﻿أَعْمَالْ.
19.
وَقْتِلِّي أَبُلُّوسْ كَانْ فِي كُورِنْثُوسْ، سَافِرْ بُولِسْ عْلَى طْرِيقْ البَرْ فِي المَنَاطِقْ العَالْيَة حَتَّى وْصُلْ لْأَفَسُسْ. وغَادِي لْقَى شْوَيَّة تْلَامْذَة. 
سْإِلْهُمْ: «يَاخِي خْذِيتُوا الرُّوحْ القُدُسْ وَقْتِلِّي أَمَّنْتُوا؟». جَاوْبُوهْ: «لَا! ولَا حَتَّى سْمَعْنَا إِنُّو الرُّوحْ القُدُسْ مَوْجُودْ». 
يَاخِي سْإِلْهُمْ: «مَالَا بَانَا مَعْمُودِيَّة تْعَمَّدْتُوا؟». جَاوْبُوا: «بْمَعْمُودِيِّةْ يُوحَنَّا». 
قَالْ بُولِسْ: «مَعْمُودِيِّةْ يُوحَنَّا كَانِتْ لِلتُّوبَة، وهُوَّ كَانْ يِدْعِي الشَّعْبْ بَاشْ يَمْنُوا بِلِّي يْجِي بَعْدُو، يَعْنِي بْيَسُوعْ». 
وكِي سَمْعُوا الكْلَامْ هَاذَا، تْعَمْدُوا بْإِسْمْ الرَّبْ يَسُوعْ. 
ووَقْتِلِّي حَطْ بُولِسْ عْلِيهُمْ يْدِيهْ، هْبَطْ عْلِيهُمْ الرُّوحْ القُدُسْ، وبْدَاوْ يِتْكَلْمُوا بْلُوغَاتْ أُخْرَى ويِتْنَبْؤُوا. 
وكَانُوا قْرَابِةْ أَثْنَاشِنْ رَاجِلْ. 
وقْعَدْ بُولِسْ يِمْشِي لْمَعْبِدْ اليْهُودْ لْمُدِّةْ ثْلَاثَة شْهُرْ، وكَانْ يِتْكَلِّمْ جْهَارْ عْلَى مَمْلِكْةْ اللَّهْ، ويْنَاقِشْ فِي الحَاضْرِينْ ويْحَاوِلْ يَقْنَعْهُمْ. 
آمَا فَمَّة الِّي عَانْدُوا ومَا حَبُّوشْ يَمْنُوا، وبْدَاوْ يْسِبُّوا فِي المَذْهَبْ الِّي يِتْسَمَّى طْرِيقْ الرَّبْ قُدَّامْ النَّاسْ الكُلْ. يَاخِي خَلَّاهُمْ بُولِسْ وهَزْ التْلَامْذَة وَحَّدْهُمْ، وبْدَا يِتْنَاقِشْ مْعَاهُمْ ويْعَلِّمْ فِيهُمْ كُلْ يُومْ، فِي مَدْرَسْةْ وَاحِدْ إِسْمُو تِيرَانُّوسْ. 
ودَاوِمْ عْلَى هَاذَا لْمُدِّةْ عَامِينْ، حَتَّى وِصْلِتْ كِلْمِةْ الرَّبْ لِلْيْهُودْ ولِلِّي مُشْ يْهُودْ الكُلْ الِّي يُسْكْنُوا فِي آسِيَّا. 
وكَانْ اللَّهْ يَعْمِلْ فِي مُعْجْزَاتْ كْبِيرَة عْلَى يْدِينْ بُولِسْ، 
حَتَّى وَلَّاوْ النَّاسْ يْهِزُّوا المْنَادِلْ والفْوُطْ الِّي مَسُّوا بْدَنْ بُولِسْ، ويْحُطُّوهُمْ عَالمُرْضَى، والمُرْضَى يَبْرَاوْ وتُخْرُجْ مِنْهُمْ الأَرْوَاحْ الشِّرِّيرَة. 
وكَانْ فَمَّة يْهُودْ رَحَّالَة خِدْمِتْهُمْ تَخْرِيجْ الأَرْوَاحْ الشِّرِّيرَة، حَاوْلُوا يِسْتَعْمْلُوا إِسْمْ الرَّبْ يَسُوعْ بَاشْ يِطَرْدُوهَا. كَانُوا يْقُولُوا لِلأَرْوَاحْ: «بْإِسْمْ يَسُوعْ الِّي يْبَشِّرْ بِيهْ بُولِسْ نُأْمْرِكْ بَاشْ تُخْرُجْ». 
وكَانْ مْعَ الجْمَاعَة هَاذُمْ سَبْعَة مِنْ وْلَادْ وَاحِدْ مِنْ كْبَارْ الكَهَنَةْ إِسْمُو سَكَاوَا. 
يَاخِي جَاوِبْهُمْ الرُّوحْ الشِّرِّيرْ: «يَسُوعْ نَعْرْفُو وبُولِسْ زَادَا نَعْرْفُو، آمَا إِنْتُومَا شْكُونْكُمْ؟». 
وهْجِمْ عْلِيهُمْ الرَّاجِلْ الِّي فِيهْ الرُّوحْ الشِّرِّيرْ وتْمَكِّنْ مِنْهُمْ وغْلِبْهُمْ، يَاخِي هَرْبُوا مِالدَّارْ عِرْيَانِينْ ومَجْرُوحِينْ. 
اليْهُودْ ولِّي مُشْ يْهُودْ السَّاكْنِينْ فِي أَفَسُسْ الكُلْ سَمْعُوا بِلِّي صَارْ، وخَافُوا بَرْشَة، وهَكَّا تْمَجِّدْ إِسْمْ الرَّبْ يَسُوعْ. 
وجَاوْ بَرْشَة مِلِّي أَمْنُوا، واعْتَرْفُوا بِالأَعْمَالْ الشِّرِّيرَة الِّي عَمْلُوهَا. 
وبَرْشَة مِلِّي كَانُوا يِسِحْرُوا لَمُّوا كْتُبِّتْهُمْ وهَزُّوا حَرْقُوهَا قُدَّامْ النَّاسْ الكُلْ. وكِي حِسْبُوا سُومْهَا لْقَاوْهَا تَسْوَى 50 000 قَطْعَة مِالفِضَّة. 
وهَكَّا كَانِتْ كِلْمِةْ الرَّبْ تِتِنْشَرْ وتَأْثِيرْهَا يَقْوَى. 
وبَعْدْ الحَاجَاتْ الِّي صَارِتْ هَاذِي الكُلْ، قَرِّرْ بُولِسْ بَاشْ يْسَافِرْ لْأُورْشَلِيمْ ويِتْعَدَّى عْلَى مَقْدُونِيَّة وأَخَائِيَة، وقَالْ: «بَعْدْمَا نِمْشِي غَادِي، لَازِمْنِي نْزُورْ رُومَا زَادَا». 
وبْعَثْ لْمَقْدُونِيَّة زُوزْ مِلِّي يْعَاوْنُوا فِيهْ، وهُومَا تِيمُوثَاوُسْ وأَرَسْطُوسْ، آمَا هُوَّ زَادْ قْعَدْ مُدَّة فِي آسِيَّا. 
وفِي المُدَّة هَاذِيكَا وُقْعِتْ مُشْكْلَة كْبِيرَة فِي أَفَسُسْ بِسْبَبْ الطْرِيقْ هَاذَا. 
عْلَى خَاطِرْ فَمَّة صَايْغِي إِسْمُو دِيمِتْرِيُوسْ كَانْ يَصْنَعْ فِي مْعَابِدْ صْغِيرَة مِالفِضَّة كِيمَا مَعْبِدْ الإِلَاهَة أَرْطَامِيسْ، وكَانُوا الصُّنَّاعْ يِرْبْحُوا فِي بَرْشَة فْلُوسْ مِالخِدْمَة هَاذِي. 
يَاخِي لَمْ صُنَّاعُو وأَصْحَابْ صَنْعْتُو وقَالِلْهُمْ: «يَا رْجَالْ، إِنْتُومَا تَعْرْفُوا الِّي الخِيرْ الِّي عَايْشِينْ فِيهْ، وَاقِفْ عْلَى صَنْعِتْنَا هَاذِي. 
وإِنْتُومَا شُفْتُوا وسْمَعْتُوا الِّي بُولِسْ هَاذَا أَثِّرْ عْلَى بَرْشَة نَاسْ، مُشْ فِي أَفَسُسْ بَرْكْ، آمَا تَقْرِيبْ فِي آسِيَّا الكُلْ، وقْنَعْهُمْ الِّي الآلْهَة الِّي تِتْصْنَعْ بِاليِدْ مَاهِيشْ آلْهَة. 
وهَاذَا مُشْ بِشْ يْنَقِّصْ مِنْ قِيمِةْ صَنْعِتْنَا أَكَهَوْ، آمَا بِشْ يْطَيِّحْ قِيمِةْ مَعْبِدْ الإِلَاهَة العْظِيمَة أَرْطَامِيسْ، ويْنَقْصِلْهَا مِنْ هِيبِتْهَا، وهِيَّ الِّي يِعْبْدُوهَا النَّاسْ فِي آسِيَّا الكُلْ وفِي بْقِيِّةْ العَالِمْ». 
وكِي سَمْعُوا الصُّنَّاعْ الكْلَامْ هَاذَا، تْغَشْشُوا بَرْشَة وبْدَاوْ يْصِيحُوا: «عْظِيمَة أَرْطَامِيسْ، آلِهِةْ أَفَسُسْ!». 
وصَارِتْ خُوضَة كْبِيرَة فِي المْدِينَة الكُلْ، وهِجْمُوا بَرْشَة نَاسْ عْلَى غَايُوسْ وأَرِسْتَرْخُسْ الِّي مِنْ مَقْدُونِيَّة ولِّي كَانُوا مْسَافْرِينْ مْعَ بُولِسْ، وهَزُّوهُمْ بِالقُوَّة لْمَسْرَحْ المْدِينَة. 
وحَبْ بُولِسْ يْوَاجِهْ النَّاسْ، آمَا التْلَامْذَة مَا خَلَّاوْهِشْ. 
وحَتَّى صْحَابُو مِالمَسْؤُولِينْ الِّي فِي آسِيَّا بَعْثُولُو، وتْشَحْتُوهْ بَاشْ مَا يْخَاطِرْشْ بْرُوحُو ويِمْشِي لِلمَسْرَحْ. 
وكَانُوا النَّاسْ دَاخْلِينْ بْعَضْهُمْ، فَمَّة الِّي يْصِيحُوا عْلَى حَاجَة وأُخْرِينْ يْصِيحُوا عْلَى حَاجَة أُخْرَى، وأَغْلَبِيِّتْهُمْ مَا كَانُوشْ يَعْرْفُوا عْلَاشْ هُومَا غَادِي. 
وكَانْ بِينَاتْهُمْ رَاجِلْ يْهُودِي إِسْمُو إِسْكَنْدَرْ، دَزُّوهْ اليْهُودْ القُدَّامْ وطَلْبُوا مِنُّو بَاشْ يِتْكَلِّمْ، يَاخِي هَزْ يِدُّو بَاشْ النَّاسْ يُسْكْتُوا ويِسْمْعُوا الدِّفَاعْ مْتَاعُو. 
آمَا كِي عَرْفُوا الِّي هُوَّ يْهُودِي، بْدَاوْ يْصِيحُوا الكُلْ بْصُوتْ وَاحِدْ ولْمُدِّةْ سَاعْتِينْ: «عْظِيمَة أَرْطَامِيسْ، آلِهِةْ أَفَسُسْ!». 
وفِي الإِخِّرْ، نَجِّمْ كَاتِبْ حَاكِمْ المْدِينَة يْرَيِّضْهُمْ وقَالِلْهُمْ: «يَا أَهْلْ أَفَسُسْ! شْكُونْ مَا يَعْرِفْشْ الِّي أَفَسُسْ هِيَّ المْدِينَة الِّي تُحْرُسْ فِي مَعْبِدْ أَرْطَامِيسْ العْظِيمَة، وفِي تِمْثَالْهَا الِّي هْبَطْ مِالسْمَاء؟ 
هَاذِي حَاجَة مَعْرُوفَة ومَا فِيهَاشْ كْلَامْ، مَالَا رِيضُوا ومَا تِتْسَرْعُوشْ. 
إِنْتُومَا جِبْتُوا الزُّوزْ رْجَالْ هَاذُمْ لَهْنَا، رَغْمِلِّي لَا سِرْقُوا المَعْبِدْ ولَا سَبُّوا إِلَاهِتْنَا. 
وإِذَا كَانْ دِيمِتْرِيُوسْ ولِّي يِخْدْمُوا مْعَاهْ يْحِبُّوا يِشْكِيوْ بْحَدْ، رَاهُو عَنَّا مْحَاكِمْ وقُضَاةْ يْنَجْمُوا يِشْكِيوْلْهُمْ. 
وإِذَا كَانْ عَنْدْكُمْ شْكَايَة أُخْرَى، لَازِمْنَا نُحْكْمُوا فِيهَا فِي جَلْسَة قَانُونِيَّة. 
آمَا هَكَّا، مُمْكِنْ يِتْهْمُونَا بِالفِتْنَة بِسْبَبْ الِّي صَارْ اليُومْ. ومَا عَنْدْنَا حَتَّى عُذْرْ نْفَسْرُوا بِيهْ الخُوضَةْ هَاذِي». 
وبَعْدْمَا قَالْ الكْلَامْ هَاذَا، بْعَثْهُمْ يْرَوْحُوا. 
