yuwatnume. Nuna nuninak tunamagchagtatui”, tiuwai. Tusa tima nunú kashia duik maki makichik toro jukiag kaya múun pujamunum ejegawag, nuwi pataidiag maawajui.
1SA 14:35 Dutikawagmatai Saúl kuntin maa patasa apeaku Apajuí ememattinun makichkish najanchauwaitak najanauwai.
1SA 14:36 Nuna dutika Israel aents aidaun Saúl chichajak: “Filisteo aidau kashi jeteka mai mainakua tsawampaku ashí amukmi”, tau. Tusa tutai dita aimainak: “Ame wakegamua duka imanisag uminkati”, tuidau. Tusa tiagtai sacerdote chichaak: “Tujash dekatkauk Apajuí iniasmi”, tau.
1SA 14:37 Tusa timatai Saúl Apajuín iniak: “¿Filisteo aidaunash jetemainkaitag? ¿Tuja filisteo aidaun amuktinme tusamesh yaijatkattamek?” tau. Tusa tamash Tuke Pujuuk nunú tsawantinig aikchauwai.
1SA 14:38 Dutikam Saúl suntaja apuji aidaun chichajak: “Apajuí mina aigkacha nunash ya pegkegchau takamsamunmak ankae nunú ejetajum”, tiuwai.
1SA 14:39 Nuna tusa: “Tuke Pujuu Israel aents aidaun ayamjina nuna daajin uminkatnun tajai: ¡Mina uchig Jonatán pegkegchaun takasu akushkam mantamnattawai!” tiuwai. Tutai suntag aidauk makichkish aimkachajui.
1SA 14:40 Nuadui Saúl Israel aents aidaun chichajak: “Kaunajum juwi ijunjatajum, nuniagmin wi mina uchig Jonatágjai atú yantam wajastajai”, tiuwai. Tusa tutai suntag aidau chichainak: “Ame tame nunisag uminkati”, tuidau.
1SA 14:41 Tusa tiagmatai Saúl senchi untsumak Tuke Pujuun aujak: “Israel aents aidaun Apajuíjiyah, ¿wagka amina inakem segapamush yamaish aikchaume? Mina pegkegchaug, nuniachkush mina uchig Jonatágka pegkegchauji akug Urim jiinkittawai, untsu Israel aents aidaun pegkegchauji ataik Tumim jiinkittawai”, tiuwai. Dutika dekam Jonatágka daaji Saúldaujai jiinkiuwai. Nunikmatai Israel aents aidauk agkan utugchatjinchau juwakajui.
1SA 14:42 Nunikmatai Saúl chichaak: “Mina uchig Jonatán wijai dekapsatajum, yana daajig jiinkit”, tiuwai. Dutika dekapeam Jonatágka daaji jiinkiuwai.
1SA 14:43 Nunikmatai Saúl Joinatágkan chichajak: “Amesh waji dutikamume nunú ujatkata” tiuwai. Tusa tama Jonatán chichaak: “Ima dapa yumijinak numi takakbau titijin antigka jukin dukamjai. ¿Tujash nunú dutikamuikik mantamnattag?” tau.
1SA 14:44 Tutai Saúl untsumak: “¡Jonatágkah, ame mantamnashtaik Apajuí mina mantuati!” tau.
1SA 14:45 Tutai Israel aents aidau Saúlan chichajuinak: “Jonatán iina ayamjutpak filisteo aidaujai maania depetmaka nuniaush ¿wagkag mantamnati? Apajuí Tuke Pujuuwa nuna daajin makichik niina intashigkesh ukuiniakag nugkag iyagchattawai, wagki Apajuí yayasam depetmaku asamtai”, tiajui. Aatus Israel aents aidau Jonatán mantamnamainun ayamjukajui.
1SA 14:46 Tuja Saúlchakam filisteo aidaujai maanitnak idaisauwai. Dutikam filisteo aidauk ditá nugken waketjauwai.
1SA 14:47 Aatus depetmak Saúl Israel aents aidaun apuji wajas inamjauwai. Tuja Israel aents aidau nugken ditá shiwaaji Moab aents aidau, Amón aents aidau, Edom aents aidaunash ayamjuk agkanmitkauwai. Tuja Sobá nugka apujinash, filisteo aidaun aatus ashí depetkauwai. Saúl niina suntaji aidaujai shiwajan jeteakug tuke depetmajakui.
1SA 14:48 Niina suntaji aidaujai ijunag maania Amalec aents aidaun depetuk ijinauwai. Dutika Israel aents aidaun kasajuinak waitkaidaun agkanmitkauwai.
1SA 14:49 Saúla uchiji aidauk: Jonatán, Ishví, Malquisúa aatus aajakui. Tuja niina nawanji iwai aajakui Merab, untsu Mical aajakui ekeu.
1SA 14:50 Saúla nuweg Ahinóam Ahimaasa nawanji aajakui. Tuja niina suntaji aidaun apujig Abner niina apaji yachi Neran uchiji aajakui.
1SA 14:51 Saúla apaji Quish aajakua duka Abneran apaji Ner aajakua nujai Abielan uchiji aajakui.
1SA 14:52 Saúl apu wajas pujusua nuaduik, Israel aents aidauk filisteo aidaujai shiig senchi maaniau ainawai. Nuadui Saúlak suntag maanitan yacha aidaun etegkeg yajuak ijumag uminas pujujakui.
1SA 15:1 Makichik tsawantai Samuel Saúlan chichajak: “Tuke Pujuu niina aentsji Israel aents aina nuna apuji atinun amina adaikati tusa awetine. Nuadui Tuke Pujuu tujama nunú shiig antukta.
1SA 15:2 Tuke Pujuu ashí senchigtina nunú juna aatus tujamui: ‘Israel aents aidau egiptunmaya jiinag minidaun Amalec aents aidau jetenak waitkasaju aina duwi, wi ditanak suwimka susagtatjai.
1SA 15:3 Nuadui amina suntajum aidaujai jetekjum ijinkujum dita wajiji aidaujaí ashí tsaigkatajum. Tuja makichkish wait anenjaigpa. Aents aishmag aidau, nuwa aidau, uchi aidau, yama uchi akiinau aidau, tuja nuigtushkam toro, uwig, camello, burro aatsajum ashí ijinatajum’ tujamui”, tiuwai.
1SA 15:4 Tusa tima Saúl suntag aidaun chichama ishitkauwai. Nuna dekaawag Telaimnum ijunjamtai ashí dekapajui. Dutikam dawé yujasag maanin aidauk doscientos mil aents aajakui. Tuja Judá wegantunmaya aidaushkam diez mil suntag aajakui.
1SA 15:5 Dutika dekapag nuna yajuak, yaakat múun Amalec nugkanum aajakua nuwi weuwai. Nunik nuwi jegattak entsa aunum nuna ijusag uumak batsamsajui, nuwi batsamsag pachiachbau jetekagtatus.
1SA 15:6 Nuwi batsamas Saúl quenita aents aidaun chichama akatmamtug akuptak: “¡Amalec aents aidau batsatbaunum pujajum duka jiinja yaja shiyaktajum! ditajai ijumja amukaijim. Wagki atum wegantutigmek Israel aents aidau egiptunmaya jiinag minidau wait anenjau ainagme”, tiuwai. Tusa ujakajam quenita aents aidauk Amalecjai ijunag batsatu jiinag yaja shiyakajui.
1SA 15:7 Nunikagmatai Saúl Amalec aents aidaun nugka Havilánum nagkama jeteka ipisig, Shur nugka Egipto nugke nagkatkamunum awa imanui ejegawajui, dutikawag nuwi amukui.
1SA 15:8 Dutika amuak nuna apuji Agag aajakua nuna achikui, dutikak niina suntaji aidaunak ashí ijituauwai.
1SA 15:9 Dutika ijiniatak Agagnak maachajui. Tuja nuigtushkam tikich waji imanchau aidaunak tsainayatak, uwig pegkeg aidaunak ijinachajui, dutikainak toro aidaunak, toro tsakat duwejam aidaunak, cabra tsakat aidaunashkam ijinachajui. Dutiksag waji akik pegkeg aidaunashkam tsaikchajui.
1SA 15:10 Dutikawagmatai Tuke Pujuu Samuelan chichajak:
1SA 15:11 “Saúlnak apu adaimainchaunas adaikayagtai, mina chichamjun umigtutsuk nii wakegamun takawai”, tiuwai. Tusa timatai, Samuel kajeka Saúl tsagkujata tusa Apajuín sega segaakua tuke tsawajui.
1SA 15:12 Nunik tsawag kashikmas Saúljai igkunik chichastatus weuwai. Nunik eke wegaun igkug ujainak: “Auk Saúlak yaakat Carmel wemae, nunik nuwi kaya esagman awajame, nuna diisag emematjitnume tusa. Dutika ukuak yaakat Guilgal wemae”, tusa ujakajui.
1SA 15:13 Tusa ujakam Samuel Saúlan egak weuwai. Nunik jegamtai Saúl Samuelan chichajak: “Apajuí pegkegnum yumigtamsati. Apajuí dutikata tujutma nunak betek umikjai”, tiuwai.
1SA 15:14 Tutai Samuel ayaak: “¿Tujash dutika betek umiku aminish, uwig aidau, baka aidau pampaina dusha tuwiya ainawa?” tau.
1SA 15:15 Tusa tama Saúl ayaak: “Aunak mina aentsug aidau Amalec aents aidaun amuinak uwig duwejam pegkeg aidaun, toro duwejam pegkeg aidaujai etegkeg yajuakag itawagmae, wagki nunú maa apeaku Tuke Pujuu amina Apajuíjum emematmi tusag. Untsu tikich aidauk ashí ijinamji”, tau.
1SA 15:16 Tusa tutai Samuel ayaak: “¡Takamtak wajasta! Tuke Pujuu yamai kashi tujutma nuna ujaktagme”, tiuwai. Tama Saúl ayaak: “Ayu ujatkata”, tiuwai.
1SA 15:17 Timatai Samuel chichajak: “Yaunchkek amek wainkauch ayume, nunin aminig Tuke Pujuu Israel aents aidaun apuji ati tusa etegtamabi.
1SA 15:18 Dutijamau asa Amalec aents pegkegchaun takau aina nunú amukta tusa Tuke Pujuu tujabiu aish,
1SA 15:19 ¿wagka Tuke Pujuu tujabau intimjukmesh amina suntajum aidau kuntin aidaun yajumainakuish, yajuaktajum tusamesh timaume?” tau.
1SA 15:20 Tusa tama Saúl ayaak: “Wika Tuke Pujuun umiju asan, nii dutikata tujutbaunak betek umiakun, Amalec aents aidau apuji Agag achikan itaajai. Tuja nuigtushkam Amalec aents aidaunak ashí ijinamji.
1SA 15:21 Untsu suntag aidau uwig duwejam aidaun, toro duwejam aidaujai ijinami tibau aig, yaakat Guilgalnum maa apeaku Tuke Pujuu amina Apajuíjum emematmi tusa yajuakagmae”, tiuwai.
1SA 15:22 Tusa timatai Samuel chichaak: “Kuntin maa, nuna neje ashí apeamua nuna nagkaesau, Tuke Pujuu tabau shiig antuka umigbauwa nunú niinak shiig awagmawai. Tuja nuigtushkam anentag dekas shiig pegkeg aidau Apajuí suwamua nuna nagkaesauwa duka nii umigbauwa nunuwai.
1SA 15:23 Nuadui amek anentaimsam dutikaum duka aents anentaimas dekamin aina nunin wajasume. Tuja kaya esajam inantai apusam, juna diis emematjitnume tau asam, dakumkamun emematin aidau Apajuí diisam pegkegchau aina nunin wajasume. Nuadui Tuke Pujuu amina Israel aents aidaun apuji ati tusa etegtabauwa nunak, ame nii tibau kajimatkiu asamin, niishkam kajimatjamkittawai, tuja niina chichame umitsuk idaisau asamin, niishkam dutiksag idaitamsattawai”, tiuwai.
1SA 15:24 Tusa tima Saúl Samuelan chichajak: “Dekas tame, Tuke Pujuu dutikata tujutbaun kajimatkin pegkegchaun takasjai, tuja ame tujutbaunashkam kajimatkijai. Aents aidaun ishamakun dita segatuinamun umigkajai.
1SA 15:25 Tujash wait aneasam mina pegkegchaujush tsagkugtugta, nunikamin iijai wee Tuke Pujuu emematmi”, tiuwai.
1SA 15:26 Tusa tama Samuel ayaak: “Wika amejaig wakitkishtatjai, wagki amek Tuke Pujuu umikta tujabau intimjukim umikchaum nuadui, yamaik Israel aents aidaun apujig achati tusa Tuke Pujuu tujamne”, tiuwai.
1SA 15:27 Aatus tusa wetatman Saúl Samuela jáanchjin achika emetuawai. Dutikak jáanchjin ichiinkauwai.
1SA 15:28 Dutikam Samuel Saúlan chichajak: “Ame mina jáanchug ichinjukum dutiksag, ame Israel aentsu apuji wajasa pujam nunak Tuke Pujuu ichinjamkattawai. Dutika atanjamki, Israel aents tikich amina nagkaetamsau pegkeg puja nuna apu emattawai.
1SA 15:29 Wagki Apajuí Israel aents aidaun depetmatan suwa duka aents nii chichakbaujin yapajin aina nuninchauwai, nii tibaunak betek uminai”, tiuwai.
1SA 15:30 Tusa tima Saúl ataktu chichaak: “Wika dekas tunamagjai. Nuniku akuish wait aneasam Israel aents aidaun apuji aina nuna emtinig, tuja Israel aents aina nuna emtinchakam eme anenjusam diigsata. Nuadui iijai Guilgalnum wemi, nunika awi Tuke Pujuu amina Apajuíjum emematmi”, tiuwai.
1SA 15:31 Tusa tima Samuel Saúljai wakitkiuwai. Nunik jegawag nuwi Saúl Tuke Pujuun emematiuwai.
1SA 15:32 Dutikamtai Samuel chichaak: “Agag Amalec aents aidau apuji achikam puja nunú itagtuatajum”, tiuwai. Tuja Agagkak yaunchuk mantumainnap mantuachaje yamaik mantuachagtatuapi tusa puyattsuk shiig aneas Samuel pujamunum jegantui.
1SA 15:33 Nunikmatai Samuel chichajak: “Amina puyagjumin uchi aidau kajegkamin, kuashat nuwa aidau uchigtuchu juwakajua nunisag, amina dukushkam uchigtuchu juwaktatui”, tiuwai. Tusa tamawaik puyajan juwakug Tuke Pujuu dutikata tibaun umiak asaag mauwai. Nunak dutikauwai yaakat Guilgalnum.
1SA 15:34 Nuna dutika Samuelak yaakat Ramá niina jeen wakitkiuwai. Nunikmatai Saúlchakam yaakat Guibeánum niina jeen wakitkiuwai.
1SA 15:35 Duwi nagkamas Samuel Saúlan anentaimtus wake besemag anentaimkush ataktu awagkig wainikchauwai. Tuja Tuke Pujuushkam nii Israel aents aidaun apuji emau asa wake besemag anentaimjauwai.
1SA 16:1 Tuke Pujuu Samuelan chichajak: “¡Saúla utugchatji anentaimtusam wake besemag dekapeakum waitu pujutsuk idaisata! Yamai nagkamsag Israel aents aidaun apujig achati tajai. Aní pujutsuk aminu kuntinu kachuji awa nuwi aceite yajaa jukim Belégkanmaya aents Jesé daagtin puja nuna jeen wetá. Niina uchiji aina nuwiyan makichik Israel aents aidaun apuji atinun etegkajai”, tiuwai.
1SA 16:2 Tusa tama nii ayaak: “¿Tujash nunash wajuk uuknuk dutikatja? ¡Nuna Saúl dekag minak mantuattawai!” tiuwai. Tusa tutai Tuke Pujuu ayaak: “Kuntinu maa apeakun Tuke Pujuun ememattasan wegajai tusam makichik toro tsakatuch jukim wetá.
1SA 16:3 Nunika jegaam Jesé ipaata ame kuntin maa apeamin uyuuntamsati. Tuja ame dutikatnunak wi jintintuattagme. Tuja apu atinnashkam wi iwaintuktatjame. Dutikamtai nunú aceiteyai buuknum nijakta”, tiuwai.
1SA 16:4 Nuna Samuel imatiksag umikui. Tuja Samuel Belén jegamtai, nuwiya apu múun aidau niina wainkag kautuawajui. Nunikag igkug iniinak: “¿Wagka taume, utugchat atsuak?” tuidau.
1SA 16:5 Tusa tama nii ayaak: “Utugchatak atsawai, ayatak kuntinu maa apeakun Tuke Pujuu ememattasan taajai”, tiuwai. Nuna tusa: “Umintsatajum, nunikjum wi kuntinu maa apeakun Tuke Pujuun emematkui uyuntustajum”, tiuwai. Aatus tusa eke kuntin maa apeatnunum wetsuk Samuel Jesén niina uchiji aidaujai dita pegkegchau takamsamujin iwagmitkak pegkeg emakui. Dutika nuadui ditajai kuntinu maa apeak Apajuín ememattatus weuwai.
1SA 16:6 Nuwi ashí jegantag Samuel Eliabpan diisa anentaimas: “Junap dekas Tuke Pujuuk apu atinnak etegkae”, tiuwai.
1SA 16:7 Tujash Tuke Pujuu niina chichajak: “Niina niimeg esantijaig diigsaipa, wagki nunak wika dakitajai. Aents niimen diijus etegkin aina nuninchauwaitjai, wika anentaimtajin diigsan etegkeajai” tusa nunak dakitjauwai.
1SA 16:8 Dutikamtai Jesé niina uchiji Abinadapan untsuka Samuelai ejentauwai. Dutikamtai Samuel chichaak: “Junashkam Tuke Pujuuk etegkache”, tiuwai.
1SA 16:9 Tusa timatai Jesé tikich uchiji Shamá aajakua nuna ejentauwai. Dutikamtai: “Junashkam Tuke Pujuuk etegkache”, tiuwai.
1SA 16:10 Duti dutikakua niina uchiji siete aidaunak ashí Samuelai ejentauwai. Tujash Samuel niina chichajak: “Juju aina juwiyanak Tuke Pujuuk makichkish etegkache”, tiuwai.
1SA 16:11 Tuja inagnamun Samuel Jesén iniak: “¿Uchijum tikichik atsugtamuak?” tau. Tusa iniam, Jesé ayaak: “Inagnamu makichik datsauch uwija kuitamak pujawai”, tau. Tutai Samuel niina chichajak: “Makichik aents awemata ujaka utiti, wagki kuntin maa apeamua nuna nejeg nii tatsaigkik yuwashtatji”, tiuwai.
1SA 16:12 Tusa timatai, ujaka utitajum tusa Jesé aentsun awemauwai. Nunú uchik jegkemtin, pegkeg iwajamu wakejumain aajakui. Nunú jeganmatai Tuke Pujuu Samuelan chichajak: “Anuwai wi etegkamua duka, nuadui aceite jukim buuknum nijakta”, tiuwai.
1SA 16:13 Tusa tima aceiten juki Davitan niina yachi aidaush wainbaunum buuknum nijakui, Israel aents aidaun apuji atin asamtai. Nunú tsawantin nagkamas Apajuí Wakani Davitan egkemtujui. Tuja Samuelak nuna dutika ukuak, yaakat Ramá niina jeen wakitkiuwai.
1SA 16:14 Apajuí Wakani Saúlai pujaun Tuke Pujuu jujukiuwai. Dutikak wakan pegkegchaun awetiuwai. Dutikam nunú Saúlan senchi waitkau.
1SA 16:15 Nuadui niina takajin aidau chichajuinak: “Apajuí aminak wakan pegkegchaun awetugma nunú senchi waitkagmawai.
1SA 16:16 Nuadui amina inakem aina nunú ishiakta, aents arpa shiig awatnun egaka utitnume. Tuja amina wakan pegkegchau waitkagmataish, nunú arpan awatkui maak anentaimsa pujusminum”, tuidau.
1SA 16:17 Tusa tama nii ayaak: “Takugmek wejum arpa shiig awatin egakjum itagtuatajum”, tiuwai.
1SA 16:18 Tusa tutai niina inake aina nuwiya makichik Saúlan chichajak: “Jesé Belégnumiaya nuna uchiji aina nuwiya makichik arpan shiig awatun wi wainkamjai. Nuigtushkam duka wajiu maanitan yacha, chichamesh pegkeg, niimesh iwajamui. Tuja niinak nuigtushkam Tuke Pujuu yayawai”, tiuwai.
1SA 16:19 Tusa tima Saúl Jesén chichaman akuptak: “Uchijum David uwija kuitamna nunú awetugta”, tiuwai.
1SA 16:20 Nuna antuk Jesé niina uchiji Davitan awetiuwai. Dutikak makichik burronum pagka pataja, vino aimkamun, nuigtu chivo tsakatan aatus ishitkauwai.
1SA 16:21 Nuna David yajuak Saúla pujusa inamtaijin jegauwai. Nunik jegamtai Saúl shiig anentus jukiuwai. Dutika niina atuwe ati tusa adaikauwai.
1SA 16:22 Tuja Saúl Jesén chichama akuptak: “Amina uchijum Davidjai shiig pujajai, nuniau asan segajame wait aneasam idaitugsata mina yaintak pujusti”, tiuwai.
1SA 16:23 Tusa tima pujus wakan pegkegchau Apajuí awemamu Saúlan waitkatai, David arpan juki awatujakui. Nuna awattai wakan pegkegchau Saúlan waitkau ukukim mijaak shiig pujujakui.
1SA 17:1 Filisteo aidau Israel aents aidaun jetektatus ditá suntaji aidaun yajuak, Judá wegantu aidau nugken yaakat Soco ijunjajui. Nunik Azecá Socojai niniaku awa nuna ejapeen nugka Efes-damim tutainum aakmajag batsamsajui.
1SA 17:2 Nuninai Saúlchakam Israel aents aidaujai Elá nugkanum ijunjajui, nuwi uminas juwakiag filisteo aidaujai maaniawagtatus.
1SA 17:3 Tuja muja segau asamtai, filisteo aidauk atú amain batsatai, Israel aents aidauk tikich yantamnum batsatu.
1SA 17:4 Nuninai filisteo suntag aidaunmaya makichik aents Gad wegantunmaya maanitan yacha Goliat daagtin, esanti kampatum metro aajakua nunú jiinkiuwai.
1SA 17:5 Niina atsejutaijig bronce najanamu tuja iyashi ejaktinji jiju najanamu cincuenta y cinco kilo ajamun nugkuaju aajakui.
1SA 17:6 Niina bakuin ejaktatus apujujakua dushakam bronce najanamu aajakui. Tuja nagkijishkam bronce najanamu aajakui.
1SA 17:7 Tuja nagki numijishkam kampujam nuna titijig jiju hierro eketkamu seis kilo aajakui. Niina emtin maanitai aidaun yajuak niina uyunajakua nunú eemak wejakui.
1SA 17:8 Goliat Israel aents aidau batsatbaunum jegantatak wajanta untsumak: “¿Wagka maaniatasa umintayama imanikjumesh uminjume? Wika makichkitjai filisteonuk, tuja atumek Saúla inake ainagme. Tujash dekas atum ainajum anuiya makichik wijai maanimain etegkajum awematajum wijai maanikti.
1SA 17:9 Nii mina depeetuk mantakuig atumi inake waigtatji, untsu wi niina maamtaig, atumek iina inake wajastatjume.
1SA 17:10 “Yamai wi Israel aents aidautigmin segajime: ¡Makichik aents awematajum wijai maanikti!”, tau.
1SA 17:11 Nuna Saúl Israel aents aidaujai antukag senchi ishamainak awake anentaimaidau.
1SA 17:12 Saúl apu aajakua nunú tsawantin makichik aents múuntuch Belégkanmaya Jesé daagtin pujujakui. Nuna uchijig ocho ajujakui. Nuwiya aajakui David.
1SA 17:13 Nunú muunta uchiji kampatum: Eliab, Abinadab, Shamá, aatus iwai aidau maaniamunum Saúljai shiyakajui. Untsu Jesé uchiji tsakat David aajakua duka,
1SA 17:15 Saúl niina suntaji aidaujai batsatbaunum chichama etsejak yutain juki ejega ukuak, atak wakitki niina apaji uwigjin kuitamak pujujakui.
1SA 17:16 Nunik pujai Goliatak kashikmas, agkuantai aatus kashi kashinig untsuak: Makichik aents wijai maanimain etegkajum awematajum, tusa Israel aents aidaun cuarenta tsawan waitka pujuju.
1SA 17:17 Imatju pujai makichik tsawantai Jesé niina uchiji Davitan chichajak: “Trigo duwikbauwa nunú veinte kilo jukim, nuigtu diez pag jukim, yatsum aidau maaniamunum batsata nunú ejetuata.
1SA 17:18 Dutikakum baka muntsuji inanja nanegbau suntaja apuji susatin diez jukita. Nunika jegaam yatsumesh pegkejash batsata nunú dekaata. Tuja pegkeg batsatkuig, ame minakum ditá takataiji jukim itagtuata”, tiuwai.
1SA 17:19 Eke Davitak uminak pujai Saúlak Davita yachi aidaujai, nuigtu ashí Israel aents aidaujai aatus nugka Elá tutainum filisteo aidaujai maaninak yujau.
1SA 17:20 Nuninai David uminas tsawak kashikmas tikich aentsun, ame uwig aidau kuitamamata tusa ukuak, niina apaji yutai aidau susamun juki weuwai. Nunik jegakma maaniatatus uminas, untsumainak pampainai jegauwai.
1SA 17:21 Nunik jegau ai Israel aents aidauk filisteo aidaujai maaniawagtatus igkuniawajui.
1SA 17:22 Nuniagtai David aents maaniaku jutai aidaun kuitamak pujaun nii yutai jukimujin ame kuitamkata tusa ukuak, yachi aidaun pegkejash yuja tusa iniastatus tupikaki weuwai.
1SA 17:23 Nunik jeganta niina yachi aidaujai chichaak wajai, Goliat yaakat Gadnumia aajakua nunú filisteo aidau ijunbaunmaya jiinki wajan, yaunchuk nagkamas tuu pujuju asa, Israel aents aidaun atsaneau. Tusa imatjittaman David antukui.
1SA 17:24 Nunú aents ibaun, wainkag Israel aents aidauk senchi ishamak pisainak:
1SA 17:25 “¿Atumesh aents maanitan yacha jiinki dusha wainkaugmek? Au aentsuk Israel aents aidaun atsaneak tantae. Makichik aents auna depetuk maamtaig, kuashat waji akik aidaun apu susattawai. Dutikak niina nawanjijai nuweattawai. Tuja nuigtushkam niina patayi aidauk apu akitai aina nunash akikmakchagtatui”, tuidau.
1SA 17:26 Tusa tuinamun David shiig antukchau asa niijai ijunun iniak: “Au filisteo, Israel aentsun atsaneak waitka nuna makichik aents maa agkan emamtaish ¿wajina apush sumainai tawa? Filisteo pegkegchaun takauwa dusha niish ¿ya asaya aannush Apajuí suntaji aidaunash pegkegchaun chichajush wekaewa?” tau.
1SA 17:27 Tusa tutai dita yaunchuk tibaunak dutiksag chichajuinak: Goliata maunak waji aidaun apu susattawai tibaunak betek ujakajui.
1SA 17:28 Aatus nunú aents aidaujai David chichaun yachi emkau Eliab antujuk senchi kajejuk chichajak: “¿Amesh juwish waji minitmaume? ¿Uwig ujumak uwegshunum batsama dusha ya kuitamkati tusamea ukukmaume? Wika ame setakchauwaitam nunak dekajai, tuja pegkegchau anentaiyai aní wekagam nunashkam dekajai. Amek iina shiwaaji aidaujaish wajuk maaniaji nunú wainkatasa wekaeme”, tau.
1SA 17:29 Tutai David ayaak: “Wi ayatak inimag nunash ¿wajina pegkegchaunash dutikaja?” tau.
1SA 17:30 Nuna tusa David niina yachi iwai aidaun ukuki, tikich aidaun iniau. Tuja ditashkam yaunchuk tibaunak dutiksag ujakajui.
1SA 17:31 Nunik iniimak wekagun antugkaju aidau Saúlan jegajuawag ujakajui. Nuna Saúl dekaa, ujaka utitajum tusa inamjauwai.
1SA 17:32 Tusa timatai ujakam David jegaa Saúlan chichajak: “¡Apuh, amek makichkish puyatjukaipa, auk wi niinak maattajai!” tau.
1SA 17:33 Tutai Saúl ayaak: “Amek makichkish maumaitsume. Nuigtushkam amek tsakatchitme, tuja niig yaunchuk datsa asag maanitnak yachai”, tau.
1SA 17:34 Tama David ayaak: “Apuh, wika mina apaju uwigjin kuitamnaitjai. Tujash ikamyawa, nuniachkush chayukesh uwija maa juki tupikakuig,
1SA 17:35 pataetukan niina weninian atannujai. Dutikai mina esattag takuig, jagkeen achikan awatjan mainujai.
1SA 17:36 Dutiksanuk au filisteo aents Apajuí Tuke Pujuuwa nuna aentsji aidaun dushikiak atsanea nunak maattajai.
1SA 17:37 Ikamyawa chayujai maawai tusa Tuke Pujuu ayamjutkauwa nunú minak yamaishkam filisteo maawai tusa ayamjutkattawai”, tau. Tutai Saúl chichajak: “Kame takumek wetá, Tuke Pujuu kuitamjamkati”, tiuwai.
1SA 17:38 Nuna tusa nii maaniaku nugkutaijin anugkug, atsejutai bronce najanamun atsemitkak, nuigtu iyash ejatai jiju najanamun anugjauwai.
1SA 17:39 Dutika anugjam David puyaja juki akachumtaijin nenauwai. Dutika wekagas dekapes, unuimatchau asa, shiig wekaemainchau atai, Saúlan chichajak: “Wika junika wekaetanak unuimatjachu asan, shiig wekaemainchau dekapeajai”, tusa ashí nii nugkuagbaujinak awimag ukukiuwai.
1SA 17:40 Dutika ushujutaijin juki cinco kaya entsanmayan yajuak wampachjin chimpia kaya egkea nagkimtaijin juki, Goliat pujamunum jegantatus weuwai.
1SA 17:41 Nuniai Goliatchakam maaniaku ejamatain takaku Davitan jegaantatatus wegau. Nuniai niina uyunin maanitai aidaun yajuak eemak wedau.
1SA 17:42 Tuja Goliat Davitan diikma tsakatuch shigmauch jegkemtin wajaknun wainkauwai. Nunik wainak puyatjusagkesh diischauwai.
1SA 17:43 Tuja Davitak ushujutaijin takus wajau asamtai, dushikis chichajak: “¿Wi yawakaitag numi jujuki minitam atinnush?” Tusa tamawaik niina apajuímtaiji daajin pachis Davitan pegkegchaunum yumigjauwai.
1SA 17:44 Tusa nuigtushkam chichajak: “¡Juwi tantata maatjame, dutikan amina iyashminak chuwag aidaun, kuntin yukagtin aidaujai ayujatjai!” tiuwai.
1SA 17:45 Tusa tama David ayaak: “Amek wijai maaniatasam puyag, nagki, nuigtu akentai imaan jukim miname. Tujash wika aminak minitjame Tuke Pujuu ashí senchigtin Israel aents aidauti emematin ainag nuna daajin. Nuadui ame niina aentsji aidau wainkaush diyakum dushikiam nunak nii kuitamkattawai.
1SA 17:46 Yamai Tuke Pujuu mina yainkattawai amina maati tusa. Nuadui amina maan buukmin tsupigkattagme. Dutika ai amina iyashminak amina suntajum filisteo aidau jinaatta nujai chuwag aidau, kuntin yukagtin aidaujai yuwawagtatui. Dutika ai ashí tikich nugkanmaya aidauk dekawagtatui, Israel aents aidauti ememattaig Apajuí ima makichkia nuna”, tau.
1SA 17:47 Nuna tusa filisteo aidaun chichajak: “Yamai juwi tuwaka ijunutijum, Tuke Pujuuk puyagjaig, nagkijaig uwemtikagtuchua nunú ashí dekattagme. Juju maaniamua juka Tuke Pujuunui. Nii inak yaimpaktatui, atum aidautigmin depetuk ijinatnume tusa”, tiuwai.
1SA 17:48 Tusa tama Goliat Davidjai maaniatatus jiintukiuwai. Nunitai Davidchakam tupikatkiuwai igkunia maaniatatus.
1SA 17:49 Nunik wegak wampachjinian makichik kaya juki kaya nagkimtainum egkea nagkia Goliatan nijayin tukuwai. Dutika tukum nijayinig kayan awajau, shushum iyaag tepesui.
1SA 17:50 Aatus David Goliatan depetkauwai. Kaya egkea nagkimtaichijinig kaya egkea nagkia tuku mauwai. Dutika maa puyaja takakchau asa,
1SA 17:51 tupikaki jegantun niina puyagjinak ukuinak jujuki awena mauwai. Dutika maa buuken tsupijuk jujukiuwai. Nunú maanitan yacha etegtua mantuam, filisteo suntag aidauk pisajajui.
1SA 17:52 Nuniagtai Israel aents aidau Judá wegantu aidaujai maaniami tusag senchi untsumkag pataetukag, filisteo aentsu yaaktaji aidau Gad Ecrógjai aajakua imanui mai mainakua jegawajui. Dutika ijinamu asa Shaaraim uwaki, yaakat Gad wetainum, nuigtu yaakat Ecrón wetainum aatus filisteo suntag jinauk tepetag jegauwai.
1SA 17:53 Israel aents aidauk filisteo aidaun pataetukag shiyaku waketug filisteo batsamtaijin kaunawag dita wajiji aidaunak ashí yajutkajui.
1SA 17:54 Dutikawagmatai David Goliata buuken juki Jerusalén ejegauwai. Untsu maaniaku jutaiji aidaunak niina aakjin jukiuwai.
1SA 17:55 Eke David Goliatjai maaniatatus wegai, Saúl suntaja apuji Abner aajakua nuna iniak: “¿Aush yana uchijimpaita?” tau.
1SA 17:56 Tusa iniam Abner ayaak: “Mina apujuh, wika shiig dekatsjai”, tiuwai. Tusa tama apu Saúl chichajak: “Kame inimsam dekata”, tiuwai.
1SA 17:57 Dutika David Goliata maa buuken tsupijuk juki minittaman, Abner igkug juki Saúlai ejentauwai.
1SA 17:58 Dutikamtai Saúl iniak: “¿Amesh yana uchijiyaitpa? ujatkata”, tau. Tama David ayaak: “Wika amina inakem Jesé Belégnumiaya nuna uchijiyaitjai”, tiuwai.
1SA 18:1 David Saúljai chichas inagnakmatai, Jonatán Davitan shiig kumpauchiji wajasui. Nuadui Davitan senchi anejakui niina iyashin aneemaina imatikas.
1SA 18:2 Tuja Saúlchakam nunú tsawantaik mina takagtin ati tusa apusauwai. Dutikau asa niina apaji jenig awagkichui.
1SA 18:3 Tuja Jonatán Davidjai dita umiktinjin tudayinak: “Dekas iik atakea duwish tuke kumpaji amí”, tiajui, wagki Davitan niina iyashin aneemaina imatikas aneau asa.
1SA 18:4 Nuigtushkam Jonatán jáanchin nii nugkuagbaujin awimak, puyagjin, flecha nagkimtaijin, akachumtaijin aatus Davitan susauwai.
1SA 18:5 Davitak filisteo aidaujai maaniati tusa awemam maaniakug tuke depetmau asamtai, Saúl suntag aidaun apuji adaikauwai. Dutikamtai suntag aidauk ashí shiig aneasajui, nunisag suntaja apuji aidaushkam shiig anentuidau.
1SA 18:6 Dutika David Goliatan maamtai suntag aidau waketug miniagtai, tuké nunin asag Israel aentsu yaaktaji aidaunmaya nuwa aidauk apu Saúlan igkugtasag ashí jiinjajui. Nuninak shiig aneasag kantamainak, nantsemainak, pandero aidaun, platillo aidaun aatus awatuidau.
1SA 18:7 Imatuinak: “Saúl mil aentsun kajegke, untsu David kajegke diez mil aentsun”, wajaidau.
1SA 18:8 Nunú Saúlan shiig awajkachui. Nuadui senchi kajeka chichaak: “David diez mil aentsun mae tusag ima senchi eme anentuinawai. Tuja minak ayatak mil aentsnak mae tujutuinawai. ¡Ima apu adaitanak awajsaje!” tau.
1SA 18:9 Duwi nagkamas Saúl Davitan kajejujakui.
1SA 18:10 Tuja kashinia nuadui Apajuí awemamu wakan pegkegchau Saúlan egkemtujui. Dutikam niina pujusa inamtaijin pujus imaanjaujai betek wajas pujau. Tuja David nuwi niijai pujus tuke arpan awatin asa awatak eketu. Nuniai Saúl nagkin takus eketu.
1SA 18:11 Nunik eketu Davitan tanishjai ijumjan achia maatjai tusa aketkauwai. Dutikam tsuntsumun jimajá uwetjauwai.
1SA 18:12 Dutika maachu asa Saúl Davitan ishamau, wagki Tuke Pujuuk niina yaitsuk Davitan yayau asamtai.
1SA 18:13 Nuadui niijai pujaun jiikiuwai. Dutika mil suntag aidaun apuji adaikauwai. Dutika ai ditajai ijunjag yujas maaniak wekaesati tusa. Dutikamu asa Davitak Saúla pujusa inamtaijinig pujujakchauwai, tuké maaniak wekagajakui.
1SA 18:14 Tuja Tuke Pujuu yayamu asa nii takamujia duka ashí pegkeg aajakui.
1SA 18:15 Nuadui Saúl Davitan ishamau, wagki Davitak Tuke Pujuu yayamu asa shiig takau asamtai.
1SA 18:16 Nuadui Israel aents aidau Judá aents aidaujai Davitan ashí wakegaidau. Wagki maaniamu ataik, nii chichakmatai maaniawag depetmak kaunaidau asag.
1SA 18:17 Makichik tsawantai Saúl Davitan chichajak: “Mina nawantug emkau Merab puja nujai nuweatjame. Tuja nunú jukitag takumek Tuke Pujuu daajin filisteo aidaujai maaniam depetmakta”, tiuwai. Nunak nigkik maumainchau dekapeak filisteo aidau maatnume tusa tiuwai.
1SA 18:18 Tusa tama David ayaak: “Wika wainkauchitjai, mina pataag aidaushkam wainkauch ainawai. Wisha nuninnush ame apuitam ibaumin nawanjinash jumainkaitag”, tau.
1SA 18:19 Tuja David nuwenatin tsawan jegamtai, nii anagkuayatak Davita sumainun yapajia, tikich aents Adriel yaakat Meholánmaya aajakua nuwi nawanjin sujukui.
1SA 18:20 Untsu Saúla tikich nawanji Mical Davitan wakekauwai. Nuna Saúl dekaa shiig aneasui,
1SA 18:21 wagki nii anentaimas: “Dekas auna susatjai, dutikan ame tsanugta tusan inagtajai. Dutika ai tsanugmatai, filisteo aidau Davitan maatnume”, tau asa tiuwai. Nuadui ataktu Davitan chichajak: “Yamaik dekas mina nawantug jukittame”, tiuwai.
1SA 18:22 Nuna tusa Saúl niina inake aidaun chichajak: “Davitai wetajum nunikjum tikich antuinachbaunum ima niijaig chichaakjum: ‘Mina nawanjun jukiti tusa apu shiig senchi wakejutpawai, nuniau asamtai ayu tita, tuja niina inake aidautishkam ame eme anentaji’ titajum”, tiuwai.
1SA 18:23 Tusa tima shimutka ujainam nii ayaak: “Atumesh anentaimsakjuah, ¿wi wainkauch ujunauchitag juninnush apu nawanjinash jumainkaitag? Kame nii taunash itugkatjaki, ayu titajai”, tiuwai.
1SA 18:24 Tusa timatai Saúla inake aidau waketug jegawag nuna Saúlan ujakajui.
1SA 18:25 Nuna dekaa Saúl filisteo aidau Davitan maatnume tau asa: “Nuwa juamunum aishmag tuke akikbau aina nuna akikmamainun filisteo aidau kati chuchuken cien tsupijug yajuak sujusti. Dutik iikmaktag tajai filisteo aidau iina amupakua nuna iikatag tau asan, tawai tusajum David ujaktajum”, tiuwai.
1SA 18:26 Tusa timatai Saúla inake aidau nuna Davitan ujakajui. Tusa ujakam Davidchakam nuna dutikan apu nawanjin jukitjai tau asa shiig aneasui. Nunú tsawan nuwenatin jegatsaig,
1SA 18:27 David niina suntaji aidaun yajuak wee doscientos filisteo aidaun kajegkajui. Dutika tsupijug yajuak apun ejetuauwai, niina nawanjin jukitag tau asa. Dutikamtai niina nawanji Micaljai nuweauwai.
1SA 18:28 Tujash Tuke Pujuu Davitan yayau asamtai, niina nawanji Micalchakam senchi aneau.
1SA 18:29 Nuna diis Saúl Davitan yaunchuk ishamajakbaunak nagkaesau senchi ishamau. Nuadui tuke niina shiwaaji wajasui.
1SA 18:30 Filisteo aents aidaun apuji aidau, dita suntaji aidaujai Israel aents aidaun jeteagtaik, Saúla suntaji apuji aidaun nagkaesau David ima senchi depetmajakui. Nuadui Israel aents aidauk eme anentujaku ainawai.
1SA 19:1 Saúl niina uchiji Jonatágkan ashí suntaja apuji aidaujai inajui David maatajum tusa. Tujash Jonatágkak Davitan senchi aneau asa,
1SA 19:2 niina apaji tibaun Davitan ujaak: “Mina apag Saúl mantamatag tawai, nuniau asamtai, kashin kashikmasam waipainatsaig ikam uumkata.
1SA 19:3 Tuja wi mina apagjai ame uumka pujuttam nuwi ijusan minittajai. Nunikan mina apajun ausattajai mantamawai tusan. Tusa taish wajinjuttig nunikmatai ujaktajame”, tiuwai.
1SA 19:4 Aatus tusa ukuak Jonatán Davitan ayamjak niina apaji Saúljai chichaak aatus tiuwai: “Apuh, amek amina inakem Davitak pegkegchau dutikatasamek wakemaitsume, wagki niig aminak makichkish pegkegchauk awajtamtsui, ayatak ame tabaunak betek uminuwe.
1SA 19:5 David nii mantamnamain wajak Goliatan maabi. Duwi nagkamas Tuke Pujuu yaimpasmatai, filisteo aidau depetkamji. Nuna David maamtai ame shiig aneemium dusha, ¿wagka yamaish David pegkegchaun takamchaush maatagtame?” tiuwai.
1SA 19:6 Tusa tama Saúl Jonatágkan chichajak: “Apajuí daajin umiktinun tajame, makichkish pegkegchauk awajkashtatjai”, tau.
1SA 19:7 Tusa tima Jonatán niina apajijai chichasbaunak imatiksag Davitan ujakui. Nuadui Saúl pujamunum ejegauwai, dutikam Davitak yaunchuk Saúlan takajak pujujakbaunak nunisag takak pujau.
1SA 19:8 Nunik kuashat tsawan pujau filisteo aidaujai ataktu maaniamu jegamtai, David maania depetuk ijinam tikich aidauk pisajajui.
1SA 19:9 Nuna dutika David apu Saúla pujusa inamtaijin wakitkiuwai. Nunik pujai makichik tsawantai Saúlan wakan pegkegchau Tuke Pujuu awemamu ataktu egkemtujui. Dutikam nagki takus, David arpa awattai antak eketu,
1SA 19:10 Davitan nagkin aketkau tanishjai ijumag achia maatatus. Tujash David menaun uwetjauwai. Dutikam nagkik tanishnum wajauwai. Dutikam nunú kashia nuaduik David tupikaki niina jeen weuwai.
1SA 19:11 Nunik tupikakmatai Saúl niina aentsji aidaun Davita jeen shimutkag nuwi batsamtus tsawampainak maatnume tusa ishiakui. Tujash Davita nuwe Mical niina emtika ujaak: “Yamai kashia duwi tupikakchaminig, kashin mantamawagtatui”, tiuwai.
1SA 19:12 Nuna tusa Mical Davitan jeganum niimtai ujaimunum nuni jiiki awemauwai. Aatus David tupikakiuwai.
1SA 19:13 Dutika awema Mical apajuímtai dakumka najanamun juki, niina pegakjin aepsauwai. Dutika chivo tsakata ujen juki, intashin apujtus jáanchi pempeag aepsauwai.
1SA 19:14 Dutika pujai Saúl niina aentsji aidaun David achiktajum tusa ishiakbau, tsawajag David jiinchatai utuawag achikagtatus waitin ijutuidau. Nuniagtai Mical waiti ujai jiinki ditan chichajak: “Davitak jak tepawai”, tiuwai.
1SA 19:15 Nuna Saúl dekaa niina aentsji aidaun David wejitajum tusa ishimak aatus akatjauwai: “¡Jak tepakuish ukukigpajum jiiki jukijum itagtuatajum maatjai!” tiuwai.
1SA 19:16 Tusa tima shimutuk Davita jeen utsanawajui. Nunik diikma apajuímtai dakumka najanamu chivo tsakata ujegai intashi buuken apujtusbau pempeajam tepaun wainkajui. Nunik waketug Saúlan ujakajui.
1SA 19:17 Nuna Saúl antuk niina inaken makichik awemauwai Mical utitajum tusa. Dutikam juki itaamtai, apaji chichajak: “¿Wagka mina shiwag jiiki awemakmesh aajamesh tsanujaume?” tau. Tama Mical ayaak: “Nii minak chichagtak, tupikakta tujutchakminig, maattagme tujutkui tupikamtikimjai”, tiuwai.
1SA 19:18 Aatus David tupikaki uwemjauwai. Nunik Samueljai chichastatus yaakat Ramá weuwai. Nuwi jegaa Saúl niina maatag tibaun ashí Samuelan ujakui. Tusa ujaka Samueljai yaakat Naiot Ramá awa nuwi pujustatus weuwai.
1SA 19:19 Davitak yaakat Naiot Ramá jegattak pujawai tabaun Saúl dekauwai.
1SA 19:20 Nunik dekaa Davitan achiktinme tusa niina aentsji aidaun ishitkauwai. Nunik jegakma, profeta aidau ijunag Apajuí chichamen etsejiagtai shiig etsegkatnume tusa nuna diyak pujaun wainkajui. Nuniai ditanashkam Apajuí Wakani egkemtujajui. Dutikam ditashkam Apajuín pachis etsejuidau.
1SA 19:21 Nuna Saúl dekaa tikich niina aentsji aidaun David achiktajum tusa ishiakui. Tusa ishiakam jegattaman, Apajuí Wakani egkemtujam ditashkam nunisag etsejuidau. Nunikagmatai kampatuma duwi ataktu aents aidaun ishitkauwai. Dutikamu ditashkam tikich aidaujai betek núnidau.
1SA 19:22 Nuniagtai Saúl nii jiintuki yaakat Ramá weuwai. Nunik yaakat Secú tutainum yumi pimutai múun aunum jegaa, Samuelash Davitjaish tuwi pujawa tusa iniimu. Tusa inimtai makichik aents auk yaakat Naiot Ramá jegattak pujawai tusa ujakui.
1SA 19:23 Tusa ujakam nuwi Saúl weuwai. Nunik wetatman Apajuí Wakani egkemtujui. Dutikam chichá chichaakua yaakat Naiot Ramá jegattak awa nuwi jegauwai.
1SA 19:24 Nunik Samuel pujamunum jega jáanch nii nugkuagbaujinak awimag, maaniaku jutaijinashkam utsag wisu tsawai, kashishkam tuke Apajuí tita tibaun chichá wekagu. Saúl nuniku asamtai: “Saúlaske profeta wajase”, tiaju ainawai.
1SA 20:1 Yaakat Naiot Ramá jegattak awa nuwi pujau David Jonatán pujamunum weuwai. Nunik jegaa iniak: “¿Wisha wajina takamsaja? ¿Tuwiya mina utugchatjush? Amina apa mina mantuatatus egatak wekaga nunash wisha ¿wajina pegkegchaunash takagsaja?” tau.
1SA 20:2 Tusa tama Jonatán ayaak: “¡Apajuí dakitawai mina apag mantamawai tusa! ¡Nuadui aminak mantamashtatui! Ame dekame mina apajuk nii dutikatag tabau ataik, nigkik dutikchauwe tuké ujatnuwe, nuadui makichkish mina ujattsukek dutikashtatui”, tiuwai.
1SA 20:3 Tama David ataktu chichajak: “Amina apa shiig dekawai ame mina kumpajuitam nuna. Nuniau asa anentaimas dekas Jonatágnak ujakchatjai, ujaka ai wake besemag anentaimjai titatui, tuja Tuke Pujuu daajin amina daagminchakam tajame, wi mantamnatnuk namput wajatsui”, tau.
1SA 20:4 Tusa tama Jonatán iniak: “Wajina dutikati tusamea wakegame nunú tujutta, nuna umigkatjame”, tiuwai.
1SA 20:5 Tama David ayaak: “Kashin atatui tsawan nantu yama takau jiistamtai. Nunú jiistatin wi apujai ekemsan tuké yujumkan yuujai. Tujash nunikchattajai. Wait aneasa etsegtugkaipa ajanum uumkan pujuttajai, nunikan kashin pujusa tsawakun agkuantai tatjai.
1SA 20:6 Tuja amina apa mina pachitus inimpakuig: ‘Maki makichik mijantin kuntin maa apeaku Apajuí ememattai jegau asamtai, wisha mina pataag aidau Belén batsata nujai ijunjan jiistamatjai tusa segatkui awemamjai’, tita.
1SA 20:7 Tusa tamin ayu timataig shiig aneasan juwaktajai. Untsu nii kajeakui dekaattame dekas maatag tawapi tusam.
1SA 20:8 Nuadui wait aneasam wi segajam nunú umigtukta. Wagki wika yainikmi tau asan ame mina kumpag ata tujutkumin, Tuke Pujuu daajin chicham umikmaiji. Tuja dekas mina utugchatjuitkuig, amina apai ejetutsuk amek dekas mantuata”, tiuwai.
1SA 20:9 Tusa tutai Jonatán ayaak: “Wainka tuu anentaimipa, mina apag mantamatag takuig wi ujaktatjame”, tiuwai.
1SA 20:10 Tusa tama David niina iniak: “Tujash ¿ya minash ujatkattawa amina apash ame ujaamash wajintigki nunash?” tau.
1SA 20:11 Tutai Jonatán ayaak: “Weajai ajanum wemi nunika awi ujaktagme”, tiuwai. Tusa ajanum weajui.
1SA 20:12 Nuwi jeganta Jonatán Davitan chichajak: “Tuke Pujuu Israel aents aidauti Apajuí emematin ainag nuna daajin tajame. Kashin, nuniashkunuk kashin pujusa tsawakun mina apajush wajintig nuna dekaatjai. Tuja mantamatag tutsuk pegkegnum chichakuig, chichaman akuptuktatjame ujapaktinme tusan.
1SA 20:13 Untsu mantamatag taun dekayatkun, wi amina agkan utugchat atsaunum tupikak uwemjati tusan ujakchamtaig, Tuke Pujuu suwimkan sujusti. ¡Tuke Pujuu mina apajun yaigkua dutiksag aminash yaimpakti!
1SA 20:14 Nunak wika Tuke Pujuu daajin umiktinjun tajame. Tuja wi iwaku pujakuig wi amina yayajam dutiksamek, minash wait aneasam yainkatin ata. Tuja wi jakamtaishkam,
1SA 20:15 Tuke Pujuu amina shiwaajum aidaun ashí ijinamtaish mina uchig aidauk tuke wait anenjatin ata.
1SA 20:16 Ame nunú umishtaik, Tuke Pujuu amina pataim aidaujai suwimkan amastinai”, tau. Aatus tusa Jonatán Davidjai chichaman umikajui.
1SA 20:17 Nuadui Jonatán niina iyashi aneemaina imatikas Davitan aneau asa ataktu awagki niijai chichaman umikui.
1SA 20:18 Nuna umika Jonatán Davitan chichajak: “Kashin nantu yama takau jiistamtai tsawan asamtai, ame ekemsa yuum duka agkan juwaktatui, nunikmatai wajukamki tujamiagtatui.
1SA 20:19 Tuja kampatum tsawan wetai, wagkag imanikash megkaekae tusag, aminí senchi anentamiagtatui. Nuniktin asamtai ame yaunchuk uumkabium nuwi wetá nunikam kaya múun batsata nuna awin uumkam pujusta.
1SA 20:20 Nuwi pujamin flechanash shiijash akenag taunig wajakin ame pujamunmanini kampatum flechan akenkattajai.
1SA 20:21 Dutikan mina inakjun chichagkun: ‘Flecha nagkimamu tikiju batsata nunú utita’, takui dekattame. Nunikam anenjas jiinkita, wagki nunak utugchat atsutin asamtai titatjai. Nunak Tuke Pujuu tutaya nuna daajin umiktinjun tajame.
1SA 20:22 Untsu wi niina chichagkun: ‘Flecha nagkimamu imau kakeka nunú diista’, takuig dekaattame Tuke Pujuuwap weti tujutua tusam, nuniakum ¡tupikakta!
1SA 20:23 Juju chicham umikag duka Tuke Pujuu ii emematin ainag nuna daajin tuke atin umikji”, tiajui.
1SA 20:24 Aatus tusag Jonatán niina apaji pujusa inamtaijin wakettai, Davitak ikam kaya múun ayaunum nuna awin uumkatatus weuwai. Nuwi uumak pujai jiista jegamtai apu yujumka yuwatatus mesanum jeganta ekemsauwai.
1SA 20:25 Nii tuké ekemsa yutaijin tanisha tuntupek ekemsauwai. Nunikmatai Jonatán niina apajijai niinis ekemsauwai. Untsu Abner niina apajijai tsanias ekemsauwai. Tuja Davita ekemtaiji agkan juwakui.
1SA 20:26 Nunú tsawantinig apuk Davidnak pachikchauwai, wagki pegkegchau takamsas eke iwagmamchau asa, sacerdote yuwinamunum pachiinak yumainchau asa, megkaekatai tau asa pachitsuk idaisauwai.
1SA 20:27 Tuja kashinia duwi jiistabaunmashkam Davita ekemsa yutaijig nunisag agkan au. Nunitai Saúl niina uchiji Jonatágkan iniak: “¿Wagka Jesé uchijish yau yujumak yuwamunum tachma nunisagkesh yamaish tache?” tau.
1SA 20:28 Tusa iniam Jonatán ayaak: “Davitak Belén wetajai tusa, wait aneasam tsawan sujusta tusa segatkui, ayu timajai.
1SA 20:29 Nuna segatak aatus tujutmae: ‘Mina pataag kuntinu maa apeak Apajuín emematiagtin asamtai, mina yatsug taata tusa untsugkae’, tujutmae. Nuadui juwi jiistamainun niina yachi emkau aidaujai Belégnum jiistamatjai tusa segatkui, ayu wetá timajai. Nuwi weu asa, jutijai ijunag yujumka yuwatsu nunak aniawai”, tiuwai.
1SA 20:30 Tusa tutai Saúl Jonatágkan shiig senchi kajejuk chichajak: “¡Dukuji detsetkauwa! ¿Wi dekatsjak Jesé uchiji amina shiig kumpagmia nuna? amek amina kumpajum yayau asam dukujai datsanmain juwakugme.
1SA 20:31 Nuadui Jesé uchiji eke iwaku pujaigkik, amek makichkish Israel aents aidau apujig achattame. ¡Nunikaig tachakmek aents ishiakam David achika itagtuata maatjai!”, tiuwai.
1SA 20:32 Tama Jonatán ayaak: “¿Tujash wagkag niish mantamnati? ¿Niish wajina pegkegchaunash dutikae mantamnatag tusash?” tau.
1SA 20:33 Tujash Saúlak Jonatágnak aitsuk wajaakug nagki jukiuwai niina maatatus. Dutikam nii anentaimas dekas mina apag Davita maatag tawapi tiuwai.
1SA 20:34 Nunik kajeka jimag tsawanta nunú jiista tsawagbaunum yujumkan yuwatatus mesanum eketu wajaki yujumkanak yutsuk ukukiuwai, wagki niina apaji Davitan maatatus datsantan chichaju asamtai.
1SA 20:35 Tuja Davitak chichama ujatkachagtimpash tusa dakamak pujai, kashin tsawag Jonatán niina inake datsauchijai David uumak pujamunum weuwai.
1SA 20:36 Nunik jegantag niina inaken chichajak: “Tupikaki weme flecha aidaun akenkamag nunú egakta”, tiuwai. Tusa tima nunú uchi tupikaki wegau, nuniai Jonatán flechan nunú uchi weamun emtika atushat nagkimauwai.
1SA 20:37 Nunú flecha nagkimamu tepaunum niina inake jeganmatai shiig senchi untsuka chichajak: “¡Flecha nagkimamag duka ame wajam nuna nagkaiki tepawai!” tau.
1SA 20:38 Nuna tusa ataktushkam untsuak: “¡Wamak tupikakta, makichkish wajasaipa!” tau. Tuja nunú inakak flecha nagkimamun juki, niina apuji Jonatágkan itajuauwai.
1SA 20:39 Tujash inakak Jonatán tuke aneas Davita ujaak tabaunak makichkish dekachui, wagki nunak Jonatán ima Davidjaig dekajakui. Nuadui nunú inakak mina apug nagkimtan unuimagtasampap nagkimua, tiuwai.
1SA 20:40 Nuna ashí dutika Jonatán nagkimtaiji aidaun jegá ejegata tusa niina inaken susauwai.
1SA 20:41 Dutika susam wakitkimtai, David kaya ayaunum uumak pujau jiinki Jonatán wajamunum jeganta, niina eme anentus tsuntsuma kampatuma imania nijayin nugkan antigkui. Nuadui pagkunik kumpamdayinak egaanidau, nunik David buutbaun mijaakui.
1SA 20:42 Nunikmatai, Jonatán Davitan chichajak: “Ii chicham umikuitag duka Tuke Pujuu daajin umikmaiji, nuniau asamtai puyattsuk wetá. Tuke Pujuu amina, tuja mina, nuigtu ii uchiji wegantu aidaunash kuitamkatin ati”, tiuwai.
1SA 21:1 Saúl maatag tama David tupikaki sacerdote Ahimélec pujamunum weuwai. Nunik minittaman sacerdote wainak puyatuk iniak: “¿Wagka ima amekesh miname?” tau.
1SA 21:2 Tama David ayaak: “Chicham dekaata tusa apu tujutmatai minajai. Tujash wagkag minash awetime nunak makichik aentskesh dekamainchau ainawai. Nuigtushkam wajina dutikata tusag akuptukmae nunashkam dekamainchau ainawai. Untsu mina aentsug aidaunak yaja batsakmajai”, tiuwai.
1SA 21:3 Nuna tusa sacerdoten iniak: “Namputchawame ¿aminush yumainush atsugtamuak? Ajutjamkuig cinco pag ajamjusta, untsu pag atsakuig waji awa dukesh sujusta”, tau.
1SA 21:4 Tusa tama sacerdote ayaak: “Pag wainka yutai aina duka atsugtawai, ayatak Apajuí anagkuamu sacerdote yutaya duke awai. Untsu atumesh ijagmajum yujakjuminig nuna amamainaitjime”, tiuwai.
1SA 21:5 Tutai David ayaak: “Maaniatasa shimakuik nuwajaig tsanichu ainaji. Tuja yamaishkam nunisaik maaniatasa yujachiatku, ii jeen pujauti jiinjamiag duwi nagkamsa ijagma yujaji”, tiuwai.
1SA 21:6 Tusa timatai pag yama najanamu Apajuí anagkuamu aidaun nunú tsawantin jega pegkegmanum sacerdote awaya ukuak, pag yaunchuk najanamu aidau atatman yajuaka ukukbaujin tikich yumainuk atsau asamtai, nuna juki Davitan susauwai.
1SA 24:1 Makichik tsawantin Saúl filisteo aidaun pataetuk wejiuwai. Nunik wejiu waketkama Davitak En-gadi nugkanum uwejush pujawai tabaun dekauwai.
1SA 24:2 Nunik dekaa ashí Israel aents aidaunmayan etegkeg tres mil suntaja yajuak, David niina aentsji aidaujai chivo batsamtaiji kaya múun pagkaju weajunum pujau asamtai wejiuwai.
1SA 24:3 Nunik wea weakua uwija wenuken ijus waa aunum David niina aentsji aidaujai uumak pujamunum jegantui. Nunik juwimpap uumak pujawa tachau asa, wakenum wetatus nunú waanum waigkui,
1SA 24:4 nunik waittaman Davita aentsji aidau wainkag Davitan ashishmas chichajuinak: “Tuke Pujuu amina chichagtamak: ‘Shiwajumnak amina idaitustatjame’, tujabauwa nunú betek uminui. Nuadui ame itugkatagtame dutikata”, tuidau. Tusa tama David wajaki diipas jegantun Saúla jáanchji jawajin tsupijuk jujukiuwai.
1SA 24:5 Nuna dutikashkam dekas aikmainchaunap aikaja tusa awake anentaimjauwai.
1SA 24:6 Nuniak niina aentsji aidaun ashishmas chichajak: “Wika apunak maumaitsujai, wagki niinak Tuke Pujuu apu ati tusa etegkamu asamtai”, tiuwai.
1SA 24:7 Tau asa niina aentsji aidaun, Saúl maawaigpa, tusa tiuwai. Tusa mautsuk idaisam nunú waanmaya jiinki weuwai.
1SA 24:8 Nunik jiinki wegaig, David nunú waanmaya jiinki untsumak: “¡Apuh, mina apujuh!” tau. Tutai Saúl ayampa diyau, dutikam David niina eme anentus tikishmag nijayin nugka antig pujusui.
1SA 24:9 Nunik pujus chichajak: “¿Wagka apuju tikich aents ujapainak, David pegkegchau awajtamkatag tawai tusa ujapainakuish dusha antugme?
1SA 24:10 Amesh yamai dekaume Tuke Pujuu aminak wi pujamunum awetabiu aig, amina mautan dakitau asan tsagkujamjame. Wi anentaimsan Tuke Pujuuwap apu ati tusa etegkauwaita tau asan idaisajame.
1SA 24:11 “Juju wi takakag juju diista. Juka ame jáanchjum nugkuajam nuna jawajin tsupika jukimjai. Nuna tsupikmag nuaduik aminak maumain awajkamjame, tujash dutikashmajame. Nuadui dekamainaitme, wi amina pegkegchau awagmatan dakitag nunú. Tuja nuigtush pegkegchaunak takagchauwaitjame, dutikamaitkum mantuatasam aintame.
1SA 24:12 Dekas Tuke Pujuu diigmas, yakita pegkegchaush nuna tujamti. Untsu wika aminak makichkish maashtatjame.
1SA 24:13 Yaunchuk tibau awai: ‘Aents pegkegchauk pegkegchaunak takawai’, nuadui wika aminak tuke maumaitsugme.
1SA 24:14 Nuigtushkam wika eme anentsa diitaigkesh atsujai. Nuninaitag nunin aish, amesh ya pataetukmea ibau apumesh pujusa inamtaijum ukuakmesh, imajui uwegshunmash taume. ¡Amek auk yawá nujantai jau, nuniachkush sugku maatasa ainmaina numamtin pataetugkum tsawan megkaeme! Makichkish aan wekaemainchau aniame.
1SA 24:15 Nuadui wika: ‘Yakita pegkegchaush nuna diis Tuke Pujuu tujamti’, tajai. Tuja nii mina takatjun diigtus duwi ame mantuatag tame nunashkam ayamjutkati”, tiuwai.
1SA 24:16 Tusa inagnakmatai Saúl untsumak: “¡Amekaitam Davitah, mina uchijuh, ya minash tujutua!” tusa Saúl buutu.
1SA 24:17 Nunik buutki chichajak: “Ame tame duka dekaske, wi amina maatasa ainmaitkum, ame mina pegkegnum iiktukume.
1SA 24:18 Yamai dekamtijuaume ame mina pegkegnum yaintam nunú. Wagki Tuke Pujuu maati tujabiu aig, ame mina mantuachume.
1SA 24:19 Makichik aents niina shiwaajin igkuakug, tuke pegkegchau awajkatatus wakenai. Tuja amek nuninchau asam mina mantumain ayatkum, wait anenjuju asamin, ¡Tuke Pujuu aminash yaimpakti tajame!
1SA 24:20 Yamaik shiig dekajai ame dekas apu atatam nuna. Ame apu wajasamin, Israel aents aidauk amejai nuni nagkaemas emkagtatui.
1SA 24:21 ¡Nuadui mina uchig aidau tuja nuna uchiji aidaushkam ijina emegkagchatnaitkumek, yamai Tuke Pujuu daajin dutikashtatjai tusam tujutta!” tiuwai.
1SA 24:22 Tusa segam nii ayaak: “¡Ame segatam nunak dekas Apajuí daajin umiktatjai!” tiuwai. Tusa timatai Saúlak niina pujusa inamtaijin wakitkiuwai. Nunikmatai Davidchakam niina aentsji aidaujai dita yaunchuk uumak pujusbaunum shiyakajui.
1SA 25:1 Samuel jakamtai ashí Israel aents aidau ijunag buutiaju ainawai. Nunikag Samuela iyashin jukiag yaakat Ramá nii akiinamu aajakua nuwi ukusajui.
1SA 28:1 Makichik tsawantai filisteo suntag aidau Israel aents aidaujai maaniawagtatus umintsajui. Nuniagtai apu Aquísh Davitan chichajak: “Ame amina suntajum aidaujai maaniamunum atujatkati tusan tajame”, tiuwai.
1SA 28:2 Tusa tama David ayaak: “Ayu, kame atuktagme. Yamai wainkattame juju amina inakem David dutikatta nunú”, tiuwai. Tutai Aquísh Davitan ayaak: “Atujatkatin asamin, suntag mina kuitamjin aina nuna apuji adaikatjame”, tiuwai.
1SA 28:3 Nunú tsawantinig Samuelak yaunchuk jakau asa atsujakui. Nii jakamtai Israel aents aidau senchi buutiaju ainawai. Nunikag nii akiinamunmak yaakat Ramá ukusajui. Tuja aents anentaimas dekamin aidau, nuigtu jakau wakanin untsujuk chichau aidau aatus Israel aents aidau nugken batsatunak Saúl ashí jiig utsagkui.
1SA 28:4 Dutikau ai makichik tsawantai filisteo aidau ijunjajui. Nunikag uminas yaakat Sunem jegawag nuwi aakmag batsamas maaniawagtatus shiyakajui. Nuninai Saúlchakam niina suntaji Israel aents aidaujai muja Guilboa tutainum ijunjajui.
1SA 28:5 Nuwi wajas diikma filisteo aidau aakmag batsatun wainkauwai, nunik shiig senchi ishamkauwai.
1SA 28:6 Nuniak Tuke Pujuun iniasui. Tujash Tuke Pujuuk kajanmagkesh, nuniachkush Urim tutai aajakua nuigkish, nuniachkush profetayaigkish ujakchauwai.
1SA 28:7 Dutikam niina suntaji apuji aidaun chichajak: “Wetajum nunikjum makichik nuwa jakau wakanin untsuka chichau aina nunin egaktajum. Dutikawagmin ¡Apajuísh wajina dutikati tujutuaki nuna iniasan dekatjai!” tiuwai. Tusa tutai dita ainak: “Endornum aents jakau wakanin untsuka chichau makichik nuwa pujawai”, tusa ujakajui.
1SA 28:8 Tusa ujakam Saúl nuna wejak dekajuawainum tusa tikich jáanchin nugkujui. Nunik jimag aents uyuntsam kashi nunú nuwa pujamunum weuwai. Nunik jegaa chichajak: “¡Wait aneasam aents jakau wakani untsugtukta, iniasan dekaatjai wajinjuttig!” tau.
1SA 28:9 Tama nuwa ayaak: “Aents anentaimas dekamin aidau, nuigtu jakau wakanin untsuka chichau aidau juwi batsatun Saúl jiija utsagmaya nunú ame dekam jamah. Nunin aish ¿wagka wi bakumamainush, tuja ameshkam bakumamainush tuu wekaeme?” tau.
1SA 28:10 Tutai Saúl Tuke Pujuu daajin niina chichajak: “¡Ishamkagtukaipa utugchatak atsugtamtatui, Tuke Pujuu daajin tajame!” tiuwai.
1SA 28:11 Tutai nuwa ayaak: “Tujash ¿yana wakanin untsugtukti tusamea tame?” tau. Tama: “¡Samuela wakani untsugtukta!” tiuwai.
1SA 28:12 Tusa tima Samuela wakanin untsuka wainkauwai. Nunik senchi untsumak Saúlan chichajak: “¿Wagka minash tsanujaume? ¡Ame Saúlaitam jamah!” tau.
1SA 28:13 Tutai Saúl chichajak: “Ishamkagtukaipa, ¿ya wainkaume?” tau. Tusa tama: “Makichik Apajuí nugkaya nayaimpinum waun wainjai”, tau.
1SA 28:14 Tutai nii iniak: “¿Wajukuita niimesh?” tau. Tama nii ayaak: “Auk makichik aishmag múuntuch jáanchin nugkuajui”, tau. Tusa tutai Samuelnap dekas wainkae tiuwai. Tusa Samuelan eme anentus tikishmag tsuntsuma nijayin nugka antig pujusui.
1SA 28:15 Nunik pujus iniau. Tusa iniam Samuel Saúlan ayaak: “¿Wagka minash taati tusamesh waitkajame?” tau. Tama Saúl ayaak: “Filisteo aidau jetetainakui shiig senchi ishamkagtajai, tuja Apajuíshkam idaituse. Nuadui wi untsuaish profetayaigkish, nuniachkush kajanmagkesh aigtsui. Dutijakui wisha wajina dutikmainaitja nuna tujutti tusan amina untsukjame”, tau.
1SA 28:16 Tutai Samuel ayaak: “¿Tuke Pujuu kajegtamak idaitamas, amina shiwaajum wajasa nuniaish wagka minash ininme?
1SA 28:17 “Tuke Pujuu amina idaitamsatnun pachis mina ujatkamtai wi amina ujakuitjame. Nuna umiak ame apuitam nunak atanjamki amina kumpajum Davitan susae,
1SA 28:18 wagki nii inapagbau umigkachu asamin. Nuigtushkam Amalec aents aidau ashí ditá tagkuji aidaujai ijinatajum tujabau umikchauwaitme. Nuadui Apajuí amina idaitamsa nunak dutijamae.
1SA 28:19 “Nuigtushkam Israel aents aina nunak filisteo aidau depetuk ijinati, dutikak aminashkam mantamatnume tusa idaitamsattawai. Tuja kashin ame, amina uchijum aina nujai jinaattagme. Tuja Israel aents aidau batsata nunashkam filisteo aents aidau depetuk achija yajuaktinme tusa Tuke Pujuu idaisae”, tiuwai.
1SA 28:20 Tusa tama Saúlak nuna antuk puyatuk, esajam wajakin jaka iyantui. Wagki nunak makichik tsawan, nuigtu makichik kashi yujumkan yutsuk wekagu asa nunikui.
1SA 28:21 Nunik Saúl jaka iyanmatai, nunú nuwa dekamin jegantun chichajak: “Wika amina inakminuk wi mantamnamainun dekayatkun, amina umiju asan ame segatbaunak ashí umikjai.
1SA 28:22 Nuadui wi titatjam nunú ameshkam umikta: Yujumkan amasmatai yuwata, nunika ichichmamjam weminum”, tiuwai.
1SA 28:23 Tusa tamash Saúlak yujumak yutanak dakitau. Nunitai suntaja apuji aidau, dekas yuwata tusa nunú nuwajai ijuntujag imatjuidau. Ima imatjam ayu tiuwai. Tusa nugká tepau nantaki pegaknum jeganta ekemsauwai.
1SA 28:24 Nunik eketai nunú nuwa makichik toro tsakat duwejam niinu pujaun mauwai. Nuigtushkam harinan levadurajai pachimtsuk naneja pagkan inajuauwai.
1SA 28:25 Nuna umika juki Saúlan niina suntaji aidaujai susauwai. Dutikam nuna yuwawag akatmamjag nunú kashik dita aakjin waketjajui.
1SA 31:1 Israel aents aidau Guilboa mujanum batsatun filisteo aidau jetekag amuinam pisajajui.
1SA 31:2 Nunik pisajagmatai, filisteo aidau Saúlan niina uchiji aidaujai pataetukajui. Dutika amaigkag kampatum uchiji: Jonatán, Abinadab, Malquisúa aatus aajakua nunak ashí kajegkajui.
1SA 31:3 Dutika ukuinak Saúlan tuwajuk flecha nagkimin aidau nagkiawag ijuajui. Dutika ijum shiig senchi ishamkauwai.
1SA 31:4 Nuniak niina uyunak maanitai aidaun yajuak takus wekaenun chichajak: “Puyagjum jukim mantuata, filisteo pegkegchaun takau aina nunú kaunawag mantuawag dushiktujainum”, tau. Tutai: “¡Atsa wika maashtatjame!” tiuwai. Nunak ishamau asa tiuwai. Tama Saúl niina puyagjin juki awajai iyaak awagkemtukui.
1SA 31:5 Nunik jakamtai niina uyunnushkam nunisag niina puyagjinak awagkemtuk jakauwai.
1SA 31:6 Nunik niina uchiji kampatum, tuja niina uyunin aatus ashí niina aentsji pisagchaju aidaujai jinawajui.
1SA 31:7 Nunikagmatai tikich Israel aents aidau muja awin batsatu tuja Jordágka amain batsatushkam Israel aidauk filisteon ishamainak pisajaje. Tuja Saúlnak uchijijai amukaje tabaun antukag, yaaktajin ukuinak ditashkam pisajajui. Nunik pisajagmatai filisteo aidau nunú yaakat aidaunum dita akiinawag batsamsajui.
1SA 31:8 Nunikag kashinia duwi filisteo aidau aents jinaun wajiji aidaun yajutkagtatus shimutuk yujagkama Saúla iyashi, uchiji iyashi aidaujai muja Guilboanum batsatun wainkajui.
1SA 31:9 Dutika wainkag Saúla buuken tsupijuk jujuinak, tuja niina maanitaiji aidaunashkam yajutkajui. Dutikawag ashí ditá yaaktaji aidaunum, ditá apajuímtaiji jegamjukbau aina nuwi aents aidau ijumjajum, Saúlak jakae tusajum etsegkatajum tusa akatmamag ishiakajui.
1SA 31:10 Nuna dutikawag duwi pujus Saúla maanitaiji aidau yajuakbaun ditá apajuímtaiji Astarté jegagkamunum awayawajui. Tuja niina iyashinak, uchiji iyashi aidaujaí jukiag yaakat Bet-san tutai peejamunum nuwi nenajag idaisajui.
1SA 31:11 Nuna dutikawagbaun Israel aents aidaun Galaad nugkanum yaakat Jabes batsamin aidau dekawajui.
1SA 31:12 Nuna dekawag aents wajiu aidau etegdaijag jiinag kashi shima shimakua yaakat Bet-san jegawajui. Nunikag Saúla iyashin, uchiji iyashi aidaujai nenajam aun kuwaki yajuakag Jabes ejegawajui. Dutikawag nuwi apeawajui.
1SA 31:13 Untsu ukunchi aidaun jukiag numi wajautin ukusajui. Dutika ukusag wake besemag dekapenak, siete tsawan yujumka yutsuk ijagmawag batsamsajui.
2SA 1:1 Saúl jakamtai pujusa, David Amalec aents aidaujai maania depetuk wakitki yaakat Siclag jegauwai. Nunik nuwi jimag tsawan pujusui.
2SA 1:2 Nunik pujai kampatum tsawanta duwi, makichik aents Saúla suntaji wake besemag dekapeak, jáanchjin japiki ichig nugka yukukuntun buuken yukumag nugkak wajasa David pujamunum yaakat Siclag jegauwai. Nunik jegá Davitan eme anentus tikishmag tsuntsuma nijayin nugka antig pujusui.
2SA 1:3 Nunitai David niina iniak: “¿Tuwiyamea miname?” tau. Tama nii ayaak: “Suntag Israel aents aidau batsatun filisteo aidau jeteam maaninakui tupikakmajai”, tau.
2SA 1:4 Tutai David iniak: “Tujash wajukawagmae nunú wait aneasam wamak ujatkata”, tau. Tama nii ayaak: “Israel aents aidautin depetamkagmatai, kuashtati pisagmaji. Tuja jinuidaushkam asagmae. Untsu Saúlak niina uchiji Jonatágjai mai jakame”, tiuwai.
2SA 1:5 Tutai David iniak: “¿Wajuk amesh dekame Saúl niina uchiji Jonatágjai jakaush?” tau.
2SA 1:6 Tama nii ayaak: “Wika tuke aneasan niimkun muja Guilboanum wekaemajai. Nuniai suntag filisteo aidau caballonum, carronum aatus Saúlan jegantattak shimutiagmae. Nuninai Saúlak niina nagkijin achimak wajame.
2SA 1:7 Nunik wajau ayampa niimsatakama waituk untsugkui, aikmajai.
2SA 1:8 “Tusa aika ai: ‘¿Amesh yaitpa?’ tujutkui: ‘Wika Amalec aentsuitjai’, timajai.
2SA 1:9 Tai nii chichagtak: ‘Wait aneasam mantuata, jakatag takunush jamain dekapeatsjai’, timae.
2SA 1:10 “Tujutkui jeganta diikman ashí jaka tepakui, tsagaumainchau asamtai maamjai. Dutikan atsejutaijin patakumtaijijai jujukin juwi itaajai, apujuh”, tiuwai.
2SA 1:11 Nuna David antuk wake besemag dekapeak jáanchjin japiki ichigkui, tuja tikich aents niijai batsatushkam jáanchjin japiki ichigkajui.
2SA 1:12 Nunikag Saúl niina uchiji Jonatánjaí jakau asamtai, buutuinak wake besemag batsatu. Tuja nuigtushkam Tuke Pujuun suntaji Israel aents aidau jinawagbaun anentaimtusag buutuidau. Nuninak yujumka yutsuk ijagmawag batsataig etsa akaikiuwai.
2SA 1:13 Nuna nagkankag, David nunú aents chichama etsejak taun iniak: “¿Amesh tuwiyampaitpa?” tau. Tama nii ayaak: “Wika Amalec aentsuitjai, nuniayatkun Israel aents aidaujai pujajai”, tau.
2SA 1:14 Tutai David senchi untsumak chichajak: “¿Amesh wajukeakmea ishamtsukesh Tuke Pujuu apu ati tusa etegkamush Saúlash maamume?” tau.
2SA 1:15 Tusa tamawaik, niina aentsji aidaunmayan makichik untsuka itan, anú aents maata tusa inajui. Tusa tima mauwai.
2SA 1:16 Dutika mautai David chichaak: “Tuke Pujuu apu ati tusa etegkamu maamujum etsegtuma wekaesam, jutika maam ame. Amek amina utugchatjuminig mantamname”, tiuwai.
2SA 1:17 Saúl niina uchiji Jonatágjai jakamunum David wake besemag pujus kantamauwai.
2SA 1:18 Nunú kantamtain ashí Judá wegantunmaya aidau jintintuatajum tusa inamjauwai. Duka papii Jasher tutainum agagbau aajakui. Duka aatus tawai:
2SA 1:19 “¡Israel aents aidauwah, “Amina imanjumea nunú mujanum tsainkae! ¡Wajukaya aents wajiu aidaush imanikash jinawaje!
2SA 1:20 Nunú pachisjum yaakat Gadnum etsegkaigpajum, tuja yaakat Ascalógnumashkam etsegkaigpajum, nuna antukag filisteo nuwa pegkegchaun takau aina nunú, shiig aneenak nantsemawainum.
2SA 1:21 “Guilboa mujajiya nuwig, ataktu awagkig yumik yutugchatnai, nuigtush sajattanakesh sajatkashtinai. Tuja nunú mujanmak aents aidauk ataktuk jinashtin ainawai, wagki nunú mujanum Israel aents wajiu aidaun makichkish ayamjumamainchau ijinawaja nuadui. Israel aents aidaun wajiujig nunú mujanum megkaekae. Nunú mujanum Saúla maaniaku ejamataiji winchamtin aajakua duka bushapaje.
2SA 1:22 Saúla puyagjig, Jonatágka puyagjijai shiwag dekas wajiu aidau numpen wiyajijai maatug waketin ayi.
2SA 1:23 ¡Saúlak Jonatágjai mina kumpag shiig aneetaig ainawai! ¡Ukukuin nagkaesau amaimainchau, leónka senchijin nagkaesau ainawai! Iwaku pujusash kanakchajua nunisag jainakush mai jakaje.
2SA 1:24 “Israel nuwa aidauwah, atumek jáanch shiig pegkeg yamakaitkau lino apagbaun, nuigtu nugkutai orojai najanamun Saúl amasmatai, nugku ayujum nunú anentaimtusjum buuttajum.
2SA 1:25 ¡Chah, aents kakajam aidaush wajukaya imanikash maaniamunmash jinawaje! ¡Jonatágnashkam mujanum maawaje!
2SA 1:26 Jonatágkah, amek mina yatsugjai betek ayume. Nuadui aminí anentaimkun, ¡Shiig senchi wake besemag dekapeajai! ¡Ame minak shiig kuitamjukuitme! ¡Wi anentaimsamak, ame mina kuitamjukuitam duka nuwa anenken nagkaesauwai!
2SA 1:27 ¡Chah, aents kakajam aidaush wajukaya imanikash maaniamunmash jinawaje! ¡Shiwag aidau, iinia suntag maanitan yacha aidaun amukaje!” Tusa David juna aatus kantamauwai.
2SA 2:1 Saúl Jonatágjai jakamtai, David ditan eme anentus kantamjuawa nunú nagkaemakmatai pujus Tuke Pujuun iniak: “¿Tuke Pujuuwah, wi mina aentsug aidaujai filisteo nugken pujag nunash, Judá wegantu aidaun yaaktajinish pujumainchaukaitag?” tau. Tutai Tuke Pujuu ayaak: “Ehe, wemainaitme” tiuwai. Tama David iniak: “Tujash ¿tuu yaaktanum wemainaitja?” tau. Tutai Tuke Pujuu ayaak: “Yaakat Hebrón wetá”, tiuwai.
2SA 2:2 Tusa tima David niina nuwe jimag: Ahinóam yaakat Jezreelnumia aajakua nuna, Abigail waje Nabala nuwe yaakat Carmel pujujakua nujai mai juki weuwai.
2SA 2:3 Nunik wegak nuigtushkam niina kumpaji suntag aidaun patayi aidaujaí yajuakui. Nunik yaakat Hebrón jegawag, nuna yantamen tikich yaakat ayaunum nuwi batsamsauwai.
2SA 2:4 Nuwi pujuttaman Judá wegantu aidau ujumak kautuawag, aceiten juki Davitan buuknum nijakag apu adaikajui. Davitak Judá wegantu aajakui. Apu adaikam pujai, Galaad nugkanum yaakat Jabes batsamin aidau Saúla iyashin juki ukusaje tabaun dekauwai.
2SA 2:5 Nunik dekaa ujumak aents chichama etsejin aidaun akateg ishiakui. Nunú jegawag chichama etsejuinak: “Aatus apu David tawai: ‘Atumek Saúl wait anentuidau asajum niina iyashi jukijum ukusu asagmin, Tuke Pujuu pegkegnum yumigsatnume. Nunú dutikaujum duka dekas shiig pegkeg aikaugme. Atumek dekas pegkeg ainagme.
2SA 2:6 Nuigtushkam Tuke Pujuu wait anenjamak makichkish kajimatjamtsuk kuitamjamkatnume tajai. Tuja wishakam atum pegkeg dutikau asagmin shiig kuitamkattajime.
2SA 2:7 Nuadui ichichmamjajum wajiu wajastajum, wagki atumi apuji Saúl jakau ataish Judá wegantu aidau mina apu adaitukaju asamtai, wi yamaik atumi apujig atatjai’ tujamui”, tiuwai.
2SA 5:1 Davitak apu adaikam yaakat Hebrón pujai, makichik tsawantai Israel wegantu aidaun apuji aidau niijai chichasagtatus shimutkajui. Nunik jegajuawag chichajuinak: “Jutii aidautik ametam nunú wegantu ainaji,
2SA 5:2 Israel aents aidauk Saúl apu pujaig amina chichamjumin antugtamas maaniawag waketug kaunianme. Tuja Tuke Pujuushkam aminak Israel aents aidaun apuji wajasa ditan kuitamkati tusa tujabiuwai”, tiajui.
2SA 5:3 Nuna tusag Hebrógnum ashí Israel wegantu apuji múun aidau Davidjai chichasajui. Nunikagmatai David ditajai Tuke Pujuu daajin chichaman umikui. Dutikamtai dita Davitan aceiteyai buuknum nijakag Israel aents aidaun apuji emajui.
2SA 5:4 Davitak apu wajas inamtanak treinta mijanji ajamu asa nagkamauwai. Tuja ashí ijumjamak cuarenta mijan inamjauwai.
2SA 5:5 Judá wegantu aidaun apuji wajasag yaakat Hebrógnum pujus siete mijan nuigtu jimaituk inamjauwai. Untsu ashí Israel aents aidaun apuji wajas yaakat Jerusalén pujus treinta y tres mijan inamjauwai.
2SA 5:6 Apu adaikam pujus David niina aentsji aidaun yajuak, nunú nugkanum Jebús aents aidau yaakat Jerusalén batsatu asamtai, maaniatatus shiyakajui. Jebús aents aidauk Davitak niina aentsji aidaujaig yaaktanak utuachagtatui tusa chichajuinak: “Atumek makichkish juwig wayashtatjume, atumnak aents wainmachu aidau, shutuu aidaujai depetamak awaktamjagtatui”, tuidau.
2SA 5:7 Tujash Davitak niina suntaji aidaujai depetmakag apu pujusa inamtai kakajus utumainchau Sión tutai aajakua nuna utuawajui. Dutikawag, duwi pujus nunú yaaktanak, “Davita yaaktaji” tuu adaikau ainawai.
2SA 5:8 Jebús aents aidaujai maania depetuk Jerusalégka jukittak pujusa David chichaak: “Aents wainmachu aina duke, shutuu aidaujai uwakattawai tujamainawai. Nuniakuig ima nunin aidaush itugkatjiki, yumi saetai taimua nuni utuajum kajegtajum, ditanak shiig senchi kajejajai”, tiuwai. Nuadui makichik tibau awai: “Wainmachu aidaukesh, tuja shutuu aidaukesh Tuke Pujuu jee pegkegma nuwig wayashtin ainawai”, tibau.
2SA 5:9 Duwi pujus David, niina nuwe aidau, uchiji aidau, suntaja apuji aidau aatus nuwi wayawag batsamsajui. Nuwi pujus nuna yaakta daajin “Davita yaaktaji” adaikauwai. Dutika duwi pujus niina aentsji aidaun yaakat peejatajum tusa inajui. Tusa timatai nain wajajunum nagkama peegkeg jukiag apu David pujusa inamtaijin inagnakajui.
2SA 5:10 Davidnak Tuke Pujuu ashí senchigtina nunú yaijakui. Dutikamu asa Davitak kashi kashinig nuni nagkaemas tikich aidaun nagkaesau wajas wegau.
2SA 5:11 Nuadui yaakat Tironmaya apu, nigki wee chichamainun, dekas niina aentsji tikich nugkanum apu chichamen etsegkatin adaikamu aidaun Davitan ishitkauwai. Dutikak nuigtushkam aents numi dakaja jegamin aidaun, kaya pakama jegamin aidaujai ishitkauwai. Dutikak setug dakagbau aidaunashkam ishitkauwai. Nujai David pujusa inamjatnun jegamjukajui.
2SA 5:12 Dutikawagmatai David anentaimas: “Dekas Tuke Pujuuwap Israel aents aidaun apuji ati tujutne. Nii Israel aents aidaun aneau asampap mina yainkui tikich aidaun nagkaesau wajasja”, tiuwai.
2SA 5:13 David Hebrón pujau Jerusalén jegá pujus, nuwiya nuwa aidaun nuwatjauwai. Nuigtushkam ikaa nuwe aidaun nuwatjauwai. Nunú nuwa aidaunum uchijin, nawanjin aatus kuashat akigkui.
2SA 5:14 Tuja niina uchiji aishmag Jerusalégnum akiinkau aidauk: Shamúa, Shobab, Natán, Salomón,
2SA 5:15 Ibhar, Elishúa, Nefeg, Jafía,
2SA 5:16 Elishama, Eliada, Elifelet aatus aajakui.
2SA 5:17 Davitan Israel aents aidau apuji adaikaje tabaun filisteo aidau antukajui. Nunikag suntag aidau niina egainak shimutkajui. Nuna David dekaa niina suntaji aidaujai kaya múun waa aidaunum nii uumka uwemtaijin weuwai.
2SA 5:18 Nunik weu ai, filisteo aidauk muja nagkatkamu paka wegaju Refaim tutainum kautuawajui.
2SA 5:19 Nunikagmatai nuna pachis David Tuke Pujuun iniak: “¿Filisteo aidau kauna nunash jetemainkaitag? tuja wi jeteakuish ¿yainkattamek?” tiuwai. Tusa iniam Tuke Pujuu ayaak: “Ehe, amina suntajum aidaujai jetekta, wi atumnak yaigtatjime depetmaktinme tusan”, tiuwai.
2SA 5:20 Tusa tima David niina suntaji aidaujai shimutuk Baal-perazim jegawajui. Nunik nuwi filisteo aidaujai maaniawag depetkajui. Dutika chichaak: “Shiwag minidaun Tuke Pujuu namak chichigmajai betek tajaka utsagke”, tiuwai. Nuna tusa nunú nugka daajin Baal-perazim adaikauwai.
2SA 5:21 Tuja filisteo aidauk pisainak dita apajuímtaiji aidaun utsag ukukiajui. Dutikamun David niina suntaji aidaujai yajuakajui.
2SA 5:22 Nunik pisaju ataktu waketug Refaimnum kaunak batsamsajui.
2SA 5:23 Nuninai David ataktu awagki Apajuín iniasui. Tusa iniam Apajuí ayaak: “Igku jetetsuk tenteajum ukunum jetektajum. Tuja numi bálsamo ijuna nuwi jegakjum,
2SA 5:24 nuna titiji aidaunum aents waka wekaebau wajukama imatu antuktatjume. Nuniakjum pisajajum jetektajum, wagki nunak wi emkan filisteo aidaun ijinatasan wetatjai”, tiuwai.
2SA 5:25 Tusa tima David Tuke Pujuu tibaunak imatiksag umikui. Aatus David filisteo aidaun depetuk yaakat Gabaón nagkama iji ijinkawa yaakat Guézer jegauwai.
2SA 6:1 David Israel aents tres mil suntag maanitan yacha aidaun etegkeg ijumjauwai.
2SA 6:2 Dutika nuna yajuak Jerusalén pujau jiinki, Quirit-jearim tikich daaji Baalá tutai Judá nugkanum aajakua nuwi weuwai. Nunak arcan juki Jerusalén ejegatag tusa wegak nunikui. Tuja Israel aents aidau Apajuí ashí senchigtina nuna emematin aina nuna chichame umiktin agagbau egkeamun arcan tapajiya duka Tuke Pujuun pujusa inamtaijijai betek tumain jimag querubin dakumkamu aajakui, nuna David niina yaaktajin ejegatag tiuwai.
2SA 6:3 Nunik wea weakua muja yaigchi naintin Abinadab pujujakua nuwi wakajui. Nunikag arcan jukiag yamajam carreta najanamunum egkeawag jukiajui.
2SA 6:4 Dutikawag buey carretan japiki wetai Abinadapan uchiji jimag, Uzá, Ahíojai pataetukajui. Nunikag, Ahío eemak wetai, Uzá ukuunum wegau.
2SA 6:5 Dutika juki emainai David ashí Israel aents aidaujai eemak wenak arpan, panderetan, tampujan, platillo aidaun aatus awatuinak, nuigtu pigkuin umpuinak nantsemkiag shimuidau.
2SA 6:6 Nuninai chicham umiktin agagbau egketun arcan carretanum egkejag buey japikmatai emaidau. Tuja Nacón trigon ijumajakua nuwi jegainai, buey winchainag iyaak carretan ayantai, arca iyajai tusa Uzá arcan achikui.
2SA 6:7 Dutika achikmatai Tuke Pujuu niina shiig senchi kajegkauwai. Nuadui arcanum ayaumas jaka iyantui.
2SA 6:8 Dutika Tuke Pujuu Uzán maamtai, David wake besemag dekapjauwai. Nuadui nunú nugka daajin Perez-Uzá adaikauwai. Duka yamaikish tuu daagtinai. Nunak Apajuí Uzán kajejuk maamu taku tawai.
2SA 6:9 Tuja David Tuke Pujuun senchi ishamak chichaak: “¡Chicham umiktin agagbau arcanum egketa nunak wika mina yaaktajuig jukishtatjai!” tiuwai.
2SA 6:10 Nuna tusa Gadnumia aents Obeb-edom aajakua nuna jeen ejegatajum tusa tiuwai.
2SA 6:11 Tusa timatai imatiksag umikajui. Nuadui Obed-edoma jeen kampatum nantu asauwai. Imaan nantu asauwa nunak imatiksag Tuke Pujuu Obed-edomnak niina patayi aidaujai pegkegnum yaigkui.
2SA 6:12 Obed-edoma jeen arca au asamtai, niina patayi aidaujaí Tuke Pujuu pegkegnum yaigke tusa Davitan ujakajui. Tusa ujakam David arcan utitatus weuwai. Nunik shiig aneas arcan juki Jerusalén ejegauwai.
2SA 6:13 Nunú arcan yanaki jukiag machik kuwagainaig David makichik toro duwegman uwig tsakatjai maa apeak Tuke Pujuun emematiuwai.
2SA 6:14 Dutika Tuke Pujuun emematak jáanch lino apagbaun sacerdote nugkutain nugkuja shiig senchi natsemki wegau.
2SA 6:15 Nunitai ashí Israel aents aidauk arcan juki wedaun saetus shimuinak, Davidjai betek shiig aneenak untsumai tikich aidau uwija kachujin umpuidaush aidau.
2SA 6:16 Arcan Jerusalén ejegawagmatai, Davita nuwe Mical Saúla nawanji, jeganum niimtai ujaimunum tsapui wajas niimkama arcan juki weagtai, nuna emtin apu David wesa Tuke Pujuun emematak senchi tsekeak nantsemki wegaun wainak senchi kajegkauwai.
2SA 6:17 Dutika ejegawag nunú arca asatnun David emtika inamjamtai aakmakbaunum nuwi awayawajui. Dutikawagmatai David ajak juukbau aidaun Tuke Pujuun anentag susauwai. Tuja nuigtushkam kuntinun maa nuna nejen ashí apeak Tuke Pujuun emematiuwai, nii ayamjuk agkanmitkamu asa.
2SA 6:18 Dutika Tuke Pujuun ememati ashimak ashí Israel aents aidaun chichajak: “Tuke Pujuu ashí senchigtina nunú tuké pegkegnum yaimpaktin atinme”, tuu yumigjauwai.
2SA 6:19 Nuna tusa ashí Israel aents aishmag aidau, nuwa aidau aatus nuwi batsatunak pagkan, nuigtu makichik torta yujág dátil tutaijai najanamun, nuigtu uva ekaejamun aatus maki makichik tinamkauwai. Dutika tinamkam nuna jukiag ditá jeen waketjajui.
2SA 6:20 Nunikagmatai Davidchakam niina jeen niina nuwe, uchiji aidaujai batsatun pegkegnum yumigsatatus weuwai. Nunik jegamtai niina nuwe Saúla nawanji Mical jiinki igkug chichajak: “¡Yamai tsawanta duwi amek yajau iwainmamkachume! ¡Amek apu tusaikish eme anentsa diimainchau amina inakem nuwa aidau datsanmain pujutaijum inaktu wekaeme!” tiuwai.
2SA 6:21 Tama David ayaak: “Dekas tame, nunak dekas nantsemamjai. ¡Tujash wika nunak Tuke Pujuu amina apan amina pataim aidaujai kajejuk idayak, mina Israel aents aidaun apuji ati tusa etegtuawa nuna emematkun nunikmajai! Nuadui wika ame tujutkuminish, Tuke Pujuun emematkun tuke nantsemtatjai.
2SA 6:22 Tuja ame diisam pegkegchaun nuniag nunak, aan nagkaemasan nuniktatjai. Ame inak aidau pachisam tame duka, wisha wagkanuk aniaja nuna shiig dekawag eme anenjusagtatui”, tiuwai.
2SA 6:23 Tuja Micalak Apajuí suwimak susamu asa makichkish uchigmachu aajakui.
2SA 7:1 David apu wajasmatai niina shiwaaji aidaujai chichaman epegkea maanitsuk agkan nii inamtaijin pujusa shiig takasti tusa Tuke Pujuu yaigkui.
2SA 7:2 Dutikam pujus, makichik tsawantai profeta Natágkan chichajak: “Wika jega setug dakaja jegamkamunum shiig pujajai. Tujash chicham umiktinun Apajuí amasua duka aakchinum awa nunú ameshkam dekame”, tiuwai.
2SA 7:3 Tusa tama Natán ayaak: “Kame ame wajuk anentaime duka betek umikta, wagki aminak Tuke Pujuu ashí yaimpawai”, tiuwai.
2SA 7:4 Tusa tiu ai, nunú kashia duik Tuke Pujuu Natágkan chichajak:
2SA 7:5 “Mina inakeg David jegajua chichagkum: ‘Amek wi pujustinuk jegamkashtatme’, tusa Tuke Pujuu tujamui tusam ujakta.
2SA 7:6 Tuja wika Israel aents aidau Egipto nugkanum batsatun jiijuitag duwi nagkamsan yamaikish jega pegkeg setug dakaja múun jegamkamunmak pujatsjai. Wika yaunchuk nagkamsan aakchinum puja pujakuan imajui tauwaitjai.
2SA 7:7 Yaunchuk nagkamsan ditajai wekaesauwaitag duikish wika mina aentsug Israel aents aidaun apuji atinun adaijauwaitag nunak, setug pegkeg dakagjum jega múun jegamjutkatajum nuwi pujustajai tusanuk segachu ainajai.
2SA 7:8 “Nuadui yamai wi taja nunú mina inakeg David aatus Tuke Pujuu ashí senchigtina nunú tujamui tusam ujakta: ‘Amek uwig kuitamku pujaumin, wi aminak jukin Israel mina aentsug aina nuna apuji ati tusan adaikamjame.
2SA 7:9 Dutikau asan ame tuwi wekaeyume nuniakminish, wi aminak kuitamkauwaitjame. Tuja amina shiwaajum aidau jetepainakuish, amina ayamjakun ijinawabiajai. Wi aminak tikich aents eme anentsa diitai aina iman eme anentsa diitai awajsajame.
2SA 7:10 “ ‘Nuigtushkam mina aentsug Israel aents aidau batsamsatnun nugkan etegkajai. Dutikan nuwi batsasagjai. Nuadui yaunchuk shiwag aidau, kasa aidaujai waitkajaku aina dutika waitkamak achagtinai.
2SA 7:11 Tujash amek yamaik amina shiwaajum aidaujaig maanitsuk agkan pujustatme. Nuigtushkam amina uchijum wegantu aidaunmaya Israel aents aidaun apuji atinai.
2SA 7:12 “ ‘Untsu ame jakamin uchijum aina nuwiyan makichik etegkan apu adaikattajai.
2SA 7:13 Dutika ai, nunú wi pujustinnak jegamjutkatnai. Tuja ame wegantunmayan apu atinun tuke adaitinaitjai.
2SA 7:14 Wi niina apaji atatjai, untsu nii mina uchig atatui. Nuadui makichik múun uchiji pegkegchaun takatai, suwimka suwama numamtuk wi niinak suwimkan susatnaitjai.
2SA 7:15 Tujash Saúlan wi apu adaikau ayatkun, niina ajapeakun amina apu emauwaitjam numamtuk, amina atankinuk tikich aentsnak apu adaikashtinaitjai.
2SA 7:16 “ ‘Ame wegantu aidaunak wi kuitamkatnaitjai, nuwiyan makichik mina aentsug aidaun apuji atinun tuke etegkan adaitinaitjai’ tujamui tusam David ujakta”, tusa Apajuí Natágkan akatjauwai.
2SA 7:17 Tusa akatjam Apajuí tibaunak imatiksag nii wainkamujai ashí betek Natán Davitan ujakui.
2SA 7:18 Nuna antuk David Tuke Pujuujai chichastatus arca pujaunum wayauwai. Nunik Apajuíjai chichaak: “Apuh, Tuke Pujuuwah, wika tikima wainkauchitjai. Tuja mina pataag aidaushkam tikima wainkauch ainawai. Nuadui wika apu atajai tumamaitsujai.
2SA 7:19 Tuke Pujuuwah, wika wainkauchitag nunin aig, amina uchijum wegantu aidau apu agtinai tusam anagtame. ¡Ame yaijatnaitam imanuk tikichik atsawai!
2SA 7:20 Tuke Pujuuwah, wi amina tumainuk makichkish atsugtawai, wagki wika amina inakmetjai. Nuadui ame minak shiig dekagme.
2SA 7:21 “Juju pegkeg midau agtin, mina uchigdau agtinjai pachisam tujutam duka ame wakegamu umiktin asam tujutme. Nuadui wika dekaskeap umiktatua tajame.
2SA 7:22 Tuke Pujuuwah, ¡amek dekas shiig múuntaitme! Yaunchuk iina muunji aajaku aidau ujapayanum nunú yamai dekas ii antaji, wagki tikichik amejai betek amainuk makichkish atsawai. Tuja wainka apajuímtai aina dukesh amea ibauk makichkish atsawai.
2SA 7:23 Tuja amina aentsjum Israel aents aina nujai betek amainuk tikich aents aidauk juju nugkanmak atsawai. Israel aents aidauk ame ayamjukam agkanmitkauwaitme. “Tikich aents aidau nagkaesau dita ayamjakum ishamain wainchatai aidau iwainajuitme. Dutikakum iish wainjinig iina shiwaaji aidau ijinauwaitme.
2SA 7:24 Wagki Israel aents aidauk tuké amina aentsjum atin atinme tusam tiuwaitme. Tuja ame atinaitme Tuke Pujuu ditan Apajuíji.
2SA 7:25 “Tuja wi amina inakmetag nunú yamai ame anagtam duka, tuke Pujuu Apajuíyah, kajimatkitin aipa. Tuja mina uchig wegantu aidaushkam apu agtin atinme. Ame tame duka tuke umiktin ata.
2SA 7:26 “¡Amina daagminak ashí nugkanmaya aidau emamattin atinme! ¡Nuninak, Israel aents aidaun Apajuíjiyai dekas ashí senchigtina duka titin atinme! “¡Wi amina inakmetag nuna uchiji wegantu aidauk ame yayasam tuke apu agtin atinme!
2SA 7:27 “Tuke Pujuuwah, ame ashí senchigtinum anagtakum mina uchig wegantu aidauk tuké apu wegagtinai tujutiu asamin, wika amina inakem ayatkun juna pachisan segajame.
2SA 7:28 “Tuke Pujuu Apajuíyah, amek Apajuí dekaskenum chichauwaitme. Wika amina inakem aig, amina anenkagmin ibau múun anagtame.
2SA 7:29 Nuadui segajame wait aneasam mina uchig wegantu aidau pegkegnum yumigtugkum, ajumaish tuke kuitamjutkatin ata. Amek Tuke Pujuu Apajuí asam dekaskenum chichauwaitme. Nuadui, ame yayamu asag ditak tikich aidaun nagkaesau agtinai. Nuninak amina umigtamkatin ainawai”, tiuwai David.
2SA 9:1 Makichik tsawantai David iniimak: “¿Wi Jonatágjai chichama umikuitag, nuna umiakun kuitamainush Saúla uchiji wegantush makichkikesh iwaku pujaush atsawash?” tau.
2SA 9:2 Tutai nuwiya makichik aents chichajak: “Saúl wegantu makichik inak Sibá daagtin pujawai”, tau. Tutai David niina chichajak: “Untsukta taati”, tiuwai. Tusa tima untsukam Sibá taamtai apu David iniak: “¿Amekaitam Sibá?” tama nii ayaak: “Ehe, witjai, ame tabaun umiktasan taajai apuh”, tau.
2SA 9:3 Tutai apu David ayaak: “Wi Apajuí daajin wait anenmainush Saúla uchiji wegantunmayash ¿makichkiuchikesh iwakush pujatsuak?” tau. Tutai Sibá ayaak: “Jonatágka uchiji makichik, naween mai beseju wekaechau pujawai”, tau.
2SA 9:4 Tutai nii ayaak: “¿Tuwi dusha pujawa?” tau. Tama: “Duka yaakat Lodebar Amielan uchiji Maquira jeen pujawai”, tiuwai.
2SA 9:5 Timatai apu David nunú weji utitajum tusa inamjauwai.
2SA 9:6 Tusa tima wejiag itawajui. Dutikam Mefi-boshet Davita emtin niina eme anentus tsuntsuma pujusui. Nunikmatai David senchi untsuak: “¡Mefi-boshet!” tiuwai. Tusa tama nii ayaak: “Ame tabaun umiktasan juwi pujajai”, tiuwai.
2SA 9:7 Timatai David chichajak: “Ishamkagtukaipa, wi amina apajai shiig wainijaku asan aminak shiig kuitamkattagme. Tuja amina apachjum Saúl aajakua nuna nugke aina nunak awagtugmaktinme titatjai. Tuja amek wijai ekemsam mesanum yujumak tuké yutinaitme”, tiuwai.
2SA 9:8 Tusa tama Mefi-boshet tsuntsuma pujus chichaak: “Wika amina inakem shiig wainkauchitjai, nunin aish ¿wagka minash waitash anenjame? Wika yawá jakaujai betekaitjai”, tiuwai.
2SA 9:9 Tusa tutaishkam Sibá yaunchuk Saúlan inake aajakua nuna apu untsuka chichajak: “Amina apujum Saúla wajiji aidaunak, niina uchijinu aidaujai ashí niina tijajin susajai.
2SA 9:10 Dutikamu asamtai, ame, amina uchijum aidau, tsakatkem aidau aatus nunú nugkanum niinu atin takagsattagme, dutikakum ajak juukam ijumtatme. Dutikawamin nuna amina apujum Saúl aajakua nuna patayi aidau yuwawagtatui. Untsu Mefi-boshet Saúla tijajiya duka wijai mesanum tuke yutatui”, tiuwai. Tusa timatai Sibá quince uchigtin, nuigtu veinte inake ajujakua nunú,
2SA 9:11 apu Davitan chichajak: “Apuh, ame tame nunak imatiksanuk umiktajai”, tiuwai. Tuja Mefi-boshetak apu uchijiskait tumain sillanum ekemas mesanum yuujakui.
2SA 9:12 Duwi nagkamas Sibá jeen batsataidauk Mefi-boshetan ashí takajujaku ainawai. Mefi-boshetan uchijig Micaías daagtin makichik aajakui.
2SA 9:13 Mefi-boshetak naween mai beseju wekaechau asa Jerusalén pujujakui, wagki apu Davidjai ekemas tuké yujumkan yuu asa.
2SA 11:1 Tsawan numi aidau yagkujut jegamunum apu aidau ditá suntaji aidaujai ijunag shiyakag shiwaaji aidaujai maanin asag, David suntaja apuji Joab aajakua nuna niina atuwe aidaujai, nuigtu ashí suntag aidaujai maaniatajum tusa awemauwai. Dutikam shiyakag Amón aents aidau yaakat Rabá batsatun jetekag depetuk amukajui. Untsu Davitak wetsuk Jerusalén juwakui.
2SA 11:2 Nunik pujau makichik tsawantai agkuantai David pegakjin ayamak tepau, nantaki wajas niimsatatus yakí wakauwai. Nuwi wajas niimkama makichik nuwa shigmauch wajakin niina agájin maak pujuttaman wainkauwai.
2SA 11:3 Nunik wainak niina inake aidaun, aush nuwash yakita inimsatajum tusa ishiakui. Tusa ishiakbau waketug kauna niina ujainak: “Au nuwa daajig Betsabé Eliama nawanji, hitita aents Uríasa nuwegai”, tiajui.
2SA 11:4 Tusa tiagmatai itagtuatajum tusa David inamjauwai. Tusa timatai weji jukiag itajuawajui. Dutikawagmatai David niijai kanajui. Nunik Betsabék niina jeen wakitkiuwai. Davitjai kanajua nunak nuwauch jau aina nuna tsawantan ejeyi nagkaanak tuke nunin asag mai uminak pujus nunikui.
2SA 11:5 Nunik ejapjuk Davitan chichaman akuptukui.
2SA 11:6 Nuna David dekaa, Urías akuptugkata tusa Joapan tiuwai. Tusa tima akupkauwai.
2SA 11:7 Urías jegamtai apu David Joapan pachis, suntag aidaun pachis, wajuk pujuagmae tusa iniasui. Tuja nuigtushkam amonitajai maaniamush wajuk amae tusa nunashkam iniasui.
2SA 11:8 Nuna ashí inias dekajua, yamai jemin weme dawem dijajam ayamsata tusa awemauwai. Dutikam jiinki wegaig yutai shiig pegkeg umikbaun Urías susatajum tusa apu David niina inaken awemauwai.
2SA 11:9 Tujash Uríasak niina jenig wetsuk, suntag apu pujusa inamtain waitiji aidaun kuitamin batsatunum nuwi ditajai pujus tsawajui.
2SA 11:10 Nunikmatai Uríasak niina jenig wakitkichmae tusa Davitan ujakajui. Nuna David dekaa, untsuka itatajum tima itawagmatai iniak: “Atushat wekagum tauwaitkumesh ¿wagka jeminish wechamume?” tau.
2SA 11:11 Tama nii ayaak: “Chicham umiktin agagbau arcanum egketa duka, suntag Israel aents aidau, Judá wegantu aidau, aatus ikam aak aakmakbaunum batsatui. Tuja Joab mina apujua dushakam suntaja apuji amina aentsjum aina nujai ikam jega atsaunum kanuinawai. Dita núninaish wisha ¿wagkanuk mina jegajui wayanush, yujumka yuwan, umutain uwajan, nuigtu mina duwagjaish kanush tepetja? ¡Wika makichkish nunimaitsujai, junak dekaskenum tajame!” tiuwai.
2SA 11:12 Tutai David chichajak: “Kame yamaik juwi juwakta nunikam kashin wetá”, tiuwai. Tusa tima niina jenig wetsuk Jerusalégnum kanag tsawajui. Nunikmatai kashinia duwi,
2SA 11:13 David ipauwai niijai yujumkan yuwa umutain uwagtatus. Dutika ipaa ama amakua enamkauwai. Tuja kiyaju asamtai, Uríasak jiinki niina jenig wetsuk, suntag apu kuitamin aidau kajiamunum nuwi kanag tsawajui.
2SA 11:14 Nunikmatai kashinia duwi kashikmas David papii agag Joab susata tusa Uríasan susa akupkauwai.
2SA 11:15 Nunú papii agagbaunum chichaak: “Maaniakjumek dekas ishamainnum Urías emtikatajum, dutikajum nigki ukuktajum shiwag aidau maatnume”, tuu agagbau aajakui.
2SA 11:16 Nuna Joab jukiu asa shiwag aidaun tenteawajui, dutikawag suntag maanitan shiig yacha aidau batsatbaunmanini nuna nii dekau asa, Uríasan nuni awemauwai.
2SA 11:17 Tuja shiwag aidauk dita yaaktajin ayamjuinak yaaktanum batsamsag, Israel aents aidaujai maaninayatak agá jiinjajui. Nunikag maaniamunum Davita suntaji aidau ditá apuji aidaujai jinauwai, tuja nuwi Uríaschakam jakauwai.
2SA 11:18 Nunikmatai Joab nuna pachis Davitan papiin agatug akuptukui
2SA 11:19 Nuna papiin juki wegaun akateak: “Ii maaniag nunú pachisam ashí apu ujakta.
2SA 11:20 Namputchawame nunú tusa ujamin nuna antuk kajeka inimpak: ‘¿Wagka amonita aidau yaaktaji jeteakjumesh, senchish yunumtukmaugme? ¡Atum dekatsjumek, shiwag aidau yaakat peejamunum waka ijunas flechan akenin aina nunú!
2SA 11:21 Tuja yaakat Tebésnum makichik nuwa yaki waka wajas kayan nagkima Abimelec Jerubaal aajakua nuna uchijin mauwai. Nunú dekau asajum yaakat imatika yunumtumainchau yunumtukugme’, tujamkuig, ame ayaakum: ‘Amina suntajum aina nuna apuji aidau jinawaja nujai betek Uríaschakam jakame’ tita”, tiuwai.
2SA 11:22 Tusa akatjam jiinki weuwai, nunik jegá, Joab akatmamjamunak imajtiksag ashí Davitan ujakui. Nuna antuk David Joapan shiig senchi kajegkauwai. Nunik chichama etsegnun chichajak: “¿Wagka yaakat jeteakjumesh, imanikjumesh yunutukmaugme? ¿Atum dekatsjumek au aents aina duka yaunchuk nuwa yaakat Tebésnumia yaakat peejamunum waka wajas, kayai nagkia tuku Jerubaal aajakua nuna uchiji Abimelekan mauwa numamtuk dita nagkimin aina nunú? Nunú dekayatkugmesh ¿wagka tujash imanikjumesh yaakat peejamush yunumtukmaugme?” tau.
2SA 11:23 Tama chichama etsejin ayaak: “Shiwag aidau jutijai maaniatatus iina nagkaetamsau shiig kuashat agá jiinjame. Tujash ii ipisja juki yaakta waitijin ejentamji.
2SA 11:24 Dutikajin tikich suntag aidau yaakat peejamunum wakag iina suntaji aidaun flechayai aketiagmae, imaniamunum ujumak suntaja apuji aidau jinawagmae, tuja Uríaschakam nuwi jakame”, tiuwai.
2SA 11:25 Timatai David niina ayaak: “Joab ujakta: ‘Nunú jinamunmak imanikag puyatjukaigka, kame maaniamunmak tuke bakumatia. Tujash shiig kuitamamak nuni senchi jeteka yaaktan tsaikti, tuja ame niina anentai ichichtugta’ tujamui tita”, tiuwai.
2SA 11:26 Tuja Betsabék niina aishi Urías jakae tabaun antuk senchi buutiuwai.
2SA 11:27 Nunik buutak wake besemag pujamujin nagkaankamtai, David niina untsukui. Dutika utsagkam jegamtai, David nii pujusa inamtaijin awayauwai. Dutika nii nuwatkauwai. Dutikam pujus makichik Davita uchijin uchigmakui. Tujash David dutikauwa duka Tuke Pujuunak shiig awagmakchauwai.
2SA 12:1 Tuke Pujuu profeta Natágkan Davitai awemauwai. Dutikam Davitan jegajua aujak: “Makichik yaaktanum jimag aents pujujakui. Tikichia duka aajakui wiakuch, untsu tikich ujudauch aajakui.
2SA 12:2 Nunú wiakchanuk uwig aidau, baka aidau shiig kuashat ajujakui.
2SA 12:3 Untsu ujudauchinuk ima makichkiuch uwig sumapakbau ajujakui. Nunak ima nigki tsakapajui. Tuja nunú uwijak niijai niina uchiji aidaujai aatus ijunag pujus tsakajui. Imatika aneasa kuitabau asa, uwijak dita yuwinamun niishkam yujakui, tuja umutnashkam dita umuinamun umujakui. Untsu kanakug dita kanamunum ayaumas kanujakui. Tuja nunú múuntak uwignak niina nawanjijai betek kuitamajakui.
2SA 12:4 “Tuja makichik tsawantai makichik aents nunú wiakchan ijagsatatus jegajuauwai. Nunikmatai, niinu uwig aidauk, baka aidauk shiig kuashat ayaig, nuna maa ijag ajamtan sujimak, ujudauchi uwigji makichkiuch pujaun atanki maa inagkauwai, ijagkan ajamsatatus”, tiuwai.
2SA 12:5 Nuna David antuk, senchi kajeka Natágkan chichajak: “¿Wagkag tikima nunash dutikawabi? ¡Nunú aentsuk shiig pegkegchauwai! Nuadui, Tuke Pujuu pachisan tajame: ¡Nuna dutikauwa duka dekas mantamnamainai!
2SA 12:6 Nuigtushkam nuna dutikauk cuatro uwija akiken akikmamainai, wagki aents ujudauchin wait anenjachu asa”, tiuwai.
2SA 12:7 Tusa tutai Natán ayaak: “¡Nunú aents pegkegchauwa duka ametme! Nuadui Tuke Pujuun Israel aents aidau Apajuín emematin aina nunú yamai juna aatus tujamui: “ ‘Wi aminak Israel aents aina nuna apuji ati tusan adaikamiagme. Tuja Saúl maawai tusanchakam ayamjukmaijame.
2SA 12:8 Ame pujusa inamjatnunash, amina apugmi nuwe aidaujai amasmaijame. Nuigtushkam Israel aents aidaun Judá wegantu aidaujai apuji awagsajame. Tuja wi imatikan amasuitag nunú ame diisam imanchauwaitkuig, aan kuashat amastajame timajai.
2SA 12:9 “ ‘Tujash ¿wagka mina chichameg intimjutkimesh wi dakitamush pegkegchaush takasume? Suntag amonita aents aidau Uríasan maatnume tusam inamjaume. Dutikawamin maawagmatai, ame niina nuwe atankiume.
2SA 12:10 “ ‘Tuja mina intimjutkim Uríasa nuwe jujukium nuadui, yamai nagkamas amina pataim aina nunak tuke puyajai mainiagtinai, dutikamu asag kuashat waitiagtinai.
2SA 12:11 Amina uchijum aina duke pempeentugmakiag waitkagmasagtinai. Tuja amina ikaa nuwem aina nuna uchijum atanjamki, amesh wainminig pan tsawai dutikati titatjai, wagki tikich aents aidaush ashí dekaatnume tusan.
2SA 12:12 Amek uumka takamsaume, tujash wika ashí Israel aents aidau dekainamunum tsawai pan iwainaktatjai’, tawai Tuke Pujuu”, tiuwai.
2SA 12:13 Tusa tama David Natágkan chichajak: “Tuke Pujuun pegkegchaun takagsajai”, tau. Tutai Natán ayaak: “Tuke Pujuu amina tudaugminak tsagkugtamjae, nuadui jakashtatme.
2SA 12:14 Tujash amek Tuke Pujuu tuke dushikiakum pegkegchau takamsaum duwi, amina uchijum akiina duka jakattawai”, tiuwai.
2SA 12:15 Nuna tusa ukuak Natán niina jeen wakitkiuwai. Nunikmatai pujus Uríasa nuween David uchin akiauwa nuna Tuke Pujuu jatan susauwai, dutikam senchi jau.
2SA 12:16 Nunitai David uchi jakai tusa Apajuín segaak, yujumkan yutsuk ijagma pegakjin kanutan dakitak, nugka tepes kanau.
2SA 12:17 Imanik waittai niina atuwe apu aidau jegajuawag inankitag tuidau. Dutikamash niig dakitau. Tuja ditajai ijunja yujumak yutanashkam dakitau.
2SA 12:18 Tujash nunú uchik siete tsawan wegak jakauwai. Nunikmatai suntaja apuji Davitan kuitamin aidau nii ujatan ishamaidau, wagki dita anentaimsag: “Uchi eke jatsaigkish ii niijai chichajinish, wake besemag dekapeau asa, ii tabaunak antugtamchama nuniaush ¿wajuk ujaktajiki uchi jakae tusaish? ¡Tusa ujajin nuna antuk nuni nagkaemas wake besemag dekapeak, pegkegchaunakesh dutikmainai!” tuidau.
2SA 12:19 Tusa chichaidaun David antuk, dekas uchik jakaegapi tiuwai. Tusa ditan untsuka iniak: “¿Uchish jakachmaka?” tau. Tutai: “Ehe, uchik jakame”, tiajui.
2SA 12:20 Tuja siete tsawantai uchi jak tepesua nuaduik Davitak makichkish maichui, tuja kugkuinnakesh nijamkachui, nuigtush jáanch pegkegnakesh nugkutsuk pujau. Nunik pujau uchi jakae tabaun dekaa, nugká tepau nantaki mainiuwai, nunik kugkuinun nijamak jáanchin yapagmamauwai. Nunik Tuke Pujuun ememattatus aak Apajuíjai chichatai aakmakbaunum wayauwai. Nunik Apajuín ememati ukuak, yujumkan sujusagmatai yuwatjai tusa niina jeen weuwai. Nunik jegamtai yujumak susam yuwauwai.
2SA 12:21 Yujumkan yuwamtai inake aidau chichajuinak: “Uchi iwaku pujusmataig aneakum yujumak yutsuk ijagma pujusam buutmaume, tuja uchi jakamtaig nantakim yujumak shiig yuwaum dusha, Apuh, amesh ¿wagka aniame?” tuidau.
2SA 12:22 Tiagtai David ditan ayaak: “Uchi jak tepema nuaduik Apajuí mina wait anenjug etsagagchaintash tusan yujumka yutsuk ijagma pujusan buutmajai.
2SA 12:23 Tuja yamai uchi jaka nuaduish ¿wagkanuk ijagma pujusnush buuttaja? Wika uchi ataktu tsagagti tusanuk tumaitsujai. ¡Wi jakun niijai ijunjatnaitjai! Untsu niig ataktu aneantag wijaig pujumaitsui”, tiuwai.
2SA 12:24 David niina uchiji Betsabéyai akiamu jakamtai, nuwe Betsabé buuttai etsagkeg ukukiuwai. Nunik pujau tikich tsawantin nuwen ijagsatatus wejiuwai. Nunik jegá niijai kanajui. Dutikam pujus ejapjuk uchi aishmagkun uchigmakui, dutikamtai David adaikauwai Salomón. Tuja nunú uchinak Tuke Pujuu anejakui.
2SA 12:25 Nuadui Tuke Pujuu profeta Natágkan akateak: “David niina uchiji akiina nunak Jedidía adaikati”, tusa tiuwai. Tusa tima David niina uchijin Jedidía adaikauwai.
2SA 13:23 Absalón aajakui Davita uchiji tikich nuwanum akiamu. Nunú niina yachin maa shiwagmaga tupikaki, Gueshur nugkanum yaakat Tecoa jegaa nuwi uumak pujusui. Nunik pujai Absalón wakitki taati tusa Joab Davitan tiuwai.
2SA 14:21 Makichik tsawantai apu David Joapan chichajak: “Absalón wakitki taa pujusti tusan tajai. Nuadui weme Absalón ujakta wakitki Jerusalén taati”, tiuwai.
2SA 14:22 Tusa tama Joab Davitan eme anentus tsuntsuma nijayin nugka antig pujus chichaak: “Apuh, ame mina wait anenjam nunak yamai dekas shiig dekaajai. Wi amina segabiajam nunú antugtuku asam, ame minak inatme”, tiuwai.
2SA 14:23 Aatus tusa, jiinki Gueshur nugkanum weuwai Absalógkan juki Jerusalén itaatatus.
2SA 14:24 Nunik wetai Apu chichaak: “Yamaikik Absalógkak minak waitkashtatui, tutupit niina jeen weti”, tiuwai. Tusa tibau asa Absalógkak apu pujamunmak wetsuk tutupit niina jeen weuwai.
2SA 14:25 Tuja Absalógjai ashí tikich Israel aents aidau ijumja diismash, niijai betek shigmauchik makichkish atsujakui. Absalógkak niina nawen nagkamas buukenish shiig shigmauch aajakui.
2SA 14:26 Niig maki makichik mijan amuebaunum intashin tsupimajakui, wagki intashi tsakatai tutitag dekapeau asa. Nunú intash tsupikbau dekapamak jimag kilo nagkaesau aajakui. Duka kijin dekapatai apunu aajakua duwi dekas shiig dekapa diisbau aajakui.
2SA 14:27 Absalógka uchijig kampatum aajakui. Untsu nawanji makichik Tamar daagtin shigmauch aajakui.
2SA 14:28 Absalógkak Jerusalén jegauwaitak, apu David eke waitkashti tibau asa, niina waintsuk jimag mijan pujau.
2SA 14:29 Nunik pujus makichik tsawantai Joapan untsukui, apu David ujatjukta, niijai chichastajai tusa. Tujash Joab dakitjauwai. Nunikmatai ataktushkam chichaman akuptukui. Tujash ataktushkam dakiajui.
2SA 14:30 Nunikmatai Absalón niina inake aidaun chichajak: “Joapa ajaji cebada ajakbau mina ajagjai apatdayas awa nunú wejijum ¡apejuatajum!” tiuwai. Tusa tima shimutkag Joapa ajajin apejuawajui.
2SA 14:31 Dutikiagtai Joab Absalógka jegajua chichajak: “¿Wagka amina inakem aidaush mina ajagnash apenawa?” tau.
2SA 14:32 Tama Absalón ayaak: “¿Wagka wisha Gueshur pujaunush juwish taamja? Dekas imaug pujumainnas miniyagtai tajai. Tau asan amina akateakun: ‘Yamai apuh, amina wainkatasan wakegajai, tuja wi pegkegchaun takamsamu akuig mantuata tajame’ tujamui tusam apu David ujatjukta tusan awematag tai, ame dakitau asamin aunak aikajai”, tiuwai.
2SA 14:33 Tusa tima Joab apu Davitan ujaktatus wejiuwai. Nunik jegajua ujakam, apu David Absalógkan untsukui. Dutikam apu pujamunum jegá, apun eme anentus tsuntsuma nijayin nugka antig pujusui. Unstu apu niina kumpamak shiig anentus yapinum kugkuasui. Dutika tsagkujug ataktu nii pujusa inamtaijin awayauwai.
2SA 15:1 Kuashat tsawan nagkaemakiu ai, Absalón makichik carro maanitain caballo aidaujai ikamkauwai. Dutika niina kuitamkatin aidaun cincuenta suntag yacha aidaun ijumjauwai.
2SA 15:2 Tuja Absalógkak kashi kashinig shiig kashikmas nantaki, yaakta waitijin jintá yantamnum tuké wajau. Nuwi wajas aents aidau utugchat ajam, apu chichama epegtujuati tusa minidaun chichajak: “Atumesh tuu yaaktanmaya ainagme”, tusa iniau. Tusa iniam: “Iik Israel aents aina nunú wegantu ainaji”, tuidau.
2SA 15:3 Tusa tiagtai Absalón chichajak: “Ame apu chichaman epegtujuati tusa wakegam duka dekas shiig pegkejai. Tujash apu niina aentsjin ame chicham epegkeata tusa adaikamuk shiig atsawai”, tau.
2SA 15:4 Tusa nuigtu chichaak: “¡Wika apu chichama epegkin ati tusa adaikamuitkunuk, utugchat ajamu wijai chichastatus minidaunak wi epegtumainaitjai!” tau.
2SA 15:5 Tusa tau asa, nuigtushkam aents niyai jegaunak, uwegnum achika kumpamak pagkuk yapinum kugkuau.
2SA 15:6 Tuja nuigtushkam aents aidau apu David chichaman iwagtujati tusa minidaunak kumpamak tuké pagkuk kugkuau. Dutikak Israel aents aidaun anentainak yampagtau. Nuadui niina apajin nagkaesau Absalógkan ima senchi eme anentuidau.
2SA 15:7 Tuja ipak usumat mijan pujus, Absalón apu Davitan chichajak: “Wisha Tuke Pujuun anagkuawaitag nuna umiktag tusan Hebrón wetag tajai, nunú minash wait aneasam ayu tujutta.
2SA 15:8 Wi Siria nugkanum Gueshur pujusan Tuke Pujuun segakun: ‘Ame Jerusalén awagtukiaminig, yaakat Hebrógnum wenu kuntinu maa apeakun ememattinaitjame’ tusan tiuwaitag nuna umiktag tajai”, tiuwai.
2SA 15:9 Tusa tutai apu ayaak: “Ayu, wetá”, tiuwai. Tusa tima Absalón yaakat Hebrógnum weuwai.
2SA 15:10 Tujash Hebrón eke wetsuk chichama etsejin aidaun akateg Israel aents wegantu aidau batsatunum ishimak, uwija kachuji umpuamun antuinakug: “Absalógkan yamaik Hebrógnum iina apuji atinun adaikaje tusa untsumkatnume”, tiuwai.
2SA 15:11 Tusa ishimak nuigtushkam Jerusalégnumian doscientos aents nii Hebrón wetai uyuntsatin aidaun ipauwai, dutikam nii chicham umiamunak dekachu asag niijai shiyakajui.
2SA 15:12 Tuja nuigtushkam, wi Apajuín emematkun kuntinun maan apetai uyuntusti tusa Davita chichajin apu aidaunmayan makichik Ahitófel daagtinun niina yaaktaji Guilo aajakua nuwi pujaun untsukui. Dutika untsukam Ahitófel Absalógjai weuwai. Nuadui Israel aents aidauk nuni kuashat Absalógjai ijunaidau. Nunidau asag shiig kuashat wajasajui.
2SA 15:13 Makichik aents chichama etsejin Davitan wejiuwai, Israel aents aidau Absalógjai ijunjaje nuninak aminak shiwagmatjamainawai tusa ujaktatus.
2SA 15:14 Dutika ujakam David suntaja apuji niinu aidau Jerusalén batsatun chichajak: “¡Yamaikiuchia duwik wamak pisajagmi, nuniatsjinig Absalón mantamain ainaji! ¡Wamak umintsatajum pisajagmi nuniatsjinig Absalón niina aentsji aidaujai amaintamak ashí Jerusalégnum batsatutinak amupamain ainawai!” tiuwai.
2SA 15:15 Tusa tutai, apu Davita chichajuinak: “Apuh, iik ame tabau umiktasa umintsa dakamji”, tuidau.
2SA 15:16 Tusa tiagmatai apu niina ikaa nuwe aidaun dieza imajin nii pujusa inamtaijin batsaak, nuwi ashí aents batsatu aidaujai jiinkiuwai.
2SA 15:17 Nunik jiinki ashí niina uyunaidaujai yaakat nagkatkamunum jega pujaunum nuna yantamen ijunjajui.
2SA 15:18 Nunikag ashí suntaja apuji aidauk niina ejapeawajui. Nuninai untsu quereteo aidau, peleteo aidaujai, apu pujusa inamtain kuitamin aidau, nuigtu seiscientos geteo aents aidau aatus yaakat Gadnum nagkamas apu pataetukaju aidauk apu wetai eemak shimujakajui.
2SA 15:19 Nunik shimuinamunum makichik aents Gadnumia Itai daagtinun apu chichajak: “¿Wagka amesh jutijaish minimume? Amek dekas wakitkim yamajam apu ekemi nujai pujusta, wagki amek nuigtushkam nugkem ukuakum tikich nugkanum pujame.
2SA 15:20 Wika wi pujustinnakesh shiig dekaa weatsug nuniaunush ¿wagkanuk wisha aminash yau taamum nuniauminash jutijai minita tusanush titagme? Dekas amek wakitkita nunikam amina pataim aidau batsatbaunum pujusta. ¡Tuke Pujuu pegkegnum yumigtamsati, dutijamak tuké kuitamjamkatin ati!” tiuwai.
2SA 15:21 Tama Itai apu Davitan ayaak: “Apajuísh antai, tuja apuh ameshkam antamin tajame: ‘Wika ame tuwi pujuttame, tuja tuwi jamainnumkesh wekaetatme, nuwi wishakam amejai amina inakem asan wekaetatjai’ ”, tiuwai.
2SA 15:22 Tusa imattai David ayaak: “Ayu, kame takumek minita”, tiuwai. Tusa tima Itai David weamunum niina patayi aidaujai, nuigtu tikich aents aidau niina uyunaidaujai aatus ijunag weuwai.
2SA 15:23 Nunik shimuinak David niina uyunaidaujai senchi buutuidau. Nunikag shimui shimuinakua, entsa chichijam Cedrón tutainum jegawag nuna ashí katitjajui. Nunikagmatai Davidchakam katigkui. Nunikag Davidjai ijunag jinta uwegshunum wetainum shiyakajui.
2SA 15:24 Tuja sacerdote Sadokshakam ashí Leví wegantu aidaujai chicham umiktin agagbau egkeamun arcan yanaki jukiag shimuidau, nunik shimui shimuinakua ashí aents yaaktanmaya jiinjagmatai, nunú arcanak sacerdote Abiatarai ukukiajui.
2SA 15:25 Dutikawagmatai David sacerdote Sadokan chichajak: “Chicham umiktin agagbau egketu arca Apajuínua duka yaakat Jerusalén awagkitajum, wagki Tuke Pujuu mina wait anenjakug Jerusalén ataktu awagtuktatui, dutijakui juju chicham umiktin arcanum egketu ukuktatag duka Niina aakjinig aun ataktu wainmainaitjai.
2SA 15:26 Untsu Apajuí wait anenjachu asa juwig pujusti tujutkuig, nunashkam nii wakegamua nunisag uminkati titatjai.”
2SA 15:27 Tusa nuigtushkam sacerdote Sadokan chichajak: “Amek Abiatarjai Jerusalén wakitkita, tuja atum wegakjumek uchijum jukijum wetajum. Ame jukita uchijum Ahimaas, tuja Abiatar jukiti uchiji Jonatágkan.
2SA 15:28 Atum nunika shimagmin untsu wi uwejush tepetpetua nuwi pujuttajai, wakitki taajum chicham ujatkamnujum tusan”, tiuwai.
2SA 15:29 Tusa tima Sadoc Abiatarjai Apajuí arcajin jukiag Jerusalén wakitkiajui, nunikag nuwi batsatu.
2SA 15:30 Nuninai David Olivo nain tutainum wakauwai. Nuwi weakug sapati weamatsuk wake besemag dekapeak datsaamamunum buuken dukuka buu buutkawa weuwai. Nunitai aents aidau niina uyudaidaushkam nunisag buuken dukuka buu buutuinakua shimuidau.
2SA 15:31 Tuja Ahitófel Absalógjai chichaman uminawai tabaun antukag Davitan ujakajui. Nuna David dekaa, Ahitófel tabaun Absalón antugkashti tusa, Tuke Pujuun ausauwai.
2SA 15:32 Nunik Davitak wea weakua muja titijin nii yaunchuk Apajuín emematak kuntinu maa apejakua nuwi wakauwai. Nunikmatai makichik aents Husai daagtin arquita aents wegantu jáanchjin japiki ichigka buuken nugka yukukuntun yukumag jiinkiuwai, Davitan igkugtatus.
2SA 15:33 Nunik minittaman David chichajak: “Ame wijai minakminig kakajus tupikakin Absalón mantuawai tusan uumainchau atatjai.
2SA 15:34 Untsu mina yainkatag takumek Jerusalén jegam Absalón chichagkum: ‘Wika ame inakmetjai, nuniau asan yaunchuk amina apa umijin ayag dutiksanuk amina umigkatjame tajai’, tita. Tusa tamin ayu tusa niina inake etamataig, nuwi pujusam Ahitófelash wajintuk chichat, nunú ame nii tabau yapagtumainaitme.
2SA 15:35 Tuja Sadoc Abiatarjai imau batsata nunú chichaman mina ujatiagtatui. Tuja Absalógkash nii pujusa inamtaijin pujusash wajintuk chichamnash umiawa mina shiwagmatuinakush, nunú antukam ame dita ashí ujattame, nuna untsu dita mina ujatiagtatui.
2SA 15:36 Nuigtushkam sacerdote Sadoc, Abiatar, nuigtu dita uchiji Ahimaas, Jonatán aatus mina chichama ujatkagtin batsatui. Nuniau asamtai, ame dekamu aidauk ditai yunumka pujusam wajintuk chichajat nunú ashí ujatkata”, tiuwai.
2SA 15:37 Tusa tima Husai Davita kumpaji aajakua nunú wea weakua Jerusalén jegakma Absalógchakam Jerusalén jegá wayaig betek niishkam jegauwai.
2SA 16:1 David mujanum pujau chichama dekaa jiinki muja nagkaiki ujumak kuwagai, Sibá Mefi-boshetan inake aajakua nunú jimag burron entsamkatin umikbaun juki, nuwi doscientos pag chimpiamun, uva juukbaun cien nantagkun, tuja uva ekaeja cien pag najanamun aatus pataja, nuigtu umutai vinon juki Davita igkugtatus weuwai.
2SA 16:2 Dutika igkugkam David niina iniak: “¿Aancha itugkatna imatikamesh iniime?” tau. Tama nii ayaak: “Juju burro aina juka amina nuwem aidau, uchijum aidaujai pekamiagtinai. Untsu pag aina nunak, uva ekaekamu aina nujai amina inakem aidau yuwawagtinai. Tuja umutai vinoa juka jintá uwegshunum shimamunum yaki pimpiawa nunú uwajagtinai”, tiuwai.
2SA 16:3 Timatai David iniak: “¿Amina apujum Saúl aajakua nuna tijaji Mefi-boshetash wajukame?” tau. Tama Sibá ayaak: “Auk ame tupikakiamin niina apachji Saúl apu aajakua nuadui mina apu adaitukchajaintash tusa Jerusalén juwakmae”, tau.
2SA 16:4 Tusa tutai David niina chichajak: “Ayu, dekas nii tuu wekagu asamtai, Mefiboshetdau aajaku aina nunak amina amastajame”, tiuwai. Tusa tima apu emtin tsuntsuma pujus chichaak: “Wi ame wakegamun umiakui, ame mina yamai wait anenjujum aikasmek tuké wait anenjugtin ata tajame”, tiuwai.
2SA 16:5 Aatus chichasa ukuak Davitak aents niina uyunaidaujai we wenakua yaakat Bahurim jegawajui. Nuninai nuwiya makichik aents Saúl wegantu Guerar aajakua nuna uchiji Simí daagtin jiinki, Davitan pegkegchaun chichaju.
2SA 16:6 Imatjak kaya juki Davitan tukutatus nagkiau, dutikak niina suntaji aidaunashkam nagkiau. Dutiktai Davita aentsji aidau, suntag niina kuitamin aidaujai tentea ejapeawag emainaig,
2SA 16:7 Davitan pegkegchaun chichajak: “¡Magkagtinu, juwi pujutsuk wejumta!
2SA 16:8 ¡Ame apu atasam Saúla patayi aidau amukuitam duwi Tuke Pujuu aminak suwimkan amawai! ¡Nuna umiak Tuke Pujuu yamai amina atanjamki, amina uchijum Absalógkan apu emattawai! Ame juwi wekaesam waitiam duka amina pegkegchaugmin waitiame. Amek dekas pegkegchau magkagtinaitme”,
2SA 16:9 tusa imatjutai, Abisaí Seruiá uchiji aajakua nunú apu Davitan chichajak: “¿Wagka jusha annaitkush aminash pegkegchaunash chichagtamua? ¡Dekas yamaikiuch niina buuken tsupigkan maatjai!” tau.
2SA 16:10 Tutai apu ayaak: “Atum Seruiá uchijitigmek tuke aanin chichá yujagme, tujash wika dutikatajum tichattajai, wagki nii mina pegkegchaun chichagta nunak Tuke Pujuu tita tibau asa tawai. Nuadui makichik aentskesh, wagka dusha tame tusag niinak tumain ainatsui”, tiuwai.
2SA 16:11 Nuna tusa Abisaín, suntaja apuji aidaujai chichajak: “¡Mina uchigkesh mantuatag tujuta duwi, Benjamín wegantua duka dekas minak mantuatag tawai! ¡Idaisatajum pegkegchaun chichagtakush chichagtukti! ¡Tuke Pujuu tita tibau asants tujutatai!
2SA 16:12 Tuke Pujuu wi waitiamun diigtus au aents mina yamai pegkegchaun chichagta nuna yapajia pegkegnum yumigtumainai”, tiuwai.
2SA 16:13 Aatus tusa niina aentsji aidaujai, nuwi nagkaemakiag shimuidau. Nuniagtai Simí David weamunum yantamen peentaunum wesa pegkegchaun chichajak, kayai nagkiak, nugka yukukuntun juki yukuau.
2SA 16:14 Tuja Davitak niina aentsji aidaujai namak Jordán jegawajui, nunikag senchi yawejaju asag nuwi ayamainak batsamsajui.
2SA 16:15 Tuja Davitak niina aentsji aidaujai tupikakiag imau yujainai, Absalón Ahitófeljai nuigtu ashí Israel aents aidaujai Jerusalén jegawajui.
2SA 16:16 Nuninai Husai arquita aents Davita kumpaji Absalógka jegantun senchi untsumak chichajak: “¡Ameketme apumek, ameketme apumek!” awaju.
2SA 16:17 Imatjam Absalón niina iniak: “¡Wika aminak mina apag Davitan shiig kumpajimpapi tinugme! ¿Wagka amina kumpagmijaish wechamume?” tau.
2SA 16:18 Tama Husai ayaak: “Wika Tuke Pujuu yana etegkattawa apu ati tusa, tuja nuigtushkam Israel aents ashí ijunag etegkawagtata nuna yayaakun pujustag tau asan juwakmajai.
2SA 16:19 Ame apu uchijiyaitam nuna umigchaknush wisha tujash ¿yanak umigkatja? Nuadui wika amina apan umijiag dutiksanuk amina umigkattajame”, tiuwai.
2SA 16:20 Tusa timatai idayas pujus Absalón Ahitófelan iniak: “¿Amesh minash wajukati tujutme?” tau.
2SA 16:21 Tusa tama Ahitófel chichajak: “Amina apa tupikak niina ikaa nuwe aidaun jega kuitamkati tusa batsaki nujai kanagta. Dutikawamin ashí Israel aents aidau dekas niina apajinak shiwagmagapi tujamiagtatui. Aatus tikich amina yaimpaina dushakam aminí agtatui”, tau.
2SA 16:22 Nuna tusa jega tuntupen carpan aakmatkajui. Dutikawagmatai nuwi apaji ikaa nuwe batsatun yajuak utsaa, ashí Israel aents aidau wainainamunum ditan kanutjauwai.
2SA 16:23 Tuja nunú tsawantinig Ahitófelan chichameg Apajuín chichamejai betek tumain aajakui. Nunak David pujusmataish iman aajaku asa, Absalón pujusmataish imanuk aajakui.
2SA 17:1 Duwi pujus Ahitófel Absalógkan chichajak: “Amina suntajum maanitan yacha aina iman etegjam doce mil sujusta. Dutikawamin yamai kashia duwik Davitan pataetuktajai.
2SA 17:2 Dutikan pimpiki ayamak pujaun amainagkan, niina aentsji aidaun uwaaka ishimkun nigki juwakmatai maatjai.
2SA 17:3 Dutika ai ashí aents aidauk nuwa aishina niina apajin dukujijai ukuak, aishijai wegama numamtuk waketug aminí kaunattawai, wagki amek ima Davitak mantamnati tusam wakegame. David mantamnamtai ashí Israel aents aidauk agkan ijunag utugchat atsaunum batsamsagtatui”, tiuwai.
2SA 17:4 Tusa timatai Absalón nuna shiig pegkeg diisui, tuja Israel aents aidaun apuji aidaushkam pegkejai tiajui.
2SA 17:5 Tujash Absalógkak Husai untsuka utitajum niish wajintuk anentaimua nunú dekajuami tiuwai.
2SA 17:6 Tusa tima Husai jegamtai, Absalón chichajak: “Ahitófel chichaak: ‘Yamaikiuch David pataetukmi’ tawa dusha ¿amesh wajintu anentaime? nunú tukagtita”, tau.
2SA 17:7 Tama Husai ayaak: “Yaunchuk pegkejan tujamin akush, yamai tujama nunak pegkegchaun tujamne.
2SA 17:8 Amek shiig dekame amina apak niina aentsji aidaujai maanitan yacha ainawai. Iman asag chayú uchiji yajutkam kajeka ishamain wajama imaninawastai. Nuigtushkam amina apak yaunchuk nagkamas maanitnak unuimatjauwai. Nuadui niig aneaku asa tikich aents aidaujai ijunjag kanagchattawai.
2SA 17:9 Yamaikish auk niig waanmagkesh, nuniachkush tikich yantamnumkesh uumkas pujatai. Tuja ame jeteamin amina suntajum aidaun ujumak jinaamtaig, tikich Israel aents aidau nuna dekawag Davitap dekas niina suntaji aidaujai depetkae tusa niina eme anenjagtatui.
2SA 17:10 Nuniagtai amina suntajum dekas wajiu leónjai betek kajen aidaush nuna antukag maaniachmin dekapjagtatui, wagki Israel aents aidauk ashí dekainawai, amina apak niina aentsji aidaujai wajiu aina nuna.
2SA 17:11 Nuadui wika dekas Israel aents aidau yaakat Dagnum nagkamnas yaakat Beershebanmaya aatus suntag shiig kuashat nayantsa kamatkaji dekapamainchauwa iman batsata nunú ipaam ijumjata. Dutikam nunú ame yajuakam dekas wejita tumainaitjame.
2SA 17:12 Dutika amina apash tuwig pujawa nunú jeteka, yumi sajatuk kakegama numamtuk pachiachbau utsantua ashí niina aentsji aidaujai ijinami dutikam makichkish iwakuk juwakchati.
2SA 17:13 Tuja David tupikaki tikich yaakat utumainchau peejamunum uumkamtaish, ashí Israel aents aidauti daek yajutka yaakat peejamu anaa japiki entsanum utsaattaji, dutika ajin makichik kaya pujaukesh atsuttawai. Nunikmatai utua amina apa pujau wainka maattaji”, tiuwai.
2SA 17:14 Aatus Husai timatai Absalón ashí Israel aents aidaujai wakejukajui, wagki Ahitófel tibaun nagkaesau pegkeg asamtai. Ahitófel tibaun yapagtuawa nunak Tuke Pujuu tibau asamtai dutikauwai, wagki nuna dutikamtai David Absalógkan depetkati tau asa.
2SA 17:15 Aatus tusa ukuak Ahitófel wajintu Absalógkan ashí Israel aents aidaujai ijumag tine nuna pachis, tuja niish wajintu Absalógnash tine nuna aatus Husai sacerdote Sadokan Abiatarjai ujakui.
2SA 17:16 Dutika ditan chichajak: “Wamak shiyakjum David ujaktajum, dita batsata nuigkik batsamtsuk nuna ukukiag namak Jordágka amain katiagtinme. Untsu nuna nunichagtaik, Absalón niina suntaji aidaujai amukagtatui”, tiuwai.
2SA 17:17 Tuja Davitan ujakagtinuk Jonatán Ahimaasjai yaaktanum wayajin waipakainum tusag, yaaktanum jegattak yumi pukuni jiinin Roguel tutainum nuwi uumak dakamainak batsatu. Nuninai makichik nuwa inak weji ujakui. Dutikam nuna Davitan ujakagtatus jiinag shimuidau.
2SA 17:18 Núnidaun makichik uchi wainak, Absalógkan ujaktatus wejiuwai. Nunitai Jonatán Ahimaasjai waugtusag makichik aents dita waintai yaakat Bahurim tutainum pujujakua nuna jeen jegawajui. Nunikag nuna agájin yumigmat taimunum nuwi egkemawag uumkajui.
2SA 17:19 Nunikagmatai nuna nuwe yumigmat dukutain juki dukuka nuwi trigo akagbaun ukaja, yumigmat taimunak wainmainchau emauwai. Dutikamu asamtai makichkish yumigmatnak wainkachaju ainawai.
2SA 17:20 Nunik chimpijai Absalógka inake aidau nuwi jegawag nunú nuwan iniinak: “¿Ahimaasash Jonatágjaish tuwi batsatua?” tuidau. Tusa iniam nii ayaak: “Juwi kaunawag namaka aatu shiyakmae”, tau. Tusa timatai shimutkag egai egainakua wainkachag Jerusalén waketjajui.
2SA 17:21 Nunik waketjamtai Ahimaas Jonatágjai jiinkiag tupikaki shiyakajui Davitan ujakagtatus. Nunik jegawag ujainak: “Wamak umintsajum Jordágka amain katiagtajum, wagki Ahitófel atumi mantamatatus chichaman Absalógjai umikaje”, tuidau.
2SA 17:22 Tusa ujakajam David niina aentsji aidaujai ashí jiinjag waugtusag Jordágka amain katiajajui. Nunak nunú kashia duwik ashí katiajajui.
2SA 17:23 Tuja Ahitófelak nii tibau umigkacham kajeka niina burrojin entsamak niina jeen yaakat nii akiinamujin weuwai. Nunik jegaa niina patayi aidaujai ashí chichas uminak, suween daekai jigkama jakauwai. Nunik jakamtai niina apaji ukusbaunum ukusajui.
2SA 17:24 Davitak Mahanaim jegau ai, Absalógkak niina suntaji aidaujai pataetuk Jordágkan yama katituidau.
2SA 17:25 Tuja Joab suntaja apuji aajakua nuna yapajia Amasá Joapa ikaa yachi aajakua nuna Absalón adaikauwai. Amasá aajakui Ismael aents Itrá aajakua nuna uchiji, niig Nahasa nawanji Abigail Davitan ikaa umayi aajakua nuwi akiamu aajakui. Abigail aajakui Seruiá umayi Joapan dukuji.
2SA 17:26 Tuja Absalógkak tikich Israel aents aidaujai Galaad nugkanum jegawajui.
2SA 17:27 Nuninai David Mahanaim jegamtai, Nahasa uchiji Sobí Amón nugkanum yaakat Rabánmaya, tuja Amiela uchiji Maquir yaakat Lodebarnumia, nuigtu Barzilai nugka Galaadnum yaakat Roguelimnumia aatus Davita igkug kumpamatatus jintukiajui.
2SA 17:28 Nunik shimuinak David niina aentsji aidaujai susatnun: Jáanch asepatai aidaun, shikika umutai aidaun, ichinak aidaun aatus yajuakajui. Tuja nuigtushkam trigon, cebadan, harinan, trigo duwikbaun, haba aidaun, lenteja aidaun,
2SA 17:29 dapa yumijin, mantequillan, uwijan, nuigtu baka muntsujijai queso najanamun aatus yajuakag David niina aentsji aidaujai yuwati tusa ejetiajui. Nunak dita anentaimas: Uwegshunum mininak pimpiki yapagkiag kitajag mininawai tusag dutikawajui.
2SA 18:1 David niina suntaji aidaun ashí dekapajui, dutika mil suntajan apuji agtinun, cien suntajan apuji agtinjai adaitujui.
2SA 18:2 Nuna dutika nuwiyan kampatuma imajin akanag ijumag nunú makichik akanka ijumjamun apujin Joapan adaitukui, tuja tikich akanka ijumjamu apujin Abisaín adaitukui. Juju jimaja juka Seruián uchiji aajakui. Untsu tikich akanka ijumjamun apuji atinun Itai Gadnumia aajakua nuna adaitukui. Dutika ashí ijumag chichajak: “Wishakam maaniamunmak atumjai minittajai”, tiuwai.
2SA 18:3 Tutai dita ainak: “Dekas apuh amek minipa, wagki shiwajak ii aidautinak imanikag puyatjupainatsui, nuadui ii pisaajinish idaitamainai, nuniachkush jimaitukesh amupak idaitamainai. Tujash amek ii diez mil ainag nuna nagkaesau akikaitme. Nuadui amina dekas mantamawagtatus wakejutpainawai. Nuadui apuh, amek dekas juju yaakta juwig pujusam iina depetamainakui atujatkatin ishiakta”, tiajui.
2SA 18:4 Tusa tama: “Ayu, atum tajum duke ati”, tiuwai. Tusa tamawaik yaakta waitiji yantamen wajasui. Nunik wajai suntag mil akanjamu aidau, cien akanjamu aidaujai aatus jiinaidau.
2SA 18:5 Nunú eke shimuinatsaig apu David chichaak: “Absalón wainkugmesh tikima maawaigpa”, tusa, Joapan, Abisaín, Itain aatus ujakui. Tusa taun suntag aidau ashí antukajui.
2SA 18:6 Aatus suntag aidau jiinag tikich Israel aents aidaujai maaniawagtatus shiyakajui. Nunak ikam Efraín tutainum maaniawajui.
2SA 18:7 Nuwi maaninak Davita aentsji aidau tikich Israel aents aidaun depetkajui. Nuwi maaniamunum shiig kuashat jinauwai. Ashí ijumjamak veinte mil aents jinawajui.
2SA 18:8 Nunú tsawantin ashí nugkanum maaniau ainawai. Tuja nuwi maaniamunmak puyajaik imanikag jinachajui, ikam shiig múun ishamainnum maanidau asag, imannum wainak akuumak yujasag ima kuashat jinawajui. Aatus Absalógka suntaji aidau shiig kuashat jinauwai.
2SA 18:9 Tuja Absalógchakam burronum entsamak wekama Davita aentsji minidaujai pachiachbau igkunikui. Nuna burro wainak ishamak tupikaki numi encina tutai ayaunum akumkauwai. Nunitai Absalón nuna numi kanawen kuntujen eteemamtai, burro tupikak ukukiuwai, dutikam yaki numi kanawen detau.
2SA 18:10 Nunik detaun makichik aents wainak tupikaki jegaa Joapan ujaak: “¡Absalón numi kanawen eteema detaun wainkamjai!” tau.
2SA 18:11 Tusa ujaam Joab niina chichajak: “¿Wagka wainkayatkumesh nuwig maa ukukchamume? Dutikawaminig plata diez najanamu aidaun makichik akachumtaijai amamain awajkajame”, tau.
2SA 18:12 Tusa tama nunú suntag niina chichajak: “Nunú mil plata sujakminish, wika apu uchijinak maumaitsujai, wagki apu amina, Abisaín, Itain aatus chichagtamainak, mina uchijuk maawaigpa tujamaidau ashí antukmag nuadui.
2SA 18:13 Tuja wi maamtaig apu Davitak tuké dekamainai, wagki niig makichkish uumjukaik idaimaitsui. Niig iniimas tuke dekamainai. Nunik dekamtaig amekesh minak ayamjutmaitsume, nii minak mantumainai”, tiuwai.
2SA 18:14 Tusa tutai nii ayaak: “¡Amejai chichaaku tsawan megkaemainuk atsugtawai!” tusa ukuak kampatum nagkin juki Absalógkan jegantun iwaku detaun aketuk kampatuma imania detsepnum ijuwai.
2SA 18:15 Dutikamtai Joapan uyunaidau diez aents yujau Absalógkan tenteawajui. Dutikawag awenawag maawajui.
2SA 18:16 Dutikawagmatai, Joab uwija kachuji umpuagtajum tusa inamjauwai. Tusa tima umpuajagmatai, suntag aidauk tikich suntag Israel aidaun aintug shimuidau ukukiajui, wagki Joab ukuktajum tau asamtai.
2SA 18:17 Nunikag Absalógka iyashin jukiag nunú ikamnum waa múun aunum nuwi egkeawajui, dutikawag nuwi kaya múun aidaun yajuakag shiig kuashat ijumjujag ukukiajui. Tuja tikich suntag Israel aents aidauk Davita suntaji aidau pataetuk shimuidau ukukiajam, maki makichik dita jeen pisajajui.
2SA 18:18 Absalón iwaku pujusa niina niimen dakumak kayai najanauwai. Nunak nii anentaimas: “Mina uchijuk atsa duwiyap wika jakanuk makichkish pachikcham megkaemainaitja”, tau asa nii iwaku pujusa dakummamak najanamujin, Absalón adaikauwai. Duka yamaikish Absalón dakummamak najanamu tutai nugka paka, apu nugke tutaya nuwi awai.
2SA 18:19 Tuja Sadoka uchiji Ahimaas Joapan chichajak: “Tuke Pujuu amina ayamjutpak shiwaajum aidaunak ijinae tusan apu Davitan tupikakin wenu ujaktajai”, tiuwai.
2SA 18:20 Tama Joab ayaak: “Amek yamaik chichamak etsegkashtatme, tikich tsawantin etsegkata, wagki yamaik apu uchiji mantamnae”, tiuwai.
2SA 18:21 Tusa tiuwaitak suntag etiope aentsun chichajak: “Ame wetá nunikam apu pujamunum jegam ame waji wainkaume nunú ashí ujakta”, tiuwai. Tusa tima niina eme anentus tikishmag nugkan nijayin antig pujau wajaki tupikaki weuwai.
2SA 18:22 Nunikmatai Ahimaas Joapan ataktu chichajak: “Dekas minash idaitusta wisha etiope aents wega nujai wetajai”, tau. Tutai Joab ayaak: “¿Wagka amesh nunú chicham etsegbaunum pegkeg waji jukitnunigkish wetag tame?” tau.
2SA 18:23 Tama Ahimaas ayaak: “¡Duka puyatjukaipa, juachkunush jukishtajai. Wika wamak tupikakin wetag tajai!” tau. Tutai Joab ayaak: “¡Untsu takumek, tupikakim wetá!” tiuwai. Tusa tima nugka paka tepajunmanini tupikakiuwai. Nunik etiope aentsnak amayag nagkaikiuwai.
2SA 18:24 Nuninai Davitak yaakat Mahanaima waitijin nuna yantamen eketu. Nunik eketai suntag jinta kuitamin yaakat peejamu waitijin nuna yakin wakauwai. Nunik niimkama makichik aents tupi tupikakua midaun wainkauwai,
2SA 18:25 nunik apu David antukti tusa senchi untsumkauwai. Nuna antuk apu chichajak: “¡Ima nigki minakug, chicham pegkejan etsegkatatus minak aniawai!” tau. Tuja nunú aents tantattak minai,
2SA 18:26 tikich aentschakam nuna ukujin tupi tupikakua midaun wainkauwai. Nunik nunú suntag waiti kuitamin untsumak: “¡Tikishchakam tupi tupikakua minawai!” tau. Tutai apu ayaak: “¡Niishkam chicham pegkejan etsegkatag tusas minatai!” tiuwai.
2SA 18:27 Tutai waiti kuitamin awentsag chichaak: “Tupikamuji diigsamash Sadoka uchiji Ahimaas diyajai eemak mina nunak”, tau. Tutai apu ayaak: “¡Niig aents shiig anentaimkauwe, chicham pegkejan etsegkatasas minatai!” tau.
2SA 18:28 Tusa chichaak eketai, Ahimaas tupikaki taakug apu eketun jegantun tikishmag tsuntsuma nijayin nugka antig pujus kumpama chichajak: “¡Tuke Pujuu amina Apajuígmia duke ememattai ati! Wagki amina kajegtamiagma nuna, amina suntajum aidau depetkati tusa nii timatai depetkag ayamjutpaku asagmatai”, tiuwai.
2SA 18:29 Tama nii iniak: “¿Absalógkash pegkejak wekaema?” tau. Tama Ahimaas ayaak: “Joab mina chicham etsegkata tujutmatai tupikakin minai, mina ukujui suntag aidau shiig senchi pampaidaun antukmajai. Tujash dekachmajai wagkas imatiagma”, tau.
2SA 18:30 Tutai apu David chichajak: “¡Menasta, nunikam anui wajasa dakamsata!” tama Ahimaas ayu tusa menaas wajasui.
2SA 18:31 Nunik wajai etiope aentschakam tupi tupikakua tantauwai. Nunik apu Davitan chichajak: “Chicham pegkejan itaag nunú amesh, mina apujuh, antukta. Yamai Tuke Pujuu amina ayamjutpak shiwag amina kajegtamiagma nunak ashí ijina agkanmitkagmae”, tau.
2SA 18:32 Tusa tama apu David etiope aentsun iniak: “¿Absalógkash pegkejak wekaema?” tau. Tama nii ayaak: “Apajuí waketaik nunú uchi Absalón jakama nunisag tikich amina kajegtamaina dushakam itugkag ashí jinawanum tusan wakegajai”, tau.
2SA 18:33 Nuna antuk apu anentain inagmakui. Nunik waitinum yaki kanutai umikbaunum nuwi waka buutiuwai. Tuja nuwi wekagas buutkabaikia chichaak: “¡Uchuchi Absalógka! ¡Uchuchi Absalógka! ¡Wi mantamnamain ame mantamnaume! ¡Uchuchi Absalógka!” waja wajas buutu.
2SA 19:1 Apu David Absalón jakamun dekaa buutui tabaun niina uyunainak Mahanaim jegawaju aidau dekawajui. Nunikag ujumak aents Joapan ujaktatus wejiajui.
2SA 19:3 Nuna suntag aidau antukag depetmakaju asag shiig aneasag waketmainun, ayatak datsaajag depetmakchauti wajukmaina numamtuk wake besemag waketjajui.
2SA 19:4 Nuninai apu David yapiin jáanchi dukumak senchi jiika buutak: “¡Uchuchi Absalógka! ¡Uchuchi Absalógka! ¡Uchuchi Absalógka!” wajau.
2SA 19:5 Imatak niina inamtaijin pujusa buutak pujuttaman, Joab jegajua chichajak: “Amina, tuja amina nuwem aidau, uchijum aidau, nawanjum aidau, ikaa nuwem aidau aatsa ayamjaku, amina kajegtamiagma duka yamai depetka ijinaji. Dutikau ajinig, amek ii pegkegchau takamsamtai datsankagtakum wajukmaina aan pujame.
2SA 19:6 Amek suntaja apuji aidau, nuigtu amina suntajum aina dushakam eme anentsa diyatsum nunú yamai paan iwainmamkaume. Nuniau asam ya amina kajegtamua nunú ima senchi aneakum, amina anempaina nunú kajejame. Amek ii jinaa ajinish puyatkagtutsuk, Absalón iwaku pujakuig shiig aneasa pujumain asam aniame.
2SA 19:7 Aní pujutsuk jiinkim amina suntajum aina nunú anentai ichichtugta. Ame dutikchataik, amina aentsjum aina duka makichkish juwi batsamsag tsawagchagtatui. Nunikagmatai amek juwaktatme. Nunak Tuke Pujuu daajin tajame. Nunú atatui ame yaunchuk datsauch asam utugchat igkugkuitam nuna nagkaesau utugchat igkugtatam nunú”, tiuwai.
2SA 19:8 Tusa tima apu David yaakta waitijin jeganta ekemsauwai. Nunikmatai ashí aents aidau nuna dekaawag apu eketbaunum jegantag ijunjajui. Ashí Israel aents aidauk pisajag maki makichik dita jeen shiyakajui.
2SA 19:9 Nunikagmatai Israel aents maki makichik wegantu aidau chichainak: “Iina shiwaaji aidau waitkagmagma nunak David ayamjutpakji, tuja filisteo aents aidau waitkagmaidaunashkam ayamjutpak agkanmitkagmaji. Imanape tama Absalógka ishamak tikich nugkanum tupikaki wekaewai.
2SA 19:10 Untsu Absalón iina apuji atin adaikamiag duka maaniamunum jakae. Nunika duwish ¿wagka David nigki ataktu iina apuji ati tumainchauwaita?” tuidau.
2SA 19:11 Aatus Absalógka aentsji aajaku aidau tuinamun David dekauwai. Nunik: “Sacerdote Sadokan, Abiatarjai Judá wegantu aidaun apuji múun aidau iniastajum: ‘¿Wagkag ditash minash wakitki niina inamtaijin taati tusash untsujuinatsua?
2SA 19:12 Dita ainawai wi wegantu mina pataag aina duka. Nuadui dita ainawai dekas mina taati tusag untsugmain aina duka’ ”, tiuwai.
2SA 19:13 Tusa nuigtushkam Amasán chichajak: “Ameshkam minak dekas shiig pataachijuitme. Nuadui Joab suntaja apuji puja nuna yapajiakun amina apu adaikattagme. Tuja nuna wi umishtaik, Apajuí suwimkan sujusti”, tiuwai.
2SA 19:14 Nuna tusa Judá wegantu aidau wainak chichá yujaun imijkauwai. Dutikam dita ashí ijunag apu David wakitki niina suntaji aidaujai Jerusalén taati tusag chichaman akuptukajui.
2SA 19:15 Nuna dekaa apu David niina aentsji aidaujai wakitkiag namak Jordágnum jegawajui. Nuninai Judá wegantu aidaushkam David niina aentsji aidaujai Jordán katiniagtai, yaigkagtatus shimutuinak Guilgal jegawajui.
2SA 19:16 Nunik shimiagtai Simí Gera uchiji Benjamín wegantu Bahurimnumia aajakua dushakam apu Davita igkugtatus tupikaki ditajai ijunag weuwai.
2SA 19:17 Nunik wetai mil aents Benjamín wegantu aidau uyuniajui. Tuja Sibá Saúla jeen pujusa tsakajua dushakam niina uchiji quince aajakua nuna yajuak, nuigtu veinte inake aidaun yajuak eke apu David Jordán jegatsaig niyá jegauwai. Nunikag apu David batsatbaunum katiajajui.
2SA 19:18 Nunak nunikajui wagki apu David niina patayi aidaujai yaigka ikatiaja shiig anemtiksami tuidau asag. Tuja apu David Jordágkan katitkatatus uminai, Simí niina jegantun eme anentus tsuntsuma wajas
2SA 19:19 chichajak: “Ame Jerusalén jiinki weamin, wi amina pegkegchaun chichagkauwaitjam nunú wait aneasam tsagkugtugta. Tuja nuigtush anentaimtu pujutsuk kajimatkita.
2SA 19:20 Mina apujuh, wi dewakbaugnak dekagmamjai. Nuadui wika amina igkugtasan ima wiki José wegantunuk wiyá emkan taajai”, tiuwai.
2SA 19:21 Tusa tutai Seruián uchiji Abisaí chichaak: “¡Auk Simík apu Davitan Tuke Pujuu etegkamun pegkegchau chichagkau asa mantamnamainai!” tiuwai.
2SA 19:22 Tusa tutai, David ayaak: “¡Wainka tuu wekaetsuk idaisata! ¡Yamai aents suwimak susami tabauk atsawai! Ayatak ijuntsa jiistamatag taji, wagki Israel aents aidaun apujinuk yamaishkam wikitjai”, tiuwai.
2SA 19:23 Nuna tusa Simín chichajak: “¡Aminak mashtatjame! Wi tajam nunak Apajuí antamunum tajai”, tiuwai.
2SA 19:24 Tuja Saúla tijaji Mefi-boshet aajakua dushakam apu Davitan igkugtatus jiintukiuwai. Tuja niig David Absalógkan ishamak Jerusalén jiinkiuwa duwi nagkamas nawenak nijatsuk, jáanchjinash nijatsuk, tuja susujinashkam awatsuk pujai, apu David iwaku pegkeg wakitki tauwai.
2SA 19:25 Tuja niishkam apu Davitan igkugtatus Jerusalén jegauwai. Nunik jegamtai apu chichajak: “Amesh ¿wagka wijaish minichmayume?” tau.
2SA 19:26 Tama nii ayaak: “Apujuh, wika shutuu asan wi ekemi wetinun burron itagtuati tusan mina inakjun inagbaijai. Tusa ti ai ayu tujutiatak, umikchau asamtai minichbaijai.
2SA 19:27 Tuja wi wetinun umigtutsuk ukuak amina tajutjama wi makichkish tichamun amina tsanupagmayi. Tujash apuh, amek Apajuí aentsji nayaimpinmayajai betekaitme. Imanaitam duwi ame wajuk wakegapa duka nunisag uminkati.
2SA 19:28 Wagki mina apaju uchiji aidautik ame ijinam amainaitku, amina pataim itugmaina numamtuk ipatuawamin, amejai ijunja ekemsan yujumka yuwag nuniaunush ¿wisha nuigtush wajinak ima segatjame? Wika amina inakmetjai”, tiuwai.
2SA 19:29 Tusa tama apu David ayaak: “Duka imanuk chichaak wekayipa. Wika amina Sibájai Saúla nugke aajakua nunú akandaika jukitajum timajime”, tiuwai.
2SA 19:30 Tama Mefi-boshet ayaak: “Mina apachju nugke aina duka ashí niinu ati, wagki nuna nagkaesauwa duka, dekas ame shiig pegkeg ataktu ame pujusa inamtaigmin taum nunuwai”, tiuwai.
2SA 19:31 Tuja Barzilai galaadnumia aajakua dushakam yaakat Roguilim pujau, apu David Jordágka katittai yaigka, nuwi apujai akatdayag ukuak wakitkitatus wejiuwai.
2SA 19:32 Niinak ochenta mijanji ajujakui. Untsu niig wiakuch aajakui. Iman asa apu David Mahanaim pujusa atsumamujinak nii ashí yaijakui.
2SA 19:33 Nuadui apu David Barzilain chichajak: “Jerusalén taata nunikamin wi amina kuitamkatjame”, tiuwai.
2SA 19:34 Tusa tama Barzilai ayaak: “Wika múuntuch wajasjai, nuniku asan kuashat tsawan iwakuk pujushtatjai. Tuja kuashat tsawan amejai pujustinigkik Jerusalégkak minimaitsujai,
2SA 19:35 minak ochenta mijan ajutui, nuadui yujumka yuwaknush, umutain umaknush pegkegnak dekapeatsjai. Tuja nuigtushkam kantabaunash antumain dekapeatsjai. Nuadui wainka ame mina kuitamjakum waittsaim tajai.
2SA 19:36 Ame Jordán katiakmin yaigtasan tajuajam duwikik apujuh, minash pegkegnum yainkatag tame. ¡Dekas duka puyatjukaipa!
2SA 19:37 Wika dekas wakitkin mina yaaktajui jegaan, nuwi pujusan jakatjai. Nunikmatai mina apaju ukumataijin ukugsatnume tajai. Untsu juju mina uchig Quimham amina takagtamin ati tajai. Nii amina uyuuntamas wekaekui, ame nii yaigtin ata”, tiuwai.
2SA 19:38 Tusa tama apu David niina ayaak: “Untsu Quimham wijai pujusti, tuja ame uchigminash wajuk yainjukti tusa wakegame nunak imatiksanuk umiktajai. ¡Tuja ame waji segattatme nunak ashí dutikatjai!” tiuwai.
2SA 19:39 Tusa chichas inagnakmatai, ashí aents aidauk Jordán utsaanawag katiajajui. Nunikag nuwi apu David Barzilaijai akatdayag niina kumpamak yapinum kugkuasui. Dutikam Barzilaik niina jeen wakitkiuwai.
2SA 19:40 Nunikmatai apu David niishkam Quimhamjai uyunis, nuigtu suntag Judá wegantu aidaujai aatus ashí ijumag, nuigtushkam suntag Israel wegantu aidau jimaituk aatus yaakat Guilgalnum shiyakajui.
2SA 19:41 Nunik nuwi jegawag batsatai, dukap atsuk ashí Israel aents aidau apu Davitan jegajua chichajuinak: “¿Wagka ii Israel wegantu aidauti ame yaigka Jordán ikatimain aish, Judá wegantu aidaush aminash Jordán katitminish yaimpakagmae?” tuidau.
2SA 19:42 Tusa tiagtai, Judá wegantu aidau ditan ainak: “¿Wagka atumesh wainkagmesh kajeagme? Iik yaigmaji, wagki apuk iina patayi asamtai. Iik apu yutain, nuniachkush waji aidaun amastí tusaikish yaigchamji”, tiajui.
2SA 19:43 Tusa tiagtai Israel wegantu aidau ditan chichajuinak: “Ii ainaji dekas apu yaimaintik, wagki ii ima kuashat maki makichik wegantu dekapamak dieza imajin ainaji, tuja atumek ima makichik wegantua duke ainagme. Tuja nuigtushkam ii ainaji apu wakitki taati tusa untsukutik. Dutikau ajinig atumek tikima wainkauchia nunin anenkagtagme”, tiajui. Tujash Judá wegantu aidau Israel aents aidaun nagkaesau ima senchi pegkegchaun chichaidau.
2SA 22:1 Saúl Davitan maatag tutai, Tuke Pujuu ayamjukui. Tuja tikich shiwag aidau maatag tiagtaishkam, Tuke Pujuu ayamjukbau asa Apajuín emematak juna aatus David kantamauwai.
2SA 22:2 Nuniak aatus tiuwai: “Tuke Pujuuwah, ametme mina kuitamjaumek, ametme mina ejamataigmek, mina agkanmitkagnumek.
2SA 22:3 Ametme mina Apajuígmek, ametme kaya muunnum uumka ejamtayama imanmek, ametme mina ejamaka uwemtaijuk. Ametme senchimek, mina uwemtijinmek; amek dekas shiig yakí, mina uumka uwemtaijuitme. Amek dekas shiig yakí mina ejamataijuitme, ametme mina uwemtijin. ¡Aents magkagtin aidau mantuatag tuinakuish, ame minak ayamjutkabiume!
2SA 22:4 Tuke Pujuuwa, ametme pegkejam ememattaimek, wika amina emematjame, mina shiwag mantuatag tuinakui amina untsuagme, tusa tai ame ayamjutme.
2SA 22:5 “Jamain ishamainnum jeganbaijai; tuja magkagtin aidaunum pachiinkan, mantuinawapi tusan senchi ishamkamiajai.
2SA 22:6 Jamainnum egkemkamiajai. ¡Nunak shiwag aidau maami tusag umigtukagmayi!
2SA 22:7 Nuna ishamakun Tuke Pujuun segabiajai, mina Apajuíjun yainkati tusan segabiajai, tusa tai niina pujutaijin pujus antugtukmayi. ¡Wi untsubaunak nii antukmayi!
2SA 22:8 “Untsuka ai nugka senchi uugkabi, muja aidaushkam buchitjabi, nunak ¡Tuke Pujuu kajeka imatikabi!
2SA 22:9 Tuke Pujuu nujinia bukuiti jiinmayi. Tuja niina weninia jii keeka jiinmayi, niina weninian jii kaiji kegaun nagkimayi.
2SA 22:10 Nayaimpik jáanchjai betek ichiinak nemaabi, nuwiya akaikibi mina ayamjutkatatus. ¡Amek yujagkim ikiyamag suwe wajasbaunum nuwi najamayume!
2SA 22:11 Amek mina ayamjutkatasam, ángel querubignum ekemis, nii nanaakmatai minatai tumain, dasenum pachitkau taabiume.
2SA 22:12 Yujagkim ikiyamag suwe ishamainnum, amek pachitkau taabiume.
2SA 22:13 Amina senchijum chaagpijai betek keeka jiinmayi, nuniai jii kegau yumijai betek yutibi.
2SA 22:14 Imaniamunum Tuke Pujuu Apajuí múunta nunú, chichamun ipamtajai betekan antukagmayi.
2SA 22:15 Imatak akentaiji aidaun akenak chaagpin ajuagmayi, imatikak mina shiwag aidaunak, uwakek ipisjabi.
2SA 22:16 Ame kajeka chichamin, dase senchi dasentak, nayantsa umpui buku emamtai, nugka initke wantinkauwai.
2SA 22:17 “Apajuíyah, ame minak nayaimpinum pujusam, uwejum awentuntabiume, dutikam nayantsa kunajinia jiikim uwemtijugmayume.
2SA 22:18 Mina shiwag aidau, mina nagkaetasu senchigtin aidau kajegtiagmayi. Tujash ame ayamjutkabiume.
2SA 22:19 Wi waitiakun pujai jetetkajabi, tujash Tuke Pujuuwa, ame minak ayamjutkauwaitme.
2SA 22:20 Amek mina anentu asam, uwemtijujam agkanmitkajuauwaitme.
2SA 22:21 Tuke Pujuuwah, wika ame wakegamun takau asamtai, ame minak pegkegnum akigkabiume.
2SA 22:22 Wika Tuke Pujuu tujutbaunak betek umikuitjai, nii tujutbaun umitskek idaisachuitjai.
2SA 22:23 Wika niina chichame umiktina nunak, ashí betek aneakjai, nuadui ¡niina chichame umiktina nunak makichkish umitskek idaisachuitjai!
2SA 22:24 Wika ame diismash pegkegchaunak takamsachuitjai, tuja tudau aina nunak tupanjauwaitjai.
2SA 22:25 Tuke Pujuu emtin pegkegchaun takaschau asamtai, nii minak pegkegnum yainkauwai.
2SA 22:26 “Tuke Pujuuwah, amina betek umigtamainakuig, ameshkam betek uminaitme. Ya amina chichamjumin betek umiawa, nunú amek shiig kuitamnaitme.
2SA 22:27 Aents dekaskenum chichau aina duka, ameshkam dutiksamek kuitamnaitme. Untsu aents waitjin aina duka ameshkam dutiksamek iikuame.
2SA 22:28 Amek aents ememachu aidau uwemtiknaitme, untsu ememau aina duka wainka dushiktai emame.
2SA 22:29 Tuke Pujuuwah, ametme mina tsaaptinug, mina Apajuíjuh, ametme wi suwenum wekagaish tsaaptin etugtaumek.
2SA 22:30 Ame yaintsamin, mina shiwag aina nujaig maaniattajai, nunikan depetkan amuktatjai.
2SA 22:31 “Apajuíyah, ame dutikamu aina duka ashí pegkejai. Ame anagkagtuamua nunak dekaskeapi tajai. Tuke Pujuuk ya niyai dekaskeapi tuinawa nuna kuitamui.
2SA 22:32 Tuke Pujuuwah, ima ameketme Apajuímek. Ame kuitamkagtinaitam imanuk tikichik atsawai.
2SA 22:33 Apajuíyai senchigtin mina kuitamjinuk, nii minak pujutji pegkeg ati tusa jintinjinai.
2SA 22:34 Apajuí minak shiwag amaigkai tusa, japa amaimainchau tupikaina iman etawai. Wi shiwag amaintukai tusan, muja titijin wakamtaish, ame minak kuitamjinaitme.
2SA 22:35 Ame minak shiwagjai maanitash jintinjame, ametme flecha ekenka nagkimtai jiju bronce najanamun, japiki nagkimati tusam senchimtijaumek.
2SA 22:36 Ametme shiwag aidau jetetuinakuish uwemtijinmek, ame yaintu asamin, tikich aidaush eme anenjuinawai.
2SA 22:37 Ame wi wekaebaunmak kuitamjame, nuadui atakuinjanush iyagchabiajai.
2SA 22:38 Mina shiwag aidaun pataetukan ashí ijinamiajai, dutika ijinan ima wiki wakitkimiajai.
2SA 22:39 ¡Shiwagnak ashí ijinawabiajai! ¡Makichik iwakukesh juwakchabi!
2SA 22:40 Ame senchimtijuawamin shiwaajujai maaniawabiajai. Wijai shiwagmagaidaush mina nii ijinati tusam idaitugsabiume.
2SA 22:41 Ame mina shiwag aidauk, wisha wainaig ipisja ishiakuitme. Tujash wi pataetuka amainagkan mina kajegtuidaunak ijinawabiajai.
2SA 22:42 Dutika ijinai, tikich aents aidaun egayanme yainkatnume tusag, tujash makichkish yaigchajabi. Tuke Pujuuwah, aminash egapayanume, tujash yaigchabiume.
2SA 22:43 ¡Nugka tsaimaina imatikan tsaikamiajai! Tsakus wajatua najamaina imatikiajai ditanak.
2SA 22:44 Mina pataag aidauk pempeentugkiag shiwagmatuinakuish, ame ayamjuttsamin depetkamiajai. Ame minak Israel aents aidau apuji, nuigtu tikich aents aidau apujishkam etiuwaitme. Aents wi wainajakchamu aidau mina umigtuinak takagtuinawai.
2SA 22:45 Wi tabaunak betek umigtuinawai. Aents tikich nugkanmaya aidau, mina inataig waigkag emematjuinawai.
2SA 22:46 Aents tikich nugkanmaya aidauk, wijai maaniatag takush sapigmainawai, nuninak uumak batsatu kujaukmaikia jiinkiag mantuawaipa tujutuinawai.
2SA 22:47 “¡Tuke Pujuuwah, amek tuke pujuuwaitme! ¡Ameketme mina ejamataigmek! ¡Ashí aents aidautijum mina uwemtijina nunú ememattajum!
2SA 22:48 Apajuíyah, ame mina shiwag aidauk ijinabiume, ame minak kuashat tikich aents aina nunashkam apuji etiuwaitme.
2SA 22:49 Mina shiwag kajegtuinak mantuatag tuinakuish, ame minak uwemtijame. ¡Tuke Pujuuwah, aents pegkegchau aidau mantuatag tujutiagmayi, tujash ame ayamjutkauwaitme!
2SA 22:50 Nuadui tikich aents ii wegantuchu aina nuna emtinish amina emematjame, tuja amina etsagkeakun kantamjai.
2SA 22:51 Ame apu ati tusa etegtuau asam, depetmatak tuké sujame. Ame minak, tuja mina uchig wegantujai amina anenkagmin tuké kuitamjame.”
2SA 23:1 Jujuwai David inagnaku kantamamu: “Wika David Jesé uchijiyaitjai, Israel aents aidau apuji ati tusa Apajuí etegtuau asa, ajaantusa diyaku chichame antugtai emauwa nunuwaitjai, mina apachug Jacob aajakua duka niina emematujakui. Wika Israel aents shiig pegkegchin kantamin asan wakejutaiyaitjai. “Nuadui juna kantamjai:
2SA 23:2 “Tuke Pujuu Wakani minai pujau asa chichamtijawai. Nii tujutbauwa nuna kantamjai.
2SA 23:3 Apajuí Israel aents aidautin Apajuíjiya nunú chichakmae. Israel aents aidautin kuitamjamna nunú chichagtak: ‘Aentsu apuji atinun Apajuí adaikauwa nunú shiig Apajuín ishamas, betek pegkegnum takauk,
2SA 23:4 kashikmas etsa jiinak etsantama imatikas aents aidaun yaigtatui. Tuja yumi yutug nagkanbaunum etsa jiinak nugkan shiig sukuam chijichi tsapaama iman atatui.’
2SA 23:5 Apajuík wijai chichaman umikui, duka atakesh tuke atinai. Nuadui mina pataag aidauk ishamtsuk shiig batsamtatui, tuja ima Apajuíke pujut pegkejan sukagta duka.
2SA 23:6 Untsu aents pegkegchau aidauk jagkijai betek achimainchau ainawai.
2SA 23:7 Tsuwat aidau numi juki duwi tiwija jii kegamunum utsaam esaka megkagama numamtin ainawai. Dutikamunak ataktu waketjukiajag juchau ainawai”, tiuwai David.
1KI 1:1 Apu Davitak muumpakiu asa senchi tsetsemak waitiau asamtai, jáanchin kuashat yajutuk asekedau. Imatikamash kukukutuk dekapeachu.
1KI 1:2 Nunitai niina kuitamin aidau chichajuinak: “Apuh, dekas amina kuitamjamkatin makichik nuwa muntsujut egaka itaami. Nunú aminí ayaumas kanakui, kukukut kanagminum”, tuidau.
1KI 1:3 Aatus tusag Israel aents aidau nugkenian nuwa shigmauchin etegkatag tusa ashí egakajui. Dutikawag yaakat Sunemnum nuwa Abisag daagtinun wainkajui. Dutikawag nuna jukiag apu Davitan ejetuawajui.
1KI 1:4 Abisagkak muntsujut shigmauch aajakui. Nunú apu Davitan kuitamajakui. Tujash apu Davitak nunú nuwauchijaig makichkish tsanijinachui.
1KI 1:5 Nunú tsawantin Davita uchiji Adonías, Haguit aajakua nuwi akiamu, wi Israel aents aidaun apuji atajai tusa, carro maaniaku jutai aidaun, caballo maanitai aidaun, nuigtu cincuenta aents niina kuitamkatin aidaun aatus etegkeg ijumjauwai.
1KI 1:6 Adoníasnak Davitak tsakat asamtaigkish, pegkegchau takamsaipa tusag makichkish chichagkachui. Nuigtushkam Adoníasak shigmauch yantsaptin, niina yachi Absalógka awaan akiinau aajakui.
1KI 1:7 Tuja Seruiá uchiji Joab aajakua nujai, nuigtu sacerdote Abiatar aatus Adonías chichaman umikui. Nuadui dita aidau yaijaku ainawai.
1KI 1:8 Tujash sacerdote Sadokkesh, Benaías Joiadá uchijigkesh, nuniachkush profeta Natágkesh, tuja Davitan kajittsa anentai Simí aajakua dukesh Adoníasnak yaigchajui. Tuja Davita suntaji yacha aina dukesh Adoníasnak yaigchajui.
1KI 1:9 Makichik tsawantai Adonías chichaak: “Jiistamku yuwatin uwig aidau, baka aidau, toro tsakat duwejam aidau kajegjum inagka umiktajum”, tusa inamjauwai. Nunak Roguel nugkanum yumi pukuni jiinbaunum ijus, Zohéletnum kaya múun pujujakua nuwi dutikauwai. Dutika umika apu Davita uchiji niina yachi aidaun, Judá wegantu aidaun, tuja apu Davita takajin aidaun aatus ashí ipauwai.
1KI 1:10 Untsu profeta Natágnak, Benaíasnak, Davitan maawainum tusa, suntag kuitamajaku aina nujaig ipachui. Tuja niina yachi Salomógnakesh ipachui.
1KI 1:11 Nunikmatai Natán Salomógka dukuji Betsabén chichajak: “Apu David dekatsaig Adonías apu wajasa duka ¿amek dekatsmek?
1KI 1:12 Nunú dekachkumek juwi taata, wi amesh amina uchijum Salomógjaish wajuk ayamjumaktatme nuna ujaktagme.
1KI 1:13 Nijah, apu David jegajua chichagkum: “Apuh, ame umiktinjum mina chichagtakum: “ ‘Wi jakamtaig, mina uchig Salomón apu wajas inamjattawai’ tusa tujutmayum nuniaish ¿wagka Adoníasash apush wajase? tita.
1KI 1:14 Tusa niijai chichamin wi wayakun, nunak dekas tawai tusan titajai”, tiuwai.
1KI 1:15 Tusa tima Betsabé apu Davidjai chichastatus weuwai. Tuja apu Davitak shiig muumpakiu asamtai, Sunemnumia nuwa Abisag niina kuitamak pujau.
1KI 1:16 Nuniai Betsabé apu pujamunum jeganta niina eme anentus tsuntsuma nijayin nugka antig pujusui. Nunitai apu David iniak: “¿Waji atsumame?”, tau.
1KI 1:17 Tama nii ayaak: “Apujuh, amina Apajuíjum Tuke Pujuu tutaya nunú adaisam chichagtakum: ‘Amina uchijum Salomón apu wajas inamjattawai’ tujutmayume.
1KI 1:18 Nunú umintsaig Adonías apu wajase, tujash duka amek eke dekatsme.
1KI 1:19 Nunik apu wajasu asa, jiistamku yuwami tusa toro múun aidaun, toro tsakat aidaun, nuigtu kuashat uwig maajum inagkatajum tusa niina inake aidaun inaje. Dutikak amina tikich uchijum aidaun ipae. Tuja nuigtushkam sacerdote Abiataran, nuigtu Joab suntag aidaun apujiya nuna aatus ipae. Tujash amina uchijum Salomógnak ipache.
1KI 1:20 Nuadui ashí Israel aents aidau apu Davitash yanak dekas apu atinnash etegkeati tusa dekatatus yamai dakamainawai.
1KI 1:21 Tuja nunú ame etsegkachaminig, ame jakamin minak mina uchig Salomógjai Adonías mantuattawai”, tiuwai.
1KI 1:22 Tusa aujak pujai, profeta Natán jegauwai.
1KI 1:23 Nunikmatai Davita inake aidau Natán tae tusa ujakajui. Tusa ujakam wayati tima, Natán apu pujamunum wayauwai. Nunik niina eme anentus tsuntsuma nijayin nugka antig pujusui. Natán wayamtai, Betsabék jiinki weuwai.
1KI 1:24 Nunikmatai Natán Davitan iniak: “¿Apujuh, ame jakamin Adonías apu ati tusamesh ameka timaum?
1KI 1:25 Tichamaitkush ¿wagka Adoníasash Sojelet jegaash, toro múun aidaunash, tsakat aidaujaish, nuigtu uwig aidaujai maatajum tusa inamjash amina uchijum aidaun, suntaja apuji aidaun, nuigtu sacerdote Abiataran aatus ipash ijumag nuna ditajai yuwak, umutain umuinak batsamas untsumainakush: “ ‘¡Adoníasai iina apujig!’ wajainawa?
1KI 1:26 Nuninakush minak, tuja sacerdote Sadoknak, Joiadá uchiji Benaíasnashkam ipapachaje. Tuja amina uchijum Salomógnakesh ipachaje.
1KI 1:27 ¿Tuja ame jakaminish, yaki apush ati dusha ameka mina ujattsuk, Adonías apu adaikatajum tusam inamjamum?” tiuwai.
1KI 1:28 Tusa timatai apu David Betsabé untsuktajum tiuwai. Timatai untsukam apu Davitai jeganta wajasui.
1KI 1:29 Nunikmatai apu David niina chichajak: “Tuke Pujuu wi waitiamujun diigtus agkanmitkajuauwa nuna adaisan tajame:
1KI 1:30 Tuke Pujuu Apajuí jutii Israel aents aidauti emematin ainag nuna adaisan, wi yaunchuk amina timaijam nunak yamai betek umiktatjai: “¡Wi jakamtaig, amina uchijum Salomón apu wajas inamjattawai!” tiuwai.
1KI 1:31 Tusa tima Betsabé tsuntsuma nijayin nugka antig pujus senchi jiika chichaak: “¡Mina apujuh Davita, kuashat tsawan iwaku pujusam inamjatin ata tajame!” tiuwai.
1KI 1:32 Tusa tima apu David sacerdote Sadokan, profeta Natágkan, Benaías Joiadá uchijin aatus ujaka utitajum tusa inamjauwai. Tusa timatai ujakam kampatuma duka betek kaunawajui.
1KI 1:33 Nunikagmatai apu ditan chichajak: “Mina atunitaig apu aina nunú ujaktajum. Dutikajum atumjai ijunjajum mina uchig Salomón burro mina entsamtaijua nuwi ekeni jukijum, Guihón ematajum.
1KI 1:34 Nuwi ejegajum aceiteyai buuknum nijakjum, Israel aents aidaun apuji ematajum. Dutikajum yamajam apu ekenji tusajum makichik aents uwija kachuji umpuagta titajum. Nuna umpuakui senchi untsumkajum: “ ‘¡Salomógkah, yamaik ametme iina apujig, kuashat mijan inamjatin ata!’ titatjume.
1KI 1:35 Dutikajum atum kuitamkajum Jerusalén itaatajum. Dutikam nii mina pujusa inamtaijui waya ekemsati. Nunik nuwi pujus inamjati, wagki wi niinak Israel aents aidaun, Judá wegantu aidaujai apuji ati tusan tijai”, tiuwai.
1KI 1:36 Tusa tutai Joiadá uchiji Benaías apu Davitan ayaak: “¡Ame tame duke ati! ¡Tuja ame tame duka Tuke Pujuu amina Apajuíjum tujabau tau asamin imanisag uminkati!
1KI 1:37 Tuja nuigtushkam Tuke Pujuu amina yaimpakua dutiksag Salomógnashkam yaigti. Dutikamu asa ame apu wajasa inamjauwaitam, aan nagkaemas niina takatjig pegkeg ati”, tiuwai.
1KI 1:38 Tusa timatai sacerdote Sadoc, profeta Natán, Benaías Joiadá uchiji, quereteo aents aidau, nuigtu peleteo aents aidau aatus ijunag apu Davita burrojin Salomógkan ekeniag juki Guihón emajui.
1KI 1:39 Dutika ejegawagmatai, sacerdote Sadoc aak pegkejam Apajuíjai chichatai aakmakbaunum chicham umiktin agagbau egkeamu arca aajakua nuwiyan uwija kachujin aceitejai jukiuwai dutika nunú aceiteyai Salomógka buuknum nijak apu emauwai. Dutikamtai uwija kachuji jukimun umpuajajui. Nuna antukag ashí aents aidau untsumainak: “¡Salomógka, ametme iina apujig, kuashat mijan inamjatin ata!” wajaidau.
1KI 1:40 Tusa imatuinak Salomógka saetus shimak shiig aneasag pigkuinak umpui umpuinakua shimuidau. Tuja shiig aneenak senchi untsumaidau asagmatai, nugkak jimaitukes puunatai tumain wajau.
1KI 1:41 Tuja Adoníasak niina ipake aidaujai yujumkan yuwawag inagnainai, pampaidaun antukajui. Tuja kachu shinaun Joab antuk chichaak: “¿Wagka yaaktanmash imanikash pampainawa?” tau.
1KI 1:42 Tusa chichá wajaig, Jonatán Abiatara uchiji aajakua nunú jegauwai. Nunikmatai Adonías chichajak: “Wayata amek eme anentsa diitaiyaitme, chicham pegkeg etsegkatasa taachumek”, tiuwai.
1KI 1:43 Tama Jonatán Adoníasan ayaak: “Atsa, chichamak pegkegchauwai. Iina apuji David Salomógkan apu adaikae.
1KI 1:44 Dutika sacerdote Sadokan, profeta Natágkan, Joiadá uchiji Benaíasan, tuja quereteo aents aidaun, peleteo aents aidaujai Salomón uyuntsatajum tusa tine. Tusa tima apu Davita burrojin ekeniag emaje.
1KI 1:45 Dutikawag entsa pukuni jiinu Guihón tutaya nuwi ejegawag sacerdote Sadoc profeta Natágjai aceiteyai buuknum nijakag apu emaje. Dutikawag shiig aneasag waketjaje. Nuadui yaaktanum aents pampaina nunak imatuinawai. Nunú imatuinamu atumek antukugme.
1KI 1:46 Tuja nuigtushkam Salomógkak apu pujusa inamtaiya nuwi waya ekemsae.
1KI 1:47 Nunikmatai apu Davitan atuwe suntaja apuji aidau shiig anentuinak Davitan nagkaesau Apajuí yaigti, dutikam shiig takasti tusa tiagtatus shimutkaje. Tuja Davidchakam Apajuín emematak niina pegajinig tsuntsuma tepese.
1KI 1:48 Nunik tepes chichaak: “ ‘Israel aents aidaun ememattai Apajuí Tuke Pujuu tutaya duke ememattai ati, wagki nii tibaunak betek umiak, yamai mina uchig aina nuwiyan makichik apu awajsae. Dutika mina pujusa inamtaijua nuwi pujus inamjati tusa apusa nuadui. Tuja minashkam eke jatsuk wainkati tujutiu asamtai wainkajai’, tusa Apajuín aujak timae”, tiuwai.
1KI 1:49 Nuna antukag Adonías ipaamu aidauk sapigmainak kujaidau. Nuninak maki makichik shiig wamak jiinag shiyakag megkaejajui.
1KI 1:50 Nunikagmatai Adoníaschakam Salomón mantuawai tusa ishamak aak pegkejam Apajuíjai chichatai aakmakbaunum wayauwai. Nunik nuwi kuntin maa patai apetai altar aajakua nuna kachujin achimak pujusui.
1KI 1:51 Nunikmatai makichik aents Salomógkan ujaktatus wejiuwai. Nunik jegaa ujaak: “Adonías amina ishamjamak aak pegkegmanum waya altarnum achimak pujus chichaak: “ ‘Apu Salomón mina mantuashtinaitkug, Apajuín adayas dekas mashtatjai tusa tujutti’ tujamui”, tiuwai.
1KI 1:52 Tusa ujakam Salomón chichaak: “Niish aents shiig anentaimkauwaitkug, niina buukeniag makichik intashigkesh iyagchattawai. Untsu niina pegkegchauji dekagnamtaig, tuke mantamnattawai”, tiuwai.
1KI 1:53 Tusa tamawaik suntaja apuji aidaun jiiktajum tusa ishitkauwai. Tusa tima shimutkag jiiki juki ejegawajui. Dutika ejegam Adonías apu Salomógkan eme anentus niina emtin tsuntsuma wajasui. Nunikmatai Salomón, ¡wetá jemin! tusa awemauwai.
1KI 2:1 David nii jakatnuji tsawan jegamtai pujusa, uchijin Salomógkan akateak:
1KI 2:2 “Wi jakatnujuk tsawantak jegagtine. Nuadui ¡amek mijamtsuk wajiu wajasta!
1KI 2:3 Nuniakum Tuke Pujuu Apajuí amina ememattaigmea nunú chichagtamak, wi wakegamua duke umikta tujabiuwa nunú imatiksamek ashí umikta. Tuja Moisés chicham umiktinun agajua dushakam ashí umikta. Nunú betek umiakum ame takamugminig ashí pegkeg atatme. Tuja tuwi wekaetatme nuniakmeshkam ashí pegkegnum wekaetatme.
1KI 2:4 Nuigtushkam Tuke Pujuu mina anagtak: ‘Uchijum aidau pujutji pegkeg asag chichaman betek dita anentaijai, wakanijai mina umigtuinakuig, amina uchijum wegantu aidaunmayan tuke Israel aents aidau apuji ematnaitjai’, tujutiuwa nuna dutiksag umikti.
1KI 2:5 “Tuja Joab Seruiá uchiji takamsauwa nunú kajimatkipa. Niig jimag suntaja apuji Abner, Ner aajakua nuna uchijin, nuigtu Jétera uchijin Amasánashkam mauwai. Nunak maaniachbau aig, yaunchuk dita magkagtuawajua duwi iikmajai tusa wainak chicham atsamunmak mauwai. Dutikak mina utugchatan itagtuauwai. Nuadui ame duka nii takamsamujinish wajuk titatme nunú dutikattame.
1KI 2:6 Nuadui shiig anentaimsam dutikata. Tujash agkan pujus jakati tusamek idaisaipa.
1KI 2:7 “Untsu Barzilai galaadnumiaya nuna uchiji aina duka wait anenjam ame ekemsa yutaigmin ekentsam ayujatin ata, wagki wi amina yatsum Absalón aintakui tupikaki wekagai, dita kuitamjuku ainawai.
1KI 2:8 “Tuja aneaku ata, anui Benjamín wegantu Simí, yaakat Bahurimnumia puja nunú wi Mahanaim wegai shiig pegkegchaun chichagtukabi. Tujutiuwaitak Mahanaim pujaun waketai, mina igkunkatatus namak Jordán tajutuawabi. Nunikmatai dekas wi umiktinjun chichagkun: Maashtatjame tusan Tuke Pujuu daajin tiabiajai.
1KI 2:9 Tujash amek duka tsagkujaipa. Amek yachaitme, iman asam ame diista itugkattame. ¡Tujash waitus jakati tita!” tiuwai.
1KI 2:10 David jakamtai niina apachji aidau ukumasbaunum Jerusalén ukusajui.
1KI 2:11 Davitak Israel aents aidaun apuji wajasag cuarenta mijan inamjauwai. Yaakat Hebrógnum inamjauwai siete mijan, untsu Jerusalén inamjauwai treinta y tres mijan.
1KI 2:12 Salomón niina apaji David jakamtai, nii apu wajas shiig agkan pujus inamjauwai.
1KI 3:1 Salomón Egipto nugka apujijai maaniachmi tusag chichaman umikui. Nunú chicham umiamunum Salomón nuna nawanjin nuwatkauwai. Dutika nuwatuk yaunchuk Jerusalén David pujusa inamajakua nuwi ejegauwai. Nuwi pujai Salomón nii pujusa inamjatnujin yamagman jegamkauwai. Dutika Tuke Pujuu emematku ijuntainashkam jegamak umika, yaaktanashkam peegkeg ashimkauwai.
1KI 3:2 Tuja jega Tuke Pujuu emematku ijuntai eke uminchau asamtai, Israel aents aidauk yaunchuk nuwiya aents aidau nugka nain aidaunum dita apajuímtaijin emematuinak kuntinu maa apejaku aina nuwig ditashkam Tuke Pujuun emematuinak kuntinun maa apejaku ainawai.
1KI 3:3 Salomógkak Tuke Pujuun aneau asa, yaunchuk niina apaji David umijujakua nunisag niishkam Tuke Pujuun umijujakui. Nuniayatak nugka nain aidaunum kuntinun maa apejakui, dutikak kugkuin incienso tutainashkam nuwi apejakui.
1KI 3:4 Ima nuigkik pujujakchauwai, yaakat Gabaógnumshakam wejakui kuntinun maa nuna nejen ashí apeak Apajuín ememattatus, wagki nunú ima nain tsakaju asamtai. Nuwi jegá mil kuntinun maa nuna nejen ashí apejakui.
1KI 3:5 Nuwi pujai kashi Tuke Pujuu kajanum wantintuk chichajak: “¡Waji wakegame, nunú segatta amastajame!” tiuwai.
1KI 3:6 Tusa tama Salomón ayaak: “Mina apag David amina inakem aajakua nunú ame tabaun betek umiak shiig takau asamtai, ame yaigkuitme. Tuja minashkam niina uchiji apu wajasa shiig takasti tujutu asam, wait anenjakum duka tujutme.
1KI 3:7 Tuke Pujuu, mina Apajuíjuh, ame mina apag David jakamtai, nii apu wajas inamjati tujutu asam, wika tsakatuch shiig anentaimja takamainchau aig etegtuabiume.
1KI 3:8 Nunin ayatkun amina aentsjum shiig kuashat makichik aentskesh dekapajag ejemainchau aina imanun apuji wajasjai.
1KI 3:9 Tuja makichik aentskesh juju aents shiig kuashat aina nuna apuji wajas, niina yachajinig shiig takamainuk atsawai. Nuadui minash shiig anentaimsa takatnum yachamtijuata. Dutijuawamin wisha juwapi pegkejak, tuja juwapi pegkegchauk tusan shiig dekau atajai tusan segajame”, tiuwai.
1KI 3:10 Tusa nuna sumakmatai Apajuí Salomógkan shiig anenjauwai.
1KI 3:11 Nunik chichajak: “Kuashat mijan iwaku pujutkesh, tuja wiakuch wetakesh, atsa nuniachkumesh shiwaajum aidau ijintakesh segattsuk, dekas wajuk mina aentsug aidaujaish shiijash takamainaitme nunú segatiu asamin,
1KI 3:12 ame segatam nunak imatiksanuk amastajai. Tuja yaunchuk aents yacha aajaku aina nuna nagkaesau, nuigtush atakesh iman achatnun yachamtikattajame.
1KI 3:13 Tuja ame segatchamunashkam wiakchamtikattagme, dutikakun eme anentsa diitai awajsattagme, dutika ai apu ashí nugkanmaya aidaun nagkaesau atatme.
1KI 3:14 Tuja wi wakegamua duke takakum, nuigtu chicham umiktin agagbauwa nuna amina apa David umikua dutiksamek umiakminig, kuashat mijan iwaku pujustinnum yumigsattagme”, tiuwai.
1KI 3:15 Tusa tima shintaag anentaimas, dekas kajanmap tujutne tiuwai. Nunik wakitki Jerusalén jegaa chicham umiktin agagbau egkeamu arca pujaunum jegantui. Nunik kuntinu maa nuna nejen ashí apeak Tuke Pujuun emematiuwai. Nuna dutika ajak juukbau aidaun Apajuín anentag suwak tikich kuntin tudau tsagkugnagtasa maamu aidaun neje ujumak apeaku ampigbaun nuna nejen inamag umika niina atuwe aidaun suntaja apuji aidaujai ashí ajamsauwai.
1KI 3:16 Nunú tsawantin jimag nuwa akika dutiktai aidau Salomógkan jegajuawajui. Nunik nii eketbaunum jegantag,
1KI 3:17 makichkia nunú chichaak: “¡Chah apujuh! Juju nuwa jujai makichik jeganmak pujaji. Nunika pujusan uchin uchigmakmajai.
1KI 3:18 Nunikan kampatum tsawan pujai, juju nuwashkam uchigmakmae. Nunika ima jimagchitik pujumji. Tikich aents wainchataigkesh atsume.
1KI 3:19 Nuniamunum kashi juju nuwa uchijin tepejuk maame.
1KI 3:20 Dutika ejampek shintaag, wi kanaja tepai mina uchig minai ayaumas tepaun juki niiyai ayaunas aepeak, niina uchiji jakaun minai itan aepsame.
1KI 3:21 Dutikau ai tsawajan kashikmasan nantakin mina uchiju amuntsuatag tukaman jakaun wainkamjai. Tujash shiig tsawagmatai, diikman mina uchigchaun wainkamjai”, tiuwai.
1KI 3:22 Tutai tikich nuwa chichaak: “Atsa, auk iwakua duka mina uchijui, jaka nunuwai amina uchigmik”, tau. Tutai yama nagkamchak chichakua nunú chichaak: “Atsa, auk uchi jakauwa duka aminui, untsu uchi iwakua nunuwai mina uchijuk”, tusag aatus apu emtin jiyanidau.
1KI 3:23 Nuniagtai apu Salomón anentaimas: “¡Uchi iwakua juka mina uchijui tawai juju nuwa. Tuja untsu uchi jakauwa nunak tikich nuwa aunui tawai. Tujash tikich nuwa aushkam dutiksag tawai!”
1KI 3:24 Tusa chichaak: “¡Puyag sujustajum!” tiuwai. Tutai puyajan ejentuntajui.
1KI 3:25 Dutikawagmatai chichaak: “Anú uchi iwakua nunú jimaituk tsupikam jimag nuwa nunú mai etsegka susata”, tiuwai.
1KI 3:26 Tutai uchi iwaka nuna dukuji niina uchiji asamtai, puyatjau asa, apu Salomógkan chichajak: “¡Wait aneasam apuh, uchik maawaipa! ¡Dekas juju nuwa susata!” tiuwai. Tutai untsu tikich nuwa nunú chichaak: “Anú uchia duka midaukesh achattawai, ¡dekas jimaituk tsupiktinme!” tiuwai.
1KI 3:27 Tusa tutai apu chichaak: “Uchi iwakua duka anú nuwa uchi maawaigpajum tawa nunú susata, wagki niyai dekas uchigtinuk”, tiuwai.
1KI 3:28 Aatus apu Salomón epegkeamtai, nuna ashí Israel aents aidau dekawajui. Nunikag apu Salomógkan eme anentuidau, wagki Apajuí chichaman shiig epegkeati tusa yachametan susau asamtai.
1KI 5:1 Salomógkan apu adaikaje tabaun yaakat Tiro apuji Hiram dekauwai. Nunik kumpamatatus niina aentsji aidaun ishitkauwai. Nunak dutikauwai wagki yaunchuk nagkamas Davidjai shiig anendayajaku asa.
1KI 5:2 Dutika ishitkam Salomón dita waketiagtai, Hiraman chichama akuptak:
1KI 5:3 “Amek dekame mina apag David niina shiwaaji aidaujai maaniak jega Apajuí emematku ijuntain jegamkachua nunú. Tujash niina shiwaaji aidaun ashí depetkati tusa Apajuí tima ashí depetkauwai.
1KI 5:4 Tujash yamai Tuke Pujuun Apajuín wi emematnaitag nunú iina agkatmikagbau asamtai, jutijai maanidauk atsawai.
1KI 5:5 Nuadui Tuke Pujuu mina apag Davitan chichajak: “ ‘Apajuí emematku ijuntain amina uchijum jegamkattawai, nuwi wayawag mina emematjiagtinun’, tusa tiuwa nuna umiakun jegan jegamkattajai.
1KI 5:6 Nuadui amina aentsjum aidau Líbano tutaya nuwiyan setjun tsupigtugtinme. Tuja mina inakeg aidau ditan yainkagtatui. Nunú amina aentsjum aidaunak ame wajuk akikti tujuttatpa nuna wi akikagtatjai. Nunak tajame, wagki jutii aidautik amina aentsjum Sidón batsamin aidau, numi tsupitan yacha aina imanuk makichkish atsa nunú, ameshkam dekau asamin”, tiuwai.
1KI 5:7 Tusa chicham akuptukbaun Hiram antuk, shiig aneasui. Nunik senchi untsumak chichaak: “¡Tuke Pujuu Israel aents aidau emematin aina duke ememattai ati, wagki nii Davitan wait anentug uchi yachan niina aentsji aidau apuji atinun susauwai!” tiuwai.
1KI 5:8 Tusa pujus Salomógkan chichama akuptak: “Ame chicham akupjutkamun antukjai. Nuniku asan ame segatam nunak imatiksanuk: Setjun pinojai ishitkattagme.
1KI 5:9 Mina inakeg aidau Líbanonmayan tsupijag nayantsanum utsawagtatui. Dutikawagmatai ame tuwi itagtuatnume titatme nuwi papagma ejetuatajum titatjai. Nuwi ikaunmawag atijagmatai ame yajuaktatme. Untsu ame mina akigmainaitam nunú mina aentsug aidau wi pujusa inamtaijui batsata nunú yuwatin aidau yujumak susata”, tiuwai.
1KI 5:10 Aatus Hiram setug aidaun pino aidaujai, Salomón wakegamunak imatiksag ashí susauwai.
1KI 5:11 Tuja Salomógshakam Hiram niina aentsji aidau ayujatnun cuatro millón cuatrocientos mil litro trigon, nuigtu cuatro mil cuatro cientos litro aceite olivo nejenia yajuakbaun susauwai. Tuja maki makichik mijanai nunak sujakui.
1KI 5:12 Tuja Tuke Pujuu Salomógkan anagkuamunak imatiksag shiig yacha emauwai. Tuja Hiramshakam maaniachmi tusa Salomógjai chichaman umiku asa maanitsuk batsamajakui. Nuadui maanitsuk batsamajaku ainawai.
1KI 5:13 Nunik batsamas apu Salomón takat nagkamnati tusa ashí Israel aents aidaunum chichaman ishiakui. Tusa tima treinta mil aents aidau tuwakajui.
1KI 5:14 Nunikagmatai, muja Líbano tutainum maki makichik nantutin diez mil aentsun numin tsupigtinme tusa ishimajakui. Dutikamu asag aents aidauk nunú mujanum makichik nantu takasag waketug dita jeen jimag nantu batsamajaku ainawai. Tuja takata apujig Adoniram aajakui.
1KI 5:15 Nuigtushkam nunú mujanum ciento cincuenta mil aents takainak batsatu. Nuwiya ochenta mil kayan tsupinau, dutikiagtai setenta mil aents yanaidau.
1KI 5:16 Nuigtushkam Salomógnak ajujakui tres mil trescientos aents takata takaidaun kuitamaidau.
1KI 5:17 Tuja apu Salomón aents kaya tsupin aidaun chichama akuptak: “Kaya múun, shiig pegkeg aidaun, kaya pakamamu aidaujai jega Apajuí emematku ijuntai jegamkatnunum aepka nagkamatin aidaun, yajuak ikaunmatnume”, tiuwai.
1KI 5:18 Tusa timatai Salomógka aentsji jegá jegamin aidau Hirama aentsji aidaujai, nuigtu yaakat Guebalnum tikiju batsamin aidau aatus numin tsupijag, kaya dakajag pakamawag jega Apajuí emematku ijuntain ashí jegamak umikajui.
1KI 6:1 Salomón apu wajas kampatum mijan ejeyi, nuigtu ipak usumta nuna achika nantu kampatuma nunú Ziv tutai taka jimaituk wegai, jega Apajuí emematku ijuntain jegamkatatus nagkamauwai. Nunak Israel aents aidau Egipto nugkanum batsatu jiinjauwa duwi nagkamsa dekapajam cuatrocientos ochenta mijan weamunum nagkamauwai.
1KI 6:2 Jega Apajuí emematku ijuntain Salomón jegamkauwa nuna esantig veintisiete dekapamu, wegkanti nueve dekapamu, tuja yakinti trece nuigtu jimaituk dakapamu aajakui.
1KI 6:3 Tuja jega jegamku ajigbau waitinum jegantatak aajakua nuna esantig, jega wegkantijai betek nueve dekapamu aajakui, untsu wegkantig cuatro dekapamu, nuigtu jimaituk aajakui.
1KI 6:4 Nunú jeganum wajasa niimtai aidaun najanak, jiju aidaun ajintuk umikui.
1KI 6:5 Nuigtushkam sacerdote aidau, dita takataiji aidaun chimpiawag kuitamkagtinun nunú jega yantamen achimtika jegamkauwai. Dutika kampatum tesauwai.
1KI 6:6 Nunú jeganum yama nagkamchaku tesaamu aajakua nuna wegkantig jimag dekapamu, nuigtu veinticinco centímetro aajakui. Untsu nuna yakin tesaamua nunú jimag dekapamu nuigtu setenta centímetro aajakui. Tuja nuna yakin inagnamu tesaamua duka tres dekapamu nuigtu quince centímetro aajakui. Nunú jeganak yaigchinum nagkama yakí iwakag jegamkauwai. Nunak dutik jegamkauwai wagki jega pegkejam jegamkamua nuna numi iju chigkawai tusa.
1KI 6:7 Jega pegkejam Apajuí emematku ijuntain jegamkug kaya pakamamu aidaun shiig umikbaun nuna ekenag jegamkajui. Nuadui martillo, jacha, tikich jiju najanamu aidauwaikish awatbauk makichkish antukachui.
1KI 6:8 Tuja jega pegkejam jegamkamunum nuwi achimtika jegamkamu aajakua nuna waitijig untsugnumanini aajakui. Untsu nuwi waya yaki wataig papaja tentea iwakbau aajakui.
1KI 6:9 Tuja Apajuí emematku ijuntai jegamnak ashí uminkamtai, inagnak setug dakagbaun yakí pataja umikui.
1KI 6:10 Tuja nuigtushkam nunú jeganum achimtika ashí tentea jegamkauwai. Nunak nuwi waji aidau chimpia kuitamkatnun dutikauwai. Tuja duka numi ajinka emetjamu aajakui. Untsu maki makichik tesaamu aajakua nuna yakintig jimag dekapamu nuigtu veinticinco centímetro aajakui.
1KI 6:11 Nuna ashí ashimkamtai Tuke Pujuu Salomógkan chichajak:
1KI 6:12 “Ame Apajuí emematku ijuntai múun jegamam nuna pachisan tajame: Shiig pujusam mina chichameg umiktin agagbau aina nunú betek umiakminig, wi amina apa Davitan anagkuawaitag nunak imatiksanuk amina yayaakun umiktatjai.
1KI 6:13 Tuja Israel aents aidautigminak makichkish idaisashtinaitjime, wi atumnak tuke kuitamkatnaitjime”, tiuwai.
1KI 6:14 Aatus Salomón jega múun Apajuí emematku ijuntai atinun jegamak ashimkauwai.
1KI 6:15 Dutika nuna initken setug dakagbaun anujug shiig umikui. Untsu nugkanum numi pino dakagbaun papaja shiig umikui.
1KI 6:16 Tuja nuigtushkam jega nagkatkamunum makichik tesauwai, dutika nunú tesaamua nunú “shiig pegkejam” tutai atinun setug dakagbauwai yakí nagkama shiig pegkejan umikui.
1KI 6:17 Tuja tikich tesaamu ayatak “pegkejam” tutai aajakua nuna esantig dieciocho dekapamu aajakui.
1KI 6:18 Tuke Pujuu emematku ijuntai jegamkamu aajakua nuna initkenig setug dakagbau shiig anujamunum taumi yagkug aidau, yujág aidau dakumjamu aajakui.
1KI 6:19 Nunú jeganum tesaamu “shiig pegkejam” tutainum chicham umiktinun Tuke Pujuu agagbau egkeamu arca asatnun Salomón shiig umikui.
1KI 6:20 Nunú tesaamu shiig pegkejam tutai aajakua nuwi waya dekapamak esantig nueve aajakui. Tuja wegkantishkam nueve dekapamu aajakui. Tuja yakintishkam nueve dekapamu aajakui. Tuja Apajuí emematku incienso patasa apetain Salomón numi setjun najana orojai ukatkauwai. Dutika nunú tesaamu shiig pegkejam tutainum nuna niimtikas apusauwai.
1KI 6:21 Tuja nuigtushkam jega Apajuí emematku ijuntai jegamkamunak oron ukatkauwai, dutika nuwi tesaamu shiig pegkejam tutainashkam oron ukatuk umikui. Dutika ashimak nuna waitijin cadena oro najanamu aidaun detujui.
1KI 6:22 Aatus ashí oron ukatuk emau asa, Apajuí emematku patasa apetai aajakua nunashkam dutiksag ukatuk umikui.
1KI 6:23 Tuja nuigtushkam jega tesaamu shiig pegkejam tutainum asatnun, jimag querubigkan dakumak numi olivo tutayai najanauwai. Nunú aidaun esantig cuatro dekapamu aajakui.
1KI 6:24 Nuna nanapeg maki makichik jimag dekapamu nuigtu veinticinco centímetro aajakui. Nuniau asa mai apatkam ipak usumat dekapamu nuigtu jimaituk aajakui.
1KI 6:25 Nunú dakumka najanamu jimag aajakua nuna esantig mai betekak aajakui. Niimeshkam betek aajakui.
1KI 6:26 Nuna yakinti aidauk cuatro dekapamu nuigtu jimaituk aajakui.
1KI 6:27 Nuna Salomón juki jega tesaamu shiig pegkejam tutai aajakua nuwi awayauwai. Nunú aidaun nanapeg yapaag aajakui. Nuniau asa tikichia nuna nanape mena nunini awa nunú tanishan antig aajakui. Untsu tikichia nuna nanape untsuja nuni awa nunú tikich tanishan antig aajakui. Tuja tikich nanapega duka mai igkunia antiinik aajakui.
1KI 6:28 Nunashkam Salomón oron ukatkauwai.
1KI 6:29 Nuna dutika jega initken, tuja awankenishkam querubin aidaun nanamtinun taumi dakumjauwai. Dutikak nuigtushkam palmera aidaun, yagkug aidaun dakumjauwai.
1KI 6:30 Tuja jega initken nugkanum setug dakagbau shiig batsaka umikbau aajakua nunashkam agaajijaí oron ukatkauwai.
1KI 6:31 Untsu nunú jeganum tesaamu shiig pegkejam tutaya nuwi wayaku ujatain jimag waitin numi olivon najanauwai. Nunú waiti nujamkatin aidau ajigbauk, cinco yantamjintin dakagbau asa yantagtaju aajakui.
1KI 6:32 Tuja jimag waiti najanamu aajakua duka numi olivo najanamu aajakui. Nunú waitinum Apajuí aentsji nanaptin aidau taumi dakumjamu aajakui. Nuigtushkam palmera aidau, yagkug aidau dutiksaik dakumjamu aajakui. Tuja nunashkam oron ukatkauwai.
1KI 6:33 Tuja jega Apajuí emematku ijuntai jegamkamun waitiji nujamkatnunashkam numi olivo cuatro dekapa tsupija ajigbau aajakui.
1KI 6:34 Nuna waitijig jimag najanamu asa mai ujanajakua duka pino najanamu aajakui.
1KI 6:35 Nuwishkam querubin nanaptin aidau, palmera aidau, yagkug aidau taumi dakumja oro ukatkamu aajakui.
1KI 6:36 Tuja nunú jeganum atrio tutai agkajua nunashkam kaya pakamamu aidaun kampatuma imania ekenag tentea umikui.
1KI 6:37 Apajuí emematku ijuntain jegamkug nantu Ziv tawa duwi nagkamauwai. Nunak Salomón apu wajas ipak usumat mijan inamak pujus nagkamauwai.
1KI 6:38 Dutika nagkama nii apu wajas inabaujin once mijanan ejeyi, nantu ochoa nunú Bul tutai takau ai, ashí umikui. Tuja ashí ijumjamak nunú jeganak siete mijanai umikui.
1KI 8:1 Nuna ashí umiku asa, Sión Davita yaaktaji tutai aajakua nuwi Tuke Pujuu chichame umiktin agagbau arcanum egketun jukitatus Salomón Israel aentsu apuji múun aidaun, maki makichik wegantu aajaku aina nuna apuji aidaun, nuigtu tikich Israel aents eme anentsa diitai aidaun aatus ipaa Jerusalén ijumjauwai.
1KI 8:2 Nunak Etanim nantutin numi kanawe tsupija aakmaja batsamsamu tusag jiistamajaku aina nunú tsawantin ashí Israel aents aidauk apu Salomógjai ijunjauwai.
1KI 8:3 Nunikag Israel aents aidaun apuji múun aidau ashí ijunjagmatai, sacerdote aidau,
1KI 8:4 ujumak Leví wegantu aidau yaigkajam arcan juwinak, Apajuíjai chichatai carpa aakmakbau aajakua nujai jukiajui. Dutikainak nuwi takatai aidaunashkam ashí yajuakag Apajuí emematku ijuntai jega jegamkamunum, Apajuí dutikata tibaunak imatiksag ejegawajui.
1KI 8:5 Dutikawagmatai apu Salomón ashí Israel aents aidaun arca apusamunum nuna igkuas ijumjauwai. Dutika nuwi uwig aidaun, toro aidaun makichkish dekapamainchau shiig kuashat maa apeak Apajuín emematiuwai.
1KI 8:6 Dutikamtai, sacerdote aidau Tuke Pujuu chichame umiktin agagbau egketun arcan jukiag Apajuí emematku ijuntainum awayawajui. Dutikawag nunú jeganum tesaamu shiig pegkejam tutainum querubin dakumkamu nanamtin aidau ijunbaunum nuna nanape aidaunum yununak apusauwai.
1KI 8:7 Nuna nanape aidauk chicham umiktin agagbau egkeamu arcan dukuka aajakui. Tuja arca juwaku numi wegagtai aajakua nunashkam dukuk aajakui.
1KI 8:8 Tujash nuna numiji aidauk esajam aajakui. Iman asa agá wajasa diyam wantinchakush, jega tesaamu ayatak pegkejam tutainum wajasa diyamak paan aajakui. Nuna dutika awayau aina duka yamaikish nunisag awai.
1KI 8:9 Nunú arcanmak Israel aents aidau Egipto nugkanum batsatun yajuak emas, muja Horebnum jimag kaya pakama najanamunum chicham umiktin agagbaun Tuke Pujuu Moisésan susauwa ima duke egkemajakui.
1KI 8:10 Sacerdote aidau arcan awayawag ukuinak, jega tesaamu pegkejam tutainum batsatu jiinainaig, yujagkim jeganak initkajai ijiuwai.
1KI 8:11 Nunú Tuke Pujuu imanji jeganum akijuau asamtai, sacerdote aidauk ijunja Tuke Pujuu emematmi tibaunak umikchajui.
1KI 8:12 Imanikmatai Salomón chichaak: “Tuke Pujuuwah, ame chichaakum wika suwenum pujuuwaitjai tiuwaitme.
1KI 8:13 Tujash wi ame tuke pujustinun jegan jegamjukjame”, tiuwai.
1KI 8:14 Nuna tusa, Israel aents aidau tuwaka ijunbaunum ayampa wajas ditan pegkegnum yumigkiak,
1KI 8:15 aatus tiuwai: “Israel aents aidau emematin aina nunú Tuke Pujuu mina apag Davitan anagkuawa nuna umike. Nuadui ima nigki ememattai ati. Tuja nii chichaak:
1KI 8:16 ‘Israel aents aidau Egipto nugkanum batsatun jiijuitag duwi nagkamsanush mina jegajun jegamjutkagmatai, nuwi wayawag emematjitnume tusanuk maki makichik wegantu aina nuna yaaktaji aina nuwiyanak nugkanak makichkish etegkachuitjai. Tujash Davitan etegkauwaitjai mina aentsug Israel aents aina nuna apuji atinun’ tusa Apajuí tawai”, tiuwai Salomón.
1KI 8:17 “Nuadui mina apag David Tuke Pujuu emematku ijuntai atinun jegamkatatus wakekauwai.
1KI 8:18 Tujash Tuke Pujuu niina chichajak: “ ‘Ame mina jegag jegamkatasa wakegam duka dekas pegkejai.
1KI 8:19 Tujash amechuitme jegamkatnumek, amina uchijum akiinatta nunú mina emematjaku ijuntainak jegamjutkatnai’, tiuwai.
1KI 8:20 “Tusa tiuwa nunak imatiksag umike. Nii tibaunak imatiksanuk, atumi apuji wajasan, mina apag ekemas inamajakua nuwig wi wayan ekemsajai. Nuniku asan Tuke Pujuu emematku ijuntain jegan jegamkajai.
1KI 8:21 Tuja nuigtushkam, iina muunji aajaku aina nuna Tuke Pujuu Egipto nugkanmayan jiija yajuak chicham umiktinun susauwa nunú arcanum egketa nunashkam tesajuan umikjai”, tiuwai.
1KI 8:22 Tusa inagnak, nunú jega agájin kuntin maa patai apetai altar pujaunum nuna igkuas wajasui. Nunikmatai ashí Israel aents aidaushkam ijunjajui. Nunikagmatai ditá emtin niina uwejen nayaimpinmanini takuiniuwai.
1KI 8:23 Nunik wajas senchi chichaka Tuke Pujuun segaak: “¡Tuke Pujuuwah, ametme Apajuí Israel aents aidauti ememattaimek! Tuja ame chichakbaujum betek uminaitam imanuk tikichik nayaimpinmash, nugkanmashkam atsawai. Aents aidau amina dita anentain umigtamaina duka shiig anennaitme.
1KI 8:24 “Tuja ame mina apag anagkuawaitam nunú yamai umikume. Niig ima aminak umigtamkauwa duwi ame niijai chicham umiakum: ‘Amina uchijum wi pujustinun jegan jegamjutkatnai’, tiuwaitme.
1KI 8:25 Nuadui ame mina apag David chichagkum: ‘Ame wegantunmaya aidau shiig kuitamamas pujuinak, shiig takainakuig, nuwiyan apu atinun tuké etegtinaitjai’, tiuwaitam dushakam umikta.
1KI 8:26 Tuke Pujuu, Israel aents aidautin Apajuíjiyah, ame mina apag anagkuawaitam duka imatiksamek umikta.
1KI 8:27 “Nugka múun, nayaim múun aina nuwigkish amek betek pujumaitsume. ¡Tuja juju jega ame pujustinun wi jegamjukjam juninchinmash wajuk pujustameki tajai!
1KI 8:28 Nuninuch aigkish Tuke Pujuuwah, wi segajam nunú wait aneasam antugtukta. Wi amina inakmin yamai segajame.
1KI 8:29 Tuja juju jeganum pujustatjai tiuwaitam nuadui ame pujakum tsawaish, kashish tuke diyaku ata. Wi amina inakmin juwi wajasan segajame.
1KI 8:30 Amina aentsjum Israel wegantu aidauti, jega ame emematku ijuntai jegamkamua nuni ijuntsa segajam nunú nayaim amina pujutaigmia nuwi pujusam antugkagtukta, nunikam ii pegkegchau takamsamujish tsagkugkagtugta.
1KI 8:31 “Makichik aents tikich aentsun pegkegchaun takamjusmataig, juju kuntin maa patasa apetia juwi itantam wajas takamsachu asa dekaskenum chichaak: ‘Wika dekas takamsachmajai’ tumamkui,
1KI 8:32 ame nayaimpinum pujusam, dekas yanawaita utugchatash nunú diisam aents takamsau suwimak suwakum, takamsachua duka idaisatin ata.
1KI 8:33 “Tuja amina aentsjum aidau pegkegchau takagtamsau asagmatai, dita shiwaaji depetuk achija yajuakam yujas, waituinak awake anentaimag amina emematjamainak, juju jega jegamkamua juna anentaimtus, tsagkugtugta tusa segapainakuig,
1KI 8:34 nayaimpinum pujusam antugkata. Dutika tsagkujam ame iina muunji aajaku aidau juju nugka susauwaitam juwi ataktu awagkim ikaunmatin ata.
1KI 8:35 “Amina aentsjum Israel wegantu aina nunú amina pegkegchaun takagtamainakui, suwimak suwakum yumi yutumtikjachamin waituinak awake anentaimag amina emematjamainak, juju jega jegamkamua nuna anentaimtus segapainakuig,
1KI 8:36 nayaimpinum pujusam antugkatin ata. Dutikam amina aentsjum asagmatai, tsagkujatin ata. Dutikam jintintuatin ata, wajuk shiig batsamain ainawa nunú. Dutikam juju nugka atumdau tuke atinai tusa susauwaitam nuwi yumi yutumtijatin ata.
1KI 8:37 “Juju nugkanum nujantai waitiamu, tuja yumish yutachu asamtai, ajak aidau kagaka jinau, nuniachkush ajaka jati aidau, manchi aidau, tema aidau, shiwag aidaukesh iina yaaktaji aidaun tenteawag jetedau, nuniachkush tikich waitut jata aidau aatus waitkainam,
1KI 8:38 anentaimas juju jega ame emematku ijuntai jegamkamua juni uwejen takuniag wajasag amina segapainakuig antugkatin ata.
1KI 8:39 Maki makichik aents wajuk anentaimainawa, tuja wajina dutikatag tuinawa duka ame dekame. Nuadui nayaim amina pujutaigmin pujusam maki makichik dita takatji diigsam aiktin ata. Dutikakum dekaskenum segapaina duka tsagkujatin ata.
1KI 8:40 Dutikawamin ame iina muunji aidau nugka susauwaitam nuwi batsamsag aminak eme anenjamas umigtamiagtinai.
1KI 8:41 “Makichik aents atushtanmaya Israel wegantuchu amina daagmin antuka, juwi taa juju jega ame emematku ijuntaiya juni ayampa pujus,
1KI 8:42 amina segapakuig, amina daajum múunta nuna nuigtu ame senchigtinaitam nunashkam antuidau asagmatai,
1KI 8:43 nayaim amina pujutaigmia nuwi pujusam antugkatin ata. Dutikakum nii segapamuk ashí susata. Nuna diisag aents tikich nugkanmaya aidaush, Israel aents aidau amina eme anenjamin aina dutiksag ditashkam eme anenjamsatnume. Aatus tikich nugkanmaya aidaushkam dekatnume amina daajum juju jegan wi umikag juwi ememattai atata nuna.
1KI 8:44 “Tuja amina aentsjum Israel wegantu aidau, dita shiwaaji aidaujai maaniatnume tusam tuwi ishiaktatme, nuwi yujasag maaninak ame yaakat etegkauwaitam nuni ayampawag, tuja wi ame emematku ijuntain jegamkag junishkam ayampawag segapainakuig,
1KI 8:45 nayaimpinum pujusam dita sumamuji antugkam ayamjuktin ata.
1KI 8:46 “Ashí aents aidau amina pegkegchaun takagtamsagmatai, shiig senchi kajekam, dita shiwaaji aidau achija yajuaktinme tima, achija yajuakam nugken ukukiag,
1KI 8:47 tikich nugkanum batsamas amina emematjamainak dita pegkegchau takamsamujin anentaimas awake anentaimag amina segapainakuig yaigtin ata.
1KI 8:48 Tuja shiwag aidau achija yajuakam tikich nugkanum batsamas, juju yaakat Jerusalén ame etegkamua nuni ayampawag, tuja juju jega ame emematku ijuntai atinun wi jegamkag juni ayampawag pujusag dita anentaijai, wakanijai segapainakuig,
1KI 8:49 dita sumamu antugkam nayaim amina pujutaigmia nuwi pujusam ayamjukam, kuitamkatin ata.
1KI 8:50 Amina aentsjum aina nunú pegkegchaun takainak amejai shiwagmagainakuish, tsagkujatin ata. Dita shiwaaji aidau achija yajuakagmataish, nunú shiwag aidau amina aentsjum aidaun wait anenjatnume tita.
1KI 8:51 Wagki ditak amina aentsjum asag aminu ainawai. Egipto nugkanum batsamas jiju jii kegamunum jiya ukuitayama numamtuk awajam waituinak batsatu ame jiijuitme.
1KI 8:52 “Amina aentsjum Israel aents aidau segapaina nunú, tuja wi amina inakminchakam segajam nunú antugkagtukta. ¡Ii sumamua nunú antugkagtukam yaijatkata!
1KI 8:53 Tikich aents aidauk batsataig, juju aents aina nunú aminu agtin etegkauwaitme. Dutikauwaitam nunú pachisam, iina muunji aidau Egipto nugkanum batsatu jiijuitam nuadui amina inakem Moisés ujakuitme”, tusa aatus Salomón Tuke Pujuun segauwai.
1KI 8:54 Aatus Salomón altaran igkuas tikishmag pujus uwejen nayaimpinmanini takui Tuke Pujuun segauwai.
1KI 8:55 Nunik ashimak wajai, ashí Israel aents aidaun senchi chichaka pegkegnum yumigkiak:
1KI 8:56 “Tuke Pujuu, nii anagkagtuamua nuna umiak, niina aentsji Israel aents aidau maanitsuk batsamsati tusa tujabiu asamtai agkan batsatag nuadui ima nigki ememattai ati. Wagki nii pegkeg aidaun Moisésan anagkuauwa nunak umitskek idaisachu asamtai.
1KI 8:57 Tuja Tuke Pujuu Apajuí ii emematin ainag nunú iina muunji aajaku aina nuna yaigkua dutiksag iinashkam yamaish yaimpakti. Ima iinakek idaitamsashti,
1KI 8:58 dekas iinash nii wakesa umigtan amastí, dutijamamtai nii wakegamua nunú umiaku niina chichame umiktin agagbau aidaun umiktajum tusa iina muunji aidaun susauwa dushakam umikagmi.
1KI 8:59 ¡Juna ashí pachisan wi taja nunak, Tuke Pujuu iina Apajuíji pegkegnum yaimpak, tsawaish, kashish tuke aneaku atin ati! Nuniak ii kashi kashinig atsumamunash sujamsatin ati.
1KI 8:60 Nuna diisag aents tikich nugkanmaya aidaush dekas tikich Tuke Pujuu Apajuíya ibauk atsawapi titin atinme.
1KI 8:61 “Nuadui atum aidautigmek Tuke Pujuu ii emematin ainag duka dekaskenum takajin atajum. Nuniakjum niina chichame umiktin agagbau yamai umiajum dutiksagmek umiktin atajum”, tiuwai Salomón.
1KI 8:62 Nuna tusa inagnak, apu Salomón ashí Israel aents aidaujai Tuke Pujuun emematak kuntinun maa apeauwai.
1KI 8:63 Aatus Salomón Tuke Pujuujai chicham epegkeamunum veinti dos mil toron, nuigtu ciento veinte mil uwijan mauwai, Apajuín emematak. Dutika apu Salomón ashí Israel aents aidaujai nunú jega Tuke Pujuu emematku ijuntai jegamkamun: Juka yamaik Tuke Pujuunui, tusa niina idaitusui.
1KI 8:64 Tuja nunú tsawanta duik nunú jega jegamkamua nuna waitijin jegantatak agkaju awa nuna, juka Apajuínui tusa nuwi emematak kuntinu maa nuna nejen ashí apeauwai. Dutikak ajaka neje juukbau aidaunashkam Tuke Pujuun anentag susauwai. Tuja kuntinu wiyaji aidaunashkam Tuke Pujuu agkan pujutan amastí tusa apeauwai. Tuja nunú aidaunak kuntin maa patai apetai bronce najanamu aajakua nuwi pataig apeachui, wagki nuwi ashí pataja apemainchau kuashat asamtai.
1KI 8:65 Nunú tsawantin numi kanawe tsupija aakmaja batsamsamu tsawan asamtai, Salomón ashí Israel aents aidaujai, nuigtu yaakat Hamat jegattak nagkamas entsa Egipto nugkanum awa imanuiya nagkamas shiig kuashat aents kaunawajua nujai ijunag siete tsawan jiistamawajui. Tuja tikich jiistanashkam siete tsawan jiistamawajui. Nunidau asag ashí ijumjamak catorce tsawan jiistamawajui.
1KI 8:66 Nunú jiista ashimdaekamtai, kanag tsawajag apu Salomón aents aidaun ashí kumpamauwai. Dutikam ditashkam Tuke Pujuu Davitan pegkegnum yayaak, ditanashkam dutiksag pegkegnum yaigbau asag, apu Salomógkan kumpamawag pegkegnum yumigkis shiig aneas waketjajui.
1KI 9:1 Salomón jega Tuke Pujuu emematku ijuntain jegamak ashimak, nuigtu nii pujusa inamjatnunashkam ashimak, tuja tikichin nii dutikatag tibau aidaunashkam ashí umikui.
1KI 9:2 Dutikamtai Tuke Pujuu yaunchuk Gabaógnum wantintukua dutiksag ataktushkam wantintukui.
1KI 9:3 Nunik chichajak: “Ame segatmaum nunak antugkajame. Nuadui juju ame jega wi tuke pujustin jegamkaum nunak tuke kuitamkattajai.
1KI 9:4 Tuja amina apa David mina umigtak shiig takasua imatiksamek wi chicham umikta tibauwa nunú ashí betek umiakminig,
1KI 9:5 wi amina apa Davitan anagkuakun: “ ‘Amina uchijum aidaunmayag makichik tuké Israel aents aidaun apuji atinai’ tiuwaitag nunak imatiksanuk amejai umiktatjai.
1KI 9:6 “Untsu ame, nuigtu amina uchijum wegantu agtina nunú mina chichameg umiktin agagbauwa nunú umitsuk tikich apajuímkugminig,
1KI 9:7 wi Israel aents aidaun nugka susauwaitag nuwi batsatjum nunak utsagtinaitjai. Tuja juju jega juna wi pujustinun etegkag nunashkam idaisattajai. Dutika ai tikich aents aidau Israel aents aidaunak dushikiagtinai.
1KI 9:8 Tuja juju jega juka tsaikam numi aidauk, kaya aidauk tuwasua weaku atinai. Dutika ai aents nuni nagkaemainak wainkag puyatuk tuke dushikis chichainak: “ ‘¿Wagkag Tuke Pujuush Israel aents aidau nugkenash, juju jega nii pujustin jegamkamua nujaish imatikayawa?’ tiagtinai.
1KI 9:9 Tusa tiagtai, tikich aents ditan chichajuinak: “ ‘Auk ditá muunji aajaku aina nunú Egipto nugkanum batsatun Tuke Pujuu jiija agkanmitkamaitak, nuna umigtsuk kajimatkiag tikichin apajuímainak idaisamu asa, suwimka suwak imatikae’, tiagtinai”, tiuwai.
1KI 10:1 Salomógkak Tuke Pujuu yayamu asa, shiig yachai tusa augmatuinamun Sabá nugka apuji nuwa aajakua nunú antukui. Nunik dekas yachashit tusa dekapsatatus Jerusalén weuwai.
1KI 10:2 Suntaja apuji aidau ejapeam camello aidaunum nijamtai kugkuin aidaun, oro aidaun kuashat yajuak, nuigtu kaya pegkejuch akik aidaun aatus yajuak jegauwai. Nunik jegaa, Salomógkan iniastajai tibaunak ashí iniasui.
1KI 10:3 Tusa iniam Salomón nunak ashí betek aikui. Makichkish nii aimainchau utugchat dekapeamuk atsugsauwai.
1KI 10:4 Dutika ashí aimkamtai anentaimas, Salomógkak dekas yachapi tiuwai. Tuja Salomón pujusa inamjatnujin jegamkamunashkam wainkauwai.
1KI 10:5 Nuigtushkam niina yutaiji aidau shiig kuashat ayau, tuja niina suntajin apuji aidau batsamtaijishkam shiig pegkeg umikbau, nuigtush niina takajin aidaush, nii uwagtinjin shikika su aidaujai shiig iwagmamkau aidau, tuja nuigtushkam kuntin duwejam shiig pegkeg aidaun sacerdote aidau Apajuín emematuinak maa ashí apeamu aidaun, aatus ashí wainak puyatus anentain jegagchauwai.
1KI 10:6 Nunik apu Salomógkan chichajak: “Amina takatjumin amina dekatjumjai pachisag augmatuidaun mina nugkajui pujusa antukmag duka shiig dekaske.
1KI 10:7 Tujash wika dekaskeapi tichamjai, yamai juwi taa wainkau asan dekaskeapi tajai. Auk minak ashí ujatkachagmayi. Wi antukmayag nuna nagkaesau dekas amina dekatjumik takatjumjai shiig múuntai.
1KI 10:8 ¡Amina nuwem aidauk shiig aneasas batsatatai! ¡Amina inakem aidaush ame pegkeg chichamun antuinakus shiig aneasag batsatatai!
1KI 10:9 ¡Tuke Pujuu amina Apajuígmea duke ememattai ati, wagki nii aminak shiig anenjamas Isarael aents aidaun apuji ati tusa adaitamkae! ¡Tuke Pujuu Israel aents aidaun aneau asa, apu adaitamkae shiig pegkegnum takasti tusa!” tiuwai.
1KI 10:10 Nuna tusa, tres mil novecientos setenta kilo oron, nuigtu kugkuin nijamtai aidaun, kaya pegkejuch akik aidaun aatus shiig kuashat Salomógkan susauwai. Nunak yaunchuk nagkamsagkesh Israel aents aidaunmak imatikaik apu sujakchamun nunú nuwa imatika Salomógkan susauwai.
1KI 10:11 Nuigtushkam lancha múun aidaunum Hiram ofirnumian, oro aidaun ikautkauwai. Tuja numi sándalo tutai katsujam shiig pegkeg aidaunashkam, kaya pegkejuch akik aidaujai ikautkauwai.
1KI 10:12 Dutikamtai nunú numi sándalo tutayai jega Tuke Pujuu emematku ijuntai jegamkamu nagkatkamunum wajasa niimtain, tuja nii pujusa inamjatin jegamkamua nunú nagkatkamunmashkam dutiksag umikui. Tuja nuigtushkam kantamin aidau awatiagtinun nunú numijai arpa aidaun, salterio aidaun ashí umikui. Yaunchuk nagkamsaish numi sándalok imatika wainajakchamun nunú tsawantin shiig kuashat wainnakui.
1KI 10:13 Tuja Salomógshakam yaakat Sabá apuji nuwa aajakua nunú sumamunak ashí susauwai. Dutikak nuigtushkam nigki anentaimas tikich waji aidaunashkam susauwai. Dutika susam nuna yajuak niina aentsji kuitamkam nugken wakitkiuwai.
1KI 10:14 Salomógkak maki makichik mijantin oro aidaun veinti dos mil kilo tumainun yajuak ijumajakui.
1KI 10:15 Tuja nuigtushkam Israel aents aidau nugken waji sujin aidaushkam Salomógkan akijaku ainawai. Arabia nugkanmaya aidaush, nugka yaig aidaun apuji aidaushkam, ashí akijaku ainawai.
1KI 10:16 Tuja ejamaka maanitai tantag múun aidau oro ukatkajum doscientos najanatajum tusa inamjauwai. Tuja maki makichik ejamaka maanitai aidauk seis kilo oro ukatka najanamu aajakui.
1KI 10:17 Tuja nuigtushkam trescientos tantag yaijuch najanatajum tusa nunashkam inamjauwai. Nunú maki makichik tantag aidauk makichik kilo nuigtu jimaituk tumain oro ukuijajum ukatka najanatajum, tiuwai. Tusa tima najanawagmatai, nuna yajuak jega pujusa inamtai Líbano ikamji tutai aajakua nuwi awayauwai.
1KI 10:18 Nuna dutika nuigtushkam elefante nai aidau yajuakjum ekemsa inamtai najanatajum tusa inamjauwai. Tusa timatai imatiksag najanawajui. Dutikawagmatai, oro ukatkatajum tima, ukatkajui.
1KI 10:19 Nunú ekemsa inamtai aajakua duka seisa imania ekeni najanamu aajakui. Tuja atumtaijiya duka apuni najanamu aajakui. Untsu kuntujin patai ekemtai najatuamu aajakua nuna yantamen león wajau dakumka najanamu aajakui.
1KI 10:20 Tuja seisa imania ekenjamu aajakua nuwishkam maki makichik ekenjamua nuna yantamen león dakumjamu aajakui. ¡Nunak tikich apu aajaku aina dukesh numamtin najanamukesh wainkashbaun nii imatika najanauwai!
1KI 10:21 Tuja apu pujusa inamtaiji Líbano ikamji tutai aajakua nuwishkam apu shikika umutaiji aidauk, egkeja yutaiji aidaujai oro najankamu aajakui. Makichkish plata najanamuk atsujakui, wagki Salomón pujusmataig platak wakejusa diimainchau aajakui.
1KI 10:22 Tuja Salomógka lanchaji aidau yaakat Tarsisnum batsamajakua nunú Hiraman lanchaji aidaujai kampatum mijan asa tuke kaunajakui, nuniak oro aidaun, plata aidaun, elefante nai aidaun, kuntin uwegtin aidaun, pavo real aidaun aatus ikaunmajaku ainawai.
1KI 10:23 Tuja apu Salomógkak ashí tikich nugkanmaya apu aidaun nagkaesau wiakuch, nuigtush yacha aajakui.
1KI 10:24 Apajuí yachamtikamu asamtai, ashí aents aidauk niina wainkatatus, nuigtu chichamen antugkatatus shimujaku ainawai.
1KI 10:25 Nunik shimuinak apu susatnun maki makichik juki wejaku ainawai. Nunak waji plata najanamu aidaun, oro najanamu aidaunashkam, jáanch aidaun, maaniaku jutai aidaun, kugkuin nijamtai aidaun, caballo aidaun, burro aidaun aatus sujaku ainawai.
1KI 10:26 Salomógkak mil cuatrocientos carro maanitai aidaun, doce mil caballo maanitai aidaujai sumag ijumjauwai. Tuja tikich suntag aidauk carro maanitai aidaun kuitamainak batsatu, nuninai untsu tikich aidauk apu Jerusalén pujusmatai kuitamkagtin aidau dushakam batsatu.
1KI 10:27 Apu Salomógkak Jerusalégnum kuichkinak kayajai betek shiig kuashat ijumjauwai. Tuja setjunashkam, higuera ajakchamaitak paka weagbaunum, shiig kuashat aiyama imatika ijumjauwai.
1KI 10:28 Tuja Salomógka inake waji sujin aidau Egipto nugkanum nugka Musri tutai aajakua nuwiyan, Cilicia nugkanmayajai caballon apu Salomógkan sumajuk akuptujaku ainawai.
1KI 10:29 Tuja makichik carro egiptunmayan akikeg seiscientos kuichik plata najanamu aajakui. Untsu makichik caballo akikeg ciento cincuenta aajakui. Tuja hitita aentsu apuji aidauk sirianmaya aentsu apuji aidaujai, Salomón sumagbaun nuwiyan carro aidaun, caballo aidaujai sumajaku ainawai.
1KI 11:26 Nabat aajakua nuna uchiji Jeroboamshakam Salomógjai shiwagmagauwai. Jeroboam aajakui Salomógkan suntaji aidaun apuji. Niig yaakat Seredánmaya Efraín wegantu aajakui. Niina dukujig waje Serúa daagtin aajakui.
1KI 11:27 Jeroboam apu Salomógjai shiwagmagauwa duka juni nagkamdauwai: Salomógkak Davita yaaktaji tutai aajakua nuna, nain wajajunum nagkama peegkeg tentea ashimak, agkaju aidaun sekatug ashimkatatus takak pujusa,
1KI 11:28 Jeroboam wajiu, takau wajasu asamtai, José wegantu aidau takaina nuna diisti tusa nuna apujin apu Salomón adaikauwai.
1KI 11:29 Nunú tsawantin Jeroboam Jerusalén pujau jiinki wekama profeta Ahías yaakat Silónmaya aajakua nunú jáanch yamagman nugkuaju wegaun igkugkui. Dutika ima niijaig ajanum batsatu.
1KI 11:30 Nuwi pujus Ahías jáanch yamajam nugkuagbaujin doceya imajin ichiajui.
1KI 11:31 Dutika Jeroboaman chichajak: “Juju jáanch doce ichiagbauwa juwiya diez aminu atin jukita, wagki Tuke Pujuu Apajuí Israel aents aidau emematin aina nunú amina chichagtamak: ‘Salomón apu puja nuna atankin, Israel aents aidau diez wegantu aina nuna amina amastatjame, dutikakun dita apuji adaikattagme’, tujamui.
1KI 11:32 ‘Untsu David mina inakeg aajakua nunú mina chichamjun umigtuku asamtai, tuja Israel aents aina nuna yaaktaji aina nuwiyan makichik Jerusalégkan wi pujustinun etegkauwaitag nuadui, Salomógnak ima Judá wegantu aina nuna apuji ati tusan titatjai.
1KI 11:33 Salomógkak minak dakitjuje, nuniak nuwa Astarté dakumka najanamun yaakat Sidógnumia aidau emematin aina nuna, nuigtu Quemós Moab aents aidau ememattai aina nuna, nuigtu Milcom amonita aents aidau emematin aina nunashkam emematui. Nuadui niina takatjig mina shiig awajtatsui. Niina apaji David mina chichameg umiktin agagbau aidaun umikua dutikag niig umikchae.
1KI 11:34 Nunin aigkishkam nii apu wajas inama nunak tikima ashí atankishtatjai. Nunak dutiktsuk nii iwaku puja duikik apu ati titatjai, wagki mina inakeg David wi etegkamu aajakua nunú mina chichamjun betek umigtuku asamtai.
1KI 11:35 Tujash niina uchiji apu atina nunak Israel wegantu doce aina nuwiyan diez atankittajai, dutikamtai ame nuwi inamjattame.
1KI 11:36 Tuja niina uchijinak ima makichik wegantunak ukugkittajai. Nunak dutikattajai, wagki mina inakeg David aajakua nunú wegantunmaya makichik Jerusalégkan wi etegkauwaitag nuwi pujus inamjati tusan.
1KI 11:37 Tuja wi aminak ashí ame wakegamunum inamjata titatjame, dutikakun Israel aents aidaun apuji emattagme.
1KI 11:38 Tuja wi amina titatjam nunú ashí umiakum takatjumesh pegkeg, tuja mina chichameg umiktin agagbauwa dushakam mina inakeg David umikua dutiksamek umiakminig, wi aminak yaigtinaitjame. Dutikakun David wegantunmaya apu agtinai tiuwaitag nunak imatiksanuk ame wegantu aidaunmayanashkam Israel aents aidaun apuji wajas inamjatnun etegkatnaitjai.
1KI 11:39 Untsu David wegantu aidaunak Salomón mina umigtutsuk tikichin apajuímak idaitusu asamtai, suwimkan susagtatjai. Tujash nunú suwimkanak tuke suu pujushtinaitjai’, tawai Apajuí”, tiuwai Ahías.
1KI 11:40 Nuna Salomón antuk Jeroboaman maatag tiuwai. Dutikam Jeroboam tupikaki apu Sisac inamajakua nuwi Egipto nugkanum weuwai. Nunik nuwi pujaig Salomón jakauwai.
1KI 11:41 Salomógka pujutji, yachaji, takasbauji aidauk papii Crónica tutainum agagbau ainawai.
1KI 11:42 Salomógkak Jerusalén pujus ashí Israel aents aidaunum cuarenta mijan tumain inamjauwai.
1KI 11:43 Salomón jakamtai Jerusalégnum niina apaji Davita yaaktaji tutainum ukusajui. Nii jakamtai niina uchiji Roboam apu wajas inamjauwai.
1KI 12:1 Israel aents aidau Roboaman apu adaikagtatus Siquemnum shiyakajui, nunikagmatai Roboamshakam nuwi weuwai.
1KI 12:2 Nuna aatus chichainamun Jeroboam Nabatan uchiji, Salomón maatag tama tupikaki, Egipto nugkanum weuwa nunú, nuwi pujus dekauwai.
1KI 12:3 Jeroboaman untsuka itawag Israel aents aidau niijai ijunag Roboamjai chichastatus shiyakajui. Nunik jegajua chichajuinak:
1KI 12:4 “Amina apa aajakua duka ii aidautinak senchi takamtijamak waitkagmasui. Tuja amesh imatika takat sukagtachkuminig, iishkam ame tabauk betek umiktatji”, tiajui.
1KI 12:5 Tusa tama Roboam ditan chichajak: “¡Waketjatajum, nunikjum kampatum tsawan asajum kaunatajum!” tiuwai. Tusa tiajam Israel aents aidau waketjajui.
1KI 12:6 Nunikagmatai Roboam niina apaji Salomón iwaku pujusmatai, múun aidau niijai takajaku aidaun iniak: “Juju aents aidau tuina nunash wisha ¿wajintu aimainaitja?” tau.
1KI 12:7 Tusa iniam dita ainak: “Amina takagtamainak ame tabaun tuke umigtamkatin atinme tusam wakegakmek, yamai ditajai shiig chichasam, dita tujamaina nunú umikta”, tuidau.
1KI 12:8 Tusa tamashkam apu Roboamak ditanak antugkachui. Nuniak niijai betek tsakaku niina takajin aidau batsatun, iniak:
1KI 12:9 “Juju aents aidau chichainak: ‘Amina apa iina shiig senchi waitkagmasua nunitsuk, amek shiig kuitamkagtukta’, tujutuina nunash ¿atum anentaimsamash wajinmainaitja?” tiuwai.
1KI 12:10 Tusa tutai nunú aents niijai betek tsakaku aidau niina chichajuinak: “Au aents aidau amina chichagtamainak: ‘Amina apa iina senchi waitkagmasua nunitsuk, amek shiig kuitamkagtukta’, tusa tujamaina duka aajam tumainaitme: ‘Mina apag atumin shiig kuitamjamkachuitkuig, wika nuni nagkaemasan shiig kuitamkashtatjime.
1KI 12:11 Tuja mina apag senchi takamtijamsau ainakuig, wi nuni senchi takamtikun waitkastatjime. Tuja mina apag akachumtayai atumin asutamajakuitkuig, wi nuni nagkaemasan jiju hierro tutai tsakaskatu aina duwi asutiattajime’ tita”, tiajui.
1KI 12:12 Tuja apu Roboam Jeroboaman kampatum tsawan asam taata tibau asa, Israel aents aidaujai ashí apu Roboamjai chichastatus jegawajui.
1KI 12:13 Nunikagmatai apu Roboamak apu chichagkagtin múun aidau tibaunak umitsuk, shiig senchi pegkegchaun chichagkauwai.
1KI 12:14 Nuniak nunú datsauch aidau tibauwa nuna imatiksag chichaak: “Mina apag senchi takamtijamajakuitkuig, wika nuni senchi takamtikakun waitkastatjime. Tuja mina apag akachumtayai asutamajakuitkuig, wika nuni senchi jiju hierro tutai tsakaskatu aidauwai asutiattajime”, tiuwai.
1KI 12:15 Tau asa Israel aents múun aidau tita tibaunak Roboamak umikchauwai. Wagki nunak Tuke Pujuu profeta Ahíasan akateak: “Salomón Israel wegantu doce aina nuna apujiya nunak diez atankin, Jeroboaman susattajai”, tusa tiuwa nunú uminkatin asamtai nunikui.
1KI 12:16 Tuja Israel aents aidau tabaun apu Roboam antugcham dita chichajuinak: “¡David wegantu aina nunú iina apuji ati tusaik wakegatsji! ¡Jesé uchiji aidau dita wajijin akanak iina amamainuk makichkish atsujainawai! ¡Davita tijaji aidauk dita ditak kuitamdaikatnume! ¡Untsu Israel aents aidautik iina jeen waketjagmi!” tiajui. Aatus tusa ukuinak dita jeen waketjajui.
1KI 12:17 Nunikagmatai Roboamak Israel aents ainayatak Judá wegantu aidau nugken batsamajaku aina nuna apuji wajas inamak pujujakui.
1KI 12:18 Nunik pujai, tikich Israel wegantu aidau pampaidau. Imatiagtai Adoram takata apuji aajakua nuna Roboam dekata tusa awemauwai. Dutikamun Israel aents aidau kayai tukui tukuinakua maawajui. Dutikawagmatai apu Roboam ishamak shiig wamak carrojin egkema Jerusalén tupikakiuwai.
1KI 12:19 Aatus Israel aents aidau diez wegantu aajaku aina nunú David wegantu apu wajasujai shiwagmagawajui.
1KI 12:20 Nunik batsamas Jeroboam wakitki tae tabaun Israel aents aidau diez wegantu aajaku aina nunú antukag, ijunag chichama akuptukajui taati tusag. Tusa akuptukam taamtai, dita apuji adaikag chichainak: “¡Yamaik ametme iina apujimek!” Tuja David wegantu iina apuji ati tuidauk ima Judá wegantu aina duke juwakaje.
1KI 12:21 Tuja Roboamak tupikaki Jerusalén wegak, suntag aidaun etegkeg Judá wegantunmayan Benjamín wegantunmayajai ciento ochenta mil yajuak, Israel wegantu aidaujai maania depetmakan ashí dita aidaun apuji atajai tusa jegauwai.
1KI 12:22 Tujash profeta Semaías aajakua nuna Tuke Pujuu chichajak:
1KI 12:23 “Salomógka uchiji Roboam Judá wegantu apujijai chichasta, nuniakum ashí aents Judá wegantu aina nujai, tuja Benjamín wegantu aidaujaishkam chichaakum:
1KI 12:24 Tuke Pujuu chichaak: ‘Dita yachi Israel aents aina nujaig maaniawainmegka. Nunak nunitsuk dita jeen waketjatnume, wagki wi mina aentsug aina nunak kanaktinme tijai’, tawai tusam ujakta”, tiuwai. Nunú Tuke Pujuu tibau ujakam, nuna umiinak dita jeen waketjajui.
1KI 12:25 Tuja Jeroboam yaakat Siquem Efraígka nugken awa nuna tentea peegkeg apakui, dutika nuwi nii pujusui. Nuwi pujus yaakat Penuel daagtin aajakua nuna peegkeg tentea apakui.
1KI 12:26 Tujash nii anentaimas: “David wegantu aina nunú tikich Israel aents diez wegantu aina nuna awagki ijumag dita apuji atajai tumainai.
1KI 12:27 Tuja juju aents aidauk Tuke Pujuun emematuinak, kuntinun apeatatus Jerusalén shimuina nuninak Roboam Judá wegantu apujiya nuna ataktu shiig anenmain ainawai. “Nuninak mina mantuawag Roboamjai ataktu ijunmain ainawai” tusa,
1KI 12:28 niina suntaji apuji aidaujai chichasa, oro yajuakjum jimag toro tsakat dakumka najanatajum tusa inamjauwai. Nuna najanawagmatai, aents aidaun chichajak: “Atum aidautijum kuashta Jerusalén shimagme. Tujash yamaik jujuwai atumi Apajuíjum, Egipto nugkanum batsatutigmin jiipajajua duka”, tiuwai.
1KI 12:29 Nuna tusa niina suntaji aidaun inajui, dutikam nunú jimag toro tsakat dakumka najanamun makichik jukiag tsumujin yaakat Betelnum apusajui, untsu tikichnak yaakat Dagnum apusajui.
1KI 12:30 Dutikawagmatai Israel aents aidauk pegkegchaun takamsajui, wagki Jerusalén wegag Apajuí emematmainun idayinak, Betelnum shiyakag, tuja Dagnum shiyakag nuna emematuidau asag.
1KI 12:31 Tuja Jeroboamshakam nain aidaunum jega Apajuí emematku ijuntai tusa jegamjauwai. Dutika aents Leví wegantuchu aidaunak sacerdote adaijauwai.
1KI 12:32 Nuigtushkam Jeroboam dutikati tichamaitak, nantu ocho takamunum tsawan quincetin Judá wegantu aidau jiistamin aina nunú jiistamami tusa nigki umikui. Dutika nigki nuigtushkam kuntinun maa kuntin patasa apetainum apeauwai. Nunak nii inamjamtai toro tsakat najanamu Betelnum aajakua nuna emematak dutikauwai. Dutika nunú jega wainka apajuímtai emematku ijuntai aidaun kuitamkatnun, atum sacerdote atajum tusa adaitujui.
1KI 12:33 Aatus nantu ochoa nunú takamtai, tsawan quincetin Jeroboam kuntin patasa apetain Betelnum najanauwa nuwi kuntinu maa patas apeauwai. Dutikak juju nantutin Apajuí emematku jiistamtai ati tusa Israel aents aidaun tiuwai. Nuna tusa kugkuin incienso tutain apeatatus altarnum wakauwai. Tujash nunak nii wakegak dutikauwai.
1KI 16:29 Makichik aents Asá daagtin Judá wegantunum apu wajas treinta y ocho mijan inamai, Omrí uchiji Acab aajakua nunú Israel nugkanum apu wajas inamtan nagkamauwai. Niig yaakat Samaria pujus veinti dos mijan inamjauwai.
1KI 16:30 Tujash niina pujutig Tuke Pujuu diismak shiig pegkegchau aajakui. Tikich apu aidau pegkegchaun takasu aina nuna nagkaesau pegkegchau aajakui.
1KI 16:31 Makichkish pegkegchaun takaschatjai tusagkesh anentaimtsuk, Jeroboamjai betek pegkegchaun takasui. Nuniau asa Sidógkan apuji Et-baal aajakua nuna nawanji nuwa pegkegchau Jezabelan nuwatkauwai. Nunik ditá ememattaiji Baal aajakua nuna niishkam emematujakui.
1KI 16:32 Nuigtushkam Baal emematku kuntin patasa apeatnun Samaria nugkanum najanauwai. Dutikak Baal emematku ijuntain jegan jegamkauwai.
1KI 16:33 Tuja nuigtushkam tikich dita apajuímtaiji Asherá aajakua nuna niimen numinum dakumak najanauwai. Dutikamtai Tuke Pujuu Israel aents aidaun Apajuíjiya nunú, yaunchuk apu aajaku aidaun kajegkauwa nuna nagkaesau shiig senchi kajegkauwai.
1KI 16:34 Acab apu aajakua nunú tsawantin makichik aents betelnumia Hiel daagtin yaakat Jericó tsaikbau aajakua nuna ataktu yaaktamauwai. Nuna yaaktamatatus yama nagkama takamunum niina uchiji iwai Abiram jakauwai. Tuja yaakta najana nuna waitijin apujtusu ai, niina uchiji ekeu Segub jakauwai. Duka nunikui wagki Tuke Pujuu Josuén chichajak: “Makichik aents Jericón ataktu yaaktamatag tusa takatna nuna uchijig jinaatnai”, tiuwa nunú umintai.
1KI 17:1 Profeta Elías Tisbénmaya aajakua nunú apu Acabpan chichajak: “¡Juju mijana duwi nagkama yumi yutugchattawai, wi yutugti tama yutugtin asa! Tuja sajattanakesh sajatkashtatui. ¡Junak Israel aents aidau Tuke Pujuu Apajuín emematin aina nuna wi umijag nuna daajin dekas uminkatnun tajai!” tiuwai.
1KI 17:2 Tusa pujai Tuke Pujuu Elíasan chichajak:
1KI 17:3 “Juwi pujam nunú jiinkim etsa minitaiya nuni wetá. Nunikam entsa Querit tutai namak Jordágnum etsa minitaiya nuni awa nuwi uumkam pujusta.
1KI 17:4 Nuwi pujusam nunú yumi uwagtatme. Tuja wi chigki cuervon awemattajai yutain amastí tusan”, tiuwai.
1KI 17:5 Tusa tima Elías Tuke Pujuu tibaun umiak Querit entsanum weuwai.
1KI 17:6 Nunik imau pujai, cuervo aidau pagkan nejejai jukiag kashikmas, aagkú aatus ejetuidau. Untsu yuminak nunú entsanmayan umujakui.
1KI 17:7 Tujash yumi yutachu asamtai, nunú entsak dukap atsuk kuyua buku wajasui.
1KI 17:8 Nunik entsa kuyuamtai, Tuke Pujuu Elíasan chichajak:
1KI 17:9 “¡Yaakat Sarepta Sidón nugkanum awa nuwi weme pujusta! Tuja makichik nuwa waje nuwi puja nunú amina yutain amastí tijai”, tiuwai.
1KI 17:10 Tusa tima Elías nunú yaaktanum weuwai. Nunik wea weakua jegattak wekama, makichik nuwa chigkimin juwaak wekaetatman wainkauwai. Nunik untsuka chichajak: “¡Wait aneasam tsapanum yumi shikikam ajampusta uwagtajai!” tiuwai.
1KI 17:11 Tusa tima nunú nuwa yumin utitag tusa wegaun Elías ataktu untsuka chichajak: “¡Wait aneasam pagshakam itagtuata!” tiuwai.
1KI 17:12 Tama nii ayaak: “Tuke Pujuu Apajuí ame emematnaitam nuna daajin dekaskenum tajame, pagkak shiig atsugtawai. Untsu harina shiig piipich ichinkanum, tuja aceiteshkam piipich jarranum ajutui. Nuna mina uchigjai inajuan yuwatasan chigkimin juwakun wekaejai. Untsu nuna ashí inajuamtai yuwami, nunika nunú amuka nujantaikish jinaami, wagki tikich yumainuk shiig atsawai”, tiuwai.
1KI 17:13 Tutai Elías ayaak: “Nuna amukan nujantai jakashtajash tusamek puyatkaipa. Ame piipich ajutui tame nunú inagkata. Tujash wi yuwatna nunuwá pag inajuam sujusta. Dutikam nuadui ame yuwatin uchijum yuwatnujai inajuata.
1KI 17:14 Wagki Tuke Pujuu Apajuín Israel aents aidau emematin aina nunú: ‘Harina ichinkanum awa duka amuekashtatui, tuja aceite jarranum awa dushakam amuekashtatui’, tawai. Nuadui nunú yusa pujajinig, Tuke Pujuu yumin yutumtijattawai”, tiuwai.
1KI 17:15 Tusa tima ukuak weuwai. Nunik Elías tibaunak imatiksag umikui. Nuna yusag kuashat tsawan batsamsajui.
1KI 17:16 Tuja Tuke Pujuu Elíasan tibaunak betek, harina ichinkanum auk amuekachui. Tuja aceite jarranum aushkam amuekachui.
1KI 17:17 Nunik kuashat tsawan batsatai, nunú nuwa wajea nuna uchiji jata achikam shiig senchi jau asa jakauwai.
1KI 17:18 Nunikmatai nunú nuwa Elíasan chichajak: “¡Elíasah, Apajuín inakegah! ¿Wisha aminash itugkamu asamea suwimak sujakmesh mina uchijush mantugtame?” tiuwai.
1KI 17:19 Tama Elías ayaak: “¡Uchijum juwi itanta!” tusa niina bakuin uchijin patasa pujujun juki, Elías nii kanutaijin yakí iwaka niina pegakjin aepsauwai.
1KI 17:20 Dutika senchi untsumak Tuke Pujuu Apajuín segaak: “¡Tuke Pujuu Apajuí mina ememattaijuh! Juju nuwa mina kuitamjuka juna uchiji jakamtai, anentaimak senchi waittsati tusamesh ¿wagka tiume?” tau.
1KI 17:21 Tusa tamawaik uchin kampatuma imania pagkuk senchi untsumak Apajuín segaak: “¡Tuke Pujuu Apajuí mina ememattaijuh! ¡Wait aneasam juju uchi etsagagta!” tiuwai.
1KI 17:22 Tusa segam Tuke Pujuu niina antujuk uchin etsagajui.
1KI 17:23 Dutikamtai Elías uchi juki nugká akaiki dukujin suwak: “¡Diisia nijah, amina uchigmek iwakui!” tiuwai.
1KI 17:24 Tusa tama nunú nuwa ayaak: “Yamai dekajai, amek dekas Apajuí etegkamuitme. Tuja ame tame duka ¡dekaskea nu Tuke Pujuunmaya tame!” tiuwai.
1KI 18:1 Kampatum mijan nagkaemakiu ai, makichik tsawantai Tuke Pujuu Elíasan chichajak: “¡Yumin yutumtijattajai, dutikatin asamtai apu Acab pujamunum wetá!” tiuwai.
1KI 18:2 Tusa tima Elías weuwai. Nunik apu Acab pujamunum jegauwai. Tuja nunú tsawantinig yaakat samarianmaya aidauk yumain atsau asamtai, shiig senchi nujantai waituidau.
1KI 18:3 Imanik waituidau asag Elíasak eke jegatsaig, Acab niina wajiji aidaun kuitamin Abdías Tuke Pujuun eme anentus emematujakua nuna untsukui.
1KI 18:4 Tuja nunú tsawantin Jezabel Tuke Pujuu aentsji profeta aina nunú kajegtajum tusa suntag aidaun inajui. Dutiktai Abdías cien profeta Apajuí takajin aidaun ijumjauwai. Dutika cincuenta, cincuenta akanak jimag waanum uumkatajum tusa ishiakui. Dutika ishiakam imau uumak batsatun yujumkan ejetua ayujujakui.
1KI 18:5 Tuja Abdías apu Acab pujamunum jegamtai, nii chichajak: “Juju nugkanum entsa aidau, namak aidau ayá nuni wemi. Nunika nuwi wekaesa namputchawame caballo aidau, burro aidau ayugmain chijichi atsawash egakmi. Dutika egachkuik kuntin jinaamtai tagkugtuchu juwaktatji”, tiuwai.
1KI 18:6 Nuna tusag, nunú nugkanum dita yujastag tibaunum shiyakajui. Tuja Acab tikich yantamnum wetai, untsu Abdías tikich yantamnum weuwai.
1KI 18:7 Nunik wekama Elías minaujai Abdías igkunikui. Nunik niina emtin tsuntsuma pujus chichajak: “¡Mina Apujuh! ¿Ame Elíaschaukaitam?” tau.
1KI 18:8 Tama nii ayaak: “Ehe, witjai. Weme amina apujum Acab, Elías tae tusam ujakta”, tiuwai.
1KI 18:9 Tusa tama Abdías ayaak: “Wi apu Acabpan jegajua ujaig, minak mantumainai.
1KI 18:10 Apu Acab amina egapak ashí nugkanum aents ishiakbau aidau yujawai. Dutikamu waketug kaunawag wainkachji tusa ujainam, dekas wainkachuitkumek Tuke Pujuu daajin tajai tita tusa imatjawai. Nunak ame Tuke Pujuu Apajuí ame emematnaitam nuna daajin dekaskenum tajame.
1KI 18:11 ¿Imania nunash wi jegajuan Elías juwi pujawai tusan ujaktag?
1KI 18:12 Wi apu ujaktasan amejai pujag nuna ukukin wegai, Apajuí Wakani egkemtugmag wi dekashbaunum etamtatui. Tuja wi Acabpan ujaka ai, nii amina waipaktakama waipakchag mina mantumainai. Wi amina inakmetag nunak datsauch asanuk Tuke Pujuun umignaitjai.
1KI 18:13 Tuja Jezabel profeta aidaun kajegtag takui, wi ayamjukuitag duka ¿amek dekachukaitam? Tusa chichaman umikmatai, wi profeta aidaun cien ijumjan, cincuenta cincuenta akankan jimag waanum utsawabiajai. Dutikan nuwi batsatun yutain suyajai.
1KI 18:14 Nunin aish ¿wagka yamaish minash, apujum wejim Elías juwi pujawai tusa ujakta tusamesh tujutme? Atsa amina waipakcha maati tusa ¿tujuttsumek?” tiuwai.
1KI 18:15 Tutai Elías ayaak: “Tuke Pujuu Apajuí ashí senchigtina nuna daajin tajame. Yamaikiuch apu Acabjai chichastasan wetatjai”, tiuwai.
1KI 18:16 Tusa tima Abdías Acabpan ujaktatus weuwai. Dutika ujakam Acab Elíasjai igkunik chichastatus weuwai.
1KI 18:17 Nunik jegaa Elíasan chichajak: “¿Amekaitam Israel aents aidau utugchat apugtusam waitkam nunú?” tiuwai.
1KI 18:18 Tusa tama nii ayaak: “Wika Israel aents aidaunak utugchatan apujtusnuk waitkatsjai. Auk ame amina pataim aidaujai Tuke Pujuu chichame umiktajum tibauwa nunú idaikujum, Baal emematu yujau asajum, Israel aents aidauk waitkagme.
1KI 18:19 Untsu takumek ashí Israel aents aidau, Baala chichamen etsejin cuatrocientos aidau, nuigtu Astarté chichamen etsejin cuatrocientos aatus aina nuna Jezabel ayuju pujuja nunú muja Carmelo tutaya nuwi ashí ijunjatnume tusam tita”, tiuwai.
1KI 18:20 Tusa tima Acab ashí Israel aents aidaun Baala profetaji aidaujai muja Carmelonum ijumjauwai.
1KI 18:21 Dutikamtai Elías ashí tuwaka ijunbaunum jeganta ditan chichajak: “¿Atumesh ima Apajuík umigchau jimag anentaintin ainajum dusha wajutiya yapajinattagme? Wi Tuke Pujuun umijag nunú dekas Apajuíyaitkuig nii umigkatajum. Untsu dekas Baal Apajuíyaitkuig nii umigkatajum”, tiuwai. Tusa tamash aents aidauk makichkish aimtsuk ijunu.
1KI 18:22 Nuna tusa ataktu awagki chichaak: “Tuke Pujuu chichamen etsegtin iwakuk ima wikiuchitjai. Untsu Baala profetaji aina duka cuatrocientos cincuenta ainawai.
1KI 18:23 Tuja jimag toro tsakat sukagtustajum, nuna dita makichik etegka jukiag maa asajag jii ikapagtin ijumjamunum patagtinme. Tujash eke jiinak ekemakainmegka. Dutikawagmatai wishakam tikich toro tsakatan asajan jii ikapagtin ijumjamunum patagtajai, tuja wishakam jiinak ikapagchattajai.
1KI 18:24 Nunú ashí uminkamtai atum aidautijum atumi apajuíji untsuktajum. Tuja wishakam Tuke Pujuun untsuktajai. Tusa untsuam nuna antujuk jii kegaun ajuag ekemaktata nunú dekas atatui Apajuíya duka”, tiuwai.
1KI 18:25 Nuna tusa Elías Baala chichamen etsejin aidaun chichajak: “Atumek kuashat ainajum nuadui jimag toro tsakat puja nunú diisjum etegka jukijum atumea umiktajum. Dutikajum atumi apajuíjum untsuktajum. Tujash eke jii ijumjamua duka ekemakaigpa”, tiuwai.
1KI 18:26 Tusa tima, betek umikajui. Dutika umikag kashikmas nagkamas Baalan untsú batsatu. Imatuinak: “¡Apawa Baala aijatkata!” tusag kuntin patasa apetainum nuna tentea ijunas peepet tsekenau. Tujash makichkish ayachu.
1KI 18:27 Imaniagtai etsa tutupit ai, Elías ditan tuke aneas dushikiak: “Senchi untsumkatajum, auk dekas niyai apajuík. Tsawanji atsugmas aigmatsutai. Nuniachkush wakenmas wematai. Atsa nuniachkush tikich nugkanmas wematai. ¡Namputchawame kanag shintachu asa aniatsuash, ishintagtajum!” tau.
1KI 18:28 Tuja ditak tuke untsuma batsatu. Imatuidau asag, dita apajuíjin emematuinakug tuke nunin asag, kuchiyai tsupimakag numpak wajasag batsatu.
1KI 18:29 Etsa tajiag tegamtaishkam, imaanjaujai betek tsekenak untsuma batsatu. Imani batsataig kuntin apeatin tsawan jegauwai. Tujash imatuidaun ayauk makichkish antukachui. Wagki ditan aimainuk makichkish atsau asa.
1KI 18:30 Nunikmatai Elías ashí aents aidaun chichajak: “Wi wajag juwi kaunatajum”, tiuwai. Tusa tima ashí jegantajui. Nunikagmatai Tuke Pujuu emematku kuntin maa patasa apetai yaunchuk najanamu aajaku tsaikbaun ataktu iwajauwai.
1KI 18:31 Nuna najankug Apajuí Jacopan Israel atatme tiuwa nuna uchiji doce aajakua imatiksag doce kaya aidaun yajuakui.
1KI 18:32 Dutika nunú kaya aidaun ekenag Apajuí emematku kuntin patasa apeatnun najanauwai. Dutika, nuna tentea tainiuwai veinte kilo trigo chimpimainun.
1KI 18:33 Dutika nuwi chigkimi patag nuadui toro tsakatan asaag nuwi pataajui.
1KI 18:34 Dutika chichaak: “Ipak usumat ichinkanum yumi aimkatajum, dutikajum kuntin asaaja patagbauwa nunú chigkim patagbauwa nujai kampatuma ukatkatajum”, tiuwai. Tusa tima imatiksag dutikau ainawai.
1KI 18:35 Dutikamu asa nunú yumi saegak kuntin patasa apetai najanamunum nuna yantamen nugka taimunmak ashí piyajui.
1KI 18:36 Tuja kuntinu neje ashí apetai tsawan jegamtai Elías nuwi jeganta chichaak: “Tuke Pujuu Apajuín Abraham, Isaac, Israel aents aidau emematin aina nunuwah, dekas amek Israel aents aidaun ememattayaitam nuna yamai dekatnume. Tuja wika amina inakem asan, ame inatjamin jutikag nunashkam dekatnume.
1KI 18:37 ¡Tuke Pujuuwah ayu tujutta. Amek ditan Apajuíji asam aigkata, nuna wainkag ataktu amina umigtamainak, ame dita untsuam nuna shiig dekatnume!” tiuwai.
1KI 18:38 Tusa inagnaig Tuke Pujuu awemamu nayaimpinmaya jii iyajui. Nunik iyaag nunú kuntin maa asaja patagbaunak chigkimjai ijumag apeauwai. Dutikak kayanashkam apea yuku emauwai. Dutikak nugka taimunum yumi piyajunak buku emauwai.
1KI 18:39 Nuna wainkag aents aidauk ishamkag tsuntsumawag nijayin nugka antig pujusag chichainak: “¡Tuke Pujuuk dekas iina Apajuíjiyai, Tuke Pujuuk dekas iina Apajuíjiyai!” wajaidau.
1KI 18:40 Imatiagtai Elías ditan chichajak: “¡Baala profetaji aina nunú achiktajum! ¡Makichkish tupikakig uwemjainmegka!” tiuwai. Tusa tima Israel aents aidau aintug achikajui. Dutikawagmatai muja segaunum entsa Quisón tutainum yajuak emauwai, nuwi ejegawag kajegkajui.
1KI 18:41 Dutika ijinawagmatai Elías apu Acabpan chichajak: “Wamak weme yujumak yuwata, yumi uutun antajai”, tiuwai.
1KI 18:42 Tusa tima Acab yujumka yuwatatus weuwai. Tujash Elíasak muja Carmelo tutainum yakí wakauwai. Nunik nuwi tikishmag tsuntsuma yapin tikishin antig pujusui.
1KI 18:43 Nunik pujus niina inaken chichajak: “Weme nayantsanmanini niimsata”, tiuwai. Tusa tima wee diisui, nunik wakitki taa chichaak: “Atsawai wainkachjai”, tiuwai. Tujash Elías chichajak: “Sieteya imania wakitkita”, tiuwai.
1KI 18:44 Tusa tima sieteya nuna wee taa chichaak: “¡Nayantsanmaya yujagkim piipich uwegjai betek yakí wau wainnawai!” tiuwai. Timatai Elías niina chichajak: “Weme Acab ujakta, carrojin juki, eke yumi yutatsaig weti, yumi senchi yutak epenkai”, tiuwai.
1KI 18:45 Tusa tima, weji Acabpan ujakui. Dutika ujakam carrojin egkema yaakat Jezreelnum weuwai. Nuniai nayaimpinmak dasesegmat yujagkim suwe wajasui. Nunik shiig senchi yutujui.
1KI 18:46 Tuja Elíasak Tuke Pujuu senchimtikamu asa, niina jáanchjin akachumtaiyai jigka shiig senchi tupikaki, apu Acab yaakat Jezreel jegatsaig niiya jegauwai.
1KI 19:1 Acab yaakat Jezreelnum jegá, Elías dutikamun pachis wajuk Baala profetaji aidaun ijinae nuna ashí Jezabelan ujakui.
1KI 19:2 Dutika ujakam niina aentsji chichama etsegnun Elías ujakta tusa akateak: “¡Elíasah, ame mina profetag aidau kajegkume, nuadui wi aminak mantamatnume titatjai! ¡Tuja ame mina profetag aidau kajegkum dutiksanuk, kashin etsa yamai awa juniai wi amina maachmataig mina apajuíg suwimkan sujusti!” tiuwai.
1KI 19:3 Nuna chichama antuk maatag tabau asa tupikaki, Judá nugken yaakat Beershebanum weuwai. Nunik jegaa nuwi niina inaken ukukiuwai.
1KI 19:4 Untsu niig nigki uwegshunmanini weuwai. Nunik makichik tsawan wea weakua tampuch wajamunum jeganta nuwi ayaumas pujusui. Nuwi pujus jamainun anentaimu asa chichaak: “¡Tuke Pujuuwah, yamai anentaimkun waittsashjai! ¡Dekas jakati tujutta, wagki wika mina muuntug aina nuna nagkaesaukesh atsujai!” tiuwai.
1KI 19:5 Aatus tusa nuwig tepes kanajui. Nunik tepaun ángel tumain Apajuí tajua achika ishintak: “¡Nantakim yujumak yuwata!” tiuwai.
1KI 19:6 Tusa tama shigtaag ashí niimsatakama, niina chaiken makichik torta yama inajuamu, nuigtu yumi jarranum aimkam pujaun wainkauwai. Nunik wainak nantaki nuna yuwa umutnashkam uwajui. Nunik ataktu tepes kanajui.
1KI 19:7 Tujash Apajuí ángel tumain ataktu tajua achika ishintag, chichajak: “¡Nantakim yuwata, ame wegam duka shiig atushtai!” tiuwai.
1KI 19:8 Tusa tima Elías nantaki nuna yuwa umutain uwajui. Nuna yuwa ichichmamag cuarenta tsawan, nuigtu cuarenta kashi wekagas Apajuí mujaji Horebnum jegauwai.
1KI 19:9 Nunik jegaa nuwi waanum waigka kanag tsawajui. Nuwi pujaun Tuke Pujuu niina chichajak: “¿Elíasah, amesh juwish waji pujugme?” tiuwai.
1KI 19:10 Tama nii ayaak: “Israel aents aidau amina idaitamsaju asag, ame emematku kuntin maa patasa apetai najanamu aidaun yumpuajag, amina profetajum aidaunashkam kajegkaje. Nuninakui amina akasmatkun shiig senchi kajeajai. Tuja ima wiki iwaku juwakjai. Minashkam mantuatatus egatuinawai”, tiuwai.
1KI 19:11 Tusa timatai Tuke Pujuu niina chichajak: “¡Jiinkim anú mujanum mina emtijui wajasta!” tiuwai. Nuna tusa inagnaig, Tuke Pujuu nagkaemakiuwai, nuniai dase shiig senchi dasentak nunú mujan umuchiam kaya múun aidau jimaituk dakaejauwai. Nunú nagkaemaig nugka senchi uugkauwai. Tujash Tuke Pujuuk dasenmak atsujakui.
1KI 19:12 Tuja nugka uugbau nagkaemaig, jii keejakui. Tujash Tuke Pujuuk nunú jii kegamunmashkam pujujakchauwai. Nunú jii kegau megkagai, antuekauwai shiig pegkegchin shinau.
1KI 19:13 Nuna Elías antuk ishamak niina jáanchjin juki, yapin dukuka waanum pujau jiinki pujusui. Nunik pujai chicham chichamu antuegak: “¿Elíasah, amesh anuish waji pujugme?” tau.
1KI 19:14 Tama nii ayaak: “Israel aents aidau amina idaitamsaju asag, ame emematku kuntin maa patasa apetai najanamu aidaun yumpuajag, amina profetajum aidaunashkam kajegkaje, nuninakui amina akasmatkun shiig senchi kajeajai. Tuja ima wiki iwaku juwakjai. Minashkam mantuatatus egatuinawai”, tiuwai.
1KI 19:15 Tusa tutai Tuke Pujuu niina chichajak: “Ame taamun nunú jintanmak uwejush yaakat Damasco awa nuni wakitkita. Nunika jegaam Hazael aceiteyai buuknum nijakam Siria apuji emata.
1KI 19:16 Tuja Nimsí tijaji Jehú aceiteyai buuknum nijakam Israel aents aidaun apuji emata. Untsu Safat Abel-meholánmayan uchiji Eliseo amejai yapajinatin adaikata.
1KI 19:17 Dutikawamin Israel aents aidau Baalan emematiu aidaunak Hazael kajegtatui. Dutika kajeam pisagmataish, Jehú ijinattawai. Untsu Jehú maatag tama pisagmataig, Eliseo ijinattawai.
1KI 19:18 Untsu Israel aents siete mil aidau Baalan tikishmatug emematchaju aidau, tuja sauktanakesh saukuachaju aina nunak ijinashtatjai”, tiuwai.
1KI 19:19 Tuja Elíasak nuwi pujau wakitkiuwai, nunik Eliseo ajak ajakmatnun takak pujaun wainkauwai. Tuja doce toro aidaunum nugka pukutai jigkatuamu aidau eemak, nugka pukui shimutai niishkam nuna ukujin makichik japis nugka pukua pukuakua wegau. Nunittaman Elías jegantun niina jáanchjiyai tuntupnum dukukui.
1KI 19:20 Dutikam nuna japis wegau ukuak tupikaki Elíasan jegantun chichajak: “¡Machik tsawan sujusta! ¡Mina apajun mina dukugjai ujaka ukuakun amejai wekaesatjai!” tiuwai. Tusa tama: “¡Ayu nunikta, tujash aneaku ata wi amina ipajam nunú!” tiuwai.
1KI 19:21 Tusa tima Eliseo Elíasan ukuak weuwai. Nunik jegá nunú jimag toro nugka pukuu aidaun mauwai. Dutika umika, toro nugka pukuiti tusa numi minantua jigkamua nunak juki ikapag inajuauwai. Dutika aents aidaun susauwai yuwatnume tusa. Nuna dutika ukuak Elíasjai uyunis wekaesatatus weuwai.
1KI 21:1 Apu Acab aajakua duka Samaria nugkanum pujus inamajakui, nuniayatak tikich niina pujusa inamtaiji yaakat Jezreel ajujakui. Nunú yaaktanmaya makichik múun Nabot daagtin uva ajakbau jega apu pujusa inamtain nuna yantamen aajakui.
1KI 21:2 Tuja makichik tsawantai Acab Nabotan chichajak: “Amina ajajum uva ajakbauwa nunú mina sujusta, mina ajag ati, wagki wi pujusa inamtaijua nuwi au asamtai. Nunú sujakminig, tikich ajanum uva ajakbau shiig pegkeja nuna amastajai. Untsu ame wakegakminig, juna akiken kuichkin akiktajame”, tiuwai.
1KI 21:3 Tusa tama Nabot ayaak: “¡Mina apag mina dukugjai ukugtukmauwa duka midau asamtai, amamaitsugme!” tiuwai.
1KI 21:4 Tusa tima Acab wake besek wakitkiuwai, wagki Nabot chichaak: Mina apag mina dukugjai ukugtukbaunak amamaitsugme tusa tibau asa. Nunik jegaa yujumkan yutsuk yapin tanishnum anug tepesui.
1KI 21:5 Nunik tepetai niina nuwe Jezabel, jegantun iniak: “¿Wagka yujumak yutsukesh wake besekmesh pujame?” tau.
1KI 21:6 Tama Acab ayaak: “Jezreelnumia múun Nabotjai chichasmajai, niina ajaji uva ajakbauwa nuna sumaktajai tusan. Tujash sujutan dakitakui, tikich aja uva ajakbauwa nuna nagkaesau pegkeg awa nuna susatjai timajai. Tujash nii mina sujutan dakitmae”, tiuwai.
1KI 21:7 Timatai niina nuwe Jezabel ayaak: “Tujash ¿amechukaitam Israel aents aidaun apujimek? Aní pujutsuk yujumak yuwata. ¡Au Nabotan ajajin uva ajakbauwa nunak wi ikamjuktagme!” tiuwai.
1KI 21:8 Tusa tamawaik Acabpa daajin papiin agag apu sellojin apuja, nunú yaaktanmaya apu eme anentsa diitai aidau Nabotjai batsamin aidaun ishitkauwai.
1KI 21:9 Nunú papiinmak aatus agajui: “Yujumak ijagmat ati tusajum etsegkatajum. Tuja aents aidau tuwakmatai, Nabot juki ejentatajum dita emtin ekentsatajum.
1KI 21:10 Dutikajum niina tsanumjugtin aidau jimag aents pegkegchau aidau niijai niimtikajum ekentsatajum. Nuwi ekemas tuke aneas tsanumjuinak: ‘Ame Apajuí pegkegchau chichagkum Apushkam pegkegchau chichagkamume’, tusa titinme. Tusa tiagmatai jiikjum, kayai tukua tukuakuajum maatajum”, tiuwai.
1KI 21:11 Tuja Nabotan yaaktajinia aents aidauk múun aidau, nuigtu apu aidau aatus Jezabel papii agag akupkamunak imatiksag umikajui.
1KI 21:12 Nuninak yujumka ijagmawag batsamas, Nabotan jukiag aents tuwak batsatbaunum ejegan dita emtin ekentsajui.
1KI 21:13 Dutikawaju ai, ashí aents aidau antamunum niina tsanumjugtin aidau jimag jegantajui. Nunikag tsanumjuinak: “Nabot Apajuín, apu Acabjai pegkegchaun chichaju antukmaji”, tiajui. Tusa tiagmatai juki, yaakta ukumtikiag kayai tukui tukuinakua maawajui.
1KI 21:14 Dutika maawagmatai, Nabotnak maawaje tusag Jezabelan ujakajui.
1KI 21:15 Nuna Jezabel dekaa Acabpan chichajak: “¡Nabot niina ajaji uva ajakbauwa nuna amina amatan dakitma nunú weme jukita, wagki yamaik niig jakae!” tiuwai.
1KI 21:16 Nuna Acab dekaa Nabota ajajin jukitatus wejiuwai.
1KI 21:17 Dutikamtai Tuke Pujuu Elíasan chichajak:
1KI 21:18 “Wetá nunikam Acab Israel aents aidaun apuji Samaria nugkanum puja nunú egakta. Tuja yamaya juwik Nabota ajajin jukitatus ajanum jegan wekaewai.
1KI 21:19 Nunú jeganta chichagkum: ‘Ame Nabot maakum numpe ukagbauwa nuna yawá aidau dukajaja dutiksag, amina numpenashkam nuanuig dukajagtatui’, Apajuí tujamui tita”, tiuwai.
1KI 21:20 Tusa ujakam, Nabot Elíasan ayaak: “Amek mina shiwaajuitme, tujash juwi igkunkaume”, tiuwai. Tama Elías ayaak: “Ehe, igkugjame. Wagki amek Tuke Pujuu diismak ima pegkegchauwa duke takame.
1KI 21:21 Nuniau asamin Apajuí aatus tujamui: ‘Aminak shiig pegkegchaun itajuattagme, dutikakun ame wegantu aidaunak ijituattagme; tuja amina uchijum aishmag aidau Israel nugkanum batsatunak ashí ijituattagme.
1KI 21:22 Tuja Nabata uchiji Jeroboaman, niina uchiji aidaujai ijinauwaitag dutiksanuk aminashkam ijinattagme. Tuja Ahías aajakua nuna uchiji Baasa Israel aents aidaun pegkegchaun takamtikak mina kajemtijuku asamtai, wi suwimka suwakun ijinauwaitag numamtuk aminashkam ijinattagme’, tujamui Apajuí.
1KI 21:23 “Tuja Jezabelnashkam pachis Tuke Pujuu chichaak: ‘Jezabelnak yaakat Jezreel peejamua nuna aawin yawá aidau yuwawagtatui.
1KI 21:24 Tuja amina pataim aidau yaaktanum jakagtata nunak yawá yuwawagtatui. Untsu agá jaunak chuwag yuwawagtatui’ ”, tiuwai.
1KI 21:25 Tuja tikich apu aajaku aina duka Acabpan nuwe Jezabel tabaun umiju asa, Tuke Pujuu diismash ima pegkegchaunak takajakua nuninuk atsujakui.
1KI 21:26 Tuja amorreo aents aidau dakumkamun emematujaku aina nunisag, Acabshakam nuna emematak shiig pegkegchau Tuke Pujuu aentsji Israel wegantu aidau emtin iwainmamajakui.
1KI 21:27 Juna aatus Apajuí tibaun Acab antukui. Nunik puyatuk jáanchjin japiki ichigkui, dutika jáanch pegkegchaun nugkuja, yujumkan ijagma pujau. Nunik pujus makichkish yapagmamtsuk, wake besek wekagu.
1KI 21:28 Nunik pujutai Tuke Pujuu Elíasan chichajak:
1KI 21:29 “¿Acab awake anentaimag minai yunumka dusha dekamek? nuniku asamtai, nii iwaku pujaigkik, niina uchiji aidaunak ijituashtatjai. Untsu nii jakamtai, niina uchiji apu wetata nuadui, niina uchiji wegantunak suwimkan susattajai”, tiuwai.
1KI 22:1 Israel aents aidauk Siria nugkanmaya aidaujai maanitsuk kampatum mijan batsamsajui.
1KI 22:2 Tujash kampatum mijana duwi Judá wegantu aidau apuji Josafat Israel aents aidau apuji Acabpan ijagsauwai.
1KI 22:3 Nunik mai apuk chichaak batsatai, Acab Israel aents aidaun apuji niina atuwe aidaun chichajak: “Atumek dekagme, yaakat Ramot Galaadnum awa duka dekas iinui. Nunin aig Siria nugkan apuji nii atai kuitama nunú atankimi”, tiuwai.
1KI 22:4 Nuna tusa Josafatan iniak: “Yaakat Ramot Galaadnum awa nuna sirianmaya aidau ayamjuinak akasmatuina nunú jeteamunum ¿uyunkagtumainchaukaitam?” tau. Tama Josafat ayaak: “Wika mina suntag aidaujai, tuja caballonum entsamak maanin aina dushakam betek amina suntajum aidaujai atuniaji.
1KI 22:5 Tujash eke shimutsuk Tuke Pujuu iniasta ¿niish tunak tujamit?” tiuwai.
1KI 22:6 Tusa tima Israel aents aidaun apuji Acab cuatrocientos profeta aajaku aina nuna ijumag chichajak: “¿Yaakat Ramot Galaadnum awa nunash jetemainkaitag, atsa jetemainchaukaitag?” tiuwai. Tusa tama dita ainak: “Jetekta, auk amek Tuke Pujuu yaimpasmatai depetkattame”, tiajui.
1KI 22:7 Tujash Josafat Judá wegantu aidaun apuji iniak: “¿Juju profeta aidaush dekaskeash tuina tusa, tikich profeta iniasa shiig dekamainush juwish pujatsuak?” tiuwai.
1KI 22:8 Tusa tama Acab Josafatan ayaak: “Ehe, makichik pujawai, nunú iniasa dekamainai Tuke Pujuush wajintuaki. Nuna daajig Micaías, Imlá uchijiyai. Tujash wika niinak kajegnujai, wagki pegkejan ujattsuk, ima pegkegchaunak ujatu asamtai”, tiuwai. Tutai Josafat ayaak: “¡Duka aajamek tiipa!” tiuwai.
1KI 22:9 Tusa tima Israel aents aidau apuji Acab makichik suntaja apujin untsuka chichajak: “¡Imlá uchiji Micaías wamkes juwi taati tusan wakegajai!” tusa akateg akupkauwai.
1KI 22:10 Tuja Israela apuji Acab Judá apuji Josafatjai apu nugkutain nugkujag iwagmamag, yaakat Samaria waitainum ekemsa ayamtai plazanum apu ekemtai aidau umikbaunum eketaidau. Nunik eketainai ashí profeta aidauk, Apajuí tawai tusa chichaman etsejuidau.
1KI 22:11 Tuja nuwiya makichik Sedequías daagtin múun Quenaaná uchiji baka kachujijai betek jiju najanamujin takus wajasa untsumak: “¡Tuke Pujuu aatus chichaak: ‘Juju kachu aina jujai sirianmaya aidau jetektatjume, dutikajum ashí amuktatjume!’ tawai”, tau.
1KI 22:12 Tuja tikich profeta aidaushkam dutiksag chichainak: “Yaakat Ramot Galaadnum awa nunú jetekta, ame depetmaktatme, wagki Tuke Pujuu depetmak yaaktan atankiti tujamu asamtai”, wajaidau.
1KI 22:13 Imatu batsatai Micaíasan utitag tusa weu jegajua chichajak: “Ashí profeta aidauk ashí chicham pegkejan apu Acabpan ujakaje. Nuadui ¡wait aneasam ameshkam ditajai ijunjam, chicham pegkeg apu Acab ujakta! tusan tajame”, tiuwai.
1KI 22:14 Tusa tama Micaías niina ayaak: “¡Dekas umiktinun Tuke Pujuu daajin tajame. Wika Tuke Pujuush wajintig ima nunak etsegkattajai!” tiuwai.
1KI 22:15 Nuna tusa apu pujamunum weuwai. Nunik jegamtai apu Acab iniak: “Micaíasah, ¿yaakat Ramot Galaadnum awa nunash jetemainkaitag, atsa jetemainchaukaitag?” tau. Tusa iniam nii ayaak: “¡Jetekta, Tuke Pujuu yaimpaktatui depetmakti tusa!” tiuwai.
1KI 22:16 Tusa tutai apu Acab niina ayaak: “Ame dekas takumek, Tuke Pujuu daajin tajai tita tusan kuashta tajame”, tiuwai.
1KI 22:17 Tusa tama Micaías niina chichajak: “Israel aents suntag aidauk uwig aidau kuitamain atsugsam, pampagka yujama numamtuk yujaun wainkamjai. Tuja Apajuí mina chichagtak: ‘Dita aidaun kuitamainuk atsawai, nuadui maki makichik agkan dita jeen waketjatnume’ tusa tujutui”, tiuwai.
1KI 22:18 Tusa timatai Acab Josafatan chichajak: “Wi juna aneasan, ¿juju aentsuk pegkegnakesh etsegchauwe, ima pegkegchaunak etsegnuwe tusan tichamkajam?”, tiuwai.
1KI 22:19 Tusa tutai Micaías ataktu chichajak: “Ame tame nuniau asam, wi Tuke Pujuu tujutbaun ujaktatjam nunú shiig antukta: Tuke Pujuu niina ekemtaijin ekemsamtai, niina aentsji aidau untsujin, menajin aatus ijunun wainkamjai.
1KI 22:20 Nunik ijunun Tuke Pujuu iniak: ‘Maaniamunum Acabpan maatnume tusa tuke aneas tsanuak Galaad, nugkanum yaakat Ramot awa nuna sirianmaya aidau akasmatuina nunú jetekta tusa ¿Acabpan tsanumainush yakita?’ timae. Tusa tutai niina aentsji aidau nuwi ijunu maki makichik anentain apusagmae.
1KI 22:21 Tusa tuinai wakan pegkegchau Tuke Pujuu eketbaunum tanta chichaak: ‘¡Wi nunak tsanumainaitjai!’ timae. Tusa tutai Tuke Pujuu iniak: ‘¿Tujash wajuk dutikattame?’ timae.
1KI 22:22 Tusa iniam nunú wakan pegkegchau Tuke Pujuun ayaak: ‘Auk profeta aina nunú ashí Acabpan tsanugtinme titatjai’ timae. Tusa timatai Tuke Pujuu niina chichajak: ‘Kame tsanumain asameas tametai, weme tsanugta’, timae.
1KI 22:23 Yamai dekaume amina profetajum aina nuna Tuke Pujuu wakan waitan egketjamu asa, maatnume tusa tsanugmaina nunú”, tiuwai.
1KI 22:24 Tusa timatai Quenaaná uchiji Sedequías Micaíasa jegantun yapinum awati chichajak: “Tuke Pujuu Wakani mina chichamtija nunú jiinki mina ukujak, aminí waya chichamtijatsuash tusamek wainka anentaimjaipa, nunak makichkish nuniatsui”, tiuwai.
1KI 22:25 Tusa tama Micaías Sedequíasan ayaak: “Ayu, ame mina tujutam duka tupikaki wekaesam uuma wekaetatam nuniakum dekattame”, tiuwai.
1KI 22:26 Tusa timatai Acab chichaak: “¡Achika jukijum yaakta apuji Amón puja nuwi ejegatajum, dutikakjum mina uchig Joásaishkam ejegatajum!
1KI 22:27 Dutikawagmin wi taja nuna dutiksag aents achika egketainum egkeatnume. Dutikawag pagkan yumijai piipichin susatnume, dutikainai wi maania depetmakan pegkeg jatsuk taatjai”, tiuwai.
1KI 22:28 Tusa tutai ataktushkam Micaías niina chichajak: “¡Ame iwaku wakitkiaminig, mina tujutma nunak Tuke Pujuu tujutchau asamtai nuniktatme!” tiuwai.
1KI 22:29 Tusa timatai suntag aidau Micaísan achikag aents achika chimpitainum juki emajui. Dutikainai Israel aents aidaun apuji Judá wegantu aidaun apujijai yaakat Ramotan jetekagtatus shimutkajui.
1KI 22:30 Nunik shimutuinak Israel aents aidaun apuji Josafatan chichajak: “Wika suntag wainkauch aina nuna nugkutain nugkugtatjai. Untsu ame mina jáanchug apu nugkutaiya nunú nugkugta”, tiuwai. Nuna tusa Acabpak suntag wainkauch aidau nugkutain nugkuja maaniamun nagkamauwai.
1KI 22:31 Nunik shimuinai sirianmaya apushkam treinta suntaja apuji capitan carronum yujas maanin aidaun chichajak: “¡Tikich aentsuk jetekaigpajum, ima Israel aents aidau apujiya duke jetektajum!” tiuwai.
1KI 22:32 Tujash nunú suntag aidau Josafatan wainkag jutsukaita Israel aents aidau apuji tusag jiintujag tenteawajui. Dutikam Josafat niina suntaji aidaun untsukui yainkatnume tusa.
1KI 22:33 Nuna antugkag, juka dekas Israel aents aidaun apujichuapi tiajui. Nuadui tupikautaish pataetukchajui.
1KI 22:34 Untsu Sirianmaya suntag makichik aentsnakesh wainchayatak wainak niina flechajin akenkauwai. Dutikkama Israel aents aidau apuji Acab niina suntaji aidau shimamunum pachitkau wegaun pachiachbau ijuwai. Dutika ijum niina carrojin anuntuk wegaun chichajak: “¡Carro ataktu awagkita, wika jakattajai, minak ijutiaje!” tiuwai.
1KI 22:35 Nunú tsawantin suntag aidau shiig senchi maaniawajui. Tuja apu Acabnak niina carrojin egkeja awajainiag batsamtuidau sirianmaya aents aidaujai maaninak. Tujash flechayai ijumunum numpa saegak carronak ayatak numpak awajsauwai, nunik etsa akagai jakauwai.
1KI 22:36 Tuja etsa ashí akagai Israel suntag aidaun apuji chichaak: “Ashí waketjatajum,
1KI 22:37 wagki iina apujig jakae”, tabaun antukajui. Tusa tima waketuinak Acabpa iyashin jukiag Samaria ejegawajui. Dutikawagmatai niina patayi aidau nuwi ukusajui.
1KI 22:38 Dutika ukusagmatai niina inake aidau carro jukiag, nuwa wainka takatai aidau matainum ejegawag nijakajui. Dutikamunmayan numpa saekiun yawá aidau dukajajui, Tuke Pujuu tibaunak imatiksag.
1KI 22:39 Tuja apu Acab pachisa augmatbauk nii takasbauji aidaujai, nuigtu jega apu pujusa inamtai marfil umikbau aajakua duka, tuja yaaktan najankauwa dushakam papii crónicanum apu aidau takasbau agatkamua nuwi agagbau ayawai.
1KI 22:40 Aatus Acab jakauwai. Nunikmatai niina uchiji Ocozías apu wajas inamjauwai.
2KI 2:1 Apajuí dasen wainchijai betek ajuag Elíasan jukitin tsawan jegau ai, Elías Eliseojai yaakat Guilgal batsatu juwakiag shiyakajui.
2KI 2:2 Nunik wesag Elías Eliseon chichajak: “Amek juwi pujumata, Tuke Pujuu minak Betelnum awetawai”, tau. Tama Eliseo ayaak: “Tuke Pujuu antai tuja ameshkam antamin tajai. Wika ima nigki weti tusanuk idaisashtatjame”, tiuwai. Tusa timatai mai juwakiag Betel jegawajui.
2KI 2:3 Nunikagmatai profeta aidau Betelnum batsatu Eliseon igkugtatus jiintujajui. Nunik igkug chichajuinak: “¿Amesh amina jintinjamnun Tuke Pujuu jujutjamkitta dusha dekamek?” tuidau. Tusa iniam nii ayaak: “Ehe, dekajai, tujash atumek duka tiigpa”, tiuwai.
2KI 2:4 Tuja ajuma duwi Elías Eliseon chichajak: “Amek juwi pujumata, minak Tuke Pujuu Jericó awetawai”, tau. Tama Eliseo ayaak: “Tuke Pujuu antai tuja amesh antamin tajai. Wika ima nigki weti tusanuk idaisashtatjame”, tiuwai. Tusa timatai mai juwakiag Jericó jegawajui.
2KI 2:5 Nunikagmatai profeta aidau Jericó batsatu Eliseon igkugtatus jintujajui. Nunik igkug chichajuinak: “¿Amesh amina jintinjamnun Tuke Pujuu jujutjamkitta dusha dekamek?” tuidau. Tama nii ayaak: “Ehe, dekajai, tujash atumek duka tiigpa”, tiuwai.
2KI 2:6 Tuja ajuma duwi Elías Eliseon chichajak: “Amek juwi pujumata, Tuke Pujuu minak Jordán awetine”, tau. Tama Eliseo ayaak: “Tuke Pujuu antai tuja ameshkam antamin tajame. Wika ima nigki weti tusanuk idaisashtatjame”, tiuwai. Tusa timatai mai juwakiag Jordán jegawajui.
2KI 2:7 Nunik wegagtai cincuenta profeta aidau Jericó batsatu pataetukajui. Nunik pataetukag Elías Eliseojai ijunun nuna ukujin ikaa ijuntsajui. Nunik ijunai Elíasak Eliseojai namaka jegawajui.
2KI 2:8 Nunik jegawag Elías jáanch nii dukumataijin juki pempeag yumin awatiuwai. Dutika awatim namakak jimaituk kanaka buku wajasui. Nunikmatai nugka bukunum katimaina imatikas mai katiajajui.
2KI 2:9 Nunik katiajag Elías Eliseon chichajak: “Eke amejai kanaatsug nuaduik, ame wajina sujusti tame nunú segatta”, tiuwai. Tama Eliseo ayaak: “Tuke Pujuun senchiji aminí awa nuna aan nagkaemas sujusti tajame”, tiuwai.
2KI 2:10 Tusa tama Elías ayaak: “Amek shiig kuashat sumame. Tuja mina Apajuí jujuktata nunú waitkum ame segatam duka jukittame. Untsu mina Apajuí jujamu waitchakmek jukishtatme”, tiuwai.
2KI 2:11 Nuna aatus chichakiag shimuinai pachiachbau makichik carro kegau, tuja caballo dushakam kegau wantinkauwai. Nuniak tsanig wajaun akankauwai. Dutikam Elíasak dase wainchijai betek ishamain wajaunum pachiinak nayaimpinum weuwai.
2KI 2:12 Nunikmatai Eliseo wainak senchi buutak: “¡Apawah! ¡Apawah! ¡Amek Israel aents aidaunmak suntag maanin aidaun nagkaesau ayume!” waja wajas buutu. Tujash ataktu awagkig Elíasnak wainkachui. Elías wematai wake besemag dekapeak niina jáanchjin japiki ichigkui.
2KI 2:13 Elías wegak jáanch nii dukumataijin ajuag ukukbaun Eliseo jukiuwai. Nunik wakitki namak Jordágnum jegauwai.
2KI 2:14 Nunik nuna jáanchin pempeag duwi namakan awati untsumak: “¿Tuke Pujuu Apajuí Elíasan ememattaish tuwi pujawa?” tau. Dutikamuik namakak jimaituk kanaka buku wajasui. Nunikmatai Eliseo katigkui.
2KI 2:15 Tuja profeta aidau nuwi ijunas dii ijunuk, Eliseo dutikaun wainak chichainak: “¡Apajuí Wakani Elíasai pujumia nunú yamai Eliseowai pujawai!” tusag niina igkugtatus wejiajui. Nunik jegantag,
2KI 2:16 tsuntsuma ijunas chichajuinak: “Antukta nijah, ii ame inakem ainag juwiya cincuenta aents wajiu aina nunú amina jintinjamin Elías megkaeka nuna egaktinme. Namputchawame Tuke Pujuu Wakani yaki takui juki tikich mujanum, dutikachkush segaunmakesh ajuag ukukchaintash”, tuidau. Tusa tiagtai nii chichaak: “Atsa, makichik aentskesh egaktinme tusagmek awemaigpajum”, tiuwai.
2KI 2:17 Tusa tamaitak intimki imatiagtai, ayu cincuenta aents ishiaktajum tusa tiuwai. Tusa timatai ishiakam kampatum tsawan yujagsag egainakush wainkachajui.
2KI 2:18 Nunik wainkacha waketug Jericó kaunamtai, Eliseo ditan chichajak: “Wika anna aneasan wegpajum timajime”, tiuwai.
2KI 2:19 Tuja Jericónmaya aents aidau Eliseon chichajuinak: “Iina yaaktajiya juka pegkejai. Duka ameshkam wainme. Tujash yumi pegkegchau umumaitsui, nugkashkam ajakmamash tsapatsui”, tuidau.
2KI 2:20 Tiagtai Eliseo ditan chichajak: “Tazón yamajam weejai jukijum itagtuatajum”, tau. Tusa tima juki ejentuntajui.
2KI 2:21 Nuna Eliseo juki yumi pukuni jiinbaunum jeganta nagkimak: “Juna aatus Tuke Pujuu chichaak: ‘Juju yumia junak wi pegkeg awagsajai. Nuadui makichik aentskesh juna umauk jakashtatui. Tuja nugkashkam ajak tsapamainchauk achattawai’ tawai”, tiuwai.
2KI 2:22 Duwi nagkamas Eliseo tibaunak imanisag, yumi pegkeg wajasui.
2KI 2:23 Nuna dutika ukuak Eliseok Betel weuwai. Nunik wegaun uchi betelnumia datsa aidau jiintujag dushikinak: “¡Nampiaju ameshkam nayaimpinum wetá! ¡Nampiaju ameshkam nayaimpinum wetá!” awajuidau.
2KI 2:24 Tusa imatjam Eliseo ayampatua Apajuín adayas ditan yumigkig ukukiuwai. Dutika ukuaig jimag chayú ikamia jiintuki cuarenta y dos uchi datsa aidaun ichiag ijinauwai.
2KI 2:25 Nuwi juwaki Eliseo weuwai muja Carmelonum. Tuja nuwiya juwaki wakitkiuwai yaakat Samaria nugkanum.
2KI 4:8 Makichik tsawantai Eliseo Samaria wegak yaakat Sunem aajakua nuni nagkaemakiuwai. Nunik nagkaemattaman nuwiya nuwa eme anentsa diitai pujau, yujumkan yuwati tusa waitkas ipauwai. Nuadui Eliseo nuni weakug nuwi yujumkan yuwatatus tuke waijakui.
2KI 4:9 Tuja makichik tsawantai nunú nuwa niina aishin chichajak: “Antukta nijah, wika dekajai au aents nagkaemak tuke waya ijagtama duka dekas pegkejam Apajuín profetajiyai.
2KI 4:10 Nuadui jega tuntupega nuwi nii kanutai umigkami. Dutika makichik pegak, makichik patasa yutai, ekemtai, nuigtu ekematai aatsa umigkami. Dutika umikbau asamtai, iina ijagtamkush nuwi kanagti”, tusag umikajui.
2KI 4:11 Dutika umikbaunum Eliseo nuwi kanagtatus waya,
2KI 4:12 niina inake Guehazí aajakua nuna chichajak: “Nuwa jentin untsukta”, tiuwai. Tusa tima untsukui. Dutika untsukam taamtai, Eliseo niina inaken chichajak:
2KI 4:13 “Anú nuwa iina shiig awajtamka nuniau asamtai, iish wajinmak yaimainaita nunú iniasta. Tuja niish wakegakuig apujai, nuniachkuish suntaja apujijai chichamainaitji”, tiuwai. Tusa tutai nunú nuwa ayaak: “Wika juwi mina pataag aidaujai pujau asan shiig pujajai, utugchatak atsugtawai”, tiuwai.
2KI 4:14 Nuna tusa wakitkimtai, Eliseo niina inaken chichajak: “¿Tujash wajuk yaimainkita?”, tau. Tama nii ayaak: “Achah, wajuk yaimaintsukait. Uchigtuchui, tuja aishishkam múunchi”, tiuwai.
2KI 4:15 Timatai, kame ataktu untsukta tiuwai. Tusa tima ataktu weji untsukui, dutikam kanutainmak waitsuk, ayatak waitinum jegan wajasui.
2KI 4:16 Nunikmatai Eliseo nunú nuwan chichajak: “Tikich mijan atata duwi yamai tsawanta juniai, uchi uchigmakam pagkuaku atatme”, tiuwai. Tama nii Eliseon ayaak: “Mina apujuh, amek Apajuí etegkamuitam iman asam minak tsanujaipa”, tiuwai.
2KI 4:17 Tau asa nigka dekaskeapi tichauwai. Tujash duwi pujus Eliseo tibaunak imatiksag ejapjukui. Nunik tikich mijantin uchigmakui.
2KI 4:18 Dutikam pujus nunú uchi muumpajui. Nunik pujau makichik tsawantai niina apaji aents ajaka juwagtai diyak ajanum pujau asamtai, ditajai pujustatus weuwai.
2KI 4:19 Nunik jegan wajanbauwaik senchi buutak: “¡Ayau, buukeg najautawai! ¡Ayau, buukeg najautawai!” wajau. Imattai apaji niina inaken chichajak: “Juju uchi jukim dukujin ejegata”, tiuwai.
2KI 4:20 Tusa tima juki dukuji pujamunum ejegauwai. Dutikamtai niina dukuji juki niina bakuin ekenas pujujus etsan tajipiuwai. Nunik nuwi pujusag uchik jakauwai.
2KI 4:21 Nunik jakamtai dukuji juki profeta Eliseo kanutaijin yaki iwaka pegaknum aepes waitin epeni ukukiuwai.
2KI 4:22 Dutika ukuki niina aishin untsuka taamtai chichajak: “Makichik inak burro susam awetugta nujai wi wenu profeta Eliseojai chichasan taatjai”, tiuwai.
2KI 4:23 Tutai niina aishi chichaak: “¿Wagka yamaish niijaish chichastag tame? Nantuk yama takache, tuja tsawanchakam ayamtaichui”, tau. Tama nii ayaak: “Duka amek puyatjukaipa, nunin aigkish wetatjai”, tiuwai.
2KI 4:24 Tusa timatai ayu tusa niina inaken burronum ekemsa wetin umikta tiuwai. Tusa tima umikmatai nuwa niina chichajak: “Wegajai wamak, ame emkata, tuja wi juwi ayamjami tatsaigkik wajantaipa”, tusa weuwai.
2KI 4:25 Nunik wea weakua muja Carmelonum Eliseo pujamunum jegauwai. Nuwi jegattak wetatman Eliseo wainak niina inake Guehazín chichajak: “Nijah diisia, au nuwa mina duka Sunemnumia nuwa iina kanutain amauwe nunuwai.
2KI 4:26 Tupikaki igkugkam iniasta niina aishish, niina uchijish pegkejash batsata nunú”, tiuwai. Tusa tima tupikaki weji igkug iniasui. Tusa iniam nii ayaak: “Ehe, pegkeg batsatji”, tau.
2KI 4:27 Nuna tusa Eliseo pujamunum jegauwai. Nunik Eliseo nawen tapit achik pujusui, nunitai Guehazí jegantauwai emenastatus. Dutiktai Eliseo niina inaken chichajak: “Idaisata nigka kuashat anentaimak waitiawai, tujash Tuke Pujuu eke tujuttsui waji utugchatak ajawa”, tiuwai.
2KI 4:28 Tusa tutai nunú nuwa Eliseon chichajak: “¿Mina apujuh, wisha aminash uchi uchigmaktasan wakegajai tusanush timakaijam? Juna aneasan wika aminak wainkam tsanujaipa timaijame”, tiuwai.
2KI 4:29 Tusa tutai Eliseo niina inake Guehazínkan chichajak: “Umintsata nunikam mina ushujutaig jukim juju nuwa jeen wetá. Tuja jintá weamin aents igkupainakuish kumpamawaipa. Tuja makichik aentskesh kumpamjamkuish aikaipa. Nunika jegam mina ushujutaijua juju uchi yapiin patatta”, tiuwai.
2KI 4:30 Tusa tutai nunú nuwa Eliseon chichajak: “Tuke Pujuu antai, tuja ameshkam antamin tajame, wika ame wegachkuminig makichkish wechattajai”, tiuwai. Tusa imattai Eliseo nunú nuwajai weuwai.
2KI 4:31 Nunik Eliseok eke wegai Guehazí niyá eemak jegá, ushujutai takakbauwai uchi yapiin patatiuwai. Tujash uchik makichkish tsagaumainchau tepau. Nunitai ukuak Eliseon igkugtatus wejiuwai. Nunik igkug chichajak: “Ame tujutmaum nunak betek dutikamjai, tujash uchik tsagaichmae, jakamutak tepeme”, tiuwai.
2KI 4:32 Tusa ujakam Eliseo niishkam jegá jegauwai. Nunik waya diikma uchi jaka peaknum tepaun wainkauwai.
2KI 4:33 Dutika wainak nunú kanutain epeni Tuke Pujuun aujak pujau. Tuja nunú kanutainmak ima Eliseok nunú uchi jakaujai pujau.
2KI 4:34 Eliseo Apajuín aujus inagnak pegaknum waka uchi jakaun patamti uchin pagkuk niina wenin, jiin, uwejen, uchi wenin, jiin, uwejen, aatus tuket enekna tepesui. Nunik tepai, uchi jaka bichatug tepau nimpautan nagkabau.
2KI 4:35 Nunitai Eliseo nantaki nunú kanutainum imau wajan, wekagu. Nunik ataktushkam pegaknum waka uchi patamti pagkuk tepau, nunik tepai uchi sieteya imania jachituk niimiuwai.
2KI 4:36 Nunikmatai Eliseo Guehazigka untsuka chichajak: “Uchi dukuji untsukta”, tima untsukui. Tusa untsukam nunú nuwa Eliseo wajamunum jeganmatai Eliseo chichajak: “Juju uchijum jukita, jakache tsagaje”, tiuwai.
2KI 4:37 Tusa tima tupikaki Eliseo nawen pagkuk pujusui. Dutika ukuak uchijin juki Eliseo kanutaijin pujau nugká akaikiuwai.
2KI 5:1 Siria nugkan apuji aajakua nuna suntaji aidaun apuji makichik aents Naamán daagtin aajakui. Niina Tuke Pujuu yayau asamtai, sirianmaya aidau maaninak depetmakaju asag, niinak apu shiig anentujakui. Tujash nunú aents lepra achiimak jak tepau.
2KI 5:2 Nunik tepai makichik tsawantai, sirianmaya aidau Israel aents aidaujai maaninak, makichik nuwa tsakatan achikag jukiag Siria nugkanum ejegawajui. Dutikawagmatai Naamán niina nuwen inake ati tusa juki apusauwai.
2KI 5:3 Dutikam pujus nunú nuwauch niina inaun chichajak: “Mina apug amina aishjum ja duka profeta Samaria nugkanum puja nuna weji diyakug tsagaumainai”, tiuwai.
2KI 5:4 Tusa timatai Naamán nuna pachis apun weji ujakui.
2KI 5:5 Tusa ujaam apu chichaak: “Dekas tame, wetá, ame wegakmin papii agajan, Israel aents aidaun apujin akuptuktajai yaimpakti tusan”, tiuwai. Tusa tima Naamán kuichik plata najanamun treinta mil juki, nuigtu kuichik oro najanamun juki, nuigtushkam diez jáanch nugkutai aidaun profeta akiktinun aatus yajuak niina inake aidaujai weuwai.
2KI 5:6 Nunik wegak nuigtushkam papii agagbaun jujukiuwai. Nunú papiinmak: “Wi mina aentsug Naamán suntaja apujiya nuna awemajai, lepra achimak ja nuna etsagagti tusan”, tuu agagbau aajakui.
2KI 5:7 Nuna Israel aents aidaun apuji aujus diisa, shiig anentaimainchau waugkamin dekapeak, niina jáanchjin japiki ichigka chichaak: “¿Wi Apajuí pujuta sukagtin, nuigtush jakati tusash tukagtina dukaitag, aents lepra achimak ja nuna etsagagti tusa awetam atinun? ¡Atumesh shiig anentaimsa diistajum, wika junak maaniami tusa segapak jutijamui tajai!” tiuwai.
2KI 5:8 Tuja papii agaja akupkamun apu diisa, jáanchjin japiki ichigke tabaun profeta Eliseo antukui, nunik niina chichaman akuptak: “¿Wagka jáanchjumesh japikmesh ichigkume? aaní wekaetsuk anú aents awemata juwi tati. Nunik juwi taa dekaattawai, Israel aents aidaunum makichik profeta Apajuí etegkamu puja nuna”, tiuwai.
2KI 5:9 Tusa timatai Naamán niina carrojin caballo aidaujai yajuak weuwai. Nunik Eliseo jeen jeganta waitinum wajasui.
2KI 5:10 Tujash Eliseok jiintukig kumpamachui, ayatak chichama etsegnun akateg awemak: “Namak Jordágnum jegá sieteya imania nijamagti, nunik duwi tsagagtatui, tujamui tita”, tusa akateg awemauwai.
2KI 5:11 Nuna antuk Naamán shiig senchi kajekui, nunik wegak chichaak: “Wika niina jenis awaintua, nuwi wajasa Tuke Pujuu niina Apajuíjin segaa, nuadui mina iyashjui lepra ayá nuna achikmatai tsagajainja timajai.
2KI 5:12 Israel aents aidau nugken namak aina nuna nagkaesau Damasconmaya namak pegkeg dekas múun aidau Abaná Farfarjai awa ¿duchaukait? Nuwi wika wenu nijamaja tsagaumain wajakchaja”, tau. Tusa senchi kajeka weuwai.
2KI 5:13 Nunik wetai niina inake aidau jegantag chichajuinak: “¿Profeta amina aan nagkaemas utugchatan tujamkuig duka umikchatnukum? Iik umimainapi taji, nuadui dekas ayatak nijamajam tsagagta tujama duka, dutiksamek nijamajam tsagaumainaitme”, tiajui.
2KI 5:14 Tusa tima Naamán namaka wee, Eliseo tibaunak imatiksag sieteya imania iyagka nijamajui. Nunik tsagag niina iyashinig uchi tsakatchin iyashijai betek pegkeg wajasui.
2KI 5:15 Nunik tsagag niina uyunaidau aidaujai ijunag Eliseojai chichastatus weuwai. Nunik jegá Naamán Eliseon chichajak: “¡Dekas yamaik shiig dekaajai, tikich nugkanmak Apajuík atsawai, ima Israel aents aidaunmak pujawai! Nuniau asamtai, wait aneasam ame mina etsaentuju asamin, wi amina inakem asan, waji aidaun amastatag nunú jukita”, tiuwai.
2KI 5:16 Tusa tama Eliseo niina ayaak: “Tuke Pujuu wi takamun deka nuna daajin tajame. Ame tujutam nunak ayu tichattajame”, tiuwai. Nuadui Eliseok Naamán, waji susatag tamash dakitjauwai.
2KI 5:17 Dutika dakitjamtai Naamán Eliseon chichajak: “Wi amina amastag taig ame dakitau asamin, untsu wi amina segajame. Juju Israel aents aidaun nugkega juna tai aimkan, jimag burro entsamainun nugkan jukitjai. Dutikan mina nugkajui ejegan Apajuí emematku kuntin maa patasa apetain najanatjai. Wagki wika yamai nagkamsanuk tikich apajuímtai aina nunak kuntinu maan nuna nejen ashí apeaknuk emematchattajai, ima Tuke Pujuu ame emematam nunak ememattatjai.
2KI 5:18 Untsu wi mina nugkajui jeganuk mina apug niina apajuímtaiji Rimón ememattatus weakui uyuntsattajai, wagki nunú ememattainum waya nuna emematak mina kuntujui achimak tikishmag pujakui, wishakam tikishmajan pujustatjai. Nuna wi nunitaish, minash Tuke Pujuu tsagkugtugti tajai”, tiuwai.
2KI 5:19 Tusa tutai Eliseo niina chichajak: “Ayu, puyattsuk nugka jukim wetá”, tusa tima Naamán nuwi pujau jiinki weuwai. Nunik ujumak kuwagai,
2KI 5:20 Eliseo inake Guehazí anentaimas: “Naamán sirianmaya aentsua nunú susatag tama mina apug Eliseo dakitug awagki nunak dekas wi wamak pataetukan amaigkan wajinak segainja nuna segatjai. Tuja nunak Tuke Pujuush waitai umiktajai”, tiuwai.
2KI 5:21 Aatus anentaimas Naamágkan pataetukui. Nunik pataetuk wegaun Naamán wainkauwai, nunik niina carrojin aepes akaikiuwai kumpamatatus, nunik kumpamak: “¿Utugchat atsuak?” tau.
2KI 5:22 Tama nii ayaak: “Atsa, utugchatak atsawai. Untsu mina apug Eliseo profeta datsa aidau Efraígka nugkenia kaunawaju asamtai, nunú susatin ame weme tres mil kuichik plata najanamu, nuigtu jimag jáanch nugkutaijai sega utita tusa tujutmatai minajai”, tiuwai.
2KI 5:23 Tutai Naamán niina ayaak: “Dekas wait aneasam seis mil kuichik jukita”, tusa imatjau. Nuna tusa jimag sacon juki kuichkin chimpia jáanchnashkam jimajan egkeauwai. Dutika niina inake aidaun susauwai atum jukijum ejetuatajum, tusa.
2KI 5:24 Dutikam jukiag mujanum Eliseo Guehazíjai pujujakua nuwi ejegawajui. Dutikawagmatai Guehazí nuna juki ditan kumpama ishiakui. Nunik shiyakmatai nunú kuichkin jáanchjai juki jegá uukui.
2KI 5:25 Dutika uuka ukuak niina apuji Eliseo pujamunum jegauwai, nunikmatai Eliseo niina iniak: “¿Amesh tuwiyamea miname?” tau. Tama nii ayaak: “Wika yajak wegatsjai, juwig pujajai”, tau.
2KI 5:26 Tutai Eliseo niina ataktu chichajak: “Naamán amina kumpamjamatatus niina carrojinia akaikima nunak, nuwi amejai mina wakanjuk pujume. Yamaik kuichkikesh, jáanchkesh, olivo ajakbaukesh, uva ajakbaukesh, uwig aidaukesh, buey aidaukesh, inak aishmagkesh, nuwa aidaukesh makichkish jumaitsuji.
2KI 5:27 Nuniaig ame jukiu asamin Naamágka lepraji amina, ame wegantu aidaujai achigmaktatui. Dutijamamtai tuke leprayai jau atatjume”, tiuwai. Tusa tima Guehazí Eliseojai pujamun kanaabuik lepran achiimak niina iyashinig ishamain puju wajasui.
2KI 6:1 Makichik tsawantai profeta aidau Eliseon chichajuinak: “Ii ame pujamunum pujag duka shiig piipichi.
2KI 6:2 Nuniau asamtai wait aneasam idaikagtusta, Jordágnum shiyaka numi tsupika ii pujustin jegamkagmi taji”, tuidau. Tusa tiagtai: “¡Ayu wetajum!” tiuwai.
2KI 6:3 Tutai nuwiya makichik niina chichajak: “Wait aneasam uyunkagtusta”, tau. Tusa tama: “¡Ayu, kame uyuntsatjime!” tiuwai.
2KI 6:4 Aatus ditajai juwaki Jordán jegauwai. Nunikag nuwi numi tsupinak yujau.
2KI 6:5 Nuninai nuwiya makichik aents jachan apakuig namaka ajugkui. Dutika ajugka untsumak: “¡Chah, jintinkagtinuh! ¡Jachak midauchawe tsagkatjukagmae!” tau.
2KI 6:6 Imattai nii iniak: “¿Tuwi ajugmaume?” tau. Tutai nuwi tikich wajau chichaak: “Auk juwi iyagmae”, tiuwai. Tusa timatai Eliseo numin tsupik juki nuwi nagkima ajugkui. Dutikam jacha wampumni jiiniuwai.
2KI 6:7 Nunikmatai: “Jukita”, tusa tima nuwi tikich wajau asa esanti jukiuwai.
2KI 6:8 Tuja nunú tsawantin sirianmaya apu Israel aents aidaujai maanidau asag, tuwig niina suntaji aidaujaish ijunjatnush aajabi nuna pachis niina atuwe aidaujai chichasui.
2KI 6:9 Nuna pachis Apajuí Eliseon ujakui. Dutikam Eliseo chichama etsegnun akateg awemak: “Sirian apuji niina suntaji aidaujai nunú nugkanum ijunjattaji tuinawai. Nuadui Israel aents aidaun apuji niina suntaji aidaujaig nuni nagkaemakinmegka tusajum ujaktajum”, tiuwai.
2KI 6:10 Tusa timatai ujakam, Israel aents aidaun apuji anentaimas, Eliseosh dekaskeash tawa tusa niina suntaji aidaun ujumak akupkauwai, dutika dekakmá dekas atai, yaja shimak uwemaidau. Nunik kuashta uwemajaku ainawai.
2KI 6:11 Nunidau asagmatai apu sirianmaya shiig senchi kajekui. Nunik suntaja apuji aidaun untsuka ijumag chichajak: “¡Israel aents aidau apuji maatasa chicham umijag nunash ya ima ujawa nunú etsegkatajum!” tiuwai.
2KI 6:12 Tusa tutai nuwiya makichik ayaak: “Iik apu ujakchamji, auk profeta Eliseo Israel nugkanum puja nunú ame chichamun antuk ashí ditan ujawai. Nuigtushkam ame amina kanutaigmin pujusa chichaam nunashkam antawai, nunik Israel aents aidau apujin ashí ujawai”, tiuwai.
2KI 6:13 Tusa timatai sirianmaya apu chichaak: “Tuwig Eliseosh pujawa nunú inimsa dekatajum, dutikajum nii pujamu shiig ejeyagmin, aentsun ishitkatjai achiktinme”, tiuwai. Tusa tima iniimas dekawag: “Eliseok yaakat Dotán pujawai”, tusa ujakajui.
2KI 6:14 Tusa ujakam suntag caballonum maanin aidaun, carronum yujas maanin aidaun, nuigtu dawenum yujas maanin aidaujai ishitkauwai. Dutikam shimutuk kashi yaakat Dotágkan tenteawajui.
2KI 6:15 Nunik batsatai kashikmas Eliseo inake nantaki agá jiinkama, suntag aidau caballonum, carronum aatus yaaktan tenteawag batsatun wainak tupikaki waya Eliseon chichajak: “¿Jintinkagtinuh, yamaish iish wajukattaji?” tau.
2KI 6:16 Tutai Eliseo niina ayaak: “¡Ishamkagtukaipa! wagki jutijai batsata nunuwai ditajai batsata nuna nagkaesau aidau”, tiuwai.
2KI 6:17 Aatus tusa Eliseo Apajuín segaak: “¡Tuke Pujuuwah, wait aneasam amina senchigmin mina inakeg waintsu nunú yamai iwaintukta!” tiuwai. Tusa taig Tuke Pujuu niina suntaji caballo aidaunum, carro aidaunum jii kegaujai betek nunú mujanum Eliseon tentea ijunun iwaintukui.
2KI 6:18 Tuja suntag sirianmaya aidauk yaakat Eliseo pujamun jetektatus uminainai Eliseo Tuke Pujuun segaak: “¡Au aents aina nunú wainmachujai betek emakta!” tiuwai. Tusa tima Tuke Pujuu imatiksag wainmachu emakui.
2KI 6:19 Dutikamtai Eliseo jiintuki ditan chichajak: “Jintak juchauwai, wainka yujagme, tuja atum yaakat egajum dushakam juchauwai. Wi weakui minitajum, atum aents egajum nuwi ejegatjime”, tusa yajuak yaakat Samaria nugkanum ejegauwai.
2KI 6:20 Dutika ejega Apajuín segaak: “¡Tuke Pujuuwah, juju aents aina nunú yamai ataktu wainmitkakta!” tiuwai. Tusa tima Tuke Pujuu wainmitkakui, dutikam niimsatakama Samaria nugkanum batsatbaun wainkajui.
2KI 6:21 Tuja Israel aents aidaun apuji nunú aents aidaun wainak, Eliseon iniak: “¿Apawah, juju aents aidaunash kajegtatjak?” tau.
2KI 6:22 Tutai Eliseo ayaak: “¡Atsa kajegkaipa! Maaniamunum aents aidau achija yajuakbaukesh amek mauchume, nuadui duka tutsuk ¡yujumak ayujam dita apuji pujamunum awakjata!” tiuwai.
2KI 6:23 Tusa timatai jiistan umikag, yujumkan shiig ayujawag, umutnash imatiksag ajamsag nuadui apu ditan kumpama ishiakui. Dutikam dita apujin waketjauwai. Duwi nagkamas Israel aents aidaujaig maaniachaju ainawai.
2KI 6:24 Nunú nagkaemakiu ai, Siria nugkan apuji Ben-hadad niina suntaji aidaun ashí ijumag yajuak Samarian jetektatus weuwai. Nunik jegaa yaaktan tenteawajui.
2KI 6:25 Dutikam epemi batsatu asagmatai, nunú tsawantin Samaria nugkanum nujan tepeauwai. Nuadui burro buuke akikeg ochenta plata najanamu aajakui. Untsu pauma iji jimaituk litro tumain yajamun akike cinco plata najanamu aajakui.
2KI 6:26 Tuja makichik tsawantai Israel aents aidaun apuji yaakat peejamunum yakí nunigka wegaun makichik nuwa wainak untsuak: “¡Apuh, minash yainkata!” tiuwai.
2KI 6:27 Tusa tama nii ayaak: “¿Tuke Pujuukesh yaimpatsu nunash wisha itug yaigtagmeki? ¡Trigo amamainuk minak atsugtawai!
2KI 6:28 ¿Wagka tuu wekaeme?” tau. Tama nii ayaak: “Juju nuwa chichagtak, amina uchijum yamai yuwami, nunika kashin mina uchig yuwami tujutmae.
2KI 6:29 Tujutmatai mina uchig maa, ukugkuutai aidau chimpijua inagka yuwamji. Tuja yamai aminu yuwami tai, niig uchijinak uuke”, tau.
2KI 6:30 Nuna apu antuk kajeka, niina jáanchjin japiki ichigkui. Dutika yakí yaakat peejamunum wekagu asamtai, aents aidau diikma jáanch pegkegchaun nugkuaju wekagun wainkajui.
2KI 6:31 Tuja nuwi wajas apu senchi untsumak: “¡Yamaikiuch Eliseo Safatan uchijiya nuna buuken tsupigkan maattajai! ¡Untsu dutikachmataig, Apajuí mina suwimkan sujusti!” tiuwai.
2KI 6:32 Tuja Eliseok nii pujamunum Israel aentsu apuji múun aidaujai ijunak pujau. Nuniai apu niina aentsji aidaunmayan makichik Eliseon akuptukui. Tujash nunú eke jegatsaig, Eliseo Israel aentsu apuji múun aidaun chichajak: “Au apu magkagtina nunú niina aentsjin mina buukjun tsupigtukti tusa awema nunú atumesh dekaatajum. Tujash antaku atajum. Nunú aents wayau wainkugmek waiti epentajum. Dutikajum nii wajamunmanini shitakjum emetuatajum. ¡Niina apuji ukunum patatkau minisa pampaun antajai!” tau.
2KI 6:33 Tusa ditajai chichá wajaig, apu akupkamu tauwai. Nuniaig apushkam patatkau taa chichaak: “¡Ii waituinag nunak Tuke Pujuu aikagbau asamtai, nii yaimpakti tusanuk dakak pujumaitsujai!” tiuwai.
2KI 7:1 Tusa tutai Eliseo niina ayaak: “Tuke Pujuu chichaak: ‘Kashin yaakat Samarian waitijiya nuwi, yamai etsa eketa juniai, aents aidau makichik kuichik plata najanamuik siete kilo trigon sumagtatui, tuja cebadanashkam makichik kuichik plata najanamuik quince kilo sumagtatui’ tawai”, tiuwai.
2KI 7:2 Tusa tutai apu atuwe niina ayaak: “¡Tuke Pujuu nayaimpin ujaimtaish ame tame duka makichkish nunimaitsui!” tau. Tutai Eliseo ayaak: “Nuna imatika sumaidauk ameshkam waintkattame. Tujash amek duka makichkish yuwashtatme”, tiuwai.
2KI 7:3 Tusa chichainai cuatro aents jata lepran achiimaku aidau agá yaaktanum waitainum batsatu dita ditak pempeentunikiag chichainak: “¿Iish juwish waji pujugji, nujantai jinaatag tusaika aní batsatag?
2KI 7:4 Yaakat wayaish, tuja juwig pekagkuish betek nujantai jinaattaji, wagki juju yaaktanmak yumainuk shiig atsawai. Dekas sirianmaya batsata nuwi shiyakagmi. Nunika dita wait anenjamainakuig, ditajai batsamsami. Untsu dita wait anenjamainachkug, mantamkush mantamatnume”, tuidau.
2KI 7:5 Nuna tusag kintamainak juwakiag sirianmaya aidau aakmag batsatbaunum shiyakajui. Nunikag jegattak wesag diistag tukama makichik aentskesh atsaun wainkajui.
2KI 7:6 Sirianmaya aents aidau nuwi batsatu pisajua nunak Tuke Pujuu carro aidaunum, caballo aidaunum, suntag maaniatatus shimuinamu kedegtuwama imatun antuktinme tibau asag nuna antukag, Israel aents aidaun apujimpap hitita aentsu apuji aidaun, egiptunmaya aentsu apuji aidaujai jetekmi tusa minitjamainawa tusag,
2KI 7:7 pisagtatus uminas batsatu asag, kashi pisainak dita aakjinak, caballoji aidaunak, burroji aidaujai, ashí batsainak, pisajajui.
2KI 7:8 Nunik pisainak ukukbaunum lepran achiimaku jegawag aaknum wayawajui. Nunikag nuwiyan yutain yuwawag, umutnash uwajajui. Nunikag plata aidaun, oro aidaun, jáanch aidaun, aatus yajuakag yaja uukajui. Dutika ukuinak tikich aaknum wayawag nuwiyanashkam dutiksag waji aidaun yajuakag yaja uukajui.
2KI 7:9 Dutikawag ditak pempeentunikiag chichainak: “Ii aikag duka pegkegchau dutikaji. Yamai tsawanta jujuwai pegkeg chicham, sirianmaya pisajaja nunú pachisa tikich Israel aents aina nunú ujamain. Dutikmain aig iik dutikatsji. Tuja kashin jegá etsegjinig ¿wagka wamak etsegkachugme? tusa iina kajegtamak suwimkan amamain ainawai. Nuadui dekas apui wemi, nunika sirianmaya aidauk pisajagmae tusa etsegkami”, tuidau.
2KI 7:10 Aatus tusag waketug jegawag suntag yaakta kuitamin aidaun untsuka chichajuinak: “Sirianmaya aidau batsamtain wemaji, nunika jegá diikma makichkish atsume. Tuja makichik aents chichaukesh antukchamji. Ima caballo aidauk, carro aidaujai anaam batsaamae, tuja aak aakmagbau aidaushkam nunisag batsaamae”, tiajui.
2KI 7:11 Tusa tiagmatai, yaakta waitijin kuitamin aidau, apu pujusa inamtaijin kuitamin aidaun untsukajui.
2KI 7:12 Nuna apu dekaa, kiyaju aig nantaki, niina suntaji aidaun chichajak: “Jasta sirianmaya aidaush itugtamkatasag aninawa nuna ujaktajime. Aunak ii nujantai waituinag nuadui ikam uumja batsatjin nujantai jinuinak jiinaidau achigmi, dutika dita yaaktajin utsantuami, tusa aninawai”, tau.
2KI 7:13 Tutai suntaja apuji chichaak: “Dekas cinco caballo batsata nunú ame cinco aents etegkam susam ishiakta, dutika pujusa diismi wajukawagtig. Tuja dita iwaku waketuinakush, nuniashkush jinuinakush tikich Israel aents aidauti juwi batsatag nuna nagkaesauk achagtatui, tuja nuniachkush nuni wainkauchikesh achagtatui”, tiuwai.
2KI 7:14 Tusa timatai ujumak suntag aidau jimag carron, caballo aidaujai jukiajui. Dutikawagmatai sirianmaya aidaun batsamtai diisa ukutajum, wagkag ankaje tusa ishiakui.
2KI 7:15 Dutikam shiyakag diikma agkan wajas atatman wainkajui. Dutikawag pataetukag Jordán jegawajui. Tuja jintanmak jáanch aidauk, tikich waji aidaujai sirianmaya pisainak utsagbauk tepetag weakun wainkajui. Nuna wainkag waketug jegawag, dita wainkamujinak imatiksag Israel aents aidau apujin ujakajui.
2KI 7:16 Dutikawagmatai aents aidau shimutkag waji aidaunak ashí yajuakajui. Tuke Pujuu tibaunak imatiksag, waji sujin aidauk trigonak siete litron makichik kuichkijai yapajidau, tuja cebadanashkam quince litro sujak nunashkam dutiksag makichik kuichkijai yapajidau.
2KI 7:17 Imaniagtai apu niina atuwen yaakta waitijin kuitamkati tusa inajui. Tujash nuwiya aents aidau shiig kuashat utsaanaidau asag tepejuk maawajui. Nunak apu, profetajai chichastatus jegamtai, profeta apun tibaunak imanisag jakauwai.
2KI 7:18 Nuniktinun profeta Eliseo, Israel aents aidau apujin aatus tiuwai: “Yaakat Samaria nugkanum waitainum aents aidau siete litro tumainun harinan makichik kuichki sumagtatui. Tuja cebadanashkam quince litron makichik kuichki sumagtatui”, tiuwai.
2KI 7:19 Tusa Eliseo tutai, apu awemamu suntaja apuji chichaak: “Tuke Pujuu nayaimpin ujaimtaish, duka makichkish imanimaitsui”, tutai, Eliseo ayaak: “Wi taja duka wainkattame, tujash amek duka yuwashtatme”, tiuwa duka
2KI 7:20 imanisag uminkauwai. Nuadui niinak Eliseo tiuwa nunak imatiksag yaakta waitijin kuitamak pujaun aents aidau utsaanainak tepegkam jakauwai.
2KI 13:14 Eliseo shiig senchi jak tepau asamtai, Israel aents aidaun apuji Joás niina ijagsatatus wejiuwai. Nunik jegajua pagkuk buutak: “¡Apawah! ¡Apawah! ¡Amek Israel aents aidaunmak suntag maanin aidaun nagkaesau ayume!” tiuwai.
2KI 13:15 Tutai Eliseo niina chichajak: “¡Flecha akentai, flechajai jukita!” tau. Tama nuna apu mai jukiuwai.
2KI 13:16 Dutikamtai Eliseo niina chichajak: “¡Umintsata flecha akenkamnum!” tiuwai. Tusa tima uminai, Eliseo niina uwejen apu uwejen patainiuwai,
2KI 13:17 dutika chichajak: “¡Niimtai najanamu etsa minitaiya nuni awa nunú ujaita!” tau. Tima apu ujainiuwai. Dutikamtai Eliseo chichajak. “¡Yamai flecha akenkata!” tau. Tama apu flechan akenkauwai, dutikamtai Eliseo senchi untsumak: “¡Apajuíyai juju flechajai betek ayamkagtin! Nuadui ¡Apajuí yaimpasmatai sirianmaya aents aidau yaakat Afecnum depetkajum ashí ijinattagme!”, tiuwai.
2KI 13:18 Tuja ataktu chichajak: “¡Ataktushkam flecha jukita!” tiuwai. Tusa tima jukimtai, Eliseo chichajak: “¡Anú flechayai nugka awatta!” tiuwai. Tama apu nunú flechayai kampatuma imania nugkan awatiuwai.
2KI 13:19 Dutikamtai Apajuí inake Eliseo niina kajejuk chichajak: “Cincoa imania dutikashkumesh seisa imania awatiuwaitkumek, sirianmaya aidau depetkam ashí amumainaitme. Tujash kampatuma awatiu asam dutiksamek kampatuma imania depetkattame”, tiuwai.
2KI 13:20 Nuna ashí tusa nuadui Eliseo jakauwai, nunikmatai ukusajui. Tuja maki makichik mijantin Moab aents kasa aidau Israel aents aidau nugken utuawag waitkaidau asagmatai,
2KI 13:21 makichik tsawantai ujumak Israel aents aidau aents jakaun ukustatus nugka tagak batsatu. Nuna tagak batsatu diistakama, kasa aidau minidaun wainkag ishamak pisainak, aents jakau iyashin nagkimawag Eliseo ukusbaunum egkeawag ukukiajui. Dutika ukuinaig nunú aents jakauwa duka Eliseo ukunchin antig aneantui, nunik jiinkiuwai.
2KI 18:9 Elá uchiji Oseas Israel aents aidaun apuji wajas siete mijan inamak pujai, Ezequíaschakam Judá wegantu aidaun apuji wajas, ipak usumat mijan inamak pujau. Nunú tsawantin Asirian apuji Salmanasar niina suntaji aidaujai Samarian tenteawag jetekajui.
2KI 18:10 Dutika maa maaninakua kampatum mijana duwi depetuk yaaktan utuawag dita atainiajui. Nunak apu Oseas inabaujin nueve mijan ejeyu ai, tuja apu Ezequíaschakam nii inabaujin seis mijan ejeyu ai, dutikau ainawai.
2KI 18:11 Asiria nugkan apuji niina suntaji aidaujai Israel aents aidaunak depetuk achija niina nugken asirianum yajuakui. Dutika Habor nugkanum yaakat Halah batsasui. Untsu tikich aidaun Gozán nugkanum namak aajakua nuna yantamen batsasui. Tuja tikich aidaunak medo aents aidau yaaktaji aidaunum batsasui.
2KI 18:12 Nunak dutikau ainawai, wagki Tuke Pujuu dita Apajuíji yaunchuk ditajai chichaman umikua nuna umitsuk, tuja Tuke Pujuun inake Moisés tibaunashkam betek umikchaju asamtai, dutikau ainawai.
2KI 18:13 Apu Ezequías catorce mijan inamai Senaquerib Asirian apuji Judá wegantu aidaun yaaktaji peejamu aidaun jetekag depetuk utsantuawag nii atainiuwai.
2KI 18:14 Dutikamtai Judá wegantu aidaun apuji Ezequías, Asirian apuji Senaquerib yaakat Laquishnum pujaun chichaman akuptak aatus tiuwai: “Wi dewakjai, nuniku asan ame jiinbaunum wajupa akigkati tujutpa nunak imatiksanuk akiktajame. ¡Mina nugkajui pujam duka amina suntajum aidaujai jiinkim wetá!” tiuwai. Tusa tima Asirian apuji ayu tusa Ezequíasan nueve mil novecientos kilo platan segauwai, dutikak nuigtushkam novecientos noventa kilo oro akigkata, tiuwai.
2KI 18:15 Tusa timatai Ezequías ayu tusa, jega Apajuí emematku ijuntai jegamkamunum ayaunak, apu pujusa inamtai aidaunum waji akik ayaujai nagkamas ashí yajuak susauwai.
2KI 18:16 Dutikak nunú tsawantinig Ezequías jega Apajuí emematku ijuntai jegamkamu waitiji aidaun, tuja waiti nujamkatin aidaujai nii najanak, oro ukatkamu aidaunashkam ukuinag oron yajuak Asiria nugka apujin Senaqueripan susauwai.
2KI 18:17 Dutika pujai Asiria nugka apuji yaakat Laquishnum pujus suntaja apujin, tikich niina atuwe kajittsa diitain, tuja tikichin suntaja apujin suntag aidaujai aatus apu Ezequíasan jetektinme tusa Jerusalén ishitkauwai. Dutika ishiakam Jerusalén jegawag, entsa pukuni jiinu Guihón tutai saekitin taimua nuna yantamen yumi piyajunum, aents aidau jáanchin dijajag pegkeg emau aina nuwi anutug batsamsajui.
2KI 18:18 Nuwi batsamsag apu Ezequíasan untsukajui jiinkiti tusa. Tujash niig jiinkichui, ayatak niina aentsji aidaun kampatum ishiakui ditajai igkunikti tusa. Nuna daajig juju ainawai: Eliaquim Hilquíasa uchiji apu pujusa inamtain waji ayaun kuitamin, untsu Sebná, Asaf aajakua nuna uchiji Joahjai papiin agau aajakui.
2KI 18:19 Dutikam jegawagmatai, asirianmaya suntag apu aidau ditan chichajuinak: “Iina apuji Senaquirib Asirian apujiya nunú Ezequíasan chichama akupta nunú jegajum ujaktajum. Niig juna aatus tawai: “ ‘¿Amesh yayai emesh anenmame?
2KI 18:20 ¡Chicham pegkejuch chichamua duka, maanitan yacha senchi shiig maanimaina nujaig betekchauwai! ¿Amesh ya yainkati tusamea wijaish shiwagbaeme?
2KI 18:21 Ame anentaimsamek, egiptunmaya aidau yainkagtatui tau diyagme. Nunú takumesh duka wainka titatme, wagki auk egiptunmaya aidauk tagkan chipaju achika shutukmatku besemaina iman ainawai. Iman asag, Egipto apujiya duka niiyai kajinas anentaimaidaunak senchi waitkawai.
2KI 18:22 Tuja ame chichaakum: “ ‘¡Tuke Pujuu Apajuí ii emematin ainag nunú iinak yaimpaktatui! tumainaitme. Nunú tumainaitkumesh ¿wagka tujash Apajuí emematku kuntin maa patasa apetai najankamu aidau tsaika utsagmesh: ¡Ima Jerusalégnumak kaunajum ememattajum! tusamesh timayume?
2KI 18:23 Nunú tuu anentaimtsuk dekas apu Senaquiribjai chicham umikta. Dutikawamin aents caballonum entsamak maanitan yacha aidau egakaminig, wi dos mil caballon amastajai.
2KI 18:24 Nuna amasmataish, amek asirianmaya suntag aidau kakakchau aina dukesh uwakamek tupikamtikmaitsume. Nuninaitkum amek egiptunmaya caballonum maanitan yacha aidau ikamkatag tame.
2KI 18:25 Tuja nuigtush amek Tuke Pujuu jetektajum tichamaitak jetepaktatus kaunacheash tumaitsume. ¡Minak Tuke Pujuu atumin jeteka ijinata, tusa tujutne!’ tusajum Ezequías ujaktajum”, tiuwai.
2KI 18:26 Tusa chicham akupkamun antukag Eliaquim, Sebná, Joah aatus nunú suntag asiarianmaya chichama itaun chichajuinak: “¡Wait aneasam hebreo chichamaik aujkagtusaipa, yaakat peejamunum yaki waka yuja nunú antuinawai! ¡Dekas arameo chichamai aujkagtusta, wagki iik arameo chichamak antaji!” tiajui.
2KI 18:27 Tusa tiagtai suntag asirianmaya ditan ayaak: “Asirianmaya apuk ima atumi apuji Ezequíasnakek, tuja atumnakek chichamnak akuptugmakchame. Ashí aents aidau yaakat peejamunum waka batsata nunú antuktinme timae, wagki dita aidauk atumjai betek yumain, umumain atsujuinam dita ijin yuwinak, shikiin umiagtatui”, tiuwai.
2KI 18:28 Tusa tutai makichik suntaja apuji nuwi wajau senchi untsumak hebreo chichamai chichaak: “Anú tikich apu aidaun nagkaesau apu asirianmaya chichaman akupka nunú, antugkatajum:
2KI 18:29 ‘¡Ezequías tsanugma nunú wainka antuju yujaigpa, nigka makichkish mina depetukag ayamjutpamaitsui!’
2KI 18:30 Tuja Ezequíasak atumin tsanugmainak, Tuke Pujuu yaimpaktatui, tuja Tuke Pujuuk asirianmaya aidau juju yaaktan tsaikti tusag idaisashtatui tujamui.
2KI 18:31 Tusa tujama duka antugkaigpa. Asiria apuji mina atumi ujakti tusa akaatak: “ ‘¡Intimtsuk wijai chicham epegkeajum mina inataig atajum, nunika shiig batsamsajum maki makichkitijum nii ajakmamunmayan uvan, higo aidaun aatus yuwawagtatui, tuja yuminashkam dita taimunmayanak uwajagtatui!
2KI 18:32 Duwi pujus tikich nugkanum trigo aidau, uva aidau, pag najana yumain aidau, vino najana umumain, olivo aceiteji aidau, dapa yumiji aidau aatus atumi nugkeen ayá nujai betek ayá nuwi jujamki ejetamawagtatui. Dutijamawagmatai nuwi jinutsuk shiig batsamsatnaitjume. Nuadui Ezequíasak antugkaigpajum, wagki nigka atumi tsanugmak ¡Tuke Pujuu ayamjutpak agkanmitkagmattawai!’ tujamui.
2KI 18:33 Nijah, atumesh anentaimsatajum, tikich aents aidaun apajuímtaiji aina dusha ¿asiarianmaya apun depetkash niina aentsji aidaunash ayamjukukait?
2KI 18:34 ¿Hamatnumia aents aidaun apajuíji, arpadnumia aents aidaun apajuíji, sefarvaimnumia aidaun apajuíji, yaakat Henánmaya aidaun apajuíji, Ivánmaya aidaun apajuíji aatus aajaku aina dusha asirianmaya aidaun depetkash samarianmaya aidaunash ayamjukukait?
2KI 18:35 Tuja wi adaijag nuwiyash tuu nugkanmaya aidaun apajuíjiya asirianmaya aidaun ¿depetkash niina aentsji aidaunash ayamjukuita? Nunú dekau asajum, Jerusalégnumia aidautinak Tuke Pujuu yaimpak uwemtijamjattawai tumaitsugme”, tiuwai.
2KI 18:36 Tusa tutai aents aidau yaakat Jerusalén peejamunum yaki waka pekajuk itatug makichkish aimkachajui, wagki apu Ezequías ditan chichajak, makichkish aikaigpajum tibau asa.
2KI 18:37 Nuna antukag Eliaquim, apu pujusa inamtaijin waji ayaun kuitamin aajakua nunú, Sebná, Joahjai papiin agajakua nunú aatus kajekag jáanchjin japiki ichigkajui. Nunikag asirianmaya suntajan apuji chichakbaun Ezequísan ujaktatus shiyakajui.
2KI 19:1 Nuna apu Ezequías dekaa jáanchjin japiki ichigka, wake besemag dekapeak jáanch pegkegchaun nugkuja, Tuke Pujuujai chichastatus jega Apajuí emematku ijuntainum weuwai.
2KI 19:2 Nunik Apajuíjai chichasa ukuak, nii pujusa inamtaijin kuitamin Eliaquim aajakua nuna, tuja papii agagbau aidaun kuitamin Sebná, papiin agajakua nuna, nuigtu sacerdote eme anentsa diitai aidaun aatus, jáanch pegkegchau wake besemag pujaku nugkutai aidaun anugkug, profeta Isaías Amosa uchiji aajakua nujai chichastajum tusa ishiakui.
2KI 19:3 Dutika ishimak aatus chichaman akuptukui: “Nuwa uchigmaktinji jegagmaitak kakaumainchau dekapeak uchin uchigmamainchauwa numamtuk, yamai suwimak juki waituinaku kakaja ayamjumamainchau dekapeajin dushiktamainakui, datsaama batsatji.
2KI 19:4 Tuja Tuke Pujuun pegkegchaun chichagkati tusa apu asirianmaya niina suntaji aidau apujin akupkamu juwi taa, Apajuí Tuke Pujuuwa nuna pegkegchaun chichaja nuna, itusag Tuke Pujuu amina Apajuíjum antujuk suwimkan susa tajai. ¡Nuadui Israel aents aidau ujumak juwag batsata nunú pachisam Apajuí ausata! tujamui apu Ezequías titajum”, tiuwai.
2KI 19:5 Tusa akatjam apu Ezequíasa atuwe aidau Isaíasjai chichastatus shiyakajui.
2KI 19:6 Nunik jegawag Isaíasan ujakajui. Dutikam Isaías ditan chichajak: “Tuke Pujuuk juna aatus tawai: ‘¡Nunú suntaja apuji asirianmaya mina pegkegchaun chichagtuka nunak ishamkainmegka!
2KI 19:7 Wi niinak utugchatan antuk, ishamak niina nugken wakitkiti titatjai. Nunikmatai nuwiya aents aidau niinak maawagtatui’, tawai Apajuí timae tusajum apu Ezequías ujaktajum”, tiuwai.
2KI 19:8 Tuja nunú asirianmaya suntaja apuji Apajuín pegkegchaun chichagkauwa dushakam apu Senaqueripak niina suntaji aidaujai yaakat Laquishnum batsatu jiinag shiyakaje tabaun antukui. Nunik Jerusalén pujau niishkam weuwai. Nunik wekama apu niina suntaji aidaujai yaakat Libnán jetenamunum jegauwai.
2KI 19:9 Nuna jetenak yujasag, apu Tirhaca Etiopíanmayaya nunú Judá wegantu aidaun atuinak ataktu amejai maaniatatus niina suntaji aidaujai minitjamainawai, tusa tabaun Senaquerib antukui. Nunik niina suntaji aidaun ataktushkam apu Ezequíasan ishitkauwai.
2KI 19:10 Dutika ishimak aatus akatmamtujui: “Ame chichaakum: ‘Wi Apajuín emematnaitag nunú minak yainkattawai’, tame nunú Jerusalégkan tsaikai tusa dakitau asamtai, Jerusalégkak iinuk achattawai. Tujash aneaku ata nunú Apajuí wainak tsanupajai.
2KI 19:11 Tuja asirianmaya apu aidau, tikich nugka múun aidaun tsaikaju aina nunú amek shiig dekame. Nuadui amek makichkish ayamjumakchattame.
2KI 19:12 Mina muuntug aajaku aina nunú yaakat Gozán, Harán, Résef, Telasar aajaku aina nuna ashí tsaiku ainawai. Imatikiagtaish ditá apajuímtai aidaukesh makichkish ayamjukchauwai.
2KI 19:13 ¡Tuja yaakat Hamat, Arpad, Sefarvaim, Hená, Ivá aajaku aina nuna apuji aidaunashkam ashí ijinawaju ainawai!” tiuwai.
2KI 19:14 Tusa, papii agaja akupkamun Ezequías juki ausauwai. Nunik jega Apajuí emematku ijuntainum weuwai. Nuwi waya Tuke Pujuu emtin nunú papii agagbaun aepes,
2KI 19:15 Tuke Pujuun aujak: “Tuke Pujuu, Israel aents aidau Apajuíjiyah, amina pujusa inamtaigmek querubin batsatbaunum awai, ameketme ashí apu nugkaya aina nuna Apujimek. Tuja ametme nugka nayaimpijai najanaumek.
2KI 19:16 ¡Tuke Pujuuwah, shiig jitusa antukta, nuniakum diyaku ata. Senaquerib mina chichama akuptujak, amina pachipas pegkegchaun chichagtamka nunú shiig antukta!
2KI 19:17 ¡Tuke Pujuuwah, asirianmaya aidau tikich nugkanmayan tsaiku aina duka dekaske!
2KI 19:18 Dutikainak nunú aents aidau apajuímtaiji aidaunashkam jinum apejuk utsankau ainawai. Tujash duka dekas Apajuíchu wainka aents dakumka numi, kaya najanamu aajaku ainawai. Nuadui nunak apea ajapau ainawai.
2KI 19:19 Tujash ametme Tuke Pujuu iina Apajuíjimek, nuadui wait aneasam yamai dita iina waitkagmaina nunú ayamkagtukta. ¡Ame ayamkagtukamin, ashí nugkanmaya aidaush dekas Tuke Pujuuk ima ameketam nuna ditashkam dekaatnume!” tiuwai apu Ezequías.
2KI 19:20 Duwi pujus profeta Isaías Ezequíasan chichaman akuptak: “Tuke Pujuu Israel aents aidaun Apajuíji chichaak: ‘Ame Asirian apuji Senaquerib pachisam segatmaum nunak antugkajame’ tujamui”, tiuwai.
2KI 19:21 Tuja yamai Apajuí Senaqueripan pachis juna aatus tawai: “Senaqueripah, Jerusalégkak nuwauchijai betek amina dakitjamak dushiktamui. Jerusalégnumia aidauk ame waketmin dushiktamainak buuken pegainawai.
2KI 19:22 ¿Amesh yanas dushikiakun pegkegchaun chichagja tame? ¡Amek mina pegkegchau chichagtakum eme emematjai chichá wekaeme! ¡Amek Israel aents aidaun ememattai Apajuí pegkegma nunú pegkegchau chichagkaume!
2KI 19:23 Tuke Pujuun pegkegchau chichagkatnume tusam amina aentsjum chichama etsejin aidau akatja ishiakume. “Tuja ame chichaakum: ‘Mina carrog maanitai aidau shiig kuashat ayá duwi, egkemjan muja titiji aidaunum wakajai, tuja muja Líbanonum yakí wakan, nuwiya setug shiig esajam aidaun tsupigjai. Tuja muja shiig múun aina nuna ikamji aidau yagkug ajakbaujai betek aidaunmashkam wakajai tame.
2KI 19:24 Tuja tikichi nugke aidaunmash yumigmatan tain nuwiyan yumin uwagmajai, dutikakun egiptunmaya namaknashkam dajajan ukuyakbaijai’, tame.
2KI 19:25 Tujash duka wi nunikti tibau asamtai, dutikauwaitme. Nuadui amek dekas Apajuíyap aikawa tumainaitme. Wi nunak yaunchuk emtikan nuna dutikatjai tusan anentaimtugbaujun yamai umikjai. Ame yaakat peejamu aidau tsayam duka nunú uminkui dutikame. Dutika tsaikbau asag kaya aidau, numi aidau tuwasua weakui.
2KI 19:26 Nunú yaakat aidaunum aents batsamajaku aina duka, kakaag ayamjumamainchau aajaku ainawai, sapig, datsan wajasu aidau, dupa ajanum aiyama numamtin, tuja chijichig yama tsapaku samekbauwama numamtin, tuja chijichig jega tuntupen tsapakun dase etsa minitaiya nuwiya dasentak umpuim jinuwama numamtuk aidau asamtai, duka ijinawaitme.
2KI 19:27 Wika ame tuwi wekaeme nunak shiig wainjame, ame waji dutikame nunashkam ashí wainjai, ame mina senchi kajegtukum nunashkam dekajai.
2KI 19:28 Amek kajen wajasu, emebau wajasuitam nunashkam dekajai, nuadui makichik tsajam uwegnum patakumtain amina dujimin tigkaan detuattagme, tuja nuigtushkam chichakaim tusan wenimin jigkatuattagme, dutikan ame itug taamume duke awagkittagme, tawai Apajuí Senaqueripan”, tusa Isaías Ezequíasan tiuwai.
2KI 19:29 Tusa ataktushkam Ezequíasan chichajak: “Juju mijantin tuja tikich mijantinchakam, trigo aidau ajaachmaitak, tsapaka nejektata nuna neje yuwattame. Untsu mijan kampatuma duwi atum ajakmajum nejekmatai juuttagme, tuja uva ajakjum nunú nejekmatai yuwattagme.
2KI 19:30 Tuja Judá wegantunmaya jinachu aina duka waji ajakaitkuish, kagkapenawag nejeawagtatui.
2KI 19:31 Jerusalégnumia aidauk nujantaik ashí jinachagtatui, ujumak aents iwaku batsamtatui. Tuke Pujuu nunak dutikattawai wagki nii senchi aneau asa. Juju ashí betek uminkui dekaattagme, dekas Tuke Pujuuwap yaimpawa tusajum”, tiuwai.
2KI 19:32 Nuigtushkam Isaías Ezequíasan chichajak: “Asirianmaya apun pachis Tuke Pujuu juna tawai: ‘Asirianmaya apuk Jerusalégnak utuashtatui. Tuja makichik flechanakesh aketkashtatui. Ejamaka maanitai aidaun ejamakash jetekchattawai. Tuja yaakat peejamua nunak pinikmatjagkesh utuachagtatui.
2KI 19:33 Untsu Jerusalégnumash niish itug taamki nunak nunisag waketjumkittawai. Juju yaaktanmak makichkish wayashtatui. Witjai Tuke Pujuunuk, nunak dekas nuniktinun tajai.
2KI 19:34 Wika wiki anenmamsan, nuigtush David mina inakeg aajakua nunú mina chichamjun shiig umigtuku asamtai, niina aneau asan juju yaaktanak wi kuitamkattajai, dutikakun ayamjuktatjai’ tusa Apajuí tawai”, tiuwai Isaías.
2KI 19:35 Tuja nunú kashi aajakua duwik, Apajuí ángel tumain nayaimpinmaya taa ciento ochenta y cinco mil suntag asirianmaya aidaun ijinauwai. Dutikamu asa kashinia duwi aents jinauk tuwasua weaku aajakui.
2KI 19:36 Dutika ijituam Senaquerib niina nugken wakitki yaakat Nínivenum pujusui.
2KI 19:37 Nunik pujus makichik tsawantai niina apajuíji Nisroc tutain emematak pujai, uchiji aidau Adramélec Sarézerjai jegajuawag apajin maawajui, dutikawag ukuinak tupikakiag Ararat nugkanum wegajui. Dutika maawagmatai, niina tikich uchiji Esarhadón aajakua nunú apu wajasui.
2KI 22:1 Josíasak ocho mijan ajamu apu wajasui. Nunik apu wajas Jerusalégnum pujus treinta mijan ejeyi, nuigtu machik mijan inamjauwai. Niina dukujig Adeías yaakat Boscatnumia aajakua nuna nawanji Jedidá aajakui.
2KI 22:2 Tuja Josíasa takatjig Tuke Pujuu diismak shiig pegkeg aajakui. Niig nii wakegamun takatsuk, niina apachji Davita pujutji pegkeg aajakua nuna ainjauwai.
2KI 22:3 Josías apu wajasa dieciocho mijan ejeyi pujus, Asalías aajakua nuna uchiji Mesulama tijaji Safán papiin agau aajakua nuna, jega Apajuí emematku ijuntainum weme sacerdotejai chichasta tusa awemauwai. Dutika awemak:
2KI 22:4 “Weme sacerdote Hilquías wi taja nunú ujakta: ‘Israel aents aidau Tuke Pujuun anentag suwinak Apajuí emematku ijuntainum kuichkin ejegawagmatai, Leví wegantu waitin kuitamin aidau jukiag utsaawajua nuna yajuak ijumjatnume.
2KI 22:5 Dutikawag jega Apajuí emematku ijuntaya nuna iwajiagtai yujajus diin aidaun susatnume. Dutikawajam nunú kuichkia duwi nuna iwajuinak takaidaun akiktinme.
2KI 22:6 Nunak numi tsupija jegamtan yacha aidaun, jega shiig jegamnakti tusa chichamjin aidaun, jega jegamin aidaun aatus akiktinme. Tuja nunú kuichki numi sumankattawai, dutikaku kaya aidaushkam sumankati.
2KI 22:7 Nuna kuichkin susajashkam wajuk akikmajugme tusagkesh iniaschagtatui, wagki ditak wainkagkesh takachu, shiig anentaimkau ainawai’ timae tusam ujakta”, tiuwai.
2KI 22:8 Tusa ujakam chicham umiktin agagbaun jega Apajuí emematku ijuntai aajakua nuwi aun wainkajai tusa, Hilquías sumo sacerdote aajakua nunú Safánkan ujakui. Dutika ujaka nuna juki susauwai, dutikam Safán juki ausauwai.
2KI 22:9 Dutika aujus nuna pachis apu ujaktatus weuwai. Nunik jegá ujaak: “Jega Apajuí emematku ijuntainum plata ayaunak amina inakem ukuiyag umikaje. Dutikawag jega takaidaun susagmae”, tiuwai.
2KI 22:10 Tusa nuigtushkam, sacerdote Hilquías chicham umiktin agagbaun sujusmae tusa apu Josíasan ujakui. Dutika niina aujtusui.
2KI 22:11 Nunú aujtusam antuk, wake besemag dekapeak jáanchjin japiki ichigkui.
2KI 22:12 Nuniamuik wamkes profeta Hilquíasan, Ahicam Safánka uchiji aajakua nuna, Acbor Micaíasa uchiji aajakua nuna, Safán apu takamun agajakua nuna, Asaías suntaja apuji apu kuitamajakua nuna aatus inag ishimak:
2KI 22:13 “Wetajum nunikjum mina pachittsajum, aents aidau pachisjum, ashí aents Judá wegantu aina nunú pachisjum, tuja chicham agagbau wainnaka nunú pachisjumshakam Tuke Pujuu iniastajum. Iina muunji aajaku aina nunú juju agagbaunum chichá nuna betek umikchaju aina duwis Tuke Pujuu iinak kajegtamkatai”, tiuwai.
2KI 22:14 Tusa tima Hilquías, Ahicam, Acbor, Safán, Asaías, aatus Ticván uchiji Harhásan tijaji Salum aajakua nuna nuwe Huldá daagtin profeta aajakua nujai chichastatus shiyakajui. Salumak jega Apajuí emematku ijuntainum jáanch aidaun kuitamajakui. Untsu Huldá pujujakui Jerusalén, tujash yaakta ejapeenig pujujakchawai tikich yantamnum pujujakui. Nuna jegajuawag niijai chichasajui.
2KI 22:15 Dutikam nii ayaak: “Tuke Pujuu, Israel aents aidauti Apajuíji juna aatus tawai: Mina inintsatnume tusa atumin awetami nunú ujakta:
2KI 22:16 ‘Wi Israel aents aidau Apajuíjin tajai: Chicham uminkatnun Moisés agajua nuwi wajintu chichawa nuna apu Josías antuka dutiksanuk, juju aents Jerusalégnumia aidaunak suwimkan susattajai. Dutikakun yaaktajinashkam tsaigkattajai.
2KI 22:17 Wagki dita aidauk mina kajimatjukiag pegkegchaun takainak, wainka apajuímtai aina nuna emematuinak, kugkuin incienson apenak shiig senchi kajemtijuinawai. Nuadui juju nugkanmaya aina nunak shiig senchi kajegkau asan, aní batsamtinme tusanuk idaisashtatjai. Ditanak tuke suwimkan susagtatjai.’
2KI 22:18 Dutikatin asamtai Judá wegantu aidaun apuji Tuke Pujuu iniasa dekatajum tusa atumin awetamiaja nunú ujaakum: Tuke Pujuu Apajuín Israel aents aidau emematin aina nunú junashkam chichagtamak: “ ‘Wi juju yaaktanak tsaiktatjai, tuja nuwiya aents aidaunashkam pegkegchaunum yumigjattajai, tija nunú antukam minai yunumkaume.
2KI 22:19 Tikich Israel aents aidau pegkegchaun takamsaju asamtai, wake besemag dekapeakum jáanchjum ichigkume. Tuja nunú anentaimsam buutam nunashkam wainjame.
2KI 22:20 Nuadui aminak shiig agkan pegkegnum jakati, nunik niina muunji aajaku aidaujai ijunjati tusan titatjame. Tuja amek wi nunú aents aidaun suwimka suwakun itugkattaja duka makichkish wainkashtatme’, tujamui Tuke Pujuu tita”, tiuwai. Tusa tima nunú aents aidauk nuna pachis apu Josíasan ujaktatus waketjauwai.
2KI 23:1 Nunik jegawag apu Josíasan ujakajui. Tusa ujakam Judá wegantu apuji múun aidaun niijai Jerusalégnum ijunjatnume tusa untsukui.
2KI 23:2 Dutika untsuka, ashí Judá wegantu aidau, Jerusalégnumia aidau, sacerdote aidau, profeta aidau, ashí aents aidau, ujunauchinum nagkamas aents eme anentsa diitai aidau aatus jega Apajuí emematku ijuntainum shiyakag ijunjajui. Nunikagmatai, chicham umiktinun Apajuí Israel aents aidaun susauwa nuna jega Apajuí emematku ijuntainum aun Hilquías jukiuwa dusha wajintuk agagbau ayi nuna imatiksag ashí ausauwai.
2KI 23:3 Nuna ashí aujus, apu Josías jega jegamku ajiamunum ayaumas wajasui. Nunik wajas, dekas Tuke Pujuu daajin juju chicham umiktinun Moisés agajua duka ashí imatiksaik umikagmi tusa tiuwai. Tusa tutai ashí aents aidauk, ayu duke ati tiajui.
2KI 23:4 Apu Josías sumo sacerdote Hilquíasan tikich sacerdote aidaujai, nuigtu waiti kuitamin aidaun, aatus jega Apajuí emematku ijuntainum wainka apajuímtai aidau, Baal, Asherá, nuigtu yaya aidau aatus dakumja najanamu ayá nunú emematku takatai aidaun ashí jiigtajum tiuwai. Tusa tiajam shiyakag ashí jiijajui. Dutikawagmatai apu Josías apeatajum tusa tima Jerusalégka ukukiag entsa Cedrón tutaya nuna yantamen apeawajui. Dutikawag yuku wajasmatai nuna jukiag yaakat Betelnum ejegawajui.
2KI 23:5 Tuja wainka apajuímtai Baal, etsa, nantu, yaya aidau nayaimpinum ayá nunú dakumkamu aidaun, nainnum jega jegamjag Apajuí emematji tusag kugkuin incienson apeatin aidaun yaunchuk Judá apuji aajaku aidau sacerdote aidaun adaijau aina nuna Josías ashí ijumag chichajak: “Atumek yamaik sacerdotek achattajume, tuja nuigtush inciensok apeashtatjume”, tiuwai.
2KI 23:6 Nuna tusa nuigtushkam, wainka apajuímtai Asherá dakumka najanamu jega Apajuí emematku ijuntainum aun juki Jerusalégkan ukumtiki entsa Cedrón tutai yantamen ejegawag apeawajui. Dutikawag yuku wajasun jukiag dita ukumataijin egkeawag ukukiajui.
2KI 23:7 Tuja jega Apajuí emematku ijuntai aajakua nuwi batsamas, nuwa aidau dita apajuímtaiji Asherá dakumka najanamu anugjatnun jáanchin apajaku aina nuwi mai aishmagkuk pegkegchaun takanijaku aina nunashkam tsaijuk utsankauwai.
2KI 23:8 Nuna dutika Judá wegantu aidau yaaktajin sacerdote batsata nunú ashí kaunati tiuwai. Tusa tima kaunamtai, dita yaunchuk nain aidaunum kugkuin incienson apejaku aina nunak Guebanum nagkamas yaakat Bershebaya aatus ashí utsagkui. Tuja wakan pegkegchau aidau emematku kuntin maa patasa apetai Josué yaakta apuji aajakua nuna waitiji yaakat wayamunum mena nuni aajaku aina nunashkam ashí tsaigkauwai.
2KI 23:9 Tujash nunú sacerdote wainka apajuímtai aidaun mujanum emematujaku aina duka, Apajuí jee jegamkamu Jerusalén aajakua nuwig wetsuk batsamas, dita kumpaji tikich sacerdote aidaujai ijunag pag levadurajai pachimtsuk inajuamun yujaku ainawai.
2KI 23:10 Tuja nuigtushkam muja najatamu wake Ben-hinom tutainum wainka apajuímtai Moloc dakumkamua nunú tsaika ukuutajum, nuna emematuinak dita uchiji aishmagkun, dutikachkush nawanjinakesh maa apeawainum tusa aentsun ishiakui.
2KI 23:11 Tuja yaunchuk eke Josías apu weatsaig, Judá apuji aajakajua nunú, etsan emematuinak caballon najatuamu jega Apajuí emematku ijuntainum nuna waitaijin ijus, suntaja apuji Natán-melekan kanutaiji aajakua nuna yantamen atatman nunashkam tsaigkauwai. Dutikak dita apajuímtaiji etsa aajakua nuna carroji tusa najankamu aidaunashkam apea utsankauwai.
2KI 23:12 Tuja apu Ahaz inamtai jegamkamunum niina kanutaijin tikich tesaamu ijuntai aajakua nuna tuntupen Judá wegantu aidaun apuji aidau kuntin maa patasa apeatnun altaran najanawajua nunashkam tsaigkauwai. Dutikak nuigtushkam Apajuí emematku ijuntainum nuna agájin kuntin maa patasa apeatnun altaran apu Manasés najanauwa nunashkam tsaijuk yukuu wajasmatai, jukiag entsa Cedrógnum ukaja ajapawajui.
2KI 23:13 Tuja Olivo nain tutai Jerusalégjai niniaku awa nuwi tsumujinini yaakat Sidógnumia aents aidaun apajuímtai Astarté aajakua nuna, Moab aents aidaun apajuímtai Quemós aajakua nuna, nuigtu amonita aents aidaun apajuímtai Milcom aajakua nuna aatus Salomón Israel aents aidaun apuji najanak umikua nunashkam apu Josías tsaika utsagkui.
2KI 23:14 Tuja kaya aidau, numi aidau aatus dita apajuímtaiji dakumka najanamu aajaku aina nunashkam ashí tsaigkauwai. Dutika atak waketjukiag tikich wainka apajuímtai aidaun nuwi najanawainum tusa nunú tsaikbau aidaunum aentsu ukunchi aidaun ijumag ukukiajui.
2KI 23:15 Nuna dutika ukuak, yaunchuk Nabatan uchiji Jeroboam, Betelnum wainka apajuímtai ememattinun umikmatai, nuna Israel aents aidaun emematmikak tunamitkajua nunashkam tsaika yuku awajus jinum apeauwai. Tuja tikich wainka apajuímtai Asherá dakumka najanamu aajakua nunashkam apu Josías apeauwai.
2KI 23:16 Nuna dutika ayampas ashí niimkama, nuna mujajin ukumasbau ayaun wainak, niijai yujaun chichajak: “Au ukumasbau aina nuwiya ukunch jiija yajuakjum utitajum” tusa ishiakui. Tusa tima ukunchin yajuak ikaunmawagmatai, kuntin patasa apetai najanamu Betelnum aunum nuwi patai Josías apeauwai. Duka Apajuí chichamen etsejin profeta nuna pachis etsegkauwa imanisag uminkauwai.
2KI 23:17 Nuna dutika chichaak: “¿Aush waji dakumka najanamuita?” tau. Tutai, betelnumia aents aidau ainak: “Ame yamai betelnumia aents aidau dita apajuímtaiji aidaun emematuinak, kuntinun pataidiag apen aina nunú tsaigkaum dutikatnun, chichama etsegkatatus Judánmaya tauwa nunú jakamtai ukusbauwai”, tiajui.
2KI 23:18 Tusa tiagmatai Josías chichaak: “¡Auk aantsag asati! ¡Ukunchig achikaigpajum!” tiuwai. Tusa timatai profeta chichama etsejin Judánmaya aajakua nuna ukunchinak samarianmaya profeta chichama etsejin aajakun ukunchijai mai dutiksag idaisajui.
2KI 23:19 Tuja Israel aents aidau apuji aajakajua nunú wainka apajuímtai aidaun Samaria nugkanum jegamjujagmatai, Apajuí senchi kajegkauwa nunashkam, Betelnum tsaiku aina dutiksag Josíaschakam niina aentsji aidaujai ashí tsaigkajui.
2KI 23:20 Nuna dutika pujus sacerdote wainka apajuímtain emematin aidau nuwi batsatunak altarnum patai kajegkui. Dutika aentsu ukunchi aidaun yajuakag nunú altarnum sacerdote kajegbau aidaujai ashí patag apeauwai. Dutika ukuak apu Josías Jerusalén wakitkiuwai.
2KI 23:21 Makichik tsawantai Apu Josías ashí aents aidaun chichajak: “¡Yaunchuk Apajuí chichame agagbaunum Tuke Pujuu, atumi Apajuíjum emematkujum Pascua jiistamatajum tibauwa nunú umiakjum jiistamatajum!” tiuwai.
2KI 23:22 Tusa tiajam yaunchuk Israel aentsu apuji chichama epegkin aidau batsamajaku aina duikish imatikchatain, tuja Israel aents aidau apuji, Judá weantu aidau apuji aatus aajaku aina duikish imatika jiistamajakchamun, nunú tsawantin shiig jiistamawaju ainawai.
2KI 23:23 Nunak Josías apu ekemi dieciocho mijan takai, Jerusalégnum Tuke Pujuun emematuinak Pascuan jiistamawajui.
2KI 23:24 Josíasak tunchi aidaun, anentaimas dekamin aidaujai ashí ijinauwai. Dutikak dita jeen apajuímtai dakumka najanamu ayaunash, tuja tikich wainka apajuímtai aidau, ashí waji pegkegchau aidaujai Judá wegantu aidaunum ayaunak Jerusalégnum ayaujai nagkamas ashí tsaika utsagkui. Nuna dutikauwa nunak jega Apajuí emematku ijuntainum Moisés chicham umiktinun agajua nunú atatman, sacerdote Hilquías wainkauwa nuna umiak dutikauwai.
2KI 23:25 Tuja Josías niina anentaijai, wakanijai, senchijijai Tuke Pujuun umijujakua, imanuk yaunchuk apu aajaku aina nuwiyag makichkish atsujakui.
2KI 23:26 Tujash Tuke Pujuuk Judá wegantu aidaunak Manasés wegantu aidau pegkegchaujin kajegkamutak pujau.
2KI 23:27 Nuadui Tuke Pujuu chichaak: “Judá wegantu aidaunak Israel aents aidaun ijinauwaitag dutiksanuk ijinattajai. ¡Tuja Jerusalén wi etegkamua nunak jega wi pujustin jegamkamua nujai tsaiktatjai!” tiuwai.
2KI 23:28 Josías nuigtush kuashat takasua duka, tikich Judá wegantu aidaun apuji takasu aina nunú agatkamu papii Crónica tutaya nuwi agagbau ayawai.
2KI 23:29 Makichik tsawantai Egipto nugkan apuji Necao aajakua nunú asirianmaya apun maaniamunum atuktatus namak eufratesnum weuwai. Nunitai apu Josías jiintukiuwai niijai maaniatatus, nunik wetatman faraón Necao niyá wainak Meguido nugkanum niina mauwai.
2KI 23:30 Dutika maamtai, suntaja apuji aidau carronum egkeawag jukiag Jerusalén ejegawag, nii ukumastin umikbaunum ukusajui. Nuna dutika ukuinak, Josíasa uchiji Joacazan aceiteyai nijakag Judá apuji adaikajui.
2KI 24:8 Joaquígkak dieciocho mijanji ajamu Judá wegantu aidaun apuji wajasui. Tuja Jerusalégnumak ayatak kampatum nantu inamjauwai. Niina dukujig Elnatán Jerusalégnumia aajakua nuna nawanji Nehustá aajakui.
2KI 24:9 Tuja Joaquígkak niina apajijai betek Tuke Pujuun intimjuki pegkegchaun takajakui.
2KI 24:10 Tuja nunú tsawantin Babilonia nugkan apuji Nabucodonosor aajakua nuna suntaji aidau Jerusalégkan jetekagtatus shimutkajui. Nunik jegawag tentea apakajui.
2KI 24:11 Dutika tenteawag jetenai Nabucodonosorchakam jegauwai.
2KI 24:12 Nunik jegamtai Joaquín Judá wegantu aidaun apuji mantuawainum tusa ishamak, niina dukuji, tuja suntaja apuji aidau, niina atuwe aidau aatus Babilonia apujin sujumankauwai. Nunikagmatai achija yajuakajui. Nunú utugchat asauwa duka Nabucodonosor apu wajas ocho mijan inamai nunikui.
2KI 24:13 Nuna achija yajuak jega Apajuí emematku ijuntainum waji pegkeg akik aidau ayaunak, tuja apu pujusa inamtainia aidaunashkam Nabucodonosor ashí yajuakui. Dutikak nuwi takastin waji aidaun apu Salomón oron najanak umikua nunashkam ashí tsaikui.
2KI 24:14 Dutika ukuak aents Jerusalégnumia aidaunak ashí yajuakui. Suntaja apuji aidaun, suntag maanitan yacha aidaun, dakumak najantan yacha aidaun, hierrojai takata yacha aidaun aatus ashí achija yajuakui. Ashí ijumjamak diez mil aentsun yajuakui. Dutikam Judá nugkanmak ayatak ujudauch aidauk juwakajui.
2KI 24:15 Tuja nuigtushkam apu Joaquígkan, niina dukujin, niina nuwe aidaun, suntaja apuji aidaun, aents eme anentsa diitai aidaun aatus achija Babilonia nugkanum yajuakajui.
2KI 24:16 Tuja aents eme anentsa diitai aidaunak siete mil achija yajuakui, dutikak untsu dakumak najanin aidaun, hierrojai najanin aidaujai mil achija yajuakui. Dutikak nuigtushkam aents senchi maanitan yacha aidaujai ashí achija yajuakui.
2KI 24:17 Dutika yajuak pujus apu Nabucodonosor Joaquígka apaji yachin Mataníasan Judá wegantu aidaun apuji adaikauwai. Dutika niina daajin yapagtua Sedequías adaikauwai.
2KI 24:18 Sedequíasak apu wajasa inamtanak nagkamauwai veintiún mijan ajamu. Nunik apu wajas Jerusalégnum inamjauwai once mijan. Niina dukujig Hamutal yaakat Libnánmaya Jeremiasa nawanji aajakui.
2KI 24:19 Tujash Sedequíasak Joaquimjai betek Tuke Pujuun umigtsuk pegkegchaun takajakui.
2KI 24:20 Nuadui Jerusalégnumia aidaun, Judá wegantu aidaujai Tuke Pujuu shiig senchi kajejuk yaitsuk idaisauwai. Dutikam pujus apu Sedequías, Babilonian apujijai shiwagmagauwai.
2KI 25:1 Sedequías apu wajasa diez mijanan ejeyi, nuigtu nueve nantu inamak pujai, Babilonia nugkan apuji niina suntaji aidaujai shimutkajui Jerusalégkan jetekagtatus. Nunik jegawag, yaaktan tenteawajui, dutikawag nuwi ijus kumpinan najankajui, nuwi wakag ima shiig jetekagtatus.
2KI 25:2 Dutika tenteawag nuwi batsataig, Sedequías tsawan nii inabaujin once mijanan ejeyuwai.
2KI 25:3 Dutika tenteam batsamas nunú mijantin nantu Julio tsawan veinticuatrotin yujumak yumain abuekamtai nujantai senchi waituidau.
2KI 25:4 Tuja nunú tsawantai babilonianmaya suntag aidau Jerusalén peejamun iju chigkawajui. Dutikawagmatai Israel aents aidauk senchi ishamaidau. Nuninak Sedequías Israel aents aidaujai Jerusalén waitainum jimag apatka peejamunum niina pujusa inamtaiji agájin yagkug ajakbau aajakua nuni kashi jiinkiag jinta namak Jordán wetainum paka aajakua nunú pisajajui.
2KI 25:5 Nunik shimittaman babilonianmaya suntag aidau apu Sedequíasan pataetukag Jericó pakajin amainagkajui. Dutikiagtai niina suntaji aidauk pisajag shimuinak ima niinak ukukiajui.
2KI 25:6 Dutikam nigki juwakmatai, apu Sedequíasnak niina uchiji aishmag aidaujai, achikag jukiag Babilonia nugkan apuji yaakat Riblá, Hamat aajakua nuna nugken pujau asamtai nuwi ejegawajui. Dutikawagmatai apu Nabucodonosor Sedequías maatajum tusa inamjauwai.
2KI 25:7 Tusa inamjamtai Sedequíasa uchiji aidaunak nii wainai suwenum tsupik maawajui, untsu Sedequíasnak jiin mai ukuitkajui, dutikawag cadenayai jigkajag Babilonia nugkanum jukiajui.
2KI 25:8 Tuja Nabucodonosor Babilonia nugkan apuji wajas tsawan siete, nantu Julio, mijan diecinueve ejeyi pujus, niina kuitamin suntag aidau apuji Nebuzaradán aajakua nuna Jerusalén awemauwai.
2KI 25:9 Dutikam jegaa, Apajuí ememaku ijuntai jega jegamkamu aajakua nuna, apu pujusa inamtaijin nuigtu nunú yaaktanum tikich jega aidaun, tuja aents eme anentsa diitai aidau jenashkam ashí apeauwai.
2KI 25:10 Tuja nuigtushkam suntaja apujin uyunainak yujaidau Jerusalén peeja tentea apakbau aajakua nunak ashí tsaikajui.
2KI 25:11 Dutikawagmatai, Israel aents aidau Nebuzaradán mantamawai tusag ishamainak yunumjau aidaun, nuigtu dakumak waji aidaun najantan yacha aidaun, aatus achija niina nugken Babilonia yajuakui.
2KI 25:12 Dutika yajumak shiig ujudauch aidaunak, uva ajakbau dupajin, tuja tikich ajak ajakbau aina nuna dupajijai takagsatnume tusa batsakiuwai.
2KI 25:13 Nuna dutikawag jega Apajuí emematku ijuntainum takastin waji bronceyai najankamu aidaunak ashí tsaikajui. Tuja jega bakui aidaun, jega jegamku aepkamu aidaun, nuigtu yumi aimtai múun najanamu aidaun ashí tsaikajui. Dutikawag nuwi bronce ayaunak ashí Babilonia nugkanum yajuakajui.
2KI 25:14 Nuigtushkam yuku shikika jutai aidaun, palana aidaun, cuchara aidaun, tijig aidaun, nuigtu Apajuí emematku takatai bronceyai najankamu aidaun ashí yajuakajui.
2KI 25:15 Tuja jii kaiji chimpitai oro najanamu aidaun, nuigtu tsapa plata najanamu aidaun aatus ashí Nabuzaradán yajuakui.
2KI 25:16 Tuja jega Apajuí emematku ijuntain Salomón jegamak jimag shugkun ajigkua duka, tuja yumi aimtai múun, nuigtu jiju taubau shugku ajigtin aepkamu aatus aajakajua nuna kijinjig makichkish dekapamainchau aajakui.
2KI 25:17 Tuja jimag shugku aajakua nuna esantig maki makichik ocho dekapamun nagkaesau ajujakui. Untsu nuwi ekeni jiju bronceyai jega emetuatin najanamu aajakua nuna esantig jimag dekapamun nagkaesau ajujakui. Nuwi manzanaya numamtin dakumka bronce najanamu aidau detugbau aajakui. Tuja nunú shugkuk mai betek aajakui.
2KI 25:18 Tuja nuigtushkam sumo sacerdote Seraías, sacerdote Sofonías, nuigtu jega Apajuí emematku ijuntai jegamkamun kuitamin kampatum aajakua nunashkam achija yajuakui.
2KI 25:19 Dutikak sacerdotechunashkam suntaja apuji aidaun, cinco aents apu chichajin aidaun, nuigtu suntaja apuji aidaun daajin agatuk kuitamnun, tuja sesenta aents eme anentsa diitai aidaun aatus achikajui.
2KI 25:20 Dutikawag nuna Nabuzaradán ashí yajuak Babilonia apujishkam yaakat Riblá pujai ejegauwai.
2KI 25:21 Dutika Hamata nugken ejegawagmatai, Babilonia nugkan apuji kajegtajum tusa inamjauwai. Aatus Judá wegantu aidaunak achijag, dita nugken ukumtikiag tikich nugkanum yajuakajui.
2KI 25:22 Tuja Judá nugkanum ujumak iwaku juwakajua nuna apuji ati tusa apu Nabucodonosor makichik Israel aentsun etegkauwai. Nuna daajig Guedalías, Ahicaman uchiji, Safánka tijaji aajakui. Niig yaakat Mispá pujujakui.
2KI 25:23 Nuna suntaja apuji Judá wegantu achikchamu aidau batsatu dekawag, Guedalíasjai chichasagtatus yaakat Mispá shiyakajui. Nunú apu aidauk: Netaníasan uchiji Ismael, Caréah uchiji Johanán, tuja Tanhúmetan uchiji Seraías yaakat Netofánmaya aajakui, untsu Jaazanías aajakui yaakat Maacánmaya.
2KI 25:24 Nunik jegawagmatai, Guedalías ditan chichajak: “Apajuí Tuke Pujuu tutaya nuna daajin tajime: Juwi batsamsaja apu Nabucodonosor umigjinig, babilonianmaya aidauk shiig awagtamkagtatui. ¡Nuadui babilonianmaya suntag aidau apuji aina duka ishamkaigpajum!” tiuwai.
2KI 25:25 Tusa idayas siete nantu pujai, Judá wegantu aidaun apuji aajaku aina nunú wegantu, Netaníasa uchiji Elisamán tijaji Ismael, diez aents aidaun yajuak Guedalíasan jegajua mauwai. Dutikak judío aidaunashkam, babilonianmaya suntag aidaujai batsatunak ashí kajegkui.
2KI 25:26 Nuna dutikawagmatai, ashí aents aidauk babilonianmaya aidaun ishamainak, datsauch aidaunum nagkamas múuntuch aidaujai, tuja suntaja apuji aidaujai pisajag Egipto nugkanum shiyakajui.
2KI 25:27 Tuja Judá apuji Joaquín aajakua nunak achikag Babilonia nugkanum jukiajui. Dutikam pujus treinta y siete mijan ejeyi, nantu doceya nunú takau ai, tsawan veintisietetin makichik aents babilonianmaya Evil-merodac apu wajasui. Nunik Joaquígkan wait anentug aents achika chimpitainum achikam egketun jiikiuwai.
2KI 25:28 Dutika, tikich apu aidau achikam chimpijaidaun nagkaesau shiig ausauwai.
2KI 25:29 Nuadui Joaquín aents achika chimpitainum pujusa nugkujakbaujinak awimak ukuak tikich jáanch pegkejan nugkujui. Nunik pujus yujumkanak tuké apujai jimajuk yuujakui.
2KI 25:30 Tuja nuigtushkam apu Evil-merodac kashi kashinig nii atsumamu sumaktinjin tuké kuichkin sujakui.
EZR 1:1 Apu Ciro, Persia nugkan apuji wajasa makichik mijan takai, yaunchuk profeta Jeremías Tuke Pujuu tibaun etsegkauwa nunú uminkatin tsawan jegau asamtai, apu Ciro papiin umika ashí nugkanum nii inama nuwi ishiakti tusa Tuke Pujuu niina anentain antinkauwai.
EZR 1:2 Nuadui apu Ciro juna aatus papiin agajui: “Tuke Pujuu Apajuí nayaimpinum pujuuwa nunú ashí aents nugkanmaya aidaunak mina idaitugsae. Nuadui Judá wegantu aidau nugken Jerusalégnum Apajuí emematku ijuntain jega pegkegman jegamkati tusa inatjae.
EZR 1:3 Nuadui atum Apajuí aentsji aidautijum juwi batsatutigmek Jerusalén Judá nugken shiyaktajum. ¡Nunikjum Tuke Pujuu Apajuín Israel aents aidau emematin aina nunú nuwi puja nu emematku ijuntai, jega jegamkatajum! Apajuí nuwi puja nunú atumnak yaimpaktinme.
EZR 1:4 Tuja ashí aents jinaachu aidau Apajuí emematku ijuntain jegamkatatus shimuidaunak tikich aents ditajai batsamin aidau: kuichkin, oron, tikich waji aidaun, baka aidaun aatus susagtatui. Dutikainak nuigtushkam jega Apajuí emematku ijuntainum takastin waji aidaun anentag susagtatui”, tiuwai.
EZR 1:5 Tusa timatai Judá wegantun apuji aidau, Benjamín wegantun apuji aidau, sacerdote aidau, Leví wegantu aidaushkam ashí Apajuí wakemitkakbau aidauk Jerusalén shiyakag Apajuí emematku ijuntain jegamkagtatus umintsajui.
EZR 1:6 Nunik uminiagtai aents ditajai ijunag batsamin aidau: oron, platan, waji pegkeg najanamu akik aidaun, baka aidaun, aatus susajui. Dutikainak nuigtushkam tikich waji aidaun kuashat anentag susajui.
EZR 1:7 Tuja Apajuí emematku ijuntai jegamkamu Jerusalén aajakua nuwi waji ayaun Nabucodonosor yajuak niina apajuímtai jegamjukbaunum awaya ukukbaunashkam apu Ciro ashí yajuak susauwai.
EZR 1:8 Tujash tikima nii jukig susachui, kuichki kuitamin Mitrídates aajakua nuna ame susata tima, nii juki ashí dekaapa Judá wegantu aidaunum gobernador Sesbasar aajakua nuna susauwai.
EZR 1:9 Nunú waji aidauk juju aajaku ainawai: Treinta pinig oro najanamu aidau, mil pinig plata najanamu aidau, veinti nueve kuchii,
EZR 1:10 treinta taza oro najanamu, cuatrocientos diez taza plata najanamu aidaun aatus susauwai. Tuja nuigtushkam mil tikich waji aidaun susauwai.
EZR 1:11 Tuja waji orojai najanamu aidauk, platayai waji najanamu aidaujai ashí ijumjamak cinco mil cuatrocientos aajakui. Nunú waji aidaunak Sesbasar tikich judío aidau achija yajuakbau Babilonia nugkanum batsatujai Jerusalén waketuinak ashí yajuakajui.
EZR 3:1 Israel aents aidauk waketug ditá nugken jegawag maki makichik ditá yaaktajin batsamsau ainawai. Nunik batsamas nantu sieteya nu takau ai, ashí aents aidau Jerusalén ijunjajui.
EZR 3:2 Nunikagmatai Josué Josadakan uchiji niina kumpaji sacerdote aidaujai, tuja Zorobabel Salatielan uchiji, niina patayi aidaujai aatus ijunag Moisés jintiauwa nunak imatiksag Apajuí emematku kuntin maa patasa ashí apeatnun altaran najanawagtatus nagkamawajui.
EZR 3:3 Dutikawag nunú nugkanmaya aents aidaun ishamainayatak, yaunchuk altar najanamu tsaikbau aajakua nuwi ekeniag najanawajui. Dutikawag kashikmas, aagkú aatus tuké kuntinu maa nuna nejen ashí apeenak Apajuín emematuidau.
EZR 3:4 Nuigtushkam numi kanawe tsupija aakmaja batsamsamu aajakua nunú tsawantin jiistamatajum tusa chicham umikbaunak imatiksag jiistamawajui. Nuninak maki makichik tsawantin Apajuí emematkuik imania kuntin maa, nuna neje ashí apeami tibaunak dutiksag apedau.
EZR 3:5 Dutikaidau asag maki makichik tsawantai apetainak dutiksag apedau. Tuja nantu yama takamunum apetainashkam dutiksag apedau, wagki Tuke Pujuu nunú tsawantin emematjitajum tusa tibaun imatiksag umidau asag. Tuja nuigtushkam aents aidau Tuke Pujuun anentag waji aidaun suwidau.
EZR 3:6 Apajuí emematku ijuntai jegamtanak eke nagkamtsuk nantu siete Etanim tutai taka makichik tsawan tsawaju ai nagkamas, Apajuí tudaun tsagkugtamjati tusa kuntinun maawag nuna nejen ashí apenak Tuke Pujuun emematuidau.
EZR 3:7 Nuna dutikawag jega jegamin aidaun, numi dakag takatan yacha aidaujai, kuichkin susajui. Untsu aents tironmaya, sidógnumia aidaujai, setug tsupigbau aidaun Líbano nugkanmayan yajuakag apu Ciro tibaunak imatiksag Jope nugkanum ikaunmawagtin aidaun yutain kuashat, umutai aidaun, nuigtu aceite aidaun kuashat susajui.
EZR 3:8 Tuja Salatielan uchiji Zorobabel, Josadakan uchiji Josué, dita kumpaji sacerdote aidau, nuigtu Leví wegantu aidau aatus ijunjajui. Nuigtushkam ashí aents achija yajuakbau aidau, Jerusalén wakitki kaunawaju aidaujai ijunjag nunú jega pegkegman jegamkagtatus nagkamawajui. Nunak Jerusalén kauna batsamas jimag mijana nuna achikag, nuigtu jimag nantu takau ai, nagkamawajui. Dutikainak sacerdote aidaun, Leví wegantu aidaujai veinte mijan ajamun nagkaesau aidaun etegkeg atum jega jegabau diistajum tusa tiajui.
EZR 3:9 Tuja Josuéshkam niina uchiji aidau, niina yachi aidau aatus ijunjauwai. Tuja Cadmielchakam niina uchiji Judá wegantu aajaku aina nujai ijunjauwai. Nunikagmatai ditajai atunikag tikich aents Henadad wegantu aidau, Leví wegantu aajaku aina nujai ijunjag aents aidau nunú jegan jegamiagtai, shiig uminkati tusag diinak yujaidau.
EZR 3:10 Tuja jegá jegamin aidau Apajuí emematku ijuntai jegamkatatus shugkun ajigkag umikagmatai, David dutikatajum tibaun uminak sacerdote aidau dita nugkutaijin nugkukag iwagmamkag uwija kachujin yajuakag jegantajui. Tuja Leví wegantu Asaf aajakua nuna uchiji wegantu aidaushkam platillo aidaun yajuakag jegantajui, nuna awatuinak Tuke Pujuun emematiagtatus.
EZR 3:11 Nunik ijunag kantamainai, tikich aidauk: “Tuke Pujuuk dekas pegkejai, nuadui see titajum, niig Israel aents aidaunak tuke aneetnai”, wajaidau. Ashí aents aidauk shiig aneas Tuke Pujuun emematuinak pampaidau, wagki Apajuí emematku ijuntai ataktu jegamdau asamtai.
EZR 3:12 Nuna jegamainak nagkamiagtai sacerdote aidau, Leví wegantu aidau, nuigtu maki makichik wegantu aidaun apuji múun aidau, yaunchuk yama nagkamchaku jegamkamun wainajaku asag ataktu nagkamawag jegamiagtai, shiig aneenak senchi jiika buutuidau. Nuninai tikich aidaushkam shiig aneenak untsumaidau.
EZR 3:13 Imatuidau asamtai shiig anenakuash imatuina, atsa wake besemag dekapenakuash imatuina duka shiig dekamainchau aajakui. Nunú imati pampainamuk shiig atushat antugajakui.
EZR 6:1 Tuja chicham uminkatin agagbau aidau ijumtai Babilonia nugkanum awa nunú egaktajum tusa apu Darío inamjauwai.
EZR 6:2 Tusa tiajam egá yujakma Media nugkanum yaakat Ecbataná aajakua nuwi apu pujusa inamtain makichik papii dupajam patatun wainkajui. Nunú papiinum aatus agagbau aajakui:
EZR 6:3 “Ciro apu adaikam makichik mijan takak pujus juna aatus agajui: ‘Tuja Apajuí emematku ijuntai jegamkamun pachis aatus agagbau aajakui: Jerusalégnum jega jegamtanak nagkamatnume, dutika ataktu jegamkatnume, nuwi kuntinun maa apenak Apajuín emematiagtin asag. Nunú jega yakintig veintisiete dekapamu atatui, tuja wegkantishkam veintisiete dekapamu atatui.
EZR 6:4 Tuja nunú jega jegamkatasa aepkamu aidaunum nuwi nagkama kampatuma imania kaya múun aidau ekenja iwakbau atatui. Nunú maki makichik ekenjamu aidaunum numi yama dakagbau anujamu atatui. Tuja nuna akikenak kuichik apu aidau takasagtin tibauwa nuna jukiag akikmakagtatui.
EZR 6:5 Tuja waji orojai najanamu aidau, jiju platayai najanamu aidaun aatus apu Nabucodonosor jega Apajuí emematku ijuntainmayan yajuak Babilonia nugkanum ikaunmauwa duka Jerusalén awakjamu atatui. Dutika Apajuí emematku ijuntai jegamkamua nuwi utsaamu atatui, wagki nuwiya yajuakbau asamtai’ ”, tuu agagbau aajakui.
EZR 6:6 Nuna wainkagmatai, apu Darío nugka yaig namak eufratesnum etsa akaetaiya nuni aajakua nuna apuji Tatenai daagtin, nuigtu Setar-boznai niina kumpaji aidaujai batsatun chichajak: “Jerusalégnum batsatjum duka jiinjajum ukuktajum,
EZR 6:7 judío apuji aidau dita atuwe aidaujai jega Apajuí emematku ijuntai tsaikbau aajakua nuna ataktu jegamkatnume.
EZR 6:8 Tuja Apajuí emematku ijuntain dita jegamkatnume tusan yayaakun wishakam juna tajai: Namak Eufratesa yantamen etsa akaetaiya nuni aents nugka yaignum batsamin aidau apu takastinun kuichkin akikmaina duka jega jegamku takamunum akikmaktin ashí wayati, nunú dutikachmak wamak jega jegamain tsawan nagkaemaki.
EZR 6:9 Tuja sacerdote Jerusalégnumia aidau wajinak atsumiajat nuna sumainakuig, makichkish utugchat apujtutsuk, kashi kashinig sutajum: toro tsakat aidaun, uwig aishmag aidaun atsumainakuish, nuniashkush uwig tsakat aidaun maawag nuna nejen ashí apenak Apajuí ememattinun atsumainakuish susatajum. Tuja trigonakesh, weenakesh, vinonakesh aceitenakesh,
EZR 6:10 apenak Apajuín shiig anemtiksatatus atsumainakuish susatajum. Nuna dutikainak mina pujutjun, mina uchig aidaun pujutjijai pachisag Apajuín ausatnume.
EZR 6:11 “Tuja makichik aentskesh wi taja nuna umiachkug, niina jeniag numi juki etsaka iju maam atatui. Tuja niina jeshkam ashí tsaigka ajapjam atatui.
EZR 6:12 ¡Tuja makichik apukesh, nuniachkush aents nugka muunnumia aidaukesh Apajuí emematku ijuntai jegabaunum utugchatan apujunak Apajuí nii pujustinjin Jerusalégkan etegkauwa nunú ijinati! Wi junak apu Daríon tajai. ¡Juju wajintu agagbauwaita duka imanisag uminkati!” tusa agajui.
EZR 6:13 Aatus apu chichaman umiku asamtai, nunú nugkanum batsamin aidaun apuji aidau Tatenai, Setar-boznai aatus, tikich apu dita kumpaji aidaujai papii agagbaunak imatiksag betek umikajui.
EZR 6:14 Nuadui Apajuí chichamen etsejin profeta Hageo, Idó uchiji Zacarías aajakua nujai Apajuí emematku ijuntai jegamnaktinun pachis emtika etsegkamunak imatiksag apu takata chichamjin Judío aidau atak nagkamawag takasajui. Dutikainak Israel aents aidau Apajuíji jega dutik jegamnakti tibaunak imatiksag jegamak umikajui. Tuja Persian apuji aidau: apu Ciro, apu Darío, apu Artajerjes aatus, tibaunashkam betek umikajui.
EZR 6:15 Nunú jeganak Darío apu wajas seis mijan inamai, nantu Adar taka kampatum tsawan tsawaju ai, ashí jegamak ashimkajui.
EZR 6:16 Dutika ashimkagmatai Israel aents aidau, sacerdote aidau, Leví wegantu aidau, nuigtu aents achija yajuakbau waketjau aidau aatus ijunag, shiig aneenak jiistamawajui.
EZR 6:17 Nunú tsawantin Apajuí emematku ijuntai jegamnak ashimnaku asamtai, cien toro tsakat aidaun, doscientos uwig aishmag aidaun, cuatrocientos uwig tsakat aidaun maawag Apajuín emematuinak apeawajui. Nuigtushkam Jacopa uchiji doce aajakua dutiksag ashí Israel aents aidau tudauji tsagkugnagtinme tusag doce chivon achikag maawag nuna nejen ujumak jukiag apeawajui.
EZR 6:18 Nuna dutikawag Moisés agajua nuna uminak sacerdote aidaush wajina takastinuk aajabi, nuna mamiktujajui. Tuja Apajuí emematku Jerusalén ijunbaunmash Leví wegantu aidaush wajina dutikatnuk aajabi nunashkam dutiksag mamiktujajui.
EZR 6:19 Tuja nuigtushkam achija yajuakbau waketug kaunau aidau tsawan catorcetin mijan nagkamnamu yama nagkamchak nantu takau ai, Pascuan jiistamawajui.
EZR 6:20 Sacerdote aidau, Leví wegantu aidaujai, atumi tudaujum aidau dutik iwagmamkatajum, tusa tibaun uminak iwagmamkau ainawai. Nunikag ashí aents achija yajuakbau aidau, dita kumpaji tikich sacerdote aidaun, tuja ditanu aidau aatus tsagkugnajagtinun nunú tsawan Pascuatin kuntinun maa apeawajui.
EZR 6:21 Nunú kuntin Pascuatin maamu aidau nejenak ashí Israel aents achija yajuakbau waketug kaunau aidau, nuigtu tikich aents aidau, aents pegkegchaun takau aina nuna wekaetutsuk, Israel aents aidaujai betek Tuke Pujuun ememattag tuidaujai ijunag yuwawajui.
EZR 6:22 Tuja pag levadurajai pachimtsuk inajuamu yutai tsawan jegau asamtai, nuigtushkam Apajuí ditan ataktu yayaak Persia nugkan apuji, Apajuí emematku ijuntai jegabaunum yaigtinme tibau asa, yaigkam jegan jegamak ashimkaju asag, shiig aneenak siete tsawantai jiistamawajui.
EZR 7:1 Persia nugka apuji Artajerjes pujujakua nunú tsawantin Seraíasa uchiji Esdras daagtin pujujakui. Tuja Seraíasa patayi aidauk juju aajaku ainawai: Asarias, Hilquías
EZR 7:2 Salum, Sadoc, Ahitub,
EZR 7:3 Amarías, Azarías, Meraiot,
EZR 7:4 Seraías, Uzí, Buquí,
EZR 7:5 Abisúa, Finees, Eleazar aatus. Tuja Aarón yama nagkamchak sacerdote aajakua nunashkam shiig patayi aajakui.
EZR 7:6 Apajuí Moisésan chicham umiktinun susauwa nuna Esdrasak yacha aajakui. Tuja niinak Tuke Pujuu niina Apajuíjiya nunú yaijakui. Nuadui apu Artajerjes Esdras sumamunak ashí susauwai. Dutikam Babilonia nugkanum pujau,
EZR 7:7 apu Artajerjes inabaujin siete mijan ejeyu ai, Israel aents aidaujai, sacerdote aidaujai, Leví wegantu aidau, kantamtan yacha aidau, Apajuí emematku ijuntai jegamkamun waitijin kuitamin aidau, nuigtu aents nunú jeganum takau aidau aatus ijunag Jerusalén wakitkiajui.
EZR 7:8 Nunik mijan sietetin nantu cinco takau ai, Jerusalén jegauwai.
EZR 7:9 Babilonia nugkanum batsatu waketjauwa nunak mijan nagkamnamu, yama nagkamchak nantu taka makichik tsawan tsawaju ai, nunú tsawantin jiinki, nantu cinco taka makichik tsawan tsawaju ai, Apajuí wait anenkagtina nunú kuitamsam Jerusalén jegauwai.
EZR 7:10 Esdrasak Tuke Pujuu chichame umiktin agagbauwa nuna wisha shiig unuimajan umiakun Israel aents aidaun jintintuatjai, dutika ai ditashkam nuna umiktinme tusa puyatjujakui.
EZR 7:11 Apu Artajerjes papiin agag sacerdote Esdras jintinkagtin chicham umiktin agagbaun yacha aajakua nuna susauwa duka juju aajakui:
EZR 7:12 “Apu Artajerjes, sacerdote Esdrasan Apajuí nayaimpinum pujuuwa nuna chichame agagbaun yacha, jintinkagtina nuna kumpamak, aatus tawai:
EZR 7:13 Ashí Israel aents aidau mina nugkajui batsata nunú Jerusalén amejai wetag tuidauk wetinme. Tuja Leví wegantu aidaush, sacerdote aidaushkam wetag tuinakug wetinme.
EZR 7:14 Wi mina aentsug chichagkagtin siete aina nujai, chichama umikan Judá nugken aents batsata dusha, tuja Jerusalén batsata dusha chicham umiktin agagbaun Apajuí atumin amasua nunash betekash umiina nunú dekata tusan amina awemajame.
EZR 7:15 Tuja apu niina aentsji chichagkagtin aidaujai anentaimas, Israel aents aidaun ememattai Apajuí Jerusalén puja nunú iish susami tusag, platan, oron amasagtata nunú jukim wetá.
EZR 7:16 Tuja plata aidau, oro aidau Babilonia nugkanum yaakat ayá nuwiya ikamkugmek ashí jukitajum. Nuigtushkam tikich aents aidau, sacerdote aidau, diták anentaimas Apajuí emematku ijuntai jegamkamu Jerusalén awa nuwi takastinun amainakuig ashí yajuakta.
EZR 7:17 Dutika yajuakam nunú kuichkia duwi toro tsakat aidau, uwig aishmag tsakat, uwig múun aidaujai, nuigtu ajak juukbau aidau, vino aina nujai ijumjam sumakta. Dutikam nunú Apajuí emematku ijuntainum altar awa nuwi apeakjum atumi Apajuíjum Jerusalén puja nunú emematminjum.
EZR 7:18 Tuja oro, plata aina nunú ampinkuig, amina kumpajum aidaujai chichasam Apajuí wakegamush tukita nunú dutikatajum.
EZR 7:19 Untsu amina Apajuíjum emematku ijuntainum waya, nii emematku takastin aidaun amasag duka, Apajuí Jerusalén pujuuwa nunú susattame.
EZR 7:20 Tuja nunú jeganum takastinush waji atsumtatme nuniakmek apu aidau takastin ijumjamu aina nuwiya jukita.
EZR 7:21 Apajuí nayaimpinum pujuuwa nuna chichame umiktin agagbauwa nuna yacha, sacerdote Esdras sumamuk makichkish intimjuttsuk ashí susatajum, tusan wi apu Artajerjesan aents kuichki kuitamin aidau namak eufratesnum etsa akaetaiya nuni batsatutigminak ashí tajime.
EZR 7:22 Tuja duka juju aidau susattagme: Tres mil trescientos kilo plata, veintidos mil litro trigo, dos mil doscientos litro vino, dos mil doscientos litro aceite, tuja weenash wajupak atsumit duka imatiksagmek susattagme.
EZR 7:23 Apajuí nayaimpinum pujuuwa nunú niina jenia atinun sumakuig duka wamak ashí sunastatui, wagki nunú umiatsjinig, Apajuín suwimkega nunú apu uchijin, tuja niina inamtaiji nugka múunta nuwi suwimak iyanjamain asamtai.
EZR 7:24 Nuigtushkam juju dekatajum: Sacerdote aidauk, Leví wegantu aidauk, kantamtam yacha aidauk, jega Apajuí emematku ijuntain kuitamin aidauk, tuja nunú jeganum takau aidauk, nuniachkush tikich aentskesh nunú jeganum takau aidaushkam, apu kuichkiji atin akikmaktajum tusa waitkamuk makichkish atsuttawai.
EZR 7:25 Untsu Esdrasah, aminak Apajuí shiig anentaimsa takatan amasua duwi shiig anentaimsam, apu chichama epegkin aidau, nuigtu nugka yaig aidaun apuji gobernador aidaujai adaijata. Dutikawamin dita utugchat ataish epegkeatnume. Nunú aidau ashí tikich nugka yaig aidau namak eufratesnum etsa akaetaiya nuni ayá nuwish, amina Apajuígmin chichame umiktin agagbauwa nunash betekash umikajat nuna diistinme. Untsu nunú chichaman dekachu aina duka ame jintintuata.
EZR 7:26 Ashí aents aidau Apajuí chichame umiktin agagbauwa nuna umiachuk, tuja apu chichamenash umiachuk wamkeuch mantamnattawai, dutikachkuish tikich nugkanum sujunkattawai, nuniachkush kuichkin akikmaktatui, nuniachkush aents achika chimpitainum achika egkeam agtatui”, tusa apu Artajerjes agajui.
EZR 7:27 Aatus apu papiin agag umikmatai, Esdras Apajuín aujak: “¡Tuke Pujuu iina muunji aajaku aina nuna Apajuíji emematiagmi! ¡Nunuwai dekas pegkejam wait anenkagtinuk, wagki nii apu Artajerjesa anentain antintuk, Apajuí emematku ijuntai Jerusalégnum awa nuna eme anentus diisti tumamtikiu asamtai!
EZR 7:28 Tuja minashkam nii yaintsamtai, apu niina aentsji chichagkagtin aidaujai, nuigtu tikich aents aidau apu inamtaijin takau eme anentsa diitai aina dushakam ashí wait anenjujaje. Nuadui dita yaintsagmatai, Israel aents eme anentsa diitai aidaun wijai Jerusalén waketjatnume tusan ijumjajai”, tiuwai.
NEH 1:1 Witjai Nehemías Acalíasan uchiji. Jujuwai mina pachitus augmatbau. Artajerjes apu wajas inabaujin veinte mijan ejeyi, nuigtu nantu Quislev achika takak pujujakua, nunú tsawantin wi yaakat Susanum apu pujusa inamtaijin pujuyajai.
NEH 1:2 Nuwi pujai mina yatsug Hananí tikich aidaujai Judá wegantu aidau nugken batsatu miniyanme. Nunik minidaun wainkan iniakun: “Jerusalégnumia judío aents aidau shiwag amuam, achipag yajupakainum tusag pisaju aina dusha ¿wajukau ainawa?” tusan iniasabiajai.
NEH 1:3 Tusa iniai dita aijuinak: “Shiwag aidau tikichin achija yajumiagtai pisaju aina duka, waketug Jerusalén kauna batsamas waituinak, tikich aents aidau dushikiam batsatui. Tuja Jerusalén peejamu aya nunashkam shiwag aidau tsaikajui. Waitijinashkam jiiyai apeawajui”, tusa ujatkajabi.
NEH 1:4 Nuna antukan buutiajai. Nuniakun wake besemag dekapeakun, ujumak tsawantai yujumka ijagma pujusan Apajuí nayaimpinmayan augkun,
NEH 1:5 aatsan tiabiajai: “¡Tuke Pujuu, Apajuí nayaimpinum pujuuwah, Apajuí múun senchigtinuh, amek ame anagkagtuamuk tuke uminaitme! ¡Tuja amina anempainak chichamjumin betek umidauk kajimatkimek idaichauwaitme!
NEH 1:6 Nuadui wi amina aentsjum aidaun anentaimtusan tsawaish kashish tuke amina augjam nunú yamai antugtukta. ¡Israel aents aidauti amina chichamjum umitsuk, pegkegchau takamsag nunak dekaskeap nunikji tajai! ¡Mina muuntug aidau pegkegchaun takamsau aina nunak wishakam pegkegchaun takamsajai!
NEH 1:7 Ame diismak shiig pegkegchau takaku batsamsaji. Amina inakem Moisés chicham umiktin susauwaitam duka iik umikchaji.
NEH 1:8 Amina inakem Moisés chichagkum: ‘¡Mina chichamjun umigtutsuk pegkegchaun takainakuig, dapampaakan tikich nugkanum yujas waittsatnume tusan ishiaktinaitjai!’ tiuwaitme.
NEH 1:9 Tujash dutika utsajatkamin yujasa, ataktu aminí mininaku chichamjum umiajinig, atushat nugka nagkatkamunum batsatjinish, ataktu awagkagtukim, ame nugka etegkam juwi emematjitin atinme tibaunum ikaunmatnaitjime tiuwaitam nunú adeagta.
NEH 1:10 “Ii aidautik amina inakem ainaji. Amina aentsjum aidau Egipto nugkanum waitkam batsatu amina senchigmijai jiija agkanmitkauwaitam nunú ainaji.
NEH 1:11 ¡Tuke Pujuuwah, wait aneasam wi tajam nunú antugtukta! ¡Tuja amina inakem aidau segapaina dushakam antugkata! Ii wakegamua duka ima ame ememattag tabauwa nunuwai. ¡Tuke Pujuuwah, wait aneasam minash atutkata, apu shiig aneas wi tabaun antugtuk yainkati tusan segajame!” tiabiajai. Tuja nunú tsawantinig wika apu Artajerjes uwagtinun shikikan su ayajai.
NEH 2:1 Artajerjes apu wajasa inabaujin veinte mijan ejeyu ai, nantu Nisán taka makichik tsawan tsawaju ai, apu uwagtinun vino najanamun suwakun wake besemag wekaebaun apu waitkabi.
NEH 2:2 Nunik chichagtak: “Wake beseka wekagu diyagme ¿wagka aniame? ¡Jachu diyagme, utugchatas ajutjamatai!” tujutiabi. Tujutkui shiig senchi ishamkabiajai,
NEH 2:3 nuniakun: “¡Apuh, kuashat tsawan iwaku pujusam inamjata! ¿Wagkanuk wake besemag wekaechatja, yaakat mina apag mina dukugjai ukusbau aina nunú tsaikbau, tuja nuna waitijishkam apeka utsagbau aish?” tiabiajai.
NEH 2:4 Tusa tai, apu inintak: “¿Wajinma yaimainaitjame?” tusa tujutkui, Apajuí nayaimpinum pujuuwa nuna mina anentaijuig initak ausamiajai.
NEH 2:5 Nunikan apu ayaakun: “Apuh, ame diisam pegkejaitkuig, tuja ame mina wait anenjakmek, Judá nugken yaakat awa nuwi mina apag dukugjai ukusbauwa nuwi awetiti tajame. ¡Nuwi jegaan nunú yaakat tsaikbauwa nuna iwajatjai!” tiabiajai.
NEH 2:6 Tusa tai apu niina nuwe eketbaunum nuna yantamen eketu chichagtak: “¿Wemesh wajupa tsawanta megkaemainaitme? Nunikmesh ¿wajutiya waketmainaitme?” tujutiabi. Tujutkui tsawantan mamiktuawamiajai. Tusa ti ai ayu tujutiabi.
NEH 2:7 Tujutmatai nuigtushkam segaakun: “Ame dutikmainaitkumek, aents aidau namak Eufratesa yantamen etsa akaetaiya nuni batsamna nuna apuji aidau papii agatjata, wi nuni nagkaemai utugchatan apujtugsainum. Nuna jukin agkan Judá nugkanum jegatjai.
NEH 2:8 Tuja Asaf, amina aentsjum ikama kuitamin puja nunú numi aidaun sujusti. Nuna jukin Apajuí emematku ijuntai jegamkamua nuwi jegantatak kumpin jiikbau awa nuna iwajatjai, dutikakun yaaktan peejatjai. Dutikakun wi pujustinnashkam iwajatjai”, tusan nunashkam segabiajai. Tusa ti ai ayu tujutiabi, wagki Apajuí mina yaintu asamtai.
NEH 2:9 Tujutmatai jiinkin namak eufratesnum etsa akaetaiya nuni apu aidau batsatbaunum jegaan apu papii agagbau takakbaujun susabiajai. Tujash apuk ima papiinakek sujuschabi, mina uyuntusagtinnash aents caballonum maanitan yacha aidaun suntaja apuji aidaujai sujusabi.
NEH 2:10 Nuna dekawag Horón aents Sambalat, Tobías apu atuwe amonita aents aajakua nujai senchi kajekajui, wagki makichik aentskesh Israel aents aidaunak yaigchatnume tuidau asag.
NEH 2:11 Ima imaniakuan Jerusalén jegawabiajai, nunika jegan kampatum tsawan pujusan,
NEH 2:12 ujumak aentsu yajuakan dita uyuntusagmatai kashi nantakin wegabiajai, tujash Apajuí mina Jerusalén iwajata tusa tujutbaunak makichkish etsegkachabiajai. Wika burronum entsamkan weyajai, nuniai tikich aidauk dawé shimuyanume.
NEH 2:13 Nunú kashia duwi yaakta waitiji Valle tutaya nunú jiinkin, yumi pukunin daaji Pagki tutaya aajan, tikich waiti Tsuwat utsautai tutaya nuni wegabiajai. Nunika jegantan Jerusalén peejamu tsaikbau aidaun, waiti apekbau aidaun, wekaetusan ashí diisabiajai.
NEH 2:14 Nuna diisa ukuakun waiti Entsa pukuni jiinin tutainum wegabiajai. Tuja nuwi juwakin Apu maatai yumi aimkamu aajakunum jegantabiajai. Tujash burro wi entsamka wekaebau nuwi nagkaemamainchau ayi.
NEH 2:15 Tuja eke suwe aig entsa aintin wakabiajai. Nunikan yaakat peejamu aajakun ashí diisan ukuakun, yama nagkamchaku jiinkimunak nunisnuk wakitkiabiajai.
NEH 2:16 Tuja apu aidauk wi webaugnak dekachaju ainawai, nuigtushkam wajina dutikaknuk wekaeyaja nunakesh dekachaju aajabi. Nunika wekaekunush judío aents sacerdote aidaunash, apu aidaunash, apu yain aidaunash tuja tikich aents takata yaimkagtin aidaunakesh makichkish ujakchabiajai.
NEH 2:17 Nuadui dita chichagkun: “Ii aidauti shiig utugchatnum batsatag duka atumek dekagme, Jerusalégkak tsaikam, waitiji aidaush apegkam awai. Nuadui wijai atuniktajum, ¡nunikagmin ijunja Jerusalén peejamu tsaikbauwa nunú ataktu peeja iwajami! ¡Dutika iwajau asa dushikiam batsatag duka dutikamak achattaji!” tiabiajai.
NEH 2:18 Nuna tusan Apajuí mina wait anenjug yainkamun, nuigtu apu tujutbaunashkam ditan ujakabiajai. Dutika ai dita aimainak: “¡Ayu, takasagmi!” tusag shiig aneasag pempeentunikiag, dekas takasagmi tudayajabi.
NEH 2:19 Nuna antukag Sambalat, Tobías, Guésem árabe aents aatus dushiktamainak aatus tujabianume: “¿Waji aikash batsamtagme atumesh? ¿Apu intimjuki atumek takakjumek aniajum?” tusa tujabianume.
NEH 2:20 Tusa tujamainakui wi ditan ayaakun: “¡Apajuí nayaimpinmayaya nunú yaimpasmatai, niina inake aidautik juju tsaikbau aina duka ashí iwaja ashimkattaji! ¡Tuja atumek makichkish juka diimainchau ainagme, nuigtush Jerusalén pachisjumek makichkish chichamaitsugme, dekachu asajum!” tiabiajai.
NEH 4:1 Yaakat peejami tusa nagkama takajin, Sambalat dekaa senchi kajekui.
NEH 4:2 Nunik niina kumpaji aidau emtin, tuja suntag samarianmaya aidau emtinchakam dushikis Nehemíasan chichajak: “¿Au nujantai jinattak yuja aniaush wajukatasaya anísh yujawa? ¿Yaunchuk Apajuí emematuinak kuntinu maa apeyanum dutikatajum yamaish tujamchajaintash tusa aní yujatsuak? ¿Atsa nuniachkush makichik tsawantai takat ashimkami tuinatsuash? ¿Atsa nuniachkush kaya esaku tuwasua wegaka nuwiya yamajam kaya jiigmi tusag aní yuja?” tau.
NEH 4:3 Nuna tai Amón aents Tobíaschakam nuwi wajau asa chichaak: “¡Yaaktan peegkeg emaina auk shiig wainkauchi! ¡Aunak kujancham nuwakesh awi wakug kupik ajuattawai!” tau.
NEH 4:4 Tusa tuinakui wi Apajuín segaakun: “¡Iina Apajuíjiyah, iina dushiktamaina nunú antukta! ¡Iina kajegtamainak dushiktamaina duka ditaig pempenkita, dutikawamin dita shiwaaji aidau depetuk achija tikich nugkanum yajuaktinme!
NEH 4:5 ¡Dita pegkegchaujiya duka makichkish tsagkujaipa, tuja dita tudaujishkam esakatjaipa, wagki amina aentsjum aidau yaaktan ataktu peegtatman dushikina nuadui!” tiabiajai.
NEH 4:6 Tusa Apajuín ausan idaikun takatnak mijattsuk emayajai, imatikau asan jimaituk peeja iwakabiaji. Tuja aents aidaushkam shiig aneas wakekegat takayanume.
NEH 4:7 Jerusalén peejamu yumpuagbau aidauk peeja ashí apaka emajin, Sambalat, Tobías, árabe aents aidau, Amón aents aidau, ashdodnumia aidau aatus nuna dekawag shiig senchi kajekajabi.
NEH 4:8 Nunikag Jerusalégkan peegkeg emaina nunú tsaigkami, dutika awake anentaimtikjami tusag ijunag chichama umikajabi.
NEH 4:9 Tusa tuinakui iina Apajuíjin ausabiajai, dutika idaikun jetepainakui ayamjumakmi tusan, aents jintan tsawai kashijai niimsatin aidaun etegjan batsakabiaji.
NEH 4:10 Untsu Judá wegantu aidau chichainak: “¡Aents kijinu yanau aina duka yaakat peejamu aidau tsaikbau tuwasua wegaka nuna diisag mijamainawai, nuadui kakajus ataktu peejaik ashimaitsuji!” tuyanume.
NEH 4:11 Iina shiwaaji aidau anentaimsajag, eke dekainatsaig utua ijinami, dutika ajin takata emaina nunú idaimitkasagmi tusas anentaimianumtai.
NEH 4:12 Tujash tikich judío aidau shiwag batsatbaunum ijus batsatu kaunawag ujapainak: “¡Au aents aina nunú ashí yantamnum kautjamkag jetepakagtatui!” tusag kuashta ujapayanume.
NEH 4:13 Nuadui aents aidau dita patayi aidaujai juunikag yaakat peeja emamua nuna agájin, wake aidaunum, tuja eke peejachbau agkaju aidaunum aatus puyag aidaun, nagki aidaun, akentai aidaun yajuakjum dakamkatnume tusan tiabiajai.
NEH 4:14 Tusa tai ishamainakui, wi wajantan aents eme anentsa diitai aidaun, apu aidaun, nuigtu ashí tikich aidaujai ijumjan chichagkun: “¡Ishamkaigpa, Apajuí senchigtina nunuwai dekas ishamainuk! ¡Ishamtsuk dekas atum wegantu múun aidau, dita uchiji aidau, nawanji aidau, nuwe aidau, dita jee aidau ayamjakjum maaniatajum!” tusan tiabiajai.
NEH 4:15 Nuna iina shiwaaji aidau dekawag, dekas Apajuíyap ditanak yayawa, dutikamu asampap ii chicham umiamun dekagtamawaje tiajui. Tusa tiag wajantagmatai, yaakat peeja emamu idaisauti ataktu nagkama takayaji.
NEH 4:16 Nuadui nagkamas mina aentsug aidauk jimaituk takatan takainai, tikich aidauk puyajan, nagkin, ejamatai tantag aidaun, akentai aidaun, nuigtu maaniaku nugkutai jiju najanamu aidaun aatus yajuakag uminas batsamianume. Tuja apu aidauk Judá wegantu aidau
NEH 4:17 yaaktan peegkedaun yaiyanume. Tuja yaakat peejatnun chimpia juki ejegaidaush, yanakiag ejegaidaujai nagkamas ashí takainak yujayanume. Imanidau asag juinia uwejen takainak, tikich uwejen maanitai aidaun takaku aajabi.
NEH 4:18 Ashí aents nuwi takaidauk maki makichik dita puyagjin akachumau aajabi. Untsu mina yantamjui uwija kachujin umpuagtin wekaeyi.
NEH 4:19 Tuja aents eme anentsa diitai aidaun, apu aidaun, ashí tikich aents aidaujai chichajuinakun: “Takatak shiig múuntai, iman asa ashimainuk kuashat awai, nuigtushkam maki makichik akanjamu aidauti atushat kanaja yujasa takainaji,
NEH 4:20 nuadui iina shiwaaji aidau jetepagtaik, uwija kachuji shinuktatui. ¡Nunú antakjumek tupikaki, kaunajum yaijatkatajum! ¡Apajuí iina ayamjutpak, iina shiwaajijaig nii maaniattawai!” tiabiajai.
NEH 4:21 Tuja ii jimaituk kanakuti kashi kashinig takainaku, kashikmas nagkamsa tuke etsa akapayaji, imaniajin tikich jimaituk kanaku aidau nagki takus shiwag minaun wainkatatus niimak ijunmayi.
NEH 4:22 Tuja nuigtushkam nunú tsawantin aents aidaun chichagkun: “Atum takagmin yaimpau aina nujai ashí Jerusalén utsanatajum, nunikjum kashi jinta diistajum, nuniakjum tsawai takastajum”, tiabiajai.
NEH 4:23 Nuigtush wika, mina pataag aidaujai, mina yaintin aidaujai, mina uyuntin aidaujai, tuja tikich aents jinta niimin aidaujai jáanch nugkuagbauk nunisaik makichkish yapagmamtsuk, nagki takusa jinta niimku ijuniaji.
NEH 7:73 Ashí Israel aents maki makichik wegantu aidauk dita nugken batsamkajui, nunik batsatai nantu sieteya nunú takauwai.
NEH 8:1 Nunikmatai ashí aents aidauk Jerusalégnum waitin daaji Yumi tutai aajakua nujai niinis ekemsa, ayamtai umikbau plaza tutai aajakua nuwi ijunjajui. Nunik ijunag Esdrasan chichajuinak: Tuke Pujuu chichame umiktinun Moisés agag Israel aidaun susauwa nunú jukim itanta tusa tiajui.
NEH 8:2 Tusa tima sacerdote Esdras chicham umiktin agagbaun juki aents aishmag aidau, nuwa aidau, nuigtu ashí uchi anentaimjau aidau aatus tuwakbaunum ejentauwai. Nunak nantu sieteya nunú taka makichik tsawan tsawaju ai dutikauwai.
NEH 8:3 Dutika ejegan, kashikmas nagkamas aents tuwaka aunum nuna emtin wajas, au augkawa etsan tajipiuwai. Nuna augtai ashí aents aidauk jasa ijunas puyatjus antu ijunu.
NEH 8:4 Esdrasak aents tuwaka ijunbaunum nuna emtin numi yakí papamunum wajau. Tuja niina untsujiya nuni Matatías, Sema, Anías, Urías, Hilquías, Maaseías aatus ditashkam ijunu. Nuninai untsu menajinini Pedaías, Misael, Malquías, Hasum, Hasbadana, Zacarías, Mesulam aatus dushakam ijunu.
NEH 8:5 Nuwi Esdras waka wajau asamtai, ashí aents aidauk wainaidau, nuniamunum chicham umiktin agagbaun juki ausatatus ujatai, ashí aents aidauk wajainiajui.
NEH 8:6 Nunikagmatai Esdras Tuke Pujuu ashí senchigtinun emematiuwai. Nunitai ashí aents aidauk uweje takuiniag aimainak: “¡Aatus ati, aatus ati!” tiajui. Nuna tusag tikishmag pujusag tsuntsumawag nijayin nugka antig pujusag Tuke Pujuun emematiajui.
NEH 8:7 Tuja Leví wegantu aidau: Josué, Baní, Serebías, Jami, Acub, Sabtai, Hodías, Maaseías, Quelitá, Azarías, Jozabad, Hanán, Pelaías aatus nunú chicham umiktin agagbauwa dusha wajina takug tawa nuna aents aidaun shiig ujaidau. Tuja aents aidauk dita wajamunmak nuwig jasa ijunu.
NEH 8:8 Nunik ijunai chicham umiktin agagbaun senchi jiikag aujuinak, shiig paan antuktinme tuidau asag: Junak taku tawai tusag dita chichamen ujaidau.
NEH 8:9 Nuna aujiagtai antuinak, ashí aents aidauk buutuidau. Nuniagtai gobernador Nehemías, sacerdote Esdras, nuigtu Leví wegantu aidau aatus aents aidaun ujainau asag ditan chichajuinak: “¡Wake besemjak anentaimigpa, tuja buuttash buutigpa!” tiajui. Nunak tiajui, wagki nunú tsawanta duka Apajuí emematmi tusa etegkamu asamtai.
NEH 8:10 Tuja nuigtu Esdras ditan chichajak: “¡Jemin wejum yujumak shiig yuwajum, umutai vino yumimitu uwagtajum, nuniakjum juju tsawanta duka Apajuí emematku ijuntai asamtai, yumain umikbau atsujaidaujai ajamdaisatajum! ¡Wainka wake besemag anentaimigpajum, Tuke Pujuu dakunkutan ama nunú iinak ichichtamu asamtai, shiig aneasjum jiistamatajum!” tiuwai.
NEH 8:11 Tuja Leví wegantu aidaushkam ashí aents aidaun anentain ichichtuinak: “¡Buuttsuk itatkatajum, juju tsawanta duka pegkejam Apajuí tsawanji asamtai, uyumaku wake besemag dakapeamuk atsumainai!” tuidau.
NEH 8:12 Tusa nunú chicham jintintuam shiig antukaju asag, ashí aents aidauk yujumkan yuwinak, umutain umuinak tikichdau yumain umikbau atsujaidaujaish ajamdaisata tusag shiig aneas shiyakajui.
NEH 8:13 Nuna inagnakag kashinia duwi maki makichik wegantu aidaun apuji aidau, sacerdote aidau, Leví wegantu aidau aatus ashí Esdrasjai ijunjajui, chicham umiktin agagbauwa dusha wajina takug tawa tusa aujus diinak.
NEH 8:14 Dutika auju batsamtukma Tuke Pujuu Moisésan jintintak, Israel aents aidau numi kanawe aakmajag batsamsajua nunú tsawantin nuna anentaimtusag, numi kanawen aakmag batsamas Apajuín emematuinak jiistamatnume, tusam ujakta tibau agagbaun wainkajui.
NEH 8:15 Nunikag ashí yaakat aidaunum, tuja Jerusalégnumshakam, ashí aents aidau, mujá shiyakag olivo kanawe aidaun, arraya duke aidaun, palmera duke aidaun, nuniachkush tikich numi kuashat dukentin kadaukdauju aidaun egaktinme, Apajuí chichame umiktin agagbaunum tawa dutiksaik aakmagtinun, tusa tibau antuekauwai.
NEH 8:16 Nuna antukag aents aidauk dita jeen yaki aakmaktinun, tuja jega agaaji aidaunum aakmakagtinun, nuigtushkam jega pegkejam Apajuí emematku ijuntai jegamkamunum waitijin jegantatak agkaju ayatak shugku ajigbauwa nuwi aakmaktinun, tuja waitin daaji Yumi tutaya nuwi plaza awa nujai niniaku aakmaktinun, nuigtu tikich waitin daaji Efraín tutainum plaza awa nuwi aatus aakmajagtinun numi kanawen tsupig ikaunmawajui.
NEH 8:17 Ashí aents achijam yajuakbau aidau waketjau aidauk betek aakmajajui, dutikawag nuwi utsanawajui. Nunak aents Nun daagtin aajakua nuna uchiji Josué pujusmatai dutikau aina duwi nagkamas, dutiktsuk idaisamun imapam nunú tsawantin dutikawajui. Nuadui shiig aneaku dakujamu asauwai.
NEH 8:18 Tuja nunak siete tsawantai jiistamawajui, nuninak yama nagkamchak tsawan tsawagbaunum nagkamas chicham umiktin agagbaun Esdras kashi kashinig au augkawa jiista amuebaunum inagnakui. Nuna inagnak tsawan ochoa duwi ijunjajui, nunikag nunú tsawantinish wajinak dutiknush aajabi nuna betek umikajui.
NEH 9:1 Nantu sieteya nunú takau ai, tsawan veinticuatrotin Israel aents aidau yujumka yutsuk batsamas Apajuín ausagtatus ijunjajui. Nuninak jáanch pegkegchaun nugkujag, buuken nugka yukukuntun yukumajag,
NEH 9:2 aents tikich nugkanmaya dita wegantuchu aidau ijunbaun ukukiag, ditash kanakag ijunas dita pegkegchau takamsamu aidaun, dita muunji aajaku aidau pegkegchau takamsau aidaujai ashí etsegtumakajui.
NEH 9:3 Tuja nunisag ijunaig chicham umiktin agagbaun Tuke Pujuu dita Apajuíji ditan susauwa nuna kampatum horayai ausajui. Tuja tikich kampatum horaya duwi dita pegkegchau takamsamu aidaujin etsegtumakajui. Nunikag nuadui Tuke Pujuu dita Apajuíjin emematiajui.
NEH 9:4 Nuna inagnakag, Leví wegantu aidau: Josué, Binuy, Cadmiel, Sebanías, Binuí, Serebías, Baní, Quenaní aatus numi yakí papamunum wakajui. Nunikag nuwi ijunas senchi untsumak, Tuke Pujuu dita Apajuíjin ausajui.
NEH 9:5 Dutikawag Leví wegantu aidau: Josué, Cadmiel, Binuy, Hasabnías, Serebías, Hodías, Sebanías, Petahías aatus aidau chichainak: “¡Wajaitajum, nunika ijuntsajum Apajuí Tuke Pujuuwa nunú yamaish ajumaish tuke ememattajum! ¡Apajuí daaji dekas tikich aidaun nagkaesau ima pegkegma nunú kantamjakjum shiig ememattajum!” tiajui.
NEH 9:6 Tusa tiagmatai Esdras chichaak: “Tuke Pujuuwah, tikich apajuí amejai betekak makichkish atsawai, ima ameketme Tuke Pujuumek. Ame nayaimpik najanauwaitme, tuja nuna nagkaiki awa dushakam ame najanauwaitme, dutikam ashí yaya aidaushkam najankauwaitme. Nugkashkam, tuja nugkanum ayá dushakam ashí ame najanauwaitme. Tuja nayants aidaushkam najanam nuwi ayá dushakam najankauwaitme. Ashí waji aina duka ame pujutak suwame. Nuadui yaya nayaimpinum ayá duka amina emematjamainawai.
NEH 9:7 Tuke Pujuuwah, ame Abram etegkauwaitme. Dutikau asam caldeo aents aidau yaaktaji Ur aajakua nuwi pujau, ame jiikim niina daaji yapagtuam Abraham adaikauwaitme.
NEH 9:8 Dutikam ima aminig kajinas anentaimu wainu asam, niijai ame chicham umiakum: Canaágnumia aents aidaun nugke, hitita aents aidaun nugke, amorreo aents aidaun nugke, ferezeo aents aidaun nugke, Jebús aents aidaun nugke, gergeseo aents aidaun nugke aatus aina nuna ame wegantu aidaun susatnaitjai tusam, anagkuawaitam duka betek umikuitme.
NEH 9:9 Iina muunji aajaku aidau Egipto nugkanum batsamas waitujaku aina duka amek wainkauwaitme. Tuja nayants kapantu tutainum jegawag buutuidaush ame antugkauwaitme.
NEH 9:10 Nuadui faraón ashí niina inake aidaujai, tuja nunú nugkanmaya aidau ashí suwimak suwakum ishamain wainchatai aidau iwainajuitme, wagki Israel aents aidaun shiig pegkegchaunum waitkaidau asagmatai. Dutikau asam yamaik ameketme dekas pegkegnum augmattaimek.
NEH 9:11 Ditash wainainai nayants jimaituk akanka buku awajsabiume. Dutikamunum katiajajui. Untsu shiwag aidau ditan pataetukajua duka nayantsa ejapeen dekas shiig kunajin kayajai betek aepá emegkagmayume.
NEH 9:12 Dutika ayamjukam tsawai shimakui, yujagkim emtika awantamin, nuna diisag shimuyanume, untsu kashi jii kegau emtika awantamin jintan tsaaptin emamtai, shiig shimuyanume.
NEH 9:13 Tuja tikich tsawantin muja Sinaínum akaikiuwaitme. Tuja nayaimpinum pujusam ditajai chichasuitme. Nuwi susauwaitme chicham umiktin shiig pegkeg aidau agagbau.
NEH 9:14 Tuja tsawan ayamtai ame etegkauwaitam nunú jegakuig, nunú tuké dutikin atajum tusam jintintuawaitme. Tuja chicham dekaskenum umiktin agagbau Moisés susauwaitme, nuna umiktinme tusam.
NEH 9:15 Tuja nuigtushkam dita yapajainak waituinakuish, nayaimpinmaya pag susauwaitme, nuna yuwawag ichichmamjatnume tusam. Tuja kitamainakuish uwagtinme tusam, kayanmaya yumi susauwaitme. Nuigtushkam nugkan amastinaitjime tusam anagkuawaitam nunú jukitajum tiuwaitme.
NEH 9:16 Tujash iina muunji aajaku aina duka emebau, antakchau wajasu aajaku ainawai. Nuadui amina chichamem umiktin agagbaunash umikchau ainawai.
NEH 9:17 Nunidau asag amina chichamjum umitan dakitjag, ame dita yayaakum wainchatai ishamain aidau iwainajuitam nunashkam kajimatkiajui. Nunidau asag amina chichama intimjutpakiag, tikich apun adaikajabi ataktu Egipto nugkanum awagtamki waitkam batsabiag nuwig ejetamatnume tusag. Tujash amek tsagkugkagtin, anejatin, wait anenkagtin, nuigtush kakajus kajechuitam duwi kajimatkimek idaisachuitme.
NEH 9:18 Jiju ukuijag baka tsakatan dakumak najanawag, jujuwai apajuí, ii Egipto nugkanum waitkam batsatutin jiigmajajua duka tusag emematuinak pegkegchaun takainakuish,
NEH 9:19 uwegshunum jinaati tusamek idaitsuk wait anenjauwaitme. Dutikam tsawai dita shimamunum yujagkim wajantun wejakua dusha, tuja kashi shimamunum yujagkim keeka wejakua dushakam emegkakchauwaitme.
NEH 9:20 Nuigtushkam Wakani Pegkeji ditan jintintuatin susabiume, tuja dita yapajak yuwawagtin nayaimpinmaya yutai maná akaketkabiume, tuja kitamainakuishkam dita uwagtinuk sumayume.
NEH 9:21 Tuja cuarenta mijan uwegshunum yujasag yuwawagtinush ame susabiume, tuja jáanchjigkesh mamugchagmayi, nawenigkish iyagchagmayi.
NEH 9:22 Nugka múun aidau susauwaitme. Dutikau asam nunú akaantujam tesagkam maki makichik wegantu aidau tinamkauwaitme. Tuja apu Sihón aajakua nuna nugke Hesbón aajakua nunú, apu Og aajakua nuna nugke Basán aajakua nujai ame susauwaitme, dutikam nuna jukiag nuwi batsamsaju ainawai.
NEH 9:23 Nuigtush nayaimpinum yaya ayá iman kuashat uchigtin atinme tusam tiuwaitme. Tuja dita muunji aajaku aidau anagkuakum, nugka atumdau atinun amastinaitjime tiuwaitam nunú umiakum, yajuakam nunú nugkanum ejegauwaitme.
NEH 9:24 Dutikamu asag nunú nugkanum utsanawag Canaán nugkan jukiajui. Tuja nuwiya aents aidauk chichaka ayamjumakchamin awajsauwaitme. Tuja dita apuji aidaushkam nuwiya aents aidaujai ashí Israel aents aidau, dita wakegamun dutikatnume tusam ditai idaisauwaitme.
NEH 9:25 Nuigtushkam yaakat peejamu aidaun, nugka pegkeg ajak tsapau aidaun, jeganum waji pegkeg piyaku aidaun, yumi taimu aidaun, uva ajakmakbau aidaun, olivo ajakbau aidaun, aatus nuigtu tikich ajak jigkayi yujutai aidaun, shiig kuashat yajuakajui. Dutikawag nuna shiig yuwawag duwekajui. Aatus ame wait anenja kuitabau asag shiig batsamsajui.
NEH 9:26 Nunik batsatiatak, aminak umigtamkachu ainawai. Nunidau asag amejai shiwagmagawag, chicham umiktin ame susauwaitam nunak dakitug idaisau ainawai. Tuja nuigtushkam amina chichamjumin etsejin profeta aidau ditan chichajak, aní batsamtsuk Apajuí nemagkatajum tusa dita pegkegchaujin paan etsegtamu asag kajegku ainawai. Dutikaidau asamtai, ameshkam dita kajegkauwaitme.
NEH 9:27 Nuadui dita shiwaaji aidau waitkastinme tusam idaisauwaitme. Dutikam batsamas waituinak amina segapajabi. Tusa segapainakui, amina anenkem múunta iman asamtai, nayaimpinum pujusam dita sumamu antugkam, ditan ayamjuk agkanmitkatin aidau aents etegtujuitme.
NEH 9:28 Dutika ayamjukam machik agkan pujamuik, amina ataktu pegkegchaun takamjutpagmayi. Nunidau asagmatai dita shiwaaji aidau waitkastinme tusam idaisabiume. Dutikam waituinak ataktu amina segapainakui, amek wait anenkagtin wajasuitam iman asam, dita sumamu nayaimpinum pujusa antugkam kuashta ayamjukam agkanmitkauwaitme.
NEH 9:29 Tuja chicham umiktin agagbauwa nunú umiktajum tusameshkam ujayume. Tujash ditak eme anenmamaidau asag, amina chichamjum umiktin agagbaunak ajantusagkesh diischau ainawai. Nunidau asag amina chichamem pujutan sukagtina nunak umikchaju ainawai. Nuninak intimkiu antakchau wajasag, nunú chicham umitnak dakitjau ainawai.
NEH 9:30 Imanik pegkegchaun takamainakuish, kuashat mijadai atsanjauwaitme. Nuadui aminí Wakan awa nujai, tuja amina chichamjumin etsejin profeta aidaujai ankaigpa tusam ujayume. Tujash ditak antukchaju ainawai. Nuadui aents nugka múun aidaunmaya ditan depetuk waitkastinme tusam idaisauwaitme.
NEH 9:31 ¡Dutikau ayatkum ame wait anenkagtutaigmek múunta iman asamtai, ashí ijintsuk, nuigtush ima ditakek idaitsuk kuitamkauwaitme, wagki amek Apajuí kakagchauch, wait anenkagtinaitam iman asam!
NEH 9:32 ¡Nuadui iina Apajuíjiyah, amek múun, senchigtin, ishamain, ame chicham tibauk imatiksamek uminaitme, tuja amina anenkagmek múuntai! Jutiin apuji aidau, tikich apu aidau, sacerdote aidau, amina chichamjumin etsejin profeta aidau, iina muunji aajaku aidau, nuigtu ashí aents aidau, Asiria nugkan apuji pujujakua duwi nagkamas waitujaku aina nunisaik yamaishkam waitiaji.
NEH 9:33 Tujash ii imanika kuashat waittsa minag duka utugchatak aminuchui. Ii pegkegchau takasu asajin, amek amina chichamjum betek umiau asam suwimkak sukagtame.
NEH 9:34 Iina apuji aidau, tikich apu aidau, sacerdote aidau, iina muunji aajaku aina dushakam, chicham umiktin agagbaunak umikchaju ainawai. Tuja pegkegchau takasaigpa, suwimak jukittagme tusa ame ujamash antukchaju ainawai.
NEH 9:35 Nunidau asag ame apu emam apusamuitak, tuja nuigtush shiig kuashat waji aidau susamaitak, nuigtush nugka pegkeg shiig tsapau susamuitak, nunak kajimatug emematjamchaju ainawai. Nunidau asag pegkegchau takamujinash idaisachu ainawai.
NEH 9:36 ¡Diista nijah, ame iina muunji aidau nugka susauwaitme ajakmawag yuwatnume, nuninak wajigtin atinme tusam! ¡Nunú nugkanum batsamsa iina pegkegchaujin yamaikish wainka inaku waitkatai batsatji!
NEH 9:37 Ii ajakmamu shiig kuashat juwag duka iina pegkegchaujin ame apu aidau sukagtusu asamin, dita yuwatin ajaaku waitiaji. Ii aidautinak nunú apu aidau iina tagkuji aidaujai niinu etamak waitkagmainawai. Nuadui shiig pujuschamin dekapeakun waitiaji”, tiuwai Esdras.
NEH 9:38 Imanika waituidau asaja dekas chicham umiktin agagbauwa nunú umikmi tusa tumamainaji. Nuadui nunú pachisa papiinum agaji. Nunú papii agaja umikbaun iina apuji aidau, Leví wegantu aidau, sacerdote aidau aatus dita daajin apujawag firmainawai.
JOB 1:1 Makichik aents aajakui Job daagtin, pegkejam, utugchatji atsuju, Apajuí inake, pegkegchaun takasaig tusa kuitamamin aajakui. Niig Us nugkanum pujujakui.
JOB 1:2 Jopa uchijig aajakui siete aishmag, kampatum nuwa.
JOB 1:3 Niina tagkuji aidauk: siete mil uwig, tres mil camello, mil buey, nuigtu quinientos burro nuwa aidau aatus aajakui. Nuigtushkam niina inake aidaush kuashat ajujakui. Etsa minitainmanini tikich aents batsamajakua nuna nagkaesau nii ima wiakuch aajakui.
JOB 1:4 Niina uchiji aidauk maki makichik tsawantan etegkawag yujumka umikag yuwinak jiistamajaku ainawai. Nuna jiistamainak dita umayi kampatum aajakua nuna tuké ipajaku ainawai.
JOB 1:5 Nuna ashí uminkagmatai Job anentaimas, namputchawame mina uchig aidau Apajuín pegkegchaun takagsachajeash tusa, niina uchiji aidaun untsuka ijumag, kashikmas nantaki dita tudauji tsagkugnagtinun kuntinu maa nuna nejen ashí apeak Apajuín emematujakui.
JOB 1:6 Makichik tsawantai Apajuí aentsji ángel aidau Tuke Pujuuwai jegantagtin ainai, iwanchakam Apajuíyai jegantui.
JOB 1:7 Nunikmatai Tuke Pujuu niina iniak: “¿Tuwiyamea miname?” tama iwanch ayaak: “Ashí tikich nugkanum wekagun minajai”, tiuwai.
JOB 1:8 Tutai Tuke Pujuu ayaak: “¿Mina inakeg Job ima minak umigtinuwe dusha wainkachmakum? Aents ashí nugkanmaya aidaujai ijumja diyamash, niig ima minak umigtak, wi wakegamunak takak, pegkegchaun takatsuk pujuuwe imanuk makichkish tikichik atsawai”, tiuwai.
JOB 1:9 Tusa tutai iwanch Tuke Pujuun ayaak: “Tujash amina umigtama nunak tikima wainkag umigtamtsui.
JOB 1:10 Niina, tuja niina nuwe, niina uchiji aina nuna, niina wajiji aidaujai waitkasainum tusam tuke kuitamjame. Tuja niina takatjinish ame kuashat ikauntame. Nuadui au nugkanmak tikich aidaun nagkaesau nii ima tagkugtinai.
JOB 1:11 Tujash diik niinu aina nunú atankikiah, dutikamak aminak pegkegchaun chichagtamkattawai”, tiuwai.
JOB 1:12 Tusa tutai Tuke Pujuu iwanchin ayaak: “Dekas tame. Niina wajiji aina duka ame itugkatag tame dutikata. Tujash nigka makichkish antigkaipa”, tiuwai. Tusa tima, iwanchik Tuke Pujuujai chichaak pujau jiinki Job pujamunum weuwai.
JOB 1:13 Makichik tsawantai Jopan uchiji aidau, nawanji aidaujai niina uchiji iwai aajakua nuna jeen yujumka umikag ijunag yuwinak jiistamainak batsatai,
JOB 1:14 makichik aents tupi tupikakua Jopa jeen taa niina chichajak: “Mina kumpag aidaujai baka nugkan pukuakui batsatjin, burro nuwa aidau ii pujamunum tikiju dupan yuwak ijunmae.
JOB 1:15 Nuniamunum pachiachbau arabianmaya sabeo aents aidau kaunawag, ashí juju tagku aidaun kasamak yajumainak, mina kumpag aidaun kuchiyai ijuag kajegmae. Dutikainakui ima wiki tupikakin uwemjan taajai amina ujaktasan”, tau.
JOB 1:16 Tusa eke etsejak wajaig, tikich inak tupikaki taa chichaak: “Chaajip iyaak uwija kuitamin aidaun uwigjai ijiname. Dutikamtai ima wiki uwemjan amina ujaktasan tupikaki taajai”, tau.
JOB 1:17 Tusa eke etsejak wajaig, kampatuma nunú tupikaki taa chichaak: “Caldeo aents aidau kuashat kaunawag jetepakag depetamak, camello aidaun yajumainak, tagku kuitamin aidaunak kuchiyai iju kajegkagmae”, tau.
JOB 1:18 Tusa eke etsejak wajaig, tikich tupikaki taa chichaak: “Amina uchijum aidau nawanjum aidaujai uchijum iwai jeen yujumka umikag yuwatatus batsatai,
JOB 1:19 pachiachbau dase uwegshunmaya dasentak jegan umpui kupik ajuak, amina uchijum aidaunak ashí ijiname. Dutikamtai ima wiki uwemjan amina ujaktasan minajai”, tau.
JOB 1:20 Nuna antuk, Job wajaki wake besemag dekapeak, jáanchjin japiki ichigka, awamajui pinuin. Nunik Apajuín emematak tikishmag pujus tsuntsuma nijayin nugka antig pujusui.
JOB 1:21 Nunik pujus chichaak: “Juju nugka juwi akiinkunuk wajigtuchu akinawaitag, nunisnuk jaknushkam wajiigtuchu jakattajai. Tuke Pujuu mina ashí sujusua nunú nigki ashí jujutkine. ¡Nuadui ima Tuke Pujuu pegkegma nuna ememattajai!” tiuwai.
JOB 1:22 Aatus imaanik waitiakush, makichkish pegkegchaunak takamsachui, nuigtush Apajuínash pegkegchaunak chichagkachui.
JOB 2:1 Makichik tsawantai Apajuí aentsji ángel aidau Apajuíyai jegantagtin ai, iwanch niishkam jegantui.
JOB 2:2 Nunikmatai Tuke Pujuu niina iniak: “¿Tuwiyamea miname?” Tama iwanch ayaak: “Ashí nugkanum wekagun minajai”, tiuwai.
JOB 2:3 Tutai Tuke Pujuu ayaak: “¿Mina inakeg Job ima minak umigtinuwe dusha wainkachmakum? Aents ashí nugkanmaya aidaujai ijumja diyamash, niig ima minak umigtak wi wakegamunak takak, pegkegchaun takatsuk pujuuwe imanuk makichkish tikichik atsawai. Tuja ame utugchat atsujaig, dekapsatjai tusa segatkumin dutikata timajame. Tujash ame imatika uchiji aidau, tagkuji aidau ijutuamash nigka shiig umigtawai, nii pegkegchau takamuk atsujui”, tiuwai.
JOB 2:4 Tusa tama iwanch Tuke Pujuun ayaak: “Makichik aentsuk niina iyashin najaimamuji atsugmak shiig pujawai. Unstu najaimamu achiamak jakaig tusa nii wakegamun dutikattawai.
JOB 2:5 Diik najaimaku waitmain susakia, dutikamash wajukatig, nunú dutikamak jakaig tau asa amesh antamin pegkegchaun chichagtamainai”, tau.
JOB 2:6 Tutai Tuke Pujuu iwanchin ayaak: “Dekas tame. Ame itugkata tame dutikata. Tujash niina pujutjig antinkaipa”, tau.
JOB 2:7 Tusa tima iwanch Tuke Pujuujai chichaak pujau jiinki Job pujamunum nugká weuwai. Nunik Jopan jatan susauwai, dutikam jata iyashnum amujatin shiig kuashat ashí iyashnum amuauwai.
JOB 2:8 Imatika amuamu asa atsanmainchau dekapeak, tsuwat ijumja apetainum jeganta yukunum pujusui. Nuwi pujusa jakachin juki duwi bechmamajakui.
JOB 2:9 Imani pujutai niina nuwe chichajak. “Apajuí nemagkum shiig pujakmesh pegkejak jukichume. Nuadui Apajuí antug wekaetsuk pegkegchau chichagkam, jaka ajapnata”, tau.
JOB 2:10 Tusa tama Job ayaak: “¡Duwajuh, nuwa anentainkachujai betek chichakaipa! Apajuí waji pegkeg aidaun kuashat amaakui juwag dutiksaik, nii pegkegchaun amaakuishkam jumainaitji”, tiuwai. Tuja imanik waitiakush makichkish pegkegchaunak takamsachui, nuigtush pegkegchaunakesh Apajuínak chichagkachui.
JOB 2:11 Jopa kumpajig kampatum aajakui: Temágnumia aents Elifaz, Súah nugkanmaya Bildad, Naamat nugkanmaya Sofar aatus aajakui. Nunú aidau Job jak shiig senchi waitiawai tabaun antukag, ijagsami anentai ichichtaku tusag shimutkajui.
JOB 2:12 Nunik shima shimakua jegattak wesag diikma, Job ashí jaka yaunchuk aajakbaunak yapajina pujaun wainkag senchi jiika buutiajui. Nuninak wake besemag dekapenak jáanchjin japiki ichigkajui, dutikainak nugka yukukuntun atsaaki jukiag yaki nagkimawag dita buukeenishkam ukatmamkajui.
JOB 2:13 Nunikag Job pujamunum jegantag pujusajui. Nunik siete tsawan, kashishkam imanisag siete kashi makichkish chichatsuk batsatu, wagki Jopak najaimak shiig senchi waitiau asamtai.
JOB 3:1 Jopak imanik waitiakush, chichatsuk pujau tikima atsanmainchau dekapeak chichakui. Nuniak: “Wika akiinmainchaunas akiinawabiagtai tajai.
JOB 3:3 ¡Tsawan wi akiinamua duka pegkegchau atin ati! Tuja wi akiinamtai kashi chichainak: Aishmag akiinae tujutiu aina dushakam pegkegchau atin ati.
JOB 3:4 ¡Wi akiinawaitag nunú tsawannak Apajuí suwe emamainnas aikachamiatai, Apajuí nunú tsawantan kajimatkiu ataik, tsawaumainchaun tsawajui!
JOB 3:5 ¡Wagkag nunú tsawantinish makichik suwe dupajam iyagchabi! ¡Nunú tsawannak yujagkim suwe ijia emegkaumainnas aikachamiatai! ¡Etsa etsantun epenak suwe ishamain emama imatika emegkaumainnas aikachamiatai!
JOB 3:6 ¿Wagkag nunú kashia duwi mina dukug ejapjukua dusha, suwe wajas megkaekachabi? ¡Nunú tsawantin kashi mina dukug mina ejapjutkauwa duwi nagkamsag tsawan aidauk, nantu aidauk, mijan aidauk dekapamainchaus ayatai!
JOB 3:7 “¡Mina dukujuk nunú kashia duwik ejapjuchu wemainnas nunikchamiatai, nunikuitkuig makichik aentskesh aishmag akiinae tusag tumainchau wajakajui!
JOB 3:8 ¡Tunchi aidau, makichik kuntin múun nayants puju Leviatán tutaya nuna iwishtug nii wakegamu dutikati tumainnas dutikachajabiatai! Nunú tunchi aidaush ¿wagkag nunú kashi aajakua nunash emesjachajabi? dutikau agtaik mina dukujuk ejapjumainchau wajakui.
JOB 3:9 ¡Yaya tsawagtatak etsantin aidau, mina dukug ejapjutkamtai, ejampek etsanjau aina nunak etsanmainchaus ayatai. Tsawan tsawagmatai, etsa jiinu wainna duka wainnamainchau wajakui!
JOB 3:10 ¡Mina dukug kashi ejapjutkauwa nunú kashia duka pegkegchau atin ati! wagki jakati tutsuk akiinati tusa tujutiu asamtai, nunú kashi aajakua duwi akiina pujusan, senchi waitiag ankatin asamtai.
JOB 3:11 ¿Wagkanuk mina dukujui egkemsanuk jakachamiaja? Nuniachkunush ¿wagkanuk yama akiinmawaik jakachamiaja?
JOB 3:12 ¿Wagkag wi akiinamtaish, mina dukujush kuitamjukabi? ¿Wagkag muntsujinash amunstuawabi?
JOB 3:13 Yama akiinmawaik jakauwaitkunuk, utugchatji atsugbau shiig kanak tepemaina numamtuk, yamai ayamkun tepemainaitjai.
JOB 3:14 Yaunchuk jakauwaitkunuk apu aidau, dita atuwe aidaujai, jega múun aidaun jegamjau aidau jinawajua nujai ijunja pujumain wajajai.
JOB 3:15 Nuniachkunush maki makichik nugka apuji aajaku aidau, dita pujusa inamtaiji aajakunum oro aidaun, jiju plata aidaun utuamajaku aina nujai ijunjan pujumain wajajai.
JOB 3:16 ¿Wagkag uchi jakau akiidaun ukusa ajapin aina dutika ajapjuachajabi?
JOB 3:17 Aents pegkegchau jakauk, pegkegchaunak taka pujumaitsui, tuja tikich aentsnashkam pegkegchaunum inakug waitkamaitsui. Tuja aents pimpiki yaweja pujaushkam jakug ayamui.
JOB 3:18 Nuwi batsamas achikbau aajaku aidauk agkan batsatui, wagki takata apuji senchi takatsjume, tusa jiyaku suwimchamu asag.
JOB 3:19 Nuwig batsatui aents eme anentsa diitai aidau, imanchaush aidaushkam betekmas batsatui. Inaku waitkatai jinau aidaush apuji waitkascham agkan batsatui.
JOB 3:20 “¿Wagkag Apajuísh aents waittsatnunash akiinati tawa? ¿Wagkag aents kuashat waitiaunash iwaku pujusti tawa?
JOB 3:21 Aents jakatatus egauk wamak jatsui, waji pegkeg akik uukbaun wainkatatus egama imatika jakatatus egakush jatsui.
JOB 3:22 Nunú aents shiig aneamujiya duka jakamtai ukusam megkaga nunuwai.
JOB 3:23 Niinash waji utugchatak ajiti nunak Apajuík dekamtiktsui. Nuadui aents wainmachujai betek, jinta wetai epenbaunum wetakama tujimaina numamtuk wajawai.
JOB 3:24 “Yujumak yumainun idaikun, wake besemag dekapeakun buutjai, umutain umakun pujumainun senchi waitiakun kajeajai.
JOB 3:25 Ashí mina ishamtaig ayá nunú, dekas mina uwaktin ayá nunú yamai waitkajawai.
JOB 3:26 Makichkish ayamainchau dekapeajai, mina anentaijun ichichtujug shiig anemtijumainuk atsawai. Shiig aneasan agkan pujumainchau, ayatak waugkamin dekapeajai”, tiuwai Job.
JOB 4:1 Job chichaka inagnakmatai, Elifaz yama nagkamchak Jopan ayaak aatus tiuwai:
JOB 4:2 “Makichik aentskesh aujtamsatag takuig, kajegmainaitme. Tujash chichatskek idaimainchau dekapeajai.
JOB 4:3 Wika ame tikich aents aidau jintintin aayum nunak dekajai. Tuja aents kakaakchau aidaush anentai ichichtin aayume.
JOB 4:4 Aents wake besemag pujaush ame niina anentai ichichtuyume. Tuja aents jakatag taushkam ame jakai tusam yaiyume.
JOB 4:5 Amek sapigmamaitsume, tuja yamai waitiam dushakam ishamaitsume.
JOB 4:6 “Amek Apajuík tuké shiig umignaitme, amek aents pujutji shiig pegkejaitme. Imanmesh ¿wagka Apajuíyaish dekaskeapi tumaitsume?
JOB 4:7 Aents pegkeja takaun, Apajuí kajejuk mauwai tabaush antukuashitam, nunú anentaimsa diista.
JOB 4:8 Kuashat mijan pujau asan, utugchatan wainka weakun dekajai, aents magkagtak pegkegchaun takauk, dutiksaik iikuam auwai. Wagki duka aents nii ajakmamujinia nejekun juuwama numamtinai.
JOB 4:9 Dita pegkegchaun takaidau asamtai, Apajuí kajejuk dasejai betek umpui ijinui.
JOB 4:10 Aents pegkegchau aidauk ikamyawajai betek, kajeak senchi shinak tikich aentsun maatag tutaish, Apajuí nunak ikamyawa nai kupijam itatama numamtuk itatmitkaktatui.
JOB 4:11 León nii yuwatnujin wainkacha jamaina numamtuk, nunú aents aidauk jakagtatui. Nunikagmatai dita uchiji aidauk pampagkag megkaejagtinai.
JOB 4:12 “Tikichish antuinatsaig takamtak chicham tajutuae, nuna takatkamat shiig pegkejan antukjai.
JOB 4:13 Aents aidau kashi kaja achiam kanuinai, wika kanumainchau dekapjamjai.
JOB 4:14 Sapigmamu achigkame, mina iyashjuk ashí kujaime.
JOB 4:15 Mina yapijui dase umpuntun dekapjamjai, dutijakui iyashjui anchiajua nunin dekapmajai.
JOB 4:16 Makichik aents nuwi wajame. Nuna wi wainkamjai. Tujash niimesh dekas wajukuki nunak wainkachmajai; ashí itatjamunum untsujak, aatus tujutmae:
JOB 4:17 ‘Aents aidauk ashí jau ainawai. Apajuík makichik aentsnakesh, ametme chicham betek umiumek, tusa tama amainuk shiig atsawai. Tuja ametme dekas pegkegchau takamchaumek, tama amainchakam shiig atsawai.
JOB 4:18 Apajuík niina aentsji ángel aidaunakesh, tikima shiig kajittsag diyatsui. Apajuí diismak ditashkam tikima pegkegmak ainatsui.’
JOB 4:19 Nuadui aents aidauk ima pegkegnakek takainatsui. Maki makichik aents aina duka, nugka jegamkamua numamtin ainawai. Jega jegamin aidau nugka yukukuntunum apuja, jegamaina numamtin ainawai. Nuadui dase dasentai yumpunak, nuwi mamuk ayaun yutua emegkauwama numamtuk emegkam amainai.
JOB 4:20 “Aentsuk kashikmasagkesh, nuniachkush agkugkesh jaka megkaewai. Nunikmataish makichkish pachinatsui.
JOB 4:21 Niina pujutig hilo yupichu tsujimaina numamtuk tsujigkam megkaewai. Aentsuk ashí unuimajag jatsui”, tiuwai Elifaz.
JOB 5:1 “¡Senchi untsumkata Jopah! ¡Makichik aentskesh aipakchatpash, nunú antukmi! Ame yainkati tusa segamainuk ángelak atsawai.
JOB 5:2 Aents pegkegchauwa duka, Apajuíjai shiwagmagau asa jawai, aents shiig anentaimkachunak, kajegkagtutaijiya nunú maawai.
JOB 5:3 Wi wainjai aents pegkegchau aidau, kuashat wajiigtin wedaun, tujash machik asag wamak niina jeen atantuinawai.
JOB 5:4 Niina uchiji aidaun, nawanji aidaun, kuitamjumainuk atsawai. Apu chichama epegkin aidaush tuke aneas waitkainawai, ditá ayamjumainuk atsawai.
JOB 5:5 Ajakmamujinash kuitamjuinatsui, nuadui aents nujantai jinuidau nuna yujuinawai, dutikainak jagkinmayanash akuumtuk yujajus yajutuinawai. Tuja wajiji aidaun diigsag, imanun jukitag tinu aidau kasajuk yajutuinawai.
JOB 5:6 Wake besemag dekapeamua duka ajakjai betekak nugkayag tsapatsui. Tuja waitiamua dushakam nugkanmayag tsapatsui.
JOB 5:7 Jii kegaunmaya kaiji tsachigtuk shimuwama numamtuk aentsuk waittsatatus akiinainawai.
JOB 5:8 “Wika ametkunuk Apajuí yainkati tusan segamainaitjai, tuja wi waitiamua nunak Apajuín idaitumainaitjai.
JOB 5:9 ¡Apajuí iwainawai kuashat waji wainchatai ishamain aidaun, tuja nunash wajuk dutikawaki nuna dekaa ejemainuk makichkish atsawai!
JOB 5:10 Apajuí yuminak nugká yutumtikawai, nunú yumi yutak ajak aidaun ukatui.
JOB 5:11 Apajuík aents kakagchauch aidaun eme anentai emawai. Tuja aents patayi jajukam wake besemag pujaunashkam anentain ichishtawai.
JOB 5:12 Aents pegkegchaun dutikatasa anentaimas umiaunash Apajuí yapagtinai. Dutika yapagtuam wainak nagkaanui.
JOB 5:13 Aents niina yachajin pegkegchaun dutikatatus umiaunash nii umiamujinig pempegki ajua emegkainai, dutikak nii anentaimtugbaun yapagtuam wainak nagkanui.
JOB 5:14 Tikichin pegkegchaun takamtiksatatus yuja duka, kashi numi tukumka iyaumaina numamtuk wajainawai. Tsawai aentsun tsanuina dushakam, wainmachujai betek ainawai.
JOB 5:15 Untsu Apajuík aents kakaakchau niina shiwaaji waitkam pujaunash, nii ayamjuk uwemtikawai.
JOB 5:16 Tuja aents kakaakchau aina duka, Apajuí ayamjutuk uwemtijugti tusa dakainawai. Apajuík aents pegkegchau aina nunú, tikich aents kakaakchau aina nuna, kuntin yutaijin, yuwa amuwama numamtuk amukti tusag idaitsui.
JOB 5:17 “Nuadui aminak Apajuí suwimkan amasmatai waitiau asam, ¡amek shiig aneasta! Apajuí ashí senchigtina nunú jintinjamak aikagma nunú dakitjaipa.
JOB 5:18 Tuja nii jata amasmatai jam nunashkam, nigki etsaentamjattawai. Tuja nii waittsati tujamatai waitiaminchakam, nigki yaimpaktatui.
JOB 5:19 Ame ishamainnum pujutaish, nigka kuashta aminak agkanmitkagmattawai. Tuja pegkegchauwa nunú waitkasti tusag idaitamsashtatui.
JOB 5:20 Nujan tepeamtaish nujantai jakai tusa yaimpaktatui, tuja maaniamunmash nii ayamjutpaktatui mantamawainum tusa.
JOB 5:21 Amina pegkegchaun chichagtamainakuish ishamkagtukaipa, duka makichkish uminkashtatui, wagki aminak Apajuí kuitamjamui.
JOB 5:22 Nujantaikish, nuniachkumesh senchi waitiakmesh, amek duka dushiksam diitnaitme. Tuja kuntin ikamia kajen aina dushakam ishamkashtinaitme.
JOB 5:23 Ame ajagminig utugchat atsaunum agkan shiig takastatme, wagki ajagminig kaya awatmainkesh atsau pegkeg atinai. Tuja kuntin kajen ikamia aina duka makichkish jetepakchagtinai, duka ayatak amina kumpajum agtatui.
JOB 5:24 Nuadui amina jeminig utugchat atsau pujustinaitme, tuja amina tagkujum aidauk makichkish megkaekashtinai.
JOB 5:25 Tuja amina uchijum wegantu aidauk shiig kuashat dupa ikam ayá iman agtinai.
JOB 5:26 Trigo ajakbau tsawanji jegamtai, pegkejan tsamaka uminas aama numamtuk amek múuntuch wajasam jatanum jegamesh senchigtin, pegkeg pujutnaitme.
JOB 5:27 Kuashat mijan pujau asan, utugchat nagkaetujua nunak shiig dekajai. Nuadui atak nagkaemagtinun tajam nunak dekaskenum tajai. Nijah, juju wi tajam nunú dekaskeapi takumek dekapsata”, tusa Elifaz Jopan tiuwai. Elifaz, Bildad, Sofar, aatus Jopan ausajui. Dutikam Job inagnak ditan ayaak aatus tiuwai:
JOB 14:1 “Aents nuwanum akiinauwa nuna pujutjig ujumke, untsu waitiamuji ima múuntai.
JOB 14:2 Aentsu pujutjig yagkug kashikmas pegkegchin yagkujuk ajum kagaja megkagama numamtinai, nuigtushkam aentsu pujutjig etsa bikian wamak megkagama numamtinai.
JOB 14:3 Wika wainkauchitag nuniaigkiap mina utugchatug diigtusam, suwimak sujustasam chicham umigtame.
JOB 14:4 Pegkegchauwa duka pegkejak wemaitsui, nuna dutikmainuk makichkish atsawai.
JOB 14:5 Aents aidaush wajupa tsawantak juju nugka juwish batsamsagtinaita duka ame dekame, tuja ii jakatnuk tsawantak mamikiamui, nunú inagkeakik pujumaitsuji.
JOB 14:6 Nuadui idaikagtusta diijattsuk, idaikagtusta agkan pujusagmi. ¡Idaikagtusta takasa jukimui ii atsumamua nunú sumakagmi!
JOB 14:7 “Aents numin ajakag nuna wajauti jeeka tsapai muumpagti tusa dakauwai.
JOB 14:8 Tuja numi múun wajasa kagkapeen kukaja jakattak wajaush,
JOB 14:9 yumi juki ukatjamak ataktu uchimea yama nagkamchaku ajak ajaamu tsapai, pegkeg samekbaun muumpama iman weawai.
JOB 14:10 Tujash aents aidautik wamak jaji, nunika jaka tuke megkaeji.
JOB 14:11 “Tuja aents aidautik kucha aidau, entsa aidau, kuyuka buku waiyama numamtuk ainaji.
JOB 14:12 Nuadui nayaim eke aigkik aents jakamtai, ukusbau aidauk ataktuk nantamainchau ainawai. Aents jakauwa duka tuke kanajujai betekai.
JOB 14:13 “¡Apajuíyah, ame kajekbaujum nagkaetamai dekas jakatjai, nunikan aents jinau aidau batsatbaunum pujustajai tumain anentaimjai! ¡Nuwi pujai ame wait anenjujam ataktu inantukminum tusan!
JOB 14:14 Aents jakauwa duka ataktu anean nantakig pujumaitsui, wika aents jakau aidau batsatbaunum dakamkun pujuttajai, wait anenjug ayamtijugti tusan.
JOB 14:15 Ame mina najatuaum wait anenmain diigsam untsugkuminig, wika aminak aimainaitjame.
JOB 14:16 Ame mina kuitamjukta tau asam, wi takamug aidauk ashí wainme. Nuadui wi pegkegchaun takasmataish, tudau takasume tusamek tujutchattame.
JOB 14:17 Duka tujuttsuk ame minak tsagkugtujam mina tudaujuk wampachnum egkea jukim shiig atushat ajapmainaitme.
JOB 14:18 Dutikmain aminig ayatak muja aidau, buchig aidaujai yumpunawag amugama nuniaji.
JOB 14:19 “Ashí aents aidauk iwaku batsamsagtatus wakegainawai, tujash ame duka yumi kayan taumama numamtuk awagme. Dutikakum yumi yutak nugka yukukuntun tajaka, ajapama numamtuk aentsu pujutjig ajapeame.
JOB 14:20 Dutikam tuke emegkame, pujutchakam atankagtame, dutikam ukumatainum ekagtame.
JOB 14:21 Aents jakauwa duka, aents iwaku aidaush dita uchiji aishmag aidau, nawanji aidaujai takatjin diigsash, shiijash awagmaina nunak dekatsui, tuja pegkegchaun takagtaish, itujenawaki nunashkam dekatsui.
JOB 14:22 Ima nii iyashin najaimamunak dekapeawai, nuniak buutui”, tusa Job tiuwai.
JOB 19:1 Nuna tusa nuigtu Job chichaak:
JOB 19:2 “¡Make agkan idaitustajum, ipimtagme! ¡Atum tujutjum duka kuchiyai ijutbau najamaina imatijawai!
JOB 19:3 Kuashta minak pegkegchau chichagtagme. ¿Mina jutika waitkajakjumesh datsaamatsjumek?
JOB 19:4 Wi pegkegchaun takamsau amainaitag duka, atumnak pegkegchauk etamaitsui, duka ima mina utugchatjuke.
JOB 19:5 Atumek mina nagkaetasu pegkejam anenmamjume, wi jakun kakaumainchau wajasa pujag duwi dushiktaku imatjutagme.
JOB 19:6 Wi waitiag junak, Apajuí waittsati tujutmatai waitiag nunú shiig dekatajum. Kuntin chanua maatasa umigtayama numamtuk Apajuí umikbaunum pujusan waitiajai.
JOB 19:7 “Senchi untsumkan ¡mantuinawai! tusan imattaish, makichkish aijuinatsui. Yainkatajum taish, makichkish yaintuinatsui.
JOB 19:8 Apajuí minak nagkaemaki tusa jintan akigtujue. Tuja nuigtushkam jintan suwe etugtine.
JOB 19:9 Mina wajiig aidaun, tagkug aidaun, aents inakeg aidaun ashí yajutjuke; dutijak nuigtushkam eme anentsa diyam amainchau etine.
JOB 19:10 Minak makichkish wajigtuchu shiig wainak etine. ¡Numi kagkapejaí tegai ajapamu, ataktu tsapamaitsu numamtuk, tsagagnuap pujustatja tumainchau awajtuse!
JOB 19:11 Nii kajekbaujin imatijawai, imatijak shiwaajui utugmaina dutijawai.
JOB 19:12 Niina suntaji aidauk ashí nantagtujaje, nunikag mina jegajun tentea apakag uminas jetetuinak waitkajuinawai.
JOB 19:13 “Mina yatsug aidau mina kumpag aidaujai kajimatkitnume, dutikainak aents tikich nugkanmaya utugtaya dutikatnume tusa Apajuí tine.
JOB 19:14 “Mina pataag aidaushkam kumpag aidaujai pachittsuk idaitusaje. Wijai ijunag yujajaku aidaushkam pachitkachaje. Mina inakeg aidaushkam aents tikich nugkanmaya wainchatai itugmaina dutijainawai.
JOB 19:16 Mina inakeg aidaun untsuaish aijuinatsui; kuashta untsuaish makichkish antugtuinatsui.
JOB 19:17 Mina duwagshakam wi mejeau asamtai tsuumjawai, tuja mina yatsug aidaushkam kajegtuinawai.
JOB 19:18 Uchi ai aidauwaske dushiktuinawai, eke yama wajain wekaesatag taig, dushiktuinawai.
JOB 19:19 Mina shiig kumpauchig aidaush kajegtuinawai, mina aneetaig aidau, shiwagmatuinawai.
JOB 19:20 Watsajan ayatak ukunchik wajasjai, ashí jakan piipichin iwaakjai.
JOB 19:21 “Mina kumpag aidauwah, minash wait anenjugtajum, minak Apajuí waittsati tujutiu asamtai, wika senchi waitiajai.
JOB 19:22 ¡Make idaitustajum! atumek kuashta waitkagjume. ¡Apajuí waittsati tujutmatai waitiag duke ati!” tiuwai.
JOB 31:1 Tuja nuigtu Job chichaak: “Wika nuwa muntsujut aidaunak makichkish wakejukchatin atajai tumamiuwaitjai.
JOB 31:2 Wi nuwa aidaun diisan wakegá wekaetaik Apajuí ashí senchigtin nayaimpinum puja nunú minak dekas suwimkan sujumainai.
JOB 31:3 Atumek aents pegkegchauwa nuna Apajuík suwimkan susa waitkawai tajume.
JOB 31:4 Wisha wajinak dutikaja nunak Apajuí dekawai, tuja wisha wajuk pujajaki nunashkam nigki dekawai.
JOB 31:5 Wika makichkish tikich aentsnak pegkegchauk awagmachuitjai, tuja makichik aentsnakesh tsanugchauwaitjai.
JOB 31:6 ¡Apajuí minak kijin dekapatayai waji dekapatiama numamtuk dekapa diijus, mina anentaig pegkeja nuna dekaattawai!
JOB 31:7 “Tuja wi pegkeg pujutan idaikun, pegkegchauwa nuna wekaetutaik, tuja wi wakegamun taka wekaetaik, nuigtu wi kasamkamujun ejetujiajag
JOB 31:8 wi ajakmamua nunak tikich aents aidau ashí yajuaktinme.
JOB 31:9 Tuja tikich nuwa aishinnun wakekau ataik, nuniachkunush wijai ijunja pujutaiju nuwen pakijimatasan wakejuku ataik,
JOB 31:10 mina duwajuk inaku waitkatai wajasti, nunikmatai aents tikich nugkanmaya aidau kanutjatnume.
JOB 31:11 Wi nuwajai pegkegchaun takamsau ataik, apu aidau minak suwimkan sujumain ainawai.
JOB 31:12 Wi pegkegchaun takamsau ataik, jii kegak apea tsaika ajapama numamtuk mina wajiig aidaunak ashí tsaika ajapmainai.
JOB 31:13 “Wika mina inakeg aidau segatainakuig, dita sumamunak tuké umijin ayajai.
JOB 31:14 Wika ditan waitkasuitkunuk, Apajuí suwimka sujakuish ayamjumamaitsujai. Tuja ame takamsamu ujatkata tujutkuishkam, wika dekaskea nuna ashí ujamainaitjai, dutika ai nuna diis suwimkanak sujumainai.
JOB 31:15 Apajuí mina najatuauwa duke mina inakeg aidaunashkam najanauwai. Dutika betek pujutan amasui.
JOB 31:16 Tuja ujudauch aidau atsumainak segatainakuig, yaitskek idaisachuitjai, tuja nuwa waje aidaunash nujantai waittsatnume tusanuk idaisachuitjai.
JOB 31:17 Yujumka yuwaknush bitaik aidaunash ajamtsukek yuwachuitjai.
JOB 31:18 “Makichik múun uchijin kuitamaina imatiksan bitaik aidaunak tuke kuitamkauwaitjai. Tuja waje aidaunashkam tuke kuitamin ayajai.
JOB 31:19 Makichik aents jáanchji atsujam tsetsekai jaun wainkunuk, tuja jáanchji asepamain atsujunashkam,
JOB 31:20 mina uwigjun ujejai jáanch apagbaun asepakti tusan suyajai, dutika ai shiig anenjin aajabi.
JOB 31:21 Wika apu chichama epegkin aina nunú mina kumpag ainakuish, ditajai ijunjanuk uchi bitaikanak makichkish kajegchauwaitjai.
JOB 31:22 Wi taja nunú dekaskechuitkuig, mina kuntujun kupigtugtinme, dutikawag ichiajag ajapatnume.
JOB 31:23 Wika Apajuí suwimkenak ishamajai, ¡wagki wika niina senchijijaig betekchauwaitjai!
JOB 31:24 “Wika oro kuashat ajutkuish, nunuapi shiig pujutan sujustinuk tusankesh, ima nuig anentaimsanuk pujujakchauwaitjai.
JOB 31:25 Wika wiakuch akunush, tuja kuichik kuashat ajutkuigkish, ememaku shiig aneamuk atsugtinai.
JOB 31:26 Etsag nantujai shiig pegkeg ainawai,
JOB 31:27 tujash wika makichkish uumkankesh, nuniachkunush aents aidau emtinish nu aidaunak emematmaitsujai.
JOB 31:28 Nuna emematiu ataik, Apajuí minak suwimkan sujusu amainai, ¡wagki niina umigkachu asamtai!
JOB 31:29 Tuja mina shiwaajunu utugchat ajakuish, wika dushikchauwaitjai. Tuja ditan waitkainak pegkegchaun chichajuinakuish, wika makichkish dushikjachuitjai.
JOB 31:30 Wika mina shiwajunak makichkish pegkegchaunmak yumigchauwaitjai, tuja utusag jaka tusagkesh tuchauwaitjai.
JOB 31:31 Tuja wijai ijunag batsamin aidau aents tikich nugkanmaya aidaun waitkastag tuinakuish,
JOB 31:32 wika nunú aents aidaunak agá kajigtinme tusanuk idaisachuitjai, aents tikich nugkanmaya aidau yujaunash mina jegajui awayan ikannaitjai.
JOB 31:33 “Wika tikich aents aidau ditá pegkegchaujin ugmamin aina nuniknukesh makichkish ugmamchauwaitjai, tuja uumkan pegkegchaun takamsatag tusankesh anentaimchauwaitjai.
JOB 31:34 Wika aents aidau dushiktugchagtimpash tusanuk puyatjatsjai, nuadui wika ashí pan iwainajan takajai, patatjukchagtimpash tachau asan mina jegajuig epeminuk pujatsjai.
JOB 31:35 ¡Utusag makichik aentskesh antugtuka tajai! Wi taja nuna dekaske titinme tusan papiinum agagjai. ¡Apajuí ashí senchigtina nunú yamai aigkati tajai! Tuja wi pegkegchaun takamsamu ataik, papiinum agatjugtinme.
JOB 31:36 Nunú agagbauwa nunak eme aneasan jukin, atsejutaijai betek atsejuktatjai.
JOB 31:37 Tuja wi takasbau aidaunak Apajuín ashí ujaktatjai, dutikau asan, apu pegkeg utugchatjinchau amaina iman wajasan Apajuín jegantattajai.
JOB 31:38 “Wika mina aentsug aidaunak makichkish waitkachuitag duwi, mina nugkajuk pegkegchaunmak yumigtuchui, wika mina inakeg aidau ajakmamujinak kasagchauwaitjai, nuadui nugka tai ijumja ajakmamu aina dushakam wake besemag anentaimkug buutuinatsui.
JOB 31:40 ¡Untsu wi taja nunú dekaskechu ataik, mina nugkajuig trigo tsapatsuk jagki tsapaktinme, tuja cebada tsapamainun dupa tsapakti!”, tusa juna aatus Job ayamjumak chichaka inagnakui.
JOB 38:1 Job chichaka inagnakmatai, dase senchi dasenbaunum Tuke Pujuu Jopan chichajak aatus tiuwai:
JOB 38:2 “¿Amesh ya asamea mina dekatjua nunú dekaskechua nunin anentakmesh pegkegchaush chichame?
JOB 38:3 Diik minash amina wajiujum iwaintugkakiah, nunikam wi yamai iniastatjam nunú aigkata:
JOB 38:4 Amek wi nugka najanauwaitag, nunú tsawantaik atsuyume, untsu dekaskenum dekakmek, wi nugka najadiag duwish ¿amesh tuwi pujuyume? nunú kame tujutta.
JOB 38:5 ¿Yaki nugkanash múun ati tusash tiyabi? tuja ¿yaki najanawabi? duka amek dekatsme.
JOB 38:6 ¿Wajinum chichiajaya nugkash awa? ¿Nugka patami asatnunash ya kayanash apujtuawaita?
JOB 38:7 Kashikmas pegkejan etsantug jiinama nuniai, yaya aidau aents ijunag kantamaina numamtuk kantamiagtai, ángel aidau nantsemianum nuaduik amek atsuyume.
JOB 38:8 Tuja nayants nugka ejapeen jiiniuwa nunú piyag betsakai tusash ¿ya epetkauwaita?
JOB 38:9 Wi nunak makichik nuwa uchijin jáanchi pempegama numamtuk, yujagkim pujui dukukan epetkauwaitjai, dutikan yujagkim suwé ijikan idaisauwaitjai.
JOB 38:10 Tuja nayantsak pimu amain aig, yumi initak jiinaidaun epenjan idaisauwaitjai.
JOB 38:11 Dutikan chichagkun: ‘Juwig nagkankata, nuigtu nagkaemakmek piyajaipa; tuja tsukatbaujum ishamain waja dushakam nuigtuk wee pujushtatui’, tiuwaitjai.
JOB 38:12 “Amek tsawan pegkejan etsantug tsawagti tusamek makichkish inachuitme.
JOB 38:13 Amek nuigtush etsa ashí nugkanum etsanjati, nunitai aents pegkegchau aidau suwenum uumjatnume tusamek inachuitme.
JOB 38:14 Nunú etsa etsantug jiinak nugkanak jáanch kapantuama iman emawai.
JOB 38:15 Nunitai aents pegkegchau takau aidauk kashi uumak takamin asag, nunikchamin dekapenak idayinawai, wagki tsawai nuniagtaik, achika suwimak suwam amain asag.
JOB 38:16 ¿Tuja yumish tuwiyag jiinua nunú wainkatasamesh, amesh nayantsa initkenish jegamkayum?
JOB 38:17 ¿Amesh aents jakau aidau batsamtain jegamesh wainkaukaitam?
JOB 38:18 ¿Tuja nugkash wajupa múuntaita dusha dekamek? ¡Nunú ame dekakmek minash ujatkata!
JOB 38:19 ¿Tuja tsaaptinush suwejaish tuwi awa?
JOB 38:20 Amek duka dekachu asam tsaaptinuk emamaitsume, tuja suweshkam emamaitsume.
JOB 38:21 ¡Nunú aidaun wi najanauwaitag, nunú tsawantinig eke akiinchau asam atsuyume!
JOB 38:22 “¡Tuja wisha yujagminash bicha aidaujaish tuwig ukuaja duka amek waintsume!
JOB 38:23 Nunak maaninamunum aents pegkegchau aidau suwimak suwaku, yutumtijatnun ukusan pujugjai.
JOB 38:24 ¿Tuja peem peetish itug weawaki? duka amek dekatsme. ¿Tuja dasesh etsa minitaiya nuni dasenkash, itusaya ashí nugkanash jajutuaki? duka amek dekatsme.
JOB 38:25 ¿Nugka taimunum yumi saagama numamtuk yumin yutumtikna dusha yaita? tuja ¿yaita aents jintan inaktumaina numamtuk, ipamat pati wetai jinta inaktinush? duka amek dekatsme.
JOB 38:26 Witjai nuna dutikaunuk, tuja witjai uwejush aents makichkish atsamunum yutumtikaunuk,
JOB 38:27 wagki nunú yutak nugka tutuptinnash uchupjati, dutikam chijichig tsapaiti tusan dutikajai.
JOB 38:28 Yumi, nuigtu jegashik aina duka aents apagtin aina nuninchau ainawai. ¡Witjai nuna najanaunuk!
JOB 38:29 Bicha aidauk, tuja jegashik aidauk aents dukugtin aina nuninchau ainawai. ¡Witjai nuna najankaunuk!
JOB 38:30 ¡Witjai yuminak bichatin kaya katsugma iman emaunuk, tuja nayantsa awankenishkam bichatbikajan katsujam emauwaitjai!
JOB 38:31 “¡Yaya aidau ijumnag ayá duka ame dutikachuitme! ¡Tuja amechuitme yaya ijumnaju aidau sutu tutai, tunim tutai ditash kanakag aina nunú umikumek!
JOB 38:32 Tuja ¿amekaitam makichik yaya múun tsawak etsanjati timawa nunú etsanmitkaum? Tuja ¿amekaitam yaya ijumnaju aidau Osa múun tutaya nunú, Osa yaijuch tutaya nunujai wantinkatnume tusam iwaidaum?
JOB 38:33 Tuja yaya aidau, nantu aidau, tikich aidau nayaimpinum ayá dusha ¿wajuk buchitainawaki? duka amek anentaimsamek ejemaitsume. ¡Nuadui amek nunú aidau etsantug nugkan tsaaptin ematnume tusamek tumaitsume!
JOB 38:34 ¿Amesh yumi yujagminmaya yutak piyagti tusamesh tumainkaitam?
JOB 38:35 ¡Amek chaajip, peem aina duka, amina inakmejai betek umigtuktinme tusamek, tikich yantamnum wetajum tusamek tumaitsume!
JOB 38:36 ¿Yaita atash ayumpan, chigki aina nujai tsawantan dekapeak shinin atinme tusa tiuwa dusha?
JOB 38:37 Wika yachaitag iman asan, yujagmish wajupa ayawa nunak dekajai. Tuja witjai yumi yutumtiknunuk.
JOB 38:38 Wi yumi yutumtikag nunak nugka yukukuntua nunú chupija achinig katsujam wajasti tusan dutikajai.
JOB 38:39 “¿Amekaitam león aidau dita uchijin ayuja ututuakti tusam yutaiji egatka suum?
JOB 38:40 ¡León niina waajin uumak tepes, nuniachkush dupanum uumak tepesa, kuntinjin tsekenti tepejuk maina duka ame dutikatsme!
JOB 38:41 ¡Chuwagka uchiji aidau yapajainak buutiagtai, yutaijin mina segatuina duka amek sumaitsume!”
JOB 39:1 “¿Amesh dekamek cabra ikamia aina dusha ejapjukajash, wajupa asag petsajawa? Tuja ¿japa petsaidaush wainnukum?
JOB 39:2 ¡Amek wajupa nantu asag petsajawa duka dekatsme!
JOB 39:3 Japak petsaktinji tsawan jegajim, uchijin najaimakug nugká tepes petsauwai.
JOB 39:4 Dutika petsakam chichiag ikam pujus muumpawai. Nunik dukujin ukuak kanaka yaja wenawai, nunika ataktu wakitkig dukujinig tainatsui.
JOB 39:5 “¿Ya burro ikamia aina nunash waitkaschamu agtinme tusash tiuwaita? ¿Ya ditanash agkan yujatnash susauwaita?
JOB 39:6 Wi ditak uwegshunum, nuigtu nugka paka kachi tepaju asamtai, dupa tsapachu aina nuwi batsamsatnume tusan etegtuawaitjai.
JOB 39:7 Tuja yaaktanmaya aidauk senchi pampainak dakitmain wajaidau asagmatai, nuna dakituinak atushat batsatui, nunidau asag aents aidau burro tagkumamu aidaun inainak jiyainamunashkam antuinatsui.
JOB 39:8 Nunik batsamas dita yuwatnujin dupan egainak mujanum yujainawai.
JOB 39:9 “¡Amek toro ikamia aina nunuwap wi takatai yainkag, kiitai mina tagkuju batsamtain kajigkagtatua tusamek tumaitsume!
JOB 39:10 ¡Tuja nugka pukugti tusamek jigkaja emetuamek waitkamaitsume! ¡Nuigtush nugka pukugbaun tsaikti tusamesh tumaitsume!
JOB 39:11 ¡Nunú senchigtin ainakuishkam, amek dita takagtustinme tusamek ditakek idaimaitsume!
JOB 39:12 ¡Ame ajakmamu aina nunak ditaap juuka ikaunma ijumjutjattawa tusamek tumaitsume!
JOB 39:13 “Avestruzak shiig aneak, nanapen awagtumawai, tujash avestruzak shiijak awajkagtuchui.
JOB 39:14 Tuja avestruzak kamatkan tai, nuwi petsaka etsa sukuam, nimpak takiagti tusa pachitsuk idainai.
JOB 39:15 Tuja niig makichik aentskesh, nuniachkush kuntinkesh dajag tsaikchaintash tusag anentaimtsui.
JOB 39:16 Avestruzak uchijinash niina uchijichu itugmaina numamtuk awagnai, tuja megkaekachaintash tusagkesh puyatjuchui.
JOB 39:17 Nunak nuniawai, wagki wi unuimatan susachuitag nuadui, tuja shiig jintiaja anentaimtanashkam susachuitjai.
JOB 39:18 Untsu nantaki tupikakug caballo aidaunak aents nuwi entsatkau aidaujaí juwiachu asamtai dushikiawai, wagki nii ima senchi tupikau asa.
JOB 39:19 “¿Amekaitam caballo aidau senchimtikaum? tuja ¿amekaitam caballo kuntujen intash tumain pegkeg ajuwama nunú najatuaum?
JOB 39:20 ¿Manchi tsekegama imanik tsekeak, senchi mayatak aentsun uwakna nunú ameka dutikam?
JOB 39:21 Caballo aidauk maaniatasa ijumjamak sapigmakas ejapkabiag, aents niini entsatkau aidau shiwagjai igkunia maaniati tusa tupikauwame.
JOB 39:22 Tuja suntag aidau maanitain yajuakag uminas ijunun wainkush, ishamtsuk tupikatki jetegame.
JOB 39:23 Tuja suntag aidau flecha chimpia jutain caballo aenskam tupikainak tatagtutaish, ishamchauwai. Tuja nagki aidau, flecha aidau akenbau winchantutaish, ishamchauwai.
JOB 39:24 Maaniatatus uwija kachujin umpuiniagtaish, caballo aidauk jasa ijunmainchau dekapenak, tupikatiagtai, suntag nuwi entsatkau aidaushkam kakajus emetmainchau dekapajame.
JOB 39:25 Maaniatnume tusa uwija kachuji umpuamun caballo aidau antuinakug, aentsjai betek pampauwame, tuja atushat ijuntsag maaniamu ataik dekapeajame. Tuja suntaja apuji aidau dita suntajin chichajuinamunak, suntag aidau pampaidaujai atushat wajasag antinai.
JOB 39:26 “Tuja pinchu aidau yakí nanaak yujas etsa minitaiya nuni yuja nunú ¿ameka amina yachagmin nuniktinme tusam tiuwaitam?
JOB 39:27 Tuja ¿ameka ukukui aidau yakí nanaak yujau atinme, nuninak yakí kayanum pasugmakag nuwi petsau atinme tusam tiuwaitam?
JOB 39:28 Ukukuik yakí kayanum pujuuwai. Tuja nunú kaya yakí jiitkauwa nunuwai nii pujusa ayamjumatai, jega peejamua numamtina duka.
JOB 39:29 Imanui yakí pujus yutaijin wainak akaetuki maa yuwame.
JOB 39:30 Ukukuik tuwi jakau tepawa nuna tuwajui, tuja uchiji aidauk nuna neje uduun yuwinak shiig aneen ainawai”, tiuwai Apajuí.
JOB 40:1 Nuigtushkam Tuke Pujuu Jopan chichajak:
JOB 40:2 “Witjai Apajuí ashí senchigtinun, amek mina chicham patatjukume, nuniakum umikchamna nunin diigsaume. ¿Dusha yamaish nunismekek anentaimam? nunú yamai tujutta”, tiuwai.
JOB 40:3 Tuke Pujuu nuna tusa inagnakmatai, Job ayaak:
JOB 40:4 “¡Wisha wainkauchitag juninnush, wajintuk aiktajame aminash! Wi tumainuk makichkish atsugtawai.
JOB 40:5 Wika kuashat chichakjai, nuigtu tikich tumainuk atsugtawai”, tiuwai.
JOB 40:6 Tusa tama Tuke Pujuu dase senchi dasenbaunmaya ataktu Jopan chichajak:
JOB 40:7 “¡Diik ibau wajiuwaitkumek, sapigmatsuk wi amina iniastatjam nunú aigkata!
JOB 40:8 ¡Ame pegkeg jumamkum mina pegkegchauwa nunin jujukiume!
JOB 40:9 ¿Amekaitam mina nagkaetasu ima senchigtinum? ¿Ame chichamugmish wi chichamu chaagpijai beteka ibaukai?
JOB 40:10 ¡Nunú dekasketkuig, amina imanjum senchigmejai iwainmamkata!
JOB 40:11 Tuja imanika kajeakmek katsuntu pujutsuk, aents emebau aina nunú suwimak susam inatsakta.
JOB 40:12 Kame ame ima pegkeg takau asam, apu emebau aina duka diyamuik dita inamtaiji aina nunú emegkatjata. Tuja aents pegkegchau aina duka tuwi ame waintatme, dutikakum ijina utsagta.
JOB 40:13 Dutikam nugka taim ashí yutuata. Dutikawamin magkagtin aidau achikam chimpimama numamtuk, aents jinau aidau batsatbaunum batsamsatnume.
JOB 40:14 Nunú dutikawamin, niina senchijiniap imanik depetmake titajai.
JOB 40:15 “Amesh kuntin múun Behemot tutaiya nunú anentaimtusa diista. Wi nunú kuntinun najanauwaitag dutiksanuk aminashkam najanawaitjame. Nunú kuntinuk bueyejai betek dupan yuwai.
JOB 40:16 Niina senchiji aina duka tuntupega nuwi ashí ajawai.
JOB 40:17 Untsu ujekeg setug katsugma imanai. Tuja yaape nawen achitjau aidaushkam, daek chapikmagbaujai betek kampujam ainawai.
JOB 40:18 Tuja ukunchi aidauk, tubo jiju bronce tutai najanamua imanai. Untsu bakui aidauk jiju hierro tutai katsugma iman ainawai.
JOB 40:19 Wi kuntin aidaun najankauwaitag nujai ijumja diismash, nunú kuntinun nagkaesauk tikichik atsawai. Nunú kuntinu maumainuk makichkish atsawai, ima wiki maumainaitjai, wagki wi niinak najadau asan.
JOB 40:20 Nunú kuntinuk chijichin yusa pujuuwai, nuadui ibau múun senchigtin ataish, tikich kuntin aina duka ishamainatsui. Tuja nii chijichin yuwak tepetai, tikich kuntin aidauk nuna tentea batsamas wasugkamin ainawai.
JOB 40:21 Tuja ayamsatag takug numi jagkigtin loto tutai aina nuna wakentin tepenai, nuniachkush kuchanum tagkan ayaunum waigka uumak tepenai bichatjatatus.
JOB 40:22 Numi loto tutai aina nuna kanawe bikintu emamunum, tuja numi álamo tutai entsa akaebaunum tsapaka bikintu emamunum nuwi waig tepenai.
JOB 40:23 Nujag senchi dujajutaish ishamchauwai. Tuja nujag dujajua utugmashkam ishamtsuk tepenai.
JOB 40:24 Nunú kuntinun makichik aentskesh achika, jii ukuituk wainmachu emamainuk atsawai. Nuigtush nujiin tigkajua daekai wegak anaa emetmainuk atsawai.”
JOB 41:1 “Amek semagkauk agseayaik makichkish maumaitsume, tuja wenigkesh jigkatmaitsume.
JOB 41:2 Amek makichkish semagkau nujig jigkatmaitsume, tuja jagkenum awagkekmesh emetmaitsume.
JOB 41:3 “Aminak semagkauk wait anenjugta tusa segapakug waitkagmamaitsui.
JOB 41:4 Tuja nuigtushkam, amina inakem wajasan, tuke amina taka takagkawan jakatin atajai tusag makichkish tujamaitsui.
JOB 41:5 “Amek uchi pishakjai wasugkamama numamtukek, makichkish semagkaujaig wasugkamaitsume. Amek makichkish semagkauk amina nawanjum aidaun wasugkamtai ati tusamkesh anaamek apugmaitsume.
JOB 41:6 Namaka sujin aidauk semagkaun sujuktasag namak sujutainmak ejemainchau ainawai.
JOB 41:7 “Amek semagkauk flechayai ijumek duwapeg chigkagmaitsume, Tuja arpónkai buuknum ijuakmesh maumaitsume.
JOB 41:8 Ame achika emetuatag tukamamek, nii depetamkui maa maaniakuam pimpikim, awake anentaimjam atakek aikchau atajai tusam idaimainaitme.
JOB 41:9 Amek itugkanuk semagkaun depetkag tusamek tiipa. ¡Ayatak wainmawaik ishamkam jaka iyaumainaitme!
JOB 41:10 Makichik aentskesh umuchiamak kajeak ishamain wajawai, tuja niijai maanimainuk makichkish atsawai.
JOB 41:11 Ashí nugkanmak makichkish niijai maania depetmainuk atsawai.
JOB 41:12 “Tuja semagkaun naweg shiig senchi ainawai, niig tikich kuntin aina nuna nagkaesau senchigtinai.
JOB 41:13 Niina duwape dupajam wajakin katsugma nuna iju chigká emestumainuk makichkish atsawai.
JOB 41:14 Makichik aentskesh semagkaun achika emetua iwaag nai ishamain tsakaskatu aina nuna diigmainuk atsawai.
JOB 41:15 “Niina duwapeg shiig achimjau dasegkesh waimainchau kayajai betek katsugmai. Iman asamtai nuna chigkamainuk makichkish atsawai. Nuadui niig ememawai.
JOB 41:18 Nii jachitbaujig peemjai betek jiinui. Tuja niina jiig tsawak etsa kapantun etsantug jiinama imanai.
JOB 41:19 “Niina nujinia jii keeka jiinui, tuja nunú jii kega nuwiya yantsagtuk jiinainawai.
JOB 41:20 Niina nujinia bukuiti jiina duka olla jinum ekenkam kuwaak bukuiti jiinama imaniawai.
JOB 41:21 Tuja nii mayatbaujiya nunú jiin ekemawai, tuja niina weniin jii kegaun jiyawai.
JOB 41:22 Niina kuntujeg shiig kampujam senchi wajaknai. Iman asamtai aents aidau nuna diinakug ishamainawai.
JOB 41:23 Tuja niina nejeshkam katsujam jiju hierro ukuijamu nanaju katsugmama imanai, nuadui makichkish tsupimaitsui.
JOB 41:24 Tuja niina anentaishkam kaya katsugma imanai.
JOB 41:25 Nunú nantaun wainainakug, tikich senchigtin aidaush niina ishamainak pisainawai.
JOB 41:26 “Niinak nagkiikesh, puyajaikish, flechayaikish, makichkish maumainchau ainawai.
JOB 41:27 Nii diismak jiju hierrok dupa kagajujai betekai, tuja jiju bronceshkam numi mamujujai betekai. Nuadui niinak nunú jiju aina nujai maanitai najanamu aina duwik makichkish maumainchau ainawai.
JOB 41:28 Niig flechan ishamakug tupikatsui, kayai nagkiamua duka nii diismak dupa kagajuwai nagkimaina nuninai.
JOB 41:29 Tuja numi kijinai awatmawa duka nagkushpi awatmaina numamtinai. Tuja nagki aketmashkam niig dushikis diyawai.
JOB 41:30 “Tuja japiinak weakug, nugkanak numi etsakamui taumaina imatika taumi jintama weawai.
JOB 41:31 Tuja nayantsa kunajin tepeakug, nayantsanak yumi kuwaak wajukeama imatikawai.
JOB 41:32 Nunik wegak yuminak tsakigmitkak, puju winchamtinun saugmitkak ukuawai.
JOB 41:33 Tuja semagkaun niimega nuninuk tikichik juju nugka juwig makichkish atsawai, Wi niinak najanauwaitjai makichkish ishamkagtuchu atinun.
JOB 41:34 Niig tikich kuntin múun senchigtin aidaunash ishamatsui. Niiyai ashí tikich kuntin aina nuna apujig”, tiuwai Apajuí.
JOB 42:1 Tuke Pujuu tusa inagnakmatai, Job ayaak:
JOB 42:2 “Wika ame ashí dutikmainaitam nunak shiig dekajai, ame dutikmainchauk makichkish atsawai.
JOB 42:3 Amek makichkish tujintsuk ame wakegakmek, ashí dutikmainaitam nuna dekachua numamtuk chichakag nunak, ame yachaitam ibauchu asan, wainkan anentaimkas chichakjai. Wika ame yacha asam ashí ame najanamu aidau kuitamam nunak utujimsanuk anentaimaitsujai. Wi chichakmag nunak wainkan dekachiatkun chichakmajai, nuadui waji pegkeg aina nunashkam shiig dekamainchau dekapeajai.
JOB 42:4 Ame chichagtakum: ‘Antukta wi titatjam nunú, nunikam aigkata, wi iniastatjam nunú’, tujutmaume.
JOB 42:5 Wika yaunchuk nagkamsan, amina pachis etsegbaun antin ayajai. Tujash yamaik ame tujutu asamin, paantas wainkaja tumain dekapeajai.
JOB 42:6 Nuadui wi chichakbaujun anentaimsan datsaajan, awake anentaimjai. Nuniakun pegkegchaunap tija tusa anentaimkun yukunum pujajai”, tiuwai Job.
JOB 42:7 Aatus Job chichaka ashimkamtai, Tuke Pujuu Elifazan chichajak: “Amek amina kumpajum aidaujai mina pachittsajum waitjuau asagmin, senchi kajegkajime. Untsu Jopak mina pachitus dekaskenum chichake.
JOB 42:8 Tuja atum waitjuaujum nuna tsagkugtugti tujutkugmek, siete toro, nuigtu siete uwig aishmag aidau yajuakjum, mina inakeg Job puja nuwi wetajum, nunikjum atumi tudaujum tsagkugnagtinnum nunú kuntin aidau maajum nuna neje ashí apeatajum. Dutikawagmin mina inakeg Job atumin pachipas mina segattatui. Tusa tujutkui atumek mina inakeg Job dekaskenum chichaka nunitsuk pegkegchau chichaku asajum, suwimak jumain ajuminig tsagkujattajime”, tiuwai.
JOB 42:9 Tusa tiajam Elifaz, Bildad, Sofar aatus Tuke Pujuu tibaunak betek umikajui. Dutikawagmatai Tuke Pujuu Job sumakbaunak betek umikui.
JOB 42:10 Job niina kumpaji aidaun pachis Apajuín segauwa duwi pujus, Tuke Pujuu Jopan ataktu yaunchuk aajakua imanuk awajsauwai. Dutikak nuigtushkam yaunchuk niina wajiji aidau ajujakua nuni kuashat ikauntukui.
JOB 42:11 Dutikam pujaun niina yachi aidau, umayi aidau, kumpaji aidau, tuja tikich aents aidau, nii pegkeg pujus wainajakbau aidau aatus shimutkajui ijagsatatus. Nunik jegawagmatai, ditajai ijunag yujumkan yuwinak jiistamawajui. Nunikag Jopan chichajuinak: “Tuke Pujuu waittsati tujamatai waittsaum nunú anentaimsa wake besemag anentaimji”, tiajui. Nuna tusag, nuigtushkam plata aidaun, tuja patakumtai oro najanamu aidaujai aatus maki makichik susajui.
JOB 42:12 Aatus Tuke Pujuu Jopan nii waitus nagkaikiuwa duwi nagkamas yaunchuk ajujakbaun nagkagas ikauntukui. Niina tagkuji aidauk: catorce mil uwig, seis mil camello, dos mil baka nugká pukuu aidau, mil burro aatus ajujakui.
JOB 42:13 Nuigtushkam diecisiete uchin akiauwai, catorce aishmagkun, kampatum nuwan.
JOB 42:14 Nawanji emkaunak Jemimá adaikauwai, untsu nuwi patatkaun adaikauwai Quesiá tuja nuwi patatkaun adaikauwai Queren-hapuc.
JOB 42:15 Nunú nuwa aidauk ashí nugkanmak dita ima shigmauch aajaku ainawai. Tuja Job niina wajiji aidaun, tagkuji aidaun, nugke aidaun, aatus ashí niina uchijinu atinme, tusa tiuwai. Dutikak niina nawanjinashkam ditashkam jukitin atinme tiuwai.
JOB 42:16 Apajuí etsagajua duwi nagkamas Job ciento cuarenta mijan pujusui. Nuadui uchiji aidau, nawanji aidau, tsakaka uchi akigbau aidau, ama tijaji aidaunashkam wainkauwai.
JOB 42:17 Nunik pujus múuntuch wajas jakauwai.
PSA 1:1 Aents pegkegchau aidau chichainamun antujus umiju wekaechauk shiig aneas pujustinai. Tudau aidau takatan wakejus taka wekaechauk, tuja Apajuín pegkegchau chichajuidaujai ijunag, ditajai betek chichá wekaechauk shiig aneas pujustinai.
PSA 1:2 Wagki niig nuna wekaetutsuk, Apajuí chichame umikta timauwa nuna umiak, kashish, tsawaish tuke nuwig anentaimas pujau asa.
PSA 1:3 Nuadui nunú aentsuk makichik numi yuminum ijusa ajaamu, pegkeg, senchi nejen, dukesh kaketsama imanai. ¡Iman asa ashí nii takamuji aidauk shiig pegkeg ainawai!
PSA 1:4 Untsu aents pegkegchau aina duka nunú aentsjaig betekchau ainawai, nuadui ditak ajusa wampujin dase umpui ajapama numamtin ainawai.
PSA 1:5 Aents pegkegchau aidaunak Apajuí dita takasbaujin diijus suwimkan susatnai. Tuja aents pegkejan takau aidau Apajuí pujutain ijunjagtina nuwig ditak wayachagtinai.
PSA 1:6 Tuke Pujuuk aents pegkeg aidaun kuitamui. Untsu aents pegkegchau aidauk dita pegkegchaujinig waittsagtinai.
PSA 2:1 ¿Wagka aents pegkegchau aidaush Tuke Pujuujai shiwagmagainakush ijunjash pampandayinawa? ¿Wagka chicham jegamainchaunash wainkash tuu yujawa?
PSA 2:2 Nugkanmaya apu aidau yaakta apuji aidaujai ijunag Apajuín kajejuinak, nii etegka apu adaikauwa nunashkam shiwagmainak wakenmataik chichaman umijuinawai.
PSA 2:3 Nuninak senchi untsumkag: “¡Achikbaujai betek batsatag duka ankanmagawagmi! ¡Tuja jigkaja emetuamujai betek batsatag dushakam agkanmagawagmi!” wajainawai.
PSA 2:4 Imatiagtai Apajuík niina pujusa inamtaijin nayaimpinum pujus dushikiawai.
PSA 2:5 Dutikak kajejuk uwakeawai, untsu nuni senchi kajejuk chichajak:
PSA 2:6 “Wi etegkan apu emamugnak muja etegkamua nuwi Jerusalén pujus inamjati tusan wi apusajai”, tawai.
PSA 2:7 Tuja Tuke Pujuu mina tujutma nuna etsegkatjai. Tuke Pujuu chichagtak: “Ametme mina uchigmek, amek wi akiinati tima akiinauwaitme.
PSA 2:8 Ame wakegamu segatta, Wi nunak imatiksanuk ashí nugkanmaya aents aidaun amastatjame aminu atinun.
PSA 2:9 Ichinak najanamu shigki basegbauwai awati tsaimaina numamtuk, apu pegkegchau aina duka ame tsaika utsagtatme”, tujutmae.
PSA 2:10 ¡Apu nugkanum inamin aidauwah, shiig antuktajum, nunikjum juju chicham shiig unuimagtajum!
PSA 2:11 Nuniakjum Apajuí eme anentsajum umigkujum shiig aneasjum ememattajum.
PSA 2:12 Apajuí eme anentsajum ememattajum kajegtamkainum, nii kajegtamkamtaig jinumain ainagme, wagki nii kajeamujig makichkish imijtumaitsui. Aents Apajuíyai kajinas anentaimaidauk nii kuitamsam pujuidau asag, shiig aneas pujusagtinai.
PSA 8:1 David kantamamu Tuke Pujuuwah, ametme iina apuji, ashí tikich aidau nagkaesau muunmek. ¡Amina daagmek ashí nugkanum antunawai! ¡Amina imanjumek nayaim múunta nuna nagkaesauwai!
PSA 8:2 Amina shiwaajum kajegtamainak mantamatag tinu aina duka, uchi tsakat aidau, uchi muntsu muntsuaku aidaujai shiig pegkegchin kantamaina duwi amina senchijum iwaintukam itatmikajume.
PSA 8:3 Ame nayaim najanamua nuna diisan, tuja nantu, yaya aidaujai ame najankamu aidau nayaimpinum ayá nunashkam wainkun
PSA 8:4 anentaimsan: ¡Aents aidautik pegkegmakesh ainatsji! ¡Tikima wainkauch ainaji! Nunin ajinish ¿wagka tujash puyatkagtusmesh kuitamkagtame?
PSA 8:5 Aentsuk ángelchawashit tumain najanauwaitme. Nuadui apu kuitamaina imatiksam kuitamam duka dutikame.
PSA 8:6 Tuja ashí ame najankamu aina duka ashí nii idaitusuitme, dutikakum tikich ame najankamu aina nuna nagkaesau emam apusauwaitme.
PSA 8:7 Dutikam uwig aidau buey aidau, kuntin ikamia aidau,
PSA 8:8 chigki yakí nanamin aidau, namak nayantsanmaya aidau, tuja tikich kuntin aidau nayantsanum ayá duka ashí nii idaitusuitme.
PSA 8:9 Tuke Pujuuwah, ametme iina apujimek, ametme ashí tikich aidaun nagkaesau dekas muunmek. ¡Amina daagminak ashí nugkanum dekainawai!
PSA 14:1 David kantamamu Aents anentainkachu aidauk: “Apajuík atsawai”, tuinawai. Nuadui dita anentainig ima pegkegchau aina nunú takatak ajuinawai, nuadui dita takamuji aina duka shiig dakitmainai. Tiki makichkiuchikesh pegkejan takauk shiig atsawai.
PSA 14:2 Apajuík aents aidaunak nayaimpinum pujusag diyawai, makichkikesh shiig anentaimkau Apajuí umigmain atsuash tusa wainkatatus.
PSA 14:3 Tujash aents aidauk pegkegchau takatan yujajui, nunidau asag ashí betek tunamakaje. ¡Tiki makichkikesh pegkejan takauk shiig atsawai!
PSA 14:4 Pegkegchaun takau aina duka anentaimainatsui. Pag yuwa wamak amutiama numamtuk mina aentsug aidaun amuinawai. Nunú aents aidauk Apajuí yainkati tusagkesh makichkish Tuke Pujuunak segachu ainawai.
PSA 14:5 Nunú aents pegkegchaun takaina duka sapigmainak kujaidiagtatui. Tuja Apajuík aents ima niina chichamen umin aidaunum pujawai.
PSA 14:6 Atum pegkegchau aidautijum aents ujudauch ememachu aina nunú atsaneakjum dushikiagme, tujash Tuke Pujuu ditanak kuitamui.
PSA 14:7 ¡Israel aents aidaun uwemtijatin utusag Siógka mujajinia taawa! tusan wakegajai. Tuke Pujuu niina aentsji aina nuna pujutjin iwagtugmataig, Jacob Israel daagtina nuna uchiji aidauk ashí shiig aneasagtinai.
PSA 15:1 David kantamamu Tuke Pujuuwah, ¿aentsush wajuku aidauwa amina jem pegkegma nuwish pujumainaita? Tuja ¿wajuku aidauwa muja ame etegkamua nuwish pujumainaita?
PSA 15:2 Nuwi pujusagtina duka aents pegkeg bakumamainji atsugbau, pegkejan takau, waitjutsuk dekaskea nuna chichau;
PSA 15:3 tikichnash pegkegchaun chichagchau, niina kumpajinash pegkegchau awagmachu, tuja nii ijutkamu aidaunash inatsauchu;
PSA 15:4 aents Apajuín dakitaujaig makichkish ijunchau, untsu Tuke Pujuun eme anentaunak niishkam eme anentus diin, tuja waitiakush nii anagkagtuamunak betek umin.
PSA 15:5 Kuichkin tsagkatkagtukash ewaekam akigkata tusa waitkagkagtuchu, tuja aents takamsachu aig, tsanumjugta akiktagme tamash dakitin. Nunú aents imanis puja duka shiig aneas tajimat pujustinai.
PSA 16:1 David agagbau Chah, Tuke Pujuuwah, kuitamjukta, wika aminí ejamatnak egajai.
PSA 16:2 Wi amina chichagkun: “Ametme mina apug pegkegnum yainnumek, tikich amea ibauk atsawai.”
PSA 16:3 Ame chichagtakum: “Mina aentsug nugka batsata nunú minak umigtuidau asag shiig awajtuinawai.
PSA 16:4 Untsu tikich aents aidau apajuíchun apajuímainak niina umijuina duka senchi waittsagtinai”, tame. Nuadui wika nunak tuké etsagjashtinaitjai. Tuja nunú apajuímtai aina nunak makichkish emematchattajai. Nuna daajinakesh makichkish adaikashtinaitjai.
PSA 16:5 Tuke Pujuuwah, ametme mina ashí sujinmek. Ame sujame kuashat pegkeg aidau, mina pujutjua duka aminí awai.
PSA 16:6 Nugka shiig pegkeg aidau makichkish wi anentaimtujakchamu ajutui, Apajuí anagtuamu wi jukitin ajuta duka dekas shiig pegkejai.
PSA 16:7 Tuke Pujuunak shiig pegkegnum chichagtinaitjai, nii minak pegkegnum jintinjau asamtai. Dekas mina iyashjunash jintinjutui, dutijak kashishkam esetawai.
PSA 16:8 Tuke Pujuu mina Apajuíjua duka tuke wijai ijutkau pujawai. Wika niini emetuman wajau asamtai, makichkish ajunjashtin ainawai.
PSA 16:9 Wika shiig aneasan dakunkut pujajai, ima niyaig kajintsa anentaimsan pujuttajai.
PSA 16:10 Apajuíjuh, amek minak jakati tusamek idaituschattame, tuja ¡pegkegmaitak ukumatainum ukusam kaugti tusamesh idaituschattame!
PSA 16:11 Jinta pujutnum ekagtina nunú ame iwaintugkattame. Ame pujamugmia nuwig shiig dakujamu awai. Aminí awai dakujut tuke atina nunú.
PSA 19:1 David kantamamu Apajuí imanjiya nunak nayaimpia nunú ujajatui, nayaim wigkaya nunú wainku, dekas Apajuíyap najanauwaita taji.
PSA 19:2 Tsawaiya nunú, kashia nujai, Apajuí imanjinak tuke etsejuinawai.
PSA 19:3 Chichainachiatak, makichik chichamnakesh tuinachiatak, tuja chichamujigkesh antugchatayaitak,
PSA 19:4 ashí nugka nagkatkamunum dita chichainamuk antugainawai. Tuja nayaimpinum etsa ekemsatnunak Apajuí umikui.
PSA 19:5 Etsag nuwi eketu makichik aents yama nuwan nuwatuk nii kanutaijin pujau jiinama numamtuk kashikmas jiinui. Nunik jiinki aents tupikain uminas shiig aneas wemaina numamtuk weawai.
PSA 19:6 Nunik nayaim tikich yantamnumia etsa jiinki, tentea wea weakua, yaja tikich yantamnum jegaa kintamui. Nuadui etsa etsantun uwemtumainuk makichkish atsawai.
PSA 19:7 Tuke Pujuun chichamega duka yamajam pujutan sukagtau asa, shiig pegkejai. Tuke Pujuun chichamega duka waitchauwai, shiig dekaske, wagki nunú aents kakagchauchin unuidau asa.
PSA 19:8 Tuke Pujuun chichame umiktina duka pegkejai, anentainum dakujutan sukagtau asa. Tuke Pujuun chichame umiktina duka dekas shiig pegkeg tsaaptinun anentaimtikagtinai.
PSA 19:9 Tuke Pujuu puyatjusa umigbauwa duka shiig pegkejai, tuja nii chichamega dusha tuke megkaekashtinai. Tuke Pujuun chichame umiktina duka waitchauwai, dekaskenum ashí pegkejai.
PSA 19:10 ¡Nunú chichamak oro tsuwatjinchau shiig pegkeg akika nuna nagkaesauwai, tuja dapa yumiji yumimitu pegkejama nuna nagkaesau shiig pegkejai!
PSA 19:11 Wika amina inakmetag duwi pegkegchaun takasai tujutu asa, amina chichamjumea nunú jintinjawai. Nunú chichaman umiauk shiig pujustinai.
PSA 19:12 Makichik aentsuk niina tudaujinak nigki anentaimsag dekagmamaitsui. Nuadui, Tuke Pujuuwah, ¡wi pegkegchaun takamsatjai tusan wakegachiatkun takamsamug aidaush tsagkugtugta!
PSA 19:13 Tuja mina ememataijush emegkatjukta. Mina emematug wagagtuki, idaitusaipa. Aatsan wisha ibau tudau ajuta nuna agkanmagatjai.
PSA 19:14 Tuke Pujuuwah, mina chichamjush mina anentaimtagjai, ame diismash pegkeg, wakemain ati. Chah, Tuke Pujuuwah, ametme mina ayamjutkam uwemtijinmek.
PSA 22:1 David kantamamu ¡Apajuíjuh, Apajuíjuh! ¿Wagka minash idaitusume? ¿Wagka taamesh uwemtijatsme? ¿Wagka wi imanikan amina segaakun buutaish pachittsume?
PSA 22:2 Mina Apajuíjuh, tsawaish, kashish untsuajame, imatjamash aigtsume. ¡Wi ayabaujuk atsugtawai!
PSA 22:3 Tujash ametme pegkegmamek, ametme apumek, iman asamin Israel wegantu aidau emematjamainawai.
PSA 22:4 Iina apachji aajaku aina duka aminí kajinmamsag anentaimajaku ainawai; aminí kajinmamsag anentaimaidau asamtai, agkanmitkauwaitme.
PSA 22:5 Yainkata tusa segapainakuish, ame agkanmitkauwaitme, tuja aminí kajitmamsag anentaimaidau asagmatai, tsanugmek idaisachuitme.
PSA 22:6 Tuja wika aents tamak amaitsujai, wika bagajai betekaitjai. ¡Wika aents aidaun dushiktaiyaitjai!
PSA 22:7 Mina waituidauk dushijuinawai, nuninak buuken pegainawai.
PSA 22:8 Nuninak: “¡Tuke Pujuuwai kajinmamas anentaima pujuuwe nuadui, nii taa uwemtikjati! ¡Imatika aneau asa, nii uwemtijati!” tuinawai.
PSA 22:9 Tuu yujatnume: Ame minak akiinati tujutiu asamin, mina dukuju waken egkemkan akiinawaitjai. Tuja ame minak mina dukuju kuntujin patattsam kuitamjukmayume.
PSA 22:10 Duwik nagkamsam wi akiintsaig, ame minak kuitamjukuitme. Tuja mina dukuju wakeen pujubiag duwi nagkamsamek mina Apajuíg aayume.
PSA 22:11 Ima minakek idaitusaipa, wika waittanum jegantan pujajai. Tuja mina yainmainuk atsugtawai.
PSA 22:12 Mina shiwag aidauk, baságnumia toro kajen aina iman tententuawaje.
PSA 22:13 Dutijuawag ikamyawa kajen shinuwama imatuinak esattatus tsekenjuinawai.
PSA 22:14 Tuja wika yumi ukagag megkagama numamtinaitjai; mina ukunchig aidauk akaejaujai betek wajase. Tuja mina anentaijuk wiya yumimeaujai betek wajase.
PSA 22:15 Mina wenujuk ichinak yama inajuamu bukuama nunin wajase. Mina idaijush kayakmataijui nujamjutkae. ¡Jakaujai betek minak nugka yukukuntunum aepjukiume!
PSA 22:16 Aents pegkegchaun takau aidau yawajai betek tuwagtukaje; tuja mina dawegnak, mina uwejujai ichinjujaje.
PSA 22:17 Mina ukunchig aidaunash pan wainmain dekapeajai; tuja mina shiwag aidauk ayatak diiju batsatui.
PSA 22:18 Mina jáanchjun jujutkiag, yana daajig jiinkiti, nunú jukiti tusag, nunú dutika dekatain wasugkamainawai.
PSA 22:19 Tujash Tuke Pujuuwah, ametme mina senchimtijinmek. ¡Tupanjutsuk, wamak taam yainkata!
PSA 22:20 Puyajai ijutiag mantuawainum minash agkanmitkajuata. Yawajai betek aina nunú maatnume tusamek idaitusaipa.
PSA 22:21 Leónjai betek kajen aina nunú mantuawainum ayamjutkata. ¡Toro kajen kachujin magkagtina iman aina nunú mantuawainum ayamjutkata!
PSA 22:22 Ame ayamjutkamin, wi amina pachisan mina yatsug aidaun ujaktajai; dutikan ditajai ijunjan amina emematkun kantamatjai.
PSA 22:23 ¡Atum Israel aents aidautijum, Tuke Pujuu eme anentin aidautigmek, Niina senchiji anentaimtusjum ememattajum!
PSA 22:24 Apajuík ujudauch aidau waitiamun wainiatkug waittsatnume tusag pachitskek idaitsui. Tuja uumjutnakesh uumjuchui. Yainkata tusa segamak antujui, nunik betek yayawai.
PSA 22:25 Apajuíjuh, ima aminak ememattagme, amina aentsjum eme anenjamin aidau kuashat tuwakbaunum nunak umiktatjai.
PSA 22:26 Ujunauch aidautigmek yutai yuwajum shiig ejemagtajum. Tuja Apajuí wainkatasa egautigmek nii ememattajum, nuniakjum kuashat mijan pujustajum.
PSA 22:27 Ashí aents tikich nugkanmaya ditash niimtin aidau, chichamnash tikich chichaman chichaaku aidauwah, Tuke Pujuu kajimatkigpajum. Niiyai jeganjum, ¡tikishmaja pujusjum ememattajum!
PSA 22:28 Tuke Pujuuwai apua duka, iman asa ashí nugkanum inamui.
PSA 22:29 Shiig atsumkas pujautigmesh, tuja ashí jaka pujautigmeshkam, ima Apajuíya duke tsuntsumjuajum etsagjatajum, wagki ima atumkek pujutak jukichu asajum.
PSA 22:30 Wi wegantu aidauk Tuke Pujuun emematuinak, tuké niina pachisag etsejiagtin ainawai.
PSA 22:31 Nuninak atakea duwi akiinawagtina nunashkam Apajuín takatji pegkeja nuna, kuashat wainchatai aidaun iwainajua nujai pachisag ujakagtinai.
PSA 23:1 David kantamamu Aents uwigjin puyatjus kuitamna numamtuk mina kuitamjauk Tuke Pujuuwai, nuadui wi atsumamuk atsugtawai.
PSA 23:2 Aents niina uwigjin chijichi pegkejan ayu ayugkawa pimpiagtai, yajuak bikintunum ayamtikama numamtuk, Tuke Pujuu minak ayamtijawai. Tuja kitamamun uwagti tusashkam entsa pegkeg wiyakunum ejetawai.
PSA 23:3 Niig tuke anenka ibau asa, wi pimpitaishkam ichichtawai, dutijua pujut pegkegnum etawai.
PSA 23:4 Nugka ségaju ishamain suwenum nagkaemaknush, ame wijai wekagu asamin, ishamkashtatjai. Uwija kuitamin uwigjin ayamjuktatus ushujutaijin takus wekagama numamtuk, amek mina ayamjutkatasam wekaeme. Nuadui jamainnum jegaknush ishamkashtatjai.
PSA 23:5 Mina shiwag kajegtin aidaun emtin, ame minak yutai pegkeg aidau umigtame. Aents ipaamujin shiig anentus juwak buuken kugkuinai nijau aina imatiksam minak shiig awajtukume. Umutai umikbau pinignum aun aents wainak shiig anegama numamtuk, minashkam shiig anemtijusume.
PSA 23:6 Amina anenkagmia nunú, wait anenkagtutaigmijai ashí tsawantai tuke uyuuntawai. Tuke Pujuuwah, wika ame pujam nuwi tuke pujustinaitjai.
PSA 24:1 David kantamamu Nugkak ashí Tuke Pujuunui, nunú nugkanum ashí ayá duka, nuwi batsamin aidaujai ashí niinu ainawai.
PSA 24:2 Wagki nugka tujig asatnunak nii umikui, dutika nayantsanum, namak aidaunum aatus emetug idaisauwai.
PSA 24:3 Tuke Pujuu mujaji etegkamua nuwish ¿yaki wakainta? Apajuí jee pegkegma imannummash ¿yaki wayash pujusainta?
PSA 24:4 Nunak aents pegkegchaun takachu, anentai pegkeg, dakumka najanamun emematchau, umikchatnaitak tsanumak Apajuí daajin adayas dekas umiktatjai tuu wekaechau, nuwig wayawagtinai.
PSA 24:5 Nunú aentsnak niina apuji Apajuíya nunú uwemtijatnai. Tuja niinak Tuke Pujuu pegkegnum yumigkig, ayamjuk shiig pujutan susatnai.
PSA 24:6 Tuke Pujuu, Jacopa Apajuíjiyah, aents amina egapaidauk, dutika yayaam agtinai. Tuja amina segapaina nuna uchiji aidaushkam dutiksaik yayaam agtinai.
PSA 24:7 ¡Jerusalégka waitijiya nunú ujaitajum! ¡Yaunchuk waitai aajakua nunú ujai idaisatajum! ¡Apu pegkejam niina imanjin nayaimpinum, nugkanmash inamna nunú wayattawai!
PSA 24:8 Apu pegkejam niina imanjin nayaimpinum, nugkanmash inamna dusha ¿yaita? Duka dekas iina apuji Tuke Pujuu niina shiwaajinash ishamchau, wajiuwa nunuwai.
PSA 24:9 ¡Jerusalégka waitijiya nunú ujaitajum! ¡Yaunchuk waitai aajakua duka ujai idaisatajum! ¡Apu pegkejam niina imanjin nayaimpinum, nugkanmash inamna nunú wayattawai!
PSA 24:10 ¿Yaita nayaimpinum, nugkanum inamna dusha? ¡Duka Israel aents aidaun Apujiyai! ¡Duka Tuke Pujuu ashí senchigtina nunuwai! ¡Niiyai dekas apu pegkejam, niina imanjin nayaimpin, nugkan apujiya nunú!
PSA 27:1 David kantamamu Tuke Pujuuwai mina tsaaptinjuk, Tuke Pujuuwai mina uwemtaijuk, Tuke Pujuuwai mina pujutjun kuitamjutuk, nunin aish ¿yanak wisha ishamkainja?
PSA 27:2 Aents pegkegchau mina shiwag aina nunú, ijunainawai mina mantuawagtatus, tujash ditak tukumak iyajag jinuinawai.
PSA 27:3 Kuashat suntag mina tententuinakuish, wika ishamkashtatjai, tuja mina jetetkagtatus uminainakuish, wika puyattsuk pujuttajai.
PSA 27:4 Ima makichkia nunak Tuke Pujuun segabiajai, tuja wika ima makichkia nunak wakegajai: Wika iwaku pujag duikik kashi kashinig Tuke Pujuun emematkun niina jee pegkegma nuwi pujustatajai, niina pegkegmajiya nuna wainkatasan.
PSA 27:5 Tsawan utugchat ajuttaish, Apajuí niina jee pegkegma nuwi uugkattawai, Tuja kaya muunnum waka uwemaina numamtuk uwemtijugtatui.
PSA 27:6 Nuadui mina shiwag aidau tententuinakuish, ishamkashtatjai Apajuí depetmikaju asamtai. Nuadui kuntinu maan Apajuí jee pegkegma nuwi apeakun niina ememattatjai; shiig aneasan senchi kantamkun Tuke Pujuun ememattatjai.
PSA 27:7 ¡Tuke Pujuuwah, amina segajame, antugtukta! ¡Minash wait anenjujam, aigkata!
PSA 27:8 Mina anentaig chichagtak: “Apajuí egakta”, tujutui. Nuadui amina wainkatasan egagme.
PSA 27:9 ¡Wait aneasam uumjutkaipa! ¡Kajegtukam aigtsuk idaitusaipa! ¡Ima ameketme mina yainnumek! Nuadui mina ayamjutmain atsugtaigkik, ima minakek idaitusaipa, wagki ametme mina Apajuíg uwemtijin.
PSA 27:10 Mina apag mina dukugjai ima minak idaituinakuish, Tuke Pujuuwah, ame minak jujukim kuitamjuktinaitme.
PSA 27:11 Mina shiwag aidau egatuinawai, nuadui Tuke Pujuuwah, amina jintim pegkeja nunú iwaintugkata, tuja wisha wajuk pujumainaitja nunú tujutta.
PSA 27:12 Mina shiwag aidau dita wakegamujin uminak, maatnume tusamek tsagkamjukaipa, mina shiwag tsanumin aidau nantagtujaje.
PSA 27:13 Tujash wika eke jatsuk iwaku juju nugka juwig pujusan, amina pegkegmagmia nuna wainkatnunak shiig dekajai.
PSA 27:14 ¡Tuke Pujuuwai kajinmamsam anentaimsata! ¡Ishamkagtutsuk, ichichmamjata! ¡Ehe, dekas ima Tuke Pujuuwaig kajinmamsam anentaimsata!
PSA 32:1 David kantamamu Tudauji ashí tsagkujamua duka shiig aneastinai.
PSA 32:2 Aents pegkegchau takatan anentaimtus wekaetuchuk shiig aneastinai. Tuja tudauji ashí tsagkujamushkam shiig aneastinai.
PSA 32:3 Wika mina tudaujun etsegtumachkunuk, wake besemag pujau asan ayatak jamaijai.
PSA 32:4 Nuadui ame dekapjau asamin, tsawaish tuja kashish senchi waitmaijai. Yagkug etsa sukuam kagama numamtuk dekapmamkun, kakaumainchau dekapmaijai.
PSA 32:5 Nuniakun mina pegkegchaugnak, makichkish uutsuk etsegtumaktajai tusan amina ashí ujakmaijame, nuadui ame mina tudaujuk ashí tsagkugtugmayume.
PSA 32:6 Nuadui amina umigtamin aidauk, waituinakush amina segapainawai. Nuadui nujag dujajak nugka punag weakush, ditanak amaigkashtinai.
PSA 32:7 Ametme mina ejamataigmek, ishamainnumash ame kuitamjame; nuadui ame agkanmitkajuamun anentaimtusan shiig aneakun, kantamjagme.
PSA 32:8 Apajuí chichaak: “Wi aminak diyakjame, nuadui amina unuinagtasan jintintuattagme, tuja wiki jintan inaktusan kuitamkattagme.
PSA 32:9 Nuadui caballo, burrojai anentaimchau asamtai, jagken jijui jinka emetua mai japia, mai japia, awajam wegama numamtinuk, amek aipa”, tujamui Apajuí.
PSA 32:10 Aents pegkegchaun takau aina duka kuashat waituinawai. Untsu ima Tuke Pujuuwaig kajinas anentaimaina nunak, niina anenke múunta duwi tuke ijik kuitamui.
PSA 32:11 Aents pegkeg, tuja takatjish pegkeg aidautigmek, Tuke Pujuuwai shiig dakujustajum, ¡Nuniakjum nii emematkujum shiig aneasjum senchi kantamjuatajum!
PSA 33:1 Aents pegkeg aidauwah, shiig aneasjum Tuke Pujuu emematkujum kantamatajum. Aents pegkeg aidau kantabauk yajautsui.
PSA 33:2 Arpa awatku kantamtai kantamkujum Tuke Pujuu see titajum.
PSA 33:3 ¡Kantamtai pegkeg aina nunú kantamkujum nii ememattajum! Tuja yamajam kantamtai kantamkujum nii eme anentsajum shiig aneakjum untsumtajum.
PSA 33:4 Tuke Pujuun chichamega duka waitchauwai, shiig dekaske, nuadui nii tibauwa duka ashí betek uminui.
PSA 33:5 Tuke Pujuuk pegkeg takata nuna dekaskea nujai aneawai. ¡Nuadui niina anenkega duka ashí nugkan jamag awai!
PSA 33:6 Tuke Pujuuk ima niina chichamenig nayaim aidaun, nantu, etsa, yaya aidaun aatus ashí najankauwai.
PSA 33:7 Apajuíyai kucha múun aidaunmayan yumi yajuak makichkinmak ijumjauwa duka.
PSA 33:8 ¡Aents ashí nugkanmaya aidautijum Tuke Pujuu eme anentsajum umigkatajum!
PSA 33:9 Wagki nii niina chichamenig ashí najankauwai. Tuja nii nunikti timauwa duka imanisag makichkish wajukachmin wajas asauwai.
PSA 33:10 Tuke Pujuuk aents pegkegchau tikich nugkanmaya aidau pegkegchaun dutikatag tusa anentaimtugbaujin betek umikti tusag ayatkek idaitsui.
PSA 33:11 Untsu Tuke Pujuu nuna dutikatjai tibauwa duka makichkish yapajinchauwai.
PSA 33:12 Aents aidau Tuke Pujuuwai dekas iina Apajuíjig tuina duka shiig aneasag pujusagtinai, wagki midau ati tusa etegkamu asag.
PSA 33:13 Tuke Pujuuk nayaimpinum pujusag ashí aents aidaunak diyakui.
PSA 33:14 Nii puja nuwi pujusag aents nugkanmaya aidaush wajukenawa nunak ashí wainui.
PSA 33:15 Apajuíyai iina anentain najadauk, nuadui ashí ii takamunak diigtamkawai.
PSA 33:16 Makichik apua duka niina suntaji aina nujaig ayamjumakag uwemaitsui, tuja aents aidaushkam niina senchijinigkik ayamjumamaitsui.
PSA 33:17 Tuja caballo aina duka senchigtin ainayatkush, aentsu ayamjukag uwemtikmaitsui.
PSA 33:18 Untsu Tuke Pujuun eme anentus, ima niyaig kajinmamas anentaimaina nunak nii tuké kuitamui.
PSA 33:19 Tuja nujan tepeamtaish, nujantai jakati tusag idaitsui.
PSA 33:20 Ii aidautik Tuke Pujuuwai kajinmamsa anentaimji, nuniajin ¡nii kuitamjamak yaimpaji!
PSA 33:21 Iina anentain Apajuí anentaimtusa shiig aneaji. Nuniaku niina daaji pegkegma nuwi kajinmamsa anentaimji.
PSA 33:22 ¡Tuke Pujuuwah, aminí anentaimsa pujau asajin, amina anenkagmia nunú uyunkagtusti!
PSA 34:1 David Abimelec maatag tama mantuawai tusa tsanumak imaanjaujai betek wajatai, jiiki awemam pujus agagbau Wika Tuke Pujuunak kashi kashinig pegkegnum chichagkun, tuke ememattinaitjai.
PSA 34:2 Wika Tuke Pujuuwai eme anenmamjai; nunú antukjum ememachu aidautigmek, shiig aneastajum.
PSA 34:3 Tuke Pujuu daaji múunta nunú ashí ijuntusaja emematiagmi.
PSA 34:4 Wika Tuke Pujuun segabiajai yainkati tusan, dutika ai sapigmamujun agkanmitkajuabi.
PSA 34:5 Tuke Pujuuwai anentaimas pujuidauk, shiig aneasag pujuinawai, nuadui datsan ipatmak achagtinai.
PSA 34:6 Wika wainkauchitjai, nuniau asan Tuke Pujuun segabiajai. Tusa segai nii antugtuk, wi waitiamujun agkanmitkajuabi.
PSA 34:7 Aents Apajuín eme anentus umijin aidaunak Tuke Pujuu aentsji ángel awemamua nunú kuitamui.
PSA 34:8 Tuja Tuke Pujuush dekas pegkejashit tusajum dekaatasa wakegakjumek dekapsatajum: ¡Aents Apajuíyai kajinmamas anentaimaidauk, shiig aneas pujusagtinai!
PSA 34:9 Tuke Pujuunu atajai tumamiu aidautigmek, nii eme anentsajum ememattajum; wagki niina umijuidauk makichkish atsumchagtinai.
PSA 34:10 Wiakuch aina duka ujudauch wajasag nujantai waituinawai. Untsu aents Tuke Pujuun egau aina duka tuke waittsachagtinai.
PSA 34:11 Mina uchig aidauwah, minai minitajum, nunikjum antugtuktajum, Tuke Pujuu umigtan wi jintituatjime.
PSA 34:12 ¿Kuashat tsawan pujustasamesh wakegamek? Iwaku pujusam shiig takakum dakujustasamesh ¿wakegamek?
PSA 34:13 Nuniakmek, pegkegchau chichamak chichatsuk pujusta, tuja wait aina duka makichkish chichakaipa.
PSA 34:14 Pegkegchau takat aina duka idaisata, nunikam pegkeja duke takasta; nuniakum kakanmamsata maak agkan pujutnum.
PSA 34:15 Tuke Pujuuk aents niina shiig umijin aina nuna kuitamui, dutikak nii sumamunash antujuk yayawai.
PSA 34:16 Untsu tudaun takau aidaunak Tuke Pujuu kajejawai, dutikak ijina atakesh adeagchatnun emegkagtatui.
PSA 34:17 Tuke Pujuuk niina umijin aidau sumamun betek antujui; dutikak nii waitiamujinash agkanmitkawai.
PSA 34:18 Aents wika uwemjashtinapitja tusa anentaimak waitiaun uwemtijatatus Tuke Pujuuk tikijuch pujawai.
PSA 34:19 Tuke Pujuun umigna duka kuashat utugchatan igkuawai, tujash niinak Apajuí depetmatnak suwawai.
PSA 34:20 Tuja niina ukunchi aidaunashkam nii kuitamjawai; nuadui makichik ukunchinakesh kupigkachagtinai.
PSA 34:21 Aents pegkegchau aina duka ditá tudau takamsamujin waituinawai, tuja Apajuí umijin aidaun kajejuina dushakam suwimkan jukiagtinai.
PSA 34:22 Tujash Tuke Pujuuk niina inake aidaun uwemtikawai. Nuadui ¡Tuke Pujuuwai kajinmamas anentaimaidauk suwimak suwamak achagtinai!
PSA 37:1 David kantamamu Aents pegkegchaun pujutji diigsam kajekaipa, tuja aents pegkegchau aidau atsumkas pujuinakui, nunú diisam kajegkagtukaipa.
PSA 37:2 Wagki nunú aents aina duka dupa tsupikam wamak kagaja megkagama numamtin ainawai.
PSA 37:3 Tuke Pujuuwaig kajinmamsam anentaimsata, nuniakum ima pegkeja duke takasta. Nuniamin Apajuí yaimpasmatai, juju nugkanum pujusa takakum shiig yuwa pujusminum.
PSA 37:4 Tuke Pujuu shiig anentsam aneeta, nii umiktatui ame senchi wakegamunak.
PSA 37:5 Amina pujutjumek Tuke Pujuu idaitusta, dutikakum niyai kajinmamsam pujusta, nuniamin nii yaimpaktatui.
PSA 37:6 Ame shiig pujamugmea nunú, tuja amina takatjum pegkeja dushakam etsa tajimak shiig etsantama iman atinai.
PSA 37:7 Tuke Pujuu emtin wainka chichá wekaetsuk takamtak pujusta; nuniakum dakasta nii yaimpakti. Tuja aents pegkegchau aidau shiig atsumkas pujuinakui, nunú diisam kajegkagtukaipa.
PSA 37:8 Tuja kajeta duka idaisata, kajeka jiyanita dushakam ukukta, kajekaipa, wagki kajeamua duka utugchatan itawai.
PSA 37:9 Aents pegkegchau aina duka ijina utsaam agtinai. Untsu aents aidau Apajuín umijuinak niinig anentaimas kajinas batsata nunú Tuke Pujuu nugkan anagkagtuawa nuna jukiagtinai.
PSA 37:10 Aents pegkegchaun takau aidauk, dukap atsuk megkaejattawai; nunikagmatai wainkatasa egaakmesh makichkish wainkashtinaitme.
PSA 37:11 Untsu aents ememachu aina nunú nugka pegkegnum wayawag, tutit chicham atsamunum shiig pujusagtinai.
PSA 37:12 Untsu aents pegkegchauwa duka aents pegkejan kajejak pegkegchau awajkatatus egatui.
PSA 37:13 Tujash Apajuík nunú aents aidaunak dushikiawai, wagki dita megkaejatnuk tsawan jegau asamtai.
PSA 37:14 Aents pegkegchau aina duka ujudauch aidaun, ememachu aidaun, pujutji pegkeg aidaun aatus maawagtatus puyagjin akentaijijai uminawai.
PSA 37:15 Tujash ditak, dita puyagjinig maam agtatui, untsu akentaiji aina duka kupija utsantam agtatui.
PSA 37:16 Aents pegkegma duka wajiji kuashat achataish, aents wiakuch pegkegchaun nagkaesau shiig pujawai.
PSA 37:17 Wagki Tuke Pujuuk aents pegkegchau aidaun ijinak, aents pegkeg aidaun kuitamkattawai.
PSA 37:18 Apajuík aents tudaugtuchu aidaun kuitamui, tuja ditak ajumaish tuke atina nuna jukiagtinai.
PSA 37:19 Tsawan waitiamu jegataish, ditak waittsachagtinai, tuja nujan tepeamtaish, dita yuwatnuk kuashat ajiagtinai.
PSA 37:20 Aents pegkegchau aina duka dupa kagakujai betek keekagtinai. Tuja Apajuín shiwaaji aidaushkam jii bukuiti megkagama numamtuk megkaejatin ainawai.
PSA 37:21 Aents pegkegchauwa duka tsagkatjukta takui tsagkatkamash akikmachui; untsu aents pegkeja duka tsagkatkamak nuni ewagas akikmawai.
PSA 37:22 Apajuí pegkegnum yumigsamu aina nunú nugka pegkegnum pujusagtinai; untsu nii pegkegchaunum yumigjamu aina duka, ijina utsam agtinai.
PSA 37:23 Tuke Pujuuk aentsu pujutjin diijus nii wakegamujai betek pegkeg ataik, shiig pujusti tusa yayawai.
PSA 37:24 Tuja nunú aentsuk pegkegchaunum iyakush, nunisagkek megkaekashtinai, wagki nigka Tuke Pujuu achiakbau asa.
PSA 37:25 Wi datsa asan pujuyag duwikish, tuja yamai múuntuch wajasan pujag duwish, makichkish waintsujai aents pegkeg aidau Apajuí kajimatki idaisamu asag waituidaunak, tuja dita uchiji aidaukesh yumain atsujam waituinak sumá yujaunak makichkish waintsujai.
PSA 37:26 Aents pegkeg aina duka ashí tsawantai wait anenkagtinai, nuniau asa tsagkatkagtinai; tuja niina uchiji aidaushkam pegkegnum chichajam agtinai.
PSA 37:27 Pegkegchau takata duka tupanjata, nunikam pegkeja duke takasta, nuniakum ame pujustinun Apajuí anagtabauwa nuwi tuke pujustinaitme.
PSA 37:28 Wagki Tuke Pujuuk shiig takamua nuna wakegawai; nuadui niina umijuidaunak kajimatkig idaitsui; untsu pegkegchau aidaunak dita uchiji aidaujai ashí ijinui.
PSA 37:29 Nugkan Apajuí anagkagtuawa nuwig aents niina umijin aidau tuke pujusagtinai.
PSA 37:30 Aents pegkejak shiig anentaimas chichawai; nuniak tuke pegkeja nunak chichawai.
PSA 37:31 Nuniau asa niina anentainishkam Apajuí jintintuamua nunak tuke aneakui; ¡nuadui niig makichkish pegkegchaunmak iyaumaitsui!
PSA 37:32 Aents pegkegchauwa duka aents pegkejan tsanumjug, maatnume tusa sujuktatus wekaetawai.
PSA 37:33 Tujash Tuke Pujuuk aents pegkegchauwa nunú maati tusag idaisashtatui; tuja nuigtushkam tsanumjujagmatai, achikag waitkastinme tusagkesh idaisashtatui.
PSA 37:34 Tuja amek Tuke Pujuuwai kajinmamsam pujusta, nuniakum niina chichame umigkata; wagki nii aminak tikich aidaun nagkaesau etamtatui, dutijama nugkan anagtabauwa nuna amastinai. ¡Nuwi pujusam aents pegkegchau aidau jinuidau wainkatnaitme!
PSA 37:35 Aents pegkegchauwa nunú numi múun wajaama numamtuk ememas wajaun wainkabiajai.
PSA 37:36 Tujash wajukayawas, megkaekabi, wainkatasan egaknush wainkachmaijai.
PSA 37:37 Aents shiig anentaimkauwa nunú diista, nunú aentsuk tutit chicham atsaunum agkan pujustinai.
PSA 37:38 Untsu aents antumtikmainchau intimkiu aina duka ashí ijina utsaam agtinai; nuadui ditak jinatnujin dakainawai.
PSA 37:39 Tuke Pujuuk aents pegkeg aidaun yaigka uwemtiknai, tuja tsawan waitiamu jegataish, nii ejaka kuitamui.
PSA 37:40 Tuja ditanak Tuke Pujuu ayamjuk agkanmitkawai, wagki niyai kajinmamas anentaimaidau asagmatai.
PSA 40:1 David kantamamu Wika Tuke Pujuu yainkati tusan niiyai kajitmamsa pujusan segabiajai; tusa segai nii antugtukmayi.
PSA 40:2 Tuja wi jamainnum jeganta pujaish, nii uwemtijugmayi. Tuja kuchanum tepea jamaina numamtuk ashí jaka pujai, Apajuí uwemtijugmayi. Dutijua kaya múun makichkish buchitmainchaunum wajasa iyaumaitsu iman etibi. Nuadui wi wekaesatnunak nii umigtuke.
PSA 40:3 Dutijak yamajam kantamtain Apajuí kantamjutain kantamati tusa jintinjuabi; nuna wi kantabau kuashat aents aidau anentain antinkabi, dutikam Tuke Pujuuwaig kajinas anentaibiagmayi.
PSA 40:4 ¡Aents ememachu tuja wainka apajuímtai aidaunash emematchau, ima Tuke Pujuuwaig kajinmamas anentaimaina duka shiig aneas pujustinai!
PSA 40:5 Tuke Pujuu mina Apajuíjuh, amek jutii wait anenkagtakum, kuashat ishamain wainchatai aidau iwainajuitme. ¡Makichkish amejai betekak atsawai! Nuna pachisan etsegkatag takunush, ashí etsegmainchau dekapeajai.
PSA 40:6 Apajuí tsagkugtugti tusag kuntinu maawag nuna nejen ashí apeatnume, dutikainak ajak aidaunashkam anentag sujustinme tusamek sumatsme. Untsu Apajuín chichamen antukti tujutiume.
PSA 40:7 Nuadui, papiinum agagbau mina pachitus tawa nujai betek, chichaakun: Juwi pujajai, timajai.
PSA 40:8 Apajuíjuh, ame wakegamu takata nunú minak shiig awajtawai. ¡Ame jintinjuamua nunú mina anentaijui ajutui!
PSA 40:9 Amina aentsjum aidau kuashat tuwaka ijunbaunum amina takatjum pegkegma nuna iwainakmajai. ¡Tuke Pujuuwah, wi aminun pachisa etsegtsuk uuka pujatsug duka amek shiig dekame!
PSA 40:10 Tuja aents aidau wait anentakum, dita tudaujish tsagkugnaitam nunú pachisa etsegtanmak itattsachmajai. Tuja ame anagkagtuamuk betek uminaitam nuna ame uwemtikagtamujai pachisan chichagkagtukmajai. Nuigtush amina aentsjum kuashat aina nuna emtinig amina anenkagminak dekaskegmijaig, makichkish uukchamjai.
PSA 40:11 Nuadui Tuke Pujuuwah, amesh minash wait aneasam amina anenkagmea duka atushat etugtipa. ¡Amina anenkagmin pegkegmagmea nujai yainkata!
PSA 40:12 Untsu ame kuitamjachkuminig wika jamainaitjai, wagki wi waitiamua duka dekapakuish makichkish ejemaitsui. Mina tudaujuk mina intashjun nagkaesau shiig kuashat ajutui. Iman asamtai, datsaamakun shiig niimsachmin, nuigtush shiig pujuschamin jakamin dekapeajai.
PSA 40:13 Tuke Pujuuwah, ¡wait aneasam, minash agkanmitkajuata, dutijakum wamak yainkata!
PSA 40:14 Aents aidau mina mantuawagtatus wakejutuina duka ame inatsakta; dutikamu asag, mina pegkegchau awajtuktatus anentaimaina duka datsantin pisagtinme.
PSA 40:15 Tuja mina dushijuina duka datsagkag pisagtinme.
PSA 40:16 Untsu amina egapaina duka shiig aneastinme; tuja ame uwemtikagtinaitam nuna wakejuina duka: “¡Apajuíyai dekas múunta duka!” tusag tuke emematjamtin atinme.
PSA 40:17 Tuja wi shiig senchi waitiakun wake besemag pujag nunú, minash wait aneasam Tuke Pujuuwah, kajimatjukipa. Ametme mina yainkam uwemtijinmek; nuadui Apajuíjuh, minash wamak yainkata.
PSA 42:1 Coré uchiji aidau kantamawagbau Japa senchi kitamak uwagtatus yumin egama numamtuk wika Apajuíjuh, amina egajame.
PSA 42:2 Apajuí pujuta sukagtina nuna wainkatasan, aents kitakai waitiak yumin egamaina numamtuk egajai. ¿Wajutik wisha ataktush Apajuí jee pegkegma nuwish wayatja? tusan anentaima pujajai.
PSA 42:3 Nuadui tsawaish, tuja kashish buutú pujajai, nuniai aents aidau inintuinak: “¿Amina Apajuígmesha?” tujutuinawai.
PSA 42:4 Nuwi anentaimkunuk wake besemag dekapeajai. Wi yaunchuk aents aidaun yajuakan Apajuí jee pegkegma nuwi emai, shiig aneasag Apajuín emematuinak untsumki shimuyanum nuna anentaimjai. ¡Yajauwajah ijunja Apajuí emematbau!
PSA 42:5 Iman aish ¿wagkanuk wisha mijaktaja? Wi puyatjumainuk atsawai. Apajuí uwemtikagtina nuwig kajintsan anentaimtatjai, nuniakun ima niinak ememattatjai.
PSA 42:6 Shiig aneasa pujuschamin wake besemag dekapeajai, nuniakun muja Hermón tuja muja Misar tutainum namak Jordágka nujinchi jinagbaunum pujusan aminí senchi anentaimjai.
PSA 42:7 Tuja ame najankamu aidau mujanum wajasa antam, namaka nujinchi chichijam tuna detau aidau senchi uutak, ishamain wajama imanik wi waitiamua duka minitjawai.
PSA 42:8 Tujash kashi kashinig Tuke Pujuu niina anenkega duwi minak yaintui; nuadui wishakam Apajuí mina pujutan suja nuna emematkun kashi kantamtanak mijattsujai, nuniakun segatnashkam segatskek idaitsujai.
PSA 42:9 Apajuí mina ayamjutna nuna chichagkun: “¿Wagka minash kajimatjukiume? ¿Wagkanuk wisha mina shiwag aintuinakuish, wake besemjash wekaetaja?” tajai.
PSA 42:10 Mina shiwag aidau dushiktuinak: “¿Amina Apajuígmesha?” tusa aju ajumag inintuinawai. Imatjutiagtai mina ukunchig najautuinawai.
PSA 42:11 Tuja ¿wagkanuk wisha mijaktaja? Wi puyatjumainuk atsawai. Apajuí uwemtikagtina nuwig kajintsan anentaimtatjai, nuniakun ima niinak ememattatjai. ¡Niyai mina Apajuíg uwemtijinuk!
PSA 43:1 Apajuíyah, wi pegkegchau takamsamu atsugta duka ame dekame, nuniau asam ¡aents pegkegchau aina nunú maawai tusam ayamjutkata! ¡Aents pegkegchau waitjin aidaunum agkanmitkajuata,
PSA 43:2 wagki ametme mina Apajuíg kuitamjinmek! ¿Wagka minash idaitusume? ¿Wagkanuk wisha mina shiwag aintuinakuish wake besemjash wekaetaja? tajai.
PSA 43:3 Amina tsaaptinjum dekaskegmijai sujusta, nunú jintinjuati. Muja ame etegkamunum pujam nuwi wakatag tusaish wajuk wemainaita nuna.
PSA 43:4 Nuwi wakan amina altarjumin jegantan, arpa awatkun amina ememattajame; wagki shiig aneasa pujuta nunú ame sujau asamin.
PSA 43:5 Tuja ¿wagkanuk wisha mijaktaja? Wi puyatjumainuk atsawai. Apajuí uwemtikagtina nuwig kajintsan anentaimtatjai, nuniakun ima niinak ememattatjai. ¡Niyai mina Apajuíg uwemtijinuk!
PSA 46:1 Coré uchiji aidau agajagbau Juka jaka ukumamunum kantamajakbauwai Apajuíyai iina kuitamjamin, iina senchimtijamin, tuja utugchat ataish tuke yaijatin.
PSA 46:2 Nuadui nugka buchittai, muja aidau yumpunainak, nayantsanum kakegu wainkuish ishamaitsuji.
PSA 46:3 Nayants senchi tsukatbau, kedegtak muja aidaun senchi umuchiak ishamain wajakuish ishamaitsuji.
PSA 46:4 Namakak nii tsegkeakbaujijai Apajuí yaaktajin aents batsatun shiig anemtikui, nunú yaaktak dekas tikich yaakat aidaun nagkaesau shiig pegkegmai, Apajuí pujutai asa.
PSA 46:5 Apajuík nunú yaakta ejapeen pujawai, nuadui makichkish tsaimainchau ainawai. Tuja Apajuí aentsji aidau, nunú yaaktanum batsatunak kashikiuch nagkamas yayawai.
PSA 46:6 Aents nugka muunnumia aidauk, nugka múun aidaun apuji aidaujai Apajuí chichamun antukag ishamainak senchi pampainawai. Tuja nugkashkam Apajuí chichatai, yumpuna tsainak megkaewai.
PSA 46:7 ¡Tuke Pujuu ashí senchigtina duka jutijai pujawai! ¡Jacopan Apajuíjiya nunuwai iina kuitamjamin!
PSA 46:8 Tuke Pujuu ishamain wainchatai aidaun juju nugkanum iwainajua nunú taajum diistajum.
PSA 46:9 Maanitak ashí nugkanum atsuti tusa tine. Nuadui maaniaku flecha akentai aidaunak nagki aidaujai kupigmayi, dutikak carro maaniaku jutai aidaunashkam apeka utsagmayi.
PSA 46:10 ¡Anuig nagkankatajum! ¡Witjai Apajuínuk, nunú dekatajum! Ashí nugkanmaya aidauk mina umigtukagtatui.
PSA 46:11 ¡Tuke Pujuu ashí senchigtina duka jutijai pujawai! ¡Jacopa Apajuíjiya nunuwai iina kuitamjamnuk!
PSA 47:1 Coré uchiji aidau kantamawagbau Ashí aents aidautijum Apajuí uwejum awatitajum. Tuja nii emematkujum shiig aneasjum senchi kantamatajum.
PSA 47:2 Wagki Tuke Pujuuwai ishamtai múun, ashí nugka apujiya duka.
PSA 47:3 Aents tikich nugkanmaya aidaun Apajuí depetuk, atum inagtajum tusa iina idaitugmasui.
PSA 47:4 Apajuí Jacopan aneau asa, nii wegantu aidautin etegtamjauwai, dutijama nugka pegkejan nii anagtabauwa nuna sujamsajui. Nunú nugka duwi ii eme anenmamji.
PSA 47:5 Tuke Pujuu Apajuík niina aentsji aidau shiig aneasag senchi kantamainak, nuigtu uwija kachujin umpuinak pampainamunum niina pujusa inamtaijin waya ekemsae.
PSA 47:6 ¡Kantamtai Apajuí kantamjuatajum! ¡Kantamtai iina apuji kantamjuawagmi!
PSA 47:7 Apajuíyai ashí nugkanmaya aidaun apuji, nuadui shiig aneasjum kantamjuatajum.
PSA 47:8 Apajuík nii pujusa inamtaiji pegkegma nuwi pujusag, ashí aents nugkanmaya aidaun inawai.
PSA 47:9 Tuja ashí tikich nugkanmaya apu eme anentsa diitai aidauk, Abrahama Apajuíjin ememattatus nii wegantu aidaujai ijunainawai.
PSA 47:10 Ashí aents nugkanmaya aina duka Apajuínu ainawai. Nuadui nii ashí inawai.
PSA 51:1 David Betsabén nuwatkamtai profeta Natán jiyakam pujusa juna aatus agajui Apajuíyah, amina anenkagmin wait anenjugta; tuja amina wait anenkagtutaigmin mina tudaujush tsagkugtugta.
PSA 51:2 ¡Mina anentaijui pegkegchau ayá nunú nijatjugta! Tuja mina tudaujush jaipja utsanjukta.
PSA 51:3 Mina pegkegchaugnak wika shiig dekagmamjai. Tuja wi pegkegchau takamsamua duka mina anentaijuig sakamtsui.
PSA 51:4 Ame dakitamun amina emtimin pegkegchaun takamsan ikajeakun waitkagme. Nuadui minak dekaskenum suwimkak sujustatme. Wika pegkegmaitjai tusanuk tumaitsujai.
PSA 51:5 Wika dekas wi akiinawaitag duwi nagkamsanuk tudauwaitjai; tuja mina dukuju muntsujin muntsuaku asanuk tudau ayajai.
PSA 51:6 Amek dekas aents ememachu dekaskenum chichauwa nunú aneame; nuadui shiig anentaimja pujut sujusume.
PSA 51:7 Wi pegkegchau takamsamu mina anentaijui ajuta nunú hisopowai jaipja ajapjutuata, dutijuawamin pegkeg wajastajai; ashí minak nijatjata, dutijuawamin yujagkim pujuama nuna nagkaesau wajastajai.
PSA 51:8 Suwimak sujakum waitkagsau akumesh, yamaik minash shiig aneasa pujut sujusta.
PSA 51:9 Mina tudaug aina duka kajimatkita, nuniakum mina pegkegchaug aina nunú ashí esaktujata.
PSA 51:10 Apajuíyah, mina anentaijush tudaugtuchu yamajam etugtita, dutikakum pegkeg anentaimat ima aminak umigtamain sujusta.
PSA 51:11 Tikima ajapjutak ajapjuawaipa, tuja amina Wakanim Pegkegma dusha jujutkipa.
PSA 51:12 Tuja ame uwemtikagtujamin shiig aneamu ajutkagtuwama nunú ataktu sujusta, nuniakum amina Wakanim wait anenkagtina nujai kuitamjukta.
PSA 51:13 Dutijuawamin aents amina chichamjumin umitan dakitin aina nuna jintintuatjai, amina nemagtamkatnume tusan. Dutika ai aents tudau aidaush dita tudaujin idaisag ima aminak umigtamkatnume.
PSA 51:14 Apajuíyah, ametme mina uwemtijinmek, tuja wi pegkegchaun takamsauwaitag duwi maatnume tusamek idaitusaipa. Wisha ame wait anenkagtutaigmea nuna pachisan etsegkun shiig aneasan kantamtain senchi kantamjuatjame.
PSA 51:15 Apuh, minash kantamati tujutta, wisha kantamtain amina kantamjuatjame.
PSA 51:16 Tuja uwija maan nuna nejen ashí apeakun, nuigtu anentag aidaun amaakun amina ememattag takunush dutikmainchau dekapeajai, wagki duka aminak shiig awajtamchau asamtai.
PSA 51:17 Apajuíyah, amek aents wika tudauwapitja tusa anentaimak waitia nunú shiig anentame. Tuja aents wika tudauwapitja tusa awake anentaimag tsagkugtugta tusa segapakuig, yaitskek idaichauwaitme.
PSA 51:18 Apuh, wait aneasam Isarael aents aina nunú wait anenjam kuitamkata. Dutikakum Jerusalén peejamu tsaikbauwa nuna ataktu peejatnume tusam yaigta.
PSA 51:19 Dutikawamin kuntinu maawag nuna nejen ashí apeawagtata nunú shiig awajtamkattawai. Nuadui amina emematjamainak toro tsakat aidaun maawag apeawagtinai.
PSA 63:1 David Judá wegantu aidau nugken uwegshunum pujusa agagbau Apajuíjuh, ametme mina Apajuígmek, Yama tsawamuik kashikmasan wakejusan segajame, wika amina wainkatasan wakegakun kitamaku wajuktayama imaniajai. Tuja yumi yutushtai nugka buku wajas, yumin atsumak wajukchawash imaniawai, mina iyashjuk amina atsumjamak.
PSA 63:2 Amina jem pegkegma nuwi wayan, amina imanjumea nuna senchigmijai wainkatasan wakegajai,
PSA 63:3 wagki amina anenkagmea duka pujutan nagkaesauwai, nuadui kantamkun ememattatjame.
PSA 63:4 Wika aminak tuke ememattinaitjame, nuniakun mina uwejun takuin amina aujtatjame.
PSA 63:5 Aents yutai pegkejan yuwa shiig aneas pujuuwa numamtuk wika shiig aneasan pujuttajai, nuadui shiig aneasan kantamkun ememattatjame.
PSA 63:6 Kashi kanaku tepesnush aminí anentaimsanuk tepajai.
PSA 63:7 Ametme mina yaintumek; nuadui aminí yunumsan ame kuitamjusamin shiig aneasan pujujai.
PSA 63:8 Ashí mina pujutjua nunak amina amaajai, wagki ame minak amina senchigmin kuitamjame.
PSA 63:9 Mina mantuawagtatus wakejutuina duka ijinata, dutikam initak yutuam emegkagta.
PSA 63:10 ¡Ditak nagkí iju maam agtinai, dutikamun ikamia yawá yukagtin aidau ditá iyashinak yuwawagtinai!
PSA 63:11 ¡Untsu apuk, Apajuíyai shiig aneastinai! ¡Tuja ashí aents Apajuín daajin chichau aidaushkam shiig anentsag kantamjuawagtinai! Untsu waitjin aina nuna weninak Apajuí ashí epetjatnai.
PSA 65:1 David kantamamu Apajuíyah, muja Siógnum pujuuwah, ¡ametme eme anentsa kantamjam amainmek! Amina takagsatjame tusa anagtabau aidauk betek umigtamain ainawai.
PSA 65:2 Amek ii segamash antugkagtame; tuja ashí nugkanmaya aidauk aminí mininawai.
PSA 65:3 Iina tudauji aidau wagagkagtakuish, ame tsagkugkagtame.
PSA 65:4 Ame aents aidau etegjam, ame jem pegkegma nuwi amejai pujustinme tiuwaitam duka shiig aneasagtinai. ¡Tuja ame jem pegkegma nuwi pujusa amina pegkegmagmea nunú wainkau asaja shiig aneastatji!
PSA 65:5 Apajuíyah, ametme jutiin uwemtikagtinmek, nuadui aents pegkegchau aidau suwimak suwakum amina umigtamaidauk shiig anennaitme. Nuadui ashí nugkanum pujuidauk tuja nayantsa amain atushat batsamin aidaushkam ima aminig kajinmamas anentaimainawai.
PSA 65:6 Muja aidauk amina senchigmijai najanauwaitme, dutikam buchittsuk asatnume tusam kuitame.
PSA 65:7 Amek nayants tsukatbaujish imignaitme, tuja aents aidau pampaidaush, bitat asatajum tusam itatmitkauwaitme.
PSA 65:8 Tuja atushat batsamin aidaushkam ame amina senchigmin wainchatai aidau iwainamun wainkag kujainawai. Tuja ashí nugkanum batsamin aidaush aminí shiig aneenak untsumainawai.
PSA 65:9 Ametme nugka kuitamnumek; tuja yumishkam yutumtikame, dutikam ajak aidaush tsapapitkame. Ame yumi yutumtikjamu betsaka akagak nugkan uchupjamtai, trigo aidaush shiig tsapainiag nejenawai.
PSA 65:10 Ajak ajakmatasa nugka taimu aidaush yumi yutumtikjam uchupiame, wagki ajak aidau tsapainiag senchi nejektinme tusam.
PSA 65:11 Ajak aidau mijadai kuashat nejektinme tusamesh nejemtiknaitme. Tuja yumi kuashat yutau asamtai, yumi atsumakuish waitnatsui.
PSA 65:12 Nuadui uwegshunmash dupa tsapaka samekbau pegkeg wajas awai. Tuja muja aidaushkam samekbau pegkejan iwagmamainawai.
PSA 65:13 Tuja nugka nain pegkeg aidaunmak, tagku aidau piyake, tuja nugka paka aidaunmak kuashat trigo ayawai. ¡Ashí nunú aidau shiig anenawai!
PSA 66:1 Kantamtai agagbau Ashí nugkanmaya aidautijum shiig aneasjum Apajuí kantamjuatajum.
PSA 66:2 Apajuí daaji pegkegma nunú pachisjum kantamtai kantamatajum. Tuja niina imanjiya nunú pachisjumshakam kantamtai kantamatajum.
PSA 66:3 Apajuí chichagkujum: “Amina takatjumek shiig pegkeg ainawai. Ame ima senchigtin asamin, amina shiwaajum aidauk ishamjamainak aminí yunumainawai.
PSA 66:4 Nuninak ashí amina etsagtamainawai, nuninak amina daagmin pachisag kantamtain kantamainawai”, titajum.
PSA 66:5 Apajuí aents aidautin ayamjutpak ishamain wainchatai aidaun iwainajua nunú anentaimtustajum.
PSA 66:6 Nigki nayantsanash ukuya buku emauwai, dutikamtai ii muunji aajaku aidau bukunum katiajajui. Nuadui ¡ima Apajuíyaig shiig aneasagmi!
PSA 66:7 Apajuí niina senchijiya duwi aents aidaunak tuke inawai; untsu niina umigtan dakitin aidaunak niijai shiwagmagawainum tusa tuke diyakui.
PSA 66:8 ¡Ashí aents aidautijum, iina Apajuíjiya nunú pegkegnum chichagtajum! ¡Dutikakjum kantamtai kantamjuatajum!
PSA 66:9 Wagki nii iinak kuitamjamui. Pegkegchaun takastinme tusag idaikagtatsui.
PSA 66:10 Iina Apajuíjiyah, amek ima aminigkiash kajinas anentaima tusam dekapkagtusuitme, nuadui plata jinum jiyamu pegkejama iman ekagtiuwaitme.
PSA 66:11 Tuja kuntin achiktinun dakamtikak, kuntinun achiyajama numamtuk, shiwaaji achiktinme tusam tsagkamkagtukume. Nuigtush shiig kuashat waitkagkagtusume.
PSA 66:12 Nuadui aents pegkegchau aidau waitkastinme tusam agkan idaisabiume, tuja jutiik yuminmash tuja jiinmashkam nagkaemakmaiji. Dutika ashí dekapkagtusam, juju nugka pegkeja imagnum pujustinme tusam apujkagtusmayume.
PSA 66:13 Nuadui wi yaunchuk ishamainnum pujusan amina chichagkun: Ame yaintsamin juna nagkaikinuk, amina emematkun anentag amastinaitjame tiuwaitjam, nuna imatiksanuk amina jem pegkegma nuwi wayan kuntinu maan, nuna nejen ashí apeakun ememattatjame.
PSA 66:15 Tuja kuntin duwejam aidaun uwija wiyaji aidaujai amina eme anentsan ashí apeattajai. Nuigtushkam toro aidaun, chivo aidaun, amina emematkun apeattajai.
PSA 66:16 ¡Ashí atum Apajuí umijin aidautigmek minitajum! Nunikjum antuktajum Apajuí mina yainka nuna pachisan ujaktajime.
PSA 66:17 Apajuín untsukmaijai, dutikan niina emematkun kantamjuamiajai.
PSA 66:18 Wi ayatak pegkegchaunmak anentaimsan pujutaik, Apajuík antugtukchatnuyi.
PSA 66:19 Tujash minak antugtuku asa, wi segamunash yainkabi.
PSA 66:20 ¡Apajuík wi segamunak dakitjachmayi, tuja niina anenkenash sujitjukchabi, nuadui tuke ememattai atin ati!
PSA 69:1 David kantamamu Apajuíjuh, kuashat waitiakun atsanmainchau dekapeajai, wait aneasam yainkata.
PSA 69:2 Kucha amutnunum tepeajai, wajai emetumainkesh atsugtawai. Dekas namaka kunajin akaejai, namak chichijam asa ajektawai.
PSA 69:3 Untsu untsumkawan sagagjai; mina suweg dajautawai. ¡Apajuín daka dakakuan jiijuish yawegjai!
PSA 69:4 Mina shiwaajuk intash kuashta nuna nagkaesau ainawai, utugchat atsugtaig kajegtuinak, mantuatag tuinawai. Tuja makichkish kasamkachu aig, kasamkamujum awagkita tusa imatjutuinawai.
PSA 69:5 Apajuíjuh, ame dekame wika pegkegchau ayajai; nuadui mina tudaugnak ugmaitsugme.
PSA 69:6 Tuke Pujuu Apajuí ashí senchigtinuh, ¡aminí kajinmamas anentaimin aina nunú, wainak mina pegkegchaujui datsaama yujainum idaisaipa! Israel aents aidaun Apajuíjiyah, aents amina egapau aina nunú mina pegkegchaujui datsaama yujainum kuitamkata.
PSA 69:7 Amina umiju asan kajegtuinakuish katsuntajai. Datsanjui mina yapijuk nimpawai.
PSA 69:8 ¡Mina yatsuchig aidaush, tikich aents itugmaina dutijuinawai!
PSA 69:9 Amina jemin akasmatkun senchi waitiajai. Tuja amina pegkegchaun chichagtamainakui, nuna antakun kajeajai.
PSA 69:10 Buutkun yujumkan yutsuk ijagmaan pujai, dushiktuinakuish katsuntajai.
PSA 69:11 Jakamunum nugkutain nugkuai, dushiktuinakuish katsuntajai.
PSA 69:12 Ashí aents aidauk pegkegchaun chichagtuinawai. Tuja nampen aidaushkam tuke aneas dushiktuinak kantamjutuinawai.
PSA 69:13 Tujash Tuke Pujuuwah, wika amina segajame, ¡wait aneasam yainkata! Amek anenkaitme, tuke kuitamkagtinaitme, iman asam minash uwemtijugta.
PSA 69:14 Tsakusnum tepean tepag nunú eke jatsaig jiigkita, tuja mina kajegtuina dusha agkanmitkajuata. Tuja namak chichijam ajapjuattak awajta nunú uwemtijugta.
PSA 69:15 ¡Namak chichijam ajekjati tusamek idaitusaipa! Tuja wainchi ishamaina nunú yutua emegkakti tusamesh idaitusaipa.
PSA 69:16 ¡Tuke Pujuuwah, amek pegkeg, anentak wajasuitme, iman asam minash aigkata! Amek wait anenkagtinaitam iman asam minash antugtukta.
PSA 69:17 ¡Juju amina inakem segapa nunú antugtsuk idaisaipa! ¡Utugchat ishamain ajutui, wamak yainkata!
PSA 69:18 ¡Juwi taam, shiwag aidau waitkajuina nunú ayamjutkata!
PSA 69:19 Amek mina dushiktuinak inastuina duka shiig dekame. Tuja mina shiwaajush ya ainawa dushakam amek dekame.
PSA 69:20 Ima imatjutuinakua ipimtukiaje, nuadui shiig aneasa pujumainchau kakaagchamin dekapeajai. Yaki wait anenjug anentaijun ichichtujainta tusan, egaknush wainkachmaijai.
PSA 69:21 Yapajaish, yutainum jatain egketjiagmayi, tuja kitamaish chujuinun sujiagmayi.
PSA 69:22 Nuadui dita jiistamaina nunú yutaiji aina nunú aatus ditan pempeentuki utugchatan apujtusti.
PSA 69:23 ¡Tuja wainmachu, kakaumainchau emakta!
PSA 69:24 Dutikakum ame kajekbauwai makichkish idaitsuk ashí ijinata.
PSA 69:25 Dutikawamin dita jee aina duka agkan juwajagtatui, tuja nunú jega aidaunmak makichkish pujuschatnume.
PSA 69:26 Wagki ame mina suwimak sujusamin waitiaish, ditak minak diigtsuk ayá dushiktuinak, nuni senchi waitkajuinawai.
PSA 69:27 Nuadui ameshkam pegkegchaunmak ikata. ¡Tuja makichkish dita tudaujig tsagkujaipa!
PSA 69:28 ¡Aents tuke pujusagtin aina nuna daaji papiinum agatkamua nuwi, dita daaji ayá duka ashí esakatjata! Tuja aents amina umigtamin aidaun daaji agatkamua nuwig, dita daajig makichkish agatjaipa.
PSA 69:29 Apajuíyah, wi jakun wake besemag dushikiam pujag nunú minash wait aneasam yainkam uwemtijugta.
PSA 69:30 ¡Apajuín see tusan kantamtain kantamkun, shiig aneasan ashí iwainakan niina daajin ememattatjai!
PSA 69:31 Nunú dekas, kuntin aidau maa apeamun nagkaesau Tuke Pujuunak shiig awagmaktatui.
PSA 69:32 Tuja aents Apajuín segau aidau wake besemag batsatuk, nuna wainkag shiig aneasagtatui; nuninak ichichmamjagtatui.
PSA 69:33 Wagki Tuke Pujuuk aents waitiak wake besemag pujus sumaunak antujui; tuja niina aentsji aidau achikam batsamas waitiagtaish, dakitjag idaitsui.
PSA 69:34 Nugka, nayaim, nayants aidautigmesh Apajuí ememattajum, tuja ashí nuwi batsamin aidautigmeshkam Apajuí ememattajum.
PSA 69:35 Apajuí Jerusalégnak kuitamkattawai, dutikak Judá wegantu aidaun yaaktaji aidau tsaikbau aina nunak ataktu iwagkattawai. Dutikamtai niina aentsji aidau nuwi batsamsagtinai.
PSA 69:36 Nunú nugkak niina aentsji aidaun uchiji wegantu aidaunu atinai. Tuja nunú nugkanmak Apajuín aneen aidau shiig batsamsagtinai.
PSA 72:1 Salomón kantamjuamu Apajuíjuh, juju apu amina takatjum pegkeja nuna niishkam shiig takasti tusam yaigta. Tuja tikich apu atina dushakam dutiksag shiig takastin atinme.
PSA 72:2 Aatus amina aentsjum aidaun, tuja nuigtu waitkam batsatu aidaun apuji wajas, inamak shiig takastin ati.
PSA 72:3 Tuja muja aina nuwiya jiinjag, agkan maanitsuk pujutan, pegkeg takatjai aents aidaun jintintuati.
PSA 72:4 ¡Ujudauch aidaun ayamjukti! ¡Tuja aents waituina nuna uchiji aidaunashkam ayamjukti! ¡Tuja untsu tsanumag kasamin aina nunak waitkasti!
PSA 72:5 ¡Nii tuké iina apuji atin ati, Tuja etsa, nantu megkaekashtinun tuke auwa nujai betek pujustin ati!
PSA 72:6 ¡Yumi yutak nugkan uchupig, ajakan shiig tsapapama iman ati!
PSA 72:7 ¡Nii apu wajas inamtata duik shiig agkan pujusa takamu ati! ¡Tuja nii inabaujig nantu tuke auwa nujai betek atin ati!
PSA 72:8 ¡Nunú apua duka etsa jiintaya imanui nagkamas, etsa akaetaiya aatus ashí nugkanum inamjatin ati!
PSA 72:9 ¡Tuja niina shiwaaji aidau uwegshunum batsata duka nii tabaun umiktinme!
PSA 72:10 ¡Nuninak Tarsis nugkan apuji aidau, ajuntai aidaunum batsamnun apuji aidau, Sabá nugkan apuji aidau, nuigtu Sebá nugkan apuji aidau aatus waji aidaun ikautiagtinai!
PSA 72:11 ¡Ashí apu aidauk ima niinak tikishmatjagtatui! ¡Tikich nugkanmaya aidaushkam ima niinak umigkagtatui!
PSA 72:12 Ujudauch aidau atsumainak sumainamunak nii yaigtatui, tuja waitiak wake besemag pujaunashkam nii ayamjuktatui.
PSA 72:13 Ujudauch aidaun wait anenjattawai, dutikak wake besemag pujaunash yaigka uwemtijattawai.
PSA 72:14 Ujudauch aidaun waitkainak maaniagtaish, nii ayamjuk uwemtijattawai. Wagki dita pujutji aina duka nii diismak akik ainawai.
PSA 72:15 ¡Niig tuke iina apuji atin ati! ¡Sabánmaya oronak ashí susatnume! ¡Nii pachisa tuke Apajuí segattai ati! ¡Tuke pegkegnum chichagtai ati!
PSA 72:16 ¡Tuja ashí juju nugkanmak trigo shiig kuashat aittawai, imaniak muja titijinak ijia emegkaktatui! Imaniau asa muja Líbano tutainum trigo aijakua iman wajasti, nuniak nuna yagkuji aidauk dupa yagkujuwama imanik yagkujuk asattawai.
PSA 72:17 ¡Apu daajig etsa tuke ekemna iman tuke pegkegnum chichagtai ati! ¡Aents ashí nugkanmaya aidauk niina daajin pegkegnum yumigkiam agtinai! Ashí nugkanmaya aidauk niina pegkegnum chichajiagtinai.
PSA 72:18 Tuke Pujuu, Israel aents aidaun Apajuíjiya duka tuke pegkegnum chichagtai ati, wagki ima nigki wainchatai aidaunash iwaidau asamtai.
PSA 72:19 Apajuí daaji pegkegma duka tuke pegkegnum chichagtai ati. ¡Niina imanjiya nunú ashí nugkan jamagti! ¡Aatus ati!
PSA 72:20 Jesé uchiji David aajakua nunú kantamamuk juwi amuewai.
PSA 73:1 Asaf kantamamu Israel aents aidau anentaimtaji pegkeg aidaunak Apajuí shiig kuitamui.
PSA 73:2 Namput wajaschabiajai iyautnak, jukea akunuk iyagtinuyajai.
PSA 73:3 Aents Apajuín umigchau aidau wiakchamenakui, nuna diisan kajebiajai.
PSA 73:4 Ditak jamamtuchu batsatu asag jakachainjash tusagkesh puyatuinatsui.
PSA 73:5 Dita utugchatjig atsujuinawai, nuadui tikich aidau waituina imanikag waituinatsui.
PSA 73:6 Nuadui ditak nugkutai pegkeg najanamu nugkumaina numamtuk, dita emematin nugkuaju ainawai. Tuja ditak magkagtutaijinak, jáanchjai betek nugkuaju ainawai.
PSA 73:7 Duwegmatnak duwejam ainawai, tujash dita yapinig wainnawai anentai shiig pegkegchau aina duka.
PSA 73:8 Ememainak tikich aents aidaunash dushikinawai, nuninak makichkish datsaamtsuk, ii wakegakuik pegkegchau takamsattaji tusag awanmainawai.
PSA 73:9 Nuninak Apajuínash pegkegchaun chichajuinawai, tuja aents aidaunash dutiksag pegkegchaun chichajuinawai.
PSA 73:10 Nuna aents yujajus iniinak yajau chichainatsui tusag shiig antuju yujaush ainawai.
PSA 73:11 Nuninak: “¿Apajuísh wajuk dekatki iina pujutjinash? Tuja Apajuí nayaimpinum puja aniaush aents takainamunash ¿wajuk dekamainaita?” tuinawai.
PSA 73:12 ¡Diisjua aents pegkegchau aina nunú! Ditak utugchatji atsau, shiig pujusag wiakuch wenawai.
PSA 73:13 ¡Wi pegkegchau takatan ashí idaisauwaitag duka minak makichkish pegkegnumak yaintsui!
PSA 73:14 Minak wa wamak utugchatan itagtuinawai, tuja kashi kashikmasan suwimkanak igkuajai.
PSA 73:15 Tuja wisha dita anentaimaina nujai betek anentaimkunuk, amina aentsjum aina nunak kajimatki idaikunus, wi wakegamun takasu aintagtai.
PSA 73:16 Tuja ibau tudaugtin aidaush, ¿wajukag wiakchash wenawa? tusa anentaimsan ejetakamanush ejemainchau dekapjabiajai.
PSA 73:17 Nuni pujaun Apajuí jee pegkegma nuwi niijai chichastasan waya ai, aents pegkegchau aidaush wajukatnuk ainawa nuna Apajuí dekamtijuabi.
PSA 73:18 Nunú aents aidauk ishamainnum batsasume, dutikamu asag dita megkaejatnunum shimawai.
PSA 73:19 ¡Nunú aidauk pachiachbau shiig wamak ijina utsam agtatui! ¡Ditak sapijai jinawagtinai!
PSA 73:20 Tuke Pujuuwah, aents kanag tepau nantak nii kajamjamujin kajimatama numamtuk, ame nantakum aents pegkegchau aidau ditash ima pegkeg ainawa tumain aina duka emegkagtatme.
PSA 73:21 Wi senchi kajekan pujubiajai, nuniai mina anentaig dajautibi.
PSA 73:22 Wika aents pegkegchau aina nuna pujutjin dekajuatasan wakegakun, kuntin jintiag anentaimchau asa wajukmaina numamtuk wajabiajai.
PSA 73:23 Nuniayatkun amejaig tuke pujubiajai, nuniau asamtai tudaunum iyawai tusam egkegsam awekatmayume.
PSA 73:24 Umigtukti tujutu asam ame chichagtukmayume, nuadui wi jakamtaish, eme anenjusam jujuktinaitme.
PSA 73:25 ¿Amina nagkaetamsaush tikichish nayaimpinmash ya pujawa? Duka atsawai, ima ameketme. Amejai pujaknuk juju nugkanmaya aidaunak makichkish wakejumaitsujai.
PSA 73:26 Mina pujutjua duka nagkankattawai, tujash Apajuíya nunú pujut tuke atinun sujustatui, tuja nii mina anentaijuish ichichtawai.
PSA 73:27 Aents amina nemagtamtan dakitauk, jinawagtinai; tuja ima aminig kajinas anentaimainachushkam ijinatnaitme.
PSA 73:28 Untsu wika ima Apajuíyaig anentaimsan pujustinaitjai, nunú minak shiig awajtawai. Ametme Tuke Pujuu Apajuí, mina ayamjutkatnumek. Nuadui ashí ame dutikamu aina nunak etsegkattajai.
PSA 80:1 Asaf kantamamu Apajuí, Israel aents aidaun kuitamnuh, ¡ame José wegantu aina duka aents uwigjin kuitamas awekauwama numamtuk kuitamsa awekame! ¡Ame querubin aidauk iname! ¡Iman asam Efraín wegantu aidau,
PSA 80:2 Benjamín wegantu aidau, Manasés wegantu aidau wait anenjata! Dutikakum amina senchigmijai uwemtikagtugta.
PSA 80:3 Tuke Pujuuwah, ¡iina pujutji yapagkagtuam yaunchuk ayag iman ekagtita! Dutikagtuawaminig jutiishkam uwemjagtatji.
PSA 80:4 Tuke Pujuu ashí senchigtinuh, amina aentsjum aidau segapainakui dakitam dusha ¿wajupa kuashta aikash pujugtatme?
PSA 80:5 Yutai sukagtumaina nunú waitut sukagtusmayume, tuja umutai umumaina nunú waitiaku buutbau sukagtusmayume.
PSA 80:6 Iina nugkega nuna yantamen batsamin aina nunú atsaneaku dushiktai ekagtiume.
PSA 80:7 Apajuí ashí senchigtinuh, ¡iina pujutji yapajiam yaunchuk ayag iman ekagtita! Dutikagtuawaminig jutiishkam uwemjagtatji.
PSA 80:8 Uva numiji egiptunmaya jukim juwi itaam, aents pegkegchau aidau jiija utsaakum juju nugkanum ajabiume.
PSA 80:9 Dutikam shiig tsapaiti tusam nugka iwajabiume, dutikawamin nuwi tsapaka ashí nugkan jamagmayi.
PSA 80:10 Imaniku asa nunú tsakaak muja aidaunak bikintu awajsabi; dutikak numi múun aidaunash nagkagag niina kanawen yutua asabi.
PSA 80:11 Imaniau asa kanawe aidauk nayantsanum jegabi. Tuja nuwi yama tsapaidaushkam namak Eufratesa imanui jegabi.
PSA 80:12 Uva ajakbau peejamua dusha ¿wagka yumpuntuamesh agkantash awajtusume, aents aidau nagkaemainak akajag yajumtinme tusamesh?
PSA 80:13 Paki utsantua tegaja ijinui. ¡Kuntin ikamia aidau amuinawai!
PSA 80:14 Amek Apajuí ashí senchigtinaitme, iman asam wait aneasam nayaimpinum pujusam juju uva ajakbauwa nunú kuitamkata.
PSA 80:15 Juju uva ayá duka ame ajakbau ainawai, nuadui kuitamkata.
PSA 80:16 Tuja uva numijin tsupig apea ijinuk, ameshkam dutiksamek ijinata.
PSA 80:17 Untsu apu ati tusa ame etegkamua duka kuitamkata, dutikakum yaigta.
PSA 80:18 Tuja yamai nagkamsaik makichkish aminig tsujakchattaji. ¡Pujut sukagtusta ima aminig kajitmamsa batsamsagmi!
PSA 80:19 Chah, Tuke Pujuuwah, ametme Apajuí ashí senchigtinmek, nuadui ¡iina pujutji yapajiam yaunchuk ayag iman ekagtita! ¡Dutikagtuawaminig jutiishkam uwemjagtatji!
PSA 84:1 Coré uchiji aidau kantamawagbau ¡Tuke Pujuu, ashí senchigtinuh, amina jemea duka shiig pegkejai!
PSA 84:2 ¡Wika Tuke Pujuu jee pegkegma nuwi pujustasan shiig senchi wakegajai! ¡Nuniakun Apajuí pujuta sukagtina nuna shiig anentsan senchi kantamjajai!
PSA 84:3 Tuke Pujuuwah, ametme ashí senchigtinum. Mina apug, Apajuíjuh, tiki pishakchikesh amina jemin waya, pasugmak uchijin muumpitkamainuk agkantak ayawai.
PSA 84:4 ¡Amina jem pegkegma nuwi pujuidauk shiig aneasag batsatainawai, nunidau asag amina emematjamtanak makichkish mijamainatsui!
PSA 84:5 Tuja aents aidau aminiyan senchimetan juwina duka shiig aneasagtatui, tuja amina jemin minitag tusa wakeyin aina dushakam shiig aneasagtatui.
PSA 84:6 Nugka paka buutbau tutai yumi atsaunum weakush, yumi pukuni jiinaidaun waintinai; tuja yumigmat taimunmaya yumi kuyua megkaetaish, yumi yutak ashí nugka waa aidaunmak pimasua waigtinai.
PSA 84:7 Apajuíyah, amina senchigmejai ditak tuké senchimeawagtinai. Tuja Siógnum jegawag Apajuí senchigtina nuna wainkagtinai.
PSA 84:8 Tuke Pujuu, ashí senchigtin, Jacopan Apajuíjiyah, ¡wi sumamush antugtukta!
PSA 84:9 Apajuíyah, jutii ejamaktin ame etegkam apu emauwaitam nunú shiig anentsam kuitamkata.
PSA 84:10 Amina jem pegkegma nuwi waya, makichik tsawan pujamua duka, mil tsawan agá pujumaina nuna nagkaesau ima pegkejai. Wika aents pegkegchau aina nujai ijunja pujutnak idaikun, dekas amina jem pegkegman waitijiya nuna kuitamin atajai tusan wakegajai.
PSA 84:11 Wagki Tuke Pujuu Apajuí iinak ejapak kuitamjamui; tuja aents tudau takatsuk batsata nunak, nii wait anentak eme anentus kuitamui, dutikak waji pegkeg aidaunak sujitatsui.
PSA 84:12 Tuke Pujuu, ashí senchigtinuh, ¡aminí kajinmamas anentaimaidauk shiig aneasagtinai!
PSA 87:1 Coré uchiji aidau kantamawagbau Yaakat Jerusalégkak muja pegkejam Apajuínu tutaiya nuwi yaaktamamui.
PSA 87:2 Tuke Pujuuk Israel aents aidaun yaaktaji, tikich aina nuna nagkagas, Jerusalégkan ima senchi aneawai.
PSA 87:3 Apajuín yaaktajiya nuna Jerusalégkan pachisag, shiig pegkejan augmatuinawai.
PSA 87:4 Apajuí chichaak: “Aents aidau mina emematjuina duka Egipto nugkanum, Babilonia nugkanum, Tironum, Etiopía nugkanum, Filisteo nugkanum aatus batsatui. Nunú nugkanmaya aents aidau chichainak: ‘Apajuínak Jerusalégnum wainkabiajai’ tiagtatui”, tiuwai.
PSA 87:5 Tuja Siógnumia aidaun chichajuinak: “¿Wagkag ditash ibau pegkegnumash batsamsajabi? Dita batsamsatnunak dekas Apajuíyap umigkauwaita”, tiagtinai.
PSA 87:6 Aents aidaun daaji agattainum Tuke Pujuu dita daajinak: “Juka Siógnum akiinauwai”, tuu agatjatnai.
PSA 87:7 Nuadui nuwiya aents aidauk nantsemki, kantamkabaikia chichainak: “Mina pujutaijuk Jerusalégkai”, tiagtinai.
PSA 89:1 Esrahita aents Etán aajakua nunú kantamamu Tuke Pujuuwah, wi kantamkunuk, amek tuke wait anenkagtinaitme titatjame, tusan aju ajumag kantamjittagme.
PSA 89:2 Nuniakun amina anenkem tuke auwa nuna, tuja ame anagkagtuamuk nayaim yapajinchauwa imana nuna etsegkattajai.
PSA 89:3 Amek Davidjai chichamak umikuitme; dutikau asam nii anagkuakum:
PSA 89:4 “Ame jakaminig, ame wegantunmaya apu wajasa ame pujusa inamtaigmin pujus inamjatnai”, tiuwaitme.
PSA 89:5 Chah, Tuke Pujuuwah, nayaim aidauk amina takatjum pegkeja nuna diisag emematjamainawai, tuja ashí ángel aidauk amina anenkagmin pachisag chichainawai; ima aminak eme anenjamainawai. Tuke Pujuuwah, ametme tikich aents aidaun apajuíji aina nuna nagkaesau ishamtai dekas muunmek.
PSA 89:8 Tuke Pujuu ashí senchigtinuh, ame senchigtinum chichakbaugmek betek uminaitam imanuk tikichik makichkish atsawai.
PSA 89:9 Ame nayantsak inau asam, tsukatak ishamain wajakuish, mijaakta tusam imijiame.
PSA 89:10 Nayantsanmaya kuntin múun depetkam, amina senchigmin shiwaajum aidau uwaakam ipisjabiume.
PSA 89:11 Nayaim, nugka aina duka aminu ainawai, ame nugkak, tuja ashí nugkanum ayá nujai najankauwaitme.
PSA 89:12 Tsumujinish, nujinchinish ame ashí nugkak najanauwaitme. Tuja muja Tabor, muja Hermógjai amina daagmin pachisag kantamainawai.
PSA 89:13 Amina kuntugmek senchigtinai, tuja amina uwejum untsuja dushakam senchigtin depetbauwai.
PSA 89:14 Amek pegkegnum anenkajai inaame, tujash nuna nagkaesau dekas amina anenkagmin tuke kuitamkagtame.
PSA 89:15 Chah, Tuke Pujuuwah, aents amina emematjamin, amina tsaaptinjumin wekayin, tuja amina takatjum pegkegma nuna diis tuke shiig anea duka amek eme anentame, dutikakum pegkegnum yumigkiame.
PSA 89:17 Wagki dita imanji aina duka, tuja senchiji aina nujai ame susauwaitme. Nuadui jutii aidautik aan nagkaemasam senchigtin ekagtame.
PSA 89:18 Israel aents aidaun Apajuíji, Tuke Pujuuwah, ametme iina apuji pegkegmamek, tuja ametme ejajatkam kuitamkagtaumek.
PSA 89:19 Amina chichamjumin etsejin yaunchuk kajanum chichagkum: “Mina aentsug aina nuwiyan makichik wajiun etegkajai, duka mina inakeg Davitai, wi niinak yaigkan, chichame antugtai emajai. Dutikan ¡Israel aents aidaun apuji adaikajai!
PSA 89:21 Niinak yaitskek idaisashtinaitjai. Mina senchigjai senchimtikatnaitjai.
PSA 89:22 Niina shiwaaji aidaush jetekchagtin ainawai, tuja aents pegkegchau aidaushkam depetkachagtin ainawai.
PSA 89:23 Niina shiwaaji aidaunak niish wainaig ijinatnaitjai, tuja niina kajejuidaunash ijinatnaitjai.
PSA 89:24 Wi niina aneamua duka tuke atinai, wi kuitamsam kuashat kaweg senchigtin wajastinai.
PSA 89:25 Tuja niig nayants Mediterraneo tutaya nuwi nagkamas namak Eufratesa aatus inamjatnai.
PSA 89:26 Tuja nii chichagtak: ‘Ametme mina apag kuitamjaumek; tuja ametme mina Apajuíg uwemtijinmek’, tujuttinai.
PSA 89:27 Tuja wi niinak mina uchig iwai, ashí tikich apu aidaunash nagkaesau apu emattajai.
PSA 89:28 Wika niinak tuke anetnaitjai, tuja wi niijai chichaman umikuitag dushakam tuke atinai.
PSA 89:29 Nayaim awa nunisag aigkik, niina uchiji wegantu aidaunmayag tuke apu wegagtin ainawai.
PSA 89:30 Untsu dita chicham umiktinun wi jintintuau ainag nuna kajimatkiag batsamas,
PSA 89:31 nunú chichaman uminachkuig,
PSA 89:32 dita pegkegchaujin suwimak ishamainun susatnaitjai.
PSA 89:33 Untsu Davidnak tuke anetnaitjai, tuja wi niina anagkuawaitag nunashkam umitskek idaisashtinaitjai.
PSA 89:34 Wi niijai chichaman umikuitag nunak tuke idaisashtinaitjai, nunak tuke umiktinaitjai.
PSA 89:35 Makichik tsawantai wi Davitan anagkuawaitag nunak dekas umiktatjai tusan tumamjai.
PSA 89:36 Etsa eketa nunisag eketaigkik, niina uchiji wegantu aidauk tuke apu wegagtin ainawai.
PSA 89:37 ¡Nii wegantu aidauk, nantu tuke ekemna iman atinai! ¡Nii pujusa inamtaijishkam nayaim tuke auwa iman atinai!” tiuwaitme.
PSA 89:38 Tusa tiuwaitkum ame apu etegkamu aig, kajegkam dakitja idaisaume.
PSA 89:39 Dutikau asam niijai chicham umikuitam duka umitsuk, David kajimatkim idaisaume.
PSA 89:40 Tuja yaakat Jerusalén peejamua dushakam yumpua tsaikam ayamjumamainchau emam idaisaume.
PSA 89:41 Ashí aents nuni nagkaemaidauk wayawag dita wakegamun kasamainawai, tuja aents dita nugkega nuna yantamen batsamin aidau dushikinawai.
PSA 89:42 Nuadui Davita shiwaaji aidauk shiig anenawai, wagki dita ima senchijinawaju asag.
PSA 89:43 Niina maanitaiji puyagshakam atankiume; dutikau asam maaniakuish yaigchaume.
PSA 89:44 Eme anentai aajakua duka wainkauch idaisaume; dutikakum apu wajasa inamtaijishkam tikima wainkauch awajtusume.
PSA 89:45 Tuja nuigtush kuashat mijan pujuschati tusam atankiume, dutikakum datsa datsantak awajsaume.
PSA 89:46 Chah, Tuke Pujuuwah, ¿uumjutkamek pujuttam? ¿Kajegtukbaukek pujuttam?
PSA 89:47 Apuh, mina pujutug piipichia nunú adeagta; ame aents najanamua duka ujumak tsawantak pujus jauwai.
PSA 89:48 ¡Makichik aentsuk jatsukek iwakuk pujumaitsui! ¡Tuja jakashtajai tusa, jata uwemtumainchakam makichkish atsawai!
PSA 89:49 Apuh, ¿ame yama nagkamchakum: Davita tuke anetnaitjame tusam tiuwaitam dusha wajukame?
PSA 89:50 Apuh, iinak kuashat dushiktamainawai, imatika dushiktamainakuish atsaneaji.
PSA 89:51 Tuke Pujuuwah, amina shiwaajum aidau ¡aatus iina pegkegchaun chichagtamainawai! ¡Aatus ame apu etegkamua nuna aju ajumag pegkegchaun chichajuinawai!
PSA 89:52 ¡Tuke Pujuuk, tuke pegkegnum chichagtai atin ati! Maake, aatus ati.
PSA 90:1 Moisés Apajuí etegkamu aajakua nunú Apajuín ausamu Apuh, amek yaunchuk nagkamsam jutiik tuké yaijatnaitme.
PSA 90:2 Tuja muja aidaush najaneatsaig, nugkashkam najaneatsaig, yaunchuk nagkamsam, yamaya juish, tuja atakea duishkam ameketme Apajuímek.
PSA 90:3 Amina chichamjuminig aents aidauk jakag nugka najanenawai.
PSA 90:4 Ame diismak mil mijana duka makichik tsawan nagkaema nuninai; tuja mil mijana duka kiyag tsawak megkagama numamtuk nagkaemawai.
PSA 90:5 Amek namak chichigmajai betek aents aidauk utsame, tuja iina pujutjig kajanum kajamja shintaku ukutiama nujai betekai.
PSA 90:6 Aents aidauk dupajai betek ainawai, dupa kashikmas yagkujuk, etsa akagai kagaka jinuwama numamtuk wajaji.
PSA 90:7 Ame kajekbaugmin amujatme, tuja ame kajekamin ishamka imaanjaujai betek pujaji.
PSA 90:8 Iina tudauji pegkegchauwa duka ame shiig dekame.
PSA 90:9 ¡Ame kajegkagtukaminig ii iwaku batsatag duka, mayai mayati ajaptayama numamtuk jaka megkaemainaitji!
PSA 90:10 Iik ayatak setenta mijan pujusa jainaji, tuja nuni wajiu aidau ochenta mijan jegainawai; tujash imaan mijan pujakuish, ima waitiamua duke utugchatjai igkunui. ¡Mijanak jutii pujutjijai betek wamak nagkaemawai!
PSA 90:11 Ame senchi kajeamugminash ¿ya dekamainaita? Ame kajekbaujum ishamaina nunash ¿yaki dekamainaita?
PSA 90:12 ¡Iik tuke jakatnapitji tusa, shiig dekau ata nunú jintinkagtuata! ¡Nunú dekau asaja, pegkegnum pujuta nunú puyatjukagmi!
PSA 90:13 ¡Tuke Pujuuwah, ataktu yaijatkata! ¿Wajupa asamea yaijatkattame? ¡Juju amina inakem aina nunú wait anenjata!
PSA 90:14 Kashikmasa nagkamsam amina anenkagmea nunú sukagtusta, dutikagtuawaminig ashí tsawantai, shiig aneasa tuké kantamtinaitji.
PSA 90:15 Kuashat mijanai waitujakuitag imatiksamek shiig aneasa pujut sukagtusta.
PSA 90:16 ¡Juju amina inakem aina nunú dita wegantu aidaujai amina imanjumin senchigmejai wainkatnume tusam iwaintukta!
PSA 90:17 ¡Iina Apajuíji Tuke Pujuuwa nuna wait anenkagtutaijig jutinii asati! ¡Apajuíjuh, iina takatjish pegkegnum yumigsata! ¡Ehe, dekas iina takatjig pegkegnum yumigsata!
PSA 91:1 Apajuí múun, ashí senchigtina nunú kuitamsam pujauk,
PSA 91:2 Tuke Pujuun chichajak: “Ametme mina ejamataijuk, wi uumka ayamjumataig. ¡Ametme mina Apajuíg, ima aminig kajintsan anentaimjai!” tawai.
PSA 91:3 Wakan pegkegchau utugchatan apujtugmataish, tuja jata aidaunmashkam ima nigki ayamjutpamainai.
PSA 91:4 Wagki niig atash niina nanapen uchuchiji aidaun dukuka kuitamama numamtuk kuitamjamnai, nuadui amek puyattsuk shiig aneasam pujustinaitme. ¡Niina anenkega duwi aminak tantag ejamatia numamtuk ejapak kuitamjamkattawai!
PSA 91:5 Nuadui kashi ishamainnum pujakmesh, tuja tsawai wekaekumesh, mantuachagtimpash tusamek ishamkaipa.
PSA 91:6 Tuja jata kashi magkagtin, tsawai magkagtinkesh iyanjugmatai, jakashtajash tusamek ishamkaipa.
PSA 91:7 Amina menagmea nuni mil aents jinitnai, tuja untsugmea nunishkam diez mil aents jinitnai, tujash amek makichkish wajukashtinaitme.
PSA 91:8 Untsu aents pegkegchau aidaun Apajuí suwimak susam jinuidau waintinaitme,
PSA 91:9 wagki aminak Tuke Pujuu múun, ashí senchigtina nunú ejapak kuitamjamu asamtai.
PSA 91:10 Aminak makichik pegkegchaukesh waitkagmaschatnai, tuja jatashkam amina jeminig utugmashtinai.
PSA 91:11 Wagki Apajuí ángel aidaun ishiaktatui ame tuwi wekaetatme nuwi kuitamjamkatnun.
PSA 91:12 Nunú ángel aidau achigmaku agtatui, kaya tukumak iyajai tusa.
PSA 91:13 Nuadui, ikamyawa yukagtin aidau, tuja tikich kuntin ishamain ayaunum wekaekumesh, uyumat aneakas wekaetatme.
PSA 91:14 Apajuí chichaak: “Juju aentsuk mina waitui, anentanash anentui, nuniau asamtai wi niinak ayamjukan uwemtikjattajai.
PSA 91:15 Tuja yainkati tusa mina segatkuishkam, aiktinaitjai, dutikakun ¡niijaig pujutnaitjai! ¡Tuja waitiakuishkam agkanmitkatnaitjai! ¡Dutikakun eme anentsa diitai awajsatnaitjai!
PSA 91:16 Tuja kuashat mijan shiig pujustin ati titinaitjai. ¡Dutikakun pujut nagkanchau tuke atina nuwi pujus dakujusti tusan jukitnaitjai!” tawai Apajuí.
PSA 93:1 ¡Tuke Pujuuwai dekas apua duka! Tuke Pujuuk etsantug tsaaptin wajas eketui, niyai ashí senchigtina duka, tuja nugka buchitkai tusashkam kuitamui.
PSA 93:2 Amek yaunchuk nagkamsam apuitme, ¡Amek tuke pujuuwaitme!
PSA 93:3 Chah, Tuke Pujuuwah, namak senchi tsukatak uutui.
PSA 93:4 Tujash apujuh, amek nayaimpinum pujusmek, namak tsukatak uutuina nuna nagkaesau, tuja nayants uutbaun nagkaesau senchigtinaitme.
PSA 93:5 Chah, Tuke Pujuuwah, amina chichamjum umiktina duka yapajinchau tuke auwai. ¡Amina pegkegmagmea duka makichik jeganum yagkug nenaja iwajamuama imanik, amina jem pegkegma nuwi tuke awai!
PSA 95:1 Kaunatajum, Tuke Pujuu, iina kuitamjamak uwemtijamna nunú shiig aneasa kantamjuawagmi.
PSA 95:2 Nii pujamunum wayawaja nii emematku kantamtai kantamjuawagmi.
PSA 95:3 Wagki Tuke Pujuuwai dekas múun senchigtin, ashí tikich apajuímtai aina nunashkam Apujiyai.
PSA 95:4 Nugkak initken nagkamas ashí Apajuí emetuam awai, tuja muja tsakaju aidaushkam niinu ainawai.
PSA 95:5 Tuja nayantsashkam nii najanamu asa ima niinuke. ¡Nugkanashkam nigki najanauwai!
PSA 95:6 Minitajum, Tuke Pujuu, iina najapauwa nunú tikishmatja emematiagmi.
PSA 95:7 Niyai iina Apajuíjig, tuja iik niina aentsji ainaji, nuadui uwija kuitamin niina uwigjin kuitamama numamtuk iinash kuitamjamui. Apajuí yamai atumin tujama nunú antuktajum.
PSA 95:8 “Yaunchuk Meribánum, tuja uwejush Masánmashkam Apajuí chichamen intimjukiu aina numamtuk wajakaigpajum.
PSA 95:9 Atumin muunjum aajaku aina duka kuashat wainchatai aidaun wi iwainamun wainainayatak, dekaskechua nunin diisu ainawai.
PSA 95:10 Nuadui nunú aents aidaun dakitjan cuarenta mijan pujubiajai, nuniakun: ‘Juju aents aidauk shiig wainak yujawai; núnidau asag mina chichamjunak umigtuinatsui’.
PSA 95:11 Nuadui kajekan, chicham yapajiashtinun chichaakun: ‘Dita shiig batsamsatnun nugka pegkejan wi ditan anagkuawaitag nuwig ditak jegashtin atinme’ tiabiajai”, tiuwai Apajuí.
PSA 96:1 Ashí nugkanmaya aents aidautijum yamajam kantamtai Tuke Pujuu kantamjuatajum.
PSA 96:2 Tuke Pujuu kantamjakjum, niina daaji pegkegnum chichagtajum. Tuja Apajuíyai uwemtikagtinuk tusajum kashi kashinig etsegtajum.
PSA 96:3 Apajuí imanjiya nunú, niina pegkegmajijai pachisjum ashí nugka múun aidaunum etsegkatajum.
PSA 96:4 Wagki Tuke Pujuuwai dekas múuntak, ima nigki eme anentsa kantamjam amainuk. Niyai tikich apajuímtai aina nuna nagkaesau ishamain.
PSA 96:5 Tikich aents aidaun apajuímtaiji aina duka wainak ainawai; tuja Tuke Pujuuwai nayaimpin najanauk.
PSA 96:6 ¡Apajuín tsaaptinjiya duka jiin utsumakui! ¡Nii pujamujiya nuwig niina senchiji, pegkegmajiya nujai awai!
PSA 96:7 Ashí nugkanmaya aidautijum: “Ameketme senchigtinum, ameketme pegkegmamek”, tusajum Tuke Pujuu ememattajum.
PSA 96:8 Tuke Pujuu anentag susatin jukijum, nii jega nuna agájin ikaunmajum, tikishmaja pujusjum Apajuí etsagjatajum.
PSA 96:9 Apajuí jee pegkegma nuwi wayajum etsagjatajum. ¡Ashí nugkanmaya aidauk amina ishamjamainak kujaitnume!
PSA 96:10 Ashí aents nugkanmaya aidau chichagkujum: “¡Tuke Pujuuwai iina apujiya duka! Nugkanak jasa buchittsuk asatnun nii najanauwai, tuja ashí aents aidaunak nii inak betek diyakui.
PSA 96:11 ¡Nayaim aidaush, tuja nugkashkam shiig aneastinme! ¡Tuja nayantsashkam, tikich namak múun aidaujai shiig aneenak uuttinme!
PSA 96:12 ¡Tuja nugkashkam, nunú nugkanum batsamin aidaujaí shiig aneastinme! ¡Tuja numi ikam ayaushkam shiig aneenak,
PSA 96:13 juju nugka juwi inamjatin mina nuna emtin pampaitnume! ¡Tuke Pujuu dekas iina nugken inamjatatus taattawai! Nunik taa aents aidau takasbaujin diijus etegjattawai.”
PSA 100:1 See taku kantamtai Ashí nugkanmaya aidautijum shiig aneasjum Apajuí kantamjuatajum.
PSA 100:2 Shiig aneasjum Tuke Pujuu etsagjatajum. ¡Shiig aneasa untsumkujum Apajuí jee pegkegma nuwi minitajum!
PSA 100:3 ¡Tuke Pujuuwapi dekas apuk titajum! Iinak nii najapauwai, nuadui iik niinu ainaji. ¡Niina aentsji ainag duwi, aents uwigjin kuitamama numamtuk kuitamjamui!
PSA 100:4 Nuadui Apajuí jee pegkegma nuna waitijin kaunajum, Apajuí see takujum niina daaji pachisjum kantamtai kantamkujum ememattajum.
PSA 100:5 Wagki Tuke Pujuuk dekas pegkejai, tuja niina anenkajishkam tuke auwai, antsag nii anagkagtuamujig makichkish yapajinchauwai.
PSA 103:1 David kantamamu Ashí mina anentaigjai Tuke Pujuun emematkun pegkegnum chichagtinaitjai; niina daaji pegkegma nuna pachisan ashí mina senchigjai pegkegnum chichagtinaitjai.
PSA 103:2 Ashí mina wakanjujai Tuke Pujuun emematkun pegkegnum chichagtinaitjai; tuja nii mina yainkauwa nunak makichkish kajimatkishtinaitjai.
PSA 103:3 Niyai mina tudaujun tsagkugtauk; nigki wi jaaku pujaish etsaentinuk.
PSA 103:4 Tuja jamainnum jeganta aish, niyai mina uwemtijinuk. Tuja nigki niina anejattaijiya nuna mina anentaijui suja duka.
PSA 103:5 Niig ashí pegkeg aina nuna sujawai. Tuja wi múuntuch wajasan pujaish, nii minak ataktu senchimtijua ukukui yakí nanamama iman etawai.
PSA 103:6 Tuke Pujuuk, pegkegma iman asa, aents waituidaunash yaigka agkanmitkawai.
PSA 103:7 Moisés Israel aents aidaujai dutikatnun, tuja dita umikagtinun aatus Apajuí jintintuauwai.
PSA 103:8 Tuke Pujuuk kakagchauch wait anenkagtinai; wamak kajechui, tuja anentak wajasui.
PSA 103:9 Apajuík jiyajatu pujuchui; tuja kajegkagtukbaujish tukek achauwai.
PSA 103:10 Ii pegkegchau takamtaijin shiig kuashat suwimak jumain ajinig, imatikagkesh amaschauwai.
PSA 103:11 Niina umijin aidaunak Apajuík nayaim múun nagkatkachua nuni nagkaemas aneawai.
PSA 103:12 Etsa jiintaijiya nuna etsa akaetaijiya nujai atushat akankauwa numamtuk, iina tudaujinak atushat datupajui.
PSA 103:13 Tuke Pujuuk niina umijuina nunak, makichik múun uchijin shiig anentus kuitamama imatikas kuitamui.
PSA 103:14 Wagki iish wajiyai najanamuitji nunak nii dekawai; iik nugka yukukuntujai najanamuitji, nuna nii shiig dekawai.
PSA 103:15 Aentsu pujutjiya duka dupajai betekmamtinai; dupa tsapai yagkujuwama numamtuk wajawai.
PSA 103:16 Tuja yagkugnak dase dasentak umpui utsauwame, dutikamu asamtai, ataktu awagkik wainchataiyai.
PSA 103:17 Untsu Tuke Pujuu anenkega duka niina umijin aidaunmak megkaekashtinun tuke atinai. Nuadui, nuna uchiji wegantu aidaunash,
PSA 103:18 tuja ditajai chicham umikbauwa nuna betek umidaun, nuigtu diez chicham umiktin agagbaun kajimattsuk umidaun aatus tuke yaigtinai.
PSA 103:19 Tuke Pujuun pujusa inamtaijiya duka nayaimpinum awai; nuwi ekemas ashí nugkanum inamui.
PSA 103:20 ¡Nayaimpinmaya aents ángel senchigtin, Apajuí chichame umijin, tuja nii inapakui umiktasajum batsamin aidautijum Tuke Pujuu ememattajum!
PSA 103:21 ¡Atum niina suntaji aidautijum nii takajin, tuja nii inapamu betek umijin aidautijum Tuke Pujuu ememattajum!
PSA 103:22 ¡Tuja Apajuí najankamu ashí nugkanum batsamin aidautijum Tuke Pujuu ememattajum! Tuja wishakam ashí mina wakanjujai Tuke Pujuun ememattajai.
PSA 104:1 Ashí mina wakanjujai Tuke Pujuun emematkun pegkegnum chichagtinaitjai. ¡Tuke Pujuu mina Apajuíjuh, amek dekas múuntaitme! Tuja amek amina imanjumea nunú ijiam, etsanjam pujame.
PSA 104:2 Amek dekas tsaaptin ijimakume. ¡Ame nayaimpia duka jáanchjai betek ejauwaitme!
PSA 104:3 Dutikam yaki nayaimpinum ame pujustinjum umikuitme. Amina carrogmin yujagminum egkemkam wekaeme. ¡Amina nanapjumin dasenum nanaakam wekaeme!
PSA 104:4 Dase aina duka ame iname, ame nunikti tama jiishkam kegawai.
PSA 104:5 Apajuík nugkanak nigki buchitmainchaun najanauwai; nuadui makichkish umuchmainchau atinai.
PSA 104:6 Ame nayants pimumtikjam nugka yutuabiume, dutikakum ashí muja múun tsakaku aidaush yutuabiume.
PSA 104:7 Imanikmataish, kuyua buku wajasti timayume, tusa tabaugmin amina chichamjumin ipamtajai betek antuk wamak kuyuabi.
PSA 104:8 Nuadui, yumi piyag muja aidaun amuja auk, wake aidaunum akaiki, ame nuwi ijumnagti tibaunak imanisag nuwi ijumnajui.
PSA 104:9 Nunikmatai ataktu pimak nugkan utujai tusam, juwig nagkankati, nuwi nagkama pima pimakuag wechati tiuwaitme.
PSA 104:10 Untsu yumi mujanum pukuni jiinki, entsa najanea pakajin jegak, namak múun wajasti tusam idaime.
PSA 104:11 Nunú yumin kuntin ikamia aidau burro ikamia aidaujai kitamainak umin ainawai.
PSA 104:12 Nunú namaka yantamen numi ayaunum, nuna kanawen chigki aidau pasugmak petsainak, shinuinamu antunawai.
PSA 104:13 Tuke Pujuuwah, amek nayaimpinum pujusam yumi yutumtijam, ikam ukatkam pegkeg emame; tuja amina anenkagmea nunú nugkanak shiig anemtikui.
PSA 104:14 Apajuí dupanak tsapapitkawai, kuntin nuna yuu aidau yuwatnume tusa, tuja ajak aidaunashkam tsapapitkawai, nunú nejekmatai aents aidau yuwatnume tusa.
PSA 104:15 Tuja pagkan yuwa ichichmamtain, tuja vino uwaja shiig aneastinun, nuigtu aceite kugkuin yapinum nijamtain aatus ashí umikui.
PSA 104:16 Tuke Pujuu numi najankamua duka yumi uchupiam shiig ijunui, tuja Líbanonmaya setug aidaun nii tsapapitkakua dushakam, yumi yutak nugkan uchupiau asamtai shiig ijunui.
PSA 104:17 Nuna kanawe aidaunum chigki aidau pasugmak petsainawai; nuwi pishak cigueñashkam pujawai.
PSA 104:18 Tuja muja tsakaku aina duka cabra ikamia aidau batsamtai ainawai; untsu kaya múun aina duka wapujushan uumka batsamtai ainawai.
PSA 104:19 Apajuí nantunak najanauwai, wajupa nantuk weawa tusa dekatnun; tuja tsawan dekapa dekatain etsan najanauwai.
PSA 104:20 Etsa akaetaik kiyawai, nunikmatai kashi kuntin ikamia aidau jiinag yujawai.
PSA 104:21 Tuja león aidaushkam kashi jiinag, dita yumainji atsutai shinuinawai, Apajuín segainak.
PSA 104:22 Untsu tsawak etsa jiintai, dita waajin akuumag megkagainawai.
PSA 104:23 Tsawan tsawagmatai, aents aidau takatjin jiintukiag, takai takainakua agkutai ukuinawai.
PSA 104:24 ¡Tuke Pujuuwah, amek shiig kuashat najankauwaitme! Tuja ashí duka amina yachagmijai umikuitme. ¡Nugka ame najanamua nuwig ashí ame najankamu aina nunú batsatui!
PSA 104:25 Diisia ame najanamu nayants shiig múun, nuwig kuntin múun aidau, kuntin piipich aidau shiig kuashat makichkish dekapamainchau ayawai.
PSA 104:26 Nuwi yujawai lancha múun aidau; tuja nuwi semagkau múun najanawaitam nunú shiig aneak wasugkamui.
PSA 104:27 Nunú aidauk ashí amina dakagmainawai, wajutik yutainash amasat tusag.
PSA 104:28 Nuadui ame dita yuwatnuk suwame, dutikam jukiag shiig yuwinawai.
PSA 104:29 Untsu ame uumjukmak, senchi ishamainawai; tuja ame mayatut jujamshakam jawai, nunik iyashig yukukuntu najaneawai.
PSA 104:30 Tujash ame Wakanim suwamak ashí nugkanmaya aents aidauk yamajam pujutan juwinawai.
PSA 104:31 ¡Tuke Pujuu imanjiya duka tuke auwai! ¡Tuke Pujuuk nii najankamujin diisa shiig aneawai!
PSA 104:32 Tuja Apajuí diyamak nugkak kujawai, untsu muja aidauk Apajuí antiamak bukuituinawai.
PSA 104:33 Wi eke iwaku pujuttag nuaduik Tuke Pujuun, mina Apajuíjun emematkun kantamtain kantamjuattajai.
PSA 104:34 Tuja Tuke Pujuu wi anentaibaujua nuna shiig aneas diigtusti, wagki minak niyai shiig aneamujuk ajutui.
PSA 104:35 ¡Aents pegkegchaun takau aidau Apajuí ememattan dakituidauk ashí jinawag megkaejatnume! ¡Ashí mina wakanjujai Tuke Pujuun emematkun pegkegnum chichagtinaitjai! ¡Yajauwajah! Tuke Pujuun daaji ememattai ati.
PSA 105:1 ¡Tuke Pujuu see titajum! ¡Niina daaji pachisjum aents aidau ujaktajum! Dutikakjum nii takatji tikich nugkanmaya aidaush ujaktajum.
PSA 105:2 Apajuí wainchatai aidaun iwainajua nunú anentaimtusjum, kantamtai kantamjuatajum.
PSA 105:3 Niina daaji pegkegma nunú anentaimtusjum eme anenmamtajum. ¡Tuke Pujuun umijin aidautigmek, shiig aneastajum!
PSA 105:4 Ashí tsawantai Tuke Pujuu egaktajum, nuniakjum niina senchijiya nunú segatajum. ¡Tuké Apajuí egaktajum!
PSA 105:5 Apajuí ii aidautin, tuja niina inake Abraham, Jacob aajaku aina nunú wegantu aidaun etegjauwa nuna, ayamjak wainchatai ishamain aidaun iwainajua nunú anentaimtustajum. Tuja chicham umiktin agagbauwa dushakam adeagtajum.
PSA 105:7 Niyai Tuke Pujuu, iina Apajuíjiya nunú; niyai ashí aents aina nuna apujig.
PSA 105:8 Kuashat mijan nagkaemataish, nuna dutikatjai tusa anagkagtuamujinak Apajuík tuke kajimatkishtinai.
PSA 105:9 Nunak Abrahamjai umikua nuna, Isaakjaishkam ataktu umikui.
PSA 105:10 Nuna Jacobjaishkam umikui, tuja nunú tuke asatin Israel aents aidaunum juwakui.
PSA 105:11 Nuadui Apajuí niina chichajak: “Wi nugka Canaágnak amastajai, aminu tuke atina nuna”, tiuwai.
PSA 105:12 Israel wegantu aidauk ujumchik aajaku aina duwik nugkenchau asag, Canaán nugkanmak ijagjai betek wainak yujajaku ainawai.
PSA 105:13 Nunidau asag, tikich nugkanum shiyakag, nuwi batsamas, nuna ukuinak tikich apu aidau batsatbaunum jegawag, nuwi ujumchik tsawan pujusag, waja yujayanume.
PSA 105:14 Tujash Apajuík waitkastinme tusag idaisachmayi, nuadui ditan ayamjak apu aidaun suwimkan susabi.
PSA 105:15 Nuadui apu aidaun chichajak: “Mina aentsug wi etegjamu aina duka, tuja mina chichamjun etsejin aidaushkam makichkish waitkasaigpajum”, tiuwai.
PSA 105:16 Tuja Canaán nugkanum Apajuí ajak aidaun ashí ijinabi, dutikamu asa nujan tepeabi.
PSA 105:17 Tujash eke nujan tepeatsaig, Apajuí Josén emtika Egipto nugkanum awemauwai, dita yachi aidau wainka inataijai betek sujukajua nuna.
PSA 105:18 Dutikam Egipto nugkanum jegamtai, Josénak jijui dawenum jigkajag jukiag aents achika egketainum egkeawagmayi.
PSA 105:19 Tuja José kajamjamuji uminkati tusa, Tuke Pujuu niina dekapeak kuashat tsawan waitkastinme tiuwai.
PSA 105:20 Nunik waitu pujaun, Egipto nugkan apuji José jiiktajum tusa inamjamtai jiikiagmayi, dutika agkanmitkabi.
PSA 105:21 Dutika jiiki niina jeen apuji ema, nuigtu niinu aidau Egipto nugkanum ayaunak ashí diisti tusa niina idaitusui.
PSA 105:22 Tuja nuigtushkam apu atuwe aidaun, tuja tikich apu aidaunashkam nigki jintintua unuinakti tusa idaitusui.
PSA 105:23 Nunikbaunum Jacob Israel daagtin aajakua nunú Egipto nugkanum jegauwai. Nunik jegaa tikich nugkanmayayaitak Cam nugkanum pujusui.
PSA 105:24 Nunik pujusmatai, Apajuí nii aentsji aidaun kuashat uyujkauwai, dutika niina shiwaaji aidaun nagkaesau senchigtin emauwai.
PSA 105:25 Tujash egiptunmaya aidau Israel aents aidaun kajejiagti, dutikainak tsanujagtinme tusa Apajuí tsagkamkauwai.
PSA 105:26 Tuja kuashat waitkagtai, Apajuí niina inake etegkamujin Moisésan Aarógjai Egipto nugkanum awemauwai.
PSA 105:27 Nuadui Apajuí senchijin wainchatai ishamain aidaun Egipto nugkanum, Cam nugkanum iwainakajui.
PSA 105:28 Tuja Egipto nungkak ashí suwe wajasti tusa Apajuí suwe emabi. Nuna wainainayatak egiptunmaya aents aidauk, Apajuí chichamenak antugkachaju ainawai.
PSA 105:29 Tuja yumi aidaunak ashí numpa awajtusui; imanikmatai, namak aidaushkam jinawajui.
PSA 105:30 Takash aidaunashkam, ashí yaaktanum piyakti, nuniak apu pegajinish tuja nii ekemtaijinish utsaniag waitkasti tusa ishitkabi.
PSA 105:31 Apajuí nunikti timatai, anchi teteejai pachimnag, yujagkim wajukama imanik Egipto nugkanak akijuawabi.
PSA 105:32 Tuja yumin yutumtiktsuk, bicha kaya iman najaneaku jiijai pachimag nayaimpinmayan Egipto nugkanum yutumtikjabi.
PSA 105:33 Nunú yutak uva ajakbau aidaun, higo aidaunash ijinabi. Dutikak numi kanawe aidaunashkam ashí kupijabi.
PSA 105:34 Tuja Apajuí ataktushkam nunikti tusa timatai, manchi aidau shiig kuashat kaketukmayi. ¡Shiig kuashat asa dekapatash dekapamaichabi!
PSA 105:35 ¡Imaniau asa ajak ajanum ayaunak, tuja dupa aidaunak ashí amukagmayi!
PSA 105:36 ¡Dutiksag egiptunmaya aents aidaun uchiji iwai aidaunashkam ijituabi!
PSA 105:37 Dutika nuadui, iina muunji aidaunak Apajuí oro aidaun, tuja plata aidaun aatus uyumitkak jiigmayi. Nunik shimakush Israel aents aidauk makichik kayanakesh tukumkachagmayi.
PSA 105:38 Nunik shimiagtai, egiptunmaya aidauk ishamkagtu batsatu asag, shiig aneasaju ainawai.
PSA 105:39 Dutika jiija yujagmin awetiuwai, niina aentsji aidaun ejakti tusa; tuja dutiksag kashi diisag shiyaktinnashkam jii kegaun awetiuwai.
PSA 105:40 Tuja yumainji atsujam yapajuinak sumagtaish, codornisan ishitkabi; tuja nayaimpinmaya yutai susam nuna yuwawag ejemajag shiig aneasagmayi.
PSA 105:41 Tuja Moisés kayan awatmatai, kayanmaya yumi jiinkibi, nunik entsajai betek wajas uwegshunum akaikibi.
PSA 105:42 Apajuí yaunchuk Abrahaman anagkuamunak betek umikmayi.
PSA 105:43 Aatus Apajuí niina aentsji aidau Egipto nugkanum batsatun jiigmayi. Dutikam aents aidauk shiig aneenak untsumiagmayi.
PSA 105:44 Dutika yajuak nugka tikich aents aidau batsamtain susabi, dutikak ajak tikich aents aidau ajakbau aidaunashkam susabi.
PSA 105:45 Nunak Apajuí dutikauwai, juwi batsamas chicham umiktin agagbauwa nuna umiktinme tau asa. ¡Yajauwajah! Apajuí emematiagmi.
PSA 107:1 Tuke Pujuu see titajum, wagki niyai pegkejak, niina anenkajig tuke auwai.
PSA 107:2 Iina shiwaaji aidau inaku waitkatai batsatutin Tuke Pujuu niina senchijijai jiigmag agkanmitkagmabi titajum.
PSA 107:3 Dutijama etsa jiintai, etsa akaetai, nujinum, tsumunum batsamin aidautin yajupak ijupagmayi.
PSA 107:4 Tuja iina muunji aajakajua duka, wainak megkagag uwegshunum yujajakui, yaakat dita batsamainun wainainachu asag.
PSA 107:5 Nuninak nujantai, kitakai ashí jinawag yujagmayi.
PSA 107:6 Nunik waituinak Tuke Pujuun yaijatkata tusag segagmayi, nuna nii antujuk, dita waitiamujin yaigka agkanmitkabi.
PSA 107:7 Dutika jintintua dita shiig batsamsatnunum ejegawagmayi.
PSA 107:8 Nuadui Tuke Pujuu emematiagmi, niina anenkajin iina ayamjutpak ishamain wainchatai aidaun iwainajua, nunú pachisaja.
PSA 107:9 Wagki Apajuíyai aents kitakai jaunash, tuja nujantai jaunashkam suwa duka.
PSA 107:10 Tuja iina apachji aajakajua duka, inaku waitkainam pimpikiag wake besemag pujuagmayi.
PSA 107:11 Nunak Tuke Pujuun shiwagmainak, chicham umiktinun susauwa nunash uminachu asag nunikajui.
PSA 107:12 Nuadui Apajuí suwimak susam shiig senchi waitujakajui, dita yaimainuk makichkish atsugsamu asa.
PSA 107:13 Nunik waituinak Tuke Pujuun yaijatkata tusa segagmayi, nuna Apajuí antujuk, dita waitiamujin yaigka agkanmitkabi.
PSA 107:14 Dutika senchi inainaku waitkam batsatun agkanmitkabi.
PSA 107:15 ¡Tuke Pujuu anenkega nunú see titajum, wagki nii jutiin ayamjutpak kuashat wainchatai ishamain aidaun iwainajua nuadui!
PSA 107:16 ¡Waiti bronce najanamunash, tuja jiju awajamu aidaujai, Apajuí ashí tsaikui!
PSA 107:17 Tuja iina apachji aidauk anentainkachu asag, dita pegkegchaujin jata achikam senchi waitiagmayi.
PSA 107:18 Nunik jinuinak yujumkan tsumainak yutsuk, nujantai ashí jinaa batsabi.
PSA 107:19 Nunik waituinak Tuke Pujuun yaijatkata tusa segagmayi, nuna Apajuí antujuk, dita waitiamujin yaigka agkanmitkabi.
PSA 107:20 Ashí niina chichamenig etsagakmayi. ¡Aatus ashí jinaa batsatun uwemtikjabi!
PSA 107:21 Tuke Pujuun anenkega nunú see titajum, wagki nii jutiin ayamjutpak, kuashat wainchatai ishamain aidaun iwainajua nuadui.
PSA 107:22 Apajuí yaimpakua nunú anentaimtusjum, see takujum kuntin maa apeatajum, dutikakjum nii dutikamuji pachisjum shiig aneasjum senchi untsumkajum etsegkatajum.
PSA 107:23 Iina apachji aajaku aina nunú lanchanum nayants shiyaku aidauk, nayantsa amain tikich nugkanum wajiin sujak yujau ainawai.
PSA 107:24 Ibau nayants muunnum yujasag, junak dekas Tuke Pujuuwap najanauwaita tusa dekawajui.
PSA 107:25 Apajuí chichakmatai, dase ishamain iyagmayi, imaniak nayantsan shiig senchi tsukatmitkabi.
PSA 107:26 Imatikak lanchanak yaki ema ema ajuibi. ¡Imaniau asamtai, ayamjumamainchau dekapiagmayi!
PSA 107:27 Nuninak nampekujai betek winchainag tukumak iyainiagmayi. Imaaninak lanchanum yujatan yacha ainayatak dutikmainchau dekapiagmayi.
PSA 107:28 Imanitai ishamainak Tuke Pujuun segagmayi, tusa segam antujuk yaigka uwemtijabi.
PSA 107:29 Dutikak dase ishamain wajak nayantsan tsukatmitkaunak imijakmayi.
PSA 107:30 Nunik mijakmatai, shiig aneasagmayi, tuja Apajuí ditanak yajuak dita jegatag tibaunum ejegauwai.
PSA 107:31 ¡Tuke Pujuu anenkega nunú see titajum! Wagki nii jutiin ayamjutpak, kuashat wainchatai ishamain aidaun iwainajua nuadui.
PSA 107:32 ¡Ashí aents aidautijum ijunjajum Apajuí ememattajum! Tuja Israel aents aidaun apuji múun aidautigmesh ijunjajum Apajuí ememattajum.
PSA 107:33 Apajuík namak múun aidaunash ukuya uwejush emawai, tuja yumi pukuni jiinunash ukuya buku emawai.
PSA 107:34 Tuja nugka ajak shiig tsapaunash, nuwiya aents aidau tudaujin ajak tsapachu emawai.
PSA 107:35 Uwejush yumi atsaunash kucha ain emawai, dutikak nugka buku ataish, yumi pukuni jiinin emawai.
PSA 107:36 Tuja aents nujantai waituidaunak yajuak nuwi batsawai, dutikam nuwi dita batsamsatnun yaaktan najanainawai.
PSA 107:37 Nuwi batsamas uva ajakag kuashat nejekun juuka yuwinawai.
PSA 107:38 Apajuí ditanak yayawai, tuja dita tagkuji aidaunashkam kuashat ikauntawai.
PSA 107:39 Untsu tikich aidauk kuashat waitkainamu asag, ujudauch ainawai.
PSA 107:40 Tuja Apajuík aents pegkegchau waitkagkagtin aina nunak kajejawai. Nuadui ditanak uwegshunum wainak yujas jinaati tusa idaisauwai.
PSA 107:41 Tuja aents ujudauch wake besemag pujaunash nii agkanmitkawai. Dutika nii uchijinak tagkujai betek kuashat uyujtawai.
PSA 107:42 Nuna aents Apajuí umijin aidau diisag shiig anenawai. Untsu aents pegkegchau aidauk datsaamainak ataktuk tumainchau dekapenawai.
PSA 107:43 Aents shiig anentaimkauk juna anentaimas diisti. Nuniak Tuke Pujuun anenkega nuna dekattawai.
PSA 110:1 David kantamamu Tuke Pujuu mina apujun chichajak: “Mina untsujui ekemsata, nunikamin wi amina shiwaajum aidaunak depetkan aminí ikaunmakmatai, ame inagminum”, tiuwai.
PSA 110:2 Jerusalégnum pujusa inamjati tusa Tuke Pujuu amina umigtamkae. Tuja amina shiwaajum aidaunak nii depeteawai.
PSA 110:3 Ame apu wajasamin, amina aentsjum aidau shiig aneas kaunawag, ame tabau umikmi tusa tujabiagtin ainawai. Tuja amek kashikmas jegashjuk tsawauwama numamtuk, kashi kashinig yamajam senchi jutatme.
PSA 110:4 Tuke Pujuu nii umiktinjin yapajinashtinun chichaak: “Ametme sacerdote Melquisedec aajakua nujai betek tuke sacerdote atinmek”, tiuwai.
PSA 110:5 Apajuík amejaig pujawai amina yaimpaktatus. Makichik tsawantai nii kajeka apu aidaunak ijinattawai.
PSA 110:6 Aents aidaun suwimkan susa ijinatnai, dutikam ashí nugkanmak aents jinauk tuwasua weaku atinai. ¡Nugka múun aidaun apuji aidaunash ashí ijinatnai!
PSA 110:7 Depetmak jintá minis yumi entsanmayan uwagtinai; nunik ataktu ichichmamjatnai.
PSA 115:1 Tuke Pujuuwah, jutiik eme anenkagtusaipa, dekas ima amek eme anenmamta, amina anenkagmin, tuja dekaskegmijai eme anenmamta.
PSA 115:2 Wagkag aents pegkegchau aidaush jutiin chichagtamainakush ¿tuwi pujawa atumi Apajuígmesh, tusash tujamiajainta?
PSA 115:3 Iina Apajuíjig nayaimpinum pujawai, tuja nii wakegamu aidaun ashí najankauwai.
PSA 115:4 Aents pegkegchau aidau apajuímtaijig oro, plata ainawai. Tuja duka aents najankamu ainawai.
PSA 115:5 Dita apajuímtaijig weni ajamaitak chichachu ainawai; jiishkam ajamaitak wainmachu ainawai.
PSA 115:6 Kuwishish ajuidau, tujash antuchu; nujintin, tujash mayatchau;
PSA 115:7 uwegtin aidau, tujash achimchau; nawentin aidau, tujash wekaechau; ¡makichik chichamujigkesh antugchatai ainawai!
PSA 115:8 Nuniau asamtai aents nuna najanin, tuja nunú dakumka najanamua nuna emematin aina duka dita apajuímtaijijai betek ainawai.
PSA 115:9 ¡Israel aents aidautigmek, Tuke Pujuuwaig kajinmamsa anentaimsatajum! Wagki nii jutiinak yaimpawai, tuja nigki kuitamjamui.
PSA 115:10 Sacerdote aidautigmesh ima Tuke Pujuuwaig kajinmamsa anentaimtajum. Wagki nii jutiinak yaimpawai, tuja nigki kuitamjamui.
PSA 115:11 Ashí aents Tuke Pujuu umijin aidautigmek, ¡Tuke Pujuuwaig kajinmamsa anentaimsatajum! Wagki nii jutiinak yaimpawai, tuja nigki kuitamjamui.
PSA 115:12 ¡Tuke Pujuu iinak kajimatjamtsuk pegkegnum yumigtamjatnai! ¡Israel aents aidaunashkam pegkegnum yumigjatnai! ¡Sacerdote aidaunashkam pegkegnum yumigjatnai!
PSA 115:13 Aents Tuke Pujuun eme anentus umijin aidaun: aents eme anentsa diishtai, eme anentsa diitai aidaujai Apajuí ashí ditanak pegkegnum yumigjatnai.
PSA 115:14 Tuke Pujuu atumi uchijum aidaunash, tuja nuna uchiji aidaunash uyujtugmaktinai.
PSA 115:15 ¡Tuke Pujuu nayaimpin, nugkajai najanauwa nunú aminak pegkegnum yumigtamsattawai!
PSA 115:16 Nayaimpia auk Tuke Pujuunui, tuja nugka nuna aents aidaun susauwai.
PSA 115:17 Jakau aidauk chichamainchau asag, Tuke Pujuunak emematmainchau ainawai.
PSA 115:18 Untsu ii iwaku aidautik tuke ememattinaitji. ¡Yajauwajah! Iina Apajuíji ememattai ati.
PSA 116:1 Wika Tuke Pujuunak aneajai, wagki wi segamun antugtuku asamtai.
PSA 116:2 Wagki wi segamun antugtuku asamtai, wi iwaku pujaknuk, niina tuke segatnaitjai.
PSA 116:3 Jata achigkamtaimpap jakattaja tusan ishamkabiajai, nuniakun wake besemag pujubiajai.
PSA 116:4 Nuniakun Tuke Pujuun segabiajai uwemtijugta tusan.
PSA 116:5 Tuke Pujuuk pegkejam, wait anenkagtinai, iina Apajuíjiya duka kakagchauch anejatin wajasui.
PSA 116:6 Tuke Pujuuk aents kakakchau aidaunash kuitamui. Wi kakaumainchau wajasan pujaishkam, nii minak uwemtijugmayi.
PSA 116:7 ¡Yamaik shiig aneasan pujumainaitjai, Tuke Pujuu pegkeg etiu asamtai!
PSA 116:8 Wagki Apajuí jamainun uwemtijug wi wake besemag buutku pujamugnash yaintuk uwemtijuja nuadui.
PSA 116:9 Tuja iwaku juju nugka juwi pujag nuaduik, Tuke Pujuunak tuke umigkatnaitjai.
PSA 116:10 Wika senchi waitiaknushkam, Apajuínak dekaskeapi tibaijai.
PSA 116:11 Tuja wi waugtukan chichaakun: “Ashí aents aidauk waitjin ainawai”, tibaijai.
PSA 116:12 ¿Tuke Pujuu mina pegkegnum yainkamunmash, wisha wajuk akimainaitja?
PSA 116:13 Tuja nii mina uwemtijugbaunum vinon anentag Tuke Pujuun suwakun, niina daajin pachisan ememattajai.
PSA 116:14 Wi umiktajai tusan Tuke Pujuun tiuwaitag nunak, yamai ashí niina aentsji aidau wainainamunum umiktatjai.
PSA 116:15 Tuke Pujuuk niina umijin aina nunú jakamtaig, wake besemag dekapeawai.
PSA 116:16 ¡Tuke Pujuuwah, wika amina inakmetjai! ¡Wika nuwa amina inakmea nuna uchijiyaitjai! ¡Ame minak achikbaujai betek ashí jakan pujai uwemtijugmayume!
PSA 116:17 Tuke Pujuuwah, ame uwemtijugbaunum see takun uwija maan apeakun ememattatjame, dutikakun daagmin pachisan segattajame.
PSA 116:18 Wi umiktajai tusan Tuke Pujuun tiuwaitag nunak, yamai ashí niina aentsji aidau wainainamunum umiktatjai.
PSA 116:19 Yaakat Jerusalégkan ejapeen, Tuke Pujuu jee pegkegma nuna waitijin jegantatak agkaju ayatak shugkuk ajigmauwa nuwi nunak dutikattajai. ¡Yajauwajah! Apajuí daaji ememattai ati.
PSA 118:1 Tuke Pujuu see titajum, wagki niyai pegkejak; niina anenkajig tuke auwai.
PSA 118:2 Israel aents aidauk yamaikiuch: “Apajuí anenkeg tuke auwai”, titinme.
PSA 118:3 Sacerdote aidaushkam: “Apajuí anenkeg tuke auwai”, titinme.
PSA 118:4 Tuke Pujuun eme anentus diin aidaushkam: “Apajuí anenkeg tuke auwai”, titinme.
PSA 118:5 Waittanum pujusan Tuke Pujuun untsukbaijai, dutika ai, aijuk uwemtijugmayi.
PSA 118:6 Tuke Pujuu wijaig pujawai; nuadui wika ishamkagtatsjai; minak makichkish pegkegchauk awajtumain ainatsui.
PSA 118:7 Tuke Pujuu wijaig pujawai; nuniau asa minak nii yaintui. ¡Nuadui mina shiwag aidau mina kajegtuina nuna nii ijinamun wainkattajai!
PSA 118:8 Aentsnum kajintsa anentaima wekaetsuk, dekas Tuke Pujuuwaig kajintsa anentaimainaitji.
PSA 118:9 Apu aidaunum kajintsa anentaima wekaetsuk, dekas Tuke Pujuuwaig kajintsa anentaimainaitji.
PSA 118:10 Tikich nugkanmaya aents aidau tuwagtukagmayi; tujash Tuke Pujuu daajin depetkamiajai.
PSA 118:11 Ashí tententuawagmayi; tujash Tuke Pujuu daajin depetkabiajai.
PSA 118:12 Etejai betek tuwagtukagmayi; tujash jagki ijumjamun jii apea emegkauwama imatikan ajapabiajai; ¡Tuke Pujuu daajin depetkabiajai!
PSA 118:13 Ajua maami tusag shitatkiagmayi; tujash minak Tuke Pujuu ayamjutkabi.
PSA 118:14 Wika Tuke Pujuu mina senchimtija nuna kantamjajai. ¡Niiyai mina uwemtijinuk!
PSA 118:15 Aents Apajuín umijin aina nuna jenig shiig aneas untsumainak: “Tuke Pujuun senchijiya nunú depetmake”, titinme.
PSA 118:16 ¡Tuke Pujuun senchijiya duka augmatkuish, makichkish ejemaitsui! ¡Tuke Pujuun senchijiya nunú depetmakui!
PSA 118:17 ¡Jakashtatjai, iwaku pujuttajai, wagki Tuke Pujuu iina ayamjutpak dutikauwa nuna etsegkatasan!
PSA 118:18 Tuke Pujuu minak shiig senchi suwimkan sujusmayi; tujash jakati tusag idaituschabi.
PSA 118:19 ¡Apajuí jee pegkegma nuna waitiji ujatjitajum; nuwi wayan Tuke Pujuun see titag tajai!
PSA 118:20 Juju waitiya duka Tuke Pujuu pujamunum waitaiyai; aents Apajuín nemajin aidauk nunú waitiya nuni wayawagtinai.
PSA 118:21 Tuke Pujuuwah, see tajame wagki ame antugtukam uwemtijuju asamin.
PSA 118:22 Kaya ekenag jegamin aidau kaya pegkegchauwai tusag, dakitjajua nunú yamai dekas kaya ima pegkeg atsumtai wajase.
PSA 118:23 Nunak Tuke Pujuu dutikae, duka yamaik puyattsa diimainai.
PSA 118:24 Juju tsawanta juwai, Tuke Pujuu iina ayamjutpakua nunú; nuadui ¡yamai shiig anenaku jiistamawagmi!
PSA 118:25 Tuke Pujuuwah, ¡wait aneasam uwemtikagtugta! Tuke Pujuuwah, ¡wait aneasam yaijatkata, shiig batsamsagmi!
PSA 118:26 ¡Tuke Pujuu awemamu mina nunú dekas ememattai ati! ¡Tuja Tuke Pujuu jee pegkegma nuwi pujusan atumin pegkegnum yumigkiajime!
PSA 118:27 Tuke Pujuuk Apajuíyai. ¡Apajuíyai tsaaptinun sujamsauk! Yagkug aidau yajuaka altarnum ejegawagmi, dutikawaja Apajuí aentsji aidau nuwi batsata nunú uyuntsagmi.
PSA 118:28 Amek mina Apajuíg asamin see tajame, nuniakun amina imanjumin emematjai.
PSA 118:29 Tuke Pujuu see titajum, wagki niyai pegkejak; niina anenkajig tuke auwai.
PSA 119:97 ¡Amina chichamjum umiktin sukagtusuitam nuna shiig senchi aneau asan, kashi kashinig nuwig anentaimjai!
PSA 119:98 Nunú chicham umiktin agagbau umiktajum tusa sukagtusuitam nunú mina shiwag aidaun nagkaesau yachamtijawai, wagki nunú jintinjau asamtai.
PSA 119:99 Wika nuna ausa dekau asan, mina jintinjin aidaun nagkaesau chicham umiktin agagbauwa nuwi anentaimjai.
PSA 119:100 Tuja amina chichamjum umiktin sukagtusuitam nuna umiau asan, múun amina chichamjumin etsejin aidaun nagkaesau amina chichamjumnak dekajai.
PSA 119:101 Amina chichamjumin umiktag tau asan, pegkegchau aina nunak idaisabiajai.
PSA 119:102 Tuja ame minak jintinjau asamin, aminu chicham umiktina nunak idaisachmaijai.
PSA 119:103 Ame umiktin anagkagtuawaitam nunak mina kayakmataijuig shiig yumintsak dekapeajai, tuja mina wenujui dapa yumijin nagkaesau yumintsak dekapeajai.
PSA 119:104 Amina chichamjum umiktin sukagtusuitam nuwiya unuimaju asan, waitjut aina nunak kajejajai.
PSA 119:105 Amina chichamjum agagbauwa nunú jii ekemakbaujai betek, wi weamunum tsaaptin emawai, tukumak iyajai tusa.
PSA 119:106 Wi yaunchuk chichaakun, umiktajai tiuwaitag nunak, ataktushkam tajai: “Amina chichamem pegkegma nunak dekas umiktatjai.”
PSA 119:107 ¡Tuke Pujuuwah, shiig pimpikin wake besemag pujajai! ¡Ataktu ichichtugta, ame chichamjum wajintu chichawa dutiksamek!
PSA 119:108 Tuke Pujuuwah, wi amina emematjam nunú shiig aneasam jujutkita, nuniakum amina chichamjumia nunú jintinjuata.
PSA 119:109 Wika tuké jamainnum pujajai, tujash ame jintinjuamua nunak kajimattsujai.
PSA 119:110 Aents pegkegchau aidau, utugchatan apujtujuinawai, tujash amina chichamjum umiktin sukagtusuitam nunak kajimatkinuk idaitsujai.
PSA 119:111 Amina chichamjum umiktina nunú minak tuké shiig aneasa pujutan sujawai.
PSA 119:112 Wika amina chichamjum umiktin sukagtusuitam nunak wakejusan, atakea duwish tuke umiktin atajai, tusan tumamjai.
PSA 119:129 Amina chichamjum umiktina duka shiig pegkejai; nuadui wika betek umiajai.
PSA 119:130 Amina chichamjum etsegbauwa duka tsaaptinjai betekai; nuniau asa aents kakagchauchinak shiig dekamtikawai.
PSA 119:131 Amina chichamjum umiktin sukagtusuitam nuna dekatasan wakegajai, nuniakun itugkanuk shiig dekawag tusa anentaimkun waitiajai.
PSA 119:132 Tuke Pujuuwah, amina anempau aidau wait anentam dutiksamek, minash diigsam wait anenjugta.
PSA 119:133 Amina chichamjum wajintua dutiksamek awekattsata; pegkegchau wagagkiti tusamek idaitusaipa.
PSA 119:134 Aents pegkegchau aidau mantuawainum ayamjutkata, wika amina chichamjum umiktin sukagtusuitam nuna umiktasan wakegajai.
PSA 119:135 Wi amina inakmetag dusha shiig aneasam diigsata, nuniakum nunú chichamem jintinjuata.
PSA 119:136 Amina chichamjumin eme anentus uminachu asamtai, shiig senchi buutjai.
PSA 119:137 Tuke Pujuuwah, amek pegkegmaitme; tuja ame suwimak sukagtam dushakam pegkegnum jintinkagtawai.
PSA 119:138 Chicham umiktin ame sukagtusuitam duka waitchauwai, betek uminnai.
PSA 119:139 Mina shiwag aidau amina chichamjumin uminachkui, kajeakun shiig senchi waitiajai.
PSA 119:140 Amina chichamjumik ashí dekapsamu dekas pegkegmai, nuadui wika amina inakminuk nuna wakegajai.
PSA 119:141 Wika dushiktai, wainkauchitjai, tujash amina chichamjum umiktin sukagtusuitam nunak kajimattsujai.
PSA 119:142 Amina takatjum pegkeja duka tuké imanisag auwai, tuja amina chichamjum umiktin agagbauwa duka dekas shiig pegkegmai.
PSA 119:143 Waitiakun wake besemag pujubiajai; tujash amina chichamjum umiktin sukagtusuitam nunak minak shiig anemtijusmayi.
PSA 119:144 Ame chicham umikuitam duka makichkish yapajinchauwai. ¡Yainkata wisha nuna shiig antukan umiktajai!
PSA 121:1 Atushat wekaeku Apajuíyai anentaimsa kantabau Muja aidaun pagkain diyakun: ¿Tuwiya taag minash ayamjutkainta? tajai.
PSA 121:2 Minak Tuke Pujuu nayaimpin nugkajai najanauwa nunú yainkattawai.
PSA 121:3 ¡Apajuík waitkastinme tusag makichkish idaituschattawai! ¡Amina kuitamjamna duka makichkish kanatsui!
PSA 121:4 Nigka makichkish kanuchui; Israel aents aidaun kuitamna duka makichkish kanuchui.
PSA 121:5 Tuke Pujuu aminak kuitamjamui; Tuke Pujuu aminak ejaka kuitamjamui. Niig amina yaimpaktatus amejai ijutkawai.
PSA 121:6 Tuja tsawaishkam etsag senchi sukupakug waitkagmaschattawai, antsag nantushkam waitkagmaschattawai.
PSA 121:7 Ishamain ataish, Tuke Pujuu ejapak kuitamjamui; tuja nii amina pujutjumnash kuitamjutpawai.
PSA 121:8 Tuke Pujuuk yamaya juwish, tuja ajumaish ame tuwi wetatme nuniaminish, tuja wakitki minaminish, nigki tuké kuitamjamkatnai.
PSA 122:1 David Jerusalén wakatatus wesa shiig aneak kantamamu Tuke Pujuu jee pegkegma nuwi wemi tujutuinakui, wika shiig anebiajai.
PSA 122:2 Jerusalégkah, yamai juwi waitinum kaunaji.
PSA 122:3 Jerusalén yaaktamamua nuwi ashí tikich yaakat aidaushkam ijutkau ainawai.
PSA 122:4 Ashí Israel aents Tuke Pujuun aentsji aidauk Jerusalén tuwainawai, Apajuín emematuinak, wagki nuwi Apajuí ememattajum tibau asag, nuna umiinak.
PSA 122:5 Nuwi awai chicham inagnatai, tuja Davitan pujusa inamtaijishkam.
PSA 122:6 Nuadui: “Jerusalégkah, aminak utugchatak atsugtamti; tuja amina anempaina dushakam agkan pujustinme.
PSA 122:7 Yaakat peeja apakbauwa nuna initken aents batsata dushakam agkan, tuja jega apu pujusa inamtaijiya dushakam waitkaschamu ati”, titajum.
PSA 122:8 Tuja mina yatsug aidaun kumpag aidaujai chichagkun: “Atumnash utugchatak atsugtamtinme”, tajai.
PSA 122:9 Untsu Jerusalégkah, aminig pujut pegkeg ati tusa wakegajai, wagki Tuke Pujuu amina Apajuígmi jee pegkegma nunú au asamtai.
PSA 124:1 David Jerusalén wakatatus wesa shiig aneak kantamamu Ashí Israel aents aidautigmek, Tuke Pujuu iina yaimpakchau akuish, wajukauk ainji, tumamtajum.
PSA 124:2 Tuke Pujuu iina yaimpakchau ataik, aents aidau jetepagmaya nuaduik,
PSA 124:3 ashí ijipamain awajtamkajui, senchi kajegtamkaju asag.
PSA 124:4 Dutijamawagmatai namak dujajak tajaka ajapama numamtuk ajapeam amain wajakuitji.
PSA 124:5 Namak chichijam tajaka ajapama numamtuk ajapjamain awajtamkajui.
PSA 124:6 ¡Tuke Pujuuk tuke pegkegnum chichagtai ati, wagki shiwaaji ijinatnume tusa idaitamsachu asamtai!
PSA 124:7 Aents chigkin achiktatus detuamunum chigki nemak tsujimak wegama numamtuk, iishkam shiwag achigmak mantamatag tujamainakui, pisaja uwemjabiaji.
PSA 124:8 Tuke Pujuu nayaimpin nugkajai najanauwa nunuwai ayamkagtinuk.
PSA 126:1 Jerusalén wakatatus wesag shiig aneenak kantamawagbau Achija yajupakagmatai, waitu batsatutin Tuke Pujuu awagtamag Jerusalén ikaupamtai, kajanmatskait dekapin ayaji.
PSA 126:2 Nuniaku senchi dushimiaji, imaniaku shiig aneasa senchi kantamaiji. Nuniajin tikich nugkanmaya aents pegkegchau aidau chichainak: “¡Tuke Pujuu ditanak shiig pegkegnum yaigke!” tuyanume.
PSA 126:3 Duka dekaske, ¡Tuke Pujuu iinak yaimpak agkanmitkagmabi! ¡Nuadui iishkam shiig anebiaji!
PSA 126:4 ¡Tuke Pujuuwah, yumi uwegshunum yututai, entsa najanea akagama numamtuk, ataktu awagkim Jerusalén itajatuata!
PSA 126:5 Aents buu buuttajai ajakmaku aidauk, atakea duwi shiig aneas juukagtinai.
PSA 126:6 Tuja aents aidau ajak pegkejan juki ajakmatatus buutkabaikia shiyakaju aidauk, dita ajakmamunmayan juukag, shiig aneas kantamkiag dita jeen wakitkiagtinai.
PSA 127:1 Salomón Jerusalén wakatatus wesa shiig aneak kantamamu Tuke Pujuu jegan jegamchataik, jegá jegamin aidauk wainak takak waituinawai; tuja Tuke Pujuu yaakta kuitamchataik, yaaktan kuitamin aidauk wainak kuitamak waituinawai.
PSA 127:2 Ajakma yuwatatus takak, kashikmas nantaki tuke etsan akapakush, kuashat juuka yuwatnunig wainak imanik waituinawai. Nuninai Apajuík niina kumpajinak kanak tepetaish, nii yuwatnujinak ashí suwawai.
PSA 127:3 Iina uchiji aina duka, Tuke Pujuu anentag pegkejuch amasbau ainawai.
PSA 127:4 Ii datsa ajin iina uchiji akiinaina duka, aents maanitan yacha nuna flechajijai betek ainawai.
PSA 127:5 Nuadui aents kuashat uchigtina duka shiig aneasagtin ainawai. Tuja niina shiwaaji aidaujai igkuniakush dushikiam achatnai, niina uchiji kuashat asa, apajin ayamjukagtinai.
PSA 130:1 Jerusalén wakatatus wesag shiig anenaku kantamawagbau Tuke Pujuuwah, waanum initak egkema pujusan amina untsuagme.
PSA 130:2 ¡Apuh, wi untsuajam nunú antugtukta! ¡Wi amina egakun untsumag nunú antugtukam yainkata!
PSA 130:3 Tuke Pujuuwah, ame tsagkugkagtugchawaitkuminig, iwakuk batsamaitsuji.
PSA 130:4 Tujash ame tsagkugkagtau asam, eme anentsa umijam atatme.
PSA 130:5 Wika Tuke Pujuuwai ashí mina anentaigjai, kajintsan pujajai. Tuja nii anagkagtuawa nunashkam dekaskeapi tajai.
PSA 130:6 Wika yaakta kuitamin wajupa asag tsawajat tusa, tsawantan dakajama numamtuk mina Apajuíjun dakajai.
PSA 130:7 Israel aents aidautigmek Tuke Pujuu taatnuji dakastajum; wagki niyai awai anentak, tuja ashí agkanmaetashkam.
PSA 130:8 Apajuí Israel aents aidaun tudaujinak ashí tsagkujug agkanmitkattawai.
PSA 137:1 Babilonia namak aidaunum uwet pekaamsaja, Jerusalén anentaimtusa buutiaji.
PSA 137:2 Nuwi numi ayaunum nuna kanawen iina arpaji aidau nenayaji.
PSA 137:3 Nunika nuwi batsatjin suntag iina achipag yajupaku aidau chichagtamainak: “¡Shiig aneasjum kantamatajum, tuja atumi nugkem Sión pachisjumshakam kantamatajum!” tusa waitkagmayanume.
PSA 137:4 Iik makichkish iina Apajuíji kantamjutaig tikich nugkanmak kantamaitsuji, tuyaji.
PSA 137:5 ¡Jerusalégkah, wi amina kajimatkin idaitaik, mina uweg untsujua duka makichkish achika takamainchau wajasti!
PSA 137:6 ¡Tuja wi amina eme anentsuk, kajimatkin idaikun shiig aneasan pujutaik, mina idaijuk kayakmataijui nujamak asati.
PSA 137:7 Tuke Pujuuwah, babilonianmaya aents aidau Jerusalégkan tsaikajua duwi, Edom aents aidau chichainak: “¡Ashí tsaiktajum!” tusa imatianum nunú kajimatki idaisaipa!
PSA 137:8 ¡Babiloniah, ameshkam tsayam atatme! ¡Ame jutii aidauti waitkagkagtam nuna iiktamainak tsaipaidauk shiig aneasagtin atinme!
PSA 137:9 ¡Amina uchijum aidaun achika yajuakag kayanum anugkag tsupig ijinawagtina nunak Apajuí pegkegnum yumigjatin ati!
PSA 139:1 David kantamamu Tuke Pujuuwah, ame minak shiig dekagme.
PSA 139:2 Ame wi dutikamu aina duka ashí dekame, amek atushat pujusmesh, wi wajuk anentaimja dushakam dekame.
PSA 139:3 Wi wajuk wekaeja duka amek ashí dekame, ¡wi wajina takaja dushakam ashí dekame!
PSA 139:4 Wika eke chichatsaig, wi wajina titag taja duka amek emtikam dekame.
PSA 139:5 Ame minak ashí tententuam, amina uwegmin achigsam pujame.
PSA 139:6 Wika amina yachajum imana nunak kakajus dekamainchau dekapeajai. Mina dekatjuk nuwig makichkish jegatsui.
PSA 139:7 Amina Wakanmin ukuknush ¿tuki wetaja? Ame ashí nugkanum dekam nuniaish, ¿wisha itug tupikaknuk uumjuktagme?
PSA 139:8 Wi nayaimpinum wakamtaish, amek nuwi pujuttame, tuja wi nugka initken akaikimtaish, amek nuwishkam pujuttame.
PSA 139:9 Wi nanaakan etsa minitaiya nuni wemataish, ame minak achigkau atatme, tuja etsa akaetaiya nuni nayantsa amain wenu pujusmataishkam, ame minak yainkattame.
PSA 139:11 Wi suwenum uumkatjai tumainaitjai, tuja nuniachkush tsawaiya nunú suwe wajasmataish,
PSA 139:12 suwea duka minak aminig ugmaitsui; ame diismak kashia duka tsaaptinai. ¡Ame diismak suwea duka tsaaptinjai betekai!
PSA 139:13 Ame mina iyashjuk najatjuawaitme, ame minak, mina dukuju wakeen najatuawaitme.
PSA 139:14 Wika ame imatiksa najanamu asan see tajame, ame najanamu aina duka ashí pegkejai. ¡Wika nunak shiig dekajai!
PSA 139:15 Wi initak wainkachbau mina dukuju wakeen najaneauwaitag duka ame waitmayume, eke najaneaig wajupa tsawan pujustinaitja duka ame umigtukuitme. ¡Nunú amina papiigmin agagbauwai!
PSA 139:17 Chah Apajuíjuh, amina anentaimtagmia nunak shiig anentaimja ejeyin dekamainchau dekapeajai. ¡Untsu nuna pachisan augmattsatag takun ima utugchat dekapmainaitjai!
PSA 139:18 Nuna dekapagtajai takunush, kamatak kuashta iman asamtai, kakajus dekapamaitsujai. ¡Tuja kanaja shintaish amek wijaig pujame!
PSA 139:19 Apajuíyah, aents pegkegchau aina duka ijinata, dutikakum magkagtin aidaushkam datupatjukta.
PSA 139:20 Nunú aents aidauk amina daagmin pachisag pegkegchaun chichainawai. Nuninak amijai wainak shiwagmagainawai.
PSA 139:21 Tuke Pujuuwah, amina kajegtamaidaunak wishakam kajejajai, tuja amina dakitjamaidaunashkam dutiksanuk dakitajai.
PSA 139:22 ¡Nunú aents aidaunak shiig senchi kajejajai! Amina shiwaajum aina duka mina shiwag ainawai.
PSA 139:23 Chah Apajuíyah, mina anentaijush shiig diigtusta, dutikam mina anentaimtajush shiig dekapjuttsata.
PSA 139:24 Tudau jintan aintsujash nunú diigtusta, nuniakum jinta pujut nagkankashtinnum ekagtina nuni etita.
PSA 145:1 David kantamamu Mina apug Apajuíyah, amina daajum ajumaish tuke atina nuna pachisan etsegkatjai. Tuja amina daagminak tuké pegkegnum chichagtinaitjai.
PSA 145:2 Ashí tsawantai aminak pegkegnum chichagtatjame, nuniakun amina daagmin tuke ememattinaitjai.
PSA 145:3 Tuke Pujuuk dekas múuntai, iman asa ima nigki emematam amainai, iman asamtai anentaimsaish, kakajus dekamaitsui.
PSA 145:4 Uchi akiinak wegagtina duka ame pegkeg iwainajuitam nuna emematiagtinai. Tuja amina senchigmejai wainchatai ishamain aidau iwainajuitam nunú etsegnaktinai.
PSA 145:5 Amina imanjumin tsaaptinjumjai pachisag etsejiagtinai. Nuninakui wishakam ame iwainajuitam nuna pachisan chichattajai.
PSA 145:6 Amina senchigmin shiwaajum aidau depetnaitam nuna pachisag chichagtinai. Nuninakui wishakam ame múuntaitam nuna pachisan chichattajai.
PSA 145:7 Amina wait anenkagtutaigmin pachisag etsejiagtinai; nuninak shiig aneas kantamainak: ¡Apajuíyai pegkegmak! tujamiagtinai.
PSA 145:8 Tuke Pujuuk kakagchauch, wait anenkagtin; wamak kajechu anentak wajasui.
PSA 145:9 Tuke Pujuuk ashí aents aidaun kuitamui; tuja tikich nii najankamu aina nunashkam puyatjus kuitamui.
PSA 145:10 ¡Tuke Pujuuwah, ashí ame najankamu aidau emematjamtinme! ¡Tuja amina umigtamin aidaushkam pegkegnum chichagtamtinme!
PSA 145:11 ¡Amina inamtaijum pegkegma nuna pachisag chichatnume! ¡Tuja amina senchigmejai wainchatai ishamain aidau iwainajuitam nuna pachisag chichagtatui!
PSA 145:12 ¡Tuja amina senchigmea nuna, ame inamtaijum pegkegma nujai ashí aents aidau dekaatnume!
PSA 145:13 Amina inamtaigmea duka ajumaish tuke atinai, nuadui ajumaish amek tuke inamtinaitme.
PSA 145:14 Tuke Pujuu aents wake besemag pujaunash yayawai, tuja kakakchau wajas pujaunash senchimtikawai.
PSA 145:15 Apujuh, ashí aents aidauk amina dakagmainawai, yutain sujamsati tusa.
PSA 145:16 Nuninakui ame shiig aneasam suwame, nuna ashí iwaku aidauk yuwawag ejemakag shiig anenawai.
PSA 145:17 Tuke Pujuuk ashí nii anagkagtuamunak betek uminai, tuja nii najankamu aina nunak shiig anentawai.
PSA 145:18 Tuke Pujuuk aents niina dekaskenum segau aina nujai ijutkawai.
PSA 145:19 Tuja niina eme anentus umijin aina nunú segamak antujuk yaigka uwemtikui.
PSA 145:20 Tuke Pujuuk niina aneen aidaun kuitamui; untsu aents pegkegchau aidaunak ijina utsawai.
PSA 145:21 ¡Wika kantamkun Tuke Pujuun ememattatjai! ¡Ashí aents nugkanum batsamin aidauk Apajuí daaji pegkegma nuna pachisag tuké ajumaish ememattin atinme!
PSA 148:1 ¡Iina Apajuíji emematiagmi! ¡Nayaim aidautijum Tuke Pujuu ememattajum! ¡Yakí agkajunum Apajuí ememattajum!
PSA 148:2 ¡Atum Apajuí aentsji ángel aidautijum Apajuí ememattajum! ¡Nayaimpinmaya suntag aidauwah, Apajuí ememattajum!
PSA 148:3 ¡Etsa, nantu aidauwah, Apajuí ememattajum! ¡Yaya aidautigmesh Apajuí ememattajum!
PSA 148:4 ¡Yumi yakiya aidautigmesh Apajuí ememattajum! ¡Nayaim shiig múunta dushakam Apajuín emematti!
PSA 148:5 Tuke Pujuu daaji ememattajum, wagki nii chichakmatai, ashí najaneakua nuadui.
PSA 148:6 Nii ashí umikui tuke asatnun; dutika chichaman umikui atakesh yapajinashtinun.
PSA 148:7 ¡Nugkaya aidautigmesh, tuja nayantsanum batsamin kuntin múun aidautigmesh, nayantsa initken batsamin aidaujaí Tuke Pujuu ememattajum!
PSA 148:8 ¡Chaajip, bicha, nieve, yujagkim aidautigmesh, tuja dase Apajuí dasenkati tima ishamain dasentin aidautigmesh,
PSA 148:9 muja aidautigmesh, nain aidautigmesh, tuja ashí setug aidautigmesh, numi neje yujutai aidautigmesh Apajuí ememattajum!
PSA 148:10 ¡Kuntin tagkumtai, kuntin tagkumchatai, chigki aidau, kuntin japiinas yujau aidautigmesh,
PSA 148:11 tuja ashí nugka múun aidaun apuji aidautigmesh, atumi aentsjum aidaujai, apu ashí nugkanmaya aidautigmesh,
PSA 148:12 aishmag, nuwa, datsa, múuntuch aidautigmesh,
PSA 148:13 ashí Tuke Pujuun daaji ememattajum, wagki ima niina daajiya duke múuntak! ¡Niina imanjiya duka nayaimpin nugkajai nagkaesau múuntai!
PSA 148:14 ¡Apajuí niina aentsji aidaunak senchimtikawai! Nuadui niina aentsji Israel wegantu aidautik nii emematuinaji. ¡Yajauwajah! Apajuí ememattai ati.
PSA 150:1 ¡Yajauwajah! ¡Apajuí niina jee pegkegma nuwi ememattajum! ¡Apajuí nayaim wigkaya nuna niina senchijijai najanauwa nuwi ememattajum!
PSA 150:2 ¡Niina senchijin wainchatai aidaun iwainajua duwi ememattajum! ¡Niina imanjig nagkatkachua duwi ememattajum!
PSA 150:3 ¡Uwija kachuji aidau umpuakjum ememattajum, arpa, salterio aatsa awatkujum ememattajum!
PSA 150:4 ¡Pandero aidau awatkujum nantsemkijum ememattajum! ¡Pigkui umpuakjum, guitarra awatkujum ememattajum!
PSA 150:5 ¡Platillo awatkujum ememattajum! ¡Platillo senchi shinin aina nunú awatkujum ememattajum!
PSA 150:6 ¡Ashí pujutji ajamu aidauk Tuke Pujuun ememattinme! ¡Yajauwajah!
PRO 1:1 Juju ainawai apu Salomón, Davita uchiji, Israel aents aidaun apuji aajakua nunú tibau.
PRO 1:2 Juna tiuwa nunak: Niina aentsji Israel wegantu aidau yacha shiig anentaimkau atinme, nuninak dekas chicham pegkeg aina nuna dekau atinme.
PRO 1:3 Nuninak jintiamu antuka jutan, wainak chichashtan, shiig takatan, imagnisa emetmamja pujutan,
PRO 1:4 tuja datsauch imanis jintiag anentaimchau aidaun jintintua wajiu aneaku emak, shiig anentaimsa eseja pujutan unuinagtatus agajui.
PRO 1:5 Aents yacha shiig anentaimkauwa duka juju jintiamua nunak shiig antawai, nunik nuni kuashat unuimatan shiig anentaimtajai juwawai.
PRO 1:6 Wagki niig aents yacha shiig anentaimkau aidau tuja dita apachji augmattsamu, etsegbaun, tuja adivinanza jintiamu aidaun aatus antuka unuimagtag tau asa.
PRO 1:7 Yachameta duka Tuke Pujuu eme anentsa umigbauwa nuwi nagkamnawai. Tuja aents pegkegchau aidauk unuimat pegkeg jintiamua nunak dakitawai.
PRO 1:8 Uchuchih, amina apa chichame antugkata, tuja amina duku jintinjabaush kajimatki idaisaipa.
PRO 1:9 Nii jintinjabauwa duka amina nugkutaijum pegkeg nugkuaju, tuja atsejutai corona atsejaku amainaitam nujai betekai.
PRO 1:10 Uchuchih, aents pegkegchau aidau tsanupagtag tuinakuish antugkaipa.
PRO 1:11 Tuja dita tujamiajaintaih: “Juwi taata nunikamin jutijai ijunja tuke aneasa ii wakegamu umiktasa aents utugchatji atsugbau nagkaebaukesh maami,
PRO 1:12 dutikaku aents shiig anentaimkau aina dushakam dutiksaik maami. Dutikawaja nugka tai initak yutua ukukiagmi.
PRO 1:13 Dutika waji aidau yajuaka wiakchameawagmi. ¡Nuniaku iina jenig waji kasamkamu aidau yajuaka aimkagmi!
PRO 1:14 Nuadui taata nunikamin kasamkattag nunú akandaika yajuakmi”, tujamainakuish,
PRO 1:15 ¡amek uchuchi ditajaig wepa! Tuja dita pegkegchaun takaina duka amek tupanjata.
PRO 1:16 Wagki ditak pegkegchaun takastatus waugtuinawai; ¡Aentsun maatasashkam waugtuinawai!
PRO 1:17 Pishak achiktasa, pan wainmain apujtusmak, pishakak nuna wainu asa duka nagkaemamaitsui.
PRO 1:18 Tujash nunú aents aidauk dita jamainnak dekainayatak pempeentumakiag umigmamainawai.
PRO 1:19 Nuadui aents magkagtin aina duka wiakuch wetajai tukama, dita pegkegchau takamtin ¡ditashkam dutiksaik maam ainawai!
PRO 1:20 Unuimatak antugtuktinme tusa jinta aidaunum untsumainawai.
PRO 1:21 Unuimata duka yaakta waitijin, tuja tuwig ima senchi aents aidaush tuwawa nuwi aatus untsumainak:
PRO 1:22 “Datsauch imanis jintiag anentaimchau aidauwah, atumesh ¿wajutiya dushikagtutash, kajegkagtutash idaisattagme? Tuja unuimat dakitajum dusha ¿wajutiya idaisattagme? ¿Wajutiya unuimagtatjume?
PRO 1:23 Wi tajim nunú antuktajum, nuniakjumin wi atumnak mina wakanjun amastatjime, dutikakun mina anentaimtajun dekamtikattajime.
PRO 1:24 Wi atumnak untsuajime, tuja wi ipaajime kaunatajum tusan, tujash atumek mina antugtutak dakitagme.
PRO 1:25 Nuniau asajum, mina chichamjuk kajimatkijum idaisaugme, tuja wi atumin jintinbau antuka unuimatchakam dakitagme.
PRO 1:26 ¡Nuadui wishakam atum waitiakjuminish, tuja sapigmakjuminish ayatak dushittajai!
PRO 1:27 Tuja sapigmamu, waitut, wake besemag pujamu, waugkamin anentaibau aatus, dase wainchijai betek iyaak nugká ayaunak ashí tsaiyama imanik minitjamkui,
PRO 1:28 waitiakjum untsugkugminish, wika aikchatnaitjime. Egatkugmesh waitkashtinaitjume, untsugkugmesh ayam achattagme.
PRO 1:29 Wagki atumek unuimat pegkeja duka dakitau asajum, Apajuí umigtashkam dakitagme.
PRO 1:30 Nuniau asajum, mina chichameg antuka jutak dakitagme, tuja wi atumin nunikaigpajum tusan tajim dushakam dakitagme.
PRO 1:31 ¡Nuadui atumek nunú umiakjum waittsattagme! ¡Tuja atum wakegamu taka takakuajum pimpiktatjume!
PRO 1:32 Aents shiig emetug anentaimkachu aina nunak nii dekachbaujiya duke pempeentuki maawai. Tuja aents pegkegchau aina nunak nii wakejus pegkegchaun taka duke pempeentuki maawai.
PRO 1:33 Untsu mina chichamjun umigtauk makichkish ishamkagtutsuk agkan shiig pujustinai.”
PRO 3:1 Uchuchih, wi jintinkagtamua nunú kajimatkipa, tuja mina chichameg umiktin agagbauwa nunú amina anentaimin jukita.
PRO 3:2 Nunú umiakum, kuashat tsawan iwaku shiig aneasam pujustinaitme.
PRO 3:3 Tuja anenka duka, dekaskea nujai makichkish idaisatin aipa; duka nugkutaijai betek nugkuaju ata. Amina anentaimtagmin kajimatmainchau aneaku ata.
PRO 3:4 Nuniakum Apajuí wait anentam atatme, tuja aents aidaushkam wait anenjamjagtatui.
PRO 3:5 Amina dekatjumin kajinmamsa anentaimtsuk, ima Tuke Pujuuwaig ashí kajinmamsam anentaimta.
PRO 3:6 Ashí ame takattam duka Apajuí anentaimtusam takasta, nuniamin nii pujut pegkegnum etamtatui.
PRO 3:7 Ame ima yacha jumamipa, duka nunitsuk Tuke Pujuu umigkata, nuniakum pegkegchau aina nunú tupanjata.
PRO 3:8 Nuniakum jamamtuchu, wajiu pegkeg pujuttame.
PRO 3:9 Amina tagkujum aidau, wajijum aidau akanka Tuke Pujuu suwakum emematta; dutikakum ajak ajakmamu aina nuwiyashkam yama nagkamchaku juukbau Tuke Pujuu susata.
PRO 3:10 Dutikakum yutanmash, tuja umutnumash atsumkas pujuttame.
PRO 3:11 Uchuchih, Tuke Pujuu esetamatatus suwimkan amaakuig dakitjaipa, tuja nii chichagtamkuish kajekaipa.
PRO 3:12 Wagki Tuke Pujuuk makichik múun uchijin jintintak, suwimkan suwama numamtuk, nii aneamu aidaun jintintak suwimkan suwawai.
PRO 3:13 Datsauch unuimaju, shiig anentaimkauwa nunak Apajuí pegkegnum yumigkiawai.
PRO 3:14 ¡Nunú unuimata nunuwai oron nagkaesau, plata nagkaesau pegkeja duka!
PRO 3:15 Unuimat shiig anentaimja pujutan sukagta duka, kaya shiig pegkejuch akik aina nuna nagkaesauwai. ¡Iman asa tikich waji pegkeg wakejumain aina nujaigkish betekchauwai!
PRO 3:16 Aents unuimaju, yacha duka kuashat mijan pujustinai, nunik wiakuch wajas eme anentam atinai.
PRO 3:17 Apajuín chichame umiamua nunú ima pegkejai, tuja nii jintinkagtamu betek umiamua nunú agkan pujutan sukagtawai.
PRO 3:18 Shiig anentaimja pujutan unuimaina nunú pujutan juwinawai. Shiig anentaimja pujutan juidauk, numi pujuta sukagtinjai betek ainawai. Tuja nunú unuimatan jukiaju aidauk shiig aneasagtinai.
PRO 6:6 Dakih, week wajuk takawa nunú weme diisam unuimagta:
PRO 6:7 Weeka inauk atsawai, tuja nunú dutikata tusa tumainchakam atsawai,
PRO 6:8 nuniaig nii yuwatnujinak esattin ajak juut jegamtai, juuka ijumui.
PRO 6:9 ¡Dakih, yamai kanaschaum jamah! ¿Wajupa asamea nantaktatme?
PRO 6:10 Ame kanú tepamin, tuja kajim mantamkui pukuga eketmin, tuja shiig kanagtasam pagku pagkumasa tepamin,
PRO 6:11 waitut, kasajai betek pachiachbau iyanjama shiig ujuuna awajtamsattawai.
PRO 6:16 Awai seisa imajin, tuja nuigtu makichik, nujai ijumjamak sieteya imani Tuke Pujuu shiig dakita nunú:
PRO 6:17 Emebau aidaun, waitjin aidaun, aents utugchatji atsujunak main aidaun,
PRO 6:18 aents anentaimtaji pegkegchau aidaun, pegkegchau takatan wakejus wekaetaun,
PRO 6:19 tikichin tsanumjin, tuja waitjin, chichama tsanumjug niina yachijaig maanimitkau aidaun aatus Apajuík dakitawai.
PRO 7:1 ¡Uchuchih, mina chichameg umikta, mina chichameg umiktin agagbauwa nunú shiig aneaku ata!
PRO 7:2 Mina chichameg umiktin agagbau aina nunú umikta; dutikakum amina jiim kuitamainaitam imatiksam kuitamkata, nuniakum iwaku pujuttame.
PRO 7:3 Amina tsajam uwegmin jigka nenau ata, anentaimin kajimatmainchau, aneaku ata.
PRO 7:4 Unuimata duka amina umaimijai betek emata, tuja yachameta nunú amina kumpajum emata.
PRO 7:5 Tuja nuwa aishin pegkegchaun takamjin, pegkegchin chichagtamak, tsanuja pegkegchaun takamtiksai tusa, unuimata nunú ayamjutpaktatui.
PRO 7:6 Makichik tsawantai jeganum niimtai ujaimunum wi niimkun wajayajai.
PRO 7:7 Nunika niimku wajai, uchi datsa imanik jintiag anentaimkachu aidau yujainamunum, nuwi makichik datsauch nuni nagkaemas shiig esegag anentaimkachun wainkabiajai.
PRO 7:8 Nunú uchik jinta aintug juwaki, jinta tuniakbaunum jeganta nunú nuwa jeega nuni wemayi.
PRO 7:9 Nuniaig etsa akaemayi, nuniak suwe wemayi.
PRO 7:10 Nuniai nuwa akika dutiktai iwagmamin aina nujai betek, makichik nuwa iwagmamjau, pegkegchaun takamin asa nunú anentaiyai jiinkibi uchin igkugtatus.
PRO 7:11 Nunú nuwak setakchau datsantainkachu, tuja emetnag jeen titu pujuchu,
PRO 7:12 jinta ain wekayin, tuja plazanum, jinta tuniakunum aents nagkaebaun igkug, pegkegchau takamtiksatatus wekayin.
PRO 7:13 Nunin asa nunú uchi wetatman pagkuk saukua ajantsuk chichajak:
PRO 7:14 “Wi mina apajuímtaiju emematkun kuntinun maamua nuna nejen ajamsatjame. Wi dutikatjai tibaugnak yamai betek umikjai.
PRO 7:15 Nuadui amina igkugtasan jiinkijai, amina wainkatasan shiig senchi egamjam nuna yamai igkugjame.
PRO 7:16 Mina pegakjui, colcha egiptunmaya lino pegkeg najanamun ainkamjai,
PRO 7:17 dutikan kugkuin pegkeg mirra, áloe, canela aidauwai ukatkamjai.
PRO 7:18 Wayata nunikamin ii wakegamu a aniakua tuke tsawampagmi.
PRO 7:19 Mina aishjuk atsawai; tikich nugkanum wemayi.
PRO 7:20 Kuichkin aimak juki wemayi, nuadui wamkek tashtatui, nantu antumai taattawai”, tau.
PRO 7:21 Tusa pegkegchin ima imatjakua wakemitkakmayi,
PRO 7:22 dutikam buey maatasa juki ematiama numamtuk, tuja kuntin maatasa dakamtikamunum japa egkemkamtai,
PRO 7:23 flechayai anentai ijutim jama numamtuk wajaktatus, tuja pishak achiktasa detua ukukbaunum awimpap jakattaja tusa dekachu asa, wemaina numamtuk nuwan pataetuk megkaekabi.
PRO 7:24 Nunika megkaekatag tachakmek uchuchih, mina chichameg antukam umikta.
PRO 7:25 Amek nunú nuwa duka anentaimtusmek diisaipa. Wagki nunú wekaetakum, amina pujutjumin megkaekaim.
PRO 7:26 Nunú nuwa duka kuashat aentsun pegkegchaun takamtikas emegkawai. ¡Nii emegkagbau aidauk shiig kuashtai!
PRO 7:27 Tuja niina jeen wayamua duka jaka megkaemaina nujai betekai.
PRO 8:1 Unuimata duka senchi untsumui; yachameta nunú niina chichamen antumtikagtawai.
PRO 8:2 Nain aidaunum, jinta amatkau aidaunum,
PRO 8:3 tuja waiti aidaunum, yaaktanum waitainum wajas untsumak:
PRO 8:4 “¡Ashí aents aidautigmin juna tajime!
PRO 8:5 Datsauch jintiag anentaimkachu aidautigmesh shiig anentaimkau atajum; tuja atum shiig anentaimkachu aidautigmek, eseja anentaimat unuimagtajum.
PRO 8:6 Pegkeg unuimamainun wi titatjim nunú shiig antuka jukitajum.
PRO 8:7 Wi titatag duka dekaske; minak waitjutak shiig awajtuchui.
PRO 8:8 Mina chichamjuk ashí pegkejai; wika jimag weninnuchuitjai.
PRO 8:9 Aents shiig anentaimkauwa nunú diismak mina chichamjuk dakitmainchau paan antumainai.
PRO 8:10 Plata jumain idaikujum, dekas wi jintiamua nunú jukitajum, tuja oro shiig pegkeg jumain idaikujum, dekas unuimata nunú jukitajum.
PRO 8:11 Unuimata duka kaya pegkejuch aina nuna nagkaesauwai. Tuja waji pegkeg wakemain ainakush, makichkish unuimatjaig betekchauwai.
PRO 8:12 Witjai dekatnuk, witjai chicham pegkejan sukagtinnuk, tuja wi dutikatag takunuk shiig anentaimsan dutikajai.
PRO 8:13 Tuke Pujuun umija duka pegkegchau takat aina nunak kajejawai. Tuja ememamu, tikich wagagkau anentaimat, pegkegchau takat, waitjut aina nunak wika kajejajai.
PRO 8:14 Chichagkagtut, pegkegnum anentaimat, yachamet, unuimat aina duka midau ainawai. Tuja senchia dushakam midauwai.
PRO 8:15 Wi nunikti tibau asag apu wenawai, nuninak chicham umiktin dekas pegkeg aidaun najanainawai.
PRO 8:16 Ashí apu nugkanum inamin aina duka, wi nunikti tibau asag inamainawai.
PRO 8:17 Tuja mina anentuidaunak wishakam dutiksanuk aneajai, tuja mina egatuidaunashkam wantintajai.
PRO 8:18 Wiakchamet, eme anentam ata, shiig pujut, waji wamak megkaejashtin aina nunashkam wi suwajai.
PRO 8:19 Wi sukagtamua duka oro pegkeja nuna nagkaesauwai, tuja wi sukagtamua duka plata akiken nagkaesauwai.
PRO 8:20 Wika tuke pegkejan takauwaitjai,
PRO 8:21 nuniau asan mina anentuidaunak, kuashat wajigtin wiakuch emajai.
PRO 8:22 “Tuke Pujuu minak najatuawai. Nii najankamu aina nunak eke najantsuk miná najatuawai.
PRO 8:23 Tuja nugkanak eke najantsuk miná najatuawai.
PRO 8:24 Mina najatuawa nuaduik nayantsak atsujakui, tuja yumi pukuni jiinaidaush, namak aidaush atsujakui.
PRO 8:25 Tuke Pujuuk muja aidaun, nain aidaun eke najantsuk miná najatuauwai.
PRO 8:26 Tuja nugkanak ikam aidaunash, nuigtu nugka yukukuntujai nugkan najankauwa nunakesh najantsuk miná najatuauwai.
PRO 8:27 Apajuí nayaimpin yumi piyajunum eneknak najanauwa nuaduik wika pujuyajai.
PRO 8:28 Tuja yakí agkajunum yujagmin najana umika, nayantsan initken yumi pukuni jiinaidaun epetug,
PRO 8:29 nayantsanum yumi piyag betsakai tusa emetug idayak, tuja nugka buchitmainchau atinun umikua nuadui nagkamsan,
PRO 8:30 wika Apajuí takakui, niijai takakun pujuyajai. Wi ayajai niina shiig anemtikin, tuja niina emtinig shiig aneasan wasugkamkun pujuyajai.
PRO 8:31 Apajuí nugka najanamun diisan shiig aneyajai, tuja nii aentsun najanauwa nuna diisan shiig aneamu ajuti.
PRO 8:32 “Nuadui uchig aidauwah, wi tajim nunú antugtuktajum: Wi tajim nunú umiakjumek, Apajuí yayaam atinaitjume.
PRO 8:33 Wi jintinjim nunú dakittsuk shiig unuimagtajum, nuniakjum shiig anentaimkau atajum.
PRO 8:34 Aents kashi kashinig mina jegajui taa mina chichamjun antugtauk shiig aneastinai, wagki Apajuí yayamu asa.
PRO 8:35 Mina igkuntuk pujutan juwawai, nunik Tuke Pujuu wait anentam awai.
PRO 8:36 Tuja mina pegkegchaun chichagtauk jaka megkaetanum pujawai. ¡Tuja mina kajegtuina duka jaka megkaetan aneenak núninawai!”
PRO 13:1 Uchi shiig anentaimkauwa duka niina apaji chichamen umignai, untsu uchi anentainkachua duka apaji chichamenak antugtsui.
PRO 13:2 Maki makichik aentsuk nii pegkeg chichakbaujinian pegkejan juwawai, untsu aents chichaman betek umichu aina duka dita pegkegchaujin suwimkan juwinawai.
PRO 13:3 Shiig anentaimag chichauk niina pujutjin kuitamak nuniawai, untsu wainak chichá wekaguk kuashat utugchatan igkuawai.
PRO 13:4 Aents dakia duka nii wakegamujin jukitag takush juwatsui, untsu aents takauwa nudauk kuashat waji ajawai.
PRO 13:5 Aents pegkegchau takatan tupanjauk waitjutnak dakitawai. Untsu aents pegkegchaun takauk eme anentsa diishtai, datsan chichajam auwai.
PRO 13:6 Shiig anentaimsa pujamua nunú aentsnak pegkeg emawai, untsu aents pegkegchaun takau aina nunak niina pegkegchaujig bakuawai.
PRO 13:7 Awai aents makichkish wajigtuchuitak wiakuch atajai tusa wakegau, tuja antsag kuashat wajigtin aidaushkam wajigtuchuapi tujuttinme tusa uumush ainawai.
PRO 13:8 Aents wiakcha duka achikmak, mantuawainum tusa ishamkagtak niina kuichkijin ashí akikmak uwemainai, untsu ujunauchik achigkachagtimpash tusa anentaimkug waitiatsui.
PRO 13:9 Aents pegkegchau takatan tupanjau aina duka tsaaptin pegkeg winchamtinama iman ainawai, untsu aents pegkegchauwa duka jii kajinkaujai betekai.
PRO 13:10 Ememata duka ima maanitnak inimui; untsu unuimata nunú aents chichama antuk umin aina nuwi awai.
PRO 13:11 Yupichuch wiakchameamua duka wamak amugak megkaewai; tuja aents shiig takak, diipas wiakchamea duka kuashat ikauwai.
PRO 13:12 Tuja ii wakegamu uminchakuig, wake besemag dekapnawai. Untsu ii atsumamu betek uminkuig, shiig aneamu ajutkagtawai.
PRO 13:13 Aents chichaman umiachuk suwimkan jukitnai; untsu chichaman umiauk akiam atinai.
PRO 13:14 Aents shiig anentaimkau jintinkagtamua duka pujutan sukagtawai, nuadui jamainun uwemtikagtawai.
PRO 13:15 Shiig jintinkagtauk shiig anentam auwai, untsu shiig jintinkagtachuk pegkegchaunum jegantinai.
PRO 13:16 Aents yacha shiig anentaimkauwa duka shiig anentaimag takawai, untsu aents anentainkachua duka nii dekachbaujiya nuna iwaintumawai.
PRO 13:17 Aents chichaman betek etsegchauwa duka utugchatan apujui, untsu chichaman shiig betek etsegna nunú aentsnak shiig anemtikawai.
PRO 13:18 Aents chichagkatatama dakitauk, waittanum, datsannum pujutnai; untsu chichaman antuk umiauk, eme anentam atinai.
PRO 13:19 Ii wakegamu uminkuig shiig aneenui; tuja aents anentainkachu aina duka pegkegchau takat idaitanak atsanenatsui.
PRO 13:20 Aents yacha aidaujai tsaniauk, niishkam yacha atinai, untsu aents shiig anentainkachu aina nujai tsaniauk, pegkegchaunum jegatnai.
PRO 15:1 Pegkegnum aimawa nunú kajekbaunak imijiawai; untsu kajeka aimawa duka nuni senchi kajeamun inimui.
PRO 15:2 Aents yacha shiig anentaimkau aina nuna chichameg unuimatan sukagtawai, untsu aents anentainkachu aina nuna chichameg pegkegchau ainawai.
PRO 15:3 Tuke Pujuuk ashí yantamnum pujawai, nuniau asa aents pegkeg aidaun pegkegchau aidaujai diyakui.
PRO 15:4 Pegkeg chichamua nunú aentsnak pegkegnum yayawai. Untsu pegkegchau chichamua nunú aentsu pujutin emestawai.
PRO 15:5 Aents anentainkachua duka niina apaji jintinmash dakitawai, untsu yacha shiig anentaimkauwa duka niina apaji chichamen antujui.
PRO 15:6 Aents Apajuí umigna duka shiig kuashat wajigtinai, untsu aents pegkegchauwa nunak niina wajijiya duke utugchatan itajui.
PRO 15:7 Aents yacha shiig anentaimkauwa duka nii dekamujin tikich aentsnash pegkejan jintintui. Untsu aents anentainkachu aina duka pegkegchauwa nuna jintintui.
PRO 15:8 Aents pegkegchau aidau Apajuí anentag suwaji tusag, kuntinun maa apeena duka Tuke Pujuunak shiig awagmatsui. Untsu aents pegkegchau takatan tupanjau aina nunú segamak Apajuík shiig antujui.
PRO 15:9 Tuke Pujuuk aents pegkegchau aina nuna pujutjinak dakitawai, untsu ya tudaun tupantug pegkejan takak pujawa nuna aneawai.
PRO 20:1 Vino nampeamua nunú aentsun pegkegchau chichamtin emawai; uwaja nampetai aina duka utugchatan inimui; nuna uwag nampeauk shiig anentaimag chichatsui.
PRO 20:2 Apu kajena duka león kajeak shinuwama imanai; tuja nuna apun ikajeauk nigki bakumawai.
PRO 20:3 Aents pegkegchau takatan tupanjauk jiyanitnak dakitawai; untsu anentainkachua duka jiyanitan wekaetawai.
PRO 20:4 Aents dakia duka aja takamain esat tepeau aig, takatsuk pujau asa, yumi tepeamtai nii yumainjig atsugtinai.
PRO 20:5 Aentsu anentaimtajig nayantsa kunajinia wainmaitsu numamtinai. Untsu aents yacha duka nuna takumpap tawa tusa shiig dekawai.
PRO 20:6 Kuashat aents aidau, amina kumpauchijum atajai tuinawai; ¿tujash dekas aents imanush igkumainashit?
PRO 20:7 ¡Aents pegkegchau takatan tupanjau aidaun uchiji aidauk, dita apaji pegkejan takajaku aina nujai betek pegkejan takainak, Apajuí yayamu asag shiig aneasagtinai!
PRO 22:1 Pegkegnum augmatam ata nunuwai wiakchameutan nagkaesau.
PRO 22:2 Aents wiakuch akush ujunajaig betekai, wagki mai Tuke Pujuu najanamu asag.
PRO 22:3 Aents yacha shiig anentaimkauwa duka pegkegchaun wainkug wamak idaiwai; untsu aents anentainkachua duka ayatak akuumtawai, nuniau asa, utugchatan igkug waitiawai.
PRO 22:4 Apajuí eme anentsa puyatjusa umigbauwa nunú sukagtawai pujutan, wiakchameutan, eme anentam atan.
PRO 22:5 Aents pegkegchau aina nuna tsanumtaiji aidauk ishamain ainawai. Untsu aents niina pujutjin kuitama duka nunak tupantawai.
PRO 22:6 Amina uchigmek piipichia duik shiig jintintuata, dutikamu asa múun wajasash kajimatkishtinai.
PRO 23:4 Wiakuch atajai tusam anentaimkum waittsaipa, duka puyatjutsuk idaisata.
PRO 23:5 Ame shiig anentaimsa diyakmek, wiakuch wetak wainkaya nunú dekaattame, wagki duka águila uchiji aidau nanapjuk nanaak shimak megkagama numamtuk megkaewai.
PRO 23:19 Uchuchih, wi tajam nunú shiig antukam unuimagta, nuniakum shiig anentaimsam pegkeg takata duke takasta.
PRO 23:20 Aents nampeku aidaujai ijunjamek wekaesaipa, tuja ushu aina nujaishkam kumpajinawaipa.
PRO 23:21 Wagki nampen aidauk, ushu aidauk, ujuuna wenawai, tuja daki aidauk jáanch pegkegchau ampinkau mamuku aidaun apajag nugkuinawai.
PRO 23:22 Apa amina akimpawa nuna chichame antugkata; tuja amina duku múuntuch wajasmataish dakitjaipa.
PRO 23:23 Dekaskea nunú, yachameta nunú, jintinjamamu aina nunú, unuimata nunú aatsam sumakta. ¡Dutikamek duka sujukaipa!
PRO 23:24 Uchi pegkeg, yacha, shiig anentaimkauwa nuna apajig shiig aneak ememas anentaimui.
PRO 23:25 ¡Yajauwajah, uchi yacha shiig anentaimkau aidaunmak! Nuadui uchita atumek atumi apa dukujai shiig anemtiksatajum.
PRO 23:26 Uchuchih, wi tajam nunú shiig antukta, nuniakum wi jintintuawaitjam nunú kajimatkipa;
PRO 23:27 wagki nuwa akika dutiktai aina duka waa múun suwe ishamainama imanai; tuja nuwa aishintin tikichjai tsanijinna dushakam waa tsejegkush, init akagama numamtinai.
PRO 23:28 Nuadui kasajai betek kuashat aishmag aidaun achiawai, dutika aents nuna yujajin aina nujai betek emawai.
PRO 23:29 ¿Yaita waitiaush? ¿Ya waitiakush ejetua? ¿Yaita utugchatan apujus anentaimak waitu wekagush? ¿Yaita nigki suwimkan sumamas waitiaush? ¿Yaita bushapajun niim wekagush?
PRO 23:30 Nunak vino uwaja, nampetan makichkish idaitsuk, tikich umutai aidaunashkam umú yujau aina nunú nunak núninawai.
PRO 23:31 ¡Datsauchih, uwaja nampetai aidau kajiak niime pegkeg wega duka makichkish anentaimtusmek diisaipa! ¡Nunú diyakmek wakejukam uwagtatme!
PRO 23:32 Tuja niimeg pegkejaitak, dapi esajatbau tsaagke najamama imanai.
PRO 23:33 Iman asamtai nunú umakmek, pegkegchau wainchatai aidau waintatme, tuja pegkegchau anentaimkum ima pegkegchauk chichattame.
PRO 23:34 Nuniakum lanchanum egkemjanus yakí jiitkaunum ekemsan nayantsanum wegagtai dekaptatme.
PRO 23:35 Nuniakum: “Awatujagmae, tujash dekapjachmajai; asutuinakuish dekapjachmajai; tujash nunak puyatjatsjai, juna sakapagnuk nantakin vino egakan, nuni kuashat uwagtatjai”, titatme.
PRO 24:3 Jegak shiig anentaimsa jegamtayai, tuja shugkushkam shiig anentaimsa ajitayai.
PRO 24:4 Waji pegkejuch wakejumain aidau ijumaina numamtuk, unuimata nuna niina kanutaiji aidaunum ijumui.
PRO 24:5 Aents yacha nunuwai tikich aents senchigtina nuna nagkaesauk. Unuimata nunuwai dekas senchigtin ata nuna nagkaesauk.
PRO 24:6 Wagki maaniatag takuik, shiig anentaimsa chicham umika maanitayai, tuja depetmaktatus wakegauk tikichi chichamenash shiig antuku amainai.
PRO 24:17 Amina shiwaajum waituinakuish, shiig aneakjum dushikjaigpajum, tuja utugchatji ajakuish dushikjaigpa.
PRO 24:18 Wagki duka Tuke Pujuunak shiig awagmatsui, nuniau asa amina kajegtamak suwimkan amamainai.
PRO 24:19 Aents pegkegchau aidau diisam kajekaipa, tuja niina wajiji aidau diigsamesh kajegkaipa.
PRO 24:20 Wagki aents pegkegchauwa duka pegkeg pujutnakesh jukishtinai. ¡Aents pegkegchau aina duka lampara ikagnakbaujai betek agtinai!
PRO 25:21 Amina shiwajumesh yapajakuig, yutai ajamsata; tuja kitamakuishkam umutai susata.
PRO 25:22 Nunú ame dutikamin, amina pegkegchau awajtamin asa nii tuma datsaagtatui, Nuadui Tuke Pujuu aminak pegkegnum akigmaktinai.
PRO 27:1 Kashin nuna imatikan takastatjai tusamek emtikamek tumamipa, wagki amek dekatsme kashinish wajukatamki duka.
PRO 27:2 Duka amekek imatipa, idaisata nunak tikich aidau tujamtinme, iik eme anenmamku imatbauk pegkegchauwai.
PRO 27:3 Kaya, kamatak aina duka senchi kijin ainawai, tujash nuna nagkaesau kijinai aents anentainkachu nii wakegamun umiktakama kajeamujiya nunú.
PRO 27:4 Kajeamua duka pegkegchauwai, tutitjan itawai, tujash nuna nagkaesau kakajus depetmainchauwa duka, tikich takakui diisa kajegkagtamua nunuwai.
PRO 27:5 Aents amina anempa duka uuka chichá wekaetsuk, paan igkumpa tujamtatui.
PRO 27:6 Shiwag kajegtamiatak tsanupak kumpamjama nunú kajittsa diitsuk, dekas iina kumpaji igkujatua tukagta nuwi kajintsa anentaimainai.
PRO 30:18 Wi puyatjusa diyamug aidauk kampatum waji, tuja nuigtu makichik, nujai ijumjamak ipak usumta imajin ainawai. Tujash shiig ejeyin dekamainchau dekapeajai.
PRO 30:19 Duka juju ainawai: “Águila yakí wekaga nuna jintig dekamaitsui, tuja kaya aidaunmash dapi jintish wajuk awaki duka shiig dekamaitsui. Tuja lancha nayantsanum wekaga nuna jintishkam dekamaitsui; tuja wagkag aishmagkush imatikash nuwanash wakegawa dushakam dekamaitsui. Juju aina nuna shiig ejeyin dekamainchau dekapeajai.”
PRO 31:10 Nuwa shiig anentaimkauk kakajus igkumaitsui, ¡kaya pegkejuch akik aina nuna nagkaesauwai!
PRO 31:11 Niina aishig shiig kajitus diyawai, tuja kuichkinash atsumchagtinai.
PRO 31:12 Niina aishig, nuwe utugchatan apujtus waitkachbau asa, tuké shiig aneas pujawai.
PRO 31:13 Lanan ujuchjai egaka sumak, nuna wakejus shiig aneas jáanchi apijug najanak pujawai.
PRO 31:14 Lancha wajiin atushtanmayan ikaunmama numamtuk, nunú nuwa dita yuwatnujinak atushtanmayan ikaunmawai.
PRO 31:15 Dutika eke tsawatsaig nantaki, yutain inajuk uchiji aidaun inake aidaujai ayujuk, inake aidaunak takatnum ishimui.
PRO 31:16 Tuja nugka pegkejan diisa, nuna akikenak nii takasa jukimui betek akikmak sumawai. Dutika nuwi uvan ajakmawai.
PRO 31:17 Aatus kakaag senchi takau asa, shiig aneas kashikmas nagkama taka takakua etsa akapak ukuawai.
PRO 31:18 Wajiji kuashat kawegti tau asa nii kuitamui, tuja kashish takau asamtai, jii tuké keeka awai.
PRO 31:19 Tuja niina jáanchjinash nigki apaja nugkuawai.
PRO 31:20 Tuja ujudauch aidau atsumiagtaish, yayawai.
PRO 31:21 Tsetsek tepetaish, niina uchiji aidaunak puyatjatsui, wagki ditak jáanchin shiig nugkujag yujaidau asagmatai.
PRO 31:22 Colchajinash nigki najanui, tuja niig jáanch shiig pegkeg apagbau aidaun nugkuawai.
PRO 31:23 Tuja niina aishinashkam yaaktanmaya aidauk ashí wainainawai, wagki apu eme anentsa diitai aina nuwi niishkam pachitkau asamtai.
PRO 31:24 Nunú nuwak jáanch aidaun akachumtai aidaujai najanak, waji sujin aidaunum sujawai.
PRO 31:25 Eme anentsa diitai asa, nuna megkaekaig tusa kuitamamui. Tuja atakea duish wajukatnukitja tusagkesh puyatmamtsui.
PRO 31:26 Chichaakush shiig anentaimas chichawai, tuja niina uchijinash shiig anentus jintintui.
PRO 31:27 Niina jeen utugchat ai tusa aneaku pujawai, tuja nii takasa jukichbaujinianak yuwatsui.
PRO 31:28 Nuadui niina uchiji aidau niina aishijai emematus chichajuinak:
PRO 31:29 “¡Nuwa pegkeg aidauk kuashat ayawai, tujash ametme ashí tikich nuwa aina nuna nagkaesaumek!” tuinawai.
PRO 31:30 Nuwa shigmaji diisa wakejamua duka wainkayai, tuja shiig awajkagtamujia dushakam wainkayai, dekas nuwa Tuke Pujuun umigna nunuwai ememattsa diyam auwa duka.
PRO 31:31 ¡Niina takatji pegkeja nunú anentaimtusjum, ashí aents aidau emtin eme anentsajum pegkegnum chichagtajum!
ECC 3:1 Juju nugkanum ashí waji aidau nagkaemaina duka tsawanji mamiktuamu ainawai:
ECC 3:2 Tsawan jegawai akiinbau, tuja jamu, ajak ajakmamu, nunú ajakmamu nejekmatai juwaamu.
ECC 3:3 Tsawan jegawai aents maamu, tuja aents jakui tsuwamu, yaakat tsayamu, tuja yaakat tsaikbau ataktu yaaktabau jegawai.
ECC 3:4 Tuja buuttinush tsawan jegawai, tuja shiig aneaku dushiamush, jakamunum buutku wake besemag pujamush, tuja jiistamatnush tsawan jegawai.
ECC 3:5 Tsawan jegawai kaya yajuaka utsamu, kaya utsagbau yajuaka ijubau; shiig anendaiku pagkuniamu, tuja kanaamu.
ECC 3:6 Tsawan jegawai kuichik juwamu, tuja takatsuk wainka pujamu, ii takasa jukimu anetamu, tuja ii anettsamu utsamu.
ECC 3:7 Tsawan jegawai jáanch ichiamu, nunú ichigbau apigbau, chichatsuk pujamu, tuja tsawan jegawai chichaamu.
ECC 3:8 Tsawan jegawai aneeniamu, kajegdayamu, maaniamu, maanitsuk agkan shiig pujamu.
ECC 3:9 Aents senchi takak waitia dusha ¿waji pegkegna juwawa?
ECC 3:10 Tuja Apajuí aents aidaunak takainak batsamsatnume tusa, kuashat takatan susauwa nuna anentaimsan ejemaijai.
ECC 3:11 Tuja Apajuí juju nugkan najanauwa duwi nagkamas, aentsnak shiig pegkejan najanauwai. Dutika unuimatan susauwai, atakea duish wajig nagkaemajagtinaita nuna dekatnume tusa. Tujash dutikamaitak, aents aidauk Apajuí yama nagkamchak najankauwa nunak shiig dekamainchau dekapenawai.
ECC 3:12 Nuadui wika dekajai dekas aentsuk eke iwaku puja duik, pegkejan takak shiig aneas pujumainai.
ECC 3:13 Tuja ii yutai aidau yuwaku, umutai umag duka ii takasa jukimunmaya dutikaji, wagki Apajuí nunak amasu asamtai.
ECC 3:14 Tuja nuigtushkam dekajai ashí Apajuí najankamu aina duka tuke asatna nunak: Nii najankamua duka nuwi ekekaik makichkish najanmaitsui, tuja emegkautkesh emegkaumaitsui. Nunak Apajuí dutikauwai, wagki niina senchijin dekaatnume tau asa.
ECC 3:15 Ashí yamai ayá duka yaunchuk aijakua nunuwai, tuja atakea duwi agtina dushakam yamai ayá nunuwai. Tuja yaunchuk nagkaemajua nunak Apajuí ataktu nunikti tusa tima ataktu wantinui.
ECC 3:16 Juju nugkanmak apu aidauwap shiig takasagtatua tusa eme anentamaitak, ima pegkegchaunak takainak aentsun waitkaina nuna anentaimsan ejemaijai.
ECC 3:17 Nuadui Apajuí aents aidaunak tsawan jegatna duwi pegkejan takasunash pegkegchaun takasujai mai apatuk dekajuatnai.
ECC 3:18 Tuja nuigtushkam aentsu pujutjig kuntinu pujutijaig betekmamtina nuna Apajuí ditan dekamtikaun anentaimsan ejemaijai.
ECC 3:19 Shiig anentaimsa diyamak, aents aidaush, tuja kuntin aidaush mayattaiji betek ajamu asag, tsawanji jakatin jegagmak betek jainawai. Wagki juju nugka juwi pujutak aajayai.
ECC 3:20 Ashí iwaku aina duka betek jainawai. Nunikag nugka yukukuntui najanamu asag, nunisag ataktu nugka yukukuntu wajasagtinai.
ECC 3:21 ¿Ya tumainaita, aentsu wakanig yakí nayaimpinum weawai, nuniai untsu kuntinu wakani nugka initken akaewai tusash?
ECC 3:22 Untsu jaka ajin inantamki, atakea duish wajig nagkaemakinta nuna iwaintugmamainuk makichkish atsawai. Nuadui ii takasa juwamua duwi ii wakegamu takaku shiig aneasa pujumainun anentaimsan ejemaijai, wagki iik nuni takas pujusti tibau ainaji.
ECC 9:7 ¡Wainka anentaimkum waitu pujutsuk, Apajuí amina takatjumin shiig anenjamsau asamtai, yutai yuwam, umutai vino uwajam shiig aneasam pujusta!
ECC 9:8 Amek jáanch puju tuké nugkuta, nuniakum kugkuin buukmin tuké nijamta.
ECC 9:9 Juju nugka juwi pujutak wainkaya nuna Apajuí amasua nuwi pujusam, amina nuwem aneetaigmea nujai kashi kashinig shiig anendaisam pujusta. Nunuwai ame kuashat takaku waitiam duwi pegkeg juwamua duka.
ECC 9:10 Ashí ame takamain ajutjamkuig, duka ame dekapmamsam takasta; wagki ame jakam wetatam nuwig takamainuk, tuja dekatan jukitjai tusa waitmainchakam makichkish atsutnai.
ECC 9:11 Tuja tupikamunum depetma duka ya ima senchi tupikawa nunú depetmatsui, tuja maaniamunum depetma dushakam nunú ima wajiu asagkesh nuniatsui; tuja yacha aina nuna yumainjig tuké ajuinatsui, wamak unuibau aina dusha wiakchak ainatsui. Tuja papiin unuimaju aina dusha shiig anenmak ainatsui; ditanushkam shiig pujamu shiig pujachbaush jegajuinawai.
ECC 9:12 Tuja dekatsji wajutik ii jakatnush tsawantash jegagtamti duka, nuadui red nená ukukbaunum namak nemama numamtuk, tuja pishak achitai nená ukukbaunmashkam pishak nemama numamtuk pachiachbau ii waittsatnunum jegaku waitiaji.
ECC 11:1 Aents yapajau wainkumek, yutai susata yuwati. Nunú dutikau asam, makichik tsawantai ameshkam dutiksaik iikuam atatme.
ECC 11:2 Aminu ajutjama duka anetu pujutsuk ajamasta, wagki amek dekatsme waji utugchatak juju nugka juwish nagkaemakti duka.
ECC 11:3 Yujagkim bukusea weakug yumi yutak nuniawai. Numi katugak nujinum, tuja nuniachkush tsumunmagkesh iyakug tuwi iyaje, nuwig tepestinai.
ECC 11:4 Ajakmatasa wakegakmek dase dii pujuipa; tuja ajak ajakmamu juuktag takumek nayaim dii pujuipa.
ECC 11:5 Dase dasenkash itug weawaki nunú dekatsum numamtuk, tuja uchish wajuk najaneawaki dusha dekatsum numamtuk, Apajuí ashí najankauwa nunash wajuk dutikaukita duka dekatsme.
ECC 11:6 Kashikmasam ajakmata, tuja agkushkam ajakmata, wagki yama nagkamchaku ajaamua nunuwash ima shiig nejekat, atsa, ukuunum ajamua nunuwash ima shiig nejekat, aatsa nuniachkush mai betekash nejekat duka dekamainchau asamtai.
ECC 12:1 Eke múuntuch wetsuk yamai datsauchitam duik Apajuí amina najapauwa nunú aneaku ata. Tuja tsawan waitiamu jegamtai, ame chichaakum: “Kuashat tsawan waitu pujutak shiig awajtatsui”, titinaitme.
ECC 12:2 Eke etsa, nantu, yaya aidau etsanbaujin kajinainatsaig, amina najapauwa nunú adeagta. Tuja yumi yutug nagkankamunum yujagkim wajas awa duik adeagta.
ECC 12:3 Tuja tsawan jegattawai apu pujusa inamtain kuitamin aidau ishamkagtuinak kujainamu. Tuja aents wajiu aidaush ishamkagtuinak tikishmasua waigkagtatui; tuja trigo dekeen aidaushkam ujumchik asag dekeetnak idaisagtatui. Tuja jeganum niimtai ujaimunum niimin aidaushkam wainmamainchau wajasagtatui.
ECC 12:4 Nunú tsawan jegamtaig, waiti aidauk ashí epenjamu atatui. Tuja trigon dekeenak tatagmitkamushkam itatjagtinai. Nuninai untsu pishak shinuinamu senchi antuetinai. Untsu ame kantabaugmek shiig antumainchau initak kujakjatu antuetinai.
ECC 12:5 Nunú tsawan jegakuig nainnum wamu ishamtinaitme. Tuja iyajaig tusamshakam ishamtinaitme. Tuja almendro yagkujamu nagkamnattawai, tuja amina iyashmek makichkish atsumchattame, ayatak manchi pakaemag nanapjug nanaak wegama numamtuk atasam duke dakattame. Nunú jegakuig amek ataktu wakitki tashtinnum wetinaitme, nunikamin aents aidau ame jakamin buutuinak agá tuwagtamkagtinai.
ECC 12:6 Nuadui amina pujutjum plata najanamui anaa emetuamua numamtina nunú eke tsujintsaig, tuja ichinak oro najanamu tsaintsu duik, tuja nuigtushkam ichinak yumi shikitaiya nunú eke tsainak ajapnatsaig, yamaya juwik Apajuí amina najapauwa nunú kajimattsuk umigkata.
ECC 12:7 Nunú tsawan jegamtaig, amina iyashmek nugka yukukuntu wajastinai, wagki amek nugka yukukuntu juki najanamu asam. Untsu wakanik Apajuíyai wakitkittawai, wagki nii amasbau asa.
ECC 12:8 Wi Apajuí chichamen etsegnun juna ataktu tajai: “¡Juju pujuta juwig iman pegkejak makichkish atsawai! ¡Ashí wainak ainawai!”
ISA 1:1 Judá wegantu aidaunash waji utugchatak ajitnush ayi nuna pachis Amosa uchijin Isaíasan Apajuí ujakui. Nunak Judá wegantu aidaun apuji aidau Uzías, Jotam, Acaz, Ezequías aatus aajaku aina nunú tsawantin ujakui.
ISA 1:2 Dutikam nuna Isaías etsejak: Nayaim, nugka aidautigmesh Tuke Pujuu tawa nunú antuktajum. Apajuí chichaak: “Wi Israel aents aidaunak mina uchig asagmatai, kuitamkan tsakapakan idaisauwaitjai. Dutikamaitak mina umigtutsuk wijai shiwagmagawaje.
ISA 1:3 Tuja bakak, yaita niina kuitamnush nunak shiig wainui; tuja burro aidaushkam aents niyai entsamak wekaena nunak shiig dekainawai, untsu mina aentsug Israel aents aina duka wi kuitamsam batsatiatak mina shiwagmatuinawai.
ISA 1:4 “¡Aents ayatak pegkegchaunak takau aidauk, pegkegchau takat aina nuna utuatmamkag batsamin ainawai! ¡Tuja pegkegchaun takajaku aina nuna uchiji wegantu aidaushkam, pegkegchaunak dekainayatak, nuninun yujaju asag Tuke Pujuu, pegkejam, Israel aents aidaun Apajuíjiya nuna kajimatkiag idaisaje!
ISA 1:5 Atumek dekas intimkiu atag tusajum wakegagme, nunin asagmin shiig kuashat suwimkan amasjime. Imatikamu asajum atumi iyashinig pegkeg ayautkauk atsawai. Tuja atumi buuken pujagbauk esamtsui, tuke imanisag ayawai. ¡Nuadui atumek kakakchau wajasugme!
ISA 1:6 Dawemin nagkamas buukmijai ashí atumi iyashig makichkish pegkeg ayautkauk atsawai; tuja anú ibau atumi iyashin ayá nuna ampia pempenjamag kuitamak etsaentamainuk makichkish atsawai. Tuja najaimagminish aceiteyai yakagtamjagkesh, imijtugmakchaje.
ISA 1:7 Atumi nugkenak yaaktajum aidaujai shiwag aidau tsaikagmatai, agkan shiig pujumainchau wajase. Tuja yaakat aidau apeamu keenawai. Tuja atum ajakmamu aidaunmayan shiwag aidau juukag atumesh wainjuminig amuinawai. Yaunchuk yaakat Sodoma tsaikam atsau agkan juwakua numamtuk wajase”, tujamui Apajuí.
ISA 1:8 Untsu ima Jerusalégkak tsaikchamu juwake, nuniku asa melón ajakbaunum nuna ejapeen makichik aak aakmaka pachitsuk idaisamu aama numamtuk wajas awai. Nuniak nuigtushkam makichik yaakat shiwag tenteam aama numamtin wajas awai.
ISA 1:9 Tuja Tuke Pujuu ashí senchigtina nunú jutii ainag nuwiyan ujumak uwemtikchakuig, iik sodomanmaya aents, gomorranmaya aents aidaujai ijinauwa numamtukes wajakagtai.
ISA 1:10 Israel aents aidaun apuji aidautigmek, sodomanmaya tuja gomorranmaya aents aidaun apuji pegkegchau aajaku aina nunin wajasugme. Nuadui Tuke Pujuun chichamega nunú shiig antuka jukitajum.
ISA 1:11 Tuke Pujuu chichaak: “¡Atum Apajuí anentag suwaji tusajum, kuntin aidau maajum mina emematjaku kuntin patai apetainum patagjum, nuna neje ashí apeajum nunak wika dakitajai! ¡Ataktuk sujusaigpa! Tuja toro aidaun wiyaji, uwig aishmag aidaun, chivo tsakat aidaun numpen wainkunchakam tsumajai.
ISA 1:12 Wika mina emematjitasajum minakjum, kuntin aidau ikaunmatajum tusanuk makichkish atumnak segatsjime. Atumek mina dushiktakjum, mina jegag pegkegma nunú pegkegchau ematasajum kaunjume. ¡Juju jega mina emamatjaku ijuntaya juwig batsamtsuk, jiinja shiyaktajum!
ISA 1:13 Ataktu awagkigmek anentag mina sujamu pegkegchau aina juninuk itagtuawaigpa. Nunú apeamua nunak wika tsumain diyajai. Tuja nantu yama takamunum Apajuí emematku jiistamtai, nuigtu tsawan ayamtain jiistamtai ati tusa umikbauwa nunú jiistamami tusajum aents aidau ipajum ijumjume, tujash wika aents pegkegchaun takau aidau jiistamaina nunak shiig dakitajai.
ISA 1:14 Nantu yama takamunum jiistamjum nunak wika dakitajai; ¡Nunú jiistamjum nunak dakitmain diyajai, nuniakun katsuntu pujumainchau dekapeajai!
ISA 1:15 Tuja atum mina aujtustasajum uwejum takuajum nunak wika makichkish diyatsjime; tuja antugtanakesh antugtsujime. Tuja atumek kuashat aents mainaitjum duwi, uwejum takuajum duka ayatak numpak ainawai.
ISA 1:16 ¡Nijamaktajum! ¡Pegkegchaujum aidau diitan dakitajai! ¡Pegkegchau takatak idaisatajum!
ISA 1:17 ¡Pegkeja nunú takat unuimagtajum, kakanmamsatajum pegkeg takatnum, nuniakjum aents waitkam batsata nunú yaigtajum, dutikakjum uchi bitaik aidaush, tuja waje aidaushkam ayamjuktajum!”
ISA 1:18 Tuke Pujuu chichagtamak: “Yamai juju pachisa atumjai chichasmi. Tuja atumi tudaujum numpa kapantua imanaitkuish, wi nunak esakatjan yujagkim pujua iman awajtustatjime; tuja jáanch numpa kapantui egkekbauwa imanaitkuish, wi nunak esakatjan lana pujuama iman awajtustatjime.
ISA 1:19 Atum mina umigtakjumek, atumi nugkem pegkeja nuwi ajakmajum yuwattagme.
ISA 1:20 Untsu atum ayatak intimkugmek, duka maaniamunum ijina utsam atatjume”, tujamui Tuke Pujuu tusa, Isaías tiuwai.
ISA 1:21 ¡Jerusalégnumia aents aidauk yaunchkek shiig anentaimkau, waitjuchu, pegkeg aajabi, tujash yamaik nuwa wainka akika dutiktaijai betek, magkagtin wajasu ainawai!
ISA 1:22 Atumek plata pegkejama iman ayugme, tujash yamaik utsagbaujai betek wajasugme. Yaunchkek vino pegkeja iman ayugme, tujash yamaik chujuin wajasugme.
ISA 1:23 Atumi apuji aidauk aents intimkiu, pegkegchau aina nuna kumpaji ainawai. Kuichik akiam, tuja waji aidau suwam nuna juwinak, aents takamsachunak jujuwai takamsauk tuinawai. Tuja bitaik aidaunash, waje aidaunash waitkainawai, dutikainau asag makichkish yainatsui.
ISA 1:24 Nuadui apu Tuke Pujuu ashí senchigtina nunú chichaak: “¡Ditak mina shiwag ainawai, nuadui wi ditanak suwimkan susagtatjai!
ISA 1:25 Dutikakun dita tudaujinak waji pegkegchau aidau apetia numamtuk apean utsankattajai, dutikan dita pegkegchau takamtaiji aina nunak esakatjattajai.
ISA 1:26 Dutikan yaunchuk apu chichama epegkin aidau, chichagkagtin aidau shiig takau, waitjuchu aajabia nujai betek emaktatjai. Dutika ai: ‘Jerusalégnumia aents aidauk, pegkejan takau aidau’, nuigtu: ‘Ima Apajuínak umijin aidau’, tujamtin ainawai.
ISA 1:27 Wika wait anenkagtin asan, nuigtush uwemtikagtin asan, Jerusalégnumia aents aidau mina umigtuinakuig, wainka waitkam yujakuish, wi ditanak ayamjuktinaitjai.
ISA 1:28 Untsu aents pegkegchaun takau aina duka ashí jinawagtinai, wagki mina umigtutan dakituidau asag.
ISA 1:29 Tuja atum aidautijum anú yagkug aidau, tuja numi encina aidau ayá nunú shiig wakejusjum kuitamjum nuwi wainka apajuímtai aidau emematjum nunú diisjum datsagtinaitjume.
ISA 1:30 Atum aidautigmek, numi encina duke kakekamtai, wentsamtug wajama numamtin, tuja yagkug yumi ukattsuk idaisamujai betek atinaitjume.
ISA 1:31 Tuja atum ainajum anuiya senchigtina duka chijichi kagaju apeam megkagama numamtuk megkaejatnai. Niina tudauji aina nunuwai jii kegaujai beteka duka. Nuniau asa nunú chijichinak apea ajapeawai. Nuadui niina tudaujijai esatnai, tuja nuna ikagnamainuk makichkish atsutnai.”
ISA 2:1 Apajuí Judá wegantu aidaun, Jerusalégjai pachis, Amosa uchijin Isaíasan ujakua duka jujuwai:
ISA 2:2 Apajuí emematku ijuntai mujanum jegamkamu awa duka atakea duish eme anentsa diitai atinai. Nuna diinak kuashat aents tikich nugkanmaya aidau kauniagtinai.
ISA 2:3 Kuashat aents aidau kaunainak: “¡Minitajum au muja Tuke Pujuu etegkamua awi wakagmi, tuja jega Apajuí emematku ijuntai jegamkamua awi wakagmi. Awi Apajuí niina chichamen jintinjamamtai, nunú antuka nii tabauwa duke umikagmi!” titinai. Wagki nii chichame umiktin agagbauwa duka Siógnumia wantintinai. Tuja niina chichameshkam Jerusalégnumia jiinki antuetinai.
ISA 2:4 Tuja nugka múun aidaunmayanash Apajuí dita pegkegchaujin diijus suwimkan susatnai. Nuadui ashí nugka múun aidaunmayag dita maanitaiji aidaunak ajak ajakmaku nugka pukutai, arroz tsupitain najankatin ainawai. Dutikawagmatai maaniamuk nagkankatnai, tuja maaniatin jintiamushkam atsustinai.
ISA 2:5 ¡Israel aents aidauwah, Tuke Pujuun chichamega nunú antuka betek umikagmi!
ISA 5:1 Mina kumpaju daajin pachisan, nii uva ajakmamujiya nuna pachisan, kantamtain wi kantamatjai. Mina kumpagdau nugka pegkeg shiig tsapaunum uva ajakbau ajuyi.
ISA 5:2 Nuna nugkan pukuja, kaya aidaun utsantuk, uva ajake shiig pegkeg aidaun ajakui. Dutika peegkeg apaka, nunú aja ejapeen kumpinan jiika, vino najanatnunashkam umikui. Dutika umika uva yumimitun tsamakti tusa eke tsamachu asamtai, dakak pujau. Tujash nunú uva aidauk chujuinun tsamakui.
ISA 5:3 Jerusalégnumia aidauwah, Judá aents aidauwah, nunú nunika dusha ¿yanawaita utugchatash, midaukait, atsa uva ajakbauwa nudaukait?
ISA 5:4 ¿Uva chujuin ai tusan wi dutikmainush awak? Wika yumimitun nejekti tusan wakekabiajai, tujash ¿wagkag chujuinnash nejekiawa?
ISA 5:5 Tuja midau uva ajakbauwa nunash, wisha itugkatag tajaki nuna yamai ujaktajime. Wika aunak ashí ijinatnume tusan kuitamtsuk idaisattajai, tuja utsaantuawag, najakag kupig ijinatnume tusan peejamua nunashkam tegajattajai.
ISA 5:6 Dutikan pachitsuk idaisattajai. Tuja tuke nejen ati tusa, kanawe pegkegchau aidau tsupija utsanka pegkeg ematia nunash dutikachagtatui. Tuja dupanash takagsachagtatui, dutikamu asa dupa jagki aidaujai tsapaka akijuatnai. Tuja nuna uchupig pegkeg ematnunash yuminak yutumtijashtatjai.
ISA 5:7 Tuke Pujuu ashí senchigtin uvan wakejus ajakua duka Israel aents Judá wegantujai aina nunuwai. Tuke Pujuuk mina chichamjun umigtuktinme tusa wakekauwai, tujash ditak magkagtin wajasu ainawai. Tuke Pujuuk shiig pegkeg dekaskenum takau atinme tusa wakekauwai, tujash ditak ima pegkegchaunak takaidaun Tuke Pujuu wainui.
ISA 6:1 Apu Ozías jakauwa nunú mijantin Apu Apajuí niina ekemsa inamtaiji shiig pegkegnum yakí eketun wainkabiajai. Tuja jega Apajuí emematku ijuntai jegamkamua nuna initkenak nii jáanch nugkuagbauwa nunú dukuka amayi.
ISA 6:2 Apajuí eketbaunum nuna yakin serafín aidau batsamayi. Maki makichik seis nanaptin agmayi. Jimag nanapega duwi yapin dukuaku agmayi, tikich jimaja duwi nawen dukuaku agmayi, tuja tikich jimaja duwi nanamiagmayi.
ISA 6:3 Tuja dita chichainak: “Tuke Pujuu ashí senchigtina duka shiig pegkegmai, tuja niina imanjiya nunú ashí nugkan jajutua awai”, wajagmayi.
ISA 6:4 Nunú Apajuín emematuinak imatuinamu, jega Apajuí emematku ijuntai waitiji aidaun senchi umuchmayi, nuniai nunú jeganum bukuituk yujagkim wajas asabi.
ISA 6:5 Imaniakui chichaakun: “¡Jajapi yamaik! Wagki wika pegkegchaun chichau wajasu, tuja aents pegkegchaun chichau aina nujai ijunjan pujag, nuniayatkunuap Tuke Pujuu ashí senchigtina nuna pan wainkaja”, tusan tibaijai.
ISA 6:6 Tusan tai makichik serafín wi wajamunum nanaak tantabi. Nunik minák altarnumian jii kaiji kapaun juki itanmayi.
ISA 6:7 Dutika duwi mina wenujun antinjuk chichagtak: “Nijah, juju jii kaiji amina wenimin antinjamkae. Juwi Apajuí amina tudaugminak esakatjamjae. Nuadui amina tudaugmek tsagkugnaje”, tujutmayi.
ISA 6:8 Tujutmatai pujai Apajuí chichaak: “¿Yanak awemainja? ¿Yaki iina chichamen etsegnush ati?” taun antukbaijai. Tusa takui wi ayaakun: “¡Mina awetita, wi amina chichamjumnak etsejin atajai!” tiabiajai.
ISA 6:9 Tusa tai nii chichagtak: “Wetá nunikam juju aents aidau aatsam ujakta: ‘Chichaman antuinakush nunap tawa tusag tichagtatui, tuja pan wainainakush dekachagtatui.’
ISA 6:10 Juju aents aina nuna dekatig pachimjukta, dutikakum antukchamin, wainmakchamin emakta, dutikamu asag wainmamainchau, antutnash antumainchau, tuja anentaimsash nunap tawa tusa dekamainchau wajastinme, nuninak pujutjinish yapajinmainchau atinme. Nunidau asagmatai, wishakam dita tudaujinak tsagkujashtatjai, tawai tita”, tujutmayi.
ISA 6:11 Tusa tujutkui wi niina iniakun: “Apuh, ¿tujash dusha wajupa tsawanta atatua?” tibaijai. Tusa tai nii aijak: “Yaakat aidaun tsainak ashí aents aidau ijinawajam agkan wajastina duwi, tuja jega aidaunmash makichik aents pujaukesh atsutna duwi, aja aidaunmash atsutna duwi,
ISA 6:12 tuja Tuke Pujuu aents aidaun dita nugkenian jiija tikich nugkanum ishiakmatai, dita nugkega nunú aents atsau agkan juwaktina nunú tsawantin nagkankatnai.
ISA 6:13 Tuja cien aents aidaunmaya diezkesh iwaku pujau akushkam ijina utsam agtatui. Dutika ashí ijinawagmataish, numi ajakam wajauti juwama numamtuk, ujumchik Israel Apajuín umijin aidau juwakagtinai. Nuwiya aidau numi ajakbaitak, wajauti ataktu jegama numamtuk wajakagtinai”, tujutmayi.
ISA 7:1 Jotama uchiji, Ozíasa tijaji Acaz Judá aents aidaun apuji wajas Jerusalén pujai, Siria nugkan apuji Resín, Remalíasa uchiji Pécah Israel aents aidaun apuji aajakua nujai jimagtukag Jerusalégkan jetekajui, depetka iinu emami tusag. Tujash depetkachajui.
ISA 7:2 Dutika jeteagtai, Apu Acaz pujusa inamtaijin niina aentsji aidaujai pujuttaman jegajuawag ujainak: “Sirianmaya aents aidau Israel aents aidaujai jetepakagtatus ijunjaje”, tusa ujakajui. Nuna dekaa niina aentsji aidaujai ishamak kujainak, numi dase umpuam saatama imanidau.
ISA 7:3 Imaniagtai Tuke Pujuu Isaíasan chichajak: “Amina uchijum Sear-iasubjai weme apu Acaz igkugta. Duka Gihonnum yumi pukuni jiina nuwiya japiki aimkatin aepá juki yaki yumi aimtainum nain iwakbauwa nuwi ayaumas jáanch nijaku wetai jinta nagkaemakua nuwi igkugtatme.
ISA 7:4 “Nunika chichagkum: “ ‘Kuitamamkata, tujash ishamkaipa; apu Resín, apu Pécahjai shiig senchi kajenawai, tujash ishamkaipa, wagki ditak jii bukuituk wamak kajinama numamtin ainawai’, tita.
ISA 7:5 Tuja sirianmaya aents aidau, Efraín aents aidau Remalíasan uchiji aatus amina mantamatatus chichaman umigtamkagmae. Nunik chichainak:
ISA 7:6 ‘Judá aents aina duka uwaaka depetka utua Tabeelan uchijiya nunú apu adaitukmi’, tuinawai.
ISA 7:7 Tujash Tuke Pujuu chichaak: ‘¡Duka makichkish nunikchattawai!
ISA 7:8 Wagki Sirian yaaktaji dekas múunta duka Damaskui, tuja Resínkai Damascon apuji; tuja Efraín aents aina nuna yaaktaji dekas múunta duka Samariayai, tuja Remalíasan uchijiya nunuwai Samarian apuji. Tujash Efraín aents aidau ditash nugkentin aina nunak sesenta y cinco mijan jegai, depetkag nugke atankim nugkenchau juwakagtatui. Tuja atumshakam minai kajintsa anentaimkujum dekaskeapi tusajum, mina umigtachkugmek ijina utsam atatjume’, tawai Apajuí”, tiuwai Isaías.
ISA 7:10 Tuja nuigtushkam Tuke Pujuu Acazan chichajak:
ISA 7:11 “Ame dutikatnujum wainchatai aidau iwaintugkata tusam Tuke Pujuu amina Apajuíjum segata, tuja ame waji wakegame nunú nayaimpinmayagkesh nuniachkumesh nugka initkeniagkesh segatta, tusa tujamui”, tau.
ISA 7:12 Tusa tama Acaz ayaak: “Atsa make, wika Tuke Pujuun nuna segaakun pegkegchaunum dekaptanak dakitajai”, tiuwai.
ISA 7:13 Tutai Isaías chichaak: “Davitan patayi aidautijum antuktajum. ¿Aents atumin chichagtamu antugtsuk intimjakjum waitkajum duke nuniskek, Apajuíyaske waitkastasajum wakegajum?
ISA 7:14 Nunin asagmin atumnak Apajuí nii dutikatnujin iwaintugmaktatui. Nunak: ¡Makichik nuwa muntsujut aentsu takashtai ejapjuktatui, nunik uchi aishmagkun uchigmaktatui, dutika uchigmakmatai, uchi daaji adaikattagme Emanuel!
ISA 7:15 Nunú uchi muumpak ashí anentaimama nuniak baka muntsuji kantemtikamun dapa yumijiyai yutinai.
ISA 7:16 Tujash nunú uchik eke jintiag anentaimtan juwatsaig, jimag nugka múun amina uwaktamaina nuna tsaikagtinai.
ISA 7:17 “Tuja duwi pujus tikich tsawantin amina, nuigtu amina aentsjum aina nuna, ame wegantu aina nuna aatus Tuke Pujuu suwimak ishamainun awetugmattawai. Dutikamtai yaunchuk Salomón apu pujusmatai, Israel aents aidau Judá wegantu aidaujai kanakajua duwi nagkamsaish, makichkish imanuk wainkachbau shiig ishamain atinai. ¡Duka asirianmaya apu niina suntaji aidaujai waitkagmasagtina nunuwai!
ISA 7:18 Nunú tsawan jegatai, egiptunmaya suntag aidaun, kaapjai betek shiig kuashat, tuja nuigtu asirianmaya suntag aidaun dapa ishamain ijujatin aina imanun Tuke Pujuu ishitjamkatnai.
ISA 7:19 Dutikam kaunak nugka ségaju aidaunum, uwejush aidaunum, kaya múun waa aidaunum, jagki tepaju aidaunum, tuja yumi baka umutai aina nuwi, aatus ashí piyaktinai.
ISA 7:20 Nunú tsawantin namak Eufratesa amainia navaja ikamka itamaina numamtuk, Apajuí asirianmaya aents aidaun apujin niina suntaji aidaujai ikaunmatnai. Dutikam Israel aents aidau intashin, susujin, uje aidaunash ashí kesajug utsankagtinai.
ISA 7:21 “Nunú tsawantinig makichkiuch bakan, jimagchik uwigjai apujus pujayatak,
ISA 7:22 shiig kuashat nuna muntsujin ijuja juwau asa, nuna kantemtika yutinai. Tuja tikich aents maaniamunum uwemjau aidaushkam nunú baka muntsuji kantemtikamun, dapa yumijijai atsumkas yutin ainawai.
ISA 7:23 Tuja mil uva ajakbaun akike mil plata aajakua duka ayatak jagki tsapaka ikam wajas asatnai.
ISA 7:24 Nunú nugkanmak ashí jagki tsapaka akijua ikam wajasu asamtai, ayatak kuntin maatasa wekaetai atatui.
ISA 7:25 Tuja nain tepetpetu aidaunum pegkeg takatai aajabia duka jagki wajastinai, imanikmatai ishamainak makichkish duka wechagtinai. Ayatak uwig aidau, baka aidau yutai wajastinai.”
ISA 8:1 Tuke Pujuu chichagtak: “Sacerdote Urías, Jeberequíasa uchiji Zacaríasjai untsukta. Dutikam dita wainbaunum makichik numi dakakbau wegkajam jukim nuwi shiig pan wainmain: ‘Maher-salal-hasbaz’ tuu agagta” tujutiabi.
ISA 8:3 Tujutmatai nuna agajan pujusan tikich tsawantin mina duwajui uchi aishmagkun akiauwaitjai. Dutika ai Tuke Pujuu chichagtak: “Uchi daajig Maher-salal-hasbaz adaikattame.
ISA 8:4 Nunú uchik: ‘Apauch, awach’ tusagkesh eke chichatsaig, asirianmaya aidau yaakat Damasconak Samariajai mai tsaikagtinai. Dutikawag dita wajiji aidaunak ashí yajutkagtin ainawai”, tujutmayi.
ISA 8:5 Nuna tujuti ataktu Tuke Pujuu chichagtak:
ISA 8:6 “Wika yumi aimkamu Siloé tutai chichigmachua nujai betek kakagchauchitag duwi juju aents Judá wegantu aina duka Siria apuji Rezínkan Israel aents aidaun apuji Pécahjai ishamainak, dita ayamjutpaktinme tuidau asag mina dakitjuinawai”, tiuwai.
ISA 8:7 Nuadui ditanak Apajuí asirianmaya suntag aidaun ishitkattawai, dutikam namak Eufrates dujajak ashí utuja nugkan yumpuag eemak, nuwi ayaunak ashí utsauwama numamtuk ditanak utsagtatui.
ISA 8:8 Imatikau asa Judá wegantu aidaunashkam waji nujagketkuish, ashí utuja suwega iman iwaktinai. Imatikak águilajai betek nanapen ayapatug ashí dukuk uwemainchau awajsatnai. Tujash jutiyaig Apajuí pujawai.
ISA 8:9 Ashí aents nugka muunnum atushat batsamin aidautigmesh antuktajum, atum maaniami tusajum uminkugmesh wainkajum nuniktatjume; tuja maaniami tusajum maanitai aidau umiakjumesh ayatak sapigmaktatjume, nuniakjum ijinam atatjume.
ISA 8:10 Atum waji dutikatag tajume duka umiktajum; tujash nunak Apajuí emegkaktatui; tuja atum waji dutikatasajum wakegagme dushakam chicham umiktajum, dutikakjumesh makichkish umikchattagme, wagki Apajuík jutijai pujawai.
ISA 8:11 Minak Tuke Pujuu niina uwejen senchi achijuk emetjua chichagtak: “Tikich Judá aents aidau takaina nuninuk amek takasaipa”, tusa tujutmayi. Nuna tujuti nuigtushkam chichagtak:
ISA 8:12 “Apajuín shiig umijin aina nunak pempeenkagtuki sujujatna nuninuk chichagmain ainatsui. Nuadui atum ishamkatnume tusa ishamainun chichaina duka makichkish ishamkaigpajum.
ISA 8:13 Dekas Tuke Pujuu ashí senchigtina nunuwai, shiig pegkejam asamtai, ishamaku ajantusa diimaina duka.
ISA 8:14 Atumin shiig pujutan sujamna duka Apajuíyai. Tujash Israel aents aidauk Judá wegantu aidaujai nuna dakitjaje. Nunidau asag Apajuí suwimak susam Jerusalégnumia aidauk kaya múun tukumaina numamtuk tukumkag iyaidaun nunú kaya tepegkam nantamainchau wajasag jiniagtinai.
ISA 8:15 Kuashat aents atum ainajum anuiya kayan tukumak iyajag jinuidau agtinai. Tuja kuashat achija yajubaushkam agtinai.”
ISA 8:16 Juju chicham Apajuínun wi etsejag nunú jintinkagtag nujai ashí agagjum shiig ijiajum uuka ukuktajum. Dutikajum tikich tsawantin jintinkagtuatatjum.
ISA 8:17 Tuke Pujuu Jacopan kajejuk uumjuku akuish, wika ima niyaig kajintsan anentaimjai, nuniakun ima niinak dakajai.
ISA 8:18 Mina daagnak, mina uchig aidaun Apajuí sujusbau aina nuna daaji aidaujai Tuke Pujuu ashí senchigtin muja Siógnum pujuuwa nunú Israel aents aidaun utugchatjin iwaintuktatus adaikamu ainaji.
ISA 8:19 Tuja atumin chichagtamainak: “Ashí aents aidauk dita apajuímtaiji aidaun iniasag dekainawai. Nuadui atumshakam aents jakau aina nuna wakani, tuja anentaimsa dekaji tinu aina nujai iniasjum dekaatajum, atakea duish waji utugchatak nagkaetamkiajat”, tusag tujabiagtatui. Tujash atumek nuninuk antugkaigpa, duka shiig wainkayai. Atumek dekas Apajuí iniasjum dekaatajum.
ISA 8:21 Tuja yumain atsutai, tikich nugkanum yujasag waituinak kajekag dita apujin, dita apajuímtaiji aidaujai pegkegchaun chichajiagtinai, nuninak ataktu yakí pagkaidiag niibiagtinai.
ISA 8:22 Untsu nugká niimkama, ayatak waitut, suwe, buutut, wake besemag ayaun wainkagtinai, iman suwenum ditak pujusagtinai.
ISA 9:1 Tujash imanik waituinak wake besemag batsabiagtina duka tuke achatnai. Tuja Sabulógka nugkeg Neftalí nugkejai mai Galileanum aents Apajuín nemagchau aidau batsata nuna ijus awai. Nunú nugkak, namak Jordágka amain nagkamnas nayantsanum jegaa nagkanui. Tuja yaunchuk nunú aidaun Apajuí suwimkan susa ijinauwai. Tujash duwi batsamas ataktu Apajuí anenken wainkau ainawai. Nunú nuniktinun Isaías pachis etsejak:
ISA 9:2 “Aents aidau suwenum yujau agma nunú tsaaptinun wainkaje; tuja suwenum batsatunashkam tsaaptin etsantug iyanjae.
ISA 9:3 Apuh, aents aidauk kuashat uyugkaume, tuja shiig aneamushkam múun awajsaume. Nuadui ajak juwamunum shiig aneen aina numamtuk, amina emtimin shiig aneasagtin ainawai. Tuja wiakuch wajiin akantuninak shiig aneen aina numamtuk shiig aneasagtinai.
ISA 9:4 Wagki aents aidau inaku waitkatai wajasag waitu batsamaya duka ame agkanmitkaume. Dutikakum Madián wegantu aidau tsaikuitam dutiksamek yamaishkam ijina utsagkam agkanmitkaume.
ISA 9:5 Tuja suntag aidau maaniatatus shimuinak botasjin wakugtin aajabia duka, jáanchji numpamkamu aidaujai jinum apeam utsankatnaitme.
ISA 9:6 Wagki iinak makichik uchi akiintugmae, Apajuí iinak makichik uchin amase. Nunú uchia nunuwai apu ati tusa etegkamua duka. Nuadui niina daaji aidauk: ‘Shiig chichagkagtin’, ‘Apajuí senchigtin’, ‘Apajuí tuke Pujuu’, ‘Agkan pujutan apuji’ tutai atinai.
ISA 9:7 Nunú uchik apu David inamaajakua nuwi pujus ashí nugkanum inamjatnai. Nuniau asamtai agkan pujuta duka tuke atinai. Tuja nii inabaujig shiig emetjamu atinai, nii inabaujinig shiig takamu, ajantunisa niiniamu atinai. Nunak Tuke Pujuu ashí senchigtina nunú iina anempau asa dutikatnai.”
ISA 11:1 David wegantuk numijai betek ajaka ajuamu atatui, tujash nuna wajautinia yamajam jeeka tsapaitnai.
ISA 11:2 Nunikmatai Tuke Pujuu Wakani niyai pujus unuimatan, shiig anentaimtan, senchimetan, tuja Apajuín shiig wainu asamtai, puyatjus umigtan susatnai.
ISA 11:3 Nunú apuk aentsnak ayatak diisagkek suwimkanak susashtinai, tuja nuigtush ayatak chichaman antamuikik, nuni ati tusag chichamnak iwajachagtinai.
ISA 11:4 Aents kasagtai aidau, ujudauch aidaujai waitkam batsata nuna ayamjuktinai, dutikak untsu aents magkagtin, pegkegchau aidaunak suwimkan susa ijinatnai.
ISA 11:5 Niig pegkeg takatan dekaskea nujai ayamjak maanitkatnai.
ISA 11:6 Tuja nunú tsawan jegamtaig, lobo uwigjai ijunag pujuagtinai; ikamyawa chivojai ijunag kanitnai, untsu baka leónjai ijunag wekagas tsakagtinai, tuja uchi aidau nuna yutaijin ayujuinak yajuak awekaidiagtinai.
ISA 11:7 Tuja baka nuwa, chayú nuwajai shiig kumpaji agtinai, tuja uchiji aidaushkam nujai ijunag kajiitnai, tuja leónshakam bueyejai ijunag chijichin yuwagtinai.
ISA 11:8 Tuja uchi piipich aidaushkam dapijai wasugkabiagtinai, dapi pasugken pujaunash inua achiagtinai.
ISA 11:9 Nunú tsawantinig Tuke Pujuu mujanum puja nuig pegkegchau awajkagtumainuk makichkish atsutnai, wagki yumi nayantsanum pima numamtuk, Tuke Pujuu imanjinak ashí nugkanum dekawagtin ainawai.
ISA 28:1 ¡Chah, Samariayah, amina nugkemek pegkeg shiig tsapau wajasuitam duwi, Efraín aents nampen aina duka aminí ememainawai! Untsu atumi apujig yagkug pegkejuch aidau kagaka megkagama numamtuk megkagainawai. Samarianmak ima aents nampen aina duke piyak awai.
ISA 28:2 Makichik aents senchigtin Tuke Pujuu etegkamu pujawai, niina senchijig bicha kakegak ishamain wajama imanai, tuja dase senchi dasentak magkagtina iman, yumi senchi yutug, nujag pimak ijijatna imanai. Iman asa samarianmaya aents aidaunak makichkia shitamuik ajuattawai.
ISA 28:3 Dutikak Efraín wegantu nampen wajasu aidau, yaakat Samaria pegkeg asamtai, emema batsata nunak nii tsaika ajapatnai.
ISA 28:4 Dutikamtai nunú nugka pegkegnum yagkug kagaku ayá duka, higo tsamajun aents ajantutsuk akaka yuwa amuwama numamtuk awajam agtatui.
ISA 28:5 Untsu nunú tsawantin aents niina umijin aidau iwaku juwagtina nuna atsejutaiji, dekas pegkeg atina duka, Tuke Pujuu ashí senchigtina nunuwai.
ISA 28:6 Tuja apu chichama epegkin aidaunashkam Apajuí shiig takau emaktinai, tuja suntag yaaktan kuitamin aidaunash wajiumitkaktinai.
ISA 28:7 Tuja profeta aidaushkam sacerdote aidaujai, senchi vinon umuidau asag, nampejag winchainainak tukumak iyá yujawai; imanik nampedau asag, Apajuí chichamenak antukchamin batsatui.
ISA 28:8 Nuadui dita mesajinig ayatak tsumain iyakbau ayawai, makichkish iyaka tsuwapachbauk atsawai.
ISA 28:9 Tuja mina chichagtuinak: “¡Taata nunikam aminash Apajuísh wajina iwaintugmake, nunú uchi piipich
ISA 28:10 papii augchau unuimagti tusa a, ba, cha, da, jintinmaina numamtuk jintinkagtuata!” tusa dushiktuinawai.
ISA 28:11 Tuja atumek nampekjum pegkegchau chichá batsatu asajum, chicham antut dakitau asagmin, aents tikich chichaman chichaaku aidau amuktinme tusa Apajuí idaitamsattawai.
ISA 28:12 Yaunchuk Apajuí chichagtamainak: “Juwig utugchatak atsawai, juwi ayamainaitjume, aents pimpikiuk ayamsati”, tusa tujabiuwai. Tujash atumek tusa tujamaig antugkachuitjume.
ISA 28:13 Nuadui Tuke Pujuu atumnak uchi piipich papii augtan unuimagti tusa chichagmaina numamtuk chichagtamkattawai. Uchi piipich yama wekagama numamtin atatjume, nunin asajum tuntupmin iyagjum, najaimakjum nantakchamin dekaptatjume.
ISA 28:14 Atum datsantainchau aidau Jerusalégnum apu wajasjum, inamak batsatu aidautijum Tuke Pujuu tujama nunú antuktajum.
ISA 28:15 Atum chichaakjum: “Ii aidautik jinau aidaujai chicham umikji”, tajume. Tuja atumek asirianmaya suntag aidau ishamakjum iwanchnum sujumankaugme, nii kuitamjamkati tusajum. Nuniku asajum, chichakjum: “Iinak makichkish mantamainchau ainawai, wagki nunú iina shiwaaji aidaunak tsanuja dushijattawai”, tajume.
ISA 28:16 Nuadui Tuke Pujuu chichaak: “Siógnum makichik kaya etegkamu shiig pegkeg akikan apusattajai, nunú atatui dekas ima eme anentsa diitai. Nunú kayanum ekeni jegamnaktatui. Nunú kayanum kajinas anentaimaidauk shiig agkan batsamsagtinai.
ISA 28:17 Nunú jegamku, tunin ai tusa plomo nená diitia numamtin atatui shiig takamua nunú. “Atumek egiptunmaya aidau ayamjutpaktatui tajume, tujash ditanak asirianmaya suntag senchigtin aidau namak dujajak tajaka ajapama numamtuk ijinawagtinai.”
ISA 30:1 Tuke Pujuu chichaak: “¡Chah, mina uchig intimkiu aina nunak, wait anentuinajai, wijai chichatsuk, wi inachmaitak dita wakegamun takasagtatus chichaman uminawai! ¡Nuninak aan kuashat tudaun utuatmamainawai!
ISA 30:2 Tuja mina inintsuk Egipto nugka apuji ayamjutpakti tusag pisajuinawai.
ISA 30:3 Tujash Egipto nugka apujig, wi ayamjuktajime tiuwaitak, ditanak ayamjukchattawai, dutikam egiptunmaya aidaunum yunumka uwemjami tukama datsajagtatui.
ISA 30:4 Israel aents aidauwah, Soán nugkanum yaakat ayá imanui, tuja yaakat Hanés tutaya imanuishkam aents atumin chichamjutpaktin aidau ishiaku akugmesh,
ISA 30:5 nunú nugkanmaya aidauk atumnak tsanupajagtatui, ditak makichkish yaimpakchagtatui, ayatak utugchatan itagtamawagmatai, waitiakjum datsagtatjume”, tiuwai Apajuí.
ISA 30:6 Tuja Isaías chichaak: “Juna Apajuí aatus tawai: ‘Israel aents aidauk egiptunmaya aents aidau ayamjutpaktinme tusag dita wajiji aidaun, dita burrojin, camellojin aatus patag yajuakag, Néguev nugka ishamain, león aidau, dapi aidau, dragón nanamtin aidau aatus ayamunum shimuinawai,
ISA 30:7 tujash egiptunmaya aidauk kakagmachu tikima wainkauch ainawai. Nuadui dita daajinak: “Kuntin múun shinakush wainak imatin” tuu adaikauwaitjai’ tawai Apajuí”, tiuwai Isaías.
ISA 30:8 Tusa inagnakmatai Apajuí Isaíasan chichajak: “Wi timag nunú yamai numi pakama najanamunum agagta, atakea duwish wi tibauwa nuna tuke adeagtin atinme”, tiuwai.
ISA 30:9 Tusa tima Isaías chichaak: “Israel aents aidauk intimkiu asag, Tuke Pujuu chichame umiktin agagbauwa nunú umitnak dakituinawai.
ISA 30:10 Nunidau asag Apajuí chichamen etsejin profeta aidaun chichajuinak: ‘Yamai nagkamsagmek atum kajanum wainkamu aidauk etseju yujaigpa. Tuja chicham pegkeg dekaskea dushakam ujajatkaigpa; duka idaikujum dekas nugkaya waji pegkeg aidau ayá nunú ujajatkatajum.
ISA 30:11 Tuja jinta pegkegnum atum wegajum duka idaisatajum, nuniakjum ataktu awagkigmek, Israel aents aidaun Apajuíji pegkegma nunú pachisjumek aujkagtusaigpa’, tuinawai.
ISA 30:12 Nuadui Israelan Apajuíji pegkegma nunú chichaak: ‘Atumek ujamash dakitagme, nuniakjum ayatak pegkegchau, magkagtut, waitjut aina nunú takatnum eme anenmamjume.
ISA 30:13 Nuadui atumek atumi tudaugmin nugka peegmagbau pachiachbau yumpuna iyauwama numamtin ainagme.
ISA 30:14 Tuja ichinak najanamu ashí tsainak ajapnamtai, jii kaijigkesh chimpia jumainchau, tuja yumikesh shikimainchau wegama numamtuk, Apajuí ditanak ashí tsaika emegkagtatui.’
ISA 30:15 Nuadui Tuke Pujuu Israel aents aidaun Apajuíji pegkegma nunú chichaak: ‘Ataktu mina umigtuktajum, nuniakjumin wi senchimtikattajime. Tuja dekas minai kajintsajum anentaimkugmek, wainkajum chichá batsamtsuk takamtak batsamsatajum, nuniakjum uwemjattagme’, tujamui. Tujash atumek nunú dakitau asajum,
ISA 30:16 chichaakjum: ‘Atsa, dekas caballonum, ekemi pisajagmi’, tajume. Kame takugmek pisagtajum. Tuja nuigtushkam chichaakjum: ‘Carronum egkemja pisagmi’, tajume. Kame takugmek nuniktajum, tujash atumin aintamaidau ima senchi tupikainau asag amaintamkagtatui.
ISA 30:17 Nuadui makichik aents awanmaig, nuna ishamainak mil aents pisajagtatui. Tuja cinco aents awanmakuig nunú ishamakjum, atumek ashí pisagtinaitjume. Nunikagmin ujumchik juwakag, makichik numi mujanum ajiamu wajama numamtuk, tuja mujanum numi ajiamunum bandera jiikbau makichik wajama numamtuk juwaktatjume.
ISA 30:18 “Untsu atum tsagkugnagtin tsawan jegamtai, Tuke Pujuu atumin wait anenjamag atumi tudaugmin tsagkugtamjattawai. Apajuík niina anenken iwaintugmaktatus wakegawai, wagki niig pegkegchaunak dakitin asa, ima pegkeja nunak takauwai. ¡Nuadui Apajuíyai kajinas anentaimaidauk shiig aneasagtin ainawai!” tiuwai Isaías.
ISA 31:1 Egipto nugkanmaya aidaun caballoji maanitai aidau kuashat, tuja carrojishkam imanisag asagmatai, Israel aents aidauk dita yaimpaktinme tusag shimutuina nunak wait anentuinajai, wagki Israel aents aidau ememattai Tuke Pujuu pegkegma nunú yaimpakti tusag, niina segamainun idayinak wainak yujau asagmatai.
ISA 31:2 Tujash Apajuík makichkish tsanushtayai, iman asa suwimkan sukagtinai, tuja nii dutikatjai tibaun yapajiag idaichauwai, betek uminai. Apajuík aents pegkegchaun takau aidaun yayaunak suwimkan susa ijinatnai.
ISA 31:3 Egiptunmaya aidauk Apajuíchu ainawai, ditak aents ainawai; tuja caballoji aidaushkam iyashtin ainawai, wakankesh ainatsui. Tuke Pujuu ditanak suwimkan susattawai. Nuadui Israel aents aidauk ya ditan ayamjawa nujai betek suwimkan jukiag jinawagtatui.
ISA 31:4 Tuja Tuke Pujuu chichagtak tujutmae: “León uwijan maamtai, uwijan kuitamin aidau tuwakag, senchi untsumkag leónkan uwakatajtakush uwakmainchau ainawai. Numamtuk Tuke Pujuu ashí senchigtina nunú taattawai muja Siógnum niina aentsji aidaun ayamjuktatus.
ISA 31:5 Tuja chigki nanaak wekagas niina uchijin kuitamama numamtuk, Tuke Pujuu ashí senchigtina nunú Jerusalégnak kuitamak uwemtikattawai, dutika ayamjuk agkanmitkattawai.”
ISA 31:6 Nuadui Israel aents aidauwah, atum tudau, chicham imtimkiu akugmesh, ataktu Apajuí umigkatajum.
ISA 31:7 Wagki atum aidautijum, oro, plata aidaujai atum dakumka najanamu aidau emematjum nunú idaisagminig,
ISA 31:8 asirianmaya aents aidauk ijina utsam agtatui, tujash nunak aents aidauk ijinashtatui, ayatak maaniamun ishamainak pisajagtatui, tuja datsauch maanitan yacha aidaush wainka inaku waitkatai wajasagtatui.
ISA 31:9 Tuja dita apujig nuna ishamak tupikaki jiinkittawai, tuja suntaja apuji aidaushkam banderajinak ukuinak pisajagtatui. Tuja junashkam Apajuí chichaak: “Niina shiwaaji aidaun suwimak susatnujig Jerusalégnum umikbau awai”, tawai.
ISA 32:1 Makichik aents apu atinai pegkegnak inamjatin, tuja nuna atuwe aidaushkam shiig takasagtin ainawai.
ISA 32:2 Aents aidauk shiwag jeteamash, tuja utugchatnum jegainakush, tuja pegkegchau takainak waitkainamash, nunú apu aidau shiig takaidau asagmatai, ditai yunumak ayamjumaktin ainawai.
ISA 32:3 Nuadui Israel aents aidauk wainmachu wainmamaina numamtuk Apajuínak pan wainkagtinai. Nuninak Apajuí chichamesh wajintua nuna puyatjus antuktatus wakeyagtinai.
ISA 32:4 Nuadui waugtutsuk emamkemas takasagtatui, nuninak dekaskea nuna shiig antumainun chichagtatui.
ISA 32:5 Aents pegkegchau, tsanumin aina duka eme anentsa diyam achagtinai.
ISA 32:6 Wagki aents pegkegchauwa duka ima pegkegchaunak chichawai; tuja niina anentainish ayatak pegkegchau takatnak anentaimui; nuniak magkagtuta nuna wekaetawai, tuja Apajuínash tsanumjuinak pegkegchaun chichajuinawai; nunidau asag aents nujantai waitiaunash, tuja kitakai waitiaunashkam ajampenatsui.
ISA 32:7 Aents waitjin aina nuna ayamjumataijig ishamainai; tuja pegkegchau takastinun niina anentain umiawai; Nunin asag ujudauch aidau chichamjumak, ayamjumamainchaunak tsanumjug, apunum sujuk waitkainawai.
ISA 32:8 Untsu aents pegkeg aidauk tikichnash yaigtatus wakenai, nuadui niina pegkegjinig shiig anentam atinai.
ISA 32:9 Atum nuwa daki batsamtin puyatmamchau aidautijum, wi titatjim nunú antuktajum.
ISA 32:10 Atumek yamaik puyatmamtsugme, tujash kuashat tsawan atsuk, yumain atsakui, tuja uva juuka yumainkesh atsakui, makichik mijan nuigtu ewaekajum waitiakjum kujaittagme.
ISA 32:11 Nuwa aidautijum puyatmamtsuk shiig aneasa batsatutigmek puyatakjum kujaitajum; tuja atum pachimakas pujautigmek sapigmakjum kujaitajum. Nuniakjum jáanch pegkeg nugkuagjum duka awika ukuakjum, wake besemag pujaku nugkutai nugkugtajum.
ISA 32:12 Atumdau trigo ajakbau, uva ajakbau aidaujai shiig kuashat pegkeg ayá duka imankek achattawai. Nuadui wake besemag dekapeakjum detsepem ijutajum.
ISA 32:13 Mina nugkag múunta nuwig jagki aidau ashí tsapak akijuattawai, tuja jega pegkejuch aidau yaaktanum ayá nuwi batsamsajum, shiig anee batsatjum duka ashí tsaikam megkaejattawai.
ISA 32:14 Tuja apu pujusa inamtaijishkam ukukim itajak juwaktatui; yaakat muunchakam ukukim agkan juwaktatui. Tuja kumpin jiikbau aidaushkam, yaakat tentea peejamu aidaush, ashí ukukim agkan juwagtatui. Nunikmatai ikamia burro aidau, baka aidau nuwi batsamsagtinai.
ISA 32:15 Tujash Apajuí ashí waji aidaun najankauwa nuna senchiji ataktu tajutjamattawai, nuniak uwegshunak nugka pegkeg ajak ajakmamain awajsattawai, untsu nugka pegkeja duka yaunchuk aajakua nuna nagkaesau shiig pegkeg wajastatui.
ISA 32:16 Nunikmatai juju nugka múunta juwig ashí yantamnum pegkeja duke takamu atatui.
ISA 32:17 Tuja pegkeg takamua nunuwai atakesh maanitsuk agkan, kajinmamsa pujutan sukagta duka.
ISA 32:18 Nuadui mina aentsug aidauk waitkascham agkan dita jeen puyatkas shiig batsamsagtinai.
ISA 32:19 Bicha kakegak ikaman ijinau akuish, tuja yaakat tsaikbau akuish,
ISA 32:20 ¡atumek yumi ayaunum ajakmajum, nunú yuwakjum pujustinaitjume, tuja burro aidaush, baka aidaush chijichi ayaun yuwinak agkan batsatkui, shiig aneasjum pujustinaitjume!
ISA 33:1 Wait anentagme aminak, wagki amek tikich nugkanmaya aidau tsainaitkum tsaikchamuitme, nuigtush amek tikich nugkanmaya aidau tsanuwaitkum tsanugchamuitme. Nuadui amujatut idaisa pujamin, aminashkam tikich nugkanmaya aidau tsaipakagtinai, tuja tsanujatut idaisa pujamin, tikich nugkanmaya aidau tsanupajagtinai.
ISA 33:2 Tuke Pujuuwah, niimpap yaimpaktatua tusa aminig anentaimaidautik wait anenkagtugta. Nuniakum tuké kashikmasam yaijatta, tuja ishamainnum jegamunmash ame uwemtikagtugta.
ISA 33:3 Amina chichamjumin antukag ishamainak, tikich aents aidauk pisainawai, tuja yaakat muunnumia aidauk amina senchijum iwainamun wainainak, ishamkag pampagkag megkagainawai.
ISA 33:4 Nuniagtai dita shiwaaji aidau manchijai betek yumpuntuk utsantuawag, dita wajiji aidaunak ashí yajutuinawai.
ISA 33:5 Tuke Pujuuwai dekas múuntak, niig nayaimpinum pujawai; Jerusalégnumia aidaunak pegkejan takainak, esegag pujustinme tiuwai.
ISA 33:6 Nuadui shiig pujustinme tusa tuké kuitamtinai. Unuimata duka dekata nujai uwemtan sukagtau asa, waji pegkeg aidaun nagkaesauwai. Tuke Pujuu puyatjusa umigbauwa nunuwai waji pegkeg akik aina nuna nagkaesau.
ISA 33:7 ¡Suntag wajiu aidau tikich yaimpaktinme tusag, jintá yujas untsumainawai, tuja agkan pujutan chichaman etsejin aidaushkam kajekag buutuinawai!
ISA 33:8 Jinta aidauk bashiake, makichkish jintanmak yujainatsui, tuja jutijai chichaman umikajua nunash uminatsui; nuadui ajantunisa niniamush atsawai.
ISA 33:9 Israel aents aidaun nugkega duka ajak aidau tsapaachu asamtai, wake besemag wajas awai. Líbano aidaush datsaamainak jajatuk jinawai; tuja nugka paka Sarón tutaya dushakam yaunchkek pegkeg ajak shiig tsapaya nunak yamai uwegshujai betek wajase. Tuja Basán nugka, muja Carmelo tutaya nujai nugka pegkeg numi dukentin ayau asa, pegkeg samekbau wajas ayá duka duke kakekamtai, wentsamtuk ijunui.
ISA 33:10 Nuadui Tuke Pujuu chichaak: “Wi yamai nantagkitjai; nuniakun ashí mina senchijun iwainaktajai.
ISA 33:11 Tuja atum chicham umiamua duka dupa kagakujai betek, nuigtush tsuwatjai betek ainawai. Nunin asamtai wi umpuamua nunú nunak jiijai betek ekemak ajapattajai.
ISA 33:12 Nuadui aents aidauk jagki tsupigbau akaam keegama numamtuk keeka yuku wajasagtatui.
ISA 33:13 “Atushat pujautigmek, wi dutikauwaitag nunú dekatajum, tuja tikiju pujautigmeshkam, mina senchijua nunú dekaskeapi titajum.”
ISA 33:14 Aents pegkegchau aidau Jerusalégnum batsata duka sapijin kujainawai, tuja aents Apajuín umigchau aina dushakam sapigmainawai. Nuninak: “¿Ii ainag nuwiyash yaki jii kajinchau tuke kee auwa ibaunmash pujusainta?”
ISA 33:15 Aents pegkejan takau, dekaskenum chichau, tuja tikichin atanki yajutuk wiakchameuchu, tuja akikam yaimchau, magkagtuata tusa tamash dakitin, nuigtush pegkegchaunak makichkish anentaimtuchu,
ISA 33:16 nunú aentsuk waitkascham agkan pujustinai. Niina jeeg utumainchau kaya jegamkamu atinai. Tuja nii yuwatnujish uwagtinjish ashí ajitnai.
ISA 33:17 Tuja ataktu wainkatnaitme apu niina imanjin etsantug tsaaptin wajas eketu. Niig atushat tikich nugka aidaunmash inamjatnai.
ISA 33:18 Ame yaunchuk sapigmayum nunú anentaimtusa chichaakum: “Apu kuichkiji atin akikmakbau aidaun dekapainak, akikmaktajum tusa waitkagmayanum dusha ¿tuwi batsatua? ¿Tuwi batsatua ajak juukbau aidaun dekapau aajabia dusha? Iina uchiji aidaun suntagmagatnume tusa achija yajutjamianum dusha ¿tuwi batsatua?” titinaitjume.
ISA 33:19 Aents pegkegchau tikich chichaman antumainchaun pachimtakan chichaaku aidaujai ijunjajum pujajum duka yamaik nunikchattagme.
ISA 33:20 Jerusalégnum jega Apajuí emematku ijuntainum ijunja jiistamnuweg nunú anentaimtusam diista; Jerusalégkak aak shiig aakmagbau yumpumainchau numi ajigbaush kupimainchau, tuja daekai jigkakbaush tsujimainchauwama iman atinai.
ISA 33:21 Nuwi Tuke Pujuu niina imanjijai iina wantintugmawai. Jerusalégnumak namak múun chichijam aidau ayawai. Namak iman agtaish, shiwag aidauk dita lanchaji wiyanka wekaetai aina duikish, tuja lanchaji múun aina duikish kakajus utuachagtinai.
ISA 33:22 Wagki Tuke Pujuuwai iina ayamjutpa duka, tuja ii umiktinnak nii chichaman sukagtawai. Niyai iina apujig, iina uwemtijamin.
ISA 33:23 Nunú lanchanum numi ajiamu aidau jigkakbauwa duka daekak takatkae, nuniku asamtai jáanch detuamua duka pukugak iyaumain wajawai. Nunitai wemainchau dekapenakui, lanchajin utsaantua wajiji aidau yajutkagtatji, dutikajin aents shutuu ai aidauwaske dita wajiji aidaunak yajuakagtatui.
ISA 33:24 Tuja Judá wegantu aidaun tudaujinak Apajuí tsagkujatnai, nuadui makichik aentskesh: “Jajai”, tusa tauk atsutnai.
ISA 35:1 Uwejush ajak ajakmamainchau buku wajas awa duka nugka pegkeg wajastatui, nunik ajak aidau tsapatai, uwegshuk aents shiig aneemaina numamtuk shiig aneastatui.
ISA 35:2 Nunik ajak aidau kuashat tsapakmatai, uwegshuk shiig aneas senchi kantamtatui. Tuke Pujuuwa nunú uwegshunak, Líbano nugka, Carmelo nugka, Sarón nugka pegkeg aina iman awajsattawai. Dutikamtai ashí aents aidauk iina Apajuíji imanjiya nuna niina senchijijai wainkagtinai.
ISA 35:3 Atum mina chichameg antautigmek, Judá wegantu kakaakchau aina nunú ichichiagtajum, dutikakjum pimpikiu aidaushkam yaigtajum.
ISA 35:4 Tuja sapig aidau chichagkujum: “¡Ishamkagtutsuk, aishmag wajastajum! ¡Amina Apajuíjum juwi pujawai uwemtijamjagtatus, tuja iina shiwaaji aina nunak nii suwimkan susattawai!” titajum.
ISA 35:5 Dutikamtai aents wainmachu aidau wainmakagtinai, tuja empeku aidaushkam chichaman antukagtinai;
ISA 35:6 tuja aents shutuu aidaush japajai betek tsekeniagtatui, nuninai chichachu aidaushkam chichainak shiig aneasag untsumiagtinai. Nuninai uwegshunmashkam shiig kuashat yumi pukuni jiiniagtinai.
ISA 35:7 Imanidau asamtai, uwegshuk yumi wajas asattawai, tuja nugka bukunmashkam kuashat yumi pukuni jiiniagtatui. Tuja lobo batsamtai aina nuwig tagkan kajis aidaujai tsapaktatui.
ISA 35:8 Nuwi atinai makichik jinta. Nuna daajig: “Jinta pegkejam” tutai atinai. Aents pegkeechu aidauk nunú jintanmak wechagtin ainawai; tuja aents anentainkachu aidauk nunú jintanmak yujaschagtin ainawai.
ISA 35:9 Nuwig leónkak atsutnai, tuja tikich kuntin yukagtin aidaukesh nunak makichkish adijkachagtinai. Tuja Tuke Pujuu uwemtikjamu aidauk nunú jinta nuni waketjagtinai.
ISA 35:10 Tuke Pujuu uwemtikjamu aidauk shiig aneas kantamkiag Jerusalén utsanawagtinai. Nunikag tuké shiig aneasag batsamsagtinai. Ditaig ima shiig aneamua duke atinai. Nuadui wake besemjak atsutnai, tuja najaimamushkam atsutnai.
ISA 40:1 Iina Apajuíji chichaak: “Shiwag aidau achipag dita nugken yajupakagmatai batsamsagmesh, ¡mina aentsug aina nuna anentai ichichtugtin atajum!
ISA 40:2 Jerusalégnumia aents aidauk shiig anentsajum ausatajum, tuja achija yajuakam yujasag waituina nunú ayamsagtinuk tsawantak jegae”, titajum. Dita tudaujig tsagkugnaje. Dita pegkegchau takasbaujin nagkaesau Tuke Pujuu suwimken jukiag waituinak umikaje.
ISA 40:3 Makichik aents uwegshunum untsumak: “¡Tuke Pujuu wekaesatin jinta uwegshunum shiig iwaja jintamajum, tunin aidau dakuegjum umiktajum!
ISA 40:4 Nugka ségaju aina duka yutuka aimjajum paka awajsatajum, tuja muja tsakakunum nuna wakeen entsa ayá dushakam yutukjum makichkish wagaku atsau paka awajsatajum.
ISA 40:5 Dutika umikagmin Tuke Pujuu niina imanjin iwainaktinai, nuna ashí aents aidau ijunag wainkagtinai, tawai Tuke Pujuu”, tusa Isaías tiuwai.
ISA 40:6 Nuna tusa nuigtushkam Isaías chichaak: “Makichik aents chichagtak: ‘¡Untsumkata!’ tujutkui, wi ayaakun: ‘¿Wajintu untsumkattaja?’ tai, nii chichagtak: ‘Ashí aents aidauk dupajai betek, tuja yagkug ikamia niime wainak pegkegchiama nunin ainawai.
ISA 40:7 Tuja Tuke Pujuu dase awemamu dasentak tukua tukuam dupa kagaka ijuname, tuja yagkugshakam kagaka kakegame. Numamtuk aentsuk dupajai betek ainawai.
ISA 40:8 Dupag kagaka jininai, tuja yagkugshakam kagaka kakenai. Tujash Apajuí chichameg makichkish megkaekashtinun tuke auwai’.
ISA 40:9 “Jerusalégnumia aidauwah, muja titijin wakatajum, nunikjum nuwi ijuntsajum senchi untsumkatajum, aents ashí nugkanmaya aidau antuktinme. Jerusalégnumia aidauwah, chicham etsegtak ishamkagtutsuk senchi untsumkajum etsegkatajum, ashí Judá nugkanmaya yaakta aidaush yamajam chichaman antuktinme. Senchi untsumkajum: ‘Iina Apajuíjiya duka jujuwai’, tusa titajum.
ISA 40:10 Apu Tuke Pujuu niina senchijijai minawai, nuniak nii ima senchigtin asa, ashí depetmak minawai. Nunik minak niina aentsji aidau waitkam batsatun yajuak inimui.
ISA 40:11 Uwija kuitamnujai betek niina aentsji aidaun kuitamak inimui. Uwig tsakat aidaunak pagkuk juki inimak, yama petsakbau aidaunak shiig puyatjus juki minawai.”
ISA 40:12 “Apajuík nayantsanak makichik uwejenig achika dekapamainai. Tuja nayaimpinashkam tsajam uwejinig ashí achika dekapamainai. Nugkash wajupa kijinkita nuna shiig dekauk Apajuíyai. Apajuí dekawai muja aidaush wajupa kijinuk ainawa nunak.
ISA 40:13 Tuke Pujuun chichagnuk makichkish atsawai. Apajuín jintinmainuk shiig atsawai.
ISA 40:14 Apajuín jintintua unuinajuk makichkish atsawai. Tuja pegkeg takat aina nuna takasti tusa Apajuín jintintushkam atsawai. Niig ashí yachai. Ashí waji ayá dusha wajuk najaneakukita nuna pachis Apajuín jintinmainuk atsawai. Niig ashí dekawai, wagki nii najankau asa. Apajuí yacha ati tusa jintintua unuinajuk atsawai.
ISA 40:15 Nugka múun aina duka nii diismak makichik yumi dakitamua nujai betek, nugka yukukuntunmaya makichik nenentuch piipich juki, balanzanum dekapam kijinji atsumaina numamtinai. Nugka múun aidau nayantsan ijus ayá dushakam makichik kayam piipichia nunin ainawai.
ISA 40:16 Ikam múun Líbano tutaya nuwiya kuntin ashí yajuaka Apajuí emematku apeatin ijumjamash, Apajuí diismak piipichi, tuja kuntin maa apeatin nunú ikamnumia numi ashí yajuaka ijumjamash Apajuí diismak piipichi.
ISA 40:17 Ashí aents maki makichik chichamtin nugka muunnum batsamin aina dushakam Apajuí emtinig shiig wainkauch ainawai. Nii diismak atsaujai betek ainawai.
ISA 40:18 Atumek Apajuík makichkish tikichjai apatkagmek diimaitsugme. Dakumka najanamu aina dukesh Apajuíjai betek amainuk makichkish atsawai.
ISA 40:19 Aents dakumak najanna nunú dakumak najanui, dutikamtai tikich aents patakumtai aidaun najanin orojai ukatuk umiawai, dutika cadenan platayai najatui.
ISA 40:20 Tuja ujunauch aidaunu aents dakumak najanna duka numi katsujam wamak mamumainchaun diisa najanui. Dutika nunú iyaag tsainkai tusa tikich aentsun ame juju chichiag asatin najatuata tusa inawai.
ISA 40:21 “¿Atumek duka dekachuk ayujum? ¿Nuna pachisag chichaidauk antuchuk ainajum? ¿Yama nagkamchakush ujapaku ainatsuak? Apajuí nugkan najanauwa duwi nagkamas aents aidauk dekau amain ainawai.
ISA 40:22 Apajuí pujusa inamtaijiya duka nayaimpi yakin awai. Nuwi pujus aents aidaunak manchia nuninush diyawai. Tuja nayaimpinak Apajuí carpajai betek ejaa, nuna nugkaan aents aidau batsamsatnume tiuwai.
ISA 40:23 Apajuík aents senchigtin aidaunak tikima wainkauch emawai, tuja nugkaya apu aidaunashkam ijina emegkawai.
ISA 40:24 Nuadui ditak ajak yama ajakmamu kagkape yama achimag wegama nujai betek ainawai. Tuja Apajuí dasen dasenmitkataik pimpika jinawai, tuja dase ishamain iyakug chijichi tsupigbau kagakujai betek umpui utsawai.
ISA 40:25 Tuja Apajuí pegkegma nunú chichaak: ‘Atumek minak makichkish tikichjai apatukjumek diigmaitsugme. Wijai betekak makichkish tikichik atsawai’, tawai.
ISA 40:26 Yakí pagkaijum diistajum: ¿Juju ayá nunash ya najanauwaita? Yaya aidaun, nantu, etsa, nuigtu tikich aidau ayá nuna najanak, maki makichik akanag pekasua nunú nigki nuna daaji aidaunash adaitug umikui. Niig senchigtina ibau asa, makichkikesh najantsuk ampija ukukbaujig atsawai.
ISA 40:27 Jacopa uchiji Israel aents aidauwah, ¿wagka atumesh wainkagmesh chichagme? ¿Wagka wainkagmesh: Tuke Pujuuk wi waitiag nunak dekatsui; tuja Apajuík minak pachittsui, tajume?
ISA 40:28 Apajuí Tuke Pujuu, ashí nugkan, nayaimpijai najanauwa duka makichkish yawechu, nuigtush pimpichu, dekatish amuechauwa duka ¿amek dekatsmek, atsa nuniachkumesh amek antuchukum?
ISA 40:29 Apajuíyai aents pimpikiunash senchimtika wajiu emauwa duka, tuja aents kakakchaunash senchijin ikauntinai.
ISA 40:30 Datsauch aidaush pimpikiag kakaumainchau dekapenawai, tuja aents senchigtin aidaush nugka tukumak iyainawai.
ISA 40:31 Tujash ima Tuke Pujuuwaig kajinas anentaimaina duka yamajam senchin jukiagtin ainawai. Águilajai betek nanaakagtin ainawai, wekaekush yawegchagtin ainawai, makichkish yaweakchau shiig tupikaidiagtinai.”
ISA 41:1 Apajuí chichaak: “Yaakat múun nayantsanum ijus ayá nuwi batsamin aidautijum takamtak pujusjum antugtuktajum. Tuja nugka muunnum batsamin aidautigmesh ishamkagtutsuk kaunatajum. Nunikagmin atumesh shiijash batsatjum nunú ijunja dekaami. Nunika atumesh wajukatagmeki nunú chicham umikmi.
ISA 41:2 Etsa minitaiya nuwiya apu tuke depetma nunash ¿ya dutiknaita? Anú apu tikich nugkanmaya aidaun depetuk ijinatnume tusan umiaunuk witjai. Nuadui nunú apu suntaji aidau, puyagjai, nagkijai aatus shaa dekeaja tsaitiama numamtuk tsaikag ijinatnume, dutikawag chijichi kagakun dase umpui dapampaak utsauwama numamtuk emegkagtinme tusan idaijai. Dutikakun dita apuji aidaushkam suntaji amutam sapijin ditai yunumjatnume tusan idaijai.
ISA 41:3 Shiwaajin pataetakush ishamain atsaunum, agkan shiig wamak nanaakas shimatai tumain shimitnume tusash ¿ya dutiknaita?
ISA 41:4 Witjai nuna dutikaunuk. Yama nagkamchakun nugkan nayaimpijai najanawaitag duwi nagkamsan, yaunchuk waji nagkaemajua nunak, tuja yamai nagkaema nunashkam, wi dutiknaitjai. Witjai Tuke Pujuu dekas Apajuínuk.
ISA 41:5 Wi dutikamunak yaakat nayantsanum ijus batsamin aidauk wainin ainawai. Nuna wainainak senchi sapigmainawai. Nugkashkam ashí yantamnum uujui. Aents tikich nugkanmaya aidau ijunjagtatus ashí kaunawag mininawai.
ISA 41:6 “Maki makichik aents dakumak najanin aidauk niina kumpajinak ima niinakek idaitsui, yayawai dutikak anentain ichichtawai.
ISA 41:7 Dakumak najanin aina duka patakumtain, nugkutain orojai najanin aina nuna chichajuinak: ‘Pegkeg najanme, idaitsuk takasta’, tuinawai. Tuja martillowai takau aidauk, jiju awatug ikag najanin aidaun chichajuinak: ‘Achija umikum duka pegkejai’, tuinawai. Nuna tusag dakumka najanamu iyajai tusag clavowai achiawag ukuinawai.”
ISA 41:8 Apajuí chichaak: “Jacob wegantu Israel aents aidauwah, antuktajum: Atumek mina inakeg, wi etejamu ainagme. Atumek mina kumpag Abraham aajakua nunú wegantu ainagme.
ISA 41:9 Tuja tikich nugkanum achija yajuakam atushat batsatutigmin wi agkanmitkauwaitjime, dutikan mina takagtustajum tusan chichagkun: ‘Atumek mina inakeg ainagme’, tiuwaitjime. Wi atumnak etegkauwaitjime, nuadui atumnak dakitjankesh idaisachjime.
ISA 41:10 Ishamkagtukaigpa, wi atumjaig pujajai. Ishamkagtukaigpa, witjai atumi Apajuíjinuk. Wi atumnak senchimtikajime, wi atumnak yayajime, mina uweg senchigtin depetmauwa duwi ayamjukan kuitamjime.
ISA 41:11 “Amina kajegtamin aidaunak, wi inatsaktinaitjai. Dutika ai ememamujinak kajimatkiagtinai. Atumjai maanidaushkam ashí ijinawajam megkaejattawai.
ISA 41:12 Nunik megkaejamtai, wainkatasajum egakjumesh wainkashtinaitjume, wagki amejai maaniatag tinu aidauk ashí amukam megkaejatnai.
ISA 41:13 Tujash aminak wi achiakjame. Wi atumin chichagkun: ‘Ishamkagtukaigpa, wi atumnak yayajime’ tiuwaitjime”, tawai Apajuí.
ISA 41:14 Tuja Apajuí ataktu awagki chichaak: “Jacob wegantu Israel aents aidautigmek, piipich kakakchau ainakjumesh, ishamkagtukaigpa, wi atumnak yayajime. Witjai Israel aents aidau Apajuíji pegkegmanuk, wi atumnak agkanmitkauwaitjime.
ISA 41:15 Antuktajum nijah: Atum ainajum anuiyan, makichik trigo akatain yamagman, naín batsatkan najanattajai. Dutikamtai nujai muja aidau tsaikam yukukuntu awajsattagme. Tuja nain aina dushakam tsaiktatjume, dutikawagmin chijichi kagaku tuwasua weaku atatui.
ISA 41:16 Nunú yakí takui nagkimjumin, dase umpui utsagtinai. Tuja trigo akagbau, dukee utsankam wampuji juwakun dase shiig senchi dasentak utsauwama numamtuk, atumi shiwaajum aidaun dapampaak utsagtatui. Dutikamtai Israel aents aidaun Apajuíji pegkegma nuwi shiig aneasam pujuttame, nuniakum ima niyaig eme anenmamtatme.
ISA 41:17 “Aents ujudauch kuichkigtinchau, wajigtuchu wekagas yumi egá egakua wainkacha kitamak umumain atsujam, suweuchijin jujug wekaetatui. Tujash wi niinak yaigtinaitjai, witjai Tuke Pujuu Israel aents aidau Apajuíjinuk, nuadui ditanak kajimatkinuk idaisashtinaitjai.
ISA 41:18 Muja uwegshunum entsa ayau awajsatnaitjai, tuja nugka ségaju paka aidaunmashkam yumi pukuni kuashat jiiniagtinai. Nuadui yumi kuashat ayau asamtai, dupa shiig tsapak aama iman uwegshunak emaktatjai.
ISA 41:19 Uwegshunmak setug aidaun, numi acacia aidaun, arrayan aidaun, nuigtu olivo aidaun tsapapitkatnaitjai; untsu nugka bukunum, numi pino aidaun, abeto aidaun, nuigtu cipre aidaun tsapapitkatnaitjai.
ISA 41:20 Nuna ashí aents aidau wainkatnume, nuninak puyatjus unuimagtinme, wi Tuke Pujuun mina senchigjai dutikag nuna. Witjai Israel aents aidaun Apajuíji pegkegmanuk, wi nunak najanauwaitjai”, tiuwai.
ISA 41:21 Jacob wegantu Israel aents aidaun Apajuíji chichaak: “Apajuímtai dakumka najanamu aidautijum kaunajum, chichamjumaktajum, nuniakjum atumi takatjum ayamjuktajum.
ISA 41:22 Kaunatajum, nunikjum atakea duwi atin etsegkatajum, dutikakjum yaunchuk waji nagkaemajua nunú shiig ujajatkatajum, iish shiig antukagmi atakea duish wajig nagkaemagtinaita nunú, tuja dusha dekas uminkatpash nunú diismi.
ISA 41:23 Atakea duish waji nagkaemagtatua nunú tukagtitajum. Atum dekas Apajuíyaitkugmek nunú iwainaktajum. ¡Atum dutikmain pegkeg aidau, tuja pegkegchaukesh, nuniachkush ishamain iina uwaktamain aidaukesh iwainaktajum!
ISA 41:24 ¡Atumek shiig wainkauch ainagme, nuadui makichkish iwainamaitsugme! ¡Atumin kajintsa anentaimauwa duka pegkegchau shiig wainkayai!
ISA 41:25 “Makichik aentsun etsa minitaiya nuwiyan jiikjai, dutikan niina daajin untsuka ai nujinmanini minawai. Nunú aentsua nunú tikich apu aidaunak tsakus najamaina numamtuk najaktatui, tuja ichinka najanin duwen nawen najama numamtuk najak ukuktatui.
ISA 41:26 Junak emtikan eke nagkaematsaig wi ashí ujajime. Dakumka najanamu apajuímtai aina duka wi etsejag nunak, wi taatsaigkik yaunchkek makichkish etsegchau ainawai; Dita chichamuk makichkish antugchatayai.
ISA 41:27 Junak makichkish etsegchatain wi Jerusalégnumia aidaun ujakuitjai. Tuja aents achija yajuakbau tikich nugkanum batsata duka, dukap atsuk waketjattawai tusa etsegkatnun wi makichik aentsun akatjan Jerusalén awemajai.
ISA 41:28 Ashí diyajai, tujash makichik apajuímtai dakumka najanamukesh wantintsui; chichaman etsegmainkesh makichkish wantintsui. Tuja wi ditan iniasagmag nuna aigmainkesh makichkish wantintsui.
ISA 41:29 ¡Ditak shiig wainak ainawai! Dita dutikmainuk makichkish atsawai. Ditak dakumka najanamu waa ainawai.”
ISA 42:1 “Jujuwai mina inakeg, Wi niinak achiakjai, wi niinak etegkauwaitjai, niini shiig aneajai, niyai mina Wakanjun apusajai; Nii aents ashí nugkanmaya aidaun pujut pegkejan susatnai.
ISA 42:2 Niig senchi jiikag untsumchatnai, chichaakush senchi jiikag chichashtinai, jintá wekagas senchi untsumak chichamujish antuekashtinai.
ISA 42:3 Tagkan kupinak aunash tsujigkag ajapashtinai, tuja lamparin ekemakbau shiig keeshtaish ikagnakchatnai. Niig dekas pegkeg pujutan itaatnai.
ISA 42:4 Tuja ashí nugkanum pujut pegkeg ati tau asa, nii takamujinak makichkish ayamsashtinai, tuja pimpikigkesh idaisashtinai. Tuja nugka múun nayantsa ijus ayá nuwi aents batsamin aidauk, nii jintiamun antuktatus niina dakagtinai, tawai Apajuí”, tiuwai Isaías.
ISA 42:5 Tuke Pujuu Apajuí nayaimpin najanauwa nunú, tuja nugkanashkam najana, nunú nugkanum tsapau aidaunashkam najankauwa nunú, tuja iwaku pujutan mayattanashkam aents aidaun susauwa nunú niina inaken chichajak:
ISA 42:6 “Witjai Tuke Pujuu Apajuínuk, tikichik atsawai, wi aminak mina takagtusti, nuniak uwemtikagtugti tusan etegkeawaitjame, wi aminak kuitamkatnaitjame, dutikakun achiaku atatjame, wagki wi chichaman ditajai umikuitag nuna umiakun, mina aentsug aidaun amasjai. Ame tsaaptin asam, aents aidau yajuakam minai ikaunmatnaitme.
ISA 42:7 Aents wainmachu aidau wainmitkakta, tuja aents achikbau aidau suwenum chimpija dushakam jiijam agkanmitkata, tusan wakegajai.
ISA 42:8 ¡Wika Tuke Pujuuwaitjai, nunuwai mina daajuk! Mina emematjaku kantamtai aina duka tikichik makichkish kantamjuawaigpa, tuja mina emematjutmaina nunú idaikumek, dakumka najanamu aina duka makichkish emematipa.
ISA 42:9 Wi yaunchuk etsegkauwaitag nunú uminka nunú atumesh anentaimsa diistajum, yamai etsegkattajai yaunchkesh antukchamu yamajam aidaun. Nunú eke wantintsaig, atumnak dekamtikajime”, tiuwai Apajuí.
ISA 42:10 Yamajam kantamtai Tuke Pujuu kantamjuatajum. Ashí nugka najatamunum batsamin aidautigmesh Apajuí emematkujum kantamatajum, lanchanum nayants yujau aidaush, kuntin nayantsanum batsamin aidaush, tuja nugka múun nayantsa ijus ayá nuwi batsamin aidaush Apajuín ememattinme.
ISA 42:11 Uwegshunum yaaktamak batsamin aidaush, tuja Quedar wegantu aidaujai batsamin aidaushkam shiig aneastinme. Yaakat Selá batsamin aidaushkam shiig aneasag dakunkut Apajuín kantamjuatnume; tuja aents mujanum batsamin aidaushkam depetmaka shiig aneaku untsumaina imattinme.
ISA 42:12 Tuke Pujuu imanjiya nunak ima niinak idaitustinme, tuja nugka muunnum nayantsa ijus batsamin aina dushakam Apajuín emematak kantamjuatnume.
ISA 42:13 Tuke Pujuu, múun, senchigtin asa, maanitan yacha, shiwaaji aidaun kajejuk, suntag maaniamunum untsumajama imati untsumak jiintuki, shiwaaji aidaunak ijinattawai.
ISA 42:14 Apu Mesías chichaak: “Kuashat tsawantai chichatsuk pujujai, makichik chichamnakesh tutsuk, tuja nuigtush kajetsuk pujujai. Tujash yamaik nuwa uchin uchigmak, buutak mayatama imanittajai.
ISA 42:15 Muja aina nunak nain aina nujai tsaiktatjai, tuja numi aidau, ajak aidau ayá nunashkam ashí ijinattajai. Tuja entsa ayá nunak ukuyuan buku awajsattajai. Dutikakun kucha aidaunashkam ukuyan buku awajsattajai.
ISA 42:16 Wainmachu aidaunak jinta dita wainajakchamunum emattajai. Tuja suwenum yuja nunak tsaaptin etittajai. Tuja jintanum kaya pujutjin weaja nunashkam utsagkan pegkeg awajtustatjai. Wi taja nunak umitskek idaisashtatjai, tuké dutikattajai.
ISA 42:17 Tuja wainka apajuímtai dakumka najanamu aidaun dekaskeapi tinu aina duka dita apajuímtaiji aidaun chichajuinak: ‘Atumetjume jutii apajuíji aidautigmek’, tuinawai. Nuna tinu aina duka datsagkag jiinag megkaejagtinai”, tiuwai Apajuí.
ISA 42:18 Antuchu aidauwah, antuktajum, wainmachu aidauwah, niimi wainmaktajum.
ISA 42:19 Wi mina takagtustinme tusan, atumin etegkau asan aents aidau chicham ujaktajum tusan ishiakbau ainayatkujum aents antuchu, wainmachu aina nujai betek ainajum, nuninuk tikichik makichkish atsuinawai. Atumin wi mina takagtustinme tusan etegkamu aidautijum chicham antuchu, wainmachujai betek ainajum annuk tikima tikichik makichkish atsawai.
ISA 42:20 Wi atumin yayaakun kuashat dutikawaitag duka atumek wainkauwaitjume, tujash umigtukchau ainagme. Atumek chichamak antagme, tujash wi tajim duka makichkish nunap tawa tusagmek dekatsjume.
ISA 42:21 Tuke Pujuuk uwemtikagtina ibau asa, pegkeg wakemain aina nuna aents aidaun jintintuatjai tusa wakejukui.
ISA 42:22 Tujash juju aents aina nunak, dita shiwaaji aidau kasajainak waitkainawai. Dutikainak achijag waanum, nuigtu aents achika chimpitainum chimpiawag batsamtawai. Dutikawag dita wajiji aidaunak ashí yajutuinawai. Ditan ayamjumainuk makichkish atsawai. Tuja dita patayi aidaunash achika jukiag, akikmakui awagtukmi tusag emegkatuinawai. Tujash ditan ayamjuk awakmainuk atsawai.
ISA 42:23 Tujash atum ainajum anuiyag makichkish nunak puyatjusagkesh diinatsui. Nunidau asag atakea duish wajukatnukita tusa dekatatus wakegauk makichkish atsawai.
ISA 42:24 Jacob wegantu Israel aents aina nuna shiwag aidau utsaantuawag kasajuinak waitkaina nunash, ya dutikati tima dutikainawa duka atumek shiig dekagme. ¿Tuke Pujuuchukait nuna dutikau? Israel aents aidauk Apajuín pegkegchau takamjusu ainawai, nuninak, Apajuísh ditanash wajuk pujustinme tiyamkiyi nunash umikchau ainawai, núnidau asag nii jintintuawa nuna umitnash dakitjajui.
ISA 42:25 Nuadui atumnak kajegtamak suwimkan amasmatai, maaniamunum ijipau ainawai. Tujash imaanika waitiakjumesh, makichkish unuimatsjume.
ISA 43:1 Jacob wegantu Israel aents aidauwah, Tuke Pujuu atumin najapauwa nunú chichagtamak: “Ishamkagtukaigpa, witjai atumin agkanmitkaunuk, wi atumnak daagmin adaisan midau atinme tusan etegkauwaitjime, nuadui atumek midau ainagme.
ISA 43:2 Yumi piyajunum nagkaemakminish, wi kuitamkattagme, tuja namak aidau katitkuminish, jakejai tusan kuitamkattagme; tuja jii kegamunum nagkaemakmesh esashtinaitme, jii kegak nimpaush dekapjashtinaitme.
ISA 43:3 Witjai Tuke Pujuu, amina Apajuígminuk, witjai amina uwemtiknunuk, witjai Israel aents aidaun Apajuíji pegkegmanuk. Wi Egipto nugkan, Etiopía nugkan, Sabá nugkan aatsan sujakun atumnak sumakuitjime.
ISA 43:4 Atum iwaku batsamsamnujum tusa tabaunum tikich aidau jinawajui. Atum jinumainun yapajian dekas dita jinatnume tiuwaitjai. Wi nunak dutikauwaitjai, wagki atumin wait anentau asan, atumek dekas waji pegkeg akikama iman ainagme. Wika atumnak aneajime.
ISA 43:5 Ishamkagtukaigpa, wi atumjaig pujajai. Amina aentsjum aidau etsa minitaiya nuni, tuja etsa akaetaiya nuni batsata nuna ijumjatasan yajuakan ikaunmattajai.
ISA 43:6 Tuja aents nujinum batsamin aidaun chichagkun: ‘Awakjatajum’, titatjai. Tuja tsumunum batsamin aidaun chichagkun: ‘Makichkish emetuawaigpa’, titatjai. ‘Mina uchig aidau, mina nawantug aidaujai, atushat nugka nagkatkamunum batstush awakjatajum.
ISA 43:7 Tuja uchi apaji daajin naamama numamtuk mina aentsug asag, mina daajun jukiu aina nunak mina daag ememattai atinun najanauwaitjai; nuadui makichkish emettsuk awakjatajum.’
ISA 43:8 “Mina aentsug aidau jiintin ainayatak wainmachujai betek aina nunú, tuja kuishtinaitak antuchu aina nunú dita nugken ashí awakjatajum.
ISA 43:9 Ashí aents aidautijum makichik ijunbaunmak ijunjatajum. Nunikjum tujuttajum atum ainajum anuiyash ¿yaita atakea duwi atinun pachis, tuja yaunchuk nagkaemajua nunash betek etsegnush? Nunin ataik juwi itantinme, dutikam nunú etsegtai antukag dekaskeapi titinme.”
ISA 43:10 Apajuí chichaak: “Atumek mina chichamjun etsegtugkatnume tusa etegkamu ainagme, wi atumnak etegkauwaitjime, minai kajintsa anentaimkugmek, dekas wi Tuke Pujuuwaitag nunú dekajuattagme. Initaikia duwish tikich apajuí mina nagkaetasuk atsujakui, tuja atakea duwish, duka makichkish atsutnai.
ISA 43:11 Ima wikitjai Tuke Pujuunuk; tikichik uwemtikagtumainuk atsawai.”
ISA 43:12 Tuke Pujuu chichaak: “Wi atumin ujaakun, uwemtijatnaitjime tusan tiuwaitjim nunak, betek uwemtijauwaitjime; tuja wainka apajuímtai aina duka atumnak uwemtijamjachajui, duka atumek shiig dekagme.
ISA 43:13 Witjai yaunchuk nagkamsan Apajuínuk, tuja atakea duwish wiki atinaitjai Apajuínuk. Makichkish mina suwimkajun uwemtumainuk atsawai. Tuja wi dutikamua nuna emegkaumainush makichkish atsawai.”
ISA 43:14 Tuke Pujuu pegkejam, Israel aents aidaun agkanmitkauwa nunú aatus tawai: “Atumin ayamjakun suntag aidaun Babilonia nugkanum ishiaktatjai, dutika ai dita yaaktaji waitiji aidaunak tsaikagtatui. Dutikawagmatai, caldeo aents aidau shiig aneas batsataina nunak wake besemag juwakagtatui.
ISA 43:15 Witjai Tuke Pujuu, Israel aents aidaun najanaunuk. Witjai atumi Apajuíjum pegkegmanuk.”
ISA 43:16 Nayants kuna ishamainnum nuna ejapeen Apajuí ukuya buku awajus ikankauwai. Aatus niina aentsji aidaun ikatiajui.
ISA 43:17 Tuja Egipto nugkanmaya suntag maanitan yacha aidau caballo aidaujai, carro aidaujai Israel aents aidaun pataetukajui, tujash nayantsanum tepeawag makichkish jiinkishtinun megkaejabi; tuja lamparin ekemakbau kajinak megkagama numamtuk megkaejabi.
ISA 43:18 Apajuí niina aentsji aidaun yamai chichajak: “Waji nagkaemakiuwa duka pachikaigpa, tuja anentaimtutkesh anentaimtusaigpa.
ISA 43:19 Wi iwainaktatjai yamagman, nunú ame yamaikiuchia duik wainkattame. Uwegshunum jintan jintamattajai, tuja nugka pegkegchau ajak tsapachua nunashkam entsa ayau awajsattajai.
ISA 43:20 Kuntin ikamia kajen lobo aidau, avestruz aidau aatus shiig anenjusagtinai, wagki wi yumi pukuni jiinun uwegshunum kuashat jiiju asamtai. Tuja nugka ajak tsapachunum entsa aidaun kuashat najankattajai, mina aentsug, wi etegkauwaitag nuna, uwajagtinun.
ISA 43:21 Nunú aents aidaunak wi najankauwaitjai, mina emematjitnume tusan.
ISA 43:22 “Tujash Israel aents Jacob wegantu aidautigmek mina umigtutak kajimatki idaisaugme.
ISA 43:23 Tuja uwig aidaush anenjauchik sujatsjume, kuntin maa nuna neje ashí apeakjumesh emematjatsjume. Wika atumnak anentag sujustajum tusa segaaknuk waitkatsjime, tuja kugkuin incienso apeatajum tusankesh segaaknuk waitkatsjime.
ISA 43:24 Mina anentag sujustinuk pagat kugkuin aina duka sumagtukchabiugme, kuntin aidau wiyajigkesh apeakjumek minak emematjishbaijume. Ayatak pujusjum pegkegchau takamugmin dii diin yawetjajai, nunú pegkegchaugmia nuna diitan tsuwaagjai.
ISA 43:25 Tujash wi amina Apajuíjum asan, ame magkagtutaijum aidaunak esakatjattagme, dutikan atakea duish adeagchatnun kajimatkin idaisattajai.
ISA 43:26 Ame mina utugchatug dekagtakmek yamai tujutta, chichasmi. Pai, ame waji titag tame nunú tita, nunú tiyamin amesh dekas shiig imagnismeash pujam nunú dekaami.
ISA 43:27 Atumi apachjum aajakua nunú, tikich amina chichaman jintinjabianum nujai mai pegkegchaun takainak mina umigtukchau ainawai.
ISA 43:28 Tuja amina apujum aajaku aidau jega mina emematjaku ijuntain shiig kuitamkachu ainawai. Nuadui Jacob wegantu Israel aents aidaunak ijinatnume, dutikawag dushiki batsamtitin atinme tusan idaisauwaitjai”, tawai Apajuí.
ISA 44:1 Tuke Pujuu chichaak: “Jacob wegantu Israel aents aidautigmin wi mina takagtustinme tusan etegkauwaitjim, nunú aidautijum yamai shiig antuktajum.
ISA 44:2 Witjai Tuke Pujuu, atumin najanaunuk, atumek eke akiintsugminig najanauwaitjime. Wi atumnak yayajime. Amek Jesurún Jacob wegantu, mina inakeg wi etegkamuitme, nuadui ishamkagtukaipa.
ISA 44:3 Uwegshunmak yumi kuashat ayau awajsattajai, tuja nugka buku aina nuwishkam entsa kuashat aittawai. Ame wegantu aidaunak mina Wakanjun susagtinaitjai, dutikakun kuashat pegkegnum yaigtinaitjai.
ISA 44:4 Nuadui chijichi yumi ukattai asa, pegkejan muumpama iman, tuja álamo namaka tugkitken tsapaka aiyama iman atinaitjume.
ISA 44:5 Nuwiya makichik chichaak: ‘Wika Tuke Pujuunuitjai’, tumamtinai. Tuja tikichik: ‘Jacob wegantu’, naamkatnai. Untsu tikichik niina uwejen: ‘Wika Apajuínuitjai’ tuu agatmamjatnai. Tuja nuigtu ikak agak, niina apachji daajin ‘Israel’ agagtinai.”
ISA 44:6 Tuke Pujuu, Israel aents aidaun apuji, Israel aents aidaun uwemtikin, Tuke Pujuu ashí senchigtina nunú chichaak: “Witjai nagkamtinish tuke pujuunuk, tuja atakea duish tuke pujutnaitjai. Tikich Apajuí mina nagkaetasuk atsawai.
ISA 44:7 ¿Yaita wijai betek amainush? Iman akug juwi wajanta tujutti. Tuja mina aentsug agtinun etegkauwaitag duwi nagkamsan atakea duwi nagkaemagtinnash etsegnunuk witjai, tuja wikitjai atakea duish wajig nagkaemagtinaita nuna betek etsegnunuk.
ISA 44:8 ¡Makichkish ishamkagtukaigpa! Yaunchuk nagkamsan emtikan junak ujakuitjime. Duka atumek shiig dekagme, tikich Apajuík wijai betekak makichkish atsawai. Tikich Apajuí atumin kuitamjamainuk atsawai. Wika tikich Apajuínak waintsujai.
ISA 44:9 “Dakumak najanin aina duka pegkejak ainatsui. Tuja dakumka najanamu aidaun dita shiig anentuina dushakam pegkegchau ainawai. Tuja dakumka najanamun emematuina duka anentainchau wainmachujai betek ainawai, nuadui ditak datsagkag wainak juwakagtatui.
ISA 44:10 Tuja dita emematiagtinun jiju ukuiyag najanin aina duka shiig pegkegchauwai.
ISA 44:11 Dakumka najanamun emematin aidauk datsaajagtinai, wagki dakumak najanin aina duka aents wainkauch ainawai. Ashí dita aidauk Apajuí emtin dita utugchatjin dekagmamawag datsaajagtinai, nuninak sapigmakagtinai.
ISA 44:12 “Diistajum jiju najanin wajuk takawa nunú: Jinum jiya inimpag, martillowai dekegka tsaika niina senchijin takawai. Nuadui nuna puyatjak yujumkan yutsuk, umutnash umutsuk pujujus pimpiki takamainchau dekapeawai.
ISA 44:13 “Tuja numi taumi dakumak najanin aina dushakam anentaimtusa diisagmi: Niig reglayai dekapawai, tuja lápisai, compásai aatus dakumui. Dutika formónkai tai aentsun dakumak najana jega Apajuí emematku ijuntainum awaya apujui.
ISA 44:14 “Tuja tikichik setjun ajainawai, dutikamun yumi yutak uchupiam muumpawai, nuadui niinu setug ajaka takamain aittawai. Nuniachkush numi ciprén, roblejai wakegainakug ikam ajawag shiig kuitamainawai kampuagti tusa.
ISA 44:15 Nunú kampuaju aidaun ajakag kanawen tsupig yajumainawai jiin ikapag anamawagtinun, untsu tikichnak pag inajuatnun juwinawai. Dutikainak wainka apajuímtain dakumak najanatnunashkam juwinawai, dutika najanawag emematuinawai.
ISA 44:16 “Tuja numi jimaituk ampinjaun jukiag nuna ikapajag, nuwi kuntinu nejen pegka inajuawag shiig yuwawag senchi tutuinawai. Nunikag nunú jinum ayaumas anamak pujus chichaak: ‘¡Yajautsui jii ijusa pujusa anabauk!’ tuinawai.
ISA 44:17 Nuwiya numi ampinjaun jukiag wainka apajuímtain dakumak najanainawai, dutikawag nuna emematak tikishmatug pujus segaak: ‘¡Ametme iina apajuíjimek, jutiish uwemtikagtugta!’ tuinawai.
ISA 44:18 “Nunú aentsuk makichkish dekatsui, tuja antutnash antatsui, wainmachujai betekai, unuimatish atsau, shiig anentainkachui.
ISA 44:19 Ekeemsagkesh anentaimainatsui, jintiaja shiig anentaimat atsujuinawai, nuadui ditak: ‘Jimaituk numin apeamjai, dutikan nuna kaijin pagkan inajuamjai, tuja nuigtu neje pegka inajuan yuwamjai, tuja nunú ampinjauwai juna pegkegchaun tsumainun dutikamjai, ¡wika numi tsupikbaun emematu wekaejai!’ tumamainchau ainawai.
ISA 44:20 Duka dekaskenum yuku yumaina numamtinai. Duka wainka tsanuam nuni wekaemainai. Nunú aents aina duka pujutjinak uwemtijashtin ainawai. Dita takuinaka duka shiig pegkegchauwai. Nunin ataish ditak: ‘Juka pegkegchauwapi’ tusa dekamainchau ainawai”, tiuwai Isaías.
ISA 44:21 “Israel aents Jacob wegantu aidauwah, mina inakeg ainajum nunú adeagtajum; atumek mina inakeg ainagme, atumek mina inakeg wi najanamu ainagme, nuadui ¡minak kajimatjuki idaitusaigpajum!
ISA 44:22 Amina pegkegchaujum aidaunak yujagkim kakegak megkagama numamtuk emegkatkagme. Ataktu wakitkim mina umigtukta, wi aminak agkanmitkauwaitjame” tawai Apajuí.
ISA 44:23 ¡Nayaimpih, ameshkam Tuke Pujuu dutika nunú anentaimtusam shiig aneakum senchi kantamata! Nugka initken batsatutigmesh senchi untsumkujum aents wajukmaina imattajum. Muja aidautigmesh, ikam aidautigmesh, ashí numi aidaujai shiig aneakjum aents wajukmaina imatkujum senchi untsumtajum. Tuke Pujuu Israel aents Jacob wegantu aina nuna ayamjuk agkanmitkak niina senchijin iwainake.
ISA 44:24 Tuke Pujuu amina uwemtijamin, ame eke akiintsuminig najapauwa nunú chichaak: “Witjai Tuke Pujuu, ashí waji aina nuna najankaunuk, wi nayaimpinak nugkajai najanauwaitjai, mina yainkauk makichkish atsawai.
ISA 44:25 Tuja waita etsejin aina nunú etsegbau betek uminkati tusanuk wika wakegatsjai, anentaimsa dekamji tinu aina nunak anentainchau emajai. Aents yacha aina nuna dekatjinak yapagtuan shiig wainak dekachu emajai.
ISA 44:26 Untsu mina inakeg aidau chichaman etsejuina duka betek uminkati tusan yayajai, tuja aents wi awemamu aidau chichaman umina dushakam imanisag betek uminkati tajai. Tuja Jerusalégnumak ataktu yaaktamak batsamsagtinai. Tuja Judá wegantu aidaun yaaktaji aajaku aina dushakam ataktu awagki yaaktamkamu atatui. Yaakat tsaikbau aidaun ataktu jegamjatnume tusan, jega jegamin aidaun wi inagtatjai.
ISA 44:27 Tuja nayants kuyua buku wajasti, nunikmatai tikich namak aidaushkam buku waigti tusan tumainnuk witjai.
ISA 44:28 Wi apu Ciron chichagkun: ‘Ametme mina uwig aidau kuitamnumek, amek wi wakegamua duke ashí takastatme’ tajai. Tuja Jerusalégkan chichagkun: ‘Amek ataktu yaaktamamu atatme’ titatjai. Untsu jega Apajuí emematku ijuntai jegamkamun chichagkun: ‘Amina ataktu jegamjamkatnun, jega jegamin aidaun awemattajai’ tawai Apajuí”, tusa Isaías tiuwai.
ISA 45:1 Tuke Pujuu Ciron apu adayak, aents tikich nugka múun aidaunum apu senchigtin batsata nuna depetuk, maanitaiji aidaunak atanjati tusa yayaak, egkesa awekajakui. Tuja yaakat peeja apakbau aina nunash tujintsuk utua shiwag aidaun ijinati tawai. Nuadui Apajuí niina chichajak:
ISA 45:2 “Ame weamunmak wi emkan wetatjai, tuja muja aidaunak yumpuajan paka emaktatjai, waiti jiju bronce najanamu aina nunak tsaiktatjai, tuja jiju hierro waiti batsatkamua nunashkam tsaiktatjai.
ISA 45:3 Tuja waji pegkeg aidau makichkish wainmainchau uukbau awa nuna, wi amastatjai. Nunú wainkam, Tuke Pujuu Israel aents aidau Apajuíjinuk ima wikitag nunú dekattame. Wi aminak untsukmajame.
ISA 45:4 Israel aents Jacob wegantu aidau, mina inakeg aina nunú aneamunum, amek minak dekagtsuminig wi aminak etegkamjame, dutikan apu emamjame tikich apu aina nuna nagkaesau ati tusan, nuadui aents aidaush ame tabaun antugtamkagtatui.
ISA 45:5 Witjai Tuke Pujuunuk, tikich mina nagkaetasuk atsawai, amek minak dekagtsuminig wi aminak kuitamkattajame depetmakti tusan.
ISA 45:6 Ashí tikich nugkanum batsamin aidaush tikich Apajuí mina nagkaetasuk atsa nuna dekaatnume tau asan nunak dutikattajai. Witjai Tuke Pujuunuk, tikich mina nagkaetasuk makichkish atsawai.
ISA 45:7 Witjai tsaaptinun suwejai najanaunuk, tsawan pegkeg atinnash, tsawan pegkegchau atinnashkam, ashí nunak wi dutikajai.”
ISA 45:8 “Ashí nugkanmaya aidauk ima pegkeg takat aina nunak takagtatui, duka Tuke Pujuu jegashik nayaimpinmayan akakea numamtuk atatui. Aatus aents aidau pegkejan takainak uwemtan jukiagtinai.”
ISA 45:9 Pinig duwe juki najanamua duka, aentsjai betekak, niina najanauwa nuna chichagkug: “Amek najantak dekatsme” tusag jiyanimaitsui, tuja tsakusai pegkejan dakumak najannunak: “¿Waji takame?” tusag tsakusak iniatsui.
ISA 45:10 Tuja uchi yama akiinauwa duka niina apajinak dukujijaig: “¿Wagka minash akiintuabiugme?” tusag jiyamaitsui.
ISA 45:11 Apajuí pegkejam, Tuke Pujuu, Israel aents aidaun najanauwa nunú chichaak: “Atumek minak makichkish inatmain ainatsjume, mina aentsug aidaunash wisha itugkatnaitja nuna ujatkati tusagmek wakemaitsugme, tuja wi dutikamujua dushakam jutik dutikata tusagmek jintinjumain ainatsjume.
ISA 45:12 Wi nugkanak najanan, nuwi aents aidaun batsasuitjai, tuja nayaimpinash múun agkajun najanan, nuwi agkajunum etsanjatin aidaun najankauwaitjai.
ISA 45:13 Wi apu Cironak etegkajai, dutikau asan wi niinak Jerusalén mina yaaktajua nuna ataktu jegamag yaaktamkati tusan yaigtatjai. Nuadui Israel aents aidau achija yajuakam Babilonia nugkanum batsata nuna jiigtatui, dutika jiija agkanmitkakush, akikmaktajum tusag makichkish kuichkinak segashtatui”, tusa Tuke Pujuu ashí senchigtina nunú juna aatus tawai.
ISA 45:14 Tuke Pujuu Israel aents aidaun chichajak: “Egiptunmaya aents ajakan ajakbau, tuja etiopíanmaya aents waji sujin aidau, Sabá aents esajam aina dushakam, ashí ditak ima atum tabaunak umigtabiagtatui. Ditak atumi wainka inaku waitkatai agtatui. Imanik waituinak atumi emtin tikishmag pujusag chichainak: ‘Dekas Apajuík ima atumjaig pujawai, tikich Apajuík makichkish atsawai.’
ISA 45:15 Amek dekas wainmainchauwaitme, tuja ametme Israel aents aidau ayamjukam uwemtiknumek.
ISA 45:16 Wainka apajuímtai aidaun dakumak najanin aina duka datsagkag wainak juwakagtatui.
ISA 45:17 Tuja Israel aents aina nunak Tuke Pujuu tuke batsamsatnun uwemtijatnai. Nuadui ditak wainka inaku waitkatai, dushiktaig achagtinai.”
ISA 45:18 Tuke Pujuu Apajuí nayaimpin, nugkan najana, juwi aents aidau batsamsatnume tusa umikua nunú chichaak: “Witjai Tuke Pujuunuk, tikichik makichkish atsawai.
ISA 45:19 Wika aents aidau antachbaunum suwenum uumka pujusnuk chichatsjai. Tuja Israel aents aidaun susashtinaitkunuk, segattajum amastajime tusanuk anagkuatsjai. Wika Apajuí dekasken pegkejan chichauwaitjai.”
ISA 45:20 “Ashí nugkanum batsatutijum juwi kaunajum ijunjajum, antuktajum. Atumek anentainkachu ainajume, wainka apajuímtai numi dakumka najanamu makichkish atumin uwemtijamainchau emematjume.
ISA 45:21 Tuja wainka apajuímtai dakumka najanamu emematjum dusha pegkejash aniajum nunú pempeentunikjum ininistajum. ¿Yaita juju waji aidau nagkaemagtinun pachis emtika etsegkaush? Makichik aentskesh juju waji nagkaemaina nuna pachis etsegkauk atsawai. Witjai Tuke Pujuuk juju waji nagkaemaina juniktinun yaunchuk emtikan etsegkaunuk. Tikich Apajuí mina nagkaetasuk makichkish atsawai. Apajuí pegkejam uwemtikagtinuk tikichik atsawai.
ISA 45:22 “Tikich nugkanum atushat batsatutigmesh minai minitajum, wi uwemtan amastajime, witjai Apajuínuk tikich mina nagkaetasuk atsawai.
ISA 45:23 Wika dekas umiktinjun tumamjai, mina shiwag aina nunak ijinatnaitjai, duka dekas imanisag uminkatnai. Tuja mina emtijui aents aidauk tikishmag batsamsag emematjuinak: ‘Dekas ametme jutii Apajuíjimek’, tujutiagtin ainawai.
ISA 45:24 Tusa chichainak: ‘Pegkeg takata duka ima Tuke Pujuuwaig awai, tuja ima nigki senchigtinuk’ tujutiagtinai. Aents mina chichamjun umitan dakitujaku aina duka datsagkag wainak juwakagtinai.
ISA 45:25 Ashí Israel aents aidauk wi yayamu asag, minak umigtuinak ima pegkeg takata nunak takagtinai”, tawai Tuke Pujuu, tiuwai Isaías.
ISA 46:1 Isaías chichaak: “Babilonianmaya aidaun apajuímtaiji Bel, Nebo, aina duka winchainag, nugka iyainawai. Tuja babilonianmaya aidauk, kuntin waji pataja jutai aidaunum dita apajuímtaiji aidaun patajag yajumainak, kijin asamtai kuntinjin waitkainawai.
ISA 46:2 Nunik kijimainak nugka tukumak iyaak ajuajam ayamjumamainchau asag tsainak ajapnainawai. Nunin asagmatai tikich nugkanum yajumainawai”, tiuwai.
ISA 46:3 Tuja Apajuí chichaak: “Jacob wegantu, Israel aents iwaku batsatutijum antuktajum: Wi atumnak eke akiintsugminig uchi pagkusa kuitamaina numamtuk kuitamkauwaitjime.
ISA 46:4 Tuja atum múuntuch wajasjum jempejuja pujakjuminish, wi atumin najadau asan, yamai kuitamjim dutiksanuk kuitamkan uwemtijatnaitjime.
ISA 46:5 “Wijai betek tikichik makichkish atsawai. Witjai tikich aina nuna nagkaesaunuk.
ISA 46:6 Tuja awai aents kuashat oron, platan ikaunbau. Dutika ikaunamtai aents wainka apajuímtain dakumak najanin najanamtai, emematmi tusag nunú aentsun egainawai.
ISA 46:7 Tuja nuna najanamtai, yanaki jukiag tuwi pujustatua nuwi ejegan apujuinawai, dutika apujkim makichkish buchittsuk pujawai. Nunik pujaun yaimpakti tusag, senchi untsukag segamash makichkish ayatsui, tuja waituinak nii ayamjutpakti tusa segamash makichkish ayamjumaitsui.
ISA 46:8 Pegkegchaun takau aidauwah, juju adeagtajum, nuniakjum shiig anentaimjatajum,
ISA 46:9 yaunchuk waji aidau nagkaemajua nunú adeagtajum, witjai Apajuínuk tikichik atsawai; witjai Apajuínuk, tikich wijai betekak makichkish atsawai.
ISA 46:10 Tuja tsawan nagkanbaush wajuk atinaita nunak wika yaunchuk nagkamsan dekajai, tuja atakea duish waji nagkaemagtinaita nunashkam etsegjai. Wi wajina dutikatag tusanua wakegaja nunak wika imatiksanuk uminaitjai.
ISA 46:11 Makichik aentsun tikich nugkanmayan etsa minitaiya nuwiyan untsukmajai, duka tuke chuwagjai betek atushtanmaya minittawai, nigka wi tabaun umiktatui. Tuja wi nuna dutikatin atajai tusan tiuwaitag nunak nii imatiksag umiktatui. Wi dutikatnujun chichaman umikuitag nunak tuke umiktatjai. Nunak dekas uminkatnun tajai.
ISA 46:12 Chichaman antakchau, intimkiu aidautijum anentaimsajum, iik wamak agkanmagashtin ainaji tusajum tautijum, wi tajim nunú antuktajum.
ISA 46:13 Wi atumnak wamak agkanmitkattajime, nunak shiig wamak dutikattajai. Tuja Jerusalégnum aents aidau batsata nunak wi ayamjukan agkanmitkattajai. Mina imanjua duka Israel aents aidaunum atatui”, tiuwai Apajuí.
ISA 49:1 “Yaakat múun nayantsan ijus ayá nuwi batsamin aidautijum, tuja tikich nugka múun aidaunum atushat batsamin aidautigmeshkam wi tajim nunú antugtuktajum: Tuke Pujuu minak eke akiintsaig etegtuauwai. Tuja mina dukuju wakeen egketaig mina daajun adaitujus untsugkauwai.
ISA 49:2 Apajuí minak senchimtijua chichamtin, puyag etsakamu empekama iman, tuja flecha etsakamu tsakaskatuama iman awajtusmayi. Dutijua makichik waji ejaka kuitamaina numamtuk kuitamjukmayi.
ISA 49:3 Tuja nii chichagtak: ‘Israel aents aidauwah, atumek mina inakeg ainagme, atumiin mina senchignak iwainaktatjai’, tujutmayi.
ISA 49:4 Tuja wi anentaimsan chichaakun: ‘Pegkegnakesh jukitnunig wainka takakun waitiajai’, tibaijai. Tujash wi takasbaunum jukitnujuk Tuke Pujuu senchigtina nuwi amayi.
ISA 49:5 “Israel aents Jacob wegantu aidau pampagka batsata nuna yajuak atak awakeag ikaunmati, dutikak mina takagtusti tujutu asa, wika eke akiintsaig, Tuke Pujuu minak wait anenjug, yaunchuk nagkamas etegtuauwai.
ISA 49:6 Tuja nii chichagtak: ‘Wika aminak mina inakeg ati, nuniak Jacob wegantu aidau achija yajuakam nugken ukukiag, tikich nugkanum batsata nuna ataktu awakeag, dita nugken ikaunmati tusanuk ima nunakek tatsugme. Tuja ashí tikich aents judíochu aina nuwishkam tsaaptinun iwainakti titatjame. Ashí tikich nugka aidaunum mina chichamjun etsegkati, nunitai ditashkam uwemjatnume tusa’, tujutmayi.
ISA 49:7 Tuke Pujuu uwemtikagtin, Israel aents aidaun Apajuíji pegkegma nunú, niina aentsji tikich nugkanmaya aidau kajejam, wainka inaku waitkatai batsata nuna chichajak: Wi atumnak etegkauwaitjim nuadui apu aidauk niina atuwe aidaujai atumi waipakag, eme anenjamsag, atumi emtimin tikishmag pujusagtinai. Nuadui wi atumin anagkuawaitjim nunak imatiksanuk umiktatjai.”
ISA 49:8 Tuke Pujuu chichaak: “Wi wait anenkagtamu tsawan jegau asamtai, untsugkugmin aikmaijime, uwemain tsawan jegagtamiaju asamtai, wi yaigbaijime. Wi atumnak tikich aents aina nuna nagkaesau agtinme tusan etegkauwaitjime. Nuadui atum Israel aents aidautigmek atumi nugkemin ataktu waketjattagme, nunika jegajum atumi shiwaajum aidau yaaktan tsaikajua nunú ataktu yaaktamkatnaitjume.
ISA 49:9 Tuja aents aidau achijam chimpija nunú chichagkujum: ‘Yamaik agkan wajasugme, tuja suwenum batsatutigmeshkam tsaaptin wainkatajum, nunikjum jinta yantamenig chijichi pegkeg ayau wainkattagme. Tuja muja uwegshunmash baka aidaun yumainjig kuashat aittawai’, titajum.
ISA 49:10 Atumek nujantaish tuja kitakaish, etsa sukupainakuish, seekiyaish, makichkish waittsashtin ainagme. Wi atumnak aneau asan uyuntsattajime, tuja nuigtushkam yumi pukuni kuashat jiinaidaun amastinaitjime.
ISA 49:11 Muja aina nunak yumpuajan pakaman, shiig iwaja jintaman esekan tutupit dakuejan umiktatjai.
ISA 49:12 Tuja Israel aents aidautigmek tikich nugka nagkatkamunum atushat batsatutijum juwi kaunatnaitjume. Untsu tikich aidauk nugka Sinim batsatu kaunatnai.
ISA 49:13 ¡Nayaimpih, shiig aneakjum kantamatajum! ¡Nugkah, shiig aneasta! ¡Muja aidauwah, shiig aneakjum untsumkatajum! Wagki Tuke Pujuu niina aentsji waituinak wake besemag batsatun, wait anentug anentai ichichtuju asamtai.
ISA 49:14 “Atum Jerusalén batsamsajum chichaakjum: ‘Tuke Pujuuk jutiinak kajimatjamki idaitamsae’, tuyugme.
ISA 49:15 “¿Nuwa nii jujegbaujinash wait anentsukesh kajimatkish idainukaih? Nuwa nii jujegbaujin kajimatki idaisaintai, tujash wika aminak makichkish kajimatkinuk idaisashtatjame.
ISA 49:16 Atumek mina aentsug ainajume, mina uwejui agaja takaku amainaitag numamtin ainajume. Jerusalén peeja tenteamu tsaikbauwa nuna tuke anentaimtajai.
ISA 49:17 “Shiwag aidau Jerusalégkan wamak tsaikajua nuni senchi shiig wamkeuch ataktu jegamjajum yaaktamkatin ainajume.
ISA 49:18 “Jerusalén batsatutigmek pagkaijum, ashí yantamnum niimsatajum, Israel aents aidau achija yajuakbau aidau ataktu waketug Jerusalén kaunainawai. Junak dekas uminkatnun wi Tuke Pujuun tajai. Dita nunik waketiagtai, nuwa aishinatin tsawan jegamtai, iwagmamak patakumtain patakumama numamtuk Jerusalégkak wajaktatui.
ISA 49:19 Atumi nugkem tsaikam pegkegchau wajas amayi, tujash nuna dutikau aina duka yamaik ukukiaje. Nuadui nunú nugkanum kuashat aents piyakmatai, tikich aents pujumain agkauk atsutnai.
ISA 49:20 Atumi uchijum aidau megkaejamtai, kajimatki idaisamu aidau kaunawag chichagtamainak: ‘Juju nugkak tikima piipich asa ijunja pujumaitsui. Nunin asamtai tikich nugka sukagtusta nuwi pujusagmi’, tujamiagtatui.
ISA 49:21 Tujamainakui atum chichaakjum: ‘¿Ya iinash uchinash imatikash amase? Iik kuashat uchigtuchu ayaji, nuigtush uchijinmainchau ayaji, iik uchiji yajutka ukukim uchigtuchu juwakuitji. Tujash ¿jusha tuwiya kaunae? ¿Jusha ya kuitamkam tsakakuita?’ titinaitjume”, tiuwai.
ISA 49:22 Nuadui Tuke Pujuu apu chichaak: “Wi nugka múun aina nunak wainchatai ishamain aidaun iwaintuktatjai, dutika ai, nuna wainkag atumi uchijum aidaun, nawanjum aidaun shiig kuitamas yanaki jukiag ikaunmatnume titatjai.
ISA 49:23 Tuja atumek apu aina nunú apajimattagme, untsu apu nawanji aidauk atumi nawanjuchijum aidaun kuitamin agtatui. Nuninak atumin tikishmatjamjag dawem bika wajasun dukatjamiagtinai. Nuninakui anentaimsajum, dekas Tuke Pujuuk pujawapi titatjume. Tuja mina dekaskeapi tujutuidauk tsanuamak achagtinai.
ISA 49:24 “Aents wajiu maanitan yacha asa, maania depetmak waji jukimujia duka kakajus atanmaitsui. Tuja aents maaniaku achikmauwa dushakam aents wajiun tsanug ukukig tupikaumaitsui.
ISA 49:25 Tujash Tuke Pujuu chichaak: Aents senchigtin maania depetmak, waji aidaun yajuakbaujinak atanjagtinai, tuja tikich aents wajiu aentsun achika jukiuwa nunashkam atankiagtinai. Tuja atum Israel aents aidautigmin utugchatan itagtamainakuig, wi atumi uchijum aidaunak ayamjuktinaitjai.
ISA 49:26 Dutikakun ditak pempeentumakiag yumamatnume, nuninak dita numpenak uwag vinojai betek nampegtinme titatjai. Dutika ai ashí aents nugkanmaya aidauk wi Tuke Pujuu, amina uwemtikin Jacopan Apajuíji senchigtinaitag nuna dekawagtatui. Witjai amina ayamjukan agkanmitkaunuk”, tiuwai Apajuí.
ISA 50:1 Nuigtushkam Tuke Pujuu chichaak: “Israel aents aidauwah, wika atumin egaknush wainkachmaijime. Untsukmaijime, tujash aigkashmaijume. Wika atumnak pachitskek idaisachuitjime; tuja mina diwig akikmaktinun kuichkin jukitag tusankesh wainka inaku waitkatai atinme tusanuk sujukchabiajime. Wika atumi tudaugmin idaisabiajime. Tujash atum waitu batsatjum nuna jiiki uwemtikmainuk mina senchijuk ajutui. Aents patayi jakamtai, jáanch bukusean nugkuwama numamtuk nayaimpinak wi bukuseayai dukukan idaijai. Tuja nayants, nuigtu namak aina nunú kuyuatag takug wi nunikti tusan machikiuch tamawaitak kuyumainai. Nunik yumi buku wajasmatai, namak aidau jinaa kaukti tusa nunak nunimainai”, tiuwai.
ISA 50:4 Tuke Pujuu, apu, minak aents pimpiki batsatun jintintua anentain ichichtugti tusa unuitugmae. Tuja aents chichaman antuk betek umiauk jintintayama duwi minak Apajuí kashi kashinig tuké kashikmas inaantawai, niina chichamen antuk unuimagti tujutu asa.
ISA 50:5 Tuke Pujuu, apu, minak chichama umin ati tusa jintinjuauwai. Nuadui wika niina intimjuknuk umigtsukek idaisachmaijai.
ISA 50:6 Mina tuntupjui asutuinakuish, asutuatnume tusan idaisabiajai, susujun uwegtuinakuish, idaisabiajai. Dushiktuinak yapijui usuktuinakuish, yapignak ejakchabiajai.
ISA 50:7 Tuke Pujuu, apua nunuwai mina yainta duka, nuadui pegkegchaun chichagtuina nunak wika najaimatsjai. Nuadui wika kaya múun umuchmainchawama iman wajasan pujuyajai, nuadui wika wainka inatsamak achattajai.
ISA 50:8 Mina ayamjutna duka wijai pujawai. Tuja ¿wi pegkegchau takamsamujun etsegtugmainush yaita? ¡Nuna dekau akuig, apu chichaman epegkin pegkeg puja nuwi wemi! Wi pegkegchau takamsamun dekau akug nuwi tantati. ¡Nunik mina igkuntua tujutti!
ISA 50:9 Tuke Pujuu, apu, minak kuitamjawai, mina achijuk suwimka sujumainuk makichkish atsawai. Mina shiwag aina duka jáanch mamuk yuwam megkagama numamtuk megkaejagtinai.
ISA 52:1 Jerusalégnumia aidautijum aneaku niimkau pujustajum, Jerusalén yaakat pegkegma nuwi batsatutigmek wajiu wajastajum, nuniakjum shiig iwagmamkatajum, wagki Apajuín umigchau aents pegkegchau aina duka ataktu awagkig atumnak jetepakchagtatui.
ISA 52:2 Jerusalégnumia aidautijum nugká pushugkajum batsatjum duka, datsaamtsuk wajakjum jáanchjum pegakjum yantsaptuktajum, nunikjum apu niina inamtaijin ekemaina numamtuk ekemsatajum. Tuja datsauch aidautigmesh, achija yajuakam batsabaijum nunisjumek yamaikish batsamtsuk, agkanmagatajum.
ISA 52:3 Tuja Apajuí chichaak: “Atumin achipag yajupakajua nunak minak akigkachu ainawai. Nuadui wishakam atumin awakeaknuk makichkish akikmakchattajai.
ISA 52:4 Yaunchuk mina aentsug aidau Egipto nugkanum shiyakag nugkenchau inaku waitkatai batsamajaku ainawai. Tuja tikich tsawantinchakam makichkish utugchatji atsujunak asirianmaya aents aidau senchi waitkasaju ainawai.
ISA 52:5 Tujash yamaish ¿wagka imatikash waitkainawah? Mina aentsug aina nunak utugchatji atsujunak Babilonia nugkanum yajuakaje. Dutikawag nuna apuji aidau waitkainak ememas chichainak kashi kashinig kajemtijuinawai.
ISA 52:6 Tujash tsawan jegattawai, mina aentsug aidau mina shiig waitkagtina nunú. Nunik waitkag adeajagtinai, wi ditan chichagkun: ‘Witjai apunuk’ tiuwaitag nuna”, tiuwai Apajuí.
ISA 52:7 Aents mujanmaya akaiki wekagas yamajam chichaman agkanmaetan uwemtajai pachis etsejak wekagas, Jerusalégnumia aents aidaun chichajak: “Atumin Apajuíjiyai dekas apuk”, tusa etseja duka shiig anentam auwai.
ISA 52:8 Atumi suntajum jinta niimin aidau Tuke Pujuu Jerusalégnum wakitki midaun wainkag shiig aneenak untsumaina nunú ¡antuktajum!
ISA 52:9 ¡Jerusalégnumia aidauwah, Tuke Pujuu niina aentsji aidaun wait anentug Jerusalégnashkam agkanmitka duwi nii eme anentsajum kantamtai shiig aneasjum senchi kantamatajum!
ISA 52:10 Ashí aents tikich nugkanmaya aidaush wainainamunum Tuke Pujuu niina senchijin iwainake. Tuja Apajuí iina uwemtijamja nunak ashí nugkanum dekawagtinai.
ISA 52:11 ¡Babilonia nugkanum batsatjum duka jiinjajum ukuktajum! ¡Tuja Tuke Pujuu jeen takastin waji aidau ikaunmatnutigmek kuitamamkatajum, pegkegchau takasaigpa!
ISA 52:12 Tujash wainkajum waugtukaigpa, tuja uumkagmekesh tupikakigpa, atumi aintamuk atsawai. Tuke Pujuu, Israelan Apajuíjiya nunú atumnak kuitamjamainawai.
ISA 52:13 Mina inakjuk ashí depetmaktinai, nuadui tikich aidaun nagkaesau eme anentam atinai.
ISA 52:14 Kuashat aents aidau niina yapin diigsag puyatkagtinai, wagki yapi emestujam aents niimtinchau wajasu asamtai.
ISA 52:15 Tuja aents tikich nugkanmaya aidaushkam senchi puyatkagtinai. Tuja apu aidauk nuna wainkag makichkish chichakchagtinai, wagki nunak yaunchkesh antushtain antuinak, waintanashkam wainaidau asag.
ISA 53:1 ¡Ii etsegbaunak makichik aentskesh dekaskeap tawa tichau ainawai! ¡Apajuí senchijinak makichik aentskesh wainkachui!
ISA 53:2 Apajuí niina inakenak ajak yama tsapaak kagkape nugka katsugmanum init akagama nunikti tiuwai. Nunú aentsuk imanchauch, eme anentsa diimainchau, nuigtush wait anenmainkesh atsayi.
ISA 53:3 Ashí aents aidauk niina tsumainak dakitianume. Niyai dekas senchi najaimak waittsauwa duka. Niig waitiakush, waitiajai tichauwai, wagki tuke unuimatjau asa. Nuadui makichik aents ii dakitamu diimaitsu dutikiaji. Tsuwaaja idaisabiaji, nuadui puyatjusaikish diischauwaitji.
ISA 53:4 Tujash niig dutikamaitak ii waitiamujinak nii yajuakmayi, tuja iina najaimatai aidaunak nii yajuakmayi. ¡Iik niina pegkegchaujinis aents aidau eemtin Apajuí suwimak susam waitiatai tuyaji!
ISA 53:5 Niinak iina katseken nagki ijuajui, tuja iina tudaujin shiig senchi waitkasaju ainawai. Nii waittsamunum agkanmagat jukimui, tuja nii ijunbaunum iinak etsaentamjauwai.
ISA 53:6 Tuja yaunchkek iik uwig kuitamkacham wagaka wekagama numamtuk aayaji. Tujash yamaik Tuke Pujuu iina tudaujinak niyai akikmatjamkauwai.
ISA 53:7 Niinak shiwag aidau shiig senchi suwimawagmayi, imatikamash niig ayatak yunumkabi, nuniak makichkish chichakchabi, uwig maatasa juki ematia numamtuk jukiag emagmayi maatasag. Tuja uwig uje tsupigmash takamtak tepegama numamtuk makichkish chichakchabi.
ISA 53:8 Pegkegchaun takamsachunak achikag jukiagmayi, dutika juwagtaish niina ayamjumainuk makichkish atsubi. Tuja niinak makichkish puyatjukchagmayi, ayatak ajak ajaamu tegai ajapmaina numamtuk, mina aentsug aidau tudaujin maawagmayi.
ISA 53:9 Niig makichkish magkagtuachu aig, tuja waitjutnakesh waitjuachu aig, aents pegkegchau aidau jinau ukusbaunum nuna yantamen ukusagmayi.
ISA 53:10 Nunak Tuke Pujuu dutik waitkastajai tusa wakekauwai. Niig aents aidau tudaujin waittsau asa, kuashat mijan jatsuk iwaku pujus, nii wegantu aidaun uchiji wegantu aidaunak ashí wainjatnai. Tuke Pujuu nii dutikatnujin anentaimtujua duka nunú aents waittsamunum betek uminkatnai.
ISA 53:11 Imanik waitus nagkaikiu asa, dekaattawai dekas Apajuí umigbau ima pegkeja nuna, nunik shiig aneas juwaktinai. Apajuín inake chichaman betek umina nunú aents aidau tudaujinak entsaktinai, dutikak agkanmitkatnai.
ISA 53:12 Nuadui Apajuí niinak senchigtin ashí eme anentsa diitai awajsattawai. Wagki niig pegkegchau takamsachuitak, pegkegchaun takamsaujai betek, aents aidau uwemjatnume tusa, dita tudaujin dita mantamnamainun nii mantamdauwa duwi.
ISA 54:1 Isaías chichaak: “Nuwa uchin uchigmachu aidauwah, shiig aneakjum kantamtai senchi kantamatajum, Apajuí chichaak: ‘Nuwa uchin uchigmachu asamtai, idaisamua duka aishinnun nagkaesau uchigtin atatui’, tawai.
ISA 54:2 Israel aents aidauwah, atumin aakjum aina nunú puyattsuk nuni senchi múun awajsatajum, dutikajum daek esajam yajuakjum nunú achimtika jigkaktin numi shiig ajigtajum.
ISA 54:3 Ame wegantu aidauk shiig kuashat yujaktatui, nunikag tikich nugkanum shiyakag makichik yaaktakesh atsaunum dita yaaktamak batsamsagtinai.
ISA 54:4 Ishamkagtukaipa, wainka pegkegchau chichagmak achatnaitme, dushikiamash achattame. Datsa asam uchijum atsau asamtai, dushikiam wekaeyum duka kajimatkita. Ame wajemea pujamin dushiktamainakui, datsaamin ayum duka yamaik nunikchattame.
ISA 54:5 Wagki Apajuí amina najapauwa nunú nuwa nuwatkamujai betek awajtamsattawai. Niina daajig Tuke Pujuu ashí senchigtin tutayai. Amina ayamjutpak uwemtijamna duka Israela Apajuíji pegkejam ashí nugkan jajutua awai.
ISA 54:6 Amek nuwa muntsugtaitak idaisam pujus waitu pujuuwama numamtuk waitu pujubiume. Tujash niina aishi ataktu awagki tsagkujug jumaina numamtuk, Apajuí untsugmawai midau ati tusa, nuadui juna aatus tujamui:
ISA 54:7 ‘Ujumchik tsawantai pachitsuk idaisamjame, tujash wika wait anenkagtinaitag iman asan, ataktu awagkin minai itattagme.
ISA 54:8 Amina kajegkan, ujumak tsawan uumjukan idaisamiagme. Tujash makichkish kajimatmainchaun aneau asan, wait anenjabiagme’, tusa Tuke Pujuu amina uwemtijamjauwa nunú tawai.”
ISA 54:9 Tuja junashkam Apajuí chichaak: “Yumi ashí nugkanum piyajua nunú tsawantin wi Noén chichagkun: ‘Ataktu awagkinuk nugkanmak yuminak pimumtijashtinaitjai’ tiuwaitag dutiksanuk yamaishkam tajai. Ataktuk aminak kajegkashtatjame, tuja awantanashkam awankashtatjame.
ISA 54:10 Muja aidau tikich yantamnum shimakuish, tuja yumpuna kakekuish, wi amina aneajam nunak anentaignak yapajiashtinaitjai, tuja utugchat akuish, epegkea pujutai atinun chichaman umikuitag dushakam yapajinashtinai, tusa Tuke Pujuu amina wait anenjamja nunú tujamui”, tiuwai Isaías.
ISA 54:11 Apajuí chichaak: “¡Jerusalégkah, aminak anentaimin ichichtugmatsuk kajimatki idaitamsagmatai, dase tukua tukuam pegkegchau wajasum nunak ataktu nagkaman iwajattagme! Dutikakun kaya zafiron aepkan nuwi ekenin kaya pegkejuch akik aidauwai peejan umiktatjame.
ISA 54:12 Kumpin aidaunak kaya rubí tutayai najanattajai, tuja waiti aidauk kaya berilo tutayai najanamu agtatui. Untsu yaaktanak kaya pegkejuch aidauwai peejattajai.
ISA 54:13 “Amina uchijum aidaun, nawanjum aidaujai ashí jintintuattajai, dutika ai, ditak agkan shiig batsamsagtinai.
ISA 54:14 Amek shiig takauwaitam duwi senchi atatme, nuadui makichik aentskesh inapakug waitkagmaschatnai. Tuja sapigmamush atsugtamtinai, ishamain antakum sapigmam duka ataktuk sapigmakchatnaitme.
ISA 54:15 Makichik aentskesh jetepakug, wi inagbau asagkesh jetepakchatnai, dutijamkuish duka ame depetkatnaitme.
ISA 54:16 “Juju shiig antukta: Aents jiju ukuiyag najanin aina nunak wi najanauwaitjai, tuja aents magkagtak utugchatan aepin aina nunashkam wiki najanauwaitjai.
ISA 54:17 Tuja wi najankauwaitag nuna nagkaesaun magkagtutai amina mantamainun najanauk makichkish atsawai. Nuadui amina mantamatag tuidauk ashí depetkam itatmikagtinaitme. Wika mina inakeg aidaunak: ‘Depetmatan suwajai’ ” tusa Tuke Pujuu tiuwai.
ISA 55:1 Apajuí chichaak: “Aents kitamauk minai taa uwagti. Kuichik atsugbau aidauk minai kaunawag trigo, vino, leche aidaun akikmatsuk yuwatnume.
ISA 55:2 Waittsa takasa kuichik jukimua duka yutai sumaka yuwa yapajamu megkaekashtinaitkuik, wainka akikmakaik ajapmaitsui. Wi tajam nunú antukam yutai pegkeg yuwatnaitme.
ISA 55:3 “Juwi minai kaunajum wi titatjim nunú antuktajum, nuniakjum iwaku pujustajum. Wi Davita aneau asan anagkuawaitag nuna umiakun, atumjai chichaman umiktatjai atakesh yapajinashtin tuke asatnun.
ISA 55:4 Juju shiig antuktajum, wi niinak mina chichamjun ashí tikich nugkanmaya aidaunash jintintuati tusan apu awajsauwaitjai.
ISA 55:5 Israel aents aidauwah, aents tikich nugkanmaya aidau untsuktinaitjume. Dutikawagmin atumin waipachu ainayatak, tupi tupikainakua kautjamawagtinai. Wi nunak atumin wait anenjamjatnume tusan dutikattajai. Witjai Tuke Pujuu, Israel aents aidaun Apajuíji pegkegmanuk.
ISA 55:6 Tuke Pujuu wainkatag takugmek yamaikiuchia duik egaktajum, tuja tikijuch puja duik untsutash untsuktajum.
ISA 55:7 Pegkegchaun takau aina duka nuninun wekaetutsuk idaisati, tuja pegkegchaun anentaimtin aina dushakam nunak idaisatnume. Ataktu wakitkijum Tuke Pujuu tsagkugkagtina nuwi minitajum, nuniagmin nii wait anenjamjagtatui.”
ISA 55:8 Tuke Pujuu chichaak: “Wika atumjai betekak anentaimtsujai. Nuigtush wi takamua duka atum takajum nujaig betekchauwai.
ISA 55:9 Tuja mina anentaimtajuk, atumi anentaimtajin nagkaesauwai, mina takatjushkam atum takajum nuna nagkaesauwai”, tusa Apajuí tujamui.
ISA 55:10 Yumik nayaimpinmaya yutawai, nunikash ataktuk nayaimpinmak wakettsui, ayatak nugkan uchupig ajak tsapamain emawai, dutikamtai ajak aidau tsapawai, nunik nejeku juuka yutayama
ISA 55:11 numamtuk mina chichamjushkam wi tibau umintsukek, tuja wi wakegamua nunashkam dutiktsukek wakitkig minaig waatsui.
ISA 55:12 Atum achija yajuakam batsatjum duka jiinjajum agkan shiig aneasjum, atumi nugkemin waketjajum kaunattagme. Nunika kaunajum muja aidau wainkujum, shiig aneasjum senchi kantamtinaitjume. Atum imatjumin muja aidauk, numi aidauk, aentsjai betek uwejen awatiagtinai.
ISA 55:13 Atumi nugkemin jagki ayá nunú jinaamtai, pino aidau tsapaktinai, tuja naja jinutai arrayán aidau tsapaktinai. Nuna wainainak ashí aents nugkanmaya aidauk Apajuín emematiagtinai. Apajuí niina senchijin umikbaunak makichkish tsaikchagtin ainawai.
ISA 58:1 Apajuí mina chichagtak: “¡Ishamkagtutsuk senchi untsumkata, uwija kachuji shinaujai betek senchi chichakta! ¡Imatkum mina aentsug Jacob wegantu aina nunú pegkegchaun takamsamuji pachisam senchi chichagkata!
ISA 58:2 Dutikakum tita: ‘Atumek minak kashi kashinig untsugjume, nuniakjum chichama umin najaneajum mina umigtuktasajum wakegagme. Nuniau asajum ii chicham uminkatna nunú sukagtusta tusajum segatjume, nuniakjum shiig aneagme Apajuí umigji’ tusajum.
ISA 58:3 Tusa tayatkujum: ‘¿Wagkaik wainkaish Apajuí waipatsu nuniaish ijagmash pujutji? ¿Wagkaik ijagmaish waitush wekaetaji Apajuí waipatsu nuniaish?’ tajume. Tau asajum atumek ijagma pujusa Apajuí segatia nunú tsawantin waji sujakjum, atumi takagtamin aidaushkam shiig akitsuk kasagjume.
ISA 58:4 Atumek ijagma pujusa Apajuí segatia nunú tsawantin jiyaniakjum, maaniakjum ijuni batsatjume. Apajuí atum ijagma pujusa segamun antugtukti takugmek, a antajaig takamaitsugme.
ISA 58:5 Ijagma pujusa Tuke Pujuu segaji tayatku, imani batsatmawa duka Apajuínak shiig awagmatsui. Atumek kajis namaka uwet kasua wajama nunikjum tsuntsuma pujusjum, jáanch wake besemag pujaku nugkutai nugkugjum yukunum tepajum nunú, ijagma pujusa Apajuí segaji, tajume. Nuniakjum juju Tuke Pujuunak shiig awagmawai, tajume.
ISA 58:6 Tujash duka dekaskechui. Mina shiig awajkati tujutkugmek, ijagma pujusam: Aents achikam chimpija nunú agkanmitkata, takamsachu aig jigkajam batsata nunú atiam agkanmitkata, inaku waitkatai batsata nunú agkanmitkata. Dutikakum shiig takashtai, pegkegchau aina duka ashí idaisatajum.
ISA 58:7 Nuniakjum, atumdau yutai ajutjamaina nunú tikich aents nujantai waituidau ajamsatajum; tuja aents jenchauwa duka atumi jem jukitajum; tuja nugkumainji atsakuishkam, jáanch susatajum nugkugti. Dutikakjum tikich aidaushkam tuké yaitajum.
ISA 58:8 Nunú dutikakjumek, kashikmas etsa jiinak etsantama iman atatjume. Nuniagmin mina imanjua nunú uyuntamsagtatui. Tuja pegkegchau takataijum aidau tsupimakbaujai betek wajas awa duka wamak esamattawai.
ISA 58:9 Nunikmatai untsugkugminig aiktatjime; tuja yainkata tusajum senchi untsugkugminishkam, wi ayaakun: ‘Juwi pujajai’, titatjime. Tikich aents aidau waitkajum nunú idaisajum pegkegchau chichagtsuk, nuigtush wainka tsanumjutsuk,
ISA 58:10 yumainji atsujush amek anenmamsam ajampeakum, tikich waituidau yayakjumek, suwenum jii kegak tsaaptin emama numamtin atatjume. Tuja amina pegkegchaujum suwe wajas awa duka, yamai pegkeg takagmin, etsa tutupit wegak etsantug tsaaptin emama iman wajastatui.
ISA 58:11 Wi aminak tuké uyuntsattagme, dutikakun uwegshunum pujakminish, shiig kuashat yutain amastatjame, dutikakun senchimtikattagme, nuadui ajak ajakbau yumi ukattai asa pegkejama iman, nuigtu yumi pukuni jiinu tuke amuechau ama iman atatjume.
ISA 58:12 Atum wegantu aidau yaakat yaunchuk tsaikbau aidaun ataktu jegamjagtinai. Dutikainak nunú jegamku kaya aepkamu aidau yumpunawai tusa shiig emetug umikagtinai. Dutikau asagmatai: ‘Yaakat peejamu tsaikbaun ataktu iwajin aidau’, nuigtushkam: ‘Jega tsaikbaun iwajin aidau’ tuu adaikagtinai.”
ISA 58:13 “Tsawan ayamtaya nunú ajantusjum diistajum, tuja mina tsawantug pegkegma duik atumi takatjumek takasaigpajum. Nunú tsawanta duwi shiig aneasjum ima Tuke Pujuu pegkegma duke ememattajum, tibauwa nuwi anentaimsatajum. Nunú tsawantin atumi takatjum, nuniachkush atum wakegamukesh chichamju yujatsuk ayatak ajantusa diistajum.
ISA 58:14 Nunú umiakjuminig, shiig aneasa pujutan wi amastatjime. Nuigtush nugka múun aidaun apuji awajsattajime. Dutikakun wi atumi apachjum Jacopan anagkuawaitag nuna nugkan amastatjime. Junak dekas wi umiktinjun tajai”, tiuwai Tuke Pujuu.
ISA 60:1 Isaías chichaak: “Jerusalégnumia aidauwah, atumnak Tuke Pujuu imanjiya nunú ijipaku asamtai, winchamtin wajasugme.
ISA 60:2 Untsu nugkanak suwe dukuakui, nuniai yaakat múun aidaunak suwe ijike, untsu atumnak Tuke Pujuu etsantug wajantugmattawai, nuniak niina imanjiya nunú wantintugmakagtatui.
ISA 60:3 Aents nugka muunnumia aidauk atumin etsantug awa nuwi miniagtatui, tuja apu aidaushkam atumin tsaaptin awa nuwi miniagtatui.
ISA 60:4 ¡Jerusalégnumia aidauwah, ayampajum ashí niimsatajum, ashí aents aidauk Jerusalén ijunainawai. Atushtanmaya aidau dita patayi aidaujai ashí yajumakag uchin pagkuaku mininawai!
ISA 60:5 Nunú imanik kaunainak, nayantsanmaya waji aidaun, tikich nugka múun aidaunmaya waji aidaun takuinaku mininakui shiig aneastinaitjume.
ISA 60:6 Madiágnumia aidau, efánmaya aidau camellonum entsatkau minidau waintinaitjume. Tuja Sabá nugkanmaya aidaushkam ashí camellon yajuakag oron, kugkuin inciensojai patajag minidau wainkujum, mina emematjitnaitjume wi dutikau asamtai.
ISA 60:7 Tuja Quedarnumia aents aidaun tagkuji ikaunmawagtata duka, Nebaiotnumia uwig tsakat aidaun ikaunmawagtata nujai ashí Apajuín shiig anemtiksatin altarnum pataijum apeattagme. Aatus Apajuí niina jee pegkegma nunak nuni pegkeg awajsattawai.
ISA 60:8 “¿Aush yujagmijai betek nanaakag, paum dita pasugken shimuwama numamtuk minina dusha ya ainawa?
ISA 60:9 Duka lancha múun Tarsisnumia aidau, atumi uchijum aidaun yajuakag Tuke Pujuu atumi Apajuíjum senchimtijamna nuna emematiagtatus oron, plata aidaujai yajuak mininawai.
ISA 60:10 “Apajuí atumin kajegtamak suwimkan amasajui. Dutijamayatak yamai wait anenjamjau asamtai, aents tikich nugkanmaya aina nunú yaakat peejamu aidau tsaikbauwa nunak ataktu peegkeg umikagtatui. Tuja apu aidauk amina inakem agtatui.
ISA 60:11 Tikich nugkanmaya apu aidau dita aentsji aidaujai waji aidaun ikaunmawagtin asagmatai, Jerusalégka waitijig kashish, tsawaish tuke ujaim asatnai.
ISA 60:12 “Ashí aents tikich nugkanmaya aidau atumin takagtamtan dakituidauk ijinam agtinai.
ISA 60:13 Apajuí Jerusalégnumia aidaun chichajak: ‘Líbanonmaya waji aina duka, numi dakaja jegamtai shiig pegkeg: pino, abeto, cipre aina nujai ashí wi pujusa inamjatnun etegkauwaitag nuwi mina jegag awa, nunú iwaja shiig pegkejuch awajsatnun ikaunmawagtinai.
ISA 60:14 Yaunchuk atumin waitkagmajaku aina nuna uchiji aidauk atumin inake waigtatui, tuja atumin yaunchuk dakitjamajaku aidauk atumin tikishmatjamag, Jerusalégkan chichajuinak: “Tuke Pujuu, Israel aents aidaun Apajuíji pegkegma nuna yaaktajiyai”, wajagtinai.
ISA 60:15 Atumek kajimatki idaisamu, kajegtai ayugme. Tujash nunak wi yapajian atumin imanjumek tuke atin ati titatjai. Nuadui atumek ajumaish shiig aneasjum pujustinaitjume.
ISA 60:16 Tikich nugkanmaya aidau atum yuwatnun yutai shiig pegkeg aidaun ikautjabiagtinai, tuja apu aidaushkam waji akik aidaun anentag amasagtinai. Nuna Jerusalégnumia aidau wainainak wi Tuke Pujuu, senchigtin, Israel aents aidaun uwemtiknaitag nuna dekajuawagtinai.
ISA 60:17 “ ‘Witjai Israel aents aidaun Apajuíjinuk, nudiau asan, agkan shiig takainak batsamsatnume tusan agkan pujutan, waitjutsuk shiig takatan jintintuattajime. Dutikakun bronce amamainaitkun dekas oron amastatjime, tuja hierro amamainun dekas platan amastatjime, tuja numi amamainun dekas broncen amastatjime, tuja kaya amamainun hierron amastatjime.
ISA 60:18 Atumi nugkeminig maaniamuk makichkish antuekashtinai, tuja yaakat tsayamush atumi nugkeminig makichkish atsutnai. Nuadui Jerusalén peejamua duka “Uwemtai” adaikatnaitjume. Untsu waitiji aina nunú “Dakujutai” adaikatnaitjume.
ISA 60:19 “ ‘Tuja etsantug tsaaptin wajas ajumaish tuke atina duka witjai. Nuadui atumek etsa etsankui yujasmi, tuja nuniachkuish nantu kashi etsantak tsaaptin weakui yujasagmi tusagmek batsamchattagme.
ISA 60:20 Witjai Tuke Pujuu atumi Apajuíjinuk. Nuadui etsag makichkish akaikig megkaekashtinai, tuja nantushkam etsanbaujinak kajinkashtinai. Wi ajumaish atumi tsaaptinjum tuke atinaitjai. Nuadui atum wake besemag pujamuk atsugtamiagtinai.
ISA 60:21 “ ‘Atumi aentsjum aidauk shiig anentaimkau eme anentsa diitai, nugkeesh atantam achatnaitjume, tuja waji ajakaitkuish wi ajakmamu atinaitjume. Wi nunak mina imanjun iwainaktasan dutikattajai.
ISA 60:22 Kuashtachu aina nunú yujaka mil aents wajastinai, nunú yujaka nugka múun wajastinai. Wi nunak nunú tsawan jegakui wamak dutikattajai. Witjai dekas Tuke Pujuunuk’, tawai Apajuí”, tiuwai Isaías.
ISA 61:1 Tuke Pujuu inake chichaak: “Apajuí minak ujudauch aidaun yamajam chichaman ujakti, dutikak waitkam batsata nuna anentain ichichtugti, tuja achikbau aidaunash agkanmitkati, dutikak achikam chimpija nunashkam agkanmitkati tusa awetine. Nuadui niina Wakani minai awai.
ISA 61:2 Nuigtushkam Tuke Pujuu iina wait anenjamjatnuk tsawan jegattawai, tuja nunú tsawantin Apajuí iina shiwaaji waitkagmaina nuna depetuk, uwemtijamjatnuk tsawantak jegattawai tusam etsegkata tusa awetine. “Tuja aents wake besemag batsatunashkam anentain ichichtugti tusa awetine.
ISA 61:3 Israel aents aidau dita shiwaaji depeteam buutu batsata nuna shiig aneastinme, tuja yukuun ukatmama batsata nuna dakunkut anentain susati tusa awetine. Tuja wi agkanmitkamu asag, numi roble Apajuí ajakbau pejkejush amain aina iman asagmatai, tikich aidau chichajuinak: ‘Roble katsujam tegamainchau’ tiagtinai.
ISA 61:4 “Tuja yaunchuk yaakat tsaikbau aidau tuwasua wegaka nunú Jerusalégnumia aidautijum ataktu jegamjajum yaaktamkatnaitjume.
ISA 61:5 Dutikawagmin aents tikich nugkanmaya aidau kaunawag tagkuji aidaun, ajajum uva ajakbau aidaujai kuitamjutpakagtinai.
ISA 61:6 “Tuja atumnak ‘Sacerdote aidau, Tuke Pujuun takajin’ tujamiagtinai. Atumek yutai tikich nugkanmaya aidau shiig pegkeg yutinaitjume. Tuja nugkutai aidaushkam pegkeg iwajamu aidau tikich nugkanmaya iwagmamtinaitjume.
ISA 61:7 Atumek mina aentsug ainayatkujum shiig kuashat datsan chichajam, busainaku dushikiam kuashat waittsau ainagme. Nuadui nuna nagkaesau atumi nugkem waji aidaujai shiig kuashat jukitnaitjume. Dutikajum ajumaish tuké shiig aneasjum pujustinaitjume.
ISA 61:8 Apajuík waitjutsuk shiig takamua nuna aneawai, nuniak kajegdayat, magkagtut aina nunak kajejawai. Nuadui niina aentsji anagkuamunak makichkish ewaetsuk umiktinai. Dutikak chicham tuke atinun ditajai umiktinai.
ISA 61:9 Dutikau asamtai, dita wegantu aidauk tikich aents aidaun nagkaesau shiig kuashat agtinai. Ashí aents aidauk nuna diisag: ‘¡Tuke Pujuuwap ditanak pegkegnum yumigjauwaita!’ tiagtinai.
ISA 61:10 “Tuke Pujuu minak shiig anemtijawai. Apajuí minak dakunkut pujutan sujawai. Apajuí minak uwemtijuje. Apajuí minak shiig pegkegnum kuitamjuke.
ISA 61:11 Nuadui jigkai ajaamu tsapaama numamtuk, tuja ajak ayaunmaya tikich ajak tsapaama numamtuk, tsanumtsuk shiig takatan shiig aneasa pujutjai ashí aents aidaunum waji ajakaitkuish, Tuke Pujuu tsapapitnai. Nuadui shiig aneenak kantamiagtinai.”
ISA 63:1 ¿Yaita aush edomnumia yaakat múun Boshrá tutaya nuwiya jáanch kapantui egkekbau tumainun shiig pegkejan nugkuaju ishamain mina dusha? Nunak wi depetmaktinun iwainajai, wika senchigtin asan uwemtikagtumainaitjai.
ISA 63:2 ¿Wagka uva naja najam jáanch kapantu wegama imanush jáanchjumesh wajasuita?
ISA 63:3 Junak imanikjai wiki uvan najakun, makichkish yainkachaje. Senchi kajekmajai, nunikan mina shiwag aidaun suwimkan susamjai. Dutikakun senchi kajeku asan, tepegka ijinmaina imatikamjai, dutikai nuna numpe aidau tsakiantak jáanchjui ukatjukmae.
ISA 63:4 Nunak dutikamjai mina aentsug aidaun ayamjakun, mina shiwag aidau ijinatin tsawan jegau asamtai.
ISA 63:5 Mina yainmainush atsuash tukaman makichkish wainkachmaijai, nunikan anentai jegachmaijai. Nunikan senchi kajekbaujui mina senchigjai depetmakmaijai.
ISA 63:6 Shiig senchi kajekbaujui aents nugka muunnumia aidaunak tepegka ijinmaina numamtuk ijinabiajai. Dutika ai numpa saeki akaikibi.
ISA 63:7 Isaías chichaak: “Apajuí anenken pachisan chichaakun, nii jutiin ayamjutpak kuashat dutikauwa nuna anentaimtusan kantamatasan wakegajai. Apajuík Israel aents aidaun wait anentau asa niina anenkega nuna ditan iwaintak kuashat yaigkui.”
ISA 63:8 Apajuí chichaak: “Ditak mina aentsug asag, mina uchig, mina nawantug aina duwi intimjutmainchau ainawai. Nuadui dita pegkegchaujig kuashat aig, wait anentug uwemtikjauwai.
ISA 63:9 Israel aents aidaun waitkagtaik, niig tikichin akupkag ayamjukchauwai, dekas nii Apajuí taa ayamjukui. Apajuík niina anenken, niina senchijin aatus, Israel aents aidaunak wait anentak tuké ayamjuk uwemtiknai.
ISA 63:10 Imatika yayamash Israel aents aidauk intimjuinak, Apajuí pegkegman ikajejaku ainawai. Nuadui ditan pempeentuki shiwaajui itugmaina numamtuk ditajai maaniauwai.
ISA 63:11 Imanik waituinak yaunchuk Moisés dita apachji aajaku aidaun jiija yajuak uwemtikjauwa nuna anentaimtus chichainak: ‘Moisés Israel aents aidaun apuji aajakua nunú piipich asamtai, namak Nilonum ajugkam jakeaun jiikiuwa dusha Apajuísh ¿tuwi pujawa? Tuja Moisésai Niina Wakani pegkegman apusauwa dusha Apajuísh ¿tuwi pujawa?
ISA 63:12 Apajuí niina senchijijai Moisésan uyunajakua dusha, tuja niina aentsji aidau ishamainun ukumtikak, atakea duish kajimatkishtinun niina senchijin iwainak nayantsan ukuyauwa dusha ¿tuwi pujawa?
ISA 63:13 Caballo mujanum weakush atakuinag iyauchua numamtuk, nayants buku wajasbaunum initak shimakush, atakuinjashtinme tusa umikua dusha Apajuísh yamaish ¿tuwi pujawa?
ISA 63:14 Apajuí niina aentsji aidaun baka aidau nainnum yujau wakeen nugka pakanum utsanawag ayamama numamtuk ayamtikna dusha Apajuísh ¿tuwi pujawa?’ tiagtinai”, tiuwai. Tuja inagnamua nuna Isaías chichaak: “Apajuín Wakani ditan uyuntsauwai. Aatus niina imanjin ashí iwainak ekemsauwai”, tiuwai.
ISA 63:15 Israel aents aidau Apajuín aujainak: “Chah, Apajuíjuh, ame pujutaijum nayaim pegkegma nuwi pujusam antukta. Amek jikamsa anejatchau dekapeaji, tuja ame senchigtinaitam dusha iwainkagtatsme. ¿Amesh jutiish wajuk diijatme? Atsa amina wait anenkagtutaigmek ¿amuekaek?
ISA 63:16 ¡Ametme jutiin apajimek, Abraham niina uchijichu anenjamkuish, tuja Israel pachipachkuish, ametme iina apajimek! ¡Ametme iina tuke uwemtikagtinmek!
ISA 63:17 Aminí kanaktinme tusamek tukagtipa, tuja intimkiu atinme tusamesh tukagtipa. Amina inakem ainag nunú, amina aentsjum maki makichik wegantu aina nujai aneakmek, ataktu wait anenkagtugta.
ISA 63:18 Amina aentsjum ame etegkamu aina duka dita nugkeenig ujumak tsawanchik batsatui. Ame emematku ijuntaiya nunak iina shiwaaji aidau pegkegchau awajainawai.
ISA 63:19 Ii aidautik amina chichamem umitsuk, nuigtush aminuchu amaina numamtuk batsatji. Wait aneasam amina anenkem ataktu iwainkagtukta”, tiajui.
ISA 64:1 Apajuíjuh, utusamek nayaim ujaim akaikim nugká taakum muja aidau pegakam,
ISA 64:2 jii kegak jagki kagakun apegama numamtuk, tuja dutikachkush yumin ukuwama numamtuk awajkam tusa wakegaji. Nuna amina shiwaajum aidau wainainak, Apajuík ima ameketam nuna dekawagtinai. Tuja aents nugka muunnumia aidaush ishamjamainak kujaidiagtinai.
ISA 64:3 Kuashat ishamain aidau iwainajuitam nunú iina uwaktamkauwai. Nuadui muja aidaush amina emtimin senchi buchitiagmayi.
ISA 64:4 Aminí kajinas anentaimaidau yayaakum, ame ishamain aidau iwaintujuitam dutika tikich apajuí niina kajitus anentaidaun yayaak, imanun ditan iwaintukuk yaunchkesh makichkish wainkachbauwai, tuja antutkesh antushtayai.
ISA 64:5 Aminak aents shiig aneas pegkejan takak, chichamjum umiktina nuna aneaku puja nunú shiig awajtamui. Amek ii pegkegchau takaku yaunchuk nagkamsaish ikaje pujag duwi kajekume.
ISA 64:6 Ii aidautik makichik aents tsumaina iman ainaji. Ii pegkeg takaji taji dushakam jáanch tsuwata iman ainawai. Ashí ii aidautik duka kagaka kakekaujai betek ainaji. Tuja iina magkagtutaijiya nunú dasejai betek tukugmi ajapjamainawai.
ISA 64:7 ¡Amina segapauk, tuja amina nii wait anenjugti tusa kakanmamukesh makichkish atsawai! Nuadui amek iina pegkegchaujin uumka idaikagtusume.
ISA 64:8 Apuh, ii nunin ainajinish, ametme iina apajimek. Ii aidautik duwejai betek ainaji, untsu amek aents duwen namuka najannujai betekaitme. ¡Iik ashí ame najankamu ainaji!
ISA 64:9 Tuke Pujuuwah, imanikmek kajekaipa, tuja iina magkagtutai aidaush pachikaipa. ¡Kame, iik amina aentsjum ainaji!
ISA 64:10 Yaakat ame etegkamu aina duka itajak wajas bashiak ainawai. Jerusalégnak iina shiwaaji aidau tsaikam pegkegchau wajas awai.
ISA 64:11 Amina jem pegkegmanum iina apachji aidau amina emematjamajaku aina nunak jiiyai apea ashí tsaikajui. ¡Ii ima senchi wakesa diin ayag duka tsaikam pegkegchau wajas awai!
ISA 64:12 Tuke Pujuuwah, imatikau aina nuna iikmakti tusamek amek ¿yaijatkashtatmek? Atsa ¿ayatkek idaisattam? Nuniakum aan senchi waitkastinme tusamek ¿idaikagtustatam?
ISA 65:1 Apajuí chichaak: “Aents makichkish mina segatchau aajabia nunú mina kautjuinawai; tuja aents mina egatkachu aajabia nunú yamai mina waituinawai. Mina emematjuchu aajabia nuna chichagkun: ‘Juwi pujajai’, tibaijai.
ISA 65:2 Aents intimkiu aidau wijai shiwagmagainak, dita wakegamun pegkegchaun taka yujau aina nunú segatainakui yaigtasan tuke dakabiajai.
ISA 65:3 Nunú aents aidauk mina igkuntuawag tuke inastuinawai. Dita aidauk apajuímtai dakumka najanamun emematuinak, kuntinu maawag ikam yujasag, kaya pataja najanamunum nuwi patainiag apé yujau aajabi. Nuigtushkam ladrillo najanamunum kugkuin incienson apé yujau ainawai.
ISA 65:4 Nunú aents aidauk ukumatainum pekamá yujayanume, nuninak waanum uumak batsamas tsawampa batsamianume. Nunú aents aidauk Apajuí dakitamun kuchi nejen yuyanume, nuigtush dakumkamu emematku kuntin maamu aidau painkamun yumiji ollanmak tsumain aajabi.
ISA 65:5 Nunú aents aidau chichainak: ‘Antijatkaigpa iik Apajuí etegjamu asa pegkejam ainaji’, tuinawai. Nunú aents aina duka jii tuke, tsawantai keeka aama numamtin ainawai. Jii bukuituji dujin amajama numamtuk minak waitkajuinawai”, tiuwai.
ISA 65:17 Apajuí chichaak: “Antuktajum nijah, wi yamajam nayaimpin, nugka yamagmajai najanattajai. Tuja yama nagkamchak nayaim nugkajai aajakua nunak kajimatkiagtinai. Makichkish nunak tuke adeagchagtinai.
ISA 65:18 Wi nuna yamagman najanatin asamtai, ajumaish tuké shiig aneastin atajum. Wi yamajam Jerusalégkan shiig pegkejan najanattajai; dutikamtai nuwi aents aidauk shiig aneasag batsamsagtinai.
ISA 65:19 Tuja wishakam Jerusalégkan diisan shiig aneastatjai; nuniakun mina aentsug aina nuwishkam shiig aneastatjai. Jerusalégnumak jaku buutbaush atsutnai.
ISA 65:20 Nunú nugkanmak uchi akiina jaka megkaguk atsutnai, tuja múunchishkam tsawanjin shiig ejetsuk jauk atsutnai. Tuja makichik aentskesh cien mijan ajamu jauk múuntuch achatnai, datsauch atinai. Tuja cien mijanan ejetsu duka suwimak asamtai nuniktinai.
ISA 65:21 Aents aidauk nunú yaaktanum jegamag batsamas, trigon, uvan ajakmakag nuna nejen juukag yuwagtinai.
ISA 65:22 Dita jegamkamunmak tikich akiinag batsamsachagtinai, tuja dita ajakmamujinash atankiajag yujuachagtinai. Mina aentsug aidauk numijai betek kuashat tsawan iwaku pujusagtinai; Wi etejamu aina duka dita takasbaujinian jukiag shiig batsamsagtinai.
ISA 65:23 Dita aidauk Apajuí pegkegnum yumigjamu asag wainak takainakug waittsachagtinai, tuja dita uchiji aidaushkam tsawan jegatsaigkik jakachagtinai. Nunú uchi aidau wegantu aidaushkam ditajai betek pegkegnum yumigjamu agtinai.
ISA 65:24 Eke dita untsujuinatsaig, wiyá ditanak aiktinaitjai; tuja eke chichakag ashimainatsaig, wiyá ditanak antugkatnaitjai.
ISA 65:25 Lobo uwig tsakatjai jimagtuk yuwawagtinai. Leónkak bueyejai betek chijichin yutinai. Untsu dapi nugka yukukuntun yutinai. Tuke Pujuu chichaak: ‘Jerusalégnumak tikichin pegkegchau awagbauk makichkish atsutnai’ ”, tiuwai.
ISA 66:1 Tuke Pujuu chichaak: “Nayaimpik mina ekemsa inamtaijui. Untsu nugka nunuwai wi najamsa eketbau. Atumek wi ayamsatnuk mina jegajuk jegamjutmaitsugme, tuja nunú jegamainchakam nugka etegkamuk atsawai.
ISA 66:2 Waji ayá nunak wiki ashí najankauwaitjai; dutika ai nunisag juwajui. Witjai Apajuínuk. Wi nunak dutikauwaitjai. Wika aents wakanin pimpiki pujusa mina chichamjun eme anenta nuna diyakjai”, tiuwai.
JER 1:1 Profeta Jeremías Hilquíasa uchiji sacerdote wegantu, Benjamígka nugken yaakat Anatot pujujakua nuna, Tuke Pujuu chicham etsegtugkata tusa ausauwai.
JER 1:2 Tuke Pujuu Jeremíasan ausauwa nunak, Amónka uchiji Josías Judá apuji wajas trece mijan inamai, chichaman ujakui.
JER 1:3 Tuja nuigtushkam Josíasa uchiji Joaquim Judá wegantu aidaun apuji aajakua duishkam Apajuík Jeremíasnak ausauwai. Tuja Josíasa uchiji tikich Sedequías Judá apuji wajasa inabaujin nantu Julion achiak, once mijanan ejeyuwa nunak, Apajuík Jeremíasjaig kuashta chichasui. Nunú tsawantin Jerusalégkan jetekag depetuk, Israel aents aidaun achijag yajuakajui.
JER 1:4 Tuke Pujuu mina chichagtak:
JER 1:5 “Wi aminak eke akiintsuminig, mina chichamjun ashí nugkanum etsegtugkati tusan etegkauwaitjame”, tujutmayi.
JER 1:6 Tusa tujutkui wi ayaakun: “Chah, apu Tuke Pujuuwah, wika tsakataitag nuniau asan jintiaja chichatnak dekatsjai”, tibaijai.
JER 1:7 Tusa tai nii chichagtak: “Tsakataitjai tusamek tiipa. Wi amina tuwi awemattagme nuwi amek wetatme, nunikam wi titatjam nunú etsegkattame.
JER 1:8 Makichkish ishamkagtukaipa wi aminak kuitamkattagme, wi nunak dekas umiktinjun tajai”, tujutmayi.
JER 1:9 Nuna tusa Tuke Pujuu wenujun achigtuk chichagtak:
JER 1:10 “Antukta nijah, aminak yamai nagkamas aents nugka muunnumia aidaush, nuna apuji aidaush antugtamkagtinun, tuja tsaiktinun, ijinatnun, tsaikbau ataktu yaaktamkatnun ajakmatnum senchimtikajame”, tujutmayi.
JER 1:11 Nuna tusa chichagtak: “¿Jusha wajimpaya?” tujutmayi. Tujutkui wi ayaakun: “Anka almendro kanawegai”, tibaijai. Tusa tai Tuke Pujuu aijak:
JER 1:12 “Dekas tame, wika mina chichameg uminkati tusan antaku pujuttajai”, tujutmayi.
JER 1:13 Nuna tujuti ataktu chichagtak: “¿Jusha wajimpaya?” tujutkui wi ayaakun: “Ichinak ekenkamu kuwaak nujinmanini yantak ukagattak eketui”, tibaijai.
JER 1:14 Tusa tai Tuke Pujuu chichagtak: “Nujinmaya juwaki tsumujiya aatus aents batsata nunak suwimkan susattajai.
JER 1:15 Dutikakun aents nugka muunnumia nujinum batsata nunak ashí untsuktatjai. Dutika ai nuna apuji aidau kaunawag Jerusalégnum waitaiya nuwi kaunawag, yaakat peejamua nuna tenteawag batsamtusag, Judá wegantu aidaun jeteka depetuk achija yajuakagtatui.
JER 1:16 Nuni suwimkan susattajai, aents aidau mina umigtutsuk wainka apajuímtain tikich aents aidau emematin aina nuna dakumak najanawag, nuna emematuinak kugkuin incienson apenau asagmatai.
JER 1:17 Untsu amek umintsata; nunika weme wi amina titatjam nunú ashí etsegkata. ¡Wainka ishamkagtukaipa! Ishamkagtakminig shiwagjai igkuniak sapijin kujaiti titatjame.
JER 1:18 Wi aminak yaakat peejamu utumainchawa iman, jiju hierro ajiamu kupinchauwa iman, tuja yaakat broncejai peejamu tsaika utumainchawa iman awajsajame. Judá wegantu aina nuna nugkenig, tuja dita apuji aina nujaishkam, sacerdote aina nujai nagkamas ashí aents aina nuna chichagkati tusan senchimtikajame.
JER 1:19 Jetepakagtatui, tujash depetamkachagtinai, wagki wi amina kuitamkatasan, amejai pujau asamtai. Witjai Tuke Pujuu ashí senchigtinnuk, junak dekas uminkatnun tajai”, tiuwai.
JER 2:1 Tuke Pujuu mina chichagtak:
JER 2:2 “Jerusalén wetá, nunikam ashí aents aidau senchi untsumka chichagkum aatus Tuke Pujuu tawai tita: “ ‘Ame tsakat asam ima minak umigtin ayum nuna aneakjai. Tuja yama nuwatkamu aishin aneemaina imatikam anentiume, nuniau asam uwejush ajakmamash tsapamainchaunum juki emaish pataetugsam miniyume.
JER 2:3 Israel aents aidauk midau agtin etegkamu ayi, ditak ajak ajakmamu yama nagkamchak shiig pegkejan nejegama iman aajabi. Tuja ditan waitkainakuig, wi nunak suwimkan su ayajai. Nunak dekas dutikamujun’, tajai”, tiuwai.
JER 2:4 ¡Israel aents aidauwah, Apajuí chichame antuktajum!
JER 2:5 Tuke Pujuu chichagtamak: “Atumi apachjum aajaku aina dusha ¿waji utugchatan waitjukajaya minash tupanjujush ainawa? Dakumka najanamu pegkegchaun emematu yujau asag, ditashkam nuninuk wajasajui.
JER 2:6 Nunidau asag, dita apachji aidau Egipto nugkanum batsatun jiija yajuakan, uwejush yumi atsau, muja yumpunjau aidau, ishamain aents aidaush pujumainchau, makichkish nagkaemamainchau ishamain wegajunum wi kuitamsan emauwaitag nunak aneetsuk pachitkachajui.
JER 2:7 Wi atumnak juju nugka pegkeja juwi ajakmawag yuwatnume tusan ikaunmawaitjime. Tujash atum kaunajum mina nugkag pegkeg ayá nunú emesjauwaitjume. Nuadui mina nugkag pegkeg ayá duka tsumain awajsaugme.
JER 2:8 Sacerdote aidaush mina pachittsag inimsachu ainawai; tuja mina chichamjun jintinkagtin aidaush makichkish waitkachaju ainawai, apu aidaush pegkegchaun takamjuttsau ainawai, tuja mina profetag aidaushkam Baalan etsegtuinak, mina chichamjunak etsegkachu ainawai. Nunidau asag dakumka najanamu aidaun wainak emematujaku ainawai.
JER 2:9 Nuadui atumnak, atumi uchijum aidaun, tijajum aidaujaí suwimkan jukitnume tusan umigkattajime. Nunak wi Tuke Pujuun dekas umiktinjun tajai.
JER 2:10 “Etsa akaetaiya nuni nayantsa ajuntaijin yaakat ayá nuwi wetajum, nuniakjum Quedar nugkanum aents awematajum. Dutikajum inimsatajum
JER 2:11 tikich aents dakumka najanamun emematin aina dusha, atum wajukeajum ankampash nuna idayinak, tikichin nemaju yujau aina. Nunú aents aidauk wainka apajuímtai dakumka najanamun pegkegchaun emematin ainayatkush, yapa yapajiakuag wechau ainawai. Tujash mina aentsug aina duka dakumka najanamu aidaun yujajak, dekas wi Tuke Pujuu senchigtinaitag nunak idaitusaje.
JER 2:12 Nugka múunta duka nuna antuk puyatuk ishamak senchi kujawai. Witjai Tuke Pujuunuk. Nunak dekas tajai” tiuwai.
JER 2:13 “Mina aentsug aidauk jimajan tudaun takamsaje: Yumi pukuni pujutan sukagtina duka witjai, nuniaig mina kajimatjukiag idaitusaje. Nuninak yumi aimtain chigkaejaun tikichin umikaje.”
JER 2:14 “Israel aents aidauk wainka inaku waitkataig ainatsui, Israel aents aidauk inaku waitkatai atinuk akiinachajui. Tujash ¿wagka imatika waitkamash ainawa?
JER 2:15 ¿Wagka imatikash leónjai betek jetenakush senchish untsumainawa? Dita nugkega duka yaaktaji aidau apegkam pegkegchau wajas bashiak awai. Nuwi pujauk makichkish atsawai.
JER 2:16 Menfisnumia suntag aidau, Tafnesnumia aidaujai buukmin tsaigtamjaje.
JER 2:17 Nunak wi Tuke Pujuu atumi Apajuíjum asan, kuitamka itamaitkujum mina kajimatjukiu asajum dutikam asaugme.
JER 2:18 Tuja yamaish atumesh ¿waji wakegakjumea egiptunmaya suntag aidau asirianmaya aidaujai atujatkatajum tusa ditajai chicham umikmi tusagmesh tajume?
JER 2:19 Atumek intimkiu, pegkegchau takamin ainajum duwi dekas nunin ainagme tama ajume. Nuadui mina umigtichagtaish, waji utugchatak miniawa nunú wainkajum dekaskeapi titajum. Witjai apu Tuke Pujuu ashí senchigtinnuk, nunak dekas tajai.
JER 2:20 Yaunchuk nagkamsajum wijai shiwagmagajum, mina umigtut dakitakjum: ‘Apajuí umigtak dakitaji’, tiuwaitjume. Tau asajum, mina umigtutsuk dakumka najanamu aidau nain aidaunum emematkujum, numi kampuja aidau wakentin nuwa akika dutiktaijai betek wajasjum, pegkegchau takama yujayugme.
JER 2:21 Wi atumnak uva numiji dekas shiig pegkeg etejamu juki ajamaina iman amainun waji ajataitkuish ajauwaitjime. Tujash ¿wagka imanikjumesh pegkegchaush wajasugme? ¡Imaniku asagmin wainkatag takunush waintsujime!
JER 2:22 Lejiajai nijamakjumesh, tuja jabón pegkeg aidaujai atum wakegamu nijamakjumesh, atumi pegkegchaujum makichkish esakaumaitsugme. Witjai Tuke Pujuunuk, nunak dekas tajai.
JER 2:23 Ibau pegkegchau ainayatkugmesh ¿wajukeakjumea iik pegkegchauk takatsji, tuja dakumka najanamu aina dushakam emamatuinatsji tajume? Nijah, nugka Ben-hinom aajakua nuwi wakeen pujusjumesh wajukin ayugme nunú adeagtajum, nunikjum dekaskeapi titajum. Atumek camello numpajak emetnag pujuschamin wajama nujai betek ainagme.
JER 2:24 Atumek burro numpajak aishmag entsamjutkati tusa egak, dase dasentai mejea, mejea, mejea wajak tupikaki ikam akumkuig, makichkish emetmaitsu nujai betek wajagme. Imaniau asamtai, aishmag egakug yupichuch igkuinai.
JER 2:25 ¡Israel aents aidauwah, sapatjinchau tupika yujasjum dawem ichiajaigpa, kitakai jinawaigpa! tusa tamash, atum chichaakjum: Atsa, duka makichkish nunikchattawai, iik tikich aents aidau dakumkamun emematin aina nunú emematmi tusa wakegau asa, ditajai shimaji tusajum shimutjume.
JER 2:26 Atumek kasa kasamkatatus wekagu wainkam datsaamama numamtuk, atumi apujum aidaujai, sacerdote aidaujai, profeta aidaujai ashí datsagtatjume.
JER 2:27 Atumek numi chichagkujum: ‘Ametme iina apajimek’, tajume. Tuja kaya chichagkujum: ‘Ametme iina dukujig’, tajume. Tujash atumek minak diigtsuk tuntupmatjagme. Nuniayatkujum ishamainnum jegakjumek: ‘¡Ayamkagtukta!’ tusajum segatjume.
JER 2:28 Tuja atum aidautijum atumek dakumka najanamu apajuíma yujaujum dusha ¿wajukawaje? Atumi apajuímtai aidauk yaakat kuashta iman ainawai. Nunú aidau kaunawag atum ishamain igkuagminish ayamjutpaktinme.
JER 2:29 ¡Atumek minak tuke intimjutin ainagme! Nunin asajum minak wainkagmek pegkegchauk chichagtumaitsugme. Witjai Tuke Pujuunuk, nunak dekas tajai.
JER 2:30 Atumi uchijum aidauk suwimak suwakuish wainka dutikmainai, wagki imanik suwimka juinakush makichkish unuimainatsui. Atumek león kajeaujai betek mina profetag aidau ijinawaitjume.
JER 2:31 Tuja atum yamai uchi aidautigmeshkam Tuke Pujuu chichame antuktajum. Wika uwejush nimpain asamtai, waittayama dutikankesh waitkachuitjime, tuja waa suwenum pujusa waittayama dutikankesh waitkachuitjime. Dutika waitkashtayaitkugmesh ¿wagka iik agkan batsatji, nuniau asa ataktuk aminak emematchattagme tusagmesh tujutjume?
JER 2:32 Nuwa aishinatnuk jáanch aishinku nugkutainak patakumtai aidaujaig makichkish kajimatbaitsui. Tujash mina aentsug aidauk yaunchuk minak kajimatjukiaje.
JER 2:33 ¡Amek pakijintai aina nuanuig shiig yachaitme! Iman asamin nuwa akika dutiktai aina duka aminiyan unuimainawai.
JER 2:34 Amina jáanchjum aidauk aents pegkegchaun takachu aina nuna numpen, ujudauch aidau numpejai maatug numpak wajasui. Makichkish takamsachu aig, tsagkugtsuk tuke aneasam mainaitme.
JER 2:35 Nuninaitkum datsantainkas chichaakum: ‘Wika Apajuí kajegtukti tusanuk pegkegchaunak takamtsujai’, tame. Ayu kame takamtsujai tusa imatu asamin, nuna dekajuatasan apu chichama inagdau aina nuwi ematjame.
JER 2:36 ¿Wagka tujash atuniktinjum egaakmesh imanikmesh waugtame? Auk Asiria nugkanmaya aidau idaitamsa antsag Egipto nugkanmayashkam idaitamsattawai.
JER 2:37 Mina kumpag ainawai tame nunak wi dakitjan idaisajai. Nuadui amek egiptunmaya aidaujai atunikan maaniatjai tukamam depetamkagmatai, datsaaja wake besekam wakitkittame. ¡Amina kumpajum ainakush makichkish yaimpakchagtatui! tujamui Tuke Pujuu”, tiuwai Jeremías.
JER 6:16 Apajuí niina aentsji aidaun chichajak: “Jintanum wajasjum diistajum, yaunchuk jinta pegkeg aajakua dusha tuki ayi tusajum inimsatajum. Jinta pegkeja nunú ainkujum ayamat igkugtatjume”, tujamui. Tujash dita chichainak: “Atsa, iik nii tawa nunú umigtak dakitaji”, tuinawai.
JER 6:17 Jinta niimin aidau utugchat atai, etsegkatnun Apajuí ishiaku asa, Israel aents aidaun chichajak: “Dita chicham atai etsejainakui antuktajum” tiuwai. Tusa tamashkam dita chichainak: “Iik nunú antutak dakitaji”, tuinawai.
JER 6:18 Tusa tiagtai Apajuí chichaak: “Mina aentsug aidaunash itugkagtajak nunú tikich nugkanmaya aidautigmesh dekatajum.
JER 6:19 Ashí nugkanmaya aidautigmesh antuktajum: Mina aentsug aidau dita wakegamun takastag tuidau asag, wi chicham umiktajum timawa nuna dakitug umitsuk idaisaju asagmatai, wi ditanak suwimkan susagtatjai.
JER 6:20 ¿Wagka Sabá nugkanmaya kugkuin incienso jukigmesh itagtuaugme? ¿Wagka tikich nugka atushtanmaya kugkuin jukigmesh itagtuaugme? Atum anentag itaamu aidau, tuja mina emematjaku kuntin maa nuna neje ashí apeajum duka minak shiig awajtatsui.”
JER 6:21 Nuna tusa Tuke Pujuu chichaak: “Wi shiwag aidaun ishitkattajime, dutika ai jetepakag, uchijum aidaun, atum pujamunum nuna yantamen ijunag pujuidaunak atumi kumpaji aidaujai ashí ijinatnume, tusan”, tiuwai.
JER 6:22 Tuke Pujuu chichaak: “Aents atushat nujinum batsamin senchigtin aidau uminainawai maaniawagtatus.
JER 6:23 Suntag aidauk puyag aidaun akentai aidaujai yajuakag umintsaje; ditak magkagtin wait anenkagtuchu ainawai. Dita untsubaujig nayants uutbaujai betekai caballonum ekemiag mininawai Jerusalégkan jetekagtatus”, tiuwai.
JER 6:24 Nuna aents aidau antukag chichainak: “Nunú chicham dekawaja sapigmainaku kakaumainchau dekapeaji, nuniaku nuwa tsawanji jegajim uchin najaimak waitama imaniaji.
JER 6:25 Nuadui makichkitigmekesh ajanmak wegpajum, tuja jinta ainjagmesh yujasaigpajum, ¡shiwag aidau puyaja yajuakag mininawai! ¡Ashí yantamnumak sapigmainawai!
JER 6:26 Mina aentsug aidauwah, jáanch wake besemag pujaku nugkutai nugkugjum yuku tadaetugtajum, nunikjum makichik uchi pujau jakamtai, wake besemag dekapeaku buutmaina imanikjum buuttajum; wagki iina ijipawagtinuk dukap atsuk kautjamkagtatui”, tibaijai.
JER 6:27 Tuja Tuke Pujuu mina chichagtak: “Wi aminak mina aentsug aina nuna pujutish wajukuk ainawa nuna diigsati tusan apusabiagme”, tujutmayi.
JER 6:28 Tujutkui wi ayaakun: “Ditak intimkiu, tsanumkagtin, chichama antuchu, pegkeja iman wantinaidau, tujash chichamesh pegkegchau antumtikmainchau bronce, hierro katsugma iman ainawai.
JER 6:29 Jiju jinum jiyamak kuwija pegkegchaujin utsanak pegkeg weawai, tujash aents pegkegchau aina nuna iwagmainuk atsawai. Nunú iwajatag takuish, wainka tsawan megkaemainai.
JER 6:30 Nunin asagmatai ame idaisau asamin: ‘Plata pegkegchau asagmatai utsagbau’ tuu adaikagtinai.”
JER 7:1 Tuke Pujuu Jeremíasan chichajak:
JER 7:2 “Jega Apajuí emematku ijuntainum wetá, nunikam nuwi wajasam juju chicham etsegkum: ‘Judá wegantu aidautijum Apajuí ememattag tusajum juju jeganum utsanin aidautijum, Tuke Pujuu Israel aents aidaun Apajuíji ashí senchigtina nuna chichamega nunú antuktajum: “ ‘Atumi pujutjum, pegkegchau takataijum aidaujai iwagmamjatajum, nunikagmin kuashat tsawan juju nugka juwi iwaku batsamsatnume titatjime.
JER 7:4 Waita jintinkagtin aidau chichagtamainak: ¡Jega Apajuí emematku ijuntaig jujuwai, tusa ujapainakuish, duka antugkaigpa!
JER 7:5 Atumi pujutjum iwajatajum, nuniakjum tikich aidaujaish, pegkegnum yainiktajum, tuja aents tikich nugkanmaya aidau, bitaik aidau, waje aidau, shiig akikchatnaitkujum inaku waitkajum nunú idaisatajum. Nuniakjum aents takamsachu aig, maajum dushakam idaisajum, nuigtush wainka apajuímtai aidau emematkujum, atumek pegkegchau wegajum nunú ashí idaisagminig, juju nugka juna atumi apachjum aidaun susauwaitag nuwi kuashat tsawan iwaku batsamsatnume titatjime.
JER 7:8 “ ‘¡Tujash atumek wait chicham, atumnash pegkegnumkesh yaimpakchatna nunú ima dekas antugjume!
JER 7:9 Atumek kasamjume, magkagtagme, tikichi nuwejai tsanijinjume, nuninaitkujum tsanumkujum Apajuí anagmagme, tuja wainka apajuímtai aidau Baal tikich aina nujai yaunchkesh wainchau ainayatkujum emematkujum kugkuin incienso apé yujagme.
JER 7:10 Nunin ainayatkujum juju jega mina emematjaku ijuntaya juwi kaunajum, juju jega juwi pujakuits, uwemtak jumainaitai tajume. Nuadui agá jiinkigmek pegkegchau tsumain wi dakitamu aina nunú takagme.
JER 7:11 Atumek mina emematjaku ijuntai jegamkamua duka kasa batsamtai emaugme, wika nunak ashí wainkajai. Witjai Tuke Pujuunuk, nunak dekas tajai.
JER 7:12 “ ‘Israel aents aidauwah, yama nagkamchak mina emematjaku waitai pegkejam aakmakbau Silónum aajakua nuwi wetajum, nunikjum diistajum wisha nunú jeganash atumi tudaujinish itugkauwaitja nunú.
JER 7:13 Wika atumi pujutjumin pachisan atumnak kuashta chichagkauwaitjime, tujash mina umigtutak dakitjauwaitjume. Nuniau asajum wi tabau antuka umitsuk pegkegchau takata nunú ainjauwaitjume. Witjai Tuke Pujuunuk, nunak dekas tajai.
JER 7:14 “ ‘Nuadui, juju mina emematjaku ijuntai jegamkamua nuna wi atumin, tuja atumi apachjum aajaku aina nunashkam susauwaitag, nuwi atum kajinmamsajum anentaimjum nunak, wi amasu akunush wi yaunchuk nunú aak Silónum aun tsaikuitag dutiksanuk tsaiktatjai.
JER 7:15 Dutikakun yaunchuk atumi yatsum Efraín wegantu aidaun jiijan utsagkuitag dutiksanuk atumnashkam utsagtatjime’ tujamui Apajuí”, tiuwai Jeremías.
JER 7:16 Apajuí chichagtak: “Jeremíasah, yamai nagkamsamek juju aents aina nunú pachismek segatipa, tuja dita anentaimtusmesh buutipa, tuja yaigta tusa segatkumesh waitkagsaipa, tujutkuminish antugkashtatjame.
JER 7:17 “Judá wegantu aidau nugken tuja Jerusalégnum jinta aina nuwi pegkegchaun takaina duka ¿amek waintsumek?
JER 7:18 Uchi aidau chigkimin ikaunmainawai, múun aidau jiin ikapainawai, nuwa aidau pagkan inajuinawai dita apajuímtaiji nuwa shigmauch nayaimpinmaya etegkamu tuina nuna emematuinak susatnun. Dutikainak nuigtushkam tikich wainka apajuímtai aina nuna emematuinak, vinon suwina duka mina dushiktuinak aninawai.
JER 7:19 Tujash dekas minak dushiktuinatsui, ditak pempeentumakiag datsantan dushikmamainak aan yujawai. ¡Witjai apu Tuke Pujuunuk, nunak dekas tajai!
JER 7:20 Nuadui wi kajekbaujui juju nugka junak aents aidaun, kuntin aidaun, numi aidaun, ajak aidaun, ashí ijinattajai. ¡Wi kajekbaujua duka jiijai betek kakajus kajinchauwai! Nunak dekas uminkatnun tajai.”
JER 7:21 Tuke Pujuu ashí senchigtin, Israel aents aidaun Apajuíji niina aentsji aidaun chichajak: “Atum wakegakjumek mina eme anenjusjum anentag sujustin aina duka, kuntin maa nuna neje ashí apeatin aidaujai yajuakjum ijuma pujutajum, dutikajum nuna neje yuwajum tagkaijum kantaushmaktajum.
JER 7:22 Untsu atumi apachjum aidau Egipto nugkanum batsatun jiijuitag nunak wika mina eme anenjusjum anentag sujustajum, nuniakjum kuntin maajum nuna neje ashí apeatajum tusanuk ditanak inagchauwaitjai.
JER 7:23 Wika ditanak mina umigtuktinme, nuninakui wi ditá Apajuíji atajai, untsu dita mina aentsug atinme tiuwaitjai. Tuja nuigtushkam chicham umiktinun wi susajuitag nuna umiktinme nuninak shiig batsamsatnume tiuwaitjai.
JER 7:24 Tujash minak umigtukchajui, nuigtush puyatjusagkesh dekaskeap tawa tujutchajui. Nunidau asag, anentainkachu najaneawag dita wakegamun takajaku ainawai. Nunidau asag mina idaituinak nuni senchi pegkegchau wajasajui.
JER 7:25 Atumi apachjum aidau Egipto nugkanum batsatu jiinjau aina duwi nagkamsan wika yamaikish atumnak profeta mina chichamjun etsejin aidaunak makichkish mijattsuk tuke ishitnaitjime.
JER 7:26 Imatikamaitkujum atumek minak umigtatsjume. Nuadui mina chichamjuk puyatjusjumkesh diitsuk, atumi apachjum aidaun nagkaesau pegkegchau ainagme.
JER 7:27 “Jeremíasah, antugtamkashtin ainaigkish, tuja aipakchagtin ainaigkish, juju chicham senchi untsumkam ashí etsegkata.
JER 7:28 Ame dita chichagkum: ‘Juju aents aina duka Tuke Pujuu dita Apajuíji umigtanak dakituinawai. Nunidau asag Apajuí jintintuatag tamash dakituinawai. Dita dekaskenum chichataijig shiig atsujuinawai’, tita” tujutmayi.
JER 7:29 ¡Jerusalégnumia aidauwah, intashim esajam aina duka tsupigjum utsagtajum! ¡Dutikajum muja uwegshunum shiyakjum, nuwi yujasjum wake besemag pujaku kantamtai kantamatajum, wagki atumnak Apajuí kajegtamak idaitamsau asamtai!
JER 7:30 Apajuí chichaak: “Judá wegantu aina duka wi dakitamu aidaun, dakumka najanamu pegkegchau tsumain aina nuna mina jegag pegkegma nuwi awayawag mina jegajun pegkegchau etugtiaje.
JER 7:31 Tuja nuigtushkam, wi dutikata tichamaitak makichkish anentaimtushtaijun, dita uchiji aidaun nawanji aidaujai maawag, apeenak dita apajuímtaijin emematiagtinun Ben-hinom nugka ségaju awa nuwi altar Tófet tutain najanawaje.
JER 7:32 Tujash nunú Tófet, Ben-hinom tutai aina nuna daajig dukek achagtinai. Nuna daaji yapajinkatnuk tsawan jegattawai. Nunikmatai: ‘Nugka ségaju aents aidau kajeetai’, adaikagtinai. Witjai Tuke Pujuu, nunak dekas tajai. Tuja aents jinawajunak tikich nugka ukumamain atsau asamtai, Tófet tutaya nuwig batsakiagtinai.
JER 7:33 Dutikamun, nuna ayamjumainuk atsau asamtai chuwag aidau, kuntin aidau yuwa amukagtinai.
JER 7:34 Tuja Judá wegantu aidaun yaaktaji aidaunum jiistamku kantabau, shiig aneamu, nuwenbaunum shiig aneaku kantabau aajabia nunak ashí emegkagtatjai. Dutikamtai Judá aents aidau nugkega duka bashiak itajak wajas asattawai.”
JER 9:10 “Nunikmatai muja aidaunum yujasjum “atumi tagkujum aidaun yutaiji chijichi aidauk ashí apekbau asamtai, wake besemag dekapeakjum buuttajum. Tuja imatika apekbau asamtai, nuni nagkaematnak dakitainawai; tuja atumi tagkujum aidau shinaukesh makichkish antuenatsui, chigki aidaush, kuntin ikamia aidaush ashí pisag megkaejaje.
JER 9:11 “Judá wegantun yaaktaji aidaunak wi ashí tsaiktatjai, dutika ai aents atsau bashiak agkan wajas asatnai. Jerusalégnashkam tsaiktatjai, dutika ai ayatak kaya tuwasua weaku atatui. Nunú nugkanmak ikamia yawá aina duke batsamsatnai, tujamui Tuke Pujuu”, tiuwai Jeremías.
JER 9:12 Nuigtu Jeremías chichaak: “Juju nugkanum yaakat ayá dusha ¿wagka imatikaish tsaikbauwaita? Juju nugka juni waya nagkaebauk makichkish atsawai. “¡Uwegshuchuashit tumain wajas awai! ¿Yaita nuna shiig dekamainush? Profeta Apajuí awemamu asa, ¿nuna pachis iina ujapamainush awash?” tiuwai.
JER 9:13 Tutai Tuke Pujuu ayaak: “Ehe, auk chicham umiktinun wi ditan susauwaitag nuna intimkiag umitsuk idaisaju asag aikam asaje.
JER 9:14 Nuna umitsuk dita apaji emematujakagbaun nuna, ditashkam dita anentai wakegamun Baal aidaun emematiaju ainawai.
JER 9:15 Nuadui wi Tuke Pujuun, Israel aents aidaun Apajuíji, ashí senchigtinun juna tajai: Wi ditanak yutai yapaun ayujawagtatjai, tuja umutai jatai egketuamun aajagtatjai.
JER 9:16 Tuja yaunchkesh dita apajigkesh wainajakchamunum tikich nugkanum dapampaakan utsagtatjai. Dutika ai, shiwag aidau puyaja juki yujagsag ashí amuktinme titatjai”, tiuwai.
JER 9:17 Tuke Pujuu ashí senchigtina nunú chichaak: “¡Juju shiig antugtuktajum! Aents jakamtai buutin atinme tusa etegjamu nuwa aina nunú untsuka ikaunmatajum.
JER 9:18 ¡Duka dekas buuttan yacha aina nunú wamak kaunawag atumin egampagtinme! ¡Imatuinak dita jiinig negaikijinak bete wajastinme!
JER 9:19 Nunik Siógnum nagkamas buutuinak: ‘¡Jauchah, wagkaik imatika tsayamash asaji! Iina jee aidaunak ashí tsaigtamkaje, tikich nugkanum shimaku ukukiagmi’, wajaidau antuenawai.
JER 9:20 Tuja nuwa buuttan yacha aidauwah, Tuke Pujuu chichame shiig jitusa antuktajum, nunikjum atumi nawanjum aidau kumpajum aidaujai wake besemag pujaku buuttai, juju aatsa jintintuatajum:
JER 9:21 Iina jee aidaunum jata wainjamae, tuja apu pujusa inamtainish wayae, nuniku asa, uchi piipich jintá wasugkamak yujaun, datsauch aidau plazanum yujaunashkam ijinui.
JER 9:22 Dutikamu asa aents jinau aidauk, ajak juwaam kakegak batsamama numamtuk, tuja tsuwat ukaja ukukmawa numamtuk wajas awai. Witjai Tuke Pujuunuk, nunak dekas tajai.
JER 9:23 “Tuja aents yacha duka niina yachajinigkik eme anenmamigka, tuja aents senchigtina dushakam, niina senchijinigkik eme anenmamigka, tuja wiakchashkam niina wiakchajinig eme anenmamigka.
JER 9:24 Dekas eme anenmamsatatus wakegakug, wi Tuke Pujuu ashí senchigtinaitag nuna shiig dekaa umigtak eme anenmamainai. Wika nugkag anenkajai takajai, nuadui anenka nunú tsanumtsuk shiig takamua nujai shiig awajtawai.”
JER 14:1 Yumi yututsuk kuashat tsawan au asamtai, Tuke Pujuu Jeremíasan chichajak:
JER 14:2 “Judá wegantu aidauk wake besemag dekapenak buutuinawai, dita yaaktaji aidaunmash waji sujutaiji aidauk atsujuinawai. Ashí aents aidauk nugká batsatui, tuja Jerusalégnumak senchi buutuinawai.
JER 14:3 Wiakuch aidauk dita inake aidaun yumi egaktajum tusa ishimainawai, tusa tima yumi aimtainum shiyakag egainawai, tujash yumik atsawai. Nunitai yumi shikitainak wainak takus yuja yujakua waketuinak, puyatkiag datsantin buuken dukumakag waketuinawai.
JER 14:4 Tagkugtin aidauk yumi yutachu asamtai, nugka buku wajasmatai, senchi puyatuinak buuken dukuinawai.
JER 14:5 Nugka buku wajasu asa chijichi jinaamtai, japa aidauk yumainji atsujam, uchiji yama petsakbaunak ukukiag yaja shimuinawai.
JER 14:6 Ikamia burro unuinakchamu aidauk chijichi yumain atsutai, nain uwegshunum ijunas nujantai jinuinak, ikamia yawajai betek dase dasentai mejea mejea mejea wajainawai, imaaninak jaka iyainawai”, tiuwai.
JER 14:7 Jeremías Apajuín segaak: “Tuke Pujuuwah, iik dekas ame umigtsuk amina emtimin shiig kuashat pegkegchau takamsaji. ¡Tujash wait aneasam ame tuke pujuuwaitam nunú anentaimsam yaijatkata!
JER 14:8 ¡Ametme Israel aents aidau uwemtiknumek, ametme tsawan utugchat akuish ayamkagtukam uwemtikagtinmek! Imanaitkumesh, ¿wagka aents tikich nugkanmaya ijaak tau asa, ayatak diijatus kanag tsawak wegama numamtukesh awajkagtame?
JER 14:9 Israel aents aidau Apajuíjiyah, ashí aents aidauk dekainawai amina aentsjum ainag nunak, tuja amek jutijai pujame. ¡Kajimatkimek idaikagtusaipa! Aents kakakchau maanitan yachachu ayamkagtumainchauwa nunin wajasume”, tiuwai.
JER 14:10 Tuke Pujuu aents aidaun chichajak: “Atumek wainka apajuímtai aidau ememattasajum ima senchi wakegagme, nuniau asajum wainka yujagme, anka minak shiig awajtatsui, nuadui wi atumnak suwimkan amastatjime”, tujamui.
JER 14:11 Nuna tusa Tuke Pujuu mina chichagtak: “Jeremíasah, anú aents aina nuna yaigti tusam segatkumek waitkagsaipa.
JER 14:12 Yujumak ijagma pujusam segatkuminish, wika antugkashtatjame; kuntin aidau, trigo, cebada aidau kuashat anentag sujakjuminish, wika jujukchattajime. Wika atumnak maaniamunum, nujantai, jatai ijinattajime”, tujutmayi Apajuí.
JER 14:13 Tujutkui wi ayaakun: “Tujash apu Tuke Pujuuwah, tikich profeta aidau aents aidaun chichajuinak, maaniamuk atsuttawai, tuja nujanchakam tepeashtatui tusa, amina au nii shiig utugchat atsaunum batsamsatnume tusa yaimpaktatui tuinawai”, tibaijai.
JER 14:14 Tusa tai Tuke Pujuu aijak: “Nunú profeta aidau mina daajun pachis tuina nunak waitjuinak tuinawai. Wika ditanak, atum wejum chicham etsegkatajum tusanuk makichkish inatsjai. Nuigtush wika ditanak aujuinatsjai. Nunak ditak anentaimas waitjuinak tuinawai.
JER 14:15 Nunú profeta aidau wi akatja awemachmaitak mina pachitus, auk maaniamuk atsuttawai, tuja nujanchakam juju nugkanmak tepeashtatui tuu yuja duka nujantai, puyajai jinawagtatui.
JER 14:16 Tuja tikich aents aidaun dita ujaina dushakam nunisag nuwe aidau, nawanji aidau, uchiji aidau aatus ashí nujantai, puyajai jinawagtatui. Nunik jinawagmatai, dita iyashi aidauk Jerusalén jinta ayá nuwi tepetag waigtatui, wagki ditan ukumainuk atsau asamtai. Nuni akikmakagtatui dita pegkegchau takamsamujinak.
JER 14:17 “Nuniktin asamtai juju aatsam aents aidau ujakta: “ ‘¡Mina aentsug aidau utugchat ishamainun igkugkaju asamtai, nuna anentaimtusan tsawaish, kashish mijamtsuk tuke buut pujuttajai! Dita utugchatjiya duka tsupimakbaujai betek najamawai.
JER 14:18 Jiinkin ajanum wekaman, aents aidau puyajai kajegkam batsatun wainjai, tuja yaaktanum waikmanchakam, nujantai jinuidaun wainjai. Imanitaish profetakesh, sacerdotekesh, wagkag imaniawa nunak puyatjutsuk wainak tikich nugkanum yujawai’, tujutmayi.”
JER 14:19 Jeremías Apajuín ayaak: “Apuh, ¿Judá wegantu aidauk tuke idaikumek idaisaum? ¿Yaakat Jerusalégkak yawetjamek idaisaum? ¿Wagka waji jataitkuish ampimakuish, tsagaumainchaush ekagtiume? Pegkejap batsamsattaji tibaiji, tujash pegkegchau iyanjamamtai, kuashat waituinaji.
JER 14:20 Tuke Pujuuwah, iina pegkegchaujiya duka dekagmamji, tuja iina apachji pegkegchaun takasu aina dushakam dekaji. Iik dekas ame pegkegchau takagku tunamagji.
JER 14:21 ¡Amek betek uminaitam iman asam, antugkagtuskek idaikagtusaipa, tuja amina pujutaijum jega pegkegma nunú tsaikaipa! Duka dutiktsuk ame jutijai chicham umikuitam nunú adeagta nunikam betek umikta.
JER 14:22 Tuke Pujuu, iina Apajuíjiyah, dakumkamu apajuímtai aina duka yuminak makichkish yutumtikmaitsui, ametme yumi nayaimpinmaya yutumtiknumek, ametme ashí najankaumek. ¡Nuadui ima aminig kajintsa anentaimji!” tiuwai.
JER 15:1 Tuke Pujuu chichagtak: “Juju aents aina nunú wait anenjata tusa Moisés, Samueljai segatainakuish, wika juju aents aina nunak wait anenmaitsujai. Jiinag shiyaktinme tujamui tusam ujakta, dutikam jiinag shiyaktinme.
JER 15:2 Tuja tuwi shiyaktatji tusa inimpainakuig ame ayaakum: “ ‘Nii jatai jakati tibauk nunisag jakati; tuja nii maaniamunum jakatnuk nunisag maaniamunum jakati; untsu nujantai jakatnuk dushakam nunisag nujantai jakati; tuja achija yajuakam yujas waittsatnuk nunisag waittsatnume’.
JER 15:3 “Wi ditanak ipak usumta imajin suwimkan ishitkattajai. Tuja duka juju ainawai: Maaniamunum jinawagtinai, nunikmatai yawá aidau esainiag japisa yujagtatui, chuwag amukagtinai, dutikawagmatai kuntin kajen aidau, shiig amutan amukagtinai.
JER 15:4 Nunak Ezequíasa uchiji Manasésa pegkegchaujin dutikattajai. Wika nunú Judá apuji wajas pujusa Jerusalégnum wajina dutikauwaita nunak kajimattsujai. Nuna antukag nugka múun aidaun apuji aidau senchi ishamkagtatui. Nunak dekas nuniktinun tajai.
JER 15:5 “¿Jerusalégkah, aminash yaki wait anenjamjainta? ¿Yaki amina anempakush buutti? ¿Yaki aminash jamamtuchu pujusti tusash puyatjutpakti?
JER 15:6 Atumek mina idaitusjum pegkegchau takagtusugme. Nuniakjuminish wait anentau asan tsawanta ewae ewaekawan yawegjai, nuniku asan yamaik ijinattajime.
JER 15:7 Jerusalégkah, aminí aents batsata nunak chijichin dase umpui utsauwama numamtuk yaakta ukumtikin utsagtatjai. Mina aentsug aidauk mina umigtukchaju asag uchigtuchu juwakaje. Wi ditanak mina umigtukchaju asagmatai ijinawagjai.
JER 15:8 Dutika ai nayantsa kamatkaji kuashta nuna nagkagas nuwa aidauk shiig kuashat wajemeakagtinai. ¡Etsash etsantaig nuwa aidaunak dita uchiji datsa aidaujai ijinattajai! Makichkish nuniktatuapi tachamunum pachiachbau ishamainun ajunjagtatjai.
JER 15:9 Nuwa kuashat uchigtin aidauk wampainag iyajag nunisag jagtinai. Nunikag datsan dushikiam agtinai, Tuja etsa pegkeg etsantug au suwe wajastinai. Makichik aentskesh iwaku pujaunak tikich aents aidau maatnume tusan idaisattajai. Nunak dekas nuniktinun tajai”, tiuwai Tuke Pujuu.
JER 15:10 “¡Chah, dukuwa wika senchi anentaimkun waitiajai! ¡Wika akiinmainchaunas akiinawamiagtai! Wika makichik aentsnakesh pegkegchauk awagmachuitjai, tujash minak ashí pegkegchaun chichagtuinawai, dutijuinak shiwagmatuinakui ditajai maaniajai.
JER 15:11 Wi ame inatjamun umikchau ataik, tuja dita pachisnush amijai chichaschau ataik, dita tujutuina duka betek uminkati. ¡Tujash mina shiwag aidau waituinakui, nuna yaigti tusan wi amina segajam duka amek dekame!
JER 15:12 Tuke Pujuu aents aidaun chichajak: Suntag asirianmaya, babilonianmaya aina nuna depetmainuk atsawai.
JER 15:13 Israel aents aidautigmek ashí tunamakugme, nuniku asagmin atumi tagkujum aidau, wajijum aidau, tuja atumi nugkemin ayá nunashkam atumi shiwajumin ashí susattajai.
JER 15:14 Wika shiig senchi kajekjai, nuniku asan, jiijai betek apeattajime. Atumi shiwaajum aidau achipag tikich nugka atumi wainchataijin yajupakag, dita inainak waitkastinme tusan idaisattajime”, tiuwai Tuke Pujuu.
JER 15:15 Jeremías Tuke Pujuun aujak: “Tuke Pujuuwah, amek ashí dekame, wika amina takaju asan maatag tama ajai, minash kajimatjutsuk yainkata. ¡Tuke Pujuuwah, mina mantuatag tuina duka ayatak dii pujugtsuk eke mina mantuinatsaig, suwimak susam ijinata!
JER 15:16 Tuke Pujuu ashí senchigtinuh, ame mina aujtuyum nunak wika puyatjusan antuyajai. ¡Wika aminuitag duwi amina chichamjumin antakun shiig aneyajai!
JER 15:17 Wika aents pegkegchau takatnak yujajin aina nujai ijunja wekaetanak idaisajai. Aminu etiuwaitam duwi nagkamsan wika wiki pujajai, tuja pegkegchau takat ame kajejam nunak wishakam kajejajai.
JER 15:18 ¿Wagka tujash imaniknush waitush pujaja? ¿Wagka wi imanikan waitiag dusha megkaemainchauwaita? Niimpap yainkattawa timajai, tujash idaitusume, amek yumi pukuni jiinu kuyua buku wegama numamtin wajasume”, tiabiajai.
JER 15:19 Tusa ti ai Tuke Pujuu aijak: “Nunú anin wainka tuu wekaetsuk, awake anentaimjam minai minakminig, mina chichamjun etsegtujin ati tusan yaigtatjame. Dutika ai ame mina profetag atatme. Amek ditaig waketmaitsume, auk dita aminí minimain ainawai.
JER 15:20 Juju aents aina nuna emtinig wi aminak yaakat broncejai peejamua iman awajsattajame. Amina shiwaajum aidau jetepainakush depetamkachagtatui, wi aminak ayamjukan uwemtijattagme. Witjai Tuke Pujuunuk, nunak dekas dutikatin asan tajai.
JER 15:21 Aents pegkegchau aidau mantamatag tuinakuish, wi ayamjukan uwemtikjattagme; tuja magkagtin aidau mantamatag tuinakuish, wi uwemtikjattagme”, tiuwai.
JER 18:1 Tuke Pujuu chichagtak:
JER 18:2 “Jeremíasah, duwe namuka najanin puja nuna jeen wetá. Nunikamin nuwi chichaman ujaktagme”, tujutmayi.
JER 18:3 Tusa tujutmatai nuna jeen webaijai. Nunika jegakman nunú aents shikika umutain tornonum najanak pujaun wainkabiajai.
JER 18:4 Nuna najanak pujus, shiig jiinkichmatai, nunú duwenak juki ataktu nagkama nii wakegamunak imatiksag shiig pegkejan najanmayi.
JER 18:5 Nuwi Tuke Pujuu mina chichagtak:
JER 18:6 “Atumek mina uwejui pujagme, nuadui wika atumnak juju aents duwen namuka najanak itujeawa nujai betek awagmamainaitjime. “Witjai Tuke Pujuunuk, nunak dekas tajai.
JER 18:7 Wi wakegaknuk, nugka múun aidaunash, tuja apu aidaunash, shiig wamak tsaikan utsajai.
JER 18:8 Untsu nunú aents aidau pegkegchau takatan idayinak mina umigtuinakuig, suwimkan susatasan umigkau akunush suwimkanak sumaitsujai.
JER 18:9 Tuja tikich tsawantai, aents nugka muunnumia aina nunú takainak emkatnume, nuninak senchigtin wajastinme tusanush dutikajai.
JER 18:10 Untsu nunú aents aidau pegkegchaun takainak mina umigtuinachkuig, wi dita wajiji aidaun susatag tibaugnash suchauwaitjai”, tujutmayi Apajuí.
JER 18:11 Tuja duwi pujus Tuke Pujuu chichagtak: “Judá aents aina nunú Jerusalégnum batsamin aidaujai, wi taja nunú ujakta: ‘Atumin suwimka amastasan chichaman umiajai. Tuja suwimak dakitakjumek, pegkegchau takat idaikujum pujutjum iwajatajum’ tujamui Apajuí tita tujutmayi.
JER 18:12 Tusa tamin dita chichagtamainak: ‘¡Wainka tsawan megkaekum tuu wekaetsuk wetá, iik ii wakegamu takainaku batsamsatasa wakegaji!’ tujamiagtatui.
JER 18:13 “Tusa tujamainakui wi ditan chichagkun: “Tikich aents pegkegchaun takau aina duka tikima atumjai betekak atsawai. ¡Tuja atum Israel aents aidautigmek tikima shiig pegkegchau takagme!
JER 18:14 Muja Líbano titiji aidaunum bicha nujamag ayá duka makichkish megkaechauwai. Tuja entsa bichatin muja aidaunum ayá dushakam kuyuag megkaechauwai.
JER 18:15 Tujash mina aentsug aidauk minak kajimatjukiaje, nuninak dakumka najanamu apajuímtai aidaun emematuinak kugkuin incienson apé yujawai. Dita yujatai jinta aya nuna imagkag wainak jintachunum yujawai.
JER 18:16 Nunidau asagmatai, dita shiwaaji aidau wa wamak waitkamu asag yaaktaji tsaigkam, dita nugkeg bashiak awai. Ashí aents nuni nagkaemaidauk nuna diisag puyatkag buuken pegag nagkagainawai.
JER 18:17 Israel aents aidaunak dase etsa minitainmaya dasentak utsaumaina numamtuk wi utsagtatjai; tuja dita shiwaaji aidaun ishamkag pisagtinme titatjai. Suwimak jukitnuji tsawan jegamtaig, ditanak ausachagtatjai, ayatak atsu ayampatuan idaisagtatjai”, tiuwai.
JER 18:18 Aents aidau chichainak: “Sacerdote aidau, aents yacha aidau, profeta aidau Apajuí chichamen iina jintinjamainuk tuke aitnai. Nuadui nii tawa duka makichkish antugkachmi, dutikaku Jeremíasak chicham umigka tsanumjuja maa ajapami”, tuidau.
JER 18:19 ¡Tuke Pujuuwah, wait aneasam antugtukta! ¡Mina shiwag aidau chichaina nunú antukta!
JER 18:20 ¡Wi egkema jakatnujun waa muuntan tautjiaje! ¡Wika ditanak pegkegnum yayamaitak, dita mina aan iiktuina duka pegkegchauwai! Wi ditan wait anentakun juwi taan, suwimak susaipa tusan amina segajam nunú adeagta.
JER 18:21 ¡Tujash yamaik ame dita uchiji aina duka nujantai jinaati tita! Untsu nuniachkush maaniamunum jinaati tita. ¡Nunikagmatai dita nuwe aidauk waje uchigtuchu juwakagtinme! ¡Tuja aents múun aidaunak jata ijinatnume! ¡Untsu datsa aidauk maaniamunum jinatnume!
JER 18:22 Tuja pachiachbau kasa aidau ishitkata, ¡nuna ishamainak pampaidau antuekati! Wagki ditak wi egkema jakatnun waa muuntan tai umigtukaje. Tuja wi weamunmashkam iyatnun umigtuinawai.
JER 18:23 Tujash Tuke Pujuuwah, mina mantuawagtatus chichaman umigtuina duka amek shiig dekame. ¡Dita pegkegchauji aina duka tsagkujaipa! ¡Tuja kajimatkimesh idaisaipa! ¡Ame kajekbaugmin suwimak susata, shiwag aidau depetuk ijinatnume tusam idaisata!
JER 19:1 Tuke Pujuu mina chichagtak: “Yumi shikitai makichik duwe najanamu sumakta. Dutikam aents aidaun apuji múun aina nuwiya ujumak, sacerdote múun chichin aidaujai untsukam ijumjata.
JER 19:2 Dutikam dita uyuntamsagmatai, Ben-hinoman pakajin wetá. Nunikam yaakta waitiji ichinak duwejai najanamu tutaya nujai niniaku wajasam, wi amina akatjattajam nunú etsegkata.
JER 19:3 Nuwi wajanta chichaakum: ‘Judá apuji aidauwah, Jerusalégnumia aidautigmejai, Tuke Pujuu ashí senchigtin, Israel aents aidaun Apajuíjiya nuna chichame antuktajum. Apajuí chichaak juna aatus tawai: “ ‘Juju nugka juwi waitut ishamainun awemattajai, dutika ai nuna antuidauk senchi ishamak kujainiagtinai.
JER 19:4 Wagki Israel aents aidauk mina kajimatjukiag, juju nugka junak Apajuí etegkachua nunin awajsag, ditash wainchataijin, tuja dita apachji aajaku aina dukesh wainajakchamun, Judá wegantu aidaun apuji aidaukesh wainchatai wainka apajuímtai aidaun emematuinak nuwi kugkuin incienson apé yujawai. Nunidau asag juju nugkanak aents takamsachu aina nuna numpeg awajsaje.
JER 19:5 Tuja nuigtushkam, wi dutikatajum tichamaitak, nuigtush makichkish anentaimtachbaujun, Baalan emematuinak dita uchijin maawag patasa apeatnun altaran najadau ainawai.
JER 19:6 Nuadui juju nugka daaji Tófet tutaiya nunú yapagtuatin tsawan jegattawai. Dutikamu asa Ben-hinoman pakaji tutaigkesh achattawai. Juju nugka daajig: “Aents ijinamu” tutai atinai. Witjai Tuke Pujuunuk, nunak dekas uminkatnun tajai.
JER 19:7 Judá wegantu aidau Jerusalégnumia aidaujai chichaman umina nunak pachimjukan emegkatkattajai. Dutikan shiwag aidau maaniamunum ijinatnume tusan idaisagtatjai. Dutika ai nuwi jinawag tepetag waigkun chuwag aidau, kuntin kajen aidaujai amuktinme titatjai.
JER 19:8 “ ‘Tuja Jerusalégnak ashí tsaikan ishamain awajsattajai. Dutika ai bashiak asattawai. Tuja aents nuni nagkaemaidauk nunú imatika yaakat tsaikbaun diisag ishamiagtinai. Nuninakush dushikiagtinai.
JER 19:9 Shiwag ishamain aidau ditan ijinawagtatus yaaktan tenteawagtinai. Dutikawagmatai jiintsuk batsamas yumain atsutai, nujantai jinuinak dita uchiji aidaun, nawanji aidaujai yuwatnume, dutikainak pempeentunikiag yudaitinme tusan idaisattajai, tawai Apajuí’, titatme.
JER 19:10 “Nunú tusa inagnakam, aents aidau amina uyuntamainak yuja nunú wainainamunum yumi shikitai duwe najanamu takakbaujum ajiaja tsaiktatme, dutika tsaikam
JER 19:11 chichagkum: Apajuí ashí senchigtina nunú chichaak: ‘Juju aents aina nunak yumi shikitai tsainka nunú iwagmaitsu numamtuk ataktush nantamainchaun tsaiktatjai. Dutikamtai aents aidauk nuna iyashi aidaunak tikich ukumamain atsau asamtai Tófetnum ukusagtinai.
JER 19:12 Tuja Jerusalégkak tsaikam Tófetjai betek wajastatui. Witjai Tuke Pujuunuk, duka dekaskenum uminkattawai.
JER 19:13 Nuadui, Jerusalégnumia jega aina nuwig, tuja Judá wegantu aidaun apuji aidau pujusa inamtaiji aina nuwishkam minak makichkish emematjishtinme titatjai, wagki ashí yaya aidaun emematuinak nunú jega aina nuna tuntupen kugkuin incienson apeenak, tikich apajuímtai aidaun anentag suwinak vinon ukaidau asag senchi tunamaidau asagmatai. Nuadui duka ashí Tófetjai betek juwaktatui’ tawai Apajuí”, tiuwai Jeremías.
JER 19:14 Nuna tusa inagnak, Tuke Pujuu mina chichameg etsegkata tima, Tófetnum weuwa nuwiya wakitkiuwai. Nunik jega Apajuí emematku ijuntai jegamkamunum nuna waitijin jegantatak wajanta ashí aents aidaun chichajak:
JER 19:15 “Tuke Pujuu ashí senchigtin, Israel aents aidaun Apajuíjiya nunú chichaak: ‘Juju aents aina duka yaaktajijai nagkamas nuni senchi intimkiag mina umigtutnak dakitjaje. Nuadui dita suwimak jukitnun pachisan timag nunak imatiksanuk suwimkan susagtatjai’ tawai Apajuí”, tiuwai Jeremías.
JER 20:1 Imer aajakua nuna uchiji Pashur sacerdote Apajuí emematku ijuntai jegamkamun apuji aajakua nunú Jeremías utugchat nagkaemagtinun pachis chichagkagtaun antukui.
JER 20:2 Nunik: “Jeremías achikjum asutiatajum, dutikajum aents achika chimpitai Apajuí emematku ijuntai jegamkamua nuwi jegantatak, Benjamígka waitiji tutaya nuwi ayaumas awa nuni egkeatajum”, tusa inamjauwai.
JER 20:3 Tusa inamjayatak kashinia duwi kashikmas Jeremías jiiktajum tusa tiuwai. Tusa timatai jiikiajui, dutikam Jeremías niina chichajak: “Amina daagminak Tuke Pujuu yapagtugmattawai. Dutijamamtai Pashur idaikum Magor-misabid namkattame.
JER 20:4 Wagki Tuke Pujuu chichaak: ‘Aminak senchi sapigmitkaktatjame, dutikakun amina kumpajum aidaunashkam sapigmitkaktatjai. Nuadui amesh wainminig shiwag aidau amina kumpajum aidaunak ijinawagtatui. Tuja ashí Judá wegantu aidaunak Babilonian apuji depetuk achija niina nugkeen yajuakti, tuja dutikachkush kuchiiyai kajegti tusan niina idaitustatjai.
JER 20:5 Tuja nuigtushkam ashí dita wajiji aidaunak apu takatai waji akik pegkeg aidaujaí nagkamsan shiwajan ashí susattajai. Dutika ai nuna ashí yajuakag Babilonia nugkanum ejegawagtinai.
JER 20:6 Tuja Pashura aminak amina pataim aidaujaí achipajag Babilonia nugkanum yajupakagtinai. Dutijamawagmatai nuwi pujusam jakattame, nunikamin amina kumpajum aidau Apajuí pachisam wainka tsanu ayum nujai ijumag ukupasagtinai’ tusa Apajuí tawai”, tiuwai Jeremías.
JER 20:7 Jeremías chichaak: “Tuke Pujuuwah, amek minak pegkeg chichagtukam untsugkabiume, tusa tujutkumin ayu tusan aikmaijame. ¡Amek mina nagkaetasu senchigtinaitme, iman asam wagagtukmayume! “Minak aents aidauk tuké dushiktuinawai.
JER 20:8 Wi tuwi chichaja nuniaknuk: ‘¡Suwimak juki waittsatin tsawan jegawai! ¡Shiwag ijipatin tsawan jegawai!’ tusan tuké nuna tajai. Nuadui amina chichamjumin etseju asan kashi kashinig dushikiam pujajai.
JER 20:9 Tuja wi anentaimsa chichaakun: ‘Dekas yamai nagkamsanuk Apajuínak kajimatkitjai, tuja niina daajin pachisnush etsegkashtatjai’, tajai. ¡Tujash amina chichamem mina anentaijui jiijai betek nimpak mina ukunchjunash sukuawai! Dekas yamaik chichakchatjai tajai, tujash amina chichamjumnak etsegtsuk idaimainchau dekapeajai.
JER 20:10 “Aents aidau tuke aneas dushiktus chichainak: ‘¡Ashí yantamnum sapigmainaji!’ tuinawai. Tikichnashkam chichainak: ‘¡Kaunatajum tsanumjuja utugchat apujtusmi!’ tuidaunash antajai. Mina shiig kumpauchig aidaush itusag pegkegchaun takasa tusa utugchatan egatjuinawai. Nuninak: ‘Tsanusa dekapsami, dutikkama ajuaik depetka emegkaktatji’, tujutuinawai.
JER 20:11 “Tujash Tuke Pujuuwah, amek maanitan yacha depetmainchauwaitme, ame wijaig tuké pujame; nuadui mina aintuina duka minak depetukchagtatui. Ame depetkamu asa datsagkag, ame dutikamua nunak makichkish kajimatkishtinun tuke augmatu yujatin atinme.
JER 20:12 “Tuke Pujuu ashí senchigtinuh, amek aentsu anentaimtajig shiig wainme, nuadui ii anentaibaujish, tuja ii dutikatasa anentaimtamush ashí dekame. Ame wajuk suwimak susattame nuna wainkatasan wakegajai, wagki wika midauwa nunak amina idaitusjame.
JER 20:13 ¡Tuke Pujuu kantamjuatajum! ¡Tuke Pujuu ememattajum, wagki aents pegkegchau aidau ujudauch aidaun waitkagtaish, nii ayamjuk agkanmitkawai!
JER 20:14 “¡Tsawan wi akiinamua duka shiig pegkegchau atin ati! ¡Mina dukug uchigmatjukua nunú tsawanta duka pegkegnum chichagtai achati!
JER 20:15 Wi akiinamtai: ¡Aishmag akiinae! tusa mina apajun ujaka shiig anemtiksauwa duka shiig pegkegchau atin ati.
JER 20:16 Utusag nunú aentsuk yaakat Tuke Pujuu tsaikam, tuke megkaena numamtuk megkaeka tusan wakegajai. ¡Nuniak imaanjaujai betek kashikmas untsumiagtai, tuja etsa tutupit aish, maaniamunmas imatuinawa tumainun antak sapigma wekaya tajai!
JER 20:17 Imanikan waitu pujutnaitkunush ¿wagkanuk akiinawabiajah? Aika datsanmain maa ajapeam atinaitkunus dekas jakau akiinachamiagtai. ¡Akiintsuk jakauwaitkunuk wi ukumasbaujuk mina dukuju wake amainai!” tiuwai.
JER 23:1 Tuke Pujuu chichaak: “¡Chah, aents uwija kuitamin, mina uwijun pachitsuk ipisig ishima nunak wait anentajai!”
JER 23:2 Tuke Pujuu, Israel aents aidaun Apajuíjiya nunú, niina aentsji aidaun apuji aina nuna chichajak: “Atum aidautijum mina uwig aidau dapampaakugme, dutikajum shiig kuitamtsuk ipisjaugme. Dutikau asagmin wi atumnak suwimkan amastatjime, wagki atumi pegkegchaujin achijag tikich nugkanum yajuakaju asagmatai. Witjai Tuke Pujuunuk, nunak dekas tajai.
JER 23:3 Tujash wi dutika yajuaktinme tibau asag dutikau ainakuish, mina uwig aidaunak wiki ataktu awakjan dita nugken ikaunmattajai, dutika ai nuwiyan chijichin yuwinak yujakag kuashat wajasagti tusan.
JER 23:4 “Dutika ikaunman, ditan kuitamkagtinun tikich aidaun adaitugtatjai, dutika ai ishamkagtutsuk batsamsagtinai. Witjai Tuke Pujuunuk, nunak dekas tajai”, tiuwai.
JER 23:5 Tuke Pujuu chichaak: “Mina aentsug aidaunmak aents shiig takau, yacha nunú apu atatui. Duka David wegantunmaya atinai. Nunú dekaskenmak shiig takastinai.
JER 23:6 Nii inamjatna dui, mina aentsug Judá wegantu aidauk ayamjumaktinai, tuja Israel aents aidaushkam agkan shiig batsamsagtinai. Nunidau asag, Apajuí daajinak: ‘Tuke Pujuuwai iina depetmitkagbauk’ tuu adaikagtinai.
JER 23:7 “Tuke Pujuu chichaak: ‘Israel aents aidau Egipto nugkanum batsatun Tuke Pujuu jiijua nuna daajin tajai’ tusa tutaiya nunú yapajinatnuk tsawan jegattawai.
JER 23:8 Nunikmatai nuna idayinak: ‘Israel wegantu aidau Babilonia nugkanum, tuja tikich nugka aidaunum, utsagkam batsatun Tuke Pujuu jiija yajuak ikaunmauwa nuna daajin tajai’ tiagtinai. Apajuí yajuaka ikaunmam dita nugken batsamsagtinai”, tiuwai.
JER 23:9 Jeremías chichaak: “Profeta aidaun anentaimtusan shiig senchi anentaimkun waitiajai, imaniai mina iyashjuk ashí sunatui. Tuja Tuke Pujuu niina chichame pegkegma duwi profeta aidaun pachis ujatkau asamtai, nuwi senchi anentaimkun, aents vinon nampeka wajukmaina numamtuk winchainjan iyaumain dekapeajai.
JER 23:10 Juju nugkanmak, ayatak aents pegkegchaun takau aidau, pegkegchaun takastatus tupikatin aidau, apu adaikam nuna anagma tikichi waitkau aidau aatus batsatui. Nunin asagmatai juju nugkanak Apajuí pegkegchaunum yumigjauwai. Dutikamu asamtai chijichi kagaka megkaejamtai, juju nugka juka uwejush wajas asae.”
JER 23:11 Tuke Pujuu chichaak: “Profetayaske, sacerdoteyaske pegkegchaun takainawai, núnidau asag mina emematjaku ijuntai jegamkamua nuwi pegkegchaun takaidaun wainkamjai.
JER 23:12 Nuadui dita jintig suwe atakuinja iyaumain atinai. Shitaki ajuatnume tusan wi inamjattajai. Suwimak jukitnuji tsawan jegamtai, wi ditanak suwimkan susagtatjai. Witjai Tuke Pujuunuk, nunak dekas tajai.
JER 23:13 “Samarianum shiig pegkegchaun wainkamjai. Wi dakitamua nuna profeta aidau Baalan pachis etsejuinawai, dutikainak mina aentsug aidau ima minak umigtumainun datupainawai.
JER 23:14 Tuja profeta Jerusalégnumia aina duka dekas nuna nagkaesau shiig pegkegchau ainawai. Nuadui ditak dekas Apajuí chichamen etsegtsuk dita anentaimsa jiikbaujin waitan etsejuinawai. Nuna aents pegkegchau aidau antuinak ichichmamainawai. Nunú aidauk, makichkish pujutjin yapajiatag tusagkesh anentaimainatsui. Ayatak pegkegchaunak takainawai. Nuadui ditak dekas aents sodomanmaya, gomorranmayajai aajaku aina nuna nagkaesau ainawai.
JER 23:15 Nuadui wi apu Tuke Pujuu ashí senchigtinun profeta Jerusalégnumia aina dusha wajukawagtigki nuna yamai etsegjai: Ditanak yutai yapaun ayujawagtatjai. Tuja umutainashkam jatain egketuan aajagtatjai, nunak dita pegkegchauji aidau ashí Israel aents aidau nugken yujaku asamtai, dutikawagtatjai”, tawai Apajuí.
JER 23:16 Tuja atum Israel aents aidautigmin pachipas Tuke Pujuu ashí senchigtina nunú chichagtamak: “Israel aents aidautigmek anú profeta aidau tujamaina duka makichkish antugkaigpa. Dita etsejuina nunak waitjak tuu yujawai, wi mina chichameg etsegtugkata tichamaitak, ditak nagkabiag tuu yujawai.
JER 23:17 Nunidau asag mina chichamjun dakitin aidaun chichajuinak: ‘Tuke Pujuu tujamui, utugchatak atsugtamiagtatui’, tuinawai. Tuja aents dita wakegamunak takaina nuna chichajuinak: ‘Makichik suwimkakesh jukishtatjume’, tuinawai.”
JER 23:18 ¿Yaita nigki waya Tuke Pujuujai chichasush? ¿Yaita nuna wainkaush, tuja nuniashkush chichamen antugkaush? ¿Yaita nuna antuk puyatjus umiktajai tusa anentaimush?
JER 23:19 Tuke Pujuu kajekbaujiya duka dase ishamainun dasentama iman asa, aents pegkegchau aidaunak ijinattawai.
JER 23:20 Tuke Pujuu kajekbaujiya duka makichkish mijamtsuk ashí wajina dutikatjai tawa nuna umika nagkankattawai. Makichik tsawantai dekatnaitjume, wagkag dusha imaniktinaita.
JER 23:21 Nunú profeta aina nunak wika makichkish awematsjai, mina chichameg etsegtugkatajum tusanuk, ditanak augtanakesh augtsujai, dutikamaitak jiinki yujasag mina daajun pachisag etsejuinawai.
JER 23:22 Dekas mina chichamjun antuk uminakug, mina aentsug aidaunak mina chichamjun ujakag pegkegchau takatnak idaimitkamain ainawai.
JER 23:23 Tuke Pujuu chichaak: “Atushat akuish, tuja tikijuch akuish wika nuwi pujajai.
JER 23:24 Nuadui minak makichkish uumjutmainchau ainawai. Nayaimpinmash, nugkanmash wika pujajai, wi nunak Tuke Pujuun dekaskenum tajai.
JER 23:25 “Anú profeta aidau waitjuinak mina pachitus Apajuíjai kajanum chichaji tuidaun antukjai.
JER 23:26 Wainak waitjuinak ditak anentaimas dita wakegamun chichá yuja nunash ¿wajutik idaisagti?
JER 23:27 Kajanmayan augmatuinak mina aentsug aidaun tsanuinawai, dutikam yaunchuk dita apachji aidau Baalan emematuinak mina kajimatjuki idaitusu aina numamtuk ditashkam kajimatki idaisatnume tusa.
JER 23:28 Makichik profetakesh kajamkagtujag, kajanmayan tajai titi. ¡Untsu mina chichamjun antuk etsejuk, shiig betek etsegkati! Trigon dukega duka nejejaig betekchauwai.
JER 23:29 Mina chichamjuk jiijai betek, nuigtu martillowai kaya awati tsaitiama imanai. Witjai Tuke Pujuunuk, nunak dekas tajai.
JER 23:30 “Nuadui wika au profeta aidau dita ditak pempeentunikiag, witjai dekas Apajuí chichamen etsejunuk tusa tuu yuja nuna antakun kajeajai. Witjai Tuke Pujuunuk, nunak dekas tajai.
JER 23:31 Au profeta aidau ditak anentaimas jiikiag tsanumak mina chichamjua numamtuk etsejuina nuna antakun kajeajai.
JER 23:32 Au profeta aidau kajanmayan waitan etsejuinak, mina aentsug aidaun anentain yapagtuawag pegkegchau takamtikaina duwi kajeajai. Wika ditanak makichkish mina chichameg etsegtugkatajum tusanuk ishimtsujai. Nuadui ditak mina aentsug aidaunak pegkegnumkesh yaimainchau ainawai. Witjai Tuke Pujuunuk, nunak dekas tajai”, tiuwai.
JER 26:1 Josíasan uchiji Joaquim Judá wegantu aidaun apuji wajas inabaun nagkamai, Tuke Pujuu Jeremíasan Jerusalén pujaun chichajak:
JER 26:2 “Mina emematjaku ijuntai jegamkamua nuna waitijin jegantatak agkaju ayatak shugku ajigbauwa nuwi wajasta. Nuwi wajasam, aents Judá wegantu aidau mina emematjitatus minidau wi amina akatjamjam nunú ashí ujakta.
JER 26:3 Nuna antukag pegkegchau takatan idayinak pujutjin yapajinakuig, suwimkan susatjai tiu akunush dutikashtatjai.
JER 26:4 Tuja jujuwai ame dita ujaktinuk: ‘Mina antugtutsuk, wi ditan jintintuawaitag nunash umitsuk,
JER 26:5 wi mina profetag aidaun ishiakbau yujasag pata pataka ujamash nunashkam antugkachaju asagmatai,
JER 26:6 juju mina emematjaku ijuntai Jerusalén awa nunak yaunchuk Silónum aak mina emematjaku waitai aakmakbaun tsaikuitag dutiksanuk tsaiktatjai, dutika ai juju yaakta duka ashí aents tikich nugkanmaya aidau dushiktai atatui’ tawai Apajuí”, tiuwai Jeremías.
JER 26:7 Nuna aatus Jeremías tabaun sacerdote aidau, profeta aidau, ashí aents aidaujai antukajui.
JER 26:8 Tuja Tuke Pujuu tita tibaun ashí tusa inagnakmatai, sacerdote aidau, profeta aidau, ashí aents aidaujai ijuntujag Jeremíasan achikajui. Dutikawag chichajuinak: “¡Amek yamaik mantamnattame!
JER 26:9 ¿Wajukeakmea amesh Tuke Pujuu daajinish, juju Apajuín jega duka, yaunchuk Silónum Apajuíjai chichatai aakmakbau wajukauwa nuniktatui tusamesh, nuigtush yaaktashkam tsaikam aents jinaamtai agkan wajastatui tusamesh tame?” tuidau. Nuna tusag ashí aents aidau nuwi batsatuk ijuntug tenteawag achikajui.
JER 26:10 Nuna Judá wegantu aidaun apuji aidau antukag apu inamtain batsatu Apajuí emematku ijuntai jegamkamunum shiyakajui. Nunik jegawag nunú jega waitiji yamajam aajakua nuwi jegantag ekemsajui.
JER 26:11 Nuwi pekajun sacerdote aidau, profeta aidaujai ditan chichajuinak: “Juju aentsua duka mantamnamainai, wagki atumesh antagmin: ‘Juju jega duka yaaktajaí tsainkattawai’ tuu wekagu asa”, tuidau.
JER 26:12 Tusa imatiagtai, Jeremías apu aidaun ashí tikich aents aidaujai ijunun chichajak: “Apajuí emematku ijuntai jegamkamun, yaakat Jerusalégjai pachisan wi tabau antukujum nunak wiki nagkamnukek tatsujai, nunak dekas Tuke Pujuu tita tujutbaun tajai.
JER 26:13 Suwimak dakitakjumek pujutjum iwajatajum, nunikjum Tuke Pujuu atumin Apajuíjiya nunú umigkatajum. Nuniagminig nii suwimkan amastatjime tujabi nunak amaschattawai.
JER 26:14 Tuja wika juwi atumjai pujajai, atum itugtuktatajume, nunú atum wakegamu umiktajum.
JER 26:15 Tujash atum mina mantakjumek, utugchatak atumdau atatui, wagki aents utugchatji atsaig mau asajum. Wika wiki nagkamnukek tatsujai, dekas Tuke Pujuu etsegkata tujutbaun etsegjai”, tiuwai.
JER 26:16 Tusa timatai apu aidau, ashí aents aidaujai sacerdote aidaun profeta aidaujai chichajuinak: “Juju aents pegkegchau takamsamujig atsujui, niig Tuke Pujuu iina Apajuíjiya nunú tibaun etsejui, nuadui niig makichkish mantamnamaitsui”, tuidau.
JER 26:17 Tusa tiagtai, apu múun aidau ujumak wajakiag nuwi aents ijunag batsatun chichajuinak:
JER 26:18 “Ezequías Judá apuji wajas inamjauwa nunú tsawantin profeta Miqueas Morésetnumia aajakua nunú, Tuke Pujuu akatjam ashí aents Judá wegantu aidaun juna aatus chichajak: “Tuke Pujuu ashí senchigtina nunú chichaak: ‘Jerusalégnak tsaikagtinai; dutikam ayatak kaya tuwasua weaku atinai. Tuja nainnum Apajuí emematku ijuntai jegamkamua nunak dupa tsapaka akijuatnai. Jerusalégkak dutika tsaikbau asa jega atsau, ayatak ajak ajakmatai wajastatui’, tiuwai.
JER 26:19 “Nuna aatus Miqueas tutaish, apu Ezequíasak Judá wegantu aidaujai ijunjag niinak maachajui. Nuadui apu Ezequíasak ashí aents aidaujai Tuke Pujuun ishamaidau asag, tsagkugkagtugta tusag segajui. Nuadui Tuke Pujuu ditan suwimkan susatag tiuwaitak tsagkujug idaisauwai. ¿Dita nuniku ainaimpash, ii Jeremías maaku utugchat igkugtag?” tiajui.
JER 26:20 Tuja Semaías yaakat Quiriat-jearimnumia aajakua nuna uchiji profeta Urías Jeremíasjai betek Tuke Pujuu daajin Jerusalégkan nugka múunta nujai pegkegchaun chichagkauwai.
JER 26:21 Tusa timatai, apu Joaquim niina atuwe aidaujai nuna antukag mantamnati tiuwai. Tujash nuna Urías dekaa ishamak Egipto nugkanum tupikakiuwai.
JER 26:22 Nunikmatai apu Joaquim Acboran uchiji Elnatán aajakua nuna uchijin tikich aents aidaujai Urías egaktajum tusa ishiakui.
JER 26:23 Dutikam yujajus Egipto nugkanum pujaun juki itawajui. Dutikawag apu Joaquiman ejetuawajui. Dutikawagmatai: “Maatajum, dutikajum aents jakau egkea ajaptai nugka taimua nuwi egkeatajum”, tusa inamjauwai.
JER 26:24 Tuja Zafagka uchiji Ahicam Jeremíasan wait anentau asa, aents aidau maawainum tusa ayamjukui.
JER 31:1 Tuke Pujuu chichaak: “Israel aents aidau achija yajuakbau Babilonia nugkanum batsata nunú ataktu waketug kaunawagmataig, wi ashí Israel aents aidaun Apajuíji atatjai, untsu dita mina aentsug agtinai”, tawai.
JER 31:2 Tuke Pujuu chichaak: “Israel aents aidau uwegshunum yujayanum nunak wi wait anenjan yaigkuitjai. Tuja maaniamunum jinachu aina nunashkam wi ayamtiksauwaitjai.
JER 31:3 Yaunchkek wika ditanak atushat wantintukuitjai. Nunika chichagkun: Wika atumnak tuke aneen asan, yamaikish tuke wait anentakun kuitamjime.
JER 31:4 Israel aents aidauwah, ataktu inantaittajime. Dutika ai ataktu pandereta awatkujum shiig aneasjum nantsemtinaitjume.
JER 31:5 Samaria mujajin ataktu uva ajakmakjum nunú nejekmatai, shiig aneasjum yuwatnaitjume.
JER 31:6 Tuja suntag jinta kuitamin aidau Efraígka mujajinia untsumainak: ‘¡Kaunatajum, nunikagmin Jerusalén shiyaka Tuke Pujuu iina Apajuíji emematiagmi!’ tiagtina nunú tsawan jegatnai”, tawai.
JER 31:7 Tuke Pujuu chichaak: “Israel aents aidau pachisjum, shiig aneasjum kantamatajum, atum ainagme tikich nugka múun aina nuna nagkaesau eme anentsa diitai aidautijum. Nuadui senchi kantamkujum: ‘¡Tuke Pujuu niina aentsji aidau ujumak iwaku juwaku aina nuna ayamjuk uwemtikjati!’ titajum.
JER 31:8 Babilonia nugkanum batsatjum nunak awakjattajime, tuja tikich nugkanum batsatutigminashkam atumi nugkemin awakjattajime. Wainmachu aidaush, shutuu aidaush, nuwa ejamtin aidaush, yama uchigmaku aidaush waketjagtinai. Nuninak shiig kuashat waketjagtinai.
JER 31:9 Awake anentaimag buutkiag waketiagtinai, nunik mininakui wi yajuakan, jinta pegkeg paka tukumka iyaumainchau wega nuni emagtinaitjai. Witjai Israel aents aidaun apajinuk. Tuja Efraígkai mina uchig iwaiya duka.
JER 31:10 Ashí aents aidautijum Tuke Pujuu chichame antuktajum, nunikjum nayantsa pakajin atushat yujasjum niina chichame etsegkatajum. Israel aents aidaunak Apajuí dapampaak emegkajui. Tujash nigki ataktu ikaunmattawai, dutika uwija kuitamin uwigjin kuitamama imatikas kuitamkattawai.
JER 31:11 Tuke Pujuu Israel aents aidaunak tikich nugka muunnumia achija yajuakbaun ayamjuk agkanmitkatnai.
JER 31:12 Dutika Apajuí yaigbau asag, Israel aents aidauk Jerusalén kaunawag shiig aneenak kantamiagtinai. Untsu Tuke Pujuu ditan yayaak: Trigo, vino, aceite, uwig aidau, baka aidau susamun nuna maawag shiig aneas yuwawagtinai. Tuja ditak ajak ajakbau yumi ukattai asa, pegkegchiama iman agtinai. Ditak atakesh depeteamak achagtinai.
JER 31:13 Tuja nuwa muntsujut aidau, aishmag datsa aidau, múuntuch aidau aatus shiig aneasag nantsebiagtinai. Wi dita anentainak ichichtugtinaitjai, dutikakun wake besemag batsatunak yapagtuan dakujamun susagtinaitjai. Tuja dita najaimainak waituina nuna nagkaesau shiig anemtiksagtinaitjai.
JER 31:14 Sacerdote aidaushkam dekas yutai shiig pegkeg aidaun yuwawagtinai, tuja mina aentsug aidaushkam, wi ditan susagtinaitag nunak dita atsumamun nagkaesau jukiagtinai, nuninak shiig anediagtinai. Witjai Tuke Pujuunuk, nunak dekas tajai.”
JER 31:15 Nuigtu Tuke Pujuu chichaak: “Ramá nugkanum senchi buutbau antuenawai, nunak Raquel niina uchiji jinamunum buutak imatui, tuja anentai ichichtugta tamash dakitawai”, tawai.
JER 31:16 Tujash Tuke Pujuu niina chichajak: “Raquelah, buutu pujutsuk idaisata, nunikam negaikijum jaipjata, wainkan uchigtuchu juwakchatjash tiipa, amina uchijum aidauk shiwaja nugken batsatu waketug kaunattawai. Nunikmatai wake besemag pujam duka shiig aneastatme. Witjai Tuke Pujuunuk, nunak dekas tajai.
JER 31:17 Uchigtuchuap wajasja tusam anentaimkum waitiame, tujash amina uchijum aidauk atakea duwi waketug kaunatnai. Witjai Tuke Pujuunuk nunak dekas tajai.
JER 31:18 Mina aentsug Efraín wegantu aidau kajeka buutuinak: ‘Israel aents aidau Apajuíjiyah, ¡Ametme Tuke Pujuu, ii aidauti Apajuíjimek! Iik toro kakajus unuinamaitsu iman ayaji, tujash ame unuinakbau asa, ame tabau umiaji. ¡Ametme jutii Apajuíjimek, nuadui ataktu awagkim yaijatkata!
JER 31:19 Ii aidautik ame umigtsuk wainka yujasji, tujash awake anentaimja ii pegkegchau takamsamu anentaimtusa, pempeentumaki iina bakui iju yujaji. Yaunchuk datsa asa pegkegchau takamsamu anentaimtusa datsaamaji’, tuidau.”
JER 31:20 Tujash Tuke Pujuu ditan chichajak: “Efraín aents aina duka mina uchig ainawai, nuadui wika dita aidaun ima senchi aneajai. Suwimka susanush pachitskek idaitsujai. ¡Ashí mina anentaigjai aneajai! ¡Ditanak shiig anentuinajai! Witjai Tuke Pujuunuk, nunak dekas tajai.
JER 31:21 Israel aents aidauwah, atum weajum nunú jinta shiig diisa wetajum, kajimatkugmesh ataktu yupichu wainkamnujum. Atumi wekaetaijum aajakua nunú shiig diistajum. Nunikjum, ¡wakitkijum atumi yaaktajin kaunatajum!
JER 31:22 Makichik nuwauch emetnag pujuchujai betek wainka yujajum dusha ¿wajutiya idaisattagme? Witjai Tuke Pujuu, Israel aents aidau Apajuíjinuk, juju nugka juwi pegkejan Apajuí umike. Nunak nuwa aishin aneak ataktu wakitkittawai”, tawai.
JER 31:23 Tuke Pujuu, Israel aents aidaun Apajuíji ashí senchigtina nunú kajanum chichagtak: “Judá wegantu aidau shiwaja nugken batsata nuna awakjan Jerusalén ikaunmattajai. Dutika ai dita nugken, dita yaaktajin batsamas ataktu chichainak: ‘¡Jerusalégkah, amek Tuke Pujuu pegkegnum yumigsamu ata! ¡Jerusalégnum dekas shiig takamu awai!’ tiagtinai.
JER 31:24 “Nunú nugkanmak, Judá wegantu aidau, dita yaaktaji aidau, ajak ajakbau aidau, uwija kuitamin aidau aatus aitnai.
JER 31:25 “Tuja aents pimpikiag kakaumainchau wajas batsatunak wi ayujatnaitjai, dutikakun umutainashkam agtinaitjai”, tusa Apajuí tujutmayi.
JER 31:26 Tujutkui antu pujaun shintajan, kajanmap ankaja tibaijai, nunú mina shiig awajtukmayi.
JER 31:27 Tuke Pujuu chichaak: “Israel aents aidau nugken, Judá wegantu aidau nugken, aents aidau shiig kuashat, tuja kuntin aidaushkam imanisag yujakti tusan titatjai. Nunú uminkatin tsawan jegattawai.
JER 31:28 Tuja tsaiktasan, ijinatasan, tegaktasan, aneaku pujuyag nunisnuk yamaishkam yaakat tsaikbaun ataktu yaaktamkatasan, ataktu ajakmatasan, ataktu iwajatasan nunú betek uminkati tusan aneaku pujuttajai. Witjai Tuke Pujuu, nunak dekas uminkatnun tajai.
JER 31:29 Nunú tsawantin chichainak: ‘Múun aidau takainawai, nuniagtai uchi aidau akikmainawai’ tusa tauk makichkish atsutnai.
JER 31:30 Wagki maki makichik aentsuk nii pegkegchau takamsamujin suwimkan jukitnai. Nuadui maki makichik dita pegkegchau takasbaunum jakagtinai”, tiuwai.
JER 31:31 Tuja Tuke Pujuu junashkam tawai: “Wi Israel aents aidaujai, Judá wegantu aidaujai, chichaman umiktinaitag nunú tsawan jegatnai.
JER 31:32 Wi chichaman umiktinaitag duka yaunchuk dita apachji aajaku aidau Egipto nugkanum batsatun jiijan ditajai chichaman umikuitag nujai betekak achatnai, wagki ditak midau ainayatak, mina chichamjun umikchaju ainawai. Witjai Tuke Pujuunuk, nunak dekas tajai.
JER 31:33 “Tuja nunú tsawan jegamtai, wi ditajai chichaman umiktinaitag duka juju atinai: Wi chicham umikbauwa nuna dita anentain egketjattajai, tuja anentaimtajinish agatjagtatjai. Wi dita Apajuíji atatjai, untsu dita mina aentsug agtatui. Witjai Tuke Pujuunuk, nunak dekas tajai.
JER 31:34 “Nuadui makichik aents mina chichamjun unuimag tikichi jintinmainuk makichkish atsumnashtinai, wagki nunú tsawantinig uchi aidau nagkamas múun aidaushkam ashí mina chichamjunak unuimajagtinai. Tuja wi dita tudaujinak ashí tsagkujatnaitjai. Ataktu awagkinuk dita tudaujinak adeagchatnaitjai. Witjai Tuke Pujuunuk, nunak dekas uminkatnun tajai”, tiuwai.
JER 31:35 Tuke Pujuu etsanak tsawai etsanjatnun apusauwai, tuja yaya, nantu, aina nunashkam kashi etsanjagtinun apusauwai. Tuja nayantsak tsukatak uutti tama imaniawai. Nunak Tuke Pujuu ashí senchigtina nunú tawai:
JER 31:36 “Tuja Israel aents aidau chicham umikagtinun wi umikag nuna betek uminachkug, duwi nagkamsag mina aentsug achagtinai. Witjai Tuke Pujuunuk, nunak dekas tajai.
JER 31:37 Untsu wi ditan anagkuawaitag nuna, dita pegkegchaujin idaisatag takunuk, makichik tsawantai nayaimpin ashí dekapa ashimak, nugka initkenash ashí ejeyagmatai idaisatnaitjai. Witjai Tuke Pujuunuk nunak dekas tajai.”
JER 31:38 Tuke Pujuu chichaak: “Mina yaaktag Jerusalén tsaikbau ataktu kumpin jiikbau Hananel awa, nuwi nagkama waiti múun najanamu yaakat tuniakbaunum awa imanui yaaktamkatin tsawan jegattawai.
JER 31:39 Yaakat peejamu nagkatkau aidauk, tutupit juwaki Garebnum nain awa nuwi ejeenta, nuwi tunimtikja juki Goa tutaya nuni emamu atatui.
JER 31:40 Tuja aents jakau aidau ukutai, yuku aidau utsautai wake aina duka ashí midau atatui. Tuja nuigtushkam nugka agkan takaschamu entsa Cedrón tutaya aatus nagkamas, caballo waitai tutai etsa minitaiya nuni awa imanui nagkatkauwa duka ashí midau atatui. ¡Atakea duish Jerusalégkak ataktu awagki tsayamak achatnai!” tiuwai.
JER 36:1 Josíasa uchiji Joaquim Judá apuji wajas ipak usumat mijan inamai, Tuke Pujuu Jeremíasan chichajak:
JER 36:2 “Jeremíasah, duwap ikamkata, dutikam wi Israel aents aidaun, Judá wegantu aidaun, tuja tikich nugkanmaya aidaunashkam pachisan apu Josías pujusmatai nagkamsan timajam nunú yamai tajam nujai ashí ijumjam agagta.
JER 36:3 Judá wegantu aidaun wi suwimka susatasan umijag nuna antukag, pegkegchaun takaina nuna idayinakuig, dita tudaujinak tsagkujagtatjai”, tiuwai.
JER 36:4 Tusa timatai, Neríasan uchiji Baruc aajakua nuna Jeremías untsuka itan Tuke Pujuu tibaunak imatiksag ashí ujakui. Dutikam Baruc nuna agajui.
JER 36:5 Nuna ashí agagmatai, Jeremías Barukan chichajak: “Minak juwi achijuk emetjuawagmatai, Apajuí emematku ijuntainmag wemainchau wajasan pujajai.
JER 36:6 Nuniau asamtai, tsawan ijagma pujusa Apajuí augtai jegatta duwi ame dekas Apajuí emematku ijuntainum wetá. Nunika jegaam wi Tuke Pujuu chichamen amina ujaka ai, ame agagmaum nunú senchi jiika ausata. Dutikamin Jerusalégnumia aidau, tikich aents Judá wegantu dita yaaktajin batsamin aidaujai nuwi kaunawag Tuke Pujuu chichamen antuktinme.
JER 36:7 Nunikag Tuke Pujuu ditan kajejuk suwimka susatatus umia nuna dekawag, pegkegchau takamujin idayinak pujutjin yapajiachajaintash”, tiuwai.
JER 36:8 Tusa tima ayu tusa nuwi weuwai. Nunik jegaa Jeremías tibaunak imatiksag Tuke Pujuu chichame agagbaun ausauwai.
JER 36:9 Tuja nunú tsawantin Jerusalégnumia aidau, tikich aents Judá wegantu dita yaaktajin batsamin kaunau aidaujai ashí ijagma pujusa Tuke Pujuu augnasti tusa Josíasa uchiji Joaquim, Judá wegantu aidaun apuji aajakua nunú, tiuwai. Nunak apu Joaquim inabaujin cinco mijanan achika, nantu nueveya nunú takau ai tiuwai.
JER 36:10 Nunú tsawantin Baruc Apajuí emematku ijuntainum weuwai, nunik aatu yantamnum waiti yamajam najanamu aajakua nuwi jegantatak agkaju ayatak shugku ajigbau aajakua nuwi wayauwai. Nunik nuwi Safánka uchiji Guemaríasan papii takataiji tesaamu aajakua nuwi wajas, ashí aents aidau antuinamunum Tuke Pujuu chichamen ausauwai.
JER 36:11 Micaías, Guemaríasa uchiji, Safánka tijaji aajakua nunú, Tuke Pujuu chichamen Baruc augbaun ashí antukui.
JER 36:12 Nunik apu pujusa inamtain weuwai, nunik papiin agau pujutai tesaamunum apu aidau: Papii agatan yacha Elisamá aajakua nunú, Semaíasan uchiji Delaías, Acboran uchiji Elnatán, Safánkan uchiji Guemarías, Ananíasan uchiji Sedequías, nuigtu tikich apu aidau aatus ijunag batsatbaunum wayauwai.
JER 36:13 Nunik Micaías waya, Baruc Apajuí chichame agagbaun ashí aents aidau emtin aujun antukbaujinak imatiksag etsegkauwai.
JER 36:14 Tusa etsegkamtai, apu atuwe aidau Netaníasan uchiji, Selemíasan tijaji, Cusígkan ama tijaji Jehudí aajakua nuna, Baruc ujakta nii chicham agagbaun aents aidau antuinamunum ausama nuna itaati tusa akateg awemajui. Nunú ujakam Barucshakam chicham agagbaun juki dita batsatbaunum jegauwai.
JER 36:15 Nunikmatai dita chichajuinak: “Anui ekemsam chicham agagbau takakam nunú ausata antukmi”, tuidau. Tusa tima, Baruc nuna ausauwai.
JER 36:16 Dutika aujus ashimkamtai, nuna antukag ishamak pempeentunikiag chichainak: “Dekas juju pachisa apu ujakagmi”, tiajui.
JER 36:17 Nuna tusag Barukan iniinak: “Jusha tuwiya agagmaume nunú etsegkata. ¿Jeremíasak tuu agagta tujamatai agagmaum?” tuidau.
JER 36:18 Tusa tama Baruc ditan ayaak: “Wika junak Jeremías tuu agagta tujutkui, nuna imatiksanuk tintai agagmajai”, tiuwai.
JER 36:19 Tusa timatai niina chichajuinak: “¡Nuniakuig amek yamaikiuch Jeremíasjai mai tupikakim uumkatajum! ¡Makichkish atum pujamunak dekashtinme!” tiajui.
JER 36:20 Nuna tusag apu atuwe aidauk nunú chicham agagbaun Elisamá pujusa papii takataijin awaya ukuinak, nuna pachis apu ujakagtatus wegajui.
JER 36:21 Dutika ujakam, nunú chicham agagbau Elisamá papii takatainum au asamtai, nunú utita tusa Jehudínkan awemauwai. Tusa tima juki itaa, apu niina atuwe aidaujai antuinamunum ausauwai.
JER 36:22 Tuja nantu Quislevtinig tsetsek aajakui. Iman asamtai apuk tsetsektin pujustinji tesaamunum nuwi jii anamak pujau.
JER 36:23 Nuwi pujau asa Jehudí chicham agagbaun aujus wetai, ausa nagkaikimun apu kuchiyai tsupik jinum pataka apejakui. Duti dutikakua ashí apea ashimkauwai.
JER 36:24 Nunú chicham Apajuínu agagbaun antuinakush, apuk niina atuwe aidaujaig makichkish ishamkachajui, tuja awake anentaimjagkesh wake besemag dekapenakug jáanchjinak ichigchajui.
JER 36:25 Nunú chicham agagbaun apu apetai, Elnatán, Delaías, Guemaríasjai niina chichajuinak: “Wait aneasam apeawaipa”, tuidau. Tusa tamash ditanak antugtsuk,
JER 36:26 Jerahmeel aajakua nuna, tuja Asrielan uchiji Seraíasan, Abdeelan uchiji Selemíasan aatus apu chichajak: “Baruc Jeremías tabaun agauwa nunú Jeremíasjai achikjum egkeatajum”, tusa inamjauwai. Tujash ditanak Tuke Pujuu uukui wainkainum tusa.
JER 36:27 Baruc Tuke Pujuu chichamen Jeremías agagta tima agajua nuna apu apea ajapamtai, Tuke Pujuu Jeremíasan ataktu chichajak:
JER 36:28 “Yamajam duwap ikamkata, dutikam yama nagkamchaku agagbaun Judá apuji Joaquim apeabia nujai betek nunú duwapnum agagta.
JER 36:29 Tuja nuigtushkam apu Joaquim chichagkum: ‘Tuke Pujuu chichaak: Babilonianmaya aidauk makichkish megkaetsuk tuké kaunattawai, nunikag aents aidaunak kuntin aidaujai ijinawagtatui, tusa Jeremías agajua nunú apeaume, dutikakum Jeremíaschakam jiyakume.
JER 36:30 Dutikau asam yamai juju dekata. Amina uchijum aina nuwiyag makichkish Judá wegantu aidaun apujig achatnai. Tuja ame jakaminig ukugmaschagtinai, dutijamawagmatai amina iyashmek etsa sukuam tepetnai, untsu kashi bichatug tepetnai.
JER 36:31 Aminak ame wegantu aidaujai, tuja amina atuwem apu aina nujai ijumjan atumi pegkegchaujin suwimkan amastatjime. Atumin, tuja Jerusalégnumia aidaunashkam, ashí Judá wegantu aina nujai ijumjan suwimak ishamain aidaun amastatjime tusan tibaijim nunak imatiksanuk amastatjime. Nunak dutikattajime wagki atumek mina umigtukchau asagmin’, tujamui Apajuí”, tiuwai Jeremías.
JER 36:32 Nuna tusa nagkanak, Jeremías tikich duwapen juki Baruc papiin agau aajakua nuna susauwai, dutikam nuna juki Jeremías tabaunak imatiksag ashí agajui. Nunak yama nagkamchaku agagbaun apu Joaquim apeauwa nuna ashí betek agajui, dutikak, nuigtushkam tikichin nunú chicham agagbaujai betekmamtinun Jeremías ekek tutai nunashkam dutiksag ashí agajui.
JER 37:1 Babilonia nugkan apuji Nabucodonosor, apu Joaquima uchiji Jeconíasan Judá apuji adaimainun idayak, Josíasa uchiji Sedequíasan apu adaikauwai.
JER 37:2 Tujash Sedequíasak, niina atuwe aidaush, tuja tikich aents Judá wegantu aidaushkam Jeremías Tuke Pujuu chichamen etsegbaunak antugkachu ainawai.
JER 37:3 Nuninayatak apu Sedequías Selemíasan uchiji Jucal aajakua nuna sacerdote Sofonías Maaseíasan uchiji aajakua nujai akateg profeta Jeremías ujaktajum tusa ishiakui. Dutika ishimak aatus akatmamjauwai: “Jeremíasah, Tuke Pujuu iina Apajuíjiya nunú ame segatkagtita”, tiuwai.
JER 37:4 Tuja Jeremíasak eke aents achika chimpitainmak egkeachbau asa, agkan wekagajakui.
JER 37:5 Nunú tsawantin babilonianmaya suntag aidau Jerusalégkan jetektatus tenteawag batsamtau. Nunik batsatun egiptunmaya suntag aidau apu Sedequías maanitai atukagtatus mininawai tabaun antukajui, nunik antukag ishamak dita nugken waketuinak Jerusalégnak ukukiajui.
JER 37:6 Nunikagmatai Tuke Pujuu Jeremíasan chichajak:
JER 37:7 “Judá apuji aents chichama etsejin aidaun awemama nunú ujakta: Egiptunmaya suntag aidau dita ayamjuktatus minina duka dita nugken waketjattawai.
JER 37:8 Nunikmatai, babilonianmaya aidau ataktu waketug Jerusalégnak jetekag depetuk ditanu emagtatui, dutikainak yaaktanak jiiyai apeawagtatui.
JER 37:9 Tuke Pujuu chichaak: Babilonianmaya aidauk tuke shimak shiyakaje, ataktu wakitkig kaunachagtatui tusagmek shiijak aneasaigpajum, nunak nunikchattawai.
JER 37:10 Tuja atumin ataktu jetepainakui, atum ashí ijinawagminish, ujumak aents kupinau aidau dita aakjin juwaju aina nunú ataktu nantajag atumnak depetamak atumi yaaktajinak jiiyai ekemakagtatui”, tiuwai.
JER 37:11 Tuja egiptunmaya suntag aidau mininamun antukag, caldeo suntag aidau Jerusalégkan tentea batsatu waketuinaig,
JER 37:12 Jeremías nuwi pujau jiinkiuwai, Benjamín wegantu aidau nugken wetatus, wagki nuwi jegaa nugkan tinamkagtiagtai niinu atinun jukitin asa.
JER 37:13 Nunik wea weakua Benjamígka waitijin jegattaman, Selemíasan uchiji Irías Hananíasan tijaji waitin kuitamin aajakua nunú awajus chichajak: “¡Amek dekas babilonianmaya suntag aidaujai ijunjatjai tusameap wakegame!” tiuwai.
JER 37:14 Tusa tama Jeremías ayaak: “¡Wika babilonianmaya suntag aidaujai ijunjatag tusanuk wakegatsjai!” tiuwai. Tusa tutaish antugtsuk achika juki apu atuwe batsatbaunum ejegauwai.
JER 37:15 Dutikamtai nunú apu atuwe aidau Jeremíasan shiig senchi kajejuidau asag, suwimatajum dutikajum Jonatán papiin agauwa nuna jee aajakua nunú, yamai aents achika egketai awajsamua nuwi initak taimua nuwi egkeatajum tusa tima egkeawajui. Dutikam nuwi kuashat tsawan pujusui.
JER 37:17 Nuwi pujaun, Jeremías jiikjum wi pujusa inamtaijua juwi itaatajum tusa apu Sedequías, tiuwai. Tusa timatai Jeremíasan juki ejegawajui. Dutikawagmatai apu Sedequías ima niinak akanak iniak: “¿Chicham etsegkata tusa Tuke Pujuu akatamjamush atsuak?” tau. Tama Jeremías ayaak: “Ehe awai, tuja apujuh, aminak Babilonia nugkan apujiya nunú depetamkattawai tujutmae”, tiuwai.
JER 37:18 Nuna tusa niina pempeentuki iniak: “Atum mina achigkajum egketuaujum nunash wisha ¿aminash, amina atuwem aidaunash, nuniachkunush ashí tikich aents aina nunash waji pegkegchauna dutikau asamtai egketuaugme?
JER 37:19 Tuja profeta aidau chichainak, babilonianmaya aidauk atumnak, tuja atumi nugkenash jetekchagtinai tusa tujamin agma dusha ¿tuwi batsatua?
JER 37:20 Apuh, minash wait anenjugta tajame. Wait aneasam, ¡ataktu awagkimek Jonatágka jeen egkeatajum tusamek tiipa! ¡Nuwi epenim pujus jakati tusamesh wait aneasam idaitusaipa!” tiuwai.
JER 37:21 Tusa timatai apu Sedequías, Jeremías jukijum agá suntaja ijuntai awa nuwi apusajum, kashi kashinig pagka sujin yuja nuwiya makichik pag sutatjume, tiuwai. Tusa timatai jukiag, suntaja ijuntain apusajui. Dutikawag makichik tsawantai makichik pagkan suwidau. Dutika suu batsatu ashí yaaktanum pag amuekamtai, sutsuk idaisajui.
JER 38:1 Nunú kuashat tsawan nagkaemakiu ai, Jeremíasan shiwaaji aidau: Matánka uchiji Sefatías, Pashura uchiji Guedalías, Selemíasa uchiji Jucal, aatus antuinamunum Jeremías aents tuwakbaunum chichaman etsejak:
JER 38:2 “Tuke Pujuu chichaak: ‘Juju yaaktanum juwak pujauk maaniamunum, nujantai, jatai aatus jinawagtatui, untsu babilonianmaya suntag aidaunum sujumanuk, pujutjinakesh uwemtijattawai.’
JER 38:3 Tuja nuigtu Tuke Pujuu chichaak: ‘Juju yaaktanak Babilonia nugkan apuji niinu awajsattawai, dutikamtaig makichkish atanmainchau atatui’, tawai Apajuí”, tiuwai Jeremías.
JER 38:4 Nuna antukag apu atuwe aidau apun chichajuinak: “Jeremiasak nuna taku, suntag yaaktanum batsata nunak ashí aents aidaujai, kakakchau wainkauchia nunin anemtikawai. Juju aentsuk pegkegnakesh augmatu wekaetsui, ima pegkegchaunak augmatui”, tuidau.
JER 38:5 Tusa tiagtai apu Sedequías ditan ayaak: “Ayu, atum tajum duka pegkejai, atum itugkatag tajume dutikatajum. Wika atum dutikatag tabaunak dutikawaigpajum tumaitsujai”, tiuwai.
JER 38:6 Tusa timatai, shimutuk Jeremíasan achikajui, dutikawag daekai jigkawag apu uchiji Melquías aajakua nuna yumigmatji agá taimu aajakua nuwi egkeawajui. Nunú yumigmatnumak yumi atsau, ayatak kunta piyaku asamtai, nuwi initak amamki egkemsauwai.
JER 38:7 Dutikawaju ai etiope aents apu inake kajittsa diitai Ébed-mélec apu inamtain pujujakua nunú, Jeremíasan achika waanum egkeawaje tabaun dekauwai. Nunú tsawantinig apu Sedequíasak Benjamígka waitiji tutainum ijunak pujujakui.
JER 38:8 Untsu Ébed-mélec apu pujusa inamtaijin pujau jiinki apu ujaktatus weuwai.
JER 38:9 Nunik jegajua ujaak: “Apujuh, au aents aidau Jeremíasan shiig senchi waitkainawai, nugka taimunum initak egkeam puja nuwig pujus nujantai jakattawai, tuja pag sumainchakam ashí yaaktanmak atsawai”, tiuwai.
JER 38:10 Tusa ujakam apu Sedequías Ébed-mélekan inajui, treinta aents jukim Jeremías eke jatsaig jiiktajum tusa.
JER 38:11 Tusa tima Ébed-mélec aentsu yajuak, apu pujusa inamtaijin makichik tesaamu jáanch ijumtainum waya, jáanch mamukun juki, daekai jigka Jeremíasan detuauwai.
JER 38:12 Dutika chichajak: “Anú jáanchia duwi kuntugmin pempemagta, daek pakapakai”, tiuwai. Tusa tima kuntujin jáanchin pempemajui.
JER 38:13 Nunikmatai daeka detuawag jiikiajui. Dutika jiikim Jeremiasak apu suntaji aidau ijuntai agá aajakua nuwi pujau.
JER 38:14 Nuwi pujaun Jeremías jukijum Apajuí emematku ijuntai waitiji kampatuma nuwi ejentatajum, tusa apu Sedequías timatai, jukiag ejeentajui. Dutikawagmatai apu Sedequías Jeremíasan jegantun chichajak: “Wi amina iniastatjam nunú waitjutsuk dekas aigkata”, tiuwai.
JER 38:15 Tusa tama Jeremías ayaak: “Wi dekaskenum aimkamtaig amek mantuattame, tuja wi chicham pegkejan amina ujaish antugtukchattame”, tiuwai.
JER 38:16 Tusa tutai apu Sedequías nii dekaskenum umiktinjin ashishmas chichajak: “Atsa, mashtatjame, nunak Tuke Pujuu iina pujutan amasua nuna daajin tajame. Tuja tikich maatnume tusanush idaisashtatjame”, tiuwai.
JER 38:17 Tusa tama Jeremías Sedequíasan chichajak: “Ayu, kame ujaktajame: Tuke Pujuu ashí senchigtina nunú chichaak: ‘Atum aidautigmek ashí Babilonia apujin sumimkatajum, nunikjumek amina pataim aidaujaí uwemjattagme. Tuja yaaktakesh apenashtatui.
JER 38:18 Untsu ame nunishtaik, juju yaaktanak babilonianmaya aidau utsantuawag apeawagtatui, dutikainakui atumshakam makichkish uwemjashtatjume’ tujamui”, tiuwai.
JER 38:19 Tusa tutai Sedequías ayaak: “Kame nunak nunimainaitjai, tujash judío aents aidau babilonianmayajai ijunjaja nuna wi ishamajai. Wi Babilonia apujin yunumtaik, nunú judío aents aidau minak senchi suwi suwimjuinakua mantumain ainawai”, tiuwai.
JER 38:20 Tusa tutai Jeremías ayaak: “Apujuh, aminak judío aents aidauk suwimjamachagtatui. Tuke Pujuu chichamen wi amina tajam nunú wait aneasam umikta, nunú umiakmek shiig pujustatme, tuja nuigtush mantamachagtatui.
JER 38:21 Untsu Tuke Pujuu tujama nunú umiatsminish, waji utugchatak nagkaetamkiti nuna Apajuí iwaintugkame.
JER 38:22 Apujuh, ame pujusa inamtaigmin nuwa aidau batsata nunak babilonianmaya aidau ashí yajuakag suntaja apuji aidaun susagtatui, dutikam imau batsamas chichainak: “ ‘Apu Sedequíasnak niina kumpauchiji aidau tsanujag depetkagmayi, amina kumpajum aidauk ashí idaitamsaje. Tuja amek suwemea iman kuntanum amamam tepeattaku wajame’, tujamiagtinai”, tiuwai.
JER 38:23 Nuna tusa nuigtushkam chichajak: “Amina nuwem aina nunak uchijum aidaujai ashí Babilonia nugkanum yajuakagtatui, tuja ameshkam uwemjashtatme, Babilonia apuji aminak achigmaktatui, tuja yaaktanashkam apeawagtatui”, tiuwai.
JER 38:24 Tusa tutai Sedequías Jeremíasan chichajak: “Ame pujutjum puyatjakmek, juju mina ujatkaum duka makichkish tikichik ujakaipa.
JER 38:25 Tuja wi amijai chichasag nuna apu aidau dekawag, waji pachisam apush ausamume, tuja niish wajinjutpame nunú uutsuk etsegkata, tuja nunú etsegchakmek mantamnattame tujamain ainawai.
JER 38:26 Tusa tujamainakuig ame chichagkum: ‘Ataktu awagtukmek Jonatágka jeen aents achika egketai awa nuwi egkeam pujus jakati tusamek wait aneasam tujutipa tusan augkun pujumjai’ tita”, tiuwai.
JER 38:27 Tusa apu tibaunak imatiksag ashí apu atuwe aidau Jeremíasan shimutkajui. Nunik jegajuawag inidau. Tusa iniam, apu tuu aimkata tibaunak imatiksag betek aimkauwai. Tusa timatai, apu Sedequías Jeremíasjai chichamun antukchaju asag utugchatan tutsuk agkan ukukiajui.
JER 38:28 Tuja Jeremiasak suntaja ijuntai agá aajakua nuwi pujau. Nuwi pujaig Jerusalégkan jetekag utuawajui.
EZE 1:1 Witjai sacerdote Ezequiel, Buzí uchiji. Babilonianmaya aents aidau apu Joaquígkan achika juwinak tikich Israel aents aidaujai ijumag achijuk jujukiajabi. Dutijuawagmatai Babilonia nugkanum cinco mijan pujusan, mina mijanjun treinta mijan ejeyu ai, tsawan cincotin, nantu Tammuz takau ai, kajanum namak Quebar aajakua nuwi uwet eketai, nayaim ujaniabi. Nunikmatai Apajuín wainkabiajai, nunikan Tuke Pujuu senchijin dekapjabiajai, dutijua ashí iwaintugkabi tikich tsawantinish wajig nagkaemagtinush ayi nuna.
EZE 1:4 Nunú nayaim ujanbaunmayan diikman etsa akaetaiya nuwiya dase shiig senchi dasentuk yujagkim múun ijiamu winchamtin, tuja nunú yujagminmaya peem ashí yantamnum peetun, nuigtu yujagminum jii kegaunum nuna ejapeen jiju jinum jiyam duwenip wegama imanun wainkabiajai.
EZE 1:5 Imaniamunum nuna ejapeen, ipak usumat aentsjai betek wantinkabi.
EZE 1:6 Nunú aina duka ipak usumat yapintin, ipak usumat nanaptin,
EZE 1:7 kagkajig chuujam aentsu kagkajijai betek, nanchikig toro tsakata nanchikijai betek, bronce shiig keemja winchamtin awajsamujai betekayi.
EZE 1:8 Nuigtushkam nunú ipak usumat yapintin, ipak usumat nanaptin aina nuna uwejeg nanape nugkaan ipak usumat aentsu uwejejai betek agmayi. Tuja nanape aina duka mai nanapenig antiniakuyi, tuja nanamainakushkam betekush ukunmakesh ayampag niimtsuk nanamiagmayi.
EZE 1:10 Tuja nuna niimeg juninuyi: Eem diyamak aentsua nuninuyi, tuja untsugnumanini diyamak león niimtinuyi, unstu menanum diyamak toro tsakata nuninuyi, tuja ukunum diyamak ukukuijai betekayi.
EZE 1:11 Tuja nanape aidauk yaki takuni agmayi, nuwiya jimaja nunú mai nanapeg antinik amayi, tuja tikich jimaja nunú iyashin dukuakuyi.
EZE 1:12 Apajuí senchiji wajuk ditan emawa nunisag tutupit, makichkish ukunmakesh ayampash niimtsuk shimiagmayi.
EZE 1:13 Nunú aina nuna niimeg jii kaiji kegaujai betek agmayi, tuja nuna ejapenis jii ekemaka ekentsamu mai we mai we wajatai tumain wantinmayi, tuja jii nunú kegauk winchantibi, nuwiya peem aidau jiiniagmayi.
EZE 1:14 Nunú aina duka shiyakajash shiig wamak peemjai betek waketug kaunmayi.
EZE 1:15 Tuja nunú aidaun diikman maki makichik dita ijunbau yantamen rueda ajuidaun wainkabiajai.
EZE 1:16 Nunú rueda aidauk makichik niimtinuk betek najanamu, kaya pegkejuch winchamtina iman agmayi. Tuja nuna initkenis tikich rueda egketatai tumain shiig shutukja umikbauyi.
EZE 1:17 Imatika umikbau asa ashí yantamnum buchitkush ukunmak waketchabi.
EZE 1:18 Tuja rueda ipak usumat shutukjamua nuna yantame aidaunmak jii batsatkamu winchamtin agmayi. Nuna imanun wainkan senchi ishamkabiajai.
EZE 1:19 Nunú aentsjai betek aidau shimutai, ruedashkam ditajai betek shimibi, tuja dita yakí takuntaik, ruedashkam yaki takuniagmayi.
EZE 1:20 Nunú aidaunum Apajuí Wakani pujau asa, nii wajuk weawa nunitaik ditashkam nunisag shimiagmayi, tuja yakí takuntaik betek yakí takuniagmayi, untsu nugká akaetaik betek akayagmayi, tuja ukunum wakettaishkam betek waketiagmayi.
EZE 1:21 Tuja aentsua nunin aidau buchitiagtaik, rueda aidaushkam buchitaidau, tuja dita nuwig jasa ataik ruedashkam nuwig batsamayi. Untsu nunú yaki takuniagtaik ditashkam yaki takunaidau, wagki Apajuí Wakaniya nunú ruedanum au asamtai.
EZE 1:22 Nunú aentsjai betek aidaun buuken makichik nagkuekau vidrio winchamtina iman pegkejuch ajiagmayi.
EZE 1:23 Nuna nugkaan, jimag nanape dakuenak mai antiniakuyi, tuja tikich jimaja nunú iyashin dukuakuyi.
EZE 1:24 Tuja nanamiagtaik, nanape aina duka namak senchi dujajua uutama imatmayi, Apajuí ashí senchigtina nunú chichamus imatatai tumain, suntag kuashat ijunag pampaumaina imatmayi. Tuja nanaak wegau iyainiagtaik, nanape aina duka nugkaan nemag amayi.
EZE 1:25 Nuninai dita buukenia makichik waji nagkuekau ajuinamunmaya senchi chajatuk jiinmayi.
EZE 1:26 Tuja nunú dita buuken ajuina nuwi apu ekemsa inamtaiji safiro najanamujai betekayi. Nuwi makichik aentsjai betek ekemayi.
EZE 1:27 Tuja akachumtaya nuwi nagkamas yakinig, jiju ukuija tsuwatji utsankamu winchamtinama imanayi, untsu akachumtaya nuna nugkanig jiijai betek keebi. Tuja ashí yantamnumak keeka tsaaptin wajas amayi. Untsu nuna yantamen yumi yutugmatai yujagminum pagki wajae tutayama nunin winchamtin wajaknuyi. Nuwiya Tuke Pujuu imanji wantintugkabi. Dutijakui tikishmajan nijaijui nugka antigkan pujusan mina aujtaun antukbaijai.
EZE 2:1 Tuja Apajuí chichagtak: “Aentsu uchijiyah, wajaita amejai chichastatajai”, tujutmayi.
EZE 2:2 Tusa tujutai Apajuí senchiji egkemjutuabi, nunik awajtukmayi, dutijuamtai dekabiajai Apajuí aujtamun.
EZE 2:3 Tuja nii chichagtak: “Aentsu uchijiyah, Israela uchiji aidauk, dita apachji aidau mina chichamjun umigtukchaju aina nujai betek mina chichameg umitan dakitin asag yamaikish pegkegchaunak taka batsatui.
EZE 2:4 Dita uchiji aina duka antakchau, kakajus antumtikmainchau ainawai, nunin ainaig wi aminak awemajame, mina chichamjun ditan ujakti tusan.
EZE 2:5 Tusa ujamin dita antugtamainakug antugtamain ainawai, nuniachkush antugtamainchau ainawai. Nuninakuish duka puyatjukaipa, amek chichamak etsegkata, ditak antakchau chichaman umichu intimkiu aina duwi nunimain ainawai, tujash nunak ditai profeta puja nunak dekayaitak nunikagtatui.
EZE 2:6 Tujash ditak ishamkaipa, dita chichaman tujamainakuish, ishamkagtukaipa, jagki tentea apakbauwa iman, tuja titig ayaunum ejapeena wajamaina iman dekapeakmesh, tuja kajekag pegkegchaun chichagtamainakuish, amek ishamkagtukaipa.
EZE 2:7 Mina chichamjun antutan dakitainakuish, amek mijamtsuk mina chichamjuk etsegkata, ditak chichaman umichu intimkiu ainawai.
EZE 2:8 Wi tajam nunú shiig antukta. Tuja amek ditajai betekak aipa, tuja wi amina amastatag nunú yuwata”, tujutmayi.
EZE 2:9 Tujutkui diistakaman papiinum chicham agaja pempeagbaun awentujun wajaun wainkabiajai,
EZE 2:10 tuja mai yantamejai agagbaun nuna dakuek iwaintugkabi, nunú agagbauk: “Jakamunum buutbau, najaimamu, wake besemag pujamu”, aatsa agagbauyi.
EZE 3:1 Nuna iwaintujuk chichagtak: “Aentsu uchijiyah, juju papiinum chicham agagbaun amag nunú yuwam ejemagta”, tujutmayi. Tusa tujutmatai papiinum chicham agagbaun yuwabiajai, duka dapa yumijijai betek yumimituyi. Nuna yuwa ai chichagtak: “Israel aents aidaunum weme wi amina titatjam nunú etsegkata”, tujutmayi.
EZE 3:5 Nuigtu chichaak: “Tuja ame chicham dekamainchaun chichaaku aidau batsatbaunmak awematsjame, ame wegantu aidaunum awemajame. Aents tikich chichaman chichaaku aidau batsatbaunum awema aish, ditak ame mina chichameg etsegbaunak shiig antugtamain ainawai.
EZE 3:7 Tujash Israel aents aina duka aminak antugtamkachagtatui, wi tabaunash antuinachu asag, wagki ditak antakchau, kakajus antumtikmainchau, intimkiu ainawai.
EZE 3:8 Tuja wi aminak dita kajemtin antakchau aina nujai betek awajsattajame.
EZE 3:9 Wi aminak kaya katsugma iman emattajame. Nuadui amina kajegtamainak ishamainun diigmainakuish ishamkagtukaipa, ditak kakajus antumtikmainchau intimkiu ainawai”, tujutmayi.
EZE 3:10 Tuja nuigtushkam Apajuí chichagtak: “Wi titatjam nunú shiig antukam jukita, dutikam kajimatmainchau aneaku ata.
EZE 3:11 Amina pataim aidau achija yajuakbau Babilonia nugkanum batsata nuwi weme wi tajam nunú etsegkata. Tusa etsegmin antugtamainashkuish, makichkish idaitsuk, Tuke Pujuu tawai tusam etsegkata”, tujutmayi.
EZE 3:12 Tusa tujutai Apajuí senchiji yaki takugmayi, dutijai mina ukujui Tuke Pujuun imanji nugka au takunak uujak wajukeama imatun antukbaijai.
EZE 3:13 Tuja aentsjai betek aina dushakam, nanapen mai apatuinak senchi uutmayi, tuja rueda aidaushkam kagkegainak nugka uujak wajukeama imatmayi.
EZE 3:14 Tuja minak nuwi pujai, uwegnum achika jumaina numamtuk Apajuín Wakani jujukmayi. Dutijakui kajekan wake besemag dekapmaijai.
EZE 3:15 Nunikan Tel Abib, namak Quebarnum uwet, Israel aents aidau achija yajuakbau batsatbaunum jegabiajai, nunikan nuwi ditajai makichkish shiig anentaimjan tumainchau dekapeakun chichatsuk wake besemag siete tsawan pujubiajai.
EZE 3:16 Siete tsawan nagkaemai, Tuke Pujuu chichagtak:
EZE 3:17 “Aentsu uchijiyah, wi aminak Israel aents aidaun kuitamkati tusan apusajame, dutikamu asam, wajina wi titatjame duka imatiksamek dita aidau ujaktatme.
EZE 3:18 Tuja aents pegkegchau takaina nunak idayinak pujutjin iwajatnume tusan wi taja nunú ame ujakcham, pegkegchau takatan idaitsuk batsamas jinawagmataig, ametme suwimak jukitnumek.
EZE 3:19 Untsu pegkegchau takainajum duka idaikujum pujutjum iwajatajum tusa ame ujamaitak, amina antugtamtsuk pegkegchau takatan idaitsuk batsamas jinaamtaig, amina utugchatjumek atsuttawai.
EZE 3:20 Tuja namputchawame, aents pegkegchau takatan tupanjauwaitak, ataktu pegkegchaun takak megkaetanum pujau wainiatkum ame mina chichameg ujatsuk idaisam pujus jakamtaig, ame suwimak suwam atatme.
EZE 3:21 Tuja ame chicham ujakam awake anentaimag pujutjin yapajiakug iwaku pujuttawai, nuniakui ameshkam utugchat atsau agkan juwaktatme”, tujutmayi.
EZE 3:22 Nuna tusa Tuke Pujuu mina uwejui achijuk chichagtak: “Wajaim agá nugka paka nuwi wetá, nunikamin ame dutikatnun pachisan ujaktajame”, tujutmayi.
EZE 3:23 Tujutmatai agá jiinkin jeganbaijai, nuwi wajasan Tuke Pujuu imanjin wainkabiajai, nunikan shiig diikman namak Quebarnum uwet pujusan Apajuí imanjin wainkabiag nujai betek wainkan, tikishmajan nijaijui nugkan antigkan pujusbaijai.
EZE 3:24 Nunikan pujai Apajuí Wakani egkemjutug awajtukmayi, dutijua chichagtak: “Jemin weme epemim egkemsata.
EZE 3:25 Nijah, aminak achipakag daekai jigkapajag, jiinki agkan wekaemainchau etamiagtatui.
EZE 3:26 Tuja wi aminak ujumak tsawantai chichachu awajsattajame, nuadui amek Israel aents aidau intimkiu aina duka kakajus chichagmainchau wajastatme.
EZE 3:27 Tujash wi ataktu chichamtikattajame, dutika ai chichaakmek: ‘Nii antuktatus wakegauk antukti, tuja antutan dakitauk antukchati’ tawai Tuke Pujuu titatme. Wagki ditak intimkiu ainawai”, tiuwai Apajuí.
EZE 18:1 Tuke Pujuu nuigtu chichagtak:
EZE 18:2 “¿Wagka Israel aents aidaush juju chicham agagbaunum chichaak: ‘Múun aidau pegkegchau takamsamunum uchi aidau waituinawai’, tawa nunash kajimatuinatsua?
EZE 18:3 Tujash dekas uminkatnun wi yamai juna tajai. Atumek juju chicham agagbauwa duka ataktu awagkigmek Israel aents aidaunmak augmattsashtinaitjume.
EZE 18:4 Ashí aents aina duka midau ainawai, múun aidaush, uchi aidaushkam midau ainawai. Nuadui aents ayatak pegkegchaunak takaidauk jakagtinai.
EZE 18:5 “Aents pegkejan taka duka pegkeg takatan dekawai.
EZE 18:6 Nunin asa wainka apajuímtai dakumka najanamu aidaun emematiagtatus mujanum shimutaish, ditajai ijunjag ememattsui, tuja nuwigkish kajinmamsag anentaimtsui. Tikichi nuwejaish tsanijinchauwai, niina nuwe tsawanjin jataish nuwejaig kanatsui,
EZE 18:7 tikichnash makichkish waitkachui, tuja aents diwijun akikmakun jukitjai tusa niina jáanchji ukukbaunash akikmatai awaktawai. Makichik aentsnakesh kasagchauwai. Yumainji atsujunash ajampeawai, jáanch atsujunash suwawai.
EZE 18:8 Kuichkin tsagkamkash ewaekam akigkata tusag tuchauwai, tuja tikichnash pegkegchau awagmatsui, utugchat ajaunash yadaukita dekas utugchatash nuna diisa shiig epegtinai.
EZE 18:9 Nunú aentsua duka iwaku dukap tsawan pujustinai, wagki mina chichamjun betek umiau asa. Witjai apu Tuke Pujuunuk, nunak dekas uminkatnun tajai.
EZE 18:10 “Tujash nunú aentsu uchijiyaitak kasa, magkagtin, niina apaji dutikachbaun takak,
EZE 18:11 nuwiya aents aidau wainka apajuímtain ememattatus mujanum shimutai, ditajai ijunag nuna emematak, tuja tikichi nuwen tsanijimak,
EZE 18:12 ujuuna aidaun waitkak, tikich aidaunash kasajin, tuja aents diwimkagtukbaujin akikmak jukitatus, niina jáanchji ukukbaujinash awagtutsuk, wainka apajuímtai aidaunum kajinas anentaimak pegkegchaun wi dakitamua nuna takak,
EZE 18:13 kuichkin tsagkamkash nuni senchi ewaegak segaakug iwakuk pujumaitsui. Ashí wi dakitamua nuna dutikau asa, nunú aentsuk nii pegkegchau takasbaujinig akikchau jaka ajapnattawai.
EZE 18:14 “Tujash aents pegkegchauwa nuna uchiji, niina apaji tudau ataish, nigka nunak aintsuk,
EZE 18:15 wainka apajuímtai aidaun mujanum emematuinak ijunag jiistamiagtaish, ditajai ijunjag jiistamchau, nuigtush nuwigkish kajintsag anentaimchau, tuja tikichi nuwejaish tsanijinchau,
EZE 18:16 tikichnash waitkachu, akikmakun jukitjai tusa jáanch ukukbaunash betekush awagtau. Makichkish aentsnak kasagchau, aents yumainji atsujunash ajampeau, jáanchji atsujunash suwau,
EZE 18:17 tikichnash pegkegchauk awagmachu, kuichkin tsagkamkash ewaekam akigkata tusag segachu. Nunú aentsua duka niina apaji tudaujinig mantamnamaitsui. Ayatak nigka dukap tsawan iwaku pujustinai. Wagki wi mina chichameg umiktinun ukukiuwaitag nuna betek umiau asa.
EZE 18:18 “Tuja niina apajig katsek, kasa, tikichin kasajin asa, nii pegkegchau takasbaujin suwimkan juki jakattawai.
EZE 18:19 Namputchawame atum anentaimsajum: “ ‘¿Apaji tudau aajakua nunin aish, wagka uchijish suwimkanash jumainchawaita?’ tumainaitjume. Tujutkugmin wi atumin ayaakun: ‘Nigka mina chichamjun betek umiak pegkegchau takat aidaunak takaschau asa, iwaku pujustatui’, tumainaitjime.
EZE 18:20 Múun uchigtin aina duka, niina uchiji aidau pegkegchau takamsamujinig suwimkanak jumaitsui, tuja uchi aina dushakam ditá apaji aidau pegkegchau takamsamujinig suwimkanak jumaitsui. Ayatak nii pegkegchau takasbaujin suwimkan jukittawai, untsu nii pegkejan takasuk waji pegkejan jukitnai.”
EZE 18:21 “Aents pegkegchauwa nunú, awake anentaimag pegkegchau takatan idayak, mina chichamjun betek umiakug, jatsuk iwaku pujustatui.
EZE 18:22 Tuja nii tudauji aidaunak tsagkujan, atakea duish anentaimtuschatnun kajimatkin idaisatnaitjai, nigka waji pegkeg aina nuna takasu asa iwaku pujustatui.
EZE 18:23 Aents pegkegchau aina nunú jakai tusan dakitajai, ayatak pegkegchau takatan idayinak pujutjin iwajatnume, nunikag iwaku pujustinme tajai. Witjai Tuke Pujuunuk nunak dekas uminkatnun tajai.
EZE 18:24 “Tuja aents pegkeg takatan idayas, aents pegkegchau aina nujai betek wi dakitamu tsumain aina nuninun takakush, ¿nunú aentsush iwakush pujumainkait? Wika nii pegkeg takasbaujiya nunak ataktu awagkinuk adeagchatnun kajimatkin idaisatnaitjai. Dutikam nigka mina umigtutsuk pegkegchau takata nunak taka wekagu asa jakattawai.
EZE 18:25 Tuja atum chichaakjum: “ ‘Auk Apajuík pegkegchauwai shiig takatsui’, tajume. Israel aents aidauwah, shiig anentaimsajum aigkatajum, ¿dekas wikaitag shiig takachunush? ¿Atumchaukaitjum dekas pegkegchau takautigmek?
EZE 18:26 Tuja aents pegkeja nunú pegkeg takatan idayak pegkegchaun takakug, nii pegkegchaujinig jakattawai.
EZE 18:27 Tuja aents tudauwa nunú pegkegchau takatan idayak, niina pujutjin iwajug pegkejan takakug pujutjinak uwemtijattawai.
EZE 18:28 Nii pegkegchau takamujin wainmamak awake anentaimag nuna idaisau asa, jatsuk iwaku pujustinai.
EZE 18:29 “Tujash Israel aents aidautijum ataktushkam chichaakjum: “ ‘Apajuík shiig takatsui’, tujutjume. ¿Tujash dekaskenmash wika shiig takatsug? ¿Atum Israel aents aidautijum dekas pegkegchau takatsjumek?
EZE 18:30 Israel aents aidauwah, witjai atum maki makichik takasbaugmin diigsan suwimkan amastinnuk. Witjai Tuke Pujuunuk nunak dekas uminkatnun tajai. Tuja atumi tudaujum aina duka idaisatajum, atum pegkegchau takasbaunum suwimak juki waittsaijum.
EZE 18:31 Atum pegkegchau takajum duka ashí idaisatajum. Nuniakjum shiig anentaimat, yamajam pujut jukitajum. Nunú nuniakjumek makichkish jakashtatjume.
EZE 18:32 ¡Wika atum jakatnume tusanuk wakegatsjai! ¡Nuadui pegkegchau takat aina duka idaisatajum, nuniakjumek iwaku pujustatjume! Witjai apu Tuke Pujuunuk nunak dekas uminkatnun tajai”, tiuwai.
EZE 33:1 Tuke Pujuu nuigtu chichagtak:
EZE 33:2 “Ezequielah, wi tajam nunú chicham Israel aents aidau ujakta: ‘Wi makichik nugkanum maaniamun akupeakui, juwiya aents makichik etegkajum jinta kuitamkatin adaikatajum.
EZE 33:3 Nunú jinta kuitamna nunú shiwag aidau yaaktanum kaunattak miniagtai, aents aidaun ujaak uwija kachujin umpuagtatui.
EZE 33:4 Nunú uwija kachuji umpuamun antayatak, intimki umintsuk pujai, shiwag aidau jetekag maawagmak, duka niina utugchatji atatui.
EZE 33:5 Wagki nunú umpuamun antuk umintsau akug uwemainaitak, umintsuk pujus mantamdau asa.
EZE 33:6 Untsu jinta kuitamna nunú shiwag aidau minidaun wainiatak, uwija kachujin umputsuk pujai, shiwag aidau jeteka makichik aentsnakesh maamak nunú aentsuk tudauk pujus jakattawai, tujash wi jinta kuitamna nunak nunú aents jakamunum suwimkan susattajai.’
EZE 33:7 “Aentsu uchijiyah, wi aminak Israel aents aina nuna kuitamin ati tusan etegkajame, nuadui mina chichameg shiig antukam, wi tajam nunú etsegkata.
EZE 33:8 Tuja aents pegkegchauwa nuna wi chichagkun: ‘Nigka niina pegkegchaujinig jakattawai’, tusan titatjai. Tuja ame aents pegkegchauwa nunú: ‘Tudaujum idaisam pujutjum iwajata’, tusam ujatsuk pujamin, tudaugtin pujus jakamtaig, ame bakumatnaitme.
EZE 33:9 Untsu nunú aents chichagkum: ‘Tudaujum idaisata nunikam pujutjum iwajata’, tusa ujamaitak, nunú antutan dakitakug niina tudaujinig jakattawai. Nunikmataish amek ujaku asam bakumashtinaitme.”
EZE 33:10 “Aentsu uchijiyah, Israel aents aina nunú chichagkum: Atum chichaakjum: ‘Iik shiig tudau waigji, imaniku asaja ii aidautik kaujujai betek ainaji, nunin aidautish ¿itugsaik iwakush batsamsatji?’ tajume.
EZE 33:11 Tujash wika aents tudau aina nunú jinaati tusanuk wakegatsjai, ayatak pujutjin yapajiawag iwaku pujustinme tusan wakegajai. Israel aents aidauwah, pegkegchau takajum duka idaisatajum, nuniakjumek jakashtatjume, tawai Tuke Pujuu.
EZE 33:12 “Ezequielah, amina pataim aina nunú ujakta: Aents pegkeja nunú tudaun takakuig, nii pegkejan takajaku akuishkam uwemtijashtinaitjai. Tuja aents tudauwa nunú, pegkegchau takatan idayak pujutjin yapajiamtaig, nii tudau aajakua duwik suwimkanak susashtinaitjai. Aents pegkeja nunú tudaun takakug, yaunchuk tudaun takajakchauwa nuaduikik iwakuk pujuschattawai.
EZE 33:13 Tuja aents pegkeja nuna wi chichagkun: Amek kuashat mijan pujustinaitme timawaitak, nii pegkeg takasbaujin kajinas anentaimak, pegkegchaun ataktu takakuig, pegkejan takasu akuishkam kajimatkin idaisatnaitjai. Dutikamu asa nunú aentsuk niina tudaujinig jakatnai.
EZE 33:14 Aents tudauwa nuna chichagkun: ¡Amek amina tudaugmin jakatnaitme! tusa tai, niina tudaujin idayas pegkejan takak,
EZE 33:15 aents diwimkagtak akikmakun jukitjai tusa jáanch ukukbaun awagtukchamujin, tuja kasamkamujin awakeakuig, niina tudaujinak kajimatkitnaitjai. Dutikamu asa mina chichameg pujuta sukagtina nuna betek umiau asa, atakea duish tuke pujustinai.
EZE 33:16 Yaunchuk nii pegkegchau takasbauji akuish, nunak kajimatkitnaitjai. Nigka ashí pegkeg aidaun takasu asa iwaku pujustinai.
EZE 33:17 Tuja amina pataim aidau chichainak: “ ‘¡Apajuík shiig takatsui!’ tuinawai. Tujash dekaskenmak dita ainawai pegkegchaun takaidauk.
EZE 33:18 Untsu aents pegkeja nunú, pegkeg takatan idayak pegkegchaun takakug, niina pegkegchaujinig jakattawai.
EZE 33:19 Aents tudauwa nunú pegkegchau takatan idayak, pujutjin yapajia, pegkejan takakug iwaku pujustinai.
EZE 33:20 Tuja Israel aents aidau ataktushkam pegkegchaun chichagtuinak: “ ‘¡Apajuík shiig takatsui!’ tujutuinawai. Tujash wi Israel aents aidaunak maki makichik dita takasbaujin diigsag suwimkan susatnaitjai.”
EZE 33:21 “Tuja babilonianmaya achipag yajupakagmatai, nuwi jegaa, tsawan cinco, nantu diez, doce mijan batsatjin, shiwag Jerusalégkan tsayagtai, makichik aents uumak tupikakiu, Jerusalégnak iina shiwaaji aidau tsaikagmae tusa ujatkabi.
EZE 33:22 Tuja nunú aents eke taatsaig, Tuke Pujuu niina senchijin kashi mina egkemjutak, chichachu awajtusmayi, tujash kashinia duwi nunú aents uwemjau tatai, Apajuí ataktu chichamtijukmayi.”
EZE 33:23 Nunika Tuke Pujuu mina chichagtak:
EZE 33:24 “Israel aents aidau nugke tsaikbauwa nuwi aents ujumak iwaku juwaju aidau batsamas chichainak: ‘Abrahamak nigkitak, juju nugkanak niinu ema pujusui, tuja ii aidautik kuashat ainaji nuadui utujimkas iinu emami’, tuinawai.
EZE 33:25 Nuadui ame weme Tuke Pujuu tawai tusam etsegkata: ‘Atumek pegkegchau takakjum, neje numpentin yuwagme, wainka apajuímtai dakumka najanamu emematjume, atumi maanitaijum aidau eme anentajume, nuniakjum tikichi nuwejaish tsanijinjume, nuni batsatiatkugmek, ¿juju nugkak iinu atatui tajum?’ tawai Apajuí tita.
EZE 33:27 “Tuja jushakam ujakta: ‘Israel aents aidau shiwag amuam ujumak iwaku juwaju yaakat tsaikbaunum batsata nunashkam ijinawagtatui, tuja aents ikam batsatunashkam kuntin kajen aidau yuwawagtatui. Tuja wainmainchau shiig peeja apakbaunum, waanum uumak batsataidauk jatai jinawagtatui. Witjai apu Tuke Pujuunuk nunak dekas uminkatnun tajai.
EZE 33:28 “ ‘Atumek pegkegchau wi dakitamua nunú takagme, nuadui wi atumi senchijinak, atumi ememataijum aidaujai atankittajime, dutika ai juju nugkak bashiak aents atsau shiig agkan itajak juwaktatui. Muja aina nuwig makichik aentskesh wekaguk atsustinai. Nunikmatai wi dekas Tuke Pujuuwaitag nuna dekajuawagtinai.’
EZE 33:30 “Amina pataim aidau, yaakat peejamua imanui nagkamas, dita jeen waitijin amina pachipas chichainak: ‘Kaunatajum Tuke Pujuu niina chichamen Ezequielai awetugma nunú antukagmi’, wajainawai.
EZE 33:31 Nunik kaunawag ame chichamun antukagtatus tuke nunin asag, aminí ayaumas pekajui. Amek dita diismak aents kantamtan yacha pegkegchin anenkan kantamnujai betekaitme, ditak senchi wakegainawai ame chichamun antukagtatus. Tujash ditak kuichkin ima puyatjuinawai. Nunidau asag ame chichamunak antugtamainayatak uminatsui.
EZE 33:33 Tuja wi taja duka shiig wamak uminkattawai. Nunú betek umintai, dekawagtinai Apajuí chichamen etsegtin dita pujamunum puja nuna, tawai Apajuí”, tiuwai Ezequiel.
EZE 34:1 Nuigtu Tuke Pujuu chichagtak:
EZE 34:2 “Aentsu uchijiyah, Israel aents aidaun apuji aina nunú juna apu Tuke Pujuu tawai: ¡Chah, apu Israel aents aidaun uwigjai betek kuitamin aina nunak wait anentuinajai! ¡Dita aidauk nunú uwijan shiig kuitamtsuk ima ditanunak anenmama batsatui!
EZE 34:3 Atumek uwija muntsuji ijugbau umagme, tuja nuna uje najanamush nugkuagme, nuigtush uwig duwejam aidau maagme; dutikayatkujum uwig aidauk kuitamtsugme.
EZE 34:4 “Atumek uwig kakakchau aidaush kuitamtsugme, tuja jakuishkam ampiatsjume, nawen kuwimjukmataish pempenjagmesh kuitamtsugme, tuja wagakmataish ejakjumek ataktu awakeatsjume, tuja megkaekamtaish egatsjume, duka dutiktsuk ayatak asutiakjum senchi waitkagme.
EZE 34:5 Mina uwig aidauk kuitamain atsugsam, ditak batsatu asa pisaja megkaejae, nunik wainak yujaun kuntin kajen aidau yuwinawai.
EZE 34:6 Uwig aidauk ashí muja aidaunum tuja nain aidaunum pisaje, nuninak ashí nugkan pampamtuk megkaejae, nunik megkaejamtaish, nuna egaka awakjatatus puyatjauk makichkish atsawai.
EZE 34:7 “¡Uwija kuitamin aidauwah, wi taja nunú shiig antuktajum!
EZE 34:8 Mina uwig aidaun kuitamainuk atsau asamtai, kuntin ikamia kajen aidau amuke. Uwija kuitamkagtinun adaijamu aidauk uwignak kuitamainatsui. Ditak anenmamainak uwig aidaunak pachikchaje. Witjai apu Tuke Pujuunuk, nunak dekaskenum tajai.
EZE 34:9 Nuadui wi chichaman tajim nunú uwija kuitamin aidautijum shiig antuktajum:
EZE 34:10 Uwija kuitamin aidauwah, wika yamaik atumnak shiwagmajime, mina uwig aidau kuitamkatajum tiuwaitjim dusha betekash umikujum nuna dekajuattajime. Dutikakun mina uwig aidaun apuji ainajum nunak jiiktatjime. Nunak dutikattajime ima atumek anenmamkujum mina uwig aidau yuu batsamijum tusan. Dutikan mina uwig aina nunak ataktu yajuakan ijumjattajai, tawai tusam ujakta.”
EZE 34:11 “Tuja mina uwig aidaunak tikich kuitamkatnume tusanuk idaisashtatjai, ima wiki kuitamkattajai. Witjai apu Tuke Pujuunuk, nunak dekas dutikattajai.
EZE 34:12 Aents uwigji megkaejamtai puyatjuwama imatiksan mina uwig aidaunak puyatjittajai, nuadui yujagkim suwe wajasmatai ishamainak pisaja megkaeja nunak ataktu yajuakan ikaunmattajai.
EZE 34:13 Tikich nugkanum achija yajuakbau batsata nuna ataktu awakjan, dita nugke ashí batsamtukbauwa nuwi ikaunmattajai. Dutikan dita nugken muja aidau, entsa aidau ayá nuwi ashí yajuaka iwajan chijichi pegkeg aidaun ayujawagtatjai.
EZE 34:14 Israel aents aidau nugken muja aina nuwi yajuakan iwagtatjai, nuwiya dupa shiig pegkeg aina nuna yuwatnume tusan. Dutika ai nuwiyan pegkeg dupa aidaun shiig yuwawag ayamjagtatui.
EZE 34:15 Wi dita yuwatnunak susattajai, dutikakun ayamtiksagtatjai. Nunak dekas wi umiktinjun tajai.
EZE 34:16 Uwig megkaeja nuna egakan tikich jintanum yujaunash yajuaka ikaunman nawen ichiinkau akuish, shiig dijajan ijijuan kuitamkattajai, tuja duwejam wajiu aidaunash kuitamkattajai, dutikakun kakaakchau aidaunashkam shiig kuitamkattajai.
EZE 34:17 “Atum mina uwig aidautigmin wi tajim nunú antuktajum: Atum ainajum anuiyag uwig múun, tuja uwig tsakatuch, uwig kakaakchau, uwig wajiu, tuja chivokesh akuishkam ashí betek ijumsan kuitamkattajai.
EZE 34:18 Atum ainajum anuiya chijichi pegkejan yuwinakush shiijak aneenatsui, ayatak tikich chijichi ayaunash najak tsaika ukuinawai. Yumi pegkejan saawin umuinawai, nuninayatak tikich saawi wajas aunak wajatug ukusmak ukuinawai.
EZE 34:19 Mina uwig kakaakchau aidauk atum chijichi najakbaun yuwawagtatui, tuja yuminashkam atum ukusmakbaun uwajagtatui.
EZE 34:20 Nuadui wi juna tajime: Wika aents wajiunash kakakchaujai betek diisan suwimkan susattajai. Nunak dekas dutikatnujun tajai.
EZE 34:21 Atum wajiu aidautijum uwig kakakchau aidau depetkajum kachugmin ijua ijuakuajum tupikamtikjume.
EZE 34:22 Tujash mina uwig aina nunak wi ayamjukagtatjai. Ataktu kasajuinak waitkastinme tusanuk idaisashtatjai. Mina uwig aina nuwish yakita shiig takaush, tuja shiig takachush nunak wi diistatjai.
EZE 34:23 Mina inakeg David mina umigtujakua nunú uwijan kuitamkati tusan ataktu untsuktatjai.
EZE 34:24 Witjai Tuke Pujuunuk. Wi dita Apajuíji atatjai, untsu dita apujig David atatui. Witjai Tuke Pujuunuk, nunak dekas uminkatnun tajai.
EZE 34:25 Agkan pujusagtinme tusan wi ditajai chichaman umiktatjai. Tuja kuntin ikamia kajen aina nunak yaja ishiaktatjai, dutika ai mina uwig aidau agkan batsamsatnume, nuninak ikamash agkan kanitnume tusan.
EZE 34:26 “Mina uwig aidaunak midau muja pegkegma nuna yantamen batsastatjai, tuja ditanak wi yaigtatjai, dutikakun yuminashkam nunú tsawantin yutugti tibaunak imatiksanuk yutumtijattajai.
EZE 34:27 Numi aidaush nejeagtinai, tuja ajakmamash shiig tsapai kuashat nejetnai, nuadui ditak dita nugken shiig batsamsagtinai. Mina aentsug aidaun waitkaina nuna suwimkan suwakun agkanmitkawaja ai, wi dita Apajuíjiyaitag nuna shiig dekawagtinai.
EZE 34:28 Aents Israel wegantuchu tikich nugkanmaya aidauk, Israel aents aidaunak ataktu dita inataiji emakag waitkaschagtinai. Tuja kuntin kajen aidaukesh ditanak yuwachagtinai. Nuadui ditak makichkish ishamkagtutsuk agkan shiig batsamsagtinai.
EZE 34:29 Dita nugkenak pegkeg, ajak aidaush shiig tsapau awajsattajai. Nuadui ditak nujantaik waittsachagtinai, tuja tikich nugkanmaya aidaush ataktu awagkiajag dushikjachagtinai, wagki shiig batsatu asagmatai.
EZE 34:30 Nuadui wi Tuke Pujuu, dita Apajuíjin ditajai pujag nuna dekawagtinai. Witjai apu Tuke Pujuunuk, nunak dekas tajai.
EZE 34:31 Atumek mina uwijujai betek ainagme. Witjai atumin Apajuígminuk”, tiuwai Tuke Pujuu.
EZE 36:22 “Nuadui Israel aents aidau chichagkum: “Juna aatus apu Tuke Pujuu chichaak: Atumi pegkegchaujin tikich aents aidau mina daag pegkegma nuna dushikinawai, nuadui atumek tsagkujamak amaitsugme. Nunin ajuminig wika mina daag pegkegma nuna ayamjakun agkanmitkattajime. Dutika ai nuna wainkag wika Tuke Pujuu pegkejam, ashí senchigtin, Israel aents aidaun Apajuíjiyaitag nuna dekawagtinai. Witjai Tuke Pujuunuk nunak dekas uminkatnun tajai.
EZE 36:24 Atum tikich aents aidau waitkam batsatjum nunak wi agkanmitkattajime, dutikan yajuakan atumi nugkeen ikaunmatnaitjime.
EZE 36:25 Atumek dakumka najanamu tsumain emematin ainagme, tujash wi atumi tudaujinak kajimatkin idaisattajai, dutikan jáanch bika dijaja pegkeg ematia numamtuk dijajan pegkeg awajsattajime.
EZE 36:26 Wi atumnak yamajam pujutan, pegkeg anentaimtajai amastatjime. Dutikakun kakajus antumtikmainchau kayajai betek ainajum nuna, kakagchauch chichaman umin awajsattajime.
EZE 36:27 Nuigtushkam mina Wakanjun amastinaitjime, mina chichameg umiktin agagbau aina nuna umiktinme tusan.
EZE 36:28 Dutikamu asajum atumi apachjum aajakajua nuna nugkan susauwaitag nuwi jegajum batsamsatnaitjume. Tuja atumek mina aentsug atatjume, wi atumi Apajuíjum atatjai.
EZE 36:29 Atumi tudaujumnak esakatjattajime, dutikakun shiig kuashat trigon tsapamtikatnaitjai, nunú yuwakjum ataktu awagkigmek nujantaik waittsashtinaitjume.
EZE 36:30 Tuja ashí numi nejen aidaunak, atum ajakmamu aidaujai senchi nejemtikatnaitjai, wagki atum nujantai waitiagmin, tikich nugkanmaya aidau dushiktamaina nunak ataktu awagkig dushiktamjashtinme tau asan.
EZE 36:31 Nuna dutika ai atumi pujutjum pegkegchau, tuja takamujum aidaush shiig pegkegchau aina nunú wainmamkajum datsagtatjume.
EZE 36:32 Israel aents aidautijum shiig antuktajum. Wi ashí nuna dutikattag nunak atum pegkejam asagminkish dutikashtatjai. Nunak dutikattajai, atumi pujutjum anentaimtusjum datsaagminjum tusan. Witjai apu Tuke Pujuunuk, nunak dekas uminkatnun tajai.
EZE 36:33 “Wi atumi tudaujum aidaun ashí tsagkujan, atumi yaaktaji tsaikbau aina nuna ataktu jegamjatnume timatai, jegamjajum nuwi batsamsatnaitjume.
EZE 36:34 Tuja atumi nugkeg ukumkimu asa takascham bashiak au, atum ataktu kaunajum nuwi ajakmatnaitjume. Nuna ashí aents nuni nagkaemaidauk wainiagtinai.
EZE 36:35 Nunik chichainak: ‘Juju nugka ukumkimu asa bashiak amaya nunú yamai Edégjai betek wajase; tuja yaakat tsaikbau asa kaya tuwasua weaku aajabia dushakam shiig jegamja peeja umikbau ainawai. Imannum aents aidau batsatui’, tiagtinai.
EZE 36:36 Tuja imatika tsaikbaunash wi ataktu jegamjan, tegagbaunash ataktu ajakmakan uminaitag nuna diisag, Israel aents aidau nugken tikich yantamnum aents iwaku pujuidauk dekas Tuke Pujuuwap aikae tiagtinai. Witjai Tuke Pujuunuk, nunak dekas umiktatjai.
EZE 36:37 “Tuja nuigtush Israel aents aidauk shiig kuashat yujakag uwigjai betek agtinai, wagki nunak dita aatus mina segatiaje. Nunak dekas dutikattajai. Yamaik dita yaaktaji tsaikbau aina nunak ataktu yaaktamkag, nuwi aents aidauk pimasua weaku atatui. Jiista jegamtai, Apajuín emematuinak uwijan shiig kuashat Jerusalén yajumin aina nujai betek atatui. Imanitai nuna wainainak, dekas Tuke Pujuuwap aikawa tiagtinai”, tiuwai.
EZE 37:1 Apajuí senchiji mina tajutuamtai, niina Wakani egkemjutug muja najatamu pakajin ukunch sakaku tuwasua weakunum ejentunmayi.
EZE 37:2 Dutijua ashí yantamnum awekatus shiig kuashat ukunch sakaku batsatun iwaintugkabi.
EZE 37:3 Nuna iwaintujuk chichagtak: “Ame anentaimsamash juju ukunch sakakua dusha ¿ataktu aents najanemainuk aina?” tujutmayi. Tujutkui wi ayaakun: “Apu, Tuke Pujuuwah, duka ame dekame”, tibaijai.
EZE 37:4 Tusa tai nii chichagtak: “Ukunch sakaku batsata nunú mina pachittsam ujaakum: ‘Ukunch sakaku aidauwah, juju Tuke Pujuu chichame antuktajum.
EZE 37:5 Apu Tuke Pujuu chichaak: Wi atumnak mayain egketjattajime aneantinme tusan.
EZE 37:6 Dutikan yaapen, nejen, duwapen batsatkan mayain egketjagtatjime, anean iwaku pujustinme tusan. Dutika ai, dekas Tuke Pujuuwap aikae tujuttatjume’ tita”, tujutmayi.
EZE 37:7 Tusa tujutmatai nii tujutbaunak imatiksanuk ukunch sakaku batsatun ujakbaijai. Tusa ujaakun wajai, nugka uugmayi, ¡nuniaig ukunch aidauk ikaniagmayi!
EZE 37:8 Nuniaig yaap aidau, neje aidau, duwap aidau, ukunch aidaun ijika iyashtin emabi. Tujash mayati pujustinjig eke atsujiagmayi.
EZE 37:9 Nunikagmatai nii chichagtak: “Mayai pujutan sukagtina nunú mina pachittsam chichagkum: ‘Aatus apu Tuke Pujuu tawai: Mayati iwaku pujutan sukagtinuh, ashí yantamnum taata, nunikam aents jinaa batsata nunú egkemtujam inanjata’ tita”, tujutmayi.
EZE 37:10 Tusa tujutbaunak imatiksanuk Apajuí daajin tibaijai. Tusa ti ai nunú mayati pujutai egkemtugmayi, dutikam ashí nantajag shiig kuashat suntagjai betek ijunjabi.
EZE 37:11 Nunikagmatai Apajuí chichagtak: “Aentsu uchijiyah, Israel aents aidauk juju ukunch sakaku aina nujai betek ainawai. Nunin asag chichainak: ‘¡Iik ukunch sakakujai betek ainaji! ¡Iina ayamjutpamainuk atsugtamui! ¡Kakaja ayamjumakchamin wajasji!’ tuinawai.
EZE 37:12 Tuu batsata nunú mina pachittsam ujaakum: ‘Apu Tuke Pujuu juna tujamui: Mina aentsug aidauwah, atumek aents jinau ukusbaujai betek ainagme, nunin akugminish wi yajuakan atumi nugkemin ejegattajime.
EZE 37:13 Dutikan jakau aidau ukusbau sakaku ujamaina numamtuk awajkattajime, dutika ai: Juwapi Tuke Pujuu iina Apajuíjiya duka, titatjume.
EZE 37:14 Tuja wi atumnak mayati iwaku pujutan amastatjime, dutika ai atumek aneantatjume, nunikagmin atumin nugkeminig batsastatjime.’ Nuadui: Dekas Tuke Pujuuwap nii tibaunak betek umike, titatjume. Witjai Tuke Pujuunuk, nunak dekas uminkatnun tajai.”
EZE 37:15 Nuigtushkam Tuke Pujuu mina chichagtak:
EZE 37:16 “Makichik numinum agakum ‘Judá aents aidauk Israel aents aidaujai atuunin ainawai’, tuu agagta. Untsu tikich numinum agakum: ‘Josén uchiji Efraín wegantu aina nunú tikich Israel wegantu aidaujai ijunainawai’, tuu agagta.
EZE 37:17 Dutikam nunú numi mai apatkam achikta.
EZE 37:18 Dutikawamin ame wegantu Israel aents aidau inimpainak: ‘¿Jusha wagka aikame?’ tujamainakuig,
EZE 37:19 ame ayaakum: ‘Tuke Pujuu juna aatus chichaak: Numinum José daaji agagbauwa nuna Efraín tikich Israel aidaujai takakuina nuna jukin, tikich numi Judá daaji agagbauwa nujai apatkan makichik numi awajsattajai.
EZE 37:20 Tuja ame jimag numinum agagmaun nunú ditash wainainai mai apatkam achikta.’
EZE 37:21 Nunú takusa wajasam dita chichagkum: ‘Tuke Pujuu juna aatus chichaak: Israel aents aidau tikich aents aidau nugken batsata nunak jiija yajuakan dita nugken ikaunman batsastatjai.
EZE 37:22 Dutikan dita nugkenak dita mujaji aidaujaí ashí makichik nugkak emattajai. Dutika ai jimag nugka akankachbau makichik apugtinuk agtinai.
EZE 37:23 Tuja nuigtushkam Israel aents aidauk ataktu awagkig, dakumka najanamu tsumain aina nuna emematuinakug tunamagchagtin ainawai, tuja tikich pegkegchau aina nunashkam takama yujashtin ainawai. Dita pegkegchaujinash pachitsuk idaisatnaitjai. Ditak mina aentsug agtinai, untsu wi dita Apajuíji atinaitjai.
EZE 37:24 “ ‘Dita aidaun apujig David atatui, tuja ditan kuitamkatnushkam ima Davitak atinai. Untsu chicham umiktinun wi ditan susauwaitag nunak dita umikagtinai.
EZE 37:25 Nuninak wi Jacopan nugka susauwaitag nuwi batsamsagtinai. Nunú nugkanum dita muunji aajaku aidaushkam batsamajaku ainawai. Nuwi ditak dita uchiji aidaujai tuke batsamsagtinai, tuja dita wegantu aidaushkam ashí nuwi batsamsagtinai. David mina inakjua nunú dita apujig tuke atinai.
EZE 37:26 Utugchat atsaunum agkan batsamsatnume tusan wi ditajai chichaman umiktatjai. Wi ditajai chichaman umiktatag duka atakesh tuke yapajinashtinai. Wi ditanak shiig kuashat uyujkatnaitjai, tuja dita nugken mina emematjaku ijuntain tuke asatnun umiktinaitjai.
EZE 37:27 Dutikan ditajai pujustinaitjai, nuniakun wi dita Apajuíji atinaitjai, untsu dita mina aentsug agtinai.
EZE 37:28 Mina emematjaku ijuntai nugka dita batsamtain jegamkamu tuke atina nuna tikich aents Israel wegantuchu aidau diisag, dekas Tuke Pujuuwap Israel aents aina nunak etegkauwaita tiagtinai. Witjai Israel aents aidaun Apajuíjinuk’ tawai Apajuí”, tusa Ezequiel tiuwai.
DAN 1:1 Joaquim Judá aents aidaun apuji wajas kampatum mijan inamai, Babilonia nugkan apuji Nabucodonosor Jerusalégkan jetektatus niina suntaji aidaujai tenteawajui.
DAN 1:2 Apu Nabucodonosor Israel aents aidaun depetuk, apu Joaquiman tikich Israel aents aidaujai achija yajuakti tau asa, Tuke Pujuu Israel aents aidaunak yaigchauwai. Tuja Apajuí emematku ijuntai jegamkamunum takatai aidaunashkam yajuaktinme tusa tiuwai. Nuadui Nabucodonosor Israel aents aidaun achija Babilonia nugkanum yajuakui, dutikak Apajuí jeen takatai ayaunashkam kuashat yajuak Babilonia nugkanum ejegauwai, dutika dita apajuímtai aidau jegamjukbaunum nunú emematku takatai waji akik pegkeg aidau ayaunum nuwi awayauwai.
DAN 1:3 Tuja nuigtushkam apu Nabucodonosor niina aentsji aidau apu pujusa inamtaijin takau aidaun apuji Aspenaz aajakua nuna chichajak: “Israel aents achigbau aina nuwiya apu wegantu aidau, tuja aents eme anentsa diitai aina nuwiyashkam datsauch shigmauch, yantsaptin, iyashish pegkeg, ashí yacha, apu inamtaijin pujusa takamain aidau etegjata. Dutikawamin iish wajuk batsamin ainaji nunú, tuja iina chichameshkam kampatum mijanai jintinnati.
DAN 1:5 Tuja ditak kampatum mijanai apu yuwatin umikbaun yuwawagtatui, umutainashkam apu uwagtin umikbaun umiagtatui. Nuni nuninakua kampatum mijanan ejeyag, duwi nagkamas apu takajuinak batsamsatnume tajai”, tiuwai.
DAN 1:6 Datsauch aidaun etegjaju aina duka ipak usumta imajin Judá wegantu aajaku ainawai; dita daaji aidauk: Daniel, Ananías, Misael, Azarías aatus aajakui.
DAN 1:7 Tuu daagtin aidaun Aspenaz yapagtukui, dutikak: Danielan Beltsasar adaikauwai, untsu Ananíasan Sadrac adaikauwai, tuja Misaelan Mesac adaikauwai, untsu Azaríasan Abed-nego adaikauwai.
DAN 1:8 Tujash Danielak nigki anentaimas dekas wika apu yutainak yuwashtajai, umutaijinkesh uwagchatjai tumamiuwai, wagki nii nuna yuwakug pegkegchau wemain dekapeau asa. Nuadui Aspenazan chichajak: “Apu yutai aina nunú yuwata tusamek wait aneasam waitkagsaipa, tuja mina kumpag aidaushkam waitkasaipa”, tiuwai.
DAN 1:9 Tusa tutaish Apajuí Danielnak yayau asamtai Aspenazak kajegkachui.
DAN 1:10 Dutikayatak chichajak: “Atum yuwatnunak, tuja atum vino uwagtinnashkam apu chichaman umike. Nuadui wika mina apujun ishamajai. Wagki tikich datsa aidau pegkeg batsatai, atum yujumak yuwachu asajum jaujai betek shigchau wajasjum pujagmin, apu waipakag mina mantumainai. Dutijuamtaig atumdau utugchatak atatui”, tiuwai.
DAN 1:11 Nuna tusa apu pujusa inamtain waji aidaun kuitamin Melsar aajakua nuna Aspenaz etegkauwai, Danielan niina kumpaji aidaujai kuitamkati tusa. Dutikamtai Daniel Melsarjai chichastatus weuwai, nunik jegajua chichajak:
DAN 1:12 “Jutii aidautik amina inakem ainaji. Nuadui wait aneasam diez tsawantai ii yuwatnuk, yutai ajanmaya juukbau aidau yumi uwagtinjai sukagtusta tajame.
DAN 1:13 Tuja nunú diez tsawan jegamtai, tikich datsauch aidau apu yuwatin umikbaun yuwina nujai apatkam diijattsata. Nunikam ame wajuk anentaime nunú tita”, tiuwai.
DAN 1:14 Tusa tima ayu tusa Daniel tibaunak imatiksag dutikauwai.
DAN 1:15 Nunú diez tsawan nagkaemakmatai diikma, Danielak niina kumpaji aidaujai tikich datsauch aidau apu yuwatin umikbaun yuwidaun nagkaesau shiig pegkeg wajiu aidau batsatun wainkauwai.
DAN 1:16 Dutika wainak, yujumak vinojai susatajum tusa apu tibaunak sutsuk yutai ajanmaya juukbau aidaun yumijai sujakui.
DAN 1:17 Nunú ipak usumat datsauch aajaku aina nunak, ashí waji aidaun unuimagtinme tusa Apajuí yachamtikauwai. Nuigtush Danielak kajanmayanash shiig dekajakui.
DAN 1:18 Apu tsawantan mamikiamu jegamtai, Aspenaz datsauch aidaun yajuak apu Nabucodonosor pujamunum ejegauwai.
DAN 1:19 Dutikamtai apu ditajai chichasui. Tujash Daniel, niina kumpaji aidaujai shiig yacha aajaku aina imannak tikich datsauch aidaunak makichkish wainkachui. Nuadui ditak apu takajuinak batsamsajui.
DAN 1:20 Apu nii dekatag tusa wakegamujinak ashí inias dekajakui, tuja anentaimas dekamin aidau, tunchi aidau apun ujajaku aina nuna nagkaesau ditak shiig yacha aajaku ainawai.
DAN 1:21 Aatus Danielak nuwi pujaig, tikich apu yamajam Ciro, Persia nugkanmaya aajakua nunú, Babilonia nugkan apuji wajasui.
DAN 2:1 Nabucodonosor apu wajasa jimag mijana nuna inamak pujus, kajanum kuashat pegkegchaun kajamjauwai, nunik wagkanuk aan kajamjaja tusa senchi anentaimak kanumainchau dekapeau.
DAN 2:2 Nuniak ujatkatnume tusa, anentaimas dekamin aidaun, tunchi aidaun, yaya dekapau aidaun aatus untsukui. Dutikam apu pujamunum jegawajui.
DAN 2:3 Nunikagmatai apu nii kajamjamujin ditan ujaak: “Kajanum kajamjag nuna shiig ejemainchau dekapeakun senchi anentaimjai”, tau.
DAN 2:4 Tutai dita arameo chichamai apun chichajuinak: “¡Apuh, kuashat tsawan pujusam inamjatin ata! Tuja waji kajamjaume nunú amina inakem aidauti ujajatkata, nunikamin wagkamek aan kajamjaume nunú ashí ame ujakmi taji”, tiajui.
DAN 2:5 Tusa tiagtai apu ditan ayaak: “Wika juna anentaimsajai. Wi kajamjag nunash wajukatnunak aan kajamjaja nunú betek ujatchakjumek asaja ijinam atatjume, tuja atumi jeshkam ashí tsainkattawai.
DAN 2:6 Untsu atum wi kajamjag nunash wagkanuk aan kanagja nunú betek ujatkagminig, kuashat waji aidaun amastatjime. Dutikakun ashí aents aidauk atumin eme anenjamtinme titatjai”, tiuwai.
DAN 2:7 Tusa timatai anentaimas dekamtan yacha aidau niina ataktu chichajuinak: “Apuh, ame waji kajamjaume nunú etsegkata, nunikamin wajukatnuk aan kajamjaume nunú ii ame ujakmi”, tuidau.
DAN 2:8 Tusa tiagtai apu ditan ayaak: “Atumek mina tsawan emegkatkujum tuu yujagme. Wagki atumek wi tija nunú dekaujum nuadui, wajintuk tsanujag tusajum tajume.
DAN 2:9 Tujash wi tija nunak yapajiashtatjai. Ayu kame wi kajamjag nunash wajukatnuna aannunash kajamjaja nunú yamai ujatkatajum. Nunú ujatkagmin dekas yachap ainawa titajime. Nunú betek ujatchakjumek ashí betek suwimak jukittagme”, tiuwai.
DAN 2:10 Tusa timatai dita ainak: “Initaikish makichik apukesh iman senchigtinaitkush aents yacha nii iniasa dekataiji aidaunak ibau utugchat shiig ejemainchaunak iniaschauwai. Nuigtush apuh, ame dekatag tame nuna anentaimas ejeyi ujapamainuk ashí nugkanmash makichkish atsawai.
DAN 2:11 Untsu apajuímtai aina dutsu ujapakaintai. ¡Tujash duka juju nugkanmak batsamchauwai!” tuidau.
DAN 2:12 Tusa tiagtai apu senchi kajeka aents yacha dekamin babilonianmaya aina duka ashí kajegtajum tusa inamjauwai.
DAN 2:13 Tusa timatai Danielnashkam niina kumpaji aidaujai maatasag shimutuk egakajui.
DAN 2:14 Suntag apu kuitamin aidaun apuji Arioc aajakua nunú aents yacha anentaimas dekamin aidaun ijinatatus umintaun Daniel dekauwai.
DAN 2:15 Nunik Ariokan jegajua shiig pegkegnum iniak: “¿Wagka apush aents yacha anentaimas dekamin aina nunú ijinatajum tusash inamjae?” tau. Tusa iniam, wagkag inamjabi nuna ashí ujakui.
DAN 2:16 Dutika ujakam Daniel apun jegajua chichajak: “Apuh, wait aneasam tsawan sujusta, nunikamin ame kajamjaum dusha wajukatnuk aan kajamjaume nuna dekaan ujaktajame”, tiuwai.
DAN 2:17 Nuna tusa ukuak nii pujutaijin weuwai, nunik niina kumpaji Ananíasan, Misaelan, Azaríasan aatus nii apujai chichasbaun ashí ujakui. Dutika: “Apajuí segatajum nii nuna ashí dekamtijamati, wagki nunú betek ujakcha ajin babilonianmaya yacha aina nuna mainak iinash mantamawainum”, tiuwai.
DAN 2:19 Nuna tusa kanuinai, kajanum Nabucodonosor kajamjamun Apajuí Danielan ashí ujakui. Dutikam Daniel Apajuín emematak,
DAN 2:20 aatus tiuwai: “Apajuíyah, amek senchigtin ashí yachaitme. ¡Apajuín daajiya nunú ajumaish tuke ememattai atin ati!
DAN 2:21 Tsawan yapajinak minina nunak Apajuí dutikawai, Apajuí aentsnak apu emawai, nuigtush nigki yapajinai, aents yacha shiig anentaimkau aina nunak nii dutikawai. Tuja wamak unuibau aina nunashkam nigki dutikawai.
DAN 2:22 Anentaimsaish ejemainchaunash nii iwainauwai, tuja uukbau ataish nigki iwainauwai. Apajuíyai tsaaptinuk.
DAN 2:23 Apajuíyah, ametme mina apachug aajaku aina nuna Apajuíjimek, amina see takun emematjame. Ame minak yacha wajiu etiume, tuja ii sumakmag duka imatiksamek, apu nii kajamjamujin anentaimtus dekatatus waitma nunú mina iwaintugkaume”, tiuwai.
DAN 2:24 Nuna aatus Apajuíjai chichasa ukuak, Ariokan wejiuwai, nunik jegajua chichajak: “Aents yacha anentaimas dekamin babilonianmaya aina duka kajegkaipa. Dekas mina apui ejetuata. Nii kajamja nunash wajukatnunak aan kajamjae nuna wi ashí ujaktajai”, tiuwai.
DAN 2:25 Tusa timatai Arioc Danielan juki wamak apu Nabucodonosor pujamunum ejegauwai, dutika apun chichajak: “Apuh, ame kajamjamugmin ujapaktinun judío aents achija yajuakbau batsata nuwiyan makichik jukin itaajai”, tiuwai.
DAN 2:26 Tusa timatai Danielan dita Beltsasar adaikau aina nuna apu chichajak: “Ameka wi kajamjag nunú ejeyim, nunash wajukatnunak aan kanagja nunú ¿tujutmainaitam?” tiuwai.
DAN 2:27 Tusa tama Daniel ayaak: “Ame kajamjaum nunak, aents anentaimas dekamnukesh, tunchikesh, yayan dekapau aidaukesh wajukatnuk aan kajamjaume nuna ejeyig makichkish ujapamainchau ainawai.
DAN 2:28 Tujash Apajuí nayaimpinum puja nunuwai dekamainchaunash dekamtikagtinuk. Nii aminak atakea duwi atinun iwaintugmake. Jujuwai kajamjaum duka.
DAN 2:29 Apuh, ame anentaimsam atakea duish wajukatnukita tusam ane anentaimkawam kanimume, nuniamin Apajuí nuna iwaintugmake.
DAN 2:30 Nuna minashkam Apajuí iwaintugkame, tujash wi tikich aents aidaun nagkaesau yacha asamtaigkish iwaintugkache, ayatak ame kajamjaum dusha wajukatnuk aan kajamjaume nuna ujakti, dutikam shiig dekaati tusa iwaintugkae.
DAN 2:31 “Apuh, kajanum makichik aents dakumka najanamu múun, tsumain wajakin, winchamtin ishamain wainkaume.
DAN 2:32 Nuna buukeg tikichjaigkish pachimjachbau ayatak oro najanamu; tuja detsepeg kuntujijai plata najanamu, untsu ampuji bakuijai bronce najanamu,
DAN 2:33 kagkaji hierro najatuamu, tuja naweg hierro tsakusjai pachimja najanamu wajau wainkaume.
DAN 2:34 Nunú dii wajamin makichik kaya múun mujanmaya, aentskesh shitakchamaitak nigki kagkegak juwaki nunú wajattaman, dawenum dekegka nawe tsaigkam iyaag tepesmae.
DAN 2:35 Nunik iyaabuik oro, plata, bronce, hierro aidauk tsainak yuku wajase. Nuniaig dase senchi dasentak trigo akaaku duke ijumjamun umpui utsauwama numamtuk umpui utsagke. Dutikam tuke megkagak megkaekae. Untsu nunú kaya tuku tsaikua duka muja shiig múun najaneau wainkaume.
DAN 2:36 “Apuh, ame kajamjaum duka juju ainawai. Tuja dusha wajukatnuk aan kajamjaume nuna yamai ujaktajame:
DAN 2:37 Apuh, aents dakumka najanamun buuke oro wainkaum duka ametme. Aminak Apajuí nayaimpinmayaya nunú apu etamne, dutijabau asa senchigtin eme anentsa diitai awajtamsae. Tuja nuigtushkam ashí aents nugkanmaya aidaunak kuntin aidaun chigki aidaujai ashí amina idaitugmase.
DAN 2:39 “Amina ukuugmin tikich aents ametam aan wainkauch apu wajastinai. Untsu nuna ukuujin kampatuma nunú broncejai betek tumain apu wajas ashí nugkanum inamjatnai.
DAN 2:40 Untsu nuna ukuujin ipak usumta nunú apu wajastinai, tuja duka hierrojai betek atinai. Iman asa tikich apu aidaunak ashí depetuk ijinatnai.
DAN 2:41 “Tuja nuigtushkam apuh, ame nunú aentsu nawe hierro, tsakusjai najatuamu wainkaum duka ipak usumta nunú apu wajastina duwi aents aidau kanakagtina nunú aan wainkaume. Nunú apua duka hierro katsugma iman atinai. Untsu tikichia nunú tsakus pukutsama nunin kakakchau atinai.
DAN 2:43 Tuja aents dakumka najanamu wainkaum nuna tsajam nawe hierro tsakusjai pachimjamu tame duka, kanakchagmi ijutkau agmi tusag tikich nugkanmaya aidaujai nuwan sudayagtata nunú aan kajamjaume. Tujash nuninakush hierro tsakusjai apatka anugkam tuke amaitsu numamtuk maki makichik apugtin aina duka makichkish ijunmainchau atatui.
DAN 2:44 “Tujash nunú tsawantin Apajuí nayaimpinmaya makichik tuké apu atinun adaikatnai, nunak makichkish depetkachagtinai. Tikich apu aidaunak nii ashí depetuk ijinatnai.
DAN 2:45 Apuh, ame kaya makichkish shitakchamaitak kagkegak iyaak aents dakumka najanamu wajaun dekegka tsaika yuku emau wainkaum duka nunú aikaume. Nuna Apajuí tikich tsawantin nagkaemaktinun iwaintugmake. Ame kajamjaum duka dekaske, tuja wajukatnuk aan kajamjaume dushakam wi taja imanisag betek uminkattawai”, tiuwai.
DAN 2:46 Tusa Daniel timatai, apu Nabucodonosor Danielan ememattatus tikishmag pujusui. Tuja nuigtushkam Daniel anentag suwakjum kuntin maajum apeatajum dutikakjum kugkuin inciensoshkam apeatajum tusa tiuwai.
DAN 2:47 Nuna tusa Danielan chichajak: “Atumi Apajuíjiya duka wainka apajuímtai aina nuna nagkaesau múuntai. ¡Niyai apu aidaun nagkaesauwa duka! Niig ashí yachai, nuadui nii ujapakmatai kajanmaya kakajus dekamainchaush ujatkaume”, tiuwai.
DAN 2:48 Nuna tusa, apu Nabucodonosor waji pegkeg akik aidaun anentag susauwai. Nuigtushkam babilonianmaya nugka yaig aidaun apuji gobernador adaikauwai, dutika nunú nugkanmaya aents yacha dekamin aidaun apuji awajsauwai.
DAN 2:49 Dutikau asa, Daniel niina kumpaji aidaun chichamjukmatai, ditanashkam Daniel takatai yaigkagtinun adaitujui. Tuja Danielak tikich aents apujai takau aidau batsatbaunum nuwi niishkam pujujakui.
DAN 3:1 Duwi pujus Apu Nabucodonosor chichaak, aents dakumkajum oro najanatajum tusa inamjauwai. Nuna esantig treinta dekapamu untsu wegkanti tres dekapamu aajakui. Nuna najanawag babilonianum nugka yaig aajakua nuwi muja Durá tutai najatamu pakajin apusajui.
DAN 3:2 Dutikawagmatai nunú iwainamunum, apu Nabucodonosor tikich apu nugka yaijan apuji gobernador aidaun, suntaja apuji aidaun, apu chichajin aidaun, kuichki diin aidaun, apu chichama epegkin aidaun, aatus ashí ipauwai, nuna wainkatnume tusa.
DAN 3:3 Dutika ipaam ashí apu aidauk aents dakumka najanamu iwainamunum jiistamawagtatus ijunjajui.
DAN 3:4 Nunikagmatai, makichik aents ame nagkamattame tusa tibau senchi jiika chichaak: “Ashí aents maki makichik chichamtin aidautijum juwi kaunaujum nunutijum antuktajum:
DAN 3:5 Uwija kachujin, pigkuijai umpuinak, cítara, lira, salterio, gaita aatus awatuidau antakjumek, tikishmaja pujustatjum, apu Nabucodonosor inamjamtai, aents dakumka oro najanamua nunú ememattatjume.
DAN 3:6 Untsu nunú tibau aig tikishmag pujusa emematuinachuk, wamak juki pag inagtai kee awa nuwi egkeam agtatui”, tiuwai.
DAN 3:7 Tusa tibau asag, nuna awatiagtai ashí tikishmajag batsamsajui, nunikag aents dakumka oro najanamun emematuidau.
DAN 3:8 Tuja ujumak Israel aents aidau nuwi batsatuk emematchajui, nuniagtai babilonianmaya aents aidau, apu ujakmi tusag shiyakajui.
DAN 3:9 Nunik apu Nabucodonosoran chichajuinak: “¡Apuh, kuashat tsawantai iwaku pujusta! ¡Tuja amina daagmek tuke pachitai atin ati!
DAN 3:10 Apuh, ame chichaakum músican awatuinamu antakjumek wamak tikishmaja pujustajum, nunikjum aents dakumka oro najanamua nunú ememattajum,
DAN 3:11 tuja nuna nuniachuk pag inagtai kee awa nuwi wamak jukijum egkeatajum tukagtimume.
DAN 3:12 Tujash ujumak judío aents aidau, nugka yaig babilonianum awa nuwi amejai atuegak takasagtin Sadrac, Mesac, Abed-nego aatsam batsasmayume, tujash ditak aminak eme anenjamainatsui, nuninak amina apajuímtaijum aidaunash, tuja aents dakumka oro najanamunashkam emematuinatsui”, tiajui.
DAN 3:13 Tusa ujakam, apu Nabucodonosor senchi kajeka, utitajum tusa inamjauwai. Dutikam yajuak apu pujamunum itawajui.
DAN 3:14 Dutikawagmatai apu ditan iniak: “Mina apajuímtaijua nuna emematuinatsui, nuninak aents dakumka oro najanamua nunashkam tikishmatjag emematuinatsui tujamaina nunash ¿dekaskek tujamaina?
DAN 3:15 Nunú dekasketkuish nunak tsagkujajime. Untsu yamai músican awatuinakui, jeganjum tikishmaja pujusjum ememattajum. Nuniakjuminig suwimkanak amaschagtatjai. Untsu atum emematchakjuminig, pag inagtai horno kega imannum egkeatajum tusan titatjai. Nuna dutika aish, makichik apajuíkesh atumnak ayamjutpakchagtatui”, tiuwai.
DAN 3:16 Tusa tutai, dita chichajuinak: “Iik duka makichkish puyatjatsji.
DAN 3:17 Ame jinum egkejatuawaminish, Apajuí ii emematnaitag nunú iinak uwemtijamainai, tuja ame itugkami tukagtame, nunashkam iinak Apajuí uwemtijamjattawai.
DAN 3:18 Tuja Apajuí iina uwemtijamchakuish amina apajuímtaigmia duka, tuja dakumka oro najanamua dukesh tikishmatja emematchapash tusaik makichkish anentaimtsuji”, tiajui.
DAN 3:19 Aatus datsauch aidau tiagtai, apu Nabucodonosor ditan senchi kajejuk yapinig kapantu wajasui. Nunik aents aidaun, jii kega nunú nuni senchi siete jii kemaina imatikajum ikapagtajum tusa tiuwai.
DAN 3:20 Tusa tima imatiksag umikagmatai, suntag senchi aidaun etegkeg, atum datsauch kampatuma nunú achikjum jinum egkeatajum tusa inajui.
DAN 3:21 Tusa timatai, kampatum datsauch aidauk ditashkam tuke apu asag jáanch pegkeg aidaun nugkuajunak imatiksag achikag, jigkaja jukiag jiinum nagkimawag egkeawajui.
DAN 3:22 Tuja apu inamjamtai jiik nuni senchi ikapajam shiig senchi atushat nimpau asa, suntag aidau uchin achikag egkedaun apeam jinauwai.
DAN 3:23 Untsu datsauch aidauk shiig pegkeg jigkagbaunak nunisag hornonum egkemsajui.
DAN 3:24 Nunik pegkeg chimpimtai, Nabucodonosor puyatuk wajaakug aents niina anentaimtan su aidau ijunun jegantun chichajak: “¡Uchi datsa kampatume duka imatiksaikiap jigkaja chimpiamji!” tau. Tutai dita ainak: “Ehe, kampatume duka dutiksaik egkeamji”, tuidau.
DAN 3:25 Tusa tiagtai apu chichaak: “¿Wagka tujash ipak usumta imanish chimpijua? Jigkagbaunak atimawag jii sukuachbau wajukmaina numamtuk shiig yujawai. Nuigtushkam ipak usumta nuwiya makichik ángeljai betekai”, tiuwai.
DAN 3:26 Nuna tusa Nabucodonosor horno waitijin jeganta untsumak: “¡Apajuí múunta nuna inake: Sadrac, Mesac, Abed-nego aidauwah, jiinkijum juwi taatajum!” tau. Tusa tama kampatuma duka imanisag jinum chimpiju jiinkiajui.
DAN 3:27 Nunikagmatai ashí apu aidau nuwi ijunuk datsauch aidaun jegaantag diidau, tujash makichkish esachajui, nuigtush makichik intashigkesh shiig esachui, tuja jáanchji aidaukesh shiig esachu asa, jáanch esau mejegama dukesh shiig atsau.
DAN 3:28 Nuna wainak Nabucodonosor senchi untsumak: “¡Sadrakan, Mesakan, Abed-negon ayamjak niina aentsji ángelan awema nunú Apajuí ima nigki tuke emamattai ati! Ditak dita Apajuíjin kajinas anentaimaidau asag, wi chicham umikbaunash umikchagmae. Nuadui wainka apajuímtai aina nunú ememattan dakituinak, dekas ayatak jinaami tumabiagmae.
DAN 3:29 Tuja juju datsauch aina nuna Apajuíji iwainaka imanun iwainamainuk tikich Apajuík makichkish atsawai. Nuadui, nunú Apajuí pegkegchaun chichajuk asaja maam atatui, tuja niina jeshkam apea ajapjam atatui. ¡Nunak juwiya akuish, tuja tikich nugkanmaya akuish, makichkish tsagkujashtatjai!” tiuwai.
DAN 3:30 Aatus apu chichaman umika pujus, nunú uchi datsa kampatum aajakua nunak imatiksag Babilonia nugkanum nugka yaig provincia aajakua nuna tuke apuji agtinun adaijauwai.
DAN 4:1 Nuna dutika pujus, apu Nabucodonosor chichaak: “Wika ashí aents maki makichik chichamtin, ditash nugkentin aina duka shiig agkan maanitsuk, ajak aidaun ajakmawag shiig atsumkas batsamsatnume tusan wakegajai.
DAN 4:2 Apajuí nigki ashí wagakua nunú shiig pegkeg aidaun mina iwaintugka nunú atumesh dekatajum tusan wakegajai.
DAN 4:3 ¡Yaunchkesh dekashtai aidaun Apajuí iwainamua duka, shiig pegkeg makichkish ejemaitsui! Nii inabaujiya duka ajumaish tuke atinai, tuja niina senchijiya dushakam makichkish nagkankashtinai.
DAN 4:4 “Witjai Nabucodonosor, wika apu asan, makichkish atsumkas mina pujusa inamtaijui shiig aneasan pujuyajai.
DAN 4:5 Imanisan pujukman, kashi kajanum ishamainun kajamjabiajai. Nuna anentaimtusan senchi ishabiajai.
DAN 4:6 Nuniakun, nunash wajukatnunak aan kajamjaja, nuna ujatkatnume tusan, aents anentaimsa dekamtan yacha aidau ashí ikautjuatajum tiabiajai.
DAN 4:7 Tusa ti ai, tunchi aidaun, anentaimas dekamin aidaun, yaya dekapau aidaun ikaunmawagmatai, wi kajamjamujun ujakajabiajai, tujash makichkish duka nuniktin aan kajamjaume tusag ujatkachagmayi.
DAN 4:8 Nunik ujatkachagmatai pujai Daniel taawabi. Wi niina daajinak yapagtuan mina apajuíjun eme anentsan Beltsasar adaikamiajai. Wika Danielnak Apajuí pegkegma nuna Wakani jintintui tajai. Niina wi kajamjamujun ujaakun:
DAN 4:9 “ ‘Beltsasarah, amek juju aents yacha aidau ijuna nuna nagkaesau yachaitme. Apajuí pegkegma nuna Wakani aminí puja nunak wika dekajai, nuadui amek shiig dekamainchau aidaush ashí dekame. Nuadui wi kajamjamujun amina ujaktatjam nunú antukam wajukatnunak aan kajamjaja ujatkata’, tiabiajai.
DAN 4:10 “Nuna tusan wi kajamjamujun ujaakun: “ ‘Kajanmash nugka múunta nuna ejapeen numi múun jiitkau wajame.
DAN 4:11 Nunú numia duka shiig muuntan tsakaja nayaimpin antiime, iman asamtai ashí nugkanmaya aidaush wainiagmae.
DAN 4:12 Nunú numi dukeg pegkeg samekbauwe, tuja shiig kuashat nejeku asamtai, nuna ashí chigki aidauk yuwagmae, tuja kuntin aidauk nuna wajauti bikintunum batsamas ayamiagmae, untsu kanawe aidaunum chigki aidau pasugmagmae, ashí nugkanum iwaku batsamin aidauk nuwiyan yuwa batsamae.
DAN 4:13 “ ‘Nuna dii wajakman pachiachbau makichik ángel kuitamkagtin nayaimpinmaya akagun wainkamjai.
DAN 4:14 Nunú senchi untsumak chichaak: “ ‘ “¡Au numia duka ajaka ajuatajum! Dutikajum kanawe tsupijatajum, dukeshkam utsankatajum, neje aidaushkam akagjum utsankatajum. Tuja kuntin aidau nuna wakenti bikintunum batsata duka pisagtinme, pishak aidau kanawen pasugmaina dushakam shiyaktinme.
DAN 4:15 Untsu wajautiya duka tegainigpajum, ayatak cadena hierro najanamui, bronce najanamujai jigkagjum, ajanum dupa ayaunum ukuktajum. Dutikam jegashik uchupiam asati. Nuniak kuntin aidaujai jimagtuk chijichin yuwati.
DAN 4:16 Nunú numi anentaimtajig yapajinati, nunikmatai kuntinjai betek wajasti. Nunisag pujus siete mijanan ejeti”, timae.
DAN 4:17 Aatus Apajuín aentsji ángel aidau suwimkan susatnuwe. Nunak dutikatnuwe, wagki Apajuí nigki ashí wagakua nunuwai apu aidaun inauk, tuja apu atinnashkam nii wakegamun etegkeawai, aikasag makichik nugka apuji atinnash aents aidaunmayan imanchauchin etegka apu emawai tusa aents aidaun nuna iwaintuktag tusa dutikmae’.
DAN 4:18 “Juna wi amina ujajam nuna kajamjamjai. Nunikan yacha aidaun ujatkatajum tijai, tujash ujatkachaje. Tujash wika amina Beltsasara niimpap ujatkattawa tajai, wagki aminig Apajuí pegkegma nuna Wakani pujawai, tibaijai.
DAN 4:19 “Tusa ti ai Danielak kuashat anentaimat minitbau asa, puyatak chichatsuk ekemayi. Nuniakui wi niina tikich daajin untsukan chichagkun: “ ‘Beltsasarah, wi kajamjamua duka puyatjukaipa, tuja nunash wajukatnunak aan kajamjaja dushakam puyatjukaipa, ayatak ujatkata’, tibaijai. “Tusa tai nii chichagtak: ‘¡Chah apuh, utugsag ame kajamjaum nunú ashí shiwag aidauwai uminka tajai!
DAN 4:20 Numi múun shiig esagman tsakaju asamtai, ashí nugkanmaya aidaush wainaidau,
DAN 4:21 tuja nuna dukeg pegkeg samekbau, tuja shiig kuashat nejeku asamtai, ashí nugkanmaya aidauk nuwiyan yuwawag batsatu, tuja kuntin aidauk nuna wajauti bikintunum batsamas ayamaidau, chigki aidaush nuna kanawen pasugmaidau kajamjaum duka, ame ashí tikich aidaush nagkaesau wajasum nunú kajanum wainmamkaume. Tuja amina imanjumea duka nayaimpinash antigke. Nuigtush ame inabaugminak ashí nugkanum dekainawai’.
DAN 4:23 “Tuja nuigtushkam Apajuí aentsji nayaimpinmaya kuitamkagtin minis chichaak: ‘Au numia duka ajaka ajuajum tsaiktajum, untsu wajautjiya duka tegainigpajum, ayatak cadena hierro najanamui bronce najanamujai jigkagjum ajanum dupa ayaunum ukuktajum. Dutikam jegashik uchupiam asati. Nuwi kuntin aidaujai ijuntug chijichin yuwati’, tusa tau kajanum wainkaume.
DAN 4:24 Auk duka Apajuí nigki ashí wagakua nunú amina suwimkan amastatus umigtamka nunú aan kajamjaume.
DAN 4:25 Amek aents aidaujai ijunjamek pujuschattame, kuntin aidaujai ijunjam pujustatme, nuniakum ditajai betek dupa yutatme. Amek jegashik uchupiam tepettame, nunika pujusam siete mijan ejetatme. Nuwi pujusam dekas Apajuí nigki ashí wagakua nunuwap apu aidaunak inawa, tuja nii wakegamujinap apu atinnash etegkeawa tusam anentaimat jukittame.
DAN 4:26 “Numi ajakbauwa duka wajautijai ukuktajum tusa tau kajanum antukum duka, dekas Apajuíyapi ashí senchigtinuk tusam anentai jukittam duwi ataktu apu wajastatam nunú aan kajamjaume.
DAN 4:27 Nuadui wi yamai titatjam nunú antukta: Pegkegchau takatak idaisata, nunikam shiig takakum ujudauch aidau yaigta. Nunú dutikakum shiig aneasam agkan pujakum shiig atsumkas pujuschainpash”, tiuwai.
DAN 4:28 Aatus Daniel apu Nabucodonosoran ujakua duka imanisag ashí uminkauwai.
DAN 4:29 Makichik mijan nagkaemakiu ai apu nii pujusa inamtaijin niimak wekagu.
DAN 4:30 Nunik wekagu untsumak chichaak: “¡Atumesh Babilonia shiig múunta nunú diistajum! ¡Aunak wi awi pujusa inamjatnujun ibau pegkejan umikuitjai! ¡Nuigtush mina senchijun ashí aents tikich nugkanmaya aidaun iwaintuktasan imatikan umikuitjai!” tau.
DAN 4:31 Tusa eke chichaak wajai nayaimpinmaya chichau antuekauwai, nunú niina chichajak: “Apuh, amek yamai nagkamsamek apu achattame.
DAN 4:32 Amek aents aidaujai ijunjamek pujuschattame, kuntin aidaujai ijunja pujusam ditajai betek dupa yusa pujusam siete mijan ejetatme. Nuwi pujusam dekas Apajuí ashí senchigtina nunuwap apu aidaunak inawa, tuja nii wakegamujinap apu atinnash etegkeawa tusam anentaimat jukittame”, tiuwai.
DAN 4:33 Nuna tusa inagnaig duka imanisag uminkauwai. Nuadui Nabucodonosor niina pujusa inamtaijin pujaun jiiki jukiag baka batsatbaunum ejegan ukukiajui. Dutikam nuwi pujus bakajai betek chijichin yuu pujau. Nuwi pujus jegashkijug pujau, tuja intashishkam águilan ujejai betek, nanchikish águilan nanchikijai betek muuntan tsakapak pujau.
DAN 4:34 “Wi suwimkan juki waitiamu tsawan amuekamtai, wi Nabucodonosor nayaimpin diismaijai, nunikan detsemeajujai betek waitu pujamujun tsagagbaijai. Nunikan Apajuí nigki ashí wagaku tuke pujuuwa nuna emematkun: “ ‘Apajuí senchijiya duka nagkankashtin atakesh tuke atinai, niina inamtaijiya dushakam tuke imanuk atinai.
DAN 4:35 Apajuí emtinig aents aidauk tikima wainkaush ainawai. Apajuík nayaimpinmash, nugkanmash nii wajuk wakegawa nuna umiawai. Apajuíjai ainik tudaimainuk atsawai, nuigtush ¿wagka aikame? tusa tumainkesh atsawai’, tibaijai.
DAN 4:36 “Tusa Apajuín emematin nagkanmawaik, detsemeaja pujamugnak pegkeg wajasmaijai, nunikan ataktu inamtan nagkamabiajai. Nunika ai chichamnum mina yaintujaku aidau tikich aents apu aidaujai ashí kautjuawagmayi. Nunik kaunawagmatai, ditajai ijunjan yaunchuk aajakbaujun nagkaesau wajasmaijai.
DAN 4:37 “Nuadui wika Apajuí nayaimpin apujiya nuna emematjai, wagki nii takamujiya duka betek shiig pegkeja nuadui. Aents emebauwa nunak Apajuí inatsawai. Wika apu Nabucodonosoraitjai. Wi nunak dekas tajai.”
DAN 5:1 Apu Belsasar Babilonia nugkan apuji jiista muuntan umika, niijai takau aidau mil aents eme anentsa diitai aidaun ipauwai. Dutika ipaam kaunawag vinon shiig kuashat uwajajui.
DAN 5:2 Tuja apu Belsasarchakam kuashat vinon uwag nampeka, yaunchuk niina apaji Nabucodonosor Jerusalégnum Apajuí emematku ijuntai aajakua nuwiyan shikika umutai oro najanamu aidaun, plata najanamu aidaujai yajuakua nuna utugtitajum tusa inamjauwai. Nunak nii ipaamu aidaujai, tuja niina nuwe aidaujai, nuigtu awan nuwe aidaujai aatus batsamas duwi shikikag umú batsabiagtatus tiuwai.
DAN 5:4 Nuna umuinak batsamas dita apajuímtaiji oro, plata, bronce, hierro, numi, kaya najanamu aidaun emematuinak kantama batsatu.
DAN 5:5 Imatu batsatai makichik uweg tanishnum wantinak, jii kegau asamtai, apu pujusa inamtaiji tanish pujui ukatkamunum paan agau. Nuna apu wainak,
DAN 5:6 senchi ishamak kujaak yapinig puju wajasu.
DAN 5:7 Imaniak, babilonianmaya tunchi aidaun, yaya dekapau aidaujai senchi untsumak chichajak: “Anú chicham agajam awa dusha wajintuaki nuna ujatkaunak jáanch shiig pegkeg yamakaitkaun anujattajai, tuja nuigtush kuntujeanum nugkutai oro najanamun anujattajai. Niinak mina ukujui tikich jimag apu aina nuna ukujin apu atinun adaikattajai”, tau.
DAN 5:8 Tusa imattai aents yacha yaya dekapau aidau, anentaimas dekamin aidau aatus nuwi apu inamtain batsatuk ashí jiinag chicham agajam aunum utsanawajui. Tujash wajintu agagbauk ayi nuna aujus diis nuna taku tawai tusa apu ujamainuk makichkish atsusui.
DAN 5:9 Nuadui apu Belsasarak senchi puyatuk yapinig puju wajasui. Nunitai niijai takau apu aidaushkam shiig anentaimjachmin dekapedau.
DAN 5:10 Belsasar nii aents ipaamu aidaujai pampainiagtai, nuwa múun niina dukuji reyna tutai pujau jiinki, yujumak yuwaku ijuntainum wayauwai. Nunik chichaak: “¡Apuh, kuashat tsawan iwaku pujustin ata! ¡Imanikmek puyatkaipa, tuja nuigtush senchi ishamkaipa!
DAN 5:11 Juwi iina nugken makichik aents yacha pujawai. Niyaig Apajuí pegkegma nuna Wakani pujawai. Amina apa Nabucodonosor ayá nunú niina shiig wainajakui, nuadui ashí aents yacha anentaimas dekamin aidaun apuji adaikauwai.
DAN 5:12 Nunú aents yacha duka kajanmayanash, tuja utugchat shiig dekamainchaunash shiig etsegmainai. Niina daajig Daniel aig apu Nabucodonosor yapagtua Beltsasar adaikauwai. Nunú untsukta, dutikawamin nii taa juju agagbauwa jusha wajintuk agagbauwaita nuna ujapakti”, tiuwai.
DAN 5:13 Tusa tima Danielan untsukui, dutikam taamtai apu niina iniak: “¿Amekaitam Daniel mina apag Nabucodonosor judío aents Judá nugkanmaya aidaun achija ikaunmauwa nuwiyam?
DAN 5:14 Amina pachipas ujatuinak, Apajuí pegkegma nuna Wakani Danielai pujawai, nuadui niig shiig yachai, iman asa kajanmaya shiig dekamainchaunash betek etsejui tujamainawai.
DAN 5:15 Ame eke tatsminig juwiya dekas ashí aents shiig yacha anentaimas dekamin aina imanun ikaunman, juju agagbauwa dusha wajintua nunú ausa diisjum ujatkatajum ti ai diisagmae, tujash makichkish dekainatsui.
DAN 5:16 Tujash wika niimpap utugchat shiig dekamainchaunash juna taku tawai tusa etsegmainaita tajame. Anú chicham agajam awa dusha wajintuaki nunú ujatkaminig, jáanch shiig pegkeg yamakaitkaun anujattagme, tuja nuigtush nugkutai oro najanamun anujattagme. Nuigtushkam mina ukujui tikich jimag apu aina nuna ukujin apu atinun adaikattajame”, tau.
DAN 5:17 Tusa tama Daniel niina ayaak: “Apuh, tanishnum agagbauwa dusha wajina takug tawa nunak wi aminak ujamainaitjame. Tujash minak makichik wajigkesh sujumaitsume, nuigtush apu adaitukti tusanush wakegatsjai.
DAN 5:18 “Apajuí nigki ashí wagakua nunú, amina apa Nabucodonosornak apu emauwai. Nuadui nugka muunnum aents batsamin aidaush ashí ajaantus diijaku ainawai, niina imanjinash shiig dekajaku ainawai.
DAN 5:19 Nuigtushkam ishamainak kujaidau, wagki nii yana kajejawa nunak mau, dutikak wait anentamujinak mautsuk idayu asamtai. Nii yana apu ati tusa wakegawa nuna apunash adayu, untsu nii dakitamunak idayajakui.
DAN 5:20 Apu Nabucodonosor, nigki ima wagaku senchigtin anenmamtai, Apajuí nii apu aajakua nunak atankiuwai.
DAN 5:21 Dutikamu asa nigka aents aidaujai ijunjag pujumainchau asamtai, kuntin aidau batsatbaunum ejegawag ukukiajui. Dutikam nuwi pujus burro ikamia aidaujai betek dupan yuujakui, tuja iyashinashkam jegashik jegashkijam tepejakui, nunik nuwi pujus dekas Apajuí nigki ashí wagakua nunuwap apu aidaunak inawa, tuja nii wakegamujinap apu atinnash etegkeawa tusa anentaimtan jukiuwai.
DAN 5:22 Tuja apuh, amek nuna uchiji asam shiig dekame, nuniayatkum pegkeg takatak dakitame.
DAN 5:23 Nuadui Apajuí dushikiakum niina jenia shikika umutai aidau yajuakbau aina nunú itagtuatajum tusa inamjamin ikaunmawagmatai, nujai vino shikikam tikich apu ipaamu aidaujai umame, wainka apajuímtai aidau oro, plata, bronce, hierro, numi, kaya aidau najankamu, wainmatnash wainmachu, antutnash antuchu, anentaimtajish atsu aina nunú emematu wekaeme, Apajuí pujutan amasua nunú emematmain idaikum.
DAN 5:24 Nuadui Apajuí uwejan awemae juna agagti tusa. Nunú chicham agagbauwa duka juju ainawai:
DAN 5:25 ‘MENE MENE TEKEL Y PARSIN’,
DAN 5:26 Juju chicham aina duka juna taku tawai: MENE tawa duka: Ame apu asam inamam nunú amuekatnunak Apajuí tsawantan mamiktugmae, taku tawai.
DAN 5:27 Untsu TEKEL tawa duka: Makichik waji yaunchuk kijin aajaku duwi dekaapam kijinji megkaekauwa numamtuk amina Apajuí apu etamiu aig, ame shiig takaschaum nuna taku tawai.
DAN 5:28 PARSIN, tawa duka: Ame inabaugmea nuna Apajuí jimaituk akankattawai, dutika Medo aents aidaun, Persia aents aidaujai susatta nuna taku tawai”, tusa Daniel ujakui.
DAN 5:29 Tusa ujakam nuna ashí antuk nagkanmawaik, Daniel jáanch shiig pegkeg yamakaitkau anujatajum, tuja nugkutai oro najanamua dushakam anujatajum tusa inamjauwai. Nuna tusa, nugka yaijan apuji kampatuma duka Daniel atatui tusa ashí etsegkauwai.
DAN 5:30 Nuna tusa kintamun nunú kashia duik apu Belsasar Babilonia nugkan apujin mau ainawai.
DAN 5:31 Nunikmatai Darío Media nugkanmaya aajakua nunú apu wajasui. Tuja Daríok sesenta y dos mijanji ajamu apu wajasui.
DAN 6:1 Darío apu wajasu asa niina yaigtin aidaun ciento veinte gobernadoran adaijauwai.
DAN 6:2 Tuja gobernador aidau takagtai, diistin aidaun kampatum apun adaitujui. Nunak adaitujui wagki apu nuna uyumak anentaimak waittsai tusa. Nunú kampatuma nuwi Danielchakam pachitkau aajakui.
DAN 6:3 Tuja Daniela takatjig tikich apu aidaun takatjijai diismash nii ima yacha shiig takajakui. Iman asamtai apu anentaimas, ashí wi inabauwa nuwi mina aentsug aina nuna apuji dekas adaikatjai tiuwai.
DAN 6:4 Nuna tikich apu aidau dekawag, wajinmak dewakat, tuja nuniachkush wajinak shiig umikchat nuniakuig apu ujatkami tusag egatuidau. Dutikainakush Danielak shiig takau asamtai, makichkish pegkegchaunak waitkachajui.
DAN 6:5 Nuniku asag chichainak: “Daniel shiig takatsui tusa tsanumjumainuk makichkish atsujui, untsu nii Apajuín umigjai tawa nuwi utugchat apujtusmi”, tiajui.
DAN 6:6 Aatus gobernador aidau chichaman umikag, apu Daríojai chichastatus shiyakajui. Nunik jegajuawag chichajuinak: “¡Apuh, kuashat mijan pujustin ata!
DAN 6:7 Apuh, chicham umiktina nunú papii najannati tusa, amejai takau aidauti chichasji. Nunú chicham umiamunmak: makichik nantua duwi tikich apajuímtai aidau, tuja aentskesh emematbauk shiig atsusti, untsu apuh, ima aminak emematjamtinme. Tuja nuna umiachunak leónka batsamtain egkeatnume.
DAN 6:8 Nunú papii ame firmawaminig, nunak makichkish yapagmainchau ainawai. Duka aatus Media nugkanum Persia nugkanmashkam umikbauwai”, tiajui.
DAN 6:9 Tusa tiagmatai, nunú papii umikbaunum apu Darío firmauwai.
DAN 6:10 Dutika apu papii umike tabaun Daniel dekaa ukuak Apajuín ausatatus niina jeen weuwai. Nunik waya nunú jeganum Jerusalégnumanini niimtai ujaimu epenim aun ujai, nuwi tikishmag pujus maki makichik tsawantai kampatuma Apajuín augtaijinak dutiksag Apajuín aujak pujau.
DAN 6:11 Nunik Apajuín aujak pujai, nunú aents chichaman umiku aidau Daniela jeen utsaankama Apajuín aujak, emematak pujaun wainkajui.
DAN 6:12 Dutika wainkag Danielan tsanumjujagtatus apun wejiajui, nunik jegajuawag chichajuinak: “Apuh, ame chicham umiakum makichik nantu wainka apajuímtai aidaunak, tuja aentsnakesh emematchagtatui, ayatak ima minak emematjitnume, untsu nuna umiachuk leónka batsamtaijin egkenati timaum duka eke nantuk amuetsui. Nunú ¿dekaskechukait?” tuidau. Tiagtai apu ditan ayaak: “Ehe, duka dekaske. Media nugkanum, tuja Persia nugkanmashkam chicham umikbauk makichkish yapagmaitsui, duka nunisagke”, tiuwai.
DAN 6:13 Tusa timatai, nuigtu chichajuinak: “Nunin aish ¿wagka tujash judío aents achija ikaunmamua dusha Danielash amina eme anenjamtsukesh, nuigtush ame chicham umikbauwa nunash ajaantus diitskesh, tsawantaish kampatuma imaniash Apajuínash auju pujawa?” tuidau.
DAN 6:14 Nuna apu antuk, senchi wake besemag dekapjauwai. Nuniak wajuk Danielan ayamjukajak tusa ane anentaimkawa kintamu.
DAN 6:15 Nuniai nunú aents aidau ataktu apu jegajuawag chichajuinak: “Apuh, Daniel jakatnuk amek dekame. Wagki Medo aents aidaun apuji, nuniachkush Persia aents aidaun apujigkesh chichaman umikbauk makichkish yapajimaitsui”, tiajui.
DAN 6:16 Tusa tiagtai, untsu Daniel utitajum, dutikajum león batsata nuwi egkeatajum tusa inamjauwai. Tujash eke egkenatsaig Danielan apu chichajak: “¡Ame Apajuí tuke umignaitam nunú ayamjutpakti!” tiuwai.
DAN 6:17 Tusa inagnaig Danielan jukiag leónka batsamtain egkeawajui. Dutikawag kaya muuntan jukiag nunú waan dukukajui, dutikawagmatai nuna waitijin apu niina sellojin apujtuauwai. Tuja tikich apu aidaushkam Danielan jiikinum tusa ditashkam dita sellojin apujtuawajui.
DAN 6:18 Dutika ukuak apuk nii pujusa inamtaijin weuwai, nunik jegaashkam yujumkanak yutsuk kanagtatus tepesui, nunik kanagchamin dekapeak tuke kanutsuk tsawau, nuniakush kantamtain awattinme antuktajai tusagkesh tichauwai.
DAN 6:19 Nunik tsawamuik nantaki waugtus leónka batsamtain weuwai.
DAN 6:20 Nunik waanum jegantatak wesa wake besemag dekapeak aatus Danielan untsukui: “¡Apajuí pujutan sukagtina nuna inake Danielah! ¿Amina Apajuígmesh león yujamawai tusash ayamjutpakchaek?” tau.
DAN 6:21 Tusa untsuam Daniel ayaak: “¡Apuh, kuashat tsawan iwaku pujustin ata! tajame.
DAN 6:22 Wi pegkegchau takamsachbaun Apajuí dekau asa, tuja aminakesh tsanuchuitjam nunashkam dekau asa, león yuwawai tusa, wi Apajuín nemajag nunú niina aentsji ángelan akupkame, dutikamu taa nii leónka weninak epetjame”, tau.
DAN 6:23 Tusa aimkamtai Daniel jiiktajum tusa apu tiuwai. Apu timatai jiikiajui, dutikawag león esaicheash tusa ashí diidau, tujash Danielak shiig pegkeg egketu, wagki niig Apajuíyai kajinas anentaimu asa.
DAN 6:24 Daniel jiinkimtai ajuma duwi, aents Danielan tsanumjuju aidau ikaunmatajum tusa apu timatai ikaunmawajui. Dutikawagmatai ashí nuwejai, uchiji aidaujai yajuakag león batsatbaunum ashí chimpiawajui, dutikam eke nugka iyachunak yakig león aidau tsekentiag ichiajajui.
DAN 6:25 Nunikmatai, apuk ashí aents tikich nugkanmaya ditash chichamtin aidaun papiin aatus agatjauwai: “Ashí atum aidautigmin kumpamjime,
DAN 6:26 nuniakun ashí wi inamag nuwi batsamin aidauk Daniela Apajuíjiya nuna ememattinme tajai. “Apajuíyai pujutan sukagtina duka, niig tuke pujuuwai. Nii inabaujiya duka makichkish megkaekashtinai, tuja niina senchijishkam nagkankashtinai.
DAN 6:27 Apajuíyai agkanmitkagtin, Apajuíyai uwemtikagtin, niig nayaimpinmash, nugkaash wainchatai pegkeg aidaun iwainauwai. Apajuí Danielan león yuwawai tusa ayamjuke”, tiuwai.
DAN 6:28 Nuadui Danielak apu Darío aajakua nunú eme anentsa diitai aajakui. Tuja apu Ciro Persian apuji aajakua duishkam imanuk aajakui.
DAN 7:1 Belsasar Babilonia apuji wajasa makichik mijan inamak pujai, Daniel kashi kajanum kajamjauwai, nunik shintaag nii kajamjamujin agajui. Tuja duka aatus tawai:
DAN 7:2 “Kajanum nayaimpinmaya dase ashí yantamnum dasentuk nayantsan iyantug senchi tsukatmitkabi.
DAN 7:3 Imaniamunmaya pachiachbau ipak usumat kuntin múun maki makichik niimtin aidau jiiniagmayi.
DAN 7:4 Yama nagkamchak jiiniuwa duka leónjai betekmamtinayi, tujash nanapeg ukukuin nanapejai betekayi. Nuna dii wajai nanapen japiki ichinkagmayi, dutikawag inantainiag aentsjai betek awajainiagmayi, dutikawag aentsu anentaimtajijai betek awajsagmayi.
DAN 7:5 “Untsu tikich kuntinuk chayujai betekayi, niina pagae juinia yantame ima wagakuyi. Tuja kampatum ukunch pagae aidaun apaakuyi, nuna chichajuinak: ‘¡Wetá, nunikam neje ame wakegamu shiig kuashat yuwata!’ tiagmayi.
DAN 7:6 “Tuja tikich kuntinuk kaichjai betekayi. Nunú kuntinuk chigki nanapejai betek tuntupen ipak usumat nanape ajibi, tuja buukeshkam ipak usumta imaniyi. Niina senchimtikawagmayi, aents aidaun apuji wajas inamjati tusa.
DAN 7:7 “Untsu tikich kuntinun kajamjabiag duka yama nagkamchakun kampatum kuntinun kajamjabiag nuna nagkaesau shiig tsumain, ishamain, senchigtin, diez kachugtinayi. Iman asa naísh jiju hierro tsakaskatu etsakamu asamtai, nii wainbaunak ashí amubi, dutikak ampinunak najak tsaika ukubi.
DAN 7:8 “Nunú kuntinu kachuji diez asamtai, nuna dii wajai pachiachbau tikich kachuji piipich ukuunum jiinmayi. Nunikmatai, nunú nigki agkan wajasti tusa kachuji múun aidaun kampatum ukuitkagmayi. Tuja kachu yama tsapainiuwa nuna jiig aentsdaujai betekayi, chichaakush ememas chichabi.
DAN 7:9 “Nuniakui dii wajai, apu ekemsa inamtai aidaun jukiag apusagmayi, nuwi makichik apu múun ekemsabi. Nuna jáanchjig yujagkim shiig pujua imanayi, intashishkam lana pujua imanayi. Tuja ekemtaijiya nuna ruedajig jii kegaujai betek tsawan wajas amayi.
DAN 7:10 Tuja nii eketbaun emtinia jii kegau betsaka akaemayi. Nunú muunnak aents shiig kuashat emematiagmayi. Nuninai tikich aents aidau nuni kuashat makichkish dekapamainchau, jegantag ijuniagmayi. Nuninai nunú múun dita takasbaujin diijus suwimkan susatatus papii aidaun ujakmayi.
DAN 7:11 “Nuna kuntinun kachuji yamajam tsapainiuwa nunú ememas chichaakui dii wajabiajai, nuniai nunú kuntinun maawagmayi, dutikawag tsupijag jii kegaunum chimpiawagmayi.
DAN 7:12 Nuna dutikawag tikich kuntin aidaunashkam kakaagchamin awajsagmayi, dutikau ainayatak mautsuk tsawanji jegagti tusag ukukiagmayi.
DAN 7:13 “Nuna wika kajanum ashí diyakun wajabiajai. “Nuniai pachiachbau, yujagminum pachitkau makichik aentsjai betek akagun wainkabiajai. Nunik akaiki nunú múun eketbaunum jeganmayi.
DAN 7:14 Nunikmatai niina dekas tikich aidaun nagkaesau apu emabi, dutikamtai aents ashí nugkanmaya maki makichik chichamtin aidau niina umijuinak emematiagmayi. Niina senchijig imanisag atinai, tuja inamtaijishkam makichkish megkaekashtinai.
DAN 7:15 “Nuna imanun wainkan senchi ishamkabiajai, nunikan puyatkan jamaijai.
DAN 7:16 Nuniakun aents tuwaka ijunbaunum jegantan, makichik iniakun: ‘Aunash wagka imaninawa nunú minash ujatkata’ tibaijai. Tusa tai ayu tujutmayi. Tusa chichagtak:
DAN 7:17 ‘Juju ipak usumta imajin kuntin múun aina duka ipak usumat apu aidau ashí nugkanum inamjagtina nunuwai.
DAN 7:18 Tujash nunú nagkaemakmatai, Apajuí aents aidaun etegkauwa nunú atakea duish tuke inamjatnai’, tusa ujatkabi.
DAN 7:19 “Tusa ujatkamtai shiig dekatag tau asan, kuntin inagnamu ipak usumta nunú tikich aidaujaig betekchau tsumain, nai aidaush hierro, nanchikish bronce, nii wainbaunak ashí yuwa amuka, ampinunak najak tsaika ukua aush wagkag ibauwaita,
DAN 7:20 tuja nuigtush diez kachugtina dusha, tuja kachuji uchuchiji yama tsapainiuwa nunú jiinna dusha wagkag annaita, tuja nuigtush chichaakush ememas chichau, tuja kachuji yamajam tsapainiuwa nunú piipichitak tikich kachuji múun aidaun nagkaesau, nunú tsapatai kampatum kachuji ukuiniaja nunash, wagkag ankae nuna dekatasan iniasbaijai.
DAN 7:21 Tuja nuigtushkam, nunú kachu yama tsapainiuwa nunú Apajuín aentsji aidaujai maania ditan depeteaun wainkabiajai.
DAN 7:22 Imatika pujujai nunú múun taabi, nunik Apajuí ashí senchigtinu aentsji aidaun ayamjuk agkanmitkabi. Nunak Apajuí ashí senchigtinun aentsji aidau apu wajasag inamjagtin tsawan jegau asamtai nunak dutikatnai.
DAN 7:23 “Dutika chichaak: “ ‘Kuntin inagnamu ipak usumta nunú kuntin wainkaum duka, apu ipak usumta nunú ashí nugkanum inamjatna nunuwai, duka tikich aidaujaig betekchau atinai. Ashí nugkanmaya aidaunak yuwa amuak, tikich aidaunak najak tsaika ukubi.
DAN 7:24 Untsu diez kachujiya duka, nunú tsawantin diez apu aidau inamjagtina nunuwai. Nunú nagkaemakmatai, yama nagkamchak apu aajaku aidaun nagkaesau tikich apu wajastinai, nunik diez apu aidaunmayan kampatum depetuk maatnai.
DAN 7:25 Nunú apuk Apajuí pegkegma nuna pegkegchau chichagtinai. Nuniak Apajuí aentsji aidaujai maanitnai. Tuja Apajuí chichame umiktin agagbauwa nunashkam, Apajuí emematku ijuntai tsawan etegjamu aidaunashkam yapajiatag titinai. Nuniak Apajuí aentsji aidaunak kampatum mijan nuigtu jimaituk nii wagagki waitka pujugtinai.
DAN 7:26 Tujash nunú apua duka apu chichaman inagdau aidau utugchatjin ejetim suwimkan jukitnai, nunik ajumaish apu achatnun tuke megkaekatnai.
DAN 7:27 Nunikmatai Apajuí ashí senchigtina nuna aentsji aidau apu wajasag nugkanmaya apu aidaunak ashí inagtinai. Dutikamtai dita aidau niina chichamen umijuinak emematiagtinai. Tuja nii inabaujig atakea duish tuke atinai.’
DAN 7:28 “Juna augmattsag nunuwai wi kajanum wainkamua duka. Nuna kajamjan puyatkan shiigchau yampia wajasmaijai, tujash nuna pachisnukesh tikichnak makichkish ujakchabiajai”, tiuwai Daniel.
DAN 9:1 Asuero uchiji Darío, Medo aents aajakua duka, caldeo aents aidaun apuji wajas inamajakui.
DAN 9:2 Nunú apu makichik mijan inamai, nunú mijantin wi Daniel, Apajuí profeta Jeremíasan ujaak, Jerusalégnak tsaikagtinai, dutikam setenta mijan asatnai tiuwa nunú agagbaun augkun pujuyajai.
DAN 9:3 Nuna ausan, yujumka ijagmaan jáanch pegkegchaun nugkujan, yukunum antumka pujusan mina pataag aidaun pachisan Apajuín aujiajai.
DAN 9:4 Wi Tuke Pujuun mina Apajuíjun segaaknuk aatsan segayajai: “Apajuíjuh, ametme múun ashí senchigtinum. Ame dutikatjai tibauk betek uminaitme, tuja amina anempainak chichamjumin umigtamin aina nunú amina anenkem iwaintinaitme. Nuadui anentaimsan
DAN 9:5 dekas pegkegchauwap takasji tajai. Ii aidautik aminig pegkegkesh iwainmamtsuji. Ame atsakmin wajukmaina numamtuk batsatu asa, ame umigtash kajimatki idaisa wainka yujaji.
DAN 9:6 Amina takagtamin profeta aidau ame akatjam wekagas iina apuji aidaun, iina muunji aajaku aina nunash, tuja ashí Israel aents aidaunash chichaman ujaku ainawai. Tujash ii aidautik nii chichaman ujapakuish dekaskeapi tatsuji. Nunidau asa makichkish antugtsuji.
DAN 9:7 Apuh, ametme pegkegmamek. Nuadui ii judío aents aidautik datsaamaji. Jerusalégnum batsatushkam datsaamainawai, tuja tikich Israel aents aidau amina shiwagmatjamawagmatai, ame utsagkam tikich nugkanum batsatushkam datsaamainawai.
DAN 9:8 Tuke Pujuuwah, iik pegkegchau takamsau asa datsaamainaji. Tuja iina apuji aidaush, iina muunji aidaush datsaamainawai.
DAN 9:9 Iik ame intimjaku chichamjumik umikchaji. Tujash amek tuke wait anenkagtinaitam duwi tsagkugkagtumainaitme.
DAN 9:10 Tuke Pujuu iina Apajuíjiyah, amina profetajum aidau ame akatjamu jintinjamainakuish nunú antukaik umikchaji.
DAN 9:11 Israel aents aidauk ashí amina chichamem umiktina nunak umikchaje, nuninak tupantug idaisaje. Nuadui Moisés amina inakem agak: Apajuí umigchakjumek suwimak jukitnaitjume tiuwa nunú uminu asamtai, iina pegkegchaujin amina suwimkajum iyanjamae.
DAN 9:12 Ame yaunchuk ujajatkamu umiakum, jutii pegkegchau takasbaunum, tuja iina apuji aidaush pegkegchau takasagbaunum suwimak ishamain shiig katsunmainchau, yaunchuk Jerusalégnum aents iina shiwaaji aidau batsatu suwimak suwakmesh imatika susachbau sukagtusume.
DAN 9:13 Juju suwimak iina iyanjamja duka yaunchuk Moisés agajua nunú imanisag uminkae. Tuke Pujuu iina Apajuíjiyah, iik nunú iman dekainayatku ame egatsuk, tuja ame umigtsuk, nuigtush iina tudauji aidaush idaisachji, tuja amina chichamjumkesh umikchaji.
DAN 9:14 Nuadui Tuke Pujuuwah, ame suwimak sukagtusume, iina Apajuíjiyah, ame dutikamua duka shiig pegkejai, nunin aig jutii aidauti ame umijut dakituinaji.
DAN 9:15 “Apuh, iina Apajuíjiyah, yaunchuk ame aentsjum aidau Egipto nugkanum inaku waitkatai batsatu ayamjukam amina senchigmijai jiigmayume. Nunú ame dutikakum senchijum iwainakuitam duka yamaikish augmattai awai. Iman aig jutii aidautik pegkegchau takamsaji.
DAN 9:16 Apuh, ame wait anenkagtinaitam duka shiig dekaji. Tuja Jerusalén amina yaaktagmia duka wait aneasam ame kajeku akumesh tsagkujata, wagki ashí aents amina umigtamchau tikich nugkanmaya aidau iina pegkegchaujin, tuja iina apachji aajakajua nuna pegkegchaujinishkam Jerusalégkan tsaikajua nuna diisag amina aentsjum aidautinashkam dushiktamainawai.
DAN 9:17 Iina Apajuíjiyah, wi amina inakmin segajam nunú wait aneasam antugtukta. Ame emematku ijuntai pegkegma nunú wajukaya awa nunú wait anenjata.
DAN 9:18 Apajuíjuh, wait aneasam antugkagtukta; ¡ii waitiamua nunú diista, tuja ame emematku ijuntai yaakat aya nunashkam tsaikajui! Ii sumag duka pegkeg takau asaikish sumatsji, amek wait anenkagtinaitam nunú dekau asa sumaji.
DAN 9:19 ¡Apuh, ii pegkegchau takamsau ainakuish, wait aneasam tsagkugkagtugta! ¡Apuh, idaikagtutsuk atujatkata! ¡Apajuíjuh, amek anenmamsam, amina aentsjum amina emematjamin aidau anentaimtusam, tuja amina yaaktajum anentaimtusam, kuashat tsawan megkaetsuk wamak yaijatkata!” tusan segabiajai.
DAN 9:20 Tuja nuigtushkam, mina pegkegchaujun pachisan, Israel aents aidau pegkegchaujin, tuja Jerusalégkan pachisnushkam Tuke Pujuu mina Apajuíjun augkun pujuyajai.
DAN 9:21 Nunika Apajuí augkun pujai, yaunchuk ángel Gabriel wantintugkauwa nunú nanaak taawabi. Nunak etsa akagai aagkú Apajuí emematku kuntin maa apetia nuniai taawabi.
DAN 9:22 Nunik chichagtak: “Danielah, chichaman amina shiig ujaktasan minajai.
DAN 9:23 Apajuí amina senchi anempawai, nuadui ame yama nagkamchakum Apajuí augmaum duik nagkamas ame sumamunak Apajuí antugtamak aigmake. Wi nuna pachisan amina ujaktasan tajuagme. Tuja ame kajamjaum dusha wajukatnuk aan kajamjaume nunashkam wi ujaktatjam nunú shiig antukta:
DAN 9:24 “Amina pataim aidau Apajuín intimjukiag pegkegchaun takamsaju asag suwimkan jukiag waituina nunak, setenta semana waitu batsamtatui, tuja yaakat pegkejam tsaikbauwa dushakam nunisag setenta semana asatnai. Imanik waituinak anentaimtan jukiagtinai, tuja Apajuí dita tudaujinak tsagkujatnai, dutikamtai ima pegkeg takata nunú tuke atinai. Tuja Apajuí emematku ijuntai jegamkamunum tesaamu shiig pegkejam tutaya dushakam yaunchuk profeta aidau takasu aina iman shiig iwajamu atinai.
DAN 9:25 Juju ame shiig dekaata: Jerusalén tsaikbauwa nuna iwajatnume tabau chicham antuekatna nunú tsawantin nagkamas yamajam apu etegkamu wantinkatna duwi siete semana jegattawai. Jerusalégnum jinta ayá nunú iwagbaunak, Jerusalén peeja iwagbaujai sesenta y dos semana ashimkagtinai, tujash nunú tsawantinig senchi waitiamu, wake besemag atinai.
DAN 9:26 Sesenta y dos semana nagkaemakmatai, apu atin etegka adaikamun makichkish utugchatji atsujunak maawagtinai. Tuja tikich apu ekemtina nuna suntaji aidau Jerusalégnak jega Apajuí emematku ijuntai jegamkamujai ashí tsaikagtinai. Nunú tsawan uminbauk pachiachbaunum nujag dujajak utuwama numamtuk atinai. Tuja maaniamu, tsainiamu atinai tusa etsegkamua duka imanisag wea weakua amuekatnai.
DAN 9:27 Tuja nuigtu makichik semana inagnamua duwi apu pegkegchau ekemiuwa nunú aents aidaujai chichaman umiktinai. Dutikayatak jimaituk semana wegak Apajuí emematku kuntin maa nuna neje ashí apetia nuwi shiig pegkegchaun tsumainun takamsatnai. Nuniau asa Apajuí emematku anentag suwamuk atsusti titinai. Tusa umik pujuttaman, Apajuí suwimkan susa maatnai”, tujutmayi.
HOS 1:1 Beeri uchiji Oseasan Tuke Pujuu ausauwai. Nunak Ozías, Jotam, Ahaz, Ezequías aatus Judá wegantu aidaun apuji aidau, tuja Joásan uchiji Jeroboam Israel aents aidaun apuji aatus batsamajaku aina nunú tsawantin ausauwai.
HOS 1:2 Yama nagkamchak Tuke Pujuu Oseasan ausauwa duka jujuwai: “Israel aents aina duka mina umigtutnak idaisaje, nuninak nuwa akika dutiktaijai betek wajasaje, nuadui ameshkam nunismek nuwa akika dutiktaijai nuwenata, nunikam nuwi uchi akiata. Dutikamu asag ditak nuwa akika dutiktain uchiji agtinme”, tiuwai.
HOS 1:3 Tusa tima múun Diblaim aajakua nuna nawanji Gómeran nuwatuk pujus uchi aishmagkun akiauwai.
HOS 1:4 Nunú uchi akiinamtai Tuke Pujuu Oseasan chichajak: “Anú uchi daajig Jezreel adaikata, wagki ujumak tsawan asan, apu Jehú Jezreel nugkanum kuashat amujatkawa nuna umiakun, suntag Israelnumia aidaunak ashí ijinattajai. Dutikan Jehú apu wajas puja nunak atakesh tuke apu achatnun atankittajai.
HOS 1:5 Nunak nugka paka Jezreel tutaya nuwi Israel aents aidaun shiwaaji jetekag ijinatnume, dutikainak achija yajuaktinme titatjai”, tiuwai.
HOS 1:6 Duwi pujus Gómer ataktu ejapjuk tsawanji jegajim nuwauchin uchigmakui. Nunikmatai Apajuí Oseasan chichajak: “Israel nugkanmaya aidaunak ataktuk wait anenjashtatjai, tuja nuigtush ditá pegkegchaujinash tsagkujashtatjai. Dutikatin asamtai, uchi nuwauch akiina nuna daajig Lo-ruhama adaikattame.
HOS 1:7 “Untsu Judá wegantu aina nunak wi, apu Tuke Pujuunuk, wait anenjattajai. Tujash wika ditanak suntagjai ijunjanuk, nagki, puyag, flecha, caballo, aidaun yajuakan maaniankesh ayamjukchagtatjai ima wiki ayamjukagtatjai”, tiuwai.
HOS 1:8 Tuja Gómer niina nawanji Lo-ruhama aajakua nuna amuntsuamun atsujuk pujus, ataktu ejapjuk uchi aishmagkun uchigmakui.
HOS 1:9 Nunikmatai Tuke Pujuu Oseasan chichajak: “Anú uchik Lo-amí, adaikattame, wagki atumek mina aentsug ainatsjume, wishakam atumi Apajuígmichuitjai.
HOS 1:10 “Tujash Israel aents aidauk shiig kuashat yujakag, nayantsa kamatkaji dekapamainchauwa iman wajasagtinai. Nunú tsawantinig Apajuík ataktu chichaakug: ‘Atumek mina aentsjuchu ainagme’, tichatnai. Ayatak dekas: ‘Atumek Apajuí tuke pujuuwa nuna uchiji ainagme’, titinai.
HOS 1:11 Tusa tima Judá wegantu aidau Israel aents aidaujai ijunag dita apujin ima makichik adaikagtinai. Dutikawagmatai tikich nugkanum achija yajuakbau batsatushkam waketug kaunawagtinai. Duwi nagkamas Jezreel nugkanmak shiig aneasa pujamu atinai”, tiuwai.
HOS 2:1 Nunik atumi yatsum aidau waketug kaunawagmatai atum chichagkujum: “Apajuín aentsji aidau” titinaitjume. Untsu nuwa aidau chichagkujum: “Wait anenjamu aidau” titinaitjume.
HOS 2:2 Nuigtu Apajuí chichaak: “¡Wika Israel aents aidaunak nuwa nuwatkamua numamtin anentiajai, tujash ima minakek umigtukchau ainawai. Nuadui wika yamaik pachikchagtatjai. ¡Atum dita uchiji aidautijum apu chichaman epegkin aidaunum chicham egketuatajum. Niig yamaik mina duwagchauwai, tuja wishakam niina aishichuitjai! Untsu wainak nuwa akika dutiktaijai betek wajá puja nuna idaisati! ¡Niina pakiji aidaun shiig anemtika pujutsuk idaisati!
HOS 2:3 Nuna nuniachkuig, jáanchjin awitkan nii yama akiinak wisu akiinauwa nunin awajsattajai. ¡Dutikan uwejush nugka buku takasa pujumainchau awajsattajai! Dutika ai kitakai jinattawai.
HOS 2:4 Tuja niina uchiji aina duka mina uchigchau ainawai, nunak nii pegkegchaun takamak wekagas uchigmaju asamtai, wika ditanak wait anenjachagtatjai.
HOS 2:5 Israel aents aidauk nuwa akika dutiktai datsantainkachua nunin ainawai. Nunin asag chichainak: ‘Mina pakig aidaun egaktajai, wi atsumamu aidaunak dita: yujumkan, yumin, jáanch lana najanamun, lino najanamun, aceiten, vinon, kugkuin aidaun aatus sujuinak wi wakegamun umigtin ainawai’, tuinawai.
HOS 2:6 Tuidau asagmatai, jiinki yujasag pakijin igkugkainum tusan, jintanak jagki awajsattajai.
HOS 2:7 Dutika ai, dita pakijin igkugtag tuinakush igkugchagtatui, tuja nuigtush wainkachagtatui. Nuninak: ‘Yama nagkamchakun aishinauwaitag nujai ima shiig pujuyajai, dekas niyai wakitkitjai’, titinai.
HOS 2:8 “Tuja wika niina kuitamu asan, nii yuwatnunak, nii atsumamujinash ashí suwaitag nunak niig anentaimas diyatsui. Wika niinak oronash, platanash suwaitjai. Dutika aish nuna yajuak nii ememattin aidaun dakumag najanauwai.
HOS 2:9 Nunin asamtai, wi nii yuatnun trigon, vinon, tuja nii asepaktinun lana, lino najanamu aidaun susauwaitag nunak imatiksanuk ashí atanjattajai,
HOS 2:10 dutikakun niina pakiji aidau emtin wisu awikan inatsagtatjai. ¡Nuna dutikai niina ayamjumainuk makichkish atsuttawai!
HOS 2:11 Tuja maki makichik semanatin, maki makichik nantutin, maki makichik mijantin jiistamtaya nunak jiistamashti titatjai. Nuadui nuna jiistamak dakujinuwe nunak ataktuk nunikchattawai.
HOS 2:12 Higo ajakbau ayá nuna, uva ajakbau ayá nujai pachis: Juka mina pakiig aidau sujusbau ainawai tusa emema puja nunak unuptuktatjai, dutika ai ikamia kuntin aidau ashí amutkatnai.
HOS 2:13 Tuja dakumkamu aidaun emematak incienson apejakui, nuigtush mina kajimatjuki, niina pakijin pataetak patakumtain patakuma, nugkutain nugku nugkus iwagmamag weawai. Nuni wekagu asamtai wi suwimkan susattajai. Witjai Tuke Pujuun, nunak dekas tajai.”
HOS 2:14 “Aatus mina aentsug pegkegchaunum wekaekuish, wi jukin uwegshunum emattajai, dutikan ataktu mina anenti tusan shiig kuitamkattajai.
HOS 2:15 Dutika unuinakan, niina nugken uva ajakbau ayá nunak imatiksanuk awagtuktatjai. Tuja muja Acoran pakaji pegkegchauwa nunak pegkeg awajsattajai, dutika ai nuwiyan yuwa pujustinai. Nuniak ataktu nagkama yama nagkamchak aya iman atatui, nuniak egiptunmaya jiinki shiig aneeya imanun anentaimtatui.
HOS 2:16 Nuadui ataktu awagkig: ‘Baaldauwaitjai’ tichatnai, dekas: ‘Wika aminuitjai’, tujuttinai. Ataktu awagkig wainka apajuímtai aidaun daajinak adaikashtin ati tusan idaimitkastatjai. Witjai Tuke Pujuu Israel aents aidaun Apajuíjinuk. Nunak dekas uminkatnun tajai.
HOS 2:18 “Nunú tsawan jegamtaig, mina aentsug aidauk shiig agkan maaniamu atsaunum batsamsatnume tusan kuitamkagtatjai. Tuja kuntin aidau ditan waitkamainush atsutnai.
HOS 2:19 “Israelah, wika aminak waji nuwaitkuish ataktu nuwatkattagme, ajumaish amek tuke mina duwag atinaitme. Wika aminak shiig senchi aneajame, nuadui amek dekas mina shiig duwag wi chicham umikbaunum nuwenin aina nujai betek nuwatkamu atatme.
HOS 2:20 Wika aminak mina duwajun kuitamainaitag imatiksan kuitamkattagme, dutikakun ima aminak anettagme, nunú diisam, dekas juwapita mina apujuk tujuttinaitme.
HOS 2:21 Israel aents aidauwah, nunú tsawan atina duwi wi yumin yutumtijatnaitjai,
HOS 2:22 dutika ai, trigo, aceite, vino aatus shiig kuashat aitnai. Aatus Jezreel nugka duka shiig pegkeg ajak tsapau wajastinai. Witjai Tuke Pujuu Israel aents aidaun Apajuíjinuk. Juna taja nunak dekaskenum tajai.
HOS 2:23 Mina aentsug aidaunak Israel nugkanum ima midauk agtinun batsastinaitjai. Dutikan chichagkun: ‘Atumek mina aentsjuchu ayugme, tujash yamaik mina aentsug ainagme’, titinaitjai. Untsu dita chichagtuinak: ‘¡Ametme iina Apajuíjig!’ tujutiagtinai.”
HOS 3:1 Tuke Pujuu ataktu chichagtak: “Oseasah, amina nuwemek wainak takamin asa, amina kumpagmijai pakijina pujawai. Nunin aigkish kajegtsuk ataktu aneeta. Tuja Israel aents aidaushkam dakumka najanamu aidaun ataktu waketjukiag emematuinak anentag torta susamu aidaun yuu batsatui. Nunin ainaig wika ditanak aneajai”, tujutmayi.
HOS 3:2 Tusa tujutmatai, mina duwajun awagkitasan niina pakijin quince kuichik plata najanamun akikmaijai, dutikan nuigtu cebadan trescientos treinta kilo susabiajai.
HOS 3:3 Dutikan mina duwajun chichagkun: “Yamaik mina duwag wajasu asam, pegkegchau takamtsuk pujusta. Nuniakminig wishakam pegkegchaunak takamjuschattagme. Untsu ujumak tsawan tsanigkaik kanagchattaji”, tibaijai.
HOS 3:4 Numamtuk Israel aents aidauk kuashat tsawan apugtuchu batsamsagtinai, tuja Apajuínash anenjakesh susachagtinai, Apajuísh ditanash wajina dutikatnume tusag wakegawa nunakesh dekachagtinai, tuja sacerdote aidaush atsutnai, dita jenish dakumka najanamu emematmainuk makichkish atsutnai.
HOS 3:5 Nunú nagkaemakmatai Israel aents aidauk awake anentaimjag Tuke Pujuuwai ataktu waketjagtinai. Nunikag nunú tsawan umintai, ataktu Tuke Pujuun eme anentus umijuinak, nii yaimpakti tusag segagtinai. Nuninak dita apuji Davitan ataktu egakagtinai.
HOS 4:1 Israel aents aidauwah, Tuke Pujuu chichaa nunú antuktajum. “Juju nugkanmayag waitjutsuk chichauk atsawai, tikichjaish aneeninatsui. Tuja minashkam iina Apajuíjiyapi tujutuinatsui. Nuadui juju nugka juwi batsamin aidaunak Apajuí chichaman umigkae.
HOS 4:2 Juju nugka juwig ayatak waitjamu, umikchatnaitak Apajuí daaji adaisa tsanumat, magkagtut, kasamat, nuwennush, aishinnush antugdayas batsamtsuk ikagdaibau, aju ajumag magkagtamu aina duke piyak awai.
HOS 4:3 Iman wajas au asamtai, aents aidauk buutuinawai, nuninak kakaagchamin dekapenawai, tuja kuntin ikamia aidaush, chigki aidaush, namak nayantsanmaya aidaush ashí jinuinawai.”
HOS 4:4 Tuke Pujuu chichaak: “¡Sacerdote aidauk makichkikesh tikich aidaunak jiyakchati! Tuja utugchatnakesh apujtuschati. Wika atum sacerdote aidautigminak kajejajime.
HOS 4:5 Atumek tsawaish kashish, tuke pegkegchau takamjume, nuniakjum tikich profeta aidaush, pegkegchau takamtikagme. Nunin asagmin amina aentsjum aidaunak ijinattajai.
HOS 4:6 Mina aentsug aidauk dita Apajuíjichua nunin anenjuidau asagmatai ijinauwaitjai. Untsu amek sacerdote mina umigtukchau asamin, wi aminak ajapattagme, wagki amek mina chichameg umikchaume, nuadui atum wegantu aidaunashkam pachikchatnaitjai.
HOS 4:7 Kuashat sacerdote kawenakug, imanisag pegkegchaun takainak mina shiwagmatiagmayi. Nuadui eme anentam aina nunak, dushiktai awajsagtatjai.
HOS 4:8 Tuja mina aentsug aidau dita tudaujin tsagkugnajagtatus kuntinun ikaunmagtai Sacerdote aidauk nuna yusa batsatu asag, puyatjutsuk pegkegchaun takastinme tusag idayinawai.
HOS 4:9 Nunin asagmatai, ditanak mina aentsug aidaujai ijumjan suwimkan susagtatjai.
HOS 4:10 Mina umigtutan idaisaju asag imanik yuwinakush shiig aneasag pujuschagtinai. Tuja uchi akiami tusag tuinakush uchinash akiachagtinai”, tawai.
HOS 4:11 Nuigtushkam Apajuí chichaak: “Israel aents aidauk nuwan yujajuinak, vino nampe yujau asag, shiig anentaimja pujumainjig atsujuinawai.
HOS 4:12 Nunin asag numi dakumka najanamu aidaun wajinjutpatig, tuja atakea duish wajukatnukitji tusag nuna jegantun iini yujawai. Pakijintanak idaimainchau dekapedau asag, mina aentsug aidauk nuna yujajuinak mina umigtutan tupanjujag wagakag wainak yujawai.
HOS 4:13 Nugka nainnum wakag imanui numi ayaunum nuna wakentin bikintunum, kuntinu maa apenak, kugkuin incienson apenak dita apajuímtaijin emematuinawai. ¡Dita nawanji aidauk tuja dita uchijin nuwe aidaushkam nuwa akika dutiktai aina nujai betek ainawai!
HOS 4:14 Nunik pegkegchaun takamainakuish, wika ditanak suwimkanak susashtatjai, wagki atumshakam nuwa wainka apajuímtai aidaun apajuímin aina nuninjai tsanijinjume. Aents shiig anentaimsa pujutan megkaga duka tuke beseak nuninawai.
HOS 4:15 Israel aents aidauwah, atum aidautijum, wainka apajuímtai yujagjuminish, Judá wegantu aidauk atum pegkegchau takajum nunak takaschagtatui. ¡Guilgalnum, tuja Bet-avénnumshakam dakumka najanamu ememattai aina duka emematigpa! ¡Nuigtush Tuke Pujuu daajin umiktatjai tusagmek tuu yujaigpajum!
HOS 4:16 Israel aents aidauk antakchau intimkiu, burro nuwa unuinakchamujai betek ainawai. Nunin aina nunash itugsag Tuke Pujuush uwig tsakatuch chijichi pegkeg samekbau ayamunum kuitamaina ¿imatiksash kuitamkati?
HOS 4:17 Israel aents aidauwah, wainka apajuímtai aidau ememattasajum wakegakjumek emematu yujatajum. ¿Atumek datsaamtak wakegajum, atsa shiig anentam atak wakegajum?
HOS 4:18 ¡Nampenakug nuwa akika dutiktai aina nuna yujajuinawai! Pegkeg takatnak dakituinak, pegkegchau datsanmainun yujajuinawai.
HOS 4:19 Wainka apajuímtai aina nuninun emematu yujaidau asag, dase chijichi kagakun umpui ajapama numamtuk ajapeam agtatui”, tiuwai.
HOS 5:1 ¡Sacerdote aidauwah, antugtuktajum! ¡Israel aents aidauwah, antugtuktajum! Apu patayi aidauwah, shiig antuktajum. Atum aidautijum mina aentsug aidau tsanuakjum, wainka apajuímtai aidau ememattajum tusajum dita dakituinaig, waitkasjum muja Tabornum, Mizpanum awekasjum, Sitima pakajin yumigmat taimu ukumkimujai betek awajsauwaitjum duwi suwimkan amastatjime.
HOS 5:3 Efraín wegantu aidauwah, Israel aents aidauwah, wika atum wajuku ainagme nunak shiig dekajai. Atumek nuwa akika dutiktaijai betek ainagme.
HOS 5:4 Nuadui ataktu Apajuí umigkatag tajuminish, atumi pegkegchau takataijum aina nunú nunimainchau etamainawai. Wainka apajuímtai aidau emematuidau asajum minak iina Apajuíjiyapi tujuttsugme.
HOS 5:5 Atumek pegkegchau, emebau ainagme, nunin asajum ijina utsam atatjume. ¡Judá wegantu aidaushkam dutiksaik ijinam agtatui!
HOS 5:6 Tuke Pujuu tsagkugtamjati anentag susami tusag, uwig aidaun, baka aidaun yajuak shimiagtinai, nuninakush Apajuí idaisamu asag, niinak wainkachagtinai.
HOS 5:7 Ditak Tuke Pujuunak umigchau ainawai, dita uchiji aina duka mina uchigchau ainawai. Ima Apajuínak umigchau aina duwi dita nugkenak ditajai ijumag makichik nantuik tsaika emegkam agtatui.
HOS 5:8 ¡Kachu Guibeánum umpuagtajum, untsu uwija kachuji Ramánum umpuagtajum! ¡Adeagtinme tusa umputai Bet-avénnum umpuagtajum! ¡Benjamín wegantu aidau ujaktajum aneaku pujustinme!
HOS 5:9 Israel aents aidaun suwimkan susattajai tiuwaitag duka imanisag uminkattawai tusan etsegjai. Nuna dutika ai, Efraín wegantu aidaun nugkeg yaakat aidaujaí tsaigkam bashiak asatnai.
HOS 5:10 Judá wegantu aidaun apuji aidauk aents ajantsuk tikichi nugken kasajin aina nujai betek asag Israel aents aidau nugken atantuinawai. Nunin asagmatai wi kajekbaujui ditanak suwimkan susagtatjai.
HOS 5:11 Israel aents aidauk wainka apajuímtai aina nuninun apajuíma yujau asagmatai, tepejus chichajuinak ajantusash diitsuk dushiki batsamtuinawai.
HOS 5:12 Nuadui Israel aents aidaunak, Judá wegantu aidaujaí ijinattajai. Mamuk numin amuwama numamtuk ashí amuktatjai.
HOS 5:13 Tuja Israel aents aidauk, Judá wegantu aidaujai dita kuashat pegkegchau takamsamujin mai suwimka jukiag waituinak, asirianmaya apu yaimpakti tusag shimutkagtinai, tujash niig makichkish yaigchatnai.
HOS 5:14 Israel aents aidaunak, Judá wegantujai leónjai betek jetektatjai, dutikan wiki achikan asaajan ukuktatjai, nuna dutikai ditan ayamjumainuk makichkish atsuttawai.
HOS 5:15 Dutikan ujumak tsawan pachitsuk idaisan dakastinaitjai awake anentaimjatnume tusan, dutika ai, dita pegkegchau takamsamujin anentaimtusag buu buuttajai egatkagtinai, tawai Apajuí tiuwai, Oseas.
HOS 6:1 Nuna antukag Israel aents aidau chichainak: “Kaunatajum ataktu wakitki Tuke Pujuu umigkagmi, nii kajegtamak suwimkan amasu akush, nigki wait anenjamag tsagkugtamjattawai.
HOS 6:2 Jakaujai betek batsatag nunak jimag tsawan asa, nuniachkush kampatum tsawan asa, inantamkimtai niijai ijutkau atatji.
HOS 6:3 ¡Tuke Pujuu umigtanum kakanmamsagmi! Imaniajinig etsa kashi kashinig jiina numamtuk, tuja numi yagkujutnum yumi yutak nugka uchupiama imanis iina yaimpaktatus tajutjamattawai”, tuidau.
HOS 6:4 Tusa tiagtai Apajuí ditan ayaak: “Israel aents aidauwah, Judá wegantu aidauwah, ¿itugkainjimki atumnash? Atum mina aneagme tujutjum duka yujagkim kashi kakegak, tuja jegashik kashi kakekau, tsawak kashikmas megkagama numamtuk atumi anenkeg megkaewai.
HOS 6:5 Nuadui, wi mina profetag aidaun akatja ishiaka ai, yujasag dita mina chichamjun etsejuinamu chaajip iyaak tsaimaina imatijamawaje, wi shiig takamua duka jii keeka tsaaptin emaama imanai.
HOS 6:6 Atum mina anentag sujajum nunak wika dakitajai, tuja mina emematjakjum kuntin maajum nuna neje ashí apeajum nunashkam dakitajai. Wika ayatak mina anentinme, nuninak: ¡Ametme iina Apajuíjimek! tujuttinme tusan wakegajai.
HOS 6:7 Tujash mina aentsug aidautigmek, Adágjai betek antakchau intimkiu ainagme, nuadui chicham umiktinun wi amasuitag nunú umikchaugme.
HOS 6:8 Yaakat Galaadnumak ayatak pegkegchau aidauk magkagtin aidaujai batsatui.
HOS 6:9 Sacerdote aidauk jinta Siquemnum wetaya nuwi kasajai betek uuma yujawai, aents nuni wedaun mainak wajijin atankiagtatus.
HOS 6:10 Tuja Israel aents aidauk nuna nagkaesau pegkegchau Apajuín umigchau intimkiu aidaun wainkajai.
HOS 6:11 Tuja Judá wegantu aidautigmeshkam pegkegmauchik ainatsjume, nuadui atumshakam suwimak jukittagme. “Nunú ashí nagkaemagmatai, mina aentsug aidaunak dita nugken waketjati titinaitjai.”
HOS 11:1 “Israel aents aidaunak tsakatuch ainaig nagkamsan aneen ayajai, wi ditanak mina uchig asagmatai, Egipto nugkanum batsatun jiijuitjai.
HOS 11:2 Dutikamaitak mina umigtutan dakituinak nuni senchi tupanjuyanume, nuninak wainka apajuímtai aidaun emematuinak kuntinun maa apeenak, kugkuin inciensonashkam apeeyanume.
HOS 11:3 Nunin ainaig wi ditan aneau asan uchijai betek jukin egkesan emayajai, dutikakun wekaetanash jintintuawabiajai, yutainash ayujiajai, utugchatnumash yaigkabiajai. Imatiksa kuitamaitak, Apajuíyap kuitamjamua tichau ainawai.
HOS 11:5 Nunidau asag mina umigtutnak dakitjau ainawai. Nuadui egiptunmaya aents aidau inainak waitkajaku aina nunak, yamaik asirianmaya ditanak inainak waitkasagtatui.
HOS 11:6 Dita yaaktaji aidaunak tsaigkagtinai, dutikainak aents aidaunashkam ijinawagtinai, nuna dutikainak dita anentaimjamujinak ashí idaimitkasagtinai.
HOS 11:7 Mina aentsug aidauk, wainka apajuímtai aidaun emematuinak mina umigtutnak dakituinawai. Nunidau asag mina idaitusag batsata nunisag batsamsatatus wakegainawai. Senchi untsumainawai, tujash makichkish ditan yayauk atsawai.
HOS 11:8 “¡Israel aents aidauwah, wika atumi aneakun shiig senchi waitiajai, nuadui wika kajimatkinuk idaimaitsujime! ¡Wika Admánmaya aents aidaun, Seboímnumia aents aidaujai dita pegkegchaujin ijinauwaitag imatikanuk tikima ijinmaitsujime!
HOS 11:9 Wika atumnak kajekbautkek suwimkanak amaschagtatjai, Tuja Efraín wegantu aidaunak ataktuk ijinashtinaitjai, wagki wika aentschauwaitjai, wika Apajuíyaitjai. Witjai Tuke Pujuu pegkegmanuk, wika atumjai ijutkau pujajai, wika atumin ijinatasanuk tachmajai.”
HOS 13:4 Tuke Pujuu chichaak: “Israel aents aidauwah, witjai apu atumi Apajuígminuk, atum Egipto nugkanum batsatutigmin wi jiijuitjim duwi nagkamsanuk yamaikish wika atumi Apajuíjiyaitjai. Witjai atumin uwemtiknunuk.
HOS 13:5 Uwejush yumi atsau nimpainnum batsabiujum duish wi atumnak kuitamkauwaitjime.
HOS 13:6 Tujash atumek yutai kuashat ajutjamu asamtai, ememakjum mina kajimatjukiu ainagme.
HOS 13:7 “Nuadui león kajeka kuntinun jetegama imatikattajime. Jintá yantam uumka tepesan ikamyawajai betek tepegkattajime.
HOS 13:8 Chayú niina uchiji megkaetujam wainkatatus egak ishamain wajama imanika jiintukin detsepen ichinjattajai; dutikan nuwig leónjai betek amuktatjai.
HOS 13:9 Israel aents aidautigmek wi kuitamkam batsamnaitjume, tujash yamaik wi ijinattajime, dutikawaipa tujutmainuk atsawai.
HOS 13:10 Dusha atumi apujish ¿wajukame? ¿Wagka nunú untsuatsjume ayamkagtukta tusajum? Tuja nuigtush tikich apu aidau adaitujata tusajum sumabiujum dusha ¿wajukawagmae?
HOS 13:11 Imatkugmin atumin kajegkan apun adaitukbaijime. Tuja yamaishkam nunisnuk atum kajemtijuku asagmin nunak atankittajime, dutikam apugtuchu juwaktatjume.
HOS 13:12 “¡Atum pegkegchau takasbau aidaunak ashí papiinum agagjai!
HOS 13:13 Israel aents aidautigmek anentainkachu ainagme, nunin asajum uchi akiinatnuji jegau aig, tutupit egkemtsuk tunija egkemama nuninaitjume.
HOS 13:14 Nunin ainayatkujum Apajuí uwemtijamjati tusajum dakagjume. ¡Wika atumnak jatanmak uwemtikjashtatjime! Nuadui: ‘¿Jaka megkaetaish tuwi awa? ¡Amina senchigmejai juwi taam juju aents aidau ijinata!’ tusan untsuajai.
HOS 13:15 Yaja aneasjum chijichi tsupigbau ataktu pegkejan tsapaama numamtuk wajakainjumtaih, nuniakjuminish dase uwegshunmaya dasentak entsa pukuni jiinun buku emama numamtuk wi ijinan emegkagtatjime. Dutika ai atumi shiwaajum aidau wajijum pegkeg akik aidaun yajutjamkagtinai.
HOS 13:16 Samarianmaya aidauk Apajuín shiwagmawaju asag suwimkan jukiagtatui. Nuwi aents aidauk maaniamunum jinawagtatui, uchi piipich aidaunak nugká ajiajag kajegkagtinai, untsu nuwa ejamtin aidaunak ejapeniag ijinawagtinai”, tawai.
HOS 14:1 Oseas Israel aents aidaun chichajak: “Israel aents aidauwah, atumi pegkegchaujum wagagtamkimtai, kakaumainchau wajasjum batsatjum nunú idaikujum ataktu atumi Apajuíjum, Tuke Pujuuwai minitajum. Nuniakum juju aatsajum Apajuí segatajum: ‘Apajuíjuh, amek pegkejaitme, nuadui wait aneasam iina tudaujish tsagkugkagtugta, dutikawamin ii ame emematku kantabauwa nunú amina shiig awajtamkati.
HOS 14:3 Asirianmaya aidauk carrogtin ainakush, iinak ayamjutpamainchau ainawai, nunin asamtai ataktu awagkik ii dakumka najanamu aidauk emematchattaji. Bitaikshakam ima aminiyanak anenkanak wainainawai’ titajum”, tiuwai.
HOS 14:4 Tuke Pujuu Israel aents aidaun chichajak: “Wi kajekbaugnak mijaakjai, nuniku asan dita pegkegchau ainaigkish, mina anenkajun iwaintukagtatjai, dutika ai nuigtuk intimkichagtatui.
HOS 14:5 Israel aents aidaunmak wika jegashkijai betek atatjai. Tuja dita aidauk Lirio yagkujuwama iman, Líbanonmaya setug shiig kagkapenag wajama iman agtatui.
HOS 14:6 Tuja kanaweshkam olivo kanawejai betek kadaukdauju pegkejuch, Líbanonmaya setug pegkegchin kugkuwama iman agtatui.
HOS 14:7 Israel aents aidauk ataktu wi kuitamkam batsamsagtinai; dutikamu asa trigojai betek tsakajagtinai, nuninak uva yagkujuwama imaniagtinai, kugkuntishkam muja Líbanonmaya vinon kugkuntijai betek atinai.
HOS 14:8 Tuja Efraín nugkanmaya aidau chichainak: ‘Dakumka najanamu aina duka iik makichkish puyatjatsji’, tiagtinai. Witjai mina aentsug aidau segatuinakui antujunuk, witjai mina aentsug aidaun kuitamunuk. Wika pino pegkeg samekbau tuke kukachua imanaitjai, minai pegkeg waji aidaunak jukiagtinai”, tawai.
HOS 14:9 Aents yacha shiig anentaimkau akug, juna chichaman antukti: Tuke Pujuu dutikamu aina duka shiig pegkejai, nuadui dita aidaun diisag tikich aidaush pegkeg takata nunak takamain ainawai. Tuja aents pegkegchau aina duka pegkegchaunak takainawai, nuadui Apajuí ditanak suwimkan suwawai.
JOE 1:1 Joel Petuelan uchiji aajakua nuna Apajuí Israel aents aidaun ujakti tusa akateak aatus tiuwai:
JOE 1:2 Atum chichaman jintinkagtin múun aidautijum juju shiig antuktajum, tuja ashí aents aidautigmeshkam antuktajum. ¡Ipak usumta imajin manchi maki makichik niimtin aidau kakegak iina ajake aidaunak tikich manchi aidau amuak ukubaun ashí amutjamkaji! Tuja ¿atumesh wajutiya junin wantinush wainkauwaitjume? Yaunchuk atumi muunjum aidau batsamajaku aina duka makichkish junin wantinunak wainkachu ainawai. ¡Nuadui atumi uchijum aidau nunú pachisjum ujaktajum, tuja dita ujaktinme dita uchiji aidaun, nuna uchiji aidau ujaktinme dita uchiji aidaun!
JOE 1:5 ¡Nampen aidauwah, nantagtajum, vino umin aidautigmek buuttajum, atum vino umumainuk atsuttawai!
JOE 1:6 Manchi shiig kuashat, suntag maaniatatus shimaujai betek iina nugkeen untsaantugmae. Nuna nai aidauk shiig empek asag, león kajenun naíya iman ainawai.
JOE 1:7 Iman asag uva ajakbau aidaunak higo ajakbau aidaujai ashí tsupije. Imatikau asa kanawe aidaunak ashí pakajug saeptuchu emake.
JOE 1:8 Imatikau asamtai, nuwa nii aishinatag tibau jakamtai, wake besemag pujaku nugkutain nugkuja buutama imanikag, aents aidauk makichkish etsagmainchau buutuinak jakamunum nugkutain nugkuinawai.
JOE 1:9 Tuja Apajuí anentag suwaku vino, trigo, cebada ejemainuk atsutai, jega Apajuí emematku ijuntainmag ejegainachu asamtai, sacerdote aidaushkam buutuinawai.
JOE 1:10 Ajanum ajak ayauk kagaka asae, imaniku asamtai trigok, vinok, aceitek makichkish atsawai. Tuja nugkak uwejush tutuptina nunin wake besemag wajas asae.
JOE 1:11 Atum ajanum takau aidautigmek, uva ajakbaunum takau aidautigmek, wake besemag dekapeakjum buuttajum. Atumek trigo cebadajai ashí jinaamtai, shiig wainka juwakugme.
JOE 1:12 Uva aidau, higo aidau, munchi aidau, palmera aidau, manzana aidau, tikich numi aidau aatus ashí jinaamtai, aents aidauk buutuinawai. Nuninak shiig aneamunak idayinak wake besemag batsatui.
JOE 1:13 Vino, trigo, cebada aina duka atsau asamtai, aents aidauk Apajuínak anentag ejetuinatsui. Nuadui Apajuí emematku ijuntainmak makichkish atsawai. Nunú diisjum atum sacerdote Apajuí altarjin takau aidautigmek wake besemag pujaku nugkutai jáanch nugkugjum kashi buu buutkawajum tsawaitajum.
JOE 1:14 Nuniakjum Apajuí emematku ijuntainum apu múun aidau ashí Israel aents aidaujai ijumjatajum. Dutikajum, ijagma pujusjum Apajuí ausatajum.
JOE 1:15 ¡Apajuí taatnuk namput wajaschae! ¡Tsawan ishamain atina duka ashí jegawai! ¡Pegkegchau takat idaiku Apajuí umigtsujinig, Apajuí ashí senchigtina nunú suwimak ishamainun amastatui!
JOE 1:16 Ii yuwatin agmaya nunak manchi aidau iish wainjinig dukeen amutuk ijinae. Nuadui Apajuí emematku ijuntainum shiig aneasa takau ayag duka nunimainchau wajasji.
JOE 1:17 Trigo ajakbau aidauk, yumi yutushtai ashí jinae, nuadui juuka yumain shiig atsau asamtai, trigo chimpitai aidauk wainak batsamas mamuka utsanui.
JOE 1:18 ¡Iina bakaji aidauk buutuinawai! ¡Uwig aidaushkam buutuinawai! ¡Tagku aidauk yumainji chijichi atsutai, nujantai jinuinawai!
JOE 1:19 Tuja jii kegak dupa aidaunak, numi aidaunashkam apea ijinae. ¡Apajuíjuh, wait aneasam yaijatkata!
JOE 1:20 Entsa aidauk kuyuka buku waigke, tuja jii kegak dupanak ashí ijinae. ¡Imanikmatai kuntin ikamia aidaushkam Apajuí yaimpakti tusag ima aminak segapainawai!
JOE 2:1 ¡Jerusalégnum uwija kachuji umpuagtajum! ¡Adeagtinme tusa umputai Tuke Pujuu emematku ijuntainum umpuagtajum! Nuna antuinak ashí aents aidau Judá nugken batsamin aidauk sapigmainak kujaitnume, wagki Tuke Pujuu taatin tsawan ashí jegae.
JOE 2:2 Nunú tsawanta duka suwe atinai, nunú tsawantinig yujagkim suwe wajastinai. Suntag aidau shiig kuashat depetmainchau muja aidaunum shiyaktatui, nunikag etsa kashikmas yama jiinak etsantug, ashí mujan patamtuwama numamtuk ashí nugkan pampankattawai. Duka yaunchkesh imanuk wainkachbauwai, tuja atakea duish imanuk wainnakchatnai.
JOE 2:3 Nunú iman aina duka jii kegaujai betek asa, nii juwi taatatus minakug ashí apea nagkaemawai. Nunú tatsaigkik nugkak shiig pegkeg ayi, nunú taamtai nagkamas nugkak uwegshujai betek wajase. ¡Nuna uwemtumainuk makichkish atsawai!
JOE 2:4 Nunú manchi aina duka aents caballonum maanitan yacha aidau maaniamunum jetejatmaina imanik utsantawai.
JOE 2:5 Ikam utsaana tsekeamuji antamak carro maanitai shimak wajukama imatui, duka kagaku apeam tsachigtuwama imatui, suntag shiig kuashat ijunag uminas shiwaajin jetektatus ijunama imanai.
JOE 2:6 Nunú manchi aina duka kasajai betek jeganum wakag niimtai ujaimua nuni utsanui. Suntag aidaujai betek yaakat peejamunash tujintsuk pachiachbaunum yaaktan utsantawai. Nunidau asag dita shimamunak nunisag makichkish tunitsuk, shitanitnash shitanitsuk, ukunmakesh wakettsuk shimutui. Tuja akentai aidaun shiig kuashat aketmash ditak nunisag shimawai. Imanik manchi minidaun wainkag aents aidauk senchi ishamainak yapinig puju wajasag kujainawai.
JOE 2:10 Tuja nugkak nayaimpijai senchi uujui, nunitai etsa, nantu kajinag suwe wajase. Tuja yaya aidaushkam etsantainatsui.
JOE 2:11 Tuke Pujuu niina suntaji aidaujai minak chichamujig ipamtajai betek wajawai, Tuke Pujuu suntajig senchigtin ainawai, Tuke Pujuu tabaun umin aidauk shiig kuashat dekapamainchau ainawai. ¡Tsawan Apajuí minamuk ishamain atatui! ¡Imanun atsaneg pujumainuk makichkish atsawai!
JOE 2:12 Tujash Tuke Pujuu yamai juna aatus tawai: “Atum pegkegchau takajum duka idaisajum atumi anentaimijai umigtuktajum, nuniakjum ijagma pujusjum buutkujum Apajuí ausatajum.
JOE 2:13 ¡Pegkegchau takatak idaikujum mina umigtuktajum! Wake besemag dekapeakjum, jáanchjum japiki ichí yujatsuk atumek pempeentumakjum kajegmamkatajum, nuniakjum dekas dewakjapi tumamtajum. Wika kakagchauch wait anenkagtinaitjai. Wika wamak kajechuitjai, nuadui wika tsagkugkagtugtasan pujajai.
JOE 2:14 Nuniagminish nii suwimkan amastag tiu akush tsagkugtamag trigon, vinon nii anentag susatnun shiig kuashat amaschajaintash.
JOE 2:15 “¡Jerusalégnum uwija kachuji umpuagtajum! ¡Ashí aents aidau ijumjatajum! ¡Múuntuch aidau, uchi aidau, uchi muntsu muntsuaku aidaushkam, tuja yama nuwedau aidaushkam jegá batsataidauk ashí kaunatnume! Nunikagmatai ijagma pujusjum pegkegchau takat idaisajum umintsatajum Apajuí ememattasajum.
JOE 2:17 Sacerdote aidaushkam kaunatnume, nunikag altarnum jeganta wajasag buutuinak aatus Apajuín segatnume: “¡Tuke Pujuuwah, amina aentsjum aidau tsagkujata, makichik aentskesh ditan dushijati tusamek idaisaipa! ¡Tuja tikich aents aidau depetkatnume tusamesh idaisaipa! Aents tudau aidau tuke aneasag inimpainak: ‘¿Atumi Apajuíjish wajukame?’ tusag dushiki batsamtinme tusamek idaisaipa”, tiuwai.
JOE 2:18 Tusa imatjumin Apajuí juju nugka juna aneau asa, wait anenjamag chichagtamak: “Juju shiig antuktajum: Trigon, vinon, aceiten shiig kuashat amastatjime, dutikamtai nunú yuwakjum shiig aneasjum pujustatjume. Ataktu awagkinuk tikich aents aidau dushiktai atinme tusanuk idaisashtatjime.
JOE 2:20 Nujinmaya aidau manchijai betek atumin ajaantugmatsuk jetepakaja nunak uwegshunum utsagtatjai. Untsu igku jetepaktata nunak, nayants jakau tutaya nuwi utsaan ijinattajai. Tuja ukuunum jetepaktata nunak nayants mediterraneonum utsaan ijinattajai. ¡Dutika ai nunú kauja senchi mejettawai! “Mina aentsug juju nugkanum batsatutigmek ishamkagtukaigpa, ayatak shiig aneastajum, Tuke Pujuu atumin ayamjutpak, yaunchkesh wainkachbau aidaun iwainaktatui.
JOE 2:22 Kuntin ikamia aidautigmesh, ¡ishamkagtukaigpajum! ¡Ataktu chijichi tsapaktatui! Numi aidaushkam kuashat nejeagtatui, tuja uva aidaush, higo aidaush shiig kuashat aittawai.
JOE 2:23 ¡Atum Jerusalégnumia aidautigmek shiig aneasjum Tuke Pujuu atumi Apajuíjum emematkujum kuntin maajum apeatajum! Apajuí yaunchuk yumin yutumtikjauwa dutiksag yamaishkam yumi yutugtin jegamtai yutumtijattawai. Niina anenken iwaintugmak yagkug yagkujut aig yumi yutut tepeamtai yutuwama nujai betek yutumtijattawai.
JOE 2:24 Nuadui trigo, vino, aceite, shiig kuashat aittawai.
JOE 2:25 “Atumi ajaji aidaun manchi amukmatai, tuja shiwag aidau tsaigtamkamtai, ajakjinchau wajasujum nunak Apajuí yaunchuk aajakua imanuk awajtugmastatui.
JOE 2:26 Atumek shiig yuwajum pujusjum Apajuí ememattinaitjume, wagki nii atumin ayamjutpak wainchatai ishamain aidaun kuashat iwainajui. Nuadui niina aentsji aidauk wainka inatsamak yujashtinai. “Witjai Israel aents aidaun Apajuíjinuk, wika mina aentsug aidaujai pujajai. Nuadui ima wiki dita Apajuíjig atinaitjai.
JOE 2:28 Nunú uminkamtai, mina Wakanjun ashí susagtinaitjai, dutika ai nuwa aidau, aishmag aidau ashí mina pachitus etsejiagtinai. Tuja múuntuch aidaujaig kajanum chichatnaitjai, untsu datsauch aidaunak pan wantintukan augtinaitjai.
JOE 2:29 Tuja nunú tsawantaik, inak nuwa aidaunash, aishmag aidaunashkam mina Wakanjun susagtinaitjai.
JOE 2:30 Yaunchkesh wainkachbaun ishamain aidaun nayaimpinum iwainagtinaitjai, dutikakun nugkanmashkam, numpan, jiin, senchi bukuitaun iwainagtinaitjai.
JOE 2:31 Etsag etsanjashtinai, tuja nantushkam numpa iman wajastinai, juka eke Tuke Pujuu iina apuji Apajuí minitin tsawan ishamain atina nunú jegatsaig nagkaemaktinai.
JOE 2:32 Imanitaish ima Tuke Pujuunak kajitus umijuinak segaidauk uwemjagtinai. Tuke Pujuu anagkagtuauwa duka imanisag muja Sión yaakat Jerusalégnum uwemtak atinai, Apajuí etejamu aidauk jatsuk uwemjagtinai”, tawai.
JOE 3:1 Nunú tsawan jegakuig, Judá wegantu aidau Jerusalégnumia aidaujai achija yajuakbau batsatunak awakjatnaitjai.
JOE 3:2 Untsu aents tikich nugkanmaya aidaunak Josafat nugka pakajin ashí ijumjatnaitjai, dutika ijumjan, dita mina aentsug Israel aents aidaun achija yajuakag tikich nugkanum dapampaak emegkajag, dita nugke aidaunashkam atanjag, dita uchiji, nawanji aidaunash kuichkin juwinak, tikich nugkanum sujujag nunú kuichkia duwi vinon sumak umuinak nampenak, nuigtushkam nunú kuichkia duik nuwa akika dutiktai aidaun yujaju asagmatai, suwimkan susagtinaitjai.
JOE 3:4 Atum Tiro nugkanum, Sidón nugkanum, filisteo nugkanum batsamin aidautijum mina aentsug Israel aents aidau jeteajum dusha ¿wisha itugkamu asagmea jeteajume? Atsa ¿iikmakmi tusagmek aikajum? Nunú atum eke jeteatsjuminig, wiyá atumnak suwimkan amasan ijinattajime.
JOE 3:5 Atumek oro, plata, tuja ashí tikich waji pegkeg akik midau aidau yajuakjum, atumi apajuímtaijum emematku ijuntai jegamkamunum ashí utsauwaitjume.
JOE 3:6 Atum Tironmaya, Sidógnumia aidautijum Judá wegantu aidau Jerusalégnumia aents aidaujai achija yajuakjum, griego aidaun inataiji atinme tusajum Grecia nugkanum sujujuitjume.
JOE 3:7 Dutikam nuwi batsatun wi ditanak jiija yajuakan ikaunmattajai. Untsu atumnak mina aentsug waitkasuitjum dutiksanuk wishakam iikattajime.
JOE 3:8 Dutikakun, atumi uchijum aidaun, nawanjum aidaujaí, Judá wegantu aidaunum sujutjattajime. Dutika ai dita yajuakag Sabá aents aidaunum sujujagtinai. Witjai Tuke Pujuunuk, nunak dekas uminkatnun tajai.
JOE 3:9 Juju chicham tikich aents aidaunum etsegkatajum, dutikajum ¡suntag maanitan yacha aidau ijumjajum shiig umintsatajum! ¡Nunikjum Apajuín aentsji aidaujai maaniatajum!
JOE 3:10 Atumi takataijum aidau maaniaku jukitin, nagki, puyagjai najankatajum. Tuja aents sapig aina nunú, wajiu wajastinme.
JOE 3:11 Ashí atum Judá wegantu aidaun shiwaaji aidautijum Josafat nugkanum wamak kaunajum ijunjatajum. Tuja aents kakagchauch maanitan dakitin akush, maanitan yacha wajasag ashí ijunjatnume. Nunikagmin ashí aents jutii aidauti nugken ijus batsamin aidaunak Tuke Pujuu suwimkan susattawai.
JOE 3:13 Wagki nunú aents aidauk shiig pegkegchau ainawai, nunin asagmatai, trigo tsamaku tsupija juutiama numamtuk tsupigta; tuja ajak juutak tsawantak uminkae, nuadui uva tsamakmatai juuka vino najanatasa najatiama numamtuk awajkata. ¡Dita tudauji aidauk dekas shiig múuntai!
JOE 3:14 Tuke Pujuu taatin tsawan uminu asamtai, Josafat nugkanum aents aidau shiig kuashat ijunjaje.
JOE 3:15 Tuja nantuk etsajai mai kajinak suwe wajastatui. Yaya aidaushkam etsanjachagtatui.
JOE 3:16 Tuke Pujuu kajeka muja Siógnum pujusa chichaak ipamtajai betek wajatai, nuna antukag nugkak nayaimpijai uugtatui. Imanitaish Israel aents aidaunak Tuke Pujuu niina aentsji asagmatai kuitamkattawai.
JOE 3:17 Tuja Tuke Pujuu niina aentsji aidaun chichajak: “Atumek nunú tsawan uminkui, mina pachittsajum dekas iina Apajuíjiyapi tujuttinaitjume. Wika muja Sión wi etegkamua nuwi pujajai. Jerusalégkak pegkejam mina aneetaijui, nuadui shiwag tikich nugkanmaya aidauk ataktu utuawajag makichkish dajagchagtinai.
JOE 3:18 Apajuí shiwag aidaun suwimkan susa ijinamtai nagkamas, shiig kuashat uva ayau asamtai, vino najanamu aidauk shiig kuashat aittawai, tuja baka aidaushkam shiig kuashat ayau asamtai, nuna muntsuji ijugbauk shiig kuashat mujanmaya yumi betsaka akagama iman atinai. Judá wegantu aidaun nugkenig yumi shiig kuashat aitnai. Mina jegajuiya yumi pukuni jiinki Sitim nugka pakajin ashí ukattinai.
JOE 3:19 Untsu Egipto nugkanmaya aidau, Edom nugkanmaya aidaujai Judá wegantu aidaun utugchatji atsaunak, tuke aneas jetekag dita nugkenig aents utugchatjinchaunak ijinawaju asagmatai, suwimkan susagtatjai. Dutika ai, dita nugkega duka aents atsau bashiak pegkegchau wajas asattawai.
JOE 3:20 Judá wegantu aidau jinauwa nunak wi iikmatkattajai. Nuna dutikau aidauk suwimkan jutsukek pujuschagtatui.
JOE 3:21 Untsu Judá wegantu aidau nugkeg agkan bashiakag asashtinai, Jerusalégchakam agkantak aents atsauk achatnai. Tuja wika Jerusalégnum muja Sión wi etegkamua nuwi pujuttajai”, tawai.
AMO 1:1 Nugka uugbau atin jimag mijan ai, Ozías Judá wegantu aidaun apuji, tuja Jeroboam Joása uchiji Israel aents aidaun apuji aatus batsamajaku aina nunú tsawantin, Amós uwija kuitamin yaakat Tecoanmaya aajakua nuna Apajuí akatjauwai. Dutikam Israel aents aidaun ujakui.
AMO 1:2 Nunak aatus tiuwai: “Tuke Pujuu kajeka Jerusalén pujus chichataik, chijichi aidauk kagaka jinawai, tuja muja Carmelonum ajak pegkeg wegajushkam kagaka jinawai.”
AMO 1:3 Tuke Pujuu chichaak: “Damasconmaya aidauk ayatak tudauk ainawai. Iman asagmatai, makichkish tsagkujachagtatjai. Wagki ditak galaadnumia aents aidaun trigo dekegka tsaimaina imatikawajui.
AMO 1:4 Nuadui jega apu Hazael pujusa inamtaijiya nunak apejuattajai, dutika ai nunú kegak niina uchiji Ben-hadad pujusa inamtaijiya nunashkam apeattawai.
AMO 1:5 Damasco waitijinak tegajattajai, dutika utuan, Bicat-avénkan apujin Bet-edénkan apujijai mai maattajai. Dutikamtai atum aidautigminak achigmajag Quir nugkanum yajupakagtatui”, tawai Tuke Pujuu.
AMO 1:6 Nuigtu Tuke Pujuu chichaak: “Gazanmaya aents aina duka ayatak pegkegchauk ainawai. Iman asagmatai, makichkish tsagkujachagtatjai. Nuigtush kuashat aentsun achija yajuakag Edom aents aidaunum sujujajui, dita inake atinme tusag.
AMO 1:7 Nuadui yaakat Gaza peejamua nunak ashí apejuattajai, dutika ai nunú kegak apu pujusa inamtainak ashí apeattawai.
AMO 1:8 Tuja apu Ashdodnum puja nunak Ascalónkan apujiya nujai mai tsaiktatjai, dutikakun wi kajekbaujui utuan filisteo aents aidaunak ijinattajai. Dutikakun ecrógnumianashkam wi kajekbaujui ijinattajai. Nunak dekas uminkatnun tajai”, tawai Tuke Pujuu.
AMO 1:9 Tuke Pujuu nuigtu chichaak: “Tironmaya aents aidauk ayatak pegkegchauk ainawai. Iman asagmatai, makichkish tsagkujachagtatjai. Wagki ditak tikich aents aidau dita yachi yachijaig chichama umikag batsatunash ajaantus diitsuk achija yajuakag, Edom aents aidaun inake atinme tusag ashí sujujajui.
AMO 1:10 Nuadui yaakat Tiro peejamua nunak apejuattajai, dutika ai nunú kegak apu pujusa inamtain ashí apeattawai.”
AMO 1:11 Tuja junashkam Tuke Pujuu chichaak: “Edom aents aidauk, ayatak pegkegchauk ainawai. Iman asagmatai, makichkish tsagkujachagtatjai. Wagki ditak dita yachi Israel aents aidaun tuke kajejin asag, dita kajetin umiinak pempeentukiag ai aintuinakua, makichkish wait anentsuk puyajai ijinawaju ainawai.
AMO 1:12 Nuadui yaakat Temágnak apejuattajai, dutika ai nunú kegak apu pujusa inamtain Boshránum awa nunak ashí apeattawai”, tawai.
AMO 1:13 Junashkam Tuke Pujuu chichaak: “Amón aents aidauk ayatak pegkegchauk ainawai. Iman asagmatai, makichkish tsagkujachagtatjai. Wagki ditak kuashat nugkan jukitag tuidau asag, Galaad nugkanum nuwa aidaun ejapeniag ijinau ainawai.
AMO 1:14 Nuadui yaakat Rabá peejamua nunak apejuattajai, dutika ai nunú kegak apu pujusa inamtain ashí apeattawai. Dutikan ijinai buutuinamu dase suwe wajas kedegtuwama imattatui.
AMO 1:15 Tuja dita apujinak, niina atuwe tikich apu aidaujai achikag, yaja tikich nugkanum jukiagtinai. Witjai Tuke Pujuunuk, nunak dekas uminkatnun tajai.”
AMO 2:1 Tuke Pujuu chichaak: “Moab aents aina duka ayatak pegkegchauk ainawai. Iman asagmatai, makichkish tsagkujachagtatjai. Wagki ditak Edom aents aidaun apujin ukunchin apeawag yuku awajsajui.
AMO 2:2 Nuadui Moab nugkanak apeattajai, dutika ai nunú kegak apu pujusa inamtain Quiriotnum awa nuna apeattawai. Moab aents aidauk maaniaku untsubau, cornetan umpuinamu aatus pampainamunum jinawagtatui.
AMO 2:3 ¡Dita apujinak, tikich apu eme anentsa diitai aina nujai ashí wi ijinattajai! Nunak Tuke Pujuu dekas uminkatnun tawai.”
AMO 2:4 Tuja junashkam Tuke Pujuu chichaak: “Judá wegantu aina duka ayatak pegkegchauk ainawai. Nunin asagmatai, makichkish tsagkujachagtatjai. Wagki ditak Tuke Pujuu chichamen umigtsuk, dakumka najanamu aidaun dita apachji emematiu aina nuna ditashkam emematiaju ainawai.
AMO 2:5 Nuadui Judá wegantu aidaun yaaktaji aina nunak apejuattajai, dutika ai nunú kegak apu pujusa inamtai aidau Jerusalén ayá nuna apeattawai.”
AMO 2:6 Tuke Pujuu chichaak: “Israel aents aina duka ayatak pegkegchauk ainawai. Iman asagmatai, makichkish tsagkujachagtatjai. Dita aidauk aents ujudauch aidaun, tikichi inake atinun kuichkin juwinak sujuinawai, dutikaidau asag sapatjaiyaske yapajinawai.
AMO 2:7 Tuja aents ujudauch aidaunak tikima shiig senchi waitkainawai, dutikaidau asag makichkish yainatsui. Múun aidauk, uchijijai makichik nuwanak jimagtu yujawai. Nuninak kajetan sujuinawai.
AMO 2:8 Aents ujudauch aidau jáanchjin diwijum akikmaku jukita tusa emetjuamu aidaun ainak tepesag, dita apajuímtaijin emematuinak yujumkan yuu batsatui. Aents diwimkagtukchaunak akikmakta tusag kuichkin atankiag, nunú kuichkia duwi vinon sumakag, dita apajuímtaiji jegamjukbaunum wayawag umú yujawai.
AMO 2:9 Israel aents aidauwah, wi atumnak Egipto nugkanum waitu batsatutigmin jiigmaijime, dutika yajuakan wi kuitamsan cuarenta mijan uwegshunum awekasuitjime. Dutikakun atumi shiwaajum amorreo aents aidau shiig senchigtin esajam wajatpakin aidaunak ashí ijinan dita nugken atumin amasuitjime.
AMO 2:11 Atumi uchijum aidaunmayan profeta agtinun etegjauwaitjai, tuja tikich aidaunak nazareo atinme tusan nunashkam akanjauwaitjai. Tuke Pujuu nunak dekas nunikua nuna tawai.
AMO 2:12 “Tujash atum aidautijum nunú nazareo aidau vino uwagta tusajum waitkasu ainagme. Dutikakjum profeta aidaushkam mina chichamjun etsegkai tusajum dakitjauwaitjume.
AMO 2:13 Nuadui, carreta trigon aimak wegak nugkan umuchiakui, wajasa ayamainchau dekapmaina imatikattajime.
AMO 2:14 Nuna imatikai uwemjatag tusajum tupikakjumesh uwemjashtatjume, aents senchigtin akush kakaumainchau dekapjattawai. Tuja aents wajiushkam ayamjumakchattawai.
AMO 2:15 Tuja flecha akentan yacha akush, senchi tupikain akush, caballonum tupikain akush, uwemjachagtatui.
AMO 2:16 Nunú tsawantinig maanitan yacha akush, maanitai aidau takakbaujinak utsag ukuinak pisajagtatui. Nunak dekas nuniktinun Tuke Pujuu tawai”, tiuwai Amós.
AMO 3:1 Israel aents aidauwah, atum Egipto nugkanum batsamsajum waitu batsatutigmin Tuke Pujuu jiipag agkanmitkagmawa nuna chichame antuktajum:
AMO 3:2 “Ashí nugkanum aentsuk ayaig, ima atumnak etegkauwaitjime. Dutikamuitkujum pegkegchau takamsau asajum, nunú umiakjum diwimkagtukbau akikmamaina numamtuk suwimak jukittajume.
AMO 3:3 “Jimag aents tsanigka wekaga nunak, mai antugdayas wekagu asa aniawai.
AMO 3:4 León shinakug, kuntinjin maa akasmatak shinawai, tuja leónka uchiji waanum shinakug, kuntinjin mau asa akasmatak shinawai.
AMO 3:5 Pishak nemak pujakug, nemaktinji detua ukukbaunum nemawai. Kuntin achiktasa dakamtika ukukbau tsekea nunak achika aniawai.
AMO 3:6 Trompeta yaaktanum shidaun antuinakug, aents aidauk pampainawai. Utugchat yaaktanum nagkaema duka Tuke Pujuu nunikti tibau asa nuniawai.
AMO 3:7 Tuke Pujuu niina aentsji profeta aidaun dekamtiktsukek nii wakegamu ataish, nigkik makichkish dutikatsui.
AMO 3:8 León shinaun antuinakug, ashí ishamainak kujain ainawai. Tuja Tuke Pujuu profetan chichakti tamak niina daajin chichamainai”, tawai Apajuí.
AMO 3:9 Ashdotan apuji aidau batsatbaunum, Egipto apuji aidau batsatbaunum chicham etsegkujum: “Samaria mujaji aina nuwi kaunatajum”, tusajum ijumjatajum, nuwi ijunas Samaria nugkanum magkagtuinamu pegkegchau takainamujai pachimnaga awa nuna wainkatnume.
AMO 3:10 Tuke Pujuu chichaak: “Samarianmaya aidauk shiijak takainatsui, aents aidaun mainak wajiji yajutkamu aidaun dita pujusa inamtaijin ijumag batsamtawai.”
AMO 3:11 Nuadui Tuke Pujuu chichaak: “Shiwag aidau yaakat Samarian jetektatus tenteawagtatui, dutika jetekag kaya jegamkamu aidaunak tsaikag, apu pujusa inamtaijin waji ayaunak ashí yajuakagtatui”, tawai.
AMO 3:12 Tuja junashkam Tuke Pujuu chichaak: “Uwija kuitamin uwigji yujam ayamjuktatus maanitkush ayatak jimag nawe ampigbaun nuniachkush kuishi ampigbaunakesh, juwama numamtuk atum samarianmaya aidautijum Damasconmaya jáanch pegkeg ainkajum kaji batsatjum duka pisakjum piipich jukijum pisagtatjume.”
AMO 3:13 Nuadui Tuke Pujuu ashí senchigtina nunú ataktu chichaak: “Antuktajum atum aidautijum, nunikjum Jacob wegantu aidau suwimkan jukiagtata nunú pachisjum etsegkatajum.
AMO 3:14 Wika dita pegkegchau takamsamujin suwimkan susagtatjai, dutikakun Betelnum dita apajuímtaijin emematuinak altar najankamu ayá nunak ashí tsaiktatjai, dutika ai nugká batsamsattawai.
AMO 3:15 Wiakchan jee aidau, tsetsek tepeamtai kanutai, jega pegkeg umikbau aina nunak, esattin kanutai aina nujai tsaiktatjai. Tuja jega marfil jegamkamu aina nunashkam tsaiktatjai, tuja jega apu pujusag inamaina nunashkam ashí tsaiktatjai”, tawai Tuke Pujuu.
AMO 4:1 Samarianmaya nuwa aidautijum antuktajum: Atumek baságnumia baka duwejam aina iman duwekjum batsatjume. Atumek ujudauch aidau senchi waitkakjum dushikiagme, nunin asajum atumi aishjum aidau vino sujusta uwajan nampektajai tusajum inaku waitkagme.
AMO 4:2 Israel aents aidaun Apajuíji niina pegkegmajin nii umiktinun aatus tawai: “Atumin tsegkenai awagtamak japiki jujamkiagtinuk tsawan uminui, tuja atumi uchijum aidaunak agseayai nenakag japikiagtinai.
AMO 4:3 Atumek yaakat peejamu agkaju aidaunum eteemajum maki makichik jiinjatnaitjume. Nunikagmin muja Hermógnum utsampakagtinai.” Nunak Tuke Pujuu dekas uminkatnun tawai.
AMO 4:4 “Atumek pegkegchau takat aidau ima wakegau asajum Betelnum shiyakjum, tuja Guilgalnumshakam shiyakjum, atumi apajuímtai dakumkamu najanamu aidau emematu batsamtajume. Atum nuniakjuminish, wika puyatjukchattajai. Witjai Tuke Pujuu, Israel aents aidaun Apajuíjinuk, nunak dekas uminkatnun tajai. ¡Atum wakegakjumek tunamá batsamtajum! Tuja atumi apajuímtaiji aidau emematkujum kashikmasjum kuntin maajum apeatajum. Dutikakjum nuigtushkam kampatum tsawan jegakui, atum ajakmamunmaya juukjum diezmo tuké sutajum, tuja tikich anentag aidaushkam susatajum, ashí aents aidau anentag susatnume tusajum etsegkatajum.
AMO 4:6 Nujantai waittsatnume ti ai, ashí yaakat aidaunum yumain atsakui, nujantai waitbaijume. ¡Imanika waitiakjumesh atumek minak umigtukchabiugme!
AMO 4:7 “Tuja nuigtushkam ajak juut jegau aig, kampatum nantui yumin yutumtijachmaijai. Makichik yaaktanmak yutumtijamiajai, untsu tikich yaaktanmak yutumtijachmaijai. Tikich yantamnumak yumi yutuju asamtai, nugka chupika pegkeg wajas amayi, nuniai untsu tikich yantamnum yumi yutugchau asamtai, ajakak kagaka amayi.
AMO 4:8 Nunikmatai aents aidauk yumin egainak maki makichik yaaktanum yujabi, imanik yujainakush kuashat uwaja kitak amikmainnakesh wainkachagmayi, tuja imanika waitiakjumesh minak umigtukchabiugme.
AMO 4:9 “Wi atumdau ajak ajakmakbau aidaunak, tuja numi nejen aidaunashkam ijituajime, atumi ajagmin manchi aidaun ishitkabiajime, nuigtushkam dase sukutnun uwegshunmayan dasenmitkakbaijai, tujash imanika waitiakjumesh atumek minak umigtukchabiugme.
AMO 4:10 Egiptunmaya aents aidaun suwimkan susauwaitag imatikan suwimkan amasuitjime; tuja atumi uchijum aidau maaniamunum jinaati ti ai jinawabi. Nunikagmatai dita caballoji aidaun yajutkajabi, nunú jinaa kauku mejeakjum waitiugme, ¡imaniakjumesh minak umigtukchauwaitjume!” tawai Tuke Pujuu.
AMO 4:11 Apajuí ataktu chichaak: “Sodomanmaya aents aidaun, Gomorranmaya aents aidaujai suwimka suwakun jii ajunjan ijinauwaitag numamtuk awajkauwaitjime atumnashkam. Dutika ai jii kaiji ampinjau tepegama numamtuk wajakuitjume. ¡Imanika waitiakjumesh minak umigtukchau ainagme!” tawai Tuke Pujuu.
AMO 4:12 “Nunin asagmin, yaunchuk tikich aidaun suwimkan susauwaitag numamtuk awajkattajime Israel aents aidautigminak. Apajuí suwimkeg uwemtumainchau asajum, ¡umintsajum Apajuí igkugtasajum dakastajum!”
AMO 4:13 Tuke Pujuuwai muja aidaun najanin, dasenashkam najanin, tsawainash suwe emau, niinu aidaunash aentsun paan dekamtikau ashí nugkanum wekagu. Tuke Pujuu, Apajuí ashí senchigtin tutaya nunuwai niina daajig.
AMO 5:1 Israel aents aidauwah, ishamain nagkaemaktin asamtai, wi wake besemag dekapeakun kantamag nunú antuktajum.
AMO 5:2 Israel aents aidau imanji, pegkeg wajaknuwe nunú nantakchatnun iyaajaje, nunikag nantamainchau wajasag batsatui. Ditan inanmainuk atsawai.
AMO 5:3 Tuke Pujuu Israel aents aidaun chichajak: “Makichik yaaktanmaya mil suntag maaniamunum ishiakbauk, ayatak cien suntajak iwaku wakitkittawai. Tuja cien suntag ishiakbauk, ayatak diez suntag iwaku wakitkittawai”, tawai.
AMO 5:4 Tuke Pujuu Israel aents aidaun nuigtu chichajak: “Iwaku pujustag takugmek, mina umigtuktajum.
AMO 5:5 Dakumkamu aidau ememattasajum Betelnum wetin aigpajum. Nunú nuniakjumek ijina utsam atatjume. Tuja Bershebanmakesh wetin aigpajum, nuniachkugmesh Guilgala nunigkesh nagkaemaktin aigpajum, wagki nuwiya aents aidaunak ashí achijag yajuakagtinai. Tuja Betelak tsaikam uwejush wajas asatnai.
AMO 5:6 Tuke Pujuu umigkatajum, nuniakjum iwaku pujustatjume, atum nii umigtsugminig, Israel aents aidau kanakag ijunjajua nuna ijinattawai. Betelnum dakumka najanamu apajuímtai aina nunak ekemaktatui, dutikamtaig makichkish ikagnakchagtatui.
AMO 5:7 Aents ujudauch aidau waitkam batsata nunú shiig anentsajum kuitamchau, nuigtush aents ayamke atsaujai betek waitkau aidautigminak wait anentajime. Wagki atumek pegkeja nunú pegkegchau anentagme.
AMO 5:8 “Apajuíyai yaya aidaun, nayaimpijai najadau, tsaaptinnash suwe emau, suwenash tsaaptin emau, yuminash yutumtikau. Apajuík yaakat peejamu aidaunash tsainai, tuja nunú tsaikbaunmayanak jega múun aidaun kaya ekenag jegamak uminai. ¡Tuke Pujuu ashí senchigtin tutaya nunuwai niina daajig!
AMO 5:10 Aents shiig takantsati tusa chichamjaun waitjutsuk dekasken chichaujai kajeja nunak wait anentajai.
AMO 5:11 Wagki ditak ujudauch aidaun tepejuk batsamtusag, diwijum akikmakta tusag trigo atantuinawai. Nunin asag, jega pegkeg aidaun dita jegamjajua nuwig pujuschagtatui. Tuja nuigtush dita uva ajakbaujiya nuwiyan vino najanawajag shiig aneasag uwagchagtatui.
AMO 5:12 Dita aidau shiig kuashat pegkegchaun takamaina nunak wika shiig dekajai. Tuja apu chichama epegkin aidau aents pegkegchau aidaun yayaak, tikich aents utugchatji atsujunak suwimkan suwina nunak shiig dekajai. Nuadui chicham ataik, wiakuch aidau ujudauch aidaunak tuke depetuinawai.
AMO 5:13 Nuadui kuashat pegkegchau takamu ayau asamtai, aents yacha duka takamtak pujawai.
AMO 5:14 “Pegkegchau takat aina duka idaikujum, pegkeg takat aina nunú takastajum, nunú nuniakjum dukap tsawan pujustatjume. Nuniagmin Tuke Pujuu, ashí senchigtina nunú inak yaimpawai tajum nunú dekaskenum atumnak tuke yaimpaktatui.
AMO 5:15 ¡Pegkegchauwa duka dakitjatajum! ¡Pegkeja nunú waketajum! Apu chichama epegkin aidautigmek, shiig betek chicham iwajatasajum anentaimtajum. Nuniagminig Tuke Pujuu, Apajuí ashí senchigtina nunú Israel aents aidau ujumak iwaku batsata nunash wait anenjachajaintash.”
AMO 5:16 Tuke Pujuu ashí senchigtina nunú chichaak: “Wi atumin suwimka amastasan minitaik, ashí yantamnum buutiagtinai. Jinta aidaunum buutuidau, yutai ijumja sujutai aidaunum buutuidau, ashí plaza aidaunum buutuidau, uva ajakmakbau aidaunum buutuidau, aja aidaunum buutuidau, jakamunum buutuidaushkam agtatui”, tawai Tuke Pujuu.
AMO 5:18 ¡Tuke Pujuu tattawai tusajum shiig aneautigminak wait anentajime! Atumek waji utugchatak nagkaetamkiti nunú dekachu asajum tuu yujagme. ¡Tuke Pujuu minamuk, tsaaptinuk achattawai, suwe ishamain atatui!
AMO 5:19 Nunú tsawantinig makichik aents león aintam tupika wekama, chayujai igkuniak wajuk anentaimainaita iman atatui. Nuniachkush jegá waya tanishnum atumkama, nuwi dapi tepau esaim anentaimaina iman atatui.
AMO 5:20 Duka dekaske, Tuke Pujuu minamuk tsaaptinuk achattawai, suwe atatui; ¡nunú tsawantinig shiig aneamuk achattawai, ayatak wake besemag atinai!
AMO 5:21 ¡Jiistamtai ati tusa tsawan etegjamu aina nunú umiaji tusajum jiistamjum nunak shiig dakitajai! Tuja Apajuí emematji tusajum ijunjajum shiig aneajum nunashkam shiig dakitajai.
AMO 5:22 Apajuí tudaun tsagkugtamjati tusajum kuntin maajum nuna neje ashí apeajum nunak wika dakitajai. Tuja agkan pujutan amastí tusagmeshkam, kuntin aidau, ajak juukbau aidaujai anentag kuashat ikaunmagme, tujash wika nunú diitnak dakitajai.
AMO 5:23 ¡Juwi wainka kantama batsamtsuk, yaja shiyakjum kantamatajum! ¡Atum arpa awatjum nunú antutnak dakitajai!
AMO 5:24 Aan batsamtsuk dekas wi shiig kuitamkagtinaitag nunisjumek, atumshakam tikich aidau shiig kuitamkatajum. ¡Atum shiig takamua duka namak kuyua megkaechauwa nujai betek ati!
AMO 5:25 “Israel aents aidauwah, atum cuarenta mijan uwegshunum yujasuitjum nuaduik, anentag aidauk minak sujuschauwaitjume.
AMO 5:26 Atumek Sicut atum dakumka najanamu wainka apajuímtai atum apu tajum nunú yanasa yujayugme. Nuigtushkam Quiliún atum dakumka najanamu yaya nunin aajakua nunú yanasa yujayugme.
AMO 5:27 Nuadui aents tikich nugkanmaya Siria nugkan nagkaiki batsamin aidau achija yajuaktinme tusan idaisattajime”, tawai Tuke Pujuu, Apajuí ashí senchigtina nunú.
AMO 6:1 Amós chichaak: ¡Jerusalégnumia aidau sapigmatsuk puyatkas batsata nunak wait anentuinajai! Yaakat Samaria eme anentautigminak wait anentajime. Juju nugka múunta nuwi apu aidautijum puyattsuk batsatutigminak wait anentajime.
AMO 6:2 Yaakat Calné wejum diistajum, tuja nuwi juwakjum yaakat Hamat shiig múunta nuwi wetajum, nunikjum nuwi nagkaemakjum filisteo aidaun yaaktaji Gat wetajum, nunika jegajum nunú yaakat aidaunash itugkajamkiyi nunú diistajum. Atumek dita nagkaesau ainatsjume, tuja atumi nugkega dushakam dita nugken nagkaesauchui.
AMO 6:3 Atumek suwimak jukig tusajum dakitajume, nuniayatkujum ayatak suwimak akumtagme.
AMO 6:4 Atumek wainka batsamsajum pegak shiig pegkeg marfil najanamu aidaunum kaji batsatjume, nuniakjum kuntin pegkeg duwejam aidau yuu batsatjume.
AMO 6:5 Atumek arpa wainka awatkujum kantamainchau wainka kantamjume, tuja kantamku awattai aidau tusajum wainka najanjume, nuniakjum David yacha aajakua iman anenmamjume.
AMO 6:6 Atumek tsapa muunnum vino umakjum shiig senchi nampeagme, tuja dekas kugkuin pegkeg akik aina ibau nijamjume. ¡Nuniau asajum atumi yatsum aidau waituina duka pachiatsjume!
AMO 6:7 Nunin ainajum duwi, aents aidaun achija yajumainakug atumna etegtamawag jujamkiagtinai, dutijamawagmatai atum shiig jiistama batsatjum duka wainka juwaktatjume.
AMO 6:8 Tuke Pujuu Apajuí ashí senchigtina nunú pan antumainun chichaak: “¡Jacob wegantu aidauk jega muuntan jegamag batsamas ememaidau asagmatai kajejajai! Nuadui dita yaaktaji aidaunak shiwag aidau tsaigkatnume tusan idaisattajai.
AMO 6:9 “Dutika ai makichik jeganum diez aents iwaku pujauk ashí ijinam agtatui.
AMO 6:10 Nunú aents jinau aidaun patayi aidau dita iyashin jukiag apeawagtatus kaunawag yujattaman, tikich nuna patayi aidau nuwi yujau ditan iniinak: ‘¿Tikichish atsuak?’ tusa tama: ‘Atsa, makichkish atsawai’, tiagtinai, nuna tusa: ‘¡Takamtak wajasta!’ tiagtinai. Wagki nuna inima yujas mina daajun adaikug nuni senchi suwimkan jumain asagmatai.
AMO 6:11 Wagki Tuke Pujuuk Israel aents aidaun suwimkan suwak, jega múun aidaun jega piipich aidaujai ashí tsaiktatui.
AMO 6:12 “Atumesh anentaimsakjuah, ¿caballosh kayanmash tupikaumainkait? Tuja ¿kayanmash pukujaish ajakmamainkait? Tujash atumek shiig takata duka jata awajsaugme, dutikakjum shiig aneasa pujuta dushakam wake besemag awajsaugme.
AMO 6:13 Atumek yaakat piipich aidau depetkajum ememasa chichaakjum: ‘Iina senchijin depetkaji’, tusajum shiig aneajume.
AMO 6:14 Nuniau asagmin, Tuke Pujuu Apajuí, ashí senchigtina nunú chichagtamak: Shiwag aidau Hamatnum nagkamas jetepakag, uwejush tsumujin awa aatus ashí depetamak dita wagagtamkiag waitkagmastinme tusan idaisattajime”, tujama nunú Israel aents aidautijum shiig antuktajum, tiuwai Amós.
AMO 7:1 Ajak ajakmamu nejeka tsamakmatai, apu susatnun yama nagkamchak juuka idaisamu, ataktu tsamakmatai dita yuwawagtinnak eke juwinatsaig, manchi kaketuk amuktatus uminas aun Tuke Pujuu iwaintugkabi.
AMO 7:2 Nunú ajak aidaun manchi kaketuk dupajai nagkamas ashí amuakui, Tuke Pujuun segaakun: “¡Tuke Pujuuwah, wait aneasam tsagkugkagtugta! Amina aentsjum Jacob wegantu aidau kuashtachua dusha manchi ajakji amutkamash ¿wajina yuwa batsamsattawa?” tibaijai.
AMO 7:3 Tusa tai Tuke Pujuu chichagtak: “¡Duka nunikchattawai!” tujutmayi.
AMO 7:4 Junashkam Tuke Pujuu jii kegauwai suwimkan sukagtustatus umiamujin iwaintugkabi. Nunú jii kegak ashí nugkan apebi, tuja nayantsa kunajinash apebi.
AMO 7:5 Imatikakui wi Apajuín chichagkun: “¡Tuke Pujuuwah, wait aneasam imijkata! Amina aentsjum Jacob wegantu aidau kuashtachua dusha ¿wajuk ibaunash atsanjag pujustinme?” tibaijai.
AMO 7:6 Tusa tai Tuke Pujuu ditan wait anentug chichaak: “Juju suwimkashkam uminkashtatui”, timayi.
AMO 7:7 Nuigtushkam Tuke Pujuu juna iwaintugkabi: Apajuí nená dekapatain plomon takus yaakat peejamunum ayaumas wajaun wainkabiajai.
AMO 7:8 Nuwi wajas inintak: “¿Amosah, jusha wajimpaya?” tujutmayi. Tujutkui wi ayaakun: “Aanka plomo, jega jegamin takau aina nunuwai”, tibaijai. Tusa tai nii chichagtak: “Juna takakag juwi mina aentsug aidaunak dekapan diistatjai, dita pujutish pegkejash aina nuna. Tuja dita pujuti pegkegchau ainakuig, makichkish tsagkujachagtatjai.
AMO 7:9 Isaac emematujakbau nain aidaunum ayá nunak tsaiktatjai, tuja Israel aents aidau wainka apajuímtai aidaun emematuinak jegamjamu aina nunashkam tsaiktatjai. Dutikakun Jeroboam wegantu aidaunak ijinattajai”, tujutmayi.
AMO 7:10 Betelnumia sacerdote Amasías Israel aents aidau apujin Jeroboaman chichaman akuptak: “Apuh, amina Amós Israel aents aidaunum wekagas chichaman umigtamui. Tuja iik nuna tujamá wekaeti tusaik idaimaitsuji.
AMO 7:11 Nuwi wekagas chichaak: ‘Jeroboamnak maaniamunum maawagtatui, tuja Israel aents aidaunak ashí achijag yajuakagtatui’ tusa tuu wekaewai”, tiuwai.
AMO 7:12 Tusa ujaka ukuak Amasías Amósan chichajak: “¡Dekamnuh, juwi pujusam tuu pujutsuk jiinkim wetá! Ame chicham etsejam nuwiya yuwa pujustag takumek, Judá wegantu aidau nugken wetá.
AMO 7:13 “Tujash Betelnumak nunú pachismek nuigtuk chichakaipa, wagki juju yaakta juwig dekas apu niina apajuímtaiji jegamjukbau awai”, tiuwai.
AMO 7:14 Tusa tama Amós ayaak: “Wika profetachuitjai, tuja profeta achainjash tusankesh anentaimtsujai. Wika uwija kuitamkun, higo ikamia aidaun juuka sujakun, nuwiyan yuwan pujajai.
AMO 7:15 Nunika pujai Tuke Pujuu nuna idaimitkajak, mina chichameg Israel aents aidaunum etsegkata tujutmayi.
AMO 7:16 Nuadui nii tujutbaun etsejag nunú, yamai Tuke Pujuu chichame antukta. Ame chichaakum: ‘Israel aents aidau pachisam pegkegchau chichagkaipa, tuja nuigtush Isaac wegantu aidaushkam pegkegchau chichagkaipa’, tusa tame.
AMO 7:17 Amek tame, tujash Tuke Pujuu juna aatus tawai: ‘Juju yaakta juwi amina nuwem akika dutiktai wajastatui, amina uchijum aidaunak tuja nawanjum aina nunashkam maawagtatui. Dutikawagmatai tikich aents aidau amina nugkemnak jukiagtinai, amek amina nugkem ukukim atushat aents Apajuí nemagchau aidau nugken jakatnaitme, Israel aents aidaunak achijag nugken ukumtikiag tikich nugkanum atushat yajuakagtinai’ tawai Apajuí”, tiuwai Amós.
AMO 8:1 Makichik chagkinum yujág tsamaku juuka aimkam pujaun Tuke Pujuu iwaintugkabi.
AMO 8:2 Nuna iwaintujuk chichagtak: “¿Jusha wajimpaya?” tujutmayi. Tujutkui wi ayaakun: “Yujag juuka chagkinnum aimkamu pujawai”, tibaijai. Tusa tai, Tuke Pujuu chichagtak: “Israel aents aidau suwimak jukitnujig yujág tsamaka uminas aama numamtuk tsawantak ashí jegae. Nuadui makichkiakesh tsagkujashtatjai.
AMO 8:3 Nunú tsawantin kuashat aents jinaamtai, apu pujusa inamtaijinig shiig aneasa kantabauk atsutnai, ayatak wake besemag atinai. Nunú aents jinau aidaun iyashinak takamtak yajuakag utsagkagtinai”, nunak Tuke Pujuu dekas uminkatnun tawai.
AMO 8:4 Juju nugkanmaya aents ujudauch aidaun kasajak waitkau aidautijum shiig antuktajum;
AMO 8:5 atum chichaakjum: “¿Trigo wamak sujukchamnush, wagka nantu yama takamunum jiistamtaya dusha tsawantash wamak nagkaematsua? Trigo sujaku kijinji imanchau aig, tsanumja kasamku kuashat kuichik jukichminush ¿wagka tsawan ayamtaish wamak nagkaematsua?” wajagme.
AMO 8:6 ¡Imatu asajum, trigok saepejai sujumain dekapeagme! Nunin asajum ujudauch aidauk inaku waitkatai ati tusajum kuichik piipich juwakjum sujuktag tajume, tuja nuigtush makichik sandaliayai yapajiatag tajume.
AMO 8:7 Nuadui Tuke Pujuu, Israel aents aidaun Apajuíji chichaak: “Atum dutikajum nunak makichkish kajimatkishtinaitjai”, tawai.
AMO 8:8 Imatika waitkajum duwi nugka senchi uugtinai, imaniak namak Nilo dujajak ikaman utuja ataktu kuyua, ataktu utug kuyua wajama imanittawai. Imanitai aents aidauk ishamainak buutiagtinai.
AMO 8:9 “Nunú tsawantinig etsag etsanjashtinai, tuja etsa tutupit wajas etsantu eketiatak kajinak suwe wajastinai, nunitai ashí nugkanmak suwe wajastinai.
AMO 8:10 Atum jiistamkujum shiig aneenujum nunú idaikujum, aents jinamunum wake besemag batsamsajum ayatak buut batsamtatjume, nuniakjum jáanch jakamunum nugkutai nugkugjum yujastatjume. Nuniakjum pinui awamagjum, makichik aents uchiji makichkiuch ajamu jajukam wake besemag dakapeak kajeka buutama imanittagme.
AMO 8:11 Yapajut tepeatin tsawan jegattawai, tujash duka pag atsutaigkish yumi atsutaigkish nunikchattawai; duka mina chichameg antuktasa yapajamujai betek wakegamu atinai. Nunak Tuke Pujuu dekas uminkatnun tawai.
AMO 8:12 Tuke Pujuu chichamen antuktajai tusa ashí yantamnum nayantsa amain yujatnai, tujash imaaninakush mina chichamjun etsejuidaunak antukchagtinai.
AMO 8:13 Nunú tsawantinig, nuwa muntsugtauch shigmauch aidaush, tuja uchi datsa wajiu aidaushkam pimpikiag weetuk wampainag iyainiagtinai.
AMO 8:14 Tuja nuigtushkam samarianmayan, Dagnumian, bershebanmayan wainka apajuímtai aidaun emematiaju aidauk, tuke jainak wampainag iyainiagtinai. Nunú wainka apajuímtai aidaun jutsukaita dekas Apajuík tusag, ame tuke umigtai atin ata tusag tinu aidauk nantakchatnun tuke jak wampainag iyainiagtinai”, tawai Apajuí, tiuwai Amós.
AMO 9:1 Duwi pujusan Tuke Pujuu altaran ijus wajasa chichagtak: “Tuke Pujuu emematku ijuntai jegamku shugku ajigmawa nunú awatim kupikta, dutikam jega yumpunak aentsun yutua ijinati, tuja tupikaki uwemjatag tuinakush makichkish uwemjachagtatui. Tupikaki uwemjashkam maaniamunum jakattawai.
AMO 9:2 Nugka initken uumkagmataish, imanuiyanash jiigtatjai, tuja nayaimpin nagkaesau yakí uumkagmataish, imanuiyanash ajuawagtatjai.
AMO 9:3 Tuja muja Carmelo titijin waka uumkagmataish, egakan achikagtatjai, tuja nayantsa kunajin uumjutkagmataish, kuntin múun ichiag ijinati tusan awetittajai.
AMO 9:4 Tuja shiwag aidau yajuakam uwegshunum shiyakmataish, puyajai ijinatnume tusan inamjattajai. ¡Ditanak tuké diyaku atatjai, tujash nunak yayakdukesh dutikashtatjai, suwimkan suwakun dutikattajai!
AMO 9:5 “Tuke Pujuu Apajuí, ashí senchigtina nunú nugkan antiawai, dutikam nugkak yumpunui, nunitai aents aidauk buutuinawai. Tuja nugkak uujak namak Nilo dujajak ikaman utuja kuyua, ataktu utug kuyua wajama imanittawai, imanitai aents aidauk ishamainak buutiagtinai.
AMO 9:6 Tuke Pujuu niina jenak nayaimpinum umikui, untsu nuna ichichiagtinun nugkanum umikui, nayantsak bukuiti yakí weawai, nunik yumi najanea ataktu yuta nunak Apajuí dutikawai.” Niina daajig “Tuke Pujuu” tawa nunuwai.
AMO 9:7 Tuke Pujuu chichaak: “Wi diismak Israel aents aidautigmek etiopíanmaya aidaujai betek ainagme. Atum Egipto nugkanum batsatutigmin jiijan ikaunmawaitjim dutiksanuk, filisteo aidaunashkam Creta nugkanum batsatun jiijan ikaunmauwaitjai. Tuja arameo aidaunashkam dutiksanuk Quir nugkanum batsatun jiijan ikaunmauwaitjai.”
AMO 9:8 Juju Israel nugkanmaya aidau pegkegchau aina nuna Tuke Pujuu diisa chichaak: “Au aents aidaunak ashí ijinan emegkaktatjai, dutikaknush Jacob wegantunak ashí ijintsuk ayamjukan uwemtijattajai. Witjai Tuke Pujuunuk, nunak dekas dutikattajai.
AMO 9:9 Tuja Israel aents aidautigmin shiwag aidau trigo wampuji utsankatasa pegamash jigkayi pegkejak iyautsama imatijamatnume tusan titatjai.
AMO 9:10 Ashí aents chichainak: ‘Duka makichkish nunikchattawai, utugchatak atsugtamtatji’, tuinawai. Tujash nuna tuu chichaina duka maaniamunum puyajai ashí jinawagtatui”, tawai.
AMO 9:11 “Nunú tsawan jegakui, Davita aakji tegaekau ataktu aakmamaina numamtuk, ataktu nii wegantunmaya Israel aents aidaun apuji wajas inamjatnai. Nuadui yaunchuk ayanum iman wajasagtinai.
AMO 9:12 Nunikag edomnumia iwaku pujuidauk, tuja tikich aents mina emematjin aidaujai ataktu ashí Israel aents aidaujai awakjattajai”, tusa Tuke Pujuu nii dutikatnun tawai.
AMO 9:13 “Kuashat trigo juwamu atin tsawan jegawai. Trigo juwamuk eke ashimchayatkujum ataktu nagkamajum ajakmattagme. Tuja uva juukbaushkam eke vino najantsuk ukuakjum ataktu uva ajaktatjume. Imatikau asagmin vino najanamu aidauk mujanmash, nain aidaunmash yumijai betek shiig kuashat aitnai.
AMO 9:14 Nunú tsawan uminkui, mina aentsug Israel aents aidau achija yajuakam tikich nugkanum batsatun jiija yajuakan ikaunmatnaitjai. Dutika ai dita yaaktaji tsaikbau aidaun ataktu najanawag batsamas, uva ajakmakag vinon najanawag umuinak, tikich ajak aidaunashkam dita agájin ajakmawag, nuna nejen yuwinak shiig batsamsagtinai.
AMO 9:15 Israel aents aidaunak waji ajakaitkuish wi dita nugken susauwaitag nuwi atakesh tegai ajapashtinun ajakmawagtatjai”, tusa Tuke Pujuu tawai, tiuwai Amós.
JON 1:1 Amitai uchiji Jonásan Apajuí chichajak:
JON 1:2 “Nínive yaakat múunta nuwi wetá. Nunikam dita chichagkum, atumi pegkegchaujig Apajuíyai ashí wantinkae. Nuadui Apajuí suwimkan susagtatjai tujamui tusam ujakta”, tiuwai.
JON 1:3 Tusa timaitak Nínive wemainun ukuak, dekas tikich nugkanum Apajuísh waitmainchaunum wetajai tusa, yaakat Jope lancha anumtaijin jegauwai. Nunik jegakma makichik lancha wetatus uminas tepaun wainkauwai. Nunik España nugkanum yaakat Tarsis atushat asamtai, imanui weakun Apajuín uumjuka ukuktajai tusa shiig aneas akikmak egkemjauwai.
JON 1:4 Tuja lancha juwaki nayantsanum ejapean wegai, pachiachbau Apajuí dasen shiig senchi dasenmitkatai, nayants senchi tsukatu. Imaniau asamtai lanchak tsainkattak wajau.
JON 1:5 Imanitai aents lanchanum takau aidau chimpijuk ishamainak, kujaukmaikia senchi untsu untsumak dita apajuíjin segaidau nii yaimpakti tusag. Nuninak lancha tepeawai takunti tusag, waji aidau chimpijunak nayantsanum utsaawajui. Imaaninai Jonásak initak waji chimpitainum waya shiig kanak egketu.
JON 1:6 Nunittaman lanchanum takau aidaun apuji jegantun chichajak: “¿Kaja wajasuh, amesh juwish waji kanush egkemtame? ¡Nantakim amina Apajuíjum segata! ¡Wait anenjamag yaimpakchaintash!” tau.
JON 1:7 Tusa tayatak dita ditak pempeentunikiag chichainak: “Yana utugchatjinig imajush iyanjamjae nunú dekaami”, tuidau. Tusag nunú dekataiyai dekapkamá Jonásan ejeyajui.
JON 1:8 Nunikmatai Jonásan iniinak: “¿Wagka jusha imajush iyanjamae? nunú ujajatkata, tuja amesh ¿wajinma takauwaitme? ¿Tuwiyamea miname? ¿Tuita nugkemesh? ¿Ya aentsuitpa?” tusa inidau.
JON 1:9 Tusa iniam Jonás ditan ayaak: “Wika hebreo aentsuitjai, wika Tuke Pujuu Apajuí ashí najankauwa nuna emematnaitjai. Juka mina utugchatjui. Junak wi Tuke Pujuun uumjukan ukuakun tupikag duwi imaniawai”, tau.
JON 1:10 Tusa tutai, daseshkam aan senchi dasentak nuni senchi ishamain wajau asamtai, senchi ishamaidau asag chichajuinak: “Juka amek pegkegchau aní wekaeme. ¿Dase mijaakti tusaish iish amesh utugmainaitji?” tuidau.
JON 1:12 Tusa tama nii aimak: “Juju dase ishamain waja duka dekas mina utugchatjui imaniawai. Dekas minak nayantsanum ajunkatajum, dutijuawagmin nayants tsukatak ishamain waja nunak mijaktatui”, tau.
JON 1:13 Tuja nayantsanum yujatan yacha aidauk shiig senchi wiyantuidau anumkami tusag, tujash nayants nuni senchi dasentu asamtai, anumainchau dekapedau.
JON 1:14 Nunidau asag Apajuín segainak: “Tuke Pujuuwah, juju aentsua juna tudaujin jinaati tusamek idaikagtusaipa. Nii jamainnumak ii aidautik waitbaitsuji. Juka ame diisam jutikame”, tuidau
JON 1:15 Nuna tusag Jonásan jukiag nayantsanum ajugkajui, dutikawagmatai nayants senchi tsukatbaunak mijaakui.
JON 1:16 Nunik mijakmatai, lanchanum takau aidau chichainak: “Tuke Pujuuk dekas senchigtinai iman asamtai, yamai nagkamsaik dekas Apajuí tuke umigkagmi”, tiajui. Nuna tusag kuntinun maa apeenak Apajuín emematiajui.
JON 1:17 Tuke Pujuu Jonásnak namak muuntan akuptukui, nunú Jonás nayantsanum iyaittaman kujajui. Dutika kujajam kampatum tsawan, kampatum kashi namaka ampujin pujusui.
JON 2:1 Nunik Jonásak namaka ampujin egkemas Tuke Pujuu niina Apajuíjin aujak,
JON 2:2 aatus tiuwai: “Tuke Pujuuwah, namaka initken tepeakun jajapi tibaijai. Ashí jakan amina untsukmaijame, dutika ai ame minak yainkabiume.
JON 2:3 Dekas nayantsa kunajin ajunkabiume, ayatak yuminum egkemkan wekaebaijai. Wainchi ishamain ame awemamu tuku tukuji nagkaetibi.
JON 2:4 Minak dekas ajapjuaumeapi tibaijai, tuja amina jem pegkegma nunak ataktu awagkinuk wainkashtinapitja tibaijai.
JON 2:5 Shiig initak tepeabiajai, nayants ijitua emegkatkabi, initkanmaya dupa aidau buukjun pempenjibi.
JON 2:6 Shiig initak tepean nugkanum jegabiajai, tuke jiinkishtinapitja tibaijai. Tujash Tuke Pujuuwah, mina Apajuíjuh, ame minak uwemtijugmayume.
JON 2:7 Tikima jakun aminí anentaimjan, untsukmaijame. Tusa untsumai ame amina jem pegkegma nuwi pujusam antugtukmayume.
JON 2:8 Wainka apajuímtai aidaun emematuinak ima aminak umigtamainun idayinawai.
JON 2:9 Tujash wika kuntinun maa apeakun amina ememattatjame, nuniakun wi amina ememattatjame tusan tiuwaitjam nunak imatiksanuk umiktatjai. ¡Wagki ameketme uwemtikagtinmek!” tiuwai.
JON 2:10 Tusa aatus timatai, Tuke Pujuu nunú namak Jonásan kukag iyakti tiuwai. Tusa tima Jonásan kukag iyakui.
JON 3:1 Tuke Pujuu Jonásan ataktu chichajak:
JON 3:2 “Nínive yaakat múunta nuwi wetá. Nunika jegaam wi amina akatjattajam nunú etsegkata”, tiuwai.
JON 3:3 Tusa tima, Apajuí tibaun umiak Nínivenum weuwai. Yaakat Nínivek shiig múun asamtai, ashí wekaesa wainkatag takuik, kampatum tsawantai tenteemain aajakui.
JON 3:4 Nunú yaaktanum Jonás waya makichik tsawan Apajuí chichamen etsejak: “¡Juju yaaktanak Apajuí cuarenta tsawan asa tsaiktatui!” tau.
JON 3:5 Tusa etsegtai, ashí aents Nínivenmaya aidauk uchinum nagkamas múun aidaushkam pegkegchau takatnak idayinak, dekas Apajuí umigkagmi tuidau. Nuna tusag wake besemag dekapenak, jáanch pegkegchaun nugkukag yujumkan ijagmawag Apajuín segainak batsatu.
JON 3:6 Tuja Níniven apujishkam nuna dekauwai. Nunik niishkam ekemsa inamtaijin eketu wajaki, jáanch apu nugkutai nugkuagbaunak awimak ukuak, jáanch pegkegchaun nugkuja nugká pujusui. Nunak Apajuín eme anentus nunikui.
JON 3:7 Nunik pempeenmawaik, apu niina atuwe aidaujai chichaman umika ashí aents Nínivenmaya aidaun akuptak: “Makichik aentskesh yujumkanak yuwashtinme. Tuja tagku aidaushkam ayugnashti, yumish sunaschati.
JON 3:8 Duka puyatjutsuk ashí aents aidautijum wake besemag pujaku nugkutai jáanch pegkegchau aidau nugkuktajum, nunikjum Apajuí senchi untsuktajum. Nuniakjum maki makichkitijum pegkegchau takamtaijum, magkagtutaijum aidaujai idaisatajum.
JON 3:9 Nunika ajinish Apajuí iina kajegtamak suwimkan amastag tiu akush, wait anenjamag tsagkugtamjamtai jinutsuk iwaku pujuschainjiash”, tiuwai.
JON 3:10 Tuja ashí aents Nínevenmaya aidau pegkegchau takatan idaisagmatai, Apajuí suwimkan susatjai tiuwaitak, dekas dutikashtatjai tusa idaisauwai.
JON 4:1 Apajuí Nínivenmaya aents aidaun tsagkujug suwimkan sutsuk idaisamtai, Jonás senchi kajekui.
JON 4:2 Nunik Tuke Pujuun chichajak: “Tuke Pujuuwah, wika juna aneasan tuyajai. Wi mina nugkajui pujusan anentaibiag duka imatiksamek umikume. Amek Apajuí pegkeg, wait anenkagtin, wamak kajechu, anentak wajasuitam iman asam, suwimkan susattajai timesh awake anentaimjam, suwimak sutsuk idainaitam nuna dekau asan, wika amina ukukin Tarsis nugkanum atushat tupikaktajai tibaijai.
JON 4:3 Ame suwimak sutsuk idayam nunú minak shiig awajtatsui. Aaní pujutnaitkumek dekas minak mantuata. Iwaku pujusan ame suwimak suwatsum dutikakmin anentaimku waittan dakitajai”, tiuwai.
JON 4:4 Tujash Tuke Pujuu niina ayaak: “¿Amesh wagka wainkamesh kajeame?” tiuwai.
JON 4:5 Tusa tima yaaktanum pujau jiinki, etsa minitaiya nuni yantamnum numi kupig pataja bikintu wajasmatai, nuwi waig ekemas Apajuísh yaaktanash itugkatig tusa diyaak eketu.
JON 4:6 Nuwi pujaig Tuke Pujuu makichik ajakan tsapapiuwai, dutikam nunú Jonás pujamun bikintu awajsauwai. Nuni yaigkui Apajuí Jonásan senchi etsa sukuak waitkasai tusa. Dutikam Jonásak shiig aneas nuna wakentin bikintunum pujau.
JON 4:7 Nunik pujai tsawak kashikmas Apajuí shuni numin yuwati tima yuwauwai. Dutikam nunú numi jakauwai.
JON 4:8 Nuniku ai kashikmas etsa jiinai, Apajuí dase sukutnun etsa akaetaiya nuwiyan dasenmitkakui. Nunú shiig senchi sukuam Jonás jamain dekapeak: “Iwaku pujutnak dakitajai, jakatag tajai”, wajau.
JON 4:9 Imattai Apajuí chichajak: “¿Anú numi jakamtai kajeam dusha pegkejan aniajai tamek?” tau. Tusa tama Jonás ayaak: “Ehe, wika pegkejan aniajai. ¡Senchi kajeakun jajai!” tiuwai.
JON 4:10 Tusa tutai Tuke Pujuu chichajak: “Aanka ame ajachbau, tuja nuigtush ame tsakapagchamu nigki kashi tsapai tsakaja, tikich kashia duwi jaka tsawaja nunú ame puyatjame.
JON 4:11 ¿Ame numikesh puyatjam nunash, wi ciento veinte milan nagkaesau aents Nínivenmaya aidau shiig dekachu asag uchijai betek yuja nuna, nuigtu kuashat kuntinchakam ayá nuna wait anenjashtag? Nuadui wika wait anentajai”, tiuwai Apajuí.
MIC 1:1 Tuke Pujuu Samarian Jerusalégjai dita pegkegchaujin diijus tsaiktinjin pachis Miqueas Moréset nugkanmaya aajakua nuna ujakui. Nunak Judá wegantu aidaun apuji aidau Jotam, Acaz, Ezequías aatus takasu aina nunú tsawantin ujaak aatus tiuwai:
MIC 1:2 “¡Ashí aents aidautijum wi taja nunú antuktajum! ¡Juju nugkanmaya aidautijum shiig antukjum jukitajum! Tuke Pujuuk niina jee pegkegma nuwi pujusag, atum suwimak jukitnun pachis etsegkattawai.
MIC 1:3 Tuke Pujuu niina pujusa inamtaijin pujau ukuak, muja titijin taa nuwi wekagas tattawai.
MIC 1:4 Tuja nii taa mujan najataik, muja aidauk wiya jinum sukuam yumimegama numamtuk wajaktinai, tuja muja najatamu paka aidauk yumi senchi yutak nugkan yumpuwama imanik yumpunag kanaktinai.
MIC 1:5 Duka Israel aents aidau intimtaijin, tuja dita tudaujin nuniktinai. Israel aents aidauk Samaria nugkanum pegkegchaun takamsau ainawai, untsu Judá wegantu aidauk wainka apajuímtai dakumka najanamu aidaun Jerusalégnum jegamjujag nuna emematujaku ainawai.”
MIC 1:6 Nuadui Tuke Pujuu chichaak: “Yaakat Samarianak tsaiktatjai, dutika ai ayatak kaya tuwasua weaku, jega atsau ayatak uva ajakmamain awajsattajai. Tuja muja najatamu paka aina nuwishkam, nunú kaya aidaun nagkimkattajai. Dutikan yaakat najanku kaya aepkamunash ipaantujan pan awajsattajai.
MIC 1:7 Tuja dita apajuímtaiji dakumka najanamu Samaria nugkanum ayá duka ashí tsainkattawai. Tuja dita ememattai numi aina dushakam ashí apenkattawai. Nunú dita apajuímtaiji aina duka nuwa akika dutiktai aidaun kuichkiji juki najanamu asagmatai, jinum jiya ukuijan ataktu nuwa akika dutiktai aina nuna kuichkiji awajsattajai”, tujutmayi Apajuí.
MIC 1:8 Nuna antukan shiig senchi wake besemag dekapeakun senchi buutjai, nuniakun wisu sapatjinchau wekaesan, bakantau shinau wajakun, lobo buutu wajajai.
MIC 1:9 Samarianmaya aents aidaun tudaujig tsagkugnamainchau, Judá wegantu aidaun tudaujinash amaigkae, imaniak mina aentsug aidau Jerusalén batsata imanuishkam jegae.
MIC 1:10 Tujash Gadnumia aents aidauk juju pachisjumek ujakaigpajum, buuttakesh buutigpajum, ayatak wake besemag dekapeamunum Bet-le-afránmaya nugka yukukuntua nuwi tadaejatajum.
MIC 1:11 Bellavistanmaya aents aidautigminak achipajag jujamkiagtinai, dutijamawagmatai wainka inataijai betek, wisu datsan shiyaktinaitjume. Atum pujamun ijus tikich yaaktanum batsamin aidau buutiagtinai. Tujash dutika jujabiagtaish, Zaanágnumia aents aidaush atumnak ayamjutpakchagtinai.
MIC 1:12 Tuja yaakat Amargura batsamin aidauk ayamjutpaktinme tusa dakamainak waitiagtinai. Tujash Tuke Pujuuk Jerusalén waitainum nagkamas suwimkanak susatnai.
MIC 1:13 Atum Laquishnumia aidautigmek, caballo senchi tupikain carro maanitainum jigkajum umintsatajum. Siógnumia aents aidauk Laquishnum pegkegchau takatnak unuimaju ainawai. Tuja nuwi Israel aents aidaushkam Apajuín intimjukiag pegkegchaun takasu ainawai.
MIC 1:14 Atumi nugkem Moréset-gat tutaya duka tuke ukuakjum ukuktajum. Tuja Israel aidaun apuji aidaunak yaakat Aczibnumia yaigchagtinaitak wi yaigtatjime tusag tsanujaje.
MIC 1:15 Tuke Pujuu chichaak: “Maresánmaya aents aidautigmin depetamak amupaktinme tusan aents maanita yachan ataktu awetittajime. Nunú minitaik Israel aents dekas wajiu aidaush, nuna ishamak pisajag waa Adulam tutaya nuwi akumjagtinai.
MIC 1:16 Jerusalégnumia aidautigmek buuttajum, nuniakjum susujum awagtajum, buuttajum nuniakjum awamagjum, chuagka buukejai betek pinui wajastajum. Atumi uchijum aneetaijum aidaunak, achijag tikich nugkanum yajuakagtinai”, tawai.
MIC 2:1 Aents pegkegchau aina nunak wait anentuinajai, wagki ditak depetmak batsatu asag, ememainak wajina pegkegchaun takastag tuinawa nunak kaja kajanmaske uminawai. Nuadui nantaamuik nunak betek dutikainawai.
MIC 2:2 Tuja nugkan wakegainakug tikichi nugken atantuinawai, tuja jega aidaun wakegainakushkam, tikichdaun atainiag juwinawai. Dutikainak jennunak niina nuwe, uchiji aidaujai tsanujag jiiki ajapawag waitkainawai.
MIC 2:3 Nuadui Tuke Pujuu chichaak: “Wishakam atum suwimak jukitnunak chichaman umikjai. Suwimak katsunmainchaun amastatjime, nuna uwemtumainuk makichkish atsuttawai. Suwimak ishamain katsunmainchau asamtai, emema yuja nunak nunikchagtatui.
MIC 2:4 Nunú tsawantin aents aidau dushiktamiagtinai, nuninak juna aatus kantamjutpainak: ‘¡Ashí depetkam wainak juwakaje! ¡Yaunchkek Apajuí aentsji ayanume, tujash nunak idaisaje! ¡Iina suntaji aidau depetkagmatai, dita nugke aidauk ii akandaija yajuakji!’ tiagtinai.
MIC 2:5 ¡Israel aents aidautijum antuktajum! Atumek mina aentsug ayugme, tujash wika nugkanak ataktuk amaschagtatjai”, tujamui.
MIC 2:6 “¡Atum waita etsejin aidautigmek Apajuí profetaji chicham pegkegchaun ujatkai!” tusajum dakitagme. Atumek utugchat ajutjamu dekakjumesh, dekaskeapi tatsugme. Nuadui profeta etsegbau antutak dakitagme. Nuniakjum: “Apajuík jutijaig shiwagchauwai, Apajuík jutiinak kajegtamkash idaitamtsuk atsane pujuttawai, nuigtush Apajuík aajag dutikchauwai, Apajuík ashí aents aidau pegkejan takaidaunak shiig kuitamnai”, tajume.
MIC 2:8 Atumek mina aentsug aidaujai shiwagmaejume. Tuja maaniamunum shiyaku aidau uwemjajiapi tusag shiig aneas waketug minidaushkam, jáanch akik aidaun yajuak minidau atanjume.
MIC 2:9 Dutikakjum dita jee aneetaiji aidaushkam atum atankujum nuwa aidau jiiki ajapeagme. Dita uchiji aidaun wi susauwaitag dushakam tuke jujuki emegkatjume.
MIC 2:10 Nuadui atumek ¡juwi batsamtsuk, jiinja shiyaktajum! Juwig dita wakegamun takainak batsamsatnume tichamui, tuja atum pegkegchau awajsau asagmin, juka ashí tsainkattawai.
MIC 2:11 Makichik aents nigki nagkami waitjak: “Vino senchi kajiau umamuk pegkejai, tuja tikich uwaja nampetai aina dushakam pegkejai”, tawa nunú atumek dekas profeta pegkejai tajume.
MIC 2:12 Israel aents aidau ujumchik iwaku batsatunak yajuakan, uwig makichik wenuknumak ijumaina numamtuk ijumjattajai. Dutika ai shiig aneenak, kuashtachuitak, kuashat pampaumaina imatiagtinai.
MIC 2:13 Apajuí eemak jinta jintama wetinai, nunitai dita pataekagtinai, yaakta waitijiya nuni jiinjagtinai. Nunikagmatai dita apuji Tuke Pujuu eemak wetinai.
MIC 3:1 ¡Israel aents aidaun apuji aidautijum juju yamai antuktajum! ¿Atumchaukaitjum shiig takastinme tusa etegkamu aidautijum?
MIC 3:2 Tujash atumek pegkeja nunú kajejakjum, pegkegchauwa nunú takagme. Nuniau asajum mina aentsug aina nuna neje ichiaja yajutkajum ayatak ukunchik emajum ukuajume.
MIC 3:3 Tuja atumek mina aentsug aidauk iwakuk yuwagme, dutikakjum duwape ichinjajum, neje ollanum painkatasa akaaja ukunchi tsupigtayama imatikagme.
MIC 3:4 Makichik tsawantai Tuke Pujuu untsuktinaitjume, tujash niig aigmakchagtinai. Atumek tikima pegkegchau ainajum duwi Apajuí atumnak uumjutpakagtinai.
MIC 3:5 Mina aentsug aidauk profeta waita etsejin aidau tsanumainak, utugchatak atsuttawai tuina nuna antujuinak pegkegchaunum yujawai, nunú profeta aidauk ya ditan yujumkan ajampeawa nuna shiig anentuinak, yujumkan ajampenatsu nunak kajejuinawai.
MIC 3:6 Nuadui wi wajina dutikatag taja nunak ataktuk ditanak ujakchagtinaitjai. Ajumaish ditanak makichkish dekamtikashtinaitjai, nuadui ditak wajig nagkaemaktinaita nunak makichkish etsegkashtin ainawai.
MIC 3:7 Nuadui nunú profeta aidauk, anentaimas dekamin aidaujai shiig datsantan juwakagtinai. Wagki Apajuí jintinchamush wajinak etsegkatnume nuninak wainak chichá yuja nunak itatjatnai.
MIC 3:8 Untsu minaig Tuke Pujuu Wakani pujau asa, nunú minak senchimtijawai. Nuadui wika Apajuík dekas shiig betek imatikas takawai tajai. Tuja nuigtushkam Israel aents aidauk pegkegchau intimkiu ainawai tajai.
MIC 3:9 Apajuí chichaak: “Israel aents aidaun apuji aidautijum antuktajum. Atumek tsanumtsuk shiig takata duka dakitajume, tuja chicham umiktina dushakam yapajiajum takagme.
MIC 3:10 Jerusalégnumak, tuja mina jegag pegkegma nuwishkam, pegkegchau takat, tuja magkagtut aina duka makichkish mijamtsuk tuke imani awai.
MIC 3:11 Apu chichama epegkin aidauk ya kuichkin akikmawa nuna yainawai, tuja sacerdote aidaushkam kuichkin akigkatnume tusa jintinkagtuinawai. Profeta aidaushkam kuichik akiam chichaman etsejuinawai, nuninak: ‘Tuke Pujuu jutijaig pujawai, nuadui suwimkanak amaschattawai’, tuinawai.
MIC 3:12 Atumi pegkegchaujin mina jegag pegkegma duka tsainkattawai, tuja atumi pegkegchaujin Jerusalégkak tsaikam aents atsau bashiak asattawai. Tuja muja pegkejam Siógkak dupa ijiam asattawai”, tawai.
MIC 4:1 Tuke Pujuu jee pegkejam awa nunú mujak, tikich muja aidaun nagkaesau dekas muja shiig múun atinai. Nunú mujanum ashí aents tikich nugkanmaya aidau shiig kuashat kauniagtinai.
MIC 4:2 Kuashat aents nugka muunnumia aidau kaunainak: “¡Minitajum muja Tuke Pujuunua nuwi wakagmi, nunika Jacopa Apajuíjiya nuna jeen jegawagmi, awi Tuke Pujuu niina chichame umiktin agagbauwa nuna jintinjamamtai, iish nunú antuka umikagmi!” tiagtinai.
MIC 4:3 Tuke Pujuu aents nugka muunnumia aidaunak, tuja atushtanmaya aidaunashkam suwimkan susattawai. Tuja utugchat ataishkam nii epegkeatnai. Nuadui dita aidauk puyagjinak ajak ajakmaku takatain najankagtinai, untsu nagki aidaunak trigo tsupitain najankagtinai. Dutikawaju asag nugka muunnumiagkesh tikichjai maaniauk makichkish atsutnai. Tuja maaniatag tusa uminku suntagmaebaushkam atsustinai.
MIC 4:4 Nuadui ashí aents aidauk ishamkagtutsuk maki makichik dita uva ajakbaujin, higo ajakbaujin nuna wakentin bikintunum shiig agkan ayamainak batsamsatnai. ¡Nunak dekas Tuke Pujuu ashí senchigtina nunú aatus tawai!
MIC 4:5 Tuja tikich aents aidauk dita apajuímtaiji aidaun umijuinawai; dita núninakuish, iik Tuke Pujuu iina Apajuíjiya nunú atakea duish tuke umigkatin ainaji.
MIC 4:6 Tuja junashkam Tuke Pujuu chichaak: “Mina aentsug aidauk wi suwimak susam waituidau asag, uwigjai betek yawekag, shutusag wainak yujawai. Tujash dukap atsuk ataktu yajuakan ijumjattajai. Nunú tsawan jegamtai, ujumak iwaku batsatun yajuaka ijumjan, ataktu shiig kuashat senchigtin awajsatnaitjai. Dutikan wi dita apuji wajasan mina jegag pegkegma nuwi pujusan inamjatnaitjai.
MIC 4:8 Muja Siógkah, ame yaakat Jerusalén mina aneetaijua nunú ejakam kuitamin ayume, nuadui ataktu yaunchuk aayum iman wajastatme. ¡Ame atatme mina aentsug aina nuna dekas yaaktaji shiig múun!” tawai.
MIC 4:9 “¿Wagka tujash Jerusalégka amesh nuwa uchin najaimak buutama imanikmesh buutme? Amek wainkamek buutmaitsume, amina apugmik pujawai, tuja apu chichagkagtin aidaushkam batsatui. Dekas buuttag takumek, amina aentsjum aidau ukugmakiag ikam ajanum batsatun, babilonianmaya aidau achijag yajuakagtina nunú anentaimsam buutta. Dutikawagmataish, wi ditanak ayamjukan uwemtikjan agkanmitkawagtinaitjai.
MIC 4:11 “Kuashat aents nugka muunnumia aidau amina shiwagmatjamainau asag chichainak: ‘¡Utusag Jerusalégkan tsaikanum tusa wakegaji!’ tuinawai.
MIC 4:12 Tujash nunú aents aidauk Apajuísh wajinak dutikatag tawa nunak shiig dekainatsui, Apajuí ditanak trigo tsupija ijumja jigkatiama numamtuk awajkatta nuna ditak dekainachu asa tuu yujawai.
MIC 4:13 ¡Pai Jerusalégkah! ¡Nantakta, nunikam dekegka tsaikta! Wagki Apajuí chichaak: ‘Wi aminak depetmakti tusan toro senchia iman, kachuji jiju hierro katsugma ibau, nuigtush nanchiki bronce katsugma iman awajsattagme. Dutika ai depetkam dita wajiji kasamka ijumtai aina nunú ashí yajutkam mina sujustinaitme, wagki ashí nugka duka midau ainawai’, tawai Apajuí”, tiuwai Miqueas.
MIC 5:1 Jerusalégnumia aidautigminak tentempawaje, atum ayamjumaktinjum umintsatajum. Apajuí atumi shiwaajum aina nuna ishituk, Israel aents aidau apujin senchi suwimkan susattawai.
MIC 5:2 Untsu Belén Efrata tuuta awagmatia, nuwiya aidautigmek, tikich Judá wegantu aina nujai diismash ujumchik ainagme. Nuninuch ainayatkujum, eme anentsa chichagtai atinaitjume. Wagki atumi patayi aajakua nuwiya apu atin akiina Judá wegantunum inamjattawai.
MIC 5:3 Tuja Tuke Pujuuk nuwa uchin uchigmaktin ejapjuk puja nunú uchigmakmatai, niina aentsji aidaunak ataktu yaigtin asa, yamai nagkamas ima ditanak idaiwai. Nunú uchi akiinamtai, tikich Israel aents aidau shiwag amuam iwaku juwaku aidau dita patayi aidaujai ijunjagtinai.
MIC 5:4 Nunikagmatai aents uwija kuitamnujai betek nunú apu Apajuí senchijijai ditan kuitamkatnai. Tuja nunú apuk ashí nugka nagkatkamunmash inamjatnai.
MIC 5:5 Nuniak nii agkan pujutan amastinai. Tuja asirianmaya aidau iina nugken utsanawag jega múun aidaun atanjamjatag tuinakuig, siete apu aidau ocho suntaja apuji aidaujai ditan jetektinme tusa ishiaktatji.
MIC 5:6 Dutika depetka Asiria, Nimrotan nugkega nunú utsaantua ii jukitnaitji.
MIC 5:7 Tuja maaniamunum jinachaju aidauk tikich aents aidaujai apatka diismash, chijichi yumi ukatchamaitak, Tuke Pujuu yumi yutumtijamu yutak uchupjam pegkegchin iwagnama iman agtinai. Tuja nuigtushkam león tagku wenuken waya, uwig aidaun ashí ijinama iman agtinai.
MIC 5:9 Tuke Pujuuwah, amek amina shiwaajum aidauk imatika jetekam ashí ijinatnaitme.
MIC 5:10 Tuke Pujuu chichaak: “Nunú tsawan jegatna duwi, amina caballojum maanitai aidaunak ashí ijituattagme, dutikakun carrojum aidaunashkam tsaigkattagme.
MIC 5:11 Tuja yaaktajum aidaunashkam kumpin jiigbau ayá nujai ashí tsaiktinaitjai.
MIC 5:12 Tunchijum aidaunak, anentaimas dekamin aidaujaí ashí ijituattagme.
MIC 5:13 Amina apajuímtaijum aidaunak, tuja dakumka kaya najanamu aina nujai ashí tsaiktatjai. Dutika ai ame najanamu emematu pujam duka ataktuk emematchatnaitme.
MIC 5:14 Yaaktajum aidaunak ashí tsaiktatjai, tuja amina apajuímtaijum Astarté, dakumka najanamua nunashkam, numi aidau emematam nujai tsaiktatjai.
MIC 5:15 Ashí aents tikich nugkanmaya aidau mina umigtutan dakitjau aina nunak mina umigtukchagbaunum iikmakun shiig senchi suwimkan susagtatjai”, tawai.
MIC 6:1 Israel aents aidauwah, shiig antuktajum. Tuke Pujuu atumin kajegtamak chichaak: “Mina aentsug aidauwah, atumi utugchatjumin dekajuajime, nuniku asan, yamai ayamjumaktajum tajime. Atum ayamjumaku chichamun antukag, nunak dekas tawai tusa amina yaimpakagtina nunú, muja aidau, nain aidau untsuka ijumjam, atum antugtagmin chichamjumaktajai titajum.
MIC 6:3 “Tujash nunú ame eke chichaktin aminig wi tajame: ¿Wisha aminash itugkamjame? Atsa dutikachkunush ¿wajinma pegkegchaush awajkajame? Nunú tujutta.
MIC 6:4 Atumek Egipto nugkanum inaku waitkatai batsatutigmin wi jiijan agkanmitkauwaitjime; atumin yaimpakag jiipagtinme tusan Moisésan, Aarógkan, Marían ishiakamiajai.
MIC 6:5 Mina aentsug aidauwah, Moab nugkan apuji Balac atumin pegkegchaunum yumigtamjatag tuyi, tujash Balaam mina daajui atumin pegkegnum yumigtamjabia nunú adeagtajum. Tuja nuigtushkam Sitim nugkanum juwaki, Guilgal shimamunmash waji utugchat igkugkabiugme nunú kajimattsuk aneaku atajum. Nuniakjum, dekas Tuke Pujuuwap yaimpakuita titajum”, tiuwai.
MIC 6:6 Tusa timatai dita chichainak: “Tuke Pujuuwah, amek múuntaitme. ¿Ame emematkuish, iish waji jukiya aminish tamainaitji? ¿Toro tsakat makichik mijanji ajamu maa nuna neje ashí apeakuika emematmainaitag? Tujash amek duka wakegatsme.
MIC 6:7 Dutikachkuish mil carnerok, atsa diez mil namak amaina ibau kuashtak aceite anentag amamainaitag. Tuja dushakam aminak shiig awajtamtsui; amek iina tudaujinig iina uchiji iwai aina nuna sujustinme tusamkesh tatsume”, tuidau.
MIC 6:8 Tuke Pujuuk atumnak tuwita pegkejash, tuja aminunash wajina wakegawa nunak yaunchuk ujapakagmae. Duka utugchatchauwai shiig yupichuchi, tuja duka juju ainawai: Shiig takata nunú aneetajum, nuniakjum aents imanchauch aidaush wait anenjatajum, nuniakjum emematsuk ima minak emematjitajum tusa Apajuík wakegawai.
MIC 7:18 “Apajuíjuh, tikich Apajuí amejai betekak atsawai. “Amek amina aentsjum ujumak iwaku batsata nuna pegkegchauji tsagkujakum, intimtaiji aidaush kajimatkim idaime. Amek jutii aidauti anejatu asam, kajekmesh tuke nunismekek pujatsme.
MIC 7:19 Nuadui wait aneasam ataktu wait anenkagtujam, iina tudauji aidauk dekas nayantsa kunajin ajugka ajapata.
MIC 7:20 ¡Iina apachji Abraham, Jacob, nuigtu tikich iina muunji aajaku aidau anagkuawaitam duka, dutiksamek wait aneasam amina anenkagmin tuke kuitamkagtuktin ata!” tiajui.
HAB 1:1 Profeta Habacuc aajakua nuna Apajuí nii aentsji aidaun chichama ujakti tusa iwaintukui.
HAB 1:2 “Tuke Pujuuwah, yainkata tusan senchi untsuagme, tujash amek minak antugtatsme. ¿Wajutiya minash antugtuktatme? Pempeentuniki waitkaniamu ayá nunú suwimak susam emegkagta tusan segamjame, tujash amek makichkish duka dutikatsme.
HAB 1:3 ¿Wagka minash ibau pegkegchau aidau iwaintugkumesh waitkajame? Pegkegchau takat aidau, utugchat aidau, yaakat tsayamu, jiyaniamu, maaniamu aina duka makichkish agkaatsui, ashí yantamnum ayawai.
HAB 1:4 Amina chichamem umiktin agagbaunak makichkish uminatsui, ajantunisag shiig aneas betek yainidauk makichkish atsawai. Aents pegkegchau aidau aents pegkeg aidaun waitkainawai. Tsanumat, kasamat aina duka ashí yantamnum ayawai”, tiuwai Habacuc.
HAB 1:5 Tusa timatai Apajuí ayaak: “Tikich aents aidau batsata nuwish wajukeawa nunú shiig diistajum. Aunak dukap tsawan atsuk wi dutikattag nunú wainkajum anentai jegashtatjume. Juna tikich ujapainakuig, atumek dekaskeapi tumaitsugme.
HAB 1:6 Caldeo aents pegkegchau magkagtin aidau ashí nugkanum yujasag, tikichi nugken atankiagtatus wakeyin aina nuna inajagtatjai jetepaktinme tusan.
HAB 1:7 Ditak pegkegchau takatnum eemkau ainawai, nunin asag, dita wakegamun takau ainawai, nuadui makichkish tumainchau ainawai.
HAB 1:8 Aents caballonum maanin aidauk shiig kuashat caballonum entsatkau atushat minisag tutugtuinawai. Nunú caballo aidauk ikamyawan nagkaesau senchi tupikainawai, tuja nuigtush uwegshunmaya lobo kajen ajankachua nuna nagkaesau ainawai. Iman asag atushat minisag dita shiwaajinak águila yutaijin wainak, nanaak akaetuki achiyama iman ainawai.
HAB 1:9 Dita shimuinakug ashí ijina shimawai, imaaninak senchi uwakmakag shimawai, tuja aentsun achijag yajumaina duka, nayantsanum kayam dekapamainchauwa iman weakui.
HAB 1:10 Iman asag apu aidaunak, tuja tikich aents eme anentsa diitai aina nunashkam dushikinawai. Yaakat peejamu aina nunak wainkauch diinak dushikinawai, nuninak kamatkanum batsamas yaaktanak utuinawai.
HAB 1:11 Dase senchi dasentak kedegtuk nagkaemama iman ainawai. Iman ainakush dita senchijiya nuna apajuímaidau asag tunamainawai”, tiuwai.
HAB 1:12 “Israel aents aidaun Apajuíjiyah, amek pegkejam tuke pujuuwaitme; jinatnume tusamek idaikagtusaipa. Amek amina aentsjum aidau suwimak susam jintintuatag tusam, caldeo aents aidau ishitkaume.
HAB 1:13 Amek pegkegmaitam iman asam, pegkegchauwa duka atsane pujuchuitme, tuja tudaushkam dakitnaitme. Nuadui ayatkek dii pujuipa, tuja aents pegkegchau aidau aents pegkeg aidaun maatnume tusamek agkan idaisaipa.
HAB 1:14 ¿Wagka aents aidaush nayantsanmaya namak aidaujai betekash, tuja kuntin apugtuchu aina nujai betekash awajsaume?
HAB 1:15 Nuadui caldeo aents aidau, aents namaka main agsean ajuntuk, tuja retan nená yupichuch kuashat namakan achiyama numamtuk aents aidaun achija ijumainawai, dutikawag nuna diisag shiig aneenawai.
HAB 1:16 Nuadui nunú aents namaka main aina duka niina redjin, agseajijai emematuinak kuntinun maa apeenak, kugkuin inciensonashkam apeenawai, wagki ditak duwi maawag dita yuwatnujinak shiig kuashat ijumag batsatu asag, shiig aneas batsatui.
HAB 1:17 Caldeo aents aidau wainak mau batsamtitnume tusamek idaikagtusaipa”, tiabiajai.
HAB 2:1 Nuna pachisan Apajuín segau asan, suntag jinta niimin ekemas niimak ekemama numamtuk Tuke Pujuush wajinjuttig tusan dakakun pujubiajai.
HAB 2:2 Nunikan pujai Tuke Pujuu mina aijak: “Wi amina iwaintuktatjam nunú tablanum paan shiig wainmain agagta, dutikamu asamtai, tikich aidaush yupichuch ausatnume.
HAB 2:3 Nunú ame wainkattam duka juu tamawaikik nagkaemakchattawai, tujash amek waugtutsuk dakasta, nunú nagkaemaktinuk eke tsawan jegatsui. Tujash duka makichkish megkaetsuk tuké uminkattawai”, tujutmayi.
HAB 2:4 “Tuja wi agagta tajam nunak juna tajai: ‘Aents pegkegchau emebau aidauk jinawagtinai, untsu aents pegkeg ima Apajuínak umijuidauk jinachagtinai.’
HAB 2:5 Aents emebau aidauk apu atag tusag wakegainawai, vino pegkejaitak enamkagtuwama nujai betek ainawai. Tikich aidau nagkaesau amí tuidau asag, makichkish ayámjutsuk yujajus aents tikich nugkanmaya aidaun amuinawai. Dita aidauk jaka megkaetaijai betek, tuja ukumatai aents jakaun dakitmaitsu nujai betek ainawai. Nunin asag ayatak wenawai.
HAB 2:6 Tujash ditak yana waitkainawa nunú pempeentuki dushikiam agtinai. Dutika dushikinak: ‘¡Ame tikich aents aidaun wajiiji yajutkam wiakuch wajasum nunak wait anentagme! ¿Amesh wajutiya kasamtash idaisattame?’
HAB 2:7 “Ame waitkam nunú pachiachbaunum pempeentugmakiag waitkagmasagtinai, imatijamainakui sapijai kujaitnaitme, tuja amina wajijum aidaunak ashí atanjamjagtinai.
HAB 2:8 Tikich nugkanmaya aidau ijunag chichama umikag, ame dita kasajauwaitam dutiksag ditashkam ashí kasagtamjagtinai. Dutik akikmaktatme ame juju nugka juwiya aents ijinkum yaakat aidau tsaikuitam nuadui.
HAB 2:9 ¡Kasamkamu aidau, tikich tsanuja yajutkamu aidaujai amina aentsjum aina nunú wiakuch awajsaum, nuadui aminak wait anentagme! Ame anentaimsamek, jutikanus shiig batsasainja tamestai.
HAB 2:10 Tujash ayatak datsanmain iwaintukume. Kuashat aents tikich nugkanmaya aidau ijinatjai tukamam, amek pempeentumakim amumakume.
HAB 2:11 Yaakat peejamu aidau, jega ayanke aidaujai ame pegkegchau takamsamua nuna pachisag aentsjai betek senchi untsumiagtinai.
HAB 2:12 “¡Amek aents aidau ijinkum, dita nugke atanjam nuwi yaakat najankaume, nuadui aminak wait anentagme!
HAB 2:13 Tujash ame waittsa umikum duka wainka imatikaume, aunak Tuke Pujuu ashí senchigtina nunú ashí apea tsaika ajapattawai.
HAB 2:14 Tuja Tuke Pujuun imanjiya duka, yumi nayantsan ipiamna numamtuk, ashí nugkanum piyaktatui. Nunikmatai ashí nuna dekawagtinai.
HAB 2:15 ¡Aents amejai tikiju batsatu vino drogajai pachimja ama amakuam enamkam wisu weakui, nunú diisam dushiki pujam nunak wait anentagme!
HAB 2:16 Tuke Pujuu aminak inastamjattawai, amek makichkish emematam amaitsume. Atum tikich aidau datsan dushikiajum dutiksag, atumnashkam Apajuí datsanmainun iwaintamkagtatui. Dutijamawagmatai emebau ainajum duka ememachu wajastatjume.
HAB 2:17 Muja Líbanonmaya kuntin aidau ijinauwaitam nunú aminak bakugmattawai. Ame aents aidau ijinamunum, tuja yaakat aidau tsaikbaunum, suwimak juki waitiakum amina pegkegchaujum akikmaktatme.
HAB 2:18 ¡Babilonianmaya aidaunak wait anentuinajai! ¿Wagka atumesh wainka apajuímtai aidaunmash kajintsagmesh anentaimjume? ¿Wagka atumesh aannush yainkata tusagmesh segash yujagme? Auk numi, kaya, atum najanamu ainawai, tujash duka wainak ainawai. Auk jiju najana orojai, platayai ukatkamu iwakuchu asa nigki wajamainchau, tuja chichamainchau ainawai.
HAB 2:20 Tujash Tuke Pujuuk niina jee pegkegma nuwi pujawai. ¡Niina emtinig ashí nugkanmaya aents aidauk takamtak pujustinme!” tajai.
HAB 3:1 Profeta Habacuc Apajuín juna aatus segauwai:
HAB 3:2 Tuke Pujuuwah, ame ashí dutikaum nunak shiig dekajai, nuadui amina ishamakun kujajai. Wait aneasam iina apachji aidau yaigkuitam dutiksamek yaijatkata, kajegkagtukam idaikagtusu akumesh, wait anenkagtugta.
HAB 3:3 Apajuík Temán nugkanmaya minawai, Apajuí pegkegma nunú muja Parágnumia jiinki minawai, Apajuín imanjiya duka ashí nayaimpin jajutua awai, tuja ashí nugkanum Apajuí emematku kantamtain kantamainawai.
HAB 3:4 Winchamtinnum egkemak minawai, niina uwejenia chaajip keeka jiinui, nuniak niina senchiji uumak aunash iwainawai.
HAB 3:5 Nii minitaik kuashat aents aidau jata ishamainun achiimakag jinuinawai. Tuja niina ukuujin tsuwemu ishamain minawai.
HAB 3:6 Apajuí minau jasa wajataik, nugka uujui, tuja ashí aents aidaun diitaik, aents aidauk ishamainak kujainawai, muja aidauk tsainak megkagainawai, muja yaunchuk nagkamas aajaku aidaush yumpunainawai. Tujash Apajuín jintiya duka yumpunagkesh megkaekashtinun tuke atinai.
HAB 3:7 Nuigtushkam Cusagnumia aents aidau initak makichkish jiinmainchaunum egkema waitmaina imanik senchi waituidaun wainkabiajai. Tuja Madián nugkanmaya aidaushkam senchi ishamainak jiintsuk ayatak kaemag aakchinmag batsatun wainkabiajai.
HAB 3:8 Tuke Pujuuwah, aents caballonum entsatkau minimaina imanika minakum, aents maaniamunum depetmak carro maanitainum egkemag wegama numamtuk wajam dusha ¿wagka imanikmesh umintsaume? ¿Namak aidau, nayants aidau, wainka apajuímtai aina nunú kajegkamek imanikmesh umintsaum?
HAB 3:9 Akentaiyai aketka iju ichimaina imatikabiume nugkak, amina senchigmin imatikamua nunú namak najaneakmayi.
HAB 3:10 Muja aidauk amina waipainak, ishamjamak sunatuinawai. Tuja nayaimpinmaya yumi senchi yutawai, imanitai nayants kuna senchi tsukatu asa kedegtak ishamain wajawai.
HAB 3:11 Ame chaajip ishamain winchamtin nagkijai betek ekemaka akupkaamin, etsak nantujai uumak megkaekaje.
HAB 3:12 Ame kajekam nugka tenteame, dutikakum ame kajekbaugmin aents nugka muunnumia aidauk dajaja tsaika ajapmaina imatikame.
HAB 3:13 Amina aentsjum aina duka ame apu etegkauwaitam nujai yayaakum miname. Untsu aents pegkegchau aina nuna apujig mantuam, inabaujiya duka ashí tsaigkam emegkatkaume. Dutikamu asa ditak shiig wainak juwakaje.
HAB 3:14 Caballonum maanitan yacha aidau ememasag dase senchi dasentujai betek jetepaidau asag, amupaktag tiagmayi. Imatijamainakui ayamjumamainchau dekapmaiji, tujash ame dita apujig niina flechajinig depetkabiume.
HAB 3:15 Amek amina caballogmin entsamkam nayants ishamain wajamunum wekaeme.
HAB 3:16 Nuna antakun senchi ishamkabiajai. Nuniai mina wenujuk sunatmayi, imaniakun wajaschamin, ashí mina iyashjuig kakaumainchau dekapmaijai, nuniakun anentaijui tetegtimiajai. Tujash wika imaniaknush, waugtutsuk iina waitkagbau aina nuna Apajuí waitkastin tsawan jegatna nuna dakastatjai.
HAB 3:17 Tuja higuera ajakbau nejeachkuish, uva nejeachkuish, olivo aceitunan nejeachkuish, ajanmaya aidaush, ikamia aidaukesh nejenachkuish, tuja baka aidaush, uwig aidaush ashí jinutjamamtaish, minak Tuke Pujuu uwemtijuju asamtai, wika shiig aneasan niina ememattatjai.
HAB 3:19 Wagki Tuke Pujuu minak senchimtijawai, dutijak japa senchi tupikaina iman awajtus muja aidaunum iwajuk tikichish maumainchau kuitamjawai.
ZEC 9:9 ¡Yaakat Jerusalégnumia aidautigmek shiig aneastajum! ¡Shiig aneakjum kantamatajum! ¡Amina apujum burro tsakatnum entsatkau minitjamui! Imanchauch wajakin, pegkejam, pegkegchaun takachu, amina yaimpak depetmitkagmaktatus minawai.
ZEC 9:10 Efraín wegantu aidaun carroji aidaunak, flecha akenka nagkimtai aidaujai ashí tsaiktatui, dutikak Jerusalégnumia caballo aidaunashkam ijinattawai. Israel nugkanmak ashí depetmaktatui, nunik ashí tikich aents aidaush agkan batsamsatnume titatui. Tuja niig nayants jinagbau aina imanui nagkamas, namak Eufratesa aatus ashí nugkanum inamjatnai, nii inabaujig nagkatkauk achatnai.
ZEC 9:11 Tuke Pujuu chichaak: “Jerusalégkah, wi amejai numpai chichaman umikuitag nuna betek umiakun, yumigmat taimu yumi atsaig ashí jinaajum chimpigjum nunak jiijan uwemtijattajime.
ZEC 9:12 Achija yajuakam tikich nugkanum batsatutigmek yaakat shiig peeja umikbauwa nuwi waketjattagme. Yamaik atum waitiajum nuna nagkaesau, pegkegnum yumigsattajime, nuadui shiig aneasjum batsamsattajume.
ZEC 9:13 Judá wegantu aidauk arcojai betek, tuja Israel wegantu aidauk flechajai betek, tuja Jerusalégnak puyagjai betek awajsattajai, dutikan ditajai griego aents aidaunak ijinattajai”, tawai.
ZEC 9:14 Tuke Pujuu ditan jetektajum tusa titata nunak, dita nagki akenbaujig peemjai betek agtinai, Apajuí kachun umpuag tsumujinia dasenum pachitkau wetinai.
ZEC 9:15 Tuke Pujuu ashí senchigtina nunú niina aentsji aidaunak kuitamkatnai, dutikamu asag dita shiwaaji aidaunak depetuk najakag ashí amukagtinai. Aatus depetmakaju asag, shiig aneenak altar ukatkatasa numpa tsapanum aimka jutaya imatika aimak vinon umuinak nampejag shiig aneenak pampainiagtinai.
ZEC 9:16 Nunú tsawan jegakuig, mina aentsug aidaunak, uwija kuitamin uwigjin ayamjina numamtuk wi ayamjukan uwemtikjatnaitjai, dutika ai dita nugken waketug batsamsag kaya pegkeg winchamtin juki atsejutai najanamu winchantuwama iman agtinai.
ZEC 9:17 ¡Yajauwajah, nuwauch aidau, uchi datsauch aidau shiig yuwawag senchigtin shiig aneas dakunkut juju nugkanum batsatbau!
MAL 1:1 Israel aents aidaun ujakti tusa Tuke Pujuu profeta Malaquíasan akatjauwa duka jujuwai:
MAL 1:2 Tuke Pujuu chichaak: “Wika atumnak aneajime”, tujamui. Tusa tujamaig atum chichaakjum: “¿Amesh jutiish wajuk anejatme?” tajume. Tusa tajumin Tuke Pujuu chichaak: “Wika atumnak Esaú Jocobjai jimagmamu aig, Jacopan anejakuitag dutiksanuk atumnashkam aneajime.
MAL 1:3 “Tuja Esaúnak dakitjauwaitjai. Dutikau asan, niina nugke muja pegkeg ikam tepau aajakua nunak emestujan pegkegchau, uwejush ayatak kuntinun batsamtai awajtusuitjai”, tawai Apajuí.
MAL 1:4 Tuja Esaú wegantu Edom aents aidau chichainak: “Iina yaaktaji aidaunak tsaigtamkau ainawai, dutikau ainakuish ataktu yaaktamkagmi”, tumain ainawai. Tusa tiagtai Tuke Pujuu ashí senchigtina nunú chichaak: “Yaaktamkatnume, dutikawagmataish wi nunak ataktu tsaigkagtatjai. Dita nugkeg: ‘Aents pegkegchau aidaun batsamtai’ tutai atinai. Tuja ‘nuwiya aents aidauk Apajuí tuke kajegtai agtin’ tutai atinai.”
MAL 1:5 Nunú wainkajum chichaakjum: “¡Apajuín senchijiya nunak Israel aents aidaun nugkega nuna nagkaiki aents batsamin aidaush ememattinme!” titinaitjume.
MAL 1:6 Tuke Pujuu ashí senchigtina nunú sacerdote aidaun chichajak: “Uchi aidauk dita apajinak umijuinawai, tuja inak aidaushkam dita parjugjin umijuinawai. Tuja wi atumin Apajuíjiyaitag nuniaish ¿wagka minash eme anenjusjumesh diigtsugme? Tuja wi atumin apugmitag nuniaish ¿wagka ajaantugsagmesh diigtsugme? Atumek minak dakitjagme, nuniakjum: ¿Iish amina daagmesh wajutiya dakitjaish idaisabiaji? tajume.
MAL 1:7 “Atumek pag pegkegchau aidau jukijum mina altarjui itagme. Nuniayatkujum: ¿Iish waji pegkegchauwa dutikaji? tajume. Atum aidautijum mina altarjua nunú ajaantusa diitsuk wainkaya nunin diyajum nunú minak kajetan sujawai.
MAL 1:8 Kuntin wainmachu aidau, shutuu aidau, jau aidau mina sujakjum, pegkeg takaji tajume. Diik nunú yajuakjum atumi apujum aidau susakjua ditash shiig aneasampash jukiajat.
MAL 1:9 “¿Apajuí anentag suwaji tusajum aanin pegkegchau aidau ikaunmayatkugmek, Apajuí ii segamun antugtamak wait anenjamjati tusajum dakagjum? Witjai Tuke Pujuu ashí senchigtinnuk. Tuja juna shiig dekatnume tusan wakegajai:
MAL 1:10 ¡Wika mina jegajun waitiji aina duka epennati tusan wakegajai! Ataktu awagkijum anentag susami tusajum, aanin pegkegchau aidau ikaunmajum mina altarjui wainka apeawaijum tusan dakitajai, wagki wika atumnak kajegkajime, nuadui makichkish jujukchattajime.
MAL 1:11 “Ashí nugkanum mina eme anenjus diijuina duka, mina emematjuinak kugkuin incienson apeenak, dekas anentag pegkeg wisha wakemain aidaun itagtuinawai.
MAL 1:12 Tujash atum sacerdote aidautigmek minak ajaantugsagmek diigtsugme. Nuadui midau altar, mina mesajua nunú pegkegchau diyakjum, nuwi anentag mina sujusbau yutai aina dushakam tsumain diyagme.
MAL 1:13 “Tuja atum chichaakjum: ‘¡Jutiká pujutak iik yawetjaji!’ tajume. Tau asajum, kuntin kasamkamu, baka shutuu, nuniachkush jamamtin jukijum, juju maa apeaku Apajuí shiig anemtiksami tajume. Duka minak makichkish shiijak awajtatsui, atumek duka mina dushiktakjum aikagme.
MAL 1:14 ¡Kuntin shiig pegkeg, mina anagtuamun yapajia ukuak, tikich kuntin pegkegchaun juki mina anentag itagta duka aentsuk tikima shiig pegkegchau atinai! Witjai dekas apunuk, wika aents aidaun ishamtayaitjai”, tusa Tuke Pujuu ashí senchigtina nunú tawai.
MAL 2:1 “Juna yamai wi Tuke Pujuu ashí senchigtinun taja nunak sacerdote aidaun tajai:
MAL 2:2 “Atumek ima minak umigtumain ainagme, nuniakjum ajaantugsajum diigmain ainagme. Nuniachkuminig pegkegchaunum yumigjattajime. Tuja dekaskenum takagtachkugminig, wi atumin pegkegnum yumigkiajim nuna yapajian, pegkegchaunum yumigjattajime. Tuja nuigtushkam atum sacerdote asajum, eme anentaku kuitamam ajum duka jiiki ajapam wainka juwaktatjume. ¡Nunikagmin atum kuntin mina sujajum nuna ijinig yapimin nijaktatjime, dutika ai ijan japimak ajapenak atumjai ijumjamag ajapjamawagtatui!
MAL 2:4 “Juna tajim nunak atumi apachjum Leví wegantu aajaku aina nujai chichaman umikuitag nuna, betek umiktag taja nuna dekatnume tusan emtikan ujajime. Levíjai chichaman umiakun: “ ‘Shiig agkan pujustajum tusan yaigtinaitjime’, tusa tai, nii chichagtak: “ ‘Wishakam aminak ajaantusan eme anentsan ememattinaitjame’, tujutiuwa nunak niig betek umikui”, tusa Tuke Pujuu ashí senchigtina nunú tawai.
MAL 2:6 “Levík aentsnak makichkish tsanugchauwai, ayatak dekaskea nuna jintiauwai, nigka minai sumitkau aajakui, kuashat aents pegkegchau takaidaunash idaimitkasui.
MAL 2:7 Sacerdote aidauwah, atumek mina chichameg etsejin ainagme. Nuadui atumi takatjiya duka, mina chichamjun aents aidaun ujaktinme, dutikawajam ditash pujutjin iwajag mina nemagtuktinme tibau ainagme.
MAL 2:8 “Tujash atumek pegkeg takatak idaisaugme, nuniakjum pegkegchau takat tikich aents aidaush jintinjume. Wi Levíjai chichaman umikuitag dushakam umiatsjume.
MAL 2:9 Nuadui atumnak aents aidauk ajantugmas diigmaschatnume, tuja antugtanash antugkashtinme tijai, wagki atum mina umigtachu asagmin. Atumek aents jintinkugmesh ashí betek wait anentsuk tikich ima wait anentagme”, tusa Tuke Pujuu ashí senchigtina nunú tawai.
MAL 2:10 ¿Ashí aents aidautin najapauwa dukechukai iina Apajuíji? ¿Tujash nunin aish, wagka iik pempeentunikish tsanuniaji? ¿Wagka iina apachji aajaku aina nujai Apajuí chichaman umikua dusha umiatsji?
MAL 2:11 Judá wegantu aidauk Apajuínak antugchau ainawai, nunin asag pegkegchau datsanmain aina nuna Jerusalégnum, tuja Israel nugkanmashkam takamsajui. Judá wegantu aidauk Tuke Pujuu niina jeen dekas senchi anea nunash ajaantus diischaje. Nuninak aishmag aidauk nuwa wainka apajuímtai aidaun emematin aina nuna nuwatjaje.
MAL 2:12 Utusag aents nunin aina nunak Tuke Pujuu ashí senchigtina nunú ijinawa, dutikak, Tuke Pujuun anentag suwajai tusa altarnum jeganta pujus buut pujaunashkam puyatjutsuk ashí ijinawa tajai.
MAL 2:13 Tujash atumek Apajuí anentag suwajum nuna nii shiig aneas jujutjamchakui, altarnum jeganta pujusjum nuni senchi buutjume.
MAL 2:14 Nuniakjum ¿wagkag Apajuísh aigmatsua? tajume. Tuke Pujuu atumin aigmatsu nunak, atum datsa asajum yama nagkamchaku nuwenkujum, amejaig jakatnaitjai tiuwaitam nunú umikchaum duwi aikagmawai.
MAL 2:15 Apajuí iinak makichik iyashik, makichik wakanik atinme tusa najapauwai. Nunak dutijamauwai, wagki niina aentsji atinme tujamu asa. Aents nuwen ajapin aina nunashkam Apajuík kajejawai. Nuadui atumek kuitamamkatajum, nuniakjum ima atumi nuwemjaig pujustajum, tusa Tuke Pujuu Israel aents aidaun Apajuíji ashí senchigtina nunú tawai.
MAL 2:17 Tuke Pujuuk atum sumamun antu antugtama yawetjamjae. Nuniku aig atum iniakjum: “¿Iish yawetjamjati tusaish, waji ima segaji?” tajume. Tau asajum: “Tuke Pujuuk pegkegchau asa, aents pegkegchau aidaun shiig kuitamui”, tajume. Atumek makichkish: Apajuík dekas pegkejapi, tatsugme.
MAL 3:1 Tuja Tuke Pujuu ashí senchigtina nunú chichaak: “Wi taatnun jintan umigtukti tusan mina chichamjun etsegnun awemattajai. Atum Tuke Pujuu dakajum duka pachiachbaunum wamak niina jee pegkegma nuwi wayattawai. “¡Chicham umikbaun jintinjamatna duka minawai!” tawai.
MAL 3:2 Tujash nii juwi tatai, ishamtsuk shiig aneas wajamainuk atsawai, ayatak tikichmajag pujusagtinai. Niig jii kegaujai betek taattawai iina pujutjin iwajatatus. Jabón jáanch bika wajasun esakag iwajama numamtuk iina tudaujin esakagtinai.
MAL 3:3 Tuke Pujuu Leví wegantu sacerdote aidaunak, oro, plata jinum jiyam pegkegchauji esaka ajapnak dekas pegkeg juwauwa numamtuk awagmaktatui. Dutika pujutji iwagtujam Apajuínak anentag sumain ainawai. Tujash nunak dita wakegamun takatsuk, Apajuín shiig awagma nuna imatiksag dutikmain ainawai.
MAL 3:4 Aatus shiig takagtaik, yaunchuk Judá wegantu aidau Jerusalégnumia aidaujai Tuke Pujuun anentag suwam, shiig aneas jujakua imatiksag shiig aneas jukittawai.
MAL 3:5 Tuke Pujuu ashí senchigtina nunú chichaak: “Wika atumin suwimka amastasan taatnaitjai. Tuja nuigtushkam tunchi aidaun, nuwentin, aishintin tsanijima yujau aidaun, tuja wainak tsanumak Apajuín anagbau aidaun, aentsun akikchatnaitak takamtikak, waje aidaunash, bitaik aidaunash waitkau aidaun, tuja aents tikich nugkanmaya aidaunash shiig kuitamchau aidaun, nuigtu mina eme anenjuchu aidaunashkam ashí suwimkan susattajai”, tawai.
MAL 3:6 “Witjai Tuke Pujuunuk. Wika yapajintsujai. Nuadui Israel aents aidautigminak ashí ijinachuitjime.
MAL 3:7 Atumi apachjum chicham umiktinun wi susauwaitag nuna tupantug umikchaju aina nunisjumek, atumshakam tupanjajum umitsuk idaisaugme. Wi Tuke Pujuu ashí senchigtinun atumin chichagkun: ‘¡Ataktu mina umigtuktajum, nuniakjumin wishakam ataktu yaigtatjime!’ timaijime. Tujash atum chichaakjum: ‘¿Wagkaik amesh ataktush umigkatji?’ timaijume.
MAL 3:8 Tusa takugmin wi ayaakun: ‘Minak makichik aentskesh kasagtumaitsui. Tujash atum minak kasagtagme.’ Nuniayaitkujum: ‘¿Iish waji aminush kasamkaji?’ tusajum ininjume. ¡Atumek minak atum takasa jukimunmaya diezmo, nuigtu anentag sujusta tibau aina nunú kasagtagme!
MAL 3:9 Nunak dekas ashí aents aidau kasagtuinawai, tuja atumshakam minak kasagtagme, nuadui pegkegchaunum yumigjattajime. Nunak wi Tuke Pujuu ashí senchigtinun tajai.
MAL 3:10 “Atumi diezmojum aidau mina jegajui itaatajum, dutikawagmin yutai aidau kuashat atatui. ¡Dutikajum dekapjustajum! Nunú dutikakjuminig, atum jukitnun nayaimpinmayan shiig kuashat ukatuattajime.
MAL 3:11 Tuja atumi ajakjum aidaunak uva ajakbau aidaujai jata iyantug ijinawai tusanchakam kuitamjuktatjime.
MAL 3:12 Nuadui ashí aents aidauk atumnak, ‘Apajuí pegkegnum yumigsamu aidau’ tujamiagtinai, wagki atumi nugkem shiig pegkeg asamtai. Witjai Tuke Pujuu ashí senchigtinnuk, nunak dekas wi tajai”, tiuwai Apajuí.
MAL 3:13 Tuke Pujuu chichaak: “Atumek minak pegkegchau chichagtagme. Tujutiatkujum chichaakjum: ‘¿Iish waji pegkegchauwa amesh chichagji?’ tajume.
MAL 3:14 Atum chichaakjum: ‘Apajuí ashí senchigtina duka wainkaik umiju pujumaitsui, tuja nii pegkegchau takamjusaish wake besemag dekapeakuik, jáanch aents jakamtai wake besemag pujaku nugkutaig nugkumaitsui, tuja niina chichame umiktin agagbauwa dushakam umijuk pujumaitsui.
MAL 3:15 Auk aents emebau aidau ima shiig batsatui, tuja aents pegkegchau aidau dita takatjinash ima shiig eemtikainawai. Tuja Apajuíjai shiwagmagainakush, Apajuín dekapenakush suwimkan juinatsu jama’, tajume”, tiuwai Apajuí.
MAL 3:16 Tusa timatai Apajuín emematin aidau dita ditak pempeentunikiag chichaidau. Tusa chichaidaun Apajuí antujuk, dita daaji aidauk aents Tuke Pujuun eme anentus umijin aidaun daaji agatkamua nuwi agatkamu ati, tawai Tuke Pujuu.
MAL 3:17 Tuja nuigtushkam Tuke Pujuu ashí senchigtina nunú ditan pachis chichaak: “Dita aidau ataktu mina aentsug wajasagtina nunú tsawan jegattawai. Makichik múun niina uchiji umigbau asa, wait anentus kuitamna numamtuk wishakam ditanak wait anenjagtatjai.
MAL 3:18 Nuadui, juwapi pegkejak, tuja juka pegkegchauwapi tusag ataktu shiig dekawagtinai. Nuninak Apajuín emematuidaush wajukuk ainawa, tuja Apajuín emematchau aidaush wajukuk ainawa nunashkam shiig dekawagtinai”, tawai.
MAL 4:1 Tuke Pujuu ashí senchigtina nunú chichaak: “Trigo dukee tsupigbau jiinum chimpiam keeka ashí esak megkagama numamtuk, aents pegkegchau aidau, emebau aidau ashí esakag megkaejatna nunú tsawan uminui.
MAL 4:2 Untsu atum mina eme anenjautigminak shiig kuitamkattajime. Duka makichkish uukchamu paan etsa etsantujai betek atinai. Tuja pegkegchau awajtamkatag tuinakuish wi kuitamkatnaitjime. Dutikamu asajum, toro tsakatuch aidau wenuken batsatu jiinainak, shiig aneas tsekegama imanitnaitjume.
MAL 4:3 Nunú tsawan jegamtaig aents pegkegchau aidauk, atum depetkajum nugka yukukuntu najatiama numamtuk awajkatnaitjume”, tawai.
MAL 4:4 “Wi mina inakeg Moisésan chicham umiktin agagbaun, Israel aents aidau umikagtinun, muja Horebnum susauwaitag nunú adeagtajum.”
MAL 4:5 “Juju antuktajum, wi atumin suwimkan amastasan wakitkin minittakun, emtikan profeta Elíasan awetittajime.
MAL 4:6 Dutika ai múun aidau uchiji aidaujai tsagkugnayag, shiig agkan pujustinme tusa nii yaigtatui. Untsu nuna umiinachkuig wi tajuan suwimka suwakun, dita nugke aidaunak emestujan pegkegchau awajtusagtatjai”, tawai Apajuí, tiuwai Malaquías.
MAT 1:1 Ju ainawai Jesucristo muunji aajakajua nuna daaji agatkamua duka. Nigka David, Abraham aina nu weantu aajakui.
MAT 1:2 Abraham akiauwai Isaacan, Isaac akiauwai Jacopan, Jacob akiauwai Judan nuigtú yachi aidaunashkam.
MAT 1:3 Judá akiauwai Tamarai Faresan nuigtú Zarajai. Fares akiauwai Esroman, tuja Esrom akiauwai Araman.
MAT 1:4 Aram akiauwai Aminadapan. Aminadab akiauwai Naasogkan, tuja Naasón akiauwai Salmogkan.
MAT 1:5 Salmón Rahapai akiauwai Boozan, Booz Rutai akiauwai Obetan, tuja Obed akiauwai Isain.
MAT 1:6 Isaí akiauwai rey Davitan, tuja rey David akiauwai Salomogkan Uriasa nuwe aajakua nui.
MAT 1:7 Salomón akiauwai Roboaman, Roboam akiauwai Abiasan, tuja Abías akiauwai Asan.
MAT 1:8 Asa akiauwai Josafatan, Josafat akiauwai Joraman, tuja Joram akiauwai Uziasan.
MAT 1:9 Uzías akiauwai Jotaman, Jotam akiauwai Acazan, tuja Acaz akiauwai Ezequiasan.
MAT 1:10 Ezequías akiauwai Manasesan, Manasés akiauwai Amogkan, tuja Amón akiauwai Josiasan.
MAT 1:11 Josías akiauwai Jeconiasan nuigtú yachi aidaunash, Babilonia yajuakbau aajakajua nu tsawantin.
MAT 1:12 Babilonia yajuakam batsamsag Jeconías Salatielan akiauwai, tuja Salatiel Zorobabelan akiauwai.
MAT 1:13 Zorobabel akiauwai Abiutan, Abiud akiauwai Eliaquiman, tuja Eliaquim akiauwai Azoran.
MAT 1:14 Azor akiauwai Sadocan, Sadoc akiauwai Aquiman, tuja Aquim akiauwai Eliutan.
MAT 1:15 Eliud akiauwai Eleazaran, Eleazar akiauwai Matagkan, Matán akiauwai Jacopan.
MAT 1:16 Tuja Jacob akiauwai Josen, María aishi aajakua nuna; nuwi akiinauwai Jesús, Cristo tujakbauwa nu.
MAT 1:17 Nunin asa Abrahamai nagkama ashí akiinak Davitai tantauwa duka catorce awai, tuja Davitai nagkama Babilonianmaya yajuakbauwa nui ejemash catorce awai, tuja Babilonia yajuakam batsamsauwa nui nagkama Cristo akiinauwa imanui ejemashkam catorce awai.
MAT 1:18 Jesucristo akiinamuk aatus aajakui. Josek Jesucristo dukují atinun Marian anagma pujau, tujash eke nemachiatak pujus Wakaní Pegkejin ejapjukui.
MAT 1:19 Tujash José María aishiya duka, aishmag pegkeg asa, pegkegchau diisainum tabaunum wakenmataik idaisatjai tiuwai.
MAT 1:20 Nuna aatus anentaimas José kanittaman, Apu Apajuí angelji awemamu kajanum wantintuk: “José, David weantu uchijiyah, ishamtsuk Mariak jukita, ni ejapjuka nunak Wakaní Pegkejin ejapjuke”, tiuwai.
MAT 1:21 “Nuna uchigmaktatui, nunikmatai adaikattame JESÚS, wagki niina aentsji tudauji aina nunak tsagkujug uwemtijatin asamtai”.
MAT 1:22 Ju ashí aatus nunikua duka, Apu Apajuí tibaun profeta tiuwa nu uminbaunum nunikui, duka:
MAT 1:23 “Ejapjuktinai makichik muntsujut aentsú takashtai, nunik uchigmaktinai aishmagkun, nunikmatai Emanuel adaikagtinai”, nunak: “Apajuik jutiijai awai” taku tawai.
MAT 1:24 Nu aaja tima José shintaag, Apu Apajuí angelji tibauwa dutiksag Marianak juki nuwatkauwai.
MAT 1:25 Tujash Mariajaig tsanigchauwai eke uchi akiintsaigkik, nunik pujai uchi akiinamtai adaikauwai Jesús.
MAT 2:1 Rey Herodes inamak pujai, Jesús yaakat Belén akiinauwai, Judea nugkanum awa nui. Nunikmatai ujumak mago etsá minitaijin batsamin aidau Jerusalén kaunawajui.
MAT 2:2 Nunikag iniimainak: —¿Tuwí pujawa judío aidaun reyji atin akiina dusha? yaya ni akiintai wantinkatnai timawa nunú wantinkamtai etsá minitaijin pujauti wainká mininaji ni ememattasa, tuidau.
MAT 2:3 Nu tabaun Rey Herodes antuk anentai jegachu, antsag ashí Jerusalegnumia aidaushkam puyatkajui.
MAT 2:4 Nunik apu Herodes sacerdote apuji aidaun, escriba aidaujai untsuk ijumag: —¿Tuwí Cristush akiinatnaita? tau.
MAT 2:5 Tutai dita aiinak: —Duka Belén, Judea nugkanum awa nui akiinatnai; juna aatus profeta agajui:
MAT 2:6 “Belén, amek Judá nugkanmayaitme; tujash Judanum yaakat eme anentai aina nuní piipichikesh atsume, wagki aminí jiinkitnai makichik Apu, tikich apu aidaun nagkaesau mina aentsug Israel aina nuna uwemtikatin” tawai, tuidau.
MAT 2:7 Tiagtai Herodes mago aidaun wakenmataik untsuká shiig inias dekajuau, yayá wainkajash wajupa tsawanta yujawa nuna.
MAT 2:8 Dutika Belén ishimak: —Wetajum nunikjum shiig inimsajum dekaatajum tuwig uchish pujawa, nunika waketkujum minash ujatkatajum wisha wenu ememattajai, tiuwai.
MAT 2:9 Tusá rey tima weaju, nuniai yaya etsá minitaijin pujusá wainkamu dita weamunmanini wegau, nunik uchi pujamunum mamikis tajiaku.
MAT 2:10 Nuna yayá wainkag shiig senchi aneasaju.
MAT 2:11 Nunikag jegá waikmag uchin wainkaju, dukují Mariajai pujuttaman, nunik tikishmatug emematuidau; nuninak cofre ujakag uchin anentag susaju: oron, incienson nuigtú mirranashkam.
MAT 2:12 Tujash nuna dutika kajiittaman kajanum ángel, Herodes pujamunmag wakitkigpajum tibau asag, ditá nugkeen waketuinakug tikich jintanum weajui.
MAT 2:13 Nunik waketjau ai, Josenashkam Apu Apajuí angelji kajanum wantintuk chichajak: “Nantaktá, nunikam uchi dukujijai jukim Egipto wetá, nunikam nui pujamin wi wakitkita tusan ujaktajame, wagki Herodes uchin maatatus egaktatui”, tau.
MAT 2:14 Tama Joseshkam nantakí nunú kashia duik uchin dukujijai juki Egipto weuwai.
MAT 2:15 Nunik nui pujai Herodes jakauwai. Nunú nunikua duka Apu Apajuí tibaun profeta: “Mina uchig Egipto pujaun untsukjai”, tibauwa nu imanisag uminkauwai.
MAT 2:16 Nunú mago aidau tsanugbaun Herodes dekagmama shiig senchi kajekú, nunik suntajin ishiakui ashí uchi belegnumian nuigtú nui tikiju batsataidaunash yamá akiinau aidaunum nagkama jimag mijan ajuinamun kajegtinme tusa, nunak mago aidaush wajupa tsawantak yayá wainkajash yujaayi nuna shiig dekajuau asa nuna diis dutikauwai.
MAT 2:17 Aatus uminkauwai profeta Jeremías tibauwa nu, duka:
MAT 2:18 “Antukmajai Ramá pampainamun, untsu untsumas senchi buutuinamu, nunak Raquel uchijí aidaunum buutak, anentai ichichtumain wajachmae, wagki uchijí aidauk jinawaju asagmatai”, tawai.
MAT 2:19 Herodes jakau ai, José Egipto pujuttaman Apu Apajuí angelji kajanum wantintuk:
MAT 2:20 “Nantaktá, nunikam uchi dukujijai jukim Israel nugkanum wakitkita, wagki uchin maatatus egagmaya duka jakaje”, tiuwai.
MAT 2:21 Nunú tima Joseshkam uchin dukujijai juki Israel nugkanum wakitkiuwai.
MAT 2:22 Tujash Arquelao rey wajas Judeanum inamui apají Herodes inamajakua nui tabaun dekaa nuwi wetanak ishamau, nunittaman kajanum ujakam, Galilea nugkanum weuwai,
MAT 2:23 nunik jegaa yaakat Nazaret pujustatus jegauwai. Nunú aatus nunikua duka, profeta aidau: Nazaretnumia tama atinai, tibauwa nu uminkauwai.
MAT 3:1 Nu aatus tsawan aina nu nagkaemakiu ai, Juan Yamijatin Judea uwegshujin wekaegas chichagkagtak:
MAT 3:2 “Tudau takatak idaikujum pujutjum yapajiatajum, wagki Apajuí aentsnum inamjatta duka tikijuch wajasé”, tau.
MAT 3:3 Juagkak profeta Isaías niina pachis tiuwa nu aajakui, duka: “Makichik chicham uwegshunum untsubau antuewai: ‘Apu minitin jinta iwajatajum, jinta tutupit dakuektajum’ ”, tawai.
MAT 3:4 Juagká nugkutaijig camello uje najanamu aajakui, akachumtaijish duwap nuigtú langostan, dapá yumijin yuujakui.
MAT 3:5 Juan chichagkagtamun antukagtatus Jerusalegnumia aidau, ashí Judea nugkanmayash, Jordán uwet batsamin aidaushkam kautuidau.
MAT 3:6 Nunikag tudauji aidaun etsegtumagtai namak Jordagnum yamiau.
MAT 3:7 Nuniai kuashat fariseo aidau, saduceo aidaujai yamimajagtatus jegantajam, chichajak: “¡Iwanchi uchijí aidauwah! ¿Ya atumnash yamimaku Apajuí suimkaji tikijuch wajasá nu uwemtumainai tusash tujabiagmae?
MAT 3:8 Dekas tudau takatan idaisaush wajuku amainaita, nunú iwainmamkatajum pegkeg aina nu takaakjum,
MAT 3:9 atumek: ‘Abraham wegantu asaja yupichu uwemain ainaji’ tumamigpa; wagki Apajuik jujú kaya aina junakesh Abrahama uchijí aidau emamainai.
MAT 3:10 Yamaiya juik jachai kagkap tsupitiama numamtuk awakatatus Apajuí suwimkeg uminas awai; ashí ajak nejeachu tsupika jiinum apetiama dutikatatus.
MAT 3:11 Wika yumí yamijatjai tudau takatan idaiyinak pujutin yapajiatnume tusan; tujash mina ukujui minitta nuuwai mina nagkaetasu senchigtin, wika nuna sapatjinakesh jujumaitsujai, niiyai Wakaní Pegkejiyai yamigmajagtinuk nuigtush jiiyai yamigmajagtina nu.
MAT 3:12 Nigka trigo awagti wampuji utsanku neje akantayama numamtuk awajkatatus uminas awai. Dutika ijumtainum trigonak yajumak, wampujinak jii ajumaish kajinkashtina nui apeatnai”, tiuwai.
MAT 3:13 Jesús galileanmaya jiinki Jordán jegauwai, nunik Juan yamijati tusa jegantauwai.
MAT 3:14 Dutikam Juan yamimainchau dekapeak: —Wiitag jamah ame yamiam amainaitag nunak, ¿nuniaig ame minai yamimagtasa minam? tau.
MAT 3:15 Tama Jesús ayaak: —Idaitusta, aaja jutikaku umiktatji ashí Apajuí pegkejan wakega nunú. Tutai Juagshakam yamijú.
MAT 3:16 Dutika yamijam Jesús wamkes yuminmaya jiinkiu, nuniai nayaim ujaniuwai, nunikmatai Apajuí Wakaní pauma nunin akaiki niiní jegattaman wainkauwai.
MAT 3:17 Nuniaig nayaimpinmaya chicham antuekau: “Juuwai dekas mina Uchig anetaijuk, niiní shiig aneamu ajutui”, tabau.
MAT 4:1 Nunikmatai Wakaní Pegkeji Jesusan juki emauwai uwegshunum, Iwanch dekapsati tusa.
MAT 4:2 Dutikam cuarenta tsawai, cuarenta kashi, ayuná pujau asa, yapajuauwai.
MAT 4:3 Nunitai Iwanch Jesusa jegantun chichajak: —Ame dekas Apajuí Uchijiyaitkumek, ju kaya aina jujú pag najankam yuakia, tau.
MAT 4:4 Tama Jesús ayaak: —Agagbau awai: “Aentsuk imá pagjaigkik pujumaitsui, ashí chicham Apajuí wenin jiina nujai pujumainai” tawai, tiuwai.
MAT 4:5 Timatai, Iwanch Jesusan yaakat pegkejam Jerusalegka nui emauwai, dutika jega Apajuí ememattai jegamkamunum yakí nagkatkamunum iwaká awajus,
MAT 4:6 chichajak: —Ame dekas Apajuí Uchijiyaitkumek tsekem iyata, wagki agagbau awai: “Apajuí ángel aidaun awetugmattawai, dutikam dita achigmakagtatui kayá tukumkai tusa” tiuwai.
MAT 4:7 Tama Jesús ayaak: —Dushakam agagbau awai: “Amina Apujum Apajuiya nu pegkegchaunum dekapsatasamek wakeyipa” tawai, tiu.
MAT 4:8 Timatai nuigtú Iwanch Jesusan muja tsakajunum iwakui. Dutika ashí nugkanmaya yaakat aidau shiig wiakuch senchigtin aina nuna iwaintukui, nuigtú ashí nuna imanji aina nunashkam iwaintukui,
MAT 4:9 dutika chichajak: —Ashí junak amina amastajame tikishmajam emematjakminig, tau.
MAT 4:10 Tama Jesús ayaak: —¡Wetá Iwanchih! agagbau awai: “Amina Apujum Apajuiya duke emematta, nuniakum imá nigki umigkata” tawai, tiu.
MAT 4:11 Tima Iwanchik ukukiuwai. Nunikmatai ángel aidau kautuawajui kuitamkagtatus.
MAT 4:12 Jesús, Juagkan achikag egkeawaje tabaun antuk Galilea wakitkiuwai.
MAT 4:13 Tujash Nazaretak juwakchauwai, yaakat Capernaúm Galilea kuchajin uwetus awa nui jegaa pujusui, Zabulón, Neftalí aajakajua nuna nugke aajakua nui.
MAT 4:14 Aatus uminkauwai, yaunchuk profeta Isaías tibauwa nunú:
MAT 4:15 “Zabulogka nugke nuigtú Neftalí nugke, nayantsa yantamen batsamin aidau, Jordagka amain batsamnushkam, Galilea judiochu aidau batsata dushakam;
MAT 4:16 Aents aidau suwenum yujau agma nunú tsaaptinun wainkaje; tuja suwenum batsatunash tsaaptin etsantug wajantae”, tawai.
MAT 4:17 Nui nagkama Jesús chichagkagtak: “Tudau takatak idaikujum pujutjum yapajiatajum, wagki Apajuí aentsnum inamjatta duka tikijuch wajasé”, tau.
MAT 4:18 Jesús Galilea kuchajin wekaekamá Simón, Pedro daagtina nuna, ni yachi Andresjai namakan main asag retan kuchanum ajuntuinak yujattaman wainkau,
MAT 4:19 nunik Jesús chichajak: —Minitajum wi jintintuatjime, namak maatasa yujagjum anmamtuk, Apajuí chichame etsegkujum aents aidau minai ikautjin atajum tusan, tau.
MAT 4:20 Nu tamawaik, ditá redjinak ukuinak niijai weajui.
MAT 4:21 Nunik Jesús machik kuwaesag wekamá, Jacobon yachijai Juagjai, apají Zebedeo aatus barcanum chimpimas redjin apijuinak chimpimtatman wainak, ditanash Jesús untsukú.
MAT 4:22 Tamawaik ditashkam: —Barcanak ukuinak, apajinashkam ukukiag Jesusjai weajui.
MAT 4:23 Jesusak ashí Galilea nugkanum wekaegas, jega ditá ijuntai aidaunum wayá jintinkagtau, nuniak yamajam chichaman Apajuí inabaujiya nuna pachis etseju nuniak ashí jatai jau aidaunash nuigtú najaibau aidaunashkam etsagau.
MAT 4:24 Nu dutikamua duka ashí Sirianmag antuekauwai nunikmatai itajuidau ashí jatai jau aidaun, nuigtú pegkegchau ajamu waituidaun, wakan pegkegchau egkemtuamunash, kukujiyai jau aidaun, pimpijú aidaunashkam, dutikam Jesuschakam ashí etsagakui.
MAT 4:25 Nunitai kuashat aents aidau galileanmaya, decapolisnumia, jerusalegnumia, judeanmaya nuigtú Jordagkan amain batsamin aidaush Jesusan saetuidau.
MAT 5:1 Imatika tuwajam Jesús wainak wakau nainnum, nunik nui ekeemsamtai ni jintinbau aidaushkam jegaantaju.
MAT 5:2 Nunikmatai Jesús nagkama jintintak tau:
MAT 5:3 “Shiig aneastinme iikik iina wakanig uwemtikmaitsuapi tuidauk, wagki Apajuí ashí nayaimpinum inama duka ditanu asamtai.
MAT 5:4 “Shiig aneastinme buutuidauk, wagki ditak ichichmamtan jukiagtin ainawai.
MAT 5:5 “Shiig aneastinme kakagchauch aidauk, wagki ditak nugka anagtamamua nuna jukiagtin ainawai.
MAT 5:6 “Shiig aneastinme pegkejan takastatus wakegak yapajaku nuigtú kitamtaiyama imanidauk, wagki ditak shiig juakagtin asag.
MAT 5:7 “Shiig aneastinme wait anenkagtin aidauk, wagki ditashkam wait anentam aagtin asag.
MAT 5:8 “Shiig aneastinme anentai pegkeg aidauk, wagki ditak Apajuí wainkatin asag.
MAT 5:9 “Shiig aneastinme shiig agkan pujutan chichamjina duka, wagki ditak Apajuí uchijí ainawai tama agtin asag.
MAT 5:10 “Shiig aneastinme pegkeja nuna takainak waitkam aidauk, wagki ditanu ainawai Apajuí inamtaijiya duka.
MAT 5:11 “Shiig aneastajum atumek, aents pegkegchau chichagtamainak, pegkegchau awatamainakuish, mina nemagtau asagmin ashí waitan tsanumjutpainakuish.
MAT 5:12 Shiig aneasjum dakujustajum, wagki atum jukitnuk shiig muun nayaimpinum ajutjamaidau asamtai. Wagki atum atsagmin profeta batsamajakua nunash aatus waitkasaju ainawai.
MAT 5:13 “Atumek ju nugka juajuig tuke weega nunin ainagme. Tujash nunú wee jea jeatuji megkaekamtaish, ¿utugsaya ataktush jea jeatush emamainaita? Duka atsumnachu asamtai agaa ukajá ajapmainai dutikamun aents aidau najamain ainawai.
MAT 5:14 “Atumek nugka juajuig tuke tsaaptina nunin ainagme. Yaakat nainnum awa duka uumkag amaitsui.
MAT 5:15 Lámpara ekemakaik kajunai dukukaik idaichatiame, dutiktsuk yakí ekentayame ashí jeganum awa nuna tsaaptin emati tusa.
MAT 5:16 Atumshakam nunisjumek, ashí pegkeg aidauk takaakjum aents aidaush iwaintuktajum, nuna wainainak atumin Apa nayaimpinum puja nuna emematiagtinme.
MAT 5:17 “Chicham umiktinun, nuniachkush profeta aidau agagbau aina nunakesh emegkaktatus taacheash tusajum anentaimigpajum, wika nuna emegkaktasanuk tachuitjai, ayatak nuna umiktasan tauwaitjai.
MAT 5:18 Nunak dekas tajime: Nugka, nayaim aina nunú megkaegainatsaigkik chicham umiktinnum, piipich agasbau aina dukesh megkaekashtinai, imanisag aig ashí uminkatnai.
MAT 5:19 Nuadui makichik aentskesh, jujú chicham umiktajum tibauwa juiyan imanchau diyak umiachuk, tikich aidaunash umiktajum tusa jintinchauk, Apajuí inama nuish imanchau diyam atinai. Tuja chicham umiktajum tibauwa nuna betek umiak tikichnashkam dutiksag jintintuk, Apajuí inama nui eme anentam agtinai.
MAT 5:20 “Tujash, chicham umiktinun jintinkagtin aidau, nuigtú fariseo aidau umiina nuna nagkaesau pegkeg aina nunú takaachkugmek, Apajuí ashí nayaimpinum inama nuig wayashtin ainagme.
MAT 5:21 “Atumek antukuitjume atumi muunjum aajakajua nunú tibau aajakajua nu: ‘Magkagtuawaipa, makichik aentskesh magkagtauk suwimak suwam atatui’ tawai.
MAT 5:22 Tujash wi tajime: Makichik aentskesh wainak yachin kajejauk, suwimak suwam amainai. Nunisag yachin anentainkachu chichajú wekagushkam, Sanedrín ejega dekajam amainai, tuja yachin pegkegchau chichajú wekagushkam jii ajumaish kajinkashtina nui pujus waittsatnai.
MAT 5:23 “Nunin asamtai ofrenda jukim altarnum jegakmam yatsumjai kajegdaikamu adeagmek,
MAT 5:24 ofrendak altarnum ejetsuk ukuakum dekatkauk yatsumjai epegkam agkan wajasam wakitkim ofrendajum ejentata.
MAT 5:25 “Ame apunum utugchat dekagmamatasam weakmek eke jintaa weamuik amina shiwajumjai chichasam epegtuniata, nunikchaminig jueznum ejetamamtai, juez aentsji inajam cárcel egkepawai.
MAT 5:26 Dekas tajame, nui egkepamtaig jiinkishtatme, kuichkijum ashí akikmakam ashimkam jiinmainaitme.
MAT 5:27 “Atumek antuku ainagme: ‘Tsanijinawaigpa’ tibauwa duka.
MAT 5:28 Tujash wi tajime: Aents nuwan dutikachainjash tusa wakegas diyaushkam, anentainig tsanijimui.
MAT 5:29 “Nuniau asamtai amina jiim untsugmia nu tudaunum ajumpamain awajtamkuig ukuinkam ajapata; wagki pegkejai iyashminia makichik megkaebauwa nu, ashí iyashmia nu waitiaku pujutaiya nui ajapeam amaina nu.
MAT 5:30 Tuja uwejum untsuja nunú tudaunum ajumpakuig tsupikam ajapata; wagki pegkejai iyashminia makichik megkaebauwa nu, ashí iyashmia nu waitiaku pujutaiya nui ajapeam amaina nu.
MAT 5:31 “Jushakam tibauwai: ‘Aishmag nuwen idaikug, papí nuwa idaiku najantain umiká sumainai’, tawai.
MAT 5:32 Tujash wi tajime: Aishmag nuwen ekagmakchau aig idaikug, aentsjai tsanijinati tusa idaimaina dutikawai. Nuwa idaisamujai nuwenushkam ekagmawai.
MAT 5:33 “Nuigtushkam antukuitjume atumi muunjum aajakajua nunú tibau aajakajua nu: ‘Ame Apujum Apajuí pachisam dutikatjai tibauk umitskek idaisaipa’, tawai.
MAT 5:34 Tujash wi tajime: Apajuí adaisagmek tiigpajum, nayaim pachisjumesh tiigpa; wagki nayaimpia duka Apajuí ekeemtai asamtai,
MAT 5:35 nugka ju pachisjumesh tiigpajum, wagki Apajuí najamsa eketbau asamtai; Jerusalegshakam pachisa tiigpa; wagki Rey ashí nagkaekagtasua nuna yaaktaji asamtai.
MAT 5:36 Atumi buukem pachisjumesh tiigpajum; wagki makichik intashia dukesh bukusea nuniachkush pujukesh emamainchau asajum.
MAT 5:37 Dekas ayatak ame dutikmainaitkumek ‘ehé’ tita, tuja ame dutikmaichakmek ‘atsá’ tita, aaja tumaina nu wainka tu wekaebauk pegkegchau asamtai.
MAT 5:38 “Atumek antuku ainagme: ‘Aents jiimin emestugmakuig, ameshkam dutiksamek emestugta, tuja daimin akagtamkuish, ameshkam dutiksamek nai akagkata’, tawa nu.
MAT 5:39 Tujash wi tajime: Duka dutikawaigpa. Amina pegkegchau takagtamkuishkam iikatasam wakeyipa. Makichik aentskesh yapim untsugmia atú awatamkuishkam, atumesh iikajum awattsuk, juinia yapijuish awatita tusajum ayampatuatajum.
MAT 5:40 Makichik aentskesh nugkutaigmin atanjamkitatus utugchatan aputugmakuig, awantak pataká nugkutaigmesh susata.
MAT 5:41 Aents kijinun amaak: ‘Jujú jukim makichik kilómetro kuwagtukta’, tujamkuishkam jimag kilometronum ejentuntajum.
MAT 5:42 Makichik aentskesh segapakuig susata, tuja amina wajiigmin tsagkatjukta tusa segapakuish, sujitkaipa.
MAT 5:43 “Dushakam antuku ainagme: ‘Amejai ijutkamu aneakum, shiwajum aidauk kajegkatajum’ tibauwa nu.
MAT 5:44 Tujash wi tajime: Atumi shiwajum aidaush aneetajum, nuniakjum atumin pegkegchau chichagtamaidaush Apajuí aujtustajum.
MAT 5:45 Nunú aajam dutikakjum, atumi Apa nayaimpinum puja nuna uchijí atatjume. Wagki nigka ashí aents pegkeg, pegkegchau aina nudaujai etsanak etsanmitkawai, aikasag yuminashkam pegkejan takaidau, pegkegchau takau aina nudaujai yutumtikawai.
MAT 5:46 Tujash atum ya anempainawa nujaig aneniakjumesh ¿wají imana juwagme? Nunak apu kuichkiji atinun ijumin aidaush nunin ainawai.
MAT 5:47 Tuja atum yatsum aidaujaig kumpamdayakjumesh ¿wají imana iwainame? Nunak Apajuí anentaimtuchu aidau nunin ainawai.
MAT 5:48 Dekas atumek betek umin atajum, atumin Apa nayaimpinum puja nu betek umina iman.
MAT 6:1 “Atum pegkeg takaajum nunú aentsnum iwainmamkata tabaunum dutikawaigpa, kuitamamkatajum. Atum aaja dutiktaik atumi Apa nayaimpinum puja duka wají pegkeja nunak amaschagtinai.
MAT 6:2 “Nuniau asamtai atum aents atsumau yayakjumesh, wi takaamun dekaatnume tusagmek jega ijuntainmagkesh, jintaagkesh etsejú yujaigpajum; nunak aentsú tsanú aidau eme anenjus diigsatnume tusag nuní yujau ainawai. Dekas tajime: Nuna nunidauk aents eme anentam aidau asag wají pegkeg suamak achagtinai.
MAT 6:3 Tujash ame atsumau yayakmek tikichkesh ujakaipa,
MAT 6:4 duka dekachbaunum dutikata. Nunak amina Apa ame dutikamunak wainu asa wají pegkeg aidaun amastatui.
MAT 6:5 “Atumek Apajuí aujkugmesh, aentsú tsanú aidau, jega ijuntai aidaunum, nuninachkush jintá wajantag, aents aidau wainkamu atag tus wakegainak Apajuin aujú yujau aina nunikaigpa; dekas tajime, nuna nunidauk aents eme anentam yujaidau asag wají shiig pegkeg aina nunak jukichagtinai.
MAT 6:6 Tujash ame Apajuí aujkumek, ame kanutaigmin wayam waiti epenim, dekachbaunum amina Apa puja nu ausata. Nuniamin amina Apa amek dekachbaunum nuniam nuna waipau asa wají pegkejan amastatui.
MAT 6:7 “Apajuí aujkugmesh chicham imanchauk awá awagkigmek aujigpa, Apajuí anentaimtuchu wajukin aina nunitsuk, ditak imatjamas imá shiig antugtukainta tusag nunak imatin ainawai.
MAT 6:8 Atumek dita wajukena nunikaigpa, wagki amina Apa duka dekawai atum atsumamunak eke segatsjuminig.
MAT 6:9 Atumek aaja aujmainaitjume: “ ‘Iina Apajiyah, amek nayaimpinum pujuwaitme. Pegkegmaitam ibau asam imá ameketme ememattaim.
MAT 6:10 Amek jutiishkam inajatjata. Ame wakegamun nayaimpinmaya umigtamaina nunisag ju nugka juiyash aminak umigtamkatnume.
MAT 6:11 Dutiksamek ii yuwatnushkam kashí kashinig sukagtita.
MAT 6:12 Nuigtú ii tudaujishkam tsagkugkagtugta, jutii tikich pegkegchau awajtamush tsagkujuinag aikasmek.
MAT 6:13 Pegkegchaun takastinme tusamek idaikagtutsuk, ayatak yaijatkam agkanmitkagtuata’, tiuwai.
MAT 6:14 “Atum tikich pegkegchau awajtamaidau tsagkugtaik, atumnashkam atumí Apa nayaimpinum puja dusha tsagkugtamjattagme,
MAT 6:15 untsu atum tikich aents aidaush tsagkugchataik, atumin Apa dushakam atumi tudaugminash tsagkugtamjashtatui.
MAT 6:16 “Atum ayuno takaakjumek, wake besemjak yapiminish iwainmamkaigpa, aentsú tsanú aidau, ayunawapi tusa aents waitkatnume tusag wajukena nunitsuk. Dekas tajime: Nuna nunidauk aentsnum iwainmamá yujaidau asag wají shiig pegkegnak jukichagtinai.
MAT 6:17 Nuaduí ame ayuná pujusam Apajuí aujkumek wake besekam wekaetsuk, yapim nijaim, shiig temashmajam, shiig dakunkut wekaesata,
MAT 6:18 aents aidau ayunawapi tusa dekagmawainum. Ame nuniamunak, imá amina Apa duke amijai puja nu waipawai, nuniau asa amina Apa dekachbaunash waina nu wají pegkejan amastatui.
MAT 6:19 “Jujú nugka jui wajiin mamuk emesmain, nuniachkush kawanchjumain, kasashkam wayá kasamain aina juninnum wiyakchameatasagmek wakeyigpajum.
MAT 6:20 Dekas nayaimpinum, mamukush wajiin emeskamtai megkaemainchau, nuniachkush kawanchjumainchau, kasashkam wayá kasamainchauwa nui wiyakchameatajum.
MAT 6:21 Wagki tuwí atum wiakchameatin ajutjamua nuig anentaimsa pujustajum.
MAT 6:22 “Atumi jiimek lámpara ekemakam tsaaptin emaama numamtuk atumi iyashminak awagmawai. Jiim pegkeg asamtai shiig wainmamainaitam imatiksam, ashí pegkeg aina duke anentaimtaik, anentaiminish tsaaptin ajutjamainai.
MAT 6:23 Untsu jiim pegkegchau ataik ashí amina iyashmia duka suwenum amainai. Aminí tsaaptin awa nu suwe wetaik, nuní nagkaemas pujutjum pegkegchau wemainai.
MAT 6:24 “Makichik inakak jimag apun takagnuk amaitsui; wagki tikichin dakitak, tikichnak aneemainai, nuniachkush tikichin eme anentus diyak, tikichnak junik diimainai, nunin asamtai Apajuí umigkata tu, wiyakchameatasa anentaimtu wajamaitsui.
MAT 6:25 “Nuadui atumin tajime: ¿Wajina yuwanuk, wajina uwagnuk, wajina nugkugnuk pujustaja? tusagmek uyumá pujuigpajum. Yutai nagkaesauwa duka atumi pujutjumia nuuwai, tuja jaanchin nagkaesauwa duka, atumi iyashmia nuuwai.
MAT 6:26 Shiig anentaimsa diistajum pishak agkajunum nanamaina nunú. Ditak ajakmakagkesh juwinatsui, jeganakesh jegamkag yutaijinak ijumainatsui, nuniaunak atumi Apa nayaimpinmaya nu dita yuwatnunak suawai. ¿Atum dekas chigki aidau nagkaesau ainatsjumek?
MAT 6:27 ¿Yaa atum ainajum anuiyash, esajam atajai tusa anentaimtu pujakush esaumainaita?
MAT 6:28 “¿Wagka atumesh jaanchish imá puyatjagme? Ikamia yagkug aina nu anentaimsa diistajum wajuk tsakainawa, ditak takainatsui, ujuchnash kutamainatsui.
MAT 6:29 Tujash atumin tajime, Salomón ashí imanun iwagmamá wajakuitkush yagkujá niimega ibaunak nugkujakchauwai.
MAT 6:30 Dupa ikamia aidau kashin apeam atinnakesh Apajuí imatikas iwaja ibaush, ¿wagkag aan nagkaemas atumnash dutijamashtinme aents imatikas dekaskeapi tuchau aidauwah?
MAT 6:31 Nuadui atumek: ‘¿Wajig yuwatji?, nuniachkugmesh ¿wajig uwagtaji?, tachakjumesh ¿wajig nugkugtaji?’ tusajum anentaimá pujuigpajum.
MAT 6:32 Wagki ashí nunú aidaunak Apajuí anentaimtuchu aidau puyatjus yujajin ainawai, tujash atumi Apa nayaimpinmayaya nu shiig dekagtamjume, atum ashí nu atsumajum nunak.
MAT 6:33 Nuadui dekatkauk Apajuí inama nu nuigtú ni pegkejan takaa nunuwá egaktajum, nuniakjumek ashí nunú aina dushakam aan kuashat ajutjamiagtinai.
MAT 6:34 Nunin asamtai kashin atina duka anentaimtu pujuigpajum, wagki kashin dutikmainuk tsawan ajitin asamtai, adeagtajum makí makichik tsawanta nuna utugchatji ajuina nunú.
MAT 7:1 “Tikichi pujutjig augmatú yujaigpajum, atumnash Apajuí aikasag tujaminum.
MAT 7:2 Wagki atum tikich aidau pegkegchaujish augmatú yujataik, Apajuí atumnash nunú aents tajum dutiksag tujamtatjume. Atum tikich utujagme dutiksag Apajuí atumnash dutijamattagme.
MAT 7:3 ¿Wagka yatsumi jiin chipum tekani egkemaush diyagme, atumi jiimin numi egketa nu diitskesh?
MAT 7:4 ¿Utugsamea amina yatsumish: Yatsuju jasta chipum tekani jiimin egketa nuna jigkitjame tumainaitme?
MAT 7:5 ¡Tsanumin aidauwah! Dekatkauk amina jiimin numi egketa nu jiiktá, nunikam shiig wainkam yatsumi jiin chipum tekani egketa dusha jiigkita.
MAT 7:6 “Antsagmek Apajuí chichame pegkegma nu ujamaitak antutan dakituinakuig waitkatsuk idaisatajum, ditak yawá kajen aidau yutai pegkeg suwamaitak iiki esajatta tuwama nunidau asagmatai. Tuja atumdau perlak kuchi batsatbaunmag ukubaitsugme, dajag tsaiká atumin pempeentugmaki emestamain asamtai.
MAT 7:7 “Apajuishkam segatajum, imatjamak amastatjume; egatash egaktajum, egakjumek igkugtatjume; untsuktajum, imatjamak waitin ujatjamtatjume.
MAT 7:8 Wagki ashí aents sumauk, suwam auwai; egauk igkuinai, ni egamujinak; waitinum wajas untsumushkam, ujatam auwai.
MAT 7:9 ¿Ya aentsuita uchijí yujumak segamaitak kayá sumainush?
MAT 7:10 ¿Nuniachkush namak segamaitak dapí sumainush?
MAT 7:11 Atum pegkegchau ainayatkugmesh, uchijum pegkeg sutak dekagme; ¡wagkag aan nagkaemas atumi Apa nayaimpinum puja dusha atum segamunash wají pegkegnash amaschagti!
MAT 7:12 “ ‘Nunin asamtai, ashí pegkeg aina nujai tikich aidaush shiig awajkatajum, atum shiig awajtuktinme tusajum wakejin ainajum nunisjumek’, wagki aatus chicham umiktina duka jintinkagtawai nuigtú profeta aidau tibauwa nuishkam.
MAT 7:13 “Waiti menakua nuní wayatajum. Kuashat aents aidau jinta untsujin, waiti wegkajam megkaetanum ekagta nuní imá weenawai.
MAT 7:14 Wagki waiti menaku, jinta tsejegkuch pujutnum ekagta nunak ujumak aents igkuinawai.
MAT 7:15 “Kuitamamkatajum profeta wait aina nunú tsanugmajainum, ditak uwija nunin wajas minitjamainawai, tujash anentainig ikamyawa kajena iman ainayatak
MAT 7:16 Nuadui atumek aents aidauk ditá takatji diigsajum wainmainaitjume, untukjak munchiinak nejetsame, antsag uvashkam jagkinmayag juushtayame.
MAT 7:17 Nunisag ashí numi pegkeg aidaushkam pegkegnak nejenai. Tuja numi pegkegchaushkam pegkegchaunak nejenai.
MAT 7:18 Nunin asa numi pegkejak pegkegchaunak nejemaitsui, antsag numi pegkegchaushkam pegkegnak nejemaitsui.
MAT 7:19 Ashí numi pegkegchau nejen aidauk tsupija apea ajaptaiyai.
MAT 7:20 Nuadui atumek aents aidauk dita takaamuji diigsajum wainmainaitjume.
MAT 7:21 “Ashí aents aidau: ‘Apuh, Apuh’, tujutuina duka Apajuí nayaimpinum inama nuig wayachagtin ainawai. Mina Apag nayaimpinum puja nunú wakegamun takasú aina duke wayawagtinai.
MAT 7:22 Nunú tsawan atina dui kuashat aents: ‘Apuh, Apuh’ Jutiishkam amina daagmin chichamjum etsegkabiaji, nuniaku amina daagmin iwanch aidau aentsun egkemtuaush jiijá ishimaiji, tuja aents dutikmainchau aidaush kuashat takasuitji, tujutiagtinai.
MAT 7:23 Tujash wi ayaakun: ‘¡Atumnak wainchau ainajime! ¡Pegkegchau takau aidauwah, wetajum!’ titinaitjai.
MAT 7:24 “Makichik aentskesh mina chichamjun antugtuk wi taja dutiksag umia duka, jega jegamtan dekau nugkan initak tai kaya muunnum dekanmitkak ajia jegamkau aajakua nuninai.
MAT 7:25 Nuniai yumi yutug, namakash dujajukui, dasesh senchi nunú jegan umpuau imatika tukuinakush yumpuachui, kaya muunnum dekanmitkaka ajigbau asamtai.
MAT 7:26 Untsu mina chichamjun antuinayatak umigtachuk, aents anentainkachu jegan kayamnum tauk ajigká jegamkauwa nuninai.
MAT 7:27 Nuniai yumi yutug namakash dujajukui, dase senchi jega umpuak tegakui, dutikam shiig tsainkauwai”.
MAT 7:28 Juna aatus Jesús chichá chichakua ashimkamtai, aents aidauk ni jintiamujinak anentai jegagchajui,
MAT 7:29 wagki Jesusak jintinkagtau apu chicham antugtai tumaina imatikas, maestro chicham umiktinun jintinkagtin aidaun nagkaegas, apu chichame antugtai jintimaina imatika jintinkagtau asamtai.
MAT 8:1 Nuna Jesús ashimak nainnumia akaiki wetai, kuashat aents saetukaju.
MAT 8:2 Nuniai makichik aents jata lepra achikam jaak pujau wainak, Jesusan jegantun niina eemtin tikishmag pujus segaak: —Apuh, wakegakmek etsaentumainaitme, tau.
MAT 8:3 Tama Jesús uwejin antiak: —Wakegajai, pegkeg wajastá, tiuwai. Tamawaik leprak megkaekauwai.
MAT 8:4 Nunikmatai Jesús chichajak: —Nijah, makichik aentskesh ujakaipa, sacerdote jegajuam wantintukta, nuniakum ofrenda susata Moisés dutikata tibauwa dutiksamek, ditashkam waipakag dekas tsagaje tujamtinme, tiu.
MAT 8:5 Jesús Capernaúm jegattaman capitán jegantauwai aujsatatus.
MAT 8:6 Nunik: —Apuh, mina inakeg ashí iyashí najaimak shiig senchi waitiak buchitmainchau wajas jegajui tepawai, tiuwai.
MAT 8:7 Tama ni ayaak: —Ayú, wi anui taan etsagagtajai, tiuwai.
MAT 8:8 Tutai capitán ayaak: —Apuh, wika amea ibauk mina jegajui utuamak amaitsujai; ayatak chichamaik tsagagti tujutta, tamak mina inakjush tsagagtatui.
MAT 8:9 Wagki wikishkam apu umigbau ajutui, antsag suntag mina umigtuidaush ajutuinawai, nunú aina nuiyan wi: “Wetá”, tamak wegawai. Tikichia nuna: “Taata”, tamak minawai; aikasnuk mina inakjunash: “Ju dutikata”, tamak dutikawai, tau.
MAT 8:10 Nuna tutai Jesús antuk anentai jegagchau, nunik niina saetus minina nuna chichajak: —Dekas tajime, Israel aina nuiyanakesh imatika dekaskeapi tabau ajamunak wainkachjai.
MAT 8:11 Nunin asamtai tajime: Etsá minitaijinia, etsá akaetaijinia kuashat aents aidau kaunkagtinai, nunikag Apajuí inamtaijin nayaimpinum Abraham, Isaac, Jacob aina nujai pekaamsag yuawagtinai,
MAT 8:12 tujash Apajuí inamtaijin wayatnume tibau aina duka, agaa jiikí suwenum ajapeam agtinai, dutikam nui batsamas butuinak nainak takegtú batsamtin ainawai, tau.
MAT 8:13 Nuna tii Jesús capitanin chichajak: —Wakitkita, ame dekas ashí nuniktatuapi tame duka imatiksag uminkattawai, tau. Nuna tiuwa duik inakshakam tsagajui.
MAT 8:14 Nuna tusa ukuak Jesús Pedro jeen weuwai, nui jegakmá Pedro tsatsají senchi tsuweak tepettaman wainkauwai.
MAT 8:15 Dutika Jesús uwegnum antigkui, dutikam tsuweamunak megkaekau, nunik nantakí Jesusan yutain ajampeau.
MAT 8:16 Nunú tsawantaik kintamai, kuashat aents wakan pegkegchau egkemtuamu aidaun ikautuawajui; dutikawagmatai chichamenig wakan pegkegchau aidaunak jiijá ishiakui, dutika ashí jau aidaunash etsagaku.
MAT 8:17 Nunak profeta Isaías tibau aajakua nu uminkati tusa dutikauwai, duka: “Nigki jutii kakakchamujinash, jatanashkam jukini”, tawai.
MAT 8:18 Jesús kuashat aents tuwajuinam wainak, ni jintintaiji aidaun: —Amain wegagmi, tiuwai.
MAT 8:19 Nuniai makichik maestro chicham umiktinun jintinkagtin jegantun: —Maestroh, wisha ame tuwig wekaetam nuniakminish tuke amijaig wekaesatin atajai tajai, tau.
MAT 8:20 Tutai Jesús ayaak: —Kujancham aidau waajig ajuinawai, antsag yakiya pishak aidaushkam pasugkeg ajuinawai; tujash Aentsmaga akiinauwa duka buuké atumsa ayamainjigkesh atsujui, tiu.
MAT 8:21 Nuna tutai makichik niina jintintaiji aina nuiya: —Apuh idaitusta, dekatkauk wenu mina apajun ukusan ukuakun nemagkatjame, tau.
MAT 8:22 Tutai Jesús ayaak: —Amek nemagtukta, idaisata wakanin jakau aina nu jakau aidaunak ukustinme, tiuwai.
MAT 8:23 Nuna tusa ukuak Jesús ni jintintaiji aidaujai barcanum chimpimjag weajui.
MAT 8:24 Nunik weenai dase shiig senchi dasentu, imaniau asa tsukatak barcanum yumik senchi yajanu; tujash Jesusak kanag egketu,
MAT 8:25 imanitai niina jintintaiji aidau jegaantag ishintainak: —¡Apuh, uwemtikagtugta jakektatji! tuidau.
MAT 8:26 Tama ditan ayaak: —¿Wagka sapigmajume aents imatikas dekaskeapi tuchau aidauwah? Tusa nantakí dasen, kuchanashkam imijiaku, dutikam kuchashkam miyasuch wajas patamsauwai.
MAT 8:27 Dutikamtai ditak pempeentunisag: —¿Jusha wají aents asamtaiya dasesh, kuchash ni chichamenash antujuinawa? tudaiyinau.
MAT 8:28 Nunik Jesús kuchá amain katigkú, nugka gadaranmaya aidau batsamtain, nuniai jimag aents iwanch egkemtugbau aidau ukumatainmaya jiinkiag Jesusan jegantaju. Nunú aents aidauk senchi kajen aidau asamtai, nunú jintanmag makichkish nagkaemamainchau aajakui;
MAT 8:29 nunik untsumainak: —¿Apajuí Uchijiyah, jutiish utugkagtukta tame? ¿Tsawan jegatsaigkik juish suwimak sukagtustasam minam? tuidau.
MAT 8:30 Tuja kuashat kuchishkam ikaa yuwak batsatu,
MAT 8:31 nuniau asamtai wakan pegkegchau aidau Jesusan segainak: —Ju aentsnumia jiijatkumek, au kuchi batsata awi awekagtita.
MAT 8:32 Tusá tama Jesús ayaak: —Wetajum, tiuwai. Tama wakan pegkegchau aidaushkam aentsnak ukuinak kuchinum utsanawajui, dutikam kuchishkam pisajag betsag tajaekaunum utsanawag kuchanum iyagkag jinawajui.
MAT 8:33 Nunikagmatai kuchí kuitamin aidaushkam pisajag yaakat jegawag, kuchi jinamun pachis, tuja aents wakan pegkegchau egkemtuamu aidaushkam nunikagmae tusag ashí etsejuidau.
MAT 8:34 Tiagtai ashí yaaktanmaya aidauk Jesusan wainkagtatus wejiajui, nunik wainkag, juig pujutsuk yajá wetá tusag segajui.
MAT 9:1 Nuna dutika ukuak, Jesús barcanum egkemag, amain katigká niina yaaktajin jegauwai.
MAT 9:2 Nunikmatai aents wekaechaun camillanum pataidiag ejetiaju; dutikawagmatai Jesús dita dekaskeapi tuinamujin wainak, jaun chichajak: —Uchijuh, shiig aneasta, ame tudaujum aidauk tsagkugnaje, tau.
MAT 9:3 Nuna tutai ujumak maestro chicham umiktinun jintinkagtin aidau anentaimsag: “Juka Apajuin pegkegchaun chichajak tu wekaewai”, tuidau.
MAT 9:4 Tu anentaimaidaun Jesús dekau asa ditan chichajak: —¿Wagka anentaiminish pegkegchaush anentaimjume?
MAT 9:5 ¿Tuwaita imá yupichuch tumainush, tudaujum aidauk tsagkugnaje taja dukaih, atsa nantakim wetá tumainaitag dukaih?
MAT 9:6 Tujash Aentsmaga akiinauwa nu, ju nugka juish tudau aidaunash tsagkugkagtumaina nu dekaatajum. Tusa wekaechaun chichajak: —Nantaktá nunikam camillajum jukim jeemin wakitkita, tiuwai.
MAT 9:7 Tama niishkam nantakí jeen weuwai.
MAT 9:8 Nuna wainkag aents aidauk ishamkaju, nunikag Apajuin emematiaju, niina senchijin ashí aents aidaunum iwainaku asamtai.
MAT 9:9 Nuna dutika Jesús wekamá Mateon wainkauwai, kuichik apunu atinun akikmagtai yajumak ekeemtatman, nunik: —Mateo, wegajai mina jintintaig aminum, tau. Tama Mateoshkam ayú tusa wajakug Jesusjai weuwai.
MAT 9:10 Jesús yujumkan yuwak jintintaiji aidaujai Mateo jeen eketai, apu romanmaya kuichkiji atinun ijumin aidau, nuigtú tikich aents tudaugtin aidaujai kuashat kaunawag Jesús eketbaunum jegaantag pekaamsaju.
MAT 9:11 Nuna wainkag fariseo aidau Jesusa jintintaiji aidaun iniinak: —¿Wagka atumi jintinjamnush apú kuichkiji atinun ijumin aidau, nuigtú aents tudau aidaujaish ijunjash yuawa? tuidau.
MAT 9:12 Nu tabaun Jesús antuk ayaak: —Jamamtuchu aidauk ampijatnunak atsumatsui, jau aidau atsumawai.
MAT 9:13 Wetajum nunikjum ju chichamash wajina takua tawa nu unuimagtajum: “Wait anenkagtin atajum tusan wakegajai, anentag itaajum nunak dakitajai”, tawa nu. Wika aents pegkejan takau aidau untsuktasan minichuitjai, aents tudaugtin aidaunum tauwaitjai.
MAT 9:14 Juagká jintintaiji aidau Jesusan jegaantag, iniinak: —¿Wagka jutiik, fariseo aidaujaig kuashtá ayuno takau agmag nuniajinish, amina jintintaijum aidaush ayunonash takainatsua? tuidau.
MAT 9:15 Tama Jesús ayaak: —¿Nuwenbaunum ipaamu aidaush wake besemag batsamainkaih, nu nuwenu ditajai pujaigkish? Tujash tsawan jegattawai nuwena nunú juwam atata nu, nunikmatai ipaamu aidauk ayunó wajakagtatui.
MAT 9:16 “Makichik aentskesh jaanch yamagman tsupikag jaanch mamujunmag adujtuchu ainawai, yamajam asa waketak jaanch mamujua nuna nuní nagkaemas ichiimain asamtai.
MAT 9:17 Antsag vino yamagmak duwap apagbau ajutnumag yajashtaiyai, dutikamak ichiimain asamtai, nunik vinok ukaegag, duwapshakam ichiinak ajapnamainai. Nuadui vino yamagmak duwap yamagmanum yajataiyai, nunin asa mai pegkejak amainai”, tiuwai.
MAT 9:18 Jesús nuna pachis chichagkagtai judío aidau apuji tajua, niina eemtin tikishmag chichajak: —Mina nawantug yamá jakae; tujash ame minim uwegmin antinjukta, dutikam aneantatui, tau.
MAT 9:19 Tama Jesuschakam ni jintintaiji aidaujai weajui.
MAT 9:20 Nuniamunum nuwa doce mijadai numpan puwak waitú pujú Jesusan wainak ukunum juwatki adijkauwai, nunik Jesusa jaanchji wenin antigkui,
MAT 9:21 wagki ni anentaimsag: “Imá jaanchjinakesh antiaknuk tsagagtatjapi”, tau asa.
MAT 9:22 Dutika antigkam Jesús ayampá nuwan wainak: —Nawantah, shiig aneasta, ame dekaskeapi tabaugmia nu etsaentamjae, tiuwai. Nu tsawanta nuaduik nuwak tsagajui.
MAT 9:23 Nunik Jesús judío aidau apujiya nuna jeen jegakmá pigkuin umpuin aidau nuigtú kuashat aents pampaa batsamtatman wainkau,
MAT 9:24 nunik chichajak: —Jiinjatajum, nuwauchik jakache ayatak kanaje, tau. Tutai dushikidau.
MAT 9:25 Tujash ashí aents jiinjagmatai wayá, nuwauchin uwegnum achiká inantam, niishkam nantakiuwai.
MAT 9:26 Nu dutikamua nunak ashí nu nugkanum etsejug dapampajajui.
MAT 9:27 Nuna dutika Jesús jiinki wetatman, jimag aents wainmachu pataetukag, untsumkag: —¡Davita uchijiyah, jutiish wait anenkagtugta! wajaidau.
MAT 9:28 Nunik Jesús jegá wayamtai, wainmachu aidaush jegantajam, ditan iniak: —¿Dekaskeap etsaentumainaita tujutjumek? tau. Tama ditashkam: —Ehé Apuh, tuidau.
MAT 9:29 Tiagtai Jesús ditá jiin antintak: —Atum dekaskeapi tajum nunisag uminkati, tiuwai.
MAT 9:30 Tamawaik wainmakajui. Nunikmatai Jesús shiig ujaak: —Makichik aentskesh ujakaigpa, tiuwai.
MAT 9:31 Tujash ditak jiinjag weenak, ashí aents nu nugkanum batsamin aidaunak ujá ujakua weajui.
MAT 9:32 Nunú wainmachu jiinki weenaig, aents iwanch egkemtuamu asa chichachun, Jesusan itajuawajui.
MAT 9:33 Dutikam iwanchin jigkiuwai, nunikmatai chichachushkam chichakú. Dutikamtai aents aidauk anentai jegachaju, nunikag: —Israel aidautik makichkish jutikamuk wainchataiyai, tuidau.
MAT 9:34 Tujash fariseo aidauk: —Juka iwanch aidau apujiya nuna senchijin iwanch aidaunak jiyawai, tuidau.
MAT 9:35 Jesusak wekagajakui ashí yaakat aidaunum nuigtú yaakat yaijuch aidaunmashkam, makí makichik ditá ijuntaiji aina nui jintinkagtak. Nuniak yamajam chicham Apajuí inamjatnujin pachis etsejak ashí jatai jau aidaunash tuja najaimagtin aidaunashkam etsagau.
MAT 9:36 Aents imanik tuwaidaun wainak, wait anenjauwai, wagki pimpikiag nuigtú pampagkag uwig pastorji atsugbau wajukmaina nunidau asagmatai.
MAT 9:37 Nuniak ni jintintaiji aidaun: —Dekaskenmag juumainuk kuashtai, tujash takau aidau ujumke,
MAT 9:38 nuadui nunú ajak juuktinun Apujiya nu segatajum, nuwi takastin aidaun ishiakti tusajum, tiuwai.
MAT 10:1 Jesús niina jintintaiji doce aina nuna untsuká, wakan pegkegchau aidau jiiktinun, jau aidau nuigtú najaimagtin aidau etsagaktinun senchimtikauwai.
MAT 10:2 Nunú doce apóstol aina nuna daajig jujú ainawai: dekatkauk Simón, tikich daaji Pedro, Andrés Simogka yachi nuigtú Jacobo niina yachi Juagjai Zebedeo uchijí aidau;
MAT 10:3 Felipe, Bartolomé, Tomás, Mateo apú kuichkiji atinun ijumajakua nu, Jacobo Alfeo uchijí nuigtú Tadeo,
MAT 10:4 Simón cananeo tutai nuigtú Judas Iscariote Jesusan sujukua nunú.
MAT 10:5 Jesús jujú doce aina nuna ishimak juna jintintus tiuwai: “Judiochu batsatbaunmag wegpajum, samarianmaya yaaktaji aidaunmash wayawaigpajum;
MAT 10:6 dekas Israel uwig megkaejauwa nunin aina nui wetajum.
MAT 10:7 Nunikjum etsegkatajum, ‘Apajuí nayaimpinmaya inamjatna duka tikiju wajasé’ tusajum.
MAT 10:8 Jau aidaush etsagagtajum, jakau aidaush inantajum, lepragtinush etsagagtajum, iwanch egkemtuamush jiijatajum. Nu dutikatnuk anenjauch jukiu ainajum nunisjumek anenjauch dutikatajum.
MAT 10:9 “Jukigpajum kuichkikesh, orokesh, akachumtaigmin cobrekesh,
MAT 10:10 wají egkesá jutai jintá atsumainkesh, yapagmamatnukesh, sapatkesh, ushujutaigkesh; wagki aents takaa duka yuwatnujig suwam auwai.
MAT 10:11 “Tuja yaaktanum jegakjumesh nuniachkugmesh yaakat yaigchinum jegakjumshakam, egaktajum aents kajintsá diimaina nu, nunikjum nuig pujusjum weakjum ukuktajum.
MAT 10:12 Tuja jegá wayaakjumesh nuwi batsataina nunú kumpamatajum.
MAT 10:13 Tuja nunú jeganmaya aents aina nu atumnash shiig aneas jujamiagtaik, atum agkan pujamu ajutjama duke ditaish atí; tuja nuninchau ataik, agkan pujamuk atsujiagtatui.
MAT 10:14 “Tuja makichik aentskesh jeen awaintamtan dakitjamainak, atum chicham etsegbau antutnash dakitakuig, nunú jegak ukuakjum, nuniachkugmesh yaakat jinkugmekesh daweminia tsetse pegatjam akaketkam ukuktajum.
MAT 10:15 Dekas tajime: Suwimak sukagtamu tsawan atina duik, nu yaakta duka, Sodoma Gomorra nugka aajakua nui aents batsamajakú suwimak susamua nuna nagkaesau suwimkan jukiagtinai.
MAT 10:16 “Aneaku atajum, wika atumnak ikamyawa batsatbaunum uwig ishimaina numamtuk aents pegkegchau batsatbaunum ishimjime. Nunin asamtai atumek dapi ebetmainchauwa iman atajum, nuniakjum paum aidau tutitjajish atsujin aina iman atajum.
MAT 10:17 Kuitamamkatajum, wagki achigmakag apu chichaman inagnau aidaunum sujupakagtinai, dutijamawagmatai jega ditá ijuntaiji aidaunum awaintamawag asutamawagtinai;
MAT 10:18 dutijamainak gobernador aidaunum ejetamawag nuigtú rey aidaunmash ejetamawagtinai mina nemagtuidau asagmin. Dutijamawagmatai ditá eemtin mina pachittsajum chichaakjum, Apajuí anentaimtuchu aidau eemtinish etsegtugkatin ainagme.
MAT 10:19 Tujash achigmakag sujupainakuish atum chichaktinuk uyumakaigpa wajintu titatjume dushakam, wagki atum chichattajum dui wajintu chichaktatjume duka tibau atinaitjume.
MAT 10:20 Wagki duka atum chichakchatnaitjume, atumi Apa nuna Wakaní atumin aujtama nu chichaktinaitjume.
MAT 10:21 “Nuniamunum yachin maatnume tusag sujiagtinai, antsag uchigtin aidaush uchijin sujiagtinai, uchi aidaushkam apajin shiwagmagtinai nuninak maidiagtinai.
MAT 10:22 Ashí aents aidau kajegtabiagtinai mina daag pachisjum chichaidau asagmin; tujash ni ebetmamag nagkanbaunum jegaa nu uwemjagtinai.
MAT 10:23 Tuja makichik yaaktanum pujagmin aintamainakuish tikich yaaktanum tupikaktajum. Dekas tajime, Israelnumia yaakat aina nui mina chichameg pachisjum ashí etsegtsugminig, wi Aentsmagan akiinauwaitag nunak taatnaitjai.
MAT 10:24 “Jintintaiya duka jintinkagtina nuna nagkaesauchui, tuja inakshakam apujin nagkaesauchui.
MAT 10:25 Jintintaiya duka jintinkagtina ibauk amainai, nunisag inaka dushakam apujiya ibauk amainai. Jeenna nuna Beelzebú tuina nuniaush, ¿wagkag nuna jeen batsata nunash pegké tichagtinme?
MAT 10:26 “Nuadui ditak ishamkaigpajum; wagki uukbau wantintsuk juwaktinuk makichkish atsawai, antsag dekaachbau dekantsuk juwaktinchakam makichkish atsawai.
MAT 10:27 Nuadui atumek tikichish antachbaunum wi imá atumnak jintinbau antukujum nunú, ashí aents antuinamunum etsejatajum dekaatnume.
MAT 10:28 Iyashmin mainakuish ishamkaigpajum, tujash wakanminak maumainchau ainawai. Dekas ishamkatajum iyashin, wakannash waitut tuke atina nui egkepamaina nu.
MAT 10:29 “¿Makichik kuichkiuch kayauch piipich juwaku jimag pishak sujushtaigkaih? Tujash nunú pishak aina nuna atumin Apa Apajuiya nu jakati tachamak makichkish jamaitsui;
MAT 10:30 tuja nigka atumi intashim wajupa awa nunash dekaapag shiig dekawai.
MAT 10:31 Nuadui ishamkaigpajum; wagki atumek kuashat pishak aina nuna nagkaesau akik ainagme.
MAT 10:32 “Makichik aentskesh Cristunuitjai tusa aents aidau eemtin etsegtugkaju aidaunak, wishakam dutiksanuk ditanashkam mina Apag nayaimpinum puja nuna eemtin titinaitjai.
MAT 10:33 Tujash makichik aentskesh, aents aidau eemtin: Wika Cristunak nemagchauwaitjai tujutiu aidaunak, wishakam dutiksanuk mina Apag nayaimpinum puja nuna eemtin: Ditak minak nemagtuchu ainawai titinaitjai.
MAT 10:34 “Atumek agkan pujustinme tusas ju nugka juig tauwaitai tajume; tujash wika agkan batsamsatnume tusanuk taachuitjai, maaninak batsamsatnume tusan tauwaitjai.
MAT 10:35 Wika miniuwaitjai uchi apajijai shiwagmagati tusan, nawanjish dukujijai shiwagmagati tuja nuwa nemakush tsatsajijai shiwagmagati tusan;
MAT 10:36 nuniamunum ditá shiwajiya duka niina patayí aina duke agtinai.
MAT 10:37 “Aantsag mina anenmaina nuní nagkaemas apajin, nuniachkush dukujin imá senchi aneauk midau amaitsui, antsag uchijin nuniachkush nawanjin mina nagkaetasu aneaushkam, midauk amaitsui;
MAT 10:38 tuja ni mina nemagtuk waittan dakitaushkam, midau amaitsui.
MAT 10:39 Aents ju nugka jui pujutan imá senchi wakegak, mina nemagtuk waittan dakitauk uwemjashtin ainawai; tujash mina nemagtak niina pujutjinash puyatjukchauk, uwemjatnai.
MAT 10:40 “Atumin jujamaina duka mina jujuinawai, tuja mina jujuina dushakam mina awetiuwa nuna juinawai.
MAT 10:41 Makichik aentskesh profeta Apajuí tabaun etsejin asamtai niina jeen juwauk, nu profeta wají shiig pegkejan jukitna dutiksag jukitnai; antsag aents pegkejan takaun juwaushkam, nu aents pegkejan takau wají shiig pegkejan jukitna dutiksag jukitnai.
MAT 10:42 Makichik aentskesh ju mina nemagtin imanchauch aina juna, yuminakesh vasonum suwauk, dekas tajime, wají shiig pegkeg juwamu atina nunak megkaekashtinai”.
MAT 11:1 Jesús ni jintintaiji doce aina nuna ashí jintintua inagnak, nuiya jiinki ditá yaaktaji aina nui jintinkagtak chichaman etsegkatatus weuwai.
MAT 11:2 Juagkak achikam cárcel egkemas antuku Cristo chichagkagtak wekaebaun; nunik ni jintintaiji aidaun awetiuwai,
MAT 11:3 Jesusan juna iniasti tusa: —¿Amekaitam taatnai tibauwa nu, atsa tikichnak dakastatag?
MAT 11:4 Tama Jesús ayaak: —Wetajum nunikjum Juan ujaktajum atum antukujum nu nuigtú wainkaujum dushakam.
MAT 11:5 Wainmachush wainmainawai, shutushkam wekagainawai, lepragtin aidaush tsagainawai, empekush antuinawai, jakaush nantainawai, tuja ujunauch aidaush yamajam chichaman antuinawai,
MAT 11:6 shiig aneastinai mina junik anentaimtujuinatsu duka, tiuwai.
MAT 11:7 Nunik ditak waketjamtai, Jesús nui aents batsatun Juagkan pachis iniak: “¿Wají wainkatasagmea uwegshunmash weabiugme? ¿Tagkanan dase umpuau wainkatasagmek weabiujum?
MAT 11:8 ¿Nuniachkugmesh wají wainkatasagmea weabiugme? ¿Aents jaanch shiig pegkejan nugkujá pujau wainkatasagmek weabiujum? Atumek dekagme jaanch pegkejan nugkuaju aidauk rey aidau jeen pujuinawai.
MAT 11:9 Tujash ¿wají wainkatasagmea weabiugme? ¿Profeta wainkatasagmek weabiujum? Ehé, dekaske, duka profeta nagkaesau aajakui.
MAT 11:10 Wagki ni pachisa agagbauwa duka: “ ‘Wi mina chichamjun etsegnun emtikan awemajai, ni jintanak umigtamkati tusan’, tawai.
MAT 11:11 “Dekas tajime, aents akiinaina nuig Juan Yamijatna nuna nagkaesauk atsawai; tujash Apajuí nayaimpinum inama nuig aents dekas imanchauchia nuuwai niina nagkaesauk.
MAT 11:12 “Juan Yamijatin tauwa nuwi nagkamas yamaikish, Apajuí nayaimpinmaya inama nunak tutitag awagmainak waitkainawai, tuja aents kakakantu aidau nunak emegkakta tuinawai.
MAT 11:13 Ashí profeta aidau nuigtú chicham umiktina duka Juan tauwa imanuiya atinun etsegkajui.
MAT 11:14 Tuja wi taja nu dekas nuninapi takugmek dekaatajum, niiyai Elías taatnai tibauwa nu.
MAT 11:15 Ni antutaiji ajamuk antukti”, tiuwai.
MAT 11:16 “¿Jujú aents aina junash wajijai apatkanua tumainaitja? Ditak, uchi aidau plaza aidaunum pekaamsag kumpajijai untsuninak:
MAT 11:17 ‘Flauta umpuakuish, atumek nantsemachmaugme; wake besemjan kantamkuish, buutchamugme’, tunaiyin aina numamtin ainawai.
MAT 11:18 Wagki Juan taa, yutainash yuachu, umutnash umachkui, Iwanch ajamu asa aniawai, tajume.
MAT 11:19 Tuja Aentsmaga akiinauwa nu taa yutainash yuwau, umutainash umakui, yuwa yuwakua wegawai, umutnash umú wekaewai, apu kuichkiji ijumin nuigtú tudaugtin aina nuna kumpajiyai, tajume. Tujash Apajuí yachajig, ni pegkeg takaamujiya dui wainnawai”.
MAT 11:20 Tusa aents dutikmainchaun kuashat iwainak yaakat aidaunum takasua nuna najamnun chichagtan nagkamauwai, wagki anentain yapajiachaju asagmatai, nunik:
MAT 11:21 “¡Jauchaj Corazigkah aminak wait anentajame! ¡Jauchaj Betsaidah aminash wait anentajame! Tironmash nuigtú Sidogkash aents dutikmainchau atum iwaintukbau ainajum dutikamu ainakug, yaunchkes kuashat anentai idagmak yapajinmain aajakú ainatai.
MAT 11:22 Tujash tajime tsawan dekagmabau atina duik, tironmaya, sidogkanmaya aina nuna nagkaesau atumek suimkak jukiagtin ainagme.
MAT 11:23 Capernaúm, ¿amesh nayaimpinum juwam atinaitjai tamek? Atsa, amek Hades akaikitnaitme. Wagki aents dutikmainchau atum iwaintukbau ainajum dutika sodomanmayash iwaintukbau ainakug, yamaiya juish yaaktak amainai.
MAT 11:24 Tujash tajame, tsawan suwimak sukagtamu atina duik, amek Sodoma nugkanmaya nagkaesau suwimkak jukitnaitme”, tiuwai.
MAT 11:25 Nunú tsawantinig Jesús chichaak: “Emematjame Apawah, nayaimpin nugkan Apujiyah, wagki yacha nuigtú unuimaju aina duka uugkam aents imanchauch aina nunú iwaintuku asamin.
MAT 11:26 Dekaske Apawah, wagki amek aajam wakegame”, tiuwai.
MAT 11:27 “Mina Apag ashí wají aina nunak mina idaitugsauwai. Makichkish wainainatsui Uchijinak, nunak Apajig wainui; antsag makichkish Apagnak wainuk atsawai, nunak Uchijig wainui, nunak Uchijiya nu iwaintam dekamain ainawai”.
MAT 11:28 “Minai minitajum ashí atum kuashat takat takaakjum pimpikjum nuigtú kijin aidau yanamaina imanikjum pujautigmek, nunak wi ayamtijatjime.
MAT 11:29 Wi atumin dutikatajum tajim juka umiktajum nuniakjum midau unuimagtajum, wi batajuch nuigtú imanchauch anentaimtumauwaitag nu; aaja nuniakjumin wi atumi wakanminash ayamtiksattajai.
MAT 11:30 Wagki wi atum chicham umiktinun amajim juka yupichuchi nuigtú umikchamnukesh atsui”.
MAT 12:1 Nunú Tsawan weamunum Jesús tsawan ayamtai ai ajak ajakmakbaunum nagkaebau. Nuniamunum niina jintintaiji aidaushkam yapajau asag, trigon kupik jukiaju nejen yuawagtatus.
MAT 12:2 Nuniagtatman fariseo aidau wainkag: —¡Jintintaijum aidau diisia! ¡Tsawan ayamtai tsawagmataig makichkish dutiknashti tibauwa nunin aig anina nu! tuidau.
MAT 12:3 Tiagtai ni ayaak: —¿Atumek ausachukaitjum David niijai ijunag yujaamujai yapajuinak,
MAT 12:4 jega Apajuí ememattainum wayá, pag Apajuí anagkuamun niijai yujá nujai yuwawajua duka? nunak nigkish yumainchau nuigtú niijai yujá dukesh yumainchau aajakui, nunak imá sacerdotek yuwati tibau aajakui.
MAT 12:5 ¿Nuigtush atumek chicham umiktina nuiyag ausachukaitjum, jega Apajuí ememattainum sacerdote aidauk tsawan ayamtai aig takainawai tawa nu, nuninakush bakumamainjig atsujuina duka?
MAT 12:6 Nuniau asamtai tajime, juajui pujawai jega Apajuí ememattaiya nuna nagkaesau dekas imana nu.
MAT 12:7 Nuadui atum jujú chicham: “Wait anenkagtin atajum tusan wakegajai, anentag kuntin itaajum nunak dakitajai”, tawa dusha wajina takua tawa nu dekakjumek, bakumamainun dutikainatsaigkik nimjuuk yujamainchau ainagme;
MAT 12:8 wagki Aentsmaga akiinauwa duka, tsawan ayamtaiya nuna Apujiyai, tiuwai.
MAT 12:9 Jesús nuiya jiinki jega ditá ijuntaijin jegauwai.
MAT 12:10 Nuwi aents uwejí jaka ekemkau pujau asamtai, Jesusan kajejuidau asag wajintig timatai etsegtuka bakumí tuidau asag iniinak: —¿Tsawan ayamtai aish jaush etsagaumainkaih? tuidau.
MAT 12:11 Tama Jesús ayaak: —¿Atum ainajum anuiya, makichik uwig ajamu aintai, nuniamunum nunú uwig tsawan ayamtai tsawaju ai waanum egkemamtaish, jiiskek idaimainaitjum?
MAT 12:12 Tujash ¿aentschaukait dekas uwijá nagkaesau akika duka? Nunin asamtai tsawan ayamtai aigkish pegkeg aina duka dutikmainai, tiu.
MAT 12:13 Tusa nuna aentsun chichajak: —Uwejum dakuekta, tiuwai. Tamawaik uwejin dakuek, tikich kuntujijai betek pegkeg wajasui.
MAT 12:14 Tujash fariseo aidauk jiinjag, Jesusash wajuk maumainkita nuna pachisag chichasajui.
MAT 12:15 Jesusak nuna dekaa, nuiya jiinki weuwai, nunitai kuashat aents pataetukajui; tuja niishkam ashí jau aidaun etsagau,
MAT 12:16 dutikak akateau: Mina pachittsagmek etsegkaigpa tusa.
MAT 12:17 Ju aatus nuniamunum profeta Isaías tibauwa nu uminkauwai, duka:
MAT 12:18 “Juwai mina inakeg wi etegkauwaitag nu, mina anetaig, niiní shiig aneamu ajuta nu. Niina susatnaitjai mina Wakanjun, dutikam ni aents judiochu aina nunash pegkeg takat aina nuna ujaktinai.
MAT 12:19 Nigka jiyanik wekaechatnai nuigtush untsumash wekaechatnai, jintá wajantá untsumá wekagunakesh antukchagtin ainawai.
MAT 12:20 Nigka aents tudaugtinnash tsagkugtsukek idaisashtinai, ayatak tsagkujug pegkemtiktinai, aikasag aents niina imatikas anentaimtuinachunash nigki dekaskeapi tumamtiktinai. Aatus ashí pegkegchau aidaunak ni pegkejan takaak depetkatnai, ashí aents aidaun Apuji atinai.
MAT 12:21 Tuja ashí aents aidau dakamuji atina duka niiyai”, tawai.
MAT 12:22 Aents wainmachu nuigtú chichachu, iwanch egkemtuamun Jesusan ejetuawajui, dutikawagmatai niishkam etsagaju; dutikam wainmakui nuigtushkam chichakui.
MAT 12:23 Ashí aents aidauk nuna wainkag, puyatkag: “¿Juchauwashit David weantunum Cristo akiinatnai tibauwa nu?” tuidau.
MAT 12:24 Tuinamun fariseo aidau antukag: “Beelzebú, iwanch aidau apujiya nuna senchijin iwanch aidaunak jiyawai”, tuidau.
MAT 12:25 Jesusak dita aatus anentaimainamujin dekau asa, tiuwai: “Makichik nugkanmag inamin ainayatak shiwagmagawag maaní batsatkujag megkaemain ainawai, nuigtú makichik yaaktanmag batsatiatak nuniachkush nu jeganmag batsamnaitak pempeentunisag maaní batsatushkam megkaemain ainawai.
MAT 12:26 Tuja Iwanch pempentuki iwanchin jiyakug, pempentunisag maaninak nunimainai, ¿nuniaush wajuk ni inamtaijinash kuitamainaita?
MAT 12:27 Atumek Beelzebú senchijin Iwanch aidaunak jiyawai tujutjume; tujash nu aatus aish, ¿atumi jintintaijum aidaunash, ya senchinash suwawa Iwanch aidaun jiiktinme tusash? Nuadui, dita iwainmamainawai atum dewakjum tu yujajum nunak.
MAT 12:28 Wagki wi Apajuí Wakaniya nujai Iwanch aidaun jiyaag nunak, atumiin Apajuí inamu asamtai jutikajai.
MAT 12:29 “Aents senchigtina nuna jeen wayaa wajiijin yajutkata takug, nuna aentsun jigkajá nuadui yajutmainai ashí wajiijinak.
MAT 12:30 “Aents mina yaintuinatsu duka, mina shiwagmatuinawai; nunisag wijai takainatsu dushakam aentsnak dapampainawai.
MAT 12:31 “Nuadui tajime, ashí aentsun tudaujig nuigtú Apajuí pegkegchaun chichagkau aidauk tsagkugnamainai; tujash Wakaní Pegkejin pegkegchau chichagkau aidauk tsagkugnagchagtinai.
MAT 12:32 Makichik aentskesh Aentsmaga akiinauwa nuna pegkegchau chichagkau akush tsagkujam atinai. Tujash Wakaní Pegkejin pegkegchau chichagkau aidauk, yamaiya juish ajumaish tuke tsagkujam achagtinai.
MAT 12:33 “Numi pegkejak, pegkegnak nejeawai; tuja ajak pegkegchaushkam, pegkegchaunak nejeawai. Nuadui ajakak niina nejenig dekataiyai.
MAT 12:34 ¡Iwanch weantu aidauwah! ¿pegkegchautigmesh, wajuk pegkejash chichaktagmeki? Wagki shiig kuashat anentainum awa nuiyan aentsuk chichawai.
MAT 12:35 Aents pegkejak pegkegnumag anentaimu asa, pegkegnak chichawai. Nunisag aents pegkegchaushkam pegkegchaunmag anentaimu asa, pegkegchaunak chichawai.
MAT 12:36 Tujash wi tajime: Suimak sukagtamu tsawan jegatna duik, ashí aentsuk dita chicham pegkegchau chichakbaujiya nunak imatiksag etsegtumakagtin ainawai.
MAT 12:37 Wagki ame chichamjum aina duik pegkeg diyam atatme nuniachkumesh chichamjumea duik bakumattame”.
MAT 12:38 Ujumak fariseo nuigtú maestro chicham umiktinun jintinkagtin aidaujai Jesusan iniinak: —Maestroh, ame wainchatai iwainamu wainkatasa wakegaji, tuidau.
MAT 12:39 Tiagtai Jesús ayaak: —Jujú aents pegkegchau nuigtú betek umichu aina nu wainchatai iwainamun wainkatatus wakegainawai. Tujash nunak dutikashtatjai, ayatak profeta Jonás wajukauwa nunisnuk ditanak iwaintuktatjai.
MAT 12:40 Wagki Jonás namak muunta ampujin kampatum tsawan kampatum kashi egkemsauwa nunisag, Aentsmaga akiinauwa dushakam nugká initken kampatum tsawan kampatum kashi pujustinai.
MAT 12:41 Nunisag ninivenmaya aents aidau atak suwimak atina duwi bakugmagtinai. Ditak Jonás Apajuí chichame ujakam, dekaskeapi tusag tudaujin idaiyinak Apajuin nemagkajua dui. Tujash jui atumjai pujawai Jonasa nagkaesau.
MAT 12:42 Aantsag surnumia reina aajakua dushakam nugka najatamunmaya Salomogkan tajiuwai Apajuí yachamtikamun antujuk dekajuatatus, nunú atumnak bakugmagtinai atak suwimak juwamu atina duik, wagki wi Salomogkan nagkaesaun chichagmash umikchau asajum.
MAT 12:43 “Wakan pegkegchau aentsnumia jiikí ajapamak, weawai uwegshunum ni ayamainjin egaak; tuja wainkachag:
MAT 12:44 ‘Mina jegajui pujaun jiinkibiag nuwi wakitkitjai tusa anentaimas’, tajua diikmá japimká shiig iwajamun ukumkimun wainak,
MAT 12:45 wakitki siete wakan niina nagkaesau pegkegchau aidaun yajuak egkemtawai. Dutikam aentsuk duik pegkegchau aajakbauwa nuna nagkaesau pegkegchau weawai. Nunisag jujú aents pegkegchau aina juka dutikam agtatui”.
MAT 12:46 Tusa Jesús eke aents aidaun aujak pujai niina yachi aidau, dukujijai tajuawag agaa ijunaidau, Jesusjai chichastatus wakegaidau asag.
MAT 12:47 Nuniai tikich aents Jesusan ujaak: —Amina duku, yatsum aidaujai aujsatjai tusa kaunawag agaa ijunui, tau.
MAT 12:48 Tusá ujaam, nu aents etseja nuna chichajak: —¿Yaita mina dukujush, tuja yaita mina yatsug aidaush?
MAT 12:49 Tusa ni jintinbau aina nuna inakmas: —Jujú ainawai mina yatsug, mina dukug aidauk.
MAT 12:50 Wagki mina Apag nayaim puja nu wakegamun umijuina nuuwai mina yatsug, mina ubag, mina dukug aina duka, tiuwai.
MAT 13:1 Nunú tsawantaik Jesús jegá pujau jiinki kuchanum jegaa uwetus ekeemsamtai,
MAT 13:2 aents aidaushkam tuwagkaju. Imanikagmatai Jesuschakam barcanum egkemag ekeemsau, nuniai aents aidauk kaamatak ijunaidau.
MAT 13:3 Nunikagmatai kuashat wajiin pachis augmatus ujaak: “Ajakan ajakbau ajakmatatus weuwai.
MAT 13:4 Nunik jegantá ajajin jigkai nagkimam jintá kakekaunak, pishak kaketuk amukui.
MAT 13:5 Tikich jigkai kayagnunum nugka imanik atsamunum kakekauwai, nu nunikuk wamkes tsapaidiajui, wagki nugkak awankauch asamtai;
MAT 13:6 nuniktatman etsa jiinak kagkapé initak akaejachu asamtai apeká ijinauwai.
MAT 13:7 Tuja tikich jigkai jagki ayaunum kakekaunak, jagki tsapainak yutuawajui.
MAT 13:8 Tujash tikich jigkaik nugka pegkegnum kakekajui, nunikajuk shiig nejekajui; makí makichik ajak aidau cien, tikich sesenta, tikitchakam treinta aatus nejekajui.
MAT 13:9 Ni antutaiji ajamuk antukti”, tiuwai.
MAT 13:10 Tusa augmatus ashimkamtai niina jintintaiji aidau jegaantag, iniinak: ¿Wagka aents aidau aujkumesh augmattsa jintinkagtamu pachismesh tame? tuidau.
MAT 13:11 Tama ni ayaak: “Atumnak Apajuí dekamtijamui ni nayaimpinum inama nu dekachbau aajakajua nuna; tujash ditak nunak dekamain ainatsui.
MAT 13:12 Wagki kuashat aja duka nuní dukap suwam atinai; untsu atsuja duka, nu piipich ajamua dukesh atantam atinai.
MAT 13:13 Nuadui ditanak augmatbaujai pachisan jintinjai; wagki ditak wainainakush wainchau wajukmaina nuninak, antuinakush antachu wajukmaina nunidau asagmatai.
MAT 13:14 Juka ditai uminui profeta Isaías tibauwa nu, duka tawai: “ ‘Antutaijin antuinakush, dekachagtinai; wainainakush, wainchau wajukmaina nunikagtinai.
MAT 13:15 Jujú aents aina nuna anentaimtajig wamak dekamainchau waigkaje, antutaijish epetkamua nunin, jiishkam ejatkamua nunin ainawai. Nuninchau ainakug jiin wainainak, antutaijin antuinak, anentainish dekainak yapajinmain ainawai, nuninakui wi etsagaumainaitjai’.
MAT 13:16 “Tujash atumek shiig aneastajum, waintash wainu, antutash antau asajum.
MAT 13:17 Dekas tajime, Kuashat profeta aidau nuigtú aents pegkejan takajakú aina dushakam yamai atum wainjum juna wainkagtatus wakegajakú ainawai. Tujash wainkachu ainawai, antutnash yamai atum antajum juna antukagtatus wakegajakú ainawai, nuninakush ditak antukchajui.
MAT 13:18 “Wi ajakan ajakbaun augmattsan jintinkagtuamag nuna pachisan takui antuktajum.
MAT 13:19 Ashí aents Apajuí inama nu pachisa etsegbaun antuinakush dekamainchau dekapena duka, jigkai jintá kakekauwa nunin ainawai, nunin asamtai Iwanch chicham antukbaujin anentainian kajimitka nuna takun timajai.
MAT 13:20 Jigkai kayagnunum kakekajua duka, chichaman antukag wakegas juina nuna iwainawai;
MAT 13:21 tujash nu ajakak kagkapenachu asa ebetumtsui; numamtuk utugchat minitmash nuniachkush Apajuí chichamen umidau asag waitkainam wamkes idaiyinawai.
MAT 13:22 Untsu jigkai jagki ayaunum ajaamua duka, chicham etsegbaun antuina nuuwai; tujash ju nugkanmaya takat aina nuna imá senchi uyumainak nuigtú wiyakchameata tabaujiya nu tsanuinam chicham antukbaujin sakapajag ajak nejemainchauwa nunin wenawai.
MAT 13:23 Tujash jigkai nugka pegkegnum kakekajua duka, chicham etsegbaun antukag shiig dekawag dutiksag pegkejan takaina nuna iwainawai, makí makichik ajak treinta, sesenta, cien nejeawajua numamtuk”.
MAT 13:24 Nuigtú tikichin augmatus jintinkagtak: “Apajuí inama duka aents niina ajajin jigkai pegkejan ajakmakua nujai betekmamtinai.
MAT 13:25 Tujash kajiinak batsatai, shiwaji jegají trigo ajakbaunum cizaña ajatuk ukuak weuwai.
MAT 13:26 Dutikamu trigoshkam tsapakag nejenai, cizañashkam paan wantinkajui.
MAT 13:27 Nunikmatai takau aidaushkam ajagtina nuna jegajiag chichajuinak: Apuh, ¿ame jigkai pegkeg ajagmin ajakbauwa nuniaish, tuwiya cizañash tsapaidiaje? tuidau.
MAT 13:28 Tama ni ayaak: ‘Aunak shiwag aikae’, tau. Tutai takajin aidau aiinak: ‘¿Shimutkaja tegagchagtatjik?’ tuidau.
MAT 13:29 Tiagtai: ‘Atsa, idaisatajum, cizaña tegakmajum trigoshkam tegainijum;
MAT 13:30 idaisatajum mai betekak tsakagtí, nunikmatai juwamu jegatta dui ajaka juu aina nuna, dekatkauk cizaña tegagjum jigkaka batsastajum apenkati, dutikakjum trigok mina ajak ijumtaijua nui ijumjatajum titajai’ ”, tiuwai.
MAT 13:31 Junashkam Jesús tikich augmatbaun pachis jintinkagtak: “Apajuí inama duka, aents mostaza jigkayin niina ajajin ajauwa numamtinai.
MAT 13:32 Dekaskenmag mostaza jigkayig ashí tikich jigkai aina nuní piipichi; tujash tsakakug ajak nugkauchik nejen aina nuna nagkaegas tsakawai; nunik numi wajasmatai kanawen pishak pasugmama numamtinai”, tiuwai.
MAT 13:33 Nuigtushkam tikichin augmatus jintinkagtak: “Apajuí inama duka levadurajai betekmamtinai, nuna makichik nuwa juki, harinan kampatuma imania dekaapa namukbaunum pachimjauwai, dutikam ashí harina namukbauwa nuna wampushmitkajua numamtinai”, tiuwai.
MAT 13:34 Jesusak ashí augmatbau aina nujai aents aidaunak jintintujakui, augmattsukek jintinkagtuachui.
MAT 13:35 Aatus uminkauwai profeta chichaak: “Augmatbaujai chichaktatjai, iwainaktatjai yama nugka najanetnumash dekaachbau aajakua nuna”, tibauwa nunú.
MAT 13:36 Jesús nuna tusa aents aidaun ukuak, jegá wayauwai, nunikmatai jintintaiji aidau jegaantag: Cizaña ajanum ajakbau augmattsam timaum nu ujajatkata, tusag segaidau.
MAT 13:37 Tama Jesús ayaak: “Jigkai pegkejan ajakma duka, Aentsmaga akiinauwa nuuwai;
MAT 13:38 aja timag nunak ashí nugkanmayan takun timajai, ajaka jigkayí pegkeg timag dushakam Apajuí inama nuna uchijí aina nuuwai; untsu cizaña timag duka Iwanchi uchijí aina nuuwai;
MAT 13:39 tuja shiwag ajakú timag duka, Iwanchi. Ajak juwamu timag dushakam nugka nagkanbaunum atina nuna iwainawai, tuja ajakan juu aina duka, ángel ainawai.
MAT 13:40 Cizaña tegajá jiinum apetiama numamtuk wajaktinai nugka nagkanbaush.
MAT 13:41 Aentsmaga akiinauwa nunú angelji aidaun ishiaktinai, ni inama nuiyan ashí pegkegchau takau aidau, tikichin pegkegchaun takamtikin aina nuna ijumjatnume tusa;
MAT 13:42 dutika jii kegamunum chimpiatnai, dutikam nui batsamsag buutuinak daik takegtú batsamtin ainawai.
MAT 13:43 Untsu pegkejan takasú aina duka, ditá Apají inamtaijiya nui wakag tuke etsajai betek etsantiagtinai. Ni antutaiji ajamuk antukti, tiuwai.
MAT 13:44 “Apajuí inama duka oro nugkanum yutua ukukbauwa nuninai, nuna makichik aents wainak, nuig ataktú yutua ukuak, shiig aneas wakitki, ashí niina wajiijinak sujug, nunú nugkan sumakui.
MAT 13:45 “Apajuí aentsnum inama duka, aents wají sujin kaya perla tutai dekas pegkeg iwajamu akiktanash akikan wainkatatus egá wekaetukmá,
MAT 13:46 wainak wakitki ashí niina wajiijinak sujug sumakua nujai betekmamtinai.
MAT 13:47 “Aantsag Apajuí inama duka, redjai betekmamtinai, nuna namaká main aidau nayantsanum ajugkam ashí namak aidaunak yajumui;
MAT 13:48 nunik kuashat chimpimkamtai, kaamatak ajuidiag, ekeemsag namak pegkejan chagkinnum chimpinak, pegkegchau aidaunak utsain ainawai.
MAT 13:49 Aatus atinai ju nugka nagkanbaunmashkam, ángel aina nu pegkegchau aina nuna pegkeg aina nuiyan akanjagtinai;
MAT 13:50 dutika jii kegamunum chimpiatnai, dutikam nui batsamsag buutuinak daik takegtú batsamtin ainawai”.
MAT 13:51 Tusa Jesús iniak: —¿Ashí wi taja dusha antukugmek? tau. Tutai dita aiinak: —Ehé Apuh, tiajui.
MAT 13:52 Tiagtai ni chichajak: —Ashí maestro chicham umiktinun jintinkagtin aidau Apajuí inama nuiyan unuimauk, aents jeentin oroji ukukbaun, yamagman nuniachkush ajutan jiiyama nuninawai, tiuwai.
MAT 13:53 Jesús nu augmatbaun ashimak, nuiya juaki weuwai,
MAT 13:54 nunik niina nugkeen jegaa, jega ijuntainum wayá jintinkagtau, nunitai anentai jegagchag chichainak: —¿Jusha tuwí unuimajuita imatika deka dusha? ¿Utugsaya aents dutikmainchaunash dutikawa?
MAT 13:55 ¿Jujú carpintero uchijiya duchaukaih? ¿Dukujish María, yachi aidaush Santiago, José, Simón, Judas ainajama?
MAT 13:56 ¿Ni umayí aidaushkam jui jutiijai batsata aniaish, wajukaya niish imatikash dekawa? tuidau.
MAT 13:57 Tusa pampantuinam Jesús chichaak: —Profetak niina nugkenig tuja niina jeenish eme anentamak achauwai, tiuwai.
MAT 13:58 Tau asa, nuanuig kuashat aents dutikmainchau aidaunak iwainajag takaschauwai, dekaskeapi tuinachu asagmatai.
MAT 14:1 Nunú tsawantinig Herodes tetrarca Jesús pachisa tuinamun antuku,
MAT 14:2 nunik ni inake aidaun chichajak: “Duka Juan Yamijatnai, nunú nantakne, nuniku asa senchijí ajawai aents dutikmainchaun iwaina nunak”, tau.
MAT 14:3 Nunak Herodesak niina yachi Felipe nuwe Herodiasan nuwatuk pujau asa Juagkan achiká cárcel egkeau aajakui.
MAT 14:4 Wagki Juan chichajak: “Amek, yatsumi nuweg nuwatkamek pujumaitsume”, tibau asa.
MAT 14:5 Herodesak maumainaitak aents aidaun ishamak idaisauwai; wagki Juagnak profetayai tuidau asagmatai.
MAT 14:6 Tujash dutikauwaitak Herodes akiinamuji tsawagmatai, Herodiasa nawanji ipaamu aidau eemtin nantsemauwai, nuniak Herodesan shiig awajkauwai,
MAT 14:7 dutikam makichkish yapajimainchaun anagkuauwai ni wajina segattawa nunak imatiksag susatatus.
MAT 14:8 Tima nuwauchishkam dukují akatjam, Herodesan jegantun: —Platonum Juan Yamijatnun buuké sujustá, tusa segauwai.
MAT 14:9 Nunú tama Rey Herodesak wake besekui, nuniayatak ipaamu aidaush antuinamunum yapajimainchaun anagkuau asa, susatnume tiuwai.
MAT 14:10 Dutika inamjauwai Juan cárcel puja nuna buuken tsupiktinme tusa.
MAT 14:11 Timatai Juagkan buuken platonum egkejag itaantajui, dutika nuwauchin susajui. Ni juki dukujin susauwai.
MAT 14:12 Dutikawagmatai Juagkan jintintaiji aidau kautuawag iyashin jukiag ukusag ukuinak, Jesusan wejiag ujakajui.
MAT 14:13 Jesús nuna antuk, nuiya jiinki barcanum egkemag uwejush agkantunum nigki pujustatus weuwai; nuniai aents aidaushkam dekaawag, yaaktanmaya juakiag kukag shimutkajui.
MAT 14:14 Nuniai Jesús barcanmaya jinkamá, kuashat aents tuwaká ijunun wainak, wait anenjauwai, nunik jau aidau ikaunmamunash etsagakui.
MAT 14:15 Nuniai kiyau asamtai, niina jintintaiji aidau jegaantag: —Juig aents atsamunum batsatji, etsash akaewai. Aentsuk akatjam ishiakta, yaakat yaijuch aina nui wegag dita yuwatnun sumaktinme, tuidau.
MAT 14:16 Tutai Jesús ayaak: —Wemain ainatsui, atum dita yuwatnuk susatajum, tau.
MAT 14:17 Tama dita aiinak: —Atsugtamui ayatak cinco pag nuigtú jimag namak ajutjamui.
MAT 14:18 Tiagtai Jesús: —Jui itagtuatajum, tiuwai.
MAT 14:19 Tusa aents aidaunak chijichi aina nui batsamsatnume tiuwai. Tusa cinco pagkan nuigtú jimag namaka nuna juki, nayaimpinum pagkai see tusa, pag aidaun puujá ni jintintaiji aidaun tinabiu; dutikam dita aents aidaun tinabiajui.
MAT 14:20 Tuja ashí yuwawagmatai, ampinkaun yajuakag doce chagkinnum aimjajui.
MAT 14:21 Nui yuawaju aina duka cinco mil aishmag tumain aajakajui; nuwa aidau, uchi aidaush dekapatsuk.
MAT 14:22 Nuna dutika, Jesusak ni jintintaiji aidaunak barcanum egkemjag ditá eemak kuchá amain katigtinme tusa ishimak, nigka aents aidaun akateg ukuktatus juwakui.
MAT 14:23 Nunik aents aidaun akateg ukuak, mujanum kanakí wakauwai Apajuin aujsatatus. Nunik kiyagmataishkam nuig nigki pujau,
MAT 14:24 nuniai barcashkam atushat nugkan ukukí wegai, dase igku umpuau, dutikamu asa yumi tajeamujiya nu barcanak senchi pegau.
MAT 14:25 Imaniai tsawagtatak weamunum, Jesús yumí awanken wekaegas ditan adijkauwai.
MAT 14:26 Nunik yumí awanken wekaegas minittaman jintintaiji aidau wainkag, puyatkag: —¡Pasun, pasun! tusag untsumaidau sapigmaidau asag.
MAT 14:27 Imatiagtai Jesús chichaak: —¡Witjai, ishamkaigpajum! ¡Imatigpajum! tau.
MAT 14:28 Tutai Pedro ayaak: —Apuh, dekas ametkumek minash, yuminum wekaesam tantata tujutia, tau.
MAT 14:29 Tutai: —Minitá, tiuwai Jesuschakam. Tama Pedroshkam barcanmaya jiinki, yumí awanken wekaegas Jesús wajamunum jegantatus wegau.
MAT 14:30 Tujash dase senchi dasentun wainak ishamkau, nunik yuminum tepeak: —¡Apuh, achigkata! tau.
MAT 14:31 Taig Jesuschakam uwegnum achikú, dutika: —¡Aents imanis dekaskeapi tuchauwah! ¿Wagka utujimkaume?, tiuwai.
MAT 14:32 Tusa barcanum egkemjagmatai, daseg mijakui.
MAT 14:33 Nunikmatai ashí barcanum chimpijuk Jesusan jegaantag emematuinak: —¡Amek dekaskenum Apajuin Uchijiyaitme!, tiajui.
MAT 14:34 Nuna nunikag katigkag Genesaret nugkanum jegawajui.
MAT 14:35 Nunikmatai nuiya aents aidau Jesusa wainkajui, nunikag ashí nu nugkanmag etsegkajui, dutikawagmatai ashí jau aidaunak niina ikautuidau;
MAT 14:36 dutikawajam ni jaanchji weninakesh antigtajai, idaikagtusta tusag segaidau, tuja ashí aents antigkaju aidauk tsagagkajui.
MAT 15:1 Ujumak fariseo aidau nuigtú maestro chicham umiktinun jintinkagtin aidaujai Jerusalegnumia kaunawag Jesusan jegaantag iniinak:
MAT 15:2 —¿Wagka amina jintintaijum aidaush iina muunji umiktajum tibauwa nuna umitskesh ikigmatskesh yuinawa? tuidau.
MAT 15:3 Tiagtai Jesús ayaak: —¿Wagka tujash atumesh atumi muunjum umiktajum tibauwa nu umiakjumesh, Apajuí umiktajum tibauwa dusha umiatsjume?
MAT 15:4 Wagki Apajuí: “Amina apa, dukujai eme anentsam diistá, tuja apajin, dukujinakesh pegkegchaun chichajuk tsagkugtsuk maatajum”, tiuwai.
MAT 15:5 Tujash atumek: Makichik aentsuk apajin, nuniachkush dukujinakesh: “Wika yaimaitsugme, wagki ashí ajutuina junak, Apajuin ofrendan susajai”, tumainai tajume,
MAT 15:6 nuniau asag, apajinak dukujinash yaimaitsui tajume. Aaja tau asajum atumek, atumi muunjumi umitaijiya nu umiakjum Apajuí umiktajum tibauwa duka imanchauch awajsaugme.
MAT 15:7 ¡Tsanumin aidauwah! profeta Isaías atumin pachipasag shiig tiuwai:
MAT 15:8 “Ju aents aina juka weninig eme anenjuinawai; tujash anentainig atushat minaig ainawai.
MAT 15:9 Mina emematjuina duka wainkayai; jintinkagtuina nunak, aents tibauwa nuna jintinkagtuinawai”.
MAT 15:10 Nuna tii, Jesús aents aidaun untsuká: —Antuktajum, nuniakjum dekaatajum, tiuwai.
MAT 15:11 Wenunum wayá duka aentsnak pegkegchauk ematsui; untsu wenunmaya jiina nuwai aentsun pegkegchau ema duka.
MAT 15:12 Timatai ni jintintaiji aidau Jesusan jegaantag iniinak: —¿Amesh wainkamkum fariseo aidau ame tame nuna antukag kajekagma dusha?, tuidau.
MAT 15:13 Tama ni ayaak: —Ashí ajak mina Apag nayaimpinum puja nu ajachbau aidauk, kagkapejai tegam agtinai.
MAT 15:14 Idaisatajum, ditak wainmainatsui, nuninaitak tikich wainmachu aidaun jintan inaktustatus wajukmaina nuninawai. Wainmachua nunú tikich wainmachun jintan inaktustatus weakug mai waanum iyaumainai.
MAT 15:15 Tutai Pedro Jesusan: —Ame augmatbau pachisa timaum nu ujajatkata, tau.
MAT 15:16 Tutai Jesús ayaak: —¿Atumesh duka dekamainchauk dekapeajum?
MAT 15:17 ¿Dekatsjumek ashí wenunum wayauk ampugnum nagkaemaki, atsumamunum wegam letrinanum ajapna duka?
MAT 15:18 Tujash wenunum jiina duka anentainmaya jiinui; nuniau asa aentsnash pegkegchau emawai.
MAT 15:19 Anentainmaya jiinui pegkegchau anentaibau aidau, magkagtamu aidau, tsanijinat, ashí pegkegchau iyashnum takanit, kasamat aidau, dekaskechu aig tsanumjut aidau, pegkegchau chichagkagtut aina nu.
MAT 15:20 Ju aina juuwai aentsun pegkegchau ema duka, tujash ikigmagjum yuwatajum timawa nunú, ikigmatsuk yuwamuk aentsnak pegkegchauk ematsui.
MAT 15:21 Jesús nuiya jiinki Tiro nugkanum, Sidón nugkanmash weuwai.
MAT 15:22 Nui jegattaman canaagnumia nuwa Jesusan untsukmaikia minis: —¡Apuh, Davita uchijiyah, minash wait anenjugta! ¡Mina nawanjun wakan pegkegchau egkemtug senchi waitkagta nu!, tau.
MAT 15:23 Tamash Jesusak machikish aikchauwai. Nunitai ni jintintaiji aidau jegaantag: —Iina ukujin minis untsú untsumkawa minajama, wakitkita tikia, tuidau.
MAT 15:24 Tama Jesús: —Apajuik minak Israel aents megkaejau aina nuig awetiuwai.
MAT 15:25 Tujash nuwak Jesusa eemtin tikishmatug pujus: —Apuh, yainkata, tau.
MAT 15:26 Tutai Jesús ayaak: —Uchijui aidau pag atankí yawá suwamuk pegkegchauwai, tau.
MAT 15:27 Tutai nuwa ayaak: —Apuh dekaske; tujash yawashkam mesanmayan apají tsaisá akakeamun yuwamajamah, tau.
MAT 15:28 Tutai Jesús chichajak: —Nawantah, dekaskeapi tabaujum shiig muun ajutjamui, ame wakegam duka nunisag uminkati, tiuwai. Nuna taig wamkes niina nawanjishkam tsagajui.
MAT 15:29 Jesús nuiya jiinki Galilea kuchajin tikiju jegauwai; nunik nainnum waka ekeemsauwai.
MAT 15:30 Nunikmatai kuashat aents aidau ni eketbaunum tuwakaju; nuninak shutú aidaun, wainmachu aidaun, manchantuku aidaun, chichachu aidaun, nuigtú kuashat jau aidaunashkam ni eketbaunum ikautuidau. Nunikmatai Jesuschakam etsagakui.
MAT 15:31 Nuna Dutikamtai aents aidauk anentai jegagchaju chichachu aidaush chichaidau, manchantuku aidaush pegkeg wedau, shutú aidaushkam wekagaidau, wainmachu aidaushkam wainmaidaun wainaidau asag. Nuninak Israela Apajuijiya nuna emematuidau.
MAT 15:32 Nunikagmatai Jesús ni jintintaiji aidaun untsuká chichajak: —Aents aina juna wait anentuinajai, wagki kampatum tsawan jui wijai batsatainawai; tujash yumainjig atsujuinawai. Yujumkan ayugtsukek ditá jeenig ishimaitsujai, wagki jintá wekamag jaka iyaantainum tau asan, tau.
MAT 15:33 Tutai ni jintintaiji aidau: —¿Tuwiya jukiya yumainush sumainaita, aents atsamunum pujag juniautish?, tuidau.
MAT 15:34 Tiagtai Jesús ditan iniak: —¿Wajupa pagka ajutjamainawa?, tau. Tutai dita aiinak: —Siete pag nuigtú wajumchik namak ajutjamui, tiajui.
MAT 15:35 Tiagmatai Jesús aents aidaunak nugká batsamsatajum tusa
MAT 15:36 siete pag aina nuna juki nuigtú namak aina nunashkam juki Apajuin see tii, puujá jintintaiji aina nuna susajui, dutikam dita aents aidaun tinamkajui.
MAT 15:37 Dutikawajam ashí shiig yuwawajui, nuigtushkam ampinjau aidaun siete chagkinnum aimjajui.
MAT 15:38 Nui yuawajuk cuatro mil aishmag aajakajui; nuwa aidau, uchi aidaush dekapatsuk.
MAT 15:39 Juna dutika Jesús aents aidaun akateg ukuak, barcanum egkemag Magdala nugkanum weuwai.
MAT 16:1 Fariseo aidau, saduceo aidaujai pegkegchau anentaiyai dekapsagtatus Jesusan jegaantajui, nunikag nayaimpinmaya wainchatain iwainakti tusag segaidau.
MAT 16:2 Tiagtai ni ayaak: “Atumek agkuantai: Pegkeg tsawan atatui, nayaim kapantu wajasé”, tinu ainagme;
MAT 16:3 untsu kashikmasjum: “Yamai tsawanta juik senchi dasenkattawai, wagki nayaim kapantu wajas yujagkim suwe wajasé”, tajume. Atum nayaimpi niimé diisjum nuniktatui tinu ainayatkugmesh, ¿wajuk asagmea tsawan aina nui wantinkagtin aina dusha dekamainchaush dekapeagme?
MAT 16:4 Jujú aents pegkegchau aidau Apajuí chichamenash umigchau aina nu, wainchatai iwainakta tusag segatuinawai. Tujash dita tuina nunak nuigtuk iwaintukchattajai, ayatak Jonás wajukauwa nunisnuk ditanak iwaintuktatjai, tusa ukuak weuwai.
MAT 16:5 Jesusa jintintaiji aidau kuchá amain weenak pagkan kajimatki jutsuk katigkajui.
MAT 16:6 Nunikbaunum Jesús ditan chichajak: —Nijah, fariseo aidau nuigtú saduceo levaduraji aina nujai kuitamamkatajum, tau.
MAT 16:7 Tutai niina jintintaiji aidau pempeentunikiag: —Junak ii pag takukchag dui tujamji,
MAT 16:8 tusa tuinamun Jesús antuk: —Aents imanis dekaskeapi tuchau aidauwah, ¿wagka pagkak atsugtamji tajume?
MAT 16:9 ¿Eke dekamainchauk dekapeajum nuigtush aneaktsugmek, wi cinco pagka nuiyan cinco mil aents tinamkam yuinak ampijagmataish, wajupa chagkina aimjabiugme duka?
MAT 16:10 ¿Nuigtush aneaktsugmek, wi siete pagka nuiyan cuatro mil aents tinamkam yuinak ampijagmataish, wajupa chagkina aimjabiugme dusha?
MAT 16:11 ¿Wagka antumainchaush dekapeagme, wi kuitamamkatajum fariseo, saduceo levadurajiya nujai taja nunak pagkan pachisan tatsug duka? tiuwai.
MAT 16:12 Timatai dekawajui, Jesusak levadura pag najanatasa pachimtaiya nuna tatsuapita; fariseo, saduceo jintinkagtutaiji aidaunap tawa tusag.
MAT 16:13 Jesús nugka Cesarea, Filipo yaaktamamua nui jegaatatus wesa, ni jintintaiji aidaun iniak: —¿Aents aidaush Aentsmaga akiinauwa nunash yayai tuinawa?, tau.
MAT 16:14 Tutai dita aiinak: —Ujumak aents aidau: “Juan Yamijatnai”, tuinai; tikich chichaidau: “Auk Eliasai”, taush ainawai. Nuniai tikich tuidau: “Jeremiasai nuniachkush profeta aajakú aina nuiyaskaitai” tuinawai, tuidau.
MAT 16:15 Tiagtai ditan iniak: —¿Tujash atumesh minash yayai tujutjume?, tau.
MAT 16:16 Tutai Simón Pedro ayaak: —Amek Cristo, Apajuí tuke pujuuwa nuna Uchijiyaitme, tiuwai.
MAT 16:17 Tutai Jesús ayaak: —Simón, Jonasa uchijiyah amek shiig aneasta, aminak aents nejentin numpenna nuninkesh tujamchae, mina Apag nayaimpinum puja nunú dekamtijamae.
MAT 16:18 Wishakam amina tajame, yamaik amek Pedro atatme. Jujú kaya muunta jui ekenin mina iglesiagnak jegamkattajai, nunak jaamua dukesh depetkashtinai;
MAT 16:19 amina idaitustatjame Apajuí inama nuna llave ujatiama numamtuk awajkati tusan; dutikamu asam ame ju nugka jui chicham etsegbaun dekaskeapi tachauk nayaimpinmag tsagkugnagchatnai. Untsu ame chicham etsegbaun dekaskeapi tauk aantsag nayaimpinmashkam tsagkugnagtinai, —tiuwai.
MAT 16:20 Nuna tusa ni jintintaiji aidaun, makichkish tikich aidauk, nigka Cristuwai tusagmek tiigpajum, tiuwai.
MAT 16:21 Nui nagkamas Jesús ni jintintaiji aidau ujatan nagkabau, ni Jerusalén jegamtai apu aidau, sacerdote apuji aidau, maestro chicham umiktinun jintinkagtin aidaujai waitkasa maam, kampatum tsawanta jui nantaktina nuna pachis.
MAT 16:22 Tutai Pedro akanak juki kakaakan chichajak: —Apuh, Apajuí wakechataik, duka nuninuk makichkish nagkaetamaitsui, tau.
MAT 16:23 Tujash Jesús Pedron ayampatua chichajak: —¡Wetá Iwanchih, ukugkita! Ame utugchat aputugme, amek dekatsme Apajuí dutikatjai tabaujiya duka, nuadui nuna umikai tusam tujutme, aentsú anentaimtaig anentaimam duwi, tiuwai.
MAT 16:24 Nuna tii Jesús ni jintintaiji aidaun: —Makichik aentskesh mina jintintaig atatus wakegauk, niinunak idaiyak, waitiakush nemagtukti.
MAT 16:25 Wagki aents ju nugka jui pujutan imá senchi wakegak, mina nemagtuk waittan dakitauk uwemjashtin ainawai. Tujash mina nemagtak niina pujutinash puyatjukchauk, uwemjatnai.
MAT 16:26 ¿Wajinma yaimainaita aentsnash ashí nugka juiyan niinu emakush, wakanin megkaemaina nuish? ¿Nuniachkush wajupa wakaninash akikmatmainaita?
MAT 16:27 Wagki Aentsmaga akiinauwa duka, ni Apají imanjiya nujai nuigtú niina angelji aidaujai minitnai, nuniak makí makichik aents takasbaujiya dutiksag akiktinai.
MAT 16:28 Dekas tajime Atum jui ijunjum juiyatijum ujumak aidautijum eke jatsuk, Aentsmaga akiinauwa nu inamjatatus minau wainkatnutigmesh ajume, tiuwai.
MAT 17:1 Seis tsawan asa Jesús, Pedron, Jacobo niina yachi Juagkan aatus juki muja yakí tsakajunum weajui.
MAT 17:2 Nuwi ditash wainainaig Jesusa niimé yapajinauwai; nunik yapig etsajai betek etsantu, niina jaanchjishkam shiig puju tsaaptin wajasui.
MAT 17:3 Nuniai Moisés Eliasjai Jesusan aujuinak ijuntatman wainkajui.
MAT 17:4 Nunik Pedro Jesusan chichajak: —Apuh, ¡jutiish maigkis jui batsatagtai!, amesh wakegakminig kampatum aak umikagmi, makichik aminu, tikich Moisesdau, nuigtú Eliasdau, tau.
MAT 17:5 Nuna aatus Pedro chichai, yujagkim winchamtin ashí ditajai ijumag ijikui; nuniai yujagminmaya chichaak: “Juuwai mina uchig anetaijuk, wi etegkamu. Nigki antugkatajum”, tiuwai.
MAT 17:6 Nu tabaun antukag, niina jintintaiji aidau senchi ishamkag tikishmajag tsuntsumawaju.
MAT 17:7 Nunikagmatai Jesús ditan tajuntun antiak: —Nantaktajum; ishamkaigpajum, tau.
MAT 17:8 Tama diistakamá imá Jesusak wajattaman wainkajui.
MAT 17:9 Nunik Jesús mujanmaya minisá: —Atum wainkaujum nu pachisjumek makichik aentskesh ujakaigpajum, Aentsmaga akiinauwa nu jakau aina nuiya nantatsaigkik, tiu.
MAT 17:10 Nuna timatai, ni jintintaiji aidau inidau: —¿Wagka maestro chicham umiktinun jintinkagtin aidaush, dekatkauk Eliasá taatnai tuinawa?
MAT 17:11 Tusa iniam Jesús ayaak: —Duka dekaske, Elías niiyá eemak taa tikich takastinun umiktinai tibauwa duka.
MAT 17:12 Tujash wi tajime, Eliasak taabi, nunikunak ditak dekachaju ainawai, nuninak ashí dita wakegaina dutiksag niinak inagkeatkiagmayi. Nunisag Aentsmaga akiinauwa dushakam dita waitkam atatui, tiuwai.
MAT 17:13 Nuna tutai ni jintintaiji aidaushkam dekaawajui, Jesusak Juan Yamijatnunap pachis tawa tusag.
MAT 17:14 Aents tuwakbaunum jegamtai, makichik aents Jesusa tajuntun tikishmatug chichajak:
MAT 17:15 —Apuh, mina uchijush wait anenjutjata, nantu nantutin jauwe nuniak senchi waitnuwe, imaaniak kuashtá jiinum patamnuwe nuniak namakash iyainuwe;
MAT 17:16 imaniakui jintintaijum aidaun itaantamjai; tujash etsagagchagmae, tau.
MAT 17:17 Tutai Jesús ayaak: —¡Aents dekaskeapi tuchau pegkegchau aidauwah! ¿Wajupá dukapea atumjaish pujumainaitja? ¿Wajupak katsunjatjime? Jui uchi itantá, tiuwai.
MAT 17:18 Tusa Jesús iwanchin jiyaká uchinmayan jiikiuwai, dutikamuik uchishkam pegkeg wajasui.
MAT 17:19 Nuna dutikamtai ajuma dui jintintaiji aidau Jesusan niinak akanki iniinak: —¿Wagka jutiish wakan pegkegchau jiiktakamaish tujinkamji?, tuidau.
MAT 17:20 Tiagtai Jesús chichaak: —Atumnak dekaskeapi tabauk imaanis atsugtamainawai. Dekas tajime, dekaskeapi tabaujum mostaza jigkayiya nuninkesh ajutjamainakuig, ju muja jujú chichagkujum: “Juig atsuk tikich yantamnum wetá”, tamak nunisag nagkaemamainai. Makichkish tujinmainuk atsugtamainaitjume.
MAT 17:21 Tujash jujú wakanik ayuno takaaku, Apajuí aujku jiimainai, tiuwai.
MAT 17:22 Galilea weenak ijunja shimamunum Jesús jintintaiji aidaun chichajak: —Aentsmaga akiinauwa nunak, aents aidaunum sujukagtatui,
MAT 17:23 dutikawagmatai maawagtatui; tujash kampatum tsawanta jui nantaktatui, tau. Tutai ditashkam senchi wake besekajui.
MAT 17:24 Nunik Jesús ni jintintai aidaujai yaakat Capernaúm jegawagmatai, jega Apajuí ememattainum kuichik itaamun yajumin aidau Pedron jegaantag iniinak: —¿Amina jintinjamnuk jega Apajuí ememattainum kuichik itaata tibauwa nunak akikmakchattawak?, tuidau.
MAT 17:25 Tama Pedro ayaak: —Ehé akikmaktatui, tusa ukuak jegá wayamtai. Jesús niiyá iniak: —¿Simogka amesh wajuk anentaimtame? ¿Ju nugka juiya Rey aidaush yaá aents aidauna akikmakta tuinawa? ¿Ditá uchijish akikmainawak atsa tikich aents aidaunak akikmakta tuina?, tau.
MAT 17:26 Tutai Pedro ayaak: —Ikaya aina nuna akikmakta tuinawai, tau. Tutai Jesús ayaak: —Dekaske, ditá uchijig akikmainatsui;
MAT 17:27 tujash nunin aig dita shiig juwakchainum tau asá kuchanum weme agsea ajugtá, dutikam dekatkau namak ajuittam nuna weni iwanjam diistá. Nui kuichik egkemtatui. Nunú kuichik jukim jega Apajuí ememattainum weme, midau aminujai akikmakta, tiuwai.
MAT 18:1 Nunú tsawantinig ni jintintaiji aidau Jesusa jegaantag: ¿Apajuí inama nuish yaita dekas iman wagaakush? tusag inidau.
MAT 18:2 Tiagtai Jesús makichik uchin untsuká itan ditá ejapen awajus,
MAT 18:3 chichaak: Dekas tajime, atum yapajinajum uchi aina numamtin wegachkugmek, Apajuí inama nuig waimain ainatsjume.
MAT 18:4 Nunin asamtai makichkikesh imanchauch anenmamak jujú uchia junin weena nuuwai Apajuí inama nui iman wagaakua duka.
MAT 18:5 Makichkikesh ju uchia juninun mina daajui juidauk, mina jujuinawai.
MAT 18:6 “Makichkikesh jujú piipich aina juiya mina dekaskeapi tujutuina nuna tudaun takamtikaidauk, dekas kaya muun juki kuntugnum jigká detua nayantsa kunajin ajugká ajapmainus ajapachbau ainatai.
MAT 18:7 ¡Wait anentuinajai aents aidaunak, tsanumin aidau midiagtin asagmatai! Duka uwemtumainchau atinai; tujash ¡wait anentuinajai ya aents aidaun tudaun takamtikiagtatua nunak!
MAT 18:8 “Nuadui amina uwejum nuniachkush amina dawem tudaunum ajumpamain awajtamkuig tsupika ajapata; pegkejai uwejí muntuch wajasá nuniachkush shutusá pujutnum wayamuk, jimag uwegtin jimag nawentin jii tuke kajinchauwa nui ajapeam amaina nu.
MAT 18:9 Tuja amina jiim tudaunum ajumpamain awajtamkuish, ukuinkam ajapata; pegkejai makichik jiintin pujutnum wayamuk, jimag jiintin jii waitiaku pujutaiya nui ajapeam amaina nu.
MAT 18:10 “Nijah, imanchauch diisaigpajum ju piipich aina jujú, wagki ángel aidau ditan kuitamin aina duka nayaimpinmag mina Apag nayaim puja nunak tuke wainainawai.
MAT 18:11 Wagki Aentsmaga akiinauwa duka, megkaekauwa nuna uwemtikatatus tauwai.
MAT 18:12 “¿Wajuk anentaimjume? Aents cien uwig ajamu makichik wagak megkaetukam, noventa y nueve uwija nunak muja aidaunum batsaak, ¿megkaekauwa nuna egaak wemainchaukaih?
MAT 18:13 Nunik wainkag, dekaskenmag nuna imá shiig anenmainai, noventa y nueve megkaekachu aina nuna nagkaegas.
MAT 18:14 Nunisag atumi Apa nayaimpinum puja dushakam, jujú piipich aina juiya makichkish megkaekatnume tusag wakegatsui.
MAT 18:15 “Amina yatsum tudaun takagtamkuig, imá nigki ausata, dutikakum ni dewakbaujish dekamtikata. Ame tama antugtamkuig, duka yatsum yaigkume.
MAT 18:16 Untsu antugtamchakuig, makichik aentskesh nuniachkumesh jimagkesh jukim wetá, jimag nuniachkush kampatumkesh antuinamunum ashí chichamua duka dekaamu atí.
MAT 18:17 Ditanash antugchakuig, iglesia ujaktá; iglesianash antugchakuig, aents Apajuí anentaimtuchu nuigtú apú kuichkiji atinun ijumin aidau aentsú tsanug yajutin aina nuninuk emá idaisatajum.
MAT 18:18 Dekas tajime, atum ju nugka jui aaja yayachmak nayaimpinmashkam tsagkugnagchatnai. Untsu atum ju nugka jui tsagkujamuk, nayaimpinmashkam aantsag tsagkugnagtinai.
MAT 18:19 Ataktushkam awentsanuk tajime, ju nugka jui jimagtigmekesh atuekajum, ashí wají pachisjum segamak mina Apag nayaimpinum puja nu amastatjume.
MAT 18:20 Wagki tuwí jimag nuniachkush kampatumkesh mina daajui ijunag pujuinawa, nuwi wika ditajai pujajai”.
MAT 18:21 Nuna tutai Pedro Jesusan jegantun iniak: —Apuh, ¿wajupa imania tsagkugmainaitja mina yatsug tudaun takagtakuish? ¿Sieteya imania tsagkugmainkaitag?
MAT 18:22 Tama Jesús ayaak: —Sieteya duke tsagkujata tatsujame, tuke tsagkugsamké ata tajai, tiuwai.
MAT 18:23 “Nuadui Apajuí nayaimpinum inama duka, rey niina takajin diwibau asa, akikmakti tiuwa nujai betekmamtinai.
MAT 18:24 Dutika nagkamak, aents diez mil kuichkin diwimkagtaun juki ejetuawajui.
MAT 18:25 Tuja nunú akikmamainji atsuju asamtai, apu inamjauwai nuwesh, uchijí aidaush nuigtú ashí wajiiji aina dushakam sujunkati, dutika diwijig akikmakbau atí tusa.
MAT 18:26 Tutai apú takagnushkam tikishmag segak: Apuh, wait aneasam dakagsata, amina diwimjam nunak ashí akiktatjame, tau.
MAT 18:27 Tama apushkam niina inaken wait anenmain diisá, diwijinak tsagkujauwai dutika agkan idaisauwai.
MAT 18:28 Tujash nunú apú inake jiinki wekamá, niijai takataiji cien denario diwimun igkugku, nunik suwenum ininá awajus: ‘Diwimjam nunú yamaik akigkata’, tusa segau.
MAT 18:29 Imatikam niijai takauwa dushakam tikishmatug segak: ‘Wait aneasam dakagsata, amina diwimjam nunak ashí akiktatjame’, tau.
MAT 18:30 Tamash antugtsuk, achiká egkeauwai, nui pujus diwin akikmakti tusa.
MAT 18:31 Nunú dutikamun tikich ditajai takatai aina nu wainkag shiig wake besemag diisajui, nunikag apun jegajiag ashí dita wainkamunak imatiksag ujakajui.
MAT 18:32 Dutikam apushkam itatnume tusa inamjauwai, nunik: ‘¡Inak pegkegchauwah! ame segatu asamin ashí mina diwimjam nunak tsagkujamjame.
MAT 18:33 Dutikamu asam ameshkam, amijai takau diwimjama duka wait anenmain awajkaume, wi amina wait anenjamjam dutiksamek’.
MAT 18:34 Tusa apu senchi kajeká achijatin aidaun inajui suwimkan susatnume, dutikam ashí niina diwijinak akikmakti tusa”.
MAT 18:35 Dutiksag mina Apag nayaimpinum puja dushakam atumi yatsum dekas anentaiyai tsagkugchataik dutijamawagtinai, tiuwai.
MAT 19:1 Jesús nuna tusa ashimak, Galilean ukuak Judea nugkanum jegaa Jordagka amain katigkui.
MAT 19:2 Nunikmatai kuashat aents aidau pataetukaju, dutikam nui jau aidaunash kuashat etsagakui.
MAT 19:3 Nuniai ujumak fariseo aidau Jesusan jegaantaju, nunikag pegkegchau anentaiyai iniinak: —¿Nuwennush utugchat atsaish nuwenash idaimainkaih?, tuidau.
MAT 19:4 Tama Jesús ayaak: —¿Atumek ausachukaitjum Agagbaunum, Apajuí yama nagkamchakug aishmagkun nuwajai najanauwai,
MAT 19:5 dutika chichajak: “Aishmag nuwenkug apajin, dukujin ukuak niina nuwejaig ijunmainai, nuniak nuwejai makichik iyash wegawai” tawa duka?
MAT 19:6 Nunin asag jimagchauwai, makichik iyash weawai. Nuadui aatus Apajuí dutikamua nunak aentsuk datupaumainchau ainawai, tiuwai.
MAT 19:7 Tutai dita iniinak: —¿Wagka tujash Moisesash papí nuwa idaiku najantain umiká nuwá susa idaisati tiuwaita?
MAT 19:8 Tiagtai Jesús ayaak: —Nunak atum antumtikmainchau ainajum dui, Moisesak nuwemik idaimainaitjume tujabiajui, tujash nagkamtinig Apajuik nunak tichauwai.
MAT 19:9 Wi tajime, makichkikesh nuwe tsanijinachu aig tikichjai nuwenkug ekagmawai, nunisag nuwa idaisamujai nuwenushkam ekagmawai, tiuwai.
MAT 19:10 Tutai ni jintintaiji aidau: —Aatus aishmag nuwejai nunimainaitkuig, nuwenmaitsujama, tuidau.
MAT 19:11 Tiagtai ni ayaak: —Nunak ashí aentsuk nunimain ainatsui, ya nunin atí tibauwaita duke nunimain ainawai.
MAT 19:12 Awai aents tuke nuwenmainchau akiinau aidaush; nuniai tikichik aents kagamtikamush ainawai, tuja aents nigki Apajuí inama nuna etsegtin atajai tabaunum nuwenmainchaush ainawai. Ni nunimain dekapmamuk; nunikti, tiuwai.
MAT 19:13 Ujumak uchi aidaun Jesusan ikautuawajui achiká Apajuin aujtusti tusag; dutikiagtai ni jintintaiji aidau uchin ikaunmaina nuna jiyaidau.
MAT 19:14 Nudiagtai Jesús chichaak: —Idaisatajum uchi aidauk minai minitnume, utujiakaigpajum, wagki Apajuí inama duka jujú uchi aina junin aina nudauwai, tiuwai.
MAT 19:15 Nuna tusa uchi aidaun makí makichik buuknum uwejin achiká pegkegnum yumigkis ukuak weuwai.
MAT 19:16 Makichik aents Jesusan jegantun iniak: —Maestroh, ¿wají pegkegna takamainaitja pujut nagkanchaun jukitasanush?, tau.
MAT 19:17 Tutai Jesús ayaak: —¿Wagka pegkeg pachismesh ininme? Imá makichki pegkeja duka. Tujash ame pujutnum wayatasam wakegakmek, chicham umiktina nu umiktá, tau.
MAT 19:18 Tama ni ayaak: —¿Tu ainawa?, tau. Tutai Jesús ayaak: —Magkagtuawaipa, tsanijinawaipa, kasamkaipa, wainkamek tsanumkagtujaipa,
MAT 19:19 amina apa dukujai eme anentsam diistá, nuniakum tikich aidaush amek anenmamsam aneeta, tiu.
MAT 19:20 Tama datsauch ayaak: —Wika nunak datsauch asanuk ashí umikuitjai. ¿Nuigtush wajina dutikmainaitja?, tau.
MAT 19:21 Tutai Jesús ayaak: —Ame pegkeg atasam wakegakmek, weme amina wajiijum ajutjamaina duka sujukam, ujunauch aina nu susata, dutikam nayaimpinum wajiigmik ajutjamtatui; nunika taam mina nemagtukta, tiuwai.
MAT 19:22 Nu tama datsauchik wake beseká weuwai, wagki shiig wiyakuch asa.
MAT 19:23 Nunikmatai Jesús jintintaiji aidaun chichajak: —Dekas tajime, wiyakuch aidauk kakajus Apajuí inama nuig wayashtin ainawai.
MAT 19:24 Awentsanuk tajime: Camellok aujá jiinish waigkag yupichu nagkaemamainai, tujash wiyakuch Apajuí inamtaijin wayata tabauk utugchatai.
MAT 19:25 Nu tabaun jintintaiji aidau antukag shiig anentai jegagchag: —¿Yaki tujash uwemjaush amainaita? tudayinau.
MAT 19:26 Tiagtai Jesús ditan diis chichajak: —Aents diismak dutikmaitsui, tujash Apajuik ashí dutikmainai, tiuwai.
MAT 19:27 Tutai Pedro ayaak: —Nijah, jutii ashí iina ajutjamaina duka ukuinaku ame nemagkabiajim nuutish, ¿wajig jukitnaitji?, tau.
MAT 19:28 Tutai Jesús ayaak: —Dekas tajime, ashí najankamu aidau yamagmitkamu jegatna nunú tsawantin, Aentsmaga akiinauwa nu ni ekeemsa inamtaiji imana nui ekeemsamtai, atum mina nemagtuku aidautigmek doce ekeemtainum ekeemsajum, Israelan uchijí doce aajakajua nunú weantu inagtin ainagme.
MAT 19:29 Tuja ashí aents mina nemagtuinak jeen, yachi aidaun, umayí aidaun, apajin, dukujin, nuwen, uchijí aidaun, nugke aidaun ukukiaju aidauk, dita ukukbaujin nagkaesau ciegka imaania jukiagtin ainawai, nuigtushkam pujut tuke atina nunash jukiagtinai.
MAT 19:30 Tujash kuashat aents dekatkau atatus wakegaina nu ukunum juwakagtinai. Untsu iman atan anentaimtumachu aina nu dekatkauk agtinai.
MAT 20:1 “Apajuí inama duka, uva ajagtin, shiig kashikmas ajajin takastin aidaun aentsun egaak jiinkiuwa nujai betekmamtinai.
MAT 20:2 Nunik takastin aina nuna igkug, makichik tsawan takagtustajum akiktajime tusa chichasá, uva ajakbaunum ajajin ishiakui.
MAT 20:3 Nunik ataktú a las nueve tumain ai jiinkiuwai, nunikmá tikich aidaushkam plazanum wainak batsatun wainak,
MAT 20:4 chichajak: ‘Atumshakam mina ajajui uva ajakbauwa nui takaakjum wetajum, atumnashkam dutiksanuk betek akiktajime, tama ditashkam weajui’.
MAT 20:5 Dutika ataktushkam etsa tajiaju ai jiinkiuwai, nunik wakettsag a las tres wegaishkam jiinkiuwai, nunik nunashkam betek dutikauwai.
MAT 20:6 Nunik a las cinco jegattak wegai jiinki wekamá, tikich aidaushkam wainak ijuntatman wainkauwai, nunik iniak: ‘¿Wagka atumesh takatskesh etsash akapagme?’, tau.
MAT 20:7 Tama dita aiinak: ‘Iinak makichik aentskesh, takastá tusag egapainatsui’. Tiagtai: ‘Atumshakam mina ajag uva ajakbauwa nui takaakjum wetajum’, tiuwai.
MAT 20:8 Nunik kiyagmatai uva ajagtina nu, niina inake takatá diinun chichajak: ‘Ashí takau aidau untsuktá dutikam inagnamunum wayawagma nui nagkamsam, nagkamchak wayawagma imanui akigtá’, tiuwai.
MAT 20:9 Timatai a las cinco jegattak wegai wayau aidau kaunawag, makichik tsawantai takasbaunum akikmataiya dutiksag makí makichik aidau makichik denario jukiaju.
MAT 20:10 Dutikamtai yama nagkamchak wayau aidau jegaantag, jutiinak aan dukapeap akigmaktatji tusag anentaimaidau, tujash ditashkam dutiksag makí makichik, makichik denario jukiajui.
MAT 20:11 Nuna jukiag, ajagtina nu augmattan nagkamawaju,
MAT 20:12 nunikag chichajuinak: ‘¿Wagka jujú aidau inagnamunum wayawag makichik hora takasagma nuniaish jutiijai betekash akikume, dekas jutii kijin takainaku etsa sukumainakuish katsunja tsawan ashimag nuniajinish?’, tuidau.
MAT 20:13 Tiagtai ajagtina nu dita aina nuiyan makichik ayaak: ‘Kumpajuh, wika aminak makichik pegkegchaunakesh dutikatsjame, ¿wi yama nagkamchakun makichik denario akiktajame tama, ayú tichamkum?
MAT 20:14 Juuwai aminua duka, jukim wetá, inagnamunum waya nunash amina amaajam dutiksanuk susatasan wakegajai.
MAT 20:15 ¿Mina kuichkignak wi wakegamun dutikmainchaukaitag? ¿Wi pegkeg asan dutikag duiká ame tikich kajejakum tu wekaegam?’, tiuwai.
MAT 20:16 “Tujash kuashat aents dekatkau atatus wakegaina nu ukunum juwakagtinai. Untsu iman atan anentaimtumachu aina nu dekatkauk agtinai”.
MAT 20:17 Jesús Jerusalén wakatatus wesa jintaa jintintaiji doce aina nuna akanki chichajak:
MAT 20:18 —Yamai Jerusalén wakattaji, nunikmatai Aentsmaga akiinauwa nunak achikag sacerdote apuji, maestro chicham umiktinun jintinkagtin aidaunum sujukagtatui maatnume tusag,
MAT 20:19 dutikam dita jukiag judiochu aidaunum sujukagtatui; dushí dushikinakuag, asutiawag, achijag maatnume tusag; tujash kampatum tsawanta jui nantaktatui, tiu.
MAT 20:20 Zebedeo uchijí aina nuna dukují niina uchijí aidaujai ijunag, Jesusan jegantun niina eemtin tikishmaju, wait anenjugti tusa segatatus.
MAT 20:21 Nunitai Jesús iniak: —¿Wají wakegame?, tau. Tama nuwa ayaak: —Ame inamtaigmin mina uchig jimaja juna, makichik untsujin ekenak, tikichia junak menajin eketjusti tajame, tau.
MAT 20:22 Tutai Jesús ayaak: —Atumek dekatsjume mina segatjum duka. ¿Atumesh wi waittsattag imaanikjumesh waitmainuk ainajum? tau. Tama dita aiinak: Ehé, iishkam duka nunimainaitji, tuidau.
MAT 20:23 Tiagtai Jesús ditan chichajak: —Dekaskenum wi waittsattag nunisjumek waittsatin ainagme; tujash mina untsujui nuigtú mina menajui ekeemsatajum tusanuk wika tumaitsujai; nunak mina Apag ya aidau ekeemsatnuna umigkauwaita nuna dutikatnai, tiuwai.
MAT 20:24 Nu tabaun tikich diez jintintaiji aina nu antukag, mai yachijai kajegkajui.
MAT 20:25 Nuniagtai Jesús ditan untsuká chichajak: —Atumek dekagme, aents ju nugka juiya aentsun apuji aidauk, aentsnak ditanua nunin emak inainawai, tuja nunú apu aina nuna aentsji aidaushkam aentsnak, dita wakegamun inainawai.
MAT 20:26 Tujash atum ainajum anuiyag nuninuk amaitsui; dekas apu atatus wakegauk atum ainajum anuiyag, tikichi takajin amainai;
MAT 20:27 Atum ainajum anuiya dekatkau atatus wakegauk, atumi inakem wemainai.
MAT 20:28 Wagki Aentsmaga akiinauwa duka umigtuktinme tusag taachui, nigka tikich aidaun yaigtatus tauwai, nunik mantamnak kuashat aentsun uwemtikata tau asa.
MAT 20:29 Jericonmaya dita jiinki weagtai, kuashat aents Jesusan saetukajui.
MAT 20:30 Nuniamunum jimag aents wainmachu aidau jintá yantamen eketaidau, Jesús nagkaebaun antukag: —¡Apuh, Davita uchijiyah, jutiish wait anenkagtugta! tusag untsuidau.
MAT 20:31 Imatiagtai aents aidau itatkati tusag jiyaidau; tujash ditak nuní senchi untsumkag: —¡Apuh, Davita uchijiyah, jutiish wait anenkagtugta!, tuidau.
MAT 20:32 Imatjam Jesús nui wajan untsuk ikaunman iniak: —¿Utugtukti tusagmea wakegagme?, tau.
MAT 20:33 Tama dita aiinak: —Apuh, iik wainmaktasa wakegaji, tuidau.
MAT 20:34 Tiagtai Jesuschakam wait anentug ditá jiin antinkaju, dutikamuik wainmakag, ditashkam Jesusan nemagkaju.
MAT 21:1 Jerusalén tikiju wajasag Betfagé jegawaju Olivosan mujají awa nui, nunik Jesús ni jintintaijin jimajan awemauwai,
MAT 21:2 dutikak: —Wetajum au yaakat yaijuch awa awi, nunikjum wainkattagme makichik burra jigkam uchijijai wajau. Nunú atia jukijum itagtuatajum.
MAT 21:3 Nu dutikagmin makichik aentskesh wajinjutpatig, takuish: Apu atsumawai, wamak awagtugmaktatui, tusajum ukuktajum, tiuwai.
MAT 21:4 Jujú junikua duka profeta tibauwa nu uminkauwai, duka:
MAT 21:5 “Yaakat Jerusalén batsamin aina nu titajum: ‘Diistá amina Reyjum minitjamui, imanchauch wajasá, burronum ekemi, burro tsakat, kuntin kijin takamtiktaiya nuna uchijin’ ”, tawai.
MAT 21:6 Tiajam jintintaiji aidaushkam wegag Jesús tibaunak imatiksag umikaju.
MAT 21:7 Dutikawag burran uchijijai itantag, jaanchji aidaun tuntupen aitkagmatai, Jesús ekebiuwai.
MAT 21:8 Kuashat aents asag, jinta Jesús weamunum jaanchji aidaun aiinak emainai, tikich aidauk dukan tsupig jintá ainag emaidaush aidau.
MAT 21:9 Imatikainak aents eemak weedau, ukunum minidaushkam untsumkag: —¡Shiig anentsagmi Apu David weantunum akiinauwa nunú! ¡Apu Apajuí awemam miná duka pegkegmai! ¡Apajuishkam emematiagmi! wajaidau.
MAT 21:10 Nunik Jesús Jerusalén wayamtai ashí aents aidauk pampaidau, nuninak: —¿Jusha yaita? tusag inimaidau.
MAT 21:11 Tiagtai: —Juka profeta Jesusai, Nazaret, Galilea awa nuiyayai, tuidau.
MAT 21:12 Jesús jega Apajuí ememattainum wayau, nunik nui sujak batsatun sumau aidaujai ashí agaa jiijú, dutikak kuichki yapajiin aidau mesajinashkam shitaki akaketuk, paumá sujin aidau ekeemtaiji aidaunash dutiksag akaketkau;
MAT 21:13 dutika: —Agagbau awai: “Mina jegajuk, Apajuí aujku ijuntai tutai atinai” tawai; nuniaig atum kasá batsamtai emaugme, tiuwai.
MAT 21:14 Jega Apajuí ememattainum Jesusan jegajuawajui wainmachu aidau, shutú aidaujai; nunikmatai niishkam etsagakui.
MAT 21:15 Tujash Jesús anentai jegamainchau dutikamun sacerdote apuji aidau, maestro chicham umiktinun jintinkagtin aidaujai wainkag, uchi aidaushkam jega Apajuí ememattainum batsamas untsumainak: “¡Davita uchijí emematiagmi!”, awajuinamun antukag kajekag,
MAT 21:16 Jesusan chichajuinak: —¿Antamek jujú imataina dusha?, tuidau. Tiagtai Jesús ayaak: —Ehé, antajai; tujash ¿atumek tuke ausachuk ainajum: “Uchi tsakat aidau, muntsuaku aidaujai emematjitnume tusam umikume” tawa duka? tiuwai.
MAT 21:17 Nuna tusa yaaktan ukuak jiinki, Betania weuwai, nunik nui kanajui.
MAT 21:18 Kashikmas yaakat waketak, Jesús yapajuau.
MAT 21:19 Nuniak higuera jintá yantamchijin wajattaman wainak jegantau, tujash nejeg atsau ayatak dukak wajas atai, chichajak: —¡Amek tuke nejekchatnaitme! tamawaik higuerashkam kukajá wajasú.
MAT 21:20 Nunikun wainkag jintintaiji aidau puyatkajui, nunikag Jesusan iniinak: —¿Wajukaya higuerash tabauwaikish kukajé?, tuidau.
MAT 21:21 Tiagtai Jesús ayaak: —Dekas tajime, atum dekaskeapi tabau ajutjamkui utujibaush atsugtamkuig, imá higueran jutikag dukek dutikmainchau ainagme, ju muja jukesh: ¡Jui atsuk nayantsanum wajaata! tamak nunimainai.
MAT 21:22 Ashí atum Apajuí aujkujum, dekaskeapi tabauwai segakjumek, jukittagme, tiuwai.
MAT 21:23 Jesús jega Apajuí ememattainum wayá jintinkagtak wajai, sacerdote apuji aidau nuigtú judío apuji aidaujai tajuntag iniinak: —¿Aminash ya jintinkagtuata tusash awetamae? ¿Yana chichamenia jusha juniame?, tuidau.
MAT 21:24 Tama Jesús ayaak: —Wishakam makichik iniastajime, nunú aigkagmin wisha ya aikata tujutkuiya jutikaja nuna titajime.
MAT 21:25 ¿Juagnash ya yamijatjata tiuwaita, Apajuik awemauwait atsa aents aidauk awemauwait?, tau. Tama ditak pempeentunikiag chichainak: “Juagnak Apajuí awemauwai tajinish, ‘¿tujash wagka dekaskeapi tichau ainagme tujamtatajama?’
MAT 21:26 Tuja aents aidau awemauwai titag takuish, aents aidau ishamaji, Juagnak profetayai tuidau asagmatai”.
MAT 21:27 Nunikag Jesusan aiinak: —Dekatsji, tuidau. Tiagtai ni ayaak: —Wisha tichattajime yana chichamenia jutikaja nunak, tiuwai.
MAT 21:28 Jesús ditan iniak: —¿Atumesh jusha wajuk anentaimtagme? Makichik aents jimag uchijí ajujakui, nunú uchijí emkauwa nuna chichajak: “Uchijuh, yamai uva ajakbauwa nui weme takastá”, tiuwai.
MAT 21:29 Tama uchi ayaak: “Maake, wechattajai”, tau. Tiuwaitak anentai yapajia, weuwai.
MAT 21:30 Tikichia nunashkam jegantun dutiksag tiuwai. Tama nu ayaak: “Ayú apuh, wi wetajai”, tiuwai. Tujash wechauwai.
MAT 21:31 ¿Ju jimaja juiyash, tuuwa apají wakegamunash dutikauwaita? Tuinam dita aimainak: —Dekatkauwa nuuwai, tuidau. Tiagtai Jesús ayaak: —Dekas tajime, apú kuichkiji atinun ijumin aidau nuigtú nuwa akiká takatai aina duka, atumek wayasjuminig Apajuí inamtaijinig ditá wainawai.
MAT 21:32 Wagki Juan Yamijatna duka pegkeg takatan jintinjamatatus tauwai, tujash atumek dekaskeapi tichau ainagme; atum nuniagmin apú kuichkiji atinun ijumin aidau nuigtú nuwa akiká takatai aidaushkam dekaskeapi tiajui, tujash atumek ashí nu wainiatkujum tudaujum idaisajum pujutjum yapajiachu ainagme nunikjum niish dekaskeapi tumainaitjum nu, tiuwai.
MAT 21:33 “Antuktajum tikich augmatbaushkam: Aajakui makichik aents jeentin, nunú uvan ajakui, dutika tanishig, uva yumiji ijugtinnash umik, wajasá diistinnash torre ajiauwai. Dutika ujumak takau aidaun ukujak tikich nugkanum weuwai.
MAT 21:34 Nunik uva juwaamu jegamtai, ni inake aidaun ishiakui takau aidau batsatbaunum, niinush wajupaita nuna jukitnume tusa.
MAT 21:35 Tujash takau aidau inak awemamu aina nuna achikag, makichkia nuna suimainak tikichia nunak maawag, tikichia nunak kayai tukujajui.
MAT 21:36 Dutikawagmatai nagkamchaku ishiakbauwa nuní kuashat inaken ishitkauwai; tujash nunashkam dutiksag dutikawajui.
MAT 21:37 “Dutikawagmatai inagnamunum niina uchijin awemauwai: ‘Mina uchignak ajantusampap diimain ainawa’, tusa anentaimas.
MAT 21:38 Tujash takau aina nu uchí wainkag ditak pempeentunikiag: ‘Auwai ju aja juna jukitnuk, dekas maa ajapami, dutikaku juka iinu emami’, tuidau.
MAT 21:39 Tusag achiká jukiag uva ajakbaun ukumtikiag maawajui.
MAT 21:40 “Dusha atumesh wajuk anentaimtagme, dekas uva ajagtina nunú minakush, ¿utugmainai tajume takau aina nunash?”
MAT 21:41 Tutai dita aiinak: —Nunú pegkegchau aina nunak wait anentsuk kajeemainai, dutika tikich takau aidaun idaitumainai uva juut jegamtai juwinak niinu amaina nuna sujustinme tusa.
MAT 21:42 Tiagtai Jesús ditan ayaak: —¿Atumek Agagbau aina duka tuke ausachuk ainajum, nui: “Kayá ekenag jegamin aidau, kaya pegkegchauwai tusag dakitjajua nunú yamai dekas jegá ichichkatin kaya apujtutia iman wajasé; Nunak Apu Apajuí dutikau asamtai jutii diismak anentai ejetumaitsui” tawa duka?
MAT 21:43 “Nuadui tajime, Apajuí atumin inapa nunak idaiyak tikich aentsun inagtinai, midau atin aidaunak dutiksag itagtuatnume tau asa.
MAT 21:44 Nunú kaya nui iyauk, tsainkatnai; untsu kaya aentsnum iyaakug, yuku ematnai”.
MAT 21:45 Nuna Jesús augmattai sacerdote apuji aidau, fariseo aidaujai antukag, ditan pachis tawa nuna dekagmamawaju.
MAT 21:46 Nunikag achiktag tuidau; tujash aents aidaun ishamaidau, Jesusak profetayai tuidau asagmatai.
MAT 22:1 Jesús ditan aujuinak ataktú nagkama augmatbaun pachis tau:
MAT 22:2 “Apajuí inama duka makichik rey uchijí nuwenatin asamtai yutai shiig pegkejan umigkauwa nujai betekmamtinai.
MAT 22:3 Dutika ishiakui inake aidaun, ipaamu aina nuna ujaktinme tusa, tujash ditak nui minitnak dakitjajui.
MAT 22:4 Nunikagmatai ataktú tikich inake aidaun ishimak: ‘Ipak aidau ujaktajum, yumainuk uminkae, mina toro aidaujun, kuntin uduekbau aidaunashkam maatajum tijai; ashí uminkae, nuwenbaunum minitnume, timae titajum’ tusa.
MAT 22:5 Tujash ipaamu aidauk antugkachajui. Nunikag makichik ajajin wegai, tikich wajiijin sujak weuwai,
MAT 22:6 nuniai tikich aina duka, apú inake ishiakbau aina nuna achikag, wai waitkainakuag maawajui.
MAT 22:7 Dutikamun rey antuk kajeká suntaji aidaun ishitkauwai, dutikam wejiag aents magkagtuau aina nuna kajegká, ashí yaaktajinash apejuk ukugkiajui.
MAT 22:8 Nuna dutika inake aidaun chichajak: ‘Nuwenbaunum yuwatnuk uminkae, tujash ipamu aidauk minimainchau ainawai.
MAT 22:9 Wetajum yaaktanum jinta aina nui, nunikjum ashí aents atum wainbauk ipaatajum nuwenbaunum kaunatnume’, tiuwai.
MAT 22:10 Tiajam inak aidaushkam jintanum shiyakag, ashí aents dita wainbaunak ipaawajui pegkeg aidaun, pegkegchau aidaujai. Imatikamu asa jeganmag aentsuk piyakui.
MAT 22:11 “Nunikmatai rey wayau, ipak aidaun diistatus. Nunikmá makichik aents nuwenbaunum weaku nugkutain nugkuagchaun wainkau,
MAT 22:12 nunik: ‘Kumpajuh, ¿wajuk amesh juish wayaume jaanch nuwenbaunum nugkutai nugkutskesh?’ Tamash nigka chichaachu.
MAT 22:13 Nunitai rey ni inake aidaun chichajak: ‘Juka dawenum jigkagjum, uwejinish jigkagjum agaa suwea awi jiiktajum, nui pujus buutak nainak takegtú pujutí’, tiuwai.
MAT 22:14 Wagki untsukbau aidauk kuashtai, tujash etejamu aidauk ujumke”.
MAT 22:15 Timatai fariseo aidau jiinjag chichaman umikaju, Jesús wajintig nunikmatai tsanumjugmi tusag.
MAT 22:16 Nunikag ishiakajui ditá aentsji aina nuiyan ujumak, Herodesan aentsji aina nujai, Jesusan iniastinme tusag, dutikawajam: —Maestroh, dekainaji amek dekaskea duke tame duka, Apajuí jinti dekaskea duke jintinkagtam dushakam, aents tuina dukesh uyumatsme wagki dita shiig awajkatasam tachau asam.
MAT 22:17 Nuniau asamin tajame: ¿Amesh wajinpa, Cesarash kuichkish akimainkaih atsa akimainchaukaih?, tuidau.
MAT 22:18 Tiagtai Jesús dita pegkegchau anentaiyai tabaun dekaju asa: —¡Tsanumin aidauwah! ¿Wagka pegkegchaunum dekapjustasagmesh wakejutagme?
MAT 22:19 Iwaintugkakjua kuichik akikmajum nunú, tau. Tama makichik denario ejentuntaju.
MAT 22:20 Dutikam ditan iniak: —¿Yana niimegaita jusha, tuja yana daajiyaita ju agagbauwa jusha?, tau.
MAT 22:21 Tama dita aiinak: —Cesardauwai, tuidau. Tiagtai Jesús ayaak: —Cesardauwa duka, César susatajum; Apajuinua duka, Apajuí susatajum, tiuwai.
MAT 22:22 Nuna antukag anentai jegagchaju, nunikag ukuinak weajui.
MAT 22:23 Nunú tsawantaik saduceo aidaushkam Jesusan wejiaju, ditak jakau aidauk nantagchatnai tinu asag, nunikag iniinak:
MAT 22:24 —Maestroh, Moisés chichaak: “Aents nuwan juki uchin akiitsuk jakamtaig, ni yachintin nuwan juki uchin akiimainai, dutika yachí uchijiya nunin emamainai”, tiuwai.
MAT 22:25 Nuniamunum, jutii ainag juiya siete yachigbau aayi. Nuanuiya nagkamchak nuwenauwa duka uchin akiitsuk jakauwai, nuniak nuwanak yachin ukugkiuwai.
MAT 22:26 Nunikmatai jimaja ju jukishkam nunisag jakauwai, nunisag kampatuma dushakam jakauwai, nuni nuninakua siete aajakajua duka ashí jinawajui.
MAT 22:27 Nu ashí jinawagmatai pujus nuwashkam jakauwai.
MAT 22:28 Nuna nunikajua duish, atak nantamunmash, ¿Siete yachi aajakajua nu ashí nunak nuwatkajua duish, yana nuweg atinaita? tuidau.
MAT 22:29 Tama Jesús ayaak: —Atumek Agagbau aina duka, nuigtú Apajuí senchijiya dushakam dekachu asajum dewakugme.
MAT 22:30 Atak nantamu atina duik nuwenbauk atsutnai, ángel nayaimpinum batsata nuninuk agtinai.
MAT 22:31 Tujash ¿jakau nantajagtinun pachis Apajuí tibau agagbauwa duka ausachuk ainajum, nuanuig:
MAT 22:32 “ ‘Witjai Abraham, Isaac, Jacob aina nuna Apajuijinuk’ tawa duka? Apajuik jakau aidaun Apajuijichui, iwaaku aina nuna Apajuijiyai”, tiuwai.
MAT 22:33 Aents aidau nuna antukag, Jesús jintinkagtamun anentai jegagchaju.
MAT 22:34 Jesús saduceo aidaun itatmitkakbaun fariseo aidau antukag, ijunjaju;
MAT 22:35 nunikbaunum dita aina nuiya makichik maestro chicham umiktinun jintinkagtin, pegkegchau anentaiyai iniak:
MAT 22:36 —Maestroh, ¿chicham umimain dekas imana dusha tuwaita?, tau.
MAT 22:37 Tama Jesús ayaak: —Amina Apujum Apajuiya nu, ashí amina anentaimjai, ashí amina wakanmijai, ashí amina anentaimtagmijai aneeta, tawai.
MAT 22:38 Juuwai dekas imanuk, nuigtú chicham dekatkau umimaina duka.
MAT 22:39 Tuja tikichia duka jujai betekmamtinai, duka: “Tikich aidaush amek anenmamsam aneeta”, tawai.
MAT 22:40 Ju jimag chicham umiktina juig ashí chicham umiktin aidau nuigtú profeta aidau tibauwa dushakam ainawai, tiuwai.
MAT 22:41 Fariseo aidau ijunjamutak batsataig, Jesús iniak:
MAT 22:42 —¿Atumesh Cristush wajuk anentaimtagme? ¿Yana uchijiyai tajume?, tau. Tuinam dita aiinak: —Davita uchijiyai, tuidau.
MAT 22:43 Tiagtai: —Nuniaish, ¿wajuk asamtaiya Davitash Wakan ichachiamash Apú tiuwaita?
MAT 22:44 Tau asa: “Apu mina Apujun chichajak: Ekeemsata mina untsujui, nunikamin wi amina shiwajum aidaunak ashí idaitustajame”, tiuwai.
MAT 22:45 —David, Apu tawa nuniaish, ¿wajuk asaya Davita uchijish amainaita?, tau.
MAT 22:46 Tutai makichkish aimainchau dekapedau asag, nui nagkamsag makichkish iniaschajui.
MAT 23:1 Nunikagmatai Jesús aents aidaun, niina jintintaiji aidaujai chichajak:
MAT 23:2 “Maestro chicham umiktinun jintinkagtin aidauk, fariseo aidaujaig Moisés tibauwa nuna jintinkagtuinawai.
MAT 23:3 Nuadui atumek, ashí dita dutikatajum tujamaina duka umigkatajum; tujash dita takaina duka takasaigpajum, wagki ditak tuinayatak nunak takainachu asagmatai.
MAT 23:4 Ditak shiig kijin yanamainchau aidaun tikichnak ayanainawai, ditakesh makichik tsajam uwejinkesh antitnak dakituinayatak.
MAT 23:5 Ashí dita dutikaina nunak aents wainkamu atatus nuninawai, nuninak senta wegkagman jukiag, chicham umiktajum tibauwa nuiyan agajag, kuntujinish dutiksag jigkamá yujainawai. Aantsag nugkuagbauji weniya nuwish esagman sasamjukag detug nugkujag yujainawai.
MAT 23:6 Yutai umikbau yuinamunmash, aents eme anentsá ekeemsati tibaunum ekeemsagtatus wakegainawai; nunisag jega ijuntainum wainakush nuninawai.
MAT 23:7 Nunidau asag, plazanum aents kumpamjuinakush eme anenjus: Rabí tujuttinme tusag wakejin ainawai.
MAT 23:8 “Tujash atumek ‘Rabí’ tujuttinme tusagmek wakemaitsugme; wagki makichki atumi Maestrogmek, tuja ashí atum aidautigmek yatsut ainagme.
MAT 23:9 Atum aidautigmek ju nugka juiyag makichkish ‘Apawá’ tiigpajum; wagki makichki atumi Apak, nayaimpinum puja duke.
MAT 23:10 Nuigtush ‘maestro’ tamak aigpajum; wagki atumi Maestrogmik makichki, Cristua duke.
MAT 23:11 Atum ainajum anuiya dekas eme anentaiya nunú, tikich aina nuna inake amainai.
MAT 23:12 Wagki nigki eme anenmama duka, imanchau diyam atinai, untsu imanchau diyamua nu eme anentam atinai.
MAT 23:13 “¡Wait anentajime atumnak, maestro chicham umiktinun jintinkagtin nuigtú fariseo aidautigminak tsanumin asagmin! Wagki Apajuí inama nui wayawainum tusa epetjume, atumkesh wayachiatkujum tikich wayata tuidaush idaitsugme.
MAT 23:14 ¡Wait anentajime atumnak, maestro chicham umiktinun jintinkagtin nuigtú fariseo aidautigminak, tsanumin asagmin! Wagki atumek nuwa waje aina nuna jee atankijum, tsanumkujum Apajuí dukap aujú yujau ainagme, nunin asajum imá senchi bakumatin ainagme.
MAT 23:15 “¡Wait anentajime atumnak, maestro chicham umiktinun jintinkagtin nuigtú fariseo aidautigminak, tsanumin asagmin! Atumek kukag nuigtú nayantsanum yujagme atumdau amain wainkatasajum, nunika wainkagmek nunú aentsuk unuinagjum, atumi nagkaetamas jimaja imania waitmain emá idaiyin ainagme.
MAT 23:16 “¡Wait anentajime atumnak, wainmachu ainayatkujum jinta inakmaidau asagmin! Atumek: ‘Makichkikesh jega Apajuí ememattaiya nuna pachis dutikattajai tauk wainkayai tajume; untsu oro jega Apajuí ememattain awa nuna pachis tawa nu, ni tibaujiya nunak betek umimainai tajume’.
MAT 23:17 ¡Anentainkachu, wainmachu aidauwah! ¿Dekas tuwaita imanush: orokaih, atsa nuniachkush jega Apajuí ememattai oron pegkemtika dukaih?
MAT 23:18 Nuigtushkam atumek tajume: ‘Altaran adaiyas ni dutikatnujin umiktatjai tauk, wainkayai’ tajume; ‘untsu Apajuí ofrenda suwamu altarnum patatun adayas tauk, dekas imatiksag umimainai’ tinu ainagme.
MAT 23:19 ¡Wainmachu aidauwah! ¿Dekas tuwaita imanush: ofrendakai atsa altar ofrendan pegkemtika dukaih?
MAT 23:20 Aents ni dutikatnujin altaran adayas tawa duka imá altarnak taku tatsui, ashí altarnum patata nujai taku tawai.
MAT 23:21 Tuja jega Apajuí ememattaiya nuna pachis taushkam imá jeganak takug tatsui, Apajuí nui puja nujaí taku tawai.
MAT 23:22 Aantsag nayaimpin pachis taushkam Apajuí ekeemtaijiya nuna nuigtú nui eketa nunashkam pachis tawai.
MAT 23:23 “¡Wait anentajime atumnak, maestro chicham umiktinun jintinkagtin nuigtú fariseo aidautigminak, tsanumin asagmin! Atumek menta, anís, comino aatsajum diezmó wajau ainagme; nuniayatkujum chicham umiktin dekas iman aina duka umiatsjume: pegkeg takata nu, wait anenkagtuta nu, dekaskeapi tabauwa dushakam. Jujú dutikmain ainagme, tikichia dushakam idaitsuk.
MAT 23:24 ¡Wainmachu ainayatak jintá inakbau aidauwah! Wiyunchik tsatsamá ajapeayatkujum, camellok kujajume.
MAT 23:25 “¡Wait anentajime atumnak, maestro chicham umiktinun jintinkagtin nuigtú fariseo aidautigminak, tsanumin asagmin! Wagki vaso, plato aina nuna awankeg jaipiagme, tujash initkak kasamtaijum nuigtú pegkegchau takataijum aina duka piyak ajutjamainawai.
MAT 23:26 ¡Fariseo wainmachuh! Dekatkauk vaso, plato aina nuna initkegá jaipjata, dutikam awankeshkam pegkeg atatui.
MAT 23:27 “¡Wait anentajime atumnak, maestro chicham umiktinun jintinkagtin nuigtú fariseo aidautigminak, tsanumin asagmin! Aents ukusbau awanke pujui ukatkamua nunin asajum pegkeg wantinjume, tujash initkagminig aents jakau ukunchí tsumain wajas aama nunin ainagme.
MAT 23:28 Atumshakam nunin ainagme aents aidau eemtinig pegkejan takauwa iman iwainmamjume; tujash initkagminig tsanumtaijum, pegkegchaujum aidau piyak ajutjamainawai.
MAT 23:29 “¡Wait anentajime atumnak, maestro chicham umiktinun jintinkagtin nuigtú fariseo aidautigminak, tsanumin asagmin! Atumek profeta ukusbau aina nunú jegagkajum nuigtú aents yaunchuk pegkejan takasú batsamajakajua nuna niimé dakumkamu aidaush shiig iwajin ainagme,
MAT 23:30 nuniakjum: Jutiish ii muunji batsamajakua nunú tsawantin pujujakuitkuik, profeta aidaun mainak numpen ukajajua nuig jutiik pachinkachus amainaitai, tajume.
MAT 23:31 Nunú tajum nuadui atumek etsegtumagme profeta aidaun maawaju aina nunú weantu ainajum nu.
MAT 23:32 ¡Atumi muunjum nagkamamua duka, atumshakam dutiksagmek ashimkatajum!
MAT 23:33 “¡Iwanch dapimea aentsun tsanujua nujai betek aidauwah! ¿Wajuk uwemtugtagmeki, suwimak waitiamu atina dusha?
MAT 23:34 “Nuadui wi profeta aidaun, aents yacha aidaunash, maestro aidaunashkam awemattajai. Tujash atum nunú aina nuiya maakjum, tikichik achigtin ainagme; tikich aina duka jega atumi ijuntaigmin awayajum asutiakjum, tikich aina duka ya yaaktanum yujagsajum aintú yujagtin ainagme.
MAT 23:35 Aaja nuniau asagmin, atumiin suimkak iyagtinai, ashí numpa pegkejam nugkaa ukaejamunum, Abel pegkejan takajakua nui nagkamas, Zacarías Berequiasa uchijí, jega Apajuí ememattai ai altar awa nuna ejapen mau ainajum dui.
MAT 23:36 Dekas tajime, ashí nuna nunikajua dui yamai aents aina jui suimkak iyagtinai.
MAT 23:37 “¡Jerusalén, Jerusalén, amek profeta aidaush mainaitme, dutiksamek aminí awemamu mininakuish kayai tukui tukuinakuajum main ainagme! Kuashtá wakekamjai uchijum aidaun, atash uchijí aidaun nanapen ijumama numamtuk awajkatasan, tujash amek dakitjamume.
MAT 23:38 Nuniku asagmin atumi jeemia duka ukumkimu juakagtinai.
MAT 23:39 Nunin asamtai tajime yamai nagkamsagmek ataktuk waitkashtatjume, nuniautijum: ¡Apajuí awemam mina ju emematiagmi! tujuttinaitjum dui waitkatin ainagme”.
MAT 24:1 Jega Apajuí ememattainmaya jiinki Jesús wetai, niina jintintaiji aidau jegaantaju jega Apajuí ememattai jegamkamun inaktustatus.
MAT 24:2 Dutikam Jesús chichaak: —¿Ju ashí wainjumek? Dekas tajime, juka makichik kayakesh ekenjamu aina nuiyag juwakchatnai, ashí tsaikbau atinai, tiuwai.
MAT 24:3 Jesús Olivosa mujajin waka ekemsamtai, niina jintintaiji aidau jegaantag, niinak akanak iniinak: —Tukagtita, ¿wajutiya dusha nuniktinaita, tuja wají wantinkatnaita ame taattaku wajataish, nuigtú nugka nagkanbau jegattak wajataish?, tuidau.
MAT 24:4 Tiagtai Jesús ditan ayaak: —Kuitamamkatajum, makichkish tsanugmajainum.
MAT 24:5 Wagki kuashat midiagtinai mina daajun pachisag, nuninak: “Witjai Cristunuk”, tusag kuashat tsanumiagtinai.
MAT 24:6 Atumek maaniamu aidau, nuigtú maaniatatus pampandayamush antitnaitjume, imatuinakuish puyatkaigpajum. Duka dekas ashí aatus nagkaemagtinai, tujash nu achatnai nagkanbauk.
MAT 24:7 Nugka muunnum inamnuk, mai imanuk maaniagtinai, tuja nugka yaignum batsamnushkam, mai nuninuk maaniagtinai. Jata ishamain utsumaja jinamush, yapagtash, kuashat nugkanum uugbaush atinai.
MAT 24:8 Tujash ashí ju aina juka waitut yamá nagkamnak imanitnai.
MAT 24:9 “Untsu atumnak waitkastinme tusag sujupakagtinai, dutijamawagmatai mantamawagtinai; ashí aents aidau kajegtabiagtinai, mina daag pachisjum chichaidau asagmin.
MAT 24:10 Nunú tsawantinig kuashat aents minak tupanjukagtinai, nuninak pempé pempeentunisag sujuninak, pempeentunisag kajegdayagtinai.
MAT 24:11 Kuashat profeta tsanumaidaush wantinjatnai, nuninak kuashat aentsun tsanuagtinai.
MAT 24:12 Kuashat pegkegchau aitnai, imaniau asamtai kuashat aents Apajuí aneamunak mijakagtinai.
MAT 24:13 Tujash ni ebetmamag pujusá nagkanbaunum jegaa nu uwemjatnai.
MAT 24:14 Ju yamajam chicham Apajuí inamjatin pachisa etsegbauwa duka, ashí nugkanum etsegkamu atinai, ashí aents aidau dekaatnume tabau asamtai; nunikmatai nagkanbauk atinai.
MAT 24:15 “Profeta Daniel Apajuí ememattai pegkegma nui shiig pegkegchau dutikawagtinun pachis agajua nunú wainkugmek (nuna aujuk dekaatnume),
MAT 24:16 atum Judea batsatutigmek mujanum pisagtajum.
MAT 24:17 Tuja jega ekenja jegamkamu nagkatka nui pujauk akaikig makichkish wajiijinak jukiigka;
MAT 24:18 antsag ajanum takaak pujaushkam, jaanchi jukitjai tusag waketjukigka;
MAT 24:19 ¡wait anentuinajai nunú tsawantin nuwa ejamtin, nuigtú uchí amuntsuaku agtina nunak!
MAT 24:20 Apajuí ausatajum, atum pisamua nu tsetsek tepeamunum, nuniachkush tsawan ayamtai aigkish ajutjaminum.
MAT 24:21 Wagki nugka najanamu aajakua nui nagkamas, yamaiya juish, atakea duish imanika waittsashtin tikima senchi waitiamu atinai.
MAT 24:22 Tuja nunú tsawan aina nui imanika waitiamu atina nuna Apajuí imijchataik, makichik aentskesh uwemainchau ainawai; tujash ni etegjamu aina nunú aneamunum imijkatnai.
MAT 24:23 “Tuja makichik aentskesh: ‘Diistajum, jui Cristo pujawai’, tachakush: ‘Awi pujume’ tuinakuish dekaskeapi tiigpajum.
MAT 24:24 Wagki kuashat aents, ‘Cristuitjai’ tusag nuigtú profeta ainaji tuidaush wantinjagtinai; nuninak kuashat aents dutikmainchaun iwainagtinai tsanumainak, nunidau asag Apajuí etegkamu aidaunash dita tsanuamunak tsanujagtinai.
MAT 24:25 Junak yaunchkesh timajime.
MAT 24:26 Nuadui: ‘Uwegshunum pujawai’, tujamainakuish weegpajum; nuniachkush: ‘Jega tesamua jui pujawai’, tujamainakuish dekaskeapi tiigpajum.
MAT 24:27 Wagki peem etsá minitaiya nuiya peeti, etsá akaetaiya atú peemama numamtuk wajaktinai Aentsmaga akiinauwa nu minamuk.
MAT 24:28 Tuwí jakau tepettawa nuna chuwagkak tuwakagtinai.
MAT 24:29 “Nunú waitut nagkaemaig, etsag suwe wajastinai, nantushkam etsanbaunak megkaekatnai, yaya aidaushkam kakeyagtinai, imanidau asagmatai nayaimpinmaya senchigtin aidaushkam peganjagtinai.
MAT 24:30 Nuniamunum Aentsmaga akiinauwa nu minamu nayaimpinum wantinkatnai, nunitai ashí aents nugkanmaya aidauk buutiagtinai, Aentsmaga akiinauwa nunú nayaimpinmaya yujagminum pachitkau shiig tsawan wajas senchijijai minaun wainkag.
MAT 24:31 Nunik ni angelji aidaun ishiaktinai trompeta senchi umpuajag ashí nugka nagkatkamunum nayaim najatamunum nagkamas ni etejamuji batsata nuna ijumjatnume tusa.
MAT 24:32 “Higueran pachisan augmattsan titatjim nu unuimagtajum, atumek: ‘Higuera kanawe aidau wentsamtuju dukegkuig wamkeap esat nagkamnattawa’, tusajum dekau ainagme.
MAT 24:33 Nunisjumek, ashí nunú wají uminaidau wainkugmek, Aentsmaga akiinauwa nu taatnuk namput wajaschagapi titin atajum.
MAT 24:34 Dekas tajime, yamai aents aina jusha batsataig ashí uminkatnai.
MAT 24:35 Nayaimpik nugkajaig megkaejatnai, tujash mina chichamjuk umintsukek juwakchatnai.
MAT 24:36 “Tujash tsawannak, horanash makichkish dekainatsui, nayaimpinmaya ángel aidaukesh, Apajuí Uchijigkesh dekatsui, imá Apajuk dekawai.
MAT 24:37 “Noé pujusua nu tsawantin wajukejakú aina nuninuk atinai Aentsmaga akiinauwa nu minamunmash.
MAT 24:38 Nunú tsawantaik eke diluvio nagkamnatsaig batsamsag, yutai yuinak, umutnash umuinak, nuwenainak, nawanjin suju wajá batsatai Noé niina arcajin egkemauwai;
MAT 24:39 imaní batsatu asag dekachajui, nuniai diluvio nagkamna ashí aentsnak tajak utsagkui. Nunisag atinai Aentsmaga akiinauwa nu minamushkam.
MAT 24:40 Nuniamunum, jimag aents ajanum takaak pujauk makichik juwaku, tikichik ukuam atinai.
MAT 24:41 Jimag nuwa deketainum dekeak pujuidaushkam makichik juwaku, tikichik ukuam atinai.
MAT 24:42 “Iwá pujutajum, wagki atumek atumí Apugmesh wají tsawantinig minitnaita duka dekachu asajum.
MAT 24:43 Tujash ju dekatajum, makichik jeentin wají horatinia kasa taattawa nuna dekakug, iwá pujumainai wayá kasagtukai tau asa.
MAT 24:44 Nuadui atumshakam umintsajum pujustajum; wagki Aentsmaga akiinauwa duka, hora atum anentaimtachbaunum minitin asamtai.
MAT 24:45 “¿Yaita inak betek umin nuigtú shiig anentaimkau asamtai, apuji niina jeen batsatun yutain diyaku susati tibauwa dusha?
MAT 24:46 Shiig aneastinai inak, ni apuji wakitki takamá, ni tibaujinak betek umiak pujaun wainam atina duka.
MAT 24:47 Dekas tajime ashí niina wajiiji aina nunak ni diistí tusa idaitumainai.
MAT 24:48 Untsu nunú inak pegkegchau asa anentaimas: ‘Mina apujuk wamak taashtatui’, tusa;
MAT 24:49 tikich inak aina nuna suwimak, nigka nampen aidaujai yuwak, umak wekagai,
MAT 24:50 nunú inaka nuna apuji tsawan dekachbau, horash dekachbau ai taa,
MAT 24:51 suwimkan susa, aents tsanumin aidaujai waittsati tusa idaimainai. Dutikam nui pujus buutak nainig takegtú pujutnai.
MAT 25:1 “Apajuí inama duka, diez nuwa muntsujut lámpara jukiag nuwenun igkugtatus jiintukiajua nujai betekmamtin atinai.
MAT 25:2 Cinco nuwa aina duka shiig anentaimkachu aajakajui, nuniai tikich cinco aina duka shiig anentaimkau aajakajui.
MAT 25:3 Shiig anentaimkachu aina duka, lamparajin juinakush aceitenak jukichajui;
MAT 25:4 nuniai nuwa shiig anentaimkau aina duka, lamparajin juinakush aceitenak botellanum aimak jukiajui.
MAT 25:5 Nuwenatna nu tachatai, dakai dakainakua kaji pujajuinam ashí kajigkajui.
MAT 25:6 Nuniai aehaet ai antukajui: ‘¡Nuwenatta duka minawai, jiinjajum igkugtajum!’ tusa untsumjamun.
MAT 25:7 Tutai nuwauch aidaushkam nantajag lamparajin ekemaktasag uminaidau.
MAT 25:8 Nuniamunum nuwa shiig anentaimkachu aina nu, nuwa shiig anentaimkau aina nuna: ‘Jutii lamparajig kajinainawai, aceite machik sukagtusta’, tuidau.
MAT 25:9 Tama dita aiinak: ‘Uju ujumak akantunika jukimak, minashkam aminash abuetugmamainai, dekas aceite sujutainum wejum sumaktajum’, tiaju.
MAT 25:10 Tiajam aceiten sumaktatus weenai, aents nuwenatnush tauwai, nunikmatai nuwa umintsag daká batsataidauk, nuwenku fiestabaunum utsanawaju, nunikmatai waitin epeniuwai.
MAT 25:11 Nuniku ai nuwa aceiten sumainak wegajushkam kaunkag: ‘¡Apuh, apuh, waiti ujatkagtita!’ wajaidau.
MAT 25:12 Tama ni ayaak: ‘Dekas tajime wika atumnak wainchaujime’ ”, tiuwai.
MAT 25:13 Nuadui atumek aneaku batsamtajum, wagki Aentsmaga akiinauwa nu taatnujig tsawantak nuigtú horash dekachu asajum.
MAT 25:14 “Apajuí inama duka, aents tikich nugkanum wetin asa, inake aidaun untsuká niina wajiiji aidaun tinamkauwa nujai betekmamtinai.
MAT 25:15 Makichik inakega nuna cinco talento suwak, tikichia nuna jimag talenton susa, kampatuma juna makichik talenton susauwai. Junak makí makichik dita takamainjin diijus tinamkauwai. Dutika ukuak tikich nugkanum weuwai.
MAT 25:16 Inak cinco talento jukiuk, wajiin sumag sujak nuigtushkam imatiksag cinco talento ikaugkauwai.
MAT 25:17 Tuja jimag talento jukiushkam, dutiksag jimag talento ikaugkauwai.
MAT 25:18 Untsu inak makichik jukiuwa duka, ni apuji kuichkijinak nugkan tai yutua idaisauwai.
MAT 25:19 “Kuashat tsawan nagkaemakiu ai, apushkam ni inake batsatbaunum wakitki tauwai; nunik, wajupak kuichkinash ikaugkaje tusa dekajuawagtatus nagkamau,
MAT 25:20 nuniai cinco talento jukiuwa nu, nuigtú cinco talento juki jegantun chichajak: ‘Apuh, cinco talento sujusmayume; nunak jui itajuajame, nunú talentowa nuna takamtiksan, nuigtú cinco talento ikaugkajai’, tau.
MAT 25:21 Tama apuji chichajak: ‘Ayú, amek inak pegkeg nuigtush betek uminaitme. Machik susamuitkum imatikam ikaugkaume, yamaik aan kuashat amastajame. Wayata, nunikamin iijai dakujusmi’.
MAT 25:22 Tusa inagnaig, tikich jimag talento jukiuwa nu jegantun chichajak: ‘Apuh, minak jimag talento sujusmayume nunak jui itajuajame, juna takamtiksan nuigtú jimag talento ikaugkajai’, tau.
MAT 25:23 Tama apuji ayaak: ‘Ayú, amek inak pegkeg, nuigtush betek uminaitme. Machik susamuitkum, imatikam ikaugkaume, yamaik aan kuashat amastajame. Wayata, nunikamin iijai dakujusmi’, tiu.
MAT 25:24 “Nuniai tikich makichik talento jukiuwa dushakam jegantun chichajak: ‘Apuh, wika ame waitkagkagtinaitam nuna dekagjame; ame ajakchauwaitkum juu wekaenaitme, nuigtushkam ame ipanjachuitkum yajumá wekaenaitme;
MAT 25:25 nunin asamin ishamakun talentogminak nugká yutuan idaisabiajai, dutikamun yamai jui itajuajame’, tau.
MAT 25:26 Tutai apuji ayaak: ‘Amek inak pegkegchau, dakitme; wi ajakmachiatkun juu wekayin, nuigtushkam ipanjachuitkun yajumá wekayin dekaju asam,
MAT 25:27 banconum takau aidau sumain awajkaume, dutikau asamin wi taakun midau kawegkun jumain wajakjai’.
MAT 25:28 Tusa nui ijuntatman chichajak: ‘Aanú makichik talento aja nu atankijum, diez talento aja nu susatajum,
MAT 25:29 wagki kuashat aja duka, nuní dukap suwam atinai, dutikamu asa nuní kuashat ajitnai; untsu atsuja duka, ni piipich aja dukesh atantam atinai.
MAT 25:30 Ju inak atsumnatsu duka, agaa suwea awi jiiktajum, nui pujusá buutak daik takegtú pujutí’.
MAT 25:31 “Aentsmaga akiinauwa nu tsawan wajas ashí niina angeljijai minakug, ekeemtaiji dekas imana nui ekeemsamtai,
MAT 25:32 niina eemtin, ashí aents nugkanum batsataidauk tuwakagtinai. Nunikmatai pastor uwigjin chivojai akanama numamtuk akanjatnai.
MAT 25:33 Uwig aidaunak untsugnum ijumak, chivo aidaunak menanum ijumjatnai.
MAT 25:34 Dutika, untsujin ijunaina nuna Rey chichajak: ‘Minitajum, mina Apag pegkegnum yumigsamu aidautigmek, nunikjum jukitajum atum inamjatnun nugkash najannatsaig umigtamkamua nunú.
MAT 25:35 Wagki yapagbaijai, nuniakuish atum ajamjusbaijume; kitabiajai, nuniakuish umutai sujusbaijume; tikich nugkanum wekaeyajai, nuniakuish atumi jeemin jujukbaijume.
MAT 25:36 Nugkumainush atsugtuyi, nuniakuish atum sujusbaijume; jaakun tepakuishkam taajum ijagtusbaijume; achigkagmatai egketaish waitkatasajum tajutbaijume’, titinai.
MAT 25:37 Tutai pegkejan takasú aina nu aiinak: ‘Apuh, ¿wajutiya ame yapajú wekaeminish ayujabiajame? ¿Wajutiya kitamá wekaeminish umutaish amasbaiji?
MAT 25:38 ¿Wajutiya tikich nugkanum wekaekuminish, iina jeenish jukibiajime, tuja nugkumain atsugtamkuish, wajutiya amasbaiji?
MAT 25:39 ¿Nuniachkuish wajutiya ame jaakum pujaminish tajuabiajime nuniachkuish achinká pujakminish wainkatasaish tabiaji?’ tiagtinai.
MAT 25:40 Tiagtai Rey ayaak: ‘Dekas tajime, ju mina yatsug aina juiya wait anenjauwaitjum duka, mina dutijuau ainagme’.
MAT 25:41 “Tusa menajin ijunun chichajak: ‘Pegkegchau aidauwah, jii ajumaish tuke atin Iwanch ni angelji aidaujai umigkamua nui wetajum.
MAT 25:42 Wagki yapagbaijai, nuniakuish atumek ajamjuschabiugme; kitabiajai, nuniakuish umutaig sujuschabiugme;
MAT 25:43 tikich nugkanum wekaeyajai, nuniakuish atumi jeeminish jujukchabiugme, nugkumainush atsugtuyi, nuniakuish sujuschabiugme, jaaknush tepebiajai, achinkanush pujubiajai, nuniakuish waitkatasagmesh tajutuachbaijume’, titinai.
MAT 25:44 Tama ditashkam aimainak: ‘Apuh, ¿wajutí ame yapagkim, kitaajam, tikich nugkanmash wekagu, jaanchjinchau, jaakum nuniachkumesh achinkam pujamu wainiatkuish yaigchabiajime?’
MAT 25:45 Tiagtai Apu ayaak: ‘Dekas tajime, atum ju aents imanchauch aina jujú yaigchauwaitjum duka, mina dutijuau ainagme’, titinai.
MAT 25:46 Aaja tima nunú aents aidauk suwimak tuke atina nui weagtinai; untsu aents pegkeg aidauk pujut tuke atina nui wayawagtinai”, tiuwai.
MAT 26:1 Jesús nuna ashí chichaká ashimak ni jintintaiji aidaun chichajak:
MAT 26:2 —Atumek dekagme, jimag tsawan asa fiesta Pascua atata duka, nuanui Aentsmaga akiinauwa nunak, achigtinme tusag sujukagtatui, tiuwai.
MAT 26:3 Tuja nunú tsawantinig sacerdote apuji aidau, judío apuji aidaujai sumo sacerdote Caifasa jeen agaajin ijunjajui.
MAT 26:4 Nunikag chichaman umikajui, Jesús tsanumjuja achiká maami tusag.
MAT 26:5 Tujash fiesta aigkik dutikachagmi, yaaktanum pampandayamu ai, tiajui.
MAT 26:6 Jesús Betanianum, Simón lepragtin tutai jeen pujai,
MAT 26:7 nuwa tajuauwai makichik botella alabastro najanamunum kugkuin aimkamu shiig akik wajaknun takusá, nunik Jesús mesanum eketun buuknum ukatjauwai.
MAT 26:8 Nunú dutikamun ni jintintaiji aidau wainkag kajekajui, nunikag: ¿Wagka wainkash wasujua?
MAT 26:9 Dekas akik sujuka ujunauch aidau yaimainajama, tuidau.
MAT 26:10 Jesús nuna antuk ditan chichajak: —¿Wagka ju nuwash kajejagme? Mina jutija junak pegkejan takaak aikae,
MAT 26:11 ujunauch aidauk tuke atumjai batsamiagtatui, tujash wika atumjaig pujushtatjai.
MAT 26:12 Ju nuwa mina iyashjui kugkuinun ukatjuka junak, wi ukuntsatnun umigtak jutijawai.
MAT 26:13 Dekas tajime, yamajam chichama juna etsejuinak ashí nugkanum yujainakush, ju nuwa mina jutija juna pachis tuke etsejiagtin ainawai, tiuwai.
MAT 26:14 Doce aina nuiya, Judas Iscariote daagtin sacerdote apuji aidaujai chichastatus weuwai.
MAT 26:15 Nunik: —¿Wajupa sujumainaitjume, wi Jesusan atumiin sujakuish?, tau. Tutai treinta kuichkin susaju.
MAT 26:16 Nui nagkamas ni yupichu sujumainjin egatu.
MAT 26:17 Pag levaduragtuchu yuwaku fiestamtai nagkamak tsawagmatai, ni jintintaiji aidau Jesusan jegaantag iniinak: —¿Pascua yuatnush tuwí umiktinme tusamea wakegame?, tuidau.
MAT 26:18 Tama ni ayaak: —Yaakat wetajum, nunikjum atum aents wainjum nunú jegajuajum: “Maestro chichaak: Mina tsawanjuk namputchí wajaschae, nuniau asamtai niina jeen mina jintintaig aidaujai Pascuan fiestamatjai tujamae” titajum, tiu.
MAT 26:19 Tiajam jintintaiji aidaushkam Jesús tibaunak imatiksag Pascua yuwatnunak umikajui.
MAT 26:20 Kiyagmatai Jesús ni jintintaiji doce aina nujai mesanum jegantá ekeemsau.
MAT 26:21 Nui yuwamunum Jesús chichaak: —Dekas tajime, atum ainajum juiyag makichik minak sujutkattawai, tau.
MAT 26:22 Tutai shiig senchi wake besemag dekapjag, makí makichik iniinak: ¿Apuh, wikaitag? wajaidau.
MAT 26:23 Tiagtai Jesús ayaak: —Wijai nu platonmag uchutua yuwa nu, minak sujutkattawai.
MAT 26:24 Dekaskenmag Aentsmaga akiinauwa duka, ni pachisa agagbauwa nunisag wetatui; tujash ¡wait anentajai ya sujuktatua nunak! Duka dekas akiinmainchaunas akiinawabiataih, tau.
MAT 26:25 Tutai Judas niina sujukua nu chichaak: ¿Maestroh, wikaitag?, tau. Tutai ni ayaak: —Ame tame duka dekaske, tiuwai.
MAT 26:26 Yuwinak pekagbaunum, Jesús pagkan juki Apajuin see tii, puuká, jintintaiji aidaun suwak: Ju yuwatajum, juka mina iyashjun iwainawai;
MAT 26:27 tusa, copa juki Apajuin see tii, suwak: —Ju copa juiya ashí atum uwagtajum;
MAT 26:28 wagki juka mina numpajui, yamajam chicham apaamunum kuashat aents tudaujin tsagkugnagti tabaunum ukaejatta nuuwai.
MAT 26:29 Dekas tajime, yamai nagkamsanuk ju uva yumijinak awenanuk uwagchattajai, atak tsawan uminkui mina Apajú inamtain ataktú atumjai ijunkun yamagman uwagtin asan.
MAT 26:30 Nuna timatai himno kantamawag Olivosan mujajin weajui.
MAT 26:31 Nunik Jesús ditan chichajak: —Jujú kashia juik, ashí atum aidautigmek minak ukugkittagme, wagki agagbauwa nui: “Pastoron maattajai, dutikam uwig ijunag batsatuk pampagkagtinai” tawa nunisag.
MAT 26:32 Tujash ataktú nantakin, atumek Galilea wegatsjuminig wiyá emkan wetatjai, tiuwai.
MAT 26:33 Tutai Pedro ayaak: —Ashí tikich aidau ukugmainakuish, wika aminak tuke ukukchattajame, tau.
MAT 26:34 Tutai Jesús ayaak: —Dekas tajame, jujú kashia juik atash shinatsaig, kampatumá: “Wainchaujai” tujuttatme, tiuwai.
MAT 26:35 Tama Pedro ayaak: —Amijai jakata tau asan, wainchaujai tichattajame, tau. Nuna tutai ashí niina jintintaiji aidaushkam dutiksag tiajui.
MAT 26:36 Nunik Jesusak ditajai ijunag Getsemaní tutainum jegaa, jintintaiji aidaun chichajak: —Jui ekeemsatajum, nuniagmin wi awi wenu Apajuin ausatjai.
MAT 26:37 Tusa Pedron nuigtú Zebedeo uchijin mai juki wesa wake besetan nagkamauwai, nuniak shiig senchi anentaimak waitiau.
MAT 26:38 Nunik Jesús chichaak: —Senchi wake besemag dekapeakun jamain dekapeajai, atumek jui batsamsajum wijai betekak iwá batsamtajum, tiuwai.
MAT 26:39 Tusa machik kuwaesag, tikishmag nugkan nijayin intaa pujus, Apajuin aujak: “Mina Apajuh, nunimainaitkuig, wi waitmainaitag duka agkanmitkajuata. Tujash wi wakegamu achati, ame wakegamu atí”, tiuwai.
MAT 26:40 Nuna ti ni jintintaiji batsakbaunum wakitkiu, nunikmá kajigká batsatun wainak Pedron chichajak: ¿Atumek wijaig makichik horakesh iwamainchauk dekapeajum?
MAT 26:41 Kají batsamtsuk Apajuí ausatajum, pegkegchaunum iyawaijum; dekaskenmag atumi wakanmik uminas awai, tujash iyashia nuuwai kakaakchauk.
MAT 26:42 Tusa ataktú wakitki Apajuin aujak: Mina Apajuh, wi waitmainaitag nuna waittsuk nagkaemainchauwaitkuig, ame wakegamu dutikata, tau.
MAT 26:43 Nuna tusa ataktú tanta diikmá, kajigkag batsatun wainkauwai, kaji senchi mainamu asag.
MAT 26:44 Nunik diisá ukuak kampatuma jui wakitki Apajuin aujak, ni tibaujinak dutiksag auju.
MAT 26:45 Nunik ataktú jintintaiji aidau jegantun: —¿Atumek ayamkugmek kají batsatjum? Yamaik horak jegawai, Aentsmaga akiinauwa nuna tudaugtin aidaunum sujukagtata nu.
MAT 26:46 Nantagtajum weagmi, mina sujuta duka tikiju minawai, tiuwai.
MAT 26:47 Tusa Jesús eke chichaak wajai, Judas doce aina nuiya, kuashat aents espada, numi aidaun takuinaku sacerdote apuji nuigtú judío apuji aidau ishiakbaujai tajuntau.
MAT 26:48 Judas Jesusan sujukua nu: “Wi kugkuastatag nu atatui, nu achiktajum”,
MAT 26:49 tiu asa Jesusan jegantun: ¡Maestro pujamek! takug kugkuasu.
MAT 26:50 Tutai Jesús ayaak: Kumpajuh, ¿wagka miname? Taunak jegaantag Jesusan achikajui.
MAT 26:51 Nuna dutikiagtai Jesusa jintintaiji aina nuiya espadajin ukuini juakug, sumo sacerdote inake kuwishin tsupigkauwai.
MAT 26:52 Dutikamtai Jesús chichajak: Espadajum jukim awajata, ashí aents espadajai magkagtauk, espadajai maam agtinai.
MAT 26:53 ¿Dekatsmek, wi mina Apajun segamak yamaiya juik doce nagkaesau legión ángel aidaun ishitjumaina duka?
MAT 26:54 Tujash nu nunitaish, ¿wajuk uminmaina ainawa Agagbau aina nui aatus nuniktinai tibauwa dusha?
MAT 26:55 Tusa Jesús aents tuwakun chichajak: —¿Wagka kasa achiktasa utugmaina imanikjumesh espada, numi aidau takusjumesh achigkatasagmesh minitjagme? Wi kashí kashinig jega Apajuí ememattainum atumin jintinnujim nuniakuish, jutikagmek achigkachu ainagme.
MAT 26:56 Tujash ashí ju juniajum juka, profeta aidau agagbau aina nunú uminu asamtai juniagme. Nuna taig, ashí niina jintintai aidauk pisainak ukukiajui.
MAT 26:57 Jesusan achikag jukiaju aina nu, Caifás sumo sacerdote jeen ejegawajui, maestro chicham umiktinun jintinkagtin aidau nuigtú tikich apu aidaujai ijunag batsatbaunum.
MAT 26:58 Tujash Pedrok ikaag pataetus wea weakua sumo sacerdote agaajin jegauwai. Nunik wayá achijatin aidaujai ekeemsau, wajuk inagnakagtig tusa diistatus.
MAT 26:59 Sacerdote apuji aidau, ashí apu chichaman inagnau aidaujai egatuidau, Jesusan tsanumjujag maatnume tusa sujukagtatus;
MAT 26:60 tujash ejetichaju kuashat aents wainak tsanumjuinakush. Nuninai inagnamunum jimag aents tsanumjugtin taawaju,
MAT 26:61 nunikag: Ju aents chichaak: “Wika jega Apajuí ememattaiya juna tegakan, kampatum tsawantai ataktú jegamainaitjai timayi”, tuidau.
MAT 26:62 Tiagtai sumo sacerdote wajakí iniak: —¿Wagka machikish aimtsume? ¿Nunash wajinbauna tujamainawa? tau.
MAT 26:63 Tamashkam Jesusak chichaachu. Nunitai sumo sacerdote chichajak: —Apajuí iwaakua nuna daajin tajame, ame dekas Cristo, Apajuí Uchijiyaitkumek dekas ujajatkata, tau.
MAT 26:64 Nu tama Jesús ayaak: —Duka ame tiume, nuigtushkam tajime, yamai nagkamsajum Aentsmaga akiinauwa nu Apajuí ashí senchigtina nuna untsujin eketu tsawan uminkamtai, nayaimpinmaya yujagminum pachitkau minau waitkatnaitjume, tiuwai.
MAT 26:65 Nuna tutai sumo sacerdote ni nugkuagbaujin japikí ichigká chichaak: —¡Apajuin pegkegchaun chichagkae! ¿Nuigtush ya etsegtukti tusaya atsumaji? ¡Yamaik atumshakam Apajuin pegkegchau chichagka nu antukugme!
MAT 26:66 ¿Atumesh wajuk anentaimtagme?, tau. Tutai dita aiinak: —Aanka mantamnamainai, tiajui.
MAT 26:67 Tiagtai yapinum usukinak ijuidau: Nuniai tikich aidauk yapinum awatuinak:
MAT 26:68 —Cristo dekakia, ¿ya awapime?, tuidau.
MAT 26:69 Pedro jegá agaajin ekeemtatman, makichik nuwa inak jegantun chichajak: —Amesh Jesús galileanmayaya nujaimpap wekaemume, tau.
MAT 26:70 Tujash nigka ashí aents aidaun eemtin uwau, nuniak: —Dekatsjai, wají takumes tame, tiuwai.
MAT 26:71 Nuna tusa waitinum jiintatman tikich nuwa inak wainak, nui aents ijunun ujaak: —Ju Jesús nazaretnumiaya nujai wekaenuwejama, tau.
MAT 26:72 Tujash Pedrok ataktushkam: —¡Dekas tajai, wika au aentsnak wainchaujai!, tau.
MAT 26:73 Machik asag aents nui batsatu Pedron jegaantag: —Dekaskenum amesh dita aina awiyayapitme, ame chichamjuminig dekagme, tuidau.
MAT 26:74 Tama Jesusan pegkegchaun chichajak nuigtú Apajuí adaiyas: —¡Wika au aentsnak wainchaujai! tau. Taig atash shinukui,
MAT 26:75 nunikmatai Pedroshkam adeaju Jesús chichajak: “Atash eke shinatsaig kampatumá ugtuktinaitme” tibauwa nuna. Nunik nuiya jiinki senchi kajeká buutiuwai.
MAT 27:1 Tsawagmatai, ashí sacerdote apuji aidau, judío apuji aidaujai Jesusan chichaman umigkajui mantamnati tusag.
MAT 27:2 Dutikawag jigkajá jukiag, apu Poncio Pilato pujamunum ejegawag susajui.
MAT 27:3 Judas, Jesusan sujukua nunú, maawagtatus imatikiagtai wainak, anentai idajuk sacerdote apuji aidaun tikich apu aina nuna treinta kuichkin awagtak:
MAT 27:4 —Wika tudau takasjai, pegkegchau takasbaujish atsujaig maatajum tusa sujuku asan, tau. Tama dita aiinak: —¿Iish dusha utugkatjiki? Duka aminuajamah, tiaju.
MAT 27:5 Tiagtai Judas kuichkin nagkimá jega Apajuí ememattainum ukuak, wee kajemjauwai.
MAT 27:6 Dutikamtai sacerdote apuji aidau kuichkin jukiag: —Ju kuichkia juka ofrenda egketaiya nuig egkemaitsui, aents mantamnati tusa akikmatkamu asamtai.
MAT 27:7 Tusag chichasag nunú kuichkia duik, “Duwé takau nugke” tutain sumakajui, aents tikich nugkanmaya jaidaun ukustinun.
MAT 27:8 Nuadui, nunú nugka duka yamaikish “Nugka numpeagbau” tutaiyai.
MAT 27:9 Aatus uminkauwai profeta Jeremías: “Jukiaje treinta kuichkin Israela uchijí aidau akike apujtusbaun,
MAT 27:10 dutikawag sumakaje duwé takauwa nuna nugkeen, Apajuí tibauwa dutiksag” tawa nunú.
MAT 27:11 Jesusa jukiag gobernadora eemtin ejegawajui, dutikawagmatai iniak: —¿Amekaitam Rey judío aidaunu?, tau. Tama Jesús ayaak: —Duka ame tujutme, tiuwai.
MAT 27:12 Tuja sacerdote apuji aidau, tikich apu aidaujai bakutatus etsegtuidau, imatjamash nigka makichkish chichaachu;
MAT 27:13 nunitai Pilato chichajak: —¿Antatsmek kuashat wajiin pachis imatjutpaina duka?
MAT 27:14 Tamashkam Jesusak makichik chichamnakesh aikchau. Nunitai apuk shiig anentai jegagchau.
MAT 27:15 Tuja apuk fiestatinig aents achikbau aina nuiyan makichik jiisagké au, aents aidau nu jiinkiti tusa mamikiamua nuna.
MAT 27:16 Nuniamunum Jesús Barrabás daagtinchakam pegkegchaunum wantinjau achikam egketu.
MAT 27:17 Nunin asamtai aents aidau nui ijuntatman Pilato iniak: —¿Yana jiiktí tusagmea wakegagme, Jesús Barrabasnak jiiktatag atsa Jesús, Cristo daagtina nunaká jiiktatag?, tau.
MAT 27:18 Nunak kajejuidau asag sujukaja nuna dekau asa tiuwai.
MAT 27:19 Nuna tusa Pilato chicham epegkatasa ekeemtaijin eketai, niina nuwe chichaman awetak: “Amek aanú aents pegkejan takauwa nuig pachinkaipa. Wi ishamainun kajamjamjai yamai, aanú imatikamunum”, tiu.
MAT 27:20 Tujash sacerdote apuji aidau nuigtú tikich apu aidaujai, aents tuwaká ijunun anentain egketuawaju, Pilaton segatí Barrabás jiintai Jesús mantamnati tusag.
MAT 27:21 Ataktushkam Pilato ditan iniak: —¿Ju jimaja juiyanash, yana akupkati tusagmea wakegagme?, tau. Tutai dita aiinak: —Barrabás akupkata, tuidau.
MAT 27:22 Tiagtai Pilato ditan iniak: —¿Tujash Jesús, Cristo tajum junash utugkatjaki? tau. Tutai ashí pampaajag: —¡Anka achinjati! wajaidau.
MAT 27:23 Tiagtai apu ayaak: —¿Tujash jusha wají pegkegchauna takasé?, tau. Tutaishkam nuní senchi untsumkag: —¡Anka achigtá! wajaidau.
MAT 27:24 Pilatok makichkish niinak antujuinatsu nuna wainu asa, ayatak nuní senchi pampaidiagtai yumí utugtitnume tusa inamjau, nunik ashí ditá eemtin ikigmak: —Wika agkantaitjai, ju aents pegkegma nuna numpe ukaemainnumag; atum diistajum, tau.
MAT 27:25 Tutai ashí aents pampaajag: —Ni mantamnamua duka jutiiní nuigtú ashí ii uchijí aina nui juakti, tiaju.
MAT 27:26 Tiagtai Barrabasan jiikiu, dutika Jesusnak asutiawagmatai, achigtinme tusa sujukui.
MAT 27:27 Dutikamtai apú suntaji aidau Jesusan jukiag apú pujusá inamtaijin ejegawagmatai, ashí suntag ijuntujaju ni wajamunum.
MAT 27:28 Nunikag jaanchin awitkag tikich jaanch kapantu nentetkaun anugjaju.
MAT 27:29 Dutiksag atsejutain jagkin najatuawag Jesusan atsemitkakag, uwejí untsujin numin achimtikag, niina eemtin tikishmatjag dushikinak: —¡Juuwai Rey judío aidaunuk! awajuidau.
MAT 27:30 Imatjuinak usukidau, dutikainak numi atakuamujin jujukiag buuknum awatuidau.
MAT 27:31 Dutikainak dushí dushikinakua jaanch anugjamunak awituk, ni nugkutaijinak anugjag juki emajui achijagtatus.
MAT 27:32 Jiinkamag, yaakat cirenenmaya Simón daagtinun wainkag, Jesús achigtinun cruzan yanaktí tusag susajui.
MAT 27:33 Nunikag Gólgota tutainum jegantajui, (“Gólgota” tawa duka, “Buuké Sakamtai” taku tawai.)
MAT 27:34 Nui ejentag, Jesusan vino chujuau dupa yapaujai pachimjamun uwagti tusag susajui. Nu susam apas dekapes idaisauwai.
MAT 27:35 Dutika achijag, suntag aidauk Jesusa jaanchjinak yana kayají jiintukne nuna diisag akandaikajui.
MAT 27:36 Nunikag pekaamsag dii batsamtuidau.
MAT 27:37 Tuja wajuk asamtaiya achijaje nuna pachisag agajag chaiken anujtukaju: “JUUWAI JESÚS, REY JUDÍO AIDAUNU”, tusag.
MAT 27:38 Nuigtushkam jimag kasan niijai achijajui, makichkia nuna untsujin awajainak, tikichia nunak menajin awajawajui.
MAT 27:39 Tuja nui aents nagkaemaidauk, buuken pegajag pegkegchau chichajuidau, nuninak:
MAT 27:40 —¡Ame, jega Apajuí ememattai tegakam kampatum tsawantai ataktú jegamainaitjai tinumjamah, akaikim uwemjakia! ¡Dekas Apajuí Uchijiyaitkumek, cruznum nematsuk akaikita!, tuidau.
MAT 27:41 Dutiksag sacerdote apuji, maestro chicham umiktinun jintinkagtin aidau nuigtú tikich apu aidaujai ijunag dushikinak:
MAT 27:42 —Tikich aidaunak uwemtiknuwe, tujash nigkig uwemain dekapeatsui. Nuigtush Israela Reyjiyai, nunin asa yamai cruznum deta nuna akaikimtai, niinig dekaskeapi tiagmi.
MAT 27:43 Apajuin kajinas anentaimtinuwe, ni wakegakug yamai agkanmitkati, wagki Apajuí Uchijiyaitjai tumamnuwe dui, wajaidau.
MAT 27:44 Nunisag kasa aidaushkam Jesusjai achijam detaidaush pegkegchau chichajuidau.
MAT 27:45 Etsa tutupit ai nagkamas, a las tres wegaish ashí nugkanum suwe wajas asauwai.
MAT 27:46 A las tres jegattak weamunum Jesús senchi untsumak: “Elí, Elí, ¿lama sabactani?”, tiuwai. (Nunak: “Mina Apajuijuh, mina Apajuijuh, ¿wagka idaitusume?” taku tiuwai).
MAT 27:47 Ujumak aents nui ijunaidauk nuna antukag: —Eliasan untsuawai, tuidau.
MAT 27:48 Tusa taig, ijuna nuiya makichik tupikaki esponja juki vino chujuaunum ajugká tagkanai aapi Jesusan uwagti tusa iwagkau.
MAT 27:49 Dutiktai tikich aidau chichainak: —Idaisakia, Elías uwemtijatatus minishtimpash wainkami, tuidau.
MAT 27:50 Tujash Jesusak ataktú senchi untsumak, jakauwai.
MAT 27:51 Nuniaig jega Apajuí ememattainum jaanch ejaamuk, yakiin nagkamnas ichiinak jimaituk kanakui. Nugkashkam ugkauwai imaniau asamtai kaya muun aidaushkam punjauwai;
MAT 27:52 Imanikmatai ukumatai aidauk ujaniajui, nunikmatai kuashat pegkejam jinau aidaushkam nantajajui;
MAT 27:53 nunikag ukusbaunmaya jiinjajui Jesús nantakiu ai, nunik yaakat pegkegma nui utsanawajui, nunikun kuashat aents wainkajui.
MAT 27:54 Tuja capitán tikich niijai ijunas Jesusan diyak ijunaidauk, uugbau imanikmatai nuigtú kuashat ishamain nagkaemajun wainkag, senchi ishamkag chichainak: —Dekaskenum juka Apajuí Uchijí aajakui, tuidau.
MAT 27:55 Nui nuwa aidaushkam ikaa ijunas dii ijuntuidau, Jesusan Galileanum nagkamsag saetusag yaijakú aina nunú.
MAT 27:56 Nu aina nuiya María magdalanmaya; María, Santiagon Josenashkam dukujiya nu nuigtú Zebedeo uchijí aina nuna dukují aatus wajaidau.
MAT 27:57 Kintamai arimateanmaya José daagtin wiyakuch, niishkam Jesusa jintintaiji aajakú asa tauwai.
MAT 27:58 Nunik Pilaton Jesusa iyashin segauwai. Tutai Pilatoshkam Jesusa iyashin susatnume tiuwai.
MAT 27:59 Tuja Joseshkam Jesusa iyashin juki, dekas sábana pegkejai pempeajui,
MAT 27:60 dutika ukumatai yamá kaya taimunum awayá kaya muuntan apapetug waajin epeti ukuak weuwai.
MAT 27:61 Tuja María magdalanmaya tikich María aatus, Jesús ukusbaunum jegantag eketaidau.
MAT 27:62 Kashinia nu, tsawan ayamtai tsawagtin asamtai, sacerdote apuji aidau nuigtú fariseo aidaujai Pilaton jegajuawag:
MAT 27:63 —Apuh, adeagji wait aaya nunú, iwaaku pujus chichaak: “Kampatum tsawan asan nantaktinaitjai”, tuuyi.
MAT 27:64 Nuniau asamtai, awemata aents ukusbauwa nuna kampatum tsawantai shiig kuitamkatin, dutikashmak niina jintintaiji aidau kashi kautuawag iyashin jukiag, aents aidaun ujainak: “Jakabia duka nantakne”, tiagtatui. Nuna aatus tuinakug yama nagkamchaku waitjuamua nuna nagkaesau waitjuawagtatui, tuidau.
MAT 27:65 Tusa tiagtai Pilato ayaak: —Anú suntag aidau kuitamkatnume, wejum wajuk wakegagme dutiksagmek umiktajum, tau.
MAT 27:66 Timatai ditashkam wegag ukusbau kaya apujtukbaunak shiig asakug, nui suntag kuitamkatin aidaunashkam batsatkiajui.
MAT 28:1 Tsawan ayamtai nagkaemaki tumig tsawagmatai, María magdalanmaya, tikich Mariajai Jesús ukusbaun diisagtasag weaju.
MAT 28:2 Nuniamunum senchi ugkauwai, wagki Apajuí angelji nayaimpinmaya akaegu asamtai, nunik taak kayan ekek ni nui ekeemsauwai.
MAT 28:3 Nuna niimeg peemjai betek, jaanchjish puju nieve tutaya iman aajakui.
MAT 28:4 Imanun wainkag suntag kuitamak batsatuk ishamak kujagkag, jakaujai betek kakekajui.
MAT 28:5 Nunikaju ai, ángel nuwa aidaun chichajak: —Ishamkaigpajum, wika dekajai atum Jesusan achijagma nu egajum nunak.
MAT 28:6 Juig atsawai, nigka nantakne ni timaya nunisag. Jui tantajum Apu Jesusan ukusagma nunú diistajum,
MAT 28:7 nunikjum wamak wejum: Jakama duka nantakne, tusajum niina jintintaiji aidau ujaktajum. Nigka, niiyá eemak Galilea wetatui, awi wainkagtatui. Juna titajime timajai, tiuwai.
MAT 28:8 Nu tima nuwa aidaushkam, ukusbaunmaya jiinkiag ishamainayatak shiig aneasag tupikaidau, Jesusa jintintai aidaun chichaman ujakagtatus.
MAT 28:9 Nuniai Jesús wantintuk ditan kumpamauwai. Tuja ditashkam Jesusan jegaantag dawenum pagkukag emematuidau.
MAT 28:10 Dutikam Jesús chichajak: —Ishamkaigpajum; wejum mina yatsug aidau ujaktajum Galilea minitnume, awi minak waitkagtatui, tiuwai.
MAT 28:11 Nunikag nuwa aidauk weenai, ujumak suntag nuna kuitamaidau yaaktanum wegag, sacerdote apuji aidaun dita wainkamunak ashí ujakaju.
MAT 28:12 Tusá ujakajam weajui apu aidaujai ijunjag chichaman shiig umikagtatus. Nunikag kuashat kuichkin suntajan susaju.
MAT 28:13 Dutikainak: Atumek aajajum etsegkatajum: “Jutii kajigká batsatjin jintintaiji aidau kashi kautuawag kasamkagmae titajum”,
MAT 28:14 tuja gobernador dekamtaishkam jutii tiagtatji, dutikaku atumnak ayamjuktatjime, tiaju.
MAT 28:15 Tiajam ditashkam kuichkin jukiag, dita titajum tusa akatjamunak imatiksag tuidau. Jujú tibauwa nunak yamaikishkam judío aidauk dutiksag tinu ainawai.
MAT 28:16 Tuja Jesusa jintintaiji once aina duka Galilea weajui, Jesús nunú mujanum minitnume tibaunum.
MAT 28:17 Nunikag Jesusan wainkag emematuidau, tujash ujumak utujimushkam asaju.
MAT 28:18 Jesús ditá jegantun chichajak: “Ashí nayaimpinmaya aidau, nugkanmaya aidaushkam ame diistá” tusa mina Apag sujusé,
MAT 28:19 nunin asamtai, wetajum nunikjum atum jintintuatajum ashí nugkanmaya aidaush, nuniakjum Apajú daajin, Uchijí daajin, Wakaní Pegkeji daaji pachisjum yamigtajum,
MAT 28:20 dutikakjum ashí ju umiktajum, atumin tiuwaitjim dushakam jintintuatajum. Wika ashí tsawantai, nugka nagkanbau atina duish atumjaig tuke pujutnaitjai. Aatus atí.
MAR 1:1 Jesucristo Apajuí uchijiya nu pachisa yamajam chicham etsegbauwa nu nagkamnamu.
MAR 1:2 Profeta Isaías agagbaunum: “ ‘Wi mina chichamjun etsegnun emtikan awemajai, ni jintanak umigtamkati tusan’.
MAR 1:3 ‘Makichik chicham uwegshunum untsubau antuewai’: ‘Apu minitin jinta iwajatajum, jinta tutupit dakuektajum, tibauwa nu uminkauwai’ ”.
MAR 1:4 Aatus asamtai Juagshakam uwegshunum aentsun yamiau, nuniak etseju tudau idaiyinak yamimajag tudau aidaun tsagkugnagtinme tusa.
MAR 1:5 Nuna antukag ashí yaakat Judea nugkanmaya aidauk, ashí Jerusalegnumia aidaushkam kautuidau. Nunikag ditá tudaujin etsegtumagtai Juagshakam Jordagnum yamiau.
MAR 1:6 Juagká nugkutaijig camello uje najanamu, akachumtaijish duwap aajakui, tuja langostan nuigtú dapá yumijin yuujakui.
MAR 1:7 Juan aents aidaun chichajak: “Mina ukujui minittawai dekas mina nagkaetasu senchigtin. Wika nuna sapatjinak tsuntsumtuankesh jigkatuamunak atitmaitsujai niiya imanchau asan.
MAR 1:8 Wika ayatak yumiik yamigmajime, tujash nigka Wakaní Pegkejiya dui yamigmagtatjume”, tau.
MAR 1:9 Nunú tsawantai Jesús Nazaret, Galilea nugkanum awa nuiya jiinki jegauwai, nunikmatai Juan Jordagnum yamijui.
MAR 1:10 Dutikam yuminmaya jinkamá, Jesús wainkauwai nayaim ujanmatai, Wakaní Pegkeji pauma nunin niiní akaetatman.
MAR 1:11 Nuniai nayaimpinmaya chicham antuekau: “Ametme mina uchig aneetaigmek, dui aminig shiig aneajai”, tabau.
MAR 1:12 Juna timatai Wakaní Pegkeji uwegshunum emauwai.
MAR 1:13 Nui cuarenta tsawan pujusui, nunittaman Iwanch pegkegchaunum dekapsauwai. Kuntin kajen aidau batsatbaunum pujau; tuja ángel aina nu Jesusnak kuitamaidau.
MAR 1:14 Juagkan achikag egkeawaju ai, Jesús Galilea weuwai yamajam chicham Apajuinua nuna etsegkatatus.
MAR 1:15 Nuniak: “Tsawantak yamaik uminkae, Apajuí inamjatnuk tikijuch wajasé; tudau idaikujum, yamajam chichama ju dekaskeapi titajum”, tiuwai.
MAR 1:16 Jesús Galilea kuchají yantamen wekamá Simogkan, ni yachi Andresjai namakan main asag retan ajuntuinak yujattaman wainkau,
MAR 1:17 nunik Jesús: —Minitajum wi jintintuatjime, namak maatasajum yujagjum anmamtuk, Apajuí chichame etsegkujum aents aidau minai ikautjin atajum tusan, tau.
MAR 1:18 Tamawaik ditá redjinak ukuinak niijai weajui.
MAR 1:19 Nuwi nagkaemaki machik kuwaesag wekamá, Zebedeo uchijí Jacobo ni yachi Juagjai, barcajin chimpimas redjin apijuinak chimpimtatman wainkauwai.
MAR 1:20 Dutika nunashkam: —Weajai, mina jintintaig atajum, tiu. Tama ditashkam apají Zebedeonak ditajai takau aidaunak barcanum ukuinak Jesusjai weajui.
MAR 1:21 Capernaúm jegawajui, nunik tsawan ayamtai tsawagmatai Jesús jega ijuntainum wayá jintinkagtau.
MAR 1:22 Nunitai aents aidauk ni jintinkagtamujin puyatjuk diidau, wagki maestro chicham umiktinun jintinkagtin aidaun nagkaegas, apu chichame antugtai jintimaina imatika jintinkagtau asamtai.
MAR 1:23 Nuniamunum jega ijuntaiya nui, makichik aents wakan pegkegchau egkemtuamu eketu untsumak:
MAR 1:24 —¡Jesús nazaretnumiayah! ¿Wagka amesh jutii pujamunmash miname, ijijatuatasamek minam? Wika ame yaitpa nunak dekagme, amek pegkejam Apajuinuitme, tiuwai.
MAR 1:25 Tama Jesús wakan pegkegchaun jiyaak: —¡Takamtak jiinkim ju aentsuk ukuktá!, tiuwai.
MAR 1:26 Tamawaik wakan pegkegchaushkam aentsun waugmitkak nugká ajiajui, dutika shiig senchi untsumak jiinki ukukiuwai.
MAR 1:27 Nunikmatai ashí ishamkag, ditak pempeentunikiag: —¿Jusha yaita? ¿Jintiamujish yamagmajama, wajuku asaya chichamesh senchigtinaita wakan pegkegchau aidaush antujuina dusha?, tudayinau.
MAR 1:28 Nunú nunikbaunak wamak ashí galileanmaya aidauk dekawajui.
MAR 1:29 Nunik Jesusak jega ijuntainmaya jiinki Jacobojai nuigtú Juagjai, Simón nuigtú Andresa jeega nui weajui.
MAR 1:30 Simogka tsatsajig tsuweak pegakjin tepau, nunitai Jesusan ujakajui.
MAR 1:31 Tima Jesuschakam jegantun uwegnum achik inankiuwai; dutikamuik tsuweamunak megkaegak, Jesusan yutain umijuk ajamsauwai.
MAR 1:32 Kintamai, etsa akaikiu ai, ashí aents jau aidaun nuigtú iwanch egkemtuamu aidaunashkam Jesusan ikautkaju;
MAR 1:33 tuja ashí aents nui batsamin aidauk waitinmag tuwakaju.
MAR 1:34 Nunikagmatai Jesús kuashat aents ashí tikich jatai jau aidaun etsagakui, kuashat iwanch aidaunashkam jiijui; tujash iwanch aidaunak chichaktí tusag idaichau, wainainamu asa.
MAR 1:35 Tsawak eke suwe aig nantakí, jiinki aents atsamunum weuwai, nunik nui Apajuí auju.
MAR 1:36 Nunikmatai Simón ni kumpají aidaujai egaak weajui;
MAR 1:37 nunik Jesusan wainkag: —Ashí aents egapainawai, tuidau.
MAR 1:38 Tusa tama ni chichaak: —Wemí yaakat tikiju anem aina nui, awishkam chichaman etsegkatjai; wika nuna nuniktasan tauwaitjai, tau.
MAR 1:39 Nunik Jesusak ashí Galileanum makí makichik yaaktanum jega ijuntai aidaunum chichagkagtak, iwanch aidaunashkam jiijá ishimu.
MAR 1:40 Makichik aents lepra achikbau Jesusa jegantun tikishmag pujus: —Wakegakmek etsaentumainaitme, tau.
MAR 1:41 Tama Jesuschakam wait anentug uwejin antiak: —Wakegajai, pegkeg wajastá, tiuwai.
MAR 1:42 Tusa taig leprak megkaekauwai, nunikmatai pegkeg wajasui.
MAR 1:43 Tujash Jesús nuna shiig akateg ukuak:
MAR 1:44 —Nijah, makichik aentskesh ujakaipa; ayatak weme sacerdote wantintukta, nuniakum ofrenda jukita Moisés tibauwa dutiksamek, ame pegkeg wajasum nuna ditash waipaktinme, tiuwai.
MAR 1:45 Tujash nigka jiinki weak makichkish uutsuk ni tsagagbaujinak etse etsegkawa weuwai. Dutikau asamtai, Jesusak wantinak yaaktanmash waimainchau wajasú asa, aents atsamunum wekagu; nuniaig ashí yantamnumia aidau niina wainkatatus minituidau.
MAR 2:1 Ujumak tsawan pujus Jesús wakitki Capernaúm jegauwai; nunikmatai jega ni pujamujin dekajuawaju.
MAR 2:2 Nunikag kuashat aents aidauk jeganmag pimuidiaju, waitinum nagkamnasag tikichish wayachmin awajsaju. Imanikagmatai niishkam Apajuí chichamen etseju.
MAR 2:3 Nuniai cuatro aents aidau, aents wekaechaun jukiag itawaju.
MAR 2:4 Dutikawag kuashat aents asamtai, Jesús wajamunum jegamainchau asag, Jesús wajamun mamikis jegá tuntupen wakag chigkaidiag, wekaechauwa nuna camillanum aepsag akakiaju.
MAR 2:5 Dutikamtai Jesús niiní dekaskeapi tuidaun wainu asa, wekaechaun chichajak: —Uchijuh, amina tudaujum aidauk tsagkugnaje, tau.
MAR 2:6 Nuna tutai ujumak maestro chicham umiktinun jintinkagtin aidau nui pekajaidau ditá anentainig:
MAR 2:7 “¿Wagka jusha tuush chichawa? ¡Apajuin pegkegchau chichajak tu wekagajama! Imá Apajuikeajama tudaun tsagkugkagtumainuk”, tuidau.
MAR 2:8 Dita aatus anentaimainamujinak Jesús dekau asa: —¿Wagka aannush anentaimainagme?
MAR 2:9 ¿Tuwaita imá yupichuch wekaechauwa ju tumainush, amina tudaujum aidauk tsagkugnaje taja dukaih, atsa nantakim tepetaijum jukim wetá tumainaitag dukaih?
MAR 2:10 Tujash Aentsmaga akiinauwa nu, ju nugka juish tudau aidaunash tsagkugkagtumaina nu dekaatajum. Tusa wekaechaun chichajak:
MAR 2:11 —Amina tajame, nantakim ainká tepetaijum jukim jeemin wetá, tiuwai.
MAR 2:12 Tamawaik nantakug tepetaijin juki ashí wainainamunum jiinkiu. Nunikmatai ashí ditak anentai jegagchajui, nunikag Apajuin emematuinak: —Juninuk makichkish wainkachuitji, tuidau.
MAR 2:13 Dutika Jesusak ataktú weuwai kuchá tugkitken; nunitai kuashat aents niina jegajuidau, dutikam niishkam jintinkagtau.
MAR 2:14 Nui nagkaemakmá Leví Alfeo uchijin wainkauwai, apú kuichkiji atinun ijumin asa akikmagtai yajumak ekeemtatman, nunik: —Wegajai mina jintintaig aminum, tiuwai. Tama Levishkam wajakí Jesusjai weuwai.
MAR 2:15 Nunik Jesusak Leví jeen jegaa mesanum ekeemsau, kuashat apu romanmaya kuichkiji atinun ijumin aidau nuigtú tudaugtin aidaush, jintintaiji aidaujai ijunag niijai ekeemsajui, kuashat niina saetus yujaidau asag.
MAR 2:16 Nunittaman maestro chicham umiktinun jintinkagtin fariseo aina nu, Jesús ijunag yuwaun wainkag jintintaiji aidaun chichajuinak: —¿Wajukeakua niish apú kuichkiji atinun ijumin nuigtú tudaugtin aina ibaujaish ijuntug yuwakush, umutnash umawa?, tuidau.
MAR 2:17 Nu tabaun Jesús antuk ayaak: —Jamamtuchu aidauk ampijatnunak atsumatsui, jau aidau atsumawai. Wika aents pegkejan takau aidau untsuktasan minichuitjai, aents tudaugtin aidaunum, tauwaitjai.
MAR 2:18 Juagká jintintaiji aidau, fariseo aidaushkam ayuno takainak batsataidau, nuninai ujumak Jesusan jegantun iniinak: —¿Wagka Juan Yamijatna nuna jintintaiji aidauk, fariseo aidaujai ayuno takainaish, ame jintintaijum aidaush ayunonash takainatsua?, tuidau.
MAR 2:19 Tama Jesús ayaak: —¿Ipaamu aidaush nuwena nu ditajai pujaigkish ayunaumainkaih? Nuwenu ditajai pujaigkik ayunaumaitsui.
MAR 2:20 Tujash tsawan jegattawai nuwena nunú juwam atata nu, nunikmatai ipaamu aidaush wake besemag dekapenak ayunawagtatui.
MAR 2:21 “Makichik aentskesh jaanch yamagman tsupikag jaanch mamujunmag adujtuchu ainawai, yamajam asa waketak jaanch mamujua nuna nuní nagkaemas ichiimain asamtai.
MAR 2:22 Dutiksaik vino yamagmashkam duwap apagbau ajutnumag yajashtaiyai, dutikamak ichiimain asamtai, nunik vinok ukaegag, duwapshakam ichiinak ajapnamainai. Nuadui vino yamagmak duwap yamagmanum yajataiyai”.
MAR 2:23 Tsawan ayamtai tsawaju ai, Jesús trigo ajakbaunum wegau, nuniamunum niina jintintaiji aidau trigon kupig juidau.
MAR 2:24 Nuniagtai fariseo aidau wainkag: —Nijah, ¿wagka tsawan ayamtai aig takantsashti tibauwa nuniaish aikainawa?, tuidau.
MAR 2:25 Tusa tiagtai Jesús ayaak: —¿Atumek tuke ausachuk ainajum, David niijai yujaamujai yapajuinak dutikawajua duka?
MAR 2:26 Abiatar sumo sacerdote wajas pujai, jega Apajuí ememattainum wayauwai, nunik yuwauwai pag Apajuí anagkuamu imá sacerdotek yuwati tibauwa nuna, dutikak aents niijai yujaunash susauwai.
MAR 2:27 Tsawan ayamtaiya duka aents atsumau asamtai aikamui. Untsu aentsuk tsawan ayamtaiya nuiya umimain aina nuna umiktinme tichamui.
MAR 2:28 Nunin asamtai Aentsmaga akiinauwa duka, tsawan ayamtaiya nuna Apujiyai, tiuwai.
MAR 3:1 Jesús ataktú jega ijuntainum wayau, nuwi aents uwejí jaka ekeemkau pujau.
MAR 3:2 Nunitai dii ijuntuidau tsawan ayamtai aish etsagagchatpash tusag tsanumjugtatus.
MAR 3:3 Nuninaig Jesús aents uwejí jaka ekeemkaun chichajak: —Wajaktá nunikam ejapen wajantá, tiuwai.
MAR 3:4 Nuna ti, tikich aidaun chichajak: —¿Tsawan ayamtai aina nuish pegkejan dutikati atsa pegkegchaun dutikati tibaukaih; etsagautskek jakati tusa idaimainait?, tau. Tamash ditak aimainachu.
MAR 3:5 Nuna ti nui ijuntatman kajeká, wake besemag diisú antumtikmainchau asagmatai. Nunik nuna aentsun chichajak: —Uwejum dakuekta, tiuwai. Tama niishkam uwejin dakueku, nuniamuik uwejenig pegkeg wajasui.
MAR 3:6 Dutikamtai fariseo aidau, Herodesan aentsji aidaujai agaa jiinjag, Jesusan maatasag chichaman umigkajui.
MAR 3:7 Tujash Jesusak ni jintintaiji aidaujai kuchanum weajui, nuniai kuashat aents galileanmaya aidau, Judeanmaya aidaushkam,
MAR 3:8 Jerusalegnumiashkam, idumeanmaya aidaush, Jordagka amain batsamin aidaushkam nuigtú Tiro, Sidón aina nuwi tikiju batsamin aidaush minitiajui, Jesús kuashat iwainaka takaamun antukaju asag wainkagtatus.
MAR 3:9 Nuniau asamtai, Jesusak ni jintintaiji aidaun, kuashat aents kaunainak chanuntuawainum tau asa barca yaijan shiig umis asatnume tusa ujakajui;
MAR 3:10 wagki kuashat jau aidaun etsagau asamtai, ashí najaimak waituidauk niina antigkagtatus awagkemtuidau asamtai.
MAR 3:11 Tuja wakan pegkegchau aidauk Jesusan wainkag, niina eemtin tikishmajag, senchi untsumkag: —Amek Apajuí Uchijiyaitme, tuidau.
MAR 3:12 Tujash Jesusak senchi jiyau, dekajuawainum tau asa.
MAR 3:13 Nunik Jesús mujanum wakauwai, nui untsukui ni wakegamu aidaun, dutikam niiní kauntajui.
MAR 3:14 Dutika nuanuiyan etegjauwai doce, nunú aidaunak apóstol tusa adaijauwai tuke niijai ijunja wekaesatin aidaun, niina chichame etsegkati tusa ishiaktinji aina nuna,
MAR 3:15 dutikak wakan pegkegchau aidau egkemtugbau jiiktinnashkam senchijin susauwai.
MAR 3:16 Doce etegjamua duka ju ainawai: Simón, Pedro atatme tibauwa nu,
MAR 3:17 Jacobo ni yachi Juagjai, Zebedeo uchijí aidaun Jesús Boanerges adaikajua nu (nunak “ipamta uchijí aidau” taku tawai),
MAR 3:18 Andrés, Felipe, Bartolomé, Mateo, Tomás, Jacobo Alfeo uchijí, Tadeo, tikich Simón cananeo tutai aajakua nu,
MAR 3:19 nuigtú Judas Iscariote Jesusan sujukua nunú.
MAR 3:20 Nuna dutika Jesús jegá wayauwai, nunikmatai ataktushkam aents aidau tuwagkag yujumkash yumainchau awajuidau.
MAR 3:21 Nuna antukag Jesusa patayí aidau jukitasag kautuawaju, anentainkachu wajas wekaetsuash tuidau asag.
MAR 3:22 Maestro chicham umiktinun jintinkagtin aidau Jerusalegnumia kaunawaju aidau chichainak: “Beelzebú, iwanch aidau apujiya nuna senchijin iwanch aidaunak jiyawai”, tuidau.
MAR 3:23 Tiagtai Jesús ditan untsuká, augmatbaun pachis ujaak: ¿Utugkaya iwanchish, iwanchnash jiimainaita?
MAR 3:24 “Makichik nugkanmag batsatiatak pempeentuniki maaní batsatkug megkaemain ainawai.
MAR 3:25 Tuja makichik jeganmag ijunag batsatiatak pempeentunikiag maaní batsatushkam megkaemain ainawai.
MAR 3:26 Aantsag Iwanchia dushakam pempeentuniki, maaniakug, megkaemain ainawai, nuniakug nagkanbauji jegajim nunimainai.
MAR 3:27 “Aents senchigtina nuna jeen wayag makichkish wajiijinak yajutmainchau ainawai nuna jigkatskek, untsu nuna jigkajá wajiijinak yajutmain ainawai.
MAR 3:28 “Dekas tajime, Apajuik ashí aentsú tudaujinak tsagkujatnai, niina pegkegchau chichagkau aidaunashkam,
MAR 3:29 tujash Wakaní Pegkejin pegkegchaun chichagkau aidauk, tuke tsagkugnagchatnai, ajumaish tudaujig tuke atinai”.
MAR 3:30 Nunak Jesusak: “Wakan pegkegchau ajawai” tibau asa tiuwai.
MAR 3:31 Nuna tusa inagnaku ai Jesusa yachi aidau dukujijai kautuawaju, nunikag agaag ijuntsag, untsugtuktajum tiajui.
MAR 3:32 Tuinam Jesusan tenteawag pekajuidau ujainak: —Amina duku, yatsum umaim aidaujai agaa ijunas egapainawai, tuidau.
MAR 3:33 Tusá ujaam ni ayaak: —¿Yaita mina dukug, mina yatsug aidaush?
MAR 3:34 Nuna tusa nui pekajuidaun ayampatua: —Jujú ainawai mina dukug, mina yatsug aidauk.
MAR 3:35 Ashí aents Apajuí wakejamun takaina nuuwai mina dukug, mina yatsug, mina ubag aidauk, tiuwai.
MAR 4:1 Jesús ataktú kuchanum uwet jintinkagtau nunitai shiig kuashat aents tuwagkaju, nunikmatai barca kuchanum nanatunum egkemag ekeemsau, nuniai aents aidauk kuchá uwet kaamatak ijunaidau.
MAR 4:2 Nunik kuashat wají aidaun pachis augmatus jintinkagtak:
MAR 4:3 “Antuktajum, ajakan ajakbau ajakmatatus weuwai.
MAR 4:4 Nunik jegantá ajajin jigkai nagkimam jintá kakekaunak, pishak kaketuk amukui.
MAR 4:5 Tikich jigkai kayagnunum nugka imanik atsamunum kakekauwai, nu nunikuk wamkes tsapaidiajui, wagki nugkak awankauch asamtai;
MAR 4:6 nuniktatman etsa jiinak, kagkapé initak akaejachu asamtai apeká ijinauwai.
MAR 4:7 Tuja tikich jigkai jagki ayaunum kakekaunak, jagki tsapainak yutuawajui, dutikamu asa nejeachui.
MAR 4:8 Tujash tikich jigkaik nugka pegkegnum kakekajui, nunikajuk tsapaidiag, tsakajag shiig nejekajui, ni treinta nejeai, tikich sesenta, tikich cien aatus nejekajui”, tau.
MAR 4:9 Nuna tii nuigtushkam: “Ni antutaiji ajamuk antukti”, tiuwai.
MAR 4:10 Nigki juwakmatai, niijai juwakajua nu doce aina nujai inidau ajak augmattsa tibauwa nuna pachis.
MAR 4:11 Tama ni ayaak: “Atumnak Apajuí dekamtijamui ni inabauji dekajakchamua nuna; tujash tikich aina nunak ashí augmatbau pachisan tajai,
MAR 4:12 imanik wainainakush wainmachu wajukmaina nuniktinme, kuashat antuinakush antachu wajukmaina nuniktinme, nunidau asag yapajinashtinme nunitai tudau aidaujish tsagkugnagchatnume tusan”, tiuwai.
MAR 4:13 Junashkam tiuwai: “¿Atumek jujú augmattsa tabauk dekatsjumek? ¿Aniautigmesh ashí wi augmattsan takuish, wajuk dekattagme?
MAR 4:14 Ajakan ajakbauwa duka chichaman ajakma nuuwai.
MAR 4:15 Ajaka jigkayí jintá kakekauwa nunin aina duka juninai: yamaikik chichaman antittaman wamak Iwanch tajua chicham ditai ajakmamua nuna sakapitkawai.
MAR 4:16 Tikich aidauk ajaka jigkayí kayagnunum ajakmamua nunin ainawai: chichaman antukag yamaikik shiig wakegas antuinawai,
MAR 4:17 tujash nu ajakak kagkapenachu asa ebetmamtsui; numamtuk utugchat minitmash nuniachkush Apajuí chichamen umidau asag waitkainam wamkes idaiyinawai.
MAR 4:18 Tikich aina duka ajaka jigkayí jagki ayaunum ajaamua nuninai: chichamnak antawai,
MAR 4:19 tujash ju nugkanmaya takat aina nuna imá senchi uyumainak, wiyakchameata tabaujiya nu tsanuinam nuigtú ashí wají ajuttí tusa senchi wakegamujiya nu egkemtam chicham antukbaujinak sakapag ajak nejemainchauwa nunin weawai.
MAR 4:20 Untsu jujú ainawai nugka pegkegnum ajamua nunin aina nu: chichaman antukag, jukiaju aidauk makichik ajak treinta jigkain, sesenta, cien aatus nejeawajua nunin ainawai”.
MAR 4:21 Junashkam chichaak: “¿Lámpara ekemakaish, dukukaik dutikachkuish pegaká wakentinig aputayama? ¿Dutiktsuk yakí ekenchataigkama?
MAR 4:22 Nunisag, ashí uukbau aidaush wantintsuk juwaktinuk atsawai, antsag ashí dekaachbau aidaushkam dekaamu agtinai.
MAR 4:23 Ni antutaiji ajuinamuk antuktinme”.
MAR 4:24 Junashkam tiuwai: “Shiig antuktajum, tikichish utujagme dutiksagmek atumesh dutikam atatjume, antuidautigmek aan nagkaemasa eketam atinaitjume.
MAR 4:25 Wagki kuashat ajá duka nuní dukap suwam atinai; untsu piipich ajamua dusha, nu piipich ajamua dukesh atantam atinai”.
MAR 4:26 Junashkam Jesús tiuwai: “Apajuí inabaujiya duka, aents jigkain nugká ajaa nuninai,
MAR 4:27 nunik ajaa kanak tepaish tuja iwaa pujaishkam kashi tsawai aish jigkaik tsapaawai, nunik tsakawai ajauwa duka wajuk tsakaawa nunak dekatsaig.
MAR 4:28 Nunak nugka nigki nejemtikamu asa nuniawai, dekatkauk dupaya nunin wee, tsakaak pasamjawai, nunik pasamega nui ayatak jigkaik weawai.
MAR 4:29 Nunik jigkayí tsamakmatai hozan juki jiintawai juuktatus, tsawan juumainji jegau asamtai”.
MAR 4:30 Junashkam Jesús tiuwai: “¿Apajuí inama dusha wají pachisaiya nuninai tumainaita, nuniachkuish wají augmatbaujaiya apatkaish tumainaita?
MAR 4:31 Duka mostaza jigkayí nugká ajatiama nuninai. Ashí nugkanmaya jigkai ajakmatai aina nuna nagkaesau shiig piipichi,
MAR 4:32 tujash ajaam tsakaakug ajak nugkauchik nejen aina nuna nagkaegas tsakawai, nunik kanawe muun wajasmatai yakiya pishak aidaushkam nuna wakentí bikintunum pasugmau ainawai”.
MAR 4:33 Tusa Jesusak kuashat augmatbaun pachis jumamtin aidaun jintinkagtujakui, dita wajuk antumaina ainawa dutiksag.
MAR 4:34 Augmatbaun tutsukek aents aidaunak aujujakchauwai, tujash jintintaiji aina nunak ditanak akanki ashí jintias ujajakui.
MAR 4:35 Nunú tsawantai kiyagbaunum Jesús jintintaiji aidaun chichajak: —Amain weagmi, tiuwai.
MAR 4:36 Timatai aents aidaunak ukuinak, Jesús barcanum egketunak dutiksag jukiag weajui. Nuniai tikich barcanum minidaush aidau.
MAR 4:37 Nunik weenai dase senchi kuchan umpuak tsukatmitkau, imaniau asa barcanmag yumik bete wajasú.
MAR 4:38 Tujash Jesusak barca ukujin atamjutain atamjuk kanag egketu, nunittaman ishintainak: —¡Maestro! ¿Amek puyatkagtatsmek jutii jakektatag duka?, tuidau.
MAR 4:39 Tama nantakí dasen jiyak idaiyak, kuchanashkam: —¡Mijakta! ¡Jasá asata!, tiuwai. Tamawaik daseshkam mijaku, nunikmatai kuchashkam wiyaku wajasú.
MAR 4:40 Nuna dutika niina jintintaiji aidaun chichajak: —¿Wagka sapigmajume? ¿Dekaskeapi tabauk atsugtamainawak?, tau.
MAR 4:41 Nuna dutikamtai shiig senchi puyatkaju, nunikag ditak pempeentunikiag: —¿Jusha yaita dasesh, kuchash antujam awa dusha?, tudayinau.
MAR 5:1 Kuchá amain katigkajui gadaranmaya batsamtai nugkeen.
MAR 5:2 Nunik Jesús barcanmaya jiinaig, ukumatainmaya aents wakan pegkegchau egkemtugbau tajuauwai.
MAR 5:3 Nunú aentsuk ukumatainum pujú, makichkish cadenayaikish jigkamainchau.
MAR 5:4 Kuashtá cadenayai uwejin jigkajá, dawenum jigkajá awajkamash tsujiag utsau, imaniau asa makichkish depetmainchau.
MAR 5:5 Nuniak tuke kashi tsawaishkam mujanum, ukumatainmash wekaegas untsumá wekagu, nuigtush kayai ijumak tsupimag wekagu.
MAR 5:6 Nuniau Jesusan atushat wainmawaik, tupikatki jegantun tikishmatjau.
MAR 5:7 Nunik senchi untsumak: —¡Jesusah, Apajuí ashí tikich aidau nagkaesau muunta nuna uchijiyah! ¿Wagka amesh minaish miname? Apajuí daajin segajame, ¡wait aneasam waitkagkagtusaipa!, tau.
MAR 5:8 Nunak Jesús: —Wakan pegkegchauwah, aents jiinkim ukuktá, tibau asa tiuwai.
MAR 5:9 Tutai Jesús iniak: —¿Amesh yaitpa?, tau. Tama ni aiimak: —Wika Untsujiyaitjai, wagki jutiik kuashat asaja, tiuwai.
MAR 5:10 Nuna tii senchi segau Jesusan tikich nugkanum aweti tusa.
MAR 5:11 Mujanum tikiju kuashat kuchi dupaan yuwinak yujau asamtai,
MAR 5:12 ashí wakan pegkegchau aidau Jesusan segainak: —Kuchi batsata awi awekagtita, kuchinum wayawagmi, tuidau.
MAR 5:13 Tutai Jesuschakam nuniktinme tusa idaisauwai. Dutikam wakan pegkegchau aidaushkam jiinjag, dos mil kuchi tumain batsatunum utsanawajui. Dutikawajam kuchishkam pisajag betsag tajagak kuchanum najataunum utsanawag jinawajui.
MAR 5:14 Nunikagmatai kuchí kuitamin aidaushkam pisajaju, nunikag yaaktanum jegawag etsejuinak, ajanum batsataidaunash dutiksag ujakajam, aents aidaushkam nu nunikbaun diisagtatus shimutkaju.
MAR 5:15 Nunik Jesús pujamunum jegakmag, wakan pegkegchau untsují chimpimtuamu aajakushkam pegkeg wajas, jaanchin nugkujá eketun wainkag, senchi ishamkajui.
MAR 5:16 Nuna wainkau aidau tikich aidaunashkam ujaidau, aents iwanch chimpimtuamu tsagajun nuigtú kuchi jinaamun pachisashkam.
MAR 5:17 Tiagtai Jesusan segajui, ditá nugkenak ukuak, yajá weti tusag.
MAR 5:18 Jesús waketak barcanum egkemtai, iwanch egkemtuamu aajakushkam niijai wetatus segauwai.
MAR 5:19 Tujash Jesusak nunikta tichauwai, ayatak: —Jeemin wetá pataim batsatbaunum, nunikam shiig kuashat Apu Apajuí amina wajuk wait anenjamjae nunú pachisam ashí ujaktá, tiuwai.
MAR 5:20 Tima weuwai, nunik Decápolis jegaa Jesús niina shiig kuashat wait anenja nu pachisa etsegtan nagkabau. Nunitai ashí aents aidauk anentai jegachaju.
MAR 5:21 Jesús barcanum egkemag ataktú kuchá amain katigmatai, kuashat aents aidau tuwagkaju; dutikam nigka nuig kuchá tugkitkenig juwakui.
MAR 5:22 Nuniai jega ijuntaiya nuna apuji aina nuiya makichik Jairo daagtin Jesusan wainak jegantun tikishmatjau;
MAR 5:23 nunik senchi segau: —Mina nawantug ashí jakaun ukukmajai; ame taam uwegmin achigtukta, dutikam tsagag pujustí, tusa.
MAR 5:24 Tama Jesús niijai wegau, nuniai kuashat aents saetuidau asag senchi chanuidau.
MAR 5:25 Nu imatikainamunum nuwa doce mijadai numpan puwak waitú pujú asa,
MAR 5:26 kuashat ampijatin aidaunum wekaegas ampimak ashí ni ajamuchijinak ashimkush, tsagautsuk nuní nagkaemas waitú wekayin,
MAR 5:27 Jesús pachisa chichainamun antuk, aents tuwakbaunum eteenki, ukujin pataetuk Jesusa jaanchjin antinkauwai.
MAR 5:28 Wagki ni anentaimsag: “Imá jaanchjinakesh antiaknuk tsagagtatjapi”, tau asa.
MAR 5:29 Nuniamuik numpa puwamujinak megkaekau, tuja ashí iyashin jaamujinash pegkeg weamujin dekapjauwai.
MAR 5:30 Nuniaig Jesuschakam niina senchijí jiinun dekapeg, aents minidaun ayampatua: —¿Yaa jaanchjuish antinkae?, tau.
MAR 5:31 Tutai niina jintintaiji aidau ayaak: —Kuashat aents chanumpaina nu wainiatkumek, ¿ya antinkae tame?, tuidau.
MAR 5:32 Tujash Jesusak ashí diyau, yaki antinkame tusa wainkatatus.
MAR 5:33 Nunitai nuwak ishamak kujaukmaikia, ni wajukae nuna dekau asa, jegantun niina eemtin tikishmag, dekaskenum ashí ni waitiamujinak ujakú.
MAR 5:34 Tusá ujaam: —Nawantah, ame dekaskeapi tabaugmia nu etsaentamjae, shiig agkan anentaimsam wetá, yamaik jaamugmik tsagajume, tiuwai.
MAR 5:35 Tusa eke chichaak wajai, apu Jairo jeen batsatu kaunawag ujainak: —Nawanjumek jakame ¿utugkatasamea Maestrosh waitkame?, tuidau.
MAR 5:36 Tujash Jesusak nu tuinamun antuk, jega ijuntain apujiya nuna chichajak: —Ishamkaipa, ayatak dekaskeapi tita, tiuwai.
MAR 5:37 Nuna tii makichik aentskesh uyuntusainmegka tusa Pedro, Jacobo ni yachi Juan aatus weajui.
MAR 5:38 Nunik apú jeen jegakmá aents pampainak, untsu untsumas butuidaun wainkauwai.
MAR 5:39 Nunik wayá: —¿Wagka pampakjumesh buutush batsatjume? Nuwauchik jakache kanag tepawai, tiuwai.
MAR 5:40 Tutai dushikidau. Tujash nigka ashí aents nui batsatunak jiijá, nuwauchi apají, dukují nuigtú ni jintintaiji uyunaina nujai utsanawajui nuwauch jaka tepamunum.
MAR 5:41 Nunik uwegnum achik: —¡Talitá cum!, tiuwai. Nunak: “Nuwauchih, amina tajame, nantaktá”, taku tiuwai.
MAR 5:42 Tamawaik nuwauchik nantakiu nunik wekagu, duka doce mijan ajau. Nuna dutikamtai aents aidauk senchi ishamkajui.
MAR 5:43 Tujash Jesusak makichkish etsegkaigpajum tusa shiig akatjag idaiyak, nuwauch yumain susatajum yuwati, tiuwai.
MAR 6:1 Jesús nuiya jiinki ni nugken wetai, jintintaiji aidaushkam niijai weajui.
MAR 6:2 Nunik tsawan ayamtai tsawagmatai, jega ijuntainum nagkama jintinkagtutai nui kuashat antuidauk puyatjukag: —¿Jusha tuwí imatikash unuimajuita? ¿Utusaya imatikash yachameajuita? ¿Tuwiyana senchinash jiyawa uwejinig aents dutikmainchaun dutika nunash? tuidau.
MAR 6:3 ¿Jujú carpinterowe duchaukaih, María uchijí nuigtú Santiago, José, Judas, Simón aina nuna yachi? ¿Umayí aidaushkam jutiijai batsatajama? Tusag pampantuidau.
MAR 6:4 Tujash Jesús ditan chichajak: —Profetak niina nugkenig, niina patayí aidaunmash tuja niina jeenish eme anentamak achauwai, tiuwai.
MAR 6:5 Nuwig aents dutikmainchaunak makichkish dutikachui, nuniayatak ujumchik jau aidaun uwejin achik etsagakui.
MAR 6:6 Nunik anentai jegagchauwai ditak dekaskeapi tuinachu asamtai. Nunik yaakat yaijuch aidaunum wekaegas Jesusak jintinkagtau.
MAR 6:7 Nunik ni jintintaiji doce aina nuna untsuká, jimá jimajan apatuk ishimtan nagkamauwai, dutikak wakan pegkegchau aidau jiimainnash senchijin susauwai.
MAR 6:8 Dutikak jintá wesá atsumainuk wají egkesá jutaigkesh, pagkesh, akachumtaigmin kuichkikesh jukigpajum, ayatak ushujutaigmek jukitajum,
MAR 6:9 nuniakjum sapat wegamaktajum, tujash nugkutaigmik pataká nugkujaigpajum, tiuwai.
MAR 6:10 Tusa ditan chichajak: —Makichik jeganum wayaakjumek nuig pujusjum weakjum ukuktajum.
MAR 6:11 Tuja atum tu yaaktanma jegattagme nuniagmin jujamtan dakitjamainak, antugtamtanash dakitjamainakuig jiinkí ukuktajum, nuniakjum atumi akap dawemin yukukuntu awa nu pegagjum akakekjum ukuktajum dita suwimak jukitnujiya nu iwaintakjum. Dekas tajime, suwimak sukagtamu tsawan jegatna duik, nunú yaaktanmaya aents aina duka, nugka Sodoma Gomorra aajakua nui aents batsamajakú suwimak susamua nuna nagkaesau suwimkan jukiagtinai.
MAR 6:12 Tima jintintaiji aidau shiyakag, aents aidau tudaujin idaiyinak pujutjin yapajiatnume tusag etsejuidau.
MAR 6:13 Nuninak kuashat iwanch aidaunash jiijag ishimainak, jau aidaunashkam buuken aceitiyai nijak etsagaidau.
MAR 6:14 Rey Herodes Jesús pachisa chichainamu ashí yantamnum naatun antuku. Wagki ujumak chichainak: “Juan Yamijatin maamua nu nantakiu asa, senchigtin wajas aents dutikmainchaun aikawai”, tuidau.
MAR 6:15 Tikich chichaidau: “Auk Eliasai” tuinai, tikich chichaidau: “Profetayai nuniachkush profeta aajakú aina dutsukaitai”, tuidau.
MAR 6:16 Nunú tuinamun Herodes antuk: —Auk Juan wi buuké tsupigkatajum tii ai tsupijuk maawajamia nunú nantakne, tiuwai.
MAR 6:17 Nunak Herodesak nigki Juan achiktajum tima shimutkag, achikag cadenayai jigkajag cárcel egkeau aajakui. Nunak ni yachi Felipe nuwe Herodiasan juki nuwatuk pujutai,
MAR 6:18 Juan Herodesa chichajak: “Amek yatsumi nuweg nuwatkamek pujumaitsume”,
MAR 6:19 tabaun Herodías antuk kajejuk maatatus wakegayatak dutikmainchau dekapeau,
MAR 6:20 wagki Herodesak Juagnak ishamau, pegkegnak takau nuigtush pegkegman dekau asa, nuniak kuitamu. Herodesak Juan chichatai antujak tumainchau dekapeayatak, wakejus antuju.
MAR 6:21 Nuniamunum Herodes ni akiinamuji tsawagmatai fiestamak, yutai umikbaun ni aentsji aidaujai nuigtú suntajá apuji aidau, galileanmaya eme anentsá diitai aidaujai yuwinak pekagbaunum,
MAR 6:22 Herodiasa nawanji wayá nantsebau, nuniak Herodesan nuigtú niijai mesanum pekajuidaunashkam shiig awajkauwai. Nunikmatai rey nuwan chichajak: —Ame wakegamu segattá, tujutkuminig amastajai.
MAR 6:23 Tusa Apajuí pachis anagkuauwai ashí ni wajina segamua nuna nuniachkush ni inama nunakesh jimaituk susatatus.
MAR 6:24 Tima jiinki dukujin jegajua chichajak: —¿Wajinak segatjá?, tau. Tama dukují ayaak: —Juan Yamijatna nuna buuké segatá, tau.
MAR 6:25 Tima nuwauchishkam wamkes rey pujamunum wayau, nunik: —Yamaikiuch Juan Yamijatna nuna buuken platonum egkejá sujustí tusan wakegajai, tau.
MAR 6:26 Tama rey shiig senchi wake besekú; nuniayatak ipaamu aidaush antuinamunum yapajimainchaun anagkuau asa, dakitmainchau dekapjauwai.
MAR 6:27 Nuniku asa rey wamak makichik suntajan awemauwai, Juagká buuken tsupik itati tusa. Tima suntagshakam cárcel jegá Juagká buuken tsupigkauwai,
MAR 6:28 dutika platonum egkea itauwai. Dutikamtai nuwauchin susau, tuja ni juki dukujin susauwai.
MAR 6:29 Nu dutikamun Juagká jintintaiji aidau antukag wejiag, iyashin jukiag ukusajui.
MAR 6:30 Apóstol aidau Jesusjai ijunjaju, nunik ashí dita dutikamujin nuigtú jintinkagtuamujinash ujaidau.
MAR 6:31 Tama ni chichajak: —Minitajum, wegagmi agkan aents atsamunum, nunikjum machik ayamsatajum, tiuwai. Wagki kuashat weenai tikich minidaush aidau asag yujumak yumainush agkantak atsujuidau.
MAR 6:32 Nunik barcanum chimpimjag nugka agkantunum ditak shiyakajui.
MAR 6:33 Tujash nunik wetatman kuashat aents aidau wainkag, tuwí weakua nuniawa nuna dekawag kukag juakiag tupikakiag ditá jegawaju.
MAR 6:34 Jesús barcanmaya jinkamá shiig kuashat aents tuwaká ijunun wainkau, nunik wait anenmain diisui, uwig pastorji atsugbau wajukmaina numamtuk wajaidau asagmatai. Dutikak kuashat wají aidaun pachis jintintan nagkamauwai.
MAR 6:35 Nuniai etsashkam akaegu asamtai jintintaiji aidau jegaantag: —Juig aents atsamunum batsatji, etsash akaewai.
MAR 6:36 Aentsuk akatjam ishiakta, aja aina nui nuigtú yaakat yaig aidaunum wegag yumainun sumaktinme, yumainjig atsujuinawai, tuidau.
MAR 6:37 Tiagtai Jesús ayaak: —Atum dita yuwatnuk susatajum, tau. Tama dita aiinak: —¿Jutii shiyakaiyash doscientos denariowai pag sumaka ayugkatag?, tuidau.
MAR 6:38 Tiagtai ni ayaak: —¿Wajupa pagka ajutjamainawa? wejum diistajum. Tima wegag dekawag: —Cinco pag nuigtú jimag namak awai, tuidau.
MAR 6:39 Tusa ujakam: —Aents aidau yajuakjum chijichi aina anui akanjajum batsagtajum, tiuwai.
MAR 6:40 Tiajam ditashkam cien aentsun akanak batsainai, tikich cincuenta akanag batsaush aidau.
MAR 6:41 Dutikawagmatai cinco pagkan nuigtú jimag namaka nuna juki, pagkai nayaimpin diis see tusa, pagkan puujá jintintaiji aidaun susaju, dita aentsun tinamkatnume tusa. Dutiksag namak jimaja nunashkam ashí tinamkau.
MAR 6:42 Dutikawajam ashí shiig yuwawajui.
MAR 6:43 Nunikagmatai pag namakjai ampinkaunak yajuakag doce chagkinnum aimjaju.
MAR 6:44 Junak cinco mil aishmag aidau yuawajui.
MAR 6:45 Nuna dutikamuik, jintintaiji aidaunak barcanum chimpijag ditaa eemak atú amain Betsaida katigtinme tusa ishimak, aents aidaun akateg ukuktatus juwakui.
MAR 6:46 Nunik aentsun akateg ukuak mujanum wakauwai Apajuin ausatatus.
MAR 6:47 Nunik kiyaju ai, barcashkam kuchá ejapean wegai nigka kukag juwaku.
MAR 6:48 Nunikmá wainkau dase igku umpuamu asa, wiya wiyantuinakua pimpikiag tsawagtatak wedaun. Nuniamunum niishkam yumí awanken wekaegas ayaumas nagkaikitatus ditan adijkau.
MAR 6:49 Nunik yumí awanken wekaegas minittaman wainkag, dita anentaimsajag pasun minatsuash tusag senchi untsumaidau,
MAR 6:50 wagki ashí wainaidau asag ishamainak. Imatiagtai Jesús chichaak: —¡Witjai, ishamkaigpajum! ¡Imatigpajum!, tiuwai.
MAR 6:51 Tusa dita chimpigbaunum barcanum egkemjau, nunikmatai daseshkam mijaku; nunikmatai senchi puyatkag anentai jegagchaju.
MAR 6:52 Wagki pag dutikamua nunakesh, dutikamape tusag anentaimtuinachu asag, utujimas anentaimaidau.
MAR 6:53 Kuchá amain katigkag Genesaret nugkanum anumkaju.
MAR 6:54 Nunik barcanmaya jiinaidaunak Jesusan aents aidau wainkaju.
MAR 6:55 Nunikag ashí yaaktanum wegag jau aidaun camillanum pataidiag Jesús nui pujawai tabaun antuinakug nui emaidau.
MAR 6:56 Dutikaidau asag yaakat yaig aidaunmakesh, yaaktanmakesh nuniachkush ajanum batsatbaunmakesh ni tuwí jegawa nuwi jau aidaunak jintá aepedau, dutikam jaanchji weninakesh antigtajai tusag segaidau. Ashí nuna antidauk tsagagkaju.
MAR 7:1 Fariseo aidau, maestro chicham umiktinun jintinkagtin Jerusalegnumia kaunawaju aidaujai Jesusan jegaantajui.
MAR 7:2 Nunú aidau, ujumak Jesusa jintintaiji uwejí tsuwat aig achiká yuwagtatman wainkag augmatuidau, nunak ikigmagchaju asagmatai tiajui.
MAR 7:3 Wagki fariseo aidauk, ashí judío aidaushkam eke yutsuk ikigmanjati tibauwa nuna umitskek yuujakchajui, ditá muunji nunitaijinak idaimainchau dekapedau asag.
MAR 7:4 Ditak, mercado wegag wakitki tawajash ikigmatskek yuujakchajui. Nuigtushkam kuashat tikich aidaunash umijakú ainawai, vaso nijatan, jarra aidaun nuigtú tikich takatai cobre aidau, pegaknumia aina nunashkam.
MAR 7:5 Fariseo aidau nuigtú maestro chicham umiktinun jintinkagtin aidaujai Jesusan jegaantag iniinak: —¿Wagka amina jintintaijum aidaush, iina muunji umiktajum tusa tibauwa nuna umitskesh uwejí tsuwat aigkish yuinawa?, tuidau.
MAR 7:6 Tama ni ayaak: —Tsanumin aidauwah, dekas profeta Isaías atumin pachis agak: “Ju aents aina juka weninig eme anenjuinawai; tujash anentainig atushat minaig ainawai.
MAR 7:7 Mina emematjuina duka, wainkayai; jintinkagtuina nunak, aents tibauwa nuna jintinkagtuinawai”, tiuwai.
MAR 7:8 Atumek Apajuí chicham umiktajum tibauwa duka umitsuk, aents tibauwa nu idaimainchau dekapeagme. Jarra aidau nijakjum, vaso aidau nuigtú tikich kuashat jumamtin aidaush takaa yujagme.
MAR 7:9 Nuigtushkam tiuwai: Apajuí umiktajum tujabauwa duka wainka diyagme, atumi muunjum umiktajum tibauwa nu umikta tau asajum.
MAR 7:10 Wagki Moisés tiuwai: “Amina apa, dukujai eme anentsam diistá”, tuja “apajin, dukujinakesh pegkegchaun chichajuk tsagkugtsuk maatajum”.
MAR 7:11 Tujash atumek makichik aentsuk apajin nuniachkush dukujinakesh: Wika yaimaitsugme, ashí ajutuina juka Corbagkai (nunak ofrenda Apajuinu taku tawai) tumainai tajume;
MAR 7:12 nuniakjum apajinakesh, dukujinakesh yaimainchau emagme;
MAR 7:13 Apajuí chichamega duka idaikujum, atumi muunjum umiktajum tibauwa duke tikich aidaush inagkeatjume, nuigtú kuashat wají jumamtin aidaush takagme, tiuwai.
MAR 7:14 Juna tii, Jesús ashí aents tuwakú aidaun untsuká chichajak: —Wi taja ju shiig antugtuktajum:
MAR 7:15 Makichkish atsawai agaya aentsnum wayá aentsun pegkegchau emamainuk, untsu aentsnumia jiina nuuwai pegkegchau ema duka.
MAR 7:16 Ni antutaiji ajamuk antuktinme, tiuwai.
MAR 7:17 Nuna tusa aents aidaun ukuak jegá wayamtai, niina jintintaiji aidau nu augmatbaun pachisag inidau.
MAR 7:18 Tama ni ayaak: —¿Atumesh duka dekamainchauk dekapeajum? ¿Dekatsjumek ashí agaya wayá duka aentsnak pegkegchau ematsu duka?,
MAR 7:19 wagki anentainum wayachu asa ampugnum egkemá letrinanum ajapnawai. Junak ashí yutai aidauk pegkeg ainawai taku tiuwai.
MAR 7:20 —Untsu aentsnumia jiina nu aentsnak pegkegchau emawai.
MAR 7:21 Wagki initkanmaya, aentsú anentainia jiinainawai pegkegchau anentaimat aidau, ashí pegkegchau iyashnum takanitaish, kasamat aidau, magkagtamu aidaushkam,
MAR 7:22 tsanijinbau aidau, pegkegchau wakegamu aidau, pegkegchau aidau, tsanubau, ii wakegamuk takaamu, tikichdau diisá kajeamu, Apajuí pegkegchau chichagbau, eme anenmabau, shiig anentaimchat aina nu;
MAR 7:23 Ju ashí pegkegchau aina juuwai initkanmaya jiinu asa, aentsun pegkegchau ema duka.
MAR 7:24 Nuiya jiinki Tiro nugkanum weuwai. Nunik jegá wayauwai makichik aentskesh dekajuawainum tau asa; tujash uumainchau dekapjauwai.
MAR 7:25 Nuniai wakan pegkegchau egkemtugbauwa nuna dukují wamak antukui, Jesusak nui pujawai tabaun, nunik tajuntun tikishmatjau.
MAR 7:26 Duka nuwak judiochu, Sirofenicianmaya aajakui, nunú segauwai nawanji iwanch egkemtugbaun jigtugkita tusa.
MAR 7:27 Tujash Jesús ayaak: —Jasta dekatkauk Israela uchijí aina nuwá shiig yuwatnume, wagki pegkegchauwai uchi pag yuwamuji atankí yawá suwamuk, tau.
MAR 7:28 Tama nuwa ayaak: —Apuh dekaske, tujash yawashkam mesa wakentin pujusá uchi yuwaku tsaisá akakeamun yuwamajamah, tau.
MAR 7:29 Tutai ni ayaak: —Nunú tame duik wetá, iwanchik nawanjumnak jiinki ukukne, tau.
MAR 7:30 Tima nuwashkam wakitki jeen jegakmá, nawanjig iwanch jiinki ukukim pegaknum tepettaman wainkauwai.
MAR 7:31 Jesús Tiro nugkanmaya jiinki Sidón nagkaemak, Galilea kuchají Decápolis nugkanum awa nui jegauwai.
MAR 7:32 Nunikmatai aents antuchu shiig chichachun itaantag segaidau uwejin achiktí tusa.
MAR 7:33 Tama Jesús aentsun ukumtiki niinak akanki, tsajam uweji aidauwai kuwishin inujuauwai; dutika usukin juki inayinash antinkauwai.
MAR 7:34 Dutika wajan nayaimpinum pagkai senchi mayatak: “Éfata”, tau. (Nunak: “Ujanta” taku tiuwai.)
MAR 7:35 Tusa tamawaik aents antuchun kuwishig ujaniuwai, inayishkam pegkeg wajasui, nunikmatai shiig chichakú.
MAR 7:36 Dutika, makichik aentkesh ujakaigpajum tusa tiuwai. Tujash tiigpajum tibauwaitak nuní senchi etsejuidau.
MAR 7:37 Aents aidauk shiig senchi puyatkag: “Ashí dekas pegkejan takaawai, empekunash antumtikawai, chichachunash chichamtikawai”, tuidau.
MAR 8:1 Nunú tsawantinig ataktú kuashat aents tuwakú asag yumainji atsujuidau asagmatai, Jesús ni jintintaiji aidaun untsuká chichajak:
MAR 8:2 —Ju aents aina juna wait anentuinajai, wagki kampatum tsawan jui wijai batsatainawai; tujash yumainjig atsujuinawai,
MAR 8:3 wi yujumkan ayugtsuk jeen ishiakmak, jintá wekamá jaka iyaumain ainawai, ujumak atushtanmaya kaunkajush aina dui, tau.
MAR 8:4 Tutai jintintaiji aidau aiinak: —¿Tuwiya jukiya yumainush sumainaita aents atsamunum pujag juniautish?
MAR 8:5 Tiagtai ditan iniak: —¿Wajupa pagka ajutjamainawa? Tama: —Siete pag ajutjamui, tuidau.
MAR 8:6 Tiagtai aents nugkanum batsagtajum tusa ishiakui. Dutika siete pagkan juki Apajuin see tii, puujá ni jintintaiji aidaun tinabiu, dutikam ditashkam aentsun tinamkaju
MAR 8:7 Nuigtushkam ujumchik namak ajuidau, nuna Apajuin see tii tinamkagtitajum tusa tinabiuwai.
MAR 8:8 Nunik ashí shiig yuwawajui, nunikagmatai ampinkau aidaun siete chagkinnum aimjajui.
MAR 8:9 Nuna yuawajuk cuatro mil tumain aajakajui. Imana nuna akatek ishiakajui.
MAR 8:10 Nunik jintintaiji aidaujai barcanum chimpimjag Dalmanuta nugkanum weuwai.
MAR 8:11 Nui jegamtai fariseo aidau kautuawag Jesusjai tudaiyidau, nuninak pegkegchau anentaiyai dekapsagtatus nayaimpinmaya wainchatai iwainakti tusag segaidau.
MAR 8:12 Tusá segainam Jesús senchi mayati chichaak: —¿Wagka ju aents aidaush wainchatai iwainakti tusash segamainawa? Dekas tajime makichik wainchataigkesh iwaintamak achagtatui.
MAR 8:13 Tusa ukuak barcanum egkemag, ataktú amain katigkui.
MAR 8:14 Kajimatkiaju asag pag aidaunak jukichajui, ayatak makichik pag ajuidau barcanum egketu.
MAR 8:15 Nuniku ai Jesús ditan chichajak: —Nijah, fariseo aidau nuigtú Herodesa levaduraji aina nujai kuitamamkatajum, tau.
MAR 8:16 Tutai ditak pempeentunikiag: “Nunak pag takukchag dui tujamji”, tuidau.
MAR 8:17 Nu tuinamun Jesús dekajua: —¿Wagka pag atsawai tusagmesh jiyaniagme? ¿Atumek dekamainchauk nuigtush antumainchau dekapeajum? ¿Ekek utujimsa anentaimjum?
MAR 8:18 ¿Jiimesh ajutjamainaigkik wainmatsjum nuigtush antutaigmish ajutjamainaig antasjum? ¿Nuniau asagmek aneaktsujum?
MAR 8:19 Wi cinco pagkan puujan cinco mil aents ayugkamash ¿ampinjau aidaush wajupa chagkina aimjamiugme? Tama dita aiinak: —Doce, tiaju.
MAR 8:20 Tiagtai: —Wi siete pagkan cuatro mil aents ayugkamash ¿ampinjau aidaush wajupa chagkina aimjamiugme? Tama dita aiinak: —Siete, tiajui.
MAR 8:21 Tiagtai ni ayaak: —¿Dutikauwaitkugmek antumainchau dekapeajum?
MAR 8:22 Nunik Betsaida jegawajui, nunikmatai wainmachun itajuawag, antinjukta tusa segaidau.
MAR 8:23 Tama Jesuschakam wainmachun uwegnum egkesá juki yaakat yaijan ukumtiki jiin usuktua, uwejin nuna jiin patati, machikish wainmawash tusa iniau.
MAR 8:24 Tama wainmachushkam pagkai niimak: —Aents aidaunak numia nuninun wainjai; tujash weedaun wainjai, tau.
MAR 8:25 Tutai Jesús wainmachu jiin ataktú uwejin patatiu, dutikam paan wainmakui, nunik atushtanmayanash shiig wainu.
MAR 8:26 Nunikmatai jeen awemak: —Yaakat yaija awigkesh wayawaipa, tiuwai.
MAR 8:27 Nuna dutika, Jesús jintintaiji aidaujai weajui yaakat yaig aidau Cesarea nugkanum Filipo yaaktamamua nui. Nunik jintá wesa jintintaiji aidaun iniak: —¿Aents aidaush minash yayai tujutuinawa?, tau.
MAR 8:28 Tutai dita aiinak: —Ujumak aents: “Juan Yamijatnai” tuinai, tikich chichaidau: “Auk Eliasai” taush ainawai, tikich tuidau: “Profeta aajakajua nuiyaskaitai” tujamainawai, tuidau.
MAR 8:29 Tiagtai ni ayaak: —¿Tujash atumesh, minash yayai tujutjume? tau. Tutai Pedro ayaak: —Amek Cristuitme, tiu.
MAR 8:30 Tujash Jesusak mina pachittsagmek makichkish tiigpajum, tiuwai.
MAR 8:31 Tusa Jesús nagkama jintinkagtak: Aentsmaga akiinauwa duka kuashat waittsattawai nuigtú judío apuji aidau, sacerdote apuji aidaush, maestro chicham umiktinun jintinkagtin aidaujai dakituinak maawagtatui, dutikamash kampatum tsawan asa nantaktatui, tau.
MAR 8:32 Tusa paan etsegtai, Pedro akanak juki kakaakan chichagtan nagkabauwai.
MAR 8:33 Tujash Jesús ayampattsag, jintintaiji aidaun diis Pedron jiyaak: —¡Wetá Iwanchih, ukugkita! Amek Apajuinu aina duka anentaimtatsme, aentsú anentaimtajig anentaime, tiuwai.
MAR 8:34 Nunik Jesusak jintintaiji aidaun nuigtú tikich aents aidaunashkam untsuká chichajak: —Makichik aentskesh mina jintintaig atatus wakegauk, niinunak idaiyak, waitiakush nemagtukti.
MAR 8:35 Wagki ashí aents ju nugka jui pujutan imá senchi wakegak, mina nemagtuk waittan dakitauk uwemjashtin ainawai; tujash mina nemagtak nuigtú yamajam chichaman etsejuinak waituidauk uwemjatnai.
MAR 8:36 ¿Wajinma yaimainaita aentsnash ashí nugka juiyan niinu emakush, wakanin megkaemaina nuish?
MAR 8:37 Nuniachkush aentsush ¿wajupa wakaninash akikmatmainaita?
MAR 8:38 Wagki mina pachitus etsegtan datsanjuju tuja mina chichamjunash aents betek umichu weantu aina nuna nuigtú aents tudaugtin aidau ujatnash datsanjau aidaunak, Aentsmaga akiinau Apají imanjiya nujai ángel pegkejam aidaujai minitna dui datsanjatnai.
MAR 9:1 Junashkam Jesús chichaak: —Dekas tajime: Atum jui ijunjum juiyatijum ujumak aidautijum eke jatsuk iwaaku pujusjumek, Apajuí inama nu senchijijai minau wainkatnutigmesh ajume, tiuwai.
MAR 9:2 Jesusak seis tsawan nagkaemakiu ai, Pedron, Jacobon, Juagkan aatus juki ditanak akanki muja yakí tsakajunum weuwai. Nui ditá eemtin, Jesusa niimé yapajinauwai.
MAR 9:3 Jaanchjig winchamtin, shiig puju, nugkanmaya jaanchi nijaukesh imatikag puju emamainchau aajakui.
MAR 9:4 Nuniai Moisés, Elías aatus Jesusjai chichaidaun wainkajui.
MAR 9:5 Nunik Pedro Jesusan chichajak: —Maestroh, pegkejai jutii jui batsatag duka, nuniau asá kampatum aak aakmakagmi. Makichik aminu, tikich Moisesdau nuigtú Eliasdau, tau.
MAR 9:6 Nunak ni tabaujinakesh dekachiatak tiuwai, wagki ishamkaju asag.
MAR 9:7 Nuna taig yujagkim ijikui, nuniai yujagminmaya chichaak: “Juuwai mina uchig anetaijuk, ni antugkatajum”, tabaun antukajui.
MAR 9:8 Nuna taig diikmá, imá Jesusnak wainkajui nuigtú tikichik atsuidau.
MAR 9:9 Nunik mujanmaya akaebaunum, dita wainkamujinak Aentsmaga akiinauwa nu jaka nantatsaigkik makichik aentsnakesh ujakainum tusa akatjajui.
MAR 9:10 Tibau asag ditakek pachitsuk idaiyinayatak, jaka nantatsaigkik tawa nunash wajukatnunak tawa tusag iniinidau.
MAR 9:11 Nuninak Jesusan iniinak: —¿Wagka maestro chicham umiktinun jintinkagtin aidaush, dekatkauk Eliasá taatnai tuinawa?, tuidau.
MAR 9:12 Tiagtai Jesús ditan ayaak: —Dekaskenmag Eliasak niiyá eemak taatnai nunik ashí wají aidaunak ni ataktú iwajatnai. Tujash ¿Aentsmaga akiinau pachisaish wajintu agagbauwaita, senchi waittsatnai nuigtush dakitjamu atinai tatsuak?
MAR 9:13 Tujash wi tajime: Eliasak taabi, nunikmataish ashí dita wakegaina dutiksag inagkeatkiagmayi, agagbaunum niina pachis tawa dutiksag, tiuwai.
MAR 9:14 Nunik ni jintintaiji aidau batsatbaunum jegakmá, wainkaju kuashat aents tuwajuk aun, tuja maestro chicham umiktinun jintinkagtinchakam ditajai tudayinaun.
MAR 9:15 Nunidau Jesusan wainkag puyatuk tupikatkiag jegaantag kumpamawajui.
MAR 9:16 Nunikmatai ditan iniak: —¿Wají pachisjumea ditajaish tudaijume?, tau.
MAR 9:17 Tutai aents tuwakbaunmaya makichik ayaak: —Maestroh, mina uchijun wakan pegkegchau egkemtua chichachu etugtimun amina itajuajame.
MAR 9:18 Junak wakan egkemtakug nugká ajinuwe, nunik saun apak, nain takegtak, ichichkam patamnuwe. Imatijutin asamtai amina jintintaijum aidaun jigtugkitajum timajai, tujash tujinkagmae, tau.
MAR 9:19 Tutai Jesús ayaak: —¡Aents dekaskeapi tuchau aidauwah! ¿Wajupá dukapea atumjaish pujumainaitja? ¿wajupá dukapek dakastajime minak dekaskeapi tujuttinme tusanush? Jui uchi itantá, tiuwai.
MAR 9:20 Timatai uchin ejentuntaju. Dutikam wakan pegkegchaushkam Jesusan wainak uchinak waugmitkak nugká ajiaju, dutikam tadaegak saun apakú;
MAR 9:21 nunitai Jesús uchí apajin iniak: —¿Junash wajutí nagkamsaya imatikawa?, tau. Tama ni ayaak: —Uchuch aig nagkamas.
MAR 9:22 Dutikau asa kuashtá jinumash patakta tinuwe, namakash ajug maata tinuwe. Ame machikish dutikmainaitkumek, jutiish wait anenkagtujam yaijatkata, tau.
MAR 9:23 Tutai Jesús ayaak: —Dekaskeapi tumainaitkuminig, dekaskeapi tawa nudauk ashí dutikmain ajawai, tau.
MAR 9:24 Tusa taig uchí apajishkam untsumak: —¡Dekaskeapi tajai! ¡Wi dekaskeapi tachakuish yainkata!, tiuwai.
MAR 9:25 Jesús kuashat aents tuwagtai wainak, wakan pegkegchaun jiyak: —Wakan chichachu empekuwah, wi tajame: ¡Jiinkim ukuktá, ataktuk waketjukmek egkemtuawaipa!, tiuwai.
MAR 9:26 Tama wakanchakam untsumak uchin kujamtikak waugmitkak jiinkiuwai, nunikmatai uchik jaka iyaantu. Nunitai kuashat aents chichainak: —Jakajamah, tuidau.
MAR 9:27 Tujash Jesús uwegnum achiká inankiu, dutikam wajainiu.
MAR 9:28 Nuna dutika Jesús jegá wayamtai, jintintaiji aidau agkan niinak iniinak: —¿Wagka jutiish jiiktakamaish tujinkamji?, tuidau.
MAR 9:29 Tiagtai ni ayaak: —Tujash ju wakania juka junisaikik jimaitsui ayuno takaaku Apajuí aujku jiimainai, tiuwai.
MAR 9:30 Nuwiya jiinki Galilea wegamunum makichik aentskesh dekawainum tusa Jesús dakitau,
MAR 9:31 wagki ni jintintaiji aidaun jintintu asa. Nunik: —Aentsmaga akiinauwa nunak aents aidaunum sujukagtatui, dutikawagmatai maawagtatui. Tujash jakaashkam kampatum tsawanta jui nantaktatui, tau.
MAR 9:32 Tutaish ditak ni tawa nunak dekamain dekapenachu, nuninakush ishamaidau asag iniaschajui.
MAR 9:33 Yaakat Capernaúm jegawajui, nunik nui jegá batsatbaunum Jesús jintintaiji aidaun: ¿Jintaa minisjumesh wají tudaimugme?, tau.
MAR 9:34 Tujash ditak chichainachu, wagki jintaa minisag ditak pempeentunikiag, yaki imá wagaakush atinaita tudaiyaju asag.
MAR 9:35 Nuniagtai ekeemsau, nunik jintintaiji doce aina nuna untsuká: Ni dekatkau atatus wakegauk, ashí tikich aina nuna ukujin amainai, nuniak ashí tikich aidaun takajin amainai.
MAR 9:36 Nuna tii uchin juki ejapen awasauwai, dutika minaaki juki chichaak:
MAR 9:37 Ju uchia junin aidaun mina daajui juidauk, mina jujuinawai; tuja mina jujuina duka, minakek jujuinatsui, mina awetiuwa nunash juwinawai.
MAR 9:38 Tutai Juan chichaak: —Maestroh, makichik wainkamji amina daagmin iwanchin jiyau, tujash jutiijai minitan dakitakui, amek aikawaipa timaji, tau.
MAR 9:39 Tutai Jesús ayaak: —Atumek aikawaipa tusagmek tiigpajum. Makichik aentskesh mina daajui wainchatain iwainayatkug, pempeentugsagkek pegkegchaunak chichagtumaitsui.
MAR 9:40 Jutiin shiwagmatjamtsu duka, jutiinu asa nuniawai.
MAR 9:41 Tuja makichik aentskesh atumin mina daajui, Cristunu asagmin yumin amasú aidauk, dekas tajime, dita wají shiig pegkeg jukitnujiya nunak megkaekachagtinai.
MAR 9:42 “Makichkikesh jujú piipich aina juiya mina dekaskeapi tujutuina nuna tudaun takamtikaidauk, dekas kaya muun juki kuntugnum jigká detua nayantsa kunajin ajugká ajapmainus ajapachbau ainatai.
MAR 9:43 Amina uwejum tudau takamtijamkuig tsupikta, dekas pegkejai muntuch wajasá pujut tuke atina nui wayamuk, jimá uwegtin asá waitiaku pujutai, jii tuke kajinchaunum waimaina nu,
MAR 9:44 nuig akash jinuchu nuigtú jiishkam tuke kajinchauwa nui.
MAR 9:45 Tuja amina dawem tudau takamtijamkuig tsupikta, dekas pegkejai pujut tuke atina nui shutusá wayamuk, jimá nawentin asá waitiaku pujutai, jii tuke kajinchaunum ajapeam amaina nu,
MAR 9:46 nuig akash jinuchu nuigtú jiishkam tuke kajinchauwa nui.
MAR 9:47 Amina jiim tudaun takamtijamkuig ukuinkata, dekas pegkejai Apajuí inamtaijiya nui makichik jiintin wayamu, jimag jiintin asá waitut tuke atina nui ajapeam amaina nu,
MAR 9:48 nuig akash jinuchu nuigtú jiishkam tuke kajinchauwa nui.
MAR 9:49 “Wagki ashí nunú aidauk weejai kachitiama numamtuk jiiyai kachiam agtinai.
MAR 9:50 Week pegkejai; tujash jea jeatuji megkaekamtaish, ¿utugsaiya ataktush jea jeatush emamainaita? Atuminish weega numamtin ajutjabiagti nuigtú shiig agkan tikichjai pujamush ajutjamtinme”.
MAR 10:1 Jesús Capernaumnumia jiinki Judea nugkanum jegaa, Jordagka amain katigkú. Nunikmatai aents aidau ataktú tuwagkajam jintinkagtutan nagkabau, ni tuke jintinkagtina dutiksag.
MAR 10:2 Nuniai ujumak fariseo aidau Jesusan jegaantaju, wajintig tusa dekapsagtatus, nuwennush nuwenash idaimainashit tusag.
MAR 10:3 Tama ni ayaak: —¿Moisesash wajukatajum tujabiajuita?
MAR 10:4 Tama dita aiinak: —Moisesak papí nuwa idaiku najantai umikjum nuwemek idaisatajum tujabiuwai, tuidau.
MAR 10:5 Tiagtai Jesús chichaak: —Moisesak atum antumtikmainchau ainajum dui nu umiktinnak agajui.
MAR 10:6 Tujash yama nagkamchaku najanbaunmag Apajuik aishmagkun nuwajai najanauwai.
MAR 10:7 Dutikamu asag aishmag nuwenkug apajin, dukujin ukuak niina nuwejaig ijunmainai,
MAR 10:8 nuniak nuwejai makichik iyash wegawai. Nunin asa jimagchauwai, makichki.
MAR 10:9 Nuadui aatus Apajuí dutikamua nunak aentsuk datupaumainchau ainawai, tiuwai.
MAR 10:10 Nunik jegá jegawag jintintaiji aidau nuna pachisag Jesusan inidau.
MAR 10:11 Tusá iniam: —Makichik aentskesh nuwen idaiyas tikich nuwajai nuwenkug, jeteken ekajeak nunimainai,
MAR 10:12 nunisag nuwashkam aishin idaiyas tikich aentsnum nemakug, ekagmawai, tiuwai.
MAR 10:13 Ujumak uchi aidaun Jesusan ikautuawajui, uwejin antinjukti tusag. Dutikiagtai ni jintintaiji aidau, uchin ikaunmaina nuna jiyaidau.
MAR 10:14 Dutikiagtatman Jesús wainak kajek chichajak: Idaisatajum, uchi aidauk minai minitnume, utujiakaigpajum, wagki Apajuí inama duka jujú uchi aina junin aina nudauwai, tiuwai.
MAR 10:15 Dekas tajime: Aents aidau, uchi mina anentaimjutuina imanis anentaimjutuinachuk, Apajuí inamak amain ainatsui, tiuwai.
MAR 10:16 Tusa Jesús uchi aidaunak minaaki juki, makí makichik uwejin buuknum achiak Apajuí pujutnum yumigtamsatnume, tiuwai.
MAR 10:17 Jesús wetatus jiinai, makichik tupikaki tajuntau, nunik niina eemtin tikishmatug iniak: —Maestro pegkejah, ¿wajina dutikmainaitja pujut tuke atina nuna jukitasanush?, tau.
MAR 10:18 Tama Jesús ayaak: —¿Wagka pegkejá tujutme? Makichkish pegkejak atsawai, imá makichik Apajuiya duke pegkejak.
MAR 10:19 Chicham umiktin aina nu dekame: “Tsanijinawaipa, magkagtuawaipa, kasamkaipa, wainkamek tsanumkagtujaipa, wainka tsanujá jujukipa, apa dukujai eme anentsam diistá” tawa nu, tau.
MAR 10:20 Tama ni ayaak: —Maestroh, wika ashí nunak datsauch asanuk umikuitjai, tiuwai.
MAR 10:21 Tutai Jesús wait anenmain diisui, nunik chichajak: —Makichik umimain ajutjame: wetá, nunikam ashí amina ajutjamaina duka sujukam ujunauch aina nu susata. Nu dutikawamin nayaimpinum wajiigmik ajutjamtinai. Nu dutika ukuakum waitiakmesh atsanjam nemagtukta, tiuwai.
MAR 10:22 Nu tama junik dekapjauwai, nunik wake besek weuwai shiig wiyakuch asa.
MAR 10:23 Jesús ayampá ashí niimas jintintaiji aidaun chichajak: —Shiig utugchatai wiyakuch aidau Apajuí inamtaijin wayata tabauk.
MAR 10:24 Nuna tutai jintintaiji aidauk puyatkaju. Nuniagtai Jesús ataktú chichaak: —Uchig aidauh, shiig utugchatai Apajuí inamtaijin wayata tabauk.
MAR 10:25 Camellok aujá jiinish waigkag yupichu nagkaemamainai, tujash wiyakuch Apajuí inamtaijin wayata tabauk utugchatai, tau.
MAR 10:26 Nuna antukag, nuní nagkaemas puyatkag, pempeentunisag iniininak: —¿Yaki tujash uwemjaush amainaita?, tuidau.
MAR 10:27 Tiagtai Jesús ditan diis chichajak: —Aents diismak dutikmaitsui, tujash Apajuiyaig nuninchauwai, wagki Apajuik ashí wají aina nunak dutikmainai.
MAR 10:28 Pedro nagkama Jesusan chichajak: —Nijah, Jutiik ashí iinu aina duka ukuinaku, ame nemagkauwaitji, tau.
MAR 10:29 Tutai Jesús ayaak: —Dekas tajime, makichik aentskesh mina nemagtak nuigtú yamajam chichaman etsejak jeen, yachi aidaun, umayí aidaun, dukujin, apajin, uchijí aidaun, nugke aidaunash ukukiu aidauk,
MAR 10:30 yamai puja duish ciegka inagkeas jee aidaun, yachi aidaun, umayí aidaun, dukují aidaun, uchijí aidaun, nugke aidaun ukukbau aidaun inagkeas jukiagtinai waittsau ainakush, nunik atak atina nuish, pujut tuke atina nuna jukiagtinai.
MAR 10:31 Tujash kuashat aents dekatkau atatus wakegaina nu ukunum juwakagtinai. Untsu iman atan anentaimtumachu aina nu dekatkauk agtinai.
MAR 10:32 Jerusalén wakatasa wegamunum, Jesusak eemak wegai ni jintintaiji aidauk puyatuidau nuniai tikich aidauk ishamaidau. Nuniagtai ataktú niina jintintaiji doce aina nuna yajuak akanki, niinash wají nagkaikittawa nu pachisa ujatan nagkabau.
MAR 10:33 Nuniak: “Yamai Jerusalén wakatasa wegag juik Aentsmaga akiinauwa nuna achikag sacerdote apuji aidau nuigtú maestro chicham umiktinun jintinkagtin aidaunum sujukagtatui; dutikam dita mantamnati tusag judiochu aidaunum sujukagtatui.
MAR 10:34 Dutikawagmatai dushi dushikinakua, usu usukinak, asuttanash asut awa awajainakua maawagtatui, tujash kampatum tsawanta jui nantaktatui”, tiuwai.
MAR 10:35 Zebedeo uchijí aidau Jacobo Juagjai, Jesusan jegaantag: —Maestroh, ii segamtatag nuna wait aneas umigkagtukti tusa wakegaji, tuidau.
MAR 10:36 Tiagtai ni iniak: —¿Wajina dutikati tusagmea wakegagme?, tau.
MAR 10:37 Tutai dita aiinak: —Jutii jimajaitag nunuti ame inamtaijum imana nui, makichkia nu untsugmin ekenkum, tikichia nu menajui ekeemsatin atajum tukagtita, tuidau.
MAR 10:38 Tiagtai Jesús ayaak: —Atumek mina segatjum duka dekatsjume. ¿Atumesh wi waittsattag imaanikjumesh waitmainuk ainajum nuigtush wi jakattag nunisjumkek jamain ainajum?, tau.
MAR 10:39 Tama dita chichainak: —Ehé, nunimainaitji, tuidau. Tiagtai Jesús ditan chichajak: —Dekaskenmag wi waittsattag nunisjumek atumesh waittsatin ainagme, wi jakattag nunisjumek jakatin ainagme,
MAR 10:40 tujash mina untsujui, mina menajui ekeemsatin atajum tusanuk tumaitsujime. Duka ya aidau ekeemsatnuji umigkamuita nudau ainawai.
MAR 10:41 Nu tabaun tikich diez jintintaiji aina nu antukag, Juagkan Jacobojai kajegkajui.
MAR 10:42 Nuniagtai Jesús ditan untsuká chichajak: —Atumek dekagme, aents ju nugka juiya aentsun apuji aidauk aentsnak ditanua nunin emak inainawai, tuja nunú apu aina nuna aentsji aidaushkam aentsnak dita wakegamun inainawai.
MAR 10:43 Tujash atum ainajum anuiyag nuninuk amaitsui; dekas apu atatus wakegauk atum ainajum anuiyag tikich aina nuna umijin amainai.
MAR 10:44 Atum ainajum anuiya dekatkau atatus wakegauk, tikichi inake amainai.
MAR 10:45 Wagki Aentsmaga akiinauwa duka umigtuktinme tusag taachui, tikich aidaun yaigtatus tauwai, ni mantamna kuashat aentsun uwemtikata tau asa, tiuwai.
MAR 10:46 Jericó jegawajui; nunik nuiya jiinki Jesusak ni jintintaiji aidaujai nuigtú kuashat aents aidaujai ashinai, wainmachu Bartimeo daagtin Timeo uchijí jintá yantam ekeemas, kuichkin segamak eketu.
MAR 10:47 Nuniau Jesús nazaretnumia nagkaemawai tabaun antuk, untsumtan nagkamau, nuniak: —¡Jesusah Davita uchijiyah, wait anenjugta! wajau.
MAR 10:48 Imattai kuashat aents itatkati tusag jiyaidau; tujash nigka nuní senchi untsumak: —¡Davita uchijiyah, minash wait anenjugta! wajau.
MAR 10:49 Imattai Jesuschakam wajantú, nunik chichaak: —Untsuktajum, tau. Tutai wainmachun untsuinak: —Shiig aneasta, untsugmawai wajaktá, tuidau.
MAR 10:50 Tama niishkam tseke wajakí jaanchjinak nagkimá ukuak Jesús wajamunum jegantui.
MAR 10:51 Nunikmatai Jesús iniak: —¿Minash utugtukti tusamea wakegame?, tau. Tama wainmachu ayaak: —Maestroh wainmaktasan wakegajai, tau.
MAR 10:52 Tutai Jesús: —Wetá, ame dekaskeapi tabaugmin tsagajume, tiuwai. Tusá tamawaik wainmakui, nunik Jesús wetai niishkam weuwai.
MAR 11:1 Jerusalén tikiju awajus weenak, jegawajui Betfagé nuigtú Betania Olivosan mujajin diiká awa nui, nunik Jesús ni jintintaijin jimajan awemauwai,
MAR 11:2 nunik chichajak: —Wetajum au yaakat yaijuch awa awi, nuwi waikmajum wainkattagme burro tsakat jigkam wajau, makichik aentskesh entsamchatai, nu atiajum itaatajum.
MAR 11:3 Nu dutikagmin makichik aentskesh: ¿Wagka aikagme? tusa inimpainakuig, Apu atsumawai, wamak awagkittawai tusajum ukuktajum, tiuwai.
MAR 11:4 Tiajam wegag, burrok yaakta waitijin agaan jigkam wajattaman wainkajui, nunikag atiawajui.
MAR 11:5 Dutikiagtai ujumak aents nui ijunaidau: —¿Wagka burrosh atiagme? tusag inidau.
MAR 11:6 Tiagtai ditashkam Jesús titá tibaunak dutiksag tiajui, tutai jukiti tusag idaisajui.
MAR 11:7 Dutikawag burron jukiag Jesusan ejetuawag, burro tuntupen jaanchji aidaun aitkajui, dutikawagmatai niishkam ekebiuwai.
MAR 11:8 Kuashat aents jaanchji aidaun ainag emainai tikich aidauk ajanmayan dukan tsupijag ainag emaidaush aidau.
MAR 11:9 Imatikainak aents eemak weedau, ukunum minidaushkam untsumkag: —¡Emematiagmi! ¡Apu Apajuí awemam miná duka pegkegmai!
MAR 11:10 ¡Pegkejai iina apají David inamajakua nui inamjatatus mina nu! ¡Nigki nayaimpinmash ememattai atí! wajaidau.
MAR 11:11 Nunik Jesús Jerusalén wayá, jega Apajuí ememattainum weuwai. Nunik ashí wají nui atatman diis ukuak, etsa akaegu asamtai jintintaiji doce aina nujai Betania weuwai.
MAR 11:12 Kashinia dui betanianmaya jiinki wegamunum Jesús yapajuau,
MAR 11:13 nunikmá ikaag wainkau higuera duken, nunik neje atsuash tusa diistatus wejiu; tujash jegantá diikmá nejeg atsau ayatak dukeg au, higo nejetchau asamtai.
MAR 11:14 Jesús higueran chichajak: —¡Ame nejekbaunak makichik aentskesh tuke yuwachagtin ainawai!, titatman ni jintintaiji aidau antugkajui.
MAR 11:15 Jerusalén jegawag jega Apajuí ememattainum Jesús wayá, nui sujak batsatun sumau aidaujai agaa jiijú, dutikak aents kuichki yapajiin aidau mesajinashkam shitatki akaketuk, paumá sujin aidau ekeemtaiji aidaunash dutiksag akaketkau,
MAR 11:16 dutika jega Apajuí ememattaiya nui makichik wajinakesh takusá wayawainum tusa dakitau.
MAR 11:17 Nunik jintinkagtak: —Apajuí chichame agagbaunum: “Mina jegajuk ashí tikich nugkanmaya aidau Apajuí aujuinaku ijuntai tutai atinai” tawa nuniaig atum kasa aidau batsamtai emaugme, tiu.
MAR 11:18 Nuna timatai sacerdote apuji, maestro chicham umiktinun jintinkagtin aidaujai antukag, wajuk maumainaita tusag egatuidau; wagki ni jintinkagtamun ashí aents puyatjus antujuidau asamtai nuna ishamainak.
MAR 11:19 Tujash kiitai, Jesusak jintintaiji aidaujai yaaktanmaya jiinjajui.
MAR 11:20 Shiig kashikmas ai nagkaemakmag, higuera ashí kagkapejai kukag wajattaman wainkaju.
MAR 11:21 Nunik Pedro adeag Jesusan chichajak: —Maestroh, diisia ame higuera yumigjam ukukmaum nu kukajá wajana, tau.
MAR 11:22 Tutai Jesús ayaak: —Imá Apajuiyaig dekaskeapi titajum.
MAR 11:23 Wagki dekaskenum tajime, makichkitigmekesh ju muja chichagkujum: ¡Jui atsuk nayants wajaata! tusam anentaiminish utujimtsuk dekas wi taja duka nuniktatuapi tamak, nunisag uminkattawai.
MAR 11:24 Nuadui tajime, Atum Apajuí aujku segakjumek, dekas jukittajapi titajum, nuniakjumek jukittagme.
MAR 11:25 Atum Apajuí aujkugmek, tikichjai kajegdaikamu ajutjamkuig tsagkujatajum, atumnashkam Apajuí nayaimpinum puja dushakam aikasag tsagkugtamjatnume atum pegkegchau chichakbaugminash.
MAR 11:26 Wagki atum tsagkugkagtushtaik, atumin Apa nayaimpinum puja dushakam, atum pegkegchau chichakbaugminash tsagkugtamjashtatjume.
MAR 11:27 Ataktú wakitkiag Jerusalén jegawajui. Nunik jega Apajuí ememattainum Jesús wekaetatman sacerdote apuji, maestro chicham umiktinun jintinkagtin aidau nuigtú tikich apu aidaujai jegaantag,
MAR 11:28 iniinak: —¿Aminash ya jintinkagtuata tusash awetamae? ¿Ya ju aikata tusash tujamae?, tuidau.
MAR 11:29 Tuinam Jesús ayaak: —Wishakam iniastajime, atum nu aigkagmin ujaktajime ya jutikata tujutmataiya jutikaja junash.
MAR 11:30 ¿Juagnash ya yamijatjata tiuwaita, Apajuik awemauwait atsa aents aidauk awemauwait? Nunú aigkatajum, tau.
MAR 11:31 Tama utujimkag, ditak pempeentunikiag chichainak: “Juagnak Apajuí awemauwai tajinish, ‘¿tujash wagka dekaskeapi tichau ainagme’ tujamtata jama?
MAR 11:32 ¿Wajintajiki, aents aidau awemauwai titajiash?” Tuinayatak aents aidaun ishamaidau Juagkak dekaskenum profetayai tuidau asagmatai.
MAR 11:33 Nuninak Jesusan chichajuinak: —Dekatsji, tuidau. Tiagtai Jesús ayaak: —Wisha tichattajime yana chichamenia jutikaja nunak, tiuwai.
MAR 12:1 Jesús ataktú augmatbaun pachis aents aidaun jintintak, tau: “Aents niina ajajin uvan aajakui, dutika tanishig, uva yumiji ijugtinnash umik, wajasá diistinnash torre ajiauwai. Dutika ujumak takau aidaun: Atum takastajum nuniakjum minash sujustajum tusa susa ukuak tikich nugkanum weuwai.
MAR 12:2 Nunik uva juut jegamtai, makichik inaken awemauwai takau batsatbaunum, nui jegamtai uva neje jukbaun niinun susatnume dutikam itagtuati tusa,
MAR 12:3 nui jegamtai uva neje jukbaun niinun susatnume dutikam itagtuati tusa, nunik jegattaman takau aina nu suwimawag sutsuk wainak awagkiajui.
MAR 12:4 Dutikawagmatai ataktú tikich inaken awemauwai, tujash nunak kayai buuknum tukuag upukajui, dutikawag pegkegchaun chichagkag awagkiajui.
MAR 12:5 “Dutikawagmatai tikichin awemauwai, nunashkam maawajui. Dutikamtai tikichin kuashat ishiakui; dutikamun ujumak suwimainak, tikichnak maawajui.
MAR 12:6 “Inagnamun niina uchijí makichkiuch aneetaiji ajamun dita batsatbaunum awemauwai: ‘Mina uchignak ajantusampap diimain ainawa’ tusa anentaimas.
MAR 12:7 Tujash takau aidauk ditak pempeentunisajag: ‘Auwai ju aja juna jukitnuk, maami, dutika juka iinu emami’, tuidau.
MAR 12:8 Tusag achikaju, dutika maawag uva ajakbauwa nuna ukumtikiag iyashinak ajapawajui.
MAR 12:9 “¿Nunash uva ajagtina dusha utugmainaita? Dekas ajagtina nu tajakug nunú ajanum takaina nunak kajeg idaiyak, ajanak tikichin sumainai.
MAR 12:10 “¿Atumek Agagbauwa duka ausachuk ainajum: “ ‘Kayá ekenag jegamin aidau, kaya pegkegchauwai tusag dakitjajua nunú, yamai dekas jegá ichichkatin kaya apujtutia iman wajasé;
MAR 12:11 Nunak Apu Apajuí dutikau asamtai jutii diismak anentai ejetumaitsui’ tawa duka?”
MAR 12:12 Tutai achiktag tuidau, wagki augmatus tawa nunak, ditan pachis tawa nuna dekaidau asag, tujash aents tuwakajua nuna ishamaidau asag, ukuinak weajui.
MAR 12:13 Nunikag ujumak fariseo aina nuiyan, Herodesan aentsji aidaujai awemajui, Jesusan iniastinme dutikam wajintig, nunikmatai tsanumjugmi tusag.
MAR 12:14 Dutikawajam ditashkam Jesusan jegaantag: —Maestroh, dekainaji, amek dekaskea nu tame duka, nunin asam aents tuina dukesh uyumatsme, wagki dita shiig awajkatasam tachau asam, Apajuí jinti dekaskea duke pachisam jintinkagtau asam. ¿Amesh wajinpa, Cesarash sumainashit, atsa sumainchaukaih? tusag inidau.
MAR 12:15 Tama Jesús dita tsanubaujin dekaju asa: —¿Wagka pegkegchau anentaiyai dekapjustasagmesh wakegagme? ¡Makichik kuichik itagtuakjua diistajai!, tau.
MAR 12:16 Tutai ditashkam ejentuntaju, dutikam: —¿Yana niimempaita jusha, tuja yana daajiyaita ju agagbauwa jusha?, tau. Tutai dita aiinak: —Cesardauwai, tiaju.
MAR 12:17 Tiagtai Jesús ayaak: —Cesardauwa duka Cesarak susatajum, Apajuinua duka Apajuí susatajum, tiuwai. Nuna timatai anentai jegagchajui.
MAR 12:18 Nuniku ai saduceo aidaushkam Jesusan tajuntajui, jakauk nantakchagtin ainawai tinu aina nunú, nunikag iniinak:
MAR 12:19 —Maestroh, Moisés agag ukugtamkiuwa nuig, makichik aents nuwentin uchi akiitsuk jakamtaig, yachi nuwan juki uchin akig yachí uchijiya nunin emamainai tawai.
MAR 12:20 Nuniamunum siete yachigbau aajakui. Nuanuiya nagkamchak iwai nuwenauwai, tujash uchin akiitsuk jakauwai.
MAR 12:21 Nunikmatai tikich yachi jukiuwai. Nunik niishkam uchinak akiitsuk jakauwai. Kampatuma nu jukishkam nunisag jakauwai.
MAR 12:22 Nuni nuninakua siete aajakajua duka uchinak akiitsuk ashí jinawajui. Nunikaju ai dui pujus nuwashkam jakauwai.
MAR 12:23 Dusha atak nantamu atina dui nantainakush, ¿siete aajakajua nu nunak nuwatkajua duish, yana nuweg atinaita?, tuidau.
MAR 12:24 Tiagtai Jesús ayaak: —Atumek Agagbau aina nu nuigtú Apajuí senchijiya dushakam dekachu asajum dewakugme.
MAR 12:25 Atak nantamu atina duik nuwenbauk atsutnai, ángel nayaimpinum batsata nuninuk agtinai.
MAR 12:26 Tujash jakau nantajagtinun pachis tawa duka, ¿atumek ausachuk ainajum Moisés papí agagbauwa nui Apajuí zarza kegamunum chichaak: “Witjai Abraham, Isaac, Jacob aina nuna Apajuijinuk” tawa duka?
MAR 12:27 ¡Apajuik jakau aidaun Apajuijinchui, iwaaku aina nuna Apajuijiyai! Nunin aig atumek shiig kuashat dewagme, tiuwai.
MAR 12:28 Jesús shiig aimkamun maestro chicham umiktinun jintinkagtin aina nuiya antuku asa, jegantun iniak: —¿Tuwaita ashí chicham umiktin aina nuiya dekatkau umimaina dusha?, tau.
MAR 12:29 Tutai Jesús ayaak: —Ashí chicham umiktajum tibauwa nuiya dekatkau umimainuk juuwai: “Antuktajum Israel aidauwah, Apu iina Apajuijiya duka, Apuk makichkiuchi.
MAR 12:30 Amina Apujum Apajuiya nu, ashí anentaimjai, ashí amina wakanmijai, ashí amina anentaimtagmijai, ashí amina senchigmijai aneeta, tawai.
MAR 12:31 Tuja tikichia duka jujai betekmamtinai, duka: Tikich aidaush amek anenmamsam aneeta”, tawai. Tikich chicham umiktin juna nagkaesauk atsawai, tau.
MAR 12:32 Tutai maestro chicham umiktinun jintinkagtinchakam: —Maestroh duka dekas tame, imá makichik Apajuik awai, tikichik atsawai;
MAR 12:33 tuja ashí anentaijai, ashí anentaimtajai, ashí senchijai nuigtú tikich iik anenmamsa aneamua nuuwai kuntin maa apeaku Apajuí ememattaiya nuna nagkaesauk, tiuwai.
MAR 12:34 Shiig anentaimas timatai, Jesús wainak: —Apajuí inama nuig atushat atsume, tiuwai. Nui nagkamsag makichik aentskesh inimainchau dekapjajui.
MAR 12:35 Jesús jega Apajuí ememattainum jintinkagtak: —¿Wajuk asamtaiya maestro chicham umiktinun jintinkagtin aidaush, Cristuk Davita uchijiyai tuinawa?
MAR 12:36 David Wakaní Pegkejiya nu ichachiam: “Apu mina Apujun chichajak: Ekeemsata mina untsujui, nunikamin wi amina shiwajum aidaunak ashí idaitustajame”, tiuwai.
MAR 12:37 David mina Apug tawa nuniaish, ¿wajuk asaya Davita uchijish amainaita? tau. Tutai nui aents tuwakú aidauk shiig aneasag antujuidau.
MAR 12:38 Jesús jintinkagtak: “Maestro chicham umiktinun jintinkagtin aina nujaig kuitamamkatajum, ditak nugkutai esagman nugkujag yujainak, plazanum igkuntuinakush eme anenjus kumpamjitnume tusag wakejin ainawai,
MAR 12:39 nuninak jega ijuntainum nuniachkush yuamunum wainakush aents eme anentsá ekeemsati tibaunum ekeemsagtatus wakejin ainawai,
MAR 12:40 nuninak nuwa waje aina nuna jee aidaun atankiag tsanumainak dukap Apajuí aujú yujau ainawai. Nunú aidau imá senchi bakumatin ainawai”.
MAR 12:41 Jesús ofrenda egketainum igkuas, aents aidau kuichkin egkeagtai diyak eketu; tuja kuashat wiyakuch aidaushkam kuichkin kuashat chimpidau.
MAR 12:42 Nuniai nuwa waje ujunauch taa, niishkam jimagchik kuichik cobre najanamu, akiktanash imanis akikchaun egkeauwai.
MAR 12:43 Nunikmatai jintintaiji aidaun untsuká ikaunman chichajak: —Dekas tajime, ju waje ujunauchia ju ashí kuichkin egkeena nuna nagkaesau imá kuashat egkeae,
MAR 12:44 wagki ashí tikich egkeawaja duka ampinun egkeawaje, tujash juka ujunauchitak ni sumaka yumainjiya nunak ashí egkeae, tiuwai.
MAR 13:1 Jesús jega Apajuí ememattainmaya jiintatman niina jintintaiji aina nuiya makichik: —Maestroh, ¡kaya aina nu diisia nuigtú jegamkamua dushakam!, tau.
MAR 13:2 Tutai Jesús ayaak: —¿Ju ibau ekenjá jegamkamua nu wainjumek? Juka makichik kayakesh ekenjamu aina nuiyag juwakchatnai, ashí tsaikbau atinai, tiuwai.
MAR 13:3 Olivosa mujají jega Apajuí ememattaijai ninis awa nui waka Jesús ekeemsauwai. Nunikmatai Pedro, Jacobo, Juan, Andrés aatus niinak akanak iniinak:
MAR 13:4 —¿Wajutiya dusha nuniktinaita? ¿Tuja tu wantinkatnaita ashí nu wají aina ju uminkatnush?, tuidau.
MAR 13:5 Tiagtai Jesús ditan ayaak: “Kuitamamkatajum makichkish tsanugmajainum,
MAR 13:6 wagki kuashat midiagtinai mina daajun pachisag, nuninak: ‘Witjai Cristunuk’, tusag kuashat tsanubiagtinai.
MAR 13:7 “Atumek maaniamu aidau, nuigtú maaniatasa pampandayamu antakjumesh puyatkatin aigpajum; wagki duka aatus nagkaemaktinai, tujash nu achatnai nagkanbauk.
MAR 13:8 Wagki nugka muunnum inamnuk, mai imanuk maaniagtinai, tuja nugka yaignum batsamnushkam mai nuninuk maaniagtinai. Nuigtush kuashat nugkanum uugbaush atinai; nuniai yapagtash tepeatnai, pampandayamushkam atinai. Waitiamu yama nagkamnamuk nu agtinai.
MAR 13:9 “Tujash atumek kuitamamkatajum; wagki apu chichaman inagnau aidaunum sujupakagtinai nuigtú jega ijuntai aidaunum awaintamawag asutamawagtinai. Dutijamainak mina nemagtau asagmin gobernador batsatbaunum ejetamawag nuigtú rey batsatbaunmash ejetamawagtinai, mina pachitus titinme tusag.
MAR 13:10 Tujash dekatkauk yamajam chichama juka ashí nugkanum makí makichik chichaman chichaaku batsata nuish etsegkamu atinai.
MAR 13:11 Tuja apunum sujupaktatus jujamainakuish, atum chichaktinuk uyumakaigpajum, nui titatjum duka Apajuí tujamtata nu chichaktatjume; wagki duka atum chichakchattagme, Wakaní Pegkejiya nu chichamtijamkatnai.
MAR 13:12 Nuniamunum yachin maatnume tusag sujiagtinai, antsag uchigtin aidaushkam uchijin maatnume tusag sujiagtinai; uchi aidaushkam apají shiwagmagtinai nuninak maidiagtinai.
MAR 13:13 Ashí aents aidau kajegtabiagtinai mina daag pachisjum chichau asagmin; tujash ni ebetmamag nagkanbaunum jegá nu uwemjagtinai.
MAR 13:14 “Tuja profeta Daniel, makichkish dutikmainchaun shiig pegkegchau dutikawagtinun pachis tiuwa nunú wainkugmek (nuna aujuk dekaatnume), Judea batsatutigmek mujá pisagtin atajum.
MAR 13:15 Tuja jega ekenja jegamkamu nagkatka nui pujauk, akaiki jegagkesh wayawaigka makichik wajiijinakesh jukitasag,
MAR 13:16 antsag ajanum takaak pujaushkam, jaanchi jukitjai tusag waketjukigka.
MAR 13:17 ¡Wait anentuinajai nunú tsawantin nuwa ejamtin nuigtú uchí amuntsuaku agtina nunak!
MAR 13:18 Apajuí ausatajum, atum pisamua nu tsetsek tepeamunum ajutjaminum.
MAR 13:19 “Wagki Apajuí nugká najanauwa nui nagkamas yamaiya juish imanika waitchatain, atakea duish imanika waittsashtin tikima senchi waitiamu atinai.
MAR 13:20 Tuja Apu Apajuí nu waitiamu aina nuna imijchataik, makichkish uwemainchau ainawai; tujash ni etegjamuji aina nu aneamunum, waitiamu aina nunak imijkatnai.
MAR 13:21 “Tuja makichik aentskesh: ‘Diistajum, Jui Cristo pujawai’ tachakush ‘Awi pujume’ tuinakuish dekaskeapi tiigpajum.
MAR 13:22 Wagki kuashat aents ‘Cristuitjai’ tusag nuigtú profeta ainaji tuidaush wantinjagtinai; nuninak kuashat aents dutikmainchaun iwainagtinai tsanumainak, nunidau asag Apajuí etegkamu aidaunash dita tsanuamunak tsanujagtinai.
MAR 13:23 Nuadui atumek kuitamamkatajum, ashí juna pachisnuk yaunchuk emtikan tibaijime.
MAR 13:24 “Nunú tsawan waitut nagkaemaig, etsag suwe wajastinai, nantushkam etsanbaunak megkaekatnai.
MAR 13:25 Yaya aidaushkam kakeyagtinai, imanidau asagmatai nayaimpinmaya senchigtin aidaushkam buchitjagtinai.
MAR 13:26 Nunú imaniai Aentsmaga akiinauwa nu, yujagminum pachitkau ashí senchijijai tsawan wajasá minaun wainkagtinai.
MAR 13:27 Ni angelji aidaun ishiaktinai, dutikam ni etegjamuji aidau ashí nugka nagkatkamunum nayaim najatamunum batsatun ijumjatnume tusa.
MAR 13:28 “Higueran pachisan augmattsan titatjim nu unuimagtajum, atumek: ‘Higuera kanawe aidau wentsamtuju dukegkuig wamkeap esat nagkamnattawa’, tusajum dekau ainagme.
MAR 13:29 Nunisjumek, nunú wají uminaidau wainkugmek, Aentsmaga akiinauwa nu taatnuk namput wajaschagapi titin atajum.
MAR 13:30 Dekas tajime, yamai aents aina jusha batsataig ashí uminkatnai.
MAR 13:31 Nayaimpik nugkajaig megkaejatnai, tujash mina chichamjuk umintsukek juwakchatnai.
MAR 13:32 “Tujash tsawannak nuigtú horanash makichkish dekainatsui, nayaimpinmaya ángel aidaukesh, Apajuí Uchijigkesh dekatsui, imá mina Apajuk dekawai.
MAR 13:33 Nuadui atumek aneaku pujakjum iwá pujutajum, wagki nu tsawan uminkatnuk dekachu asajum.
MAR 13:34 Juka, aents tikich nugkanum weak, niina inake aidaun jega kuitamjutkatajum tusa makí makichik inake aina nuna takatan tinamak, waitin kuitamkatnunashkam iwá pujutá tusa ukuak weuwa nuninai.
MAR 13:35 Nuadui iwá pujutajum, wagki jeenna dusha wajutik minit; kintamkumpash nuniachkush ae aetash, atash shinaimpash, kashikmasampash minit duka dekachu asajum;
MAR 13:36 nuniagmin pachiachbau minikmá kajigka batsatjumin waipakainum.
MAR 13:37 Atumin tajim junak, ashí tikichnash tajai: ¡Iwá pujutajum!”
MAR 14:1 Jimag tsawan asa fiesta Pascua nuigtú pag levaduragtuchu yutai jegatin ai, sacerdote apuji aidau maestro chicham umiktinun jintinkagtin aidaujai, wajuk Jesusash achikaiya tsanumjuja maumainaita nuna egatuidau.
MAR 14:2 Nunidau asag: Fiesta aigkik dutikachagmi, aents aidaujai pampandayamu ai, tiajui.
MAR 14:3 Jesús Betania weuwai, Simón lepragtin tutaiya nuna jeen. Nunik mesanum jegan eketai, makichik nuwa botella alabastro najanamunum kugkuin ayatak nardo najanamu senchi akikan takusá tajuauwai. Dutika botella alabastro najanamua nuna kupik Jesusa buuken ukatjauwai.
MAR 14:4 Dutikamtai ujumak aidau initkag kajedaush asajui, nunikag: —¿Wagka kugkuinnash wainkash wasujua?
MAR 14:5 Aikatsuk trescientos denario amain sujuka ujunauch aidau sumainajamah, tusag nuwan ashishmatuidau.
MAR 14:6 Tiagtai Jesús chichajak: —Idaisatajum, ¿wagka waitkagme? Pegkejan jutijawai.
MAR 14:7 Ujunauch aidauk tuke atumjai batsamiagtatui, nuniakui atum wakegakjumek yaimainaitjume, untsu wika atumjaig pujushtatjai.
MAR 14:8 Juka nuwak ni dutikmaina nuna dutikae; wagki mina iyashjunak emtika ukatjutkae mina ukugsagtina nuna.
MAR 14:9 Dekas tajime, yamajam chichama juna etsejuinak ashí nugkanum yujainakush, ju nuwa mina jutija juna pachis tuke etsejiagtin ainawai, tiuwai.
MAR 14:10 Nuna timatai Judas Iscariote, doce aina nuiya jiinki weuwai sacerdote apuji aidaujai Jesusan wajuk sujumainaita nuna chichaman umiktatus.
MAR 14:11 Nu tama antukag shiig aneasaju, nunikag kuichkin susatatus anagkuawaju. Dutikam Judaschakam wajuk yupichu sujukajak tusa egatu.
MAR 14:12 Pag levaduragtuchu yutai nagkamak fiesta tsawagbaunum, Pascua yuwatin uwig aishmag tsakat mautai asamtai, Jesusa jintintaiji aidau: —¿Tuwí umiktatji Pascuatin yuwatnush?
MAR 14:13 Tiagtai jimagchik niina jintintaijin awemak: —Yaakat wetajum, nunikjum aishmag yumin aimak waketu wainkattajum nunú pataetuktajum,
MAR 14:14 nunikjum wayaakui jeenna nu: “Maestro chichaak: Tuwí wi mina jintintaig aidaujai Pascua yumainush” agkantash awa tujamae titajum, tiu.
MAR 14:15 —Nu tajumin ni inaktugmastatui yakí tesamu agkan muuntan shiig umikbaun, nuanui jutiinuk umiktajum, tiu.
MAR 14:16 Tiajam jintintaiji aidaushkam wegag yaakat jegakmag, ni tibaunak imatiksag wainkag, Pascuatin yuwatnunak nui umikajui.
MAR 14:17 Kiyagmatai Jesús niina jintintaiji doce aina nujai jegawaju.
MAR 14:18 Nunik mesanum pekaamsag yuwinamunum Jesús chichaak: —Dekas tajime: Atum ainajum juwiyag makichik wijai yuwa nu minak sujutkattawai, tau.
MAR 14:19 Tutai ditak wake besekaju, nunikag makí makichik iniininak: —¿Wikaitag? tutai, tikitchakam: —¿Wikaitag? wajaidau.
MAR 14:20 Tiagtai Jesús ayaak: Duka doce ainajum juwiya wijai nu platonmag uchutua yuwa nuuwai, tau.
MAR 14:21 Tusa: —Dekaskenmag Aentsmaga akiinauwa duka, ni pachisa agagbauwa nunisag wetatui; tujash, ¡wait anentajai ya sujuktatua nunak! Duka dekas akiinmainchaunas akiinawabiataih, tau.
MAR 14:22 Yuwinak pekagbaunum, Jesús pagkan juki Apajuin see tii puuká, ditan suwak: —Ju yuwatajum, juka mina iyashjun iwainawai, tau.
MAR 14:23 Tusa, copa juki Apajuin see tii ditan susauwai, dutikam ashí betek uwajajui.
MAR 14:24 Dutika: —Juka mina numpajui, yamajam chicham apaamunum kuashat aentsnum ukaejatta nuuwai.
MAR 14:25 Dekas tajime, ju uva yumijinak awenanuk uwagchattajai, atak tsawan uminkui Apajuí inamtaijin ataktú yamagman uwagtin asan, tiuwai.
MAR 14:26 Nuna timatai himno kantamawag, Olivosan mujajin weajui.
MAR 14:27 Nunik Jesús ditan chichajak: —Jujú kashia juik, ashí atum aidautigmek mina pampanjugtatjume; wagki agagbauwa nui: “Pastoron maattajai, dutikam uwig aidauk pampagkagtinai” tawa nunisag.
MAR 14:28 Tujash ataktú nantakin, atumek Galilea wegatsjuminig wiyá emkan wetatjai, tiuwai.
MAR 14:29 Tutai Pedro ayaak: —Ashí tikich aidau ukugmainakuish, wika nunikchattajai, tau.
MAR 14:30 Tutai Jesús ayaak: —Dekas tajame, yamai kashia juik atash eke jimajá shinatsaig, kampatumá wainchaujai tujuttatme, tau.
MAR 14:31 Tamashkam Pedrok itatchau, nuniak: —Amijai jakata tau asan wainchaujai tichattagme, tau. Tutai tikich aidaush ashí dutiksag tiajui.
MAR 14:32 Nunikag ajak ajakbau Getsemaní tutainum jegawajui. Nunik jintintaiji aidaun: —Jui ekeemsatajum, nuniagmin wi awi wenu Apajuin ausatjai.
MAR 14:33 Tusa weak Pedron, Jacobon, Juan aatus yajuak ditajai wesa, wake besetan nagkamauwai nuniak shiig senchi anentaimak waitiau,
MAR 14:34 nuniak: —Senchi wake besemag dekapeakun jamain dekapeajai, atumek jui batsamsajum iwá batsamtajum.
MAR 14:35 Tusa machik kuwaesag, nugká tikishmag, Apajuin ausauwai, nunimain ataig ni waitmaina duka tsawantak jegagtishti tusa.
MAR 14:36 Nunik: “Mina Apajuh, ashí wají aina duka ame dutikmainaitme, wi waitmainaitag nuwig agkanmitkajuata, tujash wi wakegamuk achati, ame wakegamu atí”, tiuwai.
MAR 14:37 Tusa wakitki dita batsatbaunum jegakmá, kajig batsatun wainak, Pedron chichajak: —Simón, ¿kanamek? ¿Makichik horakesh iwamainchauk dekapeam?
MAR 14:38 Kají batsamtsuk Apajuí ausatajum, pegkegchaunum iyawaijum; dekaskenmag wakanik pegkejan takastatus wakegawai, tujash iyashia nuuwai kakaakchauk.
MAR 14:39 Tusa ataktú wee, ni tibaujiya dutiksag, Apajuí ausauwai.
MAR 14:40 Nunik waketjuki diikmá, ataktú kajig batsatun wainkauwai kaji senchi mainam, nunidau asag aimainchau dekapjajui.
MAR 14:41 Kampatuma jui waketjuki taa, chichajak: —Kajigtajum nuniakjum ayamjatajum, yamaik horak jegae Aentsmaga akiinauwa nuna tudaugtin aidaunum sujam atata nu.
MAR 14:42 Nantagtajum, wegagmi; mina sujuta duka tikiju minawai, tiuwai.
MAR 14:43 Tusa Jesús eke chichaak wajai, Judas, doce aina nuiya kuashat aents espada, numi aidaun takuinaku sacerdote apuji nuigtú maestro chicham umiktinun jintinkagtin aidau judío apuji aidau ishiakbaujai tajuntauwai.
MAR 14:44 Judas Jesusan sujukua nu: “Wi kugkuastatag nu atatui; achikjum shiig emetjajum jukitajum”,
MAR 14:45 tiu asa Jesusan wamkes jeganmawaik: —¡Maestro! takug kugkuasui.
MAR 14:46 Dutiktai achikag jukiajui.
MAR 14:47 Tujash ijuna nuiya makichik espadajin ukuini juwakug, sumo sacerdote inake kuwishin tsupigkauwai.
MAR 14:48 Tuja Jesús nu aents aidaun chichajak: —¿Wagka kasa achiktasa utugmaina imanikjumesh espada, numi aidau takusjumesh achigkatasagmesh minitjagme?
MAR 14:49 Wi kashí kashinig jega Apajuí ememattainum atumjai pujusan jintinnujime, nuniakuish achigchau agmaugme; tujash juka Agagbau uminu asamtai juniagme, tiuwai.
MAR 14:50 Nuna taig, ashí niina jintintaiji aidauk pisainak, ukukiajui.
MAR 14:51 Tujash makichik datsauch sabanan pempemag pataetuku, nunittaman achikajui,
MAR 14:52 tujash sabananak ukuak wisú tupikakiuwai.
MAR 14:53 Jesusan jukiag sumo sacerdote pujamunum ejegawajui; dutikawagmatai ashí sacerdote apuji aidau, judío apuji aidau nuigtú maestro chicham umiktinun jintinkagtin aidaujai ijunjajui.
MAR 14:54 Tuja Pedrok ikaag pataetus wea weakua, sumo sacerdote jeen wayá agaajin achijatin aidaujai jiin anamak eketu.
MAR 14:55 Sacerdote apuji aidau, ashí apu chichaman inagnau aidaujai egatuidau, Jesusan tsanumjujag maatnume tusa sujukagtatus, tujash ejetuinachu.
MAR 14:56 Wagki kuashat wainak tsanumjuinakush, betek tuinachu.
MAR 14:57 Nuniai ujumak wainak tsanumjuinak:
MAR 14:58 —Jutii ni tabauk antugkabiaji: “Wi ju jega Apajuí ememattai uwejai takasbauwa nunak yumpuan kampatum tsawantai tikichin uwejai takaschamun jegamkattajai” timayi, tuidau.
MAR 14:59 Tujash nuna aatus tuinakush makichkish bakumainchaun tuidau.
MAR 14:60 Nuniai sumo sacerdote ejapen wajantá, Jesusan iniak: —¿Wagka machikish aimtsume? ¿Nunash wajinbauna tujamainawa?, tau.
MAR 14:61 Tujash nigka aimkag chichaachu, nunitai sumo sacerdote awentsag iniak: —¿Amekaitam Cristo, Apajuí Pegkeja nuna Uchijim?, tau.
MAR 14:62 Tutai Jesús ayaak: —Witjai, nuigtush wainkatnaitjume Aentsmaga akiinauwa nu Apajuí ashí senchigtina nuna untsujin eketu nayaimpinmaya yujagminum pachitkau minamu, tau.
MAR 14:63 Tutai sumo sacerdote ni nugkuagbaujin japikí ichigká chichaak: —¿Nuigtush ya etsegtukti tusaya atsumaji?
MAR 14:64 Apajuin pegkegchau chichagka nu antukugme, ¿atumesh wajuk anentaimtagme? Tusag ashí pampajag, mantamnati tiajui.
MAR 14:65 Tiagmatai ujumak usukinai, jiin epetkag ijuinak: —Adaikakia, ya ijupime, tuidau. Tuja achijatin aidaushkam yapinum awatuidau.
MAR 14:66 Pedro jegá agaajin nugkaa pujai sumo sacerdote inake nuwa aina nuiya makichik tajuntau,
MAR 14:67 nunikmá Pedro jiin anamak ekeemtatman wainak, dii wajatu, nunik: —Amesh Jesús nazaretnumiaya nujaimpap wekaemume, tau.
MAR 14:68 Tama Pedro uwaak: —Wika wainchaujai, ame tujutam nunakesh dekatsjai, tiuwai. Tusa ukuak waitaiya nuní jiinkiuwai, nuniai atash shinukui.
MAR 14:69 Nuwa inaka nu ataktú wainak, nui batsatun chichajak: —Jujú ditajai wekaenuwejamah, tau.
MAR 14:70 Tujash nigka ataktushkam uwau. Nuniai machik asag, nui batsatu ataktushkam Pedron chichajak: —Dekaskenum amesh dita aina nuiyampapitme, wagki amesh galileanmayaitamjamah, dita chichaina aujai betek chichamjamah, tuidau.
MAR 14:71 Imatjuinam pegkegchau chichatan nagkama nuigtú Apajuí adaiyas: —¡Atum tajum nunak wika wainchaujai!, tau.
MAR 14:72 Nuna taig atash awentsag shinukui, nunitai Pedroshkam Jesús chichajak: “Atash jimajá shinatsaig, kampatumá waintsamjai tujuttatme” tibauwa nuna adeag buutiuwai.
MAR 15:1 Tsawamunum, sacerdote apuji aidau, judío apuji aidau, maestro chicham umiktinun jintinkagtin aidau nuigtú apu chichama inagnau aidaujai ijunjag chichasag, Jesusan jigkajag jukiag Pilaton ejetuawajui.
MAR 15:2 Dutikawagmatai Pilato iniak: —¿Amekaitam Rey judío aidaunu?, tau. Tama ni ayaak: —Duka ame tujutme, tiuwai.
MAR 15:3 Tujash sacerdote apuji aidauk kuashat wajiin pachisag etsegtuidau asagmatai,
MAR 15:4 Pilato ataktú iniak: —¿Amek machikish aimtsumek? Diisia kuashat wajiin pachis tsanumjutpaina nu, tau.
MAR 15:5 Tujash Jesusak nu tamashkam aimchau, nunitai Pilato anentai jegagchau.
MAR 15:6 Tuja fiestatinig aents achikbau aina nuiyan makichik jiisagké au, aents aidau ya jiinkiti tusaya segabiagtatua nuna.
MAR 15:7 Nuanui Barrabás daagtin, apu dakituinaku pampandayamunum ni kumpajijai aentsun mau asamtai achikam cárcel egketu.
MAR 15:8 Nuniamunum kuashat aents kaunkag, makichik aents tuke akupdauwe dutiksaik akupnakti tusag Pilaton segaidau.
MAR 15:9 Tama Pilato ditan chichajak: —¿Wakegagmek judío aina nuna Reyjin akupkati tusagmesh?, tiuwai.
MAR 15:10 Nunak sacerdote apuji aidau tuke aneas kajejuinak sujukaja nuna dekau asa tiuwai.
MAR 15:11 Tujash sacerdote apuji aidau aents tuwaká ijunun akatjajui, Pilato dekas Barrabasan jiiktí titajum tusag.
MAR 15:12 Tiagtai Pilato ataktú ayaak: —¿Judío aidau Reyji tajum junash utugkati tajume?, tau.
MAR 15:13 Tutai untsumkag: —¡Achinjati!, tiajui.
MAR 15:14 Tiagtai Pilato ayaak: —¿Tujash jusha wají pegkegchauna takasé?, tau. Tujash nuní senchi untsumkag: —¡Achigtá! awajuidau.
MAR 15:15 Imatiagtai Pilatoshkam aents aidaun shiig awajkata tau asa, Barrabasan jiikiu; dutikak Jesusnak asutiawagmatai achigtajum tusa inamjauwai.
MAR 15:16 Dutikamtai suntag aidau jukiag jega apu pujusá inamtaijin ejegawagmatai, ashí suntag aidau ijuntujaju.
MAR 15:17 Dutikawag jaanch kapantu nentetkaun anugjag, atsejutai jagki najanamun atsemitkakag,
MAR 15:18 eme anentsá kumpamji tusag dushikinak: —¡Juuwai Rey judío aidaunuk! awajaidau.
MAR 15:19 Imatjuinak tagkanai buuknum awatuidau, usuktanash usukidau, nuninak emematji tusag tikishmatuidau.
MAR 15:20 Dutikainak dushí dushikinakua jaanch kapantu nentetkaunak awituk jujuinak, ni nugkutaijinak anugjag juki emajui achijagtatus.
MAR 15:21 Makichik aents cirenenmaya, Simón daagtin Alejandro, Rufo aina nuna apají, ajajinia wakettatman inajajui cruzan yanaktí tusag.
MAR 15:22 Dutika Jesusnak Gólgota tutainum ejentag, (“Gólgota” tawa duka “Buuké sakamtai” taku tawai);
MAR 15:23 vino mirrajai pachimjamun susajui; tujash nigka uwagchauwai.
MAR 15:24 Dutika achijag, suntag aidauk Jesusa jaanchjinak, yana kayají jiintukne nuna diisag akandaikajui.
MAR 15:25 Jesusnak kashikmas a las nueve ai achijajui.
MAR 15:26 Dutikainak wajuk asamtaiya achijaje nuna pachisag: “REY JUDÍO AIDAUNU” tusag agatjajui.
MAR 15:27 Nuigtushkam jimag kasan niijai achijajui, makichkia nuna untsujin awajainak, tikichia nunak menajin awajawajui.
MAR 15:28 Aatus uminkauwai agagbaunum chichaak: “Pegkegchau takau aidaujai betek dutikam atinai”, tawa nunú.
MAR 15:29 Tuja nui aents nagkaemaidauk, buuken pegainak pegkegchau chichajuinak: —¡Waj!, ame jega Apajuí ememattai tegakam kampatum tsawantai ataktú jegamnumjamah,
MAR 15:30 cruznum nematsuk akaikim, amek uwemjakia, awajuidau.
MAR 15:31 Dutiksag sacerdote apuji aidau, maestro chicham umiktinun jintinkagtin aidaujai dushikinak: —Tikich aidaunak uwemtiknuwe, tujash nigkig uwemain dekapeatsui.
MAR 15:32 Cristo, Israela Reyjiya nunú yamai cruznum deta nuna akaikiti nunikmatai wainká dekaskeapi tiagmi, awajuidau. Nunisag niijai achijam detaidaush pegkegchaun chichajuidau.
MAR 15:33 Etsa tutupit wajasú ai nagkamas a las tres wegaish ashí nugkanum suwe wajas asauwai.
MAR 15:34 Nuniamunum a las tres wegai Jesús senchi untsumak: “Eloí, Eloí, ¿lemá sabactani?” tiu. Nunak: “Mina Apajuijuh, mina Apajuijuh, ¿wagka idaitusume?” taku tiuwai.
MAR 15:35 Tuja ujumak aents nui ijunaidau nuna antukag: —Antukjua, Eliasa untsuana, tuidau.
MAR 15:36 Nuniai makichik tupikaki, esponjan vino chujuau pujaunum uchupig, tagkannum aapi Jesús uwagti tusa susau, dutika: —Elías juna kuwaktatus minishtimpash nuniau wainkagmi, tau.
MAR 15:37 Tujash Jesusak senchi untsumak jakauwai.
MAR 15:38 Nunikmatai jega Apajuí ememattainum jaanch ejaamuk, yakiin nagkamnas ichiinak nugkaan jegaak jimaituk kanakui.
MAR 15:39 Tuja capitán Jesús achigbaunum diyaak wajau, senchi untsumak jakamtai wainak, chichaak: —Dekaskenum ju aentsuk Apajuí Uchijí aajakui, tau.
MAR 15:40 Nuigtushkam ujumak nuwa ikaag ijunas diidau, nu aina nuiyag María magdalanmaya, tikich María José nuigtú Santiago ekeuwa nuna dukují, Salomé aatus ijunu,
MAR 15:41 Jesús Galilea pujusmatai, nemajus yujasag yaijakú aina nu; nuigtú kuashat nuwa Jesusjai Jerusalén kaunawajua dushakam.
MAR 15:42 Kintabaunum, tsawan ayamtai nagkamnatin asamtai uminbaunum,
MAR 15:43 José arimateanmaya, apu chichaman inagnau aina nuiya eme anentsá diitai, niishkam Apajuí inamjatnun dakau asa, ajankas Pilaton jegajua Jesusa iyashin segauwai.
MAR 15:44 Tusá segam Pilatok anentai jegachu jakae tutai. Nunik capitanin untsuká iniasui, wajupa yaunchkea jakame tusa.
MAR 15:45 Tutai capitán jakame tusa ujakam, Josen Jesusa iyashinak jukita tiuwai.
MAR 15:46 Dutikam makichik sabanan sumak, Jesusa iyashin kuwakí juki pempeajui; dutika ukumatai kaya tai umikbaunum egkea, kaya muuntan apapetug waajin epeni ukukiuwai.
MAR 15:47 Nui ukuamun María magdalanmaya nuigtú María Josen dukujiya nujai wainkajui.
MAR 16:1 Tsawan ayamtai nagkaemakmatai María magdalanmaya, tikich María Jacobo dukují nuigtú Salomé aatus, pegkeg kugkuinun sumakaju, Jesús ukusbaunum wegag Jesusa iyashin ukatkagtatus.
MAR 16:2 Nunikag tumig tsawaju asamtai, shiig kashikmas Jesús ukusbaunum wegaju, etsa jiiniu ai.
MAR 16:3 Nunik weenak pempeentunikiag: —¿Yaki eketjamkati ukumatai waitainum kaya aputuamuwe nunash?, tudayinau.
MAR 16:4 Tujash jegaantag diikmá, kaya shiig muun aputukbauk ekekam atatman wainkajui.
MAR 16:5 Nunik ukumatain utuawag diikmag, untsugnumanini aents datsauch jaanch puju esagman nugkuaju ekeemtatman wainkag ishamkaju.
MAR 16:6 Nuniagtai nunú chichajak: —Ishamkaigpajum, atumek Jesús nazaretnumian achijagma nu egagme, duka nantakne, juwig atsawai, anui ukusagma nunú diistajum.
MAR 16:7 Tujash wejum niina jintintaiji aidau nuigtú Pedroshkam ujaktajum. Nigka Galilea niiyá eemak wetatui, awi wainkagtatui ni tiuwa nunisag, tiuwai.
MAR 16:8 Nu tima nuwa aidaushkam Jesús ukusbaunum jegantajuk ukuinak tupikakiaju, shiig senchi ishamkag kujaidau asag, makichik aentsnakesh ujakchajui.
MAR 16:9 Jesús tumigtin kashikmas nantakí dekatkauk María magdalanmaya wantintukui, ni siete iwanch jiijamu aajakua nuna.
MAR 16:10 Dutikam wee Jesusjai yujajakú aidau, wake besemag dekapenak buutú batsatun jegajua ujakajui.
MAR 16:11 Tujash ditak, Jesusak iwaakuwe wi wainkamjai tusa ujainamash, dekaskeapi tuinachu.
MAR 16:12 Nuigtushkam ni jintintaiji jimag ajanum wetainum jintá wetatman tikichia nunin wajas wantintuku.
MAR 16:13 Dutika wantintukam ditashkam tikich batsatun jegajiag ujakaju; tuinamash ditanash dekaskeapi tichajui.
MAR 16:14 Inagnamunum once aina nunú mesanum pekajun wantintuku, nunik dekaskeapi tuinachu asamtai kakaakan chichagkauwai, nantakiu wainkau aidau ujamash dekaskeapi tichaju asagmatai.
MAR 16:15 Nuna tii chichajak: “Ashí nugkanum wetajum, nunikjum yamajam chichama ju ashí aents aidaunum etsegkatajum.
MAR 16:16 Dekaskeapi tuidauk yamimagtinme nuninak uwemjatnume; untsu dekaskeapi tuinachuk, bakumagtinai.
MAR 16:17 Dekaskeapi tuina duke ju wainchatai aina nunak dutikawagtinai: mina daajui iwanch aidaun jiinak, yamajam chicham chichashtainash chichagtinai;
MAR 16:18 dapi achiam esaimash, jatai egketuamun umuinakush jakashtin ainawai. Jau aidaunash ditá uwejin achikag etsagaidiagtinai”, tiuwai.
MAR 16:19 Apu Jesús nuna tusa inagnak, nayaim weak takuniuwai; nunik Apajuí untsujin ekeemsauwai.
MAR 16:20 Tuja ditashkam jiinjag ashí yantamnum etsejuidau, nuniagtai Apu Jesús chicham etsegbaunash aents aidaush dekaskeapi titinme tusa wainchatai aidau iwainamunmash yaigkui. Aatus atí.
LUK 1:1 Kuashat aents dekapsaje augmatbau jutiiní dekaskenum nagkaemakiuwa nuna pachisag betekmas agajagtatus,
LUK 1:2 yama nagkamsag Jesusan wainkau aidau, chichaman etsejuidau jutiin jintinjamawajua dutiksanuk,
LUK 1:3 wishakam kuitamsan ashí wají aidaush wajuk nagkamdauwaita nuna shiig inimsan dekaan, betekmasan aneetaiju Teofiloh agatjame,
LUK 1:4 amina dekaskea nuna jintinjamawajua nu shiig dekau aminum tau asan.
LUK 1:5 Herodes Judeanum rey wajas inamai, sacerdote Zacarías daagtin pujujakui Abías weantu, nuweg Aarón weantu Elisabet daagtin aajakui.
LUK 1:6 Ditak Apajuí eemtinish pegkegnak takaidau, nunidau asag Apu Apajuí chicham umiktajum tibauwa nui awa nunashkam imatiksag betek umidau.
LUK 1:7 Tujash uchijig atsujuidau Elisabet kaga asamtai, nuigtushkam ditak mai muuntuch wajasaju asag.
LUK 1:8 Nuniamunum makichik tsawantai Zacarías, ditajai ijunja takataijai antiamu asa, sacerdote Apajuí eemtin takau aina dutika takainamunum,
LUK 1:9 sacerdote aidauk tuke dutikin asag, Apu Apajuí ememattai pegkegma nui wayash yaki inciensonash apeat tabaunum, niina kayají jiintukiuwai.
LUK 1:10 Nunikmatai incienso apetai hora jegamtai, ashí aents aidauk agaa ijunas Apajuin aujuidau.
LUK 1:11 Nuniai Apu Apajuí angelji Zacariasan wantintuk, altar incienso apetainum ayaumas untsugnumanini wajantau.
LUK 1:12 Nuna Zacarías wainak puyatkau, nunik senchi ishamau;
LUK 1:13 nunitai ángel chichajak: —Zacariasah ishamkaipa, wagki ame Apajuí augbauk antuekae, nuniau asamtai nuwem Elisabet aishmagkun uchigmakmatai Juan adaikattame.
LUK 1:14 Nunikmatai shiig aneasam dakujustatme. Tuja kuashat aents aidaushkam shiig aneediagtatui nu uchi akiinamunum;
LUK 1:15 wagki nigka Apu Apajuí eme anentai atinai, uwagchatnai vinonash, umutai kajiau aidaunashkam nuigtushkam dukují wakeen nagkamsag Wakaní Pegkeji ajitnai;
LUK 1:16 kuashat Israelan uchijí aidaun ataktú ditá Apuji Apajuiya nui awakeagtatui;
LUK 1:17 niiyá eemak taa etsegkattawai Apu minitnujin Eliasa wakaní nuigtú senchijí ajujakua nunisag, dutikak muun aidaush anentain yapajiawag uchijijai iwajag pujustinme, aents intimkiu aidaushkam chichaman betek umiktinme, apu minitaish shiig anentus jukitag tuidau asag, tau.
LUK 1:18 Tama Zacarías angelan ayaak: ¿Nunash wajuk nuniktatuapi titajaki, wi mina duwagjai mai muuntuch wajasag juninnush?, tau.
LUK 1:19 Tutai ángel ayaak: —Wika Gabrielaitjai, Apajuí inakegaitjai, ni awetime yamajam chicham pegkeja nuna amina ujaktí tusa;
LUK 1:20 tujash wi tajam nu dekaskeapi tatsum dui, yamaik chichachu wajastatme, nunikam chichatsuk pujusam, tsawan wi tajam nu ejetatme, tau.
LUK 1:21 Nuniai aents aidauk Zacariasan dakak ijunaidau, tesamu pegkegmanum wayá megkaekamtai, wagkag imanikash megkaekae tusag.
LUK 1:22 Nuninai jiinki chichamainchau dekapeau, nunitai tesamu pegkegmanum waya duwiyap wantintuke, tuidau. Nigka ayatak iwimas augmamu nuniak chichatsuk pujau.
LUK 1:23 Nunik Zacariasak tsawan ni takaamujinak ashí umik ukuak, ni jeen wakitkiu.
LUK 1:24 Nuna nunik dukap tsawan pujatsaig nuwe Elisabet ejapjuku, nunik wantintsuk jeenig pujus cinco nantun inagkeakiu.
LUK 1:25 Nunak: “Apu Apajuí wait anenjak jutijuae, wi datsaamá pujuweg nuna emegkatjuktatus”, taku nunikui.
LUK 1:26 Elisabet ejapjuk seis nantu pujai, Apajuí, ángel Gabrielan yaakat Nazaret tutai Galilea nugkanum awa nui awemauwai,
LUK 1:27 nuanui makichik nuwa María daagtin aentsú antishtai, Rey David wegantu José daagtin anagmamu pujau asamtai.
LUK 1:28 Nunik ángel María pujamunum wayaak: —María pujamek, aminak Apu Apajuí wait anenjamag etegtamjae, dutijabau asa amijai awai, tau.
LUK 1:29 Tujash nigka nu aaja tama antuk puyatkau, wajina takug tuush kumpamjawa tusa.
LUK 1:30 Nunitai ángel chichajak: —María ishamkaipa, aminak Apajuí wait anenjamjae,
LUK 1:31 nunin asamtai amek ejapjukam aishmag uchigmakam, Jesús adaikattame.
LUK 1:32 Duka eme anentai atatui, nuniau asa “Apajuí ashí tikich aidau nagkaesau muunta nuna Uchijí” tama atinai. Apu Apajuiya nu, niina apají David ekeemas inamajakua nui inamjati tusa susattawai,
LUK 1:33 dutikamu asa, Jacopa uchijí aidaunum tuke inamin atí tusa, ni inabaujiya duka ajumaish nagkankashtinai, tau.
LUK 1:34 Tama María angelan ayaak: —¿Dusha wajuk nunimainaita wi makichik aishmagjaigkish pujatsugjama?, tau.
LUK 1:35 Tutai ángel ayaak: —Wakaní Pegkeji aminí taattawai nunikmatai ashí tikich aidau nagkaesau muunta nuna senchijí ejapaktatui. Nunin asa uchi akiinatta dusha pegkejam “Apajuí Uchijí” tama atinai.
LUK 1:36 Tuja ame pataim Elisabetchakam muumpatnum ejapjuke, nunik seis nantu wegawai, kagae tinu agma nunú.
LUK 1:37 Apajuí tujinmainuk makichkish atsawai, tau.
LUK 1:38 Tutai María ayaak: —Wika Apu Apajuí inakegaitjai, ame tujutam duka nunisag uminkati, tiu. Timatai angelak weak ukukiuwai.
LUK 1:39 Nunú tsawan wegamunum, María waujus jiinki weuwai, Judea nugka mujajin yaakat aunum,
LUK 1:40 nunik Zacariasa jeen wayá Elisabetan kumpamau.
LUK 1:41 Nunik Elisabet, María kumpamku chichaamun antaig uchi senchi kakaaju, nuniaig Elisabetan Wakaní Pegkeji egkemtujam,
LUK 1:42 senchi chichaak: —Ashí nuwa aina nuiyan amina Apajuí pegkegnum chichagtai awatamsae, antsag uchigminash pegkegnum chichagtai awasae.
LUK 1:43 Wi imanchauwaitag nunin aish, ¿wagka mina Apujú dukujimesh ijagtustasamesh miname?
LUK 1:44 Wagki ame mina kumpamjakum chichaam nuna antaig, uchi senchi kakaaje, shiig aneak.
LUK 1:45 Shiig aneastinai dekaskeapi tiuwa duka, wagki Apu Apajuí tibauwa duka uminkatin asamtai.
LUK 1:46 Tutai Mariashkam: “Wika Apunak mina anentaimtagjai emematjai.
LUK 1:47 Mina wakanjuk shiig aneawai Apajuí mina uwemtijina nui,
LUK 1:48 niina inake imanchauch aigkish mina etegtua dui. Yamai nagkamsag ashí aents aidauk, shiig aneasui tujutiagtinai.
LUK 1:49 Wagki Senchigtina nu, wají shiig muuntan minai dutika duka daajig Pegkegmai.
LUK 1:50 Nuigtush ni wait anenkagtutaijiya duka, aents akiinak minidau niina ajantus emematiagtin aina nudauwai.
LUK 1:51 Nigka senchigtina ibau asa junak jutikae; dutikak emebau aidau dutikatasa anentaimtusbaujinash wainak emake.
LUK 1:52 Senchigtin aidau ekeemtaijinak atankine, dutika imanchauch aina nuna dekas iman awasae.
LUK 1:53 Yapajuau aidaunash wají pegkeg aidaun shiig kuashat susaje, dutikak wiyakuch aidaunak uwegmatak ishiake.
LUK 1:54 Ni inake Israelnak yaigké, ni wait anenkagtutaijiya nuna aneaku asa;
LUK 1:55 nuna pachisag jutii muunji aajakajua nuna tiu aajakui, Abrahaman nuigtú ni weantunum akiinak wegagtina nunash tuke atina nuna”.
LUK 1:56 María nuna tii, Elisabetan jeenig kampatum nantu tumain pujusui, nunik wakitkiuwai niina jeen.
LUK 1:57 Elisabet tsawanji jegajim, aishmagkun uchigmakui.
LUK 1:58 Nunikmatai nui ijutkau batsataidau, niina patayí aidaushkam Apu Apajuí wait anenjam uchigmakbaun antukaju asag Elisabetjai shiig aneasajui.
LUK 1:59 Uchi akiina ocho tsawan wetai, uchí pakaji ajapjuatasag kautuawajui, nuninak apají daaji Zacariasa nunak adaikatag tuidau.
LUK 1:60 Tujash uchí dukují chichaak: —Atsa, uchik Juan atatui, tau.
LUK 1:61 Tutai: —Ame pataim aina nuiyag tu daagtinuk atsajamah, tuidau.
LUK 1:62 Tutai uchí apajin iwiyas inidau, daajish ya atí tawaki tusag.
LUK 1:63 Nuniagtai tapna sujustá tusa inakmatai susam: Daajig Juagkai tusa agaju. Dutikamtai ashí anentai jegagchaju.
LUK 1:64 Nuna dutikamuik ataktú chichakú. Nunik Apajuin emematiu.
LUK 1:65 Nunikmatai nui ijutkau batsamin aidauk senchi puyatkaju; nunisag ashí Judea mujajin batsamin aidaushkam, nu nunikbauwa nunak ashí dekaawaju.
LUK 1:66 Ashí aents nuna antuidauk: “¿Jusha uchish wajukuk atinaita?” tuidau, Apu Apajuí niina senchijin kuitabaun dekaidau asag.
LUK 1:67 Zacarías, uchí apajiya nu, Wakaní Pegkeji chichamtikam, nuniktinun pachis chichaak:
LUK 1:68 “Emematiagmi Apu, Israelan Apajuijiya nu, ni aentsjin agkanmitkatatus taa nunú.
LUK 1:69 Awetugmaji makichik senchigtin Uwemtikagtinun, ni inake David aajakua nunú wegantun.
LUK 1:70 Yaunchuk nagkamas niina profetaji pegkejam aajakajua nu etsejuinak:
LUK 1:71 iina shiwaji aidaun nuigtú ashí tikich aents kajegtamin aina nunash depetuk uwemtijamjatna nuna;
LUK 1:72 iina muunji aajakajua nunash wait anenjatnaitjame tusa chicham apakbau pegkegma nuna aneaku asa.
LUK 1:73 Iina apají Abrahaman dekas umiktatjai tiuwa duka juuwai:
LUK 1:74 Ishamkas pujuinaku, iina shiwajinish agkanmagawaja, ni umijuinaku,
LUK 1:75 pegkeniaja nuigtú pegkeja nu takainaku niijaig ashí tsawantai pujusagtasa”, tiuwai.
LUK 1:76 Nuna tii uchijinashkam: “Amek uchijuh, ashí tikich aidau nagkaesau muunta nuna profetaji tama atatme; wagki amek eemkam wetatme Apú jinti umigkatasam,
LUK 1:77 ni aentsjish uwemat dekamtikatasam; tudau aidau tsagkugnamushkam.
LUK 1:78 Iina Apajuijiya nu shiig senchi wait anenjamu asa, nayaimpinmaya etsa puwau jiinama nuniktinun awetugmae,
LUK 1:79 suwenum batsataina nuna tsaapmitka; jinta agkan pujutnum ekagtina nui jutiinash awekapasti tau asa”, tiuwai.
LUK 1:80 Uchishkam tsakau, nuniak wakaninchakam nuní senchi ichichmamu, nuniak uwegshunum pujusui, Israelnum chicham etsegkatin tsawan jegatai wantinkatatus.
LUK 2:1 Nu tsawantin, César Augusto ashí aents aidau agatmamkatnume tusa chichaman umik dapampajui.
LUK 2:2 Jujú nagkamchaku agatmabauk Cirenio, Siria apuji wee pujai nunikui.
LUK 2:3 Tibau asamtai ashí shimuidau, makí makichik ditá yaaktajin agatmamjagtatus.
LUK 2:4 Tuja Joseshkam Galileanum yaakat Nazaret awa nuiya juwaki Judea nugkanum jegau, yaakat Belén David akiinamu aajakua nui, nigka David wegantu asa.
LUK 2:5 Nui agatmamjatatus weak, ni nuwenatasa dakaniamuji María ejamtinun ayasá weuwai.
LUK 2:6 Nunikag nui jegaa pujuinai tsawan ni uchigmaktinji jegajiu.
LUK 2:7 Nunikmatai iwaijin aishmagkun uchigmaku, dutika uchi pempetaiyai pempeag tagku ayugtainum egkeauwai, ijagka kajiitainig dita ayamainuk agkantak atsusú asamtai.
LUK 2:8 Nu nugka nuiyag ujumak pastor aidau uwigjin kuitamainak kashi iwá batsataidau.
LUK 2:9 Nuniai makichik ángel Apu Apajuinu wantintuku, nuniaig Apu Apajuí tsaaptinjiya nu tsawan awajus tenteawajui, dutikam shiig senchi ishamkajui.
LUK 2:10 Nuniagtai ángel chichaak: “Ishamkaigpajum, wika atumin yamajam chichaman ujaktasan minitjime, ashí aents aidau shiig aneasagtata nuna.
LUK 2:11 Yamai kashia juik Davita yaaktajiya nui makichik Uwemtikagtin, Apu Cristo akiinae.
LUK 2:12 Uchi pempeajam tagku ayugtainum egketu wainkattajum nunú atatui”.
LUK 2:13 Nuniaig pachiachbau angeljai kuashat tikich ángel nayaimpinmaya aidau wantinjau, nunikag Apajuin emematuinak:
LUK 2:14 “Nayaimpinmash Apajuiya duke emematiagmi, nugkanmash shiig agkan pujamu atatui Apajuí wait anenjamu aina duka”, wajaidau.
LUK 2:15 Ángel aidau nayaimpinum wakitkiagmatai, pastor aidau pempeentunikiag: —Belén wegagmi, Apu Apajuí nunike tusa ujapaka nu wainkagmi, tuidau.
LUK 2:16 Tusag waujus wegag jegakmag, Marian Josejai nuigtú uchi tagku ayugtainum egkemtatman wainkaju.
LUK 2:17 Nunik wainkag, uchi pachisa tibauwa nuna etsejuidau.
LUK 2:18 Tusa pastor aidau etsegbaun ashí aents antuidauk anentai jegachaju.
LUK 2:19 Tujash Mariak nu ashí tabau antukbaun sakapamainchau dekapeau, nuniak nuwi nuwig anentaimá pujau.
LUK 2:20 Nunikag pastor aidauk waketuinak Apajuin eme anentsag emematuidau, ashí antukbauji nuigtú wainkaja duka, ángel tibauk imanisag uminkau asamtai.
LUK 2:21 Ocho tsawan jegamtai, uchin pakaji ajapjuatasag adaikaju JESÚS. María eke ejapjumainchau aig, nu adaikattame tusa ángel tibaunak dutiksag.
LUK 2:22 Nunikag tsawan dita pegketnujiya nu jegamtai, Moisés chicham umiktinnum tibauwa dutiksag Jerusalén ejegawaju Apu Apajuí eemtin iwainaktatus.
LUK 2:23 Nunak Apu Apajuí tibau chicham umiktina nui agagbaunum: “Ashí uchi aishmag iwai akiinuk Apu Apajuinu atí”, tibau asamtai dutikawajui.
LUK 2:24 Nunik weenak Apu Apajuinu atinun jukiaju chicham umiktajum tibaunum: Jimag tórtola, nu atsakuig jimag paum tsakat itaatajum tibauwa dutiksag.
LUK 2:25 Nunú tsawantinig Jerusalén pujujakui Simeón daagtin, pegkejan takau, wait anenkagtin, Israelan Apajuí ichichjatna nuna wainkatatus daká pujú, Wakaní Pegkejishkam ajamu;
LUK 2:26 nuniau asa Wakaní Pegkejiya nu dekamtikau aajakui, Apu Apajuí Etegkamu waintsukek jakashtinaitme tusa;
LUK 2:27 nunin asa Wakaní Pegkeji anentaimtikjam jega Apajuí ememattainum weuwai; Joseshkam Mariajai Jesusan jukiag jega Apajuí ememattainum jegawaju, chicham umiktinnum dutikatajum tawa nuna betek dutikatatus.
LUK 2:28 Nunik Simeón uchin minaaki juki Apajuin pegkegnum chichajak:
LUK 2:29 “Apuh, yamaik ame chicham tujutbauwa duka uminkau asamtai, mina inakjuk shiig agkan anentaimas jakati tusam idaitusta.
LUK 2:30 Wagki mina jiijui wainkajai ame uwemtikagtamunak,
LUK 2:31 ashí aents ame awemamun wainkagtata nuna.
LUK 2:32 Juka tsaaptin judiochu aidaunash wantintuktina nuuwai, amina aentsjum Israel aina nu eme anentai atina nu”, tau.
LUK 2:33 Ashí nuna pachis uchí tutai, Josek Mariajai anentai jegachaju.
LUK 2:34 Nuna tii Simeón atumnash Apajuí yaimpaktinme tusa, Jesusa dukujin, Marian chichajak: —Nijah, ju uchia junak kuashat Israel aina nuiyag dakitiagtinai niina dakituidauk megkaejagtatui, nuninai kuashat nemajiagtina nu uwemjagtinai. Nigka Apajuinua nuna iwainatnai, tujash kuashat aents dakitiagtinai,
LUK 2:35 aatus nuninak ditá anentain awa nuna iwainmabiagtinai, nu nuninamua nunú aminak espadayai ijumaina imatijamak anentaimin waitkagmastinai, tiuwai.
LUK 2:36 Nuanuig nuwa profeta Ana daagtin, Fanuela nawanji Aser weantu shiig muuntuch wajasá pujau. Nigka shiig tsakatuch aishina siete mijan pujusui,
LUK 2:37 nuniau wajemea ochenta y cuatro mijan wegau; nuigtush jega Apajuí ememattainum kashish tsawaishkam megkaechau, nuniau asa ayunó wajak Apajuin aujú pujú.
LUK 2:38 Nuniaig niishkam, Apajuin see taku uchin pachis ashí aents Jerusalén agkanmitkam atinun dakaina nuna tau.
LUK 2:39 Apu Apajuí chicham umiktajum tibauwa nunak imatiksag umikag, ditá yaaktaji Nazaret, Galilea nugkanum awa nui wakitkiaju.
LUK 2:40 Tuja uchishkam tsakau nuniak senchi wegau, nuigtush senchi yachameau, tuja Apajuí wait anentamujish niiní au.
LUK 2:41 Ashí mijantin José Mariajai, Jerusalén tuke wesagké aidau fiesta Pascua jegatai;
LUK 2:42 nuniamunum Jesús doce mijan ajamu ai weajui Jerusalén fiesta inagkeautaiya nuna betek dutikatatus.
LUK 2:43 Nunik fiesta ashimnakmatai ditak waketainai Jesusak Jerusalén juwakui, Josek Mariajai dekainatsaig.
LUK 2:44 Dita anentaimsajag, tikich aidaujais ijunag wegatai, tusag makichik tsawan kuwaekaju, nuniau ashí ditá waintai nuigtú ditá patayí aidaunmash egaidau;
LUK 2:45 tujash wainkachag Jerusalén waketjaju egainak.
LUK 2:46 Nunikag kampatum tsawanta jui wainkaju, jega Apajuí ememattainum maestro chicham umiktinun jintinkagtin aidaujai ejapena ekeemas, chichaagtai antak niishkam iniimak eketun.
LUK 2:47 Ashí aents ni chichaamun antujuidauk, yachajin diijus puyatkag diidau, dita iniamash shiig aimu asamtai.
LUK 2:48 Nunittaman apají dukujijai wainak puyatjuk, dukují chichajak: —Uchijuh, ¿wagka jusha jutikagtame? Nijah, wi apajai shiig senchi puyatjukan egakun wekaetusjamna, tau.
LUK 2:49 Tama ni ayaak: —¿Wagka minash egatjume? ¿Atumek dekatsjumek mina Apagdau aidaun uyumamainaitag duka?, tau.
LUK 2:50 Tujash ditak, wagkag tawa tusag dekagmainchau dekapedau.
LUK 2:51 Nunikag Jesusan jukiag Nazaret waketjajui, Jesús nui pujusá ashí dita tabaunak betek umiau. Tujash niina dukujig ashí Jesús nunikbaunak tuke kajimattsuk anentaimtú pujau.
LUK 2:52 Tuja Jesuschakam nuní senchi tsakau, nuniak nuní senchi dekau, nunisag Apajuishkam shiig anentau nuigtú aents aidaushkam shiig anentuidau.
LUK 3:1 Tiberio César quince mijadai inabaunum, Poncio Pilato gobernador wajas Judeanum inamu, nuniai Herodes Galilea inamu, untsu niina yachi Felipe Iturea nuigtú Traconitenum inamu, nuniai Lisanias Abilinia inamu,
LUK 3:2 nuniai Anás, Caifás aatus sumo sacerdote wajas pujuinai, Zacariasa uchijí Juan uwegshunum pujuttaman Apajuí ujakui chichagkagtukti tusa,
LUK 3:3 dutikam niishkam Jordagnum tikiju batsataidaunum ashí wekaegas chichagkagtau, tudau idaiyinak yamimajag tudau aidaun tsagkugnagtinme tusa;
LUK 3:4 profeta Isaías tibau agagbaunum tawa nunisag, duka: “Makichik chicham uwegshunum untsubau antuewai: ‘Apu minitin jinta iwajatajum, jinta tutupit dakuektajum’,
LUK 3:5 ashí japagau aidaunash nugkan ainjatnai, nainnashkam yumpuag pakamak betekmaktinai, jinta tunin aidaunash tutupit esekatnai, jinta japaejau aidaunash ainjatnai, tawai.
LUK 3:6 Apajuí uwemtikagtamua nunak ashí aents wainkagtatui”, tawai.
LUK 3:7 Kuashat aents aidau Juan yamijati tusag minituidau, nuniagtai chichajak: “¡Iwanchi uchijí aidauwah! ¿Yaa atumnash yamimaku Apajuí suwimkaji tikijuch wajasa nu uwemtumainai tusash tujabiagmae?
LUK 3:8 Dekas tudau takatan idaisaush wajuku amainaita nunú iwainmamkatajum, wainka atumek anentaimsajum: Abraham wegantu asaja yupichu uwemain ainaji, tumamigpa; wagki Apajuik jujú kaya aina junakesh Abrahama uchijí emamainai.
LUK 3:9 Nuigtush yamaiya juik jachai kagkap tsupitiama dutikatatus Apajuí suwimkeg uminas awai; ashí numi nejenatsu duka tsupika jiinum apeam atatui”.
LUK 3:10 Tutai aents aidau iniinak: —¿Wají dutikmainaitji?, tuidau.
LUK 3:11 Tiagtai ni ayaak: —Jimag nugkumainji ajamuk atsugbaun susati, yumainji ajamushkam dutiksag dutikati, tau.
LUK 3:12 Apú kuichkiji atinun ijumin ujumak yamijati tusag kaunawag iniinak: —Maestroh, ¿jutiish wajukmainaitji?, tuidau.
LUK 3:13 Tiagtai Juan ayaak: —Wajupa akikmakta tibauwaita, nunú uwaekajum akikmakta tiigpa, tau.
LUK 3:14 Tutai ujumak suntag aidaushkam iniinak: —¿Jutiish wajukmainaitji?, tuidau. Tiagtai: —Makichkish uwakagmek atankigpajum, tikichish tsanugmek jujukigpa, apujum akigmaina nujaig shiig aneasjum juwaktajum, tau.
LUK 3:15 Tuja aents aidauk, dakak batsataidau asag, ditá anentainig, Juagchauwashit Cristo, tuidau;
LUK 3:16 tujash Juan ashí ditan chichajak: “Wika dekaskenmag yumí yamijatjai, tujash mina nagkaetasu makichik senchigtin minawai, wika niina sapatji jigkamunakesh atitmaitsujai niiya imanchau asan. Niiyai Wakaní Pegkejiya nujai yamigmagtinuk nuigtush jiiyai yamigmagtina dushakam.
LUK 3:17 Nigka trigo awagti wampuji utsanku neje akantayama numamtuk awakatatus uminas awai, dutika ijumtainum trigonak yajumak, wampujinak jii ajumaish kajinkashtina nui apeatnai”, tiuwai.
LUK 3:18 Juna aatus tusa nuigtú kuashat tikich chicham aidaujai Juagkak aents aidaunak jintintu yamajam chicham pegkeja nuna.
LUK 3:19 Tuja gobernador Herodesan jiyakui, yachi Felipe nuwen Herodiasan juki pujau asamtai, nuigtú ashí pegkegchau dutikamuji aina nuna pachis,
LUK 3:20 nu aaja tibau asa nuní nagkaemas pegkegchaun takaak, Juagkan achiká cárcel egkeauwai.
LUK 3:21 Ashí aents yamimainamunum, Jesuschakam yamimajui, nunik Apajuí aujai nayaim ujaniu;
LUK 3:22 nuniai Wakaní Pegkeji pauma nunin wajas paan niiní akaegu, nuniai nayaimpinmaya chicham antuekau: —Ametme mina uchig aneetaigmek, aminí shiig aneamu ajutui, tabau.
LUK 3:23 Jesús takatjin nagkamauwa duka treinta mijan tumain ajujakui, José uchijiyai tujakajua nu, Josek Elí uchijí aajakui,
LUK 3:24 Elik Matata uchijí, Matat Leví uchijí, Levik Melqui uchijí, Melquik Jana uchijí, Jana José uchijí,
LUK 3:25 José Matatiasa uchijí, Matatías Amosa uchijí, Amós Nahuma uchijí, Nahúm Eslí uchijí, Eslí Nagai uchijí,
LUK 3:26 Nagai Maata uchijí, Maat Matatiasa uchijí, Matatías Semeí uchijí, Semei José uchijí, José Judá uchijí,
LUK 3:27 Judá Joana uchijí, Joana Resa uchijí, Resa Zorobabela uchijí, Zorobabel Salatiela uchijí, Salatiel Neri uchijí,
LUK 3:28 Neri Melqui uchijí, Melqui Adi uchijí, Adi Cosama uchijí, Cosam Elmodama uchijí, Elmodam Era uchijí,
LUK 3:29 Er Josué uchijí, Josué Eliezera uchijí, Eliezer Jorima uchijí, Jorim Matata uchijí, Matat Leví uchijí,
LUK 3:30 Leví Simeogka uchijí, Simeón Judá uchijí, Judá José uchijí, José Jonagka uchijí, Jonán Eliaquima uchijí,
LUK 3:31 Eliaquim Melea uchijí, Melea Mainagka uchijí, Mainán Matata uchijí, Matat Natagka uchijí, Natán Davita uchijí,
LUK 3:32 David Isaí uchijí, Isaí Obeta uchijí, Obed Booza uchijí, Booz Salmogka uchijí, Salmón Naasogka uchijí,
LUK 3:33 Naasón Aminadapa uchijí, Aminadab Arama uchijí, Aram Esroma uchijí; Esrom Faresa uchijí, Fares Judá uchijí,
LUK 3:34 Judá Jacopa uchijí, Jacob Isaaca uchijí, Isaac Abrahama uchijí, Abraham Taré uchijí, Taré Nacora uchijí;
LUK 3:35 Nacor Serugka uchijí, Serug Ragau uchijí, Ragau Pelegka uchijí, Peleg Hebera uchijí, Heber Sala uchijí,
LUK 3:36 Sala Cainanka uchijí, Cainán Arfaxata uchijí, Arfaxad Sema uchijí, Sem Noé uchijí, Noé Lameka uchijí,
LUK 3:37 Lamec Matusalegka uchijí, Matusalén Enoca uchijí, Enoc Jareta uchijí, Jared Mahalaleela uchijí, Mahalaleel Cainagka uchijí,
LUK 3:38 Cainán Enosa uchijí, Enós Seta uchijí, Set Adagka uchijí, Adán Apajuí najanamu.
LUK 4:1 Jesús Wakaní Pegkeji egkemtujam Jordagnumia wakettai, Wakaní Pegkeji uwegshunum emauwai,
LUK 4:2 cuarenta tsawan pujustí tusa, nui pujaun Iwanch pegkegchaun takamtiksatatus dekapsauwai. Nu tsawan aina nuwig makichkish yuwachui, nunú inagnamunum yapajuauwai.
LUK 4:3 Nunitai Iwanch chichajak: —Ame dekas Apajuí Uchijiyaitkumek, ju kaya ju pag najanam yuakia, tau.
LUK 4:4 Tutai Jesús ayaak: —Agagbau awai: “Aentsuk imá pagjaigkik pujumaitsui, ashí Apajuí chichamega nujai pujumainai” tawai, tiuwai.
LUK 4:5 Timatai Iwanch juki muja tsakajunum iwakui, dutika juu inaktamuik ashí nugkanum inamin aina nuna iwaintukui.
LUK 4:6 Dutika Iwanch chichajak: —Ashí ju imaja junak nuigtú ditá imanji aina nunashkam amina amastajame, wagki juka minai idaisamui, nuadui wi wakegamun sumainaitjai.
LUK 4:7 Ame mina tikishmajam emematjakminig, ashí aminuk atí tusan idaitustajame, tau.
LUK 4:8 Tama Jesús ayaak: —¡Wetá Iwanchih! agagbau awai: “Imá amina Apujum Apajuiya duke emematta, nuniakum imá nigki umigkata” tawai, tiu.
LUK 4:9 Timatai nui juki Jerusalén ejegau, dutika jega Apajuí ememattainum yakí nagkatkamunum iwaká: —Ame dekas Apajuí Uchijiyaitkumek, tsekem iyata,
LUK 4:10 wagki agagbau awai: “Apajuí, angelji aidaun awetugmattawai amina kuitamjamkatnun,
LUK 4:11 dutikam dita achigmakagtatui kayá tukumkai tusa”, tiuwai.
LUK 4:12 Tutai Jesús ayaak: —Dushakam agagbauwai: “Amina Apujum Apajuiya nu pegkegchaunum dekapsatasamek wakeyipa” tawai, tiuwai.
LUK 4:13 Tuja Iwanchik pegkegchau takamtiksata tibaunak ashí dekapes, ujumak tsawan idaisauwai.
LUK 4:14 Nunik Jesusak Wakaní Pegkeji senchimtikam Galilea wakitkiuwai, nunikmatai ashí nugkanum nui batsataidauk niina pachisag kuashat chichaidau.
LUK 4:15 Nui jegaa, jega ijuntainum wayá jintinkagtutai ashí aents aidauk emematuidau.
LUK 4:16 Jesús Nazaret ni pujusá tsakagbaunum wakitki jegaa, tsawan ayamtai tsawagmatai jega ijuntainum wayau tuke nunin asa; nunik wajainiu Apajuí chichamen ausatatus,
LUK 4:17 nunitai papí pempeagbau profeta Isaías agagbaun susaju, dutikam dakuek, ju pachisa agagbaun wainkau, nunik auju:
LUK 4:18 “Apu Apajuí Wakaní minai awai, nuniau asa mina etegtuauwai, ujunauch aidaunash yamajam chichaman ujaktí tusa; achikbau aidaunash antuinamunum senchi chichaká agkanmaetan ujaktí, nuniak wainmachu aidaunash wainmitkakti, waitkatai aidaunash agkanmitkati,
LUK 4:19 yamai mijana juuwai Apu Apajuí wakegamu tusa chichagkagtukti” tibauwa nuna.
LUK 4:20 Nuna aujus inagnak papiin pempeag nui takaun susa ekeemsau; nunikmatai ashí aents jega ijuntainum utsanawajuk, dii pekajaidau.
LUK 4:21 Nuniagtai: —Agagbaunum tawa juka, atumin eemtimin yamai uminkae, tiuwai.
LUK 4:22 Ashí aents aidauk niina pachisag pegkejan etsegtuidau, ni wají pegkeg pachisa chichamunashkam puyatjusag diidau, nuninak: —¿Ju José uchijiya duchaukaih?, tuidau.
LUK 4:23 Tiagtai ni ayaak: —Dekaskenmag ju chicham: “Ampijatnuh, amek ampimata” tibauwa ju tujuttatjume. Nuigtushkam: “Kuashat wají aidau Capernaúm dutikamu antinuweg nu, juwish amina nugkeminish dutikata”, tujuttatjume.
LUK 4:24 Nuna tii: —Nuigtush dekas tajime, makichik profetakesh niina nugkenig shiig anentsá juwamak achauwai.
LUK 4:25 Junak dekas tajai, Elías pujujakua nunú tsawantinig Israel nugkanmag kuashat nuwa waje batsamajakajui, nuniamunum kampatum mijan jimaituk yututsuk au asamtai, ashí nugkanum yapajut tepeauwai;
LUK 4:26 tujash Eliasnak nuwa waje Israel batsata nui awematsuk, sareptanmaya nuwa waje yaakat Sidón tikiju awa nui pujaunum awemauwai.
LUK 4:27 Nuigtushkam kuashat aents lepragtin Israel aijakui, profeta Eliseo pujujakua nunú tsawantin; tujash makichkish nunú aidaunak etsagautsuk, Naamán sirianmaya aajakua nuna etsagajui, tiuwai.
LUK 4:28 Nu tabau antukag jega ijuntainum utsanawajuk senchi kajekaju,
LUK 4:29 nunikag wajatjag Jesusan yaaktanmayan jiikiag, muja nagkatkamunum ditá yaaktajish nuwig au asamtai jukiag iwakaju betsag tajaekaunum ajuami tusag.
LUK 4:30 Dutikam dita mininamunmag eteenki, waketak ukukiuwai.
LUK 4:31 Nunik Jesusak yaakat Capernaúm Galilea nugkanum awa nui weuwai, nui pujus tsawan ayamtai tsawautai jintinkagtau.
LUK 4:32 Nunitai aents aidauk ni jintinkagtamujin puyatjuk diidau, wagki apu chichame antugtai jintimaina imatika jintinkagtau asamtai.
LUK 4:33 Nuniai jega ijuntainum aents wakan pegkegchau egkemtuamu wayá eketu, shiig senchi untsumak:
LUK 4:34 —¡Jesús nazaretnumiayah, ukujatkita! ¿Wagka amesh jutii pujamunmash miname, ijijatuatasamek minam? Wika ame yaitpa nunak dekagme, amek pegkejam Apajuinuitme, tiuwai.
LUK 4:35 Tutai Jesús jiyak: —¡Takamtak jiinkim ju aentsuk ukuktá! Tama iwanchakam ditá eemtin ajiaju, nunik jiinkiuwai makichkish aentsnak pegkegchau ematsuk.
LUK 4:36 Nunikmatai ashí aents aidauk anentai jegagchaju, nunikag pempeentunisag: —¿Jusha wajuku asaya chichamesh senchigtinaita wakan pegkegchau aidaunash chichamenig jiyá dusha?, tuidau.
LUK 4:37 Nu dutikamua duka, ashí nu nugkanmag antuejauwai.
LUK 4:38 Jesús jega ijuntainmaya jiinki Simogka jeen jegauwai. Nuniai Simogka tsatsají senchi tsuweak tepau, nunitai etsagagti tusag segajui.
LUK 4:39 Tama Jesuschakam niina tsuntsumtua, tsuwemun ukuktí tamawaik pegkeg wajasá nantakí yutain umijuk ajamsauwai.
LUK 4:40 Etsa akaegai, ashí aents makí makichik jatai jau aidaun Jesusan ikautuawajui, dutikawagmatai niishkam makí makichik achiká etsagakui.
LUK 4:41 Nuigtushkam iwanch kuashat aentsun egkemtuju aidaush senchi untsumak jiinainak: —Amek Apajuí Uchijiyaitme, tuidau; tujash Jesusak senchi jiyau chichakai tusa, wagki ni Cristua nunak dekaidau asagmatai.
LUK 4:42 Nunik tsawagmatai, Jesusak jiinki aents atsamunum weuwai. Nuniai aents aidauk egai egainakuag ni pujamunum jegawag, emetuidau ukujatki tusag.
LUK 4:43 Tujash ni ayaak: —Wika tikich yaakat aina nuwishkam yamajam chicham Apajuí inama nuna pachisan etsegmainaitjai, wagki nuna nunikti tusa awemamuitjai, tiuwai.
LUK 4:44 Tau asa, Galilea jega ijuntai aidaunmash wayá chichamnak etseju.
LUK 5:1 Jesús kucha Genesaretnum uwet wekagai, kuashat aents Apajuí chichamen antukagtatus tuwakag chanuidau.
LUK 5:2 Nuniamunum jimag barca kaamatak tepaun Jesús wainkauwai, namaká main aidau redjin nijainak jiinjá ukukbaun.
LUK 5:3 Nunik makichik Simogka barcajiya nui egkemag, machik ejapen inananta tusa, nui ekeemas aents namaká uwet tuwakun jintintu.
LUK 5:4 Nunik chichamun ashimak, Simogkan chichajak: —Wiyankam kuchanum ejapeantam redjum ajugkam namak maata, tau.
LUK 5:5 Tama Simón ayaak: —Maestroh, kashi red ajú ajunkawa tsawampakuish makichkish maachmaji, tujash ame chichamjumin ajugtajai, tau.
LUK 5:6 Tusag ajukmag, shiig kuashat namakan chimpikaju, imatikamu asa rednak ichiau.
LUK 5:7 Nunitai ditá kumpají tikich barcanmayan iwiyaidau, taawag yaimpaktinme tusag. Dutikam kautuawaju, nunikag namaknak barcanmag mai aimkaju, dutikam tepeattak wajau.
LUK 5:8 Imanitai Simón Pedro nuna wainak, Jesusa eemtin tikishmag: —Apuh, ukugkita minak, wika tudauwaitjai, tiu.
LUK 5:9 Namakan imatika kajegká ishamkau, nunisag ashí niijai yujaidaushkam,
LUK 5:10 nuniamunum Jacobo, Juan Zebedeo uchijí Simogka kumpají aina dushakam nunikaju. Nunitai Jesús Simogkan chichajak: —Ishamkaipa, yamai nagkamsamek namak maatasa wekaetam anmamtuk, Apajuí chichame etsegkum aents aidau minai ikautjin atatme, tiu.
LUK 5:11 Nunikag barca aidaunak anugkag, ashí ukuinak, Jesusjai weajui.
LUK 5:12 Tikich tsawantai, Jesús makichik yaaktanum pujai, aents lepragtin tajuauwai, nunik Jesusan wainak tikishmag tsuntsumá, nijayin nugká antig pujusá: —Apuh, wakegakmek etsaentumainaitme, tau.
LUK 5:13 Tama Jesuschakam uwejin antiak: —Wakegajai, pegkeg wajastá, tiuwai. Tusa tamawaik leprak megkaekauwai.
LUK 5:14 Dutika: Makichkish ujakaipa, sacerdote jegajuam wantintukta, nuniakum ofrenda susata ame pegkeg webaugmin Moisés tibauwa dutiksamek, ditashkam waipakag, dekas tsagaje tujamtinme, tiuwai.
LUK 5:15 Tujash ni dutikamua duka nuní nagkaemas naatu, nuniau asamtai kuashat aents tuwajuidau ni chichamen antugkagtatus nuigtú dita jaamujinash etsaentugti tusag.
LUK 5:16 Tujash nigka nugka agkantu aidaunum wegau, nunik Apajuin auju.
LUK 5:17 Makichik tsawantai Jesús jintinkagtau, nuniamunum fariseo aidau, maestro chicham umiktinun jintinkagtin aidau eketaidau, nunú aidauk ashí yaakat yaijuch galileanmaya, Judeanmaya nuigtú Jerusalegnumia aina nuiya kaunawajui. Nuniamunum Apu Apajuí senchijin Jesús iwaidau aents aidau etsagamunum.
LUK 5:18 Nuniamunum ujumak aents aidau, aents wekaechaun camillanum pataidiag itawag, awayatag tuidau Jesús wajamunum ejentuntatus.
LUK 5:19 Tujash kuashat aents tuwakú asa waimainchau asamtai, jegá tuntupen wakaju, nunikag ujajag aagkawag, wekaechauwa nuna camillanum akakiaju, dutikawag ejapen Jesusa eemtin aepsaju.
LUK 5:20 Jesús dita dekaskeapi tabaujin wainak chichajak: —Aishmagkuh, amina tudaujum aidauk tsagkugnaje, tau.
LUK 5:21 Nuna tutai chicham umiktinun jintinkagtin aidau, fariseo aidaujai ditak anentaimsag: “¿Niish ya asaya Apajuinash pegkegchaunash chichajua? ¿Ya tudau aidaunash tsagkugkagtumainaita imá Apajuikeajama?”, tuidau.
LUK 5:22 Tu anentaimaidaun Jesús dekau asa ditan chichajak: —¿Wagka annush anentaimjume?
LUK 5:23 ¿Tuwaita imá yupichuch tumainush, amina tudaujum aidauk tsagkugnaje taja dukaih, atsa nantakim wetá tumainaitag dukaih?
LUK 5:24 Tujash Aentsmaga akiinauwa nu, ju nugka juwish tudau aidaunash tsagkugkagtumaina nu dekaatajum. Tusa wekaechaun chichajak: —Amina tajame, nantakim camillajum jukim jeemin wakitkita, tiuwai.
LUK 5:25 Tusa tamawaik ditash wainainaig nantakiuwai, nunik camillajin juki Apajuin emematki jeen weuwai.
LUK 5:26 Dutikamtai ashí aents aidauk puyatkaju, nunikag Apajuin emematiaju, nunik ishamkag, chichainak: —¡Yamai anentai jegagmainchau wainkaji!, tuidau.
LUK 5:27 Nuna dutika ukuak jiinkiu, nunik wekamá Leví apú kuichkiji atinun akikmagtai ijumak ekeemtatman wainkauwai, nunik chichajak: —Wegajai mina jintintaig aminum, tiuwai.
LUK 5:28 Tama ni takataijinak ashí ukuak niijai weuwai.
LUK 5:29 Nunik nunú tsawantaik Jesusan eme anentus ajamsatatus niina jeen yutain shiig umikú, dutikamunum Leví kumpají, apu romanmaya kuichkiji atinun ijumin aidaushkam, nuigtú tikich aidaujai mesanum pekajaidau.
LUK 5:30 Nuniagtai maestro chicham umiktinun jintinkagtin aidau fariseo aidaujai, Jesusa jintintaiji aidaun chichajuinak: —¿Wagka atumesh apú kuichkiji atinun ijumin, nuigtú tudaugtin aidaujai ijunjajum yuwakjumesh, umutash umagme?, tuidau.
LUK 5:31 Tiagtai Jesús ayaak: —Jamamtuchu aidauk ampijatnunak atsumatsui, jau aidau atsumawai.
LUK 5:32 Wika aents pegkejan takau aidau untsuktasan minichuitjai, wika aents tudaugtin aidau tudaujin idaiyinak mina nemagtuktinme tusan tauwaitjai, tiuwai.
LUK 5:33 Jesús tutai dita aiinak: —¿Wagka Juagká jintintai aidauk, kuashtá ayunainak Apajuinash aujin agmae nunisag fariseo aidaushkam, tujash amina jintintaijum aidauk ayatak yuwinak, umutnash umú yujainawa?, tuidau.
LUK 5:34 Tutai Jesús ayaak: —¿Nuwenbaunum ipaamu aidaush, nu nuwenu ditajai pujaigkish, ayunatajum tumainuk ainajum?
LUK 5:35 Tujash tsawan jegattawai nuwena nunú juwam atata nu, nunikmatai ayunawagtatui, tiuwai.
LUK 5:36 Tusa junashkam augmatus: —Makichkish nugkutai yamagman tsupikag nugkutai mamujunmag adujtuchu ainawai, dutikamak nugkutai yamagmaitak besemain asamtai, tuja yamajam tsupikbau mamujunum adujtamashkam shiig juwamaitsui.
LUK 5:37 Dutiksaik vino yamagmashkam, duwap apagbau ajutnumag yajashtaiyai, dutikamak vino yamajam ichiimainai nunik ukaemainai, nunitai duwapshakam ajapnamainai.
LUK 5:38 Nuadui vino yamagmak duwap yamagmanum yajataiyai, dutikamu asa mai betek amainai.
LUK 5:39 Tuja umutai kajiau umin aidauk, yamá kajiaunak wakegainatsui, wagki: “Kajiau imá pegkejai” tuidau asag, tiuwai.
LUK 6:1 Tsawan ayamtai tsawaju ai, Jesús ajak ajakbaunum nagkaebau. Nuniamunum ni jintintaiji aidau trigo nejeen kupik jukiag uwejin pakajag yuwidau.
LUK 6:2 Nuniagtai ujumak fariseo aidau chichajuinak: —¿Wagka tsawan ayamtai tsawagmataig takantsashti tibauwa nunin aish aikagme?, tuidau.
LUK 6:3 Tiagtai Jesús ayaak: —¿Atumek agagbauk ausachuk ainajum, David niijai yujamujai yapajuinak,
LUK 6:4 jega Apajuí ememattainum wayá, pag imá sacerdotek yuwati tibauwa nuna yuwak, niina kumpají aidaunash susauwa duka?, tau.
LUK 6:5 Nuna tii, nuigtú chichaak: —Aentsmaga akiinauwa duka, tsawan ayamtaiya nuna Apujiyai, tiuwai.
LUK 6:6 Ataktú tikich tsawan ayamtai ai, Jesús jega ijuntainum wayau, nunik jintinkagtau; nuniamunum nui aents uwejí untsujiya nu jaka ekeemkau pujau.
LUK 6:7 Nunitai maestro chicham umiktinun jintinkagtin aidau, nuigtú fariseo aidaujai Jesusan dii ijuntuidau, tsawan ayamtai aish etsagagchatpash tusag tsanumjugtasag.
LUK 6:8 Tujash nigka dita anentaibaujinak dekau asa, aents uwejí jaka ekeemkaun chichajak: —Wajaktá, nunikam ejapen wajantá. Tama niishkam wajakí ejapen wajantú.
LUK 6:9 Nunikmatai Jesús chichajak: —Iniastajime: ¿Tsawan ayamtai aina nuwish pegkejan dutikati atsa pegkegchaun dutikati tibaukait; etsagautskek jakati tusa idaimainait?, tau.
LUK 6:10 Nuna tii ashí aents nui ijunun diisá, nuna aentsun chichajak: —Uwejum dakuekta, tiuwai. Tama dakueku, nunik uwejenig pegkeg wajasui.
LUK 6:11 Dutikamtai ditak senchi kajekag, Jesusash utugmainkita tusag chichaidau.
LUK 6:12 Nunú tsawantai Jesús Apajuí ausatatus mujanum weu, nunik nui kashi pujus Apajuí au aujkawa tsawampajui.
LUK 6:13 Nunik tsawag jintintaiji aidaun untsukui, dutika nunú aina nuiyan doce etegjauwai, nunú aidaun apóstol tusa adaijauwai.
LUK 6:14 Duka jujú ainawai: Simón, Pedro atatme tibauwa nu, Andrés Simogka yachi, Jacobo, Juan, Felipe, Bartolomé,
LUK 6:15 Mateo, Tomás, Jacobo Alfeo uchijí, nuigtú Simón Zelote tutai aajakua nu.
LUK 6:16 Judas Santiago uchijí, nuigtú Judas Iscariote Jesusan sujukua nu aatus.
LUK 6:17 Nunik mujanmaya ditajai ijunag akaiki, pakanum wajantú, nunikmatai kuashat aents tuwagkaju ashí judeanmaya, jerusalegnumia, Tiro nayantsa uwet awa nuiya, sidognumia aidau, ni jintinkagtamujin antukagtatus, nuigtushkam dita jaamujinash etsaentugti tusag,
LUK 6:18 nunikag wakan pegkegchau egkemtugbau aidaush tsagagkaju.
LUK 6:19 Ashí aents aidauk Jesusan antigtatus kakanmamaidau, niiniya senchi jiinak ashí aents jau aidaunak etsagau asamtai.
LUK 6:20 Jesús ni jintintaiji aidaun diisá chichajak: “Shiig aneastajum atum ujunauch aidautigmek, wagki Apajuí inama duka atumdau asamtai”.
LUK 6:21 “Shiig aneastajum yamai yapajautigmek, wagki shiig juwakagtin asajum. Shiig aneastajum atum yamai buututigmek, wagki shiig aneakjum dushigtin asajum.
LUK 6:22 “Shiig aneastin atajum, Aentsmaga akiinau nemaju asagmin aents aidau kajegtamainak, yajá pujusta tusa jiipainak, pegkegchau chichagtamainak, daagmin adaisajash pegkegchau tujamainakuish.
LUK 6:23 Nunú tsawantinig shiig aneakjum dakujustin atajum, wagki atum jukitnuk shiig muun nayaimpinum ajutjamaidau asamtai; wagki aatus dutikajakú ainawai atumi muunjum, profeta aajakajua nunashkam.
LUK 6:24 “¡Tujash wait anentajime atum wiyakuch aidautigminak, wagki ju nugka juwig atum shiig aneamuk ajutjamaidau asamtai!
LUK 6:25 “¡Wait anentajime atum yamai shiig yuwá batsatutigminak! wagki atak yapajuawagtin asagmin. “¡Wait anentajime atum yamai dushit batsamtautigminak, wagki wake besemag jegagtamkui buuttin asagmin!
LUK 6:26 “¡Wait anentajime atum ashí aents pegkegnum chichajam aidautigminak! wagki atumi muunjum aajakajua dusha wait profeta aidaun imatikas chichajujakú aina dui.
LUK 6:27 “Tujash atum mina antugtautigmin tajime: Atumi shiwajum aidaush aneetajum, kajegtamaidaushkam pegkegnum yaigtajum;
LUK 6:28 pegkegchau chichagtamaidaush pegkegnum chichagkatajum, wainak tsanumjutpainakuish Apajuí aujtustajum.
LUK 6:29 Yapinum awatamkujaish, tikich yapiminish awapiti idaitusta; capa jujutjamkujaish tunicagmesh sujittsuk susata.
LUK 6:30 Makichik aentskesh segapakuig susata; tuja amina wajiigmin jujutjamkuishkam, awagtugkita tiipa.
LUK 6:31 Atum tikich aidau shiig awajtuktinme tusajum wakejin ainajum nunisjumek tikichish shiig awajkatajum.
LUK 6:32 “Atumin anempa duke atumshakam aneakjumesh, ¿wají imana juwagme? Wagki aents tudau aidaushkam dita aneniamujaig aneninawai.
LUK 6:33 Atumin shiig awajtamaina duke shiig awagmakjumesh ¿wají imana juwagme? Wagki aents tudaugtin aidaush nunak nunin ainawai.
LUK 6:34 Atum kuichkin ekes awagtugmamaina duke tsagkatkugmesh ¿wají imana juwagme? Wagki aents tudaugtin aidaushkam penpeentunisag tsagkatdayin ainawai, uwaegak jukitag tuidau asag.
LUK 6:35 Atumí shiwajum aidaush aneetajum, nuigtush shiig awajkatajum, nuigtushkam tsagkatkatajum, niish minash jutiksag iktukti tusa dakatsuk, aatus nuniamunum wají shiig pegkeg jukitnuk ajutjamtinai, nuniakjum Apajuí ashí tikich aidau nagkaesau muunta nuna uchijí atatjume; wagki nigka pegkejai, niina see tuchau aidau, pegkegchau aina nujaishkam.
LUK 6:36 Wait anenkagtin atajum, atumin Apa wait anenkagtina ibau.
LUK 6:37 “Tikichi pujutjig augmatú yujaigpajum, atumesh dutiksagmek tama aijum. Suwimkash sukagtusaipa amesh suwimak suwam aim, tsagkugkagtugtajum dutiksaik tsagkujam aminjum.
LUK 6:38 Tikich atsumau wainkugmek susatajum, atumnash Apajuí amastinme tikich atsubau wajuk suwagme dutiksag. Nigka shiig kuashat atum atsumamu nagkaesau amastatjume.
LUK 6:39 “Jesús junashkam augmatak tau: ¿Wainmachua dusha tikich wainmachunash jintanash inaktumainkaih? ¿Mai waanum iyaumainchaukaih?
LUK 6:40 Jintintaiya duka jintinkagtina nuna nagkaesauchui. Untsu papí augbaujin ashimkatta dui, niina jintinta iman wemainai.
LUK 6:41 “¿Wagka yatsumi jiin chipum tekani egkemaush diyagme, atumi jiimin numi egketa nu diitskesh?
LUK 6:42 ¿Utugsamea amina yatsumish: Yatsuju jasta chipum tekani jiimin egketa nuna jigkitjame tumainaitme? ¡Tsanumin aidauwah! Dekatkauk amina jiimin numi egketa nu jiiktá, nunikam shiig wainkam yatsumi jiin chipum tekani egketa dusha jiigkita.
LUK 6:43 “Numi pegkejak pegkegchaunak nejemaitsui, numi pegkegchaushkam pegkegnak nejemaitsui.
LUK 6:44 Wagki makí makichik numi aidauk ni nejea dui dekanui; untukjak munchiinak nejetsame, antsag uvashkam zarzanmayag juushtayame.
LUK 6:45 Aents pegkejak pegkegnak chichauwai, wagki pegkeja duka anentain ajamu asa. Nunisag aents pegkegchaushkam pegkegchaunak chichauwai, wagki pegkegchauwa duka anentain ajamu asa; wagki shiig kuashat anentain aja nunak, chichaak iwainawai.
LUK 6:46 “¿Wagka: ‘Apuh, Apuh’ tujutjume wi taja nu umiachiatkugmesh?
LUK 6:47 Ashí aents minai tanta, mina chichamjun antugtukag imatiksag umidaunak wajijai betekaita nuna titajai.
LUK 6:48 Duka aents jegá jegamkatatus initak tai, kaya muunnum dekanmitkak ajiamun, namak piyujak jegan senchi tukuakush, kayanum dekanmitkakbau asamtai machikish umushkachua numamtinai.
LUK 6:49 Tujash mina chichamjun antayatak umigtachuk, aents jegá jegamak, ajitsuk nugká awanken ekeni jegamkamun, namak piyujak jegá senchi tukú tegak shiig tsaik ajapauwa numamtinai”.
LUK 7:1 Jesús aents aidau jintinbaun ashimak Capernaúm weuwai.
LUK 7:2 Nui makichik capitán pujau, nuna inake aneetaijiya nu jau, nuniak jakattak tepau.
LUK 7:3 Nunitai Capitán Jesús pachisa chichaamun antuk, ujumak judío apuji aidaun awetiuwai, mina inakjun taa etsaentujati, timae titajum tusa.
LUK 7:4 Tima Jesusan jegajiag ujakaju, nuninak: —Au capitanik dekas wait aneasam yaimainaitme;
LUK 7:5 nigka judío aidautinash anejatnuwe, nuniau asa jega ijuntainash jegamjutpakmayi, tuidau.
LUK 7:6 Tiagtai Jesuschakam ditajai weuwai. Tujash jegá tikiju wajasá weenai, capitán ujumak niina kumpají aidaun ishitkauwai, dutikak: “Apu kajegtukaigka, wika niiya ibau, mina jegajui utuamak amaitsujai;
LUK 7:7 nuniau asan wika niinakesh adijmaitsujai, tujash tsagagti tujutti, tamak mina inakjush tsagagtatui;
LUK 7:8 wagki wikishkam apu umigbau ajutui, antsag suntag mina umigtuidaush ajutuinawai, nunú aina nuiyan wi: Wetá, tamak wegawai: Tikichia nuna: Taata, tamak minawai, aikasnuk mina inakjunash: Ju dutikata, tamak dutikawai”, tujamae tita tiuwai.
LUK 7:9 Tusá ujaam Jesús antuk anentai jegagchau, nunik nui aents minidaun ayampattsag: —Dekas tajime, Israel aina nuiyanakesh imatika dekaskeapi tabauji ajamunak wainkachjai, tau.
LUK 7:10 Nunú awemamu aidau waketug jegá jegakmag, inak jau ukukbauk tsagag pegkeg pujaun wainkaju.
LUK 7:11 Nu nuniku ai, Jesús yaakat Naín tutainum wegau, nunitai ni jintintai aidau nuigtú kuashat aents aidau saetukaju.
LUK 7:12 Nunik yaakta waitijin tikiju wajas wegai, nuwa wajé uchijí makichkiuch ajamu jakamtai ukustatus emaidau, nunitai nuwan uyunainak kuashat aents weedau.
LUK 7:13 Nunittaman Apu Jesús nuwan wainak wait anenjau, nunik chichajak: —Buutipa, tiu.
LUK 7:14 Tusa jakau patasá yanakí emamun adijkau, nunik antigku. Dutikamtai yanasá weedaush wajantaju, nunikmatai Jesús chichajak: —Datsauchih, amina tajame nantaktá, tiu.
LUK 7:15 Tama jakaushkam nantakiu, nunik chichatan nagkabau, nunikmatai Jesús dukujin susauwai.
LUK 7:16 Dutikamtai ashí aents aidauk ishamkag Apajuin emematuinak: Profeta dekas senchigtin jutiinash wantintugmakji, Apajuí ni aentsji aidautin yaimpaktatus tajutjamaji, tuidau.
LUK 7:17 Nu Jesús dutikamuk ashí Judeanmag antuekau, nuigtú tikiju aneem batsatu aidaunmashkam.
LUK 7:18 Juagká jintintaiji ashí nu wají dutikamu aidaun ujakaju. Dutikam Juagshakam jimag jintintaijin untsuká,
LUK 7:19 Apu Jesús pujamunum awemau iniastinme: “¿Amekaitam minitnai tibauwa nu atsa tikichik dakastatag?” tusa.
LUK 7:20 Tusá awemajam Jesusan jegajuawag: —Juan Yamijatna nu amina iniasti tusa awetamaji, nuniak: ¿Amekaitam minitnai tibauwa nu atsa tikichik dakastatag? timae, tuidau.
LUK 7:21 Nuna tuinaig aents jau aidaun, tikich jatai waituidaunash, wakan pegkegchau egkemtuamu aidaun, nuigtú kuashat wainmachu aidaunash nimtikiaju.
LUK 7:22 Tiagtai Jesús ditan ayaak: —Wetajum, nunikjum atum wainkaujum ju nuigtú antukujum dushakam Juan ujaktajum: Wainmachush wainmainawai, shutú aidaushkam wekaegainawai, lepragtin aidaush tsagainawai, empekush antuinawai, jakaush nantainawai, tuja ujunauch aidauk yamajam chicham ujaam ainawai;
LUK 7:23 nuigtú shiig aneasagtinai minai dekaskeapi tabaujin megkaegainatsu duka, timae tusam ujaktajum, tiuwai.
LUK 7:24 Juan awemamu aidau waketjamtai, Jesús Juagkan pachis aents aidaun iniak: “¿Wají wainkatasagmea uwegshunmash weabiugme? ¿Tagkanan dase umpuau wainkatasagmek weabiujum?
LUK 7:25 Nuniachkugmesh ¿wají wainkatasagmea weabiugme? ¿Aents, jaanch shiig pegkejan nugkujá pujau wainkatasagmek weabiujum? Atumek dekagme, nugkutai shiig pegkejan nugkuaju aidauk rey aidau jeen shiig aneenak pujuinawai.
LUK 7:26 Tujash ¿wají wainkatasagmea weabiugme? ¿Profetaka? Ehé, dekaske, duka profeta nagkaesau aajakui.
LUK 7:27 Juuwai ni pachisa agagbauwa duka: “ ‘Wi mina chichamjun etsegnun emtikan awemajai, ni jintanak umigtamkati tusan’, tawa nu.
LUK 7:28 “Dekas tajime, ashí aents akiinaina nuiyag Juagká nagkaesauk atsawai, tujash Apajuí inamtainig aents imanchauchia nuuwai niina nagkaesauk.
LUK 7:29 “Nunú tabaun antukag ashí aents aidau nuigtú apú kuichkiji atinun ijumin aidaushkam, Apajuí nuniktinme tusa wakega nuna dutiksag umiinak, Juan yamijatbaunum yamimakajui.
LUK 7:30 Tujash fariseo aidauk, maestro chicham umiktinun jintinkagtin aidaujai dakitjaju, Apajuí ditan wait anentuinak umiktajum tibauwa nu umitnak, nunidau asag Juan yamijatbaunmash yamimakchajui”.
LUK 7:31 “¿Jujú aents aina junash wajijai apatkanua tumainaitja? ¿Wajijai betekai tumainaita?
LUK 7:32 Ditak, uchi aidau plazanum pekaamsag kumpajijai untsuninak: ‘Flauta umpuakuish, atumek nantsemachmaugme; wake besemjan kantamkuish, buutchamugme’, tudaiyin aina numamtin ainawai.
LUK 7:33 Wagki Juan Yamijatin taa pagnash yuwachu, vinonash umachu nuniakui atum chichagkujum: Iwanch ajamu asa aniawai, tajume.
LUK 7:34 Tuja Aentsmaga akiinauwa nu yutainash yuwau, umutainash umakui: Ju aentsua juka yuwa yuwakua wegawai nuigtush vino umú wekaewai, nuniau asa apú kuichkiji ijumin nuigtú tudaugtin aina nuna kumpajiyai, tajume.
LUK 7:35 Tujash Apajuí yachajiya nunak, uchijí aina nu pegkegnak iwainawai”.
LUK 7:36 Fariseo aina nuiya yujumkan ajamsatatus Jesusan ipauwai, tima fariseo jeen wayá mesanum jegan ekeemsauwai.
LUK 7:37 Nuniai nuwa pujutji pegkegchauwa nu yaaktanum pujau. Nuniau Jesús fariseo jeen yuwak pujawai tabaun dekaa, botella alabastro najanamunum kugkuinun juki tajuntau;
LUK 7:38 nunik Jesusa nawen ayaumas pujus buutak nawen negaikiajui, dutika intashinig ujugtuju, nuniak nawen kugkuntak kugkuinui ukatu.
LUK 7:39 Dutiktai fariseo Jesusan ipauwa nunú nigki anentaimas: “Jujú aents profetayaitkug, ya antiawa, tuja jusha nuwash wajukuita, pujutji pegkegchauwa nuna dekamainapi”, tau.
LUK 7:40 Nunitai Jesús chichaak: —Simón, makichik wajiin titajame. Tutai: —Maestro tujutta, tau.
LUK 7:41 Tutai Jesús ayaak: —Kuichkin tsagkatkagtinun jimag aents diwimaidau, nuniamunum makichkia nu quinientos denario diwimai, tikichia nu cincuenta diwimu;
LUK 7:42 nunú akikmamainji atsujiagtai mai tsagkujauwai. Yamai tujutta: ¿Ju jimaja juwiyash tu imá senchish aneemainaita?, tau.
LUK 7:43 Tama Simón ayaak: —Diwijí imá muun tsagkujamua nu imá senchi aneemain diyajai. Tutai: Duka dekas tiume, tau.
LUK 7:44 Tusa nuwan ayampatua diis Simogkan chichajak: —¿Ju nuwa wainmek? Jeemin wayamjai, nunikmataish daweg dijagtinuk yumik sujuschamume; tujash jujú dawejun negaikiag niina intashinig ujugtujae.
LUK 7:45 Kumpamjakmesh minak kugkuntsachmaume; tujash ju nuwa juka wayamag dui nagkamas dawegnak kugkunjú pujawai.
LUK 7:46 Buukeajuish aceiteyaikish nijatkachmaume; tujash jujú kugkuinui dawejun nijatjuje.
LUK 7:47 Nunin asamtai tajame; niina tudauji shiig kuashta duka ashí tsagkugnaje, dutikamu asa imá senchi anentui, tujash aents tudauji ujumak ajamu tsagkujamuk ujumak anentui, tiuwai.
LUK 7:48 Nuna tii nuwan chichajak: —Tudaujum aidauk tsagkugnaje, tiu.
LUK 7:49 Tuja mesanum niijai pekajaidauk ditak pempeentunisag chichainak: —¿Jusha ya asaya tudaunash tsagkugkagtawa?, tudayinau.
LUK 7:50 Tuinaig nigka nuwan chichajak: —Ame dekaskeapi tame nu uwemtijamjae, shiig agkan anentaimsam wetá, tiuwai.
LUK 8:1 Nuna nunik Jesusak kuashat yaakat aidaunum nuigtú yaakat yaijuch aidaunmashkam wekaegas, yamajam chichaman Apajuí inabaujin pachis etseju, nunitai doce aina nunú uyunaidau,
LUK 8:2 nuigtú ujumak nuwa wakan pegkegchau egkemtuamu, jau aidau etsagagbau aidaushkam uyunaidau. Nuanui pachitkau María magdalanmaya, siete wakan pegkegchau egkemtuamu jiijamua nunú,
LUK 8:3 tikich Juana, Cuza Herodesa kuichkijin kuitamna nuna nuwe, Susana, nuigtú kuashat aidau ditá wajiiji aina nujai yaidau.
LUK 8:4 Makí makichik yaakat aina nuiya aents minidau Jesusan wainkatasag, nunikag kuashat tuwakagmatai Jesús juna pachis augmatak:
LUK 8:5 “Ajakan ajakbau ajajin ajaka jigkayin nagkimak ukutatus weuwai, dutika ajakmau asa. Nunik ajajin jegaa nagkimkau, dutikam ujumak jigkai jintaa kakekauwai, nunikun aents najakag ukukbaun yakiya pishak kaketuk amukajui.
LUK 8:6 Tikich jigkai kayagnunum kakekauwai, nunik tsapainiuwaitak jakauwai, chupitnuchu asamtai.
LUK 8:7 Tuja tikich jigkaik jagki ayaunum kakekauwai, nunik tsapaittaman jagki yutua ijinauwai.
LUK 8:8 Tujash tikich jigkaik nugka pegkegnum kakekajui, nunikajuk tsapaidiag shiig nejekajui, makí makichik ajak cien jigkain nejeawajui”. Nuna tii senchi jiiká chichaak: “Ni antutaiji ajamuk antuktinme”, tiuwai.
LUK 8:9 Timatai jintintaiji aidau, wají takumea nu augmattsamesh timaume tusag inidau.
LUK 8:10 Tama ni ayaak: —Atumnak Apajuí ni inabauji dekaachbau aajakajua nuna dekamtijamjume, tujash tikich aidaunak augmatbaujai pachisan augjai, wagki wainmainakush wainmachu wajukmaina nuniktinme tuja antuinakush antachu wajukmaina nuniktinme tusa, tiuwai.
LUK 8:11 Wi ajakan ajakbaun augmattsan timag nunak juna takun timajai: Jigkaiya duka Apajuí chichamega nuuwai.
LUK 8:12 Jintá jigkai kakekauwa duka, aents aidau chichaman antuidaun, Iwanch juwatki chicham ni anentain wayaun dekaskeapi tuinak uwemjainum tusa yajuta nuuwai.
LUK 8:13 Jigkai kayanum kakekajua duka, chichaman antukag wakegas nemajuina nuna iwainawai; tujash nu ajak kagkapenachua duka, ujumak tsawantai dekaskeapi tuinawai; tujash utugchat minitam idaiyina nuuwai.
LUK 8:14 Jagki ayaunum iyajua duka, chichaman antuina nuuwai; tujash tsawan wegamunum uyumamu aina nu, wiyakchameamu aina nu nuigtú dita wakegamu aina nuna anentaimtuinak ajak nejemainchauwa nunin wenawai.
LUK 8:15 Tujash nugka pegkegnum iyajua duka, aents anentai pegkeg nuigtú wakegas antukag chichaman umiinak, imagnis pujuidauk, ajak pegkejan nejekua nunin ainawai.
LUK 8:16 Makichik aentskesh lámpara ekemakajag ichinkaik dukuchu ainawai, dutikachkush pegaká wapken awaigkagkesh apujchau ainawai, dutiktsuk yakí ekenin ainawai wayatatus minidaush tsaaptinun wainkatnume tusag.
LUK 8:17 Numamtuk yamai uukbauwa nunik awa juka, atak paan wantinkatnai. Aantsag yamai dekamainchauwa dushakam atak shiig dekamu atinai.
LUK 8:18 Juna tajim jujú shiig antuktajum, ni aja duka nuní kuashat suwam atinai, untsu atsuja duka, ajuttatuapi tusa anentaimta dusha atantam atinai.
LUK 8:19 Jesusa dukují, yachi aidaujai tajuawajui; tujash ni wajamunmag jegamainchau dekapjajui kuashat aents tuwakaju asamtai.
LUK 8:20 Nunitai niina ujainak: —Amina duku yatsum aidaujai waipaktatus tajutjamawag agaa ijunui, tuidau.
LUK 8:21 Tama ni ayaak: —Mina dukug nuigtú mina yatsug aina duka Apajuí chichamen antukag umiina nu ainawai, tiuwai.
LUK 8:22 Makichik tsawantai Jesús ni jintintaiji aidaujai barcanum chimpimjaju, nunik: Kuchá amain wegagmi. Tusag weedau,
LUK 8:23 tujash katiamunum Jesusak kanaju. Nuniai dase senchi dasentak kuchan umpuau, nunitai barcanum yumi yajanak tepeattak ishamain wajau.
LUK 8:24 Imanitai jegaantag ishintainak: —¡Maestroh, Maestroh iik jakektatji! tuidau. Tama shintaag dasen jiyak idaiyak, kucha tsukatunashkam: —¡Mijakta!, tiuwai. Tusá tamawaik dase imaniauk mijak, miyasu wajas patamsau.
LUK 8:25 Nunikmatai ni jintintaiji aidaun chichajak: —¿Dekaskeapi tabaugmish utugkaugme?, tau. Tujash ishamkag anentai jegagchaju, nunikag ditak pempeentunikiag: —¿Jusha ya asamtaiya dasesh, yumish ni chichamenash umijuinawa?, tudayinau.
LUK 8:26 Nunikag kuchá amain katigkag gadaranmaya batsamtai nugkeen Galilea igkuas awa nuwi anumkajui.
LUK 8:27 Nunik Jesús jiinkimtai nunú yaaktanmaya aents, kuashat mijanai iwanch egkemtujam pujú igkugtatus jiintukiuwai, duka jaanchnash nugkuchu, jegaash pujuchu ukumatainum pujú.
LUK 8:28 Nunú Jesusan wainak senchi untsumkau, nunik niina eemtin tikishmag senchi untsumak: —¡Jesusah, Apajuí ashí tikich aidau nagkaesau muunta nuna Uchijiyah, minash utugtuktasamea miname! ¡Wait aneasam suwimkak sukagtusaipa!, tau.
LUK 8:29 (Wagki Jesús, wakan pegkegchauwa nuna: Anú aentsuk jiinkim ukuktá tibau asa tiuwai. Nu aentsnak kuashat tsawantai wakan pegkegchau egkemtug pujuju, nuniau asamtai cadena aidaujai jigkajag kuitamaidau, tujash cadena aidaunak tsujimtikag, wakan pegkegchau nugka uwejush aidaunum emau.)
LUK 8:30 Tutai Jesús iniak: —¿Amesh yaitpa? Tama ni aimak: —Wika Untsujiyaitjai, tau. Nunak kuashat wakan pegkegchau aentsun chimpimtua batsamtau asag tiuwai;
LUK 8:31 nunú aidau Jesusan, waa muun ishamain akaga nuig awekagtipa, tusag segaidau.
LUK 8:32 Nuanui kuashat kuchi mujanum dupaan yuwinak yujaidau asamtai, nuwi wayatjai idaikagtusti tusag segaidau, tiagtai niishkam; nuniktajum, tiuwai.
LUK 8:33 Tima iwanch aidaushkam aentsnumia jiinjag kuchinum utsanawajui; dutikam kuchishkam pisajag betsag tajagak kuchanum najataunum iyagkag jinawajui.
LUK 8:34 Nunikmatai kuchí kuitamin aidau nu nunikbaun wainkag pisajag yaaktanum jegawag etsejuinak, ajanum batsataidaunash dutiksag ujakajui.
LUK 8:35 Tusá ujakajam: Wagkag ankae diisagmi, tusag wejiajui. Nunik Jesús pujamunum jegakmag, aents iwanch egkemtuamu aajakua duka pegkeg wajas, shiig anentaimas Jesusai ayaumas jaanchin nugkujá ekeemtatman wainkag ishamkaju.
LUK 8:36 Nuniagtai nuna wainkau aidau aents aidaun, Iwanch egkemtuamu wajuk tsagaje nuna ujaidau.
LUK 8:37 Tiagtai ashí aents nugka Gadaranum batsataidauk Jesusan yajá weti tusag segaidau, senchi ishamaidau asag. Tama Jesuschakam barcanum egkemag wakitkiu.
LUK 8:38 Nunitai aents Iwanch jiijamushkam Jesusan segau niijai wetatus; tujash Jesús akateg ukuak:
LUK 8:39 —Amek jeemin wakitkita, nunikam Apajuí amina ashí dutijama nunú etsegkata, tiuwai. Tima wee ashí yaaktanum etsejauwai Jesús niina shiig kuashat dutika nuna pachis.
LUK 8:40 Jesús wakitki jegamtai kuashat aents tuwakajuk shiig aneas jukiaju, ashí aentsuk niina dakaidau asag.
LUK 8:41 Nuniamunum Jairo daagtin, jega ijuntaiya nuna apuji tauwai. Nunik Jesusa tikishmatug segauwai niina jeen jukitatus,
LUK 8:42 wagki niina nawanji shiig makichkiuch doce mijan ajamu tumaina nu jakattak tepau asamtai. Nunik wegaun kuashat aents wedau asag Jesusan chanuidau.
LUK 8:43 Nunú aents aina nuiya makichik nuwa doce mijadai numpan puwak waitú pujú pachitkau, nuigtú kuashat ampijatin aidaunum ampimak ashí ni ajamuchijinak ashimkau; imaniakush makichkish etsagam asachui.
LUK 8:44 Nunú nuwa ukunum jegantun Jesusa jaanchji wenin antigkui; dutikamuik numpa puwamujinak megkaekauwai.
LUK 8:45 Dutikam Jesuschakam: —¿Yaa antinkame?, tau. Tujash ashí aents aidauk etsegchagtai, Pedro chichajak: —Maestroh, kuashat aents tuwakag chanumpaina nu antimpakaja nuniaigkik, ¿ya antinkae tame?, tiu.
LUK 8:46 Tutai Jesús ayaak: —Makichik antinkau awai, wagki minaiya senchi jiinun dekapjajai, tau.
LUK 8:47 Tutai nuwak, uumainchau dekapeak kujaukmaikia Jesusan jegantun tikishmatug, ashí aents antuinamunum, wajuk asaya antigke nuna pachis, nuigtú ni Jesús antiamuik tsagagbaujinashkam ujakú.
LUK 8:48 Tutai Jesús ayaak: —Nawantah, ame dekaskeapi tabaugmia nu etsaentamjae, shiig agkan anentaimsam wetá, tiuwai.
LUK 8:49 Eke Jesús chichaak wajai, Jairo jega ijuntaiya nuna apuji jeenia makichik aents tanta: —Nawanjumek jakame, nuigtuk Maestrok waitkasaipa, tau.
LUK 8:50 Tabaun Jesús antuk chichajak: —Ishamkaipa, ayatak dekaskeapi tita nawanjumik aneantatui, tau.
LUK 8:51 Nunik jeganum jegaa, wayamunum tikich aidaunak makichkish awayachajui, ayatak Pedro, Jacobo, Juan, nuwa jakauwa nuna apají dukují aina duke wayawajui.
LUK 8:52 Tuja ashí aents aidauk buutuidau nuninak anentai idajuidau nuwauch jakaun anentaimtusag. Tujash Jesús chichajak: —Buutigpajum jakache, ayatak kanaje, tau.
LUK 8:53 Tutai dushikidau, jakaun dekaidau asag.
LUK 8:54 Tujash nigka uwegnum achiak senchi chichaká: —¡Nuwauchih nantaktá!, tiu.
LUK 8:55 Tusá tamawaik mayai egkemtujam nantakmatai, Jesús chichajak: Yumain susatajum, tiuwai.
LUK 8:56 Dutikamtai nuwauchi apajig dukujijai anentai jegachaju; tujash Jesusak: —Ju junika ju pachisjumek makichik aentskesh ujakaigpajum, tiuwai.
LUK 9:1 Jesús jintintaiji doce aina nuna ijumag ashí iwanch aidaunum jiimainun, nuigtú jata aidaunum etsaegkagtumainnash senchin susauwai.
LUK 9:2 Dutikak ishiakui Apajuí inama nuna pachis etsegkatnume nuninak jau aidaunash etsagagtinme tusa;
LUK 9:3 dutikak: —Makichkish jukigpajum jintá weaku atsumainuk. Ushujutaigkesh, wají egkesá jutaigkesh, pagkesh, kuichkikesh, nuigtú nugkutaigmesh yachiagmek jukigpajum;
LUK 9:4 atum tu jeganma wayattagme nuig pujustajum nunikjum weakjum ukuktajum.
LUK 9:5 Tuja tuwí atumin jujamtan dakitjamiagtatua, nuniakuig nu yaaktanmag jiinkí ukuakjum, atumi dawemin yukukuntu awa nu pegagjum akaketkajum ukuktajum, dita suwimak jukitnuji iwaintakjum, tiu.
LUK 9:6 Tiajam ditashkam jiinjag ashí yaakat yaijuch aidaunum nagkaemainak yamajam chichama nuna etsejuinak, jau aidaunashkam etsagaidau.
LUK 9:7 Herodes tetrarca Jesús ashí dutikamua nuna antuku, nunik anentai jegachu, wagki ujumak aents aidau chichainak: “Juan maamua nu nantakne”, tuinai
LUK 9:8 tikich chichaidau: “Auk Eliasai” tuinai, tikich chichaidau: “Yaunchuk profeta aajakajua nuiya nantakne”, tuidau asagmatai.
LUK 9:9 Tujash Herodes chichaak: —Wi inamja ai Juagká buuken tsupikagmayajama, ¿dusha ya amainaita tuinamun antujag dusha? Tusa wainkatatus wakegau.
LUK 9:10 Apóstol aidau Jesús ishiakbau waketug kaunawag, ashí dita dutikamujinak ujakaju. Dutikam ditan yajuak nugka agkantu yaakat Betsaida tutainum awa nui weajui.
LUK 9:11 Tujash aents aidau dekaawag shimutkaju; nunikag jegajuawajam Jesuschakam ditan shiig anentus jukiajui, dutika Apajuí inama nuna pachis ujainak, tsagagtatus atsumaidaunash etsagau.
LUK 9:12 Nuniai etsashkam akaegu asamtai, doce aina nunú jegaantag chichajuinak: —Aents akatjam ishiakta, yaakat yaig aina nui nuigtú ajanum batsata nui wegag kanuinak dita yuwatnujinash egaktinme, wagki juig makichkish atsamunum batsatji, tuidau.
LUK 9:13 Tiagtai Jesús ayaak: —Atum dita yuwatnuk susatajum, tau. Tuinam dita aiinak: —Atsugtamajamah, cinco pag, nuigtú jimag namaka duke ajutjamajamah, untsu jutii shiakaja ashí ju aents aidau yuatnuk sumamainchauwah, tuidau;
LUK 9:14 duka cinco mil aishmag tumain aajakajui. Tiagtai Jesús ni jintintaiji aidaun: —Cincuenta, cincuenta kanagjum batsamsatajum titajum, tiu.
LUK 9:15 Tima ditashkam ashí dutiksag batsasaju.
LUK 9:16 Dutikawagmatai cinco pagkan nuigtú jimag namaka nuna juki, pagkai nayaimpin diis see tusa puug jintintaiji aidaun tinabiu, dita aentsun tinamkatnume, tusa.
LUK 9:17 Dutikawajam ashí shiig yuwawajui, nunikagmatai ampinjau aidaunak doce chagkinnum yajuakajui.
LUK 9:18 Makichik tsawantai Jesús kanaká Apajuin aujak pujusá ni jintintaiji aidaush, nui pujuidau asamtai iniinak: —¿Aents aidaush minash yayai tujutuinawa?, tau.
LUK 9:19 Tutai dita aiinak: —Ujumak aents aidau, Juan Yamijatnai tuinai; tikich chichaidau auk Eliasai taush ainawai; nuniai tikich tuidau yaunchuk profeta aajakajua dutsu aneantatai tujamainawai, tuidau.
LUK 9:20 —Tiagtai Jesús ayaak: ¿Atumesh minash yayai tujutjume?, tau. Tutai Pedro ayaak: —Amek Cristo Apajuí awemamuitme, tiu.
LUK 9:21 Tujash Jesusak mina pachittsagmek makichkish tikichik tiigpajum, tiuwai.
LUK 9:22 —Aentsmaga akiinauwa duka kuashat waittsattawai nuigtú judío apuji aidau, sacerdote apuji aidaush, maestro chicham umiktinun jintinkagtin aidaushkam dakitjagtatui. Dutikau asag maawagtatui, tujash kampatum tsawan asa nantaktatui, tiuwai.
LUK 9:23 Tusa ashí aents aidaun chichajak: —Makichik aentskesh mina jintintaig atatus wakegauk, niinunak idaiyak kashí kashinig waitiakush nemagtukti.
LUK 9:24 Wagki aents ju nugka jui pujutan imá senchi wakegak, mina nemagtuk waittan dakitauk uwemjashtin ainawai; tujash mina nemagtak niina pujutjinash puyatjukchauk, uwemjatnai.
LUK 9:25 ¿Wajinma yaimainaita aentsnash ashí nugka juwiyan niinu emakush, wakanin nigki megkaemaina dusha?
LUK 9:26 Wagki mina pachitus etsegtan datsanjuju tuja mina chichamjunash datsanjau aidaunak, Aentsmaga akiinau Apají imanjiya nujai ángel pegkejam aidaujai minitna dui datsanjatnai.
LUK 9:27 Tujash dekas tajime, atum ainajum juwiyatijum ujumak eke jatsuk, Apajuí inabauji wainkatnutigmesh ajume, tiuwai.
LUK 9:28 Nuna tii ocho tsawan tumain nagkaemakiu ai Jesús Pedron, Juagkan, nuigtú Jacobo juki mujanum wakauwai, Apajuí ausatatus.
LUK 9:29 Nunik Apajuin aujak pujai niina yapi yapajinauwai, jaanchjish puju winchamtin wajasui.
LUK 9:30 Nuniaig jimag aents Jesusan aujuidau, duka Moisés, Eliasjai aajakajui;
LUK 9:31 nunik tsaaptin winchamtin wajasbaunum wantinkaju, nunikag ni wakitkitnujin nuigtú Jesús Jerusalén waitkasa maam atinun pachis aujuidau.
LUK 9:32 Tuja Pedro ditajai ijunag yujaidaushkam, kaji depeteam kajigkú shintaukmá, Jesús tsawan wajas Moisés, Elías aatus ijuntatman wainkajui.
LUK 9:33 Nunik jimag aentsua nunú wegagmatai, Pedro Jesusan chichajak: —Maestroh, jutiish maigkis jui batsatagtai; kampatum aak umikagmi, makichik aminu, makichik Moisesdau, nuigtú Eliasdau, tau; tujash nunak ni tabaunash dekachiatak, tiuwai.
LUK 9:34 Juna aatus Pedro chichai, yujagkim ditajai ijumag ijikui, dutika yujagkim ijikam ishamkajui.
LUK 9:35 Nuniai yujagminmaya chichaak: “Juuwai mina Uchig, wi etegkamu ni antugkatajum”, tabau antuekauwai.
LUK 9:36 Nunú chichaamu nagkanaig Jesús nigki wajaun wainkajui; tujash ditak takamtak juwakajui, nuigtush nunú tsawanta duik, makichkish tikich aidaunak dita wainkaja nunak ujakchajui.
LUK 9:37 Nunik kashinia dui mujanmaya akaejagmatai, kuashat aents Jesusan igkugtatus minidau.
LUK 9:38 Nuniai tuwakbaunmaya makichik aents senchi jiiká chichaak: —¡Maestroh, wait aneasam mina uchig makichkiuchia ju etsaentujata;
LUK 9:39 wakan pegkegchau egkemtakug pachiachbau untsumtiknuwe, imatikak kujamtiknuwe, dutikam saun wenin apauwe! ¡Nuigtush tunamitkag waitkas ipimpig ukuwe!
LUK 9:40 Imatikakui amina jintintaijum aidaun segamjai jiigtugkitnume tusan tujash tujinkagmae, tau.
LUK 9:41 Tama, Jesús ayaak: —¡Aents dekaskeapi tuchau, pegkegchau aidauwah! ¿wajupá dukapea atumjaish pujumainaitja, wajupak katsunjatjime? jui uchijum itantá, tiuwai.
LUK 9:42 Tima uchishkam adiju, nuniai iwanch uchin nugká ajiaju, dutika waugmitkam senchi kujau; tujash Jesús wakan pegkegchaun jiyakú, dutikamtai uchik tsagaju, nunikmatai apajin susauwai.
LUK 9:43 Dutikamtai ashí aents aidauk anentai jegachaju Apajuí senchijiya nuna wainkag. Nunikag ashí aentsuk Jesús dutikamun wainkag puyatuk ijunainai, Jesús jintintaiji aidaun chichajak:
LUK 9:44 —Shiig antuktajum wi titatjim nu: Aentsmaga akiinauwa nunak, aents aidaunum sujukagtatui, tau.
LUK 9:45 Tujash ditak antuinachu wajina takua tawa nunak, eke Apajuí dekamtikchamu asag; nuigtush ajantuidau nunú pachisa iniitnak.
LUK 9:46 Nunikag jintintaiji aina nu, dita aina nuiyash yaki imá wagakush atinaita tudayinau.
LUK 9:47 Jesús dita anentaibaujinak dekaju asa, uchin juki niiní ayaunas awajsau,
LUK 9:48 dutika chichaak: —Makichik aentskesh ju uchia juna mina daajui juwauk, mina jujak dutikawai; nuigtú makichik aentskesh mina jujauk, mina awetiuwa nuna juwawai; wagki atum ainajum anuiya imanchauch anenmamaina nu imá wagaaku atinai, tiuwai.
LUK 9:49 Tutai Juan ayaak: Maestroh, makichik wainkamji amina daagmin iwanchin jiyau; tujash jutiijai minitan dakitakui, amek aikawaipa timaji, tau.
LUK 9:50 Tutai Jesús ayaak: —Duka tiigpajum, jutiin shiwagmatjamtsu duka, jutiinu asa nuniawai, tiuwai.
LUK 9:51 Jesús nayaim wakitkitnuji tsawan jegau asamtai, puyatkas Jerusalén wegau.
LUK 9:52 Nuniak chichama etsegkatin aidaun emtikak awemau, dutikam ditashkam wegag samarianmaya aents aidau batsamtaijin yaakat yaignum wayawaju ni kanagtinun umikagtatus.
LUK 9:53 Tujash samarianmaya aidauk dita jutanak dakitjaju, Jerusalén weenak tuidau asamtai.
LUK 9:54 Dutikainam Jacobo, Juagjai Jesusan chichajuinak: —Apuh, ¿nayaimpinmaya jii iyak apeká ijinati tumainchaukaih?, tuidau.
LUK 9:55 Tujash Jesús ditan ayampattsag jiyakú.
LUK 9:56 Nunik tikich yaakat yaignum weajui.
LUK 9:57 Nunik jintá weenai, makichik aents Jesusan chichajak: —Apuh, wisha ame tuwig wekaetam nuniakminish tuke amijaig wekaesatin atajai tajai, tau.
LUK 9:58 Tutai Jesús ayaak: —Kujancham aidau waajig ajuinawai, antsag yakiya pishak aidaushkam pasugkeg ajuinawai; tujash Aentsmaga akiinauwa duka tepesá ayamainkesh atsujui, tiu.
LUK 9:59 Nuna tii Jesús tikich aentsun: —Nemagtukta, tiuwai. Tama: —Apuh idaitusta, dekatkauk wenu mina apajun ukusan ukuakun nemagkatjame, tau.
LUK 9:60 Tutai Jesús ayaak: Idaisata, wakanin jakau aina nu jakau aidaunak ukustinme; tujash amek weme Apajuí inama nu pachisam etsegkata, tiu.
LUK 9:61 Tikitchakam: —Apuh nemagkatjame, tujash idaitusta, dekatkauk mina jegajui pataag aidaun akatjan ukuutajai, tau.
LUK 9:62 Tutai Jesús ayaak: —Aents nugka tsayaak, nugka tsaitaijiya nuna bakajin nenaa tsayaak wekaeyatak, ukujin ayampatua dii wajamaina numamtuk wajauk, Apajuí inama nu pachisa etsegkata tamak amaitsui, tiuwai.
LUK 10:1 Nuna tii, Apu Jesús tikichnashkam setenta y dos etejauwai, dutika jimá jimajan emtika ashí yaakat nuigtú nugka ni wetin aidaunum ishiakui.
LUK 10:2 Dutika chichajak: “Dekaskenmag ajak juumainuk kuashtai, tujash takau aidau ujumke; nuadui ajakjinna nu segatajum aents nuwi takastin aidaun ishiakti tusajum, tiuwai.
LUK 10:3 Nunin asamtai wetajum; tujash kuitamamkatajum, atumnak uwig ikamyawa batsatbaunum ishimaina numamtuk aents pegkegchau batsatbaunum ishimjime.
LUK 10:4 Weakjumesh kuichik egketai, wají egkesá jutaigkesh, sapat aidaukesh jukigpajum; jintá weakjumesh makichik aentskesh kumpamkujum wajantaigpa.
LUK 10:5 Makichik jeganum wayaakjumesh, dekatkauk: Apajuí atumnash shiig agkan anentaimsa pujutan amastinme titajum.
LUK 10:6 Tajumin aents nui puja nu shiig aneas jujabiagtaik, Apajuí ditanash yaigtatui. Untsu atumin shiig aneas jujamchagtaik, Apajuishkam ditanak yaigchagtatui.
LUK 10:7 Nunú jega nuwig pujustajum nunikjum dita yutain amainamuk yuwatajum, umutain amainakuish uwagtajum; wagki aents takaa duka akiam auwai, makí makichik jeganum kanagjum nagkaemá yujaigpajum.
LUK 10:8 Atum makichik yaaktanum jegattajum nui jujamkiag, yutain amasagtata duka yuwatajum.
LUK 10:9 Nuniakjum nui jau akuish etsagaitajum, dutikakjum: ‘Apajuí inama duka tikiju wajasé’, titajum.
LUK 10:10 Tuja makichik yaaktanum jegagmin jujamtan dakitjamainakuig jiinkijum:
LUK 10:11 ‘Atumi yaaktagminia nugka jutii nawen peemja juka, atuminig pegajá akakeka ukuaji, chicham etsegbau dakitjau asagmin; tujash Apajuí inamjatta duka tikiju wajasé’, titajum.
LUK 10:12 Juna tajime: Suwimak sukagtamu tsawan jegatna duik, sodomanmaya aidau suwimkan jukiuwa nuna nagkaesau jukiagtinai.
LUK 10:13 “¡Corazinkah aminak wait anentajame! ¡Betsaidah aminash wait anentajame! Tironmash nuigtú Sidonkash aents dutikmainchau atum iwaintukbau ainajum dutikamu ainakug, yaunchkes senchi anentai idagmak tudau takatan idaiyinak yapajinmain aajakú ainatai.
LUK 10:14 Tujash Apajuí suwimak sukagtamu jegatna duik, tironmaya, sidogkanmaya aina nuna nagkaesau atumek suwimkak jukiagtin ainagme.
LUK 10:15 Capernaúm, ¿amesh nayaimpinum juwam atinaitjai tamek? Atsa, amek Hades akaikitnaitme.
LUK 10:16 “Atum chicham etsegbaun antugtamaina duka, mina antugtuinawai; untsu atumin dakitjamaina duka, mina dakitjuinawai; mina dakitjuina dushakam mina awetiuwa nuna dakituinawai”.
LUK 10:17 Setenta y dos ishiakbau shiig aneas kaunawag: —Apuh, ame daagmin iwanch aidaush: Jiinkita tamak, iinash antugtamak aents aidaunash jiinkiag ukuagmae, tuidau.
LUK 10:18 Tama ni ayaak: —Dekaske, wisha wainkabiajai Iwanch peem wajukea imanik nayaimpinmaya iyaun.
LUK 10:19 Nuadui atumi shiwajum Iwanchia nuna senchijí depetkatnun mina senchijun amasmajime. Dutikamu asagmin dapi esapainakuish, titigkesh ijupainakuish wajukashtatjume.
LUK 10:20 Tujash shiig aneasaigpajum wakan pegkegchau aidau antugtamkaja duikik, dekas shiig aneastajum, atumi daagmik nayaimpinum agagbauwa nuadui.
LUK 10:21 Nuna tusa idaiyak, Jesús Wakaní Pegkeji shiig anemtikam: “Apawah, amek ashí nayaimpinum batsamin aidau, nugkaya aidaushkam apuji asamin emematjame; wagki yacha nuigtú unuimaju aina duka uugkam aents imanchauch aina nunú iwaintuku asamin. Dekaske Apawah, wagki amek aajam wakegame”.
LUK 10:22 “Mina Apag ashí wají aina nunak mina idaitugsauwai. Makichkish dekajuinatsui Apajuí Uchijiyaitag nunak, imá mina Apajuk shiig dekajui, aikasag mina Apagnash dekainatsui, imá wiki shiig wainjai. Tuja Uchijiya nu iwaintamu dekamain ainawai”.
LUK 10:23 Tusa jintintaiji aidaun ayampatua ditanak chichajak: “Shiig aneasagtinai atum wainjum juna wainaidauk;
LUK 10:24 wagki junak tajime kuashat profeta aidau, rey aidaushkam atum wainjum juna wainkatatus wakegajakú ainawai, tujash wainkachajui; antutnash atum antajum juna antukagtatus wakegajakú ainawai, nuninakush ditak antukchajui ju chichamnak”, tiuwai.
LUK 10:25 Tutai maestro chicham umiktajum tibauwa nuna jintinkagtin wajakí, Jesusan dekapsatatus: —Maestroh, ¿wajina dutikmainaitja pujut tuke atina nuna jukitasanush?, tau.
LUK 10:26 Tama ni ayaak: —¿Wajintu agagbauwaita chicham umiktina nuwish? ¿Wajintu augme?
LUK 10:27 Tama ni ayaak: —“Amina Apujum Apajuiya nu ashí anentaimjai, ashí wakanmijai, ashí senchigmijai, ashí anentaimtagmijai aneeta, nuniakum tikich aidaush amek anenmamsam aneeta” tawai, tiu.
LUK 10:28 Tutai Jesús ayaak: —Shiig aimkaume; nunú dutikata, nuniakum pujut tuke atina nu jukittame, tau.
LUK 10:29 Tujash ni tabaujin shiig juwakta tau asa, Jesusan iniak: —¿Yaita wijai ijutkamush?, tau.
LUK 10:30 Tutai Jesús ayaak: —Makichik aents Jerusalegnumia juwaki Jericó wegau, nunikmá kasanum egkemkauwai; nunikmatai kasa achikag suwi suwimainakua, ipu ipujú ashí maawag, ni takakbaujinak yajutuk weak ukukiajui.
LUK 10:31 Dutikamu ai, pachiachbau sacerdoteshkam nunú jintanmag nagkaemakmá wainak, ikaag diis ukukiuwai.
LUK 10:32 Nunisag levitashkam nuwi jegakmá wainak, ikaag wajas diis weak ukukiuwai.
LUK 10:33 Nuniai samarianmaya aentschakam nu jintanmag wekamá wainkauwai, nunik wait anenjauwai.
LUK 10:34 Nunik jegantun, aceite vinojai juki ipujamu aidaun ampijua pempeaju, dutika niina entsamtaijin ekeni jega kajiitainum ejega kuitamkauwai.
LUK 10:35 Nunik kashinia dui weak, jeennun jimag denarion akik chichajak: “Ame kuitamjutkata, wi waketkun wajupa tujuttatme nunash akiktajame”, tiuwai.
LUK 10:36 Tusa, ¿ju kampatum aina nuiyash ya aajakuita nigki anenmamas kasa suwimam aents tepaun wait anenjaush?, tau.
LUK 10:37 Tutai ni ayaak: Nuna wait anenjauwa nuuwai, tiuwai. Timatai Jesuschakam: —Ameshkam wakitkim, dutiksamek amijai ijutkamu wait anenjata, tiuwai.
LUK 10:38 Tusa ukuak Jesusak wega weakua yaakat yaig aunum jegauwai; nunikmatai nuwa Marta daagtin niina jeen juki awayauwai.
LUK 10:39 Nuna kai María daagtin pujau, duka Jesús chichatai ayaumas antak eketu.
LUK 10:40 Tujash Martak kuashat takamainun uyumak wekaetau asa, Jesusan jegantun chichajak: —Apuh, anú mina kaig ayatak eketa nu, kaim yaigtá tusam awetujia niish yainkati, tau.
LUK 10:41 Tama Jesús ayaak: —Marta, Marta, shiig kuashat takamain uyumakam pimpikim wekaeme,
LUK 10:42 tujash dekas imá senchi puyatjumainuk makichkiuchi, Mariak dekas pegkejan etegka mina chichamjun antak eketui nunak makichkish atanmain ainatsui, tiuwai.
LUK 11:1 Makichik tsawantai, Jesús Apajuin aujak pujuttaman wainkaju. Nunik ashimkamtai jintintaiji aina nuiya makichik jegantun: —Apuh, Apajuí aujut jintinkagtuata, Juan jintintaijin jintintuauwa dutiksamek, tau.
LUK 11:2 Tama ni ayaak: —Apajuí aujkugmek aaja titajum: “Apawah, amek nayaimpinum pujuwaitme, pegkegmaitam ibau asam imá ameketme ememattaim. Amek jutiishkam inajatjata. Ame wakegamun nayaimpinmaya umigtamaina nunisag, ju nugka juwiyash aminak umigtamkatnume.
LUK 11:3 “Dutiksamek ii yuwatnushkam kashí kashinig sukagtita.
LUK 11:4 Jutii tudaujish tsagkugkagtugta, wagki jutiish ashí pegkegchau awajtamaidaush tsagkujuinag dutiksamek, pegkegchaun takastinme tusamek idaikagtusaipa” ayatak yaijatkam agkanmitkagtuata, tiuwai.
LUK 11:5 Junashkam tiuwai: —Atum ainajum anuiyash, ¿ya kumpají ajamu asa, aehaet jegajua: “Kumpajuh, kampatum pag tsagkatjukta,
LUK 11:6 mina kumpag atushtanmaya tajutua nunú ajaamain shiig atsugtau asamtai tajame”,
LUK 11:7 tamin ni jegaag pujus aigmak: “Waitkagsaipa, waitinak epenin mina uchig aidaujai kanakun tepajai, nunin asan nantaknuk amamaitsujai tujamainkait?”
LUK 11:8 Dekas tajime, nantakí sumainchau ayatkush niina kumpají asamtai, nantakí ashí ni atsuma nunak sumainai.
LUK 11:9 Nuadui wi tajime: Apajuishkam segatajum, imatjamak amastatjume; egatash egaktajum, egakjumek igkugtatjume; untsuktajum, imatjamak waitin ujatjamtatjume.
LUK 11:10 Wagki ashí aents sumauk, suwam auwai; egauk igkuinai, ni egamujinak; waitinum wajas untsumushkam, ujatam auwai.
LUK 11:11 “¿Atum ainajum anuiyash, yaita uchijí yujumak segamaitak kayá sumainush? ¿Nuniachkush namak segamaitak dapí sumainush?
LUK 11:12 ¿Nuniachkush makichik nujintan segamaig, titigkin sumainush?
LUK 11:13 Atum pegkegchau ainayatkugmesh dekagme uchijum aidau pegkeg wají aidau sutak. Atumkesh nuniagminish ¡wagkag aan nagkaemas atumi Apa nayaimpinum puja dusha Wakaní Pegkeji segamash amaschagti!”, tiuwai.
LUK 11:14 Iwanch aentsun egkemtua chichachu emamun Jesús jiikí awetak chichamtikau, nunikmatai aents aidauk anentai jegagchaju.
LUK 11:15 Tujash ujumak aents chichainak: Juka “Beelzebú, iwanch aidau apujiya nuna senchijin iwanch aidaunak jiyawai”, tuidau.
LUK 11:16 Nuna tuinai tikich aidau, pegkegchaunum dekapsagtatus, nayaimpinmaya wainchatain iwainakti tusag segaidau.
LUK 11:17 Tujash nigka dita anentaimainamun dekau asa: “Makichik nugkanmag batsatiatak pempeentuniki maaní batsatkujag megkaemain ainawai; nunisag makichik jeganmag batsatiatak maaní batsatushkam megkaemain ainawai.
LUK 11:18 Nunisag Iwanch nigki pempeentuniki shiwagmagakush ¿wajuk niina inamtaijiya dusha nunisagkesh amainaita? nunak atum, Beelzebú senchijin iwanch aidaunak jiyawai tujutjum dui tajime.
LUK 11:19 Atumek Beelzebú senchijin iwanch aidaunak jiyawai tujutjume; tujash nu aatus aish, ¿atumi jintintaijum aidaunash, ya senchinash suwawa, iwanch aidaun jiiktinme tusash? Nuadui atumi jintintaijum aina duke atumnak bakugmatnai.
LUK 11:20 Wi Apajuí senchijin iwanch aidaun jiyag nunak, atumiin Apajuí inamu asamtai jutikajai.
LUK 11:21 “Aents senchigtin niina jeen kuitamak akajun takus wajataik wajiiji nui awa duka ashí betek amainai.
LUK 11:22 Tujash tikich aents niiya nuní senchi minitak depetuk, akajun atanki jegá wayá ashí wajiinak yajutuk kumpají aidaun tinamainai.
LUK 11:23 “Aents wi takaag nujai shiig aneas juwachuk mina shiwagmatui, nunisag Apajuí chichame etsegbaunash yainchagtaik, kuashat aents uwemainun megkaegainawai.
LUK 11:24 “Wakan pegkegchau aentsnumia jiikí ajapamak, wegawai uwegshunum ni ayamainjin egaak; nunik wainkachag: Wi pujaun jiinkibiag nuwig wakitkitjai tusa anentaimas,
LUK 11:25 tajua diikmá, nunú aentsuk jega japimká shiig iwajamuama imanun wainak ukuak,
LUK 11:26 tikich wakan niina nagkaegas pegkegchau aidaun sieteya imaan yajuak nu aentsnum pujustatus egkemtawai. Dutikam aentsuk duik pegkegchau aajakbauwa nuna nagkaesau shiig pegkegchau wegawai”, tiu.
LUK 11:27 Eke Jesús nuna pachis chichá wajai, aents tuwakua nuiya nuwa senchi untsumak: —¡Shiig aneastinai nuwa amina jujepag muntsujin amuntstamauwa duka! tiuwai.
LUK 11:28 Tutai Jesús ayaak: —¡Dekas nuní nagkaemas shiig aneastinai Apajuí chichamen antukag umijuina nu! tiuwai.
LUK 11:29 Jesús aents aidau nuní kuashat tuwajam nagkama chichaak: “Ju aents aina juka pegkegchau asag aents dutikmainchau iwainakta tujutuinawai, tujash nunak dutikashtatjai, ayatak Jonás wajukauwa nujai betekak iwaintuktatjai.
LUK 11:30 Jonás namaknumia iwaku jiinki ninivenmaya aents aidaunum Apajuí chichamen etsegtai dekas Apajuí awemamuapita tiajua nunisag, Aentsmaga akiinauwa dushakam jaka nantakmatai wainkag, dekas Apajuí awemamuapita tujutiagtatui.
LUK 11:31 Aantsag surnumia reina aajakua dushakam Salomogkan tajiuwai, Apajuí yachamtikamun antujuk dekajuatatus. Nunú atumnak bakugmagtinai, atak suwimak atina duik, wi Salomogkan nagkaesaun dekaun imatika chichagmash antukchaju asagmin.
LUK 11:32 Nunisag ninivenmaya aents aidau atak suwimak atina duwi bakugmagtinai. Ditak Jonás Apajuí chichame ujakam, dekaskeapi tusag tudaujin idaiyinak Apajuin nemagkajua dui. Tujash jui atumjai pujawai Jonasa nagkaesau.
LUK 11:33 “Makichik aentskesh lámpara ekemakag yantamnum uuká nuniachkush kajunai dukukag apujchau ainawai, dutiktsuk yakí ekenin ainawai, wayatatus minidaush tsaaptinun wainkatnume tusag.
LUK 11:34 Atumi jiimek lámpara ekemakam tsaaptin emaama numamtuk atumi iyashminak awagmawai. Jiim pegkeg asamtai shiig wainmamainaitam imatiksam, ashí pegkeg aina duke anentaimtaik, anentaiminish tsaaptin ajutjamainai. Untsu jiim pegkegchauwaitkui wainmamainchauwaitam nunisjumek, ayatak pegkegchauk anentaimkugmek suwenum pujagme.
LUK 11:35 Nunin asamtai aminí tsaaptin awa nunú suwe wajatjamsai kuitamkata.
LUK 11:36 Ame ashí pegkegchau aidau idaisam pujakmek, lámpara kashi ekemakam tsaaptin emama numamtuk, atumi pujutjuminish wajagme”.
LUK 11:37 Jesús chichaká ashimai, makichik fariseo yujumkan ajamsatatus ipauwai. Tima Jesuschakam jegá wayá, mesanum jegantá ekeemsau.
LUK 11:38 Nunikmatai fariseo wainak anentai jegagchau, eke yujumak yutsuk tuke ikigmasjumké atajum timawa nuna umikchamtai.
LUK 11:39 Tujash Apu Jesús ayaak: —Atum fariseo aidautigmek, vaso nuigtú plato aina nuna awanke nijamaina numamtuk wajagme; tujash atumi anentaiminig kasamtaijum nuigtú pegkegchau takataijum aidaushkam piyak ajutjamainawai.
LUK 11:40 ¡Anentainkachu aidauwah! ¿Apajuí iyashin najanauwa duke iina anentainash najanachukait?
LUK 11:41 Nuadui atumek, atumin ajutjamaina duka ujunauch aidau susatajum, aaja nuniakjum ashí pegkeg atatjume.
LUK 11:42 “¡Wait anentajime fariseo aidautigminak!, atumek menta, ruda, nuigtú ashí ajak nugkauchik nejen aina nuiya diezmó wajagme. Tujash pegkeg takat aina nu nuigtú Apajuí anemainaitjum dushakam idaijume. Juuwai dekas dutikmaina nu, tikichia dushakam idaitsuk.
LUK 11:43 “¡Wait anentajime fariseo aidautigminak! Atumek jega ijuntainum aents eme anentsá ekeemsati tibaunum ekemsatasajum wakejin ainagme, plazanum igkuntuinakush eme anenjus kumpamjuatnume tusagmesh wakejin ainagme.
LUK 11:44 “¡Wait anentajime atumnak! Atumek aents ukusbau wainmainchau shiig yutuamua nunin ainagme, nunin asagmin aents nui awantak wekaekush dekatsuk wekaemaina numamtuk wajainawai”.
LUK 11:45 Tutai maestro chicham umiktinun jintinkagtin ayaak: —Maestroh, ame fariseo aidau tame duka jutiishkam tukagtakum tame, tau.
LUK 11:46 Tutai Jesús ayaak: —¡Wait anentajime atum maestro chicham umiktinun jintinkagtin aidautigminash! wagki atumek chicham umiktin kakajus umimainchauwa ibauk, tikich aidau ju umiktajum tajume atumkesh umiachiatkujum, nuniau asajum tikich kijin ayankajum machikish yaitsuk chichagmainaitjum numamtuk wajau asagmin.
LUK 11:47 “¡Wait anentajime atumnak, atumek profeta ukusbau aina nu jegamjin ainagme, atumi muunjum maawajua nu!
LUK 11:48 Nu nuniakjum iwainmamjume atumi muunjum dutikajakú aina nuninuk atumesh ainajum nu, wagki dekaskenmag dita maawajui, dutikamtai atum profeta ukusbauwa nu jegamjau asajum.
LUK 11:49 “Dui Apajuí ni yachajin atumin pachipas: ‘Awetittajime profeta aidaun nuigtú apóstol aidaunashkam, nunú aina nuiya mainakjum tikich aidauk aintú yujatin ainagme’ tiuwai.
LUK 11:50 Nuadui ju aents aina junak Apajuí suwimkan susatnai ashí profeta aidaun nugka najanamu aajakua nui nagkamas maawaju aina nuadui,
LUK 11:51 Abela maawajua nui nagkamas Zacariasa maawajua imanui, jega Apajuí ememattai ai altar awa nuna ejapen maawaju aina nu. Nuadui ju aents aina junak Apajuí suwimkan susatnai.
LUK 11:52 “¡Atum maestro chicham umiktinun jintinkagtin aidautigminak wait anentajime! Atumek aents llave takakiatak, tikich jegá wayata tutai waitin epetin aina numamtuk, aents Apajuí nemagkag uwemjata tuinaig, atum chicham umiktina duka dekayatkujum, wajina tawa nunú dekachu asajum shiig jintintsugme, nuniau asajum atumkesh uwemainnum pujatsjume”.
LUK 11:53 Tusa Jesús nuiya jiinkimtai, maestro chicham umiktinun jintinkagtin aidau fariseo aidaujai senchi kajekú asag, kuashat awá awagki iniinak waitkaidau,
LUK 11:54 wajintuk chichakat timatai tsanumjuja maami tusag.
LUK 12:1 Nuniai kuashat mil aents aidau tuwakaju asag, pempeentuniki najanidau. Imaniagtai Jesús dekatkauk jintintaiji aidaun chichajak: —Fariseo aidau levaduraji aina nujai kuitamamkatajum, ditá tsanumtaiji aina nujai.
LUK 12:2 “Wagki uukbau wantintsuk juwaktinuk makichkish atsawai, antsag dekaachbau dekantsuk juwaktinchakam makichkish atsawai.
LUK 12:3 Nuniau asamtai ashí atum tikich antachbaunum chichakbauwa duka, paan antuekatnai; atum kanutaigmin epeni pujusjum chichakbaunashkam ashí antukagtinai”, tiuwai.
LUK 12:4 Atum mina kumpag aidautigminash tajime: Iyashmin mainakuish ishamkaigpajum, nuna dutikainakush nuigtuk dutikmainchau ainawai.
LUK 12:5 Tujash wi jintintuatjime ya ishamainaitjume nuna: Apajuí ishamkatajum suwimkan sujamak waitut tuke atina nui egkepawagmatai waitmainaitjum nunú.
LUK 12:6 ¿Jimag kuichkiuch kayauch piipich juwakjum cinco pishak sujuchuk agmujum? Tujash nunú aina nunak Apajuik makichkish kajimatkig idaitsui.
LUK 12:7 Antsag atumnash Apajuik atumi intashim wajupa awa nunash shiig dekawai, nunin asamtai atumek ishamkaigpajum. Atumek pishak aina nuna nagkaesau ainagme.
LUK 12:8 Makichik aentskesh Cristunuitjai tusa aents aidau eemtin etsegtugkaju aidaunak, dutiksag Aentsmaga akiinauwa dushakam Apajuí angelji aidau eemtin mina nemagtin ainawai titinai;
LUK 12:9 “tujash aents aidau eemtin mina pachitus dekachujai tujutiu aidauk, Apajuí angelji aidau eemtin ditanak wainchaujai tama agtinai.
LUK 12:10 “Ashí aents aidau Aentsmaga akiinauwa nuna pegkegchau chichagkau akush tsagkujam agtinai; tujash Wakaní Pegkejin pegkegchau chichagkau aidauk tsagkugnagchagtinai.
LUK 12:11 “Atum mina nemagtin aidautigminak jega ijuntainum gobernante nuigtú apu inamin aidau eemtin ejetamawagmataish, wajuk aimkatjaki nuniachkugmesh wajintuk titaja tusagmek uyumaktin aigpa;
LUK 12:12 wagki Wakaní Pegkeji dekamtijamattawai wajintu titatjume nunak”.
LUK 12:13 Aents tuwakú aina nuiya makichik chichaak: —Maestroh, iina apají jaak wají ukugtamkimua nu, ame mina yatsug, yatsumjai akantuniktajum tujutta, tau.
LUK 12:14 Tutai Jesús ayaak: —Kumpajuh, ¿ya minash ame juez atá nuniachkumesh aents wají sujitdayinakui akantukam suu atá tusash adaitukmae? tau.
LUK 12:15 Nuna tii idaiyak: —Kuitamamkatajum, utugsag shiig kuashat wají ajutia tusagmek anentaimtú pujuigpa; wagki aentsú pujutjiya duka, shiig kuashat wají aja nui atsui, tiuwai.
LUK 12:16 Nuna tusa augmatbaun pachis: “Makichik wiyakcha nugkeen, shiig kuashat ajak juumain uminjauwai.
LUK 12:17 Imanikmatai nigki anentaimas: ‘¿Utugkatjaki juuká ijumain atsugta duish?’ tau.
LUK 12:18 Nunik anentaimag: ‘Dekas juna jutikatjai, ajak juuká ijumtai aina junak tegagtajai dutikan aan muuntan jegamjatjai, nuwi ashí ajak juukbau aidaun ijumkun nuigtú mina wajig aidaunashkam nuwig ijumjatjai;
LUK 12:19 nunikan umikan: Kuashat mijanai yumain wají aidaunash nuwig ijumjan, nuanui jegá pujusan ayamkun shiig yuwakun, umutainash umakun shiig aneasan pujustajai’, tiuwai.
LUK 12:20 Tujash Apajuí chichajak: ‘¡Anentainkachuh! Yamai kashia juik jakattame; tuja ame wají imatikam ijumjaum dusha, ¿yanau atatua?’ tiuwai.
LUK 12:21 Aatus nuniawai nigki wiyakchameatatus wakega duka, tujash Apajuí eemtin pegkejan takaachkug”, tiuwai.
LUK 12:22 Jesús nuna tusa idaiyak jintintaiji aidaun chichajak: “Nuadui tajime. Atumek wajinak yuwatja, wajinak nugkugtaja tusagmek uyumá pujuigpajum.
LUK 12:23 Dekas pujuta nuuwai yutai nagkaesauk, tuja iyashia nuuwai jaanchin nagkaesauwa duka.
LUK 12:24 Cuervo aidau anentaimsa diistajum, ditak ajakmag juuchu ainawai, ajak juuká ijumtaijish jegash atsujuinawai; nuniaig Apajuí ayujui. ¿Atum dekas cuervo aidau nagkaesau akik ainatsjumek?
LUK 12:25 ¿Atum ainajum anuiyatigmesh wajupatigmea esajam achainjash tusajum anentaimtú pujakjumesh esaumainaitjume?
LUK 12:26 Nu nuninchikesh dutikmainchau ainayatkugmesh, ¿wagka tikich wají aidaush imanikjumesh uyumagme?
LUK 12:27 “Yagkug aina nu anentaimsa diistajum wajuk tsakainawa, ditak takainatsui, ujuchnash kutamainatsui; tujash atumin tajime, Salomón ashí imanun iwagmamá wajakuitkush yagkujá niimega ibaunak nugkujakchauwai.
LUK 12:28 Dupa ikamia aidau kashin apeam atinnakesh Apajuí imatikas iwaja ibaush, ¿wagkag aan nagkaemas atumnash dutijamachagti aents imatikas dekaskeapi tuchau aidauwah?
LUK 12:29 Nuadui atumek yuwatin, uwagtin aina nu uyumaka anentaimkujum waitú pujuigpajum.
LUK 12:30 Wagki ashí ju wají aina junak aents Apajuí anentaimtuchu aidau, puyatjus yujajin ainawai, tujash atum nunú wají atsumajum nunak atumin Apa nu dekawai.
LUK 12:31 Nuadui atumek, Apajuí inama nu egaktajum, nuniakjum nunú aina duka aan kuashat ajutjamtatjume.
LUK 12:32 “Ishamkaigpajum, ujumak mina jintintaig ainajum nuutigmek, wagki atumnak Apa Apajuiya nu mina inamtaijui pujustinme tusa wakejutpagme.
LUK 12:33 Sujuktajum atumi wajiijum aidauk dutikajum ujunauch aidau yaigtajum. Atum dutiktai Apajuí nayaimpinum wiyakchameaut tuke atinun, kasash waimainchau, mamukush wajiin emesmainchauwa nuanui ukugtamsattajume;
LUK 12:34 nunú wiyakchameatin ajutjamaina nuanuig anentaimsajum pujustajum.
LUK 12:35 “Shiig umintsajum lámpara ekemakjum dakamsatajum;
LUK 12:36 nuniakjum inak aidau apuji nuwenbaunum wematai, wakitki taa untsumkui wamak ujattajai tusa daká pujuwa numamtuk wajatajum.
LUK 12:37 Shiig aneasagtinai nunú inak aidauk apuji wakitki takamá iwá batsatu igkuam atina duka; dekas tajime, nunak yapagmitka mesanum pekas ni yutain ajamsatnai.
LUK 12:38 Shiig aneasagtinai ditak, aehaet wajasú aish nuniachkush tsawamunmakesh apuji minak uminas batsatu wainam agtina duka.
LUK 12:39 Tujash ju dekatajum, jeenna nunú wají horatinia kasa taattawa nuna dekakug iwá pujumainai, nuniakug jeenig utua kasagmak amaitsui.
LUK 12:40 Nunisjumek atumshakam umintsá pujumainaitjume, wagki Aentsmaga akiinauwa duka, nu horatiniap minittawa tusa anentaimtachbaunum minitnai”, tiuwai.
LUK 12:41 Nuna timatai Pedro iniak: —Apuh, ¿nu augmatbau tame dusha jutiikek tukagtam atsa ashí tikich aidaush takumek tame? tau.
LUK 12:42 Tutai Apu Jesús ayaak: “¿Yaita inak betek umin nuigtú shiig anentaimkau asamtai, apuji niina inake aidaun diistí nuniak yutain diyakuk susati tusa idaitam amaina dusha?
LUK 12:43 Shiig aneastinai inak, ni apuji wakitki takamá, ni tibaujinak betek umiak pujaun wainam atina duka.
LUK 12:44 Dekas tajime, ashí wajiijinak niina diigtusti tusa idaitustinai.
LUK 12:45 Tujash nunú inak anentaimas: ‘Mina apujuk wamak taashtatui’, tusa tikich inak aidaun nuigtú inak nuwa aidaunashkam suwimak, nigka yuwak nuigtú umak, nampetnash nampee wajá pujai,
LUK 12:46 nunú inaka nuna apuji tsawan dekachbau, horash dekachbau ai taa suwimkan susa, tikich aents betek umichu aina nujai waittsati tusa idaimainai.
LUK 12:47 “Nunú inak apuji wakegamun shiig dekayatak, umitsuk takatnash takatsuk puja nunú imá senchi suwimkan jukitnai.
LUK 12:48 Untsu suwimak jumainun dekachu asa dutikauwa duka, ujumak suwimak suwam atinai; wagki ya kuashat susamuita, duka kuashat segam atinai; ya kuashat kajintsá idaitusbau ainawa, duka nuní inagkeasa segam atinai.
LUK 12:49 “Wika ju nugka juwig tauwaitjai mantuawagmatai ataktú nantaki ai mina nemagtuidau Wakaní Pegkejin jukitnume nunitai tikich mina dakitjuina nunak Apajuí suwimkan susatnume tusan, nuniau asan utugsag wamak uminka tajai.
LUK 12:50 Senchi waittsan inagkeaktatjai, nuadui ¡nunú uminkati tabaunum kuashat anentaimkun waitiajai!
LUK 12:51 ¿Atumek agkan pujustinme tusas ju nugka juwig tauwaitai tajumek? Nuninchauwaitjai, wika atum mina nemagtin aidautigmin tikich dakitjamainak kajegtamá batsamtin asamtai tauwaitjai.
LUK 12:52 Wagki yamai nagkamas makichik jeganum cinco aents batsata nuiya, kampatuma nu jimaja nuna shiwagmattawai; nuniai jimaja nu kampatuma nuna shiwagmattawai.
LUK 12:53 Apajishkam uchijijai shiwagmagagtinai, uchishkam apajin shiwagmatnai, dukujish nawanjijai nunisag nawanjish dukujijai, uchijí nuweshkam tsatsajijai, tsatsajishkam uchijí nuwen shiwagmatnai”, tiuwai.
LUK 12:54 Tusa Jesús aents aidaun chichajak: “Yujagkim etsá akaetaiya nuiya jiinu wainmawaik, yumi yutugtatui tajume, tibauk imanisag yutawai.
LUK 12:55 Dase tsumunmaya dasenkamtaig atumek: Seeki atatui tajume, duka imanisag uminui.
LUK 12:56 ¡Tsanumin aidauwah! atum nugkanmayash, nayaimpinmayash niimé diisjum, tsawan wajuku atatua nunú dekau ainayatkugmesh, wi takaamush wainu nuniayatkugmesh, ¿wagka Apajuinunap iwainawa tusagmesh dekamainchaush dekapeagme?
LUK 12:57 “¿Wagka atum pegkeg takamainaitjum duke egatmamtsugme?
LUK 12:58 Amina shiwajumjai apu chichaman epegnunum weakmek, jintaag kakantsam iwajata. Nunikchaminig jueznum ejetamamtai, juez aentsji inajam cárcel egkepawai.
LUK 12:59 Duwi tajame, nui egkepamtaig jiinkishtatme, diwijum ashí akikmakam jiinmainaitme”, tiuwai.
LUK 13:1 Nunú tsawantaik, ujumak aents Jesusan jegajuawag, wajuk Pilato ujumak galileanmaya aidaun kajegké Apajuí emematuinak uwijan maawag apeenak batsamtatman, nuna pachisag ujaidau.
LUK 13:2 Tiagtai Jesús ditan ayaak: “¿Atum anentaimsagmek nunú galileanmaya aidaun dutikawaja duka, galileanmaya aina nuig dita imá senchi tudau asag aikam ainawai tajumek?
LUK 13:3 Atsa, duka nuninchauwai. Atumshakam tudau takat idaisajum pujutjum yapajiachkugmek ashí betek antsagmek jinatin ainagme.
LUK 13:4 Torre iyak Siloenum batsatun dieciocho aentsun kajegkua dusha, ¿Jerusalén batsamajakajua nuna nagkaesau tudau asajampap suwimkan juwak jinauwaita tajumek?
LUK 13:5 Atsa, duka nuninchauwai. Atumshakam tudau takat idaikujum pujutjum yapajiachkugmek ashí betek antsagmek jinatin ainagme”.
LUK 13:6 Junashkam Jesús augmatak: “Makichik aents uva ajanum makichik higuera ajaamu ajujakui, nuna nejeatsuash tusa diistatus wejiuwai, tujash nejeg makichkish atsuju.
LUK 13:7 Nunitai ni inake ajan kuitamak pujuttaman: ‘Jujú higueran kampatum mijadai tajuan diyajai nejeatsuash tusan, tujash nejeatsui ajakam ajapata. ¿Wagkag atsumnachiatkush nugká akijuash wajastí?’, tiu.
LUK 13:8 Ajakjintin tutai inak ayaak: ‘Apuh, dekas makichik mijan dakasmi nejeashtimpash, wi wajauti tentean pukujan, tikich nugka dekas pegkeg aina nuna yajutkan ijutjatjai;
LUK 13:9 dutikamash nejekchatpash, untsu tikich mijantinish nejeachkui ajakta’ ”, tiuwai.
LUK 13:10 Jesús jega ijuntainum tsawan ayamtai ai jintinkagtau;
LUK 13:11 nuniai nui makichik nuwa dieciocho mijadai jaa pujú, wakan pegkegchau egkemtuamu asa machikish dakuentsuk, punus wekayin eketu.
LUK 13:12 Nuna Jesús wainak untsuká chichajak: —Nuwah, yamaik jaam duka tsagame.
LUK 13:13 Takug nuwan achikú; dutikamuik nuwashkam dakuenkau, nunik Apajuin emematu.
LUK 13:14 Tujash jega ijuntaiya nuna apuji kajekú, wagki Jesús tsawan ayamtai aig etsagaju asamtai, nunik aents aidaun chichajak: —Seis tsawan awai takat takamainuk, nunú tsawan aina dui kaunatajum etsaentugti takugmek, tsawan ayamtai aig antsuk, tau.
LUK 13:15 Tutai Apu Jesús ayaak: —¡Tsanumin aidauwah! ¿Makí makichik atum aidautijum tsawan ayamtai aig baka nuniachkugmesh burro ayugtaijin batsatu atiajum namaká ejegajum yumi amuchuk agmaujum?
LUK 13:16 Jujú nuwa Abraham wegantu dieciocho mijadai Iwanch waitkam pujaunash, ¿wagkanuk etsagagchatja tsawan ayamtai aigkish?
LUK 13:17 Jesús nuna aatus timatai, niina shiwaji aidauk datsajajui; tujash ashí aents aidauk shiig aneedau, kuashat anentai jegamainchaun Jesús dutikau asamtai.
LUK 13:18 Junashkam Jesús chichaak: “¿Apajuí inabaujiya dusha wají pachisaiya nuninai tumainaita nuniachkuish wají augmattsaiya tumainaita?
LUK 13:19 Apajuí inama duka mostaza jigkayin makichik aents ajajin ajauwa nuninai; dutikamu tsapai tsakajá muun wajasmatai, yakiya pishak aidau nuna kanawen pasugmakajui”, tiuwai.
LUK 13:20 Nuigtushkam chichaak: ¿Apajuí inama nunash wajijai apatkanua tumainaitja?
LUK 13:21 Duka makichik nuwa harinan kampatuma imania dekaapa namukbaunum levaduran pachimjauwai, dutikam ashí harina namukbauwa nuna wampushmitkajui, tiuwai.
LUK 13:22 Jerusalén jegatatus weak, Jesús yaakat aidaunum nuigtú yaakat yaig aidaunmashkam jintí jintinkagtakua wegau.
LUK 13:23 Nuniai makichik iniimak: —Apuh, ¿uwemkagtin aidaush wajumkek aina? tau. Tama ni ayaak:
LUK 13:24 —Waiti menakua nuní wayatasajum kakanmamsatajum; wagki tajime, kuashat wayatatus kakanmabiagtinai nuniakush ashí betek wayachagtinai.
LUK 13:25 Jeenna nu wajakí waiti epenmataig, atum agaa waitinum ijuntsajum untsumkujum: “Apuh, Apuh waiti ujatjita, tajumin, ni aigmak: Wika atumnak wainchau ainajime, tuwiyants ainajum tujabiagtinai”
LUK 13:26 Takui atum ayaakjum: “Apuh, jutii amijai yuwaku, umutash umin aayagjama, jutii plazajinish jintinkagtin aayumjama, tiagtin ainagme”.
LUK 13:27 Tajumin ataktú ni aigmak: “Wika atumnak wainchau ainajime, tuwiyants ainajum wetajum ashí pegkegchau takau aidauwah”, tujabiagtinai.
LUK 13:28 Nunú atinai atum agaa utsagkam batsamsajum buutbau nuigtú dai takegtamu, Apajuí inamtaijin Abraham, Isaac, Jacob nuigtú ashí profeta aajakua nu ijunu wainkajum.
LUK 13:29 Wagki etsá minitaijinia, etsá akaetaijinia, nortenmaya, surnumia aidau kaunkag, Apajuí inamtaijin mesanum pekaamsagtinai yuawagtatus.
LUK 13:30 Nuniamunum aents dekatkau atatus wakegaina nu ukunum juwakagtinai. Untsu iman atan anentaimtumachu aina nu dekatkauk agtinai.
LUK 13:31 Nunú tsawanta duik ujumak fariseo aidau Jesusan tajuawag: Juig jiinkita, nunikam tikich nugkanum wetá, wagki Herodes mantamatatus wakejutpawai, tuidau.
LUK 13:32 Tama ni ayaak: —Wetajum, nunikjum nunú apu pegkegchau takatan shiig anentaimtug takauwa nu jegagjum ujaktajum: Wika yamai, kashinchakam iwanchnak jiittajai, aents jau aidaunash etsagaittajai, nunikan kampatum tsawanta jui ashimkattajai wi dutikmaina nunak.
LUK 13:33 Wi yamai wegag junisnuk wetatjai, kashinchakam, nui tsawaknush, wagki makichik profetak Jerusalén pujachukek maamak amaitsui.
LUK 13:34 “¡Jerusalén, Jerusalén amek profeta aidaush mainaitme, dutiksamek aminí awemamu aidau mininakuish kayai tukui tukuinakuam mainaitme! Kuashtá wakekamjai uchijum aidaun, atash uchijí aidaun nanapen ijumama numamtuk awajkatasan, tujash amek dakitjamume.
LUK 13:35 Nuadui atumdau jega Apajuí ememattaiya duka ukumkimu atatui; dui tajime ataktuk awenagmek waitkashtatjume tajim nunak, nuniautijum tsawan jegamtai: ¡Apú daajin mina duka pegkejai! tujuttinaitjum dui waitkatin asajum”.
LUK 14:1 Tsawan ayamtai ai Jesús fariseo aidau apuji jeen yujumka yuwatatus weuwai, nunitai tikich fariseo aidauk wajukatig tusag diidau.
LUK 14:2 Nunik waikmá Jesús wainkau aents iyashin iyag tepettaman.
LUK 14:3 Nunitai Jesús escriba aidaun, fariseo aidaujai iniak: —¿Tsawan ayamtai aish aents jaush etsagaumainkaih, atsa etsagaumainchaukaih? tau.
LUK 14:4 Tujash ditak aimainachu. Nuniagtai Jesús kuntunum achiká etsagaju, dutika awemauwai.
LUK 14:5 Nudiagtai ditan chichajak: —¿Yaa atum ainajum anuiyash uchijigkesh nuniachkush torojigkesh waanum egkemamtaish, tsawan ayamtaiyai tusash wamak jiiskesh idaimainaita?
LUK 14:6 Tamashkam ditak aimainchau dekapedau.
LUK 14:7 Nuwenbaunum ipaamu aidau aents eme anentsá ekentsatin aidaun etegkawag pekabiagtai, juna augmatu:
LUK 14:8 —Makichik aentskesh nuwenbaunum ipapamtaish, aents eme anentsá ekentsatin aidaunmag ekeemsaipa, wagki amina nagkaetamsau tikich eme anentsá ipaamush amainai;
LUK 14:9 nuniau asa amina ipapauwa nu tajuntugman: “Wajaktá, ju aents ekeemsati”, tujamkui, datsá datsanjai wajakim ukunum ekeemtai aunum ekeemsaim.
LUK 14:10 Duka nunitsuk, ipapawagmataish ukunum ekeemsata, nuniamin ni ipapauwa nu minak: “Kumpajuh, eemkam ekeemtai pegkeja awi ekeemsata”, tujamti. Aatus dutijamamtai ashí ipaamu aina nuna eemtinish eme anentam atatme.
LUK 14:11 Wagki nigki eme anenmama duka, imanchau diyam atinai, untsu imanchau diyamua nu eme anentam atinai.
LUK 14:12 Nuigtushkam aents niina ipauwa nuna chichajak: —Yuwatin umiakjumesh nuniachkugmesh aagkú yuwatin dutikakjumesh, kumpajum aidau, yatsum aidau, pataim aidau, amijai ijutkamu wiyakuch pujaukesh ipaawaipa; nu dutikamak, ditashkam dutiksag ipapainakui, akikbauwa nunin juwaktatme.
LUK 14:13 Duka nunitsuk, yuwatin pegkeg umiakmek untsuktá ujunauch aidau, takamainchau aidau, shutú aidau, wainmachu aidaushkam;
LUK 14:14 nuniakmek shiig aneastinaitme, wagki ditak akigmamainchau asagmatai, tujash aents pegkejan takasú aidau nantajagtina dui akiam atinaitme.
LUK 14:15 Nu tabaun antuk, Jesusjai mesanum pekaja nuiya makichik chichaak: —Shiijap aneastin ainawa Apajuí inamtaijin yutai shiig umikbaun yuawagtin aina duka, tau.
LUK 14:16 Tutai Jesús ayaak: —Makichik aents yutain shiig umikui aagkú yuwatnun, dutika kuashat ipamauwai.
LUK 14:17 Dutika aagkú yuamu hora jegamtai, inaken awemauwai ipaamu aidaun ujaktí tusa, dutikak: Kaunatnume, yuwatnuk ashí uminkae, tita tusa.
LUK 14:18 Tujash ashí makí makichik tsakugtugti tutan nagkamawaju. Dekatkau ipaamua nu chichaak: “Yamá nugká sumakjai, nuna diyakun wetatjai, wait aneas tsagkugtugti”, tau.
LUK 14:19 Nuniai tikich chichau: “Cinco toron yachigkan sumakjai, nuna dekapsatasan weajai, wait aneas tsagkugtugti”, tiu.
LUK 14:20 Tikitchakam aikasag: “Yamá nuwenajai, nuniau asan minishtatjai”, tau.
LUK 14:21 Tiagmatai inak wakitki apujin ashí ujakui. Dutikam jeennushkam kajeká inaken chichajak: “Wamak plaza aina nui wetá nuigtú yaaktanum jinta aina nuishkam, nunikam ujunauch aidau, takamainchau aidau, shutú aidau, wainmachu aidaushkam jui ikaunmakta”, tiuwai.
LUK 14:22 Tima inakshakam wee, aents nunin aidaunak yajuak ikaunma apujin wejí: “Apuh, ame tujutmaum nunak imatiksanuk umikjai, tujash nuigtú ekeemainuk awai”, tau.
LUK 14:23 Tama apu inaken chichajak: “Wetá jinta aina nui nuigtú yaakat pegmagbau agaaji aina nuishkam, nunikam tikich aidau wainkam kakantsam jukim ikaunmata, mina jegajui ekeemtai agkan awa nu ashí piyakti.
LUK 14:24 Wagki wi nagkamchakun ipaamu agma duka, aagkú yuwatnun shiig umikag nunak yuwachagtatui”, tiuwai.
LUK 14:25 Kuashat aents Jesusjai weedaun, ayampatua chichajak:
LUK 14:26 “Makichik aentskesh mina nemagtayatak, apajin, dukujin, nuween, uchijí aidaun, yachi aidaun, umayí aidaun, niina pujutinakesh imá senchi aneauk, mina jintintaijuk amaitsui.
LUK 14:27 Nunisag mina nemagtuk waittan dakitaushkam, mina jintintaijuk amaitsui.
LUK 14:28 Atum ainajum anuiya, torre jegamkatatus wakegakug, ¿dekatkauk wajupa akikaik jegamainaita kuichkish kuashtash ajuta ju ashimainush tusa ekeemas anentaimainchaukait?
LUK 14:29 Nuniachkug jegamkatatus ajiajuitak ashimkashmataig, ashí nuna wainaidauk dushikmain ainawai;
LUK 14:30 nuninak: ‘Junak makichik aents jegamkatatus nagkamabi, nunikiatak ashimkachmayi’, tumain ainawai.
LUK 14:31 Nuniachkush makichik rey tikich reyjai maaniata takug, ¿dekatkauk ekeemas anentaimainchaukait, diez mil suntag ajuta jujaish dita veinte mil minitjuina nujaish maanimainashitag tusa?
LUK 14:32 Nunik maanimainchau dekapeakug, eke nagkamtsuk rey atushat pujaig, dekas epegkami, tusa chichaman akupjumainai.
LUK 14:33 Nunisag, atum ainajum anuiyatijum makichkitigmekesh ashí atumdau aina nu idaichakjumek, mina jintintaijuk amaitsugme.
LUK 14:34 “Week pegkejai, tujash jea jeatuji megkaekamtaish, ¿utugsaya ataktush jea jeatush emamainaita?
LUK 14:35 Wee nunikmataig nugkanum takamainkesh, abono najanmainnumkesh atsumaitsui, ayatak agaa ukajá ajapmainai. Nuna antutaiji ajamuk, antuktinme”, tiuwai.
LUK 15:1 Jesusan antugkagtatus kuashat aents apú kuichkiji atinun ijumin aidau, tikich aents tudaugtin aidaujai ijuntuidau.
LUK 15:2 Imatikiagtai fariseo aidau, escriba aidaujai Jesusan pachisag: —Au aentsuk tudau aidaun yajuak ditajai ijunag yu wekaenuwe, tusag ashishmatuidau.
LUK 15:3 Nu tama ju augmatbaun pachis augmatak:
LUK 15:4 Atum ainajum anuiya, cien uwig aja nuiya makichik megkaetukam, noventa y nueve juwaka nunak uwejush batsaak, ¿megkaekauwa nuna igkugtatus egaak jiintumainchaukaih?
LUK 15:5 Nunik wainkag, shiig anentus yanakí juawai;
LUK 15:6 nunik wakitki jeen jegaa, kumpají aidaun nuigtú niijai ijutkau batsatun chichajak: “Uwig megkaetugkaunak yamaik igkugjai, nuniku asamtai atumesh wijai shiig aneastajum”, tumainai.
LUK 15:7 Nunin asamtai tajime, nayaimpinmash juní nagkaemas shiig aneamu awai makichik aents tudau takatan idaiyak pujutjin yapajintaig, noventa y nueve pegkeg aidau sujumankatatus atsumainatsu nuna nagkaesau.
LUK 15:8 ¿Nunisag nuwa diez dracma ajamu makichik emegkak, lámpara ekemak, jegá japimak shiig kuitamas egaak igkumainchaukaih?
LUK 15:9 Nunik wainak, kumpají aidaun nuigtú niijai ijutkau batsatun ijumag: “Dracma emegkakmayag nunak igkugjai, nuniku asamtai atumesh wijai shiig aneastajum, tumainai.
LUK 15:10 Nunin asamtai tajime, Apajuí angelji aidauk shiig aneenawai, makichik aents tudau takatan idaiyak pujutjin yapajitaik”.
LUK 15:11 Junashkam Jesús augmatak: “Makichik aents ajujakui jimag uchijí;
LUK 15:12 tuja uchi ekeuwa nu apajin chichajak: ‘Apawah, wají aidau midau amaina duka yamaik sujustá’, tusa segauwai. Tutai apajishkam wají aidaunak mai akantuk susauwai.
LUK 15:13 Dutikam dukap tsawan atsuk, uchi ekeuwa duka ashí ni wajiijinak ijumag juki apajinak ukuak, tikich nugkanum atushat weuwai. Nunik nui pujus pegkegchaunum wekaegak, wajiiji aidaunak wainak ashimkauwai.
LUK 15:14 Nunik ashí ashimak pujai, nunú nugkanum shiig senchi yapajut tepeauwai, nunikmatai niishkam shiig atsumamunum jegantui.
LUK 15:15 Nuniak wee nuiya aentsun jegantun takatan inimtai, ajajin awemauwai kuchin kuitamjutkati tusa.
LUK 15:16 Dutikam kuchi yuinamun yumain dekapeau, tujash makichik aentskesh yutainak suwinachu.
LUK 15:17 Dutikam anentaimag: ¡Mina apajú takajin aidauk shiig kuashat yutaiji ajuinaimpap wi jui pujusan nujantai jakattaja!
LUK 15:18 Dekas mina Apajuí wakitkitjai, nunikan jegaan: Apawah, wika Apajuinash tuja aminash shiig pegkegchau takagsajame,
LUK 15:19 nuniku asan wika amina uchijum tamak amaitsujai, minak amina takagtamin aina nuninuk etita titajai, tiuwai.
LUK 15:20 Tusa jiinki apají pujamunum weuwai. Nunik iká minittamanak uchijin wainak, apají wait anenjauwai, nunik tupikatki igkug, kajut pagkuk kugkuasui.
LUK 15:21 Dutikam uchijí chichaak: ‘Apawah, wika Apajuinash tuja aminash shiig pegkegchau takagsajame, nuniku asan wika amina uchijum tamak amaitsujai’, tiuwai.
LUK 15:22 Tujash apajig inake aina nuna chichajak: ‘Wamak jaanch dekas pegkeg agma iman jiikjum anugtujatajum, dutikakjum tsajam uwejinish anillo patakuajum, sapatchakam wegagtuktajum.
LUK 15:23 Dutikajum toro tsakat duwejam itajum maatajum, yutai shiig umiká yuwinaku fiestamawagmi;
LUK 15:24 wagki juka mina uchijuk jakau aajakui, tujash yamaik iwaaku wakitki tae; megkaekau aajakui, tujash yamaik wainkaji’. Tusa timatai fiestamtan nagkamawajui uchijí tajuam shiig aneak.
LUK 15:25 “Nuniai, uchijí eemkau ajanum pujau, wakitki jegá taattak minikmá, nantsemainak música ishinainamun antuku;
LUK 15:26 nunik inaken untsuká: ¿Wagka imatuinawa? tusa iniau.
LUK 15:27 Tama ni ayaak: —Amina yatsum taamtai apa, toro tsakatan dekas duwegman mae, uchijí jatsuk iwaaku tau asamtai, tau.
LUK 15:28 Tama kajeká, jegaa waitnak dakitau, nunitai apají jiintuki, wayata tusa imatjau.
LUK 15:29 Tama apajin ayaak: ‘Apawah, wajupa mijadaiya ame dutikata tabaunak makichkish intimjutsuk yayatsjame, nuniaigkish makichik cabra tsakatchikesh kumpají aidaujai fiestamati tusamek sujuchume.
LUK 15:30 Tujash ju amina uchijum, ashí wajiijum aidaunak nuwa akiká takatai aidaujai wekagak ashimak taamtai, eme anentsam toro tsakat dekas duwejam mantuam ayugkum fiestamjame’, tau.
LUK 15:31 “Tama apají ayaak: ‘Uchijuh, amek wijai ijunjam tuke pujuwaitme, ashí wají midau aina duka aminu ainawai.
LUK 15:32 Tujash juka fiestamainaitji shiig aneaku, wagki juka yatsumek jakau aajakui, tujash yamaik iwaaku wakitki tae, megkaekau aajakui, tujash yamaik wainkaji’ ”, tiuwai.
LUK 16:1 Junashkam Jesús jintintaiji aidaun ujaak: “Aajakui makichik aents wiyakuch, nu ajujakui makichik inak wajiiji aidaun kuitamjin; nuna apujin ujatkajui, wajiigminak wainak takagtamui”, tusag.
LUK 16:2 Tiagtai untsuká chichajak: ¿Wajuk asamtaiya nunash tujamainawa? Ame takasbaujum iwaintugkata, wagki yamaik mina wajig kuitamnuk achattame, tau.
LUK 16:3 Tama wají kuitamin anentaimas: “¿Mina apug takatnum jiija duish, wajinak dutikatja? Nugkanash kakaajan taumaitsujai, wainkauch sujustajum tusa segamtanash datsamajai.
LUK 16:4 Untsu juna jutikatjai apu ni takatjin jiigtaish, aents ditá jeen jujumain aina nuna”, tau.
LUK 16:5 Tusa ni apujin diwimaidaun makí makichik untsuká, dekatkauwa nuna iniak: ¿Wajupa mina apujush diwime? tau.
LUK 16:6 Tama ayaak: “Wika aceite cien barril diwimjai”, tau. Tutai: “Ju papí jukim ekeemsam wamkesam agagta cincuenta diwimjai tusam”, tiuwai.
LUK 16:7 Nunik tikichin iniak: “¿Amesh wajupa diwime?” Tama ni ayaak: “Wika trigo cien saco diwimjai”, tau. Tutai ni ayaak: “Ameshkam ju papí jukim ekeemsam wamak agagta ayatak ochenta diwimjai tusam”, tiuwai.
LUK 16:8 Nunú inak wají kuitamin pegkegchauwa nu, shiig anentaimag dutikamujin waituk, apujig shiig anentsauwai. Nuna tusa Jesús, Apajuí nemagchau aina duka pegkegchau takatnumag, Apajuí nemajin aidaun nagkaegas imatika anentaimainawai.
LUK 16:9 “Nuadui tajime: Dekas kuichik pegkegchau takasa jukimua duka tikich yayakjum kumpajum ikaugkatajum, nu dutikagmin atumdau abuetugmakmataish, Apajuí ni pujutaiji tuke auwa nui jujamkitin asamtai.
LUK 16:10 “Aents wají piipichinakesh kuitamas takauwa duka, wají muunnumash nunisag amainai; untsu wají piipichinakesh kuitamas takachuk, wají muunnumshakam nunisag amainai.
LUK 16:11 Aents ju nugka jui pujus, kuichik kuashat ajamaitak pegkejan takaachunash, ¿Yaa dekas tuke atina nunash sumainaita?
LUK 16:12 Tikichdaukesh kuitamsa takaschaum nunash, ¿yaki amastí atumdau atí tibaunash?
LUK 16:13 “Makichik inakak jimag apunak takagmaitsui; wagki makichkia nuna dakitak, tikichia nuna anemainai; nuniachkush makichkia nuna umijak, tikichia nunak umigmaitsui. Atumek Apajuí takag, wiyakchameatasa takaa wajamaitsugme”.
LUK 16:14 Ashí ju wají aina nu tabaun fariseo kuichkinak anentaimtin aina nu antukag, dushikis chichajuidau.
LUK 16:15 Nudiagtai Jesús ayaak: “Atumek aentsú eemtinig pegkejan takauwa iman jumamjume, tujash Apajuí atumi anentaimnak dekagtamjume; wagki aents eme anentam aina nunak, Apajuik dakitawai.
LUK 16:16 “Chicham umiktin nuigtú profeta tibau aina duka Juan tauwa nui nagkanui; nui nagkamas yamajam chicham Apajuí inabau pachisa etsegnawai, nuwi wayawagtatus ashí kakanmamainawai.
LUK 16:17 “Nugka, nayaim aina nu megkagainatsaigkik, chicham umiktinnum Moisés agagbau piipich aina dukesh umintsukek juwakchatnai.
LUK 16:18 “Makichik aishmag nuwen idaiyas tikichjai nuwenkug, ekagmawai; tuja nuwa idaisamujai nuwenushkam, nunisag ekagmawai.
LUK 16:19 “Aajakui makichik aents wiyakuch, apu iwagmamtai dekas jaanch shiig pegkejan iwagmamag pujus, kashí kashinig yutain shiig umiká fiestamá pujau.
LUK 16:20 Nuniai, makichik ujunauch Lázaro daagtin ashí iyashinig kuwi kuwimjú wajasun wiyakcha waitijin apujkiajui nui pujus segamtí tusa;
LUK 16:21 nui pujus senchi yapajak wiyakcha mesajinia puunas kakegun yuwatatus wakegau, nunittaman yawá aidau tajuawag kuwimjin dukatuidau.
LUK 16:22 Lázaro nuní pujau jakamtai, ángel aidau jukiag Abraham pujamunum iwakajui. Nuniku ai wiyakchashkam jakauwai, nunikmatai ukusajui.
LUK 16:23 “Tuja wiyakchak Hades waitiak pujus pagkas niimkamá, Abrahaman atushat wainkauwai, Lazaroshkam niiní ayaumas ekeemtatman.
LUK 16:24 Nunik senchi untsumak: ‘Apawah Abrahama, minash wait anenjugta nuniakum Lázaro awetugta ni tsajam uweji titigchijin yumí antig idaijun bichatmitkajuati, wagki jii imaniamunum pujusan senchi waitiajai’, tau.
LUK 16:25 Tujash Abraham ayaak: ‘Uchijuh, ame pujusbaujum adeagta, aminak wají pegkeg aidau ajutjamajakui; nuniai Lazarok waitujakui. Tujash yamaik nigka jui shiig aneas pujai, ame waitiame.
LUK 16:26 Nuigtushkam juwiyati anui minita takuish minimaitsui, wake ishamain asamtai. Anuiyatigmeshkam jui minitasajum wakegakjumesh nagkaemamaitsugme’, tau.
LUK 16:27 “Tama wiyakuch ayaak: ‘Untsu apawah Abrahamah, Lazaron mina apajú jeen awemati tusan segajame,
LUK 16:28 nui cinco yatsug batsata nuna ujatjukti, dutikam ditak ju imag waitiamua juig minishtinme’, tau.
LUK 16:29 Tama Abraham ayaak: ‘Ditak, Moisés nuigtú profeta aidau agagbauwa nu ajuinawai; nuna aujus imatiksag umiinak waittanmag minimainchau ainawai’, tau.
LUK 16:30 Tama wiyakuch ayaak: ‘Atsa, apawa Abrahama, jakau aina nuiya makichik nantakí jegajua ujamak, tudau takatan idaiyinak pujutjinak yapajimain ainawai’, tau.
LUK 16:31 Tutai Abraham ayaak: ‘Moisés nuigtú profeta aidau agagbauwa nuna betek umiinatsu anidauk, jakau aina nuiya nantakí ujamash antugkachagtatui’ ”, tiuwai.
LUK 17:1 Jesús jintintaiji aidaun chichajak: —Kakajus tupanmaitsui tudau takata nuna anentai egketkagtuina duka; tujash ¡wait anentajai makichik aentskesh tikichin tudau takamtikaina nunak!
LUK 17:2 Dekas pegkeja duka jujú piipich aina juiya mina dekaskeapi tujutuina nuna tudaun takamtikaidauk, dekas kaya muun juki kuntugnum jigká detua nayantsa kunajin ajugká ajapmainus ajapachbau ainatai.
LUK 17:3 Nuadui ¡Atumek kuitamamkatajum! “Amina yatsum tudau takagtamkuig, jiyaktá; dutikam tsagkugtugta takuig, tsagkujata.
LUK 17:4 Nuigtú makichik tsawantinig sieteya imagnia tudaun takagtamas, sieteya imania tajutjama: Atak awagkinuk ankashtatjai takuig, tsagkujata”, tiuwai.
LUK 17:5 Apóstol aidau Apu Jesusan: —Dekaskeapi tabau aan nagkaemas sukagtusta, tuidau.
LUK 17:6 Tiagtai Apu Jesús ayaak: —Dekaskeapi tabauwa nu mostaza jigkayiya nuninkesh ajutjamainakuig, ju sicómoro chichagkujum: “Teganim nayantsanum wajaata”, tamak nunisag umigtamainai, tiuwai.
LUK 17:7 “¿Atum ainajum anuiyash, ya inake ajanum takaak wekagu nuniachkush baká kuitamak wekagu taamtai, wayam mesanum ekeemsam yujumak yuwata, tumainaita?
LUK 17:8 ¿Nunak tutsuk: ‘Aagkú yuwatin umigtukta, nunikam yapagmamam ajamjusta wi yuwan, uwagmatai amesh dui yuwam uwagta’, tuchauk aina?
LUK 17:9 ¿Inakega nuna dutikata tibaun imatiksag umikmataish see tinuk aina?
LUK 17:10 Atumshakam nunisjumek, Apajuí ashí dutikata tibauwa duke umiká idaikugmek: ‘Jutiik inak atsumchatai ainaji, imá tibauwa duke umidau asaja’, tumainaitjume”.
LUK 17:11 Jesús Jerusalén weak, Samaria, Galileajai tesagdayamu jinta asamtai nuní nagkaebau.
LUK 17:12 Nunik yaakat yaignum jegai, diez aents lepragtin jiinag ikaag ijuntsaju,
LUK 17:13 nunik senchi untsumkag: —¡Jesús, Maestro, jutiish wait anenkagtujia! wajaidau.
LUK 17:14 Imatiagtai Jesús wainak, chichajak: —Wetajum nunikjum sacerdote wantintuktajum, tiu. Tima ditashkam, jintá wesag pegkeg wajasaju.
LUK 17:15 Nunik dita aina nuiya makichik ni tsagagbaujin wainmamak, senchi jiiká Apajuin emematki waketak,
LUK 17:16 Jesusa jegantun tikishmag dijayin nugkan antig pujus, see tau. Duka samarianmaya aajakui.
LUK 17:17 Nunitai Jesús chichak: —¿Diez aidau tsagagchagmaka? ¿Nueveya dusha wajukawagmae?
LUK 17:18 ¿Imá jukeuchikaih tikich nugkanmayayaitak wakitki Apajuí ememati duka? tau.
LUK 17:19 Tusa Jesús: —Wajakim wetá, amek dekaskeapi tame dui tsagajume, tiuwai.
LUK 17:20 Fariseo aidau Jesusan, Apajuish wajutí inamjatasash taatnaita tusag inidau. Tama ni ayaak: —Apajuí inamjatna duka duwiyap atatua tusaik kakajus dekamaitsui.
LUK 17:21 Nuniau asamtai: “Jui inamui, awi inamui”, tabauk achatnai. Apajuik yamaiya juik atumin inamui, tiuwai.
LUK 17:22 Tusa jintintaiji aidaun chichajak: —Tsawan jegatnai, Aentsmaga akiinauwa nuna makichik tsawankesh wainkatatus wakeyagtin aina nu, nuniakush waitkachagtin ainawai.
LUK 17:23 Ujumak aents aidaukesh chichagtamainak: “Jui pujawai”, nuniachkush “awi pujume”, tujamainakuish wegpajum nuigtushkam nemagkaigpajum.
LUK 17:24 Wagki peem peeti nayaimpin mai yantamejai tsaaptin emama numamtuk wajaktinai tsawan Aentsmaga akiinau minamu atina duka.
LUK 17:25 Nunú tsawan jegatsaig, dekatkauk senchi waittsattajai, aantsag aents aidaush dakitjiagtatui.
LUK 17:26 Noé pujusua nu tsawantin wajukejakajua numamtuk wajagtinai, tsawan Aentsmaga akiinauwa nu minamunmash.
LUK 17:27 Aents aidauk yuwinak, umutnash umuinak, nuwenainak, nawanjin suju wajá batsatai, Noé niina arcajin egkemauwai, nuniai diluvio minak ashí tajakui.
LUK 17:28 Nunisag Lot pujujakua nu tsawantinish yuwinak, umuinak, sumainak, sujuinak, ajakmainak nuigtú jegá jegam wajá batsataidau;
LUK 17:29 nuniai Lot Sodoma pujau jiinkiuwai, nunikmatai nayaimpinmaya jii yutug azufrejai pachimdaegag iyajui, nunikmatai ashí jinawajui.
LUK 17:30 Nunisag atinai Aentsmaga akiinauwa nu wantinkatna dusha.
LUK 17:31 “Nu tsawantin, jega ekenja jegamkamu nagkatka nui pujauk, wajiiji jegá aunak akaikig jukishti; antsag ajanum takaak pujaushkam jeenig wakitkishti.
LUK 17:32 Adeagtajum Lota nuwe wajukauwaita nu.
LUK 17:33 Aents ju nugka jui pujutan imá senchi wakegak, mina nemagtuk waittan dakitauk uwemjashtin ainawai; tujash mina nemagtak niina pujutjinash puyatjukchauk, uwemjatnai.
LUK 17:34 “Junashkam tajime: Jimag aents kashi makichik pegaknumag tsanias tepaushkam, makichik juwaku, tikichik ukuam atinai.
LUK 17:35 Jimag nuwa tsanias deketainum dekeak pujuidaushkam makichik juwaku, tikichik ukuam atinai.
LUK 17:36 Jimag aents ajanum takaak pujaushkam, makichik juwaku, tikichik ukuam atinai”, tau.
LUK 17:37 Tutai iniinak: —¿Apuh, dusha tuwí nuniktinaita? Tiagtai ni ayaak: —Tuwí jakau tepettawa, nuwi chuwagkak tuwakagtinai, tiuwai.
LUK 18:1 Jesús juna augmattsauwai mijamtsuk Apajuí tuke augmaina nuna pachis jintinkagtuata tau asa.
LUK 18:2 “Makichik yaaktanum makichik juez pujujakui, Apajuinash ishamsash anentaimtuchu, aentsnash eme anentsagkesh diichu.
LUK 18:3 Nunú yaaktanmag pujujakui makichik nuwa waje, nunú shiwaji utugchat aputusam juezan jegajua: ‘Jujú epegtujuata’, tusa segau.
LUK 18:4 Tusa imatjú pujugmash yaitnak dakitú pujau asa nigki anentaimas: ‘Apajuin ishamsanush anentaimtuchu, aents aidaunash ajantusnush diichu akunush,
LUK 18:5 ju nuwa waje waa wamak tajutak waitkaja juní pujui yaigkan epegtuatjai dutikam, agkan idaitusti’ ”, tiuwai.
LUK 18:6 Tusa nuigtú Apu Jesús chichaak: Juez pegkegchaukesh aatus tiuwa nunin aish;
LUK 18:7 ¿Apajuish ni etejamu aidau kashi tsawaijai untsuamash, wagkag ayamjukchati? ¿Wamak aitskesh idaimainkaih?
LUK 18:8 Dekas tajime Apajuik waamak yaimpamainai. ¿Tujash wi Aentsmaga akiinauwaitag nuna ataktú ju nugka jui taatnaitag nuniaknush aents dekaskeapi taunash wainkatnashitag?, tiuwai.
LUK 18:9 Ujumak aents aidau dita imá pegkejan takauwa iman anenmamainak, tikich aidaunak imanchauch diidau asagmatai, Jesús jujú augmatbaun pachis chichaak:
LUK 18:10 Jimag aents Apajuin ausatatus jega Apajuí ememattainum weajui, makichik fariseo, tikich apú kuichkiji atinun ijumnujai.
LUK 18:11 Nunik fariseo Apajuin aujak wajai wajas: Apawah, see tajame, wika tikich aents aidau kasa, pegkegchau takau, tsanijimtan wekaetin, jujú apú kuichkiji atinun ijumin puja juninkesh atsujai;
LUK 18:12 wika makichik semanatin jimag tsawantai ayunó wajaujai, nuigtushkam kuichkinash ashí wi juamunak diezmó wajaujai, tau.
LUK 18:13 Tujash apú kuichkiji atinun ijumnuk kanaká iká wajas, nayaimpinash pagkai diitsuk, detsepen ijuak: “Apajuiyah, wika tudauwaitjai, minash wait anenjugta”, tiuwai.
LUK 18:14 “Wika tajime, nunú aatus tiuwa nu pegkeg Apajuí emtin wantinak waketai, tikichia duka nunikchauwai. Wagki nigki eme anenmama duka, imanchau diyam atinai; untsu imanchau diyamua nu eme anentam atinai”, tiuwai.
LUK 18:15 Nuna tusa ashimkamtai uchi aidaun Jesusan ikautuidau antinjukti tusag. Imatikiagtai ni jintintaiji aidau wainkag uchigtin aidaun jiyaidau.
LUK 18:16 Tujash Jesús, uchin untsuká: —Idaisatajum, uchi aidauk minai minitnume, utujiakaigpajum, wagki Apajuí inama duka, jujú uchi aina junin aina nudauwai.
LUK 18:17 Dekas tajime: Aents aidau, uchi mina anentaimjutuina imanis anentaimjutuinachuk, Apajuí inamak amain ainatsui, tiuwai.
LUK 18:18 Makichik apu Jesusan iniak: —Maestro pegkejah, ¿wajina dutikmainaitja pujut tuke atina nuna jukitasanush? tau.
LUK 18:19 Tama Jesús ayaak: —¿Wagka pegkejá tujutme? Makichkish pegkejak atsawai, imá Apajuiya duke pegkejak.
LUK 18:20 Amek dekame chicham umiktin agagbaunum: “Tsanijinawaipa, magkagtuawaipa, kasamkaipa, wainkamek tsanumkagtujaipa, amina apa dukujai eme anentsam diistá” tawa nunú, tau.
LUK 18:21 Tama ni chichaak: —Wika nunak datsauch nagkamsanuk ashí umikuitjai, tau.
LUK 18:22 Nuna tutai Jesús antuk ayaak: —Nuigtú makichik umimain ajutjamui: ashí amina ajutjamaina duka sujukam ujunauch aina nu tinamkata. Nu dutikawamin nayaimpinum wajiigmik ajutjamtinai. Nu dutika ukuakum mina nemagtukta, tiuwai.
LUK 18:23 Tujash nu tama wake besekú, wagki shiig wiyakuch asa.
LUK 18:24 Nunik senchi wake besektatman Jesús wainak chichaak: —¡Shiig utugchatai wiyakuch aidau Apajuí inamtaijin wayata tabauk!
LUK 18:25 Camello aujá jiin waigká nagkaemamain yupichuchia nuna nagkaesau utugchatai, wiyakuch Apajuí inamtaijin wayatag tabauk, tiuwai.
LUK 18:26 Nu tabaun tikich aidaushkam antukag, iniimainak: —¿Yaki tujash uwemjaush amainaita? tuidau.
LUK 18:27 Tiagtai Jesús ayaak: —Aents aidau dutikmainchauwa nunak Apajuí dutikmainai, tiuwai.
LUK 18:28 Tutai Pedro ayaak: —Apuh, jutii aidautik ashí iina ajutjamaina duka ukuinaku, ame nemagkabiaji, tau.
LUK 18:29 Tutai Jesús ayaak: —Dekas tajime, ashí aents Apajuí inabaujin etsejuinak jeen, nuwen, yachi aidaun, uchijí aidaun, apajin dukujijai ukukiag yujaidauk,
LUK 18:30 jujú nugka jui pujusash, ni ukukbaujin nagkaesau jukiagtinai, nuigtú atak atina duish pujut tuke atina nunash jukitnai.
LUK 18:31 Jesús ni jintintaiji doce aina nuna akanak chichajak: “Yamai Jerusalén wegag dui, profeta aidau Aentsmaga akiinau nuniktinun ashí agajajua nunú uminkattawai.
LUK 18:32 Nuniau asamtai aents judiochu aidaunum sujukagtatui, dutikawagmatai pegkegchau chichajuinak, dushikinak usukiagtatui;
LUK 18:33 dutikawag asuttanash asut awa awajtuinakuag maawagtatui; tujash kampatum tsawanta dui nantaktatui”, tau.
LUK 18:34 Nunak jintintaiji aidauk makichkish shiig dekachajui, wajina takua tawa nuna shiig dekamainchau dekapedau asag.
LUK 18:35 Jesús Jericó jegattak wegai, aents wainmachu jintá yantamen ekeemas: Kuichik sujustajum, tusa segamá eketu.
LUK 18:36 Nuniau kuashat aents nagkaemainak pampainamun antuk, wagka imatainawa tusa iniimu.
LUK 18:37 Tutai, Jesús nazaretnumia wetai imatuinawai tusag ujaidau.
LUK 18:38 Tiagtai senchi untsumak: —¡Jesusah, David weantu uchijiyah, minash wait anenjugta! wajau.
LUK 18:39 Imattai aents eemak ashinaidau itatkati tusag jiyaidau, tujash nigka nuní senchi untsumak: —¡David weantu uchijiyah, minash wait anenjugta! wajau.
LUK 18:40 Wainmachu imatbaun antuk Jesús wajantá: —Jukijum jui itagtuatajum. Timatai ejentuntam, iniak:
LUK 18:41 —¿Utugtukti tusamea wakegame? tau. Tama ni ayaak: —Apuh, wainmaktasan wakegajai, tau.
LUK 18:42 Tutai Jesús chichajak: —¡Wainmakta! Ame dekaskeapi tame dui tsagajume, tiu.
LUK 18:43 Tusá tamawaik wainmakui. Nunik Apajuin emematkamaikia Jesusan nemagkauwai. Tuja ashí aents nuna wainkajushkam Apajuin emematuidau.
LUK 19:1 Jesús yaakat Jericó wayá nagkaebau.
LUK 19:2 Nuniai Zaqueo apú kuichkiji atinun ijumin aidaun apuji shiig wiyakuch, nunú yaaktanmag pujau.
LUK 19:3 Nuniau asa Jesusan wainkatatus wakegau; nuniayatak kuashat aents tuwagkagmatai wainmainchau dekapjau, sutajuch asa.
LUK 19:4 Nuniak eemak tupikaki, sicomoronum waka ekeemsau, Jesús nuní nagkaemaktin asamtai wainkatatus.
LUK 19:5 Nuniai Jesuschakam nui jegak pagkai diyak: —Zaqueo, wamkesam akaikita, yamai amina jeemin ayamjatasan minajai, tiu.
LUK 19:6 Tama Zaqueoshkam wamkes akaiki, shiig anentus Jesusan juki niina jeen emauwai.
LUK 19:7 Nunitai ashí aents aidau wainkag, aents tudaugtinu jeen kanagtatus wegawai tusag augmatuidau.
LUK 19:8 Tujash Zaqueok niina jeen ejega wajakí Jesusan chichajak: —Apuh, yamai nagkamsanuk aents ujunauch aidaunak jimaituk wajiijun akankan tinamtajai, wi makichik aentsun wajiin kasagkau akunush ipaksumta imagnia awagtuktajai, tau.
LUK 19:9 Tutai Jesús ayaak: —Yamaik ashí amina pataimijai uwemkaugme, Abraham dekaskeapi tiuwa nunisjumek dekaskeapi tujutiujum dui, dekas Abraham wegantu wajasugme.
LUK 19:10 Wagki wi Aentsmaga akiinauwaitag nunak, megkaejauwa nuna egaká uwemtijatasan tauwaitjai, tiuwai.
LUK 19:11 Jesús Jerusalén jegattak wegau asamtai, aents aidau ni chichaamu antugkaju asag, awi jegaa apu wajasá waamak inamjashtimpash tusag anentaimaidau asagmatai augmatbaun nagkabau.
LUK 19:12 Nuniak tau: “Makichik aents eme anentsá diitai aajakui, nunú tikich nugkanum atushat weuwai, rey wajas wakitki taatatus.
LUK 19:13 Eke wetsuk niina inaken diez aina nuna untsuká, makí makichik kuashat kuichkin susa chichajak: ‘Jujú kuichkia ju takamtikamatajum nuniagmin wisha taatjai’, tiuwai.
LUK 19:14 Tujash aents niina nugkenia aidau kajejuidau asag, dekas apun chichaman awetuinak: ‘Jutiik anú rey wajas jutiiní inamjati tusaik wakegatsji’ ”, tiajui.
LUK 19:15 “Tujash nu aaja tabau aig, rey adaikam wakitki niina nugkeen tauwai, nunik inake kuichik tinamká ukukbauji aidaun untsukajui, maki makichkish wajupak ikaugkaje tusa dekajuatatus.
LUK 19:16 Tiajam makichik niiyá eemak jegantá: ‘Apuh, amina kuichkigmik diesa imania kawegke’, tau.
LUK 19:17 Tama ni ayaak: ‘Ayú, pegkeg aikaume, amek inak pegkejaitme, machik susamuitkum imatikam ikaugkaume, dui wishakam diez yaakat aina nuna apuji emattajame’.
LUK 19:18 Tusa inagnaig tikitchakam jegantun chichajak: ‘Apuh ame kuichik sujusmayum duka, nuigtú cincoa imania kawegke’, tau.
LUK 19:19 Tutai rey nunashkam ayaak: ‘Ameshkam cinco yaakta apuji atá’, tiuwai.
LUK 19:20 “Tuja tikich inak tajuntun chichajak: ‘Apuh, juuwai kuichkigmik, jaanchi shiig ijian ukusan pujugjai,
LUK 19:21 wagki amek waitkagkagtin, nuigtush ame susachu ayatkum atantin, aikasmek ame ajakchauwaitkum juu wekayin asamin ishamakun kuichkigminak takamtiksachmajai’, tau.
LUK 19:22 Tama ni ayaak: ‘Amek inak pegkegchauwaitme, amina chichamjuminig bakumattame, wi waitkagkagtin, susachu ayatkun atantin, nuigtú ajakmachu ayatkun juu wekayin dekajiatkumesh,
LUK 19:23 ¿wagka banconum egkeam ukugtukchabiume, wakitki taak kawegkun jukiti tusam?’, tau.
LUK 19:24 Tusa nui ijuntatman chichajak: ‘Aanú kuichik atankita, dutikam diesa imania ikaugka nu susatajum’.
LUK 19:25 Tutai aents chichajuinak: Apuh, niinuk diesa imania ikaugkamu ajajama, tuidau.
LUK 19:26 ‘Tiagtai rey chichajak: Kuashat aja duka nuní dukap suwam atinai; untsu piipich ajamua dusha, nu piipich ajamua dukesh atantam atinai.
LUK 19:27 Mina shiwag aidau rey wajasá jutiiní inamjai tusa dakitjiagma nunú, jui itanjum mina emtijui kajegtajum’ ”, tiuwai.
LUK 19:28 Juna tusa idaiyak, Jesús nagkaemaki Jerusalén wakatatus wegau.
LUK 19:29 Nunik Betfagé nuigtú Betania awa nui tikiju wajas, olivosa mujají tutainum jegan, Jesús ni jintintaijin jimajan awemauwai.
LUK 19:30 Dutikak: Wetajum au yaakat yaijuch awa awi, nuwi jegakmajum burro makichik aentskesh entsamchatai jigkaam wajau wainkattagme; nu atiajum itaatajum.
LUK 19:31 Nu dutikagmin makichik aentskesh inimpainak: ¿Wagka atiagme? tujamkujaish: Apu atsumawai titajum, tiu.
LUK 19:32 Tiajam jintintaiji aidaushkam wegag, jegakmá ni tibaunak imatiksag betek wainkaju.
LUK 19:33 Nunik jegantun atittaman burrogtin wainak: —¿Wagka burrosh atiagme? tau.
LUK 19:34 Tama dita aiinak: —Apu atsumau asamtai juwaji, tiaju.
LUK 19:35 Dutika jukiag Jesusan itaantaju, dutikawag jaanchji aidaun jukiag burro tuntupen aitkag, Jesusan ekeniajui.
LUK 19:36 Nunik Jesús wetai, aents aidauk ditá jaanchji aidaun jintá ainag emaidau.
LUK 19:37 Nunikag olivosan mujají chapaibaunum jegantatak weenak, ashí Jesusa nemajin aidauk shiig dakujusag senchi jiikag Apajuin emematuidau, aents dutikmainchaun dutikaun wainkaju asag,
LUK 19:38 nuninak: —¡Apu Apajuí awemam Rey miná duka pegkegmai! ¡Nayaimpinmash shiig agkan atí, antsag ashí yakiya aidaush junak ememattinme! wajaidau.
LUK 19:39 Imatiagtai ujumak fariseo nui pachitkau aidau: —Maestroh, jintintaijum aina nu itatjatajum tita, tuidau.
LUK 19:40 Tama Jesús ayaak: —Dita itatiagtaik kaya aina ju pampaumain ainawai, tiuwai.
LUK 19:41 Jesús Jerusalén tikiju wajasú, nunik yaakta wainak, buutiuwai.
LUK 19:42 Nunik: “¡Wajuk dekawajumek tusan wakegajai yamaiya juik amina agkan etamaina nu! Tujash yamaik duka dekamainchauwaitme ejatkamua nunin asam.
LUK 19:43 Tujash tsawan jegagtamtinai, shiwajum yaaktagmin peegmak apagtamak, ashí yantamnum dakagmajag jetepakagtina nu.
LUK 19:44 Dutijamainak atumnak ashí uchigmijai amupainak yaaktagminash ashí tsaigtamkagtinai, dutikamu asa makichik kayakesh tikich kayanum patamiukesh juwakchatnai, wagki Apajuí uwemtijamjatatus awetugmamu dakitjau asajum”.
LUK 19:45 Nuna tusa idaiyak, Jesús jega Apajuí ememattainum wayauwai, nunik nui sujak batsamtatman jiijú.
LUK 19:46 Dutika chichajuinak: —Agagbau awai: “Mina jegajuk Apajuí aujku ijuntaiyai” tawa nuniaig, atum kasa aidau batsamtai emaugme, tiu.
LUK 19:47 Nunik Jesusak jega Apajuí ememattainum kashí kashinig jintinkagtau. Nunitai sacerdote apuji, maestro chicham umiktinun jintinkagtin nuigtú judío apuji aidaujai maawagtatus chichaman umijuidau.
LUK 19:48 Tujash yupichu dutikmainchau dekapedau, kuashat aents aidaush ni chichagkagtamunak puyatjus antujuidau asagmatai.
LUK 20:1 Jesús jega Apajuí ememattainum aents aidaun jintintak nuigtú yamajam chichaman etsejak pujai, sacerdote apuji aidau, maestro chicham umiktinun jintinkagtin, tikich judío apuji aidaujai utsanawajui.
LUK 20:2 Nunikag: ¿Aminash ya jintinkagtuata tusash awetamae? ¿Yana chichamenia jusha juniame? tuidau.
LUK 20:3 Tama Jesús ayaak: —Wishakam iniastajime, aigkatajum:
LUK 20:4 ¿Yaa Juagnash yamijatjata tusash awemauwaita, Apajuik awemauwait, atsa aents aidauk awemauwait? tau.
LUK 20:5 Tama ditak pempeentunikiag chichainak: “Juagnak Apajuí awemauwai tajinish, ‘¿Tujash wagka dekaskeapi tichau ainagme?’ tujamtata jama.
LUK 20:6 Tuja aents awemauwai tajinchakam, ashí aents aidauk Juagnak profetayai tuidau asag kayai tukugmag mantamain ainawai”, tuidau.
LUK 20:7 Tusag: —Dekatsji, yatsu Juagnash yamijatjata tusash awemauwait, tuidau.
LUK 20:8 Tiagtai Jesús ayaak: —Wishakam tichattajime yana chichamenia jutikaja nunak, tiuwai.
LUK 20:9 Junashkam Jesús aents aidaun jintintak augmatbaun pachis nagkama tau: “Makichik aents ajajin uvan ajakui, dutika ujumak aents takau aidaun ukujak, weuwai dukap tsawan asa taatatus.
LUK 20:10 Nunik uva juut jegamtai, makichik inaken awemauwai takau batsatbaunum, nui jegamtai uva neje jukbaun niinun susatnume dutikam itagtuati tusa, nunik jegattaman takau aina nu suwimawag sutsuk wainak awagkiajui.
LUK 20:11 Dutikawagmatai tikich inaken awemauwai, tujash nunashkam suwimawag pegkegchaun chichagkag wainak awagkiajui.
LUK 20:12 Nuna dutikawagmatai kampatuma juna tikich inaken awemauwai, dutikamun ajanum takaina nu senchi suwimá, upu upujú awajsag jiikí awemajui.
LUK 20:13 “Dutikawagmatai uva ajagtina nu anentaimas: ‘¿Utugkatjaki? tusa, dekas mina uchig anetaijua juna awematjai, dutika ai nuna wainkag ajantus diischajaintash’ tiuwai.
LUK 20:14 Tujash takau aina nu uchi minittaman wainkag: ‘Auwai ju aja juna jukitnuk, dekas maa ajapami, dutika juka iinu emami’, tuidau.
LUK 20:15 Tusag achiká jukiag uva aja ukumtikiag maawajui. “¿Nunash ajagtina dusha utugmainai tajume?
LUK 20:16 Dekas ajagtina nu tajakug takau aina nunak kajegká utsak, uva ajakbauwa nunak tikich aents aidaun susa idaimainai”. Nuna Jesús tutai antukag: —¡Duka tuke dutikamak achatnaitji! tuidau.
LUK 20:17 Tiagtai Jesús ditan esetug diisá: —¿Tujash wajina pachisaya agagbauwa nuwish: “Kayá ekenag jegamin aidau, kaya pegkegchauwai tusag dakitjajua nunú, yamai dekas jegá ichichkatin kaya apujtutia iman wajasé”, tawa?
LUK 20:18 Nunú kaya nui iyauk tsainkatnai, untsu kaya aentsnum iyakug yuku ematnai, tau.
LUK 20:19 Nuna Jesús augmattai, sacerdote apuji aidau, maestro chicham umiktinun jintinkagtin aidaujai achikta tuidau. Nuninayatak aents aidaun ishamaidau.
LUK 20:20 Nuninak aents aidaun, iish pegkeja nu dekatasa wakegainaji tusajum dekajuatajum tusag awemajui, dutika Jesús wajintig timatai achiká gobernador inama nui sujukmi tusag.
LUK 20:21 Tiajam Jesusan iniinak: —Maestroh, jutiik dekainaji ame tame duka nuigtú jintinkagtam dushakam dekas jintinkagtame; nuigtush aents shiig awajkata tabaunum dutikasme, amek dekaskenum Apajuí jintiya nu pachisam jintinkagtame.
LUK 20:22 Nuniau asamin amina iniagme: ¿Jutiish Cesarash akimainkaih atsa akimainchaukaih? tuidau.
LUK 20:23 Tujash Jesusak pegkegchau anentaimainamujin dekaju asa: —¿Wagka pegkegchau anentaiyaish tujutjume?
LUK 20:24 Iwaintugkakjua makichik kuichik. ¿Yana niimegaita jusha, yana daaji agagbauwaita? Tama: —Cesardauwai tuidau.
LUK 20:25 Tiagtai Jesús ayaak: —Cesardauwa duka, César susatajum, Apajuinua dushakam Apajuik susatajum, tiuwai.
LUK 20:26 Nuna ashí aents antuinamunum timatai, tsanumjumainchau dekapjaju. Nunikag nu tu aikam anentai jegagchag, itatjaju.
LUK 20:27 Juna tusa machik aig, ujumak saduceo aidau, jakauk nantagchagtin ainawai tinu asag, Jesusan iniinak:
LUK 20:28 —Maestroh, Moisés papí agag ukugtamkiuwa nui: “Aents nuwan juki uchin akiitsuk jakamtaig, ni yachintin nuwan juki uchin akiimainai, dutika yachí uchijiya nunin emamainai”, tawai.
LUK 20:29 Tuja nuniamunum, siete yachigbau aajakajui, nuanuiya nagkamchak iwai nuwenauwai, tujash uchinak akiitsuk jakauwai.
LUK 20:30 Nunikmatai tikich yachi jukishkam, uchinak akiitsuk jakauwai.
LUK 20:31 Tuja kampatuma nu jukiish, uchinak akiitsuk jakauwai, nuni nuninakua siete aajakajua duka, uchinak akiitsuk jinawajui.
LUK 20:32 Nunikagmatai dui pujus nuwashkam jakauwai.
LUK 20:33 Siete aajakajua duka ashí nunak nuwatjaju aina duish ¿dekas yana nuweg atinaita atak nantainamunmash? tuidau.
LUK 20:34 Tusa tiagtai Jesús ayaak: —Ju nugka juig aishmag aidauk nuwenainawai, nuwa aidaushkam aishinainawai,
LUK 20:35 tujash uwemkaju aidau jakau nantajag tuke pujustin aina nuig, makichkish nuwenbauk atsutnai,
LUK 20:36 jatanash jakachagtinai. Ditak angeljai betek agtinai nuigtú Apajuí uchijí agtinai nantakiaju asag.
LUK 20:37 Jakau aidau nantajagtina nunak Moisés dekamtijamui zarza kegamunum, Apu Apajuí chichaak: “Witjai Abraham, Isaac, Jacob aina nuna Apajuijinuk”, tiuwa dui.
LUK 20:38 Wagki ¡Apajuik jakau aina nuna Apajuijichui, nigka iwaaku aidaun Apajuijiyai! Apajuí diismak jakau aidaush iwaaku batsatainawai.
LUK 20:39 Aatus timatai maestro chicham umiktinun jintinkagtin aidau: —Maestroh shiig tiume, tuidau.
LUK 20:40 Nuna timatai ataktuk iniaschajui.
LUK 20:41 Nuniagtai Jesús ditan iniinak: —¿Wajuk asamtaiya Cristuk Davita uchijiyai tuinawa?
LUK 20:42 Tujash David nigki Salmosnum agak: “Apu mina Apujun chichajak, ekeemsata mina untsujui;
LUK 20:43 nunikamin wi amina shiwajum aidaunak, amina dawemin ikautkatjame”, tiuwai.
LUK 20:44 David Apug tawa nuniaish ¿wajuk asaya Davita uchijish amainaita? tau.
LUK 20:45 Ashí aents antuinamunum jintintaiji aidaun chichajak:
LUK 20:46 “Maestro chicham umiktinun jintinkagtin aina nujaig kuitamamkatajum, ditak nugkutai esagman nugkujag yujainak, plazanum igkuntuinakush eme anenjus kumpamjitnume tusag wakejin ainawai, nuninak jega ijuntainum nuniachkush yuamunum wainakush aents eme anentsá ekeemsati tibaunum ekeemsagtatus wakejin ainawai.
LUK 20:47 Nuwa waje aidau jeenash atankiag, tsanumainak Apajuin au aujuinakua ukú yujau aina nunin aigpajum. Nunú aidau imá senchi suwimkan jukiagtin ainawai”.
LUK 21:1 Ofrenda egketainum wiakuch aidau kuichkin egkeagtai Jesús diyak wajau,
LUK 21:2 nunikmá makichik nuwa waje ujunauch jimag kuichik cobre najanamun egkettaman wainkau.
LUK 21:3 Nunik: —Dekas tajime, jujú nuwa waje ujunauchia ju ashí tikich aidaun nagkaesau egkeae,
LUK 21:4 wagki ashí ofrendan tikich egkeawaja duka ampinun egkeawaje, tujash juka ujunauchitak ni sumaka yumainjiya nunak ashí egkeae, tiuwai.
LUK 21:5 Ujumak aents aidau jega Apajuí ememattain pachis, kaya pegkeg nuigtú ofrenda itaamu aidaujai jega shiig iwajamua nuna pachisag chichaidau. Tiagtai Jesús chichajak:
LUK 21:6 —Atum ju imatika jegamkamu wainjum juka, tsawan jegatnai nunikmatai makichik kayakesh ekenjamu aina nuiyag juwakchatnai, ashí tsaikbau atinai, tiuwai.
LUK 21:7 Tutai Jesusan iniinak: —Maestroh, ¿wajutiya dusha nuniktinaita? ¿Wají aidauk wantintinaita nu dutikam atin jegattak wajataish? tuidau.
LUK 21:8 Tama ni ayaak: “Kuitamamkatajum tsanuam aijum, wagki kuashat midiagtinai mina daajun pachisag, nuninak: ‘Witjai Cristunuk, tsawantak tikiju wajasé’ wajagtinai, tuinakuish atumek antugkaigpajum.
LUK 21:9 Maaninawai tuinamu antitnaitjume, nuigtú pampandayamush aitnai, imaninakuish ishamkaigpajum; dekatkauk nunú aidauwá nagkaemagtinai, tujash nagkanbauk nu nuniaig achatnai”.
LUK 21:10 Tusa nuigtushkam: “Nugka yaignum batsamin aidau tikich nuninum batsatujai maaniagtinai, tuja nuninai nugka muunnum batsamin aidaushkam, mai imannumiajaig maaniagtinai.
LUK 21:11 Senchi uugbau aidaush agtinai nuigtú yapagtash, jata ishamain utsumaja jinamush ashí yantamnum atinai. Nayaimpinmayashkam shiig ishamain wantinaidaun wainiagtinai.
LUK 21:12 “Tujash ju ashí wi tajim nu eke jegatsaig, atumnak achigmakag waitkagmasagtinai. Dutijamainak jega ijuntai aidaunum awaintamawag, nui jujamkiag cárcel egkepawag, nui jujamkiag tikich apu aidaunum ejetamawag, nui inagkeapakiag gobernador aidaunmash ejetamawag, nuigtú rey aidaunmash ejetamawagtinai mina nemagtin asagmin.
LUK 21:13 Tujash nuna dutijamainakuish, mina pachittsajum tikich yupichu ujamainush ajutjamiagtinai.
LUK 21:14 Nuniakjumesh uyumakaigpa atum ayamjumamainush wajintu tumainaitjume duka;
LUK 21:15 wagki wi atum chichaktinnak dekamtikattajime, dutikamu asagmin atum chichataik, shiwajum aina nuiyagkesh makichkish tujamainchau agtinai.
LUK 21:16 Tujash atumnak apa aidau, yatsum aidau, pataim aidau, kumpajum aina duke sujupakagtinai, dutijamawagmatai dita maamuk maam agtinai;
LUK 21:17 nuigtush ashí aents aidau kajegtabiagtinai mina daag pachisjum chichaidau asagmin,
LUK 21:18 tujash makichkish minaig datumtamain ainatsui.
LUK 21:19 Tujash ebetmamja pujakjumek, uwemjatin ainagme.
LUK 21:20 “Suntag aidau Jerusalegkan tentea au wainkugmek, wamkeap tsaikagtatua tusajum dekaatin atajum.
LUK 21:21 Nuadui, Judea batsatutigmek mujá pisagtin atajum; Jerusalén batsatushkam jiinjag yaaktanak ukuktinme; ajanum takaak batsatushkam, yaaktanmag wakitkig waimainchau ainawai.
LUK 21:22 Wagki duka tsawantak suwimak jegau asa imanitnai, ashí agagbaunum tibauwa nu uminu asa.
LUK 21:23 ¡Wait anentuinajai nunú tsawantin nuwa ejamtin nuigtú uchí amuntsuaku agtina nunak! Wagki ju nugka juig shiig senchi waitiamu atinai nuigtushkam ju aents aina judauk suwimak ishamain atinai.
LUK 21:24 Espadayai maamush agtinai nuigtush achijag ashí tikich nugka aidaunum yajumam agtinai; judiochu aina nu Jerusalegnak tsaikagtinai, nunisag pujus tsawan dita mamiktugbauwa nuna ejeyagtinai.
LUK 21:25 “Nuniamunum etsa, nantu, yaya aidaunum wainchatai aidau wantiniagtinai. Ashí nugkanmaya aents aidauk anentaimak waitiagtinai nuniak puyatiagtinai nayants shiig senchi tsukatak uutbauji antuidau asag.
LUK 21:26 Imatu asamtai ishamainak jaka iyauke agtinai nugkanum nagkaemaktata nuna anentaimtusag, nuigtú nayaimpinmaya senchigtin aidaush peganaidau asagmatai.
LUK 21:27 Nuniai Aentsmaga akiinau yujagminum pachitkau tsawan wajas niina senchijijai minau wainkatnaitjume.
LUK 21:28 Nunú nagkamna imaniakuig ichichmamjatajum, nuniakjum pagkai diistajum, wagki atum agkanmagatnuk tikijuch wajasú asamtai”, tiuwai.
LUK 21:29 Tusa Jesusak junash augmatus: “Higuera diistajum nuniachkugmesh tikich numi aina dukesh.
LUK 21:30 Atumek numi wentsamtuju dukegkuig, wamkeap esat nagkamnattawa tusajum dekau ainagme.
LUK 21:31 Nunisjumek, nunú nunidau wainkugmek, Apajuí inamjatnuk tikijuap wajasé tusajum dekaatin atajum.
LUK 21:32 “Dekas tajime, yamai aents aina jusha batsataig ashí uminkatnai.
LUK 21:33 Nayaimpik nugkajaig megkaejatnai, tujash mina chichamjuk umintsukek juwakchatnai.
LUK 21:34 “Kuitamamkatajum, pegkegchau unuimatjam shiig anentaimja dekaachmin wajasaim, nampet nuigtú nugkaya aina nu uyumakam wekaetakum, nuniamin pachiachbau tsawan nagkanbau jegak uwaktamkai,
LUK 21:35 chinamu ujatbauwa numamtuk; wagki duka ashí aents nugkaa batsataina nuwi minitnai.
LUK 21:36 Nuadui atumek aneaku ashí tsawantai Apajuí aujú pujutajum, nunú ishamain nagkaemagtina nu uwemtugminjum nuigtushkam Aentsmaga akiinauwa nujaish ijunjamnujum”.
LUK 21:37 Jesusak tsawai jega Apajuí ememattainum jintinkagtua, kiitaik Olivosa mujají tutainum weejakui.
LUK 21:38 Ashí aents aidauk kashikmasag jega Apajuí ememattainum weedau, Jesús jintinkagtutai antukagtatus.
LUK 22:1 Fiesta pag levaduragtuchu yutai Pascua tutai jegattak wajai,
LUK 22:2 sacerdote apuji aidau, maestro chicham umiktinun jintinkagtin aidaujai, aentsun ishamaidau asag, Jesús wajuk maawajik tusag chichaidau.
LUK 22:3 Nuniamunum Jesusa jintintaiji doce aina nuiya Judas, Iscariote tuuta awagmatia nuna Iwanch egkemtuauwai,
LUK 22:4 dutikam wee sacerdote apuji aidaujai nuigtú jega Apajuí ememattain kuitamin aidaujai chichasajui, wajuk Jesusash achikaish sujumainaita nuna pachisag.
LUK 22:5 Tama ditak shiig aneasajui, nuninak kuichkin susatatus anagkuawajui.
LUK 22:6 Tama Judaschakam ayú tusa wajuk Jesusan aents atsamunum sujukajak tusa egau.
LUK 22:7 Pascuatin, pag levaduragtuchu yuwaku uwig aishmag tsakat maa yutai jegau asamtai;
LUK 22:8 Jesús, Pedron Juagjai awemak: —Wetajum, nunikjum Pascua yuwatin umiktajum, tiuwai.
LUK 22:9 Tuinam dita aiinak: —¿Tuwí umiktí tusamea wakegame? tuidau.
LUK 22:10 Tiagtai Jesús ayaak: —Yaakat wayamunum makichik aishmag yumí aimak waketu wainkattagme, nunú pataetukjum jeen wayatta imanui jegatajum,
LUK 22:11 nunikjum jeentin chichagkujum: “Maestro chichagtamak: ¿Tuwí awa tesamu wi mina jintintaig aidaujai Pascua yumainush? tujamae” titajum,
LUK 22:12 tajumin ni inaktugmastatui yakí tesamu agkan muuntan shiig umikbaun, nuanui umiktajum, tiuwai.
LUK 22:13 Tusa tiajam wegag Jesús tibaunak imatiksag wainkaju. Nunikag nui Pascua yuwatnunak umikajui.
LUK 22:14 Hora jegamtai, Jesús apóstol aidaujai mesanum jegaantag pekaamsajui.
LUK 22:15 Nunik chichaak: —Senchi wakemajai, eke jatsuk ju Pascuan atumjai ijunjan yuwatasan.
LUK 22:16 Wagki junak ataktuk jutikanuk yuwashtinaitjai; atak Apajuí inabauji uminkatna dui yuwatin asan, tiuwai.
LUK 22:17 Tusa vino copanum aun juki, Apajuin see tusa chichaak: —Ju uwagtajum ashí atum aidautijum,
LUK 22:18 dekas tajime, ataktuk jutikanuk uva yumijinak uwagchatnaitjai, Apajuí inamak taatna duwi uwagtin asan, tiuwai.
LUK 22:19 Tusa pagkan juki Apajuin see tii puuká, jintintaiji aidaun susa chichaak: —Jujú pagka juka mina iyashig atumiin mantamnatta nuna iwainawai, juka tuke jutiksagmeké atin atajum mina anentaimjuttsajum.
LUK 22:20 Tusa ashí yuwawagmatai copa juki, chichaak: —Ju copa juka, mina numpajui yamajam chicham apaamu atumiin ukaejatta nuuwai.
LUK 22:21 Mina sujutkatta duka ju mesa juwig wijai eketui.
LUK 22:22 Dekaskenmag Aentsmaga akiinauwa duka, nuniktinai tusa agagbauwa nunisag wetatui, tujash nuna sujuktata nunak wait anentajai, tau.
LUK 22:23 Tutai ditak pempeentunikiag iniinidau, yaki nunash dutikati tusag.
LUK 22:24 Nuigtushkam jintintaiji aidau jutii ainag juwiyash yaki imá wagakush atinaita tusag pampandayidau.
LUK 22:25 Tudaiyagtai Jesús chichajak: “Rey nugkanum inamaina duka aentsnak ditanua nunin emak waitkainawai, tuja apu inamaina nunú, pegkegnum yaimin ainaji tumamin ainawai;
LUK 22:26 tujash atumek nuninuk amaitsugme. Duka nunitsuk atum ainajum anuiya eme anentai atag takug, datsauch eme anentsá diishtaya nunin anenmamainai. Inamna dushakam tikichin takagna nunin amainai.
LUK 22:27 Wagki ¿yaita eme anentsá diitaish, mesanum eketa dukaih atsa ajaama dukaih? ¿Mesanum eketa duchaukaih? Nunin aig witjai atumjaig ajamauwa nuninnuk.
LUK 22:28 “Atum ainagme mina pegkegchaunum dekapjuinakuish wijaig ijutkau yujasujum duka.
LUK 22:29 Nuadui wi atumnak apu emajime, mina Apag mina apu etiuwa dutiksanuk,
LUK 22:30 mina inamtaijui mina mesajui yuwakjum uwagminjum tusan, nuniakjum ekeemtainum ekeemsajum Israelan uchijí doce aajakajua nunú wegantu inagtin ainagme”.
LUK 22:31 Junashkam Jesús tiuwai: —Simón, Simón Iwanch segamne, atumin trigo pegatia numamtuk awatamkagtatus;
LUK 22:32 tujash wi aminak segatmagme, dekaskeapi tabaugmia nunú mijakaim tusan. Ame minai ataktú anentaimjam, yatsum aidaush minaig ebetmamjatnume tusan yaigminum tau asan.
LUK 22:33 Tama ni ayaak: —Apuh, wika umintsan wekaejai cárcel jujamainakuish nuniachkush mantamainakuish amijai jakatasan, tau.
LUK 22:34 Tutai Jesús ayaak: —Pedro, yamai kashia juik atash eke shinatsaig, Jesusnak waintsamjai tusam kampatumá ugtuktatme, tiuwai.
LUK 22:35 Tusa idaiyak: —Atumin wi ishimkun, wají egkea jutaigmekesh, kuichik egketaigkesh, sapatkesh jukigpajum tiuwaitjim duish, ¿makichkish atsumamush ajutjamsauk aina? Tama dita aiinak: —Atsa, tiajui.
LUK 22:36 Tiagtai Jesús ayaak: —Tujash yamaik wají egkea jutaigmesh, kuichik egketaigmeshkam jukitajum, espadajum atsugtamkuig, jaanchjum sujakum makichik sumaktajum.
LUK 22:37 Dekas tajime, agagbaunum tawa duka minai uminkattawai: “Aents pegkegchaujai betek diyam atinai”, tusa mina pachittsa agagbauwa duka uminui, tau.
LUK 22:38 Tutai dita aiinak: —Apuh, jui jimag espada ajutjamui, tiajui. Tiagtai Jesuschakam: —Maake, tiuwai.
LUK 22:39 Tusa Jesús yaaktanmaya jiinki Olivosan mujajin weuwai, nui tuke weu asa, nunitai jintintaiji aidaushkam ashinkajui.
LUK 22:40 Nui jegantá jintintaiji aidaun chichajak: —Jui pujusjum Apajuí ausatajum, pegkegchaunum iyawaijum, tau.
LUK 22:41 Tusa ukuak nigka kaya nagkimam iyauwama imaan atushat kanaká, tikishmag pujus Apajuin aujak:
LUK 22:42 “Apawah, amesh wakegakmek, wi waitmainaitag nu agkanmitkajuata; tujash wi wakegamu achati, ame wakegamu atí”, tiuwai.
LUK 22:43 Nuniai makichik ángel nayaimpinmaya wantintuku anentain ichichtugtatus.
LUK 22:44 Jesusak ni senchi waittsatnuji jegau asamtai anentaimak waitiau asa, nuní senchi Apajuin auju, imaniau asamtai segagbaujig numpa apu aidau nugká kitaama numamtuk wajaidau.
LUK 22:45 Jesús Apajuí augbaun inagnak wajakí, jintintaiji batsakbaun jegantun diikmá, wake besemag dekapenak ane anentaimainakua kajig batsatun wainak:
LUK 22:46 —¿Wagka kajiish batsatjume? Nantakjum Apajuí ausatajum pegkegchaunum iyawaijum, tiuwai.
LUK 22:47 Tusa Jesús eke chichaak wajai, kuashat aents kaunawaju, nuniamunum ni jintintaiji doce aina nuiya Judas daagtin eemak minau, nunú jegantau Jesusan kugkuastatus;
LUK 22:48 Nunitai Jesús chichajak: —Judasah, ¿Aentsmaga akiinauwa duka kugkuasmeap sujame? tiuwai.
LUK 22:49 Jesusjai yujaidauk, nu nunidaun wainkag: —¿Apuh, espadajaig maaniattag? tuidau.
LUK 22:50 Tuinai dita aina nuiya makichik sumo sacerdote apuji inaken espadayai kuwishí untsujin tsupigkauwai.
LUK 22:51 Dutiktai Jesús chichajak: —Maake, idaisatajum. Tusa kuwishí tsupigkamun juki ataktú anujtuk pegkeg awajtusui.
LUK 22:52 Dutika sacerdote apuji aidau, jega Apajuí ememattain kuitamin aidau apuji nuigtú judío apu aidaujai niina achiktatus kaunau aidaun Jesús chichajak: —¿Wagka kasa achiktasa utugmaina imanikjumesh, espada aidau, numi aidau tinamdaekagmesh tantaugme?
LUK 22:53 Wi kashí kashinig jega Apajuí ememattainum atumjai ijunnuweg duikish jutikagmek achigchau agmaugme. Tujash juka tsawantak atumdauwai, Iwanch inapainakui juniajum juka, tiuwai.
LUK 22:54 Dutikawag Jesusa achiká jukiag sumo sacerdote jeen ejegawaju, dutikiagtai Pedroshkam ikaag patataetus wegau.
LUK 22:55 Nuwi, jegá agaajin jií ikapajag pekagbaunum, Pedroshkam ditajai anamak ekeemsau.
LUK 22:56 Nunittaman makichik nuwa inak, jiinum ekeemtatman wainak, dii wajatu, nunik: —Jusha Jesusjai wekaemajama, tau.
LUK 22:57 Tama Pedro wainchauwa nunin chichaak: —Nuwah, wika wainchaujai, tau.
LUK 22:58 Machik asag, tikitchakam Pedron wainak: —Amesh Jesusa jintintaijitamjama, tau. Tama Pedro ayaak: —Atsa, duchauwaitjai, tau.
LUK 22:59 Tusa makichik hora tumain nagkaemai, tikitchakam iniak: —Dekaskenum jusha niijaimpap wekaenaita, wagki niishkam galileanmaya asa, tuidau.
LUK 22:60 Tiagtai Pedro chichaak: Wika atum tajum nunak dekatsjai. Tusa chichaak wajai, atash shinukui.
LUK 22:61 Nuniai Jesús ayampá Pedron diisú, dutikam Pedroshkam adeaju Apu Jesús chichajak: “Atash eke shinatsaig kampatumá ugtuktinaitme”, tibauwa nuna.
LUK 22:62 Nunik Pedrok nuiya jiinki, senchi kajeká buutiuwai.
LUK 22:63 Aents Jesusan kuitamak ijunaidauk niina dushikinak awatuidau.
LUK 22:64 Dutikainak jiin epetkag iniinak: —Dekakia ¿ya awatamne? tuidau.
LUK 22:65 Tusag nuigtú kuashat pegkegchaun chichajuidau.
LUK 22:66 Nunik tsawagmatai, judío apuji aidau, sacerdote apuji aidau, maestro chicham umiktinun jintinkagtin aidaujai ijunjag Jesusan jukiag Sanedrín ejegawag, iniinak:
LUK 22:67 —¿Amekaitam Cristo? tukagtita, tuidau. Tama Jesús ayaak: —Wi nunuwaitjai takuish, dekaskeapi tujutchattagme,
LUK 22:68 tuja wi inimkuish aigmaitsugme, nuigtush akupjumaitsugme.
LUK 22:69 Tujash yamaiya jui nagkamas Aentsmaga akiinauwa duka, Apajuí ashí senchigtina nuna untsujin ekeemsattawai, tiuwai.
LUK 22:70 Tutai ashí pampanjag iniinak: —¿Untsu amekaitam Apajuí Uchijim? Tuidau. Tuinam Jesús ayaak: —Dekaske atum tajume, tiuwai.
LUK 22:71 Nuna timatai: —¿Nuigtush ya etsegtukti tusaya atsumaji? ii dekas ni chichaamu antugkagjamah, tuidau.
LUK 23:1 Ashí aents aidauk wajajag, Jesusan jukiag Pilato pujamunum ejegawaju.
LUK 23:2 Dutikawag Jesusa tsanumjuinak: —Jujú aents jutii nugkeen chichaman tsuwapak wekaegas: —Witjai Rey Cristunuk; tusa, Roma apujig akimaitsui, tu wekagu asamtai jui itaaji, tuidau.
LUK 23:3 Tiagtai Pilato iniak: —¿Amekaitam Rey judío aidaunu? tau. Tama Jesús ayaak: —Duka ame tujutme, tiuwai.
LUK 23:4 Timatai sacerdote apuji, nuigtú aents tuwakú aina nuna Pilato chichajak: —Wika ju aents bakumamainjinak makichkish waittsujai, tau.
LUK 23:5 Tutai nuní nagkaemasag: —Aanka aents aidaun jintintak dapamkagtú wekaenuwe. Nuniak Galilea nagkamas jintí jintinkagtakua juwish Judeanmash dutiksag dapamkagtú wekaewai, awajuidau.
LUK 23:6 Nu tabaun antuk, Pilato iniimu, ju aents galileanmayachukai tusa.
LUK 23:7 Jesusak Herodes inama nuiyayai tabaun dekaa, Herodesan awetiuwai, niishkam nunú tsawantinig Jerusalén taa pujau asamtai.
LUK 23:8 Herodes Jesusan wainak shiig aneasu, kuashat tsawantai niina wainkatatus wakegá pujú asa, niina pachis chichaidaun antau asa, nunik Jesusan wainchatai iwainakta titatus.
LUK 23:9 Nuniau asa kuashat iniasui, tujash Jesusak makichkish aikchauwai.
LUK 23:10 Nunitai nui sacerdote apuji, maestro chicham umiktinun jintinkagtin aidaujai ijunu wainak senchi tsanumjuidau.
LUK 23:11 Herodeschakam ni suntaji aidaujai, Jesusan dushikinak, jaanch shiig iwajamun anugkug, ataktú Pilato pujamunum awemauwai.
LUK 23:12 Yaunchkek Herodesak Pilatojai shiwag pujuwaitak, nunú tsawanta duik, nuna dutikainak kumpamdayawajui.
LUK 23:13 Dutikawagmatai Pilato sacerdote apuji aidaun, gobernante aidaun nuigtú tikich aents aidaun ijumjau.
LUK 23:14 Dutika chichajak: —Atum ju aents itagtuamugme, aentsun dapampawai tusajum; tujash wi atumi eemtimin iniasjai, dutikaknush dekajuashjai atum nuninai tajum nui bakumamainnak.
LUK 23:15 Nunisag Herodeschakam dekajuache, dutikau asa awagkine; diistajum, makichkish ni mantamnamainnak pegkegchaunak takaschae.
LUK 23:16 Asutiatajum titajai, dutikan akupkatjai, tiuwai.
LUK 23:17 Nu fiestatinig makichik aents tuke jiitai aajakui.
LUK 23:18 Tutai ashí aents aidauk betek pampaajag: —¡Anka mantamnati, Barrabás akupkata! wajaidau.
LUK 23:19 Barrabasnak cárcel egkeawaju yaaktanum pampandayamunum aentsun mau asamtai.
LUK 23:20 Pilato Jesusan akupkata tau asa, ataktú awentsag ditan chichajak: —Dekas Jesusan akupkatjai, tau.
LUK 23:21 Pilato tutai nuní senchi untsumkag: —¡Achigtá! ¡Achigtá! wajaidau.
LUK 23:22 Imatiagtai kampatuma juwishkam Pilato chichajak: —¿Tujash wají pegkegchauna takasé jusha? wika ni pegkegchau takasbaunum bakumaku mantamnamainjinak dekagchau asan, ayatak asutiawagmatai jiiktajai, tau.
LUK 23:23 Tutaishkam nuní senchi untsumkag, achinjati wajainak Pilatonak depetkiajui.
LUK 23:24 Imatiagtai Pilatoshkam, dita sumaina dutiksag uminkati, tiuwai,
LUK 23:25 dutikak dita aentsun jiinkiti tusa segamaina nuna jiikiuwai, pampandayamunum aentsun maamtai cárcel egkeamua nuna, dutikak Jesusnak dita wakegaina dutiksag umiktinme tusa sujuk idaisauwai.
LUK 23:26 Dutikam Jesusan achigtatus juki emainak, cirenenmaya aents Simón daagtin ajajinia minittaman awantag, cruzan ayankajui. Dutikam Jesús eemak wetai, ukuunum yanas wegau.
LUK 23:27 Jesusan kuashat aents nemajus ashinainamunum, nuwa aidaushkam imanisag ukunum saegas, untsu untsumas buu buutuinakua ashinaidau.
LUK 23:28 Imatiagtai Jesús nuwa aidaun ayampatua chichajak: —Jerusalegnumia nuwa aidauwah, minak eganjaigpajum, atumek egaamakjum uchijum anentaimtusjumesh buuttajum.
LUK 23:29 Wagki tsawan jegagtamiagtinai, nunikmatai: “Nuwa kaga aidauk, uchinash jujegchau, muntsujinash amuntsuachu aidauk yajau aneas batsatainatsuapi wajatin ainagme”.
LUK 23:30 Nuniakjum muja chichagkujum: “¡Yutujatuata!” takujum, mujauch aidaush: Uujatkata, wajatin ainagme.
LUK 23:31 Wi tudau takaschau aig, imatijuawag waitkajuinaish, ¿Apajuish wagkag tudau aidaunash waitkaschati? tiuwai.
LUK 23:32 Nuigtushkam jimag magkagtinun jukiajui, Jesusjai achijag maawagtatus.
LUK 23:33 Nunikag Gólgota tutainum ejegawag, Jesusan achijajui nuigtú magkagtin aidaunashkam, dutikawag makichik untsugnum awajuinak tikichnak menajin awajawajui.
LUK 23:34 Dutikam Jesús chichaak: “Apawah, tsagkujata, wagki dita jutikaina nunak dekainatsui”, tau. Nuniai suntag aidauk, yana kayajig jiinkit nunú Jesusa jaanchjinak jukiti tusag wasugkamaidau.
LUK 23:35 Nuniamunum aents aidauk dii ijuntuinai, gobernante aidau Jesusan dushikinak: —Tikichnak uwemtiknuwe, yamai niishkam nigki uwemjati, ju dekas Cristo, Apajuí etegkamuitkug, tuidau.
LUK 23:36 Nunisag suntag aidaushkam jegaantag dushikinak, vino chujuinun aagtatus jegantag,
LUK 23:37 chichajuinak: —Ame judío Reyjiyaitkumek, amek uwemjakia, awajuidau.
LUK 23:38 Tuja ni chaikenchakam griego, latín, hebreo chicham aidauwai: “JUUWAI REY JUDÍO AIDAUNUK”, tusag agatjajui.
LUK 23:39 Jimag magkagtin achijam deta nuiya makichik Jesusan pegkegchau chichajak: —Ame dekas Cristuitkumek, amek uwemjam, aaní nematsuk amea akaikim, jutiish uwemtikagtujia, tau.
LUK 23:40 Tutai nui tikich detau aiká jiyak: —¿Amek Apajuik ishamatsmek, amesh niijai betek suwimak juwayatkumesh?
LUK 23:41 Jutiik dekaskenum waituinaji, ii nunikbaunum suwimak juwau asá; tujash juka makichkish pegkegchau takasbauk atsujui, tau.
LUK 23:42 Tusa Jesusan chichajak: —Jesusah, minash ame apu wajasam inamjattam nuniakmesh kajimatjukipa, tiuwai.
LUK 23:43 Tutai Jesús ayaak: —Dekas tajame, yamaiya juik amek wijai paraíso pujuttame, tiuwai.
LUK 23:44 Etsa tutupit ai nagkamas, a las tres wegaish ashí nugkanum suwe wajas asauwai.
LUK 23:45 Etsa suwe wajas ai, jega Apajuí ememattainum jaanch ejaamu ichiinak jimaituk kanakui.
LUK 23:46 Nuniai Jesús senchi untsumak: —¡Apawah, amina uwegmin mina wakanjunak idaijai! tau. Nuna tusa jakauwai.
LUK 23:47 Nunik jakamtai Capitán wainak, Apajuin emematak: —Dekas ju aentsua juka pegkegchaukesh atsujui, tau.
LUK 23:48 Ashí aents nui ijunaidauk, nu nunikbaun wainkag, waketuinak, wake besemag dekapenak detsepenak awatkiag weedau.
LUK 23:49 Nuninai ashí Jesusa waintaiji aidauk, nuwa Galilea nagkamas saetusag yujajakú aidaushkam, ikaag ijunas Jesusan dii ijuntuidau.
LUK 23:50 Judeanum yaakat Arimatea tutai awa nuiya José daagtin, niishkam apu chichaman inagnau aina nuiya, aents pegkeg nuigtushkam pegkeg aidaunak takaak pujuwa nu,
LUK 23:51 Apajuí inamjatnujin dakak pujú asa, Jesusan maata tiagtaish dakitjauwa nu
LUK 23:52 Pilato jegajua Jesusa iyashin segauwai.
LUK 23:53 Dutika cruznumian akakí sabanayai pempeag, kaya waa muun tai umikbau, makichik aentskesh ukuschamunum egkeauwai.
LUK 23:54 Nunú tsawantak, tsawan ayamtai atin asamtai, ashí umintai aajakui.
LUK 23:55 Nuwa aidau Galilea nagkamas Jesusa nemajus yujasaju aidaushkam, José wetai pataetukaju, nunik wainkaju Jesusa iyashin wajuk ukusaje nuna,
LUK 23:56 nunik waketug jegá kaunkag, Jesusa iyashí ukatkatnun kugkuin shiig pegkeg aidaun najanawaju, dutikawag tsawan ayamtai tsawaju asamtai, ayamjaju chicham umiktinnum tawa nunisag.
LUK 24:1 Tumig tsawagmatai shiig kashikmasag nuwa aidau kugkuin shiig pegkeg najanamujin jukiag, Jesús ukusbaunum wegaju.
LUK 24:2 Nunik jegakmag ukumatai kaya muuntai epenbauk ekemak atatman wainkaju;
LUK 24:3 nunik utuawaju, tujash Apu Jesusa iyashinak wainkachajui.
LUK 24:4 Nunikag puyatkag, wajukamki tusag iniininak wajainai, jimag aents jaanch winchamtinun nugkuaju ditai ayaumas wajaantaju.
LUK 24:5 Nuna wainkag senchi ishamkag, nugká tsuntsumá ijunainai chichajak: —¿Wagka iwaaku pujaush jakau ukutainmash egagme?
LUK 24:6 Juig atsawai, nantakne. Adeagtajum ni Galilea pujus chichaak:
LUK 24:7 “Aentsmaga akiinauwa nunak, aents tudaugtin aidaunum sujukagtatui dutikawagmatai achijag maawagtatui, dutikam kampatum tsawanta jui nantaktatui”, tujabiajua nu.
LUK 24:8 Tama ditashkam Jesús chichaak nuniktatjai tibauwa nuna adeajaju.
LUK 24:9 Nunik ukusbaunmaya waketug jegawag, ashí dita wainkamujinak niina jintintaiji once juwakajua nuna ujakajui nuigtú tikich aidaunashkam.
LUK 24:10 Apóstol aidaun ujakajua duka: María magdalanmaya, Juana, tikich María Jacobo dukujiya nunú, nuigtú tikich nuwa aidau aajakajui.
LUK 24:11 Nuwa tusa etsejiagtaish, wainak tu yujatsuash tusag, ditak dekaskeapi tichajui.
LUK 24:12 Nuniagtai Pedrok jiinkug tupi tupikakua Jesús ukusbaunum jegantá, tekená diikmá imá sabananak wainkauwai, nunik anentai jegacha wajukamki tusa ane anentaimkawa jegá wakitkiuwai.
LUK 24:13 Nunú tsawantinig, Jesusa jintintaiji aina nuiya jimag, yaakat yaijuch Emaús tutainum wedau, Jerusalén juwaki once kilómetro awa nui jegawagtatus.
LUK 24:14 Nunik weenak ashí Jesús dutikamun pachisag chichai chichainakua weedau.
LUK 24:15 Nuna tuinak ditak tudayinai, Jesuschakam amainag ditajai ijunag ashinu.
LUK 24:16 Tujash ditak, wainainayatkush Jesusapita tuinachu.
LUK 24:17 Nudiagtai Jesús iniak: —¿Jintá wesagmesh, wají pachisjumea chichamugme? Tau. Tama wake besekag ijuntsajui.
LUK 24:18 Tutai Cleofas daagtin ayaak: —¿Imá amekek ashí wají Jerusalén nagkaemaki nunú dekatsum? Tau.
LUK 24:19 Tama ni iniak: —¿Wají nagkaemakne? Tau. Tutai: —Jesús nazaretnumia profeta aayi, takaamujish tuja chichamesh senchigtin Apajuí eemtin nuigtú ashí aents aidaunmashkam;
LUK 24:20 nuna, sacerdote apuji aidau nuigtú jutii gobernanteji aidaujai sujukagmae achijag maatnume tusa.
LUK 24:21 Tujash jutiik, niimpap Apu wajas Israel aidautinak agkanmitkagmattaji tusa dakauji. Nuna dutikawaja duka kampatum tsawan nagkaemawai.
LUK 24:22 Nuniamunum ujumak nuwa jutiijai yujau aidau kashikmas Jesús ukusbaunum wegaju, anentai jegamainchaun,
LUK 24:23 Jesusa iyashin wainkachag, waketug kaunawag, ángel aidau wainkamji nunika ajin, Jesusak iwaaku pujawai tujamaji tusa etsejiagtai,
LUK 24:24 ujumak jutii kumpají aidau Jesús ukusbaunum wegag, nuwa tiaja nunak imatiksag wainkaje, tujash Jesusnak wainkachaje, tuidau.
LUK 24:25 Tiagtai Jesús ayaak: —¡Wagka anentainkachush ainagme nuigtush dekaskeapi tumainchauk dekapeajum ashí profeta tiajua duka!
LUK 24:26 ¿Atumek dekatsjumek Cristuk niina imanjiya nuwig eke waitsuk waittsatna duka?
LUK 24:27 Tusa, Moisés agagbauwa nui nagkamas nuigtú ashí profeta aidau, ashí agagbaunum niina pachis tawa nuna ujakajui.
LUK 24:28 Nunik yaakat yaijuch Emaús jegamunum, Jesusak nagkaemaki wegau, nuní atushat wegau wajukmaina numamtuk.
LUK 24:29 Nunitai dita chichajuinak: —Jui jutiijai juwakta, kiyawai, tuidau. Tiagtai Jesuschakam wayauwai ditajai juwaktatus.
LUK 24:30 Nunik ditajai mesanum jegantá pekagbaunum, pagkan juki Apajuin see tusa puukú, dutika susaju.
LUK 24:31 Nuna dutiktai dekawajui Jesusapi tusag, nuniaig nigka megkaekauwai.
LUK 24:32 Nunikmatai ditak pempeentunikiag: —¿Wagkaik jintá minis Apajuí chichameg nuní awai tusa ujapakui, shiig aneasua minimag duwish anentaimjaish diischamji? tudayinau.
LUK 24:33 Tusag tamawaik jiinjag Jerusalén wakitkiajui, nunik jegakmag once aina nu nuigtú tikich aidaujai ijunag batsatun wainkajui.
LUK 24:34 Nunik kaunamtai ujainak: —Dekas Apu Jesusak nantakne, nunik Simogkan wantintuke, tuidau.
LUK 24:35 Tama ditashkam jintá wesá wainkamun nuigtú pag puuká susam Jesusapi tusa dekamujin pachis ujaidau.
LUK 24:36 Nuna pachisag chichainak batsatai, Jesús ditá ejapen wajantá, chichaak: —Agkan pujamu atumnash ajutjamti, tau.
LUK 24:37 Tama ditak senchi ishamkaju, wakan waintsujiash tusag.
LUK 24:38 Nuniagtai ditan chichajak: —¿Wagka imaanikjumesh ishamagme? ¿Wagka utujimsagmesh anentaimjutjume?
LUK 24:39 Mina uweg aidau diistajum nuigtú daweg aina dushakam, witjai, achigká diigsatajum; makichik wakanik nejeesh ukunchí aidaukesh atsugnai, mina ajutu wainjum junikag.
LUK 24:40 Nuna tii niina uwejin, dawenmashkam achiamu aajakua nuna ditan inaktusajui.
LUK 24:41 Dutikam wainkag shiig aneenayatak dekas nantakneapi tumainchau dekapiagtai: —¿Yumainuk atsugtamainawak? tau.
LUK 24:42 Tutai makichik namak achijuamun kupik susaju,
LUK 24:43 dutikam niishkam juki ditá eemtin yuwauwai.
LUK 24:44 Nunik chichaak: Juna pachisan atumjai pujubiag duwi, Moisés chicham umiktin agagbaunum, profeta aidau agajajua nuwish nuigtú salmosnum ashí mina pachitus agagbauwa duka uminkattawai tusan ujayajime, tiuwai.
LUK 24:45 Nuna aatus taku Apajuí chichamen agagbauwa nuna shiig dekamtikawajui.
LUK 24:46 Nuna ti nuigtú chichaak: —Aaja agagbauwai, Cristuk jakatnai, nunik kampatum tsawanta jui nantaktinai,
LUK 24:47 nunikmatai niina daajin pachis chichagkagtuinak ashí nugkanmaya aidaush anentai yapajiawag, tudaujin tsagkugnagtinme tusag, duka Jerusalén nagkamsajum
LUK 24:48 atum ainagme ju ashí wainkaujum nunú etsejatin aidautigmek.
LUK 24:49 Tujash yamaikik Jerusalegkak juwaktajum, nuniagmin wi mina Apag Wakaní Pegkejin anagtamawajua nuna awetitjime, nunikmatai nayaimpinmaya senchi jukitajum, tiuwai.
LUK 24:50 Nunik Jesusak jintintaiji aidaun yajuak yaakta ukumtiki Betania ejegawajui, nunik nui Jesús uwejin takui: Apajuí yaimpakti, tiuwai.
LUK 24:51 Tusa Apajuí yaimpaktinme tamawaik yakí takuniuwai, nunik nayaimpinum wakitkiuwai.
LUK 24:52 Nunikmatai ememati ukuinak, shiig aneasag Jerusalén waketjajui.
LUK 24:53 Nunikag jega Apajuí ememattainum kashí kashinig tuke ijuntsagké aidau Apajuin emematuinak.
JOH 1:1 Yama nagkamtinig Chichamak aajakui, nu Chichama duka Apajuijai aajakui, nuigtush Chichama duke Apajuí aajakui.
JOH 1:2 Nagkamtinish nigka Apajuijai pujujakui.
JOH 1:3 Ashí wají aidauk ni najankamu ainawai, nunin asa makichkish ni najanachbauk atsawai.
JOH 1:4 Niinig pujutash aajakui, nunú pujuta nu aentsun tsaaptinji aajakui.
JOH 1:5 Nu tsaaptin suwe aidaunak tsaaptin awajsauwai, imatikamu asa suwea dushakam tsaptinnak depetkachajui.
JOH 1:6 Aajakui makichik aents Apajuí awemamu, Juan daagtin,
JOH 1:7 nigka tsaaptinun pachis etsegtukti tibau aajakui, nunú etsegtai ashí aents aidauk dekaskeapi titinme tabaunum.
JOH 1:8 Juagkak tsaaptina nu aajakchauwai; ayatak tsaaptina nuna etsegtukti tusa awemamu aajakui.
JOH 1:9 Nu dekas tsaaptin ashí aentsun tsaapmitkauwa nu, wamak ju nugka jui taatin asamtai.
JOH 1:10 Nunú tsaaptinuk nugká akiinauwai, nuigtush nugkak ni najanamu aajakui; tujash nugkanmaya aidauk, juwapita Apajuí awemamuk tusag dekachaju ainawai.
JOH 1:11 Niinu aidau batsatbaunum tauwai, tujash niinu aina duka dakitjajui.
JOH 1:12 Dutikawagmataish ya aidauwa chichaman etsegtai shiig wakejus antugkag dekaskeapi tiaje, nu aidaunak Apajuí uchijí emakui,
JOH 1:13 nunin asag Apajuí uchijí ainawai, aents wakegamunum akiintai aina nunin ainatsui, Apajuiyai akiinkaju asag.
JOH 1:14 Nunú Chichama duka Aentsmaga akiina jutiijai wajumchik mijan pujusui. Nuna imanjig jutii wainkabiaji, Apajuí Uchijí makichkiuchia nu, wait anenkagtamuji nuigtú dekaskejishkam.
JOH 1:15 Juan Jesusan pachis etsegtak: “Juuwai wi niina pachisan: Mina ukujui minitta nuuwai mina nagkaetasuk, wagki nigka wisha atsaig pujujakú asa” timayag duka, tiuwai.
JOH 1:16 Wagki ashí niina imanjiya nuiyag pegkeg pujutak jukiuwaitji, shiig kuashat anentag wait anenjamjauwa dui.
JOH 1:17 Apajuik chicham umiktina nunak Moisesai sujamsau aajakui, tujash wait anenkagtamu nuigtú dekaskea duka Jesucristui jukiuwaitji.
JOH 1:18 Apajuinak makichik aentskesh tuke wainkachu ainawai, ni Uchijí makichkiuch Apajijai ijunag pujuwa nunú dekamtijamauwai.
JOH 1:19 Juna Juan etsegkauwai, judío apuji aidau Jerusalén batsamsag sacerdote aidaun, levita aidaujai Juagkan iniasti niish yakita tusag ishitkajua dui.
JOH 1:20 Nu aidau tusá iniam Juan ugmamtsuk etsegtumak: —Wika Cristuchuitjai, tiuwai.
JOH 1:21 Tutai ataktú iniinak: —¿Tujash amesh yaitpa? ¿Eliaskaitam? tuidau. Tama: Duchauwaitjai, tau. Tutai: —¿Profeta taatnai tibauwa dukaitam? Tamashkam: —Atsa, tiuwai.
JOH 1:22 Tutai: —¿Tujash amesh yaitpa? jutii awetabiagma nu ujakta tau asá dekatasa taji, ¿amesh yaitjai tumame?
JOH 1:23 Tama Juan ayaak: —Wika makichik chicham uwegshunum untsubau antuekatnai: “Apu minitin jinta tutupit dakuektajum”, titinai tusa profeta Isaías tiuwa nuuwaitjai, tau.
JOH 1:24 Fariseo aidau ujumak aents aidaun Juagkan iniasti tusa awemamu aidau,
JOH 1:25 iniinak: —Ame Cristuchu, Eliaschau, profetakesh achayatkumesh ¿wagka aentsush yamiame? tuidau.
JOH 1:26 Tiagtai Juan ayaak: —Wika yumí yamijatjai, tujash atum ainajum anuiya awai makichik, duka atumek waintsugme,
JOH 1:27 nigka duik nagkamas tuke pujuwaitak mina ukujui patatkawai. Wika niiya ibauchu asan ni sapatji jigkamunakesh atitmaitsujai, tiuwai.
JOH 1:28 Ashí jujú aina duka Betábara Jordagka amain, Juan yamijatak pujamunum nunikui.
JOH 1:29 Kashinia dui, Juan Jesusan wainkauwai, niina adijkatatus minittaman, nunik: “Diistajum, auwai Apajuí Uwigji, ashí aents nugkanmaya aidau tudaujin akikmak mantamnatta nunú.
JOH 1:30 Juuwai wi niina pachisan: ‘Mina ukujui makichik aents minitta nuuwai mina nagkaetasu, wagki nigka wisha atsaig tuke pujujakú asa’, timag duka.
JOH 1:31 Wikishkam niinash yaita nunak dekachiatkun yumí yamijatmajai, Israel aents aidauk ni wantintai dekaatnume tau asan”, tiuwai.
JOH 1:32 Junashkam Juan: “Wakaní Pegkeji nayaimpinmaya pauma nunin wajas akaiki, Jesusai ekeemtatman wainkabiajai tusa etsegkauwai.
JOH 1:33 Nuniakuish eke dekachbaijai niish yaita nunak; tujash yumí yamijatjata tusa awetiuwa nu chichagtak: ‘Wakaní Pegkeji akaiki yayai ekeemu wainkattame, nunú atatui Wakaní Pegkejijai yamijatjatnuk’, tujutmayi.
JOH 1:34 Wika nuna wainkau asan, nigka Apajuí Uchijiyai tusan etsegtajai”, tiuwai.
JOH 1:35 Kashinia dui, Juan ataktú jimag jintintaijijai wajai,
JOH 1:36 Jesús nagkaemattaman wainak: —Diistajum, auwai Apajuí Uwigji, tau.
JOH 1:37 Tutai jimag Juagká jintintai aidau antukag, Jesusan nemagkajui.
JOH 1:38 Nunik miniagtatman Jesús ukujin ayampá diikmá wainak: —¿Wají atumesh egagme? tau. Tutai dita aiinak: —Rabí (nunak maestro taku tawai), ¿tuwí pujame? tuidau.
JOH 1:39 Tiagtai Jesús ayaak: —Minitajum nunikjum wainkatajum, tau. Tima ditashkam wegag ni pujamujin wainkajui, nunikag nuig juwakajui, a las cuatro tumain wegau asamtai.
JOH 1:40 Jimaja nuiya Juan tabaun antuk Jesusan nemagkajua duka Andrés, Simón Pedro yachiya nu aajakui.
JOH 1:41 Andrés Jesusan wainak dekatkauk ni yachi Simogkan wejí: —Yamaik Mesías wainkaji, tusa ujakui. (“Mesías” tawa nunak “Cristo” taku tawai.)
JOH 1:42 Tusa Simogkan juki Jesús pujamunum ejegauwai, dutikamtai Jesús wainak, chichajak: —Amek Simogkaitme, Juagká uchijí, tujash yamaik amek Cefas atatme, tiuwai. (Cefas tawa nunak Pedro taku tawai.)
JOH 1:43 Kashinia dui, Jesús Galilea wekamá Felipen igkug, chichajak: —Nemagtukta, tiuwai.
JOH 1:44 Felipek betsaidanmaya, Andrés Pedro aina nuna yaaktajiya nuiyag niish aajakui.
JOH 1:45 Felipeshkam Natanaelan ujaktatus weuwai, nunik: —Jesús nazaretnumia, José uchijí wainkamji, niina pachis Moisés chicham umiktinnum agajua nu, nuigtú profeta aidaush dutiksag agajajua nu, tau.
JOH 1:46 Tama Natanael chichaak: —¿Nazaretnumiash makichik pegkejash jiinmainkaih? tau. Tutai Felipe ayaak: —Dekas wemí amesh wainkamnum, tiuwai.
JOH 1:47 Tima Natanael Jesús pujamunum jegantatus wetatman ikaag wainak: —Ju mina juuwai dekaskenum Israel aents, tsanumtanash tsanumchauwa nu, tau.
JOH 1:48 Tama Natanael ayaak: —¿Tuwí minash waitkamume? tau. Tutai Jesús ayaak: —Eke Felipe tajutjama ujapatsaig, higuera wakentin pujamin wainkamjame, tiuwai.
JOH 1:49 Tama Natanael ayaak: —Rabí, amek Apajuí Uchijiyaitme, ametme Rey Israeldau, tau.
JOH 1:50 Tama Jesús ayaak: —¿Higuera wakentin pujamin wainkamjame taja duikik, dekaskeapi tujutam? juna nagkaesau wají aidau wainkattame.
JOH 1:51 Tusa nuigtú chichaak: —Dekas tajime, Atumek nayaim ujanmatai Apajuinu ángel aidau Aentsmaga akiinauwa nuwi taa waketuidau wainkatin ainagme, tiuwai.
JOH 2:1 Kampatum tsawan asa nuwenbau asauwai Caná Galilea nugkanum awa nui. Jesusa dukujish nui pujau.
JOH 2:2 Nunú nuwenbaunum Jesusnashkam jintintaiji aidaujai ipawajui, dutikamu asa weajui.
JOH 2:3 Nuniamunum vino abuekamtai Jesusan, dukují chichajak: —Vinonak amukaje, tau.
JOH 2:4 Tama Jesús ayaak: —Dukuwah, ¿wagka dusha minash tujutme? Wi takamainjuk eke mina tsawanjuk jegatsui, tau.
JOH 2:5 Tutai ajaamak yujaun María chichajak: —Ni tujamtata duka imatiksagmek dutikatajum, tiuwai.
JOH 2:6 Nui batsatu seis buits kaya najankamu yumi aimtai, judío aidau pegketasa takataiji, makí makichik buitsnumag cincuenta, nuniachkush setenta litro tumain pimuidau.
JOH 2:7 Jesús ajaamau aidaun chichajak: —Buitsnum yumi aimjatajum, tiu. Timatai ajaamau aidau yumin buitsnum betsamtsat aimjaju.
JOH 2:8 Dutikawagmatai Jesús chichaak: —Machik shikikjum fiesta chichamja auwá susatajum, tau. Tutai dutiksag susajui.
JOH 2:9 Fiesta chichamjauk yumi vino emamun uwag dekapsauwai, tuwiyanak aikainawa nunak dekatsuk; nunak imá inak aina duke dekaidau, dita yumin aimjaju asag. Nunik fiesta chichamja nu, nuweena nuna untsuká,
JOH 2:10 chichajak: —Tikich nuwenaidauk dekatkauk vino pegkejan ajaabau agmae, dutikawag ipak dukap uwajagmatai, dui vino imanchauchin ajamau agmae. Tujash amek, yamaikish vino pegkeja duke ajamá pujame, tiuwai.
JOH 2:11 Juna nagkamchak Jesús aents dutikmainchaun iwainakua nunak Caná, Galilea awa nui dutikauwai. Aatus niina imanjin iwainakmatai jintintaiji aidauk dekas Apajuí Uchijimpapita tiajui.
JOH 2:12 Nuna dutika Jesusak Capernaúm weuwai ni dukují, niina yachi aidau nuigtú ni jintintaiji aidaujai; nunik nui ujumak tsawan batsamsajui.
JOH 2:13 Judío aidau fiestamtaiji, Pascua jegattak wajasmatai, Jesusak Jerusalén weuwai.
JOH 2:14 Nunik jega Apajuí ememattainum waikmá toro aidaun, uwig aidaun, paumá sujin aidaun nuigtú kuichki yapajiin aidaushkam pekajaidaun wainkauwai.
JOH 2:15 Nunik nuwi duwap etsentsjamu atatman juki chapikmag, jiyaká iwiyag, jega Apajuí ememattainum batsatunak ashí jiijui, uwig aidaunash, toro aidaunashkam. Dutikak kuichki yapajiin aidau kuichkijinak nugká nagkimjuk, mesajinash akaketkauwai.
JOH 2:16 Dutika, paumá sujin aidaun chichajak: —Jui aina juka jiigtajum. Mina Apajú jeeg, wají sujutai emaigpajum, tiuwai.
JOH 2:17 Dutikamtai jintintaiji aidau, agagbaunum chichaak: “Amina jeemnak senchi akasmatjai”, tawa nuna adeajajui.
JOH 2:18 Dutiktai judío apuji aiinak: —¿Wají iwainakmea aents chicham antugtai wajukea nunikmesh aikame? tuidau.
JOH 2:19 Tama Jesús ditan ayaak: —Jega Apajuí ememattaiya ju tegaktatjume, dutikawagmin kampatum tsawan asan ataktú jegamkattajai, tiuwai.
JOH 2:20 Tutai judío apuji aidau chichajuinak: —Cuarenta y seis mijadai ju jega Apajuí ememattai jegamkamua duká, ¿ame kampatum tsawantai jegamkattam? tuidau.
JOH 2:21 Tujash ni, jega Apajuí ememattai tawa nunak, niina iyashin taku tiuwai.
JOH 2:22 Nuadui, jakamtai ukusbau aajakú nantakmatai jintintaiji aidau adeajajui nuna tiuwa nuna; nunikag Agagbauwa nuna nuigtú Jesús tibauwa nunashkam dekaskeapi tiajui.
JOH 2:23 Jesús fiesta Pascua tutain inagkeaktatus Jerusalén jegaa pujai, kuashat aents niiní dekaskeapi tiajui, aents dutikmainchaun dutikaun wainaidau asag.
JOH 2:24 Tujash Jesusak ditanak kajinas anentaimtuinachu, ashí ditanak wainu asa;
JOH 2:25 nuniau asa atsumachu aents aidaun pachis etsegtuktinme tusag, wagki nigka aentsun anentaimtajinak shiig dekaju asa.
JOH 3:1 Aajakui makichik fariseo Nicodemo daagtin judío aina nui eme anentsá diitai.
JOH 3:2 Nunú kashi Jesusan ausatatus weuwai, nunik: —Rabí, jutiik dekainaji, aminak Apajuí jintinkagtuati tusa awetabiuwa duka, wagki makichkish ame aents dutikmainchau iwainam jutikmainchau ainawai, Apajuí niijai achataik, tau.
JOH 3:3 Tama Jesús ayaak: —Dekas tajame, aents ataktú akiinachuk Apajuí inamtaijinak wainmain ainatsui, tau.
JOH 3:4 Tutai Nicodemo iniak: —¿Muuntuch wajasush utugsaya akiinmainaita? ¿Ataktú dukují wakeen egkemkag akiinmainait?
JOH 3:5 Tutai Jesús ayaak: —Dekas tajame, yuminum nuigtú Wakaní Pegkejiya nui akiinachuk, Apajuí inamtaijinig waimainchau ainawai.
JOH 3:6 Aentsnum akiinaina duka, aentske; Wakania nui akiinauk, wakania duke.
JOH 3:7 Wi tajam duka, anentai jegagchamnuk anentaimtipa, nunak: “Ataktú akiinmain” ainawai.
JOH 3:8 Daseg ni wajuk wakegawa nunisag umpuawai, nunú dasentu antakmesh, tuwiya minawa, tuja tuwí wegawa duka dekatsme. Juninke ashí aents Wakaní Pegkejin akiinaidaush, tiuwai.
JOH 3:9 Tama Nicodemo ayaak: —¿Dusha wajukaya nunimainaita? tau.
JOH 3:10 Tutai Jesús ayaak: —¿Ame Israela maestrojiyaitkumek, dusha dekatsum?
JOH 3:11 Dekas tajame, jutiik dekamu chichainaji, tuja wainkamu etsejuinaji. Tujash jutii taji duka dekaskeapi tatsugme.
JOH 3:12 Wi ju nugkanmaya wajiin pachisan takuish dekaskeapi tatsujum aniautigmesh, ¿Utusagmek dekaskeapi titagme nayaimpinmaya pachisa chichaakuish?
JOH 3:13 “Makichkish nayaimpinum wakauk atsawai; nayaimpinmaya akaikiuwa duke, duka Aentsmaga akiinauwa nunuwai.
JOH 3:14 Moisés dapi dakumká najanamun uwegshunum yakí jiikua numamtuk, Aentsmaga akiinauwa nunash yakí jiikagtinai,
JOH 3:15 ashí aents niina dekaskeapi tuidauk, pujut nagkanchaun jukitnume tabaunum.
JOH 3:16 “Wagki Apajuí ashí aentstin senchi anejatu asa, Uchijí makichkiuchia nuna sujamsauwai, ashí niina dekaskeapi tuidauk megkaekashtinme, ayatak pujut nagkanchau ajitnume tau asa.
JOH 3:17 Wagki Apajuik Uchijinak ju nugka juig aents aidaun suwimkan susati tusag awemachui, ayatak aents aidau niiní uwemtan jukitnume tusa awemauwai.
JOH 3:18 “Niina dekaskeapi tuidauk, bakumashtinai; tujash niina dekaskeapi tuinatsu duka bakumatnum juwakajui, wagki Apajuí Uchijí makichkiuchia nuna daajin dekaskeapi tichaju asag.
JOH 3:19 Dekaskeapi tuinachu bakumakbauwa duka juuwai: tsaaptinuk ju nugká juig tae, tujash aents aidauk tsaaptinnak dakituinawai, suwen imá senchi wakegaidau asag tudau takaina nuna iwaintugkai tuidau asag.
JOH 3:20 Wagki ashí aents pegkegchaun takaina duka, tsaaptinnak dakituinawai, nunidau asag tsaaptinnak adijainatsui, pegkegchau aidau takaamujin iwaintugkai tuidau asag.
JOH 3:21 Tujash dekaskea nuna takaidauk, tsaaptinnum mininawai, Apajuí wakegamu takaamua nu paan iwainakbau atí tuidau asag”.
JOH 3:22 Nuna tii, Jesús jintintaiji aidaujai Judea nugkanum weuwai, nunik nui ditajai pujus yamijatu.
JOH 3:23 Nuniai Juagshakam Enón yamijatu, Salimnum tikiju awa nui, nuwi kuashat yumi au asamtai; nuwi aents aidauk weedau yamimajagtatus.
JOH 3:24 Nunak Juagkak eke cárcel egkeachbau asa nunikui.
JOH 3:25 Nuniamunum Juagká jintintaiji aidau, makichik judiojai pegkeamun pachis tudayinau,
JOH 3:26 nunikag Juagkan jegajuawag, chichajuinak: —Rabí, Jordagka amain amijai pujubia nu, ame ni pachisam etsegmayum nunú yamijattai, kuashat aents aidauk tuwajuinawai, tuidau.
JOH 3:27 Tama Juan chichaak: —Apajuí dutikata tichamunak aentsuk makichkish dutikmaitsui.
JOH 3:28 Atumetjume wi tibau antuku aidautigmek, wika Cristuchuitjai, ayatak ni minitin asamtai emtika awemamuitjai tibaijim nunú.
JOH 3:29 Nuwenbaunum, nuwe atinun achiaka duka nuwatkatna nuuwai, tuja aishmag nuwenatna nuna kumpajig ayaumas wajas nunú chichatai antak shiig aneawai. Wishakam nunisnuk senchi shiig aneajai ju chichainamu antakun.
JOH 3:30 Niiyai imá eme anentam atata duka, nuniakui wika imanchauch juwaktatjai.
JOH 3:31 Yakiya tauwa nuuwai ashí nagkaekagtasua duka. Nugkanmayaya duka, nugkanmayagke, nunin asa chichakush nugkanmayanak chichawai. Tujash nayaimpinmaya mina nuuwai ashí nagkaekagtasua duka;
JOH 3:32 nunin asa ni wainkamujin nuigtú antukbaujin etsejui, nunitaish makichkish dekaskeapi tuinatsui ni etsegbaunak.
JOH 3:33 Tujash ni etsegbaun antujuina nuuwai, Apajuí tabauk dekaske tuina duka.
JOH 3:34 Apajuí awemamua duka Apajuí chichamenak chichawai, wagki Apajuí Wakaní Pegkeji ashí susamu asa.
JOH 3:35 Apajiya nu Uchijin aneau asa, ashí wají aidaunak niina uwejin idaitusui.
JOH 3:36 Duwi niina Uchijin dekaskeapi tuidauk, pujut nagkanchau ajuinawai, tujash niina Uchijiya nuna dekaskeapi tuinachuk, nu pujutak atsujuinawai, nunin asag Apajuí suimkaji ishamaina nunak jukiagtinai, tiuwai.
JOH 4:1 Jesús antuku fariseo aidau dekawaje Jesús yamiamua nu Juagká jintintaiji aidau nagkaesau kaweawai tuinawai tabaun.
JOH 4:2 (Jesusak yamijattsaig niina jintintaiji aidau yamijatuinaig tuidau.)
JOH 4:3 Nuna Jesús dekaa, Judeanak ukuak ataktú Galilea weuwai.
JOH 4:4 Nunik Samaria nugkanum nagkaemak,
JOH 4:5 Samaria nugkanum yaakat Sicar tutainum, Jacob ni uchijí Josen nugká susauwa nui tikiju jegauwai.
JOH 4:6 Nuwi au Jacob nugka tai yumi chigkamu aajakua nu. Jesús miná minakua pimpikiu asa, nugka tai yumi chigkamunum ayaumas ekeemsauwai, etsa tajiastatak wegai.
JOH 4:7 Nuniai samarianmaya nuwa yumin shikiak tantamtai, Jesús chichajak: —Minash machik yumi ajamjusta uwagtajai, tau.
JOH 4:8 Jintintaiji aidauk yaakat yutain sumaktasag wegaju ai.
JOH 4:9 Tujash judío aidauk samarianmaya aidaujaig dakitdayin asag, nuwa ayaak: —¿Wagka ame judiowaitkumesh, wi samarianmaya nuwa aish, yumi ajamjusta tusamesh segatme? tau.
JOH 4:10 Tama Jesús ayaak: —Apajuí anentag awemamua nu yumin segapa nu dekakmek, dekas tajame, ameshkam segamainaitme, dutikamak nigka yumi iwakua nuna amamainai, tiu.
JOH 4:11 Tutai nuwa chichaak: —Apuh, yumi shikitai takaktsum aniaumesh, yumishkam initka nunin aish, ¿tuwiya yumi iwakush sujustatme?
JOH 4:12 ¿Ame ii muunji Jacob aajakua nunú nagkaesaukaitam? Ii muunji Jacob aajakua nu junak nugká tai yumin chigká ukugtamkiuwai. Niishkam junak ashí ni uchijijai umujakui, tagkujinashkam junak suujakui, tau.
JOH 4:13 Tama Jesús ayaak: —Ashí ju yumia juna umuidauk tuke kitabiagtin ainawai,
JOH 4:14 untsu wi yumí susattag nuna uwajuk, tuke kitaagchatin ainawai, ayatak wi yumí susattag nunú niiní yumi pukuni jiinama imaní au asa, pujut tuke atina nu ajitnai, tiuwai.
JOH 4:15 Tama nuwa ayaak: —Apuh, minash nunú yumi sujustá, kitamchau atajai, nuigtú yumí shikiaknush minichu atajai, tiuwai.
JOH 4:16 Tutai Jesús chichajak: —Weme aishum jukim, jui taata, tau.
JOH 4:17 Tama nuwa ayaak: —Wika aishinchauwaitjai, tiuwai. Tutai Jesús ayaak: —Dekas tame aishinchauwaitjai tame duka;
JOH 4:18 tujash cinco aishum ajutjamajakui, tuja yamai ajutjama dushakam aishumchauwai. Duwi dekas tiume, tau.
JOH 4:19 Nunú tama nuwa chichaak: —Apuh, profeta diyajame;
JOH 4:20 iina muunji aajakajua nu Apajuí emematujakbauk au muja auwai, tujash judío aidautigmek, Apajuí emematmainuk imá Jerusalegka nuigki tinu ainagme, tau.
JOH 4:21 Tutai Jesús ayaak: —Nuwah, dekaskeapi tujutta, hora jegawai imá ju muja juig, imá Jerusalegkak Apagnak emematchagtata nu.
JOH 4:22 Atumek dekachiatkujum emematjume; tujash jutiik ya emematji duka dekainaji, wagki uwemtikagtinuk judionmaya minitin asamtai.
JOH 4:23 Yamaik horak jegawai, duka yamaiya juiki, dekaskenum Apajun emematin aidauk, Wakan tawa dutiksag dekaskenum emematiagtata nu. Mina Apajuk nunú aidaun emematjitnume tusa egawai.
JOH 4:24 Apajuik Wakani, nunin asamtai niina emematuidauk, wakan tawa dutiksag dekaskenum emematmain ainawai, tau.
JOH 4:25 Tutai nuwa ayaak: —Dekajai Mesías Cristo daagtin taatna nunak, ni taak ashí wají aidaunak ujapaktinai, tau.
JOH 4:26 Tutai Jesús ayaak: —Nunak wi amijai chichag nuuwaitjai, tiuwai.
JOH 4:27 Nuna aatus chichaak pujai, jintintaiji aidau kaunawajui, nunikag anentai jegagchajui makichik nuwajai chichaak pujau asamtai. Nunikajash makichkish ¿wají iniame? nuniachkush ¿wají pachismea chichame? tusagkesh iniaschajui.
JOH 4:28 Nunik nuwak yumi shikitaijin ukuak, yaakat weuwai. Nunik jegaa aents aidaun ujaak:
JOH 4:29 —Awi aents pujuma nu ashí wi nunikbaugnak tujutmae, atumesh miní diistajum ¿Cristuchuashit? tau.
JOH 4:30 Tutai yaaktanmaya aidauk jiinjag, Jesús pujamunum weajui.
JOH 4:31 Nuna nuninai, jintintaiji aidau: —Maestro, amesh yuwata, tuidau.
JOH 4:32 Tama ni ayaak: —Wi yumainuk ajutui, atumek duka dekatsjume, tau.
JOH 4:33 Tutai ditak pempeemtunikiag: —Tikichiash yuwatnunash itajuawagma, tudayinau.
JOH 4:34 Tiagtai Jesús chichajak: —Mina yutaijua duka, mina awetiuwa nu wakejamuji umigkata tabau nuigtú ni takatji ashimjukta tabauwa nuuwai.
JOH 4:35 Atumek: Ajak juutak eke ipaksumat nantu awai, tinu ainagme. Tujash wi tajime: Pagkai diistajum, ajak ajakbauk uminag saigká, juumain wajas awai.
JOH 4:36 Ajak juwaamunum takaa duka akiam auwai, nu ajak juukbauwa duka pujut nagkanchaunum atina nuuwai; ajakbauwa nu, juwá nujai shiig aneastinme tabaunum.
JOH 4:37 Wagki ju tibauwa juka dekaske: Makichkia nu ajakmawai, tikichia nu juwaawai, tawa nu.
JOH 4:38 Wi atumnak, makichkish atum takaschamu aig, juuktajum tusan ishiakbaijime; tikich takaak waittsau ainawai, nuniku aig, atum nu takasbauwa nuiya juukbaijume, tiuwai.
JOH 4:39 Nuniai Kuashat samarianmaya nunú yaaktanum pujuidauk, dekaskeapi tiajui, nuwa etsejak: “Wi nunikbaugnak ashí tujutmae”, tiu asamtai.
JOH 4:40 Nunikag samarianmaya Jesusan kautuawag, jui jutiijai juwakta tusag segajui. Tima nui jimag tsawan pujusui.
JOH 4:41 Nui pujus chichatai niina chichamen antuinak, nuní kuashat dekaskeapi tiajui.
JOH 4:42 Nunikag nuwan chichajuinak: Ame timaum duikik dekaskeapi tatsuji, wagki jutiishkam ni chichamuk shiig antugkaji, nuniku asá niimpapita dekas ashí nugkanmayan uwemtijatnuk tusa dekainaji, tiajui.
JOH 4:43 Jimag tsawan pujusá, Jesús Galilea weuwai.
JOH 4:44 Wagki Jesús nigki etsegkauwai, “profetak niina nugkenigkik eme anentamak achauwai”, tusa.
JOH 4:45 Nunik Galilea jegamtai, nuiya aidauk shiig anentus jukiajui, Jesús Jerusalén pujus fiesta Pascuatin ashí dutikamujin ditashkam fiestatin jegawag wainkaju asag.
JOH 4:46 Ataktú Jesús Caná Galilea awa nui jegauwai, ni yumin vino emamua nui. Nuniai Capernaúm pujau makichik rey oficialji, nuna uchijí jaak tepau.
JOH 4:47 Nunú, Jesús Judeanmaya Galilea tae tabaun dekaa, jegajua segau, mina uchig ashí jakama nu, jegajui taam etsaentujata tusa.
JOH 4:48 Tama Jesús ayaak: —Aents dutikmainchau iwainamu waintsukek kakajus dekaskeapi tumaitsume, tiuwai.
JOH 4:49 Tutai oficial ayaak: —Apuh, mina uchig jaatsaig jegaami, tau.
JOH 4:50 Tama Jesús chichaak: —Jeemin wakitkita, uchigmik tsagaje, tiuwai. Tutai dekaskeap Jesusak tawa tusa wakitkiuwai.
JOH 4:51 Nunik jeen wakettatman, ni inake aidau igkugkag: —Uchigmik tsagagmae, tusag ujaidau.
JOH 4:52 Tiagtai wají horatinia tsagagmae tusa inidau. Tama dita aiinak: —Yau a la una ai tsuweamunak bichatjame, tuidau.
JOH 4:53 Tama uchí apajishkam adeaju, nunú horatin Jesús chichajak: Uchigmik tsagaje, tibauwa nuna. Nunik nigka ashí ni patayí aidaujai, Jesusai dekaskeapi tiajui.
JOH 4:54 Ju jimaja juna wainchatain iwainakua nunak, Jesús Judeanmaya jiinki Galilea jegaa dutikauwai.
JOH 5:1 Nuna dutika pujai, judío aidau fiestamaidau, nuniagtai Jesuschakam Jerusalén wakauwai.
JOH 5:2 Jerusalén, waiti Uwijá waitai tutaiya nui tikiju awai yumi ipiagbau, hebreo chichamai Betesda tutai. Duka cinco waiti aagjamu ajuidau.
JOH 5:3 Nuanui kuashat jau aidau batsataidau wainmachu aidau, shutú aidau nuigtú wekaechau aidau.
JOH 5:5 Nunú jau aina nuiya makichik aents treinta y ocho mijadai jauwa nu nui pujau.
JOH 5:6 Nunittaman Jesús wainak, nunisag kuashat mijadai tepenun dekau asa, iniak: —¿Tsagagtasamesh wakegatsmek? tau.
JOH 5:7 Tama jau ayaak: —Apuh, yumi ipiagbauwa ju tagkittai ajunmainuk atsau asamtai, wi iyagta taig tikichia iyainawai, tiuwai.
JOH 5:8 Tutai Jesús chichajak: —Nantakim camilla jukim wetá, tiuwai.
JOH 5:9 Tusá tamawaik nunú aentschakam tsagag, ainká tepetaijin takui juki wekaetan nagkamauwai, nunak tsawan ayamtai aig nunikui.
JOH 5:10 Tujash judío aidau, nu aents tsagajua nuna chichajuinak: —Yamaik tsawan ayamtaiyai, nunin asamtai ainká tepetaijum jukimek wemaitsume, tuidau.
JOH 5:11 Tama ni ayaak: —Tujash mina etsaentugma nu chichagtak: Ainká tepetaijum jukim wetá tujutmajamah, tau.
JOH 5:12 Tutai dita iniinak: —¿Yaita ainká tepetaijum jukim wetá tujabiush? tuidau.
JOH 5:13 Tujash etsagagbau aajakua duka dekachu ya etsagaje nunak, wagki Jesusak nui aents batsata nunak ukuak weu asamtai.
JOH 5:14 Dutikamu ajuma dui Jesús, jega Apajuí ememattainum wainkau, nunik chichajak: —Nijah, yamaik tsagajume, ataktú awenamek tudau takasaipa, aan nagkaemas pegkegchau ajutjami, tiuwai.
JOH 5:15 Tima weuwai, nunik judío aidaun jegajua: —Mina etsaentuja duka Jesusai tusa ujakajui.
JOH 5:16 Nunak tsawan ayamtai aig dutikau asamtai judío aidau Jesusan achiktatus egaidau.
JOH 5:17 Nudiagtai Jesús chichaak: —Mina Apajuk yamaikish takaawai, nuniau asamtai wishakam dutiksanuk takaajai, tiuwai.
JOH 5:18 Nuna tutai judío aidauk nuní senchi maatatus wakegaidau, wagki tsawan ayamtaiya nunak umiachu nuigtushkam Apajuijai betek chichagmamak, Apajuik mina Apajui tau asamtai.
JOH 5:19 Nu imatjuinam Jesús ayaak: “Dekas tajai, Uchik nigki nagkamig takamaitsui, Apají dutikamun waina nuna takamainai; wagki ashí Apají takaa nunak Uchijishkam takauwai.
JOH 5:20 Wagki Apajiya nu uchijin aneau asa ashí wají aidaun ni takaa nunak iwaintawai, nuigtush nuní nagkaemasash iwaintuktatui, dutikamtai atumek anentai jegamainchau juwaktatjume.
JOH 5:21 Wagki Apag aents jakaunash inanki pujutan suwa dutiksanuk wishakam wi wakejamugnak pujutan suwajai.
JOH 5:22 Apajuk aentsnak etejashtinai, nunak ashí mina idaitugsauwai ame dutikata tusa;
JOH 5:23 mina eme anenjin aina dutijamsag aminash eme anenjamtinme tujutiuwai. Tujutiu asamtai mina eme anenjachuk, Apag mina awetiuwa nunashkam eme anentuinatsui.
JOH 5:24 “Dekas tajime, mina chichamjun antuk, mina awetiuwa nunash dekaskeapi tauk, pujut nagkanchau ajawai; nuniau asa bakumashtinai, wagki jaakug megkaemaina nuna ukuak pujut nagkanchaun jukiu asa.
JOH 5:25 Dekas tajime, hora jegawai, duka yamaiya juwai, jakau aidau Apajuí Uchijí chichamen antukagtata nunú, nuna antuidauk tuke pujusagtinai.
JOH 5:26 Wagki mina Apajuí pujutak awai, nunin asa wi niina Uchijí asamtai niinish pujutak nunisag ajití tusa sujusui;
JOH 5:27 nunak wi Aentsmaga akiinauwaitag nuna nigki aentsnash etejati tusa idaitugsauwai.
JOH 5:28 Juka anentai jegagchamin anentaimtigpajum; wagki hora jegatnai ashí ukusbau aina nu, niina chichamen antukagtina nu,
JOH 5:29 nuniamunum pegkejan takasú aidauk nantakiagtinai, pujutan jukitatus; untsu pegkegchaun takasú aina duka nantakiagtinai, suwimkan jukiagtatus.
JOH 5:30 “Wika wikik makichkish dutikmaitsujai. Apag dutikata tujutbauwa dutiksanuk etegkeajai, tuja wi etegkeag duka pegkejai, wagki wi wakegamun egatsjai, Apag mina awetiu wakegamua nuna egajai.
JOH 5:31 Wi wiki pachimasan etsegtumamuk, dekaskechu amainai.
JOH 5:32 Tujash awai tikich mina pachitus etsegtuju, nunú mina pachitus etsegtuja duka dekas tawai.
JOH 5:33 Atum Juagkan inias dekajuati tusajum awemauwaitjume, tama nigka dekaskea nuna etsegkauwai.
JOH 5:34 Tujash wika aents mina pachitus etsegtugkatnume tusanuk atsumatsjai, junak atum uwemkamnujum tabaunum tajime.
JOH 5:35 Juagkak lámpara kegak etsantama numamtin aajakui, tuja atumek ujumak tsawantai niina chichame wakejusa antugkujum shiig anejakuitjume.
JOH 5:36 Tujash Juan mina pachitus etsegtugkauwa nuna nagkaesau ajutui; wagki mina Apag takatan sujak ju umiktá tujutbauwa nuna takaag duke minak etsegtujuinawai Apag awetiuwa nuna.
JOH 5:37 Nuigtushkam mina Apag jui awetiuwa dushakam, mina pachitus etsegtujui. Atumek niina chichameg makichkish antugkachu ainagme, waintashkam wainkachu ainagme,
JOH 5:38 niina chichamega dushakam atumek umigtsugme, dekas Apajuí awemamuapi tujutchau asajum.
JOH 5:39 Atumek Agagbauwa duka shiig kuitamsajum augjume, awiyampap pujut tuke atina duka jumainaita tau asajum, nunú agagbauwa nuwig mina pachitus chichawai,
JOH 5:40 nuniaig atumek nunú pujut jukitasajum minaig minatsjume.
JOH 5:41 “Tujash wika aents aidau eme anenjitnume tusanuk wakegatsjai,
JOH 5:42 tujash atumnak wainjime nuigtush dekajai dekaskenum Apajuí aneamu atsugtamaina nuna.
JOH 5:43 Wika mina Apag awetimtai taamjai, nuniaig atumek minak dakitjagme. Tujash tikich, awemachmaitak, nigki nagkami minakuig, duka shiig anentsajum jumainaitjume.
JOH 5:44 ¿Utusagmek dekaskeapi titagme, atumek pempentunikjum iman anendaiyakjum, Apajuí makichkia nuna imanji egachutigmesh?
JOH 5:45 Wainka anentaimsaigpa Apajin ujatjamak bakugmashtimpash tusajum. Atumin bakugmatna duka Moisesa nuuwai, atum dakakjum batsamtajum nunú.
JOH 5:46 Wagki Moisés dekaskeapi takugmek, minash dekaskeapi tujutmain ainagme, wagki nigka mina pachitus agajui.
JOH 5:47 Tujash ni agagbauwa nu dekaskeapi tachautigmesh, ¿utugsagmek mina chichamjush dekaskeapi titagme?”, tiuwai.
JOH 6:1 Nuna tusa ukuak, Jesusak Galilea kuchají amain weuwai, Tiberias tutainum.
JOH 6:2 Nuniamunum kuashat aents saetukajui, jau aidaun aents dutikmainchaun dutikaun wainkaju asag.
JOH 6:3 Nudiagtai Jesusak nainnum waka, jintintaiji aidaujai ekeemsauwai,
JOH 6:4 Judío aidau fiestamtaiji Pascua tikiju wajasú ai.
JOH 6:5 Nunik Jesús niimkamá shiig kuashat aents niiní minidaun wainak, Felipen iniak: —¿Pagkash tuwiya sumaktatji aents imaanik minina au ayugmainush? tau.
JOH 6:6 Tujash nunak dekapsatatus tiuwai, wagki nigka dekau wajuk dutikattawa nunak.
JOH 6:7 Tama Felipe ayaak: —Doscientos denariowai pag sumaka, makí makichik aents imá imachik tinamash tuké jegamaitsui, tiuwai.
JOH 6:8 Tutai jintintaiji aina nuiya makichik Andrés, Simón Pedro tutaya nuna yachi chichaak:
JOH 6:9 —Jui makichik uchi cinco pag cebadajai najanamu nuigtú jimag namak ajawai. ¿Jukeuchish aents ibauwa nuish jegamainkaih? tiuwai.
JOH 6:10 Tiagtai Jesús ayaak: —Ashí aents aidau batsamsatajum titajum, tiuwai. Nuanui kuashat chijichi ayau, nuwi batsamsajui cinco mil aishmag tumain.
JOH 6:11 Jesús nuna pagkan juki Apajuin see tii jintintaiji aidaun tinamkauwai, dutikam dita jukiag batsata nuna tinamkajui, dutika namaknashkam dita wakegaina dutiksag tinamkajui.
JOH 6:12 Dutikam shiig yuwawagmatai, Jesús jintintaiji aidaun chichajak: —Punjau ampinkaja duka yajuaktajum, wainak utsankai, tiuwai.
JOH 6:13 Tima ditashkam yajuakajui, dutikawag doce chagkinnum aimkajui, cinco pag cebada najanamu yuwaku puujá ampigbau aina nuna.
JOH 6:14 Dutikawagmatai aents aidaushkam, Jesús aents dutikmainchaun dutikau asamtai, chichainak: —Juka dekaskenum profeta ju nugka jui taatnai tibauwa nuuwai, tuidau.
JOH 6:15 Tujash aents aidau Jesusan tajuawag kakantus jukiag rey ematasag wakegainamun dekau asa, ataktú nigki muja yakí jiitkaunum wakauwai.
JOH 6:16 Nunik kintamai, Jesusa jintintaiji aidauk kuchanum jegawajui,
JOH 6:17 nunikag barcanum chimpimjag Capernaúm katigtatus weedau. Shiig suwe wajasmataishkam, Jesusak eke wakitkig taachu asamtai.
JOH 6:18 Nuniamunum, dase senchi umpuamu asa kuchak senchi tsukatu.
JOH 6:19 Imatikamaitak wiyankag seis kilómetro tumain kuwagainai, Jesús yumí awanken wekaegas barcan adijkattak minittaman wainkajui. Nunik ishamkajui.
JOH 6:20 Nuniagtai Jesús chichaak: —¡Witjai ishamkaigpajum! tiuwai.
JOH 6:21 Tutai shiig aneasag barcanum egkejajui, nunik machik wesag wamkes dita jegatasa wegamunum anuumkajui.
JOH 6:22 Kashinia dui, aents kuchá amain juwaju aidauk adeajajui, jintintaiji aina duka makichik barca au asamtai ditak weenai, Jesús ditajai egkemjachua nuna.
JOH 6:23 Nuniamunum yaakat Tiberiasnumia barca aidau, Apu Jesús Apajuin see tusa pagkan puujá, aents aidaun ayugkauwa nui, tikiju anumkajui.
JOH 6:24 Nunikag diikmá, Jesús ni jintintaiji aidaujai nui atsuagtai, ataktú barca aina nui chimpimjag Capernaúm weajui, Jesusan egakagtatus.
JOH 6:25 Nunik kuchá amain katikmag Jesusan wainkag, iniinak: —Maestroh, ¿wajutí juish taamume? tuidau.
JOH 6:26 Tama Jesús ayaak: —Dekas tajime, atum egatjum duka aents dutikmainchaun dutikamag dui egattsugme, pag shiig yuwamujum dui egatjume.
JOH 6:27 Yutai dukap atsuk abuena duka anentaimtigpajum. Dekas yutai abuechau tuke pujutan sukagtina nu jukitasajum anentaimtustajum; nunak Aentsmaga akiinauwa nu amastatui, wagki Apajuí mina Apajua nu: Ame duka dutikata tusa inatjau asamtai.
JOH 6:28 Timatai aents aidau iniinak: —¿Wají dutikmainaita Apajuí wakegamu umigkatasaish? tuidau.
JOH 6:29 Tiagtai Jesús ayaak: —Juuwai Apajuí wakega duka, ni awemamua nuna dekaskeapi titinme tawa nuuwai.
JOH 6:30 Tutai dita chichajuinak: —¿Wají wainchatai iwainkagtumainaitme, nu wainkaja dekaskeapi tumainush? ¿Tuwaita ame takaamu aidaush?
JOH 6:31 Jutii muunji aajakajua duka uwegshunum maná yuujakú ainawai, agagbaunmash: “Nayaimpinmaya pagkan yuwatnume tusa susauwai” tawai, tuidau.
JOH 6:32 Tiagtai Jesús ayaak: —Dekas tajime, nunak Moisés nayaimpinmaya pagnak susachui, mina Apajua nuuwai nayaimpinmaya pag dekaskea nuna sukagta duka.
JOH 6:33 Wagki Apajuí pagjiya duka nayaimpinmaya jui akaikiuwa nuuwai, ashí nugkanmayan pujutan susatna nu.
JOH 6:34 Tutai: —Apuh, nu pag tuke sukagtita, tuidau.
JOH 6:35 Tiagtai Jesús chichaak: —Witjai pag pujutan sukagtinnuk, minai minidauk tuke yapajuashtin ainawai. Nunisag minai dekaskeapi tuidaushkam tuke kitaagchatin ainawai.
JOH 6:36 Tujash timajim dutiksanuk tajime, mina waitiatkugmesh dekaskeapi tujuttsugme.
JOH 6:37 Ashí mina Apag sujamu aina nu minaig tamain ainawai, nunú minai taidaunak wika dakitjashtatjai.
JOH 6:38 Wagki wi nayaimpinmayan akaikig nunak, wi wakegamun takastasan taachuitjai; mina awetiuwa nu wakegamun takastasan tauwaitjai.
JOH 6:39 Juuwai mina awetiuwa nu wakegamua duka, makichkish ni sujusbauwa nunak emegkaumainchauwaitag nu, dutikakun tsawan nagkanbaunmash inanmainaitag nuuwai.
JOH 6:40 Wagki mina Apag wakegamua duka, ashí aents Apajuí Uchijimpapita tusa dekaskeapi tujutuidauk pujut nagkanchau ajitnume, nunikmatai wi tsawan nagkanbaunum inankitjai, tawa nuuwai.
JOH 6:41 Nuna tutai judío aidauk Jesús augmattan nagkamawaju, wagki ni chichaak: “Witjai pag nayaimpinmayan akaikiunuk” tau asamtai.
JOH 6:42 Nunik pepeemtunisag: —¿Ju Jesús José uchijí, apajish nuigtú dukujish jutii wainnuweg duchaukaih? ¿Wajukeakua jusha nayaimpinmayan akaikijai tusash tawa? tuidau.
JOH 6:43 Tiagtai Jesús chichaak: —Atumek tudayá yujatsuk idaisatajum.
JOH 6:44 Makichkitigmekesh minaig tamain ainatsjume mina Apag awetiuwa nu itagmashkuig. Tuja wi inankittajai tsawan nagkanbaunum.
JOH 6:45 Profeta aidau agagbaunum: “Ashí Apajuí jintintuamu agtinai”, tawai. Nunin asamtai ashí Apajun antugkau aina nu nuigtú niiniyan unuimaina nu minaig mininawai.
JOH 6:46 “Nunak makichik aentskesh Apajun wainkau asa nuniatsui, ya Apajuiyai pujau tauwaita duke Apagnak wainkauwai.
JOH 6:47 Dekas tajime, minai dekaskeapi tuidauk, pujut tuke atina nu ajuinawai.
JOH 6:48 Witjai pag pujutan sukagtinnuk.
JOH 6:49 Atumi muunjum aajakajua nu uwegshunum maná yuwawaju aina duka jinawaju ainawai;
JOH 6:50 tujash wika pag nayaimpinmaya akaikiuwa nuna tajai, ya nuna yuwattawa duka jakashtinai tusan.
JOH 6:51 Witjai pag iwaaku nayaimpinmayan akaikiuwaitag nunak. Makichik aentskesh ju pagka juna yuwauk, tuke pujutnai. Wi pagkan sukagtustatag duka, mina iyashjua nuuwai, nunak wi ashí nugkanmaya aidaun pujutan susatasan nuniktatjai”.
JOH 6:52 Tutai judío aidau ditak tudaiyinak: —¿Utugsaya niina nejenash yuwatajum tusash sujamainaita? tuidau.
JOH 6:53 Tiagtai Jesús ditan chichajak: —Dekas tajime, Aentsmaga akiinauwa nuna neje yuwachkugmek, numpesh umachkugmek, pujutak atsugtabiagtinai.
JOH 6:54 Mina nejejun yuwak, numpagnash uma nu, pujut tuke atina nu ajawai; nuna tsawan nagkanbaunum wi inankittajai.
JOH 6:55 Wagki dekaskenum yutaiya duka mina nejejua nuuwai nuigtú dekaskenum umutaiya dusha, mina numpajua nuuwai.
JOH 6:56 Mina nejejun yuwak, mina numpajun umauk, wijai ijutkawai, nunisnuk wisha niijai ijutkajai.
JOH 6:57 Apag iwaaku pujuwa nu awetiu asamtai, wisha niinig iwaaku pujajai; nunin asamtai minaiyan yuwauk, wijai pujustinai.
JOH 6:58 Juuwai pag nayaimpinmaya akaikiuwa nu. Atumi muunjum maná yuujakaju jinawajua nuninchau, ju pagka juiyan yuwauk, tuke pujustinai.
JOH 6:59 Jesús ashí ju aidaun pachis jintinkagtuauwa nunak, Capernaúm jega ijuntainum tiuwai.
JOH 6:60 Nu jintinkagtamun antukag, kuashat niina nemajuidau chichainak: —Juna jintia juka shiig utugchatai, ¿ya nunash nunimainaita? tuidau.
JOH 6:61 Nuna tusa ashishmatuinamun Jesús dekaa chichajak: —¿Wi tajim duka atumnak shiig awajtamkachajek?
JOH 6:62 ¿Atumesh wajukmainaitjume, Aentsmaga akiinauwa nu yaunchuk pujujakbauwa nuwi weak takunu wainkugmesh?
JOH 6:63 Wakani pujutan sukagta duka, tujash iyashia duka nunak sukagtumaitsui; wi chicham aidaun timajim nu ainawai wakan aidauk nuigtú pujut aina duka.
JOH 6:64 Tujash atum ainajum anuiya ujumak dekaskeapi tuinachush ainawai. Nunak Jesusak yama nagkamsag ya aidauwa dekaskeapi tuinatsua, tuja ya sujama atinaita nuna dekau asa tiuwai.
JOH 6:65 Nuigtushkam chichaak: —Nuadui timajime makichkitigmekesh minaig minimainchau ainagme, Apag nunikti tichamu aidautigmek tusan.
JOH 6:66 Duwi nagkamas, kuashat jintintaiji aidauk ukukiajui, nunikag nuigtuk niijaig yujainachu.
JOH 6:67 Nunikagmatai Jesús ni jintintaiji doce aina nuna: —¿Atumesh wetasajum wakegatsjumek? tau.
JOH 6:68 Tutai Simón Pedro ayaak: —Apuh, ¿jutiish yayaig wetaji? Amina chichamjum aina dukeajama pujut tuke atinun sukagta duka.
JOH 6:69 Jutiik aminí dekaskeapi tiuwaitji, nunin asá dekaji, amek Cristo, Apajuí pegkegma nudauwaitme, tau.
JOH 6:70 Tutai Jesús ayaak: —¿Wichaukaitag atum doce ainajum nuna etegjaunuk? Dutikamu ainagminig, atum ainajum anui makichik Iwanch pachitkawai, tiuwai.
JOH 6:71 Nunak Judas Iscariote, Simogka uchijiya nuna tiuwai, wagki nunú doce aina nuiya sujam atin asa.
JOH 7:1 Nuna tusa idaiyas, Jesusak Galileanum wekagu, Judea pujutnak dakitau, wagki nuiya judío aidau maatasag egainamu asa.
JOH 7:2 Judío aidau fiestamtaiji tabernáculo tutai tikiju wajasú ai,
JOH 7:3 yachi chichajuinak: —Juig pujutsuk Judea wetá, jintintaijum aidau ame takaamun wainkatnume;
JOH 7:4 wagki makichkish aents wainkamu atatus wakegauk, wají aidaunak uuká takachu ainawai. Nunin asamtai ju aina ju jutikakmek, ashí aents wainainamunum dutikata, tiajui.
JOH 7:5 Nunak yachi aidaukesh niiní dekaskeapi tuinachu asag tiajui.
JOH 7:6 Tiagtai Jesús chichaak: —Mina tsawanjuk eke jegatsui, tujash atumdauk tsawantak uminas awai.
JOH 7:7 Atumnak ju nugkanmaya aents aidauk kajegtamain ainatsui, tujash minak kajegtuinawai, wagki dita takaamujiya nu pegkegchauwai tusa etsegtuinamu asa.
JOH 7:8 Atumek fiestanmag wetajum, wika minishtatjai; wagki mina tsawanjuk eke jegachu asamtai, tiuwai.
JOH 7:9 Nuna tusa, nigka Galilea juwakui.
JOH 7:10 Tujash yachi fiestanum weaju ai, Jesuschakam wantintsuk uumak weuwai.
JOH 7:11 Judío aidauk fiestatin egaidau, nuninak: —¿Dusha tuwig pujawa? tuidau.
JOH 7:12 Kuashat aents aina nuiya niina pachis kuashat chichaidau. Nuniai ujumak chichaidau: “Duka aentsuk pegkejai”, tuinai; tikich chichaidau: “Atsa nuninchauwai, aentsun tsanuawai”, tuidau.
JOH 7:13 Tujash makichkish niina pachisag paan iwainakag chichainachu, judío apuji aidaun ishamaidau asag.
JOH 7:14 Fiestamainamu tsawan ejapeantu ai, Jesuschakam jega Apajuí ememattainum wayau, nunik jintinkagtau.
JOH 7:15 Nunitai judío apuji aidauk puyatjusag diidau, nuninak: —¿Utusaya imatikash dekawa papí ausachua annaitkush? tuidau.
JOH 7:16 Tiagtai Jesús ayaak: —Wi jintinkagtag duka midauchui, mina awetiuwa nudauwai.
JOH 7:17 Aents Apajuí wakegamun takastatus wakega nunú, dekamainai wi jintiag jusha Apajuinumiayashit atsa wiki nagkamnuash taja nuna.
JOH 7:18 Nigki nagkami chichá duka, niina imanjinak egak tawai; tujash ya awemauwaita nuna imanjin egá nuuwai, dekaskea duka nuigtush ni pegkegchau takaamujish atsuja nu.
JOH 7:19 “¿Moisés chicham umiktinun atumin amaschaukaitjum? Dutikamuitkujum atum ainajum anuiyatigmek makichkish umiatsjume. ¿Wagka mantuatasagmesh wakegagme?”, tau.
JOH 7:20 Tutai aents aidau aiinak: —Iwanch ajutjamui, ¿ya mantamata tujamua? tiajui.
JOH 7:21 Tiagtai Jesús ayaak: —Wi aents dutikmainchaun makichik dutikamag duik anentai jegatsjume.
JOH 7:22 Dekaskenum Moisés, uchi aishmag akiinkuig pakaji ajapjitajum tujabiajui, (nunak Moisés nagkamachui, duka atumi muunjum nagkamamui); nunin asamtai atumek tsawan ayamtai aigkish pakaji ajapjin ainagme.
JOH 7:23 Duka dekaske, atumek Moisés umiktajum timawa nuna uwaekaig tusajum, tsawan ayamtai aigkish uchi aishmag akiinamtaig pakaji ajapjin ainagme. Nunin ainayatkugmesh ¿wagka wi tsawan ayamtai aig, aents jaun etsagagmataish kajeagme?
JOH 7:24 Atumek aentsú niimé diisjum etegkawaigpajum; dutikakjumesh shiig anentaimsa dutikatajum, tiuwai.
JOH 7:25 Ujumak Jerusalegnumia aidau: —¿Juchaukaih maatatus egagma nu?
JOH 7:26 Diisjuah, tuwakbaunum chichataish pachinatsujamah. ¿Dekas Cristui tuidau asampash apu aidaush ayatak diina?
JOH 7:27 Tujash jutiik jusha tuwiyampaita duka dekainaji, untsu Cristo minitna nunak makichkish dekajuachagtin ainawai tuwiyampaita nunak, tiajui.
JOH 7:28 Nu tuinamun, Jesús jega Apajuí ememattainum jintinkagtak pujau antuk, senchi chichaak: —Minak dekagjume tuwiyanua minaja duka. Tujash wika, wiki nagkamnuk taachmajai, minak dekaskea nu awetiuwai, duka atumek waintsugme.
JOH 7:29 Tujash wika wainjai, wagki niiniya minau asan nuigtush nigki awetiuwai, tau.
JOH 7:30 Tutai achikta tuidau; tujash makichkish achikchajui, niinu hora eke jegaachu asamtai.
JOH 7:31 Kuashat aents niiní dekaskeapi tiajua nunú chichainak: —Cristo taatna duish, ¿ju iwainag takaa juní nagkaemasampash takastinait? tuidau.
JOH 7:32 Aents aidau Jesusan pachisag chichainamun fariseo aidau antukajui; nunikag fariseo aidau, sacerdote apuji aina nujai jega Apajuí ememattai kuitamin aidaun awemajui Jesusan achiktinme tusag.
JOH 7:33 Nudiagtai Jesús chichaak: —Wika atumjaig wajumchik tsawan pujusan, mina awetiuwa nui wetatjai.
JOH 7:34 Atumek minak egatkattagme, tujash waitkashtatjume, nuigtush wi tuwí pujuttaja, nuig atumek minimainchau ainagme, tiuwai.
JOH 7:35 Timatai judío aidau pempeentunisag iniininak: —¿Tuwig jusha wetí ii wainmainchaunmash? ¿Judío aidau pampagkag griego aents batsatainamunum pujuina nui wee, griego aidaun jintintuatasampash tawa? tuidau.
JOH 7:36 ¿Nunash wajuk takua, “egatkattagme, tujash waitkashtatjume, nuigtush wi tuwí pujuttaja, nuig atumek minimainchau ainagme”, tujamji? tiajui.
JOH 7:37 Fiesta ashimnamua nunú tsawan dekas imá puyatjusa anentaimtutai asamtai, nunú tsawantin Jesús wajantá senchi jiiká chichaak: —Makichik aentskesh kitabauk, minai tantati, nunik uwagti.
JOH 7:38 Ni minai dekaskeapi tauk, Agagbau tawa nunisag, niina anentainig yumi pujutan sukagtina nunú pukuni jintuktinai, tiuwai.
JOH 7:39 Nuna tiuwa nunak, niiní dekaskeapi tuidau Wakanin jukiagtin aina nuna taku tiuwai; Nu tsawantaik Wakaní Pegkejig eke taachu, wagki Jesús jaka nantakí nayaimpinum waketchau asamtai.
JOH 7:40 Nunú tabaun ujumak aents antukaju chichainak: —Dekas ju aentsua juka profetayai, tuidau.
JOH 7:41 Tikich chichaidau: —Juka Cristui, tiajui. Ujumak chichaidau: ¿Cristo galileanmayag atinait?
JOH 7:42 ¿Agagbauwa nuanui, Cristuk David weantu nuigtú belegnumia atinai David pujujakua nuiya tatsuak? tuidau.
JOH 7:43 Nuna Jesusan tukiag, aents aidauk kanajajui.
JOH 7:44 Nuniai ujumak dita aina nuiya Jesusan achiktag tuidau, tujash achikchajui.
JOH 7:45 Nunikag jega Apajuí ememattain kuitamin aidauk waketjag fariseo aidau, sacerdote apuji aidaujai batsatbaunum jegawajui. Nunikmatai iniinak: —¿Wagka itachugme? tuidau.
JOH 7:46 Tusá tuinam jegá kuitamin aidau aiinak: —Makichik aentskesh nu aents chichama imatika chichauk tuke wainkashbauwai, tiajui.
JOH 7:47 Tiagtai fariseo chichainak: —¿Atumesh tsanuamak yujainajum?
JOH 7:48 ¿Jutii apuji aidaukesh, nuniachkush fariseo aidaukesh niiní dekaskeapi tuidaush wainjumek?
JOH 7:49 Tujash au aents chicham umiktinun dekatsu duka, shiig pegkegchauwai, tuidau.
JOH 7:50 Tiagtai dita aina nuiya Nicodemo, Jesusan ausatatus jegajuauwa nu chichaak:
JOH 7:51 —¿Jutii chicham umiktina nuish, makichik aents ni chichamujish antugtsuk nuigtú ni takaamujish dekagtsuk suwimak sumainai tawak? tiuwai.
JOH 7:52 Tutai dita aiinak: —¿Amesh galileanmayagkaitam? Agagbauwa nu ausam diistá nuniakum wainkattame, galileanmayag makichkish profetak tuke jiinkichui, tiajui.
JOH 7:53 Tusag makí makichik ditá jeen shiyakajui.
JOH 8:1 Tujash Jesusak Olivosa mujajin weuwai,
JOH 8:2 nunik kashinia dui, kashikmas, jega Apajuí ememattainum wakitki jegauwai. Nunikmatai kuashat aents tuwagkam ekeemas jintinkagtutan nagkamauwai.
JOH 8:3 Nuniai maestro chicham umiktinun jintinkagtin aidau, fariseo aidaujai, nuwa aentsjai takamun wainkag jukiag itawaju, dutika aents aidau ejapen awaasajui,
JOH 8:4 dutikawag Jesusan iniinak: —Maestroh, ju nuwa aentsjai takaniak pujau wainkaji.
JOH 8:5 Moisés chicham umiktajum tujabauwa nuig, nuwa junin aidaunak ayatak kayai tukua tukuakua maatajum tawai, ¿tujash amesh wajinpa? tuidau.
JOH 8:6 Nunak wajintig tusa dekapsatatus tiajui, nunik tsanumjugtasag. Tujash Jesusak tsuntsumá uwejin nugkanum agau.
JOH 8:7 Nunitaishkam ayatak inidau, imatjam Jesús pagkai chichaak: —Atum ainajum anuiyash yaita machikish tudaun takachush, nunú dekatkauk kayai tukutí, tau.
JOH 8:8 Tusa ataktú tsuntsumá nugkan agau.
JOH 8:9 Nuna timatai ditá tudaujinash dekagmamaidau asag, muunchinum nagkamna makí makichik jii jiinkawag ashí shiyakagmatai, imá Jesusak nuwajaig juwakui.
JOH 8:10 Nunik Jesús pagkai niimkamá aents atsuagtai nuwan iniak: —Nuwah, ¿dusha wajukawagmae? ¿Makichkish tukugmachagmaka? tau.
JOH 8:11 Tusa tama nuwa ayaak: —Atsa Apuh, tiuwai. Tutai Jesús chichaak: —Wisha suwimkan jukiti tumaitsujame. Wetá, nuigtuk awenamek tudauk takasaipa, tiuwai.
JOH 8:12 Ataktushkam Jesús aents aidaun chichajak: —Witjai nugká tsaaptinjinuk; mina nemagtauk, suwe aidaunmag wekaesashtinai, ayatak tsaaptin pujutan sukagtina nu ajiagtinai.
JOH 8:13 Tutai fariseo aidau chichajak: —Amek, aminuk pachisam etsegtumame, nuniau asam ame etsegtumam duka dekaskechui, tuidau.
JOH 8:14 Tiagtai Jesús ayaak: —Wi wiki midaun pachisan etsegtumaknush, wi tumamag duka dekaske, wagki wika dekajai tuwiyanua tauwaitja nuigtush tuwí wetatja nunak; tujash atumek tuwiyanua tauwaitja nuigtú tuwí wetatja dusha dekatsjume.
JOH 8:15 Atumek aentsú anentaimtaijiya dutiksagmek etegkeagme; tujash wika makichik aentsnakesh etegkeatsjai;
JOH 8:16 tujash wi etegkeaknuk, dekaskenum dutikmainaitjai, wagki wika wikichuitjai; wi, Apag awetiuwa nujaiyaitjai.
JOH 8:17 Atum chicham umiktin agagbauwa nuig, jimag aents etsegtuina nuuwai dekaskek tawai.
JOH 8:18 Witjai midaun pachisan etsegtubaunuk, nuniai Apag awetiuwa dushakam mina pachis etsegtujui.
JOH 8:19 Nuna tutai: —¿Amina Apash tuwí pujawa? tusag inidau. Tama Jesús ayaak: —Atumek minak dekagtsugme, nuniau asajum mina Apagshakam dekamaitsugme. Atum mina dekagkugmek mina Apagshakam dekamain ainagme, tiuwai.
JOH 8:20 Juna tiuwa nunak Jesusak ofrenda aidau egketainum, jega Apajuí ememattainum jintinkagtak pujus tiuwai; tujash makichik aentskesh achikchajui, wagki horaji eke jegachu asamtai.
JOH 8:21 Jesús ataktú chichaak: —Wika wetatjai, nunikmatai egatkattagme, tujash atumek atumi tudaugminig jakatnaitjume. Wi wetatag nuig, atumek minimainchau ainagme.
JOH 8:22 Tutai judío aidau chichainak: —¿Nigki maamatin asampash, wi wegamunmag atumek minimainchau ainagme tujama? tuidau.
JOH 8:23 Tiagtai Jesús ayaak: —Atumek nugkaya ainagme, witjai yakiyanuk. Atumek ju nugka juiya ainagme, wika ju nugka juiyachuitjai.
JOH 8:24 Nuadui timajime atumi tudaugminig jakatnaitjume timag nunak; wagki Witjai taig dekaskeapi tujutchakjumek, atumi tudaugminig jakattagme, tau.
JOH 8:25 Tutai: —¿Amesh yaitpa? tusag inidau. Tama Jesús ayaak: —Nunak nagkamchakun timajime.
JOH 8:26 Kuashat atum dutikajum nu pachisa tumainuk ajutui; tujash mina awetiuwa nu dekaskea nuna tawai. Nunin asamtai wika, ni tabau antukbauwa nuna aents aidaunak augjai, tiuwai.
JOH 8:27 Tujash ditak dekachajui Apajin pachis tawa nunak.
JOH 8:28 Nuadui Jesús ditan chichajak: —Aentsmaga akiinauwa nunú yakí takuijum dekattagme Wikitag nu, nuigtú wiki nagkamin takatsuk, Apag jintinjuamua dutiksanuk chichag dushakam.
JOH 8:29 Mina awetiuwa duka wijai pujawai, Apajuk minakek idaitatsui, wagki wika ni wakega dutiksanuk tuke takau asamtai, tiuwai.
JOH 8:30 Nuna Jesús timatai, kuashat aents aidau niiní dekaskeapi tiajui.
JOH 8:31 Jesús judío aidau niiní dekaskeapi tiaju aidaun chichajak: —Atum wi jintinjim nu dutiksagmek umiakjumek, dekaskenum mina jintintaig atatjume;
JOH 8:32 nuniakjum dekaskea nu dekattagme, tuja dekaskea nunú agkanmitkagmattagme, tiuwai.
JOH 8:33 Tutai dita aiinak: —Jutiik Abraham weantu ainaji, nunin asaja makichkish inaku waitkataig aajakchauwaitji. Nuniajinish, ¿wagka agkanmagattagme tukagtame?
JOH 8:34 Tiagtai Jesús ayaak: —Dekas tajime, ashí aents tudau takaa duka, tudau inaku waitkatai ainawai.
JOH 8:35 Inaku waitkataiya duka inamnun jeenig tuke pujuchu ainawai; untsu inamnun uchijiya nuuwai jeen tuke pujuwa duka niina uchijí asa.
JOH 8:36 Nuadui, Uchijiya nu agkanmitkagmakuig, dekaskenum agkanmagattagme.
JOH 8:37 Dekajai atumek Abraham weantu ainajum nunak, nuninaitkujum mantuatasajum wakegagme, wagki mina chichameg atumiin shiig juwachu asamtai.
JOH 8:38 Wika Apagdauwa nu wainkamun chichaajai; atumshakam nunisjumek, apanu antukbauwa duke takaagme, tau.
JOH 8:39 Tutai dita aiinak: —Jutii apajig Abrahamai, tuidau. Tiagtai Jesús ayaak: —Abrahama uchijí ainakjumek, Abraham takajakua duke takamainaitjume.
JOH 8:40 Wi mina Apag jintinjuamun dutiksanuk jintinmash minak ayatak mantuatasajum wakejutagme. Abrahamak makichkish annunak anentaimajakchauwai.
JOH 8:41 Atumek, atumi apá takatjiya nu takaagme, tau. Tutai dita aiinak: —Jutiik kasanum akiamuk ainatsji, iina Apajig imá makichki, Apajuiya duke, tuidau.
JOH 8:42 Tiagtai Jesús ayaak: —Atumi apa Apajuiyaitkuig, dekaskenum mina anenmain ainagme, wagki wika Apajuinumia taan jui pujajai. Wika wiki nagkamnuk taachmajai, minak Apajuí awetiuwai.
JOH 8:43 ¿Wagka wi chichaamush dekamain dekapeatsjume? Duka mina chichameg antut dakituidau asajum nuniagme.
JOH 8:44 Atumin apa duka Iwanchia nuuwai; nunin asamtai atumí apa wakega duke takastasajum wakegagme. Nagkamtinish Iwanchik magkagtin aajakui, nunin asa dekaskea nunak nigka tuchauwai, wagki niinig dekaskea duka atsau asamtai. Waita nunin asa chichakush waitnak tawai tuke nunin asa, wagki nigka waitai, nunin asa waita apajiyai.
JOH 8:45 Tujash wika dekaskea nuna chichaig, dekaskeapi tujuttsugme.
JOH 8:46 Atum ainajum anuiyash ¿ya wi tudau takasbaugnash dekagtuinawa? ¿Wagka wi dekaskea nuna etsegkuish, dekaskeapi tujuttsugme?
JOH 8:47 Apajuinua duka, Apajuí chichamen antujuk umijin ainawai; tujash atumek Apajuinuchu ainajum nuadui, nu antutak dakitagme.
JOH 8:48 Tutai judío aidau chichajuinak: —Ii timayag duka dekaske, amek samarianmaya aentsuitme, nunin asamin Iwanch pujugtamui timayag duka.
JOH 8:49 Tama Jesús ayaak: —Makichik iwanchkesh minak atsugtawai. Wi takaag nunak Apajun eme anentsan aikajai, nuniaig atumek minak eme anenjusjumek diigtsugme.
JOH 8:50 Wika mina emematjitnume tusanuk egatsjai; tujash Apajuí emematjitnume tujutu asa, mina emematjumainnak iwainawai, nuuwai aentsú etegkea duka.
JOH 8:51 Dekas tajime, mina chichamjua nuna umiauk, tuke jakachagtin ainawai, tiuwai.
JOH 8:52 Tutai judío aidau aiinak: —Yamai dekas dekaji Iwanch ajutjama duka; Abraham nuigtú ashí profeta aidaush jinau aina nuniaig, “mina chichamjua nuna umiauk, tuke jakachagtinai”, tame.
JOH 8:53 ¿Ame iina apají Abraham aajakua nuna nagkaesaukaitam? Abrahamak nuigtú profeta aajakajua dushakam jinawajui nuniaish, ¿amesh ya anenmamkumea tame? tiajui.
JOH 8:54 Tiagtai Jesús ayaak: —Wiki eme anenmamkunuk, wi eme anenmamag duka wainkayai. Tujash mina eme anenjauk, mina Apajui, atum iina Apajuijiyai tajum nunú.
JOH 8:55 Tujash atumek wainchauwaitjume, wika wainjai; wainchaujai takunuk, atum waitaitjum nuninuk amainaitjai. Tujash wainu asan, ni chichamenash umigjai.
JOH 8:56 Abraham atumi muunjum aajakua nu, wi jui taamtai waitkatatus shiig anejakui; nuniau mina waituk shiig aneasui, tiuwai.
JOH 8:57 Tutai judío aidau: —Cincuenta mijankesh ajutjamtsu nuniaigkik, ¿Abrahaman wainkauwaitjai tame? tuidau.
JOH 8:58 Tama Jesús ayaak: —Dekas tajime, Abrahamash akiintsaig, tuke pujuwaitjai, tau.
JOH 8:59 Tutai tukutasag kaya aidaun jukiajui, tujash Jesusak uumkauwai, nunik jega Apajuí ememattainmayag jiinkiuwai.
JOH 9:1 Jesús nuiya jiinki wekamá, aents tuke wainmachu akiinaun wainkauwai.
JOH 9:2 Nunikmatai jintintaiji aidau iniinak: —Maestroh, ¿wagka jusha wainmachush akiinauwaita? ¿Apají nuniachkush dukují tudaujiniash ankauwait atsa niina tudaujinigkiash aanin akiinauwait? tuidau.
JOH 9:3 Tiagtai Jesús ayaak: —Juka niina tudaujin nuniachkush apají, dukují tudaujinkish ankachui; Ju junin akiinauwa juka, Apajuí ni senchijin iwainaktatus wakegau asamtai aanin akiinauwai.
JOH 9:4 Eke tsawaiya juik, mina awetiu dutikata tujutbauwa nunak takastatjai; kashi wajasmataig, makichkish takamainchau agtatui.
JOH 9:5 Nugkaa pujag juikik, nugká tsaaptinjiyaitjai, tiuwai.
JOH 9:6 Nuna tusa, Jesús nugkaa usukmá, niina sawinjin nugkan bikamkatu ema juki, wainmachu jiin anutukui.
JOH 9:7 Dutika chichajak: —Yumi ipiagbau Siloé tutaya awi weme nijamita, tiuwai. (“Siloé” tawa nunak, “Awemamu” taku tawai.) Tima wainmachushkam wee nijamajui, nunik wainmak wakitkiuwai.
JOH 9:8 Nunikmatai wainmachujai ijutkau batsamin aidau nuigtú yaunchuk segamá ekeemnun wainin aidau chichainak: —¿Juchaukaih ekeemas segamá ekeemnuwe nunú? tuidau.
JOH 9:9 Tiagtai ujumak chichainak: —Ehé, niiyai, tuinai; tikich chichainak: —Atsa, auchui, nujai betekmamtinai, tiajui. Tiagtai ni chichaak: —Witjai, tau.
JOH 9:10 Tutai: —¿Tujash wajukamea wainmakume? tusag inidau.
JOH 9:11 Tiagtai ni ayaak: —Makichik aents Jesús daagtina nu, nugkan bikamkatu ema jiijui anutujuk, weme “yumi ipiagbau Siloé tutaya nuwi nijamita”, timatai wenu, nijamin wainmakmajai, tau.
JOH 9:12 Tutai: —¿Dusha tuwí pujawa? Tama: —Achah, tiuwai.
JOH 9:13 Nunú wainmachu aajakua nuna jukiag fariseo batsatbaunum ejegawajui.
JOH 9:14 Jesús nugkan bikamkatu ema wainmachun wainmitkakua nunak tsawan ayamtai aig dutikau asamtai,
JOH 9:15 fariseo aidau awentsag iniasajui: ¿Wajukamea wainmakume? tusag, tama ni chichaak: —Nugkan bikamkatu ema jiijui adutugkamtai nijamin, yamaik wainmajai, tau.
JOH 9:16 Tutai ujumak fariseo aidau chichainak: —Nuna dutijama duka Apajuí awemamuk amaitsui, wagki tsawan ayamtaiya nunak ajantus diyatsui, tuidau. Tiagtai tikich aidau chichainak: —¿Utugsaya aents tudaugtinush aents dutikmainchaunash iwainamainata? Tusag ditak kanajajui.
JOH 9:17 Nunikag awaksag wainmachu aajakua nuna iniinak: —Amesh, amina etsaentamja dusha ¿yayai tame? Tama: —Duka profetayai, tiuwai.
JOH 9:18 Tujash judío aidauk wainmachu aajakua nuuwap yamai wainmawa tusag dekaskeapi tumainchau dekapedau, nuninak apajin dukujijai untsukajui,
JOH 9:19 dutika iniinak: —¿Jukaih atumi uchijum wainmachu akiinauwai tuina nunú? ¿Utugsaya yamaish wainmawa? tuidau.
JOH 9:20 Tiagtai nuna apají dukujijai chichainak: —Ju iina uchijí wainmachu akiinauwa duka dekaji,
JOH 9:21 tujash dekatsji wajuk wainmake duka, nuigtushkam yaki wainmitkakmae dusha dekatsji. Nigka muuntai, nigki iniastajum, ni tujamtatui, tiuwai.
JOH 9:22 Nuna, apají dukujijai tiajua nunak, judío aidau, makichkikesh Jesusak Cristui takuig, iina ijuntaijinig jiikmí tusag chichaman umikaju asagmatai ishamainak tiajui.
JOH 9:23 Nuniau asamtai wainmachu apajig dukujijai: —Nigki iniastajum, nigka muuntai, tiajui.
JOH 9:24 Nuna timatai judío aidau wainmachu aajakun ataktú untsuká itan chichajak: —Apajuí eemtin dekaskenum tukagtita. Jutiik dekainaji nu aentsua duka tudaugtinai.
JOH 9:25 Tiagtai ni ayaak: —Tudaugtinashit, dekatsjai. Makichik wajiya nunak dekajai, wainmachu aajakuitkun, yamai wainmag juna, tiuwai.
JOH 9:26 Tutai ataktú iniinak: —¿Utugtamkame? ¿Utugkaya niimtijamne? tuidau.
JOH 9:27 Tusá iniam: Timajimjamah, tujash antugtatsjume, ¿Wagka awagki tití tusagmesh wakegagme? ¿Atumesh ni nemagkatasajum wakegau asagmek tajum? tiuwai.
JOH 9:28 Tutai pegkegchau chichajuinak: —Ameakitme nu aentsú jintintaimek, tujash jutiik Moisesa jintintai ainaji.
JOH 9:29 Apajuí Moisesan aujujakua duka dekainaji; tujash au aentsuk tuwiyagkita dusha dekantsui, tiaju.
JOH 9:30 Tama ni chichaak: —Nuuwajamah kamé anentai jegagmainchau, mina wainmitkajiu, atum dekatsji tuwiyaskai tajum nu.
JOH 9:31 Dekainaji Apajuik tudaugtin aidaunak antugtsu nu, tujash Apajuin puyatjus umijuinak, ni wakegamujin takaa nuna antujui.
JOH 9:32 Nagkamtinish antukchamui makichik aentskesh, aents wainmachu akiinaun wainmitkakui tabauk.
JOH 9:33 Au, Apajuí awemam taachuitkug, makichkish aikmaitsui, tau.
JOH 9:34 Tutai dita aiinak: —Ame akiinkumesh ayatak tudauk akiinauwaitkumek, ¿jutii jintinkagtam? tusag jega ijuntainmayan jiikiajui.
JOH 9:35 Jesús antuku jiikiaje tabaun, nuniau asa wekamá wainak chichajak: —¿Amesh Aentsmaga akiinauwa dusha dekaskeapi tamek? tiuwai.
JOH 9:36 Tama ni ayaak: —Apuh dusha yaita, wisha niiní dekaskeapi titajai, tau.
JOH 9:37 Tutai Jesús ayaak: —Amek duka wainme, wi amijai chichag juuwaitjai, tau.
JOH 9:38 Tutai ni ayaak: —Apuh, dekaskeapi tajai. Tusa tikishmag emematiuwai.
JOH 9:39 Tutai Jesús ayaak: —Wika ju nugka juig tauwaitjai aents aidau etejatasan, wainmachu aidau wainmaktinme, nunitai wainbau aina nu wainmachu waigtinme tusan.
JOH 9:40 Tutai ujumak fariseo aidau ditajai ijunu, nuna antukag, iniinak: —¿Jutiish wainmachuk ainag? tuidau.
JOH 9:41 Tiagtai Jesús ayaak: —Atum wainmachu ainakjumek atumin tudaugminish bakumamainuk atsugtamainai; tujash atum wainbau ainaji tajum dui, tudaugmik ajutjamainawai, tiuwai.
JOH 10:1 Nunik Jesús chichaak: “Dekas tajime, uwig pegmatjamu waitijiya nuwi waitsuk yajá waya duka, kasa nuniawai,
JOH 10:2 tujash waitinum wayá duka, pastor uwijá kuitamna nu nuniawai.
JOH 10:3 Nuna waiti kuitamnuk ujatui, nunikmatai uwig aidaushkam nuna chichamen antuinawai; nuniau asamtai makí makichik daajin adaitus untsuawai, dutika jiyawai.
JOH 10:4 Dutika ashí jiijá, ni eemtuk weawai, nunitai uwigshakam saetuinawai wagki niina chichamen antuju asa.
JOH 10:5 Uwijak ni wainchataijinak saetuchu ainawai, ayatak pisag shiminai, wagki chichamen takanchbau antuju asa”, tiuwai.
JOH 10:6 Jesús ju augmatbaun apatuk tiuwa nunak, ditak dekachajui wajintu takua tawa nunak.
JOH 10:7 Jesús ataktú chichaak: “Dekas tajime: Witjai uwig aidau waitijinuk.
JOH 10:8 Ashí yaunchuk wi taatsaig kaunawaju aina duka kasa aidau, uwijá yajumin aajakajui; tujash uwig aidauk antugkachajui.
JOH 10:9 Witjai waitinuk, aents minai waidauk uwemjagtin ainawai; nunik uwig wenuken utsanawag jiinag pasto yuwama numamtuk wajagtatui.
JOH 10:10 “Kasak, kasamak kajeg ijina emegkaktatus minawai, tujash wika pujutan jukiag shiig atsumkas batsamsatnume tusan tauwaitjai.
JOH 10:11 Witjai dekas pastor pegkegnuk; pastor pegkejak ni pujutinak uwigji aidaunum tsagkamanmainai;
JOH 10:12 untsu akitaiya duka, pastorchauwai, wagki uwig aina duka niinuchu asamtai, nunin asa ikamyawa minittai wainkug, uwignak ukuak tupikainai; nunikmatai ikamyawashkam uwig aidaunak uwakek ipisiawai.
JOH 10:13 Nunú aentsua duka tupikawai wagki akitai asa, nunin asa uwig aidaunak puyatjatsui.
JOH 10:14 “Witjai pastor pegkegnuk; nunin asan uwig midau aidaunak wainjai, nunisag minash waituinawai.
JOH 10:15 Apag mina waita antsanuk, wishakam Apagnak wainjai, nuniau asan mina pujutjunak uwig aidaunum tsagkamankattajai
JOH 10:16 Nuigtush tikich uwig aidaush ajutuinawai ju pegjamua juiyachu; nunú aidaunashkam yajuakan ikaunmattajai, dutika ai makichkinmag ijunag batsamas mina chichamjun antugtiagtatui, nuigtú pastorchakam makichik atatui.
JOH 10:17 “Nuadui Apajuk anentui, wagki mina uwigjun ayamjakun mantamnan ataktú nantaktin asamtai.
JOH 10:18 Makichkish minak mantumain ainatsui, wika wiki tsagkamankattajai; minak senchig ajutui jakanush ataktú nantamainaitag dushakam. Nunak mina Apag aatus tujutiuwai”.
JOH 10:19 Jesús nu tabaun antukag, judío aidauk ditak tudaiyag, ataktú kanakajui.
JOH 10:20 Kuashat dita aina nuiya chichainak: —¿Wagka antugjume, Iwanch egkemtuamu asa imaanag tuu wekaga aniaush? tuidau.
JOH 10:21 Tujash tikich chichaidau: —Makichkish Iwanch egkemtuamuk aajag chichamaitsujama, ¿iwanchish wainmachunash wainmitkamainkaih? tuidau.
JOH 10:22 Tsetsek tepeau ai, Jerusalén fiestamaidau jega Apajuí ememattai jegamkamua nunú tsawan jegau asamtai.
JOH 10:23 Tuja Jesusak jega Apajuí ememattainum Salomón waiti aagjamunmanini wekagu.
JOH 10:24 Nuniaun judío aidau tenteawag, iniinak: —¿Wajutiya shiig dekamainush tukagtittame? Ame dekas Cristuitkumek shiig ujajatkakia, tuidau.
JOH 10:25 Tiagtai Jesús ayaak: —Wika atumnak timajime, tujash dekaskeapi tujuttsugme. Mina Apag dutikata tibaun takaakun paan atumnash iwaintajim nuuwai mina etsegtuja duka;
JOH 10:26 tujash atumek dekaskeapi tujuttsugme, wagki mina uwigjuchu asajum.
JOH 10:27 Mina uwig aidauk mina chichamjun antugtuinawai, wishakam ditanak wainjai, nunú aidau minak saetujuinawai.
JOH 10:28 Wi ditanak pujut tuke atina nunak suwajai, dutikamu asag tuke waittsashtin ainawai. Mina uwejuiyanak makichkish atanjumainchau ainawai.
JOH 10:29 Mina Apag ashí nagkaekagtasua nu minak sujusui. Nunin asamtai Apajú uwejinianak makichkish atanmainchau ainawai.
JOH 10:30 Wika mina Apagjaig makichkitji, tiuwai.
JOH 10:31 Tutai judío aidau ataktushkam kayá jukiag tukutá tuidau.
JOH 10:32 Dutikam Jesús chichaak: —Wi mina Apagdaun kuashat pegkejan takasan iwaintukmajim duish, ¿tu dutikamunma kayaish tukugta tajume? tau.
JOH 10:33 Tama judío aidau aiinak: —Pegkeg takasbaunum tukumí tatsujame, amek aentsuitkum Apajuí pegkegchau chichagkum, Apajuiya iman anenmamam dui kayai tukumí taji.
JOH 10:34 Tiagtai Jesús chichaak: —Atum chicham umiktina nuwi agagbaunum: ¿Wi, atumek Apajuí ainagme tijai tatsuak?
JOH 10:35 Agagbaunum tawa duka dekainaji, nuninchauwai tumaitsui; Apajuik ni chichamen aents aidaun awetiuwa nuig apajuí ainagme tiuwai.
JOH 10:36 Apajuí mina etegtua ju nugka jui awetimtai tau asan: —Wika Apajuí Uchijiyaitjai takuish, wajuk anentaimsagmea Apajuí pegkegchau chichajui tujutjume
JOH 10:37 Wi mina Apag wakega dutiksanuk takaachkuig, dekaskeapi tujutigpa.
JOH 10:38 Mina dekaskeapi tujutchakjumesh, wi takaag nu diisjum dekaskeapi titajum, nuniakjum minai Apag ai, wi Apajuí aja dushakam dekaatajum.
JOH 10:39 Tutai ataktú achikag jukiagta tuidau, imatikainam Jesusak jiinki weuwai.
JOH 10:40 Nunik Jesús wakitki Jordagka amain weuwai, yaunchuk Juan yamijatujakbauwa nui, jegaa pujusui.
JOH 10:41 Kuashat aents jegajuawag: —Juagkak dekaskenmag aents dutikmainchaunak iwainakag takaschauwai; tujash Juan ju aentsun pachis ashí tiuwa duka dekaske, tuidau.
JOH 10:42 Nuninak kuashat aents nui batsatuk Jesusnak dekaskeapi tiaju.
JOH 11:1 Betanianmaya Lázaro daagtin jaak pujau; María, Marta aina nuna umayí.
JOH 11:2 Duka Mariak, Lázaro umayí Apu Jesusa nawen kugkuinui ukatuk niina intashinig ujugtujua nunú aajakui.
JOH 11:3 Nunú, ni kaijai Jesusan chichaman akupjuinak: —Apuh, amina kumpajum aneetaigmia duka jaawai, tiajui.
JOH 11:4 Jesús nuna antuk, chichaak: —Au jata duka jachataiyai, ayatak Apajuin eme anentuinak, nuigtú Apajuí Uchijiya nunú dutikamunum eme anentiagtata nuna iwainaktatus aniawai, tiuwai.
JOH 11:5 Jesusak Martan niina kaijai, nuigtú Lazaronashkam aneejakui.
JOH 11:6 Lázaro jaawai tabaun antukuitak, wetsuk, ni pujamunmag jimag tsawan pujusui,
JOH 11:7 nunik ni jintintaiji aidaun chichajak: —Judea wakitkimi, tiuwai.
JOH 11:8 Tama dita aiinak: —Maestroh, dukap atsujama judío aidau kayai tukugmagta tiagma nunú, nuniaigkik, ¿ataktú awi wakitkitasamesh wakegam? tuidau.
JOH 11:9 Tiagtai Jesús ayaak: —¿Makichik tsawantan doce hora ajatsuak? aents tsawai wekaegas wegauk tukumtsame tsaaptinnum shiig wainak wegau asa;
JOH 11:10 untsu kashi wekaga duka tukumui, tsaaptinnum wainak wegachu asa.
JOH 11:11 Nuna tii, nuigtú: —Iina kumpají Lazarok kanawai, tujash wi wejin ishintagtajai, tiuwai.
JOH 11:12 Tutai jintintaiji aidau chichajuinak: —Apuh, kanag tepauku, nantaktatajamah, tuidau.
JOH 11:13 Tujash Jesusak Lázaro jakau asamtai tau, nuniaig ditak kanag tepaunas tawatai tuidau.
JOH 11:14 Tiagtai Jesús paan iwainak: —Lazarok jakae,
JOH 11:15 tujash awi pujuschag dui shiig aneajai; wagki atum dekaskeapi tiagtin asagmin. Tujash wee diisagmi, tau.
JOH 11:16 Tutai Tomás, Jimagmamu tutaiya nu, tikich Jesusa jintintai aina nuna chichajak: —Jutiishkam wegagmi, mainakush jutiijai mantamatnume, tiuwai.
JOH 11:17 Jesús jegakmá, Lázaro ukusam cuatro tsawan wegaun wainkauwai.
JOH 11:18 Betaniak Jerusalén jegattak kampatum kilómetro tumain au.
JOH 11:19 Kuashat judío aidau Martan Mariajai jegajuawaju, umayí jakau asamtai anentain ichichtugtasag.
JOH 11:20 Nuninai Jesús taattak minawai tabaun Marta antuk, igkugtatus jiintukiuwai, nunitai Mariak jegag juwakui.
JOH 11:21 Nunik Marta Jesusan chichajak: —Apuh, ame jui pujutaik mina ubajuk jamain wajakchae,
JOH 11:22 tujash wika yamaikish ame Apajuí segamunak imatiksagkeap amastatua tajai, tiuwai.
JOH 11:23 Tutai Jesús ayaak: —Amina umaimek aneantatui, tau.
JOH 11:24 Tama Marta chichaak: —Dekaske, tsawan nagkanbau atina dui jakau aidau nantakiagtina nunak dekajai, tiu.
JOH 11:25 Tutai Jesús chichajak: —Witjai jakaunash inannunuk, wikitjai pujutnash sukagtinnuk. Minai dekaskeapi tauk, jakau akush tuke pujutnai;
JOH 11:26 ashí aents iwaaku pujuina nu mina dekaskeapi tujutuk, tuke jakashtin ainawai, ¿dusha dekaskeapi tamek? tiuwai.
JOH 11:27 Tama ni ayaak: —Ehé Apuh, wika aminak dekaskeapita Cristo Apajuí Uchijí, ju nugka jui taatnai tibauwa nuuwapi tajame.
JOH 11:28 Nuna tusa ukuak, Martak kai Marian jegantun, niinak akanki: —Maestro jui taa untsugmawai, tau.
JOH 11:29 Nu tama antamuik, Mariashkam wajaakug Jesusan wainkatatus wejiuwai.
JOH 11:30 Jesusak yaaktanmag eke waitsuk, Marta igkugbaunmag pujau.
JOH 11:31 María waujus jiinki wetai, judío aidau María jeen anentai ichichtuinak kauná batsatushkam: —Umayí ukusbaunum jegantá buuttasas wegatai, tusag pataetukajui.
JOH 11:32 Nunik Mariak Jesús pujamunum jegantá tikishmatug pujus: —Apuh, ame jui pujutaik, mina ubajuk jakachampastaih, tau.
JOH 11:33 Tusa María buuttai, judío Marian pataetuk kaunkaushkam buutiagtatman Jesús wainak, shiig senchi wake besemag dekapjauwai.
JOH 11:34 Nunik iniak: —¿Tuwí ukusmaugme? tau. Tutai aiinak: —Apuh jui ukusmaji, tantá diistá, tuidau.
JOH 11:35 Tama jegan diikmá wainak Jesús buutiu.
JOH 11:36 Nunitai judío aidau: —¡Diisjuah, yaitnaku aneejakuajah! tuidau.
JOH 11:37 Tiagtai dita aina nuiya chichainak: —¿Jujú wainmachunash wainmitkauwe ibaush, Lázaro jataish utugkatnuki, ni pujutaish jakatnasha? tuidau.
JOH 11:38 Jesús ataktú shiig senchi wake besemag dekapeg, ukusbaunum jegantú. Duka makichik waa, waitaiji kaya aputuamu aajakui.
JOH 11:39 Nunik Jesús chichaak: —Kayak ekektajum, tiuwai. Tutai Marta, jakauwa nuna umayí chichaak: —Apuh, mejeawastaih, wagki jaka cuatro tsawan wega dui, tau.
JOH 11:40 Tutai Jesús ayaak: —¿Ame dekaskeapi takumek, Apajuí senchijí iwainamu wainkattame tichamkajam? tiuwai.
JOH 11:41 Tama kayan ekekaju, dutikamtai Jesús nayaimpin pagkai diyak: —Apawah see tajame, wagki antugtukum dui.
JOH 11:42 Wika dekajai, amek minak tuke antugtam nunak; tujash ju aents ijunaina nu shiig wainkag, ame awetiuwaitam nuna dekaskeapi tujuttinme tabaunum tajame, tau.
JOH 11:43 Nuna tii, senchi untsuká: —¡Lázaro, nantakim agaa jiinkita! tiuwai.
JOH 11:44 Tama jakauwa dushakam, uwejinish nawenish pempeagbau nuigtú jaanchi yapijai pempeagbauk imanisag jiinkiuwai. Nunikmatai Jesús chichaak: —Atiajum idaisatajum, wetí, tiuwai.
JOH 11:45 Kuashat judío aidau Marian uyunainak kaunawajuk, Jesús dutikamun wainkag: Dekas juka Apajuí Uchijimpapita, tiajui.
JOH 11:46 Tujash ujumak dita aina nuiya fariseo aidaun wejiag, Jesús dutikamun ujakajui.
JOH 11:47 Dutikam fariseo aidau, sacerdote apuji aidaujai apu chichaman inagnau aidaun ipawag ijunjag: —¿Utugkattaji, au aents aentsush dutikmainchaun iwainag kuashat takaa aush?
JOH 11:48 Aikasaik idaijinig, ashí niinig dekaskeapi tiagtatui; nuniamunum romanmaya kaunawag iinu jega Apajuí ememattaiya nuna tsainak, ashí jutiijai amupaktatajama, tuidau.
JOH 11:49 Tiagtai dita aina nuiya, Caifás daagtin, nunú mijantin sumo sacerdote wajas pujau asa, chichaak: —Atumek makichkish dekatsjume,
JOH 11:50 anentaimsagmesh diyatsjume, ashí aents jinumaina nuna makichik aents mantamnamaina duka, tiuwai.
JOH 11:51 Nunak Caifasak nigki nagkamig tichauwai, nunú mijantin sumo sacerdote wajas pujau asa, Jesús judío aidaunum mantamnatnun etsegkauwai;
JOH 11:52 tujash imá judío aidaunmagkek mantamnatsuk, ashí Apajuí uchijí pampag batsataina nu ijumja makichik emata tabaunum nuniktinun tiuwai.
JOH 11:53 Nunikag, nunú tsawanta duik, mantamnati tusag chichaman umigkajui.
JOH 11:54 Nuadui Jesusak judío aidaunmag wantinkag wekaechau, nuniau asa Judeanak ukuak, makichik yaakat yaijuch Efraín tutai uwejush tikiju anem aunum weuwai. Nunik nui jegaa niina jintintaiji aidaujai pujusui.
JOH 11:55 Judío aidau fiestamtaiji Pascua tikiju wajasú asamtai, kuashat aents yaaktanmaya aidau Jerusalén weedau, eke Pascua jegatsaig pegkeniagtatus.
JOH 11:56 Nunik Jesusan egaidau asag, jega Apajuí ememattainum wayawag pempeentunisag iniininak: —¿Wajuk Jesusash anentaimtagme? ¿Fiestanmash taatpash? tuidau.
JOH 11:57 Sacerdote apuji aidau, fariseo aidaujai: —Makichkitigmekesh Jesús pujamuji dekagkugmek etsegkatajum achikmí, tiajui.
JOH 12:1 Seis tsawan asa Pascua jegatin ai, Jesusak Betania weuwai, Lázaro jakamtai ni inankiuwa nuna pujutaijin.
JOH 12:2 Nui jegamtai Jesusan eme anentsag agkú yuatnun umigkajui; dutikawagmatai Marta yutain pekai, Lázaro Jesusjai mesanum eketaidau.
JOH 12:3 Nuninai María kugkuin senchi akik, ayatak nardo najanamun, jimaituk litro juki tajuntun, Jesusa nawen ukatuk, niina intashinig ujugtujui. Dutikam kugkuntig jegan akijuauwai.
JOH 12:4 Imanikmatai Judas Iscariote, niina jintintaiji aina nuiya, makichik niina sujuktina nu chichaak:
JOH 12:5 —¿Wagka jujú kugkuinush trescientos denario sujunkache, dutika ujunauch aidau yaimaina nu? tau.
JOH 12:6 Tujash nunak, ujunauch aidaun puyatjak tichauwai, nigka kasa asa nuigtú kuichik egketainash nigki takaku asa, nui egkeamunash juujakú asa dutikatatus tiuwai.
JOH 12:7 Tutai Jesús ayaak: —Idaisata, junak mina ukugsagmatai jutijuawagtinun ukusá pujugbaun jutijawai.
JOH 12:8 Ujunauch aidauk atumjaig tuke batsabiagtatui, untsu wika atumjaig tuke pujushtatjai, tiuwai.
JOH 12:9 Kuashat judío aidau Jesús Betania pujawai tuinamun dekawag weajui, niina wainainak Lazaronashkam jakau aig Jesús inankiu asamtai, wainkata tuidau asag.
JOH 12:10 Nudiagtai sacerdote apuji aidaushkam, Lázaro maami tusag chichaman umigkajui,
JOH 12:11 wagki ni nantakbaujin wainainak, kuashat judío aidau Jesusan dekaskeapi tusag nemajuinak ditajai kanaidau asagmatai.
JOH 12:12 Kashinia dui kuashat aents fiestanum kaunau aidau, Jesús Jerusalén taatatus minawai tabaun dekawaju,
JOH 12:13 nunikag duká tsupijag jiinjag igkuinak, senchi untsumkag: —¡Emematiagmi! ¡Apu Apajuí awemam Israela Reyji miná duka pegkegmai! wajaidau.
JOH 12:14 Jesús burron wainkau, nunik nuwi ekeemiu, Agagbaunum tawa nunisag, duka:
JOH 12:15 “Siognumia aents aidautigmek ishamkaigpa; diistá atumi Reyjum burronum entsatkau mina nunú”, tawai.
JOH 12:16 Nagkamchakug jintintaiji aina duka wagka aniawa nunak dekachajui; tujash Jesús nayaimpinum wakitkimtai adeajajui, ashí niina utugkaje, nu pachisa agagbauwa nunak.
JOH 12:17 Aents aidau Jesús Lázaro ukusbaun untsuká inanbaun wainkaju aina nu, dutikame tusag etsejuidau.
JOH 12:18 Nunikmatai, aents aidau Jesusan igkugtatus jiintujaju, wagki aents dutikmainchaun dutikamu tabaun dekawaju asag.
JOH 12:19 Nuniagtai fariseo aidau ditak tudaiyinak: —¡Diisjuah, ashí aents igkugtatus ashintuinana! Ii chicham umikmag duka makichkish dutikashtatagjama, tiajui.
JOH 12:20 Fiestanum Apajuin ememattatus kaunkau aina nuiya, ujumak griego aents aidau,
JOH 12:21 Felipe yaakat betsaidanmaya Galilea nugkanum pujuuwa nuna jegaantag: —Apuh, Jesús wainkatasa wakegaji, tiajui.
JOH 12:22 Tama Felipe Andresan jegajua ujakú, nunik niijai Jesusan ujakajui.
JOH 12:23 Tusá ujaam Jesús chichaak: —Aentsmaga akiinauwa nu nayaimpinum wakitkitta duka yamaik horak uminkae.
JOH 12:24 Dekas tajime, Ajakan jigkayí nugkaa ajachmak nunisag nigki awai, untsu nugkaa initak ajaam jaka tsapai nejeakug, kuashat nejeawai.
JOH 12:25 Aents ju nugka juiyan wakegas takaa pujauk, uwemjashtinai; untsu ju nugkanmaya aina nunak uyumatsuk mina umigtuina duka pujut tuke atina nuna jukitin ainawai.
JOH 12:26 Aents mina umigtuktatus wakegauk nemagtuktinme, mina umigtin aidauk wijai pujusagtinai, tuja mina umigtin aina nunak mina Apagshakam eme anentinai.
JOH 12:27 Yamaiya juik shiig senchi anentaimku waitiamu ajutui, ¿wajintajaki? ¿Apawah, mina mantuawagtata nunak idaitustinme titajash? Tujash juna juniktasan tauwaitjai.
JOH 12:28 Apawah, aminak emematjabiagtinme, tiuwai. Nuna tai nayaimpinmaya chicham: Duwik emematjitnume tusanuk dutikabiajai, tujash awentsanuk iwainaktatjai tabau antuekauwai.
JOH 12:29 Nu tabaun aents nui ijunu antukaju, nunikag, ipamtai tuidau; nuniai tikich aidau: —Ángel chichaké, tuidau.
JOH 12:30 Tiagtai Jesús chichaak: —Juna chichá nunak mina antumtijuktasag tatsui, atumin antumtijamkagtatus tawai.
JOH 12:31 Yamaiya juuwai ju nugkanmaya suwimak suwamu atata duka, tuja yamaiya juiki Iwanch ju nugka jui inama nunú depetkamu atata dushakam.
JOH 12:32 Mina numinum achijag yakí takujiagmatai, jakan nantaakun, ashí aentsnak minai minaig ikaunmantatjai, tiuwai.
JOH 12:33 Nunak ni wajuk maam atinaita nuna aentsun dekamtikak tiuwai.
JOH 12:34 Tutai aents aidau aiinak: —Chicham umiktina nui, Cristuk tuke pujutnai tibauwa nu antukuitji; nuniaish, ¿wajuk asamea Aentsmaga akiinauwa duka maatasa yakí takuam atatui tame? ¿Nu Aentsmaga akiinaush yaita?
JOH 12:35 Tiagtai Jesús ayaak: —Yamaikik tsaaptinuk atumjai ijunag pujawai, tujash dukap tsawan pujugtamchattawai, wajumchik tsawan atumjaig pujuttawai, nuniau asamtai atumjai tsaaptin awa duik, tsaaptinnum yujastajum. Pachiachbau suwe minak uwaktamkainum, wagki suwenum wekaga duka dekatsui ni wegamujinak shiig wainmak wegachu asa.
JOH 12:36 Tsaaptin atumin awa duik, tsaaptina nu dekaskeapi titajum, nunikjum tsaaptinu uchijí aminjum. Juna Jesús tusa ukuak weuwai, nunik ditanak uumjukui.
JOH 12:37 Tujash aents dutikmainchaun kuashat ditá eemtin iwainataish Jesusnak dekaskeapi tuinachu;
JOH 12:38 nu nuniamunum profeta Isaías agagbauwa nui: “Apuh, ¿ya ii etsegbaunash dekaskeapi tuinawa? ¿Apush yana niina senchijinash iwaintawa?” tawa nu uminkauwai.
JOH 12:39 Nuadui dekaskeapi tumain dekapenachu, junashkam Isaías agak:
JOH 12:40 Apajuí ditanak wainmachu, anentaimtanash anentainkachu emakajui; dutikamu asag jiinchakam wainmachua nunin ainawai, chicham etsegbaun antuinakush antachua nunin ainawai, nunin ainachkug chichamjun antukag pujutjin yapajinakuig wi ditanak uwemtikmainaitjai, tiuwai.
JOH 12:41 Isaías juna tiuwa nunak, Jesusa imanjin wainkau asa, niina pachis tiuwai.
JOH 12:42 Tujashkam kuashat aents aidau, nuigtú apu aidaushkam Jesusnak dekaskeapi tiajui. Nuninakush fariseon ishamainak iwainmamainachu, ditá ijuntaijin tuke jiyaku jiyam aig tuidau asag.
JOH 12:43 Nunak aents eme anentam ata wakegaidau asa, Apajuí dekas eme anentam amaina nunak imanchau anentuinak nunikajui.
JOH 12:44 Jesús senchi jiiká chichaak: “Mina dekaskeapi tujutuk imá minakek dekaskeapi tujuttsui, mina awetiuwa nunash dekaskeapi tawai;
JOH 12:45 tuja mina waita dushakam, mina awetiuwa nunash wainui.
JOH 12:46 Wika tsaaptin ju nugka juig taamjai, minai dekaskeapi tuidau suwenum pujusainum tusan.
JOH 12:47 Makichkikesh mina chichamjun antayatak umiatsu nunak wika bakushtatjai; wagki wika aents aidaun bakutasanuk taachuitjai, aentsun uwemtijatasan tauwaitjai.
JOH 12:48 Mina dakitjak, chichamjunash antugtatsu nuna bakutnuk awai, chichaman wi timajim nunuwai tsawan nagkanbaunum bakujattinuk.
JOH 12:49 Wika wiki nagkamnuk chichatsjai, Apag mina awetiuwa nu nigki wi tumainaitag nunak nuigtú jintimainaitag nunash umiktá tujutiuwai.
JOH 12:50 Nuadui wika shiig dekajai, Apag umiktá tibauwa duka pujut tuke atina nuna; nunin asamtai wi atumin tajim nunak Apag tujutbauwa dutiksanuk tajime”, tiuwai.
JOH 13:1 Pascua fiestamtai eke jegatsaig, Jesús ni Apajin weaku ju nugka ukuktinji hora jegaun dekau asa, ni jintintaiji aidaun ju nugka jui pujus aneejakbaujinak, imatiksag inagnamunmash aneamujin iwaintukui.
JOH 13:2 Nunik agkú yuamunum Judas Iscariote Simogkan uchijiya nuna, Jesús sujutnum Iwanch anentaimtijauwai.
JOH 13:3 Jesusak Apají ashí wají niiní idaitusbauwa nuna, nuigtú Apajuijai pujau tauwa nunash, nuigtushkam Apajuiyai waketa nunashkam dekau asa;
JOH 13:4 agkú yuamunum wajakí jaanch awantak nugkuagbaujin awimak toalla juki itipjuauwai.
JOH 13:5 Nunik bandejanum yumin yajaa, niina jintintaiji aidau nawe nijattan nagkamau, dutika toalla itipjuamujiya nujai ujugtuk emau;
JOH 13:6 dutikau asa Simón Pedronashkam jegantau, dutikam ni chichaak: —¿Apuh, ameká mina daweg nijatjugtatam? tau.
JOH 13:7 Tutai Jesús ayaak: —Wi jutikag juka yamaikik dekatsme, tujash dui dekaattame, tiuwai.
JOH 13:8 Tusa tama Pedro chichaak: —Apuh, amek mina dawejuk tuke nijatjugchattame, tiuwai. Tutai Jesús ayaak: —Amina nawemin wi nijagchamtaig, amek wijaig ijunmaitsume, tau.
JOH 13:9 Tama Simón Pedro chichaak: —¡Untsu apuh, imá dawejuk nijatsuk, uwejush nijatjakum, buukjushkam nijatjugta! tiuwai.
JOH 13:10 Tutai Jesús ayaak: —Mainua duka nuigtú nijamagtasag atsumatsui, ayatak naweeg nijatam amainai; wagki ashí iyashiya duka tsuwatchau asamtai, numamtuk atumek tsuwatchau ainagme, tujash ashí tsuwatchauk ainatsjume, tiuwai.
JOH 13:11 Jesusak dekau ya sujuktatua nunak, nuadui: “Ashí tsuwatchauk ainatsjume”, tiuwai.
JOH 13:12 Dutika, ashí nawen nijatuk, jaanchjin juki wakitki mesanum jegantá chichaak: —¿Atumesh dekagmek wi jutikajim jusha?
JOH 13:13 Atumek minak Maestro nuigtú Apú tujutjume, duka dekas iman asamtai tujutjume.
JOH 13:14 Wi Maestroitkun nuigtush Apuitkun atumi nawemin nijatjajime, atumesh junisjumek atumin kakagchaujum pempeentunikjum iwaintuniktajum.
JOH 13:15 Wi jutikag junak, atumesh jutiksagmek takastajum tusan iwaintakun jutikajime.
JOH 13:16 Dekas tajime, inakak apujin nagkaesauchui, awemamua dushakam awekagtiuwa nuna nagkaesauchui.
JOH 13:17 Ju aina ju dekaajum atumesh dutiksagmek takaakjumek shiig aneasjum pujustin ainagme.
JOH 13:18 Junak ashí atumin takun tatsujime, wika dekajai ya aidauna etegjauwaitja nunak; tujash Agagbauwa nui: “Wijai pagkan yuwa nuiyag pempeentugkittawai”, tawa nu uminkattawai.
JOH 13:19 Yamai nagkamsanuk, eke jegatsaig tajime, wagki nunú tsawan jegakui, dekas Apajuí Uchijimpapita tujutminjum tau asan.
JOH 13:20 Dekas tajime, wi awemamun jukitta duka, mina jujuinawai, mina jujuina dushakam, mina awetiuwa nuna juinawai.
JOH 13:21 Jesús nuna tii, shiig senchi wake besemag dekapjauwai, nunik chichaak: —Dekas tajime, atum ainajum juiyag makichik minak sujutkattawai, tau.
JOH 13:22 Nuna timatai jintintaiji aidauk pempeentunisag niinidau, yana takug tawa tusag.
JOH 13:23 Nuniai jintintaiji aina nuiya makichik, Jesusa anetaiji, Jesusai ayaumas eketu.
JOH 13:24 Nuna Simón Pedro iwijau, yana takug tawa iniasti tusa.
JOH 13:25 Dutikam Jesusan adijik, iniak: —¿Apuh, dusha yaita? tau.
JOH 13:26 Tama Jesús ayaak: —Yana wi pagkan puukan uchupjan susattaja nuuwai. Tusa pagkan uchupig Judas Iscariote Simogkan uchijiya nuna susauwai;
JOH 13:27 dutikam yuwaig, Iwanch waintuauwai. Nunitai Jesús chichajak: —Ame dutikattam duka, wamak dutikata, tiuwai.
JOH 13:28 Tujash makichkish mesanum eketaina duka dekachajui wagka tawa nunak.
JOH 13:29 Ujumak anentaimsajui, Judas kuichik egketain takaka duis, Jesús: Fiestanum atsumtin sumakta nuniachkumesh ujunauch aidau susata tawastai tiaju.
JOH 13:30 Judaschakam pag puukbau juki waujus jiinkiuwai. Nunak kashi nunikui.
JOH 13:31 Judas jiinki wematai, Jesús chichaak: —Yamaiya juuwai Aentsmaga akiinauwa nu eme anentam atata nu, nuigtú Apajuinash niiní eme anentiagtatui.
JOH 13:32 Aentsmaga akiidau Apajuí ememattinme tusa iwainataik, Apajuishkam Uchijun ememattinme tusa wamak umiktatui.
JOH 13:33 Uchuchig aidauwah, atumjai ijunjanuk kuashat tsawantaik pujushtatjai, tujash judío aidaun timag dutiksanuk atumnash tajime, wi wetatag nuanuig atumek yamaikik minimainchau ainagme.
JOH 13:34 Chicham umiktinun yamagman ukugjime: Makí makichik pempeentunisjumek aneenitajum; wi atum aneamun iwaintukjim nunisjumek, atumesh pempeentunisjumek aneenitajum tusan.
JOH 13:35 Atum pempeentunikjum aneediagtaik, tikich aidaush Jesusa jintintaijimpap ainawa tusag dekagmawagtatui, tiuwai.
JOH 13:36 Tutai Simón Pedro iniak: —Apuh, ¿tuwí wetatme? tau. Tama Jesús ayaak: —Wi wetatag nuig yamaik minimaitsume, tujash dui pujusam minittame, tau.
JOH 13:37 Tutai Pedro ayaak: —Apuh, ¿wagka yamaikish minimainchauwaitja? wisha aminí jakatasan umintsan pujajai, tau.
JOH 13:38 Tutai Jesús ayaak: —¿Dekaskek wijai mantamnatasam umintsam wekaegam? Dekas tajame, eke atash shinatsaig kampatumá ugtuktatme, tiuwai.
JOH 14:1 Nuna tii: “Atumek wi tajim nunú anentaimtakjum wake besemag anentaimá pujuigpajum; Apajuiyai dekaskeapi takujum, minaishkam dekaskeapi titajum.
JOH 14:2 Mina Apajú jeenig kuashat pujumain awai, nu iman au asamtai, wi atum pujustinnak umigkatjime tusan weajai.
JOH 14:3 Yamai wenu atum pujustinun umikan, ataktú wakettsanuk taattajai, mina pujutaijui pujustajum tusan atumin juwakun.
JOH 14:4 Atumek jintak wainjume, wi wegag nui minimaina duka”.
JOH 14:5 Tutai Tomás: —Apuh, dekatsji tuwí wegame duka, nuniautish, ¿wajuk jintash dekamainaitji? tau.
JOH 14:6 Tutai Jesús ayaak: —Witjai jintanuk, dekasketnash wikitjai, nuigtushkam witjai pujutnash sukagtinnuk. Makichkish wijaichuk mina Apajuig jegamainchau ainawai.
JOH 14:7 Atum mina waitutigmek, mina Apagshakam wainjume. Yamai mina waitjum juik, mina Apagshakam wainjume, tau.
JOH 14:8 Tutai Felipe chichaak: —Apuh, Apa iwainkagtukta, duke atsumaji, tiuwai.
JOH 14:9 Tama Jesús ayaak: —Felipeh, kuashat tsawan atumjai pujag nuniaigkik, ¿eke waittsum? Mina waita duka, Apagnashkam wainui, nuniaish; ¿wagka Apa iwaintugkata tame?
JOH 14:10 ¿Dekaskeapi tatsumek wi mina Apajui pujau asamtai, mina Apagshakam minai puja duka? Wi chichaman tajim nunak, wiki nagkamnuk tatsujai, mina Apag minai puja nunú, ni dutikata tabaunak takaajai.
JOH 14:11 Wi mina Apagjai pujau asamtai, mina Apag minai pujawai taja duka dekaskeapi titajum. Nuniachkugmesh, wi takaag nunú diisjum, dekaskeapi tujuttajum.
JOH 14:12 Dekas tajime, mina dekaskeapi tujutuk, wi takaag junak jutiksag takastatui, nuigtush wi takasag juna nagkaegas takasagtinai, wagki wi Apajuí wegau asamtai.
JOH 14:13 Ashí mina daajui Apag segattajum nunak amastatjime, wi dutikamunum Apajun ememattinme tau asan.
JOH 14:14 Makichik wajigkesh mina daag pachisjum atum segatkugminig, imatiksanuk umiktatjai.
JOH 14:15 Atum mina anenkugmek, wi chicham umiktajum tajim nunú betek umiktajum.
JOH 14:16 Nuniakjumin wi Apajun segattajai, atumiin tuke pujus ichichtamtina nuna Wakaní Pegkeji awetugmati tusan.
JOH 14:17 Nunú Wakan dekaskea nuna jintinkagtina nunak, aents mina nemagtuchu aidauk jumain ainatsui, wagki waintanash wainmainchau dekatnash dekamainchau asag; tujash atumek dekagme, wagki atumiin pujau asamtai nuigtushkam atuminig tuke pujutnai.
JOH 14:18 Tuke bitaika numamtukek ukukchatnaitjime, waketjusnuk ataktú tajuatnaitjime.
JOH 14:19 Machik asag, aents mina nemagtuinatsu duka waitkachagtatui, tujash atumek waitkattagme, wagki wi pujau asamtai atumshakam tuke pujutin asajum.
JOH 14:20 Nunú tsawan jegakui, wi Apajui pujai atumshakam minai pujagmin, wi atumin pujamuk shiig dekaattagme.
JOH 14:21 Aents wi chicham umiktajum tibauwa nuna umiakug dekas mina anentak nuniktatui. Nuniaun mina Apajuk aneettawai, nuniakui wishakam aikasnuk anettajai, dutikakun wantintuktatjai.
JOH 14:22 Tutai Judas (Iscariotechu) chichaak: —Apuh, ¿amina nemagtamchau aidau wantintutskesh, utugsamea imá jutiikesh wantinkagtuktatme? tau.
JOH 14:23 Tama Jesús ayaak: —Mina anentuk, mina chichamjua nuna umiktatui, nunitai mina Apajush aneettawai; nuniakui wishakam mina Apagjai niina anentain tajuan tuke pujustinaitjai.
JOH 14:24 Untsu mina anenchauk, mina chichameg aina nunak umikchattawai; tujash jujú chicham atum antajum juka midauchui, Apag awetiuwa nudauwai.
JOH 14:25 Ashí juna tajim junak, yamai atumjai pujag dui tajime.
JOH 14:26 Tujash Ichichkagtina nuna, Wakaní Pegkejin Apag mina daajui awematta nunú, ashí wají aina nunak jintinjamawagtatui, dutikak ashí wi tiuwaitjim nunash aneemtijamjagtatui.
JOH 14:27 Shiig agkan pujuta nuna ukugjime, mina shiig agkan pujutaijua nunash amajime, wika ju nugkanmaya sukagtin aina nuninnak amatsjime; nunin asamtai anentaiminish puyatkaigpa, ishamtash ishamkaigpajum.
JOH 14:28 Wika wegajai, nuniknush wakettsanuk atumjai pujustasan tajuattajime tabaushkam antukmaugme. Dekas mina anenkugmek, wi Apag mina nagkaetasua nui wegajai tabau antugtakjumek shiig aneemain ainagme.
JOH 14:29 Junak emtikan tajime, nunú uminkui dekaskeapi timinjum tusan.
JOH 14:30 Atumjaig kuashat chichá pujushtatjai, ju nugka juna apuji minau asamtai, nigka mina depetumainjig senchijig atsujui;
JOH 14:31 tujash ju nugkanmaya aidauk dekamain ainawai wi mina Apajun aneau asan, ni dutikata tujutbaunak imatiksanuk umijag nuna. Wajagtajum, wegagmi.
JOH 15:1 Witjai dekaskenum uva numijinuk, untsu mina Apajua nuuwai ajakan kuitamna duka.
JOH 15:2 Ashí mina kanaweg nejeachunak tsupiawai; untsu ashí kanaweg nejena nunak, asantug iwajui aan senchi nejektí tau asa.
JOH 15:3 Atumek wi chichaman jintintuamjim nu umiau asajum shiig asanjamu ainagme.
JOH 15:4 Wijai ijutkau atajum, wi atumjai ijutkag antsagmek. Ajakan kanawe numijin achitkachu nigki kanakí akug nejemaitsui, antsagmek atumesh wijai ijutkau achakjumek pegkejak takamaitsugme.
JOH 15:5 Witjai uva numijinuk, atumetjume mina kanaweg aidautigmek, wijai ijutka nu, tuja wi niiní ijutkag nunú senchi nejeawai; wagki atum wijai ijutkau achakjumek Apag wakegamua duka makichkish dutikmainchau ainagme.
JOH 15:6 Wijai ijutkatsu duka, jiikí ajapam ajaka kanawe tsupikbau kukagmatai, jukí jiinum apetiama numamtuk awajam atinai.
JOH 15:7 Wijai ijutkau pujakjumek nuigtú mina chichameg aina dusha umiakjumek, ashí atum wakegamu segattajum, nuniakjuminig ashí amastinaitjime.
JOH 15:8 Atum pegkeg takaamu aina duke iwainagtaik, tikich aidaush mina Apagnash shiig emematiagtatui, nuninak dekas mina jintintaig ainajum nunashkam dekagmawagtatui.
JOH 15:9 Apag mina anenta dutiksanuk atumnashkam aneajime, nuadui wi aneajim nunisjumek atumshakam anenitajum.
JOH 15:10 Mina chichameg aina nu umiakjuminig wishakam aneettajime, wi mina Apajú chichame aidaun umiju asamtai, ni anenta aikasnuk.
JOH 15:11 Ju aidaun tajim junak, wijai betek dakujus shiig aneas pujustinme tusan tajime.
JOH 15:12 Wi chicham umiktajum tajim duka: Mina nemagtin aidautigmek pempeentunisjumek aneenitajum, wi atumin aneajim antsagmek, tajim nuuwai.
JOH 15:13 Makichik aentskesh ju anenka juna nagkaesauk atsujui, niina pujutjin kumpají aina nui tsagkamanmainuk.
JOH 15:14 Atumek mina kumpag ainagme, wi dutikatajum tajim nu umiakjumek.
JOH 15:15 Nuniau asamtai inak ainagme tichattajime, wagki inaka duka apuji takaa nunak dekatsui; mina kumpag ainagme tajime, wagki mina Apag tabau antukbaunak ashí ujakjim nuadui.
JOH 15:16 Atum minak etegtuachu ainagme, wi atumnak etegjauwaitjime, dutikau asan mina chichameg etsegkujum, ajak senchi nejegama numamtuk wajaktajum timaijim duka ajumaish tuke atinai. Nuadui atum mina pachittsajum, ashí mina Apag segamak amasagtinai.
JOH 15:17 Junashkam tajime: Pempeentunisjumek anenitajum.
JOH 15:18 Aents mina nemagtuchu aidau, atum mina nemagtau asagmin kajegtamainakuish, adeagtajum, mina dekas nagkamchakug kajegtuku ainawai.
JOH 15:19 Atumesh ju nugkanmaya agtaik, dita anenina aikagmasajag anempamain ainagme. Tujash wi atumnak ju nugkanmaya aina nuiyatigmin etegjan midau emakbau asajum, ditajai betekchau ainajum duwi kajegtamainawai.
JOH 15:20 Adeagtajum wi: “Inakak apujin nagkaesauchui” timajim nu. Mina waitkagsaju aina dutiksag atumnash waitkagmasagtinai. Mina chichamjun umiauk, atum tabaunash umikagtatui.
JOH 15:21 Ashí nu aina nunak mina nemagtuidau asagmin imatijabiagtinai, wagki mina Apag awetiuwa nuna dekainachu asag.
JOH 15:22 Wi jui taan ujakchamu ainakug, tudaujin bakumamainuk atsugmain ainawai; tujash yamaik ditá tudaujin ayamjumamainuk atsujuinawai.
JOH 15:23 Mina kajegtuidauk, mina Apagnash kajejuinawai.
JOH 15:24 Wi dita aina nui tikichish dutikchatain takaschau ataik, bakumamainchau ainawai; tujash wi iwainaja takaamun waituinayatak ayatak kajegtuinak, mina Apagnashkam kajejuidau asag bakumagtinai.
JOH 15:25 Tujash junak dita chicham umiktin agagbauwa nui: “Wainak kajegtukajui”, tawa nu uminu asamtai aikajuinawai.
JOH 15:26 Tujash wi Ichichkagtinun awemattag nu, Wakan Apagdau dekasken jintinkagtina nu, mina pachitus shiig dekamtijamattagme.
JOH 15:27 Dutijamainakui atumshakam yama nagkamchakjumesh wijaig batsamsau asajum mina pachittsajum tikich aidaush ujaktatjume.
JOH 16:1 Juna tajim nunak, minai dekaskeapi tabau megkaekaijum tusan tajime.
JOH 16:2 Jega ijuntai aina nui wayagminish agaa jigmaktin ainawai, dutijamawag mantamainak: Juka Apajuí takaju asa jutikaji tiagtinai.
JOH 16:3 Nunak mina Apagnash, minashkam dekajuinachu asag dutijamiagtinai.
JOH 16:4 Juna tajim nunak, nu tsawan jegakuish wi tibauwa nu adeagminjum tusan tajime. Junak nagkamsanush tichabiajime, wagki wi atumjai pujau asan.
JOH 16:5 Tujash yamaik mina awetiuwa nujai pujustasan wegajai, makichkitigmekesh: ¿Tuwí wegame? tusagmek inintsachugme;
JOH 16:6 ayatak, wi nunú aidaun takui wake besekjum pekagjume.
JOH 16:7 Tujash dekaskea nuna tajime: Wi weamua nu atuminig imá pegkejai; wagki wi wechataik, Ichichkagtina duka atumjai pujustasag tamaitsui, tujash wi wenu awemattajai.
JOH 16:8 Dutikam ni taa, aents aidau tudaunum batsata nunak dekamtikattawai, pegkeg takat aina nunash nuigtú suwimak atina nunashkam.
JOH 16:9 Tudau takaina duka, mina dekaskeapi tujutuinatsu nuuwai;
JOH 16:10 Wi pegkejan takaunuk mina Apajuí wetatjai, nunikmataig ataktuk waitkashtatjume;
JOH 16:11 suwimkan jukitta duka, ju nugka juna apujiya nuwai, duka suwimkan jukiti tibauwai.
JOH 16:12 Kuashat wají aidau atum tumainuk ajutui, tujash yamaiya juikik imatikagmek ashí dekamainchau ainagme.
JOH 16:13 Tujash Wakan dekaskea nu taa, ni ashí dekaskea nuna dekamtijamattawai, wagki nigka nigki nagkamig chichakchattawai, ashí ni antukbaujiya nuna titatui nuigtush wají nagkaemagtina nunash dekamtijamattawai.
JOH 16:14 Wakaní Pegkejiya nu mina imanjua nunak iwaintugmak, imá midaunmayanak atumnash dekamtijamattagme.
JOH 16:15 Ashí mina Apagdauwa duka midau ainawai; nuadui Wakaní Pegkeji midauwa nuna juki, dekamtijamattawai tajime.
JOH 16:16 Machik asagmek minak waitkashtatjume, tujash dukapech tsawan asagmek ataktú waitkattagme.
JOH 16:17 Tutai ujumak jintintaiji aidau pempeentunisag iniininak: —¿Wajina takua nunash, “machik asagmek minak waitkashtatjume, tujash dukapech tsawan asagmek ataktú waitkattagme, wagki Apajuí wegau asamtai” tawa nunash tawa? tuidau.
JOH 16:18 Tusag ¿wajina takua: “Machik asagmek tawa”? Antumaitsui wajina takus tawa, tuidau.
JOH 16:19 Tusag, iniastag tuinamun Jesús dekau asa, chichaak: —“Machik asagmek minak waitkashtatjume, tujash dukapech tsawan asagmek ataktú waitkattagme” taja duká, ¿pempeentunikjum iniiniakjum, wajinak tawa tajum?
JOH 16:20 Dekas tajime, atumek buutkujum wake besemag pujuttagme, nuniagmin ju nugkanmaya aents aidauk shiig aneediagtatui; tujash atum wake besemag pujamua duka, sakapakjum ataktú shiig aneastatjume, wi nantakin wantintuktatjim dui.
JOH 16:21 Nuwa uchigmakug najaimawai, wagki horaji jegagbau asa; tujash uchin uchigmaktata dui, ni waittsamujinak kajimatui, uchin uchigmak shiig aneamunum.
JOH 16:22 Atumnashkam aantsag yamaik wake besemag ajutjamainawai, tujash wakettsanuk wainkattajim dui, atumi anentaimin shiig aneastinaitjume, nunú shiig aneamugmia nunak makichkish emegkatjamainchau ainawai.
JOH 16:23 Nunú tsawanta duik makichkish inintsashtin ainagme. Dekas tajime: Atum mina pachittsajum ashí mina Apag segattajum nunak amastatjume.
JOH 16:24 Yamaikish makichkish mina pachittsagmek Apajuk segachugme, tujash yamaik segatajum nuniakjumek jukittagme, nunikjum atumesh shiig aneastatjume.
JOH 16:25 Ju aina junak augmatbaujai apatkan tinujime, tujash hora jegawai augmatbaujai apatkan tutsuk, shiig paan mina Apajun pachisan etsegkattag nu.
JOH 16:26 Nu tsawantinig mina pachittsajum Apag segatajum, wi Apajun atumin segattajime tatsujime,
JOH 16:27 wagki Apajuk tuke atumnak anempajume. Atumin anempajum nunak mina anenjum dui anempawai, wagki wi Apajuinumia tauwaitag nu dekaskeapi tujutuidau asagmin.
JOH 16:28 Mina Apajuiyan jiinkin ju nugka juig tauwaitjai, yamaik ju nugka junak ukuajai Apajuí waketkun.
JOH 16:29 Tutai jintintaiji aidau chichainak: —Makichik augmatbaukesh tutsuk, yamaik paan tukagtiume, tuidau.
JOH 16:30 Yamaik dekaji ashí wají aidau dekam duka, nuigtush atsumatsme inintsatnume tusamek, nuadui Apajuiyap awemauwaita tusa dekaskeapi tuinaji, tuidau.
JOH 16:31 Tama Jesús ayaak: —¿Yamaik dekaskeapi tajum?
JOH 16:32 Yamaik hora jegawai, duka yamaiya juiki, atum pampagjum makí makichik shimakjum minak ukugkittajum nu. Tujash imá wikik juwakchattajai, wagki Apag wijai pujawai.
JOH 16:33 Juna tajim junak, minaiya shiig agkan pujuta nu ajitnume tusan tajime. Ju nugka juig waitiamuk igkugtinaitjume, tujash ichichmamjatajum, wi ju nugkanmayanak depetkajai.
JOH 17:1 Nuna tii idaiyak, Jesús nayaimpin diis chichaak: Apawah, minak horak jegagtine; minash ememattai etita, aents aidaushkam: Dekas Apajuí Uchijimpapita tusag dekajuatnume. Wishakam dutiksanuk aents aidaunmash iwainaktajame emematjabiagtinme tusan.
JOH 17:2 Ame minak ashí nugkanmaya aina nunak, nigki diistí tusam idaitugsaume, dutikakum senchigmishkam sujusmaume, mina nemagtin aidau ame sujusmauwa nunash pujut nagkanchaun susati tusam
JOH 17:3 Pujut nagkanchauwa nunak, amina dekagmawag: imá jukeapita dekas Apajuik tujamainak, ame mina awetiuwaitam nunashkam: Dekas juwapita uwemtikagtumainuk, tuidau jukiagtinai.
JOH 17:4 Wika ju nugka jui pujusnuk aminak emematjame, nuniakun ame umiktá tujutiuwaitam nunash imatiksanuk umikjai.
JOH 17:5 Apawah, yamaik ame minash yaunchuk nugkash najannatsaig amijai emematjamin aajabia imanuk etita.
JOH 17:6 Ame ju nugkanmaya aents aidau etejam sujusuitam nunak, wishakam amina pachisnuk shiig jintintuawagjai. Duka aminuk sujusuitme, dutikamu asag ditashkam chichamjumnak betek umigtamainawai.
JOH 17:7 Yamaik wi ashí aminu aidaun jintintuabiag nunak, dekainawai;
JOH 17:8 aikasnuk ame mina chicham etsegtugkata tujutbaunak imatiksanuk ujakagmajai, dutikam ditashkam wakejus antukagmae, nuninak: Dekas Apajuí awemamuap tauwaita tusag dekaskeapi tujutuinawai.
JOH 17:9 Duwi ditanun pachisan segagme aminu asagmatai, tikich aents mina nemagtuinatsu nuna pachisnuk segatsjame.
JOH 17:10 Ashí aents midauwa duka aminu ainawai, tujamtai aminu aidauk midau ainawai. Nunú aidau mina emematjuinawai, tikich aidaushkam Jesusa imanjin wainkatnume tusag.
JOH 17:11 Wika aminí midau asan juig pujushtatjai, tujash jujú aidauk nugká juwainawai. Apawa pegkegmah, amina senchigmin kuitamkata ame sujusbau aina duka, ii makichik duke anentaimkag nunisag ditashkam anentaimtinme.
JOH 17:12 Wi ditajai pujaknuk, ame senchijum sujusbauwa dui ditanak kuitamnujai, dutikamu asa dita aina nuiyag makichkikesh megkaekache, nuninaitak aatus megkaekati tibauwa nu megkaekae, yaunchuk chicham agagbauwa nu uminu asamtai.
JOH 17:13 Yamaik ame pujam nui minajai, nuniayatkun ju nugka jui pujusan tajame, ditanash wi shiig aneag nunisag betek ajitnume tau asan.
JOH 17:14 Amina chichamjumnash jintintuawagmajai, dutikai aents ju nugkanmaya aidau kajejuinawai, wagki wi ju nugkanmayachuitag nunisag ditashkam ju nugkanmayachu asagmatai.
JOH 17:15 Ju nugka jui batsamsainum yajuakta tusanuk segatsjame, Iwanch waitkainakuish ayamjukta tusan segajame.
JOH 17:16 Wi ju nugkanmayachuitag nunisag ditashkam ju nugkanmaya ainatsui.
JOH 17:17 Amina chichamjum dekaskea nunak umigtamkatnume ditash pegkemtikata.
JOH 17:18 Ame mina ju nugka jui, aents amina dakitjamin aidau batsatbaunum awetiuwaitam dutiksanuk ditanash ishimjai.
JOH 17:19 Wika, amina takaju asan mina pujutjunak ashí idaitusjame, ditashkam nunisag aminu dekaskea nuna takagtamainak, ashí ditá pujutinak idaitugmastinme.
JOH 17:20 Tujash imá jujú aidaunakek segatsjame, dita chichaman etsejiagtai antuinak mina dekaskeapi tujutiagtin aidau pachisnush segajame;
JOH 17:21 ashí dita aina duka ijutkau atinme, tusan. Apawah, ame minai amin, wi aminí au asamtai makichkitag nunin ditash atinme, nuniagtai ju nugkanmaya aidaush ame awetiuwaitam nuna dekaskeapi tiagtinme.
JOH 17:22 Ame imanjum mina sujusuitam nunak ditanash susajai, jutii makichkitag nunisag ditash makichik agtinme tusan;
JOH 17:23 wi ditai ai, ame wijai ame nunisag, shiig betek ijunas makichik atinme, nuniagtai ju nugkanmaya aidaush ame awetiuwaitam nuna dekajuatnume, nuninak mina anentam aikasmek dita aneam nunashkam dekaatnume.
JOH 17:24 “Apawah, ame sujusbau aina nunak mina pujutaijui ditash pujusag, nugkash najannatsaig ame mina anentujakú asam, amina imanjum ashí mina sujusum nunash wainkatin atinme tusan wakegajai.
JOH 17:25 Apag pegkegmah, aents nugkanmaya amina umigtamainachuk dekagmainatsui; tujash wika aminak dekagme, ju aina jusha dekagmainawai ame mina awetiuwaitam nunak.
JOH 17:26 Wika amina pachisnuk ditanak shiig dekamtikamjai, aan nagkaemasnush tuke dekamtiksanké atatjai, ame mina anentam aantsag ditaish atí, nuniakui wishakam ditai atajai tau asan”.
JOH 18:1 Jesús aatus Apajuin aujus inagnak, ni jintintaiji aidaun yajuak entsa Cedrón tutai amain katigkui, nunik ajak olivos tutai ajakbaunum jegantajui.
JOH 18:2 Nunak Judas, Jesusan sujuktina dushakam dekau, wagki nui Jesús ni jintintaiji aidaujai kuashtá ijunin asamtai.
JOH 18:3 Nunin asa Judaschakam, kuashat suntag aidaun yajuak nuigtú sacerdote apuji, fariseo aidau ditashkam, jega Apajuí ememattain kuitamin aidaujai ishiakbaujai, lamparan nuigtú jii ekemajag, nagkí tinamdaekag Jesusan kautuawajui.
JOH 18:4 Tujash Jesusak, ashí niina utugkagtatua nuna dekau asa, jiintuki igkugku, dutika iniak: —¿Yaa egagme? tiuwai.
JOH 18:5 Tama dita aiinak: —Jesús nazaretnumia egaji, tuidau. Tiagtai Jesús ayaak: —Witjai nunak, tiuwai. Judas niina suja dushakam ditajai wajau asa,
JOH 18:6 Jesús chichaak: “Witjai”, tutai wakettsag nugkaa kakekaju.
JOH 18:7 Nunikagmatai awentsag iniinak: —¿Yaa egagme? tau. Tutai dita aiinak: —Jesús Nazaretnumia egaji, tiajui.
JOH 18:8 Tiagtai Jesús ayaak: Witjai timajim jama, mina egatkugmek, ju aina juka idaisatajum wetinme, tiuwai.
JOH 18:9 Nunak Jesús Apajin segaak: “Apawah, ame sujusbaunak makichkish emegkatkachjame” tiuwa nu betek uminu asamtai tiuwai.
JOH 18:10 Nuniagtai Simón Pedro, espadajin ukuini juwakug sumo sacerdote inake Malco daagtinun kuwishí untsujiya nuna tsupigkauwai.
JOH 18:11 Dutiktai Jesús Pedron chichajak: —Espadajum jukim awajata, ¿amek, mina Apag waittsati tujutbauwa nunak umimainchauk anentaimtujam? tiuwai.
JOH 18:12 Suntag aidau, comandante, jega Apajuí ememattai kuitamin judío aidau ishiakbau aina nujai Jesusan achikag jigkajajui.
JOH 18:13 Dutikawag dekatkauk Anasai ejegawajui Caifasa wegajin, nu mijantinig Caifás sumo sacerdote wajas pujau asamtai.
JOH 18:14 Nunú Caifás judío aidaun chichajak: “Ashí aentsun ayamjuk uwemtijatnuk, dekas makichik aents mantamnamainai”, tiuwa nu aajakui.
JOH 18:15 Jesusan jukiag emagtai, Simón Pedro nuigtú tikich Jesusa jintintaijiya nujai, ukunum pataesag weedau. Nunú Jesusa jintintaijiya duka, sumo sacerdote waintai asa, sumo sacerdote jeen agaajin Jesusan awayagtai niish wayauwai,
JOH 18:16 nunitai Pedrok agaag, waitinum juwakui. Nuniai Jesusa jintintai sumo sacerdote waintaijiya nu jiinki, nuwa waiti kuitamna nuna aujus Pedron awayauwai.
JOH 18:17 Nunittaman nuwa waiti kuitamna nu Pedron iniak: —¿Amesh au aentsú jintintaiji aina duchaukaitam? tau. Tama Pedro ayaak: —Atsa, duchauwaitjai, tau.
JOH 18:18 Tsetsek asamtai, sacerdote apujin inake aidau nuigtú jega Apajuí ememattai kuitamin aidaujai jiin ikapajag anamainak ijunaidau; nuniamunum Pedroshkam ditajai ijunag jii anamak wajau.
JOH 18:19 Sumo sacerdote Jesusan, niina jintintaiji aidaun nuigtú ni jintinkagtutaijin pachis iniau.
JOH 18:20 Tutai Jesús ayaak: —Wika ashí aents antuinamunum chichaujai. Tuke jintinkagtinujai jega ijuntainum nuigtú jega Apajuí ememattainmash ashí judío aidau ijunin aina nui, wika uuknuk chichachujai.
JOH 18:21 ¿Wagka minash ininjume? Wi chichaamun antuku aina nu iniasta, dita wi wajintu chichauja nunak dekainawai, tiuwai.
JOH 18:22 Nuna Jesús tutai, jega Apajuí ememattain kuitamna nu makichik juwatki yapinum awatí chichajak: —¿Aajamek sumo sacerdotesh aiyamum? tiuwai.
JOH 18:23 Dutikam Jesús ayaak: —Wi pegkegchaun chichakmataig, titá wajina pegkegchaunash tija nu, nuninchau aish, ¿wagka awatame? tiuwai.
JOH 18:24 Timatai Anás, Jesusnak jigkagbautak sumo sacerdote Caifás pujamunum awemauwai.
JOH 18:25 Nuniai, Pedroshkam jii anamak wajau. Nunittaman iniinak: —¿Amesh auna jintintaiji aina nuiyachukaitam? tuidau. Tama Pedroshkam uwaak: —Atsa duchauwaitjai, tiuwai.
JOH 18:26 Titatman sumo sacerdote inake aina nuiya makichik, Pedro kuwishí asankauwa nuna patayí chichajak: —¿Wi amina ajak ajakbaunum Jesusjai wajamin wainkachmakiajam? tau.
JOH 18:27 Tamashkam Pedrok ataktú uuku, nuniaig atash shinukui.
JOH 18:28 Jesusnak Caifasa jeenian jukiag gobernador romanmaya pujamunum ejegawajui. Dutikawag tsawau asamtai, apú jeenig wayachajui, pegkegchau utsumakaja Pascua yuwachaig tuidau asag.
JOH 18:29 Nuniagtai Pilato dita ijunbaunum jiinki, iniak: —¿Jusha aentsush wajukamtai itagtuaugme? tau.
JOH 18:30 Tutai dita aiinak: —Ju aents katsekchauwaitkuig jutika achikaik itagmaitsujime, tuidau.
JOH 18:31 Tiagtai Pilato chichaak: —Atum jukijum, atum chicham umiktinnumash wajintua dutiksagmek dutikatajum, tiuwai. Tutai judío apuji aidau aiinak: —Jutii judío aidautik, makichik aentskesh maatajum tibauk ainatsji tiajui.
JOH 18:32 Aatus uminkauwai Jesús, wajuk waitus jakatin asaya tiuwaita nu.
JOH 18:33 Tiagmatai Pilato ataktú jega niina pujusá inamtaijin wayá, Jesusa iniak: —¿Amekaitam Rey judío aidaunu? tau.
JOH 18:34 Tama Jesús ayaak: —¿Dusha amek nagkamek tujutam atsa tikich mina pachitus tujamchagmaká? tau.
JOH 18:35 Tama Pilato ayaak: —¿Wi judiokaitag? Amina aentsjum nuigtú sacerdote apuji aina nujai achigmakag minai itagmawaje. ¿Wají aikamume? tau.
JOH 18:36 Tama Jesús ayaak: —Mina inamtaijuk ju nugka juchauwai; juiya ataik, mina takagtin aidau maanimain ainawai achikag judío aidaunum mina sujutkainum tusa; tujash mina inamtaijuk juiyachui, tiuwai.
JOH 18:37 Tutai Pilato iniak: —Nuniakmek ameapitme rey, tau. Tama Jesús ayaak: —Ame rey tujutam duka dekaske. Wika ju nugka juig akiinauwaitjai, nunikan chicham dekaskea nuna etsegkatasan tauwaitjai. Ashí aents chicham dekaskea nuna antukag umiina nu mina chichamjunak antugtuinawai, tiuwai.
JOH 18:38 Tutai Pilato iniak: —¿Wajimpaya dekaskea dusha? tiuwai. Nuna tii ukuak agaa jiinki, judío aidau ijuntatman chichajak: —Wika ju aents bakumamainjinak makichkish pegkegchaujinak dekajuachjai.
JOH 18:39 Tujash Pascua jegakuig, tuke makichik jiiktá takugmin jiinuweg dutiksag, ¿judío aina nuna Reyjinash jiiktí tajumek? tau.
JOH 18:40 Nuna tutai ataktú ashí senchi untsumkag: —¡Aanka jiikipa, Barrabás jiiktá! wajaidau. Duka Barrabasak kasa aajakui.
JOH 19:1 Imatiagtai Pilato, Jesusan jukijum asutiatajum tusa suntag aidaun inajui.
JOH 19:2 Dutikamtai suntag aidaushkam jagkin chapikmajag atsejutain najanawag Jesusan atsemitkakag, jaanch kapantu nentetkaun anugjajui;
JOH 19:3 dutika chichajuinak: —¡Juuwai judío aina nuna Reyjig! awajuidau. Tuinakug yapinum awatuidau.
JOH 19:4 Tiagtai Pilato ataktú jiinki chichaak: —Diistajum jui agaa itanjai, ni bakumamainjig makichkish atsuja nuna dekatnume tusan, tau.
JOH 19:5 Jesuschakam jagki atsejutai najanamu atsegmitkakbaunak nuigtú jaanch kapantu nentetkau anujamunash imanisag jiinkiuwai, nunikmatai Pilato chichaak: —¡Ju aentsun jui itanjai, diistajum! tiuwai.
JOH 19:6 Tutai sacerdote apuji aidau, jega Apajuí ememattai kuitamin aidaujai wainkag, senchi untsumkag: —¡Achigtá! ¡Achigtá! awajuidau. Imatiagtai Pilato ditan chichajak: —Imatjakjumek atum jukijum achigtajum; wika ni pegkegchau takasbaujin mantamnamainnak dekajuachjai, tau.
JOH 19:7 Tutai judío apuji aidau aiinak: —Jutii chicham umiktin agagbauwa nui tawa nunisag jamainai, wagki Apajuí Uchijiyaitjai tumamu asa, wajaidau.
JOH 19:8 Tuinamun Pilato antuk, nuní senchi ishamkauwai.
JOH 19:9 Nunik jega niina pujusá inamtaijin ataktú wayá Jesusan iniak: —¿Amesh tuwiyampaitpa? tau. Tujash Jesusak aikchauwai.
JOH 19:10 Nunitai Pilato chichaak: —¿Wagka aigtsume? ¿Dekatsmek wi achigtajum takunush, nuniachkunush akupkatajum tusanush tumainaitag duka? tau.
JOH 19:11 Tutai Jesús ayaak: —Mina Apag dutikata tujamchakuig makichkish minak dutikatajum tujutmaitsume; untsu mina aminí itajuawaja nu ainawai amina nagkaetamsau tunamaina duka, tiuwai.
JOH 19:12 Nuna tutai Pilato Jesusan utugsanuk jiikiag tusa kakantu; tujash judío aidauk senchi untsumkag: —Aanú jiyakmek Roma apuji Cesara nuna kumpajichu atatme, ashí aents reyyaitjai tumamuk, Roma apuji Cesara nuna shiwaji weak tawai, awajuidau.
JOH 19:13 Nuna Pilato antuk, Jesusnak agaa jiikiuwai, nunik chicham dekaku ekeemtaijin ekeemsauwai hebreo chichamnum Gabatá tutainum. “Gabatá” tawa nunak “Kaya ukatkamu” taku tawai.
JOH 19:14 Pascua jegatin asamtai uminainak batsatbaunum, etsa tajiastatak wajasú ai, Pilato judío aidaun chichajak: —¡Rey atumdaunak jui itantajime! tau.
JOH 19:15 Tujash ditak senchi untsumkag: —¡Dakitaji! ¡Dakitaji! ¡Achigtá! wajaidau. Imatiagtai Pilato iniak: —¿Atumi reygminash achigtag? tau. Tutai sacerdote apuji aiinak: —¡Iina reyjig imá Roma apuji Cesara duke! tuidau.
JOH 19:16 Tiagtai Pilatoshkam achigtinme tusa ditan susauwai, dutikamtai suntag aidau Jesusan jukiajui.
JOH 19:17 Dutikam Jesusak cruz ni achinjatnun yanakí jiinkiuwai, “Buuk sakaju” tutainum weak, hebreo chichamnum Gólgota tutaiya nui.
JOH 19:18 Nuwi achijajui, dutikainak niijai nuigtú jimajan achijag, Jesusan ejapeawag awajawajui.
JOH 19:19 Dutikawagmatai Pilato: “JESÚS NAZARETNUMIA, REY JUDÍO AIDAUNU” tusa agajui, dutika cruznum adutuktajum tiuwai.
JOH 19:20 Kuashat judío aidau nu agagbaun ausajui, wagki Jesús achigbauk yaaktanum tikiju au asamtai; nu agagbauwa duka hebreowai, latigkai nuigtú griego chichamai agagbau aajakui.
JOH 19:21 Nu dutikamu asamtai, sacerdote apuji aidau, tikich apu aidaujai Pilaton jegaantag aujuinak: —Judío aidau reyji tusamek agajaipa; tutsuk, juka: “Judío aidau reyjiyaitjai” tinuwe nuuwai tita, tuidau.
JOH 19:22 Tiagtai Pilato ayaak: —Wi agagmag duka, nunisag atatui, tiuwai.
JOH 19:23 Suntag aidau Jesusan achijag, jaanchjin jujukiajui, dutikawag ipaksumta imajin ichiajag makí makichik tinamdaekajui. Nuigtushkam tunicajinash jukiajui apijachbau ayatak yakiin nagkama awantua nugká inagnakbau aajakua nuna;
JOH 19:24 dutikawag, pempeentunisag chichainak: —Juka ichiagchagmi, yana kayajig jiinkit nu jukiti, tiajui. Nuní uminkauwai, duik Agagbaunum: “Mina jaanchjunak ditak tinamdaekaje, dutikainak mina jaanchjun yana kayajig jiinkit nu jukiti tiaje”, timawa duka. Junak suntag aidau dutikawajui.
JOH 19:25 Cruz Jesús achigbaunum niina dukují, dukujiya nuna kai, tikich María Cleofasa nuwe, nuigtú María magdalanmaya aatus tikiju ijunaidau.
JOH 19:26 Nunittaman Jesús dukujin wainak nuigtú ni jintintaiji anetaijiya dusha nuig wajau asamtai, dukujin chichajak: —Dukuwah, yamaik anuwai uchigmik, tau.
JOH 19:27 Nuna tii, jintintaijin chichajak: Anuwai amina dukuk, tiuwai. Nu tima ajumag niina jeen jukiuwai.
JOH 19:28 Nuna tii, Jesús ashí ni dutikmainjin uminkaun dekau asa, Agagbauwa nu uminkati tabaunum: —Kitamajai, tiuwai.
JOH 19:29 Tutai nui buitsnum vino chujuau bete pujau asamtai, nu chujuauwa nujai esponjan uchupjag numi hisopo kanawen ayai takuji aapawajui.
JOH 19:30 Dutikam Jesús vino chujuaun uwag chichaak: —¡Yamaik ashí umikjai! tusa tsuntsumá jakauwai.
JOH 19:31 Judío aidauk Pascua atin asamtai uminaidau asag, iyashik cruznumak juwakchati tuidau tsawan ayamtaiya duka dekas puyatjusa diitai asamtai, nuninak Pilaton jegajiag chichajuinak: Suntag ishitkata aents cruznum detaina nuna kagkajin kupijag, ashí kuwajag yajuaktinme tuidau.
JOH 19:32 Tima suntag aidaushkam wejiajui, nunikag Jesusjai achigbau aidau dekatkauwa nunaa nuigtú tikichia nunashkam kagkajin kupigkajui.
JOH 19:33 Nuna dutikawag Jesusan jegantun diikmag jakaun wainkajui, nunikmatai kagkajinak kupigkachajui.
JOH 19:34 Dutikamu aig makichik suntag nagkí bijagnum iju ichigkui, dutikamuik numpa yumijai jiinkiuwai.
JOH 19:35 Wika nunak dekas wainkau asan etsegjai, wainkachbaugnak etsegtsujai. Wi wainai dutikawaju asagmatai, atumshakam shiig dekaatajum, nunikjum dekaskeap nunikuita timinjum tusan ujajime.
JOH 19:36 Nu nunikajua duka Agagbaunum: “Makichik ukunchigkesh kupigkachbau atinai”, tibauwa nunú uminkauwai.
JOH 19:37 Nuigtú tikich Agagbaunmash: “Ijumun wainkagtin ainawai”, tawai.
JOH 19:38 Nu ashí dutikamu ai, José arimateanmaya Jesusa jintintaiji asa, judío aidaun ishamak wakenmataik Pilaton jegajua, Jesusa iyashin jukitjai tusa segauwai; tama Pilatoshkam dutikata tiuwai, tima wejí Jesusa iyashin jukiuwai.
JOH 19:39 Nicodemo Jesusan yaunchuk kashi ijagsatatus jegajuauwa dushakam, kugkuin mirra, áloe tutaijai pachimjamun treinta kilos takus tauwai.
JOH 19:40 Nunikmatai Joseshkam nujai atuegak Jesusa iyashin jukiag, jaanchin kugkuidai ukatuk pempeajag, judío wajuk ukuumau ainawa dutiksag ukusajui.
JOH 19:41 Nunú Jesús achigbauwa nuig ajak ajakbau au, nunú ajak ajakbauwa nuig ukuumatai yamajam makichik aentskesh ukuschamunum,
JOH 19:42 judío aidau pascuaji atinun uminaidau asag, Jesusa iyashinak jukiag ukusajui, nu ukuumatai imá tikiju asamtai.
JOH 20:1 Tumig tsawaju ai, María magdalanmaya kashikmas, suwe aig Jesús ukusbaunum weuwai, nunikmá kaya aputukbau ekekam atatman wainkauwai;
JOH 20:2 nunik tupikaki, Simón Pedro tikich Jesusa jintintaiji anetaijiya nu pujamunum weuwai, nunik jegawag: —Iina Apujin ukusagma nunak jukiaje, tujash dekatsji tuwig ukusaje, tusag ujaidau.
JOH 20:3 Tusa ujakajam Pedro tikich Jesusa jintintaijiya nujai ukusbaun diisagtatus weajui.
JOH 20:4 Nunik mai tupikaidau, tujash tikich jintintaiya nu Pedro nagkaesau tupikau asa, niiyá eemak Jesús ukusbaunum jegantui;
JOH 20:5 nunik tekená diikmá, imá jaanchnak wainkauwai, tujash nigka wayachui.
JOH 20:6 Nuniai Simón Pedroshkam niina ukujin tantauwai, nunik Jesús ukusbaunum wayaa, diikmá imá jaanch aidauk atatman wainkauwai,
JOH 20:7 nuigtushkam Jesusa buuké jaanchi pempenjamu ajakua duka, iyashí pempeagbauwa nujaig ijunag achau, kanaká pempeajam tepaun wainkauwai.
JOH 20:8 Nuniai tikich jintintai ukumatainum eemak tantauwa dushakam wayauwai, nunikmá wainak, dekaskeapi tiuwai.
JOH 20:9 Ditak Apajuí chichamen agagbaunum: Jesusak maamash ataktú nantaktinai tibauwa nunak anenachu.
JOH 20:10 Nuna dutika diisag jintintaiji aina duka ditá jeen wakitkiajui.
JOH 20:11 Tujash Mariak agaa Jesús ukusbaunum buutú wajau; nunik buutkabaikia Jesús ukusbaun tekenas diikmá,
JOH 20:12 jimag ángel pujun nugkuaju aidau Jesusa iyashí ukukbau aajakua nui chaiknum makichik eketai, tikich dawenmanini ekeemtatman wainkauwai.
JOH 20:13 Dutikam ángel aidau iniinak: —Nuwah, ¿wagka buutme? Tau. Tama ni ayaak: —Mina Apujun jukiaje, tujash tuwig ukusaje nuna dekachu asan butjai, tiuwai.
JOH 20:14 Nuna tusa ayampakmá Jesús nui wajattaman wainkauwai, tujash dekaachui niimpapita tusag.
JOH 20:15 Nunitai Jesús iniak. —Nuwah, ¿wagka buutme? ¿Yaa egame? tau. Tama nigka, ajak ajakbauwa nuna kuitamnuskaitai tau asa: —Apuh, ame jukiuwaitkumek, tuwí ukusmaume nu ujatkata, wi jukitjai, tau.
JOH 20:16 Tutai Jesús ayaak: —¡Mariah! tiuwai. Tama ayampatua diikmá Jesusan wainak: —Raboni, tiuwai, (duka arameo chichamnumag: Maestro taku tawai).
JOH 20:17 Nuna takug achikta tama Jesús chichajak: —Achigkaipa, eke mina Apajuig weatsjai; wetá mina yatsug batsatbaunum nunikam ujaktá: Mina Apajuí weajai, atumnash Apa nui nuigtú mina Apajuig atumnash Apajuigmea nui timae tusam, tiuwai.
JOH 20:18 Nu tima María magdalanmayashkam weuwai, nunik Apu Jesús wainkamujin nuigtú ni tibaujiya nunash jintintaiji aidaun ujakajui.
JOH 20:19 Nunú tsawantinig tumig kintabaunum, jintintaiji aidauk judío ishamainak waitinak epenjag pujuinai, Jesús ejapen wajantú, nunik ditan kumpamak: —Apajuí atumnash shiig agkan pujutan amastinme, tiuwai.
JOH 20:20 Nuna tusa, uwejí achigbau aidaun nuigtú bijagnum nagkí ijumunash iwaintukui. Nunitai jintintaiji aidaushkam Apu Jesusan wainkag shiig aneasajui.
JOH 20:21 Dutika Jesús awentsag: —Apajuí atumnash shiig agkan pujutan amastinme. Mina Apag awetiuwa dutiksanuk atumnash awemajime, tiuwai.
JOH 20:22 Nuna tusa ditainini suut umpuiniuwai, dutika: —Wakaní Pegkeji jukitajum.
JOH 20:23 Atum ju nugka jui tsagkujashbauk, nayaimpinmashkam tsagkugnagchatnai. Untsu atum ju nugka juish tsagkujamuk nayaimpinmashkam tsagkugnagtinai, tiuwai.
JOH 20:24 Tujash Tomás doce aina nuiya Jimagmamu tutaya duka, Jesús wayauwa nuig atsau asa wainkachui.
JOH 20:25 Nuniku asamtai tikich jintintaiji aina nu: —Apu Jesús wainkamji tuidau. Tama ni chichaak: —Wika uwejin clavowai achijagmaya nuna wainkan tsajam uwejuish inujuan diigtsukek nuigtú bijagnum ijuagmaya nunash inujuan dekaptsukek dekaskeapi tumaitsujai, tau.
JOH 20:26 Ocho tsawan nagkaemakiu ai, jintintaiji aidauk makichik jeganum ataktú ijunjajui, nuanuig Tomasash pujau. Waitinak shiig epenag batsataig, Jesús ejapen wajantá kumpamak: —Apajuí agkan pujutan atumnash amastinme, tiuwai.
JOH 20:27 Nuna tusa Tomasan chichajak: —Jui tsajam uwegmin inuata, dutikakum mina uweg aina nu diistá; uwejum itantá nunikam mina bijagjui inuata. ¡Dekaskeapi tuchauk aipa, dekaskeapi tinu atá! tiuwai.
JOH 20:28 Tama Tomás senchi chichaká: —Mina Apujuh, amek mina Apajuijuitme, tau.
JOH 20:29 Tutai Jesús ayaak: —Tomasah yamai mina waitkaum dui, dekaskeapi tujutme. ¡Mina waitkachuitak dekaskeapi tujutiu aina nu shiig aneasagtinai! tiuwai.
JOH 20:30 Jesús aents aidau dutikmainchaun ashí iwainag niina jintintaiji aidaush wainainamunum takasua duka, ashí ju papinumag agagchamui.
JOH 20:31 Nuniaig juka: Atumesh Jesusak, Cristo Apajuí Uchijimpapita, tusajum dekaskeapita takujum, pujut tuke atina nu jukimnujum, tusan agatjime.
JOH 21:1 Nuna nunik, Jesús jintintaiji aidau kucha Tiberias tutai tugkitken batsatun ataktú wantintukui. Nunak juní nunikui:
JOH 21:2 Simón Pedrojai ijunjag, Tomás Jimagmamu tutaiya nu, Natanael Caná Galilea awa nuiya, Zebedeo uchijí aidau, nuigtú jimag Jesusa jintintaiji aidau batsataidau.
JOH 21:3 Nuninamunum Simón Pedro chichaak: —Namakan maatjai, tau. Tutai, ditashkam: —Jutiijai wegagmi, tusag barcanum egkemjag weajui, nunik nu kashia duik makichkish maachajui.
JOH 21:4 Nunikag yamá tsawaig, Jesús kuchanum uwetus wajau, tujash jintintaiji aidauk, Jesusapi tichajui.
JOH 21:5 Nuniai Jesús: —Uchig aidauh, ¿makichik namakkesh maachugmek? tau. Tama dita aiinak: —Atsah, tiajui.
JOH 21:6 Tiagtai Jesús chichaak: —Redjum barcanum untsuja atú ajugtajum, dutikakjum achiktatjume, tama ajugkajui dutikam kuashat namak chimpimkamtai jiiktakamag tujinkajui.
JOH 21:7 Nunitai Jesusa jintintaiji anetaijiya nu Pedron chichajak: —¡Auk Apu Jesusai! tau. Tabaun Pedro antamuik awimaku asa jaanchjin nugkujui, nunik tseke namaká iyagkui.
JOH 21:8 Nuniai tikich jintintaiji aidauk barcanum anumkaju rednum namak chimpimkaun japisag, cien metros tumain yujau asag.
JOH 21:9 Nunik kukag jiinkamag jii ikapagbaunum, makichik namak pagjai jiyamun wainkajui.
JOH 21:10 Dutikainai Jesús chichaak: —Namak achikujum nu ujumak itatajum, tiuwai.
JOH 21:11 Tutai Simón Pedro barcanum egkemjau, nunik retan kukag jiikiu, namak muun aidau ciento cincuenta y tresa imaan piyakun, imaan chimpimkauwaitkush rednak ichigchauwai.
JOH 21:12 Nunikmatai Jesús chichaak: —Tantajum yuwatajum, tiuwai. Makichkish jintintaiji aina duka iniaschajui: ¿Amesh yaitpa? tusag, wagki Apu Jesusan dekaidau asag.
JOH 21:13 Nuna tii, Jesús jegantá, pagkan juki tinamak, dutiksag namaknashkam tinamkauwai.
JOH 21:14 Nunak Jesusak jakau nantakí kampatuma jui jintintaiji aidaun wantintukui.
JOH 21:15 Yujumak yuwá nagkankamunum Jesús, Simón Pedron iniak: —Simón, Jonasa uchijiyah, ¿minash jujú aina juna nagkaesauk anentam? tau. Tama Pedro ayaak: Ehé Apuh, ame wi aneajam duka dekagtame. Tutai Jesús chichajak: Uwig midau aina nu kuitamkata, tau.
JOH 21:16 Tusa awentsag iniak: Simón, Jonasa uchijiyah, ¿minash anenmek? tau. Tama Pedro ayaak: Ehé Apuh, ame wi aneajam duka dekagtame, tau. Tutai Jesús chichajak: Uwig midau aina nu ayujata, tau.
JOH 21:17 Tusa kampatuma juna iniak: Simón, Jonasa uchijiyah, ¿minash anenmek? tau. Tama Pedro wake besekú, kampatuma juish: ¿Anenmek? tabau asa. Nunik Pedro ayaak: —Apuh, amek ashí dekame, wi dekaskenum aneajam duka, tau. Tama Jesús ayaak: Uwig midau aina nu kuitamkata.
JOH 21:18 Dekas tajame, amek aan datsauch asamek, amek nugkujam ame wakegamunum wejakuitme; tujash muuntuch wajastatam nuig, kuntujum dakuekamin tikich anugtamjagtinai, dutijama ame wakegachbaunum jujamkiag etabiagtinai, tiuwai.
JOH 21:19 Nunak Pedro wajuk maam atinaita nuna ujaak tiuwai. Nuna tii: —¡Nemagtukta! tiuwai.
JOH 21:20 Tima Pedro ayampá niimkamá, Jesusa jintintaiji niina aneetaijiya nu, agkú yuwamunum niiní ayaumas ekeemas: —Apuh, ¿yaita amina sujupaktinush?, tusa iniasua nu minittaman wainkau.
JOH 21:21 Nuna Pedro wainak, Jesusan iniak: —Apuh, ¿jusha wajukatnaita? tau.
JOH 21:22 Tama Jesús ayaak: Wi wakegaknuk nigka iwaaku pujaig taatin atajai tumainaitjai. ¿Wagka amesh dusha uyumame? Amek tutsuk nemagtukta, tiuwai.
JOH 21:23 Nunú tibauwa nunak yachi aidau nu jintintaiya nunak jakashtinai tine tabaun antujajui; tujash Jesusak, jakashtinai tichauwai: Wi wakegaknuk iwaku pujaig taatin atajai tumainaitjai. ¿Wagka amesh dusha uyumame? tiuwai.
JOH 21:24 Junak Jesusa dekas jintintaiji aajakua nunú, ashí ni wainkamujinak etsejak dekaske tusa agajui. Dutikamu asamtai dekaskeapi tuinaji.
JOH 21:25 Jesús takasbauwa duka shiig kuashtai, nunú makí makichik pachisa agamak, ju nugka juig ayatak papikes piyakaintai. Aatus atí.
ACT 1:1 Anetaiju Teofiloh, wi yama nagkamchakun papiin agatjabiajam nunak, Jesús ashí takaamujin, jintinkagtamujin nagkamauwa nuna,
ACT 1:2 nuigtú ni nayaimpinum wakitkiuwa imanuiyan pachisan agatjabiajame. Nunak eke wetsuk Wakaní Pegkeji dutikata tabau asa ni etegjamuji apóstol aidaun jintintuauwai;
ACT 1:3 nuigtush waitus jaka nantakí, iwaku paan kuashat aents aidaun kuashtá wantintukui cuarenta tsawantai, nuniak Apajuí inabaujin pachis ujakajui.
ACT 1:4 Nui Jesús apóstol aidaujai ijunag yuwak pujus: Jerusalén ukukí wegpajum juig pujusjum, mina Apag Wakaní Pegkejin amastatjime tusa anagtamamun ujakmajim nunú dakastajum,
ACT 1:5 wagki Juagkak imá yumiik yamijatjauwai, tujash atumek dukap tsawan atsuk Wakaní Pegkejiya nujai yamigbau atatjume, tiuwai.
ACT 1:6 Tutai nui ijunag pujuina nu iniinak: ¿Apuh, yamaikik Israelnumash ataktú yaunchuk inamin aajabia nunin awasattam? tuidau.
ACT 1:7 Tama Jesús ayaak: Atumek dekamaitsugme tsawantak nuniachkugmesh wajutí dutikatjai tusa Apag nigki mamikiauwaita duka;
ACT 1:8 tujash Wakaní Pegkeji atumiin tajutjamamtai nuna senchijí jukittagme, nunikjum mina pachittsajum jui Jerusalén, ashí Judeanum, Samarianmashkam, nuigtú ashí nugka atushat aina nuwishkam etsegtugkattagme, tiuwai.
ACT 1:9 Nuna tutai ditash dii ijunaig takuniuwai, nuniaig yujagkim ijikui, nunikmatai awenag wainkachajui.
ACT 1:10 Nunik Jesús wematai nayaimpin dii ijunai, jimag aents jaanch pujun nugkuaju ditai ayaumas wajaantaju,
ACT 1:11 nunikag ditan chichajuinak: —Galileanmaya aents aidauh, ¿wagka nayaimpish diish ijunjume? Jujú Jesús, nayaim wegau wainkaujum junisag ataktush minitnai, tiaju.
ACT 1:12 Nunú tusá tiajam Olivosa mujají tutainum batsatu Jerusalén wakitkiajui, nuní imá tikiju asamtai, chicham umiktinnum tsawan ayamtai tsawagmataig tikijuk wekaenasti tibauwa dui.
ACT 1:13 Yaaktanum jegawag jega yakí tesamunum wakaju nui batsataidau asag, nuna daajig ju ainawai: Pedro, Juan, Jacobo, Andrés, Felipe, Tomás, Bartolomé, Mateo, Jacobo Alfeo uchijiya nunú, Simón Zelote tutai, Judas Santiago uchijiya nunú.
ACT 1:14 Ashí nunú aidauk kashí kashinig makichik anentaiyaik ijunas Apajuin aujuinak ijunaidau, Jesusa yachi aidaujai, María Jesusa dukujiya nu, nuigtú tikich nuwa aidaushkam.
ACT 1:15 Nunú tsawantin ciento veinte aents tumain ijunjajui Jesusa nemajin aidau, nunikbaunum Pedro wajakí chichaak:
ACT 1:16 Yatsug aidauh, David Wakaní Pegkeji dekamtikam, Judas Jesusan achiktinme tusa unupiagtinun pachis yaunchuk Agajua duka kuashat mijan nagkaemakne.
ACT 1:17 Judasak jutiijai ijunag wekaegas niishkam jutii takaag jutiksag takaajakui.
ACT 1:18 (Nuninaitak Jesusan sujuk kuichkin juki nugkan sumakui, tujash nigka nunú nugka ni sumakbauwa nuig kajeemag tsujimak achapai iyaak pujaká ampujin jiijá jakauwai.
ACT 1:19 Nu nunikbaunak ashí Jerusalegnumia aidauk dekawajui, nunikag nuna nugkan ditá chichamen Acéldama adaikajui, nunak “Nugka Numpeagbau” taku tiajui.)
ACT 1:20 Nuna tusa nuigtú Pedro chichaak: Wagki duka salmosnum agagbauwai: “Niina jeeg ukumkimu atatui, makichik aentskesh nuig pujuschatnai, nuigtushkam: Niina takatjinak tikich takastinai”, tusa.
ACT 1:21 “Nu tibau asamtai makichik etegkami, Apu Jesús jutiijai pujusmatai tuke ijunag yujasaju jutiijai batsataina nuiya, Juan Jesusan yamijua dui nagkamas tuke Jesusjai wekaegas nayaimpinum wegaunash wainkauwa nu, dutikamu asa jutiijai betek Jesús nantakbaun pachisash shiig etsegmainai”, tau.
ACT 1:23 Timatai, jimajan ju atí tiaju, José Barsabás tutai, Justo tuuta awagmatia nuna nuigtú Matiasan.
ACT 1:24 Dutikawag aatus Apajuin aujuinak: “Apuh, ame ashí aentsú anentaimtajig wainam ibau asam, iwainkagtukta, ya ju jimaja juwiyash etegkaume nunú,
ACT 1:25 dutikamu asa niishkam Judas, apóstol atí tibauwa nu, ni dutikata tabaujin wejak ukukí nuna takastí tusam”, tiajui.
ACT 1:26 Dutikawag, yana kayajig jiintukit tabaunum, Matiasdau jiinkiuwai; nunikmatai once apóstol aina nuanui Matiasan pachiawajui.
ACT 2:1 Tsawan Pentecostés jegamtai, ashí makichkinmag ijunjag batsataidau.
ACT 2:2 Nuninai, pachiachbau nayaimpinmaya dase senchi dasentak kedegtuwama imatuk, jegá dita pekagbaunum tauwai;
ACT 2:3 nuniaig, wantinjauwai jii kegama numamtin aidau, nunik ditan makí makichik kanajug pekamtujui;
ACT 2:4 nunikmatai Wakaní Pegkeji ashí egkemtujajui, dutikam tikich chichaman chichaidau Wakan chichamtikamua dutiksag.
ACT 2:5 Nu tsawanta duik, judío aidau Apajuí puyatjus umijin ashí tikich nugkanum batsamin aidau Jerusalén kaunawag batsataidau.
ACT 2:6 Nu imatuk kedegtamun antukag aents aidauk ijunjajui; nunikag puyatkajui, wagki makí makichik ditá chichamen chichaidaun antuidau asag.
ACT 2:7 Nunik puyatkag anentai jegachag chichainak: —¿Ju chichaina jujú ashí galileanmaya ainatsuak?
ACT 2:8 ¿Wajukaya chichainawa makí makichik iina chichamen chichaidau antuinag dusha?
ACT 2:9 Juwig partianmaya aidau, medianmaya aidaush, elamnumia, mesopotamianmaya, judeanmaya, capadocianmaya, pontonmaya, asianmaya,
ACT 2:10 frigianmaya, panfilianmaya, egiptonmaya nuigtú Libia nugka aina nui, Cirene tikiju awa nuiya, Roma batsamnushkam juig pujuinawai;
ACT 2:11 ujumak judío aidau nuigtú judío atajai tumabiag judío waigkú aidau, cretanmaya aidaushkam nuigtú arabianmaya aidaujai antuinaji iina chichamen Apajuí imanjin pachisag chichainamu.
ACT 2:12 Tusag ashí puyatkaju, nunikag shiig anentaimainchau dekapenak, pempeentunisag iniininak: —¿Jusha wagka juninawa? tudayinau.
ACT 2:13 Tuinai tikich aidau dushikinak: —Nampejajama, tuidau.
ACT 2:14 Tiagtai Pedro, once aina nujai wajainiag, senchi chichaká: “Mina pataag judío aidauwah, nuigtú ashí atum Jerusalén batsamin aidautigmesh, jujú shiig dekaatajum wi titatjim nu.
ACT 2:15 Atum nampegchajeash tajum duka nuninchauwai, yamá a las nueve weawai;
ACT 2:16 juka profeta Joel nuniktinai tusa etsegkamua nuuwai, duka:
ACT 2:17 “ ‘Tsawan inagnamunum, Apajuí tawai, mina Wakanjun ashí aentsun susatnaitjai. Dutikawajam atumi uchijum aidau, nuigtú nawanjum aidaushkam mina pachittsag etsejiagtinai; nuniamunum datsauch aidauk paan wainiagtinai, nuninai muuntuch aidauk kajanum kajabiagtinai.
ACT 2:18 Aikasnuk aishmag, mina inakeg aina nuna, nuigtú nuwa mina inakeg aina nunashkam nu tsawan atina duik mina Wakanjun susatnaitjai. Dutikawajam mina pachittsag etsegtujiagtinai.
ACT 2:19 Yakí nayaimpinum nuigtú nugkanmashkam nuninush wainchatain iwaintuktinuitjime: Numpan, jiin, yujagkim aidau bukuitamun.
ACT 2:20 Etsag suwe wajastinai, nantushkam numpa wajastinai, eke Apu Apajuí senchijijai tsawan wajas minitna nu jegatsaig.
ACT 2:21 Tujash ashí aents Apu Jesusan adaiyas segauk uwemjatnai’, tawai.
ACT 2:22 “Israel aidautigmesh ju chicham antuktajum: Jesús nazaretnumiaya nuna Apajuí awemauwai dutikau asa niina senchijinash susauwai, dutika niiní aents dutikmainchau aidaun, anentai jegagmainchau aidaunash nuigtú wainchatai aidaun atumin iwaintugmakajua duka atumek shiig dekagme;
ACT 2:23 nunú sujukuitjume Apajuí wajuk dutikatasa emtikak dekauwaita dutiksagmek; dutikajum aents pegkegchau aidaujai ijuntugjum cruznum achigjum mau ainagme.
ACT 2:24 Tujash Apajuí inankiuwai ni jaak najaimaku waittsamunash agkanmitka, wagki jata duka niinak depetmainchau aajakui.
ACT 2:25 “Davidchakam Jesusan pachis tiuwai: “ ‘Wainbaijai mina Apujuk tuke mina emtijui pujaun, wagki mina untsujui pujawai nuniau asamtai umuchtumainchau ainawai.
ACT 2:26 Nuadui mina anentaijuk shiig aneawai, nuniak shiig aneas kantamui, nuigtushkam ashí mina iyashjuk niinu dekas atatui;
ACT 2:27 wagki mina wakanjuk Hadesnumak idaisashtatme, nuigtush aminu Pegkegma duka kaugtí tichattame.
ACT 2:28 Ame iwaintugkauwaitme jinta aidau pujutnumiaya nunú; Dutijuam shiig aneemtijustatme ame pujau asam’.
ACT 2:29 “Yatsug aidauh idaitustajum paan titajime, iina muunji David aajakua duka jakauwai, nunikmatai ukusaju ainawai, nu ukusbauk yamaikish jutiiní awai.
ACT 2:30 Tujash Davitak profeta aajakui, nuniau asa dekajakui Apajuí chicham yapajimainchauwai anagkuak, ame weantunmayan makichik ame ekeemtaigmin ekentsatnaitjai tibauwa nuna.
ACT 2:31 Nuna aatus emtikak Cristo aneantinun wainu asa, wakanig Hadesnumag juwakchatnai iyashigkesh kaugchatnai tiuwai.
ACT 2:32 Nunú Jesusa nuna Apajuí inankiuwai, duka jutii ashí wainkau ainaji.
ACT 2:33 Dutika eme anentai awajus nuigtú Apajuí niina untsujin ekentsam, Apají Wakaní Pegkejin anagtamauwa nuna juki sukagtusa nunú wainkaugme nuigtush antukugme.
ACT 2:34 Wagki Davidchauwai nayaimpinum wakauwa duka, nigki juna: “ ‘Apu mina Apujun chichajak, ekeemsata mina untsujui,
ACT 2:35 wi amina shiwajum aidaunak amina dawemin ikautkatjame’, tiuwai.
ACT 2:36 “Nunin asamtai shiig dekaskea ju ashí Israel aidautigmek dekaatajum, nunú Jesús atum achigbauwa nuna Apajuí etegka atumi Apujum nuigtú uwemtikagtin awasae”.
ACT 2:37 Nuna antukag shiig senchi anentain najaimawaju, nunikag Pedron nuigtú tikich apóstol aidaun iniinak: —Yatsug aidauh, ¿jutiish wajukmainaitji? tuidau.
ACT 2:38 Tiagtai Pedro ayaak: —Tudau takat idaikujum pujutjum yapajiatajum, nunikjum makí makichik yamimagtajum Jesucristo daajin, tudau tsagkugnagtag tabaunum; nunikjum Wakaní Pegkeji jukittagme.
ACT 2:39 Wagki Apajuí anagkagtuamua duka atumdau ainawai, atumi uchijum aina nudau, nuigtú ashí atushat batsataina dushakam; ya aidauna Apu Apajuí untsuktatus wakegawa nudau ainawai.
ACT 2:40 Nuigtú kuashat tikich chichamnash etsejak aents aidaun chichajak tiuwai: —Aents pegkegchau aina duka ukuktajum.
ACT 2:41 Nu tabaun chichaman antukag yamimakajui; nunikag nunú tsawanta duik tres mil aents tumain kawegkajui.
ACT 2:42 Nunikag apóstol aidau jintiamua dutiksag umidau, nuninak shiig ijuntsag pempeentunisag yainidau, nunisag pagkan yuinak Apajuinash aujuidau.
ACT 2:43 Ashí puyatjusag diidau aents aidauk, kuashat aents dutikmainchaun dutikainak apóstol aidau iwainagtai.
ACT 2:44 Ashí Jesusa dekaskeapi tiaju aidauk makichik anentaiyaik ijunaidau, nunidau asag ashí wají aidaush betek ajuidau;
ACT 2:45 ditá nugken nuigtú wajiijinash sujukag, ashí makí makichik atsumaina dutiksag akandayidau.
ACT 2:46 Kashí kashinig jega Apajuí ememattainum ijuntsagké aidau, nuninak ditá jeenish ijunag shiig aneas wakegat anentaiyai pagkan yuidau,
ACT 2:47 nuninak Apajuin emematuinak, imadiagtai ashí aents aidaushkam wakejus diidau. Nuniagtai Apu Apajuishkam kashí kashinig aents uwemaidaunak ikaweau.
ACT 3:1 Makichik tsawantai Pedro, Juagjai jega Apajuí ememattainum weedau a las tres wajasú ai, Apajuí aujtai jegau asamtai.
ACT 3:2 Nuanui jega Apajuí ememattai waitiji daaji Shiijam tutainum, aents akiinmawaik shutú akiinau pujau, nuna kashí kashinig itan apujuidau, nui aents wainiagtai kuichkin segamtí tusag.
ACT 3:3 Nunin asa Pedro Juagjai jega Apajuí ememattainum wayatatus minidaun wainak: —Wait aneasam kuichik sujustá, tusa segau.
ACT 3:4 Tama Pedro Juagjai esetug diinau, nunik Pedro chichajak: Diijattsata, tiaju.
ACT 3:5 Tama niishkam diyau piipichinakesh sujustatuapi tusa.
ACT 3:6 Nunitai Pedro chichajak: —Kuichkik atsugtawai, oroshkam atsugtawai, tujash ajuta nuna amastajame; Jesucristo nazaretnumiaya nuna daajin wajaktá nunikam wekaesata.
ACT 3:7 Takug uwejí untsujin achiká awajkiu, dutikamuik nawenig nuigtú wanusenish pegkeg wajasú.
ACT 3:8 Nunik tseke wajakí wekagu, nunik ditajai ijunag jega Apajuí ememattainum nigki wekaegas tsekeas dekapki, Apajuí emematki wayau.
ACT 3:9 Ashí aents aidau wekaegas Apajuin emematun wainkag,
ACT 3:10 senchi puyatkaju nuigtush ishamkaju nu nunikmatai, nu aentsnak jega Apajuí ememattai waitiji Shiijam tutainum ekeemas kuichkin segamnun wainin asag.
ACT 3:11 Shutú etsagagbauwa duka Pedronak, Juagjai idaichau, nunitai ashí aents aidauk puyatkag pisajag Salomón waiti aagjamu tutainum pujuagtatman jegaantaju.
ACT 3:12 Nunidaun Pedro wainak aents aidaun chichajak: “Israel aidauwah, ¿wagka ju junikmataish puyatkaugme? ¿Wagka iina senchijin nuniachkuish jutii pegkeg takau asaja ju aents awajkim wekaekui diimaina imatikagtagme?
ACT 3:13 Junak iina muunji Abraham, Isaac, Jacob aina nuna Apajuiji, iina muunji aajakajua nuna Apajuijiya nunú, niina Uchijí Jesusan ememattinme tusa jutikae; atum sujukagmin Pilatok akupkata taig atum dakitjau ainajum nuna.
ACT 3:14 Atumek Pegkejam Pegkejan takauwa nu dakitjauwaitjume, dutikakjum magkagtina nunú jiiktá tusajum segauwaitjume;
ACT 3:15 dutikakjum mau ainagme pujutan sukagtina nunú, tujash jakamtaish Apajuí inankiuwai duka jutiik wainkau ainaji.
ACT 3:16 Jesusa daaji dekaskeapi tabaunum ni etsagaje, atum wainjum junak nuigtush dekajum nunak; ni dekaskeapi tabau asa shiig etsagaja juka atumesh ashí wainjume.
ACT 3:17 “Yatsug aidauh, atumek dekachu asajum apujum aidaujai dutikauwaitjum nunak, dekajai.
ACT 3:18 Tujash junak Apajuí umiké, yaunchuk ashí niina profetaji aajakajua nui niina Cristujig aatus waittsatnai tusa etsegkauwa nuna.
ACT 3:19 Nunin asamtai tudau takat idaikujum pujutjum yapajiatajum, atumí tudaujum aidaunash esaktugmagtinme, dutijamawag Apajuí ichichmamtan amastinme;
ACT 3:20 dutika Apajuí Cristo Jesusan awetugmati yaunchuk tujamiajua nuna.
ACT 3:21 Yamaikik Jesucristuk nayaimpinmag pujuttawai, nuniai Apajuí ashí wají aidau yamagmitkamu tsawan atinun, yaunchuk niina profetaji pegkejam aidau batsamajakajua nui etsegkauwa nu jegatí tusa.
ACT 3:22 Moiseschakam iina muunji aajakajua nuna chichajak: ‘Apu, atumi Apajuigmia nu, atumi yatsum aina juiyan etegkatnai makichik profetan wiya juninun; dutikamtai mina antugtajum jutiksagmek ashí wají aidaun tujamtina duka umigkatajum;
ACT 3:23 wagki ashí aents nunú profeta tabaun antugchauk niina aentsjig achagtinai’, tiuwai.
ACT 3:24 “Ashí profeta aidau, Samuel pujujakua nui nagkamas batsamsajua dushakam, ju tsawan aidaun pachis etsegkaju ainawai.
ACT 3:25 Profeta aidaun Apajuí anagkuauwa duka atumdauwai, nuigtú jutii muunji aajakajua nujai chichaman apakajua dushakam, Abrahaman chichajak: ‘Ashí nugkanmaya aents aina duka, amina tijajum akiinak weagtina nuiya makichik akiinatna dui pegkegnum yumigsamu agtinai’, tiuwai.
ACT 3:26 Apajuí ni Uchijin inanki dekatkauk atumná awetugmae, pegkegnum yaimpaktinme dutikam makí makichik tudaujin idaiyinak yapajinatnume tujamu asa”.
ACT 4:1 Pedro Juagjai aents aidaun aujak wajai, sacerdote aidau, jega Apajuí ememattaiya nuna kuitamnun apuji, saduceo aidaujai kautuawaju.
ACT 4:2 Nunikag kajekaju, Pedro Juagjai aents aidaun jintintuinak; jakau aidau nantagtinnak, Jesús nantaak paan iwainake tuidau asagmatai;
ACT 4:3 achikag cárcel egkeawag ukukiaju etsa akaegu asamtai, kashin dekajuami tusag.
ACT 4:4 Tujash chicham etsegbaun antukag kuashat dekaskeapi tiaju aina nu imá aishmag aidauk dekapam cinco mil tumain wajasajui.
ACT 4:5 Kashinia dui Jerusalén gobernante aidau, judío apuji aidau, escriba aidau;
ACT 4:6 nuigtú sumo sacerdote Anás, Caifás, Juan nuigtú Alejandro, nuigtú ashí sumo sacerdote aidaun patayí aidaushkam, ijunjaju.
ACT 4:7 Nunikag, Pedron Juagjai dita batsatbaunum itantagmatai ejapen awaantag iniinak: —¿Yana senchijinia, nuniachkugmesh yana daajinia jusha atumesh jutikagme? tuidau.
ACT 4:8 Tama Pedro Wakaní Pegkeji tabau asa chichaak: —Gobernante aidautijum nuigtú Judío aidaun apuji aidautigmeshkam antuktajum:
ACT 4:9 Atumek aents jau pegkegnum yaigkag nu pachisjum wajukaya tsagaje tusa dekatasajum inijatjume.
ACT 4:10 Nuniau asajum ashí atumesh dekaatajum nuigtú ashí Israel aidautigmeshkam, ju aents ashí wainjum junak, Jesucristo nazaretnumia atum achigjum maawagmin Apajuí inankiuwa nuna daajin tsagaje.
ACT 4:11 Nunú Jesusa nuuwai atum jega jegamin aidautijum kaya dakitmaina numamtuk awakau ainajum nunú, dutikamu yamaik kaya dekas jegá ichichkatin apujtutia iman wajasé.
ACT 4:12 Makichkish tikich iina uwemtijamainuk shiig atsawai, wagki ju nugka juig Apajuí tikichin adaiyak juna daajin aentsuk uwemjatnume tusa susamuk atsau asamtai, tiuwai.
ACT 4:13 Pedro Juagjai ajankas chichainamun apu aidau wainkaju, nunikag papinash ausachu, unuimatnash unuimagchau aina nuna dekaidau asag anentai jegagchaju, nunikag Jesusa jintintaimpap ainawa tusag, dekawajui.
ACT 4:14 Nuigtush tsagajua dushakam ditajai nuig wajaun wainaidau asag, tumainchau dekapedau.
ACT 4:15 Nunidau asag Sanedrín ijunjamunmag Pedronak Juagjai jiikiajui ditak chichasagtatus:
ACT 4:16 —Nunikag, ¿Au aents aina dusha utugkattaji? Ashí Jerusalegnumia aidauk aents etsagagbaunak pan wainkajajamah; nunin asamtai waitai tusaikish tumaitsuji.
ACT 4:17 Tujash nuna pachis aents aidaunum etsegkainum tuidau asag “yamai nagkamsagmek makichik aentskesh Jesusa daaji pachisjumek ujakaigpajum, nu idaichakjuminig suwimkan amastatjime timí”, tuidau.
ACT 4:18 Tusag Pedron Juagjai untsukaju. Dutikawag, yamai nagkamsagmek Jesús pachisjumek chichakaigpajum makichik aentskesh jintintuawaigpajum, tiaju.
ACT 4:19 Tama Pedro Juagjai aimainak: —Atum nunimainai titajum ¿Pegkegkaih Apajuí emtinish, atum umigku ni umigmaitsu dusha?
ACT 4:20 Jutiik ii wainkamu nuigtú antukuitag dushakam tutsukek idaimaitsuji, tuidau.
ACT 4:21 Tiagtai apu aidau: —Suwimkan amastatjime tusag awemaju, suwimak jumainnak waitkachaju asag. Wagki ashí aents aidauk nunú dutikamun wainkag, Apajuin emematuidau asagmatai;
ACT 4:22 nu aents, aentskesh dutikmainchau aig etsagagbauwa duka cuarenta mijan tumain ajujakui.
ACT 4:23 Pedro Juagjai jiikiajam waketug Jesusa nemajin aidau batsatbaunum jegawag, sacerdote apuji aidau nuigtú judío apuji aidau tiagbaunak ashí ujakaju.
ACT 4:24 Nuna antukag ashí ijunag Apajuin aujuinak: Apuh, ametme ashí senchigtin nayaim, nugka najanaumek, nayantsashkam ashí nui ayá dushakam.
ACT 4:25 Ame Wakaní Pegkejiya nui, inakem David iina muunji aajakua nui chichaakum: ¿Wagka aents aidaush pampainawa? ¿Wagka wainkash anentaimainawa?
ACT 4:26 Nugkanmaya rey aidau nuigtú apu aidaushkam ijunjag, Apu Apajuin kajejuinak ni etegkamu Cristunash kajejuinawai, tiuwaitme.
ACT 4:27 “Tibau asamtai Herodes nuigtú Poncio Pilatojai, jujú yaaktanum ashí Israel aidau nuigtú judiochu aidaujai ijunjag, Uchijum Jesús pegkejam ame etegkauwaitam nuna kajegkajui,
ACT 4:28 yaunchuk amina senchigmin nuigtú ame waketagmin nuniktinai tibauwa nuna dutikawagtatus.
ACT 4:29 Nunin asamtai Apuh wainme amina inakem aidaun awantuina nunú, senchijum susata, ditash ishamkagtutsuk chichamjumin etsegkatnume,
ACT 4:30 nuninak amina senchigmin jau aidaunash etsagainak nuigtush aents dutikmainchaunash amina inakem Jesús pegkegma nuna daajin iwainatnume, tusam”, tuidau.
ACT 4:31 Tusa Apajuin ausag nagkanbaunum, dita ijunja batsatbau buchitkau; nuniaig Wakaní Pegkeji ashí egkemtujajui, dutikawajam sapigmakas Apajuí chichamenash etsejuidau.
ACT 4:32 Ashí dekaskeapi tiaju aina duka, betekak anentain idajus anentaimtunidau, nunidau asag betek nuninnak anentaimaidau. Nunin asag makichkish ditá wajijinak imá midauk atí tusag anentaimainachu, ashí wají aidauk betek aajakajui.
ACT 4:33 Tuja apóstol aidaushkam Apajuí senchijin Apu Jesús nantakbaun pachis etsejuidau, nuigtush Apajuí ashí ditan wait anentuidau asa senchi yayau.
ACT 4:34 Dutikamu asag dita aina nuiyag makichik atsumaukesh atsuidau, wagki ditá nugke ajamuk nuniachkush jee ajamukesh sujukag kuichkin jukiag,
ACT 4:35 apóstol aidaun itajuidau, dita makí makichik atsumamujin diijus akaantugtinme tusag.
ACT 4:36 Nuanui José Leví weantu chiprenmaya, apóstol aidau Bernabé adaikajua nu pachitkau, (nunak “ichichkagtinu Uchijí” taku tawai);
ACT 4:37 nunú nugke ajamu asa sujuk kuichkin juki, apóstol aidaun wajuk dutikmainaita nunak dita dutikatnume tusa itajuau.
ACT 5:1 Tujash makichik aents Ananías daagtin niina nuwe Safirajai nugkeen sujuku;
ACT 5:2 dutika nuwejai chichasag, kuichkin akanak ukuinak, tikich akankamun jukiag apóstol aidau wajuk dutikmainaita nunak dutikatnume tusag itajuauwai.
ACT 5:3 Dutikamtai Pedro chichajak: —Ananiasah, ¿wagka anentaimin Iwanch, Wakaní Pegkejin tsanugtí tujamkuish antugkaume, nugkem sujukam kuichik jukim aminu akankam ukukiuwaitkumesh?
ACT 5:4 ¿Eke sujatsminkek nugkak aminuchuka? nuigtú sujukum duish ¿Kuichkik aminuchukait? ¿Wagka jusha juniame? Aents aidaukesh tsanugchaume, Apajuí tsanujume, tau.
ACT 5:5 Nu tabaun antamuik Ananiasak jaka iyaantu. Nu nunikbaun ashí aents aidau dekawag senchi ishamkajui.
ACT 5:6 Nunikmatai datsauch aidau tajuntag pempeag jukiaju ukusagtatus.
ACT 5:7 Nunik tres hora tumain nagkaemai Ananiasa nuweshkam wayauwai, nigka nu nunikbaunak dekatsuk.
ACT 5:8 Nunikmatai Pedro iniak: —¿Nugkem sujakjumesh ju kuichkia jukek jukimujum? tau. Tama nuwa ayaak: —Ehé, anú kuichkia anke jukimji, tau.
ACT 5:9 Tutai Pedro ayaak: —¿Wagka atumesh mai betekash Apu Apajuí Wakanish tsanugta tajume? Anú waitinum tantattak mininawai amina aishumin ukustatus weagma nunú, aanke aminash jujamkiag ukugmasagtatui.
ACT 5:10 Tamawaik Safirashkam Pedro wajamunum ayaumas jaka iyaantu. Nuniktatman datsauch aidaushkam waikmag jaka tepaun wainkaju, nunikag jukiaju, dutikawag aishi ukusmaunmag ayaunas ukusaju.
ACT 5:11 Nunikmatai, ashí iglesia aidauk nuigtú ashí nuna dekawaju aidaushkam senchi ishamkajui.
ACT 5:12 Apóstol aina nui Apajuí, aents dutikmainchau aidaun kuashat aents aidaunum iwainaidau; nuniagtai ashí Jesusa nemajin aidaushkam makichkinmag anentaimas ijunaidau Salomón waiti aagjamu tutaiya nui.
ACT 5:13 Makichkish tikich aidauk ditajaig ijunmainchau dekapedau; tujash nuninayatak aents aidauk kuashat eme anentuidau.
ACT 5:14 Nuniamunum Apu Jesusan dekaskeapi tuidaush aishmag aidau nuigtú nuwa aidaushkam aan kuashat kawedau.
ACT 5:15 Tuja jau aidaunashkam ainká tepetaijin jukiag nuigtú camilla aidaunum pataidiag jiikiag jintanum batsaidau, Pedro nagkaematai makichkinakesh niina wakaní wakanman wajantati, tusag.
ACT 5:16 Nuigtush yaakat tikijunmaya aidaush Jerusalén kaunaidau, nuninak jau aidaun nuigtú wakan pegkegchau waitkam batsatunash ikaunmaidau; dutikiagtai ashí etsaegkaju.
ACT 5:17 Nuniagtai sumo sacerdote nuigtú ditajai ijunag takau aidau, saduceo aidaushkam senchi kajegkaju;
ACT 5:18 dutikawag apóstol aidaun achikag cárcel yaaktanum au asamtai nui egkeawaju.
ACT 5:19 Tujash makichik ángel Apu Apajuinu carcela waitiji aina nuna ujati jiyak:
ACT 5:20 “Wetajum, nunikjum jega Apajuí ememattainum wayajum, ashí ju chicham pujutan sukagtina jujú aents aidau ujaktajum”, tiu.
ACT 5:21 Nu tabaun antukaja nunisag kashinia dui kashikmas, jega Apajuí ememattainum wayawag jintinkagtuidau. Nuninai sumo sacerdote nuigtú ditá aentsjijai batsatu kaunawag, ashí israelita apuji aidaun untsukag, sanedrinnum ijunjaju, nunikag apóstol aidau cárcel batsatun, utitajum tusag awemaju.
ACT 5:22 Tujash suntag aidau jegajuawag diikmag wainkachaju, nunikag waketjag ujainak:
ACT 5:23 —Carcelak shiig epenjamuwe nuigtush suntag aidaush kuitamainak waitinum ijunmae; tujash ujai wayá diikmá wainkachmaji atsuagmae, tuidau.
ACT 5:24 Tiagtai sumo sacerdote nuigtú jega Apajuí ememattain kuitamin aina nuna capitanji aidaushkam antukag anentai jegagchaju nunikag dusha wajukawagmaki tusag ditak iniinidau.
ACT 5:25 Nuna tuinaig makichik tanta: —Atum cárcel egkeamujum duka, jega Apajuí ememattainum aents aidaun jintintak pujuagma jamah, tuidau.
ACT 5:26 Tiagtai capitán niina suntaji aidaujai wejiag, apóstol aidaun jukiaju tutit awagmatsuk, wagki aents aidau kayai tukujinum tusa ishamaidau asag.
ACT 5:27 Dutika itawag apu aidau batsatbaunum sanedrín ejegawaju, dutikawagmatai sumo sacerdote chichajak:
ACT 5:28 —¿Ii Jesusa daaji pachisjumek makichkish jintinkagtuawaigpa tichamkajim? Atum nu aaja ashí Jerusalegnumia jintinbau asag, jutii aidautin dita nunú aentsun mau ainawai tujamainawai, tuidau.
ACT 5:29 Tuinam Pedro nuigtú tikich apóstol aidaujai chichainak: —Jutiik aents aina nu umigtsuk Apajuí umigmainaitji.
ACT 5:30 Iina muunji aajakajua nuna Apajuiji Jesusnak inankiuwai, atum numinum nenaajum mau ainajum nuna.
ACT 5:31 Dutika Apajuí niinak ashí nagkaekagtasu Apu nuigtush uwemtikagtin awajus untsujiin ekentsauwai, Israel aidau tudaujin idaiyagtai tsagkujati, tusa.
ACT 5:32 Jutiik dekas wainkau asaja etsegji, tuja Wakaní Pegkejiya dushakam dutiksag etsegtawai. Wagki Apajuik niina umijuina nuna Wakaní Pegkejiya nunak suwawai, tuidau.
ACT 5:33 Nuna antukag kajekaju nunikag maatag, tuidau.
ACT 5:34 Nuniagtai nunú apu aina nuiya makichik fariseo Gamaliel daagtin, maestro chicham umiktinun jintinkagtin ashí aents aidaun ajantusa diitaiya nu wajakí, apóstol aidaun machik agaa jiiktajum tiuwai.
ACT 5:35 Dutika chichaak: —Israel aidauwah, kuitamamkatajum jujú aents aidau utugkatag tajume nunú.
ACT 5:36 Wagki yaunchuk, Teudas witjai apunuk tumamtai cuatrocientos aents saetukajui, nunidau nuna maawagmatai ashí nuna saetin aidauk pampagkajui nunikmatai nui nagkankauwai.
ACT 5:37 Nu nuniku ainai, Judas galileanmayashkam tsawan aentsú daaji agatbau ai kuashat aentsjintin wajasui, tujash nuna maawagmatai niina saetin aidauk pampagkajui.
ACT 5:38 Nunin asamtai tajime: Jujú aents aina juka waitkatsuk agkan idaisatajum; juna jutikaina ju ditak juní yujainakug megkaekagtatui;
ACT 5:39 tujash Apajuinuitkuig atumek depetkashtatjume, kuitamamkatajum Apajuijai maaniakjum aniatsjupash, tiuwai. Nu tamawa nuna pegkeg diisajui.
ACT 5:40 Nuna tusag apóstol aidaun untsukajui dutikawag asutiawag Jesusa daaji pachismek chichakaigpa tusag akupkajui.
ACT 5:41 Dutikawajam apóstol aidaushkam apu ukukiag weenak, shiig aneasag dakunkut weedau, Apajuí Jesusai waitsatnume tima waituidau asag.
ACT 5:42 Nunidau asag kashí kashinig jega Apajuí ememattainum nuigtú makí makichik jeganmash yamajam chichaman etsejuidau Jesusak Cristui tusag.
ACT 6:1 Nunú tsawantin Jesusa nemajuidau kuashat kaweg wenamunum, griego chichau aina nu, hebreo chichau aina nuna chichaman patatuidau, nuwa waje griego aina duka, dita yuwatnuk betek suinachbau asag.
ACT 6:2 Nudiagtai doce aina nu, ashí Jesusa nemagkau aina nuna ijumjag chichainak: —Pegkegchauwai jutii Apajuí chichame etsegmaina nu idaiku, wajuk yuawagtatua nu uyumaka wekaetuinag duka.
ACT 6:3 Nunin asamtai yatsug aidauh, atum ainajum anuiya siete yatsug eme anentsá diitai, Wakaní Pegkeji ajamu, shiig anentaimas dutikmain aina nu etegjatajum, nunú aidau ju takatnak diistinme.
ACT 6:4 Nuninai jutiik Apajuí aujut, chichame etsegta nujai uyumakagmi.
ACT 6:5 Nuna aatus tiagtai, ashí aents tuwakaju aidauk wakekaju, nunikag etegkawaju Esteban kuashat dekaskeapi tabaujish ajau nuigtú Wakaní Pegkejish ajamun, tikichin Felipen, Prócoron, Nicanoran, Timogkan, Parmenasan, Nicolás antioquianmaya judío wajasua nujai;
ACT 6:6 dutika apóstol aidau batsatbaunum ejegawaju, dutikawagmatai ditashkam buuknum achikag Apajuin aujtusaju.
ACT 6:7 Tuja Apajuí chichame etsegbaush nuní senchi wegau, Jesusa nemajuidaushkam Jerusalegkak kuashat kawegkaju; nunisag sacerdote aidaushkam kuashat Jesusan dekaskeapi tusag nemajuidau.
ACT 6:8 Esteban Wakaní Pegkeji ajamu nuigtú Apajuí senchijin kuashat aents dutikmainchaun aents aidaunum iwainau.
ACT 6:9 Jega ijuntai, agkanmagau aidau ijuntai tutainum ujumak, cirenenmaya, alejandrianmaya, cilicianmaya, nuigtú asianmaya aina nu ijunjag Estebagjai tudayinau;
ACT 6:10 tujash niijaig tudaimainchau dekapedau Wakaní Pegkeji dekamtikam chichau asamtai.
ACT 6:11 Nuninak ujumak aentsun akikaju, “Esteban Moisesan pegkegchau chichajak nuigtú Apajuinash pegkegchau chichaju ii antugkamji” titinme, tusag.
ACT 6:12 Nuna dutikawag aents aidaun ekajkaju, judío aidaun apuji, maestro chicham umiktinun jintinkagtin aidaunashkam; dutikawajam Estebagkan achikag jukiag, sanedrín ejegawaju.
ACT 6:13 Nuigtushkam tsanumjugtin aidaunash egakaju, dutikam chichainak: —Ju aentsua juka jega Apajuí ememattai pegkegma nuna pachis, chicham umiktina nunashkam pegkegchau chichagtanak idaitsui;
ACT 6:14 nuniau asa “Jesús nazaretnumiaya nunú junak tsaiktatui, dutikak Moisés juní pujustajum tujabiuwa nunashkam yapagkattawai” timayi, tuidau.
ACT 6:15 Nuna tiagtai ashí aents sanedrinnum pekajuk, Estebagkan shiig esetug diikmag, angela yapiya numamtin wajas eketun wainkajui.
ACT 7:1 Sumo sacerdote Estebagkan: ¿Dekaskek nunash tujamaina? tau,
ACT 7:2 tama ni ayaak: “¡Yatsug aidauh nuigtú mina muuntug aidautigmesh antuktajum! Iina Apajuiji dekas imana nunú, iina muunji Abraham aajakua nuna, Harán wegatsaig Mesopotamia pujuttaman wantintuk,
ACT 7:3 chichajak: ‘Nugkemik ukuktá pataim aina dushakam, nunikam wetá wi nugkan inaktustatjam nui’, tiuwai.
ACT 7:4 Tima Abrahamshakam Caldea nugkanak ukukí, Harán nugkanum pujusui. Nuwi pujai apají jakamtai, Apajuí ju nugka yamai atum batsatjum jui itauwai.
ACT 7:5 Tujash nugkanak piipichinakesh nawe najamainnakesh susachui, tujash makichik uchijigkesh atsujaig anagkuauwai amastinaitjame tusa, nuigtú niina uchijí weantu agtina nudaunashkam.
ACT 7:6 Nuigtushkam, Apajuí: ‘Amina uchigmiin akiinak wegagtina duka, tikich nugkanum nugkenchau, wainka inatai, nuigtush waitkainam cuatrocientos mijan batsamsagtinai,
ACT 7:7 tujash tu nugkanmaya inainak waitkagtinaita nunak suwimkan susatnaitjai, dutika ai nuiya jiinjag jujú nugka jui emematjiagtinai Apajuí tiuwai’.
ACT 7:8 Tuja Apajuí Abrahamjai chichaman apakua dui pakamaktajum tiuwai; tibau asa Abraham uchijí Isaac akiina ocho tsawan wetai pakajiuwai. Dutiksag Isaacshakam uchijí Jacopan dutikauwai, tuja Jacobshakam aikasag uchijí aidaunak dutikauwai, doce aajakajua nuiya Israel aidau apají agtina nuna.
ACT 7:9 “Nunú iina apají aajakajua duke José kajejuinak Egipto jukitnume tusag sujukajui. Tujash Apajuí Josejai au asa,
ACT 7:10 ashí ni waitiamujinak agkanmitka, nuigtú yachamtikauwai dutikamu asamtai Faraón Egipto reyjiya dushakam wait anentus diisui, dutika ‘Egiptonu gobernador adaiyak nuigtú jega ni inamku pujutaiya nunash niinak idaitusui’.
ACT 7:11 “Nuniku ai yumi yututsuk asamtai nugka buku wajasui ashí Egipto nugkanum nuigtú Canaagshakam, nunikmatai yapajut tepeamtai senchi waitiamu asauwai, nuniau asamtai iina muunji aajakajua dushakam yumainjig atsujuidau.
ACT 7:12 Nunidau, Egipto trigo awai tabaun Jacob antukui, nunik iina muunji aajakajua nuna nagkamchak ishiakui.
ACT 7:13 Nunikmatai ataktú jegawagmatai, José niina yachi aidaun wantintukui, nunikmatai Faraogshakam Josesh ya weantuita nuna dekauwai.
ACT 7:14 Nunik José, niina apají Jacopan ashí niina patayí aidaujai kaunatnume timatai setenta y cinco aents Egipto jegawajui.
ACT 7:15 Nunik Egipto jegaa pujus Jacopak iina muunji aajakajua nujai jinawajui.
ACT 7:16 Nunikagmataish iyashí aidaunak jukiag Siquem ejegawajui, dutikawag Abraham ukumatain Hamora uchijí aidaunun shiig akikan sumakua nui ukusajui.
ACT 7:17 “Apajuí Abrahaman anagkuauwa nu uminkattak wajau asamtai, Israel aidauk ayatak kawedau, nuninak aan kuashat Egipto yujakajui.
ACT 7:18 Nuniamunum, tikich rey Egiptonum ekeemiuwai José wainchau aajakú.
ACT 7:19 Nunú rey iina aentsjin tsanujui, dutikak iina muunji aajakajua nuna waitkainak suwimkan sujakú ainawai; dutikau asa uchi aishmag aidau akiidiagtaik jutsuk idaisatnume jakati tiuwai.
ACT 7:20 Nunú tsawantin Moiseschakam akiinauwai, nunikmatai Apajuishkam wakegas diisui, tuja apají jeen kampatum nantu uukag apusajui;
ACT 7:21 dutikawag uumainchau wajasmatai jakati tusa ajapawajui dutikamun, Faraogka nawanji juki tuke niina uchijí ema tsakapajui.
ACT 7:22 Dutika Moisesnak egiptonmaya unuimatai aina nunak ashí jintintuawajui. Dutikamu asa, chichamesh najamin takatjinish imanuk ajakui.
ACT 7:23 “Cuarenta mijan ajamu Moisés niina yachi, Israel aajakua nuna uchijí aidau ijagsata tabau anentaimat ajusam weuwai.
ACT 7:24 Nunikmá niina patayin Egiptonmaya aents suimtatman wainkauwai, nunik nuna ayamjak egiptonmaya aentsun mauwai.
ACT 7:25 Moisés anentaimsag mina yatsug aina duka, Apajuí ditan agkanmitkati tujuttata nunak dekainawapi tau, tujash ditak aajag anentaimjachaju.
ACT 7:26 Kashinia dui Moisés, jimag Israel ditak pempeentunikiag maanidaun wainak epegtuatatus jegantun chichajak: Atumesh yatsumjaish ‘¿Wagka pempeentunikjumesh maaniagme?’ tau.
ACT 7:27 Tama yachin suwima nu Moisesan shitakiu, dutikak: ‘¿Yaa aminash jutii aidautin apuji, nuigtú juez atí tusash adaitamkame?
ACT 7:28 ¿Minash yau Egiptonmaya maamum dutiksamek mantuatasamek tujutam?’ tau.
ACT 7:29 Nu tama antuk Moisesak Madián nugkanum tupikakiuwai, nunik jegaa tikich nugkanmayaitak nuwi pujusui, nuwi jimag uchi ajusui.
ACT 7:30 “Cuarenta mijan nagkaemai, makichik ángel uwegshunum wantintukui muja Sinaí tikiju awa nui, numi zarza tutai jii kegamunum.
ACT 7:31 Nunittaman Moisés wainak puyatkau, nunik shiig wainkatatus adijkamá Apu Apajuí chichamun antuku, nuniak:
ACT 7:32 ‘Witjai, amina muunjum aajakajua nuna Apajuijinuk, Abraham, Isaac, nuigtú Jacob aajakajua nuna Apajuijinuk’, tau. Tutai Moisesak ishamak kujau, nuniak diimainchau dekapeau.
ACT 7:33 Nunitai Apu Apajuí chichajak: ‘sapatjum ukuimakta, wagki ame wajam anka nugkak pegkegmai.
ACT 7:34 Dekaskenum mina aentsug Egipto batsamas waituina nunak wainkajai, nuigtush buutainak untsujuina nunash antugkajai, nunikan agkanmitkatasan akaikijai. Nunin asamtai tantata Egipto awematjame’, tiuwai.
ACT 7:35 “Nunú Moisesan dakituinak: ‘¿Yaa aminash apu, nuigtú juez atí tusash adaitamkame?’ tiajua nuna Apajuí apu ema, nuigtú agkanmitkagtin atí tusa ángel numi zarzanum wantintukua nuna senchijin awemauwai.
ACT 7:36 Tima Moisés Egipto batsamtatman jiijui, aents dutikmainchaun Egipto nugkanmayan iwaintuk, dutiksag Nayants Kapantu tutainmash, nuigtú cuarenta mijadai uwegshunum yujasua nuishkam.
ACT 7:37 “Nunú Moisesa duke Israel aidaun chichajak: ‘Apu, atumi Apajuigmia nu, atumi yatsum aina juiyan etegkatnai makichik profetan wiya juninun’, tiuwai.
ACT 7:38 Nunú Moisesa duke Israel uwegshunum ijunjagmatai, muja Sinainum angeljai chichajakua duka, nuigtú iina muunji aajakajua nujaishkam; nigki chicham pujutá sukagtinun jukiuwa dushakam jutii ujapaktinun.
ACT 7:39 “Tujash iina muunji aajakajua duka dakituidau asag umijujakchajui, ayatak Egipto waketjagtatus anentaimajakajui.
ACT 7:40 Nunidau asag Aarogkan chichajuinak: Ii Apajuimatin aidau najatkagtuata ni emjutpakti; wagki Moisés Egipto nugkanum batsatjin jiigmakiuwa duka dekantsui wajukaeki, tiajui.
ACT 7:41 Tusag toro tsakat niimtinun najanawaju, dutika kuntinun maa apeenak dita najanamujin eme anentuinak, fiestamaidau.
ACT 7:42 Nudiagtai Apajuishkam ditanak idaisauwai nayaimpinmaya yaya aina nuna ememattinme tusa. Aatus agagbauwai profeta aina nuna papijinish: “ ‘Israela uchijí aidauwah, ¿atum uwegshunum cuarenta mijadai yujasuitjum duish kuntin maa apeakjumesh emematjiuk ainajum?
ACT 7:43 Duka dutiktsuk Moloc, nuigtú atumi apajuijum yaya Refán, atum ememattasajum dakumká najanauwaitjum nudau tabernáculo yanasjum yujau asagmin, Babilonia inagkeakin atushat emattajime, Apajuí tiuwai’.
ACT 7:44 “Iina muunji aajakajua nunú uwegshunum jega pegkejam Apajuijai chicham apaaku kayanum agagbauwa nu aajakui, Apajuí Moisesan chichajak wainkaum dutiksamek jegamkata tibauwa dutiksaik takasbau.
ACT 7:45 Nunú tabernaculon iina muunji aajakajua nu jukiajui, dutikamun tikich nugkanum aents batsatun Apajuí depetuk dita emtin jiijua nui utsanawagtatus Josuejai mininak itawajui, duka David pujujakua duish aajakui.
ACT 7:46 Davitan Apajuí wait anenjauwai, dutikamu asa Jacopa Apajuijiya nudaun tabernáculo jegamkatatus wakejukui;
ACT 7:47 tujash Salomón jega Apajuí ememattainak jegamjukui;
ACT 7:48 nunin aigkish Apajuik aents jegamkamunmag pujatsui. Profeta tawa nunisag:
ACT 7:49 “ ‘Mina ekeemtaijuk nayaimpia auwai, untsu mina najamtaijua duka nugka nuuwai. ¿Minash wají jegak jegagtuktagme? ayamainjush atsugta juniaish, ¿tu amainaita mina ayamtaijush? tawai Apu Apajuí.
ACT 7:50 ¿Ju ashí wají aina juka wi najankashbaukaih?’ ”
ACT 7:51 “Atumek tuke antumtikmainchau, nuigtú antutaigmish, anentaimtagminish Apajuí anentaimtuchua nunin aajakuitjume, nuniau asajum Wakaní Pegkejishkam shiwagmagme, atumi muunjum wajukejakua nunisjumek.
ACT 7:52 ¿Ya profeta aidauna atumi muunjum aajakajua dusha waitkajakchau ainawa? Nunidau asag pegkejan takau taatna nuna pachis emtikak etsejuidaun maajakú ainawai, yamai nunú pegkejan takauwa nu tamtaish unupiagjum sujukuitjume dutikajum mau ainagme.
ACT 7:53 Atumek chicham umiktinun ángel aidau amasajua nu ajutjamainaig umikchau ainagme”.
ACT 7:54 Nu tabaun antukag, Estebagkan senchi kajegkag, nainak taket emenawag katetmitkaidau.
ACT 7:55 Tujash Esteban Wakaní Pegkeji ajamu asa, nayaimpin diikmá Apajuí imanjin wainkau, nuigtú Jesús Apajuí untsujin wajattaman, nunik:
ACT 7:56 —Nayaim ujaniun wainjai, nuigtú Aentsmaga akiinauwa dushakam Apajuí untsujin wajaun, tau.
ACT 7:57 Tujash ditak kuwishinak epenkag, senchi pampanjag ashí wajatjag achikag;
ACT 7:58 yaaktanmag jiikiag kayai tukuidau; nuninak tsanumjuina duka ditá jaanchjin awimajag makichik datsauch Saulo daagtinun kuitamkati tusag susajui.
ACT 7:59 Kayai tukuamaitak Esteban Apajuin aujak: “Apu Jesusah, mina wakanjuk jujutkita”, tusa
ACT 7:60 tikishmag senchi untsumak: “¡Apuh, ju mina jutijuina juna tudaujig tsagkujata!” tiuwai. Nuna tii jakauwai.
ACT 8:1 Sauloshkam nui pujau asa Estebagkak mantamnati tau. Nunú tsawantin iglesia Jerusalén batsatu senchi waitkamu nagkamnauwai; nuniau asamtai ashí nugkanum Judea, Samarianmash pampagkajui, tujash apóstol aidauk nuig batsatu.
ACT 8:2 Tuja Estebannak ujumak aents Apajuí puyatjus umijin aidau, Estebagkan iyashin jukiag ukusag, senchi buutiajui.
ACT 8:3 Nuniamunum Saulok iglesianmaya aidau waitkatan nagkamau, nuniau asa makí makichik jeganum utua, aishmag aidaun, nuwanashkam achig yajumu cárcel chimpiatatus.
ACT 8:4 Tujash pampagkaju aidauk, dita tuwí jegainawa nuanui yamajam chichama nuna etsejuidau.
ACT 8:5 Nuniamunum Felipe yaakat Samaria jegaa, Cristo pachis etseju.
ACT 8:6 Nunitai aents aidauk ijunjag Felipe etsegbaun puyatjus antuidau, nuninak aents dutikmainchau dutikamunash wainaidau.
ACT 8:7 Wagki kuashat aents wakan pegkegchau ajamu aidauk senchi untsumak jiinaidau, nuigtushkam wekaechau aidau, nuigtú shutú aidaunashkam etsagaku.
ACT 8:8 Dutiktai nunú yaaktanmaya aidauk shiig aneedau.
ACT 8:9 Yaunchuk nagkamas nunú yaaktanum makichik aents Simón daagtin magia takau pujujakui, nuniak samarianmaya aidaunak tsanuau “Wika imajaitjai” tusa.
ACT 8:10 Tutai, ashí uchi, muun aidaujai nagkamas puyatjus antujuinak: “Juuwai ‘dekas Apajuí senchijig’ ”, tuidau.
ACT 8:11 Tuidau asag nuna antujuidau, wagki kuashat tsawantai mágico takatai aidaujai takaak tsanú pujujuinamu asag.
ACT 8:12 Tujash Felipe yamajam chichaman Apajuí inabaujin nuigtú Jesucristun pachis etsegtai, aishmag nuwa aidaujai dekaskeapi tiaju aidauk yamimakajui.
ACT 8:13 Nuniamunum Simogshakam dekaskeapi tusa yamimag, Felipejai ashí yantamnum wekaegu, nuniak aents dutikmainchaun kuashat dutiktai puyatjus diyau.
ACT 8:14 Nuniamun apóstol aidau Jerusalén batsatu, Samarianmaya aidaush Apajuí chichamen wakegas antuinawai tabaun antukag, Pedron Juagjai awemajui.
ACT 8:15 Dutikawajam ditashkam jegawag Apajuin aujtusaju, Wakaní Pegkejin jukitnume tusa,
ACT 8:16 wagki eke ditaig makichkinmakesh Wakaní Pegkejig taachui, ayatak Apu Jesusa daajinak pachisag yamimakaju asagmatai,
ACT 8:17 Pedro Juagjai buuknum achikag Apajuin aujtuinam, Wakaní Pegkeji egkemtujajui.
ACT 8:18 Apóstol aidau aentsun buuknum achitai, Wakaní Pegkeji egkemtamun Simón wainak, kuichkin anagkuauwai.
ACT 8:19 Nuniak: Minash aanú senchi sujustajum, wisha tikich aents aidaun buuknum achiai Wakaní Pegkejin jukitnume, tau.
ACT 8:20 Tutai Pedro chichajak: —Amek kuichkigmijai megkaekatnaitme, Apajuí anentag sukagtusbauwa nunú kuichki sumakta tiu asam.
ACT 8:21 Amek makichkish jukiti tamak amaitsume, wagki Apajuí emtinig amina anentaimik pegkegchauwai.
ACT 8:22 Nuniau asam pegkegchaujum idaikum Apajuí segatá, ame aaja anentaimjaum nunash tsagkugtamjachaintash;
ACT 8:23 wagki senchi kajeam nuna wainjame, nuniau asam pegkegchauwa nu achikam wekaeme, tiuwai.
ACT 8:24 Tama Simón ayaak: —Atum minash Apu segatjitajum, atum mina tujutjum nunú imanisag nagkaetuki, tiuwai.
ACT 8:25 Pedro Juagjai Apajuí chichame etsegbaun ashimkag, Jerusalén wakitkiajui, nuninak kuashat yaakat yaig samarianmaya batsatbaunum weenak, yamajam chichaman etsejuidau.
ACT 8:26 Nuniku ai makichik Apajuí angelji Felipen chichajak: “Felipeh, surnumanini weta jinta Jerusalén juwaki Gaza wegamunum uwejush awa nui”, tiuwai.
ACT 8:27 Nu tima Felipeshkam weuwai, nunikmá etiopianmaya aents, aents kaga emamu, Etiopía reinaji Candace kuichkijin kuitamin Jerusalén Apajuin ememattatus weu wakettatman wainkau;
ACT 8:28 nugkeen waketak carrojin ekeemas profeta Isaías agagbaun au aujkawa wegau.
ACT 8:29 Nunittaman Wakan Felipen chichajak: “Carro wega au adijkata nunikam tikiju wajastá”, tiuwai.
ACT 8:30 Tama Felipeshkam adijkamá profeta Isaías agagbaun au aujkawa minittaman antujuk iniak: —¿Ame aujam dusha antamek? tau.
ACT 8:31 Tama ni ayaak: —¿Wajuk antuktajaki, nuna taku tawai tusa ujachbaunush? tau. Nuna tusa Felipen: —Wakata tiuwai niijai ekeemsatatus.
ACT 8:32 Agagbaunum ju chicham tawa juna auju: “Uwig mautainum juki ematia numamtuk jukiag emagmayi; nunisag uwig uje tsupigmash takamtak tepegama numamtuk niishkam chichakchabi.
ACT 8:33 Nuniau asa ayatak yunumkabi, nunitaish makichkish ayamjauk atsusui, niina uchijigkesh atsugsauwai ju nugka juig maamu asa”.
ACT 8:34 Tibauwa nuna eunuco Felipen iniak: —Wait aneasam tujutta, ¿junash profetash yana takua tawa; nigkik tumama, atsa tikichin takug tawa?
ACT 8:35 Tutai Felipeshkam nunú ni Apajuí chichamen auja nui nagkama, chicham yamagman Jesusan pachis ujakú.
ACT 8:36 Nunik weamunum jintaa entsa aunum jegantá eunuco chichaak: —¿Ju yumi awa jui wi yamimagta tamash wají utugchata amainaita? tau.
ACT 8:37 Tutai Felipe ayaak: —Ame dekas ashí anentaimjai dekaskeapi takumek yamimamainaitme, tiuwai. Tama ni ayaak: —Wika Jesusak dekas Apajuí Uchijimpapita tajai, tiuwai.
ACT 8:38 Tutai carrojum awantata tusa awantamtai, mai yuminum jegawajui nunik Felipeshkam yamijú.
ACT 8:39 Entsanmaya jiinkimtai, Wakaní Pegkeji Felipenak jukiuwai; dutikamtai eunucok ataktuk wainkachu, tujash shiig aneas weuwai.
ACT 8:40 Felipek Azoto wantinkauwai, nunik ashí yaaktanum nagkaemak yamajam chichaman etse etsegkawa Cesarea jegauwai.
ACT 9:1 Nuna nuninai Sauloshkam Apu Jesusa nemajuidaun maatasa awantanak idaichau. Nuniau asa sumo sacerdoten jegajuau.
ACT 9:2 Nunik papí agajam sujustá Damasco jegaan jega ijuntaiya nui wayaaknush nuna inakmasan, Jesusa nemajuidaun aishmag, nuwa aidaujai achijan, Jerusalén ikaunmaktajai, tusa segau.
ACT 9:3 Nunik, Damasco jegaattak tikiju wajas jintá wetatman, pachiachbau nayaimpinmaya tsaaptin Saulon egkeku;
ACT 9:4 dutikam nugká iyaju, nunikmá makichik chicham: “Saulo, Saulo ¿Wagka minash waitkajame?”, tabaun antuku.
ACT 9:5 Tama Saulo iniak: “¿Apuh, amesh yaitpa?” tau. Tutai ni ayaak: “Wika Jesusaitjai, ame ya ainkum waitkame nuuwaitjai,
ACT 9:6 nantaktá nunikam yaakat jegata, awi ame dutikmainnak tujabiagtatui”, tiuwai.
ACT 9:7 Aents aidau Saulojai ashinuk senchi ishamkaju, chichamunak antuinayatak wainainachu asag.
ACT 9:8 Nunik Sauloshkam nugká tepau nantakí nimtakamá wainmamainchau wajasú. Nunikmatai uwegnum achik egkesag Damasco ejegawaju;
ACT 9:9 dutikam kampatum tsawan wainmatsuk, yutanash yutsuk, umutnash umutsuk pujau.
ACT 9:10 Damasco Jesusa nemajin Ananías daagtin pujau, nunittaman Jesús wantintuk: “¡Ananiasah!” tiuwai. Tama ni ayaak: “Apuh, jui pujajai”, tau.
ACT 9:11 Tutai Apu Jesús chichajak: “Jinta tutupit tutaya nui wetá, nunikam Judasa jeen jegaam inimsata Saulo daagtin tarsonmaya pachisam, nui Apajuin aujak pujawai;
ACT 9:12 wainkae Ananías daagtin wayá wainmaktitus buuknum achiamun”, tiuwai.
ACT 9:13 Tama Ananías chichaak: “Apuh, au aentsun, Jerusalén amina nemagtamin pegkejam aidau batsata nuna, tikima pegkegchau waitkamujin pachisag chichainamun antukmagjama;
ACT 9:14 nuniau asa juishkam sacerdote apuji aidau inajam, juiya amina daagmin pachis chichaina nuna achig yajuaktatus taajama”, tau.
ACT 9:15 Tutai Apu Jesús ayaak: “Wetá, wi aunak etegkajai mina pachitus ashí judiochu aidaunum nuigtú rey aidaunmash nuigtú Israela uchijí aina nunash ujaktí tusan;
ACT 9:16 wagki wi iwaintuktatjai mina daajun pachis etsejak wajupa waittsashtatua nuna”, tiuwai.
ACT 9:17 Tima Ananiaschakam jega Saulo pujamunum weuwai, nunik waya niina uwejin buuknum achiak: —Yatsug Sauloh, Apu Jesús ame jintá minamin wantintugmaka nunú awetine ataktú wainmakti tujamu asa, nunik Wakaní Pegkejinash jukiti tusa, tiuwai.
ACT 9:18 Tamawaik Saulo jiinia namaká saepega nunin aidau kakekauwai nunikmatai wainmakui; nunik wajakmatai Ananías yamijui.
ACT 9:19 Dutikam yutain yuwa chichiajui, nunik Jesusa nemajin aidau Damasco pujuidaujai ujumak tsawan ijunag pujusui.
ACT 9:20 Nuniak jega ijuntai aidaunum wayá Jesusak Apajuin Uchijiyai, tusa etseju.
ACT 9:21 Ashí nuna antuidauk puyatkaju, nunikag: —¿Juchaukaih Jerusalén Jesusa daajin pachis chichaidaun achig yajuaktatus aintú wekaetinuwe nu? ¿Jukechukait juiyanash achijá yajuak sacerdote apuji aidaunum sujukagtatus taa nunú? tuidau.
ACT 9:22 Tujash Saulok aan nagkaemas sapigmakas Jesusak Cristui tusa etseju, nunitai judío aidau Damasco batsata duka pachimdaekag shiig dekamainchau juakajui.
ACT 9:23 Nunikag dukap tsawan asag judío aidau, Saulo maami tusag chichaman umigkaju;
ACT 9:24 tujash Saulok dekau ni maami tuinamunak. Ditak tsawai kashishkam yaakta waitiji jiintainum dakak batsamtau jiinkui maami tusag.
ACT 9:25 Tujash Saulo jintintaiji aidau kashi jukiag chagkinnum egkeawag yaakat pegmagbaunum nenaa akakiaju.
ACT 9:26 Saulo Jerusalén jegaa Jesusa nemajin aidaujai ijunjatatus wakegau, tujash ashí ishamaidau, wagki nigka Jesusa nemagtsuapi, tuidau asag.
ACT 9:27 Tujash Bernabé juki, apóstol aidau batsatbaunum ejegau, dutikam Saulo jintá wesa Apu Jesusan wajuk wainkae, wajintu ausae nuigtú Damascosh wajuk ajankas Jesusa pachis etsegkae nuna pachis ujakaju.
ACT 9:28 Saulok Jerusalén juwaku nunik, ditajai ijunag wekaegas ajankas Jesusan daajin pachis etseju;
ACT 9:29 nuniak chichaak judío, griego chichaman chichau aidaujai tudaiyu Apu Jesusa daajin pachis; tujash ditak ayatak maata tuidau.
ACT 9:30 Nuna yatsut Jesusa nemajin aidau antukag jukiag, Cesarea ejegawaju dutikawag Tarso awemajui.
ACT 9:31 Dutikawagmatai iglesia aidauk ashí Judea nugkanum, Galileanmash nuigtú Samarianmashkam, shiig agkan batsatainak, Apu Jesusan puyatjus umijuidau, nuninak nuni nagkaemas kawedau Wakaní Pegkeji ichichmamat suinamu asag.
ACT 9:32 Pedro, yatsut Jesusa nemajin aidaun diyaak wekaetau asa, Lidanum Jesusa nemajin pegkejam aidau batsatu asamtai wainkatatus weuwai.
ACT 9:33 Nunikmá Eneas daagtin wekaechau asa, ocho mijadai pegajinig tepenun wainkauwai.
ACT 9:34 Nunik Pedro chichajak: —Eneasah, Jesucristo etsaentamui; nantakim janchjum ainkata. Tamawaik Eneasak pegkeg wajas wajakiuwai;
ACT 9:35 nunikmatai ashí yaakat Lida nuigtú Sarón batsamin aidau nuna wainkag Apu Jesusan nemagkajui.
ACT 9:36 Nunú tsawantin yaakat Jopenum, Jesusa nemajin Tabita daagtin pujau. (Duka griego chichamnumak “Dorcas” taku tawai.) Nunú nuwak ashí pegkeg aina nunak takaak, aents ujunauch aidaunash yayaak pujau;
ACT 9:37 nuní pujau Dorcas jakauwai. Nunikmatai iyashin nijajag jega makichkia ekeni jegamkamunum iwakag, tesamunum awayá aepsajui.
ACT 9:38 Lidak, Jope tikiju au asamtai, Pedro nui pujawai tabaun dekaawag, Jesusa nemajin aidaushkam jimag aentsun: “Jopenum megkaetugtsuk tajutjamati, tujamae tusa ujaktajum”, tusa awetiaju.
ACT 9:39 Tusa ujakajam Pedroshkam ditajai weu. Nunik jegamtai jukiag yakí jakau tepamunum awayawaju, nunikmatai ashí nuwa waje aidauk buutuinak tenteawaju, nunikag túnica aidaun inaktuidau nuigtú tikich jaanch Dorcas ditajai iwaaku pujusá najantaiji aidaun.
ACT 9:40 Dutikam Pedro ashí aentsun jiijú nunik, tikishmag Apajuin aujus, jakaun pempeentuki: —¡Tabita nantaktá! tiu. Tama nuwashkam nimiuwai, nunik Pedron wainak nantakí ekeemsau.
ACT 9:41 Nunikmatai Pedro uwegnum achik awajainu, dutika Jesusa nemajin aidaun, nuigtú nuwa waje aidaujai untsuká iwakun iwaintukaju.
ACT 9:42 Nunú dutikamun ashí jopenmaya aidauk dekaawaju, nunikag Apu Jesusan kuashat dekaskeapi tiaju.
ACT 9:43 Nunik Pedrok Jopenum Simón duwapé apijin tutaiya nuna jeen kuashat tsawan pujusui.
ACT 10:1 Yaakat Cesareanum makichik aents Cornelio daagtin pujau, suntag akankamua nuna daaji Italianmaya tutaiya nuna capitanji.
ACT 10:2 Duka ashí niina patayí aidaujai ijunas Apajuin puyatjusag emematin aidau. Nunin asa judío senchi atsumamuji ajuidaunash yayaak kuashat kuichkin suwau, nuniak Apajuinashkam tuke aujsagké au.
ACT 10:3 Nuniau makichik tsawantai, a las tres tumain ai paan wainkau, Apajuí angelji ni pujamunum waittaman, nuniak: “¡Cornelioh!” tiuwai.
ACT 10:4 Tama Corneliok dii wajau, nunik ishamayatak: “¿Apuh, wagka tujutme?” tau. Tama ángel ayaak: “Apajuí, ame aujam nunak antugtamkae, nuigtú ame atsumaidau yayam nunash waitjamkae;
ACT 10:5 nunin asamtai ujumak aents awemata yaakat Jopenum, Simón, Pedro tutaya nuna utitnume.
ACT 10:6 Nigka tikich Simón duwapé apijin tutaya nuna jeen nayantsan uwetus pujawai”.
ACT 10:7 Ángel Cornelion aujus wakitkimtai, jimag ni inaken, nuigtú makichik suntag Apajuin puyatjus anentaimtinun ni kajittsá ditaijijai untsukú;
ACT 10:8 dutika ashí ni wainkamujinak ujaká Jope awemauwai.
ACT 10:9 Kashinia dui jintá eke yaakat jegattak weenai, Pedroshkam jega ekenja jegamkamu nagkatkamunum wakauwai Apajuin ausatatus etsa tajiastatak wajasú ai.
ACT 10:10 Nui pujus senchi yapajau, nuniak yuwatatus wakegau; tujash eke yutain umiagtai pujukmá niishkam makichik yakiya wantinun wainkauwai,
ACT 10:11 nayaim ujanmatai, sábana muun wegkagma iman cuatro weni nagkatjamuji jigkatkamu nugkanum akaetatman,
ACT 10:12 nuanui ashí kuntin cuatro nawentin aidau, yakiya chigki aidaush, ashí japiinas yujau aidaushkam chimpiju.
ACT 10:13 Nuniamunum makichik chichaman antuku: “Pedro, wajakim anú maata dutikam yuata”, tabaun.
ACT 10:14 Tama Pedro ayaak: “Atsá Apuh, dutikashtatjai, wika ju yuchatai nuigtú tsumain aina nunak tuke yuwachuitjai”, tiu.
ACT 10:15 Tutai ataktú awentsag chicham: “Apajuí pegkeg emamua duka amek tsumainai tiipa”, tiuwai.
ACT 10:16 Duka kampatumá nunikmatai, sabananak wamak nayaimpinum awagkiuwai.
ACT 10:17 Kajanum nuninun paan wainak Pedro, puyatuk wajukatnunak aunash wainkaja tusa anentaimtú pujai, Cornelio aents awemamu aidaushkam Simogkan jeen inimas waitinum tantaju,
ACT 10:18 nunikag untsumak iniimu, Simón daagtin Pedro tutaya nu anuish pujatsuak tusag.
ACT 10:19 Pedro eke kajanum paan wainkamujiya nuna anentaimtú pujai, Wakaní Pegkeji chichajak: “Simogka kampatum aents egapainawai,
ACT 10:20 wamak akaikita, nunikam ditajai ijunjam utujimtsuk wetá, wi ditanak awemamjai”, tiuwai.
ACT 10:21 Tama Pedroshkam akaiki, aents aidaun jegantun: —Witjai, atum egatjum duka, ¿wagka taugme? tau.
ACT 10:22 Tama dita aiinak: —Capitán Cornelio, pegkejan takaak Apajuin emematin asamtai ashí judío aidaush aneas wakegas diin aina nunú awetamatai minaji. Nuna Apajuí angelji chichajak amina ujaktá, dutikam ni jeemin tajutjamati, nunik ni tujamkui shiig antugkata tibau asa, tuidau.
ACT 10:23 Tutai Pedro jegá awayawaju, dutika nu kashia duik ditajai kajigkaju, nunik tsawajag Pedro ditajai weagtai, ujumak Jesusa nemajin aidau jopenmaya uyuntsaju.
ACT 10:24 Nunikag kashinia dui Cesarea jegawaju, Cornelioshkam niina patayí aidaujai nuigtú niina shiig kumpají aidaun ipaa dakak pujau.
ACT 10:25 Pedro jegá jegattaman, Cornelio jiintuki igkuak tikishmatjau ememattatus.
ACT 10:26 Tujash Pedro awajki chichajak: —Wajaita, wishakam ame aentsuitam annuketjai, tiuwai.
ACT 10:27 Tusa niijai chichá chichakua wayau, nunikmá kuashat aents ijunag atatman wainkau.
ACT 10:28 Nunik Pedro chichaak: —Atumek shiig dekagme, judío aidautinak iinu chicham umiktina nuig, judiochu aina nujaig ijunmainchaun nuigtush ditá jeenkesh utumainchaun tujama duka. Tujash Apajuí mina iwaintugkae makichkish tsumainai tsuwatai tumaitsug nuna.
ACT 10:29 Nuadui mina awetujiagminish utujimtsuk minimjai, yamai iniastajime: ¿Wagka taati tujutmaugme?, tau.
ACT 10:30 Tutai Cornelio ayaak: —Cuatro tsawan weawai, ju horaya junin ai a las tres wegai mina jegajui Apajuí aujkun pujukman, makichik aents jaanch winchamtinun nugkuaju wajattaman wainkamjai;
ACT 10:31 nunika ai chichagtak: “Cornelioh, ame Apajuí aujam nunak antugtamkae, aents atsumaidau yayam nunash waitjamkae.
ACT 10:32 Awemata aents Jopenum dutikam Simón Pedro tutaya nuna itaatnume, tikich Simón duwapé apijin nayants uwetus puja nuna jeen pujawai”, tujutmae.
ACT 10:33 Nuna tujutiu asamtai wamkesan utugtitajum tusan awetimjame, dutikamu asam ameshkam pegkeg taume. Yamai Apajuí waipamunum jui ijunjaji, nunidau asaja wakegainaji, amina Apu Apajuí tujabau iishkam ame etsegkumin antukagtasa.
ACT 10:34 Tama Pedro nagkama chichaak: —Dekaskenum yamaik dekajai, Apajuik aents aidaunak akanag juka jushá awai, jushakam nishá awai tatsu nunak;
ACT 10:35 nigka ashí nugkanmaya aents aidaunak shiig anentus diyawai, niinak puyatjus umijuinak pegkegnak takaina nunak.
ACT 10:36 Apajuí Israel aidaun chichaman awetiuwai yamajam chicham shiig agkan pujutan Jesucristo etsegkauwa nuna, nigki ashí Apua nunú.
ACT 10:37 Atumek dekagme ju chicham ashí Judea nugkanum, Galilea nagkamas Juan yamimagtajum tusa chichagkagtamu wantinjauwa duka.
ACT 10:38 Dekagme, Apajuí senchijin nuigtú Wakaní Pegkejin Jesús nazaretnumiaya nuna susauwa duka, dutikam wekaegas pegkeg aidaun takaak Iwanch waitkam batsatunash etsagajakui, wagki nunak Apajuí niiní pujau asamtai dutikauwai.
ACT 10:39 Jutii ainaji ashí wají aidaun Jesús Judea nugkanum, nuigtush Jerusalén takaamu wainkau aidautik, nuna numinum nenawag maawaju ainawai.
ACT 10:40 Tujash Apajuí kampatum tsawanta jui inankiuwai, dutika iinash iwaintugmakui;
ACT 10:41 ashí aentsnak wantintukchauwai, imá jutiinak wantintugmakui, ya aidauna Apajuí duik nagkamas, ju aidau etsegkatin atinme tusa etegjauwaita nunú aidautin, jutii aidauti nantakmatai niijai yuinaku nuigtush umutash uwagmaiji.
ACT 10:42 Ni awetabiajui aents aidaun ujaktinme, nuninak Jesusnak Apajuí, iwaku aidaun, jakau aidaunash juezji ema apusae tusa etsegkatnume tusa.
ACT 10:43 Ashí profeta aidauk Jesusnak pachis etsegtuinawai, ashí niina dekaskeapi tuidauk niina daajin tudaujig tsagkujam agtinai tusa.
ACT 10:44 Pedro eke chichá wajai, Wakaní Pegkeji ashí aents nunú chichaman antuidaunak egkemtujajui.
ACT 10:45 Pakamatan chichamjin Pedrojai kaunkaju aidauk, anentai jegachajui judiochu aidaunash Wakaní Pegkeji egkemtujajam,
ACT 10:46 tikich chichaman chichainak Apajuin emematuidau antuidau asag.
ACT 10:47 Nudiagtai Pedro chichaak: —¿Wajinma utugmamain ainawa yamimagta tabaunmash aents aidau Wakaní Pegkejin jutiijai betek jukiaja dusha?
ACT 10:48 Dutika Jesucristo daajin yamimagtajum tusa, ashí yamikajui, dutikawajam Pedron: —Jui ujumak tsawankesh pujusam wetá, tusag segajui.
ACT 11:1 Apóstol aidau, nuigtú Jesusa nemajin aidau Judea batsatu dekaawaju, judiochu aidaush Apajuí chichamen wakejus antuinawai tabaun.
ACT 11:2 Tujash Pedro Jerusalén jegamtai, pakamaku aina nuiya chicham patattan nagkamawaju.
ACT 11:3 Nuninak: ¿Wagka amesh aents pakamakchau aidau batsatbaunum wayamesh, ditajai ijunjamesh yujumkash yuwaume? tuidau.
ACT 11:4 Tuinam Pedroshkam nagkama, makí makichik wajuk nagkaemakni nuna pachis ujainak:
ACT 11:5 —Wika yaakat Jopenum pujusan Apajuí aujku pujukman, kajanum paan sábana muun wegkagma iman makí makichik nagkatjamujin jigkatkamu nayaimpinmaya akaiki wi pujamunum iwaintugbaun wainkamjai.
ACT 11:6 Nunikan shiig diikman ashí kuntin nugkanmaya kajen aidau, nuigtú japiinas yujau aidau, yakiya chigki aidaushkam chimpimtatman wainkamjai.
ACT 11:7 Nuniai makichik chicham: Pedro, wajakim anú maata, dutikam yuata tujuttatman antukmajai.
ACT 11:8 Tujutkui wi ayaakun: “Atsá Apuh, dutikashtatjai, wika ju yuchatai nuigtú tsumain aina nunak tuke yuwachuitjai”, timajai.
ACT 11:9 Nuna tai awentsag nayaimpinmaya chicham: “Apajuí pegkeg emamua duka amek tsumainai tiipa”, tujutmayi.
ACT 11:10 Nunak kampatumá dutika ashí nayaimpinum jukibi.
ACT 11:11 Nu nunikmatai pujai, cesareanmaya awemamu kampatum aents jega wi pujamunum tajutuawagmayi.
ACT 11:12 Nunikmatai Wakan, utujimtsuk ditajai wetá tujutmayi. Tujutmatai jujú seis yatsut Jesusa nemajin aina jujai wegagmaiji, nunika makichik aentsú jeen wayabiaji;
ACT 11:13 nunika ajin ni ujapakmayi, wajuk angelan niina jeen wajaun wainkae, nunik chichajak: “Aents awemata Jopenum, dutikam Simón, Pedro tutaiya nuna utitnume;
ACT 11:14 dutikam ni chichaman tujamtatui ame, amina pataimijai uwemainaitam nuna, tujutmae” tusa.
ACT 11:15 Timatai wi nagkaman chichai, ditanashkam Wakaní Pegkeji tajuawagmayi jutiin nagkamchak utugtamkabia dutiksag.
ACT 11:16 Nuna nunikmatai adeagmaijai, Apu Jesús chichaak: “Juagkak yumí yamijatjauwai, tujash atumek Wakaní Pegkejiyai yamigbau atatjume”, tujabauwa nuna.
ACT 11:17 Nunin asamtai, Apajuí jutii Apu Jesucristo dekaskeapi tabaunum anenjauch amasajua dutiksag ditanash susaja nunash, ¿wisha yaitja Apajuin dutikawaipa titinnush?
ACT 11:18 Nu tabaun antukag itatkaju, nunikag Apajuin emematuidau, nuninak: —Dekas judiochu aidaunash Apajuí, tudauji idaiyinak pujutan jukitnume tusa aikae, tuidau.
ACT 11:19 Estebagkan maawagmatai pujusag, Jesusa nemajuidau waitkatan nagkamawaju, dutikainam pampagkag ujumak Fenicianum weenai, Chiprenmash, Antioquianmashkam shiyakaju. Nui batsamsag yamajam chichaman Apu Jesusan pachisag tikichnak ujatsuk imá judío aidaunak jintintuidau.
ACT 11:20 Nuninai ujumak Jesusa nemajin aidau chiprenmaya, cirenenmaya aidau Antioquía jegawag, griego aidaunash yamajam chichaman Apu Jesusan pachisag ujaidau.
ACT 11:21 Nuniagtai Apu Jesuschakam niina senchijin ditan suidau, dutikainamu asag kuashat dekaskeapi tusag Jesusan nemagkajui.
ACT 11:22 Iglesia aidau Jerusalén batsatu antukag, Bernaben Antioquía awemaju.
ACT 11:23 Dutikam jegaa, Apajuí wajuk yainawa nuna wainak senchi shiig aneasu, nunik: Shiig anentaiminish ebetmamjajum Apu Jesús nemagkatajum, tusa chichaju.
ACT 11:24 Wagki Bernabek aents pegkeg, nuigtush Wakaní Pegkejiya nuna senchijí kuashat ajamu, dekaskeapi tabaujishkam imanuk. Iman asamtai ni chichamun antugkag kuashat aents Apu Jesusan nemagkajui.
ACT 11:25 Nuna dutika Bernabek Tarsonum weuwai Saulon egaak,
ACT 11:26 nunik wainak Antioquía jukiuwai. Nuwi iglesia aidaujai makichik mijan pujusajui, kuashat aents aidaun jintintuinak. Nui nagkamas Antioquía Jesusa nemajin aidaun “cristunu” ainawai, tiajui.
ACT 11:27 Nunú tsawantinig ujumak profeta aidau Jerusalegnumia akaikiajui Antioquía weenak,
ACT 11:28 nuanuiya makichik Agabo daagtin wajakí, Wakan dekamtikam: “Senchi yapajut ashí nugkanum Roma apuji inama nui tepeattawai”, tusa etseju, duka Apu Claudio inamak pujai nagkaemakiuwai.
ACT 11:29 Nunikmatai Jesusa nemajin antioquianmaya aidau, Jesusa nemajuidau Judea batsatu waitiagtai, makí makichik dita ajuinamujin awetitnume tusag umikajui;
ACT 11:30 dutika Bernabé Saulojai wetai, Jesusa nemajin aidaun apuji Judea batsatun ofrenda awetiajui.
ACT 12:1 Nunú tsawantaik, rey Herodes ni suntaji aidaun ishiakui, ujumak iglesia aidaun achikag waitkastinme tusa;
ACT 12:2 dutika Jacobo Juagkan yachiya nunak espadayai maatajum, tiuwai.
ACT 12:3 Nu dutikamu judío aidaun shiig awajkagmatai Pedroshkam achiktajum, tiuwai. Nu tsawan aina duka pag levaduragtuchu yutaiya nu jegamunum nunikui.
ACT 12:4 Dutika achikagmatai cárcel egkeauwai, dutikak dieciséis suntajan cuatro cuatro kanajag kuitamkatnume, dutikawag Pascua nagkaemakmatai aents aidau ijunjamunum jiikin, chichaman dekajuatjai, tusa anentaimsauwai.
ACT 12:5 Dutikamu asa Pedrok cárcel shiig kuitamkam egketu; tujash iglesia aidauk niina pachisag mijattsuk Apajuin senchi aujtuinak batsatu.
ACT 12:6 Herodes, kashin jiiktajai ashí aentsú emtin, dutikan chichaman dekajuatjai tiu ai nu kashik, Pedrok jimag suntag ejapeam, cadenayai jigkaam kanak tepau, nuniai tikich suntag aidauk waitin kuitamainak ijunaidau.
ACT 12:7 Nuninai makichik Apu Apajuí angelji wantinkau, nunitai carcelak tsawan wajasui; nuniak Pedron bijagnum antig ishintaju, dutika: “Wamak nantaktá”, tiu. Nuniaig cadena Pedro uwejin jigkamuk kakekau;
ACT 12:8 nunikmatai ángel chichajak: “Jaanchjum nugkujam akachumam, sapatjumesh shiig jigkagtá”, tiuwai. Tama dutiksag umikú, nunikmatai ángel chichajak: “Jaanchjum nugkugtá, nunikam wi weakui pataetugkata”, tiuwai.
ACT 12:9 Tama Pedroshkam pataetuk jiinkiu, tujash dekaskeash ángel tawa dusha junia tusa dekachiatak, wagki nigka kajanum waintsujash tau.
ACT 12:10 Tujash dekatkauwa nuna, nuigtú jimaja juna kuitamunash nagkaikiag, waiti jijui epenbau yaakat jiina nui jegantaju; nuniaig dushakam nigki ujaniu, nunikmatai jiinkiag makichik jintá nagkaikiaju, nunik angelak weak niinak ukukiuwai.
ACT 12:11 Dutikam Pedro nigki anentaimas: “Dekaskenum Herodes jutija junak mantuata tau asamtaimpap agkanmitkajuatatus Apu Apajuí angeljin awetugni, ashí judío aidau dakajuina dui, tau”.
ACT 12:12 Nuna aatus dekaa idaiyak, Juan Marcos tuuta awagmatia nuna dukují María jeen jegau, nui kuashat ijunag Apajuin aujuinak batsatbaunum.
ACT 12:13 Nunik agaa wajas waitin ijutai makichik nuwauch inatai Rode daagtin yakita tus diistatus jegantú;
ACT 12:14 nunik Pedro chichamen antujuk shiig aneas ujatsuk tupikaki wakitki wayá Pedro tanta waitinum wajawai, tau.
ACT 12:15 Tutai dita aiinak: ¡Imanjachumek!, tuidau. Tujash nigka dekas tajai tutaishkam, dita aiinak: Ni amaitsui angelji amainai, tuidau.
ACT 12:16 Nuna tuinai ataktushkam Pedro waitin ijuau, nunitai waitin ujakmá wainkag puyatkajui.
ACT 12:17 Nuniagtai uwejin takuinu bitat asatnume tusa, nunik Apu Jesús wajuk carcelnumian jiikne nuna pachis ujakaju, dutika: —Atum Santiago, tikich yatsut aidaushkam ujaktajum, tusa ukuak jiinki yajá weuwai.
ACT 12:18 Tsawagmatai, suntag aidauk ditak pampandayidau Pedrosh wajukamki tusag.
ACT 12:19 Nunikmatai egaktajum tusa Herodes ishiakui, dutikamash wainkachagmatai kuitamkaju aina nunak kajegtajum tiajam kajegkajui, nuna dutika Herodes Judeanak ukuak Cesarea weuwai nui pujustatus.
ACT 12:20 Herodes tironmaya aidaujai, nuigtú sidognumia aina nuna senchi kajegkauwai; tujash ditak chichama umikaju niijai chicham apakmí tusag, nunikag Blasto kumpamawaju rey Herodesjai takau asamtai, nunikag: “Ame chicham epegkami tuinawai tusam tukagtita”, tiajui, Herodes inabaujinian yutain sumaidau asag.
ACT 12:21 Tiagmatai Herodes tsawantan mamikiau asa, jaanch dekas pegkeg rey nugkutaijin nugkug iwagmamag, chicham dekatasa ekeemtainum ekeemas nagkama chichau;
ACT 12:22 nunitai aents aidauk senchi untsumkag: “¡Shiig aentschauwai, Apajuí chichau wajawai!” awajuidau.
ACT 12:23 Nuna imatjuinai, Apu Apajuí angelji jatan susauwai, Apajuin emematchau asamtai; dutikam Herodesak aka amukam jakauwai.
ACT 12:24 Tujash Apajuí chichamega nunak aan nagkaemasag ashí yantamnum etsejuidau.
ACT 12:25 Bernabeshkam Saulojai dita takaamujinak ashimak, Jerusalén waketuinak Juan, tikich daaji Marcos tutaiya nuna jukiajui.
ACT 13:1 Iglesia aidau Antioquía, profeta nuigtú maestro aidau; Bernabé, Simón (Shuwin tutai), Lucio cirenenmaya; Manaén (Herodes Tetrarcajai ijunag tsakajua nu) nuigtú Saulo aina ju batsatu.
ACT 13:2 28 Makichik tsawantai Apu Apajuin emematuinak nuigtú ayuno takainak batsatai, Wakaní Pegkeji chichaak: “Bernabek Saulojai akaantugkatajum, wi dita takastinun untsukuitag nui takastinme”, tiuwai.
ACT 13:3 Tiajam ayunamun nuigtú Apajuí augbaun inagnakag, buuknum achikag Apajuin aujtus awemajui.
ACT 13:4 Bernabé, Saulojai Wakani Pegkeji awemam weajui Seleucia, nui juaki barconum egkemawag ajuntai Chiprenum weajui.
ACT 13:5 Nui Salamina jegawag, jega judío ijuntaijin Apajuí chichamen etsejuidau. Juan Marcos tutaya nunashkam yaimpakti tima wekaegu.
ACT 13:6 Ashí ajuntai aina nunak yujagsaju, nunikag Pafos jegakmag wainkajui, makichik iwishin judío aents Barjesús daagtin wait profetan;
ACT 13:7 nunú iwishna duka gobernador Sergio Paulo yacha nujai pujau. Nunú gobernador, Bernaben Saulojai untsukú, Apajuí chichamen antuktatus wakegau asa.
ACT 13:8 Nunittaman iwishin, griego chichamaik Elimas tutaya nu, gobernador Sergio utugchatan apujtau dekaskeapi tii, tau asa.
ACT 13:9 Tutai Saulo tikich daaji Pablo tutaya nu; Wakaní Pegkeji ajamu asa shiig emetug diis chichajak:
ACT 13:10 —Amek tikima wait, pegkegchau, iwanchin uchijí, ashí pegkeg aina nuna shiwajiyaitme; ¿Wagka Apu Apajuin chichame pegkeja dusha, pegkegchauwa nuninush chichagme?
ACT 13:11 Yamai Apu Apajuí suwimkan amasmatai, wainmachu wajasam etsash waintsuk dukap tsawan pujustatme, tiu. Nunú tamawaik iwishnushkam wainmachu wajasú, nunik aentsun egau egkegsamtai wekaesatjai tusa.
ACT 13:12 Nu nunikun gobernador wainak dekaskeapi tiu, nunik Apu Jesús pachisa etsegbaunash shiig puyatjus antukui.
ACT 13:13 Pablo ni kumpají aidaujai Pafos jegawaju nunikag barconum chimpimjag Perge shiyakajui, Panfilia nugkanum awa nui; tujash Juagkak ditan ukuinak Jerusalén wakitkiuwai.
ACT 13:14 Nunikmatai ditak Perge ukuinak jegawajui Antioquía Pisidia awa nui; nuniai tsawan ayamtai tsawagmatai jega judío ijuntaijin wayawag ekeemsajui.
ACT 13:15 Nuniai chicham umiktin agagbauwa nuna, profeta agagbau aidaunash ashí aujus ashimkag, jega ijuntaiya nuna apuji chichajuinak: —Yatsug aidauh, atumesh aents aidau anentai ichichtumain ajutjamkujaig chichaktajum, tau.
ACT 13:16 Tama Pabloshkam wajakí, uwejin takuinu bitat asatnume tusa, nunik: —Israel aidauwah, nuigtú judiochu Apajuí puyatjusjum umijin aidautigmeshkam antugtuktajum.
ACT 13:17 Israelan Apajuijiya nu, iina muunji aajakajua nuna etegjauwai, dutikamu asa shiig kuashat yujakajui nuigtush tajimat wajasajui eke Egipto nugkenchau batsatiatak, imanikagmatai Apajuí shiig senchigtina ibau asa jiijui.
ACT 13:18 Dutikam uwegshunum cuarenta mijan tumain yujas pegkegchaun takaagtaish katsunjauwai;
ACT 13:19 dutika Canaán nugkanum, siete nugkanum ditash chichaku aidau batsamtatman depetuk ii muunji aidaun batsasui.
ACT 13:20 Nu ashí cuatrocientos cincuenta mijan tumain nagkaemakiu ai; “Apajuí juez aidaun adaijauwai, nu dutikamuk profeta Samuel pujujakua imanui jegantui.
ACT 13:21 Nunik pujusmatai, Samuelan segau ainawai iina reyjish ajutjamti, tusag. Tiagtai Apajuí Saulan Cisa uchijin, Benjamín weantun susauwai, dutikam cuarenta mijan inamjauwai.
ACT 13:22 Dutikamun idaimitkak Davitan rey ema chichaak: ‘Davitan Isaí uchijin wainkajai ju anentaijui shiig awajtawai ni ashí wi tabaunak dutikattawai’.
ACT 13:23 Nunú David weanta nuiyan ni anagkuauwa dutiksag Apajuí, Jesusan Israel aidaun uwemtijatnun awetiuwai.
ACT 13:24 Tujash Jesús eke jintinkagtutan nagkamtsaig, Juan ashí Israel aidaunak, ‘tudau takat idaikujum yamimagtajum’, tusa etsejú wekagu.
ACT 13:25 Nuniak Juan jakatnuji tikiju wegau asamtai chichaak: ¿Atumesh minash yayai tusagmea anentaimtugjume? wika atum auchuashit tujutjum duchauwaitjai; tujash mina ukujui makichik minittawai, nunak wika sapajinakesh atitmaitsujai, tiuwai.
ACT 13:26 “Yatsug aidauh Abraham weantu aidauwah, nuigtú atum judiochu Apajuí puyatjusjum umijin ainajum aanutigmin juna chichaman antukag uwemjatnume tusa awetugmaje.
ACT 13:27 Tujash Jerusalén batsamin aidauk, ditá apuji aidaushkam Jesusnak dekachaju ainawai, nuigtú profeta chichamen ashí tsawan ayamtainum aujuinakush dekachajui, nunidau asag Jesusnak mantamnati tiaju ainawai, nuna dutikainak Apajuí nunikti tibauwa nuna umikajui.
ACT 13:28 Ni dutikamujin mantamnamainuk atsujaig Pilaton segajui maati tusag.
ACT 13:29 Nuna ashí ni pachisa agagbauwa nuna umikag, numinmayan akakiag ukusaju ainawai.
ACT 13:30 Tujash Apajuí jakaunak inankiuwai.
ACT 13:31 Dutikam kuashat tsawantai wantintukui Galilea nagkamas Jerusalegkash tuke niijai ijunag yujajakú aina nuna. Nunú ainawai yamai niina pachis, ashí aents aidaush antuinamunum etsejuina duka.
ACT 13:32 “Nuadui jutiishkam yamajam chicham atuminish etsejuinaji: Apajuí ii muunji aajakajua nuna anagkuauwa nunú;
ACT 13:33 nunak Apajuí yamai, jutii ditá uchijí ainag nui umiké, Jesusan inankiuwa nuadui; Salmo jimaja ju agagbaunum agak: ‘Amek mina uchijuitme tuja witjai amina Apanuk, wi yamai aentsnum akiinati tima akiinau asam’, tibauwa nunisag.
ACT 13:34 Apajuik ni chichame agagbauwa nui etsegkau aajakui, Jesús inankim niina iyashig ukumatainmag kaugchatna nuna pachis, duka: ‘Wi Davitan pegkejan dekaskea nuna anagkuauwaitag nunak aminí umiktatjai’, tawai.
ACT 13:35 Nuadui tikich agagbaunmash: ‘Amek amina inakem Pegkegma nuna iyashí kaugtí tusamek idaisashtatme’, tawai.
ACT 13:36 Dekaskenmag Davitak ni weantu aina nuig Apajuí dutikata tibaunak ashí imatiksag umik jakauwai, nunikmatai niina muunji ukumataijinig ukusam kaujui.
ACT 13:37 Tujash Apajuí Jesusnak inankiuwai dutikamu asa kaugchauwai.
ACT 13:38 Nunin asamtai yatsug aidauh, atumesh dekamain ainagme, tudau tsagkugnamuk Jesusai awai tusa etsejuinag nu; nunin asamtai ditá tudauji aidauk, Moisés chicham umiktá tibauwa nu umiamunmakesh pegkejai tamak asachajui, tujash ashí Jesusai dekaskeapi tabaunum pegkeg ainagme tama asajui.
ACT 13:40 Kuitamamkatajum profeta aidau tibauwa nu atumin uminkai, duka:
ACT 13:41 “ ‘Dushikkagtin aidauwah antuktajum, puyatkatajum, nunikjum megkaejatajum; wagki atum batsamtinaitjum dui makichik takatan iwainaktinaitjai, duka makichik aentskesh ujapainakuish, dekaskeapi tichatin ainagme’ ”.
ACT 13:42 Juna tusa ashimak Pablo ni kumpají aidaujai jega ijuntainmaya jiinjagmatai, judiochu aina nu, tikich tsawan ayamtai atata duishkam ju pachisam aan nagkaemasam ujajatkata, tusag segaidau.
ACT 13:43 Nunú ijunbau ashimnakmatai, kuashat judío aidau, nuigtú judío atajai tumamiu aidaujai Pablon Bernabejai wetai uyunaidau. Nuniagtai, atumek Apajuí wait anenjamja nuig ebetmamjatajum tusag chichajuidau.
ACT 13:44 Tikich tsawan ayamtai jegamtai, ashí yaaktanmaya tumain ijunjajui Apu Apajuí chichame etsegbaun antukagtatus.
ACT 13:45 Tujash judío aidau kuashat aents tuwakajun wainkag senchi kajekag, Pablo tabaunak dakituidau asag pegkegchau chichajuidau.
ACT 13:46 Tuinam Pabloshkam Bernabejai ajankas aikaju: —Dekas dekatkauk atum ainajum nunú Apajuí chichame ujaktajum tibau ainagme. Tujash atumek pujut tuke atina duka dakitau asagmin, yamaik judiochu aina nui wetatji.
ACT 13:47 Wagki jutiinak Apu Jesús chichagtamak: “Aminak judiochu aina nui tsaaptina numamtin atí tusan apusajame, dutikamu asam midau uwemat pachisam ashí nugkanmash etsegkata tusan”, tujamaiji.
ACT 13:48 Nuna antukag, judiochu aidauk shiig aneasajui, nunikag Apu Apajuí chichameg pegkejai tutan nagkamawaju, nuninak ashí pujut nagkanchaun jukitnume tibau aina duka dekaskeapi tiajui.
ACT 13:49 Apu Apajuí chichamega nunashkam ashí nunú nugkanmag dekaawajui.
ACT 13:50 Tujash judío aidau, nuwa Apajuin puyatjus umijin eme anentsá diitai aidaun, nuigtú aishmag chicham antugtai aidaujai akatjajui; dutikam Pablon Bernabejai waitkaidau, dutikawag ditá nugkeenig jiikiag awemajui.
ACT 13:51 Dutikam ditashkam ditá nawen yukukuntu awa nuna, pegajag akaketkaju dakituinamu asag iwaintuinak, dutika ukukiag Iconio weajui.
ACT 13:52 Tujash Jesusa nemajin aidauk, shiig aneasag pujuidau, Wakaní Pegkejish ajamu asag.
ACT 14:1 Pablo Bernabejai Iconio jegawaju, nunikag tuke nunin asag, jega judío aidau ijuntaijin mai wayawaju, nunikag Jesusan pachisag etsejiagtai antukag kuashat judío aidau, judiochu aidaushkam dekaskeapi tusag Jesusan nemagkajui.
ACT 14:2 Tujash judío aidau dekaskeapi tuinatsu nu, judiochu aina nuna pegkegchau anentaiyai akatedau, Jesusa nemajuidaun kajegkatnume tusag.
ACT 14:3 Nuninaig Pablo Bernabejai dukap tsawan nui pujusajui, nunikag ajankas Apu Jesusai kajinas, Apajuí wait anenkagtamun pachis etsejuidau, nuniagtai senchijin suwidau dutikam aents dutikmainchaun iwainagtai chicham etsegbaunash dekaskeapi tuidau.
ACT 14:4 Tujash aents yaaktanmayag kanakajui; ujumak judío aidaujai ijunainai, tikich ujumak apóstol aidaujai ijunaidau.
ACT 14:5 Nunidau asag judío aidau, judiochu aidaujai nuigtú apu aidaujai chichaman umigkaju, waitkasa kayai tukui tukuinakua maami tusag.
ACT 14:6 Nunú tuinamun Pablo Bernabejai dekaawaju, nunikag Licaonia nugkanum yaakat tikijumamtin aidaunum, Listra nuigtú Derbe aina nui jegawaju,
ACT 14:7 nunikag nuwishkam yamajam chichama nuna pachis etsejuidau.
ACT 14:8 Listranum makichik aents tuke wekaechau shutú akiinauwa nunú eketu;
ACT 14:9 Pablo chichagkagtutai antak, nunittaman Pablo esetug diikmá, dekas tsagaumainapitja tabaujin waitkau;
ACT 14:10 dutika senchi jiiká chichajak: —¡Wajaita, nunikam tutupit wajastá! tau. Tamawaik tseke wajakí wekaetan nagkabau.
ACT 14:11 Pablo dutikamun wainkag aents aidauk, Licaonia chichamai senchi untsumkag: —¡Apajuí aidau aentsmaga jutiiní taawaje!
ACT 14:12 Tusag Bernaben chichajuinak: —Juka Apajuí Jupiterai tuidau. Tuja Pablon ni chichagkagtau asamtai: —Juka Apajuí Mercuriowai tuidau.
ACT 14:13 Nunú yaaktanum niniasuk Apajuí Júpiter tutai ememattai jega au, nuna sacerdoteji toro aidaun jukiag nuigtushkam iwagmamak yagkug aidaujai yajuak, kuashat aents aidaujai kaunawaju. Nunikag toron maa apeenak, ememattag tuidau.
ACT 14:14 Nu nuniamun apóstol Pablo, Bernabejai wainkag, jaanchjin tujit ichigkag aents tuwaká ijunbaunmag ditashkam eteena wajan senchi untsumkag:
ACT 14:15 —Muun aidauh, ¿wagka aancha aikagme? Jutiishkam aents atum ainajum annuketji; nunin asaja atum wainkajum aikajum aanú idaikujum, dekas Apajuí iwaku pujuwa nu nayaimpin, nugkan, nayantsan, nuigtú ashí nui ayá nunash najankauwa nu nemagkatajum tusa yamajam chicham etsejuinaji.
ACT 14:16 Yaunchuk tsawan aajakua duik, Apajuik ashí aentsnak dita wakejuinamunak takastinme tusa idaisauwai;
ACT 14:17 dutikauwaitak ni pegkeg takaamujiya nui niish yaita nunak tuké iwainmamkauwai; nigki atumin nayaimpinmayan yumin awetugma dushakam ajakash shiig nejektí tusa, nunikmatai shiig yuawag ditá anentainish shiig aneastinme tusa.
ACT 14:18 Tusá ujainamash, aents aidauk nunú toro maa apeaku dita ememattanak kakajus idaimainchau dekapedau.
ACT 14:19 Nuninai ujumak judío aidau, antioquianmaya nuigtú iconionmaya aidaujai kaunawag, aents aidaunak anentain yapagtuawaju, dutikawajam Pablonak kayai tukui tukuinakua, maajistai tusag japikí jukiag yaaktanum jiikiag aipkiajui.
ACT 14:20 Tujash Jesusa nemajin aidau ijunag Pablo tentea batsamtai niishkam nantakiu, nunik ataktú yaakat wayau; nunik kashinia dui Bernabejai jiinkiag Derbe weajui.
ACT 14:21 Nunik nunú yaaktanum yamajam chichama nuna etsejiagtai, kuashat aents Jesusan nemagkagmatai ukuinak, Listra, Iconio, Antioquía aina nuní waketjajui.
ACT 14:22 Nui jegawag Jesusa nemajuidaun chichajuinak: —Atumek dekaskeapi tiuwaitjum nuig emetmamatajum, Apajuí inamtaijin wayata takuik, kuashat waitiamuk inagkemainai, tiaju.
ACT 14:23 Nunikag makí makichik yaakat aidaunum iglesia aidau batsatun anciano aidaun adaitujag, ayunawag Apu Apajuin aujtusag niiní dekaskeapita tiu aidaunak niina idaitusajui.
ACT 14:24 Nuna dutikawag ukuinak Pisidia nugkan nagkaikiag Panfilia jegawajui.
ACT 14:25 Nunikag Perge chichaman etsegkag ukuinak, Atalía akaikiajui.
ACT 14:26 Nui egkemjag Antioquía weajui, nunú yaakta nui Apajuí anenkajin kuitamsam takastinme tusa idaisam, takasaju asag.
ACT 14:27 Nunik Antioquía jegawag, ashí iglesia aidaun ijumag, Apajuí dita takainamunum shiig kuashat yaigkagbaun pachis ujakaju, judiochu aidaush wajuk Apajuin dekaskeapi tiaje nunashkam.
ACT 14:28 Nunikag Pablo Bernabejai kuashat tsawantai nuig Jesusa nemajin aidaujai ijunag batsamsajui.
ACT 15:1 Nunú tsawantai ujumak Judeanmaya aidau Antioquía jegawag, Jesusa nemajin aidaun jintintuinak: “Atumek Moisés chicham umiktinun agajua nui, pakamaktajum tibauwa nu umiachkugmek uwemain ainatsjume”, tuidau.
ACT 15:2 Tabaun Pablo Bernabejai antukag, ditajai senchi pampandaijag kajegdaikaju. Nunikag, Pablo Bernabejai nuigtú tikich aidau ujumak Jesusa nemajin aidaujai Jerusalén wetinme, nunikag apóstol aina nujai nuigtú anciano batsata nujai nuna pachisag chichastinme tiaju.
ACT 15:3 Iglesia antioquianmaya awemajam, Fenicia nugkanum nuigtú Samarianmash nagkaemainak wajuk judiochu aidau duik umitaijin idaisaje Apajuin nemagkagtatus. Nuna etsejiagtai ashí Jesusa nemajin aidau antukag shiig aneedau.
ACT 15:4 Jerusalén jegawagmatai shiig anentus jukiaju iglesia aidau, apóstol aidaush nuigtú anciano aidaushkam, dutikawajam ditashkam ashí Apajuí ditai dutikawaja nunak ujakaju.
ACT 15:5 Tujash ujumak secta fariseo aina nuiya, Jesusan dekaskeapi tiaju aidau wajainiag chichainak: —Judiochu aidau Jesusa nemajuina dushakam pakamaktinme, nuninak Moisés chicham umiktajum tibauwa nunash umiktinme tumainai, tuidau.
ACT 15:6 Tiagtai apóstol aidau nuigtú anciano aidaujai ijunjaju shiig dekawagtatus.
ACT 15:7 Kuashat nuna pachis chichai chichainakua Pedro wajakí chichaak: —Yatsug aidauh, atumek dekagme yama nagkabaunum, Apajuí atum ainajum anuiyatigmin mina etegtuauwa duka, wi yamajam chichaman etsegtai judiochu aidaush antukag Jesusan dekaskeapi titinme tusa.
ACT 15:8 Apajuí aentsú anentainash waina nunú, ditanash iwaintukui ni anea nuna, dutikak Wakaní Pegkejinash susajui jutiin utugtamkauwa dutiksag;
ACT 15:9 jutii ainag nujaig ditanak tikich aentsua nuninuk diigmaschauwai, dekaskeapi tabaunum ditá anentainash pegkemtikiajui.
ACT 15:10 Nunin aish, ¿wagka Apajuí ekajmainush, iina muunji aidaukesh umikchaju, jutiikesh umimainchauwa dusha, Jesusa nemajin aidaush umiktinme tajume?
ACT 15:11 Duka nunimaitsui, yamaik jutii Apu Jesús dekaskeapi tabaunum anenjauch uwemainag nunisag ditashkam uwemainawai, tiuwai.
ACT 15:12 Timatai ashí itatjaju, Bernabé, Pablojai tutai antukagtatus, nunikagmatai judiochu aidaunum aents dutikmainchau aidaun Apajuí ditai iwainagbaun etsejuidau.
ACT 15:13 Nu Chichaamun ashimkagmatai Santiago wajakí chichaak: —Yatsug aidauh, minash antugtuktajum.
ACT 15:14 Simón ujapakmaji, Apajuí nagkamas judiochu aidaunash wajuk wait anentug etegjae mina aentsug agtinme tusa.
ACT 15:15 Duka Profeta aidau agagbaunum tawa jujai betekai:
ACT 15:16 “Ju junikmatai Davita jee iyaaja nuna waketjukin ataktú jegamkattajai; tsainka nuna ataktú jegamkan yaunchuk aaya imanuk awasattajai;
ACT 15:17 dutikam tikich aents aidaush Apú egaktinme, nuigtú ashí judiochu aidau mina daag pachisa ujakbau aina dushakam.
ACT 15:18 Aatus Apu Apajuí tawai, yaunchuk nagkamas jujú chichaman dekamtijamauwa nunú”.
ACT 15:19 “Nuadui wika judiochu aidau, Apajuin nemagkaja duka waitkaschagmi tajai;
ACT 15:20 dekas ayatak carta agatmainai, apajuimtai aidau anagkuamu pegkegchau aina duka, pempeaja maamu aina nuna nejeesh, nuigtú kuntinu numpeshkam yuawaigpajum tsanijintash tsanijinawaigpa tiagmi;
ACT 15:21 wagki yaunchuk nagkamas duka awai, Moisés chicham umiktajum tusa agagbauwa nuna etsejuidauk, duka ashí yaaktanum tsawan ayamtai tsawagmatai jega ijuntainum tuke aujtaiyai”, tiuwai.
ACT 15:22 Nuna tutai apóstol aidau, anciano aidaush nuigtú iglesia aidaushkam pegkeg diisajui, nunikag chichasag jutii ainag juiya etegjami dutika Pablo Bernabejai awemami Antioquía, tiaju. Dutikawag Judas, Barsabás tutaiya nuna Silasjai etegkawajui, dita aina nuiya eme anentsá diitai aidaun;
ACT 15:23 dutika ditai juna carta agajag awemajui: “Apóstol aidauti nuigtú anciano aidaujai atumi yatsum aidauti, iina yachí judiochu aidautijum Antioquía, Siria nuigtú Cilicia batsatjum nunú aidautigmin, kumpamjime.
ACT 15:24 Antukmaji ujumak jutii ainag juiya jutii awemachbauwaitak, atumiin taawag anentaimtagmin pachimjutpak ukugmakiaju tabau.
ACT 15:25 Nunikaja ashí ijunja chichasji, jutii ainag juiya ujumak aents etegkami dutika, jutii aneetaiji yatsug Bernabé, Pablojai atumin ijagtamsatatus mininakui awemami tusaja;
ACT 15:26 Bernabé, Pablo aina juka Apu Jesucristo chichamen etsejuidau asag, maata tama ishamainnum yujainakush ditá pujutinak puyatjuinatsui.
ACT 15:27 Nunidau asagmatai Judasan, Silasjai awetajime, dita igkumpawag, ashí ju agajag juna pachisag shiig ujapaktinme tusa.
ACT 15:28 Wakaní Pegkejin shiig awajkae jutiinash aikasag, nunin asamtai makichkish dita umimainchauk utugchatak apujtuschagmi, jujú aina junak dutikatnume taji;
ACT 15:29 apajuimtai aidau anagkuamu maamu aina duka yuwawaigpajum, kuntinu numpe aidaushkam, kuntin pempeaja maamu aina nuna nejeesh, nuigtú tsanijintash tsanijinawaigpajum, tajime. Jujú aidau tupantakjumek pegkeg nuniktatjume; aaja juaktajum”.
ACT 15:30 Ditashkam akatmamag ukuinak Antioquía weajui, nunikag Jesusa nemajin aidaun ijumag cartan susajui;
ACT 15:31 dutikawajam nuna ausag shiig aneasaju anentai ichichtuinamu asag.
ACT 15:32 Judas, Silas aina dushakam profeta asag, yatsut aina nuna kuashat ausaju, dutikam ichichmamjag shiig aneas juakaju.
ACT 15:33 Nui dukap tsawan batsamsag waketiagtai, Jesusa nemajin aidau shiig anentsag akateg awemajui.
ACT 15:34 Tujash Silasak nui juakta tabau shiig awajkam juwakui.
ACT 15:35 Pablok Bernabejai Antioquía juwakajui, kuashat tikich Jesusa nemagkau aidaun jintintak, nuigtú yamajam chicham Apu Jesusdaun etsejak.
ACT 15:36 Ujumak tsawan asag Pablo Bernaben chichajak: —Ataktú wee yatsut aidau ijagsami, ashí yaaktanum Apu Jesusa chichame etsegkabiag nui wajuk batsatainawaki diyaku, tiuwai.
ACT 15:37 Tama Bernabé Juagkan ayatá tau Marcos tutaiya nuna;
ACT 15:38 tujash Pablok Marcos jutanak dakitau, wagki Panfilia ditajai ijunag takaamunum ukukbau asa.
ACT 15:39 Nunitai kuashat jiya jiyanituinakua mai kanakaju. Nunik Bernabek Marcosan juki egkemag Chipre weuwai.
ACT 15:40 Nuniai Pablo Silasan etegkauwai, nunikmatai yatsut aidau, Apu Jesús wait anenjamjati tusa akatjam, nuiya jiinkiajui.
ACT 15:41 Nunikag Sirianum nuigtú Cilicianum iglesia aidaun anentain ichichtukiag nagkaemakiajui.
ACT 16:1 Pablo Derbe jegaa nagkaemaki Listra jegauwai. Nui makichik Jesusa nemajin Timoteo daagtinun wainkauwai, dukujig judío nuwa Jesusa nemajin, tujash apají griego.
ACT 16:2 Yatsut listranmaya, Iconionmaya aidaushkam Timoteo pachisag pegkejan chichajuidau.
ACT 16:3 Tuidau asagmatai Pablo uyuntusti tau asa, pakagtajum tima pakajiajui, judío nui batsamin aidau pegkegchaun anentaimtinum tau asa, apají griegon ashí dekaidau asagmatai.
ACT 16:4 Nunikag ashí yaaktanum nagkaemainak, Jesusa nemajin aidaun, apóstol aidau nuigtú anciano aidau Jerusalén batsata nujai chichaman umikag agagbauwa nuna pachisag ujaidau.
ACT 16:5 Nuniau asamtai iglesia aidaush dekaskeapi tabaujiya nuig ichichmamaidau, nuninak kashí kashinig kawedau.
ACT 16:6 Wakaní Pegkejiya nunú Asia nugkanmag chichamak etsegkaipa tabau asag, Frigia nugkanum nuigtú Galaciaya aatú nagkaemakiajui;
ACT 16:7 nunikag Misia nugkanum jegawag, Bitinia nugkanum wegagtatus anentaimaidau; tujash Jesusa Wakaní wetinme tichauwai.
ACT 16:8 Nunikag Misianak tutupit nagkaikiag Troas jegawajui.
ACT 16:9 Nuanui Pablon Macedonianmaya aents kajanum paan wantintuk chichajak: “Macedonia katigkam jutiish yaijatkata”, taun wainkauwai.
ACT 16:10 Pablo nuna wainkamtai, dekas Macedonia wegagmi tusa umintsabiaji, junak Apajuiyap yamajam chichaman awi etsegkati tujamu asa jutikawa tusaja.
ACT 16:11 Nunikaja Troas egkemjá tutupnik wega weakua ajuntai Samotracia jegaa, kashinia dui Neápolis jegabiaji.
ACT 16:12 Nui pujusá Filipos weamiaji, romanmaya batsamtaiji dekas yaakat iman Macedonia nugkeen awa nuanui, nunika nu yaaktanum machik tsawan pujusbaiji.
ACT 16:13 Nuniamunum tsawan ayamtai tsawagmatai, yaakat jiinki namaká uwet jegawabiaji, judío aidau Apajuí aujtaijig awints awatai tau asaja; nui pekaamsa nuwa aidau ijunjau chicham ujabiaji.
ACT 16:14 Nu aina nuiya nuwa Lidia daagtin, yaakat tiatiranmaya jaanch kapantu nentetkau sujin, Apajuinash emematin ekeemas antú ekeemayi; nunittaman Apu Apajuí anentain antinkabi Pablo etsegbaunash shiig antukti, tusa.
ACT 16:15 Nunik ashí niina patayijai yamimakag: —Atumesh, minash Apu Jesusan dekas umigmain waitkugmek, mina jegajui taajum kanagtajum tusa segapakui, weamiaji nui pujustasa.
ACT 16:16 Nunika, Apajuí aujtainum wegajin, nuwa muntsujut inak wakan dekamin ajamu igkumpaktatus jiintugmakmayi. Nunú dekaamtai apuji aidauk kuashat kuichkin juidau.
ACT 16:17 Nunú, jutiin Pablojai wegajin pataetugmak minis senchi untsumak: —¡Ju aents aina juka Apajuí ashí nagkaekagtasu muunta nuna inake ainawai, nunin asag nuiya uwemta nuna pachis jintinjamatatus minitjamainawai! wajau.
ACT 16:18 Nunak kuashat tsawantai imatú wekaegu, nunitai Pablo kajejuk ayampatua wakanin chichajak: Jesucristo daajin tajame, aanú nuwauch jiinkim ukuktá. Tamawaik wakanchakam jiinki ukukiuwai.
ACT 16:19 Tujash nuna apuji aidau ni dekamamtai kuichik jutaijin nunimainchau wajasmatai, Pablon Silasjai achiká jukiag, plazanum apu aidau eemtin ejegawaju.
ACT 16:20 Dutika juez aidaun chichajuinak: —Jujú aents aina juka judío ainawai, nuninaitak iina yaaktajin taawag dapamkagtuinawai,
ACT 16:21 nuninak ditá pujutin ii romanmaya aidautik machikish dutikmaitsug nuna jintinawai, tuidau.
ACT 16:22 Nuna tiagtai aents aidau Pablon Silasjai pampantug wajatkiagmatai, juez aidau, jaanchjin awitug, numí suwimatajum, tusa inamjau.
ACT 16:23 Timatai senchi suwimawag cárcel egkeawaju, dutikawag achikbau kuitamin aidaun: —Shiig kuitamkatajum, tiajui.
ACT 16:24 Nunú tiajam, achikbau kuitamnushkam juki, carcela initken calabozo egkeawajui, dutikawag naween cepo apujtusag shiig emetug ukukiajui.
ACT 16:25 Tujash aehaet wajasú ai, Pablo Silasjai Apajuin aujuinak, kantamtan kantam wajagtai, tikich achigbau aidauskam antú batsatu.
ACT 16:26 Nuniai pachiachbau shiig senchi uujak, cárcel jegamku ajigbau aidaun senchi umuchiau, nuniaig waamak ashí waiti aidaushkam ujanjau; nunitai ashí achigbau aidau cadenayai jigkakbauk tsujinag kakekajui.
ACT 16:27 Imaniai achikbau kuitamin shintaak diistakamá, carcela waitiji aidauk ujanag atatman wainkau, nunik espadajin ukuini juki maamata tau, achigbau aidauk tupikakiajeapi tusa.
ACT 16:28 Nunitai Pablo senchi untsuká: —Maamawaipa, jutiik ashí betek batsatji, tiuwai.
ACT 16:29 Tutai achikbau kuitamnushkam jii ekemakjum sujustajum tusa segabiu, nunik ishamak kujaukmaikia tupikaki Pablo Silasjai wajamunum jegantá tikishmatjau.
ACT 16:30 Dutika agaa jiikí: —Muun aidauh, ¿wajina wisha dutikmainaitja uwemjatasanush? tusa iniau.
ACT 16:31 Tuinam dita aiinak: —Apu Jesucristo dekaskeapi tita, nuniakum ame, nuigtú amina pataim aidaujai uwemjattame, tiajui.
ACT 16:32 Tusa Apu Apajuí chichamen niina ujaak, ashí niina jeen batsata nunash ujakui.
ACT 16:33 Nunú hora kashia duik juki, achikbaun kuitamnushkam ipujamu aidaun nijatkau; dutikam nuadui yamimakaju ni, nuigtú ashí patayí aidaushkam.
ACT 16:34 Nunik niina jeen juki yutain ajamsau, nunikag ashí niina jeen batsata duka shiig aneasaju, Apajuin dekaskeapi tiaju asag.
ACT 16:35 Kashikmas juez aidau achijatin aidaun, achikbau kuitamnun awetiaju: Anú aents aidauk jiiktajum, timae titajum tusa.
ACT 16:36 Tima achikbaun kuitamin Pablon chichajak: —Juez aidau akupkati tujutiaje; nunin asamtai shiig aneasjum wetajum, tau.
ACT 16:37 Tujash Pablo achijatin aidaun chichajak: —Jutiik romanmaya aents ainajinig shiig chichaman dekagtamtsuk tuwakbaunum asutamawag cárcel egkepawagmae; dutijabau ainayatkush, ¿wagka yamaish uukash jigmakta tuinawa? Duka nunimaitsui, dita taawag jigmaktinme, tuidau.
ACT 16:38 Achijatin aidau juez aidaun timae tusa ujainam, antukag senchi ishamkaju, romanmaya aents ainaji tuidau asagmatai.
ACT 16:39 Nunikag Pablon, Silasjai wejiaju, tsagkugtugtajum, tita tusag. Dutikawag jiikiag: —Juig pujutsuk wetajum, tusag awemaju.
ACT 16:40 Carcelnumia jiinkiag Pablo Silasjai Lidia jeen weaju, nunikag nui yatsut aidaun wainkag anentain ichichtujag ukuinak shiyakajui.
ACT 17:1 Nunik ashinkag Anfípolis, nuigtú Apolonia nagkaikiag Pablo Silasjai Tesalónica jegawaju, jega judío aidau ijuntaijin.
ACT 17:2 Pablok tuke nunin asa, jega ijuntainum wayau, nunik tresa imania tsawan ayamtai aina nui ditajai tudaiyidau Agagbaun pachisag.
ACT 17:3 Dutikak, Cristuk waitkasa maam ataktú nantaktinai tusa agagbauwa nuna pachis ujaak: —Wi Jesusan pachisan ujaajim, nuuwai Cristuk, tiuwai.
ACT 17:4 Nuna tutai wajumchik judío aidau dekaskeapi tiaju, nunikag Pablojai nuigtú Silasjai ijunjaju; nuigtushkam kuashat griego Apajuí emematin aidaush, nuigtú kuashat nuwa puyatjusa diitai aidaushkam, dekaskeapi tiajui.
ACT 17:5 Tujash judío aidauk senchi kajejuidau asag, aents pegkegchau, daki aidaun jintaa yujattaman yajuakaju, nunikag nujai ijunjag aents aidaun dapampaidau; nuninak Jasogka jeen jetekaju, Pablo Silasjai egainak, jukiag aents tuwakbaunum ejegatasag.
ACT 17:6 Tujash nui wainkachag Jasogkan, nuigtú ujumak yatsut aidaujai jukiag yaakta apuji batsatbaunum ejegawag untsumaidau: —Ju aents aina ju, ashí nugkanum wekaegas dapamkagtú wekaenuwe nunú jui tajutjamamtai;
ACT 17:7 Jasón niina jeen apujus pujujui, dutikam dita ashí Roma apuji chicham umiktin aidau umikbauwa nunak dakituinawai, tikich rey Jesús daagtin awai tuidau asag.
ACT 17:8 Nunú tabaun aents aidau, ashí yaakta apuji aidaush antukag, pampaidau.
ACT 17:9 Imatiagtai Jasón, nuigtú tikich aidaujai kuichkin susajui dutikamtai akupkajui.
ACT 17:10 Dutikawajam wamkesag kashi aig yatsut Apajuí nemajin aidau, Pablo Silasjai Berea awemajui, dutikam jegawag judío aidau ijuntaijin weajui.
ACT 17:11 Nuiya aidauk tesalonicanmaya aidaun nagkaegas shiig anentaimaidau, nunin asag wakegas chichamnash antuidau, nuninak kashí kashinig agagbauwa nuna kuitamas aujuinak egaidau, Pablo tawa dusha dekaskeashit tusag dekawagtatus.
ACT 17:12 Nunidau asag kuashat judío aidauk dekaskeapi tiajui, nunisag kuashat griego aidaushkam dekaskeapi tiajui nuwa eme anentsá diitai aidau nuigtú aishmag aidaushkam.
ACT 17:13 Nuniamun judío Tesalonicanmaya aidau, Pablo Berea Apajuí chichamen etsejui tabaun dekaawag shimutkaju, nunikag nuishkam aentsun dapampaidau.
ACT 17:14 Nudiagtai yatsut Jesusa nemajin aidau Pablon; nayants anunjukam wetá tusag awemaju, nuniai Silas Timoteojai Berea juwakajui.
ACT 17:15 Pablo uyunaidauk Atenas ejegawaju, nunikag waketiagtai Pablo, Silasan, Timoteojai waamak jui taatnume, ditajai igkuniktajai, tiuwai.
ACT 17:16 Pablo Atenas, Silasan Timoteojai dakak pujus, kuashat anentain idajtus diyau, ashí yaakta nuanuig imá ditá apajuimtaiji aina duke ayau asamtai.
ACT 17:17 Nuniau asamtai jega judío aidau ijuntaijin wayá judío aidaujai tudaiyu, tikich judiochu Apajuin puyatjus emematin aidaujaishkam, dutiksag kashí kashinig plazanum tuwakbaunmash tudaiyu.
ACT 17:18 Nunisag, ujumak filósofo epicúreo aidau nuigtú estoico aidaush Pablojai tudayinau, nuniagtai ujumak aents aidau: —¿Aush wajina pachisaya imá chichawa? tuidau. Tiagtai tikich chichaidau: —Tikich nugkanmaya apajuimtai aidaun yamagman pachis etsejajama, tuidau. Nunak yamajam chichaman Jesusan pachis nuigtú nantakbaujin etseju asamtai, tiajui.
ACT 17:19 Tusag Pablon, Areópago ejegawag iniinak: —¿Ame yamajam jintinkagtam dusha wají pachismea tame nunú dekatasa wakegag dusha tukagtumainkaitam?;
ACT 17:20 wagki wají aidau dekashtai tame dusha wají takumea tame nu dekatasa wakegaji, tuidau.
ACT 17:21 Ashí Atenas batsamin aidauk, nuigtú tikich ikaya kaunkau nui batsamnushkam, tikichnak dutiktsuk ayatak chichaman antuktatus wakegaidau nuninak yamajam aina nunak pachis augmatuidau.
ACT 17:22 Tama Pablo Areópago ejapen wajantá chichaak: Atenasnumia aidauwah, atum apajuimjum duka dekas pujawapi tusajum anentaimtin ainajum nunak wainjime.
ACT 17:23 Atumi apajuijum emematku ijuntaigmin nagkaemaku diikman, altarnum APAJUÍ WAINCHATAI tusa agagbaun wainkamjai; nunú atum wainchayatkujum emematjum nuna wika pachisan etsegjai.
ACT 17:24 Apajuí nugkan najanauwai, nuigtú ashí nui ayá nunashkam, niiyai nayaimpin nugkanash apujig, nunin asa aents ni ememattai atin jegamkamunmag pujuchui;
ACT 17:25 makichik aentskesh niinu atinun takagtusti tusag atsumchauwai; niiyai pujutnash, mayainash nuigtú ashí wají aina nunash sukagtinuk.
ACT 17:26 Tuja makichik aentsua nuiyanak yujak ashí nugkanum batsamsatnume tiuwai. Dutika mamiktujui tsawantan tuja nugka dita batsamsatnunashkam;
ACT 17:27 nunak Apajuik, mina egatkatnume nuninak antintsagkesh dekapsatnume tusa. Tujash dekaskenmag jutiijaig atushtak atsui.
ACT 17:28 Wagki Apajuí takui pujaji, nuniau asa buchituinaji, nunisaik iwaku batsatji; ujumak atumdau poeta aajakajua dushakam: “Jutiik Apajuí uchijí ainaji”, tiajui.
ACT 17:29 Dui Apajuí uchijí aidau asaja oro nuniachkush plata nuniachkush kayakesh aents aidau anentaimsa najanamu aina duka jutsukaitai Apajuik tusaik anentaimtumaitsuji.
ACT 17:30 Nunak aents dekachu asa nuniagtaish, Apajuik pachitsuk idaisauwai, tujash yamaik aents ashí nugkanum batsamin aidaush, tudaujinak idaisatnume, tawai.
ACT 17:31 Wagki Apajuik makichik tsawantan mamikiauwai, nunú tsawan jegatai ashí nugkanmaya aidaun, Cristo Aentsmaga akiinau maamu nantakiuwa nuna, yamaik aents pegkegchau aidau, pegkeg aidaujai etegjam akankam ijumjata titin asa.
ACT 17:32 Tujash nantakbau tabaun antukag tikich aidauk dushikinai, tikich chichainak: —Dekas ju tame duka tikich tsawantin ataktú jutiksaik antukagmi, tiaju.
ACT 17:33 Tiagmatai Pabloshkam ditanak ukukiuwai.
ACT 17:34 Tujash ujumak aents dekaskeapi tiaju, nunikag Pablojai ijunjajui, nuanui pachitkau Dionisio Areópago ijunin, nuigtushkam makichik nuwa Dámaris daagtin, nuigtú tikich aidaushkam.
ACT 18:1 Pablo nuna dutika ukuak, Atenas jiinki Corinto weuwai.
ACT 18:2 Nui jegakmá, Pontonmaya Aquila daagtinun nuwe Priscilajai wainkau italianmaya taa ujumak tsawan pujuttaman apu Claudio ashí judío Roma batsata duka jiinjatnume tibau asa. Pablo nuna diyak wejiuwai;
ACT 18:3 nunik jegakmá, jegamkatnun duwapen apijin asagmatai niishkam nu takatnak takau asa ditajai juwakui ijunag takasagtatus.
ACT 18:4 Ashí tsawan ayamtai tsawautaik, jega ijuntainum jegaa, judío aidaun, griego aidaunash tuke ausagké au dekaskeapi titinme tusa.
ACT 18:5 Silas Timoteojai Macedonia pujau taawagmatai, Pablok imá chicham etsegbauwa nunak takau, dutikak judío aidaunash Jesusak Cristuwai tusa ujaidau.
ACT 18:6 Tujash judío aidau dakituinak pegkegchau chichajuinam, Pablo niina jaanchjin pegajá wajantá chichaak: —Atumek bakumajum megkaekatin ainagme, wika atuminig agkantaitjai yamai nagkamsanuk judiochu aidaunum wetatjai, tiuwai.
ACT 18:7 Tusa jega ijuntainmaya jiinkiu, nunik Ticio Justo Apajuin emematin jega ijuntainum ayaumas pujau asamtai nuna jeen weuwai.
ACT 18:8 Tujash Crispo, jega ijuntaiya nuna apuji ashí niina patayijai Apu Jesusan dekaskeapi tusag nemagkaju. Tikich corintionmaya aidaush chicham etsegbaun antukag kuashat dekaskeapi tiaju, nunikag yamimakajui.
ACT 18:9 Nuniku ai Apu Jesús Pablon kashi paan wantintuk chichajak: “Sapigmakaipa, chichagkagtukta itatkaipa;
ACT 18:10 wagki wi amijaig ajai, makichkish pegkegchau awajtamkatasag achigmamainchau ainawai, ju yaakta jui mina aentsug aidauk kuashat ajutui”, tiuwai.
ACT 18:11 Nu tima Pablo makichik mijan nuigtú jimaituk Corinto pujusui, nuiya aents aidaun Apajuí chichamen jintintak.
ACT 18:12 Nunú tsawantin Galión Acayanum gobernador wajas pujau asamtai, judío aidau ijunjag chichaman umikag Pablo jukiag, chicham dekatainum ejegawaju,
ACT 18:13 dutikawag: —Ju aentsua ju ashí aents aidaun Apajuiya duke ememattajum tawai, iinu chicham umiktina nuig nuniktajum tabauk atsaig.
ACT 18:14 Tiagtai Pablo nagkama chichaktag taig, Galión judío aidaun chichajak: —Ju aents pegkegchau takasbau, nuniachkush magkagtuamukesh pachisjum takugminig judío aidautijum tajum nunak antugmainaitjime;
ACT 18:15 tujash ayatak chichama duke, aentsú daaji pachisjum, nuigtú atumin chicham umitaigmea duke pachisa tau asajum; atumek juka iwajatajum, wagki wika aanú aina nuig juez amaitsujai.
ACT 18:16 Tusa chicham epegkeaku ijuntainmayan agaa jiijú.
ACT 18:17 Dutikawajam ashí aents aidauk jiinjag Sóstenes jega ijuntain apujiya nuna achikag, chicham epegtaiya nuig suwimaidau, tujash Galiogkak nunak pachikchau.
ACT 18:18 Pablo Corinto kuashat tsawan pujus yatsut aidaun akateg ukuak, Aquila Priscila aatus Siria nugkanum ashinkauwai, nunik Cencrea jegaa barconum egkemtsuk, Pablo buuken kesajui, Apajuin nuniktajai tiuwa nuna umiak.
ACT 18:19 Nunik Pablo Éfeso jegaa, Priscilanak Aquilajai nui ukukiuwai, nunik jega ijuntainum waya judío aidaujai Jesusan pachis tudaiyu.
ACT 18:20 Nunikmatai: —Dukap tsawan jutiijai pujusam wetá, tusa segaidau, tujash nigka ayú tichauwai;
ACT 18:21 nunik ditá akateg ukuak: —Apajuí wakegakuig ataktú wakettsanuk taattajai, tusa barconum egkemag, Éfeso ukuak weuwai.
ACT 18:22 Cesarea anumak Jerusalén weu, iglesia aidaun kumpamatatus; nunik Antioquía weuwai.
ACT 18:23 Nui dukap tsawan pujus ataktú jiinkiu, makí makichik nugka aidaunum Galacianum, Frigianmash ashí Jesusa nemajin aidaun anentain ichichtugtatus.
ACT 18:24 Nunú tsawantin makichik judío Apolo daagtin, Alejandrianmaya Éfeso jegauwai. Nunú aentsuk Apajuí chichamenash agagbaunashkam shiig dekau aajakui iman asa shiig antumainun chichau.
ACT 18:25 Nigka, Apu Jesús pachisa jintintuamu asa, wakekegat shiig paan antumainun Jesusan pachisash jintinkagtau, imá Juan Yamijatin jintinkagtuamun dekayatak.
ACT 18:26 Apolo jega ijuntainum ashí antuinamunum chichatai Priscila Aquilajai antujuk, akanak niina jeen jukiag, Apajuí pachis shiig ujakajui.
ACT 18:27 Apolo Acaya wetag tutai, yatsut aidau yaigkaju dutikainak cartan agatjaju nuiya Jesusa nemajin aidau shiig anentus jukitnume tusag. Dutikam Acaya jegaa, Apajuí wait anentsam dekaskeapi tiaju aina nuna kuashat yaigkú;
ACT 18:28 nuniau asa ashí antuinamunum judío aidaunash, agagbauwa nuiyan Jesusak Cristuwai tusa iwaintau.
ACT 19:1 Apolo Corinto pujai, Pablok mujanmanini tsupina Éfeso jegauwai, nunikmá kuashat Jesusa nemajin aidaun wainkauwai;
ACT 19:2 nunik iniak: —¿Atumesh dekaskeapi tiuwaitjum duish Wakaní Pegkejish jukiuk ainajum? tau. Tama dita aiinak: —Atsah, jutiik Wakaní Pegkeji pachisa chichamukesh antuchuitji, tuidau.
ACT 19:3 Tiagtai: —¿Wajiyai yamimajuitjume? Tama dita aimainak: —Juan yamijatujakua nujai, tuidau.
ACT 19:4 Tiagtai Pablo ayaak: —Juagkak ayatak aents aidau tudau takatan idaiyagtai yamijakui, nuniakush mina ukujui minitta nunú dekaskeapi titajum, tiuwai, nunak Jesusan tiuwai.
ACT 19:5 Nunú tabaun antukag Apu Jesusa daajin yamimakajui.
ACT 19:6 Nunikagmatai Pablo ditá buuken achikmatai, Wakaní Pegkeji ditanash egkemtujajui. Dutikawajam tikich chichaman chichaidau, nuninak Apajuí tabaunash etsejuidau.
ACT 19:7 Nunú ashí aina nuiyag doce aishmag tumain aajakajui.
ACT 19:8 Pablok kampatum nantua imajin jega ijuntainmag wesag pujau, nui jegaa ishamkagtutsuk chichaman etseju, nuniak aents aidaunash Apajuí inabaujin pachis aujuidau shiig dekamtikatatus.
ACT 19:9 Tujash ujumak antumtikmainchau aidauk dekaskeapi tuinachu. Nunidau asag ijunjamunum yamajam chichama nuna pegkegchau chichajuidau. Nuniagtai Pablok ditajaig kanakú, nunik Jesusa nemajin aidaun yajuak, Tirano escuelajin utsaa, kashí kashinig jintintu.
ACT 19:10 Aatus jimag mijan takasui, nuniamunum ashí aents Asia nugkanum batsamin aidaush, judío aidaujai, tikich judiochu aidaushkam Apu Jesusa chichame etsegbaun antukajui.
ACT 19:11 Apajuishkam Pablon yayau dutikam kuashat aents dutikmainchau aidaun iwaidau;
ACT 19:12 nuniau asamtai pañuelo aidaun jukiag, nuniachkush jaanchikish Pablo iyashin antigkag aents jaun ejetuidau, dutikam tsagaidau, wakan pegkegchau aidaushkam jiinaidau.
ACT 19:13 Tujash ujumak judío wakan pegkegchaun jiin aidau, Apu Jesusa daajin adaikag jiiktá tuidau; nuninak “Pablo Jesusa etsegta nuna daajin jiinkitajum”, tuidau.
ACT 19:14 Nunak sacerdote aidaun apuji Esceva daagtin judío aentsua nuna uchijí siete aajakajua nu dutikaidau.
ACT 19:15 Tujash wakan pegkegchau ayaak: “Jesusnak wainnujai, nuigtush yaita Pablosh nunak dekajai; tujash atumesh ¿ya ainagme?”
ACT 19:16 Tamawaik, aents wakan pegkegchau egkemtuamua dushakam tupikatki achikag ashí depetkau, dutika senchi suwimainam jegan ukuinak wisú upu upujukim tupikakiaju.
ACT 19:17 Judío aidau, judiochu aidaushkam ashí Éfeso batsatuk antukaju, nunikag ashí ishamkaju, nuninak Apu Jesusa daajin pachisag emematuidau.
ACT 19:18 Nunisag kuashat Jesusan dekaskeapi tiu aidaush kaunawag, ashí antuinamunum dita pegkegchau takataiji aidaun etsegtumaidau.
ACT 19:19 Nunisag kuashat aents magia takajakú aidaushkam, papiijin ikaunmak, ashí wainainamunum apekaju; nuna akikeg cincuenta mil kuichik tumain aajakui.
ACT 19:20 Aatus Apu Jesusa chichameg niina senchijijai, ashí tikich nugkanmash pampag wegau.
ACT 19:21 Nunú nunik nagkaemakiu ai, Pablo macedonianmaya aidaun, nuigtú Acayanmayanash ijagsatjai, nunikan Jerusalén wetajai, tiuwai. Nuigtushkam: —Jerusalén pujusan Roma wemainaitjai, tiuwai.
ACT 19:22 Nuniak jimag niina yain aina nuna Timoteon, Erastojai Macedonia awemauwai, nunik nigka machik tsawan Asia pujustatus juwakui.
ACT 19:23 Nunú tsawantai Yamajam chicham pachisa kuashat pampandayamu asauwai.
ACT 19:24 Wagki Demetrio daagtin, jiju plata tutain takau asa, jega Diana ememattain dakumak najanu, dutikak niijai takaina nujai kuashat kuichkin juidau;
ACT 19:25 nunin asag niijai takau aidaujai, nuigtú tikich ditajai betekmamtuk takau aidaunash ipaa ijunjag chichainak: “Kumpag aidauh, dekagme jujú takainaku kuashat kuichik juu ainag duka;
ACT 19:26 tujash atumesh wainjume, nuigtush antagme jujú Pablo, apajuimtai aidau aents najanamu aina duka apajuichu ainawai tusa, kuashat aents aidaun dekas nuninapi tumamtikui, nunak imá Efesowa juig tatsui, ashí Asia nugkanmash tu wekaewai.
ACT 19:27 Juna jutika juka shiig ishamainai, wagki jutii sujuinag juka megkaemainai, nuigtú jega iina apajuiji Diana dekas imana nu ememattaiya jushakam pachikchamu atatui, nunitai Asia nugka juiya, ashí tikich nugkanmaya aidaush emematin agma nunak dakitug idaisagtatui”.
ACT 19:28 Tiagtai antukag, senchi kajekag untsumainak: “¡Diana efesonmayanua duke dekas imanuk!” wajaidau.
ACT 19:29 Imatuidau asag ashí yaaktanmag shiig dekashmin wajasag pachimdaekaju, nunikag Macedonianmaya jimag aents Pablon uyunaidaun, Gayo, Aristarcojai, achiká japikí jukiag teatro ejegawaju.
ACT 19:30 Dutikawagmatai Pabloshkam nui wayatatus wakegau, aents aidaun ausatatus, tujash Jesusa nemajin aidauk idaisachajui.
ACT 19:31 Asianmaya apu aina nuiya ujumak Pablo kumpají aidau, nigka teatronmag wayawaigka, tusag chichaman akupjukajui.
ACT 19:32 Nunú ijunjaja duka pachimdaekaju, nuninak makí makichik wajiin pachisag senchi untsumaidau, nunidau asagmatai kuashat aents aidauk dekainachu, wajina pachisag ijunjaje nunak.
ACT 19:33 Imadiagtai dita aina nuiya ujumak Alejandro ujakaju wagka aninawa nuna pachis, dutikawag judío aidau shitaki jikiaju ni chichaktí tusag, dutikam Alejandroshkam uwejin takuinu bitat asatnume tusa, judío aidaun ayamjak ashí antuinamunum chichaktatus.
ACT 19:34 Tujash judío asamtai wainkag, ashí untsumkag: “¡Diana efesonmayanua juke dekas imanuk!” wajai wajainakua jimag hora amainun ejesattak weedau.
ACT 19:35 Nudiagtai yaakta secretarioji imatuidaun itatmitkak chichaak: “Efesonmaya muun aidauwah, ashí nugkanmaya dekainawai yaakat Efesowa ju, apajuí Diana dekas imana nu ememattaiya nuna jeenak kuitamkati, ashí niina niimejai betek nayaimpinmaya iyajua nunashkam tibauwa nunak.
ACT 19:36 Dui junak wainkayai tumainchau asagmatai bitat asatajum, waugtukjumek pegkegchauk dutikawaigpajum;
ACT 19:37 wagki jujú aents atum jui itaujum juka, atumi apajuijum ememattai jega nunakesh pegkegchauk ematsui, apajuigminakesh pegkegchauk chichagtsui.
ACT 19:38 Demetrio, niijai takau aina nujai, tikich aidaujai tudaimain ataik, juez aidau batsata nui wegag, makí makichik ditanua nunak tudaimain ainawai.
ACT 19:39 Untsu atum tikich tumain ajutjamainakuig, nunú pachisjumek dekas ijunjamunum tumain ainagme.
ACT 19:40 Yamai nagkaemaki juka puyatjumainnum awai, apu aidau dekawajag chichaman tsuwapau aidau tujabiagtatui, nuninak pampandaijamua nuna pachis inimpainakui juní asae tumainush atsawai”.
ACT 19:41 Nuna tusa aents aidaunak ishiakui.
ACT 20:1 Nunú pampandayamu nagkankamtai, Pablo Jesusa nemajin aidaun untsukaju, dutika anentain ichichtug ditan pagkuk, pujumatajum atak wainiami tusa ukuak Macedonia weuwai.
ACT 20:2 Nui wekaegas ashí Jesusa nemajuidaun ijajus anentain ichichtug ukuak Grecia jegaa;
ACT 20:3 nui kampatum nantu pujusui. “Siria barcanum wetajai tusa uminas pujukmá”, dekauwai judío aidau chicham umigkagbaun, nunik ataktú kukag Macedoniaya atú nagkaemaktajai, tiuwai.
ACT 20:4 Tusa wetai uyuntsajui Sópater Pirro uchijiya nu bereanmaya, Aristarco nuigtú Segundo Tesalonicanmaya; Gayo derbenmaya, nuigtú Timoteo, nuigtú Tíquico, Trófimo Asia nugkanmaya aidau.
ACT 20:5 Ju yatsut aina juka eemkagmayi, nunikag Troas dakagmasagmayi.
ACT 20:6 Tujash jutiik pag levaduragtuchu yuwaku fiestamtaiya nu inagkeaki; filiposnumiati barcanum juaki, cinco tsawan Troas jegaa, nui makichik tumig inagkeakiabiaji.
ACT 20:7 Tumig tsawagmatai ijunjabiaji Jesús jakamu anentaimtusa pag yuwatasa, nuniamunum Pablo kashinia dui jiinkitin asa, Jesusa nemajin aidaun jintí jintintai aehaet wajasabi.
ACT 20:8 Jutiik jega yakí tesamunum kuashat lámpara ekemagbaunum ijunja batsamiaji;
ACT 20:9 nuniamunum makichik datsauch Eutico daagtin, ventananum eketu, Pablo chichá chichakua ematai kají achikam initjau kanag tercer pisonmaya iyawabi; nunikmatai jakaun wainkajabi.
ACT 20:10 Nunikun Pablo akaetuki, uchin patamti pagkuk inankiabi. Dutika chichaak: —Puyatkaigpajum iwaakui, tiabi.
ACT 20:11 Dutika ataktú waka, Jesús mantamnamun anentaimtusag pagkan puug yuwa chichá chichakua tsawampaju, nunik weuwai.
ACT 20:12 Nunitai uchin iwakun jukiag shiig ichichmamjag juwakajui.
ACT 20:13 Jutiik emka barcanum juaki Aso wegabiaji Pablo jukitasa, nigka kukag wetasan wakegajai, tiu asamtai.
ACT 20:14 Nui Aso niijai igkunika niish egkemjamtai Mitilene jegawabiaji;
ACT 20:15 nuiyati jiinki kashinia dui Quío jegawabiaji, nui juwaki kashinia dui Samos anumtainum anumkabiaji. Nunika Trogilio kanaja kashinia dui Mileto jegawabiaji.
ACT 20:16 Nunak Pablok, Éfeso tutupit nagkaemaktatus Asia nugkanum dukap tsawan pujutan dakitau asa nunikui, wamak Jerusalén jegaa niishkam fiesta Pentecostés pachinkata tau asa.
ACT 20:17 Pablo Mileto pujus, anciano aidau efesonmaya iglesian diin aina nuna untsukabi.
ACT 20:18 Tima kaunkamtai chichajak: “Atumek dekagme wi yama nagkamchakun, jui Asia nugkanum taawabiag dui nagkamsan, ashí tsawantin atumjai wajuk pujusmaija duka.
ACT 20:19 Ashí tsawantai atumjai pujusuitjai Apu Jesusan takagkun, emematsuk kuashat negayai; nuigtú Judío aidaushkam kuashat utugchatan itagtuinak waitkajianume.
ACT 20:20 Tujash, wika atumnak pegkegnum yaimpamaina nunak ujatskek idaisachmaijime, nuniakun ashí antuinamunmash, nuigtú atumi jeeminish jintinbaijime.
ACT 20:21 Judío aidaun, judiochu aidaunash tudau takatak idaikujum, Apajuí nemagkujum, Apu Jesuschakam dekaskeapi titajum tusan, ujayajime.
ACT 20:22 Yamaik Wakaní Pegkeji awetau asamtai Jerusalén wegajai, awish wajig nagkaetukit nunash dekatsuk.
ACT 20:23 Untsu Wakaní Pegkeji ashí wi yaaktanum wegag nuig achigmakagtatui nuigtush waittsattame, tusa ujatbaunak dekaujai.
ACT 20:24 Tujash wika nunak puyatjuchujai, mina pujutjunash uyumasnukesh diichujai, wika mina takatjua nuna shiig aneasan ashimkatasan wakegajai, Apu Jesús yamajam chicham Apajuí anentag uwemtikagta nu pachisam etsegkata tujutbauwa nuna.
ACT 20:25 “Yamaik dekas nuniktata nunak dekajai, wi atumiin wekaesan Apajuí inamtaijin pachisan ujayajim nuiyatigmekesh minak awenagmek waitkashtin ainagme.
ACT 20:26 Nuadui yamai titajim tusan wakegajai, wi ashí atum ainajum nui bakumamainuk makichkish atsugtawai;
ACT 20:27 wagki atumnak Apajuí wakegamujiya nunak uugtsuk ashí imatiksanuk ujakuitjim nuadui.
ACT 20:28 Nuadui atumek kuitamamkujum ashí Apajuí iglesiajiya dusha kuitamkatajum. Adeagtajum atumnak Wakaní Pegkejiya nu pastor etamkajui, Apajuí iglesiaji niina Uchijí numpeen sumakua nuna kuitamkatnume tusa.
ACT 20:29 Wagki dekajai, wi wemataig tikich aidau kuntin kajen aina iman tajutjamawag, iglesian emegkaktatus wakeyagtata nunak.
ACT 20:30 Atum ainajum anuiyag ujumak waitan jintinkagtaush agtatui, Jesusa nemajuidaush dekaskeapi tuinak nemagtuktinme tusag.
ACT 20:31 Nuadui aneaku pujustajum; adeagtajum kampatum mijadai kashi tsawaijai, makí makichik atum aidautigminak idaitsuk nuní pujustajum tusan negá negajai chichagmaijim nunú.
ACT 20:32 “Yatsug aidauh, yamaik Apajuiyai idaijime, ni anejatbaunum chichaman sujamsauwa nujai juwaktajum, nu chichamak senchigtinai, iman asa yaimpaktatjume wakannum tsakatnumash, nuigtush ashí ni aentsji pegkemtikbau aidaun anagkuauwa nunash amastatjume.
ACT 20:33 Wika tikichdau kuichik, oro, jaanch aidaunakesh wakeejuk wekaechabiajai.
ACT 20:34 Atumek shiig dekagme wi atsumamunash, nuigtú wijai yujaidau atsubiagtaish jujú uweg aina ju yainkagmayi.
ACT 20:35 Ashí jintinbaijime aaja takaaku atsumaidaush yaimainaitjume, nuigtush adeagtajum Apu Jesús chichaak: ‘Ni juwak shiig anea nuní nagkaemas shiig aneawai tikichin suwa duka’, tiuwa dushakam”.
ACT 20:36 Juna tusa idaiyak Pablo ashí tikich aidaujai tikishmajag, ditajai Apajuin ausajui.
ACT 20:37 Nunikag ashí buutuinak, Pablon pagkukag kugkuyanume.
ACT 20:38 Senchi wake besemag dekapenamuk, ataktú awenagmek waitkashtin ainagme tawa nu aayi, nunikag uyuntsag barcanum ejegawajabi.
ACT 21:1 Nuiyati yatsug aidau ukuinaku barconum chimpimjá, tutupit Cos wegabiaji, nunika kashinia dui Rodas jegaa, nagkaemasaik Pátara jegawabiaji;
ACT 21:2 nunikmá barco Fenicia wegau wainká, nui egkemjá weamiaji.
ACT 21:3 Nunika wesá Chipre ajuntaiji wainka duka menanmanini ukuaku Siria weamiaji, nunika Tiro anumkabiaji barconmayan wajiin jiigta tuinakui.
ACT 21:4 Nui Jesusa nemajin aidau wainkaja makichik tumig ditajai batsamsabiaji; nuniamunum Wakan dekamtikamu asag dita, Pablon Jerusalegkak wemaitsume, tiajabi.
ACT 21:5 Tujash makichik tumig pujusú asaja jiinjá wenajin, Jesusa nemajin aidau nuwejai nuigtú uchijí aidaujai yaaktan ukukiag uyuntamas miniyanume, nunikagmatai nui kaamatkanum tikishmakaja Apajuí ausabiaji.
ACT 21:6 Nunikaja akatdaiyinaku pagku pagkuní nagkanka barconum egkemjin ditashkam jeen waketjajabi.
ACT 21:7 Jutiik Tironmayati juwakiaja Tolemaida jegawabiaji, nunika yatsut aidau kumpamawaja nui makichik tsawan ditajai pujusabiaji.
ACT 21:8 Kashinia dui jiinkiaja Cesarea jegawabiaji, nunika apóstol aidaun yaigtin siete aajakua nuiya Felipe wekaegas chichagkagtina nuna jeen kanajabiaji;
ACT 21:9 nuna nawanji cuatro agkanjam profetisa aidau batsabianume.
ACT 21:10 Nuanuig kuashat tsawan pujajin Judeanmaya profeta Agabo daagtin taawabi,
ACT 21:11 nunik waipaktatus taa Pablo akachumtaijin jukiabi, nunik uwejin nawenishkam jigkamag, chichaak: —Aatus Wakaní Pegkeji tawai: Jutika aents juna akachumna nuna jigkajagtatui Jerusalén judío aidau, dutikawag judiochu aidaunum sujukagtatui, tiabi.
ACT 21:12 Takui nu antukaja jutii, Cesareanmaya aidaujai: Pablo, Jerusalegkak weepa, tiabiaji.
ACT 21:13 Tama Pablo aigmak: —¿Wagka buutkugmesh anentaijuish wake besemjash egketjagme? Wika ayatak jigkagbau atasanuk umintsan wekaetsujai, Apu Jesús takagbaunum chichame etsegbaunum Jerusalén jakatasan wekaejai.
ACT 21:14 Depetmainchau weakui: —Apu Jesús wakegamu atí, tusa idaisabiaji.
ACT 21:15 Nu tusa idaisá pujusá, umintsá Jerusalén ashinkabiaji.
ACT 21:16 Nuniajin cesareanmaya ujumak Jesusa nemajin aidau uyuntamsag, chiprenmaya Mnasón daagtinu jeen ejetamawagmayi, nigka duik nagkamas Jesusa nemajin pujau asamtai, niina jeen kanagtin asajin.
ACT 21:17 Jerusalén jegaa ajin yatsut aidau shiig anenjamsag jujamkiagmayi.
ACT 21:18 Kashinia duwi Pablojai ijunja weamiaji Santiago wainkatasa, nunikmá ashí anciano aidau ijunag batsatbaunum jegawabiaji.
ACT 21:19 Nunika ajin Pablo ditan kumpamá, makí makichik judiochu aidaunum ni takatai Apajuí wajuk yaigke nuna pachis ujayi.
ACT 21:20 Nuna antukag Apajuin emematiagmayi, nunikag Pablon chichajuinak: —Dekaske yatsujuh, amesh wainme shiig kuashtai judío aidau Jesusan dekaskeapi tuina duka; nunú aina duka ashí Moisés chicham umiktajum tibauwa dusha idaitsuk umimainai tuinawai.
ACT 21:21 Tujash amina pachipas ujapakagmaji, ashí judío aidau, judiochu aidaunum batsata nuna jintintak; Moisés chicham umiktajum timawa duka idaisatajum, uchi aishmag akiinkuish pakagmaitsui, iina muunji takajakua dushakam idaisatajum, tawai tusa.
ACT 21:22 ¿Wagka junash tujamainawa? Aents aidauk dekawagtatui ame jui taum nunak.
ACT 21:23 Nunin asamtai ju dutikmainaitme: Jutii ainag jui, cuatro aents aidau Apajuí eemtin dutikatjai tibaujin yamai umiktatus batsatainawai.
ACT 21:24 Nunú yajuakam wetá nunikam ditajai pegkeeta, nunikam ditash akikmatkata buuken kesagtinme; dutikawamin amina pachipas tujabiaja dusha ashí dekawag wainkampap tuinawa, niish dekas Moisés chicham umiktá tibauwa nunash imatiksagkeap umiawa, tujabiagtatui.
ACT 21:25 “Judiochu aidau Jesusan dekaskeapi tusag nemajuina dushakam, ashí apajimtai aidau anagkuamu aina duka yuwawaigpajum, tsanijintash tsanijinawaigpajum, kuntin ayatak pempeaja maamu aina nuna nejeesh, numpeshkam yuwawaigpajum tusa agatjabiaji”, tiaju.
ACT 21:26 Tima Pabloshkam cuatro aentsun yajuak wee, kashinia dui ditajai pegkeniag, jega Apajuí ememattainum wayau, wajutí pegkeamush tsawantash abuekattawa, wajutiya makí makichik ditanu ofrendanash itawagtatua nuna etsegkatatus.
ACT 21:27 Nunik siete tsawantan ejetatak wajai, ujumak judío Asia nugkanmaya aidau Pablo jega Apajuí ememattainum pujamunum taawaju, nunikag ashí aentsun ujakag pampanjag Pablon achikag,
ACT 21:28 untsumkag: “¡Israel aidauwah, yaijatkatajum! Ju aentsua juuwai ashí nugkanum wekaegas jintinkagtak, jutii aidautinash pegkegchau chichagtama wekaega nu, nuniak Moisés chicham umiktinun amasua nunash umikaigpajum taku, nuigtú jega Apajuí ememattaiya nunash pegkegchau chichajui, nuniau asa yamaish jega Apajuí ememattai pegkegma nui griego aidaun utsaa pegkegchau awasae”, wajaidau.
ACT 21:29 Nunak, yaunchuk Trófimo yaakat efesonmayaya nujai Pablo wekaegun wainkajui, nuniku asag jega Apajuí ememattainmash awayachiawash tuidau asag tiajui.
ACT 21:30 Nunitai ashí nu yaaktanmaya aidauk pampaidau, nuninak pisag kaunawag Pablonak achikag jega Apajuí ememattainum wajaun japikí agaa jiyamuik, wamkesag waitinak epetiagmayi.
ACT 21:31 Ayatak maata tiagtai, wamkes romanmaya suntaja comandantejin, ashí aents Jerusalegnumia aidauk senchi maaninawai, tusa ujakajui.
ACT 21:32 Dutikam comandanteshkam ujumak capitán aidaun, nuigtú suntag aidaunash yajuak pisajag aents tuwaká abaunum kaunawagmayi. Nunikmatai comandante suntagjai wainkag Pablo suwibaunak idaisagmayi.
ACT 21:33 Nunikmatai comandante jegantun, Pablon achiká juki jimag cadenayai jigkagtajum tiabi, dutika amesh yaitpa, wají aikaume tusa iniibi.
ACT 21:34 Tujash ujumak aents, tikichi pachisag untsumainai, tikich aidaushkam dutiksag tikichin tuidau, imati pampaidau asamtai shiig dekamainchau dekapeau asa comandante, suntajá batsamtain jukitajum, tiuwai.
ACT 21:35 Tiajam Pablon juki, suntag aidau ditá batsamtain awayatasag, papajá iwakbaunum jegantag yanakiag jukiajui, aents aidau Pablon achiktatus imatikaidau asagmatai.
ACT 21:36 Ashí aents aidauk saegas wesag untsumak: “¡Maatajum!” awajiagmayi.
ACT 21:37 Suntajá batsamtain awayattaku emam, Pablo comandanten iniak: —¿Wisha machik augmaitsujamek? timayi. Tama comandante ayaak: —¿Amesh griegosh dekamek?
ACT 21:38 ¿Amechukaitam egiptonmaya aents yamaipat romanmaya apun shiwagmá, chichaman tsuwapá cuatro mil maanin aidaun yajuak uwegshunum jiijua nu? tau.
ACT 21:39 Tama Pablo ayaak: —Wika judiowaitjai, mina pujutaijuk yaakat muun Tarso, Cilicia nugkanum awa nuiyayaitjai. Wait aneasam ayú tujutta, aents aina juna machik ausatasan wakegajai, timayi.
ACT 21:40 Tutai comandante ayú tima papajá iwakbaunum Pablo wajas uwejin takuiniabi aents tuwak abaunum, dutikam pampamun itatjamtai hebreo chichamai ditan aujak:
ACT 22:1 “Muuntug aidauwah, yatsug aidauh wi ayamjumamainun chichakui antugtuktajum”.
ACT 22:2 Tusa Pablo hebreo chichamai aujuinam antukag nuní nagkaemas bitat asagmayi. Nunikagmatai Pablo chichaak:
ACT 22:3 “Wika judiowaitjai, yaakat Tarso Cilicia nugkanum awa nui akiinauwaitjai, nunikuitkun jui Jerusalén tsakajuitjai, Gamaliel jintinjuauwai iina muunji aajakajua nu chicham umijakbauwa nunak imatiksag. Dutikamu asan, Apajuinash akasmatnaitjai atum yamai wajukeajum nunisnuk.
ACT 22:4 Nuniau asan wika duikik, yamajam chichama juna umiktatus wakegaidaunak egakan maatasanush, aishmag aidaunak nuwá nuwajai achijan cárcel chimpiyajai.
ACT 22:5 Sumo sacerdoteshkam, ashí apu aidaush nunak shiig dekagtuinawai. Dita papí agag sujusajui, Damasco iina yachi judío aidau batsatbaunum jegá nuna inakmas, Jesusa nemajin aidaun egak achijá, jui Jerusalén ikaunmamtai, suwimak susami tusag.
ACT 22:6 “Tujash Damasco jegattakun jintá wegai, etsa tajiastatak wajasú ai, nayaimpinmaya tsaaptin egketkamtai,
ACT 22:7 nugká iyagbaijai. Nunikman makichik chichaman antukbaijai: ‘Saulo, Saulo ¿wagka minash waitkajame?’
ACT 22:8 tujutkui wi iniakun: ‘¿Apu amesh yaitpa?’ tibaijai. Tai ni aijak: ‘Wika Jesús nazaretnumiayaitjai, ame ya ainme nuuwaitjai’.
ACT 22:9 Wijai yujaushkam tsaaptinun wainkag ishamkagmayi, tujash mina aujta nunak chichamnak antukchagmayi.
ACT 22:10 Nuna tujutkui: ‘Apuh, ¿wajukati tusamea wakejutame?’ tusan iniasbaijai. Nuna tai Apu Jesús chichagtak: ‘Nantaktá nunikam wegam antsamek Damasco jegata, awi jegawamin ame dutikmainnak ujapakagtatui’, tujutmayi.
ACT 22:11 Tsaaptina nu wainmachu etimtai, wijai yujaidau egkegsag Damasco ejetiajabi.
ACT 22:12 “Nuanui makichik aents Ananías daagtin, Apajuí puyatjus umijin, Moisés chicham umiktajum tibauwa nunash umin asamtai, ashí judío Damasco batsamin aidauk niina pachisag pegkeg chichagtai pujubi.
ACT 22:13 Nunú tajutua chichagtak: ‘Yatsug Sauloh, yamaik ataktú wainmakta, tujutmayi’, nuna tujutmawaik niimkaman niina wainkabiajai.
ACT 22:14 Nunika ai chichagtak: ‘Iina muunji aajakajua nuna Apajuiji, duik nagkamas wi wakegamunash dekaatin atí tusa etegtamjau asa, yamai Jesús dekas Pegkeja nunash wainak, ni chichamujinash antugkati tusa aikagmaume;
ACT 22:15 dutijabau asamtai ashí aents aidaunmash, ame wainkamu, nuigtú antukbaugmish etsejin atatme tujutmayi.
ACT 22:16 Yamaish, ¿wají dakame? Wajaktá nunikam Apu Jesusa daajin yamimagta, dutikam tudaugminish tsagkugnagta’, tujutmayi.
ACT 22:17 “Nunikan Jerusalén wakitki jegaan, jega Apajuí ememattainum Apajuin aujkun pujusan paan wainkabiajai;
ACT 22:18 nunika ai Apu Jesús chichagtak: ‘Jerusalén pujutsuk waamak jiinkita, juiyag ame mina pachittsam etsegtaish antugtamkachagtatui’, tujutmayi.
ACT 22:19 Tujutkui wi ayaakun: ‘Apu minak ditak, wi jega ijuntainum wekaetusan nuiya aents amina dekaskeapi tujamaidaun achiká cárcel chimpian suwimin aayag nunak;
ACT 22:20 nuigtush Esteban, amina inakem amina pachipas etsegna nuna maatnume tusan chichaman ijutkan, nuna maidaun jaanchjin wiki kuitamjuyag nunash dekagtuinawai’.
ACT 22:21 Tai Apu Jesús chichagtak: ‘Tutsuk wetá, wi aminak atushat tikich nugkanum aents judiochu aidau batsatbaunum awemattajame’, tujutmayi”, tiabi.
ACT 22:22 Pablo tabaun ashí antugkag, senchi pampajag: “Juka aentsuk pujumaitsui mantamnati”, waintak dakitaji wajainak,
ACT 22:23 untsumaidau nuninak jaanchjinak japikí tujit ichigkag wajantag, nugka yukuukuntun atsaaki jukiag yakí nagkimawag wajagtai;
ACT 22:24 comandante atum batsatbaunum Pablo awayajum asutiatajum, dutikam wajuk asamtaig aents aidaush imatjuinawa nuna etsegkati, tusa inamjabi.
ACT 22:25 Dutikawajam Pablonak jigkagbautak asutiata tama, nui capitán wajau asamtai chichajak: —¿Atumesh romanmaya aentsush bakumamainji dekagtsuk asutiatajum tibaukaitjum? timayi.
ACT 22:26 Nunú tama capitán antuk, comandanten jegantun chichajak: —¿Aush aentsush utugkattame? romanmaya aentsui, tiyabi.
ACT 22:27 Tima comandante Pablon jegantun iniak: —¿Dekas ame romanmaya aentskaitam? tau. Tama Pablo ayaak: —Ehé, romanmayayaitjai, tuuyi.
ACT 22:28 Tutai comandante chichaak: —Wi romanmaya aents wetasanuk kuashat kuichkin akikmakuitjai, timayi. Tutai Pablo ayaak: —Tujash wika Roma akinau asan romanmaya aentsuitjai, tuuyi.
ACT 22:29 Nuna timatai Pablon asutiatatus ijunjaushkam ukukiagmayi. Comandanteshkam romanmaya aentsun dekajua ni jigkagtajum tusa inamjau asa senchi sapigmakmayi.
ACT 22:30 Kashinia dui comandante, Pablonash wajinmag judío aidaush imatjuinawa tusa shiig dekajuata tau asa, cadena aidaunak atitjau, dutika sacerdote apuji aidaun, nuigtú tikich apu aidaujai ijunjatnume tusa, ashí ijunjamtai Pablon juki ejega ejapen awaantagmayi.
ACT 23:1 Dutikam Pablo apu ijunjau aidaun shiig esetug diis chichaak: —Yatsug aidauh, wika Apajuí emtinish pegkeg anentaiyai pujusuitjai yamaiya juishkam nunisnuk pujajai.
ACT 23:2 Tutai sumo sacerdote Ananías, aents Pablon adijis ijuna nuna: —Aanú tawa nu weni awatita tusa inajabi.
ACT 23:3 Tutai Pablo ayaak: —¡Aentsun tsanuwah, amina dekas Apajuí awatamtatui! Chicham umiktin tawa dutiksamek dekagtuatasam eketiatkumesh, ¿wagka chicham umiktina nu umitskesh awattá tujutme?
ACT 23:4 Tutai nui pekajuidau Pablon chichajuinak: —¿Aajamesh Apajuí sumo sacerdotejish pegkegchaush chichagkamum? tiajabi.
ACT 23:5 Tama Pablo ayaak: —Yatsug aidauh, wika Sumo Sacerdotenak dekachu asan tajai. Apajuí chichame agagbauwa nuishkam: “Atumin apujum aidauk pegkegchau chichajigpajum”, tawai.
ACT 23:6 Nuna tii Pablo saduceo aidau, nuigtú fariseo aidaushkam pachitjaun wainak senchi jiiká chichaak: —Yatsug aidauh, wika fariseowaitjai, fariseo uchijiyaitjai, nunin asan jakaish nantaktinaitji tau asamtai, nuna dekagtuatatus imatijuinawai, tuuyi.
ACT 23:7 Pablo nuna timatai fariseo aidau, saduceo aidaujai ditak pempeentunikiag tuná tunaiyinakua, kanakajabi.
ACT 23:8 Wagki Saduceo aidauk, nantamuk atsutnai, ángel aidaush atsuinawai, wakan aidaush atsuinawai tuinai, fariseo aidauk ashí nunak awai tinu asag nunikagmayi.
ACT 23:9 Nunikag senchi untsumiagtai, wajumchik maestro chicham umiktinun jintikagtin fariseo weantu aidau, wajakiag chichainak: —Ju aentsuk makichik pegkegchaunakesh takaschae, makichik wakankesh nuniachkush angelkesh ausau amainai, tuidau.
ACT 23:10 Ayatak nuní senchi shiniagtai, comandanteshkam ishabi Pablon maawainum tusa, nuniak suntag aidaun chichaman awetiabi, kaunawag nuiyanak jiiktinme, dutikawag dita batsatbaunum ejegawagti tusa.
ACT 23:11 Dutikam kanittaman, kashi Apu Jesús Pablon wantintuk: “Pabloh, anentaim ichichiagta, Jerusalegka jui mina pachittsam etsegkaum antsamek, romashkam etsegkata”, tiuwai.
ACT 23:12 Kashinia dui, ujumak judío aidau chichaman umikaju Pablo maami tusag, nunú umikchaik iik suimkak jukimi tiaju, nuninak yutash yutsuk, umutash umutsuk batsamsá, Pablo maami tuidau.
ACT 23:13 Nuna tumabiaju aidauk cuarentan nagkaesau aajakajui.
ACT 23:14 Nunú aidau sacerdote apuji aidaun, nuigtú tikich apu aidaun jegajiag chichajuinak: —Jutii aidauti, Pablo maachkuik iik suwimkak jukimi tiagji, nuniau asaja yutash yutsuk batsamsá maami taji tuidau.
ACT 23:15 Yamaik atum aidautijum, apu chichaman epegkin aina nujai comandante segatajum kashin jutii batsatbaunum itata tusajum, shiig kuitamka chicham dekajuami tusa utugmaina dutikajum, jutiik umintsá batsamtatji atumiin eke taachuk maatasa, tuidau.
ACT 23:16 Nu tuinamun Pablo umayin akiinau uchi antuk, suntaja batsamtaijin wayau nunik Pablon ujakabi.
ACT 23:17 Dutikam Pablo capitán aina nuiyan makichik untsuk: —Ju uchi jukim comandante pujamunum ejegata, dutikam ni ujamain awa nuna ujaktí, tiabi.
ACT 23:18 Tima capitán juki, comandante pujamunum ejegau, dutika: —Pablo achikam puja nunú untsujuk, jujú uchi jukim comandante ejetuata, ni ujamain awa nuna ujaktí tujutmae, tau.
ACT 23:19 Tama comandante uchin uwegnum egkes juki niinak akanak: —¿Wají tujutta tame? tusa iniau.
ACT 23:20 Tama ni ayaak: —Judío aidau chichaman umikagmae, nuninak amina pachipasag segatajum Sanedrín kashin Pablo itaata tusajum, shiig kuitamka chicham dekajuami tusa utugmaina dutikajum tujabiagmae;
ACT 23:21 tujash dekaskeap tuinawa tiipa, wagki cuarentan nagkaesau aents uumkag dakainawai, nu aidauk maachkuik iik suwimkak jukimi tuidau asag yutash yutsuk, umutash umutsuk batsamsá maami tiagmae; nunidau asag yamaik uminas aminak dakagmainawai aigmakti tusa, tau.
ACT 23:22 Tima comandante uchin awemak: —Makichik aentskesh ujakaipa mina ujatkaum duka, tiuwai.
ACT 23:23 Nunú ujaká ukukim jimag capitanin untsuká: —Doscientos suntag dawé weagtin aidau, setenta caballonum wegagtin, nuigtú doscientos nagki tinamkam umiktá, yamai kashia juik a las nueve Cesarea wetinme,
ACT 23:24 nuigtushkam makichik caballo shiig umikjum Pablo nui ekenjum iwaaku shiig kuitamkajum gobernador Félix pujamunum ejegatajum, tusa awemak;
ACT 23:25 juna cartan agatug awetiuwai:
ACT 23:26 “Witjai Claudio Lisias, gobernador Félix chichame antugtaiyah, eme anentsan kumpamjame.
ACT 23:27 Judío aidau, ju aentsua juna achikag maata tuidaun dekaan, wi mina suntajujai shimutkan ayamjukjai, romanmaya aentsui tabaun antukan.
ACT 23:28 Wajinmag imatjuinawa tusan dekajuatasan wakegau asan Sanedrín ejegamjai.
ACT 23:29 Nunikman dita chicham umitaiji aina nuna pachisag tuidaun antugkamjai; tujash ni cárcel wemaina nunak, maam amainnakesh dekajuachmajai.
ACT 23:30 Tujash judío aidau maawagtatus chichaman umigkagbaun ujatkagmatai, anui aminí awemajai; dutikakun chichaman tsanumjuina nunash segamjai ame antaminish niina pachisag, wagkag kajejuinawa nunash titinme tusan, dui wainiami”.
ACT 23:31 Suntag aidaushkam dutikatajum tibaunak imatiksajag Pablon caballonum ekeni jukiag, kashi wee weenakua Antípatris jegawaju.
ACT 23:32 Kashinia dui suntag dawé ashina duka, Pablonak caballonum ematnume tusag ditá batsamtain waketjaju.
ACT 23:33 Nunik Cesarea jegawag cartan gobernadoran suwinak, Pablonash ejegawaju.
ACT 23:34 Nuna cartan gobernador aujus, tu nugkanmayayaitpa tusa inias; cilicianmayayaitjai tutai dekajua,
ACT 23:35 chichajak: —Amina tsanumjutpaina nu kaunak chichainakui, dekajuatjame timayi. Tusa achijatin aidaun inagmayi Herodes yaunchuk jega jagamkamu aajakua nui ejega shiig kuitamkatnume tusa.
ACT 24:1 Cinco tsawan nagkaemakiu ai sumo sacerdote Ananías, nuigtú ujumak judío apuji aidaujai, makichik abogado Tértulo daagtinun ayasá Cesarea kaunawajui, gobernadoran emtin Pablon bakumamainun tiagta tusa.
ACT 24:2 Nunik Pablon itaawagmatai Tértulo wajakí Félix antai tsanumjak: —See tajame gobernador, ame inamu asamin agkan batsatainaji, nuigtushkam amina yachagminig kuashat wají iina nugkeenish iwagnaka dui.
ACT 24:3 Ashí nu dutikam duka ashí yantamnum ashí tsawantin juwinag dui apu Felisah see tuinaji.
ACT 24:4 Tujash kuashat tsawantan atankijam tau asan, wait aneasam jutii chichamush machik antugkagtukta tusan segajame.
ACT 24:5 Ju aentsua juka makichik jatai, nunin asa niiyai chichaman tsuwapak datumkagtú wekaega duka, ashí judío aidaunum wekaesash Nazaretnumia sectan chichamjú wekayin.
ACT 24:6 Nuigtushkam jega Apajuí ememattaiya nunashkam tsuwapaktatus nagkamamtai achikmaji, jutii chicham umitaijin tawa dutiksaik dekajuami tusa.
ACT 24:7 Nuniajin comandante Lisias suntajin utsanjama, senchi kakantus jujutjamkibi,
ACT 24:8 dutikak chichaman tsanumjuina nuna aminí wetajum timayi. Nunin asamtai imá ameketme jutii tuinag nu ashí iniasam dekagmainaitam duka.
ACT 24:9 Nuna tutai judío aidau nui ijunushkam: —Ni tawa duka dekaske, tuidau.
ACT 24:10 Tiagmatai gobernador iwijau Pablon chichaktí tusa, dutikam Pablo chichaak: —Dekajai, kuashat mijanai ame ju nugka juig juez wajasam pujam nunak, nunin asamin shiig aneasan wi ayamjumamainun tajai.
ACT 24:11 Ameketme ju shiig chicham dekamainaitam duka, wi Jerusalén Apajuin ememattasan wakabiag duka doce tsawan wegawai;
ACT 24:12 nuig makichik aentsjaigkish, jega Apajuí ememattainmagkesh, ijuntainmagkesh, tikich yaaktanmagkesh dapamkagtujan jiyaniaku wekagaigkesh waitkachagmae.
ACT 24:13 Jujú aents aidau chichaman tsanumjutuinak kaunawaja juka, dekas wi nunikbaugnak aminak nuna nunikme tusagkesh ujapamain ainatsui.
ACT 24:14 Untsu junak etsegjai: Wika mina muuntug aajakajua nuna Apajuijin emematjai, Yamajam Jinta juna, dita secta tuina nuna, wagki wika chicham umiktina nunash, profeta aidau agajajua nunashkam dekaskeapi tau asan.
ACT 24:15 Wishakam dita aidau, Apajuik aents pegkeg aidau, pegkegchau takau aidaunash inanjatnai tuina nunak dakajai.
ACT 24:16 Nuniau asan Apajuí eemtinish, nuigtú aents aidaunmash mina anentaimtajuish pegkeg, wantinkatasan kakanmamjai.
ACT 24:17 “Ujumak mijan tikich nugkanum wekagun, mina nugkajui aents waituidau yaigtinun ofrenda ejegatasan taamjai.
ACT 24:18 Nunikan pegkeenu asan, jega Apajuí ememattainum pujumjai, tujash nuig kuashat aentsuk atsuagmae, nuwig pampandaimainnakesh dutikachmajai.
ACT 24:19 Minak ujumak judío asianmaya aidau tajutuawag waitkagmae. Nunú ainawai amina emtimin mina pegkegchaujush ajutuash nuna tujamain aina duka.
ACT 24:20 Nuniachkush, ju ijuna jujú aidaukesh, Sanedrín ejetuawagmaya duish, wi bakumamainnash waitjukajiawash nuna ujapamain ainawai;
ACT 24:21 untsu ditá eemtin senchi jiikan: ‘Yamai mina jutijajum juka, jakau aidaush nantagtinai taja dui, nu dekagtuatasajum jutijagme’ tusan imá nunak timaijai”.
ACT 24:22 Nuna tutai Félix, duik nagkamas yamajam chicham etsegbaunak shiig dekaa pujau asa, ijunbaunak nuig tsujig idaiyak: Comandante Lisias taamtai, aminunak shiig dekajuatjame, timayi.
ACT 24:23 Dutika capitanin, jukijum kuitamka apusatajum, tujash machik agkan idaisatajum niina kumpají aidaush tajuawag wainkatnume, nuninak yaigtinme, timayi.
ACT 24:24 Ujumak tsawan asa Félix, niina nuwe Drusila judío nuwa nujai tajuau, nunik: —Pablo itaatajum, tima itawajui, dutikam Jesucristua duke dekaskeapi tumainai tusa etsegbaun antuku.
ACT 24:25 Tujash Pablo, pegkeg takatan pachis, iik kuitamamtan, suwimak atinun pachis etsegtai Félix ishamak: —Maake juig atí, wetá tsawan agkan ajutkui ataktú untsuktajame, timayi.
ACT 24:26 Felisak Pablo kuichkin sujustí tau asa, tuke untsuká auju.
ACT 24:27 Duti dutikakua jimag mijan jegamtai Félix jiintai Porcio Festo yapajinauwai. Nuniak judío aidaujai shiig juwakta tau asa Pablonak achikbautak Félix ukukiuwai.
ACT 25:1 Nunik Festo Cesarea jegaa, kampatum tsawan asa Jerusalén weuwai.
ACT 25:2 Nunikmatai sacerdote apuji aidau, nuigtú judío apuji aidaushkam, Pablo pachisag tsanumjuidau.
ACT 25:3 Nuninak wait aneasam Pablo jui Jerusalén awematajum tita tusag segaidau. Nunak ditak jintá dakak maata tuidau asag, tiajui.
ACT 25:4 Tiagtai Festo ayaak: —Pablok Cesarea achikam pujawai, nuniai wi ujumak tsawan pujusan awi wetatjai.
ACT 25:5 Nunitai ujumak atumi apujum aidau wijai minitnume, nunikag awi dita titinme wají pegkegchauna takasé nuna, tau.
ACT 25:6 Nunik Festok Jerusalén ocho tsawan nuniachkush diez tsawan tumain ditajai pujus Cesarea jegaa, kashinia dui chicham dekatainum ekeemsauwai, Pablon niina eemtin itaatnume tusa.
ACT 25:7 Pablo wayamtai, judío aidau Jerusalegnumia kaunkajuk adijis ijunas, kuashat wají pegkegchau aidaun tsanumjuidau nunap dutikae tusaish tumainchaun.
ACT 25:8 Imatjuinam Pablo ni ayamjumaktatus chichaak: —Wika makichik pegkegchaunakesh takaschamjai, judío chicham umiktajum timawa nuna pachisnukesh, jega Apajuí ememattaiya nunakesh, Roma apujinakesh pegkegchauk chichagkachmajai, timayi.
ACT 25:9 Tujash Festo judío aidaujai shiig juwaktag tau asa, Pablon iniak: —¿Jerusalén wetasamesh wakegatsmek? Awi chichaman dekajuatjame, tau.
ACT 25:10 Tama Pablo ayaak: —Wika Roma apuji chicham inagnataijin pujajai, nuniau asan nuig dekajam amainaitjai. Wika judío aidaunak makichkish pegkegchaunak takagsachmajai, duka amek shiig dekame.
ACT 25:11 Wi mantamnamainun pegkegchau takasuitkunuk jatanak dakitmaitsujai, tujash atsaig mina tsanumjutuina aniaigkik, makichik aentskesh ditaig sujutmain ainatsui. Nunin asan segajame, Roma apujiya nu chichamnak dekagtuati tusan, timayi.
ACT 25:12 Tutai, Festo ditajai takatai aidaujai chichasag, chichajak: —Roma apuji dekagtuati tame nuniau asam, Roma apuji pujamunum wetatme, tiabi.
ACT 25:13 Ujumak tsawan nagkaemakiu ai, rey Agripa, Berenicejai Cesarea jegawaju Feston kumpamawagtatus.
ACT 25:14 Nui jegawag kuashat tsawan batsataidau asag, Festo nunú reyn Pablo pachis ujaak: —Jui makichik aents Pablo daagtin Félix achiká ukukbau pujawai.
ACT 25:15 Jerusalén pujai sacerdote apuji aidau, judío apuji aidaushkam niina pachis dekas mantamnati tita tusag segatiagmayi.
ACT 25:16 Tujutuinakui wi ayaakun, romanmaya aidautik aents chicham tsanumjamua nunú, ya tsanumjuinawa nujai igkumtikam, ayamjumamainjin taigkik mantamnati tuchau ainaji, tibaijai.
ACT 25:17 Tai ditashkam wijai jui taawagmatai, tsawantan megkaetsuk kashinia dui chicham dekatainum ekeemsan, nunú aents itaatajum, tibaijai.
ACT 25:18 Chichaman tsanumjuina dusha pegkegchau takasbaujin tichagtimpash tusa anentaimtamunak tichagmayi.
ACT 25:19 Imá ditá muunji Apajuin umijin aina nunak, tikich Jesús daagtin maamu yamaik nantakiu asa iwaku pujawai tusa Pablo tabaujinak pachisag etsegtiagmayi.
ACT 25:20 Tuina nuna dekamainchau dekapeau asan iniasmaijai, Jerusalén wetasash wakegatsuash, awi dekajuatjai tusan.
ACT 25:21 Tujash Pablo Roma apuji chichamnak dekagtuati tajai, tujutkui, yamaikik untsu junismek pujustá, wi aents ejetamain akui awematjame tusan idaisamjai, tau.
ACT 25:22 Tutai Agripa ayaak: —Wishakam wakegajai ni chichaakui antugkatasan. Tutai Festo ayaak: —Kashin amesh chichaakui antugkata, tau.
ACT 25:23 Kashinia dui, Agripa, Berenicejai shiig iwagmamjag taawaju, suntajan apuji aidau, nuigtú nu yaaktanmaya chichame antugtai aidaujai, nunikag chicham dekatasa ijuntainum utsanawagmayi, nunikmatai Festo chichaak: —Pablo utitajum, tima itawaju.
ACT 25:24 Dutikawagmatai Festo chichaak: —Rey Agripah, ashí muun aidautijum jutiijai jui ijunjaujum nu aidautigmesh diistajum: Juuwai aentsuk, juna ashí judío aidau chichaman apujtusag Jerusalén nagkamas, jui Cesarea taamtaish ayatak mantamnati, tusag segatuinak senchi chichainawai.
ACT 25:25 Tujash wika ni mantamnamainun pegkegchau takasbaujinak waitchau asan, niishkam Roma apujiya nu chichamnak dekagtuati tujutu asamtai, niiní awematjame, timajai.
ACT 25:26 Tujash mina apug Roma puja nunash, niina pachisan juna jutikae tusa agatmainuk atsugtawai; nunin asamtai jui atumiin itaajai, rey Agripah, amina niish iniasti dutikam wajintig nuna antugkan cartanash agatjatjai, tusan.
ACT 25:27 Wagki shiig dekamaitsui, achikbauwa nu awemakuish, juna jutikau asamtai jutikainawai tutsuk dutikamuk, tiabi.
ACT 26:1 Agripa Pablon chichajak: —Ame ayamjumaku chichamainuk agkan ajutjamui, timayi. Tama Pabloshkam uwejin takuinu, nunik ni ayamjumamainun chichaak nagkamau:
ACT 26:2 “Rey Agripah, shiig aneamu ajutui, judío aidau ashí tsanumjutuina nuna yamai amina emtimin ayamjumaktasan chichag dui.
ACT 26:3 Amek judío aidauti dutiktaiji aina duka ashí dekame, nuigtú nuiya pachisa tunaiyin ainag dushakam. Nuniau asamin segajame minash emamkesam antugtukta tusan.
ACT 26:4 “Ashí judío aidauk dekagtuinawai, wi uchuch nagkamsan, datsauch asanush mina pataag aidaujaish, nuigtú Jerusalegkash wajuk pujujakuitja nunak.
ACT 26:5 Ditak minak yaunchuk nagkamas dekajuinawai, nunin asag wakegainakug etsegmain ainawai, wi fariseo asan iinu secta tawa imatiksanuk umijakuitag nuna.
ACT 26:6 Yamai mina tujutuina nunak, Apajuí iina muunji aajakajua nuna anagkuauwa nuna dakag dui, nuna dekagtuatasag jutijuinawai.
ACT 26:7 Nunú anagkagtuamu umintai wainkatag tuidau asag, doce Israela uchijí aajakajua duka, Apajuin emematuinak kashi tsawaijai takajuinawai. Nuna dakag duik rey Agripah, judío aidauk tsanumjutuinawai.
ACT 26:8 ¿Wagka atumesh, Apajuí jakau aidaunash inanmaina dusha dekaskeapi tumainchaush dekapeagme?
ACT 26:9 “Wi anentaimsanuk wajuk dutikmainaitja nunak ashí dutikatjai Jesús nazaretnumiaya nuna daajin pachis chichaina nuna emegkaktasan timaijai;
ACT 26:10 nunak dutiksanuk Jerusalegkash takamiajai. Sacerdote apuji aidau inatjagmatai Jesusan nemajin aidaun kuashat achijan cárcel chimpiyajai, mainakuish chichaman ijuyajai.
ACT 26:11 Kuashtá suwimkan suinakun waitkayajai dekaskeapi tabaun idaimitkastasan; nunak ashí jega ijuntainum dutikiajai, ditanak senchi kajejau asan, tikich nugkanmaya yaakat aidaunum batsatunash aintú wekaeyajai.
ACT 26:12 “Nuna dutikatasan yaakat Damasco webaijai, sacerdote apuji aidau dutikata tusa awetuinakui.
ACT 26:13 Tujash rey Agripah, etsa tajiaju ai jintá wekaman, makichik tsaaptinun nayaimpinmaya etsa etsanbaujin nagkaesaun wainkabiajai, nunú tsaaptina duke ashí wijai minidaujai ijumag egketkabi.
ACT 26:14 Dutijamamtai ashí nugká kakekabiaji. Nuniamunum hebreo chichamai nayaimpinmaya chichagtak: ‘Saulo, Saulo ¿wagka minash waitkajame? Amek baka kajeká jagkin tukumak beseakush dekaptsama numamtuk amek pegkegchau weakum imaniame tujutmayi’.
ACT 26:15 Tujutkui: ‘¿Apuh amesh yaitpa?’ tusan iniai: ‘Wika Jesusaitjai, ame ya waitkame nuuwaitjai, tujutmayi.
ACT 26:16 Tujash nantaktá nunikam wajantá, yamaik mina inakeg ematasan wantintukjame, dutikamu asam ame midau wainkaum nu etsegkata, ataktú iwaintuktatjam dushakam dutiksamek etsegkata.
ACT 26:17 Judío aidau nuigtú judiochu aidau kajegtamainakuish wi ayamjuktatjame, dutikatin asan dita batsatbaunum awemajame,
ACT 26:18 ame wainmitkakta dutikam suwenum batsata nuna tsaaptinun wainkatnume, nuninak Iwanchi inatai batsata nunak ukuinak Apajuin nemagkatnume; nuninak mina dekaskeapi tujutuinak tudau aidaunash tsagkugnagtinme, nunikag Apajuí aentsji pegkejam aina nuninuk atinme’, tujutmayi.
ACT 26:19 “Tujutiu asamtai, rey Agripah, nayaimpinmaya wainkamunak intimjukchabiajai;
ACT 26:20 nunikan dekatkauk Damasco batsata nuiyá etsegkabiajai, nui juakin Jerusalén, nuigtú ashí Judea nugkanmash, judiochu aidaunash tudau takatan idaiyinak Apajuin nemagkatnume, nunikag pegkejan takainak dita yapajinamujinash iwainmamkatnume, tusan.
ACT 26:21 Nuna taja duik judío aidau, jega Apajuí ememattainum pujai achigkag mantuatag tujutiagmae.
ACT 26:22 Tujash Apajuí yaintsamtai yamaikish nuig ebetmamjan pujajai, nuniakun ashí aents imanchau aidaun nuigtú eme anentai aidaunash, yacha aidaunashkam ujasnuké ajai. Profeta aidau nuigtú Moisés nuniktinai tiajua nuna idaikunuk chichachujai
ACT 26:23 Cristuk waitus jakatnai, nunikash ni dekatkau jakaunmayag nantaktinai, nunik tsaaptina nuna pachis judío aidaunum, judiochu aidaunmash etsegkatnai tiuwai”, tuuyi.
ACT 26:24 Nunú aidaun Pablo ayamjumak tutai, Festo senchi chichaká: —¡Pabloh, imaanjaume! Senchi au aujkawam imaanjaume, timayi.
ACT 26:25 Tama Pablo ayaak: —Apu Festoh, chichame antugtayah, imaanjachjai, wi taja duka dekaske, nuigtush anentaimtumainai.
ACT 26:26 Anui rey Agripa eketa dushakam ju wají aidaunak shiig dekawai, nunin asamtai shiig agkan chichajai niina emtin, wagki niish junak ashí dekawai, juka uuká takaschamu asamtai.
ACT 26:27 ¿Rey Agripah, profeta aidau tiajua dusha dekaskeapi tamek? Wika dekajai dekaskeapi tame nunak.
ACT 26:28 Tama Agripa Pablon ayaak: —¿Machik tame duikik, minash Cristo nemagkati tujutam?, timayi.
ACT 26:29 Tutai Pablo: —Wi kuashat tsawan etsegchataish, machik tsawan etsegtaish, Apajuik aminak, nuigtú ashí wi chichaamun antuina junash wi wajukeag juniktinme tujamjume, tujash wi cadenayai jigkajam wajag junitsuk.
ACT 26:30 Juna Pablo timatai, rey wajakiu nuigtú gobernador, Berenice, ashí nui ditajai pekajushkam.
ACT 26:31 Nunik kanakiag chichainak: Ju aentsua juka pegkegchau takasbaujin mantamnamainuk atsujui, carcelash wemaitsui.
ACT 26:32 Tusa Agripa Feston chichajak: —Juka akupmainaitji, Roma apujiya nu chichaman dekagtuati tichauwaitkuig, timayi.
ACT 27:1 Nunikag dekas Italia awemami tujamaidau asag, Pablon nuigtú tikich achigbau aidaun yajuak, makichik capitán Julio daagtin niina suntaji romanmaya apunu tutaiya nuna susabi.
ACT 27:2 Nunikmatai adramitionmaya barco Asia nugkanum anumtai aina nui wetatus uminas tepaunum chimpimjá shimamunum, Aristarco macedonianmaya Tesalónica awa nuiyashkam jutiijai wemayi.
ACT 27:3 Kashinia dui Sidón anumkabiaji; nunika ajin Julio Pablon eme anentus diyau asa, ni kumpají aidaush kautua wainainak yaigtinme tusa idaisabi.
ACT 27:4 Sidón juwaki dase igku umpumpau asamtai, Chipre ajuntaiji anuasa webaiji.
ACT 27:5 Nunika Cilicia, Panfilia aina nuna yantamen ijusa wega weakua, Mira yaakat Licia awa nui jegaabiaji.
ACT 27:6 Nui jegaajin capitán barco Alejandrianmaya Italia wegaun wainak nui chimpipagmayi jui wetajum tusa.
ACT 27:7 Dutijamamtai kuashat tsawantai diipasa wee batsabaiji, nunisa ashintsá senchi takai takainakua Gnido igkuasa jegaa, nui juwaki dase igku umpumpau asamtai, Creta jegabiaji Salmona igkuasa.
ACT 27:8 Nunika wai waitiakua tugkitak anuasa ashí ashinkawa yaakat Lasea tikiju, Anumtai Pegkeg aidau tutainum jegawabiaji.
ACT 27:9 Kuashat tsawan megkaekabiaji, ayuno fiestamtai nagkaemakiu asa nayants wetak ishamain wajau asamtai, nunin asamtai Pablo aents nui chimpijun chichajak:
ACT 27:10 —Muun aidauh, ju ii wegag juka shiig ishamain atin diyajai, nuigtú barcosh ashí wají aidaushkam megkaemainai, tuja jutii aidautish jinakuik jinumainaitji, timayi.
ACT 27:11 Tujash suntag aidaun capitanjiya duka, barcogtina nuna, anunta nujaig antujak, Pablonak antugkachmayi.
ACT 27:12 Nunú anumtaig yumi tepeamtaish pujusá inagkeaumainchau pegkegchau asamtai, kuashat aents aidau Fenice jegasá dekapsagmi, anumtai Cretanum etsá akaetaiya nuní awa nui, awi yumi tepeamtaish inagkeakiagmi, tiagmayi.
ACT 27:13 Surnumia dase diipas dasentu asamtai, dita anentaimsajag wemainapi tusag anclan egkejag Creta tugkitken tikiju wajasá weedau.
ACT 27:14 Nuniai machik asa etsá minitaijiya atú ayaumas, Euroclidón tutai shiig senchi dasentuk minak barcon tukuau;
ACT 27:15 nuniak senchi umpumpak yajá pempempaki etamkui, dase depetka waketmainchau asa, junisaikish wemí, tusa idaisabiaji.
ACT 27:16 Nunika ajin dase jujamkimtai ajuntai yaijuch Cauda tutai ukujin dasen ejatjamkamtai nagkaemaku, bote yaijuch nenaa minamua nu waitkasa barconum pataibiaji.
ACT 27:17 Dutika patai ajin barcon sogayai jigkajagmayi wewe ematatus. Dutikawag Sirte kaamatkajin pataamig tusag ishamaidau asag, jaanch ejagbaunak kuwajag idaisagmayi, ayatak dase umpui emati tusa.
ACT 27:18 Kashinia duishkam daseg senchi dasentu asamtai, barcanum wají chimpiamunak jiig utsaidiagmayi.
ACT 27:19 Kampatum tsawanta jui, barconum wají chimpijunak ditak utsaidiagmayi.
ACT 27:20 Kuashat tsawantai etsash, yaya aidaush waintsuk yujau asaja, daseshkam senchi tukugbau asamtai, jiinjattajiapi tabauk atsugtamayi.
ACT 27:21 Kuashat tsawantai yutsuk yujanu asamtai, Pablo ejapen wajantá chichaak: —Muun aidauh, wi timajim nu antugtukagmin Creta dakasuitkuik, wají aidaush megkaemainchau wajakji.
ACT 27:22 Tujash ichichmamjatajum tajime, makichkish jakashtatjume, imá barcok megkaekattawai.
ACT 27:23 Wagki kashi, wi Apajuinu asan nuigtush niina umijag nuna angelji minai ayaumas wajantá,
ACT 27:24 chichagtak: “Pabloh ishamkaipa, wagki amek Roma apuji pujamunum jegaatasam wegame, nuniau asamin ashí amejai barconum weena junak Apajuí kuitamkattawai tujutmae”.
ACT 27:25 Nuadui muun aidauh ichichmamjatajum, wagki minak Apajuiyai kajintsan anentaibau ajutui, nunin asamtai tujuti duka nunisagkeap uminkattawa tajai.
ACT 27:26 Tujash makichik ajuntainum patamtatji, tuuyi.
ACT 27:27 Nunika jimag tumig inagkeamunum makichik kashi dase mai jujam awajtamkui nayants Adriático nanamsabiaji, nuniajin barconum takau aidau aehaet ai, nugkan tikiju adijun dekapenak,
ACT 27:28 kunajin dekaapa diikmag treinta y seis metros kunají atatman wainkajabi, dutikawag nuní dukapech ekemsag dekapakmag veintisiete metros atatman wainkag,
ACT 27:29 kaya tukuig tusag ishamainak, barca ukujin cuatro ancla atatman nayants utsawajabi, dutikawag, utusag wamak tsawaja tusag Apajuin segayanume.
ACT 27:30 Nuniai barcanum takau aidau, uumak pisajagtatus bote yaig pataimun, barco nujinianas ancla aina nuna ajuinatai tumain ajugkajabi.
ACT 27:31 Nudiagtai Pablo capitanin nuigtú suntag aidaujai chichajak: —Ju aents aidau barconmag juwainachkuig atumek jiinjashtatjume, timayi.
ACT 27:32 Tutai suntag aidau, bote yaigchia nuna anagke aidaun tsupijug nayants ajugkagmayi.
ACT 27:33 Dutikawagmatai tsawamunum Pablo ashí aents aidaun chichajak: —Jimag tumig atumesh yutsuk yujagme wajukatjik tusa dakainaku.
ACT 27:34 Nuniau asagmin tajime, piipichikesh yuwatajum. Duka dekas atsumnawai nu ichichmamsa iwaaku jegatasaja, atum ainajum anuiyag makichkish jakashtatjume.
ACT 27:35 Nuna tusa idaiyak, Pablo pagkan juki, ashí aentsush wainainamunum Apajuin see tii puuká yuwau.
ACT 27:36 Nunitai tikich aidaushkam anentain ichichiajag yuawagmayi.
ACT 27:37 Ashí ijumjamak barconum chimpijutik doscientos setenta y seis aents aajabiaji.
ACT 27:38 Dita yapajamunak shiig yuwawag, trigonak nayants utsagkag, barconak wampu awasajabi.
ACT 27:39 Tsawagmataish barconum takau aidauk nunú nugkapita tusag dekachagmayi; tujash nayants egkeentaunum kaamatak atatman wainkagmayi, nunikag awi anuumkami tiagmayi.
ACT 27:40 Tusag ancla aidau anagke aidaunak tsupijug nayantsanmag idaiyinak, remo aidaun atiawaju, dutikawag jaanchin barca nujiin detuawagmatai, dase umpuakui kaamatak adijkatasa weyaji.
ACT 27:41 Nunikmá chichijam tukuniagbaunum barco kaamatak pataamatai, nujinchig shiig tepea umuchmainchau wajasabi, nuniai ukujinak kupiyi nayants tsukatak senchi tukuau asa.
ACT 27:42 Imanitai suntag aidauk aents achigbau aidaunak kajegta tuyanume, yukuak pisajainum tusa.
ACT 27:43 Tiagtai suntag aidau capitanji Pablon uwemtijatatus wakegau asa, dutiktsuk dekas ya imá senchi yukumnaita nunú niiyá eemak yukuak kukag jiinkitnume,
ACT 27:44 nuninai tikich yukumta dekainatsu duka tapnan barca kupinja nunakesh jukiag patabiag katigtinme, tiabi. Nuna aatus tiu asamtai ashí jinutsuk kukag jiinjabiaji.
ACT 28:1 Nunika jiinjá Malta ajuntaijimpapi tusa dekaawabiaji.
ACT 28:2 Nuwiya aidaush ashí shiig awajtamkajabi, nuninak yumi yutak tsetsek asamtai, jiin ikapajag anamatajum tusa ipapawajabi.
ACT 28:3 Nuniamunum Pablo chigkimin yajuak jiinum pataayi; nuniai nuiya dapi jii sukuam jiinak, uwegnum esainiabi.
ACT 28:4 Dutika Pablon dapi uwegnum esai nemajuaun wainkag nu ajuntainum batsamin aidau pempeentunikiag chichainak: “Juka aentsuk dekas magkagtintsukaitai, nunin asamtaints nayants jakegchamtaish, iina apajuijiya dutsu jakati tusa suwimkan suwak jutikatai”, tuyanume.
ACT 28:5 Tujash Pablok dapin pegajá jiinum jiyawabi, nunikash machikish wajuktsayi.
ACT 28:6 Nunitai uwejinish iyagchatpash, nuniachkush pachiachbau jaka iyagchatpash tusag dakayanume; tujash kuashat dakasag makichkish wajukchatai, “Auk makichik Apajuiyai”, tiajabi.
ACT 28:7 Nunú ajuntaiya nui tikiju, apu eme anentsá diitai Publio daagtinun nugke ajibi, nu niina jeen jujamki kampatum tsawantai shiig anenjamas kuitamjamkabi.
ACT 28:8 Nui Publio apají disentería achikam jaak tsuweak pegaknum tepeyi. Nunittaman Pablo diistatus waintua Apajuin aujus, uwejin antig etsagajabi.
ACT 28:9 Nuna dutikamtai ashí jau ajuntainum batsamin aidaushkam kaunianume, nunikag ditashkam tsagagkajabi.
ACT 28:10 Nunikag eme anenjamsag kuashat yaimpakajabi, nuigtú ii jintá wesá atsumainnash ashí wají aidaunak amasajabi, dutijamawagmatai, nu yajuaka barconum chimpimjá shiakabiaji.
ACT 28:11 Kampatum nantu ajuntainum pujusá inagkeakiaja, Alejandrianmaya barco niishkam nui pujus tsetsek nagkaemakmatai wegaunum egkemjabiaji, nuna nujinchin ditá apajuimtaiji Cástor nuigtú Pólux dakumjuka adujtukbau aayi.
ACT 28:12 Nunika ashí ashinkawa Siracusa anumtainum anumkaja, nui kampatum tsawan pujusabiaji.
ACT 28:13 Nuiyati juwaki anuasa ashí ashinkawa Regio jegawabiaji. Nunika kashinia dui dase surnumia senchi umpumpakui, jimagchik tsawantaik Puteoli jegawabiaji.
ACT 28:14 Nui ujumak Jesusa nemajin aidau wainká ajin, jui jutiijai makichik tumig juaktajum tusa ipapawagmatai juaka; tsawan jegakui Roma jegatasa jiinkiabiaji.
ACT 28:15 Yatsut romanmaya aidauk jutii minamunak dekawag batsatu asag, iina igkumpaktatus wají sujutai Foro tutai Apio awa nui kaunawajabi, nuniai tikich aidauk Kampatum Jega tutaiya nui igkumpakajabi. Nunikmatai Pablo ditan wainak Apajuin see tiabi, nunik ichichmamjabi.
ACT 28:16 Roma jegaa ajin, capitán aents achikbau aina nunak dekas suntajá apujin susa idaiyak, Pablonak niinash akanak makichik suntag kuitamkati tusa apusajabi.
ACT 28:17 Kampatum tsawan nagkaemai, Pablo judío aidau apuji aidaun untsuká ijumag ditajai chichaak: —Yatsug aidauh, wika judío aidaunakesh pegkegchaunak takagsachu aig, iina muunji umitaiji aina nunakesh pegkegchau chichagtsaig Jerusalén achigkag romanmaya aents aidaunum sujutkagmae;
ACT 28:18 dutijuawagmatai kuashat inintsag, wi pegkegchau takasbaunum mantamnamainuk makichkish atsugtau asamtai akupjuktag tujutiagmayi.
ACT 28:19 Tujash judío aidau dakituidau asamtai, Roma apujiya nu chichamnak dekagtuati tibaijai, tujash mina nugkajui pegkegchau takasbaunum tujutuidau asamtai tichabiajai.
ACT 28:20 Nuadui atumnash untsukjime, atumjaish wainiakan chichastasan, jutii Israel aidautik Cristo dakainag nuadui, jutika cadenayai jigkajam wajajai, timayi.
ACT 28:21 Tutai dita chichajuinak: —Jutiik Judeanmaya amina pachipas carta agagbaukesh jukichmaji, makichik yatsutkesh awiya taawajag, amina pegkegchaugmin pachisagkesh ujapakchagmae.
ACT 28:22 Tujash ame wajuk anentaime nu dekatasa wakegaji, wagki jutii dekainag duka ashí tikich nugkanmaya aidaush, ju yamajam sectaya juna dakituinak, kuashat chichainamu antaji, tiagmayi.
ACT 28:23 Makichik tsawantan, Pablojai ijunjami tusa mamikiawaju asag, kuashat kaunawajui jega ni pujamunum, nunikagmatai Pabloshkam kashikmas nagkamas agkujai Apajuí inabauji pachis ujaidau; dutikak Jesusa pachisash etseju shiig antumtikatatus, Moisés chicham umiktinnum tibauwa nui nagkama profeta aidau tiajua nunashkam.
ACT 28:24 Ujumak aents nuna etsegtai dekaskeapi tuinai, tikich dekaskeapi tuinachush aidau.
ACT 28:25 Nunidau asag, Pablo nuna timatai dekaskeapi tuinai tikich dekaskeapi tuinatsu nujai shiig juwamainchau dekapedau, nuninak aents aidauk jiinag shimutan nagkamawaju, nuniagtai Pablo chichaak: —Dekaskenum Wakaní Pegkeji profeta Isaías aajakua nui, atumi muunjum aajakajua nuna chichajak:
ACT 28:26 “Wetá, au aents aina nui, nunikam titá: Antutnak antiagtinai, nuniakush dekashtin ainawai, nuigtush diinakush, wainkashtin ainawai.
ACT 28:27 Wagki ju aents aina juna anentaimtajig antumtikmainchau wajasé; nuigtush, antutaijig epetkamu ainawai, nunisag jii aidaush epetkamu ainawai, dutikachbauwaitkug jiin wainainak, kuwishinish antumain ainawai, nuninak anentainish shiig dekainak tudau takatan idaiyinakuig, wi etsagaumainaitjai”, tiuwai.
ACT 28:28 Nunin asamtai, atumesh dekaatajum, yamai nagkamsag Apajuí uwemtikagta nu pachisa etsegbaunak, judiochu aidau antukagtatui.
ACT 28:29 Nuna timatai, judío aidauk ditak pempeentunikiag pampa pampandayinakua shiyakagmayi.
ACT 28:30 Pablok, nu jega ikamkamua nuig jimag mijan pujusui, nuniak ashí niina wainkatatus minidaunash nui juujakui.
ACT 28:31 Nuniak Apajuí inabaujin etsejak, Apu Jesucristo pachisash aents aidaunak jintinmayi shiig agkan waitkascham pujus.
ROM 1:1 Wika Pablo, Jesucristo inakegaitjai. Apajuí minak Jesucristo pachis yamajam chichama juna etsegkati tusa etegtuauwai;
ROM 1:2 ni anagkagtuamua nuna niinu profeta aajakajua nunú etsegkajui, dutikak agaju ainawai;
ROM 1:3 niina Uchijí iina Apuji Jesucristo David weantu aajakua nuna pachisag;
ROM 1:4 nigka David weantunum Aentsmaga akiinau aajakui, nuninaitak jakau atak nantakmatai Wakan pegkemtikagtina nu Apajuí Uchijí senchigtina nuna iwainakui. Duka Jesucristo iina Apujiya nuuwai.
ROM 1:5 Ni nunikbaunum Apajuí jutiinak wait anenjamag apóstol etamiuwai, Jesusa pachis etsegtukti nunitai, ashí aents aidauk niiní dekaskeapi tuinak niinak umigkatnume tusa.
ROM 1:6 Atumshakam nu aina nuiyag ainagme Apajuí Jesucristunu atí tusa etegjamu asajum;
ROM 1:7 ashí atum Roma, Apajuí aneetaiji pegkejam atinme tusa etegjamu aidautijum batsatjum nuna agatjime: Apajuí iina Apajiya nunú, iina Apuji Jesucristujai wait anenjamag, shiig agkan pujutnum yaimpaktinme.
ROM 1:8 Dekatkauk, Jesucristo yaintsamtai mina Apajuijun see tajai ashí atumin pachisan, atum dekaskeapi tabau ajutjamaina nuna pachis tikich nugkanmash pegkejan chichaidau asagmatai.
ROM 1:9 Apajuí wakejusa takaju asan, niina Uchijin pachisan yamajam chichaman etsegtag nunú dekagtawai, Apajuí aujkun idaitsuk tuke atumin adaisanké ajim nunak;
ROM 1:10 nuniakun Apajuin tuke augjai, niish wakegakug tsawantan sujusmatai atumin tajuan wainkatasan.
ROM 1:11 Wagki senchi wakegajai atumin wainkatasan, nunikan Wakaní Pegkeji don sujusbau ajuta nuna, atum ichichmamja pujumaina nuna jintintuatasan;
ROM 1:12 nunak wi dekaskeapi tabau ajuta duke atumnash ajutjamu asagmatai, pempeentunisaik ichichdaijagmi tusan tajai.
ROM 1:13 Yatsug aidauh, atumesh dekaatajum tusan wakegajai, kuashtá atumiin minitasan anentaimsamjai, tujash yamaikish tuke tujiamu ajutui. Wika, tikich nugkanmaya judiochu aidau Cristo nemagkagmaya nunisag atum ainajum anuiyash Cristo nemagkatnume tusan wakegajai.
ROM 1:14 Wika ashí aents griego aidaush, griegochu aidaush jintintuata tusa awemamu asan, diwimkagtau anentaimaina imaniajai jintinkagtuata tusan.
ROM 1:15 Nuniau asan atum Roma batsatjum nunash yamajam chichama juna Jesucristo pachisan ujaktasan wakeesan pujajai.
ROM 1:16 Wika yamajam chichama ju Jesucristo pachisa etsegtanmag datsamatsjai, wagki ashí aents nuna antukag dekaskeapi tuidaunak Apajuí senchigtina ibau asa uwemtika dui, dekatkauk judío aidauná uwemtikak dui judiochu aidaunashkam uwemtikatin asamtai.
ROM 1:17 Wagki chicham yamagma ju dekamtijamui, Apajuish wajina dutikawa jutiin pegkeja iman diigmastatkush, nunak imá niinig dekaskeapi tabauwa duik dutikawai. Aatus agagbaunmash: “Apajuí pegkejaitme tibauwa nu imá niinak dekaskeapi tawa nu tuke pujutnai”, tawai.
ROM 1:18 Apajuik nayaimpinum pujusag dekamtijamji, ashí aents niina ajantus diitsuk pegkegchau takaidaun kajejuk suwimkan suwa nuna, wagki ditá pegkegchau takatinig tikich aidaush dekaskea nuna dekamainchau dekapedau asagmatai;
ROM 1:19 ditak dekainawai ashí aentstí Apajuinu dekamainaitag nunak, wagki Apajuí najankamua nuna dekaidau asag.
ROM 1:20 Apajuí wainmainchauwa duka dekamainaitji ni takasbauji wainainag nu anentaimtusa diyaku nuigtú nugka yama nagkamchaku najanamu ashí wainainag juajui paan wainnawai, ni dekas Apajuiya nunú nuigtú niina senchijish tuke atina dushakam. Nuadui aents pegkegchau aidauk, wika Apajuinak dekatsamjai tusa ayamjumamainjig atsujuinawai.
ROM 1:21 Apajuinak shiig dekainayatak, niinak eme anentus see tutsuk, ayatak pegkegchaunak ane anentaimainakua dekamainchau wajasajui.
ROM 1:22 Yacha ainaji tumamainayatak, dekachu waigkajui;
ROM 1:23 nuninak Apajuí ajumaish jakashtina nu eme anenmaina nuna idaiyinak, aents jinin aina nuna, chigki, kuntin, dapi aidau niime dakumkamun emematiajui.
ROM 1:24 Nunidau asamtai Apajuishkam pegkegchau aidaun anentaimtuina nunak takastinme tusa idaisajui; dutikawajam tikima datsanmainun pempé pempeentunisag takanidau;
ROM 1:25 nuninak Apajuinu dekaskea nunak idaiyinak waita nuna antujuinak, najankagtina nunú emematmaina nuna; najankamu aidaun emematuidau, imá nigki ajumaish ememattai atí. Aatus atí.
ROM 1:26 Nuniagtai Apajuishkam idaisauwai tikima datsanmainun takastinme tusa. Dutikamu asag, nuwa aidauk aishmagjai pujustinme tibauwa nuna idaiyinak, mai nuwak pempeentunikiag takanijakajui;
ROM 1:27 nunisag aishmag aidaushkam nuwajai pujutan idaiyinak mai aishmagkuk pempeentunikiag takanistasag senchi wakegaidau, nuninak tikima datsantainchau waigkag, mai aishmagkuk pempeentunikiag takanijakajui. Nunidau asag dita pegkegchau takasbaujin suwimkanak egatmamkag ditak waituinawai.
ROM 1:28 Apajuik aents aidau dakituinamu asa, pegkegchau anentaimta nuwi idaisauwai; pegkegchau dutikmainchau aina nunak takastinme tusa.
ROM 1:29 Dutikamu asag ashí pegkegchau aina nunak takainak, pegkegchaunak unuimatkajui, ashí wají ajuttí tusa waugtutan, yajaumaetan, tikichdau pegkeg wakejuka kajegtan, magkagtin, jiyanitan wekaetin, tsanumin, chichama wekaetin,
ROM 1:30 augmatkagtin, Apajuí shiwaji, datsantan chichaaku, eme anenmamin, ni wagaaku chichagmamin, pegkegchaush wajuk takamainaita nuna jintiag anentaimin, apajinash dukujinash chichaman umigchau,
ROM 1:31 anentaimtajish pegkegchau, ni tibaujinash umichu, makichik aentsnakesh shiig anentus diichu, tsagkugkagtuchu, wait anenkagtuchu ainawai.
ROM 1:32 Apajuí aentsun nuninun takaidauk suwimkan juak tuke jakatin atinme tiuwa nunak shiig dekainawai. Tibau aig, ditak pegkegchauwa nunak takainak, tikich pegkegchaun takaagtaish shiig anentus diinawai.
ROM 2:1 Nunin asamtai ameshkam, yaki ainme nunin akumesh, tikich pegkegchau takainawai tusa bakutá takumesh amek bakumame, nunin asa ame ayamjumamainuk atsugtamui; amesh dita pegkegchau takaina nuninuk takau asam.
ROM 2:2 Dekaji aents nuninun takau aidaunak, Apajuí dekas dita pegkegchau takaamujiya dutiksag suwimkan suwa duka.
ROM 2:3 ¿Nunin asamtai ame, tikich nuniawai tusa augmatiatkum, dita takaina nunismek takaam dusha, Apajuik suwimkanak sujuschatnapi tamek?
ROM 2:4 Apajuik ame pegkegchau takataish shiig senchi wait anenjamu asa suwimkan sujamtsuk, tudau takatan idaiyak pujutin yapajiati tusa emamkes dakagma dusha dakitame.
ROM 2:5 Tujash ame antushtaigmin, tudau takat idaikum pujutjum yapajishtaigmin suwimak aminu atinuk ikauntumame, tsawan jegatai Apajuí kajeká, aents takasbaujiya dutiksag suwimkan susatna nui aminush atina nu.
ROM 2:6 Apajuik, makí makichik aents wajuk takasaje, nuna diijus dutiksag susatnai.
ROM 2:7 Pujut tuke atina nunak, ya aidauwa Apajuí imana nuna egak, eme anentsá diyam, jachau amig tusag pegkegnak takainak kakanmamsaje nuna susatnai;
ROM 2:8 tujash aents nigki anenmamin aidaunak, Apajuí kajejuk suwimkan susatnai, dekaskea nuna dakituinak pegkegchaun takaa batsatu asagmatai.
ROM 2:9 Ashí aents pegkegchau takatnak batsamtauk waittsagtinai, nuninak senchi anentaimak waittsagtin ainawai; dekatkauk judío aidau pegkegchau takaidauwá nunikagmatai, dui judiochu aidaushkam nunikagtinai.
ROM 2:10 Untsu ashí aents pegkejan takasú aidaunak, Apajuishkam shiig anentus ni pegkeja imanuk emaktinai nuigtush shiig agkan pujamu atina nunash susatnai; dekatkauk judío aidauná dutika, judiochu aidaunash dutikatnai;
ROM 2:11 wagki Apajuik jushá aentsui, aushá awai tuchauwai.
ROM 2:12 Wagki ashí aents chicham umiktinun Moisés agajua nunú atsugbau batsamas tudau takasú aidaush suimkanak jukiagtinai. Chicham umiktina nunú ajamaitak tudau takasú aidaushkam, chicham umiktinnum tawa dutiksag suwimkanak jukiagtinai,
ROM 2:13 wagki chicham umiktina nuna aents dekau asamtai Apajuik pegkeg takauwaitme tatsui; aents chichaman umiina nuna Apajuik pegkeg takauwaitme tawai.
ROM 2:14 Judiochu aina duka, chicham umiktin atsugmaitak tuke nunin asag, dita dutikaina duwi chicham umiktinnum tawa nuiyan takainawai, nuninak iwainmamainawai dutikmainchaunash, dutikmainnash dekaina nuna;
ROM 2:15 nuninak chicham umiktin ditá anentaimtajin ajuina nuna iwainainawai. Juka pegkegchauwapi, juwap dekas pegkejaita tusag anentaimaina nunash iwainawai, nunin asa ditá anentaimtajiya duke bakumainai nuniachkush ayamjumainai;
ROM 2:16 aatus nagkaemaktinai tsawan jegamtai Apajuí niina Uchijí Jesucristun, aents aidau ashí takasbauji nuigtú tikichish dekachbaunum anentaimsamujish diigsam, dita takasbaujiya dutiksamek susata titinai tusan, wi yamajam chichaman Jesucristo pachisan etsegnuweg nunisag.
ROM 2:17 Atum ainajum anuiya ujumak aidautijum, jutiik judiowaitji Moisés chicham umiktinnash sujamsauwai, nuadui Apajuijaish shiig ijutkaji tusajum emebautigmesh ainagme.
ROM 2:18 Atumek Apajuí wakegamua dusha dekagme, chicham umiktina nu pegkeg aina duke etegja takatan dekamtijamu asamtai.
ROM 2:19 Atum anentaimsagmek aents wainmachu egkesá emamaina numamtuk awajkagtin ainaji tajume. Nuigtush Apajuí dekachu aidaush Apajuin dekaatnume tusa yain ainaji tajume.
ROM 2:20 Nuigtushkam dekachu aidaush jintintin ainaji, nuniaku chicham umiktin ajutjamu asamtai Apajuí chichamen imaanis dekainachush unuidau ainaji wajuk shiijash pujumainaita dushakam, jutiik dekaskea dusha shiig dekainaji tajume.
ROM 2:21 Atum aaja tikich jintintin ainayatkugmesh ¿wagka atumek jintinmamtsugme? Atum kasamchatia tusa etsejiatkugmesh, ¿wagka kasamjume?
ROM 2:22 Atum tsanijinchatia tayatkugmesh ¿wagka tsanijinjume? Atum apajuimtai dakumkamu dakitayatkugmesh, ¿wagka jega nunú dakumkamu ememattainum wayagmesh kasamjume?
ROM 2:23 Atumek chicham umiktin ajutjamaina dui ememagme, nuniayatkujum nuiya umiachu asajum Apajuik eme anentsá diyatsjume.
ROM 2:24 Yaunchkesh aaja agagbauwai: “Atum pegkegchau takatigmin judiochu aidau, Apajuin pegkegchau chichajuinawai”, tusa.
ROM 2:25 Duka dekaske, judío asaja pakamainag duka pegkejai, tujash chicham umiktinnum tawa nu ashí umiinaku aaninakuik pegkeg amainaitji. Tuja pakamaku akugmesh chicham umiachkugmek pakamakchau aina nujai betekak ainagme.
ROM 2:26 Tuja pakamakchauwa nunú, chicham umiktinnum tibauwa nuna umiagtaik pakamakua iman Apajuik diyawai.
ROM 2:27 Pakamakchau akush, chicham umiktina nuiyan umiakug atumin bakugmagtin ainawai, atum chicham umiktinush ajutjamaig nuigtush pakamaku ainayatkujum chicham umiachu asagmin.
ROM 2:28 Judío aents asajum nuniachkugmesh iyashnum awantak awa nui pakamaku asajum judío tamak amaitsugme;
ROM 2:29 dekaskenum judiowa duka ditá anentainish yapajinau aina nuuwai dekaskenum pakamakaju aina duka, nunak Wakaní Pegkeji dutikawai chicham umiktinun Moisés agajua nu dutikatsui; dutikamu aina nuna Apajuik pegkeg ainagme tawai, tikich aents aidau tutan dakituinaigkishkam.
ROM 3:1 Nunin aish ¿wajinma imanaita judío atash? ¿wajinma yaijatua pakamamush?, tautigmesh amainaitjume;
ROM 3:2 tujash duka nuninchauwai, dekaskenmag judío aidautik tikich nagkaesau ainaji, Apajuí ni chichame agagbaun dekatkauk jutiná sujamsauwa dui.
ROM 3:3 ¿Tujash ujumak judío aina nuiya Apajuí tibaujin dekaskeapi tusag umikchaju aina duiká, ni anagkagtuamua nunak umimainchauwait?
ROM 3:4 Makichkish nunimaitsui, Apajuik dekas ni tibaujinak betek uminai, ashí aents aidau wait ainaigkish. Dui agagbaunmash: “Ame tibaugmek betek umin asam pegkejai tama atatme, iman asam pegkegchaun aikawai tujamainakuish, bakumamainkesh atsugtamu asamtai, tuke depetmaktinaitme”, tawai.
ROM 3:5 Jutii pegkegchau takaamuji, Apajuí pegkeg takaamujin nuní paan iwainaish, ¿wagka Apajuish suwimkanash sukagtumainaita, pegkegchau takaakug nunimainait? (Junak tikich aents aidau wajuk chichainawa nuna dutiksanuk tajai.)
ROM 3:6 ¡Duka makichkish nuninchauwai! Apajuí pegkegchaun takaakush, ¿Wajuk aents nugkanmaya aidaunash suwimkanash sumainaita?
ROM 3:7 Tujash wi waitjamua nu, Apajuinu dekaskea nuna, aan nagkaemas paan emaish, ¿wagka wisha tudauwaitme tamash aja?
ROM 3:8 Ujumak aents aidau wainak tsanumjutuinak: Pegkeg ajutjamti takuik pegkegchau takamainai tusa jintinkagtawai, tujutuinawai, ¿Dekas aajanuk jintinkagtag? Makichkish nuninchauwai, nunú aents aidau mina pachitus tu chichaina duka suwimak jumainun tu yujainawai.
ROM 3:9 ¿Wajinmainaitji? ¿Jutii judío aidautika tikich aidau nagkaesau imá pegkeg ainag? ¡Makichkish nuninchauwaitji! Timajim nunisag judío aidautish, judiochu aidaushkam tudau ainaji.
ROM 3:10 Nunin asamtai Apajuí chichame agagbauwa nuwi: “¡Makichkish aents pegkejan takauk atsawai, shiig makichkiuchikesh atsawai!
ROM 3:11 Makichkish Apajuí pegkejan wakega nuna dekaukesh atsawai, antsag Apajuin egaukesh atsawai.
ROM 3:12 Ashí aentsuk Apajuinak tupankaju asag atsumainchau waigkajui, nunin asag ashí pegkegchau ainawai. ¡Makichik aentskesh pegkejan takauk atsawai! ¡Shiig makichkiuchikesh atsawai!
ROM 3:13 Suwenig aents ukusbau ashiimua imanai, waitjuidau asag; ditá weninig dapí tsaagkega iman ajuinawai,
ROM 3:14 nunidau asag, kuashat kajeamujin aentsnash pegkegchaun chichajuinawai.
ROM 3:15 Wamkes kajedau asag aentsun maatatus yujajin ainawai;
ROM 3:16 dita tuwí yujainawa nuninakush pegkegchaun dutikainak, tikich aents aidaunak waittanum ukuinawai.
ROM 3:17 Dekainatsui tikichjaish shiig agkan pujutnak.
ROM 3:18 Apajuí ajantusa diyamujish atsujuinawai”, tawai.
ROM 3:19 Chicham umiktina nui: “Ashí pegkegchau ainagme”, tawa nunak jutii judío aidautin Apajuí chicham umiktinun sujamsau asa tujama duka dekainaji. Nunú chicham umikchamunum chichamainchau juwaktinaitji. Nunin asamtai judío aidautish, ashí nugkanmaya aents aidaush wi bakumamainuk atsugtawai tumainuk atsustinai, wagki Apajuí diismak ashí aentstí bakumamainuk ajutjamaidau asamtai.
ROM 3:20 Nuadui makichik aentskesh Apajuí eemtinig chicham umikbauwai pegkeg diyamak achatnai, wagki chicham umiktina duka ayatak jutii tudauwaitag nunak dekamtijamu asamtai.
ROM 3:21 Tujash yamaiya jui iwaintugmake, chicham umiktina nu umiatsjinkesh Apajuish wajuk pegkeg diigmaji nuna, juna pachisag chicham umiktina nuwish, profeta aidaushkam etsegkaju ainawai.
ROM 3:22 Nu aidau dekamtijamawajui Jesucristo dekaskeapi tabaunum Apajuí pegkeg ainagme tujama nunak, nunin asamtai ashí aents Jesucristo dekaskeapi tuina nunak, yaá aentsuk ainta nunin ataish nunak pachitsuk ashí betek pegkeg ainagme tujamji.
ROM 3:23 Ashí aentstik betek tunamaku asaja, Apajuí diismak pegkejak wantinkachuitji.
ROM 3:24 Nunin ajinig, Jesucristo iina tudaujin esaktugmag agkan etamkau asamtai wait anenjamag anenjauch pegkeg ainagme tujabiuwai.
ROM 3:25 Apajuik Jesusnak jutii suwimak jumaina nuna ni suwimkan juwak mantamnati tusa awetugbauwai, nunikmatai Jesusan minaimpap mantamdauwaita tusag dekaskeapi tuinak uwemjatnume tusa. Aatus Apajuik pegkeg takaamujinak iwainmamkauwai, nunin asa aents yaunchuk tudau takasbaujinash pachitsuk yaa Jesusan dekaskeapi tawa nuna uwemtikui.
ROM 3:26 Ni pegkeg dutikamun iwainmamkata tau asa Jesusan jutiiní mantamnati tusa awetugbauwai. Nuna aatus dutikak Apajuik pegkeg takaamujinak iwainakui nuigtushkam Jesusan dekaskeapi tuina nuna pegkeg ainagme tawa dui.
ROM 3:27 Nunin asamtai jutii ememamainuk makichkish atsawai, chicham umiktajum tibauwa nu umikbaunmagkesh pegkeg ainagme tichamu asaja. Ayatak Jesucristo dekaskeapi tabaunum Apajuik pegkeg ainagme tujamui.
ROM 3:28 Apajuik Jesucristo dekaskeapi tabaunum pegkeg ainagme tujama nunak, chicham umiktajum tibauwa nu umikbauwaikish tujamtsu duka dekaji.
ROM 3:29 Atsa ¿Apajuik imá judío aina nuna Apajuijigke tajumek? Atsa ¿Ashí judiochu aina nunash Apajuijichukaih? Dekaskenum ashí aents judiochu aina nunashkam Apajuijiyai.
ROM 3:30 Apajuik makichkiuchi, nunin asa nigki Jesucristo dekaskeapi tuidaunak pakamaku agtaish, pakamakchau agtaishkam pegkeg ainagme titinai.
ROM 3:31 Nunin asamtaig, ¿Jesucristo dekaskeapi tau asajin chicham umiktina duka wainak juwaka? ¡Makichkish nuninchauwai! Nunisag awai, ayatak nuní nagkaemas paan awasaji chicham umiktinush wajinma yaijatua duka.
ROM 4:1 Yamai dekawagmi Abraham iina apají wajukauwaita nudau.
ROM 4:2 Abraham ni takasbaujiya nu diigsá aents pegkejai tibau akug, nigki emematmamain aajakui, tujash Apajuiyaig ememamain aajakchauwai.
ROM 4:3 Apajuí chichame agagbauwa nuig: “Abrahamak Apajuiyai dekaskeapi tujakui, nuniau asamtai Apajuí Abrahamnak pegkeg diisui”, tawai.
ROM 4:4 Aents ni takagsamunum akiakug: Junak anentag amajame tumaitsui, diwibaunum akiau asa.
ROM 4:5 Tujash aents pegkejan takaschau aig Apajuí tudaunum agkanmitka nunak niiní dekaskeapi tau asamtai dutikawai, nunú dekaskeapi tibauwa duik pegkeg ainagme tawai.
ROM 4:6 Davidchakam aikasag agajui. Aents pegkeg takasbaujish atsujaig, Apajuí pegkeg ainagme tima shiig aneastinjin pachis agajua duka,
ROM 4:7 aatus tawai: “¡Shiig aneasagtinai aentsú pegkegchauji tsagkujamu aidauk, tuja tudau yaunchuk takasbaujish pachitsuk idaitusbau aidaushkam!
ROM 4:8 ¡Shiig aneasagtinai Apu Apajuí nu aents aidau tudaujin anenjachbau agtina duka!”
ROM 4:9 Juna tibauwa jusha ¿imá jutii pakamaku aidauti shiig aneastinnak tiuwait atsa pakamakchau aidau shiig aneastinun tichaukaih? Nunak ditanashkam tiuwai. Yaunchuk timajime, Apajuik Abrahamnak niinig dekaskeapi tabau asa, aents pegkeg diisui tusan.
ROM 4:10 Tujash nunash ¿wajukamtaiya dutikauwaita? ¿pakamakmataig dutikauwait atsa pakamatsaigkik dutikauwait? Nunak pakamakmatai dutikachui, eke pakamatsaig dutikauwai.
ROM 4:11 Nunik pujus Abrahamak pakamakui, ayatak Apajuí dekaskeapi tabaunum pakamakchau ajinkesh Apajuí pegkeg ainagme tujama nuna iwainakta tau asa. Nuniku asa Abrahamak pakamakchau ainayatak Apajuí dekaskeapi tuina nuna apají wajasui, ashí nunin aidaunak Apajuik betekmas pegkeg diyawai.
ROM 4:12 Nuigtushkam pakamaku ainakush, Abraham eke pakamatsuk Apajuiyaig dekaskeapi tujakua nunisag anentaimaina nuna apají wajasui.
ROM 4:13 Apajuí Abraham anagkuaku tibauwa duka: Ju nugka juka amina uchijum weantu akiinak wegagtina nudau atin atí tiuwai. Nunak Moisés chicham umiktajum tibauwa nuna umikú asamtaigkish tichauwai. Ayatak niiní dekaskeapi tau asamtai pegkeg diisá tiuwai,
ROM 4:14 wagki jutii judío aidauti chicham umiktajum tibauwa nunú umiaku jumainaitkuig, Apajuiyai dekaskeapi tabauwa duka ni anagkagtuamua nujaí wainak juwamainai.
ROM 4:15 Moisés chicham umiktajum tiuwa duka ii umiachbaunum Apajuí suwimkan sujamaina nuna itagtamji. Tujash chicham umiktina nunú atsakuig umiatsjume tamak amaitsuji.
ROM 4:16 Nunin asamtai Apajuí Abrahaman anagkuauwa nunak, ni weantu aidaush dekaskeapi tabaunum anenjauch uwemjatnume tiuwai. Apajuí anagkagtuamuk, jutii judío aidauti chicham umiinag nudaukechui, Abraham Apajuiyaig dekaskeapi tujakua nunisag ashí aents dekaskeapi tuina nudauwai. Aatus asamtai Abrahamak ashí jutii aidauti apajiyai.
ROM 4:17 Nuadui Apajuí eemtinish Abrahamak dekaamauwai chicham agagbaunum: “Wi aminak kuashat aents aidau apají emajame” tawa nuna. Nuadui Abrahamak aents jakaunash Apajuí inanki ataktú pujutan suwak, atsamunmayanash ashí wajiin najanna nuanui dekaskeapi tujakui.
ROM 4:18 Nunin asa Abrahamak uchijish atsugmaitak, dekaskeap uminkattawa tabauwai dakasui, nuniku asa kuashat aentsun apají wajasui, Apajuí chichajak: “Amina uchigmiin akiinak wegauk, yaya dekapamainchauwa ibau atinai”, tibau asa.
ROM 4:19 Abrahamak cien mijan tumain ajujakui, Sarashkam muuntuch wajasú asa uchinash ejapjumainchau wajasui, tujash dekaskeap uminkattawa tabaunmag mijakchauwai.
ROM 4:20 Nuigtush Apajuí niina anagkuamunash utujimsag anentaimtsuk, nuní nagkaemas dekaskeapi tabaujin ichichmamag Apajuin emematiuwai.
ROM 4:21 Abrahamak: Apajuí ashí senchigtina ibau asampap ashí ni anagkagtuamujinash imatiksag umiktatua, tiuwai.
ROM 4:22 Nunú aaja dekaskeapi tabauwai Apajuik Abrahamnak pegkeg diisui.
ROM 4:23 Tujash Apajuí Abraham dekaskeapi tabau asa pegkeg diisua duka, imá ni nunikbauwa duke pachisa agagchamui.
ROM 4:24 Jutii nuniktina dusha pachisa agagbauwai: Ii dekaskeapi tabaunum Apajuí pegkeg ainagme tama atinaitag nunú. Duka jutii Jesucristo iina Apujiya nu jakaunak Apajuí inankiuwa nunú dekaskeapi tuinag nuuwai.
ROM 4:25 Apajuí Jesusnak jutii tudaujin mantamnati tusa idaisauwai, nunik maawagmataish ataktú nigki inankiuwai jutiin pegkeg ainagme tujamta tau asa.
ROM 5:1 Yamaik Apajuiyai chichatash agkan ajutjamji, Jesucristo iiní mantamna iina tudaujinash esaktugmagmatai pegkeg ainagme tujabiu asamtai nuigtush iina Apuji Jesucristo dekaskeapi tuinag dui.
ROM 5:2 Cristo dekaskeapi tabaunum Apajuik adijkauwaitji, ni wait anenkagtuju asamtai shiig aneenaji nuniaku shiig aneasa dakainaji nuigtushkam Apajuí tsuwatan antiakchauwa imanuk iishkam wajasaja, atak niijai ijunja pujustinaitag nunú dekainaku shiig aneamu ajutjamji.
ROM 5:3 Imá duikik shiig aneatsji, kuashat waitiamu ajutjamkuish shiig aneasa batsatji, waitiamua nu utugchat emamkesa katsunjá nagkaetan unuitama dui,
ROM 5:4 nunú emamkesa nagkaiki, Apajuí dekapjabaush nunisaik nagkaikiaja atakeap niijai pujustinaitja tusa shiig aneasa dakamu ajutjamji.
ROM 5:5 Nunú dakainaku pujuidautik idatsamak achatnaitji, wagki Wakaní Pegkejiya nu iina anentain pujau asa Apajuí niina anenkajin amasua nuna dekamtijamkui tikich aidaujaish pempentunisaik anenidau asaja.
ROM 5:6 Jutiikek uwemainchau waigká batsatjin, Apajuí tsawan mamikiamu jegamtai Jesucristun awemauwai, dutikam jutii tudaujin mantamna uwemtijamjauwai.
ROM 5:7 Makichik aentskesh tikich aents pegkejan takau asamtai ayamjakun mantamnatjai tumainuk atsawai, ¿aents pegkegnum yaigbau asampash: Wi mantamnatjai tumainait? Achah tumainashit.
ROM 5:8 Tujash Apajuik ni anenkajinak iwaintugmakui, ii tudau ainajinig Cristo jutiiní mantamdauwa dui.
ROM 5:9 Cristo niina numpen Apajuiyai iwainakmatai jutiinak pegkeg ainagme tujabiuwai. Nuadui Cristo aan nagkaemas iina Apajuí suwimak sujamainnak ayamjutpakmatai waittsashtinaitji.
ROM 5:10 Yaunchkek aents aidautik Apajuin shiwaji ainajinig, ni Uchijí iina ayamjutpak mantamna ni Apajijaish epegtugmauwai. Dutijamau asa yamaik Cristo iwaku pujau asa aan nagkaemas ayamjutpaktinai.
ROM 5:11 Imá dukechui jutii Apajuiyai shiig aneenag duka, iina Apuji Jesucristo Apajuijai shiwagmagamun epegtugmauwa duish shiig aneenaji.
ROM 5:12 Makichik aents tudau takasua dui, nugkanum tudau takaamush nagkamdauwai. Nu aaja tudau takasbaunum jatashkam nagkamdauwai, nunikmatai ashí jinin wajasuitji, wagki ashí aentstik tudau takau asaja.
ROM 5:13 Apajuí Moisesan chicham umiktinun eke suwatsaig nugkanmag tudauk aajakui, tujash Apajuik aents tudaun takaagtaish pachikchauwai, chicham umiktinun eke susachu asa.
ROM 5:14 Nunin aigkishkam Adán pujujakua dui nagkamas Moisés pujujakua imanuish jamuk aajakui, Adán tudau takaak Apajuí intimjukiuwa nuninachiatak. Duka Cristo minitna nuna iwainak nunikui.
ROM 5:15 Tujash Adán umikchamunum tunamagbauwa duka Apajuí anenjauch sujamsamua nujaig apatkaish tumaitsui. Makichik aents tunamagbaunmag ashí jinin wajasuitji. Tujash Apajuí wait anenjamag anenjauch Jesucristun awetugmauwa nuadui ashí iinu pegkeg aina nunak aan nagkaemas pegkejan dutikauwai. Aatus Apajuí wait anenjamag nunú aents tunamajua nuna nagkaegas pegkejan dutikauwai.
ROM 5:16 Adán tudau takasbauwa duka Apajuí anenjauch sujamsauwa nujaig apatkaish tumaitsui. Adán tudau takasua dui ashí aentstik Apajuí eemtinish bakumamainnum juwakuitji. Tujash aents imanik tudau takasú aigkish, Apajuí anenjauch dutikauwa dui pegkeg ainagme tujamji.
ROM 5:17 Makichik aents umikchamunum tunamagbauwa dui jaamuk asauwai, tujash nuna nagkaesau makichik aents Jesucristua nu pegkeg dutikamunum Apajuí shiig senchi wait anenjamu asa, pegkeg ainagme tibau aidautik yamajam pujuta nuwi tuke pujustin ainaji.
ROM 5:18 Makichik aents Apajuí umigkashbaunum, ashí aentstik Apajuí, atumek suwimak juwakjum jakattagme tama asauwaitji. Aantsag makichik aents Jesucristo pegkeg dutikamunum, Apajuí ashí aentstinak pegkeg ainagme tujabiuwai pujut nagkanchaun jukitnume tujamu asa.
ROM 5:19 Makichik aents Apajuí intimjukbaunum kuashat aentstik tudau waigkuitji. Tuja makichik aentsua nu Apajuí umigkamunum, kuashat aents pegkeg ainagme tama agtinai.
ROM 5:20 Chicham umiktina duka ayatak nuní nagkaemas tudaunak ikauntugmakui; tujash nu imanikmataish nuna nagkaesau, Apajuí ni wait anenkagtamujiya nuna iwaintugmakui.
ROM 5:21 Nunú tudau jatan itagtabauwa nunisag Apajuishkam ni wait anenkagtamujiya nunak Jesucristo iina Apuji jakauwa dui pegkeg ainagme tujamu asa, pujut tuke atina nuna jukitnume tujabiuwai.
ROM 6:1 ¿Dusha wajuk anentaimtagme? ¿Apajuí senchi wait anenjamjati tusaik tudau takaa batsaamainait?
ROM 6:2 ¡Duka makichkish nunimaitsui! Jutiik tudau takatnumag jakauwa numamtuk juwakuitji, nunintish ¿wagkaik tudaush takaash pujutji?
ROM 6:3 Atumek shiig dekagme, jutii Cristo Jesusai dekaskeapi tabaunum yamimainakuik, ni jakauwa numamtuk wajainag duka.
ROM 6:4 Nunin asaja yamimainakuik Cristun ukusajua numamtuk wajainaji, niijai betek jakauwa numamtuk wajaidau asá. Nuniku asaja Cristo Apají niina senchijí imana nujai inankiuwa numamtuk wajainaji yamajam pujutnum pujuidau asaja.
ROM 6:5 Niijai jamaina numamtuk wajakú asá, ni nantakiuwa nunisaik jutiish nantaktinaitji.
ROM 6:6 Yaunchuk aajakuitag duka Cristo achijá maamua nujai betekak maamua duka dekainaji. Aatus nunikmatai iina iyashí yaunchuk tudau takamtiktai wajasua duka wainak juwakti, nunikmatai tudau takainak waitú batsamchatnume tujamu asa.
ROM 6:7 Aents jakauwa duka tudaunak takaa pujuchui jaka agkan wajasú asa.
ROM 6:8 Numamtuk jutiishkam iina tudau takataiji aidauk Cristujai jakau asamtai agkantaitji. Nuadui dekaskenum Cristujai pujutnaitji.
ROM 6:9 Dekainaji Cristo jakaunak Apajuí inankimu asa ataktuk jakashtina duka. Cristuk jaamunak depetkau asa ataktuk jamaitsui.
ROM 6:10 Aents tudaun takaagtai Apajuí suwimkan susatjai tiuwa duka, Cristo waitus jakauwa duik ashí nagkankauwai. Yamaik nantakí puja nunak Apajuí shiig anemtikak pujawai.
ROM 6:11 Atumshakam nunisjumek tudau takatnumak jakauwa nunin anentaimtumastajum, tuja iwaaku anentaimtumastajum, ii Apuji Cristo Jesusjai ijutkau batsatkujum Apajuí shiig aneemtiksata tabaunum.
ROM 6:12 Nuadui atumek tudauk takaa batsaamaitsugme, atumi iyashim pegkegchaun takastatus wakega nunú takaakjum.
ROM 6:13 Atumi iyashmia nuiyagkesh tudau takamtiktaig awasaigpajum. Dekas Apajuiyaig idaimamsatajum jakauti nantamaina numamtuk wajakú asajum, iyashmiin ajutjamaina nunak Apajuí pegkegnum takamtiksati tusajum idaitustajum.
ROM 6:14 Aaja dutikamu asamtai tudauwa duka atumnak inapamaitsui, wagki chicham umiktina nu umiktasa batsamtutsuk Apajuí wait anenjabaunum batsatu asagmin.
ROM 6:15 ¿Tujash wajukmainaita? ¿Chicham umiktasa batsattsuji Apajuí wait anenjabaunum batsatji tusaika, tudau takamainait? ¡Makichkish nunimaitsui!
ROM 6:16 Atumek dekagme, makichik aents wika parjugkan takajin atajai tumamkug, nuna inake wajasá parjugji wakegamujin umigna duka. Numamtuk aents ayatak tudaunak takaa pujauk nigki jatan egatmamak nuniawai. Untsu Apajuin umijak pegkeg aina nunak takauk, pegkeg pujuta nuwi weawai.
ROM 6:17 Apajuin see tajai, yaunchkek tudau achikam batsatutijum Jesucristo pachisa jintiamu antukjum, dekas anentaimin wakejusjum umijin waigkujum nuadui.
ROM 6:18 Tudau takatnum achikbauwa nunin batsatutijum agkanmitkamu asajum, pegkeg aina nunak takau atajai tumamiuwaitjume, nunikjum pegkeja duke takaakjum batsatjume.
ROM 6:19 Nunak atum kakajus antumainchau asagmin apattsan shiig antuktinme tusan tajime. Yaunchkek atumi iyashmik pegkegchau nuigtú tsumain aina nuanui takamtikajakuitjume. Tujash yamaik atumi iyashmik pegkeg takat aina nuanui takamtikakjum pegkeejum pujustajum.
ROM 6:20 Atumek tudau takatnum idaimamsau asagmin, Apajuí pegkejan wakega nunú takagsatajum tumainchau aajakuitjume.
ROM 6:21 Tujash ¿wají pegkeja jukiuwaitjume, yamai datsantan itagtamaina nunú takasuitjum duish? Duka ayatak jatanmag ejetamjume.
ROM 6:22 Tujash yamaik atumek tudaunum agkanmitkam Apajuí takajin wajasujum nuadui, pegkee pujakjum pujut tuke atina nuwi jegantinaitjume.
ROM 6:23 Tudauk Apajuiyai datumkagtawai; untsu Apajuí anenjauch sujama duka iina Apuji Cristo Jesusjai ijutkau pujamunum pujut tuke atin juwamua nuuwai.
ROM 7:1 Yatsug aidauh, atumek chicham umiktina duka dekagme. Nuigtushkam dekagme chicham umiktina nunak aents iwaaku puja duke umimaina nunú.
ROM 7:2 Ju anentaimtusa diisagmi; chicham umiktina nuanuig nuwa nemakua duka aishi pujaigkik tikichnumag nemamaitsui, untsu aishi jakamtaig chicham umiktin tawa nuig agkan juwawai tawai.
ROM 7:3 Nunin asamtai aishi pujaig tikichjai nemakug ekagmawai, untsu aishi jakamtai chicham umiktin nuwenbaun pachis tawa nunak agkan wajasú asa, tikich aentsnum nemakush ekagmatsui.
ROM 7:4 Mina yatsug aidauh, atumesh numamtuk Cristujai ijunkujum niijai jakauwa numamtuk wajasjum chicham umiktina nuig agkan wajasuitjume, nunikjum yamaik Cristo jakaunak Apajuí inankiuwa nujai ijunjajum pujagme, nuniau asajum Apajuí pegkejan wakega duke takagmain wajasugme.
ROM 7:5 Yaunchkek iina iyashí pegkegchau takatan unuimatjauwa duke takajakuitji, nuniajin chicham umiktina nunú nuní nagkaemas pegkegchau takatnum dekamtijamauwai, dutijamamtai nunú takainaku jatanum jegantuitji.
ROM 7:6 Tujash yamaik chicham umiktajum tibauwa nuanuig jakauwa numamtuk wajakaju asaja, agkanmagawaitji achikbauwa numamtin aajakuitag duka. Nunin aajakuti yamaik Wakaní Pegkeji yaimpasmatai yamajam pujuta nu jukiu asaja nujai Apajuik takajuinaji yaunchuk chicham umiktajum tibauwa duka idaiku.
ROM 7:7 Nunin asamtaig ¿chicham umiktina duka tudauwai tumainait? ¡Duka makichkish nuninchauwai! Chicham umiktina nunú atsakuig wika tudaunak dekaachu amainaitjai, nuigtushkam tikichdau pegkegchau anentai egketua wakejuta nunash chicham umiktina nu tachakuig dekaachu amainaitjai.
ROM 7:8 Tujash tudauk, nunú chicham umiktin tawa duka ashí tikichdau wainká pegkegchau anentai egketua wakejut minai awa nuna dekamtijuauwai, wagki tudauwa duka chicham umiktina nu atsutaik jakauwa nunin wajas au asamtai.
ROM 7:9 Wika yaunchkek chicham umiktina nunash dekatsuk pujujakuitjai; tujash chicham umiktina nuna dekakman wi shiig tudauwaitag nuna dekagmamauwaitjai.
ROM 7:10 Tuja chicham umiktina nu, pujutnum ejetumaina nuna megkaetanum ejetiuwai,
ROM 7:11 wagki tudauwa duka chicham umiktin tawa nujai tsanujug jatanum ejetiuwai.
ROM 7:12 Aaja dekainaji chicham umiktina duka pegkegma nu, nunin asa umiktin aina dushakam pegkegmai nuigtushkam pegkejai, pegkeg aidau takastinun tau asa.
ROM 7:13 ¿Tujash nu iman pegkejaitkush, wagka minash megkaetanmash ejetiuwaita? Duka nuninchauwai. Nuninaitak tudauwa nu, pegkeja iman wajas megkaetanum ejetiuwai dekas tudauwa nuna iwainmamkata tau asa. Nunak chicham umiktin tawa nuwish shiig pegkegchauwa nuna iwainmamkatatus nunikui.
ROM 7:14 Nunin asamtai dekainaji chicham umiktina nunak Apajuí Wakaní jintintuam Moisés agajui dutikamu asa pegkejai, untsu wika ju nugkanmaya asan kakaakchauwaitjai. Nunin asan inak apujin umijama numamtuk tudau umijag nunak dutiktsukek idaimainchau dekapeajai.
ROM 7:15 Wika dekamain dekapeatsjai, wi wakegamujua nuna takatsuk, dekas wi dakitamujua nuna takaag dui.
ROM 7:16 Nuniau asan wi dutikag nunak dakitamujua nuna takau asan, chicham umiktina duka dekas pegkejapita tajai.
ROM 7:17 Nuadui wichauwaitjai dekaskenum pegkegchaun takaunuk; minai tudau ajuta nu takamtijakui nuniajai.
ROM 7:18 Nunin asan wika mina iyashig kakaakchauwa nuwi makichkish pegkejak atsugta nunak shiig dekagmamjai, wagki pegkeja nuna takastasan wakegayatkun takamainchau dekapeau asan.
ROM 7:19 Pegkeg takastasa wakegamua nunak takatsuk, pegkegchau dakitamujua nuna imá takaajai.
ROM 7:20 Tuja wi dakitamujua nuna takaaknuk, wi takaakun nuniatsjai, minai tudau ajuta nu takamtijakui nuniajai.
ROM 7:21 Dutijau asamtai pegkeja nuna takastasan wakegayatkun, pegkegchau ajuta nuna chicham umiktina nuwi dekagmamjai.
ROM 7:22 Nunak mina anentaijui chicham umiktin Apajuí sujamsamua nu umiktasa wakegamu ajutu asamtai.
ROM 7:23 Tujash mina iyashjui umigmain ajuta nuna wainjai, duka mina anentaimtajuig pegkeja nuna umigkata taig dakitmitkajak, mina iyashjui tudau ajuta nu achigkauwa nunin eti ajuta nuuwai.
ROM 7:24 ¡Wajukawajak tajai! ¿Ya agkanmitkagmainaita mina iyashig pegkegchaun takamtijak megkaetanum eta nuanuish?
ROM 7:25 Apajuin see tajai, iina Apuji Jesucristun awetugma agkanmitkagmauwa dui. Inagnakun tajime: Apajuinu chicham umiktina nuna mina anentaijuig umigkata tajai; tujash mina iyashig tudau takatan unuimatjauwa dui idaimainchau dekapeajai.
ROM 8:1 Tujash yamaik Cristo Jesusai ijutkau pujuina duka suwimak jumainuk shiig atsujuinawai.
ROM 8:2 Wagki Cristo Jesús umijuinaku pujuidautinak Wakaní Pegkeji pujutan sujamas agkanmitkagmawajui tudaunum pujuidautin nuigtú megkaemaina nunashkam.
ROM 8:3 Moisés chicham umiktinun tibauwa duka makichkish umimainchau aajakui, iina iyashí pegkegchau unuimatjau asa kakaakchau asamtai. Nuniamun Apajuí niina Uchijin aentstí iyashí tudauwa nunin ema awemauwai, ni tudaunum mantamnati tusa. Aatus Apajuik tudaunak depetkauwai Cristo iyashí kakaakchau wajasua nujai.
ROM 8:4 Nunak chicham umiktin pegkeja nuna imatiksag umiinak iyash unuimatjamua nuna batsamtutsuk, Wakaní Pegkeji wakega nunisag pujustinme tusa dutikauwai.
ROM 8:5 Wagki iyash wakegamua nunak takaa pujuidauk, nunak anentaimtin ainawai; untsu Wakaní Pegkeji wakega nunisag pujuidauk, Wakan wakega nunak anentaimtin ainawai.
ROM 8:6 Nunin asa iyash wakegamua duke takaa pujamak megkaetanum ejekagtawai; untsu Wakaní Pegkeji wakega dutiksaik takaamak pujutnum ejekagtawai nuigtú shiig agkan pujutnumshakam.
ROM 8:7 Aents iyashí wakega nunak takastatus anentaimtú pujuidauk, Apajuí shiwaji weenawai, wagki Apajuí chicham umiktajum tibauwa nuna dakituidau asag, umitnash umimainchau asag.
ROM 8:8 Aents iyashí wakega nunak takaa puja duka, makichkish Apajuinak shiig awagmamaitsui.
ROM 8:9 Tujash atumek, iyashim wakega nu takaakjumek pujatsjume, Wakaní Pegkeji wakega nu takaakjum pujagme, Apajuí Wakaní Pegkejin sujamsamua nu atuminish pujugtamu asamtai. Untsu Wakaní Pegkejin Cristo sujama nu atsugbau aidauk Cristunuchu ainawai.
ROM 8:10 Iina iyashí tunamaju asamtai jakatin atí tibau aigkish, Cristo atumiin pujau asa wakannash pujutan suwawai, Apajuí pegkeg ainagme tujabiu asamtai.
ROM 8:11 Jesús jakaunak Wakan inankiuwa nu atumiin pujau asa, nigki Cristo inankiuwa dutiksag yamajam pujutan susatnai iina iyashinash, Apajuí Wakaní Pegkeji sujamsamu atumiin pujugtamjum dui.
ROM 8:12 Aatus asamtai yatsug aidauh, ii dutikmaina duka ajutjamji, tujash duka iina iyashí wakega nu takaaku pujuta duchauwai.
ROM 8:13 Jutii iyashí wakega duke takaa pujuinakuik, tuke megkaekatin ainaji; untsu iina iyashí wakega nu Wakaní Pegkeji yaimpasmatai idaiyutik, Apajuijai tuke pujustin ainaji.
ROM 8:14 Ashí aents aidau Apajuí Wakaní takamtijusti tusa idaimamaidauk, Apajuí uchijí ainawai.
ROM 8:15 Atumek wakan inajatak waitkagkagtina nu jukichuitjume ataktú sapig batsamtita tusagmek, Wakaní Pegkejiya nu Apajuí uchijí etamkaju asamtai. Nunú Wakan ichachtamkui: ¡Mina Apajú! tuinaji.
ROM 8:16 Nunú Wakania duke iina wakaninash dekamtikawai, Apajuí uchijí ainagme tusa.
ROM 8:17 Apajuí uchijí asaja, Apajuí ii jukitnun anagtabauwa dushakam jukitnaitji Cristo jukitna nunisaik; dekaskenum Cristo waittsauwa nunisaik waittsajaik, niina imanjiya nuwish niijai pujutnaitji.
ROM 8:18 Ju nugka jui yamai waituinag duka wainkayai, Apajuí atak pujut dekas imanun amastina nujaig apatkaish tumaitsui.
ROM 8:19 Ashí Apajuí najankamu aina duka shiig senchi wakegas dakainawai, tsawan jegatai jutii Apajuí uchijí aidautin ashí wainainamunum iwaintamkatna nuna wainkagtatus.
ROM 8:20 Wagki ashí najankamu aina duka dekaskenmash wajuku atí tibauwaita nunak megkaekaju asag wainak juwakajui, nunak dita wakegainak nunikchajui, Apajuí aatus nuniktinme tibau asa nunikajui. Nunak Apajuí makichik tsawantai yapajiatin asa dutikauwa nuna dakainawai,
ROM 8:21 wagki duka besekú asag jinin waigkajui, nuniku asag inaku waitkatai wajas awa nunú Apajuí imanjiya nujai niina uchijí aidautin agkanmitkagmatna nujai betek, ditashkam agkanmitkam agtin asamtai dutikamui.
ROM 8:22 Duka dekainaji yamaiya juikish ashí najankamu aina duka, najaimaku ejettayama imatuinak nuwa uchin uchigmaktatus najaimama imanina duka.
ROM 8:23 Tujash imá ditakek waituinatsui, jutii Apajuí amastina nu jukitin asaja emtika Wakaní Pegkeji jukiu aidautishkam waituinaji, niina uchijí aidautin agkanmitkagmatna nu dakainaku batsamsaja.
ROM 8:24 Nunú dakamu ajutjama duka uwemkau asa nuninaji. Nu dakaku pujuinag nu jukiu ainakuik, jukitnap ainaji tusaik dakaak pujumaitsuji. ¿Ya jukiuwaitkush dakakush pujumainaita?
ROM 8:25 Tujash dakainag duka ii wainchamua nu dakainaji, nuniau asá emamkesa dakainaji.
ROM 8:26 Antsag Wakaní Pegkejishkam ii kakaakchau wegajinish yaimpaji, wagki Apajuish wajuk aujmainaita duka dekachu asajin; tujash Wakaní Pegkejiya nu jutiin pachipas Apajuin aujtugmawai, anentai senchi idajka tumainchau dekapeajinchakam.
ROM 8:27 Tuja Apajuik aentsú anentain shiig dekagna ibau asa, Wakaní Pegkejish wajina tawa nunak shiig dekawai, wagki Apajuí wakega dutiksag niina aentsji pegkeemtikamu aina nuna segatu asamtai.
ROM 8:28 Dekainaji Apajuí aneen aidautinak ashí iina wají nagkaetamainawa duka pegkegnum yaijata nu. Nunú aidautik ni Apajuí wajuk dutikatjai tawa dutiksaik untsukbau ainaji.
ROM 8:29 Wagki ni yaunchuk emtika wainkamuji ainag nu aidautin etegtamjauwai mina Uchig Cristua imanuk atinme tusa, dutikau asa ni yachi kuashat aina nuig ni iwai atí tiuwai.
ROM 8:30 Nunú yaunchuk midau atinme tibau aina nu untsukbau ainawai. Nunú untsukbau aina nuna, pegkeg ainagme tiuwai. Pegkeg ainagme tiuwa nuna, wijai pujuinak eme anentai agtinme tiuwai.
ROM 8:31 ¿Nuna tajim nuanuish tu tumainaita? Apajuí iina wait anenjama nu jutiijai awa nuniaish, ¿ya pegkegchaush awajtamainaita?
ROM 8:32 Apajuí niina Uchijinakesh sujitjamtsuk ashí aents aidau tudaujin mantamnati tusa awetugbauwa ibaush, ¿wagkag ni Uchijin ashí wajiin susatna dutiksag iinash amaschagti?
ROM 8:33 ¿Ya Apajuí etegjamu aidautinash bakugmamainaita? Makichkish atsawai, wagki Apajuiya duke iina pachipas juka pegkeg ainawai tujamu asamtai.
ROM 8:34 ¿Ya suwimkanash amamainaita? Makichkish atsawai, wagki Cristo Jesusai jutiiní mantamdauwa duka, nuigtushkam nigki nantakiuwa dushakam, nunik yamaik Apajuí untsujin ekeemas iina segatjama dushakam nigki.
ROM 8:35 ¿Ya Jesucristo iina anempa nunash datumtamainaita? Makichkish atsawai. Waitiamukesh, utugchatkesh, waitkagmainakugkesh, yapajamukesh, mamuamukesh, ishamainkesh, mantamata tuinakugkesh datumtamaitsui.
ROM 8:36 Dutiksag Apajuí chichamen agagbauwa nuwi jutiin pachipas: “Apajuiyah, jutiik aminu asaja, tuké puyatjumainnum pujuinaji mantamata tuidau asagmatai; uwig mautainum jukí ematiama numamtuk awajtamainawai”, tawai.
ROM 8:37 Tujash ashí nunú aidaunmag Jesucristo anempak dutikauwa dui ashí depetmamu ajutjamui.
ROM 8:38 Wika junak shiig dekau asan tajai: Jaamukesh, iwaaku pujamukesh, ángel aidaukesh, dekas wakan pegkegchau aina nuna apujigkesh, wakan senchigtin aidaukesh, ii yamai pujag juiyagkesh, atak atina dukesh,
ROM 8:39 agkajunum batsamas inamin aidaukesh, nugká initken batsamas inamin aidaukesh, nuniachkush ashí Apajuí najankamu aina nuiyagkesh, Apajuí jutii anempamujin ii Apuji Cristo Jesusai iwaintugmakua nuna datumtamainuk atsawai.
ROM 9:1 Cristun dekaskeapi tinu asan waitjutsuk dekas tajai, Wakaní Pegkeji mina anentaimtija dushakam dutiksag tujutu asamtai duka dekaskeapi tau asan,
ROM 9:2 shiig kuashat wake besemag dekapeakun anentaijun tuke idagmasnuké ajai.
ROM 9:3 Nunimainaitkuig wi Cristui kanakan suwimkan jukitjai tumain dekapeajai, aaja nuniamash mina yatsug aidaush wait anentam amainaitkuig.
ROM 9:4 Ditak Israel aajakua nunú weantu asag Apajuí etegkamu ainawai, dutikau asa Apajuí niina imanjiya nuna iwaintukajui, ditajai Apajuik chichaman apakui, chicham umiktinun Moisés agajua nunashkam susauwai, wajuk emematjiti tusa wakegawa nunashkam shiig ujakajui, aikasag kuashat yaigtinaitjime tusa anagkuauwai.
ROM 9:5 Ditashkam ii muunji Apajuí etegkamu jutii uyujtamkatin aajakajua nu weantuk ainawai. Nunú ii muunji aajakajua nuwi Jesucristuk egkemak aentsmaga akiinauwai. ¡Cristui ashí wají aina nuna diyauk, niiyai Apajuik, nigki tuke ememattai atí! Aatus atí.
ROM 9:6 Apajuí tibauwa duka mina pataag dekaskeapi tuinachu asamtai umintsuk juwaktin asagkesh aniatsui, wagki ashí Israel weantu ainag nuiyatik ashí betek etegjachbau ainag dui,
ROM 9:7 nunisag ashí Abraham weantu aina nuiya aidautik, ashí betekak Abrahama uchijig ainatsji, wagki juna Apajuí Abrahaman chichajak: “Ame weantu aidauk Isaac akiiamua nuiya agtinai”, tiuwai.
ROM 9:8 Jui dekainaji, ayatak Abraham weantu ainag duikik Apajuí uchijí tama amaitsug duka, Apajuí anagtabauwa nuna dekaskeapi tuina nunú dekas Abraham weantu ainawai.
ROM 9:9 Apajuí Abrahaman anagkuak tiuwa duka juuwai: “Tikich mijantin ataktú tajuattajam dui, Sara uchijí ajittawai”.
ROM 9:10 Jushakam anentaimtustajum, iina muunji Isaac aajakua duke aajakui Rebeca jimagma uchigmakbau aajakajua nuna apají,
ROM 9:11 tujash uchik eke akiinainatsaig, pegkegnash pegkegchaunash takainatsaig, Apajuí wajuk dutikatasaya anentaimtus etegkauwaita duka nunisag atí tau asa takasbaujinak diigtsuk,
ROM 9:12 Apajuí Rebecan tiuwai: “Iwaiya nunú ekeuwa nuna umigkatnai”, tusa.
ROM 9:13 Dutiksag agagbaunmash: “Jacopan aneakun, Esaunak dakitajai”, tawai.
ROM 9:14 Juna taja juka Apajuí pegkegchau takaakuap aniawa tumaitsui, nigka makichkish pegkegchaunak takachui.
ROM 9:15 Apajuí Moisesan chichajak: “Wika, wi wakegamujun wait anenjatnaitjai”, tiuwai.
ROM 9:16 Nunin asa, aents etegtuati tusa wakegaidau asamtaigkish, nuniachkush niina shiig awajkatatus senchi kakanmamu asamtaigkish etegkeatsui; Apajuik nigki nagkami ni aents wait anenjata tabaujiya nuna wait anentawai.
ROM 9:17 Nunin asamtai Apajuí chichame agagbauwa nuwi Faraogkan chichajak: “Wi aminak apu emamjame, aminí mina senchijun iwainakmatai ashí aents nugkanmaya aidaush mina dekajuatnume tabaunum”, tibau awai.
ROM 9:18 Nuadui Apajuik ni wakegamun wait anentawai, tuja aents intimkiti tusa wakegakush dutiksag intimtikawai.
ROM 9:19 Tujash atum tujutmainaitjume, nunin aish: “¿Wagka Apajuish aents aidaunash pegkegchau aniagme tumainaita, Apajuí wakegak dutika nuna makichik aentskesh aikawaipa tumainush atsa aniaish?”
ROM 9:20 Nunin tautigmin tajime: “¿Amesh ya iman asamea Apajuish wagka aikame tumainaitme?” ¿Ichinak najanamush, najankagta nuna pempeentukish: “Wagka juní najatuaume”, tumainkaih?
ROM 9:21 Aents duwen takauwa duka, ni wakegamujin diisá najanmainai, nunú duwea duik amamuk fiestatin takastinun najanak, tikichnak ichinak ashí atsumamunum takastinun najanmainai.
ROM 9:22 Nunin asa Apajuishkam ni kajeamujin senchijiya nujai iwainakta tau asa shiig senchi emamkes katsunjauwai, nunú aidauk suwimkan juinak megkaetanum wegagtina nuna.
ROM 9:23 Nunisag jutiin wait anenjamjauwa nunash iwainmamkauwai, nunú aidautik Apajuí yaunchuk nagkamas emtikak niina imanji tuke atina nuwi pujustinme tusa etegjamu ainaji.
ROM 9:24 Dutikamu aina nuiyag jutii ainaji. Tujash imá judiotikek ainatsji, atum judiochu aidautigmesh ainagme.
ROM 9:25 Juna pachis yaunchuk Apajuí tiuwa nuna, profeta Oseas agagbaunum: “Yaunchkesh mina aentsjuchu aajakú aidaunash: ‘Mina aentsjuitme’ titinaitjai, duikish aneeshtaijua nuna: ‘Mina anetaijú’ titinaitjai”, tawai.
ROM 9:26 “Nuanuig junashkam tawai: ‘Atumek mina aentsjuchu ainagme’, tiuwa nu nugkanmag batsatunak makichik tsawantai: ‘Atumek, Apajuí tuke pujuuwa nuna uchijí ainawai’ tama atinaitjume”, tiuwai.
ROM 9:27 Nuigtushkam Isaías Israel aidaun pachis: “Israelan uchijí weantu aidauti shiig kuashat nayantsa kaamatkajiya ibau ainakuishkam, ayatak wajumketi ayamjuka uwemtikjamu agtinaitji,
ROM 9:28 wagki Apajuik, ni tibaujiya nunak wamak ashí nugkanum umiktatui”, tiuwai.
ROM 9:29 Nunak Isaías yaunchuk agagbauwa nuwish: “Apajuí ashí senchigtina nu, iina muunji aajakua nuna wait anenjachuitkuig, nu weantu aidautik yamaikiuchia juik Sodomanmaya aentsun, Gomorranmaya aents aidaujai ijinauwa numamtuk awajam amainaitji”, tawai.
ROM 9:30 Nuna tajim nuanuish ¿wajinmainaita? Judiochu aina duka Apajuí eemtin pegkeg atasag kakanmamchayatak, Apajuí dutikamujiya nuwi dekaskeapi tuidau asag pegkeg diyam asajui.
ROM 9:31 Tujash Israel aina duka, chicham umiktina nuna umiinak Apajuiyai pegkeg wantinkagtatus kakanmamainakush igkugchajui.
ROM 9:32 ¿Tujash wagka nunash nunikajuita? Nunak Apajuiyai dekaskeapi tutsuk dita takasbaujiya nujai Apajuí eemtin pegkeg diyam atag tukamag nunikajui. Nunidau asag kaya tukuumaina numamtuk wajakajui.
ROM 9:33 Nuna pachis Apajuí chichame agagbauwa nui: “Wi Siognum apusattajai makichik kaya muuntan. Nunú kaya nunak kuashat aents tukumak iyajagtinai. Tujash niiní dekaskeapi tauk, makichkish wainkag juwakchatnai”, tawai.
ROM 10:1 Yatsug aidauh, mina anentaijui wakegag nunak, Israel aidaush uwemjatnume tau asan Apajuinash aujtuinajai.
ROM 10:2 Wika ditanak shiig wainin asan tajai; ditak Apajuinak shiig senchi umigkagtatus wakegainawai, nuninayatak Apajuinu dekaskea nuna shiig dekainatsui.
ROM 10:3 Ditak shiig dekainaitsui Apajuí aentsun pegkeg ema nunak, nunidau asag ditak kakanmamainawai Apajuí pegkeg diyam atajai tuidau asag,
ROM 10:4 wagki Apajuí chicham umiktajum tibauwa duka Cristo tauwa dui nagkamas nagkankauwai. Yamaik Cristo dutikauwa nuig dekaskeapi tabaunum pegkeg ainagme tujamji.
ROM 10:5 Pegkeg takaamua nunú chicham umiktina nuwi tibauwa nuna Moisés agak: “Aents chicham umiktinnum tawa nuna imatiksag umiauk, nunú umiamua duwik tuke pujutnai”, tawai.
ROM 10:6 Tujash Apajuí dutikamua nuna dekaskeapi tuidaun pegkeg diya nuna pachis agakug tawai: “Makichkitigmekesh wainka anentaimsajum: ‘Yaki nayaimpinum waka’, tiigpajum”. Nunú aaja tuinakuik, “Cristo yakí pujau wajuká nugká itawagmi”, tumaina nunin asamtai.
ROM 10:7 Nuniachkugmesh: “Yaki jakau batsamtain akaikia tiigpajum”, tawai. Nunú aaja anentaimainakuik, “Aents jakau batsamtainum Cristo pujau jegají, jukí iwakagmi”, tumaina nuninai.
ROM 10:8 Nunin asamtai junashkam: “Chichamak tikijuch atumi wenimin, atumi anentaimin ajutjamjume”, tawai. Nunin asamtai dekaskeapi tabauwa nu pachisa chichamak etsegnawai.
ROM 10:9 Ame wenimin chichakam: Jesusak mina Apujui takum, anentaiminish Jesús jakauwa nunash Apajuiyap dekas inankiuwaita takumek uwemjau atatme.
ROM 10:10 Wagki anentainum dekaskeap nunikuita tabaunum pegkeg ainagme tama ainaji. Tuja, iina wenin chichaká Jesusak mina Apujui tabaunum uwemtak junawai.
ROM 10:11 Aikasag Apajuí chichame agagbauwa nuwi: “Ashí aents niiní dekaskeapi tauk makichkish wainkag juwakchatnai”, tawai.
ROM 10:12 Wagki nunak judío aidautin, griego aina nunashkam betek taku tawai, wagki Apajuik makichkiuchi ashí aents aidau Apujiya duka, nunin asa ashí ya niina segawa nunak shiig anentus yayawai.
ROM 10:13 Duka agagbau: “Ashí aents Apu Jesucristun uwemtijugta tusa segauk, uwemjagtin ainawai”, tawai.
ROM 10:14 Tujash, ¿wajuk segatnumki uwemtijugta tusash, dekaskeapi tuinachush? Tuja ¿wajuk dekaskeapi tiagtigki, ni pachisa etsegbaunash antukchaju aidaush? ¿Nuwigtush wajuk antuktinmegki niina pachis etseju atsa aniaish?
ROM 10:15 ¿Wajuk etsegkatnumki etsegkata tusa awemachbau aidaush? Apajuí chichame agagbaunum: “Tikima shiig pegkejai, yamajam chicham pegkeja nuna pachis etsejak taa duka”, tawai.
ROM 10:16 Tujash aents yamajam chicham etsegbaun antukaja nuiyag ashí betekak dekaskeapi tuinatsui. Nuna pachis Isaías: “Apuh, ¿ya ii etsegbaunash dekaskeapi tuinawa?”, tiuwai.
ROM 10:17 Nunin asamtai dekaskeapi tabauwa duka, chicham etsegbau antukbaunum nagkamnawai, nunú chichama duka Cristo chichame pachisa etsegna nuuwai.
ROM 10:18 Tujash wi iniastajime: ¿Nunash dekaskek chichamnash antukchaju asajag antukchau ainaji tuina? ¡Dekaskenum antukaju ainawai! Wagki Agagbaunum chichaak: “Chichamak ashí nugkanum etsegkamui”, tawai.
ROM 10:19 Ataktushkam iniastajime: ¿Dekaskek Israel aidaush dekaachu aina? Duka nuninchauwai. Dekatkauk Moisés Apajuí tama iina pachipas: “Wi atumnak akasbau emattajime mina aentsjuchu aina nuna yayaakun, tuja atum aents imanchau diyajum nuna yayaakun kajemtikattajime”, tiuwai.
ROM 10:20 Dutiksag Isaiaschakam wakejus chichaak: “Aents mina egatú wajakchau aidau, waitkaju ainawai. Tuja aents mina pachitus inimjutú wajakchau aidaunum, iwainmamkauwaitjai”, tiuwai.
ROM 10:21 Junashkam Israel aidaun pachis: “Ashí tsawantai dakasjai mina aentsug intimkiu, ai aimtau aina nuna yaigtasan”, tiuwai.
ROM 11:1 Yamai juna tajime: ¿Apajuish niina aentsji Israel aidaunash idaisau asag tawa? ¡Duka nuninchauwai! Wagki witjai Israel weantunuk Abraham weantu asan Benjamín aajakua nunú weantunuk.
ROM 11:2 Apajuik jutii Israel aidautinak yaunchuk, juka midau atinme tusa etegtamjau asa, ni aentsji aidautinak idaitamsachui. ¿Atumek eke dekatsjumek Apajuí chichame agagbaunum, Elías profeta aajakua nu, Israel aents aidau pegkegchau dutikamujin Apajuin ujaak:
ROM 11:3 “Apuh, chichamjumin etsejin aidaunak ashí kajegkag, ame altarjumnash yumpuajag, wiki juwakmatai minashkam mantuatatus aintuinawai”, tiuwa duka?
ROM 11:4 Tama Apajuí ayaak: “Wi siete mil aents mina umigtin aidaun ayamjukan uwemtijajai, apajimtai Baal tutaya nuna eme anentus tikishmatug emematchaju aidaun”, tiuwai.
ROM 11:5 Yamaishkam nunisag ujumak Israel weantu aidau Apajuí wait anenjamag etegjamu aidauti juwakji.
ROM 11:6 Nunú wait anenjá etegjamu aidautik, jutii pegkeg takasbaujinig etegjamu ainatsji, wagki aents pegkeg takasbaujin diigsá etegtaiyaitkuig, Apajuí wait anenkagtutaijig atsumainai.
ROM 11:7 Nunin asamtaish ¿wajintu anentaimtumainaitji? Israel aidautik egakuitag nuig jeganchau ainaji; tujash ujumak Israel weantu aidauti Apajuí wait anenjamag etegjamu aidautik, uwemtak jukiu ainaji. Nuniajin tikich aidauk utujimag juwakajui.
ROM 11:8 Apajuí chichame agagbaunum: “Apajuí, Israel aidaunak ditá wakaninia egamujinak anentaimtuja dekaachmin emakui, dutikamu asag yamaikish nuninuk ainawai, jiinish wainmachua nunin, antuinakush antakchauwa nunin atinme”, tawa nunisag.
ROM 11:9 Aikasag Apu David aajakua nu agagbaunmashkam: “Dita shiig aneastasa fiestamainamua duke ditanak, iwagtukbau dawenum jigká emetmaina numamtuk awajkatnume. Nuniachkush suwenum jigká maumaina numamtuk wajainak suwimkan jukitnume.
ROM 11:10 Jiinish bushapaju asa shiig wainmatsama numamtuk wajaktinme, tuntupenish aents kijinun yanakí punus wekaemaina numamtuk tuke waitin atinme”, tiuwai.
ROM 11:11 Yamai juna tajai, ¿Israel aidautin pachipas kaya tukumká iyautiama numamtuk wajakaje tawa nunash, nunisag juwaktin asamtaig tawa? ¡Makichkish nuninchauwai! Nunak Israel aidau chicham umiktinun umikchagmatai judiochu aidau uwemtan jukitnume tabaunum nunikajui, nuniagtai Israel aidau akasmatjitnume tawai.
ROM 11:12 Nunú mina pataag aidau intimkimunum, Apajuí ashí aentsun pegkegnum yaitan nagkabauwai. Dutikau asa: ¡Dekaskenum mina pataag aidau ashí Apajuin umijiagtaik, aan nagkaemas pegkegnum yaigtinai!
ROM 11:13 Nuadui atum judiochu aidautigmin tajime: Apajuí minak judiochu aidau chicham ujaktá tusa etegka awetiuwai. Nunin asamtai wi takaag junak, eme anentsan diiyajai.
ROM 11:14 Wi judiochu aidaunum aatus takaamun wainainak, mina pataag aidaush Apajuí akasmatchajaintash nuninak wajumkesh uwemjatnume tusan wakegajai.
ROM 11:15 Dutika judío aidau idaisamua dui ashí aents aidau Apajuijai epegtuniawaju ainawai. Aikasag mina pataag aidaun Apajuí ataktú niina aentsji emaktina duik jakau ataktú nantamaina numamtuk awajkatnai.
ROM 11:16 Pag najanatasa nagkamku nanegbauwa duka, Apajuinu atí tusa pegkeemtikamu asa, ashí nanegbauwa dushakam pegkejam ainawai; antsag ajak Apajuinu atí tusa pegkeemtikamu asa, kanaweshkam pegkeemtikamu ainawai.
ROM 11:17 Tuja Judío aidau ajak olivo tutaya nunin aina nuna kanawe ujumak tsupigbauwa nuwi ikamia olivo kanawe jukí dekas ajaknum ikakmau asa, nuna kagkapenian shiig pegkejan juwa numamtuk Apajuí awajtamkaje atum judiochu ainajum nuna jutii judío ainag nujai.
ROM 11:18 Dutikamu asajum judío aidau ajakan kanawega numamtin aina nu imanchau diyakum ememaigpa. Tuja atum eme anenmamkugmek, adeagtajum, kanawega duka niina pegkegjinak kagkapenak inagkeatmaitsui, kagkapega nuuwai pegkegjin kanawen inagkeata duka, numamtuk atumnash awajtamkajui.
ROM 11:19 Atum anentaimsagmek: “Tujash Apajuí judío aidaunak ajaka kanawe tsupika ajaptayama numamtuk ditanak awakajama, jutiin ajaknum ikamaina numamtuk awajtamkata tau asa”, tumainaitjume.
ROM 11:20 Dekaske, ditak Cristo dekaskeapi tachamunmag dutikam asajui, tujash atumek ni dekaskeapi tabauwa duik uwemtikamu ainagme. Dutikamu asajum emematsuk dekas ayatak puyattsá anentaimtumastajum.
ROM 11:21 Wagki Apajuí judío aidau ajaka kanawega numamtin aina nuna tsagkujachua nunin asa, aminashkam tsagkugtamjashtatui.
ROM 11:22 Anentaimsajum diistajum, Apajuik shiig pegkejai nuigtushkam ni tibaujinash uwaechauwai. Iman asa judío aidau tupanjam ni tibaujinak imatiksag umiak idaisauwai. Nunin asamtai atumek ni wait anenjamu asajum nunisjumek pujumainaitjume, nu nunishtaik atumnash idaitamain asamtai.
ROM 11:23 Tuja judío aidaushkam dita dekaskeapi tuchataijiya nuna idaiyagtaik, numí kanawe tsupika ajapamu jukí duik aajakbaunmag ikamaina numamtuk awajkagtinai, Apajuik senchigtina ibau asa.
ROM 11:24 Wagki atumek yaunchkek ikamia olivo aina numamtin aajakuitjume, nuninaitkujum kanawe tsupika jukí dekas ajak olivonmash ikamainchau aig ikamaina numamtuk awajkamu ainajum nuniaish, ¡wagkag dekas judío aidau ajak olivoa numamtin aina nunash ataktú yaunchuk aajakbaujin ikamaina numamtuk awajkashti!
ROM 11:25 Yatsug aidauh, Apajuí dutikatnuji dekaachbau aajakua nu dekaatajum tusan wakegajai, wainkajum yacha iman anenmamkujum ememá yujaijum tusan. Israel aina nuiya ujumak antumtikmainchaush juwakaje, duka nunisag batsamsag ashí judiochu aidau niiní wayawagtina imanui jegantagtinai.
ROM 11:26 Nu nunikmatai ashí Israel aidaunak Apajuí uwemtijatnai agagbaunum tawa dutiksag, duka: “Agkanmitkagtinuk Sión yaaktanum taa, Jacopa uchijí weantu aidau pegkegchaujinak utsankatnai”.
ROM 11:27 “Wi ditajai chichaman apaktinaitag duka, ditá tudaujin tsagkujatnaitag nu atinai”, tawai.
ROM 11:28 Nunin asag judío aidauk yamajam chicham etsegbauwa nuna dakituidau asag Apajuí shiwaji ainawai. Nunak atum uwemjatnume tabaunum nuninawai, tujash Apajuik ditanak aneawai, ditá muunji aajakajua nuna mina aentsug atinme tusa etegkauwa dui.
ROM 11:29 Apajuik anentag sukagtusbaujiya nunak atankagtuchui, antsag midau atinme tusa etejamujiya nunash yapajichui.
ROM 11:30 Atum judiochu aidautigmek yaunchkek Apajuí chichameg umigchau aajakuitjume, tujash yamaik judío aidau Apajuí chichamen umijuinachu asamtai, Apajuí atumin wait anenjamjaje.
ROM 11:31 Nunisag yamai ditashkam Apajuinak umijuinatsui, nuniagtai Apajuí atumin wait anenjamjau asa dutiksag ditanash wait anenjata tau asa dutikauwai.
ROM 11:32 Apajuik ashí aentsnak umigtukchatnume tusa idaisauwai, nunikagmatai ashí ijumag wait anenjata tau asa.
ROM 11:33 ¡Anentai jegagmaitsui, Apajuí yachajiya duka, nuigtú anentaimtuja dutiktaiya dushakam! ¡Ni takaamujiya nuna anentaimtug ejetumainuk makichkish atsawai, tuja ni juní atí tawa nuna, wagkag tawa tusa ejetumainush shiig atsawai!
ROM 11:34 Wagki: “¿Ya dekagmainaita Apajuí anentaibaujinash nuniachkush ya ju jutikata tusash jintinmainaita?
ROM 11:35 Tuja ¿ya yaunchkesh Apajuinash makichik wajiinash susauwaita minash aikasag sujustí tusash?”
ROM 11:36 Ashí najankamu aina duka Ni najankamu ainawai, nunú aina duka ni chichamenig ainawai, nunin asa ashí niinuk ainawai. Iman asamtai: ¡Imá nigki tuke ememattai atí! Aatus atí.
ROM 12:1 Nuadui mina yatsug aidauwah, Apajuí wait anenjamjau asamtai, atumi iyashmia duka iwaku ofrenda pegkejam Apajuinash shiig awagmamaina nunú Apajuí susatajum tusan segajime. Nuuwai dekaskenum Apajuí emematkujum dutikmainaitjum duka.
ROM 12:2 Atumek Apajuí nemagchau pujuina nujai betekak pujusaigpajum; nunitsuk dekas anentaimtajum yapajiatajum nunitai pujutjumish yapajinau atí, nuniakjum dekattagme Apajuí wakegamujiya nu, pegkeja dushakam, Apajuin shiig awagma nunú nuigtú imagnisa pujuta dushakam.
ROM 12:3 Minak Apajuí wait anenjug chicham etsegkata tujutiuwa dui ashí atumin tajime: Makichkitigmesh atum wagaakuk anentaimtumigpajum. Duka nunitsuk, dekas makí makichkitijum ebetmamjajum anentaimkau atajum, atumin Apajuí shiig yupichu dutikatnun dekaskeapi tau asagmin sujamsamua nunisjumek.
ROM 12:4 Wagki, iina iyashig makichkitak kuashat akanjamu ajawai, tujash nuninaitak makichik takata nunakek takainatsui.
ROM 12:5 Nunisaik jutiishkam, kuashat ainayatku, Cristo nemagbaunum makichik iyashia nunin weenaji, nunin asaja tikich aidaujaish pempeentunisaik atsumdayaji.
ROM 12:6 Nunin asamtai Apajuí makí makichik niimtin yupichuch takastinun anenjauch sujamsauwa dutiksaik dutikawagmi. Ni Apajuí tabaujin yupichu etsegtanum susamuk Apajuiyai dekaskeapi tabaujish wajuk ajawa dutiksag dutikmainai,
ROM 12:7 ni aentsun yain atí tusa Apajuí wakegat susamuk, dutiksag wakegas dutikati. Apajuí yupichu jintinkagtuati tusa susamushkam, dutiksag jintinkagtumainai;
ROM 12:8 pegkegnum wakemitkagtina duka dutiksag dutikati; aents atsubaun suwaushkam, shiig aneas dutikati; Cristo nemagnun apuji aidaushkam shiig puyatjus takastinme; aents waitiaun wait anentaushkam aneas dutikati.
ROM 12:9 Tikich aidaujaish dekaskenum pempeentunikjum aneenitajum, pegkegchauwa duka dakitakjum, pegkeja duke wakejusjum takau atajum.
ROM 12:10 Cristo nemajin aidautigmek pempeentunisjumek aneenitajum, nuniakjum ajantunisa niiniakjum eme anendaitajum.
ROM 12:11 Kakanmamsatajum, iina Apuji wakejusa takagsata tabaunum, dakik aigpajum.
ROM 12:12 Shiig aneasjum pujustajum atum jukitin dakakjum pujau asajum. Waitiakjumesh emamkesjum katsunjatajum. Apajuí aujut idaisaigpajum.
ROM 12:13 Jesucristo nemajin aidau atsumainakuig yaigtajum. Aents amina ijagtamsatatus minaushkam, shiig anentsajum jukitajum.
ROM 12:14 Waitkagmainakuish, pegkegnumak chichagtajum. Pegkegchauk chichagtsuk, pegkegnumag chichagtajum.
ROM 12:15 Shiig aneas pujaujaig, atumshakam shiig aneasjum pujustajum, tuja buutuidaujaig, atumshakam buuttajum.
ROM 12:16 Atú atumek shiig ijuntsajum pujustajum, emebau aigpajum, aents imanchauch aina nujai betek anenmamtajum. Tikichin nagkaesau yacha imanuk anenmamigpa.
ROM 12:17 Pegkegchau awajtamainakuish makichkish pegkegchaunmag iikaigpajum, duka nunitsuk pegkeg aina duke takaakjum ashí tikich aidaush pegkeg iwaintukta tabaunum kakanmamsatajum.
ROM 12:18 Atumek utugsanuk ashí aents aidaujaish shiig agkan pujusag tusajum kakanmamsatajum.
ROM 12:19 Aneetaig yatsug aidauh, atumkek iikmakaigpa, Apajuí idaitusta ni suwimkanak susati, wagki Apajuí chichame agagbaunum: “Witjai aents tikichin pegkegchau awagbaun suwimkan suwaunuk, nunin asan aents pegkegchaunak wi suwimkan susattajai”, Apu tiuwai.
ROM 12:20 Nunin asamtai: “Amina shiwajum yapajakuish yutai ajamsata, kitamakuishkam umutaish ajamsata. Ame aajam dutikamin, amina pegkegchau awajtamin asa datsagtatui”, tiuwai.
ROM 12:21 Pegkegchauwa nu depetkamu aigpajum, pegkegchauwa duka pegkeg takaakjum depetkatajum.
ROM 13:1 Ashí aents aidauk apu aina nuwi sumimain ainawai, wagki makichik apukesh nigki, wi apu atajai tusa apu weguk atsawai. Yamai apu aina duka Apajuí apu emamu ainawai.
ROM 13:2 Nunin asamtai nunú apua nuwi sumimtan dakituidauk, Apajuí apu emamu aina nuna shiwagmainawai, nuna nunidauk ditak suwimkanak jumain ainawai.
ROM 13:3 Wagki apu aina duka aents pegkejan takaidau ishamkati tusaik adaikachbau ainawai, untsu pegkegchau takaina nu ishamainawai. Apu ishamkats pujustasam wakegakmek pegkeja duke takastá, nunitai apu aidaush eme anenjamas diigmastinme.
ROM 13:4 Ditak pegkeja nuna takastinme tusa Apajuí apusamu asag, atumnak pegkegnum yaimpamain ainawai. Untsu ame pegkegchau takaakmek dekas apuk ishamainaitme. Wagki apuk, wainak suwimkan sukagtusti tusaik adaikachbau ainawai. Apajuí pegkejan takastinme tusa apusamu asag pegkegchau takaina nuna suwimkan suwawai.
ROM 13:5 Nuadui apu aidaujaig sumitkau amain ainag duka suwimkan sujusai tamawaikik nunimaitsuji, jutiik duka pegkegchau anentaimsa diyam aig tabaunum nunimainai.
ROM 13:6 Nuadui apunu kuichik atin tibauwa dushakam dutiksagmek akikmagme, wagki apu aidauk Apajuí takastinme tusa apusamu asag nuna umiinak takaidau asagmatai.
ROM 13:7 Makí makichkitijum wajinma akikmamain ajutjamainawa duka betek akikmaktajum. Apunu atin aidaush dutiksagmek akikmaktajum, nuniakjum ajantusjum diyakjum eme anentsajum diitajum.
ROM 13:8 Makichik aentskesh diwimkaigpajum, diwimkagtukmesh akikmatskek idaisaigpajum. Dekas pempeentunisaik aneenita nuuwai akikmamainchauwa duka, wagki tikich aidaush iik anenmamsa aneamua dui chicham umiktajum tibauwa duka uminu asamtai.
ROM 13:9 Apajuí chicham umiktajum tiuwa duka: “Tsanijinawaigpa, magkagtuawaigpa, kasamkaigpa, dekaskechuk tikichik tsanumjujaigpa, tikichdauk anentaimtusa wakejukaigpa”, tawai. Nuigtú tikich aidau umimain awa duka: “Tikich aidaush amek anenmamsam aneeta”, tawa nunú imatiksaik umiamunum, chicham umiktinnum tawa duka ashí uminui.
ROM 13:10 Aents aneenit ajamuk, tikichnak pegkegchaunak takagmaitsui. Nuniau asamtai chicham umiktajum tibau umiamua duka, aneenita nuuwai.
ROM 13:11 Nunin asamtai jujú tawa duka umiktajum. Wagki atumek dekagme Cristo jui taatnuji tsawantak namput wajaschae, jutii dekaskeapi tusa Cristo nemagkau aayag duik imá dukap aayi. Tujash yamaik tsawantak tikima shiig jegawai, Apajuí uwemtijamjatna duka. Nuniau asamtai atumshakam kajinkagmek batsamigpajum aneaku batsamsatajum.
ROM 13:12 Pegkegchau takata duka shiig senchi juikne, nuniau Cristo jui ataktú minitai, kiyag au tsawautai tsaaptin wegama numamtuk wajaktata dusha tikiju wajasé. Nuadui pegkegchau takaakjum suwenum wekaemaina numamtuk wajainajum duka idaisatajum, suntag maaniatin asa uminas aama numamtuk pegkeg takaakjum umintsajum pujustajum.
ROM 13:13 Nuadui yamai nagkamsaik tsawai wekaemaina numamtuk shiig kuitamamka pujusagmi. Ijunag yuwinamu wekaetusjum ayatak yuwa yuwakua weakjum nampet batsamtajum duka idaisatajum, iyashnum takanit tunamatja pujugtash, jiyanit yujagku tikichdau diigsá iish imanuk atajai tukamá kajegkagtutash.
ROM 13:14 Duka nunitsuk, Apu Jesucristo nemagkaju aidaush wajuk pujumaina ainawa nunisaik pujuinaku, iina iyashí pegkegchau takamtikta dushakam idaisagmi.
ROM 14:1 Cristo nemagna nu dekaskeapi tayatak shiig dekainachu wainkugmesh shiig anentsajum jukitajum, tujash dita anentaimaina nunú pachisjum jiyanitsuk.
ROM 14:2 Wagki, awai aents, ashí yutai aina duka yumainai tuidaush, nuniai tikich Cristui dekaskeapi tayatak shiig dekachu asa ajak dita ajakmamun yuu ainawai.
ROM 14:3 Nuniau asamtai ashí yutai aidaun tinamag yuwina duka, tikich nuna yuwinachunash dakitmaitsui. Nunisag ashí tinamag yuwinatsu dushakam chichamnak patatmaitsui tinamag yuwina nunak, wagki Apajuí nunú aidaunak ashí niina aentsji emaku asamtai.
ROM 14:4 Nunina nuwish, ¿amesh ya asamea tikichi inakega dusha chichamash patatush wekaeme? Apajuiyai ni inau asa shiig takataish, shiig takashtaish tumaina duka, wagki iina Apujig senchigtina ibau asa niinig ebetmamjau atinme tusa yaigtatui.
ROM 14:5 Nuniai, awai aents makichik tsawantan puyatjus diyau, tikichia nu, tsawantak ashí betekajama tuidaush ainawai. Makí makichik aents aidauk dita tsawantan wajuk anentaimtuinawa nunak dita anentaimtusbaujiya nunisag ebetmamjati.
ROM 14:6 Aents makichik tsawantan dekas wagaakua iman anentaimtus dutika duka, dekas Apajuin eme anentus dutikawai. Nunisag ashí tinamag yuwina dushakam Apajuin eme anentus dutikainawai, wagki Apajuin see tusa yuwidau asag. Ashí tinamag yuwinatsu dushakam, Apu Apajuí eme anentamunum yuwinatsui, wagki ditashkam Apajuin see tuidau asag.
ROM 14:7 Wagki jutiik iik shiig awagmamkatasaik pujatsji, jaakuishkam shiig awagmamkatasaik jainatsji.
ROM 14:8 Nuadui iwaaku pujakuik Apu Cristo shiig awajkata tabaunum pujuinaji, jaakuishkam Apu Cristo shiig awagmainaji. Nunin asaja iwaaku pujakuish, jaakuishkam imá Apu Cristunuk ainaji.
ROM 14:9 Wagki Cristo maamuitak ataktú nantakiuwa nunak aents iwaaku aina nuna nuigtú jakau aidaunashkam Apuji wajastatus nunikui.
ROM 14:10 Nunin asamtaish, ¿wagka yatsumish chichamash patatme? ¿Wagka wainkaya nuninush niiniagme? Ashí jutii aidautik Apajuí eemtin tuwaká ajin ni tujamtinai.
ROM 14:11 Wagki agagbaunum: “ ‘Witjai dekas tuke pujuunuk’ tawai Apu. Nuadui ashí aents aidauk, tikishmatjujag emematjuinak: ‘Ametme dekas Apajuimek’, tujutiagtinai”, tawai.
ROM 14:12 Ashí jutii aidautik makí makichkiti ii wajuk takasuitji duka dutiksaik Apajuí ujaktinaitji.
ROM 14:13 Nuadui Cristo nemajin aidautik pempeentunisaikik chichamak patatdaikachagmi. Dekas ayatak kuitamamkatajum, ame pegkegchau diyachu asam takatai, tikich yatsum waipak niishkam dutiksag takakmá tunamamaina nunú.
ROM 14:14 Wika Apu Jesusan nemajin asan, makichkish yutai aina duka pegkegchauwap ainawa tatsujai. Untsu makichik aents ashí tinamjá yuwamuk pegkegchauwai takug, nigki tawai, nuniau asa tinamjá yuwamuk niinig pegkegchauwai.
ROM 14:15 Yamai juna tajime, ame yuwam nuna waipak yatsum anentaimak waitmainai, nu aaja waitkakmek, duka anejatkum nuniatsme. Ame yuwam nuna pegkegchauwapi tayatak yukamá tunamag megkaemainai Cristo niinish mantamdauwa nunin aig.
ROM 14:16 Nu atum yuwakjumesh pegkeg dutikajum duka, yatsum Apajuí tupanmain wainkugmek idaisatajum tikich aidau pegkegchau chichagtamkainum.
ROM 14:17 Apajuik jutiinak ii yuwamun, ii umamun diisag inapatsui. Nigka Wakaní Pegkeji jutiiní puja nu yaimpasmatai pegkeg takaaku, shiig agkan pujaku, dakujusa pujutnum inajatui.
ROM 14:18 Juna ashí imatiksag Cristo wakejamun umiidauk, Apajuin shiig awagmainawai. Nunidau asagmatai, tikich aents aidaush pegkeg ainawai tumain ainawai.
ROM 14:19 Nuniau asamtai ashí tikich aidaujaish shiig agkan pujuta nu egakagmi, nuninaku pempeentunisaik Apajuinu dekatnum yainikagmi.
ROM 14:20 Apajuí aentsnum pegkejan dutikauwa nunú, yutanum utugchat apujmaunum wainkaya nunin juwakai tuidau asaja. Dekaskenmag ashí yutai aina duka pegkeg ainawai, untsu pegkegchauwa duka dita tunamamainji yuwaku Jesucristui dekaskeapi tabauji emegkatmaina nuuwai.
ROM 14:21 Nuadui dekas nejek yumaitsume, umutaish nampemain aina duka umumaitsume, makichkish amina yatsum pegkegchau wemainuk, anentaimak waitmainkesh nuigtú kakaakchaunum jegamainkesh dutikawaipa.
ROM 14:22 Ame dekaskeapi tabaunum dutikam nunak Apajuish dekagtamui. Nunin asamtai shiig aneasagtinai aents ni takaamujin bakumamainush atsugbau aina duka.
ROM 14:23 Tujash utujimaitak yuwa duka, nigki suwimak jumainnak egatmamui, wagki juka tudauk ekagtumaitsuapi tusa dekaskeapi tabauwai anentaimas yuwachu asa. Ashí ii dekaskeapi tachayatku dutikamua duka, tudauwai.
ROM 15:1 Nuadui jutii Apajuiyai dekaskeapi tabaunum ichichmamjau aidautik, tikich aidau Apajuí dekaskeapi tabaunum ichichmamjachu aina nu yaimainaitji, ii shiig aneasta tabauwa duke egatmamtsuk.
ROM 15:2 Nuniaku tikich Cristo nemagkau aidaush shiig awajkatasa wakemainaitji, pegkegnum yaigkam, ditash Cristui dekaskeapi tabaunum ichichmamjatnume tusa.
ROM 15:3 Wagki, Cristukesh imá nigki shiig awagmamkatasag wakekachui, duka niiní uminkauwai Apajuí chichame agagbaunum: “Apajuiyah, aents amina pegkegchaun chichagtamaina nunak, mina tujutuinawai”, tawa nu.
ROM 15:4 Wagki yaunchuk Apajuí chichame agagbauwa nuwi agakbauwa duka, jutiin jintinjamatin asamtai agakbauwai. Nunú chichama nujai ichichmamku, ebetmamsa pujamunum Apajuí dakamuk ajutkagtawai.
ROM 15:5 Apajuí ebetmamja pujutan sukagtak ichichkagtina nu atumnash yaimpaktinme shiig anendaisa batsamtanum, Cristo Jesús jintinjamawajua nunisjumek pujusminjum.
ROM 15:6 Nuniakjum ashí betek ijuntsajum, Apajuí, iina Apuji Jesucristo Apajiya nunú ememattajum.
ROM 15:7 Nuniakjum pempeentunisjumek shiig anendaisajum judaitajum, Cristo atumin Apajuin ememattinme tujamu asa, shiig aneas jujamkiajua nunisjumek.
ROM 15:8 Juna tajime: Cristo Jesusak judío aidautin yaimpaktatus tauwai, Apajuí iina muunji aidaun anagkuauwa nuna umiktatus. Ni nuniak iwainakui Apajuik dekas ni anagkagtuamujinak betek umina nuna.
ROM 15:9 Nuigtushkam Cristuk tauwai, judiochu aidaush Apajuí wait anenjamu asag, ditash Apajuin ememattinme tusa; agagbaunum: “Nuadui Apajuiyah, wika judiochu aidaujai ijuntsan amina emematkun, daagmin pachisan kantamjuatjame”, tibauwa dui.
ROM 15:10 Tikich agagbaunum tawai: “Judiochu aidautigmesh, judío Apajuí etegjamu asag Apajuí uchijí aina nujai dakujustajum”.
ROM 15:11 Nuigtú tikich agagbaunmashkam: “Ashí aents judiochu aidautigmeshkam Apu Cristo emematkujum, ni imanjiya duke pachisjum chichastajum”, tawai.
ROM 15:12 Tuja Isaías agakshakam: “Isaí weantunmaya atinai, ashí aents judiochu aidaunmash inamjatnuk, nunitai ashí aents aidauk imá niinak dakagtinai”, tiuwai.
ROM 15:13 Apajuí niiní mijamtsuk dakatan sukagtina nu, atum dekaskeapi tautigminak shiig dakunkut pujutan amaak, shiig agkan pujutnashkam amastinme. Dutijamainak Wakaní Pegkeji senchijiya nujai shiig senchi wakesa Apajuí dakamainnumash sujamsatnume.
ROM 15:14 Mina yatsug aidauh, atumek pegkeg wajakin ainajum dui tikich jintinmainush dekau asajum, pempeentunisjumek chichagdaimain ainajum nunak shiig dekajai.
ROM 15:15 Nuniayatkun ju papiin agatjime, dekaskenum atum dekamtikata tabau ajuta nuna, tuke aneakuk atinme tau asan. Apajuí minak wait anenjuju asa,
ROM 15:16 judiochu aidaush Cristo Jesús pachisam ujaktá uwemjatnume tusa awetiuwai. Tibau asan, yamajam chicham Apajuinua nuna judiochu aidaunash ujaajai. Wakaní Pegkeji pegkeemtikiajam tudaugtuchu wajas pujuinakui Apajuí emtinish ofrenda shiig pegkeja imanun ditanash iwainakta tau asan.
ROM 15:17 Nuadui wi Apajuí takaju asan eme anenmamainuk ajutui, Cristo Jesusan pachisan chichagkagtag dui.
ROM 15:18 Wika tikichdaunakesh pachisan chichatsuk, Cristo, judiochu aidaush Apajuin umigkatnume tujutiuwa nunak chichagkagtakun takasmajai.
ROM 15:19 Wakaní Pegkeji senchijin aents dutikmainchaunash iwainajan takaakun, Jerusalén nagkamsan ashí yantamnumash yamajam chichama junak etse etsegkawan Iliria nugkanmash Cristo pachisnuk etsejajai.
ROM 15:20 Aajan wika wekaesan yamajam chichama nuna etsegkun takasjai, tuwí Cristo pachis etsegkachaje nuwi, wagki tikich etsegkamunum wisha nuig pataká chichagkagtutnak dakitau asan.
ROM 15:21 Ju chicham agagbau: “Yaunchkesh ni pachisa etsegbaunash antujakchau aina nu wainkagtin ainawai, ni pachisa etsegbaunash antukchaju aina nu dekaawagtin ainawai”, tawai.
ROM 15:22 Nuna etsegkun pujau asan, atumin wainkatasan minitá takunush minimain dekapjachmaijai.
ROM 15:23 Tujash yamaik jui takamainuk atsugtau asamtai, kuashat mijadai atumiin minitasan wakegá pujau asan,
ROM 15:24 España weakun atumin wainkatasan minitag tajai. Nunikan atumin wainkan shiig aneasan ujumak tsawanchikesh pujusan nagkaemakui, atum yainkatajum wi wemaina duka.
ROM 15:25 Tujash yamaikik Jerusalén wegajai, yatsut waituidau yaigtin awa juna ejetuatasan.
ROM 15:26 Junak yatsut macedonianmaya, Acayanmaya aidaujai, Jerusalegnumia Jesucristun nemajuidau waituina nu yaigmí tusag wakesag anenjauch ijumjaje.
ROM 15:27 Juna wakegas pegkejan jutikawaja junak, judío aidau Jesusa nemajuina nu, ditak judiochu ainaig wakannum uwemtan pachisag ujakagbau asag, ditashkam judío aidau atsumiagtai yainak aikainawai.
ROM 15:28 Ashí ju dutikmain ajuta nuna ashimkan nuigtú atum ijumjaujum nuna jukin Jerusalén jegaan ditá susan ukuakun, España weakun minittajai nuniakun atumnashkam ijagsattajime.
ROM 15:29 Wika shiig dekajai, wi anui atumiin taattag duik Jesucristo pegkegnum yumigtamsagtata nunak.
ROM 15:30 Yatsug aidauh, iina Apuji Jesucristo daajin, Wakaní Pegkeji aneenitan sujama nujai segajime, wi maaniamu ajuta nuig atumshakam ijutkau atajum, nuniakjum mina pachittsajum Apajuí aujtugsatajum tusan.
ROM 15:31 Apajuí segatajum dekaskeapi tuinachu Judea batsata nuwi agkanmitkajuati, tuja anentag ijumjamun yatsut Jerusalén batsataidau yaigtinun ejetuattag nunashkam shiig anentus jukitnume tabaunum.
ROM 15:32 Wisha Apajuí wakegakuig, shiig aneasan atumiin taan ayamjatjai.
ROM 15:33 Apajuí shiig agkan pujutan sukagtina nu ashí atumjaish atí. Aatus atí.
ROM 16:1 Iina umayí Febe, diaconisa Cencreanum iglesia atsumiagtai nuanui, niishkam dita atsumiagtai yaimna nuna awemag nunú,
ROM 16:2 Apu Jesucristo nemajin asamtai, shiig anentsajum jukitajum. Jesucristui dekaskeapi tinu aidau wajuk judaimainaita dutiksagmek, ashí ni atsumakuish yaigtajum. Nigka tikich aidaunash kuashat yaigkui, nigki minash yainkauwai.
ROM 16:3 Priscila, Aquilajai kumpamjutuatajum, wi Cristo Jesusan pachisa etsegtaku wekagai yainkau aina nu.
ROM 16:4 Ditak, mina ayamjutuinak pujutjin ishamainnum jegantaju aina dui see tajai, imá wikik see tatsujai, iglesia judiochu aina dushakam see tuinawai.
ROM 16:5 Tuja niina jeen iglesia ijunaina dushakam kumpamjutuatajum, aiksagmek Epeneto mina aneetaijua dushakam, niiyai asianmaya nagkamchak Cristun nemagkauwa duka.
ROM 16:6 María atumin senchi yaimpakua dushakam kumpamjutuatajum,
ROM 16:7 aikasmek Andrónico, Juniasjai kumpamjutuatajum, ditak mina pataag ainawai, nuigtush wijai betek achinkajui. Ditanak apóstol aina dushakam aneas diin ainawai. Wika eke Cristun nemagtsuk pujai, ditá Cristunak nemagkaju ainawai.
ROM 16:8 Dutiksamek Amplias, mina aneetaig iina Apuji Jesucristun nemaja dushakam kumpamjutuatajum.
ROM 16:9 Kumpamjutuatajum Urbano, wi Cristo Jesusan pachisan etsejai kuashat yainkauwa nu, tuja mina aneetaig Estaquischakam.
ROM 16:10 Aikasmek Apeles, Cristo takagtusti tusa etegkamua nu, tuja Aristóbulo jeenia aidaush kumpamjutuatajum.
ROM 16:11 Mina pataag Herodiogshakam kumpamjutuatajum, Narciso jeenia Apu Jesucristun nemajuina dushakam.
ROM 16:12 Aikasmek Trifena, Trifosajai Jesucristo takatjin takainak batsata nu, tuja iina aneetai ubag Pérsida Apu Jesusdaun shiig senchi takasua dushakam kumpamjutuatajum.
ROM 16:13 Nuigtú Rufo, Apu Jesús etegkamua nu, tuja niina dukují minashkam dukujua imana dushakam kumpamjutuatajum.
ROM 16:14 Aiksamek Asíncrito, Flegonte, Hermes, Patrobas, Hermas, nuigtushkam ashí yatsug ditajai ijutkau batsataina dushakam kumpamjutuatajum.
ROM 16:15 Dutiksamek Filólogo, Julia, Nereo, niina umayijai, Olimpaschakam, tuja ashí aents Jesucristo nemajin aidau niijai ijunag batsataina dushakam kumpamjutuatajum.
ROM 16:16 Atumek pempeentunikjum shiig anendaisajum pegkeg anentaiyai kumpamdaiyatajum. Ashí Cristo iglesiaji aidau kumpamjamainawai.
ROM 16:17 Yatsug aidauh, segajime diyaku atajum, atum Jesucristo chichame jintinkagtamu antukuitjum nuna yapajiawag jintinjamainakui kanakaijum, nunin aidaujaig atumek ijunjaigpa.
ROM 16:18 Nunú aents aidauk ii Apuji Cristunak takajainatsui, dita wakejuinamun egainak tuidau asag, chicham pegkegchi aujuinak, shiig tsanuinawai imanis anentaimainachunak.
ROM 16:19 Ashí dekagtamainawai atum Jesucristo umigjum nunak, nuadui shiig aneajai. Nuniau asan utusajag pegkegchaunak takatsuk, aan nagkaemas pegkejan takainak pegkegnumak iwainmamkatnume tusan wakegajai.
ROM 16:20 Apajuí shiig agkan pujutan sukagtina nu wamak iwanchin depetugmaktatui, nunisag iina Apuji Jesucristua dushakam wait anenjabaujin iwaintugmaktatui.
ROM 16:21 Timoteo, mina takatnum yainta nunú atumnash kumpamjamainawai. Tuja mina pataag Lucio, Jasón, Sosípater aina dushakam aikasag kumpamjamainawai.
ROM 16:22 Wika Terciowaitjai, wi agajai jujú papiinak, nuniau asan wishakam Apu Jesucristo daajin kumpamjime.
ROM 16:23 Gayo wi niina jeen pujag dushakam kumpamjamainawai, ashí iglesia atsumiagtaish yaina nu. Erasto ju yaaktanum kuichkin kuitamna dushakam, iina yachi Cuartojai kumpamjamainawai.
ROM 16:24 Iina Apuji Jesucristo wait anenkagtutaijiya dushakam ashí atuminish atí. Aatus atí.
ROM 16:25 Apajuí emematiagmi, wi yamajam chichaman etsejag nuanuish, Jesucristo pachisan jintinkagtag nuig atumnash ebetmamjatnume tusa yaimpa nunú. Juka Apajuí tuke puju nugkash najannatsaig dutikatjai tusa anentaimtusbau dekaashbau aajakun iwainaka nuuwai.
ROM 16:26 Tujash yamaik iwaintugmakji Apajuí etsegtin aajakajua nunú agajajua nunak, nuigtush Apajuí tuke pujuuwa nuna ashí aents aidauk imá Jesucristunak dekaskeapi tuinak umigkatnume tibauwa nunashkam.
ROM 16:27 ¡Apajuí imá nigki yacha, ashí wajiin dekauwa nu tuke emematiagmi Jesucristo daaji pachisa! Aatus atí.
1CO 1:1 Witjai Pabloitjai, Jesucristo apostoljiyaitjai Apajuí wakegau asamtai, yatsug Sostenesjai pujusan,
1CO 1:2 atum iglesia Apajuinu aidautijum yaakat Corinto batsatutijum Cristo Jesús pegkeemtiki mina aentsug pegkejam atinme tusa, ashí tikich nugkanmaya aidau Jesucristo daajin adaiyina nujai etegtamjau asa ditá Apuji iina Apujiya nunú,
1CO 1:3 Apajuí iina Apajiya nunú, Apu Jesucristujai wait anenjamag, shiig agkan pujutan atumnash amastinme.
1CO 1:4 Tuke Apajuí see tusanké ajai atumin pachisan, atum Cristo Jesús nemajuidau asagmin, Apajuí wait anenjamjaju asamtai.
1CO 1:5 Wagki atumnak Apajuí Cristo Jesusai ashí pegkeg wakannumia aina nunak amasajui: Chichatan nuigtú dekatnashkam,
1CO 1:6 nunisag wi Cristo pachisan etsegkauwaitag dushakam atuminig imanisag juwatjamkajui.
1CO 1:7 Nunin asamtai Apajuí don sujamsamua duka ajutjamainawai, iina Apuji Jesucristo wantinkatnuji dakakjum batsatjum dui.
1CO 1:8 Apajuí nigki kuitamjamkattagme, ii Apuji Jesucristo minitta duwish bakumamainchau agtinme tujamu asa.
1CO 1:9 Apajuik ni anagkagtuamujinak imatiksag uminai, nigki etegtamjauwai niina Uchijí Jesucristo iina Apujiya nujai ijutkau pujustinme tusa.
1CO 1:10 Yatsug aidauh, iina Apuji Jesucristo daajin segajime, ashí atum aidautigmek tuké betek atuesajum takastajum, nuniamunum atsutí kanainamu, shiig anendaisajum pujustajum, nuniau asajum dutikatasa anentaimtamugmik nuní nuninuk anentaimtamu atinme.
1CO 1:11 Mina yatsug aidauh, junak tajime, atum pampandayá batsatjum nuna, Cloé patayí dekamtijuau asamtai.
1CO 1:12 Juna titag tajime, atum ainajum anuiya: “Wika Pablon nemagnaitjai”, tai; tikich: “Wika Apolon nemagnaitjai”, tawai. Nuniai: “Wika Cefasan nemagnaitjai” tai, tikich: “Wika Cristo nemagnaitjai”, tau awai.
1CO 1:13 ¿Cristush akanjamukaih? ¿Pablok atumiin achinjauwait? ¿Nuniachkugmesh Pablo daajinig yamigbau ainajum?
1CO 1:14 Wika atumnak yamigchauwaitjim dui Apajuin see tajai, imá Crisponak, Gayojaig yamigbaijai,
1CO 1:15 makichkish mina daajui yamigbau ainaji tujutijum tau asan.
1CO 1:16 Estefanasa patayinash yamigbaijai, nuigtuk dekatsjai tikichnash yamijuashitag nunak.
1CO 1:17 Minak Cristuk yamijatjata tusag awetichui, yamajam chicham etsegkata tusa awetiuwai; aents niina yachajin chichamaina nuniknuk etsegkashbaijai, Cristo cruznum achigbauwa nuna wainkaya nunin diisainum tau asan.
1CO 1:18 Cristo cruznum jakauwa nu pachisa etsegbauwa nunak wainak diinawai, megkaetanum batsata duka; tujash jutii uwemjau aidautinmag, ju chicham etsegbauwa juka Apajuí senchijiyai.
1CO 1:19 Chicham agagbaushkam: “Wi yacha aidaunak yachachu emaktatjai, dutikakun dekataijinash emegkatjattajai”, tawai.
1CO 1:20 ¡Apajuí ju nugkanmaya unuimat aidaunak wainak emake! dutikamu asa yacha aidau, chicham umiktinnash jintikagtin nuigtú tikichjai chicham ataish imaakas chichau aina dushakam wainak juwakaje
1CO 1:21 Wagki Apajuí ni yachajin iwainakua nunak aentsuk ditá yachajiya nujaig dekamainchau wajasajui, tujash Apajuik wakeekauwai, chicham etsegbaun imanchau diinaigkesh dekaskeapi tuina nuna uwemtikatatus.
1CO 1:22 Judío aidauk wainchatai iwainamun wainkatatus wakegainawai, nuniai griego aidauk aentsú yachajin antuktatus wakegainawai.
1CO 1:23 Tujash jutiik Cristo numinum achinjauwa nu pachisa etsejuinaji, nunak judío aidauk dakitus diinai, judiochu aina duka wainkaya nunin diinawai.
1CO 1:24 Tujash Apajuí untsukbau aina nudauk, judío akush, griego akushkam, Cristuk Apajuí senchijiyai nuigtú Apajuí yachajiyai.
1CO 1:25 Apajuinu imanchau diyamua nuuwai aentsú yachajiya nuna nagkaesauwa nu, Apajuinu kakaakchau diyamua nuuwai aentsú senchijiya nuna nagkaesau senchigtina duka.
1CO 1:26 Yatsug aidauh, atumek, aents diismak yacha wajakin, apu chichame antugtai aina iman, eme anentsá diitai ainatsjum duka dekaamagme.
1CO 1:27 Nunin ainagminig Apajuik, aents yacha aidaun inatsakta tau asa, aents wainkauchia nuna etegkauwai. Dutiksag aents chichame antugtai aidaun inatsaktatus, aents imanchauch aina nuna etegkauwai.
1CO 1:28 Apajuik aents imanchauch diyaku jujú nugka juig dakitjamu aina nuna etegjauwai, aents eme anentai aina duka wainak juwaktinme tau asa.
1CO 1:29 Nunak Apajuik, niina eemtinish ditak eme anenmaminum tau asa dutikauwai.
1CO 1:30 Tujash Apajuiya duke atumnak Cristo Jesusai ijupajajui, dutijama Cristunak iina yachají, iina pegkeg etamin, iina pegkeemtijamin nuigtú iina agkanmitkagbau emauwai.
1CO 1:31 Nunin asamtai chicham agagbauwa nuwish: “Makichik aentskesh eme anenmamjatatus wakegauk, Apu Jesusai eme anenmamjati”, tibau awai.
1CO 2:1 Yatsug aidauh, wi atumin Apajuinun pachisan ujaktasan tauwaitag nunak, aents yacha shiig jintiag chichaman chichaaku aina imanun iwainmamkatasanuk taachbaijai.
1CO 2:2 Wika atumjai pujubiag duik atumdaun dekatasanuk wakekachbaijai, imá Jesucristo numinum achigbauwa nunak pachisan ujakbaijime.
1CO 2:3 Wi atumin wantintukbaijim duik, imanchauch dekapmamkun senchi sapigmakun kujaibiajai.
1CO 2:4 Mina chichamjuk, wi chicham etsegbaushkam, aents yachameagbaujijai tikichin wakeemitkaktatus chichau aina nunitsuk, Wakaní Pegkeji dekamtijamunum chichagkagtakun, senchijinash iwainakbaijai,
1CO 2:5 atum dekaskeapi tabaugmia duka aentsú yachajiya nuwi najaneau achati, Apajuí senchijiya nui najaneau atí tau asan.
1CO 2:6 Nuniayatku dekaskeapi tabaujin katsugkú aina duka, dekata nujai jintiaja ujaaji. Tujash nu unuimatak ju nugka jui unuimaina nuiya unuimagchamui, nuigtú ju nugka jui senchigtin inamaina nudaukesh atsui, duka wamak megkaejatin ainawai.
1CO 2:7 Jutiik Apajuí yachají yaunchuk dekaachbau uukbau aajakua nu chichaji, nunak Apajuí nugkanash najantsuk niina imanjin ii shiig aneastinjin dutikauwai.
1CO 2:8 Nunak ju nugka jui inamin aina dukesh makichkish dekachaju ainawai, wagki nuna dekau ainakug iina Apuji dekas imana nunak achijag maachaju amain ainawai.
1CO 2:9 Tuja agagbaunmash: “Apajuí umigkauwai niina aneen aidaunak, wají makichkish wainkachbaun, antutkesh antukchamun, anentaimtutkesh anentaimtugchamun”, tawai.
1CO 2:10 Tujash Apajuí jutiinak Wakaní Pegkejiya nujai dekamtijamauwai. Wakania nuuwai ashí shiig mamikis dekauk, Apajuinu makichkish dekamainchauwa nunashkam.
1CO 2:11 ¿Tujash aents aidautish wajupatiya tikich anentaibaush dekamainaitji? Nunak aentsú wakaní niiní puja duke imá shiig dekawai. Nunisag Wakaní Pegkejiya duke dekawai Apajuí anentaibaujiya nunak.
1CO 2:12 Jutiik ju nugka juiya wakanik jukichu ainaji, Wakaní Pegkeji Apajuinumiaya nunú jukiu ainaji, Apajuí wait anenjamag ashí amasbau aina nuna dekaati tujamu asamtai,
1CO 2:13 nunú pachisa chichainag duka, aents jintinjamamu unuimagbauk chichainatsji, Wakaní Pegkeji jintinjamamu chichainaji. Nunidau asaja wakannumia pachisa jintinkagtakuik, Wakaní Pegkeji tawa dutiksaik jintinkagtaji.
1CO 2:14 Tujash aents wakanin akiinachu aina duka, Apajuí Wakaniya nuiya pachisa chichamunak wainkaya nunin diidau asag antumainchau dekapenawai, Wakaní Pegkeji atsugbau asag.
1CO 2:15 Wakaní Pegkeji ajamua duke ashí jintinkagtamunak dekaskeapi tusag dekamainai; tujash nunú aentsnak makichkish nuninchauwai tumain ainatsui.
1CO 2:16 Chicham agagbaunum: “¿Yaa Apu Apajuí anentaibaujinash dekagmainaita? ¡Makichkish Apajuí jintinmainuk atsawai!” tawai. Tujash jutiiyaitji Cristo anentaimtaiya nu anentaimkau aidautik.
1CO 3:1 Yatsug aidauh, wika aents wakanin katsugkú aidau chichagmaina imatikanuk chichagkachbaijime, ayatak aents wakanin katsuagchau aidau chichagmaina dutiksanuk chichagkabiajime, Cristo nemagtanmag uchuchia nunin asagmin.
1CO 3:2 Ayatak jintintuabiajime shiig yupichuchin, uchi kuwijuch katsugman yumainchau asamtai muntsu amutiama numamtuk. Wagki atumek yutai katsugmak yumainchauwa nunin asagmin, yamaikishkam nuninuk ainagme,
1CO 3:3 nuniau asajum tikichi pujutji diigsajum kajejagme, nuniakjum maanitash maaniakjum, tupandaikajum batsatjume. Ju aaja nuniakjum aents Apajuí nemagchau aina nujai betek pujutjum yapajitsuk batsatjume.
1CO 3:4 Atum: “Wika Pablon nemagnaitjai” tajumin, tikich chichau: “Wika Apolon nemagnaitjai” tuinajum duka, ayatak aentsú anentaimtaiji anentaimkujum tu yujagme.
1CO 3:5 ¿Pablosh wajimpaita, Apolosh wajimpaita? Jutiik ayatak Apajuí takajin ainaji, nunin asá jutii chicham etsegbau antukjum, dekaskeapi tiu ainagme; duka Apu Jesús makí makichik dutikata tujabauwa dutiksaik takasaju ainaji.
1CO 3:6 Wi atumi anentaimin Apajuí chichamen ajakmamiajai, dutikamun Apolo ajak yumí ukattayama numamtuk awajtamkajui Apajuí chichamega nuna ujapak, tujash Apajuiya nuuwai ashí niinua nuna dekamtijamawajua duka.
1CO 3:7 Nunin asamtai ajakan ajau, yumi ajakan ukatjau aina duka wainkayai, Apajuiyai dekas ashí ajakmakbaun tsakapa duka.
1CO 3:8 Wika Apolojaig mai betekaitjai, nunin asajin Apajuí iina takatjin diigtamas makí makichik akigmaktinai.
1CO 3:9 Apajuí takatjiya nunú takagtanmag Apolok mina atuetaijui; untsu atumek Apajuí ajakji, Apajuí jee ainagme.
1CO 3:10 Apajuí wait anenjug, Cristo chichame etsegtukta tujutiuwa duwi, wika jega jegamtan yacha nagkamak shugkú ajiyama numamtuk, wi Cristo pachisan nagkamsan atumnak jintintuauwaitjime. Tikich nui ekeniag emainawai, tujash makí makichik kuitamas jegamaina numamtuk, Apajuí chichamenak shiig jintinjamain ainawai.
1CO 3:11 Aatus asamtai, nagkamsa Jesucristo pachisa etsegkamua duka, jega jegamkatasa nagkamku shugku ajitiama numamtuk awakamui, nunin asamtai pataká tikich ajimaitsu numamtinai.
1CO 3:12 Makichik aents nunú shugku ajigbauwa nui ekenag jegamak oroi, jiju plata tutaiyai, kaya pegkejuch aidauwai, numiikesh, tagkanaikesh, dukaikesh jegaamainai;
1CO 3:13 nunú aidauk makí makichik takasbau dekagbau tsawan atina dui, ashí paan wantinjatnai, wajiyaik jegamkamuita nunú. Ashí takasbau aidauk jiiyai apetiama numamtuk dekapeamu agtinai.
1CO 3:14 Tuja jegamkamua nunú esakchamtaig, nuna jegamkauwa duka akiam atinai.
1CO 3:15 Tuja ni takasbauji esagkamuk wainak juwaktinai; nuniaigkish nigka uwemjatnai, jega esatai jiinmaina numamtuk.
1CO 3:16 ¿Atumek dekatsjumek jega Apajuí ememattai asagmin, Apajuí Wakaní atumiin puja duka?
1CO 3:17 Makichik aentskesh jega Apajuí ememattain tsayaunak, Apajuishkam dutiksag niinash tsaiktinai. Wagki, jega Apajuí ememattaiya duka pegkegmai, duka atum ainagme.
1CO 3:18 Makichkitigmekesh atumek tsanumajaigpajum. Atum ainajum anuiyatijum, ju nugkanmaya unuimatai aina nu ashí dekauwa iman dekapmamutigmek, dekachua nunin atajum, dekas yacha atasa wakegakjumek.
1CO 3:19 Ju nugkanmaya yachameta duka, Apajuí diismak shiig wainkayai, agagbau aatus tawai: “Apajuik yacha aidaunak ditá tsanumtaiji aina nuig achiawai”.
1CO 3:20 Nuigtushkam tawai: “Apu Apajuí dekawai yacha aidau anentaimtaiji aina duka, wainkaya nunak”.
1CO 3:21 Nuadui makichik aentskesh, tikich aentsun pachisag emematmaitsui, wagki, jujú aidauk ashí atumdau ainawai:
1CO 3:22 Wishakam, Apoloshkam, Cefaschakam, nugka dushakam, pujutash, jaamushkam, atum yamai pujajum dushakam, atak atina dushakam. Ashí ju aidauk atumdau ainawai,
1CO 3:23 tuja atumetjume Cristunu aidautigmek, untsu Cristuwai Apajuinuk.
1CO 4:1 Atumek jutiik Cristo inake aina nunin anentaimkagtustajum, Apajuinu yaunchuk dekaachbau aajakua nu jintinkagtuata tusa awemamu ainag dui.
1CO 4:2 Yamai dekaami, jintinkagtuata tibau aidauk, kajittsá diyam amaina nuna iwainmamain ainawai.
1CO 4:3 Wika, atumkesh, tikich aidaukesh mina pachittsag nuní takaawai tujutmaina nunak pachiatsjai. Wikik, shiijash takaag atsa tunatú takaajash nunak tumamaitsujai.
1CO 4:4 Mina pegkegchau anentaimtamu atsugta nuniaigkish, pegkejaitme tamak amaitsujai, tujash mina tujutmaina duka, imá iina Apujiya duke.
1CO 4:5 Nuadui atumek makichik aentskesh nuniktinai tusagmek tiigpa eke tsawan jegatsaigkik, ayatak dakastajum Apu Jesús jui taa, suwenum awa nunak tsaaptinnum wainmaina imatikas aentsú anentaimtajin aunak shiig paan iwainakui wainkatnaitji. Dutika Apajuí makí makichik aentsdaun diijus shiig aneastinjin susatnai.
1CO 4:6 Yatsug aidauh, midaun, Apolonujai pachisan tajim junak, ditash Apajuí chichame agagbau tawa nuna uwaegak anentaimtsuk, jutiinu diis unuimajagti tusan tajime, makichkia nu eme anentsá diyakjum, tikichia nu junik diisaijum tau asan.
1CO 4:7 Atumnash ¿ya tikichin nagkaesau pegkejash etabiaje? ¿Apajuí amaschamush wají ajutjamainawa? Ashí Apajuí amasajua nuniaish, ¿wagka atumek jukiuwa nunin anenmamkugmesh ememagme?
1CO 4:8 Atum anentaimsagmek: Jutiik Apajuí chichameg shiig dekaidau asaja, tikichik atsumatsji tajume, nuniau asajum atumek apu wajasjum jutiik atsumkagtatsjume. Atumesh dekas apu waigkagminig, jutiish atumjai betekak inaamainaitji.
1CO 4:9 Wagki wi anentaimsanuk, apóstol aidautik Apajuí idaisamu asajinis, mantamnati tusag chichaman umigtamkaje dekapmamaji. Nunin asajin aents ju nugka juiya aidauk, ángel aidaushkam, wakeejumainun iwainakui diistasa wakeejutiama numamtuk awajtamainawai.
1CO 4:10 Jutiik Cristo aneaku, ni pachisa etsegtamunum anentainkachua nunin diyam ainaji, nuniajin atumek Cristo nemaju asajum shiig anentaimkau ainagme. Jutii kakaakchau ainajin, atumek ichichmamjau ainagme, jutiinak wainkauch diigmainak, atumnak eme anenjamas diigmainawai.
1CO 4:11 Yamaikishkam jutiik nujantai, kitakaish, nugkumain atsugtamkuish waituinaji, aents aidaush tutitag awajtamainawai, ii pujumainush atsugtamainawai.
1CO 4:12 Jutii uwejenig takai takainakua pimpikiagji, pegkegchau chichagtamainakuish pegkegnumak chichajuinaji, waitkagmainakuish katsuntuinaji.
1CO 4:13 Pegkegchaunum augmatjamainakuish, wait anentsá chichajuinaji. Yamaikish ju nugka juig tsuwata nunin diigmainak ashí aentsuk dakitjamainawai.
1CO 4:14 Junak idatsagtasankesh agattsujime, mina uchig anentsan aneau asan chichagkun tajime.
1CO 4:15 Wagki atum Cristo Jesús nemaju asagmin diez mil jintinkagtin ajutjamkush apak kuashtak amaitsui. Atumí apanuk witjai, wagki yamajam chicham wi etsegbau antukjum Cristo nemagkau asagmin.
1CO 4:16 Nunin asagmin segajime, wi pujag junisjumek pujustajum tusan.
1CO 4:17 Nuadui Timoteo mina uchijua iman aneetaig, Apu Jesusan shiig umigna nuna awetajime; wi Cristo Jesusa nemajin asanush wajuk pujuwaitja, nuigtush wajuk jintinkagtinaitja ashí yantamnum wekaesan ashí iglesianmash nunashkam ujapaktinme tusan.
1CO 4:18 Atum ainajum anuiya ememaush ainawai; wi atumiin tuke taashtina nunin anentaimtujuinak.
1CO 4:19 Tujash wika Apu wakegakuig wamkes minittajai, nunikan anui taakun wainkatag tajai nunú aents ememak tu yujaina dusha dekas Apajuí senchijin takainakpash tuina, atsa ayatak chichainak tu yujainatsuash.
1CO 4:20 Wagki Apajuí aentsnum inama nunak, ayatak chichamaikik inajattsui, niina senchijiya nujai inajatui.
1CO 4:21 ¿Wají wakegagme, taa suwimkan sujamsati, nuniachkush anenkai shiig anenjamas aujtamsatnume tajumek?
1CO 5:1 Dekanae atum ainajum anuiya tsanijinainamu, nunak Apajuí anentaimtuchu aidaukesh nuninatsui; nuniamunum makichik apají nuween nuwejai betek ema pujuju tabau antuewai.
1CO 5:2 Nuniaig atumek ememá batsatjume, nunitsuk wake besemag batsatkujum, nunú aents nuninun takaa puja duka jiikjum awemamainaitjume.
1CO 5:3 Wi atumjai ijunja pujachkunush wakannumag ijutkajai, nunin asan wi anui pujusan aents nunikun tumainaitag nuna tajai:
1CO 5:4 Apu Jesucristo daajin, niina senchijin ijuntatjum nuanuig, wishakam mina wakanjuig atumjai ijutkau atatag dui;
1CO 5:5 nunú aentsuk Satanás idaitustajum, dutikam ni nuna iyashin suwimak susam waitiak, pujutjin yapajia Apu Jesús minitaish wakanin uwemjati.
1CO 5:6 Atumek ememasjum anentaimainchau ainagme, dekagme: “Pag najanatasa nanegbauwa nunak levadura piipich ajuntuamuitak ashí utujá wampushmitkauwai” tawa duka.
1CO 5:7 Levadura yaunchuk ajutjamajakajua duka utsagtajum, nunikjum yamajam nanegbau wajastajum, levaduragtuchu ainajum nunisjumek, wagki iina pascuaji Cristua duka jutiiní mantamdau asamtai.
1CO 5:8 Nunin asamtai yaunchuk tudau takainaku pegkegchau unuimatkamu aina nunisaik pujusaik Cristo ememattsuk, yamajam pujut dekas pegkeg aina nu takainaku dekaskenum emematiagmi.
1CO 5:9 Wi duik papiin agajan awetibiajim duishkam tsanijimtan idaiyinatsu nujaig ijunjaigpajum tibaijime.
1CO 5:10 Wika junak anui aents Cristun nemagchau aidau tsanijimtan batsamtin, ekagbau, suji, tsanumag kasamin, apajuimtai dakumkamun emematin batsataina nujai tupandaikatajum tusanuk tichabiajime. Nu nunikta takugmek ju nugka ju ukuakjum nunimainaitjume.
1CO 5:11 Wika nunak, Jesucristo nemajin asá yatsut ainaji tayatak tsanijimtanak wekaetin, suji, apajimtai dakumkamun emematin, pegkegchaun chichagkagtin, nampen, tsanumag kasamin aina nujaig ijunmaitsugme tibaijime. Aents nunin aidaujaig makichkish ijunjagmek yuwawaigpajum.
1CO 5:12 Wika Apajuí nemajuinatsu nunak suwimak susatajum tumaitsujime. Untsu Jesús nemagjum nuiya pegkegchau takainakuig, atumek pempeentunisjumek wajuk juwaktatua duka tumain ainagme.
1CO 5:13 Apajuí nemajuinatsu nunak, Apajuí titatui; nunin asamtai atumiin pegkegchau takau puja duka jiikí ajapatajum.
1CO 6:1 Atum mai Jesucristo nemajin ainayatkujum chicham tsuwapjuniagmesh, ¿wagka apu chichama iwajin Apajuí anentaimtuchu aina dusha, ni epegtugmati tusagmesh wejagme, Jesusa nemajin pegkejam aina nujaig epegmainush?
1CO 6:2 ¿Atumek dekatsjumek Apajuí aentsji pegkejam aina duka, Apajuí nemagchau aina nuna dita diistin aina duka? Nunú atum iman dutikatin ainayatkugmesh, ¿wagka imanchau aina dusha atumkesh iwagmainchaush dekapeagme?
1CO 6:3 ¿Nuigtush dekatsjumek ángel aidaush jutiik diistin ainag duka? Aan nagkaemasa juiya utugchat aina duka dutikmainaitji.
1CO 6:4 Nunin asamtai chicham tsuwapjuniagmesh, ¿wagka apu chichaman epegtujuati tusagmesh wejagme iglesianum ijutkachu aina nunin aish?
1CO 6:5 Junak datsamas dekapsatnume tusan tajime. ¿Atum Apajuí nemajin ainajum anuiyag yatsut chicham epegtan yachak makichkish atsau asamtaig,
1CO 6:6 yatsumjai pempeentunikjumesh, apu chichaman epegkin Apajuí nemagchau aidau eemtinish jiyaní yujajum?
1CO 6:7 Atum Jesucristo nemagkau aidautigmek pempeentunikjum chicham tsuwapjuniajum duka tikima pegkegchauwai. ¿Wagka pegkegchau takagtamainakuish ayatak katsunjá idaitsugme? ¿Wagka kasagtamainakuish jukiti tusam idaitsugme?
1CO 6:8 Tujash atumetjume pegkegchau takaajum duka, Jesusa nemajin aidautigmek yatsumjai pempeentunikjum kasagdaiyinau asajum.
1CO 6:9 ¿Atumek dekatsjumek aents pegkegchaun takaidauk Apajuí inamtaijinig wayashtinai tawa duka? Wainkajum tsanumajaigpajum: Aents tsanijimtanak yujajin aidau, apajuimtai dakumkamun emematin aidau, ekagbau aidau, aishmagkuitak nuwameaushkam, aishmag nuwameaun dutiknushkam,
1CO 6:10 kasamin aidaush, suji aidau, nampenchakam, chicham dekaskechunak tsanumnushkam, tsanumag kasamin aidaushkam Apajuí inamtaijinig wayachagtinai.
1CO 6:11 Yaunchkek atum ainajum anuiyatigmesh nunin aajakuitjume. Tujash yamaik Apu Jesucristo nemagkagmin, Apajuí wakaniya nunú atumin egkemtugmajag tudaugmin utsanjamkag pegkemtijabiajui, nuadui Apajuik pegkegma iman diigmainawai.
1CO 6:12 “Ashí wají aidaunak takamainaitjai”, tujash ashí shiig awajtumain ainatsui, “ashí wají aidaunak takamainaitjai”, tujash nunú depetukti tusanush idaimamaitsujai.
1CO 6:13 Jushakam: “Yutai aidauk wakenum egkematin ainawai, wakea duka yutai egkematna nuuwai”, tibauwa duka dekaske, nunak Apajuí mai emegkaktinai; tujash iyashia duka ashí pegkegchau iyashnum takanitai aina nuwi takamtiktai atí tusaik najanachbauwai, iyashik Apu Jesucristunui, tuja Apu Jesucristo iyashnak ni wakega dutiksag takamtiksatatus wakegawai.
1CO 6:14 Apajuí niina senchijinig Apu Jesucristun inankiuwa dutiksag jutiinashkam niina senchijinig inaantamkitnai.
1CO 6:15 ¿Atumek dekatsjumek atumi iyashmia duka Cristo iyashiya nuninkea duka? ¿Nunú Cristo iyashiya nuninkea nu jukiish nuwa akiká takataiya nuna iyashijaish apatmainkaih? Duka dutikmaitsui.
1CO 6:16 ¿Nuigtush dekatsjumek, makichik aentskesh nuwa akiká takataijai iyashnum tsaninakug, makichik iyash wega duka? Apajuí chichame agagbaunmash aikasag: “Jimag iyashia duka makichik iyash agtatui”, tawai.
1CO 6:17 Tujash makichik aentskesh Apu Cristo nemajuk niijai ijunkug wakannumag makichik weawai.
1CO 6:18 Tupanjatajum ashí pegkegchau iyashnum takanitai aina nu. Ashí tikich tudau aina duka iyashnak imatikag pegkegchauk ematsui, tujash nuwá tsanijima duka niina iyashinak tudau takajak nuniawai.
1CO 6:19 ¿Atumek dekatsjumek atumi iyashmia duka Wakaní Pegkeji jega duka? Nunuwai Apajuí amasbau atumin pujugtamjum nu. Nunin asa iyashik atumdauchui.
1CO 6:20 Wagki atumek Apajuí akikmaka sumakbau ainagme, nuadui atumi iyashmijai Apajuí ememattajum.
1CO 7:1 Jukimjai atum mina papí awetugkujum nuwenbau pachisam inintsamujum nunashkam. Nuna pachisnuk dekas imá pegkejak nuwenmainchau ainawai tajai.
1CO 7:2 Tujash puyatjumaina duka kuashat tsanijinaidau asagmatai, makí makichik nuwentin amain ainawai. Nuwashkam nunisag makí makichik aishintin amainai.
1CO 7:3 Aishmag nuwentin aidauk, nuwejai umigdaimain awa nunak dutiksag umimainai; nunisag nuwa aidaushkam aishijaig nunimain ainawai.
1CO 7:4 Nuwa aishinna nuna iyashig niinuchui, duka niina aishinui; nunisag aishmag nuwenna nuna iyashishkam niinuchui, duka niina nuwenui.
1CO 7:5 Nunin asamtai iyashnum tsanitnumag pempeentunikjumek dakitdaimain ainatsjume. Untsu Apajuí mamiksá aujsata tabaunum shiig chichasá machik tupandaimainai. Nuna nunikajash wakegat au asamtai Iwanch pegkegchaunum takamtijusai tuidau asag, wamkes ataktú ijunmain ainawai.
1CO 7:6 Wi ashí juna taja nunak ju umiktajum tusan tatsujime, ayatak nunimain ainagme tusan tajime.
1CO 7:7 Wika wakegajai ashí aishmag aidautigmek wiiya juninuk amainaitjume tusan; tujash makí makichik Apajuí don susamu ajuinawai, duka makichik niimtin ajamu ai; tikichik, tikich niimtin ajuinawai.
1CO 7:8 Tuja nuwenchau aidaunak, nuwa waje aidaunashkam wiiya juninuk nuwenchau amainai tajai.
1CO 7:9 Tujash aents iyashí wakega nuna depetuk pujumainchauk, nuwenati. Dekas pegkejai nuwenbauk, senchi wakegaku waitú pujumaina nu.
1CO 7:10 Untsu nuwenau aidaunak wi tatsujai, Apu Jesús tawai: Nuwak aishinak idaimaitsui.
1CO 7:11 Tuja nuwa aishin ukuakug nematsuk pujustí, nunimainchauwaitkug aishijai epegtunia juwakti; nunisag aishmagshakam nuwenak idaimaitsui.
1CO 7:12 Nuigtú tikich aidaun wi tajai, nunak Apu Jesús tatsui: Makichik yatsut Cristo nemajin, nuwa Apajuí nemagchaun ayaakush, nuwa niijaig pujustatus wakeetaig, idaitsuk niijaig pujumainai.
1CO 7:13 Tuja nuwa Apajuí nemajin, aishi Apajuí nemagchaunum detakuk niijaig pujustatus wakeetaik aishinak ukukinmegka.
1CO 7:14 Wagki aishmag Apajuí nemagchauwa duka, niina nuweg Apajuí nemajin asamtai, niinash Apajuí yaimainai. Nunisag nuwa Apajuí nemagchauwa dushakam, aishmag Apajuí nemajin asamtai niinashkam Apajuí yaimainai, nunin achagtaik dita uchijí aina duka Apajuí nemagchau uchijí aina nunin amain asamtai.
1CO 7:15 Untsu Apajuin dekaskeapi tuchaujai nuwenamu, idaidaisami tusa imatjamak idaimainai, nunik agkan juwamainai, Apajuí dekaskeapi tuina nu aishmag nuniachkush nuwa aidushkam, Apajuik shiig agkan batsamsatnume tusa untsugmaku asamtai.
1CO 7:16 Wagki ¿utugsamek dekaatame ame yaigmash nuwemish uwemainashit dusha? Nunisag ¿utusamek dekatame ame yaigmash aishumish uwemainashit dusha?
1CO 7:17 Nunin asamtai makí makichkitigmin Apu wajuk waketan anenjauch amasajuita nunisjumek pujustajum. Atum wajuk pujautigmina Apajuí untsugmakuita duka nunisjumek amainaitjume. Junak ashí iglesianmaya aidauk nuniktinme tajai.
1CO 7:18 Makichik aents pakaji ajapjuamu pujai Apajuí untsukbauk, nunisag amainai; antsag pakamatsuk pujai Apajuí untsukbaushkam, pakamaktajai tumaitsui.
1CO 7:19 Pakamamua duka wainkayai, pakamachbaushkam wainkayai. Dekas pegkeja duka, Apajuí chicham umiktajum tibauwa nuuwai.
1CO 7:20 Makí makichik aentsuk, wajukunak Apajuish untsukuita nuninuk amainai.
1CO 7:21 Inaku waitkatai pujamin Apajuí untsugmakuitkuig uyumakaipa. Untsu ame agkan wemain akuig, duka dekas kakanmamsata jiinkitasam.
1CO 7:22 Wagki inaku waitkatai pujaun, Apajuí untsukbauk agkan wajas Apu Cristunak umijin weawai. Aantsag agkan pujaun Apajuí untsukbaushkam, Apu Cristo inake weawai.
1CO 7:23 Atumek Apajuí sumakbau ainagme; nunin asajum tikich aidau inaku waitkatai atajai tumaitsugme.
1CO 7:24 Yatsug aidauh, atum wajuk pujautigmina Apajuí utsugmakajuita, duka nuninuk amainaitjume.
1CO 7:25 Untsu aishinchau aidau dita chicham umimainji Apu tujutbauk atsugtawai; tujash wi anentaibaun tajai, Apajuí wait anenjuju asamtai tajim duka kajintsá antugtumain ainagme.
1CO 7:26 Jutiik yamaiya juik tikima utugchatnum pujuinag dui, makí makichkitijum wajuk pujagme duka nunisjumek pujustajum.
1CO 7:27 Ame nuwennaitkumek nuwemik idaisaipa. Nuwem atsakuish nuwenatasamek anentaimtú wekayipa.
1CO 7:28 Tujash ame nuwenkumesh tudau takaakum nuniatsme; nunisag nuwa agkanjam nemakush tudau takaak nuniatsui, nunin aig nuwenawajag utugchatnum jegainak waitmain asagmatai nuna tupanmain ainawai tusan tajai.
1CO 7:29 Yatsug aidauh, juna tita tajime: Tsawantak ujumak juwatjamui, nunin asamtai yamai nagkamsag nuwentin aidauk nuwenchauwa nunis pujumain ainawai.
1CO 7:30 Atum butbaunum pujakjumesh, dakujamunum pujumaina imaanisjum pujustajum; dakujaku pujautigmeshkam, butbaunum pujumaina nunisjum pujustajum; tuja wajiijum sumakjumesh, atumdauchu anentaimtumaina nunisjum pujustajum.
1CO 7:31 Aents ju nugka juiya wají aina nujai shiig aneas pujuidaush nu aina nujaig shiig aneas pujachua nunis pujustinme; wagki ju nugkanmaya wainainag duka megkaetanum au asamtai.
1CO 7:32 Wika wakegajai duka uyumá pujuigpajum tusan. Wagki nuwenchauwa duka imá Apu takatjiya nunak ni shiig awajkata tabaunak uyumamain asamtai.
1CO 7:33 Tujash nuwentin aina duka ju nugkanmaya wají aina nuna niina nuwe shiig awajkata tabaunak uyumainawai.
1CO 7:34 Nunisag nuwa aishinna duka agkanjama nujaig betekchauwai. Agkanjama duka Apajuí takatjiya nuna imá uyumawai, iyashinish wakaninish pegkejam ata tabaunum; untsu aishinna duka ju nugkanmaya wají aina nunak uyumawai wajuk aishinash shiig awagmamainaita nuna.
1CO 7:35 Wika junak atum shiig juwamainun tajime, nunimaitsugme tatsujime, ayatak shiig imagnis utugchat atsau Apu takajuinak pujustinme tusan tajime.
1CO 7:36 Aishmag, ni nuwenamig tibaujiya nu tsakagmatai, nuwenatjai takug, dekas aaja nuniamu niinish shiig juwamain anentaimkug, nuwenati, nu nuniamush tudauchui.
1CO 7:37 Tuja tikich aents nuwentan dakitau asa, shiig agkan pujusan, wi wakegag nunisnuk Apajuin takagsatjai, tusa anentainish nunisag ebetmamag nuwenashtajai takush, pegkejan nuniawai.
1CO 7:38 Nawanjin aentsnum sujauk pegkejai, tuja ni nawanjin aentsnum sujatsu nu imá pegkejai.
1CO 7:39 Nuwa aishintin aina duka aishi iwaaku pujaigkik, tikichnumag nemamaitsui; untsu aishi jakamtai agkan wajas ni wakegamunum nemamainai, tujash Apu Cristo nemagnujai.
1CO 7:40 Tujash wi anentaimsanuk nuwa wajemeag ataktuk nematsuk imá shiig aneas pujumainai tajai. Wishakam Apajuí Wakaní ajutu asamtai anentaimsan tajai.
1CO 8:1 Apajuimtai dakumkamu anagkuaku kuntin maamun pachisan tajim duka ashí dekainaji. Tujash dekata duka emematnum ejekagtawai, untsu anenka duka eemtanum yaijatui.
1CO 8:2 Makichik aentskesh dekauwa iman anenmamuk, eke dekatsui dekas dekamaina nunak.
1CO 8:3 Tujash aents Apajuin anea nunak, Apajuí shiig wainui.
1CO 8:4 Apajuimtai dakumkamu anagkuaku kuntin maamu yuwamua nu pachisaik dekainaji, apajimtai dakumkamu aina duka ju nugka juig wainak aina nu, imá makichki Apajuiya duka, nuigtú tikichik atsawai.
1CO 8:5 Ujumak aents aidau; nayaimpinmash, nugkanmash Apajuik ayawai tuinawai (nu tabaunmag kuashat apajuí, kuashat apu aidaush ayawai),
1CO 8:6 tujash jutiinuk imá makichki Apajuik, ashí najankamu aina nuna Apají, jutiiskam niinuk ainaji, nuigtush iina Apujig Jesucristua duke, niinig ashí najaneaku ainawai, jutiishkam nigki najanamuitji.
1CO 8:7 Tujash ashí dekainatsui dekaskea nunak. Ujumak apajimtai aina nu ememattan unuimatkaju aajakaju asag, apajuimtai anagkuamu maamun dekainayatak yuwinak, ditá anentaimtajin kakaakchau asag ditak tsuwapmamainawai.
1CO 8:8 Apajuik ii yuwamua nuna diisag imá pegkejak diigmatsui, tuja yutai yuwakuish nuní pegkejak wemaitsui, yuwachkuish nuní pegkegchauk wemaitsuji.
1CO 8:9 Tujash atum agkan anentaimkujum dutikajum nuna, dekaskeapi tabaujin kakaakchau aina nunú yuwak tudau weenum tusajum kuitamamkatajum.
1CO 8:10 Ame nunú dekayatkum jega apajuimtai ijuntutainum ekeemsam yutaik, makichik yatsut anentaimtajin kakaakchauwa nunú waipak, niish nunú apajuimtai anagkua maamun wakeejuk yumainai.
1CO 8:11 Ame dekayatkum nuniamin, yatsum Cristun imanis dekatsu nunú megkaemainai, Cristo niinish mantamdau aig.
1CO 8:12 Aaja yatsum tudau takamtikakjum, imanis dekainatsu nu anentaimtaji emestakjumek, Cristo tudau takagkujum aniagme.
1CO 8:13 Nunin asamtai wi yuwamujua nu mina yatsujun tudau emamainaitkuig, nejenak ajumaish yumaitsujai.
1CO 9:1 Wika agkantaitjai apóstol asan, iina Apuji Jesusnash wainkauwaitjai, atumek wi chicham etsegbau antukjum Apu Cristui sujumankau ainagme.
1CO 9:2 Tikich aidauk apostolchauwai tujutuinawai; tujash dekas atuminig nuninchauwaitjai, wagki atum Apu Jesusjai ijutkau pujajum nuuwai mina sellojuk nu iwaintawai dekas apostoloitag nunak.
1CO 9:3 Mina chichama patatjuina nuna tajai:
1CO 9:4 ¿Jutiik yutsuk, umutsuk batsamsati tibauk ainag?
1CO 9:5 ¿Jutiish iina nuwe Jesusa nemajin ayaaku tamainchaukaitag, Cefas nuigtú tikich apóstol aidau, Apu Jesusa yachi aidaujai wajukena nunisaik?
1CO 9:6 ¿Wikik, imá Bernabejaig atum yaigchamu amainaitag?
1CO 9:7 ¿Yaá suntaja ditak akikmakash yu yujaame? ¿Yaita uva ajakuitak nejen yutsuk idainush? ¿Yaita uwijan kuitamiatak muntsujin umutsuk idainush?
1CO 9:8 ¿Junash wiki anentaimsanuk taja? ¿Juna pachis chicham umiktina nuwi tatsuak?
1CO 9:9 Chicham umiktin Moisés agagbauwa nuig: “Toro trigon dajag pakak wekaga nuna nujig jigkatuawaipa”, tawai. ¿Apajuí toron puyatjau asag tiuwait,
1CO 9:10 jutiin pachipas taku tichaukaih? Nunak jutiin pachipas tu agajui. Wagki aents ajan ajama duka, ajakan juwaa dushakam jukittajapi tusa dakainawai.
1CO 9:11 Jutii, ajak wakannumia atumiin ajakbauwaitag nunin asa, shiig kuashat segamainaitjime jutii atsumamunum yaijatkatajum tusa.
1CO 9:12 Tikich aidau atsumainakuig yayajume, jutiik aan nagkaemas yaigbau amainaitji. Tujash jutiik yainkatajum tutsuk, ashí waitiakuish katsunbaiji, yamajam chichaman Cristo pachisa etsegbauwa nuna shiig antumainchau ainum tabaunum.
1CO 9:13 Atumek dekagme jega Apajuí ememattainum takaidauk, nuiyanak yujakaju aina duka, nunisag altarnum takaidaushkam nuiyanak anentag itaamun yuujakú ainawai.
1CO 9:14 Dutiksag Apu Cristushkam, yamajam chichaman etsejuina nunak, chicham etsegbaun antuina nu yaigtinme tiuwai.
1CO 9:15 Tujash midaush nunimain ajutaigkish yainkatajum tusanuk segachmaijime, juna agatjim junash sujustajum tusan segakun tatsujime. Wika chicham etsegbaunum eme anentaimsan akijuinachkuish wekagag junisnuk jakatasan wakegajai.
1CO 9:16 Wi yamajam chichama juna etsegkun ememamainjuk atsugtawai, wagki juka dekas atsumamu asamtai umiktá tibau asan. ¡Wait anenmamain niimajai yamajam chichama juna etsegchaknuk!
1CO 9:17 Nunin asamtai mina wakeetajui wiki nagkaman takasuitkunuk akiam amainaitjai, tujash nu umimain asamtai dutikag nunak Apajuí dutikata tibau asan dutikajai.
1CO 9:18 Nunin asan wi shiig juwamujua duka, yamajam chicham etsegbaunum akijuinatsaig wekaesá takata nuuwai, wi chicham etsegbaunum nunimain ajuta nunak pachitsuk idaiyu asan.
1CO 9:19 Nuadui wika inaku waitkatai achayatkun, ashí aentsun inake wajasjai, kuashat aents Cristun nemagkatnume tabaunum.
1CO 9:20 Judío aidaunum pujaknuk, wishakam judiok wegajai, ditashkam Cristo nemagkatnume tabaunum; nunak Moisés chicham umiktajum tibauwa nuna umiachiatkun chichaman umina nunin wegajai, ditashkam Cristun nemagkatnume tabaunum.
1CO 9:21 Aantsanuk Moisés chicham umiktajum tibauwa nu atsugbau aidaujai pujaknuk wishakam nuninuk wegajai, Apajuí chicham umiktajum tibauwa nuig agkanchauwaitkun, Cristo chicham umiktá tibauwa nuna umiajai, chicham umiktin atsugbau aidaush Cristo nemagkatnume tabaunum.
1CO 9:22 Aents Cristun imatikas dekaskeapi tuinachujai pujaknush, wishakam nuninuk wegajai, chicham ujakta tabaunum. Ashí nunin aina nujaig wishakam nuninuk wajasjai, aaja nuniamunum wajumkesh uwemjatnume tabaunum.
1CO 9:23 Nunak yamajam chicham etsegkata tabaunum nuniajai, wishakam atak ditajai betek ijunjatasan.
1CO 9:24 Atumek dekagme, dekapdayamunum tupikainakug ashí betek tupikainayatak, makichik wagaktata nu wajinak juwame. Nunin asamtai atumesh jukita takugmek kakaagtajum.
1CO 9:25 Ashí aents tupikamunum dekapdaisatin akug, shiig kuitamamin ainawai, atsejutai besegtina nunú jukita tabaunum; untsu jutii kakanmamainag duka, atsejutai atakesh tuke atina nu jukita tabaunum nuninaji.
1CO 9:26 Nuadui wika mamikjamunum jegantatus tupikauwama imaniajai. Nuniau asan maaniajai, tujash wainkan dasenum iyatsuk.
1CO 9:27 Imatikau asan mina iyashjunak wi depetkin, wi wakegamun takamtikajai. Wi chichaman etsejujakuitkun, wainka juwakaig tabaunum.
1CO 10:1 Yatsug aidauh, iina muunji aajakajua nunú, ashí yujagmin wakentin ejakam weenak nayants kapantu tutainum katiajua nunú kajimatkijum tusan dakitajai.
1CO 10:2 Nunikag ashí nunú aidauk yujagminum, nayantsanmash yamigbau juwakajui, nunik Moisesjai ijutkau wajasajui.
1CO 10:3 Nunisag ashí yutai wakannumiaya nunash yuwawajui,
1CO 10:4 Tuja umutainash wakannumiaya nunak ashí uwajajui, wagki wakannumian kaya muunnumian umujakajua nunú uyunajakui, nunú kaya muunta duka Cristo aajakui.
1CO 10:5 Tujash nuiya kuashat aidau Apajuin shiig awajkachajui, nunikaju asag uwegshunum jinaa utsaankajui.
1CO 10:6 Ashí nu nunikajua duka jutii iwaintugmak nunikajui, wají pegkegchauwa nunú anentaimtusa wakegá wekaemainchauwa nuna, dita wajukawajua nunikainum tabaunum.
1CO 10:7 Nuadui atumek ujumak dita wajukawajua nunikjumek apajimtai dakumkamuk emematmaitsugme. Nuna pachis agagbau tawai: “Ashí aentsuk yuwinak, umuinak pekaamsajui, nunikag wajajag nantsemawajui”.
1CO 10:8 Nunin asamtai tsanijinachagmi, ujumak dita wajukawajua nunikaik, nuní yujakmá makichik tsawantaik veintitrés mil aents jinawajui.
1CO 10:9 Apu Cristo dekapsatasaik wakeechagmi. Ujumak dita nuní yujakmag dapí ijinam asajui.
1CO 10:10 Apajuish pegkegchau chichajigpajum. Ujumak aents Apajuí pegkegchau chichajú yujakmá Apajuí awemamu nayaimpinmaya aents ijinam asajui.
1CO 10:11 Nunú iina muunji nunikajua duka, jutiin iwaintugmaji. Nuadui yamai tsawan inagnamunum batsatainag nunú aidautin, ditash nunikainum tusa aneemtijamak agagbauwai.
1CO 10:12 Nunin asamtai ni shiig ebetmamja pujajai tumamushkam kuitamamainai pegkegchau takasaig tabaunum.
1CO 10:13 Atum pegkegchau anentaimtakjum waitiajum nunak tikich aents aidaush nunisag waituinawai, tujash Apajuik betek umina ibau asa atum katsunmainchaunmag waittsati tusag idaitamsachagtatui, ayatak ame pegkegchau anentaimkum waitiam dusha wajuk katsunjam nagkaemainaitme nuna yaimpaktatui.
1CO 10:14 Nuadui aneetaig yatsug aidauh, apajuimtai dakumkamu aina duka tupanjatajum.
1CO 10:15 Junak atumek shiig anentaimkau asagmin tajime, wi tajim juka atum anentaimsajum titajum.
1CO 10:16 Copanum pegkeg yumig awa nunú ijunja see tusa umuinakuik, ¿Cristo achijam numpen ukajua nunú anentaimtusa nuninatsjik? pag puuká yuwinag dushakam, ¿Cristo jutiiní mantamdauwa nunú anentaimtusa nuninatsjik?
1CO 10:17 Kuashat aentsuitku makichik paagkak puuká yuwinag duka, jutiik makichik iyashkea nunin ainaji tusa iwainmamku nuninaji.
1CO 10:18 Israel aidaushkam anentaimsa diistajum, kuntinun maawag altarnum apeenakug nuiyanak nejen yuujakú ainawai, aatus nuninak Apajuijai ijutkau aajakajui.
1CO 10:19 Juna apatka taja junak, judiochu aidau kuntinun maawag apajuimtaiji dakumkamun anagkuina nunú imá pegkejai, nuniachkush dakumkamu aina nu imá pegkeg ainawai tusan tatsujai.
1CO 10:20 Judiochu aidau apajuimtaiji aidaun kuntinun maawag anagkuina nunak, iwanchin anagkuinawai, Apajuinak anagkuinatsui. Nunin asamtai dakitajai atumesh wakan pegkegchau aina nujai ijunkujum wayawaijum tusan.
1CO 10:21 Nuadui atumek copa Apu Cristunua nuiya uwagjum, ajuma dui copa iwanchdau umuu wajamaitsugme; antsagmek Apu Cristo mesajiya nuiya yuwajum, ajuma dui wakan pegkegchau aina nuna mesajin yuu wajamaitsugme.
1CO 10:22 Aaja nuniakuik Apu Cristo ekajeaku nunimainaitji, tujash jutiik ni senchigtina ibau ainatsji.
1CO 10:23 Ashí dutikmainaitjai tujash ashí shiijak awajkagtumaitsui, ashí dutikmainaitjai tujash duka ashí pegkegnumak yaijatmaitsui.
1CO 10:24 Nunin asamtai makichkish niina pegkeg awagmamaina nuna egatsuk, tikichin pegkegnum yaimaina nuna egamain ainawai.
1CO 10:25 Ashí neje sujutainmaya sumaka yuwakjumesh, makichkish iniimsaigpajum, wainka anentaimsaijum;
1CO 10:26 wagki, ju nugka juka nuigtú ashí nugkanum ayá dushakam Apu Jesusdau ainawai.
1CO 10:27 Makichik aents Cristun nemagchau yuwami tusa ipapamtai jegaagmesh, ashí yutai amainamuk yuwatajum makichkish iniimtsuk wainka anentaimsaijum.
1CO 10:28 Nuniagmin, tikich chichagtamak: Ju nejea juka kuntin maa apajimtai anagkuamui tujamkuig yuwawaigpa, nu etsegkamtai dekau asam wainka anentaimsaijum.
1CO 10:29 Junak atumnak tatsujime, tikich wainak anentaimsai tusan tajime. Wi agkan anentaimsan dutikag nuna tikich aents pegkegchaun aniawai tusa chicham patatam amainchauwaitjai.
1CO 10:30 Wi Apajuin see tusan yuwag nunak tikichik pegkegchaunak chichagtumaitsui Apajuin see tusan yuwau asamtai.
1CO 10:31 Nuadui yuwakjumesh umakjumesh, ashí wají dutikakjumesh, ashí Apajuí ememattsajum dutikatajum.
1CO 10:32 Makichkish tikichik pegkegchauk iwaintukaigpa, judío aidaukesh, judiochu aina dukesh, iglesia Apajuinu aina dukeshkam.
1CO 10:33 Wi ashí dutikag nunak ashí tikich aidaunash shiig awajkata tabaunum nuniajai, mina shiig awajta nuna egatsuk, tikichin shiig awagma nuna egajai ditash uwemjatnume tau asan.
1CO 11:1 Wi Cristo pujutin diisan niina nemajag antsagmek, atumshakam mina pujutug diisjum Cristo nemagkatajum.
1CO 11:2 Mina yatsug aidauh, eme anentajime, tuke minash kajimatjutsuk wi jintintuabiajim dutiksagmek betek umidau asagmin.
1CO 11:3 Tujash ashí aishmag aina duka Cristui sumitkau aina nu dekaatajum tusan wakegajai, nuwa aina dushakam aishin sumitkau ainawai, untsu Cristuwai Apajuiyai sumitkauwa duka.
1CO 11:4 Ashí aishmag aidau Apajuí aujak nuniachkush Apajuí chichamen etsejak buuken dukuauk Cristun eme anentus diyachu asa nuniawai.
1CO 11:5 Tuja ashí nuwa aidau Apajuí aujak nuniachkush Apajuí chichamen etsejak buuken dukuachuk, aishin eme anentus diyachu asa nuniawai, intashin ashí awajú asa wajukmaina numamtuk wajau asa.
1CO 11:6 Nuwa buuken dukuachuk, dekas imá pegkeg ashí intashinak awag ajapati. Untsu nuniamu datsan ataik jaanchi dukumakti.
1CO 11:7 Aishmag aidauk Apajuí niimejai betek najanamu asa, Apajuí imanjiya nuna iwainawai, nunin asa buukenak dukumaitsui. Untsu nuwak aishmagku imanjiya nuna iwainawai.
1CO 11:8 Wagki aishmagnak nuwanmayan jukig najanachui, untsu nuwan aishmagnumian juki najanauwai.
1CO 11:9 Aishmagkuk nuwa nigki pujumainchau asamtai najanachbauwai, aishmag nigki pujumainchau asamtai nuwak najanamui.
1CO 11:10 Nunin asamtai nuwak, ángel aidau iwaintukta tabaunum Apajuí aujkug nuniachkush Apajuí chichamen etsegkug buukenak dukumain ainawai.
1CO 11:11 Tujash Apu Jesús nemagbaunmag aishmagkuk nuwajainchuk amaitsui, antsag nuwashkam aishmagjainchuk amaitsui.
1CO 11:12 Duka dekaske, nuwak aishmagnumia najanamui, nunisag aishmagshakam nuwanmag akiinui; tujash duka ashí Apajuí najankamu ainawai.
1CO 11:13 ¿Atumesh pegkejai tumainkaitjum nuwa buuken dukutsuk Apajuin aujkuish?
1CO 11:14 Aishmag wajuku atí tibauwaita duka dekainaji, nuniai aishmag intashin esagman tsakapaina duka datsanmainai.
1CO 11:15 Untsu nuwa intashí tsakapauk eme anentsá diyam ainawai, ditak buuké jaanchi dukumaina nuna intashí ejatkati tibau asa.
1CO 11:16 Juna pachis makichik aentskesh jiyanitkata tuidauk dekamain ainawai, jutii aidautikesh, nuigtú iglesia Apajuinu aina dukesh tikich nunimain unuimatjamu atsujuina nuna.
1CO 11:17 Juna tajim junak eme anentsan tatsujime, wagki dekas pegkegnum ijunmaina nu, nuní pegkegchau etamainnum ijunu asagmin.
1CO 11:18 Dekatkauk antukmajai, atum iglesia aidautijum ijunjum anuiyag ditash kanaidau tabaun, nunak dekas nuninap amainaita tajai.
1CO 11:19 ¡Duka dekas ditash kanaamuk amainai, nuniamunum iwainmamain ainawai, yaita atum ainajum anuiyash dekas Jesusa nemajin aidaush!
1CO 11:20 Aaja tupandaika batsatiatkujum, Apu Jesús kashi yuwak, mina anentaimjuttsajum yuwatajum tiuwa nu dutikami tusajum ijunjum duka dekas nuniatsjume.
1CO 11:21 Wagki nu yuwamunmag makí makichik kashi yuwatnujin itauk niiyá eemak yuwinawai, nuniai tikichik yapajuinai, tikichik nampenawai.
1CO 11:22 ¿Atumek jeenchauk ainajum nuwi yuwakjum umumainaitjum duka? nuniachkugmesh ¿iglesia Apajuinu aina nu imanchauch diyau asagmek yumainji atsujuina nu idatsagtasajum nuniajum? ¿Aniajum duish wajintajimki? ¿emegash anentaimtitjim? nunak makichkish dutikmaitsujime.
1CO 11:23 Wika Apu Jesús tujutbauwa dutiksanuk atumnash jintintuabiajime: Apu Jesusak sujam asauwa nunú kashik pagkan juki,
1CO 11:24 Apajuin see tii puuká chichaak: “Jujú jukijum yuwatajum, juka mina iyashjua nuna iwainawai atumiin wi mantamnattag nuna, juka tuke jutiksagmeké atin atajum mina anentaimjuttsajum”, tiuwai.
1CO 11:25 Aikasag, yuwá nagkankamunum copa juki chichaak: “Ju copa juka mina numpajui yamajam chicham apaamu atata nuna iwainawai, ju copanmaya tuke jutika umakjumek, mina anentaimjuttsajum jutikatajum”, tiuwai.
1CO 11:26 Nunin asamtai tuke jutika ju pag yuwakjumek, ju copanmaya umakjumesh, ni mantamnamujiya nu etsegtakjum nuniagme Apu Jesús minitin asamtai.
1CO 11:27 Tuja nuna makichik aentskesh wajuk dutiktaiyaita nuna shiig dutiktsuk pagkan yuwak, umutai Apu Jesusa copajiya nuiyan umauk, Jesusa iyashí, niina numpe anentaimtusa dutikamu asamtai tunaamak nuniawai.
1CO 11:28 Nuadui eke pagkan yutsuk, copanmayanash umutsuk makí makichik anentaimas niimamain ainawai.
1CO 11:29 Wagki Apu Jesusa iyashí tawa nunash wagka tawa nuna shiig dekatsuk yuwauk, umutnash umakug ni suwimak juwaku waittsatnujinak nuniawai.
1CO 11:30 Nuadui atum ainajum anuiya kuashat jaush ainawai, kakaakchau waigkushkam, nuniai ni jauk kuashat jakaje.
1CO 11:31 Nuniau asamtai: Iik anentaimsa niimakuik Apajuí suwimak suwamak amaitsuji.
1CO 11:32 Tujash Apu Jesús suwimkan sujamkug jintinjamak dutijamui, aents Apajuí nemagchau aidau suwimkan jukiagtin aina nujai suwimkan jukiinum tujamu asa.
1CO 11:33 Nuadui mina yatsug aidauh, Jesús maamua nu anentaimtusjum yuwatasa ijunkugmek dakanistajum.
1CO 11:34 Ni yapajauk niina jeenig yuwati, shiig ijunja takaachbaunum Apajuí suwimkan sujusai tau asa. Tikich tumain awa nunak anui taan ujaktajime.
1CO 12:1 Yatsug aidauh, wakannumian Apajuí don sukagta nuna pachis dekatnume tusan wakegajai.
1CO 12:2 Atumek eke Cristo nemagtsuk batsamsagmek, wainmachujai betek apajuimtai dakumkamu chichachu aina nu emematujakuitjum duka dekagme.
1CO 12:3 Nuadui yamai dekaatajum, makichik aents Apajuí Wakaní chichamtikbauk, Jesusnak pegkegchauk chichagmaitsui. Tuja: “¡Jesusak Apui!” taushkam nigki tatsui, Wakaní Pegkeji chichamtikam tawai.
1CO 12:4 Kuashat niimtin ainawai don aina duka; tujash Wakaní Pegkejiya duke nunak dutikawai.
1CO 12:5 Makí makichik niimtin takamainuk awai; tujash makichik Apua nudauk.
1CO 12:6 Apajuiya duke ashí wají aina nunak, ashí aentsun makí makichik niimtinun takamtikmaina duka.
1CO 12:7 Apajuik makí makichkitin Wakan takamtikagta nunak sukagtawai, tikich aidaujaish yainikti tabaunum.
1CO 12:8 Wakania duke sukagtawai yachameaja chichatan, nunú Wakania duke sukagtawai shiig dekaa chichata nunashkam;
1CO 12:9 tikichia nuna nu Wakania duke suwawai dekaskeapi tutan, nunú Wakania duke anenjauch aents jau etsagaumainnash suwawai,
1CO 12:10 tikichin aents dutikmainchau iwainaktinun, tikichin Apajuí tabaun etsegtuktinun, tikichin wakan etegja dekatan, tikichin ii chichashtai aidau chichatan, tikichin nunú chichatai etsegtuktinun.
1CO 12:11 Tujash ashí ju aina junak, Wakania duke nigki dutikawai, ni wajuk wakegawa nunak makí makichik dutiksag suwawai.
1CO 12:12 Iina iyashí kuashat akanjamu akushkam makichik iyashke, jutiish Cristujaig betekaitji.
1CO 12:13 Nuadui ashí judío, griego, inaku waitkatai, agkan batsamin ainakuish makichik Wakania duik yamigbau ainaji, ashí nunú aidautik Wakan susamu ainaji.
1CO 12:14 Iyashik makichkichui, kuashat ijutkamuji ajawai;
1CO 12:15 nuiya dawe tumainai: “Wika uwejchau asan iyashnumiachuitjai”, takush ¿iyashnumiachu asag tumainait?
1CO 12:16 Tuja kuwish tumainai: “Wika jiichu asan iyashnumiachuitjai”, takush ¿iyashnumiachu asag tumainait?
1CO 12:17 Nuniachkush ashí iyashia nu ayatak jiiketkuish ¿utusaya antumainaita? Tuja ashí iyashia nu ayatak antutaiya duke akuish ¿tuwí kugkuasa dekaptaish amainaita?
1CO 12:18 Tujash Apajuí, ashí ju iyashnum ijutkau aina nunak, ni wakegamujin diis makí makichik batsakui.
1CO 12:19 Ayatak iyashnum ijutkau aina duke agtaish ¿tuwí iyashish amainaita?
1CO 12:20 Dekaske, kuashtai iyashnum ijutkau aina duka, tujash iyashik makichki.
1CO 12:21 Jiik, uwegnak: “Wika aminak atsumatsjame” tumaitsui. Aantsag buukshakam, dawenak: “Wika atumnak atsumatsjime” tumaitsui.
1CO 12:22 Nunin ai iyashnum ijutkau aina nuiya, imanchau diyamua nu imá senchi atsumnawai.
1CO 12:23 Iyashnum ijutkau aina nuiya imanchau diyamua nu imá shiig kuitamnawai, tuja iyashnumia paan iwainamainchauwa duka shiig ejaká kuitamnawai,
1CO 12:24 untsu iyash paan iwainamain aidauk dutiknatsui. Apajuí, iyashnum ijutkau aina nuiya imanchau diyamua nuna dekas puyatjus diistinme tusa aikauwai,
1CO 12:25 nunidau asag iyashnumag kanakag achagti, nuninak makí makichik iyashnum ijutkau aina duka pempeentunisag yainiktinme tusa dutikauwai.
1CO 12:26 Aatus asamtai iyashnum ijutkau aina nuiya makichik waittaik, ashí iyashnum ijutkau aina dushakam waituinawai, antsag iyashnum ijutkau aina nuiya makichik puyatjusa kuitamjinig, ashí iyashnum ijutkau aina dushakam shiig aneenawai.
1CO 12:27 Nunin asamtai, atumek Cristo iyashí ainagme nunin asajum makí makichik aidautigmek nunú iyashia nuwi ijutkau ainagme.
1CO 12:28 Apajuí iglesianum takasagtinun apusauwai dekatkauk: Apóstol aina nuna, profeta aidaun, maestro aidaun, aents dutikmainchaun iwainakagtin aidaun, aents jaidau etsagagtin aidaunash, yaimkatin aidaun, takatan diistin aidaun, chicham chichashtain chichaktin aidaunashkam.
1CO 12:29 Nunin asag ashí apostolak ainatsui, ashí profetakesh ainatsui, ashí maestrok ainatsui, antsag aents dutikmainchaunash ashí iwaidauk ainatsui.
1CO 12:30 Antsag aents jaina nuna etsagagtin aidauk ashí don susamu ainatsui, chicham chichashtainash ashí chichainatsui, nunú chichataish ashí etsegtin ainatsui.
1CO 12:31 Atumek don dekas iman aina nu jukitasajum imá senchi wakeejitajum. Tujash wi dekas shiig pegkeja nuna jintintuattajime.
1CO 13:1 Wi tikich chicham aidau chichatan yacha amainaitjai, ángel aidau chichatain chichau akunush anentak atsugtakuig, jiju nuniachkush platillo awatim ayatak tsantsantuwama numamtuk wajamainaitjai.
1CO 13:2 Wi Apajuí tabaujin etsegtin amainaitjai, Apajuinu yaunchuk dekaachbau aajakua nunash ashí dekau, ashí dekamush ajutu, dekaskeapi tabau ajutu asamtai, muja aidaunash yajá inagkemain akunush, anentak atsugtakuig wainkayaitjai.
1CO 13:3 Ashí mina wajiig ajutuina nuna ujunauch aidaun tinamkunush, mina iyashjun apeatnume tusan sujaknush, anentak atsugtakuig wainkan dutikmainaitjai.
1CO 13:4 Anenka duka: Katsunta nuna dekamtijamui, kakagchau atan, tikichdau diisá kajee wekaechatan, ememashtan, iman anenmamchatan;
1CO 13:5 tutitjachu atan, imá iinuk anentaimtushtan, kakajus kajeshtan, kajegkagtukbautak pujushtan;
1CO 13:6 pegkegchau takat aidaujaig shiig aneechui, dekaskea nujai shiig aneenai.
1CO 13:7 Anentak ajamuk: Ashí waitiawai, ashí dekaskeapi tawai, ashí dakawai, ashí katsuntawai.
1CO 13:8 Anenka duka tuke megkaekashtinai, tujash Apajuí tabauji etsegtutak nagkankatnai, chicham chichashtai chichatash megkaekatnai, unuimat aina dushakam nagkankagtin ainawai.
1CO 13:9 Wagki machik dekainaji, machik Apajuí tamaush etsegtuinaji.
1CO 13:10 Tujash shiig dekamu atina nu jegatnai, nunikmatai machik dekainag duka megkaejatnai.
1CO 13:11 Wika uchi asanuk, chichaaknush, anentaimkunush, nunimainun takunush uchi wajuknaita nuniyajai. Tujash yamaik muun wajasan, uchi asan nunijakbaugnak ukukiuwaitjai.
1CO 13:12 Yamaik espejonum tuujin waintayama numamtuk wainji, tujash jegatnai igkunisa wainiaktinaitag nunú. Yamaik machik wainji, tujash jegatnai Apajuí ni mina waitkauwa dutiksanuk wainkatnaitag nu.
1CO 13:13 Yamaiya juik jujú kampatum awa juka megkaekashtin ainawai: dekaskeapi tabau, dakamua nu, anenka dushakam; tujash jujú aina nuig dekas wagaakua duka anenka nuuwai.
1CO 14:1 Anentak ajuttí tusajum kakanmamsatajum, nuniakjum imá senchi wakeetajum Apajuí anenjauch wakannumian sujustí tusajum, tujash imá senchi Apajuí tabau etsegtuta nunú.
1CO 14:2 Chicham chichashtai chichaina nunak, aentsun aujuinatsui Apajuin aujak tawai, nuadui antuinatsui wajina tawa nunak, dekachbaun Wakan tabaun chichau asamtai.
1CO 14:3 Tujash Apajuí tabaun etsejuina duka, aents aidaun aujui pegkegnum yaigta tabaunum, dutikak pegkegnum wakeemitkak anentainash ichichtawai.
1CO 14:4 Chicham chichashtai chichá duka, imá niina yaimaina nunak tawai; untsu Apajuí tabaun etseja duka iglesianash pegkegnum yayawai.
1CO 14:5 Wakeemainaitjai ashí atumesh chicham chichashtai chichaktajum tusan, tujash imá senchi wakegajai Apajuí tabaun etsegkatnume tusan. Juuwai dekas chicham chichashtai chichata nuna nagkaesauk. Tikich chichaman chichaina duka atsumainawai nunak taku tawai tusa etsegtumaina nuna, iglesiashkam pegkegnum yaigbau amain asamtai.
1CO 14:6 Yatsug aidauh, wi anui taan Apajuí iwaintugkamun atum dekamainun, Apajuí tabau etsegmainun, jintinkagtumain aina nu dutikmainun, chicham chichashtaiyai augmainaitjim duka atumnak yaimpamaitsui.
1CO 14:7 Wagki kantamku umputai flauta nuniachkush arpa aina nunú wainak pachimkamun shiniagtaik, wají kantamtaina makí makichik aina dusha tawa tusag dekamaitsui.
1CO 14:8 Nunisag trompetan umpua dushakam, maaniamunum shiyaktin umintsatnume tusa umputaiya nuna umpushtaik, maaniatasag uminmain ainatsui.
1CO 14:9 Atumshakam nunisjumek, chicham shiig antumainchaun aujtamkuish ¿wajuk dekaagmek nunap tujutua titagme? Nuniakug wainak chichá wekaemainai.
1CO 14:10 Kuashat chicham ju nugka jui chichatai ayá duka, ashí ajuinawai wajintu taku tutaimpaya nunú.
1CO 14:11 Tujash mina aujta nu, wajina takug tawa nuna dekachkunuk, tikich nugkanmayaya nunin wantinmainaitjai ya aujtawa nuig, niishkam antsag minaish tikich nugkanmayaya nunin wantinmainai.
1CO 14:12 Nuadui atumek, don aidau wakannumia ajuttí tusa imá senchi wakegau asajum, nu aina nujai senchi takastajum iglesian pegkegnum yaimaina nunú.
1CO 14:13 Nunin asamtai chicham chichashtain chichauk, Apajuin aujak segamainai ni tabaujin paan dekamtijuati tusa.
1CO 14:14 Wi chicham chichashtaiyai Apajuin aujtaik, mina wakanjua duke Apajuinak aujui, tujash wika dekatsuk juwajai.
1CO 14:15 ¿Tujash wajukmainaitja? Apajuinak wakanjujai augmainaitjai, tujash antukan augmainaitjai, wakanjujai kantamainaitjai, tujash antukan kantamattajai.
1CO 14:16 Wagki ame wakanminig Apajuí see tutaish tikich ayatak antak eketa dusha, ame tame nuna dekachush ¿utusaya “aatus atí” tumainaita?
1CO 14:17 Ame Apajuí see tabauk pegkeg amainai; tujash tikichnak pegkegnumak yaimaitsui.
1CO 14:18 Wika atumin nagkaesau chicham chichashtain chichag dui Apajuinak see tajai.
1CO 14:19 Tujash iglesianmag ayatak cinco chicham antumain aina nunak chichaktasan wakegajai, tikich aidaun jintinkunchakam, tikich chichamai diez mil chicham chichamaina nuna dutiktsuk.
1CO 14:20 Yatsug aidauh, uchi anentaimuk wajaigpajum. Dekas uchi anentaimu wajatajum pegkegchau anentaimtushtanum, tujash anentaimtanmag katsuaju ainayatkujum.
1CO 14:21 Chicham umiktinnum: “Ju aents aina junak, aents ditá chichashtain chichaaku aina nuwi ausattajai, dutikamash antugtukchagtatui”, tiuwai Apu Apajuí.
1CO 14:22 Nuadui chicham chichashtai chichamua duka Apajuí nemagchau aina nuna iwaintawai, Jesusai dekaskeapi tuina nudauchui; tujash Apajuí tabau etsegbauwa duka Jesusai dekaskeapi tuina nudauwai, Apajuí nemagchau aina nudauchui.
1CO 14:23 Iglesia ijunjag ashí chicham chichashtai chichainamunum, Apajuí dekaskeapi tuchau aidau nuniachkush Apajuinun dekachu aina nu wayá antukmag: Imaanak tu batsatajama, tujamainai.
1CO 14:24 Untsu Apajuí tabaun ashí etsejuinamunum, Apajuí dekaskeapi tuchau aidau nuniachkush Apajuinun dekachu aina nu wayá antuinakug, dekaskeap tuwinawa tusa, ditá pujutjinash diimainai.
1CO 14:25 Nuniak ditá anentain uumkau aunash paan wainmamkag tikishmag Apajuin emematuinak, dekas Apajuik atumjai awai tujamainaitjume.
1CO 14:26 Nuadui yatsug aidauh, atum ijunbaunmag makí makichik atum ainajum anuiya salmosan kantamai, tikich jintinkagtai, tikich Apajuí iwaintukbaun etsejai, tikich chicham chichashtain chichai, tikich nu chichakbaun nunak taku tawai tusa etsegtau amainai. Tujash ashí duka Jesusa nemajin aidautijum pempeentunisjumek pegkegnum yainikta tabaunum dutikatajum.
1CO 14:27 Nuniamunum chicham chichashtain chichaidauk jimag nuniachkush kampatum amainai, tujash makí makichik chichak inagnakmatai chichatnume; nunitai makichik, nunak taku tawai tusa etsegtukti.
1CO 14:28 Tujash nuna taku tawai tusa etsegmain atsutaik, iglesianmag chichamaitsui, imá nigki Apajuin aujak chichamainai.
1CO 14:29 Aantsag profeta aidaush jimagchik nuniachkush kampatumchikesh chichamainai. Nunitai tikich aidauk dekaskeash Apajuí tabaunash etseja tusa kuitamas diimain ainawai.
1CO 14:30 Tuja nuwi aents antak pekaja nuiya, Apajuí dekamtikam makichik wajakí chichataik, nagkamas chichá duka itatkati.
1CO 14:31 Wagki Apajuí tabauk makí makichik ashí etsegmain ainagme, makichik niiyá ashimkamtai, duwi tikitchakam chichamainai; nuniamunum ashí tikich aidaush unuimagtinme nuninak ashí ichichmamjatnume tabaunum.
1CO 14:32 Apajuí tabaun etsegkatin don ajuina duka, wajutí tumainaita tuja wajutiya tumainchauwaita nunak dita dekamain ainawai.
1CO 14:33 Wagki Apajuik, agkan pujuta nuna Apajuijiyai, nunin asa dakitnai pachimdaetanak. Ashí iglesia pegkejam aina duka nuna nunimain ainawai.
1CO 14:34 Iglesia ijunjamunmag, nuwa aidauk bitat amainai, wagki ditak chichakainmegka tibauwai. “Nuwak aishin sumitkau atinme”, chicham umiktinnum tawa nunisag.
1CO 14:35 Nuwa dekaatatus wakegakug, niina jeen aishin iniasti, wagki iglesia ijunjamunum nuwa chichamua duka maakchau asamtai.
1CO 14:36 Ju adeagtajum Apajuí chichame etsegbauk atumiin nagkamnachui, nuigtush imá atumkechuitjume Apajuí chichame antukutigmek.
1CO 14:37 Makichik aentskesh profeta anenmamuk nuniachkush Wakan dekamtijawai tumamushkam, Apu Jesús umiktajum tibaun wi agatjim juna dekaati.
1CO 14:38 Tuja juna dekamainchau dekapeauk niishkam nunisag dekaachbau juwakti.
1CO 14:39 Nuadui yatsug aidauh, kakanmamsatajum Apajuí tabau etsejut don ajuttí tusajum. Nuniakjumesh chicham chichashtain chichaina duka chichamaitsui tiigpajum,
1CO 14:40 tujash duka ashí dutikatajum shiig kuitamkajum nuigtush wainak pampautsuk makí makichik titinme.
1CO 15:1 Yatsug aidauh, aneemtijatasan wakegajime, wi yamajam chicham etsegbau antukuitjum nuig ebetmamjajum batsatjum nuna;
1CO 15:2 nunin asajum wi yamajam chichaman etsegkauwaitag nuig ebetmamjau akugmek uwemjattagme; nuniachkugmek dekaskeapi tiuwaitjum duka wainkayai.
1CO 15:3 Wagki nagkamchaknuk wi dekauwaitag dutiksanuk atumnash jintintuauwaitjime, Cristuk iina tudaujin jakauwai, Agagbaunum tawa nunisag;
1CO 15:4 dutika ukusam kampatum tsawanta jui nantakiuwai, Agagbau tawa nunisag;
1CO 15:5 nunik Cefasan wantintukui, nuwi pujus ni jintintaiji doce aajakajua nunashkam wantintukui.
1CO 15:6 Duwi pujus quinientos inagkeas yatsut aidaun juu tamawaik wantintukui, nuna wainkajuk kuashat yamaikish batsatui, untsu wajumchik jakaje.
1CO 15:7 Duwi pujus Santiagon wantintukui, nunik ashí ni apostolji aina nuna wantintukui.
1CO 15:8 Nunik inagnamunum minash wantintugkauwai, uchi akiinatin tsawanji jegatsaig akiinama numamtuk wika wajakuitjai.
1CO 15:9 Nuadui wika apóstol aina nuig imanchauwaitjai, wagki Apajuinu iglesian aintujakú asan apóstol tamak amaitsujai.
1CO 15:10 Tujash Apajuí wait anenjujua dui, yamaik wi yaitja nunuwaitjai, ni wait anenjak jutijuauwa duka minaig wainkachui, nuadui wika Apajuí yaintsamtai ditá nagkaesau takasjai.
1CO 15:11 Wagki wi etsegbau nuniachkush dita etsegbaukesh antukjum Cristo dekaskeapi tiu ainagme.
1CO 15:12 Tujash Jutii Cristuk maa ukusbau nantakiuwai tusa etsegjinish, ¿wagka atum ainajum anuiyash jakaik nantagchatnaitji taush ainawa?
1CO 15:13 Jakau nantagchagtin agtaik, Cristushkam nantakchau amainai.
1CO 15:14 Cristo nantakchauwaitkuig, ii chicham etsejag juka wainak amainai; antsag atum Cristui dekaskeapi tajum dushakam wainak amainai.
1CO 15:15 Nu nuninaitkuig, Apajuik wainka tsanumjaku tu yujamainaitji, Apajuik Cristo jakaun inankiuwai tusa etsegtuinag duka, wagki nunikchau aig tuidau asá, dekaskenum jakau aidaush nantakchagtin ainakuig.
1CO 15:16 Jakau aidau nantagchagtin ainakuig, Cristush nantakchau amainai.
1CO 15:17 Cristo nantakchauwaitkuig, atum niiní dekaskeapi tajum dushakam wainkayai, nunin asajum tudaunumag batsatjume.
1CO 15:18 Nunin ataik Cristui dekaskeapi tiaju jinawajua duka megkaejauwap ainawa.
1CO 15:19 Jutii Cristo dakainag nunú, imá jui pujag duik pegkeg amainaitkuig, tikich aents aina nuna nagkaesau shiig aneasaik pujumaitsuji.
1CO 15:20 Tujash dekaskenmag Cristuk nantakiuwai. Niiyai dekas jakau nantashtainmaya nagkamas nantakiuwa duka.
1CO 15:21 Wagki makichik aentsua nuig jata wayauwa nunisag makichik aents nantakiuwa dui jakau aidaush nantajagtinai.
1CO 15:22 Adagkaig ashí jainaji nunisaik Cristui ashí iwaaku pujutnaitji.
1CO 15:23 Tujash juka juní atinai: Nagkamchakug Cristo nantakiuwai; Cristo ataktú jui minitta duik, niina nemajin aidau jinawajua nu nantakiagtinai.
1CO 15:24 Nuniamunum inagnamu atina duka, Cristo ashí apu aidaun, inamin aidaun senchigtin aina nuna senchijin depetuk Apajuin Apajiya nuna ashí idaitustinai ni inamjati tusa.
1CO 15:25 Cristo Apu wajas inamak pujai, ashí niina shiwaji aidauk depetkamu atinai.
1CO 15:26 Inagnamunum shiwag depetkamu atina duka, jata nuuwai.
1CO 15:27 Wagki Apajuik Cristunak: “Ame ashí diistá”, tusa idaitusui. Juna tiuwa nunak Apajuinash nigki Cristuk inawai tusag tatsui, Apajuí ashí wajiinak Cristun idaitusui.
1CO 15:28 Ashí Cristo idaitusbau atina dui, Cristo Apajuí Uchijiya duke Apajuiyai sumimkatnai, ni ashí wají aidauk idaitusbau asa. Nunikmatai Apajuik ashí nigki diistinai.
1CO 15:29 Nantamu atsutin aish, ¿jakau pachisjum yamimajum dusha wají jukitasagmea yamimagme? jakau aidau tuke nantagchagtin aish, ¿wagka dita pachisjumesh yamimagme?
1CO 15:30 ¿Tujash wagka jutiish ashí tsawantaish ishamainnumash yujainaji?
1CO 15:31 Yatsug aidauh, wika ashí tsawantai ishamainnum jamainnum wekaejai, nuniaknush atum Cristo Jesús iina Apujiya nu nemajuinajum nuna anentaimtakun shiig aneajai.
1CO 15:32 ¿Wajina jukiuwaitja efesonmaya kuntin kajena iman aina nujai maanikuitag duish? Jakau nantagchatnaitkuig: “Kashin jinatin asá, yuwawagmi, uwajagmi”, tumainaitji.
1CO 15:33 Tsanuamak aigpajum: “Aents pegkegchaujai tsaniamua nu pujut pegkeg unuimatjamua nuna emeseawai”.
1CO 15:34 Dekas aneaku pujakjum tudauk takasaigpajum, wagki Atum ainajum anuiya ujumak Apajuin dekachush awai, junak datsaagtinme tusan tajime.
1CO 15:35 Tujash juna iniimush amainai: “¿Jakau aidaush wajuk nantajagtinuk ainawa? ¿Wajuku iyashimkag midiagtinaita?”
1CO 15:36 Anentainkachuh, jigkai ajaamua duka jaawai nunikmatai nuiya ajak tsapawai.
1CO 15:37 Trigo ajaakuik tikich ajak akuishkam dukegkau ajatsuk, jigkayí ajataiyai.
1CO 15:38 Dutikamun Apajuí wajuk wakegawa dutiksag tsapapawai, dutika makí makichik jigkainak wají ajakaita dutiksag suwawai.
1CO 15:39 Nunisag neje aina dushakam betek ainatsui, aents aina nuna nejeesh ai, kuntin aina nuna nejeesh awai, namak aina nuna nejeesh ai, chigki aina nuna nejeesh awai.
1CO 15:40 Aantsag nayaimpinmaya iyashish ai, nugkanmaya iyashish awai. Tujash nayaimpinmaya aina nuna shiigmajish ai, nugkanmaya aina nuna shiigmajish awai.
1CO 15:41 Nunisag etsá etsantaijish ai, nantú etsantaijishá awai, tuja yaya aidau etsantaijish awai; yaya aidaukesh betek etsantuinatsui.
1CO 15:42 Numamtuk atinai aents jinau nantajagtina dushakam. Aents jakauk besegtin asamtai ukunui, untsu nantainakug iyash kaugchatnun iyashimak nantakiagtinai.
1CO 15:43 Aents jakauk atsumnachu asamtai ukunui; nantainakug shiig pegkejan iyashimak nantakiagtinai, iyash kakaakchau ukusbauwa duka senchigtin waigkag nantakiagtinai.
1CO 15:44 Nugkaa yutuna duka, nugkaya iyashia nuuwai; nantaktina duka, wakannumia iyashia nuuwai. Awai nugkaa pujaku iyashimtai antsag wakannumia iyashimtaish.
1CO 15:45 Aatus tawai Agagbaunmashkam: “Nagkamchaku aishmag najanamu Adán aajakua duka, iwaaku wajasui”. Untsu nagkanbaunum Adán aajakua nu Wakan pujutan sukagtin aajakui.
1CO 15:46 Tujash nayaimpinmaya iyashia duchauwai dekatkauk, nugkanmaya iyashia nuuwai; dui atinai nayaimpinum pujustina duka.
1CO 15:47 Nagkamchak aishmag aajakua duka, nugka jukí najanamu asa nugkaya aajakui, tikich aishmag aajakua duka, Apu Jesús nayaimpinmaya aajakui.
1CO 15:48 Nugkaya iyash aina juka, aishmag nugkanmaya najanamua nunú iyash ajutjamainawai; untsu iyash nayaimpinmaya jukitnaitag duka, nayaimpinmaya aishmag aajakua nunú iyash jukitnaitji.
1CO 15:49 Nunú aishmag nugka najanamu aajakua nuna niimé jukiuwaitag nunisaik, nayaimpinmayaya nuna niimé jukitnaitji.
1CO 15:50 Yatsug aidauh, juna tajime: Neje numpajaiya duka Apajuí inamtaijinig wayashtinai. Iina iyashí besena jushakam, tuke besechu atina nuig waimaitsui.
1CO 15:51 Tujash Apajuinu yaunchuk dekaachbau aajakua nuna dekaatnume tusan wakegajai: Jutiik ashí jinashtinaitji, tujash ashí yapajinkau agtinaitji,
1CO 15:52 waamak piit tsuwisaik niimtayama numamtuk, trompeta inagnamun shinuktina dui. Wagki trompeta shinuktina nu antamuik jakau aidauk nantajagtinai ajumaish jakashtinun iyashimkag, nuniai jutii iwaaku aidautik iyashí yapagtam agtinaitji.
1CO 15:53 Dekas atsumnawai iyash besena nu, ajumaish besegchatin atinme tusa; iyash jinin aina jushakam, ajumaish tuke jachau atinme tusa.
1CO 15:54 Nunik iyash besena nu ajumaish besegchatnun iyashimkamtai, nunisag iyash jauwa jushakam ajumaish jachau atinun iyashimkamtaig, Agagbaunum: “Jaamua duka depetkamu juwake”, tawa nu uminkatnai.
1CO 15:55 “¿Jataiyah, tuwí ajutjamua, ame magkagtutaigmesh? ¿Ukumataiyah, tuwí ajutjamua, ame depetmataigmesh?”
1CO 15:56 Jataiya nuna magkagtutaig tudauwa nuuwai, tudau senchijiya duka chicham umiktina nuuwai
1CO 15:57 Tujash Apajuiya duke see tiyagmi, iina Apuji Jesucristui depetmatan amasua dui.
1CO 15:58 Nuadui mina yatsug aneetaig aidauwah, ebetmamjajum pujusjum Apu Jesusa takatjig tuke mijattsuk ematajum; wagki atumek dekagme, Cristunu takaajum duka wainkagmek takaatsjume.
1CO 16:1 Jesusa nemajin pegkejam aidau yaigtin kuichik anentag ijumkugmek, galacianmaya iglesia aidaun jintintuabiag dutiksagmek atumesh dutikatajum.
1CO 16:2 Ashí tumigtin makí makichkitijum wajupa kuichkish jikiugme nu akantsajum ukú pujutajum. Dutikamu asamtai wi taattag nuaduik kuichik ijumjata tabauk atsutí.
1CO 16:3 Wi anui taan atum aents etegkawagmin cartan agajan susan Jerusalén awematjai, atum kuichik anenjauch ijumjaujum nuna dekaatnume tusan.
1CO 16:4 Nunimainaitkuig, wisha ditajai ijunjan wemainaitjai.
1CO 16:5 Wi minaknuk, Macedoniaya atú minittajai, nuwi juakin atumin minittajai.
1CO 16:6 Nuniknuk atumjai ujumak tsawan pujusta tajai, nuniachkunush yumi tepeatta nunak anui pujusnukeash inagkeakintag tajai, nunikan weakuish atum yainkamnujum tusan.
1CO 16:7 Nuniau asan ayatak nagkaemaku wainká ukutnak dakitajai, dukapech tsawan atumiin pujusta tau asan, Apu Jesusash aatus wakegakuig.
1CO 16:8 Tujash Éfeso pujuttajai fiesta Pentecostés inagkeakta tau asan,
1CO 16:9 wagki waiti muun ujani ajutui shiig takamaina nu, kuashat shiwag ajutainigkishkam.
1CO 16:10 Timoteo anui taakuish atumjai shiig aneas juwamaina nu dutikatajum, niishkam wi Apu Jesucristun takajag nunak takaju asamtai.
1CO 16:11 Nunin asamtai makichkitigmekesh imanchau diisaigpajum; dekas yaigtajum, shiig agkan minash taa waitkati, wagki tikich yatsug aina nujai dakaku pujaji.
1CO 16:12 Yatsug Apolon kuashtá segajai, tikich yatsug aina nujai atumin ijagtamsati tusan; tujash yamaikik anui minimainjig wakegamuk atsujui, tuwig minimainji ajit dui minittawai.
1CO 16:13 Aneaku pujustajum; nuniakjum dekaskeapi tabaugmia nuig ebetmamjatajum; wajiu, senchi atajum.
1CO 16:14 Ashí atum takaajum duka, anenkai takastajum.
1CO 16:15 Yatsug aidauh atumek dekagme, Acayanmaya Estéfanas niina nuwe, uchijí aidaujai dekatkauk Apajuí nemagkajua duka, nunikaju asag Jesusan dekaskeapi tuidau pegkejam aina nuna senchi yainawai.
1CO 16:16 Nuadui atumek ju aents yaimainak takainak imaanina junin aina nu tabau antugkatajum.
1CO 16:17 Shiig aneajai Estéfanas, Fortunato, Acaico aatus tajutuawag atum yainmaina nuna dita kuashat yaintuidau asagmatai.
1CO 16:18 Dita minak wakanjuish ichichtujajui, aikasag atumnashkam ichichtamjajui. Aents junin aina nu puyatjusjum diimain ainagme.
1CO 16:19 Iglesia asianmaya kumpamjamainawai. Aantsag Aquila ni nuwe Priscilajai ditá jeenig iglesia ijunaina dushakam Apu Jesusa daajin kumpamjamainawai.
1CO 16:20 Ashí yatsug aidau kumpamjamainawai. Antsagmek atumesh makí makichkitijum pempeentunisjumek shiig anendaisajum kumpamdaiyatajum.
1CO 16:21 Wi Pablon ju kumpamdaiyamunak mina uwejui agatjime.
1CO 16:22 Makichik aentskesh Apu Jesusan aneachuk, ¡nigki suwimkan jukittawai! Wagki Apu Jesusak wamak taattawai.
1CO 16:23 Atumnash Apu Jesús wait anenjamjatnume.
1CO 16:24 Wika atumnak Cristo Jesusan aneag dutiksanuk aneajime. Aatus atí.
2CO 1:1 Witjai Pabloitjai, minak Apajuí wakegau asa Cristo Jesusa etsegtukti tusa etegtua awetiuwai, yatsug Timoteojai pujusan atum iglesia Apajuinu aidautijum yaakat Corinto batsatjum nuna, ashí Jesusa nemajin aidautijum Acaya nugkanum batsatjum nunashkam,
2CO 1:2 Apajuí iina Apajiya nunú, iina Apuji Jesucristujai wait anenjamag shiig agkan pujutan amastinme.
2CO 1:3 Emematiagmi Apajuí, iina Apuji Jesucristo Apajiya nu, iina Apají wait anenkagtin, Apajuí ashí ichichmamtan sukagtina nunú,
2CO 1:4 nigki ichichmamtanash sujamui ashí ii waitiamunmash, ashí tikich waitiagtaish ditashkam ichichkagtugtinme, Apajuí iina ichichmamtan amasua dutiksag tujamu asa.
2CO 1:5 Wagki Cristo waittsauwa nunisaik jutiish kuashat waituinaji, nunisaik imá Cristuig kuashat ichichmabaush ajutjamji.
2CO 1:6 Jutii waituinag duka, atumesh ichichmamja pujusjum uwemjatajum tabaunum nuninaji; tuja jutii ichichmabau ajutjamaina dushakam, atumesh ii waituinag junisjumek waitiakjumesh, ichichmamja pujusjum emamkesjum katsunjatajum tabaunum waituinaji.
2CO 1:7 Atuminig ebetja dakamu ajutjamji, wagki dekainaji atumek jutii waituinag nunisjumek waitiakjumesh, jutii ichichmamainag nunisjumek ichichmamaidau asagmin.
2CO 1:8 Yatsug aidauh, jutii Asia nugkanum batsamsaja kuashat utugchatnum waittsabiag nu dekaatajum tusan wakegajai. Jutiik tikima atsanja nagkaemainchaunum jegantú asaja, iwakuap pujuttaji tusa dakamainuk atsugtamsabi,
2CO 1:9 nuniaku chicham dekajuawaja mantamnati tibauwa nunin dekapmabiaji; tujash nu dekamtijamabi iik kajintsá anentaimtumatsuk, Apajuí aents jakaunash inanna nuwi kajintsá anentaimtan;
2CO 1:10 nuniau asajin Apajuí jutii iman ishamainnum pujajinish jiigmaki uwemtijamjabi, nuniau asa yamaishkam dutijamsag agkanmitkagmasagké awai. Dutijamu asamtai nigkiap atakea duwish agkanmitkagmatnaita tusa dakamu ajutjamji;
2CO 1:11 atumesh jutii pachijattsajum Apajuí aujkagtakjuminig. Kuashat jutii pachijattsajum Apajuí segatkagtiagtaik, kuashat Apajuinashkam see tiagtatui anenjauch Apajuí sujabau juinag nuna diisag.
2CO 1:12 Wagki jutii eme anenmamag duka juuwai: Iina anentaimtajiya nu ujapaji Apajuí dekaskejiya nujaish jutiish wajuk imagnisaish pujusbaiji ju nugka juish, tuja atumjai ijunja pujusmayag duish. Jutiik aents ditá yachajin iwainmamaina nunikchabiaji, Apajuí wait anenkagta nujai iwainmamkabiaji.
2CO 1:13 Wi papiin agatjamjim nuig, tikich wají pachisaik atum aujkugmesh antukchamnukesh agatjachbaijime, nuniau asamtai shiig ausampap dekawagtatua tajime,
2CO 1:14 duka machik dekaugme, jutii aidautik atum eme anentam agtinaitag nunú, atumshakam antsagmek jutii eme anentam agtinaitjume tsawan Apu Jesús minitna dui.
2CO 1:15 Nuna aaja kajintsá anentaimu asan, dekatkauk atumná taan wainkatjime tusan anentaimsabiajai, aaja nuniakun jimajá ijagsatjime tau asan;
2CO 1:16 Macedonia nagkaemakun ijagsau asan, waketkunush awentsanuk ijagsatjime tusan. Nuna nuniakui atum minashkam wi Judea weakuish yainkamnujum tau asan.
2CO 1:17 Wi nuna aaja nuniktajai tiuwaitag nunash ¿anentainkasnuk tiuwaitag? ¿Nuniachkunush wainak aents dutikachtinaitak dutikatjai tinu aina nuniaknuk taja?
2CO 1:18 Tujash Apajuí tibaujinak betek umina nu dekagtamji jutii “dutikatjai tiuwaitku dutikashtajai” tatsug nunak.
2CO 1:19 Wagki wi, Silvano, Timoteo aaja Jesucristo Apajuí Uchijiya nu pachisaja ujakbaijime. “Jesucristuk dutikatjai ti, ajuma dui dutikashtatjai” tujakchauwai, ni tibaujinak imatiksag betek umijakui.
2CO 1:20 Wagki Apajuí ashí anagkagtuamua duka, Cristui ashí uminkauwai. Nuadui Apajuí emematuinakuik: “Aatus atí”, tuinaji Cristo Jesús pachisa.
2CO 1:21 Jutii aidautin, atumnashkam Apajuí etegtamawag Cristuwai ebetjamkauwai;
2CO 1:22 Nuna dutijama niinu etamak selló awajtamkauwai, dutika eemtikak iina anentain Wakanin sujamsajui, ni anagtamamua nu jukitin asajin
2CO 1:23 Tujash wi Corinto minichag nunak, anui taan atumin kakaakan chichagkun wake emeskaijim tusan nunikag nunak Apajuí dekagtawai. Nuna wi dekas tuchataik Apajuí suwimkan sujustí tajai.
2CO 1:24 Jutiik atum dekaskeapi tajum duka iinuk emamaitsuji, jutiik wakegaji atum yaigtasa shiig aneamu ajutjamtinme tusa, dekaskeapi tabauwa nuig ebetmamjajum pujau asagmin.
2CO 2:1 Tau asan, ataktuk wakettsankek ijagsashtajai ditan wake besemag anentaimtiká wekayig tusan juwakbaijai.
2CO 2:2 Wagki atumin wi wake besemag anentaimtikaish, ¿yaki minash shiijash aneemtijusti wi atumin wake besemag anentaimtikaish?
2CO 2:3 Nuadui ayatak agatjabiajime, wi anui taamtai atum mina shiig aneemtijumaina nu wake besemag sujusaijum tabaunum; tujash kajintsan anentaibaijai ashí atum aidautigmek wi shiig aneakuig ashí shiig aneemainaitjum nunak;
2CO 2:4 wagki senchi wake besemag anentaimkun, anentaijuish waitiakun kuashat negá negajai agajan awetibiajim nunak wake besemag anentaimjatnume tusanuk dutikachbaijai, ayatak atumin shiig senchi aneamu ajuta nuna dekatnume tabaunum dutikabiajai.
2CO 2:5 Tujash makichik aents mina wake besemag anentaimtijuja nunak imá minakek dutijuache, ashí atumnash imatiksagkeap dutijamawaje taja nunak, nuní uwaekanuk tumaitsujai.
2CO 2:6 Atum ainajum anuiya imá kuashtatijum nu aents suwimak susauwaitjum duka maake, anuig atí.
2CO 2:7 Yamaik atumek tsagkujajum anentai ichichtugtajum, wake besemag ane anentaimkawa kakaakchaunum jegantai.
2CO 2:8 Nuadui atum yaunchuk ni aneejakuitjum dutiksagmek aneamu iwaintuktajum tusan segajime.
2CO 2:9 Duik juna pachisan agatjabiajime, dekas wi tabaunash ashí umikagtimpash tusan dekapsatasan.
2CO 2:10 Atum aidautijum ya tsagkujagme wishakam nunak tsagkujattajai. Nunak tsagkugmain ajusú asamtai tsagkujamjai atumi pachisan Cristo eemtin.
2CO 2:11 Nunú aaja dutikachbaunum Satanás eteentugma tsanugmamaina nu shiig dekaidau asaja.
2CO 2:12 Yamajam chichaman Cristo pachisan etsegkatasan yaakat Troas jegaa ai, Apu Jesús waitin ujatjimi;
2CO 2:13 tujash yatsug Titon wainkachu asan shiig juwamainchau dekapeakun, ditanak akattsan ukuakun Macedonia nugkanum webaijai.
2CO 2:14 See tajai Apajuin, Cristui tuke depetbau etama dui, jutii chicham etsegbaushkam ashí yantamnum pampaag wegau asamtai, pegkeg kugkuina iman dekapenak kuashat dekaatatus wakegainawai.
2CO 2:15 Jutii aidautik Cristo Apajuiyai iwaintama nuig incienso pegkejan kugkuwama iman ainaji. Nunú kugkuina duka dapampaewai uwemjatin aina nui, megkaejatin aina nuishkam.
2CO 2:16 Nunin asamtai megkaejagtin aina duka Apajuí chichamenak jakau mejegama iman diinawai; untsu uwemjatin pujuta jukiagtin aina duka Apajuí chichamenak kugkuin pegkeja iman dekapenawai, ¿ya jujú chicham aidau etsegmainnash umintsash awa?
2CO 2:17 Jutiik tikich aidau kuichkijinatasag Apajuí chichamen yapajiawag waitá etsejuina nuninuk ainatsji, dekaskenum Apajuí awemamu asá, Apajuí eemtin Cristo daajin etsejuinaji.
2CO 3:1 Juna pachisan takuish, ataktú nigki chichagmamak tuu wekaewai tujutmain ainatsjume, ¿atsa tikich wajukena nunikaik jutiin chichamkagtuinak carta agagbau iwaintumainaitjim, nuniachkush atumek carta agajam sukagtumainaitjum?
2CO 3:2 Atum ainagme jutii cartaji, iina anentai aina nui agagbau aidautigmek; nunin asagmin ashí aents carta agagbaun wainak augmaina dutika shiig dekagmainawai.
2CO 3:3 Atum ainagme, Cristo papinum paan agagbauwa nunin aidautigmek, nunak tintai agatia dutijamachajui, jutii chicham etsegbau antukuitjum dui, Apajuí tuke pujuuwa nuna Wakanin dutijamawajui, kayanum agagbauwa dutiktsuk iina anentai nejea nuwi dutikauwai.
2CO 3:4 Apajuiyai kajintsá anentaimaidau asá, Cristo dutikauwa duka dekaskeapi tuinaji.
2CO 3:5 Juka iina senchijinig imatika takainaji tumamaitsuji, jutii senchi takainag duka Apajuinumia minawai.
2CO 3:6 Nigki unuitamjauwai yamajam chicham apakbauwa nuna etsejuinak yaimkatnume tujamu asa. Duka chicham umiktina duchauwai, Wakan takaamua nuuwai, wagki chicham umiktina duka jatanum ejekagtawai, untsu Wakania duka pujutan sukagtinai.
2CO 3:7 Chicham umiktin aidau kayanum agagbau iman aajakua nu takaamu jatanum ejekagtiuwa nunú, Moisesa yapiin winchamtin awajtusmatai, Israel aidauk Moisesa yapiinak diimainchau dekapsajui. Duka megkaekatnaitak nunikui.
2CO 3:8 ¿Dekas aan nagkaemas iman tsaaptin amainchaukait Wakan jutiiní takaamua nunú?
2CO 3:9 Chicham umiktin takaajakbauwa duka bakujatmainaitak dekas iman aajakui; aan nagkaemas imanai dekas Apajuí aentsun bakumamainchau ema nu etsejuinaku takainag duka.
2CO 3:10 Yaunchuk iman aajakua duka, yamaik imanchauwai, dekas iman wagaakua duka yamajam chicham apakbauwa nuuwai.
2CO 3:11 Wagki chicham umiktin megkaekatnaitak iman aajakua nuna nagkaesau tuke atinai yamajam chichama juka.
2CO 3:12 Nuadui nunú dakaidau asaja shiig kajintsá chichagkagtuinaji.
2CO 3:13 Moisés yapiin winchamtin wajasú asa, ju megkagun Israel aidau wainkainum tusa, jaanchi yapiin ejakua numamtukek jutiik wajainatsji.
2CO 3:14 Tujash ditak dekamainchau dekapjajui, nuadui yamai tsawanta jui yaunchuk chicham apakbau aajakua nuna aujuinakush antuinatsui, nunisag jaanch ejatkamua nunin juwatkajui, nunak imá Cristuk jujumainai.
2CO 3:15 Moisés agagbauwa nuna yamai tsawanta jui aujuinakush, jaanchi ejatkamua nunin ditá anentainig ajuinawai
2CO 3:16 Tujash Apu Jesusai sujumaniagtaik jaanch ejatkamua nunina nunak jujawai.
2CO 3:17 Wagki Apu Jesusak Wakani, nunin asa Apu Jesusa Wakaní tuwí awa nuwi agkanbaetak awai.
2CO 3:18 Nunin asa ashí jutii aidautinak, yapí ejatjamu atsau asamtai espejonum wainmamtayama numamtuk awajtamji Apu Jesusa imanjiya nunú, nunin asajin yapagtama niiya imanuk etamji Apu Jesús, nunak Wakania nu dutijamji.
2CO 4:1 Jutiinak Apajuí wait anenjamag ju takatan amasú asamtai mijatatsji.
2CO 4:2 Nuniaku uuká takaamu datsanmain aina duka ashí idaisau asaja, tsanumsaikish chichatsuk, Apajuí chichamesh yapajia etsegtsuk, dekaskea duke paan etseju asá, aents aidaush pegkeg anentaimtusa diyam Apajuí emtinish ainaji.
2CO 4:3 Tujash jutii yamajam chicham etsejuinag nu ejakbauwa nuninaitkug, imá megkaejatin aina nuig nuninai.
2CO 4:4 Dita dekaskeapi tuinatsu nunak, Iwanch ju nugká apujiya nu antumainchau emamu asag nuninawai. Nuadui yamajam chicham Cristo pachisa etsegbauwa duka tsaaptin winchamtina imanai; duka Apu Apajuí niimega nunú asa.
2CO 4:5 Chichagkagtuinag duka iinu pachisaik chichatsji, Jesucristo dekas Apua nu pachisa chichagkagtuinaji; tujash jutiik Jesucristo aneamunum, atumi inataigmia nunin ainaji tumamji.
2CO 4:6 Wagki Apajuí, suwen tsaaptin wajastí tusa tsaaptin emauwa duke jutii anentainash tsaaptin awajsauwai, Apajuí imanjiya nunú Apu Jesucristo yapiin etsanta nuna tikich aidaunash tsaaptinun iwaintukti tusa.
2CO 4:7 Jutiik, ichinak duwe najanamunum wají akik aidau egketiama dutikamu ainaji, nunak Apajuí niina senchijí muunta nuna iwainaktatus dutikauwai, duka iina senchijichui.
2CO 4:8 Nuadui kuashat waitiamu ajutjamainakuish pimpiatsji, uyumamu ajutjamainakuish waugtuinatsji.
2CO 4:9 Iina shiwaji aidau waitkagmagtaish imá iinakek Apajuik idaitamtsuji, suwimjamainakush mantamainatsui.
2CO 4:10 Tuwí wegaji nuig, Jesusan maatatus utujujakú aina imatijamainaji; jutii diigmasag Jesusnash imatiksagkeap waitkajakú ainawa tusag dekatnume tabaunum.
2CO 4:11 Nuadui jutiik, Jesús pachisa etsegbaunum ni mantamdauwa nunisaik mantamnatasa umintsá yujainaji, aaja nuniamunum Jesusa pujutji jutii iyashí jauwa nuish iwainakta tabaunum.
2CO 4:12 Jutii mantamnamainnum yujasá chicham etsegkamunum, atumesh pujut tuke atina nu jukiu ainagme.
2CO 4:13 Tujash agagbauwa nuwi: “Dekaskeapi tabau ajutu asamtai chichakmajai” tawai, nuadui jutiishkam nunú wakanik ajutjamu asamtai dutiksaik chichainaji.
2CO 4:14 Dekainaji Apajuí Apu Jesusan inankiuwa dutiksag jutiinash inantamkiag, atumjai ijupag niina pujutaijin jujamkiagtina duka.
2CO 4:15 Ju ashí waitiamu ajutjama duka atum aneamunum imanika waituinaji, kuashat aents aidau Apajuí anentag wait anenjamu asag, aan kuashat aents Apajuinash see tuwinak niina imanjiya nunash dekatnume tabaunum.
2CO 4:16 Nuadui iina iyashí muuntuch weak mijamtaishkam, iina wakaniya nu kashí kashinig senchimeakui mijamtsuji.
2CO 4:17 Wagki jui waitiamu aina duka wamak nagkaebau ainawai, Apajuí imanji tuke atinun sujamsatna nuuwai waitiamu aina nuna nagkaesauwa duka.
2CO 4:18 Nunin asamtai jutiik wají paan wainmain aina duka diischagmi, dekas wainchamu aina nu diisagmi, wagki wají wainainag juka megkaejatin ainawai; tujash wainchamu aina nuuwai tuke atina duka.
2CO 5:1 Jutiik, ju nugka juig jega jegamkamu tuke achauwa nunin ainaji; tujash dekainaji iina iyashí jega mamumaina numamtuk wajataish, Apajuí umigtamkamu jega tuke atin aents jegamkachbau nayaimpinum ajutjama nunú.
2CO 5:2 Nuadui senchi wakegamu ajutjamji nayaimpinum yamajam iyashimka pujustinaitag nunú jukita tabaunum;
2CO 5:3 nunika wisú aig tusa jaanch nugkutiama numamtuk wajaktinaitji.
2CO 5:4 Dekaskenum jega tuke achauwa nuninnum pujusaja senchi waituinaku pimpikí batsatji, dui wisuwa nunin atasaik wakegainatsji, dekas yamajam iyashia nu anugjamu asajin iyash jauwa nunak pujuta nu emegkaktinai;
2CO 5:5 nu nuniktinnak Apajuí umikui, nuadui nu jukitin asajin Wakaní Pegkejin emtikak amasui.
2CO 5:6 Nuadui tuke kajintsá batsatainaji, wagki iina iyashiya jujai pujakuik, Apu Jesusjai atushat pujuinag nu dekaidau asaja.
2CO 5:7 Yamaik dekaskeapi tabauwai pujuinaji, wainchayatku;
2CO 5:8 tujash kajintsá anentaimji, nuniau asá wakegainaji jujú iyash ukuinaku Apu Jesusjai ijunja pujustasa.
2CO 5:9 Nuadui iwaaku pujakuish, nuniachkuish niijai ijunja pujakuishkam ni shiig awajkata tabaunum kakanmamji.
2CO 5:10 Wagki tsawan jegatnai ashí jutii aidauti Cristo eemtin ijunjatnaitag nunú, nunika ajin makí makichik aents nugká pujusá takasbauji pegkeg ataish, tuja pegkegchau ataishkam dutiksag sujamsatna nu.
2CO 5:11 Nuadui Apu Jesús puyatjusa emematmaina nu dekau asaja, aents aidaush niiní dekaskeapi titinme tusa imatjuinaji, jutiinak Apajuí shiig dekagtamji, nunin asamtai atumesh nuninuk anentaibau ajutjamainaitjume.
2CO 5:12 Juka ataktú atumiin chichagmamku tatsuji; ayatak jutii eme anenkagtumainaitjum nu pachisa taji, nuniakjum aents aidau pegkeg anentaiyai takaak wajukmaina nuninak ememaina nu, wi dutikag nu ujakminjum tau asan.
2CO 5:13 ¿Atumesh jutiik pachimasa chichau asajinig, auk imaankau asag tu yujainawai tukagtuinajum? Imaankau asaja, juka Apajuí ememattasa taji, tujash imaankau asajaik chichagkagtuinatsji, juka atum yaigkagtasaja etsejuinaji.
2CO 5:14 Cristo senchi anempa nu dekaidau asaja, niina chichameg wakesa etsejuinaji. Nigka ashí aents aidaunum mantamdauwa dui, ni nemajuinaku ashí pegkegchau takatak idaisau asá jakaujai betek ainaji.
2CO 5:15 Cristuk ashí aentsnum mantamdauwai, nunin asamtai aents niina nemajuidauk, dita wakegamun takaa batsamtsuk, Cristo ditai mantamna nantakiuwa nudaun takamain ainawai.
2CO 5:16 Nuadui jutiik yamai nagkamsaik makichik aentskesh ju nugkayati waininag nuní niimtinuk waintsuji, nuigtú yaunchuk Cristun wainkau aina nuní niimtinuk niish waintsuji.
2CO 5:17 Nuadui aents Cristun nemajuidauk duik pujutinak idaiyinak, yamajam pujutan jukiaju asag, dekas yamajam aents ainawai.
2CO 5:18 Ashí nu aina nunak imá Apajuik dutikawai, Cristun awetugma niijai igkumtijamkauwa dui, dutijabau asa jutiinashkam, tikich aents aidaush, Apajuijai pujutjum iwajatajum tusa ujaktajum tujabiuwai.
2CO 5:19 Cristunak ashí aents aidauk Apajuijai epegtuniatnume tusa Apajuik awemauwai. Dutikamu asa, iina tudauji aidaunash pachitjamtsuk idaitugmasui. Tuja jutiinak: Apajuijai pujutjum iwajatajum, tusa chichagkagtuktajum tujabiuwai.
2CO 5:20 Nunin asamtai jutiin, Cristo mina chichameg wi tumainaitag dutiksagmek etsegtugkatajum tusa awemamu asaja, Apajuí atumin tujaamaina nunak jutiin tujamiu asamtai, Cristo tawa dutiksanuk tajime: Pujutjum Apajuijai iwajatajum.
2CO 5:21 Cristuk makichkish tudau aina nunak takaschauwai, nunikunak Apajuí jutii tudaujin niinak aents tudaujai betekak emauwai. Ni nunikbaujin iishkam uwemja niijai ijunjau asajin, yamaikish tudau ainajinig, pegkejan takauwa iman diigmaji.
2CO 6:1 Jutiik Apajuí chichame etsegbaunum yaimin asaja segajime: Apajuí wait anenkagtamun iwaintugmakua nu ayatak antukjum idaisaigpajum tusan.
2CO 6:2 Wagki Ni aatus tawai: “Tsawan wi antugmain jegau asamtai untsugkumin aikmajame, dutikan tsawan uwemainjum jegagtamatai yaigmajame”. Nu tsawantak yamaiya juuwai Apajuí aigmamainuk. ¡Yamaiya juuwai tsawan uwemaina dushakam!
2CO 6:3 Makichkish pegkegchauk iwaintuinatsji, ii takainag nuna pegkegchau chichajinum tuidau asaja.
2CO 6:4 Ayatak dekas Apajuin inakempap ainawa tusa dekagmatnume tabaunum, waitiakuish emamkesa, atsumakuish, utugchat akuish katsuntuinaji;
2CO 6:5 asutamainakuish, achipak egkepainakuish, ijuntugmag jiyapainakuish, imanisaik takainaku, kanutskesh tuke tsawampabiaji, yujumkash yutsuk yujabiaji,
2CO 6:6 nuniaku iwainmabaiji iina pujutinish pegkegchau atsugtabau, ii dekamushkam, wait anenkagtamu, Wakaní Pegkeji jutiiní pujau asa dekaskenum anejatbauwa dushakam;
2CO 6:7 chicham dekaskea nu etsegtanum nuigtush jutiiní Apajuí senchijí ajutjama nujai, jutii imagnisa pujuinaku tikich aidau chicham ujaku ii shiwaji aina nui ayamjumatnash sujamji;
2CO 6:8 eme anenjamush ainai, dakitjamaidaush ainawai, pegkegchau chichagtamainai, pegkejan chichagtamush ainawai, jutiik wait ainakuish, tujash dekaskenmag dekaskea nu chichau ainaji;
2CO 6:9 wainchatai utugmaina dutijamiagtaish tikichik shiig waipainaji, jakattaku yujakuish iwaaku pujuinaji, suwimkan sujamainakush mantamainatsui;
2CO 6:10 diismakek wake besemag ainaji, tujash tuke shiig aneasa pujuinaji, ujunauch ainakuish tikichik wiyakchamitkainaji, jutiinu atsugtamainakush ashí ajutjamainawai.
2CO 6:11 Yatsug corintionmaya aidauwah, jutiik dekaskenum ii anentaibaujiya duka uutsuk ashí ujakbaijime.
2CO 6:12 Jutiik makichkish atum uugkamuk atsugtamji, tujash atumek uuká anentaimjume.
2CO 6:13 Nunin asagmin (uchig anentsan tajime), wait aneasjum minash atum anentaibau ujatkatajum, wi atumin uutsuk tajim aikasjumek.
2CO 6:14 Atumek Jesusa dekaskeapi tuchau aina nujai ijuntsa takata duka wakejumaitsugme, wagki ¿pegkeja dusha pegkegchaujaish wajuk atuemainaita? ¿Nuigtush utugsaya tsaaptina dusha suwejaish apatdaimainaita?
2CO 6:15 Cristuk Iwanchjaig ijunmaitsui. Nunisag Cristun nemajuidaushkam Cristun nemagchau aina nujaig ijunmaitsui.
2CO 6:16 Jega Apajuí ememattaiya duka, apajuimtai dakumkamu aina nujaig makichkish apaemaitsui. Wagki jutiik Apajuí tuke pujuuwa nuna jee ainaji, nuadui Apajuí chichaak: “Ditai pujustajai, nunikan ditajaig wetajai. Dita mina aentsug atinme, nuninakui wi dita Apajuiji atajai”, tiuwai.
2CO 6:17 Nuadui Apu Apajuí: “Tupanjatajum pegkegchaun takaina duka, nuniakjum kanaktajum pegkegchau aina duka takasaigpajum, nunikagmin wi atumnak jukitjime.
2CO 6:18 Wi atumin Apa atajai, tuja atum mina uchig, mina nawantug atajum, tiuwai Apu ashí senchigtina nunú”.
2CO 7:1 Nu aatus anagtamamu aidau ajutjamaidau asamtai aneetaig yatsug aidauh, ashí pegkegchau aidau iina iyashin, wakannash pegkegchau etugtamain aina duka idaisagmi. Apajuí ajantusa diinaku, aan nagkaemasa pegketasa kakanmamsagmi.
2CO 7:2 Atumi anentaiminish jutiijaish shiig juwaktajum, wagki makichik aentskesh pegkegchauk takagsachbaiji, makichkish pegkegchau etamainuk jintintuachbaijime, makichik aentskesh wainka inakuik waitkaschabiaji.
2CO 7:3 Wika junak atumin bakutasan tatsujime, yaunchuk tibaijim dutiksanuk, atumek mina anentaijui pujagme, jaaknush iwaaku pujaknush atumjaig pujustasan wakegajai.
2CO 7:4 Dekas uutsuk tajime, atumiin ememasa anentaibau ajutui, nuniakun kuashat ichichmamjai, ashí waitiamu ajutjamkuish shiig aneamu ajutui.
2CO 7:5 Macedonia taabiag duik iina iyashig ayamtijashbaiji, ashí agaya aidaush waitkagmagmayi; pampanjamainakui ishamkagtakuish waitbaiji.
2CO 7:6 Tujash Apajuí aents pimpikiaju aidaun ichichmatan suuwa nu, Titon awetugma jutiinash anentain ichichtamjabi.
2CO 7:7 Tujash imá ni taa duikik nunikchamjai, ni atumin waipak ichichmamjau asa, atum jutii waijatkatasa wakegamun, nuigtú wi waitiamu antukjum kuashat wake besemag batsatkujum, uyumatjuinajum nuna ujatkamtai antukan, nuní nagkaemasan shiig aneasmajai.
2CO 7:8 Tuja wi papí agaja awemabiag nu wainkajum wake besemag anentaimsauwaitjume, nunak wisha waittsabiajai, tujash yamaik waitiatsjai, wagki papiin agatjabiajim nu wainkajum ujumak tsawantai wake besemag pujusú asagmin.
2CO 7:9 Yamaik shiig aneajai, nunak atum wake besemag batsamsaujum dui nuniatsjai; atum wake besemag batsatkujum Apajuiyai ataktú wakitkiujum dui. Duka Apajuí dutijamkui nunikugme, nuadui atumin pegkegchau awagmamaina duka dutikachjiapi taji.
2CO 7:10 Apajuí wake besemag anentaimtijama nunak pujutjin yapajia uwemjati tusa dutijamui, nuniau asamtai nu anentaimtaku waitú pujumainuk atsawai. Untsu nugkanmaya wake besemag awa duka jatanum ejekagtawai.
2CO 7:11 Apajuí wake besemjan itagtama duish wajukaugme nu diistajum, ¡wajuk yapajinaugme nunú! Atumiin utugchat awa nunú puyatjusjum shiig dekaugme nuniakjum minashkam ayamjutkaugme. Kajeamush nuigtú ishamamush ajutjamsaje, nuniakjumesh mina waitkatasajum wakekaugme, nuniau asajum pegkegchaun takaa dusha suwimak susaugme. Nu ashí dutikaujum dui iwainmamkaugme, atumesh dekas nunú pegkegchau dakituinajum duka.
2CO 7:12 Wi papiin agagmayag nunak aents pegkegchaun takasua nuna anentaimtusnukesh agagchabiajai. Nuniachkunush aents waitkasbaunakesh agatjachbaijai. Ayatak atum jutii puyatjusjum antugkagtajum nuna Apajuí eemtin iwainaktasan agatjamjime.
2CO 7:13 Ashí nu aina duka ichichmamtan sujamsauwai, atum ichichmamjauwaitjum nunisag. Tujash nunú ichichmamjamua nuní nagkaemasa shiig aneasmaji, wagki Tito shiig dakujus pujau wainku, ashí dita aidauwap wakanin ichichmamtan susaje tusa.
2CO 7:14 Wi atumin ememattsan anentaimtamun Titonash ujakmajai. Nuna tija nunak pegkegchauk juwakchajai. Ii ashí dekaskea nu pachisa atum ememattsa tibaijim nunisag Titoshkam dekaskenum waipakaje.
2CO 7:15 Nigka atumnak nuní senchi anempajume, ni atumin segapakuish betek umijujakbau asa, nuigtú puyatjusjum eme anentsá jukiuwaitjum nuna aneaku asa.
2CO 7:16 ¡Shiig aneamu ajutui, atumiin kajinmasan anentaimag dui!
2CO 8:1 Yatsug aidauh, iglesia Macedonia batsata nuna Apajuí wajuk wait anenjae nuna pachisan ujaktasan wakejajime.
2CO 8:2 Ditak senchi waitiamunum batsatiatak, shiig aneamunum ujunauch ainayatkush, wiyakuch wajukmaina imanisag wakejus kuashat anentag yaimkaje.
2CO 8:3 Wi wainkau asan etsegjai, dita dutikmainji ajamun diisag wakejus, dita anentaimtusbaujin inagkeasag anenjauch susagmayi;
2CO 8:4 ditak nagkabiag, Jesusa nemajuidau pegkejam aina nunú yaigmí taji tusag segatiagmayi.
2CO 8:5 Wi anentaimtusbauwa nuna inagkeasag dutikawagmayi. Dekatkauk ashí ditá pujutinak Apu Jesucristun idaitusag, nuadui wi Apajuí wakegamun taja dutiksag umikagmayi.
2CO 8:6 Nuadui Tito segaji, ni anui taa, atum tikich wait anenjatin ijumkujum nagkabauwaitjum nuna jukiti tusa.
2CO 8:7 Atumek ashí wagaagme, dekaskeapi tutanmash, wamak chicham dekatnumash, unuimatnumash, wakejusa anenkai yaimat jutiiní unuimajuitjum dutiksagmek, wait anenkagtusjum yaimjum nuishkam wagatajum.
2CO 8:8 Wika ju dekas umiktajum tusan tatsujime. Ayatak tikich aidau wajuk shiig wakejus aikainawa nuna wainkatnume nuninak ditanu dekas anenka nunash iwainaktinme tusan dekapeakun tajime.
2CO 8:9 Atumek dekagme iina Apu Jesucristo wait anenkagtamujiya duka, atumin anempamunum ujunauch wajasui wiyakchaitak, ni ujunauch webaunum dekas pegkeja nuna jukitnume tujamu asa.
2CO 8:10 Wika junak atumin shiig awajtamaina nuna pachisan tajime. Tikich mijan nagkaemakmaya dui nagkamsajum ayatak ijumjata tabauk nagkamachbaijume dekas wakesa dutikata tabaush ajutjamsagmayi.
2CO 8:11 Yamaishkam atum dutikmain ajutjamaina nu diisjum dutikatajum, nagkamchakjum wakeejusjum dutikami tusajum shiig iwainakuitjum dutiksagmek ematajum.
2CO 8:12 Wagki, aents dekaskenum wakejus dutikatjai tusa, wajupa ajawa nuna diis anenjauch sukagta nuna shiig anentus Apajuik jujawai, Apajuik aents atsuja nunak segatsui.
2CO 8:13 Junak tikich yayamu shiig aneenai atum waittsatajum tusan tatsujime, mai betek atsumamu ajutjamtinme tusan tajime.
2CO 8:14 Yamaik atum dita atsumainakui yaimainuk kuashat ajutjamainawai; tikich tsawantin atum atsumtaish dita yaimpamain ainawai. Junak mai betekak atsumamush ajutjamtinme tusan tajime.
2CO 8:15 Apajuí chichame chichaakushkam: “Kuashat jukiuwa nudaush ampinjachui, tuja machik jukiunush tagagchauwai”, tawai.
2CO 8:16 See tajai Apajuin, wi atumin uyumajim dutiksag Titonash anentaimtan susau asamtai.
2CO 8:17 Wi awemag juna juki, niishkam atumiin minitatus wakegau asa, wakejus minawai atumin waipaktatus.
2CO 8:18 Titojai awemajai makichik yatsutan, ashí iglesia aidaush chicham yamagma juna shiig jintinkagtawai tusag wakejin agma nuna.
2CO 8:19 Nuigtushkam ju iglesia aina juiyan jutiijai minití tusa etegkawaje, anenjauch yaimkatna nuna ejegati tusag, nuniak Apu Jesús eme anentsá wakejusa takainag nuna yaimkati, nunitai jutii yaimkatasa wakegag nunash dekaawagtinme tuidau asag.
2CO 8:20 Nunú yatsut atsumaidau yaigtinun, anentag kuashat kuichik ijumjamu juinag nuna pachisag, wainak augmatjamsainum tuidau asaja tuke kawemak yujainaji.
2CO 8:21 Nuniaku utusaik pegkeja duke takasag tusa kakanmamainaji. Imá Apu Jesusa eemtinig iwainmamkatasa nunitsuk, aents aidaush jutii shiig takainamun wainkatnume tabaunum.
2CO 8:22 Ditajai awemajai tikich iina yachi ashí wajiinum kuashtá dekapsamua nuna, nigka shiig kuitamas takauwai, yamai atuminish shiig kajinmas anentaimin asa wakegas minawai.
2CO 8:23 Titon pachisan tajime, nigka mina kumpajui nunin asa wijai atuegak atumi yaimpaktatus takauwai. Tuja tikich yatsug jimaja nunak, iglesia aina nu awemainawai. Ditashkam Apu Cristun emematin ainawai.
2CO 8:24 Iglesia aidau dekaatnume tabaunum, atum dita aneamugmish iwaintuktajum, jutiik atum eme anentaimtuidau asaja tajime.
2CO 9:1 Nunú pegkejam aidau yaigtin ijumnagti tibauwa nunak, ataktú pataknuk agatmaitsujime.
2CO 9:2 Wagki, wika atum wakesajum dutikamugminak shiig dekagjime, nuniau asan Macedonia nugkanmaya aidaun ujaknush, atumí eme anentsan ujainajai. Nuniakun Acaya nugkanmaya aidaush tikich mijanae dui nagkamas, dita yaimkatnujinak umintsaje tajai. Nunú atum wakejusa dutikamun, Macedonianmaya antukag senchi wakekagmayi.
2CO 9:3 Atum imaniagminig yatsug aidaun awetajime, wi atumin ememattsan chichag nuna wainak tu wekaguwa nunin diigsainum tusan, wi etsegtajim nunisjumek umintsajum asatajum tusan tajime.
2CO 9:4 Macedonianmaya aidau wijai anui takamá, wi tajim nuninchaun waipainakuig, atum datsamain aig, ii atumiin kajinmasa chichakú asaja jutii datsamainaitji.
2CO 9:5 Nuadui nunin ai tau asan, ju yatsug aidaun, atum emkajum wetajum, nunikjum yaimkatnun dita anagkagtuamun wakejus nagkamawagmaya nuna ijumjatnume yaigtajum tusan segainajai. Ijumja umisjum asatajum sujimayatku dutiktsuk, wakejusampap jutikainawa tumain atí.
2CO 9:6 Jushakam adeagtajum: Ajakan machik ajauk machik juwaawai, kuashat ajakmakushkam kuashat juwaawai.
2CO 9:7 Makí makichkitijum atum wajuk susatjai tusagmea anentaimsaugme, dutiksagmek susatajum, junik anentaimiatkujum, nuniachkugmesh tikich apusata tujamainakui dutiktsuk. Apajuik ya wakejus suwawa nuna imá shiig aneawai.
2CO 9:8 Apajuik senchigtina ibau asa kuashat ajitnume tujamu asa ashí anenjauch amamainai; ditak, imatiksag ajuinamu asag, tikich atsumaina nunash ashí takat pegkeg aina nuwi yaigtinme tau asa.
2CO 9:9 Agagbaunum chichaak: “Ujunauch aidaun kuashat susaja nunak, Apajuik tuke kajimatjukchatnai dita pegkeg dutikamujiya nunak”, tawai.
2CO 9:10 Apajuiyai ajaka jigkayí ajakmatnun sukagta duka, nuigtú yuwatnunash sukagtinuk. Nunin asa tu atsumtatjume ajakmatasagmesh nunak amastatui, nunik nigki tsapapak kuashat nejepitkak atum wakesajum yaimjum nunak, nuní nagkaemas kuashat sujamsattagme, tikichin pegkegnum yaigtinme tusa.
2CO 9:11 Dutikamu asajum atumek ashí wajiinum wiyakchamitkamu atatjume, atumi tsagkagminig ashí yaimain ajutjamtinme tabaunum. Nuadui atum shiig aneasjum yaimat ijumjajum jutiiní awemajum nuna, yatsug waituidau aina nunú juinak, Apajuin see tiagtatui.
2CO 9:12 Wagki jujú atum yaimkatin takaajum duka, ayatak Apajuí aentsji pegkejam aina nunú atsumaina nuigkik achattawai, Apajuí shiig kuashat see tabaunmash yaigtatui.
2CO 9:13 Jujú yaibaun jukiag Apajuin emematiagtatui, atum yamajam chicham etsegbau antukjum Cristo dekaskeapi takujum iwainmamkujum dutikajum dui. Nuninak Apajuinash eme anentus emematiagtatui, atum dita wakejusa yayakjum, ashí tikich aidaush yayajum nuadui.
2CO 9:14 Nuninak atumin anempas Apajuin aujtugmagtatui, Apajuí shiig kuashat wait anenkagtamujin atumin iwaintugmakaja dui.
2CO 9:15 ¡See tajai Apajuin, chichamaikish tumainchaun shiig kuashat anenjauch sujamsauwa nuadui!
2CO 10:1 Witjai Pabloitjai, Cristo kakagchauch nuigtú wait anenkagtin aajakua nunisnuk segajime. Mina chichagtuinak: Pablok jutiijai jui pujusag senchi ajankagtinuwe nuninaitak atushat kanaki papí agatjamkug kajeká senchi chichagkagtawai, tujutuinawai.
2CO 10:2 Duwi segajime: Wi atumin wainkatasan taakun, jutii pachijatus aents wakegamun takainawai tukagtuina nuna, shiig titajai tusan umintsan pujajai.
2CO 10:3 Dekaske, jutiik aents ainaji, tujash pegkegchaujai maaninakuik, aents maanina nuninatsji.
2CO 10:4 Wagki, maanitai takuinakag duka ju nugkanmaya ainatsui, duka Apajuí senchijí ashí pegkegchaunash tsaina nuuwai.
2CO 10:5 Aentsú anentaimsa tutaiji, ememainak Apajuí dekatan shiwagmaina dushakam ashí tsaigkaji, dutikaku ashí aentstí anentaimtaijiya duka Cristui sumimtikainaji niina umigkati tusa.
2CO 10:6 Jutiik umintsá pujaji ashí chicham umitan dakituina nunú suwimak susatasa, atum dekas betek umittajum nuniakjumin.
2CO 10:7 Atumek wají paan wainbauwa duke diyagme. Makichik aentskesh dekaskenum Cristunu anenmamuk, ni anentaimtuma nunisag adeagti, dita Cristunu aina nunisaik jutiishkam Cristunu ainag nuna.
2CO 10:8 Wagki wi atumin nagkaesau ememasan witjai chicham etsegkata tibaunuk tumamkunush datsamatsjai; nunak Apu Jesús, atum niiní dekaskeapi tajum nu megkaekaijum tusa yaigtí tujutiu asamtai, minak nu ame emegkatkata tujutchauwai.
2CO 10:9 Wi papiin agajan awetajim junak, uwakatasankesh aikasjime.
2CO 10:10 Tujash awai mina pachittsag: Pablo carta agag awetugmakug najamnun tujamji, tujash taa pujakug chichamesh puyatjusa antugmainchauwe tujutuinawai.
2CO 10:11 Nuna aents aatus tujutuidaushkam dekaatnume: Wi papinum agakun timayag nunak, atushat pujusan anui taaknushkam imatiksanuk umiktatjai.
2CO 10:12 Jutiik, aents ditak emematmamas tikich aidaujaish apatuk niimas nujai betek ata tuina nuninuk ainatsji. Tujash ditak anentaimas, tikich aina nunin achainjash tusag nunina nunak shiig dekachiatak nuní yujainawai.
2CO 10:13 Tujash jutiik, wainkaik imaanikaik emematmamaitsuji. Apajuiyai jutiish wajuk dutikmainaitji nuna tujamuk. Nigki jutiinak atum Corinto batsatjum anuish takastí tusa wakejutpaji.
2CO 10:14 Nuadui yaunchuk atumin taachu asá wajukmaina nunikaik ii nunimaina nu inagkeakik dutikatsji. Jutiiyaitji dekatkau yamajam chicham Cristunua nu etsegku atumiin tautik.
2CO 10:15 Jutiik ii takaschamu aig, tikich takasbaunmag ememamaitsuji. Ayatak wakeesa dakainaji atumjai aan kuashat takastasa. Atum Cristui dekaskeapi tajum nu aan nagkaemas ajutjamti tusa. Jutiik Apajuí dutikata tujabauwa duka dutiksaik takainaji.
2CO 10:16 Nuniaku atumi nagkaetamas atushat batsataidaush yamajam chicham ujaktasa wakegaji, tujash tikich chicham etsegkamunum waitsuk, tikich takasbaunum ememaig tuidau asaja.
2CO 10:17 Makichik aentskesh eme anenmamjatatus wakegauk, Apu Jesús takasbaujiya nuna eme anenmainai.
2CO 10:18 Wagki Apu Jesusa eemtin pegkeg wantina duka nigki emematmama duchauwai, ni Apu yana eme anentawa nuuwai dekas imanuk.
2CO 11:1 Wi imaanag wajukmaina nuniakuish katsuntsajum diigmainaitjume.
2CO 11:2 Wagki wika Apajuí akasmataijiya nuna jukiu asan atumnak akaseajime. Atumek, wi makichik aishmagnum nemakti tusa anagmitkamua nunin ainagme, duka Cristui, nuwa aentsun adijkachua iman iwainakta tau asan.
2CO 11:3 Tujash puyatajai, dapi Evan tsanujua dutiksag atumnash anentaimtagmin dekaskenum imagnisjum Cristun nemagjum nu tsanugmainakui kanakaijum tusan.
2CO 11:4 Makichik aentskesh atumin tajutjamawag, jutii Jesús pachisa jintintuauwaitjim nuna yapajiawag jintinjamainak, Wakaní Pegkeji jukiuwaitjum nunash, tikich wakan jumainaitjume tujamainak, yamajam chicham etsegkamua nunash yapajia jintinjamainakuish shiig antugkatasajum wakegajume.
2CO 11:5 Tujash apóstol ainaji tusag iman anenmamaina nuna nugkaanik anenmamtsujai.
2CO 11:6 Wi shiig jintiaja chichaachkunush dekatjuig nuninchauwaitjai. Duka ashí ii takaamunum tuke iwaintibiajime.
2CO 11:7 Atumin yamajam chichaman Apajuinun pachisan ujaknush akigkatajum tusanuk segachuitjime, ayatak yaigkan emtikata tau asan. ¿Nuna dutikauwaitag duiká tudau takasag?
2CO 11:8 Wika tikich nugkanmaya iglesia aidau akigkagmatai, nunú kuichkia duik atumin yaigtasan wekaeyajai.
2CO 11:9 Wi atumiin pujubiag dui atsumaknush makichkitigminakesh waitkaschabiajime, yatsug macedonianmaya aidau taawag ashí wi atsumamunak sujusagmayi. Atumin waitkasaig tusan kuitamamkabiag nunisnuk kuitamamkattajai atumin waitkasaig tabaunum.
2CO 11:10 Cristo dekaskejiya nu dekas ajutu asamtai ememasan tajai, Acaya nugkanum batsamin aidaunak makichkish kuichik sujustajum tusanuk segashtinaitjai.
2CO 11:11 ¿Wagka nunash taja? ¿atumin aneachu asanuk taja? Apajuí dekawai atumin aneajim nunak.
2CO 11:12 Tujash wi takaag junak, jutiksanuk emattajai, tikich aents aidau Apajuí awemamu ainaji tusag eme anenmamainak jutiiya imanuk anenmamaina nu imijkata tabaunum.
2CO 11:13 Wagki nunú aina duka wait apóstol ainayatak, Cristo apostolji wajukmaina numamtuk wajainawai.
2CO 11:14 Dita nunia duka anentai jegagchamnukesh atsui, wagki Satanaschakam tsanumkug Apajuí aentsji nayaimpinmayaya iman weeta wajauwai,
2CO 11:15 nuadui niina takajin aina dushakam pegkejan takauwa iman iwainmamainawai. Tujash nunú aidauk dita takasbaujiya dutiksaik suwam agtinai.
2CO 11:16 Awentsanuk tajime, imaanjauwa nuninuk anentaimjuttsaigpajum, tujash nunin anentaimjutkugmek ayatak diigsatajum tuke imaanjaujai betek chichaktajai, wisha machik eme anenmamjatjai.
2CO 11:17 Wi emematmamsan chichag nunak, Apu Jesús titá tujutbaun tatsujai. Nuadui imaanjaujai betek chichaajai.
2CO 11:18 Tujash tikich ainawai ditak emematmamas chichaidaush. Nunin asamtai wishakam wiki emematmamsan chichaajai.
2CO 11:19 Atumek shiig anentaimkau asajum, tikich anentainkachu chichaman etsejuinakui shiig antujuinagme.
2CO 11:20 Atumek inak etamaidaush, tsanugmajag jujutjamaidaush, wainak wajiin takagtamainakuish, aentschau chichagtamaidaush, yapimin awatamaidaush shiig antugjume.
2CO 11:21 Datsamayatkun tajime, jutiik tikima kakaakchauch asaja nu imanuk nunikchabiaji. Tujash tikich ditak emematmamaina nunisnuk wishakam emematmamjai, imaanjaujai betek chichaakun nunak tajai.
2CO 11:22 Dita hebreo aina wishakam nuninketjai, dita Israel aina wishakam nuninketjai, dita Abraham weantu aina nunisnuk, wishakam nunú weantuitjai.
2CO 11:23 ¿Ditash Cristo takagnuk aina? Tujash witjai dekas ditan nagkaesaunuk, juna aaja takunuk tuke imaanjaujai betek chichaajai. Wika ditá nagkaesau takasuitjai, ditá nagkaesau achinkanush egkemauwaitjai, ditá nagkaesau asutnauwaitjai, kuashta imania mantumain awajtukaju ainawai.
2CO 11:24 Cincoa imania judío aidau achigkag treinta y nueveya imaania asutuawaju ainawai.
2CO 11:25 Kampatuma imania numí suwimjuawajui, makichkia kayai tukuujaju ainawai, kampatuma imania lancha wi wegamu tepeauwai, nunikmatai jakemain wajakan, makichkia nayantsa ejapen tsawampajuitjai.
2CO 11:26 Kuashat wekaesauwaitjai, namak ishamainnum, kasa ishamain ayamunmash, mina pataag judío aidau, judiochu aidau kajegtuinakui. Nuigtú ishamain aidau yaaktanum, uwegshunum, nayantsanum weakun, tuja Cristo nemagnaitjai yatsut ainaji tusag tsanumaidaunum wekaekun.
2CO 11:27 Senchi takasan yaweakun, kuashtá kanutsuk tsawaakun, yapajakun kitamakun, kuashtá yujumkan yutsuk wekaekun, tsetsekai waitiakun, jaanch atsugtakuishkam waittsauwaitjai.
2CO 11:28 Juna aaja imaniaknush tikichia duka, kashí kashinig ashí iglesianu uyumamuk tuke ajuta nuuwai.
2CO 11:29 Makichik aentskesh jaakuig, wishakam najaimattsan diyajai. Makichik aentsnakesh pegkegchaun takamtikainakuig, wisha kajeajai.
2CO 11:30 Wi ememamainaitag nunak, mina kakakchamujua nuwi ememamainaitjai.
2CO 11:31 Apajuí, ii Apuji Jesucristo Apají nigki tuke ememattaya nu dekagtawai wi dekas taja nunak.
2CO 11:32 Damasco jegaa ai, Apu Aretas tutaya nujai takau aidau, ashí yaakta waitijin achijatin aidaun dakamtijagmayi mina achigkagtatus.
2CO 11:33 Tujash chagkinnum egketuawag, yaakat peegmagbau ventanajin detuawag ajuntuawagmatai, uwemjauwaitjai achigkata tuinamun.
2CO 12:1 Dekaskenmag iik eme anenmamtak pegkegchauwai, tujash Apu Jesús mina iwaintugbaun wainkauwaitag nuna tajai.
2CO 12:2 Wainjai makichik aents Cristo nemagnun, catorce mijan nagkaemawai kampatum nayaimpia nuwi iwakbau aajakua nu. Dekatsjai iyashijai jukimuashit atsa wakaninakeash jukiabia, nunak Apajuí dekawai. Tujash wainjai nu aentsua duka (iyashijai jukimuashit atsa wakaninakeash jukiabia, nunak Apajuí dekawai),
2CO 12:4 paraíso iwakam antukui chicham tumainchaun, duka makichik aentskesh ujamainchau aajakui.
2CO 12:5 Nu aentsua nuna wika emematmainaitjai, tujash wika emematmamaitsujai, ayatak wi kakakchamujua nuwi emematmamjai.
2CO 12:6 Tujash wi emematmamtasan wakegaknush anentainkachu wajukmaina nunimaitsujai, dekaskea nuna tau asan, nunin aig nunak tatsujai; mina waituinak, chichamjunash antugtuina nuna nagkaesau anentaimjuttsainum tabaunum.
2CO 12:7 Tuja nu imanun iwaintugkauwa dui eme anenmami tujutu asa, mina iyashjui jagkia imanai ijutiuwai, tujash nunak Apajuí dutikati tima Satanasa inake dutijuauwai mina waitkagsatatus.
2CO 12:8 Dutijuamtai Apu Jesusan kampatumá segajai: “Wi waitiag nuna emegkatjukti”, tusan.
2CO 12:9 Tujash Apu Jesús chichagtak: “Amek, mina anenkajua nu ashí atsumame, wagki mina senchijua nunak kakaakchamua nuwi iwainajai”, tujutmayi. Nuadui shiig aneajai wi kakakchauwaitag dui, Cristo senchijiya nu minai ajuttí tabaunum.
2CO 12:10 Nuadui shiig aneajai kakaakchau weaknush, pegkegchaun chichagtuinakuish, atsumamu ajutkuish, waitkajuinakuish, utugchat ajutkuish Cristo nemagbaunum waitiajai; wagki shiig kakaakchau dekapmamaknuk nuní senchi dekapmamjai.
2CO 12:11 Wika anentainkachu wajukmaina nunikbaijai wiki emematmamkun; nunak atum wajukeagme nuniakjumin nunikbaijai. Wika atum emematam amain aajakuitjai, wagki wika wainkayaitkunush, apóstol ainaji tusa eme anenmamaina nuna nugkaan achau asan.
2CO 12:12 Ashí wi waitiamu aidaunak emamkesan katsunjan, wainchatai aidaunash iwaintakun, aents dutikmainchau aidaun dutikakun, puyatjusa diimain aidaunash takasuitag nunú, wi dekaskenum apostoloitag nuna iwaintawai.
2CO 12:13 Atumek makichik wají dutikachbaunmag tikich iglesia aina nujaig imanchauch juwakugme, wi yainkatajum tusan segachuitjim dui. Tujash nuna aajan segachuitjim dui tsagkugtugtajum tajime.
2CO 12:14 Kampatuma junash ijagsatjime tusan umintsan pujajai, nuniaknush yamaishkam waitkaschattajime. Wika atumin ajutjamaina nunak egatsjai, imá atumnak wainkatasan wakejajime; wagki Aents uchigtin aina nuuwai uchijinu atinun kuichkin ijumaina duka, uchi aina duka apajinu atinnak dutikmaitsui.
2CO 12:15 Nunin asamtai wakesan ashí mina ajuta nujai yaigta tajime, nunisnuk ashí mina iyashjuish waittsattajai atum wakanmin megkaekaijum tusa aneamunum, wi atumin senchi aneajim nunisjumek minash anenmainaitjume.
2CO 12:16 Wi atumin waitkaschauwaitjim duka atumesh dekagme. Nuniaig, tikich aidau chichagtuinak, shiig tsanumna dui tsanuak tu wekaewai tujutuinawai.
2CO 12:17 ¿Wisha tikich yatsug aidaun awetibiajim duiká tsanugbaijim?
2CO 12:18 Titon segabiajai atumiin minití tusan, dutikakun niijai tikich yatsutan awemabiajai. ¿Titoká tsanugmajagmaya? Titojaig makichik wakania duke ajutjamji, nuniau asa atumin yaimpaktatus wijai betek takaawai.
2CO 12:19 Atum anentaimsagmek, tsagkugtugtinme tusag tuinatsuash tautigmesh amainaitjume, tujash nuninchauwai. Jutiik Apajuí eemtin Cristo nemajin asaja tuinaji, ashí ii dutikainag duka, aneetaig yatsug aidauh, atum yaigta tabaunum dutikainaji.
2CO 12:20 Nuniau asan puyatajai atumin wainkatasan takaman, wi anentaimtag nuninchaun wainkachainjash, tuja atumshakam mina anentaimjutjum nuninchau waitkaijum tusan. Puyatajai jiyaniakjum, tikichdau diisjum kajegkujum, kajeakjum, tupandaikajum, pegkegchau chichagdayakjum, chichaman patatdayinak, ememainak, wainak pachimdaekag batsatbaunum jegashtajash tusan.
2CO 12:21 Nuigtushkam puyatajai wi ataktú ijagsattajim dui Apajuí atumiin datsamtan sujusmatai buutig tusan, atum ainajum anuiya yaunchuk nagkamas tudau takainak idaitsuk tsanijinainak ayatak tsumain aina nunak tunamatuk batsamtau asamtai.
2CO 13:1 Yamai minittag nuuwai kampatuma juna ijagsattajim nu. Ashí tumain aina duka jimag nuniachkush kampatumkesh etsegtuinakui nunikti tumainaitjume.
2CO 13:2 Yaunchuk wi jimaja jui ijagsatasan tajuawabiajim dui tibaijime, pegkegchau takaajum duka idaisatajum tusan. Yamai atushat pujusnush nunak agatjime, ataktú ijaaku minittag dui ashí yaunchuk tudaun takaak batsabiagmaya nunisag takaa batsatun wainkunuk tsagkujashtatjai,
2CO 13:3 wagki atumek Cristo minai chichá nu dekapjustasajum egagme. Cristuk atumin dutijamatta duka kakaakchauchui; niina senchijinak atumiin iwainaktatui.
2CO 13:4 Duka dekaske nigka kakaakchau wajasmatai yupichu achijaju ainawai, tujash yamaik Apajuí senchijijai pujawai. Jutiishkam nunisaik ni kakaakchau aajakua nuninuk ainaji, tujash Apajuí senchijin Cristujai ijunja pujuinaji atum yaigta tabaunum.
2CO 13:5 Atumek niimastajum dekaskeapi tabaunmash ebetmamjagmeash pujajum; atumek dekapmamsatajum. ¿Atumek wainmamtsugmek Jesucristo atumiin puja duka? Apajuí dekapjabaunum megkaechakjumek.
2CO 13:6 Atumesh utusagmek jutii kuashat dekapeam ainakuish megkaetsug nu dekaawajum tusa dakainaji.
2CO 13:7 Nuniau asan Apajuin aujtajime pegkegchau takasaijum tusan, nunak dekapkagtamua nuna nagkaikiu asan iwainmamkun nuniatsjai, ditak pegkejan takastinme tabaunum nuniajai, jutiik megkaekauwa nunin ainayatkuish.
2CO 13:8 Jutiik dekaskea nuna shiwagmamainuk makichkish takamaitsuji, dekaskea duke takamainaitji.
2CO 13:9 Jutiik kakaakchau ainakuish shiig aneenaji atumek senchi asagmin; nuniaku Apajuí aujtajime shiig imagnis pujustinme tusa.
2CO 13:10 Nuniau asan eke atumiin minitsuk juna papiin agajan awetajime, wi atumiin taakun najam tiijim tusan, Apu Jesusak atumin yaigtí tusa senchimtijuauwai, pegkegchau ematnume tujutchauwai.
2CO 13:11 Yatsug aidauh, inagnakun tajime, dakujusjum pujustajum, imagnisjum pujakjum ichichdaitajum, makichik anentaimkauk atajum, Apajuí shiig agkan pujutan sukagtin anenka nu atumjai atí.
2CO 13:12 Makí makichkitijum pempeentunisjumek shiig anendaisajum kumpamdaiyatajum.
2CO 13:13 Ashí Jesusa nemajin pegkejam aina nu kumpamjamainawai. Apu Jesucristo wait anenkagtamuji, Apajuí anenkajiya nu, Wakaní Pegkejiya dushakam ashí atum aidaujai atí. Aatus atí.
GAL 1:1 Witjai Pablo apóstol, aents aidaukesh etegka awemachbauwaitjai, Jesucristo nuigtú iina Apají Apajuí Jesús jakaunak inankiuwa nujai awetiuwai,
GAL 1:2 ashí yatsug wijai batsata nujai, atum iglesia aidautijum Galacia batsatjum nuutigmin kumpamjime.
GAL 1:3 Iina Apají Apajuiya nunú, Apu Jesucristujai wait anenjamag shiig agkan pujutan amastinme.
GAL 1:4 Jesucristuk nigki jutii tudaujin mantamnatatus tsagkamankauwai, yamai ju nugka tudaunum batsatainag nuwi agkanmitkagmata tau asa, ii Apají Apajuí wakega nunisag;
GAL 1:5 nuadui, ¡Apajuiya duka tuke ememattai atin atí! Aatus atí.
GAL 1:6 Atumnak Apajuí untsugmakajui, Cristo wait anenjamag anentag amaamu jukitajum tusa, nuadui anentai jegatsjai tikich yamajam chichaman yapajia etsejuinakui nu antukjum wamkesjum Apajuí idaisaujum dui.
GAL 1:7 Dekaskenmag duka tikich yamajam chichamchauwai. Nunin aig tikich aidau pachimjutpainawai yamajam chicham Cristo pachisa etsegbauwa nuna yapajiawag tsuwapaktatus wakegaidau asag.
GAL 1:8 Tuja jutiikesh nuniachkush makichik ángel nayaimpinmayagkesh jutii jintintuauwaitjim nuna yapajia tikich chicham yamagman jintinjamaidaunak, Apajuí suwimkan sumainai.
GAL 1:9 Duik timajim nunak awentsanuk tajime: Makichik aentskesh yamajam chicham antukuitjum nuna yapajia jintinjamaidaunak, Apajuí suwimkan sumainai.
GAL 1:10 Wi juna tajim nunak aentsun shiig awajkatasanuk tatsujai, wika Apajuí shiig awajkata tabaunum takaajai. Aents aidaujai shiig juwakta tusanush egatsjai, wi aentsun shiig awajkatasan nuniaknuk Cristo inakeg amaitsujai.
GAL 1:11 Yatsug aidauh, ju shiig dekaatajum: Wi chicham yamagman etsejag junak aents anentaimsa tibaunakesh etsegtsujai.
GAL 1:12 Wika aentskesh jintinjuamtai antukan dekaachuitjai, aentsnumianakesh unuimagchauwaitjai, minak Jesucristo iwaintugkauwai.
GAL 1:13 Atumek antukuitjume mina pujutug wajuku aajakuita judío aidau umitaijin umiakun pujusuitag duish, iglesia Apajuinu aidaun emegkaktasan aintujakuitag nunú.
GAL 1:14 Wika judío aidau umitaijin umiakun pujusnuk mina pataag aidau wijai betek tsakakú aidaunak ashí wagagsan, mina muuntug aidau umitaiji aina nunak imatiksanuk betek umijakuitjai.
GAL 1:15 Tujash Apajuí wisha akiintsaig wait anenjug minak etegtuauwai. Dutijuau asa,
GAL 1:16 niina Uchijin iwaintugkauwai judiochu aidaunum yamajam chichaman etsegkati tujutu asa, dutijuamtaish aents aidaunak, wajukattaja tusanuk iniaschabiajai,
GAL 1:17 Jerusalegkash wechabiajai, mina Jesús apóstol etatsaig ditá apóstol emamu aidau batsata nuna wainkatasanuk, nunitsuk wamak Arabia nugkanum wenu wakettsanuk Damasco jegauwaitjai.
GAL 1:18 Jesús wantintugkamu kampatum mijan nagkaemai, Jerusalén Cefasan wainkatasan jegaan, niijai quince tsawan pujusuitjai.
GAL 1:19 Tujash nuig tikich apóstol aidaunak wainkachbaijai, imá Santiago Apu Jesusa yachiya nunak wainkabiajai.
GAL 1:20 Wi agatjim junak, Apajuí eemtinish dekaskea nuna tajai.
GAL 1:21 Nunikan Siria nugkanum, Cilicia nugkanmash weuwaitjai.
GAL 1:22 Yatsug iglesia Cristunu aidau Judea nugkanum batsatuk, minak igkuntsag waitujakchaju ainawai.
GAL 1:23 Nunidau asag ayatak antujakajui: “Yaunchuk aintamajakua nu yamaik Jesusai dekaskeapi tabaun pachis etsejui ni emegkaktatus wakegajakua nuna” tabaun.
GAL 1:24 Wi nunitai Apajuin emematiajui.
GAL 2:1 Catorce mijan inagkeakin, ataktú Jerusalén Bernabejai weakun Titon ayauwaitjai.
GAL 2:2 Nunak Apajuí wetá tusa iwaintugkamtai wegabiajai. Nunikan wi judiochu aidaunum yamajam chichaman etsegkauwaitag nunash tuja yamai takaag nunash wainkan takatsjash tusan Jesusa nemajin aidau apuji aina nujai kanakan ijunjan chichasbaijai.
GAL 2:3 Tujash Tito wijai wekagunakesh, griego aents aig pakamakti tichajui.
GAL 2:4 Ujumak wainak Jesús nemagji tusag uumak jutii batsatbaunum wayawagmayi, jutii Cristo Jesusai agkanmagauwaitag nuna dekamawagtatus, nuigtú chicham umiktajum tusa waitkatai aajakuitag nui ataktú awagtamkitatus.
GAL 2:5 Nunú aidauk machikish antugkachbaiji, wagki yamajam chicham dekaskea nu jutii etsegbau antukuitjum nunú atuminish nunisag ajutjamti tuidau asaja.
GAL 2:6 Tuja Jesusa nemajin aidau apuji aina duka yamajam chicham umimainnakesh tujutchagmayi, (dita wajukuk aajakú ainawa nunak puyatjatsjai, wagki Apajuí diismak ashí betekak ainaji).
GAL 2:7 Ayatak dekagtuawagmayi Apajuí pakamakchau aidaunum yamajam chicham etsegkata tujutbauwa nuna, Pedron pakamaku aidaunum etsegkati tiuwa dutiksag.
GAL 2:8 Apajuí Pedron judío apostolji emauwa duke, minashkam judiochu aidau apostolji etiuwai.
GAL 2:9 Santiago, Cefas, Juan, Jesusa nemajin aidau apuji aina nu Apajuí mina wait anenjug sujusbauwa nuna dekagtuawag, mina Bernabejai uwegnum achigmainak, atueka takasagmi, atumek: Judiochu aidaunum takastajum, jutiik judío aidaunum takasagtatji tujabiagmayi.
GAL 2:10 Ayatak segapagmayi, Apajuí nemajin Jerusalén ujunauch batsata nu adeagtajum tusag, nunak wishakam shiig kuitamsan takastasan kakanmamsabiajai.
GAL 2:11 Tujash Cefas yaakat Antioquía taa yatsut bakumamainun nuní wekaekui, yapinum igkuan jiyakbaijai.
GAL 2:12 Nagkamchakug judiochu aidaujai ijunag yu pujayatak, Santiago awemamu kaunawagmatai tupautan nagkama, ditajai ijunja yutanak idaisabi, pakamaku aina nuna ishamak.
GAL 2:13 Pedro nunitai tikich judío Jesusa nemajin aidaushkam nunisag judiochu aidaujai ijuntuja yutanak idaisajui, nuniagtai Bernabeshkam dita tsanumaina nuninuk wajasmayi.
GAL 2:14 Tujash yamajam chicham dekaskenum etsegna nuna betek umiinachun wainkan, aents tuwakbaunum Pedron chichagkun: “Ame judiowaitkum judiochu wajukmaina nunimum dusha, ¿wagka judiochu aidaush judío wajukena nuninuk emaktasamesh wakejame?”, tibaijai.
GAL 2:15 Jutiik dekas judío ainaji, nunin asaja judiochu aidau tudaugtin aina nuninchau ainaji.
GAL 2:16 Dekainaji chicham umiktina nu umiamunum pegkeg ainagme tama amainchauwaitag duka, ayatak Jesucristui dekaskeapi tabaunum pegkeg ainagme tama amainaitag nunú. Nuadui jutiishkam Jesucristui dekaskeapi tiu ainaji, Apajuí pegkeg ainagme tujamti tabaunum, chicham umiktina nu umiamunmachu; nunin asá makichkish chicham umiamunmag pegkeg ainagme tamak achatnaitji.
GAL 2:17 Nunin asamtai Cristo pegkejaitme tama atasa egainaku, jutiishkam tudauwaitag nu dekamauwaitji. ¿Duiká Cristo tudau takamtikagtinai tumainait? Duka makichkish nuninchauwai.
GAL 2:18 Wagki wi juka umimaitsui tiuwaitkun, nunak awaksanuk umimainai takunuk, wiki bakumajai.
GAL 2:19 Wagki chicham umiktina nuna umiktasa pujaknuk jakaujai betek wenu pujubiajai. Tujash yamaik Cristo achigbau aajakua nui mina tudaujuk nagkanjauwai.
GAL 2:20 Nuniku asan wichauwaitjai iwaaku pujag nunak, Cristo minai puja nu minak iwamtijawai. Wi yamai iwaaku pujag nunak, Apajuí Uchijí mina anentu asa, minai mantamdauwa nunú dekaskeapi tabaunum pujajai.
GAL 2:21 Apajuí wait anenkagtugbaujiya nunak dakitatsjai; wagki chicham umiktina nu umiamunum pegkeg ainagme tama asauwaitkuik, Cristuk wainak jakau amainai.
GAL 3:1 ¡Galacianmaya anentainkachu aidauwah! Atum jutii Jesucristo achigbauwa nu pachisa etsegjin, paan achigbau wainkajum anentaimtumainaitjum imatiksajum anentaimtibiujum nunash, ¿yaa chicham dekaskea nuna umikai tusash tsanugmajaje?
GAL 3:2 Juna aigkatnume tusan wakegajai: ¿Wakaní Pegkeji jukiuwaitjum dusha Moisés chicham umiktajum tibauwa nu umiamunmag jukiuwaitjum, atsa Jesucristui dekaskeapi tabaunum jukichukaitjum?
GAL 3:3 ¿Waa imá anentainkachush ainagme? ¿Wakaní Pegkeji yaimpasmatai pegkeg nagkamau ainayatkugmesh, wagka: Jutiik kakanmamainaitji Apajuí wakegamu takastag takuik tajume?
GAL 3:4 ¿Kuashat pegkeg takaidau asajum waitkam asauwaitjum duka wainkagmek waittsauwaitjum? Duka wainka waitkasbau ainatsjume.
GAL 3:5 Apajuí Wakaní Pegkejin atumin sujamas aents dutikmainchau aidaun atumin iwaintugma nunash, ¿Moisés chicham umiktajum tiuwa nu umiamunmag dutika, atsa chicham etsegbau antukjum dekaskeapi tau asagmin dutikatsuak?
GAL 3:6 Nunisag “Abrahamak Apajuiyai dekaskeapi tujakua dui, Apajuishkam pegkeg diisui”.
GAL 3:7 Nunin asamtai jujú dekaatajum, Abraham weantu aina duka, Apajuiyai dekaskeapi tuina nu ainawai.
GAL 3:8 Nuna pachis yaunchuk agagbau aajakua nuna dekau asa, judiochu aidaush dekaskeapi tiagtai Apajuí pegkeg ainagme tama agtina nuna emtika Abrahaman yamajam chichaman ujaak: “Ashí nugkanmaya aents aidauk aminí pegkegnum yaigbau agtinai”, tiuwai.
GAL 3:9 Nu aatus asamtai Apajuiyai dekaskeapi tuina duka, Abraham dekaskeapi tiuwa nujai betek pegkegnum yaigbau ainawai.
GAL 3:10 Tuja ashí aents chicham umiktina nuwi kajinas anentaimaidauk, bakumatnum batsatainawai. Wagki, agagbaunum: “Chicham umiktin papinum agagbauwa nuna aents imatiksag umiinachuk suwimkan jukitnume”, tawa dui.
GAL 3:11 Nuadui juka paantai, Apajuik makichik aentsnakesh Chicham umiktin aajakua nuna umiau asamtai pegkeg ainagme tatsui. Wagki agagbaunmag: “Pegkejan takaa duka imá dekaskeapi tabauwaik tuke pujutnai”, tawai.
GAL 3:12 Chicham umiktina duka Apajuin dekaskeapi tuidau tuke pujutnai tatsui, nuadui chicham umiktina nuig, “Aents chicham umiktina nuna imatiksag umiauk, nu umiamua duik tuke pujutnai”, tawai.
GAL 3:13 Cristo jutiinak agkanmitkagbauwai chicham umiktina nu umiachbaunum suwimak jumaina nunak. Ni iina ayamjutpakta tau asa suwimkan juwak mantamdauwai, nunisag agagbaunmashkam: “Aents maamua nu numinum nenam awa duka, Apajuí aents tikima katsek tudaugtin dutikatajum tibau asa dutikam awai”, tawai.
GAL 3:14 Nunak Apajuí Abrahaman pegkejan anagkuauwa nunash, judiochu aidaush Cristo Jesús dekaskeapi tabauwai, Apajuí Wakaní Pegkejin anagtamauwa nunash jukitnume tabaunum nunikui.
GAL 3:15 Yatsug aidauh, aents aidauti nunitaijiya nuna pachisan tajime: Makichik aents tikich aentsjai chichaman apainak papinum agajag nuní atí tusa firmamunak, makichkish nuna esaktumainuk, nuigtú eketus dutikmainush atsawai.
GAL 3:16 Apajuí Abrahaman, niiní akiinak weagtina nunash kuashat anagkuauwai. Agagbauwa nuig kuashat taku tumaina dutikag, “akiinkau aidau” tatsui, ayatak makichkin tawai: “Aminiya akiinau”, jui dekanui makichkin tawa nu, nunak Cristun taku tawai.
GAL 3:17 Wi tajim duka juuwai: Apajuí Abrahamjai Cristun pachisag chichaman apakú aina nunak dutiksag kuitamkauwai, dutikamu asamtai cuatrocientos treinta mijan nagkaemai chicham umiktin asauwa nuwish Apajuí anagkagtuamua duka nunisag juwakui.
GAL 3:18 Apajuí anagtamauwa nunú chicham umiktina nu umiaku jumainaitkuig, ni anagtamauwa duka wainak amainai. Tujash Apajuik Abrahamnak anenjauch amastatjame tusa anagkuauwai.
GAL 3:19 Aatus aish, ¿wajinma atsumnawa chicham umiktina dusha? duka ayatak aents aidau betek umiachbaujiya nunú iwaintukta tabaunum dutikamu aajakui, nunú nuniai Apajuí Abrahaman “aminiya akiinatnai” tusa anagkuauwa nu akiinauwai. Chicham umiktina nunak Apajuí angelan Moisesan awetim ujakui dutikam niishkam aents aidaun ujakui.
GAL 3:20 Tujash Apajuí makichkia nu Abrahaman anagkuauwa nunak tikich tití tusag atsumjachui, nigki igkua amastinaitjame tiuwai.
GAL 3:21 ¿Nuna tawa nunash chicham umiktina duka Apajuí anagkagtuamu aina nujaig betekchauwai takug tawa? Duka makichkish nuninchauwai; wagki Chicham umiktina nu pujutan sukagtumainaitkuig Chicham umiamunum pegkeg ainagme tama amainaitji.
GAL 3:22 Tujash Agagbaunmag ashí aentsuk tudau achikbauwa nunin ainawai tawai, nunak ya aidauwa Jesucristun dekaskeapi tuinawa, nu Apajuí uwemat anagkagtuamua nuna jukitnume tujamu asa.
GAL 3:23 Nu eke dekaskeapi titina nu taatsaigkik, Chicham umiktina duka aentsun achijá chimpia epena numamtuk awajam asauwaitji, jutii dekaskeapi titina nu Cristo dakainaku batsatu asaja.
GAL 3:24 Chicham umiktina duka, inak uchi aidaun kuitamama numamtuk kuitamjamajakui, Cristo taamtai niiní dekaskeapi tuinak pegkejaitme tama agtinme tujamu asa.
GAL 3:25 Tujash yamaik Jesusai dekaskeapi tuidau asaja, Chicham umiktina duka atsumnatsui.
GAL 3:26 Cristo Jesús dekaskeapi tabaunum ashí atumek Apajuí uchijí wajasuitjume,
GAL 3:27 wagki ashí Cristui yamimaku ainajum duka Cristunu ainajum nunú iwainmamkata tabaunum nunikuitjume. Nuniku asaja ni wajukea nuninaji.
GAL 3:28 Nuniku asajum juka judiowai, juka griegowai, juka inataiyai, juka inashtaiyai, juka aishmagkui, juka nuwai tabauk atsawai, wagki Cristo Jesús nemagbaunmag ashí atum aidautigmek makichkia nunin ainagme.
GAL 3:29 Atumek Cristunu asajum Abraham weantu ainagme, nunin asajum Apajuí anagkuauwa dushakam imatiksagmek jukitin ainagme.
GAL 4:1 Juna titag tajime: Aents uchigtina nu wi jataik mina wajiignak mina uchig jukitin atí tabauwa nu tsakatuch akug inaka nujai betekak pujawai, dekaskenmag ashí wají aina duka niinu aig; nunin asamtai aents uchin kuitama nu niinu atina nunash kuitamjin ainawai apají tsawan mamiktugbauwa nu jegatí tusa.
GAL 4:3 Nunisag jutiinash nagkaetamui, yaunchkek judío aidautish Cristo dekachu asaja uchijai betek, ju nugkanmaya unuimatjamu aina nu umiktasa achikbau inaku waitkamaina imatikam aajakuitji.
GAL 4:4 Tujash Apajuí tsawan mamikiamujiya nu uminkamtai niina Uchijin awemauwai, dutikam makichik nuwanum akiinauwai, nunik chicham umiktina nuna umiak pujusui;
GAL 4:5 chicham umiaku batsatutin agkanmitkagma Apajuí uchijí etamkata tujamu asa.
GAL 4:6 Nuadui niina uchijí waigkú asajin Apajuí iina anentain niina uchijí Wakaniya nuna sujamsauwai, nunú ichachtamkui: ¡Mina Apajú! tuinaji.
GAL 4:7 Nunin asamtai amek inaku waitkataig atsume, Apajuí uchijiyaitme, nunin asam Cristo nemagbaunum Apajuí sujamsatna nu ameshkam jukitnaitme.
GAL 4:8 Atumek yaunchkek Apajuí dekachu asagmek, apajuimtai dekaskechu aina nunú umijujakuitjume.
GAL 4:9 Tujash yamaik atumek Apajuí dekaugme, nunisag Apajuí atumnash dekagmainawai, nunin aish, ¿wajukeakjumea atumesh kakaakchau senchigtuchu aina dusha ataktú waketjukjum umigkujum waittsatasagmesh wakegagme?
GAL 4:10 Atumek Moisés agagbaunum tsawan, nantu, mijan aina nuna pachis tibauwa nu, jutsu Apajuin shiig awagmatai tusa umiktasajum fiestamjume.
GAL 4:11 Nuniakjumin puyatajai wi atumin imatika jintintuauwaitjim nunak wainkanuap takasja tusan.
GAL 4:12 Yatsug aidauh, wi wajukauwaitag nuniktajum tusan segajime, wisha atum wajukeajum ankauwaitjai Chichaman umiakun pujusan. Nunak atum pegkegchau awajtuku asagmin tatsujime.
GAL 4:13 Atumek dekagme, wi yama nagkamchakun yamajam chichaman ujayajim nunak jaayatkun wekaesan ujayajime,
GAL 4:14 Nunú jata mina iyashjui ajutujakua nunú atumnak shiig antumainchau awajtabianume, nuniakuish dakitjuja idaitutsuk, ángel nuniachkush Cristo Jesús taamtai kuitamainaitjum imatijusjum kuitamjukuitjume.
GAL 4:15 ¿Nunú imanika shiig aneejakú ainajum dusha utugkaugme? wagki atum nuniyujum nuna tajime, jiish ukuintaiyaitkuig jiim ukuinkajum sujumain awatuyujume.
GAL 4:16 ¿Wi atumin dekaskea nuna ujakuitjim duiká atumi shiwajum wajasag?
GAL 4:17 Nunú aents atumin senchi puyatjutpaina duka pegkeg anentaiyai nuninatsui. Ditak wakegainawai jutiiní datumtamag, dita iina puyatjutpaktinme tusag.
GAL 4:18 Dekas tikich puyatjamua duka pegkejai, tujash pegkeg anentaiyai; nuna nuninuk tuke nuninuk amainai, wi atumjai pujuttag dui nunitsuk.
GAL 4:19 Mina uchig aidauh, wika nuwa uchin najaimak waitama imanikan ataktú atumiin waitiajai, atumesh Cristua imanuk atinme tabaunum.
GAL 4:20 Wakegajai, utugkanuk yamaiya juik atumiin taan tikichin yapajian ausajim tusan. Utugkajimek tusan kuashat anentaimtajime.
GAL 4:21 Chicham umiktina nu umiktasajum wakegautijum yamai tujuttajum: ¿Atumek antukchaukaitjum chicham umiktina nui juna tawa duka?
GAL 4:22 Nu agagbaunmag, Abrahamak jimag uchijí ajujakui tawai, makichik uchijiya nu inakenia aajakui, tuja tikich uchijiya duka dekas niina nuwe inakchauwa nuiya aajakui.
GAL 4:23 Inaka nuwi akiinauwa duka aenstí akiinainag nunisag akiinauwai. Untsu agkanta nuwi akiinauwa duka, Apajuí anagkuauwa nu uminbaunum akiinauwai.
GAL 4:24 Juka atak nuniktin aajakua nuna iwainawai jimag nuwa aina juka, jimag chicham apakbau aajakua nuna iwainawai: makichkia duka muja sinainumia minawai, duka Agar niina uchijí inak agtin akiinkau aajakajua nuna dukujiyai.
GAL 4:25 Tuja Agarak iwainawai muja Sinaí Arabia nugkanum yamai Jerusalén awa nuwi uchijí aidau batsamas chicham umiktajum tibauwa nuna umiktatus waituinak batsata nuna.
GAL 4:26 Tujash Jerusalén nayaimpinmayaya nunak Sara agkanta nu iwainawai, nuna uchijí aidautik jutii ainaji dekas Apajuí uchijí aidautik.
GAL 4:27 Chicham agagbauwa nuwishkam: “Nuwa uchin uchigmachuh, shiig aneasta, uchijum atsugtamu asamtai. Shiig aneakum untsumkata, amek uchi uchigmaku najaimatash dekapsachu asam. Nuwa idaisamu aina nunú imá kuashat uchigtin agtinai, nuwa aishintin aidaun nagkaesau”, tawai.
GAL 4:28 Aatus asamtai yatsug aidauh, Apajuí Abrahaman Isaacan anagkuamu akiinauwa numamtuk atumesh akiinau asajum, Apajuí uchijí ainagme.
GAL 4:29 Tujash yaunchuk Abraham Sarajai wakegau asamtai, Agarai uchi akiinauwai. Tuja Wakan akiinati tima Isaac Sarai akiinauwa nuna, Agarai akiinauwa nu kajejujakua numamtuk, yamaishkam chicham umiktajum tibaun umiina nu, Jesucristun dekaskeapi tuina nuna kajejuinawai.
GAL 4:30 Tujash ¿wajintua Agagbaunmash? Nuwig: “Nuwa inataiya duka uchijijai jiiktá, wagki inataiya nuna uchijig, nuwa agkanta nuna uchijí jukiti tibauwa nunak jumaitsui”, tawai.
GAL 4:31 Nunin asamtai yatsug aidauh, jutiik inaku waitkataiya nuna uchijí ainatsji, agkanta nuna uchijí ainaji.
GAL 5:1 Atumek chicham umiktajum tibauwa nu umiktasajum waitú batsatutigmin, Cristo agkanmitkagmawajua nunisjumek agkan pujustajum. Ataktú chicham umiktin umiktasajum waitiujum duka waketjukigpajum.
GAL 5:2 Antugtuktajum, wi Pablon tajime, atum pakamakjumesh Cristo yayamak achattagme.
GAL 5:3 Ataktushkam tajime: Aents pakamauk chicham umiktina nuna ashí umiktatus nuniawai.
GAL 5:4 Atum chicham umiktajum tibauwa nu umiinaku pegkeg diyam ata tautigmek, Cristui kanaaku nuniagme. Nuniakjum Apajuí anentag amamaina dusha dakitjaugme.
GAL 5:5 Tujash jutiik Wakaní Pegkeji yaimpasmatai, Cristo dekaskeapi tabaunum Apajuí pegkeg ainagme tujamtina nu dakainaji.
GAL 5:6 Wagki pakamaku akush, pakamakchau akushkam Cristo Jesusaig wainkayai, dekas Cristo Jesusai dekaskeapi tabaunum anenkai takaamua nuuwai dekas pegkejak.
GAL 5:7 Atum shiig pujubiujum nunash, ¿ya chicham dekaskea duka umikaigpa tujabiaje?
GAL 5:8 Aannak Apajuí atumí etegtamjauwa nu aikagmachaje.
GAL 5:9 Duka levadura ujumak ajuntuamuitak, nanegbauwa nuna ashí wampushmitkama dutijamawaje.
GAL 5:10 Wika atumnak Apu Jesusai kajintsá anentaimtajime, yapajiagmek anentaimainchau ainajum dui, tujash yaki ainta nunin ataish pachimjutpaina nuna Apajuí suwimkan susatnai.
GAL 5:11 Yatsug aidauh, wi pakamaktajum tusan etsegku wekaeyatkunush ¿wagka waitkamash wekaeja? Nuna aatsa etsegku wekaetaik, Cristo cruznum achigbaun etsejag nunash dakittsag diimain ainatsui.
GAL 5:12 Nunú pachimjutpá yujaina duka dekas juu tamawaik ashí tsupik ajapmain ainawai tajai.
GAL 5:13 Yatsug aidauh, atumek agkan pujustinme tusa etegjamu ainagme. Tujash nunú agkan pujamu ajutjama dui iyash wakegamu takamtiktsuk, aneenisjum pempeentunisjumek yainiktajum.
GAL 5:14 Chicham umiktin agagbauwa duka: “Tikich aidaush amek anenmamsam aneeta”, tawa nu imatiksaik umiamunum ashí chicham umiktinnum awa duka uminui.
GAL 5:15 Kuitamamkatajum, atumek pempeentunisjumek shiwagmagajum kajegdayakjum pempeentunisjumek pegkegchau awagdaikaijum.
GAL 5:16 Nuadui tajime: Wakaní Pegkeji wakega nunisjumek pujakjum, atumi iyashim pegkegchau wakega duka umigkaigpajum.
GAL 5:17 Wagki iyash wakega nunak Wakaní Pegkejig dakitawai, nunisag Wakaní Pegkeji wakega nunashkam iyashik dakitawai. Aatus dakitjunidau asamtai atum wakegamua duka takamaitsugme.
GAL 5:18 Tujash Wakaní Pegkeji yaimpasmatai pegkeg aina duke takaakjumek, Moisés chicham umiktajum tibauwa nu umiktasagmek anentaimtumaitsugme.
GAL 5:19 Iyash pegkegchau wakegamu takaamu paan wantina duka ju ainawai: ekagmamu, tsanijinbau, Apajuí pegkegchau diyamu aina nu takaamu, ii pegkegchau wakegamua duke tunamatja pujugbau,
GAL 5:20 apajuimtai dakumkamu emematbau, wawejatbau, shiwagmaga pujamu, tsuwat chichamtin, akasmamu, waa wamak kajeamu, jiyaniamu, datumkagtamu, niish kanaktatus anentaimin,
GAL 5:21 pegkejan takaidau kajejamu, nampeamu, yuwa yuwakua wegamu, nuigtú tikich jumamtin aidaunashkam tibaijime. Nunin aina nuna takaa pujuidauk Apajuí inamtaijinig wayachagtin ainawai tusan.
GAL 5:22 Untsu Wakaní Pegkeji pujugbau aidauk: Anejatnai, shiig aneenai, shiig agkan anentaimas pujuwai, wamak kajeakchau, shiig awakagtin, wait anenkagtin, dekaskeapi tinu,
GAL 5:23 kakagchau, ebetmamag pujú aina nuuwai. Ashí ju aina junak, chicham umiktajum timawa nuwish, nunin amaitsui tatsui.
GAL 5:24 Cristo Jesusdau aina duka, ditá iyashí wakegamu nuigtú senchi pegkegchau wakegamu aina nujaí Cristo nemajuinak idaisaju ainawai.
GAL 5:25 Nuadui Wakaní Pegkeji pujugbau aidautik ni wakega dutiksag takamtijusti tusa idaimamain ainaji.
GAL 5:26 Emebau achagmi, shiwagmaetash shiwagmaetsuk, tikich pegkejan takainamu diisá pempeentuniki kajegdayá batsamchagmi.
GAL 6:1 Yatsug aidauh, atum ainajum anuiya tudau takau wainkugmek, atum Wakaní Pegkeji takamtikbautijum yaigtajum esemamati. Nuniakjumesh senchi kuitamamkatajum, atumesh dita pegkegchaun takaina nu takasaijum.
GAL 6:2 Atumek pempeentunikjum yainiktajum utugchat ajamu wainkugmek, aaja dutikdayakjum Cristo tibauwa nu umiktatjume.
GAL 6:3 Makichik aentskesh imanchauwaitak eme anenmamá wekaguk, nigki tsanuumak tu wekaewai.
GAL 6:4 Makí makichik dita wajuk pujuinawa nuna niimamain ainawai dekas eme anenmamtatus wakegakug, tikichi pujutjin diigtsuk.
GAL 6:5 Wagki makí makichik iina utugchatjig ajutjamainawai, nuniau asamtai imá iinuk uyumamainaitji.
GAL 6:6 Apajuí chichamen jintinjamuk, atum jintinbautijum ashí wají pegkeg aina nujai yaigtajum.
GAL 6:7 Atumek tsanumajaigpajum: makichkish Apajuinak tsanumain ainatsui. Aents ni ajakmamujin juu aina numamtuk, makí makichik dita takasbaujin dutiksag jukiagtinai.
GAL 6:8 Aents ni pegkegchau wakegamujinak takasuk, nuiyanak juwak waittanum wegagtinai. Untsu Wakaní Pegkeji wakega nuna takasuk, nuiyanak pujut nagkanchaun jukiagtinai.
GAL 6:9 Pegkeg takata duka mijatkachagmi; imaní batsatu asaja tsawan jegakui Apajuí pegkeg aina nuna sujabau jukitnaitji.
GAL 6:10 Tsawan eke awa juik ashí aentsuk tutit awagmatsuk pegkegnum yaigtajum, tujash Cristo nemajuina nujai imá senchi yainiktasajum wakeetajum.
GAL 6:11 Yamaik wi mina uwejui letra muuntai agatjim ju diistajum.
GAL 6:12 Aents aidaun shiig awajkatatus wakegaina nunú, pakamaktajum tusag imatjutpainawai, Cristo cruznum achigbauwa nuna etsejai waitkagsainum tuidau asag.
GAL 6:13 Tujash pakamaku aina dukesh chicham umiktinnum tawa nunak betek umiinatsui. Nuninayatak wakegainawai atum pakamakagmin wi tima ankaje tusag ememagtatus.
GAL 6:14 Tujash wika wiki eme anenmamtanak wakegatsjai, iina Apuji Jesucristo cruznum achigbauwa nunak ememattasan wakegajai. Cristo numinum achijam jakauwa dui nugkanmaya aina nunak uyumatsjai, nuniau asan nugkanmaya aidaunak idaisauwaitjai.
GAL 6:15 Wagki Cristo diismak pakamaku akush, pakamakchau akushkam wainkayai, dekas imana duka Cristo nemagbaunum yamajam aents weenag nuuwai.
GAL 6:16 Atum Apajuinu aidautijum, jujú tawa jutiksagmek batsatutigminak, nuigtú Cristo nemajin mina pataag Israel aidautigminash, Apajuí wait anenjamag shiig agkan anentaimsa pujutan amastinme.
GAL 6:17 Yamai nagkamsanuk makichkish utugchatan aputugsatnume tusanuk wakegatsjai, wagki Apu Jesusai bakumakun mina iyashjui esamkamug aidau ajutuina dui.
GAL 6:18 Yatsug aidauh, iina Apuji Jesucristo makí makichik atumi wakanminish ajutjamtinme. Aatus atí.
EPH 1:1 Witjai Pablo, Apajuí wakegau asa Jesucristo apostolji etiuwai, atum imagnisjum shiig Cristo Jesús nemajin pegkejam aidautijum Éfeso batsatutigmin kumpamjime.
EPH 1:2 Atumnash Apajuí iina Apajiya nu, ii Apuji Jesucristua nujai wait anenjamaidau asag, shiig agkan pujutan amastinme.
EPH 1:3 Apajuí emematiagmi, iina Apuji Jesucristun Apajiya nu, nayaimpinmaya ashí pegkeg wakannumia aina nuna Cristui sujamsau asamtai.
EPH 1:4 Apajuik nugkanash najantsuk Cristui etegtamjauwai pegkejam pegkegchauji atsugbau niina emtinish atinme tusa. Wagki ni anempau asa,
EPH 1:5 wi ju aidaunak mina uchig emaktin atajai Jesucristo ditai mantamnamtai tusa yaunchuk emtika niina waketajin etegtamjauwai.
EPH 1:6 Nunak niina Uchijí aneetaijiya nuna amasua dui Apajuí wait anenkagtamuji dekas imana dui, emematjitnume tusa dutikauwai.
EPH 1:7 Nuna dutikauwa dui Cristo numpe ukaejamunum agkanbaetak ajutjamui nuigtú tudau aidaunum tsagkugnamushkam; shiig kuashat wait anenjamu asa,
EPH 1:8 nigki jutiinash shiig kuashat yachametan, dekatnashkam sujamsauwai.
EPH 1:9 Duik nagkamas, ni wakegamujin dutikatjai tibau dekaachbau aajakua nuna dekamtijamauwai. Nunak ni wait anenkagtamujin Cristui pegkejan dutikatjai tiuwa nuna iwaintugmakui,
EPH 1:10 dutikau asa ni tsawan mamikiamuji aina nu uminkamtai, nayaimpinum aina nuna, nugkanum aina nunashkam ashí Cristui ijumjatnai ni diistí tusa.
EPH 1:11 Ii jukitna duka Cristui ajutjamainaji, nunak yaunchuk Apajuí ni wajuk dutikatatus wakejukaya anentaimtujuita dutiksag dutikatnai.
EPH 1:12 Nigka wakekauwai dekatkauk jutii aidauti Cristun dakastinme nuninak mina imanjua nuna emematjitnume tusa.
EPH 1:13 Cristo chichame dekaskea nu etsegku uwemat awai tabau antukjum, atumesh Cristo dekaskeapi tuidau asagmin, Apajuí niinu etamu asa Wakaní Pegkeji anagtabauwa nuna amasajui. Dutijamau asamtai yamaik niinuap ainaji tusa dekainaji.
EPH 1:14 Nunú Wakania nuuwai, Apajuí sujabau jukiagtin asajin emtika amasmauwa duka, jutiin ashí agkanmitkagma niina aentsji etamkatna dui, dutijamamtai ashí jutiik Apajuí senchigtin imana nu ememattinaitji.
EPH 1:15 Nuadui atum imá Apu Jesusaig dekaskeapi tusajum ashí Jesusa nemajin aidaujaish aneeniamugmin pachis chichainamun antukan,
EPH 1:16 mijattsuk Apajuí aujkun see tusanké ajai atumin pachisan,
EPH 1:17 Segajai Apajuin iina Apuji Jesucristo Apají dekas imana nuna, wakan dekatan sukagtina nuna amastinme dutikam nu iwaintugmakui Apajuí shiig dekaatajum tusan.
EPH 1:18 Nuigtushkam segajai atumi anentaiminish tsaapmitkagmatnume, dutijamamtai niina aentsji wajasjum nayaimpinum atumdau atin dakainajum dushakam shiig dekamnujum tusan, nuigtú Jesusa nemajin pegkejam aidau wajiin shiig kuashat dekas shiig pegkeg jukitin ajuina dushakam,
EPH 1:19 nuigtú niina senchijí nagkanmainchauwa dushakam jutii ni dekaskeapi tinu aidautin ajutjamji. Nu senchijí imana nunak Apajuí Cristo jakaunak inankiuwa dui iwainakui, dutika nayaimpinum iwaká niina untsujin ekentsauwai,
EPH 1:21 ashí wakan senchigtin aina nuna nagkaesau ema, inamin aidau, nugkaya apu aina nunash nagkaesau senchimtikauwai, yamaiya juish atak atina duishkam,
EPH 1:22 dutika ashí najankamu aina nuna nuigtú iglesia aina nunashkam Apuji ema idaisauwai, ashí nigki diistí tusa.
EPH 1:23 Dutikamu asá ni nemajin aidautik Cristo iyashí ainaji, ni jutiiní ashí jajutua awa nunisag ashí najankamu aina nuwish awai.
EPH 2:1 Atumek yaunchkek atumi intimtaigminig, atumi tudaugminig jakau aajakuitjume,
EPH 2:2 ju nugkanmaya aentsú nunitaiji aina nu dutiksagmek takaakjum, agkajunum wakan senchigtin inama nu wakegamuji umijujakuitjume, yamai niina senchijijai Apajuin intimjuina nuwi inama nu.
EPH 2:3 Yaunchuk pujujakuitag duik ashí jutiishkam dita pujuina nunisaik pujujakuitji, iina iyashí pegkegchau wakega nujai, ii wakegamua nu takaaku, ii anentaimtamua duke dutikainaku, nunin asaja dekaskenum tikich aina nujai betek Apajuí suimkajig jumain aajakuitji.
EPH 2:4 Tujash Apajuik shiig senchi wait anenkagtina ibau asa, ni anenkajiya nujai shiig senchi anempajui,
EPH 2:5 jutiik iina tudauji aina dui jakau batsamnutin Cristujai betekak pujutnak amasui. Dutikamu asajum niina wait anenkagtutinig uwemtikam asauwaitjume.
EPH 2:6 Nunika Cristo Jesusjai ijunjau asajin Apajuí niijai betek inantamkiuwai, dutijama nayaimpinum niijai ekepasui.
EPH 2:7 Juna jutikauwa nunak atak tsawan atina dui ashí aents aidaun iwaintuktatus dutikauwai, niina shiig kuashat wait anenkagtutaiji niina pegkegjiya nujai jutiinu atinun Cristo Jesusai dutikauwa nuna.
EPH 2:8 Wagki atumek dekaskeapi tabauwai wait anenjá uwemtikjamu ainagme; nunak atum pegkeg takasbauwai dutikachui, Apajuí nigki anenjauch uwemtanak amasajui,
EPH 2:9 duka ii pegkeg takasbauwai uwemat jukichu asaja, ii emematmamainuk makichkish atsugtamji.
EPH 2:10 Wagki jutiik Apajuí najankamu asaja, Cristo Jesusjai ijunbaunum yamajam etamkauwai pegkeg aina nunak takainak pujustinme tusa, Apajuí emtika anentaimtujua dutiksag.
EPH 2:11 Nunin asamtai atum judiochu aidautigmek, “pakamakchau” ainawai tama aajakuitjume, judío aidau aentsú iyashinian pakaji ajapjuawag, “pakamaku” ainaji tumamaina nunú.
EPH 2:12 Nunin asamtai nunú tsawan aajakajua duik, Cristo dekachu asajum, Israel aina nujaig kanakú aajakuitjume nuigtush Apajuí ditajai chicham aidaun apakag anagkuauwa nuiyash jumainchau aajakuitjume, nuní uwemainapita tusa dakamukesh atsugtamaidau asamtai Apajuigtuchu ju nugka juig pujujakuitjume.
EPH 2:13 Tujash yamaik Cristo Jesusjai ijutkau pujakjum, yaunchuk Apajuijai atushat aajakuitjum duka, Jesús numpen ukajua dui Apajuijai tikijuch wajasuitjume.
EPH 2:14 Wagki Cristuwai jutiin agkan pujutan sukagtina duka, nunin asa judío aidau judiochu aidaujai shiwag batsamajakbauwa nunak, ni mantamdauwa dui tanish tesá akankamua nunin aajakua nuna tsaiká makichik niina aentsji etamkajui,
EPH 2:15 dutika chicham umiktajum tibauwa nuwi umiktin aina nunashkam inagnakui, judío aidaun judiochu aidaunash niinu emakta tau asa, yamajam aents makichik atinme tusa. Aatus dutika shiig agkan pujutan amasajui.
EPH 2:16 Jesucristuk cruznum achijam jakauwai, judío aidau judiochu aidaujai mai Apajuijai epegtuniatnume, nuninak makichik aents atinme yaunchuk shiwag batsamajakbauwa nunak idaiyinak tusa nunikui.
EPH 2:17 Cristuk tauwai, nunik yamajam chicham shiig agkan pujuta nuna, Apajuí dekachu aajakuitjum nu aidautigmin, tuja jutii Apajuí dekau aidautinash ujapakajui.
EPH 2:18 Aatus Cristo dutikau asamtai judío aidauti, judiochu aidautigmeshkam makichik Wakania duke ajutjama nujaig iina Apají Apajuiya dusha adigmainaitji.
EPH 2:19 Nunin asajum atumek tikich nugkanmayagkesh, ijagkesh ainatsjume, duka nunitsuk Jesusa nemajin pegkejam aina nuninuk wajasú asajum Apajuí aentsji ainagme.
EPH 2:20 Atumek, apóstol aidau nuigtú profeta aina nunú, Cristo Jesús kaya jegá ichichna imana nui ekeni jegamaina dutikamu ainagme.
EPH 2:21 Ashí Cristo nemajuidauti niijaig ijunainaku kanamainchau waigkaja ayatak kawenaji jega Apu ememattai pegkegma iman wajastag tabaunum.
EPH 2:22 Nunin asamtai atumshakam, ashí niinig ijunainakjum, jega Apajuí ememattaiya iman ainagme; Apajuí, Wakaní Pegkejiya nuwi pujugtamu asamtai.
EPH 3:1 Nunú aatus asamtai wi, Pablo, Cristo Jesusan takaju asan, atum judiochu aidautigmin pegkeg atina nu etsegbaunum achigkagmatai pujajai.
EPH 3:2 Atumek dekau amainaitjume Apajuí wait anenkagtamujiya nuna mina atumin jintintuati tujutiuwa duka.
EPH 3:3 Yaunchuk dekaachbau aajakua nunak Apajuí mina iwaintugkau asamtai, atumnashkam nuna pachisan ujumak agatjabiajime.
EPH 3:4 Nunú aujkujum dekaattagme, yaunchuk dekaachbau aajakun Apajuí Cristui dutikauwa nuna mina dekamtijuauwa nunú.
EPH 3:5 Nunak aents yaunchuk batsamajakua nunakesh dekamtikachui, tujash yamaiya juik, pegkejam apóstol aina nuna nuigtú profeta aidaunash Wakaní Pegkeji dekamtikawaje.
EPH 3:6 Nunú yaunchuk dekaachbau aajakua duka, yamajam chicham etsegbauwa nuna antukag, dekaskeapi tuidauk, judío aidaush judiochu aidaushkam betek uwemjatnume, nunikag makichik aents wajasag, Apajuí Cristo Jesusan nemajuidaun anagkuauwa nunash betek jukitnume tibau aajakua nuuwai.
EPH 3:7 Nunin asamtai yamajam chichaman etsegkati tusa minak Apajuí anenjauch wait anenjug awetiuwai, dutijua niina senchijí imana nunash sujusui.
EPH 3:8 Wika ashí Apajuí nemajin pegkejam aina nujai apatkamak wainkayaitjai; tujash nunin aig Apajuí minak wait anenjug yamajam chichaman Cristo yainke makichkish shiig tumainchauwa nuna pachis judiochu aidaunash ujaktí tusa awetiuwai.
EPH 3:9 Nuigtushkam Apajuí ashí wají aidaun najankauwa nunú, yaunchuk nagkamas dutikatjai tibau dekaachbau aajakua nu wajuk uminkae, nunú dekamtikata tujutiuwai.
EPH 3:10 Nunak Apajuí yachají kuashat niimtina nujai iglesianum dutika nuna yamaik ashí wakan senchigtin aidau, agkajunum inamin aina dushakam dekatnume tusa dutikauwai.
EPH 3:11 Nunak Apajuik tuke atinun dutikatjai tusa anentaimtujua dutiksag ii Apuji Cristo Jesusai dutikauwai.
EPH 3:12 Nunin asamtai yamaik Cristo dekaskeapi tabaunum ajankas kajinmasa Apajuiyai jegamaina duka agkan ajutjamji.
EPH 3:13 Nuadui segajime, wi atumiin waitiag nu diisjum mijakaijum tusan, nunitsuk dekas atumesh eme anenmamjatajum.
EPH 3:14 Nunú aatus asamtai iina Apajiya nunak tikishmatjan emematjai,
EPH 3:15 nigka ashí niina aentsji aidau nayaimpinum, nugkanmash batsata nunash Apajiyai.
EPH 3:16 Nuniakun segatjime, Apajuí wait anenkagtugbau dekas imana nuna amastinme, dutijamawagmatai Wakaní Pegkejiya nunú atumi anentaiminish senchimtijamatnume,
EPH 3:17 nunikjum Cristo dekaskeapi tau asagmin atumi anentaiminish Cristo pujustí, nuniakui aneenitnum shiig ebetmamjajum pujakjum kakajus tsujamainchau aminjum tusan,
EPH 3:18 nu nuniakjum ashí Apajuí aentsji aidautigmek dekamain ainagme ashí ni dutikamu aina duka, nuigtú Cristo anempamuji nagkanmainchauwa dushakam.
EPH 3:19 Nuigtushkam segajai, nunú Cristo anenkaji makichkish tumainchau ashí tikich aidaun nagkaesauwa nuna dekatnume; nuninak ashí Apajuinua dusha ajitnume tusan.
EPH 3:20 Nuadui Apajuí emematiagmi, ii wají dutikatasaya segaji nuniachkuish wají anentaimtaji nuna nagkaegas ashí pegkejan dutikmaina nu, nunak niina senchijí jutiiní awa nujai dutikmainai.
EPH 3:21 ¡Apajuí emematiagmi iglesia aidautik Cristo Jesusa, sujamsau asamtai, nigki ajumaish tuke ememattai atin atí! Aatus atí.
EPH 4:1 Wika Apu Jesús takagbaunum achinkan pujusan segajime, wait aneasjum Apajuí wajuk pujusti tusaya untsugmaku ainawa nunisjumek pujustajum tusan.
EPH 4:2 Atumek ememachu nuigtush kakagchauch; utugchat akuish aneeniamunum pempeentunisjumek katsunjajum emamkesjum iwajin atajum,
EPH 4:3 nuniakjum kakanmamsatajum Wakaní Pegkejiya nujai ijutkau pujakjum tikich aidaujaish shiig agkan ijutkau pujustag tabaunum,
EPH 4:4 wagki makichik iyash ainaji, tuja Wakaní Pegkejiya dushakam makichki, nunin asamtai ashí atum aidautigmesh ni pegkejan yaijata duke dakagme, Apajuik aatus nuniktinme tusa untsugmaku asagmatai.
EPH 4:5 Nunisag Apush makichki, dekaskeapi taji dushakam makichki, yamimamush makichki,
EPH 4:6 Apajuishkam makichki, ashí niina nemajin aina nuna Apajiya nunú, nunin asa ashí niina nemajuina nuig nigki inamui, nunisag ashí ditaig awai.
EPH 4:7 Tujash jutii aidautinak Cristo makí makichik wait anenjamag, don sujamsatatus wakekauwa dutiksag sujamsauwai.
EPH 4:8 Nuadui agagbaunum chichaak: “Nayaimpinum ni shiwajin depetuk achijá yajuak wakae, nunik aents aidaun don aidaun tinamkae”, tawai.
EPH 4:9 ¿Wajuk takua nunash depetmak “wakae” tawa? Nunak, nugká taa maam nantaki ataktú wakatin asamtai tiuwai.
EPH 4:10 Nunú nugká tauwa duke ashí nayaim aidaun nagkaegag wakauwai, nunik Apajuí ashí najankamua nunak imá nigki diyawai.
EPH 4:11 Nigki etegjauwai apóstol agtinun, profeta agtinnash, evangelista agtinnashkam, pastor agtinun nuigtú maestro agtinnashkam,
EPH 4:12 aatus etegkeg umikui niina aentsji pegkejam aina nuiyan tikich aidaunash yaigtinme, dutikam Cristo nemajuidaush aan kuashat kawegtinme tusa,
EPH 4:13 dutikamu asaja makichik dekaskeapi tabauwa duke ashí ajutjamtinme, nuniaku Apajuí Uchijiya dusha shiig dekamain ainaji, imagnisa pujuinaku Cristujai betek agmi iina anentaimtajinish, aents aidaujaish shiig awagdaiyinaku.
EPH 4:14 Nuninaku uchi aidau emetug anentaimchau asag waa wamak tibaujin yapajiak, tsanuamash dekaskeapi tuwama numamtuk, aents tsanumtan yacha aidau ashí dekaskechu waitan jintiina nu tsanuamak amaitsuji.
EPH 4:15 Duka nunitsuk dekaskea duke chichainaku tikich aidaujaish aneenimainai, nu aaja nuninaku ashí ii takaamuji aina nujai Cristuwa imanuk amainaitji. Cristo nemajin aidautinak niiyai jutii Apujiya duka.
EPH 4:16 Cristuwai niina nemajin aina nuna ashí niinig ijumag shiig emetuk, makí makichik aina nu shiig ijunas takainak aan nagkaemas aneenitnum emkatnume tusa dutika duka.
EPH 4:17 Tuja juna tajim nunak, Apu Jesús tawa dutiksanuk tajime: Atumek Apajuí nemagchau pujuina nunisjumek pujusaigpajum, wagki ditak wainak anentaimaina nunisag pujuinawai.
EPH 4:18 Nu aents aidauk dekachu nuigtushkam antakchau ainawai, nunin asag Apajuí pujutan sukagta nunash dekamain dekapenatsui.
EPH 4:19 Nuninak datsantainchau waigkag, ashí pegkegchau takatnum idaimamsau asag, Apajuí eemtin ashí pegkegchau aina nunash idaimainchau dekapenawai.
EPH 4:20 Tujash atumek Cristui aaja pujutak unuimagchau ainagme,
EPH 4:21 atumek dekaskenum Cristo pachisa etsegbau antuku ainagme, nunin asajum ni wajuk pujusti tusaya wakejutpawa nunisjumek pujakjum, Jesusdau dekaskea dushakam unuimamain ainagme.
EPH 4:22 Nuadui atumek, yaunchuk pujujakuitjum dui pegkegchau wakeeta nu tsanugmakui idaimainchau takaajakuitjum duka idaisatajum,
EPH 4:23 nunikjum wakannumash anentaimtanmash yapajinau yamajam atajum,
EPH 4:24 nuigtushkam yamajam aents pegkeja nunak takau atajum. Apajuí pegkeja nunak takastinme nuigtushkam dekaskenum pegkejam atinme tibau aidaush wajuku amainaita nunisjumek.
EPH 4:25 Nunin asamtai waitjut aina duka idaisatajum, nuniakjum tikich aidaujaish dekaskea duke chichatajum, wagki ashí jutii aidautik Cristo nemagbaunmag makichik iyash asaja.
EPH 4:26 Kajeakjumesh, tudauk takasaigpa, kajekjumesh tuke etsag akapakigpajum,
EPH 4:27 iwanch yunumtugmak pegkegchaun takamtijamsainum.
EPH 4:28 Yaunchuk kasamajakú akush, yamaik kasamkaigka, dekas takastí pegkeg aina nuna, nuniak ajití tikich atsumaidau yaimaina dusha.
EPH 4:29 Pegkegchau aidauk chichakaigpa, dekas chicham pegkeg tikichnash pegkegnum yaimaina nu chichatajum, antuidaunash shiig awagmamaina nunú.
EPH 4:30 Apajuí niina aentsji etamu asa Wakaní Pegkejin amasua nu pegkegchau takaakjum wake besemag anentaimtikaigpajum, tsawan jegatai nuna diis ashí niinu aidaunak tudaunum tuke agkanmitkatna nu.
EPH 4:31 Ashí kajeamu aina duka idaisatajum, senchi kajeamu, tsagkugchamin kajeamu, shinamu, pegkegchau chichagkagtamu, nuigtú ashí pegkegchau aina dusha takasaigpa.
EPH 4:32 Nuniakjum pegkeg atajum, tikich aidaujaish pempeentunisjumek wait anendaiyakjum, pempeentunisjumek tsagkugdaitajum, Apajuí atumin Cristo nemaju asagmin tsagkugtamjajua dutiksagmek.
EPH 5:1 Atumek Apajuí uchijí aneetai asajum, ni wajukuita nuninuk atasajum kakanmamsatajum.
EPH 5:2 Cristo jutii anempau asa nigki jutiiní tsagkamankauwa nunisjumek tikich aidaush aneetajum, Cristo maamua duka kugkuin pegkejan kugkuwama iman Apajuinak shiig awajkauwai.
EPH 5:3 Atumek Apajuí aentsji pegkejam asajum, ashí pegkegchau iyashnum takanitai aidau, mijamainchau wakegamu aina dushakam, nuigtú ashí pegkegchau aina nu pachisjumkesh chichá yujaigpajum,
EPH 5:4 pegkegchau aidau augmatut, wainka anentainkas chichat, pegkegchaunum iwajut aidauk idaisatajum duka pegkegchauwai, nu tu yujatsuk dekas Apajuí see titajum.
EPH 5:5 Atumek shiig dekagme, iyashnum tsanitai pegkegchau aina nuna takaa yujajin aidauk, nuniachkush pegkegchau aina nuna takaa pujú aidaushkam, nuniachkush utugsanuk wajiijinawag tusa imá nunak anentaimtú pujú (duka apajuimtai ememattaiya nuninai), aidauk Cristo Apajuijai inamjatna nuig wayachagtinai.
EPH 5:6 Makichkish wainak chicham aina nujaig tsanuam aigpajum, wagki nunú timajim nuna takaidauk, Apajuinu suwimak ishamaina nuna juinawai Apajuí intimjuidau asag.
EPH 5:7 Nunin asamtai atumek aents nuna takaina nuninuk aigpajum.
EPH 5:8 Atumek duikik suwenum pujujakuitjume, tujash yamaik Apu Jesusjai ijutkau pujakjum, tsaaptinnum pujagme. Nuniau asajum tsaaptinnum pujaush wajuk pujumainaita nunisjumek pujustajum.
EPH 5:9 Wagki, nu Wakaní Pegkeji pujugtamu asa: Ashí wait anenkagtutan, pegkeja duke takatan, nuigtú dekaskea duke chichatnash sujamji,
EPH 5:10 nunin asamtai shiig dekaatajum, Apu Jesusan shiig awagma nunú.
EPH 5:11 Aents Apajuí nemagchau aidau pegkegchaun takaina duka takasaigpajum, dekas dita nuniamuji iwaintuktajum, dutikam dita takaamuji pegkegchauwa nuna dekaatnume.
EPH 5:12 Dita pegkegchaun uuká takaina nu pachisaik tumaitsui, tikima shiig datsan asamtai,
EPH 5:13 tujash ashí nunú aidau dekaamak paan weawai,
EPH 5:14 wagki ashí paan wega duka tsaaptin iwainamu asa nuniawai, nuadui: “Ame kanam duka shintagta, aents jinau aidaunum pujaumesh nantaktá, nunikamin Cristo tsaaptin etamtatui”, tawai.
EPH 5:15 Nuadui atum wajuk pujagme nu shiig kuitamsa diistajum, anentaimkas batsamtsuk shiig anentaimsa pujustajum.
EPH 5:16 Tsawan wainka megkayigpa, wagki yamai tsawan batsatag juik, pegkegchau takaamu ayau asamtai.
EPH 5:17 Anentainkachu wajukmaina nunitsuk, dekas Apu Jesús wakegamua nu dekatasajum kakanmamsatajum.
EPH 5:18 Nampekaigpajum anentainkachua nunin ekagtau asamtai, dekas Wakaní Pegkeji takamtijusti tusajum idaimamsatajum.
EPH 5:19 Nuniakjum pempeentunisjumek wakegat egketdaiyatajum salmo aidau, himno, wakannumia aina nu kantamkujum. Nu kantamkujum anentaiminish Apu Jesús ememattajum.
EPH 5:20 Nuniakjum Apajuí iina Apajiya nunú, ashí wají aina nu pachisjum tuke see tusagmeké atajum, iina Apuji Jesucristo pachisjum.
EPH 5:21 Cristo eme anentamunum, pempeentunisjumek sumimdaikatajum.
EPH 5:22 Nuwa aishintin aidaushkam aishinig sumimain ainawai, Apu Jesusa nemagkaju imá niinig sumimkaju aina nunisag.
EPH 5:23 Wagki aishmagkui nuwen nunikta tumainuk; Cristo iglesia niina iyashí ainag nunutin tujama nunisag, nunin asa jutiin Uwemtijamnuk niiyai.
EPH 5:24 Iglesia Cristui sumima nunisag, aishintin aidaushkam niina aishinish sumitkau amainai ashí wajiinum.
EPH 5:25 Nuwentin aidauh, atumi nuwem aneetajum Cristo iglesia aneau asa niiní mantamdauwa nunisjumek,
EPH 5:26 Cristuk nunak niina iglesiajiya nu, niina chichamen antukag umiagtai pegkeemtikata tau asa nunikui,
EPH 5:27 dutika niina iglesiajin shiig tsaaptin tsuwatnash antiakchau, makichkish pegkegchauji atsugbau, pegkejam iwainakta tau asa.
EPH 5:28 Nunisag nuwentin aidaushkam nuwenak niina iyashí anentus aneemain ainawai. Ni nuwen aneauk niina iyashinash dutiksag aneawai.
EPH 5:29 Wagki makichkish niina iyashinak kajegchau ainawai. Ayatak shiig kuitamak ayujin ainawai, Cristo iglesian kuitama dutiksag,
EPH 5:30 wagki jutiik niina iyashí ainaji.
EPH 5:31 Nunin asamtai: “Aishmag nuwenkug apajin, dukujin ukuak, niina nuwejaig ijunmainai, nuniak nuwejai makichik iyash wegawai”, tawai.
EPH 5:32 Jujú dekaskea nu dekamainchau aajakun taja nunak, Cristo iglesiajai makichik wega nuna pachisan tajai.
EPH 5:33 Aatus asamtai atumshakam, makí makichik nuwentin aidautigmek nuwem aneetajum atumi iyashim anentsajum, tuja nuwashkam niina aishinak eme anentus diistí.
EPH 6:1 Uchi aidauh, apa aidau umigkatajum Apu Jesusan shiig awagma dutiksagmek, nuuwai dekas pegkejak.
EPH 6:2 Dekatkau chicham umiktinnum anagtamamu awa duka juuwai: “Amina apa dukujai eme anentsam diistá,
EPH 6:3 jujú aaja dutikakum shiig aneasa dukap tsawan nugká pujamush ajutjamti”, tawai.
EPH 6:4 Uchigtin aidauh, uchijum kajemainuk chichagkaigpajum, dutiktsuk chichagká esegajum jintintua tsakapagtajum, Apu Jesús wakega dutiksagmek.
EPH 6:5 Achikbau aidauwah, atumi apujum ju nugkanmayaya nunú umigkatajum puyatjusjum nuigtush ajantusjum shiig anentaiyai, Cristo takagmainaitjum imatiksajum takagsatajum,
EPH 6:6 dita wajasá diigmakui shiig awajkata tabaunum nunitsuk, atumek Cristo inake asajum wakejusjum pegkeg anentaiyai Apajuí wakega dutiksagmek takagsatajum,
EPH 6:7 Apu Jesusdau anentsajum shiig wakejusjum takastajum, aents aidaunu anentsa dutiktsuk;
EPH 6:8 wagki aents agkan aidaun, achikbau aidaunashkam, dita pegkeg takasbauwa dutiksag Apu Jesús akiktina nunú dekau asajum.
EPH 6:9 Nunin asamtai inamin aidautigmesh, atumi inakem aina duka awantsagmek chichajigpajum. Adeagtajum atumin inapau, ditanash ina duka, nayaimpinum makichik Apu puja nunú, nigka aentsnak akanjag diyatsui.
EPH 6:10 Nuadui yatsug aidauh, Apu Jesusai ijutkau pujakjum niina senchijí dekas imana nujai ichichmamjatajum.
EPH 6:11 Nuniakjum Apajuí maanitain ashí amasajua nujai ejaamaktajum, nunikjum atumshakam tajitkatajum Iwanch tsanugmainakuish.
EPH 6:12 Wagki jutiik aents nejentin ukunchtin aina nujaig maaniatsji, dekas wakan pegkegchau aina nuna apuji, wakan senchigtin aidau, wakan pegkegchau, aents ju nugkanmaya aidaun pegkegchau takamtikin, agkajunum batsamin aina nujai maaniaji.
EPH 6:13 Nuadui ashí maanitain Apajuí amasajua nunú jukitajum, nuniku asajum iwanch jetepakuish tajitkatajum, nu ashí nagkaikiu asajum nunisjumek atajum.
EPH 6:14 Nunin asamtai tajitkaujum nunisjumek pujakjum, dekaskea nu akachumtaijai beteka nu jukitajum, nuniakjum pegkeg takaamu corazajai beteka dushakam jukitajum.
EPH 6:15 Nuniakjum sapat wegamaka shiig uminmaina imanikjum umintsatajum, yamajam chicham agkan pujuta nu pachisa etsegkata tabaunum.
EPH 6:16 Ju aina nuní nagkaemas dekaskeapi tabauwa nu ajutjamtinme, atum ejamaktin tantagjai beteka nu, Iwanch flecha ekeemak aketjamkui ikagnaktin.
EPH 6:17 Nunisjumek uwemat atsejutaijai beteka nu, nuigtú Apajuí chichame Wakaní Pegkeji espadajiya dushakam jukitajum.
EPH 6:18 Atumek Apajuí aujut idaisaigpajum, tuke mijattsuk Apajuí segasjumké atajum Wakaní Pegkeji yaimpasmatai. Aneaku pujustajum junik anentaimá pujutsuk ashí Cristo nemagkaju aina nu pachisjumesh Apajuí aujtustajum.
EPH 6:19 Minash Apajuí segatjitajum, wi wajintu tumainaitja nunash Apajuí sujustí, ajankas yamajam chicham Apajuinu yaunchuk dekaachbau aajakua nuna pachisan dekamtikatjai.
EPH 6:20 Apajuí minak ju chicham etsegkata tusa awetiuwai, nunú etsegbaunum yamaik cadenayai jigkatjagmatai pujajai, nuniau asamtai minash Apajuí segatjitajum ishamkagtutsuk niina pachisan etsegkatjai.
EPH 6:21 Tíquico iina yachi anetaiya nu, nuigtú shiig imagnis Apu Jesusa takatjin yaimna nunú, ni anui taa ashí ujapaktatui mina pachitus wajuk pujaja nunashkam.
EPH 6:22 Nuadui ni jutii wajuk pujuinaji nuna pachis ujapakti nuniak anentaimnash ichichtugmagtinme tusan awetajime.
EPH 6:23 Apajuí iina Apajiya nu nuigtú Apu Jesucristujai shiig agkan pujutan, aneenitan, dekaskeapi tutanash yatsug aidaun susatnume.
EPH 6:24 Apajuí wait anenkagtamujiya duka dekaskenum ashí iina Apuji Jesucristun aneena nui tuke atinai. Aatus atí.
PHI 1:1 Witjai Pablo, nuigtú Timoteojai Cristo Jesusa inake aidauti, ashí Apu Jesusai pegkeniu aidautijum obispo aidau, nuigtú diácono aidautijum Filipos batsatjum nuutigmin kumpamjime.
PHI 1:2 Atumnash Apajuí iina Apajiya nu, ii Apuji Jesucristua nujai wait anenjamaidau asag, shiig agkan pujutan amastinme.
PHI 1:3 Atumin anentaimtaknuk tuke see tusanké ajai mina Apajuijun.
PHI 1:4 Ashí wi Apajuí aujag nuniaknush, ashí atumin pachisan shiig aneasan tuke segatjime;
PHI 1:5 wagki, atum nagkamchakjum yamajam chicham antukjum yaintiujum dui nagkamsajum, yamaikish tuke yainjum nuadui;
PHI 1:6 Apajuí atumiin takat pegkejan nagkabauwa nunak, dutiksagkeap takamtijamá atatua tsawan Jesucristo minamu atina imanuish tajai.
PHI 1:7 Wi ashí juna aajan atumin anentaimtajim duka pegkejai, wagki wika atumnak senchi aneajime; wi achinká pujakuish, chichaman dekagtuatatus apu jujuinakuish, nuigtú yamajam chichaman etsegkati tusagmesh yainjum nuadui.
PHI 1:8 Wi atumin ashí aneajim nunak Apajuí shiig dekagtawai, Cristo Jesús jikamsá anejattaijin suja nujai aneajim nunak.
PHI 1:9 Nuniau asan Apajuí aujkunush, atumi anenkajum aina nu aan nagkaemas, nuigtú aan nagkaemas unuimatash, ashí dekata dushakam ajutjabiagti tusan segatjime;
PHI 1:10 nunikmatai dekas pegkeja nunú etegket dekaatajum tusan. Aaja nuniakjum pujutjuminish pegkeg makichkish tumainchau atajum, Cristo minamu tsawan atina duish;
PHI 1:11 Jesucristo yaimpasagmatai kuashat pegkeg takaagmin tikich aidaush Apajuin eme anentus ememattinme tusan.
PHI 1:12 Yatsug aidauh, mina utugchat aidau nagkaetukiaja nu dekaatajum tusan wakegajai, duka dekaskenum yamajam chichama nu aan nagkaemasa etsegbaunum yainkaje;
PHI 1:13 nuniau asa wi achinkag duka, apú jeen aents batsatbaunmash, nuigtú ashí tikich aina nuish Cristo pachisan paan etsegbaunum yainkae.
PHI 1:14 Nunin asamtai kuashat yatsug aidau, wi achinkamun wainkag Apu Jesusai ichichmamjag ishamkagtutsuk chicham etsegta nuna wakekaje.
PHI 1:15 Duka dekaske, ujumak aents aidau kajegkagtamunum, nuigtush shiwagmagata tabaunum Cristo pachis etsejuinawai, nuniinai tikich aidauk pegkeg anentaiyai etsejuinawai.
PHI 1:16 Nuniinai ujumak aidau Cristo aneamunum etsegtuinawai, Apajuí yamajam chichama juna ayamjukti tusa mina jui apujtusa nuna dekagtuidau asag;
PHI 1:17 tujash tikich aidauk ditanunak anentaimtus nuninawai, wi jui achinkan pujag nuna aan nagkaemas utugchatan apujtugsagtatus.
PHI 1:18 Tujash nunak puyatjatsjai, dekaskenum pegkeg anentaiyai etsejuinakush, nuniachkush imá Cristunak pachis etsejuina dui shiig aneajai, nuigtush aan nagkaemasan shiig aneamuk ajuttatui.
PHI 1:19 Wagki wika dekajai atum Apajuí aujtugjum dui, Wakan Jesucristunua nu agkanmitkajuatta nunak.
PHI 1:20 Wi senchi wakegamug nuigtú dakamu ajuta duka, makichkinmakesh inatsam aig tusan imagnisan pujustag taja nuuwai; yamaishkam nunisnuk pujustag tajai, wi iwaaku pujutaish nuniachkunush jakamtaish minaiyan unuimajag Cristo imanjiya nunash shiig dekaatnume, tusan.
PHI 1:21 Wagki minaig iwaku pujuta duka Cristo takagku pujuta nuuwai, untsu jaamua duka Cristujai tuke pujuttag nuuwai.
PHI 1:22 Wi ju nugka jui pujaknuk, pegkeg takat aina nunak takastasan nunimainaitjai, nunin asamtai dekatsjai tutsu etegmainait.
PHI 1:23 Wagki jimaja juiya etegkata tabauk minaig utugchatai: wakegajai jakan Cristujai pujustasan, nunú imá pegkeg asamtai;
PHI 1:24 tujash pujusta tabauwa duka atum mina atsumjajum dui nunimainai.
PHI 1:25 Nuna aaja dekau asan atumjaiyap pujuttaja tajai, atum dekaskeapi tabaunum shiig aneastina nuna yaigtin asan.
PHI 1:26 Nunikjum wi ataktú atumiin taattag dui Cristo Jesusai dakujamu aan nagkaemas ajutjamtinme tusan.
PHI 1:27 Ayatak, atumi pujutjuminish yamajam chicham Cristunu tawa nunisjumek pujustajum, wi atumin wainkatasan taaknush, tuja atumjai pujachkunush ditak ebetmamjag makichik anentaiyaik shiig ijuntsag yamajam chicham dekaskeapi tabauwa nuna etsejuinak kakantuinawai tabaun antuktajai;
PHI 1:28 makichkish atumi shiwajum aina duka ishamkaigpajum, nunú atum nuniamua nunú Apajuí ditanak suwimkan suwak, atumnak uwemtijamjatna nuna iwaintuinawai. Nunak Apajuí ashí dutikattawai.
PHI 1:29 Wagki Apajuik atumnak ayatak Cristo dekaskeapi titinme tusa wakegatsui, Cristo nemajuinak waittsatnume tusa wakegawai;
PHI 1:30 nuadui atumnash wi waitiamu wainkauwaitjum duke ajutjamainawai, nunisnuk yamai waitiag dusha antugtagme.
PHI 2:1 Cristo atumin tikich wakemitkatan senchijin amasua nujai nuigtú anentak atumiin ajutjamaina nujai tikich aidaush anentai ichichtugtajum, nuniakjum makichik Wakania duke ajutjamaina dui pempeentunisjumek wait anendaitajum;
PHI 2:2 nuniakjum minash shiig anemtijustajum ashí ijutkau pujakjum, makichik anenka nuig ijunkujum, makichik anentaimta nuig, takastasa anentaimtamua dusha makichik anentaimtakjum.
PHI 2:3 Makichkish shiwagmagata tabauwai takasaigpa, nuniachkugmesh ememamuikish, duka nunitsuk ayatak imanchauch anenmamkujum makí makichkitijum tikich aidaush atumin nagkaetamsau diitajum.
PHI 2:4 Makichkish imá ni wakegamujiya nuna egatsuk, ashí tikich aidau wakegamua nuna egaktinme.
PHI 2:5 Atumnash Cristo Jesús anentaimajakua nuninuk anentaimtash ajutjamain ainawai;
PHI 2:6 nigka Apajuí wajukuita ibau aajakuitak, Apajuijai betek atasag wakekachui;
PHI 2:7 ni aajakbauwa nunak idaiyak jutiijai betek wajas, ashí aents aidau inataijiya nunin wajasui;
PHI 2:8 nunik aentsjai betek wajas nigki imanchauch wajasui, nunik jaakush Apajuí umijak, cruznum jakauwai.
PHI 2:9 Nunikmatai Apajuishkam imá niinak ememattai awasauwai, dutika daajinash ashí tikich aidau daaji aina nuna nagkaesaun susauwai;
PHI 2:10 nayaim batsamin aidaush, nugkanmayash, nuigtú nugká initkenia aidaushkam imá Jesucristunak tikishmatug ememattinme tusa;
PHI 2:11 nuninak ashí nugkanmaya aidaush Jesucristo Apua nuna dekaatnume, nunikag iina Apají Apajuiya nunak ememattinme tusa.
PHI 2:12 Nuadui mina aneetaig yatsug aidauh, wi atsakuish tuke umigtin agmaujum nunisjumek, yamai wi atushat pujag juish aan nagkaemasjum umigtuktajum. Atum uwemjamu dekaskea duke puyatjusjum kuitamkatajum;
PHI 2:13 wagki Apajuiya nuuwai wakeetan nuigtú ni wakega dutiksaik wakejusa takatan atumin amá duka.
PHI 2:14 Ashí dutikatajum makichkish augmatnaitsuk nuigtush jiyanitsuk;
PHI 2:15 makichkish nuninai tama amainchau, bakumamainjish atsugbau, Apajuí uchijí asajum pegkegchaush atsugbau, aents pegkegchau besekú aina nuig, atum agkajunum yaya aidau etsantak nugkan tsaaptin emama numamtin atajum.
PHI 2:16 Chicham pujutan sukagtina nuanuig ebetmamjatajum, nuniau asagmin Cristo minakuish, atumiin ememasan anentaimjatjai, wainkanuk wekaesachuapitja nuigtush wainkanuk takaschauwapitja tusan.
PHI 2:17 Nuniau asan, dekaskeapi tabauwai atum takaamu ofrenda Apajuí sumaina numamtuk wajajum nujai betek atatui wi mantamnamush, nunikmatai atumjai shiig aneakun dakujamu ajuttatui.
PHI 2:18 Nunin asamtai atumshakam shiig aneakjum wijai dakujustajum.
PHI 2:19 Apu Jesús wakegakuig, Timoteon wamak atumiin awemata tajai, atum wajuk pujagme nuna dekaan shiig aneastasan.
PHI 2:20 Wagki tikichik wi uyumag imatika atumdau pegkeg amaina nuna uyumauk atsawai.
PHI 2:21 Wagki ashí tikich aidauk, Cristo Jesús wakega nuna egatsuk dita wakegamua nunak egainawai.
PHI 2:22 Tujash atumek dekagme Timoteo pujutji pegkeja duka, nuigtush wajuk wijai takasé yamajam chicham etsegbaunum, mina uchig yainmaina imatika.
PHI 2:23 Nunin asamtai minash wajuk ajuttig nuna dekaan awematag tajai;
PHI 2:24 Apu Jesusai kajintsan anentaimjai nuniau asan wisha waamak minittajai.
PHI 2:25 Dutiksanuk yatsug Epafrodito awetitag tajime, mina takat atuetutaig, nuigtú yamajam chicham etsegbaunmash senchi takaak, nuigtú wi atsumamunmash yainka nuna.
PHI 2:26 Nigka shiig senchi wakemayi atumin ashí waipakagtatus, nuniayatak shiig senchi waittsabi atum jaawai tabau antukchamkaijum nuna.
PHI 2:27 Dekaskenmag jamayi, jatanum jeganmayi, tujash Apajuí niinak wait anenjabi, imá niinakek dutikache, minashkam wait anenjuje, wake besemag pujag nuna, nuní nagkaemas wake besemag pujusai tujutu asa.
PHI 2:28 Nuadui wamkesan awetajime, atumshakam ataktú ni wainkajum shiig aneastajum, nuniakjumin wishakam wake besemjak pujushtajai, tusan.
PHI 2:29 Shiig aneasjum Apu Jesusa daajin jukitajum, nuniakjum tikich niiya junin aidaushkam aneasjum diistajum;
PHI 2:30 wagki Cristo takagbaunum jatanum jeganmayi, niina pujutinak ishamainnum idaisabi atum mina yainmaina nuna ni yainkata tau asa.
PHI 3:1 Yatsug aidauh, atumek Apu Jesusjai ijutkau pujakjum shiig aneasjum pujustajum. Wi agatjabiajim nunak awaksanuk tajim duka minaig tutitjakesh atsugtawai, juka dekas atuminish atsumnawai.
PHI 3:2 Aents aidau yawá pegkegchau tsuumaina numamtin yujas: Uwemjata takugmek pakamaktajum, tu yujaina nujaig kuitamamkatajum.
PHI 3:3 Wagki jutii ainaji pakamaku aidautik, Apajuí Wakaní yaimpasmatai emematuinag nunuti, jutiik Cristo Jesusai ememainaji, nuniaku iyashnumiag kajintsá anentaimtatsji.
PHI 3:4 Nunú imá jutiik kakanmamsa uwemainaitkuig, wi dekas imá mina takatjuig uwemain aajakuitjai. Witjai dekas tikich aidaun nagkaesan ashí chichamnash umikunuk.
PHI 3:5 Minak akiinan ocho tsawan wegaig pakagtiu ainawai, wika Israel aentsuitjai, Benjamín weantuitjai, hebreo aina nuig witjai hebreonuk; tuja chicham umitnumag fariseowaitjai;
PHI 3:6 Apajuí takatji akasmatkun iglesia aintujakuitjai, chicham umiktinnum pegkeg takastajum tawa nu umitnumag makichkish nuninai tumainchau aajakuitjai.
PHI 3:7 Tujash ashí ju aidau minai iman aajakajua nunak, Cristo aneamunum wainkan diiyajai.
PHI 3:8 Ashí nunú aidaunak idaisauwaitjai, dutikakun pasuamu ukajá ajaptayama nunin anentajai, Cristo Jesús mina Apujua nunú shiig dekaata tabaunum,
PHI 3:9 nuigtush niijai ijutkau atag tabaunum, chicham umiktina nu umiamuchui, Cristo dekaskeapi tabauwai, Apajuí pegkejan takauwa iman diigma dui.
PHI 3:10 Wakegag nunak Cristo dekaatag taja nuuwai, niina senchijin nantakiuwa nunash dekapjatasan, ni waittsauwa nunisnuk waittsatasan, nuigtú ni jakauwa nunisnuk jakatasan,
PHI 3:11 jakau aidau nantainakui wisha nantakmig tau asan.
PHI 3:12 Wika ashí dutikajai takun tatsujai, nuigtush iman wajasjai tusanush tatsujai, tujash nui jegantasan wegajai, dekatkauk Cristo Jesús niinu etiu asamtai.
PHI 3:13 Yatsug aidauh, wika nui jeganjai tusan tatsujai, ayatak yaunchuk takasbauwa nunak dekaskenum pachitsuk idaikun, jegantasan wegag nuna imá senchi takaajai;
PHI 3:14 takasa ashimkata tibauwa nui jegantasan weajai, nunikan wají jukitnume tusa Apajuí nayaimpinum pujus Cristo Jesusai untsugmakua nuna jukitasan.
PHI 3:15 Nunin asamtai, ashí wakannum katsuaju aidautik duke anentaimain ainaji, tuja tikich yajá anentaimu ataish nunashkam Apajuí iwaintuktatui.
PHI 3:16 Untsu nunimainaitag duka jutii dekauwaitag nunisaik umiaku pujumainaitag nuuwai.
PHI 3:17 Yatsug aidauh, wi wajukeaja duke dakumkatajum, nuniakjum jutii pujuinag nunisag pujuina dusha diistajum.
PHI 3:18 Wagki anui kuashat yujainawai, nuna pachisan kuashta imaania tibaijime, yamaishkam awentsanuk buutkun tajime, aanú aidauk Cristo cruznum jakauwa nuna shiwaji ainawai tusan,
PHI 3:19 ditak imá nugkanmayanak anentaimtuinawai, ditá apajuijig iyashí wakegamuji aina duke, dita ememamujiya duka ditá datsantí atina nuuwai, nunú aidau nagkanbauji atina duka megkaeta nuuwai.
PHI 3:20 Nuninai, jutiik nayaimpinmaya aents ainaji, nunin asaja nayaimpinmaya Uwemtikagtin Apu Jesucristo taati tusa dakainaji;
PHI 3:21 ni jutii iyashí imanchau aina nunak yapagtugmatnai, niina iyashí imana ibauk etamkatatus. Nunak nigka senchigtina ibau asa, ashí wají aina nunak niinig sumimtikata tau asa dutikatnai.
PHI 4:1 Nuadui mina yatsug aneetaig aidauwah, wika atumnak senchi aneajime, wi atumiin shiig aneamu ajuta duka, wají shiig pegkejan jumainaitag imanai. Nunin asamtai, atum Apu Jesusai ebetmamjajum pujajum nunisjumek pujustajum.
PHI 4:2 Evodia, Sintiquejai segainajai Apu Jesusa nemajuidau asag shiig chichasag pujustinme, tusan.
PHI 4:3 Dutiksanuk aminashkam mina kumpag betek umin asamin segajame, aanú ubag aina nu yaigtá tusan, ditak wijai betek yamajam chicham etsegbaunum senchi takasagmayi Clementejai, nuigtú tikich aina nujai; nunú aidau daajig aents pujuta jukiu papinum agattaiya nui agatkamu ainawai.
PHI 4:4 Tuke Apu Jesusaig dakujitajum. Awaksanuk tajime: ¡Dakujustajum!
PHI 4:5 Atumí shiig awajkagtutaigmea dusha ashí aents aidaush wainkamu atí. Apu Jesús taatnuk namput wajaschae.
PHI 4:6 Makichkish atumkek uyumá pujuigpajum, nunitsuk Apajuí aujkujum ashí iwaintuktajum nuniakjum see titajum.
PHI 4:7 Apajuí agkanji, ashí dekatan nagkaega nunú, atumi anentaimnak nuigtú anentaimtagminash Cristo Jesusai kuitamjutpaktatjume.
PHI 4:8 Nuigtushkam yatsug aidauh, ashí dekaseg aina nui, ashí ajantusa diita nui, ashí pegkeg takaamu aina nui, ashí ayatak pegkeg aina nuig, ashí kakagchau ata nui, ashí eme anentsá diyam atanum, nuigtú eme anentam amaina nui anentaimsatajum.
PHI 4:9 Ashí wi jitintuauwaitjim nu takastajum, ashí wi takaamu nuigtú antukuitjum dushakam dutikatajum; nuniagmin Apajuí agkan pujutan sukagtina nu atumjaish atatui.
PHI 4:10 Shiig senchi shiig aneajai Apu Jesusai, ataktú mina uyumatjukujum dui, atum mina tuke uyumatjin agmaujum nunak dekajai, nuninaitkujum dutikmain atsau asamtai ankaugme.
PHI 4:11 Wika junak atsumau asan tatsujai, wika ajuta nujaig shiig aneasa pujutan unuimajuitjai.
PHI 4:12 Wika ujunauch pujutnash dekajai, antsanuk kuashat ajutkagtamunum pujutnashkam dekajai; nunin asan ashí wajuk pujuinjaki nunash unuimajuitjai, shiig yuwa pujutnash, yapajayatku pujutnash, kuashat ajutkagtamunum pujutnash, atsumayatku pujutnash.
PHI 4:13 Ashí nunak nunimainaitjai, Cristo senchimtijau asamtai.
PHI 4:14 Tujash atumek wi waitiamujua nui pegkeg dutikaugme.
PHI 4:15 Atumshakam dekagme filiposnumia aidauwah, nagkamchakun yamajam chichaman etsegkatasan Macedonia pujaun jiinkibiag nuig, makichik iglesiakesh minak yainkachagmayi, imá atumek yainkabiugme;
PHI 4:16 nuniau asajum wi Tesalónica pujaish awetugbaijume, nuigtush awentsagmekesh wi atsumag nuna dutikati tau asajum.
PHI 4:17 Wika junak anentag sujustinme tusan tatsujai, atumdau aan nagkaemas ajutjamtinme tusan tajime.
PHI 4:18 Atum Epafroditowai awetugbaijum nunak ashí imatiksanuk jukibiajai, yamaik wi atsumamun nagkaegas ajutui, duka pegkeg kugkuin apeamu Apajuin shiig awagma imanuyi.
PHI 4:19 Nuadui mina Apajuijua nu, ashí atumin atsugtamjum nunak, niina wiyakchaji dekas imana nuna imatiksag Cristo Jesusai amaamu jukitnaitjume.
PHI 4:20 Apajuí iina Apajiya nu, nigki tuke ememattai atí. Aatus atí.
PHI 4:21 Ashí yatsug Cristo Jesusai pegkeniaju aina nunú kumpamjutuata. Antsag yatsug wijai batsata dushakam atumnash kumpamjamainawai.
PHI 4:22 Nunisag ashí pegkejam aina dusha kumpamjamainawai, imá senchi Cesara jeenia aina nu.
PHI 4:23 Iina Apuji Jesucristo wait anenkagtamujiya nu ashí atumi wakanminish ajutjamtinme. Aatus atí.
COL 1:1 Witjai Pablo Apajuí wakegau asa Jesucristo apostolji etiuwai, nuniau asamtai yatsug Timoteojai jui pujusan,
COL 1:2 atum yatsug pegkejam, nuigtú imagnisjum Cristo umijin aidautijum Colosas batsatjum nuna kumpamjime; iina Apají Apajuí, nuigtú Apu Jesucristua nujai wait anenjamag atumnash shiig agkan pujutan amastinme.
COL 1:3 Atum pachisa Apajuí aujkuik, tuke see tusaikí aji, iina Apuji Jesucristo Apajiya nunú,
COL 1:4 atum Cristo Jesusai dekaskeapi tuinajum nu, nuigtú ashí Jesusa nemajin pegkejam aidaush aneajum dusha antuku asaja;
COL 1:5 duka atumek yamajam chicham dekaskea nu etsegbaunum atum jukitin nayaimpinum ukugtamsamu ajutjamaina nu dekauwaitjum nu dakaidau asajum nuniagme;
COL 1:6 nunú yamajam chicham atumin tajutjamauwa duke ashí nugkanmash dapampaegak weawai. Ashí yantamnum wantinui pujutin yapajinaina dui, atum yama nagkamchakjum Apajuí dekaskenum wait anenkagtamuji antukuitjum dui nagkamas pujutjum yapajiau ainajum nunisag;
COL 1:7 junak Epafras iina aneetaiji jutiijai takau, Apu Cristo imajtikas takagna nu atumdau pegkeg amaina nuna jintinjamawajui.
COL 1:8 Nigki jutiinash, atumin Wakaní Pegkeji aneenitan amainakui aneniajum nunash ujapakmayi.
COL 1:9 Nuadui jutiishkam, dekaabiag dui nagkamsaik, atumek idaitsuk Apajuí tuke aujtajime, nuniaku Apajuí segatjime ni wakegamujiya nuna shiig dekamtijamamtai ashí yachamet wakannumia aina nunash dekaatajum tusan;
COL 1:10 Apu Jesusdau aidaush, wajuk pujumaina ainawa nunisag pujuinak, ashí pegkeg aina nunak takainak shiig awagmainak, Apajuin aan nagkaemas dekaatnume tau asan;
COL 1:11 nuigtushkam segatjime niina senchijí imana nujai senchimtijamatnume tusan, dutikamu asajum ashí katsunjajum emamkesjum shiig ichichmamjajum;
COL 1:12 shiig aneasjum atumesh iina Apají see titajum, wagki ni umigtamkauwai ni inamtaiji tsaaptina nuiyan, niina aentsji pegkejam aidau susatnun anagkuauwa nuna jukitnume tusa.
COL 1:13 Apajuí agkanmitkagmauwai wakan senchigtin suwenum inamaina nuiyan, dutijama niina Uchijí anetaijiya nuna inamtaijin jujamkiajui,
COL 1:14 niiní agkanbaetak ajutjamui nuigtú tudau aidaunum tsagkugnamushkam.
COL 1:15 Wagki niiyai Apajuí wainmainchauwa nuna niimen iwaidauk; niiyai iwai, ashí wají aina nu eke najannatsaig pujujakú asa.
COL 1:16 Wagki ashí wají aina nunak Apajuí niiní najankauwai, nayaim aina nui ayá nunash, nuigtú nugkanmayanash, wainmain aina nunash, wainmainchau aina nunashkam; inamin aidaunash, apu aidaunash, wakan pegkegchau aina nuna apujinash, wakan senchigtin aidaush, ashí niiní najankamu ainawai, niinu atí tusa.
COL 1:17 Cristuk ashí wají aina dusha eke atsaig pujujakui, nuniau asa ashí wají aina dushakam ni wajuk dutikamuita nunisag ainawai;
COL 1:18 nuigtushkam nigki, iglesia niina iyashiya nuna Apujishkam. Nigkiyai nagkamtinish pujujakuk, nagkamas jakau aidaunmaya nantakiuwa dushakam, nunin asa ashí nu wají aina nuig niiyai dekatkauwa duka;
COL 1:19 nuadui Apajuik niina Uchijí Aentsmaga akiinauwa nunak ni senchigtina ibauk atí tusa wakekauwai;
COL 1:20 nunikmatai niiní ashí wají aidau nugkanum, nayaimpinum aina nunashkam epegtua, Cristo cruznum numpeen ukajua dui agkanmitkata tau asa.
COL 1:21 Atumshakam yaunchuk tsawan aajakua duik takanchbau Apajuí shiwaji aajakuitjume anentaimtagminish, pegkegchau aina nu takaakjum nuniautigmin yamaik epegtugmawaje;
COL 1:22 Cristo ju nugka jui pujus waitus jakauwa dui epegtugbauwai, niina pujutainish pegkejam aidau, nuigtush tsuwatjish atsugbau niina emtinish bakumamainush atsugbau iwaintamkata tau asa.
COL 1:23 Tujash nuna nuniktag tuinakug Jesusan dekaskeapi tiajua nuig shiig ebetmamjag, nuigtú yamajam chicham Jesusai uwemna nu pachisa etsegbaun antukajua nunak dakainak pujuina nunú iman amain ainawai, nunú chicham ashí nugkanum etsegnakua nunak wishakam etsegjai.
COL 1:24 Yamaik shiig aneajai atumiin waitiakun, nuniakun Cristo niina iyashí iglesiaya nui waittsamu mina iyashjui atsugta nuna umiajai;
COL 1:25 nuniau asan niina takajin wajasuitjai, nunikmatai Apajuí atumiin pegkeg amaina nuna yaigtí nuniak ashí yantamnum chichaman etsegkati tusa awetiuwai;
COL 1:26 yaunchuk nagkamas anentaimtusbau dekaachbau aajakua nuna yamai niina aentsji pegkejam aina nuna iwaintuke;
COL 1:27 nunú aidaun, Apajuí niina imanji dekas imana nu dekaachbau aajakua nuna judiochu aidaun dekamtikatatus wakekauwai; duka Cristo atumin ajutjama nuuwai, niina imanji dakainajum nunú.
COL 1:28 Nunú Cristo pachisa etsegtakuish, ashí aents aidauk chichagji, nuniaku jintinji ashí dekamu aina nunú, Cristo eemtinish shiig pegkeg iwainakta tuidau asaja;
COL 1:29 nuna dutikata tau asan, senchi takaajai niina senchijí minai takaa nujai.
COL 2:1 Wagki dekatajum tusan wakegajai shiig senchi atumiin takaag nunú, Laodiceanmaya aina nuish, nuigtú ashí tikich mina waitchau aina nuishkam;
COL 2:2 anentainish ichichmamag aneenis ijutkau pujuinak, Apajuinu, nuigtú Cristunu yaunchuk anentaimtusbau dekaachbau aajakú dekas ashí niinu imana nuna shiig dekaatnume tusan;
COL 2:3 ashí pegkeg yachamet nuigtú dekat aina dushakam imá Cristuig awai.
COL 2:4 Junak, makichkikesh chicham wakemain aidaun tujamainak tsanugmajainum tusan tajime.
COL 2:5 Wagki wi atumjai ijunja pujachkunush, mina wakanjuig atumjaig ijutkajai, nuniau asan shiig aneajai atum Cristui dekaskeapi tusajum niinig ebetmamjajum, imagnisjum pujuinajum nuna wainkun.
COL 2:6 Nuadui, atumek Apu Cristo Jesús nemagkau aidautigmek ni wakega nunisjumek pujustajum;
COL 2:7 nuniakjum numí kagkapé initak akaejau asa, kakajus katuemainchau wajas aama imanikjum Jesucristo dekaskeapi tabaunmash tsujamainchau wajasjum atajum, wajuk jintintuabiajime nunisjumek, nuniakjum Apajuish see titajum.
COL 2:8 Kuitamamkatajum, makichkish dita yachameagbauji dekaskea imanun jintinjamainak tsanugmajainum, tujash nunak ditá muunji tujakbauwa nuna jintinawai ju nugkanmaya aina nuna, Cristo tawa nudauchui.
COL 2:9 Wagki, ashí Apajuinua duka Cristui paan wainnawai;
COL 2:10 nunin asamtai atumnak niiní ashí betek ajutjamjume, wakan pegkegchau aidau apuji, wakan senchigtin aidaun ashí nagkaesauwa nunú.
COL 2:11 Nuigtush niiní pakamaku ainagme, aents dutikin aina nuninchau, nunú pakamamuk iyashnumia tudau idaibauwa nuuwai, nunú pakamamunak Cristo dutikauwai.
COL 2:12 Atum yamimaju ainajum dui Cristujai ukuntsau ainagme, nunisjumek niijai nantakiu ainagme, Apajuí ni senchijin jakau aidaunmayan inankiuwa nuanuig dekaskeapi tuidau asajum.
COL 2:13 Atumek tikich tsawan aajakua duik, wakannumag jakau aajakuitjume atum tudau takataijum idaichau asajum, tujash yamaik Apajuí pujutan amasaje, Cristo nemaju asagmin dutijamawag ashí tudaunak tsagkugtamjaje;
COL 2:14 dutika chicham umiktin aajakua nu umiachbaunum bakumamain aajakuitag nunak Apajuí juki, Jesucristo cruznum achinjauwa nui esakajui;
COL 2:15 dutika Apajuí ashí wakan pegkegchau aidau apujinash, nuigtú wakan senchigtin aina nuna senchijinash atanjauwai, Cristui depetuk imanchau emak achijá ashí wainbaunum iwainakui.
COL 2:16 Nuadui makichkish atum yuajum nuna, nuniachkush umajum nunakesh, nuniachkush nantu yamá takamtai, nuigtú tsawan ayamtai fiestamtai aina nuna diisagkesh augmatjamain ainatsui;
COL 2:17 ashí nuna dutikajakú aina nunak eke Cristo taachu asamtai ni taatna nuna iwainainak dutikajakú ainawai.
COL 2:18 Makichik aentskesh ememachua nunin wajasag uwemjatag takugmek ángel aidau ememattajum tujamainakuish antugkaigpajum, nu aidauk wainkachuitak wainkajai tuinawai ememainak, aentsú anentaimtaiji pegkegchau aina nunak anentaimaidau asag;
COL 2:19 Cristo niina nemajuidaun Apujiya nujaig ditak ijutkau ainatsui. Ni ashí iyashnak kuitamui ashí niinu aidaun ijumag, dutikau asa Apajuí anentaimtusbauwa dutiksag tsakatnash suawai.
COL 2:20 Atumesh Cristujai jakau ainayatkugmesh ¿wagka ju nugkanmaya pujuina nunikjumesh, ju umitai atí tibau aina nu:
COL 2:21 “Juka yuwawaigpa, apasmesh dekapsaigpa, antitash antigkaipa”, tawa nu umiktasagmesh pujugjume?
COL 2:22 Ashí nunú umiktin aina duka wají aidau takaa takaam abuegama nuniktinai, aents aidau jujú umiktajum tusa jintiamu asag;
COL 2:23 nu aents jintiamu aina duka, jutsukaitai dekas yaijatmainuk tusa puyatjusa umimain ainawai, wagki Apajuí umigkuik, kakagchauch amainai nuigtush iyash senchi waitkamainai tuinawai, tujash duka makichkish iyash pegkegchau wakega nu idaitanmag yaijattsui.
COL 3:1 Nuadui atumek Cristujai nantakiu asajum, nayaimpinmaya wají aidau egaktajum, Cristo Apajuí untsujin eketa nuiya.
COL 3:2 Nuniakjum nayaimpinmaya wají aina nui anentaimtajum, nugkanmaya aina nui anentaimtsuk;
COL 3:3 Atumek Cristujai jakau asajum, Cristujai pujau asagmin yamajam pujut ajutjamjum nunak aentsuk wainmain ainatsui.
COL 3:4 Nunin asamtai, Cristo atumí pujutjumea nu wantinkatna dui, atumshakam niiya imanuk wantinkatnaitjume.
COL 3:5 Ju nugkanmaya ashí atumiin ajutjamaina duka idaisatajum, tsanijinbau, pegkegchau aidau, katsunmainchau wakejut aidaush, pegkegchau wakejut, utugsag nu ajutia tusa senchi wakegat, nunin aina duka apajuimtai ainawai;
COL 3:6 nunú aidaun takainak intimaina nuanui Apajuí suimkeg minawai;
COL 3:7 yaunchuk pujujakuitjum duik atumshakam ju aidau takaajakú ainagme.
COL 3:8 Tujash yamaik ju aina duka ashí idaisatajum: magkagtumain kajeamu, kajet, pegkegchau takaamu, pegkegchau chichagkagtamu, chicham pegkegchau chichat.
COL 3:9 Pempeentunisjumek tsanunijaigpajum. Yaunchuk takaajakbau aina duka idaisajum,
COL 3:10 yamajam aents wajasugme; nuniku asajum atumin najapau niimega ibau weakjum ni shiig dekaatajum.
COL 3:11 Nunin asamtai judío tabau, griego tabaush, pakamaku, pakamakchaush, tikich nugkanmaya tabaush, unuimagchau tabaush, inataiyai tabaush, agkantai tabaush atsawai, Cristuwai ashí nuigtú ashí nunú aidaunum awa duka.
COL 3:12 Nuadui Apajuí pegkejam atinme tusa anempas etegtamjau asamtai, shiig wait anenkagtin, pegkeg, ememachu, kakagchau, ebetmamjau atajum;
COL 3:13 pempeentunisjumek tsagkugdaijatajum, tikichjai wake besegdaikamu ajutjamkuish pempeentunisjumek tsagkugdaijatajum, iina Apu Cristo tsagkugtamjauwa nunisjumek atumesh tsagkugdaijatajum.
COL 3:14 Ashí nu wají aina nuig anenka nu ajutjamtinme, nuuwai dekas shiig ijuntsa pujutan sukagta duka.
COL 3:15 Atumi anentaiminish Cristunu shiig agkan pujuta nu ajutjamtinme, makichik iyash atinme tusa etegtamjajua nunisag, Apajuik nuna aatus dutijamata tau asa makichik iyashik etamkauwai, nuadui atumek see titajum.
COL 3:16 Cristo chichamega nu atuminish shiig kuashat tuke ajutjamtinme, nuniau asamtai pempeentunisjumek jintindaiyakjum nuigtú pegkeg wakegat egketdaiyatajum ashí yachamet aina nujai, nuniakjum atumi anentaiminish Apajuí wakesa kantamjuatajum salmo aidau, himno aidau nuigtú Wakaní Pegkeji waketan amá nujaishkam kantamatajum.
COL 3:17 Ashí atum dutikajum nu nuigtú chichajum duka Apu Jesusa nemajin asajum nunimaina nu dutikatajum, Apajuí iina apajiya nunú Jesucristo dutikauwa nu pachisjum see takujum.
COL 3:18 Nuwatkamu aidauwah, atumi aishumin sumimkatajum, juwai Apu Jesús nemajin asajum nunimainaitjum duka.
COL 3:19 Nuwentin aidauh, atumi nuwem aneetajum, nuniakjum najamnuk chichagkaipajum.
COL 3:20 Uchi aidauwah, apa dukujai ashí umigkatajum, wagki nuuwai Apu Jesusan shiig awagma nu.
COL 3:21 Uchigtin aidauwah, uchijum kajemtiká yujaigpajum, junik anentaimá pujuinum.
COL 3:22 Inak aidauwah, atumin apujum ju nugkanmaya aina duka ashí umigkatajum, wajas diigmakui shiig awajkata tabaunum takatsuk, dekas shiig anentaiyai Apu Jesús ajantusa diyamunum.
COL 3:23 Ashí takaajum duka shiig wakesajum dutikatajum, aentsdau takamaina nunitsuk, Apu Jesús takagku wajukmaina nunisjumek.
COL 3:24 Atumek dekagme Apu Jesús atum jukitnun amastina duka, wagki atumek Apu Cristo takagjume.
COL 3:25 Tujash pegkegchaun takaa duka, ni pegkegchau takasa dutiksaik akiam atatui, wagki aents akanjá diyamuk atsau asamtai.
COL 4:1 Inamin aidauwah, atumi inakem shiig awagmakjum, inamin pegkeg atajum, atumek dekagme nayaimpinum makichik Apu ajutjama duka.
COL 4:2 Apajuí mijattsuk aujkujum aneaku batsamsajum, see tusagmeké atajum,
COL 4:3 nuniakjum jutii pachijattsagmesh Apajuí aujkagtustajum, Apu Jesusa chichame agkan etsegtumainnumash yaimpakti, dutijamamtai dekamtikawagmi Cristo pachisa yaunchuk dekaachbau yamai etsejuinag nu, nunú etsegbaunum achinkan pujajai,
COL 4:4 nuna wajuk tumainaitja dutiksanuk titajai tau asan tajime.
COL 4:5 Yacha pujumaina imagnisa pujakjum Apajuí nemagchau aidaush iwaintuktajum, tsawan wainka megkaetsuk.
COL 4:6 Atum augmabauk tuke pegkeg, wakejusa antumain atí, nuigtushkam dekau amainaitjume makí makichkish wajuk aimainaita dushakam.
COL 4:7 Tíquico iina yachi aneetaiya nu, shiig imagnis pujus yaimin, jutiijai atuegas Apu Jesusan takagna nu, mina pachittsag ujapaktatjume.
COL 4:8 Duwi niina atumiin awemajai, jutii wajuk pujuinaji nuna ujapainak, anentaimnash ichichtamjatnume tusan awetajime,
COL 4:9 niijai minawai Onésimo, jutii yachi aneetai shiig imagnis pujuwa nu, dita ujapakagtatui ashí jui wajuk awa nunak.
COL 4:10 Aristarco, wijai achikam puja dushakam kumpamjamainawai, nunisag Bernabé iká yachi Marcosa dushakam kumpamjamainawai. Wi niina pachisan dutik jukitajum tibaijim dutiksagmek atumiin minakuish jukitajum.
COL 4:11 Nuigtú Jesús Justo tutaiya dushakam kumpamjamainawai, jujú judío aina juke Apajuí inamtai pachisa etsegbaunmag yaintuinawai, ditak mina anentaignash shiig senchi ichichtujagmayi.
COL 4:12 Dutiksag Epafras kumpamjamainawai, Cristo Jesusa inakega nu, niig atum aina annuke, nuniak Apajuin senchi aujtugmainawai, imagnis ebetmamag pujuinak, ashí Apajuí wakegamua nunak takagsatnume tujamaidau asag.
COL 4:13 Atumin puyatjutpaina nunak wi wainjai, nuniak Laodicea pujuidaun antsag Hierápolis pujuina nunash uyumawai.
COL 4:14 Lucas, ampijatin jutii aneetaiya nunú, Demasjai kumpamjamainawai.
COL 4:15 Yatsug Laodicea batsata nunú kumpamjutuatajum, dutiksagmek Ninfas nuigtú iglesia niina jeen ijunaina dushakam kumpamjutuatajum.
COL 4:16 Jujú papí ausagmek, iglesia Laodicea awematajum, ditashkam ausatnume. Tuja laodiceanmaya awetimu atumin awetugmainakuish aikasjumek ausatajum.
COL 4:17 Arquipo ujaktajum: Takat Apu Jesusdaun jukiuwa nuna puyatjus umiktí, tawai tusajum.
COL 4:18 Ju kumpamdaiyamunak, wi Pablon mina uwejui agatjime. Wi achinkan pujag ju anenjatajum. Apajuí wait anenkagtamujiya nu atumnash ajutjamtinme. Aatus atí.
1TH 1:1 Witjai Pablo, nuigtú Silvano, Timoteo aaja atum iglesiatijum Tesalónica batsamin aidautigmin kumpamjime. Iina Apají Apajuiya nu Apu Jesucristujai wait anenjamag shiig agkan pujutan amastinme.
1TH 1:2 Ashí atum pachisa Apajuí aujkuik tuke see tusaikí ainaji,
1TH 1:3 nuniaku tuke pachisaikí ainaji iina Apají Apajuiya nuna emtin, atum dekaskeapi tabauwai takaakjum, anenkai takaajum nu, nuigtú mijamtsuk iina Apuji Jesucristo dakaidau asagmin.
1TH 1:4 Yatsug Apajuí anetai aidauwah, ni atumnash etegtamjauwa duka dekainaji.
1TH 1:5 Jutii yamajam chicham atumiin etsegkabiag duka, ayatak chichamaikik etsegkachbaiji, nunitsuk Apajuí senchijish iwaintukmaijime Wakaní Pegkeji jutiiní takaa nujai shiig paan dekamtikaku. Atumek shiig dekagme, atumiin pujubiag duik, atumiin pegkeg amaina duke egabiag nunú.
1TH 1:6 Atumek jutiinua nu, nuigtú Apu Jesusdauwa nujai dakumjume, nuniau asajum senchi waitiakjumesh shiig aneasjum chicham etsegbaush antuku ainagme Wakaní Pegkeji dakujutan amaidau asamtai,
1TH 1:7 nu nuniakjum ashí macedonianmaya, nuigtú acayanmaya dekaskeapi tiaju aina dusha iwaintukugme.
1TH 1:8 Apu Jesusa chichamega duka atumiin nagkamna dapampaekae, nunak imá Macedonia, Acaya aina nuigkik nunikchae, ashí tikich nugkanmash pampagké, nuigtush dekainawai atum Apajuiyai dekaskeapi tajum nunashkam, nunin asamtai jutii anui chichagkagtumainaitag duka makichkish atsumnatsui.
1TH 1:9 Wagki ditak etsejuinawai atum wajuk jutii jukagtukiuwaitjume nuna pachisag, nuigtú Apajuí iwaaku dekaskea nu umigkatasajum apajuimtai idaisaujum nunashkam,
1TH 1:10 nunikjum Apajuí niina Uchijin Jesusan jakaunmayan inankiuwa nu nayaimpinmaya minitna nu dakasta tuidau asajum, Apajuí suimkaji ishamain atina nui agkanmitkagmatna nunú.
1TH 2:1 Yatsug aidauh, atumek dekagme, jutii atumiin ijasmayag duka wainkag nagkankachmayi.
1TH 2:2 Nuigtushkam dekagme Filiposnum pegkegchau chichagkamu nuigtushkam waitkasbau aajakuitag duka, tujash kuashat utugchat ajutjamtaish, Apajuí ichichtamjabi yamajam chichaman etsegkatnume tujamu asa.
1TH 2:3 Wagki jutii chichagkagtukmayag duka dewakaikish, pegkegchau anentaiyaikish, makichik aents tsanugtasaikish tichabiaji.
1TH 2:4 Apajuí jutii anentainash ashí diigtamas, yamajam chichaman Cristo pachis etsegtukti tusa sujamsauwa nu etsejuinaji; duka aents shiig awajkata tabaunum nunitsuk, Apajuí iina anentainash shiig dekagtama nu shiig awajkata tabaunum nuninaji.
1TH 2:5 Jutii makichkish shiig anenjustinme tabaunum chichachuitag duka atumek dekagme, nuigtush kuichik jujuktasaikish chichachuitji. Junak Apajuishkam shiig dekawai.
1TH 2:6 Makichkish eme anenjitnume tusaik egachuitji; atumdaukesh, nuniachkush tikich aidaukesh.
1TH 2:7 Cristo apostolji asaja yaijatkatajum tusa atum segamainaitku, nuwa uchijí aidaun shiig anentus kuitamama numamtuk, atumnak shiig anentsan kuitamkabiajime.
1TH 2:8 Imatika aneedau asaja, ayatak yamajam chicham Apajuinua duke ujaktasaik wakegatsji, atumiin bakumatasaish wakegainaji wagki jutii aneetai wajasú asagmin.
1TH 2:9 Yatsug aidauh, atumek aneakjume, atum aidautijum makichkish waitkat dakitau asaja wajuk takayaji, tsawai kashishkam takai takainakua pimpikiajaish yamajam chicham Apajuinua nu etsejiag duka.
1TH 2:10 Atum ainagme jutiinu dekau aidautigmek, nunisag Apajuishkam dekagtamji, atum Apajuí nemagkau aidautigmijai pujubiag duik pegkegchau aidauk takaachu asaja, makichkish nuninai tumainjish atsugbau pujusbaiji.
1TH 2:11 Jushakam dekagme, uchigtin uchijin utuja numamtuk chichagkun, makí makichkitigmin anentaimnash ichichtuyajime,
1TH 2:12 dutikakun, Apajuí niina inamtaiji imana nui pujustinme tusa untsukbau aidaush wajuk pujumainaita nunisjumek pujustajum tuyajime.
1TH 2:13 Nuadui jutiishkam Apajuik mijattsuk see taji, atum ii chichagkagtamu aentsdauchuapi Apajuí chichamempapi tusajum shiig antuku asagmin. Duka dekas Apajuí chichamegai. Nu chicham atumesh dekaskeapi tau asagmin pujutjumnash kuashat yapagtugmawajui.
1TH 2:14 Yatsug aidauh, atumek iglesia Apajuinu Cristo Jesusdau aidau Judea batsata nu dakumjume, atumi nugkeminiag pempeentugmakiag waitkagmasaju aina dui, judío aidau nunú iglesia aidaun waitkasaju aina dutiksag.
1TH 2:15 Nunú judío aina duke Apu Jesusnash maawajui, nuigtú profeta aidaunash, nuninak jutiinak jiikí ajapjamawajui, nuniau asag Apajuinak shiig awagmainatsui, nunisag ashí aents aidaunash shiwagmainawai;
1TH 2:16 judiochu aidau uwemjatnume tusa chicham ujakta tajinish utugtamainawai, nunidau asag nuní nagkaemas tudaunak ikauntumainawai, nunidau asagmatai Apajuí shiig senchi suwimkan susatnai.
1TH 2:17 Yatsug aidauh, ujumak tsawantai atumjai kanakuitag duik, atum wainchakuish tuke iina anentainig aneaku amaiji, nuniaku atum wainkatasaish wakeyaji.
1TH 2:18 Nuniau asan wi Pablon atumin ijagsatasan kuashtá wakekabiajai, tujash Satanás utugtamkamtai minichbaiji.
1TH 2:19 ¿Tuwaita jutii dakamush, jutii shiig aneamu, jutii Apuji Jesús wakettsag taatta dui ememamu atinush? Nunú atum achagtaik, tikichik amainchau ainawai.
1TH 2:20 Atumetjume jutii eme anenmamtai, nuigtú iina dakujutai ainajum duka.
1TH 3:1 Nuadui, katsunmainchau dekapeau asaja, Atenas juakmi timaiji,
1TH 3:2 nuniaku iina yachi Timoteon awemabiaji, Apajuí takaju asa yamajam chicham Cristo pachisa etsegbaunum yaimpauwa nuna, atum dekaskeapi tajum nuig ebetmamjatajum tusa ichichtamjatnume tusan,
1TH 3:3 makichkikesh nunú waitiamu aina nujai pachimdaekainum tusan. Tujash atumek dekagme nunú wají aina nuig waitmainaitag duka.
1TH 3:4 Nuigtushkam atumjai pujuyag dui emtikan ujayajime, jutiik waittsatin ainaji tusan, duka nunisag nagkaetamjume yamai wainjum nunú.
1TH 3:5 Nuadui katsunmainchau dekapeau asan, awemabiajai atum dekaskeapi tajum nuna dekaati tusan, pegkegchaunum dekapkagtina nu pegkegchaun takamtiksachajeash tusan, nunikmatai ii takasbauwa nu wainak juakai tabaunum.
1TH 3:6 Tujash Timoteo atuminia wakitki jutiiní taa, yamajam chicham pegkeg aidaun atum dekaskeapi tajum nuna, nuigtú anentak ajutjamjum nunashkam; jutii shiig anenkagtusjum waijatkatasajum tuke pachijatjum nunash ujapakagmayi, jutii atum wainkatasa wakegag nunisjumek atumesh wakegajum nuna.
1TH 3:7 Nuadui yatsug aidauh, ashí atsumamu nuigtú kuashat waitiamu ajutjamaina duka, atum dekaskeapi tabauk nunisjumek pujamu antuka ichichmamjabiaji.
1TH 3:8 Atum Apu Jesusaig ebetmamjajum pujamu dekaawaja shiig yantsaptugmaiji.
1TH 3:9 Dusha, ¿wajuk Apajuish see tumainaita atum pachisaish, niina eemtin ashí shiig aneamu egketkagtajum dusha?
1TH 3:10 nuniau asaja tsawai kashijai Apajuí shiig senchi segaji, atumin ataktú igkugkan wainkatasan, nunikan atum dekaskeapi tayatkujum ashí nuniachbau ajutjamkujaish yaigtasan.
1TH 3:11 Wakegainaji Apajuí iina Apají, Apu Jesusjai jutii atumiin minimaina nunash umigtamkati tusaja.
1TH 3:12 Apu Jesús sujamsatnume aan nagkaemasjum ashí tikich aidaujaish pempeentuniki aneenita nuna, jutii atum aneajim aikasag,
1TH 3:13 atumi anentaiminish ebetmamjau, makichkish nuninai tumainchau pegkejam iina Apají Apajuiya nuna emtinish atajum, Apu Jesús niina aentsji pegkejam aidaujai minitna duish. Aatus atí.
1TH 4:1 Nuadui yatsug aidauh, Apu Jesusa daajin puyatjusan segajime, Apajuin shiig awagma nunisjumek pujakjum kashí kashinig emtajum jutiinu unuimagbaijum nunisjumek.
1TH 4:2 Wagki atumek dekagme Apu Jesús dutikata tibaun jintintuabiajim nu.
1TH 4:3 Atumnak Apajuik imá midau pegkeg aina nunak takainak, tsanijintsuk pujustinme tusa wakejutpagme.
1TH 4:4 Nuigtush makí makichik nuwentin aidauk niina nuwenak eme anentus diyak, pegkegchau takagtsuk pujumainai,
1TH 4:5 nuninak aents Apajuí dekachu aidau senchi iyashí wakegamun takau aina nunitsuk,
1TH 4:6 makichkish yachinak pegkegchau awajkaigka tsanutnash tsanujaigka; wagki Apu Jesusak ashí nunin aidaunak suwimkan suawai, nunak duikish timaijime.
1TH 4:7 Apajuik iinak pegkegchaun takaa pujutnume tujamchauwai, pegkee pujustinme tusa untsugmakui.
1TH 4:8 Nunin asamtai, ju jintinkagtamun dakitauk aentsnakesh dakitak nuniatsui, Apajuí Wakaní Pegkejin sujamsauwa nuna dakitak nuniawai.
1TH 4:9 Tujash yatsutjai pempeentuniki aneenita nunak agatjashtatjime; wagki pempeentuniki aneenitnak Apajuí jintinjamawaju asagmatai.
1TH 4:10 Duka nunisjumek dutikagme, ashí yatsut Macedonia batsata nujaishkam. Tujash yatsug aidauh, segajime aneeniajum aan nagkaemasjum aneenitajum tusan;
1TH 4:11 nuniakjum kakanmamsatajum shiig agkan pujustasajum, nuigtush atum dutikmain aina duke uyumakjum, atumi uwegmin takastajum jutii nuniktajum timaijim dutiksagmek,
1TH 4:12 aatsa pujau asagmin Apajuí nemagchau aina dusha ajaantus diigmastinme, tikichdau niimjú pujachu asagmin.
1TH 4:13 Yatsug aidauh, jakau aina dusha wajukatna ainawa nunú dekatsuk juwakaijum tusa dakitaji, tikich aidau dakamuji atsugbau asag wake besemag batsataina nunikaijum tusan.
1TH 4:14 Wagki Jesusak jakauwap nantakiuwaita tusa dekaskeapi tuinag nunisag, Apajuishkam Jesusai dekaskeapi tuidau jinawajua nunash inanjatnai.
1TH 4:15 Nuadui Apu Jesús tiuwa dutiksaik taji, jutii iwaaku batsatutik Apu Jesús minitta nuaduik, jakau aidau ukuakuik emjashtin ainaji.
1TH 4:16 Apu Jesús nayaimpinmaya minak senchi untsumak akaikitnai, ángel aidau apujishkam arcángel untsumkatnai, Apajuí trompetajinash senchi umpuagtinai, nunitai Cristui dekaskeapi tuidau jinau aidauwá nantajagtinai.
1TH 4:17 Nuniku ai, iwaaku juwaku aidautik ditajai ijumja juwam agtinaitji yujagminum Apu Jesusjai agkajunum igkuniktasa, nunikaja Apu Jesusjai tuke pujutnaitji.
1TH 4:18 Nuadui jujú chichama jujai tikich aidaujaish anentai ichichtunigtajum.
1TH 5:1 Yatsug aidauh, tsawan aidaun pachis nuigtú wajutik nuniktinaita nuna agatjugti tusagmek atsumatsjume.
1TH 5:2 Atumek shiig dekagme, tsawan Apu Jesús wakitki minamuk, kasa kashi miniyama numamtuk atinai.
1TH 5:3 Wajutiya aents aidau: Yamaik shiig agkan, nuigtush kajintsá batsatainaji, tiagtin ainawa, nuniai atinai dita waittsatnuji minittina duka, nuwa ejamtin uchigmatji jegamtai najaima numamtuk, nunak uwemtugchagtin ainawai.
1TH 5:4 Tujash atumek yatsug aidauh, suwenmag batsattsugme, nunin asagmin, nunú tsawan Apu Jesús minamu atina duik, kasan pachiachbau achiká juwajama numamtuk awagmak amaitsugme,
1TH 5:5 wagki ashí atumek Jesucristo aentsji asajum pegkeg takaakjum tsaaptinnum pujumaina numamtuk wajagme, jutii Jesucristo dekaskeapi tuidautik iwanchdau aidau pegkegchau takainak suwenum wajukmaina numamtuk wajaina nuninuk ainatsji.
1TH 5:6 Nuadui Apajuí nemagchau aidau kashi kajiaku wajukmaina numamtuk wajaina nunitsuk shiig umintsá aneaku batsamsagmi,
1TH 5:7 wagki kanuina duka dekainatsui wají nagkaemaktatua nunak, nampena dushakam kashi wajukmaina numamtuk wajainawai;
1TH 5:8 tujash jutiik tsawai batsamaina numamtuk batsatu asaja aneaku batsamsagmi; suntag detsepen coraza ejabau aina numamtuk dekaskeapi tabaujai nuigtú anenkajai ejamakagmi nuninaku uwemat jukimu dakainag nujai casco atsejumaina numamtuk wajakagmi.
1TH 5:9 Wagki Apajuik iinak suwimkan jukitin atinme tujamchauwai, ayatak Apu Jesucristui uwemtan jukitnume tujabiajui,
1TH 5:10 ni jutiiní jakauwai, iwaaku batsatkush, jakau akushkam wijai ijutkau pujustinme tujamu asa.
1TH 5:11 Nuadui pempeentunisjumek wakegat egketdayakjum nuigtú yainiktajum, atum takaajum dutiksagmek.
1TH 5:12 Yatsug aidauh, segajime, atumin takainak Apu Jesús nemagtanum jintinjamaina duka ajantusjum diitajum.
1TH 5:13 Dutikakjum eme anentsajum aneetajum, dita takatan dutikaina dui. Pempeentunisjumek shiig agkan batsamsatajum.
1TH 5:14 Nuigtushkam yatsug aidauh segajime, daki aidaush chichagkatajum, junik dekapedaush wakemitkaktajum, kakaakchau aidaushkam yaigtajum, nuniakjum ebetmamjajum ashí tikich aidaujaish pujustajum.
1TH 5:15 Diyaku atajum makichkikesh tikichjai pegkegchaunum iikdaikainum; duka nunitsuk, pegkeja duke tuke dutikatasajum kakanmamsatajum atum ainajum nujaish nuigtú ashí tikich aidaujaishkam.
1TH 5:16 Tuke shiig aneetajum.
1TH 5:17 Nuniakjum mijamtsuk Apajuish tuke ausagmeké atajum.
1TH 5:18 Ashí pachisjum Apajuí see titajum, wagki nuuwai ni wakegamuk, atum Cristo Jesusai dekaskeapi tuidautijum nunimainaitjum nu.
1TH 5:19 Wakaní Pegkeji wakega duka umigtsukek idaisaigpajum.
1TH 5:20 Apajuí tabaun etsegtuina dusha wainkaya nuninuk diisaigpajum,
1TH 5:21 ashí shiig kuitamsa antukjum, pegkeja duke ebetjatajum.
1TH 5:22 Ashí pegkegchau aina duka idaisatajum.
1TH 5:23 Apajuiya duke, shiig agkan pujutan sukagtina nu atumnash pegkeemtijamiagti, ashí atumi wakanmin, anentaibaugmin nuigtú iyashminashkam, Apu Jesucristo taatta duish bakumamainchau atinme tusa.
1TH 5:24 Apajuí dekas betek umina nunú atumnak etegtamjauwai, dutijabau asa nigki nunak umiktatui.
1TH 5:25 Yatsug aidauh, jutii pachijattsajum Apajuí aujkagtustajum.
1TH 5:26 Ashí yatsug aidau shiig aneasjum kumpamatajum.
1TH 5:27 Apu Jesusa daajin tajime, jujú papiik ashí yatsug pegkejam aidau aujtustajum.
1TH 5:28 Iina Apuji Jesucristo wait anenkagtamua nu atumnash ajutjamtinme. Aatus atí.
2TH 1:1 Witjai Pablo, nuigtú Silvano, Timoteo aajan atum iglesiatijum Tesalónica batsamin aidautijum iina Apají Apajuiya nujai, nuigtú Apu Jesucristujai ijutkau aidautigmin kumpamjime.
2TH 1:2 Iina Apají Apajuiya nu, Apu Jesucristujai wait anenjamag shiig agkan pujutan amastinme.
2TH 1:3 Yatsug aidauh, jutiik atum pachisa Apajuí tuke see tusaikí ainaji, nuuwai dutikmaina duka, wagki atumek aan nagkaemasjum dekaskeapi tuinakjum, pempeentunisjumek aan nagkaemasjum aneenidau asagmin.
2TH 1:4 Nuadui atum pachisa tikich iglesia Apajuinu aina nuish eme anentsá chichainaji, atum dekaskeapi tabaugmin aintamainakuish nuigtú waitiakjumesh emamkesjum katsunjajum nagkaejum dui.
2TH 1:5 Nunú iwainawai dekaskenum Apajuí pegkejan takauwa nuna, nunin asa yamai waitiajum dui Apajuí niina inamtaijin awaintamawagtinai.
2TH 1:6 Apajuik pegkeja nunak takauwai, nunin asa yamai atumin waitkagmaina nunak suwimkan susatnai,
2TH 1:7 tuja atum waitiajum nunak, jutiijai betek ayamtan sujamsatnai. Nunak Apu Jesús nayaimpinmaya niina angelji senchigtin aina nujai, jii kegamunum egketkau minitna dui dutikatnai,
2TH 1:8 nuniak suwimkan susatnai Apajuinu dekatan dakitjau aidaun, nuigtú yamajam chicham Apu Jesús pachisa etsegbaun antugkachaju aina nunashkam.
2TH 1:9 Nunú aidauk waittsagtinai tuke megkaetainum weenak, nuniau asag Apu Jesusjaig tuke kanaak kanakagtinai, nuadui niina imanjinak nuigtú niina senchijinash wainkachagtinai,
2TH 1:10 ni minitna nunú tsawantinig, niina aentsji pegkejam aidau emematuinam nuigtú ashí dekaskeapi tuidau puyattsá diyam atina nuna. Tuja atumek jutii etsegbau dekaskeapi tiu ainagme.
2TH 1:11 Nuadui atum pachisa tuke Apajuí aujuinaji, atumin untsugmakajua nunisjumek pujamunum yaimpaktinme tusa nuigtú nigki niina senchijinash amastí dekaskeapi tabauwai ashí pegkeg aidau takamaina nuishkam tusaja.
2TH 1:12 Atum aaja nuniamunum Apu Jesusa daajig eme anentam atatui, nuadui niishkam atumin eme anenjamsattawai, iina Apajuiji nuigtú apu Jesucristo wait anenjama nunisag.
2TH 2:1 Yatsug aidauh, iina Apuji Jesucristo ataktú wakitki taatnai, nunikmatai jutiik niijai ijunjatnaitji. Nuniktin asamtai segajime,
2TH 2:2 kakajus anentain yapajinmainchau atinme tusan, nuigtush makichkish uwakeam aigpajum, “Apu Jesús taatnuk tsawantak jegae” wakan tujutne, chicham antukji, cartan jutii agagbauwa dutika tujamainakuish.
2TH 2:3 Makichkish tsanuamak aigpajum; wagki eke nunú tsawan jegatsaig Apajuí shiwagmamu atinai, nuniamunum aents tudau takamtikagtin wantinkatnai, megkaekatna nu,
2TH 2:4 nunú aentsua duka ashí Apajuin adaiyina nuna shiwajiyai, nuniachkush ememattai atatus waketinai, nuniau asa jega Apajuí ememattainum wayá ekeemas: “Witjai Apajuinuk”, titinai.
2TH 2:5 ¿Aneaktsugmek wi atumjai pujusan juna pachisan tibaijim duka?
2TH 2:6 Tuja yamaik atumek dekagme, nunú eke tsawan jegatsaig wantinkai tusa emetea duka.
2TH 2:7 Wagki ni pegkegchau dutikatnuji dekamainchauwa nunak yamaikish takaawai, nuninaitak nuna yamai emetea nu agkaasti tabaunum awai.
2TH 2:8 Nunikmatai aents pegkegchau takauwa nu wantinkatnai, nunittaman Apu Jesús niina wenin wakan jiina nujai maatnai, dutikak ni minamu tsaaptin atina nujai tsaiktinai;
2TH 2:9 nunú aents pegkegchau takau wantinkatna duka, Satanasan takagsatatus minitnai, niina senchijijai wainchatai aidaun iwainak, nuigtú tsanumak aents dutikmainchau aidaunash dutiktinai.
2TH 2:10 Nuniak ashí pegkegchau aina nujai tsanutnai megkaejatin aina nunak, wagki ditak anentak dekaskea nu etsegbaun antukag dekaskeapi tuinak uwemaina nuna dakitjaju asagmatai,
2TH 2:11 Nuadui Apajuik nunú tsanumak senchijin iwaina nuna dekaskeapi titinme tusa idaiwai;
2TH 2:12 nunak ashí aents aidau, ni chichame dekaskea nuna dekaskeapi tutan dakituinak, pegkegchaunak wakejus takasú aidaun, suwimkan susata tau asa dutikatnai.
2TH 2:13 Yatsug Apu Jesusa aneetai aidauwah jutiik atum pachisa tuke Apajuí see tuinaji, wagki yaunchuk nagkamas Apajuí atumnak etegtamjajui, Wakaní Pegkeji yayasam chicham dekaskea nuna dekaskeapi tiagtai pegkemtikiajam uwemjatin atinme tusa.
2TH 2:14 Nuadui Apajuí atumnak untsugmakajui jutii yamajam chicham etsegkauwaitag dui, iina Apuji Jesucristo imanjiya nui ditash pachinkatnume tujamu asa.
2TH 2:15 Nuadui yatsug aidauh, ebetmamjatajum jutii jintiamu unuimajuitjum nuanuig, chichamai tiuwaitjim nu nuigtú cartayai timaijim dushakam.
2TH 2:16 Iina Apuji Jesucristo, nuigtú iina Apají Apajuiya nujai anempajua nu, wait anenjamag ichichmamat tuke atinun, nuigtú pegkeg dakamu ajutjamaina nunashkam sujamsajua duke,
2TH 2:17 anentaim aidaunash ichichtugmagtinme, ashí chichainakush takainakush pegkeg aina nunak takastinme tujamu asa.
2TH 3:1 Inagnamun yatsug aidauh tajime, jutii pachijattsajum Apajuí aujkagtustajum, Apu Jesusa chichamega nu wamak ashí yantamnum dapampaejati, nuigtú shiig wakesa antamu atí atumiin wajukabia nunisag.
2TH 3:2 Dutiksagmek Apajuí aujkagtustajum aents pegkegchau, nuigtú yajau aina nuish agkanmitkagmati, wagki ashí dekaskeapi tuinamu atsujuidau asagmatai.
2TH 3:3 Tujash Apu Jesusak betek uminai, ibau asa nigki ichichtamag, pegkegchaunmash kuitamjamkatnume.
2TH 3:4 Apu Jesusaig kajintsá anentaimji atum dutikajum nui, nuigtú ii dutikatajum tibaijim nunash dutiksagkeap takasagtatua tusa.
2TH 3:5 Apu Jesús yaimpaktinme Apajuí anejata nunisaik anejattanum, nuigtú Cristo waitiakush katsunjauwa nunisag katsunjatnume tabaunmashkam.
2TH 3:6 Yatsug aidauh, iina Apuji Jesucristo daajin tajime, ashí yatsut aidau takatsuk wainak batsataidauk tupanjatajum, jutii jintintuabiajim nunisag pujuinatsu nunú aidau.
2TH 3:7 Wagki atumek dekagme jutii wajukmaiji nunisjumek pujumainaitjum duka, jutiik atumjai pujubiag duik wainkaik takaskek pujuchbaiji,
2TH 3:8 makichik aentskesh akitskek yujuachbaiji. Duka nunitsuk tsawai kashijai ayamtsuk shiig senchi takabiaji atum ainajum anuiya makichkish waitkat dakitau asaja,
2TH 3:9 jutiik atum yayam amainchau asa nunishmaiji, ayatak jutii takaamun wainainak ditashkam nunisag takastinme tusa nunibiaji.
2TH 3:10 Wagki wi atumjai pujubiag duik juna tibaijime: Ni takatan dakitauk yutanash yuwashti, tusan.
2TH 3:11 Tujash antukmaji atum ainajum anuiya ujumak, takatsuk wainak yujasag tikichin waitká yujaidau tabaun.
2TH 3:12 Nunú aents nunin aidaunak Apu Jesucristo daajin tajai, emetnag batsamas dita yuwatnujin takastinme tusan.
2TH 3:13 Tujash atumek yatsug aidauh, pegkeg takata duka yawetjaigpa.
2TH 3:14 Makichik aentskesh wi cartanum tajim juna umiachuk mamikiatajum, dutikagmek niijaig ijunjaigpa, datsaagti.
2TH 3:15 Tujash shiwagmá pujusaigpajum, ayatak yatsum anentsam chichagkata.
2TH 3:16 Apu Jesús shiig agkan pujutan sukagtina duke, tuke shiig agkan pujutan atumnash amastinme ashí tsawan wajuku agtatua nuwishkam. Apu Jesús ashí atumjaish atí.
2TH 3:17 Witjai Pabloitjai jujú kumpamkagtamunak mina uwejui agatjime, ashí cartan awemaknuk tuke jutikan agajai.
2TH 3:18 Iina Apuji Jesucristo ashí atumnash wait anenjamjatnume.
1TI 1:1 Witjai Pabloitjai, Cristo Jesusan apostoljiyaitjai, Apajuí iina Uwemtijamna nu nuigtú Cristo Jesús jutii dakainag nujai chichaman etsegkati tusa awetiuwai,
1TI 1:2 Timoteoh, dekaskeapi tabaunmag dekas mina uchig asamin kumpamjame; Apajuí iina Apajiya nu, nuigtú Cristo Jesús iina Apuji anentag, wait anenjamag, nuigtú agkan pujutan amastí.
1TI 1:3 Wi Macedonia weakun, amek Éfeso juwakam, makichkikesh yapajia jintinkagtuawaigpa titá tibaijame,
1TI 1:4 wainka augmatbau aidaun, nuigtú ditá muunji aajakú ejechamnun augmatiagtai antujú yujainum. Nunú wají aina duka jiyanitan itaawai, Apajuí takatji dekaskeapi tabauwai emtikmaina nuna.
1TI 1:5 Wi ju nuniktajum taja nunak, anenkak anentai pegkegnum najaneati, anentaimtashkam pegkeg, nuigtú dekaskenum dekaskeapi tabauwa dushakam, tusan tajai.
1TI 1:6 Tujash ujumak aents nuna idaiyinak, kanakag wainak chichá yujainawai.
1TI 1:7 Chicham umiktina nuna jintinkagtin atagtus wakegainawai; tujash dekaskenmag dekainatsui dita chichaina nunakesh, nuigtush antuinachiatak duka nuninai tuinawai.
1TI 1:8 Chicham umiktin pegkeja duka dekainaji, tawa dutiksaik umiakuik,
1TI 1:9 juka dekainaji, chicham umiktina duka pegkejan takaina nudauchui, duka chichaman umichu, yajau, tudau aidau, eme anenkagtuchu, nugkanmayanak anentaimtin, apají main, dukují main, magkagtin,
1TI 1:10 tsanijimtan wekaetin, mai aishmagkuk dutikdayin, aentsun kasamak sujin aidaun, wait aidau, dekas umiktatjai tusa tsanumin aidau, dekaskea nu jintiamun dakitin aina nudauwai,
1TI 1:11 junak yamajam chicham imana nu jintinkagtawai, Apajuí shiig anenkagtin mina kajitjus idaitugsamua nu.
1TI 1:12 See tajai mina senchimtijuau Cristo Jesús iina Apujiya nuna, wagki mina betek umimainjun diigtus niina takatjin apujtusui,
1TI 1:13 wi yaunchuk pegkegchau chichajujakú, niina nemajuidaunash ainkun waitkajakú aigkish. Tujash Apajuí minak wait anenjujui, wagki wika eke dekaskeapi tujakchauwaitjai, nuigtush dekachu asan nunikuitjai.
1TI 1:14 Tujash iina Apuji anentag wait anenkagta nu minaig imá kuashat ajuttsauwai dekaskeapi tabauwa nujai, nuigtú Cristo Jesusai anentak awa nujai.
1TI 1:15 Juka chichamak dekaske, ashí dekaskeapi tumain ainawai: Cristo Jesusak ju nugka juig tauwai tudau aidaun uwemtikatatus, nunú aina nuiyag witjai dekatkauk.
1TI 1:16 Tujash wi iman aigkish Apajuí minak wait anenjujui, Jesucristo minai dekatkauk ashí wait anenkagtutaijiya nuna iwainakta tau asa, nuna wainainak tikichish niina dekaskeapi tuinak pujut nagkanchaun jukitnume tusa.
1TI 1:17 Nuadui Rey tuke puju, jachau, wainchatai, Apajuí makichkiuchia duke eme anentsá ajumaiya duish tuke ememattai atí. Aatus atí.
1TI 1:18 Uchuchi Timoteoh, jujú chicham umikta tajame: Amina pachipas yaunchuk tujabiu aina nunismek shiig maanikta tajame,
1TI 1:19 nuniakum ame dekaskeapi tame dutiksamek shiig anentaimsam pujustá, nuna nuninachu asag ujumak dekaskeapi tabaun megkaekaje.
1TI 1:20 Nunak Himeneo, Alejandrojai nunikaje. Nunikmatai ditanak Satanasan idaitusmajai, pegkegchau chichashtan unuimagtinme tusan.
1TI 2:1 Dekatkauk ju aidau dutikatajum tajime, segatajum, Apajuishkam ausatajum, mijattsuk segakjum, ashí aents aina nu pachisjum Apajuí see titajum,
1TI 2:2 nuniakjum rey aidau nuigtú ashí apu aidau pachisjumesh Apajuí aujtustajum, shiig agkan, tutitag atsamunum ashí Apajuí puyatjusa umijuinaku imagnisa batsamsagmi tusajum.
1TI 2:3 Wagki juuwai pegkeja duka, nuigtú iina Apajuiji Uwemtikagtina nunash shiig awagma duka,
1TI 2:4 nunin asa nigka ashí aents uwemjatnume, nunikag dekaatnume dekaskea nuna tusa wakegawai.
1TI 2:5 Wagki makichik Apajuik awai, nunisag Apajuijai chichaman epegtugbaush makichki, duka Cristo Jesusai aentsmagauwa nunú,
1TI 2:6 nunin asa nigki tsagkamankauwai ashí aentsun agkanmitkata tau asa; nunak, nuniktinji tsawan jegamtai Apajuí iwaintugmakui.
1TI 2:7 Nuadui chichagkagtin nuigtú apóstol emamuitjai, (nunak Cristo daajin waitjutsuk tajai) Apajuí minak judiochu aina nuna maestroji etiuwai dekaskenum dekaskeapi tuta nuna jintintuati tusa.
1TI 2:8 Nuadui, ashí yantamnum aishmag aidauk pegkejam anentaiyai, kajegdaitsuk nuigtush jiyanitsuk, uwejin nayaimpinum takuidiag Apajuí aujsatnume tusan wakegajai.
1TI 2:9 Nunisag nuwa aidaushkam, jaanchjish ajantsá diyam amainun nugkugtinme, datsan amainchaun nuigtú pegkeg iwagmamja iwainmamkata tachamui, wakejumainun temashmatsuk, oro, kaya perla nuigtú jaanch akik aina ibaujai iwagmamtsuk,
1TI 2:10 ayatak pegkeg aina nunak takainak, iwainmamkatnume nuwa Apajuí puyatjus umignush wajukuita nuna.
1TI 2:11 Nuwak takamtak unuimagti, ashí nu aina nuig sumimak,
1TI 2:12 nuwanak jintinkagtuati tatsujai, aishmagku wagagkig nunikta tumaitsui, takamtak atinme.
1TI 2:13 Apajuik dekatkauk Adagkan najana dui Evan najanauwai;
1TI 2:14 nuigtush Adagkak tsanuamak asachui, nuwa tsanuam asauwai, dutika tsanujam tudaun takasui.
1TI 2:15 Tujash nuwak uchí uchigmau asa, ebetmamag dekaskeapi tusa, anenka takaak, pegké pujak uwemjattawai.
1TI 3:1 Juka chichamak dekaske: Obispo atatus wakega duka, pegkeg takata nuna wakegak nuniawai.
1TI 3:2 Tujash obispok amainai makichkish nuninai tuchatai, makichik nuwentin, ebetmamjau, shiig anentaimkau, eme anentsá diitai, jeenish shiig jukagtin, jintinkagtuatasash wakeyin,
1TI 3:3 nampeta wekaetuchu, wainak shinú wekaechau, kuichkinak anentaimtú wekaechau, shiig awajkagtin, kakagchauch amainai,
1TI 3:4 nuigtushkam jeenish shiig chichas pujú, uchijí aidaushkam chichama umin nuigtú pujutish pegkeg amain ainawai,
1TI 3:5 wagki niina jeenigkish shiig chichasá pujutan dekachush, ¿utugsaya Apajuinu iglesia aina nunash kuitamainaita?
1TI 3:6 Nunin asamtai, nui takastinuk yamá sujumankauk amaitsui, ememakmá Iwanch suwimak jutanum jegantua niish nunikai tabaunum.
1TI 3:7 Dui atsumnawai Apajuí nemagchau aidaush pegkegnum chichagtai atí tusa, nuniachkug wainka chichagtai nuigtush Iwanch pegkegchaunum takamtiksai tabaunum.
1TI 3:8 Nunisag diácono aidaushkam ajantusa diitai amain ainawai, waitjus chichachu, nampeta wekaetuchu, takat pegkegchau aina nujai kuichkijinatatus wakegá wekaechau;
1TI 3:9 nuigtushkam dekaskenum dekaskeapi tabau dekanauwa nunash pegkeg anentaiyai dekamain ainawai.
1TI 3:10 Nunú aidauk dekatkauk dekapsamu amain ainawai, dutika makichkish nuninai tumainjish atsujuina nu diácono adaikam takamain ainawai.
1TI 3:11 Nunisag diácono nuwe aidaushkam eme anentai amainai, chichaman tsanumá wekaechau, ebetmamjau, nuigtú ashí wají aidaunmash kajittsá diitai amainai.
1TI 3:12 Diácono aidauk makichik nuwentin amainai, uchijí aidaujaishkam shiig chichas pujú nuigtú niina jeenishkam.
1TI 3:13 Wagki diácono shiig takaina duka, eme anentsá diitai, nuigtú Cristo Jesusai dekaskeapi tabaun etseja dusha kajittsá antugtai amainai.
1TI 3:14 Junak wamak taan wainkatasan wakegayatkun agatjame,
1TI 3:15 wi dukap megkaekuish, Apajuí tuke pujuwa nuna aentsji iglesia aina nuanuish wajuk pujumainaita nu dekata tajame. Dita ainawai dekaskea nuna etsejuinak ayamjin aina duka.
1TI 3:16 Juka utujimsaish anentaimtumaitsui, shiig muun wait anenkagtamu dekaachbau aajakua duka: Nigka aentsmaga wantinkauwai, Wakaní Pegkejishkam pegkegchauji atsujui tiuwai, ángel aidaushkam wainkamu, judiochu aidaunmash etsegkamu, nugkanmaya aidaush dekaskeapi tibau, nayaimpinum jukimu aajakui.
1TI 4:1 Tujash Wakaní Pegkeji paan tawai, tsawan nagkanbau atina duik ujumak aents aidauk dekaskeapi tabaunak idaisagtinai, wakan tsanujatin aina nuna nuigtú Iwanchdau jintiamu aidaun antujuinak,
1TI 4:2 duka tsanumin, wait aidau, datsaamsash anentaimchau aina nu jintiamu atinai,
1TI 4:3 nuninak nuwentash nuwenawaigpa tiagtinai, nuigtush yutai aidaun Apajuí najankauwa nunash, Apajuí nemajin dekaskea nuna dekau aidauk see tusa yumaina nuna.
1TI 4:4 Wagki ashí Apajuí najankamua duka pegkejai, makichkish dakitmaitsui see tusa yuinakuik,
1TI 4:5 wagki Apajuí chichame nuigtú Apajuí aujbauwa nu pegkemtikawai.
1TI 4:6 Ju yatsug aidau jintinkumek, Cristo Jesusa inake pegkeg atatme, chicham aina nuiya dekaskeapi tabaush shiig dekau nuigtú pegkeg jintiamu unuimajuitam nunismek atatme.
1TI 4:7 Wainka augmattsamu aidau nuigtú jumamtin augmattsamu aina dusha dakitjata, nuniakum Apajuí puyatjusa umigtanum kakanmamjata,
1TI 4:8 wagki iyash pegkeg atí tusa takamtikamua duka machik yaijatui, untsu Apajuí puyatjusa umigku takaamua nuuwai ashí wajiinum yaijata duka, wagki anagkagtuamua duka yamai pujag juigkechui atak atina imanuiyai.
1TI 4:9 Juka chichamak shiig dekaske, nunin asamtai ashí dekaskeapi tumain ainawai.
1TI 4:10 Nuadui takainaji nuigtush wainak chichagtamainakuish kakanmamainaji, Apajuí iwaaku ashí aents dekaskeapi tuidaun uwemtikna nu dakaidau asaja.
1TI 4:11 Jujú aidau umiktajum tita dutikakum jintintuata.
1TI 4:12 Datsauch asam makichkish imanchauch diyam aipa, nunitsuk Apajuí nemajin aidau iwaintukta ame chichaamujum, ame wajuk pujame nu, ame anejatbaujum, dekaskeapi tabaugmesh, nuigtush tudau antiakchau pujakum.
1TI 4:13 Wi eke taatsaig, uyumakta Apajuí chichame augbau, pegkegnum wakemitkagtuta nu nuigtú jintinkagtamu.
1TI 4:14 Ame don jukiuwaitam nu takamtiksata, juna takastatui tutai anciano aidau buukmin achigmakag Apajuin aujtugmasajua nunú.
1TI 4:15 Jujú wají aina nu uyumakta, nunú aina duka dutiksamek takastá, ame pegkeg takaam duka ashí wainkamu atí.
1TI 4:16 Amek kuitamamkata nuigtú jintiamua dushakam, duka dutiksamek dutikata, nu aaja dutikakum ameshkam uwemjattame nuigtú amina antugtamaina dushakam.
1TI 5:1 Muun aidau chichagkumesh jiyakaipa, dutiktsuk apa anentsam wakegat egketuata, dutiksamek datsauch aidaush, yatsum utugmaina dutikata;
1TI 5:2 nuwa muunchakam duku utugmainaitam dutikata, tuja muntsujut aidaush, ame umaim anentsam diistá pegkegchau anentaimtutsuk.
1TI 5:3 Nuwa waje aidau dekaskenum ditá yaimainush atsujuina nu yaigtá.
1TI 5:4 Tujash nuwa waje uchijí ajuinamuk, nuniachkush tijajigkesh ajuinamuk, nunú uchi ditanak ashí atsumamujinash yaimainai, uchuch asamtai ditan kuitamkamu asa. Nunuwai Apajuí emtinish pegkeja duka, nigka nuna dutikatnume tusa wakegawai.
1TI 5:5 Tujash nuwa dekaskenum waje nigki juwakua duka, Apajuinak dakawai nuniak mijattsuk tsawai kashishkam Apajuin aujak pujawai.
1TI 5:6 Tujash nuwa waje iyashí wakegamun takaa puja duka, iwaaku pujakush jakauwa numamtinai.
1TI 5:7 Jujú wají aina nu umiktajum tita, makichkish nuninai tumainchau atinme,
1TI 5:8 wagki makichik aentskesh niina patayin yayatsu duka, niina jeenianakesh dutikachuk, dekaskeapi tabaunak megkaewai, nuniau asa Apajuí nemagchauwa nuna nagkaesau pegkegchau weawai.
1TI 5:9 Nuwa waje agatbaunmag ayatak sesenta mijan ajamua nu agatjamu amainai, tujash makichik aishintin aajakajua nu,
1TI 5:10 pegkeg takaamuji aidaush waitujakbau, uchijí aidaunash shiig tsakapaku aajakú, jeen minidaunash shiig anentus ju wajakú, Apajuí aentsji pegkejam aina nunash nawen nijatú wajakú, waituidaunash yaijakú nuigtush ashí pegkeg aidaunak takajakua nu.
1TI 5:11 Tujash nuwa waje aidau agatbaunmag tsakat wajemeau aina duka agatjaipa, wagki ni wakegamujiya nunú Cristuig datupawai, dutikam nemaktatus wakegainawai,
1TI 5:12 nuniak bakumamainai, ni nagkamak dekaskeapi tibauwa nuna megkaegu asa.
1TI 5:13 Nuigtushkam jegá nagkaematú yujainak dakí unuimainawai, imá dakinak unuimainatsui, chichaman yujajuinak, wainak pachiinak chichamainchaun chichá yujainawai.
1TI 5:14 Nuadui wakegajai, nuwa tsakat wajemeau aidaunak, nemaktinme nunikag uchijinawag jeenian uyumaktinme, nunidau asag shiwaja nu kakajus pegkegchaunum chichajam amainchau atinme tusan.
1TI 5:15 Wagki ujumak nuwa waje aidauk kanakaje, nunikag yamaik Satanasan umijuinawai.
1TI 5:16 Makichik nuwa Apajuí nemagna nuna patayí waje aidau agtaik, ni yaimainai, iglesiaya nu kuashat takat ají tabaunum, dutikam iglesiak dekaskenum waje, makichkish yaimainji shiig atsujuina nuna yaimainai.
1TI 5:17 Anciano aidau shiig takaina duka eme anentsá diyaku shiig akikbau amainai, imá senchi chichaman etsejuinak nuigtú jintinkagtuina nu,
1TI 5:18 wagki agagbaunum chichaak: “Toro trigon dajag pakak wekaga nuna nujig jigkatuawaipa” tawai, nuigtú: “Aents takaa duka, akiam auwai” tau asamtai.
1TI 5:19 Anciano pachis, jimag aentskesh nuniachkush kampatumkesh, pegkegchau takaamujin etsegtuinachkuig antugkaigpa.
1TI 5:20 Tuja tudau idaitsuk takaa puja duka, ashí tikich aidaush antuinamunum jiyaktá, nuna wainkag tikich aidaush ishamkatnume.
1TI 5:21 Juna wi; Apajuí, Cristo Jesús nuigtú ángel etejamu aina nuna emtin tajam ju dutiksamek umiktá, makichkia nu takum tikichia duka pachitsuk idaiyin aipa, nuigtush wait anentamugmekesh idaitsuk ashí dutikata.
1TI 5:22 Makichik aentskesh shiig anentaimtsuk waugtukam uwegmin achikam Apajuí aujtusaipa, tikichi tudauji pachintukaim. Tupanjata ashí pegkegchau aidauk.
1TI 5:23 Amek wakemin beseakum waa wamak jaum nunin asam, yumik umutsuk machik vino uwagta.
1TI 5:24 Ujumak aents aidau tudau takaamuji paan wainmainush awai eke chicham dekagmainnum jegachiatak, nuniai awai tikich pegkegchau takaamuji kakajus dekagmainchaush, tujash nunak pegkegchauji wantintai dekajuinawai.
1TI 5:25 Nunisag pegkeg takaamua nu paan wantinush awai, tuja pegkegchauwa dushakam nunisag uumkag amaitsui.
1TI 6:1 Ashí achikbau inam batsataidauk, niina apujin ashí eme anentus diimain ainawai, Apajuí daajin nuigtú jutii jintinkagtamua nuna pegkegchau chichagkainum tabaunum.
1TI 6:2 Tuja apuji aidau Apajuí nemajin agtaik, dekaskeapi tabaunum yachi wajasú asamtai ajantus diitnak idaimainchau ainawai. Nunitsuk, dekas shiig takagmain ainawai, wagki ni pegkeg takaamujin juina duka Apajuí nemajin nuigtú yatsut aneetai aina nu ainawai. Ju jintinkagtakum nuigtush etsegkata.
1TI 6:3 Tuja makichik aentskesh, tikich wají pachis jintinkagtak, iina Apuji Jesucristo pegkeg jintiamua nujai betek jintiitsuk, nuigtush wait anenkagtamu jintiamua nujaish betek tachakug,
1TI 6:4 nunú aents nunin aidauk dekachiatak wainak ememainak tu yujainawai. Duka dita anentaimsa chichamujin pachisag jiyanitkatatus wakeyin ainawai. Nu jiyanitbaunmag kajegdayamu, shiwagmagamu, pegkegchau chichagdayamu, kajintsá anentaimtuniashbau,
1TI 6:5 nuigtushkam inagnamainchaun jiyanitú yujainawai, aents pegkegchaunak anentaimtin dekaskea nuna dekachu asag, Apajuí pachisa chichamunum wiyakchameautia nuninun anentaimainawai. Aents nunin aidauk tupanjata.
1TI 6:6 Tujash shiig muun juamua duka Apajui puyatjusa umigku iinu ajutkagta nujai shiig aneasa pujamua nuuwai.
1TI 6:7 Wagki ju nugka juig makichkish takakuk taachuitji, nunisaik makichkish jukik wechatnaitji.
1TI 6:8 Nuadui, ayamjumamain nuigtú ejamamainush ajutjamkuig, nujaig shiig aneasa pujumainaitji.
1TI 6:9 Wagki wiyakchameatatus wakejuina duka wamak pegkegchau takatnum iyainawai, nuninak kuashat wakegainak waituinawai, nunú imanchau aidau pegkegchau ekagtuina nuna imatika uyumaidau asag, waittanum nuigtú megkaeta nuwi weenawai;
1TI 6:10 wagki ashí pegkegchau aidau nagkamnamua duka kuichik imá senchi wakegamua nuuwai, nuadui ujumak aidau imanik wakegainak, dekaskeapi tabaun idaisaje; nunikag shiig senchi waituinawai.
1TI 6:11 Tujash amek, Apajuí aentsji asam, ashí jujú wají aina duka takasaipa, nuniakum pegkeja duke takastá, Apajuí puyatjusa umigta nu, dekaskeapi tabau, anentak, waitiakmesh katsunjá pujakum imagnisa pujustá.
1TI 6:12 Ame dekaskeapi tame nujai senchi kakaajam maanikta, pujut nagkanchau jukiuwaitam nunismek pujusam; aminak Apajuik aatus nunikti tusa etegtamauwai, nuadui ame dekaskeapi tabaugmia duka shiig etsegtumakuitme kuashat antuinamunum.
1TI 6:13 Apajuí ashí wají aidaun pujutan suuwa nu nuigtú Jesucristo Poncio Pilato emtinish niinun pegkejan etsegtumakua nuna emtin tajame,
1TI 6:14 wi tajam ju umiktá, pegkegchauji atsugbau imagnisa pujusam iina Apuji Jesucristo minitta nu dakakum,
1TI 6:15 Apajuí ni tsawan dakamuji uminkamtai ataktú Jesucristun ju nugka jui awematnai. Tuja imá nigkiyai Rey ashí rey aina nuna nagkaesau nuigtushkam nigkiyai Apu ashí apu aidaunash nagkaesauwa nu, imá nigkiyai eme anentsá ememattaiya duka.
1TI 6:16 Nigkiyai jachauwa dushakam, tsaaptin adigmainchaunum pujuwa nu, makichkish wainchatai nuigtush wainmainchauwa nu, niina senchijish, ni inabaujish tuke atina nu ememattai atí. Aatus atí.
1TI 6:17 Wiyakuch ju nugkanmaya aina dushakam ememachu atajum tita, ni wajiiji aina nuiyanak dakasaigka, wagki nu wiyakchameuta duka dekaskechui, Apajuí ashí wají aidaun shiig aneas pujustinme tusa kuashat sukagtina nui kajinas anentaimsatnume.
1TI 6:18 Pegkeg aina duke takastajum tita, pegkeg aidau takatnum wiyakuch atinme, tsagka, nuninak ditanu ajuina nujai yaimkagtatus waketinme,
1TI 6:19 aatus nuninak, dita atak jukitnujiya nuna kuashat ikaugkagtatui, nuigtush pujut nagkanchauwa nunash jukiagtinai.
1TI 6:20 Timoteoh, takastá tibauwaitam nu shiig kuitamkam takastá. Nuniakum nugkanmaya wají aidaun wainak augmatuina nu, nuigtú tsanumainak dekaskea nu dekainaji tuina dushakam antugkaipa,
1TI 6:21 wagki nuna antujuinak, ujumak aents dekaskeapi tabaun idaisaje. Apajuí ashí atumnash wait anenjamjatnume.
2TI 1:1 Witjai Pablo Apajuí wakegau asa Jesucristo apostolji etiuwai, Cristo Jesusai pujut anagkagtuamu juwamua nuna etsegkati tusa awetiuwai.
2TI 1:2 Timoteoh, mina uchig anetaiju kumpamjame; Apajuí iina Apajiya nunú, Cristo Jesús iina Apuji anentag, wait anenjamag nuigtú agkan pujutan amastí.
2TI 1:3 Apajuin see tajai, mina muuntug takajujakajua nunisnuk wishakam pegkeg anentaiyai takajag nuna, nuniau asan tuke pachiajame Apajuin kashi tsawai aujkunchakam,
2TI 1:4 nuniakun ii kanaamunum ame buutú wajakbau aina nuna tuke aneaku asan, amina wainkan shiig aneastasan wakegajai,
2TI 1:5 wagki dekaskenum dekaskeapi tabau ajutjama nuna aneaku asan. Nunak dekatkauk amina dukuchjum Loida, amina duku Eunicejai ajujakajui, aminash dukeap ajutjamua tajai.
2TI 1:6 Apajuí don amasbau ajutjama nu paan iwainakta tajame, wi amina buukmin achikan Apajuí segai jukiuwaitam nunú.
2TI 1:7 Wagki Apajuik wakan sapija nunak sujamsachui; wakan senchigtina nuna, aneenitan, iik kuitamamkatnun sujamsauwai.
2TI 1:8 Nuadui, iina Apuji Jesús pachisam nuigtú wi achinkan pujag nu pachisa chichatash datsaamipa. Duka nunitsuk, yamajam chicham etsegbaunum waitiakmesh Apajuí senchin sujama nujai katsunjata,
2TI 1:9 ni uwemtijamag nuigtú mina aentsug pegkejam atinme tusa etegtamjauwa dui. Nunak ii pegkeg takasbaunmakesh dutijamachui, ayatak ni yaunchuk anentag dutikatnujin anentaimtusua nuna Cristo Jesusai sujamsauwai,
2TI 1:10 tujash yamaik iina Uwemtijamin Cristo Jesús tauwa dui iwaintugmake, jata nuna senchijin depetuk yamajam chichama nujai pujutan tsaaptinun susa jachau awajsauwai.
2TI 1:11 Nuadui minak nuna chichaman etsejin atí tusa, apóstol, nuigtú maestro etiuwai.
2TI 1:12 Duwi wika ashí ju aidaunak waitiajai, tujash datsamatsjai; wagki, wi yana dekaskeapi tiuwaitja nuna dekau asan, nuigtush nigkiap senchigtina ibau asa, atak tsawan atina dui midau atinnash kuitamjutua tau asan.
2TI 1:13 Chicham dekaseg aidau minaiya antukuitam duke kuitamkata, dekaskeapi tabau nuigtú Cristo Jesusjai ijutkau asá anentak ajutjama nujai.
2TI 1:14 Wakaní Pegkeji iiní pujugtama nuna senchijin, kuitamkata pegkeja nuna jintinkagtuati tibauwaitam nu.
2TI 1:15 Amek dekame, ashí Asia nugkanmaya aidau mina ukugkiaja duka; nunú aina nuiyag Figelo, Hermógenes aina nuuwai.
2TI 1:16 Apu Jesús wait anenjati Onesíforon patayí aina nunak, wagki ni kuashta imania ichichtugmayi wi achinkan cadenayai jigkatjagmaitai egketaish datsamtsuk,
2TI 1:17 nuniau asa Roma taamuik, shiig senchi egá egatkawa waitkabi.
2TI 1:18 Apu Apajuí yaigtí Apu Jesusa tsawanji atina duish wait anenjamu atí tusa. Amek shiig dekame, ii Éfeso pujajin wajupa yaimpakchabi duka.
2TI 2:1 Mina uchiju Timoteoh, amek senchi wajastá, Cristo Jesús anentag uwemtijamu asam.
2TI 2:2 Kuashat antuinamunum wi tabau antukuitam nunú, tikich Apajuí nemagkau aidau kajittsá diyamua nu jintintuata, dutikam ditash tikich aidau jintinmainnash unuimagtinme.
2TI 2:3 Amek senchi waittsata, Cristo Jesusa suntaji asam shiig umigbaunum.
2TI 2:4 Suntagmagak puja duka, suntagchau pujuina nu pujutnak anentaimtuchu ainawai, apuji shiig awajkata tabaunum.
2TI 2:5 Nunisag wasugkamin aidaushkam, dutik wasugkamata tibauwa dutiksag wasugkamchakug wají pegkegnak jumaitsui.
2TI 2:6 Ajanum takaa duka, ni ajakma nuiya jukita takug, dekatkauk senchi takamainai.
2TI 2:7 Juna taja nu anentaimtusta, Apu Jesús ashí dekatan amastí.
2TI 2:8 Adeagta, Jesucristo David weantu aajakua nu, jakau aina nuiya nantakiuwa nuna pachisan yamajam chichaman etsegnuweg nunú,
2TI 2:9 nu etsegbaunum achigkagmatai pujusan senchi waitiajai, magkagtin utugmaina dutijuawag cadenayai jigkatjagmatai, tujash Apajuí chichamega duka jigkagchamui.
2TI 2:10 Nuadui ashí katsuntajai Apajuí etejamu aina nu aneamunum, ditashkam uwemat nagkanchau Cristo Jesusa imanjin awa nuna jukitnume tusan.
2TI 2:11 Juka chichamak shiig dekaske: “Niijai jakau akuik, nunisaik niijaig pujutnaitji.
2TI 2:12 Waittsau ainakuik, niijai inamjatnaitji. Ni dakitjau akuik, dutiksaik dakitam atinaitji.
2TI 2:13 Betek umichu ainajinish, nigka betek uminai, wagki ni tibaujinak betek umina dui”.
2TI 2:14 Jujú aidau anemtikjata dutikakum chichagkata Apajuí eemtin, wainak chicham aina duka jiyanitú yujaigpajum tusam, duka makichkish yaijattsui, nuna nunina duka antuina nuna pegkegchau emainak tu yujainawai.
2TI 2:15 Shiig kuitamka takastasam kakanmamsata, Apajuí eemtinish pegkejan takau wantinkatasam, takatan takasú datsamainji atsuja numamtuk, chicham dekaskea nu shiig jintinkagtakum.
2TI 2:16 Tupanjata nugkanmaya aidau wainka chichamjú wekaetai aina duka, wagki nuna tu wekaeguk aan nagkaemas pegkegchaunum wemain asamtai.
2TI 2:17 Tuja dita jintinkagtamua duka kuchap ayatak wegkag wegama numamtuk wajawai, nunak Himeneo, Filetojai dutikainawai,
2TI 2:18 dekaskea nuna tupanjag yujasag chichainak, jakau nantagtina duka nagkaemakne tuinak, ujumak aents aidaun dekaskeapi tabaujin pachimjukaje.
2TI 2:19 Tujash Apajuí nagkamku tibauwa duka yapajinmaitsui nunisagke, duka agagbaunmag: “Apu Apajuik wainui niinu aina nunak”. Nuigtushkam: “Ashí aents apu Jesusan umijuidauk, pegkegchau aina nunak tupanjatnume”, tawai.
2TI 2:20 Makichik jega muunta nuig takatai aidauk oro, jiju plata aina nujai najankamukek atsame, numí najanamush, duwé najanamushkam auwai; nuniai ujumak iman dutikatasa takatai ainai, tikich aina duka imanchaunum takatai ainawai.
2TI 2:21 Nuadui, makichik aentskesh Jesucristo atsumtai atatus wakegakug ju wají aina nuna shiig idaiyas pujumainai, takatai aidau pegkeg aina ibau wajasá, nunitai Jesuschakam oro najanamun apu takauwa numamtuk niinashkam takat pegkegnum apusatnai.
2TI 2:22 Datsa asá iyashnumia senchi waketai aina duka ukuktá, nuniakum pegkeja duke takastá, dekaskeapi tabauwa nu, anentak, nuigtú agkan pujuta nu, ashí anentai pegkeg aidau Apu Jesusan umijuina nujai.
2TI 2:23 Chicham imanchau nuigtú wainak aina duka pampantú wekayipa. Amek dekame nunú tudaibau aidauk jiyanitnum ejekagtina nu.
2TI 2:24 Wagki Apu Jesusa inakeg jiyaní wekaenuk amaitsui, nunitsuk ashí shiig awajkagtin, jintinkagtuatatus wakeyin, nuigtú emamkemas dekau amainai,
2TI 2:25 kakagchau anentaiyai antakchau aina nunash esemainai, Apajuiyai atak wakitki dekaskea nunash dekachaintash,
2TI 2:26 nuninak shiig dekawag Iwanch achiká tsanuam ni wakegamujin umijuinak batsata nunash agkanmagachajaintash tau asa.
2TI 3:1 Nuigtushkam jusha dekamainaitme: Tsawan nagkanbau agtina nuig, tsawan ishamain aidau midiagtinai.
2TI 3:2 Wagki aents aidauk imá nigki anenmamin, imá niinunak anentaimtin, eme anentaimtumin, emebau, pegkegchau chichagkagtin, apajin dukujinash intimjin, see tuchau, Apajuinash anentaimtuchu,
2TI 3:3 anejattsa diijatbaush atsujin, wait anenkagtuchu, kajemtin, chichaman tsanumin, ebetmamjachu, yajau, ashí pegkeg aidaun shiwagbau,
2TI 3:4 unumkagtin, esekachu, antakchau, Apajuinun nagkaesau niina shiig awagma nunak wekaetiagtin ainawai.
2TI 3:5 Apajuin shiig puyatjus umigna iman iwainmabiagtinai, tujash dita wajuk pujuinawa nu iwainatnai dekaskechua nuna. Aents nunin aina duka tupanjata.
2TI 3:6 Wagki nunú aina nuiyayai jega aidaunum wayawag, wainak nuwauch aidau tudaunak takainak iyashí ashí pegkegchaun wakega nuna takamtikin aidaun tsanú yujajin aina nu.
2TI 3:7 Nunú nuwa aidauk tuke unuimasagké ainawai, nuninakush dekaskea nunak tuke dekamainchau ainawai.
2TI 3:8 Janes Jambresjai Moisesan utugchatan aputusajua nunisag, nunú aents aidaush dekaskea nu etsegbaunum utugchatan apujuinawai. Ditak anentaimtajinig besekú, dekaskeapi tabaujinish tuke megkaegak megkaejau ainawai.
2TI 3:9 Tujash nunak nuigtuk emachagtinai, wagki ashí aents aidauk dita anentainkachu yujas nuní yujainamunak dekajuamu asag, nu jimag wajukawajua nunisag.
2TI 3:10 Tujash amek mina jintinkagtutaijua nu, mina pujutjua nu, wi takastasan anentaimtutaijua nu, dekaskeapi tutaijua dusha, wi waugtuchuitag nu, mina anenkag, utugchat katsuntanmash senchitag nu imatiksamek unuimajuitme,
2TI 3:11 mina waitkajuinamush, nuigtú wi waitiamujush. Nuigtush dekauwaitme wi Antioquía, Iconio, Listra aina nui waittsauwaitag dushakam; waitkajuinakui wajuk waitin ayaja nu, tujash ashí nunú aidaunmag Apu Jesús agkanmitkajuauwai.
2TI 3:12 Nunisag, ashí aents imá Cristo Jesusnak umijuinak pujustatus wakejuidaushkam, waitkam agtinai,
2TI 3:13 tujash aents pegkegchau aidau, nuigtú tsanumin aina dushakam nuní nagkaemas pegkegchaun takaagtinai, nuninak tsanubiagtinai ditash tsanuinamu asag.
2TI 3:14 Tujash amek, ashí unuimajuitam duke takastá, dekas nuninapi tiuwaitam nu. Amek dekame yanauwa unuimajuitme.
2TI 3:15 Amek uchuch asamek Agagbau Pegkegma duka dekauwaitme, nunú aina nuuwai Cristo Jesús dekaskeapi tabaunum uwemna nuna dekamtijamaina nunú.
2TI 3:16 Ashí Agagbauwa duka Apajuí tibauwa nuuwai, nunin asa atsumtaiyai jintinkagtamunum, anentai yapagkagtuata tabaunum, esekagtuata tabaunmash, pegkeg takat aina nui jintinkagtuata tabaunum,
2TI 3:17 Apajuí aentsji imagnis pujú ashí takat pegkeg aina nu takatnash shiig dekau atí tabaunum.
2TI 4:1 Apajuí nuigtú Cristo Jesús inamjatatus jui taa, iwaaku aidaun, jakau aidaunash dita takasbaujin diijus titina nuna eemtin puyatjusan tajame,
2TI 4:2 chicham etsegkata tusan; nuniakum ashí tsawantai titá anentai yapajiatnume, jiyaktá, pegkegnumash wakemitkakta dutikakum emamkesam jintintuata.
2TI 4:3 Wagki tsawan jegatnai, chicham dekaskea nu jintiamu antutan dakitjagtina nu, nuninak egakagtinai kuashat maestro aidaun, dita pegkegchau wakegaina nuninun jintinkagtaun igkugkagtatus.
2TI 4:4 Nuniau asag dekaskea nu antutnak idaisagtinai, nuninak wainka augmatbau aina nuna antujiagtinai.
2TI 4:5 Tujash amek, shiig ebetmamjam waitiakmesh katsunjata, nuniakum yamajam chicham etsegbauwa duke uyumakta, aajam takatjum umiktá.
2TI 4:6 Wagki wi maam atatag duka namput wajaschae, nuigtú tsawan wi wetina dushakam tikijuch wajasé.
2TI 4:7 Wika shiig senchi maanikjai, mina takatjunash ashimkajai, dekaskeapi tabaunash kuitamkajai.
2TI 4:8 Nuigtushkam wi pegkeg takasbaunum corona jukitnuk kuitamkam ajutui, nunak Apu Jesús juez dekas pegkejan takauwa nu tsawan atina nui sujustinai; tujash imá minakek sujuschatnai, ashí ni minitnun aneas dakasu aina nunash susatnai.
2TI 4:9 Waamak taam waitkata,
2TI 4:10 Demasak ju nugkaya wajiin imá senchi wakegau asa Tesalónica weak ukugkine; untsu Crescente Galacia wemae, nuniai Tito Dalmacia wemae.
2TI 4:11 Imá Lucasak wijaig pujawai. Minakum Marcos ayaktá, takatnum yainkati tusan atsumajai.
2TI 4:12 Tiquiconak Éfeso awemamjai.
2TI 4:13 Ame minakum capa takugtukta, Carpo jeen Troas ukukmayag nu, aiksamek papí aidaush, imá senchi pergamino aina nu.
2TI 4:14 Alejandro jijú takauwe nu minak kuashat tsanumjutjae; tujash Apu Jesús ni wajuk takasé dutiksag akiktí.
2TI 4:15 Ameshkam aujaig kuitamamkata, wagki jutii chichagkagtamunak shiig senchi dakitmayi.
2TI 4:16 Nagkamchaku wi ayamjumkatasa chichaamunmag makichkish yainkachagmayi, ashí ukugkiagmayi; dita nunikaja nunak Apajuish pachitsuk idaisati tajai.
2TI 4:17 Tujash Apu Jesús wijai au asa senchin sujusmayi, chicham etsegbauwa duka minai uminkati nunitai ashí judiochu aidaush antuktinme tau asa. Aatus agkanmitkajuabi león yuwata takui ayamjumaina numamtuk.
2TI 4:18 Dutiksag Apu Jesús agkanmitkajuattawai ashí takat pegkegchau aina duish, nunik niina inamtaiji nayaimpinum jujukí kuitamjuktatui. Nigki tuke ememattai atin atí. Aatus atí.
2TI 4:19 Priscila, Aquila nuigtú Onesíforo ni patayí aidaujai kumpamjutuata.
2TI 4:20 Erastok Corinto juwakmae, untsu Trófimo jau asamtai Mileto ukukmajai.
2TI 4:21 Yumi tepeatsaig minisam dekapsata. Eubulo, Pudente, Lino, Claudia, nuigtú ashí yatsut aidaushkam kumpamjamainawai.
2TI 4:22 Apu Jesús amina wakanmijaish atí, ni wait anenkagtamujiya dusha ashí atuminish ajutjamti.
TIT 1:1 Witjai Pabloitjai, Apajuí inakegaitjai nuigtush Jesucristo apostoljiyaitjai. Minak Apajuí etegjamu aidau dekaskeapi tuina nuna, Apajuí puyatjus umijin aidaush wajuk pujumaina ainawa nuna pachis chicham dekaskea nuna jintintuati tusa ni awetiuwai.
TIT 1:2 Jutii dakamua duka pujut nagkanchauwa nuuwai, nunak Apajuí, waitjuchua nu, nugkanash najantsuk anagtamauwai,
TIT 1:3 nuna yamai ni dutikatnuji tsawan jegau asamtai, ni chichamen iwainake, Apajuí iina Uwemtijamna nu mina etsegtugkata tusa idaitugsauwa nuna.
TIT 1:4 Titoh, amek wijai betek Apajuí dekaskeapi tau asam tuke mina uchijuitme: Apajuí iina Apajiya nu nuigtú Cristo Jesús jutii uwemtijamna nujai anentag wait anenjamag shiig agkan pujutan amastí.
TIT 1:5 Wika aminak utugchat iwagmain juwaka ju iwajata, nunikam makí makichik yaakat aina nui iglesia diistin aidau, anciano adaijata wi tibaijam dutiksamek tusan Creta ukukbaijame.
TIT 1:6 Ancianok, makichkish nuna nunikchama tusaish augmatchatai amainai, makichik nuwentin, uchijí aidaush Apajuí nemajin, intimkichu nuigtú pegkegchau takau agmae tusaish augmatchatai.
TIT 1:7 Wagki obispok, Apajuinun kuitamin asa, makichkish nuninai tuchatai amainai; ememachu, kajemtin wajaknuchu, nampetnash nampechu, wainak shinú wekaechau, kuichkinak anentaimtú wekaechau amainai.
TIT 1:8 Nunitsuk, jeenish shiig jukagtin, pegkeg takatnak anentaimtin, ebetmamjau, pegkejan takau, pegkejam, shiig kuitamamak pujú,
TIT 1:9 chicham dekaskea nu wajuk jintintuamuita nunak shiig dekau amainai, nunin asa chichaman dekaskechua nunin chichajuidaunash shiig jintintua dekaskeapi tumamtikmainai.
TIT 1:10 Judío aina nuiyag kuashat antumtikmainchau ainawai, nunin asag wait chichaman chichainak aentsun tsanuinawai.
TIT 1:11 Nunú aents aina duka itatmitkaktajum, jintimainchau ainayatak kuichik jukitag tabaunum makichik jeganum ashí batsata nunak, tumainchaun jintintuinak pachimjú yujaidau asamtai.
TIT 1:12 Cretanmaya aina nuiya makichik profeta chichaak: “Cretanmaya aidauk tuke wait, kuntinjai betek, yuu batsamin, daki aidau” tiuwai.
TIT 1:13 Nunú tibauwa duka dekaske; nuadui najam jiyajatkata, dekaskeapi tabauji pegkeja nuna kuitamkatnume,
TIT 1:14 nunidau asag antugkashtinme judío aidau augmattaijin, aents tibau aidau dekaskea nuwi datumkagtina nunashkam.
TIT 1:15 Aents pegkeja duka, ashí anentaibaujinish pegkejai; untsu aents besekú aina duka, makichkish pegkejak atsugnai, wagki anentaimtajinig nuigtú dekatjinish besejú asag.
TIT 1:16 Apajuinun dekauwa iman chichagmamainawai, tujash dita takaamujin wainak tuina duka wainnawai; ditak dakittsá diimain, yajau, makichkish pegkegnak takamainchau ainawai.
TIT 2:1 Tujash amek chicham dekas jintinkagtuamua dutiksamek chichagkagtukta.
TIT 2:2 Anciano aidauk ebetmamjau, shiig anentaimkau; dekaskenum dekaskeapi tinu, anejatin, waugtuchu amainai.
TIT 2:3 Nunisag anciana aidaushkam, pegkejam aidau wajuk pujuinawa nunisag pujustinme, tsanumkagtuchu, umutai nampemain aidaun tunamatjauchu, pegkeja jintinkagtin agtinme,
TIT 2:4 nuninak jintintuatnume nuwa muntsujut aidaun aishi aneetan, uchijí aidau aneetnash,
TIT 2:5 shiig anentaimkau atanum, ayatak pegkejak atanmash, jega kuitamka pujutnumshakam, aishijaish pegkeg nuigtú aishinig sumitkau atan, Apajuí chichamega nu pegkegchaunum chichajam ai tabaunum.
TIT 2:6 Aikasmek datsauch aidaush pegkegnum wakemitkakta shiig anentaimkau atinme,
TIT 2:7 nuniakum ameshkam iwainmamkata ashí takat pegkeg aina nu takatnum, jintiamu ayatak pegkeg ajantusa diimaina nu,
TIT 2:8 chicham dekaskea nu, dakitmainchau; aaja nuniamin shiwagshakam datsaagti, nuninak jutiinash makichkish pegkegchau tujamainchau atinme.
TIT 2:9 Achikbau aidaushkam jintintuata ditá apujinak ashí umigkatnume, nuninak shiig awajkatnume, wainak ai aimtau ainum,
TIT 2:10 nuigtush kasagkainmegka, nunitsuk ashí kajittsá diyam amainun iwainmamkatnume, Apajuí iina Uwemtijamna nudau jintiamua nunash ashí eme anentus diistinme.
TIT 2:11 Apajuí ni jutii wait anenkagtamujinak iwaintugmakui. Nunú ashí aents aina nunak uwemtikatatus wakejawai.
TIT 2:12 Nunú, jintinjamji pegkegchau aina nu, nugkanmaya wakegamu aina dushakam idaisá, yamai tsawanta juik shiig anentaimsa, pegkegnum pujuinaku nuigtú wait anenkagtaku pujumaina nuna,
TIT 2:13 jutii shiig aneastinji Apajuinu nuigtú Jesucristo jutii Uwemtijamna nuna imanji wantinkatna nu dakainaku.
TIT 2:14 Nigka nigki jutiiní mantamnata tus tsagkamankauwai, ashí pegkegchau aina nuanui agkanmitkagmatatus; dutika pegkemtijami niina aentsji etamak ashí pegkeg aina nunak takamtijamsatatau asa.
TIT 2:15 Jujuwai jintinkagtumainaitam duka, wakemitkagkagtakum, ajantsuk najam chichagkagtukta. Makichkikesh imanchau diigmaisainum.
TIT 3:1 Aneemtikjata apu inamin aina nui nuigtú nunú apu adaijamu aina nuishkam sumimkatnume, nunik umijuinak ashí pegkeg aina nunak takastatus wakeyin atinme.
TIT 3:2 Makichik aentsnakesh pegkegchau chichagkashtinme, wainak shinú wekaechau atinme, nunitsuk shiig awajkagtin ashí aents aidaunash kakagchaujin iwaintuktinme.
TIT 3:3 Wagki jutiishkam yaunchkek anentainkachu, intimkiu, megkaejá batsamsá, iyash pegkegchau wakega nu inaku waitkatai, nuigtú ashí pegkegchau aina nuna shiig anentin aajakuitji. Pegkegchaunum batsamsá, tikichdau pegkeg diigsá kajejuinaku, kajegtamaidaush pempeentunike kajejujakuitji.
TIT 3:4 Tujash Apajuí iina Uwemtijamna nu iwaintugmakui niinu pegkeja nuna nuigtú ashí aents aneamua nunashkam,
TIT 3:5 dutika jutii pegkeg takasbaush atsugtamaig wait anenjamu asa Jesucristo numpega nujai nijapak uwemtijamjauwai; dutijama yamajam etamak Wakaní Pegkeji pujugtamu asamtai yamajam pujutan sujamsauwai,
TIT 3:6 nuna jutii aidautin shiig kuashat amasajua nunak, Jesucristo iina Uwemtijamna nu Wakani Pegkejinash sujamsauwai,
TIT 3:7 ni anentag pegkeg ainagme tujamatai pujut tuke atin jukitnun dakastinme tujamu asa.
TIT 3:8 Jujú chichama juka dekaske, nuadui jujú jintinkagtamu aina nuna mijattsuk tití tusan wakegajai, ashí aents Apajuiyai dekaskeapi tuina duka pegkeg takat aina nuna uyumaktinme tabaunum. Jujú jintinkagtamu aina duka pegkeg ainawai nuigtú ashí aentsnash pegkegnum yaimainai.
TIT 3:9 Tujash imanchau aina duka jiyanitú wekayipa, ditá muunji aajakajun pachis tuina dushakam, kajegdaimain aina dushakam, chicham umiktina nu pachismesh jiyanitú wekayipa, wagki duka wainak ainawai nuigtush yaijattsui.
TIT 3:10 Makichik aentskesh kanamainun chichá wekaekuig, chichagkata, tuja ataktú tamash antugtamchakuig jiiktajum,
TIT 3:11 dutikagmesh dekaatajum duka pegkegchau unuimatug nuigtush tunamag ni bakumaku suwimak jumainun tu wekaga nu.
TIT 3:12 Artemasan nuniachkunush Tíquico awetittajame, nunikmataig wamak Nicópolis taam waitkata, yumi tepeatta nunak nuwi pujusan inagkeaktasan pujuttajai.
TIT 3:13 Abogado Zenas Apolosjai, anui taa weenakuig, wajuk yaimainaitme dutiksamek yaigtá, makichkish atsumamuji atsugtinme.
TIT 3:14 Atum dutikamun jutii yachi aina dushakam wainkag unuimagtinme pegkeg takat aina nuna, atsumamu aina nui yaimtan, nuninak tuke atsumtai agtinme.
TIT 3:15 Ashí wijai batsata nunú kumpamjamainawai. Kumpamjutuata dekaskeapi tabaunum anejatuina nunú. Apajuí anentag wait anenkagtamua nu atuminish atí.
PHM 1:1 Witjai Pabloitjai, Cristo Jesusan takaju asan achinkan pujusan yatsug Timoteojai kumpamjame anetaiju Filemogkah, jutiijai takatnum atuetai asamin;
PHM 1:2 nuigtú iina umayí anetai Apia, Arquipo jutiijai takat atuetutaiya nuna, nuigtush iglesia amina jeemin ijunaina nunashkam.
PHM 1:3 Apajuí iina Apajiya nunú, Apu Jesucristujai anentag wait anenjamag agkan pujutan amastinme.
PHM 1:4 Mina Apajuijun aujkunuk amina pachisan tuke see tusanké ajai,
PHM 1:5 wagki antugkamjame, Apu Jesús aneamugmin nuigtú dekaskeapi tabaugminash, nuniau asam ashí Apajuí aentsji pegkejam aidau aneam nunashkam.
PHM 1:6 Apajuin segatjame wi dekaskeapi taja nunismek amesh dekaskeapi tame dui, Cristo aneau asá ashí pegkeg jutiiní dutikmain ajutjama nuna dekaati tau asan.
PHM 1:7 Shiig aneakun ichichmamjai ame anejatbaun antakun. Yatsujuh, Apajuí aentsji pegkejam aina dushakam aminig anentain ichichmamkaje.
PHM 1:8 Nuadui, Cristo daajin, ju dutikata tumain ajutaig,
PHM 1:9 ayatak anenkai segajame. Wi, Pablo, muun wajasuitkun Cristo Jesusa chichame etsegbaunum achinkan pujusan,
PHM 1:10 Onésimo, wi cárcel pujusan Cristo pachisan etsejai antuk sujumankau asa mina uchijua imana nu, ataktú amina jeemin mina anú wait aneasam jukita.
PHM 1:11 Yaunchuk tsawantaya duik amesh atsumainchauyi, tujash yamaik ameshkam wishakam atsumtai wajasé,
PHM 1:12 nuniku asamtai awagkin awetajame, mina utugtumainaitam dutiksag jukiti tusan,
PHM 1:13 amina yaimpamaina nuna, jui pujusá mina yainkati, yamajam chicham etsegbaunum achinkan pujag nuna tumainaitkun.
PHM 1:14 Tujash makichkish ame wakegatsminig dutiktanak wakekashmajai, ame mina yainbau wi takui dutikamu ai, dekas ame wakegamunum dutikamu atí tusan.
PHM 1:15 Juna juniktasants ujumak tsawantai aminí kanakuitai, nunik ataktú ame jukim amijai tuke pujustatus,
PHM 1:16 tujash achikbaujai betekchau, achikbauwa aan nagkaemas yatsut aneetai minaig wajasé, tujash aminig aan nagkaemasayai, aentstí nunitaiya nuninchau, Apu Jesús nemagbaunum yatsut wajasú asa.
PHM 1:17 Nuadui, ame minash kumpag anenjakmek, mina utugtumainaitam dutiksamek jukita.
PHM 1:18 Amina pegkegchau takagtamsau nuniachkush diwimjamkau akuish, minai idaisata.
PHM 1:19 Wi Pablon junak mina uwejui agatjame, wi akikmaktatjai; ame pujut jukimunum mina diwimjam nuna tumainaitkun.
PHM 1:20 Aajan yatsujuh, iina Apuji nemagbaunum aminiyan pegkejan wainkatasan wakegajai, nuniakum mina anentaijuish ichichtugta Cristo nemaju asam.
PHM 1:21 Junak, dekas umiktatuapi tabaunum kajittsan agatjame, wagki wi segajam nu inagkeasmesh dutikattam nuna dekau asan.
PHM 1:22 Wi kanagtin minash umigtukta, wagki atum Apajuí aujtugsagmin, atumjai ataktú wainimainnash sujustata dui.
PHM 1:23 Epafras kumpamjamui, Cristo Jesús nemagbaunum wijai betek achinak egketa nunú,
PHM 1:24 dutiksag Marcos, Aristarco, Demas, Lucas aatus mina yaintin aina dushakam.
PHM 1:25 Apu Jesucristo anentag wait anenkagtamujiya nu atumí wakanminish ajutjamtinme.
HEB 1:1 Apajuik yaunchuk iina muunji batsamajakajua nunak niina etsegtin aajakajua nuwi kuashtá au aujkawa inibiajui ni wajuk ausata tawa dutiksag.
HEB 1:2 Tujash yamaik, ju tsawan inagnamunum batsatag ju tsawantaik niina Uchijin awetugma dui aujtamui, ashí wají aidauk ni najankamu asamtai ashí niinuk atí tusa idaitusua nuna.
HEB 1:3 Niiyai Apajuí imanjiya nuna iwaina duka. Nigka Apajuí wajukuita niishkam imanke. Ni chichame senchigtina dui ashí wají aidaunak emetuk awai. Nuigtú iina tudaujinash nijatjamag pegkeg etami nayaimpinum Apajuí ekeemtaijin untsujin ekeemsauwai.
HEB 1:4 Niiyai nayaimpinmaya aents aina nuna wagagkauk, nigki dekas Apu wagaaku ashí nayaimpinmaya aents aina nuna nagkaesau eme anentsá adaitaiya dushakam.
HEB 1:5 Apajuik makichkish ángel aina nunakesh: “Amek mina Uchijuitme, wi yamai aentsnum akiinati tima akiinau asam”, tichauwai. Nuigtush nayaimpinmaya aents aidaunak: “Wi niina apají atajai, ni mina uchig atí”, tichauwai.
HEB 1:6 Tikichnumshakam jutiksag, niina Uchijí makichkiuchia nuna pachis nugkanum awemak: “Apajuí angelji aina duka ashí niinak ememattinme, tiuwai” tawai.
HEB 1:7 Ángel aidaun pachisag: “Apajuik niina angelji aidaunak tuke dasega nunin weu ainawai; tuja takagtuinakush tuke jiiya nunin weu ainawai”, tawai.
HEB 1:8 Tujash Apajuik niina Uchijin pachisag: “Apajuiyah, ame ekeemsa inamtaigmek ajumaish tuke atinai pegkeg aina duke takau asam.
HEB 1:9 Amek pegkeg aina nu aneakum, pegkegchau aina duka dakitjaume. Nuadui Apajuí, amina Apajuigmea nu etegtama shiig aneemtijamsauwai kumpajum aina nuna nagkaesau”, tiuwai.
HEB 1:10 Junashkam Uchijin tiuwai: “Apuh, amek yama nagkamtinish nugka najankum nayaimpishkam najankauwaitme.
HEB 1:11 Nunú najankamujum aina duka megkaejatnai jaanch mamujá megkagama numamtuk, tujash amek tuke pujutnaitme.
HEB 1:12 Jaanch ninutia numamtuk awajkattame. Yapajiakmeshkam jaanch yapagmamtayama numamtuk yapajiattame. Tujash amek imanismek atinaitme, amina pujutjumshakam nagkankashtinai”.
HEB 1:13 Apajuik makichkish ángel aina nunak: “Ekeemsata mina untsujui, nunikamin wi amina shiwajum aidaunak ashí depetuktajame, dutikan ikaunmamtai dui ame diisminum”, tichauwai.
HEB 1:14 Wagki, ashí ángel aina duka wakan Apajuin takajin ainawai, aents uwemjatin aina nuna yaigtí tusa ishimtai ditak ainawai.
HEB 2:1 Nuadui Cristo chichame antukbauwa duka, puyatjusa shiig aneaku amainaitji, Cristo nemajut tupanjaig tuidau asaja.
HEB 2:2 Yaunchuk Apajuí niina angelji aina nuwi chicham umiktinun awetim susauwa duka senchigtin aajakui. Nunin asamtai nuna umitsuk tudaun takaidauk dutiksaik suwimak suujakbauwai.
HEB 2:3 Nunin aish, ¿jutiish wajuk Apajuí suwimkajish uwemtumainaita, uwemat dekas imana nu pachitsuk idaikuish? Nu uwemtanak dekatkauk Apu Jesús etsegkauwai, nunikmatai nuna antuku aidau jutiinash dekaske tusag ujapakajui.
HEB 2:4 Nuigtushkam Apajuí nuna shiig dekamtijamata tau asa, niina chichamen etsejuidaunash yaigkui. Dutikam anentai jegagmainchaun, aents dutikmainchau aidaun iwainag takaajakajui. Dutiksag Wakaní Pegkejiya nujai ii yupichu dutikatnun ni wakejamua dutiksag makí makichik jutiinak amasajui.
HEB 2:5 Nugka yamajam atak atin pachisa chichainag nunak, Apajuik ángel aina nunú diistí tusag idaituschauwai.
HEB 2:6 Jushakam aatus agagbauwai: ¿Wajimpaya aentsush imatika kajimatmainchau anentaimtitnush? nuniachkush ¿wajuku asamtaiya aentsnum akiinaush ijagsatasamesh wakegame?
HEB 2:7 Ujumak tsawantaik ángel aina nuní imanchauch emaume, tujash ataktú imanuk emam eme anentsá diitai awajsaume;
HEB 2:8 dutikam ame najankamu aina duka ashí nigki idaitusume. Nunú ashí idaitusbau asa makichkish Cristo diyachbauk atsawai, nuninaitak eke ashí ni idaituschamuskaitai tumain wajas awai.
HEB 2:9 Tujash Jesús ujumak tsawantai ángel aina nuní imanchauch emamuitak, ni waittsa jakamunum eme anentsá diitai wajasua duka wainji. Nunak Apajuí jutiin wait anenjamu asa, ashí aents aidaunum waitus jakati tima nunikui.
HEB 2:10 Ashí wají ni najankamu ayá duka niinuk ainawai. Nigka wakegawai ashí niina uchijí aidauk nayaimpinum pujustinme tusa. Nuna dutikata tau asa Apajuí Jesucristunak waittsati tiuwai, ni nunikbaunum ashí niina uchijí aidaunak pegkeg emak uwemtikata tau asa.
HEB 2:11 Wagki ashí aents pegkemtikamu aidauk, nuigtú pegkemtikagtina dushakam ashí Apajuinuk ainawai. Nuadui Jesús Apajuí Uchijiya duka, datsamatsui jutii aidautin pachipas, “mina yatsug ainawai” tujamtanmag.
HEB 2:12 Nuna pachis agagbaunum chichaak: “Apawah, amina pachisan yatsug aidaun ujaktajai, dutikakun ditajai ijuntsan kantamkun ememattajame”, tawai.
HEB 2:13 Junashkam: “Wika imá Apajuiyaig kajintsan anentaimtatjai”, ataktushkam: “Wika juig Apajuí uchijí aidaun sujusua nujai pujajai”, tiuwai.
HEB 2:14 Aentstí iyashtin numpentin ainag nuninuk wajas Jesuschakam akiinauwai, nunik jaak Iwanch niina senchijin jatanum inamajakua nuna depetkata tau asa.
HEB 2:15 Nunik agkanmitkakui ashí aents iwanchin inake waig batsamas, jaamun ishamá batsamtatman.
HEB 2:16 Wagki nigka nayaimpinmaya aents aidaun ayamjuktatus minichui, nigka Abraham weantu aina nuna ayamjuktatus miniuwai.
HEB 2:17 Nunin asa niina yachi aina nuninuk betek wajasui. Nunik ni dekas Sumo Sacerdote wajas Apajuin betek umijak, jutiinash wait anenjamjauwai, ni waitus mantamnamunum Apajuí aents aidau tudaujinash tsagkujati tau asa.
HEB 2:18 Niishkam Iwanch pegkegchau takamtiksatasa dekapeam asau asa, Iwanch dekapeam waituidaunak senchigtina ibau asa yaigtatui.
HEB 3:1 Nuadui yatsug aidauh, atum Apajuí mina aentsug pegkejam atinme tusa etejamu aidautigmek, Cristo Jesús Apajuí etegkamu, sumo sacerdoteya duke puyatjusjum anentaimtitajum. See tajai jutiishkam nigki dekaskeapi tuidau asaja ni pachisa etsegtuinag dui.
HEB 3:2 Jesusak Apajuí takastá tibaunak imatiksag betek umikui, Moiseschakam antsag Apajuí tibaunak jega Apajuí ememattainum ashí betek umijakui.
HEB 3:3 Nuadui Moisesa nagkaesau eme anentsá diimaina duka Jesusai, jega jegamkamuk eme anentsá diitsuk, aents jegan jegamkauwa nu eme anentaiya numamtuk.
HEB 3:4 Ashí jega aina nunak aents jegamainawai, antsag ashí wají aina dushakam Apajuí najankamu ainawai.
HEB 3:5 Moisesak Apajuí inake asa ashí Apajuí jeega nuig betek imatiksag takasui. Tuja ni takasua nunak Apajuí atak titina nuna iwainaktatus dutikauwai.
HEB 3:6 Untsu Cristuk Apajuí Uchijí betek umina ibau asa, jutii Apajuí jee ainag nuwi pujus yaimpaji. Jutii uwemjatnapitja tusa wakesa dakainag nuig ebetmamja pujuinakuik niina aentsji ainaji.
HEB 3:7 Nuadui Wakaní Pegkeji tibau agagbaunum tawa ju: “Yamai Apajuí tabau antakjumek,
HEB 3:8 anentaimin utujimka juwakaigpajum. Aents intimkiu aidau Apajuin uwegshunum dekapsajua numamtukek.
HEB 3:9 Atumi muunjum aajakajua nunú dekapjusajui, wi ditan cuarenta mijadai yaigkan iniibaun wainainayatak.
HEB 3:10 Nuninakui nunú weantu aidaunak kajegkan: ‘Ditak wainak anentaimainawai, nunidau asag wi taja nu dekatnash dakituinawai’.
HEB 3:11 Nunidau asagmatai ditan senchi kajegkan chicham yapajimainchauwai: ‘Ditak wi ayamsatajum tusan nugkan anagkuauwaitag nuig wayachagtatui’, tijai”.
HEB 3:12 Yatsug aidauh, kuitamamkatajum, atum ainajum anuiyatijum pegkegchau anentaibau ajutjamsamtai utujimsajum anentaimkujum, Apajuí tuke pujuuwa nunú tupanjaijum.
HEB 3:13 Duka nunitsuk kashí kashinig makí makichik pempeentunikjum anentai ichichtunigtajum, “yamai”, tibauwa nu tsawan eke au asamtai. Atum ainajum anuiya tudau takainak Apajuí tupanjag antakchau waigkainum.
HEB 3:14 Wagki Cristuwai pegkeg jukimu ajutjamaina duka, yama nagkamchaku niiní kajintsá anentaimajakuitag nunisaik nagkanbaunmash jegainakuik nunisag ajutjamtinai.
HEB 3:15 Agagbauwa nuwi chichaak: “Yamai Apajuí tabau antakjumek, anentaimin utujimka juwakaigpajum duik intimjukiaju aina nunisjumek”, tawai.
HEB 3:16 ¿Ya Apajuí chichaamun antukaju ainayatkush intimjukiaju ainawa? Duka ashí aents Egipto batsatun Moisés jiijá agkanmitkakua nunú nunikajui.
HEB 3:17 ¿Ya aidauna Apajuish cuarenta mijadaish kajegkash pujusuita? Nunak aents tudau takasaju uwegshunum jinawajua nuna dutikawajui.
HEB 3:18 ¿Ya aidauna Apajuish chicham yapajimainchauwaish: Wi ayamsatajum taja nuig wayashtatjume, tiuwaita? Nunak aents chichaman intimkiajua nuna tiuwai.
HEB 3:19 Dita wayachajua nunak Apajuin dekaskeapi tuinachu asag nunikajua duka wainnawai.
HEB 4:1 Nuadui Apajuí ishamsa diimainaitji, minai wayajum ayamsatajum tusa anagtamamu eke ajutjama dui, atum ainajum anuiyatigmekesh waimainchaunum juwakaig tabaunum.
HEB 4:2 Jutii aidautish yamajam chicham etsegbau antukuitji, dita antukajua nunisaik. Tujash ditak antuinakush wainkaya nunin diisajui, wagki Apajuiyai dekaskeapi tuidau chichaman umikajua nunikchaju asag.
HEB 4:3 Tujash jutii Apajuiyai dekaskeapi tuidautik, Apajuí ayamsatajum tibauwa nuwi wayawagtinaitji. Nuna pachis Apajuí chichaak: “Nunidau asamtai ditan kajegkan chicham yapajimainchauwai, ditak wi ayamsatajum tiuwaitag nuig wayachagtatui tijai”, tawai. Nunak Apajuik niina takatjinak yama nagkamas nugkan najanauwa duik inagnakuitak tiuwai.
HEB 4:4 Tikich yantamnum agagbauwa nuwi, siete tsawanta nuna pachis: “Apajuik ashí ni takamainjinak ashimak siete tsawanta jui ayamjauwai”, tawai.
HEB 4:5 Tuja agagbaunum awaksag chichaak: “Ditak wi ayamsatajum tiuwaitag nuig wayachagtatui tijai”, tawai.
HEB 4:6 Tujash nunú ayamnagtina nuwi eke wayachush ainawai, nagkamchak Apajuí uwemtikagtugta tabaun chichaman antuku aidauk uwemjachajui ditá chicham umishtin.
HEB 4:7 Nunikagmatai Apajuí ataktú makichik tsawantan mamikiae, “Yamaiya juna”. Yaunchuk nagkamas au aujtamkawa minimú ai pujus, David agagbau timag nuna awaksag chichaak: “Yamai Apajuí tabau antakjumek, anentaiminig utujimkajum juwakaigpajum”, tawa nu.
HEB 4:8 Wagki Josué Israel aents aidaun Apajuí ayamsatnume tiuwa nuna susau ataik, Apajuik tikich tsawannak mamikiachu amainai.
HEB 4:9 Nunin asamtai makichik tsawan shiig pegkeg juwawai, Apajuí nemajin aidau ayamjatna nu.
HEB 4:10 Nuadui Apajuí ayamtan sukagta nuwi wayauk, ditá takataijinak idaiyinak ayamjaje, Apajuí ni takas ayamjauwa nunisag.
HEB 4:11 Duwi kakanmamainaitji dekas ayamtainum wayatasaja, makichkitigmekesh chichaman intimkiu wajukawajua numamtuk wajakaig tabaunum.
HEB 4:12 Apajuí chichamega duka senchigtinai pujutnash sukagtinai, nuigtush espada mai yantamejai etsakamua nuna nagkaesauwai. Iman asa wakannumash, anentaimat aina nunash anentainum shiig wayá pegkeg aunash, pegkegchau aunashkam dekamtijamji.
HEB 4:13 Apajuí najanamu aina nuiyag niina uumjumainuk makichkish atsawai. Apajuí eemtinig ashí wají aina duka shiig paan ainawai, nunin asamtai Apajuí eemtinig ashí ii takasbauji tumamtinaitji.
HEB 4:14 Jesús Apajuí Uchijiya nuuwai, jutii Sumo sacerdoteji dekas iman nayaimpinum wayauwa duka. Nuadui niiní dekaskeapi tuidautik ebetmamja nunisaik pujumainaitji.
HEB 4:15 Wagki jutii Sumo sacerdotejiya nu, ii kakaakchau wegajinish wait anenjamainai. Nigka jutiijai betek pegkegchau takamtiksatasa dekapeam asauwai, tujash nigka makichkish tudaunak takaschauwai.
HEB 4:16 Nuadui Apajuí anejatin ekeemtaijin eketa nunú kajintsá adijka ausagmi. Ni jutiinak wait anenjamag ashí ii atsumamunmash yaimpaktatui.
HEB 5:1 Ashí sumo sacerdote aina duka, aents aina nuiya etegka adaikamu aajakui, Apajuí eemtin ni anentag kuntin itaamun maa aentsun tudaujin segattí tusa.
HEB 5:2 Tujash sumo sacerdotek nigkishkam pegkegchaun takamain asa, aents Apajuí umigtan shiig dekachu asag, wainak pegkegchaunum yujaidaunash wait anentus yaigtí,
HEB 5:3 dutikakush niina tudaujiná tsagkugnagtatus kuntinun maa apeati, dutika dui aents aidau tudaujin tsagkugnagti tusa kuntinun maa apeati tibau aajakui.
HEB 5:4 Jujú takat ajantusa diimaina junak makichik aentskesh nigki nagkamig takamaitsui. Junak Apajuí Aarogkan etegkauwa dutiksag etegkamu aina nu takamain ainawai.
HEB 5:5 Nunisag Cristushkam nigki wi sumo sacerdote atajai tusag naamkachui. Nunak Apajuí eme anentai awajsauwai, dutikak nigki: “Amek mina Uchijuitme, wi yamai aentsnum akiinati tima akiinau asam”, tiuwai.
HEB 5:6 Nuigtushkam tikich agagbaunmashkam tawai: “Ametme sacerdote dekas tuke atinmek, Melquisedec aajakua nujai betek”.
HEB 5:7 Cristo ju nugka jui pujusua nuaduik, shiig senchi untsumak buutak negá negajai Apajuin segauwai. Ni jamaina nunak Apajuí senchigtina ibau asa agkanmitkajuati tusa. Nunitai Apajuik ni umigbau asa ayatak antugkauwai.
HEB 5:8 Cristuk Apajuí Uchijiyaitak, waitiamunum Apajuí wakegamu umigtanak unuimajui.
HEB 5:9 Ni juna imatikas betek umikú asa, uwemat tuke atina nuna sukagtin wajasui ashí niina umijuina nuna.
HEB 5:10 Tuja Apajuí niinak sumo sacerdote atí tusa adaikauwai, Melquisedec aajakua nujai betek.
HEB 5:11 Jujú pachisa tumainuk kuashat ajutjamji, tujash juní tawai tusaik shiig tumaitsui, atumek wamak antumainchau asagmin.
HEB 5:12 Atumek Cristo nemagkajum dukap tsawan pujau asajum, jintinkagtin amainaitkujum, ataktú awagkijum Apajuinun shiig jintias dekas yupichuchin jintinjamatnume tusa atsumagme. Nuniau asajum uchi yamá akiintsau yutai katsugman yumainchau asa, muntsunak muntsuwama nunin ainagme.
HEB 5:13 Ashí uchi muntsun muntsuaku aina duka, chicham pegkeg aidaunak jintiag chichaakuk amaitsui, wagki uchi asa.
HEB 5:14 Tujash pegkeg takaamua nuna, pegkegchau takaamua nujai akanag dekatan unuimatjau aina nuuwai, muun yutai katsugman yuwina numamtin aidauk.
HEB 6:1 Nuadui nagkamchaku Cristo pachisa jintiamu aajakua duka ukuaku, nuní nagkaemasa dekamain ainaji. Nunidau asaja pujut yapajita nu pachisa, tudau takaamu jatanum ejekagta nu idaiyat, Apajuiyai dekaskeapi tabauwa nu ataktú awagki dekaatasaik batsamtumaitsui.
HEB 6:2 Yamimat pachisa jintinkagtamu, Jesusa nemajuidau buuknum achiká Apajuí segatut, jakau aidau nantajagtin, nuigtú Apajuí suwimak tuke atinun sukagtustina nu pachisa dekatasaishkam batsamtumaitsuji.
HEB 6:3 Ju pachisaishkam jintintuattajime Apajuish dutikati tujamkuig.
HEB 6:4 Wagki Apajuí chichame anenjauch sukagtusbauwa nuna dekaawaju ainayatak nuigtú Wakaní Pegkejinash jukiu aidau,
HEB 6:5 nuigtushkam Apajuí chichame shiig pegkeja nunash wakejus antuku, tuja Apajuí niina senchijin ju nugka jui inamjatna nunash shiig dekauwaitak,
HEB 6:6 Apajuí dekaskeapi tutan idaiyas, ataktú ni pegkegchau takaajakbaujinak waketjuki takaak, Cristo shiwagmaina duka, kakajus ataktú pujutinak yapajimaitsui. Wagki dita nuna nuninak, dita dekas Apajuí Uchijin achijagmatai, tikich aidau Cristun dushikis chichagmaina numamtuk wajaidau asagmatai.
HEB 6:7 Yumi yutug nugkan uchupjamtaig ajak tsapakug pegkejan nejeawai, nunikmatai juwaa duka Apajuí yainken juwawai.
HEB 6:8 Untsu ayatak jagkik ajanum tsapataik takatsuk idaiyin ainawai tikich tsawantin apea ajapatin asa.
HEB 6:9 Tujash aneetaig aidauh, nu aaja takuishkam, atumek aents megkaemainai taji nuninuk ainatsjume. Wika atumnak shiig dekagjime, dekas pegkeg atum uwemjamujum ajutjamaina nunak.
HEB 6:10 Apajuik pegkegchaunak takachua ibau asa, atum ni aneau asajum, ememattsa takagkujum, Apajuí aentsji pegkejam aidaush yaigkuitjum nuna nuigtú yamaikish yaimainajum nunash kajimatkishtinai.
HEB 6:11 Nuadui makí makichik aidautijum wakesajum takaajum nunak, dutiksag emainak jegantinme tusa wakegaji atum dakainajum nuwi, nuniau asajum duka imatiksagmek jukitin ainagme.
HEB 6:12 Duwi daki batsamtutsuk, Cristui dekaskeapi tabauwai emamkemas pujuinak, Apajuí anagkagtuamua nuna jukitin aina nunisjumek pujustajum.
HEB 6:13 Apajuí Abrahaman anagkuauwa nunak, niina nagkaesau adaisa tumain atsau asamtai, Apajuí nigki adaimamas, chichajak:
HEB 6:14 “Dekaskenum kuashat yaigtatjame, dutikakun ame weantu aidaunak shiig kuashat uyujkatnaitjai”, tiuwai.
HEB 6:15 Tima Abraham emamkemas dakasu asa, Apajuí niina anagkuauwa nunak imatiksag jukiuwai.
HEB 6:16 Aents ni dutikatnujin anagdayinakug, ditá nagkaesauwa nuna adaisag anagdayin ainawai. Nunú iman antamunum tiu asag dekaskenmap dutikattawa tusag ukú ainawai.
HEB 6:17 Nuadui Apajuí anagkagtuamujin jukitin aina nuna shiig iwaintuktatus wakekauwai, ni anagkagtamua nunak makichkish yapajitsuk imatiksag umiktin asa, nigki adaimamas dekas umiktatjai tiuwa nuna.
HEB 6:18 Nu jimajan tiuwa nunak yapajimainchau asamtai Apajuik waitjuchua dui, dekas dutikattawapi tau asaja, shiig senchi ichichmamainaji Apajuí ayamjutpasmatai kajinmasa ni anagkagtuamua nu jukittajiapi tusa dakaidau asaja.
HEB 6:19 Nunú dakamua nuuwai ii Apajuiyai kajinmasa anentaibaunum iina wakanin ichichtamuk, jiju ancla lanchan buchitmainchau ema ebetama numamtuk. Nu dakamua dui jega Apajuí ememattainum jaanch ejaamu aajakua nu nagkaiki wayau ainaji.
HEB 6:20 Jesús eemak wayauwa nunak, jutii wayatnun jintan ujatjamtatus nunikui. Nuniau asa niiyai sumo sacerdote tuke atin Melquisedec aajakua nujai betek.
HEB 7:1 Melquisedecak yaakat Salemnumia rey, Apajuí nayaimpinmayaya nuna sacerdoteji aajakui. Nuniau asa Abraham apu aidaujai maania depetmak wakettatman, Melquisedec jiintuki igkug pegkegnum yumigsauwai.
HEB 7:2 Dutikam Abrahamak ashí ni maania depetka jukimujiya nuiyan diezmon susauwai. Melquisedec tawa nunak: “Rey pegkejan takau” taku tawai, nuigtú yaakat Salema Apuji aajakui tawa nunashkam: “Shiig agkan pujutan apuji” taku tawai.
HEB 7:3 Melquisedeca apajig, dukujish, ni weganbaujish, akiinamujish, jakamujishkam dekajuachbauwai, duka Apajuí Uchijí tuke sacerdotek pujutna numamtinuk aajakui.
HEB 7:4 Anentaimtusjum diistajum, Melquisedec dekas iman aajakua nu. Iman asamtai Abrahamak apu aidaujai maania depetmaka, wají yajuakbaujin diezmo susauwai.
HEB 7:5 Moisés chicham umiktajum tibauwa nuig, sacerdote Leví weantu aidaunak ditá yachi aina nunú diezmo susati tibau aajakui, ditashkam Abraham weantu ainayatak.
HEB 7:6 Tujash Melquisedecak Leví weantuchuitak, Abraham Apajuí anagkuamun jukiuwa nunú, diezmo suwamash jukiuwai. Dutikam Melquisedecshakam pegkegnum yumigsauwai.
HEB 7:7 Juka ashí dekainaji, pegkegnum yumigkagtina duka, pegkegnum yumigsamua nuna nagkaesauwa nunú.
HEB 7:8 Yamai jutii diezmo suwinag duka aents jinin aina nu suwinaji. Tujash Apajuí chichamen agagbauwa nuig, Melquisedec eke iwaaku pujauwa nuninun etsegtawai.
HEB 7:9 Nunin asamtai Abraham Melquisedecan diezmon susauwa dui, sacerdote Leví weantu aidaushkam diezmon ditashkam susajua nuninai.
HEB 7:10 Melquisedec Abrahaman igkugtatus jiintukiuwa nuaduik Leví weantu eke akiinachu ainayatkush, Abragkai akiinkagtin asag, ditashkam nuig batsatua nunin aajakajui.
HEB 7:11 Israel aidau chicham umiktin susamua duka Leví weantu sacerdote aina nu susamu aajakui aents aidaun yaigtinme tusa. Tuja nunú sacerdote aajakaju aina nu aentsun Apajuí eemtin pegkeg emamain agtaik, tikich sacerdotek atsumnamainchau aajakui, nuadui atsumnajui tikich sacerdote Melquisedec aajakua ibauk Aarón weantua nuiyachu.
HEB 7:12 Wagki sacerdote takataijiya duka yapajiamu asamtai, chicham umiktinnum tawa dushakam yapajiamu amainai.
HEB 7:13 Tuja agagbaunum iina Apuji Jesucristun pachis tawa duka, tikich Israela uchijí aina nuiya aajakui tawai. Nuiyag makichkish altarnum takastí tusaik makichkish tichamu aajakui.
HEB 7:14 Shiig dekanui, iina Apuji Jesusak Judá weantu aajakui, Moisesak sacerdote aidau takastinjin tiuwa nunak Judá weantunmaya takamainnak makichkish tichauwai.
HEB 7:15 Juka shiig paantai, makichik sacerdote yamajam wantinka duka Melquisedec aajakua imana nu.
HEB 7:16 Chicham umiktinnum Leví weantu aina duke takastin atinme tibauwa nuiyachui, nigka sacerdote senchigtin ajumaish wajukashtin tuke pujuwa nuuwai.
HEB 7:17 Niina pachis Apajuí etsegtak: “Ametme sacerdote tuke pujutnumek, Melquisedec aajakua nujai betek”, tiuwai.
HEB 7:18 Nuadui yaunchuk umiktin aajakua duka idaisamui, aents aidaunak yaimainchau asamtai.
HEB 7:19 Moisés chicham umiktajum tibauwa duka makichkish aentsnak pegkeg emachui, nunikmatai tikich nuna nagkaesau dekas pegkeg dakamu ajutjamui, nuadui Apajuiyaig jegainaji.
HEB 7:20 Apajuik ni dutikatjai tibauwa nunak chicham yapajimainchauwai, tiuwai. Tikich sacerdote aidauk imatika chichagkaik adaikachbau ainawai.
HEB 7:21 Tujash Cristuk chicham yapajimainchauwai chichagká tibauwa nunú agagbaunum tawai: “Apu Apajuí nigki adaimas, mina chichamjunak yapajiashtatjai, ametme sacerdote tuke pujutnumek”, tiuwai.
HEB 7:22 Nu aatus asamtai Jesús chicham apakbauwa nuuwai nagkamchaku chicham apakbau aajakua nuna nagkaesau dekas pegkeja duka.
HEB 7:23 Tikich sacerdote aidauk kuashat aajakajui tuke pujuchu asag.
HEB 7:24 Tujash Jesusak tuke jakashtin asa, tikichnakesh ni takaa nunak inagkeatkishtinai.
HEB 7:25 Nuadui niiyai tuke atinun uwemtikagtumainuk, jutii niiní yunumka Apajuiyaish jegajinig. Nigka tuke pujuuwa ibau asa Apajuin segatjamui.
HEB 7:26 Nunin asa dekas sumo sacerdote ii atsumajakuitag duka Jesusai. Nigka pegkegmai, pegkegchaunash antiakchau, tudaugtin aidaujaish ijutkachu, iman asamtai Apajuí niinak dekas nayaimpia nuna yakiin apusauwai.
HEB 7:27 Nigka tikich sumo sacerdote aidau kashí kashinig kuntinun maa apeak, dekatkauk niina tudaujiná tsagkugnag, dui tikich aents aidau tsagkugnagtinjin apejakua nuninchauwai. Jesusak makichkia mantamdauwai ajumaish tuke jakashtinun, nigki tsagkamankauwai.
HEB 7:28 Moisés chicham umiktinun agajua nuiyan diisag sumo sacerdote atinun adayajakajua duka, aents kakaakchau aajakajui. Chicham umiktina nu nagkaemakiu ai, Apajuí chicham yapajimainchauwai, niina Uchijin sumo sacerdote atí, tusa adaikamua nuuwai dekas tuke pegkejak atinuk.
HEB 8:1 Wi dekas imanun titasan tajim duka juuwai: Jutii sumo sacerdotejig, Jesús nayaimpinum Apajuí ekeemtaiji untsujin eketa nuuwai.
HEB 8:2 Nigka dekas jega pegkegmanum pujus sacerdotejai betek takaawai Apu Apajuí umikbauwa nuwi, duka aents takaschamui.
HEB 8:3 Ashí sumo sacerdote aajakajua duka, Apajuinu anentag itaamun maa apeati tusa adaikamu ainawai. Nunisag Jesuschakam jutii tudaujin mantamnak niina iyashinak Apajuin anentag susauwai.
HEB 8:4 Nigka ju nugka jui pujakush sacerdotek amaitsui, juig kuashat sacerdote ayau asamtai. Nunin asag chicham umiktinnum Apajuí anentag susatajum tibauwa dutiksag takaidau asagmatai.
HEB 8:5 Tujash juiya sacerdote aina duka, nayaimpinmaya wají aina nunú ayatak dakumká najanamunum wayawag takainawai. Dutiksag Moisesnash chichajak: “Ame mujanum pujamin jega Apajuí ememattain iwaintukbaijam nuna niimejai betekuch najanata”, tiuwai.
HEB 8:6 Untsu jutii sumo sacerdoteji takasbauwa nu imá pegkejai. Nunin asa ni Apajuí aents aidaujai chicham apakbauwa duka shiig pegkejai, nuigtush dekas pegkeg aidaun anagtamauwa dui.
HEB 8:7 Nagkamchaku chicham apakbauwa nu pegkeg aajakú ataik, ataktú chicham apakmí tabauk atsusú amainai.
HEB 8:8 Tujash Apajuik nunú aents aidaunak pegkejak diischauwai, nuniku asa chichajak: “Apu tawai: Tsawan jegatnai, Israel aents aidaujai, Judá weantu aidaujai ataktú chichaman apaktinaitag nunú.
HEB 8:9 Duka wi ditá muunji aidaun Egipto nugka batsatun jiijan, ditajai chichaman apakuitag nuna umikchagmatai idaisauwaitag nuninuk achattawai, tawai Apu Apajuí.
HEB 8:10 Nunú tsawan atina dui, wi Israel aidaujai chichaman apaktatjai, tawai Apu Apajuí. Wi ditá anentaimtajin chicham umiktinnak egketjagtatjai, dutikakun ditá anentainish agatjagtatjai. Wi ditá Apajuiji atatjai, untsu dita mina aentsug agtatui.
HEB 8:11 Dutikamu asajum atum ijutkamukesh, yatsumkesh Apajuí dekaati tusagmek jintintuashtin ainagme. Wagki ashí piipich, ashí muun aidau nagkamas shiig dekajuawagtin ainawai.
HEB 8:12 Wika dita pegkegchaun takaina nunak wait anenjan tsagkuujan, tudauji aidaunash ajumaish adeagchatnun kajimatkitnaitjai”, tawai.
HEB 8:13 Apajuí yamajam chicham apakbaun pachis tawa nunak, nagkamku chicham apakbauwa duka muuntuch wajasú asamtai tawai, muuntuch wajasú asamtai atsumnatsu duka megkaekatin asa nuniawai.
HEB 9:1 Yamai dekaami, nagkamku chicham apakbau aajakua nuig, ju nugka jui jega Apajuí ememattai pegkejam jegamkamu aajakua nuwish, Apajuish wajuk emematmainaita nu pachisa tibau aajakui.
HEB 9:2 Nunú jegak juní umikbau aajakui: Dekatkau tesamua nunak “Pegkejam” tuujakajui, nuanuig candelabro jii ekeemaja pekatai, pag Apajuí anagkuamu, mesanum patagbau aajakui.
HEB 9:3 Jaanch ejaamua nuna ukuujin tesamu aajakua nunak, “Shiig Pegkejam” tuujakajui.
HEB 9:4 Nuanuig altar kugkuin incienso patai apetai ayatak orok najanamu aajakui, nuigtú kajun arca Apajuijai chicham apakbau ayatak orok epekbau aajakua nunú. Nunú arcaya nuna initken egkemajakui Aarogka ushujutaiji jeekú aajakua nu, chicham umiktin kayanum agagbauwa dushakam, nuigtú makichik ichinkauch ayatak orok najanamunum maná chimpiamu aajakua dushakam.
HEB 9:5 Nunú kajun arcaya nuna awanken jimag aents nanamtin nayaimpinmaya dakumkamu, Apajuí nuwi pujamujiya nuna iwainajakajui. Nunú aidauk ditá nanapen kajun arca tutaiya nuna dukukag aajakajui. Tujash juna pachisnuk imatikanuk shiijak tichattajai.
HEB 9:6 Ashí ju imatika umikbaunum sacerdote aidauk, kashí kashinig dekatkau tesamu Pegkejam tutainum waijakajui, dita takastí tibauwa nuna umiktatus.
HEB 9:7 Tujash nuna ukuujin tesamu shiig pegkejam tutaiya nuig, imá sumo sacerdotek makichik mijantin makichkia waijakui, kuntinun numpen takus. Nunik nunú numpa nuna Apajuin anagkuak, dekatkauk niina tudaujin tsagkugnagtatus segatmami, dui tikich aentsú tudaujinash segatujakui.
HEB 9:8 Nuna Wakaní Pegkeji shiig dekamtijamui. Dekatkau tesamunum sacerdote takainaigkish, tikich ukuunum tesamu Shiig Pegkejam tuujakbauwa nuig, tikich aents wayati tusaik tichamu aajakui.
HEB 9:9 Ashí nuna dutikajakajua nunak, yamai tsawanta jui nuniktinun iwainak dutikawajui. Nuniau asag nunú jeganum batsamsag, kuntin Apajuí anentag anagkuamun maa apeenak Apajuin emematuinakush, dita anentaimtajinig agkantak anentaimajakchajui.
HEB 9:10 Nu jeganum batsamas chicham umiktajum tibaun umiinak, ayatak yutai aidau, umutai aina nuna, Apajuí ememattasag yumin ikigmajakajua nujai takasajui. Ashí nunú aidaunak Apajuí eke yapajiachu asamtai dutikajakajui.
HEB 9:11 Tujash Cristo jui tauwa nuuwai yamaik sumo sacerdote, pegkeg aidau tuke atinun sukagtinuk. Ni sacerdotejai betekak jega pegkegmanum wayá takaa nuuwai dekas imá pegkejak. Duka aents aidau jegamkachbauwai, nunin asa ju nugka juiyachui.
HEB 9:12 Cristuk chivo aidau, toro tsakat aina nuna numpeenakesh jukig wayachui. Nigka niina numpeenak juki Apajuí pujutai dekas shiig pegkegma nuwi makichkia wayauwai tuke atinun, nuniak jutiinash agkanmitkagbauwai tuke atinun.
HEB 9:13 Duka dekaske; toro aidau, chivo aina nuna numpen jukiag, nuigtú baka tsakat altarnum apeamu yukuujin jukiag, aentsú yukujakú ainawai pegkegchau iyashin ajamun pegkeeti nunik tsuwatchau wajastí tabaunum. Tujash nunak awankak dutikajakú ainawai.
HEB 9:14 Aan nagkaemas Cristo numpega duka senchigtinai, nigka Wakan tuke pujuuwa nunú yayasam Apajuí eemtinish makichkish tsuwatji atsugbau nigki tsagkamanak mantamna numpen ukajua dui iina anentain pegkegchau takaaku jatanum jegamaina nunash nijatjamjauwai, Apajuí iwaaku puja nunak umigkatnume tujamu asa.
HEB 9:15 Cristuwa nuuwai yamajam chichaman apakua duka, wagki ni untsukbau aidau tuke atinun Apajuí anagkagtuauwa nunash jukitnume tujamu asa, Cristuk nagkamchaku chicham apakbau aajakua nuwi batsamas tudau takasbau aidaujin agkanmitkata tau asa jakauwai.
HEB 9:16 Aents wi jakamtaig mina wajiignak, nu aents jukitin atí tusa papinum agaja umikbauwa duka, nuna umikua nu dekas jakamtai senchigtin wemainai.
HEB 9:17 Aaja chicham umikbau aig, nuna umikú iwaaku pujaigkik nu chichama duka wainkayai. Untsu papinum agag umikua nu jakamtai, nu aents jukitin atí tibaujiya duka uminnai.
HEB 9:18 Nunisag Apajuí yamá nagkamchak chicham apakbau aajakua dusha, numpajaichuk dutikachbau aajakui.
HEB 9:19 Dutika chicham umiktina nuna ashí aents aidaun Moisés ujaká, nuadui toro tsakat maamu aidau numpen, chivo numpe aidaun yumijai pachimag, uwijá uje kapantaku emamun jukiag numí hisopo kanawen jigkawag, numpanum uchupig, chicham umiktin agagbaun pegashmatug uchupik, aents aidaunashkam dutiksag dutikauwai.
HEB 9:20 Dutika chichajak: “Ju numpa juka Apajuí atumjai chichaman apaa nuuwai”, tiuwai.
HEB 9:21 Nuigtushkam Apajuí ememattai carpa jegamkamua nuna numpan pegashmatug, dekatkau tesamu Pegkejam tutainum takatai aina nunashkam dutiksag pegashmatjauwai.
HEB 9:22 Chicham umiktina nuig, numpajai ashí pegkeemtikmaina iman tibau aajakui. Numpajaichuk tudauk tsagkugnamainchau asamtai.
HEB 9:23 Aatus atsumnajui nayaimpinmaya wají aidau dakumjá najankamu aina nu pegkeemtikata tabaunum. Tujash nayaimpinmaya wají aina duka, kuntin maamu numpen nagkaesau dekas pegkejan atsumawai.
HEB 9:24 Cristuk jega tesamu Shiig Pegkejam tabaun aents umikajua nuig wayachui, duka dekas nayaimpinum awa nu dakumká najanamu aajakui. Nigka dekas nayaimpinum wayauwai. Yamaik awi Apajuijai pujus, jutiin Apajuin aujtugmaji yaimpakti tusa.
HEB 9:25 Nigka wayachui kuashtá maam atasag, sumo sacerdote aidau makí makichik mijantin Apajuí ememattai pegkegma nuwi tikichi numpen takus waijakua nunikag.
HEB 9:26 Ju aatus ataik yama nagkamchaku nugka najanamua dui nagkamnas mantamná pujumainai, tujash yamaik tsawan nagkanbau jegau asamtai Jesusak tauwai. Nunik tudaun depetkatatus ajumaish jakashtinun makichkia mantamdauwai.
HEB 9:27 Tuja nunisag aents aidaushkam makichkia jakati tibau ainawai, nunik dui nagkaemamainai Apajuiyai dekagmamatatus.
HEB 9:28 Nunisag Cristushkam kuashat aents aidau tudaujin utsankatatus makichkia jakauwai, tuja ataktú minitta duik tudaunak pachikchattawai, niina dakak batsatun uwemtikatatus minau asa.
HEB 10:1 Chicham umiktin Moisés agagbauwa duka Apajuí pegkeg aidaun amastina nuna iwainajakui; tujash duka dekaskesh wajukuita nu aajakchauwai, nunin asa makichkish aentsnak pegkejak emamainchau aajakui, Apajuin adijkatasag makí makichik mijantin kuntinun maawag apejakú aina nunak dutikainakush.
HEB 10:2 Chicham umiktina nu dekaskenum tudaun nijag pegkeg emamu ainakug, nuwi takaina duka kuntin mautnak idaisag nuigtuk tudaunumak bakumamainchau anentaimain ainawai.
HEB 10:3 Tujash nunú kuntin maamua duka ayatak ashí mijantin ditá tudaujinak anemtikajakui.
HEB 10:4 Wagki toro numpe, chivo numpe aina duka aentsú tudaujinak jujumainchau asamtai.
HEB 10:5 Nuadui Cristo nugká taatin asa Apajuin tiuwai: “Kuntin maamu, tuja anentag itaamush dakitame. Nuniau asam minak aentsú iyashijai betek etiume.
HEB 10:6 Kuntin maa apeamu, nuigtú tudau tsagkugnagtasa anentag itaamu aidaushkam dakitame.
HEB 10:7 Nuniau asamin wi amina chichagkun: ‘Apajuiyah, mina pachitus papinum agajajua nuna, ame wakegamu umiktasan jui pujajai’, tibaijame”.
HEB 10:8 Nuna nagkamas takug: “Apajuik kuntin maamu, anentag itaamu, tudau tsagkugnagtasa kuntin maa apeamu aina nunak dakitawai, shiig awagmatsui tawai. Chicham umiktina nuwi dutikatajum tibauwa nunin aigkish”.
HEB 10:9 Ataktú takushkam: “Wi, ame wakegam nuna umiktasan minajai” tiuwai. Nunak yaunchuk kuntin maajakbauwa duka emegkakum, yamagmauchia nu apusata taku tiuwai.
HEB 10:10 Nuadui jutiinak Apajuí pegkemtijabiajui, Jesucristo Apajuí wakegamun umiak makichkia mantamna ajumaish jakashtinun nunikua dui.
HEB 10:11 Ashí sacerdote aidauk kuntin maa apeamua nunak kashí kashinig dita dutiktaijinak dutiksag takaajakú ainawai, tudaunash makichkish utsanjamainchau aig.
HEB 10:12 Tujash Jesucristuk tudau aidaunum tsagkamankauwai, nunik tuke atinun makichkia mantamna Apajuí untsujin ekeemsauwai.
HEB 10:13 Nuwi yamaik dakak pujawai, “ni shiwaji aidaunak ashí niinig Apajuí depetuk ikaunmakti” tusa.
HEB 10:14 Nuna niina iyashin anentag Apajuin susauwa dui, midau atí tibau aina nunak tuke atinun pegkeemtikiuwai.
HEB 10:15 Dutiksag Wakaní Pegkejiya dushakam shiig dekamtijamji nuniak:
HEB 10:16 “Nunú tsawan atina dui wi ditajai chichaman apaktinaitag duka juuwai, tawai Apu Apajuí: Wi ditá anentain chicham umiktinnak egketjagtatjai, dutikakun ditá anentaimtajinish agatjagtatjai.
HEB 10:17 Ditá pegkegchauji, tudauji aidaunash ajumaish adeagchatnun kajimatkitnaitjai”.
HEB 10:18 Nuadui iina tudaujinak Apajuí tsagkugtamjau asamtai, tsagkugnagtasa kuntin mautak atsumnatsui.
HEB 10:19 Yatsug aidauh, yamaik Jesucristo numpen ukajua dui, Apajuí pujutaiji shiig pegkegma nuwi waimainuk agkan ajutjamui,
HEB 10:20 yamajam jintan Jesús ujatjabiuwa nuwi weenaku pujut tuke atinnum jegamaina nuna, nunak ni jatai jaanch ejaamu ichiinkau ajakua dui dutikauwai,
HEB 10:21 Jesusai jutii sacerdoteji dekas senchigtin Apajuí jeen puja duka.
HEB 10:22 Nuadui Apajuik dekaskenum, dekaskeapi tabauwai jegaantagmi, dekaskeap nuninaita tusa, iina anentaimtajinish pegkegchau atsau, iyashish yumi dekas pegkejai dijagbau amaina iman wajasá.
HEB 10:23 Nunin asamtai ni anagkagtuamua nu dakaku pujuidautik ebetmamja batsamsagmi, dekaskeap uminkattawa tusaja, wagki Apajuik tibaujinak imatiksag betek umin asamtai.
HEB 10:24 Pempeentunisaikish wajuk yainimainaita nu egakagmi. Pegkeg takainaku nuní nagkaemasa aneenimaina nu.
HEB 10:25 Apajuí ememattasa ijunbaunmag megkaekachagmi, ujumak taachush ainawai nuní unuimatjau asag, nuna nunin aidaush yaigtajum wakeetan jukitnume, wagki Cristo minitnujiya duka tikiju wajasú asamtai.
HEB 10:26 Wagki Apajuí chichame dekaskea nunú dekau ainayatku, jutii wakeetajin pegkegchau takaaku Cristo shiwagmakuik, nuigtú iina tudaujin tsagkugtamjatatus Cristo mantamdauwa nunik tudaunum mantamnamainuk tikichik atsawai.
HEB 10:27 Ayatak jii shiig ishamainnum Apajuí niina shiwaji aidaun suwimkan susatna nunak dakainawai.
HEB 10:28 Nuadui makichik aentskesh Moisés chicham umiktajum tibaun umikchamtaig, jimag aentskesh, nuniachkush kampatumkesh apu aidaun jegajiag, nunú aents chichaman umitsuk wainak takaawai tusag etsegtukagmataig, wait anentug tsagkugtsuk maajakú ainawai.
HEB 10:29 Tujash nuna nagkaesau, Apajuí Uchijiya nuna dakituinak, niina numpe ukaejamunum Apajuijai chichaman apak pegkeemtikiuwa nunash pegkegchau diinak, Wakan wait anenkagtina nunash pegkegchau chichajuidau asag shiig senchi suwimkanak jukiagtinai.
HEB 10:30 Apajuí chichaak: “Witjai aents tikichin pegkegchau awagbaun suwimkan suwaunuk, nunin asan aents pegkegchaunak wi suwimkan susattajai”, tawai. Junashkam: “Niina aentsji aidaunak Apajuí ni titinai”, tawai.
HEB 10:31 ¡Tikima shiig ishamainai, Apajuí iwaaku tuke pujuuwa nunú suwimak sukagtamuk!
HEB 10:32 Tujash adeagtajum, nagkamchakjum Apajuí chichame dekaajum Cristui sujumankajum ashí utugchat, waitiamu akuish, katsunjá ichichmamjajum depetkauwaitjum nunú.
HEB 10:33 Wagki atum ainajum anuiyatijum, tuwakbaunum pegkegchau chichagku waitkasbautigmesh ainagme, nuniagmin tikich aidauk aents dutika waitkamu aina nujai ijuntsan waittsatjai tusa anentaimsaush ainawai.
HEB 10:34 Atumek Cristo nemajuidau achikam chimpijush wait anenjauwaitjume. Tuja atumi shiwajum wajiigmin yajutjamkagmataish, atumek shiig aneasjum pujagme, atum jukitnuk nayaimpinum dekas shiig pegkeg tuke atin ajutjamaina nu dekau asajum.
HEB 10:35 Cristui kajintsá anentaimjum nunú megkaekaigpa, wagki atum jukitna duka shiig pegkeg ajutjamu asamtai.
HEB 10:36 Atumek atsumagme waitiakjumesh ichichmamja pujusjum, Apajuí wakegamua nu takaakjum, ni anagtamamua nu jukitasajum.
HEB 10:37 Agagbaunum chichaak: “Minitna duka, megkaetsuk wamak minittawai.
HEB 10:38 Mina aentsug pegkejan takaa duka imá dekaskeapi tabauwaik tuke pujutnai, untsu mina nemagtukuitak ataktú waketuidaunak shiig anentsashtinaitjai”, tawai.
HEB 10:39 Jutiik aents suwimka jukiagtin aidau Cristo nemagkau ainayatak ataktú waketuina nuninuk ainatsji, ayatak dekaskeapi tabauwai uwemtan jukiaju aina nuninuk jutiishkam ainaji.
HEB 11:1 Apajuiyai dekaskeapi tabauwa duka, dekaskenmap jukittaja tusa kajintsá dakamua nuuwai. Nuigtushkam wainchayatku dekas awapita tabauwa nuuwai.
HEB 11:2 Jutii muunji aajakajua duka, Apajuiyai dekaskeapi tuidau asag, Apajuí eemtinish pegkeg wantinkajui.
HEB 11:3 Apajuiyai dekaskeapi tau asaja dekainaji, nugkanum nuigtú agkajunum ayá duka Apajuí chichameniap najaneakuita tusa. Yamai paan wainainag duka, wají wainajakchamu aajakui.
HEB 11:4 Apajuiyai dekaskeapi tabauwai, Abelak kuntin dekas pegkejan maa apeak, Apajuin anentag susauwai Caigdau nagkaesau. Dutikau asamtai Apajuik Abelnak ni dutikamujiya nujaí pegkeg diisui. Nunin asamtai Abel jakau aigkish, ni Apajuiyai dekaskeapi tiuwa duka yamaikish etsegtú awai.
HEB 11:5 Enocshakam Apajuiyai dekaskeapi tau asamtai, Apajuí iwaakunak nayaimpinum jukiuwai, dutikamtai aents aidauk nuigtuk wainkachajui. Chicham agagbauwa nuwi: Enocak eke Apajuí juwacham pujusag, Apajuinak shiig awajkauwai, tawai.
HEB 11:6 Wagki Apajuiyai dekaskeapi tabau atsugkagtaigkik, nigka shiig awagmamaitsui, nunin asamtai niina adijkatatus wakegaidauk, dekas Apajuik pujawapita tuja niijai ijutkau atatus egaidaunash akiskek idaichauwapita tabaujiya nu ajumainai.
HEB 11:7 Apajuiyai dekaskeapi tabauwai Noeshkam, wají nagkaemaktinun eke wainchayatak Apajuí ujakam niina umijak arcan najanauwai ni patayí aidaujai uwemjatnun. Nunú Apajuiyai dekaskeapi tau asa Noé uwemai ashí aents dekaskeapi tuinachuk bakumakajui, aatus nunikua dui dekaskeapi tabaujin pegkeg wantinkauwa dui ni jukitnujig ajusui.
HEB 11:8 Apajuiyai dekaskeapi tabauwai Abrahamak Apajuí untsuam umijak jiinkiuwai, ni nugkan aminu atí tusa suwam atina nuwi weak, tuwí jegattawa nunak dekatsuk.
HEB 11:9 Apajuiyai dekaskeapi tabauwai, Abraham Apajuí nugka anagkuamua nuwi, tuke ikayajai betek duwapen aakmak pujusui. Nunisag nunikajui Isaac, tuja Jacobshakam, ditan Apajuí nugkan amastajame tusa anagkuauwa nuwi batsamsag,
HEB 11:10 nunak Abrahamak nayaimpinmaya yaakat makichkish wajukmainchau Apajuí shiig anentaimtus umikbauwa imanui pujustinun dakak nunikui.
HEB 11:11 Dekaskeapi tabauwai Abrahamshakam muuntuch wajasuitak Sarashkam kaga ai senchin jukiuwai uchig aidau ajuttinme tabaunum, wagki Apajuí anagtuama nunak betekap umiktatua tau asa.
HEB 11:12 Abrahamak jamainjin jegas pujai ni nuwe makichkiuch uchigmakua nuiya weantu aidau nayaimpinum yaya dekapamainchauwa iman, nayantsa kaamatkaji dekapamainchauwa iman wajasajui.
HEB 11:13 Ashí nunú aidauk Apajuí anagkuamua nunak jutsuk jinawajui. Tujash ditak Apajuiyai dekaskeapi tabauwai atushtanmaya waintayama numamtuk wainkag shiig aneasajui, ditak ju nugka juig tuke ijagka nunin asajaiyap ukuktinaitku batsatji tusa dekaamaidau asag.
HEB 11:14 Nuna aatus anentaimajakajua dui shiig dekaji, ditak nugka pujumainun egainakuap nunijakajuita tusa.
HEB 11:15 Wagki ditá nugkeen ukukiu aina nuna anentaimtú pujuinakug waketmainuk tsawantak ajujakajui.
HEB 11:16 Tujash ditak nugka dekas pegkeja nuna wakegajakajui, duka nayaimpinum awa nuna. Nuadui Apajuí dita pujusagtinnak yaakat nayaimpinum awa nuna umigkauwai, dutikau asa Apajuik: Juka midau ainawai tutanmak datsamatsui.
HEB 11:17 Dekaskeapi tabauwai Abrahamak, Apajuí dekapsatatus, uchijum Isaac maam emematjita tamash, ni uchijí makichkiuchia nuna maa Apajuí ememattatus wakekauwai, Apajuí Abrahaman anagkuak:
HEB 11:18 “Ame weantu aidauk Isaac akiiamua nuiya agtinai”, tibau ayatak.
HEB 11:19 Abrahamak, Apajuik senchigtina ibau asampap aents jakaunash inanmainaita tabaunum, uchijí mauwaitak Apajuí ataktú inaantukim jukiuwa numamtina nuna iwainawai.
HEB 11:20 Apajuiyai dekaskeapi tau asa Isaac, niina uchijí Esaun tuja Jacobnashkam atak agtina nuna pegkeg pujutnum yumigsauwai.
HEB 11:21 Apajuiyai dekaskeapi tabauwai Jacob jakattak pujus, makí makichik José uchijí aidaun ditá pujutjin agtina nuna pegkegnum yumigsauwai, nunik ushujutaijin ichichmamas wajas Apajuin emematiuwai.
HEB 11:22 Apajuiyai dekaskeapi tabauwai Joseshkam jaak: Israel aidau Egipto batsatu jiinjatnun tiuwai, nuniak: Mina ukunchjuk jujutkitin atajum tiuwai.
HEB 11:23 Apajuiyai dekaskeapi tabaunum Moisés akiinamtai, apají dukujijai kampatum nantu uukajui uchi pegkejuch asamtai, nuninak rey uchi kajegtajum tibaunash ishamkachaju ainawai.
HEB 11:24 Apajuiyai dekaskeapi tabauwai Moisés muun wajasash: Faraogka nawanjin uchijiyaitjai tumamtanak dakitujakui.
HEB 11:25 Nigka Apajuí aentsji waitkam batsataidaujai waittsatatus wakegau asa, ujumak tsawantai tudaun takaidaujai shiig aneetnak dakitjauwai.
HEB 11:26 Nigka egiptonmaya wají aidaun juki shiig aneastatus wakeetsuk, Cristo atak taa waittsatnujin betek waittsatatus wakekauwai, Apajuiyap dekas pegkejan sujustatua tusa dekau asa.
HEB 11:27 Apajuiyai dekaskeapi tabauwai, Moisesak Egipto nugkanmaya jiinkiuwai rey kajektinjinash ishamtsuk, ni dutikata tibaujiya nuig ebetmamjauwai Apajuí wainchataiya nunú niijai abaunash dekapeau asa.
HEB 11:28 Moisés Apajuiyai dekaskeapi tabaunum pascua fiestamauwai. Dutikak uwijá numpeen ditá waitijin numpeajajui. Dutikamu asamtai ángel magkagtaushkam, makichkish Israela uchijí iwai aidaunak mautsuk ukukiuwai.
HEB 11:29 Apajuiyai dekaskeapi tabauwai Israel aidauk nayants kapantu tutainum bukunum katimaina nunikag katiajajui. Nuniai Egiptonmaya aidaush ditash nunisag katiagtakamag jakekajui.
HEB 11:30 Apajuiyai dekaskeapi tabauwai, yaakat Jericon siete tsawantai Israel aidau tentea apainak, yaakat peegmagbaujin yumpuntua akaketkajui.
HEB 11:31 Apajuiyai dekaskeapi tabauwai nuwa Rahab daagtin, akiká takatai aajakua duka, tikich aents intimkiu aina nu jinutaish nigka jakachui, Israel dekamatatus yujaunash shiig anentus yajuak kuitamkau asa.
HEB 11:32 ¿Nuigtush wajinak titaja? Gedeogkan, Baracan, Sansogkan, Jefté, David, Samuel, nuigtú tikich profeta aina nuna pachisa tita takunuk tsawantan atsumainaitjai.
HEB 11:33 Apajuiyai dekaskeapi tabauwai tikich nugkanum inamin aidaunash maania depetuk utsaantuawajui, pegkeg aidaunash takasajui, Apajuí anagkuamua nunash jukiajui, nunisag león aidaunash yukagtumainchau emakajui.
HEB 11:34 Jii senchi kegamunum egkeamush esachaju ainawai. Espadayai maata tamash pisajakajui. Kakaakchau aidaushkam wajiu waigkag shiwajijai maaniawag depetkajui.
HEB 11:35 Nuwa patayí jajukbau ataktú inaantuki suujakbaush ainawai. Tujash tikitchakam agkan juwatan dakituidau asag senchi waitkasa maamush ainawai, Apajuiyap wi jakamtaish inaantuki dekas pegkeg pujutan sujustatua tuidau asag.
HEB 11:36 Nuigtushkam tikich aidauk, dushiksa chichajuinam, asutiam, jiju cadenajai jigkajam, achiká egkeam waittsajui.
HEB 11:37 Tuja tikich aidauk kayai tukua tukuakua maamush ainai, serruchui tsupika maamu, espadayai kajegbaush ainawai. Ditak jeenchau yujasag, uwijan duwapen, cabra duwapejai nugkujakajui. Nuigtushkam ujunauch, senchi waitkainam wake besemag batsamajakajui.
HEB 11:38 Nunú aents aidauk shiig pegkeg, aents pegkegchau aidaujai ijunag batsaamainchau aajakajui. Nunin asag senchi waitkainam, jiinag uwegshunum shiyak, mujanum wajag yujas, kayanum waa ayaunum utsanawag kanuu, nuigtú nugka waanum kanuu wajajakú ainawai.
HEB 11:39 Tujash ashí nunú aina duka Apajuiyai dekaskeapi tuinayatak, Apajuí anagkuawajua nunak jukichaju ainawai.
HEB 11:40 Apajuik jutiinun dekas pegkejan umigtamkau asa, ditanak eke susachajui, jutiijai betek pegkeg emakta tau asa.
HEB 12:1 Nuadui jutiishkam, kuashat aents aidau Apajuiyai dekaskeapi tabaujin iwainmamkaju aina dui, ashí iina tutitag awajtama nu, tudau ebetjama awa dushakam idaisagmi, nuniaku ii jegantinnum weaku kuitamamsa wetayama numamtuk wajakagmi.
HEB 12:2 Jesús diisagmi. Niiní nagkamnawai dekaskeapi tabauk, jutii dekaskeapi tabaush niinig nagkatkawai. Jesusak datsantan cruznum achijá maam waitiakush uyumatsuk atsanjauwai, ni shiig aneastinji daka nuna dekau asa, nunik Apajuí ekeemtaiji untsujin ekeemsauwai.
HEB 12:3 Nuadui Jesús nunikbauwa nu anentaimtusjum diistajum, nigki aents tudaugtin aidaunum waittsatjai tumami senchi waittsauwa nunú, nuadui pimpitash pimpitsuk, mijattsuk nemagkatajum.
HEB 12:4 Atumek tudau depetkatasajum maaniajum duka tudaunum mantamnatasajum nuniatsjume.
HEB 12:5 Atumek kajimatkiugme Apajuí, uchijí aidaun chichajak agagbaunum: “Uchijuh, Apu esetamatatus jintinjamkuish dakitjaipa, tuja ni chichagtamkuish mijakaipa,
HEB 12:6 wagki Apua duka jintintui yana ni aneawa nuna, suwimkanash suwawai ni uchijí emamujiya nuna”, tawa nu.
HEB 12:7 Nuadui atumek Apajuí jintinjamu asamtai waitiagme, wagki Apajuik ni uchijí asajin nunak dutijamui. ¿Ya aentsua uchijin pegkejan takastí tayatkush jintintsukesh idaimainaita?
HEB 12:8 Tujash Apajuí ashí niina uchijí aidaun jintinta dutiksag atumnash jintinjamchakuig dekas shiig uchijig ainatsjume.
HEB 12:9 Nuigtushkam jutii uchi aajakuitag duik, iina apají jintinjamu asamtai ajantusa diijakuitji. Nuní nagkaemasa dekas iina Apají nayaimpinmayaya nunú shiig umigmainaitji, pujut jukita tau asá.
HEB 12:10 Jutii apajig ujumak tsawantai jintinjamajakajui dita anentaibaujiya dutiksag. Tujash Apajuik iina dekas pegkeg etamaina nuna jintinjamji, ni pegkegma ibauk atinme tujamu asa.
HEB 12:11 Dekaskenmag nunú suwimak juwag duikik shiijak aneemaitsui wagki najabau asamtai. Tujash nuwi unuimaja inagkeakik, shiig agkan anentaimsa pujuta nunú nuigtú pegkeja duke takatchakam unuimagtatji.
HEB 12:12 Nunin asamtai, atum pegkeg takatnum pimpikiujum nunú nuigtú jinta pegkeja nu nemagtanum kakaakchau wajasujum dushakam, kakanmamsajum ichichmamjatajum.
HEB 12:13 Nuniakjum Cristo wakega duke takaakjum pegkegnum wekaesatajum, pegkeg dutikmain idaijum nu ataktú pegkeg takastajum.
HEB 12:14 Ashí tikich aidaujaish shiig agkan pujustasajum kakanmamsatajum, nuniakjum pegkee pujustajum, wagki nuna nuniachuk makichkish Apu Jesusnak wainkashtin ainawai.
HEB 12:15 Nunin asamtai pepeemtunisjum kuitamdaikatajum makichik aentskesh Apajuí wait anenkagtamujiya nuna megkaekainum. Wagki aents kajegkagta duka ajak jatai asa kuashat aentsun pegkegchau emamaina numamtuk wajau asamtai.
HEB 12:16 Makichkitigmekesh nuwa tsanijimtak pujugsaigpajum, Apajuinu pegkeg aina dushakam dakitjaigpa. Esaú ni iwai asa ashí niinu pegkeg jumainjiya nuna yutaijai yapajiuawa numamtuk wajakaijum.
HEB 12:17 Atumek duka dekagme, Esaú dutika sujukuitak Apajin pegkegnum yumigtusti tukamá dakitam asauwai, nunik senchi buutkush ataktú awagki dutikmainuk atsugsauwai.
HEB 12:18 Israel aidau muja Sinaí antitash antimainnum, jii kegaun, suwe wajasú, ikiyamjau, senchi dasentun adijkajua atumek nunikchaugme,
HEB 12:19 nuigtushkam trompeta shinamush, Apajuí chichaamush antukchaugme. Nunú chichaamun antukaju aina duka: “Apajuik ataktú awenag chichakaigka”, tusag segaju ainawai,
HEB 12:20 wagki katsunmainchau dekapedau Apajuí chichaak: “Ju muja juna kuntinkesh najakuig kayai tukujum nuniachkugmesh nagkikesh maatajum”, tau asamtai.
HEB 12:21 Nunú mujanmag tikima ishamain imaniau asamtai, Moisés chichaak: “Senchi ishamakun kujaajai”, tiuwai.
HEB 12:22 Tujash atumek muja Sión Apajuí tuke pujuuwa nuna yaaktaji nayaimpinmaya Jerusalegka nu adijkaugme, nuig nayaimpinmaya aents aidau shiig kuashat Apajuin emematuinak ijunag ainawai,
HEB 12:23 nuigtushkam nagkamas iglesia aidau ditá daajig papinum agatkamu nayaimpinum ajuina dushakam, Apajuí ashí aentsú juezjiya nunak ijuntug batsatui. Nunisag Apajuí nemajin initaik jinawajua nuna wakaní aidaushkam pegkeemtikawajam awig batsatui,
HEB 12:24 Jesús yamajam chichaman apaak chichamkagtukua dushakam jegantaugme, nuigtush Cristo numpeejai pegkeemtikbau ainag nuuwai Abela numpe aajakua nuna nagkaesau tawa nu.
HEB 12:25 Nuadui kuitamamkatajum Apajuí aujtabauwa nu dakitjaijum. Apajuí jujú nugka jui chicham umiktajum tibaun antugkachaju aidauk, suwimkanak uwemtutskek nagkankachajui. Nuní nagkaemasa jutiik Apajuí nayaimpinum pujus aujtama nu antugchakuik suwimkak pegké uwemtumaitsuji.
HEB 12:26 Nunú tsawantinig Apajuí chichaamujig nugkan pegakui, tujash yamai tujamji: “Ataktuk imá nugkanak pegatsuk, ashí nayaimpinashkam pegaktatjai”, tiuwai.
HEB 12:27 Ju chicham “ataktú” tibauwa dui, ashí tuke achatin najankamu aina juka, tuke atina nujaimpap yapajiam atinaita tusa dekainaji.
HEB 12:28 Tuja Apajuí inamtaijiya nuwi batsamsatnaitag duka makichkish umuchiam achatin asamtai, see tiagmi Apajuí ju pachisa. Nuniaku shiig puyatjusa, eme anentsá emematiagmi, niina shiig awagma dutiksaik.
HEB 12:29 Wagki iina Apajuijiya duka jiijai betek asa, jii apea emegkauwama imanai.
HEB 13:1 Yatsut anendaisa pempeentuniki aneenita duka idaisaigpajum.
HEB 13:2 Aents atumi jeemin minidaush shiig anentsá awaita nunú kajimatkigpajum. Aatus nunidauk dekatsuk ángel aidaun shiig anentus jukiajush ainawai.
HEB 13:3 Aents achikam egketaidaush, atumin achigmakagmatai egkeemainaitam nu anentaimsam yaigtajum. Aents waitkam batsataidaushkam, atumshakam dutiksaik waitkam amainaitjum nu anentaimsajum yaigtajum.
HEB 13:4 Atum nuwenamua duka eme anentsajum diistajum, nuniakjum pegkegchau takagdaitsuk pujustajum; wagki tsanijimtanak yujajuidaun nuigtú nuwennaitak tsanijimtan yujajuidaunash Apajuí suwimkan susatnai.
HEB 13:5 Kuashat kuichik ajuttí tusagmek anentaimtú pujuigpa, ajutjamaina nujaig shiig aneasjum pujustajum. Wagki Apajuí chichagtamak: “Makichkish idaisashtinaitjame”, tujabiu asamtai.
HEB 13:6 Nuadui jutiik shiig kajintsá: “Apui mina yainta duka dui puyatatsjai. Aents aidau mina dutijumaina nunak ishamatsjai” tumainaitji.
HEB 13:7 Adeagtajum atumin Apajuí chichamen jintinjamajakú aina nu, nuniakjum wajuk pujusaya dekaskeapi tiu ainawa nunisjumek atumshakam ainjatajum.
HEB 13:8 Jesucristuk yauwa duish, yamaiya juish, atakea duishkam tuke nuninuk atinai.
HEB 13:9 Tikichin antushtain pachimak jintinkagtuidauk antugkaigpajum. Dekas Apajuí wait anenjamjauwa nuanuig anentaimin ichichmamjatajum, yutai pachisa tibauwa nu umiktasa yujagtsuk, wagki nuna nunidauk makichkish pegkegnak jukichaju ainawai.
HEB 13:10 Jutiik makichik altar ajutjamji, nuiyanak Apajuí ememattasa carpa jegamkamunum takaidauk yumainchau ainawai.
HEB 13:11 Wagki kuntin maamua nuna numpeenak sumo sacerdote juki Apajuin anentag suwinak jega pegkejam Apajuí ememattainum waijakui tudaujun tsagkugtugti tusag, dutikawag nejeenak jukiag yaakta ukukí apejakajui.
HEB 13:12 Nunisag Jesuschakam yaakta ukukí waitus jakauwai, niina numpe ukaejamunum aents aidaun pegkeemtikata tau asa.
HEB 13:13 Nuadui Jesusjai weenaku, ukukiagmi, nuniaku aents aidau dakitjag yaakta ukumtikiag waitkasajua nunisaik iishkam waittsagmi.
HEB 13:14 Jutiinak ju nugka juig makichik yaakat ii dekas tuke pujustinuk atsugtamui. Ayatak egainaji yaakat atak atina nu.
HEB 13:15 Nuadui Jesucristo yaimpasmatai Apajuí emematiagmi, duka iina wenin niina daaji adaisa ememattkuik iina Apajuiji wají anentag sumaina numamtuk awagmainag nuuwai.
HEB 13:16 Kajimatkigpajum, pegkeg takaaku tikichjaish pempeentunikiaja yainita duka. Wagki nunú anenjauch sudaibau aina nuuwai, Apajuin shiig awagmaina duka.
HEB 13:17 Apajuí chichame etsejin aina nu umigkatajum, nuniakjum ditai sumimkatajum, wagki dita atumin diigmaku asagmatai, ditak Apajuí eemtinish etsegtugmaktin asag, shiig aneas takastinme, nu nuniachbau ataik atumnash shiig yaimpakchagtatui.
HEB 13:18 Jutii pachijattsajum Apajuí aujkagtustajum, pegkeg anentaibau ajutjamu asamtai kajintsá ashí pegkeg aina duke takaaku pujustasa wakegainaji.
HEB 13:19 Apajuí mina pachittsajum imá senchi aujtugsatajum, wishakam wamak ataktú atumiin taan wainkatjime.
HEB 13:20 Apajuí shiig agkan pujutan sukagtina nu, iina Apuji Jesús aents uwigjin shiig kuitamna imana nu jakaunak inankiuwai, niina numpeejai ajumaish tuke atinun chichaman apakua nuna,
HEB 13:21 nunin asa atumnash pegkeg etamtinme ashí ni wakega duke takasminjum. Nigki ashí jutiinash ni wakega duke takamain etamti, Jesucristo dutikamua dui. ¡Imá Jesucristua duka tuke ememattai atí! Aatus atí.
HEB 13:22 Yatsug aidauh, segajime ujumak chicham atum ichichmamainun agatjamjim nuna shiig kuitamas antuktinme tusan.
HEB 13:23 Atumesh dekaatajum: Yatsug Timoteo achikam egkeemaya duka yamaik jiinkine, wamak taamtaig wi atumin wainkatasan minakun ayaktatjai.
HEB 13:24 Ashí Apajuí chichamen etsejin aina nu, nuigtú ashí Apajuí nemajin pegkejam aina dushakam kumpamjutuatajum. Yatsug italianmaya aidau atumnash kumpamjamainawai.
HEB 13:25 Apajuí atumnash ashí wait anenjamjatnume.
JAM 1:1 Witjai Santiagoitjai, Apajuí nuigtú Apu Jesucristo inakegaitjai. Israela uchijí doce aajakua nunú weantutijum pampagjum, ashí nugkanum batsatutigmin kumpamjime.
JAM 1:2 Mina yatsug aidauh, senchi shiig aneastajum makí makichik dekapkagtamu aina nu igkuakjumesh,
JAM 1:3 wagki atumek dekagme, dekaskeapi tabaugmia nu dekapsamu atata dui, emamkesa katsunjá nagkaeta nu unuimajume.
JAM 1:4 Tujash kakanmamsatajum emamkesa katsunta nui shiig katsuagtasajum, nuniku asajum imagnisa pujakjum, nuigtú nunimainuk atsugtamtinme.
JAM 1:5 Atum ainajum anuiya dekaachmin dekapeauk, Apajuin segatí, dutikamak ni susattawai; wagki Apajuik ashí wakejus suwawai makichkish dakittsuk.
JAM 1:6 Tujash dekaskeapi tabauwai segatí, makichkish utujimtsuk; wagki utujima duka nayants tsukatak wajukea numamtuk wajawai, nuniau asa dase umpuam mai waket wajama nuniawai.
JAM 1:7 Nuna nuniauk, Apu Jesús makichik wají sujamunakesh jukittajapi tusag anentaimaitsui,
JAM 1:8 wagki yamai makichik wajiin anentaimtawai, nunik kashin tikichin, nunin asa niina pujutjinig ebetmamjauchui.
JAM 1:9 Yatsut imanchauch anentamua duka, eme anenmamainai, Apajuí iman emamu asa,
JAM 1:10 untsu wiyakchak, eme anenmamainai imanchauch emamu asa, wagki wiyakchak, dupá yagkují megkaega numamtuk wajaidau asamtai.
JAM 1:11 Etsa jiinak senchi sukuam, dupa kagagmataig yagkujig kakegame, nunik niimé pegkejuch aajakuk megkagama numamtuk, wiyakchak ashí ni sujutaiji aidaunak megkaekatnai.
JAM 1:12 Shiig aneastinme aents utugchatan depetuk nagkaeguk, wagki utugchatan depetkau aina duka Apajuí pujut tuke atinun niina aneedau aidaun anagkuauwa nuna jukiagtinai.
JAM 1:13 Makichkitigmekesh pegkegchau wakegamu ajutjamkuig, Apajuiyap jutijawa tiigpajum; wagki Apajuik pegkegchau takastasag anentaimchauwai nuigtush pegkegchau takastí tusash tuchauwai.
JAM 1:14 Makí makichik pegkegchau wakegaina nunak, niina iyashí senchi wakegamua nu wagajam nuniawai.
JAM 1:15 Nunú iyash pegkegchaun senchi wakega nui tudauk najaneawai, nunika tudau takasbaunum, jaamu jegawai.
JAM 1:16 Mina aneetaig yatsug aidauh, tsanumajaigpajum.
JAM 1:17 Ashí pegkeg wainkauch juamu nuigtú ashí don pegkeja duka yakiya taawai, iina Apají nayaimpinmaya etsantin aidaun najankauwa nuiya; nunú aidau yapajinin nuigtú bushapau weena nigka nuninchauwai.
JAM 1:18 Nigka, niina waketajinig, chicham dekaskea dui pujutnak sujamsauwai, ni najankamu aina nuiyag dita dekatkau najankamua nunin agtinme tujamu asa.
JAM 1:19 Nuadui mina aneetaig yatsug aidauh, ashí aents aidauk chichaman shiig antumainai, nuniak waugtuk aimchau nuigtush wamak kajechu amainai;
JAM 1:20 wagki kajea duka, Apajuí eemtinig pegkejan takaak nuniatsui.
JAM 1:21 Nuadui, ashí pegkegchau nuigtú kuashat pegkegchau ayá duka idaisatajum, nuniakjum atum chicham antukuitjum nu emematsuk umiktajum; wagki nuuwai senchigtin atumin uwemtijamaina duka.
JAM 1:22 Tujash chicham tawa dutiksagmek takau atajum, ayatak antin aigpa, atumek pempeentuniki tsanunijaijum.
JAM 1:23 Tujash chichaman antayatak nuna umiatsu duka, aents espejonum niimama nujai betekai,
JAM 1:24 wagki niimen wainmamkauwaitak, weak kajimatui, wajuku niimtinna wainmamkae nuna.
JAM 1:25 Tujash ni antukbaujin kajimattsuk, chicham umiktin agkanbaetan sukagtin pegkeja nuna shiig wainak dutiksag umiauk, ni dutikamujin shiig aneastinai.
JAM 1:26 Makichkikesh atum ainajum anuiya Apajuí umigna iman anenmabiatak, chichaman emetuachuk, nigki anentain tsanuak tu wekaewai, nunin asa ni Apajuin umigjai tawa duka wainkayai.
JAM 1:27 Dekas Apajuí puyatjusa umigbau, nuigtú Apajuí iina Apají emtinish pegkegchaujish atsugbau iwainmabauwa duka juuwai: bitaik aidau, nuwa waje aidau waituinakui yayamua nu, nuigtú ju nugkanmaya pegkegchau aina dushakam takatsuk pujamua nunú.
JAM 2:1 Mina yatsug aidauh, Jesucristo iina Apuji dekas imana nui dekaskeapi tautigmek, makichkia nu eme anentakjum tikichia duka junik diimaitsugme.
JAM 2:2 Anentaimsagmi, atum ijunja batsatjumin makichik wiyakuch jaanch pegkejan iwagmamag anillo oro patakumau wayawaintai, nuniai makichik ujunauch jaanch mamusuchin nugkuaju dushakam wayawaintai,
JAM 2:3 nuniakuig jaanch pegkejan iwagmama nunú eme anentsajum: “Amek, ekeemtai pegkeja jui ekeemsata” takum, ujunauchia duka: “Amek anui wajastá, nuniachkumesh wi eketag jui tantam nugká pujustá” tumainaitjume.
JAM 2:4 ¿Nunú atumek etegdaiyajum nu, pegkegchau anentaiyai dutikdaiyatsjumek?
JAM 2:5 Mina aneetaig yatsug aidauh, antuktajum: ¿Apajuí etegkachukai ju nugkanmaya ujunauch aina nuna, dekaskeapi tabaunum wiyakuch agtinme, nuninak niina inamtaijiya nuna niina aneen aidaun anagkuauwa nuna jukitnume tusa?
JAM 2:6 Tujash atumek ujunauch aina duka inatsagme. ¿Wiyakuch aina duchaukai wainak waitkagmainak nuigtush ditak achigmakag jujamkiag chicham epegtainum ejetamaina nu?
JAM 2:7 ¿Dita ainatsuak Cristo eme anentsa chichagtai atum nemagjum nuna pegkegchaun chichajuina nu?
JAM 2:8 Chicham umiktin dekas iman agagbauwa nu dekaskenum umiakjum: “Tikich aidaush amek anenmamsam aneeta”, tawa nu umiakjumek pegkeg takagme.
JAM 2:9 Tujash atum makichik aents eme anentakjum tikich junik diiyakjumek, tudau takaagme, aaja nuniau asajum chicham umiktina nu umichu weagme.
JAM 2:10 Wagki makichik aentskesh chicham umiktina nuiyan ashí umiayatak, makichkinum dewakug, chicham umiktina nuiyanak ashí umikchauwa nunin weawai.
JAM 2:11 Wagki: “Tsanijinawaipa”, tiuwa duke: “Magkagtuawaipa” tiuwai. Nunin asamtai tsanijimchakmesh magkagtakmek, chicham umiktina nu intimjame.
JAM 2:12 Atum chichajum dutiksagmek takastajum, chicham umiktin agkanmitkagtina nujai dekajam atinush wajukmaina ainawa nunisjumek.
JAM 2:13 Wagki suwimak atina duik, wait anenkagtugchajuk, dutiksaik wait anentam achagtinai; wait anenkagtamua nuuwai suwimak jumaina nuna wagagsauwa duka.
JAM 2:14 Mina yatsug aidauh, ¿makichik aents dekaskeapi tabau ajutui tayatak, takaamujin iwainatsu dusha wajinma yaimainaita? ¿nunú dekaskeapi tajai tawa duká uwemtikmainait?
JAM 2:15 Makichik yatsug nuniachkush makichik umaakesh nugkumainji atsuju nuigtú tsawantai yuwá pujumainjish atsujaig,
JAM 2:16 atum ainajum anuiyatijum chichagkujum: “Shiig aneasam wetá, nunikam jegaam jaanch nugkujam, yujumak shiig yuwata” tumainaitjum dusha, ¿wajinma yaimainaita?
JAM 2:17 Nunisag dekaskeapi tabauwa dushakam, takaamu atsakug jakauwa numamtinai.
JAM 2:18 Tujash tikichia nu chichaak: Aminak dekaskeapi tabau ajutjame, nuniai mina takaamu ajutui, iwaintugkakia dekaskeapi tabaugmia nu ame takatsuk, nuniamin wi iwaintuktagme mina dekaskeapi tabaujua nuna wi takaamug aina nujai.
JAM 2:19 Ame Apajuik dekas makichki tame duka, pegkeg tame; nunisag iwanch aidaushkam dekaskeapi tuinawai, nuniayatak ishamak kujainawai.
JAM 2:20 Anentainkachuh, ¿dekatsmek dekaskeapi tabauwa nu takaamu atsakug wainkaya duka?
JAM 2:21 Iina apají Abraham aajakua nunak Apajuí pegkeg diisui, niina uchijí Isaacan maa ememattatus altarnum patainiuwa dui
JAM 2:22 ¿Wainjumek dekaskeapi tabauwa nujai dutikauwa nu, nuniku asa dekaskeapi tabaujiya duka ni dutikauwa dui pegkeg diijam asauwa duka?
JAM 2:23 Aatus uminkauwai Apajuí chichame agagbauwa nui: “Abrahamak Apajuiyai dekaskeapi tujakui, nuniau asamtai pegkeg diisui”, nuigtush “Apajuí kumpají” tutai aajakui tawa nu.
JAM 2:24 Wainjumek, aentsuk ni dutika dui pegkeg diyam awa nu, ayatak dekaskeapi tabauwa nujaichu.
JAM 2:25 Nunisag nuwa akiká takatai Rahab aajakua dushakam, dekamatatus yujaun yajuak ikanag, tikich jintanum ishiakua dui Apajuí pegkeg diyam asauwai.
JAM 2:26 Wagki wakan jiintaik iyashik jaawai, numamtuk jutii dekaskeapi tabaujiya nu, pegkeg aina nuna takamtijamchakuig jakauwa numamtin ainaji.
JAM 3:1 Mina yatsug aidauh, atum ainajum anuiyatigmek kuashat jintinkagtin atasagmek wakeyigpajum, wagki aents chichaman jintinkagtayatak betek umikchaju aidaun imá senchi suwimkan susatin asamtai.
JAM 3:2 Ashí aentstik kuashat dewau ainaji, tuja makichik aentskesh ni tabaujiya nuna dewachuk, nunuwai dekas aents pegkeja duka, ashí niina iyashinash kuitamaina nu.
JAM 3:3 Caballo aidauk itagkatnuji wenin apututaiyai umigtukti tusa, dutika ashí iyashí depetuka emataiyai.
JAM 3:4 Nuigtushkam barco aina nu anentaimsa diistajum; shiig muun akushkam dase senchi umpugká juwam auwai, dutiktaish timonji shiig piipich aig anunta nu tuwí wakegawa nui emauwai.
JAM 3:5 Antsag iina iyashinishkam idaik piipichi, tujash wají muun aidau kuashat dutikmainun chichauwai. Anentaimsa diistajum ikam muunta nuna jii yantsaji peemtuk ekemamaina imanai.
JAM 3:6 Nuigtush idaik makichik jiiya numamtinai, nunin asa ashí pegkegchau ju nugka juiya aina nuna takamtijamji. Iina iyashii aina nuwi awai, nuninaitak ashí iyashnak pegkegchau etugtamji, nuigtush jii apejata numamtuk wajau asa suwimak tuke atina nuwi ejetami ashí iina pujutinash emegkaumainai.
JAM 3:7 Aents aidauk dekainawai ashí kuntin kajen aidau, chigki aidau, dapi aidau, nuigtú nayantsanmaya kuntin aidau unuinatnak;
JAM 3:8 tujash makichik aentskesh idainak unuinamaitsui. Duka makichkish itagmaitsui, tsegas jataiya iman piyak au asa.
JAM 3:9 Nunú idaiya duik Apajuí iina Apajiya nu pegkeg chichagji, nuaduik aents aidaush pegkegchau chichajuinaji, Apajuí niina niimejai betek najanamu aina nu.
JAM 3:10 Makichik wenua duik pegkeg chichagdayamu nuigtú pegkegchau chichagdayamush jiinui. Yatsug aidauh, duka nuninuk amaitsui.
JAM 3:11 ¿Makichik yumi pukuni jiina nuish, yumi pegkejash yapaujaish jiinmainkaih?
JAM 3:12 Mina yatsug aidauh, ¿higuerash aceitunanash nejemainkaih nuniachkush uvash higonash nejemainkaih? Nunisag yumi pukuni yapakú jiina nuig yumi pegkejak jiinmaitsui.
JAM 3:13 ¿Atum ainajum anuish, yaita yachash nuigtú dekaush? Nuninuk shiig pujak, emematsuk pujus ni yachajin takaamujiya nuna iwainakti.
JAM 3:14 Tujash atum tikichdau diisá anentaimin kajeakjum shiwagmagata tabaunum wají dutikakjumek, eme anenmamainuk atsugtamjume, nuigtushkam dekaskea dusha atsugtamui.
JAM 3:15 Wagki nu yachameta duka Apajuinumia minatsui, nu yachametak nugkanmayayai, aentsú anentaimtaijiya nu nuigtú Iwanchdauwa nu.
JAM 3:16 Tuwí tikichdau diigsá kajejamu nuigtú shiwagmagamu awa, nuwi pachimdaebau nuigtú ashí pegkegchau aidau takaamushkam awai.
JAM 3:17 Tujash yachamet Apajuinumia ajamu aidauk, dekatkau pujutji ayatak pegkeg, nui tutitag wajachu, shiig awajkagtin, kakagchauch, wait anejatin wajasú, pegkeg aidaun takau, betek anenkagtin, nuigtú waitjuchu ainawai.
JAM 3:18 Agkan pujutnum kakanmamaina duka, agkan pujusá pegkeg takasbauji jukitnujin takaak nuniawai.
JAM 4:1 ¿Tuwiya maaniamu aina dusha minawa nuigtú atumek pampandayamu aina dusha? Duka atum pegkegchau wakegakjum anentaimin waitiajum duwi aniagme.
JAM 4:2 Atumek makichik wají wakegakjumesh juwatsjume, tikichi wajiiji diigsajum kajeagme nuniakjum magkagtagme, nuniakjumesh atum wakegamuk jumainchau dekapeakjum jiyaniagme, nuniakjum maaniagme. Tujash juwatsjume Apajuí segachu asajum.
JAM 4:3 Segakjumesh juwatsjume, wagki pegkegchau anentaiyai segau asajum, atum pegkegchau wakegamu dutikata tau asajum.
JAM 4:4 ¡Aents umichu aidauwah! ¿Atumek dekatsjumek ju nugka juiyan imá senchi wakejuidauk Apajuin shiwaji wega duka? Makichik aentskesh nugkanmaya kumpají atatus wakegauk, Apajuí shiwaji najaneawai.
JAM 4:5 ¿Nuniachkugmesh agagbaunum tawa duka wainkag anentaimtajum: “Apajuí Wakanin amasua nu shiig senchi akastamas wakejutpawai tawa duka?”
JAM 4:6 Tujash ni anentag sukagtamu imá muuntai. Nuadui agagbaunum: “Apajuik emebau aidaunak dakitus diyawai, tujash imanchauch aina nuna wait anentawai” tawai.
JAM 4:7 Apajuiyaig sumimkatajum; Iwanch tsanugmakuish antugkaigpajum, nuniagminig weak ukugmaktatjume.
JAM 4:8 Apajuí adijkatajum, nuniagmin niishkam adijtamkattawai. Tudau aidauwah, tudau takatak idaisatajum; atum Apajuí anentaimtayatkujum nugkanmayash anentaimtu wajautigmek, nuninuk idaikujum dekas imá Apajuik umigkatajum.
JAM 4:9 Shiig aneasa dushit batsamtutsuk atumi tudaujum tsagkugtugta tusajum Apajuí segakjum wake besemag batsamsajum senchi buuttajum.
JAM 4:10 Nuniakjum Apu Jesús wika shiig tudauwaitjai titajum, tajumin ni dekas aents iman etamtatui.
JAM 4:11 Yatsug aidauh, atumek pempeentunisjumek pegkegchau chichagdaikaigpajum. Ni yachin pegkegchaun chichajuk nuigtú yachin chichaman patatuk, chicham umiktina nuna pegkegchaun chichajui, nuigtush chicham umiktina nuna chichaman patatak tawai, tujash chicham umiktina nunú chicham patatkumek chicham umiktina nuiya umitsuk juez weakum tame.
JAM 4:12 Chicham umiktinun sukagtusua nu nuigtú jueza duka makichki, uwemtan sukagtumain nuigtú suwimkan sukagtumaina nu. Tujash amesh, ¿ya asamea tikichish chichamash patatush wekaeme?
JAM 4:13 Yamai atum ju tinu aidautijum antuktajum: “Yamai nuniachkuish kashin nu yaaktanum weagmi, nunika nui makichik mijan pujusá sujaku kuichik jukiagmi” tajume,
JAM 4:14 kashinish tsawantash wajuku atatua duka dekachiatkujum. Wagki, ¿wajimpaita atumi pujutjumish? Atumek tuke yujagmia nunin ainagme, yamaikik wantinak machik asa megkaegama nunin.
JAM 4:15 Duka tutsuk aaja tumainaitjume: “Apu Apajuí wakegakui pujuinakuik, ju nuniachkuish nunú dutikawagmi” tumain ainagme.
JAM 4:16 Tujash duka ememasa chichaakjum tu yujagme; ashí nu ememasa tu wekaebauk pegkegchauwai.
JAM 4:17 Pegkeg takata nuna dekayatak takaatsu duka, tudau takaak nuniawai.
JAM 5:1 Yamai atum wiyakuch aidautijum antuktajum. Buuttajum nuniakjum senchi untsumtajum, wajiijum megkaejamtai kuashat waittsagtin asajum.
JAM 5:2 Atumin wajiigmik mamukaje, jaanchjum aidaunash mamuk amutjamkaje.
JAM 5:3 Atumi orogmik, nuigtú kuichkigmishkam pushugkaje. Nunú pushugkaja nu atum bakumatnunak iwaintugmawai. Nunú atumi iyashminak jiiyai apemaina numamtuk awajtugmaktatui, duka tsawan aidau nagkaniagtina dui dutikam atin ijumjau asajum.
JAM 5:4 Aents aidau ajaka juwinak atumi ajagmin takasú aidau akikchamu untsumainawai, atum tsanujá akitsuk idaisamu asag; nunú juukaju aidau untsumaina nuna Apu ashí senchigtina nu antawai.
JAM 5:5 Atumek ju nugka juig shiig aneasa pujusugme atumin shiig awatama nu takaakjum, nunin asajum tsawan jegakui kuntin maam atin duwegama imanikugme.
JAM 5:6 Atumek aents bakú ainagme, nuigtush utugchatji atsujush main ainagme makichkish ayamjumamainchau aina nu.
JAM 5:7 Nuadui yatsug aidauh, Apu Jesús taatnuji emamkesa dakastajum. Diistajum ajakan ajakbau wajuk dakawa yumi yutugti tusa nuigtushkam nugka pegkejan nejepati tusa.
JAM 5:8 Nunisjumek atumshakam ebetmamjatajum, nuniakjum emamkesjum dakastajum Apu Jesús minitnuk tikiju wajasú asamtai.
JAM 5:9 Yatsug aidauh, pempeentunisjumek tutitag chichagdayá pujuigpajum, bakumaijum. Niiyai jutii juezjig, ni taatnuk namput wajaschae.
JAM 5:10 Mina yatsug aidauh, atumshakam duik profeta aidau kuashat waituinakush, emamkemas pujusag, Apu Apajuí chichamenak etsejujakajua nuniktajum.
JAM 5:11 Nuadui jutiik shiig anentuinaji waituinakush ichichmamag katsuntuina duka. Atumek antukuitjume wajuk Job waitiakush katsunjauwaita nu, nuigtú inagnamunmash Apu Apajuish wajuk dutikauwaita nu, Apu Apajuik wait anenmain diijatak wait anenkagtinai.
JAM 5:12 Tujash ashí juna nagkaesauwa duka, mina yatsug aidauh, atum dutikatnuk Apajuí adaisagmek tiigpajum, nayaimpikesh, nugkakesh nuigtú tikich wají aina nu adaisagmekesh. Dutikatjai takumek “ehé” tita, nuigtú dutikashtatjai takumesh “atsá” tita, bakumamainnum jegantaijum.
JAM 5:13 ¿Atum ainajum anuiyash waitiaush atsuak? Nuninuk Apajuí ausati. ¿Dakujus pujaush atsuak? Nuninuk kantamak Apajuí emematti.
JAM 5:14 ¿Atum ainajum anuiyash jaush atsuak? Nunin akuig iglesianmaya anciano aidau untsuktajum, dutikam Apu Jesusa daajin aceiteyai buuknum ukatuk Apajuí segattinme.
JAM 5:15 Dekaskeapi tabauwai Apajuí augbauwa nu etsagagtatui jaa nunak, nunikmatai Apu Jesús inankittawai, tudau takasú akush tudauji tsagkujamu atatui.
JAM 5:16 Nuadui tudaujum aidaush pempeentunisjumek etsegtumaktajum, nunikjum pempeentunisjumek Apajuí aujtunistajum etsagagbau aminjum. Aents pegkejan takauwa nu Apajuí augbau imá senchigtinai nuniau asa kuashat dutikmainai.
JAM 5:17 Eliasak jutii aents aidauti kakakchamu ajutkagtuina juninuk aajakui. Tujash shiig senchi Apajuin segauwai yumi yutugchati tusa, dutikam kampatum mijan, nuigtú seis nantu yututsuk asauwai.
JAM 5:18 Nunitai ataktú Apajuin segauwai, dutikam yumi yutugmatai ajak nugkanum tsapainuk nejekajui.
JAM 5:19 Mina yatsug aidauh, makichkish atum aina anuiya dekaskea nuna idaiyas wekaegun tikichia nu awakeakug,
JAM 5:20 dekaati nuna tunamajun awakea duka, jamainun uwemtika nuna, nuigtú kuashat tudau aidau tsagkugna nunashkam.
1PE 1:1 Witjai Pedro, Jesucristo apostoljiyaitjai, atum Apajuí etegjamu aidautijum nugkem ukuakjum pampagjum tikich nugkanum Ponto, Galacia, Capadocia, Asia, Bitinia aina nui batsatutigmin kumpamjime,
1PE 1:2 atum Apajuí iina Apají duik nagkamsa anentaimtusbauwa dutiksaik etejamu aidautigmin. Atumnak Wakania nujai pegkeemtijabiajui umigtuktinme tusa, nuigtú Jesucristo numpejai pegkeg etamkata tau asa. Anenjauch wait anenkagtamu nuigtú agkan pujamu kuashat ajutjamtinme.
1PE 1:3 Emematiagmi Apajuí, nuigtú iina Apuji Jesucristo Apajiya nu, ni shiig senchi wait anenkagtau asa Jesucristo jakau nantakiuwa dui ataktú akiinau ainagme, pegkeg ajutjamtina nuna dakastinme tujamu asa,
1PE 1:4 nuninak besemainchau, tsuapaemainchau, kagamainchau nayaimpinum jutiinu ukugtamsamu awa nuna jukitnume tujamu asa.
1PE 1:5 Atum Apajuiyai dekaskeapi tabau ajutjamaina dui niina senchijin kuitamjamui, uwemat umikbau awa nuna jukitnume tujamu asa, nunak tsawan nagkanbau atina dui iwainaktinai.
1PE 1:6 Nuadui atumek shiig aneajume, nunimainaitkuig yamai ujumak tsawantai kuashat niimtinai waitkasa dekapsamu amainaitjume.
1PE 1:7 Atum aaja waitiamunum Apajuiyai dekaskeapi tusa anentaimainajum nu dekapsamu asamtai, Jesucristo taatna duwi dekas eme anentsá diyaaku, nuigtú ememattsa diyaam atinaitjume. Oronum pegkegchau peetkau ajapna ayatak orok juwakti tusa, jiiyai apeamu shiig pegkejama nuna nagkaesau wegawai atum Apajuí dekaskeapi tajum duka.
1PE 1:8 Atumek Jesucristo wainkachu ayatkujum aneagme; yamaikish wainchayatkujum dekaskeapi tabauwai shiig aneakjum tumainchau imana nui dakujagme;
1PE 1:9 wagki atum dekaskeapi tajum nu inagnamunum atumi wakanim aidau uwemtijatna duka tikiju awajsau asajum.
1PE 1:10 Profeta aidau etsegkajui atum anentag jukitnume tibau aajakua nuna, nunin asag shiig kuitamas aujujakajui nunú uwemtan pachis dekawagtatus.
1PE 1:11 Cristo Wakaniya nu emtika profeta aidaun dekamtikawajui Cristo waittsatna nuna, nuigtú imanji atina nunashkam; dutikam tsawantan dekawagtatus nuigtú wajukeamunum nuniktinna Wakaní Pegkeji ditai puja dusha mamiktawa nuna dekatasag wakegajakajui.
1PE 1:12 Tujash Apajuí dekamtikawajui ditanu achatnun jutiinu atina nuna; nunú aidaun etsejujakajua nuna yamai yamajam chichaman nayaimpinmaya Wakaní Pegkeji awemamua nuna senchijin etsejuinawai. Nunú wají aina nuna ángel aidaush wainkatatus wakejuinawai.
1PE 1:13 Nuadui umintsá pujustajum atum dekajum nujai, nuniakjum ebetmamjatajum. Nuniakjum Apajuí wait anenjamu asa Jesucristo wantintai sujamsatna nunú ashí kajintsá dakastajum.
1PE 1:14 Uchi shiig umina iman asajum, eke Apajuí dekachbaunum pegkegchau wakegamu takajakuitjum nunisjumkek pujusaigpajum.
1PE 1:15 Duka nunitsuk, atumin untsugmaku pegkegma ibau asamtai, atumshakam pegkejam atajum, ashí atum wajuk pujagme nuishkam,
1PE 1:16 wagki agagbaunum: “Wi pegkejam asamtai, atumshakam pegkejam atajum”, tawa dui.
1PE 1:17 Atum Apajuí, Apawah takugmek, makichik aentsun imá senchi wait anentsuk, aents aidau wajuk dutikawaje dutiksag betek suuwa nu, ashí tsawantai ju nugka jui pujuttajum dui puyatjusjum umigkatajum.
1PE 1:18 Atumek atumi muunjum wainak pujujakajua nu pujut jukiu asajum nunisjumek batsatutijum agkanmitkamuitjum duka dekagme, wají besen aidau oro, kuichik aina nujaichu,
1PE 1:19 Cristo numpe shiig pegkeg uwig makichkish tsuwatji atsugbau nuigtú tunamagchau aajakua imana nu,
1PE 1:20 yaunchuk nugkash najaneatsaig nunikti tibau aajakui, tujash yamai tsawan nagkanbauwa jui atumi anempau asa wantintugmake.
1PE 1:21 Cristo nunikbaunum atumek Apajuik dekaskeapi tajume, niina inanki nuigtú ememattai awajsauwa nui, nunin asamtai atumek dekaskeapi takujum Apajuinumiag dakagme.
1PE 1:22 Yamaik atumek dekaskea nu umidau asajum pegkemtikbau ainagme, yachi aidaujai dekaskenum aneenitnume tabaunum, nuadui atumek pempeentunisjumek anentai pegkejai aneenitajum,
1PE 1:23 wagki atumek ataktú akinau ainagme, jaka besen aina nujaichu, Apajuí chichame jachau iwaku tuke auwa nujai.
1PE 1:24 Wagki agagbaunum tawai: “Ashí iyashik tuke dupayai, nuigtú ashí aentsú imanjiya duka, dupá yagkujijai betekai. Dupag kagawai, nunitai yagkují iyawai;
1PE 1:25 tujash Apu Apajuí chichamega duka tuke auwai”. Juuwai yamajam chicham atumin etsegkamua nu.
1PE 2:1 Nuadui idaisatajum ashí pegkegchau aidau, ashí waitjamu aidaush, tsanumat, tikichdau diigsá kajet, ashí wainka tsanumkagtut aidaushkam.
1PE 2:2 Nuniakum uchi yamá akiintsau muntsun muntsuatatus senchi wakejuwama numamtuk, Apajuí chichame shiig pegkeja nu wakejitajum. Nujai wakanmin tsakaakjum uwemat jukimnujum.
1PE 2:3 Apu Apajuinu pegkeja nu wakegakjumek.
1PE 2:4 Cristo, Kaya tuke pujuwa imana nujai ijutkau atajum, nunú kaya numamtina nuna Apajuí etegka tikichin nagkaesau emauwai, tujash aents aidauk dakitug idaisajui.
1PE 2:5 Atumshakam nunisjumek kaya numamtin iwaku ainagme, nunin asagmin wakannumag Apajuí ememattai jega jegamkamu pegkegma iman etamjume, Jesucristo jutiiní mantamna iina tudauji utsanjamkau asamtai Apajuí shiig awagma dutiksaik iina wakaní susata tabaunum.
1PE 2:6 Nuadui Apajuí chichame agagbauwa nui: “Diistajum, wi yaakat Siognum apugjai makichik kayan jegá ichichkatin etejamu, shiig pegkeja nuna; niiní dekaskeapi tauk makichkish wainkag juwakchatnai”, tawai.
1PE 2:7 Atum dekaskeapi tautigminak, nunú kaya duka shiig pegkejai; tujash niiní dekaskeapi tuinatsu nuanuig: “Kayá ekenag jegamin aidau, kaya pegkegchauwai tusag dakitjajua nunú, kaya dekas jegá ichichkatin apujtutia iman wajasé”.
1PE 2:8 Nuigtushkam: “Nunú kaya nunak kuashat aents tukumak iyajagtinai”, tawai. Wagki tukumaina duka chichama umiinachu asag nuninawai, aatus nunikti tibau aina nu.
1PE 2:9 Tujash atumek Apajuí niina aentsji atinun etegkauwa nu weantu ainagme, sacerdote rey takajin, Apajuí aentsji pegkejam, Apajuí sumaka jukimu. Jutiinak pegkegchau takainaku suwenum batsatjin tsaaptin dekas imana nuna amasui, Apajuí takasbauji shiig pegkeja nuna etsegkatnume tujamu asa.
1PE 2:10 Atumek yaunchkek Apajuí aentsji aajakchauwaitjume, tujash yamaik Apajuí aentsji wajasugme. Yaunchkek Apajuí wait anenjachbau aajakuitjume, tujash yamaik wait anenjamjaje.
1PE 2:11 Anetaig aidauh segajime, ju nugka juig tikich nugkanmaya jeenchauwa numamtin ainajum nuutigmin, iina iyashí pegkegchau wakega duka idaisatajum; nunú aidauk iina wakanijai maaniau asamtai,
1PE 2:12 Apajuí nemajuinatsu nujaig shiig kuitamamka pujustajum. Jutii pegkegchau takauwa iman chichagtamaina dusha Apajuí ememattinme, tsawan uwemau atina nuaduish atum pegkeg takasbaun diigtamsag.
1PE 2:13 Apu Jesús nemaju asajum ashí rey aina nuadui sumimkatajum, ni imá wagaku asamtai,
1PE 2:14 nuniachkugmesh gobernador aidaun, aents pegkegchau takaidaun suwimkan susati tusa awemamu aina dushakam nuigtú pegkejan takaidaunak eme anentus diistí tibauwa nu.
1PE 2:15 Wagki juuwai Apajuí wakegamua duka: pegkejan takainak aents dekachu, shiig anentaimkachu aina nunash itatmitkaktinme tawa nu.
1PE 2:16 Aents agkanmitkamush wajuku amainaita nunin atajum, tujash nunú agkan pujamu ajutjama dui pegkegchau takasta tachamunum, Apajuí inake asajum.
1PE 2:17 Ashí ajantusjum diistajum. Yatsum aidaush aneetajum. Apajuish eme anentsá diistajum. Reyshkam ajantusjum diistajum.
1PE 2:18 Inak aidauwah, atumi apujum ashí ajantusa diyakjum sumimjuktajum; ayatak pegkeg nuigtú kakagchauch aina duke dutiktsuk, dakitmain pegkegchau aina dushakam.
1PE 2:19 Atum pegkegchau takasbauk atsugtamaig waitkagmainakuish, Apajuí nemajin asajum katsunjatajum. Duka Apajuinak shiig awagmawai.
1PE 2:20 ¿Wají imanaita ii pegkegchau takasbaunum suwimak juwayatku katsuntajai tabaush? Pegkeg amainai, ii pegkeg takamunum suwimak juwaku katsuntamuk, nu Apajuin shiig awagbau asamtai.
1PE 2:21 Nuna nuniktinme tusa untsukbau ainagme, wagki Cristushkam jutiiní waittsauwai, atumnash ni wajukauwaita nunisag waittsatnume tusa iwaintugmak.
1PE 2:22 Cristuk makichkish tudaunak takaschauwai, makichik aentsnakesh tsanugchauwai,
1PE 2:23 nigka pegkegchau chichagmash, pegkegchaunakesh aimkachui. Imatika waitkamash, iikmakagkesh chichakchauwai, ayatak Apajuí dekaskenum pegkejan takauwa nuna idaitujakui.
1PE 2:24 Nigki iina tudaujinash niina iyashin jukiuwai numinum achinjauwa dui, tudau takatnak idaiyinak, pegkeja nuna takastinme tujamu asa; niina iyashí tsupinjauwa dui atumek tsagaju ainagme.
1PE 2:25 Wagki atumek tuke uwig wagakujai betek aajakuitjume, tujash yamaik Jesucristo atumi wakanim aidaun kuitamaina nui wakitkiugme.
1PE 3:1 Nunisjumek atumshakam, nuwatkamu aidautigmek atumi aishum aina nuig sumimkatajum, Apajuí chichamega nuna dekaskeapi tachau akushkam, chicham ujachmaitak atum pujamun diisag wakekatnume,
1PE 3:2 dekaskenum Apajuí umigkujum imagnisa pujamun waipainak.
1PE 3:3 Atumek jaanch pegkeg iwajamu aina ibau nugkugjum awantak iwagmamjatasagmek wakemaitsugme. Intashmesh tikich pegkeg diigsatnume tusagmek iwagmaitsugme, nuigtú oro aina imanjai iwagmamjatasagmesh wakemaitsugme.
1PE 3:4 Dekas iwagmamat shiig pegkeja duka anentainum nuigtú wakannumash kakagchauch shiig anentaimkau ata nuuwai, nuna Apajuik wakegas diyawai.
1PE 3:5 Nuwa pegkejam duwik batsamajakajua dushakam, Apajuiyaig kajinas anentaimaidau asag, imá aishinig sumimajakú ainawai.
1PE 3:6 Sarashkam Abrahaman umijak: Mina apug, tujakui. Atumek niina nawanji asajum pegkeja nu takaakjum shiig puyatkas pujumain ainagme.
1PE 3:7 Aishmag aidautigmeshkam nuwemjaig shiig antugdaikajum pujustajum, nuwak kakaakchau asamtai. Apajuishkam nuwanash wait anentau asa pujut nagkanchaun susauwai. Atum nuwemjai shiig pujushtaik, Apajuishkam ni augmash antugtamkachagtatui.
1PE 3:8 Inagnamun tajime, ashí atumek shiig anendaisa pujustajum, betek nuninuk anentaimkau, dekaskenum yatsut anendaisajum aneniakjum. Wait anenkagtin, nuigtú imanchauch atajum.
1PE 3:9 Pegkegchau awajtamainakuish, pegkegchaunmag iikaigpajum, pegkegchau chichagtamainakuish pegkegchauk chichagkaigpajum. Duka dutiktsuk pegkeg chichagkatajum, nuna nuninak pegkeg yumigkia nuna jukitnume tusa untsukbau ainagme.
1PE 3:10 Wagki: “Ni pujutan aneas diyak, pegkeg tsawantan dakujus inagkeaktatus wakegauk, pegkegchau chichatnak idaisati, tsanumsá chichat aina nunashkam.
1PE 3:11 Pegkegchauk tupanjata nuniakum pegkeja nu takastá, agkan pujuta nu egaktá nuniakum duke wejitá.
1PE 3:12 Wagki Apu Apajuik pegkejan takaina nuna kuitamak, dita Apajuí augbaunash antujui; untsu aents pegkegchaun takaina nunak Apu Apajuik diitnash dakitawai”.
1PE 3:13 ¿Yaita dusha pegkegchau etamainush, atum pegkeja duke takagminish?
1PE 3:14 Tujash atum pegkeg takaakjum waitiakjumek shiig aneastajum. Makichkish ishamkaigpajum nuigtush uwakmamkaigpajum;
1PE 3:15 duka nunitsuk, atumi anentaiminish Cristo atumi Apujum anentsajum eme anentajum, nuniakjum tuke umintsau atajum atum ayamjumaktin, kakagchau nuigtú ajantsá diijatkujum, atum dakamu ajutjamaina nuna pachis tujamainakui ashí ujamaina nu,
1PE 3:16 tujash pegkeg anentaiyai nuigtú eme anentsajum dutikatajum, atum Cristo nemaju asajum shiig pujajum nuna pegkegchau chichagtamainak wainak tsanumjutpaina nu datsagtinme.
1PE 3:17 Wagki pegkeg takaaku waitiamu nu imá pegkejai, Apajuish aatus wakegakuig, pegkegchau takaaku waitmaina nu.
1PE 3:18 Wagki Cristushkam tudau aidaunum makichkia jakauwai, pegkejan takauwa nu pegkegchau takau aidaunum, Apajuiyai jujamkita tau asa. Iyashinig jaak waittsauwai tujash aneantui Wakaní Pegkejiya nuna senchijin,
1PE 3:19 nunik aents jakau aidau wakaní tuke achikbaujai betek batsatbaunum wee chichaman etsegkauwai,
1PE 3:20 yaunchuk Noé pujusmatai batsamajakú intimkiaju aina nuna, Apajuí waugtutsuk arcan najantai dakajakua dui, nu nuniamunum ujumak aents, ocho yuminmag uwemjajui.
1PE 3:21 Nunú yumia duka yamimainag nuna iwainawai, nu aaja nuniaku yamai uwemat juinag nu. Yamimamuk iyashnak pegkeg ematsui, ayatak anentaimtajuish pegkeg Apajuí emtinish atajai tabauwa nuuwai; duka Jesucristo nantakiuwa dui uwemnawai,
1PE 3:22 nigka nayaim waka, Apajuí untsujin eketui; niinig sumimtikamui ángel aidau, wakan senchigtin aidaush, agkajunum inamin aina dushakam.
1PE 4:1 Cristo jutiiní niina iyashin waittsau asamtai, atumshakam nujai betek nuniktasajum anentaimsatajum; wagki ni iyashin waittsauwa dui tudaunak inagnakui,
1PE 4:2 wajupa tsawan pujumain awa nunak, niina iyashí senchi wakegamun takaa pujutsuk, Apajuí wakegamua nunak takastinme tujamu asa.
1PE 4:3 Kuashat tsawantai aents Apajuí anentaimtuchu takaina nu takaajakuitjum duka idaisatajum, pegkegchau tunamatja pujujut aidau, iyash senchi wakegamu aina nu, nampeamu aidau, fiestanum nampeaku yuamu aidau, uma umakua weamu nuigtú apajuimtai dakitmain aina nu emematut aina dushakam.
1PE 4:4 Nunú nuniajumin aents atumjai pegkegchau takajakú aidauk, atum ditajai ijunja pegkegchau takat dakitamu waipainak, wagkag aninawa tusag pegkegchaun chichagtamainawai.
1PE 4:5 Tujash dita takasbaujinak etsegtumakagtin ainawai, iwaku aidaun nuigtú jakau aidaunash titin uminas puja nui.
1PE 4:6 Nuadui yamajam chichama duka jakau aina nuish etsegkamui, ashí aents jau aina nunisag jakau ainakush, yamaik wakaninig Apajuijai tuke pujustin atinme tusa.
1PE 4:7 Ashí wají aina nu nagkankatnuk tsawantak tikiju wajasé, nuadui atumek shiig ebetmamja pujusjum, puyatjusjum Apajuí aujú batsamtajum.
1PE 4:8 Ashí ju aina nuig atumek pempeentunisjumek senchi aneenitajum, wagki anenka nuuwai kuashat tudau aidaunash tsagkugkagta duka.
1PE 4:9 Atumi jeeminish pempeentunisjumek judaitajum augmatdaitsuk.
1PE 4:10 Makí makichkitijum don jukiu ainajum nujai tikichish yaigtajum, shiig kuitamka takastajum Apajuí anentag makí makichik niimtinun amasajua nu.
1PE 4:11 Makichik aentskesh chichaakug Apajuí chichame tawa dutiksag chichaktí, makichik aentskesh takaakug Apajuí senchí suwa nujai takastí, dutikamunum Apajuiya nu eme anentam atí; nuniakjum Jesucristo yaimpasmatai ememattajum, Apajuí senchigtin ajumaish tuke atina nu. Aatus atí.
1PE 4:12 Aneetaig aidauh, utugchat katsunmainchaunum jegakjumesh anentai jegagchamnuk anentaimtigpa, makichkish wají nagkaechataiya nunin nagkaetamu diisaigpajum.
1PE 4:13 Duka nunitsuk, Cristo waittsauwa nunisjumek waitiau asajum shiig aneastajum, nuniau asajum ni imanjin wantinkatna duish shiig senchi aneakjum dakujusminjum.
1PE 4:14 Cristo nemajin asagmin pegkegchau chichagtamainakuish atumek shiig aneastajum, shiig aneastajum Apajuí Wakaní imana nu atumin tuke pujau asamtai.
1PE 4:15 Nunin asamtai atum ainajum anuiyag magkagtin, kasa, pegkegchau takau, tikichdaun niimjuinak waitú yujau aina nunikag waittsashti.
1PE 4:16 Tujash makichkikesh Cristo nemaju asa waitiakug datsamigka, nunitsuk nu waitiamua dui Apajuin ememattinme.
1PE 4:17 Apajuí aentsji aidauti waittsatnuk yamaik nagkamnae, aatus nu jutiiní waitiamu nagkamna aniaish, yamajam chicham Apajuinua nuna umiinatsu dusha, ¿wajuk nagkankatnuk ainawa?
1PE 4:18 Pegkejan takaukesh tujiayatak uwema nuniaish, ¿Apajuí anentaimtuchu nuigtú tudau aidaush wajuk juaktinuk ainawa?
1PE 4:19 Nunin asamtai, Apajuí wakega dutiksag waituidauk, ditá wakaní aina nunak Apajuí najankagtin betek umina nuna idaitumainai nuninak pegkeja nunak takamainai.
1PE 5:1 Anciano aidau atumjai pujuina nuna segajai, wishakam dita anciano aina nunin asan, Cristo waittsamu aidaunash wainkauwaitjai, wishakam ni jui taak niina imanjin iwainaktina nuish pachinkatin asan.
1PE 5:2 Apajuinu atumjai ijunaina nu kuitamkatajum, atumin idaitugmasua nu, duka shiig wakesajum dutikatajum; dutikata tujamkui nunitsuk, nuigtush kuichik anentaimtusa dutikawaigpa, Apajuí wakega dutiksagmek dutikatajum.
1PE 5:3 Atum kuitamjum nu atumdau asamtai utugmaina dutikawaigpa, duka nunitsuk dita pegkeg iwaintukta tabaunum kakanmamsatajum.
1PE 5:4 Nuniau asajum, pastor ashí nagkaekagtasua nu wantinkatna dui atsejutai duka najanamu kagama nuninchau tuke atina nu jukitnaitjume.
1PE 5:5 Nunisjumek datsauch aidauwah, anciano aina nui sumitkau atajum; ashí pempeentunisjumek sumimdaimain ainagme imanchau anenmamsajum, wagki: “Apajuik emebau aidaunak dakitus diyawai, tujash imanchauch aina nuna wait anentawai”, tau asamtai.
1PE 5:6 Nuadui imanchauch iwainmamkatajum Apajuí senchigtina nui, nuniagmin tsawan jegatai ni eme anentsá diitai etamti.
1PE 5:7 Ashí atum uyumamuk Apajuí idaitustajum, wagki ni atumnak kuitamjamu asamtai.
1PE 5:8 Aneaku niimkau atajum, atumi shiwajum iwanchia duka pegkegchaun takamtijamsatatus, ikamyawa kajeak shinuwama imatak teentugmawai;
1PE 5:9 nuniau asamtai dekaskeapi tabauwai tajitkatajum, ashí nugkanmaya atumi yatsum aidaush, atum waitiajum nunisag waituina nu dekaidau asajum.
1PE 5:10 Tujash Apajuí ashí wait anenkagtina nu, niina imanji tuke atina nui Jesucristui etegtamjauwai, dutijamau asa atum ujumak tsawan waittsa inagkeakiagminish Apajuí pegkeg etabiagtatui, dutijama senchijin amastatui ebetmamag niiní tsujamainchau atinme tusa.
1PE 5:11 Nigki ajumaish tuke senchigtin atí. Aatus atí.
1PE 5:12 Junak Silvano, yatsut betek umina nu yaintsamtai ujumak chichaman agatjajime atumesh anentaim ichichiagtajum, nuniakjum Apajuí wait anenkagtamuji dekaskea nuig ebetmamjatajum tusan ujaktasan.
1PE 5:13 Iglesia Babilonia awa nu, atumjai betek etejamua nunú nuigtú Marcos mina uchijua imana dushakam kumpamjamainawai.
1PE 5:14 Makí makichik pempeentunisjumek aneenisjum kumpamdaiyatajum. Ashí atum Cristunu aidautigminak shiig agkan anentaimsa pujut ajutjamtinme. Aatus atí.
2PE 1:1 Witjai Simón Pedro, inakaitjai nuigtush Jesucristo apostoljiyaitjai, iina Apajuiji Uwemtijamin nuigtú Jesucristo pegkejan takauwa nu dekaskeapi tabau shiig pegkeg jutii ajutjama duke ajutjamu asagmin atumnash kumpamjime.
2PE 1:2 Iina Apají Apajuí, iina Apuji Jesusjai anenjauch wait anenjamag shiig agkan pujutan amastinme. Atumek ni pachisjumesh shiig dekau asagmin.
2PE 1:3 Apajuí niina senchijin ashí iina pujutjin atsumamua nuna nuigtú nigki puyatjusa umigta nunash sujamsauwai; nigki niina imanji nuigtú ni takasbauji shiig pegkeja nunash dekatnume tusa etegtamjauwai.
2PE 1:4 Nunú senchik ashí pegkeg tikichin nagkaesau aidaun ni anagtamauwa nunash sujamsauwai; dutikamu asag ju nugka jui pegkegchau wakegat aina nunak agkanmagawag Apajuí wajukuita imanuk atinme tujamu asa.
2PE 1:5 Nuadui atumshakam kakanmamainaitjume dekaskeapi tabauwa nu, pegkeg takamua dusha ajití tabaunum; pegkeg takamua nu, dekata dusha ajití;
2PE 1:6 dekata nu, iik kuitamamta dusha ajití; iik kuitamamta nu, waugtakchau ata dusha ajití; waugtakchau ata nu, Apajuí puyatjusa umigta dusha ajití;
2PE 1:7 Apajuí puyatjusa umigta nu, yatsut anendaisa anenita dusha ajití; yatsut anendaisa anenita nu, aneenit ajití.
2PE 1:8 Ashí ju aidau ajutjamainakuig nuigtush takamtikamak, nuní senchi iina Apuji Jesucristo dekatnum yaimpaktatjume, nuniau asajum atsumchataig nuigtú wainkagmek juwakchattagme.
2PE 1:9 Tujash juna betek uminachuk aents wainmachujai betekai, nuniachkush atushat wainmachua nuninai, yaunchuk tudauji aajakua nuna Apajuí tsagkujamunash aneachu asa.
2PE 1:10 Nuadui yatsug aidauh, atumek Apajuí untsukbau nuigtú etegkamu asajum nuig ebetmamata tabaunum kakanmamsatajum; wagki aaja nuniakjumek kakajus tudauk takaschattagme.
2PE 1:11 Nuniau asajum shiig anentsá, iina Apuji Uwemtikagtin Jesucristua nuna inamtaiji tuke atina nui awayam atatjume.
2PE 1:12 Nuadui junak tuke aneemtiksanké atatjime dekagminkish, nuigtú dekaskea nu atumin ajutjamjum nui ebetmamjau ainagminig.
2PE 1:13 Wi iwaaku pujag duik, tuke aneemtiksanké amainaitjim duka pegkejai.
2PE 1:14 Wagki dekajai dukap pujutsuk jakattag nunak, iina Apuji Jesucristo dekamtijuama nunisnuk.
2PE 1:15 Tujash ashí wi dutikmainnak dutiksan dekapsatjai, wi jakamtaish nunú aina nunak, tuke aneaku atinme tau asan.
2PE 1:16 Wagki iina Apuji Jesucristo ashí ni senchijijai minitna nu pachisa atum dekamtikauwaitag duka, aents anentaimsa augmattsamu aina nuninchauwai, duka iina jiin niina imanji wainkauwaitag nu tibaiji,
2PE 1:17 ni Apají Apajuiya nu eme anentus nuigtú tsaaptin ema awajus, nu tsaaptin shiig pegkeja nuiya chichaman akupjak: “Juuwai mina uchig anetaijuk, wi etegkamu”, tiuwa nu.
2PE 1:18 Nu chicham nayaimpinmayag jutii antukbaiji, niijai muja pegkegma nui batsamsaja.
2PE 1:19 Nuigtushkam chicham dekaskea nuna profeta aidau tibauwa nu ajutjamji, nunú emamkesjum dekatajum, dita chichakbauwa duka lámpara ekemakam suwen tsaaptin emama numamtinai, nunin asa Cristo yaya etsawamak tsaaptin wegama imana nu atumi anentaiminish tsaaptin etamtatui.
2PE 1:20 Tuja ashí dekatkau dekamainaitjum duka: Atak uminkatin chicham Agagbauwa duka, makichik aentskesh ni wajuk anentaimua nu tichamu ainawai,
2PE 1:21 nu atak uminkatin tibauwa duka, makichkish aents wakegak tibau ainatsui, duka aents pegkejam Apajuinu aajakajua nuna, Wakaní Pegkejiya nu ujaam tiaju ainawai.
2PE 2:1 Israelnumash wait profeta aidaush aajakajui, atum ainajum nuish maestro waitá jintin aidau agtina nunisag. Ditak dekamainchaun jintidiagtinai ditá anentai pegkegchauwa nuiyan, aatus nuninak Apu Jesús ditan agkanmitkauwa nunash dakitiagtinai; nuninai pachiachbau dita bakumatnuji jegajiagtinai.
2PE 2:2 Kuashat saetukagtinai datsanmainun takaina nuna, nuninak dekaskea nunak pegkegchau chichajiagtinai.
2PE 2:3 Kuashat kuichik ajuttí tabaunum waitá jintinak jujutjabiagtinai; tujash dita bakumatna duka yaunchuk nagkamas umigkamui, dutikamu asamtai dita megkaekatna duka dakas ajawai.
2PE 2:4 Apajuik ángel aidau tunamakajunak tsagkuujachui, ayatak suwimak tuke atin suwea nui achijá utsauwai, tsawan jegatai suwimkan susata tau asa.
2PE 2:5 Nuigtushkam Apajuik yaunchuk aents ju nugka jui batsamajakajua nunakesh tsagkugtsuk, diluvio awetiuwai aents pegkegchau takau batsamajakajua nuna, dutikak Noé pegkejan chichagkagtujakua nunak, nuigtú siete aents aidaujai uwemtijauwai.
2PE 2:6 Aikasag yaakat aidau Sodoma nuigtú Gomorra aina nunak suwimkan suwak apekui, dutika yuku awajsauwai, nunak atak aents pegkegchau takaidau batsabiagtina dusha wainkatnume tusa iwainak dutikauwai,
2PE 2:7 tujash Lotnak pegkejan takau asamtai uwemtijauwai, aents pegkegchaun takagtai anentaimak waitujakua nuna,
2PE 2:8 wagki nunú aents pegkejan takau ditajai ijunag pujujakua duka, pegkejan anentaima nunak waitiau kashí kashinig pegkegchau takagtai wainak nuigtush antau asa.
2PE 2:9 Apu Apajuik niina puyatjus umijuina nunú utugchatnum jegatai agkanmitkatnak dekawai, dutikak aents pegkegchau takaidaunak ayatak kuitamui tsawan jegatai suwimkan susamig tusa,
2PE 2:10 nunak iyashí pegkegchau wakega nunak takainak, ni inabaujiya nunash wainkaya nunin diina nuna dutikatnai. Nunú aina duka antumtikmainchau nuigtush emebau asag, senchigtin wagaaku aina nu pegkegchau chichagtanash ishamainatsui,
2PE 2:11 nuninai, ángel ditá nagkaesau dekas senchigtin aina dukesh, dita suwimak jukitnun pachisagkesh pegkegchauk chichajuinatsui Apu Apajuí eemtinish.
2PE 2:12 Tujash nunú aents aidauk ditakesh antachiatak wají pegkegchau aidaun chichainawai; ditak kuntin anentainchau ayatak akiinawag maam megkaega nuniktin ainawai,
2PE 2:13 dita pegkegchau takasbaujin suwimkan juinak. Nunú aidauk pegkegchau nuigtú tsuwapaekau ainawai, nunin aidau atumjai ijunag yuinak shiig anenawai ditá pegkegchauji aina nujai.
2PE 2:14 Nuwa aidaunash tsanijimat anentaiyai dii yujau ainawai, nunidau asag tudau takatnash yawetuinatsui; nunisag aents imagnis Cristun nemajuinatsu nunash tsanú yujainawai, pegkegchau aidau wakeeta nunak unuimatjau asag, tikima aents pegkegchau ainawai.
2PE 2:15 Ditak pegkeg takatnak idaisag, Balaam Bosora uchijí nunikua nuna wejuinak dewakaje, duka pegkegchau takaamujin akiam atatus wakegajakui,
2PE 2:16 nuniau ni pegkegchaujinig jiyankauwai; makichik burro kijin aentsmitkatai, chichachuitak, aentstijai betek chichakui, dutikak profeta anentaimkas nuniamujin idaimitkasui.
2PE 2:17 Nunú aidauk yumigmat kuyuauwa nunin ainawai, yujagmin dase umpui juwama numamtin, nunú aidau batsamsati tibauk shiig suwe kanchi wajas awa nuuwai.
2PE 2:18 Ditak ememas chichainak nuigtush wainak chichau ainawai; nuninak wakegat pegkegchaun iyashnum takanitan anentain egketin ainawai, aents yamá pegkegchaujin idaiyas pujuina nuna.
2PE 2:19 Nuninak anagkuinawai agkan pujuta nuna, pegkegchau takatnum achikbau ainayatak; wagki ashí achikbau aina duka depetkamu asa nuniawai
2PE 2:20 Jutii Apuji Jesucristo Uwemtikagtina nuna nemajak, pegkegchau ju nugkanmaya takatan idaisauwaitak, ataktú dita takajakbaujin waketjuinakug, depetkamu weawai, nuniau asa yaunchuk aajakbaun nagkaesau pegkegchau weawai.
2PE 2:21 Ditak imá pegkeg takat pegkeja nunak dekamainchaunas dekau aajabiatai, chicham pegkejam umiktin susamua nuna dekauwaitak idaiyina nunitsuk.
2PE 2:22 Tujash ditai proverbionum dekas tawa duka uminui: “Yawak iyakbaujin pempeentinai, kuchi imaimush kuchan tadaetinai”, tawa nu.
2PE 3:1 Aneetaig aidauh, juuwai carta awentsanuk agatjim nu. Nunú mai agagbauwa nuig wakekajai, shiig anentaimtijatasan taja dui ayatak pegkegnak anentaimainak,
2PE 3:2 profeta pegkejam aidau tibauwa nuna adeagtinme, nuigtú chicham umiktinun Apu Uwemtikagtin tibaun apóstol aidau sujamsamua nuna tusan.
2PE 3:3 Dekas dekatkauk ju dekamain ainagme, tsawan nagkantina duik, iyash pegkegchau wakegamujin takamtikin aina nu, dushiktamas chichagtamainak
2PE 3:4 tiagtinai: “¿Taatnaitjai tusa anagkagtuauwa dusha wajukae? Wagki iina muunji jinawagmataish, ashí wají nagkamsa najankamua duka yamaikish nunisag ainajama” tusag.
2PE 3:5 Nunú aents aidauk, yaunchuk tsawan aajakua imanui nagkamas Apajuí nayaimpin najana niina chichamenig nugkan yuminmaya akankamu, yuminmag egketka nunak tuke aneas dekachu wajukmaina nuninawai.
2PE 3:6 Yaunchuk Apajuí yumin yutumtikag ashí nugkan amugmatai, aents nui batsamajakui duka ashí jinawajui.
2PE 3:7 Tujash nayaim, nugka yamai aina juka, niina chichamenig esaktin kuitamkam awai. Nunú jiiya nu apeatnai aents pegkegchau takau aidau suwimak suwamu tsawan jegatna dui.
2PE 3:8 Tujash kajimatkigpa aneetaig aidauh, Apu Apajuiyaig makichik tsawantak mil mijana nuninai, tuja mil mijanak makichik tsawanta nuninai.
2PE 3:9 Apu Apajuik ni anagkagtuamujinak umitskek idaisashtatui, ujumak aents taashtina nunin anentaimtuina nunak, nuninaitak nigka waugtuk dutikchauwa dui, makichkish megkaekashtinme, ayatak pujutjin yapajiatnume tusa aniawai.
2PE 3:10 Tujash Apu Jesús minamuk kasa pachiachbau kashi miniyama numamtuk atinai; nu tsawantinig nayaim aidauk shiig ishamainun kedegtuk megkaegainai, nui ayá dushakam esakag yuku waigkagtinai, antsag nugkashkam ashí nui takasbau ayá dushakam esakagtinai.
2PE 3:11 Ashí nunú aidauk aatus utsankagtin asamtai, atumek pegké pujakjum, puyatjusjum umigmainaitjume,
2PE 3:12 nuniakjum shiig senchi wakejusjum tsawan Apajuí minitnujiya nu dakastajum. Nu tsawantinig nayaim aidauk jiiyai apekbau atinai, tuja nui ayá dushakam jii keetai yumimeakag megkaejagtinai.
2PE 3:13 Tujash jutiik, ni anagtamamu yamajam nayaim aidau nuigtú yamajam nugka nu dakainaji, ayatak pegkejak takaamu atina nu.
2PE 3:14 Nuadui aneetaig aidauh, nunú nuniktina nu dakainakjum, kakanmamsatajum niina emtin shiig agkan pujakjum, pegkegchau atsugbau nuigtú nuninai tusaish tumainchau wantinkamnujum.
2PE 3:15 Adeagtajum iina Apuji emamkemas dakama nunak, uwemjatnume tabaunum aniawai. Juna pachis iina aneetaiji yatsug Pabloshkam, Apajuí dekat susamua dui agaje,
2PE 3:16 ashí ni carta agagbauwa nuig juna pachis chichawai, nunú aina nuiya shiig antumainchaush aina nuna, aents dekachu aidau nuigtú ebetmamjachu aina nu yajupenawai, dutiksag tikich agagbau aina nunash dutikaidau asag, dita bakumatnujin umigmamainawai.
2PE 3:17 Nuadui aneetaig aidauh, atumek emtika dekau asajum kuitamamkatajum, aents pegkegchau aina nu tsanugmajagmatai wejakjum, atum ebetmamja pujamu idaisaijum.
2PE 3:18 Nunitsuk, dekas tsakagtajum anentag jukimua nui nuigtú iina Apuji Jesucristo Uwemtikagtina nu dekatnum, nigki yamaish nuigtú tuke pujustin tsawan jegatna nuish ememattai atí. Aatus atí.
1JO 1:1 Cristo chicham pujutan sukagtin yama nagkamtin aajakua nunú chichaamu antugkauwaitji, ni iwainaja takaamush iina jiin wainkauwaitji nuigtú ii uwejinish achikaish dekapsau ainaji.
1JO 1:2 Nunú pujutan sukagtin aentsmaga akiina wantinkauwai nunikmatai wainkau aidauti juwai pujut tuke atinun sukagtina duka tusa etsegtuinaji, nigka yaunchkek niina Apají Apajuijai pujujakua nunú wantintugmakui,
1JO 1:3 jutii wainkau aidauti nuigtush antuku aidauti etsejuinaji atumesh jutiijai ijutkau atajum tau asaja; wagki jutiik iina Apajijai ijutkaji nuigtú niina Uchijí Jesucristujaishkam.
1JO 1:4 Jujú aidaunak atumesh jutiijai betek shiig aneasminjum tusan agatjime.
1JO 1:5 Jujuwai chicham Jesucristo jintiamu antukuitag duka, nunú etsejuinaji, Apajuik shiig tsaaptinai iman asamtai niinig makichkish suwek atsuwai.
1JO 1:6 Jutii niijai ijutkau pujajai tayatku pegkegchau takata duke wekaetakuik, waitjaji, nuigtush dekaskea duke takaachu asa,
1JO 1:7 tujash jutiish ni tsaaptinnum puja nunisaik pujakuik, niijai betek tikich aidaujaish shiig anendaisa pempeentunisaik ijutkau amainaitji, nuniajin Apajuí niina Uchijí Jesucristo numpega nujai ashí iina tudaujinash nijatjamag esakatjamui.
1JO 1:8 Tujash minak tudauk atsugtawai tumamkuik, jutiik tsanuumaku tumamji, dekaskea nu tumamchau asa.
1JO 1:9 Nu tu wekaetsuk jutii tudauji etsegtumajinig, iina tudaujinash tsagkugtamag nuigtú ashí pegkegchau aidaunash esaktugmagtatui, nigka betek umina ibau asa nuigtush pegkegnak takauwa dui,
1JO 1:10 tuja wika tudaunak takachuitjai tumamkuik Apajuik waita nunin emaji, niina chichame aatus tujamtsaig tau asa.
1JO 2:1 Mina uchuchig aidauwah, jujú aidaunak tudau takasainum tusan agatjime; tujash dewakjum makichkitigmekesh tudau takaakjumesh dekaatajum Apajuí emtin iinu abogado pujugtamji Jesucristo pegkejan takauwa nunú.
1JO 2:2 Niiyai iina tudauji aidaun tsagkugtamjatatus jakauwa duka, tujash imá iinigkik nunikchauwai, ashí nugkanum aents batsata nuna tudaujinish jakauwai.
1JO 2:3 Nuadui ni chicham umiktajum tibauwa nu betek umiinakuik, ninuapitja tusa dekamainaitji.
1JO 2:4 Tuja makichik aentskesh: “Wika niinak dekajai” tayatak, chicham ni umiktá tibauwa nuna umiachuk waitjak tu wekaewai dekaskenum tachau asa,
1JO 2:5 tujash Apajuí chichamen umia nuuwai, dekaskenum aan nagkaemas Apajuí anenkajin deka duka; nuniaku dekamainaitji nijaimpap ijutkaji tusa.
1JO 2:6 Aents Apajuijai ijutkau pujajai tauk, Jesús pujujakua nunisag pujumainai.
1JO 2:7 Aneetaig aidauh, yamajam chicham umiktinnak agattsujime; yaunchuk chicham umiktin ajutjamajakua nunak agatjime, jujú umiktin yaunchuk aajakua duka, chicham nagkamchakjum antukuitjum nuuwai.
1JO 2:8 Nunin aig yamajam chicham umiktina nuna agatjime, nu chichama duka Cristui dekaseg aajakui nunisag atumnash ajutjamtinme, wagki nunú chicham betek umiagmin atumi pujutjumin suwe awa duka tsaaptin wetai megkaekattawai.
1JO 2:9 Makichik aentskesh tsaaptinnum pujajai tayatak tikich Cristo nemagnun kajejauk, eke suwenum pujau asa nuniawai.
1JO 2:10 Ni yachi Cristo nemagnun anea duka tsaaptinnum pujawai, nuniau asa niiní utugchat igkumainuk atsawai.
1JO 2:11 Untsu niina yachi Cristo nemagnun kajeja duka eke suwenum pujawai, nuigtush suwenum wekaewai, nuniau asa dekatsui tuwí wegawa nunak, wagki suwe aina nu jiin ejatbau asa.
1JO 2:12 Uchuchig aidauh, atumnak Jesucristo mantamnamunum Apajuí atumi tudaugminak tsagkugtamjaju asagmatai agatjime.
1JO 2:13 Atum uchigtin aidautigmin agatjime, wagki nagkamtinish tuke pujujakua nu shiig dekau asagmin. Atum datsauch aidautigminash agatjime, iwanch depetkau asagmin. Uchuchig aidauh atumin agatjime, wagki iina Apají Apajuiya nu dekau asagmin.
1JO 2:14 Uchigtin aidautigmin agatjamjime, nagkamtinish pujujakua nu dekau asagmin. Atum datsauch aidautigminash agatjamjime, wagki senchi asajum Apajuí chichamega nu umiakjum iwanchish depetkau asagmin.
1JO 2:15 Pegkegchau takat ju nugkanmaya aidaun, Apajuí nemagchau takaina duka takasaigpa, aents ju nugka juwiya pegkegchau takat aina nuna takaa pujuidauk Apajuinak aneatsui.
1JO 2:16 Wagki ashí nugkanum ayá nu, iyash wakegamu aidau, diisá wakejut aidaush, nuigtú wiki iman achainjash tusa anentaimat aina dushakam Apajuinumia ainatsui, nugkanmaya ainawai.
1JO 2:17 Ju nugka juka, nuigtú wakejumain aina dusha megkaejattawai; tujash Apajuí wakegamun takaina duka, tuke pujutin ainawai.
1JO 2:18 Uchuchig aidauh, tsawan nagkanbaunum batsatji, nuigtush atum anticristo wantinkatnai tabau antukuitjum nunisag yamaik kuashat anticristo aidau wantinjaje, nuniau asamtai dekainaji tsawan nagkanbaunmap batsatji tusa.
1JO 2:19 Duka jutii ainag juiyag jiinjaje, tujash dekaskenmag jutiinumia aajakchajui, wagki jutiinumia aajakuitkug jutiijai batsamain ainawai, tujash jiinjaje jutiijaichu aina nuna iwainmamkata tuidau asag.
1JO 2:20 Tujash atumek Cristo Wakaní Pegkejin sujamsamu ajutjamjume, nunin asamtai ashí wají aidauk dekagme.
1JO 2:21 Junak dekaskea nu dekachu asagmin agattsujime, dekaskea duka dekagme, wagki makichkish waitnumiag dekaskek jiinmaitsui.
1JO 2:22 ¿Yaita waitash, Jesusak Cristuchui tuina duchaukaih? Nuuwai anticristo, Apajuinash nuigtú niina Uchijinash dakita nu.
1JO 2:23 Ashí aents Apajuí Uchijin dakitauk, Apajinash dakituinawai. Yaa dekas Jesusak Apajuí Uchijiyai tusa etsegtawa, nuuwai Apajuijai ijutkau aidauk.
1JO 2:24 Atum nagkamchakjum antukuitjum duka nunisag atumnash ajutjamtinme. Atum nagkamchakjum antukuitjum nunú nunisag atumin ajutjamkuig, atumshakam nunisjumek Apajuijaish nuigtú niina Uchijijaish ijutkau atatjume.
1JO 2:25 Nunuwai Cristo pujut tuke atinun anagtamamun amasua duka.
1JO 2:26 Junak tsanugmagta tuidau asagmatai agatjime.
1JO 2:27 Tujash atumnak Jesucristo Wakaní Pegkejin sujamsajua nu ajutjamjume, dui atsumaitsugme yaki jintinjuawa tusagmek. Wakani Pegkeji atumin pujugtamjum nu waitchau dekaskea nuna ashí jintinjamattagme nunin asamtai niijaig ijutkau atajum.
1JO 2:28 Uchuchig aidauh yamaik niinig ijutkau atajum, ni minakuish, kajintsá datsamtsuk puyatkas igkugtag tabaunum.
1JO 2:29 Atumek dekagme Jesucristo pegkejan takauwa duka, nuniau asajum dekamainaitjume ashí pegkejan takaina duka Apajuí uchijimpap ainawa tusajum.
1JO 3:1 Diistajum wajupa iina Apajuí anempatsji, imatijamu asa mina uchig aidau tujamji, nuadui jutiik Apajuí uchijí ainaji; tujash Apajuí nemajuinatsu duka dekagmainatsui, wagki niinash dekachajua dui.
1JO 3:2 Aneetaig yatsug aidauh, yamaik Apajuí uchijí ainaji, tujash ii wajuku agtinaitji duka eke wantintsuji; nuninayatku dekainaji Jesucristo jui minak wantintugmaktina duik niiya imanuk agtinaitag duka, nunikaja ni wajukuita duka imatiksaik shiig wainkatnaitji.
1JO 3:3 Ashí aents Jesucristo dakaidauk, ni pegkegma imanuk atatus kakanmamui.
1JO 3:4 Untsu aents tudau takaina duka, Apajuí takasaigpajum tibauwa nuna umiinachu asag nuninawai. Tudau takata duka chicham umiachbaunum nuninui.
1JO 3:5 Atumek dekagme Jesucristo jutii tudaujin jujutjamkita tau asa tajutjabauwa duka, nuigtush niinig tudauk atsawai.
1JO 3:6 Ashí aents Jesucristujai ijutkau pujuidauk tudau takaajakbaujiya nunisagkek takaa pujumaitsui; ashí tudau takaina duka wainkachu asa nuigtush dekachu asa nuniawai.
1JO 3:7 Uchuchig aidauh, kuitamamkatajum makichik aentskesh tsanugmajainum. Pegkejan takaa duka pegkeg asa nuniawai, nunú aents aidauk Apajuí emtinish pegkeg ainawai, Jesucristo pegkeja imanuk.
1JO 3:8 Tujash tudau takaa wekaga duka Iwanchdau asa nuniawai, wagki Iwanchia duka nagkamtinig tunamajui. Nuadui Apajuí Uchijiya nu Iwanchi takatji aina nuna emegkakta tau asa tauwai.
1JO 3:9 Makichkish Apajuí uchijiya duka tudaunak takaa pujumaitsui, wagki Apajuí pujutjiya nunú ajamu asa, tudaunak takaa takakuag wemaitsui, Apajuí uchijí asa.
1JO 3:10 Aatus iwainmamainawai Apajuí uchijí aina nuna, nuigtú Iwanchi uchijí aina nunashkam. Ashí pegkejan takainatsu duka nuigtush tikich Cristo nemagkau aidaunash aneatsu duka Apajuinuchu ainawai.
1JO 3:11 Jujuwai chicham etsegbau nagkamchakjum antukuitjum duka: Pempeentunisaik aneenita nu.
1JO 3:12 Caín wajukauwa nuninuk achagmi, nigka iwanch wakejamun umiau asa yachin mauwai. ¿Wajina dutikau asamtai mauwaita? Caín niina takatjig pegkegchau asamtai, ni yachi imá pegkejan takau asamtai mauwai.
1JO 3:13 Yatsug aidauh, aents Apajuí nemagchau aidau kajegtamainakuish, kajegdaichatain nagkami kajegtamaina nuninuk anentaimtigpajum.
1JO 3:14 Jutiik dekainaji jatanum batsatuti tuke pujutnum inagkeakbauwaitag nu, nuniau asá yatsut aidaujaish aneeninaji. Yachin aneatsu duka, jakaujai betek pujawai.
1JO 3:15 Ashí aents yachin kajeja duka magkagtinjai betekai; nuigtush magkagtina nudauk, pujut tuke atina duka niinig atsujui.
1JO 3:16 Jutiik Jesucristo iiní mantamdauwa dui anenkak dekauwaitji, ni jutiiní mantamnak waittsau asamtai jutiishkam nunisaik iina pujutjig tsagkaamainaitji tikich Jesucristo nemajuina nui.
1JO 3:17 Makichik aents Apajuí nemajin ju nugkanmaya ashí wají aidau ajamaitak, yachi atsumaun wainiatak yayachush, ¿wajuk Apajuí anenkajish niina anentainish ajumainaita?
1JO 3:18 Mina uchuchig aidauh, ayatak chichamaik, wenui aneenin achagmi, nunitsuk dekaskenum ii yainiamunum iwaintunikagmi.
1JO 3:19 Aaja nuniaku dekamainaitji dekaskenum Apajuinuapitja tusa, nuniaku iina anentainish Apajuijai ijutkajapi tumainaitji,
1JO 3:20 Jutiik iina anentai ii pegkegchau takasbaujin bakumamainun dekamtijamkui waituinaji, tujash Apajuiyai jutii anentai nagkaesau ashí dekagtama duka.
1JO 3:21 Aneetaig aidauwah, iina anentain nu aaja anentaibau atsugtamu asamtai, jutii bakumamainuk atsugtamjiapi tusa Apajuiyai kajintsá anentaibau ajutjamui;
1JO 3:22 nuniaku ashí ii segamua duka niiniya jukittaji, wagki ni chicham umiktajum tibauwa nu umiaku, nuigtú niina shiig awagma nu takaidau asaja.
1JO 3:23 Jujuwai ni chicham umiktajum tibauwa duka: Niina Uchijí Jesucristo daajiya nui dekaskeapi tuinaku, nuigtú pempeentunisaik aneenimaina nu, ni tujabauwa nunisaik.
1JO 3:24 Ni chicham umiktajum tibauwa nuna umiidauk niiní pujawai, nuigtú niishkam ditai pujawai. Jui dekainaji ni jutiiní puja nu, Wakanin sujamsauwa dui.
1JO 4:1 Aneetaig yatsug aidauh, ashí aents aidau wakan tujutbaun tajai tuinakuish dekaskeapi tiigpa, nunitsuk dekapsatajum wakan ditai awa dusha Apajuinuash ajá tusajum; wagki kuashat wait profeta aidau nugkanum jiinjaju asagmatai.
1JO 4:2 Aaja dekamainaitjume yana Apajuí wakanish ajawa duka: ashí aents Jesucristuk aentsmaga tajutjamauwai tuina nuuwai, Apajuí wakaní ajuina duka,
1JO 4:3 tuja ashí wakan Jesusak aentsmaga taachui tuina duka Apajuinuchui; duka anticristo wakaní ajawai, atum minawai tabau antukuitjum duka yamaik ju nugká jui wantinui.
1JO 4:4 Uchuchig aidauh, atumek Apajuinu ainagme, nunin asajum depetmakugme; wagki atumiin puja nuuwai nugká puja nuna nagkaesauk.
1JO 4:5 Ditak ju nugkanmaya ainawai; nuadui nugkanmayanak chichainawai, nuigtush nugkanmaya aidauk antujuinawai.
1JO 4:6 Jutiik Apajuinu ainaji nunin asajin, Apajuin dekaina duke antugtamainaji; Tujash Apajuinuchu aina duka antugtamtsuji. Aatsa dekamainaitji yaa wakan dekaskea dusha ajawa nuigtú wakan tsanumna dushakam.
1JO 4:7 Aneetaig aidauh, pempeentunisaik aneediagmi, wagki anenkak Apajuinu asamtai. Ashí anejatuina duka, Apajuí uchijí ainawai nuniau asa Apajuinash dekainawai.
1JO 4:8 Anejattsu duka, Apajuinak dekatsui, wagki Apajuik anenkai.
1JO 4:9 Aatus Apajuik ni anenkajinak jutiinak iwaintugmakui, niina Uchijí makichkiuchia nuna nugká awetugmauwa dui, ni pujutan susati tujamu asa.
1JO 4:10 Anenkak aatus nagkamnauwai: duka jutii Apajuí aneamunum nunikchauwai, ni jutiinak anempajui, dutikak niina Uchijin awemauwai ni mantamnamunum jutii tudauji aidaunash tsagkugnagtinme tusa.
1JO 4:11 Aneetaig aidauh, Apajuí jutiin aatus anempaju asamtai, jutiishkam pempeentunisaik aneenimainaitji.
1JO 4:12 Makichik aentskesh Apajuinak tuke wainkachu ainawai, tujash pempeentuniki aneeniajinig Apajuí jutiijai awai, nuniau asa ni anenkajinak aan nagkaemas jutiiní iwainakui.
1JO 4:13 Aaja dekainaji jutii niijai ijutkau ainag duka, tuja niishkam jutiijai ijutka nu, niina Wakanin sujamsauwa dui.
1JO 4:14 Jutii wainkauwaitji nuniku asá etsegtuinaji, Apají ni Uchijin nugkanmayan Uwemtijatnun awemauwa nunú.
1JO 4:15 Makichik aentskesh Jesusak Apajuí Uchijiyai tawa nui Apajuik ijutkawai, nuigtú niishkam Apajuinum ijutkawai.
1JO 4:16 Aaja dekau asaja Apajuí anempamush dekaskeapi tiu ainaji. Apajuik anenkai, nuigtú nu anenka nui pujauk, Apajuijai pujawai, nunisag Apajuí niinish pujawai.
1JO 4:17 Nunú nuniamunum dekaskenum anenka duka jutiiní awai, tsawan suwimak sukagtamu atina dui kajintsá anentaibau ajutjamti tabaunum, wagki ju nugka juig ni pujujakua nunisaik pujusaju asaja.
1JO 4:18 Anejatut abaunmag ishamamuk atsuwai. Dekas anejatbauwa nu ishamamunak emegkawai. Apajuí suimkaji ishamaina duka anejatuinachu asag nuninawai.
1JO 4:19 Jutiik nig aneenaji ni dekatkauk anempaju asamtai.
1JO 4:20 Makichik aentskesh: “Wika Apajuin aneajai” tayatak yachin kajejakug, waitjak tawai. Yachin waina nunakesh aneatsu dusha, ¿utugsaya Apajuí waintsu nunash aneemainaita?
1JO 4:21 Jutiinak ju chicham umiktin ajutjamji: Apajuin anea duka yachinashkam aneeti tibauwa nu.
1JO 5:1 Ashí aents Jesusak Cristui tusa dekaskeapi tuina nuuwai Apajuí uchijí aidauk. Apajuí aneakuik ni uchijí aidaushkam aneaku dutiknawai.
1JO 5:2 Apajuí aneaku niina chichamesh betek umiakuik dekanui, tikich Apajuin nemajuina nunash aneajapi tusaja.
1JO 5:3 Apajuí aneamuk ni chicham umiktajum timawa nu imatiksaik umiamua nuuwai. Ni chicham umiktajum tujamawa duka kakajus umikchamna nuninchauwai.
1JO 5:4 Wagki Apajuí uchijí aina duka nugka jui pegkegchau aina nunak depeteawai, nunú depetmamua duka jutii Apajuiyai dekaskeapi tuinag dui depetmainaji.
1JO 5:5 ¿Yaita nugkanmaya pegkegchaun depetea dusha? Duka Jesusak Apajuí Uchijiyai tusa dekaskeapi tuina nuuwai.
1JO 5:6 Jesucristuk yuminum yamimajua dui nuigtú cruznum numpen ukajua dui Apajuí Uchijiya duka dekanauwai. Nunisag Wakaní Pegkeji dekasken chichauwa dushakam: “Jesucristuk Apajuí Uchijiyai” tusa etsegtawai.
1JO 5:7 Jujú kampatuma juwai dekaske tusa etsegtuina duka:
1JO 5:8 Wakania nu, yumi nuigtú numpa nu; jujú kampatuma juka nunak tuinawai.
1JO 5:9 Aents etsegbaush antujuinaji, tujash Apajuí etsegbauwa nuuwai nuna nagkaesau imana duka, wagki duka Apajuí etsegbau asa, niina Uchijin sujamsamua nuna pachis tau asa.
1JO 5:10 Apajuí Uchijiya nuna dekaskeapi tauk, nigki nunak etsegtak nuniawai, Apajuiya nuna dekaskeapi tachauk, wait emawai, wagki Apajuí niina Uchijin pachis etsegtukua nuna dekaskeapi tachau asa.
1JO 5:11 Juuwai etsegtamua duka: Apajuí pujut tuke atinun sujamsamua nu, nunú pujutak niina Uchijin awai.
1JO 5:12 Apajuí Uchijijai ijutkau pujuidautik, pujut tuke atina nu ajutjamainaji. Untsu Apajuí Uchijijai ijutkau pujuinachuk, pujut tuke atina duka atsujuinawai.
1JO 5:13 Jujú aina junak Apajuí Uchijiya nu dekaskeapi tuidau asajum, pujut nagkanchau jukiuwaitjum nunú aidautigmin dekaatnume tusan agatjime.
1JO 5:14 Nuadui Apajuiyai kajinmasa anentaimaidau asaja, ni wakega dutiksaik segamak antugkagtawapi tusa dekainaji.
1JO 5:15 Ii segamunash antugtawapi tusa dekainag nunisaik, ii sumamushkam dekas jukittajapi tumainaitji.
1JO 5:16 Makichik yatsutkesh tudau jatanum ejekagtina nuna takaachu wainkugmek Apajuí segattá, dutikam Apajuí pujutan susattawai. Nunak tudau jatanum ejekagtuchua nuna pachisan tajai, wagki awai tudau jatanum ejekagtin, wika nuna takaidau Apajuí segattajum tusanuk tatsujime.
1JO 5:17 Ashí pegkegchau takaamua duka tudauwai, tujash tudau jatanum ejekagtachush awai.
1JO 5:18 Dekainaji ashí aents Apajuí uchijí wajasú aidauk tudaunak takaa pujumaitsu duka, wagki Jesucristo Apajuí Uchijiya nu kuitabau asa, nuniau asamtai Iwanchik pegkegchau takastí tusag inamaitsui.
1JO 5:19 Jutiik Apajuinu ainag duka dekainaji, untsu ashí aents Apajuí nemagchau aina duka wakan pegkegchau inatai ainawai.
1JO 5:20 Nuigtushkam dekainaji Apajuí Uchijí ju nugka jui tauwa duka, nunik ni dekamtijabauwai Apajuí dekas tuke pujuwa nuna. Jutiik Jesucristo dekaskea nujai ijuntsa pujuinaji, duka Apajuí dekaskea nuuwai pujut tuke atinun sukagtina nu.
1JO 5:21 Uchuchig aidauh, kuitamamkatajum apajuimtai aina nujaig.
2JO 1:1 Witjai anciano, ubajuh Apajuí etegkamu asamin nuigtú amina uchijum aidaujai kumpamjame, dekaskenum atumin aneau asan; nunak imá wikik dutikatsjame, ashí dekaskea nuna dekau aina dushakam anempainawai,
2JO 1:2 dekaskeapi tabauwa nu jutiiní ajutjamu asamtai, nuigtush jutiinak tuke ajutjamtinai:
2JO 1:3 Anentag sujamsamua nu, wait anenkagtamu, nuigtú agkan pujamu Apajuí iina Apajiya nudau, nuigtú Jesucristo iina Apají Uchijiya nudaushkam, dekaskea nu nuigtú anenka dusha jutiinash ajutjamtinme.
2JO 1:4 Kuashat shiig aneasmajai ujumak uchijum aina nuiya iina Apají umiktajum tibauwa nunisag dekaskea nunak takaidau wainkan.
2JO 1:5 Yamai ubajuh segajame, pempentunisaik aneeniagmi tusan; tujash junak yamajam umiktinun tumainaitjam dutikanuk agattsujame, nagkamchaku tibau ajutjama nunak tajame.
2JO 1:6 Jujuwai anenkak, ni umiktajum tibauwa nu umiaku pujamua nu. Juuwai umiktina duka: nagkamchakjum aneenisa pujustajum tabau antukuitjum nu.
2JO 1:7 Wagki kuashat tsanumin aidau nugkanmag jiinjaje, Jesucristuk aentsmaga akiinachui tuina nu. Nunuwai tsanumin nuigtú anticristo.
2JO 1:8 Nuadui atumek kuitamamkatajum, atum takasbaunum jumain megkaekaijum; dekas kakanmamsatajum akigmamu betek jukita tabaunum.
2JO 1:9 Makichik aentskesh Cristo jintiamua nuna uwaegak jintinkagtuina nujaig Apajuik ijutkau atsui; untsu Cristo jintiamua nuwi nunisag ebetmamag puja nujai, iina Apají nuigtú niina Uchijish ijutkau awai.
2JO 1:10 Makichik aentskesh atumin ijagtamak taa, nu jintiamua nuna betek tachakuig jeeminig awayawaipa nuigtush: ¡Shiig anentsam! jukipa.
2JO 1:11 Wagki: ¡Shiig anentus! juwauk, ni pegkegchau takaa nui pachinui.
2JO 1:12 Kuashat wají aidau pachisa agamainuk ajutui, tujash carta agatnak dakitajai. Dekas atumiin taan igkuasan aujsatasan dakajai, nuniamunum jutii shiig aneamu uminkati tusan.
2JO 1:13 Wi yamai Apajuí nemajin aidaujai ijunja pujag juka, anuiyatijum Apajuí nemagkujum ijunjum nujai betekai, wi pujag juwiya Apajuí nemajin aidau kumpamjamainawai.
3JO 1:1 Witjai anciano, aneetaiju Gayoh, dekaskenum aneau asan kumpamjame.
3JO 1:2 Aneetaijuh, Apajuin segatjame ashí pegkejak ajutjama nunisag wakanminish nuigtú jamamtuchu pujamush ajutjamti tusan.
3JO 1:3 Kuashat shiig aneasmajai, yatsut aidau kaunawag ame betek umiakum dekaskea dusha wajuk takaame nuna ujatkagmatai.
3JO 1:4 Mina uchig aidau dekaskea nuna takainawai tabau antakun shiig aneag nuna nagkaesau shiig aneamuk atsugtawai.
3JO 1:5 Aneetaijuh, amek Cristo umikta tibauwa duka betek umikam weame, Cristo nemajin yatsut aidau atsumaidau wajuk yayame nuadui, imá senchi wainchataijum aidau dutikam dui.
3JO 1:6 Nunú aidau iglesianum etsejuinawai, ame anejattsam yaimam nuna pachipas. Apajuin shiig awagma dutiksamek tuke yaita aents jintá weak atsumainjinish.
3JO 1:7 Ditak Jesucristo aneamunum niina daaji pachisa etsegkagta tabaunum jiinjaje, nunú aidauk Apajuí anentaimtuchu aina nunú yaigbau atasag dakituinawai.
3JO 1:8 Nuadui jutii ditanuk uyumamainaitji, chicham dekaskea nuna tikich aidaunmash etsegkati tabaunum.
3JO 1:9 Juna pachisan wi iglesian agatjamjai, nuna Diótrefes dakitau asa jujutjamchau tabaun antajai, nigka imá mina chichamjunak antugtuktinme tusa wakegau asa.
3JO 1:10 Nuniau asamtai, wi anui taan wainak chicham pegkegchaun jutiin tujamu tawa nuna titatjai, nuigtú nuna takush shiig juwachu asa, yatsut aidau kaunu jutanash dakitawai, nuna juwaunash aikawaipa tawai, dutikak iglesianmash jiikí ajapeawai.
3JO 1:11 Aneetaijuh, aents pegkegchaun takaa duka dakumkaipa, dekas pegkeja nunú takastá. Aents pegkejan takaa nuuwai Apajuinuk, tujash aents pegkegchaun takaa duka Apajuinak wainchau asa nuniawai.
3JO 1:12 Ashí Demetrio pujutji pachisajag pegkejan etsegtuinawai, Apajuí chichame tawa imatiksag umiau asamtai. Jutiishkam dutiksaik etsegtuinaji, tuja atumek dekagme jutiik dekaskea nu etsejin ainag nu.
3JO 1:13 Kuashat juní inagkeasa tumainuk ajutui, tujash nunak jui agakun tutanak dakitajai,
3JO 1:14 wagki wamak minin wainkata tau asan, nuniaku igkunisa chichasmí.
3JO 1:15 Shiig agkan pujamu ajutjamti. Kumpajum aidau kumpamjamainawai. Ameshkam jutii kumpají aidau makí makichik kumpamjutuata.
JUD 1:1 Witjai Judas, Jesucristo inake Santiago yachiyaitjai, atum Apajuí iina Apajiya nuna anetaiji etegjamu aidautijum, Jesucristo kuitamsam batsatjum nuutigmin kumpamjime.
JUD 1:2 Atumnash Apajuí wait anenkagtamuji, shiig agkan pujuta nunú, anenka dushakam ajutjamtinme.
JUD 1:3 Aneetaig yatsug aidauh, shiig senchi wakemajai Apajuí uwemat amasbau betek ajutjama nuna pachisan agatjatasan, tujash yamai dekas atsumamua nuna segatá tajime, Apajuí aentsji pegkejam aidaun dekaskeapi tabaun susauwa nu kuitamkatajum tusan.
JUD 1:4 Wagki ujumak aents tsanumag wayawaje nunikag tsanugmajaje, duka yaunchuk nagkamas aatus suwimkan jukitnume tibau aina nu. Nunú aents aidauk pegkegchau ainawai, nunin asag Apajuí anentag amasua dui agkantaitji tusag pegkegchaun takainak Apajuinash dakituinawai nigki imana nuna, nuigtú iina Apuji Jesucristunashkam.
JUD 1:5 Juka atumek dekagminig aneemtikjime, Apu Apajuí niina aentsji Egipto nugkanum batsatun jiijui, dutikauwaitak niiní dekaskeapi tuinachunak ijinauwai.
JUD 1:6 Tuja ángel aidau ditá imanjin kuitamtsuk, ditá batsamtaijinash ukukiaju aidaunak tuke atinun achijá suwenum chimpiauwai, tsawan jegatai suwimkan susatatus.
JUD 1:7 Nunú wajukawajua nunisag Sodoma, Gomorra nuigtú yaakat tikiju aina dushakam shiig pegkegchau aina nuna takainak nuigtú mai aishmagkuk dutikdaiyá batsamtai, Apajuí jii tuke kajinkashtina dui apek utsagkui, nunú dutikamua duka aents tudaun taká batsatuk jii ajubaish kajinkashtina nui suwimkan jukiagtina nuna iwaintugmaji.
JUD 1:8 Nunisag nunú aents aidauk kajanum wajukmaina numamtuk, pegkegchau takainak dita iyashinak pegkegchau emainawai. Apajuí senchigtina nunash pachitsuk idaiyinak, nayaimpinmaya senchigtin aina nunash pegkegchau chichajuinawai.
JUD 1:9 Tuja arcángel Miguel, Moisesa iyashin jukitatus Iwanchjai maanitkush suwimak jukitnujinak pachitsuk, ayatak: “Apu Apajuí tujamti”, tiuwai.
JUD 1:10 Tujash nunú aents aidauk dekainachiatak pegkegchaun chichajuinawai. Ditak kuntin anentaimainachu asag dita wakegamunum pujuina numamtuk, dita pegkegchau wakegamujiya nunak wejuinak, ditak pegkegchau weenawai.
JUD 1:11 ¡Wait anentuinajai ditanak! wagki Caín wajukauwa numamtuk wajaidau asagmatai, nuigtú Balaam wajukauwa nunisag kuichik jukita tabauwai pegkegchau takaina duwishkam, aantsag Coré ni chicham intimtinig jakauwa nuniktin asagmatai.
JUD 1:12 Nunú aina duka datsanmainun atum Cristo nemajin aidautijum yatsut aneenisa fiestabaunum wayawag yuinak nuigtú umuinak shiig ané yujainawai, makichkish ajanas diijattsuk. Ditak pastor imá ditanunak uyumainawai, nunidau asag yumi yutugchatnaitak yujagkim bukusea wajasun dase umpui yajá ajapama numamtuk wajainawai. Ditak ajak nejetinish nejeshtai ajakjintin tegai ajapama numamtuk ajapeam agtinai.
JUD 1:13 Ditak nayants senchi tsukatak ayatak saunak jiiyama nuninawai, dita wají datsanmain takaamunum. Ditak yaya keeká wegau megkagama nuninawai, nunin aidaunuk tuke atin shiig suwea nu umigkamu ainawai.
JUD 1:14 Ju aents nunikagtinun pachis Enoc tiuwai, Adagkai nagkamas akiinak weamunum siete aajakua nu: “Apu Apajuí, dekapamainchau ángel aidaujai midaun wainjai,
JUD 1:15 ashí aents takasbaujin diijus titatus; nuniak pegkegchau takasú aidaun tuja Apajuinash pegkegchau chichagkau aidaunash suwimkan susatatus”, tiuwai.
JUD 1:16 Ditak chichaman patá yujau, augmatkagtin, dita wakegamujinak takaa yujajin, ememas chichá yujau, tikich aentsnash imanchau aig igkuawag, amek dekas pegkejaitme tusa anentai egketuawag niinun jujukiagtatus aujú yujajin ainawai.
JUD 1:17 Tujash atumek aneetaig aidauwah, iina Apuji Jesucristo apostolji aidau chichaman etsegkajua nu aneaku atajum,
JUD 1:18 juna tujabiaju ainawai: “Tsawan nagkanbau atina duik, aents aidauk pegkegchau chichagkagtin aidau agtina, nuninak dita pegkegchau wakegamu aina nuna takaa batsabiagtinai”, tusag.
JUD 1:19 Nunú ainawai atum Jesús nemajin aidautigmin datumtamak akaantamaina nu, nuadui yaunchuk pujujakbaujiya nunisag pujuidau asag Apajuí Wakanig atsujuinawai.
JUD 1:20 Tujash atumek aneetaig aidauwah, atum dekaskeapi tabau pegkegma nuig ebetmamjatajum, nuniakjum Wakaní Pegkeji tujama nunisjumek Apajuí aujsatajum.
JUD 1:21 Apajuí anempajum nuig kuitamamkatajum, iina Apuji Jesucristo wait anenjamu asa pujut tuke atinun amastina nu dakakjum.
JUD 1:22 Dita uwemjauwaitak utujimaidaush wait anentsajum yaigtajum.
JUD 1:23 Tikich aidauk, jiinmaya jiimaina dutikajum yaigtajum uwemjatnume, tikich aidaush puyatjusjum wait anenjatajum, nuniakjumesh kuitamamkatajum dita iyashin pegkegchau takasú aina duke atumesh takasaijum.
JUD 1:24 Apajuí senchigtina nuuwai atumnak pegkegchau takasainum tusa kuitamjamainuk. Niina emtin dekas imana nui ijupagtina nunú tsawantinig, atumek shiig aneastinaitjume, atumin bakugmamainuk makichkish atsutin asamtai.
JUD 1:25 Apajuí makichkiuch, niina Uchijí iina Apujiya nuna awetugma uwemtijamjauwa duke emematiagmi, imá nigki senchigtinuk, yamaiya juishkam, atakea duishkam tuke atina nu. Aatus atí.
REV 1:1 Junak Apajuí Jesucristun iwaintukui, wají aidau waamak uminjatta nuna ni inake aidaun iwaintukti tusa. Dutikam Jesucristo angelan awemauwai niina inaken Juagkan iwaintukti tusa;
REV 1:2 dutikamu asa, dekas ni ashí wainkamujin tiuwai, nuigtush Apajuí tibaun Jesucristo tiuwa nunash etsegtawai.
REV 1:3 Shiig aneasagtinai ju agagbaun aujus, atak uminkatin tibauwa juna shiig dekaawag, nui agagbauwa nuna umiidauk; wagki tsawantak tikiju wajasú asamtai.
REV 1:4 Witjai Juagkaitjai, siete iglesia aidau Asia nugkanum awa nui batsatutigmin kumpamjime. Apajuí tuke pujuu, nuigtush tuke pujujakú, jui taatna nunú, nuigtú siete Wakan ni ekeemtaijin emtin awa nujai; wait anenjamag shiig agkan pujutan amastinme;
REV 1:5 nuigtú Jesucristo dekaskea nuna etsejin, aents jakau aidau nantashtain ni nagkamak nantakiuwa nu nuigtú ju nugka juiya rey aina nuna nagkaesau senchigtina dushakam. Cristo jutiinak anempaji nuniau asa niina numpejai iina tudaujinak nijatjamkauwai;
REV 1:6 dutijabau asa jutiinash rey aidau etamak nuigtú Apajuí niina Apajiya nuna sacerdoteji aidau etamkajui; nuadui imá nigki ashí senchigtina nunú, ajumaish tuke ememattai atí. Aatus atí.
REV 1:7 ¡Cristuk yujagminum pachitkau minitnai! Nunitai ashí wainkagtin ainawai nuigtú niina mau aidaushkam wainkagtinai; nunikag ashí aents nugkanmaya aidauk buutiagtinai. Dekaske, aatus atí.
REV 1:8 Witjai nagkamtinish tuke pujusunuk, atakea duish tuke pujutnunuk tawai Apu Apajuí ashí senchigtin, tuke pujuu, nuigtush tuke pujujakú, jui taatna nunú.
REV 1:9 Witjai Juagkaitjai, Jesusa nemaju asan atumi yatsumitjai, atum waitiajum nunisnuk waitiaknush Jesusan nemaju asan emamkesan katsunjau asan atumjai betek Apajuí inamtaijin pujutnaitjai. Wika Apajuí chichame etsegbaunum nuigtú Jesús pachisa etsegtamunum achigkagmatai ajuntai Patmos tutainum pujubiajai.
REV 1:10 Apu Jesusa tsawanji tumig tsawagmatai Wakaní Pegkeji minai tajutmatai pujubiajai, nuniai mina ukujui makichik chicham senchi, trompeta umpuam shinuwama imatun antukmaijai;
REV 1:11 nuniai chichaak: “Witjai nagkamtinish tuke pujusunuk wikitjai atakea duish tuke pujutnunuk. Agagta makichik papinum ame wainam nunú, dutikam siete iglesia aidau Asia nugkanum batsata nu awetita: Éfeso, Esmirna, Pérgamo, Tiatira, Sardis, Filadelfia, nuigtú Laodicea” tujutmayi.
REV 1:12 Tujutkui: Yaki aujtawa tusan ayampá diikman, siete candelero oro aidaun wainkabiajai.
REV 1:13 Nunú siete candelero aina nuna ejapen Aentsmaga Akiinau aajakua numamtin, jaanchin esagman nugkuaju dawea aatus nuntumag, akachumtai oron detsepega imaan akachumau wajattaman wainkabiajai.
REV 1:14 Intashishkam uwija uje shiig pujua imanuyi, nieveya iman, jiishkam jii kegak wajukea imanibi;
REV 1:15 nawe aidaushkam bronce hornonum egkeam dewa wegama imanun etsanmayi, chichameshkam tuna uutama imatmayi.
REV 1:16 Uwejí untsujin siete yaya aidaun takakuyi, weninia makichik espada mai yantamejai etsakamua iman jiinmayi nuigtush yapig, etsa shiig senchi etsantama imanik etsanmayi.
REV 1:17 Imanun wainkan, ni wajamunum ayaumsan tuke jakaujai betek iyagbaijai, nuniai ni uwejí untsujin achijak: Ishamkaipa Witjai nagkamtinish tuke pujusunuk, ajumaish tuke pujutnunuk;
REV 1:18 nuigtush iwaaku pujajai. Jakabiajai, tujash yamaik iwaaku pujajai nuniku asan ajumaish tuke pujutnaitjai, aatus atí. Wikitjai jatanash depetkaunuk nuigtush jinau aidaunash nantagtajum titinnuk.
REV 1:19 Agagta wají aidau wainkaum nunú, yamai aina nu, jujú nagkaemagmatai atak atina dushakam.
REV 1:20 Mina uwejui untsuja nui siete yaya aidau wainkaum nu, nuigtú siete candelero oro aidau dekamainchau wainkaum duka juu ainawai: siete yaya aina duka ángel aidau, siete iglesia aina nuna diin ainawai, nuigtú siete candelero aidau wainkaum duka, siete iglesia aina nuuwai.
REV 2:1 Agatjata ángel iglesia Éfeso awa nuna diina nunú: Uwejí untsujin siete yaya aidaun takaku, candelero oro aina nui ejapena wekaga nunú, juna tawai:
REV 2:2 Atum takaam nunak wainjai, utugchatnum pujakjum senchi waitiajum nunashkam, nuniakjumesh emamkesjum nagkaejume. Pegkegchau aidaush dakitagme, nuigtush apóstol ainaji tuidaush dekapsajum waitjamu dekagjum nunashkam;
REV 2:3 nuniakum senchi waitiakmesh, mina anentu asam nuig ebetmamjam mijakchaume.
REV 2:4 Tujash aminí makichik dakitamu ajutui, nagkamchakum anentium duka idaisaum dui.
REV 2:5 Nuadui adeagta wajukeakmea nunikume nunú, nunikam yapajinam nagkamchaku takaajakuitam nunú takastá; nuniachkugminig waamak tajuattagme, nunikan yapajinchakminig candelero jujuktatjame.
REV 2:6 Tujash pegkeja nu ajutjamui, wi nicolaíta aidau takatjin dakitag nunisjumek atumshakam dakitajum nunú.
REV 2:7 Ni antutaiji ajamuk antukti, Wakan iglesia aidaun tawa nuna. Depetmakunak Apajuí pujutai paraíso ejapen numi pujutan sukagtin wajá nuna nejeen susattajai yuwati tusan.
REV 2:8 Agatjata ángel iglesia Esmirna awa nuna diina nunú: Nagkamtinish tuke pujusu, ajumaish tuke pujutna nu, nuigtush maamu aajakú ataktú nantakí iwaaku puja nunú, juna tawai:
REV 2:9 Ame waitiamujum aina nunak wainjai, nuigtú ujunayaitam nunashkam, tujash amek wakannumag wiakchaitme, nuigtush judiowaitji tuidau pegkegchau chichagtamaina nunashkam; tujash duka Satanasa jee ainawai.
REV 2:10 Waittsattam duka makichkish ishamkaipa. Atum ainajum anuiyan, Iwanch wakegamun takau aina nu achigmakag cárcel egkepattajume dekapjamsagtatus, dutijamamtai diez tsawan waittsattagme, mantamainakuish minai dekaskeapi tabauk idaisaipa, nunikamin wi pujut nagkanchauwa nuna amastatjame.
REV 2:11 Antutaiji ajamuk, antukti, Wakan iglesia aidaun: Depetmakua duka jiinum pujusag waittsashtinai, tawa nuna antuktinme.
REV 2:12 Agatjata ángel iglesia Pérgamo awa nuna diina nunú: Espada mai yantamejai etsakamun takaka nu, aatus tawai.
REV 2:13 Ame takaam nunak wainjai, anui Satanás ekeemtaijin ekeemas inama nui pujam nunashkam; tujash minak nemagtame. Antipas mina etsegtugna nuna, Satanás inama anui maawagmataish minai dekaskeapi tabaush idaisachume.
REV 2:14 Tujash ujumak wají aidau aminí dakitamu ajutui: Balaam Balacan jintintak: Israel aidau tunamamaina nuna, apajuijimtai kuntin anagkuamu maamu aidaush yumainai, nuwash tsanijimainai tiuwa nuna, atum ainajum anuiya ujumak idaiyinachush ainawai.
REV 2:15 Nuigtush ajutjamui Nicolaíta aidau jintiamua nuna idaiyinachu.
REV 2:16 Nuadui pujutjum yapajiata, nuniachkugminig waamak tajuan, mina chichameg senchigtina nujai ditajai maaniattajai.
REV 2:17 Ni antutaiji ajamuk antukti, Wakan iglesia aidaun tawa nuna: Depetmakunak maná uukbauwa nuna susatnaitjai yuwati tusan, nuigtush kayauch pujuchin yamajam daa agagbaun susatnaitjai, nunak makichkish dekainatsui imá jukiuwa duke dekaatnai.
REV 2:18 Agatjata ángel iglesia Tiatira awa nuna diina nunú: Apajuí Uchijí, jii keegama imanun jiimkauwa nu, naweshkam bronce dewa wegama imanun nawemka nunú chichaak, juna tawai:
REV 2:19 Atum takaajum nunak wainjai, nuigtú mina anenjum nunashkam, minai dekaskeapi tabaugminash, atsumaidau yayajum nunashkam nuigtushkam waitiakjumesh emamkesjum katsunja nagkaejume; nuigtushkam takaajum duka nagkamchaku takajakuitjum nu inagkeasjum yamaik takaagme.
REV 2:20 Tujash ujumak pegkegchau takaajum nu dakitamu ajutui: Aanú nuwa Jezabel profetisayaitjai tusa, mina inakeg aidaun tsanuak, tsanijinmainai nuigtush apajuimtai kuntin anagkuamu maamu aidaush yumainai, tusa jintinkagtakuish ayatak diyagme.
REV 2:21 Nuniakuish tsawantan susajai pujutjin yapajiati tusan. Tujash tsanijinat idaitanak dakitawai.
REV 2:22 Nuniau asamtai niina pegajinig jata susan aepsattajai, dutikakun niina tsanijibau aidaunash shiig senchi waittan susattajai, ni takaamun takaina nuna idaiyinachkuig.
REV 2:23 Nuigtush uchijí aidaunak kajenkattajai, dutikamtai ashí iglesia aidaush dekaawagtatui; anentaibaunash, anentainash ashí wiki dekauwaitag nuna, dutikakun makí makichik takasbaujin diigsan susatnaitjai.
REV 2:24 Tuja atum aidautijum nuigtú tikich aidau Tiatira batsatutigmek, nu nuwa jintinkagtamua duka umiatsjume, nuniau asajum, Satanasdau duikish dekaachbau jintinkagtaji tuina dusha unuimatjachu asagmin, atum tikich umimainnak amaschattajime.
REV 2:25 Tujash dekaskea nu dekauwaitjum duke kuitamkatajum, nuniagmin taatjai.
REV 2:26 Depetmakunak, nuigtush wi wakegamugnak takai takainakua nagkanbaunum jegaunak, wi ashí nugkanmaya aidaun apuji emaktatjai,
REV 2:27 mina Apag Apu etiuwa dutiksanuk. Dutikamu asag, ichinka najanin duwe najanamu jijui awatí tsaiyama numamtuk, awajkagtinai aents pegkegchau aidaunak;
REV 2:28 nuigtush yaya tuke tsawampauwa nuna susatnaitjai.
REV 2:29 Ni antutaiji ajamuk antukti, Wakan iglesia aidaun tawa nuna.
REV 3:1 “Agatjata ángel iglesia Sardis awa nuna diina nunú: Apajuí Wakaní sieteya imajin aja nunú, nuigtush siete yayan takaka nunú juna tawai: Ame takaam nunak wainjai, iwakui tama ame, tujash jaká pujame.
REV 3:2 Shintaagta, nunikam tikich aidau dutikmain megkaekattak awa nunú inantaita, wagki amina takatjumnak Apajuí eemtinish pegkegnak wainkachjai.
REV 3:3 Adeagta pegkeg jintiamu antukuitam nunú; nuniakum umiktá, nuigtush tudau takatash idaisata. Aneaku pujachkuminig, wi kasajai betek minittatjame, tujash wají horatinia minittaja duka dekashtatme.
REV 3:4 Tujash ujumak aents aidau ajutjamui Sardis, jaanchjin tsuwapachaju aidau; nu aidauk jaanch pujun nugkujag wijai yujasagtinai, Apajuí wakegamun takasaju asag.
REV 3:5 Pegkegchau takatan depetkauwa duka jaanch puju anugkuam atinai, nuigtush pujutá jukiu daaji papinum agattaiya nui, daaji agatjamunash tuke esakagchatnaitjai, ayatak mina Apajú emtin nuigtú ángel aidau antuinamunum juka midauwai, titinaitjai.
REV 3:6 Ni antutaiji ajamuk antukti, Wakan iglesia aidaun tawa nuna”.
REV 3:7 Agatjata ángel iglesia Filadelfia awa nuna diina nunú: Junak Pegkejam, Dekaskea nunú, Davita llavejin takaka nu, ni ujaimtaig makichkish epenmainchau, nuigtú epenmataish makichkish ujamainchauwa nunú, tawai:
REV 3:8 Ame takaam nunak wainjai, nuniau asan amina eemtimin waitin ujain idaisajai, nunak makichik aentskesh epenmaitsui; wagki atumek wajumchik ainayatkujum, mina chichamjush betek umigtakjum, mina daajush dakitjachugme.
REV 3:9 Nunin asamtai, wisha judiowaitjai tusag anui wait aidau ijunaina duka Satanasdau asamtai, atumi emtimin tikishmitkaktatjai, wi atumin aneajim nuna dekaatnume tusa.
REV 3:10 Ashí aents nugkanmaya aidauk utugchat, waitiamu ajiagtinai. Tujash amek mina chichamjuk betek umikú asamin ayamjuktatjame, wají horak utugchat ju nugká jui aents batsata nu dekapsata tabaush minit nuniakuish.
REV 3:11 Wika wamak minittajai, nunin asamtai ashí amina ajutjama duka shiig kuitamkata, ame depetmaku asam corona jumaina nuna tikich atanjamki.
REV 3:12 Depetmakunak wi, jega mina Apag ememattaiya nui awayattajai, dutikamu asa nuig tuke pujutnai; dutikan mina Apajuiju daajin, nuigtush mina Apajuiju yaaktaji yamajam Jerusalegka nuna daajin, mina Apajuig nayaimpinum puja nuiya akaikitna nuna, nuigtú mina daag yamagma nunashkam niiní agagtinaitjai.
REV 3:13 Ni antutaiji ajamuk antukti, Wakan iglesia aidaun tawa nuna.
REV 3:14 Agatjata ángel iglesia Laodicea awa nuna diina nunú: Junak ni tibaujinak betek umina nunú, waitjuchu dekaskea nuna etsejin, nuigtú nagkamchakush Apajuijai ashí najankauwa nunú chichaak:
REV 3:15 Ame takaam nunak wainjai, bichatnukesh atsume, sukutnukesh atsume. ¡Utusamek bichatin, nuniachkumesh sukutnukesh aam!
REV 3:16 Tujash amek papaapatu asamin, nuigtú bichatnukesh achau, sukutnukesh atsum dui iyakan ajapatnaitjame.
REV 3:17 Wagki ame chichaakum: Wika wiyakchaitjai makichkish atsumamuk atsugtawai tame; tujash amek Apajuí diismak shiig aneas pujuchu, waitin, ujunauch, wainmachu, nuigtú wisú pujam duka dekaamatsme.
REV 3:18 Nuadui wi tajame: Minai sumakta oro jiinum apea ayatak orok awasamua nunú, nunikam wiakuch wajasminum, nuigtush jaanch puju aidau nugkugminum, ame wisú wetai datsantan dekagmawainum, nuigtushkam jiiminish colirio egkeeta wainmakminum.
REV 3:19 Wika ashí wi aneamug aidaunak jiyaajai, dutikakun suwimkanash suajai, nunin asamtai pegkegchau idaikum Apajuí umigkata.
REV 3:20 Wika waitinum wajasan untsumjai; nuniai makichik mina chichamjun antuk waitin ujatjakuig niiní wayattajai, nunikan niijai ijunjan agkú yutain yuattajai.
REV 3:21 Depetmakunak, mina inamtaijui ekentsatnaitjai, wi depetmaku asan mina Apajú ekeemsa inamtaijin eketag dutiksanuk.
REV 3:22 Ni antutaiji ajamuk antukti, Wakan iglesia aidaun tawa nuna.
REV 4:1 Ju nunikmatai niimkaman, nayaimpinmaya makichik waiti ujani atatman wainkabiajai, nagkamchakun chichaman antukag duka trompeta wajukea imatuk mina aujtak: “Jui wakata, nunikamin ju nagkaemagmatai atak wají nagkaemagtin aina nuna wi iwaintuktajame”, tujutmayi.
REV 4:2 Nuna taig, Wakaní senchijí minai tajutuabi, nunikmatai diikman nayaimpinum ekeemtai umikbaunum makichik ekeemtatman wainkabiajai.
REV 4:3 Nunú ekeemtainum eketa nuna niimeg, kaya jaspe tutai nuigtú cornalina tutai aina nujai betekmamtinuyi; nunú eketa nuna tentea arco iris amayi, kaya esmeralda tutaiya nuna niimejai betekmamtin.
REV 4:4 Nunú ekeemtaiya nuna tentea, veinticuatro ekeemtai aidau agmayi; nuanui veinticuatro anciano aidau jaanch puju aidaun nugkuinaju, corona oro aidaun atsejaku pekabiagmayi.
REV 4:5 Nunú ekeemtai ejapen awa nuiya peem aidau, chaajip aidau, chichamushkam jiiniagmayi, nuigtú ekeemtai eemtin siete jii ekemagbau amayi, duka siete Wakan Apajuinu aina nuuwayi.
REV 4:6 Nuigtushkam ekeemtaiya nuna eemtin nayantsa numamtin vidrio saawiya iman wajas amayi. Nuigtú ekeemtai ejapen awa nuna tentea cuatro iwaaku aidau wajagmayi, ukuujin, eemtinish kuashat jii ajamu aidau.
REV 4:7 Dekatkau iwaakua duka león niimtinuyi nuniai tikichia duka toro tsakata nuní niimtinuyi, kampatuma nuna yapig aentsú yapijai betekmamtinuyi, nuniai cuatroa duka ukukui nanamua nuninuyi.
REV 4:8 Nunú cuatro iwaaku aina duka, makí makichik seis nanape ajiagmayi, jiishkam ashí iyashin ajiagmayi; nunú iman aidau tuke itattsuk tsawai, kashijai: “¡Pegkegmai, pegkegmai, pegkegmai, Apu Apajuí ashí senchigtin, tuke pujuu, nuigtush tuke pujujakú, jui taatna nunú!”, awajiagmayi.
REV 4:9 Nunú iwaaku aidau Apajuí tuke pujuwa nu, ekeemtainum eketun emematuinak, eme anentus see tuinak ajumaish tuke pujutna nuna imatjiagtai;
REV 4:10 veinticuatro apu aidau ekeemtainum eketa nuna emtin tikishmajag ajumaish tuke pujuwa nuna emematuinak, dita coronaji aidaun jukiag niina eemtin apujtuinak:
REV 4:11 “Apuh, iina Apajuijiya ameketme ememattaim, nuigtush eme anentai, nuigtushkam senchigtinaitam ibau asam. Wagki ame ashí wají aidauk najankauwaitme, dutikamu asag ame wakejusam najankauwaitam nunisag, ame wakegamunmag ainawai”, awajiagmayi.
REV 5:1 Wainkabiajai ekeemtainum eketa nunú, uwejí untsujin makichik rollo mai yantamejai agagbau, sieteya imania achiamun takus ekeemtatman.
REV 5:2 Nuigtú wainkabiajai makichik ángel senchigtin senchi untsumak: “¿Yaita dekas imanush, ju rollo achigbauwa juna kuwajug atimainush?” tusa iniimtatman.
REV 5:3 Tujash nayaimpinmayagkesh, nugkayagkesh, nugká initkeniagkesh nuna rollo atijá nui agagbauwa nuna diimainuk makichkish atsusmayi.
REV 5:4 Nuniakui wika senchi buutmaijai, wagki rollo atimainuk, nuna diisá augmainkesh atsusú asamtai.
REV 5:5 Nuniai anciano aina nuiya makichik chichagtak: “Buutipa, Judá weantua nuna Leogji, David weantua nu depetmake, nuniku asa niiyai rollo sieteya imania achigbauwa nuna ukuitug ujamainuk”, tujutmayi.
REV 5:6 Takui diikman, ekeemtai ejapen cuatro iwaaku aidau, nuigtú anciano aidau ejapeam makichik Uwig maamu aajakua numamtin wajattaman wainkabiajai; ajibi siete kachují aidau, nuigtú siete jii aidau, nunú aina duka siete Wakan aidau Apajuinu ashí nugkanum ishiakbau aina nuna iwainawai.
REV 5:7 Nuniai, ekeemtainum uwejí untsujiin rollo takus eketa nuna Uwig jegantun jujukmayi.
REV 5:8 Nuna rollo jukimtai, cuatro iwaaku aina nunú, nuigtú veinticuatro anciano aina nujai Uwijá eemtin tikishmajagmayi; ashí nunú aidauk arpa nuigtú copa oro aidaunum incienso aimjamu aidaun makí makichik takaku agmayi, duka Apajuí aentsji pegkejam aidau Apajuí augbauwa nu agmayi.
REV 5:9 Nuninak yamajam kantamtain kantamainak: “Ameketme rollo agagbauwa nu jukim, sello aina dusha atimainmek. Wagki amek maamu aajakuitme, nunin asam amina numpemin, Apajuinu atinme tusam sumajatkauwaitme, ashí aents nugkanmaya aidau, tikich chichaman chichaaku aidau nugka yaignumia nuigtú nugka muun aina nuiyashkam,
REV 5:10 nuigtushkam ditak rey aidau, sacerdote aidau emakume, Apajuin takagsatnume tusam, dutikamu asag nugkanum inamjagtatui”, wajagmayi.
REV 5:11 Nuna takui diikman, kuashat ángel aidau, nuigtú iwaaku aidau; anciano aidaushkam, nuigtush dekaapatash dekapamainchau aidau ekeemtaiya nuna tenteawag pampainamun antukbaijai,
REV 5:12 nuniai senchi jiikag chichainak: “¡Uwig maamu aajakua, nuuwai dekas wagaaku senchigtinuk, wiyakuch, yacha, senchigtin, eme anentsá diitai, ememattai, tuke kantamjutai atinuk!” wajagmayi.
REV 5:13 Nuigtú ashí najankamu nayaimpinum, awa nunú, nugkanmaya, nuigtú nugká initkenia aidaush, nayantsanmayashkam, ashí wají aidau nui aina dushakam, senchi chichakag: “¡Ekeemtainum eketa anú, Uwigjai kantamjuinaku, eme anentsá ememattai senchigtina ibau asamtai ajumaish tuke ememattai atin atí!”, awajuidaun antukbaijai.
REV 5:14 Imatjiagtai cuatro iwaaku aina nu senchi aiká: “Aatus atí”, tiagmayi; nuniaig anciano aidaushkam tikishmatug, emematiagmayi ajumaish tuke pujutna nuna.
REV 6:1 Wainkabiajai siete sello aina nuiyan Uwig makichik ujattaman, nuigtush antukbaijai cuatro iwaaku aina nuiya makichik ipamat wajukeama imatuk: “¡Tantá diistá!”, tujutun.
REV 6:2 Takui diikman makichik caballo pujun wainkabiajai; nui entsatka duka makichik nagkí takakuyi, nuigtush corona susamuyi, nigka depetmaku asa ataktush depetmaktatus jiinkibi.
REV 6:3 Nunikmatai jimaja juna sellon Uwig ujaibi, nuniai iwaaku aina nuiya jimaja nu chichagtak: “¡Tantá diistá!”, tujutmayi.
REV 6:4 Taig tikich caballo kapantaku jiinkibi; nui entsatka duka senchi susamuyi ashí aents aidaun maanimitkati dutikamu asa pempee pempeentuniki mantamdaitinme nuninak agkan batsatbauk atsuti tusa, nuigtush espada esagman susami.
REV 6:5 Kampatum selloa juna Uwig ujaibi, nuniai iwaaku aina nuiya kampatuma ju untsujuk: “¡Tantá diistá!”, tujutmayi. Tujutkui diikman, caballo bukusean wainkabiajai; nui entsatka duka balanza takakuyi.
REV 6:6 Nuniai cuatro iwaaku aina nuiya ejapenia chichaak: “Makichik tsawan takasbauwai makichik kilo trigon jukiagtinai, tuja makichik tsawan takasbauwai kampatum kilo cebada suwam agtinai. Tujash aceite, vino aina duka emeskaipa”, taun antukbaijai.
REV 6:7 Cuatro selloa nuna Uwig ujaibi, nuniai iwaaku aina nuiya cuatroa nu untsujuk: ¡Tantá diistá!, tujutmayi.
REV 6:8 Tujutkui diikman caballo yampia wajas wajaun wainkamiajai, nui entsatka nuna daajig Jata tutaiyayi, nunak Hades pataetakuyi; Caballonum entsatka duka senchi susamuyi, ashí aents nugkanmaya aina nuna jimaitukjiya nuna jimaituken maanimtikak ijinati, nujantai, jataishkam, kuntin kajen nugká batsata nunashkam tusa.
REV 6:9 Cinco selloa nuna Uwig ujaibi, dutikamtai wainkabiajai, altara wakentin Apajuí chichame etsegbaunum, nuigtú pegkejan iwainmamaidau asamtai waitkasa maamu aidau wakaní ijuntatman.
REV 6:10 Nunú aidau senchi untsukag: “Apuh pegkegmah, dekaskenum chichauwah, ¿wajupa asamea nugkanmaya iina mantamawajua dusha ikmatkagtuktatme?” awajiagmayi.
REV 6:11 Nunú aidaunak jaanch puju aidaun makí makichik susagmayi, dutika: Ujumak tsawan ayamkujum dakastajum, atumin mantamawajua imatiksag yatsum aidaunash Apajuin takajiagtai maawag betek awasatnume, timayi.
REV 6:12 Seis selloa nuna Uwig ujaibi, dutikamtai wainkabiajai senchi uugbaun; nuniai etsag bukusea, jakamunum jaanchin bukusea nugkuwajama iman wajasmayi, nantushkam kapantu numpa numamtin wajasmayi;
REV 6:13 nunisag nayaimpinmaya yaya aidaushkam, higuera nejee dase senchi pegam kakegama numamtuk nugká kakeyagmayi.
REV 6:14 Nayaimpishkam papí pempeaja jutayama numamtuk megkaekabi, ashí muja aidauk, ajuntai aidaujai pachimdaegak patamsabi.
REV 6:15 Imanitai nugkanmaya rey aidau, aents eme anentai aidau, wiakuch aidau, capitán aidau, senchigtin aidau, nuigtú ashí inatai aidau, inashtai aidaushkam, muja kaya waa aidaunum uumkagmayi;
REV 6:16 nunikag mujan, untsuinak: “Yutujatuam uujatkakia, Apajuí nayaimpinum ekeemtaijin eketa au waipakai, Uwig suwimkan sujamsai;
REV 6:17 wagki ni kajeká suwimak sukagtamuk tsawantak jegae, makichkish yamaik suwimkanak uwemtumain ainatsui”, wajagmayi.
REV 7:1 Nunú nagkaemakiu ai, wainkabiajai cuatro ángel aidau, cuatro nugka najatamu aina nui kanajag, cuatro dase aina nunú nugkanum dasentak nayantsan, makichik numinakesh umpuini tusag emetuawag ijuntatman.
REV 7:2 Nuigtushkam wainkabiajai tikich ángel etsá jiintaiya nuiya sello Apajuí tuke pujuwa nudaun takaku minittaman; nuniak cuatro ángel aina nuna senchi untsuká, senchin susami nugka, nayantsajai emeskatna nuna;
REV 7:3 dutika chichajak: “Yamaikik nugkak, nayantsak, numi aina dushakam emeskaigpajum, iina Apajuiji inake aina nuna nijayin eke selló awagmatsjinkik”, timayi.
REV 7:4 Nuniaig: “Ashí Israela uchijí weantu aidau dekapamak, ciento cuarenta y cuatro mil aidau nijayin selló awakamu ainawai”, tabaun antukbaijai.
REV 7:5 Judá weantunmaya doce mil, Rubén weantunmaya doce mil, Gad weantunmaya doce mil,
REV 7:6 Aser weantunmaya doce mil, Neftalí weantunmaya doce mil, Manasés weantunmaya doce mil,
REV 7:7 Simeón weantunmaya doce mil, Leví weantunmaya doce mil, Isacar weantunmaya doce mil,
REV 7:8 Zabulón weantunmaya doce mil, José weantunmaya doce mil, Benjamín weantunmaya doce mil.
REV 7:9 Nunú nagkaemakiu ai diikman, ashí nugkanmaya aents aidau shiig kuashat, makichkish dekaapamainchau ditash chichaaku aidau, ditash niimtin aidau, yaaktanmaya aidaushkam ekeemtai pujá nuna emtin, nuigtú Uwijá emtin, jaanch pujun nugkuaju aidau dukan takuinasua ijunaidaun wainkabiajai.
REV 7:10 Nuninak senchi untsumkag: “¡Uwemta duka ekeemtainum Apajuí eketa nudauwai, nuigtushkam Uwigdauwai!”, wajagmayi.
REV 7:11 Nuniai ashí ángel aidau ekeemtaiya nuna, anciano aidaunash, nuigtú cuatro iwaaku aina nunashkam tentea wajagmayi; nunú aina nujai ekeemtai eemtin tikishmajag nijayin nugkan antig pujusag Apajuin emematuinak:
REV 7:12 “¡Aatus atí! Emematbau, niina imanjiya dushakam, yachajishkam, see tutai, eme anentsá diitash, senchijish, ichichmamta dushakam imá Apajuinuk atí, ajumaish tuke ememattai atin atí. ¡Aatus atí!”, wajagmayi.
REV 7:13 Nuna tiagmatai, anciano aina nuiya makichik, inintak: “Jaanch pujun nugkuaju aina aush ¿ya ainawa, tuwiya kaunkaje?” tujutmayi.
REV 7:14 Tujutkui wi ayaakun: Apuh, ame dekam jama tibaijai. Tai ni chichagtak: Juka shiig senchi waitiamu awa nuiya wakaje, nunú aidau Uwijá numpeen jaanchjin nijakag puju emakaje.
REV 7:15 Nuadui Apajuí ekeemtaiya nuna eemtin ijunainawai, nuigtush jega Apajuí ememattaiya nui kashi tsawaijai takajuinawai; nuniagtai ekeemtainum eketa nunú niina tabernaculojin batsas kuitamkattawai.
REV 7:16 Dutikamu asag yapajamush atsujiagtinai, kitamamushkam, etsash sukuam achagtinai, seemakugkesh waittsashtin ainawai.
REV 7:17 Wagki Apajuí ekeemtaiji ejapen awa nui Uwig, wajá nunú kuitamkagtatui, dutikak yumi pukuni jiinu pujuta sukagtina nuna amitnai, nuigtushkam Apajuí ashí negaiki aina nunak ujugtuktatui, tujutmayi.
REV 8:1 Siete selloa nuna Uwig ujaibi, dutikamtai nayaimpik bitat wajas asabi jimaituk hora tumain.
REV 8:2 Nuniamunum wainkabiajai siete ángel aidau Apajuí emtin ijuntatman, nunú aidaun siete trompetan tinamkagmayi.
REV 8:3 Nuniai tikich ángel, incienso apetain oro takus, altara eemtin wajasmayi; nunikmatai kuashat incienson susabi, Apajuí aentsji pegkejam aina nu, Apajuí augbaujiya nujai ijumag altar oro, Apajuí ekeemtaijin eketa nuna eemtin awa nui patai apeati tusa.
REV 8:4 Dutikamtai ángel takakbauwa nuiya incienso, Apajuí aentsji pegkejam aidau Apajuí augbauwa nujai ijumnag bukuiti, Apajuí eketbaunum wamayi.
REV 8:5 Nuniai ángel incienso apetain jukibi, dutika altarnum jii kegá nuna juki aimak nagkimá nugká ajuagmayi; dutikam ipamat, pampaamu aidau, chaajip, nugkashkam uugmayi.
REV 8:6 Imatiagtai siete ángel aidau, siete trompeta takus ijuna dushakam umintsagmayi umpuajagtatus.
REV 8:7 Nagkamchak makichik ángel trompetan umpuagmayi, dutikamtai bicha, nuigtú jii numpajai pachimjamun nugká nagkimá ajuabi; dutikam nugkanak jimaituk amaisattak numi aidaun apekmayi, nuigtush dupa aidaunash apekmayi.
REV 8:8 Nunikmatai jimag angela ju trompetan umpuagmayi, dutikamtai makichik muja muunta numamtinun kegaun nayants nagkimá ajugmayi; dutikam nayantsan jimaitukjin amaisattak numpa wajasmayi.
REV 8:9 Nuniku asamtai nayantsanum iwaaku batsamin aidauk jinawagmayi, barco aidau nui yujaushkam ashí esakagmayi.
REV 8:10 Kampatuma nu ángel trompetan umpuagmayi, dutikamtai nayaimpinmaya makichik yaya muun keeká antorchaya numamtin, namak aidau, yumi pukuni jiinin aina nuna jimaituken amaisattak iyagmayi.
REV 8:11 Nunú yayak Yapau daagtinuyi, nunin asa yumi aina nuna jimaitukjin amaisattak yapau awasabi; nuniku asamtai kuashat aents nuna uwajajuk yapakag jinawagmayi.
REV 8:12 Nu nunikmatai cuatro angela nu trompetan umpuagmayi, nunikmatai etsa, nantu, yaya aina nuna jimaitukjin amaisagtatak emeskabi, besekaja nunisag suwe wajastinme tusa, dutikamu asa tres hora kashi tsawaishkam tsaaptinuk atsusmayi.
REV 8:13 Nu nuniku ai wainkabiajai, nuigtush antukbaijai makichik ukukui nayaimpi ejapen nanaak minis, senchi untsumak: “Ae, ae, ae, shiig ishamain atatui nugká batsata nudauk, kampatum ángel aidau trompeta umpuinatsu nunú umputaik” wajattaman.
REV 9:1 Cinco angela nu trompetan umpuagmayi, dutikamtai nayaimpinmaya makichik yaya nugká iyaittaman wainkabiajai; nuna waa muun ishamain akaga nuna llavejin susabi.
REV 9:2 Dutikam waa muun ishamain akaga nuna ujaibi; dutikam aja tsajutkau apeam bukuituwama imanik bukuiti jiinmayi, imaniak etsanak suwe awasabi, daseshkam waanmaya bukuita ibauk wajasmayi.
REV 9:3 Nunú bukuita nuiya langosta aidau titigki ijujattaiya iman aidau senchimtikam jiinag nugkan pampankabi.
REV 9:4 Tujash nugkanmaya dupa aidaukesh, makichik numikesh emesjaigpa, ayatak aents Apajuinuchu aidau nijayin sellachbau aina nu ijutajum;
REV 9:5 tujash maawaigpa, ayatak cinco nantui najaimak waittsatta nu dutikatajum timayi. Tibau asag aentsuk titig ijum najaimama imaniagmayi.
REV 9:6 Imanidau asag nunú tsawantinig aents aidauk jakatagtus egakagtinayi, tujash igkuichagmayi; nuigtush jakatasash wakeyagmayi, tujash dita jamainuk atsusagmayi.
REV 9:7 Langosta aidauk caballo aidau maanitnum weagtatus uminas aama nujai betek wajas agmayi, buuké aina nuig corona aidau oroa numamtin ajiagmayi; yapi aina duka aentsú yapiya numamtin agmayi;
REV 9:8 intashishkam nuwá intashiya numamtin ajiagmayi, nai aina dushakam leogka naiya numamtin ajiagmayi;
REV 9:9 iyashí aidauk jijua numamtin anugjamuyi, nanapenishkam caballo aidau maaniamunum shimak kuashat carro aidau japiam tutugtuwama imatmayi;
REV 9:10 ujuké aina duka titigki ujukega nunin ajiagmayi, nuigtush ijujattaijish ajiagmayi; nunin asag ujukega dui aentsun iju cinco nantui waitkasti tusa senchimtikamuyi.
REV 9:11 Ditá reyjiya duka, waa muun ishamain akaga nui ángel puja nuuyi; nuna daajig hebreo chichamaik “Abadón” tutaiyai, untsu griego chichamai “Apolión” tutaiyai.
REV 9:12 Nagkamchak ¡ae! tibauwa duka nagkaemakmayi, tujash eke miniagtatui jimag ¡ae! tibauwa nunú.
REV 9:13 Seis angela ju trompetan umpuagmayi, dutikamtai altar oro cuatro kachují ajamu Apajuí eemtin awa nuiya chichamun antukbaijai;
REV 9:14 nuniai ángel trompeta takaka nuna chichajak: “Cuatro ángel aidau, namak muun Éufrates uwet jigkajam ijuna au atiata”, timayi.
REV 9:15 Tutai cuatro ángel aidau jigkajam ijuntatman atiawagmayi, ditanu hora, tsawan, nantu, mijan umintai nunikti tibau jegau asamtai, dutikam jimaituk ejesattak aents aidaun ijinati tusa.
REV 9:16 Suntag aidau caballonum entsatkau aidauk doscientos millones awai tabaun antukbaijai.
REV 9:17 Junak shiig paan wainkabiajai, caballo aidaun, nuigtú entsatkau aidaunash, nu aidauk coraza kapantu jiiya numamtin aidau ajiagmayi, zafirowa numamtin wigka, nuigtú azufreya numamtin yagkú ajiagmayi. Caballo aina nuna buukeg león aidau buukega numamtin agmayi; nuigtush weniya nuiya jii, bukuitamu, azufre aatus jiiniagmayi.
REV 9:18 Jujú kampatum jata jii, bukuitamu, azufre aidau, nuna wenin jiinaina dui, aents aidauk jimaitukea nuna amaisattak jinawagmayi.
REV 9:19 Caballo aidau senchijig wenin, ujuké aina nui ajibi; wagki ujuké aina nuig dapí buukejai betek ajiagmayi, nunin asamtai aentsnak dui emesiagmayi.
REV 9:20 Tujash tikich aents aidau nujantai jakachu aidauk, pegkegchau takaamujin idaiyas yapajintsuk, Iwanch aidau ememattanash idaitsuk, orojai dakumká najanamu aidaun, jiju platayai najanamu, broncejai najanamu, kayajai najanamu, numí aina nujai najankamu aidaun emematiagmayi, wainmachu, antutnash antuchu, wekaetanash wekaechau aina nuna;
REV 9:21 nuigtush magkagtutnash, wawejattanash, tsanijimtanash, kasamtanash idaichagmayi.
REV 10:1 Tikich ángel senchigtin nayaimpinmaya yujagminum pachitkau akaegun wainkabiajai, buukenig arco iris ajamu, yapig etsajai betek etsanmayi, nawe aina duka jii kegak wajukeama imaniagmayi.
REV 10:2 Papí piipich pempeagbau ujakbaun takakuyi, nawe untsujiya duka nayants najama amayi, nuniak menajiya nunak nugká najama wajabi;
REV 10:3 nunik senchi untsumak león shinak wajukeama imatuk nagkanaig, sieteya imania ipamat wajukea imatuk paan antumainun chichakagmayi.
REV 10:4 Nunú sieteya imania ipamat wajukea imatuk chichakagmatai agagta timaijai; nuniai nayaimpinmaya chichagtak: “Sieteya imania ipamat wajukea imatuk tiaja duka idaisata, agajaipa”, tujutmayi.
REV 10:5 Tuja ángel nayantsanum najama, nugkanmash najama wajaun wainkamiag nu, uwejí untsujiya nuna nayaimpinum takuibi;
REV 10:6 nunik, ajumaish tuke pujutin, nayaimpin ashí wají aidau nui ayá nunash, nugkanash ashí wají aidau nui ayá nujai, nayantsanash ashí wají nui ayá nujai najankauwa nuna daajin adaiyak: “Yamaik tsawantak jegae,
REV 10:7 siete angela nu trompetan umputai, Apajuí ni dutikatnujin ii dekaachbaun, niina inake profeta aidau etsegkajua duka uminkattawai”, timayi.
REV 10:8 Nayaimpinmaya chichaamun antukag duke ataktú awentsag aujtak: “Wetá, nunikam ángel nayantsanum, nugkanum najama papí piipich ujakbaun takus waja nu jukita”, tujutmayi.
REV 10:9 Tujutkui angelan jegaantan “Papí piipich pempeagbau sujustá”, tusan segabiajai: Tai ni chichagtak: “Jukita, nunikam yuata; wakeminig yapau awajtamsattawai, tujash weniminig dapá yumiji yumintska iman dekapjattame”, tujutmayi.
REV 10:10 Tujutkui, ángel piipich pempeagbau takakbaun jukin yuabiajai; nunikman dapá yumiji yumintska imanun wenujui dekapjamiajai, tujash yuwá ai wakejui yapau awajtusmayi.
REV 10:11 Nuniai ni chichagtak: “Ataktú awentsamek etsegkata, kuashat aents aina nui, nugka muun aina nuishkam, ditash chichaaku aina nuish, nuigtú rey aidau batsatbaunmash”, tujutmayi.
REV 11:1 Nuna tujuti, makichik tagkanan dekapatia nuninun sujusmayi, dutika chichagtak: “Wetá, nunikam jega Apajuí ememattaiya nu, altar puja nujai dekapata, nuigtú wajupa aentsua nuish emematuinawa dushakam.
REV 11:2 Tujash jega Apajuí ememattaiya nuna agaajig dekapatsuk idaisata, duka judiochu aina nu idaitusbauwai; dita ju yaakat pegkegma nunak cuarenta y dos nantui batsamtusag najakag tsai batsamtiagtatui.
REV 11:3 Nuniakui wi jimag aentsun, jaanch wake besemag pujaku nugkutain nugkug yujasag, mil doscientos sesenta tsawantai mina pachitus etsegkatnun awemattajai”.
REV 11:4 Nunú jimag mina pachitus etsejuina duka, jimag olivo ainawai, nuigtush jimag candelero ashí nugkanmaya Apujiya nuna eemtin ijuna nuuwai.
REV 11:5 Duka makichik aentskesh pegkegchau awajkata tamak, ditá weninia, jii jiinak niina shiwaji aina nunak apeká ijiniagmayi; nunin asagmatai makichik aentskesh niina pegkegchau awajkata tauk, nunisag jiniagmayi.
REV 11:6 Ditá senchijig nayaim epenmainush ajuinawai, chichaman etsejuinak yujagtata dui yumi yutujai tusag nuigtush yumi numpa emamaina dusha senchijig ajiagmayi nuigtú wajupa imania dutikata tuinawa dutiksag nugkanmaya aidaun jatan susa waitkamaina dushakam senchijig ajiagmayi.
REV 11:7 Chicham etsegbaun ashimkamtai, bestia waa muun ishamain akagaunmaya jiinki ditajai maaniattawai, nunik ditanak depetuk maawagtinuyi.
REV 11:8 Nuna iyashí aidauk yaakat muunta nuna ejapen plazanum tepeagmayi, nunú yaaktak ditá pegkegchauji pachittsa “Sodoma”, “Egipto” tutaiya nui, iina Apuji Jesucristo achijag maawajua nui.
REV 11:9 Ashí aents tikich nugkanmaya aidaush, makí makichik ditash niimtin aidau, ditash chichaaku aidau, nuigtú ashí nugkanmaya aidaushkam iyashinak ukutsuk kampatum tsawan jimaituk dii batsamtiagtinuyi.
REV 11:10 Nuninak ashí nugkanmaya aents aidauk nunú jakamtai shiig aneas dakujuinak, pempeentunikiag anentag wajichin sudaiyagtinuyi; wagki nu jimag profeta aina nunú chichagkagtiagtai, shiig tutitag dekapejakú asag.
REV 11:11 Tujash kampatum tsawan nuigtú jimaituk nagkaemai, Apajuí mayai awetim ditai egkemtujam nantakí wajantagmayi, nunikagmatai nuna wainkaju aidauk shiig senchi ishamkagmayi.
REV 11:12 Imaninai nayaimpinmaya senchi untsuká: “Jui wakatajum”, timayi. Tama mai yujagminum pachiinak ditá shiwaji aidaush wainainaig wakagmayi.
REV 11:13 Nu nuniaig senchi uugbau asabi, imaniak kuashat jegan yumpuagmayi, nu uugbaunum siete mil aents jinawagmayi; nuniai tikich aidauk senchi ishamkag, Apajuí nayaimpinum pujuuwa nuna emematiagmayi.
REV 11:14 Jimaja ju ¡ae! timauwa duka nagkaemakni, waamak kampatuma ju ¡ae! timauwa dusha minittawai.
REV 11:15 Siete angela ju trompeta umpuagmatai, nayaimpinmaya senchi pampajagmayi, nuninak: “Ashí nugkanmaya inamaina duka yamaik iina Apajuijinu nuigtú Cristunu wajasé. Nigki ajumaish tuke inamin atinai”, wajagmayi.
REV 11:16 Imatiagtai veinticuatro anciano aidau ditá ekeemtaiji aina nui Apajuí emtin pekajushkam, tsuntsumawag nijayin nugkan antig Apajuí emematiagmayi;
REV 11:17 nuninak: See tajame, Apu Apajuí ashí senchigtinuh, ametme tuke pujuu nuigtú tuke pujujakumek, iman asam amina senchigmijai inamjatasam nagkamaume.
REV 11:18 Nuniau asamin ashí nugkanmaya aidauk kajekaje, tujash ame kajeamugmik nagkamnae, nuigtú jakau aidau suwimak susattam dushakam tsawantak jegae, nuigtú amina inakem profeta aidau, aentsjum pegkejam aidau, amina umigtamin aidau, eme anenchatai, eme anentai aidau, akiktinaitam dushakam nuigtú nugkan emesena nu tsaiktinchakam jegae, wajagmayi.
REV 11:19 Nuniai jega Apajuí ememattaish ujanmayi nayaimpinum awa nunú; nunikmatai kajun arca tutai chicham apakbau aajakua nu, jega Apajuí ememattain auk paan wainnabi, nui agmayi peem aidau, pampainamu, ipamat aidau, uugbau, nuigtú senchi bicha kakegainamu.
REV 12:1 Nayaimpinum anentai jegagmainchau wantinkabi: makichik nuwa etsaya imanun nugkuaju, nawe aina nuna wakentin nantu ajibi, buukenchakam corona doce yaya batsakbaun atsejaku.
REV 12:2 Ejamtin asa, uchigmaktatus najaimak waitiak senchi untsumayi.
REV 12:3 Nuigtushkam nayaimpinum tikich wantinkabi: makichik dragón muun kapantaku, ajibi siete buuké aidau, nuigtú diez kachují aidau, makí makichik buuké aina nuig corona ajiagmayi,
REV 12:4 ujuken nayaimpinmaya yaya aidaun jimaitukjin amaisattak amainun tajak juki nugká akakekmayi. Nunik dragón nuwa uchigmaktatus puja nuna eemtin wajanmayi, uchi yamá akiinunak yuatatus.
REV 12:5 Nuniai nuwak aishmagkun uchigmakmayi, ashí nugkanum niina senchijijai inamjatna nuna; tujash uchijinak jujukiag Apajuí ekeemtaijin eketbaunum iwakagmayi.
REV 12:6 Nuwak uwegshunum tupikakmayi, nui pujusmatai mil doscientos sesenta tsawantai yumainun susatnume tusa, Apajuí ni pujustinun umigkauwa nui.
REV 12:7 Nuniku ai nayaimpinum maaniamu asabi, Miguel niina angelji aidaujai dragogjai maaniagmayi. Dragogshakam ashí niina angelji aina nujai ijunag maaniagmayi;
REV 12:8 tujash depetkachmayi nuigtushkam dita pujumainuk nayaimpinmag atsusmayi.
REV 12:9 Nunikmatai dragón yaunchuk dapi tujakbau, Iwanch Satanás tutai, ashí nugkanum tsanumá wekaena nunak, ashí niina angelji aidaujai jiikí nugká ajapawagmayi.
REV 12:10 Dutikamtai nayaimpinum senchi pampaidaun antukmaijai: “Yamaik tsawan uwemat jegae, iina Apajuiji niina senchijijai inamjatta nunú, niina Uchijí Cristo inamjatta dushakam; wagki iina yachi aidaun tsawai kashijai iina Apajuiji eemtin tsanumjú wekaenuwe duka jiikí ajapamu asamtai.
REV 12:11 Ditak Uwijá numpejai nuigtú, niina chichame etsegbauwa nujai depetmakaje, nuigtush ditá pujutinash puyatjukchaje jakagtatus uminas yujaidau asag.
REV 12:12 ¡Nuadui nayaim batsatutigmek shiig aneastajum! Tujash ¡Wait anentajime nugkanum, nayantsanum batsatainajum nunak! Wagki Iwanch tsawan piipich juwatka nuna dekau asa senchi kajeká atumin akaetugmakiu asamtai”, timayi.
REV 12:13 Dragón nugkanum ajapamu asa, nuwa uchijin aishmagkun uchigmakua nuna ainmayi.
REV 12:14 Dutiktai nuwan, ukukui nanapen shiig muuntan jimajan susabi, dutikam nanaak uwegshunum weak dragognak ukuktí, nunik nui kampatum mijan jimaituk pujusmatai yutain susatnume tusa.
REV 12:15 Nunikmatai dragón, weninian yumin jiikí makichik namakan najanabi nuwá amainag tajaká jukiti tusa.
REV 12:16 Tujash nuwanak nugka ayamjukmayi, nugka ujani dragón weninian yumin namaka najana awetimunak uwag amukmayi.
REV 12:17 Dutikamtai dragón nuwan senchi kajegkabi, nunik nuwá patayí weantu aidaujai maaniatatus wejibi, Apajuí chicham umiktajum tibaun umiina nujai, nuigtush Jesusan pachis etsegtuina nujaishkam.
REV 12:18 Nunik dragogkak nayantsan uwetus wajanmayi.
REV 13:1 Wainkabiajai makichik bestia siete buuké aidau ajamun, nuigtú diez kachují aidau ajamu nayantsanmaya jiintatman; kachují aina nuig corona ajiagmayi, untsu buuké aina nuig daaji, Apajuí pegkegchau chichajin tabau agatkamuyi.
REV 13:2 Nu bestia wainkag duka ikamyawajai betekmamtinuyi, naweg chayú nawega numamtinuyi, untsu wenig leogka weniya nuninuyi. Nuna dragón niina senchijin nuigtú niina ekeemsa inamtaijiya nunash susabi ni inamjati tusa.
REV 13:3 Wainkabiajai buuké aina nuiya makichik, jakati tusa awatbauwa nuninun, tujash awatbauwa duka esamauwayi; nunikmatai aents ashí nugkanmaya aidauk puyatjukagmayi, nunikag bestia nemajiagmayi;
REV 13:4 nuninak, dragogkan emematiagmayi, bestian senchimtikau asamtai, nuninak bestianash emematiagmayi, nuninak: “¿Yaita bestiaya imajush, ya niijaish maanimainaita?”, awajiagmayi.
REV 13:5 Nuigtushkam idaitusmayi kuashat wají aidaun chichaktí, nuniak cuarenta y dos nantui pujus Apajuinash pegkegchau chichagkati tusa.
REV 13:6 Tibau asa Apajuinash, daaji pachisash, ni pujutainash, nuigtú ashí nayaimpinum batsamin aina nunash pegkegchau chichagmayi.
REV 13:7 Nuigtushkam Apajuí nemajin aidaujaish maaniati nuniak depetkati tibauyi. Nuigtushkam, ditash niimtin aina nuish, yaaktanmash, ditash chichaaku aidaunmash nuigtú ashí nugkanmash inamjati tusa idaitusbauyi.
REV 13:8 Dutikamu asamtai ashí nugkanum batsamin aidau, yama nugka najanamua duwi nagkamas, Uwig maamu aajakua nuna papiijin pujutan jukitnume tusa, daaji agatkashbau aina nunú aidau emematiagmayi.
REV 13:9 Ni antutaiji ajamu aidauk antukti.
REV 13:10 “Ni achiká juwam amainuk, achiká jukimu agtatui, ni espadayai maam amainuk, espadayai maam agtatui”. Ju nuniamunum, Apajuí aentsji pegkejam aidau waitiamu katsuntan, dekaskeapi tutan unuimamain ainawai.
REV 13:11 Nu nuniku ai, tikich bestia nugkanmaya jiinun wainkabiajai, jimag kachují Uwigdaujai betek ajibi, tujash dragón chichau wajabi.
REV 13:12 Nuniak nagkamchak bestia inamjati tusa susamua nudaun takabi, nuniau asa nugkanum aents batsamin aidaunak, “dekatkau bestia buuken awatbau esamauwa nu ememattajum”, timayi.
REV 13:13 Tusa kuashat wainchatain iwainabi, dutikak ashí aents wainainamunum nayaimpinmayan jiin nugká ajuibi.
REV 13:14 Nuniak bestia emtin dutikati tibau asa wainchatai aidaun iwainak nugká batsatunak tsanubi, nuniau asa nugká batsatunak bestia niime dakumkajum najanatajum espadayai awatbau aajakú iwaku puja nunú timayi.
REV 13:15 Tima niimé dakumak najanawagmatai, bestia nugkanmaya jiinki nu mayain egketkabi, bestia dakumká najanamua nu chichaktí, nunik ashí aents niina emematuinatsu nunak kajegtí tusa.
REV 13:16 Nunik ashí aents eme anenchatai aidau, eme anentai aidau, wiyakuch aidau, ujunauch aidau, inaku waitkashtai aidaush, inatai aidaushkam nijayinkesh, nuniachkush uwejí untsujinkesh marca apujtustajum;
REV 13:17 marca atsugbau aidau nuniachkush bestia daajigkesh atsugbau, daajiya nuna numerojigkesh atsugbau aidauk sumatnash sumamainchau, sujutnash sujumainchau atinme, timayi.
REV 13:18 Juka yachameta nujai dekamainai, ya shiijash antawa nu dekapagti bestia numerojiya nuna, juka aentsú numerojiyai. Nunú numerok seiscientos sesenta y seis, tawa juuwai.
REV 14:1 Wainkabiajai Uwig muja Siognum wajattaman, nuigtú niijai ciento cuarenta y cuatro mil aents aidau, niina daaji, nuigtú niina Apají daaji, dita nijayin agatkamu aidaun.
REV 14:2 Nuniamunum nayaimpinmayan antukbaijai, yumi senchi uutama imatak, senchi chaajip wajukeama imatun, nuigtú pampamua dushakam arpa awatin aidau awatbau wajukea imatmayi.
REV 14:3 Nuigtú yamajam kantamtain kantamiagmayi, Apajuí ekeemtaijin eketa nuna eemtin cuatro iwaaku aina nu, nuigtú anciano aina nuna emtin wajantag, nunú kantamtai yamagma nunak makichkish tikichik unuimachagmayi, imá ciento cuarenta y cuatro mil uwemtikamua duke dekagmayi.
REV 14:4 Nunú aidauk makichkish tsuwapaekachu agmayi nuwa aina nujai antinikchau asag. Jujú aina duka Uwig tuwig wegawa nunitaish nemajin ainawai, jujú aina duka aents nugkanmaya aina nuiya nagkamchaku Apajuinu nuigtú Uwigdau atí tusa uwemtikamu ainawai.
REV 14:5 Nuigtushkam ditak pegkegchaujish atsugbau, waitjuamujish atsugbau asag, Apajuí eemtin ijuniagmayi.
REV 14:6 Wainkabiajai tikich ángel, aents nugkaa batsata nui, ashí nugkanmash, makí makichik niimtin aina nuish, makí makichik chichaaku nuigtú yaakat batsata nuishkam yamajam chicham tuke auwa nuna etsegkatatus takaku nayaimpi ejapen nanamtatman;
REV 14:7 nuniak senchi untsumak: “Apajuí puyatjusjum ememattajum, wagki suwimak sukagtustina duka hora jegau asamtai; ememattajum nayaimpin, nugkan, nayantsan, yumi pukuni jiinaina nunash najankauwa nunú”, timayi.
REV 14:8 Tai nuna ukujin tikich ángel patatkau: “¡Tsainkae, Tsainkae yaakat muun Babilonia muunta duka! ¡Ashí nugkanmaya aidaunak vino ni pegkegchau takaamujiya nuna takamtikak, apajuimtai aina nu umigkatajum tusa jintinkagtuau asamtai!” wajabi.
REV 14:9 Nuniai ángel kampatuma ju patatkau midaushkam senchi untsumak: “Makichik aentskesh bestia emematuk, nuniachkush niime dakumkamua nunakesh emematak nijayinkish, uwejinkesh marcamu aina nunak,
REV 14:10 Apajuí kajeká suwimkan susatnai, dutikak niinu ángel pegkejam aina dusha nuigtú Uwijash wainaig jii azufrejai pachimjamua nui utsatnai.
REV 14:11 Dita waituina nuiya bukuiti jiina duka tuke ajumaish bukuitú atinai. Bestia emematiaju aidau, niime dakumkamujiya nunakesh, niina daajiya nujaigkish marcamu aina duka tsawaish, kashikesh ayamauk atsugtinai”.
REV 14:12 ¡Nuadui Apajuí nemajin pegkejam aina duka, waituinakush emamkemas katsuntug batsamas, Apajuí chicham umiktajum tibauwa nuna umiinak, Jesusai dekaskeapi tumain ainawai!
REV 14:13 Antukbaijai makichik chichaman nayaimpinmaya tujuttatman: “Agagta: Shiig aneasagtatui yamai nagkamas Apu Jesusjai ijutkau pujus jaina duka”. Tutai, Wakaní Pegkeji chichaak: “Ehé, dita takaak waituina nunak ayamsagtatui, wagki ashí dita takasbaunum akiam agtata dui, timayi”.
REV 14:14 Niimkaman wainkabiajai makichik yujagkim pujun, nunú yujagmia nui Aentsmaga akiinauwa numamtin, oro atsejaku, hoz shiig etsakamun takaku ekeemtatman.
REV 14:15 Nuniai jega Apajuí ememattainmaya makichik ángel jiinkibi, nunik yujagminum eketa nuna senchi untsuká: “Pai, yamaik hora jegae, nugkanmaya ajak tsamak uminkae, hozjumjai tsupijam juuktá” timayi.
REV 14:16 Tama yujagminum eketa nunú, hozjijai tsupig ajak nugkanmayanak juukmayi.
REV 14:17 Nunikmatai jega Apajuí ememattai nayaimpinum awa nuiya, tikich ángel hoz shiig etsakamun takus jiinkibi.
REV 14:18 Nuniai tikich ángel jii ekemamain senchijí ajamu altarnumia jiinkibi, nunik hoz etsakamun takaka nuna senchi untsuká: “¡Hoz etsakamu takakam dui nugkanum uva ajakbau tsamakaja aanú tsupijam juuktá!”, timayi.
REV 14:19 Tama angelchakam hozjijai nugká uva tsamakun tsupig yajuak, uva dajaja ijutainum chimpiabi, duka Apajuí suimkaji ishamaina nuna iwainabi.
REV 14:20 Dutikamtai uvanak yaaktan ukumtikiag ijujagmayi, tuja uva ijutainmaya numpa jiinkibi, nunik caballo weniya aatus amugmayi. Nuniak trescientos kilómetros tumain nugkan ukatkabi.
REV 15:1 Wainkabiajai nayaimpinum tikich shiig anentai jegagmainchau wantinun: siete ángel aidau, inagnamunum jata atinun takuinakuyi. Nujai Apajuí ni kajekbaujinak inagnaktinuyi.
REV 15:2 Nuigtush wainkabiajai, nayantsa numamtin vidrio saawiya iman jiijai pachimjamu atatman. Nui ijuniagmayi Apajuí arpa susamun takuinaku, bestia niime dakumkamua nunakesh emematchaju aidau, dakumkamunakesh, marcash atsugbau, daaji numerowai agatjashbau aina nunú.
REV 15:3 Nunú aidau, Moisés Apajuí inake aajakú kantamamua nuna kantabiagmayi nuigtú Uwijá kantamtaijiya nujai, nuninak: “Shiig muuntai, anentai jegagmaitsui, ashí ame takasbau aina duka. Apu Apajuí Ashí senchigtinuh; ame takasbau aina duka pegkejai, dekaskenum aikame, amek ashí nugkanmaya aina nuna reyjiyaitme.
REV 15:4 ¿Apuh yaki ishamjamkashti? ¿Yaki emematjamchati? Ameketme pegkegmamek. Iman asamin ashí nugkanmaya aidauk kautjamak emematjabiagtatui, wagki ame dekas dutikaum duka ashí wantinjau asamtai”, wajagmayi.
REV 15:5 Juna tusa inagnakui, niimkaman nayaimpinum jega Apajuí ememattai ujantatman wainkabiajai.
REV 15:6 Nunú jega Apajuí ememattai ujanmatai siete ángel aidau, siete jata aidaun takaku jiinjagmayi, jaanch lino tsuwatchau winchamtin aidau nugkuaju, detsepega aatus akachumtai oro akachumau agmayi.
REV 15:7 Nuniai siete iwaaku aina nuiya makichik, siete ángel aina nuna, siete copa oro aidaun susabi, Apajuí tuke pujuwa nuna kajetí aimjamun.
REV 15:8 Jega Apajuí ememattaiya nunak Apajuí imanji, nuigtú senchijiya nu bukuiti akijuabi; imaniau asamtai siete ángel aidau, siete jata aidaun takuinaka nuna ashimtsaigkik makichkish nuig waimainchau agmayi.
REV 16:1 Antukbaijai jega Apajuí ememattainmaya senchi untsumak, siete ángel aina nuna chichajak: “Wetajum nunikjum siete copa aina nui Apajuí kajetí aimjamua nu nugká ukagtajum”, tabaun.
REV 16:2 Tama dekatkauwa nu ángel wee, copanum aimkamua nuna nugká ukagmayi. Dutikamtai aents aidau, bestia marcaji ajamu aidaun nuigtú niime dakumká najanamua nuna emematiaju aidauk kuchap jiintujam najaimainak senchi waitiagmayi.
REV 16:3 Nuniai tikich ángel copanum aimkamua nuna nayants ukagmayi. Dutikamtai nayantsak numpa wajasmayi, aents maamu numpega iman. Imanikmatai ashí nayantsanum iwaaku batsamin aina duka jinawagmayi.
REV 16:4 Nuniai ángel kampatuma ju copanum aimkamua nuna, namak aidaunum, yumí pukuni jiintaiji aina nui ukagmayi, dutikam numpa wajasagmayi.
REV 16:5 Nu ángel yumi dutikmain senchijí ajá nu chichaamun antukbaijai: “Apuh, amek pegkeg takauwaitme, iman asam juka jutikaume. Pegkegmah, tuke pujuu nuigtush tuke pujujakuitme,
REV 16:6 wagki ditak amina aentsjum pegkejam aidaun, nuigtú profetajum aidaunash mainak numpen ukajaju asagmatai, ameshkam dutiksamek numpa amame. ¡Dekaskenum ditak aatsa aikam amain ainawai!”
REV 16:7 Nuigtush altar puja nuiya, chichaak: “Apu Apajuí ashí senchigtinuh, amina suimkajum aina juka pegkejai, dekas ainawai”, tabaun antukbaijai.
REV 16:8 Nuniai ángel cuatroa ju, copanum aimkamua nuna etsan ukatjabi, dutikak senchin susabi jii kegama imaniak aents aidaun apeati tusa.
REV 16:9 Dutikamtai aents aidauk sukuinam senchi esagmayi, imaninak Apajuí senchigtin asa jatá dutika nuna adaisag pegkegchau chichajiagmayi, nunidau asag ditá tudaujinash idaiyinak Apajuinak emematchagmayi.
REV 16:10 Nuniai ángel cincoa ju, copanum aimkamua nuna bestia ekeemsa inamtaijin ukagmayi; dutikamtai niina inamtaijig suwe wajasmayi, nunikmatai aents aidauk iyashin najaimainak inayin esagmayi,
REV 16:11 imanik kuchapjin najaimainak Apajuí nayaimpinum pujuwa nuna pegkegchau chichajiagmayi, tujash pegkegchau takatnak idaichagmayi.
REV 16:12 Nuigtú ángel seisa ju copanum aimkamua nuna namak Éufrates muunta nui ukagmayi, dutikamtai namakak buku wajasmayi, rey aidau etsá minitainia aidau suntajijai mininak katiajagtina nunú.
REV 16:13 Nuniai wainkabiajai dragogka weninia, nuigtú bestia weninia, waitá etsegna nuna weniniashkam, kampatum wakan pegkegchau kuwauwa nuní niimtin aidau jiinaidaun;
REV 16:14 duka wakan iwanchdau ainawai, nunin asag aentsush dutikmainchaun iwainag takainak, ashí nugkanmaya rey aina nuna yujajiagtinai ijumjatatus, Apajuí ashí senchigtina nu, suwimak sukagtamu tsawan jegakui maaniami tusag.
REV 16:15 Wika kasajai betekmamtuk minittajai, shiig aneasagtinai aneaku batsatuk, nuigtush jaachjin kuitamaidauk, wi minitaish wisú pujuinachu asag datsamamujish atsujiagtina dui.
REV 16:16 Dutika rey aidaunak ijumjabi hebreo chichamai nugka Armagedón tutaya nui.
REV 16:17 Nuniai ángel sieteya ju copanum aimkamua nuna dasenum ukagmayi, dutikamtai jega Apajuí ememattainum ekeemtai nayaimpinum awa nuiya, senchi untsumak: Ashimdaekae, timayi.
REV 16:18 Timatai ipamat, chaajip, peem aidaujai senchi pampaidiagmayi, imatbaunum nugkak senchi uugmayi, yama nagkamak aents batsamsauwa dui nagkamsash imanika uugchatain shiig senchi uugmayi.
REV 16:19 Imaniau asamtai yaakat muunta duka kampatuma imajin kanakmayi, yaakat aidau nugka muunnum aina dushakam tsainkabi. Apajuí yaakat Babilonia pegkegchaujin kajimatjukchau asa, kajejuk suwimkan suak imatikabi.
REV 16:20 Ashí ajuntaik muja aidaujai megkaejagmayi.
REV 16:21 Nuigtushkam nayaimpinmaya bicha muun cuarenta kilo tumainun nagkaesau aentsnak kaketiagmayi; Nu suwimak ishamain imanitai, Apajuin pegkegchau chichajiagmayi.
REV 17:1 Siete ángel aidau, siete copa aidaun takaka nuiya makichik tajuntujun chichagtak: “Jui tantata, nunikamin akiká takaaku tuwagtaiya nu kuashat namak aidaunum eketa nunú suwimak susatnun iwaintuktajame;
REV 17:2 nu nuwajai nugkanmaya rey aina duka pegkegchaun takasaje aantsag ashí nugkanum aents batsataina dushakam nujai takaninak nampejaje” tujutmayi.
REV 17:3 Nuna Wakan iwaintugkamtai, ángel uwegshunum jujukmayi, dutijuamtai bestia kapantaku, siete buuktin, diez kachují ajamu, ashí iyashin Apajuí pegkegchau chichagbau agatkamunum makichik nuwa ekeemtatman wainkabiajai.
REV 17:4 Nunú nuwak jaanch yamakaitkau kapantaku pachimjugbaun nugkuajuyi, nuigtush oro, kaya shiig pegkeg aidau, perla aidaujai iwagmamjauyi; nuigtushkam makichik copa oronum ashí dakitmain aidau, tsumain niina takanitaiji aidau piyakun takakuyi;
REV 17:5 tuja nijayinchakam chicham dekamainchau: “BABILONIA AKIKÁ TAKAAKU TUWAGTAI, AKIKÁ TAKATAI AINA NUNA DUKUJÍ, NUIGTUSH ASHÍ PEGKEGCHAU DAKITMAIN APAJUIMTAI NUGKANUM AYÁ NUNASHKAM”, tusa agatjamuyi.
REV 17:6 Nunikmatai Apajuí aentsji pegkejam aina nuna numpen, Jesusa etsegtin asagmatai maawagbauwa nuna numpejai uwag nampeká ekeemtatman nuwan wainkabiajai. Nuna wainkan senchi puyatkabiajai.
REV 17:7 Nuniai ángel chichagtak: “¿Wagka imanikmesh puyatame?” “Ju nuwash wajukatnuna aniawa, nunak wi shiig ujaktajame, nuigtú bestia siete buuktin, siete kachují ajamunum entsatka nuna pachisan.
REV 17:8 Bestia wainkaum duka duik pujujakui, tujash yamaik atsawai; nuninaitak waa muun ishamain akaga nuiya jiinkittawai, nunik ni suwimak jukitnujin jegatatus. Ashí nugkanum batsataina nunú, yama nugka najannaigkish papí pujutan jukiu agattaiya nuish daaji agatkashbau aidauk, bestia pujujakú, tujash yamaik atsau, ajumaish achatna nuna wainkag senchi puyatkagtin ainawai.
REV 17:9 “Jui wainmainai yaki yachaita, yaki shiijash antawa nunú: Siete buukega duka, siete mujanum nuwa eketa nuuwai;
REV 17:10 nuigtú siete rey aina nuna iwainawai. Cinco rey aina duka megkaejaje, nunikmatai makichik inamui tuja makichik eke minatsui, tujash nu inamkug dukap tsawan pujus inamjashtatui.
REV 17:11 Bestia pujujakú, jakau asa atsá nunú ataktú rey wajas inamtai ocho rey atatui, duka siete rey aajakua nuiyagke, nunak suwimak tuke atina nui weak nuniktatui.
REV 17:12 “Diez kachují aidau wainkaum duka, diez rey aidau eke inamainatsu nuuwai, tujash nunú aidauk bestiajai ijunag makichik hora inamjagtinai.
REV 17:13 Ditak makichik dutikata tabaunak anentaimtuidau asag, bestia inamjati tusag senchimtikawag ditá inamtaijinak idaitusagtatui.
REV 17:14 Dutikawajam Uwigjai maaniawagtatui, tujash Uwig ditanak depetkagtatui, wagki imá nigki Apu ashí apu aidaun nagkaesauk nuigtushkam nigki Rey ashí rey aina nunash nagkaesauwa ibau asa; ditajai ijuna duka ni untsukbau ainawai, ni etegjamu nuigtush chichamenash betek umijin aidau”.
REV 17:15 Nuigtush ángel chichagtak: “Ame namak aidaunum akiká takatai eketu wainkaum duka, ashí aents aidau, ashí nugkanmaya, ditash chichaaku aidau, nugka muunnumia aidau, ashí yaaktanmaya aina nu ainawai.
REV 17:16 Bestia diez kachují ajamu wainkaum aanú aidau akiká takataiya nuna kajegkagtinai, dutikawag yaaktan tsaikag ashí wají yajutuk wisú ukukiagtinai; nuna nejenak yuawagtinai dutikainak jiiyai apekagtinai;
REV 17:17 wagki nunak, Apajuí ni dutikata tibauwa nuna dutikatnume tusa ditá anentain apujtusajui, dutikamu asag shiig chichasag ditá inamtaijiya nunak, bestia idaitusaju ai, Apajuí tibauwa nunú uminkatnai.
REV 17:18 Ame nuwa wainkaum duka yaakat muunta nuuwai, ashí nugkanum rey aina nui inama nunú”, tujutmayi.
REV 18:1 Juna wainkan, tikich ángel senchigtin, niina tsaaptinjinig nugkanak tsawan awajus nayaimpinmaya akaegun wainkabiajai.
REV 18:2 Nuniak shiig senchi untsumak: “¡Tsainkae, tsainkae yaakat Babilonia muunta duka! ¡Yamaik wakan pegkegchau aina nuna batsamtai, nuigtú chigki tsumain dakittsá diitai aidau batsamtai wajasé!
REV 18:3 Wagki ashí nugkanmaya aidauk vino nuwa pegkegchau takaamua nunak uwajaje; nuigtush rey nugkanmaya aidaush nu nuwajai takanisaje, wají sujin nugkanmaya aidaushkam nunú nuwa senchi wakejamujiya nuna suwinak wiyakchameawaje”, timayi.
REV 18:4 Nuigtú tikichin nayaimpinmaya chichaamun antukbaijai, nuniak: “Mina aentsug aidautigmek, aanú yaaktanum pujutsuk jiinjatajum, dita tudau takaina nu takaakjum, jata ditan ishamain minittata nunú atumesh jukijum;
REV 18:5 ditá tudaujig nayaimpinak antigke imaniku asamtai, Apajuí ditá pegkegchaujin suwimkan susagtatui.
REV 18:6 Aanú nuwa tikichin pegkegchau awajkauwa dutiksagmek, niishkam pegkegchau awajkatajum. Nuigtush ni pegkegchau takasbaujiya nuna nagkaesau waitkastajum; ni copanum tikich uwagtinun pachimjug umijuk amujakua nuanuig, nigka aan nagkaemasjum senchi pachimjugtajum.
REV 18:7 Dutikakjum ni ememas shiig aneas pujusua dutiksagmek, ni senchi waitiak buuttinjiya dushakam susatajum, wagki ni anentaimsag: Wika juig reinajai betek wajasan eketjai, nuigtush wajechuitjai, nunin asan tuke waittsashtinaitjai tawai;
REV 18:8 tau asamtai makichik tsawanta duik ni ashí waitiamujig ajittawai: Jaamuji, buutbauji, yapajamuji, inagnamunum jiinum apeam atatui; wagki Apu Apajuí ashí senchigtina ibau asa, niina suwimkan suwak dutikattawai”.
REV 18:9 Nugkanmaya rey aidau nunú nuwajai takanisaju aidauk, niijai wakegamun pujusaju asag buutiagtinai, nuninak senchi niina anentaimtusag waitiagtinai, esaak bukuitaun wainaidau asag;
REV 18:10 imanik waittai ishamainak ikaag ijunas: “¡Wait anentajame, wait anentajame Babilonia ame yaakat muun senchigtin aajakuitkum, makichik horaya duik suwimak juamu ajutjamsa dui!”, awajiagmayi.
REV 18:11 Wají sujin nugkanmaya aidaush buutiagtinai, nuninak nuwa nuna anentaimtuinak waitiagtinai, wagki ditá wajiiji sumagmainuk makichkish atsusú asamtai;
REV 18:12 wají sujutaiji aidauk oro, jiju plata tutai, kaya pegkeg aidau, perla aidau, lino dekas pegkeg, jaanch yamakaitkau, seda, jaanch kapantaku aidau, ashí numi kugkuin aidau, ashí wají elefante naijai najanamun, ashí wají numi pegkeg aidaujai najankamu, cobre, hierro, nuigtú mármol;
REV 18:13 nuigtú canela, kugkuin aidau, incienso, mirra, olíbano, vino, aceite, harina dekas pegkeg aidau, trigo, bestia aidau, uwig aidau, caballo carro japitai aidau, nuigtú inatai aidau, aents aidaushkam, aajakajui.
REV 18:14 Nunin asamtai yaaktan chichajuinak: “¡Ame wají shiig wakejin aayum duka, yamaik atsugtamsae! Ashí wajiijum shiig pegkeg aidau ajutjamajakua duka tuke igkugchatnaitme”, awajiagmayi.
REV 18:15 Nunú wajiin sujin aidauk, nuna suinak wiyakuch waigkú aina duka, nunú imanik waitiamun wainkag ishamainak ikaa ijuntsagtinai, nunik anentain idajuk buutuinak:
REV 18:16 “¡Wait anentajai, wait anentajai yaakat muunta nunak! jaanch lino najanamun, jaanch kapantu nentetkaun nugkug, oro, perla, kaya pegkeg aina ibaujai iwagmamnuwe nuna,
REV 18:17 ¡wagki makichik horaya duik ibau wiakchameamujiya duka esagkae!” tiagmayi. Nuigtushkam ashí lanchá anuntin aidau, nui chimpimag yujau aidau, nui takau aidaush, ashí aents nayantsanum takau aina nujai ikaa ijuntsagmayi.
REV 18:18 Nunikag esaku bukuitamujin wainkag senchi untsumkag: “¿Tikich yaakat jujú yaakat muunta ibagjai betekmamtinuk atsawapita?”, wajagmayi.
REV 18:19 Tusag wake besemag dekapenak nugka yukuukuntun jukiag, buuken yukuajag senchi untsumak buutuinak: “¡Wait anentajai, wait anentajai yaakat muunta nuna! Ashí lanchagtin aidautinak nigki wiyakuch etamiajuitak makichik horaya duik esaké”, wajagmayi.
REV 18:20 “Nayaim batsatutigmesh, Apajuí aentsji pegkejam aidautijum, apóstol aidautigmesh, nuigtú profeta aidautigmeshkam ju nuwa imania jujú diisjum shiig aneastajum. Wagki Apajuí atumin iikmatjamak suwimkan suwak imatikau asamtai”, timayi.
REV 18:21 Nuna timatai, makichik ángel senchigtin, kaya deketai muunta numamtinun jukibi, dutika nayants ajugmayi, nuniak: “Jujai betekak yaakat Babilonia muunta aushkam ajapeam atatui, nunikmataig ajumaish wainkashtin ainawai.
REV 18:22 Dutikamu asamin, aminiya arpa awatbauk, pigkui umpuamush, trompeta umpuin aidau umpuamush, aents nui pujus takaush, yutain dekedaukesh tuke antuekashtinai.
REV 18:23 Nuigtush aminiya lámpara ekemamukesh wainnakchatnai tuja, nuweniagtai fiestamainak pampainamukesh tuke antuekashtinai, wagki amina wajiigmin sujutjamajakua duka, nugkanmag dita wagaku aajakajui, amina tunchigminig ashí nugkanmaya aents aidauk tsanujakuitme.
REV 18:24 Nuigtush niiní profeta aina nuna numpe nuigtú, aents pegkejam aidaun numpe wainnakui, nuigtú ashí aents Apajuí umijin aidaun nugkanum maawajua nudaushkam”, timayi.
REV 19:1 Nunú nagkaemakmatai nayaimpinum kuashat ijunjag senchi pampainamun antukbaijai, nuninak: “¡Yajautsui! Uwemat, senchi, eme anentut, nuigtú emematut aina duka, imá iina Apuji Apajuiya nudauke,
REV 19:2 wagki Apajuí suwimkan susa duka pegkejai nuigtush dekaske, nuwa akiká takaaku tuwagtaiya nu ashí nugkanmaya aidaun, ni takataijiya nuna jintintua pegkegchau emaku asamtai suwimkan susae. Nuigtush niiní ikmake niina inaken kajegkú aina nuna”, wajagmayi.
REV 19:3 Nunikag ataktushkam awentsag: “¡Yajautsui! Nuwa akika takaaku tuwagtai esaak bukuita duka ajumaish tuke megkaekashtinai”.
REV 19:4 Timatai veinticuatro anciano aidau cuatro iwaaku aidaujai, Apajuí niina ekeemtaijin eketun tikishmatjag tsuntsumawag nijayin nugkan antig pujusag emematuinak: “¡Yajautsui! Aatus atí”, tiagmayi.
REV 19:5 Nuna tiagtai nunú ekeemtaiya nuiya chichaak: “¡Ashí niina inake aidautigmesh, eme anentsá diitai, eme anentsá diishtai aidautigmesh, iina Apajuijiya nu eme anentsajum ememattajum!” tabaun antukbaijai.
REV 19:6 Nuigtushkam antukbaijai kuashat ijunag chichainak wajukmaina imatak, yumi uutama imatak, shiig senchi ipamat kedegtak wajukea imatuinak: “¡Yajautsui! Wagki iina Apuji Apajuí ashí senchigtina nunú inabaun nagkamae,
REV 19:7 shiig aneasagmi nuniaku dakujusagmi nuninaku emematiagmi, wagki Uwig nuwenbau tsawan jegau asamtai, niina nuweg yamaik umintsae,
REV 19:8 nuniku asamtai lino dekas pegkejan tsuwatchau winchamtinun apegae, wagki lino pegkeja duka, Apajuinu pegkejam aidau pegkeg takasbauji aina nuna iwainawai”, wajaidaun.
REV 19:9 Tutai ángel chichagtak: “Agagta: Shiig aneasagtinai Uwig nuwenku yuamunum ipaamu aidauk”. Nuigtushkam chichagtak: “Juka chichamak Apajuinu dekaskea nuuwai”, tujutmayi.
REV 19:10 Tujutkui ni wajamunum tikishmagbaijai niina ememattasan, nuniai: “Ankaipa wika Apajuí inakegaitjai. Ame, amina yatsum aidaujai Jesús chichakbau betek umijin ainajum wisha annuketjai. Dekas Apajuí emematta”. Apajuí tabaun etsejuina duka Jesusa chichamenash etsejuinak nuninawai, tujutmayi.
REV 19:11 Nuniai nayaim ujanmatai caballo pujun wainkabiajai, nui entsatka duka “Betek Umin” nuigtush “Dekaskea nu” daagtinuyi, nuigtushkam suwimkanash dekas dutiknuyi, aantsag maaniakush dekaskenum maaninuyi.
REV 19:12 Nuna jii aidauk, jii kegak wajukeama imanibi, buukenish kuashat atsejutaiji ajibi; nuigtush daaji agatjamush ajibi, tujash nunak imá nigki dekabi.
REV 19:13 Jaanch numpai numpeagbaun nugkuajuyi, duka: “Apajuí Chichame” daagtinuyi.
REV 19:14 Nayaimpinmaya suntag aidauk lino dekas shiig pegkeg puju tsuwatchau aidaun nugkuinaju, caballo puju aidaunum entsatkau saetus miniagmayi.
REV 19:15 Niina weninia makichik espada tsakatskatu empek jiinmayi, nuadui ashí nugkanmaya aidaunak kajegká, niina senchijijai inamjatnuyi; Apajuí ashí senchigtina nu kajeká aents aidaun suwimak ishamainun susatta nunash, nigki uva yumiji vino jiiktasa neje najatia dutika dajagtinuyi.
REV 19:16 Ni nugkuagbaujinish, niina bakuinish: “REY ASHÍ REY AINA NUNA NAGKAESAU NUIGTUSHKAM APU ASHÍ APU AIDAUNASH NAGKAESAU”, tabau agatkamuyi.
REV 19:17 Nuigtú wainkabiajai makichik ángel etsanum wajas, ashí chigki agkajunum nanaak yujau aidaun senchi untsuak: “Minitajum, nunikjum jui ijunjajum, Apajuí yutain kuashat umiká ju yuatajum,
REV 19:18 rey aina nuna neje, capitán aidaun neje, senchi aidaun neje, caballo aidaun neje, nui entsamin aina nuna neje, ashí neje aidau, agkan aidau nuigtú inatai aidau, eme anenchatai, eme anentai aina juna neje aidau”, timayi.
REV 19:19 Nuniaig niimkaman wainkabiajai bestia, nugkanmaya rey aidau nuigtú nuna suntaji aidaujai, caballonum entsatka nujai nuigtú suntaji aidaujai maaniatatus tuwak ijuntatman.
REV 19:20 Nunittaman bestianak achikmayi wait profetaya nujai niina eemtin wainchatain iwainak, bestia marcajin jukiu aidaun tsanujua nuna, nuigtush niime dakumkamujinash emematiu aidaun, nu jimaja nunak jii azufrejai pachimjamu kee abaunum iwakunak ajuabi.
REV 19:21 Tikich aina nunak, caballo pujunum entsatka nuna weninia espada jiina nujai ijinabi, dutikamtai ashí nanamtin aidau nunú neje aina nuna yuawag ejemakagmayi.
REV 20:1 Wainkabiajai makichik ángel nayaimpinmaya waa muun ishamain akaga nuna llavejin nuigtú cadena muuntan takus akaegun.
REV 20:2 Nunik dragogkan achikmayi yaunchuk “dapi” tujakbau, Iwanch Satanás tutaiya nujai, dutika jigkagmayi mil mijadai pujustí tusa;
REV 20:3 dutika waa muun ishamain akaga nui ajua shiig epeni ukukmayi, jiinki ashí nugkanmaya aina nuna tsanujai tusa, nui pujus mil mijanan ejematai wajumchik tsawanchik atiatnuyi.
REV 20:4 Nuigtú wainkabiajai ekeemtai aidaun, nui pekabiagmayi inamjatnume tusa senchi susamu aidau, nuigtushkam wainkabiajai Jesusan pachis nuigtú Apajuí chichamen etsejiagtai tsupika maamu aidau wakanin; bestianash emematchaju aidau, niime dakumkamunakesh, nuigtú nijayinish, uwejinish marca jukichaju aidau nantajag, Cristujai mil mijan inamjagtinuyi.
REV 20:5 Nunuwai dekatkau nantajú aidauk, tujash tikich jakau aidauk nantakchagmayi mil mijan jegamtai nantajagtin asag.
REV 20:6 Shiig aneasagtinai dekatkau nantamu atina dui nantakiu aidauk, ditak Apajuí aentsji pegkejam wajasú asag. Nunú aidauk ataktú jaamu atina nuig waittsachagtinai, ayatak Apajuí, Cristo sacerdoteji waigkagtinai nunikag mil mijadai inamjagtin ainawai.
REV 20:7 Nunú mil mijan jegamtai, Satanás achikam puja nuna akupkatnai;
REV 20:8 dutikam jiinki ashí nugkanmaya aidaun tsanuagtinai, Gog Magog aina nuiyan, maaniatnun ijumjatatus; nunú aidauk nayantsa kaamatkaji dekapamainchauwa ibau atinuyi.
REV 20:9 Nunikag ashí nugkan jamajag midiagmayi, nuninak yaakat Jerusalén pegkejam aidau batsamtai Apajuí anetaijiya nuna tenteawagmayi; nuniagtatman Apajuí nayaimpinmaya jiin ajuntug ashí apekmayi.
REV 20:10 Tuja Iwanch ditan tsanujakua nunak kucha jii azufrejai pachimjamua nui ajuabi, bestia nuigtú wait profeta egketbaunum, dutikam kashi tsawaijai ajumaish tuke waitú batsabiagtinai.
REV 20:11 Wainkabiajai makichik ekeemtai muuntan pujun, nui makichik ekeemtatman. Nuna emtinig nugkak nayaimpijai atsusagmayi, nuniku asag makichik yantamnumkesh wainnakchagmayi.
REV 20:12 Wainkabiajai jakau aidaun, eme anentsá diitai, eme anentsá diishtai aidaujai Apajuí ekeemtaijin eketa nuna eemtin ijuntatman; nunikmatai papí aidaun ujakmayi, tikich papinash ujakmayi papí pujutan jukiu agattaiya nuna; nunikmatai jakau aidaunak papinum dita takasbauji agakbau aina nuiyan diisá dutiksag suwimkanak sumayi.
REV 20:13 Nayants jakeku aidaush nantajagmayi, jataiya dushakam nuigtú Hadeschakam jakau niiní aidaunak susabi. Dutikawagmatai makí makichik dita takasbaujin diijus akanmayi.
REV 20:14 Jata nunak, nuigtú Hadesjai kucha jiiya nui ajugmayi. Nuuwai Apajuijai tuke kanaaku kanaamu atina duka.
REV 20:15 Aents pujutan jukitin agattaiya nui papinum daaji agatjashbau aidaunak nui utsawagmayi.
REV 21:1 Wainkabiajai nayaim yamagman, nugka yamagmajai; wagki dekatkau najankamu nayaim, nugka, nayants aina duka atsusagmayi.
REV 21:2 Nuigtush wainkabiajai yaakat pegkejam yamajam Jerusalegka nu nayaimpinmaya Apajuí puja nuiya akaetatman, duka nuwa aishinatin shiig iwagmamjauwa imanuyi.
REV 21:3 Nuniamunum nayaimpinmaya senchi untsumun antukbaijai, nuniak: “Juajui aents aina duka Apajuijai ijunag pujustatui, nigka ditajai pujustatui. Nunitai dita niina aentsji agtinai, Apajuiya duke ditá Apajuiji atinai.
REV 21:4 Nuniau asa ashí ditá negaikinak ujugtuktinai. Nuigtush atsutnai jaamu, buutbau, waitiaku untsubau, najaimamushkam, wagki nagkamchak wají aajakajua duka atsusaju asagmatai”, timayi.
REV 21:5 Nuniai ekeemtainum eketa nu chichaak: “Wi ashí wají aina nunak yamajam emajai”, nuigtú chichagtak: “Agagta, wagki ju chicham aina juka dekaske nuigtush dekas uminkatin ainawai”, tujutmayi.
REV 21:6 Nuigtú chichaak: “Yamaik ashimnake. Witjai nagkamtinish tuke pujusunuk atakea duish tuke pujutnunuk. Nagkamnamunmash nuigtú nagkanbaunmash wikitjai. Kitamaunak yumi pukuni jiina nu pujutan sukagtina nuna anenjauch susattajai uwagti tusan.
REV 21:7 Depetmakunak ashí wají aina nuna susatnaitjai, nunikan wi ditá Apajuiji atatjai, tuja dita mina uchig agtatui.
REV 21:8 Tujash sapig aidau, dekaskeapi tuchau, kajegkagtin, magkagtin, tsanijimtan wekaetin, wawejatin aidau, apajuijimtain emematin, nuigtú ashí wait aidaujai kucha jii azufrejai pachimjamu kee awa nui chimpimawagtinai, Apajuijai tuke kanaaku kanaamu atina nui”, timayi.
REV 21:9 Nuniai siete ángel aidau, siete copanum inagnamunum jata atin aimjamun takuinaku aajakajua nuiya makichik chichagtak: “Wegajai, wi Uwig nuwatkatna nuna iwaintuktajame”, tujutmayi.
REV 21:10 Nuniai Wakaní Pegkeji makichik muja yakí jiitkaunum jujukmayi, dutika yaakat Jerusalén shiig pegkegma nuna iwaintugkabi, nayaimpinum Apajuí puja nuiya akaetatman.
REV 21:11 Yaaktak Apajuí etsantajinig etsanmayi, nunú etsanbaujiya duka makichik kaya shiig pegkeja imanuyi, kaya jaspe, vidrio saawiya iman.
REV 21:12 Peegmagbaujig muun yakí jiikbauyi, nuigtú doce waiti ajibi, nunak doce ángel aidau kuitabiagmayi, nuigtushkam Israelan uchijí doce aajakajua nuna daaji agatkamuyi;
REV 21:13 Makí makichik yaakta yantame aina nuig, kampá kampatum waiti ajiagmayi.
REV 21:14 Yaakat peegmagbauwa duka doce kaya batsatuamuyi, nuig doce apóstol aidau Uwigdauwa nuna daaji agatkamuyi.
REV 21:15 Mina aujta duka yaakat peegmagbaujiya nuna ashí waitiji aina nujai dekaapatnun tagkana nuninun oro takakuyi.
REV 21:16 Yaaktak ashí yantamejai nuní nuninuk agmayi, esantiya duka wegkantijai betekayi. Ángel yaaktan tagkan takakbauwai dekaapabi, dutikam dos mil doscientos kilómetros ajibi. Esantí, yakintí, wegkantí aina duka betek agmayi.
REV 21:17 Nuigtushkam yaakat peegjamua nuna dupantinak sesenta y cinco metros dekaapabi, ángel aentstí dekaapatiama dutiksag.
REV 21:18 Duka jaspeyai peegmagbauyi. Untsu yaaktak ayatak orokeyi, vidrio saawi tsuwatchauwa iman.
REV 21:19 Yaakat peegmaku kaya batsatuamua duka, ashí kaya shiig pegkeg aidauwai iwajamuyi. Nagkamchakuik kaya jaspe apujtuamuyi, jimaja duka zafiro; kampatuma ju ágata, cuatroa ju esmeralda,
REV 21:20 cincoa ju ónice, seisa ju cornalina, sieteya ju crisólito, ochoa ju berilo, nueveya ju topacio, dieza ju crisopraso, onceya ju jacinto, doceya ju amatista.
REV 21:21 Doce waiti aina duka doce perla agmayi, makí makichik waiti aina duka makichik perlayaik takasbauyi. Untsu yaakta jintiya duka ayatak orokeyi, iman asa vidrio saawiya imanuyi.
REV 21:22 Nuanuig jega Apajuí ememattainak wainkachbaijai, wagki ditá jee Apajuí ememattaiya duka, Apu Apajuí ashí senchigtina nuna Uwigjai emematuidau asagmatai.
REV 21:23 Yaakta duka etsanak nantunakesh atsumchabi tsaaptin emati tusag; wagki Apajuí tsaaptinjiya duke tsaaptin emau asamtai, nuigtush Uwija nuuyi niina lamparajig.
REV 21:24 Ashí aents uwemkaju aidauk nunú tsaaptina nui yujasagtinai. Tuja ju nugka juiya rey aidauk ditanu wají shiig pegkeg aidaun niina eme anentsag itajiagtinai.
REV 21:25 Waitiji aidaushkam ashí tsawantai ujaimutak atinai, wagki kashik atsau asamtai.
REV 21:26 Ashí nugkanmaya aidaushkam ditá wiakchajiya nuiyan, nuigtú wají pegkeg aidaunash itajiagtinai.
REV 21:27 Nunú yaaktanmag aents pegkegchau tsumain aina nuna takau aidauk, wait aina dushakam wayachagtinai. Uwijá papiijin pujutan jukiu agattaiya nui daaji agatkamu aina duke wayawagtinai.
REV 22:1 Nuniku ai, ángel iwaintugkabi makichik namak pujuta sukagtin tsuwatchau, vidrio saawiya iman, Apajuí ekeemtaijin Uwigjai eketbaunmaya jiintatman.
REV 22:2 Jintak yaakta ejapen nagkaemakuyi, nuniamunum mai namaka yantamega nui, numi pujuta sukagtin aatú amain makichik wajai tikich yantamen makichik wajabi, duka makichik mijantin doceya imania nejenuyi nantu nantutin nejeau asa; nuigtú numí duke aina duka ashí nugkanmaya aidau etsagagtasa takataiyayi.
REV 22:3 Nuigtushkam awig makichkish pegkegchau chichagdaiyamuk atsutnai. Apajuí ekeemtaiji nuigtush Uwijá ekeemtaijiya dushakam nu yaaktanum atinai, nunin asamtai niina inake aidaushkam niinak emematiagtinai.
REV 22:4 Nunidau asag paan igkua wainiagtinai, tuja ditá nijayinish Apajuí daaji agatkamu agtinai.
REV 22:5 Nu yaaktanmag kashik atsutnai. Lámpara ekemaktasaikish atsumnashtinai, aantsag etsashkam atsumnashtinai, wagki Apu Apajuí tsaaptin emau asamtai, nunikmatai nui batsamas tuke inamá batsamtinai.
REV 22:6 Ángel chichagtak: “Ju chichama juka betek uminkatnai nuigtush juka dekaskea nu ainawai. Apu, Apajuí profeta aidaun Wakaní Pegkeji awetim dekamtikajakua nunú niina angeljin awemae, wají aidau wamak nagkaemagtata nuna ni inake aidaun iwaintukta tau asa”, tujutmayi.
REV 22:7 “¡Waamak minittajai! Shiig aneastinai jujú papinum chicham tibauwa nuna umia duka”, tawai.
REV 22:8 Witjai Juagkaitjai, jujú wají aina nuna wainkaunuk antutnash antukunuk. Juna antukan tuja wainká wajakan, ángel mina iwaintuja nuna ememattasan tikishmatjabiajai.
REV 22:9 Nuniai ni chichagtak: “Nijah Ankaipa, wagki wishakam ame inakaitam annuketjai, amina yatsum profeta aina nunin, nuigtú ju papinumian chichaman umiina nuninketjai, Apajuí emematta”, tujutmayi.
REV 22:10 Nuigtú chichagtak: “Jujú papinum chicham tibau agagbauwa juka uukmek idaisaipa, wagki tsawantak ashí jegau asamtai.
REV 22:11 “Pegkegchaun takaa duka nunisag pegkegchaunak takastí; nuigtú tsumain aidaun takaidauk nunisag tsumain aidaunak takasti, tuja pegkejan takaa dushakam nunisag pegkegnak takastí. Pegkeniuwa duka nuní senchi pegketi”.
REV 22:12 “Nijah, wamak minittajai, nuniakun makí makichik takasaja dutiksaik akiktinun takuktatjai.
REV 22:13 Witjai nagkamtinish tuke pujusunuk ajubaish tuke pujutnunuk, nagkamnamunmash nuigtú nagkatkamunmash wikitjai”, timayi.
REV 22:14 Shiig aneasagtatui jaanchjin nijaina duka, numí neje pujutan sukagtina nunash yuwatin, nuigtush yaakta waitiji aina nuish wayatin asag.
REV 22:15 Tujash aents besekú aidau, tunchi aidau, tsanijimta yujajin aidau, magkagtin aidau, apajuimtain emematin aidau, nuigtú ashí pegkegchau aidaun wakejus takau aidauk wayachagtinai agag batsamsagtinai.
REV 22:16 “Witjai Jesús, mina angeljun awemamjai ashí ju aidaun iglesia aidaun ujaktinme tusan. Witjai dekas atsamunum nagkamdaunuk David weantuitjai, nuigtushkam yaya tsawak etsantama numamtinaitjai”.
REV 22:17 Nuniai Wakan nuigtú, Uwijá nuwega nujai: “Minitá”, tuinawai. Ni antaushkam “Minitá”, titi. Ni kitamauk minití, ni wakegauk yumi pujutan sukagtina nuna anenjauch uwagti.
REV 22:18 Ashí aents aidau jujú papinum chicham tibau agagbau antuina nuna ujainajai: Makichik aentskesh, jujú wají aina nuna ekeaunak, Apajuí niinashkam ni waittsatin aina nuna eketkattawai jujú papinum agagbauwa dutiksag.
REV 22:19 Nuigtushkam makichik aentskesh jujú papinum uminkatin agagbauwa juna emegkakunak, Apajuishkam numi pujutan sukagtina nuna nejenak susashtinai, nuigtushkam yaakat pegkejam jujú papinum pachisa agagbauwa nuishkam awayashtinai.
REV 22:20 Jujú wají aidaun pachis etseja nunú tawai: “Dekaskenum wamak minittajai”, Aatus atí. “Apu Jesusah, wamak minitá”.
REV 22:21 Apu Jesús wait anenkagtamujiya nu ashí atuminish atí. Aatus atí.
