MAT 1:1 Ri Qanimajawal Jesucristo e ralkꞌoꞌal kan ri David y ralkꞌoꞌal kan ri Abraham. E ri kipetebꞌem lo che ri Abraham e taq waꞌ:
MAT 1:2 Ri ralkꞌoꞌal ri Abraham, Isaac rubꞌiꞌ; ri ralkꞌoꞌal ri Isaac, Jacob rubꞌiꞌ; taq ri ralkꞌoꞌal ri Jacob, e ri Judá kukꞌ ri ratz-uchaqꞌ.
MAT 1:3 Taq ri ralkꞌoꞌal ri Judá, e ri Fares y ri Zara yey rubꞌiꞌ ri kichu e Tamar; ri ralkꞌoꞌal ri Fares, Esrom rubꞌiꞌ; ri ralkꞌoꞌal ri Esrom, Aram rubꞌiꞌ.
MAT 1:4 Ri ralkꞌoꞌal ri Aram, Aminadab rubꞌiꞌ; ri ralkꞌoꞌal ri Aminadab, Naasón rubꞌiꞌ; ri ralkꞌoꞌal ri Naasón, Salmón rubꞌiꞌ.
MAT 1:5 Ri ralkꞌoꞌal ri Salmón, Booz rubꞌiꞌ yey ruchu ri Booz e Rahab. Ri ralkꞌoꞌal ri Booz, Obed rubꞌiꞌ yey rubꞌiꞌ ruchu ri Obed e Rut. Ri ralkꞌoꞌal ri Obed, Isaí rubꞌiꞌ.
MAT 1:6 Ri ralkꞌoꞌal ri Isaí, e ri rey David y ri ralkꞌoꞌal ri David, Salomón rubꞌiꞌ yey ruchu ri Salomón e ri rixoqil ri Urías.
MAT 1:7 Ri ralkꞌoꞌal ri Salomón, Roboam rubꞌiꞌ; ri ralkꞌoꞌal ri Roboam, Abías rubꞌiꞌ; ri ralkꞌoꞌal ri Abías, Asa rubꞌiꞌ.
MAT 1:8 Ri ralkꞌoꞌal ri Asa, Josafat rubꞌiꞌ; ri ralkꞌoꞌal ri Josafat, Joram rubꞌiꞌ; ri ralkꞌoꞌal ri Joram, Uzías rubꞌiꞌ.
MAT 1:9 Ri ralkꞌoꞌal ri Uzías, Jotam rubꞌiꞌ; ri ralkꞌoꞌal ri Jotam, Acaz rubꞌiꞌ; ri ralkꞌoꞌal ri Acaz, Ezequías rubꞌiꞌ.
MAT 1:10 Ri ralkꞌoꞌal ri Ezequías, Manasés rubꞌiꞌ; ri ralkꞌoꞌal ri Manasés, Amón rubꞌiꞌ; ri ralkꞌoꞌal ri Amón, Josías rubꞌiꞌ.
MAT 1:11 Taq ri ralkꞌoꞌal ri Josías, e ri Jeconías kukꞌ ri ratz-uchaqꞌ; rike xebꞌalax chupa taq ri qꞌij echiriꞌ raj Israel xekꞌam bꞌi Babilonia.
MAT 1:12 Echiriꞌ ekꞌamom chubꞌi Babilonia, xalax jun ralkꞌoꞌal ri Jeconías, Salatiel rubꞌiꞌ; ri ralkꞌoꞌal ri Salatiel, Zorobabel rubꞌiꞌ.
MAT 1:13 Ri ralkꞌoꞌal ri Zorobabel, Abiud rubꞌiꞌ; ri ralkꞌoꞌal ri Abiud, Eliaquim rubꞌiꞌ; ri ralkꞌoꞌal ri Eliaquim, Azor rubꞌiꞌ.
MAT 1:14 Ri ralkꞌoꞌal ri Azor, Sadoc rubꞌiꞌ; ri ralkꞌoꞌal ri Sadoc, Aquim rubꞌiꞌ; ri ralkꞌoꞌal ri Aquim, Eliud rubꞌiꞌ.
MAT 1:15 Ri ralkꞌoꞌal ri Eliud, Eleazar rubꞌiꞌ; ri ralkꞌoꞌal ri Eleazar, Matán rubꞌiꞌ; ri ralkꞌoꞌal ri Matán, Jacob rubꞌiꞌ.
MAT 1:16 Y ri ralkꞌoꞌal ri Jacob e ri José, ri rachijil ri María, ruchu ri Jesús. Yey ri Jesús e ri kabꞌiꞌx “Cristo” che.
MAT 1:17 Jekꞌulaꞌ chi konoje ri tikawex ujeqebꞌem lo chwi ri Abraham kꞌa chwach ri David, xebꞌikꞌow kajlajuj lemaꞌj; chwi lo ri David kꞌa chwach echiriꞌ xekꞌam bꞌi raj Israel pa ri tinamit Babilonia, xebꞌikꞌow kajlajuj lemaꞌj; yey chwi lo echiriꞌ xekꞌam bꞌi raj Israel pa ri tinamit Babilonia kꞌa chwach ri ralaxibꞌal ri Cristo, xebꞌikꞌow kajlajuj lemaꞌj.
MAT 1:18 Jewaꞌ xuꞌan ri ralaxibꞌal ri Qanimajawal Jesucristo: Ri María, ruchu ri Jesús, unimam chik kakꞌuliꞌ rukꞌ ri José. Ekꞌuchiriꞌ kꞌamajaꞌ kakijunimaj kibꞌ, ri María xkanaj yewaꞌ ixoq ruma ruchuqꞌabꞌ ri Santowilaj Ruxlabꞌixel ri Dios.
MAT 1:19 Ri José, ri rachijil ri María, ruma lik jusukꞌ rubꞌinik y ruma na karaj taj kuya ukꞌix ri María chikiwach ri winaq, xraj kꞌut kuya kanoq e laꞌ na jinta kꞌo kenaꞌbꞌen re.
MAT 1:20 Ekꞌuchiriꞌ kuchꞌobꞌ raqan puwi waꞌ, xaqikꞌateꞌt jun ángel re ri Dios xukꞌut ribꞌ pa uwachikꞌ y xubꞌiꞌij che: «José, at ralkꞌoꞌal kan ri David, maxiꞌij awibꞌ che kakꞌam ri María re kuꞌan awixoqil, ma rumatzem rire, ukꞌulum ruma ri Santowilaj Ruxlabꞌixel ri Dios.
MAT 1:21 Kalax kꞌu jun ralabꞌ y Jesús rubꞌiꞌ kakojo, ma Rire kebꞌukolobꞌej rutinamit che ri kimak» xchaꞌ.
MAT 1:22 Ronoje waꞌ xuꞌano chaꞌ e kuꞌana janipa ri kubꞌiꞌij Ruchꞌaꞌtem ri Dios echiriꞌ ri qꞌalajisanel re ri Dios xubꞌiꞌij:
MAT 1:23 Chitanapeꞌ: Jun chomilaj qꞌapoj ali kakanaj yewaꞌ ixoq y kalax jun ralabꞌ. Ekꞌu rubꞌiꞌ kabꞌiꞌxik: Emanuel xchaꞌ. Waꞌ keꞌelawi “Dios xoꞌljeqel qukꞌ”.
MAT 1:24 Ekꞌuchiriꞌ xkꞌun saq chwach ri José, e xuꞌan ri xtaq che ruma ri ángel re ri Dios; xukꞌam kꞌu ri María re rixoqil.
MAT 1:25 Pero xuchajij na ruchomal ri María ma na xkꞌojiꞌ ta rukꞌ kꞌa echiriꞌ xalax na ri ralko ralabꞌ. Y Jesús rubꞌiꞌ xukojo.
MAT 2:1 Ri Jesús xalax chilaꞌ Belén re Judea echiriꞌ e rey ri Herodes. Xebꞌopon kꞌu Jerusalem jujun achijabꞌ e petinaq pa relebꞌal lo ri qꞌij. Rike lik kꞌo kinaꞌoj puwi taq ri chꞌumil.
MAT 2:2 Jekꞌuwaꞌ kakibꞌiꞌij: —¿Pa kꞌo wi ri rey ke raj judiꞌabꞌ alaxinaq? Ma riꞌoj xqil ruchꞌumil kꞌa pa relebꞌal lo ri qꞌij; yey e waꞌ oj petinaq chaꞌ koꞌlqaloqꞌnimaj uqꞌij —kechaꞌ.
MAT 2:3 Echiriꞌ xuta waꞌ ri rey Herodes, lik xsach unaꞌoj che y jelaꞌ xkikꞌulumaj konoje ri winaq e aj Jerusalem.
MAT 2:4 Xumol kꞌu kichiꞌ konoje ri nimaq e aj chakunel pa Rocho Dios kukꞌ raj kꞌutunel re ri tzijpixabꞌ y xutzꞌonoj kꞌu chike pa kalax wi ri Cristo, Ruchaꞌoꞌn lo ri Dios.
MAT 2:5 Rike xkibꞌiꞌij che: —Ri Cristo kalax pa raldea Belén re Judea, ma jewaꞌ utzꞌibꞌam kan ri qꞌalajisanel chupa Ruchꞌaꞌtem ri Dios:
MAT 2:6 Riꞌat Belén at kꞌo pa ri luwar re Judea, tobꞌ lik at chꞌutiꞌn, riꞌat lik kꞌo awach chikiwach raj wach e kꞌo Judea, ma awukꞌ riꞌat kape wi ri Jun Taqanel; ekꞌu Rire kuꞌana chajinel ke ri nutinamit Israel —xechaꞌ.
MAT 2:7 Ri Herodes ruma ri xuto, xa xeꞌlaqꞌay xebꞌusikꞌij rachijabꞌ e aj naꞌoj puwi taq ri chꞌumil y xutzꞌonoj kꞌu chike jampa xwinaqir waꞌ wa chꞌumil.
MAT 2:8 Tekꞌuchiriꞌ, xebꞌutaq bꞌi Belén, jewaꞌ xubꞌiꞌij chike: —Oj alaq y lik tzukuj alaq chi utz ri ralko akꞌa. We xriq kꞌu alaq, koꞌlbꞌiꞌij alaq chwe pa kꞌo wi chaꞌ jelaꞌ kinꞌek riꞌin y kiꞌnloqꞌnimaj uqꞌij —xchaꞌ.
MAT 2:9 Tekꞌuchiriꞌ rachijabꞌ e aj naꞌoj xkita ri xubꞌiꞌij ri rey, xkimaj chubꞌi ri kibꞌe. Ekꞌu ri chꞌumil kilom lo kꞌa pa relebꞌal lo ri qꞌij, nabꞌe bꞌi chikiwach y xtakꞌiꞌ kꞌu chwi ri luwar pa kꞌo wi ri ralko akꞌa.
MAT 2:10 Rike echiriꞌ xkil ri chꞌumil, lik xekiꞌkot che.
MAT 2:11 Ekꞌuchiriꞌ xebꞌok pa ri ja, xkil ri ralko akꞌa rukꞌ ruchu María. Xexukiꞌik y xkiloqꞌnimaj uqꞌij. Xkijaq kꞌu uchiꞌ ri kikaxa y xkiya taq sipanik che, waꞌ re oro, re incienso y re mirra lik kiꞌ ruxlabꞌ.
MAT 2:12 Chaqꞌabꞌ kꞌu riꞌ, xqꞌalajisax chike pa wachikꞌ na ketzelej ta chi pa kꞌo wi ri Herodes. Ruma kꞌu riꞌ, xetzelej pa kitinamit pa jun chik bꞌe.
MAT 2:13 Echiriꞌ rachijabꞌ e aj naꞌoj ebꞌelinaq chubꞌi rukꞌ ri Jesús, xukꞌut ribꞌ jun ángel re ri Dios pa uwachikꞌ ri José y xubꞌiꞌij che: «Chatyaktajoq, chebꞌakꞌama bꞌi rakꞌa y ruchu. Chixanimaj bꞌi kꞌa Egipto y chixkanaja chilaꞌ kꞌate kambꞌiꞌij chiwe jampa kixpetik, ma ri Herodes kutaq utzukuxik rakꞌa chaꞌ kakamisaxik» xchaꞌ.
MAT 2:14 Xyaktaj kꞌu bꞌi ri José chaqꞌabꞌ, xebꞌukꞌam bꞌi rakꞌa y ruchu, y xebꞌek Egipto.
MAT 2:15 Chilaꞌ kꞌut xekꞌojiꞌ wi kꞌa che rukamik ri Herodes. Xuꞌan kꞌu waꞌ chaꞌ e kuꞌana rubꞌiꞌim lo ri Dios ruma ri qꞌalajisanel echiriꞌ jewaꞌ xubꞌiꞌij: «Kꞌa chilaꞌ Egipto xinsikꞌij wi lo ri Nukꞌajol» xchaꞌ.
MAT 2:16 Ri Herodes, echiriꞌ xretaꞌmaj xsokosoꞌx kan kuma rachijabꞌ e aj naꞌoj, lik xpe royowal. Ruma kꞌu riꞌ, xutaq kikamisaxik konoje ri raltaq ko chꞌutiꞌq alabꞌo kꞌamajaꞌ kakikꞌis kebꞌ junabꞌ, chike ri e kꞌo Belén y pa taq ri luwar e kꞌo lo chunaqaj. Ekꞌu xukꞌam re riꞌ ri xkibꞌiꞌij ri e aj naꞌoj puwi ruqꞌijol echiriꞌ xwinaqir ri chꞌumil.
MAT 2:17 Jekꞌulaꞌ e xuꞌana ri tzꞌibꞌital kan ruma ri qꞌalajisanel Jeremías echiriꞌ xubꞌiꞌij:
MAT 2:18 Xtataj jun qulaj pa Ramá, oqꞌej y sikꞌ rukꞌ bꞌis. E ri Raquel keroqꞌej ri ralkꞌoꞌal y na karaj tane kabꞌochiꞌix ukꞌuꞌx ruma ri kikamik ri ralkꞌoꞌal xchaꞌ.
MAT 2:19 Tekꞌuchiriꞌ kaminaq chi ri Herodes, jun ángel re ri Dios xukꞌut ribꞌ pa uwachikꞌ ri José chilaꞌ Egipto y xubꞌiꞌij che:
MAT 2:20 «Chatyaktajoq, chebꞌakꞌama bꞌi rakꞌa junam rukꞌ ruchu y chixtzelej tanchi Israel, ma ya xekam konoje ri kakaj kakikamisaj rakꞌa» xchaꞌ.
MAT 2:21 Xyaktaj kꞌu ri José, xebꞌukꞌam bꞌi rakꞌa y ruchu, y xtzelej lo Israel.
MAT 2:22 Pero xuxiꞌij ribꞌ keꞌek Judea, ma xretaꞌmaj e ri Arquelao rukꞌajol ri Herodes ri xkanaj kan rey re Judea pukꞌaxel ruqaw. Ruma kꞌu ri xqꞌalajisax che pa jun chik uwachikꞌ, xumaj bꞌi ubꞌe Galilea.
MAT 2:23 Echiriꞌ xebꞌopon chilaꞌ, xeꞌjeqela pa ri tinamit Nazaret, chaꞌ e xuꞌana ri xkibꞌiꞌij ri qꞌalajisanelabꞌ chwi ri Jesús: “Rire kabꞌiꞌx che aj Nazaret.”
MAT 3:1 Xopon ruqꞌijol echiriꞌ ri Juan Aj Yaꞌl Bautismo katzijon pa taq ri luwar katzꞌintzꞌotik re Judea.
MAT 3:2 Jekꞌuwaꞌ kubꞌiꞌij: «Tzelej tzij alaq chwach ri Dios, ma rutaqanik ri Dios petinaq chilaꞌ chikaj lik xa naqaj chi kꞌo wuloq» kachaꞌ.
MAT 3:3 Ri qꞌalajisanel Isaías xutzꞌibꞌaj kan puwi waꞌ wa Juan echiriꞌ xubꞌiꞌij: Katataj uqul jun tzijonel kasikꞌin chupa ri luwar katzꞌintzꞌotik, jewaꞌ kubꞌiꞌij: “Yijbꞌaꞌ pana alaq ri bꞌe re ri Qanimajawal; sukꞌupij alaq rubꞌe Rire” xchaꞌ.
MAT 3:4 Ruqꞌuꞌ ri Juan ukojom ꞌanom rukꞌ rismal camello y rupas ximil che rupa e jun tzꞌuꞌum; ri kutijo e taq ri sakꞌ y uwaꞌal kabꞌ re upa taq juyubꞌ.
MAT 3:5 Ri ejeqel pa ri tinamit Jerusalem kukꞌ konoje ri e kꞌo pa ri luwar re Judea y ri ejeqel chuchiꞌ ri nimayaꞌ Jordán, xebꞌel lo che utayik ri Juan.
MAT 3:6 Kakitzꞌonoj kꞌu kuybꞌal kimak chwach ri Dios, y ri Juan kuya ri bautismo chike pa ri nimayaꞌ Jordán.
MAT 3:7 Ekꞌu ri Juan echiriꞌ xrilo lik e kꞌi chike ri fariseos y ri saduceos xekꞌun ruma ri bautismo kuyaꞌo, xubꞌiꞌij chike: «¡Ralaq pachaꞌ alaq jupuq chi kumatz! ¿China xbꞌiꞌn re we utz kesaj ibꞌ alaq chwach ri unimal kꞌaxkꞌobꞌik kutaq lo ri Dios pawiꞌ alaq?
MAT 3:8 Bꞌina alaq jusukꞌ chaꞌ jelaꞌ kaqꞌalajinik jalkꞌatim chi ri bꞌinik silabꞌik alaq, jelaꞌ pachaꞌ ri taqal chike ri kitzelem chi kitzij.
MAT 3:9 »Y machꞌobꞌ ne alaq chi ibꞌil ibꞌ alaq waꞌ: “Riꞌoj utz qaꞌanom, ma oj ralkꞌoꞌal kan ri Abraham.” Ma riꞌin kambꞌiꞌij che alaq: We xraj ri Dios, utz kuꞌan ralkꞌoꞌal ri Abraham tobꞌ ne che taq waꞌbꞌaj.
MAT 3:10 Yey jikil chi ne uwach ruqꞌatbꞌal tzij ri Dios pawiꞌ alaq, e pachaꞌ juna achi uyakom chi ri ikaj chwi ri ratzꞌayaq ri cheꞌ; ekꞌu taq ri cheꞌ na kuya ta chomilaj jiqꞌobꞌal, kapoqꞌix bꞌi y kakꞌaq pa aqꞌ.
MAT 3:11 »Riꞌin paqatzij wi kanya ri bautismo che alaq rukꞌ yaꞌ, kꞌutubꞌal re tzelem chi tzij alaq chwach ri Dios. Noꞌj kꞌu ri Jun katajin lo chwij riꞌin, kꞌo puqꞌabꞌ kuya ri bautismo che alaq rukꞌ ri Santowilaj Ruxlabꞌixel ri Dios y rukꞌ aqꞌ. Rire más kꞌo uchuqꞌabꞌ chinuwach riꞌin; na taqal tane chwe tobꞌ xa kanmolej ruxajabꞌ.
MAT 3:12 Ekꞌu Rire koluꞌqꞌata tzij pakiwi ri tikawex chaꞌ jelaꞌ kuya ri tojbꞌal taqal chike chikijujunal. E pachaꞌ juna achi rukꞌaꞌam chi ri puꞌbꞌal uwach ri trigo puqꞌabꞌ chaꞌ naꞌl kujosqꞌij waꞌ y karesaj rupukꞌ chupa. Tekꞌuchiriꞌ, kujok ri trigo y kukꞌol chupa rukꞌolibꞌal. Ekꞌu rupukꞌ kuporoj pa ri jun aqꞌ na jinta utaqexik katenowik» xcha ri Juan.
MAT 3:13 Ekꞌuchiriꞌ ri Jesús petinaq Galilea, xopon chuchiꞌ ri nimayaꞌ Jordán chaꞌ ri Juan kuya ri bautismo che.
MAT 3:14 Pero ri Juan na xraj taj kuya ri bautismo che ri Jesús, jekꞌuwaꞌ xubꞌiꞌij che: —Ri lik usukꞌ e rilal ri kayaꞌw la ri bautismo chwe riꞌin. ¿Yey e kami kaꞌaj la riꞌ kanya riꞌin ri bautismo cheꞌla? —xchaꞌ.
MAT 3:15 Ekꞌu ri Jesús xukꞌul uwach: —E chaꞌana woꞌora saꞌ ri kambꞌiꞌij riꞌin chawe, ma lik chirajawaxik e kaqaꞌan janipa ri lik usukꞌ chwach ri Dios —xchaꞌ. Jekꞌulaꞌ ri Juan xuya ri bautismo che.
MAT 3:16 Tekꞌuchiriꞌ ri Jesús xukꞌul ri bautismo, xel lo pa ri yaꞌ. Y na jampatana kꞌu riꞌ xjaqataj ruwa kaj y xrilo echiriꞌ ri Ruxlabꞌixel ri Dios xqaj lo puwiꞌ pachaꞌ juna palomax.
MAT 3:17 Ekꞌuchiriꞌ, xchꞌaw lo Jun chilaꞌ chikaj, jewaꞌ xubꞌiꞌij: «E Nukꞌajol waꞌ ri lik kꞌax kannaꞌo y lik kinkiꞌkot che» xcha ri Dios.
MAT 4:1 Tekꞌuchiriꞌ, ri Jesús xkꞌam bꞌi ruma ri Ruxlabꞌixel ri Dios pa jun luwar katzꞌintzꞌotik chaꞌ kakꞌam upa ruma ritzel winaq.
MAT 4:2 Ri Jesús xkꞌojiꞌ chilaꞌ yey cuarenta qꞌij y cuarenta aqꞌabꞌ kꞌu riꞌ na jinta kꞌo xutijo. Kꞌisbꞌal re waꞌ xpe numik che.
MAT 4:3 Xqibꞌ kꞌu ritzel winaq rukꞌ ri Jesús re kukꞌam upa chaꞌ katzaq pa mak, jewaꞌ xubꞌiꞌij che: —We qatzij at Ukꞌajol ri Dios, chat-taqan che chaꞌ taq waꞌbꞌaj kuꞌan wa —xchaꞌ.
MAT 4:4 Ri Jesús xukꞌul uwach: —Jewaꞌ tzꞌibꞌital kan chupa Rutzij Upixabꞌ ri Dios: Na xew ta ruma ri wa e kꞌas ri tikawex, ma e kꞌaslik ruma ronoje taq chꞌaꞌtem kel lo puchiꞌ ri Dios —xchaꞌ.
MAT 4:5 Ekꞌuchiriꞌ, ritzel winaq xukꞌam bꞌi pa ri santowilaj tinamit Jerusalem kꞌa chikaj che ruwi ri Rocho Dios.
MAT 4:6 Xubꞌiꞌij kꞌu che: —We qatzij at Ukꞌajol ri Dios, chakꞌaqa bꞌi awibꞌ kꞌa chuꞌlew y na jinta kꞌo kakꞌulumaj, ma jewaꞌ tzꞌibꞌital kan chupa Rutzij Upixabꞌ ri Dios: Ri Dios kebꞌutaq lo ru ángeles awukꞌ chaꞌ katkichajij. Katkichap kꞌu rukꞌ ri kiqꞌabꞌ chaꞌ na kaꞌchiqa ta rawaqan che juna abꞌaj —xchaꞌ.
MAT 4:7 Ri Jesús xukꞌul uwach: —Jewaꞌ tzꞌibꞌital kan chupa Rutzij Upixabꞌ ri Dios: Makꞌam upa ri Dios Qajawxel —xchaꞌ.
MAT 4:8 Ekꞌuchiriꞌ, ritzel winaq xukꞌam tanchi ubꞌi ri Jesús chutzaꞌm jun nimalaj juyubꞌ y xukꞌut kꞌu chwach, ronoje ri taqanik kaꞌan puwi taq ri tinamit che ruwachulew rukꞌ ronoje ruchomalil taq waꞌ.
MAT 4:9 Xubꞌiꞌij kꞌu che: —Ronoje taq waꞌ kanya paqꞌabꞌ we kaxukubꞌaꞌ awibꞌ chinuwach y kaloqꞌnimaj nuqꞌij —xchaꞌ.
MAT 4:10 Ekꞌu ri Jesús xubꞌiꞌij che: —Chatela chinuwach Satanás, ma jewaꞌ tzꞌibꞌital kan chupa Rutzij Upixabꞌ ri Dios: Lik chaloqꞌnimaj uqꞌij ri Dios Qajawxel y xew Rire chanimaj uqꞌij —xchaꞌ.
MAT 4:11 Ekꞌu ritzel winaq xuya kan ri Jesús y xel bꞌi chiriꞌ. Xekꞌun kꞌu lo jujun ángeles y xkijeqo kakinimaj ri Jesús.
MAT 4:12 Ri Jesús, echiriꞌ xuto kꞌo ri Juan pa cárcel, xeꞌek tanchi Galilea.
MAT 4:13 Xel bꞌi pa ri tinamit Nazaret y xeꞌjeqela pa ri tinamit Capernaúm. Waꞌ jun tinamit kꞌo chuchiꞌ ri mar pa ri luwar re Zabulón y re Neftalí.
MAT 4:14 Xuꞌan kꞌu waꞌ chaꞌ e kuꞌana janipa rutzꞌibꞌam kan ri qꞌalajisanel Isaías echiriꞌ xubꞌiꞌij:
MAT 4:15 Pa ri luwar re Zabulón y re Neftalí, ri kꞌo pa rubꞌeyal ri mar, chꞌaqa yaꞌ che ri nimayaꞌ Jordán, pa taq ri luwar re Galilea pa ejeqel wi ukꞌiyal winaq na e ta aj judiꞌabꞌ;
MAT 4:16 ri tikawex ejeqel pa qꞌequꞌm xkil ri Qꞌijsaq yey ri ejeqel pa ri qꞌequꞌm re kamik, xwon ri Qꞌijsaq pakiwiꞌ xchaꞌ.
MAT 4:17 Chwi kꞌu lo riꞌ xujeq ri Jesús katzijonik, jewaꞌ kubꞌiꞌij: «Tzelej tzij alaq chwach ri Dios, ma rutaqanik ri Dios petinaq chilaꞌ chikaj lik xa naqaj chi kꞌo wuloq» kachaꞌ.
MAT 4:18 Echiriꞌ kabꞌin ri Jesús chuchiꞌ ri mar re Galilea, xril pan kiwach kebꞌ achijabꞌ kichaqꞌ kibꞌ, jun Simón rubꞌiꞌ (Pedro kecha che) y ri jun chik Andrés rubꞌiꞌ. Rike e aj chapal kar, yey e riꞌ ketajin che ukꞌaqik ri ki atarraya pa ri mar.
MAT 4:19 Ekꞌu ri Jesús xubꞌiꞌij chike: —Chixpetoq, chixterej lo chwij, y riꞌin kanꞌan chiwe ix aj molol tikawex, jelaꞌ pachaꞌ iꞌanom lo chike ri kar —xcha chike.
MAT 4:20 Y na jampatana xkiya kan ri ki atarraya y xeterej bꞌi chirij ri Jesús.
MAT 4:21 Xbꞌin kꞌu pan jubꞌiqꞌ chik y xeril chi pan kebꞌ achijabꞌ kichaqꞌ kibꞌ, jun Jacobo rubꞌiꞌ y ri jun chik Juan rubꞌiꞌ. Wa kaꞌibꞌ e ukꞌajol ri Zebedeo. Rike e kꞌo chupa jun barco junam rukꞌ ri kiqaw y ketajin che ukꞌojoxik ri ki atarraya. Ekꞌu ri Jesús xebꞌusikꞌij bꞌi.
MAT 4:22 Y na jampatana rike xkiya kan ri kibarco y ri kiqaw, y xeterej kꞌu bꞌi chirij ri Jesús.
MAT 4:23 Ri Jesús xikꞌow che ronoje tinamit re Galilea. Kakꞌutun pa taq sinagogas chujujunal tinamit, kutzijoj ri Utzilaj Tzij re rutaqanik ri Dios y kukunaj ronoje uwach yabꞌil kꞌo chike ri winaq.
MAT 4:24 Konoje ri e kꞌo pa taq ri tinamit re Siria xketaꞌmaj taq ri kuꞌan ri Jesús. Xekikꞌam kꞌu lo chwach Rire konoje ri tikawex rukꞌ taq ukꞌiyal kꞌaxkꞌolil. Waꞌ e ri e kꞌo pa yabꞌil, ri kꞌax kikꞌulumam, ri e kꞌo pakiqꞌabꞌ itzel uxlabꞌixel, ri kebꞌumaj tew y ri e sik. Ekꞌu ri Jesús xebꞌukunaj konoje.
MAT 4:25 Lik e kꞌi kꞌu ri xeterej bꞌi chirij. Waꞌ e petinaq Jerusalem y che jujun chik luwar re Judea, kukꞌ ri e petinaq pa taq ri tinamit re Galilea, re Decápolis y che jujun chik tinamit e kꞌo chꞌaqa yaꞌ che ri nimayaꞌ Jordán.
MAT 5:1 Ri Jesús, echiriꞌ xeril rukꞌiyal winaq, xaqꞌan chwa ri juyubꞌ y xtzꞌuyiꞌik. Ekꞌu rutijoꞌn xkimol kibꞌ rukꞌ.
MAT 5:2 Jekꞌuwaꞌ ri xujeq ukꞌutik chikiwach:
MAT 5:3 «Nim kiqꞌij kalaxik ri kaketaꞌmaj lik chirajawaxik ri Ruxlabꞌixel ri Dios chike, ma rutaqanik ri Dios petinaq chilaꞌ chikaj kuꞌana ke.
MAT 5:4 Nim kiqꞌij kalaxik ri kebꞌoqꞌik, ma ri Dios e kabꞌochiꞌin kikꞌuꞌx.
MAT 5:5 Nim kiqꞌij kalaxik ri kiꞌanom chꞌutiꞌn che kibꞌ chwach ri Dios, ma kayaꞌ na chike, ri luwar ubꞌiꞌtisim chi ri Dios.
MAT 5:6 Nim kiqꞌij kalaxik ri lik kacha kikꞌuꞌx che utzuquxik ri jusukꞌ bꞌinik silabꞌik chwach ri Dios, ma ri Dios e kayaꞌw waꞌ chike.
MAT 5:7 Nim kiqꞌij kalaxik ri kakikꞌut ri kꞌaxnaꞌbꞌal kikꞌuꞌx chike jujun chik, ma ri Dios kukꞌut ri kꞌaxnaꞌbꞌal ukꞌuꞌx chike rike.
MAT 5:8 Nim kiqꞌij kalaxik ri uꞌanom chom ri kanimaꞌ chwach ri Dios, ma rike kakil na uwach ri Dios.
MAT 5:9 Nim kiqꞌij kalaxik ri kakitzukuj utzil chomal chikiwach, ma kabꞌiꞌx chike rike e ralkꞌoꞌal ri Dios.
MAT 5:10 Nim kiqꞌij kalaxik ri keternabꞌex rukꞌ kꞌaxkꞌobꞌik ruma ri kakiꞌan ri jusukꞌ chwach ri Dios, ma rutaqanik ri Dios petinaq chilaꞌ chikaj kuꞌana ke.
MAT 5:11 »Nim iqꞌij iwalaxik riꞌix echiriꞌ wuma riꞌin kixternabꞌex rukꞌ kꞌax, kakꞌaq bꞌi iqꞌij y kabꞌiꞌx ronoje ri na utz taj chiwij yey waꞌ xa raqꞌubꞌal.
MAT 5:12 Chixkiꞌkotoq y chixbꞌixonoq, ma lik nim ri rajil ukꞌaxel kikꞌul chilaꞌ chikaj. Makam kꞌu iwanimaꞌ che echiriꞌ kixyaꞌ pa kꞌax, ma jelaꞌ xꞌan chike ri qꞌalajisanelabꞌ ojertan, ri xenabꞌej lo chiwach riꞌix.
MAT 5:13 »Wara che ruwachulew riꞌix lik kixajawax chike ri tikawex jelaꞌ pachaꞌ ratzꞌam lik kajawaxik. Yey we xsach rutzayul ratzꞌam, ¿suꞌanik tanchi kaꞌan tza che? Riꞌ na jinta chi kꞌana uchak; keꞌkꞌaq kꞌu bꞌi y kaxajaxoꞌx kan uwiꞌ kuma ri tikawex.
MAT 5:14 »Riꞌix ix qꞌijsaq che ruwachulew. E juna tinamit kꞌo lo chwi juna juyubꞌ na utz taj kewaxik.
MAT 5:15 Yey na utz tane katzij juna aqꞌ y kachꞌuq uwiꞌ rukꞌ juna mulul re pajbꞌal, ma ri kaꞌan che e kayaꞌiꞌ lo chupa rukꞌolibꞌal chikaj chaꞌ jelaꞌ kutzij kiwiꞌ konoje ri e kꞌo pa ri ja.
MAT 5:16 Jekꞌulaꞌ riꞌix, ix qꞌijsaq chikiwach ri tikawex chaꞌ kakil ri chomilaj chak kiꞌano y jelaꞌ e kakiyak uqꞌij ri Qaqaw Dios kꞌo chilaꞌ chikaj.
MAT 5:17 »Michꞌobꞌ kꞌu riꞌix we riꞌin in kꞌuninaq re koꞌlnusacha uwach Rutzij Upixabꞌ ri Dios tzꞌibꞌital kan kuma ri Moisés y ri qꞌalajisanelabꞌ. Ma na in kꞌuninaq ta che usachik uwach waꞌ; e in kꞌuninaq re koꞌlnuqꞌalajisaj rusukꞌ.
MAT 5:18 Paqatzij wi kambꞌiꞌij chiwe: Xaloqꞌ kꞌa tikil ruqꞌijol ruwa kaj y ruwachulew, na kesax ta kꞌana juna letra yey na kesax tane tobꞌ xa juna ralko juchꞌ che Rutzij Upixabꞌ ri Dios, ma e kuꞌana na ronoje ri tzꞌibꞌitalik.
MAT 5:19 »Ruma kꞌu waꞌ, china ri kupalajij juna taqanik tobꞌ ne lik chꞌutiꞌn chwach rire yey e tanchi ukꞌutik kuꞌan chikiwach ri tikawex, riꞌ na jinta uwach chupa rutaqanik ri Dios petinaq chilaꞌ chikaj. China kꞌu ri kukoj Rutzij Upixabꞌ ri Dios yey jelaꞌ kukꞌut chikiwach jujun chik chaꞌ e kakiꞌano, riꞌ lik kꞌo uwach chupa rutaqanik ri Dios.
MAT 5:20 »Paqatzij wi kambꞌiꞌij chiwe: Xew kixok riꞌix chupa wa taqanik petinaq chilaꞌ chikaj, we ribꞌinik isilabꞌik e más jusukꞌ chwa ri kibꞌinik raj kꞌutunel re ri tzijpixabꞌ y ri fariseos. Noꞌj we na je ta laꞌ, riꞌ na taqal ta chiwe.
MAT 5:21 »Riꞌix itom ri xbꞌiꞌx lo chike ri tikawex ojertan chupa Rutzij Upixabꞌ ri Dios: “Matkamisanik”; yey china kꞌu ri kakamisanik, riꞌ kaqꞌat tzij puwiꞌ.
MAT 5:22 »Noꞌj riꞌin kambꞌiꞌij chiwe: China ri kape royowal chirij juna ratz-uchaqꞌ, riꞌ kaqꞌat tzij puwiꞌ. China kꞌu ri kukꞌaq bꞌi uqꞌij ri ratz-uchaqꞌ, riꞌ kakꞌam bꞌi chwach ri qꞌatbꞌal tzij re ri tinamit. Yey china ri kubꞌiꞌij che juna ratz-uchaqꞌ: “¡Na jinta kꞌana achak!”, riꞌ katewun puwiꞌ keꞌek pa aqꞌ chi xibꞌalbꞌaꞌ re tijbꞌal kꞌax.
MAT 5:23 »Ruma kꞌu laꞌ, echiriꞌ kakꞌam bꞌi raqasaꞌn chwa raltar yey chiriꞌ kakꞌun chakꞌuꞌx kꞌo juna awatz-achaqꞌ kꞌo royowal chawij,
MAT 5:24 chayaꞌa na kan raqasaꞌn chwa raltar y jat nabꞌe rukꞌ rawatz-achaqꞌ, jaꞌana utzil chomal rukꞌ. Ekꞌuchiriꞌ, utz katpe tanchi chwa raltar y kaya kꞌu riꞌ raqasaꞌn chwach ri Dios.
MAT 5:25 »We kꞌo junoq kukoj amak y katukꞌam bꞌi pa qꞌatbꞌal tzij, nabꞌe chaꞌana pan utzil chomal rukꞌ pa bꞌe chaꞌ jelaꞌ na katuꞌyaꞌa ta chi puqꞌabꞌ raj qꞌatal tzij. Ma we na xaꞌan ta riꞌ, raj qꞌatal tzij katuya bꞌi puqꞌabꞌ ri ausiliar chaꞌ katuꞌyaꞌa pa cárcel.
MAT 5:26 Paqatzij wi kambꞌiꞌij chawe: Na katel tana lo pa ri cárcel we na xatoj ta kan ronoje ramak.
MAT 5:27 »Riꞌix itom ri xbꞌiꞌx lo ojertan chupa Rutzij Upixabꞌ ri Dios: “Matmakun chirij ri kꞌulanikil.”
MAT 5:28 »Noꞌj riꞌin kambꞌiꞌij chiwe: We kꞌo junoq karil juna ixoq y kurayij uwach re kamakun rukꞌ, riꞌ ya xmakun rukꞌ pa ranimaꞌ.
MAT 5:29 »E uwariꞌche, we e rawach uwikiqꞌabꞌ ri katzaqisan awe pa ri mak, chawesaj y chakꞌaqa bꞌi; ma xa ne kuya riꞌ e kajam jun che rawach, chwa ri katkꞌaq bꞌi rukꞌ ronoje racuerpo chi xibꞌalbꞌaꞌ re tijbꞌal kꞌax.
MAT 5:30 We e raqꞌabꞌ uwikiqꞌabꞌ ri katzaqisan awe pa ri mak, chaqꞌataꞌ y chakꞌaqa bꞌi; ma xa ne kuya riꞌ e kajam jun che raqꞌabꞌ, chwa ri katkꞌaq bꞌi rukꞌ ronoje racuerpo chi xibꞌalbꞌaꞌ re tijbꞌal kꞌax.
MAT 5:31 »Jenewaꞌ xbꞌiꞌx lo ojertan: “We juna achi karaj kujach bꞌi ri rixoqil, xew chuyaꞌa bꞌi ruwujil re jachbꞌal ibꞌ che.”
MAT 5:32 »Noꞌj riꞌin kambꞌiꞌij: We rachi kuya bꞌi ruwujil re jachbꞌal ibꞌ che ri rixoqil tobꞌ rixoq na makuninaq ta chirij ri kꞌulanikil, riꞌ e kumin ri rixoqil pa ri mak. Ma we rixoq jachom bꞌi kukꞌam jun chik achi, kamakun kꞌu riꞌ chirij ri kꞌulanikil. Yey e rachi kakꞌuliꞌ rukꞌ rixoq jachom bꞌi, riꞌ jenelaꞌ kamakun chirij ri kꞌulanikil.
MAT 5:33 »Riꞌix itom ri xbꞌiꞌx lo chike ri tikawex ojertan: “Matsokon rukꞌ ri kajikibꞌaꞌ uwach; e lik chaꞌana janipa rajikibꞌam uwach chwach ri Dios” kachaꞌ.
MAT 5:34 »Noꞌj riꞌin kambꞌiꞌij chiwe: Lik makꞌo mijikibꞌaꞌ uwach pubꞌiꞌ junoq. Makꞌo ne mijikibꞌaꞌ uwach pa rubꞌiꞌ ri kaj, ma ri chilaꞌ chikaj e tzꞌulibꞌal pa kataqan wi ri Dios.
MAT 5:35 Makꞌo mijikibꞌaꞌ uwach pubꞌiꞌ ruwa ulew, ma ruwa ulew e utakꞌalibꞌal ri raqan ri Dios. Makꞌo ne mijikibꞌaꞌ uwach pubꞌiꞌ ri tinamit Jerusalem, ma waꞌ e utinamit ri Nimalaj Taqanel Dios.
MAT 5:36 Makꞌo mijikibꞌaꞌ uwach pubꞌiꞌ ruwiꞌ ijolom, ma riꞌix na kiriq tane uꞌanik saq o qꞌeq che riwiꞌ, tobꞌ tane xa jun chi wiꞌaj.
MAT 5:37 E chibꞌiꞌij ri jusukꞌ. We lik qatzij, xew chibꞌiꞌij: “Qatzij.” We na qatzij taj, xew chibꞌiꞌij: “Na qatzij taj.” Ma ri kakojiꞌ uwiꞌ ri kabꞌiꞌxik, waꞌ rukꞌ ritzel winaq petinaq wi.
MAT 5:38 »Riꞌix itom ri xbꞌiꞌx lo ojertan: We kꞌo junoq kupuchꞌ rawach, riꞌ taqal che kapuchꞌ ri riꞌre. We kꞌo junoq kutor bꞌi juna aweꞌ, riꞌ taqal che kator bꞌi ri riꞌre.
MAT 5:39 »Noꞌj riꞌin kambꞌiꞌij chiwe: Miꞌan ukꞌaxel che ri kuꞌan ri na utz taj chiwe. We kꞌo kꞌu junoq kupachꞌ qꞌabꞌ xeꞌ aweꞌ pawikiqꞌabꞌ, chayaꞌa luwar che kupachꞌ ri pa mox.
MAT 5:40 We kꞌo junoq katuchap pa chꞌaꞌoj pa qꞌatbꞌal tzij re kumaj rakoton, asu chayaꞌa ne kan raqꞌuꞌ re pisbꞌal awij che.
MAT 5:41 We kꞌo junoq katumin bꞌi chuxeꞌ eqaꞌn chaꞌ kaweqaj bꞌi jun kilómetro che, asu kebꞌ kilómetro chaweqaj bꞌi che.
MAT 5:42 Chatsipan che ri nibꞌaꞌ we kutzꞌonoj toꞌbꞌal chawe. We kꞌo junoq kachiqꞌiman chawe, maꞌan xuꞌyal che.
MAT 5:43 »Itom kꞌu ri xbꞌiꞌx lo ojertan: Kꞌax chanaꞌa rawatz-achaqꞌ yey tzel chawila ri tzel kilow awe.
MAT 5:44 »Noꞌj riꞌin kambꞌiꞌij chiwe: Kꞌax chebꞌinaꞌa ri e aj retzelal kꞌuꞌx chiwij. Chitzꞌonoj ri rutzil ukꞌuꞌx ri Dios pakiwi ri kakitzꞌonoj ri na utz taj piwi riꞌix. Chiꞌana ri utz chike ri tzel kebꞌilow iwe. Chiꞌana kꞌu orar pakiwi janipa ri kakikꞌaq bꞌi iqꞌij y ri kixkiternabꞌej rukꞌ kꞌaxkꞌobꞌik
MAT 5:45 chaꞌ jelaꞌ kaqꞌalajinik ix ralkꞌoꞌal ri Qaqaw Dios kꞌo chilaꞌ chikaj. Ma Rire kuꞌan che ri qꞌij kel lo pakiwi ri tikawex kakiꞌan ri utz y pakiwi ri kakiꞌan ri na utz taj, yey kutaq lo ri jabꞌ pakiwi ri jusukꞌ kibꞌinik kisilabꞌik y pakiwi ri na jusukꞌ ta kibꞌinik kisilabꞌik.
MAT 5:46 »Ma we xew kꞌax kebꞌinaꞌ ri kꞌax kenaꞌw iwe, ¿saꞌ kꞌu riꞌ ri rajil ukꞌaxel kikꞌulu? Ma jenelaꞌ kakiꞌan raj tzꞌonol puaq re tojonik.
MAT 5:47 We xew kiya rutzil kiwach ri iwatz-ichaqꞌ riꞌix, ¿saꞌ kꞌu riꞌ ri utz kixtajin che uꞌanik? Ma jenelaꞌ kakiꞌan ri na ketaꞌam ta uwach ri Dios.
MAT 5:48 Chiꞌana kꞌu jusukꞌ che ri ibꞌinik isilabꞌik jelaꞌ pachaꞌ ri usukꞌlikil ri Qaqaw Dios kꞌo chilaꞌ chikaj.
MAT 6:1 »Miꞌan ri kikꞌut ri jusukꞌ ibꞌinik isilabꞌik chiwachil xa re kixilitaj kuma ri tikawex; ma we jelaꞌ kiꞌano, na jinta rajil ukꞌaxel kikꞌul che Riqaw Dios kꞌo chilaꞌ chikaj.
MAT 6:2 E uwariꞌche, echiriꞌ kiya limoxna che juna nibꞌaꞌ, mitzijoj chike ri tikawex, pachaꞌ ri kakiꞌan ri xa kebꞌ kipalaj pa taq sinagogas y pa taq bꞌe. Ma rike jelaꞌ kakiꞌano xew chaꞌ kayak kiqꞌij. Noꞌj riꞌin paqatzij wi kambꞌiꞌij chiwe: Rukꞌ kꞌu wa yakbꞌal kiqꞌij, ya e laꞌ xkikꞌul ri rajil ukꞌaxel ri xkiꞌano.
MAT 6:3 E uwariꞌche, echiriꞌ kiya limoxna chike ri nibꞌaꞌibꞌ, miꞌan chiwachil.
MAT 6:4 Jekꞌulaꞌ na jinta kꞌo kanaꞌbꞌen re, xew Riqaw Dios ketaꞌman waꞌ. Ekꞌu Rire kuya na ri rajil ukꞌaxel chiwe.
MAT 6:5 »Echiriꞌ kixchꞌaꞌt rukꞌ ri Dios, miꞌan iweꞌix pachaꞌ ri kakiꞌan ri xa kebꞌ kipalaj. Ma rike lik kukꞌul kikꞌuꞌx ri kakibꞌololej oración e laꞌ e takꞌal pa taq sinagogas y pa taq jachbꞌal bꞌe chaꞌ jelaꞌ kebꞌilitaj kuma ri tikawex. Noꞌj riꞌin paqatzij wi kambꞌiꞌij chiwe: Rukꞌ kꞌu wa yakbꞌal kiqꞌij, ya e laꞌ xkikꞌul ri rajil ukꞌaxel ri xkiꞌano.
MAT 6:6 Noꞌj riꞌix echiriꞌ kixchꞌaꞌt rukꞌ ri Dios, chixok pa ja, chitzꞌapij lo ri puerta y chixchꞌaꞌt rukꞌ Riqaw Dios xa itukel; jekꞌulaꞌ Riqaw Dios karil ri kiꞌan xa itukel y kuya na kꞌu ri rajil ukꞌaxel chiwe chiwachil.
MAT 6:7 »Ekꞌuchiriꞌ kixchꞌaꞌt rukꞌ ri Dios, miwererej chꞌaꞌtem ukꞌiyal laj pachaꞌ kakiꞌan ri na ketaꞌam ta uwach ri Dios; ma e kakichꞌobꞌ rike ruma ri kakiwererej chꞌaꞌtem, ketataj ruma ri Dios.
MAT 6:8 Miꞌan kꞌu iweꞌix pachaꞌ ri kakiꞌan rike, ma Riqaw Dios lik retaꞌam chik saꞌ ri kajawax chiwe echiriꞌ kꞌamajaꞌ ne kitzꞌonoj che.
MAT 6:9 »Ekꞌu riꞌix echiriꞌ kixchꞌaꞌt rukꞌ ri Dios utz jewaꞌ taq ri kibꞌiꞌij: Qaqaw Dios, Lal kꞌo la chilaꞌ chikaj, ¡lik chetaꞌmaxoq nim uqꞌij ri bꞌiꞌ la!
MAT 6:10 Peta la, taqana la paqawiꞌ; chuꞌana kꞌu ri rajawal kꞌuꞌx la wara che ruwachulew, jelaꞌ pachaꞌ ri kaꞌan chilaꞌ chikaj.
MAT 6:11 Yaꞌa ko la waqꞌij ri qawa, ri kajawax chiqe ronoje qꞌij.
MAT 6:12 Kuyu ko la qamak, jelaꞌ pachaꞌ riꞌoj kaqakuy kimak ri emakuninaq chiqij.
MAT 6:13 Y maya ko la luwar chiqe kojtzaq pa mak; e lik chojkolobꞌej la chwach ritzel winaq. Ma paqꞌabꞌ Rilal kꞌo wi ronoje taqanik y chuqꞌabꞌ; y xew che Rilal taqal wi ri yakbꞌal qꞌij na jinta utaqexik. Amén.
MAT 6:14 »Ma we riꞌix kikuy kimak taq ri tikawex, jekꞌulaꞌ riꞌ kuꞌan ri Qaqaw Dios kꞌo chilaꞌ chikaj, kukuy imak riꞌix.
MAT 6:15 Noꞌj we riꞌix na kikuy ta kimak taq ri tikawex, jekꞌulaꞌ riꞌ kuꞌan ri Qaqaw Dios, na kukuy ta imak riꞌix.
MAT 6:16 »Echiriꞌ riꞌix kiꞌan ayuno, mikꞌut bꞌis che ripalaj pachaꞌ ri kakiꞌan ri xa kebꞌ kipalaj. Ma rike kakiꞌan waꞌ xa pachaꞌ kebꞌilitaj kuma ri winaq. Paqatzij wi kambꞌiꞌij chiwe: Rukꞌ kꞌu wa yakbꞌal kiqꞌij, ya e laꞌ xkikꞌul ri rajil ukꞌaxel ri xkiꞌano.
MAT 6:17 Noꞌj riꞌix echiriꞌ kiꞌan ayuno, chichꞌaja ripalaj y chixiya riwiꞌ chi utz.
MAT 6:18 Jekꞌulaꞌ ri tikawex na kakil taj we riꞌix ix kꞌo pa ayuno. Xew kꞌu Riqaw Dios, ri na kilitaj ta uwach, karil ri na kakil ta ri tikawex. Ekꞌu riꞌ Rire kayaꞌw na ri rajil ukꞌaxel chiwe.
MAT 6:19 »Mixchakun xa re kimol ukꞌuꞌxibꞌal bꞌeyomalil re ruwachulew, ma ri wara e taq ri ikꞌolom xa kapokꞌirik y kuꞌan mojos, yey kebꞌok ne eleqꞌomabꞌ che releqꞌaxik bꞌi.
MAT 6:20 We kiwaj kiriq ri saqil bꞌeyomalil, e chiꞌana wara che ruwachulew janipa ri lik kꞌo uchak chwach ri Dios chaꞌ jelaꞌ kꞌo kutiqoj chiwe riꞌix chilaꞌ chikaj. Ma ri ikꞌolom chilaꞌ na kapokꞌir taj y na kuꞌan ta mojos, yey na jinta ne eleqꞌomabꞌ kebꞌok che releqꞌaxik bꞌi.
MAT 6:21 Ma pa kꞌo wi ribꞌeyomalil riꞌix, puwi waꞌ keꞌek wi ikꞌuꞌx.
MAT 6:22 »Ri qawach e pachaꞌ candil re ri qacuerpo, ma ruma waꞌ kojtzuꞌnik chaꞌ utz kojbꞌinik. Jekꞌulaꞌ, we ri qawach utz uꞌanom, ronoje ri qacuerpo nojinaq che qꞌijsaq y kaqil kꞌu ronoje chi utz.
MAT 6:23 Noꞌj we ri qawach na utz taj, ronoje ri qacuerpo kꞌo pa qꞌequꞌm. Jekꞌulaꞌ, we ri qꞌijsaq kꞌo qukꞌ uꞌanom junam rukꞌ ri qꞌequꞌm, ¡koꞌl chi lo qꞌequꞌmalil riꞌ oj kꞌo wi!
MAT 6:24 »Lik kꞌayew we juna aj chak e kaꞌibꞌ ri rajaw. Ma laj tzel karil ri jun yey kꞌax kunaꞌ ri jun chik; o laj kuyak uqꞌij ri jun yey kukꞌaq bꞌi uqꞌij ri jun chik. Ruma kꞌu laꞌ, na utz taj we junoq kuya ribꞌ che unimaxik ri Dios yey kuya ribꞌ che utzukuxik ri bꞌeyomalil re ruwachulew.
MAT 6:25 »E uwariꞌche kambꞌiꞌij chiwe riꞌix: Mubꞌisoj ikꞌuꞌx rikꞌaslem; mubꞌisoj ne ikꞌuꞌx saꞌ riwa y rimiqꞌinaꞌ kitijo o saꞌ riqꞌuꞌ kikojo. ¿Na e ta nebꞌa más kꞌo uwach rikꞌaslem riꞌix chwach ri kitijo? ¿Yey na e ta nebꞌa más kꞌo uwach ri cuerpo chwach riqꞌuꞌ kikojo?
MAT 6:26 »Chebꞌiwilape ri tzꞌikin kexikꞌikꞌ che ruwa kaj. Rike na ketikoꞌnaj taj, na kakiꞌan tane kimolonik y na jinta ne pa kakikꞌol wi ri kimolonik. Na rukꞌ ta kꞌu riꞌ, Riqaw Dios kꞌo chilaꞌ chikaj kebꞌutzuqu. ¡Makꞌuwariꞌ riꞌix, ri Dios kixuchajij, ma e más kꞌo iwach riꞌix chikiwa ri tzꞌikin!
MAT 6:27 »¿Kꞌo nebꞌa junoq chiwe riꞌix kuriq kunajtirisaj jun chik qꞌij che rukꞌaslem wara che ruwachulew? Na jinta junoq, tobꞌ ne lik kutij uqꞌij che.
MAT 6:28 ¿Suꞌbꞌe kꞌu riꞌ lik kubꞌisoj ikꞌuꞌx riqꞌuꞌ kikojo? Chiwilapeꞌ suꞌanik kekꞌiy ri kotzꞌiꞌj pa taq juyubꞌ; waꞌ na kechakun taj y na kekeman ta nenareꞌ chaꞌ kakiꞌan ri kiqꞌuꞌ.
MAT 6:29 Yey riꞌin kambꞌiꞌij chiwe: Ri rey Salomón, tobꞌ lik kꞌo uchomal ruqꞌuꞌ xukojo, waꞌ na xumaj ta kꞌana ruchomalil taq ri kotzꞌiꞌj.
MAT 6:30 Jekꞌulaꞌ we ri Dios uꞌanom chom che ri aqꞌes kꞌo waqꞌij pa juyubꞌ yey chweꞌq xa kaporox pa aqꞌ, ¿na kuya ta kami riꞌ ri Dios riqꞌuꞌ kajawax chiwe? ¡Riꞌix lik xa jubꞌiqꞌ ri kubꞌulibꞌal ikꞌuꞌx rukꞌ ri Dios!
MAT 6:31 »Kambꞌiꞌij kꞌu chiwe: Mubꞌisoj ikꞌuꞌx y mibꞌiꞌij: “¿Saꞌ ri qawa, saꞌ ri qamiqꞌinaꞌ kaqatijo? ¿Saꞌ ri qaqꞌuꞌ kaqakojo?”
MAT 6:32 Ma jenelaꞌ kakiꞌan ri winaq na ketaꞌam ta uwach ri Dios, e kubꞌisoj kikꞌuꞌx taq waꞌ. Noꞌj riꞌix kꞌo jun Iqaw chilaꞌ chikaj lik retaꞌam kajawax ronoje taq waꞌ chiwe.
MAT 6:33 »Ri lik chirajawaxik chiwe nabꞌe e lik chixok il che rutaqanik ri Dios y che ri jusukꞌ bꞌinik silabꞌik karaj Rire chiwe. Yey ronoje taq kꞌu ri kajawaxik, xa uwiꞌ chik kayaꞌtaj chiwe.
MAT 6:34 Mubꞌisoj pan ikꞌuꞌx ri kiwil chweꞌq, ma chujujunal qꞌij ukꞌamom chi lo rukꞌayewal.
MAT 7:1 »Miꞌan ri xa piwe riꞌix kixuꞌan aj qꞌatal tzij pakiwi jujun chik, chaꞌ jelaꞌ na kaqꞌat ta tzij piwi riꞌix.
MAT 7:2 Ma e ruꞌanik kiqꞌat tzij riꞌix pakiwi jujun chik, jelaꞌ kuꞌan ri Dios piwi riꞌix; ma rukꞌ ri pajbꞌal kixpajan wi, rukꞌ laꞌ kixpaj wi riꞌix.
MAT 7:3 »¿Suꞌchak e lik katzutzaꞌ rukꞌaj cheꞌ kꞌo chupa ruwach rawatz-achaqꞌ yey e na katok ta kꞌu il che resaxik ri cheꞌ qꞌebꞌel chupa rawach riꞌat?
MAT 7:4 Y we qꞌebꞌel la jun cheꞌ chupa rawach riꞌat, ¿utz nawi kabꞌiꞌij che rawatz-achaqꞌ: “Chayaꞌa luwar chwe kanwesaj la jun ukꞌaj cheꞌ kꞌo chupa rawach”? ¡Na utz taj!
MAT 7:5 ¡Xa kebꞌ apalaj! Nabꞌe na chawesaj lo la cheꞌ qꞌebꞌel chupa rawach riꞌat, y jelaꞌ kat-tzuꞌn chi utz chaꞌ katoꞌ rawatz-achaqꞌ che resaxik lo rukꞌaj cheꞌ kꞌo chupa ruwach rire.
MAT 7:6 »Miya chikiwa ri tzꞌiꞌ janipa ri lik chom chwach ri Dios, ma kꞌaxtaj kepe chiwij y kakiraqachꞌij ipa; jekꞌulaꞌ mikꞌaq chikiwach ri aq ri perlas kꞌo iwukꞌ, ma kꞌaxtaj xa kakixiqꞌixaꞌ uwiꞌ.
MAT 7:7 »Janipa ri kajawax chiwe, chitzꞌonoj che ri Dios y kayaꞌiꞌ chiwe; chitzukuj rukꞌ Rire janipa ri kajawax chiwe y kiriqo; chichꞌaꞌbꞌej Rire y lik kixukajmaj loq.
MAT 7:8 Ma china ri kutzꞌonoj ri kajawax che, kukꞌul na; china ri kꞌo kutzukuj, kuriq na; y china ri kachꞌaw pan che ruchiꞌ ja, kajaqiꞌ na lo che.
MAT 7:9 »¿Kꞌo nebꞌa juna achi chixoꞌl, we rukꞌajol kutzꞌonoj pam, kuya juna abꞌaj che;
MAT 7:10 o we kutzꞌonoj kar, kumatz ri kuya che? ¡Na jinta junoq!
MAT 7:11 Ekꞌu riꞌ riꞌix tobꞌ xa ix tikawex na lik ta utz ikꞌuꞌx, na rukꞌ ta kꞌu riꞌ, kiriq uyaꞌik chomilaj taq sipanik chike riwalkꞌoꞌal. ¡Makꞌuwariꞌ ri Qaqaw Dios kꞌo chilaꞌ chikaj kuya chomilaj taq sipanik chike ri ketzꞌonow re che!
MAT 7:12 »Ekꞌu riꞌix chiꞌana chike ri tikawex jelaꞌ pachaꞌ ri kiwaj kakiꞌan rike chiwe. Ma e utaqanik waꞌ Rutzij Upixabꞌ ri Dios tzꞌibꞌital kan kuma ri Moisés y ri qꞌalajisanelabꞌ.
MAT 7:13 »Chixok bꞌi che ri okibꞌal chꞌutiꞌn uwach. Ma ri okibꞌal y ri bꞌe keꞌek chi xibꞌalbꞌaꞌ lik nim uwach, yey lik e kꞌi ri kebꞌok bꞌi chiriꞌ.
MAT 7:14 Noꞌj ri okibꞌal y ri bꞌe keꞌek chi kꞌaslemal na jinta utaqexik, lik chꞌutiꞌn uwach, yey na e ta kꞌi ri kebꞌok bꞌi chiriꞌ.
MAT 7:15 »Lik chichajij iwibꞌ chikiwach ri kakibꞌiꞌij e qꞌalajisanelabꞌ re ri Dios yey xa e sokosoꞌnel. Ma waꞌ kekꞌun iwukꞌ riꞌix lik chakojoꞌ utz kikꞌuꞌx, noꞌj chupa ri kanimaꞌ xa pachaꞌ e utiw lik e bꞌiqꞌonel.
MAT 7:16 Ekꞌu riꞌix kiwetaꞌmaj saꞌ ri kꞌo pa kanimaꞌ ri tikawex ruma ri kakiꞌano, we utz o na utz taj. »E pachaꞌ taq ri cheꞌ: ri kꞌiix, na uva ta rujiqꞌobꞌalil kuyaꞌo; yey ri xulukej, na higos ta rujiqꞌobꞌalil kuyaꞌo.
MAT 7:17 Jekꞌulaꞌ juna chomilaj cheꞌ, lik chom rujiqꞌobꞌalil kuyaꞌo; noꞌj ri cheꞌ na chom taj, na jinta uchak rujiqꞌobꞌalil kuyaꞌo.
MAT 7:18 Ri chomilaj cheꞌ na ubꞌe taj we na chom ta rujiqꞌobꞌalil kuyaꞌo; jekꞌulaꞌ ri cheꞌ na chom taj na kuya ta ujiqꞌobꞌalil chom.
MAT 7:19 Yey ronoje cheꞌ we na chom ta rujiqꞌobꞌalil kuyaꞌo, kachet bꞌi y kaporox pa aqꞌ.
MAT 7:20 Riꞌix kiwetaꞌmaj kꞌu uwach juna cheꞌ ruma rujiqꞌobꞌalil kuyaꞌo; jekꞌulaꞌ kaqꞌalajinik saꞌ taq ri kꞌo pa kanimaꞌ ri tikawex ruma ri kibꞌinik kisilabꞌik.
MAT 7:21 »Na konoje ta ri kakibꞌiꞌij chwe “Qajawal, Qajawal” kebꞌok chilaꞌ chikaj pa rutaqanik ri Dios, ma xew kebꞌok ri kakiꞌan ri rajawal ukꞌuꞌx ri Nuqaw kꞌo chilaꞌ chikaj.
MAT 7:22 Kopon kꞌu ruqꞌijol echiriꞌ ri Dios kuqꞌat tzij pakiwi ri tikawex, yey chupa laꞌ la qꞌij lik e kꞌi ri kakibꞌiꞌij chwe: “Wajawal, Wajawal, riꞌoj xqaꞌan qꞌalajisanik chupa ri bꞌiꞌ la chike ri tikawex. Yey chupa ri bꞌiꞌ la xeqesaj bꞌi ri itzel uxlabꞌixel y pa ri bꞌiꞌ la xqaꞌan ukꞌiyal milagros” kechaꞌ.
MAT 7:23 Ekꞌuchiriꞌ, riꞌin jewaꞌ kambꞌiꞌij chike: “Na xinwetaꞌmaj ta kꞌana iwach, chixela wukꞌ; ma riꞌix xew ix ꞌanal re ri lik itzel uwach.”
MAT 7:24 »China kꞌu ri kataw re ri nutzij yey kuꞌan janipa ri kambꞌiꞌij, kanjunimaj rukꞌ jun achi lik kꞌo unaꞌoj ma xutzꞌaq lo ri rocho paꞌbꞌaj.
MAT 7:25 Xpe kꞌu lo ri jabꞌ, lik xnimar taq ri nimayaꞌ y xpe lo unimal kaqjiqꞌ y xumachꞌ ribꞌ che ri ja; na rukꞌ ta kꞌu riꞌ, ri ja na xtzaq ta ubꞌi, ma paꞌbꞌaj tzꞌaqom lo wi.
MAT 7:26 Noꞌj kꞌu ri kuta ri nutzij yey na kuꞌan ta janipa ri kambꞌiꞌij, kanjunimaj rukꞌ jun achi na jinta unaꞌoj, ma xuꞌan ri rocho pa sanyebꞌ.
MAT 7:27 Xpe kꞌu lo ri jabꞌ, xenimar taq ri nimayaꞌ, xpe lo unimal kaqjiqꞌ y xumachꞌ ribꞌ che ri ja. Ekꞌu riꞌ ri ja xwuluwubꞌ bꞌi y xsach uwach» xchaꞌ.
MAT 7:28 Echiriꞌ xukꞌis ubꞌiꞌxik waꞌ ri Jesús, ri winaq lik kaminaq kanimaꞌ che rukꞌutunik,
MAT 7:29 ma ruma rukꞌutunik kaqꞌalajinik lik kꞌo uwach, na xa ta pachaꞌ ri kakiꞌan raj kꞌutunel re ri tzijpixabꞌ.
MAT 8:1 Ekꞌuchiriꞌ xqaj lo ri Jesús chwa ri juyubꞌ, lik ukꞌiyal winaq xeterej lo chirij.
MAT 8:2 Tekꞌuchiriꞌ, xopon jun achi kꞌo ri yabꞌil lepra che, xuxuk ribꞌ chwach ri Jesús y xubꞌiꞌij che: —Wajawal, we kaꞌaj ko la, josqꞌij la ri nucuerpo che wa yabꞌil —xchaꞌ.
MAT 8:3 Ekꞌu ri Jesús xuchap pana rukꞌ ruqꞌabꞌ y jekꞌuwaꞌ xubꞌiꞌij che: —Kuaj, chuꞌana bꞌa chom riꞌ racuerpo —xchaꞌ. Xew kꞌu xukꞌis ubꞌiꞌxikil waꞌ, na jampatana xsach ri yabꞌil kꞌo che rachi.
MAT 8:4 Ekꞌu ri Jesús xubꞌiꞌij che: —Chatapeꞌ, lik matzijoj che junoq riꞌin xatinkunaj. Jat chwach raj chakunel pa Rocho Dios chaꞌ rire karilo na jinta chi lepra chawe, y chayaꞌa chwach ri Dios ri qasaꞌn xtaqan kan ri Moisés che chaꞌ kaqꞌalajin chikiwach ri tikawex at kunutajinaq chik —xchaꞌ.
MAT 8:5 Echiriꞌ xopon ri Jesús pa ri tinamit Capernaúm, xopon jun capitán ke ri soldados aj Roma rukꞌ y xujeq lik kelaj che,
MAT 8:6 jewaꞌ kubꞌiꞌij: —Wajawal, ri waj chak lik yewaꞌ kꞌo chwa uwarabꞌal chiwocho. Rire xuꞌan sik y lik kꞌo pa kꞌax —kachaꞌ.
MAT 8:7 Ri Jesús xubꞌiꞌij che: —Riꞌin kinꞌek y kankunaj —xchaꞌ.
MAT 8:8 Ekꞌu ri capitán xubꞌiꞌij che: —Wajawal, riꞌin lik na taqal ta chwe kok la chiwocho. Xew bꞌiꞌij la: “Chatkunutajoq”, y rukꞌ ri chꞌaꞌtem la, kakunutaj ri waj chak.
MAT 8:9 Ma e pachaꞌ riꞌin, in kꞌo puqꞌabꞌ jun taqanel y rire ebꞌuyaꞌom ukꞌiyal soldados panuqꞌabꞌ. We kambꞌiꞌij kꞌu che junoq “Jat”, keꞌek; o kambꞌiꞌij che junoq chik “Chatpetoq”, kapetik. Yey we kambꞌiꞌij che juna waj chak “Chaꞌana waꞌ”, kuꞌano —xchaꞌ.
MAT 8:10 Ri Jesús echiriꞌ xuta waꞌ, lik xkam ranimaꞌ che y jewaꞌ xubꞌiꞌij chike ri eteran chirij: —Paqatzij wi kambꞌiꞌij chiwe: Na nuriqom tane chikixoꞌl raj Israel junoq lik kꞌo unimal kubꞌulibꞌal ukꞌuꞌx pachaꞌ wa jun achi.
MAT 8:11 Kambꞌiꞌij kꞌu chiwe: Lik e kꞌi ri kepe pa relebꞌal lo ri qꞌij y e kꞌi ri kepe putzaqibꞌal ri qꞌij y kebꞌok chwa ri mexa pa waꞌim rukꞌ ri Abraham, rukꞌ ri Isaac y rukꞌ ri Jacob chupa rutaqanik ri Dios kꞌo chilaꞌ chikaj.
MAT 8:12 Noꞌj taq kꞌu ri kakichꞌobꞌo taqal chike kakikꞌul rutaqanik ri Dios ruma e ratz-uchaqꞌ kan ri Abraham, riꞌ kebꞌesax bꞌi y kekꞌaq bꞌi pa ri qꞌequꞌm; chiriꞌ kꞌu riꞌ kebꞌoqꞌ wi y kaqichꞌichꞌ ruwi keꞌ —xchaꞌ.
MAT 8:13 Ekꞌuchiriꞌ, xubꞌiꞌij ri Jesús che ri capitán: —Oj chi ocho la, ma jelaꞌ kuꞌanaꞌ pachaꞌ ri xkubꞌiꞌ kꞌuꞌx la che —xchaꞌ. Chupa kꞌu laꞌ la joqꞌotaj xkunutaj ri raj chak.
MAT 8:14 Ri Jesús xopon chirocho ri Pedro. Chiriꞌ kꞌu riꞌ xril ruchu-ujiꞌ ri Pedro kꞌo chwa uwarabꞌal y lik kꞌo aqꞌ chirij.
MAT 8:15 Ekꞌu ri Jesús xuchap ruqꞌabꞌ y jekꞌulaꞌ xikꞌow ri aqꞌ chirij. Ekꞌuchiriꞌ, rixoq xyaktajik y xujeq kebꞌunimaj.
MAT 8:16 Echiriꞌ xok raqꞌabꞌ, xekikꞌam lo chwach ri Jesús ukꞌiyal tikawex e kꞌo pakiqꞌabꞌ itzel uxlabꞌixel. Ekꞌu ri Jesús rukꞌ ruchꞌaꞌtem xebꞌeresaj bꞌi taq ri itzel uxlabꞌixel chike y xebꞌukunaj konoje ri yewaꞌibꞌ.
MAT 8:17 Xuꞌan waꞌ chaꞌ e kuꞌana ri utzijom kan ri qꞌalajisanel Isaías echiriꞌ xubꞌiꞌij: Rire xukꞌam bꞌi ri qayabꞌil, y xukꞌam bꞌi ri qakꞌaxkꞌolil xchaꞌ.
MAT 8:18 Ri Jesús echiriꞌ xrilo ukꞌiyal winaq kisutum rij, xebꞌutaq rutijoꞌn chaꞌ keqꞌax chꞌaqa yaꞌ.
MAT 8:19 Ekꞌu laꞌ la joqꞌotaj xopon rukꞌ ri Jesús jun achi aj kꞌutunel re ri tzijpixabꞌ y xubꞌiꞌij che: —Lal tijonel, riꞌin kinterej bꞌi chiꞌij la tobꞌ pachawi keꞌek wi la —xchaꞌ.
MAT 8:20 Ri Jesús xukꞌul uwach: —Ri yak kꞌo kijul y ri tzꞌikin kexikꞌikꞌ che ruwa kaj kꞌo kisok; noꞌj Ralaxel Chikixoꞌl Tikawex na jinta ne uluwar tobꞌ xa pa kuxlan wi —xchaꞌ.
MAT 8:21 Kꞌo chi jun chike rutijoꞌn xubꞌiꞌij che ri Jesús: —Wajawal, yaꞌa la luwar chwe kanwoyꞌej kakam na ri nuqaw y kanmuq kanoq; tekꞌuchiriꞌ, kinterej chiꞌij la —xchaꞌ.
MAT 8:22 Ekꞌu ri Jesús xukꞌul uwach: —Riꞌat chat-terej lo chwij; chayaꞌa kan chike ri ekaminaq chwach ri Dios chaꞌ e rike kemuquw ri katz-kichaqꞌ kekamik —xchaꞌ.
MAT 8:23 Ekꞌuchiriꞌ, xok ri Jesús pa jun barco y rutijoꞌn xebꞌek rukꞌ.
MAT 8:24 Tekꞌuchiriꞌ, xpe jun nimalaj kaqjiqꞌ chwi ri mar y xujeqo kanoj ri barco che yaꞌ. Yey ri Jesús kawarik.
MAT 8:25 Ekꞌu rutijoꞌn xeꞌkikꞌosoj y xkibꞌiꞌij che: —¡Qajawal! ¡Chojkolobꞌej la, ma kojkamik! —xechaꞌ.
MAT 8:26 Ri Jesús xukꞌul uwach: —¿Suꞌchak lik kixiꞌij iwibꞌ? Riꞌix lik xa jubꞌiqꞌ ri kubꞌulibꞌal ikꞌuꞌx wukꞌ —xchaꞌ. Ekꞌuchiriꞌ xyaktajik, xuqꞌatej ri kaqjiqꞌ y ri yaꞌ. Xtaniꞌ kꞌu riꞌ ri kaqjiqꞌ y ri yaꞌ xyeniꞌik.
MAT 8:27 Rutijoꞌn lik xkam kanimaꞌ che y xkibꞌiꞌij: «¿Saꞌ ruwach waꞌ waꞌchi? ¡Ma tobꞌ ne e ri kaqjiqꞌ y ri yaꞌ kakikoj utzij!» xechaꞌ.
MAT 8:28 Echiriꞌ xopon ri Jesús chꞌaqa mar pa ri luwar re Gadara, xoꞌlkꞌul kuma kebꞌ achijabꞌ ebꞌelinaq lo chuxoꞌl taq muqubꞌal ke animaꞌ. Kikabꞌichal e kꞌo pakiqꞌabꞌ itzel uxlabꞌixel y lik itzel kiwachlibꞌal, ma kuma rike na jinta junoq kikꞌow chiriꞌ.
MAT 8:29 E taq kꞌu riꞌ waꞌ xkijeqo lik ko kesikꞌinik, jewaꞌ xkibꞌiꞌij: —¿Suꞌchak koꞌlmina ibꞌ la qukꞌ, Jesús, Lal Ukꞌajol ri Dios? ¿Petinaq kami la re kojya la pa kꞌax echiriꞌ kꞌamajaꞌ ne kopon ri qaqꞌij? —xechaꞌ.
MAT 8:30 E kꞌo kꞌu ukꞌiyal aq kewaꞌ lo chinimanaj.
MAT 8:31 Ekꞌu ri itzel uxlabꞌixel lik xebꞌelaj che ri Jesús: —We kojesaj bꞌi la, yaꞌa la luwar chiqe kojok bꞌi kukꞌ ri aq —xechaꞌ.
MAT 8:32 Ekꞌuchiriꞌ, xubꞌiꞌij ri Jesús chike: —Jix riꞌ —xchaꞌ. Taq ri itzel uxlabꞌixel xebꞌel bꞌi chike rachijabꞌ y xebꞌok kukꞌ ri aq. Tekꞌuchiriꞌ, konoje ri aq xeꞌkikꞌaqa bꞌi kibꞌ chwi jun siwan, xebꞌeꞌtzaqa kꞌa chupa ri mar y chiriꞌ xejiqꞌ wi.
MAT 8:33 Ekꞌu ri e chajinel ke ri aq xebꞌanimajik. Y echiriꞌ xebꞌopon pa ri tinamit, xkijeq utzijoxik ronoje ri xkikꞌulumaj ri aq y ri xuꞌan ri Jesús chike ri kebꞌ achijabꞌ echiriꞌ xebꞌeresaj pakiqꞌabꞌ ri itzel uxlabꞌixel.
MAT 8:34 Konoje kꞌu ri winaq re ri tinamit xepe pa kꞌo wi ri Jesús. Echiriꞌ xkil uwach, lik xkitzꞌonoj che chaꞌ kel bꞌi chiriꞌ pa taq ri kiluwar.
MAT 9:1 Ekꞌuchiriꞌ, xok ri Jesús pa jun barco, xqꞌax chꞌaqa yaꞌ y xopon pa ri tinamit pa jeqel wi.
MAT 9:2 E kꞌo kꞌu jujun achijabꞌ xkikꞌam lo jun achi sik chwach ri Jesús, kitelem lo chwa jun chꞌat. Echiriꞌ ri Jesús xril ri kubꞌulibꞌal kikꞌuꞌx rukꞌ, xubꞌiꞌij che rachi sik: —Wal, chanimarisaj akꞌuꞌx, ma ronoje ramak kuytajinaq chik —xchaꞌ.
MAT 9:3 E kꞌo kꞌu jujun chike raj kꞌutunel re ri tzijpixabꞌ jewaꞌ xkichꞌobꞌo: «Wa jun achi lik kamakun chirij ri Dios, ma na yaꞌtal ta puqꞌabꞌ junoq kubꞌiꞌij waꞌ.»
MAT 9:4 Noꞌj ri Jesús xunaꞌbꞌej saꞌ ri kakichꞌobꞌo; ruma kꞌu riꞌ, xubꞌiꞌij chike: —¿Suꞌchak kachꞌobꞌ alaq ri na utz taj?
MAT 9:5 ¿Saꞌ kꞌu ri na kꞌayew taj kambꞌiꞌij: “Ronoje ramak kuytajinaq chik” o “Chatyaktajoq y chatbꞌinoq”?
MAT 9:6 E kuaj kꞌut ketaꞌmaj alaq waꞌ: Ralaxel Chikixoꞌl Tikawex yaꞌtal puqꞌabꞌ kukuy taq ri mak ke ri winaq che ruwachulew —xchaꞌ. Xubꞌiꞌij kꞌu riꞌ che ri sik: —Chatyaktajoq, chakꞌama bꞌi rachꞌat y jat chaꞌwocho —xchaꞌ.
MAT 9:7 Xyaktaj kꞌu ri sik y xeꞌek chirocho.
MAT 9:8 Echiriꞌ xkil waꞌ ri winaq, lik xkam kanimaꞌ che y xkiyak uqꞌij ri Dios ruma uyaꞌom chike ri tikawex kakiꞌan taq waꞌ.
MAT 9:9 Xel kꞌu bꞌi ri Jesús chiriꞌ y xril jun achi aj tzꞌonol puaq re tojonik, Mateo rubꞌiꞌ, tzꞌul pa ri luwar pa kaꞌan wi ri tojonik che ri gobierno, y xubꞌiꞌij che: —Chat-terej lo chwij —xchaꞌ. Y ri Mateo xyaktajik y xterej bꞌi chirij.
MAT 9:10 Ekꞌu ri Jesús xumaj bꞌi chirocho waꞌchi y xebꞌok chwa ri mexa kukꞌ rutijoꞌn. Xebꞌopon kꞌu ukꞌiyal aj tzꞌonol puaq re tojonik y ukꞌiyal aj makibꞌ y xetzꞌuyiꞌ junam kukꞌ.
MAT 9:11 Echiriꞌ xkil waꞌ ri fariseos, xkibꞌiꞌij chike rutijoꞌn ri Jesús: —¿Suꞌchak ri tijonel iwe riꞌix kawaꞌ junam kukꞌ raj tzꞌonol puaq re tojonik y kukꞌ raj makibꞌ? —xechaꞌ.
MAT 9:12 Echiriꞌ xuta waꞌ ri Jesús, xubꞌiꞌij chike: —E janipa ri utz kiwach, na kajawax ta aj kunanel chike; ma waꞌ xew chike ri e yewaꞌibꞌ kajawax wi.
MAT 9:13 Oj kꞌu alaq y maja na alaq saꞌ keꞌelawi ri kubꞌiꞌij ri Dios chupa Ruchꞌaꞌtem: Ri lik kuaj riꞌin chiwe e ri kꞌutubꞌal re ri kꞌaxnaꞌbꞌal kꞌuꞌxaj, na e ta ri kakamisax awaj re qasaꞌn chinuwach kachaꞌ. »Riꞌin na in petinaq ta che kisikꞌixik ri jusukꞌ kibꞌinik kisilabꞌik, ma in petinaq che kisikꞌixik raj makibꞌ chaꞌ kakijalkꞌatij ri kibꞌinik kisilabꞌik —xchaꞌ.
MAT 9:14 Ekꞌuchiriꞌ, rutijoꞌn ri Juan Aj Yaꞌl Bautismo xeqibꞌ rukꞌ ri Jesús y xkitzꞌonoj che: —¿Suꞌchak riꞌoj y ri fariseos lik kaqaꞌan ayuno yey ri tijoꞌn rilal na kakiꞌan taj? —xechaꞌ.
MAT 9:15 Ri Jesús xukꞌul uwach: —¿Utz nebꞌa kekꞌojiꞌ pa bꞌis ri esikꞌim pa kꞌulanikil we kꞌa kꞌo rala kakꞌuliꞌik chikixoꞌl? Na utz taj. Noꞌj kopon na ri qꞌij echiriꞌ kesax bꞌi rala chikixoꞌl; kꞌa ekꞌuchiriꞌ kakiꞌan ayuno.
MAT 9:16 Na jinta junoq kukꞌojoj ruqꞌuꞌ qꞌeꞌl rukꞌ kꞌojobꞌal kꞌasaq, ma ri kꞌojobꞌal kꞌasaq, we xkꞌolotaj upa, e kujekꞌ ri kꞌul qꞌeꞌl y más ne kurichꞌij bꞌi.
MAT 9:17 »Jekꞌulaꞌ ri vino kꞌakꞌ ꞌanom na kaqꞌej ta chupa juna surun qꞌeꞌl. Ma we kaꞌaniꞌ waꞌ, ri vino kꞌakꞌ echiriꞌ kanajtir uqꞌij, kuraqij ri surun, katix kꞌu riꞌ ri vino y ri surun na jinta chi uchak. Ruma kꞌu laꞌ, ri vino kꞌakꞌ ꞌanom chirajawaxik wi kaqꞌej chupa ri surun kꞌasaq chaꞌ ukabꞌichal waꞌ kakowinik —xchaꞌ.
MAT 9:18 Echiriꞌ katajin ri Jesús che ubꞌiꞌxikil taq waꞌ, xkꞌun lo jun achi aj wach re ri tinamit, xuxuk ribꞌ chwach y xubꞌiꞌij che: —Ri numiꞌal lik kꞌa e laꞌ xkamik. We ta rilal keꞌek la wukꞌ y keꞌyaꞌa ri qꞌabꞌ la puwiꞌ, rire kakꞌastaj tanchik —xchaꞌ.
MAT 9:19 Ri Jesús xyaktajik y xeꞌek rukꞌ rachi, junam kukꞌ rutijoꞌn.
MAT 9:20 Ekꞌu laꞌ, kꞌo jun ixoq lik yewaꞌ, e kabꞌlajuj lo junabꞌ riꞌ na kataniꞌ ta ri yabꞌil re upa ikꞌ che. Xqibꞌ kꞌu pana chirij ri Jesús y xuchap ruchiꞌ ruqꞌuꞌ.
MAT 9:21 Ma xuchꞌobꞌ pa ranimaꞌ: «Tobꞌ tane xew luꞌqꞌuꞌ kanchapo, rukꞌ riꞌ kinkunutajik.»
MAT 9:22 Pero ri Jesús xtzuꞌn lo chirij, xutzuꞌ uwach rixoq y jewaꞌ xubꞌiꞌij che: —Ixoq, nimarisaj kꞌuꞌx la, ma xkunutaj la ruma xkubꞌiꞌ kꞌuꞌx la wukꞌ —xchaꞌ. Chupa kꞌu riꞌ la joqꞌotaj rixoq asu xkunutajik.
MAT 9:23 Ekꞌuchiriꞌ xok bꞌi ri Jesús chirocho rachi aj wach, kebꞌutzutzaꞌ ri kakichꞌawisaj suꞌ y ri winaq kewoqoqik.
MAT 9:24 Xubꞌiꞌij kꞌu ri Jesús chike: —Chixelubꞌi, ma wa ralko ali na kaminaq taj, xa kawarik —xchaꞌ. Yey xa xkitzeꞌej kꞌu ri xubꞌiꞌij.
MAT 9:25 Ekꞌuchiriꞌ xebꞌesax lo ri winaq, ri Jesús xok bꞌi pa kꞌo wi ri ralko ali; xuchap kꞌu ruqꞌabꞌ y waꞌli xyaktajik.
MAT 9:26 Xeꞌek kꞌu utzijoxik riꞌ waꞌ che ronoje taq la luwar.
MAT 9:27 Echiriꞌ xel bꞌi ri Jesús chiriꞌ, xeterej bꞌi kaꞌibꞌ potzꞌ chirij, lik ko kesikꞌin che, jewaꞌ kakibꞌiꞌij: —¡Choj-juchꞌ kaꞌn ko cheꞌla, lal Ralkꞌoꞌal kan ri rey David! —xechaꞌ.
MAT 9:28 Echiriꞌ xok ri Jesús chuchiꞌ jun ja, xeqibꞌ ri kaꞌibꞌ potzꞌ rukꞌ y Rire xubꞌiꞌij chike: —¿Kikoj riꞌix we riꞌin kꞌo panuqꞌabꞌ kanya ri itzuꞌnibꞌal? —xchaꞌ. Rike xkibꞌiꞌij: —Kaqakojo, Qajawal —xechaꞌ.
MAT 9:29 Ekꞌu ri Jesús xuya ruqꞌabꞌ puwi ri kiwach y xubꞌiꞌij chike: —Chuꞌana waꞌ iwukꞌ e chirij ri kubꞌulibꞌal ikꞌuꞌx —xchaꞌ.
MAT 9:30 Jekꞌulaꞌ xkunutaj ri kiwach. Ewi ri Jesús lik xebꞌupixabꞌaj, jewaꞌ xubꞌiꞌij chike: —Lik mitzijoj waꞌ che junoq —xchaꞌ.
MAT 9:31 Noꞌj rike xew xebꞌel bꞌi, xkijeq kakitzijoj pa ronoje taq laꞌ la luwar ri xuꞌan ri Jesús.
MAT 9:32 Echiriꞌ katajin bꞌi kelik ri kebꞌ achijabꞌ xkunutaj ri kiwach, ri winaq xkikꞌam lo chwach ri Jesús jun achi meꞌt kꞌo puqꞌabꞌ jun itzel uxlabꞌixel.
MAT 9:33 Ekꞌuchiriꞌ ri Jesús xresaj bꞌi ri itzel uxlabꞌixel che, ri meꞌt xkunutajik y xujeq kachꞌaꞌtik. E taq kꞌu ri winaq lik xkam kanimaꞌ che waꞌ y xkibꞌiꞌij chikiwach: «Na qilom ta kꞌana waꞌ wara Israel pachaꞌ wa xqil woꞌora» xechaꞌ.
MAT 9:34 Noꞌj ri fariseos xkibꞌiꞌij: «Laꞌ la Jesús kebꞌeresaj bꞌi itzel uxlabꞌixel ruma ruchuqꞌabꞌ ri kajawal ri itzel uxlabꞌixel» xechaꞌ.
MAT 9:35 Echiriꞌ ri Jesús xikꞌow pa taq ronoje tinamit y aldeas, kakꞌutun chupa taq ri sinagogas chujujunal luwar, kutzijoj ri Utzilaj Tzij re rutaqanik ri Dios y kukunaj ronoje yabꞌil y kꞌaxkꞌobꞌik.
MAT 9:36 Ekꞌuchiriꞌ xeril rukꞌiyal winaq, lik xejuchꞌ kaꞌn pa ranimaꞌ, ma rike pachaꞌ e bꞌexex e sachinaq, kikichom kibꞌ y na jinta chi chajinel ke.
MAT 9:37 Xubꞌiꞌij kꞌu chike rutijoꞌn: «Paqatzij wi kambꞌiꞌij chiwe: Ri molonik kajawax uꞌanik, lik nim; noꞌj raj chak na e kꞌi taj.
MAT 9:38 E uwariꞌche, chitzꞌonoj che ri Dios, ri Rajaw ri molonik, chaꞌ kebꞌutaq lo aj chak chupa ruchak» xchaꞌ.
MAT 10:1 Ekꞌu ri Jesús xebꞌusikꞌij ri kabꞌlajuj utijoꞌn y xuya pakiqꞌabꞌ kebꞌekesaj bꞌi itzelilaj uxlabꞌixel y kakikunaj ronoje yabꞌil y ronoje kꞌaxkꞌobꞌik.
MAT 10:2 E kibꞌiꞌ taq waꞌ wa kabꞌlajuj e taqoꞌn: Nabꞌe e Simón ri kabꞌiꞌx Pedro che y ruchaqꞌ Andrés, Jacobo y ruchaqꞌ Juan (wa kaꞌibꞌ e ukꞌajol ri Zebedeo),
MAT 10:3 Felipe, Bartolomé, Tomás, Mateo ri aj tzꞌonol puaq re tojonik, Jacobo rukꞌajol ri Alfeo, Lebeo ri kabꞌiꞌx Tadeo che,
MAT 10:4 Simón ri kabꞌiꞌx che “ri Cananista”, kꞌisbꞌal re, e Judas aj Iscariot, ri xkꞌayin re ri Jesús.
MAT 10:5 Ri Jesús xebꞌutaq bꞌi ri kabꞌlajuj y e pixabꞌanik waꞌ xuya bꞌi chike: «Mixꞌek pa taq ri luwar ke ri na e ta aj judiꞌabꞌ, mixok ne pa taq ri tinamit re Samaria.
MAT 10:6 Jix kꞌu nabꞌe kukꞌ ri bꞌexex e sachinaq, waꞌ e ri e aj judiꞌabꞌ re ri tinamit Israel.
MAT 10:7 Jix y jewaꞌ chitzijoj: “Rutaqanik ri Dios petinaq chilaꞌ chikaj xa naqaj chi kꞌo wuloq.”
MAT 10:8 »Chebꞌikunaj konoje ri yewaꞌibꞌ kukꞌ taq ri kꞌo ri yabꞌil lepra chike, chebꞌikꞌastajisaj ri ekaminaq y chebꞌiwesaj bꞌi itzel uxlabꞌixel. Wa chuqꞌabꞌ kikꞌul riꞌix e rutzil nukꞌuꞌx chiwe; jekꞌulaꞌ mitzꞌonoj rajil ri chak kiꞌan rukꞌ.
MAT 10:9 »Mikꞌam bꞌi imeyo re oro, re plata o re cobre.
MAT 10:10 Mikꞌam ne bꞌi tebꞌ re ubꞌitaq iwe, mikꞌam bꞌi jun chik ikoton, jun chik molaꞌj ixajabꞌ o jun chik ichꞌamiꞌy. Ma e junoq kachakunik, lik taqalik kayaꞌiꞌ janipa ri kajawax che.
MAT 10:11 »Echiriꞌ kixopon pa juna tinamit o pa juna aldea, chitzukuj junoq jusukꞌ ubꞌinik usilabꞌik y chixkanaj kꞌu kan chirocho kꞌate kixel bꞌi chiriꞌ echiriꞌ kixꞌek pa jun chik tinamit.
MAT 10:12 »Echiriꞌ kixok chuchiꞌ juna ja, chiyaꞌa rutzil kiwach ri e kꞌo chiriꞌ, kitzꞌonoj kꞌu ri utzil chomal re ri Dios pakiwiꞌ.
MAT 10:13 We kixkikꞌul kꞌu ri e kꞌo pa ri ja, kakanaj ri utzil chomal itzꞌonom kan pakiwiꞌ. Noꞌj we rike na kixkikꞌul taj, ri utzil chomal katzelej tanchi lo iwukꞌ.
MAT 10:14 »We na kixkikꞌul taj y na kakaj tane kakita ri kitzijoj, chixelubꞌi chupa ri ja o pa ri tinamit yey chipupaꞌ kan rulew kꞌo che ri iwaqan.
MAT 10:15 Ma paqatzij wi kambꞌiꞌij chiwe: Chupa ruqꞌijol ri qꞌatbꞌal tzij, más lik kꞌax ri kape pakiwi ri tinamit na xkikꞌul ta ri Utzilaj Tzij, chwa ri kape pakiwi ri e aj Sodoma y ri e aj Gomorra.
MAT 10:16 »Chitapeꞌ: Riꞌin kixintaq bꞌi pachaꞌ ix bꞌexex chikixoꞌl utiw. Lik chichajij kꞌu iwibꞌ chi utz jelaꞌ pachaꞌ ruꞌanik kuchajij ribꞌ ri kumatz, yey chiꞌana pachaꞌ ri palomax na jinta kꞌo kuꞌan che junoq.
MAT 10:17 »Lik chichajij kꞌu iwibꞌ chikiwach ri winaq, ma kixkikꞌam bꞌi pa taq qꞌatbꞌal tzij y kakijichꞌ ipa pa taq sinagogas.
MAT 10:18 Wuma riꞌin, kixkikꞌam ne bꞌi chikiwach taq raj qꞌatal tzij y ri taqanelabꞌ. Rukꞌ kꞌu riꞌ waꞌ, utz kiqꞌalajisaj nuwach riꞌin chikiwach rike y chikiwach konoje taq ri tinamit che ruwachulew.
MAT 10:19 Ekꞌuchiriꞌ kixkiya chikiwach, mubꞌisoj ikꞌuꞌx saꞌ ri kibꞌiꞌij; ma echiriꞌ kopon ruꞌorayil re kixchꞌaꞌtik, e ri Dios kayaꞌw lo ichꞌaꞌtem.
MAT 10:20 Ma na ix ta ri kixchꞌaꞌtik, e ri Ruxlabꞌixel Riqaw; e Rire kuya ichꞌaꞌtem.
MAT 10:21 »E taq kꞌu ri tikawex kekiya ri katz-kichaqꞌ pa kamik; ri kꞌo kalkꞌoꞌal kekiya taq ri kalkꞌoꞌal pa kamik; ri kalkꞌoꞌal keyaktaj chikij kichu-kiqaw y kekiya pa kamik.
MAT 10:22 Taq ri winaq lik tzel kixkil riꞌix xa ruma ikojom ri nubꞌiꞌ; noꞌj china kꞌu ri kuchuqꞌubꞌej ribꞌ kꞌa chupa ri kꞌisbꞌal re, e riꞌ ri kakolobꞌetajik.
MAT 10:23 Echiriꞌ lik kixternabꞌex rukꞌ kꞌaxkꞌobꞌik pa juna tinamit, jix che jun chik. Ma paqatzij wi kambꞌiꞌij chiwe, kꞌamajaꞌ ne kikꞌiso kixikꞌow chupa ronoje taq ri tinamit re Israel, echiriꞌ kakꞌun tanchi Ralaxel Chikixoꞌl Tikawex.
MAT 10:24 »Na jinta juna tijoꞌn más kꞌo uwach chwa rutijonel y na jinta ne juna aj chak más kꞌo uwach chwa ri rajaw.
MAT 10:25 Juna tijoꞌn kubꞌuloq we xuꞌana jelaꞌ pachaꞌ rutijonel y juna aj chak kubꞌuloq we xuꞌana pachaꞌ ri rajaw. We kabꞌiꞌx “Beelzebú” che ri kiqaw rakꞌalabꞌ, ¿makꞌuwariꞌ ri kabꞌiꞌx chike ri ralkꞌoꞌal?
MAT 10:26 »Mixiꞌij iwibꞌ chikiwach ri winaq. Ma kopon ri qꞌij echiriꞌ janipa ri na qꞌalajisam taj, kaqꞌalajisax na; yey janipa ri ewatalik, ketaꞌmaxik.
MAT 10:27 E janipa ri kambꞌiꞌij riꞌin xew chiwe riꞌix, chibꞌiꞌij riꞌix chiwachil; yey ri kanweswaꞌ riꞌin chiwe, chixsikꞌin che ubꞌiꞌxikil pa taq bꞌe.
MAT 10:28 »Mixiꞌij iwibꞌ chikiwach ri kꞌo pakiqꞌabꞌ kixkikamisaj, ma waꞌ xew che ri cuerpo kakiꞌan wi, noꞌj na jinta pakiqꞌabꞌ kakisach uwach rukꞌaslem junoq chwach ri Dios. E chixiꞌij iwibꞌ chwach ri Jun kꞌo puqꞌabꞌ kebꞌukꞌaq bꞌi ri tikawex junam rukꞌ ri kicuerpos y ri kanimaꞌ, chi xibꞌalbꞌaꞌ re tijbꞌal kꞌax.
MAT 10:29 »Iwetaꞌam, kaꞌibꞌ raltaq ko tzꞌikin kekꞌayix xa chwa jun ralko meyo. Na rukꞌ ta kꞌu riꞌ, na katzaq tane junoq chike pulew we ri Qaqaw na kuya ta luwar.
MAT 10:30 Makꞌuwariꞌ riꞌix lik puqꞌabꞌ ix kꞌo wi, ma xa ne chujujunal riwiꞌ ajilam ruma Rire.
MAT 10:31 E uwariꞌche, mixiꞌij iwibꞌ; ma riꞌix más kꞌo iwach chikiwach ri raltaq ko tzꞌikin.
MAT 10:32 »E junoq kuqꞌalajisaj chikiwach ri winaq, kubꞌiꞌij: “In tijoꞌn re ri Jesús”; jekꞌuriꞌlaꞌ kanꞌan riꞌin che rire, kambꞌiꞌij chwach ri Nuqaw kꞌo chilaꞌ chikaj: “Qatzij, wa jun e nutijoꞌn” kinchaꞌ.
MAT 10:33 »Noꞌj kꞌu ri kubꞌiꞌij chikiwach ri winaq: “Riꞌin na in ta tijoꞌn re ri Jesús.” Jekꞌuriꞌlaꞌ kanꞌan riꞌin che rire, kambꞌiꞌij chwach ri Nuqaw kꞌo chilaꞌ chikaj: “Qatzij, wa jun na nutijoꞌn taj” kinchaꞌ.
MAT 10:34 »Michꞌobꞌo we ri nukꞌunik che ruwachulew kukꞌam lo utzil chomal. Na e ta riꞌ, ma e kukꞌam lo chꞌaꞌoj chikixoꞌl taq ri tikawex.
MAT 10:35 Ruma kꞌu ri nukꞌunik, ri tikawex kakijeq kechꞌoꞌjin chikiwach rala rukꞌ ruqaw, rali rukꞌ ruchu y ralibꞌatz rukꞌ ruchu-ralibꞌ.
MAT 10:36 Ekꞌu riꞌ ri tzel kebꞌilow re juna tikawex, e mismo ri e kꞌo pa rocho.
MAT 10:37 »China ri más lik e kꞌax kebꞌunaꞌ ruchu-uqaw chinuwach riꞌin, na taqal ta che katerej chwij; jekꞌulaꞌ china ri más lik e kꞌax kebꞌunaꞌ ri ralkꞌoꞌal chinuwach riꞌin, riꞌ na taqal ta che katerej chwij.
MAT 10:38 »China ri na karaj taj kutij kꞌax ruma e nutijoꞌn, riꞌ na taqal ta che katerej chwij.
MAT 10:39 China ri kutij uqꞌij lik kel chi utz rukꞌaslem wara che ruwachulew, riꞌ e kujam ri kꞌaslemal chilaꞌ chikaj; noꞌj ri kuya ranimaꞌ rukꞌaslem wuma riꞌin, riꞌ e kuriq ri chomilaj ukꞌaslemal chwach ri Dios.
MAT 10:40 »China ri kakꞌuluw iwe riꞌix, in ri kinukꞌulu; yey china ri kakꞌuluw we riꞌin, e kukꞌul ri Jun taqayom lo we.
MAT 10:41 China ri kakꞌuluw re juna qꞌalajisanel ruma e qꞌalajisay re rutzij ri Dios, ri rajil ukꞌaxel kukꞌulu e jelaꞌ pachaꞌ ri kukꞌul juna qꞌalajisanel. China ri kakꞌuluw re juna tikawex ruma jusukꞌ rubꞌinik chwach ri Dios, ri rajil ukꞌaxel kukꞌulu e jelaꞌ pachaꞌ ri kukꞌul ri jusukꞌ ubꞌinik usilabꞌik chwach ri Dios.
MAT 10:42 China kꞌu ri kusipaj tobꞌ xa juna tzima yaꞌ joron che junoq chike waꞌ wa chꞌutiꞌq ruma e nutijoꞌn, paqatzij wi kambꞌiꞌij chiwe, riꞌ na kujam ta kꞌana ri rajil ukꞌaxel» xcha ri Jesús.
MAT 11:1 Echiriꞌ ri Jesús xukꞌis kipixabꞌaxik ri kabꞌlajuj utijoꞌn, xel bꞌi chiriꞌ re kakꞌutunik y re kutzijoj Ruchꞌaꞌtem ri Dios chupa taq ri kitinamit rutijoꞌn.
MAT 11:2 Ri Juan kꞌo pa cárcel echiriꞌ xuta ri kuꞌan ri Cristo. Xebꞌutaq kꞌu lo kaꞌibꞌ chike rutijoꞌn rukꞌ Rire,
MAT 11:3 chaꞌ keꞌkitzꞌonoj che: —¿E rilal Ruchaꞌoꞌn lo ri Dios, ri Jun bꞌiꞌtal chik kakꞌunik, o kaqoyꞌej chi junoq chik? —xechaꞌ.
MAT 11:4 Ri Jesús xukꞌul uwach: —Jix y chitzijoj che ri Juan ronoje wa kixtajin che utayik y che rilik.
MAT 11:5 Ma ri e potzꞌ ketzuꞌnik, ri e sik kebꞌinik, ri kꞌo yabꞌil lepra chike kekunutajik, ri e tꞌoꞌk ketanik, ri ekaminaq kekꞌastajik y chike ri nibꞌaꞌibꞌ katzijox ri Utzilaj Tzij.
MAT 11:6 Nim uqꞌij ralaxik kꞌu riꞌ ri na kasach ta ri kubꞌulibꞌal ukꞌuꞌx wukꞌ —xchaꞌ.
MAT 11:7 Ekꞌuchiriꞌ xebꞌek rike, ri Jesús xujeq kachꞌaꞌt puwi ri Juan chike ri winaq, jewaꞌ xubꞌiꞌij: «¿Saꞌ ri xeꞌila alaq pa ri luwar katzꞌintzꞌotik? ¿Xeꞌila nebꞌa alaq jun achi na jinta ukowil xa pachaꞌ tani kajabajoꞌx ruma ri tew?
MAT 11:8 ¿Saꞌ ri xeꞌila alaq? ¿Xeꞌila nebꞌa alaq jun achi uwiqom ribꞌ rukꞌ chomilaj kꞌul? Na e ta riꞌ, ma etaꞌam alaq ri lik kewiqiqik, riꞌ pa kocho e aj wach ejeqel wi.
MAT 11:9 Kantzꞌonoj kꞌu riꞌ: ¿Saꞌ ri xeꞌila alaq? ¿Xeꞌila alaq jun qꞌalajisanel? Areꞌ, yey paqatzij wi kambꞌiꞌij che alaq: Rire e más kꞌo uwach chikiwa ri jujun chik qꞌalajisanelabꞌ.
MAT 11:10 Ma jewaꞌ kubꞌiꞌij Ruchꞌaꞌtem ri Dios puwi ri Juan: Riꞌin kannabꞌesaj bꞌi ri waj chak chawach Riꞌat chaꞌ kuyijbꞌaꞌ ri bꞌe chwach pan rawoponibꞌal kachaꞌ.
MAT 11:11 »Paqatzij wi kambꞌiꞌij che alaq: Na jinta junoq chike ri tikawex ebꞌalaxinaq wara che ruwachulew más kꞌo uwach chwa ri Juan Aj Yaꞌl Bautismo. Pero chwi kꞌu riꞌ waꞌ wa keꞌek, china ri kok chupa rutaqanik ri Dios petinaq chilaꞌ chikaj, tobꞌ na jinta uwach, más nim uqꞌij ralaxik chwa ri Juan.
MAT 11:12 »Rukꞌ ri Juan Aj Yaꞌl Bautismo xjeq lo utzijoxik ri Utzilaj Tzij puwi rutaqanik ri Dios petinaq chilaꞌ chikaj, y waꞌ kꞌa katajin utzijoxik waqꞌij ora, tobꞌ e kꞌo ri kakitij uqꞌij kakiqꞌatej waꞌ. Na rukꞌ ta kꞌu riꞌ, e ri lik kakitij uqꞌij kakitzukuj wa taqanik, kayaꞌtaj chike kebꞌok chupa.
MAT 11:13 Ma lik chwach pana echiriꞌ xujeq katzijon ri Juan, ri qꞌalajisanelabꞌ y ri Moisés kitzꞌibꞌam chi lo chupa ri Tzij Pixabꞌ chwi rukꞌunibꞌal rutaqanik ri Dios.
MAT 11:14 We kiwaj kꞌu riꞌix kikojo, ri Juan e ri Elías, ri jun bꞌiꞌtal chik kakꞌunik.
MAT 11:15 China kꞌu ri kꞌo utanibꞌal che utayik, ¡chuta kꞌu riꞌ!
MAT 11:16 »¿China kꞌu rukꞌ kanjunimaj wi kiwach wa winaq re waqꞌij ora? E kanjunimaj kukꞌ ri kꞌoꞌmabꞌ kebꞌeꞌtzꞌula pa kꞌayibꞌal y lik kesikꞌin chikiwach,
MAT 11:17 kakibꞌiꞌij: Echiriꞌ riꞌoj xqachꞌawisaj suꞌ chiwe, riꞌix na xiwaj taj kix-xajawik; yey echiriꞌ xqatunaj bꞌix bꞌisobꞌal uwach chiwe, na xiwaj taj kixjuyuyik kechaꞌ.
MAT 11:18 »Jekꞌulaꞌ kakiꞌan taq ri winaq, ma echiriꞌ xkꞌun ri Juan Aj Yaꞌl Bautismo, rire lik kuꞌan ayuno y na kutij tane vino. Yey ri winaq kakibꞌiꞌij: “Waꞌ waꞌchi kꞌo puqꞌabꞌ jun itzel uxlabꞌixel” kechaꞌ.
MAT 11:19 »Xkꞌun kꞌu lo Ralaxel Chikixoꞌl Tikawex. Rire kutij ronoje ri kayaꞌ chwach, yey taq ri winaq kakibꞌiꞌij: “Waꞌ wa jun achi lik japjatel y qꞌabꞌaꞌrel, kachbꞌiꞌil raj tzꞌonol puaq re tojonik y raj makibꞌ” kechaꞌ. Noꞌj kaqꞌalajin na kꞌut china taq ri lik kꞌo runaꞌoj ri Dios kukꞌ ruma ri kiꞌanom» xcha ri Jesús.
MAT 11:20 Ekꞌuchiriꞌ, ri Jesús lik xebꞌuyaj ri winaq re taq ri tinamit pa uꞌanom wi ukꞌiyal milagros, ma rike na xkitzelej ta kitzij chwach ri Dios. Jekꞌuwaꞌ xubꞌiꞌij:
MAT 11:21 «¡Lik toqꞌoꞌ iwach ri ix aj Corazín! ¡Lik toqꞌoꞌ iwach ri ix aj Betsaida! Ma we ta chupa ri tinamit Tiro y ri tinamit Sidón xilitaj wi wa kꞌutubꞌal re ruchuqꞌabꞌ ri Dios xinꞌan chiwach riꞌix, kꞌo tan qꞌij ta lo riꞌ xkitzelej kitzij chwach ri Dios, kikojom chi kꞌu kiqꞌuꞌ kꞌax rij y kitzꞌuyubꞌam kibꞌ pa chaaj ruma ri kibꞌis.
MAT 11:22 E uwariꞌche kambꞌiꞌij chiwe: Echiriꞌ kopon ri qꞌij re ri qꞌatbꞌal tzij, más nim ri kꞌaxkꞌobꞌik kape piwi riꞌix chwa ri kꞌaxkꞌobꞌik kape pakiwi ri winaq re ri tinamit Tiro y ri tinamit Sidón.
MAT 11:23 »Yey ri ix aj Capernaúm, e chiwach riꞌix lik yakom chi iqꞌij kꞌa chikaj; yey na e ta riꞌ, ma lik kakꞌaq ne bꞌi iqꞌij y kixkꞌaq ne bꞌi kꞌa chi xibꞌalbꞌaꞌ re tijbꞌal kꞌax. Ma we ta pa ri tinamit Sodoma xilitaj wi wa milagros xinꞌan chiwach riꞌix ix aj Capernaúm, riꞌ laꞌ la tinamit kꞌa kꞌo tane woꞌora.
MAT 11:24 Ekꞌu kambꞌiꞌij waꞌ chiwe: Pa ri qꞌij re ri qꞌatbꞌal tzij, lik nim ri kꞌaxkꞌobꞌik kape piwi riꞌix chwa ri xpe pakiwi ri winaq re ri tinamit Sodoma» xchaꞌ.
MAT 11:25 Ekꞌu laꞌ la joqꞌotaj ri Jesús xuꞌan orar chwach Ruqaw, jewaꞌ xubꞌiꞌij: «Nuqaw, kanyak qꞌij la, Lal Rajaw ruwa kaj y ruwachulew, ma ri qꞌalajisam la chike ri lik kakiꞌan chꞌutiꞌn che kibꞌ, waꞌ ewam la chikiwach ri lik kꞌo kinaꞌoj y lik kꞌo kimajom.
MAT 11:26 Jelaꞌ xꞌan la, Nuqaw, ma e xꞌaj la riꞌ» xchaꞌ.
MAT 11:27 Tekꞌuchiriꞌ, xubꞌiꞌij chike ri tikawex: «Ronoje taq ri kꞌolik yaꞌtal lo panuqꞌabꞌ ruma ri Nuqaw. Na jinta kꞌu junoq lik umajom usukꞌ chi utz saꞌ ruwach Rukꞌajol ri Dios, xew ri Qaqaw Dios etaꞌmayom re. Y na jinta ne junoq umajom usukꞌ chi utz saꞌ ruwach ri Qaqaw Dios, xew Rukꞌajol ri Dios etaꞌmayom re; yey puqꞌabꞌ kꞌu riꞌ Rukꞌajol kꞌo wi china chike karaj kuqꞌalajisaj wi waꞌ.
MAT 11:28 »Chixpeta wukꞌ, iwonoje ri ix kosinaq y kꞌo iweqaꞌn, ma riꞌin kanya uxlanem chiwe.
MAT 11:29 Chiyaꞌa iwibꞌ chuxeꞌ ri nuyuku kankoj riꞌin chiwe. Chimaja kꞌu iweꞌix chwij, ma riꞌin utz nukꞌuꞌx y na kanꞌan ta nim che wibꞌ chiwach. We kiꞌan kꞌu riꞌ waꞌ, kiriq na ri utzil chomal piwanimaꞌ.
MAT 11:30 Ma ri nuyuku riꞌin, na kꞌayew ta rukꞌaxik bꞌi y ri eqaꞌn kanya bꞌi chiwe na al taj» xchaꞌ.
MAT 12:1 Chupa taq kꞌu riꞌ laꞌ la qꞌij pa jun qꞌij re uxlanibꞌal, ri Jesús kukꞌ rutijoꞌn e riꞌ kebꞌikꞌow pa taq tikoꞌn re trigo. Ekꞌu rutijoꞌn, ruma lik kenumik, xkijeq kakichꞌupilaꞌ bꞌi ri trigo; tekꞌuchiriꞌ, kakiqil rukꞌ ri kiqꞌabꞌ y kakitijo.
MAT 12:2 Echiriꞌ ri fariseos xkil waꞌ, xkibꞌiꞌij che ri Jesús: —Chilape la, ri e tijoꞌn la kakiꞌan ri na taqal taj kaꞌaniꞌ chupa ri qꞌij re uxlanibꞌal —xechaꞌ.
MAT 12:3 Ekꞌu ri Jesús xukꞌul uwach: —¿Na ajilam ta nebꞌa alaq ri xuꞌan ri David julaj echiriꞌ rire kukꞌ ri rachbꞌiꞌil xenumik?
MAT 12:4 Xok kꞌu chupa ri Rocho Dios y junam kukꞌ ri rachbꞌiꞌil xkitij ri pam yaꞌtal chi puqꞌabꞌ ri Dios; tobꞌ na taqal ta chike rike kakitijo, ma waꞌ xew taqal chike raj chakunel pa Rocho Dios.
MAT 12:5 »¿Na iwajilam ta nebꞌa ri tzꞌibꞌital kan ruma ri Moisés chupa ri Tzij Pixabꞌ? Ma kubꞌiꞌij e raj chakunel pa Rocho Dios na kebꞌuxlan ta chupa ri qꞌij re uxlanibꞌal; na rukꞌ ta kꞌu riꞌ, waꞌ na mak ta chike.
MAT 12:6 »Kambꞌiꞌij kꞌu riꞌin chiwe: Kꞌo jun wara más nim uqꞌij chwa ri Rocho Dios.
MAT 12:7 We ta riꞌix imajom usukꞌ saꞌ keꞌelawi ri kubꞌiꞌij ri Dios chupa Ruchꞌaꞌtem: Ri lik kuaj Riꞌin chiwe e ri kꞌutubꞌal re ri kꞌaxnaꞌbꞌal kꞌuꞌxaj, na e ta ri kakamisax awaj re qasaꞌn chinuwach kachaꞌ; we ta kꞌu lik kimaj usukꞌ waꞌ, riꞌ na kiqꞌat ta tzij pakiwi ri na jinta mak kiꞌanom.
MAT 12:8 Ma Ralaxel Chikixoꞌl Tikawex e rajaw ri qꞌij re uxlanibꞌal —xchaꞌ.
MAT 12:9 Echiriꞌ xel ri Jesús chiriꞌ, xok chupa ri sinagoga re ri tinamit.
MAT 12:10 Kꞌo kꞌu jun achi chiriꞌ chaqijinaq jun uqꞌabꞌ. Yey e taq ri lik kakitzukuj suꞌanik kakitzꞌaq uchiꞌ ri Jesús, xkitzꞌonoj che: —¿Ubꞌe nawi kakunax juna yewaꞌ chupa ri qꞌij re uxlanibꞌal? —xechaꞌ.
MAT 12:11 Ri Jesús xukꞌul uwach: —¿Kꞌo nawi junoq che alaq we pa ri qꞌij re uxlanibꞌal tzaqinaq juna ubꞌexex pa siwan, na keꞌresaj tuloq?
MAT 12:12 ¿China kꞌu ri más kꞌo uwach, e rachi o e ri bꞌexex? Ruma kꞌu riꞌ, taqalik kaꞌan ri utz chupa ri qꞌij re uxlanibꞌal —xchaꞌ.
MAT 12:13 Ekꞌuchiriꞌ, xubꞌiꞌij ri Jesús che rachi chaqijinaq uqꞌabꞌ: —Chasukꞌupij raqꞌabꞌ —xchaꞌ. Ekꞌu rachi xuyuq ruqꞌabꞌ y waꞌ xutzirik, ruqꞌabꞌ xuꞌan tanchi jelaꞌ pachaꞌ ri jun chik.
MAT 12:14 Xebꞌel kꞌu bꞌi ri fariseos y xkichꞌaꞌtibꞌej chikiwach suꞌanik kakisach uwach ri Jesús.
MAT 12:15 Ri Jesús retaꞌam saꞌ ri kakaj kakiꞌan che; ruma kꞌu laꞌ, xel bꞌi chiriꞌ y lik e kꞌi ri winaq xeterej bꞌi chirij. Ekꞌu Rire xebꞌukunaj konoje ri yewaꞌibꞌ
MAT 12:16 yey lik xebꞌupixabꞌaj chaꞌ na kakiqꞌalajisaj taj china Rire.
MAT 12:17 Xuꞌan taq waꞌ chaꞌ e xuꞌana rubꞌiꞌim ri Dios ruma ri qꞌalajisanel Isaías:
MAT 12:18 E waj chak waꞌ, ri Jun nuchaꞌom loq. Riꞌin lik kꞌax kannaꞌo y lik kinkiꞌkot rukꞌ. Kanya kꞌu ri Wuxlabꞌixel puwi Rire chaꞌ kutzijoj ri lik usukꞌ kanꞌan Riꞌin chikiwach konoje taq ri tinamit che ruwachulew.
MAT 12:19 Na rukꞌ ta yaj, na rukꞌ ta sikꞌ kuꞌan waꞌ; Na jinta kꞌu junoq riꞌ kataw re kayajanik o kasikꞌin pa taq bꞌe.
MAT 12:20 Yey Rire na kusach tane uwach ri xa chꞌitil chik. E pachaꞌ junoq na keꞌek ta che uqꞌepik juna suꞌ kotokik y na kuyubꞌij tane juna mecha xa kabꞌutzutz chik; ma kukꞌut ri rutzil ukꞌuꞌx chike taq ri paxinaq kikꞌuꞌx y ri na jinta chi kichuqꞌabꞌ. Jekꞌuriꞌlaꞌ kuꞌano kopon na ri qꞌij echiriꞌ na jinta chi junoq kachꞌijow uchuqꞌabꞌ ri lik usukꞌ kanꞌan Riꞌin.
MAT 12:21 Konoje taq kꞌu riꞌ ri tinamit che ruwachulew lik kakikubꞌaꞌ pan kikꞌuꞌx rukꞌ Rire xchaꞌ.
MAT 12:22 Ekꞌuchiriꞌ, xkikꞌam bꞌi chwach ri Jesús jun achi potzꞌ y meꞌt yey kꞌo puqꞌabꞌ jun itzel uxlabꞌixel. Ekꞌu ri Jesús xukunaj y jekꞌulaꞌ waꞌchi xtzuꞌnik y xujeq kachꞌaꞌtik.
MAT 12:23 Konoje kꞌu ri winaq lik xkam kanimaꞌ che y xkibꞌiꞌij: «¿Kꞌaxtaj e rire ri Ralkꞌoꞌal kan ri rey David?» xechaꞌ.
MAT 12:24 Ekꞌu ri fariseos echiriꞌ xkita waꞌ, xkibꞌiꞌij: «Waꞌ wa jun achi kebꞌeresaj bꞌi ri itzel uxlabꞌixel ruma ruchuqꞌabꞌ ri Beelzebú, ri kajawal ri itzel uxlabꞌixel» xechaꞌ.
MAT 12:25 Ri Jesús retaꞌam saꞌ ri kakichꞌobꞌo; ruma kꞌu riꞌ, xubꞌiꞌij chike: «We ri taqanelabꞌ re juna tinamit kijachom kipa ruma kechꞌoꞌjin chikiwach, riꞌ na kanajtir ta ri kitaqanik. Yey we ri ejeqelel pa juna tinamit o pa juna ja kijachom kipa ruma kechꞌoꞌjin chikiwach, riꞌ na ketikiꞌ ta chi utz.
MAT 12:26 Jekꞌulaꞌ, we ta ri Satanás karesaj bꞌi ri Satanás chike ri winaq, riꞌ e pachaꞌ kachꞌoꞌjin chiribꞌil ribꞌ y utukel kujach upa rutaqanik. ¿Saꞌ kꞌu uꞌanik riꞌ kanajtir rutaqanik?
MAT 12:27 »Ralaq kabꞌiꞌij alaq riꞌin kebꞌenuwesaj bꞌi taq ri itzel uxlabꞌixel rukꞌ ruchuqꞌabꞌ ri Beelzebú. We ta e riꞌ, ¿china kꞌu kayaꞌw kichuqꞌabꞌ riꞌ ri e tijoꞌn alaq chaꞌ kekesaj bꞌi taq ri itzel uxlabꞌixel? ¿Rukꞌ nawi ruchuqꞌabꞌ ritzel winaq kakiꞌano? Tzꞌonoj kꞌu alaq riꞌ chike ri e tijoꞌn alaq we e uꞌanom riꞌ.
MAT 12:28 Pero we riꞌin kebꞌenuwesaj bꞌi taq ri itzel uxlabꞌixel rukꞌ ruchuqꞌabꞌ ri Ruxlabꞌixel ri Dios, waꞌ e kꞌutubꞌal re kꞌuninaq chi rutaqanik ri Dios chixoꞌlibꞌal alaq.
MAT 12:29 »Tape alaq: ¿Suꞌanik kok juna eleqꞌom pa rocho junoq lik kꞌo uchuqꞌabꞌ yey kareleqꞌaj kꞌu lo rubꞌitaq re pa ja, we na kuyut ta nabꞌe ri rajaw ja? Ma we releqꞌom uyutum chi ri rajaw ja, kꞌa ekꞌuchiriꞌ utz kareleqꞌaj bꞌi ronoje la kꞌo pa ri ja.
MAT 12:30 »China kꞌu ri na uꞌanom ta re wukꞌ riꞌin, riꞌ aj chꞌaꞌoj chwij. Yey china ri na katoꞌbꞌ ta wukꞌ riꞌin che kikꞌamik lo jujun chik, riꞌ e kuwulij wa chak kanꞌano.
MAT 12:31 »E uwariꞌche kambꞌiꞌij che alaq: Kꞌo puqꞌabꞌ ri Dios kukuy ronoje taq ri mak ke ri tikawex rukꞌ ronoje taq ri na utz taj kakibꞌiꞌij, noꞌj na kukuy ta umak ri kachꞌaꞌt chirij ri Ruxlabꞌixel ri Dios.
MAT 12:32 China ri tzel kachꞌaꞌt chirij Ralaxel Chikixoꞌl Tikawex, riꞌ kakuytaj umak we kutzelej utzij. Noꞌj ri tzel kachꞌaꞌt chirij ri Santowilaj Ruxlabꞌixel ri Dios, riꞌ na kakuytaj ta kꞌana umak che waꞌ wa qꞌij oj kꞌo wi y na kakuytaj tane kꞌana umak tobꞌ ne che ruqꞌijol ri kꞌaslemal katajin loq.
MAT 12:33 »E juna chomilaj cheꞌ, lik chom rujiqꞌobꞌalil kuyaꞌo; yey ri cheꞌ na chom taj, na chom ta rujiqꞌobꞌalil kuyaꞌo. Ma ri cheꞌ ketaꞌmax uwach ruma rujiqꞌobꞌalil.
MAT 12:34 ¡Ralaq pachaꞌ alaq jupuq chi kumatz! ¿Suꞌanik kꞌu riꞌ kachꞌaꞌtibꞌej alaq ri utz we itzel kꞌuꞌx alaq? Ma rukꞌ ruchꞌaꞌtem ri tikawex kaqꞌalajin ronoje ri ukꞌolom chupa ri ranimaꞌ.
MAT 12:35 Jekꞌulaꞌ e junoq utz ukꞌuꞌx, echiriꞌ kachꞌaꞌtik, e karesaj lo ri chom ukꞌolom chupa ri ranimaꞌ. Yey e junoq itzel ukꞌuꞌx, echiriꞌ kachꞌaꞌtik, e karesaj lo ri na chom taj ukꞌolom chupa ri ranimaꞌ.
MAT 12:36 »Riꞌin kambꞌiꞌij kꞌu che alaq: Chupa ri qꞌij re ri qꞌatbꞌal tzij, chikijujunal ri tikawex kataꞌ kichiꞌ ruma ronoje ri chꞌulilaj chꞌaꞌtem kel lo chwa keꞌ.
MAT 12:37 Ma chijujunal alaq, we utz ri chꞌaꞌtem alaq, riꞌ kaqꞌalajinik alaq jusukꞌ; noꞌj we na chom ta ri chꞌaꞌtem alaq, riꞌ kaqꞌat tzij pawiꞌ alaq» xchaꞌ.
MAT 12:38 Ekꞌuchiriꞌ, jujun chike ri fariseos y raj kꞌutunel re ri tzijpixabꞌ, xkibꞌiꞌij che ri Jesús: —Lal tijonel, riꞌoj kaqaj kaqilo kaꞌan la juna kꞌutubꞌal re ri chuqꞌabꞌ la chiqawach —xechaꞌ.
MAT 12:39 Ri Jesús xukꞌul uwach: —Ri kakitzꞌonoj kꞌutubꞌal re ruchuqꞌabꞌ ri Dios e ri winaq re waqꞌij ora, ri itzel kikꞌuꞌx y na jusukꞌ ta ri kanimaꞌ chwach ri Dios. Noꞌj na kayaꞌtaj ta kꞌu waꞌ chike, ma xew kayaꞌtaj ri kꞌutubꞌal xꞌaniꞌ ojertan rukꞌ ri qꞌalajisanel Jonás.
MAT 12:40 Ma jelaꞌ pachaꞌ ri Jonás xkꞌojiꞌ oxibꞌ qꞌij y oxibꞌ aqꞌabꞌ chupa ri nimalaj kar, jekꞌulaꞌ Ralaxel Chikixoꞌl Tikawex oxibꞌ qꞌij y oxibꞌ aqꞌabꞌ kamuqiꞌ pulew.
MAT 12:41 »Ri winaq aj Nínive re ojertan keyaktaj chupa ri qꞌij re qꞌatbꞌal tzij y kakikoj kimak ri tikawex re waqꞌij ora. Ma rike xkitzelej kitzij chwach ri Dios ruma ri tzijonik xuꞌan ri Jonás chikiwach. Noꞌj ri tikawex re waqꞌij ora, kꞌo jun chikixoꞌl más kꞌo uwach chwa ri Jonás, yey na kebꞌok tane il che.
MAT 12:42 »Jekꞌulaꞌ echiriꞌ kopon ri qꞌij re ri qꞌatbꞌal tzij, kayaktaj lo ri reina re pa sur y kukoj kimak ri tikawex re waqꞌij ora. Ma rojertan lik naj petinaq wi rire chaꞌ koluꞌxikinaj runaꞌoj ri rey Salomón. Noꞌj ri tikawex re waqꞌij ora, kꞌo jun chikixoꞌl más kꞌo uwach chwa ri Salomón, yey na kebꞌok tane il che.
MAT 12:43 »Echiriꞌ juna itzelilaj uxlabꞌixel kel bꞌi che juna tikawex, ri kuꞌano e kasutin pa taq luwar katzꞌintzꞌotik, kutzukuj pa kajeqiꞌ wi. Yey we na kuriq taj,
MAT 12:44 kubꞌiꞌij kꞌu chiribꞌil ribꞌ: “Kintzelej pe chupa ri wocho pa xinel lo wi” kachaꞌ. Ekꞌuchiriꞌ koponik, kuꞌriqa rachi pachaꞌ juna ja kꞌa jinta rajaw, mesom upa y yijbꞌital chi utz.
MAT 12:45 Keꞌek kꞌut, kebꞌuꞌkꞌama chi lo wuqubꞌ rach itzelilaj uxlabꞌixel más itzel kiwachlibꞌal chwa rire; y konoje kꞌu riꞌ kebꞌokik y kejeqiꞌ chiriꞌ. Jekꞌuriꞌlaꞌ, rubꞌinik rachi más kayojtaj chwa ri petinaq loq. Ekꞌu kakikꞌulumaj waꞌ ri winaq itzel kikꞌuꞌx waqꞌij ora —xcha ri Jesús.
MAT 12:46 Ekꞌu ruchu y taq ruchaqꞌ ri Jesús xekꞌun loq echiriꞌ Rire kꞌa kachꞌaꞌt ne kukꞌ ri winaq. Xekꞌojiꞌ kꞌu lo pa bꞌe yey lik kakaj kechꞌaꞌt rukꞌ.
MAT 12:47 Kꞌo kꞌu jun xubꞌiꞌij pan che ri Jesús: —Ri chu la y taq ri chaqꞌ la e kꞌo pa bꞌe yey lik kakaj kechꞌaꞌt ukꞌ la —xchaꞌ.
MAT 12:48 Ekꞌu ri Jesús xubꞌiꞌij che ri xbꞌiꞌn pan che: —Chawach riꞌat, ¿china kꞌu ri nuchu y china taq ri nuchaqꞌ? —xchaꞌ.
MAT 12:49 Ekꞌuchiriꞌ, rukꞌ ruqꞌabꞌ xebꞌukꞌut rutijoꞌn y xubꞌiꞌij: —Wa e kꞌo wara e nuchu y e taq nuchaqꞌ riꞌ.
MAT 12:50 Ma china ri kuꞌan janipa ri karaj ri Nuqaw kꞌo chilaꞌ chikaj, waꞌ e nuchaqꞌ, e wanabꞌ y e nuchu riꞌ —xchaꞌ.
MAT 13:1 Chupa laꞌ la qꞌij, ri Jesús xel bꞌi pa ri ja y xeꞌtzꞌula chuchiꞌ ri mar.
MAT 13:2 Y ukꞌiyal winaq kꞌut xemolotaj chiriꞌ pa kꞌo wi Rire. Ruma laꞌ, ri Jesús xok chupa jun barco, xtzꞌuyiꞌ chupa y konoje ri winaq xekanaj kan chuchiꞌ ri mar.
MAT 13:3 Yey Rire xujeq uyaꞌik ukꞌiyal kꞌutunik chikiwach rukꞌ taq kꞌambꞌal naꞌoj, jewaꞌ xubꞌiꞌij chike: «Jun awanel xel bꞌi chaꞌ keꞌawanoq.
MAT 13:4 Ekꞌuchiriꞌ katajin che ujopopexik rijaꞌ, kꞌo xtzaq kan chuchiꞌ ri bꞌe. Xekꞌun kꞌu lo tzꞌikin y xoꞌlkitija bꞌi.
MAT 13:5 »Kꞌo ijaꞌ xtzaq kan pa taq abꞌaj; yey ruma na jinta ukꞌiyal ulew chuxeꞌ, xel tan lo rijaꞌ.
MAT 13:6 Ekꞌuchiriꞌ xel lo ri qꞌij, xkꞌatik; yey ruma na jinta ratzꞌayaq, xchaqijik.
MAT 13:7 »Kꞌo ijaꞌ xtzaq kan pa taq kꞌiix. Ekꞌu ri kꞌiix xkꞌiyik yey rijaꞌ xjiqꞌ kan chuxeꞌ.
MAT 13:8 »Noꞌj kꞌo ijaꞌ xtzaq kan pa chomilaj ulew. Ekꞌu riꞌ waꞌ lik xuꞌan reqaꞌn. Kꞌo ne jujun raqan xuya jun ciento, kꞌo jujun chik xuya sesenta y kꞌo xuya treinta.
MAT 13:9 China kꞌu ri kꞌo utanibꞌal che utayik, ¡chuta kꞌu riꞌ!» xchaꞌ.
MAT 13:10 Ekꞌu rutijoꞌn xeqibꞌ rukꞌ ri Jesús y xkitzꞌonoj che: —¿Suꞌbꞌe kakꞌutun la chikiwach ri winaq rukꞌ taq kꞌambꞌal naꞌoj? —xechaꞌ.
MAT 13:11 Ri Jesús xukꞌul uwach: —Chiwe riꞌix yaꞌtalik kaqꞌalajisax runaꞌoj ri Dios chwi rutaqanik petinaq chilaꞌ chikaj; noꞌj chike taq ri winaq, na yaꞌtal taj.
MAT 13:12 Ma china ri kꞌo umajom chik, riꞌ kayaꞌtaj ne che chaꞌ más kꞌo kumajo. Noꞌj china ri na jinta kꞌo umajom, kamaj ne che ri kuchꞌobꞌo umajom chik.
MAT 13:13 Ruma laꞌ kinchꞌaꞌt kukꞌ rike xa rukꞌ taq kꞌambꞌal naꞌoj. Ma tobꞌ rike ketzuꞌnik, e junam rukꞌ na ketzuꞌn taj; tobꞌ ketanik, e junam rukꞌ na ketan taj y e riꞌ na jinta kꞌo kakimaj usukꞌ.
MAT 13:14 Ma ri kikꞌulumam rike e kuꞌana pachaꞌ rubꞌiꞌim kan ri Dios ruma ri qꞌalajisanel Isaías: Riꞌix tobꞌ kixtanik, na jinta kꞌo kimaj usukꞌ che ri kito; y tobꞌ ne kixtzuꞌnik, na jinta kꞌo kimaj usukꞌ che ri kiwilo.
MAT 13:15 Ma wa tinamit lik uꞌanom ko ri kanimaꞌ; e pachaꞌ lik kꞌayew chike ketanik, y ri kiwach e pachaꞌ yupulik. Jekꞌulaꞌ na jinta kꞌo kakilo, na jinta kꞌo kakito y na jinta kꞌo kakimaj usukꞌ; yey na kakitzelej tane kitzij chinuwach chaꞌ jelaꞌ kebꞌenukunaj xchaꞌ.
MAT 13:16 »Noꞌj riꞌix lik nim iqꞌij iwalaxik, ma ri Dios kuya chiwe kiwilo y kita janipa ri kuꞌan Rire wuma riꞌin.
MAT 13:17 Paqatzij wi kambꞌiꞌij chiwe: Ojertan ukꞌiyal qꞌalajisanelabꞌ y tikawex jusukꞌ kibꞌinik kisilabꞌik lik xkaj kakil bꞌi janipa ri kiwil riꞌix woꞌora; pero na xkimaj ta chi rilik bꞌi. Lik xkaj kakita bꞌi janipa ri kita riꞌix woꞌora, pero na xkimaj ta chi utayik bꞌi.
MAT 13:18 »Chita kꞌut saꞌ keꞌelawi ri kꞌambꞌal naꞌoj puwi ri awanel.
MAT 13:19 Rijaꞌ xtzaq kan chuchiꞌ ri bꞌe, e pachaꞌ ri tikawex ketaw re ri chꞌaꞌtem chwi rutaqanik ri Dios yey na kakimaj ta usukꞌ. Kakꞌun kꞌu lo ritzel winaq y karesaj bꞌi ri chꞌaꞌtem xtikiꞌ pa kanimaꞌ.
MAT 13:20 »Rijaꞌ xtzaq kan pa taq abꞌaj, e pachaꞌ ri tikawex kakita Ruchꞌaꞌtem ri Dios y kakikoj rukꞌ kiꞌkotemal.
MAT 13:21 Pero ruma na e tikil ta chi utz, na kekowin taj. Ma echiriꞌ kakꞌun lo kꞌambꞌal kipa o keternabꞌex rukꞌ kꞌax ruma kikꞌulum Ruchꞌaꞌtem ri Dios, kepajtaj kꞌu riꞌ.
MAT 13:22 »Rijaꞌ xtzaq kan pa taq kꞌiix e pachaꞌ ri tikawex kakita Ruchꞌaꞌtem ri Dios. Pero rubꞌis kikꞌuꞌx chwi taq ri kajawax chike, rukꞌ ri sokosoꞌnik re taq ri bꞌeyomalil, kusachisaj uwach Ruchꞌaꞌtem ri Dios kꞌo pa kanimaꞌ. Ruma kꞌu riꞌ, na jinta kꞌana kijiqꞌobꞌalil kilitaj che ri kibꞌinik.
MAT 13:23 »Noꞌj rijaꞌ xtzaq kan pa chomilaj ulew e pachaꞌ ri tikawex kakita Ruchꞌaꞌtem ri Dios, lik kakimaj usukꞌ y lik kꞌo kꞌu kijiqꞌobꞌalil kilitaj che ri kibꞌinik. E jelaꞌ pachaꞌ rijaꞌ lik xuꞌan reqaꞌn; kꞌo ne jujun raqan xuya jun ciento, kꞌo jujun chik xuya sesenta y kꞌo xuya treinta —xcha ri Jesús.
MAT 13:24 Ri Jesús xutzijoj tanchi jun kꞌambꞌal naꞌoj chike: «Ri kuꞌana pa rutaqanik ri Dios petinaq chilaꞌ chikaj e jelaꞌ pachaꞌ ri xuꞌano echiriꞌ jun achi xutik chomilaj ijaꞌ trigo chwa ri rulew.
MAT 13:25 Ekꞌuchiriꞌ kewar konoje ri tikawex, xopon jun achi tzel karil ri rajaw rulew; xeꞌlaqꞌay kꞌu riꞌ xutik kan raqꞌes cizaña chuxoꞌl ri trigo y xeꞌek kꞌut.
MAT 13:26 Xel kꞌu lo ri trigo y echiriꞌ xpoqꞌik, xqꞌalajin raqꞌes kꞌo chupa.
MAT 13:27 Ekꞌu ri aj chakibꞌ xeꞌkibꞌiꞌij che ri rajaw ri tikoꞌn: “Qajawal, we chomilaj ijaꞌ xeꞌtika la chwa rulew la, ¿pachawi kꞌu riꞌ xpe wi raqꞌes xel lo chupa?”
MAT 13:28 »Yey ri rajaw ri tikoꞌn xubꞌiꞌij chike: “Kꞌo junoq laꞌ tzel kinrilo xoluꞌtika chupa.” Xkibꞌiꞌij kꞌu ri raj chakibꞌ che: “We kaꞌaj la, keꞌqamichꞌa ronoje raqꞌes chupa.”
MAT 13:29 »Ekꞌu ri rajaw ri tikoꞌn xubꞌiꞌij chike: “Na kiꞌmichꞌa taj; ma we ximichꞌ raqꞌes, kꞌaxtaj kimichꞌ ri trigo rukꞌ.
MAT 13:30 Chiyaꞌa luwar chekꞌiy na junam, kopon na ruqꞌijol ri molonik. Ma kꞌa e chiriꞌ kebꞌenutaq ri waj chak chaꞌ kakimol na raqꞌes nabꞌe, kakiꞌan chiyataꞌj y kakixim upa re kaporoxik. Tekꞌuchiriꞌ, kakimol ri trigo y keꞌkiyaꞌa pa kakꞌoliꞌ wi ri trigo weꞌin”» xchaꞌ.
MAT 13:31 Ri Jesús xutzijoj tanchi jun kꞌambꞌal naꞌoj chike: «Rutaqanik ri Dios petinaq chilaꞌ chikaj e pachaꞌ juna ijaꞌ re moxtasa xutik jun achi chwa ri rulew.
MAT 13:32 Paqatzij wi, laꞌ liꞌjaꞌ e más chꞌutiꞌn chwa taq rijaꞌ; noꞌj we xkꞌiyik, más kanimar chwa taq raqꞌes y kuꞌana pachaꞌ jun cheꞌ. Kekꞌun ne ri tzꞌikin kexikꞌikꞌ che ruwa kaj y kakiꞌan kisok puwi taq ruqꞌabꞌ» xchaꞌ.
MAT 13:33 Ri Jesús xutzijoj wa jun chik kꞌambꞌal naꞌoj chike: «Rutaqanik ri Dios petinaq chilaꞌ chikaj e pachaꞌ ri levadura. Ma echiriꞌ juna ixoq kuꞌan pam, kukꞌam jubꞌiqꞌ levadura y kutuk chuxoꞌlibꞌal oxibꞌ pajbꞌal harina; yey ri levadura kusipowirisaj upa ronoje ri qꞌor» xchaꞌ.
MAT 13:34 Ri Jesús xukꞌut ronoje waꞌ chike ri winaq rukꞌ taq kꞌambꞌal naꞌoj y na jinta kꞌo xukꞌutu we na rukꞌ ta kꞌambꞌal naꞌoj xuꞌano.
MAT 13:35 E xuꞌan waꞌ chaꞌ e kuꞌana rubꞌiꞌim kan ri jun qꞌalajisanel echiriꞌ xutzꞌibꞌaj: Rukꞌ taq kꞌambꞌal naꞌoj kinkꞌutunik; e kanqꞌalajisaj ri na etaꞌmatal ta chwi lo ri jeqebꞌal re ruwachulew xchaꞌ.
MAT 13:36 Ekꞌuchiriꞌ, ri Jesús xebꞌuchꞌaꞌbꞌej kan ri winaq y xok bꞌi pa ja. Xeqibꞌ kꞌu rutijoꞌn rukꞌ y xkitzꞌonoj che: —Qajawal, qꞌalajisaj la chiqe saꞌ keꞌelawi ri kꞌambꞌal naꞌoj puwi raqꞌes cizaña —xechaꞌ.
MAT 13:37 Ekꞌu ri Jesús xukꞌul uwach: —Rachi katikow re ri chomilaj ijaꞌ e Ralaxel Chikixoꞌl Tikawex.
MAT 13:38 Rulew pa katik wi ri tikoꞌn e ruwachulew. Ri chomilaj ijaꞌ e taq ri tikawex e kꞌo chupa rutaqanik ri Dios. Rijaꞌ re raqꞌes cizaña e taq ri tikawex eteran chirij ritzel winaq.
MAT 13:39 Ri jun itzel ukꞌuꞌx xutik raqꞌes e ritzel winaq. Ri molonik e ri kꞌisbꞌal re ruwachulew, yey ri keꞌanaw re ri molonik e ri ángeles.
MAT 13:40 »Jekꞌulaꞌ pachaꞌ ri kaꞌan che raqꞌes cizaña, kamolik y kaporox pa aqꞌ, jelaꞌ ri kuꞌana che ri kꞌisbꞌal re ruwachulew.
MAT 13:41 Ralaxel Chikixoꞌl Tikawex kebꞌutaq bꞌi ru ángeles chaꞌ kekimolo y kekesaj chupa rutaqanik konoje ri ekiminom jujun chik pa mak y ri kakiꞌan ri na utz taj.
MAT 13:42 Kebꞌekikꞌaq bꞌi pa ri orna kajomow aqꞌ chupa; chiriꞌ kꞌu riꞌ kebꞌoqꞌ wi y kaqichꞌichꞌ ruwi keꞌ.
MAT 13:43 Noꞌj ri jusukꞌ kibꞌinik kisilabꞌik e jelaꞌ pachaꞌ ri qꞌij kewon chilaꞌ pa kataqan wi ri kiqaw Dios. China kꞌu ri kꞌo utanibꞌal che utayik, ¡chuta kꞌu riꞌ! —xchaꞌ.
MAT 13:44 «Rutaqanik ri Dios petinaq chilaꞌ chikaj e pachaꞌ jun bꞌeyomalil ewatal kan chupa juna ulew. Kꞌo kꞌu jun achi keꞌtzaq lo puwiꞌ y karewaj tanchi kanoq. Keꞌek kꞌu chirocho y kuꞌkꞌayij ronoje rubꞌitaq re; tekꞌuchiriꞌ, kuloqꞌ ri ulew pa kꞌo wi ri bꞌeyomalil.
MAT 13:45 »Rutaqanik ri Dios petinaq chilaꞌ chikaj e pachaꞌ ri kuꞌan juna aj kꞌay kutzukuj taq chomilaj abꞌaj perla.
MAT 13:46 Ekꞌuchiriꞌ kuriq juna chomilaj perla lik kꞌi rajil, keꞌek y kuꞌkꞌayij ronoje rubꞌitaq re; tekꞌuchiriꞌ, kuloqꞌ ri chomilaj abꞌaj perla.
MAT 13:47 »Ri kuꞌan chupa rutaqanik ri Dios petinaq chilaꞌ chikaj e pachaꞌ ri kuꞌano echiriꞌ kakꞌaq bꞌi juna atarraya pa ri mar chaꞌ kebꞌuꞌchapa lo ukꞌiyal kiwach taq kar.
MAT 13:48 »Echiriꞌ nojinaq chi ri atarraya che kar, raj chapal kar kakesaj lo chuchiꞌ ri mar, ketzꞌuyiꞌ kꞌut y kekichaꞌ kipa ri kar. E taq kꞌu ri utzilaj kar, kekiya pa chakach; noꞌj taq kꞌu ri na e ta utz, kekikꞌaq bꞌi.
MAT 13:49 »Jekꞌulaꞌ kuꞌana che ri kꞌisbꞌal re ruwachulew. Kebꞌel bꞌi ri ángeles y kekesaj kꞌu ri tikawex itzel kikꞌuꞌx chikixoꞌl ri e jusukꞌ chwach ri Dios.
MAT 13:50 Kebꞌekikꞌaq kꞌu bꞌi pa ri orna kajomow aqꞌ chupa; chiriꞌ kꞌu riꞌ kebꞌoqꞌ wi y kaqichꞌichꞌ ruwi keꞌ» xchaꞌ.
MAT 13:51 Ekꞌuchiriꞌ, ri Jesús xutzꞌonoj chike: —¿Kimaj usukꞌ riꞌix ronoje taq waꞌ? —xchaꞌ. Rike xkikꞌul uwach che ri Jesús: —Kaqamaj usukꞌ, Qajawal —xechaꞌ.
MAT 13:52 Ekꞌu ri Jesús xubꞌiꞌij chike: —E juna aj kꞌutunel re ri tzijpixabꞌ, we lik kꞌo kumaj chwi rutaqanik ri Dios petinaq chilaꞌ chikaj, e pachaꞌ juna achi rajaw ja karesaj lo che rubꞌeyomalil ukꞌolom, taq ri kꞌakꞌ y ri xex chi kꞌo wi; yey ukabꞌichal waꞌ kuchapabꞌej. Ma ri aj kꞌutunel kakꞌutun chwi taq ri kꞌakꞌ umajom, junam rukꞌ taq ri xex chi umajom loq —xchaꞌ.
MAT 13:53 Ri Jesús echiriꞌ xukꞌis ubꞌiꞌxik taq wa kꞌambꞌal naꞌoj chike, xel bꞌi chiriꞌ.
MAT 13:54 Echiriꞌ xopon pa rutinamit, xujeq kakꞌutun chiriꞌ pa ri sinagoga. Ekꞌu ri winaq lik xkam kanimaꞌ che y xkibꞌiꞌij: —¿Pa xuꞌmaja wi waꞌchi luꞌnaꞌoj? ¿Suꞌanik kuꞌan taq wa milagros?
MAT 13:55 ¿Na e ta nebꞌa ukꞌajol waꞌ ri jun carpintero yey ralabꞌ ri María? ¿Na e ta nebꞌa katzixel ri Jacobo, ri José, ri Simón y ri Judas?
MAT 13:56 ¿Na ejeqel ta nebꞌa ri ranabꞌ wara chiqaxoꞌl? ¿Pa kꞌu xuꞌmaja wi ronoje taq riꞌ wa kuꞌano? —xechaꞌ.
MAT 13:57 Ewi lik e kꞌi tzel xkita ri xubꞌiꞌij. Noꞌj ri Jesús xubꞌiꞌij chike: —Chupa ronoje luwar kayak uqꞌij juna qꞌalajisanel; noꞌj chupa rutinamit o chikiwach ri ratz-uchaqꞌ, na kayak ta uqꞌij —xchaꞌ.
MAT 13:58 Y ri Jesús na xuꞌan ta ukꞌiyal milagros chiriꞌ ruma na xkikoj taj china Rire.
MAT 14:1 Chupa kꞌu laꞌ la qꞌij, ri Herodes ri rey re Galilea xuta puwi ri chom uchꞌaꞌtibꞌexik ri Jesús.
MAT 14:2 Ri Herodes xubꞌiꞌij kꞌu chike ri raj chakibꞌ: «Laꞌ e Juan Aj Yaꞌl Bautismo xkꞌastaj lo chikixoꞌl ri ekaminaq; e uwariꞌche kꞌo uchuqꞌabꞌ che uꞌanik wa milagros» xchaꞌ.
MAT 14:3 Xubꞌiꞌij waꞌ ma e rire ri xutaq uchapik ri Juan chaꞌ kayaꞌiꞌ pa karena y keyoꞌq pa cárcel. Xuꞌan waꞌ ri Herodes ma ri Juan xuchꞌaꞌbꞌej upa ruma uꞌanom rixoqil che ri Herodías, yey waꞌ wiꞌxoq e rixoqil ri Felipe ruchaqꞌ ri Herodes.
MAT 14:4 Jewaꞌ ri xubꞌiꞌij ri Juan che: «Lik na ubꞌe taj ꞌanom ixoqil la che ri rixoqil ri chaqꞌ la» xchaꞌ.
MAT 14:5 Ruma kꞌu waꞌ ri Herodes lik xraj kukamisaj ri Juan, noꞌj lik kuxiꞌij ribꞌ chike ri tinamit ma chikiwach rike ri Juan e jun qꞌalajisanel re ri Dios.
MAT 14:6 Ekꞌuchiriꞌ xukꞌis ujunabꞌ ri Herodes, xꞌaniꞌ jun nimaqꞌij. Ekꞌu ri ralit rixoq Herodías xajaw chikiwach ri esikꞌim pa ri nimaqꞌij, y waꞌ lik xukꞌul ukꞌuꞌx ri Herodes.
MAT 14:7 Ruma kꞌu riꞌ, xubꞌiꞌtisij kuya che rali tobꞌ saꞌ ri karaj kutzꞌonoj, y lik xujikibꞌaꞌ uwach kuꞌan waꞌ.
MAT 14:8 Ekꞌu rali nabꞌe na xuꞌtzꞌonoj che ruchu y waꞌ xuya lo itzel naꞌoj che. Xubꞌiꞌij kꞌu rali che ri Herodes: «Yaꞌa la rujolom ri Juan Aj Yaꞌl Bautismo chwe pa juna plato» xchaꞌ.
MAT 14:9 Ri rey lik xbꞌisonik ruma ri xtzꞌonox che. Noꞌj ruma kꞌu ri xujikibꞌaꞌ uwach che rali chikiwach konoje ri e kꞌo rukꞌ pa ri waꞌim, xtaqan kꞌu che chaꞌ kayaꞌiꞌ na che rali ri kutzꞌonoj.
MAT 14:10 Xtaqan kꞌu che kakꞌatzix rujolom ri Juan pa ri cárcel.
MAT 14:11 Jelaꞌ xkꞌam lo rujolom ri Juan pa jun plato, xyaꞌ kꞌu che rali y rali xuꞌyaꞌa che ruchu.
MAT 14:12 Tekꞌuchiriꞌ, rutijoꞌn ri Juan xoꞌlkikꞌama rucuerpo y xeꞌkimuquꞌ. Xebꞌek kꞌut, xeꞌkibꞌiꞌij che ri Jesús saꞌ ri xukꞌulumaj ri Juan.
MAT 14:13 Echiriꞌ ri Jesús xretaꞌmaj puwi rukamik ri Juan, xok bꞌi pa jun barco re keꞌek pa jun luwar katzꞌintzꞌotik pa na e jinta wi winaq. Yey ri winaq echiriꞌ xketaꞌmaj, xebꞌel lo pa taq ri tinamit y chaqan xebꞌek chaꞌ koꞌlkiriqa ri Jesús.
MAT 14:14 Echiriꞌ ri Jesús xel lo pa ri barco, xrilo e kꞌo chi ukꞌiyal winaq chiriꞌ. Lik kꞌut xejuchꞌ kaꞌn pa ranimaꞌ y xebꞌukunaj konoje ri e yewaꞌibꞌ chike.
MAT 14:15 Ekꞌuchiriꞌ ya kok raqꞌabꞌ, rutijoꞌn ri Jesús xeqibꞌ rukꞌ y xkibꞌiꞌij che: —Qajawal, wa luwar oj kꞌo wi lik katzꞌintzꞌotik y bꞌenaq qꞌij chik. Utz we ketaq bꞌi la ri winaq chaꞌ kebꞌek pa taq raldeas re keꞌkiloqꞌo kiwa —xechaꞌ.
MAT 14:16 Noꞌj ri Jesús xubꞌiꞌij chike: —Na kajawax taj kebꞌek; chebꞌitzuqu riꞌix —xchaꞌ.
MAT 14:17 Rike xkibꞌiꞌij che ri Jesús: —Na kꞌi ta ri waꞌim qukꞌaꞌam, xew woꞌobꞌ pam y kaꞌibꞌ kar kꞌo qukꞌ —xechaꞌ.
MAT 14:18 Xubꞌiꞌij kꞌu ri Jesús chike: —Chikꞌama lo laꞌ chwe —xchaꞌ.
MAT 14:19 Ekꞌuchiriꞌ, xtaqan che ketzꞌuyiꞌ ri winaq pa taq ri kꞌim. Xukꞌam kꞌu ri woꞌobꞌ pam rukꞌ ri kaꞌibꞌ kar, xtzuꞌn chikaj y xtioxin chwach ri Dios. Tekꞌuchiriꞌ, xuwechꞌ upa ri pam, xuya chike rutijoꞌn y rike xkijach chike ri winaq.
MAT 14:20 Konoje kꞌu ri winaq xewaꞌik y xenoj chi utz. Tekꞌuchiriꞌ, xkimol ri chꞌaqaꞌtaꞌq kiqax y rukꞌ waꞌ xnoj lo kabꞌlajuj chakach.
MAT 14:21 Ri xewaꞌik laj e lo woꞌobꞌ mil chi achijabꞌ yey na xebꞌajilax tane rixoqibꞌ y rakꞌalabꞌ.
MAT 14:22 Tekꞌuchiriꞌ, ri Jesús xebꞌutaq rutijoꞌn chaꞌ kebꞌok bꞌi chupa ri barco, kenabꞌej bꞌi chwach y keqꞌax kꞌa chꞌaqa yaꞌ xaloqꞌ Rire kebꞌuchꞌaꞌbꞌej taq kan rukꞌiyal winaq.
MAT 14:23 Echiriꞌ ebꞌuchꞌaꞌbꞌem chi kanoq, xpaqiꞌ chwa ri juyubꞌ chaꞌ kuꞌana orar. Xok kꞌu raqꞌabꞌ, y ri Jesús utukel kꞌo chiriꞌ.
MAT 14:24 Ekꞌu ri barco pa ebꞌenaq wi rutijoꞌn kꞌo chi pan chunikꞌajal ri mar, yey kꞌo kꞌu jun kaqjiqꞌ lik kuroj ribꞌ che ri barco, ma waꞌ pubꞌe ri kaqjiqꞌ bꞌenaq wi.
MAT 14:25 Lik anim tan kꞌut, ri Jesús xeꞌek kukꞌ rutijoꞌn, e riꞌ kabꞌin chwi ri mar.
MAT 14:26 Rutijoꞌn echiriꞌ xkilo kabꞌin ri Jesús chwi ri mar, lik xsach kinaꞌoj che, xesikꞌin kꞌu rukꞌ xiꞌin ibꞌ: —¡Leꞌ jun espíritu! —xechaꞌ.
MAT 14:27 Ekꞌu ri Jesús xchꞌaw chike, jewaꞌ xubꞌiꞌij: —Chinimarisaj ikꞌuꞌx, ma riꞌin in Jesús; mixiꞌij kꞌu iwibꞌ —xchaꞌ.
MAT 14:28 Ekꞌuchiriꞌ, xchꞌaw pan ri Pedro che, jewaꞌ xubꞌiꞌij: —Wajawal, we qatzij e rilal, bꞌiꞌij la chwe kinꞌek ukꞌ la, e laꞌ kimbꞌin chwi ri mar kꞌa pa kꞌo wi la —xchaꞌ.
MAT 14:29 Ri Jesús xubꞌiꞌij che: —Chatpeta riꞌ —xchaꞌ. Ekꞌuchiriꞌ ri Pedro xel bꞌi pa ri barco, xujeqo kabꞌin chwi ri mar chaꞌ keꞌek pa kꞌo wi ri Jesús.
MAT 14:30 Pero echiriꞌ xril ruchuqꞌabꞌ ri kaqjiqꞌ, xok xiꞌin ibꞌ rukꞌ y xujeq e riꞌ kamuqutajik. Xsikꞌin kꞌu pan riꞌ che ri Jesús, jewaꞌ xubꞌiꞌij: —¡Chinkolobꞌej la, Wajawal! —xchaꞌ.
MAT 14:31 Na jampatana ri Jesús xuchapalaꞌ pan che ruqꞌabꞌ y xubꞌiꞌij che: —Pedro, ¡na nim ta kꞌana ri kubꞌulibꞌal akꞌuꞌx wukꞌ! ¿Suꞌbꞌe xuxiꞌij ribꞌ akꞌuꞌx? —xchaꞌ.
MAT 14:32 Echiriꞌ ri Jesús y ri Pedro xebꞌok chupa ri barco, xtaniꞌ ri kaqjiqꞌ chwi ri mar.
MAT 14:33 Ekꞌuchiriꞌ, ri e kꞌo pa ri barco xeqibꞌ rukꞌ ri Jesús y xkiloqꞌnimaj uqꞌij, jewaꞌ xkibꞌiꞌij: —Paqatzij wi lal Ukꞌajol ri Dios —xechaꞌ.
MAT 14:34 Echiriꞌ xeqꞌax chꞌaqa yaꞌ, xebꞌopon pa ri luwar re Genesaret.
MAT 14:35 Ri winaq, echiriꞌ xkito kꞌo ri Jesús chiriꞌ, xkitaq ubꞌiꞌxikil pa taq ronoje laꞌ la luwar. Xekikꞌam kꞌu lo konoje ri yewaꞌibꞌ pa kꞌo wi ri Jesús.
MAT 14:36 Lik xebꞌelaj kꞌu che ri Jesús chaꞌ kuya luwar chike tobꞌ xew kakichap ruchiꞌ ruqꞌuꞌ. Konoje kꞌu ri xebꞌanaw waꞌ, xekunutajik.
MAT 15:1 Ekꞌuchiriꞌ, jujun chike ri fariseos y raj kꞌutunel re ri tzijpixabꞌ e petinaq Jerusalem, xeqibꞌ rukꞌ ri Jesús y xkitzꞌonoj che:
MAT 15:2 —¿Suꞌchak ri tijoꞌn la kakipalajij ri kikꞌutuꞌn kan ri qatiꞌ-qamam? Ma rike na kakichꞌaj ta ri kiqꞌabꞌ nabꞌe na echiriꞌ kewaꞌik —xechaꞌ.
MAT 15:3 Ekꞌu ri Jesús xutzꞌonoj chike: —¿Suꞌchak ralaq kapalajij alaq Rutzij Upixabꞌ ri Dios ruma e kaꞌan alaq taq ri kikꞌutuꞌn kan ri mam alaq?
MAT 15:4 Ma ri Dios jewaꞌ xtaqan che: Chaloqꞌoj kiqꞌij rachu-aqaw yey We kꞌo junoq kebꞌuyaj ruchu-uqaw rukꞌ itzel chꞌaꞌtem, riꞌ lik taqal che kakamisaxik xcha ri Dios.
MAT 15:5 »Noꞌj ralaq kabꞌiꞌij alaq: “Utz we junoq kubꞌiꞌij chike ruchu-uqaw: Na utz taj kantoꞌ alaq, ma ri toꞌbꞌal kajawax che alaq, nubꞌiꞌtisim chik re nuqasaꞌn chwach ri Dios.”
MAT 15:6 Yey chiwach ralaq, china ri kabꞌiꞌn re waꞌ, na chirajawaxik ta chi che kebꞌutoꞌ ruchu-uqaw. Jekꞌulaꞌ ꞌanom alaq che Rutzij Upixabꞌ ri Dios pachaꞌ na jinta uchak, ma e taqem alaq ri xa noꞌjibꞌal alaq.
MAT 15:7 »¡Xa kebꞌ palaj alaq! Lik kꞌu qatzij ri ubꞌiꞌim lo ri Dios pawiꞌ alaq ruma ri qꞌalajisanel Isaías, echiriꞌ xubꞌiꞌij:
MAT 15:8 Waꞌ wa tinamit xa rukꞌ ruwakeꞌ kakiyak nuqꞌij, noꞌj ri kanimaꞌ lik naj kꞌo wi chwe.
MAT 15:9 Na jinta kꞌana kutiqoj kakiloqꞌoj nuqꞌij, ma ri kꞌutunik kakiꞌano xa taqanik ke achijabꞌ —xchaꞌ.
MAT 15:10 Ekꞌuchiriꞌ, xebꞌusikꞌij rukꞌiyal winaq y xubꞌiꞌij chike: —Lik tape alaq y lik maja alaq usukꞌ waꞌ:
MAT 15:11 Ri kok bꞌi puchiꞌ ri tikawex na e ta ri kachꞌulan re; noꞌj ri chꞌaꞌtem kel lo puchiꞌ, e waꞌ ri kachꞌulan re —xchaꞌ.
MAT 15:12 E taq kꞌu rutijoꞌn xeqibꞌ rukꞌ y xkibꞌiꞌij che: —Qajawal, ¿xetaꞌmaj la lik xpe koyowal ri fariseos echiriꞌ xkita ri xbꞌiꞌij la? —xechaꞌ.
MAT 15:13 Ri Jesús xukꞌul uwach: —Waꞌ waꞌchijabꞌ na jinta runaꞌoj ri Dios kukꞌ, pachaꞌ e tikoꞌn na e ta tikom ruma ri Nuqaw kꞌo chilaꞌ chikaj; ruma kꞌu riꞌ, kamichꞌ bꞌi kꞌa pa ratzꞌayaq.
MAT 15:14 Mixok il chike, ma rike pachaꞌ e potzꞌ e kꞌamal kiwach kach e potzꞌ. Yey we juna potzꞌ kukꞌam uwach juna chik potzꞌ, kikabꞌichal kꞌu riꞌ kebꞌeꞌtzaq bꞌi pa siwan —xchaꞌ.
MAT 15:15 Ekꞌuchiriꞌ, ri Pedro xubꞌiꞌij che ri Jesús: —Qꞌalajisaj la chiqe saꞌ keꞌelawi wa jun kꞌambꞌal naꞌoj —xchaꞌ.
MAT 15:16 Xubꞌiꞌij kꞌu ri Jesús chike: —¿Ix nebꞌa kukꞌil ri na jinta kinaꞌoj puwi waꞌ?
MAT 15:17 ¿Na kimaj ta nebꞌa usukꞌ? Ma e janipa ri kok bꞌi puchiꞌ ri tikawex keꞌek pa rupa y tekꞌuchiriꞌ, kuꞌpamaj bꞌi.
MAT 15:18 Noꞌj ri chꞌaꞌtem kel lo puchiꞌ, pa ranimaꞌ kawinaqir wuloq y ekꞌu waꞌ ri kachꞌulan re ri tikawex.
MAT 15:19 Ma pa ranimaꞌ ri tikawex kel wi lo taq waꞌ: ritzel naꞌoj, ri kamisanik, ri makunik chirij ri kꞌulanikil, ri karetzꞌabꞌej uwa uqꞌij rukꞌ jun chik na ukꞌulel taj, ri eleqꞌ, ri raqꞌubꞌal y ri itzel chꞌaꞌtem chirij junoq.
MAT 15:20 E taq waꞌ ri kachꞌulan ke ri tikawex. Noꞌj ri kawaꞌ junoq yey na kuchꞌaj ta ruqꞌabꞌ nabꞌe, waꞌ na kuchꞌulaj ta rubꞌinik junoq —xchaꞌ.
MAT 15:21 Ri Jesús xel bꞌi chiriꞌ y xopon pa taq ri luwar re Tiro y re Sidón.
MAT 15:22 Kꞌo kꞌu jun ixoq aj Canaán jeqel chiriꞌ, rire kasikꞌinik xkꞌun chwach ri Jesús, jewaꞌ kubꞌiꞌij: —¡Wajawal, lal ri Ralkꞌoꞌal kan ri rey David, chinjuchꞌ kaꞌn ko cheꞌla! Ma kꞌo jun walit lik kꞌax ukꞌulumam ruma kꞌo puqꞌabꞌ jun itzel uxlabꞌixel —xchaꞌ.
MAT 15:23 Noꞌj ri Jesús na xukꞌul ta kꞌana uwach. Ekꞌu rutijoꞌn xeqibꞌ rukꞌ y lik xebꞌelaj che ri Jesús: —Chꞌaꞌbꞌej kan la liꞌxoq ma lik kasikꞌinik teran lo chiqij —xechaꞌ.
MAT 15:24 Ekꞌuchiriꞌ, xubꞌiꞌij ri Jesús: —Riꞌin intaqom lo xew kuma rutinamit ri Dios e aj Israel, ri pachaꞌ e bꞌexex e sachinaq —xchaꞌ.
MAT 15:25 Noꞌj rixoq xqibꞌ rukꞌ ri Jesús, xuxuk ribꞌ chwach y xubꞌiꞌij che: —¡Wajawal, chintoꞌo ko la! —xchaꞌ.
MAT 15:26 Ri Jesús xubꞌiꞌij che: —Na usukꞌ taj we kꞌo junoq kumaj ri kiwa ri ralkꞌoꞌal y kukꞌaq chikiwa ri tzꞌiꞌ —xchaꞌ.
MAT 15:27 Xubꞌiꞌij kꞌu rixoq: —Qatzij, Wajawal, pero ri tzꞌiꞌ kakitij ne rukꞌaj ri wa katzaq chuxeꞌ rumexa ri kajaw —xchaꞌ.
MAT 15:28 Ekꞌuchiriꞌ, xubꞌiꞌij ri Jesús che: —¡Ixoq, lik nim ri kubꞌulibꞌal kꞌuꞌx la! E chuꞌana ukꞌ la saꞌ ri kaꞌaj la —xchaꞌ. Chupa kꞌu riꞌ la joqꞌotaj ri ralit xkunutajik.
MAT 15:29 Ri Jesús xel bꞌi chiriꞌ y xikꞌow chuchiꞌ ri mar re Galilea; tekꞌuchiriꞌ, xaqꞌan chwa ri juyubꞌ y xtzꞌuyiꞌik.
MAT 15:30 Ukꞌiyal kꞌu winaq xebꞌopon chilaꞌ pa kꞌo wi Rire. Yey xekikꞌam lo ri e sik, ri e potzꞌ, ri e meꞌt, ri e tꞌum kaqan kiqꞌabꞌ y ukꞌiyal yewaꞌibꞌ chik. Xekiya kꞌu chwach ri Jesús, y Rire xebꞌukunaj konoje.
MAT 15:31 Ekꞌu ri winaq lik xkam kanimaꞌ che echiriꞌ xkilo xechꞌaw ri e meꞌt, ri e tꞌum kaqan kiqꞌabꞌ kekunutajik, ri e sik kebꞌinik, ri e potzꞌ ketzuꞌnik. Y xkijeq kꞌu kakiyak uqꞌij ri Dios re Israel.
MAT 15:32 Ekꞌuchiriꞌ, ri Jesús xebꞌusikꞌij rutijoꞌn y xubꞌiꞌij chike: —Lik kajuchꞌ kaꞌn nukꞌuꞌx chike wa tikawex, ma e urox qꞌij waꞌ e kꞌo wukꞌ yey na jinta chi kiwa. Na kuaj taj kebꞌenutaq bꞌi chikocho e laꞌ na jinta kꞌo kitijom, ma kꞌaxtaj kebꞌeꞌqꞌochqꞌobꞌ pa bꞌe —xchaꞌ.
MAT 15:33 Xkibꞌiꞌij kꞌu rutijoꞌn che: —¿Pa keꞌqariqa wi wa re kebꞌeqatzuq wa ukꞌiyal tikawex? Ma chupa wa luwar na jinta ne kꞌo e jeqelik —xechaꞌ.
MAT 15:34 Ri Jesús xutzꞌonoj chike: —¿Janipa chi pam kꞌo iwukꞌ? —xchaꞌ. Rike xkibꞌiꞌij: —Wuqubꞌ pam kꞌo qukꞌ y jujun raltaq ko kar —xechaꞌ.
MAT 15:35 Ekꞌuchiriꞌ, ri Jesús xtaqan che ketzꞌuyiꞌ ri tikawex chuꞌlew.
MAT 15:36 Xukꞌam kꞌu ri wuqubꞌ pam puqꞌabꞌ rukꞌ taq ri kar, y xtioxin chwach ri Dios puwi waꞌ. Tekꞌuchiriꞌ xuwechꞌ upa y xuya bꞌi chike rutijoꞌn yey rike xkijach chike ri winaq.
MAT 15:37 Konoje xewaꞌik y lik xenoj chi utz. Tekꞌuchiriꞌ, rukꞌ taq ruqax ri waꞌim xkimolo, xkinojisaj wuqubꞌ chakach.
MAT 15:38 Ri xewaꞌik e kajibꞌ mil chi achijabꞌ yey na xebꞌajilax tane rixoqibꞌ y rakꞌalabꞌ.
MAT 15:39 Ekꞌuchiriꞌ, ri Jesús xebꞌuchꞌaꞌbꞌej kan ri winaq; xok bꞌi pa jun barco y xeꞌek pa taq ri luwar re Magdala.
MAT 16:1 Ri fariseos y ri saduceos xebꞌopon rukꞌ ri Jesús re kakikꞌam upa. Xkitzꞌonoj kꞌu che kuꞌan juna kꞌutubꞌal re chilaꞌ chikaj chikiwach chaꞌ jelaꞌ kaqꞌalajinik we Rire taqom lo ruma ri Dios.
MAT 16:2 Ekꞌu ri Jesús xukꞌul uwach: «Echiriꞌ keꞌek la qꞌij, ralaq kabꞌiꞌij alaq: “Lik utz ri qatiempo ma kaq ruwa kaj.”
MAT 16:3 Echiriꞌ anim tan, kabꞌiꞌij alaq: “Waqꞌij lik na utz ta ri qatiempo. ma kaq ruwa kaj y qꞌeqmuj.” ¡Ralaq xa kebꞌ palaj alaq! Ma kariq alaq uchꞌobꞌik chi utz saꞌ ruꞌanom ruwa kaj, yey na kamaj tane alaq usukꞌ saꞌ taq ri katajin ri Dios che ukꞌutik chiwach alaq waqꞌij ora.
MAT 16:4 Ri kakitzꞌonoj kꞌutubꞌal re ruchuqꞌabꞌ ri Dios e ri winaq re waqꞌij ora, ri itzel kikꞌuꞌx y na jusukꞌ ta ri kanimaꞌ chwach ri Dios. Pero na kayaꞌtaj ta kꞌu waꞌ chike, ma xew kayaꞌiꞌ chikiwach ri kꞌutubꞌal xꞌaniꞌ ojertan rukꞌ ri qꞌalajisanel Jonás» xchaꞌ. Ekꞌuchiriꞌ, xebꞌuya kanoq y xeꞌek.
MAT 16:5 Echiriꞌ xebꞌopon rutijoꞌn chꞌaqa mar, xkꞌun chikikꞌuꞌx na xkikꞌam tubꞌi pam.
MAT 16:6 Xubꞌiꞌij kꞌu ri Jesús chike: —Chitapeꞌ: Lik chichajij iwibꞌ chwa ri levadura ke ri fariseos y ri saduceos —xchaꞌ.
MAT 16:7 Rutijoꞌn xa chikiwach xkibꞌiꞌij: «Rire kubꞌiꞌij waꞌ, ma na xqakꞌam ta lo pam» xechaꞌ.
MAT 16:8 Ri Jesús xretaꞌmaj saꞌ ri kakichꞌaꞌtibꞌej chikiwach, xubꞌiꞌij kꞌu chike: —¡E riꞌix na nim ta kꞌana ri kubꞌulibꞌal ikꞌuꞌx wukꞌ! ¿Suꞌchak e kubꞌisoj ikꞌuꞌx ri na jinta pam iwukꞌaꞌam loq?
MAT 16:9 ¿Kꞌamajaꞌ nebꞌa kimaj usukꞌ? ¿Na kakꞌun ta nebꞌa chikꞌuꞌx echiriꞌ xebꞌenutzuq ri woꞌobꞌ mil chi achijabꞌ rukꞌ woꞌobꞌ pam y janipa lo chakach xinojisaj rukꞌ ri kiqax?
MAT 16:10 ¿Yey na kakꞌun ta nebꞌa chikꞌuꞌx echiriꞌ xebꞌenutzuq kajibꞌ mil chi achijabꞌ rukꞌ wuqubꞌ pam y janipa lo chakach xinojisaj rukꞌ ri kiqax?
MAT 16:11 ¿Chaꞌtaj na ximaj ta usukꞌ na e ta chwi ri pam xinchꞌaꞌt wi echiriꞌ ximbꞌiꞌij: “Chichajij iwibꞌ che ri levadura ke ri fariseos y ri saduceos”? —xchaꞌ.
MAT 16:12 Kꞌa ekꞌuchiriꞌ xkimaj usukꞌ na chwi ta ri levadura re ri pam xchꞌaꞌt wi ri Jesús, ma e chwi ri kikꞌutunik ri fariseos y ri saduceos.
MAT 16:13 Kꞌo jun qꞌij xebꞌopon ri Jesús che taq ri luwar re ri tinamit Cesarea re Filipo, y xutzꞌonoj kꞌu chike rutijoꞌn: —Chikiwa ri winaq, ¿china nawi Ralaxel Chikixoꞌl Tikawex? —xchaꞌ.
MAT 16:14 Rutijoꞌn xkibꞌiꞌij che: —Kꞌo kebꞌiꞌn re e Juan Aj Yaꞌl Bautismo; jujun chik kakibꞌiꞌij e Elías; y jujun chik, e Jeremías o junoq chik chike ri qꞌalajisanelabꞌ re ojertan —xechaꞌ.
MAT 16:15 Ekꞌuchiriꞌ, xubꞌiꞌij chike rutijoꞌn: —Yey chiwach riꞌix, ¿in china riꞌin? —xchaꞌ.
MAT 16:16 Ekꞌu ri Simón Pedro xubꞌiꞌij che: —Rilal lal ri Cristo, lal Rukꞌajol ri Dios kꞌaslik —xchaꞌ.
MAT 16:17 Ri Jesús xukꞌul uwach: —Lik nim aqꞌij awalaxik riꞌat Simón at ukꞌajol ri Jonás; ma na e ta juna tikawex xqꞌalajisan waꞌ chawe, e ri Nuqaw kꞌo chilaꞌ chikaj.
MAT 16:18 Riꞌin kambꞌiꞌij kꞌu chawe: Riꞌat at Pedro. Y chwi kꞌu waꞌ waꞌbꞌaj kantik wubꞌi ri nu iglesia, yey ruchuqꞌabꞌ ri kamik na kuchꞌij tane kꞌana usachik uwach ri nu iglesia.
MAT 16:19 Y riꞌin kanya paqꞌabꞌ riꞌat ri lawe re rutaqanik ri Dios petinaq chilaꞌ chikaj. Ekꞌu janipa ri kaxim wara che ruwachulew, kaximitaj chilaꞌ chikaj; yey janipa ri kakir wara che ruwachulew, kakiritaj chilaꞌ chikaj —xchaꞌ.
MAT 16:20 Ekꞌu ri Jesús xebꞌutaq rutijoꞌn che chaꞌ na kakitzijoj ta kꞌana che junoq we Rire e ri Cristo, Ruchaꞌoꞌn lo ri Dios.
MAT 16:21 Chwi kꞌu riꞌ, ri Jesús xujeq uqꞌalajisaxik chike rutijoꞌn janipa ri kukꞌulumaj: E lik chirajawaxik che keꞌek Jerusalem, kayaꞌiꞌ na kꞌu pa kꞌax kuma taq ri nimaq winaq re Israel, ri nimaq e aj chakunel pa Rocho Dios y raj kꞌutunel re ri tzijpixabꞌ, yey kakamisaxik; noꞌj churox qꞌij kakꞌastaj loq.
MAT 16:22 Ekꞌu ri Pedro xresaj bꞌi ri Jesús chikixoꞌl y xuchꞌaꞌbꞌej upa, jewaꞌ xubꞌiꞌij che: —¡Wajawal, lik ne muya luwar riꞌ ri Dios e kakꞌulumaj la waꞌ! —xchaꞌ.
MAT 16:23 Ekꞌu ri Jesús xutzuꞌ lo uwach ri Pedro y xubꞌiꞌij che: —¡Chatel chinuwach, Satanás! Riꞌat at latzꞌanel chwe, ma na e ta kachꞌobꞌ puwi ri uchꞌobꞌom lo ri Dios, xew e kachꞌobꞌ jelaꞌ pachaꞌ ri kakichꞌobꞌ ri winaq —xchaꞌ.
MAT 16:24 Ekꞌuchiriꞌ, xubꞌiꞌij ri Jesús chike rutijoꞌn: —We kꞌo junoq karaj katerej lo chwij, lik chirajawaxik che muꞌan xew ri karaj rire, e chukuyu ri kꞌax kape puwiꞌ ruma ukojom ri nubꞌiꞌ, y tereja lo chwij.
MAT 16:25 Ma china ri na kuya ta ranimaꞌ rukꞌaslem, riꞌ e kujam ri chomilaj kꞌaslemal chwach ri Dios; noꞌj ri kuya ranimaꞌ rukꞌaslem wuma riꞌin, riꞌ e kuriq ri chomilaj ukꞌaslemal chwach ri Dios.
MAT 16:26 Ma ¿saꞌ kꞌu kutiqoj riꞌ che ri tikawex we kuꞌan rajaw ronoje ruwachulew yey kusach kꞌu uwach rukꞌaslemal? ¿O kꞌo nawi rajil kutoj rachi chwa rukꞌaslemal chaꞌ jelaꞌ na kujam taj? ¡Na jintaj!
MAT 16:27 »Ma Ralaxel Chikixoꞌl Tikawex kakꞌun rukꞌ runimal yakbꞌal uqꞌij Ruqaw y kukꞌ taq ru ángeles. Ekꞌuchiriꞌ kuya chike chikijujunal ri tikawex, ri rajil ukꞌaxel e chirij taq ri kiꞌanom.
MAT 16:28 Paqatzij wi kambꞌiꞌij chiwe: E kꞌo jujun chike wa e kꞌo wara na kekam tana we na xkil tubꞌi Ralaxel Chikixoꞌl Tikawex kakꞌun che rutaqanik —xchaꞌ.
MAT 17:1 Waqibꞌ qꞌij kꞌu ubꞌiꞌxikil riꞌ waꞌ echiriꞌ ri Jesús xebꞌuchaꞌ ri Pedro, ri Jacobo y ri Juan ruchaqꞌ ri Jacobo; y xebꞌukꞌam bꞌi chwa jun nimalaj juyubꞌ.
MAT 17:2 Chilaꞌ kꞌut xjalkꞌatitaj uwach ri Jesús chikiwach. Rupalaj lik xwonik jelaꞌ pachaꞌ ruwonibꞌal ri qꞌij; yey ruqꞌuꞌ xujeq kawolqꞌinik jelaꞌ pachaꞌ ri qꞌijsaq.
MAT 17:3 Xaqikꞌateꞌt kꞌut chikiwach xewinaqir ri Moisés y ri Elías, qꞌalajisanelabꞌ re ojertan; e riꞌ kechꞌaꞌt rukꞌ ri Jesús.
MAT 17:4 Ekꞌu ri Pedro xubꞌiꞌij che ri Jesús: —Qajawal, lik utz xyaꞌtaj chiqe riꞌoj oj kꞌo wara. We kaꞌaj la, kaqaꞌan oxibꞌ rancho: jun e la, jun re ri Moisés y jun re ri Elías —xchaꞌ.
MAT 17:5 Kꞌa kachꞌaꞌt ne ri Pedro echiriꞌ jun sutzꞌ lik kawonik xuchꞌuq kiwiꞌ. Y chupa kꞌu ri sutzꞌ xkita ruqul ri Dios, jewaꞌ xubꞌiꞌij: «E Nukꞌajol waꞌ ri lik kꞌax kannaꞌo y lik kinkiꞌkot che. E chita utzij Rire» xchaꞌ.
MAT 17:6 Echiriꞌ rutijoꞌn xkita waꞌ, xexukiꞌik, xkiqasaj kimejelem kꞌa chuꞌlew y xok jun nimalaj xiꞌin ibꞌ kukꞌ.
MAT 17:7 Ekꞌuchiriꞌ, xqibꞌ ri Jesús kukꞌ, xebꞌuchapo y xubꞌiꞌij chike: —Chixyaktajoq, mixiꞌij iwibꞌ —xchaꞌ.
MAT 17:8 Echiriꞌ xetzuꞌn apanoq, na jinta junoq chik xkilo, xew ri Jesús.
MAT 17:9 Ekꞌuchiriꞌ xeqaj lo chwa ri juyubꞌ, ri Jesús xebꞌutaq che: —Mitzijoj kꞌana che junoq janipa ri xkꞌut chiwach, kꞌate kitzijoj echiriꞌ Ralaxel Chikixoꞌl Tikawex kꞌastajinaq chi lo chikixoꞌl ri ekaminaq —xchaꞌ.
MAT 17:10 Ekꞌuchiriꞌ, rutijoꞌn xkitzꞌonoj che: —¿Suꞌbꞌe kꞌut kakibꞌiꞌij raj kꞌutunel re ri tzijpixabꞌ: “Lik chirajawaxik wi kakꞌun na ri Elías nabꞌe”? —xechaꞌ.
MAT 17:11 Ri Jesús xukꞌul uwach: —Qatzij, ri Elías nabꞌe kakꞌunik y kuyijbꞌaꞌ pan ronoje chwach rukꞌunibꞌal Ralaxel Chikixoꞌl Tikawex.
MAT 17:12 Noꞌj kanqꞌalajisaj kꞌu waꞌ chiwe: Ri Elías ya xkꞌunik, yey ri winaq na xketaꞌmaj ta uwach. Xkiꞌan kꞌu riꞌ che janipa ri xkaj rike; jekꞌulaꞌ Ralaxel Chikixoꞌl Tikawex kutij na ri kꞌax pakiqꞌabꞌ rike —xchaꞌ.
MAT 17:13 Ekꞌu rutijoꞌn xketaꞌmaj e kachꞌaꞌt puwi ri Juan Aj Yaꞌl Bautismo.
MAT 17:14 Echiriꞌ xebꞌopon pa e kꞌo wi taq ri winaq, kꞌo jun achi xqibꞌ rukꞌ ri Jesús, xuxuk ribꞌ chwach y xubꞌiꞌij che:
MAT 17:15 —Wajawal, kꞌutu ko ri kꞌaxnaꞌbꞌal kꞌuꞌx la che ri nukꞌajol, ma rire xa kumaj tew y lik kutij kꞌax ruma waꞌ; ukꞌiyal laj tzaqinaq pa aqꞌ y pa yaꞌ.
MAT 17:16 Xinkꞌam lo kukꞌ wa tijoꞌn la, pero rike na kichꞌijom ta ukunaxik —xchaꞌ.
MAT 17:17 Ekꞌu ri Jesús xukꞌul uwach: —¡E ri ix tikawex re waqꞌij ora na kubꞌul ta ikꞌuꞌx wukꞌ yey ix sachinaq! ¿Janipa chi lo qꞌij kajawaxik kinkꞌojiꞌ iwukꞌ chaꞌ kakubꞌiꞌ ikꞌuꞌx wukꞌ? ¿Janipa chi lo qꞌij kixinkuyu e laꞌ jelaꞌ iꞌanom? Chikꞌama lo rala wara —xchaꞌ.
MAT 17:18 Ekꞌuchiriꞌ, ri Jesús xutaq ri itzel uxlabꞌixel chaꞌ kel bꞌi che rala. Y chwi kꞌu riꞌ asu xkunutaj rala.
MAT 17:19 Tekꞌuchiriꞌ, rutijoꞌn ri Jesús xeqibꞌ rukꞌ re kechꞌaꞌt rukꞌ kitukel y xkitzꞌonoj kꞌu che: —¿Suꞌbꞌe riꞌoj na xqachꞌij ta resaxik bꞌi waꞌ wa itzel uxlabꞌixel? —xechaꞌ.
MAT 17:20 Ri Jesús xubꞌiꞌij chike: —E ruma na nim ta ri kubꞌulibꞌal ikꞌuꞌx rukꞌ ri Dios. We ta ri kubꞌulibꞌal ikꞌuꞌx kakꞌiyik jelaꞌ pachaꞌ ri kakꞌiy rijaꞌ re moxtasa, utz ne riꞌ kibꞌiꞌij che wa juyubꞌ: “Chatela bꞌi wara y chatqꞌax pan jelaꞌ”, y e kuꞌanaꞌ. Riꞌ na jinta kꞌayew chiwach riꞌix we ta lik kꞌo kubꞌulibꞌal ikꞌuꞌx.
MAT 17:21 Noꞌj waꞌ wa juchꞌobꞌ itzel uxlabꞌixel xew utz kebꞌesax bꞌi rukꞌ oración y ayuno —xchaꞌ.
MAT 17:22 Ekꞌuchiriꞌ e kꞌo pa taq ri luwar re Galilea, ri Jesús xubꞌiꞌij chike rutijoꞌn: «Ralaxel Chikixoꞌl Tikawex kayaꞌiꞌ pakiqꞌabꞌ rachijabꞌ
MAT 17:23 y kakamisax kuma; noꞌj churox qꞌij kakꞌastaj loq» xchaꞌ. Echiriꞌ xkita waꞌ rutijoꞌn, lik xkibꞌisoj.
MAT 17:24 Echiriꞌ ri Jesús kukꞌ rutijoꞌn xebꞌopon pa ri tinamit Capernaúm, raj tzꞌonol puaq re ri tojonik xeꞌkila ri Pedro y xkitzꞌonoj che: —¿Ri tijonel iweꞌix na kutoj ta kami riꞌ ri tojonik kaꞌanik re ri Rocho Dios? —xechaꞌ.
MAT 17:25 Ekꞌu ri Pedro xubꞌiꞌij: —Rire kutojo —xchaꞌ. Ekꞌuchiriꞌ xok ri Pedro pa ri ja, ri Jesús nabꞌe na xchꞌaw che, jewaꞌ xubꞌiꞌij: —Chawach riꞌat, ¿e juna rey che ruwachulew, china chike kutzꞌonoj wi taq ri tojonik kaꞌanik? ¿Chike ri e ralkꞌoꞌal o chike ri na e ta ralkꞌoꞌal? —xchaꞌ.
MAT 17:26 Xubꞌiꞌij kꞌu ri Pedro: —Chike ri na e ta ralkꞌoꞌal —xchaꞌ. Tekꞌuchiriꞌ, xubꞌiꞌij ri Jesús che: —Ekꞌu ri e ralkꞌoꞌal na jinta kꞌo katzꞌonox chike.
MAT 17:27 Noꞌj chaꞌ na kaqapetisaj ta kꞌu royowal junoq, jat chuchiꞌ ri mar y chakꞌaqa ri anzuelo chupa. Ekꞌu ri nabꞌe kar kachapo, chajaqa rupuchiꞌ y kariq jun meyo chupa. Rukꞌ kꞌu riꞌ, chayaꞌa ri tojonik kanꞌan riꞌin y ri tojonik kaꞌan riꞌat —xchaꞌ.
MAT 18:1 Chupa kꞌu laꞌ la qꞌij, rutijoꞌn ri Jesús xeqibꞌ rukꞌ y xkitzꞌonoj che: —¿China ri más kꞌo uwach chupa rutaqanik ri Dios petinaq chilaꞌ chikaj? —xechaꞌ.
MAT 18:2 Ekꞌuchiriꞌ, ri Jesús xusikꞌij jun ralko kꞌoꞌm y xuya chikinikꞌajal rike.
MAT 18:3 Xubꞌiꞌij kꞌu chike: —Paqatzij wi kambꞌiꞌij chiwe: We na kijalkꞌatij ta ribꞌinik isilabꞌik chaꞌ kixuꞌan pachaꞌ raltaq ko akꞌalabꞌ, na kixok ta riꞌ chupa rutaqanik ri Dios petinaq chilaꞌ chikaj.
MAT 18:4 Jekꞌulaꞌ, china ri kuꞌan chꞌutiꞌn che ribꞌ pachaꞌ wa ralko kꞌoꞌm, e lik kꞌo uwach riꞌ pa rutaqanik ri Dios.
MAT 18:5 Yey china ri kukꞌul chupa ri nubꞌiꞌ junoq na jinta uwach pachaꞌ wa ralko kꞌoꞌm, e junam rukꞌ e in ri kinukꞌulu.
MAT 18:6 »China ri kaminow pa mak junoq chike wa chꞌutiꞌq kubꞌul kikꞌuꞌx wukꞌ, e ne más utz katzayabꞌax bꞌi puqul juna nimalaj kaꞌ re keꞌem y kakꞌaq kꞌu bꞌi pa ri mar chaꞌ kamuqutaj kꞌa chuxeꞌ.
MAT 18:7 ¡Toqꞌoꞌ kiwach ri tikawex ma lik kꞌo ri katzaqisan ke chupa ri na utz taj! Ma che ruwachulew lik kꞌo taq waꞌ. Pero ¡lik toqꞌoꞌ kꞌu uwach ri jun kumin junoq chik pa mak, ma e kape ri qꞌatbꞌal tzij re ri Dios puwiꞌ!
MAT 18:8 »E uwariꞌche, we raqꞌabꞌ o rawaqan e katzaqisan awe pa mak, chaqꞌata bꞌi y chawesaj bꞌi chawe. Ma xa ne kuya tobꞌ at tꞌum o at jetzꞌ katopon pa ri kꞌaslemal chilaꞌ chikaj, chwa ri kꞌo ukabꞌichal raqꞌabꞌ y ukabꞌichal rawaqan yey katkꞌaq bꞌi chi xibꞌalbꞌaꞌ pa kꞌo wi ri aqꞌ na jinta chi uchupik.
MAT 18:9 Yey we rawach e katzaqisan awe pa mak, chawesaj bꞌi y chakꞌaqa bꞌi. Ma xa ne kuya tobꞌ xa jun rawach katopon pa ri kꞌaslemal chilaꞌ chikaj, chwa ri kꞌo ukabꞌichal rawach yey katkꞌaq bꞌi pa aqꞌ chi xibꞌalbꞌaꞌ re tijbꞌal kꞌax.
MAT 18:10 »Mikꞌaq bꞌi uqꞌij junoq chike wa e chꞌutiꞌq kubꞌul kikꞌuꞌx wukꞌ. Ma kambꞌiꞌij kꞌu chiwe, ri ángeles e chajal ke rike xaqi e kꞌo chwach ri Nuqaw Dios chilaꞌ chikaj.
MAT 18:11 Ma Ralaxel Chikixoꞌl Tikawex xkꞌunik re kebꞌukolobꞌej ri e sachinaq.
MAT 18:12 ¿Saꞌ kichꞌobꞌ riꞌix kuꞌan juna achi we kꞌo jun ciento ubꞌexex yey kasach kꞌu junoq chike? ¿Na kebꞌukꞌol ta nebꞌa kan riꞌ ri noventa y nueve y keꞌek chwa ri juyubꞌ che utzukuxik ri jun xsach kanoq?
MAT 18:13 We xuriq kꞌut, paqatzij wi kambꞌiꞌij chiwe: E más kakiꞌkot ruma ri jun bꞌexex chikiwa ri noventa y nueve na e ta sachinaq.
MAT 18:14 Jekꞌuriꞌlaꞌ, ri Nuqaw kꞌo chilaꞌ chikaj na karaj taj kasach junoq chike ri chꞌutiꞌq kubꞌul kikꞌuꞌx wukꞌ.
MAT 18:15 »E uwariꞌche, we rawatz-achaqꞌ kuꞌan ri na utz taj chawe, chatchꞌaꞌt rukꞌ e laꞌ itukel; chabꞌiꞌij che saꞌ ri na utz taj uꞌanom chawe. We xatuta kꞌut, riꞌ xakoj chi utzil chomal rawatz-achaqꞌ.
MAT 18:16 Noꞌj we na xatuta taj, jat tanchi rukꞌ; chakꞌama kꞌu bꞌi jun o kaꞌibꞌ awachbꞌiꞌil awukꞌ chaꞌ jelaꞌ e kebꞌ oxibꞌ che utayik saꞌ ri kabꞌiꞌxik.
MAT 18:17 We na xebꞌuta ta kꞌu wa kebꞌ oxibꞌ, ekꞌuchiriꞌ chatzijoj chikiwach rutinamit ri Dios. Yey we na xok ta kꞌu il chike waꞌ, chiꞌana kꞌu riꞌ che pachaꞌ e kukꞌil ri na ketaꞌam ta uwach ri Dios y e kukꞌil raj tzꞌonol puaq re tojonik.
MAT 18:18 Paqatzij wi kambꞌiꞌij chiwe: Janipa ri kixim riꞌix wara che ruwachulew, kaximitaj chilaꞌ chikaj. Janipa ri kikir riꞌix wara che ruwachulew, kakiritaj chilaꞌ chikaj.
MAT 18:19 Kambꞌiꞌij kꞌu chiwe: We e kꞌo kaꞌibꞌoq chiwe wara che ruwachulew kuꞌan junam kikꞌuꞌx chwi ri kakitzꞌonoj pa oración, ri Nuqaw kꞌo chilaꞌ chikaj kuya na chike.
MAT 18:20 Ma pa kimolom wi kibꞌ kebꞌ oxibꞌ pa ri nubꞌiꞌ, chiriꞌ in kꞌo wi riꞌin chikinikꞌajal rike —xchaꞌ.
MAT 18:21 Ekꞌuchiriꞌ, ri Pedro xqibꞌ rukꞌ ri Jesús y xutzꞌonoj che: —Wajawal, ¿janipa laj kankuy umak juna watz-nuchaqꞌ we xuꞌan ri na utz taj chwe? ¿Kꞌa pa wuqubꞌ laj nawi? —xchaꞌ.
MAT 18:22 Ri Jesús xukꞌul uwach: —Na kambꞌiꞌij ta chawe xa pa wuqubꞌ laj, ma kꞌa wuqubꞌ laj chi setenta.
MAT 18:23 »Ma ri kuꞌan chupa rutaqanik ri Dios petinaq chilaꞌ chikaj e jelaꞌ pachaꞌ ri xuꞌano echiriꞌ juna taqanel xraj karilo we na jinta kikꞌas ri raj chakibꞌ rukꞌ.
MAT 18:24 Ekꞌu riꞌ xujeq rajilaxik, xriqitaj lo jun aj chak lik ukꞌiyal rukꞌas rukꞌ y xkꞌam lo chwach.
MAT 18:25 Ekꞌu wa aj chak ruma na kuchꞌij ta chi utojik rukꞌas, xtaqan rupatrón che chaꞌ kakꞌayix bꞌi rire, junam rukꞌ ri rixoqil, ri ralkꞌoꞌal y rukꞌ ronoje rubꞌitaq re chaꞌ jelaꞌ katojtaj rukꞌas.
MAT 18:26 Pero wa aj chak xuxukubꞌaꞌ ribꞌ chwach rupatrón y lik kꞌu xutzꞌonoj che: “Lal wajaw, lik chinoyꞌej ko kꞌana la ma kantoj ronoje ri nukꞌas cheꞌla” xchaꞌ.
MAT 18:27 Ekꞌu rupatrón lik xjuchꞌ kaꞌn ukꞌuꞌx che ri raj chak. Xukuy kꞌu umak che ronoje rukꞌas y xuya bꞌi luwar che xeꞌek.
MAT 18:28 »Noꞌj kꞌu wa aj chak xew xel bꞌi, xuꞌkꞌulu lo jun rach aj chak yey waꞌ kꞌo jubꞌiqꞌ ukꞌas rukꞌ. Xuchapij kꞌu puqul e riꞌ pachaꞌ kujitzꞌaj, jewaꞌ xubꞌiꞌij che: “¡Chatojolaꞌ rakꞌas wukꞌ!” xcha che.
MAT 18:29 »Ekꞌu ri rach aj chak xuxukubꞌaꞌ ribꞌ chwach y lik xutzꞌonoj che: “Chakuyu ko numak, chinawoyꞌej na kꞌenoq ma kantoj ronoje ri nukꞌas chawe” xchaꞌ.
MAT 18:30 »Noꞌj rire na xraj taj xroyeꞌej waꞌ. Ri xuꞌano e xuꞌyaꞌa ri jun chik rach aj chak pa cárcel; yey kꞌa ekꞌu kesax loq we xutoj na rukꞌas.
MAT 18:31 »Echiriꞌ xkil taq waꞌ ri kach aj chakibꞌ, lik xok chikikꞌuꞌx. Xebꞌek kꞌut, xeꞌkibꞌiꞌij che ri kipatrón ronoje ri xuꞌan ri jun aj chak.
MAT 18:32 Ekꞌuchiriꞌ, rupatrón xutaq ukꞌamik y xubꞌiꞌij che: “¡At jun aj chak itzel akꞌuꞌx! Riꞌin xinkuy amak riꞌat che ronoje rakꞌas, ma lik e xatzꞌonoj riꞌ chwe.
MAT 18:33 Ta ne e xaꞌan riꞌat jelaꞌ pachaꞌ ri xinꞌan riꞌin chawe, ta e xakꞌut ri kꞌaxnaꞌbꞌal akꞌuꞌx che rawach aj chak; noꞌj na e ta kꞌu ri xaꞌano” xchaꞌ.
MAT 18:34 »Ekꞌu rupatrón lik xpe royowal y xtaqan che kayaꞌiꞌ pa kꞌax y kꞌa e kesax lo chupa waꞌ we xutoj na ronoje rukꞌas.
MAT 18:35 »Jekꞌulaꞌ kuꞌan ri Nuqaw kꞌo chilaꞌ chikaj iwukꞌ riꞌix we kꞌo junoq chiwe na kukuy ta umak ri ratz-uchaqꞌ rukꞌ ronoje ranimaꞌ —xchaꞌ.
MAT 19:1 Echiriꞌ xukꞌis ubꞌiꞌxik waꞌ ri Jesús, xel bꞌi Galilea y xeꞌek pa taq ri luwar re Judea y xopon pa taq ri luwar kꞌo chꞌaqa yaꞌ che ri nimayaꞌ Jordán.
MAT 19:2 Lik kꞌut e kꞌi ri winaq xeterej bꞌi chirij y xebꞌukunaj ri yewaꞌibꞌ chiriꞌ.
MAT 19:3 E kꞌo kꞌu jujun chike ri fariseos xeqibꞌ rukꞌ ri Jesús xa re kakikꞌam upa y xkitzꞌonoj che: —¿Ubꞌe nawi che juna achi, xa tobꞌ saꞌ ri kujal wi uchiꞌ ri rixoqil, kuya bꞌi ruwujil re jachbꞌal ibꞌ che? —xechaꞌ.
MAT 19:4 Ri Jesús xukꞌul uwach: —¿Na ajilam ta nebꞌa alaq saꞌ ri tzꞌibꞌital kan pa Ruchꞌaꞌtem ri Dios? Ma jewaꞌ kubꞌiꞌij: Che ri jeqebꞌal lo ruwachulew echiriꞌ ri Dios xebꞌuꞌan ri tikawex, chi achi chi ixoq xebꞌuꞌano.
MAT 19:5 Y kubꞌiꞌij: Ruma kꞌu riꞌ, rachi echiriꞌ kakꞌuliꞌik, karesaj ribꞌ chikij ruchu-uqaw chaꞌ kajeqiꞌ rukꞌ ri rixoqil y kikabꞌichal kꞌu riꞌ kebꞌuꞌana xa e jun chwach ri Dios.
MAT 19:6 Jekꞌuriꞌlaꞌ na e ta chi kaꞌibꞌ, ma xebꞌuꞌana xa e jun. E uwariꞌche, ri xebꞌujunimaj ri Dios, na yaꞌtal ta che ri tikawex kujach upa —xchaꞌ.
MAT 19:7 Ekꞌuchiriꞌ, xkitzꞌonoj che: —¿Suꞌchak kꞌu riꞌ ri Moisés xubꞌiꞌij we juna achi karaj kujach bꞌi ri rixoqil, xew chuyaꞌa bꞌi ruwujil re jachbꞌal ibꞌ che y jekꞌulaꞌ na rixoqil ta chik? —xechaꞌ.
MAT 19:8 Ri Jesús xubꞌiꞌij chike: —Waꞌ e ruma lik ko ri animaꞌ alaq. Ruma laꞌ ri Moisés xuya luwar kayaꞌiꞌ ruwujil re jachbꞌal ibꞌ; noꞌj che lo ri jeqebꞌal ruwachulew na je ta laꞌ ri xraj ri Dios.
MAT 19:9 Kambꞌiꞌij kꞌu riꞌin che alaq: China junoq kuya ruwujil re jachbꞌal ibꞌ che ri rixoqil tobꞌ ri rixoqil na makuninaq ta chirij ri kꞌulanikil, yey kakꞌuliꞌ tanchi rukꞌ juna chik ixoq, riꞌ kamakun chirij ri kꞌulanikil. Y china ri kakꞌuliꞌ rukꞌ rixoq jachom kanoq, riꞌ jenelaꞌ kamakun chirij ri kꞌulanikil —xchaꞌ.
MAT 19:10 Ekꞌu rutijoꞌn xkibꞌiꞌij che: —We jelaꞌ kukꞌulumaj rachi rukꞌ ri kꞌulanikil, más ne utz riꞌ we junoq na kakꞌuliꞌ taj —xechaꞌ.
MAT 19:11 Ri Jesús xubꞌiꞌij chike: —Na konoje ta kꞌu ri tikawex kakichꞌij waꞌ; ma xew ri yaꞌtal lo chike ruma ri Dios, kakichꞌij uꞌanik.
MAT 19:12 E kꞌo achijabꞌ na kekꞌuliꞌ taj ma kalaxibꞌem pachaꞌ e eunucos. E kꞌo jujun chik na kekꞌuliꞌ taj ma ꞌanom eunucos chike. Yey e kꞌo ri na kekꞌuliꞌ taj ma kiyaꞌom kibꞌ che ri chak re rutaqanik ri Dios petinaq chilaꞌ chikaj. China ri kachꞌijow uꞌanik waꞌ, chuchꞌija kꞌu riꞌ —xchaꞌ.
MAT 19:13 E kꞌo jujun raltaq ko akꞌalabꞌ xekꞌam lo chwach ri Jesús chaꞌ kuya ruqꞌabꞌ pakiwiꞌ y jelaꞌ kutzꞌonoj che ri Dios kebꞌuchajij. Yey rutijoꞌn xekiyaj ri ekꞌamayom lo ke.
MAT 19:14 Noꞌj ri Jesús xubꞌiꞌij chike: «Chiyaꞌa luwar chike ri raltaq ko akꞌalabꞌ chepeta na wukꞌ. Mebꞌiqꞌatej; ma ri kakiꞌan e jelaꞌ pachaꞌ rike, riꞌ kuꞌan ke rutaqanik ri Dios petinaq chilaꞌ chikaj» xchaꞌ.
MAT 19:15 Xuya kꞌu ruqꞌabꞌ pakiwi ri raltaq ko akꞌalabꞌ. Tekꞌuchiriꞌ, xel bꞌi pa ri luwar.
MAT 19:16 Kꞌo kꞌu jun kꞌakꞌal achi xkꞌun rukꞌ ri Jesús y xutzꞌonoj che: —Lal utzilaj tijonel, ¿saꞌ ri utz kanꞌano chaꞌ kꞌo nukꞌaslemal na jinta utaqexik? —xchaꞌ.
MAT 19:17 Ri Jesús xukꞌul uwach: —¿Suꞌbꞌe kabꞌiꞌij la “utz” chwe? Ma xa jun ri lik utz kꞌolik, waꞌ e ri Dios. Yey we kaꞌaj la kok la pa ri kꞌaslemal na jinta utaqexik rukꞌ Rire, e taqej la Rutzij Upixabꞌ —xchaꞌ.
MAT 19:18 Rachi xubꞌiꞌij che ri Jesús: —¿Pachike kꞌu riꞌ ri tzijpixabꞌ? —xchaꞌ. Ri Jesús xubꞌiꞌij che: —“Matkamisanik. Matmakun chirij ri kꞌulanikil. Mateleqꞌik. Maꞌan raqꞌubꞌal chirij junoq.
MAT 19:19 Chaloqꞌoj kiqꞌij rachu-aqaw” y “Kꞌax chanaꞌa rawatz-achaqꞌ jelaꞌ pachaꞌ kꞌax kanaꞌ awibꞌ riꞌat” —xchaꞌ.
MAT 19:20 Rachi xubꞌiꞌij che ri Jesús: —Ronoje waꞌ nuꞌanom lo chwi nuchꞌutiꞌnal. ¿Saꞌ kꞌu riꞌ ri kꞌa chirajawaxik chwe kanꞌano? —xchaꞌ.
MAT 19:21 Ri Jesús xubꞌiꞌij che: —We kaꞌaj la e kaꞌan la janipa ri karaj ri Dios che ri bꞌinik silabꞌik la, kꞌayij la ronoje taq ri bꞌeyomalil la y jacha kꞌu la chike ri nibꞌaꞌibꞌ; jekꞌuriꞌlaꞌ kꞌo bꞌeyomalil la chilaꞌ chikaj. Tekꞌuchiriꞌ, peta la, terej lo la chwij y kuyu la ri kꞌax kape pawiꞌ la ruma lal nutijoꞌn —xcha che.
MAT 19:22 Rachi echiriꞌ xuta waꞌ, lik kabꞌisonik xeꞌek ma rire lik rajawal bꞌeyom.
MAT 19:23 Ekꞌuchiriꞌ, xubꞌiꞌij ri Jesús chike rutijoꞌn: —Paqatzij wi kambꞌiꞌij chiwe: Juna bꞌeyom lik kꞌayew che kok chupa rutaqanik ri Dios petinaq chilaꞌ chikaj.
MAT 19:24 Kambꞌiꞌij tanchi kꞌu chiwe: E ne más kꞌayew ri kok juna bꞌeyom chupa rutaqanik ri Dios chwa ri kikꞌow juna camello chupa rutel juna akuxaꞌ —xchaꞌ.
MAT 19:25 Echiriꞌ xkita waꞌ rutijoꞌn, lik xkam kanimaꞌ che y xkitzꞌonoj chikiwach: —We e riꞌ, ¿china kꞌu riꞌ ri kakolobꞌetajik? —xechaꞌ.
MAT 19:26 Ri Jesús xutzuꞌ kiwach y xubꞌiꞌij chike: —Ri tikawex na kakikolobꞌej ta kibꞌ kitukel ma waꞌ lik kꞌayew chikiwach; noꞌj ri Dios ronoje kuꞌano ma na jinta kꞌayew chwach Rire —xchaꞌ.
MAT 19:27 Ekꞌuchiriꞌ, xubꞌiꞌij ri Pedro che: —Qajawal, riꞌoj qayaꞌom kan ronoje y oj teran chiꞌij la. ¿Saꞌ kꞌu riꞌ ri kaqakꞌul riꞌoj? —xchaꞌ.
MAT 19:28 Ri Jesús xukꞌul uwach: —Paqatzij wi kambꞌiꞌij chiwe: Kopon kꞌu riꞌ ri qꞌij echiriꞌ ronoje kuꞌan kꞌakꞌ, waꞌ echiriꞌ Ralaxel Chikixoꞌl Tikawex keꞌtzꞌula chupa ri chomilaj tzꞌulibꞌal re rutaqanik. Jekꞌulaꞌ riꞌix kixeꞌtzꞌula chupa kabꞌlajuj tzꞌulibꞌal re kixtaqan pakiwi ri kabꞌlajuj tinamit re Israel.
MAT 19:29 Yey china kꞌu ri uyaꞌom kan rocho, ebꞌuyaꞌom kan ri ratz-uchaqꞌ, ruchu-uqaw, ri rixoqil, ri ralkꞌoꞌal o ri rulew ruma ukojom ri nubꞌiꞌ, riꞌ kukꞌul na jun ciento chik chwa ronoje laꞌ yey kukꞌul kꞌu ri kꞌaslemal na jinta utaqexik.
MAT 19:30 »Lik kꞌu e kꞌi chike ri lik kꞌo kiwach woꞌora, chwach apanoq na jinta chi kiwach; yey lik e kꞌi chike ri na jinta kiwach woꞌora, e lik kakꞌojiꞌ kiwach chwach apanoq.
MAT 20:1 »Ri kuꞌan chupa rutaqanik ri Dios petinaq chilaꞌ chikaj e jelaꞌ pachaꞌ ri xuꞌano echiriꞌ juna rajaw chak anim tan xel bꞌi che kitzukuxik aj chakibꞌ kebꞌajawax chupa rutikoꞌn re uva.
MAT 20:2 Xchꞌaꞌt kukꞌ raj chakibꞌ puwi ri kajil y xkanajik kuya jun denario re jun qꞌij chak chike. Tekꞌuchiriꞌ, xebꞌutaq bꞌi chupa rutikoꞌn.
MAT 20:3 Laj che ri ubꞌelej ora anim, xel tanchi ubꞌi y xeburiq jujun chik kimolom kibꞌ pa kꞌayibꞌal na jinta kakiꞌano.
MAT 20:4 »Xubꞌiꞌij kꞌu chike: “Jix riꞌix, jixeꞌchakuna wukꞌ chupa ri nutikoꞌn re uva y tzꞌaqat kixintojo” xchaꞌ. Ekꞌu rike xebꞌek.
MAT 20:5 »Pa tikꞌil qꞌij kꞌu riꞌ, ri rajaw ri chak xel tanchi ubꞌi che kitzuquxik más aj chak. Yey je tanchi laꞌ xuꞌan che ri urox ora bꞌenaq qꞌij.
MAT 20:6 »Laj che kꞌu ri uroꞌ ora bꞌenaq qꞌij, xel tanchi ubꞌi y xebꞌuꞌriqa lo jujun chik na jinta kakiꞌano. Xubꞌiꞌij kꞌu chike: “¿Suꞌchak riꞌix ix kꞌo wara y na jinta kꞌo xiꞌan wa jun qꞌij?”
MAT 20:7 »Xkikꞌul kꞌu uwach rike: “E ruma na jinta junoq xojchokowik.” »Ekꞌuchiriꞌ, xubꞌiꞌij ri rajaw ri chak chike: “Jix, jixeꞌchakuna chupa ri nutikoꞌn re uva y tzꞌaqat kixintojo.”
MAT 20:8 »Echiriꞌ xok raqꞌabꞌ, ri rajaw ri chak xubꞌiꞌij che ri caporal: “Chebꞌasikꞌij konoje raj chakibꞌ y chebꞌatojo bꞌi. E kebꞌatoj nabꞌe ri xebꞌok kꞌunaj, y kꞌisbꞌal kꞌu re, kebꞌatoj ri xebꞌok nabꞌe pa chak.”
MAT 20:9 »Ekꞌuchiriꞌ, xekꞌun raj chak ri xebꞌok bꞌenaq qꞌij che ri uroꞌ ora. Y chikijujunal kꞌu riꞌ xkikꞌul jun denario.
MAT 20:10 Tekꞌuchiriꞌ, xekꞌun lo ri ebꞌokinaq nabꞌe pa chak. E chikiwa rike más kꞌi ri kajil kakikꞌulu. Noꞌj na je ta laꞌ xuꞌano, ma xkikꞌul chikijujunal jun denario, pachaꞌ ri xkikꞌul ri jujun chik.
MAT 20:11 »Echiriꞌ xkikꞌul ri kajil re jun qꞌij, xkijeqo kechꞌaꞌt chirij ri rajaw ri tikoꞌn,
MAT 20:12 jewaꞌ xkibꞌiꞌij che: “Waꞌ wa xebꞌok bꞌenaq qꞌij chik, xa jun ora xechakunik yey xetoj la junam qukꞌ riꞌoj, tobꞌ kꞌu riꞌ riꞌoj xqakuy lo rukꞌatanil ri qꞌij” xechaꞌ.
MAT 20:13 »Noꞌj ri rajaw chak xukꞌul uwach, jewaꞌ xubꞌiꞌij che jun chike: “Wamigo, mabꞌiꞌij we na usukꞌ ta ri xinꞌan chawe. ¿Na xojkanaj ta nebꞌa laꞌ katintoj jun denario?
MAT 20:14 Chakꞌama kꞌu rawajil riꞌat y jat. Yey we riꞌin kuaj kanya che ri xok kꞌunaj pa chak, junam rukꞌ ri xinya chawe riꞌat,
MAT 20:15 ¿na jinta nebꞌa panuqꞌabꞌ riꞌin kanꞌan saꞌ ri kuaj rukꞌ ri nupuaq? ¿O kꞌax akꞌuꞌx chwij xa ruma xinkꞌut ri rutzil nukꞌuꞌx chike jujun chik?” xcha ri rajaw ri chak.
MAT 20:16 »Jelaꞌ kꞌu riꞌ, lik e kꞌi chike ri na jinta kiwach woꞌora, e lik kakꞌojiꞌ kiwach chwach apanoq; yey lik kꞌu e kꞌi chike ri lik kꞌo kiwach woꞌora, chwach apanoq na jinta chi kiwach. Ma lik e kꞌi ri esikꞌim, tobꞌ kꞌu xa e jujun ri echaꞌtalik —xcha ri Jesús.
MAT 20:17 Echiriꞌ kꞌo chi ri Jesús chi bꞌe re keꞌek Jerusalem, xebꞌukꞌam bꞌi ri kabꞌlajuj utijoꞌn kitukel pa jun luwar y xubꞌiꞌij chike:
MAT 20:18 «Chitapeꞌ: E waꞌ kojpaqiꞌ Jerusalem, yey ekꞌu Ralaxel Chikixoꞌl Tikawex kayaꞌ pakiqꞌabꞌ ri nimaq e aj chakunel pa Rocho Dios y raj kꞌutunel re ri tzijpixabꞌ chaꞌ kakiqꞌat tzij puwiꞌ re kamik.
MAT 20:19 Tekꞌuchiriꞌ, kakiya pakiqꞌabꞌ ri na e ta aj judiꞌabꞌ chaꞌ rike kakichꞌamij, kakijichꞌ upa y kakikamisaj chwa cruz. Noꞌj churox qꞌij kꞌut kakꞌastaj bꞌi chikixoꞌl ri ekaminaq» xchaꞌ.
MAT 20:20 Ekꞌuchiriꞌ, xqibꞌ rukꞌ ri Jesús ri kichu ri kebꞌ ukꞌajol ri Zebedeo, y ekꞌu laꞌ e rachbꞌiꞌil ri ralabꞌ; xuxukubꞌaꞌ ribꞌ chwach ri Jesús ma kꞌo karaj kutzꞌonoj che.
MAT 20:21 Ri Jesús xutzꞌonoj che: —¿Saꞌ ri kaꞌaj la? —xchaꞌ. Rixoq xukꞌul uwach: —Wajawal, yaꞌa la chike wa kebꞌ walabꞌ ketzꞌuyiꞌ ukꞌ la pa ri taqanik la, jun pawikiqꞌabꞌ la y ri jun chik, pa mox la —xchaꞌ.
MAT 20:22 Ekꞌu ri Jesús xukꞌul uwach, y jewaꞌ xubꞌiꞌij chike ri kebꞌ utijoꞌn: —Riꞌix na iwetaꞌam taj saꞌ ri kitzꞌonoj. ¿Kichꞌij nebꞌa riꞌix ri kinikꞌow wi riꞌin y ri kꞌax kape panuwiꞌ? —xchaꞌ. Rike xkibꞌiꞌij: —Kaqachꞌijo —xechaꞌ.
MAT 20:23 Ri Jesús xubꞌiꞌij chike: —Qatzij, riꞌix kichꞌij na ri kꞌax kinikꞌow wi riꞌin y ri kꞌaxkꞌobꞌik kape panuwiꞌ. Pero ri kixtzꞌuyiꞌ pa nuwikiqꞌabꞌ y pa numox, riꞌ na in ta kinyaꞌw re. Ma xew kayaꞌtaj chike ri echaꞌtal chi ruma ri Nuqaw chaꞌ kuꞌana na ke —xchaꞌ.
MAT 20:24 Echiriꞌ xkita waꞌ ri lajuj chik utijoꞌn, lik xpe koyowal chikij ri kebꞌ kichaqꞌ kibꞌ.
MAT 20:25 Ekꞌu ri Jesús xebꞌusikꞌij y xubꞌiꞌij chike: —Iwetaꞌam riꞌix, ri ketaqan pakiwi ri nimaq tinamit kebꞌuꞌana pachaꞌ e rajaw ronoje; yey ri lik kꞌo kiwach kikꞌow uwiꞌ ri taqanik kakiꞌan pakiwi ri eyaꞌtal pakiqꞌabꞌ.
MAT 20:26 Noꞌj chixoꞌl riꞌix na ubꞌe taj jelaꞌ kuꞌano. Ma we kꞌo junoq chiwe riꞌix karaj kuꞌana aj wach, e chuyaꞌa ribꞌ kuꞌan nimanel iweꞌix.
MAT 20:27 Yey e junoq chiwe karaj kuꞌana nabꞌe chixoꞌlibꞌal, e chuyaꞌa ribꞌ kuꞌan nimanel ke konoje
MAT 20:28 jelaꞌ pachaꞌ ri kuꞌan Ralaxel Chikixoꞌl Tikawex. Ma Rire na xkꞌun taj re kanimaxik; xkꞌunik re koꞌlnimanoq y re koluꞌyaꞌa ribꞌ pa kamik che kikolobꞌexik ukꞌiyal tikawex —xchaꞌ.
MAT 20:29 Echiriꞌ ri Jesús kukꞌ rutijoꞌn katajin bꞌi kelik pa ri tinamit Jericó, lik ukꞌiyal winaq xeterej bꞌi chirij Rire.
MAT 20:30 E kꞌo kꞌu kaꞌibꞌ potzꞌ etzꞌul chuchiꞌ ri bꞌe. Echiriꞌ xkito katajin rikꞌowik ri Jesús, lik xesikꞌin pan che: —¡Qajawal, lal ri Ralkꞌoꞌal kan ri rey David, choj-juchꞌ kaꞌn ko cheꞌla! —xechaꞌ.
MAT 20:31 Ekꞌu ri winaq xekichꞌaꞌbꞌej kipa chaꞌ na kesikꞌin ta chik, noꞌj ri kaꞌibꞌ potzꞌ más ne ko xesikꞌinik, xkibꞌiꞌij: —¡Qajawal, lal ri Ralkꞌoꞌal kan ri rey David, choj-juchꞌ kaꞌn ko cheꞌla! —xechaꞌ.
MAT 20:32 Ekꞌuchiriꞌ, xtakꞌiꞌ ri Jesús, xebꞌusikꞌij y xutzꞌonoj chike: —¿Saꞌ ri kiwaj kanꞌan chiwe? —xchaꞌ.
MAT 20:33 Ri kaꞌibꞌ potzꞌ xkikꞌul uwach: —Qajawal, chojkunaj ko la chaꞌ kojtzuꞌnik —xechaꞌ.
MAT 20:34 Ekꞌu ri Jesús xejuchꞌ kaꞌn pa ranimaꞌ y xuya ruqꞌabꞌ puwi ri kiwach. Na jampatana kꞌu riꞌ xetzuꞌnik y xeterej bꞌi chirij ri Jesús.
MAT 21:1 Ri Jesús kukꞌ rutijoꞌn xa naqaj chik e kꞌo che ri tinamit Jerusalem, ya e riꞌ kebꞌok pa raldea Betfagé, ri kꞌo chwach ri juyubꞌ Olivos. Ekꞌuchiriꞌ, ri Jesús xebꞌutaq bꞌi kaꞌibꞌ chike rutijoꞌn chaꞌ kenabꞌej apanoq,
MAT 21:2 jewaꞌ xubꞌiꞌij chike: «Jix pa raldea kꞌo pan chiqawach. Chiriꞌ kiꞌriqa jun axna yuqulik yey kꞌo ri ral rukꞌ. Chikira loq y chebꞌikꞌama lo chwe.
MAT 21:3 We kꞌo kꞌu junoq kutzꞌonoj chiwe saꞌ ri kiꞌano, jewaꞌ chibꞌiꞌij che: “Rawaj kebꞌajawax che ri Qajawal, yey kꞌate kutaq tanchi uloq” kixchaꞌ.»
MAT 21:4 E xuꞌan waꞌ chaꞌ e kuꞌana rubꞌiꞌim kan ri qꞌalajisanel echiriꞌ xubꞌiꞌij:
MAT 21:5 Chibꞌiꞌij chike ri e aj Sion: “Chiwilapeꞌ, ri Rey iweꞌix kakꞌun iwukꞌ, uꞌanom lo chꞌutiꞌn che ribꞌ; ukojom lo jun buru, waꞌ jun qꞌapoj buru, ral jun awaj aj eqaꞌn” xchaꞌ.
MAT 21:6 Ekꞌuchiriꞌ, xebꞌek rutijoꞌn y xkiꞌano janipa ri xubꞌiꞌij bꞌi ri Jesús chike.
MAT 21:7 Xkikꞌam kꞌu lo ri axna junam rukꞌ ri ral y xkirip ri kimanta chikij. Tekꞌuchiriꞌ, ri Jesús xukoj bꞌi.
MAT 21:8 Ukꞌiyal winaq xkiwiq ri bꞌe pa kikꞌow wi ri Jesús, xkilikꞌ taq ri kimanta pa ri bꞌe; yey e kꞌo jujun chik xkiqꞌat raltaq ko uqꞌabꞌ cheꞌ y xkilem pa la bꞌe re yakbꞌal uqꞌij.
MAT 21:9 Ekꞌu ri winaq e nabꞌe chwach kukꞌ ri eteran lo chirij xkijeqo lik kesikꞌinik, kakibꞌiꞌij: «¡Qayaka uqꞌij ri Ralkꞌoꞌal kan ri rey David! ¡Nim uqꞌij ralaxik ri jun petinaq chupa rubꞌiꞌ ri Dios Qajawxel! ¡Qayaka uqꞌij ri Dios kꞌo chilaꞌ chikaj!» kechaꞌ.
MAT 21:10 Echiriꞌ xok ri Jesús Jerusalem, xetukuk konoje ri winaq re ri tinamit y lik e kꞌi ri kakitzꞌonobꞌej chikiwach: —¿China nawi wa jun achi? —kechaꞌ.
MAT 21:11 Ekꞌu ri winaq kakibꞌiꞌij: —E ri qꞌalajisanel Jesús, ri aj Nazaret re Galilea —kechaꞌ.
MAT 21:12 Ekꞌuchiriꞌ, xok ri Jesús pa ri Rocho Dios y xebꞌeresaj bꞌi konoje ri kekꞌayinik y ri keloqꞌow chupa. Xukꞌaqalaꞌ taq bꞌi ri kimexa raj jachal uwach puaq y taq ri kixila raj kꞌay palomax.
MAT 21:13 Xubꞌiꞌij kꞌu chike: «Ri Dios jewaꞌ kubꞌiꞌij chupa Ruchꞌaꞌtem: Che ri Wocho kabꞌiꞌxik: “E luwar re oración” kachaꞌ. Noꞌj ralaq ꞌanom alaq che ri Wocho e jun luwar ke eleqꞌomabꞌ» xchaꞌ.
MAT 21:14 Chiriꞌ kꞌu riꞌ chupa ri Rocho Dios, xeqibꞌ rukꞌ ri Jesús jujun potzꞌ kukꞌ jujun sik, y ri Jesús xebꞌukunaj.
MAT 21:15 Ri nimaq e aj chakunel pa Rocho Dios kukꞌ raj kꞌutunel re ri tzijpixabꞌ lik xpe koyowal echiriꞌ xkil wa milagros y xkito lik kesikꞌin rakꞌalabꞌ pa ri Rocho Dios, kakibꞌiꞌij: «¡Qayaka uqꞌij ri Ralkꞌoꞌal kan ri rey David!» kechaꞌ.
MAT 21:16 Xkibꞌiꞌij kꞌu riꞌ che ri Jesús: —¿Kata la saꞌ ri kakibꞌiꞌij rakꞌalabꞌ cheꞌla? —xechaꞌ. Ekꞌu ri Jesús xukꞌul uwach: —Qatzij wi kanto. ¿Na ajilam ta nebꞌa alaq ri kubꞌiꞌij Ruchꞌaꞌtem ri Dios pakiwi rakꞌalabꞌ? Ma jewaꞌ kubꞌiꞌij: Chikichiꞌ rakꞌalabꞌ y ri ketzꞌumanik yijbꞌam la ri chomilaj bꞌix re yakbꞌal qꞌij la —xcha ri Jesús.
MAT 21:17 Ekꞌuchiriꞌ, xebꞌuya kanoq y xel bꞌi pa ri tinamit; xeꞌek kꞌu Betania y chiriꞌ xkanaj kan wi la jun aqꞌabꞌ.
MAT 21:18 Anim tan, echiriꞌ ri Jesús katzelej tanchi pa ri tinamit, xpe numik che.
MAT 21:19 Xril kꞌu jun cheꞌ re higo kꞌo chuchiꞌ ri bꞌe. Xeꞌrilaꞌ kꞌut yey na xuriq ta tobꞌ xa juna uwach ri cheꞌ, xew ruxaq kꞌolik. Ekꞌuchiriꞌ, xubꞌiꞌij ri Jesús che ri cheꞌ: —¡Na jinta chi kꞌana ajiqꞌobꞌalil kayaꞌo! —xchaꞌ. Y na jampatana xchaqij ri cheꞌ.
MAT 21:20 Echiriꞌ xkil waꞌ rutijoꞌn, lik xkam kanimaꞌ che y xkitzꞌonoj kꞌu che: —¿Chaꞌtaj xchaqij tan wa cheꞌ? —xechaꞌ.
MAT 21:21 Ri Jesús xukꞌul uwach: —Paqatzij wi kambꞌiꞌij chiwe: We ta lik kꞌo kubꞌulibꞌal ikꞌuꞌx rukꞌ ri Dios y na kebꞌ ta kꞌana ipa rukꞌ, riꞌ na xew ta jewaꞌ kiꞌan riꞌix pachaꞌ wa xinꞌan riꞌin che ri higo. Ma utz ne riꞌ kibꞌiꞌij che wa juyubꞌ: “Chatela wara y jateꞌkꞌola chupa ri mar” kixchaꞌ y e kuꞌano.
MAT 21:22 Jekꞌulaꞌ riꞌ, e janipa ri kitzꞌonoj che ri Dios rukꞌ kubꞌulibꞌal ikꞌuꞌx, kikꞌul na —xchaꞌ.
MAT 21:23 Echiriꞌ xopon ri Jesús pa ri Rocho Dios, xujeq kakꞌutunik. Ekꞌu ri nimaq e aj chakunel re ri Rocho Dios kukꞌ ri nimaq winaq re ri tinamit xeqibꞌ rukꞌ y xkitzꞌonoj che: —¿China xyaꞌw paqꞌabꞌ la kaꞌan taq la waꞌ? ¿China xtaqaw la che kaꞌan taq la waꞌ? —xechaꞌ.
MAT 21:24 Ri Jesús xukꞌul uwach: —Riꞌin kanꞌan jun tzꞌonobꞌal che alaq. We xkꞌul alaq uwach chwe, kambꞌiꞌij kꞌu riꞌ che alaq china yaꞌyom panuqꞌabꞌ kanꞌan waꞌ.
MAT 21:25 ¿China kꞌu xtaqaw re ri Juan kuya ri bautismo? ¿E ri Dios o e rachijabꞌ? —xchaꞌ. Ekꞌu rike xkijeq kechꞌaꞌt chikiwach puwi waꞌ: «We xqakꞌul uwach che: “E ri Dios xtaqaw re”, riꞌ kubꞌiꞌij rire chiqe: “¿Suꞌchak kꞌu riꞌ na xkoj ta alaq ri xubꞌiꞌij?” kacha chiqe.
MAT 21:26 Yey kaqaxiꞌij qibꞌ kaqabꞌiꞌij: “Xa achijabꞌ xetaqaw re” ma konoje ri tinamit kakichꞌobꞌo ri Juan e jun qꞌalajisanel re ri Dios» xecha chikiwach.
MAT 21:27 Xkibꞌiꞌij kꞌu che ri Jesús: —Na qetaꞌam taj —xechaꞌ. Ekꞌu ri Jesús xubꞌiꞌij chike: «Jekꞌuriꞌlaꞌ, riꞌin na kambꞌiꞌij ta che alaq china yaꞌyom panuqꞌabꞌ kanꞌan taq waꞌ.
MAT 21:28 »Yey chiwach ralaq ¿saꞌ keꞌelawi waꞌ? Kꞌo jun achi e kꞌo kaꞌibꞌ ukꞌajol y xubꞌiꞌij che jun chike: “Nukꞌajol, jat waqꞌij pa chak, ma kanꞌan numolonik re uva.”
MAT 21:29 »Rukꞌajol xukꞌul uwach: “Na kuaj taj” xchaꞌ. Pero kꞌate na xujalkꞌatij runaꞌoj y xeꞌek pa ruchak ruqaw.
MAT 21:30 Tekꞌuchiriꞌ, rachi xqibꞌ rukꞌ ri jun chik ukꞌajol y xubꞌiꞌij che pachaꞌ ri xubꞌiꞌij che ri ratzixel. »Ekꞌu rala xukꞌul uwach: “Utz riꞌ, tat, kinꞌek pa ri chak” xchaꞌ. Yey na xeꞌek ta kꞌu riꞌ.»
MAT 21:31 Xutzꞌonoj kꞌu ri Jesús chike ri e aj wach: —Chiwach ralaq, ¿china nawi chike wa kaꞌibꞌ alabꞌo e xuꞌan ri karaj ri kiqaw? —xchaꞌ. Xkibꞌiꞌij kꞌu rike: —E ri nabꞌe —xechaꞌ. Ekꞌu ri Jesús xubꞌiꞌij chike: «Paqatzij wi kambꞌiꞌij chiwe: E raj tzꞌonol puaq re tojonik y rixoqibꞌ na chom ta ri kibꞌinik kisilabꞌik, e rike ri nabꞌe nenareꞌ kebꞌok chupa rutaqanik ri Dios chiwach ralaq.
MAT 21:32 Ma ri Juan Aj Yaꞌl Bautismo xkꞌun chiwach ralaq, xoluꞌkꞌutuꞌ suꞌanik kajeqiꞌ alaq chi jusukꞌ che ruwachulew, yey ralaq na xkoj ta alaq. Noꞌj kꞌu raj tzꞌonol puaq re tojonik y rixoqibꞌ na chom ta ri kibꞌinik kisilabꞌik, rike xkikojo. Ekꞌu ralaq, tobꞌ xil alaq waꞌ, na xjalkꞌatij ta ri naꞌoj alaq chaꞌ kakoj alaq rutzij.
MAT 21:33 »Tape alaq wa jun chik kꞌambꞌal naꞌoj: Kꞌo jun achi rajaw jun ulew. Ekꞌu rire xuꞌan tikoꞌn re uva chwach. Xusut rij rukꞌ coral, xukꞌot jun luwar pa kayitzꞌ wi ruwaꞌal ri uva y xuyak jun ja naj uwiꞌ re chajibꞌal re. Xuya kꞌu kan pa tunulik chike jujun aj chakibꞌ. Tekꞌuchiriꞌ, xeꞌek naj.
MAT 21:34 »Echiriꞌ xopon ruqꞌijol ri molonik, xebꞌutaq lo jujun raj chakibꞌ chaꞌ kakitzꞌonoj chike raj tunulel ri taqalik kukꞌul rire che ri molonik.
MAT 21:35 Noꞌj raj tunulel xekichap raj chakibꞌ ebꞌutaqom loq. Lik xkiꞌan kꞌax che jun chike, xkikamisaj jun chik y kꞌo jun chik xkiꞌan paꞌbꞌaj.
MAT 21:36 »Ekꞌu ri rajaw xebꞌutaq tanchi lo más aj chakibꞌ, yey waꞌ más e kꞌi chwa ri xebꞌutaq lo nabꞌe. Ewi raj tunulel je tanchi laꞌ xkiꞌano pachaꞌ ri xkiꞌan chike ri e nabꞌe.
MAT 21:37 »Kꞌisbꞌal kꞌu re, ri rajaw ri tikoꞌn e xutaq lo rukꞌajol kukꞌ raj tunulel, ma xuchꞌobꞌo: Kakikꞌul na chi utz wa nukꞌajol.
MAT 21:38 »Noꞌj raj tunulel echiriꞌ xkil uwach rukꞌajol, jewaꞌ xkibꞌiꞌij chikiwach: “Waꞌ e ukꞌajol ri rajaw rulew, ri kuꞌana na rajaw we xkam ruqaw. Joꞌ jeꞌqakamisaj chaꞌ rulew kuꞌan kan qeꞌoj” xechaꞌ.
MAT 21:39 »Ewi xkichapo, xkesaj bꞌi chupa waꞌ wuꞌlew y xkikamisaj» xcha ri Jesús.
MAT 21:40 Tekꞌuchiriꞌ, xutzꞌonoj chike ri e aj wach: —Chiwach ralaq, echiriꞌ kakꞌun ri rajaw rulew, ¿saꞌ nawi kuꞌan chike raj tunulel? —xchaꞌ.
MAT 21:41 Rike xkikꞌul uwach: —Na kukuy ta kꞌana kimak. Kusach na kꞌu kiwach ri itzel kiwachlibꞌal y kuya tanchi ri rulew pa tunulik chike jujun chik aj chakibꞌ, yey rike kakiya na ri molonik che chupa ruqꞌijol —xchaꞌ.
MAT 21:42 Tekꞌuchiriꞌ, xubꞌiꞌij ri Jesús chike: —¿Na ajilam ta nebꞌa ralaq ri tzꞌibꞌital kan chupa Ruchꞌaꞌtem ri Dios? Ma jewaꞌ kubꞌiꞌij: E rabꞌaj kꞌaqital kan kuma raj yakal ja, e abꞌaj waꞌ lik xajawaxik chaꞌ katikiꞌ lo ri ja. Waꞌ e ri Dios Qajawxel xꞌanaw re y riꞌoj lik kakam qanimaꞌ che kachaꞌ.
MAT 21:43 Ekꞌu uwariꞌche kambꞌiꞌij che alaq: Kamajataj na kꞌu che alaq rutaqanik ri Dios y kayaꞌtaj chike jujun chik tinamit chaꞌ kuya ri jiqꞌobꞌalil karaj ri Dios che rutaqanik.
MAT 21:44 China kꞌu ri katzaq puwi laꞌ laꞌbꞌaj, lik kꞌax ri kukꞌulumaj; yey we rabꞌaj katzaq puwi junoq, riꞌ xa jumul kusach uwach —xchaꞌ.
MAT 21:45 Echiriꞌ ri nimaq e aj chakunel pa Rocho Dios kukꞌ ri fariseos xkita taq ri kꞌambꞌal naꞌoj xutzijoj ri Jesús, xkimaj usukꞌ chikij rike xbꞌiꞌx wi waꞌ.
MAT 21:46 Ruma kꞌu riꞌ waꞌ, lik xkaj kakichap ri Jesús; noꞌj e xkixiꞌij kibꞌ chike ri tinamit ma rike kakichꞌobꞌo ri Jesús e jun qꞌalajisanel re ri Dios.
MAT 22:1 Ri Jesús xujeq tanchik kakꞌutun rukꞌ taq kꞌambꞌal naꞌoj chikiwach, jewaꞌ xubꞌiꞌij:
MAT 22:2 «Ri kuꞌana chupa rutaqanik ri Dios petinaq chilaꞌ chikaj e pachaꞌ ri xukꞌulumaj jun rey echiriꞌ xuꞌan jun nimalaj nimaqꞌij re rukꞌulanikil rukꞌajol.
MAT 22:3 »Echiriꞌ xopon ri qꞌij re ri kꞌulanikil, ri rey xebꞌutaq bꞌi ri raj chakibꞌ kukꞌ ri esikꞌim pa ri kꞌulanikil chaꞌ keꞌkibꞌiꞌij chike kepetik, pero rike na xkaj taj xepetik.
MAT 22:4 »Ewi xebꞌutaq tanchi ubꞌi jujun chik raj chakibꞌ, xubꞌiꞌij bꞌi chike: “Chibꞌiꞌij chike ri esikꞌim chik: Ri qajaw uyijbꞌam chi ronoje ri waꞌim; taq ri nawiloꞌibꞌ y taq ri meqꞌ etiꞌoꞌjirisam chik, ya xekamisaxik. Ronoje kꞌu riꞌ yijbꞌital chik. Peta kꞌu alaq riꞌ pa ri nimaqꞌij re kꞌulanikil” kixchaꞌ.
MAT 22:5 »Noꞌj ri esikꞌim chik, na xebꞌok ta il che. Jun chike xeꞌrila ri rulew, jun chik xeꞌek pa kꞌayij.
MAT 22:6 Yey jujun chik xekichap ri raj chakibꞌ ri rey, lik xkiꞌan kꞌax chike y jelaꞌ xekikamisaj.
MAT 22:7 »Ekꞌuchiriꞌ xuta waꞌ ri rey, lik xpe royowal che. Xebꞌutaq kꞌu bꞌi rusoldados re keꞌkisacha kiwach ri e kamisanel y keꞌkiporoj ri kitinamit.
MAT 22:8 »Tekꞌuchiriꞌ, xubꞌiꞌij chike ri raj chakibꞌ: “Ronoje yijbꞌital chi che ri kꞌulanikil; noꞌj kꞌu ri esikꞌim nabꞌe, na taqal ta chi chike kebꞌok pa ri nimaqꞌij.
MAT 22:9 Jix kꞌu riꞌ woꞌora pa taq nimabꞌe y chebꞌisikꞌij lo pa ri kꞌulanikil janipa taq ri winaq kebꞌiriqo” xchaꞌ.
MAT 22:10 »Xebꞌel kꞌu bꞌi ri raj chakibꞌ pa taq bꞌe y xekimol lo kichiꞌ konoje taq ri winaq xekiriqo xa tobꞌ e chinoq; jekꞌuriꞌlaꞌ ri luwar pa kaꞌan wi ri kꞌulanikil xnoj che winaq kꞌakꞌ esikꞌim.
MAT 22:11 Ekꞌuchiriꞌ, xok bꞌi ri rey y xeril ri esikꞌim chik. Xril kꞌu jun achi kꞌo chiriꞌ y na ukojom ta ruqꞌuꞌ re kꞌulanikil.
MAT 22:12 »Xubꞌiꞌij kꞌu che: “Wamigo, ¿chaꞌtaj xatok lo wara we na akojom ta raqꞌuꞌ re kꞌulanikil?” xchaꞌ. Noꞌj rachi na xchꞌaw ta kꞌenoq.
MAT 22:13 »Ekꞌuchiriꞌ, xubꞌiꞌij ri rey chike ri keniman chwa ri mexa: “Wa jun achi na uwiqom ta ribꞌ, chiyutu taq ri raqan y ruqꞌabꞌ y chikꞌaqa bꞌi pa ri qꞌequꞌm. Chiriꞌ kꞌu riꞌ koqꞌ wi y kaqichꞌichꞌ wi ruwi reꞌ” xchaꞌ.
MAT 22:14 »Ma tobꞌ lik e kꞌi ri esikꞌim, xa e jujun ri echaꞌtal chike» xcha ri Jesús.
MAT 22:15 Xebꞌel kꞌu bꞌi ri fariseos chiriꞌ y xkichꞌaꞌtibꞌej chikiwach suꞌanik kakikꞌam upa ri Jesús rukꞌ taq ri kubꞌiꞌij chaꞌ kakikoj umak.
MAT 22:16 Xekitaq kꞌu bꞌi ri kitijoꞌn rike junam kukꞌ jujun chike ri kitaqem ri rey Herodes. Ekꞌu rike xkibꞌiꞌij che ri Jesús: —Lal tijonel, riꞌoj qetaꞌam lik qatzij ri kabꞌiꞌij la y lik jusukꞌ kakꞌutun la chwi ri bꞌe re ri Dios. Yey na kaxiꞌij tane ibꞌ la che taq ri kakibꞌiꞌij ri tikawex; ma rilal junam kiwach kebꞌil la konoje, tobꞌ kꞌo kiwach o na jinta kiwach.
MAT 22:17 Bꞌiꞌij kꞌu la chiqe: ¿Usukꞌ nawi kaqaꞌan tojonik che ri nimalaj taqanel re Roma o na usukꞌ taj? —xechaꞌ.
MAT 22:18 Ri Jesús, ruma retaꞌam ri retzelal kikꞌuꞌx, jewaꞌ xubꞌiꞌij chike: —¡Xa kebꞌ palaj alaq! ¿Suꞌchak kakꞌam alaq nupa?
MAT 22:19 Kꞌutu pe alaq chwe juna meyo re kaꞌan tojonik rukꞌ —xchaꞌ. Ekꞌuchiriꞌ, xkikꞌut jun denario che.
MAT 22:20 Ekꞌu ri Jesús xutzꞌonoj chike: —¿China re wa kꞌaxwach y china re wa bꞌiꞌaj kꞌo chwach wa meyo? —xchaꞌ.
MAT 22:21 Rike xkikꞌul uwach: —Re ri nimalaj taqanel re Roma —xechaꞌ. Xubꞌiꞌij kꞌu ri Jesús chike: —Yaꞌa alaq che ri nimalaj taqanel re Roma janipa ri taqal che rire, yey yaꞌa kꞌu alaq che ri Dios janipa ri taqal che ri Dios —xchaꞌ.
MAT 22:22 Echiriꞌ xkita waꞌ, lik xkam kanimaꞌ che. Xkiya kꞌu kan ri Jesús y xebꞌek.
MAT 22:23 Chupa kꞌu laꞌ la jun qꞌij, xekꞌun rukꞌ ri Jesús jujun chike ri saduceos, ri kakibꞌiꞌij na jinta kꞌastajibꞌal chike ri ekaminaq. Xkitzꞌonoj kꞌu che ri Jesús,
MAT 22:24 jewaꞌ xkibꞌiꞌij: —Lal tijonel, ri Moisés xubꞌiꞌij kanoq: “We kꞌo juna achi xkamik yey na e jinta kan ralkꞌoꞌal, ekꞌu riꞌ ruchaqꞌ kakꞌuliꞌ rukꞌ rixoq malkaꞌn kanoq y jekꞌulaꞌ kekꞌojiꞌ ralkꞌoꞌal rukꞌ pubꞌiꞌ ri ratz xkamik” xchaꞌ.
MAT 22:25 »Julaj e kꞌo wuqubꞌ achijabꞌ kichaqꞌ kibꞌ xejeqiꞌ chiqaxoꞌl. Ri nabꞌe chike xkꞌuliꞌik yey ekꞌu riꞌ waꞌ xkamik y na e jinta kan ralkꞌoꞌal rukꞌ ri rixoqil. Ewi rukaꞌm xkꞌuliꞌ rukꞌ rixoq malkaꞌn kanoq.
MAT 22:26 Jelaꞌ kꞌu riꞌ rukaꞌm xkamik y na e jinta kan ralkꞌoꞌal rukꞌ rixoq. Yey je tanchi laꞌ xukꞌulumaj rurox, rukaj y chikijujunal ri wuqubꞌ achijabꞌ.
MAT 22:27 Kꞌisbꞌal kꞌu re, e xkam rixoq.
MAT 22:28 »Chupa kꞌu ruqꞌijol ri kꞌastajibꞌal, ¿chinoq chike ri wuqubꞌ achijabꞌ kuꞌana rachijil rixoq? Ma konoje xekꞌuliꞌ rukꞌ —xechaꞌ.
MAT 22:29 Ri Jesús xukꞌul uwach: —Ralaq lik sachinaq alaq, ma na majom ta alaq usukꞌ Ruchꞌaꞌtem ri Dios y ruchuqꞌabꞌ ri Dios.
MAT 22:30 Ma echiriꞌ kekꞌastaj lo ri ekaminaq, na kekꞌuliꞌ ta chik yey na kekiya ta chi ne ri kalkꞌoꞌal pa kꞌulanikil; kebꞌuꞌana kꞌu pachaꞌ ri ángeles re ri Dios chilaꞌ chikaj, ma ri ángeles na kekꞌuliꞌ taj.
MAT 22:31 Yey puwi ri kꞌastajibꞌal ke ri ekaminaq, ¿na ajilam ta nebꞌa alaq rubꞌiꞌim ri Dios echiriꞌ xubꞌiꞌij:
MAT 22:32 “In ri Dios re ri Abraham, re ri Isaac y re ri Jacob”? Yey ri Dios na e ta Dios ke ri ekaminaq, ma e Dios ke ri e kꞌaslik —xchaꞌ.
MAT 22:33 Echiriꞌ xkita waꞌ, ri winaq lik xkam kanimaꞌ che taq rukꞌutunik.
MAT 22:34 Ri fariseos xkimol kibꞌ echiriꞌ xketaꞌmaj ri saduceos na xkiriq ta chi ukꞌulik uwach ri Jesús.
MAT 22:35 Kꞌo kꞌu jun chike raj kꞌutunel re ri tzijpixabꞌ xraj xukꞌam upa ri Jesús, jewaꞌ xutzꞌonoj che:
MAT 22:36 —Lal tijonel, chupa Rutzij Upixabꞌ ri Dios, ¿pachike ri taqanik más chirajawaxik? —xchaꞌ.
MAT 22:37 Ri Jesús xubꞌiꞌij che: —“Kꞌax chanaꞌa ra Dios Qajawxel rukꞌ ronoje awanimaꞌ, rukꞌ ronoje akꞌuꞌx y rukꞌ ronoje anaꞌoj.”
MAT 22:38 Waꞌ e nabꞌe tzijpixabꞌ lik chirajawaxik y e ukꞌuꞌxibꞌal Rutzij Upixabꞌ ri Dios.
MAT 22:39 Yey rukaꞌm jewaꞌ kubꞌiꞌij: “Kꞌax chanaꞌa rawatz-achaqꞌ jelaꞌ pachaꞌ ri kꞌax kanaꞌ awibꞌ riꞌat.”
MAT 22:40 Ukabꞌichal waꞌ e ukꞌuꞌxibꞌal Rutzij Upixabꞌ ri Dios tzꞌibꞌital kan ruma ri Moisés y kuma ri qꞌalajisanelabꞌ —xchaꞌ.
MAT 22:41 Ekꞌuchiriꞌ kꞌa kimolom kibꞌ ri fariseos, ri Jesús xutzꞌonoj chike:
MAT 22:42 —¿Saꞌ ri kachꞌobꞌ alaq chwi ri Cristo, Ruchaꞌoꞌn lo ri Dios? ¿China che upetebꞌem wi lo rire? —xchaꞌ. Xkikꞌul kꞌu uwach: —E ralkꞌoꞌal kan ri rey David —xechaꞌ.
MAT 22:43 Ekꞌuchiriꞌ, ri Jesús xutzꞌonoj chike: —¿Chaꞌtaj kabꞌiꞌx che ri Cristo e ralkꞌoꞌal kan ri David? Ma ruma ri Ruxlabꞌixel ri Dios, ri David xubꞌiꞌij “Wajawal” che ri Cristo echiriꞌ rire xubꞌiꞌij:
MAT 22:44 Ri Dios Qajawxel xubꞌiꞌij che ri Wajawal: “Chat-tzꞌula pa nuwikiqꞌabꞌ, y chawoyeꞌej na ri qꞌij echiriꞌ kebꞌenuya ri tzel kebꞌilow awe chuxeꞌ rawaqan” xchaꞌ.
MAT 22:45 Ekꞌu ri David kubꞌiꞌij “Wajawal” che Ruchaꞌoꞌn lo ri Dios. ¿Suꞌbꞌe kꞌu riꞌ kabꞌiꞌxik e Ralkꞌoꞌal kan ri rey David? —xchaꞌ.
MAT 22:46 Y na jinta junoq xriqow ukꞌulik uwach. Chwi kꞌu riꞌ laꞌ la jun qꞌij, konoje kakixiꞌij kibꞌ kakiꞌan tzꞌonobꞌal che.
MAT 23:1 Ekꞌuchiriꞌ, ri Jesús xubꞌiꞌij chike ri winaq y chike rutijoꞌn:
MAT 23:2 «Raj kꞌutunel re ri tzijpixabꞌ y ri fariseos yaꞌtal pakiqꞌabꞌ kakiqꞌalajisaj taq rutzijpixabꞌ kan ri Moisés.
MAT 23:3 Ruma kꞌu riꞌ, riꞌix chiꞌana janipa ri kakibꞌiꞌij puwi wa tzijpixabꞌ; noꞌj miꞌan kꞌu iweꞌix ri na utz taj kakiꞌan rike, ma junwi ri kakiꞌan rike chwa ri kakikꞌutu.
MAT 23:4 »Ri kitaqanik rike e pachaꞌ nimaq taq eqaꞌn lik al y lik kꞌayew rukꞌaxik; kekitaq kꞌu ri winaq chaꞌ kakeqaj bꞌi yey rike na kakaj tane kꞌana ketoꞌbꞌ rukꞌ waꞌ.
MAT 23:5 »Ronoje taq ri kakiꞌano xew e chaꞌ kebꞌilitaj kuma ri winaq. Kakiꞌan che kibꞌ pachaꞌ lik e jusukꞌ chwach ri Dios; ruma kꞌu laꞌ, e ri kifilacterias ximital chukurusil ri kipalaj y che ri kiqꞌabꞌ, lik kakiꞌan nim che; yey taq ri cordón karabꞌabꞌ che ri kiqꞌuꞌ, kakiꞌan lik naj raqan che.
MAT 23:6 Pa taq ri sinagogas y pa taq waꞌim, lik e kukꞌul kikꞌuꞌx ketzꞌuyiꞌ chupa ri tzꞌulibꞌal ke ri lik kꞌo kiwach.
MAT 23:7 Yey lik kukꞌul kikꞌuꞌx kayaꞌ rutzil kiwach pa kebꞌilitaj wi y kabꞌiꞌx chike: “¡Lal tijonel!”
MAT 23:8 »Ekꞌu riꞌix miwoyꞌej kabꞌiꞌx “¡Lal tijonel!” chiwe, ma xa jun ri tijonel iwe, waꞌ e ri Cristo. Yey ruma Rire xixuꞌan iwatz-ichaqꞌ iwibꞌ.
MAT 23:9 Mibꞌiꞌij “Nuqaw” che junoq wara che ruwachulew, ma xa jun Riqaw kꞌolik, y waꞌ e Riqaw kꞌo chilaꞌ chikaj.
MAT 23:10 Miya luwar kabꞌiꞌx “¡Lal Aj Kꞌamal Qawach!” chiwe, ma xa jun ri Aj Kꞌamal Iwach, waꞌ e ri Cristo.
MAT 23:11 »Ekꞌu ri kꞌo uwach chixoꞌlibꞌal riꞌix e chuyaꞌa ribꞌ kuꞌan nimanel iweꞌix.
MAT 23:12 Ma china ri lik kuꞌan nim che ribꞌ, ri Dios kuqasaj uwa uqꞌij; noꞌj china ri kuꞌan chꞌutiꞌn che ribꞌ, ri Dios kuyak uqꞌij.
MAT 23:13 »¡Lik kꞌu toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! E tzꞌapim alaq ri okibꞌal re rutaqanik ri Dios petinaq chilaꞌ chikaj chaꞌ na jinta kꞌo kebꞌok bꞌi; ma na kok tane ubꞌi ralaq y na kaya tane alaq luwar chike jujun chik kebꞌok bꞌi.
MAT 23:14 »¡Lik toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! Ma kamaj alaq ri kocho rixoqibꞌ e malkaꞌnibꞌ. Yey chaꞌ na kaqꞌalajin ta ri na utz taj kaꞌan alaq, e kawererej alaq unimal chꞌabꞌal echiriꞌ kaꞌan alaq orar. Ruma kꞌu wa kaꞌan alaq, lik unimal kꞌaxkꞌolil kakꞌul na alaq echiriꞌ kaqꞌat tzij pawiꞌ alaq ruma ri Dios.
MAT 23:15 »¡Lik toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! Ralaq kaqꞌaxuj alaq uwi taq mar y kabꞌinibꞌej alaq taq ri luwar che ruwachulew chaꞌ juna tikawex kuꞌan tijoꞌn alaq. Yey echiriꞌ uꞌanom chi tijoꞌn alaq, kaꞌan alaq che ri tikawex kalaj más itzel uwachlibꞌal chiwach ralaq.
MAT 23:16 »Lik toqꞌoꞌ wach ralaq alaq pachaꞌ potzꞌ kꞌamal kiwach jujun chik, ma kabꞌiꞌij alaq: “We kꞌo junoq kujikibꞌaꞌ uwach juna tzij pa rubꞌiꞌ ri Rocho Dios, riꞌ na chirajawaxik ta che kuꞌan ri ubꞌiꞌim; noꞌj we kujikibꞌaꞌ uwach juna tzij pa rubꞌiꞌ ri oro re ri Rocho Dios, riꞌ chirajawaxik che kuꞌan janipa ri ubꞌiꞌim” kacha alaq.
MAT 23:17 »¡Na jinta naꞌoj alaq y alaq potzꞌ! ¿Pachike ri más kꞌo uwach? ¿E ri oro o e ri Rocho Dios, ri kuꞌan santo che ri oro?
MAT 23:18 Jenewaꞌ ri kabꞌiꞌij ralaq: “We kꞌo junoq kujikibꞌaꞌ uwach juna tzij pa rubꞌiꞌ raltar, na chirajawaxik ta che kuꞌan ri ubꞌiꞌim; noꞌj we kujikibꞌaꞌ uwach juna tzij pa rubꞌiꞌ ri qasaꞌn kꞌo chwi raltar, riꞌ chirajawaxik che kuꞌan janipa ri ubꞌiꞌim” kacha alaq.
MAT 23:19 »¡Sachinaq ri naꞌoj alaq y alaq potzꞌ! ¿Pachike ri más kꞌo uwach? ¿E ri qasaꞌn o e raltar ri kuꞌan santo che ri qasaꞌn?
MAT 23:20 Ma china ri kujikibꞌaꞌ uwach juna tzij pa rubꞌiꞌ raltar, riꞌ na xew ta kuꞌan pa rubꞌiꞌ raltar, ma kuꞌan pa rubꞌiꞌ ronoje ri kꞌo chwi raltar.
MAT 23:21 Jekꞌulaꞌ, china ri kujikibꞌaꞌ uwach juna tzij pa rubꞌiꞌ ri Rocho Dios, na xew ta kuꞌan pa rubꞌiꞌ ri Rocho Dios, ma riꞌ e kuꞌan tzij pa rubꞌiꞌ ri Dios, ri Jun jeqel chiriꞌ.
MAT 23:22 Jekꞌulaꞌ, china ri kujikibꞌaꞌ uwach juna tzij pa rubꞌiꞌ ri kaj, riꞌ kuꞌan pa rubꞌiꞌ ri tzꞌulibꞌal pa kataqan wi ri Dios y kuꞌan pa rubꞌiꞌ ri Jun tzꞌul chupa.
MAT 23:23 »¡Lik toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! Ma kaya alaq che ri Dios ri diezmo alaq re ri arweno, re ri anix y re ri kominox. Noꞌj na kok ta alaq il che rukꞌuꞌxibꞌal ri Tzij Pixabꞌ re ri Dios: Waꞌ e ri kaꞌan alaq ri usukꞌ, ri kakꞌut alaq ri kꞌaxnaꞌbꞌal kꞌuꞌx alaq chike jujun chik y ri kakubꞌiꞌ kꞌuꞌx alaq rukꞌ ri Dios. Lik chirajawaxik kꞌu riꞌ kaꞌan alaq taq waꞌ, junam rukꞌ ri kaya ri diezmo alaq.
MAT 23:24 »¡Alaq pachaꞌ potzꞌ kꞌamal kiwach jujun chik! Ma ri kaꞌan alaq e pachaꞌ junoq lik kuchajij ribꞌ chaꞌ na kubꞌiqꞌ tubꞌi tobꞌ xa juna ralko us, pero kubꞌiqꞌ bꞌi ri nimaq taq awaj pachaꞌ ri camello.
MAT 23:25 »¡Lik toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! Ma xew kachꞌaj alaq chi utz ri rij ri vaso y ri laq, pero na kok ta alaq il che uchꞌajik rupa. Jekꞌuriꞌlaꞌ ralaq lik kok alaq il che ri josqꞌinik re ri cuerpo, pero lik kꞌo chꞌulil pa animaꞌ alaq ruma releqꞌ y ri na usukꞌ taj ꞌanom alaq.
MAT 23:26 ¡Rilal fariseo, lal potzꞌ! Nabꞌe na chꞌaja la rupa ri vaso y ri laq; jekꞌuriꞌlaꞌ kuꞌan chom rupa y ri rij.
MAT 23:27 »¡Lik toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! Ma ralaq alaq pachaꞌ muqubꞌal ke animaꞌ xew ꞌanom saq che ri rij; chom katzuꞌnik, noꞌj kꞌu rupa nojinaq che kibꞌaqil animaꞌ y che ukꞌiyal chꞌul.
MAT 23:28 Jekꞌulaꞌ ri ꞌanom ralaq, ma ri bꞌinik silabꞌik alaq e kilitajik pachaꞌ lik jusukꞌ chikiwach ri winaq; noꞌj xa kebꞌ palaj alaq, ma ri kꞌuꞌx alaq nojinaq che ukꞌiyal chꞌulil.
MAT 23:29 »¡Lik toqꞌoꞌ wach alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! Ma kayak alaq chomilaj muqubꞌal chike ri qꞌalajisanelabꞌ re ojertan y kawiq alaq ri muqubꞌal ke ri tikawex lik jusukꞌ xebꞌinik.
MAT 23:30 Yey kabꞌiꞌij kꞌu alaq: “We ta oj kꞌo chi riꞌoj echiriꞌ xekꞌasiꞌ ri qatiꞌ-qamam ojertan, na kaqaꞌan ta qeꞌoj riꞌ kukꞌ ri xekamisan ri qꞌalajisanelabꞌ” kacha alaq. Pero ¡na e ta kꞌana uꞌanom!
MAT 23:31 Rukꞌ kꞌu ri katajin alaq che uꞌanik, kaqꞌalajinik alaq kalkꞌoꞌal kan ri xekamisan ke ri qꞌalajisanelabꞌ.
MAT 23:32 ¡Kꞌisa kꞌu alaq uꞌanik riꞌ ri na utz taj xkijeq lo uꞌanik ri chuꞌqaw alaq ojertan!
MAT 23:33 »¡Ralaq pachaꞌ alaq jupuq chi kumatz! ¿Suꞌanik kesaj ibꞌ alaq chuxeꞌ ri qꞌatbꞌal tzij re ri Dios echiriꞌ kutaq bꞌi alaq chi xibꞌalbꞌaꞌ?
MAT 23:34 E uwariꞌche riꞌin kebꞌenutaq lo ukꞌ alaq qꞌalajisanelabꞌ, waj chak lik kꞌo kinaꞌoj y aj kꞌutunel re Rutzij Upixabꞌ ri Dios. Pero ralaq kekamisaj alaq jujun chike rike. E kꞌo ne ri kekamisaj alaq chwa cruz, jujun chik kajichꞌ alaq kipa pa taq sinagogas y jujun chik keternabꞌej alaq rukꞌ kꞌaxkꞌobꞌik pa taq tinamit.
MAT 23:35 Ruma kꞌu riꞌ kape pawiꞌ alaq ronoje ri kꞌaxkꞌobꞌik taqal chike ri xekamisan ke rachijabꞌ jusukꞌ xebꞌinik, ujeqebꞌem lo chwi rukamik ri Abel ri jun ala lik jusukꞌ, kꞌa chwa rukamik ri Zacarías, rukꞌajol ri Berequías, ri xkamisaj alaq chuxoꞌl raltar y ri Rocho Dios.
MAT 23:36 Paqatzij wi kambꞌiꞌij che alaq: Ronoje waꞌ kape pakiwi ri winaq e kꞌo waqꞌij ora» xchaꞌ.
MAT 23:37 Tekꞌuchiriꞌ, xubꞌiꞌij: «¡Jerusalem, Jerusalem, riꞌix kebꞌikamisaj ri qꞌalajisanelabꞌ y kebꞌiꞌan paꞌbꞌaj janipa ri ebꞌutaqom lo ri Dios iwukꞌ! E riꞌin, ukꞌiyal laj lik xuaj xinmol kichiꞌ riwalkꞌoꞌal riꞌix, jelaꞌ pachaꞌ kuꞌan juna atiꞌ akꞌ chike taq ruwiꞌch echiriꞌ kumol kichiꞌ chuxeꞌ taq ruxikꞌ; pero riꞌix na xiwaj ta kꞌenoq.
MAT 23:38 »Chitape kꞌut: Kꞌo jun qꞌij ri iwocho riꞌix kawulix kanoq.
MAT 23:39 Kambꞌiꞌij kꞌu chiwe riꞌix: Chwi kꞌu woꞌora na kiwil ta chi kꞌana nuwach riꞌin kꞌa echiriꞌ kopon na ruqꞌijol kibꞌiꞌij riꞌix: Lik nim uqꞌij ri jun petinaq chupa rubꞌiꞌ ri Dios Qajawxel kixchaꞌ.»
MAT 24:1 Echiriꞌ xel bꞌi ri Jesús pa ri Rocho Dios yey e riꞌ keꞌek, xeqibꞌ rutijoꞌn rukꞌ re kakikꞌut che, ruchomalil ri nimaq taq ja re ri Rocho Dios.
MAT 24:2 Ekꞌu ri Jesús xukꞌul uwach: —¿Kiwil riꞌix ronoje waꞌ? Paqatzij wi kambꞌiꞌij chiwe, wara na kakanaj ta chi kan juna abꞌaj puwi juna chik, ma ronoje kawulixik —xchaꞌ.
MAT 24:3 Tekꞌuchiriꞌ, xebꞌopon chwa ri juyubꞌ Olivos. Yey echiriꞌ xtzꞌuyiꞌ ri Jesús, xeqibꞌ rutijoꞌn rukꞌ, y ekꞌu laꞌ xa kitukel xkijeq kakitzꞌonoj che: —Bꞌiꞌij ko la chiqe, ¿jampa nawi kuꞌana taq riꞌ waꞌ? ¿Yey saꞌ ri kꞌutubꞌal re ri kꞌunibꞌal la y re ri kꞌisbꞌal re ruwachulew? —xechaꞌ.
MAT 24:4 Ekꞌu ri Jesús xukꞌul uwach: «Lik chichajij iwibꞌ chaꞌ na jinta junoq kasokow iweꞌix.
MAT 24:5 Ma lik e kꞌi ri tikawex kekꞌunik y xa kakichiqꞌimaj uwach ri nubꞌiꞌ, jewaꞌ kakibꞌiꞌij: “In ri Cristo, Ruchaꞌoꞌn lo ri Dios” kechaꞌ. Y lik e kꞌi ri kesokotaj kuma rike.
MAT 24:6 »Kita kꞌu riꞌ kꞌo chꞌaꞌoj jewaꞌ y kꞌo chꞌaꞌoj jelaꞌ. Mixiꞌij kꞌu iwibꞌ che, ma lik chirajawaxik wi kuꞌana taq waꞌ; noꞌj na e ta waꞌ ri kꞌisbꞌal re ruwachulew.
MAT 24:7 Ma e kꞌo tinamit keyaktaj chikij jujun chik tinamit y e kꞌo taqanelabꞌ keyaktaj chikij jujun chik taqanelabꞌ. Kape kꞌu numik y yabꞌil yey kuꞌan taq kabꞌraqan che ukꞌiyal luwar.
MAT 24:8 Ronoje waꞌ e jeqebꞌal re taq ri kꞌaxkꞌobꞌik kakꞌunik.
MAT 24:9 »Ekꞌuchiriꞌ, kixyaꞌ riꞌix pa taq kꞌaxkꞌobꞌik y kixkamisaxik; yey konoje taq ri tinamit che ruwachulew lik tzel kixkilo ruma ikojom ri nubꞌiꞌ.
MAT 24:10 Chupa taq laꞌ laꞌ qꞌij, lik e kꞌi ri kakesaj kibꞌ chirij ri Dios, kakijeq lik tzel kakil kibꞌ chikiwach y kakikꞌayij kibꞌ chikiwach.
MAT 24:11 »Lik e kꞌi ri qꞌalajisanelabꞌ xa e sokosoꞌnel keyaktajik y lik e kꞌi ri winaq kesokotaj kuma rike.
MAT 24:12 Ruma kꞌu rukꞌiyarik taq uwach ri mak, lik e kꞌi ri kaqꞌobꞌ ri rutzil kꞌuꞌxaj pa kanimaꞌ.
MAT 24:13 China kꞌu ri lik kuchuqꞌubꞌej ribꞌ chwach taq waꞌ wa kꞌaxkꞌobꞌik kꞌa chupa ri kꞌisbꞌal re, e riꞌ ri kakolobꞌetajik.
MAT 24:14 »Yey wa Utzilaj Tzij re rutaqanik ri Dios katzijox na chike rukꞌiyal kiwach taq ri tikawex e kꞌo che ruwachulew chaꞌ konoje kaketaꞌmaj kꞌu riꞌ waꞌ; tekꞌuchiriꞌ, kakꞌun lo ri kꞌisbꞌal re ruwachulew.
MAT 24:15 »E uwariꞌche echiriꞌ kiwil riꞌix ri lik chꞌul y lik kꞌixbꞌal uwach kayaꞌ chupa ri Luwar Santo, jelaꞌ pachaꞌ ri xutzꞌibꞌaj kan ri qꞌalajisanel Daniel; (china kꞌu ri kajilan re waꞌ, chumaja usukꞌ),
MAT 24:16 ekꞌu ri e kꞌo pa taq ri luwar re Judea chebꞌanimaj ubꞌi chwa taq ri juyubꞌ.
MAT 24:17 China kꞌu ri kꞌo lo chwi ri rocho, maqaj ne lo che ukꞌamik bꞌi ubꞌitaq re pa ja.
MAT 24:18 Yey china ri kꞌo lo pa juyubꞌ, matzelej ne lo che ukꞌamik bꞌi ruqꞌuꞌ re pisbꞌal rij.
MAT 24:19 »Chupa taq kꞌu laꞌ la qꞌij, lik toqꞌoꞌ kiwach ri e yewaꞌ ixoqibꞌ y ri ketzꞌumtisanik.
MAT 24:20 Lik kꞌu chitzꞌonoj che ri Dios chaꞌ echiriꞌ kixanimaj bꞌi, na e ta uqꞌijol echiriꞌ kꞌax tew y kꞌo jabꞌ yey na chupa tane juna qꞌij re uxlanibꞌal.
MAT 24:21 Ma kakꞌun kꞌu jun unimal kꞌaxkꞌobꞌik, waꞌ na uꞌanom ta kꞌana julajoq chwi lo ri jeqebꞌal ruwachulew y na kuꞌana ta chi ne kꞌana julajoq.
MAT 24:22 We ta ri Qaqaw Dios na kuqꞌatij ta taq laꞌ la qꞌij re runimal kꞌaxkꞌobꞌik, riꞌ na jinta junoq kakꞌasiꞌ kanoq; pero ruma kꞌu kꞌax kebꞌunaꞌ ri ebꞌuchaꞌom, kuqꞌatij ruqꞌijol waꞌ.
MAT 24:23 »We kꞌo kꞌu junoq riꞌ kabꞌiꞌn chiwe: “¡Chiwilapeꞌ, wara kꞌo wi ri Cristo!” o “¡Chiwilapeꞌ, leꞌ kꞌolik!”, mixok il che.
MAT 24:24 Ma kekꞌun ri kakiꞌan “Cristo” che kibꞌ y ri kakiꞌan “e qꞌalajisanelabꞌ re ri Dios” che kibꞌ, pero xa e sokosoꞌnel. Ekꞌu rike kakiꞌan nimaq taq kꞌutubꞌal y milagros re kesokosoꞌn rukꞌ, yey kꞌo ne pa saq kesokotaj jujun chike ri ebꞌuchaꞌom ri Dios.
MAT 24:25 »Chita kꞌu riꞌ ma ximbꞌiꞌij waꞌ chiwe riꞌix echiriꞌ kꞌamajaꞌ ne kuꞌanaꞌ.
MAT 24:26 E uwariꞌche tobꞌ kabꞌiꞌx chiwe: “Chiwilapeꞌ, leꞌ ri Cristo kꞌo pa ri luwar katzꞌintzꞌotik”, mixꞌek che rilik. Tobꞌ ne kabꞌiꞌx chiwe: “Chiwilapeꞌ, leꞌ ri Cristo kꞌo lo pa ja”, mixok il che.
MAT 24:27 Ma jelaꞌ pachaꞌ echiriꞌ kayokꞌ kaꞌn ruxeꞌ kaj pa relebꞌal lo ri qꞌij y kilitaj kꞌa putzaqibꞌal ri qꞌij, jelaꞌ kuꞌan rukꞌunibꞌal Ralaxel Chikixoꞌl Tikawex.
MAT 24:28 Ma lik kaqꞌalajin rukꞌunibꞌal chikiwach konoje ri winaq; e jelaꞌ pachaꞌ lik kaqꞌalajin pa kꞌo wi juna kaminaq, ma puwi waꞌ kakimol wi kibꞌ taq ri kꞌuch.
MAT 24:29 »Xew kꞌu kikꞌow ri kꞌaxkꞌobꞌik chupa taq laꞌ la qꞌij, kuꞌan qꞌequꞌm uwach ri qꞌij, ri ikꞌ na kuya ta chi ruwonibꞌal, ri chꞌumil ketzaq lo che ruwa kaj yey konoje ri kꞌo kichuqꞌabꞌ che ruwa kaj keyikiyoꞌxik.
MAT 24:30 Ekꞌuchiriꞌ, kilitaj che ruwa kaj ri kꞌutubꞌal re rukꞌunibꞌal Ralaxel Chikixoꞌl Tikawex. Konoje kꞌu rukꞌiyal kiwach taq ri tikawex e kꞌo che ruwachulew kebꞌoqꞌik y kakil kꞌu Ralaxel Chikixoꞌl Tikawex kakꞌun lo pa sutzꞌ chwa ri kaj rukꞌ ruchuqꞌabꞌ y rukꞌ runimal uchomalil.
MAT 24:31 Kebꞌutaq kꞌu ru ángeles rukꞌ unimal uchꞌawibꞌal trompeta re kakimol kichiꞌ konoje ri ebꞌuchaꞌom ri Dios pa taq ronoje luwar che rukajchal rajlibꞌal ruwachulew.
MAT 24:32 »E chimaja ri jun kꞌambꞌal naꞌoj puwi ri cheꞌ re higo: Echiriꞌ kujeq katux lo kꞌakꞌ uqꞌabꞌ y kujeq kꞌut katux ruxaq, ruma kꞌu laꞌ kiwetaꞌmaj xa naqaj chi kꞌo wi lo ruqꞌijol echiriꞌ kabꞌukbꞌutik y na jinta jabꞌ.
MAT 24:33 Jekꞌuriꞌlaꞌ riꞌix, echiriꞌ kiwilo kuꞌana ronoje taq waꞌ, chiwetaꞌmaj kꞌu riꞌ xa naqaj chi kꞌo wi lo ruqꞌijol rukꞌunibꞌal Ralaxel Chikixoꞌl Tikawex.
MAT 24:34 Paqatzij wi kambꞌiꞌij chiwe: E kꞌo tikawex che taq laꞌ la qꞌij na kekam tana we na kakil tubꞌi ronoje waꞌ.
MAT 24:35 Ruwa kaj y ruwachulew xa kasach uwach, noꞌj taq ri nuchꞌaꞌtem na kasach ta uwach.
MAT 24:36 »Ekꞌu chwi ruqꞌijol y ruꞌorayil waꞌ, na jinta junoq etaꞌmayom re; na ketaꞌam tane ri ángeles e kꞌo chilaꞌ chikaj, ma xew ri Nuqaw etaꞌmayom re.
MAT 24:37 Ma jelaꞌ pachaꞌ ri xuꞌan chupa taq ri qꞌij re ri Noé, jelaꞌ kuꞌana pa rukꞌunibꞌal Ralaxel Chikixoꞌl Tikawex.
MAT 24:38 Ma chupa taq laꞌ la qꞌij echiriꞌ kꞌamajaꞌ kape ri unimal jabꞌ, taq ri winaq xew kakitij kiwa, kakitij kiyaꞌ, kekꞌuliꞌik y kekiya ri kalkꞌoꞌal pa kꞌulanikil. Ekꞌu ketajin riꞌ che uꞌanikil echiriꞌ xopon ruqꞌijol xok bꞌi ri Noé chupa ri nimalaj barco.
MAT 24:39 Na xkinaꞌbꞌej tane ri xpe pakiwiꞌ, kꞌate kꞌu xkinaꞌo xkꞌun lo ri unimal jabꞌ; ri yaꞌ xebꞌukꞌam bꞌi ri winaq y xekam kꞌu konoje. Jekꞌulaꞌ kuꞌano echiriꞌ kakꞌun tanchi Ralaxel Chikixoꞌl Tikawex, ma xaqikꞌateꞌt kakꞌunik.
MAT 24:40 »Chupa kꞌu laꞌ la qꞌij, kꞌo kuꞌana wi e kꞌo kebꞌ achijabꞌ chwa juyubꞌ; jun kakꞌam bꞌi y ri jun chik kayaꞌiꞌ kanoq.
MAT 24:41 O e kꞌo kebꞌ ixoqibꞌ junam kekeꞌnik, jun kꞌu kakꞌam bꞌi y ri jun chik kayaꞌiꞌ kanoq.
MAT 24:42 Lik kꞌut mawar iwach riꞌix, ma na iwetaꞌam ta ruꞌorayil rukꞌunibꞌal ri Iwajawal.
MAT 24:43 »Ekꞌu chiwetaꞌmaj waꞌ: Juna achi rajaw ja we ta karetaꞌmaj ri ora echiriꞌ kopon releqꞌom, riꞌ na kawar ta kꞌenoq y na kuya ta luwar kok releqꞌom pa ri rocho.
MAT 24:44 E uwariꞌche riꞌix chiyijbꞌaꞌ iwibꞌ che rukꞌunibꞌal Ralaxel Chikixoꞌl Tikawex, ma kꞌaxtaj kakꞌunik echiriꞌ na jinta inaꞌbꞌem.
MAT 24:45 »¿Chinoq chiwe e pachaꞌ juna aj chak lik jusukꞌ y kꞌo unaꞌoj, ri yaꞌom puqꞌabꞌ kebꞌutzuq chupa ruꞌorayil konoje ri e kꞌo pa rocho rupatrón?
MAT 24:46 Lik kꞌu nim uqꞌij ralaxik riꞌ ri aj chak we xkꞌun lo rupatrón, koluꞌriqaꞌ katajin che uꞌanik ruchak.
MAT 24:47 Ma paqatzij wi kambꞌiꞌij chiwe: Rupatrón kuꞌana taqanel che rire puwi ronoje rubꞌitaq re.
MAT 24:48 »Noꞌj we waꞌ wa jun aj chak kuꞌan ri na utz taj y kubꞌiꞌij kꞌu pa ranimaꞌ: “Ri nupatrón kꞌamajaꞌ katzelej loq”
MAT 24:49 y kujeq kꞌu kebꞌuchꞌay ri rach aj chakibꞌ; yey ekꞌu rire xew kawaꞌik y kaqꞌabꞌar kukꞌ qꞌabꞌaꞌrelabꞌ, ¿saꞌ kꞌu riꞌ ri kukꞌulumaj?
MAT 24:50 Kakꞌun lo riꞌ rupatrón chupa ri qꞌij y ri ora echiriꞌ waꞌ wa aj chak na royeꞌem taj.
MAT 24:51 Kuqꞌat kꞌu tzij riꞌ puwi ri raj chak y lik kuya pa kꞌax junam kukꞌ ri xa kebꞌ kipalaj, chiriꞌ kꞌu riꞌ koqꞌ wi y kaqichꞌichꞌ wi ruwi reꞌ.
MAT 25:1 »Ri kuꞌana pa rutaqanik ri Dios petinaq chilaꞌ chikaj, e jelaꞌ pachaꞌ ri xkikꞌulumaj lajuj qꞌapoj alito echiriꞌ xkikꞌam bꞌi ri kicandil y xebꞌek pa jun kꞌulanikil re keꞌkikꞌulu rala kakꞌuliꞌik.
MAT 25:2 E kꞌo kꞌu woꞌobꞌ chike lik kꞌo kinaꞌoj y ri woꞌobꞌ chik na jinta kinaꞌoj.
MAT 25:3 »Ri woꞌobꞌ na jinta kinaꞌoj xkikꞌam bꞌi ri kicandil, pero na xkikꞌam tubꞌi aceite re kakinojisaj tanchik.
MAT 25:4 Ekꞌu ri kꞌo kinaꞌoj kinojisam bꞌi ri kicandil che aceite, yey pa rewi kukꞌaꞌam aceite pa jun chik kꞌolibꞌal.
MAT 25:5 Ekꞌu rala kakꞌuliꞌik xmayin che ri roponik. Ruma kꞌu riꞌ, ralito xkijeqo keyuxkꞌaꞌtik y xok lo kiwaram.
MAT 25:6 »Pa tikꞌil aqꞌabꞌ kꞌut, xtataj jun kasikꞌinik, jewaꞌ kubꞌiꞌij: “¡Rala xkꞌunik! ¡Chixela lo che ukꞌulik!”
MAT 25:7 Konoje kꞌu ri qꞌapoj alito xeyaktajik y xkijeq uyijbꞌaxik ri kicandil.
MAT 25:8 »Ekꞌu ri woꞌobꞌ alito na jinta kinaꞌoj jewaꞌ xkibꞌiꞌij chike ri lik kꞌo kinaꞌoj: “Chiyaꞌa jubꞌiqꞌ qaceite che ri kꞌo iwukꞌ riꞌix, ma ri qacandil riꞌoj katajin uchupik.”
MAT 25:9 »Noꞌj ri woꞌobꞌ chik jewaꞌ xkikꞌul uwach: “We kaqaya iwe riꞌix, na kuꞌan ta riꞌ qe qonoje. Jiꞌtzukuj kꞌu iweꞌix pa kakꞌayix wi y chiloqꞌoꞌ.”
MAT 25:10 »Ekꞌuchiriꞌ ebꞌelinaq bꞌi ri woꞌobꞌ che uloqꞌik aceite, xkꞌun lo rala. Ralito kꞌo kinaꞌoj, ri kiyijbꞌam chi pan ri kicandil, xebꞌok junam rukꞌ rala pa kꞌulanikil y xtzꞌapix kꞌu lo ri puerta.
MAT 25:11 »Tekꞌuchiriꞌ, xetzelej lo ri woꞌobꞌ alito y xechꞌaw apanoq: “Qajawal, qajawal, jaqa lo la ri puerta chiqe.”
MAT 25:12 »Ekꞌu rala kakꞌuliꞌik xukꞌul lo uwach: “Paqatzij wi kambꞌiꞌij chiwe: Na wetaꞌam ta kꞌana iwach.”
MAT 25:13 »Mawar kꞌu iwach riꞌ riꞌix, ma na iwetaꞌam tane ruqꞌijol y ruꞌorayil echiriꞌ kakꞌun lo Ralaxel Chikixoꞌl Tikawex.
MAT 25:14 »Ri kuꞌana pa rutaqanik ri Dios petinaq chilaꞌ chikaj, e pachaꞌ ri xuꞌan jun achi echiriꞌ xeꞌek pa jun luwar lik naj; xebꞌusikꞌij kꞌu ri raj chakibꞌ y xuya kan rupuaq pakiqꞌabꞌ.
MAT 25:15 Che jun xuya kan woꞌobꞌ mil, che jun chik xuya kan kaꞌibꞌ mil y che jun chik xuya kan mil. Wa xyaꞌ kan chike e chirij ri kakichꞌij uchakuxik. Ekꞌuchiriꞌ, xeꞌek naj.
MAT 25:16 »Ekꞌu raj chak xkꞌamaw kan ri woꞌobꞌ mil, xuꞌan ukꞌay rukꞌ y jelaꞌ xuchꞌak chi woꞌobꞌ mil puwiꞌ.
MAT 25:17 Jekꞌulaꞌ xuꞌan ri xkꞌamaw kan kebꞌ mil, xuchꞌak chi kebꞌ mil puwiꞌ.
MAT 25:18 Noꞌj ri xkꞌamaw kan jun mil, xukꞌot jun jul y chupa waꞌ xrewaj ri puaq yaꞌtal puqꞌabꞌ ruma ri rajaw.
MAT 25:19 »Ikꞌowinaq chi kꞌu ukꞌiyal qꞌij, xtzelej tanchi lo ri kajaw raj chakibꞌ y xutzꞌonoj kꞌu chike saꞌ ri xkiꞌan rukꞌ rupuaq.
MAT 25:20 Nabꞌe xopon ri raj chak ri ukꞌamom kan woꞌobꞌ mil. Xuya kꞌu che ri rajaw ri woꞌobꞌ mil chik xuchꞌak puwi ri yaꞌom kan che y jewaꞌ xubꞌiꞌij: “Wajaw, riꞌ ri woꞌobꞌ mil xya kan la chwe y riꞌ chi woꞌobꞌ mil, waꞌ e xinchꞌak puwi ri xya kan la chwe” xchaꞌ.
MAT 25:21 »Ri rajaw xubꞌiꞌij kꞌu che: “Utz riꞌ, riꞌat at utzilaj waj chak y lik at jusukꞌ; ma jusukꞌ xachakuj ri xa jubꞌiqꞌ yaꞌtal kan paqꞌabꞌ. E uwariꞌche woꞌora lik kꞌi ri kanya paqꞌabꞌ. Chatokoq y chatkiꞌkota wukꞌ” xchaꞌ.
MAT 25:22 »Tekꞌuchiriꞌ, xopon raj chak ri ukꞌamom kan kaꞌibꞌ mil y xubꞌiꞌij che: “Wajawal, riꞌ ri kaꞌibꞌ mil xya kan la chwe y riꞌ chi kaꞌibꞌ mil kanya cheꞌla, waꞌ e xinchꞌak puwi ri xya kan la chwe” xchaꞌ.
MAT 25:23 »Ri rajaw xubꞌiꞌij kꞌu che: “Utz riꞌ, at utzilaj waj chak y lik at jusukꞌ; ma jusukꞌ xachakuj ri xa jubꞌiqꞌ yaꞌtal kan paqꞌabꞌ. E uwariꞌche woꞌora lik kꞌi ri kanya paqꞌabꞌ. Chatokoq y lik chatkiꞌkota wukꞌ” xchaꞌ.
MAT 25:24 »Ekꞌuchiriꞌ, xopon ri jun chik aj chak ri yaꞌom kan xa jun mil che, y jewaꞌ xubꞌiꞌij che ri rajaw: “Wajaw, riꞌin wetaꞌam lal jun achi lik titzꞌitik, ma kaꞌan la molonik pa na awaninaq ta wi la yey kamolon ne la pa na jinta jopopem wi la.
MAT 25:25 E uwariꞌche riꞌin lik xinxiꞌij wibꞌ. Xinꞌek kꞌut y xinmuq ri puaq la pulew. Riꞌ ri mil yaꞌom kan la chwe, ma e la” xchaꞌ.
MAT 25:26 »Ri rajaw xubꞌiꞌij che: “At jun waj chak lik na utz taj y at xepu. We xachꞌobꞌo kanꞌan molonik pa na in awaninaq ta wi yey kanmol pa na jinta nujopopem wi,
MAT 25:27 xaꞌyaꞌa ta kꞌu riꞌ ri nupuaq pa juna banco chaꞌ echiriꞌ kintzelej loq, kankꞌul ri nupuaq junam rukꞌ ruchꞌakom chik” xchaꞌ.
MAT 25:28 »Tekꞌuchiriꞌ, xubꞌiꞌij chike jujun chik raj chak e kꞌo chiriꞌ: “Chimaja che wa jun aj chak ri mil kꞌo rukꞌ y chiyaꞌa che ri kꞌo lajuj mil rukꞌ.
MAT 25:29 Ma china ri lik kꞌi kꞌo rukꞌ, kayaꞌiꞌ más che y jelaꞌ kakꞌojiꞌ ne uwiꞌ ri kꞌo rukꞌ. Noꞌj ri na jinta kꞌo rukꞌ, kamaj ne che ri xa jubꞌiqꞌ kꞌo rukꞌ.
MAT 25:30 Ekꞌu waꞌ wa jun aj chak na jinta uchak, jiꞌkꞌaqa bꞌi pa ri qꞌequꞌm; chiriꞌ kꞌu riꞌ koqꞌ wi y kaqichꞌichꞌ wi ruwiꞌ reꞌ” xchaꞌ.
MAT 25:31 »Echiriꞌ Ralaxel Chikixoꞌl Tikawex kakꞌun rukꞌ runimal uchuqꞌabꞌ kukꞌ konoje ri santowilaj ángeles, katzꞌuyiꞌ na kꞌu riꞌ chupa ri chomilaj tzꞌulibꞌal re rutaqanik.
MAT 25:32 Konoje taq kꞌu ri tinamit che ruwachulew kakimol kibꞌ chwach y Rire kujach kipa chikijujunal, jelaꞌ pachaꞌ kuꞌan juna chajinel kebꞌeresaj ri bꞌexex chikixoꞌl ri kaprux.
MAT 25:33 Kebꞌuya kꞌu ri bꞌexex puwikiqꞌabꞌ Rire yey ri kaprux kebꞌuya pumox.
MAT 25:34 »Ekꞌuchiriꞌ, ri rey kubꞌiꞌij chike ri e kꞌo puwikiqꞌabꞌ Rire: “¡Chixpetoq! ¡Lik nim iqꞌij iwalaxik riꞌix! Chixok kꞌu chupa rutaqanik ri Dios y chikꞌulu janipa ri uyijbꞌam chi pan chiwe chwi lo ri jeqebꞌal re ruwachulew.
MAT 25:35 Ma xinkꞌojiꞌ pa numik y riꞌix xiya nuwa; xinkꞌojiꞌ pa tzajin chiꞌ y riꞌix xiya numiqꞌinaꞌ; xintzukuj pa kinkanaj kan wi y riꞌix xinikꞌul pa iwocho.
MAT 25:36 Na jinta ko nuqꞌuꞌ y riꞌix xiya nuqꞌuꞌ; xinkꞌojiꞌ pa yabꞌil y xixeꞌbꞌina wukꞌ; xinkꞌojiꞌ pa cárcel y xiniꞌwilaꞌ” kachaꞌ.
MAT 25:37 »Ekꞌu ri e jusukꞌ echiriꞌ kakita waꞌ, jewaꞌ kakibꞌiꞌij: “Qajawal, ¿jampalaꞌ xqil la lal kꞌo la pa numik y xqaya wa la? ¿Jampalaꞌ xqil la lal kꞌo la pa tzajin chiꞌ y xqaya miqꞌinaꞌ la?
MAT 25:38 ¿Jampalaꞌ xqil la katzukuj la pa kakanaj kan wi la y xqakꞌul la pa qocho? ¿Jampalaꞌ xqil la na jinta qꞌuꞌ la y xqaya qꞌuꞌ la?
MAT 25:39 ¿Jampalaꞌ xqil la lal yewaꞌ o kꞌo la pa cárcel yey xeꞌqila la?” kechaꞌ.
MAT 25:40 »Y ri rey kukꞌul uwach chike: “Paqatzij wi kambꞌiꞌij chiwe: Ronoje kꞌu ri xiꞌan chike wa watz-nuchaqꞌ na jinta ko kiwach, chwe riꞌin xiꞌan wi” kachaꞌ.
MAT 25:41 »Ekꞌuchiriꞌ, kubꞌiꞌij ri rey chike ri e kꞌo pumox: “Riꞌix itzel iwachlibꞌal, chixela wukꞌ; kixꞌek kꞌu chupa ri aqꞌ na kachup ta chik, ri yijbꞌital chi pan che ritzel winaq kukꞌ konoje ru ángeles eteran chirij.
MAT 25:42 Ma riꞌin xinkꞌojiꞌ pa numik yey riꞌix na xiya ta nuwa; xinkꞌojiꞌ pa tzajin chiꞌ, yey riꞌix na xiya ta numiqꞌinaꞌ.
MAT 25:43 Xintzukuj pa kinkanaj kan wi, yey riꞌix na xinikꞌul ta pa iwocho. Na jinta ko nuqꞌuꞌ, yey riꞌix na xiya ta nuqꞌuꞌ. Xinkꞌojiꞌ pa yabꞌil y xinkꞌojiꞌ pa cárcel, yey riꞌix na xiniꞌwila taj” kachaꞌ.
MAT 25:44 »Ekꞌuchiriꞌ, kakibꞌiꞌij rike che: “Qajawal, ¿jampalaꞌ xqil la kanum la yey katzajin chiꞌ la? ¿Jampalaꞌ xqil la katzukuj la pa kakanaj kan wi la? ¿Jampalaꞌ xqil la na jinta qꞌuꞌ la? ¿Jampalaꞌ xqil la lal yewaꞌ o kꞌo la pa cárcel, yey riꞌoj na xqanimaj ta la?” kechaꞌ.
MAT 25:45 »Ri rey kukꞌul kꞌu uwach chike: “Paqatzij wi kambꞌiꞌij chiwe: Ronoje ri na xiꞌan ta chike wa watz-nuchaqꞌ na jinta ko kiwach, chwe riꞌin na xiꞌan ta wi” kachaꞌ.
MAT 25:46 »Konoje kꞌu riꞌ waꞌ kebꞌek pa ri kꞌaxkꞌobꞌik na jinta utaqexik, noꞌj ri e jusukꞌ kebꞌek pa ri kꞌaslemal na jinta utaqexik» xcha ri Jesús.
MAT 26:1 Echiriꞌ ri Jesús xukꞌis ubꞌiꞌxikil ronoje waꞌ, jewaꞌ xubꞌiꞌij chike rutijoꞌn:
MAT 26:2 «Riꞌix iwetaꞌam pa kebꞌ qꞌij kakꞌun lo ri nimaqꞌij Pascua; chupa kꞌu riꞌ wa nimaqꞌij, Ralaxel Chikixoꞌl Tikawex kayaꞌ pa kamik chwa cruz» xchaꞌ.
MAT 26:3 Ekꞌu ri nimaq e aj chakunel pa Rocho Dios kukꞌ raj kꞌutunel re ri tzijpixabꞌ y ri nimaq winaq e aj wach re ri tinamit, xkimol kibꞌ che ruwa ja re ri palacio re ri Caifás, ri kajawal raj chakunel pa Rocho Dios.
MAT 26:4 Chiriꞌ xkichꞌaꞌtibꞌej chikiwach suꞌanik kakichap ri Jesús rukꞌ sokosoꞌnik re kakikamisaj.
MAT 26:5 Xkibꞌiꞌij kꞌu chikiwach: «Na kaqaꞌan ta pa ri nimaqꞌij chaꞌ ri tinamit na ketukuk ta ruma waꞌ» xechaꞌ.
MAT 26:6 Ri Jesús kꞌo pa ri tinamit Betania chirocho ri Simón, ri jun xkꞌojiꞌ ri yabꞌil lepra che.
MAT 26:7 Xkꞌun kꞌu jun ixoq rukꞌaꞌam jun kꞌolibꞌal nojinaq che kunabꞌal lik kiꞌ ruxlabꞌ y lik kꞌi rajil. Xqibꞌ kꞌu rukꞌ ri Jesús y xuqꞌej ri kunabꞌal chuꞌjolom echiriꞌ Rire tzꞌul chwa ri mexa.
MAT 26:8 Echiriꞌ xkil waꞌ rutijoꞌn, lik xpe koyowal che y jewaꞌ xkibꞌiꞌij chikiwach: —¿Suꞌchak wa kunabꞌal xtzꞌiloꞌxik?
MAT 26:9 Ma ri lik usukꞌ e ta xkꞌayix waꞌ chi ukꞌiyal puaq, y rukꞌ kꞌu riꞌ ketoꞌ ri nibꞌaꞌibꞌ —xechaꞌ.
MAT 26:10 Ekꞌu ri Jesús retaꞌam saꞌ ri kakibꞌiꞌij chikiwach; ruma kꞌu riꞌ, jewaꞌ xubꞌiꞌij chike: —¿Suꞌchak kixchꞌaꞌt chirij ri xuꞌan wiꞌxoq? Ma ri xuꞌan chwe e jun utzilaj chak.
MAT 26:11 Ri nibꞌaꞌibꞌ e laꞌ xaqi e kꞌo iwukꞌ; noꞌj riꞌin na xaqi ta in kꞌo iwukꞌ.
MAT 26:12 Yey wa xuꞌan wiꞌxoq echiriꞌ xuqꞌej wa kunabꞌal panuwiꞌ, waꞌ re uyijbꞌaxik pan ri nucuerpo re ri muqubꞌal we.
MAT 26:13 Paqatzij wi kambꞌiꞌij chiwe: Pa taq katzijox wi wa Utzilaj Tzij che ronoje ruwachulew, kakuxtax kꞌu wiꞌxoq ruma ri xuꞌano —xchaꞌ.
MAT 26:14 Jun kꞌu chike ri kabꞌlajuj utijoꞌn ri Jesús, Judas aj Iscariot rubꞌiꞌ, xeꞌek kukꞌ ri nimaq e aj chakunel pa Rocho Dios
MAT 26:15 y jewaꞌ xubꞌiꞌij chike: —¿Saꞌ ri kaya alaq chwe we kanya ri Jesús paqꞌabꞌ alaq? —xchaꞌ. Ekꞌu rike xkibꞌiꞌij kakitoj treinta saqil puaq re plata che.
MAT 26:16 Chwi kꞌu riꞌ, ri Judas xujeq utzukuxik suꞌanik kuya ri Jesús pakiqꞌabꞌ.
MAT 26:17 Chupa kꞌu ri nabꞌe qꞌij re ri nimaqꞌij echiriꞌ katij ri pam na jinta levadura che, rutijoꞌn ri Jesús xeqibꞌ rukꞌ y xkitzꞌonoj che: —¿Pa kaꞌaj wi la keꞌqayijbꞌaꞌ wi ri cena re ri nimaqꞌij Pascua? —xechaꞌ.
MAT 26:18 Ri Jesús xubꞌiꞌij kꞌu chike: —Jix pa ri tinamit y chilaꞌ kiꞌriqa jun achi; chibꞌiꞌij kꞌu che: “Ri tijonel qeꞌoj jewaꞌ kubꞌiꞌij: Ri nuqꞌijol riꞌin xa naqaj chi kꞌo wuloq, y chupa ri ocho la kanꞌan wi ri nimaqꞌij Pascua junam kukꞌ ri nutijoꞌn” —xchaꞌ.
MAT 26:19 Rutijoꞌn ri Jesús e xkiꞌano jelaꞌ pachaꞌ ri xebꞌutaq Rire che, xeꞌkiyijbꞌaꞌ kꞌu ri cena re ri nimaqꞌij Pascua.
MAT 26:20 Echiriꞌ xok raqꞌabꞌ, ri Jesús xok chwa ri mexa junam kukꞌ ri kabꞌlajuj utijoꞌn.
MAT 26:21 Ekꞌuchiriꞌ kewaꞌik, ri Jesús xubꞌiꞌij chike: —Paqatzij wi kambꞌiꞌij chiwe: Kꞌo jun chiwe riꞌix kakꞌayin we —xchaꞌ.
MAT 26:22 Ekꞌuchiriꞌ, rutijoꞌn lik xebꞌuchap bꞌis y xkijeq chikijujunal kakitzꞌonoj che: —Qajawal, ¿kꞌaxtaj in riꞌ? —kechaꞌ.
MAT 26:23 Ri Jesús xukꞌul uwach: —E ri kumuꞌ lo rupam junam wukꞌ chupa ri laq, e riꞌ ri kakꞌayin we riꞌin.
MAT 26:24 Paqatzij wi Ralaxel Chikixoꞌl Tikawex e katajin che rikꞌowibꞌexik janipa ri tzꞌibꞌital kan puwi Rire chupa Ruchꞌaꞌtem ri Dios. Pero ¡lik toqꞌoꞌ uwach rachi kakꞌayin re! E ne más utz che waꞌchi tamaji xalaxik —xchaꞌ.
MAT 26:25 Ekꞌuchiriꞌ, xchꞌaw ri Judas, ri jun kukꞌayij ri Jesús, jewaꞌ xubꞌiꞌij: —Wajawal, ¿kꞌaxtaj in riꞌ? —xchaꞌ. Ri Jesús xukꞌul uwach: —Areꞌ; at xatbꞌiꞌn re —xchaꞌ.
MAT 26:26 Xaloqꞌ kꞌu riꞌ kewaꞌik, ri Jesús xukꞌam ri pam y xutioxij che ri Dios. Tekꞌuchiriꞌ xuwechꞌo, xujach chike rutijoꞌn y jekꞌuwaꞌ xubꞌiꞌij: —Chikꞌamaꞌ y chitijaꞌ, ma e nucuerpo waꞌ —xchaꞌ.
MAT 26:27 Tekꞌuchiriꞌ xukꞌam ri kꞌolibꞌal kꞌo vino chupa, xutioxij che ri Dios, xuya chike y jekꞌuwaꞌ xubꞌiꞌij: —Chitija iwonoje chuchiꞌ waꞌ wa kꞌolibꞌal kꞌo vino chupa,
MAT 26:28 ma e nukikꞌel waꞌ, ri katuruw na kuma ukꞌiyal tikawex re kuybꞌal kimak, yey e kujikibꞌaꞌ uwach ri kꞌakꞌ tzij.
MAT 26:29 Y kambꞌiꞌij kꞌu chiwe: Chwi woꞌora na kantij ta chi ruwaꞌal uva kꞌate kiꞌntija tanchi junam iwukꞌ chupa ruqꞌijol rutaqanik ri Nuqaw —xchaꞌ.
MAT 26:30 Echiriꞌ xkikꞌis ubꞌixoxik ri bꞌix, xebꞌek chwa ri juyubꞌ Olivos.
MAT 26:31 Ekꞌuchiriꞌ, ri Jesús xubꞌiꞌij chike: —Waqꞌabꞌ iwonoje riꞌix kiwesaj na iwibꞌ chwij, ma e pachaꞌ kubꞌiꞌij Ruchꞌaꞌtem ri Dios: Kankamisaj raj chajinel y taq rubꞌexex kakikich bꞌi kibꞌ kachaꞌ.
MAT 26:32 Noꞌj echiriꞌ kinkꞌastaj lo chikixoꞌl ri ekaminaq, kinnabꞌej bꞌi chiwach kꞌa Galilea —xchaꞌ.
MAT 26:33 Ekꞌu ri Pedro xukꞌul uwach: —Tobꞌ ne konoje kakesaj kibꞌ chiꞌij la, riꞌin na kanꞌan ta kꞌana waꞌ —xchaꞌ.
MAT 26:34 Yey ri Jesús xukꞌul uwach: —Paqatzij wi kambꞌiꞌij chawe: Wa jun aqꞌabꞌ echiriꞌ kꞌamajaꞌ ne kabꞌixon ri teren, riꞌat oxlaj chik abꞌiꞌim na awetaꞌam ta nuwach —xchaꞌ.
MAT 26:35 Xubꞌiꞌij kꞌu ri Pedro che: —Tobꞌ ne chirajawaxik kinkam junam ukꞌ la, riꞌin na kanwewaj taj wetaꞌam wach la —xchaꞌ. Jekꞌulaꞌ riꞌ xkibꞌiꞌij konoje rutijoꞌn.
MAT 26:36 Tekꞌuchiriꞌ, ri Jesús xebꞌukꞌam bꞌi rutijoꞌn pa jun luwar Getsemaní rubꞌiꞌ, y xubꞌiꞌij kꞌu chike: —Chixtzꞌula kan wara, noꞌj riꞌin kiꞌnꞌana orar chileꞌ apanoq —xchaꞌ.
MAT 26:37 Yey xebꞌukꞌam kꞌu bꞌi ri Pedro y ri kebꞌ ukꞌajol ri Zebedeo rukꞌ. Y xujeq kꞌu riꞌ lik kabꞌisonik y lik kakꞌaxkꞌobꞌ ri ranimaꞌ.
MAT 26:38 Ekꞌuchiriꞌ, xubꞌiꞌij chike: —Kꞌo jun unimal bꞌis re kamik chinukꞌuꞌx. Chixkꞌola kan wara; mixwarik, e lik chiꞌana orar wukꞌ —xchaꞌ.
MAT 26:39 Tekꞌuchiriꞌ, Rire xqibꞌ chi pan jubꞌiqꞌ chwach, xuxukubꞌaꞌ ribꞌ y xuqasaj umejelem kꞌa chuꞌlew, y xuꞌan kꞌu orar, jewaꞌ xubꞌiꞌij: «Lal Nuqaw, ꞌana ko la riꞌ chinkolobꞌej ko la chaꞌ na kinikꞌow ta chupa waꞌ wa kꞌaxkꞌobꞌik. Noꞌj na e ta kꞌu chuꞌana ri kuaj riꞌin, ma e chuꞌana janipa ri kaꞌaj Rilal» xchaꞌ.
MAT 26:40 Tekꞌuchiriꞌ, xtzelej lo pa e kꞌo wi kan rutijoꞌn y xebꞌoꞌluꞌriqaꞌ kewarik. Xubꞌiꞌij kꞌu che ri Pedro: —¿Lik kami na xichꞌij ta kꞌana ri waram chaꞌ kiꞌan orar wukꞌ, tobꞌ tane xa juna ora?
MAT 26:41 Mixwar kꞌut y lik chiꞌana orar chaꞌ kichꞌij uchuqꞌabꞌ ri kꞌambꞌal ipa kapetik. Paqatzij wi, lik kacha ikꞌuꞌx che uꞌanik ri utz, pero waꞌ lik kꞌayew chiwe ma e ri itiꞌjil na jinta ukowil —xchaꞌ.
MAT 26:42 Xeꞌek tanchi chukalaj, xuꞌana orar, jewaꞌ xubꞌiꞌij: «Lal Nuqaw, we lik chirajawaxik kinikꞌow na che wa kꞌaxkꞌobꞌik, e chuꞌana kꞌu riꞌ janipa ri kaꞌaj Rilal» xchaꞌ.
MAT 26:43 Tekꞌuchiriꞌ, xtzelej tanchi lo kukꞌ rutijoꞌn y xebꞌoꞌluꞌriqaꞌ kewarik, ma ri kiwach lik na kukuy ta chi ri waram.
MAT 26:44 Xebꞌuya tanchi kanoq y xuꞌana orar churox laj, yey e mismo ri xutzꞌonoj che ri Dios.
MAT 26:45 Ekꞌuchiriꞌ, xeꞌek tanchi pa e kꞌo wi kan rutijoꞌn y xubꞌiꞌij chike: —¿Kꞌa kixwar kami riꞌ riꞌix? ¿Kꞌa kixuxlanik? Ma e waꞌ xopon ruꞌorayil chaꞌ Ralaxel Chikixoꞌl Tikawex kayaꞌ pakiqꞌabꞌ raj makibꞌ.
MAT 26:46 ¡Chixwaꞌlijoq! ¡Joꞌ! Ma ri kakꞌayin we riꞌin e laꞌ xkꞌunik —xchaꞌ.
MAT 26:47 Kꞌa kachꞌaꞌt ne ri Jesús echiriꞌ xkꞌun lo ri Judas, jun chike ri kabꞌlajuj utijoꞌn. Ekꞌu rire erachbꞌilam lo ukꞌiyal winaq kukꞌaꞌam lo espada y cheꞌ. Taq waꞌ etaqom lo kuma ri nimaq e aj chakunel pa Rocho Dios y kuma ri nimaq winaq re ri tinamit.
MAT 26:48 Ekꞌu ri Judas, ri kayaꞌw bꞌi re pakiqꞌabꞌ, ubꞌiꞌim chi lo chike suꞌanik kaketaꞌmaj china ri kakichapo, jewaꞌ ubꞌiꞌim: «E ri jun kantzꞌubꞌ uchiꞌ, e riꞌ rire. Chapa kꞌu bꞌi alaq.»
MAT 26:49 Xqibꞌ kꞌu ri Judas rukꞌ ri Jesús y xuya rutzil uwach, xubꞌiꞌij che: —Wajawal —xchaꞌ. Y xutzꞌubꞌ uchiꞌ.
MAT 26:50 Ekꞌu ri Jesús xubꞌiꞌij che: —Wamigo, ¿saꞌ ri kolaꞌanaꞌ? —xchaꞌ. Tekꞌuchiriꞌ, xeqibꞌ ri winaq rukꞌ y xkichapo chaꞌ kakikꞌam bꞌi pa qꞌatbꞌal tzij.
MAT 26:51 Kꞌo kꞌu jun chike ri e kꞌo rukꞌ ri Jesús, xresaj lo ru espada y xujochij bꞌi jun uxikin ri raj chak ri kajawal raj chakunel pa Rocho Dios.
MAT 26:52 Ekꞌu ri Jesús xubꞌiꞌij che: —Chakꞌolo ra espada chupa rukꞌolibꞌal; ma konoje ri kechꞌoꞌjin rukꞌ espada, rukꞌ espada kekamik.
MAT 26:53 ¿Na awetaꞌam ta kami, we ta kuaj riꞌin kantzꞌonoj che ri Nuqaw woꞌora, Rire kebꞌutaq lo juna kabꞌlajuj legiones re ángeles wukꞌ?
MAT 26:54 Noꞌj we ta e xinꞌan riꞌ, ¿suꞌanik kꞌu riꞌ kuꞌana janipa ri kubꞌiꞌij Ruchꞌaꞌtem ri Dios panuwi riꞌin? —xchaꞌ.
MAT 26:55 Ekꞌuchiriꞌ, xubꞌiꞌij chike ri soldados: —¿Suꞌchak petinaq alaq rukꞌ espada y cheꞌ? ¿Petinaq kami alaq che ukꞌamik bꞌi juna eleqꞌom? Wa petinaq loq ronoje qꞌij waꞌ kꞌut in tzꞌuyiꞌnaq chiwach alaq, e laꞌ kinkꞌutun pa ri Rocho Dios. ¿Suꞌchak kꞌu riꞌ kꞌa e laꞌ kinoꞌlchapa alaq?
MAT 26:56 Noꞌj jekꞌuwaꞌ kuꞌano chaꞌ e kuꞌana ri kiqꞌalajisam kan ri qꞌalajisanelabꞌ pa Ruchꞌaꞌtem ri Dios —xchaꞌ. Tekꞌuchiriꞌ, konoje rutijoꞌn xebꞌanimajik y jelaꞌ xkiya kan ri Jesús.
MAT 26:57 Ri xechapaw bꞌi ri Jesús xkikꞌam bꞌi chwach ri Caifás, ri kajawal raj chakunel pa Rocho Dios, pa kimolom wi kibꞌ raj kꞌutunel re ri tzijpixabꞌ y ri nimaq winaq re ri tinamit.
MAT 26:58 Ekꞌu ri Pedro xa naj teran pan chirij ri Jesús, jelaꞌ xeꞌela che ruwa ja re ri rocho ri kajawal raj chakunel pa Rocho Dios. Xok kꞌu bꞌi y xeꞌtzꞌula kukꞌ ri e chajinel chaꞌ karilo saꞌ ri kukꞌisbꞌej ronoje waꞌ.
MAT 26:59 Ri nimaq e aj chakunel pa Rocho Dios kukꞌ taq ri nimaq winaq y konoje ri uchapom wi ribꞌ ri qꞌatbꞌal tzij, kakitzukuj suꞌanik kakitzꞌaq uchiꞌ ri Jesús chaꞌ jelaꞌ utz kaqꞌat tzij re kamik puwiꞌ.
MAT 26:60 Noꞌj na jinta kꞌo xkiriq chirij, tobꞌ ukꞌiyal winaq xkinukꞌ raqꞌubꞌal chirij. Tekꞌuchiriꞌ, xebꞌopon na kaꞌibꞌ xeꞌkitzꞌaqa uchiꞌ rukꞌ raqꞌubꞌal,
MAT 26:61 jewaꞌ xkibꞌiꞌij: —Waꞌ waꞌchi jewaꞌ xubꞌiꞌij: “Riꞌin kꞌo panuqꞌabꞌ kanwulij ri Rocho Dios y xa pa oxibꞌ qꞌij kanyak tanchik” —xechaꞌ.
MAT 26:62 Ewi ri kajawal raj chakunel pa Rocho Dios xyaktajik y xubꞌiꞌij che ri Jesús: —¿E kami laꞌ na jinta kꞌana kabꞌiꞌij riꞌat? ¿Saꞌ kꞌu ri kakꞌulubꞌej uwach puwi wa ketajin che ukojik chawij? —xchaꞌ.
MAT 26:63 Noꞌj ri Jesús na jinta kꞌo xubꞌiꞌij. Ekꞌuchiriꞌ, jewaꞌ xubꞌiꞌij ri kajawal raj chakunel pa Rocho Dios: —Chabꞌiꞌij chupa rubꞌiꞌ ri Dios kꞌaslik, we riꞌat at ri Cristo, Rukꞌajol ri Dios —xchaꞌ.
MAT 26:64 Ri Jesús xubꞌiꞌij che: —Areꞌ, e ri xbꞌiꞌij la. Y kambꞌiꞌij kꞌu che onoje alaq: Kil na kꞌu alaq Ralaxel Chikixoꞌl Tikawex tzꞌul puwikiqꞌabꞌ ri Dios, ri lik kꞌo unimal uchuqꞌabꞌ yey kil kꞌu alaq riꞌ echiriꞌ kakꞌun lo pa sutzꞌ chwa ri kaj —xchaꞌ.
MAT 26:65 Ekꞌu ri kajawal raj chakunel pa Rocho Dios xurichꞌij ruqꞌuꞌ y xubꞌiꞌij: —Waꞌ waꞌchi lik xmakun chirij ri Dios rukꞌ wa xubꞌiꞌij. ¡Na jinta chi uchak más e aj kojol umak! Ma lik e laꞌ xta alaq xubꞌiꞌij ri na taqal ta che.
MAT 26:66 ¿Saꞌ kꞌu riꞌ kabꞌiꞌij ralaq che? —xchaꞌ. Rike xkibꞌiꞌij: —Lik chirij umak y taqal kꞌu che kakamisaxik —xechaꞌ.
MAT 26:67 Ewi e kꞌo jujun xkijeq kakichubꞌaj rupalaj y lik kakiꞌan pa tꞌoꞌy. E kꞌo jujun chik xkipachꞌ qꞌabꞌ chupalaj
MAT 26:68 y kakibꞌiꞌij che: —At ri Cristo, Ruchaꞌoꞌn lo ri Dios, ¡chanaꞌij pe kꞌu riꞌ china xchꞌayaw awe! —kecha che.
MAT 26:69 Ekꞌu ri Pedro tzꞌul che ruwa ja echiriꞌ jun ali aj chak xqibꞌ rukꞌ y xubꞌiꞌij che: —Rilal lal jun chike ri eteran chirij ri Jesús, ri jun aj Galilea —xchaꞌ.
MAT 26:70 Noꞌj ri Pedro xrewaj chikiwach konoje, jewaꞌ xubꞌiꞌij: —Riꞌin na wetaꞌam tane saꞌ puwiꞌ katchꞌaꞌt wi —xchaꞌ.
MAT 26:71 Ekꞌu riꞌ kel bꞌi ri Pedro chuchiꞌ ri puerta yey xilitaj ruma jun chik ali aj chak, y waꞌli jewaꞌ xubꞌiꞌij chike ri e kꞌo chiriꞌ: —Waꞌ wa jun achi e jun chike ri eteran chirij ri Jesús ri aj Nazaret —xchaꞌ.
MAT 26:72 Ri Pedro xrewaj tanchik y lik xujikibꞌaꞌ uwach ubꞌiꞌxikil: —Riꞌin na wetaꞌam ta kꞌana uwach laꞌ laꞌchi —xchaꞌ.
MAT 26:73 Joqꞌotaj kꞌu riꞌ, ri e kꞌo chiriꞌ xeqibꞌ rukꞌ ri Pedro y xkibꞌiꞌij che: —Paqatzij wi rilal lal jun chike rutijoꞌn; ma lik qꞌalaj, ri kachꞌaꞌt la e junam rukꞌ ri kechꞌaꞌt rike —xechaꞌ.
MAT 26:74 Ekꞌu ri Pedro xujeq ubꞌiꞌxikil itzel taq tzij y lik xujikibꞌaꞌ uwach, xubꞌiꞌij: —Riꞌin na wetaꞌam ta kꞌana uwach laꞌ laꞌchi —xchaꞌ. Xew xukꞌis ubꞌiꞌxikil waꞌ, xbꞌixon lo ri teren.
MAT 26:75 Ekꞌuchiriꞌ, xkꞌun lo chukꞌuꞌx ri Pedro ri xbꞌiꞌx lo che ruma ri Jesús: «Kꞌamajaꞌ ne kabꞌixon ri teren, riꞌat oxlaj chik abꞌiꞌim na awetaꞌam ta nuwach.» Ewi xel bꞌi ri Pedro chiriꞌ y lik xoqꞌik ruma rukꞌaxkꞌolil ukꞌuꞌx.
MAT 27:1 Echiriꞌ xsaqirik, konoje ri nimaq e aj chakunel pa Rocho Dios kukꞌ ri nimaq winaq re ri tinamit, xkiꞌan tzij chikiwach puwi ri kakiꞌano chaꞌ kaqꞌat tzij re kamik puwi ri Jesús.
MAT 27:2 Yutum kꞌu ri Jesús, xkikꞌam bꞌi y xeꞌkiyaꞌa chwach ri taqanel Poncio Pilato.
MAT 27:3 Ri Judas ri xkꞌayin re ri Jesús, echiriꞌ xrilo xqꞌat tzij re kamik puwi ri Jesús, lik xok chukꞌuꞌx ri xuꞌano. Xeꞌek kꞌut y xutzelej ri treinta saqil puaq chike ri nimaq e aj chakunel pa Rocho Dios y chike ri nimaq winaq.
MAT 27:4 Xubꞌiꞌij kꞌu chike: —Riꞌin lik in makuninaq, ma xinkꞌayij pa kamik jun achi na jinta umak —xchaꞌ. Pero rike xkibꞌiꞌij che: —Na jinta qe riꞌoj che laꞌ; laꞌ amak riꞌat —xechaꞌ.
MAT 27:5 Ekꞌuchiriꞌ, ri Judas xuꞌkꞌaqa kan ri puaq pa ri Rocho Dios y xeꞌek kꞌut xuꞌjitzꞌaj ribꞌ.
MAT 27:6 Ri nimaq e aj chakunel pa ri Rocho Dios xeꞌkimolo ri puaq y xkibꞌiꞌij: «Waꞌ wa puaq na ubꞌe ta kꞌenoq kaqaya pa ri kaxa re qasaꞌn, ma waꞌ rajil ukikꞌel jun achi» xechaꞌ.
MAT 27:7 Tekꞌuchiriꞌ, xkiꞌan tzij chikiwach chaꞌ rukꞌ waꞌ wa puaq kakiloqꞌ juchꞌaqap ulew rubꞌiꞌ “Luwar re ri aj tzꞌaqal xoqꞌoꞌl”, chaꞌ kuꞌana jun luwar re muqubꞌal ke ri na e ta aj Israel.
MAT 27:8 Ruma kꞌu laꞌ, la jun ulew kꞌa e ubꞌiꞌ waqꞌij ora “Luwar re kikꞌ”.
MAT 27:9 Ekꞌu xuꞌan pachaꞌ ri tzꞌibꞌital kan ruma ri qꞌalajisanel Jeremías pa Ruchꞌaꞌtem ri Dios, pa kubꞌiꞌij wi: Xkikꞌam kꞌu ri treinta saqil puaq, ma e rajil riꞌ kojotal kuma raj Israel.
MAT 27:10 Y rukꞌ kꞌu wa puaq, xkiloqꞌ ri jun luwar rubꞌiꞌ “Luwar re ri aj tzꞌaqal xoqꞌoꞌl”, jelaꞌ pachaꞌ ri ubꞌiꞌim lo ri Dios chwe.
MAT 27:11 Ekꞌuchiriꞌ xkꞌam bꞌi ri Jesús chwach ri taqanel Pilato, rire xutzꞌonoj che ri Jesús: —¿Lal kami riꞌ ri rey ke raj judiꞌabꞌ? —xchaꞌ. Ri Jesús xubꞌiꞌij che: —Lal kabꞌiꞌn la re —xchaꞌ.
MAT 27:12 Yey echiriꞌ ri nimaq e aj chakunel pa Rocho Dios kukꞌ ri nimaq winaq re Israel xkitzꞌaq uchiꞌ ri Jesús, Rire na xukꞌul ta kꞌana uwach ri kakibꞌiꞌij rike.
MAT 27:13 Ruma kꞌu riꞌ, ri Pilato xutzꞌonoj che ri Jesús: —¿Na kata ta kami la janipa ri kakibꞌiꞌij chiꞌij la? —xchaꞌ.
MAT 27:14 Pero ri Jesús na xukꞌul ta kꞌana uwach; ruma kꞌu riꞌ, ri taqanel lik xkam ranimaꞌ che.
MAT 27:15 Chupa kꞌu ri nimaqꞌij Pascua, ri taqanel romano xex kuꞌan wi kuyolopij bꞌi jun chike ri e kꞌo pa cárcel, yey e ri winaq kechaꞌwik china ri kakaj kayolopix bꞌi.
MAT 27:16 Kꞌo kꞌu jun achi pa cárcel lik etaꞌmatal uwach, Barrabás rubꞌiꞌ.
MAT 27:17 Ekꞌuchiriꞌ ri winaq kimolom chi kibꞌ, ri Pilato xutzꞌonoj chike: —¿China ri kiwaj riꞌix kanyolopij bꞌi, e ri Barrabás o e ri Jesús, ri kabꞌiꞌx che “e ri Cristo”, Ruchaꞌoꞌn lo ri Dios? —xchaꞌ.
MAT 27:18 Xutzꞌonoj kꞌu waꞌ ma retaꞌam e kꞌo jujun kꞌax kikꞌuꞌx chirij ri Jesús, y xa ruma kꞌu riꞌ kiyaꞌom ri Jesús chwach.
MAT 27:19 Ekꞌuchiriꞌ tzꞌul ri Pilato pa ri qꞌatbꞌal tzij, ri rixoqil xutaq ubꞌiꞌxikil che: «Makꞌo maꞌan la che wa jun achi jusukꞌ ubꞌinik usilabꞌik, ma waqꞌij lik kabꞌison nukꞌuꞌx ruma xinꞌan jun wachikꞌ puwi rire yey lik xibꞌibꞌal uwach ri xinwachikꞌaj» xchaꞌ.
MAT 27:20 Noꞌj ri nimaq e aj chakunel pa Rocho Dios kukꞌ taq ri nimaq winaq re Israel xkikoj pa kijolom ri ukꞌiyal winaq chaꞌ e kakitzꞌonoj kayolopix bꞌi ri Barrabás yey e kakamisax ri Jesús.
MAT 27:21 Ri taqanel xchꞌaꞌt tanchi kukꞌ ri winaq, jewaꞌ xutzꞌonoj chike: —¿China chike wa kaꞌibꞌ kiwaj kanyolopij bꞌi? —xchaꞌ. Rike xkibꞌiꞌij: —E yolopij bꞌi la ri Barrabás —xechaꞌ.
MAT 27:22 Tekꞌuchiriꞌ, xutzꞌonoj ri Pilato chike: —¿Yey saꞌ kꞌu riꞌ kanꞌan che ri Jesús, ri kabꞌiꞌx che “e ri Cristo”, Ruchaꞌoꞌn lo ri Dios? —xchaꞌ. Konoje xkikꞌul uwach: —¡Kamisax chwa cruz! —xechaꞌ.
MAT 27:23 Ekꞌu riꞌ ri Pilato xubꞌiꞌij chike: —¿Saꞌ kꞌu rumak uꞌanom? —xchaꞌ. Pero ri winaq más ko xesikꞌinik: —¡Kamisax chwa cruz! —xechaꞌ.
MAT 27:24 Ri Pilato xrilo na jinta kutiqoj kuꞌan más tzꞌonobꞌal chike ma más ne ketukuk ri winaq; ruma kꞌu riꞌ, xutaq ukꞌamik yaꞌ y ekꞌu laꞌ chikiwach ri winaq xuchꞌaj ruqꞌabꞌ, y jewaꞌ xubꞌiꞌij: —Na jinta kꞌu numak riꞌin che rukamik waꞌchi jusukꞌ rubꞌinik, ma waꞌ imak riꞌix —xchaꞌ.
MAT 27:25 Konoje kꞌu ri winaq xkikꞌul uwach, jewaꞌ xkibꞌiꞌij: —Riꞌoj kukꞌ ri qalkꞌoꞌal kaqaya qibꞌ chuxeꞌ rukamik rire —xechaꞌ.
MAT 27:26 Ewi ri Pilato xuyolopij bꞌi ri Barrabás. Tekꞌuchiriꞌ, xtaqan che kajichꞌ upa ri Jesús y xuya pakiqꞌabꞌ ri soldados chaꞌ kakikamisaj chwa cruz.
MAT 27:27 Ekꞌuchiriꞌ, ri soldados re ri taqanel xkikꞌam bꞌi ri Jesús pa ri palacio y xkimol kꞌu kichiꞌ konoje ri soldados chaꞌ kakisut rij.
MAT 27:28 Xkesaj kꞌu bꞌi ruqꞌuꞌ y xkirip jun manta chirij yey waꞌ kaqkoj katzuꞌnik.
MAT 27:29 Che rujolom xkikoj jun corona pachꞌum rukꞌ kꞌiix y xkiya jukutaj tani pa ruqꞌabꞌ uwikiqꞌabꞌ. Tekꞌuchiriꞌ, xexukiꞌ chwach y xkijeq uchꞌamixik, jewaꞌ kakibꞌiꞌij che: —¡Nim uqꞌij ri rey ke raj judiꞌabꞌ! —kechaꞌ.
MAT 27:30 Yey xkichubꞌaj rupalaj, xkimaj kꞌu ri jukutaj tani puqꞌabꞌ y rukꞌ laꞌ xkichꞌay rujolom.
MAT 27:31 Echiriꞌ xkitanabꞌaꞌ uchꞌamixik, xkesaj ri manta kiripom chirij y xkikoj tanchi ruqꞌuꞌ. Tekꞌuchiriꞌ, xkikꞌam bꞌi re keꞌkikamisaj chwa cruz.
MAT 27:32 Echiriꞌ katajin kelik bꞌi, xkikꞌul jun achi aj Cirene, Simón rubꞌiꞌ, y xkitaq che kutelej bꞌi ri cruz re ri Jesús.
MAT 27:33 Ekꞌuchiriꞌ, xebꞌopon pa ri luwar Gólgota rubꞌiꞌ, waꞌ keꞌelawi “luwar re ubꞌaqil ujolom animaꞌ”.
MAT 27:34 Xkiya kꞌu che ri Jesús vinagre yijbꞌam rukꞌ aqꞌes lik kꞌa; pero Rire echiriꞌ xunaꞌ waꞌ, na xraj taj xutijo.
MAT 27:35 Echiriꞌ kiyaꞌom chi ri Jesús chwa ri cruz, ri soldados rukꞌ jun sorteo xkijach kibꞌ puwi ruqꞌuꞌ. Jekꞌulaꞌ e xuꞌana pachaꞌ rubꞌiꞌim lo ri qꞌalajisanel chupa Ruchꞌaꞌtem ri Dios: Xkijach kibꞌ puwi ri nuqꞌuꞌ, ma xkiꞌan sorteo rukꞌ.
MAT 27:36 Tekꞌuchiriꞌ, xetzꞌuyiꞌ chiriꞌ chaꞌ kakichajij ri Jesús.
MAT 27:37 Chwi kꞌu lo rucruz ri Jesús tzꞌibꞌitalik suꞌbꞌe xqꞌat tzij puwiꞌ, jewaꞌ kubꞌiꞌij: «E JESÚS WAꞌ, RI REY KE RAJ JUDIꞌABꞌ.»
MAT 27:38 Xekiya kꞌu kaꞌibꞌ eleqꞌomabꞌ chwa cruz, jun puwikiqꞌabꞌ y jun pumox ri Jesús.
MAT 27:39 Ekꞌu ri winaq kebꞌikꞌow chiriꞌ kakiyoqꞌ kanoq, kakiyiriyaꞌ ri kijolom che,
MAT 27:40 y jewaꞌ kakibꞌiꞌij: —At peꞌ ri abꞌiꞌim kawulij ri Rocho Dios y xa pa oxibꞌ qꞌij kayak tanchik; chakolobꞌej kꞌu awibꞌ riꞌ. We paqatzij wi at Ukꞌajol ri Dios, chatqaj lo chwa ri cruz —kechaꞌ.
MAT 27:41 Jenelaꞌ riꞌ xkiꞌan ri nimaq e aj chakunel pa Rocho Dios junam kukꞌ raj kꞌutunel re ri tzijpixabꞌ, ri fariseos y ri nimaq winaq re ri tinamit; lik xkichꞌamij, jewaꞌ xkibꞌiꞌij:
MAT 27:42 —Lik waꞌ kꞌut e kꞌi ri xebꞌukolobꞌej che taq yabꞌil y che kamik, yey na kuriq ta waꞌ kꞌu ukolobꞌexik ribꞌ rire. We ta paqatzij wi e Rey re ri qatinamit Israel, qaja lo riꞌ utukel chwa ri cruz chaꞌ jelaꞌ kaqakojo e rire ri Uchaꞌoꞌn lo ri Dios.
MAT 27:43 Ma lik waꞌ kꞌut xkubꞌiꞌ ukꞌuꞌx rukꞌ ri Dios. Yey we ta ri Dios lik kꞌax kunaꞌo, chukolobꞌej riꞌ woꞌora, ma rire ubꞌiꞌim e Ukꞌajol ri Dios —xechaꞌ.
MAT 27:44 Jenelaꞌ riꞌ xkibꞌiꞌij releqꞌomabꞌ eyaꞌom chwa cruz pa taq utzal, lik xkichꞌamij.
MAT 27:45 Echiriꞌ xtikꞌoj ri qꞌij, xok qꞌequꞌm che ruwachulew y waꞌ xuꞌkꞌisa kꞌa che ri urox ora bꞌenaq qꞌij.
MAT 27:46 Chupa kꞌu laꞌ laꞌ ora, ri Jesús lik ko xsikꞌinik, jewaꞌ xubꞌiꞌij pa ri chꞌaꞌtem kachꞌaꞌt wi Rire: —Elí, Elí, ¿lama sabactani? —xchaꞌ. Waꞌ keꞌelawi: “Lal nu Dios, Lal nu Dios, ¿suꞌbꞌe xinoqꞌotaj kan la?”
MAT 27:47 Jujun kꞌu chike ri e kꞌo chiriꞌ, echiriꞌ xkita waꞌ, xkibꞌiꞌij: —Waꞌ waꞌchi e kusikꞌij ri qꞌalajisanel Elías —xechaꞌ.
MAT 27:48 Y na jampatana, kꞌo jun chike rike lik kanik xeꞌek, xuꞌkꞌama lo jun esponja y xumuꞌ pa vinagre. Xuxim kꞌu chutzaꞌm jun tani y xuya pan che ri Jesús re kutzꞌubꞌu.
MAT 27:49 Ekꞌu ri jujun chik xkibꞌiꞌij che: —Maya che, qila peꞌ we kakꞌun ri Elías re koluꞌkolobꞌej —xechaꞌ.
MAT 27:50 Tekꞌuchiriꞌ, ri Jesús lik ko xsikꞌin tanchik y xuqꞌatisaj kꞌu ri ranimaꞌ puqꞌabꞌ ri Dios, asu xkamik.
MAT 27:51 Ekꞌu laꞌ la joqꞌotaj ri telón kꞌo chupa ri Rocho Dios xrichꞌrobꞌ chunikꞌajal; xujeq lo puwiꞌ y xoꞌlkꞌis kꞌa chuxeꞌ. Rulew lik xbꞌarbꞌatik y ri nimaq taq abꞌaj xejaqajobꞌ upa.
MAT 27:52 Y xejaqataj taq ri muqubꞌal yey ukꞌiyal tikawex re rutinamit ri Dios ekaminaq chik, xekꞌastaj loq
MAT 27:53 y xebꞌel lo chupa taq ri muqubꞌal. Ekꞌuchiriꞌ kꞌastajinaq chubꞌi ri Jesús, rike xebꞌok pa ri santowilaj tinamit yey chilaꞌ xebꞌilitaj kuma ukꞌiyal winaq.
MAT 27:54 Ekꞌu ri capitán y ri soldados echajiyom re ri Jesús, echiriꞌ xkil ri kabꞌraqan y ronoje taq ri xuꞌano, lik xkixiꞌij kibꞌ y jewaꞌ xkibꞌiꞌij: —¡Paqatzij wi, waꞌ waꞌchi e Ukꞌajol ri Dios! —xechaꞌ.
MAT 27:55 E kꞌo kꞌu ukꞌiyal ixoqibꞌ chiriꞌ kakitzutzaꞌ pana chinimanaj; waꞌ e taq ri e petinaq rukꞌ ri Jesús chwi xel lo Galilea y lik kinimam loq.
MAT 27:56 Chikixoꞌl waꞌ wiꞌxoqibꞌ kꞌo ri María ri aj Magdala, kꞌo ri María ri kichu ri Jacobo y ri José, yey kꞌo ri kichu ri kebꞌ ukꞌajol ri Zebedeo.
MAT 27:57 Kꞌo jun achi aj Arimatea, José rubꞌiꞌ; rire bꞌeyom y e jun chike rutijoꞌn ri Jesús. Bꞌenaq qꞌij rire
MAT 27:58 xeꞌek kꞌu rukꞌ ri Pilato re kuꞌtzꞌonoj rucuerpo ri Jesús. Ekꞌu ri Pilato xtaqan che kayaꞌiꞌ lo rucuerpo ri Jesús che rire.
MAT 27:59 Ri José xukꞌam kꞌu bꞌi rucuerpo ri Jesús, xupis bꞌi pa jun manta lik saq
MAT 27:60 y xuꞌyaꞌa pa jun muqubꞌal re rire, waꞌ kꞌakꞌ kꞌotom paꞌbꞌaj. Xutaq kꞌu uketebꞌaxik kan jun nimalaj abꞌaj chuchiꞌ re tzꞌapibꞌal re; tekꞌuchiriꞌ, xeꞌek.
MAT 27:61 E kꞌo kꞌu chiriꞌ ri María ri aj Magdala y ri jun chik María, etzꞌul chwach ri muqubꞌal.
MAT 27:62 Ikꞌowinaq chi kꞌu ri qꞌij echiriꞌ raj judiꞌabꞌ kakiyijbꞌaꞌ pan janipa ri kajawax chike pa ri qꞌij re uxlanibꞌal. Ekꞌuchiriꞌ, ri nimaq e aj chakunel pa Rocho Dios kukꞌ ri fariseos xkimol kibꞌ rukꞌ ri Pilato
MAT 27:63 y xkibꞌiꞌij che: —Qajawal, xkꞌun chiqakꞌuꞌx, laꞌ la jun achi sokosoꞌnel echiriꞌ kꞌa kꞌaslik jewaꞌ xubꞌiꞌij: “Purox qꞌij kinkꞌastaj lo chikixoꞌl ri ekaminaq.”
MAT 27:64 E uwariꞌche, taqa la uchajixik chi utz ri muqubꞌal kꞌa che rurox qꞌij, chaꞌ na kekꞌun ta rutijoꞌn chaqꞌabꞌ, koꞌlkelaqꞌaj bꞌi rucuerpo y tekꞌuchiriꞌ, kakibꞌiꞌij chike ri winaq: “Xkꞌastaj lo chikixoꞌl ri ekaminaq.” We ekꞌu xuꞌan riꞌ, kuꞌana ne más unimal raqꞌubꞌal riꞌ chwa ri nabꞌe uꞌanom loq echiriꞌ xubꞌiꞌij e Ruchaꞌoꞌn lo ri Dios —xechaꞌ.
MAT 27:65 Ri Pilato xubꞌiꞌij chike: —Chekꞌama bꞌi alaq waꞌ wa e chajinel y jeꞌtzꞌapij alaq chi utz ri muqubꞌal —xchaꞌ.
MAT 27:66 Xebꞌek kꞌut, xeꞌkitzꞌapij uchiꞌ ri muqubꞌal chi utz, xkikoj jun sello puwi ri nimalaj abꞌaj tzꞌapibꞌal uchiꞌ y xekiya kꞌu kan ri e chajinel chiriꞌ.
MAT 28:1 Ikꞌowinaq chi ri qꞌij re uxlanibꞌal, e riꞌ katajin usaqirik ri nabꞌe qꞌij che ri semana, ri María ri aj Magdala y ri jun chik María xeꞌkila ri muqubꞌal.
MAT 28:2 Xaqikꞌateꞌt xpe jun nimalaj kabꞌraqan, yey waꞌ e xꞌanaw jun ángel re ri Dios xqaj lo chikaj. Echiriꞌ xopon chwach ri muqubꞌal, xresaj rabꞌaj utzꞌapim uchiꞌ ri muqubꞌal y xtzꞌuyiꞌ kꞌu puwiꞌ.
MAT 28:3 Ri ángel lik kawolqꞌinik, katzuꞌn jelaꞌ pachaꞌ ruxeꞌ kaj echiriꞌ kayokꞌ kaꞌnik; yey ruqꞌuꞌ lik saq pachaꞌ ri nieve.
MAT 28:4 Ri soldados echiriꞌ xkil ri ángel, lik xkixiꞌij kibꞌ che; xkijeq kebꞌirbꞌotik y xekanaj kanoq pachaꞌ chi ekaminaq.
MAT 28:5 Ekꞌuchiriꞌ, xubꞌiꞌij ri ángel chike rixoqibꞌ: —Mixiꞌij iwibꞌ. Ma riꞌin wetaꞌam e kitzukuj ri Jesús, ri xkamisax chwa cruz.
MAT 28:6 Rire na jinta chi wara, ma kꞌastajinaq chubꞌi jelaꞌ pachaꞌ rubꞌiꞌim chi uloq. Choꞌliwilape wa luwar pa xyaꞌiꞌ wi ri Qanimajawal.
MAT 28:7 Jix kꞌu riꞌix, lik chiwilij bꞌi y jiꞌbꞌiꞌij chike rutijoꞌn: “Ri Jesús xkꞌastaj bꞌi chikixoꞌl ri ekaminaq. Chiwilapeꞌ, Rire keꞌek Galilea, kanabꞌej bꞌi chiwach; chilaꞌ kꞌu riꞌ kiꞌwila wi uwach.” Ekꞌu xoꞌlnubꞌiꞌij waꞌ chiwe —xchaꞌ.
MAT 28:8 Echiriꞌ rixoqibꞌ xebꞌel bꞌi chuchiꞌ ri muqubꞌal, lik kixiꞌim kibꞌ pero kꞌo unimal kiꞌkotemal kukꞌ. Kebꞌan kꞌu riꞌ xebꞌek chaꞌ keꞌkibꞌiꞌij chike rutijoꞌn janipa ri xkilo y ri xbꞌiꞌx bꞌi chike. E kꞌo kꞌu chi bꞌe
MAT 28:9 echiriꞌ ri Jesús xebꞌukꞌulu y xuya rutzil kiwach. Ekꞌu rike xeqibꞌ rukꞌ y xkixuk kibꞌ chwach; xkilaqꞌapuj ri raqan y xkiloqꞌnimaj uqꞌij.
MAT 28:10 Ri Jesús xubꞌiꞌij kꞌu chike: —Mixiꞌij iwibꞌ. Jix, jiꞌbꞌiꞌij chike ri nu hermanos chaꞌ kebꞌek chilaꞌ Galilea y chiriꞌ kakil wi nuwach —xchaꞌ.
MAT 28:11 Ekꞌuchiriꞌ e kꞌo pan rixoqibꞌ pa bꞌe, jujun chike ri e chajinel xebꞌek pa ri tinamit y xeꞌkitzijoj chike ri nimaq e aj chakunel pa Rocho Dios ronoje ri xkikꞌulumaj.
MAT 28:12 Ekꞌu ri nimaq e aj chakunel pa Rocho Dios kukꞌ ri nimaq winaq re ri tinamit, xkichꞌaꞌbꞌej kibꞌ chaꞌ kakiꞌan tzij chikiwach. Xkiya kꞌu ukꞌiyal puaq chike ri soldados
MAT 28:13 y xekitaq che jewaꞌ kakibꞌiꞌij: «Echiriꞌ okinaq lo qawaram chaqꞌabꞌ, xekꞌun rutijoꞌn ri Jesús y xkelaqꞌaj bꞌi rucuerpo.
MAT 28:14 Yey we xretaꞌmaj waꞌ ri taqanel, riꞌoj kaqakoj pujolom chaꞌ na jinta kꞌo kuꞌan chiwe» kechaꞌ.
MAT 28:15 Ri soldados xkikꞌam kꞌu ri puaq y e xkiꞌano janipa ri xbꞌiꞌx chike. Ekꞌu raj judiꞌabꞌ kꞌa e ubꞌiꞌxikil waꞌ kakiꞌan waqꞌij ora.
MAT 28:16 E taq kꞌu ri junlajuj utijoꞌn xebꞌek Galilea chwa ri jun juyubꞌ pa ubꞌiꞌim wi ri Jesús chike.
MAT 28:17 Echiriꞌ xkil uwach ri Jesús, lik xkiloqꞌnimaj uqꞌij, tobꞌ kꞌu e kꞌo jujun chike kꞌamajaꞌ kakikojo we paqatzij wi ri Jesús xkꞌastaj lo chikixoꞌl ri ekaminaq.
MAT 28:18 Ekꞌuchiriꞌ, xqibꞌ ri Jesús kukꞌ y xubꞌiꞌij chike: —Riꞌin yaꞌtal lo panuqꞌabꞌ ronoje ri taqanik chilaꞌ chikaj y che ruwachulew.
MAT 28:19 Ruma kꞌu waꞌ, jix kukꞌ konoje rukꞌiyal kiwach taq ri tinamit che ruwachulew, chiꞌana kꞌu e nutijoꞌn chike y chiyaꞌa ri bautismo chike pa rubꞌiꞌ ri Qaqaw Dios, Rukꞌajol y ri Santowilaj Ruxlabꞌixel.
MAT 28:20 Chikꞌutu chikiwach rike chaꞌ e kakiꞌan ronoje janipa ri ixnutaqom riꞌin che. Lik chiwetaꞌmaj kꞌut: Riꞌin kinkꞌojiꞌ iwukꞌ ronoje qꞌij kꞌa che ri kꞌisbꞌal re ruwachulew —xchaꞌ. Amén.
MAR 1:1 Waꞌ e jeqebꞌal re ri Utzilaj Tzij re ri Qanimajawal Jesucristo, Rukꞌajol ri Dios.
MAR 1:2 E xuꞌana pachaꞌ ri tzꞌibꞌital kan ruma ri qꞌalajisanel Isaías puwi ri ubꞌiꞌim lo ri Dios: Riꞌin kannabꞌesaj bꞌi chawach riꞌat, ri waj chak aj tzijol weꞌin, chaꞌ kuyijbꞌaꞌ ri bꞌe chwach pan rawoponibꞌal.
MAR 1:3 Katataj uqul jun tzijonel kasikꞌin chupa ri luwar katzꞌintzꞌotik, jewaꞌ kubꞌiꞌij: “Yijbꞌaꞌ pana alaq ri bꞌe re ri Qanimajawal; sukꞌupij alaq rubꞌe Rire” xchaꞌ.
MAR 1:4 Ri Juan katajin che uyaꞌik ri bautismo pa jun luwar katzꞌintzꞌotik. E kubꞌiꞌij chike ri winaq kakitzelej kitzij chwach ri Dios, kakikꞌul ri bautismo, y jekꞌulaꞌ kakuytaj ri kimak.
MAR 1:5 Ewi konoje ri tikawex e kꞌo pa taq ri luwar re Judea y konoje ri e kꞌo Jerusalem, xebꞌel lo che utayik ri Juan. Kakitzꞌonoj kꞌu kuybꞌal kimak chwach ri Dios, yey ri Juan kuya ri bautismo chike chupa ri nimayaꞌ Jordán.
MAR 1:6 Ekꞌu ruqꞌuꞌ ri Juan ꞌanom rukꞌ rismal camello, y rupas ximil che rupa e jun tzꞌuꞌum. Yey ri kutijo e ri sakꞌ y uwaꞌal kabꞌ re upa taq juyubꞌ.
MAR 1:7 Jekꞌuwaꞌ ri tzijonik kuꞌano: «Kꞌo Jun katajin lo chwij más nim ruchuqꞌabꞌ chinuwa riꞌin, ma na taqal tane chwe kinyuxiꞌik re kankir ruwach ruxajabꞌ.
MAR 1:8 Paqatzij wi, riꞌin xinya ri bautismo che alaq rukꞌ yaꞌ; noꞌj ri bautismo kuya Rire che alaq, e rukꞌ ri Santowilaj Ruxlabꞌixel ri Dios» kachaꞌ.
MAR 1:9 Chupa taq kꞌu laꞌ la qꞌij, ri Jesús xel lo Nazaret, (waꞌ e jun tinamit re Galilea), y xꞌan kꞌu bautizar ruma ri Juan chupa ri nimayaꞌ Jordán.
MAR 1:10 Na jampatana xel lo ri Jesús pa ri yaꞌ, xrilo echiriꞌ xjaqataj ruwa kaj y ri Ruxlabꞌixel ri Dios pachaꞌ juna palomax xqaj lo puwiꞌ.
MAR 1:11 Y xchꞌaw lo Jun chilaꞌ chikaj, jewaꞌ kubꞌiꞌij: «At riꞌat Nukꞌajol y lik kꞌax katinnaꞌo. Lik kinkiꞌkot chawe» xcha che.
MAR 1:12 Tekꞌuchiriꞌ, ri Jesús xkꞌam bꞌi ruma ri Ruxlabꞌixel ri Dios pa jun luwar katzꞌintzꞌotik.
MAR 1:13 Ri Jesús xkꞌojiꞌ chilaꞌ cuarenta qꞌij chikixoꞌl itzel taq awaj. Yey chupa taq laꞌ la qꞌij, lik xkꞌam upa ruma ri Satanás. Ikꞌowinaq chi kꞌu waꞌ, ri ángeles xkijeq kakinimaj ri Jesús.
MAR 1:14 Echiriꞌ yaꞌom chi ri Juan pa cárcel, ri Jesús xeꞌek Galilea che utzijoxik ri Utzilaj Tzij re rutaqanik ri Dios,
MAR 1:15 jewaꞌ kubꞌiꞌij: «Xopon kꞌu ruqꞌijol echiriꞌ rutaqanik ri Dios xa naqaj chi kꞌo lo wi; tzelej kꞌu tzij alaq chwach ri Dios y kojo alaq ri Utzilaj Tzij» kachaꞌ.
MAR 1:16 Echiriꞌ kabꞌin ri Jesús chuchiꞌ ri mar re Galilea, xeril pan ri Simón rukꞌ ruchaqꞌ Andrés, e riꞌ kakikꞌaq ri ki atarraya chupa ri yaꞌ, ma rike e aj chapal kar.
MAR 1:17 Ekꞌu ri Jesús xubꞌiꞌij chike: —Chixpetoq, chixterej lo chwij y riꞌin kanꞌan chiwe ix aj molol tikawex jelaꞌ pachaꞌ iꞌanom lo chike ri kar —xchaꞌ.
MAR 1:18 Rike xkiya kan ri ki atarraya y xeterej bꞌi chirij.
MAR 1:19 Xbꞌin kꞌu pan jubꞌiqꞌ chik y xeril ri Jacobo rukꞌ ruchaqꞌ Juan, ri kebꞌ ukꞌajol ri Zebedeo. Rike e kꞌo chupa jun barco y ketajin che ukꞌojoxik ri ki atarraya.
MAR 1:20 Ekꞌu ri Jesús xebꞌusikꞌij; ruma kꞌu riꞌ, rike xkiya kan ri kiqaw Zebedeo kukꞌ ri kimokom chupa ri barco y xeterej bꞌi chirij.
MAR 1:21 Xebꞌok kꞌu pa ri tinamit Capernaúm. Y chupa ri qꞌij re uxlanibꞌal ri Jesús xok pa ri sinagoga y xujeq kakꞌutunik.
MAR 1:22 Y ri xetaw re lik xkam kanimaꞌ che, ma ruma rukꞌutunik kaqꞌalajinik lik kꞌo uwach, na pachaꞌ ta ri kakiꞌan raj kꞌutunel re ri tzijpixabꞌ.
MAR 1:23 Chupa kꞌu ri sinagoga kꞌo jun achi kꞌo puqꞌabꞌ jun itzelilaj uxlabꞌixel. Waꞌ xujeq kasikꞌinik, jewaꞌ xubꞌiꞌij:
MAR 1:24 —Lal Jesús, aj Nazaret, ¿suꞌchak koꞌlmina ibꞌ la qukꞌ? ¿E laꞌ lal petinaq re koꞌlsacha la qawach? Riꞌin wetaꞌam lal chinoq, lal ri Santo Kꞌajolaxel re ri Dios —xchaꞌ.
MAR 1:25 Ekꞌu ri Jesús xuqꞌatej ri itzel uxlabꞌixel, jewaꞌ xubꞌiꞌij che: —¡Matchꞌaꞌt chik! Chatelubꞌi che laꞌchi —xchaꞌ.
MAR 1:26 Ri itzelilaj uxlabꞌixel xukꞌaq laꞌchi pulew y lik ko xujabꞌajaꞌ; yey kasikꞌinik xel bꞌi che laꞌchi.
MAR 1:27 Konoje kꞌu ri tikawex lik xkam kanimaꞌ che y kakitzꞌonobꞌej taq chikiwach: «¿Saꞌ waꞌ? ¿Saꞌ chi kꞌakꞌ kꞌutunik waꞌ? Ma kꞌo ne puqꞌabꞌ kataqan pakiwi itzelilaj uxlabꞌixel y waꞌ kakikoj utzij» kechaꞌ.
MAR 1:28 Y na jampatana, pa taq ronoje ri luwar re Galilea xeꞌek utzijoxik janipa taq ri kuꞌan ri Jesús.
MAR 1:29 Echiriꞌ ri Jesús kukꞌ ri Jacobo y ri Juan xebꞌel bꞌi chupa ri sinagoga, xebꞌek chirocho ri Simón y ri Andrés.
MAR 1:30 Ekꞌu ruchu-ujiꞌ ri Simón kꞌo chwa uwarabꞌal, kꞌo aqꞌ chirij. Xkitzijoj kꞌu riꞌ waꞌ che ri Jesús.
MAR 1:31 Ewi ri Jesús xqibꞌ rukꞌ la yewaꞌ, xuchap ruqꞌabꞌ y xutoꞌo chaꞌ kayaktajik. Na jampatana kꞌu riꞌ xikꞌow ri aqꞌ chirij rixoq y xujeqo kebꞌunimaj.
MAR 1:32 Echiriꞌ bꞌenaq chi ri qꞌij e riꞌ kayubꞌubꞌ chik, xekꞌam lo chwach ri Jesús konoje ri yewaꞌibꞌ y ri e kꞌo pakiqꞌabꞌ itzel uxlabꞌixel.
MAR 1:33 Y konoje ri tikawex re ri tinamit xetꞌiqiꞌ chuchiꞌ ri puerta re ri ja.
MAR 1:34 Ekꞌu ri Jesús xebꞌukunaj ukꞌiyal yewaꞌibꞌ che ukꞌiyal uwach taq yabꞌil y xebꞌeresaj bꞌi ukꞌiyal itzel uxlabꞌixel; pero na xuya ta luwar chike kechꞌawik ma rike ketaꞌam china Rire.
MAR 1:35 Lik anim tan echiriꞌ lik kꞌa qꞌequꞌm, xwaꞌlij bꞌi ri Jesús, xel kꞌu bꞌi chupa ri tinamit y xeꞌek pa jun luwar katzꞌintzꞌotik chaꞌ kuꞌana orar.
MAR 1:36 Ekꞌu ri Simón kukꞌ ri rachbꞌiꞌil xebꞌek che utzukuxik.
MAR 1:37 Echiriꞌ xkiriqo, xkibꞌiꞌij che: —Konoje ri winaq kakitzukuj la —xechaꞌ.
MAR 1:38 Ekꞌu Rire xubꞌiꞌij chike: —Joꞌ che utzijoxik ri Utzilaj Tzij pa taq ri luwar e kꞌo lo xa naqaj, ma e nuwach riꞌ in petinaq Riꞌin —xcha chike.
MAR 1:39 Xebꞌek kꞌu riꞌ, y ri Jesús katzijon chupa taq ri sinagogas che taq ronoje ri luwar re Galilea yey kebꞌeresaj kꞌu bꞌi itzel uxlabꞌixel.
MAR 1:40 Xopon kꞌu rukꞌ ri Jesús jun achi kꞌo ri yabꞌil lepra che y xuxukubꞌaꞌ ribꞌ chwach. Lik xelaj kꞌu che, jewaꞌ xubꞌiꞌij: —We kaꞌaj ko la, josqꞌij la ri nucuerpo che wa yabꞌil —xchaꞌ.
MAR 1:41 Ekꞌu ri Jesús xjuchꞌ kaꞌn ukꞌuꞌx che rachi yewaꞌ. Xuchap pana rukꞌ ruqꞌabꞌ y jekꞌuwaꞌ xubꞌiꞌij che: —Kuaj, chuꞌana bꞌa chom riꞌ racuerpo —xchaꞌ.
MAR 1:42 Xew kꞌu xukꞌis ubꞌiꞌxikil waꞌ, xa pa joqꞌotaj ri yabꞌil xsachik y rachi xkunutajik.
MAR 1:43 Ekꞌuchiriꞌ, ri Jesús xukꞌisbꞌej ruchꞌaꞌtem rukꞌ y lik xupixabꞌaj,
MAR 1:44 jewaꞌ xubꞌiꞌij che: —Chatapeꞌ, makꞌo matzijoj che junoq. Jat chwach raj chakunel pa Rocho Dios chaꞌ rire karilo na jinta chi lepra chawe. Y ruma rajosqꞌikil, chayaꞌa kꞌu chwach ri Dios ri qasaꞌn xtaqan kan ri Moisés che, chaꞌ kaqꞌalajin chikiwach ri tikawex at kunutajinaq chik —xchaꞌ.
MAR 1:45 Noꞌj laꞌchi echiriꞌ xeꞌek, lik xujeq utzijoxik ri xuꞌan ri Jesús che y jekꞌulaꞌ lik xtataj waꞌ kuma ri winaq. Ruma kꞌu riꞌ, na utz ta chik kok ri Jesús chiwachil pa ri tinamit; xujeq kꞌu kakanaj kan chinimanaj che ri tinamit pa taq luwar katzꞌintzꞌotik. Na rukꞌ ta kꞌu riꞌ, ukꞌiyal tikawex re ronoje luwar xebꞌopon rukꞌ.
MAR 2:1 Echiriꞌ ikꞌowinaq chi kebꞌ oxibꞌ qꞌij, xok tanchi ubꞌi ri Jesús pa ri tinamit Capernaúm. Taq ri winaq xkito Rire kꞌo chuchiꞌ jun ja.
MAR 2:2 Y na jampatana xemolotaj ukꞌiyal winaq y ruma ri kikꞌiyal na kebꞌok ta chi ne chuchiꞌ ri puerta. Ekꞌu ri Jesús kutzijoj Ruchꞌaꞌtem ri Dios chike.
MAR 2:3 Ekꞌuchiriꞌ, xekꞌun kajibꞌ achijabꞌ kitelem lo jun achi sik.
MAR 2:4 Yey na xkiriq taj suꞌanik kakiya pan chwach ri Jesús kuma rukꞌiyal winaq. Ewi xkiteqꞌebꞌaꞌ ruwi ri ja pa kꞌo wi ri Jesús, xkesaj julepaj che. Chiriꞌ kꞌu riꞌ xkiqasaj wubꞌi la chꞌat pa kotzꞌol wi ri sik.
MAR 2:5 Ekꞌu ri Jesús echiriꞌ xril ri kubꞌulibꞌal kikꞌuꞌx rukꞌ, jewaꞌ xubꞌiꞌij che ri sik: —Wal, ronoje ramak kuytajinaq chik —xchaꞌ.
MAR 2:6 Chiriꞌ kꞌut etzꞌul jujun aj kꞌutunel re ri tzijpixabꞌ y jewaꞌ katajin chikikꞌuꞌx:
MAR 2:7 «¿Suꞌchak jewaꞌ kachꞌaꞌt waꞌchi? Rukꞌ wa kubꞌiꞌij kamakun chirij ri Dios. Ma ¿na xew ta nebꞌa ri Dios aj kuyul mak?»
MAR 2:8 Chupa kꞌu laꞌ la joqꞌotaj, ri Jesús xunaꞌbꞌej saꞌ la kakichꞌobꞌo; ruma kꞌu riꞌ, xubꞌiꞌij chike: —¿Suꞌchak jelaꞌ katajin chikꞌuꞌx alaq?
MAR 2:9 ¿Saꞌ kꞌu ri na kꞌayew taj kambꞌiꞌij che rachi sik: “Ronoje ramak kuytajinaq chik” o “Chatyaktajoq, chakꞌama bꞌi rachꞌat y chatbꞌinoq”?
MAR 2:10 E kuaj kꞌut ketaꞌmaj alaq waꞌ: Ralaxel Chikixoꞌl Tikawex yaꞌtal puqꞌabꞌ kukuy taq ri mak ke ri winaq che ruwachulew —xchaꞌ.
MAR 2:11 Xubꞌiꞌij kꞌu riꞌ che ri sik: —Chatyaktajoq, chakꞌama bꞌi rachꞌat y jat chaꞌwocho —xchaꞌ.
MAR 2:12 Na jampatana xyaktaj rachi, xutelej bꞌi ruchꞌat y chikiwach konoje xel bꞌi. Konoje kꞌu riꞌ xkam kanimaꞌ che la xkilo y xkijeq kakiyak uqꞌij ri Dios, jewaꞌ kakibꞌiꞌij: «¡Na jinta kꞌana qilom wi waꞌ!» kechaꞌ.
MAR 2:13 Tekꞌuchiriꞌ, xeꞌek tanchi ri Jesús chuchiꞌ ri mar. Konoje ri winaq xeqibꞌ rukꞌ, y Rire xujeq kakꞌutun chikiwach.
MAR 2:14 Ekꞌu riꞌ katajin rikꞌowik pa ri luwar pa kaꞌan wi ri tojonik che ri gobierno, xril pana jun aj tzꞌonol puaq re tojonik tzꞌul chiriꞌ. Waꞌ Leví rubꞌiꞌ yey ukꞌajol ri Alfeo. Xubꞌiꞌij kꞌu ri Jesús che: —Chat-terej lo chwij —xchaꞌ. Xyaktajik kꞌu ri Leví y xterej bꞌi chirij.
MAR 2:15 Ekꞌu ri Jesús xumaj bꞌi chirocho ri Leví. Xebꞌok kꞌu chwa ri mexa kukꞌ rutijoꞌn, junam kukꞌ ukꞌiyal aj tzꞌonol puaq re tojonik y ukꞌiyal aj makibꞌ; ma lik e kꞌi ri kiternabꞌem bꞌi.
MAR 2:16 Ekꞌu raj kꞌutunel re ri tzijpixabꞌ kukꞌ ri fariseos, echiriꞌ xkilo kawaꞌ ri Jesús kukꞌ raj makibꞌ y raj tzꞌonol puaq re tojonik, xkibꞌiꞌij chike rutijoꞌn ri Jesús: —¿Suꞌchak ri tijonel iwe riꞌix kawaꞌ junam kukꞌ raj tzꞌonol puaq re tojonik yey kukꞌ raj makibꞌ? —xechaꞌ.
MAR 2:17 Echiriꞌ xuta waꞌ ri Jesús, xubꞌiꞌij chike: —E janipa ri utz kiwach, na kajawax ta aj kunanel chike; ma waꞌ xew chike ri e yewaꞌibꞌ kajawax wi. Jelaꞌ kꞌu riꞌ, riꞌin na in petinaq ta che kisikꞌixik ri jusukꞌ kibꞌinik kisilabꞌik, ma e in petinaq che kisikꞌixik raj makibꞌ —xchaꞌ.
MAR 2:18 Rutijoꞌn ri Juan Aj Yaꞌl Bautismo y ri kitijoꞌn ri fariseos echiriꞌ e kꞌo pa ayuno, xebꞌopon rukꞌ ri Jesús y xkitzꞌonoj che: —¿Suꞌbꞌe rutijoꞌn ri Juan y ri kitijoꞌn ri fariseos lik kakiꞌan ayuno, yey ri tijoꞌn rilal na kakiꞌan ta waꞌ? —xechaꞌ.
MAR 2:19 Ri Jesús xukꞌul uwach: —¿Ubꞌe nawi kakiꞌan ayuno ri esikꞌim pa juna kꞌulanikil we rala kakꞌuliꞌik kꞌa kꞌo kukꞌ? Na ubꞌe taj, ma kꞌa kꞌo rala chikixoꞌl.
MAR 2:20 Noꞌj kopon na ri qꞌij echiriꞌ kesax bꞌi rala chikixoꞌl; kꞌa ekꞌuchiriꞌ, kakiꞌan ayuno.
MAR 2:21 »Na jinta junoq kukꞌojoj ruqꞌuꞌ qꞌeꞌl rukꞌ kꞌojobꞌal kꞌasaq; ma ri kꞌojobꞌal kꞌasaq, we xkꞌolotaj upa, e kujekꞌ ri kꞌul qꞌeꞌl y más ne kurichꞌij bꞌi.
MAR 2:22 Jekꞌulaꞌ ri vino kꞌakꞌ na kaqꞌej ta chupa juna surun qꞌeꞌl. Ma we kaꞌaniꞌ waꞌ, ri vino kꞌakꞌ echiriꞌ kanajtir uqꞌij, kuraqij ri surun, katix kꞌu riꞌ ri vino y ri surun na jinta chi uchak. Ruma kꞌu laꞌ, ri vino kꞌakꞌ ꞌanom chirajawaxik wi kaqꞌej chupa juna surun kꞌasaq —xchaꞌ.
MAR 2:23 Chupa kꞌu jun qꞌij re uxlanibꞌal, ri Jesús kukꞌ rutijoꞌn e riꞌ kebꞌikꞌow pa taq tikoꞌn re trigo. Ekꞌu rutijoꞌn xkijeq kakichꞌupilaꞌ bꞌi ri trigo.
MAR 2:24 Ruma waꞌ ri fariseos xkitzꞌonoj che ri Jesús: —Chilape la, ¿suꞌbꞌe ri tijoꞌn la kakiꞌan ri na taqal taj kaꞌaniꞌ chupa ri qꞌij re uxlanibꞌal? —xechaꞌ.
MAR 2:25 Ekꞌu ri Jesús xukꞌul uwach: —¿Na ajilam ta nebꞌa alaq ri xuꞌan ri David kukꞌ ri rachbꞌiꞌil echiriꞌ kꞌo xajawax chike y xenumik?
MAR 2:26 Echiriꞌ ri Abiatar e kajawal raj chakunel pa Rocho Dios, ri David xok pa ri Rocho Dios y xutij ri pam yaꞌtal chi puqꞌabꞌ ri Dios, yey waꞌ na taqal ta chike rike kakitijo. Na rukꞌ ta kꞌu riꞌ, xuya ne ke ri e rachbꞌiꞌil. Yey waꞌ wa pam, xew taqal chike raj chakunel pa Rocho Dios —xchaꞌ.
MAR 2:27 Y jewaꞌ xubꞌiꞌij tanchi chike: —Ri qꞌij re uxlanibꞌal xuya kan ri Dios re toꞌbꞌal ke ri tikawex; na e ta xeꞌaniꞌ ri tikawex ruma ri qꞌij re uxlanibꞌal.
MAR 2:28 Yey Ralaxel Chikixoꞌl Tikawex e ne rajaw ri qꞌij re uxlanibꞌal —xchaꞌ.
MAR 3:1 Jumul chik ri Jesús xok chupa ri sinagoga y chiriꞌ kꞌo jun achi chaqijinaq jun uqꞌabꞌ.
MAR 3:2 E kꞌo kꞌu jujun lik kikꞌakꞌalem we ri Jesús kukunaj waꞌchi chupa wa qꞌij re uxlanibꞌal, chaꞌ jelaꞌ utz kakitzꞌaq uchiꞌ.
MAR 3:3 Xubꞌiꞌij kꞌu ri Jesús che rachi chaqijinaq ruqꞌabꞌ: —Chatyaktajoq y chatkꞌola chiqawach qonoje —xchaꞌ.
MAR 3:4 Ekꞌuchiriꞌ, xutzꞌonoj chike ri kakitzutzaꞌ: —¿Saꞌ ri lik usukꞌ kaꞌaniꞌ pa ri qꞌij re uxlanibꞌal: E kaꞌaniꞌ ri utz o e ri na utz taj? ¿Utz kakolobꞌex rukꞌaslem junoq o kayaꞌ luwar che kakamik? —xchaꞌ. Yey na jinta kꞌu junoq chike xkꞌuluw uwach.
MAR 3:5 Ekꞌuchiriꞌ, ri Jesús xebꞌutzuꞌ rukꞌ oyowal taq ri kisutum rij y lik xok bꞌis chukꞌuꞌx ruma lik uꞌanom ko ri kanimaꞌ. Xubꞌiꞌij kꞌu che rachi: —Chasukꞌupij raqꞌabꞌ —xcha che. Rachi xuyuq ruqꞌabꞌ y waꞌ xutzirik.
MAR 3:6 Xebꞌel kꞌu bꞌi ri fariseos, xkimol kibꞌ kukꞌ jujun chike ri kitaqem ri rey Herodes, y junam xkichꞌaꞌtibꞌej suꞌanik kakisach uwach ri Jesús.
MAR 3:7 Ri Jesús xel bꞌi y xeꞌek chuchiꞌ ri mar junam kukꞌ rutijoꞌn. Y ukꞌiyal tikawex xeterej bꞌi chirij. Waꞌ e petinaq pa taq ri tinamit re Galilea y re Judea
MAR 3:8 y pa ri tinamit Jerusalem; e petinaq pa taq ri tinamit re Idumea, pa taq ri tinamit e kꞌo chꞌaqa yaꞌ che ri nimayaꞌ Jordán, yey pa taq ri tinamit e kꞌo chunaqaj ri tinamit Tiro y ri tinamit Sidón. Konoje waꞌ e petinaq ruma xkito janipa ri katajin ri Jesús che uꞌanik.
MAR 3:9 Ekꞌu ri Jesús xubꞌiꞌij chike rutijoꞌn, xaqi kiyijbꞌaꞌ na ri barco re kaqꞌax chupa we xajawax che, chaꞌ jelaꞌ na kapitzꞌipoꞌx ta kuma rukꞌiyal winaq;
MAR 3:10 ma lik e kꞌi ri xebꞌukunaj. Jekꞌulaꞌ konoje ri yewaꞌibꞌ kakiminimaꞌ kibꞌ rukꞌ, ruma kakaj kakichapo chaꞌ kekunutajik.
MAR 3:11 Ekꞌu ri winaq e kꞌo pakiqꞌabꞌ itzelilaj uxlabꞌixel, echiriꞌ kakil uwach ri Jesús, kexukiꞌ chwach y kesikꞌinik kakibꞌiꞌij: «¡Rilal lal Rukꞌajol ri Dios!» kechaꞌ.
MAR 3:12 Noꞌj ri Jesús lik kebꞌuqꞌatej chaꞌ na kakiqꞌalajisaj taj china Rire.
MAR 3:13 Tekꞌuchiriꞌ, xaqꞌan ri Jesús chwa jun juyubꞌ y xebꞌusikꞌij china taq ri xraj kebꞌuchaꞌo, y rike xkimol kibꞌ rukꞌ.
MAR 3:14 Xebꞌuchaꞌ kꞌu kabꞌlajuj chike waꞌ chaꞌ kekꞌojiꞌ rukꞌ y kebꞌutaq bꞌi che utzijoxik ri Utzilaj Tzij.
MAR 3:15 Y xuya bꞌi kichuqꞌabꞌ re kekikunaj yewaꞌibꞌ y re kebꞌekesaj bꞌi itzel uxlabꞌixel.
MAR 3:16 Ekꞌu kibꞌiꞌ waꞌ wa kabꞌlajuj xebꞌuchaꞌo: Simón ri xkoj Pedro che,
MAR 3:17 Jacobo y ruchaqꞌ Juan (rike e ukꞌajol ri Zebedeo y xkoj ne kibꞌiꞌ “Boanerges”, waꞌ keꞌelawi “E ralkꞌoꞌal ruchꞌawibꞌal jabꞌ”),
MAR 3:18 Andrés, Felipe, Bartolomé, Mateo, Tomás, Jacobo rukꞌajol ri Alfeo, Tadeo, Simón, ri kabꞌiꞌx che “ri Cananista”,
MAR 3:19 y Judas aj Iscariot, ri xkꞌayin re ri Jesús.
MAR 3:20 Tekꞌuchiriꞌ, xok ri Jesús chuchiꞌ jun ja y xemolotaj tanchi ukꞌiyal winaq. Y ruma kꞌu riꞌ, ri Jesús kukꞌ rutijoꞌn na utz ta chi ne kewaꞌik.
MAR 3:21 Echiriꞌ xkita ri ratz-uchaqꞌ ri Jesús, xekꞌunik y xkaj kakikꞌam bꞌi kukꞌ, ma rike kakibꞌiꞌij xsach runaꞌoj ri Jesús.
MAR 3:22 Noꞌj raj kꞌutunel re ri tzijpixabꞌ, ri e petinaq Jerusalem, xkibꞌiꞌij: «Ri Jesús kꞌo puqꞌabꞌ ri Beelzebú» y «Ruma kꞌu ruchuqꞌabꞌ waꞌ wa kajawal ri itzel uxlabꞌixel, kebꞌeresaj bꞌi itzel uxlabꞌixel» xechaꞌ.
MAR 3:23 Ekꞌu ri Jesús xebꞌusikꞌij y rukꞌ kꞌambꞌal naꞌoj xubꞌiꞌij chike: «¿Saꞌ nawi we ta ri Satanás karesaj bꞌi ri Satanás chike ri winaq?
MAR 3:24 We ri taqanelabꞌ re juna tinamit kijachom kipa ruma kechꞌoꞌjin chikiwach, riꞌ na ketikiꞌ ta chi utz.
MAR 3:25 Yey we ri ejeqelel pa juna ja kijachom kibꞌ ruma kechꞌoꞌjin chikiwach, riꞌ na ketikiꞌ ta chi utz.
MAR 3:26 Jekꞌulaꞌ, we ta ri Satanás kayaktaj chiribꞌil ribꞌ y utukel kujach upa rutaqanik, riꞌ na kanajtir ta rutaqanik, xa kasach uwach.
MAR 3:27 »Na jinta kꞌu juna eleqꞌom kok pa rocho junoq lik kꞌo uchuqꞌabꞌ yey kareleqꞌaj kꞌu lo rubꞌitaq re pa ja, we na kuyut ta nabꞌe ri rajaw ja. Ma we releqꞌom uyutum chi ri rajaw ja, kꞌa ekꞌuchiriꞌ utz kareleqꞌaj bꞌi ronoje la kꞌo pa ri ja.
MAR 3:28 Paqatzij wi kambꞌiꞌij chiwe: Kꞌo puqꞌabꞌ ri Dios kukuy ronoje taq ri mak ke ri tikawex, rukꞌ ronoje taq ri na utz taj kakibꞌiꞌij, tobꞌ china chirij;
MAR 3:29 noꞌj china ri tzel kachꞌaꞌt chirij ri Santowilaj Ruxlabꞌixel ri Dios, riꞌ na kakuytaj ta kꞌana umak. Ma ri kaꞌanaw waꞌ, kꞌo chi ri qꞌatbꞌal tzij puwiꞌ na jinta utaqexik» xchaꞌ.
MAR 3:30 Xubꞌiꞌij waꞌ ma rike kibꞌiꞌim: «Rire kꞌo puqꞌabꞌ jun itzelilaj uxlabꞌixel.»
MAR 3:31 Tekꞌuchiriꞌ, ruchu y taq ruchaqꞌ ri Jesús xekꞌunik y xekꞌojiꞌ lo pa bꞌe, yey xkitaq usikꞌixik ri Jesús.
MAR 3:32 Ekꞌu ri tikawex etzꞌulik, ri kisutum rij ri Jesús, jewaꞌ xkibꞌiꞌij che: —Ri chu la y taq ri chaqꞌ la e kꞌo pa bꞌe, e laꞌ kakitzukuj la —xecha che.
MAR 3:33 Ekꞌu ri Jesús xukꞌul uwach: —¿China ri nuchu y china taq ri nuchaqꞌ? —xchaꞌ.
MAR 3:34 Tekꞌuchiriꞌ, xebꞌutzuꞌ ri etzꞌulik kisutum rij y jewaꞌ xubꞌiꞌij chike: —Wa e kꞌo wara e nuchu y e taq nuchaqꞌ riꞌ.
MAR 3:35 Ma china ri kuꞌan janipa ri karaj ri Dios, waꞌ e nuchaqꞌ, e wanabꞌ y e nuchu riꞌ —xchaꞌ.
MAR 4:1 Ri Jesús xujeq tanchi kakꞌutun chuchiꞌ ri mar y lik e kꞌi ri tikawex xemolotaj chiriꞌ pa kꞌo wi Rire. Ruma kꞌu riꞌ xok chupa jun barco kꞌo chwi ri mar, xtzꞌuyiꞌ chupa y konoje ri tikawex e kꞌo pana chuchiꞌ la mar.
MAR 4:2 Xujeq kꞌu kakꞌutun chikiwach rukꞌ ukꞌiyal taq kꞌambꞌal naꞌoj, yey jun che taq rukꞌutunik e waꞌ:
MAR 4:3 «¡Chitapeꞌ! Kꞌo jun awanel xel bꞌi chaꞌ keꞌawanoq.
MAR 4:4 Ekꞌuchiriꞌ katajin che ujopopexik rijaꞌ, kꞌo xtzaq kan chuchiꞌ ri bꞌe. Xekꞌun kꞌu lo tzꞌikin, y xoꞌlkitija bꞌi.
MAR 4:5 »Kꞌo ijaꞌ xtzaq kan pa taq abꞌaj; yey ruma na jinta ukꞌiyal ulew chuxeꞌ, xel tan lo rijaꞌ.
MAR 4:6 Ekꞌuchiriꞌ xel lo ri qꞌij, xkꞌatik; yey ruma na jinta ratzꞌayaq, xchaqijik.
MAR 4:7 »Kꞌo ijaꞌ xtzaq kan pa taq kꞌiix. Echiriꞌ ri kꞌiix xkꞌiyik, rijaꞌ xjiqꞌ kan chuxeꞌ; ruma kꞌu riꞌ, na jinta reqaꞌn xuyaꞌo.
MAR 4:8 »Noꞌj kꞌo ijaꞌ xtzaq kan pa chomilaj ulew. Ekꞌu riꞌ waꞌ xel loq, xkꞌiyik y lik xuꞌan reqaꞌn. Kꞌo jujun raqan xuya treinta, jujun chik xuya sesenta y kꞌo ne xuya jun ciento» xchaꞌ.
MAR 4:9 Ekꞌuchiriꞌ, ri Jesús xubꞌiꞌij tanchi chike: «China kꞌu ri kꞌo utanibꞌal che utayik, ¡chuta kꞌu riꞌ!» xchaꞌ.
MAR 4:10 Echiriꞌ ri Jesús xkanaj kan utukel, ri e kꞌo chunaqaj y ri kabꞌlajuj utijoꞌn xeqibꞌ rukꞌ, xkitzꞌonoj kꞌu che saꞌ keꞌelawi wa kꞌambꞌal naꞌoj xuya chike.
MAR 4:11 Ekꞌu ri Jesús xubꞌiꞌij chike: «Chiwe riꞌix yaꞌtalik kaqꞌalajisax runaꞌoj ri Dios chwi rutaqanik. Noꞌj chike taq ri winaq na e jinta chupa rutaqanik, xa rukꞌ taq kꞌambꞌal naꞌoj kabꞌiꞌx ronoje chike.
MAR 4:12 Ma tobꞌ rike ketzuꞌnik, e junam rukꞌ na ketzuꞌn taj; tobꞌ ketanik, e junam rukꞌ na ketan taj y e riꞌ na jinta kꞌo kakimaj usukꞌ. Na kakaj ta kꞌu riꞌ kakitzelej kitzij chaꞌ jelaꞌ kakuytaj kimak» xchaꞌ.
MAR 4:13 Ekꞌuchiriꞌ, xutzꞌonoj chike: «¿Na kimaj ta kami usukꞌ riꞌ wa kꞌambꞌal naꞌoj? ¿Saꞌ kꞌu uꞌanik riꞌ kimaj usukꞌ ronoje taq ri kꞌambꞌal naꞌoj kankꞌut chiwach?
MAR 4:14 »Ri awanel e pachaꞌ ri katikow Ruchꞌaꞌtem ri Dios.
MAR 4:15 »E kꞌo kꞌu jujun tikawex e pachaꞌ rijaꞌ xtzaq kan chuchiꞌ ri bꞌe; waꞌ xtik Ruchꞌaꞌtem ri Dios pa kanimaꞌ y kakita ne riꞌ. Pero kakꞌun kꞌu lo ri Satanás y kumaj bꞌi ri Chꞌaꞌtem xtikiꞌ pa kanimaꞌ.
MAR 4:16 »E kꞌo jujun chik e pachaꞌ rijaꞌ xtzaq kan pa taq abꞌaj. Waꞌ e ri kakita Ruchꞌaꞌtem ri Dios y na jampatana kakikꞌul rukꞌ kiꞌkotemal.
MAR 4:17 Pero ruma na e tikil ta chi utz, na kekowin taj. Ma echiriꞌ kakꞌun lo ri kꞌambꞌal kipa o keternabꞌex rukꞌ kꞌax ruma kikꞌulum Ruchꞌaꞌtem ri Dios, kepajtaj kꞌu riꞌ.
MAR 4:18 »E kꞌo jujun chik e pachaꞌ rijaꞌ xtzaq kan pa taq kꞌiix. Waꞌ e ri ketaw Ruchꞌaꞌtem ri Dios.
MAR 4:19 Pero rubꞌis kikꞌuꞌx chwi taq ri kajawax chike, rukꞌ ri sokosoꞌnik re ri bꞌeyomalil y ri kirayibꞌal che taq ronoje ri kꞌolik; ronoje kꞌu waꞌ e kusach uwach Ruchꞌaꞌtem ri Dios kꞌo pa kanimaꞌ. Ruma taq kꞌu riꞌ waꞌ na jinta kꞌana kijiqꞌobꞌalil kilitaj che ri kibꞌinik.
MAR 4:20 »E kꞌo kꞌu jujun e jelaꞌ pachaꞌ rijaꞌ xtzaq pa chomilaj ulew. Waꞌ e ri kakita Ruchꞌaꞌtem ri Dios, kakikꞌul chi utz y lik kꞌo kijiqꞌobꞌalil kilitaj che ri kibꞌinik. E jelaꞌ pachaꞌ rijaꞌ lik xuꞌan reqaꞌn; kꞌo jujun raqan xuya treinta, jujun chik xuya sesenta y kꞌo ne xuya jun ciento» xchaꞌ.
MAR 4:21 Ri Jesús xubꞌiꞌij tanchi chike: «¿Kꞌo nebꞌa junoq kutzij juna aqꞌ y kuchꞌuq uwiꞌ rukꞌ juna mulul re pajbꞌal o kujuꞌ chuxeꞌ ruwarabꞌal? ¿Na re ta nebꞌa kuya lo chupa rukꞌolibꞌal chikaj?
MAR 4:22 Ma kopon ri qꞌij echiriꞌ janipa ri na qꞌalajisam taj, kaqꞌalajisax na; yey janipa ri ewatalik, ketaꞌmaxik.
MAR 4:23 China kꞌu ri kꞌo utanibꞌal che utayik, ¡chuta kꞌu riꞌ!» xchaꞌ.
MAR 4:24 Jewaꞌ xubꞌiꞌij tanchi chike: «Lik chita chi utz janipa ri kambꞌiꞌij chiwe, ma “rukꞌ ri pajbꞌal kixpajan wi riꞌix, rukꞌ tanchi wa pajbꞌal kaꞌan pajanik chiwe.” Ekꞌu ri Dios kuya na chiwe lik kimaj usukꞌ ri kambꞌiꞌij, we lik e kita ri nutzij.
MAR 4:25 Ma china ri kukꞌul chi utz janipa ri kakꞌut chwach, riꞌ kakꞌut ne más chwach y jekꞌulaꞌ kumaj más. Yey china ri na kukꞌul ta ri kakꞌut chwach, riꞌ kamaj ne che janipa ri kuchꞌobꞌo umajom chi usukꞌ» xcha ri Jesús.
MAR 4:26 Xubꞌiꞌij tanchi ri Jesús chike: «Rutaqanik ri Dios e jelaꞌ pachaꞌ juna achi kutik rijaꞌ pulew.
MAR 4:27 Rachi chaqꞌabꞌ keꞌwaroq y paqꞌij kawaꞌlij tanchik; yey na kumaj ta usukꞌ suꞌanik kel lo rijaꞌ y kakꞌiyik.
MAR 4:28 Ma rulew utukel kuꞌan ribꞌ che ukꞌiyisaxik ri tikoꞌn. Nabꞌe na e kel lo ri raqan ri tikoꞌn, teran kꞌu lo rutzikꞌ; tekꞌuchiriꞌ, kawachinik.
MAR 4:29 Ekꞌuchiriꞌ ya xriꞌjobꞌik, katzaq bꞌi ri jos che ma e riꞌ xopon ruqꞌijol molonik» xchaꞌ.
MAR 4:30 Xubꞌiꞌij tanchi ri Jesús: «¿Saꞌ rukꞌ kaqajunimaj wi rutaqanik ri Dios, o saꞌ juna kꞌambꞌal naꞌoj kuqꞌalajisaj waꞌ?
MAR 4:31 E pachaꞌ rijaꞌ re moxtasa echiriꞌ katik pulew. Ma e ijaꞌ waꞌ más chꞌutiꞌn chwa taq rijaꞌ kꞌo che ruwachulew,
MAR 4:32 pero echiriꞌ tikital chik, we xkꞌiyik más kanimar chwa taq ri tikoꞌn kꞌo pa ri werta. Kel kꞌu lo nimaq taq uqꞌabꞌ y kekꞌun lo ri tzꞌikin kexikꞌikꞌ che ruwa kaj y kejeqiꞌ chuxeꞌ rumuꞌj» xchaꞌ.
MAR 4:33 Rukꞌ ukꞌiyal taq kꞌambꞌal naꞌoj pachaꞌ taq waꞌ, xkꞌutun ri Jesús puwi Ruchꞌaꞌtem ri Dios, e chirij ri kakimaj usukꞌ ri winaq.
MAR 4:34 Y na jinta kꞌo xukꞌutu we na rukꞌ ta kꞌambꞌal naꞌoj xuꞌano; noꞌj chike rutijoꞌn xuqꞌalajisaj ronoje echiriꞌ e kꞌo kitukel.
MAR 4:35 Chupa kꞌu laꞌ la jun qꞌij echiriꞌ xok raqꞌabꞌ, ri Jesús xubꞌiꞌij chike rutijoꞌn: —Joꞌ, chojqꞌax chꞌaqa yaꞌ —xcha chike.
MAR 4:36 Echiriꞌ ebꞌuchꞌaꞌbꞌem chi kan rukꞌiyal winaq, rutijoꞌn xkikꞌam bꞌi ri Jesús e laꞌ chupa ri barco pa tzꞌul wi Rire, yey e kꞌo chi jujun barcos ekachbꞌilam bꞌi.
MAR 4:37 Xpe kꞌu jun nimalaj kaqjiqꞌ chwi ri mar. Ekꞌu ri yaꞌ kuroj ribꞌ che ri barco; y waꞌ xujeq kanoj che yaꞌ, ya laj kamuqutajik.
MAR 4:38 Ekꞌu ri Jesús kꞌo pa ri barco pukꞌisbꞌal re chirij, kawar chwi jun chꞌakat. Rutijoꞌn xeꞌkikꞌosoj y jewaꞌ xkibꞌiꞌij che: —¡Qajawal! ¿Na kok ta kami la il chiqe? ¡Ma ya kojkamik! —xechaꞌ.
MAR 4:39 Ekꞌu ri Jesús xyaktajik, xuqꞌatej ri kaqjiqꞌ y jewaꞌ xubꞌiꞌij che ri yaꞌ: —¡Chat-tanaloq! ¡Chatkubꞌuloq! —xcha che. Ri kaqjiqꞌ xtaniꞌik y ri yaꞌ xyeniꞌik.
MAR 4:40 Tekꞌuchiriꞌ, xubꞌiꞌij chike rutijoꞌn: —¿Suꞌchak lik kixiꞌij iwibꞌ? ¿Suꞌbꞌe na kubꞌul ta ikꞌuꞌx wukꞌ? —xcha chike.
MAR 4:41 Ewi xok lo jun xiꞌin ibꞌ kukꞌ y xkibꞌiꞌij chikiwach: —¿Saꞌ ruwach waꞌ waꞌchi? ¡Ma tobꞌ ne e ri kaqjiqꞌ y ri yaꞌ kakikoj utzij! —xechaꞌ.
MAR 5:1 Xebꞌopon kꞌu chꞌaqa yaꞌ pa ri luwar re Gadara.
MAR 5:2 Echiriꞌ xel lo ri Jesús chupa ri barco, na jampatana xoꞌlkꞌul ruma jun achi elinaq lo chuxoꞌl taq muqubꞌal ke animaꞌ, yey waꞌ kꞌo puqꞌabꞌ jun itzelilaj uxlabꞌixel.
MAR 5:3 Waꞌ waꞌchi jeqel pa kemuq wi ri animaꞌ y na jinta chi kꞌana junoq kachꞌijow uximik, tobꞌ ne rukꞌ karena.
MAR 5:4 Ma lik ukꞌiyal laj xyut ri raqan y ruqꞌabꞌ rukꞌ taq chꞌichꞌ y karena; pero rire kuraqaraꞌ upa, kuꞌan ukꞌaj che y na jinta kꞌo kachꞌijow uchuqꞌabꞌ.
MAR 5:5 Chipaqꞌij chichaqꞌabꞌ xaqi kasutin chwi taq ri juyubꞌ y chuxoꞌl taq muqubꞌal ke animaꞌ, kasikꞌinik y kuꞌan kꞌax che ribꞌ rukꞌ abꞌaj.
MAR 5:6 Ekꞌuchiriꞌ chinimanaj xril pana ri Jesús, kakꞌalalik xqibꞌ rukꞌ y xuxukubꞌaꞌ ribꞌ chwach.
MAR 5:7 Y lik ko xchꞌawik, jewaꞌ xubꞌiꞌij: —¿Suꞌchak koꞌlmina ibꞌ la wukꞌ, Jesús lal Ukꞌajol ri Dios kꞌo chilaꞌ chikaj? Kantzꞌonoj kꞌu cheꞌla pa rubꞌiꞌ ri Dios, minya la pa kꞌax —xchaꞌ.
MAR 5:8 Xubꞌiꞌij waꞌ ma ri Jesús xubꞌiꞌij che: «At itzelilaj uxlabꞌixel, chatelubꞌi che waꞌchi» xchaꞌ.
MAR 5:9 Ekꞌu ri Jesús xutzꞌonoj che: —¿Saꞌ rabꞌiꞌ? —xcha che. Rire xukꞌul uwach: —Legión ri nubꞌiꞌ, ma lik oj kꞌi —xchaꞌ.
MAR 5:10 Yey ritzelilaj uxlabꞌixel lik xukoj ribꞌ chwach ri Jesús chaꞌ na ketaq tubꞌi kꞌa naj che taq laꞌ la luwar.
MAR 5:11 Xa chiriꞌ kꞌu riꞌ e kꞌo lo ukꞌiyal aq kewaꞌ chwa ri juyubꞌ.
MAR 5:12 E taq kꞌu ri itzelilaj uxlabꞌixel xkikoj kibꞌ chwach ri Jesús y jewaꞌ xkibꞌiꞌij che: —Chojtaqa bꞌi la kukꞌ la aq chaꞌ kojok bꞌi kukꞌ —xechaꞌ.
MAR 5:13 Y ri Jesús xuya luwar chike. Xebꞌel kꞌu bꞌi che rachi y xebꞌok bꞌi kukꞌ ri aq. Waꞌ wa aq laj e juna kebꞌ mil. Ekꞌu laꞌ konoje xeꞌkikꞌaqa bꞌi kibꞌ chwi jun siwan, xebꞌeꞌtzaq kꞌa chupa ri mar y chiriꞌ xejiqꞌ wi.
MAR 5:14 Ekꞌu ri e chajinel ke ri aq, xebꞌanimajik. Y janipa ri xkilo xebꞌek che utzijoxik chupa ri tinamit y pa taq juyubꞌ. Xepe kꞌu ri winaq che rilik saꞌ ri xꞌaniꞌ chiriꞌ.
MAR 5:15 Echiriꞌ xekꞌun pa kꞌo wi ri Jesús, xkil rachi ri lik xꞌan kꞌax che kuma ritzelilaj uxlabꞌixel; e riꞌ tzꞌulik, ukojom chi uqꞌuꞌ y jusukꞌ chi runaꞌoj. Ruma waꞌ, lik xkixiꞌij kibꞌ.
MAR 5:16 Y ri xebꞌilow waꞌ xkitzijoj chike ri kꞌakꞌ xekꞌunik; xkitzijoj suꞌanik xebꞌel bꞌi ritzelilaj uxlabꞌixel che rachi y saꞌ ri xkikꞌulumaj taq ri aq.
MAR 5:17 Ewi ri winaq xkijeqo kebꞌelaj che ri Jesús chaꞌ kel bꞌi chiriꞌ pa taq ri kiluwar.
MAR 5:18 Ekꞌuchiriꞌ, ri Jesús xok bꞌi chupa ri barco. Ekꞌu rachi ebꞌelinaq bꞌi ritzelilaj uxlabꞌixel che, xelaj che ri Jesús chaꞌ kuya luwar che katerej bꞌi chirij.
MAR 5:19 Noꞌj ri Jesús na xuya ta luwar che, jenewaꞌ xubꞌiꞌij che: —Jat chaꞌwocho kukꞌ rawatz-achaqꞌ y chatzijoj chike ronoje ri utz uꞌanom ri Dios awukꞌ, ma e xukꞌut ri kꞌaxnaꞌbꞌal ukꞌuꞌx chawe —xcha che.
MAR 5:20 Rachi xeꞌek y xujeq utzijoxik pa ri tinamit re Decápolis ronoje ri utz xꞌan che ruma ri Jesús, y konoje ri tikawex lik kakam kanimaꞌ che waꞌ.
MAR 5:21 Echiriꞌ xtzelej tanchi ri Jesús chꞌaqa yaꞌ chupa ri barco, ukꞌiyal tikawex xkimok rij y Rire xkꞌojiꞌ chuchiꞌ ri mar.
MAR 5:22 Xkꞌun kꞌu lo jun achi Jairo rubꞌiꞌ, rire e jun chike ri e aj wach re ri sinagoga. Xew kꞌu xril uwach ri Jesús, xukꞌaq ribꞌ xeꞌraqan uqꞌabꞌ.
MAR 5:23 Y lik xukoj ribꞌ chwach, jewaꞌ xubꞌiꞌij che: —Ri numiꞌal kajekꞌowik. Joꞌ ko la wukꞌ, keꞌyaꞌa ri qꞌabꞌ la puwiꞌ chaꞌ kakunutajik y jelaꞌ na kakam taj —xchaꞌ.
MAR 5:24 Xeꞌek kꞌu ri Jesús rukꞌ rachi, yey ukꞌiyal winaq xeterej bꞌi chirij y lik kakipitzꞌipaꞌ.
MAR 5:25 Chikixoꞌlibꞌal kꞌu riꞌ kꞌo jun ixoq lik yewaꞌ, e kabꞌlajuj lo junabꞌ riꞌ na kataniꞌ ta ruyabꞌil re upa ikꞌ che.
MAR 5:26 Y lik utijom kꞌax pakiqꞌabꞌ ukꞌiyal e aj kun, y ukꞌisom chi ne ronoje ri kꞌo rukꞌ; yey na jinta kꞌana xutiqoj che, ma katajin ne unimitajik ri jujun qꞌij.
MAR 5:27 Echiriꞌ xuta ri kakibꞌiꞌij puwi ri Jesús, xumin bꞌi ribꞌ chikixoꞌlibꞌal taq ri winaq. Xqibꞌ kꞌu pana chirij ri Jesús y xuchap ruqꞌuꞌ,
MAR 5:28 ma xuchꞌobꞌ pa ranimaꞌ: «Tobꞌ tane xew luꞌqꞌuꞌ kanchapo, rukꞌ riꞌ kinkunutajik.»
MAR 5:29 Y na jampatana xtaniꞌ ruyabꞌil y lik xunaꞌ chiribꞌil ribꞌ xkunutaj che ri kꞌaxlaj yabꞌil kꞌo wi.
MAR 5:30 Ekꞌu ri Jesús echiriꞌ xunaꞌ chiribꞌil ribꞌ kꞌo uchuqꞌabꞌ xelik, xebꞌutzuꞌ konoje ri winaq y xutzꞌonoj: —¿China xchapaw ri nuqꞌuꞌ? —xchaꞌ.
MAR 5:31 Rutijoꞌn xkibꞌiꞌij che: —Rilal kil la ri winaq kakipitzꞌipaꞌ la. ¿Suꞌchak kꞌu riꞌ katzꞌonoj la: “China xchapaw weꞌin”? —xecha che.
MAR 5:32 Pero ri Jesús xtzuꞌn pa taq utzal che rilik china xchapaw re.
MAR 5:33 Ekꞌu rixoq kabꞌirbꞌot ruma xiꞌin ibꞌ, ma rire e etaꞌmayom saꞌ ri xukꞌulu. Xeꞌek kꞌut y xuxukubꞌaꞌ ribꞌ xeꞌraqan uqꞌabꞌ ri Jesús. Yey xutzijoj che Rire ronoje rukꞌulumam y saꞌ ri xuꞌan la joqꞌotaj.
MAR 5:34 Ekꞌu ri Jesús xubꞌiꞌij che: —Ixoq, ruma ri kubꞌulibꞌal kꞌuꞌx la wukꞌ, xkunutaj la. Oj kꞌu la riꞌ chi utzil chomal, ma lal chi kunutajinaq che ri kꞌaxkꞌolil la —xchaꞌ.
MAR 5:35 Kꞌa kachꞌaꞌt ne ri Jesús echiriꞌ xekꞌun lo jujun achijabꞌ e petinaq chirocho ri aj wach re ri sinagoga y xoꞌlkibꞌiꞌij che: —Ri miꞌal la ya xkamik; na jinta chi kutiqoj kabꞌayabꞌaꞌ la ri tijonel —xecha che.
MAR 5:36 Ekꞌu ri Jesús, echiriꞌ xuta wa xoꞌlbꞌiꞌxoq, xubꞌiꞌij che raj wach re ri sinagoga: —Muxiꞌij ribꞌ kꞌuꞌx la, xew lik kubꞌula kꞌuꞌx la wukꞌ —xcha che.
MAR 5:37 Ri Jesús na xuya ta chi luwar che junoq katerej bꞌi chirij; xew xebꞌukꞌam bꞌi ri Pedro, ri Jacobo y ri Juan ruchaqꞌ ri Jacobo rukꞌ.
MAR 5:38 Ekꞌuchiriꞌ xopon chirocho raj wach re ri sinagoga, xeril ri winaq ketukukik, kebꞌoqꞌik y rukꞌ sikꞌ ketunanik.
MAR 5:39 Ekꞌu ri Jesús xok bꞌi y xubꞌiꞌij chike: —¿Suꞌbꞌe lik kixtukukik y kixoqꞌik? Ri ralko ali na kaminaq taj, xa kawarik —xcha chike.
MAR 5:40 Yey xa xkitzeꞌej kꞌu ri xubꞌiꞌij. Pero Rire xebꞌeresaj lo konoje ri e kꞌo pa ja, xew xebꞌukoj bꞌi ruchu-uqaw ri ralko ali kukꞌ rutijoꞌn eteran bꞌi chirij. Xok kꞌu bꞌi pa telan wi ri ralko ali.
MAR 5:41 Xuchap kꞌu ruqꞌabꞌ y jewaꞌ xubꞌiꞌij pa ri chꞌaꞌtem arameo: —¡Talita kumi! —xcha che. (Waꞌ e keꞌelawi: “Ali chuuy, ¡Chatwaꞌlijoq!”)
MAR 5:42 Y na jampatana ri ralko ali xwaꞌlijik y xbꞌinik. (Rali kabꞌlajuj rujunabꞌ.) Y ri winaq lik xkixiꞌij kibꞌ che wa xkilo.
MAR 5:43 Ekꞌu ri Jesús lik xpixabꞌan che chaꞌ na jinta kꞌo kakitzijoj wi y xtaqan kꞌu che chaꞌ kayaꞌ uwa ri ralko ali.
MAR 6:1 Ri Jesús xel bꞌi chiriꞌ y xopon pa rutinamit. Ekꞌu rutijoꞌn xeterej bꞌi chirij.
MAR 6:2 Echiriꞌ xopon ri qꞌij re uxlanibꞌal, xujeq kakꞌutun chupa ri sinagoga. Yey ukꞌiyal winaq xkito y lik xkam kanimaꞌ che, jekꞌuwaꞌ kakibꞌiꞌij: —¿Pa xuꞌmaja wi waꞌchi ronoje taq waꞌ? ¿Saꞌ chi naꞌoj wa yaꞌtal che, yey suꞌanik kuꞌan taq wa milagros?
MAR 6:3 ¿Na e ta nebꞌa jun achi carpintero; ralabꞌ ri María y katzixel ri Jacobo, ri José, ri Judas y ri Simón? ¿Na ejeqel ta nebꞌa ri ranabꞌ wara chiqaxoꞌl? —kechaꞌ. Ewi lik e kꞌi tzel xkita ri xubꞌiꞌij y xkijeq kakikꞌaq bꞌi uqꞌij.
MAR 6:4 Ekꞌu ri Jesús xubꞌiꞌij chike: —Chupa ronoje luwar kayak uqꞌij juna qꞌalajisanel. Noꞌj chupa rutinamit, chikixoꞌl ri ratz-uchaqꞌ y pa rocho, na kayak ta uqꞌij —xcha chike.
MAR 6:5 Chupa kꞌu riꞌ rutinamit xa e kebꞌ oxibꞌ ri xuya ruqꞌabꞌ pakiwiꞌ y xebꞌukunaj, noꞌj na utz taj xuꞌan juna chik milagro
MAR 6:6 ma ri tikawex na kakikoj taj china Rire. Ekꞌu ri Jesús lik xkam ranimaꞌ che waꞌ. Xikꞌow kꞌu pa taq ri aldeas kꞌo chunaqaj ri tinamit e riꞌ kakꞌutunik.
MAR 6:7 Tekꞌuchiriꞌ, xebꞌusikꞌij ri kabꞌlajuj utijoꞌn, xebꞌutaq bꞌi pa kakabꞌ y xuya pakiqꞌabꞌ kebꞌekesaj bꞌi itzelilaj uxlabꞌixel.
MAR 6:8 Yey xebꞌutaq che na jinta kꞌo kakikꞌam bꞌi re pa bꞌe; xew kakikꞌam bꞌi ri kichꞌamiꞌy. Na kakikꞌam tane bꞌi kitebꞌ, kiwa o kimeyo chwi ri kipas.
MAR 6:9 Yey utz kakikoj bꞌi kixajabꞌ; noꞌj na utz taj kakikꞌam bꞌi jumolaj chik kiqꞌuꞌ, xew ri kikojom.
MAR 6:10 Y xubꞌiꞌij bꞌi chike: «We kixkꞌul pa juna ja, chixkꞌola chiriꞌ; kꞌate kixel bꞌi echiriꞌ kixꞌek pa jun chik tinamit.
MAR 6:11 Noꞌj we chupa juna tinamit na kixkꞌul taj y na kakꞌul tane ri Utzilaj Tzij kitzijoj, chixelubꞌi chiriꞌ yey chipupaꞌ kan rulew kꞌo che ri iwaqan; waꞌ e kꞌutubꞌal re na utz ta kiꞌanom ri ejeqel chiriꞌ. Paqatzij wi kambꞌiꞌij chiwe: Chupa ruqꞌijol ri qꞌatbꞌal tzij, más kꞌax ri kape pakiwi rike chwa ri kape pakiwi ri e aj Sodoma y Gomorra» xchaꞌ.
MAR 6:12 Xebꞌel kꞌu bꞌi rutijoꞌn che utzijoxik chike ri tikawex puwi ri lik chirajawaxik kakitzelej kitzij chwach ri Dios.
MAR 6:13 Xebꞌekesaj bꞌi ukꞌiyal itzel uxlabꞌixel yey xkikoj aceite pakiwi ukꞌiyal yewaꞌibꞌ y xekikunaj.
MAR 6:14 Ri rey Herodes xuta puwi ri chom uchꞌaꞌtibꞌexik ri Jesús, ma lik xetaꞌmax rubꞌiꞌ pa taq ronoje luwar. Ekꞌu ri Herodes xubꞌiꞌij: «Laꞌ e ri Juan Aj Yaꞌl Bautismo xkꞌastaj lo chikixoꞌl ri ekaminaq; e uwariꞌche kꞌo uchuqꞌabꞌ che uꞌanik wa milagros» xchaꞌ.
MAR 6:15 Yey e kꞌo jujun chik kebꞌiꞌn re: «Rire e Elías» y jujun chik kebꞌiꞌn re: «E juna qꞌalajisanel o laj junoq chike ri qꞌalajisanelabꞌ re ojertan.»
MAR 6:16 Echiriꞌ xuta waꞌ ri Herodes, xubꞌiꞌij: «Laꞌ e ri Juan ri jun xintaq uqꞌatik rujolom, xkꞌastaj lo chikixoꞌl ri ekaminaq» xchaꞌ.
MAR 6:17 Xubꞌiꞌij waꞌ ma e rire ri xutaq uchapik ri Juan chaꞌ kayaꞌiꞌ pa karena y keꞌyoꞌq pa cárcel. Xuꞌan waꞌ ri Herodes ma ri Juan xuchꞌaꞌbꞌej upa ruma uꞌanom rixoqil che ri Herodías, yey waꞌ wiꞌxoq e rixoqil ri Felipe ruchaqꞌ ri Herodes.
MAR 6:18 Jewaꞌ ri xubꞌiꞌij ri Juan che: «Lik na ubꞌe taj ꞌanom ixoqil la che ri rixoqil ri chaqꞌ la» xchaꞌ.
MAR 6:19 Ruma kꞌu laꞌ, rixoq Herodías lik xutzukuj saꞌ kuꞌan che ri Juan. Lik xraj kukamisaj; pero na kuriq taj saꞌ uꞌanik kuꞌano,
MAR 6:20 ma ri Herodes kuxiꞌij ne ribꞌ chwach ri Juan. Yey utaqom ne uchajixik chaꞌ na jinta kukꞌulumaj, ma retaꞌam ri Juan e jun achi lik jusukꞌ y lik uyaꞌom ribꞌ puqꞌabꞌ ri Dios. Echiriꞌ ri Herodes kuta rukꞌutunik ri Juan, tobꞌ na kumaj ta usukꞌ, lik kacha ukꞌuꞌx che utayik.
MAR 6:21 Ewi xopon jun qꞌij echiriꞌ ri Herodes xukꞌis ujunabꞌ y xuya jun nimalaj waꞌim chike taq raj wach e kꞌo rukꞌ, kukꞌ ri e taqanelabꞌ ke rusoldados y ri e aj Galilea lik kꞌo kiwach.
MAR 6:22 Xok kꞌu bꞌi ri ralit rixoq Herodías pa kꞌo wi ri Herodes kukꞌ konoje taq ri e kꞌo chwa ri mexa, y xujeq kaxajaw chikiwach. Waꞌ lik xukꞌul kikꞌuꞌx konoje ri e kꞌo chiriꞌ. Ewi ri Herodes jewaꞌ xubꞌiꞌij che laꞌli: «Chatzꞌonoj saꞌ ri kawaj, ma riꞌin kanya chawe» xchaꞌ.
MAR 6:23 Y xujikibꞌaꞌ kꞌu uwach che: «Ronoje ri katzꞌonoj, kanya chawe, tobꞌ ne pa nikꞌaj che taq ri kꞌo panuqꞌabꞌ» xchaꞌ.
MAR 6:24 Ewi rali xel bꞌi chaꞌ kuꞌtzꞌonoj che luꞌchu: «¿Saꞌ nawi ri kantzꞌonoj?» xchaꞌ. «E chatzꞌonoj rujolom ri Juan Aj Yaꞌl Bautismo» xcha ruchu che.
MAR 6:25 Na jampatana kꞌu riꞌ, rali lik kanik xok bꞌi chwa ri rey Herodes y jewaꞌ xubꞌiꞌij che: «Kuaj kaya la chwe woꞌora pa juna plato rujolom ri Juan Aj Yaꞌl Bautismo» xcha che.
MAR 6:26 Ri rey lik xbꞌisonik ruma ri xtzꞌonox che. Pero ruma kꞌu ri xujikibꞌaꞌ uwach che rali chikiwach konoje ri e kꞌo rukꞌ pa waꞌim, na xraj ta chik xujekꞌ ruchꞌaꞌtem.
MAR 6:27 Ewi xutaqalaꞌ bꞌi jun soldado chaꞌ keꞌek y kukꞌam lo rujolom ri Juan.
MAR 6:28 Ri soldado xeꞌek pa ri cárcel y xukꞌatzij rujolom ri Juan. Xukꞌam lo pa jun plato y xuya kꞌu che rali, y rali xuꞌyaꞌa che ruchu.
MAR 6:29 Echiriꞌ xkita waꞌ rutijoꞌn ri Juan, xoꞌlkikꞌama rucuerpo y xeꞌkimuquꞌ.
MAR 6:30 Echiriꞌ rutaqoꞌn ri Jesús xetzelej lo che utzijoxik ri Utzilaj Tzij, xkimol kibꞌ rukꞌ Rire y xkitzijoj che janipa ri xkiꞌano y xkikꞌutu.
MAR 6:31 Ekꞌu ri Jesús xubꞌiꞌij chike: —Chixpeta wukꞌ itukel, joꞌ chaꞌ kojeꞌuxlan kꞌenoq pa juna luwar pa na e jinta wi winaq —xchaꞌ. Jelaꞌ xubꞌiꞌij chike ma lik e kꞌi ri winaq, e kꞌo ri kebꞌek y e kꞌo ri kekꞌunik yey rike na utz ta chi ne kewaꞌik.
MAR 6:32 Xebꞌok kꞌu bꞌi ri Jesús kukꞌ rutijoꞌn kitukel chupa jun barco y xebꞌek pa jun luwar katzꞌintzꞌotik.
MAR 6:33 Pero lik e kꞌi ri xebꞌilowik echiriꞌ xebꞌek y xketaꞌmaj uwach ri Jesús. Ewi ukꞌiyal winaq xebꞌek chaqan, waꞌ ebꞌelinaq lo pa taq ri tinamit. Nabꞌe kꞌu riꞌ xebꞌopon chwa ri Jesús yey echiriꞌ Rire xoponik, xkimol kibꞌ rukꞌ.
MAR 6:34 Echiriꞌ xel lo ri Jesús pa ri barco, xrilo e kꞌo chi ukꞌiyal winaq chiriꞌ. Lik kꞌut xejuchꞌ kaꞌn pa ranimaꞌ, ma pachaꞌ e bꞌexex na jinta chajinel ke. Ekꞌu ri Jesús xujeq kuya ukꞌiyal kꞌutunik chikiwach.
MAR 6:35 Echiriꞌ lik bꞌenaq qꞌij chik, xeqibꞌ lo rutijoꞌn rukꞌ y jewaꞌ xkibꞌiꞌij che: —Qajawal, wa luwar oj kꞌo wi lik katzꞌintzꞌotik y bꞌenaq qꞌij chik.
MAR 6:36 Utz we ketaq bꞌi la ri winaq chaꞌ kebꞌek pa taq raldeas y pa taq ri luwar kꞌo lo xa naqaj re keꞌkiloqꞌo kiwa, ma ri wara na jinta kꞌo katijik —xechaꞌ.
MAR 6:37 Noꞌj ri Jesús xukꞌul uwach: —Chebꞌitzuqu riꞌix —xcha chike. Rike xkibꞌiꞌij che: —¿E kami kaꞌaj la riꞌ keꞌqaloqꞌo kiwa konoje wa tikawex chaꞌ keqatzuqu? ¡Ri rajil waꞌ e junam rukꞌ kebꞌ ciento qꞌij re chak! —xechaꞌ.
MAR 6:38 Ri Jesús xubꞌiꞌij chike: —¿Janipa chi pam kꞌo iwukꞌ? Jix jiꞌwilapeꞌ —xcha chike. Echiriꞌ xketaꞌmaj, xkibꞌiꞌij che: —Xa woꞌobꞌ chi pam y kaꞌibꞌ chi kar —xechaꞌ.
MAR 6:39 Ekꞌu ri Jesús xtaqan che ketzꞌuyiꞌ konoje ri tikawex chimutzaꞌj pa taq ri rax kꞌim.
MAR 6:40 Xetzꞌuyiꞌ kꞌu chimutzaꞌj re jujun ciento y re nikꞌaj ciento.
MAR 6:41 Ekꞌu ri Jesús xukꞌam ri woꞌobꞌ pam rukꞌ ri kaꞌibꞌ kar, xtzuꞌn chikaj y xtioxin chwach ri Dios. Tekꞌuchiriꞌ, xuwechꞌ upa ri pam y xuya chike rutijoꞌn chaꞌ kakijach chike ri winaq. Y jelaꞌ xuꞌan rukꞌ ri kebꞌ kar, xjachiꞌ kꞌu riꞌ waꞌ chike konoje.
MAR 6:42 Konoje kꞌu ri winaq xewaꞌik y xenoj chi utz.
MAR 6:43 Tekꞌuchiriꞌ, xkimol ri chꞌaqaꞌtaꞌq pam y kar, y rukꞌ waꞌ xnoj lo kabꞌlajuj chakach.
MAR 6:44 Yey ri xewaꞌik e lo woꞌobꞌ mil chi achijabꞌ.
MAR 6:45 Tekꞌuchiriꞌ, ri Jesús xebꞌutaq rutijoꞌn chaꞌ kebꞌok bꞌi chupa ri barco, kenabꞌej bꞌi chwach y keqꞌax kꞌa chꞌaqa yaꞌ che ri tinamit Betsaida, xaloqꞌ Rire kebꞌuchꞌaꞌbꞌej taq kan rukꞌiyal winaq.
MAR 6:46 Echiriꞌ ebꞌuchꞌaꞌbꞌem chi kanoq, xel bꞌi chwa ri juyubꞌ chaꞌ kuꞌana orar.
MAR 6:47 Echiriꞌ xok raqꞌabꞌ, ri barco kꞌo chi punikꞌajal ri mar, yey ri Jesús utukel kanajinaq kan chuꞌlew.
MAR 6:48 Anim tan kꞌu riꞌ, ri Jesús xeril pan rutijoꞌn lik rukꞌ kꞌax ketajin che ubꞌinisaxik ri barco ruma runimal tew petinaq chikiwach. Ekꞌu ri Jesús xeꞌek kukꞌ; e riꞌ kabꞌin chwi ri mar, ya e riꞌ kikꞌow chikiwach.
MAR 6:49 Pero rutijoꞌn echiriꞌ xkilo kabꞌin chwi ri yaꞌ, xkichꞌobꞌo e juna espíritu. Xkijeq kꞌu riꞌ kesikꞌinik,
MAR 6:50 ma konoje xkilo y lik xkixiꞌij kibꞌ che. Tekꞌuchiriꞌ, ri Jesús xebꞌuchꞌaꞌbꞌej, jewaꞌ xubꞌiꞌij chike: —Chinimarisaj ikꞌuꞌx, ma riꞌin in Jesús; mixiꞌij kꞌu iwibꞌ —xcha chike.
MAR 6:51 Xok kꞌu bꞌi ri Jesús kukꞌ chupa ri barco; ekꞌu runimal tew xtaniꞌik. Rutijoꞌn lik xkam kanimaꞌ che,
MAR 6:52 ma kꞌamajaꞌ ne kakimaj usukꞌ ri xuꞌan ri Jesús echiriꞌ xuꞌan kꞌi che ri pam, ma e pachaꞌ chꞌuqutal ri kinaꞌoj.
MAR 6:53 Ekꞌuchiriꞌ xkiqꞌaxuj ri yaꞌ, xebꞌopon che ri luwar re Genesaret y xkixim ri barco chuchiꞌ ri yaꞌ.
MAR 6:54 Echiriꞌ xebꞌel lo chupa ri barco, na jampatana ri winaq xketaꞌmaj uwach ri Jesús.
MAR 6:55 Xebꞌek kꞌu riꞌ re kakitzijoj puwi ri Jesús pa taq ronoje ri luwar re Genesaret. Yey ri winaq re ronoje taq luwar xkijeq kekikꞌam taq lo yewaꞌibꞌ e telem lo chwa chꞌat kꞌa pa ri luwar pa kitom kꞌo wi ri Jesús.
MAR 6:56 Y tobꞌ pa taq chawi xok wi ri Jesús, pa taq tinamit, pa taq aldeas o pa taq juyubꞌ, e kꞌo ri kekiya ri yewaꞌibꞌ chuchiꞌ taq ri bꞌe y kakikoj kꞌu kibꞌ chwach ri Jesús chaꞌ kuya luwar chike tobꞌ ne xew ruchiꞌ ruqꞌuꞌ kakichapo. Konoje kꞌu ri kebꞌanaw waꞌ, kekunutajik.
MAR 7:1 Ekꞌu ri fariseos kukꞌ jujun chike raj kꞌutunel re ri tzijpixabꞌ e petinaq Jerusalem, xkimol kibꞌ rukꞌ ri Jesús.
MAR 7:2 Waꞌ waꞌchijabꞌ xkijeq kekichꞌaꞌtibꞌej jujun chike rutijoꞌn ri Jesús ma xekilo kewaꞌik yey na kichꞌajom ta ri kiqꞌabꞌ. Y waꞌ na e ta kikꞌutuꞌn kan ri katiꞌ-kimam.
MAR 7:3 Ma ri fariseos y ri nikꞌaj chik aj judiꞌabꞌ e lik kitaqem ri kikꞌutuꞌn kan ri katiꞌ-kimam. Rike na kewaꞌ taj we na kakichꞌaj ta nabꞌe ri kiqꞌabꞌ chi utz.
MAR 7:4 Y echiriꞌ ketzelej lo pa kꞌaybꞌal, na jinta kꞌo kakitijo we na kakichꞌaj ta nabꞌe ri kiqꞌabꞌ, jelaꞌ pachaꞌ ri kꞌutum kan chike. Yey kitaqem ukꞌiyal kꞌutunik xa kimajom kan chikij katiꞌ-kimam, jelaꞌ pachaꞌ ruꞌanik kachꞌaj taq upa ri tijbꞌal yaꞌ, ri xaro, rubꞌitaq saꞌch re chꞌichꞌ y rujosqꞌixik ri chꞌat re warabꞌal.
MAR 7:5 Ruma kꞌu laꞌ ri fariseos y raj kꞌutunel re ri tzijpixabꞌ xkitzꞌonoj che ri Jesús: —¿Suꞌbꞌe ri tijoꞌn la na kitaqem ta ri kikꞌutuꞌn kan ri qatiꞌ-qamam? Ma rike kewaꞌik tobꞌ e laꞌ na kichꞌajom ta ri kiqꞌabꞌ —xechaꞌ.
MAR 7:6 Ekꞌu ri Jesús xukꞌul uwach: —¡Xa kebꞌ palaj alaq! Lik qatzij ri tzꞌibꞌital kan ruma ri qꞌalajisanel Isaías pawiꞌ alaq. Ma jewaꞌ xutzꞌibꞌaj kanoq: Waꞌ wa tinamit xa rukꞌ ruwakeꞌ kakiyak nuqꞌij, noꞌj ri kanimaꞌ lik naj kꞌo wi chwe.
MAR 7:7 Na jinta kꞌana kutiqoj kakiloqꞌoj nuqꞌij, ma ri kꞌutunik kakiꞌano xa taqanik ke achijabꞌ.
MAR 7:8 Ekꞌu ralaq e yaꞌom kan alaq Rutzij Upixabꞌ ri Dios y e lik kok alaq il che uꞌanik ri kikꞌutuꞌn kan ri tikawex, pachaꞌ kaꞌan alaq rukꞌ rujosqꞌixik ri tijbꞌal yaꞌ y ruchꞌajik upa ri xaro; yey kꞌo ne jujun chik pachaꞌ taq waꞌ kaꞌan alaq xa majom kan alaq —xchaꞌ.
MAR 7:9 Je tanchi kꞌu waꞌ xubꞌiꞌij chike: —Ralaq ꞌanom alaq che Rutzij Upixabꞌ ri Dios pachaꞌ na jinta uchak, ruma e lik katajin alaq che uꞌanik ri kikꞌutuꞌn kan ri tikawex.
MAR 7:10 Ma ri Moisés jewaꞌ utzꞌibꞌam kan ojertan: Chaloqꞌoj kiqꞌij rachu-aqaw yey We kꞌo junoq kebꞌuyaj ruchu-uqaw rukꞌ itzel chꞌaꞌtem, riꞌ lik taqal che kakamisaxik xcha ri Moisés.
MAR 7:11 »Noꞌj ralaq kabꞌiꞌij alaq: “Utz we juna achi xew kubꞌiꞌij chike ruchu-uqaw: Na utz taj kantoꞌ alaq, ma ri toꞌbꞌal kajawax che alaq, nubꞌiꞌtisim chik re nuqasaꞌn chwach ri Dios.”
MAR 7:12 Yey chiwach ralaq, china ri kabꞌiꞌn re waꞌ, na chirajawaxik ta chi che kebꞌutoꞌ ruchu-uqaw.
MAR 7:13 Jekꞌuriꞌlaꞌ ꞌanom alaq che Rutzij Upixabꞌ ri Dios pachaꞌ na jinta uchak, ruma taq ri noꞌjibꞌal petinaq lo chike ri chuꞌqaw alaq. Yey taqem alaq ukꞌiyal kꞌutunik pachaꞌ taq waꞌ —xchaꞌ.
MAR 7:14 Tekꞌuchiriꞌ, ri Jesús xebꞌusikꞌij konoje rukꞌiyal tikawex y jewaꞌ xubꞌiꞌij chike: —Lik tanape onoje alaq y lik maja alaq usukꞌ waꞌ:
MAR 7:15 Ri kachꞌulan ri ranimaꞌ ri tikawex na e ta ri kutij bꞌi, ma e ri kel lo pa ranimaꞌ, e waꞌ ri kachꞌulan re.
MAR 7:16 China kꞌu ri kꞌo utanibꞌal che utayik, ¡chuta kꞌu riꞌ! —xcha chike.
MAR 7:17 Ekꞌu ri Jesús xebꞌuya kan rukꞌiyal tikawex y xok bꞌi che jun ja. Tekꞌuchiriꞌ rutijoꞌn xkiꞌan tzꞌonobꞌal che puwi wa kꞌambꞌal naꞌoj.
MAR 7:18 Ewi rire xubꞌiꞌij chike: —¿Ix nebꞌa jun riꞌix chike ri na jinta kinaꞌoj puwi waꞌ? ¿Na kimaj ta nebꞌa usukꞌ e ri kachꞌulan ri ranimaꞌ ri tikawex na e ta ri kutij bꞌi?
MAR 7:19 Ma e janipa ri kutij bꞌi, riꞌ na kok ta chupa ri ranimaꞌ; xa chupa rupa keꞌek wi. Tekꞌuchiriꞌ, kuꞌpamaj bꞌi —xchaꞌ. Rukꞌ waꞌ ri Jesús xraj xubꞌiꞌij e ronoje taq ri re katijik, lik utz.
MAR 7:20 Je tanchi waꞌ xubꞌiꞌij chike: —E ri kel lo pa ranimaꞌ ri tikawex, e waꞌ ri kachꞌulan re.
MAR 7:21 Ma pa ranimaꞌ ri tikawex kel wi lo taq ritzel naꞌoj, ri makunik chirij ri kꞌulanikil, ri karetzꞌabꞌej uwa uqꞌij rukꞌ jun chik na ukꞌulel taj, ri kamisanik,
MAR 7:22 ri eleqꞌ, ri rayinik re puaq, ri retzelal kꞌuꞌxaj, ri sokosoꞌnik; ri rayibꞌal re ri tiꞌjil, ri kꞌax kꞌuꞌxaj chirij jun chik, ri itzel chꞌaꞌtem chirij junoq, ri kuꞌan nim chiribꞌil ribꞌ, ri na kuchꞌobꞌ tana saꞌ ri kuꞌano.
MAR 7:23 Ronoje taq waꞌ wa itzel uwach, chupa ri ranimaꞌ ri tikawex kel wuloq y e kachꞌulan re rubꞌinik —xchaꞌ.
MAR 7:24 Xel bꞌi ri Jesús chiriꞌ y xopon pa taq ri luwar re Tiro y re Sidón. Xok kꞌu chuchiꞌ jun ja. Na xraj taj kꞌo ketaꞌman re we Rire kꞌo chiriꞌ; na rukꞌ ta kꞌu riꞌ, xketaꞌmaj ri winaq.
MAR 7:25 Kꞌo kꞌu jun ixoq, e ri ralit kꞌo puqꞌabꞌ jun itzel uxlabꞌixel. Xew xuto kꞌo ri Jesús chiriꞌ, xkꞌunik y xukꞌaq ribꞌ xeꞌraqan uqꞌabꞌ ri Jesús.
MAR 7:26 Ekꞌu rixoq na kukꞌil ta ri aj judiꞌabꞌ yey alaxel pa ri luwar re Sirofenicia. Xelaj kꞌu che chaꞌ karesaj bꞌi ri itzel uxlabꞌixel che ri ralit.
MAR 7:27 Ekꞌu ri Jesús xubꞌiꞌij che: —Chirajawaxik na nabꞌe kewaꞌik y kenoj ri e ralkꞌoꞌal ri rajaw ja, ma na usukꞌ taj we junoq kumaj ri kiwa ri ralkꞌoꞌal y kukꞌaq bꞌi chikiwa ri tzꞌiꞌ —xcha che.
MAR 7:28 Rixoq xukꞌul uwach: —Qatzij, Qajawal, pero ¿na kewaꞌ ta nebꞌa ri tzꞌiꞌ rukꞌ rukꞌaj kiwa rakꞌalabꞌ katzaq chuxeꞌ ri mexa? —xchaꞌ.
MAR 7:29 Ri Jesús xubꞌiꞌij che: —Ruma wa xabꞌiꞌij, kanya chawe ri xatzꞌonoj. Jat kꞌu woꞌora ma ri itzel uxlabꞌixel elinaq chubꞌi che rawalit —xchaꞌ.
MAR 7:30 Ekꞌuchiriꞌ xopon rixoq chirocho, xuꞌriqa ri ralit kotzꞌol chwa uwarabꞌal yey elinaq chubꞌi ri itzel uxlabꞌixel che.
MAR 7:31 Ekꞌuchiriꞌ, xel tanchi ubꞌi ri Jesús che taq ri luwar re Tiro y xikꞌow pa ri tinamit Sidón. Xopon kꞌu chuchiꞌ ri mar re Galilea y xeꞌela pa taq ri luwar re Decápolis.
MAR 7:32 Chiriꞌ xkikꞌam lo chwach ri Jesús jun achi tꞌoꞌk y kachꞌiqchꞌotik, yey ri ekꞌamayom loq xebꞌelaj che chaꞌ kuya ruqꞌabꞌ puwiꞌ.
MAR 7:33 Ekꞌu ri Jesús xresaj bꞌi rachi chikixoꞌl ri winaq. Tekꞌuchiriꞌ xujuꞌ ruwi taq uqꞌabꞌ puxikin rachi y xukoj jubꞌiqꞌ ukꞌaxaj tzaꞌm ri raqꞌ.
MAR 7:34 Xtzuꞌn chikaj, xukꞌis ukꞌuꞌx y jekꞌuwaꞌ xubꞌiꞌij che rachi: «¡Efata!» (Waꞌ pa ri chꞌaꞌtem arameo keꞌelawi “chatjaqatajoq”.)
MAR 7:35 Na jampatana kꞌu riꞌ, rachi xjaqataj ruxikin, xkiritaj ri raqꞌ y xujeqo kachꞌaꞌt chi utz.
MAR 7:36 Ekꞌu ri Jesús lik xebꞌupixabꞌaj ri winaq chaꞌ na jinta kꞌana kꞌo kakitzijoj wi, noꞌj ri winaq tobꞌ ne kepixabꞌaxik, más ne xebꞌek che utzijoxik.
MAR 7:37 Lik kꞌu kakam kanimaꞌ ri winaq che y jewaꞌ kakibꞌiꞌij: «Ronoje ri kuꞌano lik utz, ma ri e tꞌoꞌk kuꞌan chike ketanik yey ri e meꞌt kuꞌan chike kechꞌawik.»
MAR 8:1 Chupa taq laꞌ la qꞌij xkimol kibꞌ ukꞌiyal tikawex. Y ruma na jinta kiwa re kakitijo, ri Jesús xebꞌusikꞌij rutijoꞌn y xubꞌiꞌij chike:
MAR 8:2 —Lik kajuchꞌ kaꞌn nukꞌuꞌx chike wa tikawex ma e urox qꞌij waꞌ e kꞌo wukꞌ y na jinta chi kiwa.
MAR 8:3 Yey we e laꞌ kebꞌenutaq bꞌi chikocho y na jinta kꞌo kitijom, riꞌ kebꞌeꞌqꞌochqꞌobꞌ pa bꞌe, ma e kꞌo jujun chike lik naj e petinaq wi —xchaꞌ.
MAR 8:4 Rutijoꞌn xkibꞌiꞌij che: —Pero, ¿pa kariqitaj wi wa re ketzuq wa ukꞌiyal tikawex? Ma chupa wa luwar na jinta ne kꞌo e jeqelik —xechaꞌ.
MAR 8:5 Ri Jesús xutzꞌonoj kꞌu chike: —¿Janipa chi pam kꞌo iwukꞌ? —xcha chike. —Wuqubꞌ —xecha rike.
MAR 8:6 Ewi ri Jesús xtaqan che ketzꞌuyiꞌ ri tikawex chuꞌlew. Xukꞌam kꞌu ri wuqubꞌ pam y xtioxin chwach ri Dios. Tekꞌuchiriꞌ, xuwechꞌ upa y xuya chike rutijoꞌn chaꞌ kakijach chike rukꞌiyal tikawex; y rike e xkiꞌano.
MAR 8:7 Yey kukꞌaꞌam ne jujun raltaq ko kar. Ekꞌu ri Jesús xtioxin chwach ri Dios puwi waꞌ y xtaqan kꞌu che kajachiꞌ chike ri winaq.
MAR 8:8 Xewaꞌ kꞌut y lik xenoj chi utz. Tekꞌuchiriꞌ, xmol ri chꞌaqaꞌtaꞌq kiqax y rukꞌ waꞌ xnoj wuqubꞌ chakach.
MAR 8:9 Ri xewaꞌik, laj e juna kajibꞌ mil tikawex. Ekꞌu ri Jesús xebꞌuchꞌaꞌbꞌej kanoq,
MAR 8:10 xok kꞌu bꞌi chupa ri barco kukꞌ rutijoꞌn y xebꞌek pa taq ri luwar re Dalmanuta.
MAR 8:11 Kꞌo jun qꞌij ri fariseos xebꞌopon rukꞌ ri Jesús y xkijeqo e laꞌ xa pa chꞌaꞌtem kakichap pa chꞌaꞌoj. Xkitzꞌonoj kꞌu che kuꞌan juna kꞌutubꞌal re chilaꞌ chikaj chikiwach chaꞌ kaqꞌalajinik we Rire taqom lo ruma ri Dios; waꞌ xkiꞌano xa re kꞌambꞌal upa.
MAR 8:12 Ekꞌu ri Jesús lik xukꞌis ukꞌuꞌx y xubꞌiꞌij chike: «¿Suꞌbꞌe ri tikawex re waqꞌij ora e kakitzꞌonoj kanꞌan juna kꞌutubꞌal chaꞌ kaqꞌalajinik we intaqom lo ruma ri Dios? Paqatzij wi kambꞌiꞌij chiwe: Na jinta juna kꞌutubꞌal kayaꞌtaj chike» xchaꞌ.
MAR 8:13 Ewi xebꞌuya kanoq, xok tanchi ubꞌi chupa ri barco y xqꞌax chꞌaqa yaꞌ.
MAR 8:14 Ekꞌu rutijoꞌn ri Jesús xikꞌow chikikꞌuꞌx kakikꞌam bꞌi pam y xa jun chi pam kꞌo kukꞌ chupa la barco.
MAR 8:15 Ewi ri Jesús xebꞌupixabꞌaj, jewaꞌ xubꞌiꞌij chike: «Lik chichajij iwibꞌ chwa ri “levadura” ke ri fariseos y chwa ri “levadura” re ri Herodes» xchaꞌ.
MAR 8:16 Rutijoꞌn xkibꞌiꞌij kꞌu chikiwach: «Kubꞌiꞌij waꞌ ma retaꞌam na jinta pam xqakꞌam loq» xechaꞌ.
MAR 8:17 Ri Jesús xretaꞌmaj saꞌ la kakichꞌaꞌtibꞌej chikiwach y xubꞌiꞌij kꞌu chike: —¿Suꞌbꞌe kichꞌaꞌtibꞌej chiwach puwi ri na xikꞌam ta lo pam? ¿Kꞌamajaꞌ nebꞌa kimaj usukꞌ? ¿Lik kami kꞌa chꞌuqutal rinaꞌoj?
MAR 8:18 Kꞌo waꞌ kꞌu iwach yey e pachaꞌ na kixtzuꞌn taj. Kꞌo waꞌ kꞌu ixikin yey e pachaꞌ na kixtan taj. ¿Lik nebꞌa na kakꞌun ta chikꞌuꞌx
MAR 8:19 echiriꞌ xinjach ri woꞌobꞌ pam chike ri woꞌobꞌ mil tikawex? ¿Janipa kꞌu chakach xinojisaj rukꞌ ri kiqax? —xchaꞌ. Rutijoꞌn xkikꞌul uwach: —Kabꞌlajuj chakach —xechaꞌ.
MAR 8:20 Xutzꞌonoj tanchi chike: —Yey echiriꞌ xinjach ri wuqubꞌ pam chike ri kajibꞌ mil tikawex, ¿janipa lo chakach xinojisaj rukꞌ ri kiqax? —xchaꞌ. Rike xkikꞌul uwach: —Wuqubꞌ chakach —xechaꞌ.
MAR 8:21 Jekꞌuwaꞌ xukꞌisbꞌej kukꞌ: —¿Suꞌbꞌe kꞌu riꞌ kꞌamajaꞌ kꞌana kimaj usukꞌ? —xcha chike.
MAR 8:22 Tekꞌuchiriꞌ, xebꞌopon pa ri tinamit Betsaida. Taq ri winaq xkikꞌam lo jun potzꞌ chwa ri Jesús y xebꞌelaj kꞌu che chaꞌ kukunaj.
MAR 8:23 Ekꞌu ri Jesús xuchap ruqꞌabꞌ ri potzꞌ, xresaj bꞌi chupa ri tinamit y xchubꞌan che taq ruwach. Tekꞌuchiriꞌ, xuya ruqꞌabꞌ puwiꞌ y xutzꞌonoj che we karil kꞌenoq.
MAR 8:24 Ri potzꞌ xtzuꞌn pana chwach y xubꞌiꞌij: —Kebꞌenuwil rachijabꞌ pachaꞌ chi e cheꞌ kebꞌinik —xchaꞌ.
MAR 8:25 Ri Jesús xuya tanchi ruqꞌabꞌ puwi ruwach ri potzꞌ. Jekꞌulaꞌ ri potzꞌ xkunutajik y utz xtzuꞌnik. Xtzuꞌn kꞌu pana naj y xril ronoje chi utz.
MAR 8:26 Tekꞌuchiriꞌ ri Jesús xutaq bꞌi chirocho y jewaꞌ xubꞌiꞌij che: —Matok bꞌi pa ri tinamit y matzijoj ne kꞌana che junoq e riꞌin xatinkunaj —xcha che.
MAR 8:27 Ri Jesús kukꞌ rutijoꞌn xebꞌek pa taq ri aldeas re ri tinamit Cesarea re Filipo. Yey chupa kꞌu ri bꞌe, ri Jesús xutzꞌonoj chike rutijoꞌn: —Chikiwa ri winaq, ¿in china nawi riꞌin? —xchaꞌ.
MAR 8:28 Rike xkikꞌul uwach che: —Kꞌo kebꞌiꞌn re, lal ri Juan Aj Yaꞌl Bautismo; jujun chik kakibꞌiꞌij lal ri Elías; y jujun chik, lal junoq chike taq ri qꞌalajisanelabꞌ re ojertan —xechaꞌ.
MAR 8:29 Tekꞌuchiriꞌ, xutzꞌonoj chike: —Yey chiwach riꞌix, ¿in china riꞌin? —xchaꞌ. Ri Pedro xukꞌul uwach: —Rilal lal ri Cristo, Ruchaꞌoꞌn lo ri Dios —xchaꞌ.
MAR 8:30 Ewi ri Jesús xebꞌutaq che na kakitzijoj ta che junoq china Rire.
MAR 8:31 Xujeq kꞌu ubꞌiꞌxikil chike: «Lik chirajawaxik che Ralaxel Chikixoꞌl Tikawex kutij na ri kꞌax y kakꞌaq bꞌi uqꞌij kuma ri nimaq winaq re ri tinamit, ri nimaq e aj chakunel pa Rocho Dios y raj kꞌutunel re ri tzijpixabꞌ. Tekꞌuchiriꞌ, kakamisaxik; noꞌj churox qꞌij kakꞌastaj loq» xchaꞌ.
MAR 8:32 Waꞌ xuqꞌalajisaj chi utz chike. Ekꞌu ri Pedro xresaj bꞌi ri Jesús chikixoꞌl y xuchꞌaꞌbꞌej upa ruma ri xubꞌiꞌij.
MAR 8:33 Noꞌj ri Jesús xutzuꞌ lo kiwach rutijoꞌn y xuchꞌaꞌbꞌej kꞌu upa ri Pedro, jewaꞌ xubꞌiꞌij che: —¡Chatel chinuwach, Satanás! Ma riꞌat na e ta kachꞌobꞌ puwi ri uchꞌobꞌom lo ri Dios, xew e kachꞌobꞌ jelaꞌ pachaꞌ ri kakichꞌobꞌ ri winaq —xcha che.
MAR 8:34 Ekꞌuchiriꞌ, xebꞌusikꞌij ri winaq y rutijoꞌn, y jekꞌuwaꞌ xubꞌiꞌij chike: «We kꞌo junoq karaj katerej lo chwij, lik chirajawaxik che muꞌan xew ri karaj rire, e chukuyu ri kꞌax kape puwiꞌ ruma ukojom ri nubꞌiꞌ yey tereja lo chwij.
MAR 8:35 Ma china ri na kuya ta ranimaꞌ rukꞌaslem, riꞌ e kujam ri chomilaj kꞌaslemal chwach ri Dios; noꞌj ri kuya ranimaꞌ rukꞌaslem wuma riꞌin y ruma ri Utzilaj Tzij, riꞌ e kuriq ri chomilaj ukꞌaslemal chwach ri Dios.
MAR 8:36 Ma ¿saꞌ kꞌu kutiqoj riꞌ che ri tikawex we kuꞌan rajaw ronoje ruwachulew yey kusach kꞌu uwach rukꞌaslemal?
MAR 8:37 ¿O kꞌo nawi rajil kutoj rachi chwa rukꞌaslemal chaꞌ na kujam taj? ¡Na jintaj!
MAR 8:38 »Mixkꞌix kꞌu chwe riꞌin y che ri nuchꞌaꞌtem chikiwach raj makibꞌ re waqꞌij ora, ri na jusukꞌ ta ri kanimaꞌ chwach ri Dios. Ma ri kaꞌanaw waꞌ, ri in Alaxel Chikixoꞌl Tikawex kinkꞌix che rire echiriꞌ kinkꞌun lo rukꞌ runimal uchomalil ri Nuqaw y kukꞌ taq ri santowilaj ángeles» xchaꞌ.
MAR 9:1 Tekꞌuchiriꞌ, xubꞌiꞌij chike: —Paqatzij wi kambꞌiꞌij chiwe: E kꞌo jujun chike wa e kꞌo wara, na kekam tana we na xkil tubꞌi rukꞌunibꞌal rutaqanik ri Dios rukꞌ unimal chuqꞌabꞌ —xchaꞌ.
MAR 9:2 Waqibꞌ qꞌij kꞌu ubꞌiꞌxikil riꞌ waꞌ, echiriꞌ ri Jesús xebꞌuchaꞌ ri Pedro, ri Jacobo y ri Juan y xebꞌukꞌam bꞌi kitukel chwa jun nimalaj juyubꞌ. Chilaꞌ kꞌut xjalkꞌatitaj uwach ri Jesús chikiwach.
MAR 9:3 Ruqꞌuꞌ lik kawolqꞌinik, xuꞌan lik saq pachaꞌ ri nieve; rusaqil xilitajik na jinta kꞌo kaꞌanaw re che ruwachulew.
MAR 9:4 Xaqikꞌateꞌt kꞌut chikiwach xewinaqir ri Elías y ri Moisés, qꞌalajisanelabꞌ re ojertan; e riꞌ kechꞌaꞌt rukꞌ ri Jesús.
MAR 9:5 Ekꞌu ri Pedro xubꞌiꞌij che ri Jesús: —Qajawal, lik utz xyaꞌtaj chiqe riꞌoj oj kꞌo wara. Qaꞌana oxibꞌ rancho: jun e la, jun re ri Moisés y jun re ri Elías —xchaꞌ.
MAR 9:6 Ri Pedro xubꞌiꞌij waꞌ ruma na kunaꞌ taj saꞌ ri kubꞌiꞌij, ma rire kukꞌ ri kebꞌ chik rachbꞌiꞌil lik kixiꞌim kibꞌ.
MAR 9:7 Ekꞌuchiriꞌ, xqaj lo jun sutzꞌ y xuꞌan muꞌj pakiwiꞌ. Chupa kꞌu riꞌ ri sutzꞌ xkita ruqul ri Dios, jewaꞌ xubꞌiꞌij: «E Nukꞌajol waꞌ ri lik kꞌax kannaꞌo; e chita utzij Rire» xchaꞌ.
MAR 9:8 Kꞌate kꞌu xkilo, xew chi ri Jesús kꞌo kukꞌ.
MAR 9:9 Echiriꞌ xeqaj lo chwa ri juyubꞌ, ri Jesús xebꞌutaq che na kakitzijoj ta kꞌana che junoq janipa ri xkilo; kꞌate kakitzijoj echiriꞌ Ralaxel Chikixoꞌl Tikawex kꞌastajinaq chi lo chikixoꞌl ri ekaminaq.
MAR 9:10 Ekꞌu rike lik xkikꞌol pa kanimaꞌ ri xbꞌiꞌx chike y xkijeq kakitzꞌonobꞌej chikiwach puwi saꞌ keꞌelawi ri kꞌastajibꞌal lo re Ralaxel Chikixoꞌl Tikawex.
MAR 9:11 Ekꞌuchiriꞌ, xkitzꞌonoj che ri Jesús: —¿Suꞌbꞌe raj kꞌutunel re ri tzijpixabꞌ kakibꞌiꞌij lik chirajawaxik nabꞌe na kakꞌun ri Elías chwach pan rukꞌunibꞌal Ralaxel Chikixoꞌl Tikawex? —xechaꞌ.
MAR 9:12 Ekꞌu ri Jesús xukꞌul uwach: —Qatzij, lik chirajawaxik nabꞌe na kakꞌun ri Elías y kuyijbꞌaꞌ pan ronoje chwach rukꞌunibꞌal Ralaxel Chikixoꞌl Tikawex. Pero ¿saꞌ kichꞌobꞌ riꞌix puwi ri tzꞌibꞌital kan chupa Rutzij Upixabꞌ ri Dios? Ma kubꞌiꞌij lik chirajawaxik na, Ralaxel Chikixoꞌl Tikawex kutij kꞌax y na jinta uqꞌij kaꞌanik.
MAR 9:13 Noꞌj kꞌu riꞌin kanqꞌalajisaj waꞌ chiwe: Ri Elías ya xkꞌunik yey ri winaq xkiꞌan che janipa ri xkaj rike, jelaꞌ pachaꞌ ri tzꞌibꞌital kan puwi rire —xchaꞌ.
MAR 9:14 Echiriꞌ xebꞌopon pa e kꞌo wi kan ri jujun chik utijoꞌn, xkilo e kꞌo ukꞌiyal winaq kisutum kij yey raj kꞌutunel re ri tzijpixabꞌ kekichapalaꞌ che chꞌaꞌoj.
MAR 9:15 Konoje kꞌu ri winaq lik xekiꞌkotik echiriꞌ xkil ri Jesús. Kebꞌanik xeꞌkikꞌuluꞌ apanoq y xkiya rutzil uwach.
MAR 9:16 Xutzꞌonoj kꞌu Rire chike: —¿Saꞌ puwi kachapalaꞌ wi ibꞌ alaq kukꞌ rike? —xchaꞌ.
MAR 9:17 Kꞌo kꞌu jun chikixoꞌl rukꞌiyal winaq jewaꞌ xukꞌul uwach: —Lal tijonel, nukꞌamom lo ri nukꞌajol chiwach la, ma rire kꞌo puqꞌabꞌ jun itzel uxlabꞌixel uꞌanom meꞌt che.
MAR 9:18 Xa tobꞌ pa kuchap wi, kukꞌaq pulew. Ekꞌuchiriꞌ, rala kujeq kapuluwan rukꞌaxaj, kaqichꞌichꞌ ruwi taq reꞌ y kakanaj kan junchi chukꞌuchik. Xintzꞌonoj kꞌu chike ri tijoꞌn la chaꞌ kakesaj bꞌi ri itzel uxlabꞌixel, pero rike na xkichꞌij ta resaxik bꞌi —xchaꞌ.
MAR 9:19 Ekꞌu ri Jesús xukꞌul uwach, jewaꞌ xubꞌiꞌij chike: —¡E ri ix tikawex re waqꞌij ora, na kubꞌul ta kꞌana ikꞌuꞌx wukꞌ! ¿Janipa chi lo qꞌij kajawaxik kinkꞌojiꞌ iwukꞌ chaꞌ kakubꞌiꞌ ikꞌuꞌx wukꞌ? ¿Janipa chi lo qꞌij kixinkuyu e laꞌ jelaꞌ iꞌanom? Chikꞌama lo rala wara —xchaꞌ.
MAR 9:20 Xkikꞌam kꞌu lo rala chwach. Ekꞌu ri itzel uxlabꞌixel echiriꞌ xril uwach ri Jesús, lik ko xujabꞌajaꞌ rala. Ekꞌu rala xtzaq pulew y xujeqo kubꞌalkatilaꞌ ribꞌ, kapuluwan rukꞌaxaj.
MAR 9:21 Ri Jesús xutzꞌonoj kꞌu che ruqaw rala: —¿Jampa ujeqom lo waꞌ che? —xchaꞌ. Rachi xukꞌul uwach: —Chuchꞌutiꞌnal upetebꞌem loq.
MAR 9:22 Ukꞌiyal laj ukꞌaqom pa aqꞌ y pa yaꞌ re kamisaxik uwach. We kꞌo ko paqꞌabꞌ la katoꞌ la, kꞌutu ko ri kꞌaxnaꞌbꞌal kꞌuꞌx la chiqe y chojtoꞌo la —xchaꞌ.
MAR 9:23 Ri Jesús xukꞌul uwach: —¿Suꞌbꞌe kabꞌiꞌij la chwe we kꞌo panuqꞌabꞌ kanꞌan waꞌ? Ma we kꞌo junoq lik kubꞌul ukꞌuꞌx wukꞌ, ronoje kel pana rukꞌ —xchaꞌ.
MAR 9:24 Ekꞌu ruqaw rala na jampatana ko xchꞌawik, jewaꞌ xubꞌiꞌij: —Kubꞌul nukꞌuꞌx ukꞌ la, xew chintoꞌo ko la chaꞌ kanimar ri kubꞌulibꞌal nukꞌuꞌx —xchaꞌ.
MAR 9:25 Ekꞌu ri Jesús echiriꞌ xrilo katajin kimolotajik rukꞌiyal winaq, xtaqan puwi ri itzelilaj uxlabꞌixel, jewaꞌ xubꞌiꞌij che: —Itzelilaj uxlabꞌixel, ri aꞌanom meꞌt y tꞌoꞌk che waꞌla, riꞌin katintaqo: Jat, chatelubꞌi y mat-tzelej chi lo kꞌana rukꞌ —xcha che.
MAR 9:26 Ewi ri itzel uxlabꞌixel xsikꞌinik y lik ko xujabꞌajaꞌ rala; tekꞌuchiriꞌ, xel bꞌi. Ekꞌu rala xkanaj kanoq pachaꞌ kaminaq chik. Ruma riꞌ, lik e kꞌi ri xebꞌiꞌn re: «Ya xkamik» xechaꞌ.
MAR 9:27 Pero ri Jesús xuchap ruqꞌabꞌ, xuyako; y rala xtakꞌiꞌik.
MAR 9:28 Ekꞌuchiriꞌ, xok bꞌi ri Jesús chuchiꞌ jun ja. Ekꞌu rutijoꞌn xechꞌaꞌt rukꞌ xa kitukel chik, jewaꞌ xkitzꞌonoj che: —¿Suꞌbꞌe riꞌoj na xqachꞌij tubꞌi resaxik waꞌ wa itzel uxlabꞌixel? —xechaꞌ.
MAR 9:29 Ri Jesús xukꞌul uwach: —E taq waꞌ wa juchꞌobꞌ itzel uxlabꞌixel, xew utz kebꞌesax bꞌi rukꞌ oración y ayuno —xchaꞌ.
MAR 9:30 Echiriꞌ xebꞌel bꞌi chiriꞌ, xebꞌikꞌow pa taq ri luwar re Galilea. Pero ri Jesús na xraj taj kꞌo ketaꞌman re,
MAR 9:31 ma kakꞌutun chikiwach rutijoꞌn. Jekꞌuwaꞌ kubꞌiꞌij chike: «Ralaxel Chikixoꞌl Tikawex kayaꞌiꞌ pakiqꞌabꞌ rachijabꞌ y kakamisax kuma, noꞌj echiriꞌ kaminaq chik, kakꞌastaj lo churox qꞌij» xchaꞌ.
MAR 9:32 Ekꞌu rutijoꞌn na xkimaj ta usukꞌ la kubꞌiꞌij chike, yey kakixiꞌij kibꞌ kakitzꞌonoj che ri Jesús saꞌ keꞌelawi waꞌ.
MAR 9:33 Xebꞌopon kꞌu chupa ri tinamit Capernaúm y echiriꞌ e kꞌo chi chuchiꞌ jun ja, xutzꞌonoj chike rutijoꞌn: —¿Saꞌ puwi kichapalaꞌ wi iwibꞌ chiwach echiriꞌ kixtajin lo chi bꞌe? —xcha chike.
MAR 9:34 Yey na jinta kꞌu junoq chike xchꞌawik; ma echiriꞌ kꞌa ketajin lo chi bꞌe, e kakichapalaꞌ kibꞌ chikiwach puwiꞌ chinoq chike kayaꞌiꞌ más uwach.
MAR 9:35 Ewi ri Jesús xtzꞌuyiꞌik, xebꞌusikꞌij ri kabꞌlajuj utijoꞌn y xubꞌiꞌij chike: —We kꞌo junoq karaj e rire ri kakꞌojiꞌ nabꞌe chikiwach konoje, riꞌ chirajawaxik che e kakanaj kan pa kꞌisbꞌal chike konoje y kuya ribꞌ kebꞌunimaj —xcha chike.
MAR 9:36 Xukꞌam kꞌu jun ralko kꞌoꞌm y xuya chikinikꞌajal rike. Xuqꞌaluj kꞌut y jewaꞌ xubꞌiꞌij chike:
MAR 9:37 —China ri kukꞌul chupa ri nubꞌiꞌ junoq na jinta uwach pachaꞌ wa ralko kꞌoꞌm, e junam rukꞌ in ri kinukꞌulu; yey china ri kakꞌuluw we riꞌin, na xew ta kinukꞌul riꞌin, ma e kukꞌul ri Jun taqayom lo we riꞌin —xchaꞌ.
MAR 9:38 Ekꞌu ri Juan xubꞌiꞌij che ri Jesús: —Qajawal, xqil jun achi kebꞌeresaj bꞌi itzel uxlabꞌixel chupa ri bꞌiꞌ la yey rire na qukꞌil taj. Ekꞌu riꞌoj xqabꞌiꞌij che muꞌan chi waꞌ —xechaꞌ.
MAR 9:39 Ri Jesús xukꞌul uwach: —We kꞌo kaꞌanaw waꞌ, miqꞌatej, ma na jinta junoq kuꞌan juna milagro chupa ri nubꞌiꞌ yey pa joqꞌotaj kꞌu riꞌ kachꞌaꞌt lo chwij.
MAR 9:40 Ma china ri na kachꞌoꞌjin ta chiqij, riꞌ e qukꞌil.
MAR 9:41 China ri kusipaj juna tzima iyaꞌ chupa ri nubꞌiꞌ ruma ix re ri Cristo, paqatzij wi kambꞌiꞌij chiwe, riꞌ na kujam ta kꞌana ri rajil ukꞌaxel.
MAR 9:42 »Noꞌj china ri kumin pa mak junoq chike wa chꞌutiꞌq kubꞌul kikꞌuꞌx wukꞌ, e ne más utz katzayabꞌax bꞌi puqul juna nimalaj kaꞌ re keꞌem y kakꞌaq kꞌu bꞌi chupa ri mar.
MAR 9:43 »We raqꞌabꞌ e katzaqisan awe pa mak, chaqꞌata bꞌi. Ma xa ne kuya tobꞌ at tꞌum katopon pa ri kꞌaslemal chilaꞌ chikaj, chwa ri kꞌo ukabꞌichal raqꞌabꞌ yey katkꞌaq bꞌi chi xibꞌalbꞌaꞌ re tijbꞌal kꞌax, chupa ri aqꞌ na jinta chi uchupik
MAR 9:44 pa na kekam ta wi ramoloy ketijow ke waꞌ wa winaq ekaminaq, yey ri aqꞌ na jinta chi uchupik.
MAR 9:45 »Yey we rawaqan e katzaqisan awe pa mak, chaqꞌata bꞌi. Ma xa ne kuya tobꞌ at jetzꞌ katopon pa ri kꞌaslemal chilaꞌ chikaj, chwa ri kꞌo ukabꞌichal rawaqan yey katkꞌaq bꞌi chi xibꞌalbꞌaꞌ re tijbꞌal kꞌax, chupa ri aqꞌ na jinta chi uchupik
MAR 9:46 pa na kekam ta wi ramoloy ketijow ke waꞌ wa winaq ekaminaq, yey ri aqꞌ na jinta chi uchupik.
MAR 9:47 »Yey we rawach e katzaqisan awe pa mak, chawesaj bꞌi. Ma xa ne kuya ri xa jun rawach katok pa rutaqanik ri Dios, chwa ri kꞌo ukabꞌichal rawach yey katkꞌaq bꞌi chi xibꞌalbꞌaꞌ re tijbꞌal kꞌax
MAR 9:48 pa na kekam ta wi ramoloy ketijow ke waꞌ wa winaq ekaminaq, yey ri aqꞌ na jinta chi uchupik.
MAR 9:49 »Chirajawaxik kꞌut konoje kakꞌam na kipa, pachaꞌ kebꞌikꞌowisax pa aqꞌ. E pachaꞌ ri kaꞌan rukꞌ ronoje qasaꞌn kayaꞌiꞌ chwach ri Dios: kakowisax ruma ratzꞌam.
MAR 9:50 E ratzꞌam lik kajawaxik, noꞌj we xsach rutzayul, ¿suꞌanik tanchi kaꞌan tza che? Chirajawaxik kꞌut lik kꞌo kutiqoj ribꞌinik isilabꞌik riꞌix jelaꞌ pachaꞌ ratzꞌam lik kuriq uchak. Kꞌola kꞌu rutzil chomal chiwach chijujunal —xcha chike.
MAR 10:1 Ri Jesús xel bꞌi che ri tinamit Capernaúm y xeꞌek pa taq ri luwar re Judea y che taq ri luwar kꞌo chꞌaqa yaꞌ che ri nimayaꞌ Jordán. E taq kꞌu ri winaq xkimol kibꞌ rukꞌ, y Rire xujeq kakꞌutun chikiwach pachaꞌ ri xex kuꞌan wi.
MAR 10:2 Xeqibꞌ kꞌu ri fariseos rukꞌ y xkiꞌan jun tzꞌonobꞌal che xa re kꞌambꞌal upa: —¿Yaꞌtal nawi puqꞌabꞌ juna achi kuya bꞌi ruwujil re jachbꞌal ibꞌ che ri rixoqil? —xechaꞌ.
MAR 10:3 Ekꞌu ri Jesús xukꞌul uwach: —¿Saꞌ kubꞌiꞌij ri taqanik xuꞌan kan ri Moisés che alaq? —xchaꞌ.
MAR 10:4 Rike xkibꞌiꞌij: —Ri Moisés xuya luwar che rachi kuya bꞌi ruwujil re jachbꞌal ibꞌ che ri rixoqil y jekꞌulaꞌ na rixoqil ta chik —xechaꞌ.
MAR 10:5 Ri Jesús xubꞌiꞌij chike: —Xutzꞌibꞌaj ne kan riꞌ waꞌ wa jun taqanik ma e ruma lik ko ri animaꞌ alaq.
MAR 10:6 Noꞌj Ruchꞌaꞌtem ri Dios kubꞌiꞌij: Che ri jeqebꞌal lo ruwachulew echiriꞌ ri Dios xebꞌuꞌan ri tikawex, chi achi chi ixoq xebꞌuꞌano.
MAR 10:7 Y kubꞌiꞌij: Ruma kꞌu riꞌ, rachi echiriꞌ kakꞌuliꞌik, karesaj ribꞌ chikij ruchu-uqaw chaꞌ kajeqiꞌ rukꞌ ri rixoqil;
MAR 10:8 y kikabꞌichal kꞌu riꞌ kebꞌuꞌana xa e jun chwach ri Dios kachaꞌ. Jekꞌuriꞌlaꞌ, na e ta chi kaꞌibꞌ ma xebꞌuꞌana xa e jun.
MAR 10:9 E uwariꞌche, ri xebꞌujunimaj ri Dios, na yaꞌtal ta che ri tikawex kujach kipa —xchaꞌ.
MAR 10:10 Ekꞌuchiriꞌ e kꞌo chi chiꞌja, rutijoꞌn xkitzꞌonoj tanchi che puwi wa xutzijoj.
MAR 10:11 Ri Jesús xubꞌiꞌij chike: —E junoq kuya ruwujil re jachbꞌal ibꞌ che ri rixoqil yey kakꞌuliꞌ tanchi rukꞌ juna chik ixoq, riꞌ kamakun chwach ri Dios chirij ri nabꞌe rixoqil.
MAR 10:12 Jekꞌulaꞌ rixoq, we kuya ruwujil re jachbꞌal ibꞌ che ri rachijil yey kakꞌuliꞌ tanchi rukꞌ juna chik achi, riꞌ jenelaꞌ kamakun chirij ri kꞌulanikil —xchaꞌ.
MAR 10:13 E kꞌo jujun raltaq ko akꞌalabꞌ xekꞌam lo chwach ri Jesús chaꞌ kuya ruqꞌabꞌ pakiwiꞌ. Noꞌj rutijoꞌn xekiyaj ri ekꞌamayom lo ke.
MAR 10:14 Ri Jesús, echiriꞌ xril waꞌ, xpe royowal y jewaꞌ xubꞌiꞌij chike: «Chiyaꞌa luwar chike ri raltaq ko akꞌalabꞌ chepeta na wukꞌ. Mebꞌiqꞌatej; ma ri kakiꞌan e jelaꞌ pachaꞌ rike, riꞌ kuꞌan ke rutaqanik ri Dios.
MAR 10:15 Paqatzij wi kambꞌiꞌij chiwe: China ri na kukꞌul ta rutaqanik ri Dios jelaꞌ pachaꞌ kuꞌan juna ralko kꞌoꞌm, riꞌ na kok ta chupa» xchaꞌ.
MAR 10:16 Tekꞌuchiriꞌ, xebꞌuqꞌaluj ri raltaq ko akꞌalabꞌ, xuya ruqꞌabꞌ pakiwiꞌ y xebꞌuꞌan bendecir.
MAR 10:17 Echiriꞌ katajin bꞌi relik ri Jesús re kumaj tanchi ubꞌi rubꞌe, kakꞌalalik xopon jun rukꞌ, xuxukubꞌaꞌ ribꞌ chwach y xutzꞌonoj kꞌu che: —Lal utzilaj tijonel, ¿saꞌ ri kanꞌano chaꞌ kꞌo nukꞌaslemal na jinta utaqexik? —xchaꞌ.
MAR 10:18 Ri Jesús xukꞌul uwach: —¿Suꞌbꞌe kabꞌiꞌij la “utz” chwe? Ma xa jun ri lik utz kꞌolik, waꞌ e ri Dios.
MAR 10:19 Rilal etaꞌam chi la saꞌ taq Rutzij Upixabꞌ ri Dios: “Matmakun chirij ri kꞌulanikil. Matkamisanik. Mateleqꞌik. Maꞌan raqꞌubꞌal chirij junoq. Makꞌo maꞌan xa rukꞌ sokosoꞌnik. Chaloqꞌoj kiqꞌij rachu-aqaw” —xcha che.
MAR 10:20 Rachi xukꞌul uwach: —Lal tijonel, ronoje waꞌ nuꞌanom lo chwi nuchꞌutiꞌnal —xchaꞌ.
MAR 10:21 Ewi ri Jesús xutzuꞌ uwach y lik xjuchꞌ kan ukꞌuꞌx che. Xubꞌiꞌij kꞌu che: —Xa jun chi ri lik chirajawaxik wi kaꞌan la: Oj la, kꞌayij la ronoje taq ri bꞌeyomalil la y jacha kꞌu la chike ri nibꞌaꞌibꞌ; jekꞌuriꞌlaꞌ kꞌo bꞌeyomalil la chilaꞌ chikaj. Tekꞌuchiriꞌ, peta la, terej lo la chwij y kuyu la ri kꞌax kape pawiꞌ la ruma lal nutijoꞌn —xcha che.
MAR 10:22 Ekꞌu rachi lik xuchap ranimaꞌ che ri xubꞌiꞌij ri Jesús; lik kabꞌisonik xeꞌek, ma rire lik rajawal bꞌeyom.
MAR 10:23 Tekꞌuchiriꞌ, ri Jesús xebꞌutzuꞌ konoje y xubꞌiꞌij chike rutijoꞌn: —Ri e bꞌeyomabꞌ lik kꞌayew chike kebꞌok chupa rutaqanik ri Dios —xchaꞌ.
MAR 10:24 Rutijoꞌn ri Jesús lik xkam kanimaꞌ che wa xubꞌiꞌij. Rire xubꞌiꞌij kꞌu chike: —Ix walkꞌoꞌal, e janipa ri lik kikubꞌam kikꞌuꞌx rukꞌ ri kibꞌeyomalil, lik kꞌayew chike kebꞌok chupa rutaqanik ri Dios.
MAR 10:25 E ne más kꞌayew kok juna bꞌeyom chupa rutaqanik ri Dios chwa ri kikꞌow juna camello chupa rutel juna akuxaꞌ —xchaꞌ.
MAR 10:26 Rike lik xkam kanimaꞌ che waꞌ y xkibꞌiꞌij kꞌu chikiwach: «We e riꞌ, ¿china kꞌu riꞌ ri kakolobꞌetajik?» xechaꞌ.
MAR 10:27 Ekꞌu ri Jesús xutzuꞌ kiwach, xubꞌiꞌij chike: —Ri tikawex na kakikolobꞌej ta kibꞌ kitukel ma waꞌ lik kꞌayew chikiwach, noꞌj ri Dios ronoje kuꞌano ma na jinta kꞌayew chwach Rire —xchaꞌ.
MAR 10:28 Ekꞌu ri Pedro xujeq ubꞌiꞌxikil che ri Jesús: —Qajawal, e riꞌoj qayaꞌom kan ronoje y oj teran chiꞌij la —xchaꞌ.
MAR 10:29 Ri Jesús xubꞌiꞌij: —Paqatzij wi kambꞌiꞌij chiwe: China ri uyaꞌom kan rocho, ebꞌuyaꞌom kan ri ratz-uchaqꞌ, ruchu-uqaw, ri rixoqil, ri ralkꞌoꞌal o rulew, ruma ukojom ri nubꞌiꞌ riꞌin y ruma rutzijoxik ri Utzilaj Tzij,
MAR 10:30 riꞌ kukꞌul wara che ruwachulew chupa taq wa qꞌij oj kꞌo wi, jun ciento ri rajil ukꞌaxel ruma taq ri uyaꞌom kanoq, tobꞌ lik kutij kꞌax ruma waꞌ. Yey chwach kꞌu apanoq kukꞌul na ri kꞌaslemal na jinta utaqexik.
MAR 10:31 Lik kꞌu e kꞌi chike ri lik kꞌo kiwach woꞌora, chwach apanoq na jinta chi kiwach; yey lik e kꞌi chike ri na jinta kiwach woꞌora, e lik kakꞌojiꞌ kiwach chwach apanoq —xchaꞌ.
MAR 10:32 Ekꞌu riꞌ kimajom bꞌi ri bꞌe re kepaqiꞌ Jerusalem, yey ri Jesús nabꞌe bꞌi chikiwach. Ekꞌu rutijoꞌn lik sachinaq kinaꞌoj y rukꞌ xiꞌin ibꞌ eteran chirij. Ekꞌuchiriꞌ, ri Jesús xebꞌukꞌam tanchi ubꞌi kitukel ri kabꞌlajuj utijoꞌn y xujeq ubꞌiꞌxikil chike saꞌ taq ri karikꞌowibꞌej.
MAR 10:33 Jewaꞌ xubꞌiꞌij: —Chitapeꞌ: E waꞌ kojpaqiꞌ Jerusalem, yey Ralaxel Chikixoꞌl Tikawex kayaꞌ na pakiqꞌabꞌ ri nimaq e aj chakunel pa Rocho Dios y raj kꞌutunel re ri tzijpixabꞌ, chaꞌ kakiqꞌat tzij puwiꞌ re kamik y kakiya pakiqꞌabꞌ ri winaq na e ta aj judiꞌabꞌ.
MAR 10:34 Kachꞌamix kꞌu riꞌ, kajichꞌ upa, kachubꞌaxik y kakamisaxik. Noꞌj churox qꞌij kakꞌastaj bꞌi chikixoꞌl ri ekaminaq —xchaꞌ.
MAR 10:35 Ekꞌu ri Jacobo y ri Juan, ri kebꞌ ukꞌajol ri Zebedeo, xeqibꞌ rukꞌ ri Jesús y xkibꞌiꞌij che: —Qajawal, kaqaj kaꞌan ko la chiqe janipa wa kaqatzꞌonoj cheꞌla —xechaꞌ.
MAR 10:36 —¿Saꞌ ri kiwaj kanꞌan chiwe? —xcha ri Jesús chike.
MAR 10:37 Rike xkibꞌiꞌij che: —E kaqaj riꞌoj kaya la chiqe chupa ri chomilaj taqanik la, jun chiqe katzꞌuyiꞌ pawikiqꞌabꞌ la yey ri jun chik pa mox la —xechaꞌ.
MAR 10:38 Ri Jesús xubꞌiꞌij kꞌu chike: —Riꞌix na iwetaꞌam taj saꞌ la kitzꞌonoj. ¿Kichꞌij nebꞌa riꞌix ri kinikꞌow wi riꞌin y ri kꞌax kape panuwiꞌ? —xchaꞌ.
MAR 10:39 Rike xkibꞌiꞌij: —Kaqachꞌijo —xechaꞌ. Ri Jesús xubꞌiꞌij chike: —Qatzij, riꞌix kichꞌij na ri kꞌax kinikꞌow wi riꞌin y ri kꞌaxkꞌobꞌik kape panuwiꞌ.
MAR 10:40 Noꞌj kꞌu ri kixtzꞌuyiꞌ pa nuwikiqꞌabꞌ y pa numox, na in ta kinyaꞌw re, ma xew kayaꞌtaj chike ri echaꞌtal chik chaꞌ kuꞌana na ke —xchaꞌ.
MAR 10:41 Ri lajuj chik tijoꞌn, echiriꞌ xkita waꞌ, lik xpe koyowal chikij ri Jacobo y ri Juan.
MAR 10:42 Ekꞌu ri Jesús xebꞌusikꞌij y xubꞌiꞌij chike: —Iwetaꞌam riꞌix, ri ekojtalik e taqanelabꞌ pakiwi ri nimaq tinamit kebꞌuꞌana pachaꞌ e rajaw ronoje, yey ri lik kꞌo kiwach kikꞌow uwiꞌ ri taqanik kakiꞌan pakiwi ri eyaꞌtal pakiqꞌabꞌ.
MAR 10:43 Noꞌj chixoꞌl riꞌix na ubꞌe taj jelaꞌ kuꞌano. Ma we kꞌo junoq chiwe riꞌix karaj kuꞌana aj wach, e chuyaꞌa ribꞌ kuꞌan nimanel iweꞌix.
MAR 10:44 Yey e junoq chiwe karaj kuꞌana nabꞌe chixoꞌlibꞌal, e chuyaꞌa ribꞌ kuꞌan nimanel ke konoje.
MAR 10:45 Ma Ralaxel Chikixoꞌl Tikawex na xkꞌun taj re kanimaxik. Rire xkꞌunik re koꞌlnimanoq y re koluꞌyaꞌa ribꞌ pa kamik che kikolobꞌexik ukꞌiyal tikawex —xchaꞌ.
MAR 10:46 Ekꞌuchiriꞌ, ri Jesús kukꞌ rutijoꞌn xebꞌikꞌow chupa ri tinamit Jericó, y ukꞌiyal winaq xeterej bꞌi chirij. Echiriꞌ katajin bꞌi kelik chupa ri tinamit, xebꞌikꞌow pa tzꞌul wi ri Bartimeo, waꞌ e jun potzꞌ ukꞌajol ri Timeo. Rire e riꞌ kutzꞌonoj limoxna.
MAR 10:47 Ekꞌuchiriꞌ xuto e Jesús ri aj Nazaret ri katajin rikꞌowik, xujeqo kasikꞌinik: —¡Jesús, lal ri Ralkꞌoꞌal kan ri rey David, chinjuchꞌ kaꞌn ko cheꞌla! —xchaꞌ.
MAR 10:48 Ukꞌiyal winaq xkichꞌaꞌbꞌej upa chaꞌ na kasikꞌin ta chik, noꞌj rire más ne ko kasikꞌinik: —¡Lal ri Ralkꞌoꞌal kan ri rey David, chinjuchꞌ kaꞌn ko cheꞌla! —kachaꞌ.
MAR 10:49 Ekꞌu ri Jesús xtakꞌiꞌik y xutaq usikꞌixik ri potzꞌ. Ri xebꞌeꞌsikꞌin re xkibꞌiꞌij che: —¡Chanimarisaj akꞌuꞌx! ¡Chatyaktajoq! Ri Jesús katusikꞌij —xechaꞌ.
MAR 10:50 Ri potzꞌ xukꞌaq kan ruqꞌuꞌ uripom chirij, xyaktajik y xopon pa kꞌo wi ri Jesús.
MAR 10:51 Ri Jesús xubꞌiꞌij kꞌu che: —¿Saꞌ ri kawaj kanꞌan chawe? —xchaꞌ. Ri potzꞌ xukꞌul uwach: —Lal tijonel, kuaj kintzuꞌn tanchik —xchaꞌ.
MAR 10:52 Ekꞌu ri Jesús xubꞌiꞌij che: —Jat chi utzil chomal, ma ruma ri kubꞌulibꞌal akꞌuꞌx wukꞌ, at kunutajinaq chik —xchaꞌ. Chupa kꞌu riꞌ la joqꞌotaj, ri potzꞌ xtzuꞌnik y xterej bꞌi chirij ri Jesús.
MAR 11:1 Ri Jesús kukꞌ rutijoꞌn xa naqaj chi e kꞌo lo che ri tinamit Jerusalem, ya e riꞌ kebꞌopon chwach ri juyubꞌ Olivos pa taq raldeas Betfagé y Betania. Ekꞌuchiriꞌ, ri Jesús xebꞌutaq bꞌi kaꞌibꞌ chike rutijoꞌn chaꞌ kenabꞌej apanoq,
MAR 11:2 jewaꞌ xubꞌiꞌij chike: —Jix pa raldea kꞌo pan chiqawach. Xew kꞌu kixoponik, kiꞌriqa jun qꞌapoj buru yuqulik. Waꞌ na jinta junoq kojoyom re. Chikiraꞌ y chikꞌama loq.
MAR 11:3 We kꞌo kꞌu junoq kutzꞌonoj chiwe: “¿Suꞌchak kiꞌan waꞌ?”, chibꞌiꞌij che: “Rawaj kajawax che ri Qajawal, yey kꞌate kutaq tanchi uloq” —kixchaꞌ.
MAR 11:4 Xebꞌek kꞌut y xkiriq ri qꞌapoj buru yuqubꞌam pa bꞌe chunaqaj jun puerta. Ewi xkikir loq.
MAR 11:5 Jujun kꞌu chike ri e kꞌo chiriꞌ xkitzꞌonoj: —¿Saꞌ ri kiꞌano? ¿Suꞌbꞌe kikir ri qꞌapoj buru? —xechaꞌ.
MAR 11:6 Rike e xkibꞌiꞌij janipa ri bꞌiꞌim bꞌi chike ruma ri Jesús; ewi xyaꞌ lo chike xkikir loq.
MAR 11:7 Xkikꞌam kꞌu lo ri qꞌapoj buru y xkirip ri kimanta chirij. Ekꞌu ri Jesús xukoj bꞌi.
MAR 11:8 Ukꞌiyal winaq xkiwiq ri bꞌe pa kikꞌow wi ri Jesús, xkilikꞌ taq ri kimanta pa ri bꞌe; yey e kꞌo jujun chik xkiqꞌat raltaq ko uqꞌabꞌ cheꞌ y xkilem pa la bꞌe re yakbꞌal uqꞌij.
MAR 11:9 Ri winaq e nabꞌejinaq chwach kukꞌ ri eteran lo chirij xkijeqo lik kesikꞌinik, kakibꞌiꞌij: «¡Qayaka uqꞌij! ¡Nim uqꞌij ralaxik ri jun petinaq chupa rubꞌiꞌ ri Dios Qajawxel!
MAR 11:10 ¡Nim uwach uqꞌij ri taqanik re ri qamam David kakꞌun loq! ¡Qayaka uqꞌij ri Dios kꞌo chilaꞌ chikaj!» kechaꞌ.
MAR 11:11 Xopon kꞌu ri Jesús Jerusalem y xok chupa ri Rocho Dios. Xa xril kꞌu ronoje saꞌ taq ri kꞌo chupa; pero ruma ya e riꞌ kok raqꞌabꞌ, xeꞌek Betania kukꞌ ri kabꞌlajuj utijoꞌn.
MAR 11:12 Chukaꞌm qꞌij kꞌut echiriꞌ xebꞌel bꞌi Betania, ri Jesús xpe numik che.
MAR 11:13 Y chinimanaj xril pana jun cheꞌ re higo lik kꞌo uxaq. Ewi xeꞌek xeꞌrilaꞌ we kꞌo ujiqꞌobꞌalil kuriqo. Yey echiriꞌ xopon rukꞌ, na jinta kꞌo xuriq che, xew ruxaq kꞌolik, ma na uqꞌijol taj kꞌo uwach ri higos.
MAR 11:14 Ewi ri Jesús xubꞌiꞌij che ri cheꞌ re higo: —Na jinta chi kꞌana junoq kutij jiqꞌobꞌal chawe —xchaꞌ. Yey wa xubꞌiꞌij, xkita rutijoꞌn.
MAR 11:15 Xebꞌopon kꞌu Jerusalem y echiriꞌ xok bꞌi ri Jesús chupa ri Rocho Dios, xujeq lo kesaxik konoje ri kekꞌayinik y ri keloqꞌow chupa. Yey xuxulkꞌatilaꞌ taq bꞌi ri mexa ke ri e aj jachal uwach puaq y taq ri xila ke ri e aj kꞌay palomax.
MAR 11:16 Y na xuya ta luwar che junoq kꞌo rukꞌaꞌam kikꞌow pa ri Rocho Dios xa re kuqꞌat ubꞌe.
MAR 11:17 Xujeq kꞌu kakꞌutun chikiwach, jewaꞌ kubꞌiꞌij: «¿Na etaꞌam ta nebꞌa alaq ri tzꞌibꞌital kan chupa Ruchꞌaꞌtem ri Dios? Ma ri Dios kubꞌiꞌij: Che ri Wocho kabꞌiꞌxik: “E luwar re oración ke konoje taq ri tinamit che ruwachulew” kachaꞌ. Noꞌj ralaq, ꞌanom alaq che ri Wocho e jun luwar ke eleqꞌomabꞌ» xchaꞌ.
MAR 11:18 Waꞌ xkita raj kꞌutunel re ri tzijpixabꞌ y ri nimaq e aj chakunel pa Rocho Dios. Ruma kꞌu riꞌ, kakitzukuj saꞌ uꞌanik kakikamisaj ma kakixiꞌij kibꞌ che ruma konoje ri winaq lik kakam kanimaꞌ che taq rukꞌutunik.
MAR 11:19 Ekꞌuchiriꞌ xok raqꞌabꞌ, ri Jesús xel bꞌi chupa ri tinamit.
MAR 11:20 Chukaꞌm qꞌij anim echiriꞌ xebꞌikꞌow ri Jesús kukꞌ rutijoꞌn pa kꞌo wi ri cheꞌ re higo, xkilo chaqijinaq lo kꞌa pa ratzꞌayaq.
MAR 11:21 Ewi ri Pedro xkꞌun lo chukꞌuꞌx taq ri chꞌaꞌtem xubꞌiꞌij kan ri Jesús che ri cheꞌ. Xubꞌiꞌij kꞌu riꞌ che ri Jesús: —Wajawal, chilape la, ri cheꞌ re higo ri xbꞌiꞌij la che na kuya ta chi ujiqꞌobꞌalil, waꞌ chaqijinaq chik —xchaꞌ.
MAR 11:22 Ri Jesús xukꞌul uwach: —Lik kubꞌula ikꞌuꞌx rukꞌ ri Dios;
MAR 11:23 ma paqatzij wi kambꞌiꞌij chiwe: China junoq kabꞌiꞌn che wa jun juyubꞌ: “Chatela wara y jateꞌkꞌola chupa ri mar” yey lik kujikibꞌaꞌ kꞌu ukꞌuꞌx che la xubꞌiꞌij, riꞌ lik e kuꞌanaꞌ.
MAR 11:24 Uwariꞌche kambꞌiꞌij chiwe: E janipa ri kitzꞌonoj che ri Dios yey kubꞌul kꞌu ikꞌuꞌx che kayaꞌtaj na chiwe, kikꞌul na kꞌu riꞌ.
MAR 11:25 Jekꞌulaꞌ, echiriꞌ kiꞌan orar, we kꞌo chikꞌuꞌx ri makunik re junoq chiwij, chikuyu umak chaꞌ jelaꞌ ri Qaqaw kꞌo chilaꞌ chikaj kukuy imak riꞌix.
MAR 11:26 Ma we riꞌix na kikuy ta umak junoq, jekꞌulaꞌ kuꞌan ri Qaqaw Dios kꞌo chilaꞌ chikaj, na kukuy ta imak riꞌix —xchaꞌ.
MAR 11:27 Xebꞌopon tanchi Jerusalem ri Jesús kukꞌ rutijoꞌn. Y echiriꞌ kabꞌin chupa ri Rocho Dios, ri nimaq e aj chakunel kukꞌ raj kꞌutunel re ri tzijpixabꞌ y ri nimaq winaq re ri tinamit, xeqibꞌ rukꞌ.
MAR 11:28 Xkitzꞌonoj kꞌu che: —¿China xyaꞌw paqꞌabꞌ la kaꞌan taq la waꞌ? ¿China xtaqaw la che kaꞌan taq la waꞌ? —xechaꞌ.
MAR 11:29 Ri Jesús xukꞌul uwach: —Riꞌin kanꞌan jun tzꞌonobꞌal che alaq. We xkꞌul alaq uwach, kambꞌiꞌij kꞌu riꞌ che alaq china yaꞌyom panuqꞌabꞌ kanꞌan waꞌ.
MAR 11:30 ¿China kꞌu xtaqaw re ri Juan kuya ri bautismo? ¿E ri Dios o e rachijabꞌ? Kꞌulu alaq uwach —xchaꞌ.
MAR 11:31 Ekꞌu rike xkijeq kechꞌaꞌt chikiwach puwi waꞌ: «We xqakꞌul uwach che: “E ri Dios xtaqaw re,” riꞌ kubꞌiꞌij rire chiqe: “¿Suꞌchak kꞌu riꞌ na xkoj ta alaq ri xubꞌiꞌij?” kacha chiqe.
MAR 11:32 ¿Yey we xqabꞌiꞌij xa achijabꞌ xetaqaw re...?» xecha chikiwach. Yey lik kakixiꞌij kibꞌ chike ri winaq, ma konoje kakichꞌobꞌo ri Juan e jun saqil qꞌalajisanel re ri Dios.
MAR 11:33 Xkibꞌiꞌij kꞌu che ri Jesús: —Na qetaꞌam taj —xechaꞌ. Ekꞌu ri Jesús xubꞌiꞌij chike: —Jekꞌuriꞌlaꞌ, riꞌin na kambꞌiꞌij ta che alaq china yaꞌyom panuqꞌabꞌ kanꞌan taq waꞌ —xchaꞌ.
MAR 12:1 Ekꞌuchiriꞌ, ri Jesús xujeq kakꞌutun chikiwach ri e aj wach rukꞌ taq kꞌambꞌal naꞌoj, xubꞌiꞌij chike: «Kꞌo jun achi xuꞌan tikoꞌn re uva chwach ri rulew. Xusut kꞌu rij rukꞌ coral, xukꞌot jun luwar pa kayitzꞌ wi ruwaꞌal ri uva y xuyak jun ja naj uwiꞌ re chajibꞌal re. Xuya kꞌu kan pa tunulik chike jujun aj chakibꞌ. Tekꞌuchiriꞌ, xeꞌek naj.
MAR 12:2 »Echiriꞌ xopon ruqꞌijol ri molonik, xutaq lo jun raj chak chaꞌ kuꞌtzꞌonoj chike taq raj tunulel ri taqalik kukꞌul rire che ri molonik.
MAR 12:3 Noꞌj raj tunulel xkichap raj chak taqom lo kukꞌ, xkichꞌayo y xkitaq bꞌi; e riꞌ na jinta xkiya bꞌi che.
MAR 12:4 »Ri rajaw ri tikoꞌn xutaq chi lo jun raj chak kukꞌ, yey raj tunulel xkiraqij rujolom rukꞌ abꞌaj y lik xkikꞌixbꞌesaj bꞌi.
MAR 12:5 Ri rajaw ri tikoꞌn xutaq chi lo jun chik raj chak kukꞌ; ekꞌu riꞌ waꞌ asu xkikamisaj. Y xebꞌutaq chi lo jujun chik; yey chike konoje waꞌ, e kꞌo ri xekichꞌayo y e kꞌo ri xekikamisaj.
MAR 12:6 »Ekꞌu ri rajaw ri tikoꞌn xa jun chi ri kꞌo rukꞌ re kutaq bꞌi, e rukꞌajol lik kꞌax kunaꞌo. Kꞌisbꞌal kꞌu re, e xutaq lo rukꞌajol kukꞌ raj tunulel ma xuchꞌobꞌo: “Ruma e nukꞌajol, kakikꞌul na chi utz.”
MAR 12:7 »Noꞌj raj tununel xkibꞌiꞌij chikiwach: “Waꞌ e ukꞌajol ri rajaw rulew, ri kuꞌana na rajaw we xkam ruqaw. Joꞌ, jeꞌqakamisaj chaꞌ rulew kuꞌan kan qeꞌoj” xechaꞌ.
MAR 12:8 Ewi xkichapo y xkikamisaj. Tekꞌuchiriꞌ, xkesaj bꞌi rucuerpo chupa waꞌ wuꞌlew y xeꞌkikꞌaqa bꞌi» xcha ri Jesús.
MAR 12:9 Tekꞌuchiriꞌ, xutzꞌonoj chike ri e aj wach: —Chiwach ralaq, ¿saꞌ nawi kuꞌan ri rajaw ri tikoꞌn chike raj tunulel? Riꞌin kambꞌiꞌij: Kakꞌunik, kusach kiwach raj tunulel y kuya rutikoꞌn pakiqꞌabꞌ jujun chik.
MAR 12:10 »¿Na ajilam ta nebꞌa ralaq ri tzꞌibꞌital kan chupa Ruchꞌaꞌtem ri Dios? Ma jewaꞌ kubꞌiꞌij: E rabꞌaj kꞌaqital kan kuma raj yakal ja, e abꞌaj waꞌ lik xajawaxik chaꞌ katikiꞌ lo ri ja.
MAR 12:11 E ri Dios Qajawxel xꞌanaw re waꞌ, yey chiqawach riꞌoj, waꞌ lik na jinta kꞌana ilitajinaq wi —xchaꞌ.
MAR 12:12 Ekꞌu ri e aj wach lik xkitzukuj suꞌanik kakichap ri Jesús ma xkimaj usukꞌ chikij rike xubꞌiꞌij wi wa jun kꞌambꞌal naꞌoj. Pero ruma kꞌu kakixiꞌij kibꞌ chikiwach rukꞌiyal winaq, xkiya kanoq y xebꞌek.
MAR 12:13 Xetaq kꞌu lo rukꞌ ri Jesús jujun chike ri fariseos y jujun chike ri kitaqem ri rey Herodes, re kakikꞌam upa rukꞌ taq ri kubꞌiꞌij chaꞌ kakikoj umak.
MAR 12:14 Ekꞌuchiriꞌ, xebꞌopon rukꞌ ri Jesús y xkibꞌiꞌij che: —Lal tijonel, riꞌoj qetaꞌam lik qatzij ri kabꞌiꞌij la. Na kaxiꞌij ta ibꞌ la che taq ri kakibꞌiꞌij ri tikawex, ma rilal junam kiwach kebꞌil la konoje, tobꞌ kꞌo kiwach o na jinta kiwach; yey lik jusukꞌ kakꞌutun la chwi ri bꞌe re ri Dios. Kaqatzꞌonoj kꞌu cheꞌla: ¿Usukꞌ nawi kaqaꞌan tojonik che ri nimalaj taqanel re Roma o na usukꞌ taj? ¿Kaqaya nawi o na kaqaya taj? —xechaꞌ.
MAR 12:15 Ekꞌu ri Jesús, ruma retaꞌam rike xa kebꞌ kipalaj, jewaꞌ xubꞌiꞌij chike: —¿Suꞌchak kakꞌam alaq nupa? Kꞌama pe lo alaq juna meyo re kaꞌan tojonik rukꞌ chaꞌ kanwilo —xchaꞌ.
MAR 12:16 Rike xkikꞌam lo jun meyo che. Ewi ri Jesús xubꞌiꞌij chike: —¿China re wa kꞌaxwach y china re wa bꞌiꞌaj kꞌo chwach wa meyo? —xchaꞌ. Rike xkikꞌul uwach: —Re ri nimalaj taqanel re Roma —xechaꞌ.
MAR 12:17 Ekꞌu ri Jesús xukꞌul uwach, xubꞌiꞌij chike: —Yaꞌa alaq che ri nimalaj taqanel re Roma janipa ri taqal che rire, yey yaꞌa kꞌu alaq che ri Dios janipa ri taqal che ri Dios —xchaꞌ. Lik kꞌu xkam kanimaꞌ che ri Jesús ma Rire lik xuriq ukꞌulik uwach ri tzꞌonobꞌal xkiꞌan che.
MAR 12:18 Ekꞌuchiriꞌ, jujun chike ri saduceos, ri kakibꞌiꞌij na jinta kꞌastajibꞌal chike ri ekaminaq, xekꞌun rukꞌ ri Jesús y xkitzꞌonoj kꞌu che:
MAR 12:19 —Lal tijonel, ri Moisés xutzꞌibꞌaj kan chiqe: “We ri ratz junoq kakamik y na e jinta kan ralkꞌoꞌal rukꞌ ri rixoqil, ekꞌu riꞌ ruchaqꞌ utz kakꞌuliꞌ rukꞌ rixoq malkaꞌn kanoq y jekꞌulaꞌ kekꞌojiꞌ ralkꞌoꞌal rukꞌ pubꞌiꞌ ri ratz xkamik” xchaꞌ.
MAR 12:20 »Julaj e kꞌo wuqubꞌ achijabꞌ kichaqꞌ kibꞌ. Ri nabꞌe chike xkꞌuliꞌik, yey ekꞌu riꞌ waꞌ xkamik y na e jinta kan ralkꞌoꞌal rukꞌ ri rixoqil.
MAR 12:21 Jelaꞌ kꞌu riꞌ rukaꞌm xkꞌuliꞌ rukꞌ rixoq malkaꞌn kanoq. Ekꞌu riꞌ waꞌ xkamik y na e jinta kan ralkꞌoꞌal rukꞌ rixoq. Yey je tanchi laꞌ xukꞌulumaj rurox.
MAR 12:22 Jekꞌulaꞌ xkikꞌulumaj ri wuqubꞌ achijabꞌ; xekamik, e riꞌ na jinta kalkꞌoꞌal xkiya kanoq. Kꞌisbꞌal kꞌu re, e xkam rixoq.
MAR 12:23 »Chupa kꞌu ruqꞌijol ri kꞌastajibꞌal, echiriꞌ kekꞌastaj lo ri wuqubꞌ achijabꞌ, ¿chinoq chike kuꞌana rachijil rixoq? Ma konoje xekꞌuliꞌ rukꞌ —xechaꞌ.
MAR 12:24 Ri Jesús xukꞌul uwach: —Ralaq lik sachinaq alaq, ma na majom ta alaq usukꞌ Ruchꞌaꞌtem ri Dios y ruchuqꞌabꞌ ri Dios.
MAR 12:25 Ma echiriꞌ kekꞌastaj lo ri ekaminaq, na kekꞌuliꞌ ta chik yey na kekiya ta chi ne ri kalkꞌoꞌal pa kꞌulanikil; kebꞌuꞌana kꞌu pachaꞌ ri ángeles e kꞌo chilaꞌ chikaj, ma ri ángeles na kekꞌuliꞌ taj.
MAR 12:26 »Noꞌj puwi kꞌu ri kꞌastajibꞌal ke ri ekaminaq, ¿na ajilam ta nebꞌa alaq ri xutzꞌibꞌaj kan ri Moisés puwi ri xubꞌiꞌij ri Dios che echiriꞌ xchꞌaꞌt rukꞌ chupa ri jumokaj xulukej? Ma jewaꞌ xubꞌiꞌij che: “In ri Dios re ri Abraham, re ri Isaac y re ri Jacob” xchaꞌ.
MAR 12:27 Yey ri Dios na e ta Dios ke ri ekaminaq, ma e Dios ke ri e kꞌaslik. E uwariꞌche ralaq lik na usukꞌ ta ri naꞌoj alaq puwi ri kꞌastajibꞌal —xchaꞌ.
MAR 12:28 Ekꞌuchiriꞌ, xqibꞌ rukꞌ ri Jesús jun chike raj kꞌutunel re ri tzijpixabꞌ. Waꞌ waꞌchi xuto echiriꞌ ri Jesús lik xuriq ukꞌulik uwach ri tzꞌonobꞌal ke ri saduceos. Xutzꞌonoj kꞌu che: —Chupa Rutzij Upixabꞌ ri Dios, ¿pachike ri taqanik más chirajawaxik? —xchaꞌ.
MAR 12:29 Ri Jesús xukꞌul uwach: —Rukꞌuꞌxibꞌal ronoje ri Tzij Pixabꞌ re ri Dios e waꞌ: Chitaꞌ, ix aj Israel; ri Dios Qajawxel, xa jun Rire.
MAR 12:30 Kꞌax kꞌu chanaꞌa ra Dios Qajawxel rukꞌ ronoje awanimaꞌ, rukꞌ ronoje akꞌuꞌx, rukꞌ ronoje anaꞌoj y rukꞌ ronoje achuqꞌabꞌ. E ukꞌuꞌxibꞌal waꞌ Rutzij Upixabꞌ ri Dios.
MAR 12:31 Yey rukaꞌm jewaꞌ kubꞌiꞌij: Kꞌax chanaꞌa rawatz-achaqꞌ jelaꞌ pachaꞌ ri kꞌax kanaꞌ awibꞌ riꞌat. Na jinta chi kꞌu juna tzij más kꞌo uwach chwa taq waꞌ —xchaꞌ.
MAR 12:32 Jekꞌuwaꞌ xubꞌiꞌij raj kꞌutunel re ri tzijpixabꞌ che ri Jesús: —Lik utz, lal tijonel; lik qatzij ri kabꞌiꞌij la: “Xa jun ri Dios kꞌolik y na jinta junoq chik.”
MAR 12:33 Yey ri lik chirajawaxik wi e kꞌax kaqanaꞌ ri Dios rukꞌ ronoje qanimaꞌ, rukꞌ ronoje qanaꞌoj, rukꞌ ronoje qakꞌuꞌx y rukꞌ ronoje ri qachuqꞌabꞌ; yey ri kꞌax keqanaꞌ ri qatz-qachaqꞌ jelaꞌ pachaꞌ ri kꞌax kaqanaꞌ qibꞌ riꞌoj. Waꞌ e más chirajawaxik chikiwa rawaj eporom chwi raltar rukꞌ taq ri kayaꞌiꞌ chwach ri Dios —xchaꞌ.
MAR 12:34 Echiriꞌ ri Jesús xrilo lik kꞌo unaꞌoj raj kꞌutunel re ri tzijpixabꞌ, xubꞌiꞌij che: —Lik xa naqaj lal kꞌo wi che rutaqanik ri Dios —xchaꞌ. Y na jinta chi kꞌu junoq xraj xuꞌan juna tzꞌonobꞌal che.
MAR 12:35 Echiriꞌ kakꞌutun ri Jesús chupa ri Rocho Dios, jewaꞌ xubꞌiꞌij: —¿Suꞌbꞌe raj kꞌutunel re ri tzijpixabꞌ kakibꞌiꞌij: “Ri Cristo, Ruchaꞌoꞌn lo ri Dios, e Ralkꞌoꞌal kan ri rey David”?
MAR 12:36 Ma ri David, ruma ri Santowilaj Ruxlabꞌixel ri Dios, jewaꞌ xubꞌiꞌij: Ri Dios Qajawxel xubꞌiꞌij che ri Wajawal: “Chat-tzꞌula pa nuwikiqꞌabꞌ, y chawoyeꞌej na ri qꞌij echiriꞌ kebꞌenuya ri tzel kebꞌilow awe chuxeꞌ rawaqan” xchaꞌ.
MAR 12:37 Ekꞌu ri David kubꞌiꞌij “Wajawal” che Ruchaꞌoꞌn lo ri Dios. ¿Suꞌbꞌe kꞌu riꞌ kabꞌiꞌxik e Ralkꞌoꞌal kan ri rey David? —xchaꞌ. Y ukꞌiyal winaq re ri tinamit lik rukꞌ ronoje kikꞌuꞌx kakita ri kubꞌiꞌij.
MAR 12:38 Ekꞌu ri Jesús jewaꞌ kubꞌiꞌij chupa rukꞌutunik: «Lik chichajij iwibꞌ; miꞌan kꞌu iweꞌix pachaꞌ ri kakiꞌan raj kꞌutunel re ri tzijpixabꞌ. Ma rike e lik kukꞌul kikꞌuꞌx ri kejurur chupa ri kiqꞌuꞌ chaꞌ kilitajik lik kꞌo kiwach y ri kayaꞌ rutzil kiwach pa kebꞌilitaj wi.
MAR 12:39 Yey pa taq sinagogas y pa taq waꞌim lik kukꞌul kikꞌuꞌx ri ketzꞌuyiꞌ chupa ri tzꞌulibꞌal ke ri lik kꞌo kiwach.
MAR 12:40 Rike kakimaj rubꞌitaq ke rixoqibꞌ e malkaꞌnibꞌ. Y chaꞌ kayak kiqꞌij, kakiꞌan nimaq chꞌabꞌal echiriꞌ kakiꞌan orar. Ruma kꞌu ri kakiꞌano, rike lik unimal kꞌaxkꞌolil ri kakikꞌulu echiriꞌ kaqꞌat tzij pakiwiꞌ» kachaꞌ.
MAR 12:41 Ri Jesús tzꞌul pana chwach ri kaxa pa kayaꞌ wi ri qasaꞌn yey lik kutzutzaꞌ echiriꞌ ri winaq kakiya kan ri kiqasaꞌn chupa ri kaxa. Y lik e kꞌi ri bꞌeyomabꞌ kakiya ukꞌiyal qasaꞌn.
MAR 12:42 Xopon kꞌu jun ixoq nibꞌaꞌ yey malkaꞌn y xuya chupa ri kaxa kaꞌibꞌ raltaq ko meyo lik na kꞌi ta rajil.
MAR 12:43 Ekꞌu ri Jesús xebꞌusikꞌij rutijoꞌn y xubꞌiꞌij chike: —Paqatzij wi kambꞌiꞌij chiwe: Chwach ri Dios, waꞌ wiꞌxoq nibꞌaꞌ y malkaꞌn, e ne xuya más pa ri kaxa chwa ri xkiya konoje.
MAR 12:44 Ma konoje xa e xkiya ruwiꞌ ri kipuaq; noꞌj wiꞌxoq tobꞌ lik nibꞌaꞌ e xuya ronoje ri puaq kꞌo rukꞌ, waꞌ e re kuloqꞌ ri lik kajawax che —xchaꞌ.
MAR 13:1 Echiriꞌ xel bꞌi ri Jesús pa ri Rocho Dios, jun chike rutijoꞌn jewaꞌ xubꞌiꞌij che: —Qajawal, ¡chilape la wa chomilaj taq abꞌaj y wa nimaq taq ja re ri Rocho Dios! —xchaꞌ.
MAR 13:2 Ri Jesús xukꞌul uwach: —¿Kawil waꞌ wa nimaq taq ja? Wara na kakanaj ta kan juna abꞌaj chwi juna chik, ma ronoje kawulixik —xchaꞌ.
MAR 13:3 Ri Jesús xtzꞌuyiꞌ chwa ri juyubꞌ Olivos, ri kꞌo chwach pana ri Rocho Dios. Ekꞌu ri Pedro, ri Jacobo, ri Juan y ri Andrés, xa kitukel xkitzꞌonoj che:
MAR 13:4 —Bꞌiꞌij ko la chiqe, ¿jampa nawi kuꞌana taq riꞌ waꞌ? ¿Yey saꞌ ri kꞌutubꞌal kilitajik echiriꞌ kuꞌanaꞌ? —xechaꞌ.
MAR 13:5 Ekꞌu ri Jesús xujeq ubꞌiꞌxikil chike: «Lik chichajij iwibꞌ chaꞌ na jinta junoq kasokow iweꞌix.
MAR 13:6 Ma lik e kꞌi ri tikawex kekꞌunik y xa kakichiqꞌimaj uwach ri nubꞌiꞌ, jewaꞌ kakibꞌiꞌij: “In ri Cristo, Ruchaꞌoꞌn lo ri Dios” kechaꞌ. Y lik e kꞌi ri kesokotaj kuma rike.
MAR 13:7 »Ekꞌuchiriꞌ kito kꞌo chꞌaꞌoj jewaꞌ y kꞌo chꞌaꞌoj jelaꞌ, mixiꞌij iwibꞌ che; ma lik chirajawaxik wi kuꞌana taq waꞌ. Noꞌj na e ta waꞌ ri kꞌisbꞌal re ruwachulew.
MAR 13:8 Ma e kꞌo tinamit keyaktaj chikij jujun chik tinamit y e kꞌo taqanelabꞌ keyaktaj chikij jujun chik taqanelabꞌ. Kuꞌan taq kabꞌraqan che ukꞌiyal luwar, kape taq numik y ri winaq kakijeqo lik ketukukik. Ronoje waꞌ xa e jeqebꞌal re ri kꞌaxkꞌobꞌik kakꞌunik.
MAR 13:9 »Lik chichajij kꞌu iwibꞌ, ma kixkꞌam bꞌi pa taq qꞌatbꞌal tzij y kajichꞌ ne ipa chupa taq ri sinagogas. Y ruma kꞌu ikojom ri nubꞌiꞌ, kixkꞌam bꞌi chikiwach ri taqanelabꞌ y chikiwach ri reyes, chaꞌ jelaꞌ kiqꞌalajisaj ri Utzilaj Tzij chikiwach.
MAR 13:10 Lik kꞌut chirajawaxik nabꞌe na katzijox ri Utzilaj Tzij chike konoje rukꞌiyal kiwach taq ri tikawex e kꞌo che ruwachulew.
MAR 13:11 Yey echiriꞌ kixkꞌam bꞌi re kixeꞌyoꞌq pa taq qꞌatbꞌal tzij, mubꞌisoj ikꞌuꞌx y michꞌobꞌ nenareꞌ saꞌ ri kibꞌiꞌij. Riꞌix xew chibꞌiꞌij janipa ri kuya ri Dios chiwe chupa ri ora, ma na ix ta ri kixchꞌawik, e ri Santowilaj Ruxlabꞌixel ri Dios.
MAR 13:12 »E taq kꞌu ri tikawex kekiya ri katz-kichaqꞌ pa kamik; ri kꞌo kalkꞌoꞌal kekiya taq ri kalkꞌoꞌal pa kamik; ri e alkꞌoꞌal keyaktaj chikij kichu-kiqaw y kekikamisaj.
MAR 13:13 Lik kꞌut tzel kixil kuma taq ri winaq ruma ikojom ri nubꞌiꞌ. Pero china kꞌu ri kuchuqꞌubꞌej ribꞌ chwach taq waꞌ wa kꞌaxkꞌobꞌik kꞌa chupa ri kꞌisbꞌal re, e riꞌ ri kakolobꞌetajik.
MAR 13:14 »Echiriꞌ riꞌix kiwil ri lik chꞌul y lik kꞌixbꞌal uwach kayaꞌ pa ri luwar pa lik na taqal ta wi, jelaꞌ pachaꞌ ri xutzꞌibꞌaj kan ri qꞌalajisanel Daniel (china kꞌu ri kajilan re waꞌ, chumaja usukꞌ); ekꞌuchiriꞌ, ri e kꞌo pa taq ri luwar re Judea, chebꞌanimaj ubꞌi chwa taq ri juyubꞌ.
MAR 13:15 China kꞌu ri kꞌo lo chwi ri rocho, maqaj ne lo che ukꞌamik bꞌi ubꞌitaq re pa ja.
MAR 13:16 Yey china ri kꞌo lo pa juyubꞌ, matzelej lo che ukꞌamik bꞌi ruqꞌuꞌ re pisbꞌal rij.
MAR 13:17 »Chupa taq kꞌu laꞌ la qꞌij, lik toqꞌoꞌ kiwach ri e yewaꞌ ixoqibꞌ y ri ketzꞌumtisanik.
MAR 13:18 Lik kꞌu chitzꞌonoj che ri Dios chaꞌ echiriꞌ kixanimaj bꞌi na e ta uqꞌijol echiriꞌ kꞌax tew y kꞌo jabꞌ.
MAR 13:19 Ma taq laꞌ la qꞌij re unimal kꞌaxkꞌolil, na uꞌanom ta kꞌana julajoq chwi lo echiriꞌ ri Dios xuꞌan ruwachulew y na kuꞌana ta chi ne kꞌana julajoq.
MAR 13:20 We ta ri Qaqaw Dios na kuqꞌatij ta taq laꞌ la qꞌij re runimal kꞌaxkꞌobꞌik, riꞌ na jinta junoq kakꞌasiꞌ kanoq; noꞌj ruma kꞌu kꞌax kebꞌunaꞌ ri ebꞌuchaꞌom, kuqꞌatij ruqꞌijol waꞌ.
MAR 13:21 »We kꞌo kꞌu junoq kabꞌiꞌn chiwe: “¡Chiwilapeꞌ, wara kꞌo wi ri Cristo!” o “¡Chiwilapeꞌ, leꞌ kꞌolik!”, mixok il che.
MAR 13:22 Ma kekꞌun ri kakiꞌan “Cristo” che kibꞌ y ri kakiꞌan e qꞌalajisanelabꞌ re ri Dios che kibꞌ, pero xa e sokosoꞌnel. Ekꞌu rike kakiꞌan nimaq taq kꞌutubꞌal y milagros re kesokosoꞌn rukꞌ, yey kꞌo ne pa saq kesokotaj jujun chike ri ebꞌuchaꞌom ri Dios.
MAR 13:23 Lik kꞌu chichajij iwibꞌ, ma ximbꞌiꞌij ronoje waꞌ chiwe riꞌix echiriꞌ kꞌamajaꞌ ne kuꞌanaꞌ.
MAR 13:24 »Ekꞌuchiriꞌ ikꞌowinaq chi ri kꞌaxkꞌobꞌik che taq laꞌ laꞌ qꞌij, kuꞌan qꞌequꞌm uwach riꞌ ri qꞌij, y ri ikꞌ na kuya ta chi ruwonibꞌal.
MAR 13:25 Ri chꞌumil ketzaq lo che ruwa kaj, y konoje ri kꞌo kichuqꞌabꞌ che ruwa kaj keyikiyoꞌxik.
MAR 13:26 Ekꞌuchiriꞌ, kilitaj Ralaxel Chikixoꞌl Tikawex kakꞌun lo pa sutzꞌ rukꞌ runimal uchuqꞌabꞌ y rukꞌ runimal uchomalil.
MAR 13:27 Kebꞌutaq kꞌu ru ángeles che umolik kichiꞌ konoje ri ebꞌuchaꞌom ri Dios pa taq ronoje luwar che rukajchal rajlibꞌal ruwachulew. Kujeq kꞌu riꞌ che jun luwar, yey kukꞌisbꞌej che jun chik.
MAR 13:28 »E chimaja ri jun kꞌambꞌal naꞌoj puwi ri cheꞌ re higo: Echiriꞌ kujeq katux lo kꞌakꞌ uqꞌabꞌ y kujeq kꞌut katux ruxaq, ruma kꞌu laꞌ kiwetaꞌmaj xa naqaj chi kꞌo wi lo ruqꞌijol echiriꞌ kabꞌukbꞌutik y na jinta jabꞌ.
MAR 13:29 Jekꞌuriꞌlaꞌ riꞌix, echiriꞌ kiwilo kuꞌana ronoje taq waꞌ, chiwetaꞌmaj kꞌu riꞌ xa naqaj chi kꞌo wi lo ruqꞌijol rukꞌunibꞌal Ralaxel Chikixoꞌl Tikawex.
MAR 13:30 Paqatzij wi kambꞌiꞌij chiwe: E kꞌo tikawex re waꞌ wa qꞌij na kekam tana we na xkil tubꞌi ronoje waꞌ.
MAR 13:31 Ruwa kaj y ruwachulew xa kasach uwach, noꞌj taq ri nuchꞌaꞌtem na kasach ta uwach.
MAR 13:32 »Ekꞌu chwi ruqꞌijol y ruꞌorayil waꞌ, na jinta junoq etaꞌmayom re; na ketaꞌam tane ri ángeles e kꞌo chilaꞌ chikaj, na retaꞌam tane ri Kꞌajolaxel, ma xew ri Qaqaw Dios etaꞌmayom re.
MAR 13:33 »Chiwila kꞌu riꞌ, mawar iwach y lik chiꞌana orar, ma na iwetaꞌam taj jampalaꞌ kopon ruqꞌijol waꞌ.
MAR 13:34 Ri kuꞌanaꞌ e pachaꞌ echiriꞌ juna achi keꞌek naj. Ekꞌuchiriꞌ keꞌek, kuya kan ri rocho pakiqꞌabꞌ ri raj chakibꞌ y chikijujunal waꞌ kuya kan kichak. Kubꞌiꞌij kꞌu kan che ri chajinel re ri puerta: “Lik matkos che uchajixik ri ja” kachaꞌ.
MAR 13:35 Jekꞌuriꞌlaꞌ riꞌix, lik mawar iwach, ma na iwetaꞌam taj jampalaꞌ kakꞌun lo ri rajaw ja; laj echiriꞌ kok raqꞌabꞌ, laj pa tikꞌil aqꞌabꞌ, laj pa nabꞌe uchꞌawibꞌal ri teren o echiriꞌ kel lo ri qꞌij.
MAR 13:36 Mawar kꞌu iwach riꞌ, chaꞌ we xaqikꞌateꞌt xkꞌun lo ri Iwajaw, na kixuriq taj kixwarik.
MAR 13:37 Ekꞌu wa kambꞌiꞌij riꞌin chiwe riꞌix, kambꞌiꞌij chike konoje: Lik mawar iwach» xcha ri Jesús.
MAR 14:1 Echiriꞌ kebꞌ qꞌij chi kopon wi ri nimaqꞌij Pascua y ri nimaqꞌij re tijoj pam na jinta levadura che, taq ri nimaq e aj chakunel pa Rocho Dios kukꞌ raj kꞌutunel re ri tzijpixabꞌ, lik kakitzukuj suꞌanik kakichap ri Jesús rukꞌ sokosoꞌnik re kakikamisaj.
MAR 14:2 Xkibꞌiꞌij kꞌut: «Na kaqaꞌan ta pa wa nimaqꞌij chaꞌ ri tinamit na ketukuk ta ruma waꞌ» xechaꞌ.
MAR 14:3 Kꞌo kꞌu ri Jesús pa ri tinamit Betania chirocho ri Simón, ri jun xkꞌojiꞌ ri yabꞌil lepra che. Ekꞌuchiriꞌ tzꞌul ri Jesús chwa ri mexa, xopon jun ixoq rukꞌaꞌam jun kꞌolibꞌal nojinaq che kunabꞌal lik kiꞌ ruxlabꞌ y lik kꞌi rajil, waꞌ ꞌanatal rukꞌ saqil nardo. Rixoq xuteqꞌij uchiꞌ ri kꞌolibꞌal; tekꞌuchiriꞌ, xuqꞌej ri kunabꞌal chuꞌjolom ri Jesús.
MAR 14:4 E kꞌo kꞌu jujun chike ri e kꞌo chiriꞌ xpe koyowal echiriꞌ xkil waꞌ, y jewaꞌ xkibꞌiꞌij chikiwach: —¿Suꞌchak wa kunabꞌal xtzꞌiloꞌxik?
MAR 14:5 Ma ri lik usukꞌ e ta xkꞌayix waꞌ chi oxibꞌ ciento denarios, y rukꞌ waꞌ ketoꞌ ri nibꞌaꞌibꞌ —xechaꞌ. Y lik kꞌu riꞌ kechꞌaꞌt chirij rixoq.
MAR 14:6 Ekꞌu ri Jesús xubꞌiꞌij chike: —Mikꞌaq bꞌi uqꞌij wiꞌxoq. ¿Suꞌbꞌe kixchꞌaꞌt chirij ri xuꞌano? Ma ri xuꞌan chwe e jun utzilaj chak.
MAR 14:7 Ri nibꞌaꞌibꞌ e laꞌ xaqi e kꞌo iwukꞌ yey utz kebꞌitoꞌo jampalaꞌ kiwaj riꞌix, noꞌj riꞌin na xaqi ta in kꞌo iwukꞌ.
MAR 14:8 Wiꞌxoq e xuꞌano janipa ri xuchꞌij uꞌanikil; rukꞌ kꞌu waꞌ e xnabꞌej pan che uyijbꞌaxik ri nucuerpo che ri muqubꞌal we.
MAR 14:9 Paqatzij wi kambꞌiꞌij chiwe: Pa taq katzijox wi wa Utzilaj Tzij che ronoje ruwachulew, kakuxtax kꞌu wiꞌxoq ruma ri xuꞌano —xchaꞌ.
MAR 14:10 Ewi ri Judas aj Iscariot, jun chike ri kabꞌlajuj utijoꞌn ri Jesús, xeꞌek kukꞌ ri nimaq e aj chakunel pa Rocho Dios re kuya ri Jesús pakiqꞌabꞌ.
MAR 14:11 Rike, echiriꞌ xkita waꞌ, lik xekiꞌkot che y xkibꞌiꞌtisij nenareꞌ kakiya puaq che. Ekꞌu riꞌ ri Judas xujeq utzukuxik suꞌanik kuya ri Jesús pakiqꞌabꞌ.
MAR 14:12 Chupa kꞌu ri nabꞌe qꞌij re ri nimaqꞌij echiriꞌ katij ri pam na jinta levadura che y kekamisax chwi raltar taq ri qꞌapoj bꞌexex re ri Pascua, rutijoꞌn ri Jesús xkitzꞌonoj che: —¿Pa kaꞌaj wi la keꞌqayijbꞌaꞌ wi ri cena re Pascua? —xechaꞌ.
MAR 14:13 Ewi xebꞌutaq bꞌi kaꞌibꞌ chike rutijoꞌn y xubꞌiꞌij bꞌi chike: —Jix pa ri tinamit y echiriꞌ kikꞌul jun achi rukꞌaꞌam jun kuraꞌ yaꞌ, chixterej bꞌi chirij.
MAR 14:14 Pa kꞌu kok wubꞌi waꞌ waꞌchi, chibꞌiꞌij che ri rajaw ja: “Jewaꞌ kubꞌiꞌij ri tijonel qeꞌoj: ¿Pachawi kꞌo wi ri luwar pa kantij wi ri cena re Pascua kukꞌ ri nutijoꞌn?” kixcha che.
MAR 14:15 Ekꞌu ri kuꞌan ri rajaw ja e kukꞌut chiwe jun nimalaj luwar chikaj pa ri kaleꞌ ja, waꞌ yijbꞌital chik. Chiriꞌ kꞌu riꞌ chiyijbꞌaꞌ wi ri cena re Pascua —xchaꞌ.
MAR 14:16 Xebꞌek kꞌu rutijoꞌn, xebꞌok pa ri tinamit y xeꞌkiriqaꞌ jelaꞌ pachaꞌ ri xubꞌiꞌij bꞌi ri Jesús chike. Y xkiyijbꞌaꞌ kꞌu ri cena re Pascua.
MAR 14:17 Ekꞌuchiriꞌ xok raqꞌabꞌ, xopon ri Jesús junam kukꞌ ri kabꞌlajuj utijoꞌn.
MAR 14:18 Ekꞌuchiriꞌ e kꞌo chwa ri mexa, e riꞌ kewaꞌik, ri Jesús xubꞌiꞌij: —Paqatzij wi kambꞌiꞌij chiwe: Jun chiwe wa ix kꞌo wara wukꞌ pa waꞌim, e kakꞌayin we —xchaꞌ.
MAR 14:19 Ewi rike xkijeq lik kebꞌisonik y chikijujunal kakitzꞌonoj che: —¿Kꞌaxtaj in riꞌ? —kacha jun. —¿Kꞌaxtaj in riꞌ? —kacha jun chik.
MAR 14:20 Ri Jesús xukꞌul uwach; jewaꞌ xubꞌiꞌij: —Waꞌ e jun chiwe wa ix kabꞌlajuj, e ri kumuꞌ lo ruwa junam wukꞌ chupa ri laq.
MAR 14:21 Paqatzij wi Ralaxel Chikixoꞌl Tikawex e katajin che rikꞌowibꞌexik janipa ri tzꞌibꞌital kan chupa Ruchꞌaꞌtem ri Dios puwi Rire. Pero ¡lik kꞌu toqꞌoꞌ uwach rachi kakꞌayin re! E ne más utz che waꞌchi tamaji xalaxik —xchaꞌ.
MAR 14:22 Xaloqꞌ kꞌu riꞌ kewaꞌik, ri Jesús xukꞌam ri pam y xutioxij che ri Dios. Ewi xuwechꞌo, xujach chike y jekꞌuwaꞌ xubꞌiꞌij: —Chitijaꞌ, ma e nucuerpo waꞌ —xchaꞌ.
MAR 14:23 Xukꞌam kꞌu ri kꞌolibꞌal kꞌo vino chupa, yey echiriꞌ utioxim chi che ri Dios, xuya chike y konoje xkitij chuchiꞌ waꞌ wa kꞌolibꞌal.
MAR 14:24 Xubꞌiꞌij kꞌu chike: —E nukikꞌel waꞌ, ri katuruw na kuma ukꞌiyal tikawex re kuybꞌal kimak, yey waꞌ e kujikibꞌaꞌ uwach ri kꞌakꞌ tzij.
MAR 14:25 Paqatzij wi kambꞌiꞌij chiwe: Na kantij ta chi ruwaꞌal uva, kꞌate kiꞌntija tanchi chupa ruqꞌijol rutaqanik ri Dios —xchaꞌ.
MAR 14:26 Echiriꞌ xkikꞌis ubꞌixoxik ri bꞌix, xebꞌek chwa ri juyubꞌ Olivos.
MAR 14:27 Ekꞌuchiriꞌ ri Jesús xubꞌiꞌij chike: —Waqꞌabꞌ iwonoje riꞌix kiwesaj na iwibꞌ chwij, ma e pachaꞌ kubꞌiꞌij Ruchꞌaꞌtem ri Dios: Kankamisaj raj chajinel yey taq kꞌu riꞌ rubꞌexex kakikich bꞌi kibꞌ kachaꞌ.
MAR 14:28 Noꞌj ekꞌuchiriꞌ kinkꞌastaj lo chikixoꞌl ri ekaminaq, kinnabꞌej bꞌi chiwach kꞌa Galilea —xchaꞌ.
MAR 14:29 Ekꞌu ri Pedro xubꞌiꞌij: —Tobꞌ ne konoje kakesaj kibꞌ chiꞌij la, riꞌin na kanꞌan ta waꞌ —xchaꞌ.
MAR 14:30 Yey ri Jesús xukꞌul uwach: —Paqatzij wi kambꞌiꞌij chawe: Wa jun aqꞌabꞌ, echiriꞌ kꞌamajaꞌ ne kabꞌixon kalaj ri teren, riꞌat oxlaj chik abꞌiꞌim na awetaꞌam ta nuwach —xchaꞌ.
MAR 14:31 Noꞌj ri Pedro lik xujikibꞌaꞌ ubꞌiꞌxikil: —Tobꞌ ne chirajawaxik kinkam junam ukꞌ la, riꞌin na kanwewaj taj we wetaꞌam wach la —xchaꞌ. Jekꞌulaꞌ riꞌ xkibꞌiꞌij konoje.
MAR 14:32 Xebꞌopon kꞌu pa jun luwar Getsemaní rubꞌiꞌ. Ekꞌu ri Jesús xubꞌiꞌij chike rutijoꞌn: —Chixtzꞌula kan wara, noꞌj riꞌin kiꞌnꞌana orar —xchaꞌ.
MAR 14:33 Yey xebꞌukꞌam kꞌu bꞌi ri Pedro, ri Jacobo y ri Juan rukꞌ. Xujeq kꞌu riꞌ lik kabꞌisonik y kakꞌaxkꞌobꞌ ri ranimaꞌ.
MAR 14:34 Xubꞌiꞌij kꞌu chike: —Kꞌo jun unimal bꞌis re kamik chinukꞌuꞌx. Chixkꞌola kan wara; mixwarik y lik chiꞌana orar —xchaꞌ.
MAR 14:35 Tekꞌuchiriꞌ, ri Jesús xqibꞌ chi pana jubꞌiqꞌ chwach, xuqasaj umejelem kꞌa chuꞌlew, y xutzꞌonoj che ri Dios we ta kuya na che na kikꞌow ta chupa ruꞌorayil ri kꞌaxkꞌobꞌik,
MAR 14:36 jewaꞌ xubꞌiꞌij: «Tat, Lal Nuqaw, chiwach Rilal na jinta kꞌana kꞌayew; chinkolobꞌej ko la chaꞌ na kinikꞌow ta chupa waꞌ wa kꞌaxkꞌobꞌik. Noꞌj na e ta kꞌu chuꞌana ri kuaj riꞌin, ma e chuꞌanaꞌ janipa ri kaꞌaj Rilal» xchaꞌ.
MAR 14:37 Tekꞌuchiriꞌ, xtzelej lo pa e kꞌo wi kan rutijoꞌn y xebꞌoꞌluꞌriqaꞌ kewarik. Xubꞌiꞌij kꞌu che ri Pedro: —¿Katwar kami riꞌ? ¿Na xakuy ta kꞌana ri waram chaꞌ kaꞌan orar wukꞌ, tobꞌ tane xa juna ora?
MAR 14:38 Mixwar kꞌut, y lik chiꞌana orar chaꞌ kichꞌij uchuqꞌabꞌ ri kꞌambꞌal ipa kapetik. Paqatzij wi, lik kacha ikꞌuꞌx che uꞌanik ri utz, noꞌj waꞌ lik kꞌayew chiwe ma e ri itiꞌjil na jinta ukowil —xchaꞌ.
MAR 14:39 Ekꞌu ri Jesús xeꞌek tanchik, xuꞌana orar, yey e xutzꞌonoj che ri Dios ri ujeqom chi lo utzꞌonoxik nabꞌe.
MAR 14:40 Tekꞌuchiriꞌ, xtzelej tanchi lo kukꞌ rutijoꞌn y xebꞌoꞌluꞌriqaꞌ kewarik; ma ri kiwach lik na kukuy ta chi ri waram y na kakiriq ta chik saꞌ ri kakibꞌiꞌij che.
MAR 14:41 Xtzelej kꞌu lo churox laj y xubꞌiꞌij chike: —¿Kꞌa kixwar kami riꞌ riꞌix? ¿Kꞌa kixuxlanik? ¡Kuꞌan na kꞌu laꞌ! Ma e waꞌ xopon ruꞌorayil chaꞌ Ralaxel Chikixoꞌl Tikawex kayaꞌ pakiqꞌabꞌ raj makibꞌ.
MAR 14:42 ¡Chixwaꞌlijoq! ¡Joꞌ! Chiwilaꞌ, ma ri kakꞌayin we riꞌin e laꞌ xkꞌunik —xchaꞌ.
MAR 14:43 Kꞌa kachꞌaꞌt ne ri Jesús echiriꞌ xkꞌun lo ri Judas, jun chike ri kabꞌlajuj utijoꞌn. Ekꞌu rire erachbꞌilam lo ukꞌiyal winaq kukꞌaꞌam lo espada y cheꞌ. Taq waꞌ etaqom lo kuma ri nimaq e aj chakunel pa Rocho Dios, taq raj kꞌutunel re ri tzijpixabꞌ y ri nimaq winaq re ri tinamit.
MAR 14:44 Ekꞌu ri Judas, ri kayaꞌw bꞌi re pakiqꞌabꞌ, ubꞌiꞌim chi lo chike suꞌanik kaketaꞌmaj china ri kakichapo, jewaꞌ ubꞌiꞌim: «E ri jun kantzꞌubꞌ uchiꞌ, e riꞌ rire. Chapa kꞌu alaq y kꞌama bꞌi alaq, yey chekojo bꞌi alaq e chajinel re chaꞌ na kanimaj tubꞌi» xchaꞌ.
MAR 14:45 Ekꞌuchiriꞌ xkꞌunik, maji chik xqibꞌ rukꞌ ri Jesús y xubꞌiꞌij che: —¡Wajawal, Wajawal! —xcha che. Y xutzꞌubꞌ uchiꞌ.
MAR 14:46 Ekꞌuchiriꞌ, ri winaq xkichap ri Jesús chaꞌ kakikꞌam bꞌi pa qꞌatbꞌal tzij.
MAR 14:47 Kꞌo kꞌu jun chike rutijoꞌn e kꞌo chiriꞌ, xresaj lo ru espada y xujochij bꞌi jun uxikin ri raj chak ri kajawal raj chakunel pa Rocho Dios.
MAR 14:48 Xubꞌiꞌij kꞌu ri Jesús chike: —¿Suꞌchak petinaq alaq rukꞌ espada y cheꞌ? ¿Petinaq kami alaq che ukꞌamik bꞌi juna eleqꞌom?
MAR 14:49 Wa petinaq loq ronoje qꞌij waꞌ kꞌut kinkꞌutun chiwach alaq pa ri Rocho Dios. ¿Suꞌchak kꞌu riꞌ kꞌa e laꞌ kinoꞌlchapa alaq? Noꞌj jekꞌuwaꞌ kuꞌano chaꞌ e kuꞌana janipa ri qꞌalajisam kan chupa Ruchꞌaꞌtem ri Dios —xcha chike.
MAR 14:50 Tekꞌuchiriꞌ, konoje rutijoꞌn xebꞌanimajik y jelaꞌ xkiya kan ri Jesús.
MAR 14:51 Kꞌo kꞌu jun ala teran bꞌi chirij ri Jesús, upisom ribꞌ xa chupa jun sábana; rire xchap kuma ri soldados.
MAR 14:52 Pero rala xusolij kan rusábana y e laꞌ chꞌanalik xanimajik.
MAR 14:53 Xkikꞌam kꞌu bꞌi ri Jesús chwach ri kajawal raj chakunel pa Rocho Dios. Tekꞌuchiriꞌ, xkimol kibꞌ ri nimaq e aj chakunel kukꞌ ri nimaq winaq re ri tinamit y raj kꞌutunel re ri tzijpixabꞌ.
MAR 14:54 Ekꞌu ri Pedro xa naj teran pan chirij ri Jesús y xok bꞌi kꞌa che ruwa ja re ri rocho ri kajawal raj chakunel pa Rocho Dios. Xeꞌtzꞌula kꞌu kukꞌ ri e chajinel, e riꞌ kumiqꞌisaj ribꞌ chuchiꞌ ri aqꞌ.
MAR 14:55 Ri nimaq e aj chakunel pa Rocho Dios kukꞌ konoje ri uchapom wi ribꞌ ri qꞌatbꞌal tzij, kakitzukuj suꞌanik kakikoj umak ri Jesús chaꞌ jelaꞌ utz kaqꞌat tzij re kamik puwiꞌ, noꞌj na jinta kꞌo xkiriq chirij.
MAR 14:56 Ma lik e kꞌi ri winaq xkitzꞌaq uchiꞌ, pero lik junwi taq ri xkibꞌiꞌij.
MAR 14:57 Ewi xeyaktaj jujun y xkitzꞌaq uchiꞌ, jewaꞌ xkibꞌiꞌij chirij:
MAR 14:58 —Riꞌoj xqato echiriꞌ xubꞌiꞌij: “Kanwulij wa Rocho Dios ꞌanatal xa kuma rachijabꞌ, yey xa pa oxibꞌ qꞌij kanyak jun chik na ꞌanatal ta kuma rachijabꞌ” —xechaꞌ.
MAR 14:59 Na rukꞌ ta kꞌu riꞌ, lik junwi taq ri xkibꞌiꞌij.
MAR 14:60 Ewi ri kajawal raj chakunel pa Rocho Dios xyaktaj chikixoꞌl y xutzꞌonoj che ri Jesús: —¿E kami laꞌ na jinta kꞌana kabꞌiꞌij riꞌat? ¿Saꞌ kꞌu ri kakꞌulubꞌej uwach puwi wa ketajin che ukojik chawij? —xchaꞌ.
MAR 14:61 Pero ri Jesús xa xuto y na jinta kꞌo xubꞌiꞌij. Tekꞌuchiriꞌ, xuꞌan jun chik tzꞌonobꞌal che ri Jesús: —¿At bꞌa riꞌ ri Cristo, Rukꞌajol ri Dios, ri Jun lik nim uqꞌij? —xcha che.
MAR 14:62 Ri Jesús xukꞌul uwach: —Qatzij, “In Riꞌin.” Kil na kꞌu alaq Ralaxel Chikixoꞌl Tikawex tzꞌul puwikiqꞌabꞌ ri Dios, ri lik kꞌo unimal uchuqꞌabꞌ yey kil kꞌu alaq riꞌ echiriꞌ kakꞌun lo pa sutzꞌ chwa ri kaj —xchaꞌ.
MAR 14:63 Ekꞌu ri kajawal raj chakunel pa Rocho Dios xurichꞌij ruqꞌuꞌ y xubꞌiꞌij: —¡Na jinta chi uchak más e aj kojol umak!
MAR 14:64 Ma lik e laꞌ xta alaq xmakun chirij ri Dios echiriꞌ xubꞌiꞌij ri lik na taqal ta che. ¿Saꞌ kꞌu riꞌ kabꞌiꞌij ralaq che? —xchaꞌ. Ewi konoje xkiqꞌat tzij puwi ri Jesús y xkibꞌiꞌij lik taqal che kakamisaxik.
MAR 14:65 Y e kꞌo jujun xkijeq kakichubꞌaj; kakichꞌuq rupalaj, kakiꞌan pa tꞌoꞌy yey kakibꞌiꞌij kꞌu che: —Chanaꞌij peꞌ china xchꞌayaw awe —kecha che. Yey ri e chajinel kakipachꞌ qꞌabꞌ chupalaj.
MAR 14:66 Ekꞌu ri Pedro kꞌo ikem che ruwa ja echiriꞌ xkꞌun lo jun ali raj chak ri kajawal raj chakunel pa Rocho Dios.
MAR 14:67 Ekꞌuchiriꞌ rali xril ri Pedro kumiqꞌisaj ribꞌ chuchiꞌ ri aqꞌ, lik xutzutzaꞌ uwach y xubꞌiꞌij che: —Rilal lal jun chike ri eteran chirij ri Jesús ri aj Nazaret —xcha che.
MAR 14:68 Ewi ri Pedro xrewaj, jewaꞌ xukꞌul uwach: —Riꞌin na wetaꞌam ta uwach y na wetaꞌam tane saꞌ puwiꞌ katchꞌaꞌt wi —xchaꞌ. Xel kꞌu bꞌi chuchiꞌ ri puerta. Tekꞌuchiriꞌ, xchꞌaw ri teren.
MAR 14:69 Ekꞌu rali aj chak echiriꞌ xril tanchi ri Pedro, xujeq ubꞌiꞌxikil chike taq ri e kꞌo chiriꞌ: —Waꞌ waꞌchi e jun chike rutijoꞌn ri Jesús —xchaꞌ.
MAR 14:70 Noꞌj ri Pedro xrewaj tanchik. Joqꞌotaj kꞌu riꞌ, e taq ri e kꞌo chiriꞌ xkibꞌiꞌij tanchi che ri Pedro: —Paqatzij wi rilal lal jun chike rutijoꞌn; lik qꞌalaj lal aj Galilea, ma ri kachꞌaꞌt la e junam rukꞌ ri kechꞌaꞌt rike —xechaꞌ.
MAR 14:71 Ewi ri Pedro xujeq ubꞌiꞌxikil itzel taq tzij y lik xujikibꞌaꞌ uwach, xubꞌiꞌij: —Riꞌin na wetaꞌam ta kꞌana uwach waꞌ waꞌchi kabꞌiꞌij alaq —xchaꞌ.
MAR 14:72 Ekꞌu ri teren xchꞌaw chukalaj. Ewi xkꞌun lo chukꞌuꞌx ri Pedro ri xbꞌiꞌx lo che ruma ri Jesús: «Kꞌamajaꞌ ne kabꞌixon ri teren chukalaj, riꞌat oxlaj chik abꞌiꞌim na awetaꞌam ta nuwach.» Ekꞌu katajin waꞌ pujolom, xumaj roqꞌej.
MAR 15:1 Echiriꞌ xsaqirik, ri nimaq e aj chakunel pa Rocho Dios kukꞌ taq ri nimaq winaq re ri tinamit, raj kꞌutunel re ri tzijpixabꞌ y konoje ri uchapom wi ribꞌ ri qꞌatbꞌal tzij, kiꞌanom chi tzij chikiwach puwi saꞌ ri kakiꞌan rukꞌ ri Jesús. Xkikꞌam kꞌu bꞌi ri Jesús yututalik y xeꞌkiyaꞌa chwach ri taqanel Pilato.
MAR 15:2 Ri Pilato xutzꞌonoj kꞌu che ri Jesús: —¿Lal kami riꞌ ri rey ke raj judiꞌabꞌ? —xcha che. Ri Jesús xukꞌul uwach: —Lal kabꞌiꞌn la re —xcha che.
MAR 15:3 Yey ri nimaq e aj chakunel pa Rocho Dios lik kakitzꞌaq uchiꞌ.
MAR 15:4 Xutzꞌonoj tanchi kꞌu ri taqanel Pilato che: —¿E kami laꞌ na kakꞌul ta la uwach? ¿Na kata ta kami la janipa chi mak kakikoj chiꞌij la? —xcha che.
MAR 15:5 Na rukꞌ ta kꞌu riꞌ, ri Jesús na xukꞌul ta uwach. Ruma kꞌu waꞌ, ri Pilato lik xkam ranimaꞌ che.
MAR 15:6 Chupa kꞌu ri nimaqꞌij Pascua, ri taqanel romano xex kuꞌan wi kuyolopij bꞌi jun chike ri e kꞌo pa cárcel, yey e ri winaq kechaꞌwik china ri kakaj kayolopix bꞌi.
MAR 15:7 Kꞌo kꞌu jun achi Barrabás rubꞌiꞌ, rire kꞌo pa cárcel kukꞌ jujun rachbꞌiꞌil ruma xkiꞌan kamik echiriꞌ xeyaktaj chirij ri taqanel aj Roma.
MAR 15:8 Xebꞌopon kꞌu ukꞌiyal winaq chwach ri taqanel Pilato y xkijeq utzꞌonoxik che e kuꞌan pachaꞌ taq ri uꞌanom lo ronoje junabꞌ.
MAR 15:9 Ewi ri taqanel Pilato xutzꞌonoj chike: —¿Kaꞌaj alaq kanyolopij bꞌi ri rey ke raj judiꞌabꞌ? —xchaꞌ.
MAR 15:10 Xubꞌiꞌij waꞌ ma retaꞌam ri nimaq e aj chakunel pa Rocho Dios xeꞌkiyaꞌa ri Jesús chwach, xa ruma kꞌax kikꞌuꞌx chirij.
MAR 15:11 Ekꞌu ri nimaq e aj chakunel pa Rocho Dios xkikoj pa kijolom ri ukꞌiyal winaq e kakitzꞌonoj kayolopix bꞌi ri Barrabás. Yey rike jelaꞌ xkiꞌano.
MAR 15:12 Ri Pilato xutzꞌonoj tanchi chike: —¿Saꞌ kꞌu riꞌ kaꞌaj alaq kanꞌan rukꞌ ri kabꞌiꞌij alaq e rey ke raj judiꞌabꞌ? —xchaꞌ.
MAR 15:13 Yey ri winaq lik xesikꞌin tanchi che ukꞌulik uwach: —¡Kamisax chwa cruz! —xechaꞌ.
MAR 15:14 Ekꞌu ri taqanel Pilato xutzꞌonoj chike: —¿Saꞌ kꞌu rumak uꞌanom? —xchaꞌ. Noꞌj ri winaq más ko xesikꞌinik: —¡Kamisax chwa cruz! —xechaꞌ.
MAR 15:15 Ewi ri Pilato xa ruma xraj kakanaj kan chi utz kukꞌ rukꞌiyal winaq, e xuyolopij bꞌi ri Barrabás. Yey xebꞌutaq ri soldados che ujichꞌik upa ri Jesús. Tekꞌuchiriꞌ, xuya bꞌi pakiqꞌabꞌ re kakikamisaj chwa cruz.
MAR 15:16 Ri soldados xkikꞌam kꞌu bꞌi ri Jesús che ruwa ja re rupalacio ri taqanel. Chiriꞌ xmoliꞌ kichiꞌ konoje taq ri soldados.
MAR 15:17 Ekꞌu ri soldados xkikoj jun kꞌul morato che ri Jesús. Che kꞌu rujolom xkikoj jun corona pachꞌum rukꞌ kꞌiix.
MAR 15:18 Xkijeq kꞌu kesikꞌin che, jewaꞌ kakibꞌiꞌij: —¡Nim uqꞌij ri rey ke raj judiꞌabꞌ! —kechaꞌ.
MAR 15:19 Kakichꞌay rujolom rukꞌ jukutaj tani y kakichubꞌaj rupalaj. Kakixukubꞌaꞌ kꞌu kibꞌ chwach, lik xa uꞌanikil kakiyak uqꞌij.
MAR 15:20 Echiriꞌ ya lik xkichꞌamij, xkesaj ri kꞌul morato kikojom che y xkikoj tanchi ruqꞌuꞌ. Xkesaj kꞌu bꞌi chaꞌ keꞌkikamisaj chwa cruz.
MAR 15:21 Kꞌo kꞌu jun achi aj Cirene petinaq pa juyubꞌ e riꞌ kikꞌow chiriꞌ. Ekꞌu ri soldados xkitaq che kutelej bꞌi ri cruz re ri Jesús. Rachi, Simón rubꞌiꞌ, rire e kiqaw ri Alejandro y Rufo.
MAR 15:22 Y xkikꞌam bꞌi ri Jesús pa jun luwar Gólgota kabꞌiꞌx che, waꞌ keꞌelawi “luwar re ubꞌaqil ujolom animaꞌ”.
MAR 15:23 Yey xkiyaꞌ che ri Jesús vino kojotal mirra rukꞌ; noꞌj Rire na xutij taj.
MAR 15:24 Echiriꞌ kiyaꞌom chi ri Jesús chwa ri cruz, ri soldados rukꞌ jun sorteo xkijach kibꞌ puwi ruqꞌuꞌ chaꞌ kakilo saꞌ taq ri kakikꞌam bꞌi chikijujunal.
MAR 15:25 Anim che ri ubꞌelej ora, xkiya ri Jesús chwa ri cruz.
MAR 15:26 Chwi kꞌu lo rucruz ri Jesús tzꞌibꞌitalik suꞌbꞌe xqꞌat tzij puwiꞌ, jewaꞌ kubꞌiꞌij: «RI REY KE RAJ JUDIꞌABꞌ.»
MAR 15:27 Xekiya kꞌu kaꞌibꞌ eleqꞌomabꞌ chwa cruz, jun puwikiqꞌabꞌ y jun pumox ri Jesús.
MAR 15:28 Ekꞌu xuꞌana riꞌ ri tzꞌibꞌital kan chupa Rutzij Upixabꞌ ri Dios: E jun Rire xajilax bꞌi kukꞌ ri winaq itzel kikꞌuꞌx.
MAR 15:29 Ri winaq kebꞌikꞌow chiriꞌ kakiyoqꞌ kanoq, kakiyiriyaꞌ ri kijolom che y jekꞌuwaꞌ kakibꞌiꞌij che: —¡Ah! At peꞌ ri abꞌiꞌim kawulij ri Rocho Dios y xa pa oxibꞌ qꞌij kayak tanchik.
MAR 15:30 Chakolobꞌej kꞌu awibꞌ riꞌ y chatqaj lo chwa ri cruz —kechaꞌ.
MAR 15:31 Jenelaꞌ riꞌ xkiꞌan ri nimaq e aj chakunel pa Rocho Dios junam kukꞌ raj kꞌutunel re ri tzijpixabꞌ; rike lik kakichꞌamij, jewaꞌ kakibꞌiꞌij chikiwach: —Lik waꞌ kꞌut e kꞌi ri xebꞌukolobꞌej che taq yabꞌil y che kamik, yey na kuriq ta waꞌ ukolobꞌexik ribꞌ rire.
MAR 15:32 Laꞌ laꞌchi kabꞌiꞌx “Cristo, Rey ke Raj Israel” che, qaja lo riꞌ utukel chwa ri cruz chaꞌ kaqilo y jelaꞌ kaqakojo e rire ri Uchaꞌoꞌn lo ri Dios —kechaꞌ. Y jenelaꞌ ri kaꞌibꞌ eyaꞌom chwa cruz junam rukꞌ, lik xkichꞌamij Rire.
MAR 15:33 Ekꞌuchiriꞌ xtikꞌoj ri qꞌij, xok qꞌequꞌm che ruwachulew y waꞌ xuꞌkꞌisa kꞌa che ri urox ora bꞌenaq qꞌij.
MAR 15:34 Chupa kꞌu laꞌ la ora, ri Jesús lik ko xsikꞌinik, jewaꞌ xubꞌiꞌij pa ri chꞌaꞌtem kachꞌaꞌt wi Rire: —Eloi, Eloi, ¿lama sabactani? —xchaꞌ. Waꞌ keꞌelawi: “Lal nu Dios, Lal nu Dios, ¿suꞌbꞌe xinoqꞌotaj kan la?”
MAR 15:35 Jujun kꞌu chike ri e kꞌo chiriꞌ, echiriꞌ xkita waꞌ, xkibꞌiꞌij: —Chitapeꞌ, waꞌchi e kusikꞌij ri qꞌalajisanel Elías —xechaꞌ.
MAR 15:36 Kꞌo kꞌu jun xeꞌek lik kanik, xumuꞌ jun esponja pa vinagre, xuxim kꞌu chutzaꞌm jun tani y xuya pan che ri Jesús re kutzꞌubꞌu, y jekꞌuwaꞌ xubꞌiꞌij: —Qila peꞌ we kakꞌun ri Elías re koluꞌqasaj lo chwa ri cruz —xchaꞌ.
MAR 15:37 Noꞌj ri Jesús lik ko xsikꞌinik y jelaꞌ xkamik.
MAR 15:38 Ekꞌuchiriꞌ, ri telón kꞌo chupa ri Rocho Dios xrichꞌrobꞌ chunikꞌajal; xujeq lo puwiꞌ y xoꞌlkꞌis kꞌa chuxeꞌ.
MAR 15:39 Ekꞌu ri capitán takꞌal chwach ri Jesús, echiriꞌ xuto xsikꞌinik yey xrilo saꞌ rukamik, jewaꞌ xubꞌiꞌij: —¡Paqatzij wi, waꞌ waꞌchi e Ukꞌajol ri Dios! —xchaꞌ.
MAR 15:40 E kꞌo kꞌu jujun ixoqibꞌ kakitzutzaꞌ pana chinimanaj. Chikixoꞌl waꞌ e kꞌo ri María ri aj Magdala, ri Salomé y ri María kichu ri Jacobo (ri más kꞌakꞌal) y ri José.
MAR 15:41 Waꞌ wa ixoqibꞌ lik xeterej chirij ri Jesús y lik kinimam loq echiriꞌ Rire kꞌo Galilea. Rike kukꞌ jujun chik ukꞌiyal ixoqibꞌ, xepaqiꞌ lo rukꞌ pa ri tinamit Jerusalem.
MAR 15:42 Bꞌenaq qꞌij, echiriꞌ raj judiꞌabꞌ kakiyijbꞌaꞌ pan janipa ri kajawax chike pa ri qꞌij re uxlanibꞌal,
MAR 15:43 ri José aj Arimatea xok chwach ri taqanel Pilato y na xuxiꞌij ta kꞌana ribꞌ xutzꞌonoj rucuerpo ri Jesús chaꞌ kukꞌam bꞌi. (Ri José lik kꞌo uwach chike ri uchapom wi ribꞌ ri qꞌatbꞌal tzij yey lik royeꞌem rukꞌunibꞌal rutaqanik ri Dios.)
MAR 15:44 Ri Pilato lik xkam ranimaꞌ che echiriꞌ xuto kaminaq chi ri Jesús. Ewi xusikꞌij ri capitán chaꞌ kutzꞌonoj che we qatzij.
MAR 15:45 Echiriꞌ xuta chi uchiꞌ ri capitán kaminaq chi ri Jesús, xuya luwar che ri José kukꞌam bꞌi rucuerpo.
MAR 15:46 Ekꞌu ri José xuloqꞌ jun manta, xuqasaj lo rucuerpo ri Jesús chwa ri cruz y xupis bꞌi chupa ri manta. Xuꞌyaꞌa kꞌu riꞌ chupa jun muqubꞌal kꞌotom paꞌbꞌaj y xutaq uketebꞌaxik kan jun nimalaj abꞌaj chuchiꞌ re tzꞌapibꞌal re.
MAR 15:47 Yey ri María ri aj Magdala y ri María ruchu ri José, xkilo pa xmuq kan wi.
MAR 16:1 Echiriꞌ xikꞌow ri qꞌij re uxlanibꞌal, ri María ri aj Magdala, ri Salomé y ri María ruchu ri Jacobo, xkiloqꞌ kunabꞌal lik kiꞌ ruxlabꞌ re kakibꞌal rucuerpo ri Jesús chupa.
MAR 16:2 Ekꞌu ri nabꞌe qꞌij re ri semana lik anim kꞌa e riꞌ kel lo ri qꞌij, xebꞌek pa muqutal wi ri Jesús.
MAR 16:3 Kakibꞌiꞌij kꞌu chikiwach: «¿China kesan rabꞌaj chiqe kꞌo chuchiꞌ ri muqubꞌal?» kechaꞌ.
MAR 16:4 Pero kꞌate xkilo, rabꞌaj esam chik, yey waꞌ lik nim.
MAR 16:5 Ekꞌuchiriꞌ xebꞌok bꞌi chupa ri muqubꞌal, xkil jun ala tzꞌul pa uwikiqꞌabꞌ chike, ukojom jun kꞌul saq lik naj raqan. Yey rike lik xkixiꞌij kibꞌ che.
MAR 16:6 Ekꞌu rire xubꞌiꞌij chike: —Mixiꞌij iwibꞌ. Riꞌix e kitzukuj ri Jesús ri aj Nazaret, ri xkamisax chwa cruz; Rire na jinta chi wara, ma kꞌastajinaq chubꞌi. Chiwila wa luwar pa xyaꞌiꞌ wi rucuerpo.
MAR 16:7 Ekꞌu riꞌix jix, jiꞌbꞌiꞌij chike rutijoꞌn y che ri Pedro: “Rire keꞌek Galilea, kanabꞌej bꞌi chiwach; chilaꞌ kꞌu riꞌ kiꞌwila wi uwach, jelaꞌ pachaꞌ ri ubꞌiꞌim chi lo chiwe” —xchaꞌ.
MAR 16:8 Ekꞌu rixoqibꞌ xebꞌel bꞌi chuchiꞌ ri muqubꞌal lik kebꞌirbꞌotik ruma bꞌenaq kinaꞌoj puwi ri xkilo; yey na jinta ne kꞌana kꞌo xkitzijoj wi ruma kixiꞌim kibꞌ.
MAR 16:9 Ekꞌuchiriꞌ kꞌastajinaq chi lo ri Jesús, anim tan che ri nabꞌe qꞌij re ri semana, nabꞌe xukꞌut uwach chwach ri María ri aj Magdala, ri e resam bꞌi wuqubꞌ itzel uxlabꞌixel che.
MAR 16:10 Rire xeꞌek kꞌut chaꞌ kuꞌtzijoj rukꞌastajibꞌal ri Jesús chike ri xeterej chirij yey xebꞌuꞌriqa kꞌu riꞌ lik kebꞌisonik y kebꞌoqꞌik.
MAR 16:11 Yey rike echiriꞌ xkito kꞌastajinaq chi lo ri Jesús y xilitaj uwach ruma ri María, na xkikoj taj.
MAR 16:12 Tekꞌuchiriꞌ, ri Jesús xukꞌut uwach chikiwach kaꞌibꞌ chike rutijoꞌn, noꞌj junwi uꞌanikil xuꞌan waꞌ echiriꞌ rike e riꞌ kebꞌinik kebꞌek pa juyubꞌ.
MAR 16:13 Ekꞌu wa kaꞌibꞌ xetzelejik, xeꞌkitzijoj chike ri jujun chik tijoꞌn; yey waꞌ na xkoj tane chwikiqꞌabꞌ.
MAR 16:14 Kꞌisbꞌal chi kꞌu re, ri Jesús xukꞌut uwach chikiwach ri junlajuj utijoꞌn echiriꞌ rike etzꞌul chwa mexa, yey xuchꞌaꞌbꞌej kipa ruma na kubꞌul ta kikꞌuꞌx rukꞌ y ruma uꞌanom lik ko ri kanimaꞌ, ma na xkikoj ta ke ri xebꞌilow re ri Jesús kꞌastajinaq chik.
MAR 16:15 Xubꞌiꞌij kꞌu chike: —Jix che ronoje ruwachulew y chitzijoj ri Utzilaj Tzij chike konoje ri tikawex.
MAR 16:16 Ekꞌu ri kekojow re y kakikꞌul ri bautismo, kekolobꞌetajik. Noꞌj kꞌu ri na kekojow ta re, kaqꞌat na tzij pakiwiꞌ.
MAR 16:17 Yey chike ri kekojow re, kilitaj kꞌutubꞌal re ruchuqꞌabꞌ ri Dios. Pa ri nubꞌiꞌ kebꞌekesaj bꞌi itzel uxlabꞌixel, kechꞌaꞌt pa jujun chik kꞌakꞌ chꞌaꞌtem,
MAR 16:18 kakichap taq ne kumatz pakiqꞌabꞌ. Yey we kꞌo ri xkitijo y na kinaꞌbꞌem taj kamisabꞌal ke, na jinta kꞌo kuꞌan chike. Kakiya ri kiqꞌabꞌ pakiwi taq ri yewaꞌibꞌ, y waꞌ kekunutajik —xchaꞌ.
MAR 16:19 Ekꞌu ri Qanimajawal echiriꞌ chꞌaꞌtinaq chi kukꞌ, xkꞌul pana chilaꞌ chikaj y xtzꞌuyiꞌ puwikiqꞌabꞌ ri Dios.
MAR 16:20 E taq kꞌu rutijoꞌn xebꞌel bꞌi che utzijoxik ri Utzilaj Tzij pa taq ronoje luwar. Yey ri Qanimajawal xebꞌutoꞌo, xuya chike kakikꞌut ruchuqꞌabꞌ ri Dios chaꞌ rukꞌ waꞌ kujikibꞌaꞌ uwach ri Utzilaj Tzij. Amén.
LUK 1:1 Ukꞌiyal tikawex kitzꞌibꞌam chi puwi saꞌ taq ri uꞌanom ri Dios chiqaxoꞌl riꞌoj, ri nabꞌe qakojom rubꞌiꞌ ri Jesucristo.
LUK 1:2 Kitzꞌibꞌam kꞌu ri kꞌutum lo chiqe kuma ri raj chak ri Dios, ri xebꞌilow chi utz ri xuꞌan ri Qanimajawal Jesucristo chwi xujeq lo ruchak. Yey e rike ri xkitzijoj ri Utzilaj Tzij puwi Rire.
LUK 1:3 Riꞌin mismo lik xinwetaꞌmaj na chi utz y nuchꞌobꞌom lo raqan puwi ronoje saꞌ taq ri xuꞌano chwi lo rukꞌunik ri Qanimajawal che ruwachulew. Yey chinuwach riꞌin, lik utz kintzꞌibꞌan pan cheꞌla Teófilo y kantzijoj rusukꞌ waꞌ cheꞌla chucholaꞌj
LUK 1:4 chaꞌ ketaꞌmaj la chi utz puwi ri Qꞌijsaq kꞌutum chiwach la.
LUK 1:5 Echiriꞌ ri Herodes kataqan puwi ri luwar re Judea, kꞌo jun aj chakunel pa Rocho Dios, Zacarías rubꞌiꞌ. Rire e kukꞌil raj Abías. Ri rixoqil Elizabet e kukꞌil ri ralkꞌoꞌal kan ri Aarón.
LUK 1:6 Ri Zacarías y ri Elizabet junam lik e jusukꞌ chwach ri Dios, yey lik kebꞌok il che ronoje Rutzij Upixabꞌ ri Dios Qajawxel y na jinta junoq katzꞌaqaw mak chikij.
LUK 1:7 Pero rike na jinta juna kalkꞌoꞌal, ma ri Elizabet na utz taj kalanik yey kikabꞌichal e nimaq winaq chik.
LUK 1:8 Xopon kꞌu ruqꞌijol echiriꞌ ri Zacarías kukꞌ ri rachbꞌiꞌil e aj Abías keꞌkiloqꞌoj uqꞌij ri Dios.
LUK 1:9 Ekꞌu raj chakunel pa Rocho Dios kakiꞌan jun sorteo chaꞌ kakichaꞌo china chike kok chupa ri Luwar Santo pa ri Rocho Dios re kuꞌporoj incienso. Jekꞌulaꞌ xkiꞌan wa sorteo, y waꞌ xtzaq puwi ri Zacarías.
LUK 1:10 Echiriꞌ xopon ruꞌorayil re kaporox ri incienso, konoje ri ekꞌo chwach ri Luwar Santo ketajin che uꞌanik orar.
LUK 1:11 Ekꞌuchiriꞌ, jun ángel re ri Dios Qajawxel xwinaqir chwach ri Zacarías puwikiqꞌabꞌ ri altar pa kaporox wi ri incienso.
LUK 1:12 Echiriꞌ ri Zacarías xril ri ángel, xkam ranimaꞌ che y lik xuxiꞌij ribꞌ.
LUK 1:13 Noꞌj ri ángel xubꞌiꞌij che: —Zacarías, maxiꞌij awibꞌ, ma ri Dios utom chi ri atzꞌonom che. Rukꞌ kꞌu rawixoqil kakꞌojiꞌ jun akꞌajol yey Juan rubꞌiꞌ kakojo.
LUK 1:14 Kakꞌojiꞌ kꞌu kiꞌkotemal awukꞌ y lik e kꞌi ri kekiꞌkot che ri ralaxibꞌal rakꞌajol,
LUK 1:15 ma rire kuꞌana lik nim uqꞌij chwach ri Dios. Na kuchinaꞌaj ta vino y na kuchinaꞌaj ta yaꞌ re qꞌabꞌarik; y e ne chiriꞌ kꞌa matzem, rukꞌaꞌam chi lo ruchuqꞌabꞌ ri Santowilaj Ruxlabꞌixel ri Dios.
LUK 1:16 Y ruma kꞌu Rire, lik e kꞌi chike ri e aj Israel ketzelej jumul chik rukꞌ ri Dios Qajawxel y kakiya tanchi kibꞌ puqꞌabꞌ.
LUK 1:17 Ekꞌu wa Juan kanabꞌej lo chwach ri Qanimajawal rukꞌ ruchuqꞌabꞌ ri Ruxlabꞌixel ri Dios jelaꞌ pachaꞌ ri qꞌalajisanel Elías re ojertan. Yey ri chak koluꞌanaꞌ e kukoj utzil chomal chikixoꞌl ri tikawex kukꞌ ri kalkꞌoꞌal y kujalkꞌatij ri kinaꞌoj ri na e ta kojol tzij chaꞌ kuꞌana pachaꞌ ri kinaꞌoj ri kebꞌin jusukꞌ. Jekꞌuriꞌlaꞌ rire kebꞌuyijbꞌaꞌ ri tinamit chaꞌ kakikꞌul chi utz ri Qanimajawal —xcha ri ángel.
LUK 1:18 Ri Zacarías xutzꞌonoj kꞌu che: —¿Suꞌanik kakubꞌiꞌ nukꞌuꞌx che waꞌ? Ma riꞌin lik in nimalaj winaq chik yey jenelaꞌ ri wixoqil —xchaꞌ.
LUK 1:19 Ri ángel xukꞌul uwach, jewaꞌ xubꞌiꞌij che: —Riꞌin in Gabriel, intaqom lo ruma ri Dios Qajawxel chaꞌ kinoꞌlchꞌaꞌt awukꞌ y koꞌlnuyaꞌa wa utzilaj tzij chawe.
LUK 1:20 Noꞌj woꞌora katkanaj kanoq at meꞌt, y na utz ta kꞌu riꞌ katchꞌawik, ma na xakoj ta ri ximbꞌiꞌij chawe. Kopon na kꞌu ri qꞌij echiriꞌ kalax rakꞌajol; kꞌa ekꞌuchiriꞌ, utz katchꞌaw tanchik —xcha che.
LUK 1:21 Ekꞌu ri e kꞌo pan chwach ri Luwar Santo koyeꞌem jampalaꞌ kel lo ri Zacarías, yey lik xubꞌisoj kikꞌuꞌx ma lik xmayin chupa ri Luwar Santo pa ri Rocho Dios.
LUK 1:22 Echiriꞌ xel lo ri Zacarías, na utz ta kachꞌaw chike; xa kuꞌan chi kꞌutubꞌal rukꞌ ruqꞌabꞌ chike ma xkanaj kan meꞌt. Y jelaꞌ xkimaj usukꞌ kꞌo xkꞌut chwach ri Zacarías chupa ri Luwar Santo.
LUK 1:23 Echiriꞌ ri Zacarías xukꞌis taq ruqꞌijol kachakun chupa ri Rocho Dios, xeꞌek chirocho.
LUK 1:24 Kꞌa tekꞌuchiriꞌ, ri rixoqil Elizabet xkanajik yewaꞌ ixoq. Woꞌobꞌ ikꞌ kꞌu riꞌ xuchajij ribꞌ chirocho, e riꞌ na xel tubꞌi. Yey xaqi jewaꞌ ri kuchꞌobꞌo:
LUK 1:25 «E ri Nuqaw Dios ꞌanayom waꞌ chwe ma xinjuchꞌ kaꞌn che y xresaj ri chꞌamibꞌal we.»
LUK 1:26 Ikꞌowinaq chi kꞌu waqibꞌ ikꞌ riꞌ echiriꞌ ri ángel Gabriel xtaq lo ruma ri Dios chupa jun tinamit Nazaret rubꞌiꞌ, pa ri luwar re Galilea.
LUK 1:27 Xtaq lo rukꞌ jun qꞌapoj ali María rubꞌiꞌ, yey rire lik jusukꞌ rubꞌinik chwach ri Dios. Ri María unimam chik kakꞌuliꞌ rukꞌ jun ala José rubꞌiꞌ, yey rire e jun chike ri ralkꞌoꞌal kan ri rey David.
LUK 1:28 Ekꞌuchiriꞌ, xok bꞌi ri ángel pa kꞌo wi ri María, y jewaꞌ ri rutzil uwach xuyaꞌo: —¡Chatkiꞌkotoq! E riꞌat lik nim aqꞌij awalaxik chikixoꞌl konoje rixoqibꞌ. Ma ri Dios Qajawxel kꞌo awukꞌ yey akꞌulum ri unimal rutzil ukꞌuꞌx Rire —xcha che.
LUK 1:29 Ri María echiriꞌ xuta waꞌ wa chꞌaꞌtem, xsach unaꞌoj puwiꞌ y jewaꞌ xutzꞌonoj chiribꞌil ribꞌ: “¿Saꞌ keꞌelawi wa kabꞌiꞌx chwe?”
LUK 1:30 Ekꞌuchiriꞌ, ri ángel jewaꞌ xubꞌiꞌij che: —María, maxiꞌij awibꞌ, ma ariqom ri unimal rutzil ukꞌuꞌx ri Dios.
LUK 1:31 Ekꞌu woꞌora katkanajik at yewaꞌ ixoq, kalax jun awalabꞌ y Jesús rubꞌiꞌ kakojo.
LUK 1:32 Rire lik nim uqꞌij y kabꞌiꞌx che e Ukꞌajol ri Jun kataqan chwi ronoje. Ekꞌu ri Dios Qajawxel kuya puqꞌabꞌ kuꞌan rey jelaꞌ pachaꞌ ri rey David, rumam re ojertan.
LUK 1:33 Y kayaꞌtaj che kataqan puwi ri tinamit Israel yey rutaqanik na jinta utaqexik —xcha che.
LUK 1:34 Ekꞌu ri María xutzꞌonoj che ri ángel: —¿Suꞌanik kuꞌana riꞌ waꞌ, we riꞌin kꞌa jinta ne wachijil? —xchaꞌ.
LUK 1:35 Ri ángel xukꞌul uwach: —E ri Santowilaj Ruxlabꞌixel ri Dios kaqaj lo pawiꞌ y ruchuqꞌabꞌ ri Jun kataqan chwi ronoje, kuchꞌuq awiꞌ pachaꞌ sutzꞌ. E uwariꞌche rakꞌa kalaxik kabꞌiꞌx che e Santowilaj Ukꞌajol ri Dios.
LUK 1:36 Y chatape waꞌ, jenelaꞌ rawatz-achaqꞌ Elizabet umatzem chi jun akꞌa tobꞌ lik nimalaj winaq chik. E ri kabꞌiꞌx che na utz taj kalanik, woꞌora yewaꞌ ixoq y e uwaqibꞌ ikꞌ waꞌ.
LUK 1:37 Ma chwach ri Dios na jinta kꞌana kꞌayew —xcha che.
LUK 1:38 Ekꞌuchiriꞌ, xubꞌiꞌij ri María: —Riꞌin puqꞌabꞌ ri Nuqaw Dios in kꞌo wi. Ekꞌu Rire chuꞌana wukꞌ janipa ri xbꞌiꞌij la chwe —xchaꞌ. Ekꞌuchiriꞌ, ri ángel xel bꞌi chwach.
LUK 1:39 Kꞌo kꞌu jun qꞌij ri María xuyak bꞌi ribꞌ y lik kanik xumaj bꞌi ubꞌe chujuyubꞌ chupa jun tinamit re Judea.
LUK 1:40 Echiriꞌ xoponik, xok chirocho ri Zacarías y xuya rutzil uwach ri Elizabet.
LUK 1:41 Xew kꞌu xuta ri Elizabet ri rutzil uwach xyaꞌ ruma ri María, rakꞌa umatzem lik xuyikij ribꞌ y ri Santowilaj Ruxlabꞌixel ri Dios xqaj puwi ri Elizabet.
LUK 1:42 Ruma kꞌu riꞌ, lik ko xchꞌawik, jewaꞌ xubꞌiꞌij: —Nim aqꞌij awalaxik riꞌat chikixoꞌlibꞌal konoje rixoqibꞌ y nim uqꞌij rawalabꞌ amatzem.
LUK 1:43 ¿Chaꞌtaj yaꞌtajinaq kan waꞌ chwe riꞌin koꞌlbꞌina ruchu ri Qanimajawal wukꞌ?
LUK 1:44 Ma xew xinta ri rutzil nuwach xayaꞌo, na jampatana rakꞌa numatzem lik xuyikij ribꞌ ruma rukiꞌkotemal.
LUK 1:45 Nim aqꞌij awalaxik riꞌat ma xakoj ronoje janipa ri xbꞌiꞌx chawe ruma ri Dios Qajawxel yey waꞌ lik e kuꞌanaꞌ —xchaꞌ.
LUK 1:46 Ekꞌuchiriꞌ, ri María xubꞌiꞌij: «Riꞌin lik kanyak uqꞌij ri Dios Qajawxel,
LUK 1:47 y ri wanimaꞌ lik kakiꞌkot rukꞌ ri Dios Nukolobꞌenel;
LUK 1:48 ma xinjuchꞌ kaꞌn che, tobꞌ in jun raj chak na jinta ko nuwach. Chwi kꞌu riꞌ woꞌora konoje ri tikawex kakibꞌiꞌij na chwe: “Lik nim aqꞌij awalaxik riꞌat”
LUK 1:49 ma e ruchuqꞌabꞌ ri Dios Qajawxel lik saꞌch taq ri utz uꞌanom wukꞌ. Ekꞌu rubꞌiꞌ Rire lik nim uqꞌij Santo.
LUK 1:50 Y kukꞌut na ri rutzil ukꞌuꞌx chike janipa ri kꞌo xiꞌin ibꞌ pa kanimaꞌ chwach Rire.
LUK 1:51 Rire e ꞌanayom ukꞌiyal chak rukꞌ ruchuqꞌabꞌ. Usachisam ri kinaꞌoj ri kakiꞌan nim che kibꞌ,
LUK 1:52 y resam ri taqanik pakiqꞌabꞌ ri e nimaq taqanelabꞌ; yey uyakom kiqꞌij ri lik na jinta ko kiwach.
LUK 1:53 Chike ri kenumik, uyaꞌom kibꞌeyomalil; noꞌj ri bꞌeyomabꞌ xebꞌutaq bꞌi y na jinta kꞌo xuya bꞌi chike.
LUK 1:54 Ebꞌutoꞌom kꞌu rutinamit Israel, taq ri raj chak Rire; yey na umeskꞌutam ta ukꞌutik ri rutzil ukꞌuꞌx
LUK 1:55 na jinta utaqexik che ri Abraham y chike konoje ri ralkꞌoꞌal kanoq, jelaꞌ pachaꞌ rubꞌiꞌtisim chike ri qatiꞌ-qamam ojertan» xchaꞌ.
LUK 1:56 Y ri María laj oxibꞌ ikꞌ xkanaj kan chirocho ri Elizabet. Kꞌa tekꞌuchiriꞌ, xtzelej lo chirocho.
LUK 1:57 Ekꞌuchiriꞌ xopon ruqꞌij ri Elizabet re kutzir uwach, xalax ri ralabꞌ.
LUK 1:58 Y echiriꞌ ri ejeqel lo chunaqaj rire y taq ri kꞌo chux che xkito xutzir uwach ruma runimal rutzil ukꞌuꞌx ri Dios kꞌutum lo che, lik xekiꞌkot junam rukꞌ.
LUK 1:59 Echiriꞌ rakꞌa xukꞌis wajxaqibꞌ qꞌij ralaxik, xekꞌun lo ri kekojow ri retalil re circuncisión chaꞌ kakiꞌan waꞌ che. Yey rubꞌiꞌ xkaj kakikojo e Zacarías, jelaꞌ pachaꞌ rubꞌiꞌ ruqaw.
LUK 1:60 Noꞌj ruchu xubꞌiꞌij chike: —Na kakoj ta Zacarías che, ma Juan rubꞌiꞌ kakojik —xchaꞌ.
LUK 1:61 Xkibꞌiꞌij kꞌu che: —¿Suꞌbꞌe riꞌ? Ma na jinta junoq chikixoꞌl ri atz-chaqꞌ la jelaꞌ rubꞌiꞌ —xechaꞌ.
LUK 1:62 Ekꞌuchiriꞌ, rukꞌ ri kiqꞌabꞌ xkitzꞌonoj pan che ruqaw rakꞌa saꞌ ri bꞌiꞌaj karaj rire kakoj che.
LUK 1:63 Ekꞌu ruqaw rakꞌa xutzꞌonoj juperaj tzꞌalam re tzꞌibꞌanik y jewaꞌ xutzꞌibꞌaj chwach: «Juan rubꞌiꞌ kakojik.» Y konoje lik xkam kanimaꞌ che.
LUK 1:64 Kꞌa ekꞌuchiriꞌ, ri Zacarías xjaqataj ruchꞌawibꞌal y jelaꞌ utz xchꞌaw tanchik. Y xujeq kꞌu riꞌ kuyak uqꞌij ri Dios.
LUK 1:65 Y konoje ri tikawex katajin waꞌ pa kijolom rukꞌ xiꞌin ibꞌ, y xeꞌek kꞌu utzijoxik waꞌ chike konoje ri e kꞌo pa taq ri juyubꞌ re Judea.
LUK 1:66 Yey janipa kꞌu ri xetaw re rutzijoxik, xkikꞌol waꞌ pa kanimaꞌ y kakichꞌobꞌ kꞌu raqan: «¿Saꞌ nawi ruwach wa ralko ala echiriꞌ kanimarik?» kechaꞌ. Jewaꞌ xkibꞌiꞌij ma lik qꞌalaj ri Dios uqꞌalajisam ruchuqꞌabꞌ puwiꞌ.
LUK 1:67 Ekꞌuchiriꞌ, ri Zacarías ruqaw ri ralko ala xujeq kaqꞌalajisanik ma ri Santowilaj Ruxlabꞌixel ri Dios xqaj lo puwiꞌ; jekꞌuwaꞌ xubꞌiꞌij:
LUK 1:68 «Lik nim uqꞌij ri Dios Qajawxel re Israel ma xkꞌun qukꞌ re kojoꞌlukolobꞌej ri oj utinamit.
LUK 1:69 Xutaq lo jun Qakolobꞌenel lik kꞌo uchuqꞌabꞌ yey Rire elinaq lo chikixoꞌl ri ralkꞌoꞌal kan ri David, ri raj chak ri Dios.
LUK 1:70 Ma ojertan e ubꞌiꞌim lo waꞌ kuma ri qꞌalajisanelabꞌ e jusukꞌ chwach.
LUK 1:71 Ubꞌiꞌim kojoꞌlukolobꞌej pakiqꞌabꞌ ri tzel kebꞌilow qe y pakiqꞌabꞌ ri kechꞌamin qeꞌoj
LUK 1:72 chaꞌ kukꞌut ri rutzil ukꞌuꞌx chike ri qatiꞌ-qamam y na kumeskꞌutaj ta ri santowilaj utzij uꞌanom lo ojertan
LUK 1:73 puwi ri bꞌiꞌtisinik xuꞌan che ri qaqaw Abraham.
LUK 1:74 Ubꞌiꞌtisim kojoꞌlresaj pakiqꞌabꞌ ri tzel kebꞌilow qe chaꞌ jelaꞌ na rukꞌ ta xiꞌin ibꞌ kaqaloqꞌnimaj
LUK 1:75 ronoje qꞌij che ri qakꞌaslem rukꞌ jun santowilaj qabꞌinik qasilabꞌik y jusukꞌ qakꞌojiꞌik chwach Rire.
LUK 1:76 Ekꞌu riꞌat nukꞌajol, kabꞌiꞌx chawe at qꞌalajisanel re ri Jun kataqan chwi ronoje; ma katnabꞌej bꞌi chwach ri Qanimajawal re kabꞌiꞌij chike ri winaq kakiyijbꞌaꞌ ri kibꞌinik kisilabꞌik chwa rukꞌunibꞌal Rire.
LUK 1:77 Y katnabꞌej bꞌi chwach chaꞌ ri qatinamit kaketaꞌmaj ri Dios kebꞌukolobꞌej ma kukuy ri kimak.
LUK 1:78 Ekꞌu ri qa Dios, ruma ri unimal rutzil ukꞌuꞌx, kutaq lo ri Jun qukꞌ re chilaꞌ chikaj, waꞌ e pachaꞌ ri Qꞌijsaq re rusaqribꞌal
LUK 1:79 chaꞌ kebꞌuya pa qꞌijsaq ri e kꞌo pa qꞌequꞌm y e kꞌo chuxeꞌ ri kamik, yey kukꞌam qawach chupa ri bꞌe re ri utzil chomal» xchaꞌ.
LUK 1:80 Y rukꞌajol ri Zacarías katajin unimarik y katajin ukꞌojiꞌik uchuqꞌabꞌ chwach ri Dios. Xjeqiꞌ kꞌu pa taq luwar katzꞌintzꞌotik, xopon na ruqꞌijol echiriꞌ xukꞌut uwach chikiwach ri tinamit Israel.
LUK 2:1 Chupa taq laꞌ la qꞌij, ri Augusto ri nimalaj taqanel re Roma, xtaqan che kaꞌan jun ajilanik chike konoje ri tikawex re taq ri tinamit pa kataqan wi rire.
LUK 2:2 E nabꞌe ajilanik xtaqan che uꞌanik, yey xꞌaniꞌ waꞌ echiriꞌ ri Cirenio e aj wach re ri nación Siria.
LUK 2:3 Ruma wa ajilanik, konoje ri tikawex kebꞌek chikijujunal pa ri kitinamit chaꞌ kebꞌajilaxik.
LUK 2:4 E uwariꞌche ri José xel bꞌi chiriꞌ Galilea chupa raldea Nazaret pa jeqel wi, y xeꞌek Judea chupa raldea Belén pa xalax wi ri rey David, ma ri José ralkꞌoꞌal kan ri David.
LUK 2:5 Ruma kꞌu wa ajilanik, xeꞌek junam rukꞌ ri María, ri yaꞌtal chi che re rixoqil. Yey ri María yewaꞌ ixoq chik.
LUK 2:6 Ekꞌuchiriꞌ e kꞌo chi Belén, xopon ruqꞌijol kutzir uwach ri María.
LUK 2:7 Ruma kꞌu na xkiriq ta luwar pa mesón, xekꞌojiꞌ pa jun luwar re kiwarabꞌal chikop. Xalax kꞌu riꞌ ri nabꞌe ralabꞌ ri María. Rire xupis rakꞌa chi utz pa kꞌul y xukotzꞌobꞌaꞌ pa jun kanawa re kiwaꞌbꞌal chikop.
LUK 2:8 Chunaqaj Belén e kꞌo aj chajal bꞌexex kakikꞌowibꞌej raqꞌabꞌ pa juyubꞌ re kekichajij ri kibꞌexex.
LUK 2:9 Yey xaqikꞌateꞌt xwinaqir jun ángel re ri Dios Qajawxel chikiwach. Ewi runimal uchomalil ri Dios xutzij kiwiꞌ y rike lik xkixiꞌij kibꞌ che.
LUK 2:10 Pero ri ángel xubꞌiꞌij chike: «Mixiꞌij iwibꞌ, ma nukꞌamom lo utzilaj tzij chiwe re unimal kiꞌkotemal chike konoje rutinamit ri Dios.
LUK 2:11 Ma waqꞌij pa ri tinamit re ri rey David, xalax jun Kolobꞌenel iwe; e ri Qanimajawal, Ruchaꞌoꞌn lo ri Dios.
LUK 2:12 Ri kꞌutubꞌal re waꞌ e kiriq ri ralko akꞌa pistal pa kꞌul, kotzꞌol chupa jun kanawa re kiwaꞌbꞌal chikop» xcha chike.
LUK 2:13 Ekꞌu laꞌ la joqꞌotaj ukꞌiyal ángeles re chilaꞌ chikaj xaqikꞌateꞌt xewinaqir rukꞌ ri jun ángel, e riꞌ kakibꞌixoj rubꞌiꞌ ri Dios, jewaꞌ kakibꞌiꞌij:
LUK 2:14 «¡Nim uqꞌij ri Dios kꞌo chilaꞌ chikaj! Yey che ruwachulew, kꞌola ri utzil chomal re ri Dios kukꞌ ri kakikꞌul ri rutzil ukꞌuꞌx Rire» kechaꞌ.
LUK 2:15 Ekꞌuchiriꞌ xetzelej ri ángeles chilaꞌ chikaj, raj chajal bꞌexex jewaꞌ xkibꞌiꞌij chikiwach: «Joꞌ riꞌ kꞌa chilaꞌ Belén. Jeꞌqila wa xoluꞌbꞌiꞌij ri Dios Qajawxel chiqe» xechaꞌ.
LUK 2:16 Lik kꞌu kebꞌanik xebꞌek y xeꞌkiriqa ri María, ri José yey ri ralko akꞌa kotzꞌol chupa ri kanawa re kiwaꞌbꞌal chikop.
LUK 2:17 Yey echiriꞌ xkil uwach ri ralko akꞌa, xkitzijoj ri xubꞌiꞌij ri ángel chike chwi Rire.
LUK 2:18 Y konoje ri xetaw re waꞌ, lik xkam kanimaꞌ che ri kakitzijoj raj chajal bꞌexex.
LUK 2:19 Noꞌj ri María lik ukꞌolom ronoje waꞌ pa ranimaꞌ y lik kuchꞌobꞌ raqan puwiꞌ.
LUK 2:20 Tekꞌuchiriꞌ, raj chajal bꞌexex xetzelejik, kebꞌixonik y kakiyak uqꞌij ri Dios ruma ronoje ri xkilo y xkito, ma e xuꞌano pachaꞌ ri bꞌiꞌim bꞌi chike ruma ri ángel.
LUK 2:21 Echiriꞌ xukꞌis wajxaqibꞌ qꞌij ralaxik ri ralko akꞌa, xkoj ri retalil re circuncisión che. Y Jesús rubꞌiꞌ xkojik, ma echiriꞌ kꞌamajaꞌ ne kamatzexik, ri ángel xubꞌiꞌij e bꞌiꞌaj waꞌ kakoj che.
LUK 2:22 Xopon kꞌu ri qꞌij echiriꞌ chirajawaxik ri José y ri María kebꞌek Jerusalem ruma ri kijosqꞌikil chwach ri Dios, jelaꞌ pachaꞌ ri kꞌo chupa ri taqanik re ri Moisés. Xkikꞌam kꞌu bꞌi ri ralko akꞌa Jerusalem chaꞌ kakiya puqꞌabꞌ ri Dios Qajawxel.
LUK 2:23 Xkiꞌan waꞌ ma jewaꞌ tzꞌibꞌital chupa Rutzij Upixabꞌ ri Dios Qajawxel: «Konoje ri raltaq ko alabꞌo kebꞌalax nabꞌe, keyaꞌ puqꞌabꞌ ri Dios Qajawxel» kachaꞌ.
LUK 2:24 Xebꞌek kꞌu riꞌ chaꞌ keꞌkiyaꞌa ri kiqasaꞌn pachaꞌ ri kubꞌiꞌij chupa Rutzij Upixabꞌ ri Dios Qajawxel: «Jukꞌulaj xmukur o jukꞌulaj raltaq ko palomax» kachaꞌ.
LUK 2:25 Chiriꞌ Jerusalem kꞌo jun achi Simeón rubꞌiꞌ. Rire lik jusukꞌ rubꞌinik usilabꞌik, lik kukuxtaj ri Dios y royeꞌem ri kolobꞌetajik re ri tinamit Israel. Ri Santowilaj Ruxlabꞌixel ri Dios kꞌo rukꞌ
LUK 2:26 y uqꞌalajisam chi che, na kakam tana we na karil tubꞌi uwach Ruchaꞌoꞌn lo ri Dios.
LUK 2:27 Ekꞌu waꞌchi xunaꞌ pa ranimaꞌ ruma ri Ruxlabꞌixel ri Dios keꞌek pa ri Rocho Dios, y xeꞌek kꞌut. Ekꞌuchiriꞌ, ruchu-uqaw ri ralko akꞌa Jesús xkikꞌam lo pa ri Rocho Dios chaꞌ kakiꞌan rukꞌ pachaꞌ ri kubꞌiꞌij ri taqanik re ri Tzij Pixabꞌ.
LUK 2:28 Ewi ri Simeón xuqꞌaluj ri ralko akꞌa y xuyak uqꞌij ri Dios, jewaꞌ xubꞌiꞌij:
LUK 2:29 «Lal Dios Qajawxel, riꞌin xa in jun aj chak la. Ekꞌu woꞌora utz kinkam chi utzil chomal, ma xꞌan la janipa ri bꞌiꞌtisim la chwe;
LUK 2:30 ya xinwil uwach ri Kolobꞌenel,
LUK 2:31 ri yaꞌom la chikiwach konoje taq ri tinamit che ruwachulew.
LUK 2:32 Y Rire e Qꞌijsaq kuqꞌalajisaj ri bꞌe re ri Dios chike konoje taq rukꞌiyal kiwach ri tikawex che ruwachulew, yey ruma Rire kayak uqꞌij ri tinamit la Israel» xchaꞌ.
LUK 2:33 Ruchu-uqaw ri Jesús lik kakam kanimaꞌ che taq ri kabꞌiꞌx chwi ri ralko akꞌa.
LUK 2:34 Ekꞌuchiriꞌ, ri Simeón xebꞌuꞌan bendecir. Yey jewaꞌ xubꞌiꞌij che ri María ruchu ri Jesús: —¡Chatapeꞌ! Ruma wa ralko akꞌa lik e kꞌi chike ri tinamit Israel keyaktajik yey lik e kꞌi ri ketzaqik. Ma Rire yaꞌtal lo ruma ri Dios re jun kꞌutubꞌal; noꞌj ukꞌiyal tikawex na kakikꞌul taj y lik tzel kakilo.
LUK 2:35 Y jekꞌulaꞌ kaqꞌalajinik saꞌ ri kꞌo pa kanimaꞌ ukꞌiyal tikawex, we utz o na utz taj. Yey kambꞌiꞌij kꞌu chawe riꞌat: Kopon na jun qꞌij echiriꞌ lik kꞌax kunaꞌ akꞌuꞌx, ma e kuꞌana pachaꞌ kikꞌowisax juna kuchilo pa rawanimaꞌ —xchaꞌ.
LUK 2:36 Chiriꞌ kꞌu riꞌ kꞌo jun ixoq qꞌalajisanel Ana rubꞌiꞌ, umiꞌal ri Fanuel, ri ralkꞌoꞌal kan ri Aser. Rire lik nimalaj winaq chik. Wuqubꞌ junabꞌ kꞌuliꞌnaq echiriꞌ xkam ri rachijil,
LUK 2:37 yey ya e ochenta y cuatro junabꞌ riꞌ malkaꞌn kanoq. Rire xaqi kꞌo pa ri Rocho Dios y kuloqꞌnimaj ri Dios rukꞌ ayuno y rukꞌ oración chipaqꞌij chichaqꞌabꞌ.
LUK 2:38 Xopon kꞌu pan riꞌ ri Ana pa kꞌo wi ri Jesús y xtioxin chwach ri Dios. Ekꞌuchiriꞌ, xujeqo kachꞌaꞌt puwi ri ralko akꞌa chike konoje ri koyeꞌem ri kolobꞌetajik re Jerusalem.
LUK 2:39 Echiriꞌ ruchu-uqaw ri Jesús xkikꞌis uꞌanik ronoje ri tzꞌibꞌital chupa Rutzij Upixabꞌ ri Dios, xetzelej tanchi Galilea chupa ri tinamit Nazaret.
LUK 2:40 Y ri ralko akꞌa katajin ukꞌiyik, katajin ukꞌojiꞌik uchuqꞌabꞌ y katajin ukꞌojiꞌik unaꞌoj. Yey ri unimal rutzil ukꞌuꞌx ri Dios kꞌo rukꞌ.
LUK 2:41 Ronoje junabꞌ ruchu-uqaw ri Jesús kebꞌek Jerusalem re keꞌkiꞌana ri nimaqꞌij Pascua.
LUK 2:42 Echiriꞌ ri Jesús xukꞌis kabꞌlajuj junabꞌ, ruchu-uqaw xebꞌek Jerusalem jelaꞌ pachaꞌ xex kakiꞌan wi, yey xkikꞌam bꞌi ri Jesús kukꞌ.
LUK 2:43 Ekꞌuchiriꞌ xkꞌis ri nimaqꞌij, ruchu-uqaw xkimaj lo kibꞌe. Noꞌj ri Jesús xkanaj kan Jerusalem, yey waꞌ na xkinaꞌbꞌej ta ruchu-uqaw.
LUK 2:44 E pa kinaꞌoj rike petinaq ri Jesús chikixoꞌl ri e kachbꞌiꞌil. Xebꞌin kꞌu jun qꞌij; kꞌa tekꞌuchiriꞌ, xkijeq kakitzukuj ri Jesús chikixoꞌl ri katz-kichaqꞌ y taq ri ketaꞌam kiwach,
LUK 2:45 pero na xkiriq taj. Ruma kꞌu riꞌ, xetzelej pa ri tinamit Jerusalem chaꞌ kekitzukuj chilaꞌ.
LUK 2:46 Ekꞌuchiriꞌ ikꞌowinaq chi oxibꞌ qꞌij kakitzukuj, xeꞌkiriqa ri Jesús chupa ri Rocho Dios tzꞌul chikixoꞌl doctorabꞌ re ri tzijpixabꞌ. Rire kebꞌutataꞌ y kuꞌan tzꞌonobꞌal chike.
LUK 2:47 Y konoje ri ketaw re lik kakam kanimaꞌ che runaꞌoj y che ri kꞌulubꞌal uwach kuꞌan chike.
LUK 2:48 Echiriꞌ xkil waꞌ ruchu-uqaw, lik xkam kanimaꞌ che y jewaꞌ xubꞌiꞌij ruchu che: —Walabꞌ, ¿suꞌchak jewaꞌ kaꞌan chiqe? Raqaw y riꞌin lik paxinaq chi qakꞌuꞌx che atzukuxik —xcha che.
LUK 2:49 Ekꞌu ri Jesús xubꞌiꞌij chike: —¿Suꞌchak kintzukuj alaq? ¿Na etaꞌam ta nebꞌa alaq pa kinriqitaj wi? Ma lik chirajawaxik kinkꞌojiꞌ che ri chak re ri Nuqaw —xcha chike.
LUK 2:50 Noꞌj rike na xkimaj tane usukꞌ ri xubꞌiꞌij chike.
LUK 2:51 Tekꞌuchiriꞌ, ri Jesús xtzelej Nazaret junam kukꞌ ruchu-uqaw y e riꞌ lik uyaꞌom ribꞌ chitaqik kuma rike. Ekꞌu ruchu katajin chukꞌuꞌx taq waꞌ y lik ukꞌolom ronoje pa ranimaꞌ.
LUK 2:52 Y ri Jesús katajin unimarik y katajin ukꞌojiꞌik más runaꞌoj ri Dios rukꞌ. Ronoje ri kuꞌano lik utz chwach ri Dios y chikiwach konoje ri tikawex.
LUK 3:1 Chupa ri woꞌlajuj junabꞌ re rutaqanik ri nimalaj taqanel Tiberio, ri aj wach re Judea e ri Poncio Pilato, ri aj wach re Galilea e ri Herodes, ri aj wach re Iturea y re Traconite e ri Felipe ruchaqꞌ ri Herodes, y ri aj wach re Abilinia e ri Lisanias.
LUK 3:2 Ekꞌu ri Anás y ri Caifás e kajawal raj chakunel pa Rocho Dios. Chupa taq kꞌu riꞌ laꞌ la qꞌij, ri Dios xuya rutzij che ri Juan rukꞌajol ri Zacarías, chupa ri luwar katzꞌintzꞌotik.
LUK 3:3 Rire xel bꞌi y xeꞌek che ronoje taq ri luwar e kꞌo chuchiꞌ ri nimayaꞌ Jordán re kubꞌiꞌij chike ri winaq kakitzelej kitzij chwach ri Dios, kakikꞌul ri bautismo, y jekꞌulaꞌ kakuytaj ri kimak.
LUK 3:4 Wa xuꞌan ri Juan e ri tzꞌibꞌital kan chupa ruchꞌaꞌtem ri qꞌalajisanel Isaías, pa kubꞌiꞌij wi: Katataj uqul jun tzijonel kasikꞌin chupa ri luwar katzꞌintzꞌotik, jewaꞌ kubꞌiꞌij: “Yijbꞌaꞌ pana alaq ri bꞌe re ri Qanimajawal; sukꞌupij alaq rubꞌe Rire.
LUK 3:5 Chirajawaxik kꞌut kapaqꞌ ronoje juyubꞌ y kabꞌalix upa ronoje siwan; kasukꞌupix ri nimabꞌe na jusukꞌ taj y kasukꞌupix kꞌu uwiꞌ chi utz.
LUK 3:6 Y konoje kꞌu ri winaq kakil na ri kolobꞌetajik kuya ri Dios” kachaꞌ.
LUK 3:7 Ukꞌiyal kꞌu winaq xekꞌun rukꞌ ri Juan chaꞌ kakikꞌul ri bautismo kuya rire. Ekꞌu rire jewaꞌ xubꞌiꞌij chike: —¡Ralaq pachaꞌ alaq jupuq chi kumatz! ¿China xbꞌiꞌn re we utz kesaj ibꞌ alaq chwach ri unimal kꞌaxkꞌobꞌik kutaq lo ri Dios pawiꞌ alaq?
LUK 3:8 Bꞌina alaq jusukꞌ chaꞌ jelaꞌ kaqꞌalajinik jalkꞌatim chi ri bꞌinik silabꞌik alaq, jelaꞌ pachaꞌ ri taqal chike ri kitzelem chi kitzij. Y machꞌobꞌ ne alaq chi ibꞌil ibꞌ alaq waꞌ: “Riꞌoj utz qaꞌanom ma oj ralkꞌoꞌal kan ri Abraham.” Ma riꞌin kambꞌiꞌij che alaq, we xraj ri Dios, utz kuꞌan ralkꞌoꞌal ri Abraham tobꞌ ne che taq waꞌbꞌaj.
LUK 3:9 Yey jikil chi ne uwach ruqꞌatbꞌal tzij ri Dios pawiꞌ alaq, e pachaꞌ juna achi uyakom chi ri ikaj chwi ri ratzꞌayaq ri cheꞌ; ekꞌu taq ri cheꞌ na kuya ta chomilaj jiqꞌobꞌal, kapoqꞌix bꞌi y kakꞌaq pa aqꞌ —xcha chike.
LUK 3:10 Ekꞌu ri winaq jewaꞌ xkitzꞌonoj che: —¿Saꞌ kꞌu riꞌ ri kaqaꞌano chaꞌ kuꞌan chom ri qabꞌinik qasilabꞌik? —xechaꞌ.
LUK 3:11 Y rire xukꞌul uwach chike: —China ri kꞌo kaꞌibꞌ uqꞌuꞌ, chusipaj jun che ri na jinta uqꞌuꞌ; y china ri lik kꞌo katij rukꞌ, chuyaꞌa ke ri na jinta kꞌo kakitijo —xcha chike.
LUK 3:12 Ekꞌu raj tzꞌonol puaq re tojonik xebꞌopon rukꞌ ri Juan chaꞌ kakikꞌul ri bautismo y jewaꞌ xkitzꞌonoj che: —Lal tijonel, ¿saꞌ ri chirajawaxik kaqaꞌan riꞌoj? —xechaꞌ.
LUK 3:13 Y rire jewaꞌ xubꞌiꞌij chike: —Xew chitzꞌonoj ri puaq re tojonik bꞌiꞌtal ruma ri taqanel romano; mitzꞌonoj uwiꞌ —xchaꞌ.
LUK 3:14 Ekꞌu ri soldados xkitzꞌonoj che, jewaꞌ xkibꞌiꞌij: —Yey riꞌoj, ¿saꞌ ri chirajawaxik kaqaꞌano? —xechaꞌ. Ewi jewaꞌ xubꞌiꞌij chike: —Mimaj ubꞌitaq re junoq y miꞌan ri kixibꞌij upa junoq rukꞌ kamik. Mikoj umak ri na jinta umak y chixkiꞌkota rukꞌ riwajil —xchaꞌ.
LUK 3:15 Taq ri winaq lik koyeꞌem rukꞌunibꞌal ri Cristo y konoje kakitzꞌonobꞌej chikibꞌil kibꞌ we ri Juan e ri Cristo, Ruchaꞌoꞌn lo ri Dios.
LUK 3:16 Ruma kꞌu waꞌ, ri Juan jewaꞌ xubꞌiꞌij chike: —Riꞌin paqatzij wi kanya ri bautismo che alaq rukꞌ yaꞌ; noꞌj kꞌo Jun katajin loq más kꞌo uwach y más kꞌo uchuqꞌabꞌ chinuwa riꞌin. Na taqal tane chwe riꞌin kankir ruwach ruxajabꞌ. Ri bautismo kuya Rire che alaq, e rukꞌ ri Santowilaj Ruxlabꞌixel ri Dios y rukꞌ aqꞌ.
LUK 3:17 Ri kuꞌano e pachaꞌ juna achi rukꞌaꞌam chi ri puꞌbꞌal uwach ri trigo puqꞌabꞌ chaꞌ naꞌl kujosqꞌij waꞌ y karesaj rupukꞌ chupa. Tekꞌuchiriꞌ, kujok ri trigo y kukꞌol chupa rukꞌolibꞌal. Ekꞌu rupukꞌ kuporoj pa ri jun aqꞌ na jinta utaqexik katenowik —xchaꞌ.
LUK 3:18 Jekꞌulaꞌ, rukꞌ ukꞌiyal pixabꞌanik ri Juan kutzijoj ri Utzilaj Tzij chike ri winaq.
LUK 3:19 Y xuchꞌaꞌbꞌej ne upa ri rey Herodes ruma uꞌanom rixoqil che ri Herodías yey waꞌ wiꞌxoq e rixoqil ri Felipe ruchaqꞌ ri Herodes. Xuchꞌaꞌbꞌej kꞌu upa ruma taq ronoje ri na utz taj uꞌanom.
LUK 3:20 Yey ri Herodes xuya ne más uwiꞌ ri na utz taj uꞌanom, ma xtaqan che kayaꞌ ri Juan pa cárcel.
LUK 3:21 Kꞌo kꞌu jun qꞌij echiriꞌ lik ukꞌiyal tikawex kakikꞌul ri bautismo, xopon ri Jesús y xukꞌul ri bautismo. Echiriꞌ katajin che uꞌanik orar, xjaqataj ruwa kaj
LUK 3:22 y ri Santowilaj Ruxlabꞌixel ri Dios xqaj lo puwiꞌ pachaꞌ juna palomax. Y xchꞌaw lo Jun chilaꞌ chikaj, jewaꞌ kubꞌiꞌij: «At riꞌat Nukꞌajol, y lik kꞌax katinnaꞌo. Lik kinkiꞌkot chawe» xcha che.
LUK 3:23 Ri Jesús laj treinta rujunabꞌ echiriꞌ xujeq ri chak taqom lo che uꞌanik ruma ri Dios. Kabꞌiꞌx che ri Jesús, e ukꞌajol ri José. Yey ri José, e ralkꞌoꞌal ri Elí.
LUK 3:24 Ri Elí e ralkꞌoꞌal ri Matat; ri Matat e ralkꞌoꞌal ri Leví; ri Leví e ralkꞌoꞌal ri Melqui; ri Melqui e ralkꞌoꞌal ri Jana; ri Jana e ralkꞌoꞌal ri José;
LUK 3:25 ri José e ralkꞌoꞌal ri Matatías; ri Matatías e ralkꞌoꞌal ri Amós; ri Amós e ralkꞌoꞌal ri Nahum; ri Nahum e ralkꞌoꞌal ri Esli; ri Esli e ralkꞌoꞌal ri Nagai;
LUK 3:26 ri Nagai e ralkꞌoꞌal ri Maat; ri Maat e ralkꞌoꞌal ri Matatías; ri Matatías e ralkꞌoꞌal ri Semei; ri Semei e ralkꞌoꞌal ri José; ri José e ralkꞌoꞌal ri Judá;
LUK 3:27 ri Judá e ralkꞌoꞌal ri Joana; ri Joana e ralkꞌoꞌal ri Resa; ri Resa e ralkꞌoꞌal ri Zorobabel; ri Zorobabel e ralkꞌoꞌal ri Salatiel; ri Salatiel e ralkꞌoꞌal ri Neri;
LUK 3:28 ri Neri e ralkꞌoꞌal ri Melqui; ri Melqui e ralkꞌoꞌal ri Adi; ri Adi e ralkꞌoꞌal ri Cosam; ri Cosam e ralkꞌoꞌal ri Elmodam; ri Elmodam e ralkꞌoꞌal ri Er;
LUK 3:29 ri Er e ralkꞌoꞌal ri Josué; ri Josué e ralkꞌoꞌal ri Eliezer; ri Eliezer e ralkꞌoꞌal ri Jorim; ri Jorim e ralkꞌoꞌal ri Matat;
LUK 3:30 ri Matat e ralkꞌoꞌal ri Leví; ri Leví e ralkꞌoꞌal ri Simeón; ri Simeón e ralkꞌoꞌal ri Judá; ri Judá e ralkꞌoꞌal ri José; ri José e ralkꞌoꞌal ri Jonán; ri Jonán e ralkꞌoꞌal ri Eliaquim;
LUK 3:31 ri Eliaquim e ralkꞌoꞌal ri Melea; ri Melea e ralkꞌoꞌal ri Mainán; ri Mainán e ralkꞌoꞌal ri Matata; ri Matata e ralkꞌoꞌal ri Natán;
LUK 3:32 ri Natán e ralkꞌoꞌal ri David; ri David e ralkꞌoꞌal ri Isaí; ri Isaí e ralkꞌoꞌal ri Obed; ri Obed e ralkꞌoꞌal ri Booz; ri Booz e ralkꞌoꞌal ri Salmón; ri Salmón e ralkꞌoꞌal ri Naasón;
LUK 3:33 ri Naasón e ralkꞌoꞌal ri Aminadab; ri Aminadab e ralkꞌoꞌal ri Aram; ri Aram e ralkꞌoꞌal ri Esrom; ri Esrom e ralkꞌoꞌal ri Fares; ri Fares e ralkꞌoꞌal ri Judá;
LUK 3:34 ri Judá e ralkꞌoꞌal ri Jacob; ri Jacob e ralkꞌoꞌal ri Isaac; ri Isaac e ralkꞌoꞌal ri Abraham; ri Abraham e ralkꞌoꞌal ri Taré; ri Taré e ralkꞌoꞌal ri Nacor;
LUK 3:35 ri Nacor e ralkꞌoꞌal ri Serug; ri Serug e ralkꞌoꞌal ri Ragau; ri Ragau e ralkꞌoꞌal ri Peleg; ri Peleg e ralkꞌoꞌal ri Heber; ri Heber e ralkꞌoꞌal ri Sala;
LUK 3:36 ri Sala e ralkꞌoꞌal ri Cainán; ri Cainán e ralkꞌoꞌal ri Arfaxad; ri Arfaxad e ralkꞌoꞌal ri Sem; ri Sem e ralkꞌoꞌal ri Noé; ri Noé e ralkꞌoꞌal ri Lamec;
LUK 3:37 ri Lamec e ralkꞌoꞌal ri Matusalén; ri Matusalén e ralkꞌoꞌal ri Enoc; ri Enoc e ralkꞌoꞌal ri Jared; ri Jared e ralkꞌoꞌal ri Mahalaleel; ri Mahalaleel e ralkꞌoꞌal ri Cainán;
LUK 3:38 ri Cainán e ralkꞌoꞌal ri Enós; ri Enós e ralkꞌoꞌal ri Set; ri Set e ralkꞌoꞌal ri Adán; yey ri Adán e ralkꞌoꞌal ri Dios.
LUK 4:1 Ekꞌu ri Jesús xel bꞌi che ri luwar re ri nimayaꞌ Jordán yey lik kꞌo ri Ruxlabꞌixel ri Dios rukꞌ. Xkꞌam kꞌu bꞌi ruma ri Ruxlabꞌixel ri Dios pa jun luwar katzꞌintzꞌotik.
LUK 4:2 Xkꞌojiꞌ chilaꞌ cuarenta qꞌij y xkꞌam upa ruma ritzel winaq. Yey chupa taq waꞌ wa qꞌij na jinta kꞌo xutijo. Chukꞌisbꞌal kꞌu re ri cuarenta qꞌij, lik xnumik.
LUK 4:3 Ekꞌuchiriꞌ, ritzel winaq jewaꞌ xubꞌiꞌij che: —We qatzij at Ukꞌajol ri Dios, chat-taqan che chaꞌ waꞌbꞌaj kuꞌan wa —xcha che.
LUK 4:4 Ri Jesús xukꞌul uwach: —Jewaꞌ tzꞌibꞌital kan chupa Rutzij Upixabꞌ ri Dios: Na xew ta ruma ri wa e kꞌas ri tikawex; ma e kꞌaslik ruma taq ronoje rubꞌiꞌim ri Dios —xchaꞌ.
LUK 4:5 Ekꞌuchiriꞌ, ritzel winaq xukꞌam bꞌi ri Jesús chutzaꞌm jun nimalaj juyubꞌ y xa pa joqꞌotaj xukꞌut kꞌu chwach, ronoje ri taqanik kaꞌan puwi taq ri tinamit che ruwachulew
LUK 4:6 y jewaꞌ xubꞌiꞌij che: —Ronoje wa kawilo rukꞌ ronoje ruchomalil taq waꞌ, kanya paqꞌabꞌ, ma yaꞌtal kan panuqꞌabꞌ riꞌin yey panuqꞌabꞌ kꞌo wi china che kuaj kanya wi.
LUK 4:7 Kanya kꞌu ronoje waꞌ paqꞌabꞌ riꞌat we kaxukubꞌaꞌ awibꞌ chinuwach y kaloqꞌnimaj nuqꞌij —xcha che.
LUK 4:8 Ri Jesús xukꞌul uwach: —Chatela chinuwach Satanás, ma jewaꞌ tzꞌibꞌital kan chupa Rutzij Upixabꞌ ri Dios: Lik chaloqꞌnimaj uqꞌij ri Dios Qajawxel y xew Rire chanimaj uqꞌij —xchaꞌ.
LUK 4:9 Tekꞌuchiriꞌ, ritzel xukꞌam bꞌi ri Jesús chupa ri tinamit Jerusalem kꞌa chikaj che ruwi ri Rocho Dios y jewaꞌ xubꞌiꞌij che: —We qatzij at Ukꞌajol ri Dios, chakꞌaqa bꞌi awibꞌ kꞌa chuꞌlew
LUK 4:10 yey na jinta kꞌo kakꞌulumaj, ma jewaꞌ tzꞌibꞌital kan chupa Rutzij Upixabꞌ ri Dios: Ri Dios kebꞌutaq lo ru ángeles awukꞌ chaꞌ katkichajij.
LUK 4:11 Katkichap kꞌu rukꞌ ri kiqꞌabꞌ chaꞌ na kaꞌchiqa ta rawaqan che juna abꞌaj —xchaꞌ.
LUK 4:12 Ri Jesús xukꞌul uwach: —Jewaꞌ tzꞌibꞌital kan chupa Rutzij Upixabꞌ ri Dios: Makꞌam upa ri Dios Qajawxel —xchaꞌ.
LUK 4:13 Echiriꞌ ritzel winaq na xuriq ta chik suꞌanik kukꞌam upa ri Jesús, xel chiriꞌ y xroyeꞌej na kꞌu riꞌ jampalaꞌ kukꞌam tanchi upa.
LUK 4:14 Ekꞌuchiriꞌ, ri Jesús xeꞌek tanchi Galilea y lik kꞌo ruchuqꞌabꞌ ri Ruxlabꞌixel ri Dios rukꞌ. Y xeꞌek utzijoxik puwi Rire pa taq tinamit y pa taq raldeas re Galilea.
LUK 4:15 Kakꞌutun kꞌu pa taq sinagogas y konoje ri ketaw re lik kakiyak uqꞌij.
LUK 4:16 Xopon kꞌu ri Jesús chupa ri tinamit Nazaret pa xkꞌiy wi. Y chupa ri qꞌij re uxlanibꞌal xok chupa ri sinagoga jelaꞌ pachaꞌ xex kuꞌan wi. Xtakꞌiꞌ kꞌu riꞌ chaꞌ karajilaj Rutzij Upixabꞌ ri Dios.
LUK 4:17 Y xyaꞌ che Rire ri jubꞌotaj wuj re ri qꞌalajisanel Isaías. Y echiriꞌ xujaq upa, xuriq pa kubꞌiꞌij wi:
LUK 4:18 Ri Ruxlabꞌixel ri Dios Qajawxel kꞌo panuwiꞌ, ma inuchaꞌom loq chaꞌ koꞌlnuyaꞌa ri Utzilaj Tzij chike ri nibꞌaꞌibꞌ. Inutaqom loq chaꞌ kambꞌochiꞌij kikꞌuꞌx ri lik e kꞌo pa bꞌis, koꞌlnutzijoj kelebꞌal lo ke ri e kꞌo chi presoyil, kebꞌenutzuꞌnisaj ri e potzꞌ, kebꞌenuwesaj lo pa kꞌax ri lik kitijom kꞌaxkꞌolil,
LUK 4:19 y koꞌlnutzijoj ruqꞌijol ri kꞌutubꞌal re ri rutzil ukꞌuꞌx ri Dios Qajawxel.
LUK 4:20 Ekꞌuchiriꞌ xukꞌis rajilaxik Rutzij Upixabꞌ ri Dios, xubꞌoto y xuya tanchi che ri aj chak re ri sinagoga, y xtzꞌuyiꞌ chikiwach ri e kꞌo chiriꞌ. Y konoje lik kakitzutzaꞌ pan uwach.
LUK 4:21 Ekꞌuchiriꞌ, xubꞌiꞌij chike: «Waꞌ wa xinwajilaj che Ruchꞌaꞌtem ri Dios, waqꞌij xujeq bꞌi rilik chiwach alaq» xchaꞌ.
LUK 4:22 Konoje ri xetaw re, kakiyak uqꞌij y lik kaminaq kanimaꞌ che ri chomilaj uchꞌaꞌtem, jewaꞌ kakibꞌiꞌij: «¿Na e ta nebꞌa ukꞌajol ri José waꞌ?» kechaꞌ.
LUK 4:23 Y ri Jesús xubꞌiꞌij chike: «Laj ne kabꞌiꞌij alaq chwe: “Kunanel, chakunaj awibꞌ chawibꞌil awibꞌ. Chaꞌana kꞌu riꞌ chupa wa tinamit taq ri kꞌutubꞌal re ruchuqꞌabꞌ ri Dios jelaꞌ pachaꞌ ri qatom xaꞌan chilaꞌ Capernaúm” kacha alaq chwe.»
LUK 4:24 Y xubꞌiꞌij tanchi waꞌ: «Paqatzij wi kambꞌiꞌij che alaq: Na jinta juna qꞌalajisanel kakꞌul chi utz chupa rutinamit.
LUK 4:25 Paqatzij wi kambꞌiꞌij che alaq: Rojertan lik e kꞌi rixoqibꞌ e malkaꞌnibꞌ e kꞌo chupa ri tinamit Israel chwach ri qꞌalajisanel Elías echiriꞌ na xuꞌan ta jabꞌ oxibꞌ junabꞌ rukꞌ nikꞌaj y xpe kꞌu ri jun unimal numik chupa ronoje wa tinamit.
LUK 4:26 Na rukꞌ ta kꞌu riꞌ, ri Dios na xutaq tubꞌi ri Elías rukꞌ junoq chike wa malkaꞌnibꞌ aj Israel; ma e xutaq bꞌi rukꞌ jun ixoq malkaꞌn aj Sarepta, jun tinamit kꞌo chunaqaj ri tinamit Sidón.
LUK 4:27 Yey ojertan lik e kꞌi ri kꞌo ri yabꞌil lepra chike echiriꞌ ri qꞌalajisanel Eliseo kꞌo chupa ri tinamit Israel. Na rukꞌ ta kꞌu riꞌ, na jinta junoq chike xkunutajik, ma xew xkunutaj ri Naamán, ri jun aj Siria» xchaꞌ.
LUK 4:28 Echiriꞌ xkita waꞌ, konoje ri e kꞌo chupa ri sinagoga lik xpe koyowal.
LUK 4:29 Xeyaktaj kꞌut y xkesaj lo ri Jesús pa ri tinamit y xkikꞌam bꞌi kꞌa chutzaꞌm jun nimalaj juyubꞌ chaꞌ kakikꞌaq bꞌi pa siwan.
LUK 4:30 Noꞌj ri Jesús xa xikꞌow chikixoꞌl y xeꞌek.
LUK 4:31 Ri Jesús xopon chupa ri tinamit Capernaúm re Galilea y xujeq kakꞌutun chikiwach ri winaq chupa taq ri qꞌij re uxlanibꞌal.
LUK 4:32 Y konoje lik kakam kanimaꞌ che, ma ruma rukꞌutunik kaqꞌalajinik lik kꞌo uwach.
LUK 4:33 Kꞌo kꞌu chiriꞌ chupa ri sinagoga jun achi kꞌo puqꞌabꞌ jun itzelilaj uxlabꞌixel, yey waꞌ lik ko xchꞌawik, jewaꞌ xubꞌiꞌij:
LUK 4:34 —Jesús, lal aj Nazaret, ¿suꞌchak koꞌlmina ibꞌ la qukꞌ? ¿Lal kami petinaq riꞌ re koꞌlsacha la qawach? Riꞌin wetaꞌam lal chinoq, rilal lal ri Santo Kꞌajolaxel re ri Dios —xchaꞌ.
LUK 4:35 Ekꞌu ri Jesús xuqꞌatej, jewaꞌ xubꞌiꞌij che: —¡Matchꞌaꞌt chik! Chatelubꞌi che laꞌchi —xchaꞌ. Ewi ri itzel uxlabꞌixel xukꞌaq rachi pulew chikixoꞌl ri winaq y xel bꞌi rukꞌ. Yey na jinta kꞌax xuꞌan kan che.
LUK 4:36 Y konoje ri winaq lik kakam kanimaꞌ che y jewaꞌ kakibꞌiꞌij chikiwach: «¿Saꞌ chi chꞌaꞌtemal waꞌ? Ma lik kꞌo puqꞌabꞌ kebꞌutaq bꞌi ri itzelilaj uxlabꞌixel. Kebꞌutaq bꞌi rukꞌ ruchuqꞌabꞌ y kebꞌel bꞌi» kechaꞌ.
LUK 4:37 Che ronoje taq ri luwar kꞌo lo xa naqaj, xeꞌek utzijoxik janipa taq ri kuꞌan ri Jesús.
LUK 4:38 Ekꞌuchiriꞌ xel bꞌi ri Jesús chupa ri sinagoga, xopon chirocho ri Simón. Y ruchu-ujiꞌ ri Simón lik kaqopow pa aqꞌ. Xkitzꞌonoj kꞌu che ri Jesús chaꞌ kukunaj kanoq.
LUK 4:39 Ekꞌu ri Jesús xyuxiꞌ puwiꞌ, xuqꞌatej ri aqꞌ chirij y jelaꞌ xikꞌow ri aqꞌ chirij. Na jampatana xyaktaj rixoq y xujeqo kebꞌunimaj.
LUK 4:40 Chutzaqibꞌal qꞌij konoje ri kꞌo kiyewaꞌ ruma ukꞌiyal uwach yabꞌil xekikꞌam lo rukꞌ ri Jesús. Rire xuya ruqꞌabꞌ pakiwiꞌ chikijujunal y xebꞌukunaj.
LUK 4:41 Jenelaꞌ xebꞌel bꞌi itzelilaj uxlabꞌixel chike ukꞌiyal winaq. Echiriꞌ kebꞌel bꞌi, kesikꞌinik, jewaꞌ kakibꞌiꞌij: «¡Rilal lal Rukꞌajol ri Dios!» kechaꞌ. Noꞌj ri Jesús xebꞌuqꞌatej y na xuya ta luwar chike kechꞌawik, ma rike ketaꞌam chik Rire e Uchaꞌoꞌn lo ri Dios.
LUK 4:42 Echiriꞌ xsaqirik, ri Jesús xel bꞌi chupa ri tinamit y xeꞌek chupa jun luwar katzꞌintzꞌotik. Y ri winaq xeꞌkitzukuj. Ekꞌuchiriꞌ xebꞌopon kꞌa pa la kꞌo wi, xkaj kakiqꞌatej chaꞌ na kebꞌuya ta kanoq.
LUK 4:43 Noꞌj Rire jewaꞌ xubꞌiꞌij chike: «Lik chirajawaxik kinꞌek pa taq tinamit re kantzijoj ri Utzilaj Tzij re rutaqanik ri Dios chike ri tikawex kꞌamajaꞌ kakita waꞌ, ma ruma waꞌ intaqom loq» xchaꞌ.
LUK 4:44 Xeꞌek kꞌu che utzijoxik ri Utzilaj Tzij pa taq ri sinagogas re Galilea.
LUK 5:1 Kꞌo jun qꞌij ri Jesús kꞌo chuchiꞌ ri mar re Genesaret, yey ukꞌiyal winaq xebꞌoponik lik kakiminimaꞌ kibꞌ rukꞌ che utayik Rutzij Upixabꞌ ri Dios.
LUK 5:2 Ri Jesús xril pan kaꞌibꞌ barco kꞌo chuchiꞌ ri yaꞌ; ekꞌu raj chapal kar ebꞌelinaq lo chupa che uchꞌajik taq ri ki atarraya.
LUK 5:3 Ekꞌuchiriꞌ, ri Jesús xok chupa jun chike ri kaꞌibꞌ barco. Y ri rajaw waꞌ e ri Simón. Xubꞌiꞌij kꞌu ri Jesús che ri Simón kumin bꞌi kꞌana ri barco chupa ri yaꞌ. Ekꞌu ri Jesús xtzꞌuyiꞌ chupa y xujeq kakꞌutun chike rukꞌiyal tikawex.
LUK 5:4 Echiriꞌ xukꞌis rukꞌutunik, jewaꞌ xubꞌiꞌij che ri Simón: —Woꞌora chakꞌama bꞌi ri barco chupa ri mar pa lik cho wi y chilikꞌij taq kꞌu ri atarraya chiriꞌ chaꞌ jelaꞌ kebꞌichap kar —xcha che.
LUK 5:5 Ri Simón xukꞌul uwach: —Lal tijonel, ronoje raqꞌabꞌ xojchakunik y na jinta kar xqachapo. Noꞌj we rilal kintaq la, kanꞌan riꞌ —xcha che.
LUK 5:6 Echiriꞌ xkilikꞌij bꞌi ri atarraya, xekichap ukꞌiyal kar y ri atarraya xujeqo karaqarobꞌik.
LUK 5:7 Ekꞌuchiriꞌ, xkiꞌan pan kiqꞌabꞌ chike ri kachbꞌiꞌil e kꞌo chupa ri jun chik barco chaꞌ kepetik y kebꞌoꞌlkitoꞌoꞌ. Echiriꞌ xebꞌopon ri kachbꞌiꞌil, junam xkibꞌalij lo ri kebꞌ barco che kar y ruma laꞌ ya laj kemuqutajik.
LUK 5:8 Ri Simón Pedro echiriꞌ xril waꞌ, xuxuk ribꞌ chwach ri Jesús y jewaꞌ xubꞌiꞌij che: —Chel ko la wukꞌ, Wajawal. Na taqal ta chwe kꞌo la wukꞌ ma in jun achi aj mak —xcha che.
LUK 5:9 Xubꞌiꞌij waꞌ ri Pedro ma ruma rukꞌiyal kar xekichapo, lik xok xiꞌin ibꞌ rukꞌ junam kukꞌ konoje ri e kꞌo rukꞌ pa ri barco;
LUK 5:10 jekꞌulaꞌ xok xiꞌin ibꞌ kukꞌ ri Jacobo y ri Juan; rike e ukꞌajol ri Zebedeo y e rachbꞌiꞌil ri Simón. Pero ri Jesús xubꞌiꞌij che ri Simón: —Maxiꞌij awibꞌ; chwi woꞌora katuꞌan at aj molol tikawex pachaꞌ aꞌanom lo chike ri kar —xchaꞌ.
LUK 5:11 Ekꞌuchiriꞌ xkesaj lo ri barcos chupa ri mar, xkiya kan ronoje waꞌ y xeterej bꞌi chirij ri Jesús.
LUK 5:12 Ri Jesús kꞌo chupa jun tinamit re Galilea echiriꞌ xopon jun achi rukꞌ, yey waꞌchi lik katajin uqꞌayik rucuerpo ruma ri yabꞌil lepra. Rire echiriꞌ xril uwach ri Jesús, xuxuk ribꞌ chwach, xuqasaj rupalaj chuꞌlew y xutzꞌonoj che: —Wajawal, we kaꞌaj ko la, josqꞌij la ri nucuerpo che wa yabꞌil —xchaꞌ.
LUK 5:13 Ekꞌuchiriꞌ, ri Jesús xuchap pana rukꞌ ruqꞌabꞌ y jekꞌuwaꞌ xubꞌiꞌij che: —Kuaj, chuꞌana bꞌa chom riꞌ racuerpo —xchaꞌ. Xew kꞌu xukꞌis ubꞌiꞌxikil waꞌ, na jampatana xsach ri yabꞌil kꞌo che rachi.
LUK 5:14 Ekꞌu ri Jesús xutaq che na kutzijoj ta waꞌ che junoq. Xubꞌiꞌij kꞌu che: —Jat chwach raj chakunel pa Rocho Dios chaꞌ rire karilo na jinta chi lepra chawe. Y ruma rajosqꞌikil, chayaꞌa kꞌu chwach ri Dios ri qasaꞌn xtaqan kan ri Moisés che, chaꞌ kaqꞌalajin chikiwach ri tikawex at kunutajinaq chik —xchaꞌ.
LUK 5:15 Na rukꞌ ta kꞌu riꞌ, e ruma taq ri kuꞌan ri Jesús, rutzijoxik Rire katajin más retaꞌmaxik kuma ri winaq y lik kꞌu e kꞌi kakimol kibꞌ chaꞌ kakita ri kubꞌiꞌij y kekunutaj bꞌi che ri kiyabꞌil.
LUK 5:16 Noꞌj ri Jesús kel bꞌi, keꞌek pa taq luwar katzꞌintzꞌotik re kuꞌana orar.
LUK 5:17 E xuꞌan waꞌ jun qꞌij echiriꞌ ri Jesús kakꞌutun chikiwach ri winaq. Etzꞌul kꞌu chiriꞌ ri fariseos y raj kꞌutunel re ri tzijpixabꞌ; rike e petinaq Jerusalem y pa taq ri tinamit y raldeas re Galilea y re Judea. Yey ruchuqꞌabꞌ ri Dios Qajawxel kꞌo rukꞌ ri Jesús chaꞌ kakunanik.
LUK 5:18 Y xekꞌun kꞌu lo jujun achijabꞌ kitelem lo jun achi sik chwa chꞌat. Xkaj kꞌu kakikoj bꞌi pa ja chaꞌ kakiya chwach ri Jesús,
LUK 5:19 pero na xkiriq taj saꞌ rukojik bꞌi kuma rukꞌiyal winaq. E uwariꞌche xebꞌaqꞌan chwi ri ja, xkesaj julepaj che ruwiꞌ, xkiqasaj kꞌu lo ri sik e laꞌ kotzꞌol chwa ruchꞌat y xkiya chwach ri Jesús chikinikꞌajal ri winaq.
LUK 5:20 Echiriꞌ ri Jesús xril ri kubꞌulibꞌal kikꞌuꞌx rukꞌ, jewaꞌ xubꞌiꞌij che ri sik: —Achi, ronoje ramak kuytajinaq chik —xchaꞌ.
LUK 5:21 Ekꞌuchiriꞌ, raj kꞌutunel re ri tzijpixabꞌ y ri fariseos xkijeq kakichꞌobꞌ raqan: «¿Saꞌ ruwach waꞌchi? Rire kamakun chirij ri Dios echiriꞌ kubꞌiꞌij kukuy mak. Ma ¿na xew ta nebꞌa ri Dios aj kuyul mak?»
LUK 5:22 Ekꞌu ri Jesús xunaꞌbꞌej saꞌ ri kakichꞌobꞌo; ruma kꞌu riꞌ, xubꞌiꞌij chike: —¿Suꞌchak jelaꞌ katajin chikꞌuꞌx alaq?
LUK 5:23 ¿Saꞌ kꞌu ri na kꞌayew taj kambꞌiꞌij: “Ronoje ramak kuytajinaq chik” o “Chatyaktajoq y chatbꞌinoq”?
LUK 5:24 E kuaj kꞌut ketaꞌmaj alaq waꞌ: Ralaxel Chikixoꞌl Tikawex yaꞌtal puqꞌabꞌ kukuy taq ri mak ke ri winaq che ruwachulew —xchaꞌ. Xubꞌiꞌij kꞌu riꞌ che ri sik: —Chatyaktajoq, chakꞌama bꞌi rachꞌat y jat chaꞌwocho —xchaꞌ.
LUK 5:25 Chupa kꞌu laꞌ la joqꞌotaj xyaktaj ri sik chikiwach. Xukꞌam kꞌu bꞌi ruchꞌat pa ri kotzꞌol wi y xeꞌek chirocho, e riꞌ lik kuyak uqꞌij ri Dios.
LUK 5:26 Konoje kꞌu riꞌ lik xkam kanimaꞌ che y xkijeq kakiyak uqꞌij ri Dios. Y ruma ri xiꞌin ibꞌ kꞌo pa kanimaꞌ chwach ri Dios, xkibꞌiꞌij: «Waqꞌij qilom ruchuqꞌabꞌ ri Dios» xechaꞌ.
LUK 5:27 Chukꞌisbꞌal re waꞌ, xeꞌek ri Jesús y xril jun achi aj tzꞌonol puaq re tojonik, Leví rubꞌiꞌ, tzꞌul pa ri luwar pa kaꞌan wi ri tojonik che ri gobierno. Y ri Jesús xubꞌiꞌij che: —Chat-terej lo chwij —xchaꞌ.
LUK 5:28 Ri Leví xyaktajik, xuya kan ronoje y xterej bꞌi chirij.
LUK 5:29 Ewi chirocho xuꞌan jun nimaqꞌij che ri Jesús. Y lik e kꞌi ri rach e aj tzꞌonol puaq re tojonik y ukꞌiyal winaq etzꞌul chwa ri mexa kukꞌ ri Jesús y rutijoꞌn.
LUK 5:30 Ekꞌuchiriꞌ, raj kꞌutunel re ri tzijpixabꞌ kukꞌ ri fariseos xekichꞌaꞌtibꞌej rutijoꞌn ri Jesús, y jewaꞌ xkibꞌiꞌij chike: —¿Suꞌchak kixwaꞌ kukꞌ raj tzꞌonol puaq re tojonik y kukꞌ raj makibꞌ? —xechaꞌ.
LUK 5:31 Ekꞌu ri Jesús xukꞌul uwach: —E janipa ri utz kiwach, na kajawax ta aj kunanel chike; ma waꞌ xew chike ri e yewaꞌibꞌ kajawax wi.
LUK 5:32 Jelaꞌ kꞌu riꞌ, riꞌin na in petinaq ta che kisikꞌixik ri jusukꞌ kibꞌinik kisilabꞌik, ma e in petinaq che kisikꞌixik raj makibꞌ chaꞌ kakijalkꞌatij ri kibꞌinik kisilabꞌik —xchaꞌ.
LUK 5:33 Ekꞌuchiriꞌ, xkitzꞌonoj che ri Jesús: —¿Suꞌbꞌe rutijoꞌn ri Juan Aj Yaꞌl Bautismo kakiꞌan ayuno ukꞌiyal laj y lik kakiꞌan orar jelaꞌ pachaꞌ kaqaꞌan ri oj fariseos, noꞌj ri tijoꞌn rilal xew kewaꞌik y na kakiꞌan tane ayuno? —xechaꞌ.
LUK 5:34 Y Rire xukꞌul uwach: —¿Utz nebꞌa kakiꞌan ayuno ri esikꞌim pa kꞌulanikil we kꞌa kꞌo rala kakꞌuliꞌik chikixoꞌl? Na utz taj.
LUK 5:35 Noꞌj kopon na ri qꞌij echiriꞌ kesax bꞌi rala chikixoꞌl; kꞌa ekꞌuchiriꞌ, kakiꞌan ayuno —xchaꞌ.
LUK 5:36 Tekꞌuchiriꞌ, xutzijoj jun kꞌambꞌal naꞌoj chike, jewaꞌ xubꞌiꞌij: «Na jinta junoq kuqꞌat chꞌaqap che ruqꞌuꞌ kꞌasaq chaꞌ kukꞌojoj ruqꞌuꞌ qꞌeꞌl rukꞌ. Ma we ta jelaꞌ kuꞌano, riꞌ na utz ta chi ruqꞌuꞌ kꞌasaq yey ne ri kꞌasaq na kukꞌulaj ta ribꞌ rukꞌ ruqꞌuꞌ qꞌeꞌl.
LUK 5:37 »Jekꞌulaꞌ ri vino kꞌakꞌ ꞌanom na kaqꞌej ta chupa juna surun qꞌeꞌl. Ma we kaꞌaniꞌ waꞌ, ri vino kꞌakꞌ echiriꞌ kanajtir uqꞌij, kuraqij ri surun, katix kꞌu riꞌ ri vino y ri surun na jinta chi uchak.
LUK 5:38 Ruma kꞌu laꞌ, ri vino kꞌakꞌ ꞌanom chirajawaxik wi kaqꞌej chupa juna surun kꞌasaq chaꞌ ukabꞌichal waꞌ kakowinik.
LUK 5:39 Yey junoq ukꞌamom ribꞌ che kutij ri vino naj chi uqꞌij, na karaj taj kutij ri kꞌakꞌ vino, ma kubꞌiꞌij: “Ri vino naj chi uqꞌij e más utz chwa ri kꞌakꞌ vino”» xchaꞌ.
LUK 6:1 E xuꞌan waꞌ chupa jun qꞌij re uxlanibꞌal: Ri Jesús kukꞌ rutijoꞌn katajin kikꞌowik pa taq tikoꞌn re trigo, yey rutijoꞌn kakichꞌupilaꞌ bꞌi ri trigo, kakiqil rukꞌ ri kiqꞌabꞌ y kakitijo.
LUK 6:2 Ekꞌuchiriꞌ, jujun chike ri fariseos xkitzꞌonoj chike: —¿Suꞌbꞌe kiꞌan riꞌix ri na taqal taj kaꞌaniꞌ chupa ri qꞌij re uxlanibꞌal? —xechaꞌ.
LUK 6:3 Ekꞌu ri Jesús xukꞌul uwach: —¿Na ajilam ta nebꞌa alaq ri xuꞌan ri David echiriꞌ rire kukꞌ ri rachbꞌiꞌil xenumik?
LUK 6:4 Xok kꞌu chupa ri Rocho Dios y xukꞌam ri pam yaꞌtal chi puqꞌabꞌ ri Dios. Xutijo y xujach chike ri rachbꞌiꞌil; yey waꞌ na taqal ta chike kakitijo, ma xew taqal chike raj chakunel pa ri Rocho Dios kakitijo —xchaꞌ.
LUK 6:5 Y xukꞌisbꞌej kukꞌ, jewaꞌ xubꞌiꞌij: —Ralaxel Chikixoꞌl Tikawex e ne rajaw ri qꞌij re uxlanibꞌal —xchaꞌ.
LUK 6:6 E xuꞌan waꞌ chupa jun chik qꞌij re uxlanibꞌal: Ri Jesús xok chupa jun sinagoga y xujeqo kakꞌutunik. Chiriꞌ kꞌu riꞌ kꞌo jun achi chaqijinaq ruqꞌabꞌ uwikiqꞌabꞌ.
LUK 6:7 Yey raj kꞌutunel re ri tzijpixabꞌ y ri fariseos lik kikꞌakꞌalem we ri Jesús kukunaj waꞌchi chupa wa qꞌij re uxlanibꞌal, chaꞌ jelaꞌ kakikoj umak.
LUK 6:8 Noꞌj ri Jesús retaꞌam saꞌ ri kakichꞌobꞌo y xubꞌiꞌij kꞌu che rachi chaqijinaq ruqꞌabꞌ: —Chatyaktajoq y chatkꞌola chiqawach qonoje —xchaꞌ. Ewi rachi xyaktajik y xtakꞌiꞌ chikiwach.
LUK 6:9 Ekꞌuchiriꞌ, ri Jesús xubꞌiꞌij chike: —Kanꞌan jun tzꞌonobꞌal che alaq. ¿Saꞌ ri lik usukꞌ kaꞌaniꞌ chupa ri qꞌij re uxlanibꞌal: E kaꞌaniꞌ ri utz, o e ri na utz taj? ¿Utz kakolobꞌex rukꞌaslem junoq o kayaꞌ luwar che kakamik? —xchaꞌ.
LUK 6:10 Ekꞌuchiriꞌ, ri Jesús xutzuꞌ kiwach konoje ri e kꞌo chiriꞌ, y xubꞌiꞌij che rachi: —Chasukꞌupij raqꞌabꞌ —xchaꞌ. Rachi e xuꞌano, y ruqꞌabꞌ xutzirik.
LUK 6:11 Ekꞌu ri fariseos y ri aj kꞌutunel re ri tzijpixabꞌ lik xpe koyowal y xkijeq kakichꞌaꞌtibꞌej chikiwach saꞌ ri kakiꞌan che ri Jesús.
LUK 6:12 Kꞌo jun qꞌij ri Jesús xeꞌek chwa juyubꞌ chaꞌ kuꞌana orar. Xikꞌow kꞌu jun aqꞌabꞌ kachꞌaꞌt rukꞌ ri Dios.
LUK 6:13 Echiriꞌ xsaqirik, xebꞌusikꞌij rutijoꞌn y chike waꞌ xebꞌuchaꞌ kabꞌlajuj, y xubꞌiꞌij rike e “taqoꞌn”.
LUK 6:14 E kibꞌiꞌ waꞌ: Simón ri xkoj Pedro che y ruchaqꞌ Andrés, Jacobo y Juan, Felipe, Bartolomé,
LUK 6:15 Mateo, Tomás, Jacobo rukꞌajol ri Alfeo, Simón ri kabꞌiꞌx che “ri Zelote”,
LUK 6:16 Judas rukꞌajol ri Jacobo, y Judas aj Iscariot, ri xkꞌayin re ri Jesús.
LUK 6:17 Tekꞌuchiriꞌ, ri Jesús kukꞌ rutijoꞌn xeqaj lo chwa ri juyubꞌ y xekꞌojiꞌ pa jun taqꞌaj kukꞌ ukꞌiyal winaq re ronoje taq ri luwar re Judea, re Jerusalem yey re Tiro y re Sidón, kebꞌ tinamit e kꞌo chuchiꞌ ri mar. Rike e petinaq chaꞌ kakita ri kꞌutunik re ri Jesús y chaꞌ kekunutaj bꞌi che ri kiyabꞌil.
LUK 6:18 Yey janipa ri kitijom kꞌax kuma ri itzelilaj uxlabꞌixel, kekunutajik.
LUK 6:19 Ruma kꞌu ri kiyabꞌil, konoje ri winaq kakaj kakichap ri Jesús, ma Rire rukꞌ ruchuqꞌabꞌ kebꞌukunaj konoje.
LUK 6:20 Ekꞌuchiriꞌ, ri Jesús xutzuꞌ kiwach rutijoꞌn y xubꞌiꞌij chike: «Nim iqꞌij iwalaxik tobꞌ ix nibꞌaꞌ, ma ix kukꞌil ri e kꞌo puqꞌabꞌ ri Dios.
LUK 6:21 Nim iqꞌij iwalaxik tobꞌ woꞌora kitij numik, ma kopon na ri qꞌij echiriꞌ kixkubꞌiꞌ chi utz ma ri Dios kuya ronoje ri kajawax chiwe. Nim iqꞌij iwalaxik tobꞌ woꞌora kixoqꞌik, ma kopon na ri qꞌij echiriꞌ kanoj ri iwanimaꞌ che kiꞌkotemal.
LUK 6:22 Nim iqꞌij iwalaxik echiriꞌ lik tzel kixil kuma ri winaq, kixkesaj bꞌi chikixoꞌl, kakikꞌaq bꞌi uqꞌij ribꞌiꞌ, kakibꞌiꞌij chiwe lik itzel iwachlibꞌal ruma ix utijoꞌn Ralaxel Chikixoꞌl Tikawex.
LUK 6:23 »Echiriꞌ kaꞌan waꞌ chiwe, lik chixkiꞌkotoq y chixbꞌixonoq, ma lik nim ri rajil ukꞌaxel kikꞌul chilaꞌ chikaj. Makam kꞌu iwanimaꞌ che echiriꞌ kixyaꞌ pa kꞌax; ma e taq ri keꞌanaw waꞌ chiwe, e kakiꞌano pachaꞌ ri kiꞌanom lo ri katiꞌ-kimam ojertan chike ri e qꞌalajisanelabꞌ re ri Dios.
LUK 6:24 Toqꞌoꞌ kꞌu wach ralaq alaq bꞌeyomabꞌ, ma kꞌulum chi alaq ri kuya kiꞌkotemal che alaq, noꞌj moyeꞌej chi kꞌu alaq we kꞌa kakꞌul alaq waꞌ chiqawach apanoq.
LUK 6:25 Toqꞌoꞌ wach alaq ri lik kꞌo katij alaq woꞌora, ma chiqawach apanoq katij alaq numik. Toqꞌoꞌ wach alaq ri lik kakiꞌkot alaq woꞌora, ma chiqawach apanoq kakꞌojiꞌ alaq pa bꞌis.
LUK 6:26 Toqꞌoꞌ wach alaq echiriꞌ lik kayak qꞌij alaq, ma ojertan jelaꞌ xkiꞌan ri chuꞌqaw alaq, e xkiyak kiqꞌij ri qꞌalajisanelabꞌ xa e sokosoꞌnel.
LUK 6:27 »Woꞌora kambꞌiꞌij chiwe riꞌix ri kixtaw we: Kꞌax chebꞌinaꞌa ri e aj retzelal kꞌuꞌx chiwij. Chiꞌana ri utz chike ri tzel kebꞌilow iwe.
LUK 6:28 Chitzꞌonoj ri rutzil ukꞌuꞌx ri Dios pakiwi ri kakitzꞌonoj ri na utz taj piwi riꞌix. Chiꞌana kꞌu orar pakiwi ri tzel kechꞌaꞌt chiwij.
LUK 6:29 Y we kꞌo junoq kupachꞌ qꞌabꞌ xeꞌ aweꞌ, chayaꞌa luwar che kupachꞌ ri jun chik xe aweꞌ. Y we kꞌo junoq kumaj raqꞌuꞌ re pisbꞌal awij, chayaꞌa ne luwar che kukꞌam bꞌi rakoton.
LUK 6:30 Chatsipan che ri nibꞌaꞌ we kutzꞌonoj toꞌbꞌal chawe. Y we kꞌo junoq kumaj rubꞌitaq awe, matzꞌonoj tanchi che.
LUK 6:31 Ekꞌu riꞌix chiꞌana chike ri tikawex jelaꞌ pachaꞌ ri kiwaj kakiꞌan rike chiwe.
LUK 6:32 »Ma we xew kꞌax kebꞌinaꞌ ri kꞌax kenaꞌw iwe, michꞌobꞌ raqan taqal chiwe kayak iqꞌij ruma waꞌ; ma jenelaꞌ kakiꞌan taq ri winaq aj makibꞌ; rike xew kꞌax kekinaꞌ ri kꞌax kenaꞌw ke.
LUK 6:33 Y we xew kiꞌan ri utz chike ri kakiꞌan ri utz chiwe, michꞌobꞌ raqan we taqal chiwe kayak iqꞌij ruma waꞌ; ma jenelaꞌ kakiꞌan taq ri winaq aj makibꞌ.
LUK 6:34 Yey we xew kiya chaqꞌiꞌm chike ri iwetaꞌam chik kikꞌul na ri chiqꞌimbꞌal re chike, michꞌobꞌ raqan we taqal chiwe kayak iqꞌij ruma waꞌ; ma jenelaꞌ kakiꞌan taq ri winaq aj makibꞌ; xew kechiqꞌiman chike ri kakiya chiqꞌimbꞌal re chike.
LUK 6:35 »Noꞌj riꞌix, kꞌax chebꞌinaꞌa ri tzel kebꞌilow iwe y chiꞌana ri utz chike. Chiyaꞌa chaqꞌiꞌm na jinta kꞌo kiwoyꞌej chwach. We kiꞌan waꞌ, lik nim ri sipanik kikꞌul chilaꞌ chikaj; yey ekꞌuchiriꞌ, paqatzij wi kixuꞌan ix ralkꞌoꞌal ri Jun kataqan chwi ronoje, ma jelaꞌ kuꞌan Rire, kukꞌut ri rutzil ukꞌuꞌx chike ri itzel kikꞌuꞌx, ri na ketioxin ta chwach ri Dios.
LUK 6:36 Kꞌola kꞌu riꞌ ri kꞌaxnaꞌbꞌal kꞌuꞌxaj iwukꞌ jelaꞌ pachaꞌ ri Qaqaw Dios lik kꞌo kꞌaxnaꞌbꞌal ukꞌuꞌx.
LUK 6:37 »Miꞌan ri xa piwe riꞌix kixuꞌan aj qꞌatal tzij pakiwi jujun chik, y jelaꞌ na kaqꞌat ta kꞌu tzij piwi riꞌix. Miꞌan ri kꞌax kixchꞌaw chikij jujun chik, y jelaꞌ na kaꞌan ta waꞌ chiwe riꞌix. We kꞌo junoq kamakun chiwij, chikuyu umak y jelaꞌ kakuytaj imak riꞌix.
LUK 6:38 Chixsipanoq y jelaꞌ ri Dios kasipan chiwe rukꞌ jun pajbꞌal lik nim, lik tzanal upa y kapulputik; ma rukꞌ ri pajbꞌal kixpajan wi riꞌix, rukꞌ tanchi wa pajbꞌal kaꞌan pajanik chiwe» xcha ri Jesús.
LUK 6:39 Y xubꞌiꞌij jun kꞌambꞌal naꞌoj chike: «¿Utz nebꞌa juna potzꞌ kukꞌam uwach jun chik potzꞌ? ¿Na kebꞌeꞌtzaq ta nawi kikabꞌichal pa siwan?
LUK 6:40 Juna tijoꞌn na retaꞌam ta más chwa ri retaꞌam rutijonel. Yey we lik kꞌi ri kumajo, riꞌ e kuꞌana pachaꞌ rutijonel.
LUK 6:41 »¿Suꞌchak e lik katzutzaꞌ rukꞌaj cheꞌ kꞌo chupa ruwach rawatz-achaqꞌ yey e na katok ta il che resaxik ri cheꞌ qꞌebꞌel chupa rawach riꞌat?
LUK 6:42 Y we na katok ta kꞌu il che ri cheꞌ qꞌebꞌel chupa rawach riꞌat, ¿utz nawi kabꞌiꞌij che rawatz-achaqꞌ: “Watz-nuchaqꞌ, chayaꞌa luwar chwe kanwesaj la jun ukꞌaj cheꞌ kꞌo chupa rawach”? ¡Na utz taj! ¡Xa kebꞌ apalaj! Nabꞌe na chawesaj lo la cheꞌ qꞌebꞌel chupa rawach riꞌat, y jelaꞌ kat-tzuꞌn chi utz chaꞌ katoꞌ rawatz-achaqꞌ che resaxik lo rukꞌaj cheꞌ kꞌo chupa ruwach rire.
LUK 6:43 »Jinta juna chomilaj cheꞌ kuya ujiqꞌobꞌalil na chom taj, yey juna cheꞌ na chom taj, na kuya ta ujiqꞌobꞌalil chom.
LUK 6:44 Ma ronoje cheꞌ etaꞌmatal uwach ruma rujiqꞌobꞌalil. Na kamol ta higos che taq ri xulukej y na kamol ta uvas che taq ri xukuyeꞌ.
LUK 6:45 »Jekꞌulaꞌ e junoq utz ukꞌuꞌx, echiriꞌ kachꞌaꞌtik, e kel lo ri utz ukꞌolom chupa ri ranimaꞌ. Yey e junoq itzel ukꞌuꞌx, echiriꞌ kachꞌaꞌtik, e kel lo ri na utz taj ukꞌolom chupa ri ranimaꞌ. Ma rukꞌ ruchꞌaꞌtem ri tikawex, kaqꞌalajinik saꞌ ri kꞌo chupa ri ranimaꞌ.
LUK 6:46 »¿Suꞌchak kibꞌiꞌij chwe “Qajawal, Qajawal”, yey na kiꞌan ta ri kambꞌiꞌij chiwe?
LUK 6:47 Kambꞌiꞌij kꞌu chiwe china rukꞌ kajunimax wi ri jun kape wukꞌ, kuta ri nutzij y kuꞌan janipa ri kambꞌiꞌij:
LUK 6:48 »Waꞌ e kanjunimaj rukꞌ jun achi xuyak jun rocho. Xukꞌot ri jul y lik naj xuqasaj y xutzꞌaq kꞌu lo ruparaqan ri ja chwi abꞌaj. Y echiriꞌ xpe lo jabꞌ, lik xnimar ri nimayaꞌ y rutzaꞌm ri yaꞌ lik xuroj ribꞌ che ri ja; yey ri ja xuchꞌij uchuqꞌabꞌ, ma chwi abꞌaj tzꞌaqom lo wi.
LUK 6:49 Noꞌj ri jun xuta ri nutzij y na xuꞌan ta janipa ri kambꞌiꞌij, e kanjunimaj rukꞌ jun achi xuꞌan ri rocho pa sanyebꞌ y na xukoj ta lo ukowil ruparaqan ri ja. Y echiriꞌ lik xnimar ri nimayaꞌ, rutzaꞌm yaꞌ lik xuroj ribꞌ che ri ja. Ekꞌu riꞌ ri ja xwuluwubꞌ bꞌi y xsach uwach» xcha ri Jesús.
LUK 7:1 Ri Jesús echiriꞌ xukꞌis kakꞌutun chikiwach ri tikawex, xeꞌek Capernaúm.
LUK 7:2 Chiriꞌ jeqel jun capitán aj Roma y kꞌo jun raj chak lik yewaꞌ yey kajekꞌowik. Ekꞌu ri capitán lik kꞌax kunaꞌo.
LUK 7:3 Ekꞌuchiriꞌ xuto saꞌ taq ri kabꞌiꞌx puwi ri Jesús, xebꞌutaq bꞌi jujun nimaq winaq e aj wach ke raj judiꞌabꞌ chaꞌ kebꞌeꞌelaj che kapetik y koluꞌkunaj ri raj chak.
LUK 7:4 Ekꞌuchiriꞌ ri nimaq winaq xebꞌopon rukꞌ ri Jesús, lik xebꞌelaj che, jewaꞌ xkibꞌiꞌij: —Qajawal, wa jun capitán lik taqal che katoꞌ la,
LUK 7:5 ma lik kꞌax kunaꞌ ri qatinamit y xojutoꞌ ne che uyakik ri qasinagoga —xechaꞌ.
LUK 7:6 Ekꞌu ri Jesús xeꞌek kukꞌ. Ekꞌuchiriꞌ xebꞌopon chunaqaj ri ja, ri capitán xebꞌutaq lo jujun ramigos rukꞌ ri Jesús chaꞌ jewaꞌ kakibꞌiꞌij che: «Wajawal, makosisaj ibꞌ la che kape la, ma na taqal ta chwe kok la chiwocho;
LUK 7:7 ruma laꞌ xinchꞌobꞌo na taqal tane chwe kinopon chiwach la. Xew bꞌiꞌij la: “Chatkunutajoq”, y rukꞌ ri chꞌaꞌtem la, kakunutaj ri waj chak.
LUK 7:8 Ma e pachaꞌ riꞌin, in kꞌo puqꞌabꞌ jun taqanel y rire ebꞌuyaꞌom ukꞌiyal soldados panuqꞌabꞌ. We kambꞌiꞌij kꞌu che junoq: “Jat”, keꞌek; o kambꞌiꞌij che junoq chik: “Chatpetoq”, kapetik. Yey we kambꞌiꞌij che juna waj chak: “E chaꞌana waꞌ”, kuꞌano.»
LUK 7:9 Echiriꞌ ri Jesús xuta ri xubꞌiꞌij lo ri capitán, lik xkam ranimaꞌ che. Xutzuꞌ kꞌu pan kiwach ri winaq eteran chirij y jewaꞌ xubꞌiꞌij chike: —Kambꞌiꞌij chiwe, na nuriqom tane chikixoꞌl raj Israel junoq lik kꞌo unimal kubꞌulibꞌal ukꞌuꞌx pachaꞌ wa jun achi —xchaꞌ.
LUK 7:10 Ekꞌuchiriꞌ ri etaqom bꞌi xetzelej chirocho ri capitán, xeꞌkiriqa ri raj chak kunutajinaq chik.
LUK 7:11 Ikꞌowinaq chi waꞌ, ri Jesús xeꞌek pa jun tinamit Naín rubꞌiꞌ. E kꞌi chike rutijoꞌn y ukꞌiyal winaq e rachbꞌiꞌil bꞌi.
LUK 7:12 Echiriꞌ xebꞌopon chunaqaj ri tinamit, xril jun animaꞌ telem, e riꞌ keꞌmuqoq. Yey waꞌ e jun ala ralkꞌoꞌal jun ixoq malkaꞌn y xew ne ko ralabꞌ riꞌ. Ukꞌiyal kꞌu winaq re ri tinamit kachbꞌilam rixoq.
LUK 7:13 Echiriꞌ ri Qanimajawal xril rixoq, lik xjuchꞌ kaꞌn pa ranimaꞌ y xubꞌiꞌij che: —Moqꞌ chi la —xchaꞌ.
LUK 7:14 Ekꞌuchiriꞌ, ri Jesús xqibꞌ kukꞌ y xuchap ri chꞌat pa telem wi ri animaꞌ. Ekꞌu ri e teleyom re xetakꞌiꞌik. Y ri Jesús xubꞌiꞌij che ri kaminaq: —Ala, kambꞌiꞌij chawe: ¡Chatyaktajoq! —xchaꞌ.
LUK 7:15 Ekꞌuchiriꞌ, rala kaminaq chik xyaktajik y xujeqo kachꞌaꞌtik. Y ri Jesús xuya bꞌi puqꞌabꞌ ruchu.
LUK 7:16 Echiriꞌ xkil waꞌ ri winaq, konoje xkam kanimaꞌ che y xkijeqo kakiyak uqꞌij ri Dios, kakibꞌiꞌij: —Jun nimalaj qꞌalajisanel xwinaqir chiqaxoꞌl. Ri Dios kꞌuninaq chaꞌ kojutoꞌ ri oj utinamit —xechaꞌ.
LUK 7:17 Konoje kꞌu ri e kꞌo Judea y ri e kꞌo lo chunaqaj xketaꞌmaj ri xuꞌan ri Jesús.
LUK 7:18 Ekꞌu ri Juan xretaꞌmaj ronoje waꞌ, ma rutijoꞌn xkitzijoj che. Ekꞌuchiriꞌ, xebꞌusikꞌij kaꞌibꞌ chike
LUK 7:19 y jewaꞌ xubꞌiꞌij: —Jix rukꞌ ri Jesús y chitzꞌonoj che we Rire e Ruchaꞌoꞌn lo ri Dios, ri Jun bꞌiꞌtalik kakꞌunik, o kaqoyꞌej chi junoq chik —xchaꞌ.
LUK 7:20 Ekꞌuchiriꞌ, rutijoꞌn ri Juan xebꞌek rukꞌ ri Jesús y jewaꞌ xkibꞌiꞌij che: —Ri Juan Aj Yaꞌl Bautismo ojutaqom loq chaꞌ kaqatzꞌonoj cheꞌla we lal Ruchaꞌoꞌn lo ri Dios, ri Jun bꞌiꞌtalik kakꞌunik o kaqoyꞌej chi junoq chik —xecha che.
LUK 7:21 Chupa kꞌu laꞌ la ora ri Jesús xujeq kebꞌukunaj ukꞌiyal winaq che taq yabꞌil y che taq kꞌaxkꞌolil, kebꞌukolobꞌej ri e kꞌo pakiqꞌabꞌ itzel uxlabꞌixel y kebꞌutzuꞌnisaj ukꞌiyal potzꞌ.
LUK 7:22 Tekꞌuchiriꞌ, ri Jesús xukꞌul uwach ri tzꞌonobꞌal ke rutijoꞌn ri Juan: —Jix y chitzijoj che ri Juan ronoje ri xiwilo y ri xito. Ma ri e potzꞌ ketzuꞌnik, ri e sik kebꞌinik, ri kꞌo yabꞌil lepra chike kekunutajik, ri e tꞌoꞌk ketanik, ri ekaminaq kekꞌastajik y chike ri nibꞌaꞌibꞌ katzijox ri Utzilaj Tzij.
LUK 7:23 Nim uqꞌij ralaxik kꞌu riꞌ ri na kasach ta ukꞌuꞌx wukꞌ —xchaꞌ.
LUK 7:24 Echiriꞌ xebꞌek ri etaqom lo ruma ri Juan, ri Jesús xujeq kachꞌaꞌt puwi ri Juan chike ri winaq, jewaꞌ xubꞌiꞌij: «¿Saꞌ ri xeꞌila alaq pa ri luwar katzꞌintzꞌotik? ¿Xeꞌila nebꞌa alaq jun achi na jinta ukowil xa pachaꞌ tani kajabajoꞌx ruma ri tew?
LUK 7:25 ¿Saꞌ ri xeꞌila alaq? ¿Xeꞌila nebꞌa alaq jun achi uwiqom ribꞌ rukꞌ chomilaj kꞌul? Na e ta riꞌ, ma etaꞌam alaq ri lik kewiqiqik y kꞌo kukꞌ janipa ri kakirayij, riꞌ pa kocho e aj wach ejeqel wi.
LUK 7:26 Kantzꞌonoj kꞌu riꞌ: ¿Saꞌ ri xeꞌila alaq? ¿Xeꞌila alaq jun qꞌalajisanel? Areꞌ, yey paqatzij wi kambꞌiꞌij che alaq: E jun más kꞌo uwach chikiwa ri jujun chik qꞌalajisanelabꞌ.
LUK 7:27 Ma jewaꞌ kubꞌiꞌij Ruchꞌaꞌtem ri Dios puwi ri Juan: Riꞌin kannabꞌesaj bꞌi ri waj chak chawach Riꞌat chaꞌ kuyijbꞌaꞌ ri bꞌe chwach pan rawoponibꞌal kachaꞌ.
LUK 7:28 Kambꞌiꞌij kꞌu che alaq: Chike ri tikawex ebꞌalaxinaq wara che ruwachulew, na jinta juna qꞌalajisanel más kꞌo uwach chwa ri Juan Aj Yaꞌl Bautismo. Pero chwi kꞌu riꞌ waꞌ wa keꞌek, china ri kok chupa rutaqanik ri Dios, tobꞌ na jinta uwach, más nim uqꞌij ralaxik chwa ri Juan» xcha ri Jesús.
LUK 7:29 Echiriꞌ ri winaq y ri aj tzꞌonol puaq re tojonik xkita waꞌ, xketaꞌmaj paqatzij wi ri Dios lik jusukꞌ. E uwariꞌche xkitzelej kitzij y xkikꞌul ri bautismo kuya ri Juan.
LUK 7:30 Noꞌj ri fariseos y raj kꞌutunel re ri tzijpixabꞌ xkikꞌaq bꞌi uqꞌij ri rajawal ukꞌuꞌx ri Dios xkꞌut chike, ma na xkitzelej ta kitzij y na xkikꞌul ta ri bautismo kuya ri Juan.
LUK 7:31 Je tanchi waꞌ xubꞌiꞌij ri Jesús: «¿China kꞌu rukꞌ kanjunimaj wi kiwach ri winaq re waqꞌij ora? ¿Saꞌ rukꞌ e junam wi?
LUK 7:32 E kanjunimaj kiwach kukꞌ ri kꞌoꞌmabꞌ etzꞌul pa kꞌayibꞌal kesikꞌin chikiwach, kakibꞌiꞌij: “Echiriꞌ riꞌoj xqachꞌawisaj suꞌ chiwe, riꞌix na xiwaj taj kix-xajawik; yey echiriꞌ xqatunaj bꞌix bꞌisobꞌal uwach chiwe, na xiwaj taj kixjuyuyik” —kechaꞌ.
LUK 7:33 Jekꞌulaꞌ ralaq, ma echiriꞌ xkꞌun ri Juan Aj Yaꞌl Bautismo, rire lik kuꞌan ayuno y na kutij tane vino. Yey ralaq kabꞌiꞌij alaq: “Waꞌ waꞌchi kꞌo puqꞌabꞌ jun itzel uxlabꞌixel” kacha alaq.
LUK 7:34 Xkꞌun kꞌu lo Ralaxel Chikixoꞌl Tikawex. Rire kutij ronoje ri kayaꞌ chwach, yey ralaq kabꞌiꞌij alaq: “Waꞌ wa jun achi lik japjatel y qꞌabꞌaꞌrel, kachbꞌiꞌil raj tzꞌonol puaq re tojonik y raj makibꞌ” kacha alaq.
LUK 7:35 Pero kaqꞌalajin na kꞌut china taq ri lik kꞌo runaꞌoj ri Dios kukꞌ ruma ri kiꞌanom» xcha ri Jesús.
LUK 7:36 Tekꞌuchiriꞌ, xsikꞌix ri Jesús ruma jun fariseo Simón rubꞌiꞌ chaꞌ keꞌwoꞌq rukꞌ. Ekꞌu ri Jesús xeꞌek chirocho ri fariseo y xtzꞌuyiꞌ chwa ri mexa.
LUK 7:37 Kꞌo kꞌu jun ixoq aj pa la tinamit na utz ta rubꞌinik usilabꞌik. Echiriꞌ rire xretaꞌmaj kawaꞌ ri Jesús chirocho ri fariseo, xukꞌam bꞌi jun kꞌolibꞌal ꞌanatal rukꞌ alabastro nojinaq che kunabꞌal lik kiꞌ ruxlabꞌ.
LUK 7:38 Koqꞌ kꞌu riꞌ xopon xeꞌraqan ri Jesús. Yey rukꞌ ruwaꞌal uwach xujeq kuchꞌaqabꞌaꞌ ri raqan ri Jesús, y rukꞌ kꞌu ruwiꞌ kuchaqisaj; kutzꞌubꞌ ri raqan y kusoqꞌ ri kunabꞌal lik kiꞌ ruxlabꞌ che.
LUK 7:39 Echiriꞌ xril waꞌ ri fariseo, ri sikꞌiyom re ri Jesús, xuchꞌobꞌo: «We ta waꞌchi paqatzij wi qꞌalajisanel, kunaꞌbꞌej riꞌ saꞌ rubꞌinik usilabꞌik wiꞌxoq kachapaw re, ma waꞌ wiꞌxoq lik aj mak.»
LUK 7:40 Ekꞌuchiriꞌ, ri Jesús jewaꞌ xubꞌiꞌij che: —Simón, kꞌo kuaj kambꞌiꞌij cheꞌla —xchaꞌ. Ri fariseo xubꞌiꞌij che: —Bꞌiꞌij la, Wajawal —xchaꞌ.
LUK 7:41 Xubꞌiꞌij kꞌu ri Jesús: —Ekꞌo kaꞌibꞌ achijabꞌ kꞌo kikꞌas rukꞌ jun achi kuya puaq pa chaqꞌiꞌm. Jun chike, ukꞌas woꞌobꞌ ciento denarios y ri jun chik, ukꞌas cincuenta denarios.
LUK 7:42 Kikabꞌichal na kakiriq ta chik saꞌ rutojik. Ekꞌu rachi aj yaꞌl chaqꞌiꞌm xukuy kimak kikabꞌichal che ri kikꞌas. Woꞌora, Simón, bꞌiꞌij la chwe ¿china chike wa kaꞌibꞌ achijabꞌ más katioxin chwach rachi aj yaꞌl chaqꞌiꞌm? —xchaꞌ.
LUK 7:43 Ri Simón xukꞌul uwach: —Chinuwach riꞌin, e ri jun achi ri xkuytaj umak che ri kꞌas más kꞌi —xchaꞌ. Y ri Jesús xubꞌiꞌij che: —Ri xbꞌiꞌij la, lik areꞌ —xchaꞌ.
LUK 7:44 Ekꞌuchiriꞌ, ri Jesús xutzuꞌ uwach rixoq y xubꞌiꞌij che ri Simón: —¿Kil la wa jun ixoq? Echiriꞌ xinok lo riꞌin chi ocho la, rilal na xya ta la nuyaꞌ re chꞌajbꞌal ri waqan. Noꞌj wa jun ixoq xuchꞌaqabꞌaꞌ ri waqan rukꞌ ruwaꞌal uwach y xuchaqisaj rukꞌ ruwiꞌ.
LUK 7:45 Yey rilal na xtzꞌubꞌ tane la nuchiꞌ; noꞌj rire chwi echiriꞌ xinok loq, na roqꞌotam ta kutzꞌubꞌ ri waqan.
LUK 7:46 Rilal na xsoqꞌ tane la aceite chwi nujolom; noꞌj rire xusoqꞌ kunabꞌal lik kiꞌ ruxlabꞌ che ri waqan.
LUK 7:47 Kambꞌiꞌij kꞌu cheꞌla: Rire xuꞌan waꞌ ma nukuyum chi rukꞌiyal umak; e uwariꞌche lik kukꞌut ri rutzil ukꞌuꞌx chwe. Noꞌj e junoq na lik ta kꞌi rumak kuytajinaq, riꞌ xa jubꞌiqꞌ ri rutzil ukꞌuꞌx kukꞌutu —xcha che ri Simón.
LUK 7:48 Ekꞌuchiriꞌ, xubꞌiꞌij che rixoq: —Ixoq, ronoje ramak kuytajinaq chik —xchaꞌ.
LUK 7:49 Ekꞌu ri etzꞌul rukꞌ ri Jesús chwa ri mexa xkijeqo kakichꞌaꞌtibꞌej chikiwach, jewaꞌ kakibꞌiꞌij: «¿Saꞌ nawi ruwach wa jun achi kukuy mak?» kechaꞌ.
LUK 7:50 Pero ri Jesús xubꞌiꞌij che rixoq: —Ruma ri kubꞌulibꞌal akꞌuꞌx, xatkolobꞌetajik; jat kꞌu chi utzil chomal —xcha che.
LUK 8:1 Ikꞌowinaq chi kꞌu waꞌ, ri Jesús kabꞌin pa taq ronoje tinamit y aldeas kutzijoj ri Utzilaj Tzij re rutaqanik ri Dios. E rachbꞌiꞌil kꞌu ri kabꞌlajuj utijoꞌn,
LUK 8:2 kukꞌ jujun ixoqibꞌ ri ebꞌeresam pakiqꞌabꞌ itzel uxlabꞌixel y ebꞌukunam che ukꞌiyal yabꞌil. Chikixoꞌl e kꞌo ri María ri ebꞌelinaq wuqubꞌ itzel uxlabꞌixel che,
LUK 8:3 ri Juana rixoqil rachi Chuza ri aj wach re rubꞌitaq re ri Rey Herodes, ri Susana kukꞌ jujun chik ixoqibꞌ kakinimaj ri Jesús rukꞌ taq rubꞌitaq ke.
LUK 8:4 Kꞌo jun qꞌij lik e kꞌi ri winaq xebꞌel lo pa taq tinamit y xkimol kibꞌ rukꞌ ri Jesús. Ekꞌuchiriꞌ, ri Jesús xujeq kakꞌutun chikiwach rukꞌ taq kꞌambꞌal naꞌoj, jewaꞌ xubꞌiꞌij:
LUK 8:5 «Julaj jun awanel xel bꞌi che rawaxik ri rijaꞌ. Ekꞌuchiriꞌ katajin che ujopopexik rijaꞌ, kꞌo xtzaq kan chuchiꞌ ri bꞌe. Y waꞌ xyiqꞌ uwiꞌ kuma ri kebꞌikꞌowik y xtij bꞌi kuma taq ri tzꞌikin.
LUK 8:6 »Kꞌo ijaꞌ xtzaq kan pa taq abꞌaj; yey echiriꞌ xel loq, xchaqijik ma na kamuꞌmut ta ruxeꞌ.
LUK 8:7 »Kꞌo ijaꞌ xtzaq kan pa taq kꞌiix. Ekꞌu riꞌ waꞌ xkꞌiy junam rukꞌ ri kꞌiix, pero xjiqꞌ kan chuxeꞌ ri kꞌiix.
LUK 8:8 »Noꞌj kꞌo xtzaq kan pa chomilaj ulew. Ekꞌu riꞌ waꞌ, echiriꞌ xkꞌiyik, lik xuꞌan reqaꞌn; chujujunal raqan xel jun ciento che» xchaꞌ. Tekꞌuchiriꞌ, lik ko xchꞌaw ri Jesús, jewaꞌ xubꞌiꞌij: «China kꞌu ri kꞌo utanibꞌal che utayik, ¡chuta kꞌu riꞌ!» xchaꞌ.
LUK 8:9 Tekꞌuchiriꞌ, rutijoꞌn xkitzꞌonoj che: —¿Saꞌ keꞌelawi wa kꞌambꞌal naꞌoj? —xechaꞌ.
LUK 8:10 Ri Jesús xubꞌiꞌij chike: «Chiwe riꞌix yaꞌtalik kaqꞌalajisax runaꞌoj ri Dios chwi rutaqanik. Noꞌj chike ri winaq, kankꞌut xew rukꞌ kꞌambꞌal naꞌoj. Ma tobꞌ rike ketzuꞌnik, e junam rukꞌ na ketzuꞌn taj; tobꞌ ketanik, e junam rukꞌ na ketan taj y e riꞌ na jinta kꞌo kakimaj usukꞌ.
LUK 8:11 »Woꞌora kanqꞌalajisaj chiwe saꞌ keꞌelawi wa kꞌambꞌal naꞌoj. Rijaꞌ e Ruchꞌaꞌtem ri Dios.
LUK 8:12 »Ri xtzaq kan chuchiꞌ ri bꞌe, e pachaꞌ ri tikawex kakita Ruchꞌaꞌtem ri Dios, pero kakꞌun lo ritzel winaq y karesaj waꞌ pa kanimaꞌ chaꞌ na kakikoj taj y na kekolobꞌetaj ta kꞌu riꞌ.
LUK 8:13 »Ri xtzaq kan pa taq abꞌaj, e pachaꞌ ri tikawex kakita Ruchꞌaꞌtem ri Dios y kakikꞌul rukꞌ kiꞌkotemal; noꞌj na e tikil ta chi utz. Kakikoj kꞌu Ruchꞌaꞌtem xa kebꞌ oxibꞌ qꞌij; yey echiriꞌ kakꞌun lo kꞌambꞌal kipa, kakesaj bꞌi kibꞌ chirij ri Dios.
LUK 8:14 »Ri xtzaq kan pa taq kꞌiix, e pachaꞌ ri tikawex kakita Ruchꞌaꞌtem ri Dios, yey na kakiꞌan taj saꞌ ri kubꞌiꞌij. Kokꞌil kꞌu riꞌ kasach uwach Ruchꞌaꞌtem ri Dios kꞌo pa kanimaꞌ ruma rubꞌis kikꞌuꞌx, ri kibꞌeyomalil y ruqusil ruwachulew; y na chom ta kꞌu riꞌ ri kilitaj che ri kibꞌinik.
LUK 8:15 »Noꞌj ri xtzaq kan pa chomilaj ulew, e pachaꞌ ri tikawex kakikꞌul pa saqil wi Ruchꞌaꞌtem ri Dios y rukꞌ ronoje kikꞌuꞌx kakikꞌol pa kanimaꞌ. Lik chom kꞌu riꞌ ri kilitaj che ri kibꞌinik.
LUK 8:16 »Na jinta junoq kutzij juna aqꞌ y kuchꞌuq uwiꞌ rukꞌ juna mulul re pajbꞌal o kujuꞌ chuxeꞌ ruwarabꞌal. Ma ri kuꞌan che, e kuya lo chupa rukꞌolibꞌal chikaj chaꞌ jelaꞌ kutzij kiwiꞌ ri kebꞌok bꞌi.
LUK 8:17 Ma kopon ri qꞌij echiriꞌ janipa ri na qꞌalajisam taj, kaqꞌalajisax na; yey janipa ri ewatalik, ketaꞌmaxik.
LUK 8:18 E uwariꞌche chita chi utz janipa ri kambꞌiꞌij chiwe; ma china ri kukꞌul chi utz janipa ri kakꞌut chwach, riꞌ kakꞌut ne más chwach y jekꞌulaꞌ kumaj más. Yey china ri na kukꞌul ta ri kakꞌut chwach, riꞌ kamaj ne che janipa ri kuchꞌobꞌo umajom chi usukꞌ» xcha ri Jesús.
LUK 8:19 Julaj echiriꞌ lik e kꞌo ukꞌiyal winaq rukꞌ ri Jesús, ruchu y taq ruchaqꞌ xoꞌlkilaꞌ, yey na utz ta kꞌu xeqibꞌ rukꞌ kuma rukꞌiyal winaq.
LUK 8:20 Ekꞌuchiriꞌ, xbꞌiꞌx che ri Jesús: —Ri chu la y taq ri chaqꞌ la e kꞌo pa bꞌe y kakaj kakil wach la.
LUK 8:21 Rire xukꞌul uwach: —E ri ketaw re Rutzij Upixabꞌ ri Dios y kakiꞌan ronoje ri kubꞌiꞌij, waꞌ e nuchu y e taq nuchaqꞌ riꞌ —xchaꞌ.
LUK 8:22 Kꞌo jun qꞌij ri Jesús xok chupa jun barco junam kukꞌ rutijoꞌn y xubꞌiꞌij chike: —Joꞌ, chojqꞌax chꞌaqa yaꞌ —xcha chike. Y xebꞌek kꞌu riꞌ.
LUK 8:23 Echiriꞌ kebꞌin chwi ri mar, ri Jesús xwarik. Ewi xpe jun nimalaj kaqjiqꞌ chwi ri mar y xujeq kanoj ri barco che yaꞌ y e riꞌ ya laj kamuqutajik.
LUK 8:24 Na jampatana kꞌut xeꞌkikꞌosoj ri Jesús, jewaꞌ xkibꞌiꞌij che: —¡Qajawal, Qajawal! ¡Kojkamik! —xecha che. Echiriꞌ xyaktaj ri Jesús, xuqꞌatej ri kaqjiqꞌ. Ekꞌu ri yaꞌ kel chikaj, xyeniꞌik y ri tew xtaniꞌik.
LUK 8:25 Tekꞌuchiriꞌ, xubꞌiꞌij chike rutijoꞌn: —¿Saꞌ xuꞌan ri kubꞌulibꞌal ikꞌuꞌx wukꞌ? —xcha chike. Pero rutijoꞌn lik kixiꞌim kibꞌ y kaminaq kanimaꞌ che. Xkibꞌiꞌij kꞌu chikiwach: «¿Saꞌ ruwach waꞌ waꞌchi? ¡Ma tobꞌ ne ri kaqjiqꞌ y ri yaꞌ kakikoj utzij!» xechaꞌ.
LUK 8:26 Ekꞌuchiriꞌ, xebꞌopon pa ri luwar re Gadara kꞌo chꞌaqa yaꞌ che Galilea.
LUK 8:27 Echiriꞌ xqaj ri Jesús chuꞌlew, xoꞌlkꞌul ruma jun achi aj pa la tinamit. Kꞌo tan qꞌij waꞌchi kꞌo puqꞌabꞌ jun itzel uxlabꞌixel. Na kukoj ta uqꞌuꞌ y na jeqel ta chirocho, ma jeqel pa taq muqubꞌal ke animaꞌ.
LUK 8:28 Waꞌchi, echiriꞌ xril uwach ri Jesús, lik xsikꞌinik y xuxuk ribꞌ chwach. Y lik ko xchꞌawik, jewaꞌ xubꞌiꞌij: —¿Suꞌchak koꞌlmina ibꞌ la wukꞌ, Jesús, lal Ukꞌajol ri Dios kꞌo chilaꞌ chikaj? Kantzꞌonoj ko cheꞌla na kinya ta la pa kꞌax —xchaꞌ.
LUK 8:29 (Xubꞌiꞌij waꞌ ma ri Jesús kutaq ri itzelilaj uxlabꞌixel chaꞌ kel bꞌi che rachi. Yey lik kꞌo tan qꞌij rachi kꞌo puqꞌabꞌ waꞌ. Y tobꞌ kayut pa karena y pa griyetas, ronoje kuraqij y kakꞌam bꞌi ruma ri itzel uxlabꞌixel pa taq luwar katzꞌintzꞌotik.)
LUK 8:30 Ekꞌu ri Jesús xutzꞌonoj che rachi: —¿Saꞌ rabꞌiꞌ? —xchaꞌ. Rire xubꞌiꞌij: —Legión —xchaꞌ. Xubꞌiꞌij waꞌ ma lik e kꞌi ri itzel uxlabꞌixel ebꞌokinaq rukꞌ.
LUK 8:31 Ekꞌu taq ri itzel uxlabꞌixel lik xkikoj kibꞌ chwach ri Jesús chaꞌ na kebꞌutaq tubꞌi pa ri siwan na jinta utaqexik uchoyil upa.
LUK 8:32 E kꞌo kꞌu ukꞌiyal aq kewaꞌ chwa ri juyubꞌ y taq ri itzel uxlabꞌixel xkitzꞌonoj chaꞌ kebꞌok bꞌi kukꞌ ri aq. Ekꞌu ri Jesús xuya luwar chike.
LUK 8:33 Ekꞌuchiriꞌ, xebꞌel bꞌi che rachi y xebꞌok bꞌi kukꞌ ri aq. Y konoje waꞌ xeꞌkikꞌaqa bꞌi kibꞌ chwi jun siwan, xebꞌeꞌtzaq chupa ri mar y xejiqꞌik.
LUK 8:34 Ekꞌu ri kechajin ke ri aq, echiriꞌ xkil taq waꞌ, xebꞌanimajik y janipa ri xkilo xebꞌek che utzijoxik chupa ri tinamit y pa taq juyubꞌ.
LUK 8:35 Xepe kꞌu ri winaq che rilik saꞌ ri xꞌaniꞌ chiriꞌ. Echiriꞌ xekꞌun pa kꞌo wi ri Jesús, xkiriq rachi ri ebꞌelinaq chubꞌi ri itzel uxlabꞌixel che, tzꞌul xeꞌraqan uqꞌabꞌ ri Jesús, ukojom chi uqꞌuꞌ y jusukꞌ chi runaꞌoj. Ruma waꞌ, lik xkixiꞌij kibꞌ.
LUK 8:36 Y ri xebꞌilow waꞌ xkitzijoj chike ri kꞌakꞌ xekꞌunik, suꞌanik xkolobꞌetaj rachi ri xebꞌel bꞌi ri itzel uxlabꞌixel che.
LUK 8:37 Ekꞌuchiriꞌ, konoje ri winaq pa taq ri luwar re Gadara xebꞌelaj che ri Jesús kel bꞌi chiriꞌ ma lik kixiꞌim kibꞌ che. Y ri Jesús xok chupa ri barco chaꞌ katzelejik.
LUK 8:38 Ekꞌuchiriꞌ, rachi ri ebꞌelinaq bꞌi ri itzel uxlabꞌixel che, xelaj che ri Jesús chaꞌ kuya luwar che katerej bꞌi chirij; pero ri Jesús xutaq che kakanaj kanoq, jewaꞌ xubꞌiꞌij che:
LUK 8:39 —Chat-tzelej chaꞌwocho y chatzijoj chike ri tikawex ronoje ri utz uꞌanom ri Dios awukꞌ —xchaꞌ. Y rachi e xuꞌano; xeꞌek che utzijoxik chupa ronoje ri tinamit ri utz xꞌan che ruma ri Jesús.
LUK 8:40 Echiriꞌ xtzelej ri Jesús chꞌaqa yaꞌ, ri winaq xkikꞌul rukꞌ kiꞌkotemal ma konoje lik koyeꞌem.
LUK 8:41 Ekꞌuchiriꞌ, xopon jun achi Jairo rubꞌiꞌ, rire aj wach re ri sinagoga. Waꞌ waꞌchi xuxuk ribꞌ xeꞌraqan uqꞌabꞌ ri Jesús y lik xelaj che keꞌek chirocho,
LUK 8:42 ma xa jun ko rumiꞌal y laj kabꞌlajuj rujunabꞌ, yey kajekꞌowik. Ekꞌuchiriꞌ xeꞌek ri Jesús rukꞌ, ukꞌiyal winaq xeterej bꞌi chirij y lik kakipitzꞌipaꞌ.
LUK 8:43 Chikixoꞌlibꞌal kꞌu ri winaq kꞌo jun ixoq lik yewaꞌ, e kabꞌlajuj lo junabꞌ riꞌ na kataniꞌ ta ri yabꞌil re upa ikꞌ che. Ronoje ri kꞌo rukꞌ ukꞌisom chi ne kukꞌ ri aj kun, yey na jinta junoq xriqow ukunaxik ri yabꞌil kꞌo che.
LUK 8:44 Rire xqibꞌ kꞌu pana chirij ri Jesús y xuchap ruchiꞌ ruqꞌuꞌ. Y chupa kꞌu laꞌ la joqꞌotaj xtaniꞌ ruyabꞌil.
LUK 8:45 Ekꞌuchiriꞌ, ri Jesús xutzꞌonoj: —¿China ri xchapaw weꞌin? —xchaꞌ. Yey na jinta junoq kuya ribꞌ chupa. Ekꞌuchiriꞌ ri Pedro y ri rachbꞌiꞌil xkibꞌiꞌij: —Qajawal, ri winaq kakipitzꞌipaꞌ la y kakiminimaꞌ la. ¿Suꞌchak kꞌu riꞌ katzꞌonoj la: “¿China ri xchapaw weꞌin?” —xechaꞌ.
LUK 8:46 Noꞌj ri Jesús xubꞌiꞌij: —Kꞌo jun xinchapawik ma xinnaꞌo kꞌo jun xkunutaj rukꞌ ri nuchuqꞌabꞌ —xchaꞌ.
LUK 8:47 Echiriꞌ rixoq xrilo xnaꞌbꞌetaj ruma ri Jesús, xpetik kabꞌirbꞌotik. Xuxukubꞌaꞌ kꞌu ribꞌ xeꞌraqan uqꞌabꞌ ri Jesús y xutzijoj chikiwach konoje ri winaq suꞌbꞌe xuchap ruqꞌuꞌ ri Jesús y chaꞌtaj xa pa joqꞌotaj xkunutajik.
LUK 8:48 Ekꞌu ri Jesús xubꞌiꞌij che: —Ixoq, ruma ri kubꞌulibꞌal kꞌuꞌx la wukꞌ, xkunutaj la. Oj kꞌu la riꞌ chi utzil chomal —xchaꞌ.
LUK 8:49 Kꞌa kachꞌaꞌt ne ri Jesús, echiriꞌ xkꞌun lo jun petinaq chirocho ri aj wach re ri sinagoga y xoluꞌbꞌiꞌij che ri Jairo: —Ri miꞌal la ya xkamik; na jinta chi kutiqoj kabꞌayabꞌaꞌ la ri tijonel —xchaꞌ.
LUK 8:50 Echiriꞌ xuta waꞌ ri Jesús, xubꞌiꞌij che ri Jairo: —Muxiꞌij ribꞌ kꞌuꞌx la, xew lik kubꞌula kꞌuꞌx la wukꞌ y jelaꞌ kakolobꞌetaj ri miꞌal la che ri kamik —xchaꞌ.
LUK 8:51 Ekꞌuchiriꞌ xopon chirocho ri Jairo, ri Jesús xew xebꞌukoj bꞌi ri Pedro, ri Jacobo, ri Juan y ruchu-uqaw ri ralko ali; y na xuya ta luwar che junoq chik kok bꞌi.
LUK 8:52 Konoje ri winaq kebꞌoqꞌik y lik ketunanik. Noꞌj ri Jesús xubꞌiꞌij chike: —Mixoqꞌik, ma ri ralko ali na kaminaq taj, xa kawarik —xchaꞌ.
LUK 8:53 Ekꞌu rike xa xkitzeꞌej ri xubꞌiꞌij, ma ketaꞌam kaminaq chik.
LUK 8:54 Noꞌj ri Jesús xuchap ruqꞌabꞌ ri ralko ali y lik ko xubꞌiꞌij: —Ali chuuy, ¡chatyaktajoq! —xchaꞌ.
LUK 8:55 Ekꞌuchiriꞌ xtzelej lo ri ranimaꞌ y chupa kꞌu laꞌ la joqꞌotaj xyaktajik. Y ri Jesús xebꞌutaq che uyaꞌik uwa.
LUK 8:56 Ekꞌu ruchu-uqaw lik xkam kanimaꞌ che, pero ri Jesús xebꞌutaq che na kakibꞌiꞌij ta che junoq wa xuꞌano.
LUK 9:1 Ri Jesús xumol kichiꞌ ri kabꞌlajuj utijoꞌn y xuya pakiqꞌabꞌ kebꞌekesaj bꞌi itzelilaj uxlabꞌixel y kekikunaj ri yewaꞌibꞌ.
LUK 9:2 Xebꞌutaq kꞌu bꞌi riꞌ che utzijoxik rutaqanik ri Dios y che kikunaxik ri yewaꞌibꞌ.
LUK 9:3 Jewaꞌ xubꞌiꞌij chike: «Makꞌo mikꞌam bꞌi re pa bꞌe; mikꞌam bꞌi ichꞌamiꞌy, itebꞌ, iwa, imeyo o jun chik ikoton.
LUK 9:4 We xixkꞌul pa juna ja, chixkꞌola chiriꞌ kꞌate kixel bꞌi echiriꞌ kixꞌek pa jun chik tinamit.
LUK 9:5 We chupa juna tinamit na kixkꞌul taj, chixelubꞌi chiriꞌ y chipupaꞌ kan rulew kꞌo che ri iwaqan, waꞌ e kꞌutubꞌal re na utz ta kiꞌanom ri ejeqel chiriꞌ» xcha chike.
LUK 9:6 Xebꞌel kꞌu bꞌi rutijoꞌn y xebꞌek pa taq aldeas re kakitzijoj ri Utzilaj Tzij y re kekikunaj yewaꞌibꞌ che ronoje luwar.
LUK 9:7 Ri Herodes, ri rey re Galilea, xuta puwi ronoje ri kuꞌan ri Jesús. Ruma kꞌu waꞌ, lik sachinaq runaꞌoj, ma e kꞌo jujun kebꞌiꞌn re: «Laꞌ e ri Juan xkꞌastaj lo chikixoꞌl ri ekaminaq» kechaꞌ.
LUK 9:8 Yey e kꞌo jujun kakibꞌiꞌij: «Rire e Elías xwinaqir loq.» Y e kꞌo jujun chik kakibꞌiꞌij: «E junoq chike ri qꞌalajisanelabꞌ re ojertan xkꞌastaj loq» kechaꞌ.
LUK 9:9 Noꞌj ri rey Herodes xubꞌiꞌij: «Riꞌin xintaq ukꞌatzixik rujolom ri Juan. ¿China kꞌu riꞌ waꞌ waꞌchi lik saꞌchi ri kintajin che utayik puwiꞌ?» xchaꞌ. Y kutzukuj kꞌut suꞌanik karil uwach ri Jesús.
LUK 9:10 Echiriꞌ xetzelej lo ri kabꞌlajuj utaqoꞌn ri Jesús, xkitzijoj che Rire janipa taq ri xkiꞌano. Ekꞌuchiriꞌ, xekꞌam bꞌi ruma ri Jesús y xebꞌek kitukel pa jun luwar katzꞌintzꞌotik chunaqaj jun tinamit Betsaida rubꞌiꞌ.
LUK 9:11 Noꞌj ri winaq echiriꞌ xketaꞌmaj, xebꞌel lo pa taq ri tinamit y xebꞌek chaꞌ keꞌkiriqa ri Jesús. Yey Rire xebꞌukꞌul chi utz, xujeq katzijon chikiwach puwi rutaqanik ri Dios y xebꞌukunaj ri e yewaꞌibꞌ chike.
LUK 9:12 Echiriꞌ katajin ubꞌenam ri qꞌij, xeqibꞌ lo ri kabꞌlajuj utijoꞌn y xkibꞌiꞌij che: —Qajawal, utz we ketaq bꞌi la ri winaq pa taq raldeas y pa taq ri luwar kꞌo lo xa naqaj chaꞌ keꞌkitzukuj pa kewar wi y saꞌ ri kakitijo, ma ri wara pa oj kꞌo wi lik katzꞌintzꞌotik —xecha che.
LUK 9:13 Noꞌj ri Jesús xubꞌiꞌij chike: —Chebꞌitzuqu riꞌix —xchaꞌ. Ekꞌu rutijoꞌn xkibꞌiꞌij che: —Xa woꞌobꞌ pam y kaꞌibꞌ kar kꞌo qukꞌ. Xew we e laꞌ kojꞌek y keꞌqaloqꞌo waꞌim ke konoje wa ukꞌiyal winaq, keqatzuq kꞌu riꞌ —xechaꞌ.
LUK 9:14 Laj e lo woꞌobꞌ mil chi achijabꞌ e kꞌo chiriꞌ. Ekꞌu ri Jesús xubꞌiꞌij chike rutijoꞌn: —Chibꞌiꞌij chike ri winaq ketzꞌuyiꞌ chimutzaꞌj re nikꞌaj ciento chujujunal —xchaꞌ.
LUK 9:15 Jelaꞌ xkiꞌano, xekitzꞌuyubꞌaꞌ konoje.
LUK 9:16 Ekꞌuchiriꞌ ri Jesús xukꞌam ri woꞌobꞌ pam y ri kaꞌibꞌ kar, xtzuꞌn chikaj y xtioxin chwach ri Dios. Xuya kꞌu bꞌi chike rutijoꞌn chaꞌ kakijach chike ri winaq.
LUK 9:17 Konoje kꞌu ri winaq xewaꞌik y xenoj chi utz. Tekꞌuchiriꞌ, xkimol ri chꞌaqaꞌtaꞌq kiqax y rukꞌ waꞌ xnoj lo kabꞌlajuj chakach.
LUK 9:18 Kꞌo jun qꞌij ri Jesús utukel kachꞌaꞌt rukꞌ ri Dios, yey xew rutijoꞌn e kꞌo rukꞌ. Ewi xutzꞌonoj chike: —Chikiwach ri winaq, ¿in china nawi riꞌin? —xchaꞌ.
LUK 9:19 Rutijoꞌn xkikꞌul uwach che: —Kꞌo kebꞌiꞌn re lal ri Juan Aj Yaꞌl Bautismo; jujun chik kakibꞌiꞌij lal ri Elías; y jujun chik, lal junoq chik chike ri qꞌalajisanelabꞌ re ojertan kꞌastajinaq loq —xechaꞌ.
LUK 9:20 Ekꞌuchiriꞌ, xutzꞌonoj tanchi chike: —Yey chiwach riꞌix, ¿in china riꞌin? —xchaꞌ. Ekꞌu ri Pedro xukꞌul uwach: —Rilal lal ri Cristo, Ruchaꞌoꞌn lo ri Dios —xchaꞌ.
LUK 9:21 Pero ri Jesús lik xebꞌutaq che na kakitzijoj ta kꞌana che junoq china Rire.
LUK 9:22 Ekꞌuchiriꞌ, xubꞌiꞌij chike: —Lik chirajawaxik che Ralaxel Chikixoꞌl Tikawex kutij na ri kꞌax y kakꞌaq bꞌi uqꞌij kuma ri nimaq winaq re ri tinamit, ri nimaq e aj chakunel pa Rocho Dios y raj kꞌutunel re ri tzijpixabꞌ. Tekꞌuchiriꞌ, kakamisaxik; noꞌj churox qꞌij kakꞌastaj loq —xchaꞌ.
LUK 9:23 Xubꞌiꞌij tanchi kꞌu chike konoje: —We kꞌo junoq karaj katerej lo chwij, lik chirajawaxik che muꞌan xew ri karaj rire, e ronoje qꞌij chukuyu ri kꞌax kape puwiꞌ ruma ukojom ri nubꞌiꞌ; yey utz kꞌu riꞌ katerej lo chwij.
LUK 9:24 Ma china ri na kuya ta ranimaꞌ rukꞌaslem, riꞌ e kujam ri chomilaj kꞌaslemal chwach ri Dios; noꞌj ri kuya ranimaꞌ rukꞌaslem wuma riꞌin, riꞌ e kuriq ri chomilaj ukꞌaslemal chwach ri Dios.
LUK 9:25 »¿Saꞌ kꞌu kutiqoj riꞌ che juna tikawex we kuꞌan rajaw ronoje ruwachulew, yey e kujam rukꞌaslemal y jelaꞌ kusach uwach chiribꞌil ribꞌ?
LUK 9:26 Ma china ri kakꞌix chwe riꞌin y che ri nuchꞌaꞌtem, jelaꞌ kꞌu riꞌ ri in Alaxel Chikixoꞌl Tikawex kinkꞌix che rire echiriꞌ kinkꞌun tanchi rukꞌ runimal nuchomalil, junam rukꞌ runimal uchomalil ri Nuqaw y kukꞌ taq ri santowilaj ángeles.
LUK 9:27 Riꞌin paqatzij wi kambꞌiꞌij chiwe: E kꞌo jujun chike wa e kꞌo wara na kekam tana we na xkil tubꞌi rutaqanik ri Dios —xchaꞌ.
LUK 9:28 Laj wajxaqibꞌ qꞌij riꞌ ubꞌiꞌim waꞌ ri Jesús echiriꞌ xebꞌuchaꞌ ri Pedro, ri Juan y ri Jacobo y xel bꞌi kukꞌ chwa jun juyubꞌ chaꞌ keꞌchꞌaꞌt rukꞌ ri Dios.
LUK 9:29 Yey echiriꞌ kachꞌaꞌt rukꞌ ri Dios, xjalkꞌatitaj rupalaj y ruqꞌuꞌ xuꞌan lik saq y kawolqꞌinik.
LUK 9:30 Y xewinaqir kꞌu kebꞌ achijabꞌ e riꞌ kechꞌaꞌt rukꞌ. Waꞌ e ri Moisés y ri Elías, qꞌalajisanelabꞌ re ojertan.
LUK 9:31 Ekꞌu rike sututal kij rukꞌ jun chomilaj qꞌijsaq. Y kechꞌaꞌt puwi rukamik ri Jesús, ri kukꞌulumaj na chilaꞌ Jerusalem.
LUK 9:32 Ri Pedro kukꞌ ri rachbꞌiꞌil lik kꞌo waram chike, pero xtzor kaꞌn kiwach y xkil kꞌu runimal uwonibꞌal ri Jesús y ri kaꞌibꞌ achijabꞌ e kꞌo rukꞌ.
LUK 9:33 Ekꞌuchiriꞌ katajin bꞌi kelik ri kaꞌibꞌ achijabꞌ rukꞌ ri Jesús, ri Pedro xubꞌiꞌij che ri Jesús: —Qajawal, lik utz xyaꞌtaj chiqe oj kꞌo wara. Qaꞌana kꞌu oxibꞌ rancho: jun e la, jun re ri Moisés y jun re ri Elías —xchaꞌ. Ri Pedro xubꞌiꞌij waꞌ ruma na kunaꞌ taj saꞌ ri kubꞌiꞌij.
LUK 9:34 Kꞌa kachꞌaꞌt ne ri Pedro, echiriꞌ xpe jun sutzꞌ y xuchꞌuq kiwiꞌ. Lik kꞌu xkixiꞌij kibꞌ riꞌ echiriꞌ xechꞌuqutaj ruma ri sutzꞌ.
LUK 9:35 Ekꞌuchiriꞌ, xkita ruqul ri Dios chupa ri sutzꞌ, jewaꞌ kubꞌiꞌij: «E Nukꞌajol waꞌ ri lik kꞌax kannaꞌo; e chita utzij Rire» kachaꞌ.
LUK 9:36 Ekꞌuchiriꞌ xkꞌis ubꞌiꞌxikil waꞌ, na e jinta chi ri kaꞌibꞌ achijabꞌ rukꞌ ri Jesús. Chupa taq kꞌu riꞌ laꞌ la qꞌij, ri Pedro, ri Juan y ri Jacobo na xkitzijoj ta kꞌana che junoq waꞌ wa xkilo.
LUK 9:37 Chukaꞌm qꞌij echiriꞌ xeqaj lo chwa ri juyubꞌ, ukꞌiyal winaq xebꞌel lo che ukꞌulik ri Jesús.
LUK 9:38 Kꞌo kꞌu jun achi chikixoꞌl ri winaq lik ko xchꞌawik, jewaꞌ xubꞌiꞌij: —Lal tijonel, ꞌana ko la riꞌ, kunaj la wa nukꞌajol, ma xew ne ko walkꞌoꞌal waꞌ.
LUK 9:39 Rire kachaptaj ruma jun itzel uxlabꞌixel. Yey echiriꞌ ritzel uxlabꞌixel kuchapo, rala xaqikꞌateꞌt kujeq kasikꞌinik, katzaq pulew, lik ko kujabꞌajaꞌ ribꞌ y kapuluwan rukꞌaxaj. Ekꞌu ri itzel uxlabꞌixel lik kuꞌan kan kꞌax che y lik na karaj taj kel bꞌi rukꞌ.
LUK 9:40 Ya xinelaj ko chike ri tijoꞌn la chaꞌ kakesaj bꞌi ri itzel uxlabꞌixel, pero rike na xkichꞌij ta resaxik bꞌi —xchaꞌ.
LUK 9:41 Ekꞌu ri Jesús xukꞌul uwach: —¡E ri ix tikawex re waqꞌij ora, na kubꞌul ta ikꞌuꞌx wukꞌ yey ix sachinaq! ¿Janipa chi lo qꞌij kajawaxik kinkꞌojiꞌ iwukꞌ chaꞌ kakubꞌiꞌ ikꞌuꞌx wukꞌ? ¿Janipa chi lo qꞌij kixinkuyu e laꞌ jelaꞌ iꞌanom? —xchaꞌ. Ekꞌuchiriꞌ, xubꞌiꞌij che rachi: —Kꞌama lo ri kꞌajol la wara —xchaꞌ.
LUK 9:42 Echiriꞌ rala xqibꞌ rukꞌ ri Jesús, xkꞌaq pulew y lik ko xjabajoꞌx ruma ri itzelilaj uxlabꞌixel. Pero ri Jesús xutaq ri itzelilaj uxlabꞌixel chaꞌ kel bꞌi che rala y jekꞌulaꞌ xukunaj kan rala. Tekꞌuchiriꞌ, xuya bꞌi puqꞌabꞌ ruqaw.
LUK 9:43 Y konoje xkam kanimaꞌ che runimal uchuqꞌabꞌ ri Dios. Ruma kꞌu konoje kaminaq kanimaꞌ che ri kuꞌan ri Jesús, Rire jewaꞌ xubꞌiꞌij chike rutijoꞌn:
LUK 9:44 —Lik chita chi utz waꞌ y mikꞌow chikꞌuꞌx: Ralaxel Chikixoꞌl Tikawex kayaꞌiꞌ pakiqꞌabꞌ rachijabꞌ chaꞌ rike kakiqꞌat tzij puwiꞌ —xchaꞌ.
LUK 9:45 Noꞌj rutijoꞌn na xkimaj ta usukꞌ la kubꞌiꞌij, ma kꞌamajaꞌ kayaꞌtaj chike kakimaj usukꞌ waꞌ. Yey kakixiꞌij kibꞌ kakitzꞌonoj che ri Jesús saꞌ keꞌelawi waꞌ.
LUK 9:46 Ekꞌuchiriꞌ, rutijoꞌn ri Jesús xkijeqo kakichapalaꞌ kibꞌ chikiwach puwiꞌ chinoq chike kayaꞌiꞌ más uwach.
LUK 9:47 Ewi ri Jesús xunaꞌbꞌej ri kꞌo pa kanimaꞌ. Xukꞌam kꞌu jun ralko kꞌoꞌm y xuya putzal.
LUK 9:48 Xubꞌiꞌij kꞌu chike: —China ri kukꞌul chupa ri nubꞌiꞌ junoq na jinta uwach pachaꞌ wa ralko kꞌoꞌm, e junam rukꞌ e in ri kinukꞌulu. Yey china ri kakꞌuluw we riꞌin, e kukꞌul kꞌu ri Jun taqayom lo we. Ma e ri kuꞌan chꞌutiꞌn che ribꞌ, e lik kꞌo uwach riꞌ chwach ri Dios —xchaꞌ.
LUK 9:49 Ekꞌuchiriꞌ, ri Juan xubꞌiꞌij che ri Jesús: —Qajawal, xqil jun achi kebꞌeresaj bꞌi itzel uxlabꞌixel chupa ri bꞌiꞌ la; yey riꞌoj xqabꞌiꞌij che muꞌan chi waꞌ, ma rire na qukꞌil taj —xchaꞌ.
LUK 9:50 Ekꞌu ri Jesús xubꞌiꞌij che ri Juan: —We kꞌo kaꞌanaw waꞌ, miqꞌatej; ma china ri na kachꞌoꞌjin ta chiqij, riꞌ e qukꞌil —xchaꞌ.
LUK 9:51 E xuꞌan waꞌ echiriꞌ ya kopon ruqꞌijol kakꞌam pan ri Jesús chilaꞌ chikaj: Rire xa jumul xujikibꞌaꞌ uwach keꞌek chupa ri tinamit Jerusalem.
LUK 9:52 Xebꞌunabꞌesaj bꞌi rutijoꞌn chwach Rire. Rike xebꞌek y xebꞌok chupa jun aldea ke ri aj Samaria chaꞌ kakitzukuj pa kakanaj wi ri Jesús chiriꞌ.
LUK 9:53 Pero ri aj Samaria na xkaj taj kakikꞌulu ma xkinaꞌbꞌej Jerusalem keꞌek wi.
LUK 9:54 Echiriꞌ ri Jacobo y ri Juan, ri kebꞌ utijoꞌn ri Jesús xkil waꞌ, xkibꞌiꞌij che: —Qajawal, ¿kaꞌaj la kojtaqan che chaꞌ kaqaj lo aqꞌ chilaꞌ chikaj y jekꞌulaꞌ kasach kiwach konoje, jelaꞌ pachaꞌ xuꞌan ri qꞌalajisanel Elías ojertan? —xechaꞌ.
LUK 9:55 Pero ri Jesús xutzuꞌ kiwach y xebꞌuyajo, jewaꞌ xubꞌiꞌij chike: —Riꞌix na iwetaꞌam taj saꞌ chi uxlabꞌixel xkojow waꞌ pijolom.
LUK 9:56 Ma ri in Alaxel Chikixoꞌl Tikawex na in ta kꞌuninaq che usachik kiwach ri tikawex; ma in petinaq che kikolobꞌexik —xchaꞌ. Ekꞌuchiriꞌ, xebꞌek tanchi chupa jun chik aldea.
LUK 9:57 Xaloqꞌ kꞌu riꞌ e kꞌo chi bꞌe, kꞌo jun xubꞌiꞌij che ri Jesús: —Wajawal, riꞌin kinterej bꞌi chiꞌij la tobꞌ pachawi keꞌek wi la —xchaꞌ.
LUK 9:58 Ekꞌu ri Jesús xubꞌiꞌij che: —Ri yak kꞌo kijul y ri tzꞌikin kexikꞌikꞌ che ruwa kaj kꞌo kisok; noꞌj Ralaxel Chikixoꞌl Tikawex na jinta ne uluwar tobꞌ xa pa kuxlan wi —xchaꞌ.
LUK 9:59 Tekꞌuchiriꞌ, xubꞌiꞌij che jun chik achi: —Chat-terej lo chwij —xchaꞌ. Ekꞌu rachi xubꞌiꞌij che ri Jesús: —Wajawal, yaꞌa la luwar chwe kanwoyꞌej kakam na ri nuqaw y kanmuq kanoq; tekꞌuchiriꞌ, kinterej chiꞌij la —xchaꞌ.
LUK 9:60 Ri Jesús xubꞌiꞌij che: —Chayaꞌa kan chike ri ekaminaq chwach ri Dios chaꞌ e rike kemuquw ri katz-kichaqꞌ kekamik; noꞌj riꞌat jat y chat-tzijon puwi rutaqanik ri Dios —xchaꞌ.
LUK 9:61 Tekꞌuchiriꞌ, kꞌo tanchi jun jewaꞌ xubꞌiꞌij che ri Jesús: —Wajawal, riꞌin kuaj kinterej bꞌi chiꞌij la. Pero nabꞌe na yaꞌa la luwar chwe kebꞌenuchꞌaꞌbꞌej kan ri watz-nuchaqꞌ e kꞌo pa wocho —xchaꞌ.
LUK 9:62 Ri Jesús xubꞌiꞌij che: —Na jinta junoq echiriꞌ uchapom rabꞌixobꞌal katzuꞌn kan chirij, ma riꞌ na jusukꞌ ta ri chak kuꞌano. Jekꞌuriꞌlaꞌ, we junoq na uyaꞌom ta kan ronoje, na taqal ta che kꞌo chupa rutaqanik ri Dios —xchaꞌ.
LUK 10:1 Tekꞌuchiriꞌ, ri Qanimajawal xebꞌuchaꞌ chi setenta utijoꞌn y xebꞌutaq bꞌi pa kakabꞌ chaꞌ kenabꞌej bꞌi chwach Rire pa ronoje taq tinamit y luwar pa keꞌek wi.
LUK 10:2 Echiriꞌ kꞌamajaꞌ kebꞌel bꞌi, ri Jesús xubꞌiꞌij chike: «Paqatzij wi kambꞌiꞌij chiwe: Ri molonik kajawaxik kaꞌanik, lik nim; noꞌj raj chak na e kꞌi taj. E uwariꞌche chitzꞌonoj che ri Dios, ri Rajaw ri molonik, chaꞌ kebꞌutaq lo aj chak re kakiꞌan ri molonik.
LUK 10:3 ¡Jix! Pero chitapeꞌ: Riꞌin kixintaq bꞌi pachaꞌ ix bꞌexex chikixoꞌl utiw.
LUK 10:4 »Echiriꞌ kixꞌek, mikꞌam bꞌi ukꞌolibꞌal imeyo, mikꞌam bꞌi itebꞌ, mikꞌam bꞌi jun chik molaꞌj ixajabꞌ. Yey mixtakꞌiꞌ pa bꞌe re kiya kan rutzil uwach junoq.
LUK 10:5 »We xixok chuchiꞌ juna ja, ri nabꞌe ichꞌaꞌtem kibꞌiꞌij e waꞌ: “Kꞌola ri utzil chomal re ri Dios pawiꞌ alaq.”
LUK 10:6 We kꞌo junoq chiriꞌ lik karaj kukꞌul ri utzil chomal re ri Dios, kukꞌul kꞌu riꞌ. Noꞌj we na jinta kakꞌuluw re ri utzil chomal re ri Dios, waꞌ katzelej tanchi lo iwukꞌ.
LUK 10:7 Pa kixkꞌul wi, chixkanaj chiriꞌ chupa ri ja; mixqꞌax che jujun chik ja. Utz kitij ri kayaꞌ chiwe; ma e junoq kachakunik, lik taqal che katojik.
LUK 10:8 We xixok chupa juna tinamit y xixkꞌul pa juna ja, chitijaꞌ saꞌ ri kayaꞌ lo chiwach y mitzꞌonoj ri kiwaj riꞌix.
LUK 10:9 »Chebꞌikunaj kꞌu ri e yewaꞌibꞌ e kꞌo chupa ri tinamit y chibꞌiꞌij chike konoje: “Rutaqanik ri Dios xa naqaj chi kꞌo wi lo che alaq.”
LUK 10:10 »We xixok kꞌu chupa juna tinamit yey na kixkꞌul taj, chixelubꞌi pa taq bꞌe y chibꞌiꞌij:
LUK 10:11 “Tobꞌ ne rulew re wa tinamit alaq kꞌo che ri qaqan, kaqapuꞌ kanoq chaꞌ ketaꞌmaj alaq na utz ta ri xꞌan alaq. Pero chetaꞌmaj alaq chi utz waꞌ: Rutaqanik ri Dios xa naqaj chi kꞌo wi lo che alaq” kixchaꞌ.
LUK 10:12 Kambꞌiꞌij kꞌu chiwe: Más lik kꞌax ri kape na pakiwi ri tinamit na kakikꞌul ta ri Utzilaj Tzij, chwa ri kape pakiwi ri e aj Sodoma y ri e aj Gomorra.
LUK 10:13 »¡Lik toqꞌoꞌ iwach ri ix aj Corazín! ¡Lik toqꞌoꞌ iwach ri ix aj Betsaida! Ma we ta chupa ri tinamit Tiro y ri tinamit Sidón xilitaj wi wa kꞌutubꞌal re ruchuqꞌabꞌ ri Dios xinꞌan chiwach riꞌix, kꞌo tan qꞌij ta lo riꞌ xkitzelej kitzij chwach ri Dios, kikojom kꞌu kiqꞌuꞌ kꞌax rij y kitzꞌuyubꞌam kibꞌ pa chaaj ruma ri kibꞌis.
LUK 10:14 E uwariꞌche echiriꞌ kopon ri qꞌij re ri qꞌatbꞌal tzij, más nim ri kꞌaxkꞌobꞌik kape piwiꞌ chwa ri kꞌaxkꞌobꞌik kape pakiwi ri winaq re ri tinamit Tiro y ri tinamit Sidón.
LUK 10:15 Ekꞌu ri ix aj Capernaúm, e chiwach riꞌix lik yakom chi iqꞌij kꞌa chikaj; yey na e ta riꞌ, ma lik kakꞌaq ne bꞌi iqꞌij y kixkꞌaq ne bꞌi kꞌa chi xibꞌalbꞌaꞌ re tijbꞌal kꞌax.
LUK 10:16 »China ri kataw iweꞌix, in ri kinuto; china ri tzel kilow iwe, in ri tzel kinrilo; china ri tzel kilow we riꞌin, e tzel karil ri Jun taqayom lo we riꞌin» xcha ri Jesús.
LUK 10:17 Xebꞌek kꞌu riꞌ ri setenta. Y ekꞌuchiriꞌ xetzelej loq, lik kekiꞌkotik. Xkitzijoj kꞌu che ri Jesús: —Qajawal, ¡taq ri itzel uxlabꞌixel xkikoj qatzij echiriꞌ chupa ri bꞌiꞌ la xojtaqan che kebꞌel bꞌi chike ri winaq! —xechaꞌ.
LUK 10:18 Ri Jesús xubꞌiꞌij chike: —Riꞌin xinwil ri Satanás xkꞌaq lo chikaj pachaꞌ jun rayo.
LUK 10:19 ¡Chiwilapeꞌ! Riꞌin nuyaꞌom ichuqꞌabꞌ chaꞌ kichꞌij uchuqꞌabꞌ ritzel winaq y na jinta kꞌo kikꞌulumaj tobꞌ ne kiyiqꞌiyaꞌ kiwiꞌ kumatz y sinaꞌj.
LUK 10:20 Pero riꞌix mixkiꞌkot ruma kakikoj itzij ri itzel uxlabꞌixel; e chixkiꞌkota ruma tzꞌibꞌital ribꞌiꞌ chilaꞌ chikaj —xchaꞌ.
LUK 10:21 Ekꞌu laꞌ la joqꞌotaj, ri Jesús lik xkiꞌkot ruma ri Santowilaj Ruxlabꞌixel ri Dios y xubꞌiꞌij: «Nuqaw, kanyak qꞌij la, Lal Rajaw ruwa kaj y ruwachulew, ma taq ri qꞌalajisam la chike ri lik kakiꞌan chꞌutiꞌn che kibꞌ, waꞌ ewam la chikiwach ri lik kꞌo kinaꞌoj y lik kꞌo kimajom. Jelaꞌ xꞌan la, Nuqaw, ma e xꞌaj la riꞌ» xchaꞌ.
LUK 10:22 Tekꞌuchiriꞌ, xubꞌiꞌij chike ri tikawex: «Ronoje taq ri kꞌolik yaꞌtal lo panuqꞌabꞌ ruma ri Nuqaw. Na jinta kꞌu junoq umajom usukꞌ chi utz saꞌ ruwach Rukꞌajol ri Dios; xew ri Qaqaw Dios etaꞌmayom re. Y na jinta ne junoq umajom usukꞌ chi utz saꞌ ruwach ri Qaqaw Dios, xew Rukꞌajol ri Dios etaꞌmayom re; yey puqꞌabꞌ kꞌu riꞌ Rukꞌajol kꞌo wi china chike karaj kuqꞌalajisaj wi waꞌ» xchaꞌ.
LUK 10:23 Tekꞌuchiriꞌ xqibꞌ kukꞌ rutijoꞌn y e laꞌ xa kitukel xubꞌiꞌij chike: «Nim kiqꞌij kalaxik ri kakilo janipa ri iwilom riꞌix.
LUK 10:24 Ma kambꞌiꞌij kꞌu chiwe lik e kꞌi ri qꞌalajisanelabꞌ y ri taqanelabꞌ re ojertan lik xkaj kakil bꞌi janipa ri kiwil riꞌix woꞌora, pero na xkimaj ta chi rilik bꞌi. Lik xkaj kakita bꞌi janipa ri kita riꞌix woꞌora, pero na xkimaj ta chi utayik bꞌi» xchaꞌ.
LUK 10:25 Kꞌo jun aj kꞌutunel re ri tzijpixabꞌ xyaktajik y jewaꞌ xubꞌiꞌij chaꞌ kukꞌam upa ri Jesús: —Wajawal, ¿saꞌ ri kanꞌano chaꞌ kꞌo nukꞌaslemal na jinta utaqexik? —xchaꞌ.
LUK 10:26 Ri Jesús xubꞌiꞌij che: —¿Saꞌ ri tzꞌibꞌital chupa Rutzij Upixabꞌ ri Dios? ¿Saꞌ ri kamaj la usukꞌ che? —xchaꞌ.
LUK 10:27 Y raj wach xukꞌul uwach: —Jewaꞌ tzꞌibꞌitalik: Kꞌax chanaꞌa ra Dios Qajawxel rukꞌ ronoje awanimaꞌ, rukꞌ ronoje akꞌuꞌx, rukꞌ ronoje achuqꞌabꞌ y rukꞌ ronoje anaꞌoj; yey Kꞌax chanaꞌa rawatz-achaqꞌ jelaꞌ pachaꞌ ri kꞌax kanaꞌ awibꞌ riꞌat —xchaꞌ.
LUK 10:28 Y ri Jesús xubꞌiꞌij che: —Lik utz ri xkꞌulubꞌej wi la uwach. ꞌAna kꞌu la waꞌ y kakꞌojiꞌ kꞌaslemal la na jinta utaqexik —xchaꞌ.
LUK 10:29 Pero raj wach na karaj taj kutzaq ribꞌ y xubꞌiꞌij kꞌu che ri Jesús: —¿Yey china ri watz-nuchaqꞌ? —xchaꞌ.
LUK 10:30 Ri Jesús jewaꞌ xubꞌiꞌij che: «Kꞌo jun achi xel chupa ri tinamit Jerusalem y xeꞌek pa ri tinamit Jericó. Pa bꞌe kꞌut xtzaq pakiqꞌabꞌ jujun eleqꞌomabꞌ. Releqꞌomabꞌ xkimaj bꞌi ronoje rubꞌitaq re y lik xkiꞌan kan kꞌax che. Kajekꞌowik xkiya kanoq y xebꞌek.
LUK 10:31 »Ekꞌuchiriꞌ, chupa ri bꞌe xkꞌun lo jun aj chakunel pa Rocho Dios. Y echiriꞌ xril rachi ꞌanom kan kꞌax che, xa xutzuꞌ kanoq y xikꞌowik.
LUK 10:32 »Tekꞌuchiriꞌ xkꞌun lo jun chik achi aj levita, toꞌbꞌel ke raj chakunel pa Rocho Dios. Echiriꞌ xopon chunaqaj rachi ꞌanom kan kꞌax che, xa xutzuꞌ kanoq y xikꞌowik.
LUK 10:33 »Xkꞌun kꞌu lo jun achi aj Samaria. Echiriꞌ xkꞌun chunaqaj rachi ꞌanom kan kꞌax che y xrilo saꞌ ruꞌanom, lik xjuchꞌ kaꞌn pa ranimaꞌ.
LUK 10:34 Xqibꞌ kꞌu rukꞌ, xukunaj uwach rukꞌax rukꞌ aceite y rukꞌ vino, y xuchꞌuq uwach rukꞌax rukꞌ kꞌul. Xuyak bꞌi chwi rukawayuꞌ, xukꞌam bꞌi chupa jun mesón y xuchajij chi utz.
LUK 10:35 Echiriꞌ xel chiriꞌ chukaꞌm qꞌij, xresaj lo kaꞌibꞌ denarios pubꞌolxa y xuya kan che ri rajaw ri mesón, y jewaꞌ xubꞌiꞌij che: “Chajij ko la waꞌchi chwe. We na xuꞌan ta kꞌu wa puaq kanya kan cheꞌla, echiriꞌ kintzelej loq, kanyijbꞌaꞌ cheꞌla” xchaꞌ.»
LUK 10:36 Tekꞌuchiriꞌ ri Jesús xubꞌiꞌij che raj kꞌutunel: —Chiwach rilal, ¿china chike wa oxibꞌ achijabꞌ xuꞌan ratz-uchaqꞌ rachi xchapataj kuma releqꞌomabꞌ pa bꞌe? —xchaꞌ.
LUK 10:37 Raj kꞌutunel xubꞌiꞌij: —Chinuwach riꞌin, e ri jun xukꞌut ri kꞌaxnaꞌbꞌal ukꞌuꞌx che —xchaꞌ. Ekꞌuchiriꞌ xubꞌiꞌij ri Jesús che: —Lik areꞌ. Jelaꞌ kꞌu riꞌ ꞌana la rilal —xchaꞌ.
LUK 10:38 Echiriꞌ ri Jesús kꞌo chi bꞌe, xok chupa jun aldea. Chiriꞌ kꞌo jun ixoq Marta rubꞌiꞌ y rire xukꞌul ri Jesús chirocho.
LUK 10:39 Wiꞌxoq Marta kꞌo jun uchaqꞌ María rubꞌiꞌ. Ekꞌu ri María xtzꞌuyiꞌ chwach ri Jesús chaꞌ kuta ri kubꞌiꞌij.
LUK 10:40 Noꞌj ri Marta lik e ubꞌis ukꞌuꞌx taq ri kaꞌan pa ja. Ekꞌuchiriꞌ, xqibꞌ rukꞌ ri Jesús y jewaꞌ xubꞌiꞌij che: —Wajawal, ¿lik kami e laꞌ na kok ta la il che ri kuꞌan ri nuchaqꞌ? Ma inuyaꞌom kan nutukel chwach ri nimanik. Bꞌiꞌij ko la che kinutoꞌo —xchaꞌ.
LUK 10:41 Noꞌj ri Jesús xubꞌiꞌij che: —Marta, Marta, riꞌat lik e ubꞌis akꞌuꞌx y e sachinaq anaꞌoj puwi ri kaꞌano.
LUK 10:42 Xa jun kꞌu ri lik chirajawaxik wi kaꞌanik, waꞌ e ri más utz, y ri María e uchaꞌom waꞌ; yey na jinta junoq kamajaw waꞌ che —xchaꞌ.
LUK 11:1 Kꞌo jun qꞌij ri Jesús kachꞌaꞌt rukꞌ ri Dios. Y echiriꞌ xukꞌis uꞌanik orar, jun chike rutijoꞌn xubꞌiꞌij che: —Qajawal, kꞌutu la chiqe suꞌanik kaqaꞌan orar, jelaꞌ pachaꞌ xuꞌan ri Juan kukꞌ rutijoꞌn —xchaꞌ.
LUK 11:2 Y ri Jesús xubꞌiꞌij chike: —Echiriꞌ kixchꞌaꞌt rukꞌ ri Dios, utz jewaꞌ kibꞌiꞌij: Qaqaw Dios, Lal kꞌo la chilaꞌ chikaj, ¡lik chetaꞌmaxoq nim uqꞌij ri bꞌiꞌ la! Peta la, taqana la paqawiꞌ; chuꞌana kꞌu ri rajawal kꞌuꞌx la wara che ruwachulew, jelaꞌ pachaꞌ ri kaꞌan chilaꞌ chikaj.
LUK 11:3 Yaꞌa ko la waqꞌij ri qawa, ri kajawax chiqe ronoje qꞌij.
LUK 11:4 Kuyu ko la qamak, jelaꞌ pachaꞌ riꞌoj kaqakuy kimak konoje ri emakuninaq chiqij. Y maya ko la luwar chiqe kojtzaq pa mak; e lik chojkolobꞌej la chwach ritzel winaq —xchaꞌ.
LUK 11:5 Ekꞌu ri Jesús xubꞌiꞌij tanchi chike: «We ta e laꞌ kꞌo junoq chiwe, pa tikꞌil aqꞌabꞌ keꞌek chirocho juna ramigo y jewaꞌ kubꞌiꞌij che: “Wamigo, maꞌan ko riꞌ kanjal oxibꞌ nuwa chawe,
LUK 11:6 ma xkꞌun jun wamigo petinaq naj y na jinta chi nuwa re kantzuqu” kacha che.
LUK 11:7 »Ekꞌu rire kukꞌul lo uwach kꞌa pa ja, jewaꞌ kubꞌiꞌij lo che: “Minachꞌichꞌaꞌ, ma ri puerta tzꞌapil chik y oj kotzꞌol chi kukꞌ ri walkꞌoꞌal. Na utz ta kꞌu riꞌ kinyaktajik chaꞌ kiꞌnyaꞌa bꞌi chawe” kachaꞌ.
LUK 11:8 »Kambꞌiꞌij kꞌu riꞌin chiwe: Rachi tobꞌ na kayaktaj ta lo che utoꞌik ri ramigo ruma kamigos kibꞌ, pero kutoꞌo xa ruma ri ramigo lik na xroqꞌotaj ta utzꞌonoxik.
LUK 11:9 E uwariꞌche kambꞌiꞌij riꞌin chiwe: Janipa ri kajawax chiwe, chitzꞌonoj che ri Dios y kayaꞌiꞌ chiwe; chitzukuj rukꞌ Rire janipa ri kajawax chiwe y kiriqo; chichꞌaꞌbꞌej Rire y kixukajmaj loq.
LUK 11:10 Ma china ri kel uchiꞌ che utzꞌonoxik, kukꞌul na; china ri kꞌo kutzukuj, kuriq na; y china ri kachꞌaw pan che ruchiꞌ ja, kajaqiꞌ na lo che.
LUK 11:11 »¿Kꞌo nebꞌa juna achi chixoꞌl, we rukꞌajol kutzꞌonoj pam, kuya juna abꞌaj che; o we kutzꞌonoj kar, kuya juna kumatz che?
LUK 11:12 ¿O kꞌo nebꞌa juna achi we rukꞌajol kutzꞌonoj saqmolobꞌ che, kuya juna sinaꞌj che? ¡Na jinta junoq!
LUK 11:13 Ekꞌu riꞌix tobꞌ xa ix tikawex na lik ta utz ikꞌuꞌx, na rukꞌ ta kꞌu riꞌ, kiriq uyaꞌik chomilaj taq sipanik chike riwalkꞌoꞌal. ¡Makꞌuwariꞌ ri Qaqaw Dios kꞌo chilaꞌ chikaj kuya ne lo ri Santowilaj Ruxlabꞌixel chike ri ketzꞌonow re!» xcha ri Jesús.
LUK 11:14 E xuꞌan waꞌ echiriꞌ ri Jesús karesaj bꞌi jun itzel uxlabꞌixel che jun achi meꞌturisam ruma ri itzel uxlabꞌixel. Ekꞌuchiriꞌ elinaq chubꞌi ri itzel uxlabꞌixel, rachi xujeq kachꞌaꞌtik. Yey taq ri winaq lik xkam kanimaꞌ che waꞌ.
LUK 11:15 Pero e kꞌo jujun chike xkibꞌiꞌij: «Rire kebꞌeresaj bꞌi ri itzel uxlabꞌixel ruma ruchuqꞌabꞌ ri Beelzebú, ri kajawal ri itzel uxlabꞌixel» xechaꞌ.
LUK 11:16 Y e kꞌo chi jujun xa re kakikꞌam upa ri Jesús, kakitzꞌonoj che kuꞌan juna kꞌutubꞌal re chilaꞌ chikaj chaꞌ kaqꞌalajinik we Rire taqom lo ruma ri Dios.
LUK 11:17 Pero ri Jesús retaꞌam saꞌ ri kakichꞌobꞌo; ruma kꞌu riꞌ, xubꞌiꞌij chike: «We ri taqanelabꞌ re juna tinamit kijachom kipa ruma kechꞌoꞌjin chikiwach, riꞌ na kanajtir ta ri kitaqanik. Yey we ri ejeqelel pa juna ja kijachom kipa ruma kechꞌoꞌjin chikiwach, riꞌ na ketikiꞌ ta chi utz.
LUK 11:18 Jekꞌuriꞌlaꞌ, we ta ri Satanás kukꞌ ri itzel uxlabꞌixel kakijeq kechꞌoꞌjin chikiwach, ¿suꞌanik kꞌu riꞌ katikiꞌ rutaqanik? Kambꞌiꞌij waꞌ ma ralaq kabꞌiꞌij alaq riꞌin kebꞌenuwesaj bꞌi ri itzel uxlabꞌixel ruma ruchuqꞌabꞌ ri Beelzebú.
LUK 11:19 »We ta e riꞌ, ¿china kayaꞌw kichuqꞌabꞌ riꞌ ri e tijoꞌn ralaq chaꞌ kekesaj bꞌi itzelilaj uxlabꞌixel? ¿Rukꞌ nawi ruchuqꞌabꞌ ritzel kakiꞌano? Tzꞌonoj kꞌu alaq riꞌ chike ri e tijoꞌn alaq we e uꞌanom riꞌ.
LUK 11:20 Pero we riꞌin kebꞌenuwesaj bꞌi ri itzel uxlabꞌixel rukꞌ ruchuqꞌabꞌ ri Dios, waꞌ e kꞌutubꞌal re kꞌuninaq chi rutaqanik ri Dios chixoꞌlibꞌal alaq.
LUK 11:21 »We kꞌo juna achi lik kꞌo uchuqꞌabꞌ y lik kꞌo uchapabꞌal puqꞌabꞌ re kuchajij ri rocho, na jinta kꞌu kukꞌulumaj riꞌ rubꞌitaq re.
LUK 11:22 Noꞌj we xkꞌun lo junoq chik más kꞌo uchuqꞌabꞌ chwa ri rajaw ja, riꞌ kuchꞌij uchuqꞌabꞌ, kumaj kꞌu che ri rajaw ja ri chapabꞌal ri lik ukubꞌam ukꞌuꞌx rukꞌ, kukꞌam bꞌi ronoje rubꞌitaq re y kujach chike jujun chik.
LUK 11:23 Kambꞌiꞌij kꞌu che alaq: China ri na uꞌanom ta re wukꞌ riꞌin, riꞌ aj chꞌaꞌoj chwij. Yey china ri na katoꞌbꞌ ta wukꞌ riꞌin che kikꞌamik lo jujun chik, riꞌ e kuwulij wa chak kanꞌano.
LUK 11:24 »Echiriꞌ juna itzelilaj uxlabꞌixel kel bꞌi rukꞌ juna tikawex, ri kuꞌano e kasutin pa taq luwar katzꞌintzꞌotik re kutzukuj pa kajeqiꞌ wi. Yey we na kuriq taj, kubꞌiꞌij kꞌu chiribꞌil ribꞌ: “Kintzelej pe chupa ri wocho, pa xinel lo wi” kachaꞌ.
LUK 11:25 Ekꞌuchiriꞌ koponik, kuꞌriqa rachi pachaꞌ juna ja mesom upa y yijbꞌital chi utz.
LUK 11:26 Keꞌek kꞌut, kebꞌuꞌkꞌama chi lo wuqubꞌ rach itzel uxlabꞌixel más itzel kiwachlibꞌal chwa rire; y konoje kꞌu riꞌ kebꞌokik y kejeqiꞌ chiriꞌ. Jekꞌuriꞌlaꞌ, rubꞌinik rachi más kayojtaj chwa ri petinaq loq» xcha ri Jesús.
LUK 11:27 Echiriꞌ kꞌa katajin ri Jesús che ubꞌiꞌxikil waꞌ, kꞌo jun ixoq chikixoꞌl rukꞌiyal winaq lik ko xchꞌawik, jewaꞌ xubꞌiꞌij che: —Nim uqꞌij ralaxik rixoq xyaꞌw e la chwachulew y xtzꞌumtisan e la —xchaꞌ.
LUK 11:28 Noꞌj ri Jesús xubꞌiꞌij che: —Más nim kiqꞌij kalaxik ri ketaw re y kekojow re Rutzij Upixabꞌ ri Dios —xchaꞌ.
LUK 11:29 Echiriꞌ ukꞌiyal winaq katajin kimolotajik rukꞌ ri Jesús, rire xujeq ubꞌiꞌxikil chike: «Ri tikawex re waqꞌij ora lik itzel kikꞌuꞌx, ma e kakitzꞌonoj kanꞌan juna kꞌutubꞌal re ruchuqꞌabꞌ ri Dios chikiwach. Noꞌj na kayaꞌtaj ta kꞌu waꞌ chike, ma xew kayaꞌtaj ri kꞌutubꞌal xꞌaniꞌ ojertan rukꞌ ri Jonás.
LUK 11:30 Ma jelaꞌ pachaꞌ ri Jonás xoluꞌana jun kꞌutubꞌal chikiwach ri aj Nínive, jekꞌuriꞌlaꞌ Ralaxel Chikixoꞌl Tikawex koluꞌana jun kꞌutubꞌal chikiwach ri tikawex re waqꞌij ora.
LUK 11:31 »Echiriꞌ kopon ri qꞌij re qꞌatbꞌal tzij, kayaktaj lo ri reina re pa sur y kukoj kimak ri tikawex re waqꞌij ora. Ma rojertan lik naj petinaq wi rire chaꞌ koluꞌxikinaj runaꞌoj ri rey Salomón. Noꞌj ri tikawex re waqꞌij ora, kꞌo jun chikixoꞌl más kꞌo uwach chwa ri Salomón, yey na kebꞌok tane il che.
LUK 11:32 »Jekꞌulaꞌ ri winaq aj Nínive re ojertan keyaktaj chupa ri qꞌij re qꞌatbꞌal tzij y kakikoj kimak ri tikawex re waqꞌij ora. Ma rike xkitzelej kitzij chwach ri Dios ruma ri tzijonik xuꞌan ri Jonás chikiwach. Noꞌj ri tikawex re waqꞌij ora, kꞌo jun chikixoꞌl más kꞌo uwach chwa ri Jonás, yey na kebꞌok tane il che.
LUK 11:33 »Na jinta junoq echiriꞌ kutzij juna aqꞌ, keꞌrewaj lo chupa juna luwar pa na qꞌalaj ta wi. Na kuchꞌuq tane uwiꞌ rukꞌ juna mulul re pajbꞌal; ri kuꞌan che, e kuya lo chupa rukꞌolibꞌal chikaj chaꞌ jelaꞌ kutzij kiwiꞌ ri kebꞌok bꞌi.
LUK 11:34 »Ri qawach e pachaꞌ candil re ri qacuerpo, ma ruma waꞌ kojtzuꞌnik chaꞌ utz kojbꞌinik. Jekꞌulaꞌ, we ri qawach lik utz uꞌanom, ronoje ri qacuerpo nojinaq che qꞌijsaq y kaqil kꞌu ronoje chi utz. Noꞌj we ri qawach na utz taj, ronoje ri qacuerpo kꞌo pa qꞌequꞌm.
LUK 11:35 »Lik kꞌu chajij ibꞌ alaq; e mabꞌiꞌij alaq: “Oj kꞌo pa qꞌijsaq”, yey na kanaꞌbꞌej ta alaq pa qꞌequꞌm kꞌo wi alaq.
LUK 11:36 Noꞌj we paqatzij wi kꞌo chi alaq pa qꞌijsaq y na jinta chi re ri qꞌequꞌm che alaq, riꞌ ronoje kaqꞌalajin chiwach alaq jelaꞌ pachaꞌ juna candil kutzij ri bꞌe alaq rukꞌ ruwonibꞌal» xchaꞌ.
LUK 11:37 Ekꞌuchiriꞌ ri Jesús xukꞌis kakꞌutunik, xsikꞌix ruma jun fariseo chaꞌ keꞌwoꞌqa chirocho. Ri Jesús xeꞌek, xok kꞌu chupa ri ja y xtzꞌuyiꞌ chwa ri mexa.
LUK 11:38 Echiriꞌ xril waꞌ ri fariseo, lik xkam ranimaꞌ che ma na xuchꞌaj ta nabꞌe ruqꞌabꞌ jelaꞌ pachaꞌ kakiꞌan che ri kijosqꞌikil ri fariseos.
LUK 11:39 Ekꞌu ri Qanimajawal jewaꞌ xubꞌiꞌij che: —Ralaq alaq fariseos lik kok alaq il che ri kachꞌaj alaq chi utz ri rij ri vaso y ri laq pero na kok ta alaq il che uchꞌajik rupa. Jekꞌuriꞌlaꞌ ralaq lik kok alaq il che ri josqꞌinik re ri cuerpo, pero lik nojinaq ri animaꞌ alaq che rayinik y che ri na utz taj.
LUK 11:40 »¡Lik na jinta kꞌana naꞌoj alaq! Ri Jun xꞌanaw re ri kilitaj che ri cuerpo alaq, ¿na e ta nebꞌa ri xꞌanaw re ri animaꞌ alaq?
LUK 11:41 We paqatzij wi kaꞌaj alaq kuꞌan chom ri bꞌinik silabꞌik alaq chwach ri Qaqaw, sipan alaq chike ri nibꞌaꞌibꞌ rukꞌ ri kꞌo ukꞌ alaq.
LUK 11:42 »¡Lik toqꞌoꞌ wach ralaq alaq fariseos! Lik kok alaq il che jujun tzijpixabꞌ, ma kaya alaq che ri Dios ri diezmo re ri arweno, re ri ruda y re ronoje ichaj; noꞌj na kaꞌan ta alaq ri lik usukꞌ y na kꞌax ta kanaꞌ alaq ri Dios. Yey ri lik chirajawaxik wi e kaꞌan alaq ri usukꞌ y kꞌax kanaꞌ alaq ri Dios, junam rukꞌ ri kaya alaq ri diezmo alaq.
LUK 11:43 »¡Lik toqꞌoꞌ wach ralaq alaq fariseos, ri lik kaꞌan nim che ibꞌ alaq! Ma lik kukꞌul kꞌuꞌx alaq ri katzꞌuyiꞌ alaq pa taq sinagogas chupa ri tzꞌulibꞌal ke ri lik kꞌo kiwach y lik kukꞌul kꞌuꞌx alaq ri kayaꞌ rutzil wach alaq pa kilitaj wi alaq.
LUK 11:44 »¡Lik toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! Xa kebꞌ palaj alaq, ma e kechꞌulaj alaq ri winaq rukꞌ ri kakꞌut alaq. Pachaꞌ alaq muqubꞌal ke animaꞌ na kilitaj taj; ekꞌu ri winaq kebꞌikꞌow puwiꞌ y na kakinaꞌbꞌej taj rukꞌ waꞌ kakichꞌulaj kibꞌ» xchaꞌ.
LUK 11:45 Ekꞌuchiriꞌ, jun chike ri e aj kꞌutunel re ri tzijpixabꞌ jewaꞌ xubꞌiꞌij che ri Jesús: —Lal tijonel, echiriꞌ kabꞌiꞌij la waꞌ, oj jun riꞌoj kojyaj la —xchaꞌ.
LUK 11:46 Ri Jesús xubꞌiꞌij: «¡Lik toqꞌoꞌ wach ralaq alaq aj kꞌutunel re ri tzijpixabꞌ! Lik kaꞌan alaq kꞌax chike ri winaq rukꞌ ri taqanik alaq. Ma wa taqanik alaq e pachaꞌ nimaq taq eqaꞌn lik al y lik kꞌayew rukꞌaxik; ketaq kꞌu alaq ri winaq chaꞌ kakeqaj bꞌi yey ralaq na kaꞌaj tane alaq katoꞌbꞌ kꞌana alaq rukꞌ waꞌ.
LUK 11:47 »¡Lik toqꞌoꞌ wach alaq! Ma kayak alaq chomilaj muqubꞌal chike ri qꞌalajisanelabꞌ xekamisax kuma ri mam alaq ojertan.
LUK 11:48 Rukꞌ ri kaꞌan alaq kaqꞌalajisaj alaq junam tzij alaq kukꞌ ri mam alaq. Ma rike na xkikꞌul ta ri e qꞌalajisanelabꞌ y xekikamisaj; jenelaꞌ ralaq na kata ta alaq ri kitzij tzꞌibꞌital kanoq, tobꞌ kayijbꞌaꞌ alaq riꞌ ri kimuqubꞌal.
LUK 11:49 »E uwariꞌche ri Dios, ri lik kꞌo saqil naꞌoj rukꞌ, jewaꞌ kubꞌiꞌij: “Kebꞌenutaq bꞌi e qꞌalajisanelabꞌ y e taqoꞌn chikiwach wa tikawex. Y chike kꞌu waꞌ wa aj chak weꞌin, kꞌo ri kekikamisaj y kꞌo ri kekiternabꞌej rukꞌ kꞌax” kacha ri Dios.
LUK 11:50 Ekꞌu uwariꞌche, ri alaq tikawex re waqꞌij ora, pawiꞌ alaq kꞌo wi ri kikikꞌel ri qꞌalajisanelabꞌ ekamisam chwi lo ri jeqebꞌal re ruwachulew,
LUK 11:51 chwi lo rukamik ri Abel kꞌa chwa rukamik ri Zacarías, ri xkamisax chuxoꞌl raltar y ri Rocho Dios. Paqatzij wi kambꞌiꞌij che alaq, ri Dios kuqꞌat tzij pawiꞌ alaq ruma ri kikamik rike.
LUK 11:52 »¡Toqꞌoꞌ wach ralaq alaq aj kꞌutunel re ri tzijpixabꞌ! Ma alaq latzꞌanel chike ri kakaj kaketaꞌmaj ri Qꞌijsaq. Ewam alaq rusukꞌ Rutzij Upixabꞌ ri Dios, jekꞌulaꞌ na kok ta alaq pa ri Qꞌijsaq yey na kaya tane alaq luwar chike ri winaq kebꞌokik» xchaꞌ.
LUK 11:53 Echiriꞌ ri Jesús katajin che ubꞌiꞌxikil waꞌ chike, raj kꞌutunel re ri tzijpixabꞌ y ri fariseos lik xpe koyowal chirij y xkijeqo kakichapalaꞌ rukꞌ ukꞌiyal tzꞌonobꞌal.
LUK 11:54 Lik xkitij riꞌ che chaꞌ rire kubꞌiꞌij ri na usukꞌ taj y rukꞌ waꞌ kakikoj umak.
LUK 12:1 Katajin kimolotajik ukꞌiyal winaq na jinta chi kitaqexik, y ruma waꞌ lik kakiminimaꞌ kibꞌ chikiwach. Ekꞌuchiriꞌ, ri Jesús xujeqo kakꞌutunik; nabꞌe xujeq kachꞌaꞌt kukꞌ rutijoꞌn, jewaꞌ xubꞌiꞌij chike: «Lik miꞌan iwe pachaꞌ ri kakiꞌan ri fariseos, ma rike xa kebꞌ kipalaj. Jelaꞌ pachaꞌ ri levadura kojotal chupa ri qꞌor re pam yey waꞌ na kilitaj taj, jekꞌulaꞌ ri fariseos kewam ri na utz taj pa kanimaꞌ.
LUK 12:2 Noꞌj kopon ri qꞌij echiriꞌ ronoje ri chꞌuqutal uwiꞌ woꞌora, kel lo chi saq; yey ronoje ri kaꞌan xa xeꞌlaqꞌay, ketaꞌmaxik.
LUK 12:3 E uwariꞌche kopon ri qꞌij echiriꞌ janipa ri ibꞌiꞌim riꞌix pa qꞌequꞌm, kel lo chi qꞌij saq; yey e ri xa iwesewoꞌm pa juna ja, kesax utzijolal pa taq bꞌe.
LUK 12:4 »Kambꞌiꞌij kꞌu chiwe riꞌix ix wamigos: Mixiꞌij iwibꞌ chikiwach ri kꞌo pakiqꞌabꞌ kixkikamisaj, ma waꞌ xew che ri cuerpo kakiꞌan wi; yey echiriꞌ ix kaminaq chik, na jinta chi kakiꞌan chiwe.
LUK 12:5 Kambꞌiꞌij kꞌu chiwe china chwach chirajawaxik wi kixiꞌij iwibꞌ: E chixiꞌij iwibꞌ chwach ri Jun kꞌo puqꞌabꞌ karesaj rikꞌaslemal riꞌix y tekꞌuchiriꞌ kixukꞌaq bꞌi chi xibꞌalbꞌaꞌ re tijbꞌal kꞌax. Paqatzij wi e chixiꞌij iwibꞌ riꞌ chwach Rire.
LUK 12:6 »Iwetaꞌam woꞌobꞌ raltaq ko tzꞌikin kekꞌayix xa chwa kebꞌ oxibꞌ raltaq ko meyo. Na rukꞌ ta kꞌu riꞌ, ri Dios na kumeskꞌutaj ta kꞌana junoq chike.
LUK 12:7 Makꞌuwariꞌ riꞌix na kixumeskꞌutaj ta kꞌenoq, ma chujujunal ne riwiꞌ ajilam ruma Rire. E uwariꞌche, mixiꞌij iwibꞌ; ma riꞌix más kꞌo iwach chikiwa ri raltaq ko tzꞌikin.
LUK 12:8 »Paqatzij wi kambꞌiꞌij chiwe: E junoq kuqꞌalajisaj chikiwach ri winaq, kubꞌiꞌij: “In tijoꞌn re ri Jesús”, jekꞌuriꞌlaꞌ kanꞌan riꞌin che rire; ri in Alaxel Chikixoꞌl Tikawex kambꞌiꞌij chikiwach ri ángeles re ri Dios: “Qatzij, wa jun e nutijoꞌn” kinchaꞌ.
LUK 12:9 Noꞌj kꞌu ri kubꞌiꞌij chikiwach ri winaq: “Riꞌin na in ta tijoꞌn re ri Jesús”, jekꞌuriꞌlaꞌ kanꞌan riꞌin che rire; kambꞌiꞌij chikiwach ri ángeles re ri Dios: “Qatzij, wa jun na nutijoꞌn taj” kinchaꞌ.
LUK 12:10 »We kꞌo junoq kachꞌaꞌt chwij riꞌin, ri in Alaxel Chikixoꞌl Tikawex, ri Dios kukuy umak we kutzelej utzij. Noꞌj china ri tzel kachꞌaꞌt chirij ri Santowilaj Ruxlabꞌixel ri Dios, riꞌ na kakuytaj ta umak.
LUK 12:11 »Mixiꞌij iwibꞌ echiriꞌ wuma riꞌin kixkꞌam bꞌi chikiwach raj wach re ri sinagogas o chikiwach raj qꞌatal tzij y raj wach re ri tinamit; mubꞌisoj ne ikꞌuꞌx saꞌ ri kꞌulubꞌal uwach kiꞌan chike,
LUK 12:12 ma ri Santowilaj Ruxlabꞌixel ri Dios kuqꞌalajisaj chiwe saꞌ ri chirajawaxik kibꞌiꞌij» xcha ri Jesús.
LUK 12:13 Ekꞌuchiriꞌ, jun chike rukꞌiyal winaq xubꞌiꞌij che ri Jesús: —Lal tijonel, bꞌiꞌij la che ri watz kuya ri taqal chwe riꞌin che taq ri kuxtabꞌal kiyaꞌom kan ri qachu-qaqaw —xchaꞌ.
LUK 12:14 Ekꞌu ri Jesús xukꞌul uwach: —Achi, ¿china inkojoyom re in aj qꞌatal tzij pawiꞌ alaq chaꞌ kanꞌan wa jachanik? —xchaꞌ.
LUK 12:15 Tekꞌuchiriꞌ, xubꞌiꞌij chike ri winaq: —Tape alaq, lik chajij ibꞌ alaq chi utz chwach ronoje rayinik, ma na e ta rubꞌeyomalil rachi ri kuya chomilaj kꞌaslemal che —xchaꞌ.
LUK 12:16 Ekꞌuchiriꞌ xutzijoj wa jun kꞌambꞌal naꞌoj chike: «Kꞌo jun achi lik bꞌeyom yey ri rulew lik ukꞌiyal molonik xuyaꞌo.
LUK 12:17 Ekꞌu ri bꞌeyom xuchꞌobꞌ raqan chiribꞌil ribꞌ: “¿Saꞌ kanꞌano? Ma na jinta chi pa kankꞌol wi wuꞌkꞌiyal molonik xinꞌano.”
LUK 12:18 »Tekꞌuchiriꞌ xubꞌiꞌij chiribꞌil ribꞌ: “E kanꞌan waꞌ: Kanwulij taq wa kꞌolibꞌal nuꞌanom re molonik y kanyak jujun chik más nimaꞌq, chaꞌ chupa kankꞌol wi ri numolonik y taq ri nubꞌeyomalil.
LUK 12:19 Y kambꞌiꞌij kꞌu riꞌ chiwibꞌil wibꞌ: Riꞌin lik kꞌi chi ri nubꞌeyomalil kꞌoltalik, waꞌ kukuy re ukꞌiyal junabꞌ. Ekꞌu woꞌora utz kinuxlanik, kinwaꞌik, kantij nuyaꞌ y kanꞌan ronoje ri kuaj riꞌin.”
LUK 12:20 »Noꞌj ri Dios xubꞌiꞌij che: “Achi, lik na jinta kꞌana anaꞌoj. ¡Toqꞌoꞌ awach! Ma e waqꞌabꞌ katkamik; yey ronoje kꞌu rabꞌeyomalil akꞌolom, ¿china re kanoq?” xuchixik.
LUK 12:21 »Jekꞌuriꞌlaꞌ kukꞌulumaj juna achi we kukꞌol ukꞌiyal bꞌeyomalil xa riꞌre, pero chwach ri Dios lik nibꞌaꞌ» xcha ri Jesús chike ri winaq.
LUK 12:22 Tekꞌuchiriꞌ xubꞌiꞌij ri Jesús chike rutijoꞌn: «E uwariꞌche kambꞌiꞌij waꞌ chiwe: Mubꞌisoj ikꞌuꞌx rikꞌaslem; mubꞌisoj ne ikꞌuꞌx saꞌ ri kitijo y saꞌ riqꞌuꞌ kikojo.
LUK 12:23 Ma ri qakꞌaslemal e más kꞌo uwach chwa ri qawa, yey ri qacuerpo e más kꞌo uwach chwa ri qaqꞌuꞌ.
LUK 12:24 »Chebꞌiwilape ri joj. Rike na ketikoꞌnaj taj, na kakiꞌan tane kimolonik, na jinta ne pa kakikꞌol wi ri kimolonik; na rukꞌ ta kꞌu riꞌ ri Dios kebꞌutzuqu. ¡Makꞌuwariꞌ riꞌix, ri Dios kixuchajij! ¡Ma e más kꞌo iwach riꞌix chikiwa ri tzꞌikin!
LUK 12:25 »¿Kꞌo nebꞌa junoq chiwe riꞌix kuriq kunajtirisaj jun chik qꞌij che rukꞌaslem wara che ruwachulew? Na jinta junoq tobꞌ ne lik kutij uqꞌij che.
LUK 12:26 Ruma kꞌu riꞌ, na jinta kutiqoj we lik kubꞌisoj ikꞌuꞌx ri kajawax chiwe.
LUK 12:27 »Chiwilapeꞌ suꞌanik kakꞌiy ri kotzꞌiꞌj pa taq juyubꞌ. Waꞌ na kachakun taj y na kakeman ta nenareꞌ chaꞌ kuꞌan ruqꞌuꞌ. Yey riꞌin kambꞌiꞌij chiwe: Ri rey Salomón, tobꞌ lik kꞌo uchomal ruqꞌuꞌ xukojo, waꞌ na xumaj ta kꞌana ruchomalil taq ri kotzꞌiꞌj.
LUK 12:28 Jekꞌulaꞌ we ri Dios uꞌanom chom che ri aqꞌes kꞌo waqꞌij pa juyubꞌ yey chweꞌq xa kaporox pa aqꞌ, ¿na kuya ta kami riꞌ ri Dios riqꞌuꞌ kajawax chiwe? ¡Riꞌix lik xa jubꞌiqꞌ ri kubꞌulibꞌal ikꞌuꞌx rukꞌ ri Dios!
LUK 12:29 »Kambꞌiꞌij kꞌu chiwe riꞌix: Mubꞌisoj ikꞌuꞌx saꞌ riwa y saꞌ rimiqꞌinaꞌ kitijo. Mapax ne ikꞌuꞌx che,
LUK 12:30 ma jenelaꞌ kakiꞌan ri winaq na ketaꞌam ta uwach ri Dios, e kubꞌisoj kikꞌuꞌx taq waꞌ. Noꞌj riꞌix kꞌo jun Iqaw lik retaꞌam kajawax taq waꞌ chiwe.
LUK 12:31 Ri lik chirajawaxik chiwe e lik chixok il che rutaqanik ri Dios; yey ronoje taq kꞌu ri kajawaxik, xa uwiꞌ chik kayaꞌtaj chiwe.
LUK 12:32 »Riꞌix ix nutijoꞌn, muxiꞌij ribꞌ ikꞌuꞌx che rikꞌaslem, ma riꞌix tobꞌ na ix ta kꞌi, ri Qaqaw lik kakiꞌkot che kuya chiwe riꞌix kixok chupa rutaqanik y kixtaqan rukꞌ Rire.
LUK 12:33 Chikꞌayij ri bꞌeyomalil kꞌo iwukꞌ chaꞌ utz kebꞌitoꞌ ri nibꞌaꞌibꞌ. Ma we kiꞌan waꞌ, e pachaꞌ kikꞌol ribꞌeyomalil pa na jinta kꞌo kukꞌulumaj wi y jelaꞌ kꞌo kutiqoj chiwe chilaꞌ chikaj. Ma e taq ri kꞌo chilaꞌ chikaj na kajar taj, na kapokꞌir taj, yey na jinta ne eleqꞌomabꞌ kebꞌok che.
LUK 12:34 Ma pa kꞌo wi ribꞌeyomalil riꞌix, puwi waꞌ keꞌek wi ikꞌuꞌx.
LUK 12:35 »Lik chiyijbꞌaꞌ iwibꞌ, pachaꞌ raj chakibꞌ kiyijbꞌam kibꞌ chi utz y tzijtal ri kicandil,
LUK 12:36 ma koyeꞌem ri kajaw katzelej lo pa ri nimaqꞌij re kꞌulanikil. Y jelaꞌ echiriꞌ rire kakꞌunik y kachꞌaw pan chwa ri puerta, kakijaqalaꞌ tan lo che.
LUK 12:37 Nim kiqꞌij kalaxik raj chakibꞌ we xkꞌun lo ri kajaw, kebꞌoluꞌriqaꞌ na kewar taj. Paqatzij wi kambꞌiꞌij chiwe, ri kajaw kebꞌukoj chwa mexa y kebꞌunimaj chikijujunal.
LUK 12:38 Lik nim kiqꞌij kalaxik raj chakibꞌ, tobꞌ ri kajaw xmayinik, we xkꞌun lo pa tikꞌil aqꞌabꞌ o pa saqribꞌal, kebꞌoluꞌriqaꞌ na kewar taj.
LUK 12:39 Ekꞌu chiwetaꞌmaj waꞌ: Juna achi rajaw ja, we ta karetaꞌmaj ri ora echiriꞌ kopon releqꞌom, riꞌ na kawar ta kꞌenoq y na kuya ta luwar karaqix ri rocho re kaꞌan eleqꞌ chupa.
LUK 12:40 Jekꞌulaꞌ riꞌix chiyijbꞌaꞌ iwibꞌ che rukꞌunibꞌal Ralaxel Chikixoꞌl Tikawex, ma kꞌaxtaj kakꞌunik echiriꞌ na jinta inaꞌbꞌem» xchaꞌ.
LUK 12:41 Ekꞌuchiriꞌ, ri Pedro xutzꞌonoj che ri Jesús: —Qajawal, ¿xew chiqe riꞌoj kabꞌiꞌij la wa kꞌambꞌal naꞌoj o chike konoje ri winaq? —xchaꞌ.
LUK 12:42 Ekꞌu ri Qanimajawal xukꞌul uwach: «¿Chinoq chiwe riꞌix e pachaꞌ juna aj chak lik jusukꞌ y kꞌo unaꞌoj, yaꞌtal puqꞌabꞌ kebꞌutzuq chupa ruꞌorayil konoje ri e kꞌo pa rocho rupatrón?
LUK 12:43 Lik kꞌu nim uqꞌij ralaxik riꞌ ri aj chak, we xkꞌun lo rupatrón, koluꞌriqaꞌ katajin che uꞌanik ruchak.
LUK 12:44 Paqatzij wi kambꞌiꞌij chiwe: Rupatrón kuꞌana taqanel che rire puwi ronoje rubꞌitaq re.
LUK 12:45 »Noꞌj we waꞌ wa jun aj chak jewaꞌ kubꞌiꞌij pa ranimaꞌ: “Ri nupatrón kꞌamajaꞌ katzelej loq” y kujeq kꞌu lik kebꞌuchꞌay raj chakibꞌ chi achijabꞌ chi ixoqibꞌ; yey ekꞌu rire xew kawaꞌik y kaqꞌabꞌarik, ¿saꞌ nawi riꞌ ri kaꞌan che?
LUK 12:46 Kakꞌun lo riꞌ rupatrón chupa ri qꞌij y ri ora echiriꞌ waꞌ wa aj chak na royeꞌem taj. Kuqꞌat kꞌu tzij puwi ri raj chak y lik kuya pa kꞌax junam kukꞌ konoje ri na e ta jusukꞌ.
LUK 12:47 »Ekꞌu juna aj chak, we retaꞌam saꞌ ri karaj rupatrón pero na kukoj ta utzij y na kuꞌan ta ri bꞌiꞌim che, riꞌ lik kaꞌan kꞌax che.
LUK 12:48 Noꞌj juna aj chak kuꞌan ri na utz taj yey na retaꞌam ta kꞌut we na utz ta ri kuꞌano, riꞌ na lik ta kꞌax kaꞌan che. Ma china ri lik kꞌo yaꞌtal chuqul, chiqawach apanoq lik kꞌo royeꞌem ri Dios che; yey china ri lik kꞌi yaꞌtal puqꞌabꞌ, más ne royeꞌem ri Dios che chwa ri royeꞌem che ri jun na lik ta kꞌi ri yaꞌtal puqꞌabꞌ.
LUK 12:49 »Pachaꞌ aqꞌ ri koꞌlnukiqꞌa che ruwachulew. ¡Ekꞌu ri kanrayij riꞌin ta asu kumaj aqꞌ!
LUK 12:50 Lik kꞌu chirajawaxik kinikꞌow na chupa jun unimal kꞌaxkꞌobꞌik. ¡Na kikꞌow ta ri bꞌis chinukꞌuꞌx, kꞌa echiriꞌ kinikꞌow chupa waꞌ!
LUK 12:51 E chiwach riꞌix, ¿ri nukꞌunik che ruwachulew kukꞌam lo utzil chomal? Na e ta riꞌ. Ma paqatzij wi kambꞌiꞌij e kukꞌam lo jachbꞌal kipa taq ri tikawex.
LUK 12:52 Chwi woꞌora y chiqawach apanoq we e kꞌo woꞌobꞌoq pa juna ja, wuma riꞌin kꞌo pa saq kakijach kipa; ma oxibꞌ kechꞌoꞌjin kukꞌ kaꞌibꞌ y kaꞌibꞌ kechꞌoꞌjin kukꞌ oxibꞌ.
LUK 12:53 Kechꞌoꞌjin chikiwach rachi rukꞌ rukꞌajol, rixoq rukꞌ ri ralit y ruchu-ralibꞌ rukꞌ ralibꞌatz» xcha ri Jesús.
LUK 12:54 Yey xubꞌiꞌij ri Jesús chike rukꞌiyal winaq: «Echiriꞌ kil alaq ri sutzꞌ kel lo puqajibꞌal ri qꞌij, xew kil alaq y kabꞌiꞌij alaq: “Kape jabꞌ” y e kuꞌano.
LUK 12:55 Y echiriꞌ kajum kaꞌn ri tew kape lo pa sur, kabꞌiꞌij alaq: “Lik kuꞌan bꞌuk” y e kuꞌano.
LUK 12:56 ¡Xa kebꞌ palaj alaq! Kariq alaq uchꞌobꞌik chi utz saꞌ ruꞌanom ruwa kaj y ruwachulew; ¿suꞌchak kꞌu riꞌ na kamaj tane alaq usukꞌ ri katajin ri Dios che ukꞌutik chiwach alaq waqꞌij ora?
LUK 12:57 »¿Suꞌchak na kachꞌobꞌ ta alaq chi utz saꞌ ri lik usukꞌ chirajawaxik kaꞌan alaq?
LUK 12:58 We kakꞌam bꞌi la pa qꞌatbꞌal tzij ruma junoq ukojom mak chiꞌij la, e lik utz ri kaꞌan la utzil chomal rukꞌ pa bꞌe xaloqꞌ kꞌamajaꞌ kopon la chwa ri aj qꞌatal tzij. Ma we na xꞌan ta la waꞌ, kopon na la chwach ri aj qꞌatal tzij. Y we xopon kꞌu la chwach rire, kayaꞌ bꞌi la puqꞌabꞌ ri ausiliar y rire kuꞌyaꞌa la pa cárcel.
LUK 12:59 Kambꞌiꞌij kꞌut, na kel ta lo la chiriꞌ we na xtoj ta kan la ronoje ri tzꞌonom chiꞌij la» xcha ri Jesús.
LUK 13:1 Chupa waꞌ wa qꞌij e kꞌo jujun chiriꞌ xkitzijoj che ri Jesús saꞌ ri xkikꞌulumaj jujun aj Galilea, ri xekamisax ruma utzij ri taqanel Pilato echiriꞌ ketajin che uyaꞌik ri kiqasaꞌn re chikop chwa ri altar pa ri Rocho Dios. Yey ri kikikꞌel waꞌ wa aj Galilea xkich kaꞌn puwi ri kikikꞌel ri chikop.
LUK 13:2 Ekꞌu ri Jesús xukꞌul uwach: —¿E kachꞌobꞌ nawi alaq, waꞌ wa aj Galilea xekamisaxik ma e más e aj makibꞌ chikiwa ri kach aj Galilea?
LUK 13:3 Paqatzij wi kambꞌiꞌij che alaq, na e ta riꞌ. Yey ralaq, we na katzelej ta tzij alaq chwach ri Dios, e ne jun ralaq kasach wach alaq.
LUK 13:4 »¿O saꞌ nawi kachꞌobꞌ alaq puwi ri xkikꞌulumaj ri e dieciocho, ri xekamik echiriꞌ xtzaq lo ri Torre re Siloé pakiwiꞌ? ¿E kachꞌobꞌ nawi alaq, wa winaq xekamik ma kꞌo más kimak chikiwa ri kach aj Jerusalem?
LUK 13:5 Paqatzij wi kambꞌiꞌij che alaq, na e ta riꞌ. Yey ne ralaq, we na katzelej ta tzij alaq chwach ri Dios, e ne jun ralaq kasach wach alaq —xchaꞌ.
LUK 13:6 Xutzijoj kꞌu wa jun kꞌambꞌal naꞌoj chike: «Kꞌo jun achi utikom jun cheꞌ re higo chupa rutikoꞌn. Xkꞌun kꞌu loq re koluꞌtzukuj ujiqꞌobꞌalil ri higo yey na jinta xuriq che.
LUK 13:7 Xubꞌiꞌij kꞌu che ri chajinel re rutikoꞌn: “Chawilapeꞌ, e urox junabꞌ waꞌ kinkꞌunik koꞌlnutzukuj ujiqꞌobꞌalil wa cheꞌ re higo, yey na jinta kꞌana ujiqꞌobꞌalil kanriqo. Woꞌora chacheta bꞌi ma ¿saꞌ kutiqoj kꞌo chupa waꞌ wuꞌlew?” xchaꞌ.
LUK 13:8 Ekꞌu ri chajinel xubꞌiꞌij che: “Wajaw, yaꞌa chi la wa junabꞌ che, ma kantij chi na uqꞌij kankꞌot rij y kankoj abono chuxeꞌ.
LUK 13:9 Kꞌaxtaj kuya ujiqꞌobꞌalil; noꞌj we na xuya taj, kꞌa ekꞌuchiriꞌ utz kachet bꞌi” xchaꞌ.»
LUK 13:10 Pa jun qꞌij re uxlanibꞌal ri Jesús kakꞌutun chupa jun sinagoga.
LUK 13:11 Kꞌo kꞌu jun ixoq chiriꞌ e dieciocho lo junabꞌ riꞌ lik kꞌuyukꞌik uꞌanom ri rij ruma jun itzel uxlabꞌixel, yey na utz ta ne kusukꞌupij ribꞌ.
LUK 13:12 Y ri Jesús echiriꞌ xril rixoq, xusikꞌij apanoq y jewaꞌ xubꞌiꞌij che: —Ixoq, lal kunutajinaq chi che ri yabꞌil kꞌo wi la —xchaꞌ.
LUK 13:13 Y xuya ruqꞌabꞌ puwi rixoq; y chupa kꞌu laꞌ la joqꞌotaj rixoq xsukꞌupitajik y xujeqo kuyak uqꞌij ri Dios.
LUK 13:14 Ekꞌu ri taqanel re ri sinagoga lik xpe royowal chirij ri Jesús ma xkunan chupa ri qꞌij re uxlanibꞌal, y xubꞌiꞌij kꞌu chike ri winaq: —Kꞌo waqibꞌ qꞌij re chak; chupa waꞌ utz kape alaq re kakunax bꞌi alaq, pero lik na ubꞌe taj kakunax alaq chupa ri qꞌij re uxlanibꞌal —xchaꞌ.
LUK 13:15 Ekꞌu ri Jesús xubꞌiꞌij: —¡Xa kebꞌ palaj alaq! Onoje ralaq ¿na kakir ta nebꞌa alaq ri bꞌoyex y ri buru chupa ri qꞌij re uxlanibꞌal chaꞌ kakꞌam bꞌi alaq chi tijoj yaꞌ? Kaꞌan ne alaq waꞌ chike yey xa e awaj.
LUK 13:16 Makꞌuwariꞌ taqal che wiꞌxoq katoꞌik, ma rire ralkꞌoꞌal kan ri Abraham, yey e dieciocho lo junabꞌ waꞌ “yututal” ruma ri Satanás. ¿Na utz ta kami riꞌ kesax chupa ri yabꞌil pa ri qꞌij re uxlanibꞌal? —xchaꞌ.
LUK 13:17 Echiriꞌ xubꞌiꞌij waꞌ ri Jesús, lik xekꞌix konoje ri tzel kebꞌilow re; noꞌj konoje ri winaq lik kekiꞌkot ruma ri kꞌutubꞌal re runimal uchuqꞌabꞌ ri Dios kuꞌan ri Jesús.
LUK 13:18 Ekꞌuchiriꞌ, xubꞌiꞌij tanchi ri Jesús: «¿Saꞌ rukꞌ kajunimax wi rutaqanik ri Dios?
LUK 13:19 Riꞌin kanjunimaj rukꞌ juna ijaꞌ re moxtasa, ri xkꞌam bꞌi ruma jun achi y xtikiꞌ chupa ri werta. Ekꞌu riꞌ waꞌ xkꞌiyik y lik xuꞌan bꞌojobꞌik; yey ri tzꞌikin kexikꞌikꞌ che ruwa kaj xkiꞌan kisok puwi taq ruqꞌabꞌ» xchaꞌ.
LUK 13:20 Y xubꞌiꞌij tanchi ri Jesús: «¿Saꞌ rukꞌ kanjunimaj wi rutaqanik ri Dios?
LUK 13:21 E jelaꞌ pachaꞌ ri levadura, ma echiriꞌ juna ixoq kuꞌan pam, kutuk jubꞌiqꞌ levadura xoꞌlibꞌal oxibꞌ pajbꞌal harina y ri levadura kusipowirisaj upa ronoje ri qꞌor» xchaꞌ.
LUK 13:22 Echiriꞌ ri Jesús kꞌo chi bꞌe re keꞌek Jerusalem, xikꞌow pa taq tinamit y pa taq aldeas, e riꞌ kakꞌutunik.
LUK 13:23 Y kꞌo kꞌu jun xbꞌiꞌn che: —Wajawal, ¿xa nawi jujun ri kekolobꞌetajik? —xcha che. Y ri Jesús xukꞌul uwach:
LUK 13:24 «Lik chichꞌikikej iwibꞌ chaꞌ kixok chupa ri nutaqanik che ri okibꞌal xa chꞌutiꞌn uwach, ma kambꞌiꞌij chiwe: Kopon na ri qꞌij echiriꞌ lik e kꞌi ri kakaj kebꞌok bꞌi, noꞌj na kayaꞌtaj ta chike kebꞌok bꞌi.
LUK 13:25 »Ma e kuꞌana pachaꞌ ri rajaw juna ja echiriꞌ kuꞌan juna nimaqꞌij. Echiriꞌ ebꞌokinaq chi konoje ri ebꞌusikꞌim, kutzꞌapij lo ri puerta, y na jinta chi kꞌu junoq kokik. Jekꞌulaꞌ riꞌ ri kikꞌulumaj riꞌix, na kixok ta chubꞌi. Kijeq kꞌu riꞌ kixchꞌaw apanoq: “Qajaw, Qajaw, yaꞌa ko la chiqe kojok bꞌi” kixchaꞌ. »Yey Rire jekꞌuwaꞌ kukꞌul lo uwach chiwe: “Riꞌin na wetaꞌam taj pa ix petinaq wi riꞌix” kacha chiwe.
LUK 13:26 »Ekꞌuchiriꞌ, kijeq ubꞌiꞌxik: “Oj waꞌ kꞌu woꞌqinaq ukꞌ la yey xkꞌutun ne la pa taq ri bꞌe re ri qatinamit” kixcha che.
LUK 13:27 »Noꞌj Rire kubꞌiꞌij lo chiwe: “Paqatzij wi, riꞌin na wetaꞌam taj pa ix petinaq wi riꞌix. Chixela chinuwach, iwonoje ri ix ꞌanal re ri lik itzel uwach” kacha chiwe.
LUK 13:28 »Ekꞌuchiriꞌ, lik kixoqꞌik y kaqichꞌichꞌ ruwi iweꞌ echiriꞌ kebꞌiwil ri Abraham, ri Isaac y ri Jacob kukꞌ konoje ri qꞌalajisanelabꞌ e kꞌo rukꞌ ri Qaqaw pa rutaqanik chilaꞌ chikaj; yey ekꞌu riꞌ riꞌix na jinta piqꞌabꞌ kixok bꞌi kukꞌ.
LUK 13:29 Noꞌj e kꞌo ri na e ta aj judiꞌabꞌ e petinaq pa relebꞌal lo ri qꞌij, putzaqibꞌal ri qꞌij y pa ronoje luwar che ruwachulew, riꞌ kebꞌok chwa ri mexa pa rutaqanik ri Dios.
LUK 13:30 »Chiwilape kꞌu riꞌ, ma e kꞌo jujun chike ri na jinta kiwach wara che ruwachulew, e lik kakꞌojiꞌ kiwach chwach ri Dios chilaꞌ chikaj; yey e kꞌo ri lik kꞌo kiwach wara che ruwachulew, e kuꞌana na jinta kiwach chwach ri Dios chilaꞌ chikaj» xchaꞌ.
LUK 13:31 Chupa kꞌu waꞌ wa qꞌij xeqibꞌ jujun fariseos rukꞌ ri Jesús y jewaꞌ xkibꞌiꞌij che: —Chelubꞌi la y oj la ma ri rey Herodes karaj kukamisaj la —xechaꞌ.
LUK 13:32 Y ri Jesús xubꞌiꞌij chike: —Oj alaq y jeꞌbꞌiꞌij alaq che laꞌ laꞌchi, ri e pachaꞌ juna yak: “Waqꞌij y chweꞌq kꞌa kebꞌenuwesaj bꞌi ri itzel uxlabꞌixel y kanꞌan kunanik yey kabꞌij kꞌut kankꞌis ri nuchak” kacha alaq che.
LUK 13:33 Pero che kꞌu woꞌxibꞌ qꞌij chirajawaxik wi kambꞌinibꞌej pan nubꞌe kinꞌek, ma na taqal ta che juna qꞌalajisanel kakam kꞌa naj che Jerusalem —xchaꞌ.
LUK 13:34 Tekꞌuchiriꞌ xubꞌiꞌij: «¡Jerusalem, Jerusalem, riꞌix kebꞌikamisaj ri qꞌalajisanelabꞌ y kebꞌiꞌan paꞌbꞌaj janipa ri ebꞌutaqom lo ri Dios iwukꞌ! E riꞌin ukꞌiyal laj lik xuaj xinmol kichiꞌ riwalkꞌoꞌal riꞌix jelaꞌ pachaꞌ kuꞌan juna atiꞌ akꞌ chike taq ruwiꞌch echiriꞌ kumol kichiꞌ chuxeꞌ taq ruxikꞌ, noꞌj riꞌix na xiwaj ta kꞌenoq.
LUK 13:35 »Chitape kꞌut, kꞌo jun qꞌij echiriꞌ ri iwocho riꞌix kawulix kanoq. Kambꞌiꞌij kꞌu chiwe na kiwil ta chi nuwach kꞌa echiriꞌ kopon na ruqꞌijol kibꞌiꞌij: Lik nim uqꞌij ri jun petinaq chupa rubꞌiꞌ ri Dios Qajawxel kixchaꞌ.»
LUK 14:1 E xuꞌan waꞌ chupa jun qꞌij re uxlanibꞌal: Ri Jesús xsikꞌix ruma jun fariseo lik kꞌo uwach chaꞌ keꞌwoꞌq chirocho. Y chilaꞌ e kꞌo jujun chike ri fariseos lik kikꞌakꞌalem we ri Jesús kakunan pa ri qꞌij re uxlanibꞌal.
LUK 14:2 Ma chiriꞌ chwach Rire kꞌo jun achi lik yewaꞌ, waꞌlijinaq rucuerpo.
LUK 14:3 Ekꞌuchiriꞌ, ri Jesús xutzꞌonoj chike ri fariseos y raj kꞌutunel re ri tzijpixabꞌ, jewaꞌ xubꞌiꞌij: —¿Ubꞌe nawi ri kaꞌan kunanik chupa ri qꞌij re uxlanibꞌal o na ubꞌe taj? —xchaꞌ.
LUK 14:4 Pero rike na jinta xkikꞌulubꞌej uwach. Ekꞌu ri Jesús xuya ruqꞌabꞌ puwi ri yewaꞌ, xukunaj y xubꞌiꞌij che utz keꞌek.
LUK 14:5 Tekꞌuchiriꞌ xubꞌiꞌij chike: —¿Kꞌo nebꞌa junoq che alaq, we rukawayuꞌ o rubꞌoyex katzaq pa siwan, na keꞌresalaꞌ tuloq tobꞌ chupa jun qꞌij re uxlanibꞌal? ¿China na kaꞌanaw ta waꞌ? —xchaꞌ.
LUK 14:6 Ekꞌu rike na xkiriq ta ukꞌulik uwach che.
LUK 14:7 Ekꞌu ri Jesús xrilo saꞌ ri kakiꞌan ri esikꞌim pa ri waꞌim, konoje kakimajalaꞌ kibꞌ puwi taq ri tzꞌulibꞌal ke ri lik kꞌo kiwach. E uwariꞌche, xubꞌiꞌij wa kꞌambꞌal naꞌoj chike ri echokom:
LUK 14:8 «Echiriꞌ kasikꞌix la ruma junoq pa juna nimaqꞌij re kꞌulanikil, na ubꞌe taj we keꞌtzꞌula la chupa ri tzꞌulibꞌal ke ri lik kꞌo kiwach; ma kꞌaxtaj kakꞌun lo junoq chokom más kꞌo uwach chiwach rilal.
LUK 14:9 Yey kaqibꞌ kꞌu riꞌ ri rajaw ri nimaqꞌij ukꞌ la y kubꞌiꞌij cheꞌla: “Yaꞌa kan la wa tzꞌulibꞌal che wa jun chik” kachaꞌ. Ruma kꞌu laꞌ, kape ri kꞌix la y keꞌtzꞌula lo la kꞌa chirij.
LUK 14:10 »E uwariꞌche, ri chirajawaxik kaꞌan la echiriꞌ kasikꞌix la pa juna waꞌim e waꞌ: We xopon la, meꞌtzꞌula la chupa ri tzꞌulibꞌal ke ri lik kꞌo kiwach. Jelaꞌ echiriꞌ kakꞌun lo ri sikꞌiyom e la, jewaꞌ kubꞌiꞌij cheꞌla: “Wamigo, jeꞌtzꞌula la más chwach” kachaꞌ. Jekꞌulaꞌ katakꞌabꞌax qꞌij la chikiwach ri e kꞌo chwach ri mexa ukꞌ la.
LUK 14:11 Ma china ri kuꞌan lik nim che ribꞌ, ri Dios kuqasaj uwa uqꞌij; noꞌj china ri kuꞌan chꞌutiꞌn che ribꞌ, ri Dios kuyak uqꞌij» xcha ri Jesús.
LUK 14:12 Tekꞌuchiriꞌ, xubꞌiꞌij che ri fariseo, ri sikꞌiyom re pa ri waꞌim: —Echiriꞌ kaꞌan la juna waꞌim, na xew ta kesikꞌij la ri amigos la, ri e atz-chaqꞌ la, ri e kꞌo chux cheꞌla y ri bꞌeyomabꞌ e kꞌo lo chi naqaj la. Ma we kaꞌan la waꞌ, rike kakiꞌan ukꞌaxel cheꞌla, kakisikꞌij la pa juna waꞌim y jekꞌuriꞌlaꞌ asu kakꞌul la ri tzelebꞌal uwach che ri xꞌan la.
LUK 14:13 »E uwariꞌche, ri chirajawaxik kaꞌan la echiriꞌ kaꞌan la juna nimaqꞌij, e chebꞌesikꞌij la ri nibꞌaꞌibꞌ, ri tꞌum kaqan kiqꞌabꞌ, ri e sik y ri e potzꞌ.
LUK 14:14 Jekꞌuriꞌlaꞌ nim qꞌij alaxik la, ma rike na kakichꞌij ta uyaꞌik ukꞌaxel cheꞌla; pero e kakꞌul la ri rajil ukꞌaxel echiriꞌ kekꞌastaj lo ri lik e jusukꞌ chwach ri Dios —xcha ri Jesús.
LUK 14:15 Echiriꞌ xuta waꞌ jun chike ri etzꞌul chwa ri mexa, jewaꞌ xubꞌiꞌij che: «¡Nim uqꞌij ralaxik china ri kawaꞌ pa ri nimalaj nimabꞌal kuya ri Dios pa rutaqanik!» xchaꞌ.
LUK 14:16 Ekꞌu ri Jesús xubꞌiꞌij che: «Julaj kꞌo jun achi xuchꞌobꞌo kuya jun nimalaj nimabꞌal y lik e kꞌi ri xebꞌusikꞌij.
LUK 14:17 Ekꞌuchiriꞌ xopon ru orayil ri nimabꞌal, xutaq bꞌi jun raj chak chaꞌ kubꞌiꞌij chike ri echokom chik: “Peta kꞌu alaq ma yijbꞌital chi ronoje” kachaꞌ.
LUK 14:18 »Noꞌj chikijujunal xkijeq kakitzꞌonoj kuybꞌal kimak ruma na kebꞌek taj. Ri nabꞌe xubꞌiꞌij: “Xinloqꞌ ko juchꞌaqap wulew y lik chirajawaxik kiꞌnwilaꞌ. Chabꞌiꞌij ko che rapatrón chukuyu numak ma na kinꞌek taj” xchaꞌ.
LUK 14:19 »Ri jun chik xubꞌiꞌij: “Xinloqꞌ ko woꞌobꞌ yunta bꞌoyexabꞌ y ekꞌu waꞌ kiꞌntija kiqꞌij pa chak. Chabꞌiꞌij ko che rapatrón chukuyu numak ma na kinꞌek taj” xchaꞌ.
LUK 14:20 »Yey jun chik xubꞌiꞌij: “Riꞌin lik kꞌakꞌ xinkꞌuliꞌik; y ruma laꞌ na kinꞌek taj” xchaꞌ.
LUK 14:21 »Echiriꞌ xtzelej lo raj chak, xubꞌiꞌij ronoje waꞌ che rupatrón. Ekꞌu rupatrón lik xpe royowal y xubꞌiꞌij che ri raj chak: “Choqꞌotan riꞌ, jat pa taq kꞌaybꞌal y pa taq bꞌe re ri tinamit y chebꞌakꞌama lo ri e nibꞌaꞌibꞌ, ri tꞌum kaqan kiqꞌabꞌ, ri e potzꞌ y ri e sik” xchaꞌ.
LUK 14:22 »Xeꞌek kꞌu raj chak. Y echiriꞌ xtzelej loq, xubꞌiꞌij che rupatrón: “Wajaw, ya xinꞌan ronoje ri xintaq la che; na rukꞌ ta kꞌu riꞌ, lik kꞌa kꞌo luwar chwa taq ri mexa” xchaꞌ.
LUK 14:23 »Xubꞌiꞌij tanchi kꞌu rachi che ri raj chak: “Chatelubꞌi tzaꞌm tinamit y jat pa taq nimabꞌe y pa taq kuxkul bꞌe. Chamina uwach chike ri winaq chaꞌ kepetik y jelaꞌ kanoj uwa taq ri mexa nuyijbꞌam chik re wa nimabꞌal.
LUK 14:24 Yey paqatzij wi kambꞌiꞌij chawe: Na jinta junoq chike ri xenusikꞌij nabꞌe, kutij re ri nimabꞌal nuyijbꞌam” xchaꞌ.»
LUK 14:25 Echiriꞌ ri Jesús kꞌo chi bꞌe, ukꞌiyal winaq eteran chirij. Ekꞌu Rire xtzuꞌn chirij y jewaꞌ xubꞌiꞌij chike:
LUK 14:26 «We kꞌo junoq karaj katerej lo chwij, lik chirajawaxik che más kꞌax kinunaꞌ riꞌin chikiwa konoje, ma we e más kꞌax kebꞌunaꞌ ruchu-uqaw, ri rixoqil, ri ralkꞌoꞌal, ri ratz-uchaqꞌ y más ne kꞌax kunaꞌ ribꞌ rire chinuwa riꞌin, riꞌ na taqal ta che kuꞌan nutijoꞌn.
LUK 14:27 E uwariꞌche, china ri na kuya ta ranimaꞌ kutij kꞌax ruma ri katerej lo chwij, riꞌ na taqal ta che kuꞌan nutijoꞌn.
LUK 14:28 »Ma we kꞌo junoq karaj kuꞌan nutijoꞌn, lik chuchꞌobꞌo na raqan we kukuy ri kꞌaxkꞌobꞌik kape puwiꞌ ruma ri katerej lo chwij. »E jelaꞌ pachaꞌ ri kaꞌanik echiriꞌ kayak juna nimalaj ja. Ma ¿kꞌo nebꞌa junoq che alaq na kuchꞌobꞌ ta raqan chi utz nabꞌe na puwi ri kajawax che chaꞌ kuyak ri ja y karajilaj na kꞌu riꞌ janipa ri kumaj bꞌi chaꞌ karetaꞌmaj we xaqareꞌ kuchꞌij uyakik ri ja?
LUK 14:29 Ma we na kuꞌan ta waꞌ, echiriꞌ utikom chi kꞌu ruparaqan ri ja, kuchaqabꞌaꞌ uꞌanikil ruma na jinta chi puaq re kukꞌiso; yey konoje kꞌu riꞌ ri kebꞌilow re, kakijeq kakichꞌamij,
LUK 14:30 kakibꞌiꞌij: “Waꞌchi xujeq uyakik wa ja, yey na xukꞌis ta chik” kechaꞌ.
LUK 14:31 »Jekꞌulaꞌ ¿saꞌ nawi kuꞌan juna rey xa e lajuj mil rusoldados chwa juna chik rey petinaq pa chꞌaꞌoj chirij rukꞌ veinte mil soldados? Ri kuꞌano e nabꞌe na kuchꞌobꞌ na raqan chi utz we xaqareꞌ kuchꞌij uchuqꞌabꞌ ri jun chik rey e kꞌo más usoldados.
LUK 14:32 Y we kuchꞌobꞌo na kuchꞌij taj, ri kuꞌano e xaloqꞌ kꞌa naj kꞌo wi lo ri jun chik rey, kebꞌutaq kꞌu bꞌi achijabꞌ chaꞌ keꞌkiꞌana ri utzil chomal rukꞌ.
LUK 14:33 Jekꞌuriꞌlaꞌ, we kꞌo junoq che alaq karaj katerej lo chwij, lik chirajawaxik che kuya kan ronoje ri kꞌo rukꞌ; ma we na kuꞌan ta waꞌ, na taqal ta che kuꞌan nutijoꞌn.
LUK 14:34 »E ratzꞌam lik kajawaxik; noꞌj we xsach rutzayul, ¿suꞌanik tanchi kaꞌan tza che?
LUK 14:35 Ma na kuriq ta uchak che rulew y na utz ta ne kaꞌan abono rukꞌ. Ekꞌu ri kaꞌan che, e katix bꞌi. China kꞌu ri kꞌo utanibꞌal che utayik, ¡chuta kꞌu riꞌ!» xcha ri Jesús.
LUK 15:1 Konoje raj tzꞌonol puaq re tojonik y taq raj makibꞌ keqibꞌ rukꞌ ri Jesús chaꞌ kakita ruchꞌaꞌtem.
LUK 15:2 Pero ri fariseos y raj kꞌutunel re ri tzijpixabꞌ lik kakichꞌaꞌtibꞌej, jewaꞌ kakibꞌiꞌij: «Waꞌchi kebꞌukꞌul raj makibꞌ y kawaꞌ kukꞌ» kechaꞌ.
LUK 15:3 E uwariꞌche ri Jesús xutzijoj wa jun kꞌambꞌal naꞌoj chike, jewaꞌ xubꞌiꞌij:
LUK 15:4 «¿Saꞌ nawi kuꞌan junoq che alaq we e kꞌo jun ciento ubꞌexex yey kasach kꞌu junoq chike? ¿Na kebꞌukꞌol ta nebꞌa kan riꞌ ri noventa y nueve pa ri kiluwar y keꞌek kꞌu che utzukuxik ri jun xsach kanoq? Yey na kuxlan ta che utzukuxik kꞌa echiriꞌ kuꞌriqa loq.
LUK 15:5 Ekꞌuchiriꞌ kuriqo, lik kakiꞌkotik kuya lo chirij uqul.
LUK 15:6 Y echiriꞌ kopon chirocho, kumol kichiꞌ ri ramigos y ri ratz-uchaqꞌ, y jewaꞌ kubꞌiꞌij chike: “Chixkiꞌkota wukꞌ ma xinriq ri nubꞌexex sachinaq” kachaꞌ.
LUK 15:7 »Kambꞌiꞌij kꞌu riꞌin che alaq: Más ne kꞌo kiꞌkotemal chilaꞌ chikaj ruma juna aj mak kutzelej utzij chwach ri Dios, chikiwa noventa y nueve jusukꞌ e kꞌolik y na kajawax taj kakuytaj kimak.
LUK 15:8 »We e laꞌ juna ixoq kꞌo lajuj saqil puaq rukꞌ yey kutzaq kꞌu junoq, ¿saꞌ ri kuꞌano? Kutzij aqꞌ y naꞌl kumes rupa ja, kutzukuj kꞌu kokꞌil yey na kuxlan ta che utzukuxik kꞌa echiriꞌ kuꞌriqa loq.
LUK 15:9 Y ekꞌuchiriꞌ uriqom chik, kumol kichiꞌ ri ramigos y ri ratz-uchaqꞌ y kubꞌiꞌij kꞌu chike: “Chixkiꞌkota wukꞌ ma xinriq wa saqil puaq nutzaqom” kachaꞌ.
LUK 15:10 Kambꞌiꞌij kꞌu riꞌin che alaq: Jelaꞌ ri kiꞌkotemal ke ri ángeles chwach ri Dios echiriꞌ juna aj mak kutzelej utzij» xcha ri Jesús.
LUK 15:11 Xutzijoj kꞌu wa jun kꞌambꞌal naꞌoj chike, jewaꞌ xubꞌiꞌij: «Kꞌo jun achi e kꞌo kaꞌibꞌ ukꞌajol.
LUK 15:12 Jun qꞌij ri chaqꞌixel xubꞌiꞌij che ruqaw: “Tat, jacha la upa ri bꞌeyomalil la y asu yaꞌa la janipa ri taqal chwe riꞌin” xcha che ruqaw. Y ruqaw e xuꞌano. Xujach kꞌu rubꞌeyomalil, xuya ri taqal che rukꞌajol atzixel y ri taqal che ri chaqꞌixel.
LUK 15:13 »Kꞌamajaꞌ kꞌu naj ujachik upa, rala chaqꞌixel xukꞌayij ronoje ri xyaꞌ che, xumol bꞌi uchiꞌ ri puaq y xeꞌek naj chupa jun chik tinamit. Chilaꞌ kꞌu riꞌ xutzꞌilaꞌ ronoje rubꞌeyomalil, ma xuꞌan rukꞌ ri puaq ronoje ri xraj rire.
LUK 15:14 Ekꞌuchiriꞌ xukꞌis ronoje rurajil, xpe jun nimalaj numik chupa laꞌ la tinamit pa kꞌo wi. Y xujeq lik kutij kꞌax.
LUK 15:15 »Xeꞌek kꞌut che utzukuxik uchak rukꞌ jun achi aj chilaꞌ. Yey rachi xutaq bꞌi pa juyubꞌ che kichajixik ukꞌiyal aq.
LUK 15:16 Ekꞌu rala xujeq lik kanumik, kurayij uwach tobꞌ ne e ri kechaꞌ ri aq, pero na jinta junoq kayaꞌw re che.
LUK 15:17 »Tekꞌuchiriꞌ, xkꞌun runaꞌoj y chiribꞌil ribꞌ xuchꞌobꞌ raqan: “Chilaꞌ chirocho ri nuqaw lik kꞌo kakitij rukꞌiyal mokom; yey riꞌin wara kinkam che numik.
LUK 15:18 Ekꞌu woꞌora kintzelej chirocho ri nuqaw y jewaꞌ kambꞌiꞌij che: Tat, in makuninaq chwach ri Dios y chiwach rilal.
LUK 15:19 Na taqal ta chik kabꞌiꞌx chwe in kꞌajol la. ꞌAna la chwe pachaꞌ xa in chi jun mokom la” xcha chiribꞌil ribꞌ.
LUK 15:20 Y ekꞌu xuꞌano. Xumaj bꞌi ubꞌe chirocho ruqaw. »Ekꞌu ruqaw, echiriꞌ xril pana rukꞌajol chinimanaj, lik xjuchꞌ kaꞌn pa ranimaꞌ. Lik kꞌu riꞌ kanik xeꞌek y xuꞌkꞌulu apanoq. Xulaqꞌapuj y xutzꞌubꞌ uchiꞌ.
LUK 15:21 »Y rala xubꞌiꞌij che ruqaw: “Nuqaw, in makuninaq chwach ri Dios y chiwach rilal. Na taqal ta chik kabꞌiꞌx chwe in kꞌajol la” xchaꞌ.
LUK 15:22 »Pero ruqaw xubꞌiꞌij chike ri raj chakibꞌ: “Jiꞌwesalaꞌ lo ri kꞌul más chom y chiwiqaꞌ. Chikojo juna mapaqꞌabꞌ che ruwi uqꞌabꞌ y uxajabꞌ che ri raqan.
LUK 15:23 Yey jiꞌkꞌama lo ri meqꞌ lik tiꞌoꞌjirisam y chikamisaj. Qatija kꞌu riꞌ, chojkiꞌkotoq y qaꞌana nimaqꞌij,
LUK 15:24 ma wa nukꞌajol e junam rukꞌ kaminaq chik yey woꞌora xkꞌastaj loq. Rire sachinaq chik pero xriqitajik” xcha chike. Y xkijeqo lik kekiꞌkotik.
LUK 15:25 »Ekꞌu rukꞌajol atzixel bꞌenaq pa juyubꞌ; yey echiriꞌ xkꞌun lo chunaqaj ri ja, xuta ri música lik katꞌiqowik y ri kexajaw pa ri nimaqꞌij.
LUK 15:26 Xusikꞌij kꞌu pan jun chike raj chakibꞌ y xutzꞌonoj che saꞌ ri katajinik.
LUK 15:27 »Raj chak xubꞌiꞌij che: “Xkꞌun ri chaqꞌ la. Ruma kꞌu laꞌ, ri qaw la lik xkiꞌkot che ma utz uwach xkꞌunik, na jinta kꞌo xukꞌulumaj. E uwariꞌche, xutaq ukamisaxik ri meqꞌ tiꞌoꞌjirisam chaꞌ kaqaꞌan nimaqꞌij” xcha che.
LUK 15:28 »Ekꞌu ri atzixel lik xpe royowal y na xraj taj kok bꞌi. Xel na kꞌu lo ruqaw y lik xelaj che chaꞌ kok bꞌi.
LUK 15:29 Noꞌj rire xukꞌul uwach, jewaꞌ xubꞌiꞌij che ruqaw: “Rilal etaꞌam la janipa lo junabꞌ waꞌ in chakuninaq ukꞌ la y na nupalajim ta tzij la julajoq. Na rukꞌ ta kꞌu riꞌ, na yaꞌom tane la chwe tobꞌ xa juna ralko nukaprux chaꞌ kanꞌan nimaqꞌij y kinkiꞌkot kukꞌ ri wamigos.
LUK 15:30 Yey ekꞌu woꞌora xkꞌun wa jun kꞌajol la, ri xa xuꞌtzꞌilaꞌ lo ri puaq la kukꞌ ixoqibꞌ na chom ta kibꞌinik; na rukꞌ ta kꞌu riꞌ, ruma rire, xtaq la ukamisaxik ri meqꞌ tiꞌoꞌjirisam” xcha che.
LUK 15:31 »Ekꞌu ruqaw xubꞌiꞌij che: “Nukꞌajol, riꞌat ronoje qꞌij at kꞌo wukꞌ, yey rubꞌitaq we, ronoje aweꞌat chik.
LUK 15:32 Noꞌj woꞌora lik chirajawaxik wi kaqaꞌan nimaqꞌij y kojkiꞌkotik, ma waꞌchaqꞌ e junam rukꞌ kaminaq chik yey woꞌora xkꞌastaj loq. Rire sachinaq chik pero xriqitajik” xchaꞌ.»
LUK 16:1 Ekꞌu ri Jesús xutzijoj waꞌ chike rutijoꞌn: «Kꞌo jun achi bꞌeyom y rire kꞌo jun raj chak chajinel re ronoje rubꞌitaq re. Xopon kꞌu ubꞌiꞌxikil che ri bꞌeyom, ri raj chak katajin bꞌi che ukꞌisik rubꞌeyomalil.
LUK 16:2 Ekꞌu ri bꞌeyom xusikꞌij ri raj chak y jewaꞌ xubꞌiꞌij che: “¿Saꞌ waꞌ wa kanta chawe? Ma xbꞌiꞌx chwe, riꞌat e katzꞌilaꞌ rubꞌitaq we. Ruma kꞌu riꞌ, woꞌora na at ta chi chajinel chwi rubꞌitaq we, pero chayaꞌa kan chwe chucholaꞌj tzꞌibꞌital chwa wuj saꞌ ri xaꞌan rukꞌ taq ri nuyaꞌom paqꞌabꞌ” xchaꞌ.
LUK 16:3 »Ewi ri raj chak xuchꞌobꞌ raqan: “¿Saꞌ ri kanꞌan woꞌora? Ma ri wajaw karesaj ri nuchak chwe. Yey riꞌin na kankuy taj kinchakun pa juyubꞌ y kinkꞌix che kantzꞌonoj limoxna.
LUK 16:4 ¡Ah! Wetaꞌam chik saꞌ ri kanꞌano chaꞌ e kꞌo wamigos kekꞌuluw weꞌin chikocho echiriꞌ na jinta chi nuchak” xcha pa ranimaꞌ.
LUK 16:5 »Xebꞌusikꞌij kꞌu chikijujunal ri kꞌo kikꞌas rukꞌ ri rajaw. Xutzꞌonoj che ri nabꞌe: “¿Janipa rakꞌas rukꞌ ri wajaw?” xcha che.
LUK 16:6 »Y raj kꞌas xukꞌul uwach: “Nukꞌas jun ciento tenaꞌx aceite” xcha che. »Y raj chak xubꞌiꞌij che: “Riꞌ ruwujil rakꞌas. Choqꞌotan chat-tzꞌuloq, chayojo ri jun ciento y chakojo xa nikꞌaj ciento chik” xchaꞌ.
LUK 16:7 »Tekꞌuchiriꞌ, xutzꞌonoj che jun chik: “Y riꞌat, ¿janipa rakꞌas?” xchaꞌ. »Y raj kꞌas xubꞌiꞌij: “Nukꞌas jun ciento quintal trigo” xchaꞌ. »Y raj chak xubꞌiꞌij che: “Riꞌ ruwujil rakꞌas. Chayojo ri jun ciento y chakojo xa ochenta quintal chik” xchaꞌ.
LUK 16:8 »Ekꞌu ri rajaw, echiriꞌ xretaꞌmaj saꞌ ri xuꞌan ri raj chak, jewaꞌ xubꞌiꞌij: “¡Jaꞌ! ¡Lik kꞌo unaꞌoj wa jun achi, tobꞌ na jusukꞌ ta ri uꞌanom!” xchaꞌ.» Xubꞌiꞌij kꞌu ri Jesús chike rutijoꞌn: «Paqatzij wi ri winaq na e ta jusukꞌ, más kꞌo kinaꞌoj che uchapabꞌexik rubꞌitaq ke, chikiwa ri e kꞌo pa ri Qꞌijsaq.
LUK 16:9 E uwariꞌche kambꞌiꞌij chiwe: Chichapabꞌej chi utz ri puaq y rubꞌitaq iwe y rukꞌ waꞌ chebꞌitoꞌo ri nibꞌaꞌibꞌ y jekꞌulaꞌ rike kebꞌuꞌana iwamigos. Ma echiriꞌ kopon ri qꞌij na jinta chi puaq iwukꞌ, kixkꞌul na chilaꞌ chikaj pa kayaꞌiꞌ wi chiwe ri kꞌaslemal na jinta utaqexik.
LUK 16:10 »E junoq jusukꞌ uchapabꞌexik kuꞌan ri xa jubꞌiqꞌ yaꞌtal puqꞌabꞌ, jekꞌuriꞌlaꞌ kuꞌano we xyaꞌiꞌ kꞌi puqꞌabꞌ. Noꞌj we na jusukꞌ ta uchapabꞌexik kuꞌan ri xa jubꞌiqꞌ yaꞌtal puqꞌabꞌ, jekꞌuriꞌlaꞌ we xyaꞌiꞌ kꞌi puqꞌabꞌ, na jusukꞌ ta ri kuꞌan rukꞌ.
LUK 16:11 Ekꞌu riꞌ riꞌix, we na jusukꞌ ta uchapabꞌexik iꞌanom ri bꞌeyomalil xa re ruwachulew, ¿china kꞌu kayaꞌw riꞌ piqꞌabꞌ ri saqil bꞌeyomalil re chilaꞌ chikaj? Na jinta junoq.
LUK 16:12 Yey we e laꞌ na jusukꞌ ta uchapabꞌexik iꞌanom ri yaꞌom piqꞌabꞌ xa pa chaqꞌiꞌm, ¿china kꞌu riꞌ karaj kuya bꞌeyomalil chiwe? Na jinta junoq.
LUK 16:13 »Lik kꞌayew we juna aj chak e kaꞌibꞌ ri rajaw. Ma laj tzel karil ri jun yey kꞌax kunaꞌ ri jun chik; o laj kuyak uqꞌij ri jun yey kukꞌaq bꞌi uqꞌij ri jun chik. Ruma kꞌu laꞌ, na utz taj we junoq kuya ribꞌ che kunimaj ri Dios yey kuya ribꞌ che utzukuxik ri bꞌeyomalil re ruwachulew» xcha ri Jesús.
LUK 16:14 Echiriꞌ xkita waꞌ ri fariseos, ri lik keꞌek kikꞌuꞌx rukꞌ ri puaq, xa xkitzeꞌej ri kubꞌiꞌij ri Jesús.
LUK 16:15 Ekꞌu Rire xubꞌiꞌij chike: «Ralaq fariseos, lik kaꞌan chi ibꞌil ibꞌ alaq pachaꞌ lik alaq jusukꞌ chikiwach ri winaq, pero ri Dios retaꞌam saꞌ ri kꞌo pa animaꞌ alaq. Ma ronoje taq ri lik yakom uqꞌij kuma ri winaq, waꞌ lik tzel kilitaj ruma ri Dios.
LUK 16:16 »Ri qꞌalajisanelabꞌ y ri Moisés kitzꞌibꞌam chi lo chupa ri Tzij Pixabꞌ chwi rutaqanik ri Dios kakꞌun na; yey rukꞌ kꞌu ri Juan xjeqiꞌ wi utzijoxik rukꞌunibꞌal rutaqanik ri Dios, y konoje kꞌu ri winaq lik kakitij uqꞌij kebꞌok chupa waꞌ.
LUK 16:17 Na rukꞌ ta kꞌu riꞌ, lik kꞌo uwach wa Tzij Pixabꞌ tzꞌibꞌital kanoq, ma e ne más kꞌayew kajalkꞌatix jubꞌiqꞌoq che waꞌ chwa ri kasach uwach ruwa kaj y ruwachulew.
LUK 16:18 »China junoq kuya ruwujil re jachbꞌal ibꞌ che ri rixoqil yey kakꞌuliꞌ tanchi rukꞌ juna chik ixoq, riꞌ kamakun chirij ri kꞌulanikil. Yey china ri kakꞌuliꞌ rukꞌ rixoq jachom kanoq, riꞌ jenelaꞌ kamakun chirij ri kꞌulanikil.
LUK 16:19 »Kꞌo jun achi lik bꞌeyom, e taq ruqꞌuꞌ kukojo ꞌanatal rukꞌ kꞌul morato y rukꞌ kꞌul lino rubꞌiꞌ, yey waꞌ lik kꞌi rajil. Rire ronoje qꞌij kuꞌan nimaq nimanik pa rocho.
LUK 16:20 Y chunaqaj kꞌu ri puerta katzꞌuyiꞌ jun nibꞌaꞌ Lázaro rubꞌiꞌ yey waꞌ lik kaqꞌolol rij che chꞌaꞌk.
LUK 16:21 Ekꞌu wa nibꞌaꞌ lik kurayij pan uwach ri qax katzaq chuxeꞌ rumexa ri bꞌeyom; yey kekꞌun taq ne lo ri tzꞌiꞌ y kakiriqꞌiraꞌ uwach rukꞌax kaqꞌololik.
LUK 16:22 »Xopon kꞌu jun qꞌij xkam ri nibꞌaꞌ y xkꞌam bꞌi kuma ri ángeles y xyaꞌ kꞌu putzal ri Abraham. Tekꞌuchiriꞌ, xkam ri bꞌeyom y xmuqik.
LUK 16:23 »Ekꞌuchiriꞌ kꞌo chi pa kꞌax ri bꞌeyom chupa ri luwar ke ri ekaminaq, chinimanaj xril pan ri Abraham rukꞌ ri Lázaro putzal.
LUK 16:24 Ekꞌu ri bꞌeyom xsikꞌin apanoq, jewaꞌ xubꞌiꞌij: “Nuqaw Abraham, chinjuchꞌ kaꞌn ko cheꞌla, taqa lo la ri Lázaro chaꞌ kumuꞌ ruwi uqꞌabꞌ pa yaꞌ re koluꞌjorij ri waqꞌ, ma lik kꞌax in kꞌo chupa wa aqꞌ” xcha che.
LUK 16:25 »Noꞌj ri Abraham xubꞌiꞌij pan che: “At wal, kꞌuna chakꞌuꞌx echiriꞌ at kꞌas che ruwachulew, lik xakꞌul janipa ri xarayij; noꞌj ri Lázaro lik kꞌax ri xukꞌul rire che rukꞌaslem che ruwachulew. Ekꞌu woꞌora rire lik utz uꞌanom wara, noꞌj riꞌat at kꞌo pa ri kꞌax.
LUK 16:26 Yey chiqaxoꞌl riꞌoj y riꞌat kꞌo jun nimalaj siwan. Ruma kꞌu waꞌ, ri e kꞌo wara na utz taj keqꞌax pan iwukꞌ; y ri e kꞌo iwukꞌ, na utz taj keqꞌax lo wara” xcha ri Abraham.
LUK 16:27 »Xubꞌiꞌij kꞌu ri bꞌeyom che: “Kantzꞌonoj ko cheꞌla, nuqaw Abraham, taqa bꞌi la ri Lázaro chirocho ri nuqaw chwachulew,
LUK 16:28 ma chilaꞌ e kꞌo kan woꞌobꞌ nuchaqꞌ. Taqa kꞌu bꞌi la ri Lázaro chaꞌ kebꞌuꞌpixabꞌaj y jelaꞌ na kepe ta rike chupa wa luwar re kꞌax pa wa in kꞌo wi riꞌin” xchaꞌ.
LUK 16:29 »Y ri Abraham xubꞌiꞌij che: “Kꞌo chi pakiqꞌabꞌ rike ri Tzij Pixabꞌ tzꞌibꞌital kan kuma ri Moisés y ri qꞌalajisanelabꞌ. ¡Ekꞌu kita ke riꞌ!” xchaꞌ.
LUK 16:30 »Ekꞌu ri bꞌeyom xubꞌiꞌij che: “Nuqaw Abraham, rike na kebꞌok ta il che waꞌ. Pero we ta e laꞌ kꞌo junoq kꞌastajinaq bꞌi chikixoꞌl ri ekaminaq yey kawinaqir chikiwach, riꞌ kakitzelej na kitzij chwach ri Dios” xchaꞌ.
LUK 16:31 »Ekꞌuchiriꞌ xubꞌiꞌij ri Abraham che: “We rike na kebꞌok ta il che ri kitzꞌibꞌam kan ri Moisés y ri qꞌalajisanelabꞌ, na kakijalkꞌatij ta ri kibꞌinik kisilabꞌik tobꞌ ne kawinaqir chikiwach junoq kꞌastajinaq bꞌi chikixoꞌl ri ekaminaq” xcha ri Abraham.»
LUK 17:1 Ri Jesús xubꞌiꞌij chike rutijoꞌn: «Che ruwachulew lik kꞌo tzaqibꞌal pa mak, pero ¡lik toqꞌoꞌ kꞌu uwach ri kumin junoq chik chupa ri na utz taj, ma e kape ri qꞌatbꞌal tzij re ri Dios puwiꞌ!
LUK 17:2 Ma e ne más utz kuya ri katzayabꞌax bꞌi puqul juna nimalaj kaꞌ re keꞌem y kakꞌaq kꞌu bꞌi chupa ri mar, chwa ri kumin junoq pachaꞌ wa chꞌutiꞌq chupa ri na utz taj.
LUK 17:3 »Lik chiwila kꞌu iwibꞌ riꞌix. Ma we juna awatz-achaqꞌ kuꞌan ri na utz taj chawe, chachꞌaꞌbꞌej upa. Y we xutzelej utzij chawach, chakuyu umak.
LUK 17:4 Tobꞌ ne kuꞌan ri na utz taj chawe wuqubꞌ laj chupa ri jun qꞌij y wuqubꞌ laj koluꞌtzelej utzij chawach, chakuyu umak» xcha ri Jesús.
LUK 17:5 Ekꞌuchiriꞌ xkibꞌiꞌij ri kabꞌlajuj e utaqoꞌn che: —Nimarisaj la ri kubꞌulibꞌal qakꞌuꞌx —xechaꞌ.
LUK 17:6 Y ri Qanimajawal Jesucristo jewaꞌ xubꞌiꞌij chike: —We ta ri kubꞌulibꞌal ikꞌuꞌx kakꞌiyik jelaꞌ pachaꞌ kakꞌiy rijaꞌ re moxtasa, utz ne riꞌ kibꞌiꞌij che wa jun cheꞌ: “Chumichꞌa bꞌi ribꞌ wara y chutika ribꞌ chupa ri mar,” y e kuꞌanaꞌ —xchaꞌ.
LUK 17:7 Ekꞌu ri Jesús xubꞌiꞌij: «We e laꞌ junoq chiwe kꞌo juna raj chak kachakun pa abꞌixbꞌal o kebꞌuchajij chikop, yey echiriꞌ katzelej lo pa juyubꞌ, ¿kibꞌiꞌij nawi che: “Chatokoq, chat-tzꞌula chwa ri mexa”?
LUK 17:8 ¡Na e ta kiꞌano! Ri kibꞌiꞌij che e waꞌ: “Chajeqa uyijbꞌaxik ri waꞌim y chayijbꞌaꞌ awibꞌ chaꞌ kaya lo ri nuwa chwa ri mexa. Ekꞌuchiriꞌ in woꞌqinaq chi riꞌin, kꞌa tekꞌuchiriꞌ katwaꞌ riꞌat” kixchaꞌ.
LUK 17:9 ¿Kutioxij nawi ri patrón che ri raj chak ruma xuꞌan ri xutaq che? Na kutioxij taj.
LUK 17:10 Jekꞌulaꞌ riꞌix, echiriꞌ iꞌanom chi ronoje ri ixtaqom che uꞌanik ruma ri Dios, jewaꞌ chibꞌiꞌij: “Riꞌoj xa oj mokom, na taqal ta ko chiqe kayak qaqꞌij ma xew qaꞌanom ri ubꞌiꞌim ri Dios chiqe” kixchaꞌ.»
LUK 17:11 Echiriꞌ ri Jesús kꞌo chi bꞌe re keꞌek Jerusalem, katajin rikꞌowik pa ri bꞌe, ri kujach upa ri luwar re Samaria rukꞌ ri luwar re Galilea.
LUK 17:12 Echiriꞌ katajin rokik chupa jun aldea, lajuj achijabꞌ kꞌo ri yabꞌil lepra chike xebꞌel lo che ukꞌulik yey chinimanaj xetakꞌiꞌ wi lo che ri Jesús.
LUK 17:13 Xkijeq kꞌu kesikꞌin che, jewaꞌ kakibꞌiꞌij: —¡Jesús, lal tijonel, choj-juchꞌ kaꞌn ko cheꞌla! —kechaꞌ.
LUK 17:14 Ekꞌuchiriꞌ xeril pan ri Jesús, jewaꞌ xubꞌiꞌij chike: —Oj alaq, jeꞌkꞌutu ibꞌ alaq chikiwach raj chakunel pa Rocho Dios —xcha chike. Xebꞌek kꞌut, y echiriꞌ ketajin chi bꞌe, xekunutaj che ri kiyabꞌil.
LUK 17:15 Kꞌo kꞌu jun chike, echiriꞌ xrilo kunutajinaq chik, xtzelej loq y xujeqo kasikꞌinik, lik kuyak uqꞌij ri Dios.
LUK 17:16 Xuxukubꞌaꞌ kꞌu ribꞌ xeꞌraqan uqꞌabꞌ ri Jesús, xuqasaj rupalaj kꞌa chuꞌlew y lik katioxin chwach, yey waꞌ waꞌchi aj Samaria.
LUK 17:17 Ekꞌu ri Jesús jewaꞌ xubꞌiꞌij: —¿Na e ta nebꞌa lajuj ri xekunutajik? Yey ri bꞌelejebꞌ chik, ¿pa e kꞌo wi?
LUK 17:18 ¿Suꞌchak na xetzelej ta lo rike chaꞌ kakiyak uqꞌij ri Dios? Ma xew xtzelej lo wa jun achi yey rire na aj tane Israel —xchaꞌ.
LUK 17:19 Xubꞌiꞌij kꞌu che rachi: —Chatyaktajoq y chamaja bꞌi abꞌe. Ma ruma ri kubꞌulibꞌal akꞌuꞌx wukꞌ, xatkolobꞌetaj che ri yabꞌil —xchaꞌ.
LUK 17:20 Ri fariseos xkitzꞌonoj che ri Jesús: —¿Jampalaꞌ kakꞌun rutaqanik ri Dios che ruwachulew? —xechaꞌ. Y ri Jesús xukꞌul uwach: —Ri jeqebꞌal rutaqanik ri Dios na jinta kꞌutubꞌal re kilitajik.
LUK 17:21 Na jinta ne junoq kubꞌiꞌij: “¡Riꞌ kꞌo wara!” o “¡Leꞌ kꞌolik!” Ma tape alaq: Rutaqanik ri Dios kꞌo chi chixoꞌl alaq —xcha chike.
LUK 17:22 Ekꞌuchiriꞌ ri Jesús xubꞌiꞌij tanchi chike rutijoꞌn: «Kopon kꞌu ri qꞌij echiriꞌ lik kiwaj kiwil tobꞌ ne xa juna qꞌij che ruqꞌijol Ralaxel Chikixoꞌl Tikawex echiriꞌ kataqan che ruwachulew; pero na kiwil taj.
LUK 17:23 Kuꞌana kꞌu riꞌ e kꞌo kakibꞌiꞌij chiwe: “¡Riꞌ kꞌo wara!” o “¡Leꞌ kꞌolik!” Pero riꞌix mixꞌek, na kebꞌiternabꞌej ta nenareꞌ.
LUK 17:24 Ma echiriꞌ kakꞌun Ralaxel Chikixoꞌl Tikawex, konoje kakil rukꞌunibꞌal jelaꞌ pachaꞌ kuꞌano echiriꞌ kayokꞌ kaꞌn ruxeꞌ kaj y ruwonibꞌal waꞌ kuwonisaj ronoje.
LUK 17:25 Pero lik kꞌu chirajawaxik nabꞌe na kutij ri kꞌax y lik kakꞌaq bꞌi uqꞌij kuma ri winaq re waqꞌij ora.
LUK 17:26 »Ma jelaꞌ pachaꞌ ri xuꞌan chupa taq ri qꞌij re ri Noé, jelaꞌ kuꞌana pa rukꞌunibꞌal Ralaxel Chikixoꞌl Tikawex.
LUK 17:27 Ma konoje ri winaq kakitij kiwa, kakitij kiyaꞌ, kekꞌuliꞌik y kekiya ri kalkꞌoꞌal pa kꞌulanikil. Ekꞌu ketajin riꞌ che uꞌanikil, echiriꞌ xopon ruqꞌijol xok bꞌi ri Noé chupa ri nimalaj barco; kꞌa tekꞌuchiriꞌ xpe ri unimal jabꞌ y jelaꞌ xusach kiwach konoje.
LUK 17:28 Jekꞌuriꞌlaꞌ xuꞌan ojertan chupa taq ri qꞌij re ri Lot: taq ri winaq kakitij kiwa, kakitij kiyaꞌ, keloqꞌowik, kekꞌayinik, ketikoꞌnajik y kakiyak kocho.
LUK 17:29 Yey chupa kꞌu ri qꞌij echiriꞌ xel bꞌi ri Lot chupa ri tinamit Sodoma, xpe lo aqꞌ chikaj kajinow rukꞌ azufre y xekam konoje ri e kꞌo chupa ri tinamit.
LUK 17:30 Jekꞌuriꞌlaꞌ kuꞌana pa ruqꞌijol echiriꞌ kaqꞌalajin uwach Ralaxel Chikixoꞌl Tikawex, ma taq ri winaq na kakoyꞌej ta rukꞌunibꞌal.
LUK 17:31 »Chupa kꞌu riꞌ la qꞌij, china ri kꞌo lo chwi ri rocho, maqaj lo che ukꞌamik ubꞌitaq re pa ja; y china ri kꞌo pa juyubꞌ, matzelej lo pa ri tinamit.
LUK 17:32 Kꞌuna chikꞌuꞌx riꞌix saꞌ ri xukꞌulumaj ri rixoqil ri Lot.
LUK 17:33 China ri lik kutij riꞌ che na kuya ta ranimaꞌ rukꞌaslem, riꞌ e kujam ri chomilaj ukꞌaslemal chwach ri Dios; noꞌj china ri kuya ranimaꞌ rukꞌaslem wuma riꞌin, riꞌ e kuriq ri chomilaj ukꞌaslemal chwach ri Dios.
LUK 17:34 »Paqatzij wi kambꞌiꞌij chiwe: Chupa laꞌ laꞌqꞌabꞌ kꞌo kuꞌana wi e kꞌo kaꞌibꞌoq kewar junam; jun kakꞌam bꞌi y ri jun chik kayaꞌiꞌ kanoq.
LUK 17:35 O laj e kꞌo kaꞌibꞌ ixoqibꞌ junam kekeꞌnik; jun kakꞌam bꞌi y ri jun chik kayaꞌiꞌ kanoq.
LUK 17:36 Pa e kꞌo wi kaꞌibꞌoq chwa juyubꞌ; jun kakꞌam bꞌi y ri jun chik kayaꞌiꞌ kanoq» xcha ri Jesús.
LUK 17:37 Ekꞌuchiriꞌ rutijoꞌn xkikꞌul uwach, jewaꞌ xkibꞌiꞌij che: —Qajawal, ¿pachawi kuꞌana wi waꞌ? —xechaꞌ. Y ri Jesús xubꞌiꞌij chike: —Lik kaqꞌalajinik pa kuꞌana wi, jelaꞌ pachaꞌ kaqꞌalajinik pa kꞌo wi juna kaminaq, ma puwi waꞌ kakimol wi kibꞌ taq ri kꞌuch —xchaꞌ.
LUK 18:1 Ekꞌu ri Jesús xutzijoj wa jun kꞌambꞌal naꞌoj chaꞌ kukꞌut chike rutijoꞌn ri lik chirajawaxik wi na kakoqꞌotaj taj kakiꞌan orar chwach ri Dios y na kapax tane kikꞌuꞌx che royꞌexik ri kꞌulubꞌal uwach.
LUK 18:2 Jewaꞌ xubꞌiꞌij chike: «Chupa jun tinamit kꞌo jun aj qꞌatal tzij na kuxiꞌij ta ribꞌ chwach ri Dios y na kuxiꞌij ta ribꞌ chwach juna achi.
LUK 18:3 Kꞌo kꞌu jun ixoq malkaꞌn chupa wa tinamit, ronoje qꞌij kakꞌun chwach raj qꞌatal tzij y kubꞌiꞌij che: “Qꞌata la tzij puwi jun tikawex kachꞌoꞌjin chwij” kacha che.
LUK 18:4 »Ekꞌu raj qꞌatal tzij lik naj e riꞌ na xraj taj kuꞌan ri kutzꞌonoj wiꞌxoq. Tekꞌuchiriꞌ, xubꞌiꞌij pa ranimaꞌ: “Tobꞌ na kanxiꞌij ta wibꞌ chwach ri Dios y na kanxiꞌij ta wibꞌ chwach juna achi,
LUK 18:5 kanꞌan na kꞌu wa qꞌatbꞌal tzij kutzꞌonoj wiꞌxoq malkaꞌn. Ma we na kantoꞌ taj, xaqi kinoꞌluchꞌichꞌaꞌ yey waꞌ na kankuy ta chik” xcha raj qꞌatal tzij.»
LUK 18:6 Ekꞌuchiriꞌ, ri Qanimajawal xubꞌiꞌij chike rutijoꞌn: «Xita kꞌu riꞌ saꞌ ri xubꞌiꞌij wa aj qꞌatal tzij na utz ta ukꞌuꞌx. Xuꞌan kꞌu ri xutzꞌonoj rixoq che ma rire na xroqꞌotaj ta utzꞌonoxik.
LUK 18:7 »We juna achi na utz ta ukꞌuꞌx kuꞌan waꞌ, ¡makꞌuwariꞌ ri Dios kuꞌan ri usukꞌ y kebꞌutoꞌ kꞌu ri ebꞌuchaꞌom Rire we rike kakichꞌaꞌbꞌej chipaqꞌij chichaqꞌabꞌ! ¿Kamayin nebꞌa Rire che ukꞌulik uwach?
LUK 18:8 Kambꞌiꞌij chiwe: Na jampatana ri Dios kukꞌulubꞌej lo uwach y kuꞌan kꞌu ri usukꞌ chike. Pero echiriꞌ kakꞌun tanchi Ralaxel Chikixoꞌl Tikawex, ¿kꞌa keburiq nawi tikawex che ruwachulew kꞌa kꞌo kubꞌulibꞌal kikꞌuꞌx rukꞌ ri Dios?» xcha ri Jesús.
LUK 18:9 E kꞌo jujun kakichꞌobꞌo lik e jusukꞌ; ruma kꞌu riꞌ, lik kꞌu kakikꞌaq bꞌi kiqꞌij ri jujun chik. Ekꞌu ri Jesús xutzijoj wa jun kꞌambꞌal naꞌoj chike:
LUK 18:10 «E kꞌo kaꞌibꞌ achijabꞌ xebꞌek pa ri Rocho Dios chaꞌ keꞌkiꞌana orar; jun e kukꞌil ri fariseos y ri jun chik, aj tzꞌonol puaq re tojonik.
LUK 18:11 Ekꞌu ri fariseo e riꞌ takꞌalik xujeq kuꞌan orar; lik kuyak uqꞌij chiribꞌil ribꞌ, jewaꞌ kubꞌiꞌij: “Lal Dios, kantioxij cheꞌla ma riꞌin na in ta jelaꞌ pachaꞌ ri juchꞌobꞌ achijabꞌ: ri eleqꞌomabꞌ, ri na e ta jusukꞌ, ri kemakun chirij ri kꞌulanikil. Riꞌin na in tane jelaꞌ pachaꞌ la jun aj tzꞌonol puaq re tojonik.
LUK 18:12 Riꞌin kalaj kanꞌan ayuno ronoje semana, y kanya ri nudiezmo che ronoje ri kanchꞌako” kacha ri fariseo.
LUK 18:13 »Noꞌj raj tzꞌonol puaq re tojonik xa naj xkꞌojiꞌ wi apanoq. Na karaj tane katzuꞌn chikaj; kutꞌiqitꞌaꞌ ruwa ukꞌuꞌx, jewaꞌ kubꞌiꞌij: “Lal Dios Qajawxel, ¡kuyu ko la numak, ma riꞌin lik in aj mak!” kachaꞌ.
LUK 18:14 »Kambꞌiꞌij kꞌu chiwe: Wa aj tzꞌonol puaq re tojonik xtzelej chirocho ꞌanom chi jusukꞌ che ruma ri Dios; noꞌj ri fariseo, na xkuy ta rumak. Ma china ri kuꞌan nim che ribꞌ, ri Dios kuqasaj uwa uqꞌij; noꞌj china ri kuꞌan chꞌutiꞌn che ribꞌ, ri Dios kuyak uqꞌij» xchaꞌ.
LUK 18:15 E kꞌo jujun raltaq ko akꞌalabꞌ xekꞌam lo chwach ri Jesús chaꞌ Rire kuya ruqꞌabꞌ pakiwiꞌ. Yey rutijoꞌn echiriꞌ xkil waꞌ, xekiyaj ri ekꞌamayom lo ke.
LUK 18:16 Noꞌj ri Jesús xebꞌusikꞌij pan rakꞌalabꞌ y jewaꞌ xubꞌiꞌij chike rutijoꞌn: «Chiyaꞌa luwar chike ri raltaq ko akꞌalabꞌ chepeta na wukꞌ. Mebꞌiqꞌatej; ma ri kakiꞌan e jelaꞌ pachaꞌ rike, riꞌ kuꞌan ke rutaqanik ri Dios.
LUK 18:17 Paqatzij wi kambꞌiꞌij chiwe: China ri na kukꞌul ta rutaqanik ri Dios jelaꞌ pachaꞌ kuꞌan juna ralko kꞌoꞌm, riꞌ na kok ta chupa rutaqanik ri Dios» xchaꞌ.
LUK 18:18 Kꞌo jun aj wach xkꞌun rukꞌ ri Jesús y xutzꞌonoj che: —Lal utzilaj tijonel, ¿saꞌ ri kanꞌano chaꞌ kꞌo nukꞌaslemal na jinta utaqexik? —xchaꞌ.
LUK 18:19 Ri Jesús xukꞌul uwach: —¿Suꞌbꞌe kabꞌiꞌij la “utz” chwe? Ma xa Jun ri lik utz kꞌolik, waꞌ e ri Dios.
LUK 18:20 Rilal etaꞌam chi la saꞌ taq Rutzij Upixabꞌ ri Dios: “Matmakun chirij ri kꞌulanikil. Matkamisanik. Mateleqꞌik. Maꞌan raqꞌubꞌal chirij junoq. Chaloqꞌoj kiqꞌij rachu-aqaw” —xcha che.
LUK 18:21 Rachi xubꞌiꞌij: —Ronoje waꞌ nuꞌanom lo chwi nuchꞌutiꞌnal —xchaꞌ.
LUK 18:22 Echiriꞌ ri Jesús xuta waꞌ, jewaꞌ xubꞌiꞌij che: —Kꞌa kꞌo ri lik chirajawaxik kaꞌan la: E kꞌayij la ronoje taq ri bꞌeyomalil la y jacha kꞌu la chike ri nibꞌaꞌibꞌ; jekꞌuriꞌlaꞌ kꞌo bꞌeyomalil la chilaꞌ chikaj. Tekꞌuchiriꞌ peta la y tereja lo la chwij —xchaꞌ.
LUK 18:23 Ekꞌuchiriꞌ xuta waꞌ rachi, lik xuchap bꞌis, ma rire lik bꞌeyom.
LUK 18:24 Echiriꞌ ri Jesús xrilo lik xuchap bꞌis rachi, jewaꞌ xubꞌiꞌij: —Ri e bꞌeyomabꞌ, lik kꞌayew chike kebꞌok chupa rutaqanik ri Dios.
LUK 18:25 Ma e ne más kꞌayew ri kok juna bꞌeyom chupa rutaqanik ri Dios chwa ri kikꞌow juna camello chupa rutel juna akuxaꞌ —xchaꞌ.
LUK 18:26 Ewi ri xetaw re waꞌ, xkibꞌiꞌij: —We e riꞌ, ¿china kꞌu riꞌ ri kakolobꞌetajik? —xechaꞌ.
LUK 18:27 Xubꞌiꞌij kꞌu ri Jesús chike: —Ri tikawex na kakikolobꞌej ta kibꞌ kitukel, ma waꞌ lik kꞌayew chikiwach; noꞌj ri Dios kuꞌano ma na jinta kꞌayew chwach Rire —xchaꞌ.
LUK 18:28 Ekꞌuchiriꞌ, xubꞌiꞌij ri Pedro: —Qajawal, e riꞌoj qayaꞌom kan ronoje y oj teran chiꞌij la —xchaꞌ.
LUK 18:29 Ekꞌu ri Jesús xubꞌiꞌij chike: —Paqatzij wi kambꞌiꞌij chiwe: China ri uyaꞌom kan rocho, ebꞌuyaꞌom kan ruchu-uqaw, ri ratz-uchaqꞌ, ri rixoqil o ri ralkꞌoꞌal ruma rutaqanik ri Dios;
LUK 18:30 ruma taq kꞌu waꞌ wa uyaꞌom kanoq, lik kꞌi ri rajil ukꞌaxel kukꞌul wara che ruwachulew. Yey chiqawach apanoq kukꞌul na ri kꞌaslemal na jinta utaqexik —xchaꞌ.
LUK 18:31 Ri Jesús xumol kichiꞌ ri kabꞌlajuj utijoꞌn y jewaꞌ xubꞌiꞌij chike: «Chitapeꞌ. E waꞌ kojpaqiꞌ Jerusalem y chilaꞌ kuꞌana ronoje ri tzꞌibꞌital kan kuma ri qꞌalajisanelabꞌ chwi Ralaxel Chikixoꞌl Tikawex:
LUK 18:32 kayaꞌ kꞌu pakiqꞌabꞌ ri na e ta aj judiꞌabꞌ, kachꞌamixik, kayoqꞌik y kachubꞌaxik.
LUK 18:33 Echiriꞌ lik jichꞌom chi upa, kakamisaxik. Noꞌj churox qꞌij kakꞌastaj lo chikixoꞌl ri ekaminaq» xcha ri Jesús.
LUK 18:34 Pero rutijoꞌn na jinta xkimaj usukꞌ che waꞌ, ma kꞌamajaꞌ kayaꞌtaj chike kakimaj usukꞌ.
LUK 18:35 E xuꞌan waꞌ echiriꞌ ri Jesús xa naqaj chi kꞌo wi che ri tinamit Jericó. Kꞌo jun potzꞌ tzꞌul chuchiꞌ ri bꞌe, kutzꞌonoj limoxna.
LUK 18:36 Ekꞌuchiriꞌ xuto katajin kikꞌowik ukꞌiyal winaq, xutzꞌonobꞌej: —¿Saꞌ laꞌ la katajin rikꞌowik? —xchaꞌ.
LUK 18:37 Y kꞌo xebꞌiꞌn che: —E Jesús ri aj Nazaret katajin rikꞌowik —xechaꞌ.
LUK 18:38 Ekꞌuchiriꞌ, rire lik ko xsikꞌinik, jewaꞌ xubꞌiꞌij: —¡Jesús, lal ri Ralkꞌoꞌal kan ri rey David, chinjuchꞌ kaꞌn ko cheꞌla! —xchaꞌ.
LUK 18:39 Yey ri winaq e nabꞌejinaq xkichꞌaꞌbꞌej upa chaꞌ na kasikꞌin ta chik. Noꞌj ri potzꞌ más ne ko kasikꞌinik, jewaꞌ kubꞌiꞌij: —¡Lal ri Ralkꞌoꞌal kan ri rey David, chinjuchꞌ kaꞌn ko cheꞌla! —xchaꞌ.
LUK 18:40 Ekꞌuchiriꞌ ri Jesús xtakꞌiꞌik y xutaq ukꞌamik ri potzꞌ. Y echiriꞌ xkꞌam lo chwach, ri Jesús xutzꞌonoj che:
LUK 18:41 —¿Saꞌ ri kawaj kanꞌan chawe? —xchaꞌ. Y ri potzꞌ xubꞌiꞌij che: —Wajawal, ꞌana la chwe kintzuꞌnik —xchaꞌ.
LUK 18:42 Ekꞌu ri Jesús xubꞌiꞌij che: —¡Chat-tzuꞌn bꞌa riꞌ! Ma ruma ri kubꞌulibꞌal akꞌuꞌx wukꞌ, at kunutajinaq chik —xchaꞌ.
LUK 18:43 Xaqikꞌateꞌt kꞌu riꞌ xtzuꞌnik y xterej bꞌi chirij ri Jesús, e riꞌ kuyak uqꞌij ri Dios. Y konoje ri winaq xebꞌilow re xkijeqo kakibꞌixoj rubꞌiꞌ ri Dios.
LUK 19:1 Ri Jesús xopon Jericó, e riꞌ katajin rikꞌowik chupa ri tinamit.
LUK 19:2 Kꞌo kꞌu jun achi chiriꞌ Zaqueo rubꞌiꞌ, aj wach ke raj tzꞌonol puaq re tojonik yey rire lik bꞌeyom.
LUK 19:3 Rire lik kutij riꞌ che suꞌanik karil uwach ri Jesús, pero na utz taj karilo kuma rukꞌiyal winaq, ma xa chꞌutiꞌn raqan.
LUK 19:4 Lik kꞌut kanik xeꞌek xnabꞌej bꞌi chikiwach ri winaq y xaqꞌan chwi jun cheꞌ chaꞌ karil uwach ri Jesús, ma chiriꞌ kikꞌow wi Rire.
LUK 19:5 Echiriꞌ xopon ri Jesús chuxeꞌ ri cheꞌ, xtzuꞌn chikaj y xril pan ri Zaqueo; y jekꞌuwaꞌ xubꞌiꞌij pan che: —Zaqueo, choqꞌotan qaja lo la, ma waqꞌij lik chirajawaxik kineꞌkanaj kan chi ocho la —xchaꞌ.
LUK 19:6 Y ri Zaqueo maji chik xqaj loq y xukꞌul ri Jesús chirocho rukꞌ kiꞌkotemal.
LUK 19:7 Ekꞌuchiriꞌ xkil waꞌ ri winaq, konoje xkijeq kechꞌaꞌt chirij ri Jesús ma xkanaj kan chirocho jun achi lik aj mak.
LUK 19:8 Ekꞌuchiriꞌ, ri Zaqueo xtakꞌiꞌik y jewaꞌ xubꞌiꞌij che ri Qanimajawal: —Tape la, wajawal: Pa nikꞌaj che ri nubꞌeyomalil kansipaj chike ri nibꞌaꞌibꞌ; yey we nuꞌanom eleqꞌ che junoq rukꞌ sokosoꞌnik, kajlaj rukꞌaxel kantzelej che —xchaꞌ.
LUK 19:9 Ewi ri Jesús xubꞌiꞌij: —Waqꞌij xkꞌun ri kolobꞌetajik chupa wa rocho ri Zaqueo, ma rire e kukꞌil ri ralkꞌoꞌal kan ri Abraham.
LUK 19:10 Yey ri in Alaxel Chikixoꞌl Tikawex, in kꞌuninaq che kitzukuxik y che kikolobꞌexik ri e sachinaq pa mak —xchaꞌ.
LUK 19:11 Echiriꞌ kakitataꞌ waꞌ ri winaq, ri Jesús xujeq utzijoxik jun kꞌambꞌal naꞌoj chike. Ma xa naqaj chi kꞌo wi che ri tinamit Jerusalem yey e chikiwach ri winaq, echiriꞌ ri Jesús kok chiriꞌ, kuqꞌalajisaj uwach y jelaꞌ kajeqer rutaqanik ri Dios.
LUK 19:12 Xubꞌiꞌij kꞌu ri Jesús: «Kꞌo jun achi lik kꞌo uwach e riꞌ keꞌek chupa jun tinamit lik naj chaꞌ chilaꞌ kaꞌan rey che; y jelaꞌ echiriꞌ katzelej loq, kujeq rutaqanik puwi rutinamit.
LUK 19:13 Yey echiriꞌ kꞌamajaꞌ keꞌek, xebꞌusikꞌij lajuj raj chakibꞌ y xuya kan chike chikijujunal jun saqil puaq “mina” kecha che y xubꞌiꞌij kan chike: “Chixchꞌakan chirij wa puaq xaloqꞌ riꞌin na in jintaj, y kiya tanchi chwe echiriꞌ kintzelej loq” xchaꞌ.
LUK 19:14 »Pero ri winaq re ri tinamit lik tzel kakilo y xekitaq kꞌu bꞌi jujun achijabꞌ chaꞌ keꞌkibꞌiꞌij che ri jun kayaꞌw re ri taqanik che: “Na kaqaj ta kuꞌan rey waꞌchi paqawiꞌ” kechaꞌ.
LUK 19:15 »Na rukꞌ ta kꞌu riꞌ, xyaꞌtaj che rachi kuꞌan rey. Ekꞌuchiriꞌ xtzelej loq, xutaq kisikꞌixik ri raj chakibꞌ uyaꞌom kan puaq pakiqꞌabꞌ, ma karaj karetaꞌmaj janipa ri xkichꞌak chikijujunal.
LUK 19:16 »Xkꞌun ri nabꞌe y jewaꞌ xubꞌiꞌij che: “Wajaw, rukꞌ ri jun mina yaꞌom kan la panuqꞌabꞌ, xinchꞌak chi lajuj chirij” xchaꞌ.
LUK 19:17 »Ri rey xubꞌiꞌij che: “Utz riꞌ. At jun utzilaj aj chak. Ruma kꞌu xariq uchapabꞌexik chi utz ri na kꞌi taj, woꞌora kanya paqꞌabꞌ at taqanel pakiwi lajuj tinamit” xchaꞌ.
LUK 19:18 »Xkꞌun kꞌu lo jun chik raj chak y jewaꞌ xubꞌiꞌij che: “Wajaw, rukꞌ ri jun mina yaꞌom kan la panuqꞌabꞌ, xinchꞌak chi woꞌobꞌ chirij” xchaꞌ.
LUK 19:19 »Y ri rey jewaꞌ xubꞌiꞌij che: “Riꞌat kanya paqꞌabꞌ at taqanel pakiwi woꞌobꞌ tinamit” xchaꞌ.
LUK 19:20 »Xkꞌun kꞌu jun chik y jewaꞌ xubꞌiꞌij che: “Wajaw, riꞌ ri jun mina la yaꞌom kan la panuqꞌabꞌ. Waꞌ lik nukꞌolom chi utz chupa jun suꞌt
LUK 19:21 ma lik xinxiꞌij wibꞌ cheꞌla ruma lik lal titzꞌitik. Rilal kaꞌan e la che ri na lal ta kꞌoloyom re, yey kamol ne la ri na xtik ta la” xchaꞌ.
LUK 19:22 »Ekꞌuchiriꞌ, ri rey xubꞌiꞌij che: “Riꞌat at jun aj chak na jinta kꞌana achak. Rukꞌ ne la chꞌaꞌtem xabꞌiꞌij, kanqꞌat tzij pawiꞌ. We xachꞌobꞌ raqan lik in titzꞌitik ma kanꞌan weꞌin che ri na in ta inkꞌoloyom re, yey kanmol ne ri na xintik taj,
LUK 19:23 ¿suꞌbꞌe kꞌu riꞌ na xaya ta ri nupuaq pa banco chaꞌ we xintzelej loq koꞌlnukꞌamaꞌ rukꞌ ri uchꞌakom chik?” xchaꞌ.
LUK 19:24 »Xubꞌiꞌij kꞌu chike ri e kꞌo chiriꞌ: “Chimaja ri mina che wa jun aj chak y chiyaꞌa che ri kꞌo lajuj mina rukꞌ” xchaꞌ.
LUK 19:25 »Ekꞌu rike xkibꞌiꞌij che: “Qajaw, ¡pero rire kꞌo chi lajuj mina rukꞌ!” xecha che.
LUK 19:26 »Y ri taqanel xukꞌul uwach: “Paqatzij wi kambꞌiꞌij chiwe: China ri lik kꞌi kꞌo rukꞌ, kayaꞌiꞌ ne más che; noꞌj ri na jinta kꞌo rukꞌ, kamajiꞌ ne che ri xa jubꞌiqꞌ kꞌo rukꞌ.
LUK 19:27 Ekꞌu woꞌora, chebꞌikꞌama lo wara ri winaq lik tzel kinkilo, ri na xkaj taj kinuꞌan rey pakiwiꞌ, y chebꞌikamisaj chinuwach” xchaꞌ.»
LUK 19:28 Echiriꞌ xubꞌiꞌij waꞌ, ri Jesús xumaj tanchi ubꞌi ubꞌe y xpaqiꞌ Jerusalem junam kukꞌ rutijoꞌn.
LUK 19:29 Ekꞌuchiriꞌ xebꞌopon chwach ri juyubꞌ Olivos, chunaqaj raldeas Betfagé y Betania, ri Jesús xebꞌutaq bꞌi kaꞌibꞌ chike rutijoꞌn chaꞌ kenabꞌej apanoq,
LUK 19:30 jewaꞌ xubꞌiꞌij chike: «Jix pa raldea kꞌo pan chiqawach. Y echiriꞌ kixok chupa, kiꞌriqa jun qꞌapoj buru yuqulik. Waꞌ na jinta junoq kojoyom re. Chikiraꞌ y chikꞌamaꞌ loq.
LUK 19:31 We kꞌo kꞌu junoq katzꞌonow chiwe: “¿Suꞌchak kikiro?”, jewaꞌ kikꞌul uwach: “Ma kajawax che ri Qajawal” kixchaꞌ.»
LUK 19:32 Xebꞌek kꞌu ri kaꞌibꞌ etaqom bꞌi y xkiriq ri buru jelaꞌ pachaꞌ ri bꞌiꞌtal bꞌi chike.
LUK 19:33 Ekꞌuchiriꞌ ketajin che ukirik ri qꞌapoj buru, taq ri rajaw xkibꞌiꞌij chike: —¿Suꞌchak kikir la buru? —xechaꞌ.
LUK 19:34 Y rike xkibꞌiꞌij: —Ma kajawax che ri Qajawal —xechaꞌ.
LUK 19:35 Ewi xkikꞌam lo ri buru rukꞌ ri Jesús. Ekꞌuchiriꞌ kiripom chi ri kimanta chwi ri qꞌapoj buru, xkaqꞌanisaj ri Jesús puwiꞌ.
LUK 19:36 Echiriꞌ katajin rikꞌowik ri Jesús, ri winaq kakilikꞌ taq ri kimanta pa la bꞌe re yakbꞌal uqꞌij.
LUK 19:37 Y echiriꞌ katajin roponik chunaqaj ri xulanik re ri juyubꞌ Olivos, konoje rukꞌiyal utijoꞌn xkijeqo lik kakiyak uqꞌij ri Dios rukꞌ kiꞌkotemal ma kilom taq ri kꞌutubꞌal re ruchuqꞌabꞌ uꞌanom ri Jesús,
LUK 19:38 jewaꞌ kakibꞌiꞌij: «¡Lik nim uqꞌij ri Rey petinaq chupa rubꞌiꞌ ri Dios Qajawxel! ¡Utzil chomalil kꞌo chilaꞌ chikaj y lik nim uwach uqꞌij ri Dios chilaꞌ chikaj!» kechaꞌ.
LUK 19:39 E kꞌo kꞌu jujun fariseos chikixoꞌl rukꞌiyal winaq xkibꞌiꞌij che ri Jesús: —Lal tijonel, chebꞌeqꞌatej la ri tijoꞌn la chaꞌ na kakibꞌiꞌij ta chi waꞌ —xechaꞌ.
LUK 19:40 Noꞌj ri Jesús xukꞌul uwach: —Paqatzij wi kambꞌiꞌij che alaq, we ta rike kakitanabꞌaꞌ ubꞌiꞌxikil waꞌ, e taq rabꞌaj kakijeq kakiyak nuqꞌij —xchaꞌ.
LUK 19:41 Y echiriꞌ ri Jesús xopon chunaqaj Jerusalem y xril pan ri tinamit, xujeq lik koqꞌ puwiꞌ,
LUK 19:42 jewaꞌ xubꞌiꞌij: «¡Toqꞌoꞌ iwach riꞌix aj Jerusalem! ¡We ta kꞌu kiwetaꞌmaj waqꞌij ora saꞌ ri kakꞌamaw lo utzil chomal chiwe! Noꞌj waꞌ pachaꞌ ewatal chiwach woꞌora.
LUK 19:43 Kakꞌun kꞌu ri qꞌij echiriꞌ ri tzel kebꞌilow iwe kakisut rij ri tinamit Jerusalem y kakiwok iwij chaꞌ na kixanimaj tubꞌi. Tekꞌuchiriꞌ, kepe chiwij.
LUK 19:44 Kixkikamisaj iwonoje y kakiwulij ri tinamit chaꞌ na jinta juna ja katakꞌiꞌ kanoq. Kikꞌulumaj kꞌu waꞌ ma na xiwetaꞌmaj taj jampa xkꞌun ri Kolobꞌenel iwukꞌ» xchaꞌ.
LUK 19:45 Echiriꞌ xok ri Jesús pa ri Rocho Dios, xujeq lo kesaxik konoje ri kekꞌayinik y ri keloqꞌow chupa.
LUK 19:46 Y jewaꞌ xubꞌiꞌij chike: «Ri Dios jewaꞌ kubꞌiꞌij chupa Ruchꞌaꞌtem: Ri Wocho e luwar re oración kachaꞌ. Noꞌj ralaq ꞌanom alaq che ri Wocho e jun luwar ke eleqꞌomabꞌ» xchaꞌ.
LUK 19:47 Y ronoje qꞌij kakꞌutun ri Jesús pa ri Rocho Dios; noꞌj ri nimaq e aj chakunel, raj kꞌutunel re ri tzijpixabꞌ y raj wach re ri tinamit lik kakitzukuj suꞌanik kakikamisaj ri Jesús.
LUK 19:48 Pero na kakiriq taj suꞌanik, ma konoje ri winaq lik kakaj kakita ri kubꞌiꞌij Rire.
LUK 20:1 Kꞌo jun qꞌij ri Jesús kakꞌutun pa ri Rocho Dios, kutzijoj ri Utzilaj Tzij chike ri winaq. Xebꞌopon kꞌu ri nimaq e aj chakunel re ri Rocho Dios junam kukꞌ raj kꞌutunel re ri tzijpixabꞌ y ri nimaq winaq re ri tinamit,
LUK 20:2 y xkitzꞌonoj che: —Bꞌiꞌij la chiqe: ¿China xyaꞌw paqꞌabꞌ la kaꞌan taq la waꞌ? ¿China xtaqaw la che kaꞌan taq la waꞌ? —xechaꞌ.
LUK 20:3 Y ri Jesús xukꞌul uwach: —Riꞌin kanꞌan jun tzꞌonobꞌal che alaq; kꞌulu kꞌu alaq uwach.
LUK 20:4 ¿China xtaqaw re ri Juan kuya ri bautismo? ¿E ri Dios o e rachijabꞌ? —xchaꞌ.
LUK 20:5 Ekꞌu rike xkijeq kechꞌaꞌt chikiwach puwi waꞌ: «We xqakꞌul uwach che: “E ri Dios”, riꞌ kubꞌiꞌij rire chiqe: “¿Suꞌchak kꞌu riꞌ na xkoj ta alaq ri xubꞌiꞌij?” kacha chiqe.
LUK 20:6 Yey we xqabꞌiꞌij “e rachijabꞌ”, konoje riꞌ ri tinamit kojkikamisaj paꞌbꞌaj; ma rike lik kijikibꞌam uwach ri Juan e jun qꞌalajisanel re ri Dios» xecha chikiwach.
LUK 20:7 Xkibꞌiꞌij kꞌu che ri Jesús: —Na qetaꞌam taj —xechaꞌ.
LUK 20:8 Ekꞌu ri Jesús xubꞌiꞌij chike: —Jekꞌuriꞌlaꞌ, riꞌin na kambꞌiꞌij ta che alaq china yaꞌyom panuqꞌabꞌ kanꞌan taq waꞌ —xchaꞌ.
LUK 20:9 Ekꞌuchiriꞌ, ri Jesús xujeq utzijoxik wa kꞌambꞌal naꞌoj chike ri winaq: «Kꞌo jun achi xuꞌan tikoꞌn re uva chwach ri rulew. Tekꞌuchiriꞌ, xuya kan pa tunulik chike jujun aj chakibꞌ. Xeꞌek kꞌu riꞌ y ukꞌiyal qꞌij xsachiꞌik.
LUK 20:10 »Echiriꞌ xopon ruqꞌijol ri molonik, xutaq lo jun raj chak chaꞌ kuꞌtzꞌonoj chike raj tunulel ri taqalik kukꞌul rire che ri molonik. Noꞌj raj tunulel xkichꞌayo y xkitaq bꞌi; e riꞌ na jinta xkiya bꞌi che.
LUK 20:11 »Ekꞌu ri rajaw xutaq lo jun chik raj chak. Noꞌj raj tunulel xkiꞌan kꞌax che jelaꞌ pachaꞌ xkiꞌan che ri nabꞌe; xkichꞌayo, lik xkikꞌixbꞌesaj y xkitaq bꞌi. Yey na jinta xkiya bꞌi che.
LUK 20:12 »Y ri rajaw xutaq lo rurox aj chak. Pero raj tunulel lik xkiꞌan kꞌax che y xkesaj bꞌi chupa waꞌ wuꞌlew.
LUK 20:13 »Ekꞌuchiriꞌ, ri rajaw xubꞌiꞌij chiribꞌil ribꞌ: “¿Saꞌ ri kanꞌan woꞌora? Kantaq bꞌi ri nukꞌajol lik kꞌax kannaꞌo; ma kꞌaxtaj we xkil uwach rire, kakikꞌul na chi utz.”
LUK 20:14 »Noꞌj raj tunulel echiriꞌ xkil uwach rukꞌajol rachi, xechꞌaꞌt chikiwach, jewaꞌ xkibꞌiꞌij: “Waꞌ e ukꞌajol ri rajaw rulew, ri kuꞌana na rajaw we xkam ruqaw. Joꞌ jeꞌqakamisaj chaꞌ rulew kuꞌan kan qeꞌoj” xechaꞌ.
LUK 20:15 »Xkesaj kꞌu bꞌi rukꞌajol rachi chupa waꞌ wuꞌlew y xkikamisaj» xcha ri Jesús. Tekꞌuchiriꞌ xutzꞌonoj chike ri winaq: —Chiwach ralaq, ¿saꞌ nawi kuꞌan ri rajaw ri tikoꞌn chike raj tunulel?
LUK 20:16 Riꞌin kambꞌiꞌij: Kakꞌunik, kusach kiwach wa aj tunulel y kuya ri rulew pa tunulik chike jujun chik —xchaꞌ. Ekꞌuchiriꞌ xkita waꞌ ri winaq, xkibꞌiꞌij: —¡Muꞌan ne ko riꞌ waꞌ ri Dios chiqe! —xechaꞌ.
LUK 20:17 Pero ri Jesús lik xutzutzaꞌ kiwach y jewaꞌ xubꞌiꞌij chike: —¿Saꞌ kꞌu ri kabꞌiꞌij alaq che wa tzꞌibꞌital kan chupa Rutzij Upixabꞌ ri Dios? Ma jewaꞌ kubꞌiꞌij: E rabꞌaj kꞌaqital kan kuma raj yakal ja, e abꞌaj waꞌ lik xajawaxik chaꞌ katikiꞌ lo ri ja kachaꞌ.
LUK 20:18 China kꞌu ri katzaq puwi laꞌ laꞌbꞌaj, lik kꞌax ri kukꞌulumaj; yey we rabꞌaj katzaq puwi junoq, riꞌ xa jumul kusach uwach —xchaꞌ.
LUK 20:19 Ekꞌuchiriꞌ, ri nimaq e aj chakunel pa Rocho Dios kukꞌ raj kꞌutunel re ri tzijpixabꞌ lik xkitzukuj suꞌanik asu kakichap bꞌi ri Jesús, ma xkimaj usukꞌ chikij rike xubꞌiꞌij wi wa kꞌambꞌal naꞌoj; noꞌj na xkiꞌan taj ruma ri kixiꞌin ibꞌ chikiwach ri winaq.
LUK 20:20 Ekꞌu raj wach lik kikꞌakꞌalem ri Jesús y xekitaq bꞌi achijabꞌ kiꞌanom che kibꞌ pachaꞌ lik e jusukꞌ, chaꞌ kakikꞌam upa ri Jesús rukꞌ taq ri kubꞌiꞌij y jelaꞌ kakikoj umak y kakiya kꞌu puqꞌabꞌ ri taqanel re ri gobierno romano.
LUK 20:21 Xkitzꞌonoj kꞌu che ri Jesús: —Lal tijonel, riꞌoj qetaꞌam lik usukꞌ ronoje ri kabꞌiꞌij la y ri kakꞌut la, yey rilal lik lal jusukꞌ kukꞌ konoje ri tikawex. Paqatzij wi e kakꞌut la ri bꞌe re ri Dios.
LUK 20:22 ¿Usukꞌ nawi ri kaqaꞌan tojonik che ri nimalaj taqanel re Roma o na usukꞌ taj? —xechaꞌ.
LUK 20:23 Noꞌj ri Jesús, ruma retaꞌam ri retzelal kikꞌuꞌx, jewaꞌ xubꞌiꞌij chike: —¿Suꞌchak kakꞌam alaq nupa?
LUK 20:24 Kꞌutu pe alaq chwe juna meyo re kaꞌan tojonik rukꞌ. ¿China re wa kꞌaxwach y china re wa bꞌiꞌaj kꞌo chwach wa meyo? —xchaꞌ. Rike xkikꞌul uwach: —Re ri nimalaj taqanel re Roma —xechaꞌ.
LUK 20:25 Xubꞌiꞌij kꞌu ri Jesús chike: —Yaꞌa alaq che ri nimalaj taqanel re Roma janipa ri taqal che rire; yey yaꞌa kꞌu alaq che ri Dios janipa ri taqal che ri Dios —xchaꞌ.
LUK 20:26 Ekꞌu ri kikꞌakꞌalem ri Jesús na xkiriq ta juna chꞌaꞌtem xubꞌiꞌij chike ri winaq chirij ri gobierno. E ne lik xkam kanimaꞌ che ri kꞌulubꞌal uwach xuyaꞌo y na jinta chi kꞌu xkibꞌiꞌij che.
LUK 20:27 Xekꞌun kꞌu rukꞌ ri Jesús jujun chike ri saduceos, ri kakibꞌiꞌij na jinta kꞌastajibꞌal chike ri ekaminaq. Xkitzꞌonoj kꞌu che:
LUK 20:28 —Lal tijonel, ri Moisés xutzꞌibꞌaj kan chiqe: “We ri ratz junoq kakamik y na e jinta kan ralkꞌoꞌal rukꞌ ri rixoqil, ekꞌu riꞌ ruchaqꞌ kakꞌuliꞌ rukꞌ rixoq malkaꞌn kanoq y jekꞌulaꞌ kekꞌojiꞌ ralkꞌoꞌal rukꞌ, pubꞌiꞌ ri ratz xkamik”.
LUK 20:29 »Julaj e kꞌo wuqubꞌ achijabꞌ kichaqꞌ kibꞌ. Ri nabꞌe chike xkꞌuliꞌik, yey ekꞌu riꞌ waꞌ xkamik y na e jinta kan ralkꞌoꞌal rukꞌ ri rixoqil.
LUK 20:30 Jelaꞌ kꞌu riꞌ rukaꞌm xkꞌuliꞌ rukꞌ rixoq malkaꞌn kanoq. Ekꞌu riꞌ waꞌ xkamik y na e jinta kan ralkꞌoꞌal rukꞌ rixoq.
LUK 20:31 Yey je tanchi laꞌ xukꞌulumaj rurox. Jekꞌulaꞌ xkikꞌulumaj ri wuqubꞌ achijabꞌ; xekamik, e riꞌ na jinta kalkꞌoꞌal xkiya kanoq.
LUK 20:32 Kꞌisbꞌal kꞌu re, e xkam rixoq.
LUK 20:33 Chupa kꞌu ruqꞌijol ri kꞌastajibꞌal, ¿chinoq chike ri wuqubꞌ achijabꞌ kuꞌana rachijil rixoq? Ma konoje xekꞌuliꞌ rukꞌ —xechaꞌ.
LUK 20:34 Y ri Jesús xukꞌul uwach: —Wara che ruwachulew ri tikawex kꞌo kixoqilal y kꞌo kachijilal yey kakiya ri kalkꞌoꞌal pa kꞌulanikil.
LUK 20:35 Noꞌj ri kayaꞌtaj chike kekꞌastajik y kꞌo kikꞌaslemal na jinta utaqexik chilaꞌ chikaj, rike na jinta chi kixoqilal, na jinta chi kachijilal y na jinta chi ne kꞌo kuya ralkꞌoꞌal pa kꞌulanikil.
LUK 20:36 Ma chilaꞌ chikaj na jinta chi kamik chike, kebꞌuꞌana kꞌu pachaꞌ ri ángeles. Yey e ralkꞌoꞌal ri Dios; e uwariꞌche yaꞌtal chike kekꞌastaj chikixoꞌl ri ekaminaq.
LUK 20:37 Yey puwi kꞌu ri kꞌastajibꞌal ke ri ekaminaq, kꞌuna pe chikꞌuꞌx alaq ri xutzꞌibꞌaj kan ri Moisés puwi ri xubꞌiꞌij ri Dios che echiriꞌ xchꞌaꞌt rukꞌ chupa ri jumokaj xulukej, jewaꞌ xubꞌiꞌij ri Dios che: “In ri Dios re ri Abraham, re ri Isaac y re ri Jacob” xchaꞌ. Chiriꞌ kꞌu riꞌ xuqꞌalajisaj ri Moisés kꞌo kꞌastajibꞌal,
LUK 20:38 ma ri Dios na e ta Dios ke ri ekaminaq ma e Dios ke ri e kꞌaslik. Ma konoje ri e ralkꞌoꞌal ri Dios, tobꞌ ekaminaq chik, e kꞌas chwach ri Dios —xchaꞌ.
LUK 20:39 Ekꞌuchiriꞌ jujun chike raj kꞌutunel re ri tzijpixabꞌ, jewaꞌ xkibꞌiꞌij che ri Jesús: —Lal tijonel, lik utz ri xbꞌiꞌij la —xechaꞌ.
LUK 20:40 Y ri Saduceos na jinta chi kꞌo xkitzꞌonoj che ruma xkinaꞌ kibꞌ chwach.
LUK 20:41 Ekꞌuchiriꞌ ri Jesús xubꞌiꞌij: «¿Suꞌbꞌe kabꞌiꞌx che ri Cristo e “Ralkꞌoꞌal kan ri rey David”?
LUK 20:42 Ma ri David jewaꞌ xutzꞌibꞌaj kan chupa ri libro re Salmos:
LUK 20:43 Ri Dios Qajawxel xubꞌiꞌij che ri Wajawal: “Chat-tzꞌula pa nuwikiqꞌabꞌ, y chawoyeꞌej na ri qꞌij echiriꞌ kebꞌenuya ri tzel kebꞌilow awe chuxeꞌ rawaqan” xchaꞌ.
LUK 20:44 Ekꞌu ri David kubꞌiꞌij “Wajawal” che Ruchaꞌoꞌn lo ri Dios. ¿Suꞌbꞌe kꞌu riꞌ kabꞌiꞌxik e Ralkꞌoꞌal kan ri rey David?» xchaꞌ.
LUK 20:45 Chikiwach kꞌu ri winaq ketaw re, ri Jesús xubꞌiꞌij chike rutijoꞌn:
LUK 20:46 «Lik chichajij iwibꞌ; miꞌan kꞌu iweꞌix pachaꞌ ri kakiꞌan raj kꞌutunel re ri tzijpixabꞌ. Ma rike lik kukꞌul kikꞌuꞌx ri kejurur chupa ri kiqꞌuꞌ chaꞌ kilitajik lik kꞌo kiwach. Lik kukꞌul kikꞌuꞌx ri kayaꞌ rutzil kiwach pa kebꞌilitaj wi. Yey pa taq sinagogas y pa taq waꞌim e lik kukꞌul kikꞌuꞌx ri ketzꞌuyiꞌ chupa ri tzꞌulibꞌal ke ri lik kꞌo kiwach.
LUK 20:47 Rike kakimaj ri kocho kikꞌolibꞌal rixoqibꞌ e malkaꞌnibꞌ; yey chaꞌ na kaqꞌalajin ta ri na utz taj kakiꞌano, kakiwererej unimal chꞌabꞌal echiriꞌ kakiꞌan orar. Ruma kꞌu wa kakiꞌano, lik unimal kꞌaxkꞌolil kakikꞌul na echiriꞌ kaqꞌat tzij pakiwiꞌ» xchaꞌ.
LUK 21:1 Ri Jesús xebꞌutzuꞌ pan ri bꞌeyomabꞌ echiriꞌ kakiya ri kiqasaꞌn chupa ri kaxa re qasaꞌn pa ri Rocho Dios.
LUK 21:2 Y xril kꞌu jun ixoq malkaꞌn lik nibꞌaꞌ echiriꞌ xuya chupa ri kaxa kaꞌibꞌ raltaq ko meyo lik na kꞌi ta rajil.
LUK 21:3 Ekꞌu ri Jesús xubꞌiꞌij: —Paqatzij wi kambꞌiꞌij chiwe, chwach ri Dios wa jun ixoq nibꞌaꞌ y malkaꞌn e ne xuya más chwa ri xkiya konoje.
LUK 21:4 Ma konoje xa e xkiya ruwiꞌ ri kipuaq; noꞌj wiꞌxoq tobꞌ lik nibꞌaꞌ e xuya ronoje ri puaq kꞌo rukꞌ, waꞌ e re kuloqꞌ ri lik kajawax che —xcha ri Jesús.
LUK 21:5 Chiriꞌ kꞌu riꞌ e kꞌo jujun kechꞌaꞌt chwi ri Rocho Dios, kakibꞌiꞌij lik chom uꞌanom rukꞌ taq ri chomilaj abꞌaj y rukꞌ taq ri chomilaj wiqibꞌal yaꞌtal kuma ri tikawex. Ekꞌu ri Jesús xubꞌiꞌij chike:
LUK 21:6 —Kakꞌun kꞌu ri qꞌij echiriꞌ ronoje wa kitzutzaꞌ, kawulixik; jekꞌulaꞌ, na kakanaj ta chi juna abꞌaj puwiꞌ jun chik —xchaꞌ.
LUK 21:7 Tekꞌuchiriꞌ xkitzꞌonoj che ri Jesús, jewaꞌ xkibꞌiꞌij: —Qajawal, ¿jampa nawi kuꞌana taq riꞌ waꞌ? ¿Yey saꞌ ri kꞌutubꞌal kilitajik echiriꞌ kuꞌanaꞌ? —xechaꞌ.
LUK 21:8 Ri Jesús xubꞌiꞌij kꞌu chike: —Lik chichajij iwibꞌ chaꞌ na kixsokotaj taj; ma e kꞌi ri kekꞌunik y xa kakichiqꞌimaj uwach ri nubꞌiꞌ, jewaꞌ kakibꞌiꞌij: “In ri Cristo, Ruchaꞌoꞌn lo ri Dios, yey lik xa naqaj chi kꞌo wi lo ruqꞌijol ri nutaqanik,” kechaꞌ. Noꞌj riꞌix mixterej bꞌi chikij.
LUK 21:9 Y echiriꞌ kito kꞌo chꞌaꞌoj y ketukuk ri winaq che ruwachulew, mixiꞌij iwibꞌ che. Ma lik chirajawaxik nabꞌe na kuꞌana na ronoje waꞌ, noꞌj kꞌamajaꞌ ne riꞌ ri kꞌisbꞌal re ruwachulew —xchaꞌ.
LUK 21:10 Xubꞌiꞌij kꞌu chike: «Ekꞌo tinamit keyaktaj chikij jujun chik tinamit y e kꞌo taqanelabꞌ keyaktaj chikij jujun chik taqanelabꞌ.
LUK 21:11 Kuꞌan nimaq taq kabꞌraqan. Che ukꞌiyal luwar che ruwachulew kape numik y yabꞌil pakiwi ri tikawex. Yey che ruwa kaj kilitaj nimaq taq kꞌutubꞌal xibꞌibꞌal uwach.
LUK 21:12 »Pero chwach taq kꞌu riꞌ waꞌ, riꞌix kitij na kꞌax ruma ikojom ri nubꞌiꞌ, kixchapik y kixternabꞌex rukꞌ kꞌax, kixyaꞌ pakiqꞌabꞌ raj wach re ri sinagogas chaꞌ rike kakiqꞌat tzij piwiꞌ y kixkꞌam bꞌi pa cárcel, kixkꞌam bꞌi chikiwach ri reyes y chikiwach ri taqanelabꞌ.
LUK 21:13 Jekꞌuriꞌlaꞌ, utz kiqꞌalajisaj ri Utzilaj Tzij chikiwach.
LUK 21:14 Mixok il che saꞌ rukꞌulik uwach kiꞌano echiriꞌ kitoꞌ iwibꞌ chikiwach rike;
LUK 21:15 ma e riꞌin kinyaꞌw ichꞌaꞌtem yey inaꞌoj chaꞌ konoje ri tzel kebꞌilow iwe na kakiriq ta chi ukꞌulik uwach chiwe.
LUK 21:16 »Yey kixyaꞌ ne pa qꞌatbꞌal tzij kuma richu-iqaw, kuma taq riwatz-ichaqꞌ, kuma taq ri kꞌo chux chiwe y kuma ri iwamigos. Y jujun chiwe keyaꞌ pa kamik.
LUK 21:17 Lik kꞌu tzel kixil kuma taq ri winaq ruma ikojom ri nubꞌiꞌ.
LUK 21:18 Na rukꞌ ta kꞌu riꞌ, mubꞌisoj ikꞌuꞌx ma ix kꞌo puqꞌabꞌ ri Dios y na jinta ne tobꞌ xa juna iwiꞌ kasachik.
LUK 21:19 Ma we kichꞌij uchuqꞌabꞌ ronoje, kikꞌul na ri kolobꞌetajik y ri kꞌaslemal na jinta utaqexik.
LUK 21:20 »Echiriꞌ kiwil ri soldados kakijeq kakisut rij ri tinamit Jerusalem, chiwetaꞌmaj kꞌut e riꞌ kopon ri qꞌij kawulix ri tinamit.
LUK 21:21 Ekꞌu ri winaq e kꞌo pa ri luwar re Judea, chebꞌanimaj ubꞌi chwa taq juyubꞌ; y ri e kꞌo chupa ri tinamit Jerusalem chebꞌelubꞌi; yey ri e kꞌo pa juyubꞌ, mebꞌok chi lo Jerusalem,
LUK 21:22 ma waꞌ e uqꞌijol qꞌatbꞌal tzij, echiriꞌ kuꞌanaꞌ janipa ri tzꞌibꞌital chupa Rutzij Upixabꞌ ri Dios puwi waꞌ.
LUK 21:23 Chupa taq kꞌu laꞌ la qꞌij, lik toqꞌoꞌ kiwach ri e yewaꞌ ixoqibꞌ y ri ketzꞌumtisanik, ma lik saꞌch ri nimaq kꞌaxkꞌobꞌik kape che ruwachulew ruma ri royowal ri Dios chikij waꞌ wa tinamit.
LUK 21:24 »Lik e kꞌi ri kekamisax rukꞌ espada y e kꞌi kekꞌam bꞌi chi presoyil pa jujun chik tinamit che ronoje ruwachulew. Yey ri tinamit Jerusalem kakꞌojiꞌ kꞌu pakiqꞌabꞌ ri na e ta aj Israel chaꞌ ketaqan puwiꞌ, kꞌa pa kopon wi ruqꞌijol ubꞌiꞌim chi ri Dios.
LUK 21:25 »Chwa kꞌu riꞌ ri kaj kilitaj kꞌutubꞌal che ri qꞌij, che ri ikꞌ y che taq ri chꞌumil; yey taq ri winaq che ruwachulew kasach kinaꞌoj y kakijeq kakixiꞌij kibꞌ che ri nimalaj uchꞌawibꞌal ri mar y che ri yaꞌ lik kel chikaj chwi ri mar.
LUK 21:26 Keqꞌocholaj taq ri winaq, keꞌek ri kinaꞌoj y ketzaq pulew ruma xiꞌin ibꞌ che ri kꞌaxkꞌobꞌik kape che ruwachulew; ma e taq ri kꞌo kichuqꞌabꞌ che ruwa kaj keyikiyoꞌxik.
LUK 21:27 Kꞌa tekꞌuchiriꞌ kilitaj Ralaxel Chikixoꞌl Tikawex kakꞌun lo pa sutzꞌ rukꞌ ruchuqꞌabꞌ y rukꞌ runimal uchomalil.
LUK 21:28 Ekꞌuchiriꞌ kujeq kilitaj wa kꞌutubꞌal, lik chichuqꞌubꞌej iwibꞌ che royꞌexik ri ikolobꞌetajik chwa ri kꞌaxkꞌobꞌik» xcha ri Jesús.
LUK 21:29 Ri Jesús xutzijoj kꞌu wa jun kꞌambꞌal naꞌoj chike: «Chiwilape ri cheꞌ re higo y ronoje taq ri cheꞌ.
LUK 21:30 Echiriꞌ kiwilo ketuxik, iwetaꞌam xa naqaj chi kꞌo wi lo ruqꞌijol echiriꞌ kabꞌukbꞌutik y na jinta jabꞌ.
LUK 21:31 Jekꞌulaꞌ echiriꞌ kiwilo kuꞌana ronoje taq waꞌ, chiwetaꞌmaj xa naqaj chi kꞌo wi lo ruqꞌijol echiriꞌ ri Dios kataqan puwi ronoje.
LUK 21:32 Paqatzij wi kambꞌiꞌij chiwe: E kꞌo tikawex re waꞌ wa qꞌij na kekam tana we na xkil tubꞌi ronoje waꞌ.
LUK 21:33 Ruwa kaj y ruwachulew xa kasach uwach, noꞌj ri nuchꞌaꞌtem na kasach ta uwach.
LUK 21:34 »Lik chichajij iwibꞌ chaꞌ na kiya ta iwibꞌ che taq ri rayinik re ri mak, che ri qꞌabꞌarik y che rubꞌis ikꞌuꞌx re ruwachulew, ma kꞌaxtaj kakꞌun lo ruqꞌijol Ralaxel Chikixoꞌl Tikawex echiriꞌ na iwoyeꞌem taj.
LUK 21:35 Ma rukꞌunibꞌal Rire chikiwach ri e kꞌo che ruwachulew, xaqikꞌateꞌt kuꞌanaꞌ, jelaꞌ pachaꞌ echiriꞌ juna awaj xaqikꞌateꞌt katzaq pa laso re kachapik.
LUK 21:36 »Mawar kꞌu iwach, xaqi e chixchꞌaꞌt rukꞌ ri Dios chaꞌ kꞌo ichuqꞌabꞌ chwa wa katajin loq y jelaꞌ taqal chiwe kixkolobꞌetaj chwach ronoje waꞌ, y na kixkꞌix ta kꞌu riꞌ kixtakꞌiꞌ chwach Ralaxel Chikixoꞌl Tikawex echiriꞌ kakꞌun loq» xchaꞌ.
LUK 21:37 Ekꞌu riꞌ ri Jesús e taq ri paqꞌij kakꞌutun pa ri Rocho Dios yey e taq ri chaqꞌabꞌ kel bꞌi keꞌkꞌola chwa ri juyubꞌ Olivos.
LUK 21:38 Y konoje ri winaq anim tan kebꞌopon chupa ri Rocho Dios chaꞌ keꞌkita ruchꞌaꞌtem ri Jesús.
LUK 22:1 Xa naqaj chi kꞌo wi lo ri nimaqꞌij echiriꞌ katij ri pam na jinta levadura che.
LUK 22:2 Y ri nimaq e aj chakunel pa Rocho Dios kukꞌ taq raj kꞌutunel re ri tzijpixabꞌ lik ketajin che utzukuxik suꞌanik kakiya ri Jesús pa kamik, pero kakixiꞌij kibꞌ kakiꞌan chiwachil kuma rukꞌiyal winaq eteran chirij.
LUK 22:3 Ekꞌu ri Judas aj Iscariot, jun chike ri kabꞌlajuj utijoꞌn ri Jesús, xuya luwar che ri Satanás xok pa ranimaꞌ.
LUK 22:4 Xeꞌek kꞌu kukꞌ ri nimaq e aj chakunel pa Rocho Dios y kukꞌ ri e aj wach ke ri e chajinel re ri Rocho Dios chaꞌ kachꞌaꞌt kukꞌ puwiꞌ suꞌanik kuya ri Jesús pakiqꞌabꞌ.
LUK 22:5 Rike lik xekiꞌkot che y xkibꞌiꞌtisij meyo che ri Judas we kuꞌan waꞌ.
LUK 22:6 Ekꞌu rire xuya uchiꞌ che y xujeq kꞌu utzukuxik suꞌanik kuya ri Jesús pakiqꞌabꞌ xa xeꞌlaqꞌay chaꞌ na kakinaꞌbꞌej ta ri winaq.
LUK 22:7 Xopon kꞌu ri nimaqꞌij echiriꞌ katij ri pam na jinta levadura che. Chupa kꞌu waꞌ wa qꞌij chirajawaxik kekamisax taq ri qꞌapoj bꞌexex re Pascua.
LUK 22:8 Ekꞌu ri Jesús xebꞌutaq bꞌi ri Pedro y ri Juan, jewaꞌ xubꞌiꞌij bꞌi chike: —Jix, jiꞌyijbꞌaꞌ ri cena re Pascua chaꞌ jelaꞌ kaqatijo —xchaꞌ.
LUK 22:9 Y rike xkitzꞌonoj che: —¿Pa kaꞌaj wi la keꞌqayijbꞌaꞌ wi? —xechaꞌ.
LUK 22:10 Y ri Jesús xubꞌiꞌij chike: —Chitapeꞌ: Echiriꞌ kixok chupa ri tinamit, kikꞌul jun achi rukꞌaꞌam jun kuraꞌ yaꞌ. Chixterej bꞌi chirij kꞌa chuchiꞌ ri ja pa kok wubꞌi
LUK 22:11 y chibꞌiꞌij kꞌu che rachi rajaw ja: “Jewaꞌ kubꞌiꞌij ri tijonel qeꞌoj: ¿Pachawi kꞌo wi ri luwar pa kantij wi ri cena re Pascua kukꞌ ri nutijoꞌn?” kixcha che.
LUK 22:12 Ekꞌu ri kuꞌan ri rajaw ja e kukꞌut chiwe jun nimalaj luwar chikaj pa ri kaleꞌ ja, waꞌ yijbꞌital chik. Chiriꞌ kꞌu riꞌ chiyijbꞌaꞌ ri cena re Pascua —xcha ri Jesús chike.
LUK 22:13 Xebꞌek kꞌu rutijoꞌn y xeꞌkiriqaꞌ jelaꞌ pachaꞌ ri xubꞌiꞌij bꞌi ri Jesús chike. Y xkiyijbꞌaꞌ kꞌu ri cena re Pascua.
LUK 22:14 Ekꞌuchiriꞌ xopon ruꞌorayil ri cena, ri Jesús junam kukꞌ rutaqoꞌn xebꞌok chwa ri mexa.
LUK 22:15 Y ri Jesús xubꞌiꞌij chike: —¡Lik nurayim lo utijik junam iwukꞌ wa cena re Pascua chwach pan ri kꞌaxkꞌobꞌik kanwikꞌowibꞌej!
LUK 22:16 Ma kambꞌiꞌij kꞌu chiwe na kantij ta chi kꞌu juna chik cena re Pascua iwukꞌ, kꞌate na echiriꞌ kopon ri qꞌij kuꞌana na janipa ri bꞌiꞌtisim loq puwi rutaqanik ri Dios —xchaꞌ.
LUK 22:17 Tekꞌuchiriꞌ, xukꞌam ri kꞌolibꞌal kꞌo vino chupa y xutioxij che ri Dios. Xubꞌiꞌij kꞌu chike rutijoꞌn: —Chikꞌama waꞌ y chitija iwe chuchiꞌ waꞌ wa kꞌolibꞌal.
LUK 22:18 Ma kambꞌiꞌij chiwe: Na kantij ta chi ruwaꞌal uva kꞌate na echiriꞌ katikiꞌ rutaqanik ri Dios —xchaꞌ.
LUK 22:19 Tekꞌuchiriꞌ, xukꞌam ri pam y xutioxij che ri Dios. Xuwechꞌo y xujach chike, jekꞌuwaꞌ xubꞌiꞌij: —E nucuerpo waꞌ, ri kayaꞌiꞌ pa kamik iwuma riꞌix. Ekꞌuchiriꞌ kiꞌan taq waꞌ chiqawach apanoq, chiꞌanaꞌ kuxtabꞌal we riꞌin —xchaꞌ.
LUK 22:20 Kꞌisbꞌal kꞌu re ri cena, xukꞌam tanchi ri kꞌolibꞌal kꞌo vino chupa y jewaꞌ xubꞌiꞌij: —Waꞌ ri riꞌ e ri kꞌakꞌ tzij kajikibꞌax uwach rukꞌ ri nukikꞌel katuruw iwuma riꞌix re kuybꞌal imak.
LUK 22:21 Yey ekꞌu ri kakꞌayin weꞌin, kꞌo wukꞌ junam chwa wa mexa.
LUK 22:22 Ekꞌu Ralaxel Chikixoꞌl Tikawex e karikꞌowibꞌej janipa ri ubꞌiꞌim lo ri Dios puwi Rire. Pero ¡lik kꞌu toqꞌoꞌ uwach rachi kakꞌayin re! —xchaꞌ.
LUK 22:23 Ekꞌuchiriꞌ xkijeq rutijoꞌn kakitzꞌonobꞌej chikiwach china nawi chike kaꞌanaw waꞌ.
LUK 22:24 Rutijoꞌn ri Jesús kakichapalaꞌ kibꞌ chikiwach puwiꞌ chinoq chike más kꞌo uwach.
LUK 22:25 Noꞌj ri Jesús xubꞌiꞌij chike: «Ri reyes ke ri nimaq tinamit lik kikꞌow uwiꞌ ri kitaqanik kakiꞌan pakiwi ri winaq. Na rukꞌ ta kꞌu riꞌ, kakibꞌiꞌij che kibꞌ: “E toꞌbꞌel ke ri tinamit.”
LUK 22:26 »Noꞌj riꞌix miꞌan iwe pachaꞌ ri kakiꞌan rike. China ri lik kꞌo uwach chixoꞌl, e chuꞌana pachaꞌ na jinta uwach; yey ri kꞌo puqꞌabꞌ kataqanik, e chuyaꞌa ribꞌ kuꞌan nimanel.
LUK 22:27 »Chikiwach ri winaq, ¿china kꞌu ri más kꞌo uwach, e ri katzꞌuyiꞌ chwa ri mexa o e raj chak kaniman chwa ri mexa? ¿Na e ta nebꞌa ri katzꞌuyiꞌ chwa ri mexa? Noꞌj riꞌin in kꞌo chiwach riꞌix pachaꞌ raj chak kanimanik.
LUK 22:28 Yey riꞌix ix kꞌojiꞌnaq wukꞌ che ri kꞌaxkꞌobꞌik in ikꞌowinaq wi.
LUK 22:29 »Kambꞌiꞌij kꞌu chiwe: Pachaꞌ ri Nuqaw uyaꞌom panuqꞌabꞌ riꞌin kintaqanik, jekꞌulaꞌ kanꞌan riꞌin chiwe riꞌix, kanya piqꞌabꞌ kixtaqanik
LUK 22:30 chaꞌ jelaꞌ kixwaꞌ chwa ri numexa chupa ri nutaqanik y kixtzꞌuyiꞌ kꞌut re kixtaqan pakiwi ri kabꞌlajuj tinamit re Israel» xchaꞌ.
LUK 22:31 Ekꞌu ri Qanimajawal xubꞌiꞌij: —¡Simón, Simón, chatapeꞌ! E ri Satanás utzꞌonom che ri Dios chaꞌ kayaꞌtaj che kukꞌam ipa riꞌix. Kixuyikiyaꞌ kꞌu riꞌ jelaꞌ pachaꞌ kaꞌan che ri trigo echiriꞌ kapuꞌ uwach.
LUK 22:32 Noꞌj riꞌin lik nutzꞌonom che ri Dios pawiꞌ riꞌat, chaꞌ na kasach ta ri kubꞌulibꞌal akꞌuꞌx wukꞌ. Ekꞌu riꞌ riꞌat, echiriꞌ kakubꞌiꞌ tanchi akꞌuꞌx wukꞌ, e chanimarisaj kikꞌuꞌx taq rawachbꞌiꞌil —xchaꞌ.
LUK 22:33 Y ri Simón xubꞌiꞌij che: —Wajawal, riꞌin nuyaꞌom wanimaꞌ kinterej chiꞌij la, tobꞌ keꞌek la pa cárcel; yey we xyaꞌ ne la pa kamik, riꞌin kinkam junam ukꞌ la —xchaꞌ.
LUK 22:34 Ekꞌu ri Jesús xukꞌul uwach: —Pedro, paqatzij wi kambꞌiꞌij chawe: Waqꞌabꞌ echiriꞌ kꞌamajaꞌ ne kabꞌixon ri teren, riꞌat oxlaj chik abꞌiꞌim na awetaꞌam ta nuwach —xchaꞌ.
LUK 22:35 Y chike rutijoꞌn xubꞌiꞌij: —Echiriꞌ xixintaq bꞌi che utzijoxik ri Utzilaj Tzij, ximbꞌiꞌij chiwe na kikꞌam tubꞌi ukꞌolibꞌal imeyo, na kikꞌam tubꞌi itebꞌ, na kikꞌam tubꞌi jun chik molaꞌj ixajabꞌ, ¿kꞌo nebꞌa xajawax chiwe? —xcha chike. Y rike xkikꞌul uwach: —Na jintaj —xechaꞌ.
LUK 22:36 Ekꞌuchiriꞌ, xubꞌiꞌij chike: —Noꞌj woꞌora, china ri kꞌo ukꞌolibꞌal umeyo, chukꞌama bꞌi; china ri kꞌo utebꞌ, chukꞌama bꞌi; y china ri na jinta espada rukꞌ, chukꞌayij ruqꞌuꞌ re pisbꞌal rij y chuloqꞌo juna espada.
LUK 22:37 Ma kambꞌiꞌij kꞌu chiwe lik chirajawaxik wi e kuꞌana na wa tzꞌibꞌital kan panuwi riꞌin chupa Ruchꞌaꞌtem ri Dios: Xꞌan che pachaꞌ juna aj palajiy tzij kachaꞌ. Ekꞌu janipa ri tzꞌibꞌital kan panuwi riꞌin, e lik kuꞌana na —xchaꞌ.
LUK 22:38 Ekꞌuchiriꞌ, xkibꞌiꞌij rike che ri Jesús: —Qajawal, riꞌ kebꞌ espada kꞌo qukꞌ —xechaꞌ. Noꞌj rire xubꞌiꞌij chike: —¡Kuꞌan na laꞌ! Mixchꞌaꞌt chi puwi waꞌ —xchaꞌ.
LUK 22:39 Tekꞌuchiriꞌ, xel bꞌi ri Jesús. Xeꞌek chwa ri juyubꞌ Olivos, y rutijoꞌn xeterej bꞌi chirij.
LUK 22:40 Echiriꞌ xebꞌopon chilaꞌ, jewaꞌ xubꞌiꞌij chike: —Lik chitzꞌonoj che ri Dios chaꞌ kichꞌij uchuqꞌabꞌ ri kꞌambꞌal ipa kapetik —xchaꞌ.
LUK 22:41 Ekꞌuchiriꞌ, rire xbꞌin chi pan jubꞌiqꞌ más chikiwach, xuxukubꞌaꞌ ribꞌ y xujeq kachꞌaꞌt rukꞌ ri Dios,
LUK 22:42 jewaꞌ kubꞌiꞌij: «Lal Nuqaw, we utz chiwach la, chinkolobꞌej ko la chaꞌ na kinikꞌow ta chupa waꞌ wa kꞌaxkꞌobꞌik. Noꞌj na e ta kꞌu chuꞌana ri kuaj riꞌin, ma e chuꞌana janipa ri rajawal kꞌuꞌx Rilal» xchaꞌ.
LUK 22:43 Ekꞌuchiriꞌ, xwinaqir jun ángel re chikaj chwach re koluꞌyaꞌa unimal uchuqꞌabꞌ.
LUK 22:44 Y chupa kꞌu riꞌ runimal ukꞌaxkꞌolil, ri Jesús xujeq kuꞌan orar rukꞌ unimal uchuqꞌabꞌ. Ruma kꞌu laꞌ xujeqo nimaq tꞌobꞌaꞌj kikꞌ rukꞌatan katzaq chwa rulew.
LUK 22:45 Echiriꞌ xukꞌis kuꞌan orar, xyaktajik, xtzelej lo pa e kꞌo wi kan rutijoꞌn y xebꞌoꞌluꞌriqaꞌ kewarik ruma ri bꞌis okinaq chikikꞌuꞌx.
LUK 22:46 Xubꞌiꞌij kꞌu chike: —¿Suꞌbꞌe kixwarik? Chixyaktajoq y chitzꞌonoj che ri Dios chaꞌ jelaꞌ kichꞌij uchuqꞌabꞌ ri kꞌambꞌal ipa kapetik —xchaꞌ.
LUK 22:47 Kꞌa kachꞌaꞌt ne ri Jesús, echiriꞌ xebꞌopon ukꞌiyal winaq lik kewoqoqik. Yey ri Judas, jun chike ri kabꞌlajuj utijoꞌn ri Jesús, nabꞌe bꞌi chikiwach rukꞌiyal winaq. Rire xqibꞌ rukꞌ ri Jesús chaꞌ kutzꞌubꞌ uchiꞌ.
LUK 22:48 Ekꞌu ri Jesús xubꞌiꞌij che: —Judas, ¿e laꞌ rukꞌ jun tzꞌubꞌuj chiꞌaj kakꞌayij Ralaxel Chikixoꞌl Tikawex? —xchaꞌ.
LUK 22:49 Ri e kꞌo rukꞌ ri Jesús, echiriꞌ xkilo saꞌ ri katajinik, xkitzꞌonoj che: —Qajawal, ¿utz nawi kojchꞌoꞌjin rukꞌ espada? —xechaꞌ.
LUK 22:50 Ekꞌuchiriꞌ, jun chike rutijoꞌn xujochij bꞌi ruxikin uwikiqꞌabꞌ ri raj chak ri kajawal raj chakunel pa Rocho Dios.
LUK 22:51 Pero ri Jesús xubꞌiꞌij chike: —¡Miꞌan chi waꞌ! —xchaꞌ. Xuchap kꞌu ruxikin raj chak y xukunaj.
LUK 22:52 Tekꞌuchiriꞌ, xubꞌiꞌij chike ri e petinaq che uchapik bꞌi, waꞌ e ri nimaq e aj chakunel pa Rocho Dios, ri e aj wach ke ri e chajinel re ri Rocho Dios y ri nimaq winaq re ri tinamit: —¿Suꞌchak petinaq alaq rukꞌ espada y cheꞌ? ¿Petinaq kami alaq che ukꞌamik bꞌi juna eleqꞌom?
LUK 22:53 Ronoje qꞌij waꞌ kꞌut in kꞌo ukꞌ alaq pa ri Rocho Dios. ¿Suꞌchak kꞌu riꞌ kꞌa e laꞌ kinoꞌlchapa alaq? Noꞌj ekꞌu waꞌ xopon ri ora yaꞌtal che alaq echiriꞌ ri rajaw ri qꞌequꞌm kukꞌut ruchuqꞌabꞌ —xchaꞌ.
LUK 22:54 Xkichap kꞌu bꞌi ri Jesús y xkikꞌam bꞌi chirocho ri kajawal raj chakunel pa Rocho Dios. Y ri Pedro chinimanaj teran pan chirij.
LUK 22:55 E kꞌo kꞌu jujun xkinukꞌ aqꞌ che ruwa ja, y xetzꞌuyiꞌ chuchiꞌ ri aqꞌ. Yey ri Pedro xtzꞌuyiꞌ chikixoꞌl.
LUK 22:56 Kꞌo kꞌu jun ali aj chak xril ri Pedro tzꞌul chuchiꞌ ri aqꞌ. Rali lik xutzutzaꞌ uwach y jewaꞌ xubꞌiꞌij: —Waꞌ waꞌchi e jun chike ri eteran chirij ri Jesús —xchaꞌ.
LUK 22:57 Noꞌj ri Pedro jewaꞌ xubꞌiꞌij che: —Ali, riꞌin na wetaꞌam ta uwach —xchaꞌ.
LUK 22:58 Joqꞌotaj kꞌu riꞌ kꞌo jun achi xrilo y jewaꞌ xubꞌiꞌij che: —Rilal lal jun chike rutijoꞌn ri Jesús —xchaꞌ. Noꞌj ri Pedro xubꞌiꞌij che rachi: —Riꞌin na in ta jun chike rutijoꞌn —xchaꞌ.
LUK 22:59 Laj pa jun ora kꞌu riꞌ kꞌo tanchi jun jewaꞌ xubꞌiꞌij: —Paqatzij wi waꞌ waꞌchi e jun chike rutijoꞌn ri Jesús, ma aj Galilea —xchaꞌ.
LUK 22:60 Noꞌj ri Pedro xubꞌiꞌij che: —Achi, riꞌin na wetaꞌam tane saꞌ puwiꞌ kachꞌaꞌt la —xchaꞌ. Kꞌa kachꞌaꞌt ne ri Pedro echiriꞌ xbꞌixon lo ri teren.
LUK 22:61 Ekꞌuchiriꞌ, ri Qanimajawal xtzuꞌn lo chirij y e xutzuꞌ lo uwach ri Pedro. Ekꞌu ri Pedro xkꞌun chukꞌuꞌx saꞌ rubꞌiꞌim kan ri Qanimajawal che: «Kꞌamajaꞌ ne kabꞌixon ri teren, riꞌat oxlaj chik abꞌiꞌim na awetaꞌam ta nuwach.»
LUK 22:62 Ewi ri Pedro xel bꞌi chiriꞌ y lik xoqꞌik ruma rukꞌaxkꞌolil ukꞌuꞌx.
LUK 22:63 Rachijabꞌ echajiyom re ri Jesús lik kakichꞌamij y lik kakichꞌayo.
LUK 22:64 Kakichꞌuq ruwach y kakitzꞌonoj che: —¡Chanaꞌij peꞌ china xchꞌayaw awe! —kechaꞌ.
LUK 22:65 Lik qabꞌichi ri kakibꞌiꞌij che rukꞌ kꞌaxlaj chꞌaꞌtem.
LUK 22:66 Echiriꞌ xsaqirik, xkimol kibꞌ ri nimaq winaq re ri tinamit, ri nimaq e aj chakunel pa Rocho Dios kukꞌ raj kꞌutunel re ri tzijpixabꞌ; waꞌ e taq ri uchapom wi ribꞌ ri qꞌatbꞌal tzij. Rike xkitaq ukꞌamik ri Jesús chikiwach y jewaꞌ xkibꞌiꞌij che:
LUK 22:67 —Chabꞌiꞌij chiqe we at ri Cristo, Ruchaꞌoꞌn lo ri Dios —xechaꞌ. Y ri Jesús xubꞌiꞌij chike: —Tobꞌ kambꞌiꞌij che alaq “In”, na kakoj ta alaq.
LUK 22:68 Yey we kanꞌan tzꞌonobꞌal che alaq, na kakꞌul ta alaq uwach y na kintzoqopij tane ubꞌi alaq.
LUK 22:69 Pero Ralaxel Chikixoꞌl Tikawex katzꞌuyiꞌ na kꞌu puwikiqꞌabꞌ ri Dios, ri lik kꞌo unimal uchuqꞌabꞌ —xchaꞌ.
LUK 22:70 Tekꞌuchiriꞌ, konoje xkitzꞌonoj che ri Jesús: —¿At peꞌ riꞌ Rukꞌajol ri Dios? —xecha che. Y ri Jesús xukꞌul uwach: —E ralaq xbꞌiꞌn alaq re, e riꞌin —xchaꞌ.
LUK 22:71 Ekꞌuchiriꞌ, xkibꞌiꞌij rike: —Na jinta chi uchak más e aj kojol umak, ma lik oj xojtaw re ri xubꞌiꞌij rukꞌ ruwa reꞌ —xechaꞌ.
LUK 23:1 Ekꞌuchiriꞌ, xeyaktaj konoje ri kimolom kibꞌ y xkikꞌam bꞌi ri Jesús chwach ri Pilato.
LUK 23:2 Y xkijeq kꞌu kakitzꞌaq uchiꞌ, jewaꞌ kakibꞌiꞌij: —Qariqom wa jun achi kusachisaj kinaꞌoj ri qatinamit, kebꞌuqꞌatej ri winaq chaꞌ na kakiꞌan ta ri tojonik kaꞌan che ri nimalaj taqanel re Roma y kubꞌiꞌij e rire ri Cristo, ri chaꞌtal lo ruma ri Dios re kataqan pakiwi raj judiꞌabꞌ —kechaꞌ.
LUK 23:3 Xutzꞌonoj kꞌu ri Pilato che ri Jesús: —¿Lal kami riꞌ ri rey ke raj judiꞌabꞌ? —xchaꞌ. Y ri Jesús xubꞌiꞌij che: —Lal kabꞌiꞌn la re —xchaꞌ.
LUK 23:4 Ri Pilato xubꞌiꞌij kꞌu chike ri nimaq e aj chakunel pa Rocho Dios y chike konoje ri winaq: —Chinuwach riꞌin, wa jun achi na jinta umak —xchaꞌ.
LUK 23:5 Pero ri winaq más ko kesikꞌinik, jewaꞌ kakibꞌiꞌij: —Rukꞌ ri kukꞌutu lik katajin usachik kinaꞌoj ri tikawex chupa taq ri luwar re Judea; xujeq lo waꞌ Galilea y woꞌora jelaꞌ kuꞌan wara Jerusalem —kechaꞌ.
LUK 23:6 Echiriꞌ ri Pilato xuto petinaq ri Jesús Galilea, xutzꞌonobꞌej we rire aj chilaꞌ.
LUK 23:7 Y echiriꞌ xretaꞌmaj aj Galilea ri Jesús, xutaq bꞌi chwach ri Herodes, ma rire e rey re chilaꞌ, yey laꞌ laꞌ qꞌij wi kꞌo ri Herodes chiriꞌ Jerusalem.
LUK 23:8 Ekꞌuchiriꞌ ri Herodes xril uwach ri Jesús, lik xkiꞌkotik, ma lik kꞌo tan qꞌij riꞌ urayim karil uwach. Ma saꞌch taq ri utom che yey royeꞌem karil uwach chaꞌ ri Jesús kuꞌan juna kꞌutubꞌal re ruchuqꞌabꞌ chwach.
LUK 23:9 Y xujeq kꞌu uꞌanik ukꞌiyal tzꞌonobꞌal che, pero ri Jesús na kukꞌul ta uwach.
LUK 23:10 Ekꞌu ri nimaq e aj chakunel pa Rocho Dios kukꞌ raj kꞌutunel re ri tzijpixabꞌ, lik kesikꞌin che ukojik umak ri Jesús.
LUK 23:11 Ewi ri Herodes kukꞌ rusoldados lik xkikꞌaq bꞌi uqꞌij ri Jesús; xkiꞌan che pachaꞌ juna rey, xkikoj bꞌi jun chomilaj kꞌul che re chꞌamibꞌal re. Tekꞌuchiriꞌ, xtaqan che kakꞌam tanchi ubꞌi chwach ri Pilato.
LUK 23:12 Chupa laꞌ la jun qꞌij ri Pilato y ri Herodes xkijeq kechꞌaw tanchi chikiwach, ma e ri petinaq loq lik tzel kakil kibꞌ.
LUK 23:13 Ekꞌu ri Pilato xumol kichiꞌ ri nimaq e aj chakunel pa Rocho Dios kukꞌ raj wach re ri tinamit yey taq ri winaq,
LUK 23:14 y jekꞌuwaꞌ xubꞌiꞌij chike: —Kꞌamom lo alaq wa jun achi chinuwach y kabꞌiꞌij alaq rire katajin che usachik kinaꞌoj ri winaq re ri tinamit. Noꞌj riꞌin xinꞌan tzꞌonobꞌal che y xinta uchiꞌ chiwach alaq, yey na jinta juna mak nuriqom chirij pachaꞌ ri mak kakoj alaq che.
LUK 23:15 Y jenelaꞌ ri rey Herodes, na jinta juna mak xuriq che; ma xintaq bꞌi chwach, yey rire xutaq tanchi lo wukꞌ. Qꞌalaj kꞌu riꞌ na jinta mak uꞌanom re taqal che kakamisaxik.
LUK 23:16 E uwariꞌche xew kanya pa kꞌax; tekꞌuchiriꞌ kanyolopij bꞌi —xchaꞌ.
LUK 23:17 (Xubꞌiꞌij waꞌ ma ronoje junabꞌ chupa ri nimaqꞌij Pascua, ri Pilato xex kuꞌan wi kuyolopij bꞌi jun preso chikiwach ri winaq.)
LUK 23:18 Noꞌj konoje rukꞌiyal winaq junam lik ko xesikꞌin che ubꞌiꞌxikil: —¡E taqa bꞌi la ri Jesús pa kamik yey yolopij bꞌi la ri Barrabás! —xechaꞌ.
LUK 23:19 (Waꞌchi Barrabás yaꞌom pa cárcel ruma utitzꞌitikil uꞌanom Jerusalem chirij ri gobierno romano y ruma jun kamik xuꞌano.)
LUK 23:20 Ri Pilato xchꞌaꞌt tanchi kukꞌ ri winaq, ma rire e karaj kuyolopij bꞌi ri Jesús.
LUK 23:21 Noꞌj ri winaq xesikꞌin tanchi che ubꞌiꞌxikil: —¡Kamisax chwa cruz! ¡Kamisax chwa cruz! —kechaꞌ.
LUK 23:22 Churox laj kꞌu riꞌ ri Pilato jewaꞌ xubꞌiꞌij: —¿Saꞌ kꞌu rumak waꞌchi uꞌanom? Ma riꞌin na jinta juna mak nuriqom chirij re taqal che kakamisaxik. Kanya na pa kꞌax, tekꞌuchiriꞌ kanyolopij bꞌi —xchaꞌ.
LUK 23:23 Noꞌj ri winaq na kakitanabꞌaꞌ taj lik ko kesikꞌin che utzꞌonoxik kakamisax ri Jesús chwa cruz. Kꞌisbꞌal kꞌu re, xyaꞌtaj na chike ri kakaj.
LUK 23:24 Ewi ri Pilato xutaq uꞌanik ri kakitzꞌonoj:
LUK 23:25 xuyolopij kꞌu bꞌi ri jun yaꞌom pa cárcel ruma utitzꞌitikil uꞌanom chirij ri gobierno romano y ruma jun kamik xuꞌano, ma e xkitzꞌonoj riꞌ ri winaq. Y xuya luwar kakamisax ri Jesús, jelaꞌ pachaꞌ ri kakaj rike.
LUK 23:26 Ekꞌuchiriꞌ, ri soldados xkikꞌam bꞌi ri Jesús re keꞌkikamisaj chwa ri cruz. Echiriꞌ kꞌo chi bꞌe, xkichap bꞌi jun achi aj Cirene, Simón rubꞌiꞌ, petinaq pa juyubꞌ e riꞌ kikꞌow chiriꞌ. Y xkiya bꞌi ri cruz chwi utelebꞌ chaꞌ kutelej bꞌi chirij ri Jesús.
LUK 23:27 Y lik ukꞌiyal winaq eteran bꞌi. Y e kꞌo ixoqibꞌ chikixoꞌl lik ketunanik y kakoqꞌej ri Jesús, ma lik kꞌax unaꞌom kikꞌuꞌx ruma ri kaꞌan che.
LUK 23:28 Noꞌj ri Jesús xebꞌutzuꞌ pan rixoqibꞌ kebꞌoqꞌik y jewaꞌ xubꞌiꞌij chike: —Ixoqibꞌ ix aj Jerusalem, miniwoqꞌej riꞌin; e chiwoqꞌej ri katajin lo piwi riꞌix y pakiwiꞌ ri iwalkꞌoꞌal.
LUK 23:29 ¡Chitapeꞌ! Kopon na ri qꞌij echiriꞌ kabꞌiꞌxik: “Nim kiqꞌij kalaxik rixoqibꞌ na kebꞌalan taj kukꞌ ri na jinta kalkꞌoꞌal y ri na ketzꞌumtisan taj” jelaꞌ kabꞌiꞌxik.
LUK 23:30 Ruma kꞌu riꞌ ri unimal kꞌaxkꞌobꞌik e kꞌo wi, ri winaq kakaj kekamik y jekꞌuwaꞌ kakibꞌiꞌij che taq ri juyubꞌ nimaꞌq y chꞌutiꞌq: Chix-tzaqa lo paqawiꞌ re kichꞌuq qawiꞌ kechaꞌ.
LUK 23:31 Ma we kayaꞌ pa kamik junoq na jinta umak, ¿saꞌ kꞌu riꞌ ri kakikꞌulumaj ri lik kꞌo kimak? —xchaꞌ.
LUK 23:32 Yey ekꞌamom bꞌi junam rukꞌ ri Jesús kaꞌibꞌ eleqꞌomabꞌ chaꞌ kekamisax chwa cruz.
LUK 23:33 Echiriꞌ xebꞌopon pa ri luwar kabꞌiꞌx che “Luwar re Ubꞌaqil Ujolom Animaꞌ”, chiriꞌ xyaꞌ wi ri Jesús chwa ri cruz; y ri kaꞌibꞌ eleqꞌomabꞌ, jun xyaꞌ puwikiqꞌabꞌ y jun pumox Rire.
LUK 23:34 Ewi ri Jesús xubꞌiꞌij: —Nuqaw, kuyu la kimak, ma na kimajom ta usukꞌ saꞌ wa ketajin che uꞌanik —xchaꞌ. Ekꞌu ri soldados rukꞌ jun sorteo xkijach kibꞌ puwi ruqꞌuꞌ.
LUK 23:35 Y rukꞌiyal winaq xa kakitzutzaꞌ ri katajin uꞌanik. Yey ne raj wach re ri tinamit kakichꞌamij ri Jesús, jewaꞌ kakibꞌiꞌij: —Lik waꞌ kꞌut e kꞌi ri xebꞌukolobꞌej che taq yabꞌil y che kamik. We ta rire e ri Cristo, Ruchaꞌoꞌn lo ri Dios, chukolobꞌej ribꞌ riꞌ woꞌora, —kechaꞌ.
LUK 23:36 Jekꞌulaꞌ riꞌ xkiꞌan ri soldados, lik kakichꞌamij ri Jesús. Keqibꞌ rukꞌ y kakibꞌiꞌtisij vinagre che re kutijo,
LUK 23:37 y jewaꞌ kakibꞌiꞌij che: —We ta paqatzij wi at ri rey ke raj judiꞌabꞌ, chakolobꞌej kꞌu awibꞌ riꞌ —kechaꞌ.
LUK 23:38 Chwi kꞌu lo ri cruz re ri Jesús, pa ri chꞌaꞌtem griego, pa ri chꞌaꞌtem latín y pa ri chꞌaꞌtem hebreo tzꞌibꞌital waꞌ: «WAꞌ E REY KE RAJ JUDIꞌABꞌ.»
LUK 23:39 Y jun chike ri kaꞌibꞌ eleqꞌomabꞌ eyaꞌom chwa cruz, lik kuchꞌamij ri Jesús, jewaꞌ kubꞌiꞌij: —¿Na at ta nebꞌa ri Cristo, Ruchaꞌoꞌn lo ri Dios? Chakolobꞌej kꞌu awibꞌ riꞌ junam qukꞌ riꞌoj —kachaꞌ.
LUK 23:40 Noꞌj ri jun chik eleqꞌom xuyajo, jewaꞌ xubꞌiꞌij che ri rachbꞌiꞌil: —Riꞌat na kaxiꞌij ta kꞌana awibꞌ chwach ri Dios, yey junam oj kꞌo pa wa kꞌaxkꞌobꞌik qꞌatom paqawiꞌ.
LUK 23:41 Riꞌat y riꞌin paqatzij wi, taqal chiqe kaqakꞌulumaj waꞌ, ma e tojbꞌal re ri na utz taj qaꞌanom. Noꞌj waꞌchi na jinta umak —xchaꞌ.
LUK 23:42 Ekꞌuchiriꞌ, xubꞌiꞌij che ri Jesús: —Wajawal, chinkꞌuna ko chikꞌuꞌx la echiriꞌ koꞌltaqana la —xchaꞌ.
LUK 23:43 Y ri Jesús xubꞌiꞌij che: —Paqatzij wi kambꞌiꞌij chawe: Waqꞌij ne riꞌ katopon wukꞌ chilaꞌ chupa ri chomilaj luwar pa e kꞌo wi ri e kolobꞌetajinaq —xchaꞌ.
LUK 23:44 Echiriꞌ xtikꞌoj ri qꞌij, xok qꞌequꞌm che ruwachulew y waꞌ xuꞌkꞌisa kꞌa che ri urox ora bꞌenaq qꞌij;
LUK 23:45 oxibꞌ ora na xwon ta ri qꞌij. Yey chupa kꞌu ri Rocho Dios, ri telón xrichꞌrobꞌ lo chunikꞌajal.
LUK 23:46 Ekꞌuchiriꞌ, ri Jesús lik ko xchꞌawik, jewaꞌ xubꞌiꞌij: —Nuqaw, paqꞌabꞌ la kanqꞌatisaj wi ri wanimaꞌ —xchaꞌ. Xew xubꞌiꞌij waꞌ, asu xkamik.
LUK 23:47 Ri capitán ke ri soldados echiriꞌ xrilo saꞌ ri xuꞌano, xuyak uqꞌij ri Dios, jewaꞌ xubꞌiꞌij: —Paqatzij wi waꞌchi lik jusukꞌ y na jinta umak —xchaꞌ.
LUK 23:48 Ekꞌu rukꞌiyal winaq echiriꞌ xkilo saꞌ ri xuꞌano, xebꞌel chiriꞌ, kakitꞌiqitꞌaꞌ ruwa kikꞌuꞌx ruma kixiꞌin ibꞌ.
LUK 23:49 Yey kꞌu ri lik xketaꞌmaj uwach ri Jesús kukꞌ taq rixoqibꞌ e petinaq rukꞌ chwi xel lo Galilea, rike xekꞌojiꞌ pana chinimanaj y xkil ronoje ri xuꞌano.
LUK 23:50 Kꞌo kꞌu jun achi José rubꞌiꞌ, aj Arimatea, jun tinamit re Judea. Rire e jun chike ri uchapom wi ribꞌ ri qꞌatbꞌal tzij, jun achi lik utz ukꞌuꞌx y lik jusukꞌ rubꞌinik usilabꞌik.
LUK 23:51 Yey lik royeꞌem rukꞌunibꞌal rutaqanik ri Dios. Ekꞌu rire lik na xukꞌul ta ukꞌuꞌx ri xkiꞌan ri rachbꞌiꞌil.
LUK 23:52 Xopon kꞌu chwach ri Pilato y xuꞌtzꞌonoj che kayaꞌ luwar che kumuq rucuerpo ri Jesús. Y xyaꞌ luwar che.
LUK 23:53 Xeꞌek kꞌut y xuꞌqasaj lo rucuerpo chwa ri cruz. Xupis kꞌu chupa jun manta. Tekꞌuchiriꞌ, xuꞌyaꞌa pa jun muqubꞌal kꞌotom paꞌbꞌaj, yey waꞌ na jinta junoq muqum chupa.
LUK 23:54 Ekꞌu bꞌenaq qꞌij riꞌ echiriꞌ raj judiꞌabꞌ kakiyijbꞌaꞌ pan janipa ri kajawax chike pa ri qꞌij re uxlanibꞌal, y waꞌ ya kopon ru orayil.
LUK 23:55 Yey rixoqibꞌ e petinaq lo Galilea rukꞌ ri Jesús, xeterej bꞌi chirij ri José y xkil ri muqubꞌal pa xkiya wi kan rucuerpo ri Jesús.
LUK 23:56 Echiriꞌ xetzelej loq, xkijeqelaꞌ uyijbꞌaxik kunabꞌal lik kiꞌ ruxlabꞌ chaꞌ keꞌkikojo che rucuerpo ri Jesús. Ekꞌuchiriꞌ xok ri qꞌij re uxlanibꞌal, xebꞌuxlan kꞌut pachaꞌ ri kubꞌiꞌij Rutzij Upixabꞌ ri Dios.
LUK 24:1 Ri nabꞌe qꞌij re ri semana lik anim tan rixoqibꞌ e petinaq lo Galilea y jujun chik ixoqibꞌ, xebꞌek pa muqutal wi ri Jesús, yey kukꞌaꞌam bꞌi kunabꞌal lik kiꞌ ruxlabꞌ, ri kiyijbꞌam bꞌi.
LUK 24:2 Yey xeꞌkiriqa rabꞌaj esam chi chuchiꞌ ri muqubꞌal.
LUK 24:3 Xebꞌok kꞌu bꞌi chupa ri muqubꞌal, pero na xkiriq ta chi rucuerpo ri Qanimajawal Jesucristo.
LUK 24:4 Lik kꞌut bꞌenaq ri kinaꞌoj puwi waꞌ, echiriꞌ xaqikꞌateꞌt xewinaqir kaꞌibꞌ achijabꞌ chikiwach, lik kawolqꞌin ri kiqꞌuꞌ.
LUK 24:5 Rixoqibꞌ lik xkixiꞌij kibꞌ y xkiqasaj ri kipalaj pulew. Ekꞌu ri kaꞌibꞌ achijabꞌ xkibꞌiꞌij chike: —¿Suꞌchak kitzukuj chikixoꞌl ri ekaminaq ri Jun kꞌaslik?
LUK 24:6 Rire na jinta chi wara, ma kꞌastajinaq chi lo chikixoꞌl ri ekaminaq. Kꞌuna chikꞌuꞌx saꞌ rubꞌiꞌim lo chiwe echiriꞌ kꞌa kꞌo Galilea,
LUK 24:7 echiriꞌ xubꞌiꞌij: “Lik chirajawaxik wi Ralaxel Chikixoꞌl Tikawex kayaꞌ pakiqꞌabꞌ achijabꞌ aj makibꞌ chaꞌ kakamisax chwa cruz, noꞌj Rire kakꞌastaj lo churox qꞌij” —xechaꞌ.
LUK 24:8 Kꞌa ekꞌuchiriꞌ xkꞌun chikikꞌuꞌx rixoqibꞌ ruchꞌaꞌtem ri Jesús.
LUK 24:9 Echiriꞌ xetzelej lo chilaꞌ pa ri muqubꞌal, xkitzijoj ronoje waꞌ chike ri junlajuj taqoꞌn y chike konoje ri e kꞌo kukꞌ.
LUK 24:10 Ekꞌu ri xetzijon waꞌ e ri María ri aj Magdala, ri Juana, ri María uchu ri Santiago y jujun kachbꞌiꞌil.
LUK 24:11 Yey ri taqoꞌn na xkikoj ta ri xkitzijoj rixoqibꞌ, ma e chikiwach rike, wa ixoqibꞌ echꞌuꞌjerinaq.
LUK 24:12 Ekꞌu ri Pedro xyaktaj bꞌi y lik kanik xeꞌek pa kꞌo wi ri muqubꞌal re ri Jesús. Y echiriꞌ xochꞌin pan chupa, xrilo xew chi kꞌo kan ri jutaq rabꞌaꞌj kꞌul pa xbꞌolqꞌotix wi ri Jesús. Xeꞌek kꞌut lik kaminaq ranimaꞌ che ri xrilo y kutzꞌonoj chiribꞌil ribꞌ saꞌ nawi waꞌ.
LUK 24:13 Chupa laꞌ laꞌ qꞌij, kaꞌibꞌ chike rutijoꞌn kebꞌin chupa ri bꞌe re keꞌek pa raldea Emaús, waꞌ kꞌo lo pa once kilómetro che ri tinamit Jerusalem.
LUK 24:14 Xaloqꞌ kꞌu kebꞌin chupa ri bꞌe, rike kechꞌaꞌt chikiwach puwi ri kꞌakꞌ ikꞌowinaq.
LUK 24:15 Yey echiriꞌ kechꞌaꞌt chikiwach, ri Jesús xqibꞌ kukꞌ y xerachbꞌilaj bꞌi.
LUK 24:16 Pero rike pachaꞌ chꞌuqutal ri kiwach, ma tobꞌ xkilo na xketaꞌmaj ta uwach.
LUK 24:17 Ekꞌu ri Jesús xubꞌiꞌij chike: —¿Saꞌ puwiꞌ kachꞌaꞌt wi alaq chupa wa bꞌe? ¿Y suꞌchak kabꞌison alaq? —xchaꞌ.
LUK 24:18 Jun kꞌu chike, Cleofas rubꞌiꞌ, xukꞌul uwach, jewaꞌ xubꞌiꞌij: —Laj xew rilal chike konoje ri ebꞌinel e kꞌo Jerusalem na etaꞌam ta la saꞌ ri kꞌakꞌ ikꞌowinaq chupa taq waꞌ wa qꞌij —xchaꞌ.
LUK 24:19 Xubꞌiꞌij kꞌu ri Jesús chike: —¿Saꞌ ri xuꞌano? —xchaꞌ. Ewi xkibꞌiꞌij che: —E kojchꞌaꞌt puwi ri xukꞌulumaj ri Jesús ri aj Nazaret, ri nimalaj qꞌalajisanel lik kꞌo uchuqꞌabꞌ che taq ri kuꞌano y ri kubꞌiꞌij; rire lik yakom uqꞌij ruma ri Dios y kuma taq ri tikawex re ri tinamit.
LUK 24:20 Yey ri nimaq e aj chakunel pa Rocho Dios kukꞌ raj wach re ri qatinamit xkiya puqꞌabꞌ ri taqanel romano chaꞌ kaqꞌat tzij puwiꞌ y kakamisax chwa cruz.
LUK 24:21 Chwi kꞌu rukamik e urox qꞌij waꞌ. Yey riꞌoj xkubꞌiꞌ qakꞌuꞌx e rire ri kukolobꞌej ri qatinamit Israel.
LUK 24:22 »Yey kisachisam ne qanaꞌoj jujun ixoqibꞌ ebꞌare jun chiqaxoꞌl riꞌoj oj utijoꞌn kan ri Jesús. Ma rike lik anim tan xebꞌopon chupa rumuqubꞌal,
LUK 24:23 pero na xkiriq ta chi rucuerpo ri Jesús. Xetzelej kꞌu lo qukꞌ, kakitzijoj chiqe xewinaqir jujun ángeles chikiwach, yey waꞌ xkibꞌiꞌij chike: “Rire kꞌastajinaq chi lo chikixoꞌl ri ekaminaq.”
LUK 24:24 Xebꞌek kꞌu jujun chiqe riꞌoj chupa rumuqubꞌal y e xkilo jelaꞌ pachaꞌ ri kibꞌiꞌim rixoqibꞌ chiqe. Noꞌj na xkil ta uwach ri Jesús —xechaꞌ.
LUK 24:25 Ekꞌu ri Jesús xubꞌiꞌij chike: —¡Toqꞌoꞌ wach alaq ma lik na kamaj ta alaq usukꞌ y kamayin alaq che ukojik janipa ri kibꞌiꞌim kan ri qꞌalajisanelabꞌ!
LUK 24:26 ¿Na chirajawaxik ta nebꞌa ri Cristo, Ruchaꞌoꞌn lo ri Dios, kutij na ronoje wa kꞌaxkꞌobꞌik y tekꞌuchiriꞌ keꞌek chilaꞌ chikaj pa kayak wi uqꞌij? —xchaꞌ.
LUK 24:27 Xuqꞌalajisaj kꞌu chike ronoje ri kubꞌiꞌij chupa Ruchꞌaꞌtem ri Dios chwi Rire, xujeq lo rukꞌ ri tzꞌibꞌital kan ruma ri Moisés yey tekꞌuchiriꞌ xuqꞌalajisaj janipa ri tzꞌibꞌital chwi Rire kuma konoje ri qꞌalajisanelabꞌ.
LUK 24:28 Ekꞌuchiriꞌ xebꞌopon chupa raldea pa kebꞌek wi ri kebꞌ achijabꞌ, ri Jesús xuꞌan pachaꞌ e riꞌ xumaj chubꞌi rubꞌe.
LUK 24:29 Pero rike lik xebꞌelaj che kakanaj kan kukꞌ, jewaꞌ xkibꞌiꞌij che: —Kanaj kan la qukꞌ, ma bꞌenaq chi ri qꞌij yey ya kok raqꞌabꞌ —xechaꞌ. Ri Jesús xok kꞌu bꞌi y xkanaj kan chiriꞌ kukꞌ.
LUK 24:30 Echiriꞌ e kꞌo chi chwa ri mexa, xukꞌam ri pam y xtioxin chwach ri Dios, xuwechꞌ kꞌu upa y xuya chike.
LUK 24:31 Kꞌa ekꞌuchiriꞌ xjaqataj ri kiwach y xketaꞌmaj uwach. Pero ri Jesús e laꞌ chikiwach xmalkaꞌnik.
LUK 24:32 Xkibꞌiꞌij kꞌu riꞌ chikiwach: —¿Na kamiqꞌmot ta nebꞌa qakꞌuꞌx che kiꞌkotemal echiriꞌ rire kachꞌaꞌt qukꞌ pa ri bꞌe y kuqꞌalajisaj chiqe Rutzij Upixabꞌ ri Dios? —xechaꞌ.
LUK 24:33 Na jampatana xeyaktajik y xetzelej Jerusalem. Chiriꞌ xebꞌoꞌlkiriqa ri junlajuj taqoꞌn kimolom kibꞌ kukꞌ ri kachbꞌiꞌil.
LUK 24:34 Y rike xkibꞌiꞌij chike wa kaꞌibꞌ: «¡Paqatzij wi kꞌastajinaq lo ri Qanimajawal Jesucristo ma xilitaj uwach ruma ri Simón!» kechaꞌ.
LUK 24:35 Yey la kaꞌibꞌ xkijeq utzijoxik saꞌ ri xkikꞌulumaj chupa ri bꞌe echiriꞌ xebꞌek Emaús y suꞌanik xketaꞌmaj uwach ri Jesús echiriꞌ xuwechꞌ upa ri pam.
LUK 24:36 Kꞌa ketajin ne che uchꞌaꞌtibꞌexik ri kilom y ri kitom, echiriꞌ ri Jesús xwinaqir chikiwach, xaqikꞌateꞌt xtakꞌiꞌ chikixoꞌl y jewaꞌ xubꞌiꞌij chike: —Kꞌola utzil chomal iwukꞌ —xchaꞌ.
LUK 24:37 Yey rike lik xkixiꞌij kibꞌ che, ma e chikiwach rike laj juna espíritu ri kakitzutzaꞌ uwach.
LUK 24:38 Noꞌj ri Jesús xubꞌiꞌij chike: —¿Suꞌchak kuxiꞌij ribꞌ ikꞌuꞌx y na kikoj taj we in kꞌaslik?
LUK 24:39 Chiwilape ri nuqꞌabꞌ y ri waqan; chichapape rukꞌ riqꞌabꞌ y jelaꞌ kiwil chi utz lik in ri in kꞌo iwukꞌ y na xa ta in juna espíritu, ma juna espíritu na jinta utiꞌjil y na jinta ubꞌaqil pachaꞌ ri kiwil chwe riꞌin —xchaꞌ.
LUK 24:40 Y ekꞌuchiriꞌ kubꞌiꞌij waꞌ, xukꞌut ruqꞌabꞌ y ri raqan chikiwach.
LUK 24:41 Ekꞌu rike lik kekiꞌkotik y kaminaq kanimaꞌ che yey na kakiriq taj suꞌanik kakikoj ri kakilo. Ekꞌuchiriꞌ, ri Jesús xubꞌiꞌij chike: —¿Saꞌ ri kꞌo iwukꞌ re katijik? —xchaꞌ.
LUK 24:42 Xkiya kꞌu che, juchꞌaqap kar bꞌolom y uwaꞌal kabꞌ kꞌa kꞌo pa cera.
LUK 24:43 Ewi Rire xukꞌamo y xutij chikiwach.
LUK 24:44 Ekꞌuchiriꞌ, xubꞌiꞌij chike: —E nubꞌiꞌim lo waꞌ chiwe echiriꞌ kꞌa in kꞌo iwukꞌ: Lik chirajawaxik wi kuꞌana na janipa ri tzꞌibꞌital kan panuwi riꞌin chupa ri Tzij Pixabꞌ re ri Moisés, chupa ri kitzꞌibꞌam kan ri qꞌalajisanelabꞌ y chupa taq ri Salmos —xchaꞌ.
LUK 24:45 Kꞌa tekꞌuchiriꞌ xujaq ri kinaꞌoj chaꞌ kakimaj usukꞌ chi utz Rutzij Upixabꞌ ri Dios.
LUK 24:46 Xubꞌiꞌij kꞌu chike: —Jewaꞌ ri tzꞌibꞌital kan pa Ruchꞌaꞌtem ri Dios: Lik chirajawaxik wi ri Cristo, Ruchaꞌoꞌn lo ri Dios, kutij kꞌax, kakamik y kakꞌastaj lo churox qꞌij;
LUK 24:47 y chupa kꞌu rubꞌiꞌ, katzijox ri Utzilaj Tzij re tzelebꞌal tzij y re kuybꞌal mak chike konoje rukꞌiyal kiwach taq ri tikawex e kꞌo che ruwachulew, yey kajeqer utzijoxik waꞌ Jerusalem.
LUK 24:48 Riꞌix kibꞌiꞌij kꞌu riꞌ chike ri winaq janipa taq wa xiwilo y xito.
LUK 24:49 Chitapeꞌ: Riꞌin kantaq lo piwi riꞌix ri Jun ubꞌiꞌtisim lo ri Nuqaw; pero chixkꞌola wara chupa wa tinamit Jerusalem chaꞌ kiwoyꞌej na kikꞌul wa chuqꞌabꞌ kape chilaꞌ chikaj —xchaꞌ.
LUK 24:50 Ekꞌuchiriꞌ, ri Jesús xebꞌukꞌam bꞌi rutijoꞌn y xebꞌek chunaqaj Betania. Xuyak kꞌu ruqꞌabꞌ pakiwiꞌ y xebꞌuꞌan bendecir.
LUK 24:51 Echiriꞌ katajin che uꞌanik waꞌ, xujeqo xel bꞌi chikixoꞌl y xkꞌam kꞌu bꞌi chilaꞌ chikaj.
LUK 24:52 Ewi rutijoꞌn lik xkiloqꞌnimaj uqꞌij ri Jesús. Tekꞌuchiriꞌ xetzelej chupa ri tinamit Jerusalem rukꞌ unimal kiꞌkotemal chupa ri kanimaꞌ.
LUK 24:53 Y xaqi e kꞌo chupa ri Rocho Dios, kebꞌixonik y kakiyak uqꞌij ri Dios. Amén.
JOH 1:1 Che ri jeqebꞌal lo re ruwachulew, xex chi kꞌo lo wi ri Tzij; ri Tzij xex chi kꞌo lo wi rukꞌ ri Dios yey ri Tzij e ri Dios.
JOH 1:2 Ekꞌu ri Jun kabꞌiꞌx “Ri Tzij” che, xex chi kꞌo lo wi rukꞌ ri Dios chwi echiriꞌ kꞌamajaꞌ ne kajeqer lo ruwachulew.
JOH 1:3 Ruma ne Rire, ri Dios xuꞌan ronoje ri kꞌo che ruwachulew. We tamaji Rire, na kuꞌan ta riꞌ ri Dios janipa ri kꞌolik.
JOH 1:4 Rukꞌ kꞌu Rire kꞌo wi ri kꞌaslemal, yey wa kꞌaslemal e Qꞌijsaq chike ri tikawex.
JOH 1:5 Ri Qꞌijsaq kawon chupa ri qꞌequꞌm, y ri qꞌequꞌm na kuchꞌij ta kꞌana uchupik.
JOH 1:6 Kꞌo jun achi Juan rubꞌiꞌ yey rire taqom lo ruma ri Dios.
JOH 1:7 Ri Juan xkꞌunik chaꞌ kuqꞌalajisaj ri Qꞌijsaq. Xoluꞌtzijoj kꞌu ri Qꞌijsaq chaꞌ jelaꞌ ri tikawex kakikoj ri Qꞌijsaq.
JOH 1:8 Ri Juan na e ta ri Qꞌijsaq, pero rire xkꞌunik re koꞌltzijon puwi ri Qꞌijsaq.
JOH 1:9 Ri saqil Qꞌijsaq kꞌuninaq che ruwachulew, e kaqꞌalajisan runaꞌoj ri Dios chikiwach taq ri tikawex.
JOH 1:10 Tobꞌ Rire e ꞌanayom re ronoje ri kꞌo che ruwachulew; echiriꞌ xkꞌun che ruwachulew, taq ri winaq na xketaꞌmaj ta uwach.
JOH 1:11 Rire xkꞌun kukꞌ rutinamit, pero rutinamit na xkikꞌul taj.
JOH 1:12 Konoje kꞌu riꞌ ri xkikꞌulu y xkikoj rubꞌiꞌ, xyaꞌtaj chike kebꞌuꞌan e ralkꞌoꞌal ri Dios.
JOH 1:13 Ekꞌu rike xebꞌuꞌan ralkꞌoꞌal ri Dios, na kuma ta ri kichu-kiqaw na ruma ta rayibꞌal ke tikawex, yey na ruma tane ri xraj juna achi; ma e ruma ri xraj ri Dios.
JOH 1:14 Ekꞌu wa Tzij xuꞌan achi, xjeqiꞌ kꞌu chiqaxoꞌl riꞌoj, y xqil runimal uchomalil. Y wa unimal uchomalil e ri xuya ri Dios che Rire ruma xew Ukꞌajol riꞌ, yey Rire lik kꞌo unimal rutzil kꞌuꞌxaj y saqil Qꞌijsaq rukꞌ.
JOH 1:15 Ri Juan xtzijon chwi Rire, jewaꞌ xubꞌiꞌij: «Puwi Rire nubꞌiꞌim chi lo waꞌ: E ri Jun katajin lo chwij, más kꞌo uwach chinuwa riꞌin ma Rire xex chi kꞌo lo wi echiriꞌ kꞌamajaꞌ kinalax riꞌin» xchaꞌ.
JOH 1:16 Che ronoje taq ri kꞌo puqꞌabꞌ, qakꞌamom ko qeꞌoj, ma ri unimal rutzil ukꞌuꞌx qukꞌ xaqi uleꞌom ribꞌ.
JOH 1:17 Ri Tzij Pixabꞌ xyaꞌ ruma ri Moisés; noꞌj ri unimal rutzil ukꞌuꞌx ri Dios y ri Qꞌijsaq e xqꞌalajin ruma ri Qanimajawal Jesucristo.
JOH 1:18 Na jinta junoq iliyom uwach ri Dios; pero riꞌoj xqetaꞌmaj uwach ruma ri Jun lik xa jun ukꞌuꞌx rukꞌ ri Dios, waꞌ e Rukꞌajol ri Dios, ri lik xew Ukꞌajol riꞌ.
JOH 1:19 E kꞌo jujun e aj judiꞌabꞌ re ri tinamit Jerusalem xekitaq lo raj chakunel re ri Rocho Dios y raj levitas rukꞌ, chaꞌ kakitzꞌonoj che ri Juan china rire. Yey ri kꞌulubꞌal uwach xuyaꞌo, lik qꞌalaj;
JOH 1:20 na jinta kꞌo xrewaj chike. Jekꞌuwaꞌ xuqꞌalajisaj chike: —Riꞌin na in ta Ruchaꞌoꞌn lo ri Dios —xchaꞌ.
JOH 1:21 Ekꞌuchiriꞌ, xkitzꞌonoj tanchi che: —¿Lal china kꞌu riꞌ? ¿Lal ri qꞌalajisanel Elías? —xechaꞌ. Y rire xubꞌiꞌij: —Na in taj —xchaꞌ. Xkitzꞌonoj kꞌu che: —¿Laj lal riꞌ ri jun qꞌalajisanel re ri Dios qoyeꞌem kakꞌunik? —xechaꞌ. Rire xukꞌul kꞌu uwach: —Na in taj —xchaꞌ.
JOH 1:22 Ekꞌuchiriꞌ, xkibꞌiꞌij tanchi che: —¿Lal china kꞌu riꞌ? Ma riꞌoj oj petinaq re kaqakꞌam bꞌi juna kꞌulubꞌal uwach chike ri xetaqaw lo qeꞌoj. Bꞌiꞌij la chiqe saꞌ ri wach la —xechaꞌ.
JOH 1:23 Y rire xukꞌul uwach: —Riꞌin in ri jun tzijonel kasikꞌin che ubꞌiꞌxikil chupa ri luwar katzꞌintzꞌotik: “Sukꞌupij alaq rubꞌe ri Qanimajawal” jelaꞌ pachaꞌ ri tzꞌibꞌital kan ruma ri qꞌalajisanel Isaías —xchaꞌ.
JOH 1:24 Ri etaqom loq re kebꞌoꞌlchꞌaꞌt rukꞌ ri Juan, e kukꞌil ri fariseos.
JOH 1:25 Xkitzꞌonoj kꞌu riꞌ che ri Juan: —¿Saꞌ kꞌu uchak riꞌ kaya la ri bautismo we na lal ta Ruchaꞌoꞌn lo ri Dios, na lal tane ri Elías yey na lal tane ri jun qꞌalajisanel re ri Dios qoyeꞌem kakꞌunik? —xechaꞌ.
JOH 1:26 Ri Juan xukꞌul uwach: —Riꞌin kanya ri bautismo rukꞌ yaꞌ, noꞌj chixoꞌl ralaq kꞌo Jun na etaꞌam ta alaq uwach.
JOH 1:27 Ekꞌu waꞌ wa Jun katajin lo chwij riꞌin, e ri Jun xex chi kꞌo lo wi echiriꞌ kꞌamajaꞌ kinalax riꞌin y na taqal tane chwe riꞌin kankir ruwach ruxajabꞌ —xchaꞌ.
JOH 1:28 Ronoje waꞌ xuꞌan pa ri luwar Betábara, chꞌaqa yaꞌ che ri nimayaꞌ Jordán, pa kuya wi bautismo ri Juan.
JOH 1:29 Chukaꞌm qꞌij kꞌut ri Juan xril pan ri Jesús e riꞌ katajin roponik rukꞌ y jewaꞌ xubꞌiꞌij: «Chiwilapeꞌ, waꞌ e ri Qꞌapoj Bꞌexex re ri Dios, ri kesan re ri kimak ri tikawex che ronoje ruwachulew.
JOH 1:30 Puwi rire xintzijon wi echiriꞌ ximbꞌiꞌij: “Chwij riꞌin katajin lo jun achi; rire más kꞌo uwach chinuwach riꞌin. Waꞌ xex chi kꞌo lo wi echiriꞌ kꞌamajaꞌ kinalax riꞌin.”
JOH 1:31 Ri petinaq loq na xinwetaꞌmaj taj china ri jun katajin loq; na rukꞌ ta kꞌu riꞌ, riꞌin xinkꞌunik re kanya ri bautismo rukꞌ yaꞌ, chaꞌ jelaꞌ ri tinamit Israel kaketaꞌmaj uwach rire» xchaꞌ.
JOH 1:32 Xubꞌiꞌij kꞌu ri Juan: «Riꞌin xinwil ri Ruxlabꞌixel ri Dios xqaj lo chikaj pachaꞌ juna palomax y xkꞌojiꞌ puwi rire.
JOH 1:33 Ekꞌu ri petinaq loq na xinwetaꞌmaj taj china ri jun katajin loq; pero ri xtaqaw lo we riꞌin chaꞌ kanya ri bautismo rukꞌ yaꞌ, jewaꞌ xubꞌiꞌij chwe: “Echiriꞌ kawil ri Santowilaj Ruxlabꞌixel ri Dios kaqaj loq y kakꞌojiꞌ puwi jun achi, e rire ri kuya ri bautismo rukꞌ ri Ruxlabꞌixel ri Dios.”
JOH 1:34 Ekꞌu riꞌin xinwilo y kanqꞌalajisaj kꞌu waꞌ: Paqatzij wi, rire e Ukꞌajol ri Dios» xchaꞌ.
JOH 1:35 Chukaꞌm qꞌij kꞌut, ri Juan kꞌo tanchi chiriꞌ junam kukꞌ kaꞌibꞌ chike rutijoꞌn rire.
JOH 1:36 Echiriꞌ xrilo xikꞌow ri Jesús, jewaꞌ xubꞌiꞌij: —Chiwilapeꞌ, waꞌ e ri Qꞌapoj Bꞌexex re ri Dios —xchaꞌ.
JOH 1:37 Echiriꞌ ri kaꞌibꞌ utijoꞌn ri Juan xkito xubꞌiꞌij waꞌ, xeterej bꞌi chirij ri Jesús.
JOH 1:38 Ekꞌuchiriꞌ ri Jesús xtzuꞌn chirij y xrilo eteran chirij, xubꞌiꞌij chike: —¿Saꞌ ri kitzukuj? —xchaꞌ. Rike xkibꞌiꞌij che: —Rabí (waꞌ keꞌelawi “lal tijonel”), ¿pachawi jeqel wi la? —xechaꞌ.
JOH 1:39 Ri Jesús xukꞌul uwach: —Chixpetoq, choꞌliwilaꞌ —xchaꞌ. Xebꞌek kꞌut, xkilo pa jeqel wi Rire y xekanaj kꞌu kan la jun bꞌenebꞌal qꞌij chiriꞌ rukꞌ, ma laj ukaj ora chik.
JOH 1:40 Ri Andrés ruchaqꞌ ri Simón Pedro, e jun chike ri kaꞌibꞌ xkita ri xubꞌiꞌij ri Juan y xeterej bꞌi chirij ri Jesús.
JOH 1:41 Ekꞌu ri Andrés nabꞌe na xuꞌtzukuj ri ratz Simón; y echiriꞌ xuriqo, jewaꞌ xubꞌiꞌij che: —Ya xqariq ri Mesías —xchaꞌ. (“Mesías” e keꞌelawi ri Cristo, Ruchaꞌoꞌn lo ri Dios.)
JOH 1:42 Xukꞌam kꞌu bꞌi ri Simón pa kꞌo wi ri Jesús. Ekꞌu ri Jesús echiriꞌ xril uwach, jewaꞌ xubꞌiꞌij che: —Riꞌat at Simón, rukꞌajol ri Jonás; pero woꞌora rabꞌiꞌ kankojo e Cefas (waꞌ keꞌeloq Pedro) —xchaꞌ.
JOH 1:43 Chukaꞌm qꞌij kꞌut, ri Jesús xraj xeꞌek pa ri luwar re Galilea. Xeꞌek kꞌut y xukꞌul jun achi Felipe rubꞌiꞌ y xubꞌiꞌij che: —Chat-tereja lo chwij —xchaꞌ.
JOH 1:44 Ri Felipe aj pa ri tinamit Betsaida, waꞌ e tinamit pa ejeqel wi ri Andrés y ri Pedro.
JOH 1:45 Ekꞌu ri Felipe xuꞌtzukuj ri Natanael y echiriꞌ xuriqo, jewaꞌ xubꞌiꞌij che: —Xqariq ri jun ri xtzꞌibꞌan ri Moisés puwiꞌ chupa ri Tzij Pixabꞌ, yey ri qꞌalajisanelabꞌ jenelaꞌ xetzꞌibꞌan puwiꞌ: Waꞌ e ri Jesús, rukꞌajol ri José ri aj Nazaret —xcha che.
JOH 1:46 Xubꞌiꞌij kꞌu ri Natanael: —¿Kꞌo nebꞌa utz kel lo chupa ri tinamit Nazaret? —xchaꞌ. Ri Felipe xukꞌul uwach: —Saꞌa, chawilapeꞌ —xchaꞌ.
JOH 1:47 Ri Jesús, echiriꞌ xrilo katajin roponik ri Natanael rukꞌ, jewaꞌ xubꞌiꞌij: —Wa jun achi katajin lo ukꞌunik, e jun saqil aj Israel y na jinta sokosoꞌnik rukꞌ —xchaꞌ.
JOH 1:48 Ekꞌu ri Natanael xutzꞌonoj che: —¿Chaꞌtaj etaꞌam la nuwach? —xchaꞌ. Ri Jesús xubꞌiꞌij che: —Riꞌin xinwil pan awach echiriꞌ kꞌamajaꞌ ne katusikꞌij ri Felipe, echiriꞌ at kꞌo chuxeꞌ ri jun cheꞌ re higo —xchaꞌ.
JOH 1:49 Xubꞌiꞌij kꞌu ri Natanael che: —Lal tijonel, rilal lal Ukꞌajol ri Dios y ri Rey ke raj Israel —xchaꞌ.
JOH 1:50 Ri Jesús xukꞌul uwach: —¿Kakoj kami riꞌ waꞌ xa ruma ximbꞌiꞌij chawe xatinwil pan chuxeꞌ ri jun cheꞌ re higo? Chiqawach apanoq, kawil ne kꞌutubꞌal más nimaꞌq chwa taq waꞌ —xchaꞌ.
JOH 1:51 Y xubꞌiꞌij ri Jesús: —Paqatzij wi kambꞌiꞌij chiwe: Wa chiqawach apanoq kiwil ne ruwa kaj jaqalik y kebꞌiwil ri ángeles re ri Dios kebꞌaqꞌanik y keqaj lo chwi Ralaxel Chikixoꞌl Tikawex —xchaꞌ.
JOH 2:1 Oxibꞌ qꞌij rikꞌowik waꞌ, xꞌan jun kꞌulanikil pa ri tinamit Caná re Galilea. Ruchu ri Jesús e jun chike ri e kꞌo chiriꞌ.
JOH 2:2 Ekꞌu ri Jesús, junam kukꞌ rutijoꞌn, xesikꞌix pa ri kꞌulanikil.
JOH 2:3 Yey kꞌamajaꞌ ne kakꞌis ri nimaqꞌij echiriꞌ xkꞌis ri vino. Ekꞌu ruchu ri Jesús xubꞌiꞌij che: —Xkꞌis ri vino ketajin che ujachik —xchaꞌ.
JOH 2:4 Ri Jesús xukꞌul uwach: —Tape la, ¿suꞌchak kabꞌiꞌij la waꞌ chwe riꞌin? Ma kꞌamajaꞌ kopon ri ora kanqꞌalajisaj nuwach —xchaꞌ.
JOH 2:5 Ekꞌu ruchu ri Jesús xubꞌiꞌij chike ri keniman chiriꞌ: —E ꞌana alaq ronoje ri kubꞌiꞌij rire che alaq —xchaꞌ.
JOH 2:6 Chiriꞌ kꞌu riꞌ kꞌo waqibꞌ tenaꞌx ꞌanatal rukꞌ abꞌaj, waꞌ kakꞌoliꞌ yaꞌ chupa re kijosqꞌikil raj judiꞌabꞌ chwach ri Dios. Chujujunal tenaꞌx, laj kok juna ochenta o juna cien litros yaꞌ chupa.
JOH 2:7 Ri Jesús xubꞌiꞌij chike ri keniman chiriꞌ: —Nojisaj alaq che yaꞌ taq wa tenaꞌx —xchaꞌ. Ekꞌu rike xkinojisaj chi utz.
JOH 2:8 Ekꞌuchiriꞌ, ri Jesús xubꞌiꞌij chike: —Woꞌora chesaj lo alaq jubꞌiqꞌ y kꞌama bꞌi alaq che ri aj wach re wa nimaqꞌij —xchaꞌ. Y rike jelaꞌ xkiꞌano.
JOH 2:9 Ekꞌu ri aj wach re ri nimaqꞌij xunaꞌ ri yaꞌ ꞌanom vino che, tobꞌ na retaꞌam ta nenareꞌ pa xpe wi. Xew ri keniman chiriꞌ ketaꞌam, ma e rike xebꞌesan lo ri yaꞌ. Ekꞌu ri aj wach xusikꞌij rala xkꞌuliꞌik
JOH 2:10 y jewaꞌ xubꞌiꞌij che: —Konoje ri tikawex nabꞌe na e kakijach ri chomilaj vino, yey echiriꞌ ri echokom lik kꞌi chi ri kitijom, kꞌa ekꞌuchiriꞌ kajachiꞌ ri xaqi tobꞌ vino. Noꞌj riꞌat kꞌa e laꞌ xawesaj lo ri saqil vino che wa kꞌisbꞌal re wa nimaqꞌij —xchaꞌ.
JOH 2:11 E nabꞌe kꞌutubꞌal waꞌ re ruchuqꞌabꞌ ri Dios xuꞌan ri Jesús chilaꞌ Caná re Galilea. Rukꞌ waꞌ xuqꞌalajisaj ri unimal uwach uqꞌij y ruma laꞌ rutijoꞌn lik xkubꞌiꞌ kikꞌuꞌx rukꞌ.
JOH 2:12 Echiriꞌ ikꞌowinaq chi waꞌ, ri Jesús rukꞌ ruchu, kukꞌ taq ruchaqꞌ y rutijoꞌn xebꞌek pa ri tinamit Capernaúm. Yey na xekꞌojiꞌ ta chiriꞌ ukꞌiyal qꞌij.
JOH 2:13 Xa naqaj chi kꞌo wi lo ri Pascua, waꞌ e kinimaqꞌij raj judiꞌabꞌ. Ekꞌu ri Jesús xeꞌek pa ri tinamit Jerusalem.
JOH 2:14 Chiriꞌ pa ri Rocho Dios, xebꞌuꞌriqa ri e aj kꞌay bꞌoyexabꞌ, bꞌexex y palomax, kukꞌ ri e aj jachal uwach puaq etzꞌul chiriꞌ.
JOH 2:15 Ekꞌuchiriꞌ, ri Jesús xuꞌan jun asial y rukꞌ waꞌ xebꞌeresaj lo pa ri Rocho Dios konoje rike junam kukꞌ taq ri bꞌexex y ri bꞌoyexabꞌ e kꞌo pa kꞌayij. Xuxulkꞌatilaꞌ taq bꞌi ri kimexa ri e aj jachal uwach puaq, y jelaꞌ xkichikoꞌbꞌ bꞌi ri puaq.
JOH 2:16 Xubꞌiꞌij kꞌu chike raj kꞌay ke palomax: —¡Chesaj bꞌi alaq taq waꞌ! ¡Maꞌan alaq kꞌaybꞌal che ri Rocho ri Nuqaw! —xchaꞌ.
JOH 2:17 Ekꞌuchiriꞌ, xkꞌun chikikꞌuꞌx rutijoꞌn ri tzꞌibꞌital pa Ruchꞌaꞌtem ri Dios pa kubꞌiꞌij wi: Ruchajixik ri Ocho la lik e ubꞌis nukꞌuꞌx riꞌ kachaꞌ.
JOH 2:18 Ekꞌu raj judiꞌabꞌ xkitzꞌonoj che: —¿Saꞌ ri kꞌutubꞌal kaꞌan la chiqawach chaꞌ kaqakojo yaꞌtal paqꞌabꞌ la kaꞌan la waꞌ? —xechaꞌ.
JOH 2:19 Ri Jesús xukꞌul uwach: —We xwulij alaq wa rocho ri Dios, xa pa oxibꞌ qꞌij riꞌin kanyak tanchik —xchaꞌ.
JOH 2:20 Xkibꞌiꞌij kꞌu raj judiꞌabꞌ che: —Waꞌ wa Rocho Dios pa cuarenta y seis junabꞌ xutzin wi. ¿Kayak kami la riꞌ rilal pa oxibꞌ qꞌij? —xechaꞌ.
JOH 2:21 Pero ri “Rocho Dios” xchꞌaꞌt ri Jesús puwiꞌ, e rucuerpo Rire.
JOH 2:22 E uwariꞌche, echiriꞌ xkꞌastaj lo chikixoꞌl ri ekaminaq, rutijoꞌn xkꞌun chikikꞌuꞌx ri ubꞌiꞌim chi lo chike. Kꞌa ekꞌuchiriꞌ xkimaj usukꞌ y xkikoj ri tzꞌibꞌital kan chupa Ruchꞌaꞌtem ri Dios puwi ri Jesús y ri bꞌiꞌtal kan ruma Rire.
JOH 2:23 Echiriꞌ kꞌo ri Jesús Jerusalem pa ri nimaqꞌij Pascua, lik e kꞌi ri tikawex xkikoj rubꞌiꞌ Rire ruma xkil taq ri kꞌutubꞌal re ruchuqꞌabꞌ ri Dios xuꞌano.
JOH 2:24 Noꞌj ri Jesús na xkubꞌiꞌ ta ukꞌuꞌx kukꞌ ma lik retaꞌam kiwach konoje.
JOH 2:25 Na xajawax tane kabꞌiꞌx che saꞌ ri kakichꞌobꞌ raqan ri winaq, ma Rire retaꞌam saꞌ ri kꞌo chupa ri kanimaꞌ.
JOH 3:1 Kꞌo jun achi Nicodemo rubꞌiꞌ; rire e kukꞌil ri fariseos yey e jun aj wach ke raj judiꞌabꞌ.
JOH 3:2 Rire xeꞌbꞌina rukꞌ ri Jesús chaqꞌabꞌ y xubꞌiꞌij che: —Lal tijonel, lik qꞌalaj lal taqom lo la ruma ri Dios re koꞌlkꞌutun la chiqawach, ma na jinta junoq kaꞌanaw janipa wa kꞌutubꞌal kaꞌan la, we na jinta ri Dios rukꞌ —xchaꞌ.
JOH 3:3 Ekꞌu ri Jesús xubꞌiꞌij che: —Paqatzij wi kambꞌiꞌij cheꞌla: E junoq we na kalax ta tanchik, riꞌ na kayaꞌtaj ta che kok chupa rutaqanik ri Dios —xchaꞌ.
JOH 3:4 Ri Nicodemo xutzꞌonoj che: —¿Suꞌanik kꞌu riꞌ kalax junoq e laꞌ nim chik? ¿Utz nebꞌa laꞌ kamatzex tanchi ruma ruchu chaꞌ kalax tanchik? —xchaꞌ.
JOH 3:5 Ri Jesús xukꞌul uwach: —Paqatzij wi kambꞌiꞌij cheꞌla: China ri na kalax ta rukꞌ yaꞌ y rukꞌ ri Ruxlabꞌixel ri Dios, riꞌ na taqal ta che kok chupa rutaqanik ri Dios.
JOH 3:6 E junoq kalax kuma ruchu-uqaw, riꞌ lik rewi e jun tikawex; noꞌj ri kalax ruma ri Ruxlabꞌixel ri Dios, riꞌ kꞌo ukꞌaslemal chwach ri Dios.
JOH 3:7 Makam kꞌu animaꞌ la che wa ximbꞌiꞌij cheꞌla: “Lik chirajawaxik chike konoje ri tikawex kebꞌalax na tanchik.”
JOH 3:8 E pachaꞌ ri tew xa tobꞌ pa kawelel wi, xew kata la kajuxuxik, pero na etaꞌam ta la pa kape wi y pa kumaj wubꞌi. Jekꞌulaꞌ ri kebꞌalax ruma ri Ruxlabꞌixel ri Dios na kilitaj taj suꞌanik ri Dios kuya ri kꞌakꞌ kikꞌaslemal —xchaꞌ.
JOH 3:9 Ekꞌu ri Nicodemo xutzꞌonoj tanchik: —¿Suꞌanik kuꞌana waꞌ? —xchaꞌ.
JOH 3:10 Ri Jesús xukꞌul uwach: —Lal tijonel chikiwach raj Israel, ¿yey na etaꞌam tane la waꞌ?
JOH 3:11 Paqatzij wi kambꞌiꞌij waꞌ cheꞌla: Riꞌoj e kaqatzijoj janipa ri qetaꞌam y ri qilom; na rukꞌ ta kꞌu riꞌ, ralaq na kakoj ta alaq saꞌ ri kantzijoj che alaq.
JOH 3:12 We na kakoj ta alaq echiriꞌ kintzijon puwi taq ri xa re ruwachulew, ¿saꞌ kꞌu uꞌanik riꞌ kakoj alaq echiriꞌ kintzijon chiwach alaq puwi taq ri re ri Dios kꞌo chilaꞌ chikaj?
JOH 3:13 Na jinta junoq bꞌenaq chilaꞌ chikaj, xew ri jun petinaq chilaꞌ, waꞌ e Ralaxel Chikixoꞌl Tikawex.
JOH 3:14 Ma jelaꞌ pachaꞌ xuꞌan ri Moisés echiriꞌ xuyak jun kumatz chutzaꞌm jun cheꞌ pa ri luwar katzꞌintzꞌotik; jekꞌulaꞌ lik chirajawaxik wi Ralaxel Chikixoꞌl Tikawex kayakiꞌ chwa jun cheꞌ
JOH 3:15 chaꞌ china ri kakubꞌiꞌ ukꞌuꞌx rukꞌ Rire, na kasach ta uwach, ma kꞌo ukꞌaslemal na jinta utaqexik.
JOH 3:16 »Ri Dios lik kꞌax xebꞌunaꞌ ri e kꞌo che ruwachulew; y ruma kꞌu waꞌ, xutaq lo Rukꞌajol, ri lik xew Ukꞌajol riꞌ, chaꞌ china ri kakubꞌiꞌ ukꞌuꞌx rukꞌ Rire na kasach ta uwach, ma kꞌo ukꞌaslemal na jinta utaqexik.
JOH 3:17 Ma ri Dios na xutaq ta lo Rukꞌajol che ruwachulew re koluꞌqꞌata tzij pakiwi ri tikawex; ri xutaq wuloq e chaꞌ kebꞌoluꞌkolobꞌej.
JOH 3:18 China kꞌu ri kakubꞌiꞌ ukꞌuꞌx rukꞌ Rukꞌajol ri Dios, riꞌ na jinta ri qꞌatbꞌal tzij re ri Dios puwiꞌ; noꞌj china ri na kakubꞌiꞌ ta ukꞌuꞌx rukꞌ, riꞌ kꞌo chi ri qꞌatbꞌal tzij re ri Dios puwiꞌ ruma na xukoj ta rubꞌiꞌ Rukꞌajol ri Dios, ri lik xew Ukꞌajol riꞌ.
JOH 3:19 Yey ri qꞌatbꞌal tzij kuꞌan ri Dios e ruma waꞌ: Ri Qꞌijsaq re ri Dios xkꞌun che ruwachulew, pero taq ri tikawex e más xukꞌul kikꞌuꞌx ri qꞌequꞌmalil re ri mak chwa ri Qꞌijsaq; ma ri ketajin che uꞌanik, lik na chom taj.
JOH 3:20 Konoje ri kakiꞌan ri na utz taj, tzel kakil ri Qꞌijsaq y na keqibꞌ ta rukꞌ chaꞌ na kaqꞌalajin ta ri na utz taj ketajin che uꞌanik.
JOH 3:21 Noꞌj konoje ri kakitijoj kibꞌ che jun saqil bꞌinik silabꞌik, riꞌ keqibꞌ chwach ri Qꞌijsaq chaꞌ kaqꞌalajinik, ri ketajin che uꞌanik e ri karaj ri Dios chike —xchaꞌ.
JOH 3:22 Tekꞌuchiriꞌ, ri Jesús junam kukꞌ rutijoꞌn xebꞌek Judea; ukꞌiyal qꞌij xkꞌojiꞌ chiriꞌ kukꞌ y kuya ri bautismo chike ri tikawex.
JOH 3:23 Ekꞌu ri Juan katajin che uyaꞌik ri bautismo pa ri tinamit Enón chunaqaj Salim, ma chilaꞌ lik kꞌo yaꞌ. Kebꞌopon kꞌu ri tikawex rukꞌ chaꞌ kakikꞌul ri bautismo.
JOH 3:24 Ri Juan xuꞌan waꞌ echiriꞌ kꞌamajaꞌ kayaꞌiꞌ pa cárcel.
JOH 3:25 Ekꞌuchiriꞌ, jujun chike rutijoꞌn ri Juan kukꞌ jujun e aj judiꞌabꞌ xkijeq kechꞌaꞌt chwi taq ri taqanik chwi ri kijosqꞌikil chwach ri Dios.
JOH 3:26 Xebꞌek kꞌut xeꞌkibꞌiꞌij che ri Juan: —Lal tijonel, tape la, e ri jun xopon ukꞌ la chꞌaqa yaꞌ che ri nimayaꞌ Jordán, ri xqꞌalajisan la puwiꞌ, woꞌora katajin che uyaꞌik ri bautismo y konoje ri tikawex eteran chirij —xechaꞌ.
JOH 3:27 Ekꞌu ri Juan xubꞌiꞌij chike: «Na jinta kꞌo kukꞌul junoq we na e ta ri Dios chilaꞌ chikaj kayaꞌw re che.
JOH 3:28 Riꞌix xinito echiriꞌ ximbꞌiꞌij chiwe: Riꞌin na in ta Ruchaꞌoꞌn lo ri Dios, xa in jun qꞌalajisanel intaqom lo nabꞌe chwach Rire.
JOH 3:29 »E pachaꞌ pa juna kꞌulanikil. Ri lik kꞌo uwach na e ta ri ramigo rala, e rala kakꞌuliꞌik ma e ukꞌaꞌyom re rali. Yey ri ramigo kꞌo putzal rala, e lik kakiꞌkot che utayik ri kubꞌiꞌij rala. Jekꞌulaꞌ riꞌin woꞌora lik kinkiꞌkotik ma ya xkꞌun ri Cristo.
JOH 3:30 Lik kꞌu chirajawaxik más kanimarisax uqꞌij rire, chwa ri kanimarisax nuqꞌij riꞌin.
JOH 3:31 »Ri jun kape chilaꞌ chikaj, e más nim uwach uqꞌij chikiwa konoje. Ekꞌu junoq na re ta chilaꞌ chikaj, e re ruwachulew y e kachꞌaꞌt puwi taq ri re ruwachulew. Noꞌj ri jun kape chilaꞌ chikaj, e más lik nim uwach uqꞌij chikiwa konoje.
JOH 3:32 Yey rire e kuqꞌalajisaj saꞌ ri rilom y saꞌ rutom che ri Dios; na rukꞌ ta kꞌu riꞌ, taq ri winaq na kakikoj taj.
JOH 3:33 Yey we kꞌo junoq kakojow ri kuqꞌalajisaj rire, riꞌ kujikibꞌaꞌ uwach lik qatzij ri kubꞌiꞌij ri Dios.
JOH 3:34 Ma ri jun taqom lo ruma ri Dios, e kutzijoj ri kubꞌiꞌij ri Dios. Ma ri Dios na xuxuꞌyaj ta ri Ruxlabꞌixel uyaꞌom che; e uwariꞌche, xaqi kꞌo ri Ruxlabꞌixel rukꞌ.
JOH 3:35 Ri Dios lik kꞌax kunaꞌ Rukꞌajol yey uyaꞌom puqꞌabꞌ rire ronoje ri kꞌolik.
JOH 3:36 China kꞌu ri kakubꞌiꞌ ukꞌuꞌx rukꞌ Rukꞌajol ri Dios, kꞌo ukꞌaslemal na jinta utaqexik; noꞌj china ri na karaj taj kakubꞌiꞌ ukꞌuꞌx rukꞌ Rukꞌajol ri Dios, riꞌ na jinta ukꞌaslemal rukꞌ ri Dios yey qꞌatom chi tzij puwiꞌ ruma ri Dios» xchaꞌ.
JOH 4:1 Ri Jesús xretaꞌmaj, ri fariseos xkito más e kꞌi rutijoꞌn Rire chikiwa rutijoꞌn ri Juan, yey más e kꞌi ri kakikꞌul ri bautismo ruma Rire chikiwa ri kakikꞌul ri bautismo ruma ri Juan.
JOH 4:2 (Tobꞌ na e ta kꞌu ri Jesús ri kuya ri bautismo, ma e taq rutijoꞌn ri keyaꞌw re.)
JOH 4:3 Ruma kꞌu ri Jesús retaꞌam ri xkita rike, xel bꞌi pa ri luwar re Judea y xtzelej tanchi pa ri luwar re Galilea.
JOH 4:4 Yey chirajawaxik che ri Jesús kikꞌow pa ri luwar re Samaria.
JOH 4:5 Jekꞌulaꞌ xeꞌela pa jun tinamit Sicar rubꞌiꞌ, kꞌo che ri luwar re Samaria, chunaqaj rulew xuya kan ri Jacob che rukꞌajol José.
JOH 4:6 Chiriꞌ kꞌo wi ri jun pozo ukꞌotom kan ri Jacob. Ruma kꞌu kosinaq ri Jesús che ri bꞌe uꞌanom loq, xtzꞌuyiꞌ chunaqaj ri pozo echiriꞌ ya kuꞌana pa tikꞌil qꞌij.
JOH 4:7 Xkꞌun kꞌu lo jun ixoq aj Samaria, e riꞌ koꞌlresaj bꞌi uyaꞌ pa ri pozo, yey ri Jesús xubꞌiꞌij che: —Sipaj la jubꞌiqꞌ nuyaꞌ —xchaꞌ.
JOH 4:8 Yey rutijoꞌn ri Jesús ebꞌenaq pa ri tinamit xeꞌkiloqꞌo kiwa.
JOH 4:9 Rixoq aj Samaria xubꞌiꞌij kꞌu che: —¿Saꞌ riꞌ laꞌ katzꞌonoj yaꞌ la chwe? Ma rilal lal kukꞌil raj judiꞌabꞌ yey riꞌin in aj Samaria —xchaꞌ. Xubꞌiꞌij waꞌ ma raj judiꞌabꞌ na kechꞌaw ta chikiwach kukꞌ raj Samaria.
JOH 4:10 Ewi ri Jesús xukꞌul uwach: —We ta kꞌu ketaꞌmaj la saꞌ ri kusipaj ri Dios cheꞌla yey we ta ketaꞌmaj la in china riꞌin, ri kantzꞌonoj nuyaꞌ cheꞌla, riꞌ e ne rilal katzꞌonoj la yaꞌ chwe yey riꞌin kanya kꞌu cheꞌla ri yaꞌ kuya kꞌaslemal —xchaꞌ.
JOH 4:11 Rixoq xubꞌiꞌij che ri Jesús: —Wajawal, na jinta ne saꞌ rukꞌ kesaj lo la ri yaꞌ yey ri pozo lik naj upa. ¿Pachawi kꞌu riꞌ kesaj wi lo la ri yaꞌ kuya kꞌaslemal?
JOH 4:12 E ri qamam Jacob xuya kan wa jun pozo chiqe ojertan, ma wara xutij wi uyaꞌ rire kukꞌ taq ri ralkꞌoꞌal y taq ri rawaj. ¿Más nebꞌa kꞌo wach rilal chwach rire? —xchaꞌ.
JOH 4:13 Ri Jesús xukꞌul uwach: —Konoje ri ketijow re waꞌ wa yaꞌ, katzajin tanchi kichiꞌ.
JOH 4:14 Noꞌj china ri katijow re ri yaꞌ kanya riꞌin, riꞌ na kachaqij ta chi kꞌana uchiꞌ. Ma ri yaꞌ kanya riꞌin, kuꞌan pachaꞌ jun akꞌal kalax lo pa ranimaꞌ re kuya ukꞌaslemal na jinta utaqexik —xchaꞌ.
JOH 4:15 Xubꞌiꞌij kꞌu rixoq che: —Wajawal, yaꞌa ko la weꞌin riꞌ laꞌ la yaꞌ, chaꞌ na kachaqij ta chi nuchiꞌ y na kinkꞌun ta chi ne riꞌ kꞌa wara re koꞌlnuwesaj bꞌi nuyaꞌ —xchaꞌ.
JOH 4:16 Pero ri Jesús xubꞌiꞌij che: —Oj la, jeꞌsikꞌij la ri achijil la y kꞌamaꞌ kꞌu lo la wara —xchaꞌ.
JOH 4:17 Ewi rixoq xubꞌiꞌij: —Riꞌin na jinta wachijil —xchaꞌ. Xubꞌiꞌij kꞌu ri Jesús che: —Qatzij ri xbꞌiꞌij la, na jinta achijil la.
JOH 4:18 Ma e woꞌobꞌ lo rachijabꞌ e kꞌojiꞌnaq ukꞌ la yey rachi kꞌo ukꞌ la woꞌora na achijil ta la. Ruma kꞌu riꞌ, lik qatzij ri xbꞌiꞌij la —xchaꞌ.
JOH 4:19 Echiriꞌ xuta waꞌ rixoq, xubꞌiꞌij che ri Jesús: —Wajawal, e kunaꞌ nukꞌuꞌx riꞌin, rilal lal qꞌalajisanel re ri Dios.
JOH 4:20 Ri qatiꞌ-qamam ri oj aj Samaria lik xkiloqꞌnimaj uqꞌij ri Dios chwach wa juyubꞌ, noꞌj ri alaq aj judiꞌabꞌ kabꞌiꞌij alaq e Jerusalem ri luwar pa chirajawaxik wi kaloqꞌnimax wi uqꞌij ri Dios —xchaꞌ.
JOH 4:21 Ri Jesús xubꞌiꞌij che: —Ixoq, lik kojo la wa kambꞌiꞌij cheꞌla, ma kopon na ri qꞌij na xew ta chi kaloqꞌnimax uqꞌij ri Dios wara chwa wa juyubꞌ o kꞌa chilaꞌ Jerusalem, ma utz kaꞌaniꞌ waꞌ pa ronoje luwar.
JOH 4:22 Ralaq alaq aj Samaria, na etaꞌam ta alaq china ri kaloqꞌnimaj alaq uqꞌij; noꞌj riꞌoj lik qetaꞌam chi utz china ri kaqaloqꞌnimaj uqꞌij, ma ri kolobꞌetajik kape kukꞌ raj judiꞌabꞌ.
JOH 4:23 Noꞌj kopon na kꞌu ri qꞌij yey ekꞌu uqꞌijol waꞌ xoponik echiriꞌ e janipa ri kakiloqꞌnimaj uqꞌij ri Qaqaw Dios pa saqil wi, kakiꞌano ruma ri Ruxlabꞌixel kꞌo pa kanimaꞌ. Ma e karaj waꞌ ri Qaqaw Dios chike konoje ri keloqꞌniman re.
JOH 4:24 Ma ri Dios e Uxlabꞌixel; Rire na kilitaj ta uwach. E uwariꞌche konoje ri keloqꞌniman uqꞌij, lik chirajawaxik wi kiꞌana waꞌ pa saqil wi ruma ri Ruxlabꞌixel kꞌo pa kanimaꞌ —xchaꞌ.
JOH 4:25 Xubꞌiꞌij kꞌu rixoq che ri Jesús: —Riꞌin wetaꞌam kakꞌun Ruchaꞌoꞌn lo ri Dios, ri kabꞌiꞌx “Cristo” che; y echiriꞌ kakꞌun Rire, kuqꞌalajisaj ronoje chiqe —xchaꞌ.
JOH 4:26 Ri Jesús xubꞌiꞌij che: —Waꞌ wa kabꞌiꞌij la e riꞌin, ri kinchꞌaꞌt ukꞌ la —xchaꞌ.
JOH 4:27 Ekꞌuchiriꞌ, xetzelej lo rutijoꞌn y lik xkam kanimaꞌ che ma ri Jesús kachꞌaꞌt rukꞌ jun ixoq. Na rukꞌ ta kꞌu riꞌ, na jinta junoq chike xutzꞌonoj saꞌ puwiꞌ kachꞌaꞌt wi rukꞌ rixoq.
JOH 4:28 Ekꞌuchiriꞌ, rixoq xuya kan rukꞌambꞌaꞌ, xeꞌek pa ri tinamit y jewaꞌ kubꞌiꞌij chike ri winaq:
JOH 4:29 —Peta alaq, jeꞌilaꞌ alaq jun achi ubꞌiꞌim chwe janipa ri nuꞌanom. ¿Na e ta nawi rire ri Cristo? —kachaꞌ.
JOH 4:30 Ekꞌuchiriꞌ, xebꞌel bꞌi ri winaq pa ri tinamit y xebꞌek chilaꞌ pa kꞌo wi ri Jesús.
JOH 4:31 Echiriꞌ kꞌamajaꞌ kebꞌopon ri winaq, rutijoꞌn xkitij riꞌ che, jewaꞌ xkibꞌiꞌij: —Lal tijonel, tija wa la —xecha che.
JOH 4:32 Ri Jesús xubꞌiꞌij chike: —Riꞌin kꞌo ri nuwa kantijo, tobꞌ riꞌix na iwetaꞌam taj saꞌ waꞌ —xchaꞌ.
JOH 4:33 Ekꞌu rutijoꞌn xkijeq kakibꞌiꞌij chikiwach: «¿Kꞌo nawi junoq xkꞌamaw lo uwa?» xechaꞌ.
JOH 4:34 Ekꞌu ri Jesús xubꞌiꞌij chike: «Ri nuwa riꞌin e ri kanꞌan ri rajawal ukꞌuꞌx ri taqayom lo weꞌin y kankꞌis na kꞌu ruchak.
JOH 4:35 Riꞌix kibꞌiꞌij: “Kajibꞌ ikꞌ chik kopon wi chaꞌ kaꞌan ri molonik.” Noꞌj riꞌin kambꞌiꞌij chiwe: Chixtzuꞌn apanoq y chiwila chi utz ri tikoꞌn, ma ya riꞌj chik, utz chik kamolik.
JOH 4:36 Ri kachakun che ri molonik, kukꞌul na ri tojbꞌal re yey janipa ri kumolo, kꞌo kutiqoj che rukꞌaslemal na jinta utaqexik. Jekꞌulaꞌ, ri katikow re junam kekiꞌkot rukꞌ ri kamolonik.
JOH 4:37 Ma e kuꞌana pachaꞌ ri kabꞌiꞌxik: “Jun ri katikow re yey jun chik ri kaꞌanaw re ri molonik.”
JOH 4:38 Riꞌin xixintaq bꞌi re kimol ri na xitik ta riꞌix; ma e jujun chik ri xetikow re. Ekꞌu woꞌora kꞌo kikꞌul riꞌix che ri chak ke rike» xchaꞌ.
JOH 4:39 E kꞌi chike ri e aj Samaria xkubꞌiꞌ kikꞌuꞌx rukꞌ ri Jesús ruma ri xutzijoj rixoq echiriꞌ xubꞌiꞌij chike: «Rire xubꞌiꞌij chwe janipa ri nuꞌanom.»
JOH 4:40 Ruma kꞌu laꞌ, rike xekꞌun rukꞌ ri Jesús y lik xebꞌelaj che chaꞌ kakanaj kukꞌ. Ewi Rire kebꞌ qꞌij xkanaj kan kukꞌ.
JOH 4:41 Yey más e kꞌi ri xkubꞌiꞌ kikꞌuꞌx rukꞌ ruma ri xutzijoj Rire chikiwach.
JOH 4:42 Xkibꞌiꞌij kꞌu che rixoq: —Woꞌora lik kubꞌul qakꞌuꞌx rukꞌ rire na xew ta ruma ri xatzijoj riꞌat chiqe, ma e ruma ri xqata ruchꞌaꞌtem rire. Qetaꞌam kꞌu riꞌ rire paqatzij wi e ri Cristo, ri Kolobꞌenel re ruwachulew —xechaꞌ.
JOH 4:43 Echiriꞌ ikꞌowinaq chi kaꞌibꞌ qꞌij, ri Jesús xel bꞌi chiriꞌ Samaria, xumaj bꞌi ubꞌe y xeꞌek kꞌa Galilea.
JOH 4:44 Ubꞌiꞌim chi kꞌu ri Jesús: “Juna qꞌalajisanel na kayak ta uqꞌij pa rutinamit.”
JOH 4:45 Na rukꞌ ta kꞌu riꞌ, echiriꞌ xopon chilaꞌ Galilea, ri aj chiriꞌ lik xkikꞌul chi utz, ma rike xebꞌopon pa ri nimaqꞌij Pascua chilaꞌ Jerusalem y xkilo janipa taq ri xuꞌan ri Jesús pa ri nimaqꞌij.
JOH 4:46 Ekꞌuchiriꞌ, ri Jesús xtzelej pa ri tinamit Caná re Galilea pa xuꞌan wi vino che ri yaꞌ. Kꞌo kꞌu jun aj wach raj chak ri rey chilaꞌ Capernaúm, y rire kꞌo jun ukꞌajol lik yewaꞌ.
JOH 4:47 Wa waꞌchi echiriꞌ xuto ri Jesús petinaq Judea y kꞌo chi chiriꞌ Galilea, xeꞌek kꞌu che rilik y lik xeꞌelaj che chaꞌ keꞌek chirocho re kuꞌkunaj rukꞌajol kajekꞌowik.
JOH 4:48 Xubꞌiꞌij kꞌu ri Jesús che: —Ralaq na kakubꞌiꞌ ta kꞌuꞌx alaq wukꞌ we na kil ta taq kꞌutubꞌal re ri nuchuqꞌabꞌ o taq milagros kanꞌano —xchaꞌ.
JOH 4:49 Ri raj chak ri rey xubꞌiꞌij tanchi che ri Jesús: —Wajawal, peta ko la wukꞌ chiwocho, ma ri nukꞌajol kajekꞌowik —xchaꞌ.
JOH 4:50 Xubꞌiꞌij kꞌu ri Jesús che: —Oj la chi ocho la, ma ri kꞌajol la na kakam taj —xchaꞌ. Rachi xukoj ri xbꞌiꞌx che ruma ri Jesús y xeꞌek.
JOH 4:51 Echiriꞌ katajin roponik chirocho, ri raj chakibꞌ xebꞌel lo che ukꞌulik y xkibꞌiꞌij che: —¡Ri kꞌajol la na xkam taj ma xkunutajik! —xechaꞌ.
JOH 4:52 Ekꞌu rire xutzꞌonoj chike jampalaꞌ xujeqo utz uwach rukꞌajol. Y rike xkibꞌiꞌij che: —Iwir che ri nabꞌe ora bꞌenaq qꞌij xikꞌow ri aqꞌ chirij —xechaꞌ.
JOH 4:53 Jekꞌulaꞌ ruqaw rala xretaꞌmaj e ora riꞌ xubꞌiꞌij ri Jesús che: «Ri kꞌajol la na kakam taj.» Ruma kꞌu riꞌ laꞌ, rire kukꞌ konoje ri e kꞌo pa rocho xkubꞌiꞌ kikꞌuꞌx rukꞌ ri Jesús.
JOH 4:54 Wa jun kunanik e ukaꞌm kꞌutubꞌal re ruchuqꞌabꞌ ri Dios xuꞌan ri Jesús chilaꞌ Galilea echiriꞌ tzelejinaq lo Judea.
JOH 5:1 Kꞌate tanchi kꞌu riꞌ, ri Jesús xtzelej Jerusalem echiriꞌ raj judiꞌabꞌ kꞌo jun kinimaqꞌij.
JOH 5:2 Chupa kꞌu laꞌ la tinamit, chunaqaj ri Okibꞌal ke Bꞌexex, kꞌo jun nimalaj atinibꞌal, “Betesda” rubꞌiꞌ pa ri chꞌaꞌtem hebreo. Waꞌ woꞌobꞌ uchiꞌ ja kꞌo che.
JOH 5:3 Chiriꞌ e kꞌo ukꞌiyal yewaꞌibꞌ e kotzꞌerinaq; e kꞌo potzꞌ, jetzꞌ y sik. Konoje rike koyeꞌem echiriꞌ kasilabꞌ ri yaꞌ,
JOH 5:4 ma xa chirij ora kaqaj lo jun ángel y kurujuraꞌ upa ri yaꞌ. Ekꞌu riꞌ ri nabꞌe kukꞌaq bꞌi ribꞌ chupa, riꞌ kel loq kunutajinaq chik tobꞌ saꞌ ri yabꞌil kꞌo che.
JOH 5:5 Kꞌo kꞌu jun achi e treinta y ocho junabꞌ riꞌ yewaꞌ.
JOH 5:6 Echiriꞌ ri Jesús xrilo kotzꞌol chiriꞌ y xretaꞌmaj ukꞌiyal junabꞌ jelaꞌ uꞌanom, xutzꞌonoj kꞌu riꞌ che: —¿Kawaj katkunutajik? —xchaꞌ.
JOH 5:7 Rachi jewaꞌ xukꞌul uwach: —Wajawal, na jinta junoq kakꞌamaw bꞌi we chupa ri atinibꞌal echiriꞌ karujurut upa ri yaꞌ. Lik nutijom chi nuqꞌij che kankꞌaq bꞌi wibꞌ chupa; pero echiriꞌ kuaj kanꞌano, kꞌate kanwilo jun chik kanabꞌej chinuwach —xchaꞌ.
JOH 5:8 Ri Jesús xubꞌiꞌij che: —Chatyaktajoq, chakꞌama bꞌi rachꞌat y chatbꞌinoq —xchaꞌ.
JOH 5:9 Chupa kꞌu laꞌ la joqꞌotaj rachi xkunutajik, xukꞌam bꞌi ruchꞌat y xujeqo kabꞌinik. Yey waꞌ xuꞌan pa jun qꞌij re uxlanibꞌal.
JOH 5:10 Ruma kꞌu riꞌ, ri e aj judiꞌabꞌ xkibꞌiꞌij che rachi xkunutajik: —Waqꞌij e qꞌij re uxlanibꞌal, y na ubꞌe ta chawe kawukꞌaꞌaj rachꞌat —xechaꞌ.
JOH 5:11 Rachi xukꞌul kꞌu uwach chike: —Ri jun xinukunaj e xbꞌiꞌn re chwe: “Chakꞌama bꞌi rachꞌat y chatbꞌinoq” —xchaꞌ.
JOH 5:12 Xkitzꞌonoj kꞌu che: —¿China ri xbꞌiꞌn chawe: “Chakꞌama bꞌi rachꞌat y chatbꞌinoq”? —xechaꞌ.
JOH 5:13 Ekꞌu rachi na retaꞌam taj china ri xkunaw re, ma ri Jesús xel bꞌi chikixoꞌl ri tikawex e kꞌo chiriꞌ.
JOH 5:14 Tekꞌuchiriꞌ, ri Jesús xuꞌriqa rachi pa ri Rocho Dios y xubꞌiꞌij che: —Chawilapeꞌ: Woꞌora at kunutajinaq chik; matmakun chi kꞌu riꞌ, ma kꞌaxtaj kape juna kꞌaxkꞌobꞌik más nim pawiꞌ —xchaꞌ.
JOH 5:15 Xeꞌek rachi y xuꞌtzijoj chike raj judiꞌabꞌ e ri Jesús xkunaw re.
JOH 5:16 Ruma waꞌ, raj judiꞌabꞌ xkijeq uternabꞌexik ri Jesús y kakitzukuj suꞌanik kakikamisaj, ma rire kuꞌan kunanik pa ri qꞌij re uxlanibꞌal.
JOH 5:17 Ekꞌu ri Jesús xubꞌiꞌij chike: —Ri Nuqaw na roqꞌotam taj kachakunik y jekꞌulaꞌ riꞌ kanꞌan riꞌin —xchaꞌ.
JOH 5:18 Ruma waꞌ raj judiꞌabꞌ más xkiya kibꞌ che ukamisaxik ri Jesús, ma e chikiwach rike kupalajij ri taqanik puwi ri qꞌij re uxlanibꞌal. Y na xew ta waꞌ, ma kujunimaj ne ribꞌ rukꞌ ri Dios echiriꞌ kubꞌiꞌij ri Dios e Uqaw.
JOH 5:19 Ekꞌu ri Jesús xubꞌiꞌij chike: «Paqatzij wi kambꞌiꞌij che alaq: Rukꞌajol ri Dios na jinta kꞌo kuꞌan xa pa re Rire; ma xew kuꞌan pachaꞌ ri karilo kuꞌan Ruqaw. Janipa taq ri kuꞌan Ruqaw, jekꞌulaꞌ kuꞌan Rukꞌajol.
JOH 5:20 »Ma ri Dios lik kꞌax kunaꞌ Rukꞌajol y kukꞌut kꞌu che ronoje ri kuꞌano. Yey kꞌo ne ri más nimaq taq chak kukꞌut chwach. Y we xuꞌan kꞌu waꞌ, lik kakam ne animaꞌ ralaq che.
JOH 5:21 Ma jelaꞌ pachaꞌ ri Dios kebꞌukꞌastajisaj ri ekaminaq y kuya kikꞌaslemal, jekꞌulaꞌ Rukꞌajol kuya kꞌaslemal china che ri karaj kuya wi.
JOH 5:22 Yey ri Dios na kuqꞌat tane tzij puwi junoq, ma puqꞌabꞌ Rukꞌajol uyaꞌom wi kuqꞌat tzij pakiwi ri tikawex,
JOH 5:23 chaꞌ jelaꞌ konoje ri tikawex kakiyak uqꞌij Rukꞌajol, jelaꞌ pachaꞌ kakiꞌan che uyakik uqꞌij ri Dios. Yey china ri na kuyak ta uqꞌij Rukꞌajol ri Dios, na kuyak ta kꞌu uqꞌij riꞌ ri Jun xtaqaw lo re, waꞌ e ri Dios.
JOH 5:24 »Paqatzij wi kambꞌiꞌij che alaq: China ri lik kuta chi utz ri kambꞌiꞌij riꞌin y kakubꞌiꞌ ukꞌuꞌx rukꞌ ri xtaqaw lo we, riꞌ kꞌo ukꞌaslemal na jinta utaqexik y na kukꞌul ta ri kꞌaxkꞌolil re ri qꞌatbꞌal tzij. Jekꞌulaꞌ, na jinta chi puqꞌabꞌ ri kamik, ma asu xqꞌax chupa ri kꞌaslemal.
JOH 5:25 Paqatzij wi kambꞌiꞌij che alaq: Kopon kꞌu ri ora y e chi uqꞌijol waꞌ echiriꞌ ri na jinta kikꞌaslem chwach ri Dios, kakita ruqul Rukꞌajol ri Dios. Yey china taq kꞌu riꞌ ri kakikoj utzij, kꞌo kikꞌaslemal na jinta utaqexik.
JOH 5:26 Ma puqꞌabꞌ ri Qaqaw Dios kꞌo wi kuya kꞌaslemal; jekꞌulaꞌ uyaꞌom puqꞌabꞌ Rukꞌajol kuya kꞌaslemal.
JOH 5:27 Yey ri Dios uyaꞌom ne puqꞌabꞌ Rukꞌajol kuqꞌat tzij pakiwi ri tikawex, ma Rukꞌajol e Alaxel Chikixoꞌl Tikawex.
JOH 5:28 »Makam animaꞌ alaq che waꞌ, ma kopon ri ora echiriꞌ konoje ri ekaminaq kakita ruqul Rire.
JOH 5:29 Janipa ri xkiꞌan ri utz, riꞌ keyaktaj lo che jun kꞌastajibꞌal re kꞌaslemal. Noꞌj janipa kꞌu ri xkiꞌan ri na utz taj, riꞌ keyaktaj lo che ri qꞌatbꞌal tzij kaꞌan pakiwiꞌ.
JOH 5:30 »Na jinta kꞌo kanꞌan xa pa we riꞌin. Ri qꞌatbꞌal tzij kanꞌano e ri kinutaq ri Nuqaw che uꞌanik. Yey lik jusukꞌ ri qꞌatbꞌal tzij kanꞌano. Na e ta kanꞌan riꞌ ri kuaj riꞌin; ma e kanꞌan janipa ri karaj ri Nuqaw, ri xtaqaw lo we.
JOH 5:31 We ta e laꞌ xa chiwibꞌil wibꞌ riꞌin kanqꞌalajisaj saꞌ ri nuwach, riꞌ na jinta uchak ri kambꞌiꞌij.
JOH 5:32 Kꞌo kꞌu Jun kaqꞌalajisan nuwach, waꞌ e ri Nuqaw, y wetaꞌam kꞌut ronoje ri kuqꞌalajisaj Rire panuwi riꞌin, lik qatzij.
JOH 5:33 »Ralaq xtaq ne bꞌi alaq utzꞌonoxik che ri Juan panuwi riꞌin; y ri kꞌulubꞌal uwach xuꞌan lo rire, lik qatzij.
JOH 5:34 Pero riꞌin na kajawax ta chwe kꞌo junoq kuqꞌalajisaj saꞌ ri nuwach. Xew kꞌu kankuxtaj che alaq ri xubꞌiꞌij ri Juan panuwi riꞌin chaꞌ kakoj alaq y jelaꞌ kakolobꞌetaj alaq.
JOH 5:35 Ma ri Juan e pachaꞌ juna aqꞌ karepowik y kawon chi utz. Pero ralaq xa joqꞌotaj xkiꞌkot alaq che ri Qꞌijsaq xutzijoj.
JOH 5:36 »Kꞌo kꞌu jun kꞌutubꞌal más kꞌo uwach chwa ri xuqꞌalajisaj ri Juan panuwi riꞌin. Ma ronoje rubꞌiꞌim lo ri Nuqaw chwe re koꞌlnuꞌanaꞌ, e ri kintajin che uꞌanik. Yey ruma taq ri kanꞌano, kaqꞌalajinik, e ri Nuqaw ri xtaqaw lo weꞌin.
JOH 5:37 Yey ri kaqꞌalajisan re saꞌ ri nuwach riꞌin e ri Nuqaw, ri taqayom lo weꞌin. Pero lik qꞌalaj na tom ta kꞌana alaq ruqul ri Dios y na ilom ta alaq uwach, yey
JOH 5:38 Ruchꞌaꞌtem Rire na okinaq ta pa animaꞌ alaq; ma na kubꞌul ta kꞌuꞌx alaq rukꞌ ri jun utaqom lo ri Dios.
JOH 5:39 »Lik kꞌu katijoj ibꞌ alaq che Ruchꞌaꞌtem ri Dios tzꞌibꞌital kanoq; ma ralaq kachꞌobꞌ alaq e chupa waꞌ kariqitaj wi ri kꞌaslemal na jinta utaqexik. ¡Yey ekꞌu riꞌ Ruchꞌaꞌtem ri Dios ri kaqꞌalajisan nuwach riꞌin!
JOH 5:40 Na rukꞌ ta kꞌu riꞌ, na kaꞌaj ta alaq kape alaq wukꞌ chaꞌ jelaꞌ kakꞌul alaq waꞌ wa kꞌaslemal.
JOH 5:41 »Riꞌin na e ta kantzukuj ri yakbꞌal nuqꞌij kakiꞌan ri winaq.
JOH 5:42 Yey lik ne wetaꞌam ri kꞌuꞌx alaq, ma ralaq na kꞌax ta kanaꞌ alaq ri Dios pa saqil wi.
JOH 5:43 Riꞌin in petinaq pa rubꞌiꞌ ri Nuqaw yey ralaq na kakoj ta alaq nutzij. Noꞌj we ta e laꞌ kakꞌun chi lo jun chik y xa pa re katzijonik, riꞌ e kakoj alaq re.
JOH 5:44 »¿Suꞌanik kakubꞌiꞌ kꞌuꞌx alaq wukꞌ riꞌin, we xew katzukuj yakbꞌal qꞌij alaq chiwach ralaq yey na katzukuj ta alaq ri saqil yakbꞌal qꞌij, ri xew kape rukꞌ ri Dios?
JOH 5:45 E chiwach ralaq kankoj mak alaq chwach ri Nuqaw; na e ta riꞌ. Ma ri kakojow mak chiꞌij alaq, e ri jun lik kubꞌam kꞌuꞌx alaq rukꞌ; waꞌ e ri Moisés.
JOH 5:46 Ma we ta e laꞌ lik kakoj alaq ri ubꞌiꞌim lo ri Moisés, riꞌ kakoj alaq ri kantzijoj riꞌin. Ma rire panuwi riꞌin xtzꞌibꞌan wi.
JOH 5:47 Noꞌj we na kakoj ta alaq rutzꞌibꞌam kan ri Moisés, ¿saꞌ kꞌu uꞌanik riꞌ kakoj alaq ri kambꞌiꞌij riꞌin che alaq?» xcha ri Jesús.
JOH 6:1 Kꞌate tanchi kꞌu riꞌ, ri Jesús xuqꞌaxuj ri mar re Galilea, ri kabꞌiꞌx mar re Tiberias che.
JOH 6:2 Yey ukꞌiyal winaq eteran chirij ma kilom taq ri kꞌutubꞌal re ruchuqꞌabꞌ kuꞌan kukꞌ ri yewaꞌibꞌ.
JOH 6:3 Ekꞌuchiriꞌ, ri Jesús xel bꞌi chwa jun juyubꞌ y xtzꞌuyiꞌ chilaꞌ junam kukꞌ rutijoꞌn.
JOH 6:4 Xa naqaj chi kꞌo wi lo ruqꞌijol ri Pascua, ri kinimaqꞌij raj judiꞌabꞌ.
JOH 6:5 Echiriꞌ ri Jesús xeril rukꞌiyal winaq e petinaq rukꞌ, xubꞌiꞌij kꞌu che ri Felipe: —¿Pa keꞌqaloqꞌo wi kiwa konoje wuꞌkꞌiyal winaq chaꞌ kewaꞌik? —xchaꞌ.
JOH 6:6 Xubꞌiꞌij waꞌ che ri Felipe xa re kꞌambꞌal upa, ma Rire retaꞌam chik saꞌ ri kuꞌano.
JOH 6:7 Ri Felipe xukꞌul uwach: —E laꞌ kaloqꞌiꞌ pam rukꞌ rajil kebꞌ ciento qꞌij re chak, na kuꞌan taj tobꞌ ne xa jutaq bꞌiqꞌ kayaꞌiꞌ chikijujunal —xchaꞌ.
JOH 6:8 Ewi jun chike rutijoꞌn (waꞌ e ri Andrés, ri kichaqꞌ kibꞌ rukꞌ ri Pedro) xubꞌiꞌij che ri Jesús:
JOH 6:9 —Kꞌo jun ralko ala wara rukꞌaꞌam woꞌobꞌ pam re cebada y kaꞌibꞌ kar; pero ¿saꞌ ko uchak waꞌ che wa ukꞌiyal winaq? —xchaꞌ.
JOH 6:10 Xubꞌiꞌij kꞌu ri Jesús: —Chibꞌiꞌij chike konoje ri winaq ketzꞌuyiꞌik —xchaꞌ. Lik kꞌut kꞌo rax kꞌim pa ri e kꞌo wi y xetzꞌuyiꞌ laj e lo woꞌobꞌ mil chi achijabꞌ.
JOH 6:11 Ekꞌuchiriꞌ, ri Jesús xukꞌam ri pam, xutioxij che ri Dios y xujach chike rutijoꞌn. Y rike xkijach chike ri winaq etzꞌulik. Jekꞌulaꞌ xuꞌan che ri kar. Xuya chikijujunal janipa ri kakaj.
JOH 6:12 Echiriꞌ ri winaq lik xenoj chi utz, ri Jesús xubꞌiꞌij chike rutijoꞌn: —Chimolo ri chꞌaqaꞌtaꞌq kiqax chaꞌ na jinta kꞌo kakꞌaq bꞌi —xchaꞌ.
JOH 6:13 Xkimol kꞌu ri chꞌaqaꞌtaꞌq kiqax na xkitij ta che ri woꞌobꞌ pam re cebada y rukꞌ waꞌ xkinojisaj kabꞌlajuj chakach.
JOH 6:14 Ekꞌu ri winaq, echiriꞌ xkil wa kꞌutubꞌal re ruchuqꞌabꞌ ri Dios xuꞌan ri Jesús, jewaꞌ xkibꞌiꞌij: «Paqatzij wi, waꞌ e ri jun Qꞌalajisanel qoyeꞌem kakꞌun che ruwachulew» xechaꞌ.
JOH 6:15 Pero ri Jesús ruma retaꞌam chik kakaj kakikꞌam bꞌi re kakiꞌan rey che, xresaj bꞌi ribꞌ chikixoꞌl y xel bꞌi chwa ri juyubꞌ chaꞌ kakꞌojiꞌ utukel.
JOH 6:16 Echiriꞌ xok raqꞌabꞌ, rutijoꞌn ri Jesús xeqaj chuchiꞌ ri mar.
JOH 6:17 Xebꞌok bꞌi chupa jun barco y ekꞌu riꞌ keqꞌax chꞌaqa yaꞌ chaꞌ kebꞌopon Capernaúm; ma lik qꞌequꞌm chik y ri Jesús na kꞌuninaq taj.
JOH 6:18 Xpe kꞌu jun kaqjiqꞌ chwi ri mar y ri tew xujeq kuxulkꞌatilaꞌ ri yaꞌ.
JOH 6:19 Echiriꞌ ebꞌininaq chi laj woꞌobꞌ o waqibꞌ kilómetro chwi ri mar, kꞌate xkilo kabꞌin ri Jesús chwi ri yaꞌ, e riꞌ katajin roponik chunaqaj ri barco; y rike lik xkixiꞌij kibꞌ che.
JOH 6:20 Noꞌj ri Jesús xubꞌiꞌij chike: —¡Mixiꞌij iwibꞌ, ma riꞌin in Jesús! —xchaꞌ.
JOH 6:21 Ewi rike lik kekiꞌkotik xkikꞌul ri Jesús chupa ri barco. Tekꞌuchiriꞌ, xebꞌopon pa ri luwar pa kebꞌek wi.
JOH 6:22 Chukaꞌm qꞌij kꞌut, ri winaq ekanajinaq kan chꞌaqa mar xkinaꞌbꞌej rutijoꞌn ri Jesús ebꞌenaq chi chupa ri barco ri xew riꞌ kꞌo chiriꞌ iwir lo riꞌ, yey ri Jesús na xeꞌek ta kukꞌ rutijoꞌn.
JOH 6:23 Xekꞌun kꞌu lo jujun barcos e petinaq Tiberias, chunaqaj ri luwar pa xtijiꞌ wi ri pam, echiriꞌ ri Qanimajawal utioxim chi waꞌ che ri Dios.
JOH 6:24 Echiriꞌ ri winaq xkilo na jinta ri Jesús chiriꞌ y na e jinta ne rutijoꞌn, xebꞌok bꞌi chupa wa barcos y xebꞌek Capernaúm chaꞌ kakitzukuj ri Jesús.
JOH 6:25 Echiriꞌ xebꞌopon ri winaq chꞌaqa mar, xeꞌkiriqa ri Jesús y xkitzꞌonoj che: —Lal tijonel, ¿jampa xkꞌun la wara? —xechaꞌ.
JOH 6:26 Ekꞌu ri Jesús xubꞌiꞌij chike: —Paqatzij wi kambꞌiꞌij che alaq: Kintzukuj alaq xa ruma lik xwaꞌ alaq chi utz y xnoj alaq chi utz, na e ta ruma xmaj alaq usukꞌ taq ri kꞌutubꞌal re ruchuqꞌabꞌ ri Dios nuꞌanom loq.
JOH 6:27 Maya kꞌu ibꞌ alaq che utzukuxik ri wa xa kakꞌisik; e lik yaꞌa ibꞌ alaq che utzukuxik ri wa na kikꞌow ta kꞌana uqꞌij, ri kuya kꞌaslemal na jinta utaqexik. Yey ri kayaꞌw waꞌ che alaq, e Ralaxel Chikixoꞌl Tikawex, ri chaꞌtal lo ruma ri Qaqaw Dios re kuꞌan waꞌ —xchaꞌ.
JOH 6:28 Xkitzꞌonoj kꞌu che: —¿Saꞌ taq ri kaqaꞌano chaꞌ e kaqaꞌan janipa ri karaj ri Dios chiqe? —xechaꞌ.
JOH 6:29 Ri Jesús xukꞌul uwach: —Ri karaj ri Dios kaꞌan alaq, e ri kakubꞌiꞌ kꞌuꞌx alaq rukꞌ ri jun utaqom lo Rire —xchaꞌ.
JOH 6:30 Ekꞌuchiriꞌ xkitzꞌonoj che: —¿Saꞌ ri kꞌutubꞌal re ruchuqꞌabꞌ ri Dios kaꞌan la chiqawach chaꞌ kaqilo y jelaꞌ kakubꞌiꞌ qakꞌuꞌx ukꞌ la? ¿Saꞌ ri kariq la uꞌanik?
JOH 6:31 Ma ri qatiꞌ-qamam ojertan xkitij ri maná pa ri luwar katzꞌintzꞌotik, jelaꞌ pachaꞌ ri kubꞌiꞌij Ruchꞌaꞌtem ri Dios: Xuya pam chike, y waꞌ petinaq chilaꞌ chikaj —xechaꞌ.
JOH 6:32 Ri Jesús xukꞌul uwach: —Paqatzij wi kambꞌiꞌij che alaq: Na e ta ri Moisés xyaꞌw re ri pam petinaq chilaꞌ chikaj; e ri Nuqaw ri kayaꞌw ri saqil pam kape chilaꞌ chikaj.
JOH 6:33 Ma ri Pam kuya ri Dios e ri jun petinaq chilaꞌ chikaj, ri kayaꞌw kꞌaslemal chike ri tikawex —xchaꞌ.
JOH 6:34 Xkitzꞌonoj kꞌu che: —Qajawal, yaꞌa ko la qeꞌoj riꞌ laꞌ la pam ronoje qꞌij —xechaꞌ.
JOH 6:35 Ri Jesús xubꞌiꞌij chike: —In ri in pam kuya kꞌaslemal. China ri kape wukꞌ riꞌin, na kutij ta chi numik; y china ri kakubꞌiꞌ ukꞌuꞌx wukꞌ, riꞌ na kachaqij ta chi kꞌana uchiꞌ.
JOH 6:36 »Pero e pachaꞌ ri nubꞌiꞌim chi lo che alaq: Ralaq na kakubꞌiꞌ ta kꞌuꞌx alaq wukꞌ, tobꞌ ne ilom alaq nuwach.
JOH 6:37 Ma konoje ri keyaꞌiꞌ chwe ruma ri Nuqaw, kekꞌun wukꞌ riꞌin; yey china kꞌu riꞌ ri kape wukꞌ riꞌin, na kanmachꞌaj tubꞌi.
JOH 6:38 »Riꞌin na ximpe ta chilaꞌ chikaj xa re koꞌlnuꞌana ri kuaj riꞌin, ma e in petinaq re koꞌlnuꞌana ri karaj ri Jun xtaqaw lo we.
JOH 6:39 Yey ri karaj ri Nuqaw, ri xintaqaw loq, e na kanjam ta kan junoq chike ri ebꞌuyaꞌom Rire chwe; ma e kenukꞌastajisaj lo konoje waꞌ chupa ri kꞌisbꞌal qꞌij.
JOH 6:40 Ekꞌu ri lik karaj ri Nuqaw, ri xtaqaw lo weꞌin, e waꞌ: Konoje ri tikawex, ri kakiya ri kiwach wukꞌ ri in Ukꞌajol ri Dios y kakubꞌiꞌ kꞌu kikꞌuꞌx wukꞌ, kakꞌojiꞌ kikꞌaslemal na jinta utaqexik. Ekꞌu riꞌin kenukꞌastajisaj lo chikixoꞌl ri ekaminaq chupa ri kꞌisbꞌal qꞌij —xchaꞌ.
JOH 6:41 Rukꞌ kꞌu riꞌ waꞌ, raj judiꞌabꞌ xkijeq kechꞌaꞌt chirij ri Jesús ruma ri xubꞌiꞌij: «In ri in pam petinaq chilaꞌ chikaj.»
JOH 6:42 Xkibꞌiꞌij kꞌu riꞌ: «¿Na e ta nebꞌa Jesús waꞌ, rukꞌajol ri José? Riꞌoj qetaꞌam uwach ruqaw y qetaꞌam uwach ruchu. ¿Suꞌchak kꞌu riꞌ kubꞌiꞌij petinaq chilaꞌ chikaj?» xechaꞌ.
JOH 6:43 Xubꞌiꞌij kꞌu ri Jesús chike: —Mixchꞌaꞌtibꞌen chiwach chirij wa ximbꞌiꞌij.
JOH 6:44 Ma na jinta junoq kape wukꞌ riꞌin, we na e ta kꞌamayom lo ri Nuqaw, ri taqayom lo weꞌin. Yey ri kape wukꞌ, kankꞌastajisaj lo chupa ri kꞌisbꞌal qꞌij.
JOH 6:45 »Jewaꞌ kubꞌiꞌij Ruchꞌaꞌtem ri Dios chupa ri tzꞌibꞌital kan kuma ri qꞌalajisanelabꞌ: Kopon na ri qꞌij echiriꞌ e ri Dios ri kakꞌutun chikiwach konoje kachaꞌ. Y konoje ri kakita ri kubꞌiꞌij ri Nuqaw y kakimaj kꞌu ke janipa ri kubꞌiꞌij, riꞌ kekꞌun wukꞌ riꞌin.
JOH 6:46 Ma na jinta jun chik iliyom uwach ri Qaqaw Dios; xew ri jun petinaq rukꞌ ri Dios, e iliyom uwach.
JOH 6:47 »Paqatzij wi kambꞌiꞌij che alaq: China ri kakubꞌiꞌ ukꞌuꞌx wukꞌ riꞌin, kꞌo ukꞌaslemal na jinta utaqexik.
JOH 6:48 Ma in ri in pam kuya kꞌaslemal.
JOH 6:49 »Ojertan ri chuꞌqaw alaq xkitij ri maná pa ri luwar katzꞌintzꞌotik; na rukꞌ ta kꞌu riꞌ, rike xekamik.
JOH 6:50 Noꞌj riꞌin e kinchꞌaꞌt chwi ri pam kape chilaꞌ chikaj; yey we kꞌo junoq katijow re waꞌ, riꞌ na kakam taj.
JOH 6:51 »Ri pam re kꞌaslemal petinaq chilaꞌ chikaj e riꞌin. China kꞌu katijow re wa pam, kꞌo ukꞌaslemal na jinta utaqexik. Yey ri pam kanya riꞌin, e ri nutiꞌjil kanya pa kꞌax chaꞌ taq ri tikawex kꞌo kikꞌaslemal chwach ri Dios —xchaꞌ.
JOH 6:52 Ekꞌuchiriꞌ, raj judiꞌabꞌ xkijeq kakichapalaꞌ kibꞌ chikiwach, jewaꞌ kakibꞌiꞌij: «¿Suꞌanik waꞌchi karaj kuya chitijik rutiꞌjil chiqe?» kechaꞌ.
JOH 6:53 Ri Jesús xubꞌiꞌij chike: —Paqatzij wi kambꞌiꞌij che alaq: We e laꞌ na katij ta alaq ri nutiꞌjil ri in Alaxel Chikixoꞌl Tikawex y we na katij ta alaq ri nukikꞌel, riꞌ na jinta kꞌaslemal alaq.
JOH 6:54 China kꞌu ri kutij ri nutiꞌjil y ri nukikꞌel, riꞌ kꞌo ukꞌaslemal na jinta utaqexik, yey riꞌin kankꞌastajisaj lo chupa ri kꞌisbꞌal qꞌij.
JOH 6:55 Ma ri nutiꞌjil e saqil waꞌim y ri nukikꞌel e saqil yaꞌ.
JOH 6:56 China kꞌu ri kutij ri nutiꞌjil y kutij ri nukikꞌel, riꞌ kakꞌojiꞌ wukꞌ y riꞌin kinkꞌojiꞌ rukꞌ rire.
JOH 6:57 »Ri Qaqaw Dios, ri aj yaꞌl kꞌaslemal, e ri xtaqaw lo weꞌin; yey kꞌo nukꞌaslemal ruma Rire. Jekꞌulaꞌ china ri kutij ri nutiꞌjil riꞌin, riꞌ kꞌo ukꞌaslemal wuma riꞌin.
JOH 6:58 Kinchꞌaꞌt chwi ri pam petinaq chilaꞌ chikaj. Waꞌ na e ta pachaꞌ ri maná xkitij ri chuꞌqaw alaq ojertan. Ma tobꞌ xkitij ri maná, rike xekamik. Noꞌj china ri kutij re wa pam kambꞌiꞌij riꞌin, riꞌ kꞌo ukꞌaslemal na jinta utaqexik —xchaꞌ.
JOH 6:59 E kꞌutunik waꞌ xuꞌan ri Jesús pa kimolom wi kibꞌ chupa ri sinagoga re Capernaúm.
JOH 6:60 Echiriꞌ xkita ri kꞌutunik xuꞌan ri Jesús, lik e kꞌi chike rutijoꞌn xkibꞌiꞌij: «Waꞌ wa kubꞌiꞌij, lik kꞌax utayik. ¿Kꞌo nebꞌa junoq kachꞌijow ukꞌulik?» xechaꞌ.
JOH 6:61 Ekꞌu ri Jesús xunaꞌbꞌej ri chꞌaꞌtibꞌenik kakiꞌan chwi rukꞌutunik. Xutzꞌonoj kꞌu chike: —¿Kuꞌan kꞌax waꞌ che alaq?
JOH 6:62 ¿Saꞌ kꞌu riꞌ ri kaꞌan alaq we ta e laꞌ kil alaq Ralaxel Chikixoꞌl Tikawex kaqꞌan chilaꞌ chikaj pa petinaq wi?
JOH 6:63 Ri saqil kꞌaslemal na jinta utaqexik petinaq rukꞌ ri Ruxlabꞌixel ri Dios; na e ta ri petinaq xa rukꞌ ri tikawex, ma riꞌ na jinta uchak re kuya ri saqil kꞌaslemal. Ekꞌu ri chꞌaꞌtem nubꞌiꞌim riꞌin che alaq, waꞌ petinaq rukꞌ ri Ruxlabꞌixel ri Dios, ri aj yaꞌl kꞌaslemal.
JOH 6:64 Pero e kꞌo kꞌu jujun chixoꞌl alaq na kubꞌul ta kikꞌuꞌx wukꞌ —xchaꞌ. Ri Jesús xubꞌiꞌij waꞌ ma xex chi retaꞌam wi china taq ri na kubꞌul ta kikꞌuꞌx rukꞌ y china ri kakꞌayin re.
JOH 6:65 Xubꞌiꞌij tanchi ri Jesús: —Ekꞌu uwariꞌche nubꞌiꞌim che alaq: Na jinta junoq kape wukꞌ, we na e ta ri Nuqaw kꞌamayom lo re —xchaꞌ.
JOH 6:66 Chwi kꞌu riꞌ, e kꞌi chike rutijoꞌn ri Jesús xkiya kanoq y na xeterej ta chi chirij.
JOH 6:67 Ekꞌuchiriꞌ, xutzꞌonoj ri Jesús chike ri kabꞌlajuj utijoꞌn: —¿Kiwaj nebꞌa riꞌix kiꞌan iwe kiniya kanoq, pachaꞌ ri xkiꞌan rike? —xchaꞌ.
JOH 6:68 Ri Simón Pedro xukꞌul uwach: —Qajawal, ¿china chi chirij kojꞌek wi? Ma xew ukꞌ rilal kꞌo ri chꞌaꞌtem kuya kꞌaslemal na jinta utaqexik.
JOH 6:69 Riꞌoj lik kubꞌul chi qakꞌuꞌx ukꞌ la y lik qetaꞌam waꞌ: Lal Ruchaꞌoꞌn lo ri Dios, Rukꞌajol ri Dios kꞌaslik —xchaꞌ.
JOH 6:70 Ri Jesús xukꞌul uwach: —¿Na in ta nebꞌa inchaꞌyom iwe riꞌix ix kabꞌlajuj? Na rukꞌ ta kꞌu riꞌ, jun chiwe kꞌo ritzel winaq pa ranimaꞌ —xchaꞌ.
JOH 6:71 Echiriꞌ xubꞌiꞌij waꞌ, ri Jesús e xchꞌaꞌt puwi ri Judas aj Iscariot rukꞌajol ri Simón; ma e ri Judas kakꞌayin re, tobꞌ e jun chike ri kabꞌlajuj utijoꞌn.
JOH 7:1 Kꞌate tanchi kꞌu riꞌ, ri Jesús xbꞌin pa taq ri luwar re Galilea; na xraj taj kakꞌojiꞌ Judea ma chilaꞌ raj judiꞌabꞌ kakaj kakikamisaj.
JOH 7:2 Xa kꞌu naqaj chi kꞌo wi lo ruqꞌijol ri kinimaqꞌij raj judiꞌabꞌ echiriꞌ kakiꞌan kirancho.
JOH 7:3 E taq kꞌu ruchaqꞌ xkibꞌiꞌij che: —Matkanaj kan wara; jat Judea chaꞌ ri jujun chik atijoꞌn e kꞌo chilaꞌ kakilo saꞌ taq ri kaꞌano.
JOH 7:4 Ma we junoq karaj ketaꞌmax uwach, ronoje ri kuꞌano kuꞌan chiwachil. E uwariꞌche, chaꞌana waꞌ chikiwach konoje ri tikawex —xecha che.
JOH 7:5 Xkibꞌiꞌij waꞌ che ma na kakikoj taj we Rire e Ruchaꞌoꞌn lo ri Dios, tobꞌ ne rike e uchaqꞌ ri Jesús.
JOH 7:6 Xubꞌiꞌij kꞌu Rire chike: —Ri nuqꞌijol riꞌin kꞌamajaꞌ koponik; noꞌj riꞌix, xa tobꞌ pachike qꞌij utz chiwach.
JOH 7:7 Ri tikawex re ruwachulew na tzel ta kixkil riꞌix; noꞌj riꞌin lik tzel kinkilo, ma kanqꞌalajisaj chi utz ri kimak.
JOH 7:8 Jix riꞌix che ri nimaqꞌij; noꞌj riꞌin na kinꞌek ta woꞌora, ma kꞌamajaꞌ kopon ri nuqꞌijol —xchaꞌ.
JOH 7:9 Xubꞌiꞌij kꞌu waꞌ y xkanaj kan Galilea.
JOH 7:10 Ekꞌuchiriꞌ ebꞌenaq chi ruchaqꞌ, ri Jesús xeꞌek pa ri nimaqꞌij, pero na xeꞌek ta chiwachil chaꞌ taq ri winaq na kakinaꞌbꞌej taj.
JOH 7:11 Pa ri nimaqꞌij raj judiꞌabꞌ lik kakitzukuj ri Jesús, y jewaꞌ kakibꞌiꞌij: «¿Pa nawi kꞌo wi laꞌ la jun achi?» kechaꞌ.
JOH 7:12 Chikixoꞌl ri winaq lik e kꞌi ri kakichꞌaꞌtibꞌej ri Jesús. Jujun kakibꞌiꞌij: «Laꞌ la Jesús lik utz ukꞌuꞌx» kechaꞌ. Yey e kꞌo jujun chik kakibꞌiꞌij: «Laꞌ la Jesús lik na utz ta ri kuꞌano ma xa kebꞌusok ri winaq» kechaꞌ.
JOH 7:13 Pero na jinta kꞌu junoq kachꞌaꞌt puwi ri Jesús chiwachil; xa xeꞌlaqꞌay kechꞌaꞌt puwiꞌ, ma kakixiꞌij kibꞌ chikiwach raj judiꞌabꞌ e aj wach.
JOH 7:14 Ekꞌu riꞌ nikꞌajarinaq chi ri nimaqꞌij xopon ri Jesús pa ri Rocho Dios y xujeqo kakꞌutun chikiwach.
JOH 7:15 Raj judiꞌabꞌ lik xkam kanimaꞌ che y jewaꞌ xkibꞌiꞌij: «¿Chaꞌtaj lik kꞌo retaꞌam yey na jinta kꞌo kꞌutuyum chwach?» xechaꞌ.
JOH 7:16 Ri Jesús xukꞌul uwach: —Ri kintajin che ukꞌutik na xa ta pa we riꞌin kanꞌano; ma waꞌ petinaq rukꞌ ri taqayom lo weꞌin.
JOH 7:17 We kꞌo kꞌu junoq lik kuya ribꞌ che uꞌanik ri karaj ri Dios, riꞌ karetaꞌmaj we ri kankꞌutu rukꞌ ri Dios kape wi, o we xa pa we riꞌin kinchꞌaꞌtik.
JOH 7:18 Ma china ri xa pa re kachꞌaꞌtik, riꞌ xew karaj kayak uqꞌij kuma ri winaq. Noꞌj china ri karaj e kayak uqꞌij ri taqayom lo re, riꞌ lik qatzij ri kutzijoj y na jinta kꞌana raqꞌubꞌal kuꞌano.
JOH 7:19 »¿Na qatzij ta nebꞌa laꞌ e ri Moisés xyaꞌw che alaq ri Tzij Pixabꞌ? Na rukꞌ ta kꞌu riꞌ, na jinta junoq che alaq kaꞌanaw re ronoje ri kꞌo chupa wa Tzij Pixabꞌ. ¿Suꞌchak kaꞌaj alaq kinkamisaj alaq? —xchaꞌ.
JOH 7:20 Ekꞌu taq ri winaq xkikꞌul uwach: —Lal kꞌo puqꞌabꞌ jun itzel uxlabꞌixel. ¿China ri karaj kakamisan e la? —xechaꞌ.
JOH 7:21 Ri Jesús xubꞌiꞌij chike: —Riꞌin kꞌo jun kꞌutubꞌal re ruchuqꞌabꞌ ri Dios xinꞌano, yey onoje ralaq lik kakam animaꞌ alaq che ma xinꞌan waꞌ chupa ri qꞌij re uxlanibꞌal.
JOH 7:22 »Paqatzij wi, ri Moisés xuya che alaq ri jun taqanik re ri retalil re circuncisión tobꞌ na e ta rire xjeqow loq, ma e xejeqow lo re ri qatiꞌ-qamam ojertan. Yey ralaq kakoj alaq ri retalil re circuncisión che junoq tobꞌ pa ri qꞌij re uxlanibꞌal.
JOH 7:23 Kaꞌan alaq waꞌ ma ri taqanik re ri Moisés kutaq che kaꞌaniꞌ ri circuncisión pa ri uwajxaq qꞌij ralaxibꞌem juna ralko ala. Kaꞌan kꞌu alaq riꞌ, tobꞌ waꞌ katzaq pa ri qꞌij re uxlanibꞌal, chaꞌ na kapalajij ta alaq wa taqanik re ri Moisés. ¿Suꞌbꞌe kꞌu riꞌ kꞌo oyowal alaq chwij riꞌin ruma xinkunaj jun achi pa ri qꞌij re uxlanibꞌal?
JOH 7:24 »Makoj alaq umak junoq xa ruma kachꞌobꞌ alaq etaꞌam alaq ri uꞌanom; ri ꞌana alaq e chꞌobꞌo alaq rukꞌ saqil naꞌoj puwi ri paqatzij wi uꞌanom, we kꞌo umak o na jintaj —xchaꞌ.
JOH 7:25 E kꞌo jujun chike ri e aj Jerusalem kakitzꞌonobꞌej: «¿Na e ta achi waꞌ ketajin che utzukuxik re kakikamisaj?
JOH 7:26 ¿Suꞌchak kꞌu riꞌ kayaꞌ luwar che kachꞌaꞌt chiwachil yey na jinta ne junoq kaqꞌaten re? ¿Kikojom chi nawi raj wach re ri tinamit rire e ri Cristo, Ruchaꞌoꞌn lo ri Dios?
JOH 7:27 Ma riꞌoj qetaꞌam chi utz pa kape wi waꞌchi; noꞌj we xkꞌun ri Cristo, riꞌ na jinta junoq etaꞌmayom re pa kape wi» kechaꞌ.
JOH 7:28 Ri Jesús kakꞌutun pa ri Rocho Dios echiriꞌ xuta waꞌ. Lik ko kꞌu xsikꞌin che ubꞌiꞌxikil: —Kabꞌiꞌij ralaq lik etaꞌam alaq nuwach y lik etaꞌam alaq pa kimpe wi. Pero lik chetaꞌmaj kꞌu alaq waꞌ: Riꞌin na in petinaq ta xa pa we riꞌin, ma intaqom lo ruma ri Jun lik ubꞌe ronoje taq ri kuꞌano. Yey ralaq na etaꞌam ta alaq uwach Rire.
JOH 7:29 Noꞌj riꞌin wetaꞌam uwach, ma rukꞌ Rire in petinaq wi y e Rire taqayom lo weꞌin —xchaꞌ.
JOH 7:30 Ekꞌuchiriꞌ, raj wach xkaj e riꞌ kakichap bꞌi ri Jesús; pero na jinta junoq xꞌanaw re, ma kꞌamajaꞌ kopon ruqꞌijol.
JOH 7:31 Na rukꞌ ta kꞌu riꞌ, chikixoꞌl rukꞌiyal winaq, lik e kꞌi xkubꞌiꞌ kikꞌuꞌx rukꞌ ri Jesús y kakibꞌiꞌij: «Chiwach ralaq, echiriꞌ kakꞌun Ruchaꞌoꞌn lo ri Dios, ¿kuꞌan kami más kꞌutubꞌal riꞌ re ruchuqꞌabꞌ ri Dios chwa wa kuꞌan waꞌchi?» kechaꞌ.
JOH 7:32 Ri fariseos xkita ri kakibꞌiꞌij ri winaq puwi ri Jesús. E uwariꞌche, rike kukꞌ ri nimaq e aj chakunel pa Rocho Dios xekitaq bꞌi ri e chajinel re ri Rocho Dios chaꞌ kakichap lo ri Jesús.
JOH 7:33 Xubꞌiꞌij kꞌu ri Jesús: —Riꞌin na naj ta chi kinkꞌojiꞌ ukꞌ alaq, ma kintzelej rukꞌ ri taqayom lo weꞌin.
JOH 7:34 Kopon na kꞌu riꞌ ri qꞌij echiriꞌ kintzukuj alaq; pero na kinriq ta alaq, ma na kopon ta alaq pa kineꞌkꞌola wi riꞌin —xchaꞌ.
JOH 7:35 Ekꞌu ri e aj judiꞌabꞌ xkijeq kakitzꞌonobꞌej chikiwach: «¿Pa nawi keꞌek wi waꞌchi yey na keꞌqariqa ta riꞌoj? ¿Keꞌek nawi kukꞌ ri e aj judiꞌabꞌ ejeqel chikixoꞌl ri e aj griegos y keꞌkꞌutuna chikiwach?
JOH 7:36 ¿Saꞌ keꞌelawi wa xubꞌiꞌij chiqe: “Kintzukuj alaq; pero na kinriq ta alaq, ma na kopon ta alaq pa kineꞌkꞌola wi riꞌin”?» kechaꞌ.
JOH 7:37 Che ri kꞌisbꞌal re ri nimalaj nimaqꞌij, ri Jesús xtakꞌiꞌ chikiwach ri winaq y ko xsikꞌin che ubꞌiꞌxikil: «We kꞌo junoq katzajin uchiꞌ, petoq y chutija re ri yaꞌ kꞌo wukꞌ,
JOH 7:38 ma e pachaꞌ kubꞌiꞌij Ruchꞌaꞌtem ri Dios: Ri kakubꞌiꞌ ukꞌuꞌx wukꞌ riꞌin, kuꞌana pachaꞌ kajuljut taq lo akꞌal re yaꞌ kꞌaslik pa ranimaꞌ» xchaꞌ.
JOH 7:39 Rukꞌ waꞌ ri Jesús e kachꞌaꞌt puwi ri Ruxlabꞌixel ri Dios ri kakikꞌul na janipa ri kakubꞌiꞌ kikꞌuꞌx rukꞌ. Yey kꞌamajaꞌ kꞌu kakꞌun riꞌ ri Ruxlabꞌixel ri Dios ma kꞌamajaꞌ ne keꞌek ri Jesús chilaꞌ chikaj pa kaqꞌalajisax wi runimal uchomalil.
JOH 7:40 E kꞌo kꞌu jujun chike ri winaq, echiriꞌ xkita waꞌ, jewaꞌ kakibꞌiꞌij: «Paqatzij wi waꞌchi e ri jun qꞌalajisanel re ri Dios qoyeꞌem kakꞌunik» kechaꞌ.
JOH 7:41 Jujun chik jewaꞌ kakibꞌiꞌij: «Waꞌ waꞌchi e ri Cristo, Ruchaꞌoꞌn lo ri Dios» kechaꞌ. Yey jujun chik jewaꞌ kakibꞌiꞌij: «¿Galilea nebꞌa kape wi lo ri Cristo?
JOH 7:42 Na Galilea taj, ma tzꞌibꞌital kan chupa Ruchꞌaꞌtem ri Dios, ri Cristo kalax lo chikixoꞌl ri ratz-uchaqꞌ kan ri rey David pa ri tinamit Belén, rutinamit ri David» kechaꞌ.
JOH 7:43 Jekꞌulaꞌ riꞌ ri winaq jachatal kipa ruma junwi taq ri kakichꞌobꞌ raqan puwi ri Jesús.
JOH 7:44 E kꞌo ne jujun chike ri winaq xkaj kakichap bꞌi ri Jesús, pero na jinta junoq xꞌanaw re.
JOH 7:45 Ri e chajinel re ri Rocho Dios xetzelej pa e kꞌo wi ri xetaqaw lo ke, waꞌ e ri fariseos y ri nimaq e aj chakunel pa Rocho Dios, yey rike xkitzꞌonoj chike raj chajinel: —¿Suꞌchak na xikꞌam ta lo ri Jesús? —xechaꞌ.
JOH 7:46 Ri e chajinel jekꞌuwaꞌ xkikꞌul uwach: —¡Na jinta junoq jelaꞌ chꞌaꞌtinaq pachaꞌ kachꞌaꞌt waꞌ waꞌchi! —xechaꞌ.
JOH 7:47 Ekꞌu ri fariseos xkibꞌiꞌij chike: —¿Xixsokotaj kami riꞌ riꞌix ruma rire?
JOH 7:48 ¿Kꞌo nebꞌa junoq chike raj wach re ri tinamit o chike ri fariseos xkubꞌiꞌ ukꞌuꞌx rukꞌ waꞌ waꞌchi?
JOH 7:49 Noꞌj wa winaq eteran chirij ri Jesús, lik itzel kiwachlibꞌal ma na kakimaj ta kꞌana usukꞌ ri Tzij Pixabꞌ —xechaꞌ.
JOH 7:50 Ekꞌu ri Nicodemo, ri jun fariseo xopon julaj chaqꞌabꞌ rukꞌ ri Jesús, jewaꞌ xubꞌiꞌij chike:
JOH 7:51 —Kubꞌiꞌij ri Tzij qeꞌoj, na utz taj kaqꞌat tzij puwi junoq, we na kataꞌ ta uchiꞌ nabꞌe y we na ketaꞌmax ta nabꞌe we kꞌo juna mak uꞌanom —xchaꞌ.
JOH 7:52 Xkikꞌul kꞌu uwach ri Nicodemo: —¿Lal kami aj Galilea rilal? Chajilaj la chi utz Ruchꞌaꞌtem ri Dios y jelaꞌ ketaꞌmaj la we kꞌo juna qꞌalajisanel elinaq lo chikixoꞌl raj Galilea —xechaꞌ.
JOH 7:53 Ekꞌuchiriꞌ, chikijujunal xebꞌek chikocho.
JOH 8:1 Ri Jesús xeꞌek chwa ri juyubꞌ Olivos.
JOH 8:2 Echiriꞌ xsaqirik, xtzelej tanchi pa ri Rocho Dios. Konoje ri winaq xeqibꞌ rukꞌ y Rire xtzꞌuyiꞌ chikiwach y xujeqo kuꞌan kꞌutunik.
JOH 8:3 Ekꞌuchiriꞌ, raj kꞌutunel re ri tzijpixabꞌ y ri fariseos xkikꞌam lo jun ixoq chwach. Waꞌ wiꞌxoq xkimajo e riꞌ kamakun chirij ri kꞌulanikil rukꞌ jun achi na rachijil taj. Xkiya kꞌu chikinikꞌajal konoje ri e kꞌo chiriꞌ
JOH 8:4 y jewaꞌ xkibꞌiꞌij che ri Jesús: —Lal tijonel, wa jun ixoq xqamajo lik e riꞌ kamakun chirij ri kꞌulanikil rukꞌ jun achi na rachijil taj.
JOH 8:5 Yey ri Moisés, chupa ri Tzij Pixabꞌ kataqan che kaꞌan paꞌbꞌaj juna ixoq we kuꞌan waꞌ. ¿Saꞌ kꞌu ri kabꞌiꞌij rilal che? —xechaꞌ.
JOH 8:6 Xkibꞌiꞌij waꞌ che ri Jesús xa re kꞌambꞌal upa chaꞌ kakikoj umak. Ekꞌu ri Jesús xchꞌukiꞌik y rukꞌ ruwi uqꞌabꞌ xujeq katzꞌibꞌan chwa rulew.
JOH 8:7 Yey rike lik kakikꞌot upa chaꞌ kukꞌul uwach ri tzꞌonobꞌal. Ekꞌu ri Jesús xtakꞌiꞌik y xubꞌiꞌij chike: —We kꞌo junoq che alaq kunaꞌo na jinta kꞌana umak, e nabꞌe riꞌ chukꞌaqa rabꞌaj che wiꞌxoq —xchaꞌ.
JOH 8:8 Tekꞌuchiriꞌ, xchꞌukiꞌ tanchik y rukꞌ ruwi uqꞌabꞌ xtzꞌibꞌan tanchi chwa rulew.
JOH 8:9 Konoje rike echiriꞌ xkita waꞌ wa xubꞌiꞌij, xkinaꞌ kibꞌ kꞌo kimak. E uwariꞌche, pa jujun xebꞌel bꞌi. Nabꞌe xebꞌel bꞌi ri e nimaq winaq; tekꞌuchiriꞌ, ri e kꞌakꞌal. Echiriꞌ konoje ebꞌelinaq chubꞌi, xew ri Jesús y rixoq xekanaj kan chiriꞌ.
JOH 8:10 Ekꞌuchiriꞌ xtakꞌiꞌ ri Jesús y xrilo na jinta chi junoq chiriꞌ, xew chi rixoq, xubꞌiꞌij kꞌu che: —Ixoq ¿pa e kꞌo wi ri kakikoj amak? ¿Na jinta junoq xuqꞌat tzij re kamik pawiꞌ? —xchaꞌ.
JOH 8:11 Rixoq xubꞌiꞌij che: —Na jinta junoq, Wajawal —xchaꞌ. Ekꞌuchiriꞌ, ri Jesús xubꞌiꞌij che: —Jenelaꞌ riꞌin na kanqꞌat ta tzij re kamik pawiꞌ. Jat kꞌu riꞌ y matmakun chik —xchaꞌ.
JOH 8:12 Ri Jesús xchꞌaꞌt tanchi kukꞌ ri winaq, jewaꞌ xubꞌiꞌij chike: —In ri Qꞌijsaq che ruwachulew. China kꞌu ri katerej lo chwij, na kabꞌin ta chi kꞌenoq pa qꞌequꞌm ma kꞌo ri Qꞌijsaq rukꞌ yey waꞌ e ri kuya kꞌaslemal —xchaꞌ.
JOH 8:13 Ekꞌuchiriꞌ, ri fariseos xkibꞌiꞌij che ri Jesús: —Na jinta uchak ri kabꞌiꞌij la, ma xa chiꞌibꞌil ibꞌ la kabꞌiꞌij la saꞌ ri wach la —xechaꞌ.
JOH 8:14 Ri Jesús xukꞌul uwach: —Tobꞌ in ri kinqꞌalajisan re saꞌ ri nuwach, ri kambꞌiꞌij lik qatzij; ma wetaꞌam pa in petinaq wi y wetaꞌam pa kinꞌek wi. Noꞌj ralaq na etaꞌam ta alaq pa in petinaq wi y na etaꞌam tane alaq pa kinꞌek wi.
JOH 8:15 »Ralaq, echiriꞌ kabꞌiꞌij alaq saꞌ ri kachꞌobꞌ alaq puwi junoq, kaꞌan alaq waꞌ xa rukꞌ ri naꞌoj re ruwachulew. Noꞌj riꞌin na je ta laꞌ kanꞌano.
JOH 8:16 Echiriꞌ kꞌo kanqꞌalajisaj chirij junoq, qatzij ri kambꞌiꞌij. Ma na xa ta pa we riꞌin ri kambꞌiꞌij; ma ri nunaꞌoj riꞌin lik junam rukꞌ runaꞌoj ri Nuqaw, ri xtaqaw lo weꞌin.
JOH 8:17 »Yey chupa ri Tzij Pixabꞌ e alaq, tzꞌibꞌital kanoq: “We e kꞌo kaꞌibꞌ tikawex junam kakijikibꞌaꞌ uwach ri kakibꞌiꞌij, e kakoj ke riꞌ.”
JOH 8:18 Ri kanqꞌalajisaj riꞌin chiwibꞌil wibꞌ, kajikibꞌax uwach ruma ri Nuqaw, ri taqayom lo weꞌin —xchaꞌ.
JOH 8:19 Xkitzꞌonoj kꞌu che: —¿Pa kꞌu kꞌo wi ri qaw la? —xechaꞌ. Ri Jesús xukꞌul uwach: —Ralaq na etaꞌam ta alaq nuwach riꞌin y na etaꞌam ta alaq uwach ri Nuqaw; ma we ta etaꞌam alaq nuwach riꞌin, jekꞌulaꞌ riꞌ etaꞌam alaq uwach ri Nuqaw —xchaꞌ.
JOH 8:20 Ri Jesús xubꞌiꞌij waꞌ echiriꞌ kakꞌutun pa ri Rocho Dios, chiriꞌ pa kꞌo wi ri kaxa re qasaꞌn. Noꞌj na jinta junoq xchapaw bꞌi re, ma kꞌamajaꞌ kopon ruqꞌijol.
JOH 8:21 Xubꞌiꞌij tanchi ri Jesús chike: —Riꞌin kinꞌek y ralaq kintzukuj kꞌu alaq, pero kakam na kꞌu alaq riꞌ pa ri mak alaq. Ma pa kinꞌek wi riꞌin, na kopon ta ralaq chilaꞌ —xchaꞌ.
JOH 8:22 Xkibꞌiꞌij kꞌu raj judiꞌabꞌ chikiwach: «Laj kukamisaj ribꞌ; e uwariꞌche kubꞌiꞌij na utz taj kojopon riꞌoj chilaꞌ pa keꞌek wi rire» xechaꞌ.
JOH 8:23 Ekꞌu ri Jesús xubꞌiꞌij chike: —Ralaq na alaq ta re chilaꞌ chikaj, noꞌj riꞌin in petinaq chilaꞌ chikaj. Ralaq alaq re ruwachulew, noꞌj riꞌin na in ta re ruwachulew.
JOH 8:24 E uwariꞌche ximbꞌiꞌij kakam na kꞌu alaq riꞌ pa ri mak alaq. Ma we na kakoj ta alaq “In Riꞌin”, riꞌ kakam alaq pa ri mak alaq —xchaꞌ.
JOH 8:25 Ekꞌuchiriꞌ xkitzꞌonoj che: —¿Lal china kꞌu riꞌ rilal? —xechaꞌ. Ri Jesús xukꞌul uwach: —E ri nubꞌiꞌim chi lo che alaq.
JOH 8:26 Riꞌin lik kꞌo wetaꞌam chiꞌij alaq re kojobꞌal mak alaq y re qꞌatbꞌal tzij pawiꞌ alaq; pero xew kambꞌiꞌij chikiwach konoje ri tikawex saꞌ ri nutom che ri taqayom lo weꞌin, yey Rire lik qatzij janipa ri kubꞌiꞌij —xchaꞌ.
JOH 8:27 Ri Jesús e kachꞌaꞌt puwi Ruqaw, pero rike na xkimaj ta usukꞌ waꞌ.
JOH 8:28 E uwariꞌche ri Jesús xubꞌiꞌij chike: —Echiriꞌ kayak alaq Ralaxel Chikixoꞌl Tikawex y kaya alaq chwa ri cruz, kꞌa ekꞌuchiriꞌ ketaꞌmaj alaq riꞌ: “In Riꞌin”. Yey na jinta kꞌo kanꞌan xa pa we riꞌin, ma xew kambꞌiꞌij janipa rukꞌutum ri Nuqaw chwe.
JOH 8:29 Ma ri taqayom lo weꞌin kꞌo wukꞌ; ri Nuqaw na inuyaꞌom ta kan nutukel, ma riꞌin xew kanꞌano janipa ri karaj Rire —xchaꞌ.
JOH 8:30 Echiriꞌ xubꞌiꞌij taq waꞌ ri Jesús, lik e kꞌi ri xkikojo Rire e ri jun qꞌalajisanel koyeꞌem kakꞌunik.
JOH 8:31 Ekꞌuchiriꞌ, ri Jesús xubꞌiꞌij chike ri e aj judiꞌabꞌ xkikojo Rire e ri jun qꞌalajisanel koyeꞌem kakꞌunik. —We kataqej kꞌu alaq janipa wa kambꞌiꞌij che alaq, riꞌ paqatzij wi kuꞌan alaq nutijoꞌn;
JOH 8:32 y jekꞌulaꞌ ketaꞌmaj alaq ri Qꞌijsaq, y ri Qꞌijsaq karesaj lo alaq puqꞌabꞌ ri ajaw alaq —xchaꞌ.
JOH 8:33 Rike xkikꞌul uwach: —Riꞌoj oj ralkꞌoꞌal kan ri Abraham y na oj kꞌojiꞌnaq ta puqꞌabꞌ junoq. ¿Suꞌbꞌe kꞌu riꞌ kabꞌiꞌij la chiqe kojesax lo puqꞌabꞌ ri qajaw? —xechaꞌ.
JOH 8:34 Ri Jesús xubꞌiꞌij chike: —Paqatzij wi kambꞌiꞌij che alaq: Konoje ri kemakunik, puqꞌabꞌ ri mak e kꞌo wi.
JOH 8:35 Juna aj chak pa ja na junam ta uwach rukꞌ rukꞌajol ri rajaw ja, ma ri aj chak xa ajilam qꞌij kꞌo pa ja; noꞌj rukꞌajol na jinta utaqexik e ralkꞌoꞌal ruqaw.
JOH 8:36 E uwariꞌche, we Rukꞌajol ri Dios karesaj lo alaq che ri mak kꞌo wi alaq, paqatzij wi kꞌu riꞌ kakiritaj lo alaq che ri mak.
JOH 8:37 »Riꞌin wetaꞌam alaq ralkꞌoꞌal kan ri Abraham; na rukꞌ ta kꞌu riꞌ, kaꞌaj alaq kinkamisaj alaq ma na kakꞌul ta alaq ri kankꞌut che alaq.
JOH 8:38 Riꞌin e kambꞌiꞌij ri ukꞌutum ri Nuqaw chwe, yey ralaq e kaꞌan alaq janipa rubꞌiꞌim ri qaw alaq —xchaꞌ.
JOH 8:39 Rike xkikꞌul uwach: —Ri qaqaw riꞌoj e ri Abraham —xechaꞌ. Ekꞌu ri Jesús xubꞌiꞌij chike: —We ta paqatzij wi alaq ralkꞌoꞌal ri Abraham, e kaꞌan alaq riꞌ ri xuꞌan rire.
JOH 8:40 Noꞌj ralaq na je ta laꞌ katajin alaq che uꞌanik. Ma tobꞌ nubꞌiꞌim che alaq ri Qꞌijsaq ukꞌutum ri Dios chwe, na rukꞌ ta kꞌu riꞌ, kaꞌaj alaq kinkamisaj alaq. ¡Ri Abraham na je ta laꞌ xuꞌano!
JOH 8:41 Ralaq e kaꞌan alaq pachaꞌ ri kuꞌan ri qaw alaq —xchaꞌ. Ekꞌuchiriꞌ, xkibꞌiꞌij rike che: —Riꞌoj na oj ta pachaꞌ ri winaq na ketaꞌam taj china ri kiqaw; ma xa jun ri Qaqaw, e ri Dios —xechaꞌ.
JOH 8:42 Xubꞌiꞌij kꞌu ri Jesús chike: —We ta paqatzij wi e qaw alaq ri Dios, ralaq lik kꞌax kinnaꞌ alaq riꞌ, ma riꞌin rukꞌ ri Dios in petinaq wi yey riꞌ in kꞌo chiwach alaq. Na in petinaq ta kꞌu xa pa we riꞌin, ma e ri Dios taqayom lo weꞌin.
JOH 8:43 »¿Suꞌbꞌe na kamaj ta alaq usukꞌ janipa ri kambꞌiꞌij che alaq? E ruma ri na kaꞌaj ta alaq kata alaq ri kambꞌiꞌij riꞌin.
JOH 8:44 Ri qaw alaq e ritzel winaq, ma e kaꞌan alaq saꞌ ri karaj rire. Ritzel winaq aj kamisanel chwi lo ri jeqebꞌal ruwachulew. Yey rire na xtikiꞌ ta kan pa ri Qꞌijsaq, y na jinta ne kꞌana Qꞌijsaq rukꞌ. Echiriꞌ kuꞌan raqꞌubꞌal, e kuqꞌalajisaj saꞌ ri kꞌo pa ranimaꞌ; ma xex wi aj raqꞌul yey ronoje raqꞌubꞌal rukꞌ rire kape wi.
JOH 8:45 Noꞌj riꞌin e kanqꞌalajisaj ri lik qatzij, yey ralaq na kakoj ta alaq.
JOH 8:46 »¿Kꞌo nawi junoq che alaq kuriq juna mak chwij? Yey we qatzij ri kambꞌiꞌij, ¿suꞌbꞌe kꞌu riꞌ na kakoj ta alaq?
JOH 8:47 E junoq ralkꞌoꞌal ri Dios, e kuta Ruchꞌaꞌtem ri Dios; noꞌj ralaq na alaq ta ralkꞌoꞌal ri Dios, ma na kata ta alaq Ruchꞌaꞌtem —xchaꞌ.
JOH 8:48 Ekꞌuchiriꞌ, raj judiꞌabꞌ xkibꞌiꞌij che ri Jesús: —Lik qatzij ri xqabꞌiꞌij pawiꞌ la: Rilal lal kukꞌil ri aj Samaria y lal kꞌo puqꞌabꞌ jun itzel uxlabꞌixel —xechaꞌ.
JOH 8:49 Ekꞌu ri Jesús xukꞌul uwach chike: —Riꞌin na in jinta puqꞌabꞌ juna itzel uxlabꞌixel; ri kanꞌano e kanyak uqꞌij ri Nuqaw y ralaq kakꞌaq bꞌi alaq nuqꞌij.
JOH 8:50 Riꞌin na kantzukuj ta yakbꞌal nuqꞌij, tobꞌ kꞌo Jun karaj kayakiꞌ nuqꞌij yey puqꞌabꞌ Rire kꞌo wi kuqꞌalajisaj china ri kꞌo Qꞌijsaq rukꞌ.
JOH 8:51 Paqatzij wi kambꞌiꞌij che alaq: China ri kakojow re ri kanqꞌalajisaj riꞌin, na kakam taj ma kꞌo ukꞌaslemal na jinta utaqexik —xchaꞌ.
JOH 8:52 Ekꞌuchiriꞌ, raj judiꞌabꞌ xkikꞌul uwach: —Woꞌora kaqajikibꞌaꞌ uwach, lal kꞌo puqꞌabꞌ jun itzel uxlabꞌixel. Ma ri Abraham y ri qꞌalajisanelabꞌ xekamik, yey rilal kabꞌiꞌij la: “China kakojow re ri kanqꞌalajisaj, na kakam taj ma kꞌo ukꞌaslemal na jinta utaqexik.”
JOH 8:53 ¿Lik nebꞌa más kꞌo wach rilal chwa ri qaqaw Abraham? Rire xkamik yey taq ri qꞌalajisanelabꞌ xekamik. Chiwach rilal, ¿saꞌ ri wach la? —xechaꞌ.
JOH 8:54 Ri Jesús xukꞌul uwach: —We kanyak nuqꞌij riꞌin chiwibꞌil wibꞌ, riꞌ na jinta uchak ri yakbꞌal nuqꞌij kanꞌano; noꞌj kꞌu ri kayakaw nuqꞌij e ri Nuqaw, ri kabꞌiꞌij alaq e Dios alaq.
JOH 8:55 Ekꞌu ralaq na etaꞌam ta alaq uwach Rire; noꞌj riꞌin lik wetaꞌam uwach. We ta e laꞌ kambꞌiꞌij na wetaꞌam ta uwach, riꞌ kinelik in aj raqꞌul jelaꞌ pachaꞌ ralaq. Noꞌj riꞌin paqatzij wi wetaꞌam uwach Rire yey lik kanꞌan ronoje ri kubꞌiꞌij.
JOH 8:56 Ri Abraham, ri mam alaq ojertan, lik xkiꞌkotik echiriꞌ xretaꞌmaj kinkꞌun che ruwachulew; xril pan ri nuqꞌijol y lik xkiꞌkot che —xchaꞌ.
JOH 8:57 Ekꞌuchiriꞌ, raj judiꞌabꞌ xkibꞌiꞌij che ri Jesús: —Kꞌamajaꞌ ne cincuenta ri junabꞌ la, ¿yey kabꞌiꞌij la xil la uwach ri Abraham? —xechaꞌ.
JOH 8:58 Ri Jesús xukꞌul uwach: —Paqatzij wi kambꞌiꞌij che alaq: Riꞌin xex chi in kꞌo lo wi echiriꞌ kꞌamajaꞌ ne kalax ri Abraham —xchaꞌ.
JOH 8:59 Ekꞌuchiriꞌ, ri winaq xkijeq kakisikꞌ abꞌaj re kakiꞌan ri Jesús paꞌbꞌaj; noꞌj Rire xewax chikiwach, e laꞌ xikꞌow chikixoꞌl y xel bꞌi che ri Rocho Dios.
JOH 9:1 Ri Jesús echiriꞌ katajin chi bꞌe, xril jun achi ralaxibꞌem potzꞌ.
JOH 9:2 Ekꞌu rutijoꞌn xkitzꞌonoj che: —Lal tijonel, ¿wa jun achi xalaxik potzꞌ ruma nawi kimak ruchu-uqaw o ruma umak rire? —xechaꞌ.
JOH 9:3 Ri Jesús xukꞌul uwach chike: —Na ruma ta umak rire y na ruma tane kimak ruchu-uqaw; waꞌ e uꞌanom chaꞌ ruchuqꞌabꞌ ri Dios kaqꞌalajin rukꞌ rire.
JOH 9:4 Lik chirajawaxik chwe kanꞌan ruchak ri taqayom lo weꞌin xaloqꞌ kꞌa paqꞌij, ma kakꞌun lo raqꞌabꞌ echiriꞌ na jinta chi junoq utz kachakunik.
JOH 9:5 Xaloqꞌ kꞌu in kꞌo riꞌin wara che wuꞌwachulew, in ri in Qꞌijsaq che ruwachulew —xchaꞌ.
JOH 9:6 Echiriꞌ ubꞌiꞌim chi waꞌ, ri Jesús xchubꞌan chwa rulew, xuꞌan jubꞌiqꞌ xoqꞌoꞌl rukꞌ rukꞌaxaj. Tekꞌuchiriꞌ, xusoqꞌ che ruwach ri potzꞌ.
JOH 9:7 Ekꞌuchiriꞌ, xubꞌiꞌij che: —Jat, jaꞌchꞌaja rawach pa ri yaꞌ re Siloé —xchaꞌ. (Siloé keꞌelawi “ri Taqom loq”.) Ri potzꞌ e xuꞌano; xeꞌek y xuꞌchꞌaja ruwach. Ekꞌuchiriꞌ xtzelej loq, katzuꞌn chik.
JOH 9:8 Ekꞌu ri ejeqel lo chunaqaj ri potzꞌ y ri kilom xaqi kuꞌan ulimoxna, jewaꞌ kakibꞌiꞌij: «¿Na e ta nebꞌa achi waꞌ katzꞌuyiꞌ chiꞌ bꞌe y kuꞌan ulimoxna?» kechaꞌ.
JOH 9:9 Jujun chik kakibꞌiꞌij: «Qatzij, areꞌ» kechaꞌ. Jujun chik kakibꞌiꞌij: «Na e ta rire, tobꞌ lik e katzuꞌnik» kechaꞌ. Noꞌj rachi kunutajinaq chik, lik kujikibꞌaꞌ uwach, jewaꞌ kubꞌiꞌij: «Qatzij, in waꞌ kꞌut» kachaꞌ.
JOH 9:10 Xkitzꞌonoj kꞌu che: —¿Chaꞌta laꞌ xat-tzuꞌnik? —xecha che.
JOH 9:11 Rire xukꞌul uwach: —E ri jun achi Jesús ubꞌiꞌ, xuꞌan jubꞌiqꞌ xoqꞌoꞌl, xusoqꞌ che ri nuwach y xubꞌiꞌij chwe: “Jat pa kꞌo wi ri yaꞌ re Siloé y jaꞌchꞌaja rawach chupa.” Xinꞌek kꞌu riꞌ, y echiriꞌ xinchꞌaj ri nuwach, xinjeq kintzuꞌnik —xchaꞌ.
JOH 9:12 Xkitzꞌonoj kꞌu che: —¿Pa kꞌo wi riꞌ laꞌ laꞌchi? —xecha che. Rire xukꞌul uwach: —Na wetaꞌam taj pa kꞌo wi —xchaꞌ.
JOH 9:13 Ekꞌuchiriꞌ xkikꞌam bꞌi ri potzꞌ kunutajinaq chik chikiwach ri fariseos;
JOH 9:14 ma e pa jun qꞌij re uxlanibꞌal echiriꞌ ri Jesús xuꞌan xoqꞌoꞌl y xukunaj ri potzꞌ.
JOH 9:15 Jenelaꞌ ri fariseos xkitzꞌonoj che chaꞌtaj xtzuꞌnik. Rire xukꞌul uwach chike: —Rachi xusoqꞌ xoqꞌoꞌl che ri nuwach, xinchꞌaj kꞌu ri nuwach y woꞌora kintzuꞌnik —xchaꞌ.
JOH 9:16 Ekꞌuchiriꞌ, jujun chike ri fariseos kakibꞌiꞌij chikiwach: «Laꞌ laꞌchi xꞌanaw re waꞌ, na rukꞌ ta ri Dios petinaq wi; ma e kuꞌan ri na ubꞌe taj kaꞌaniꞌ chupa ri qꞌij re uxlanibꞌal» kechaꞌ. Jujun chik kakibꞌiꞌij: «We rire aj mak, ¿suꞌanik kꞌu riꞌ kuꞌan wa kꞌutubꞌal re ruchuqꞌabꞌ ri Dios?» kechaꞌ. Ruma kꞌu laꞌ, xkijach kipa ri fariseos chikiwach.
JOH 9:17 Ekꞌuchiriꞌ, xkitzꞌonoj che rachi kunutajinaq chik: —¿Saꞌ ri kabꞌiꞌij riꞌat chwi rachi xutzuꞌnisaj rawach? —xechaꞌ. Rire xukꞌul uwach: —Riꞌin kambꞌiꞌij e jun qꞌalajisanel —xchaꞌ.
JOH 9:18 Pero raj judiꞌabꞌ na xkaj taj kakikojo we rachi xex potzꞌ wi y woꞌora katzuꞌnik. Ruma waꞌ xekisikꞌij ruchu-uqaw,
JOH 9:19 y xkitzꞌonoj kꞌu chike: —¿E alkꞌoꞌal alaq waꞌ, ri kabꞌiꞌij alaq ralaxibꞌem potzꞌ? ¿Chaꞌtaj katzuꞌn woꞌora? —xechaꞌ.
JOH 9:20 Ruchu-uqaw rachi xkikꞌul uwach: —Riꞌoj lik qetaꞌam e qalkꞌoꞌal waꞌ y xalaxik potzꞌ.
JOH 9:21 Noꞌj na qetaꞌam taj chaꞌtaj katzuꞌn woꞌora, y na qetaꞌam ta nenareꞌ china xkunan re. Tzꞌonoj alaq che, ma rire nim chik —xechaꞌ.
JOH 9:22 Ruchu-uqaw rachi xkibꞌiꞌij waꞌ ruma kakixiꞌij kibꞌ, ma wa aj wach ke raj judiꞌabꞌ kiꞌanom chi tzij chikiwach chaꞌ na kekꞌul ta chi pa ri sinagoga janipa ri kakijikibꞌaꞌ uwach ri Jesús e ri Cristo, Ruchaꞌoꞌn lo ri Dios.
JOH 9:23 E uwariꞌche ruchu-uqaw rachi xkibꞌiꞌij: «Tzꞌonoj alaq che, ma rire nim chik.»
JOH 9:24 Ekꞌuchiriꞌ, raj judiꞌabꞌ xkitaq tanchi usikꞌixik rachi kunutajinaq chik y xkibꞌiꞌij che: —Woꞌora chajikibꞌaꞌ uwach chwach ri Dios ri kabꞌiꞌij. Ma riꞌoj qetaꞌam waꞌ waꞌchi lik aj mak —xechaꞌ.
JOH 9:25 Ekꞌu rire xubꞌiꞌij: —We rire aj mak na wetaꞌam ta kꞌu riꞌ riꞌin, xew wetaꞌam e ri petinaq loq in potzꞌ yey woꞌora kintzuꞌnik —xchaꞌ.
JOH 9:26 Xkitzꞌonoj tanchi che: —¿Saꞌ ri xuꞌan chawe? ¿Suꞌanik xutzuꞌnisaj rawach? —xechaꞌ.
JOH 9:27 Rachi xukꞌul uwach: —Riꞌin ya ximbꞌiꞌij che alaq y na xꞌaj ta kata alaq. ¿Suꞌchak kꞌu riꞌ kaꞌaj alaq kambꞌiꞌij tanchik? ¿Kaꞌaj kami ralaq kuꞌan alaq utijoꞌn? —xchaꞌ.
JOH 9:28 Ekꞌu rike xkiyajo, jewaꞌ xkibꞌiꞌij che: —Riꞌat e kataqej laꞌ la jun achi, noꞌj riꞌoj e kaqataqej rutzꞌibꞌam kan ri Moisés.
JOH 9:29 Ma riꞌoj qetaꞌam ri Dios xchꞌaꞌt rukꞌ ri Moisés; noꞌj laꞌ la jun achi, na qetaꞌam taj pa petinaq wi —xecha che.
JOH 9:30 Ekꞌu rire xubꞌiꞌij chike: —¡E laꞌ la lik kakam wanimaꞌ riꞌin che! Ma ralaq na etaꞌam ta alaq pa petinaq wi waꞌchi, yey rire xutzuꞌnisaj ri nuwach riꞌin.
JOH 9:31 Qetaꞌam kꞌu chi utz, ri Dios na kebꞌuta ta raj makibꞌ, xew kebꞌuta ri kakiloqꞌoj uqꞌij y kakiꞌan ri rajawal ukꞌuꞌx Rire.
JOH 9:32 Chwi lo ri jeqebꞌal ruwachulew, na jinta tatajinaq wi we kꞌo junoq utzuꞌnisam juna tikawex potzꞌ chwi ralaxik.
JOH 9:33 We tamaji wa jun achi petinaq rukꞌ ri Dios, riꞌ na jinta puqꞌabꞌ kuꞌan waꞌ —xchaꞌ.
JOH 9:34 Xkibꞌiꞌij kꞌu che: —Riꞌat lik pa mak xatalax wi. ¿Kawaj kami riꞌ katkꞌutun chiqawach? —xecha che. Chwi kꞌu riꞌ laꞌ, na xkikꞌul ta chi pa ri sinagoga.
JOH 9:35 Ekꞌu ri Jesús xretaꞌmaj na kakikꞌul ta chi pa ri sinagoga rachi kunutajinaq. Uwariꞌche echiriꞌ xukꞌulu, jewaꞌ xubꞌiꞌij che: —¿Kubꞌul akꞌuꞌx riꞌat rukꞌ Ralaxel Chikixoꞌl Tikawex? —xchaꞌ.
JOH 9:36 Rachi xukꞌul uwach: —Wajawal, bꞌiꞌij la chwe china rire chaꞌ kakubꞌiꞌ nukꞌuꞌx rukꞌ —xchaꞌ.
JOH 9:37 Ri Jesús xubꞌiꞌij che: —Awilom chi uwach; ma in riꞌ ri kinchꞌaꞌt awukꞌ —xchaꞌ.
JOH 9:38 Ekꞌuchiriꞌ, rachi xuxukubꞌaꞌ ribꞌ chwach y xuloqꞌnimaj uqꞌij, jewaꞌ xubꞌiꞌij che: —Wajawal, riꞌin kakubꞌiꞌ nukꞌuꞌx ukꞌ la —xchaꞌ.
JOH 9:39 Ekꞌu ri Jesús xubꞌiꞌij: —Riꞌin in kꞌuninaq che ruwachulew chaꞌ wuma riꞌin kaqꞌalajinik china ri kakikꞌul ri Qꞌijsaq y china ri na kakikꞌul taj. In kꞌuninaq kꞌu riꞌ chaꞌ e ri na ketzuꞌn taj, kajaqataj ri kiwach y jelaꞌ kakil ri Qꞌijsaq; yey ekꞌu ri “ketzuꞌnik”, kachꞌuqutaj ri kiwach y na kakil ta ri Qꞌijsaq —xchaꞌ.
JOH 9:40 Jujun kꞌu chike ri fariseos, ri e kꞌo pan chunaqaj ri Jesús, echiriꞌ xkita waꞌ, xkitzꞌonoj che: —¿E kami keꞌelawi riꞌ oj potzꞌ riꞌoj? —xechaꞌ.
JOH 9:41 Ri Jesús xukꞌul uwach: —We ta kaya ibꞌ alaq chupa na kil ta alaq ri Qꞌijsaq, na jinta mak alaq riꞌ. Noꞌj ruma ri kabꞌiꞌij alaq kil alaq chi utz ri Qꞌijsaq, e kakanaj kꞌu alaq riꞌ chupa ri mak alaq —xchaꞌ.
JOH 10:1 Ri Jesús xubꞌiꞌij: «Paqatzij wi kambꞌiꞌij che alaq: China ri na kok tubꞌi che ruchiꞌ ri coral ke ri bꞌexex yey xa tobꞌ kꞌu pa kok wubꞌi, riꞌ eleqꞌom y e kereleqꞌaj bꞌi ri bꞌexex.
JOH 10:2 Noꞌj kꞌu ri kok bꞌi che ruchiꞌ ri coral, riꞌ e chajinel ke ri bꞌexex.
JOH 10:3 Ekꞌu rire echiriꞌ kopon chwach ruchiꞌ ri coral, ri chajinel kꞌo che ruchiꞌ coral, kujaqalaꞌ lo che. Yey taq ri bꞌexex ketaꞌam ruchꞌawibꞌal ri chajinel ke, ma rire kebꞌusikꞌij rukꞌ ri kibꞌiꞌ chikijujunal y kebꞌeresaj bꞌi pa ri coral.
JOH 10:4 Echiriꞌ eresam chubꞌi konoje rubꞌexex pa ri coral, kanabꞌej bꞌi chikiwach y konoje rubꞌexex keterej bꞌi chirij ma ketaꞌam ruchꞌawibꞌal.
JOH 10:5 Noꞌj taq ri bꞌexex na keterej tubꞌi chirij junoq we na ketaꞌam ta uwach; ri kakiꞌano e kebꞌanimaj chwach ma na ketaꞌam ta ruchꞌawibꞌal» xchaꞌ.
JOH 10:6 Ri Jesús xubꞌiꞌij wa jun kꞌambꞌal naꞌoj chike, pero rike na xkimaj ta usukꞌ saꞌ ri karaj kubꞌiꞌij chike.
JOH 10:7 Ekꞌuchiriꞌ, xubꞌiꞌij ri Jesús: «Paqatzij wi kambꞌiꞌij che alaq: In ri in uchiꞌ ri coral pa kebꞌok wi ri bꞌexex.
JOH 10:8 Konoje ri xekꞌun nabꞌe chinuwach riꞌin e eleqꞌomabꞌ y xa e kekeleqꞌaj bꞌi ri bꞌexex; pero ri bꞌexex na xekikajmaj ta rike.
JOH 10:9 »In ri in uchiꞌ ri coral ke ri bꞌexex. China ri kok bꞌi wuma riꞌin, riꞌ kakolobꞌetajik y kachajix chi utz pachaꞌ ri bꞌexex kebꞌokisax chaqꞌabꞌ pa ri coral y kebꞌesax bꞌi paqꞌij re kebꞌeꞌwoꞌq pa chomilaj kꞌim.
JOH 10:10 Juna eleqꞌom xew kakꞌunik re kuꞌan eleqꞌ, kuꞌan kamik y kusach uwach ronoje. Noꞌj riꞌin in kꞌuninaq re kanya kꞌaslemal che alaq yey waꞌ e jun chomilaj kꞌaslemal na jinta chi ukꞌisik.
JOH 10:11 »In ri in utzilaj chajinel ke bꞌexex. Juna utzilaj chajinel ke bꞌexex kuya ranimaꞌ kakam kuma rubꞌexex.
JOH 10:12 Noꞌj juna mokom kachakun xa ruma katojik. Echiriꞌ karilo kakꞌun lo rutiw, kanimajik y kebꞌuya kan ri bꞌexex; ma na e ta chajinel ke y na e tane kajaw. E uwariꞌche kuya luwar che rutiw kebꞌuchap ri bꞌexex y kebꞌukicherisaj bꞌi.
JOH 10:13 Wa mokom kanimajik ma na kok ta il chike ri bꞌexex, xew e kok il che ri kuchꞌako.
JOH 10:14 »In ri in utzilaj chajinel ke bꞌexex, ma riꞌin wetaꞌam kiwach ri nubꞌexex y rike ketaꞌam nuwach riꞌin.
JOH 10:15 Jelaꞌ pachaꞌ ri Nuqaw retaꞌam nuwach riꞌin, jekꞌulaꞌ riꞌin wetaꞌam uwach Rire; yey kanya wanimaꞌ kinkam kuma ri nubꞌexex.
JOH 10:16 »E kꞌo jujun chik nubꞌexex na e ta kukꞌil wa e kꞌo pa wa coral. Lik chirajawaxik wi kebꞌeꞌnukꞌamaꞌ loq. We xebꞌenusikꞌij, kakikoj nutzij y jelaꞌ kebꞌuꞌana xa jun pa ri coral y xa jun ri chajinel ke.
JOH 10:17 »Ruma kꞌu laꞌ, ri Nuqaw kꞌax kinunaꞌo, ma riꞌin kanya ri nukꞌaslem pa kamik yey kankꞌam tanchi waꞌ echiriꞌ kinkꞌastaj lo chikixoꞌl ri ekaminaq.
JOH 10:18 Na yaꞌtal ta puqꞌabꞌ junoq karesaj ri nukꞌaslem we na in ta kinyaꞌw re che. Panuqꞌabꞌ riꞌin kꞌo wi kanya wibꞌ pa kamik y panuqꞌabꞌ kꞌo wi kinkꞌastaj lo chikixoꞌl ri ekaminaq. Yey waꞌ e ri Nuqaw yaꞌyom panuqꞌabꞌ» xchaꞌ.
JOH 10:19 Echiriꞌ raj judiꞌabꞌ xkita wa chꞌaꞌtem, xkijach tanchi kipa chikiwach, ma e kꞌo ri xekojow re y e kꞌo ri na xekojow taj.
JOH 10:20 E kꞌi chike jewaꞌ kakibꞌiꞌij: «Laꞌ kꞌo puqꞌabꞌ juna itzel uxlabꞌixel y chꞌuꞌjerinaq. ¿Suꞌchak kata alaq re?» kechaꞌ.
JOH 10:21 Noꞌj kꞌo jujun chik jewaꞌ kakibꞌiꞌij: «Na jinta junoq jelaꞌ kachꞌaꞌtik we kꞌo puqꞌabꞌ juna itzel uxlabꞌixel. ¿Kꞌo nebꞌa juna itzel uxlabꞌixel kebꞌutzuꞌnisaj ri e potzꞌ?» kechaꞌ.
JOH 10:22 Chupa kꞌu ruqꞌijol echiriꞌ kꞌax tew y kꞌo jabꞌ, e riꞌ katajin ri nimaqꞌij re ri Rocho Dios chilaꞌ Jerusalem.
JOH 10:23 Y ri Jesús kabꞌin che ri Rocho Dios pa ri luwar kabꞌiꞌx che “Ruchiꞌ Ja re Salomón”
JOH 10:24 Ekꞌu raj judiꞌabꞌ xkisut rij ri Jesús y jewaꞌ xkibꞌiꞌij che: —¿Jampa xaqi e waꞌ na kaqꞌalajisaj ta la chiqawach saꞌ ri wach la? We lal kꞌu Ruchaꞌoꞌn lo ri Dios, asu bꞌiꞌij la chiqe —xechaꞌ.
JOH 10:25 Ri Jesús xukꞌul uwach: —Nubꞌiꞌim chi che alaq, yey na kakoj ta alaq. Ronoje taq ri chak kanꞌano, e ri Nuqaw intaqayom che kanꞌano. Rukꞌ taq kꞌu wa kanꞌano, kaqꞌalajinik in china riꞌin.
JOH 10:26 Noꞌj ralaq na kakoj ta alaq, ma na alaq ta kukꞌil ri nubꞌexex, jelaꞌ pachaꞌ ri nubꞌiꞌim chi lo che alaq.
JOH 10:27 Taq ri nubꞌexex ketaꞌam chi ri nuchꞌawibꞌal; yey riꞌin wetaꞌam kiwach y rike eteran chwij.
JOH 10:28 Riꞌin kanya kikꞌaslemal na jinta utaqexik chaꞌ jelaꞌ na kasach ta kꞌana kiwach y na jinta ne junoq kebꞌeresaj panuqꞌabꞌ.
JOH 10:29 Yey e ri Nuqaw ri xeyaꞌw ke panuqꞌabꞌ, y Rire más kꞌo uwach chikiwa konoje. Ruma kꞌu riꞌ, na jinta junoq kebꞌeresaj puqꞌabꞌ Rire.
JOH 10:30 Ma ri Nuqaw y riꞌin xa oj jun —xchaꞌ.
JOH 10:31 Julaj chik raj judiꞌabꞌ xkikꞌam abꞌaj pakiqꞌabꞌ re kakiꞌan ri Jesús paꞌbꞌaj.
JOH 10:32 Pero Rire xubꞌiꞌij chike: —Lik kꞌi ri utzilaj chak nuꞌanom chiwach alaq rukꞌ ruchuqꞌabꞌ ri Nuqaw. ¿Ruma pachike che taq wa nuꞌanom kinꞌan alaq paꞌbꞌaj? —xchaꞌ.
JOH 10:33 Raj judiꞌabꞌ xkikꞌul uwach: —Na kaqaꞌan ta la paꞌbꞌaj ruma ri utz ꞌanom la; e ruma makuninaq la chirij ri Dios rukꞌ ri chꞌaꞌtem la. Ma rilal xa lal jun achi y kaꞌan Dios che ibꞌ la —xechaꞌ.
JOH 10:34 Ekꞌuchiriꞌ, ri Jesús xubꞌiꞌij chike: —Jewaꞌ tzꞌibꞌital kan chupa ri Tzij Pixabꞌ kꞌo ukꞌ alaq: “Ximbꞌiꞌij: Riꞌix ix dios.”
JOH 10:35 Ri Dios xubꞌiꞌij kꞌu “dios” chike ri xkikꞌul Ruchꞌaꞌtem, yey Ruchꞌaꞌtem na kajalkꞌatitaj taj.
JOH 10:36 ¿Suꞌanik kꞌu riꞌ kabꞌiꞌij alaq chwe in makuninaq xa ruma ri ximbꞌiꞌij in Ukꞌajol ri Dios? ma ri Dios xinuchaꞌ lo riꞌin yey xinutaq lo che ruwachulew.
JOH 10:37 »We na e ta kanꞌan ruchak ri Nuqaw, utz kꞌu riꞌ we na kakoj ta alaq ri kambꞌiꞌij.
JOH 10:38 Noꞌj we e kanꞌan ruchak ri Nuqaw, kojo kꞌu alaq riꞌ in china riꞌin ruma taq ri kanꞌano, na xa ta ruma ri kambꞌiꞌij. Y jelaꞌ ketaꞌmaj alaq y kakoj alaq riꞌ: Ri Nuqaw wukꞌ riꞌin y riꞌin rukꞌ Rire, xa oj jun —xchaꞌ.
JOH 10:39 Ekꞌu raj judiꞌabꞌ xkaj tanchik kakichapo, pero na xkichap taj ma ri Jesús xel bꞌi chikixoꞌl.
JOH 10:40 Y xuqꞌaxuj kꞌu ri nimayaꞌ Jordán pa xuya wi bautismo ri Juan y xkanaj kan chilaꞌ.
JOH 10:41 Ukꞌiyal winaq xebꞌopon rukꞌ; xeꞌkilaꞌ y jewaꞌ kakibꞌiꞌij: «Ri Juan na xuꞌan ta juna kꞌutubꞌal re ruchuqꞌabꞌ ri Dios chiqawach; na rukꞌ ta kꞌu riꞌ, ronoje ri xubꞌiꞌij kan chwi waꞌ waꞌchi, lik qatzij» kechaꞌ.
JOH 10:42 Y lik e kꞌi ri xkubꞌiꞌ kikꞌuꞌx rukꞌ ri Jesús chilaꞌ.
JOH 11:1 Kꞌo kꞌu jun achi yewaꞌ, Lázaro rubꞌiꞌ. Rire aj Betania, y chilaꞌ ejeqel wi ri ranabꞌ María y Marta.
JOH 11:2 Waꞌ wa María e ri xuqꞌej kunabꞌal lik kiꞌ ruxlabꞌ che ri raqan ri Jesús y xuchaqisaj rukꞌ ruwiꞌ.
JOH 11:3 Ekꞌu ri kebꞌ ixoqibꞌ kichaqꞌ kibꞌ jewaꞌ xkitaq ubꞌiꞌxikil che ri Jesús: «Qajawal, ri jun lik kꞌax kanaꞌ la, lik yewaꞌ.»
JOH 11:4 Echiriꞌ ri Jesús xuta waꞌ, jewaꞌ xubꞌiꞌij: «Waꞌ wa yabꞌil na re ta kamik, ma re yakbꞌal uqꞌij ri Dios y re yakbꞌal uqꞌij Rukꞌajol ri Dios» xchaꞌ.
JOH 11:5 Ekꞌu ri Jesús lik kꞌax kebꞌunaꞌ ri oxibꞌ kichaqꞌ kibꞌ: Ri Marta, ri María y ri Lázaro.
JOH 11:6 Na rukꞌ ta kꞌu riꞌ, echiriꞌ xuto yewaꞌ ri Lázaro, kꞌa xkanaj chi kan kebꞌ qꞌij pa ri luwar pa kꞌo wi.
JOH 11:7 Tekꞌuchiriꞌ, xubꞌiꞌij chike rutijoꞌn: —Joꞌ tanchi Judea —xchaꞌ.
JOH 11:8 Ekꞌu rutijoꞌn xkibꞌiꞌij che: —Lal tijonel, ¿na kꞌakꞌ ta nebꞌa laꞌ raj judiꞌabꞌ ya laj xkikamisaj la paꞌbꞌaj? Na rukꞌ ta kꞌu riꞌ, ¿woꞌora keꞌek tanchi la chilaꞌ? —xechaꞌ.
JOH 11:9 Ri Jesús xubꞌiꞌij chike: —¿Na qatzij ta nebꞌa laꞌ kabꞌlajuj ora kꞌo che ri jun qꞌij? Yey e junoq kabꞌin paqꞌij na kuchiq ta ri raqan, ma karil rubꞌe ruma ri qꞌijsaq re ruwachulew.
JOH 11:10 Noꞌj we junoq kabꞌin chaqꞌabꞌ, riꞌ kuchiq ri raqan ma pa qꞌequꞌm kꞌo wi —xchaꞌ.
JOH 11:11 Tekꞌuchiriꞌ, xubꞌiꞌij chike: —E ri qamigo Lázaro, kawarik. Kinꞌek kꞌu che ukꞌosoxik —xchaꞌ.
JOH 11:12 Xkibꞌiꞌij kꞌu rutijoꞌn che: —Qajawal, utz we kawarik, ma riꞌ e kꞌutubꞌal re kutzir uwach —xechaꞌ.
JOH 11:13 Ri xkichꞌobꞌ rike e xa kuxlan ri Lázaro; noꞌj ri Jesús e kachꞌaꞌt puwi rukamik ri Lázaro.
JOH 11:14 E uwariꞌche ri Jesús xuqꞌalajisaj chike: —Ri Lázaro kaminaq chik.
JOH 11:15 Yey iwuma kꞌu riꞌix, lik kinkiꞌkotik ri na in jinta chilaꞌ rukꞌ echiriꞌ xkamik, ma jelaꞌ kanimar ri kubꞌulibꞌal ikꞌuꞌx wukꞌ. Woꞌora joꞌ, jeꞌqilaꞌ —xchaꞌ.
JOH 11:16 Ekꞌuchiriꞌ, ri Tomás ri kabꞌiꞌx “Yoꞌx” che, xubꞌiꞌij chike ri jujun chik rachbꞌiꞌil: —Kojꞌek riꞌ chaꞌ jelaꞌ kojkam junam rukꞌ ri Jesús —xchaꞌ.
JOH 11:17 Kajibꞌ qꞌij chi lo riꞌ muqutal ri Lázaro echiriꞌ ri Jesús xopon Betania.
JOH 11:18 Waꞌ xa chunaqaj Jerusalem kꞌo wi, laj oxibꞌ kilómetro kꞌo wi lo che.
JOH 11:19 E kꞌi chike raj judiꞌabꞌ e petinaq kukꞌ ri María y ri Marta re koꞌlkibꞌochiꞌij kikꞌuꞌx ruma rukamik ri kixibꞌal.
JOH 11:20 Ekꞌuchiriꞌ ri Marta xuto katajin roponik ri Jesús, xel bꞌi che ukꞌulik; noꞌj ri María xkanaj kan chwa ja.
JOH 11:21 Ekꞌu ri Marta xubꞌiꞌij che ri Jesús: —Wajawal, we ta e laꞌ kꞌo la wara, na kakam ta riꞌ ri nuxibꞌal.
JOH 11:22 Na rukꞌ ta kꞌu riꞌ, lik wetaꞌam, tobꞌ ne kꞌa e waꞌ, ri Dios kuya cheꞌla ronoje ri katzꞌonoj la che —xchaꞌ.
JOH 11:23 Ri Jesús xubꞌiꞌij che: —Raxibꞌal kakꞌastaj lo chikixoꞌl ri ekaminaq —xchaꞌ.
JOH 11:24 Ri Marta xubꞌiꞌij che: —Qatzij, riꞌin wetaꞌam kakꞌastaj lo che ri kꞌisbꞌal qꞌij re ruwachulew echiriꞌ kekꞌastaj lo konoje ri ekaminaq —xchaꞌ.
JOH 11:25 Ri Jesús xubꞌiꞌij che: —E riꞌin ri kinkꞌastajisan lo ke ri ekaminaq yey e riꞌin ri kinyaꞌw kꞌaslemal. China kꞌu ri kakubꞌiꞌ ukꞌuꞌx wukꞌ, tobꞌ kakamik, kakꞌastajik.
JOH 11:26 Yey konoje ri e kꞌaslik y kakubꞌiꞌ kikꞌuꞌx wukꞌ, na kekam taj ma kꞌo kikꞌaslemal na jinta utaqexik rukꞌ ri Dios. ¿Kakoj riꞌat waꞌ? —xchaꞌ.
JOH 11:27 Ri Marta xukꞌul uwach: —Kankojo, Wajawal, ma riꞌin nukojom rilal lal ri Cristo, Rukꞌajol ri Dios, ri bꞌiꞌtisim loq kakꞌun che ruwachulew —xchaꞌ.
JOH 11:28 Echiriꞌ ri Marta xukꞌis ubꞌiꞌxik waꞌ, xeꞌek che usikꞌixik ruchaqꞌ María y xew che rire xubꞌiꞌij: —Ri Qajawal kꞌo wara y katusikꞌij —xchaꞌ.
JOH 11:29 Xew xuta waꞌ ri María, na jampatana xyaktaj bꞌi y xeꞌrila ri Jesús.
JOH 11:30 Ri Jesús kꞌamajaꞌ ne kok pa ri tinamit, ma kꞌa kꞌo pa ri luwar pa xkꞌul wi ruma ri Marta.
JOH 11:31 Ekꞌu raj judiꞌabꞌ e kꞌo rukꞌ ri María re kakibꞌochiꞌij ukꞌuꞌx, xkilo echiriꞌ na jampatana xyaktajik y kanik xel bꞌi. Rike xeterej kꞌu bꞌi chirij, ma e chikiwach rike e riꞌ keꞌek chwa ri muqubꞌal chaꞌ keꞌroqꞌej ruxibꞌal.
JOH 11:32 Echiriꞌ ri María xopon pa kꞌo wi ri Jesús, xew xril uwach, xuxuk ribꞌ chwach, y jewaꞌ xubꞌiꞌij che: —Wajawal, we ta e laꞌ lal kꞌo la wara, na kakam ta riꞌ ri nuxibꞌal —xchaꞌ.
JOH 11:33 Ri Jesús echiriꞌ xrilo lik kebꞌoqꞌ ri María y raj judiꞌabꞌ eteran lo chirij, lik xok chukꞌuꞌx y xuchap bꞌis.
JOH 11:34 Xubꞌiꞌij kꞌu chike: —¿Pa ximuq wi? —xchaꞌ. Rike xkibꞌiꞌij: —Qajawal, peta la y chilape la —xechaꞌ.
JOH 11:35 Ekꞌu ri Jesús xoqꞌik.
JOH 11:36 Xkibꞌiꞌij kꞌu raj judiꞌabꞌ: —¡Chilape alaq, lik kꞌax kunaꞌo! —xechaꞌ.
JOH 11:37 E kꞌo jujun chike raj judiꞌabꞌ xkibꞌiꞌij: —Wa waꞌchi e xtzuꞌnisan re ri jun potzꞌ. ¿Suꞌbꞌe kꞌu riꞌ na jinta xuꞌano chaꞌ na kakam ta ri Lázaro? —xechaꞌ.
JOH 11:38 Ri Jesús lik xok tanchi bꞌis chukꞌuꞌx, xqibꞌ chwa ri muqubꞌal. Waꞌ jun jul worotal paꞌbꞌaj y tzꞌapal uchiꞌ rukꞌ jun abꞌaj.
JOH 11:39 Ekꞌu ri Jesús xubꞌiꞌij: —Chiwesaj laꞌbꞌaj —xchaꞌ. Yey ri Marta, ri ranabꞌ kan ri kaminaq, xubꞌiꞌij che: —Wajawal, laꞌ lik chu chik, ma e ukaj qꞌij waꞌ muqutalik —xchaꞌ.
JOH 11:40 Ri Jesús xubꞌiꞌij che: —¿Na nubꞌiꞌim ta nebꞌa chawe, we kakubꞌiꞌ akꞌuꞌx wukꞌ, kawil runimal uwach uqꞌij ri Dios? —xchaꞌ.
JOH 11:41 Ewi xkesaj rabꞌaj kꞌo chuchiꞌ ri muqubꞌal. Ekꞌuchiriꞌ, ri Jesús xtzuꞌn chikaj y xubꞌiꞌij: —Lal Nuqaw, maltiox ko cheꞌla ma intom chi la.
JOH 11:42 Riꞌin wetaꞌam lik xaqi kinta la, pero kambꞌiꞌij kꞌu waꞌ kuma wuꞌkꞌiyal tikawex e kꞌo wara, chaꞌ rike kakikojo lal taqayom lo we —xchaꞌ.
JOH 11:43 Echiriꞌ xukꞌis ubꞌiꞌxikil waꞌ, lik ko xsikꞌin che ubꞌiꞌxikil: —¡Lázaro, chateluloq! —xchaꞌ.
JOH 11:44 Ewi ri Lázaro xel loq, bꞌolqꞌotim ri raqan y ruqꞌabꞌ pa kꞌul yey rupalaj chꞌuqutal rukꞌ jun kꞌul. Ruma kꞌu laꞌ, ri Jesús xubꞌiꞌij chike: —Chikira ri kꞌul kꞌo che chaꞌ utz keꞌek —xchaꞌ.
JOH 11:45 E kꞌi kꞌu chike raj judiꞌabꞌ, ri e petinaq che ubꞌochiꞌixik ukꞌuꞌx ri María, echiriꞌ xkil ri xuꞌan ri Jesús, xkikubꞌaꞌ kikꞌuꞌx rukꞌ.
JOH 11:46 Noꞌj e kꞌo jujun chike xebꞌek kukꞌ ri fariseos, y xeꞌkitzijoj chike ri xuꞌan ri Jesús.
JOH 11:47 Ekꞌu ri nimaq e aj chakunel pa Rocho Dios y ri fariseos xkimol kibꞌ kukꞌ jujun chik chike ri e aj qꞌatal tzij y jewaꞌ xkibꞌiꞌij: —¿Saꞌ ri kaqaꞌano? Ma waꞌchi lik ukꞌiyal kꞌutubꞌal re ruchuqꞌabꞌ kuꞌano.
JOH 11:48 We na kaqaqꞌatej taj, konoje kakubꞌiꞌ kikꞌuꞌx rukꞌ y kekꞌun kꞌu lo riꞌ raj wach re Roma chaꞌ koꞌlkiwulij wa Luwar pa kaqaloqꞌnimaj wi ri Dios y wa qatinamit —xechaꞌ.
JOH 11:49 Ekꞌuchiriꞌ ri Caifás, ri kajawal raj chakunel pa Rocho Dios che laꞌ la junabꞌ, jewaꞌ xubꞌiꞌij chike: —Ralaq na jinta etaꞌam alaq.
JOH 11:50 Na kachꞌobꞌ ta alaq raqan chi utz, ma e más utz we xa jun chi achi kakam pukꞌaxel ri tinamit chwa ri kasach kiwach konoje ri qatinamit —xchaꞌ.
JOH 11:51 Ri Caifás na xa ta pa re rire xubꞌiꞌij waꞌ. Ma ruma e kajawal raj chakunel pa Rocho Dios che laꞌ la junabꞌ, ri Dios xuya che kuqꞌalajisaj e kakam ri Jesús pakikꞌaxel konoje ri tinamit e aj judiꞌabꞌ.
JOH 11:52 Y na xew ta kuma ri tinamit Israel xkam ri Jesús, ma xkamik chaꞌ kuꞌan xa jun chike konoje ri e ralkꞌoꞌal ri Dios ekicherinaq bꞌi che ruwachulew.
JOH 11:53 Ekꞌu raj judiꞌabꞌ chwi laꞌ la qꞌij wi xkiꞌan tzij chikiwach chaꞌ kakikamisaj ri Jesús.
JOH 11:54 Ruma kꞌu waꞌ, ri Jesús na xbꞌin ta chi chikixoꞌl chiwachil. Ewi xel bꞌi pa ri luwar re Judea y xeꞌek chunaqaj ri luwar katzꞌintzꞌotik, pa jun tinamit Efraín rubꞌiꞌ. Chiriꞌ xkanaj kan wi junam kukꞌ rutijoꞌn.
JOH 11:55 Xa naqaj chi kꞌo wi lo ri Pascua, waꞌ e kinimaqꞌij raj judiꞌabꞌ. Ukꞌiyal winaq re taq ri tinamit xepaqiꞌ Jerusalem re kakiꞌan ri kijosqꞌikil chwach ri Dios, chaꞌ jelaꞌ taqal chike kakiꞌan ri nimaqꞌij Pascua.
JOH 11:56 E taq kꞌu ri winaq ketajin che utzukuxik ri Jesús, yey echiriꞌ e kꞌo pa ri Rocho Dios, kakitzꞌonobꞌej chikiwach: «¿Saꞌ nawi kichꞌobꞌ riꞌix? ¿Kakꞌun nawi pa wa nimaqꞌij?» kechaꞌ.
JOH 11:57 Yey ri fariseos kukꞌ ri nimaq e aj chakunel pa Rocho Dios etaqaninaq che we kꞌo junoq karetaꞌmaj pa kꞌo wi ri Jesús, chubꞌiꞌij chaꞌ keꞌkichapa uloq.
JOH 12:1 Waqibꞌ qꞌij chi kꞌu riꞌ che ri nimaqꞌij Pascua, ri Jesús xeꞌek Betania pa jeqel wi ri Lázaro, ri jun xukꞌastajisaj lo che ri kamik.
JOH 12:2 Chiriꞌ xkiꞌan wi jun waꞌim re yakbꞌal uqꞌij ri Jesús. Ekꞌu ri Marta e kaniman ri waꞌim y ri Lázaro e jun chike ri etzꞌul chwa ri mexa rukꞌ ri Jesús.
JOH 12:3 Ekꞌu ri María xukꞌam lo jun libra re saqil nardo, waꞌ e jun kunabꞌal lik kiꞌ ruxlabꞌ y lik kꞌi rajil. Xuqꞌej kꞌu riꞌ che ri raqan ri Jesús; tekꞌuchiriꞌ, xuchaqisaj rukꞌ ruwiꞌ. Ronoje kꞌu rupa ja lik xmuyuy che ri ruxlabꞌ wa kunabꞌal.
JOH 12:4 Kꞌo kꞌu chiriꞌ ri Judas aj Iscariot, jun chike rutijoꞌn ri Jesús. (E ri kakꞌayin re ri Jesús). Rire xubꞌiꞌij:
JOH 12:5 —¿Suꞌbꞌe na xkꞌayix ta waꞌ wa kunabꞌal chi oxibꞌ ciento denarios chaꞌ rukꞌ ri rajil ketoꞌ ri nibꞌaꞌibꞌ? —xchaꞌ.
JOH 12:6 Ri Judas xubꞌiꞌij waꞌ na e ta ruma karaj kebꞌutoꞌ ri nibꞌaꞌibꞌ, ma e ruma rire eleqꞌom. Yey puqꞌabꞌ kꞌo wi ri bꞌolxa pa kꞌolotal wi ri puaq ke rutaqoꞌn ri Jesús y kꞌo ne karesaj che.
JOH 12:7 Ekꞌu ri Jesús xubꞌiꞌij che ri Judas: —Matchꞌaꞌt chirij wiꞌxoq, ma wa kunabꞌal xex chi ukꞌolom re pan ruqꞌijol ri muqubꞌal we.
JOH 12:8 Ma taq ri nibꞌaꞌibꞌ ronoje qꞌij e kꞌo iwukꞌ, noꞌj riꞌin na xaqi ta in kꞌo iwukꞌ —xchaꞌ.
JOH 12:9 E kꞌi chike raj judiꞌabꞌ xketaꞌmaj kꞌo ri Jesús chilaꞌ Betania. Xebꞌek kꞌu che rilik, na xew ta ruma kakaj keꞌkila ri Jesús, ma kakaj keꞌkila ri Lázaro, ri jun xukꞌastajisaj lo chikixoꞌl ri ekaminaq.
JOH 12:10 Ruma kꞌu riꞌ, ri nimaq e aj chakunel pa Rocho Dios xkiꞌan tzij chikiwach chaꞌ kakikamisaj ri Lázaro;
JOH 12:11 ma ruma rire, e kꞌi chike raj judiꞌabꞌ xkesaj bꞌi kibꞌ kukꞌ y e xkubꞌiꞌ kikꞌuꞌx rukꞌ ri Jesús.
JOH 12:12 E kꞌi ri winaq ebꞌoponinaq Jerusalem ruma ri nimaqꞌij Pascua. Chukaꞌm qꞌij kꞌu riꞌ xketaꞌmaj kopon ri Jesús pa ri tinamit.
JOH 12:13 Xkiqꞌat kꞌu uxaq palma y xebꞌel bꞌi che ukꞌulik. Ekꞌuchiriꞌ, xkijeqo lik kesikꞌinik, jewaꞌ kakibꞌiꞌij: «¡Qayaka uqꞌij! ¡Nim uqꞌij ri jun petinaq chupa rubꞌiꞌ ri Dios Qajawxel! ¡Rire e ri Rey re Israel!» kechaꞌ.
JOH 12:14 Ri Jesús uriqom lo jun qꞌapoj buru y ukojom loq, pachaꞌ tzꞌibꞌital kan chupa Ruchꞌaꞌtem ri Dios:
JOH 12:15 Mixiꞌij iwibꞌ ri ix aj Sion. Chiwilapeꞌ, ri Rey iweꞌix kakꞌunik, ukojom lo jun qꞌapoj buru kachaꞌ.
JOH 12:16 Echiriꞌ xuꞌan taq waꞌ, rutijoꞌn na xkimaj ta usukꞌ; kꞌa e xkimaj usukꞌ echiriꞌ lik xyak uqꞌij ri Jesús chikiwach ruma rukꞌastajibꞌal. Kꞌa ekꞌuchiriꞌ xkꞌun chikikꞌuꞌx, e janipa ri xꞌaniꞌ che, ronoje waꞌ tzꞌibꞌital kan pa Ruchꞌaꞌtem ri Dios.
JOH 12:17 E taq ri e kꞌo rukꞌ ri Jesús echiriꞌ Rire xusikꞌij pan ri Lázaro chupa ri muqubꞌal y xukꞌastajisaj lo chikixoꞌl ri ekaminaq, ketajin che utzijoxik ri xkilo.
JOH 12:18 Ruma waꞌ, ukꞌiyal winaq xebꞌel lo che ukꞌulik ri Jesús, ma xkita ri katzijox puwi wa kꞌutubꞌal re ruchuqꞌabꞌ.
JOH 12:19 Ekꞌuchiriꞌ, ri fariseos xkibꞌiꞌij chikiwach: «Kiwil kꞌu laꞌ, lik na jinta kutiqoj saꞌ ri qaꞌanom chirij ri Jesús, ma ¡chiwilapeꞌ! konoje ri winaq eteran chirij» xechaꞌ.
JOH 12:20 E kꞌo jujun na e ta aj Israel chikixoꞌl ri winaq ebꞌoponinaq Jerusalem re keꞌkiloqꞌnimaj uqꞌij ri Dios pa ri nimaqꞌij Pascua.
JOH 12:21 Waꞌ xeqibꞌ rukꞌ ri Felipe, ri aj Betsaida, jun luwar re Galilea. Lik kꞌut xebꞌelaj che, jewaꞌ xkibꞌiꞌij: —Maꞌan ko la riꞌ, chojtoꞌo la, ma riꞌoj kaqaj kaqil uwach ri Jesús —xechaꞌ.
JOH 12:22 Ri Felipe xeꞌek y xutzijoj waꞌ che ri Andrés. Tekꞌuchiriꞌ xebꞌek junam, xeꞌkitzijoj che ri Jesús.
JOH 12:23 Ekꞌu ri Jesús xubꞌiꞌij chike: —Xopon kꞌu ruqꞌijol ri yakbꞌal uqꞌij Ralaxel Chikixoꞌl Tikawex.
JOH 12:24 Paqatzij wi kambꞌiꞌij chiwe: E juna ijaꞌ re trigo echiriꞌ katzaq pulew, kamuqik y kakamik. Yey we na jelaꞌ ta kuꞌano, kakanaj kan utukel xew ijaꞌ. Noꞌj we rijaꞌ katzaq pulew, riꞌ lik kawachinik y jekꞌuriꞌlaꞌ kakꞌiyar uwach.
JOH 12:25 Jekꞌuriꞌlaꞌ, china ri lik kok il che rukꞌaslem che ruwachulew, riꞌ e kujam ri kꞌaslemal chilaꞌ chikaj; noꞌj china ri na kok ta il che rukꞌaslem wara che ruwachulew, riꞌ na kujam ta kꞌu ri chomilaj ukꞌaslemal na jinta utaqexik chilaꞌ chikaj.
JOH 12:26 »China ri karaj kachakun pa ri nuchak, chirajawaxik riꞌ katerej lo chwij. Jekꞌulaꞌ tobꞌ pa kinkꞌojiꞌ wi riꞌin, chiriꞌ kakꞌojiꞌ wi ri waj chak. China kꞌu ri kaꞌanaw ri nuchak, riꞌ kayak uqꞌij ruma ri Nuqaw.
JOH 12:27 »Woꞌora lik paxinaq nukꞌuꞌx. ¿Saꞌ nawi ri kambꞌiꞌij? ¿Utz nawi jewaꞌ kambꞌiꞌij: “Nuqaw, chinkolobꞌej la che wa kankꞌulumaj woꞌora”? ¡Na utz taj! Ma ruma ne waꞌ in petinaq.
JOH 12:28 Xew kambꞌiꞌij: “Nuqaw, nimarisaj uqꞌij ri bꞌiꞌ la” —xchaꞌ. Ekꞌuchiriꞌ, xchꞌaw lo Jun chilaꞌ chikaj, jewaꞌ xubꞌiꞌij: —Nunimarisam chik, y e waꞌ kannimarisaj tanchik —xchaꞌ.
JOH 12:29 Ri winaq e kꞌo chiriꞌ xkita waꞌ y xkibꞌiꞌij: «Laꞌ uchꞌawibꞌal jabꞌ.» Yey jujun chik xkibꞌiꞌij: «Jun ángel xchꞌaw lo che» xechaꞌ.
JOH 12:30 Ekꞌu ri Jesús xubꞌiꞌij chike: —Na wuma ta riꞌin xtataj wa jun qulaj, ma e uma ralaq.
JOH 12:31 Yey woꞌora kaqꞌat tzij pakiwi ri winaq re ruwachulew y kesax na kꞌu bꞌi ritzel winaq, ri jun kataqan che ruwachulew.
JOH 12:32 Echiriꞌ kinyakiꞌ na lo chikaj, kanꞌan chike ri tikawex che ronoje ruwachulew chaꞌ lik kacha kikꞌuꞌx che kepe wukꞌ —xchaꞌ.
JOH 12:33 Rukꞌ waꞌ e xuqꞌalajisaj saꞌ rukamik.
JOH 12:34 Ri winaq xkikꞌul uwach: —Ruma Rutzij Upixabꞌ ri Dios riꞌoj qetaꞌam: Ruchaꞌoꞌn lo ri Dios na jinta utaqexik rukꞌaslemal. ¿Chaꞌta kꞌu riꞌ kabꞌiꞌij la Ralaxel Chikixoꞌl Tikawex kayakiꞌ che ruwachulew? ¿China kꞌu riꞌ “Ralaxel Chikixoꞌl Tikawex” kabꞌiꞌij la? —xechaꞌ.
JOH 12:35 Xubꞌiꞌij kꞌu ri Jesús chike: —Na naj ta chi kꞌo ri Qꞌijsaq chixoꞌl alaq. Bꞌina kꞌu alaq pa ri Qꞌijsaq xaloqꞌ kꞌa kꞌo ukꞌ alaq, chaꞌ ri qꞌequꞌm na kumaj ta alaq xaqikꞌateꞌt. Ma china ri kabꞌin pa qꞌequꞌm, na retaꞌam taj pa keꞌek wi.
JOH 12:36 Kojo alaq ri Qꞌijsaq xaloqꞌ kꞌa kꞌo ukꞌ alaq, chaꞌ jelaꞌ kuꞌan alaq re ri Qꞌijsaq —xchaꞌ. Echiriꞌ xukꞌis ubꞌiꞌxik waꞌ ri Jesús, xel bꞌi chikixoꞌl y xeꞌek pa jun luwar pa na kariqitaj ta wi kuma rike.
JOH 12:37 E kꞌo ri na xkubꞌiꞌ ta kikꞌuꞌx rukꞌ ri Jesús, tobꞌ Rire xuꞌan ukꞌiyal kꞌutubꞌal re ruchuqꞌabꞌ ri Dios chikiwach.
JOH 12:38 Jekꞌulaꞌ e xuꞌana pachaꞌ rutzꞌibꞌam kan ri qꞌalajisanel Isaías echiriꞌ xubꞌiꞌij: Qajawal, ¿china ekojoyom re ri qatzijom chik? yey ¿China taq chikiwach kꞌutum wi ri chuqꞌabꞌ la, Lal Dios Qajawxel? xchaꞌ.
JOH 12:39 E uwariꞌche na xkubꞌiꞌ ta kikꞌuꞌx rukꞌ ri Jesús ma e xuꞌana pachaꞌ rutzꞌibꞌam kan ri Isaías puwi ri xuqꞌalajisaj ri Dios che, echiriꞌ xubꞌiꞌij:
JOH 12:40 Wa tinamit uꞌanom pachaꞌ potzꞌ ri kiwach y uꞌanom ko ri kanimaꞌ; jekꞌulaꞌ na jinta kꞌo kakilo, na jinta kꞌo kakimaj usukꞌ y na kakitzelej tane kitzij chinuwach chaꞌ jelaꞌ kebꞌenukunaj
JOH 12:41 Ri qꞌalajisanel Isaías xutzꞌibꞌaj waꞌ ma xril pan runimal uchomal ri Jesús y lik kꞌo xuqꞌalajisaj chwi Rire.
JOH 12:42 Na rukꞌ ta kꞌu riꞌ, e kꞌi xekojow re ri Jesús, jujun ne chike e aj wach re ri tinamit. Pero na xkiqꞌalajisaj ta waꞌ chikiwach ri kachbꞌiꞌil ruma kakixiꞌij kibꞌ chikiwach ri fariseos. Ma we xetaꞌmaxik, na kekꞌul ta chi pa ri sinagoga.
JOH 12:43 E xkiꞌan waꞌ ma e más kukꞌul kikꞌuꞌx ri yakbꞌal kiqꞌij kakiꞌan ri winaq, chwa ri yakbꞌal kiqꞌij kuꞌan ri Dios.
JOH 12:44 Ri Jesús ko xsikꞌin che ubꞌiꞌxikil: «China ri kakubꞌiꞌ ukꞌuꞌx wukꞌ, na xew ta kakubꞌiꞌ ukꞌuꞌx wukꞌ riꞌin, ma e kakubꞌiꞌ ukꞌuꞌx rukꞌ ri Jun taqayom lo we.
JOH 12:45 China ri kilow we riꞌin, e junam rukꞌ karil ri Jun taqayom lo we.
JOH 12:46 »In ri in Qꞌijsaq in kꞌuninaq che ruwachulew chaꞌ china ri kakubꞌiꞌ ukꞌuꞌx wukꞌ riꞌin, na kakꞌojiꞌ ta pa qꞌequꞌm.
JOH 12:47 Noꞌj we kꞌo junoq xuta ri nuchꞌaꞌtem yey na kuꞌan ta ri kambꞌiꞌij, na in ta ri kinqꞌataw tzij puwiꞌ. Ma in kꞌuninaq che ruwachulew na re ta kanqꞌat tzij pakiwi ri tikawex; e in kꞌuninaq re kebꞌenukolobꞌej konoje ri tikawex.
JOH 12:48 »Yey china ri kukꞌaq bꞌi nuqꞌij y na kukoj ta ri nuchꞌaꞌtem, kꞌo ri kaqꞌataw tzij puwiꞌ. Waꞌ e ri chꞌaꞌtem nubꞌiꞌim, ri kaqꞌataw tzij puwiꞌ che rukꞌisbꞌal qꞌij.
JOH 12:49 Ma na xa ta pa we riꞌin kinchꞌaꞌtik; ri Nuqaw ri taqayom lo we, e intaqayom lo che ronoje saꞌ ri kambꞌiꞌij y ri kankꞌutu.
JOH 12:50 Riꞌin wetaꞌam e rutaqanik ri Nuqaw kukꞌam lo kꞌaslemal na jinta utaqexik. Jekꞌulaꞌ, ronoje ri kambꞌiꞌij riꞌin, e inutaqom lo riꞌ ri Nuqaw che ubꞌiꞌxikil» xchaꞌ.
JOH 13:1 Xa naqaj chi kꞌo wi lo ruqꞌijol ri nimaqꞌij Pascua yey ri Jesús retaꞌam ya kopon ruqꞌijol echiriꞌ kuya kan ruwachulew y keꞌek rukꞌ Ruqaw chilaꞌ chikaj. Ekꞌu Rire lik kꞌax ebꞌunaꞌom rutijoꞌn e kꞌo rukꞌ wara che ruwachulew; yey janipa qꞌij xkꞌojiꞌ kukꞌ, e laꞌ lik kꞌax xebꞌunaꞌo.
JOH 13:2 Xopon kꞌu rubꞌenebꞌal qꞌij echiriꞌ ri Jesús kukꞌ rutijoꞌn e riꞌ kewaꞌik. Jun kꞌu chike e ri Judas aj Iscariot rukꞌajol ri Simón. Yey kojom chi pa ranimaꞌ ruma ritzel winaq kukꞌayij ri Jesús.
JOH 13:3 Ekꞌu ri Jesús retaꞌam yaꞌtal ronoje puqꞌabꞌ ruma Ruqaw, yey Rire petinaq rukꞌ ri Dios y rukꞌ ri Dios katzelej wi.
JOH 13:4 Na rukꞌ ta kꞌu riꞌ, ri Jesús xyaktajik, xresaj ruqꞌuꞌ uripom chirij, xukꞌam jun twayo puqꞌabꞌ y xuxim chupa.
JOH 13:5 Tekꞌuchiriꞌ xuqꞌej yaꞌ pa jun kꞌolibꞌal, xujeq uchꞌajik ri kaqan rutijoꞌn y kuchaqisaj rukꞌ ri twayo uximom chupa.
JOH 13:6 Echiriꞌ kujeq uchꞌajik ri raqan ri Pedro, rire jewaꞌ xubꞌiꞌij che ri Jesús: —Wajawal, ¿kachꞌaj kami la riꞌ ri waqan? —xchaꞌ.
JOH 13:7 Ri Jesús xukꞌul uwach: —Woꞌora na kamaj ta usukꞌ saꞌ wa kintajin che uꞌanik; kꞌate na kꞌu riꞌ kamaj usukꞌ —xchaꞌ.
JOH 13:8 Ekꞌu ri Pedro xubꞌiꞌij che: —Riꞌin na kanya ta kꞌana luwar cheꞌla kachꞌaj la ri waqan —xchaꞌ. Ri Jesús xubꞌiꞌij che: —We na kanchꞌaj ta laꞌ waqan, riꞌ na jinta chi awe wukꞌ riꞌin —xchaꞌ.
JOH 13:9 Xubꞌiꞌij kꞌu ri Pedro che: —We e riꞌ, Wajawal, na xew tane ri waqan kachꞌaj la; chꞌaja ne la riꞌ ri nuqꞌabꞌ y ri nujolom —xchaꞌ.
JOH 13:10 Ri Jesús jewaꞌ xubꞌiꞌij che: —E junoq kꞌakꞌ atininaq, xew kajawaxik kachꞌajiꞌ ri raqan, ma ronoje rucuerpo chꞌajtal chik. Jekꞌulaꞌ riꞌix chwach ri Dios ix chi chꞌajtalik, tobꞌ na iwonoje taj —xchaꞌ.
JOH 13:11 Ri Jesús retaꞌam chik china ri kakꞌayin re; e uwariꞌche xubꞌiꞌij: “Na iwonoje taj ix chꞌajtalik.”
JOH 13:12 Echiriꞌ xukꞌis uchꞌajik ri kaqan rutijoꞌn, xurip tanchi ruqꞌuꞌ chirij, xtzꞌuyiꞌ tanchi chwa ri mexa y xutzꞌonoj chike: —¿Kimaj usukꞌ saꞌ keꞌelawi wa xinꞌan chiwe?
JOH 13:13 Riꞌix kibꞌiꞌij chwe: “Tijonel” y “Qajawal” y qatzij ri kibꞌiꞌij, ma lik e uꞌanom riꞌ.
JOH 13:14 We in kꞌu Itijonel riꞌ yey in Iwajawal y xinchꞌaj kꞌu liꞌwaqan, jekꞌulaꞌ riꞌ chiꞌana riꞌix; chichꞌaja kꞌu liꞌwaqan chiwach riꞌix chiwibꞌil iwibꞌ.
JOH 13:15 Riꞌin xinꞌan waꞌ re kꞌutubꞌal chiwach, chaꞌ riꞌix jelaꞌ kiꞌano pachaꞌ ri xinꞌan riꞌin.
JOH 13:16 Paqatzij wi kambꞌiꞌij chiwe: Na jinta juna aj chak más kꞌo uwach chwa ri rajaw, yey na jinta ne juna taqoꞌn más kꞌo uwach chwa ri taqayom lo re.
JOH 13:17 We kimaj usukꞌ taq waꞌ y kitijoj iwibꞌ che uꞌanik, nim iqꞌij iwalaxik riꞌ.
JOH 13:18 »Pero na kinchꞌaꞌt ta piwiꞌ iwonoje, ma riꞌin wetaꞌam china ri ebꞌenuchaꞌom. Yey e kuꞌana na ri tzꞌibꞌital kan pa Ruchꞌaꞌtem ri Dios, pa kubꞌiꞌij wi: E ri jun kawaꞌ junam wukꞌ, e riꞌ ri yaktajinaq chwij.
JOH 13:19 Kintajin kꞌu pan che ubꞌiꞌxikil chiwe woꞌora chaꞌ echiriꞌ kuꞌana waꞌ, riꞌix kikojo: “In Riꞌin.”
JOH 13:20 Paqatzij wi kambꞌiꞌij chiwe: China ri kakꞌuluw re ri kantaq bꞌi riꞌin, e junam rukꞌ in ri kinukꞌulu; yey china kꞌu ri kakꞌuluw we riꞌin, e kukꞌul ri Jun taqayom lo we —xchaꞌ.
JOH 13:21 Echiriꞌ xukꞌis ubꞌiꞌxikil waꞌ, ri Jesús xok bꞌis chukꞌuꞌx y jewaꞌ xubꞌiꞌij: —Paqatzij wi kambꞌiꞌij chiwe: Jun chiwe riꞌix kinukꞌayij —xchaꞌ.
JOH 13:22 Ekꞌuchiriꞌ, rutijoꞌn xkijeq kakitzulaꞌ kiwach chikibꞌil kibꞌ ma na ketaꞌam taj china ri xubꞌiꞌij.
JOH 13:23 Kꞌo kꞌu jun chike rutijoꞌn, waꞌ e ri lik kꞌax kanaꞌ ruma ri Jesús, kawaꞌik jaꞌl putzal Rire chwa ri mexa.
JOH 13:24 Ekꞌu ri Simón Pedro xuꞌan pan uqꞌabꞌ che chaꞌ kutzꞌonoj che ri Jesús china ri kubꞌiꞌij.
JOH 13:25 Y ri jun tijoꞌn jaꞌl putzal ri Jesús xutzꞌonoj kꞌu che: —Wajawal, ¿china laꞌ la kabꞌiꞌij la? —xchaꞌ.
JOH 13:26 Ri Jesús xukꞌul uwach: —Kanmuꞌ juchꞌaqap pam y china kꞌu che kanya wi, e rire —xchaꞌ. Xumuꞌ kꞌu juchꞌaqap pam y xuya che ri Judas aj Iscariot, rukꞌajol ri Simón.
JOH 13:27 Echiriꞌ ri Judas xukꞌam ri pam, xok ri Satanás pa ranimaꞌ. Ekꞌu ri Jesús xubꞌiꞌij che: —Ri kawaj kaꞌano, chaꞌana laꞌ riꞌ —xchaꞌ.
JOH 13:28 Yey na jinta junoq chike ri kewaꞌ chwa ri mexa xumaj usukꞌ suꞌbꞌe xubꞌiꞌij laꞌ che.
JOH 13:29 Ruma kꞌu puqꞌabꞌ ri Judas kꞌo wi ri bꞌolxa pa kꞌolotal wi ri kipuaq, jujun chike xkichꞌobꞌo laj ri Jesús xubꞌiꞌij che kuꞌloqꞌo tan ri kajawax chike re ri nimaqꞌij, o laj kꞌo kujach chike ri nibꞌaꞌibꞌ.
JOH 13:30 Ekꞌuchiriꞌ ri Judas ukꞌamom chi ri pam, na jampatana xel bꞌi yey lik chaqꞌabꞌ chik.
JOH 13:31 Echiriꞌ elinaq chubꞌi ri Judas, ri Jesús xubꞌiꞌij: —Ekꞌu woꞌora kaqꞌalajin runimal uchomalil Ralaxel Chikixoꞌl Tikawex y rukꞌ Rire kaqꞌalajin wi runimal uchomalil ri Dios.
JOH 13:32 Yey we Ralaxel Chikixoꞌl Tikawex kuqꞌalajisaj runimal uchomalil ri Dios, jekꞌuriꞌlaꞌ e ri Dios ri kaqꞌalajisan runimal uchomalil Ralaxel Chikixoꞌl Tikawex, yey waꞌ na kamayin ta che uꞌanik.
JOH 13:33 »Ix walkꞌoꞌal, xa joqꞌotaj chi in kꞌo iwukꞌ. Riꞌix kinitzukuj na kꞌu riꞌ; pero e pachaꞌ ri ximbꞌiꞌij chike raj judiꞌabꞌ, na jinta piqꞌabꞌ kixꞌek chilaꞌ pa kinꞌek wi riꞌin.
JOH 13:34 »Kanya wa jun kꞌakꞌ taqanik chiwe: E lik kꞌax chinaꞌa iwibꞌ chiwach. Jelaꞌ pachaꞌ riꞌin lik kꞌax kixinnaꞌo, jekꞌulaꞌ lik kꞌax chinaꞌa iwibꞌ riꞌix chiwach.
JOH 13:35 We lik kꞌu kꞌax kinaꞌ iwibꞌ chiwach, ruma waꞌ konoje ri winaq kaketaꞌmaj ix nutijoꞌn —xchaꞌ.
JOH 13:36 Ri Simón Pedro xutzꞌonoj che ri Jesús: —Wajawal, ¿pa kꞌu keꞌek wi la? —xchaꞌ. Ri Jesús xukꞌul uwach: —E pa wa kinꞌek wi riꞌin, na yaꞌtal ta chawe kat-terej bꞌi chwij woꞌora; noꞌj kopon na kꞌu ruqꞌijol echiriꞌ katopon chilaꞌ pa kinꞌek wi riꞌin —xchaꞌ.
JOH 13:37 Ekꞌu ri Pedro xubꞌiꞌij che: —Wajawal, ¿suꞌchak na yaꞌtal ta chwe kinterej bꞌi chiꞌij la woꞌora? Ma riꞌin xa jumul kanya ne ri nukꞌaslem pa kamik uma rilal —xchaꞌ.
JOH 13:38 Y ri Jesús xukꞌul uwach: —¿Lik qatzij kawaj kaya awibꞌ pa kamik wuma riꞌin? Paqatzij wi kambꞌiꞌij chawe: Echiriꞌ kꞌamajaꞌ ne kabꞌixon ri teren, riꞌat oxlaj chik abꞌiꞌim na awetaꞌam ta nuwach.
JOH 14:1 »Lik mapax ikꞌuꞌx. E chikubꞌaꞌ ikꞌuꞌx rukꞌ ri Dios y chikubꞌaꞌ ikꞌuꞌx wukꞌ riꞌin.
JOH 14:2 Chilaꞌ pa kꞌo wi ri Nuqaw lik ukꞌiyal jeqlebꞌal kꞌolik. We ta na e ta uꞌanom, riꞌin nubꞌiꞌim chi riꞌ chiwe. Ekꞌu waꞌ kinꞌek chaꞌ kiꞌnyijbꞌaꞌ jun luwar iwe riꞌix.
JOH 14:3 Yey we xinꞌek kꞌut y xyijbꞌitaj ri luwar iweꞌix, kinkꞌun tanchik y kixoꞌlnukꞌamaꞌ chaꞌ jelaꞌ pa kineꞌkꞌola wi riꞌin, riꞌix kixeꞌkꞌola chilaꞌ wukꞌ.
JOH 14:4 Riꞌix iwetaꞌam pa kinꞌek wi yey iwetaꞌam ri bꞌe —xchaꞌ.
JOH 14:5 Xubꞌiꞌij kꞌu ri Tomás che: —Qajawal, riꞌoj na qetaꞌam taj pa keꞌek wi la. ¿Saꞌ kꞌu uꞌanik riꞌ kaqetaꞌmaj ri bꞌe? —xchaꞌ.
JOH 14:6 Ri Jesús xukꞌul uwach: —In ri in Bꞌe, in ri in Qꞌijsaq yey in ri in Kꞌaslemal. Na jinta junoq kopon rukꞌ ri Nuqaw we na wuma ta riꞌin.
JOH 14:7 We iwetaꞌam nuwach riꞌin, iwetaꞌam uwach riꞌ ri Nuqaw. Chwi kꞌu riꞌ woꞌora kiwetaꞌmaj uwach, ma iwilom chi uwach —xchaꞌ.
JOH 14:8 Ekꞌu ri Felipe xubꞌiꞌij che: —Qajawal, kꞌutu la chiqawach ri Qaw la y kojkubꞌiꞌ kꞌu riꞌ che —xchaꞌ.
JOH 14:9 Ri Jesús xukꞌul uwach: —Felipe, ukꞌiyal qꞌij chi waꞌ kꞌut e laꞌ in kꞌo iwukꞌ, ¿yey kꞌamajaꞌ kawetaꞌmaj nuwach? Ma china ri etaꞌmayom nuwach riꞌin, riꞌ e rilom uwach ri Nuqaw. ¿Suꞌchak kꞌu riꞌ katzꞌonoj chwe kankꞌut ri Nuqaw chiwach?
JOH 14:10 Riꞌin rukꞌ ri Nuqaw y Rire wukꞌ riꞌin, xa oj jun. ¿Na kakoj ta kami riꞌ waꞌ? E janipa wa kambꞌiꞌij chiwe, na xa ta pa we riꞌin kambꞌiꞌij ma ri nuchꞌaꞌtem e re ri Nuqaw ri jeqel wukꞌ, yey Rire kuꞌan ruchak wuma riꞌin.
JOH 14:11 Chikojo kꞌu wa kambꞌiꞌij chiwe: Riꞌin rukꞌ ri Nuqaw y Rire wukꞌ riꞌin, xa oj jun. We na kikoj ta kꞌu waꞌ ruma ri nuchꞌaꞌtem, e chikojo ruma ri chak nuꞌanom.
JOH 14:12 »Paqatzij wi kambꞌiꞌij chiwe: China ri kakubꞌiꞌ ukꞌuꞌx wukꞌ riꞌin, riꞌ kuꞌan ne ri chak jelaꞌ pachaꞌ ri kanꞌan riꞌin; y más ne nimaq taq chak ri kuꞌano, ma e riꞌin kinꞌek pa kꞌo wi ri Nuqaw.
JOH 14:13 Ronoje kꞌu ri kitzꞌonoj riꞌix che ri Nuqaw pa ri nubꞌiꞌ, riꞌin kanꞌano chaꞌ jelaꞌ runimal uchomalil ri Dios kaqꞌalajin ruma Rukꞌajol.
JOH 14:14 Ronoje kꞌu riꞌ ri kitzꞌonoj riꞌix pa ri nubꞌiꞌ, riꞌin kanꞌano.
JOH 14:15 »We riꞌix kꞌax kininaꞌo, e lik chiꞌana janipa ri kixintaq che uꞌanik.
JOH 14:16 Yey riꞌin e kantzꞌonoj che ri Nuqaw chaꞌ kutaq chi lo jun chik Toꞌbꞌel iwe re kunimarisaj ikꞌuꞌx; y asu kakꞌojiꞌ iwukꞌ na jinta utaqexik.
JOH 14:17 Waꞌ e ri Uxlabꞌixel re ri Qꞌijsaq. Taq ri winaq na utz taj kakikꞌulu, ma na kakil ta uwach y na ketaꞌam tane uwach. Noꞌj riꞌix iwetaꞌam uwach, ma Rire kꞌo chixoꞌlibꞌal y koꞌlkꞌola piwanimaꞌ.
JOH 14:18 »Riꞌin na kixinwoqꞌotaj ta kanoq, ma kintzelej lo iwukꞌ.
JOH 14:19 Na naj ta chi kꞌu riꞌ, ri winaq na kakil ta chi nuwach; noꞌj riꞌix kiwil tanchi nuwach. Ruma kꞌu riꞌin kinkꞌastaj lo chikixoꞌl ri ekaminaq, jenelaꞌ riꞌix kixkꞌastajik.
JOH 14:20 Chupa kꞌu riꞌ laꞌ la qꞌij riꞌix kiwetaꞌmaj: Riꞌin rukꞌ ri Nuqaw xa oj jun, yey riꞌix xa jun iꞌanom wukꞌ riꞌin y riꞌin xa jun nuꞌanom iwukꞌ riꞌix.
JOH 14:21 China kꞌu ri ukꞌulum ri nutaqanik y kuꞌan kꞌu janipa ri kambꞌiꞌij che, riꞌ lik kꞌax kinunaꞌo. Y china ri kꞌax kanaꞌw we riꞌin, kꞌax kanaꞌ ruma ri Nuqaw. Yey riꞌin lik kꞌax kannaꞌo y kanqꞌalajisaj che, in china riꞌin —xchaꞌ.
JOH 14:22 Ri Judas (na e ta ri aj Iscariot) xubꞌiꞌij: —Qajawal, ¿suꞌbꞌe kaqꞌalajisaj la chiqawach riꞌoj china rilal yey chikiwach ri winaq na kaꞌan ta la waꞌ? —xchaꞌ.
JOH 14:23 Ri Jesús xukꞌul uwach: —China ri kꞌax kinunaꞌ riꞌin, e kuꞌan janipa ri kambꞌiꞌij che. Ekꞌu ri Nuqaw kꞌax kunaꞌ rire, yey ri Nuqaw y riꞌin kojoꞌljeqela rukꞌ.
JOH 14:24 China kꞌu ri na kꞌax ta kinunaꞌo, riꞌ na kutaqej ta janipa ri kambꞌiꞌij che. Wa tzij kixtajin che utayik, na xa ta weꞌin, e re ri Nuqaw, ri xtaqaw lo weꞌin.
JOH 14:25 »Ronoje waꞌ kintajin che ubꞌiꞌxik chiwe xaloqꞌ kꞌa in kꞌo iwukꞌ.
JOH 14:26 Yey echiriꞌ kinꞌek, ri Nuqaw kutaq lo ri jun Toꞌbꞌel pa ri nubꞌiꞌ re kubꞌochiꞌij ikꞌuꞌx, waꞌ e ri Santowilaj Ruxlabꞌixel ri Dios. Echiriꞌ kakꞌun Rire, kukꞌut ronoje chiwach y kukuxtaj kꞌu chiwe janipa ri nubꞌiꞌim riꞌin chiwe.
JOH 14:27 »Ri utzil chomal kꞌo wukꞌ riꞌin, kanya kan chiwe. Yey waꞌ wa utzil chomal kanya riꞌin chiwe na xa ta jelaꞌ pachaꞌ ri kakiya taq ri winaq. Mapax kꞌu ikꞌuꞌx y mixiꞌij iwibꞌ.
JOH 14:28 »Itom chi kꞌu ri nubꞌiꞌim chiwe: “Kinꞌek yey kintzelej tanchi lo iwukꞌ.” We e laꞌ qatzij lik kꞌax kininaꞌo, xixkiꞌkot tane kꞌu riꞌ che echiriꞌ xito kinꞌek rukꞌ ri Nuqaw, ma Rire más kꞌo uwach chinuwa riꞌin.
JOH 14:29 »Kannabꞌesaj pan ubꞌiꞌxik waꞌ chiwe chaꞌ echiriꞌ kuꞌanaꞌ, kikoj kꞌu riꞌ.
JOH 14:30 Na naj ta chi kꞌut kinchꞌaꞌt iwukꞌ; ma ya kakꞌun lo ritzel winaq, ri jun kataqan che ruwachulew, tobꞌ na jinta ne puqꞌabꞌ rire kataqan panuwi riꞌin.
JOH 14:31 Na rukꞌ ta kꞌu riꞌ, kanꞌano janipa ri kinutaq ri Nuqaw che uꞌanik, chaꞌ jelaꞌ ri winaq che ruwachulew kaketaꞌmaj riꞌin lik kꞌax kannaꞌ ri Nuqaw. »Chixyaktajoq; joꞌ, chojel bꞌi wara.
JOH 15:1 »In ri in saqil raqan uva y ri Nuqaw e ri aj chakunel chupa taq ri uva.
JOH 15:2 We kꞌo kꞌu juna uqꞌabꞌ ri uva na kuya ta uwach, Rire kuqꞌat bꞌi. Noꞌj kꞌu ri kuya uwach, xa e kujal uwiꞌ re kuꞌan chom che chaꞌ jelaꞌ kuya más uwach.
JOH 15:3 Jekꞌulaꞌ riꞌix ꞌanom chi chom chiwe ruma ri kꞌutunik nuꞌanom chiwach.
JOH 15:4 »Miwesaj iwibꞌ chwij, jekꞌulaꞌ xa jun qaꞌanom, riꞌix wukꞌ riꞌin y riꞌin iwukꞌ riꞌix. Ma e pachaꞌ juna uqꞌabꞌ cheꞌ na kawachin ta xa utukel we kesax che ri raqan; jekꞌulaꞌ riꞌ riꞌix, na utz taj kixwachinik we kiwesaj iwibꞌ chwij.
JOH 15:5 »In ri in raqan ri tikoꞌn yey riꞌix ix ruqꞌabꞌ. China kꞌu ri uꞌanom xa jun wukꞌ riꞌin yey riꞌin in xa jun rukꞌ rire, riꞌ lik kawachinik. Ma we iwesam iwibꞌ chwij, na jinta kichꞌij uꞌanik.
JOH 15:6 China kꞌu ri karesaj ribꞌ chwij, jelaꞌ kaꞌan che pachaꞌ ruqꞌabꞌ cheꞌ na jinta uchak, kachetik y kakꞌaq bꞌi. Kachaqij kꞌut, tekꞌuchiriꞌ kamolik y kaporox pa aqꞌ.
JOH 15:7 »Yey we e laꞌ xa jun iꞌanom riꞌix wukꞌ y na kikꞌow ta chikꞌuꞌx taq ri nukꞌutum chiwach, chitzꞌonoj kꞌu riꞌ saꞌ taq ri kiwaj y kayaꞌtaj na chiwe.
JOH 15:8 Ri Nuqaw lik kayakiꞌ uqꞌij echiriꞌ riꞌix kiya ukꞌiyal ijiqꞌobꞌalil y rukꞌ waꞌ kaqꞌalajinik pa saqil wi ix nutijoꞌn.
JOH 15:9 »Jekꞌulaꞌ pachaꞌ ri Nuqaw lik kꞌax kinunaꞌ riꞌin, jekꞌuriꞌlaꞌ riꞌin kꞌax kixinnaꞌ riꞌix. Lik kꞌut miwesaj iwibꞌ chupa ri rutzil nukꞌuꞌx chiwe.
JOH 15:10 We e kiꞌan janipa ri kixintaq che, kixkꞌojiꞌ kꞌu riꞌ chupa wa rutzil nukꞌuꞌx, jelaꞌ pachaꞌ riꞌin nuꞌanom janipa ri inutaqom ri Nuqaw che uꞌanik yey in kꞌo chupa ri rutzil ukꞌuꞌx Rire.
JOH 15:11 »Ximbꞌiꞌij waꞌ chiwe chaꞌ ri nukiꞌkotemal kakꞌojiꞌ iwukꞌ y kanoj kꞌu riꞌ ri iwanimaꞌ che kiꞌkotemal.
JOH 15:12 »Ekꞌu nutaqanik waꞌ kanya chiwe: Lik kꞌax chinaꞌa iwibꞌ chiwach jelaꞌ pachaꞌ riꞌin lik kꞌax kixinnaꞌo.
JOH 15:13 Na jinta juna kꞌutubꞌal re ri rutzil kꞌuꞌxaj más nim chwa waꞌ: E junoq kuya rukꞌaslem che utoꞌik jun chik tobꞌ ne kakam ruma.
JOH 15:14 »Riꞌix ix wamigos we e laꞌ e kiꞌan janipa ri kixintaq che uꞌanik.
JOH 15:15 Na kambꞌiꞌij ta chi ne “waj chak” chiwe, ma e juna aj chak na retaꞌam taj saꞌ ri kuꞌan ri rajaw. Kambꞌiꞌij kꞌu chiwe “ix wamigos”, ma nuyaꞌom chi retaꞌmaxik chiwe ronoje ri ubꞌiꞌim lo ri Nuqaw chwe.
JOH 15:16 Na ix ta xixchaꞌw we riꞌin, in ri xinchaꞌw iwe. Yey nuyaꞌom piqꞌabꞌ kiꞌana ri nuchak y jelaꞌ kiya ukꞌiyal ijiqꞌobꞌalil y waꞌ na jinta ukꞌisik. Yey janipa kꞌu ri kitzꞌonoj che ri Nuqaw pa ri nubꞌiꞌ, Rire kuya na chiwe.
JOH 15:17 Ekꞌu kixintaq che uꞌanik waꞌ: Kꞌax chinaꞌa iwibꞌ chiwach.
JOH 15:18 »We tzel kixkil ri winaq che ruwachulew, chiwetaꞌmaj e riꞌin ri nabꞌe tzel kinkilo.
JOH 15:19 We ta e laꞌ junam ribꞌinik riꞌix kukꞌ ri tikawex re ruwachulew, riꞌ lik kꞌax kixnaꞌik. Noꞌj in xinchaꞌw iwe riꞌix chikixoꞌl ri winaq; e uwariꞌche tzel kixilik.
JOH 15:20 Kꞌuna chikꞌuꞌx ri nubꞌiꞌim chiwe: Na jinta juna aj chak más kꞌo uwach chwa ri rajaw. We riꞌin internabꞌem rukꞌ kꞌaxkꞌobꞌik, jelaꞌ riꞌ kaꞌan chiwe riꞌix, kixternabꞌex rukꞌ kꞌaxkꞌobꞌik. Yey we e kꞌo ri kitaqem ri nutzij riꞌin, jekꞌulaꞌ riꞌ, e kꞌo ri kakitaqej ri kikꞌut riꞌix.
JOH 15:21 Pero ri kixkiternabꞌej rukꞌ kꞌax ruma ikojom ri nubꞌiꞌ, e kakiꞌan waꞌ ruma na ketaꞌam ta uwach ri xintaqaw loq.
JOH 15:22 »We tamaji xinkꞌun riꞌin y tamaji xinkꞌut rutzij ri Nuqaw chikiwach, na jinta kꞌu kimak riꞌ ruma na xkikꞌul ta wa tzij. Noꞌj riꞌin xinkꞌunik y xinkꞌut rutzij ri Nuqaw chikiwach; ruma kꞌu waꞌ, na jinta junoq chike utz kubꞌiꞌij na jinta umak.
JOH 15:23 Ma e ri tzel kebꞌilow we riꞌin, riꞌ e tzel kakil ri Nuqaw.
JOH 15:24 Na jinta kꞌu kimak we tamaji nuꞌanom ukꞌiyal milagros chikiwach yey waꞌ na jinta chi ne junoq ꞌanayom re. Noꞌj rike kilom ronoje taq waꞌ; y na rukꞌ ta kꞌu riꞌ, tzel kinkil riꞌin y tzel kakil ri Nuqaw.
JOH 15:25 »Ekꞌu xuꞌan taq waꞌ chaꞌ lik e kuꞌana janipa ri tzꞌibꞌital kan pa ri Tzij Pixabꞌ kꞌo pakiqꞌabꞌ rike: Tzel xinkilo tobꞌ na jinta numak kachaꞌ.
JOH 15:26 »Yey echiriꞌ kinopon rukꞌ ri Nuqaw, kantaq lo Jun Toꞌbꞌel iwe re kunimarisaj ikꞌuꞌx. Rire kape rukꞌ ri Nuqaw y e Qꞌalajisanel re ri Qꞌijsaq. Ekꞌuchiriꞌ kakꞌunik, kaqꞌalajisan chiwach riꞌix panuwi riꞌin.
JOH 15:27 Yey riꞌix kixqꞌalajisan na panuwi riꞌin, ma ix kꞌojiꞌnaq wukꞌ chwi ri jeqebꞌal lo ri nuchak.
JOH 16:1 »Ximbꞌiꞌij kꞌu ronoje waꞌ chiwe chaꞌ na kasach ta ri kubꞌulibꞌal ikꞌuꞌx wukꞌ.
JOH 16:2 Ma kopon ruqꞌijol echiriꞌ kixesax ne bꞌi riꞌix chupa taq ri sinagogas. Y china ri kakamisan iweꞌix, e chwa rire uchak ri Dios ri kuꞌano.
JOH 16:3 E kakiꞌan waꞌ ma na ketaꞌam ta kꞌana uwach ri Nuqaw y na ketaꞌam tane nuwach riꞌin.
JOH 16:4 Kambꞌiꞌij waꞌ chiwe, ma we xopon ruqꞌijol waꞌ, kꞌuna chikꞌuꞌx nubꞌiꞌim chi lo waꞌ chiwe. »Na ximbꞌiꞌij ta lo waꞌ chiwe chwi ri jeqebꞌal loq, ma kꞌa in kꞌo iwukꞌ.
JOH 16:5 Noꞌj woꞌora kinꞌek chaꞌ kineꞌkꞌola rukꞌ ri taqayom lo we riꞌin, yey na jinta chi ne junoq chiwe kutzꞌonoj chwe pa kinꞌek wi.
JOH 16:6 Yey ruma ne nubꞌiꞌim waꞌ chiwe, lik xok bꞌis chikꞌuꞌx.
JOH 16:7 Pero qatzij wa kambꞌiꞌij chiwe: Lik utz chiwe riꞌix we kinꞌek. Ma we na kinꞌek taj, na kakꞌun ta iwukꞌ ri Toꞌbꞌel re kubꞌochiꞌij ikꞌuꞌx. Noꞌj we xinꞌek, kantaq lo chiwe.
JOH 16:8 »Echiriꞌ kakꞌun ri Ruxlabꞌixel ri Dios, kuya na chi retaꞌmaxik chike ri winaq re ruwachulew china ri kꞌo umak, china ri lik jusukꞌ chwach ri Dios y china puwiꞌ kꞌo wi ri qꞌatbꞌal tzij re ri Dios.
JOH 16:9 Kuqꞌalajisaj kꞌut china ri kꞌo umak: Waꞌ e ri na kakubꞌiꞌ ta ukꞌuꞌx wukꞌ riꞌin.
JOH 16:10 Kuqꞌalajisaj china ri lik jusukꞌ, ma riꞌin kinꞌek rukꞌ ri Nuqaw yey riꞌix na kiwil ta chi nuwach.
JOH 16:11 Yey kuqꞌalajisaj, ri Dios uqꞌatom chi tzij puwi ritzel winaq kataqan che ruwachulew.
JOH 16:12 »Lik kꞌo kuaj kambꞌiꞌij chiwe, pero na kambꞌiꞌij tana, ma woꞌora na kimaj ta usukꞌ.
JOH 16:13 Noꞌj echiriꞌ kakꞌun ri Uxlabꞌixel re ri Qꞌijsaq, riꞌ kukꞌut chiwach riꞌix ronoje ri lik qatzij. Rire na xa ta pa re kachꞌaꞌtik, ma janipa ri kubꞌiꞌij e ubꞌiꞌim ri Dios che y jelaꞌ kuya chi retaꞌmaxik chiwe taq ri katajin loq.
JOH 16:14 Ma e kuqꞌalajisaj janipa ri kuaj kambꞌiꞌij riꞌin chiwe, y jelaꞌ kunimarisaj nuqꞌij.
JOH 16:15 Ronoje ri kꞌo rukꞌ ri Nuqaw, kꞌo wukꞌ riꞌin; e uwariꞌche ximbꞌiꞌij ri Ruxlabꞌixel e kuqꞌalajisaj janipa ri kuaj kambꞌiꞌij riꞌin chiwe.
JOH 16:16 »Na naj ta chi kꞌu riꞌ kiwil nuwach, ma riꞌin kinꞌek chilaꞌ pa kꞌo wi ri Nuqaw; pero chiqawach apanoq kiꞌwila tanchi nuwach —xchaꞌ.
JOH 16:17 Ekꞌuchiriꞌ, jujun chike rutijoꞌn jewaꞌ xkitzꞌonoj chikiwach: «¿Saꞌ keꞌelawi waꞌ? Ma kubꞌiꞌij: “Na naj ta chi kꞌu riꞌ kiwil nuwach, ma riꞌin kinꞌek chilaꞌ pa kꞌo wi ri Nuqaw; pero chiqawach apanoq kiꞌwila tanchi nuwach.”
JOH 16:18 ¿Saꞌ keꞌelawi: “Na naj ta chi kꞌu riꞌ”? Na kaqamaj ta usukꞌ saꞌ puwi kachꞌaꞌt wi» xechaꞌ.
JOH 16:19 Ri Jesús xunaꞌbꞌej kakaj kakiꞌan tzꞌonobꞌal che. Ruma kꞌu riꞌ xubꞌiꞌij chike: —Riꞌin ximbꞌiꞌij chiwe: “Na naj ta chi kꞌu riꞌ kiwil nuwach, pero chiqawach apanoq kiꞌwila tanchi nuwach.” ¿E kitzꞌonoj saꞌ keꞌelawi waꞌ?
JOH 16:20 Paqatzij wi kambꞌiꞌij chiwe: Riꞌix kixoqꞌ na y kixbꞌison na, tobꞌ ri winaq re ruwachulew kekiꞌkotik. Tobꞌ riꞌix kixbꞌison woꞌora, wa bꞌis kuꞌana kiꞌkotemal.
JOH 16:21 »Echiriꞌ kutzir uwach juna ixoq, lik kakꞌojiꞌ pa kꞌaxkꞌolil ma xopon ruqꞌij. Noꞌj echiriꞌ alaxinaq chi rakꞌa, na kakꞌun ta chi ne chukꞌuꞌx ri kꞌaxkꞌolil ruma rukiꞌkotemal, ma xalax jun akꞌa che ruwachulew.
JOH 16:22 Jekꞌuriꞌlaꞌ riꞌix kapax ikꞌuꞌx woꞌora; noꞌj echiriꞌ kiwil tanchi nuwach, kanoj kꞌu ri iwanimaꞌ che kiꞌkotemal yey waꞌ wa kiꞌkotemal na jinta junoq kesan re chiwe.
JOH 16:23 Chupa kꞌu riꞌ laꞌ la qꞌij na kajawax ta chik kiꞌan tzꞌonobꞌal chwi ri nubꞌiꞌim. »Paqatzij wi kambꞌiꞌij chiwe: Ronoje ri kitzꞌonoj che ri Nuqaw pa ri nubꞌiꞌ, Rire kuya chiwe.
JOH 16:24 Kꞌa chwi woꞌora riꞌix na jinta kꞌo itzꞌonom pa ri nubꞌiꞌ riꞌin. Chitzꞌonoj y kikꞌulu, chaꞌ jelaꞌ kanoj ri iwanimaꞌ che kiꞌkotemal.
JOH 16:25 »Nubꞌiꞌim waꞌ chiwe rukꞌ kꞌambꞌal naꞌoj; noꞌj kopon kꞌu ri qꞌij echiriꞌ na kajawax ta chik kinchꞌaꞌt iwukꞌ rukꞌ kꞌambꞌal naꞌoj, ma riꞌ lik qꞌalaj chiwach riꞌix janipa ri kambꞌiꞌij chiwe chwi ri Nuqaw.
JOH 16:26 Chupa kꞌu laꞌ la qꞌij, utz kitzꞌonoj che ri Nuqaw chupa ri nubꞌiꞌ janipa ri kajawax chiwe. Yey na kajawax ta kꞌu riꞌ kinelaj chwach ri Nuqaw piwiꞌ,
JOH 16:27 ma ri Nuqaw lik kꞌax kixunaꞌo ruma kꞌax ininaꞌom riꞌin yey lik ikojom, riꞌin rukꞌ ri Dios in petinaq wi.
JOH 16:28 Riꞌin in petinaq rukꞌ ri Nuqaw y xinkꞌun che ruwachulew; yey woꞌora e waꞌ kanya kan ruwachulew y kintzelej rukꞌ ri Nuqaw —xchaꞌ.
JOH 16:29 Ekꞌu rutijoꞌn xkibꞌiꞌij che: —Woꞌora lik qꞌalaj ri kabꞌiꞌij la chiqe, ma na kachꞌaꞌt ta chi la rukꞌ kꞌambꞌal naꞌoj.
JOH 16:30 Yey woꞌora kaqamaj usukꞌ rilal lik etaꞌam la ronoje. Uwariꞌche na kajawax taj kꞌo junoq kuꞌan tzꞌonobꞌal cheꞌla, ma etaꞌam chi la saꞌ ri kaqaj kaqatzꞌonoj echiriꞌ kꞌamajaꞌ ne kaqaꞌan ri tzꞌonobꞌal. Ruma kꞌu laꞌ, qakojom rilal rukꞌ ri Dios petinaq wi la —xechaꞌ.
JOH 16:31 Ri Jesús xukꞌul uwach: —¿Kꞌa e woꞌora kikoj waꞌ?
JOH 16:32 Kakꞌun kꞌu ruqꞌijol y waꞌ ya xujeqo echiriꞌ riꞌix kixkicher bꞌi. Chijujunal kꞌut kimaj bꞌi ibꞌe y kiniya kan nutukel. Pero riꞌin na kinkanaj ta kan nutukel, ma ri Nuqaw kꞌo wukꞌ.
JOH 16:33 »Ximbꞌiꞌij ronoje waꞌ chiwe chaꞌ wuma riꞌin kiriq utzil chomal. Che ruwachulew riꞌix lik kitij kꞌax. Pero chinimarisaj kꞌu ikꞌuꞌx, ma riꞌin nuchꞌijom uchuqꞌabꞌ taq ri na utz taj re ruwachulew —xchaꞌ.
JOH 17:1 Echiriꞌ ubꞌiꞌim chi waꞌ, ri Jesús xtzuꞌn chikaj y xubꞌiꞌij: «Nuqaw, xopon ru orayil; yaka kꞌu la uqꞌij ri Kꞌajol la chaꞌ jelaꞌ ri Kꞌajol la kuyak qꞌij Rilal.
JOH 17:2 Ma Rilal yaꞌom la che ri Kꞌajol la kataqan pakiwi konoje ri tikawex, chaꞌ puqꞌabꞌ Rire kꞌo wi kuya kꞌaslemal na jinta utaqexik chike konoje ri eyaꞌom la che.
JOH 17:3 Ekꞌu wa kꞌaslemal na jinta utaqexik e ruma ri ketaꞌmax wach la, xew Rilal Lal Dios y na jinta jun chik, yey ketaꞌmax kꞌu uwach ri Jesucristo, ri xtaq lo la.
JOH 17:4 »Riꞌin nuyakom qꞌij la wara che ruwachulew y xinkꞌis uꞌanik ri xintaq lo la che uꞌanik.
JOH 17:5 Ekꞌu woꞌora Nuqaw, yaka la nuqꞌij chilaꞌ ukꞌ la, jelaꞌ pachaꞌ ri ꞌanom la chwe echiriꞌ kꞌamajaꞌ ne kajeqer ruwachulew.
JOH 17:6 »Chike taq ri tikawex xeya la chwe che ruwachulew, nuqꞌalajisam china Rilal. Rike e e la, y xeya la panuqꞌabꞌ yey kitaqem ri tzij la.
JOH 17:7 Y woꞌora ketaꞌam waꞌ: Ronoje ri yaꞌom la chwe, ukꞌ la petinaq wi.
JOH 17:8 Ma janipa ri xbꞌiꞌij la chwe, nutzijom chike ri xeya la chwe, y rike xkikojo. Yey xketaꞌmaj kꞌut paqatzij wi riꞌin ukꞌ la in petinaq wi y Lal taqayom lo la weꞌin.
JOH 17:9 »Riꞌin kinelaj ko chiwach la pakiwi rike; na e ta pakiwi konoje ri tikawex, xew pakiwi ri eyaꞌom la panuqꞌabꞌ, ma rike e e la.
JOH 17:10 Konoje ri e kꞌo panuqꞌabꞌ, e e la. Jekꞌulaꞌ riꞌ, konoje ri e kꞌo paqꞌabꞌ Rilal, e weꞌin. Y ri yakbꞌal nuqꞌij kaqꞌalajin kuma rike.
JOH 17:11 »Yey riꞌin kintzelej ukꞌ la, na kinkanaj ta kan che ruwachulew; noꞌj rike kekanajik. Lal Santowilaj Nuqaw, chechajij ko la chupa ri bꞌiꞌ la, ri eyaꞌom la chwe, chaꞌ chuꞌana xa jun kikꞌuꞌx jelaꞌ pachaꞌ nuꞌanom riꞌin ukꞌ la.
JOH 17:12 Echiriꞌ riꞌin in kꞌo kukꞌ wara che wuꞌwachulew, xebꞌenuchajij chupa ri bꞌiꞌ la ri eyaꞌom la chwe. Na jinta junoq chike xsachik, xew kꞌu ri jun xex wi sachinaq chik chaꞌ e kuꞌana janipa ri tzꞌibꞌital kan chupa ri Chꞌaꞌtem la.
JOH 17:13 »Ekꞌu woꞌora kintzelej tanchi ukꞌ la. Pero xaloqꞌ kꞌa in kꞌo che ruwachulew, kambꞌiꞌij taq waꞌ chike chaꞌ lik kanoj ri kanimaꞌ che kiꞌkotemal, jelaꞌ pachaꞌ ri kiꞌkotemal kꞌo wukꞌ riꞌin.
JOH 17:14 »Riꞌin nuyaꞌom ri Chꞌaꞌtem la chike. Yey taq ri winaq re ruwachulew tzel kekilo ma na junam ta kikꞌuꞌx kukꞌ, jelaꞌ pachaꞌ riꞌin na junam ta nukꞌuꞌx kukꞌ ri e re ruwachulew.
JOH 17:15 Na e ta kꞌu kinelaj chiwach la chaꞌ kebꞌesaj la che ruwachulew, xew lik chechajij la chwach ritzel winaq.
JOH 17:16 Rike na junam ta kikꞌuꞌx kukꞌ ri e re ruwachulew, jelaꞌ pachaꞌ riꞌin na junam ta nukꞌuꞌx kukꞌ ri e re ruwachulew.
JOH 17:17 »Yaꞌa kꞌu la chike kebꞌin jusukꞌ chupa ri Qꞌijsaq e la, waꞌ e ri Chꞌaꞌtem la.
JOH 17:18 Jelaꞌ pachaꞌ Rilal xintaq lo la chikixoꞌl ri tikawex che ruwachulew, jekꞌuriꞌlaꞌ riꞌin kebꞌenutaq bꞌi rike chikixoꞌl ri tikawex che ruwachulew.
JOH 17:19 Y kuma kꞌu rike, lik nuyaꞌom wibꞌ riꞌin che uꞌanik ri rajawal kꞌuꞌx la, chaꞌ jelaꞌ rike kebꞌin jusukꞌ chupa ri Qꞌijsaq.
JOH 17:20 »Yey na xew tane kinelaj chiwach la pakiwi rike, ma e kantzꞌonoj cheꞌla pakiwi ri kꞌamajaꞌ kakikoj ri nubꞌiꞌ ruma kakita ri tzijonik kakiꞌan rike.
JOH 17:21 Lal Nuqaw, kantzꞌonoj ko cheꞌla chuꞌana xa jun kikꞌuꞌx chikiwach junam qukꞌ riꞌoj, jelaꞌ pachaꞌ riꞌin ukꞌ la y Rilal wukꞌ riꞌin, chaꞌ ri e kꞌo che ruwachulew kakikojo e rilal taqayom lo la we riꞌin.
JOH 17:22 »Ri yakbꞌal nuqꞌij yaꞌom la chwe riꞌin, xinya chike rike chaꞌ chuꞌana xa jun kikꞌuꞌx jelaꞌ pachaꞌ Rilal y riꞌin xa jun qakꞌuꞌx.
JOH 17:23 Riꞌin in kꞌo kukꞌ rike y Rilal kꞌo la wukꞌ riꞌin chaꞌ rike kuꞌan xa jun kikꞌuꞌx pa saqil wi. Jekꞌulaꞌ riꞌ konoje ri tikawex che ruwachulew kaketaꞌmaj e Rilal taqayom lo la we riꞌin y lik kꞌax kenaꞌ la ri nutijoꞌn, jelaꞌ pachaꞌ lik kꞌax kinnaꞌ la riꞌin.
JOH 17:24 »Lal Nuqaw, e janipa ri eyaꞌom la panuqꞌabꞌ, e kuaj riꞌin kebꞌeꞌkꞌola wukꞌ pa kineꞌkꞌola wi, chaꞌ kakil ri yakbꞌal nuqꞌij yaꞌom la. Ma xex wi kꞌax innaꞌom lo la, chwi echiriꞌ kꞌamajaꞌ ne kajeqer ruwachulew.
JOH 17:25 Nuqaw, Rilal lik Lal jusukꞌ, yey ri tikawex che ruwachulew na ketaꞌam ta wach la. Noꞌj riꞌin wetaꞌam wach la yey ri nutijoꞌn ketaꞌam e Rilal taqayom lo la we riꞌin.
JOH 17:26 Lik kꞌut nuqꞌalajisam chikiwach china Rilal y kꞌa kintajin ne che uqꞌalajisaxik waꞌ, chaꞌ ri rutzil kꞌuꞌx la chwe riꞌin, kakꞌojiꞌ kukꞌ rike y jelaꞌ kinkꞌojiꞌ riꞌin pa kanimaꞌ» xchaꞌ.
JOH 18:1 Echiriꞌ ri Jesús xukꞌis ubꞌiꞌxikil taq waꞌ, xel bꞌi junam kukꞌ rutijoꞌn, xkiqꞌaxuj kꞌu ri raqanaꞌ Cedrón y xebꞌok chupa jun werta kꞌo chiriꞌ.
JOH 18:2 Ri Judas, ri kakꞌayin re ri Jesús, retaꞌam chi ri luwar, ma ukꞌiyal laj ri Jesús kukꞌ rutijoꞌn kimolom kibꞌ chiriꞌ.
JOH 18:3 Ekꞌu ri Judas xoponik, ebꞌukꞌamom bꞌi ukꞌiyal soldados y taq ri chajinel re ri Rocho Dios. Rike kukꞌaꞌam taq chapabꞌal, yey e kꞌo ri kawolol ri ki aqꞌ y e kꞌo ri xa kitzukꞌem ki aqꞌ. Waꞌ etaqom bꞌi kuma ri nimaq e aj chakunel pa Rocho Dios y ri fariseos.
JOH 18:4 Ekꞌu ri Jesús ruma retaꞌam chi ronoje ri katajin lo puwiꞌ, xebꞌuꞌkꞌulu apanoq y xutzꞌonoj chike: —¿China ri kitzukuj? —xchaꞌ.
JOH 18:5 Rike xkikꞌul uwach: —E Jesús ri aj Nazaret —xechaꞌ. Ri Jesús xubꞌiꞌij kꞌu chike: —In riꞌin —xchaꞌ. Yey ri Judas, ri kakꞌayin re, kꞌo chikixoꞌl ri kakaj kakichap bꞌi ri Jesús.
JOH 18:6 Echiriꞌ xubꞌiꞌij ri Jesús chike: “In riꞌin”, xetzelej chikij y xetzaq pulew.
JOH 18:7 Ekꞌu ri Jesús xutzꞌonoj tanchi chike: —¿China ri kitzukuj? —xchaꞌ. Y rike xkibꞌiꞌij: —E Jesús ri aj Nazaret —xechaꞌ.
JOH 18:8 Xubꞌiꞌij kꞌu ri Jesús chike: —Riꞌin nubꞌiꞌim chi che alaq; “In riꞌin.” We in kꞌu ri kintzukuj alaq, yaꞌa bꞌi alaq luwar chike wa nutijoꞌn chebꞌeꞌojana —xcha chike.
JOH 18:9 E xubꞌiꞌij waꞌ ri Jesús chaꞌ e kuꞌana ri ubꞌiꞌim chik: «Na jinta junoq xsach chike ri ebꞌuyaꞌom ri Nuqaw chwe.»
JOH 18:10 Ekꞌu ri Simón Pedro rukꞌaꞌam jun espada. Xresaj kꞌu uloq y xujochij bꞌi ruxikin uwikiqꞌabꞌ ri raj chak ri kajawal raj chakunel pa Rocho Dios. Wa aj chak Malco rubꞌiꞌ.
JOH 18:11 Ri Jesús xubꞌiꞌij kꞌu che ri Pedro: —Chakꞌolo ra espada chupa rukꞌolibꞌal. ¿Na kinikꞌow ta kami riꞌ pa ri kꞌaxkꞌobꞌik we e ri Nuqaw intaqayom lo che? —xchaꞌ.
JOH 18:12 Ekꞌuchiriꞌ, ri soldados y ri taqanel ke, junam kukꞌ raj judiꞌabꞌ e chajinel re ri Rocho Dios, xkichap ri Jesús y xkiyutu.
JOH 18:13 Xkikꞌam kꞌu bꞌi ri Jesús chwa ri Anás, ruqaw-ujiꞌ ri Caifás ri kajawal raj chakunel pa Rocho Dios chupa laꞌ la junabꞌ.
JOH 18:14 Yey e Caifás ri ubꞌiꞌim chike raj judiꞌabꞌ: «E más utz we ta e laꞌ xa jun chi achi kakam kuma konoje ri tinamit.»
JOH 18:15 Ri Simón Pedro y jun chik tijoꞌn eteran bꞌi chirij ri Jesús. Waꞌ wa jun chik tijoꞌn etaꞌmatal uwach ruma ri kajawal raj chakunel pa Rocho Dios; ekꞌu rire xok bꞌi rukꞌ ri Jesús che ruwa ja re ri rocho ri aj wach.
JOH 18:16 Noꞌj ri Pedro xkanaj kan chwa ri puerta pa bꞌe. Ruma kꞌu riꞌ, xel lo ri jun tijoꞌn etaꞌmatal uwach ruma ri kajawal raj chakunel pa Rocho Dios, xchꞌaꞌt rukꞌ rali aj chajal re ri puerta chaꞌ kuya luwar che ri Pedro kok bꞌi.
JOH 18:17 Ekꞌuchiriꞌ rali xutzꞌonoj che ri Pedro: —¿Na lal ta nawi jun chike rutijoꞌn laꞌ la jun achi? —xchaꞌ. Ri Pedro xukꞌul uwach: —Na in taj —xchaꞌ.
JOH 18:18 Ruma kꞌu lik kꞌax tew, raj chakibꞌ y ri e chajinel e takꞌal chuchiꞌ jun aqꞌ kinukꞌum re kakimiqꞌisaj kibꞌ. Yey ri Pedro kꞌo kukꞌ chuchiꞌ ri aqꞌ.
JOH 18:19 Ri kajawal raj chakunel pa Rocho Dios xujeq utzꞌonoxik che ri Jesús pakiwi taq rutijoꞌn y puwi rukꞌutunik.
JOH 18:20 Ri Jesús xubꞌiꞌij che: —Riꞌin in tzijoninaq chiwachil chikiwach konoje ri winaq, xaqi in kꞌutuninaq pa taq sinagogas y pa ri Rocho Dios pa kakimol wi kibꞌ raj judiꞌabꞌ. Na jinta kꞌo nubꞌiꞌim xa xeꞌlaqꞌay.
JOH 18:21 ¿Suꞌchak kꞌu riꞌ katzꞌonoj alaq chwe puwi ri nukꞌutunik? E tzꞌonoj alaq chike ri e tayom we riꞌin, ma rike ketaꞌam saꞌ ri nukꞌutum chikiwach —xchaꞌ.
JOH 18:22 Echiriꞌ xubꞌiꞌij waꞌ ri Jesús, jun chike ri e chajinel xupachꞌ jun qꞌabꞌ chupalaj ri Jesús y xubꞌiꞌij che: —¿Utz nebꞌa jelaꞌ kakꞌulubꞌej uwach ri kajawal raj chakunel pa Rocho Dios? —xchaꞌ.
JOH 18:23 Ri Jesús xukꞌul uwach: —We ximbꞌiꞌij juna chꞌaꞌtem na utz taj, bꞌiꞌij la riꞌ saꞌ ri na utz taj ximbꞌiꞌij. Noꞌj we utz ri ximbꞌiꞌij, ¿suꞌchak kꞌu riꞌ xinchꞌay la? —xchaꞌ.
JOH 18:24 Yutum chi ri Jesús, ri Anás xutaq bꞌi chwa ri Caifás, ri kajawal raj chakunel pa Rocho Dios.
JOH 18:25 Ekꞌu ri Pedro takꞌal chuchiꞌ ri aqꞌ, kumiqꞌisaj ribꞌ. Yey e kꞌo jujun jewaꞌ xkibꞌiꞌij che: —¿Na lal ta nawi jun chike rutijoꞌn laꞌ la jun achi? —xechaꞌ. Ri Pedro xrewaj, jewaꞌ xubꞌiꞌij: —¡Jaꞌi! Na in taj —xchaꞌ.
JOH 18:26 Chiriꞌ kꞌo jun raj chak ri kajawal raj chakunel pa Rocho Dios. Rire kꞌo chux che ri jun xjochix ruxikin ruma ri Pedro. Xutzꞌonoj kꞌu che ri Pedro: —¿Na xinwil ta nebꞌa wach la chilaꞌ pa ri werta rukꞌ ri Jesús? —xchaꞌ.
JOH 18:27 Yey ri Pedro xrewaj tanchik, y ekꞌuchiriꞌ xbꞌixon lo ri teren.
JOH 18:28 E riꞌ katajin usaqirik echiriꞌ xesax bꞌi ri Jesús chwa rocho ri Caifás y xkꞌam bꞌi pa ri palacio re ri Pilato, ri taqanel aj Roma. Ekꞌu ri aj judiꞌabꞌ na xebꞌok ta chupa ri palacio chaꞌ na kakichꞌulaj ta kibꞌ chwach ri Dios y jekꞌulaꞌ utz kakitij ri cena re Pascua.
JOH 18:29 E uwariꞌche, ri taqanel Pilato xel loq chaꞌ kachꞌaꞌt kukꞌ y xubꞌiꞌij chike: —¿Saꞌ rumak waꞌchi kakoj alaq? —xchaꞌ.
JOH 18:30 Raj judiꞌabꞌ xkikꞌul uwach: —We tamaji aj mak, na kaqaya ta riꞌ paqꞌabꞌ la —xechaꞌ.
JOH 18:31 Ekꞌu ri Pilato xubꞌiꞌij chike: —Kꞌama bꞌi alaq y qꞌata alaq tzij puwiꞌ jelaꞌ pachaꞌ ri kubꞌiꞌij ri tzijpixabꞌ e alaq —xchaꞌ. Pero raj judiꞌabꞌ xkikꞌul uwach: —Riꞌoj oj aj judiꞌabꞌ na jinta paqaqꞌabꞌ kaqaqꞌat tzij re kamik puwi junoq —xechaꞌ.
JOH 18:32 Jelaꞌ e xuꞌana pachaꞌ rubꞌiꞌim lo ri Jesús puwi rukamik.
JOH 18:33 Ri Pilato xok tanchi ubꞌi chupa ri palacio, xusikꞌij ri Jesús y xutzꞌonoj che: —¿Lal kami riꞌ ri rey ke raj judiꞌabꞌ? —xchaꞌ.
JOH 18:34 Ri Jesús xubꞌiꞌij che: —¿Xa pa e la kaꞌan la wa tzꞌonobꞌal chwe o kꞌo ebꞌiꞌyom re cheꞌla? —xchaꞌ.
JOH 18:35 Ri Pilato xukꞌul uwach: —Na jinta we riꞌin che waꞌ, ma ¿in nebꞌa kukꞌil raj judiꞌabꞌ? Yey ri xeyaꞌw e la panuqꞌabꞌ e ri winaq re ri tinamit la kukꞌ ri nimaq e aj chakunel pa Rocho Dios. ¿Saꞌ kꞌu ri mak ꞌanom la? —xchaꞌ.
JOH 18:36 Ekꞌu ri Jesús xukꞌul uwach: —Ri nutaqanik riꞌin na re ta wara che ruwachulew. Ma we ta re wara, xechꞌoꞌjin ta kꞌu riꞌ ri nutijoꞌn chaꞌ na kinyaꞌ ta pakiqꞌabꞌ raj judiꞌabꞌ. Noꞌj ri nutaqanik na re ta wara che ruwachulew —xchaꞌ.
JOH 18:37 Xubꞌiꞌij kꞌu ri Pilato che: —¿Qatzij kami riꞌ lal rey? —xchaꞌ. Ri Jesús xukꞌul uwach: —Lal kabꞌiꞌn la re, riꞌin in rey. Riꞌin xinalax che ruwachulew yey xinkꞌunik re kanqꞌalajisaj ri Qꞌijsaq. Janipa kꞌu ri kitaqem ri Qꞌijsaq, e kakita ri kambꞌiꞌij riꞌin —xchaꞌ.
JOH 18:38 Ri Pilato xubꞌiꞌij che: —¿Saꞌ riꞌ laꞌ la Qꞌijsaq? —xchaꞌ. Echiriꞌ uꞌanom chi wa tzꞌonobꞌal, xel tanchi ubꞌi ri Pilato, xchꞌaꞌt tanchi kukꞌ raj judiꞌabꞌ y xubꞌiꞌij chike: —Riꞌin na kanriq ta juna umak waꞌchi.
JOH 18:39 Ralaq lik xex kaꞌan wi alaq ri koyꞌej alaq pa ri nimaqꞌij Pascua kanyolopij bꞌi chiwach alaq juna achi kꞌo pa cárcel. ¿Kaꞌaj kami alaq riꞌ e kanyolopij bꞌi ri rey ke raj judiꞌabꞌ? —xchaꞌ.
JOH 18:40 Ekꞌuchiriꞌ, konoje xkijeq kesikꞌin tanchik: —¡Mayolopij bꞌi la ri Jesús! ¡E yolopij bꞌi la ri Barrabás! —xechaꞌ. Yey ri Barrabás e jun achi eleqꞌom.
JOH 19:1 Ekꞌu ri Pilato xtaqan che kakꞌam bꞌi ri Jesús y kajichꞌ upa.
JOH 19:2 Yey ri soldados xkikoj che rujolom ri Jesús jun corona kipachꞌum rukꞌ kꞌiix. Y xkirip jun manta morato chirij.
JOH 19:3 Tekꞌuchiriꞌ xeqibꞌ rukꞌ y kakibꞌiꞌij: —¡Nim uqꞌij ri rey ke raj judiꞌabꞌ! —kechaꞌ. Yey kakipachꞌ qꞌabꞌ chupalaj.
JOH 19:4 Ri Pilato xel tanchi uloq y xubꞌiꞌij chike raj judiꞌabꞌ: —Chilape alaq, kanwesaj lo waꞌchi chiwach alaq. Chetaꞌmaj kꞌu alaq, riꞌin na jinta juna umak kanriqo —xchaꞌ.
JOH 19:5 Ekꞌuchiriꞌ xel lo ri Jesús, kꞌo ri corona re kꞌiix che rujolom y ripom ri manta morato chirij. Xubꞌiꞌij kꞌu ri Pilato chike: —¡Riꞌ rachi kꞌo chiwach alaq! —xchaꞌ.
JOH 19:6 Echiriꞌ ri nimaq e aj chakunel pa Rocho Dios kukꞌ ri e chajinel re ri Rocho Dios xkil ri Jesús, xkijeq kesikꞌinik, jewaꞌ kakibꞌiꞌij: —¡Kamisax chwa cruz! ¡Kamisax chwa cruz! —kechaꞌ. Ekꞌu ri Pilato xubꞌiꞌij chike: —We e riꞌ, kꞌama bꞌi ralaq y kamisaj alaq chwa cruz, pero riꞌin na jinta juna umak kanriqo —xchaꞌ.
JOH 19:7 Raj judiꞌabꞌ xkikꞌul uwach: —Riꞌoj kꞌo jun taqanik paqawiꞌ y kubꞌiꞌij kꞌu riꞌ taqal che rire kakamisaxik ma uꞌanom Ukꞌajol Dios che ribꞌ —xechaꞌ.
JOH 19:8 Echiriꞌ ri Pilato xuta waꞌ, xok más xiꞌin ibꞌ rukꞌ.
JOH 19:9 Xok kꞌu tanchi ubꞌi pa ri palacio y xutzꞌonoj che ri Jesús: —¿Pa lal petinaq wi rilal? —xchaꞌ. Pero ri Jesús na xukꞌul ta uwach.
JOH 19:10 Ri Pilato xubꞌiꞌij kꞌu che: —¿E laꞌ na kakꞌul ta la uwach wa kantzꞌonoj cheꞌla? ¿Na etaꞌam ta kami la panuqꞌabꞌ riꞌin kꞌo wi kankamisaj la chwa cruz y panuqꞌabꞌ kꞌo wi kanyolopij bꞌi la? —xchaꞌ.
JOH 19:11 Ri Jesús xukꞌul uwach: —Paqatzij wi kambꞌiꞌij cheꞌla, na jinta kꞌana paqꞌabꞌ la kataqan la panuwiꞌ we tamaji e ri Dios chilaꞌ chikaj xyaꞌw cheꞌla. E uwariꞌche, china ri xinqꞌatisan paqꞌabꞌ la, e más kꞌo umak riꞌ, chiwach rilal —xchaꞌ.
JOH 19:12 Chwi kꞌu riꞌ, ri Pilato lik xutzukuj suꞌanik kuyolopij bꞌi ri Jesús. Pero raj judiꞌabꞌ ko kesikꞌin che ubꞌiꞌxik: —¡We xyolopij bꞌi la, na lal ta chi ramigo riꞌ ri nimalaj taqanel re Roma; ma china ri kuꞌan rey che ribꞌ, riꞌ e tzel karil wa nimalaj taqanel! —xechaꞌ.
JOH 19:13 Echiriꞌ xuta waꞌ ri Pilato, xutaq bꞌi resaxik ri Jesús y xtzꞌuyiꞌ pa ri luwar re qꞌatbꞌal tzij “Tzꞌaqom Abꞌaj” kecha che, yey pa ri chꞌaꞌtem hebreo “Gabatá” rubꞌiꞌ.
JOH 19:14 E qꞌij riꞌ kayijbꞌax pan janipa ri kajawax pa ri nimaqꞌij Pascua. Ekꞌuchiriꞌ xuꞌan tikꞌil qꞌij, ri Pilato xubꞌiꞌij chike raj judiꞌabꞌ: —Riꞌ ri rey e alaq —xchaꞌ.
JOH 19:15 Noꞌj raj judiꞌabꞌ ko kesikꞌin che ubꞌiꞌxik: —¡Kamisax chwa cruz! ¡Kamisax chwa cruz! —kechaꞌ. Ri Pilato xubꞌiꞌij chike: —¿Kankamisaj kami riꞌ chwa cruz ri rey e alaq? —xchaꞌ. Pero ri nimaq e aj chakunel re ri Rocho Dios xkikꞌul uwach: —Riꞌoj na jinta juna chik qarey, xew e qarey ri nimalaj taqanel re Roma —xechaꞌ.
JOH 19:16 Ekꞌu ri Pilato xuya bꞌi ri Jesús pakiqꞌabꞌ re kakamisax chwa cruz. Ewi xkꞌam bꞌi ri Jesús.
JOH 19:17 Ri Jesús utelem bꞌi rucruz echiriꞌ xkꞌam bꞌi pa ri luwar kabꞌiꞌx che “Luwar re Ubꞌaqil Ujolom Animaꞌ”, yey pa ri chꞌaꞌtem hebreo, “Gólgota”.
JOH 19:18 Chiriꞌ kꞌu riꞌ xyaꞌ wi ri Jesús chwa ri cruz junam kukꞌ kebꞌ chik achijabꞌ, jun pa taq utzal; y xkꞌojiꞌ kꞌu Rire chikinikꞌajal.
JOH 19:19 Ri Pilato utaqom chik katzꞌibꞌax waꞌ y kayaꞌ kꞌu lo chwi ri cruz: «JESÚS RI AJ NAZARET, RI REY KE RAJ JUDIꞌABꞌ.»
JOH 19:20 Yey waꞌ tzꞌibꞌital pa ri chꞌaꞌtem hebreo, pa ri chꞌaꞌtem griego y pa ri chꞌaꞌtem latín. E kꞌi kꞌu chike raj judiꞌabꞌ xkajilaj waꞌ, ma ri luwar pa xyaꞌ wi ri Jesús chwa ri cruz xa naqaj kꞌo wi che ri tinamit.
JOH 19:21 Yey ri nimaq e aj chakunel re ri Rocho Dios xkibꞌiꞌij che ri Pilato: —Na ubꞌe taj xtzꞌibꞌaj la “Ri rey ke raj judiꞌabꞌ”. Jalkꞌatij la chaꞌ jewaꞌ kubꞌiꞌij: “Rire xubꞌiꞌij: Riꞌin in rey ke raj judiꞌabꞌ” —xechaꞌ.
JOH 19:22 Pero ri Pilato xubꞌiꞌij chike: —Ri xintaq utzꞌibꞌaxik riꞌin, jelaꞌ kakanaj kanoq —xchaꞌ.
JOH 19:23 Ri soldados echiriꞌ kiyaꞌom chi ri Jesús chwa ri cruz, xkimol uchiꞌ ruqꞌuꞌ, xkijach upa chaꞌ kuꞌan kajibꞌ rajaw. Jelaꞌ xkaj kakiꞌan rukꞌ rukoton; pero waꞌ xa jun upa uꞌanom.
JOH 19:24 Ruma kꞌu waꞌ, ri soldados jewaꞌ xkibꞌiꞌij chikiwach: —Maqarichꞌij upa rukoton; qaꞌana jun sorteo chaꞌ jelaꞌ kaqilo chinoq chiqe kakꞌamaw bꞌi re —xechaꞌ. Ekꞌu xuꞌana pachaꞌ ri tzꞌibꞌital kan chupa Ruchꞌaꞌtem ri Dios: Xkijach kibꞌ puwi ri nuqꞌuꞌ, ma xkiꞌan sorteo rukꞌ kachaꞌ. Yey jekꞌuriꞌlaꞌ xkiꞌan ri soldados.
JOH 19:25 Chunaqaj kꞌu ri cruz e kꞌo ruchu ri Jesús, ruchaqꞌ ruchu, ri María rixoqil ri Cleofas y ri María ri aj Magdala.
JOH 19:26 Echiriꞌ ri Jesús xril pan ruchu kꞌo putzal ri jun utijoꞌn lik kꞌax kunaꞌ Rire, xubꞌiꞌij kꞌu pan che ruchu: —Nuchu, chwi kꞌu woꞌora e alabꞌ la laꞌ —xchaꞌ.
JOH 19:27 Tekꞌuchiriꞌ xubꞌiꞌij che ri jun utijoꞌn kꞌo putzal ri María: —Ekꞌu riꞌat, chwi woꞌora e achu laꞌ —xchaꞌ. Chwi kꞌu riꞌ, wa jun utijoꞌn ri Jesús xukꞌam bꞌi ri María chaꞌ keꞌjeqela chirocho.
JOH 19:28 Ekꞌu ri Jesús retaꞌam ya xukꞌis uꞌanik ronoje ruchak; yey chaꞌ e kuꞌana janipa ri tzꞌibꞌital kan chupa Ruchꞌaꞌtem ri Dios, jewaꞌ xubꞌiꞌij: —Katzajin nuchiꞌ —xchaꞌ.
JOH 19:29 Chiriꞌ kꞌo jun xaro nojinaq che vinagre. Yey e kꞌo jujun xkichuqꞌ jun esponja chupa, xkixim kꞌu chutzaꞌm jun vara re hisopo y xkiya pan chwa reꞌ ri Jesús.
JOH 19:30 Rire xutij ri vinagre, tekꞌuchiriꞌ xubꞌiꞌij: —Xinkꞌis kꞌu utzaꞌm ri nuchak —xchaꞌ. Ekꞌuchiriꞌ, xuyuxubꞌaꞌ rujolom y xuqꞌatisaj ri ranimaꞌ puqꞌabꞌ ri Dios.
JOH 19:31 Ekꞌu qꞌij riꞌ kayijbꞌax pan janipa ri kajawax pa ri nimaqꞌij Pascua. Ruma kꞌu laꞌ, raj judiꞌabꞌ na kakaj taj kakꞌojiꞌ juna kaminaq chwa cruz pa ri qꞌij re uxlanibꞌal, ma laꞌ la jun qꞌij lik nimalaj nimaqꞌij. E uwariꞌche xkitzꞌonoj che ri Pilato kutaq uqꞌepik ri kaqan ri e kꞌo chwa cruz chaꞌ jelaꞌ kekam tan y keqasax kꞌu uloq.
JOH 19:32 Xebꞌek kꞌu ri soldados y xeꞌkiqꞌepa ri kaqan ri e kꞌo chwa cruz pa taq utzal ri Jesús. Xkiꞌan kꞌu riꞌ che ri nabꞌe, tekꞌuchiriꞌ jelaꞌ xkiꞌan che ri jun chik.
JOH 19:33 Pero echiriꞌ xeqibꞌ rukꞌ ri Jesús, xkilo kaminaq chik; ruma riꞌ, na xkiqꞌep ta ri raqan.
JOH 19:34 Na rukꞌ ta kꞌu riꞌ, jun chike ri soldados xutoqꞌ rukꞌalkꞌaꞌx ri Jesús rukꞌ rulanza y kꞌatetana chupa waꞌ xel lo kikꞌ y yaꞌ.
JOH 19:35 Ri katzijon re ronoje waꞌ e xilow re; lik qatzij kꞌu ri kubꞌiꞌij ma lik retaꞌam saꞌ ri xrilo. Yey kutzijoj kꞌu riꞌ chaꞌ kakubꞌiꞌ kꞌuꞌx alaq rukꞌ ri Cristo.
JOH 19:36 Ma ronoje taq waꞌ xuꞌano chaꞌ e kuꞌana janipa ri tzꞌibꞌital kan chupa Ruchꞌaꞌtem ri Dios, ma jewaꞌ kubꞌiꞌij: Na kaqꞌep tane junoq che rubꞌaqil.
JOH 19:37 Yey jewaꞌ kubꞌiꞌij Ruchꞌaꞌtem ri Dios: Kakil na kꞌu uwach ri jun xkitoqꞌ rukꞌalkꞌaꞌx.
JOH 19:38 Kꞌisbꞌal re taq waꞌ, ri José aj Arimatea xuꞌtzꞌonoj che ri Pilato chaꞌ kayaꞌ che kukꞌam bꞌi rucuerpo ri Jesús. Yey ri José e jun chike rutijoꞌn ri Jesús tobꞌ xa xeꞌlaqꞌay, ma kuxiꞌij ribꞌ chikiwach ri rach e aj judiꞌabꞌ. Ekꞌu ri Pilato xuya bꞌi che, y ri José xukꞌam bꞌi rucuerpo ri Jesús.
JOH 19:39 Ekꞌu ri Nicodemo, ri jun achi xeꞌchꞌaꞌta rukꞌ ri Jesús chaqꞌabꞌ, xopon che utoꞌik ri José. Rukꞌaꞌam laj jun quintal kunabꞌal lik kiꞌ ruxlabꞌ, waꞌ mirra uyijbꞌam rukꞌ áloes.
JOH 19:40 Xkikꞌam kꞌu bꞌi rucuerpo ri Jesús y xkibꞌolqꞌotij pa jutaq rabꞌaꞌj kꞌul kojotal ri kunabꞌal che, ma waꞌ lik xex kakiꞌan wi raj judiꞌabꞌ che kimuqik ri kekamik.
JOH 19:41 Xa naqaj che ri luwar pa xkikamisaj wi ri Jesús chwa ri cruz, kꞌo jun luwar kꞌo chomilaj cheꞌ chwach. Y chiriꞌ kꞌo jun muqubꞌal kꞌakꞌ ꞌanom, y na jinta junoq muqum chupa.
JOH 19:42 Chiriꞌ kꞌu riꞌ xkimuq wi rucuerpo ri Jesús, ma ri muqubꞌal xa naqaj kꞌo wi; yey xkaj kamuqiꞌ ri cuerpo pa ri qꞌij echiriꞌ raj judiꞌabꞌ kakiyijbꞌaꞌ pan janipa ri kajawax chike pa ri nimaqꞌij Pascua, ma na utz taj kaꞌan muqunik pa ri nimaqꞌij.
JOH 20:1 Ri nabꞌe qꞌij che ri semana, ri María ri aj Magdala lik anim tan, kꞌa qꞌequꞌm nenareꞌ, xeꞌek pa muqutal wi ri Jesús. Y kꞌate xrilo esam chi rabꞌaj chuchiꞌ ri muqubꞌal.
JOH 20:2 Ekꞌuchiriꞌ, kakꞌalalik xeꞌek pa e kꞌo wi ri Simón Pedro y ri jun chik tijoꞌn lik kꞌax kanaꞌ ruma ri Jesús, y xubꞌiꞌij kꞌu chike: —Ri Qajawal xesax bꞌi pa muqutal wi y na qetaꞌam taj pa xyaꞌiꞌ wi —xchaꞌ.
JOH 20:3 Xebꞌel kꞌu bꞌi ri Pedro y ri jun chik tijoꞌn, y xebꞌek pa xmuqiꞌ wi ri Jesús.
JOH 20:4 Kikabꞌichal kekꞌalalik xebꞌek; pero ri jun chik tijoꞌn más xkꞌalal chwa ri Pedro y nabꞌe xoponik.
JOH 20:5 Xyuxiꞌ pan chupa ri muqubꞌal y xew xril ri jutaq rabꞌaꞌj kꞌul pa xbꞌolqꞌotix wi ri Jesús, pero na xok tubꞌi.
JOH 20:6 Tekꞌuchiriꞌ xopon ri Simón Pedro, ri teran lo chirij. Ekꞌu rire asu xok chupa ri muqubꞌal y xril ri jutaq rabꞌaꞌj kꞌul kꞌo kan chiriꞌ.
JOH 20:7 Yey ri kꞌul pa xpis wi rujolom ri Jesús, na junam ta kꞌo rukꞌ ri jutaq rabꞌaꞌj kꞌul; ma utukel kꞌolik, bꞌusum kanoq.
JOH 20:8 Ekꞌuchiriꞌ, xok bꞌi ri jun chik tijoꞌn ri xopon nabꞌe chwach ri muqubꞌal. Xew xril kꞌu riꞌ waꞌ, xukojo kꞌastajinaq chubꞌi ri Jesús chikixoꞌl ri ekaminaq.
JOH 20:9 Ma ri petinaq loq rike kꞌamajaꞌ ne kimajom usukꞌ Ruchꞌaꞌtem ri Dios pa kubꞌiꞌij wi: Ri Jesús lik chirajawaxik kakꞌastaj bꞌi chikixoꞌl ri ekaminaq.
JOH 20:10 Y xetzelej kꞌu ri kebꞌ tijoꞌn pa e kꞌo wi ri kachbꞌiꞌil.
JOH 20:11 Pero ri María koqꞌik takꞌal kan chunaqaj ri muqubꞌal. Ekꞌu laꞌ koqꞌik, xyuxiꞌ apanoq y xtzuꞌn pan chupa ri muqubꞌal.
JOH 20:12 Xeril kꞌu pan kebꞌ ángeles saq kiqꞌuꞌ etzꞌul jun chujolom y jun chi raqan che ri luwar pa xyaꞌiꞌ wi rucuerpo ri Jesús.
JOH 20:13 Ekꞌu ri ángeles xkitzꞌonoj che ri María: —Ixoq, ¿suꞌchak katoqꞌik? —xechaꞌ. Ri María xukꞌul uwach: —Ma xkꞌam bꞌi ri Wajawal y na wetaꞌam taj pa xyaꞌiꞌ wi —xchaꞌ.
JOH 20:14 Tekꞌuchiriꞌ, xtzuꞌn chirij. Kꞌate xrilo takꞌal ri Jesús chiriꞌ, pero rire na xretaꞌmaj taj we e ri Jesús.
JOH 20:15 Ekꞌu ri Jesús xutzꞌonoj che ri María: —Ixoq, ¿suꞌchak katoqꞌik? ¿China ri katzukuj? —xchaꞌ. Ri María xuchꞌobꞌo wa jun achi laj e chajinel re ri werta, y jewaꞌ kꞌu xubꞌiꞌij che: —Achi, we lal xkꞌamaw bꞌi la re, bꞌiꞌij la chwe pa xeꞌyaꞌa wi la chaꞌ kiꞌnkꞌamaꞌ —xchaꞌ.
JOH 20:16 Ekꞌu ri Jesús xubꞌiꞌij che: —¡María! —xchaꞌ. Ri María xutzuꞌ uwach y jewaꞌ xubꞌiꞌij che: —¡Raboni! (Wa chꞌaꞌtem pa hebreo keꞌelawi: “Lal tijonel”.)
JOH 20:17 Ri Jesús xubꞌiꞌij che: —Chinatzoqopij, ma kꞌamajaꞌ kinaqꞌan rukꞌ ri Nuqaw. Jat y chabꞌiꞌij chike konoje ri nu hermanos: Riꞌin kinaqꞌan pa kꞌo wi ri Nuqaw yey Iqaw riꞌix; ri nu Dios riꞌin yey i Dios riꞌix —xchaꞌ.
JOH 20:18 Xeꞌek kꞌu ri María ri aj Magdala kukꞌ rutijoꞌn ri Jesús y xuꞌtzijoj chike xril uwach ri Qanimajawal. Yey xutzijoj chike janipa ri xbꞌiꞌx bꞌi che ruma ri Jesús.
JOH 20:19 Che kꞌu ri rokbꞌal raqꞌabꞌ che ri nabꞌe qꞌij re ri semana, rutijoꞌn ri Jesús kimolom kibꞌ, kitzꞌapim kichiꞌ ruma kixiꞌim kibꞌ chikiwach ri e aj wach ke raj judiꞌabꞌ. Ekꞌuchiriꞌ, ri Jesús xaqikꞌateꞌt xwinaqirik y xtakꞌiꞌ chikixoꞌl rutijoꞌn. Xuya kꞌu rutzil kiwach, jewaꞌ xubꞌiꞌij chike: —Kꞌola utzil chomal iwukꞌ —xchaꞌ.
JOH 20:20 Tekꞌuchiriꞌ, xukꞌut ruqꞌabꞌ y rukꞌalkꞌaꞌx chikiwach. Ekꞌu rike lik xekiꞌkotik echiriꞌ xkil uwach ri Qanimajawal.
JOH 20:21 Ekꞌu ri Jesús xubꞌiꞌij tanchi chike: —Kꞌola utzil chomal iwukꞌ. Jelaꞌ pachaꞌ ri Nuqaw xinutaq lo riꞌin, jekꞌuriꞌlaꞌ riꞌin kixintaq bꞌi riꞌix —xchaꞌ.
JOH 20:22 Ekꞌuchiriꞌ, xuxutꞌuj kiwiꞌ y xubꞌiꞌij chike: —Chikꞌulu ri Santowilaj Ruxlabꞌixel ri Dios.
JOH 20:23 We kꞌo junoq kutzelej utzij chwach ri Dios, yaꞌtal piqꞌabꞌ kiqꞌalajisaj che: “Ri Dios ukuyum chi amak.” Yey we kꞌo junoq na kutzelej ta utzij chwach ri Dios, yaꞌtal piqꞌabꞌ kiqꞌalajisaj che: “At tanal rukꞌ ramak chwach ri Dios” —xchaꞌ.
JOH 20:24 Ri Tomás ri kabꞌiꞌx “yoꞌx” che, e jun chike ri kabꞌlajuj utijoꞌn ri Jesús. Rire na jintaj echiriꞌ xopon ri Jesús kukꞌ rike.
JOH 20:25 Ekꞌu ri jujun chik tijoꞌn echiriꞌ xkil uwach ri Tomás, jewaꞌ xkibꞌiꞌij che: —¡Riꞌoj xqil uwach ri Qanimajawal! —xechaꞌ. Pero ri Tomás jewaꞌ xubꞌiꞌij chike: —Riꞌin xew kankojo we nabꞌe na kanwil rutel ri klawux puqꞌabꞌ y kanjuꞌ ruwi nuqꞌabꞌ chupa yey kanjuꞌ ri nuqꞌabꞌ pukꞌalkꞌaꞌx. Noꞌj we na kanꞌan ta waꞌ, riꞌ na kankoj taj —xchaꞌ.
JOH 20:26 Ikꞌowinaq chi kꞌu wajxaqibꞌ qꞌij, ri tijoꞌn kimolom tanchi kibꞌ chupa ri ja y kꞌo ri Tomás kukꞌ. Tobꞌ kitzꞌapim kꞌu kichiꞌ, ri Jesús xaqikꞌateꞌt xwinaqirik y xtakꞌiꞌ chikixoꞌl. Ewi xuya rutzil kiwach, jewaꞌ xubꞌiꞌij: —Kꞌola utzil chomal iwukꞌ —xchaꞌ.
JOH 20:27 Tekꞌuchiriꞌ, xubꞌiꞌij che ri Tomás: —Chawila ri nuqꞌabꞌ y chajuꞌu ruwi aqꞌabꞌ wara, yey chajuꞌu pe lo laꞌqꞌabꞌ pa wa nukꞌalkꞌaꞌx. Muꞌan kꞌu ri xa kebꞌ akꞌuꞌx wukꞌ; e chakojoꞌ riꞌin in kꞌaslik —xchaꞌ.
JOH 20:28 Ekꞌuchiriꞌ, ri Tomás xubꞌiꞌij che ri Jesús: —¡Lal Wajawal y Lal nu Dios! —xchaꞌ.
JOH 20:29 Yey ri Jesús xubꞌiꞌij che: —Tomás, kꞌa e laꞌ xakojo ruma xawil na nuwach. Nim kꞌu kiqꞌij kalaxik ri na kilom ta nuwach yey na rukꞌ ta kꞌu riꞌ, kakikojo riꞌin in kꞌaslik —xchaꞌ.
JOH 20:30 Ri Jesús xuꞌan ukꞌiyal kꞌutubꞌal re ruchuqꞌabꞌ ri Dios chikiwach rutijoꞌn, y waꞌ na ronoje taj tzꞌibꞌital chupa wa libro.
JOH 20:31 Pero janipa kꞌu wa xtzꞌibꞌaxik, e chaꞌ kakoj alaq ri Jesús e ri Cristo, Rukꞌajol ri Dios, y kꞌo kꞌu kꞌaslemal alaq riꞌ ruma kakoj alaq rubꞌiꞌ.
JOH 21:1 Tekꞌuchiriꞌ ri Jesús xukꞌut tanchi ribꞌ chikiwach rutijoꞌn chuchiꞌ ri mar re Tiberias. Jewaꞌ xuꞌano:
JOH 21:2 Junam e kꞌo ri Simón Pedro, ri Tomás ri kakibꞌiꞌij “Yoꞌx” che, ri Natanael ri aj Caná re Galilea, ri kebꞌ ukꞌajol ri Zebedeo y kaꞌibꞌ chik chike rutijoꞌn ri Jesús.
JOH 21:3 Ekꞌu ri Simón Pedro xubꞌiꞌij chike: —Kinꞌek pa chapoj kar —xchaꞌ. Rike xkibꞌiꞌij che: —Kojꞌek riꞌ awukꞌ —xechaꞌ. Xebꞌek kꞌut y xebꞌok bꞌi chupa jun barco, pero laꞌ laꞌqꞌabꞌ wi na jinta kꞌana kar xkichapo.
JOH 21:4 Echiriꞌ katajin usaqirik, rutijoꞌn xkil jun achi takꞌal chuchiꞌ ri mar, pero na xketaꞌmaj taj we e ri Jesús.
JOH 21:5 Xubꞌiꞌij kꞌu ri Jesús chike: —Ix walkꞌoꞌal, ¿na jinta kar ichapom? —xchaꞌ. Rike xkikꞌul pan uwach: —Na jintaj —xechaꞌ.
JOH 21:6 Xubꞌiꞌij kꞌu ri Jesús chike: —Chilikꞌij liꞌatarraya puwikiqꞌabꞌ ri barco y chiwilapeꞌ ma kebꞌiwesaj lo kar —xchaꞌ. Rike e xkiꞌano yey na kakichꞌij ta chi kꞌu lo resaxik riꞌ ri ki atarraya pa ri yaꞌ ruma rukꞌiyal kar e kꞌo chupa.
JOH 21:7 Ekꞌu ri jun tijoꞌn lik kꞌax kanaꞌ ruma ri Jesús, xubꞌiꞌij che ri Pedro: —¡E Qanimajawal! —xchaꞌ. Ri Simón Pedro xew xuto e ri Jesús, xukojolaꞌ ruqꞌuꞌ resam y xukꞌaq bꞌi ribꞌ pa ri yaꞌ.
JOH 21:8 Yey ri jujun chik tijoꞌn xekꞌun rukꞌ ri barco chuchiꞌ ri mar, kicharem ri ki atarraya nojinaq che kar, ma laj xa cien metros e kꞌo wi che ruchiꞌ ri yaꞌ.
JOH 21:9 Echiriꞌ xeqaj lo chuꞌlew, kꞌate xkilo nukꞌutal jun aqꞌ, y puwi ri rachaqꞌaꞌl kꞌo jun kar y kꞌo pam chiriꞌ.
JOH 21:10 Xubꞌiꞌij kꞌu ri Jesús chike: —Chikꞌama lo jujun chike ri kar, ri kꞌa e laꞌ xebꞌichap loq —xchaꞌ.
JOH 21:11 Ri Simón Pedro xok pa ri barco y xucharej bꞌi kꞌa chuchiꞌ ri mar ri atarraya nojinaq che nimaq taq kar, ma e ciento cincuenta y tres ri kar e kꞌo chupa. Tobꞌ lik e kꞌi ri kar, na xraqaroꞌbꞌ ta ri atarraya.
JOH 21:12 Ekꞌuchiriꞌ, xubꞌiꞌij ri Jesús: —Chixpetoq, chixwoꞌqoq —xcha chike. Na jinta kꞌu junoq chike rutijoꞌn xraj kutzꞌonoj che china Rire, ma ketaꞌam e ri Qanimajawal.
JOH 21:13 Ekꞌuchiriꞌ, ri Jesús xukꞌam ri pam y xuya chike, y jelaꞌ xuꞌan rukꞌ ri kar.
JOH 21:14 E urox laj waꞌ xukꞌut uwach ri Jesús chikiwach rutijoꞌn chwi lo rukꞌastajibꞌal chikixoꞌl ri ekaminaq.
JOH 21:15 Echiriꞌ xkikꞌis utijik ri kiwa, ri Jesús xutzꞌonoj che ri Simón Pedro: —Simón, at ukꞌajol ri Jonás, ¿más nawi kꞌax kinanaꞌ riꞌat chwa ri kꞌaxnaꞌbꞌal we kakiꞌan wa jujun chik? —xchaꞌ. Ri Pedro xukꞌul uwach: —Wajawal, rilal etaꞌam la kꞌo rutzil nukꞌuꞌx cheꞌla —xchaꞌ. Ri Jesús xubꞌiꞌij che: —Chebꞌatzuqu kꞌu riꞌ ri raltaq ko nubꞌexex —xchaꞌ.
JOH 21:16 Xutzꞌonoj chukalaj: —Simón, at ukꞌajol ri Jonás, ¿lik kꞌax kinanaꞌ rukꞌ ronoje akꞌuꞌx? —xchaꞌ. Ri Pedro xukꞌul uwach: —Wajawal, rilal etaꞌam la kꞌo rutzil nukꞌuꞌx cheꞌla —xchaꞌ. Xubꞌiꞌij tanchi kꞌu ri Jesús che: —Chebꞌachajij kꞌu riꞌ ri nubꞌexex —xchaꞌ.
JOH 21:17 Xutzꞌonoj churox laj: —Simón, at ukꞌajol ri Jonás, ¿qatzij kꞌo rutzil akꞌuꞌx chwe? —xchaꞌ. Ri Pedro lik xuchap bꞌis ruma e urox laj riꞌ xtzꞌonox che. Xubꞌiꞌij kꞌu riꞌ: —Wajawal, rilal etaꞌam la ronoje, etaꞌam kꞌu la riꞌin kꞌo rutzil nukꞌuꞌx cheꞌla —xcha che. Xubꞌiꞌij kꞌu ri Jesús che: —Chebꞌatzuqu kꞌu riꞌ ri nubꞌexex.
JOH 21:18 Paqatzij wi kambꞌiꞌij chawe: Echiriꞌ at ala, riꞌat atukel kaxim rapas y kateꞌek pa kawaj wi kateꞌek. Noꞌj echiriꞌ katuꞌana nimalaj winaq, kayak laꞌqꞌabꞌ y jun chik kaximow rapas y katukꞌam bꞌi pa na kawaj ta wi kateꞌek —xchaꞌ.
JOH 21:19 Ri Jesús xubꞌiꞌij waꞌ chaꞌ kuqꞌalajisaj saꞌ rukamik ri Pedro kaꞌanik re yakbꞌal uqꞌij ri Dios. Tekꞌuchiriꞌ, xubꞌiꞌij che: —¡Chat-tereja lo chwij! —xchaꞌ.
JOH 21:20 Echiriꞌ xtzuꞌn ri Pedro chirij, xrilo chikij teran lo ri jun tijoꞌn lik kꞌax kanaꞌ ruma ri Jesús, waꞌ e ri xjaꞌiꞌ putzal ri Jesús pa ri jun waꞌim echiriꞌ xutzꞌonoj che: «Wajawal, ¿China ri kakꞌayin e la?»
JOH 21:21 Ekꞌu ri Pedro echiriꞌ xril ri jun chik tijoꞌn, xutzꞌonoj che ri Jesús: —Wajawal, yey rire, ¿saꞌ ri kukꞌulumaj? —xchaꞌ.
JOH 21:22 Ri Jesús xukꞌul uwach: —¿Suꞌchak katzꞌonoj? We kuaj riꞌin kꞌa kꞌas rire echiriꞌ kinkꞌun tanchik, na jinta awe che. Riꞌat chat-tereja lo chwij —xchaꞌ.
JOH 21:23 Ruma kꞌu wa xubꞌiꞌij ri Jesús, xeꞌek utzijoxik chikixoꞌl ri kikojom rubꞌiꞌ ri Cristo: «Laꞌ la jun utijoꞌn na kakam taj.» Pero ri Jesús na xubꞌiꞌij ta che we na kakam taj, ma xew xubꞌiꞌij waꞌ: «¿Suꞌchak katzꞌonoj? We kuaj riꞌin kꞌa kꞌas rire echiriꞌ kinkꞌun tanchik, na jinta awe che.»
JOH 21:24 Ekꞌu waꞌ wa jun tijoꞌn e ri kajikibꞌan uwach taq waꞌ y e xtzꞌibꞌan waꞌ. Yey riꞌoj qetaꞌam kꞌut lik qatzij ronoje wa tzꞌibꞌitalik.
JOH 21:25 Lik kꞌo ukꞌiyal chak xuꞌan ri Jesús tobꞌ na ronoje ta waꞌ tzꞌibꞌital kan chupa wa libro. Yey we ta e laꞌ katzꞌibꞌax ronoje taq ri xuꞌano, riꞌin kanchꞌobꞌ raqan na kok tane che ruwachulew taq ri wuj pa katzꞌibꞌax wi. Amén.
ACT 1:1 Chupa ri nabꞌe nulibro, xintzꞌibꞌaj pan che rilal Teófilo, puwi taq ri xuꞌan ri Jesús y taq ri xukꞌutu chwi lo ri jeqebꞌal re ruchak
ACT 1:2 kꞌa chupa ri qꞌij echiriꞌ xkꞌul chilaꞌ chikaj ruma ri Dios. Chwach kꞌu pan riꞌ rubꞌenam chilaꞌ chikaj, Rire ruma ri Santowilaj Ruxlabꞌixel ri Dios xuya kan taqanik chike rutaqoꞌn ebꞌuchaꞌom puwi taq ri chirajawaxik kakiꞌano.
ACT 1:3 Chwi kꞌu rukamik, xkꞌastaj lo chikixoꞌl ri ekaminaq y kꞌa xkꞌojiꞌ cuarenta qꞌij che ruwachulew. Chupa taq kꞌu laꞌ la qꞌij, ukꞌiyal laj e laꞌ xukꞌut uwach chikiwach rutaqoꞌn y xchꞌaꞌt kukꞌ puwi ri taqanik re ri Dios. Jekꞌulaꞌ riꞌ, lik xukꞌutu paqatzij wi Rire kꞌaslik.
ACT 1:4 Echiriꞌ ri Jesús e laꞌ kꞌa kꞌo kukꞌ rutaqoꞌn, xubꞌiꞌij chike: —Chixkꞌola Jerusalem chaꞌ kiwoyꞌej rubꞌiꞌtisinik ri Nuqaw, ri nutzijom chi lo riꞌin chiwe; waꞌ e ri bautismo re ri Ruxlabꞌixel ri Dios.
ACT 1:5 Paqatzij wi ri Juan xuya ri bautismo rukꞌ yaꞌ; noꞌj ri bautismo kikꞌul riꞌix e rukꞌ ri Santowilaj Ruxlabꞌixel ri Dios; yey waꞌ kuꞌana xa chupa taq waꞌ wa qꞌij katajin loq —xcha chike.
ACT 1:6 Jun qꞌij kꞌut ri kimolom kibꞌ rukꞌ ri Jesús jewaꞌ xkitzꞌonoj che: —Qajawal, ¿chupa taq waꞌ wa qꞌij oj kꞌo wi, kayak tanchi nawi la ri taqanik re ri qatinamit Israel jelaꞌ pachaꞌ ri uꞌanom lo ojertan? —xechaꞌ.
ACT 1:7 Y ri Jesús xukꞌul uwach: —Riꞌix na yaꞌtal ta chiwe kiwetaꞌmaj ruqꞌijol y ruꞌorayil echiriꞌ kuꞌana taq waꞌ ri Nuqaw, ma ronoje waꞌ xew puqꞌabꞌ Rire kꞌo wi.
ACT 1:8 Pero kikꞌul kꞌu ichuqꞌabꞌ riꞌix echiriꞌ kaqaj lo ri Santowilaj Ruxlabꞌixel ri Dios piwiꞌ y kixuꞌana kꞌu ix tzijol weꞌin chupa wa tinamit Jerusalem, chupa ronoje ri luwar re Judea y re Samaria y kꞌa che ronoje luwar re ruwachulew —xcha chike.
ACT 1:9 Ekꞌuchiriꞌ xukꞌis ubꞌiꞌxikil taq waꞌ, xkꞌam bꞌi chilaꞌ chikaj; y ekꞌu laꞌ kakitzutzaꞌ rutijoꞌn xsach bꞌi chikiwach chupa jun sutzꞌ.
ACT 1:10 Kꞌa kakitzutzaꞌ kꞌu pan chilaꞌ chikaj pa xkꞌam wubꞌi ri Jesús, echiriꞌ xewinaqir kebꞌ achijabꞌ kukꞌ yey waꞌ lik saq ri kiqꞌuꞌ.
ACT 1:11 Waꞌchijabꞌ xechꞌaw kꞌu chike, jewaꞌ xkibꞌiꞌij: —Achijabꞌ ix aj Galilea, ¿suꞌbꞌe kꞌa kixtzutzuꞌn chikaj? Ma wa Jesús, ri xel bꞌi chixoꞌl riꞌix y xkꞌul chilaꞌ chikaj, Rire kakꞌun tanchik. Jekꞌulaꞌ pachaꞌ xiwilo xeꞌek, jelaꞌ kakꞌun tanchik —xecha chike.
ACT 1:12 Ekꞌuchiriꞌ, ri e taqoꞌn xebꞌel bꞌi chwach ri juyubꞌ Olivos y xetzelej Jerusalem. (Wa juyubꞌ xa naqaj kꞌo wi lo che Jerusalem, laj jun kilómetro unajtijil; jekꞌulaꞌ rike na xikꞌow ta uwiꞌ ri kakibꞌinibꞌej che ri yaꞌtalik e chirij ri kojobꞌal ke raj judiꞌabꞌ puwi ri qꞌij re uxlanibꞌal.)
ACT 1:13 Echiriꞌ xebꞌopon Jerusalem, xebꞌaqꞌan chikaj pa ri kaleꞌ ja pa ejeqel wi ri Pedro, ri Jacobo, ri Juan, ri Andrés, ri Felipe, ri Tomás, ri Bartolomé, ri Mateo, ri Jacobo rukꞌajol ri Alfeo; ri Simón ri kabꞌiꞌx “ri Zelote” che y ri Judas ruchaqꞌ ri Jacobo.
ACT 1:14 E konoje rike lik xa jun kikꞌuꞌx kiyaꞌom kibꞌ pa oración, junam kukꞌ jujun ixoqibꞌ, rukꞌ ri María ruchu ri Jesús yey kukꞌ taq ruchaqꞌ ri Jesús.
ACT 1:15 Chupa kꞌu taq laꞌ la qꞌij, ri Pedro xtakꞌiꞌ chikiwach ri hermanos kimolom kibꞌ, laj e ciento veinte chi konoje, y jekꞌuwaꞌ xubꞌiꞌij chike:
ACT 1:16 «Hermanos, lik chirajawaxik wi e kuꞌana na ri tzꞌibꞌital kan chupa Ruchꞌaꞌtem ri Dios puwi ri xubꞌiꞌij ri Santowilaj Ruxlabꞌixel ruma ri David echiriꞌ xchꞌaꞌt puwi ri Judas aj Iscariot. Waꞌ e ri xnabꞌej chikiwach ri xechapaw bꞌi ri Jesús,
ACT 1:17 tobꞌ rire e jun qachbꞌiꞌil y xyaꞌ che xchakun junam qukꞌ chupa wa chak re ri Dios» xchaꞌ.
ACT 1:18 (Xloqꞌ kꞌu juchꞌaqap ulew rukꞌ ri puaq xyaꞌ che ri Judas ruma ri na jusukꞌ taj xuꞌano echiriꞌ xukꞌayij ri Jesús. Ekꞌu ri Judas xuꞌxulubꞌaꞌ lo ribꞌ chwi jun cheꞌ y echiriꞌ xtzaq loq, xraqaroꞌbꞌ rupa y ronoje ri rixkolobꞌ xkich kaꞌnik.
ACT 1:19 Waꞌ xketaꞌmaj konoje ri ejeqel Jerusalem. E uwariꞌche, xkikoj “Acéldama” che wa jun luwar; waꞌ keꞌelawi “Luwar re Kikꞌ” pa ri kichꞌaꞌtem rike.)
ACT 1:20 Xubꞌiꞌij kꞌu ri Pedro: «Jekꞌuwaꞌ tzꞌibꞌital kan puwi ri Judas chupa ri libro re ri Salmos: Ri luwar pa jeqel wi chuꞌana jun luwar katzꞌintzꞌotik, y na jinta junoq kajeqiꞌ chiriꞌ. Y jewaꞌ kubꞌiꞌij tanchik: Lik chirajawaxik katzukux jun chik aj chak chaꞌ kakꞌojiꞌ pukꞌaxel kachaꞌ.
ACT 1:21 »E kꞌo kꞌu jujun achijabꞌ chiqaxoꞌl xex ojkachbꞌilam echiriꞌ kꞌa kꞌo ri Jesús qukꞌ,
ACT 1:22 chwi lo echiriꞌ xukꞌul ri bautismo ruma ri Juan y kꞌa echiriꞌ xel bꞌi qukꞌ y xkꞌul chilaꞌ chikaj ruma ri Dios. Lik chirajawaxik kꞌut kaqakoj junoq chike waꞌ waꞌchijabꞌ chaꞌ junam kojtzijon puwi rukꞌastajibꞌal ri Jesús» xcha ri Pedro chike.
ACT 1:23 Xekichaꞌ kꞌu kaꞌibꞌ achijabꞌ. Jun e ri José, ri kabꞌiꞌx Barsabás che y kojom jun retzelal ubꞌiꞌ “Justo” kecha che. Ri jun chik, Matías rubꞌiꞌ.
ACT 1:24 Y xkiꞌan orar, jewaꞌ xkibꞌiꞌij: «Qajawal, Rilal etaꞌam la ri kikꞌuꞌx konoje ri tikawex. Kꞌutu kꞌu la chiqawach chinoq chike wa kaꞌibꞌ achijabꞌ chaꞌom la
ACT 1:25 chaꞌ kukꞌam bꞌi wa chak y kaꞌan taqoꞌn la che; jekꞌulaꞌ kakꞌojiꞌ pukꞌaxel ri Judas aj Iscariot, ri xroqꞌotaj kan ri chak xyaꞌ che y xeꞌek kꞌu pa ri luwar taqal che» xechaꞌ.
ACT 1:26 Ekꞌuchiriꞌ, xkiꞌan jun sorteo chaꞌ kaqꞌalajinik china chike wa kaꞌibꞌ kakanaj kan pukꞌaxel ri Judas; y waꞌ xtzaq puwi ri Matías. Chwi kꞌu riꞌ, rire xuꞌana e jun kukꞌ ri junlajuj chik e taqoꞌn.
ACT 2:1 Echiriꞌ xopon ri nimaqꞌij re Pentecostés e taq rutijoꞌn ri Jesús kimolom kibꞌ, konoje uꞌanom xa jun kikꞌuꞌx.
ACT 2:2 Xaqikꞌateꞌt kꞌut chilaꞌ chikaj xpe pachaꞌ uchꞌawibꞌal juna unimal tew lik kajuxuxik, yey waꞌ xunojisaj ronoje upa ri ja pa kimolom wi kibꞌ.
ACT 2:3 Ekꞌuchiriꞌ, xewinaqir pachaꞌ urepebꞌal aqꞌ y waꞌ xkꞌojiꞌ pakiwiꞌ chikijujunal rike.
ACT 2:4 Yey konoje ri e kꞌo chiriꞌ xkikꞌul ruchuqꞌabꞌ ri Santowilaj Ruxlabꞌixel, y xkijeq kꞌu riꞌ kechꞌaꞌt pa jujun chik chꞌaꞌtem junwi. Chikijujunal kechꞌaꞌt pa ri chꞌaꞌtem xyaꞌtaj chike ruma ri Ruxlabꞌixel.
ACT 2:5 Chiriꞌ kꞌut Jerusalem e kꞌo e aj judiꞌabꞌ lik kakiloqꞌnimaj uqꞌij ri Dios. Rike e petinaq pa taq ukꞌiyal tinamit che ruwachulew.
ACT 2:6 Echiriꞌ xkita waꞌ wa chꞌawibꞌal, xepe che rilik. Yey lik xsach kinaꞌoj ma chikijujunal xekito kechꞌaꞌt pa taq ri kichꞌaꞌtem ke rike.
ACT 2:7 Ekꞌu laꞌ lik kaminaq kanimaꞌ che, xkijeq kakibꞌiꞌij chikiwach: «¡Chilape alaq! ¿Na e ta nebꞌa aj Galilea konoje wa kechꞌaꞌtik?
ACT 2:8 ¿Chaꞌta kꞌu riꞌ chiqajujunal keqato kechꞌaꞌt pa taq ri qachꞌaꞌtem oj alaxinaq wi riꞌoj?
ACT 2:9 Yey lik pa ukꞌiyal tinamit oj petinaq wi. Chiqaxoꞌl e kꞌo e aj Partia, e aj Media y e aj Elam. Yey e kꞌo ri ejeqel Mesopotamia, Judea, Capadocia, Ponto y Asia,
ACT 2:10 Frigia y Panfilia, Egipto y pa taq ri luwar re Libia chwach pana ri tinamit Cirene. Yey e kꞌo ri e petinaq Roma; chikixoꞌl waꞌ e kꞌo e aj judiꞌabꞌ y e kꞌo ne ri na e ta aj judiꞌabꞌ kitaqem lo ri kꞌutunik ke raj judiꞌabꞌ.
ACT 2:11 E kꞌo e aj Creta y ri e aj Arabia. Yey chiqajujunal riꞌoj kaqato kechꞌaꞌt pa qachꞌaꞌtem puwi taq ri kꞌutubꞌal re runimal uchuqꞌabꞌ ri Dios» kechaꞌ.
ACT 2:12 Konoje kꞌut lik kaminaq kanimaꞌ che y na kakiriq ta chik saꞌ ri kakichꞌobꞌ puwiꞌ, jekꞌuwaꞌ kakibꞌiꞌij chikiwach: «¿Saꞌ keꞌelawi waꞌ?» kechaꞌ.
ACT 2:13 Yey e kꞌo kꞌu jujun chik kechꞌamin ke y jewaꞌ kakibꞌiꞌij: «Laꞌ keqꞌabꞌarik» kechaꞌ.
ACT 2:14 Ekꞌuchiriꞌ, ri Pedro xtakꞌiꞌik junam kukꞌ ri junlaluj chik taqoꞌn y lik ko xchꞌawik, jewaꞌ xubꞌiꞌij: «Achijabꞌ alaq aj judiꞌabꞌ y onoje ri alaq jeqel wara Jerusalem, tape alaq chi utz ri kanqꞌalajisaj che alaq.
ACT 2:15 Ma e chiwach ralaq, waꞌ waꞌchijabꞌ keqꞌabꞌarik, noꞌj ¡na e ta uꞌanom riꞌ! Ma kꞌa e ne bꞌelejebꞌ ora laꞌ che wa anim.
ACT 2:16 Janipa wa kata alaq y kil alaq woꞌora, waꞌ e ri ubꞌiꞌim chi kan ri qꞌalajisanel Joel ojertan, echiriꞌ jewaꞌ xubꞌiꞌij:
ACT 2:17 “Che taq rukꞌisbꞌal qꞌij” kubꞌiꞌij ri Dios, “kantaq bꞌi ri Wuxlabꞌixel pakiwi konoje ri tikawex che ruwachulew. E taq kꞌu ri miꞌal alkꞌoꞌal alaq kakiqꞌalajisaj ri Nutzij. Ralabꞌo kakilo janipa ri kankꞌut chikiwach; yey e ri nimaq winaq, pa wachikꞌ kakil wi janipa ri kanqꞌalajisaj chikiwach.
ACT 2:18 Chupa taq kꞌu riꞌ laꞌ la qꞌij, pakiwi ri e waj chak ixoqibꞌ y achijabꞌ kantaq bꞌi ri Wuxlabꞌixel chaꞌ jelaꞌ kakiqꞌalajisaj ri Nutzij chikiwach ri tikawex.
ACT 2:19 Chwa ri kaj kankꞌut taq kꞌutubꞌal re nuchuqꞌabꞌ yey waꞌ na jinta ilitajinaq wi y che ruwachulew kanꞌan kꞌutubꞌal rukꞌ kikꞌ, rukꞌ aqꞌ y rukꞌ mayul re sibꞌ.
ACT 2:20 Ekꞌu ri qꞌij kuꞌan qꞌequꞌm uwach yey ri ikꞌ kuꞌan kaq uwach pachaꞌ kikꞌ; waꞌ e kuꞌana echiriꞌ ya kopon ruqꞌijol ri Qanimajawal. Waꞌ wa jun qꞌij lik nim y na jinta kꞌo kajunimax wi ruchomalil.
ACT 2:21 Y konoje kꞌu ri kakikoj kibꞌ chwach ri Qanimajawal re kebꞌukolobꞌej, riꞌ kekolobꞌetajik” xchaꞌ.
ACT 2:22 »Achijabꞌ alaq aj Israel, tape alaq janipa wa kambꞌiꞌij che alaq woꞌora: Ri Jesús ri aj Nazaret, Rire e ri Jun taqom lo chixoꞌl alaq ruma ri Dios. Lik etaꞌam kꞌu alaq ri xuꞌan ri Dios ruma ri Jesús chixoꞌl alaq, waꞌ e ukꞌiyal milagros y taq kꞌutubꞌal re ri unimal uchuqꞌabꞌ ri Dios.
ACT 2:23 Yey ri Dios lik uchꞌobꞌom chi uloq y retaꞌam suꞌchak xuya ri Jesús paqꞌabꞌ alaq. Ekꞌu ralaq xchap bꞌi alaq y xtaq alaq ukamisaxik chwa cruz kuma winaq na jinta Rutzij Upixabꞌ ri Dios kukꞌ.
ACT 2:24 Pero ri Dios xukꞌastajisaj loq y xresaj chupa rukꞌaxkꞌolil ri kamik, ma ri kamik na jinta uchuqꞌabꞌ puwi Rire y ruma riꞌ, Rire na xkꞌojiꞌ ta puqꞌabꞌ ri kamik.
ACT 2:25 »Rojertan xubꞌiꞌij kan ri rey David puwi ri Cristo: Riꞌin kanwil ri Wajawal xaqi e laꞌ kꞌo chinuwach. Ruma kꞌu kꞌo Rire pa nuwikiqꞌabꞌ, na jinta kꞌana kayuchꞌuyuꞌn weꞌin.
ACT 2:26 E uwariꞌche ri wanimaꞌ lik xkiꞌkotik y ruchiꞌ nuqul xbꞌixon rukꞌ kiꞌkotemal. Ekꞌu riꞌin, tobꞌ ne wetaꞌam kinkamik, e laꞌ kꞌo chi ri nukubꞌam pan nukꞌuꞌx che;
ACT 2:27 ma Rilal na kinya ta kan la chikixoꞌl ri ekaminaq, yey na kaya tane la luwar kaqꞌay rucuerpo ri aj chak la, ri jun lik uyaꞌom ribꞌ paqꞌabꞌ la.
ACT 2:28 Rilal xkꞌut la chinuwach ri bꞌe re kꞌaslemal. Ruma kꞌu xaqi Lal kꞌo la wukꞌ riꞌin, kanojisaj la ri wanimaꞌ che kiꞌkotemal xchaꞌ.
ACT 2:29 »Hermanos, paqatzij wi lik usukꞌ kankuxtaj waꞌ che alaq: Ri rey David ojertan, xkamik y xmuqik, y kꞌa qꞌalaj ne chiqawach riꞌoj waqꞌij ora pa kꞌo wi rumuqubꞌal.
ACT 2:30 Yey ri rey David e jun qꞌalajisanel; xretaꞌmaj kꞌu riꞌ ri Dios rukꞌ jun tzij xujikibꞌaꞌ uwach che rire: “Chikixoꞌl taq ri awalkꞌoꞌal, kayaktaj lo ri Cristo chaꞌ kuꞌan Rey y katzꞌuyiꞌ pakꞌaxel riꞌat.”
ACT 2:31 »Yey ri rey David xchꞌaꞌtik e pachaꞌ rilom chi rukꞌastajibꞌal ri Cristo echiriꞌ xubꞌiꞌij: “Na kakanaj ta kan Rire chikixoꞌl ri ekaminaq y na kaqꞌay tane rucuerpo.”
ACT 2:32 Ekꞌu waꞌ wa Jesús ri xukꞌastajisaj ri Dios che ri kamik; yey waꞌ lik qatzij, ma qonoje riꞌoj xqilo.
ACT 2:33 Lik kꞌu xyak uqꞌij echiriꞌ xtzꞌuyiꞌ puwikiqꞌabꞌ ri Dios. Yey xyaꞌtaj che Rire kutaq lo paqawi riꞌoj ri Santowilaj Ruxlabꞌixel, ri ubꞌiꞌtisim lo ri Qaqaw Dios chiqe riꞌoj. Y ekꞌu riꞌ waꞌ ri kil alaq y kata alaq.
ACT 2:34 »Ma na e ta ri David ri xaqꞌan chilaꞌ chikaj, pero e rire ri xubꞌiꞌij: Ri Dios Qajawxel xubꞌiꞌij che ri Wajawal: “Chat-tzꞌula pa nuwikiqꞌabꞌ,
ACT 2:35 y chawoyeꞌej na ri qꞌij echiriꞌ kebꞌenuya ri tzel kebꞌilow awe chuxeꞌ rawaqan” xchaꞌ.
ACT 2:36 »Tape alaq onoje ri alaq aj Israel, ma lik chirajawaxik ketaꞌmaj kꞌu alaq: Wa Jesús ri xkamisaj alaq chwa cruz, e chaꞌtal lo ruma ri Dios re kuꞌan Qajawal y Kolobꞌenel» xcha ri Pedro chike.
ACT 2:37 Ekꞌuchiriꞌ xkita waꞌ, lik xok bꞌis chikikꞌuꞌx y jewaꞌ xkibꞌiꞌij che ri Pedro y chike ri jujun chik e taqoꞌn: —Hermanos, ¿saꞌ kꞌu riꞌ kaqaꞌan riꞌoj? —xechaꞌ.
ACT 2:38 Y ri Pedro xubꞌiꞌij chike: —Tzelej tzij alaq chwach ri Dios y chijujunal alaq kꞌulu alaq pa rubꞌiꞌ ri Qanimajawal Jesucristo ri bautismo re kuybꞌal mak alaq y jelaꞌ kakꞌul na kꞌu alaq ri Santowilaj Uxlabꞌixel, waꞌ e sipanik re ri Dios che alaq.
ACT 2:39 Ma ri Dios ubꞌiꞌtisim waꞌ chike konoje janipa ri kebꞌusikꞌij: che ralaq, chike taq ri alkꞌoꞌal alaq y chike ne konoje ri ejeqel lik naj che ri tinamit re Israel —xcha ri Pedro chike.
ACT 2:40 Jekꞌulaꞌ, xebꞌupixabꞌaj rukꞌ ukꞌiyal chꞌaꞌtem y jewaꞌ xujikibꞌaꞌ uwach chike: —Chesaj lo ibꞌ alaq chikixoꞌl waꞌ wa winaq lik na jusukꞌ ta ri kiꞌanom, chaꞌ jelaꞌ kakolobꞌetaj alaq chwach ri qꞌatbꞌal tzij kape pakiwiꞌ —xcha chike.
ACT 2:41 Janipa kꞌu riꞌ ri xekojow Rutzij ri Dios ruma ri xubꞌiꞌij ri Pedro, xkikꞌul ri bautismo. Yey chupa kꞌu laꞌ la jun qꞌij, laj e oxibꞌ mil ri xkikoj rubꞌiꞌ ri Cristo.
ACT 2:42 Y konoje lik junam kebꞌin chupa ri saqil kꞌutunik ke ri e taqoꞌn re ri Jesús, junam kikꞌuꞌx, junam kewaꞌ chikiwach y junam kakiꞌan orar.
ACT 2:43 Konoje kꞌu ri tikawex xok xiꞌin ibꞌ pa kanimaꞌ ruma taq ri milagros y kꞌutubꞌal kuꞌan ri Dios kuma ri e utaqoꞌn ri Cristo.
ACT 2:44 Konoje kꞌu ri xekojow rubꞌiꞌ ri Cristo, lik xuꞌan xa jun kikꞌuꞌx chikiwach y rubꞌitaq ke chikijujunal xuꞌan re chinima ronoje.
ACT 2:45 E kꞌo ri xkikꞌayij kulew y ubꞌitaq ke, yey ekꞌu ri rajil waꞌ, kakijach chikiwach e chirij taq ri kajawax wi chike chikijujunal.
ACT 2:46 Ronoje qꞌij kakimol kibꞌ chupa ri Rocho Dios. Yey pa taq ri kocho kakijach chikiwach ri kakitijo, junam kewaꞌ rukꞌ kiꞌkotemal y rukꞌ uchꞌutiꞌnal kikꞌuꞌx.
ACT 2:47 Kakiyak kꞌu uqꞌij ri Dios y lik chom ri kichꞌaꞌtibꞌexik kaꞌan kuma konoje ri tikawex re ri tinamit. Yey ronoje qꞌij e kꞌo más tikawex katajin kikolobꞌetajik ruma ri Qanimajawal, y jelaꞌ xkꞌiyar riglesia.
ACT 3:1 Xuꞌana kꞌu chupa jun qꞌij, ri Pedro y ri Juan junam xebꞌek pa ri Rocho Dios che ri urox ora bꞌenaq qꞌij, ma e ora riꞌ re oración.
ACT 3:2 Ronoje qꞌij kꞌut kakꞌam lo jun achi ralaxibꞌem sik y kayaꞌ chwach ri Rocho Dios pa ri okibꞌal kabꞌiꞌx che “Lik Chom” chaꞌ kutzꞌonoj ulimoxna chike ri winaq kebꞌok bꞌi.
ACT 3:3 Ekꞌu rachi sik, echiriꞌ xeril ri Pedro y ri Juan e riꞌ kebꞌok bꞌi chupa ri Rocho Dios, xujeq kelaj chike chaꞌ kakiya kan ulimoxna.
ACT 3:4 Ekꞌu ri Pedro junam rukꞌ ri Juan lik xkichꞌikibꞌaꞌ ri kiwach puwi rachi, yey ri Pedro xubꞌiꞌij che: —Chojtzuꞌu pe la —xcha che.
ACT 3:5 Ewi ri sik xebꞌutzuꞌu ma royeꞌem we kꞌo kakiya che.
ACT 3:6 Pero ri Pedro xubꞌiꞌij che: —Na jinta saqil puaq wukꞌ y na jinta ne qꞌana puaq wukꞌ; noꞌj kꞌu ri kꞌo wukꞌ kanya cheꞌla. Chupa rubꞌiꞌ ri Qanimajawal Jesucristo ri aj Nazaret, yaktaj la y bꞌina la —xcha che.
ACT 3:7 Ekꞌu ri Pedro xuchap che ruqꞌabꞌ uwikiqꞌabꞌ, xuyako y chupa laꞌ la joqꞌotaj xkowir ri raqan y ruqul raqan.
ACT 3:8 Y rachi xchꞌoplin chikaj, xtakꞌiꞌik y xujeqo kabꞌinik. Junam kꞌut kukꞌ ri Pedro y ri Juan, xok bꞌi pa ri Rocho Dios, kabꞌinik, kachꞌoplanik y kuyak uqꞌij ri Dios.
ACT 3:9 Konoje kꞌu ri winaq re ri tinamit xkilo rachi kabꞌinik y lik kuyak uqꞌij ri Dios.
ACT 3:10 Y xketaꞌmaj e achi katzꞌuyiꞌik y kutzꞌonoj ulimoxna chwach ri Rocho Dios pa ri okibꞌal kabꞌiꞌx che “Lik Chom”. Lik kꞌu xkam kanimaꞌ che ri xꞌaniꞌ che rachi y na xkimaj ta kꞌana usukꞌ chaꞌtaj xkunutajik.
ACT 3:11 Rachi xkunutajik na karesaj ta chi ribꞌ chikij ri Pedro y ri Juan. Yey konoje ri winaq kaminaq kanimaꞌ che, xemok kaꞌn pa ri luwar kabꞌiꞌx che “Ruchiꞌ Ja re Salomón”.
ACT 3:12 Ekꞌuchiriꞌ xril waꞌ ri Pedro, xubꞌiꞌij chike ri tinamit: «Achijabꞌ alaq aj Israel, ¿suꞌchak lik kaminaq animaꞌ alaq che wa xil alaq? ¿Yey suꞌchak e kojtzutzaꞌ alaq riꞌoj pachaꞌ oj ri xojbꞌinisan re waꞌchi rukꞌ ri qachuqꞌabꞌ o ruma lik oj jusukꞌ riꞌoj chwach ri Dios? Na e ta riꞌ.
ACT 3:13 Ma e ri Dios ke ri qamam ojertan, waꞌ e ri Abraham, ri Isaac y ri Jacob, ekꞌu Rire ri lik xuyak uqꞌij ri Jesús ri Raj Chak Rire. Noꞌj ralaq xya alaq ri Jesús puqꞌabꞌ ri Pilato. Y na xew ta laꞌ, ma xkꞌaq bꞌi alaq uqꞌij chwach ri Pilato y na xya ta alaq luwar che rire kuyolopij bꞌi ri Jesús echiriꞌ xraj kuyolopij bꞌi ruma na jinta mak xuriq che.
ACT 3:14 Ekꞌu riꞌ ralaq na xꞌaj ta alaq kayolopix bꞌi waꞌ wa Jun lik nim uqꞌij Santo y Jusukꞌ; ma e xtzꞌonoj alaq kayolopix bꞌi ri jun kamisanel.
ACT 3:15 Xkamisaj kꞌu alaq riꞌ ri aj yaꞌl kꞌaslemal, ri Jun xkꞌastajisax lo chikixoꞌl ri ekaminaq ruma ri Dios. Puwi kꞌu riꞌ wa kꞌastajibꞌal kojtzijon wi riꞌoj ma lik oj xojilow re.
ACT 3:16 »E ruma ri kubꞌulibꞌal kꞌuꞌxaj rukꞌ ri Jesús, xkowir ri raqan waꞌ waꞌchi kil alaq y etaꞌam ne alaq uwach. Yey ruma wa kubꞌulibꞌal kꞌuꞌxaj rukꞌ ri Jesús xkunutaj waꞌchi pa saqil wi jelaꞌ pachaꞌ katajin onoje alaq che rilik.
ACT 3:17 »Wetaꞌam kꞌut, alaq qatz-qachaqꞌ, ri xꞌan alaq e ruma na xmaj ta alaq usukꞌ, y jenelaꞌ riꞌ xkiꞌan raj wach re ri tinamit alaq.
ACT 3:18 Pero ruma ri xꞌan alaq che ri Jesús, ri Dios xuꞌana janipa rubꞌiꞌim lo ojertan kuma ri qꞌalajisanelabꞌ echiriꞌ xubꞌiꞌij Ruchaꞌoꞌn lo Rire kutij kꞌax.
ACT 3:19 »E uwariꞌche tzelej tzij alaq chwach ri Dios y yaꞌa kꞌu ibꞌ alaq puqꞌabꞌ chaꞌ kakuytaj ri mak alaq y chaꞌ ri Qajawal Dios kuya uxlanem y utzil chomal chupa ri animaꞌ alaq.
ACT 3:20 Jekꞌulaꞌ ri Dios kutaq na lo ukꞌ alaq ri Jesús, Ruchaꞌoꞌn lo Rire, ri bꞌiꞌtisim chi lo che alaq ojertan.
ACT 3:21 Tobꞌ kꞌu woꞌora lik chirajawaxik wi ri Jesús kꞌo chilaꞌ chikaj, kopon na ri qꞌij echiriꞌ ri Dios kuꞌan tanchi kꞌakꞌ che ronoje jelaꞌ pachaꞌ ri xubꞌiꞌij lo ojertan kuma ri qꞌalajisanelabꞌ ri xetaq lo ruma Rire.
ACT 3:22 »Ma ri Moisés xubꞌiꞌij chike ri qatiꞌ-qamam ojertan: E ri Dios Qajawxel kuyak na lo chikixoꞌlibꞌal ri qatinamit Israel jun Qꞌalajisanel jelaꞌ pachaꞌ riꞌin. Ekꞌu chita janipa ri kubꞌiꞌij Rire chiwe.
ACT 3:23 Ekꞌu ri tikawex na kukoj ta utzij wa jun Qꞌalajisanel, riꞌ kesax bꞌi y na jinta chi re kukꞌ rutinamit ri Dios xcha ri Moisés.
ACT 3:24 »Konoje kꞌu ri qꞌalajisanelabꞌ kipetebꞌem lo chwi ri Samuel, lik etzijoninaq lo chwi taq waꞌ wa qꞌij.
ACT 3:25 Alaq kꞌu ri kakꞌuluw re ri xubꞌiꞌtisij ri Dios kuma ri qꞌalajisanelabꞌ y ruma ri tzij xuꞌan kukꞌ ri qatiꞌ-qamam ojertan, echiriꞌ xubꞌiꞌij che ri Abraham: Ruma kꞌu Jun chike rawalkꞌoꞌal, kebꞌenuꞌan bendecir konoje rukꞌiyal kiwach taq ri tikawex che ruwachulew xchaꞌ.
ACT 3:26 »Ekꞌu ri Dios, echiriꞌ xukꞌastajisaj lo ri Raj Chak chikixoꞌl ri ekaminaq, xutaq lo nabꞌe ukꞌ ralaq re toꞌbꞌel e alaq chaꞌ jelaꞌ chijujunal alaq kajalkꞌatitaj ri bꞌinik silabꞌik alaq che ri na utz taj» xcha ri Pedro chike.
ACT 4:1 Kꞌa kechꞌaꞌt ne ri Pedro y ri Juan kukꞌ ri winaq, echiriꞌ xekꞌun lo raj chakunel re ri Rocho Dios, ri aj wach ke ri e chajinel re ri Rocho Dios y jujun saduceos.
ACT 4:2 Rike lik kꞌo koyowal chikij ri Pedro y ri Juan ma kekꞌutun chikiwach ri tikawex puwi rukꞌastajibꞌal lo ri Jesús chikixoꞌl ri ekaminaq, jekꞌuwaꞌ kakibꞌiꞌij: «Rukꞌastajibꞌal ri Jesús e kꞌutubꞌal re, chiqawach apanoq ri tikawex kekꞌastaj lo chikixoꞌl ri ekaminaq» kechaꞌ.
ACT 4:3 Ekꞌu ri e aj wach re ri Rocho Dios xetaqan che kechap bꞌi ri Pedro y ri Juan. Yey ruma kꞌu lik bꞌenaq qꞌij chik, xebꞌeꞌkiyaꞌa pa cárcel chaꞌ kataꞌ kichiꞌ kꞌa chukaꞌm qꞌij.
ACT 4:4 Pero chike ri xetaw re ri xubꞌiꞌij ri Pedro, lik e kꞌi ri xkubꞌiꞌ kikꞌuꞌx rukꞌ ri Jesús; yey we kebꞌajilax xew ri achijabꞌ, laj e woꞌobꞌ mil xekojow re Rire.
ACT 4:5 Chukaꞌm qꞌij kꞌut xkimol kibꞌ pa ri tinamit Jerusalem raj wach ke raj judiꞌabꞌ kukꞌ ri nimaq winaq re ri tinamit y raj kꞌutunel re ri tzijpixabꞌ.
ACT 4:6 Kꞌo chiriꞌ ri Anás ri kajawal raj chakunel pa Rocho Dios; yey e kꞌo ri Caifás, ri Juan, ri Alejandro y jujun chik kꞌo chux chike ri kajawal raj chakunel pa Rocho Dios.
ACT 4:7 Xekiya kꞌu ri Pedro y ri Juan chikinikꞌajal y xkitzꞌonoj chike: —¿China xyaꞌw piqꞌabꞌ o china pubꞌiꞌ xiꞌan riꞌix waꞌ? —xecha chike.
ACT 4:8 Ekꞌu ri Pedro, rukꞌ ruchuqꞌabꞌ ri Santowilaj Ruxlabꞌixel ri Dios, xubꞌiꞌij chike: —Tape alaq, alaq aj wach re ri tinamit y alaq nimaq winaq re Israel,
ACT 4:9 ma e waqꞌij kataꞌ qachiꞌ puwi ri utz xꞌan che wa jun achi yewaꞌ chaꞌ ketaꞌmaxik suꞌanik xkunutajik.
ACT 4:10 Ekꞌu riꞌ woꞌora kaqaqꞌalajisaj chiwach onoje alaq y chikiwach konoje ri tinamit Israel: Waꞌ waꞌchi kꞌo chiwach alaq xkunutaj chupa rubꞌiꞌ ri Qanimajawal Jesucristo re Nazaret, ri xkamisaj alaq chwa cruz yey ri Dios xukꞌastajisaj lo chikixoꞌl ri ekaminaq.
ACT 4:11 »E pachaꞌ ri kubꞌiꞌij Ruchꞌaꞌtem ri Dios: E rabꞌaj kꞌaqital kan kuma raj yakal ja, e abꞌaj waꞌ lik xajawaxik chaꞌ katikiꞌ lo ri ja kachaꞌ. Ralaq e alaq pachaꞌ wa e aj yakal ja yey ri Jesús e ri Abꞌaj.
ACT 4:12 Xew kꞌu rukꞌ ri Jesús kariqitaj kolobꞌetajik, ma na jinta chi juna bꞌiꞌaj che ruwachulew yaꞌtal lo chike ri tikawex chaꞌ ruma riꞌ kojkolobꞌetajik —xchaꞌ.
ACT 4:13 Ekꞌu raj wach re ri tinamit xkilo ri Pedro y ri Juan na kakixiꞌij ta kꞌana kibꞌ ketzijon puwi ri Utzilaj Tzij, tobꞌ waꞌ waꞌchijabꞌ na e ta tijotal pachaꞌ rike yey xa ne e kukꞌil rachijabꞌ e aj chak re ri tinamit. Lik xkam kꞌu kanimaꞌ riꞌ chike y xkimaj usukꞌ e janipa taq ri kakiꞌano y ri kimajom ri Pedro y ri Juan, e ruma ri xekꞌojiꞌ rukꞌ ri Jesús, ri kitijonel.
ACT 4:14 Yey na utz tane kꞌu riꞌ kakibꞌiꞌij na kunutajinaq ta ri sik, ma waꞌ waꞌchi takꞌal chiriꞌ chikiwach kukꞌ ri Pedro y ri Juan.
ACT 4:15 Ekꞌu ri xkiꞌano e xetaqan che chaꞌ ri Pedro y ri Juan kebꞌel bꞌi joqꞌotaj pa ri luwar re ri qꞌatbꞌal tzij, y xew kꞌu xekanaj raj qꞌatal tzij chaꞌ kechꞌaꞌt chikiwach.
ACT 4:16 Jekꞌuwaꞌ xkibꞌiꞌij chikiwach: «¿Saꞌ ri kaqaꞌan chike waꞌchijabꞌ? Ma ri kꞌutubꞌal re kunanik ꞌanatal kuma rike, lik qꞌalajininaq chikiwach konoje ri ejeqel Jerusalem yey lik na utz taj kaqewaj.
ACT 4:17 Ri qaꞌanaꞌ e qaxibꞌij kipa chaꞌ na ketzijon ta chi kꞌana chwach junoq chupa rubꞌiꞌ wa jun achi, y jelaꞌ na keꞌek ta chi utzijoxik waꞌ» xechaꞌ.
ACT 4:18 Xekisikꞌij kꞌu ri Pedro y ri Juan y lik xekitaq che na ketzijon taj y na kekꞌutun ta chi ne kꞌana pa rubꞌiꞌ ri Jesús.
ACT 4:19 Pero ri Pedro y ri Juan xkikꞌul uwach: —Chꞌobꞌo pe ralaq: ¿Usukꞌ nawi chwach ri Dios e kaqakoj tzij ralaq chwa ri kaqakoj utzij Rire?
ACT 4:20 Ma riꞌoj, na utz taj kaqoqꞌotaj ubꞌiꞌxikil janipa ri qilom y ri qatom —xechaꞌ.
ACT 4:21 Ekꞌu ri e aj wach lik xkixibꞌij kipa. Tekꞌuchiriꞌ, xekiyolopij bꞌi ma na xkiriq taj suꞌanik kekiya pa kꞌaxkꞌobꞌik ruma kakixiꞌij kibꞌ chikiwach ri winaq re ri tinamit. Ma konoje lik kakiyak uqꞌij ri Dios ruma ri xkilo.
ACT 4:22 Yey lik qꞌalaj e rukꞌ ruchuqꞌabꞌ ri Dios xꞌaniꞌ wi ri kꞌutubꞌal re kunanik, ma waꞌchi xkunutajik, ralaxibꞌem sik yey ikꞌowinaq chi pa cuarenta rujunabꞌ.
ACT 4:23 Echiriꞌ xeyolopix bꞌi, ri Pedro y ri Juan xebꞌek kukꞌ ri kachbꞌiꞌil y xkitzijoj chike janipa ri bꞌiꞌtal bꞌi chike kuma ri nimaq e aj chakunel pa Rocho Dios y ri nimaq winaq re ri tinamit.
ACT 4:24 Echiriꞌ rike xkita waꞌ, konoje xa jun kikꞌuꞌx xkijeq kakiꞌan orar chwach ri Dios, jewaꞌ kakibꞌiꞌij: «¡Lal Dios Qajawxel, Lal ꞌanayom la ruwa kaj, ruwachulew, ri mar y ronoje ri kꞌo che taq waꞌ!
ACT 4:25 Yey ruma ri David ri aj chak la, jewaꞌ xbꞌiꞌij la ojertan: ¿Suꞌchak lik ketukuk taq ri winaq yey taq ri tinamit xew kakinoꞌjij ri na jinta uchak?
ACT 4:26 Ma xkimol kibꞌ ri taqanelabꞌ y ri e aj wach che ruwachulew, xkiꞌan kꞌu xa jun che kibꞌ y xebꞌek chirij ri Dios Qajawxel y chirij ri Cristo, Ruchaꞌoꞌn lo Rire.
ACT 4:27 Waꞌ lik qatzij, ma chupa wa tinamit oj kꞌo wi, ri Herodes rukꞌ ri Poncio Pilato xkimol kibꞌ kukꞌ ri winaq e aj Israel y kukꞌ ri na e ta aj Israel; yey junam kꞌu xeyaktaj chirij ri Jesús, ri Santowilaj Aj Chak la, ri Jun xchaꞌ lo la.
ACT 4:28 Jekꞌulaꞌ, e xkiꞌano janipa ri chꞌobꞌom lo la ojertan chaꞌ e kuꞌana na riꞌ.
ACT 4:29 »Ekꞌu woꞌora, Qaqaw, kil la ri xibꞌibꞌal kipa raj chakibꞌ la kiꞌanom; yaꞌa kꞌu la ri chuqꞌabꞌ la chike rike chaꞌ na kakixiꞌij ta kꞌana kibꞌ kakitzijoj ri Chꞌaꞌtem la.
ACT 4:30 Yaꞌa ri qꞌabꞌ la pakiwiꞌ chaꞌ chupa rubꞌiꞌ ri Jesús, ri Santowilaj Aj Chak la, kekunutaj ri yewaꞌibꞌ y kaꞌaniꞌ taq kꞌutubꞌal re ri chuqꞌabꞌ la» xechaꞌ.
ACT 4:31 Echiriꞌ xkikꞌis uꞌanik orar, ri luwar pa kimolom wi kibꞌ xbꞌarbꞌatik y konoje xkikꞌul ruchuqꞌabꞌ ri Santowilaj Ruxlabꞌixel ri Dios y jekꞌulaꞌ na kakixiꞌij ta kꞌana kibꞌ kakitzijoj Ruchꞌaꞌtem ri Dios chikiwach konoje ri winaq.
ACT 4:32 Konoje kꞌu rukꞌiyal hermanos, ri xkikoj rubꞌiꞌ ri Cristo, lik uꞌanom xa jun kanimaꞌ y xa jun kinaꞌoj; y na jinta junoq chike kuꞌan re che ri kꞌo rukꞌ, ma rubꞌitaq ke xuꞌan re chinima ronoje.
ACT 4:33 Jekꞌulaꞌ riꞌ, ri e taqoꞌn re ri Cristo rukꞌ unimal kichuqꞌabꞌ ketzijon chwi rukꞌastajibꞌal ri Qanimajawal Jesús, yey ri toꞌbꞌal re ri Dios kꞌo pakiwi konoje rike.
ACT 4:34 Na jinta kꞌu junoq kutij nibꞌaꞌil chikixoꞌl, ma janipa ri kꞌo taq kulew o kꞌo taq ja kukꞌ, we kꞌo xkikꞌayij, kakikꞌam lo ri rajil
ACT 4:35 y kakiya kꞌu pakiqꞌabꞌ ri e taqoꞌn re ri Jesús chaꞌ rike kakijach chikiwach ri hermanos e chirij taq ri kajawax wi chike chikijujunal.
ACT 4:36 Kꞌo kꞌu jun achi José rubꞌiꞌ, yey ri e taqoꞌn kakibꞌiꞌij Bernabé che. (Waꞌ wa bꞌiꞌaj keꞌelawi “bꞌochiꞌinel”.) Rire aj Chipre y e kukꞌil ri ralkꞌoꞌal kan ri Leví.
ACT 4:37 Waꞌ waꞌchi xukꞌayij chꞌaqap rulew; tekꞌuchiriꞌ, xukꞌam lo ri rajil y xuya pakiqꞌabꞌ ri e taqoꞌn.
ACT 5:1 Kꞌo kꞌu jun achi Ananías rubꞌiꞌ, junam rukꞌ ri rixoqil Safira xkikꞌayij chꞌaqap ulew.
ACT 5:2 Ekꞌu rachi kꞌo xresaj kan che ri rajil rulew, yey junam rukꞌ ri rixoqil xkiꞌan tzij chikiwach chaꞌ kakiꞌan raqꞌubꞌal puwi ri rajil rulew. Ekꞌu ri nikꞌaj chik che ri rajil xukꞌam bꞌi, xuꞌyaꞌa pakiqꞌabꞌ ri e taqoꞌn y xubꞌiꞌij waꞌ e rajil rulew.
ACT 5:3 Ekꞌu ri Pedro xubꞌiꞌij che: —Ananías, ¿suꞌchak xaya luwar che ri Satanás kok pa awanimaꞌ chaꞌ jelaꞌ kaꞌan raqꞌubꞌal chwach ri Santowilaj Ruxlabꞌixel ri Dios? Ma xabꞌiꞌij xaya ronoje ri rajil rulew, pero kꞌo xawesaj kan che.
ACT 5:4 Echiriꞌ kꞌamajaꞌ kakꞌayij rawulew, ¿na aweꞌat ta nebꞌa laꞌ? Y echiriꞌ akꞌayim chik, ¿na paqꞌabꞌ ta nebꞌa kꞌo wi kaꞌan rukꞌ ri rajil saꞌ ri kawaj? ¿Suꞌchak kꞌu riꞌ xaꞌan waꞌ? ¡Na chikiwach ta kꞌu achijabꞌ aꞌanom wi raqꞌubꞌal ma e chwach ri Dios! —xchaꞌ.
ACT 5:5 Xew kꞌu xuta waꞌ wa chꞌaꞌtem, ri Ananías xtzaq pulew y asu xkamik. Ruma kꞌu waꞌ, xpe jun xiꞌin ibꞌ pakiwi konoje ri xebꞌetaꞌman re.
ACT 5:6 Xekꞌun kꞌu lo jujun alabꞌo, xkipis rucuerpo, xkikꞌam bꞌi y xeꞌkimuquꞌ.
ACT 5:7 Laj oxibꞌ ora rikꞌowik waꞌ echiriꞌ xok lo ri Safira ri rixoqil ri Ananías; yey rire na retaꞌam ta kꞌu riꞌ saꞌ ri xukꞌulumaj ri rachijil.
ACT 5:8 Ekꞌuchiriꞌ, xutzꞌonoj ri Pedro che: —Chabꞌiꞌij chwe: ¿E rajil waꞌ rulew xikꞌayij? —xcha che. Rixoq xukꞌul uwach che: —Areꞌ, e rajil laꞌ —xchaꞌ.
ACT 5:9 Xubꞌiꞌij kꞌu ri Pedro che: —¿Suꞌchak xiꞌan tzij chiwach chaꞌ kikꞌam upa ri Ruxlabꞌixel ri Dios Qajawxel? ¡Chawilaꞌ! Ralabꞌo katajin lo kokik che ruchiꞌ ja, e laꞌ xetzelej lo che umuqik rawachijil, yey ekꞌu woꞌora e katkikꞌam bꞌi riꞌat —xchaꞌ.
ACT 5:10 Na jampatana xtzaq ri Safira chwach ri Pedro y asu xkamik. Ekꞌuchiriꞌ xebꞌok lo ralabꞌo, xoꞌlkiriqaꞌ kaminaq chik. Xkikꞌam kꞌu bꞌi y xeꞌkimuqu putzal ri rachijil.
ACT 5:11 Y xok kꞌu jun unimal xiꞌin ibꞌ kukꞌ konoje ri tinamit re ri Cristo y kukꞌ konoje ri xebꞌetaꞌman re taq waꞌ.
ACT 5:12 Kuma kꞌu ri e taqoꞌn re ri Cristo, ukꞌiyal kꞌutubꞌal re ruchuqꞌabꞌ ri Dios y nimaq taq chak katajin rilik chikiwach taq ri tikawex. Yey taq ri kikojom rubꞌiꞌ ri Cristo, lik xa jun kikꞌuꞌx kakimol kibꞌ pa ri luwar kabꞌiꞌx che “Ruchiꞌ Ja re Salomón”.
ACT 5:13 E taq kꞌu ri kꞌamajaꞌ kakikoj rubꞌiꞌ ri Cristo, kakixiꞌij kibꞌ kakijunimaj kibꞌ kukꞌ, tobꞌ konoje ri tikawex lik kakiyak kiqꞌij.
ACT 5:14 Y katajin kꞌu kikꞌiyarik ri kikojom rubꞌiꞌ ri Qanimajawal, waꞌ e ukꞌiyal achijabꞌ y ukꞌiyal ixoqibꞌ.
ACT 5:15 Ruma taq kꞌu ri kꞌutubꞌal re ruchuqꞌabꞌ ri Dios kakiꞌan rutaqoꞌn ri Jesús, taq ri winaq kekesaj taq ne lo ri e yewaꞌibꞌ pa taq ri bꞌe. Ekiyaꞌom chwa chꞌat y chwa pop, chaꞌ we xikꞌow ri Pedro, tobꞌ xew luꞌmuꞌj katzaq pakiwiꞌ, kekunutaj kꞌu riꞌ.
ACT 5:16 E kꞌi ne ri e petinaq pa taq ri tinamit kꞌo lo chunaqaj Jerusalem. Ekikꞌamom lo ri yewaꞌibꞌ y ri echꞌuꞌjerinaq kuma itzelilaj uxlabꞌixel; y konoje kꞌut kekunutajik.
ACT 5:17 Ri kajawal raj chakunel pa Rocho Dios y konoje ri e kꞌo rukꞌ, waꞌ e ri saduceos, xujeq katiꞌtot kikꞌuꞌx chikij rutaqoꞌn ri Jesús ruma lik e kꞌi ri winaq eteran chikij.
ACT 5:18 Xekichap kꞌu bꞌi rutaqoꞌn ri Jesús y xebꞌeꞌkiyaꞌa pa ri cárcel re ri tinamit.
ACT 5:19 Xopon kꞌu jun ángel re ri Qanimajawal chaqꞌabꞌ, xuꞌjaqa taq ri okibꞌal re ri cárcel y xebꞌeresaj loq. Ekꞌuchiriꞌ, xubꞌiꞌij chike:
ACT 5:20 «Jix, jixeꞌtakꞌala pa ri Rocho Dios y chitzijoj chike ri winaq re ri tinamit ronoje puwi ri kꞌakꞌ bꞌe re kꞌaslemal» xchaꞌ.
ACT 5:21 Ruma kꞌu ri xkita che ri ángel, anim tan xebꞌok pa ri Rocho Dios y xkijeq kekꞌutunik. Ekꞌu ri kajawal raj chakunel pa Rocho Dios yey ri e kꞌo rukꞌ, kꞌamajaꞌ kakinaꞌbꞌej riꞌ we rutaqoꞌn ri Jesús ebꞌesam chi lo pa ri cárcel. Xkimol kꞌu kichiꞌ taq ri uchapom wi ribꞌ ri qꞌatbꞌal tzij, kukꞌ konoje ri nimaq winaq ke raj Israel. Xekitaq kꞌu ri e chajinel re ri Rocho Dios che kikꞌamik rutaqoꞌn ri Jesús pa ri cárcel.
ACT 5:22 Ekꞌuchiriꞌ xebꞌopon ri e chajinel pa ri cárcel, na xekiriq ta chi rutaqoꞌn ri Jesús. Xetzelej kꞌu loq
ACT 5:23 y jewaꞌ xoꞌlkibꞌiꞌij: «Ri cárcel xqariqo lik tzꞌapil chi utz, yey raj chajinel e kꞌo ne chwach taq ri okibꞌal re ri cárcel. Pero echiriꞌ xqajaqo, na jinta chi junoq chike rutaqoꞌn ri Jesús chupa» xechaꞌ.
ACT 5:24 Echiriꞌ xkita waꞌ, xsach kinaꞌoj ri kajawal raj chakunel y raj wach ke ri e chajinel kukꞌ ri nimaq e aj chakunel re ri Rocho Dios. Konoje xkijeq kechꞌaꞌt puwiꞌ, ma na ketaꞌam taj saꞌ kukꞌisbꞌej wi ronoje waꞌ.
ACT 5:25 Ekꞌuchiriꞌ, xkꞌun lo jun y jewaꞌ xubꞌiꞌij: «E rachijabꞌ xeyaꞌ alaq pa cárcel, e kꞌo pa ri Rocho Dios y na koqꞌotam ta kekꞌutun chikiwach ri tinamit» xchaꞌ.
ACT 5:26 Ekꞌu raj wach ke ri e chajinel re ri Rocho Dios xeꞌek junam kukꞌ jujun e aj chajinel y xeꞌkikꞌama lo rutaqoꞌn ri Jesús. Yey na jinta kꞌo xkiꞌan chike ma kakixiꞌij kibꞌ we kakiꞌan kꞌax chike, laj keꞌan paꞌbꞌaj kuma ri tinamit.
ACT 5:27 Ekꞌuchiriꞌ xekikꞌam loq, xekiya chikiwach ri uchapom wi ribꞌ ri qꞌatbꞌal tzij. Ekꞌu ri kajawal raj chakunel pa Rocho Dios xutzꞌonoj chike rutaqoꞌn ri Jesús:
ACT 5:28 —¿Na xixqataq ta nebꞌa che chaꞌ na kixkꞌutun ta chi chupa rubꞌiꞌ wa jun achi? Yey woꞌora iwuma ne riꞌix xeꞌek utzijoxik wa kꞌutunik che ronoje Jerusalem; y na xew ta laꞌ, ma kiwaj ne kiya qeqlabꞌal che rukikꞌel laꞌ la jun achi —xechaꞌ.
ACT 5:29 Ri Pedro kukꞌ ri jujun chik e taqoꞌn re ri Jesús xkikꞌul uwach: —Lik chirajawaxik wi nabꞌe na e kaqakoj utzij ri Dios chwach ri kaqakoj kitzij rachijabꞌ.
ACT 5:30 Ma ri Dios ke ri qatiꞌ-qamam e xkꞌastajisan lo ri Jesús chikixoꞌl ri ekaminaq. Yey e ralaq ri xkamisan alaq ma uma ralaq xyaꞌiꞌ ri Jesús chwa ri cruz.
ACT 5:31 Pero ri Dios lik xuyak uqꞌij ri Jesús, xuya puwikiqꞌabꞌ y xuꞌan Qajawal y Kolobꞌenel che; chaꞌ ruma ri Jesús, raj Israel kakitzelej kitzij chwach y kakiriq na ri kuybꞌal kimak.
ACT 5:32 »Ekꞌu riꞌoj, e janipa ri xqilo, e kaqatzijoj. Yey ri Santowilaj Ruxlabꞌixel ri Dios, ri Jun yaꞌtal chike ri kakikoj utzij ri Dios, e kajikibꞌan uwach waꞌ —xechaꞌ.
ACT 5:33 Echiriꞌ xkita waꞌ ri e aj wach, lik xpe koyowal chikij rutaqoꞌn ri Jesús y xkaj kekikamisaj.
ACT 5:34 Ekꞌuchiriꞌ, chikixoꞌl ri e aj qꞌatal tzij xyaktaj jun fariseo Gamaliel rubꞌiꞌ, aj kꞌutunel re ri tzijpixabꞌ yey lik yakom uqꞌij ruma ri tinamit. Rire xtaqan che kebꞌesax bꞌi joqꞌotaj ri e taqoꞌn re ri Jesús.
ACT 5:35 Tekꞌuchiriꞌ, xubꞌiꞌij: «Achijabꞌ, alaq aj Israel, chꞌobꞌo na alaq raqan chi utz saꞌ ri kaꞌan alaq chike waꞌchijabꞌ.
ACT 5:36 Ma kꞌo tan qꞌij xyaktaj jun achi Teudas rubꞌiꞌ, yey chiribꞌil ribꞌ xubꞌiꞌij e jun achi lik kꞌo uwach. Laj e kajibꞌ ciento rachijabꞌ xeterej chirij. Pero xopon jun qꞌij rire xkamisaxik. Y konoje ri xesokotaj ruma rire, xekicher bꞌi; jekꞌulaꞌ, xsach uwach janipa ri xunoꞌjij.
ACT 5:37 »Chwi kꞌu riꞌ waꞌ, xyaktaj jun chik chupa taq ri qꞌij echiriꞌ xꞌan jun ajilanik. Waꞌ e ri Judas aj Galilea. Yey ukꞌiyal tikawex xeterej chirij. Pero xopon ruqꞌijol echiriꞌ xkamisaxik; y konoje kꞌu ri xesokotaj ruma rire, xekicher bꞌi.
ACT 5:38 »Kambꞌiꞌij kꞌu woꞌora che alaq: Mechꞌichꞌaꞌ chi alaq waꞌchijabꞌ; ri ꞌana alaq e cheyolopij bꞌi alaq. Ma we xa kinoꞌjibꞌal achijabꞌ wa kakikꞌutu, riꞌ kasach na uwach.
ACT 5:39 Noꞌj we waꞌ re ri Dios, na kachꞌij ta alaq usachik kiwach; y kꞌate kꞌu kanaꞌ alaq riꞌ kachꞌoꞌjin alaq rukꞌ ri Dios» xchaꞌ.
ACT 5:40 Konoje xukꞌul kikꞌuꞌx ri xubꞌiꞌij ri Gamaliel. Xekisikꞌij kꞌu ri e taqoꞌn re ri Jesús; tekꞌuchiriꞌ, xjichꞌ kipa rukꞌ kolobꞌ y xekitaq che na ketzijon ta chi chupa rubꞌiꞌ ri Jesús y xekiyolopij kꞌu bꞌi.
ACT 5:41 Xebꞌel kꞌu bꞌi ri e taqoꞌn chikiwach raj qꞌatal tzij. Lik kekiꞌkotik ma xyaꞌtaj chike kakitij kꞌax ruma kikojom rubꞌiꞌ ri Jesús.
ACT 5:42 Jekꞌulaꞌ, ronoje qꞌij na kakoqꞌotaj taj kekꞌutunik y kakitzijoj ri Utzilaj Tzij chwi ri Jesucristo chupa ri Rocho Dios y chiꞌ taq ja.
ACT 6:1 Chupa taq laꞌ la qꞌij lik xekꞌiyar ri kajlibꞌal ri kikojom rubꞌiꞌ ri Cristo. Ekꞌu ri hermanos e aj judiꞌabꞌ ri kechꞌaꞌt pa ri chꞌaꞌtem griego, xkijeq kechꞌaꞌtibꞌen chikij ri hermanos e aj judiꞌabꞌ ri kechꞌaꞌt pa ri chꞌaꞌtem hebreo. Ma echiriꞌ kaꞌan ri jachanik chike ri e nibꞌaꞌibꞌ, ri malkaꞌnibꞌ ri kechꞌaꞌt pa ri chꞌaꞌtem griego na kekajmax ta chi utz rukꞌ ri toꞌbꞌal ke kakikꞌul ri jujun qꞌij.
ACT 6:2 Ekꞌu ri kabꞌlajuj taqoꞌn xkimol kichiꞌ konoje ri kikojom rubꞌiꞌ ri Cristo y xkibꞌiꞌij chike: «Na usukꞌ taj we riꞌoj kaqatanabꞌaꞌ utzijoxik Rutzij Upixabꞌ ri Dios chaꞌ kaqaya qibꞌ che ujachik ri kajawax chike ri e nibꞌaꞌibꞌ.
ACT 6:3 Ruma kꞌu laꞌ hermanos, tzukuj alaq wuqubꞌ achijabꞌ chixoꞌl alaq, chom ri kibꞌinik kisilabꞌik, lik kiyaꞌom kibꞌ puqꞌabꞌ ri Ruxlabꞌixel ri Dios y lik kꞌo kinaꞌoj, chaꞌ kaqaya wa chak pakiqꞌabꞌ.
ACT 6:4 Jekꞌulaꞌ riꞌoj xew kaqaya qibꞌ che kaqaꞌan orar chwach ri Dios y che rutzijoxik Ruchꞌaꞌtem» xechaꞌ.
ACT 6:5 Konoje kꞌu ri hermanos kimolom kibꞌ, xukꞌul kikꞌuꞌx wa xbꞌiꞌx chike. Xkichaꞌ kꞌu ri Esteban, jun achi lik kubꞌul ukꞌuꞌx rukꞌ ri Dios yey lik kꞌo ri Santowilaj Ruxlabꞌixel ri Dios rukꞌ. Y xekichaꞌ ri Felipe, ri Prócoro, ri Nicanor, ri Timón, ri Parmenas y ri Nicolás, jun achi aj Antioquía xex utaqem lo ri kꞌutunik ke raj judiꞌabꞌ.
ACT 6:6 Ewi xekikꞌam lo chikiwach rutaqoꞌn ri Jesús. Ekꞌu wa taqoꞌn xkiya ri kiqꞌabꞌ pakiwiꞌ y xkiꞌan orar kukꞌ.
ACT 6:7 Jekꞌuriꞌlaꞌ ri Utzilaj Tzij re ri Qanimajawal lik xeꞌek utzijoxik y lik katajin kikꞌiyarik ri kajlibꞌal ri kikojom rubꞌiꞌ ri Cristo chiriꞌ Jerusalem. E kꞌo ne ukꞌiyal e aj chakunel pa Rocho Dios xkijeq kakitaqej ri Utzilaj Tzij.
ACT 6:8 Ri Esteban lik kꞌo ri unimal rutzil ukꞌuꞌx y ruchuqꞌabꞌ ri Dios rukꞌ. Ruma kꞌu riꞌ, kuꞌan nimaq taq kꞌutubꞌal re ruchuqꞌabꞌ ri Dios chikiwach ri winaq.
ACT 6:9 Ekꞌuchiriꞌ, xeyaktaj jujun re ri sinagoga, ri kabꞌiꞌx che “Ri sinagoga ke ri ebꞌelinaq lo pa ri kꞌax”, yey kukꞌ rike xeyaktaj jujun e aj Cirene, e aj Alejandría, e aj Chipre y e aj Asia. E taq kꞌu riꞌ waꞌ xkijeqo xa pa chꞌaꞌtem kechꞌoꞌjin rukꞌ ri Esteban.
ACT 6:10 Yey na kakiriq ta ukꞌulik uwach ri kubꞌiꞌij ri Esteban ma rire kachꞌaꞌt rukꞌ ri naꞌoj uyaꞌom ri Ruxlabꞌixel ri Dios che.
ACT 6:11 Ekꞌu ri xkiꞌano e xekipuaqij jujun achijabꞌ chaꞌ kakibꞌiꞌij kitom tzel kachꞌaꞌt ri Esteban chirij ri Moisés y chirij ri Dios.
ACT 6:12 Xa jekꞌulaꞌ xekichꞌiꞌ wi taq ri winaq re ri tinamit, ri nimaq winaq e aj wach y raj kꞌutunel re ri tzijpixabꞌ. Konoje kꞌu riꞌ waꞌ xebꞌek chirij ri Esteban; rukꞌ oyowal xkichapo, xkikꞌam bꞌi y xeꞌkiyaꞌa chikiwach taq ri uchapom wi ribꞌ ri qꞌatbꞌal tzij.
ACT 6:13 Xekikoj kꞌu achijabꞌ e aj kojol raqꞌubꞌal chirij, jewaꞌ kakibꞌiꞌij: «Waꞌ waꞌchi lik xaqi tzel kachꞌaꞌt chirij wa Santowilaj Luwar re ri Rocho Dios y chirij Rutzij Upixabꞌ ri Dios.
ACT 6:14 Ma qatom kubꞌiꞌij, laꞌ la Jesús ri aj Nazaret kuwulij wa luwar y kujalkꞌatij janipa ri kꞌutunik y kojobꞌal yaꞌtal kan chiqe ruma ri Moisés» kechaꞌ.
ACT 6:15 Konoje kꞌu ri etzꞌul pa ri qꞌatbꞌal tzij, echiriꞌ xkitzuꞌ uwach ri Esteban, xkil rupalaj e pachaꞌ upalaj juna ángel.
ACT 7:1 Ri kajawal raj chakunel pa Rocho Dios xutzꞌonoj che ri Esteban we qatzij xubꞌiꞌij waꞌ.
ACT 7:2 Ekꞌu rire xubꞌiꞌij: «Alaq achijabꞌ y alaq nimaq winaq, chinta na pe alaq. Ri Dios, ri Jun lik kꞌo unimal chomalil rukꞌ, xuqꞌalajisaj ribꞌ chwach ri qaqaw Abraham echiriꞌ rire kꞌo pa ri luwar re Mesopotamia, waꞌ e echiriꞌ kꞌamajaꞌ keꞌjeqela pa ri tinamit Harán.
ACT 7:3 Xubꞌiꞌij ri Dios che: “Chatelubꞌi chupa ratinamit y chikixoꞌl rawatz-achaqꞌ; y jat kꞌu chwach rulew pa kankꞌut wi riꞌin chawe” xchaꞌ.
ACT 7:4 Ekꞌuchiriꞌ, xel bꞌi ri Abraham chwach rulew ke raj Caldea y xjeqiꞌ pa ri tinamit Harán. Chwi kꞌu rukamik ruqaw, xtaq lo ruma ri Dios chupa wa luwar pa jeqel wi alaq woꞌora.
ACT 7:5 »Pero ri Dios na xuya tane che ri Abraham kuꞌan rajaw waꞌ wuꞌlew, tobꞌ tane xa pa kuya wi juna raqan. Noꞌj xubꞌiꞌtisij kꞌu che tobꞌ ne rire kaminaq chik, waꞌ wuꞌlew kuꞌana na re y ke ri ralkꞌoꞌal kanoq; yey echiriꞌ xbꞌiꞌx waꞌ che ri Abraham, kꞌamajaꞌ ne kꞌo juna ralkꞌoꞌal.
ACT 7:6 Ekꞌu ri Dios xubꞌiꞌij che ri Abraham: Taq rawalkꞌoꞌal kanoq kebꞌeꞌjeqela na pa jun ulew na kulew taj. Y chiriꞌ kꞌu riꞌ kaꞌaniꞌ nibꞌaꞌibꞌ chike y keyaꞌiꞌ pa kꞌaxlaj chak kajibꞌ ciento junabꞌ kuma ri tikawex re ri tinamit pa kekꞌojiꞌ wi.
ACT 7:7 Pero In kinqꞌataw tzij pakiwi wa tinamit, ri kakiya pa kꞌaxlaj chak ri nutinamit. Tekꞌuchiriꞌ, ri nutinamit kebꞌel loq y ketzelej loq y kinkiloqꞌnimaj chupa wa luwar at kꞌo wi xchaꞌ.
ACT 7:8 »Ri Dios xuꞌan jun tzij rukꞌ ri Abraham, yey ri kꞌutubꞌal re waꞌ wa tzij e ri retalil re circuncisión. E uwariꞌche ri Abraham xukoj ri retalil re circuncisión che rukꞌajol Isaac echiriꞌ xukꞌis wajxaqibꞌ qꞌij ralaxik. Jekꞌulaꞌ xuꞌan ri Isaac che rukꞌajol Jacob. Y ri Jacob jelaꞌ xuꞌan chike ri kabꞌlajuj ukꞌajol, ri e qamam re ri qatinamit.
ACT 7:9 »Ekꞌu rike xok retzelal kꞌuꞌx pa kanimaꞌ chirij ri kichaqꞌ José. Ruma kꞌu riꞌ, xkikꞌayij bꞌi chaꞌ kakꞌam bꞌi Egipto. Pero ri Dios kꞌo rukꞌ ri José
ACT 7:10 y xresaj kꞌu chupa ronoje taq ri kꞌaxkꞌobꞌik xikꞌow wi. Xuya unaꞌoj y xuꞌan che lik xukꞌul upuwach ri faraón, ri taqanel re Egipto. Ma ri faraón xuya che ri José kataqan puwi ri tinamit re Egipto y xuya puqꞌabꞌ rire ronoje rubꞌitaq re.
ACT 7:11 »Xpe kꞌu jun unimal numik chupa taq ronoje ri luwar re Egipto y re Canaán. Ruma kꞌu waꞌ xpe unimal kꞌaxkꞌobꞌik pakiwi ri qatiꞌ-qamam ma na jinta kakitijo.
ACT 7:12 »Echiriꞌ ri Jacob xunaꞌbꞌej chilaꞌ Egipto kꞌo katijik, xebꞌutaq bꞌi rukꞌajol chaꞌ keꞌkiloqꞌo trigo chilaꞌ. Waꞌ e ri nabꞌe bꞌenam xkiꞌan ri qamam chilaꞌ Egipto.
ACT 7:13 Ekꞌu che rukalaj kibꞌenam, ri José xuqꞌalajisaj ribꞌ chikiwach ri ratzixelabꞌ. Jekꞌulaꞌ ri faraón xretaꞌmaj china taq ri e ratz-uchaqꞌ ri José.
ACT 7:14 »Yey ri José xutaq ukꞌamik ruqaw Jacob y konoje ri e ratz-uchaqꞌ. Ri kajlibꞌal rike chi konoje e setenta y cinco.
ACT 7:15 Jekꞌulaꞌ xeꞌjeqela ri Jacob pa ri tinamit Egipto. Chilaꞌ kꞌu riꞌ xkam wi rire y chilaꞌ xekam wi ri qamam.
ACT 7:16 Xkꞌam kꞌu bꞌi ri kibꞌaqil pa ri tinamit Siquem y xeyaꞌ pa ri muqubꞌal uloqꞌom kan ri Abraham rukꞌ ukꞌiyal puaq chike ri ralkꞌoꞌal kan ri Hamor, chilaꞌ Siquem.
ACT 7:17 »Yey ekꞌuchiriꞌ katajin roponik ri qꞌij echiriꞌ ri Dios kuꞌana na rubꞌiꞌtisim che ri Abraham, taq ri ralkꞌoꞌal rire lik xekꞌiyar chilaꞌ Egipto.
ACT 7:18 Tekꞌuchiriꞌ, xyaktaj jun chik rey chiriꞌ Egipto; ekꞌu rire na xretaꞌmaj ta uwach ri José.
ACT 7:19 Waꞌ wa rey xebꞌusok ri qatinamit ojertan. Lik xebꞌuya ri qatiꞌ-qamam pa kꞌaxkꞌobꞌik, ma xtaqan che kekamisax ri kichꞌutiꞌq e alabꞌo chaꞌ jelaꞌ na kakꞌiyar ta kiwach ri qatinamit.
ACT 7:20 »Chupa taq kꞌu riꞌ laꞌ la qꞌij xalax ri Moisés y e jun chomilaj akꞌa chwach ri Dios. Ekꞌu rire oxibꞌ ikꞌ xchajix xa xeꞌlaqꞌay pa rocho ruqaw.
ACT 7:21 Pero echiriꞌ na utz ta chi kewax pa ja, xesax bꞌi y xeꞌriqitaj lo ruma rumiꞌal ri faraón; y waꞌli xukꞌiyisaj y xuꞌan pachaꞌ ralabꞌ che.
ACT 7:22 Jekꞌulaꞌ, ri Moisés xtijox puwi ronoje ri naꞌoj ke ri aj Egipto, y xuꞌana jun achi lik kꞌo uchuqꞌabꞌ che janipa taq ri kubꞌiꞌij y kuꞌano.
ACT 7:23 »Echiriꞌ xukꞌis cuarenta junabꞌ, xalax pa ranimaꞌ keꞌbꞌina kukꞌ ri ratz-uchaqꞌ, ri e aj Israel.
ACT 7:24 Y xril kꞌu riꞌ lik kaꞌan kꞌax che jun chike ruma jun aj Egipto. Xutoꞌ kꞌu uwiꞌ ri ratz-uchaqꞌ yey xukamisaj ri aj Egipto.
ACT 7:25 E xuchꞌobꞌ rire, taq ri ratz-uchaqꞌ kakimaj usukꞌ e ruma rire kebꞌeresaj bꞌi ri Dios pakiqꞌabꞌ raj Egipto; noꞌj rike na je ta laꞌ ri xkimaj usukꞌ.
ACT 7:26 »Chukaꞌm qꞌij kꞌut xebꞌuꞌriqa kaꞌibꞌ aj Israel kechꞌoꞌjin chikiwach y xraj kebꞌuya putzil chomal. Xubꞌiꞌij kꞌu chike: “Achijabꞌ, ralaq chaqꞌ ibꞌ alaq. ¿Suꞌchak kꞌu riꞌ kaꞌan kꞌax che ibꞌ alaq chiwach alaq?” xchaꞌ.
ACT 7:27 »Ekꞌuchiriꞌ, ri jun ri kuꞌan kꞌax che ri ratz-uchaqꞌ, xupaqchiꞌij bꞌi ri Moisés y xubꞌiꞌij che: “¿China kojoyom e la re taqanel y re aj qꞌatal tzij paqawi riꞌoj?
ACT 7:28 ¿Kaꞌaj kami la riꞌ kinkamisaj la riꞌin jelaꞌ pachaꞌ xꞌan la iwir echiriꞌ xkamisaj la ri aj Egipto?” xchaꞌ.
ACT 7:29 »Echiriꞌ xuta waꞌ wa chꞌaꞌtem, ri Moisés asu xanimaj bꞌi, xeꞌjeqela pa ri luwar re Madián, tobꞌ rire na aj ta chilaꞌ. Yey chilaꞌ xebꞌalax kaꞌibꞌ ukꞌajol.
ACT 7:30 »Ikꞌowinaq chi kꞌu cuarenta junabꞌ kꞌo chilaꞌ echiriꞌ xwinaqir jun ángel chwach chupa rurepebꞌal aqꞌ kꞌo che jumokaj xulukej pa ri luwar katzꞌintzꞌotik, chunaqaj ri juyubꞌ Sinaí.
ACT 7:31 Echiriꞌ xril waꞌ ri Moisés, lik xkam ranimaꞌ che ri katajin ukꞌutik chwach. Yey echiriꞌ xqibꞌ che rilik chi utz, xuta ruqul ri Dios, jewaꞌ xubꞌiꞌij che:
ACT 7:32 “In ri Dios ke ramam ojertan, waꞌ e ri Abraham, ri Isaac y ri Jacob” xchaꞌ. »Ekꞌu ri Moisés xujeq kabꞌirbꞌotik y ruma xiꞌin ibꞌ na xutzuꞌ ta chi ri jumokaj xulukej.
ACT 7:33 »Ekꞌu ri Dios xubꞌiꞌij che: “Chajolo raxajabꞌ che rawaqan ma wa luwar pa at kꞌo wi lik santo.
ACT 7:34 Paqatzij wi riꞌin wilom lik eyaꞌtal pa kꞌaxkꞌobꞌik ri nutinamit e kꞌo Egipto, yey nutom lik ketunanik. E uwariꞌche in petinaq re kebꞌeꞌnuwesaj loq. Ekꞌu woꞌora chatpetoq; ma katintaq bꞌi Egipto” xchaꞌ.
ACT 7:35 »Ekꞌu Moisés riꞌ waꞌ, ri xkꞌaq bꞌi uqꞌij echiriꞌ xbꞌiꞌx che: “¿China kojoyom e la re taqanel y re aj qꞌatal tzij paqawi riꞌoj?” Na rukꞌ ta kꞌu riꞌ, e ri Moisés ri xtaq bꞌi ruma ri Dios re kuꞌana kitaqanel rutinamit y re kebꞌeresaj ri tinamit pakiqꞌabꞌ raj Egipto. Xtaq kꞌu che kuꞌan waꞌ ruma ri ángel, ri xwinaqir chwach pa ri jumokaj xulukej.
ACT 7:36 E Moisés riꞌ waꞌ, ri xebꞌeresaj lo rutinamit ri Dios Egipto y lik xuꞌan milagros y taq kꞌutubꞌal re ruchuqꞌabꞌ ri Dios pa ri tinamit Egipto, chupa ri Mar Rojo y chupa ri cuarenta junabꞌ xebꞌin pa ri luwar katzꞌintzꞌotik.
ACT 7:37 »Ekꞌu Moisés riꞌ waꞌ, ri xbꞌiꞌn chike raj Israel: E ri Dios Qajawxel kuyak na lo chikixoꞌl ri qatinamit Israel jun Qꞌalajisanel jelaꞌ pachaꞌ riꞌin. Ekꞌu chita janipa ri kubꞌiꞌij Rire chiwe xchaꞌ.
ACT 7:38 »E Moisés riꞌ waꞌ, ri xkꞌojiꞌ chikiwach ri tinamit echiriꞌ kimolom kibꞌ pa ri luwar katzꞌintzꞌotik, y e xesan uchiꞌ ri ángel chikiwa ri qatiꞌ-qamam echiriꞌ xchꞌaꞌt rukꞌ chwi ri juyubꞌ Sinaí. Yey e rire ri xkꞌuluw taq ri chꞌaꞌtem re kꞌaslemal chaꞌ kuqꞌatisaj lo chiqawach riꞌoj.
ACT 7:39 »Pero ri qatiꞌ-qamam na xkaj taj kakikoj utzij; ri xkiꞌano e xkikꞌaq bꞌi uqꞌij y e xchꞌaw kikꞌuꞌx che ri ketzelej tanchi Egipto.
ACT 7:40 Yey xkibꞌiꞌij ne che ri Aarón: “Cheꞌana la qatiox chaꞌ kenabꞌej bꞌi chiqawach; ma wa Moisés, ri xesan lo qeꞌoj chwach rulew re Egipto, na qetaꞌam taj saꞌ ri xukꞌulumaj.”
ACT 7:41 Ekꞌuchiriꞌ, xkiꞌan jun tiox ukꞌaxwach toro. Xekikamisaj kꞌu awaj re kiqasaꞌn chwach wa tiox y xkiꞌan nimaqꞌij chupa rubꞌiꞌ ri tiox, ri xa xkiꞌan rukꞌ ri kiqꞌabꞌ.
ACT 7:42 »Ekꞌu ri Dios xebꞌuya kan che uloqꞌnimaxik kiqꞌij ronoje ri kꞌo che ruwa kaj. Xkiꞌan kꞌut jelaꞌ pachaꞌ ri ubꞌiꞌim ri Dios chupa ri tzꞌibꞌital kan kuma ri qꞌalajisanelabꞌ: Riꞌix ix aj Israel, echiriꞌ xebꞌikamisaj chikop re qasaꞌn chupa ri cuarenta junabꞌ xixbꞌin pa ri luwar katzꞌintzꞌotik, ¿xiloqꞌnimaj nebꞌa nuqꞌij riꞌin rukꞌ waꞌ?
ACT 7:43 Na xiꞌan taj, ma e ne xitelej ri rocho ri tiox Moloc ubꞌiꞌ y ri chꞌumil re ri tiox iweꞌix, Renfán ubꞌiꞌ. Waꞌ e kikꞌaxwach taq ri tiox xebꞌiꞌano re kiloqꞌnimaj kiqꞌij. Ruma kꞌu laꞌ kixintaq bꞌi kꞌa chwach pana ri tinamit Babilonia kachaꞌ.
ACT 7:44 »Echiriꞌ ri qatiꞌ-qamam xebꞌin pa ri luwar katzꞌintzꞌotik, kꞌo kukꞌ rike ri jun Rocho Dios xa kakirik, waꞌ e kꞌutubꞌal re kꞌo ri Dios kukꞌ. Yey rike xkiꞌan wa jun Rocho Dios jelaꞌ pachaꞌ ri xtaqan ri Dios che ri Moisés, e lik pachaꞌ ruꞌanikil rilom chi rire.
ACT 7:45 Ekꞌu ri qatiꞌ-qamam xkiya kan wa Rocho Dios (ri xa kakirik) pakiqꞌabꞌ ri kalkꞌoꞌal rike. Y wa kalkꞌoꞌal xkikꞌam bꞌi waꞌ echiriꞌ xebꞌok rukꞌ ri Josué chupa ri ulew ke ri na e ta aj Israel, ri xebꞌesax bꞌi ruma ri Dios chaꞌ waꞌ wuꞌlew kakanaj kan pakiqꞌabꞌ rutinamit Rire. Ekꞌu waꞌ wa Rocho Dios xkꞌojiꞌ kukꞌ rutinamit ri Dios kꞌa chupa taq ri qꞌij re ri rey David.
ACT 7:46 »Ekꞌu ri David lik kꞌo rutoꞌbꞌal ri Dios rukꞌ. Rire xutzꞌonoj kꞌut kayaꞌtaj che kuyak jun kꞌakꞌ Rocho ri Dios chaꞌ taq ri ralkꞌoꞌal kan ri Jacob kakiloqꞌnimaj uqꞌij ri Dios chiriꞌ.
ACT 7:47 Noꞌj e ri Salomón ri xyakaw waꞌ wa Rocho Dios;
ACT 7:48 tobꞌ ri Dios Qajawxel na xew ta kajeqiꞌ pa taq ja ꞌanatal xa kuma tikawex, pachaꞌ ri kubꞌiꞌij ri jun qꞌalajisanel:
ACT 7:49 “Ruwa kaj e nutzꞌulibꞌal re taqanik, yey ruwachulew e utakꞌalibꞌal ri waqan. ¿Saꞌ kꞌu riꞌ ri ja kiyak chwe?” kacha ri Qajawal. “¿O pachawi kꞌowi ri luwar pa kinuxlan wi?
ACT 7:50 ¿Na e ta nebꞌa ri nuqꞌabꞌ ꞌanayom ronoje waꞌ wa kꞌolik?” kachaꞌ.
ACT 7:51 »Ekꞌu ralaq lik na jinta kꞌo kata alaq. Ri kꞌuꞌx alaq y ri tanibꞌal alaq e pachaꞌ ke ri winaq na jinta ri Dios kukꞌ, ma na kaꞌaj ta alaq kakoj alaq utzij. Ralaq alaq pachaꞌ ri chuꞌqaw alaq ojertan, ma lik na kaꞌaj ta alaq kata alaq ri kubꞌiꞌij ri Santowilaj Ruxlabꞌixel ri Dios che alaq.
ACT 7:52 ¿China junoq chike ri qꞌalajisanelabꞌ na xternabꞌex ta rukꞌ kꞌax kuma ri chuꞌqaw alaq ojertan? Ma rike e xekamisan ke ri xetzijon lo puwi rukꞌutunik ri Jun lik jusukꞌ. Yey echiriꞌ xkꞌun Rire, ralaq xkꞌayij alaq y xkamisaj alaq.
ACT 7:53 Ralaq xkꞌul alaq Rutzij Upixabꞌ ri Dios kuma taq ri ángeles, noꞌj na xtaqej ta alaq janipa ri kubꞌiꞌij wa Tzij Pixabꞌ» xcha ri Esteban.
ACT 7:54 Echiriꞌ xkita ri xubꞌiꞌij ri Esteban, lik xpe koyowal y xkijeq kaqichꞌichꞌ ruwi keꞌ chirij rire.
ACT 7:55 Pero ri Esteban lik kꞌo ruchuqꞌabꞌ ri Santowilaj Ruxlabꞌixel ri Dios rukꞌ; xtzuꞌn kꞌu pana chikaj y xril runimal uchomalil ri Dios yey xrilo ri Jesús kꞌo puwikiqꞌabꞌ ri Dios.
ACT 7:56 Xubꞌiꞌij kꞌu rire: «¡Riꞌin kanwilo jaqal ruwa kaj y kanwil pana Ralaxel Chikixoꞌl Tikawex kꞌo puwikiqꞌabꞌ ri Dios!» xchaꞌ.
ACT 7:57 Ekꞌuchiriꞌ, ri winaq xkijeqo lik kesikꞌinik, xkitzꞌapij ri kixikin y xa jumul xebꞌek konoje chirij ri Esteban.
ACT 7:58 Xkesaj kꞌu bꞌi chupa ri tinamit y xkijeqo kakiꞌan paꞌbꞌaj. Y ri xkimol kibꞌ chirij, xkiya kan ri kiqꞌuꞌ che jun ala Saulo rubꞌiꞌ chaꞌ kuchajij waꞌ chike.
ACT 7:59 Ekꞌuchiriꞌ ketajin che uꞌanik paꞌbꞌaj ri Esteban, rire xuchꞌaꞌbꞌej ri Qanimajawal, jewaꞌ xubꞌiꞌij: «Wajawal Jesús, kꞌama la ri wanimaꞌ» xchaꞌ.
ACT 7:60 Tekꞌuchiriꞌ, xuxukubꞌaꞌ ribꞌ y ko xsikꞌinik: «Qajawal, kuyu la kimak che wa ketajin che uꞌanik» xchaꞌ. Y rukꞌ waꞌ, xkamik.
ACT 8:1 Ri Saulo e jun chike ri xuya uchꞌaꞌtem chaꞌ kakamisax ri Esteban. Chupa kꞌu riꞌ laꞌ la jun qꞌij, lik xjeqer kiternabꞌexik rukꞌ kꞌax janipa ri kikojom rubꞌiꞌ ri Cristo chilaꞌ Jerusalem. Ruma kꞌu riꞌ, konoje xekich bꞌi chupa taq ri luwar re Judea y re Samaria. Xew chi rutaqoꞌn ri Jesús xekanaj kan Jerusalem.
ACT 8:2 E kꞌo kꞌu jujun achijabꞌ lik kiyaꞌom kibꞌ puqꞌabꞌ ri Dios; rike xkimuq ri Esteban y lik xkoqꞌej rukamik.
ACT 8:3 Noꞌj ri Saulo ebꞌuternabꞌem rukꞌ kꞌax ri kikojom rubꞌiꞌ ri Cristo. Xok kꞌu chiꞌ taq ja re kebꞌuꞌcharej lo rachijabꞌ y rixoqibꞌ yey kebꞌuꞌyaꞌa pa cárcel.
ACT 8:4 E taq kꞌu ri ekichom bꞌi kakitzijoj ri Utzilaj Tzij chupa ronoje luwar pa kebꞌopon wi.
ACT 8:5 Ri Felipe e jun chike. Rire xopon chupa jun tinamit re Samaria y xujeq katzijon puwi ri Cristo chikiwach ri winaq.
ACT 8:6 Waꞌ wa winaq xa jun kiꞌanom che utayik janipa ri kukꞌut ri Felipe, yey kakitzutzaꞌ taq ri kꞌutubꞌal re ruchuqꞌabꞌ ri Dios kuꞌan chikiwach.
ACT 8:7 Ma lik e kꞌi ri e kꞌo pakiqꞌabꞌ itzelilaj uxlabꞌixel, yey waꞌ wa itzelilaj uxlabꞌixel kesikꞌinik kebꞌel bꞌi chike ri winaq. Y e kꞌo ukꞌiyal jetzꞌ y sik xekunutajik.
ACT 8:8 Ruma kꞌu riꞌ waꞌ, taq ri winaq re ri tinamit lik kekiꞌkotik.
ACT 8:9 Kꞌo kꞌu jun achi aj chiriꞌ Simón rubꞌiꞌ. E ri petinaq loq rire aj qꞌij chupa la tinamit; lik kebꞌusok ri winaq e aj Samaria ma kuꞌan che ribꞌ pachaꞌ lik kꞌo uwach.
ACT 8:10 Konoje kꞌu ri winaq chinimaꞌq chichꞌutiꞌq, lik kakita ri kubꞌiꞌij ri Simón y jewaꞌ kakibꞌiꞌij: «E unimal uchuqꞌabꞌ ri Dios ri kꞌo rukꞌ waꞌchi» kechaꞌ.
ACT 8:11 Lik kakikoj ri kubꞌiꞌij, ma lik xex wi ebꞌusokom rukꞌ ri qꞌijonik kuꞌano.
ACT 8:12 Pero echiriꞌ xkita ri Utzilaj Tzij kutzijoj ri Felipe chwi rutaqanik ri Dios y chwi ri Qanimajawal Jesucristo, xkikojo y jekꞌuriꞌlaꞌ achijabꞌ yey ixoqibꞌ xkikꞌul ri bautismo.
ACT 8:13 Ekꞌu riꞌ waꞌchi Simón xukoj rubꞌiꞌ ri Cristo y xukꞌul ne ri bautismo. Xujeq kꞌu riꞌ karachbꞌilaj ri Felipe y lik kakam ranimaꞌ che taq ri kꞌutubꞌal re ruchuqꞌabꞌ ri Dios karilo kuꞌan ri Felipe.
ACT 8:14 Yey ri e taqoꞌn re ri Cristo e kꞌo Jerusalem, echiriꞌ xkito ri e aj Samaria xkikoj ri ubꞌiꞌim lo ri Dios puwi ri Cristo, xekitaq bꞌi ri Pedro y ri Juan chilaꞌ Samaria.
ACT 8:15 Ekꞌuchiriꞌ rike xebꞌoponik, xkijeq kakiꞌan orar pakiwi ri aj Samaria ri kikojom chi rubꞌiꞌ ri Cristo chaꞌ rike kakikꞌul ri Santowilaj Ruxlabꞌixel ri Dios.
ACT 8:16 Ma ri Ruxlabꞌixel ri Dios kꞌamajaꞌ kaqaj puwi junoq chike, xew kikꞌulum ri bautismo pa rubꞌiꞌ ri Qanimajawal Jesucristo.
ACT 8:17 Yey echiriꞌ ri Pedro y ri Juan xkiya ri kiqꞌabꞌ pakiwiꞌ, xkikꞌul ri Santowilaj Ruxlabꞌixel ri Dios.
ACT 8:18 Ekꞌu ri Simón xrilo suꞌanik ri tikawex kakikꞌul ri Ruxlabꞌixel ri Dios echiriꞌ ri taqoꞌn kakiya ri kiqꞌabꞌ pakiwiꞌ. Xubꞌiꞌtisij kꞌu puaq chike,
ACT 8:19 jewaꞌ xubꞌiꞌij: —Yaꞌa alaq chwe riꞌin laꞌ la jun chuqꞌabꞌ, chaꞌ jelaꞌ xa tobꞌ china puwiꞌ kanya wi ri nuqꞌabꞌ, kukꞌul ri Santowilaj Ruxlabꞌixel ri Dios —xchaꞌ.
ACT 8:20 Ekꞌuchiriꞌ, ri Pedro jewaꞌ xubꞌiꞌij che: —Sach na uwach rapuaq junam awukꞌ riꞌat, ma e chawach riꞌat, xa rukꞌ puaq kaloqꞌ rusipanik ri Dios.
ACT 8:21 Yey riꞌat na jinta kꞌana awe che wa chak kaqaꞌano ma rawanimaꞌ na jusukꞌ ta chwach ri Dios.
ACT 8:22 E uwariꞌche, chatzelej atzij chwach ri Dios che waꞌ wa amak y chatzꞌonoj che Rire kukuy amak. Laj kukuy amak che la na utz taj xachꞌobꞌo.
ACT 8:23 Ma e kanwil riꞌin, lik uꞌanom kꞌax akꞌuꞌx chiqij y lik at yutum ruma ri mak —xcha ri Pedro che.
ACT 8:24 Ri Simón xukꞌul uwach: —Lik chꞌaw ko alaq panuwiꞌ chwach ri Qanimajawal chaꞌ na kankꞌulumaj ta kꞌana wa xbꞌiꞌij alaq chwe —xchaꞌ.
ACT 8:25 Ekꞌuchiriꞌ ri Pedro y ri Juan kitzijom chi taq ri xkilo y xkita che ri Jesús y kiqꞌalajisam chi ri Utzilaj Tzij re ri Qanimajawal, xetzelej Jerusalem. Yey xaloqꞌ kꞌu xebꞌikꞌow chupa taq ukꞌiyal aldeas ke raj Samaria, xkitzijoj ri Utzilaj Tzij.
ACT 8:26 Kꞌo jun ángel re ri Qanimajawal xchꞌaꞌt rukꞌ ri Felipe, jewaꞌ xubꞌiꞌij che: «Chayijbꞌaꞌ awibꞌ y jat jewaꞌ pa sur. Chamaja bꞌi ri bꞌe kel Jerusalem, ri kaqaj pa ri tinamit Gaza» xchaꞌ. (Wa bꞌe kikꞌow pa taq luwar katzꞌintzꞌotik.)
ACT 8:27 Xyaktaj kꞌu ri Felipe y xumaj bꞌi ubꞌe yey pa ri bꞌe xuꞌriqa bꞌi jun achi “eunuco”. Waꞌ waꞌchi lik kꞌo uwach ma puqꞌabꞌ rire kꞌo wi ronoje rubꞌeyomal ri Candace. Ekꞌu waꞌchi xopon Jerusalem chaꞌ kuloqꞌnimaj uqꞌij ri Dios,
ACT 8:28 yey e riꞌ katzelej pa rutinamit. Tzꞌul kꞌu chupa jun kareta y karajilaj Ruchꞌaꞌtem ri Dios tzꞌibꞌital kan ruma ri qꞌalajisanel Isaías.
ACT 8:29 Ekꞌu ri Ruxlabꞌixel ri Dios xubꞌiꞌij che ri Felipe: «Chatqibꞌ pana che la jun kareta y chatbꞌin putzal» xchaꞌ.
ACT 8:30 Echiriꞌ ri Felipe xqibꞌ apanoq, xuto rachi e karajilaj ri tzꞌibꞌam kan ruma ri qꞌalajisanel Isaías y jekꞌuwaꞌ xutzꞌonoj che: —¿Kamaj la usukꞌ la katajin la che rajilaxik? —xcha che.
ACT 8:31 Rachi xukꞌul uwach: —¿Suꞌanik kanmaj usukꞌ we na jinta junoq kaqꞌalajisan chwe? —xcha che. Y xelaj kꞌu che ri Felipe chaꞌ kaqꞌan pa ri kareta y katzꞌuyiꞌ rukꞌ.
ACT 8:32 Ekꞌu ri karajilaj che Ruchꞌaꞌtem ri Dios e waꞌ: Xkꞌam bꞌi e pachaꞌ juna bꞌexex re kakamisaxik; e pachaꞌ juna qꞌapoj bꞌexex na kachꞌaw ta kꞌenoq echiriꞌ kasokax ri rismal; jekꞌuriꞌlaꞌ rire na jinta kꞌana xubꞌiꞌij.
ACT 8:33 Xꞌaniꞌ che pachaꞌ lik na jinta uwach; y echiriꞌ xqꞌat tzij puwiꞌ, xꞌan ri lik na e ta usukꞌ che. ¿China taq kꞌu ri tikawex kakipetebꞌej lo che rire? Na e jintaj, ma xqꞌat uqꞌij che ruwachulew. E waꞌ ri katajin che rajilaxik.
ACT 8:34 Ekꞌu waꞌchi aj Etiopía xutzꞌonoj che ri Felipe: —Maꞌan ko la riꞌ bꞌiꞌij la chwe, ¿china puwi kachꞌaꞌt wi ri qꞌalajisanel echiriꞌ kubꞌiꞌij waꞌ? ¿Chiribꞌil ribꞌ nawi kubꞌiꞌij wi o kachꞌaꞌt puwi junoq chik? —xchaꞌ.
ACT 8:35 Ekꞌu ri Felipe xchꞌaꞌt rukꞌ rachi puwi waꞌ. Xujeq lo rukꞌ ri katajin che rajilaxik che Ruchꞌaꞌtem ri Dios y xutzijoj kꞌu che puwi ri Utzilaj Tzij re ri Jesús.
ACT 8:36 E kꞌo chi bꞌe echiriꞌ xebꞌopon pa jun luwar pa kꞌo wi yaꞌ. Ekꞌu riꞌ rachi aj Etiopía xubꞌiꞌij che ri Felipe: —Wara kꞌo yaꞌ. ¿Utz nawi riꞌin kankꞌul ri bautismo? —xcha che.
ACT 8:37 Ri Felipe xubꞌiꞌij che: —We kakoj la rubꞌiꞌ ri Qanimajawal Jesucristo rukꞌ ronoje animaꞌ la, lik utz riꞌ —xcha che. Rachi xukꞌul uwach: —Riꞌin kankojo ri Qanimajawal Jesucristo e Rukꞌajol ri Dios —xchaꞌ.
ACT 8:38 Y xutaq kꞌu utakꞌabꞌaxik riꞌ ri kareta. Ekꞌu ri Felipe junam rukꞌ rachi xeqaj chupa ri yaꞌ. Tekꞌuchiriꞌ, ri Felipe xuya ri bautismo che.
ACT 8:39 Echiriꞌ xebꞌel lo chupa ri yaꞌ, xaqikꞌateꞌt ri Ruxlabꞌixel ri Dios Qajawxel xukꞌam bꞌi ri Felipe. Rachi aj Etiopía na xril ta chi uwach, pero lik kakiꞌkotik xumaj tanchi ubꞌi rubꞌe.
ACT 8:40 Ekꞌu ri Felipe xeꞌyoꞌq chupa jun tinamit Azoto rubꞌiꞌ. Echiriꞌ xel bꞌi chiriꞌ, xikꞌow pa taq tinamit yey chujujunal tinamit pa xikꞌow wi, xutzijoj ri Utzilaj Tzij. Ekꞌu riꞌ xopon kꞌa chupa ri tinamit Cesarea.
ACT 9:1 Ekꞌu ri Saulo na karoqꞌotaj taj kuxibꞌij kipa rukꞌ kamik janipa ri kikojom rubꞌiꞌ ri Qanimajawal. Xeꞌek kꞌu rukꞌ ri kajawal raj chakunel pa Rocho Dios
ACT 9:2 y xutzꞌonoj bꞌi uwujil chaꞌ kayaꞌiꞌ puqꞌabꞌ kok pa taq ri sinagogas re ri tinamit Damasco. Jekꞌulaꞌ, we keburiq achijabꞌ o ixoqibꞌ e kukꞌil ri kitaqem wa kꞌakꞌ Bꞌe, kꞌo kꞌu puqꞌabꞌ riꞌ kebꞌuyut loq y kebꞌukꞌam lo Jerusalem.
ACT 9:3 Ekꞌu ri Saulo e riꞌ kꞌo pan chi bꞌe che uꞌanik waꞌ, katajin kꞌu roponik chunaqaj ri tinamit Damasco, echiriꞌ xaqikꞌateꞌt ruwonibꞌal jun aqꞌ xpe chilaꞌ chikaj, xwol kaꞌn puwiꞌ y xusut rij.
ACT 9:4 Ri Saulo xtzaq pulew y xuta kꞌu jun qulaj, jewaꞌ kubꞌiꞌij che: —Saulo, Saulo, ¿suꞌchak katchꞌoꞌjin chwij? —xcha che.
ACT 9:5 Ri Saulo xutzꞌonoj che: —¿Lal china rilal, Wajawal? —xchaꞌ. Jekꞌuwaꞌ xkꞌul uwach che: —Riꞌin in Jesús, ri Jun katchꞌoꞌjin chirij. Yey riꞌat, atukel nenareꞌ lik kaꞌan kꞌax che awibꞌ, jelaꞌ pachaꞌ juna bꞌoyex echiriꞌ kuya aqan che ri puya kachꞌik lo che —xuchixik.
ACT 9:6 Kabꞌirbꞌot kꞌu ri Saulo y uxiꞌim ribꞌ, jewaꞌ xubꞌiꞌij che: —Wajawal, ¿saꞌ ri kaꞌaj la kanꞌano? —xchaꞌ. Ri Qanimajawal xukꞌul uwach: —Chatyaktajoq y jat chupa ri tinamit, ma chiriꞌ kabꞌiꞌx wi chawe saꞌ ri chirajawaxik kaꞌano —xchaꞌ.
ACT 9:7 Ekꞌu rachijabꞌ e rachbꞌiꞌil ri Saulo lik kixiꞌim kibꞌ xetakꞌiꞌik; ma xkita ri qulaj, noꞌj na jinta junoq xkil uwach.
ACT 9:8 Ri Saulo xyaktaj chwa rulew y xujaq kꞌu ruwach, pero na jinta chi kꞌo karilo ma xkanaj kan potzꞌ. Ewi xa xchꞌelex bꞌi che ruqꞌabꞌ kuma ri erachbꞌilam y xkꞌam bꞌi chupa ri tinamit Damasco.
ACT 9:9 Xkꞌojiꞌ kꞌu chilaꞌ oxibꞌ qꞌij; e laꞌ na katzuꞌn taj, na xwaꞌ taj y na jinta ne umiqꞌinaꞌ xutijo.
ACT 9:10 Chilaꞌ kꞌu riꞌ Damasco kꞌo jun achi Ananías rubꞌiꞌ; rire ukojom rubꞌiꞌ ri Cristo. Kꞌo kꞌu jun kꞌutubꞌal re ri Dios xqꞌalajisax chwach. Ri xrilo e ri Qanimajawal xukꞌut uwach chwach y jewaꞌ xubꞌiꞌij che: —¡Ananías! —xcha che. Rire xukꞌul uwach: —Riꞌ in kꞌolik, Wajawal —xchaꞌ.
ACT 9:11 Xubꞌiꞌij kꞌu ri Qanimajawal che: —Chatyaktajoq y jat chupa ri bꞌe kabꞌiꞌx “Jusukꞌ” che. Yey chirocho kꞌu ri Judas, chatzꞌonobꞌej puwi jun achi aj Tarso, Saulo rubꞌiꞌ. Rire katajin pa oración
ACT 9:12 y qꞌalajisam chi kꞌu jun kꞌutubꞌal re ri Dios chwach. Chupa waꞌ xril jun achi Ananías rubꞌiꞌ, e riꞌ kok bꞌi y kuya ruqꞌabꞌ puwiꞌ chaꞌ jelaꞌ katzuꞌn tanchik —xchaꞌ.
ACT 9:13 Xubꞌiꞌij kꞌu ri Ananías che ri Qanimajawal: —Wajawal, lik nutom ronoje ri na utz taj uꞌanom waꞌ waꞌchi chike ri kikojom ri bꞌiꞌ la chilaꞌ Jerusalem.
ACT 9:14 Yey yaꞌtal ne lo puqꞌabꞌ kuma ri nimaq e aj chakunel pa Rocho Dios kebꞌukꞌam bꞌi pa cárcel konoje ri kikojom ri bꞌiꞌ la —xchaꞌ.
ACT 9:15 Ekꞌu ri Qanimajawal xubꞌiꞌij che: —Jat chilaꞌ rukꞌ, ma Riꞌin nuchaꞌom rire chaꞌ kuꞌana jun waj chak re keꞌek che uqꞌalajisaxik ri nubꞌiꞌ chikiwach ri winaq na e ta aj judiꞌabꞌ, chikiwach ri e taqanelabꞌ y chikiwach ri e aj Israel.
ACT 9:16 Yey kankꞌut kꞌu che, janipa ri kꞌaxkꞌolil chirajawaxik kikꞌow wi rire ruma kutzijoj ri nubꞌiꞌ —xuchix ri Ananías.
ACT 9:17 Ri Ananías xeꞌek kꞌut y xok pa ri ja pa kꞌo wi ri Saulo. Xuya kꞌu ruqꞌabꞌ puwiꞌ y xubꞌiꞌij che: «Hermano Saulo, ri Qanimajawal Jesucristo, ri xuqꞌalajisaj ribꞌ chawach chupa ri bꞌe pa at petinaq wi, inutaqom lo awukꞌ chaꞌ kat-tzuꞌn tanchik y kakꞌul kꞌu ri Santowilaj Ruxlabꞌixel ri Dios» xcha che.
ACT 9:18 Chupa kꞌu laꞌ la joqꞌotaj, kꞌo ri pachaꞌ soloꞌt xtzaq che ruwach ri Saulo y xtzuꞌn tanchik. Tekꞌuchiriꞌ, xyaktajik y xukꞌul ri bautismo.
ACT 9:19 Ekꞌuchiriꞌ xwaꞌ ri Saulo, xkꞌojiꞌ tanchi uchuqꞌabꞌ y xkꞌojiꞌ jujun qꞌij kukꞌ ri kikojom rubꞌiꞌ ri Cristo chilaꞌ pa ri tinamit Damasco.
ACT 9:20 Tekꞌuchiriꞌ, ri Saulo xujeq katzijon puwi ri Cristo chupa taq ri sinagogas, jewaꞌ ri kubꞌiꞌij: «Ri Jesús e Ukꞌajol ri Dios» kachaꞌ.
ACT 9:21 Konoje ri ketaw re lik kakam kanimaꞌ che y kakibꞌiꞌij: «¿Na e ta nebꞌa achi waꞌ ebꞌuternabꞌem rukꞌ kꞌax ri kikojom rubꞌiꞌ ri Cristo chilaꞌ Jerusalem; yey kꞌuninaq ne wara re kebꞌuyut bꞌi y kebꞌuꞌyaꞌa pakiqꞌabꞌ ri nimaq e aj chakunel pa Rocho Dios?» kechaꞌ.
ACT 9:22 Pero ri Saulo jalan katajin unimarik ruchuqꞌabꞌ puwi ri kutzijoj. Ekꞌu raj judiꞌabꞌ ejeqel chiriꞌ Damasco xsach kinaꞌoj che ma ri Saulo kuqꞌalajisaj chikiwach: Ri Jesús e ri Cristo, Ruchaꞌoꞌn lo ri Dios.
ACT 9:23 Ikꞌowinaq chi kꞌu ukꞌiyal qꞌij, raj judiꞌabꞌ xkiꞌan tzij junam chikiwach re kakikamisaj ri Saulo.
ACT 9:24 Pero waꞌ xretaꞌmaj ri Saulo. Ekꞌo kꞌu ri kichajim chipaqꞌij chichaqꞌabꞌ taq ri okibꞌal re ri tinamit chaꞌ kakichap ri Saulo y kakikamisaj.
ACT 9:25 Ruma kꞌu riꞌ, ri kikojom rubꞌiꞌ ri Cristo e laꞌ chaqꞌabꞌ xkiqasaj bꞌi ri Saulo chwi ri tapia chupa jun nimalaj chakach.
ACT 9:26 Echiriꞌ xopon ri Saulo Jerusalem, lik xraj kaqibꞌ kukꞌ ri kikojom rubꞌiꞌ ri Cristo. Pero konoje rike lik kakixiꞌij kibꞌ che, ma na kakikoj taj we paqatzij wi ri Saulo ukojom chi rubꞌiꞌ ri Cristo.
ACT 9:27 Ekꞌu ri Bernabé xukꞌam bꞌi y xuꞌyaꞌa chikiwach ri e taqoꞌn re ri Cristo. Xutzijoj kꞌu chike suꞌanik ri Saulo xril uwach ri Qanimajawal pa bꞌe y xchꞌaꞌt rukꞌ. Yey xutzijoj chike puwi ri tzijonik xuꞌan ri Saulo chupa rubꞌiꞌ ri Jesús chilaꞌ Damasco yey rukꞌ unimal uchuqꞌabꞌ xuꞌan waꞌ.
ACT 9:28 Ekꞌu ri Saulo xkanaj kukꞌ chiriꞌ Jerusalem y xerachbꞌilaj pa taq kebꞌek wi.
ACT 9:29 Lik na kuxiꞌij ta ribꞌ katzijon chupa rubꞌiꞌ ri Qanimajawal. Kachꞌaꞌt kꞌu puwi ri Jesús kukꞌ raj judiꞌabꞌ ri kechꞌaꞌt pa ri chꞌaꞌtem griego; ruma kꞌu laꞌ, rike kakitzukuj suꞌanik kakikamisaj.
ACT 9:30 Echiriꞌ ri hermanos xketaꞌmaj waꞌ, xkikꞌam bꞌi ri Saulo kꞌa Cesarea y chiriꞌ kꞌut xkitaq bꞌi chupa ri tinamit Tarso.
ACT 9:31 E taq kꞌu ri kikojom rubꞌiꞌ ri Cristo pa ronoje ri luwar re Judea, re Galilea y re Samaria, xekubꞌiꞌ chi utz ma na jinta chi ri keternabꞌex rukꞌ kꞌax. Rike kꞌo xiꞌin ibꞌ kukꞌ chwach ri Qanimajawal. Katajin kꞌu kikꞌiyarik yey yaꞌom kichuqꞌabꞌ y nimarisam kikꞌuꞌx ruma ri Santowilaj Ruxlabꞌixel ri Dios.
ACT 9:32 Xaloqꞌ kꞌu ri Pedro katajin rikꞌowik pa taq riglesias, xopon kukꞌ ri kikojom rubꞌiꞌ ri Cristo pa ri tinamit Lida.
ACT 9:33 Chilaꞌ kꞌu riꞌ xuꞌriqa jun achi Eneas rubꞌiꞌ, yey e wajxaqibꞌ lo junabꞌ riꞌ kꞌo chwa uwarabꞌal ma xuꞌan sik.
ACT 9:34 Ekꞌu ri Pedro jewaꞌ xubꞌiꞌij che: «Eneas, ri Qanimajawal Jesucristo katukunaj. Chatyaktajoq y chayijbꞌaꞌ rawarabꞌal» xcha che. Chupa kꞌu laꞌ la joqꞌotaj ri Eneas xtakꞌiꞌik.
ACT 9:35 Konoje kꞌu ri ejeqel chupa ri tinamit Lida y pa taq ri luwar re Sarón xkilo ri Eneas kunutajinaq chik; y ruma kꞌu waꞌ, xkiya kibꞌ puqꞌabꞌ ri Qanimajawal.
ACT 9:36 Chupa ri tinamit Jope kꞌo jun ixoq ukojom rubꞌiꞌ ri Cristo, Tabita rubꞌiꞌ. (Pa ri chꞌaꞌtem griego “Dorcas” kecha che.) Waꞌ wiꞌxoq lik uyaꞌom ribꞌ che uꞌanik ri utz y lik kebꞌutoꞌ ri nibꞌaꞌibꞌ.
ACT 9:37 Chupa taq laꞌ la qꞌij ri Dorcas xuchap yabꞌil y xkamik. Ekꞌuchiriꞌ xchꞌaj rucuerpo, xqꞌatisax chikaj pa ri kaleꞌ ja.
ACT 9:38 Ekꞌu ri hermanos e kꞌo Lida xkito kꞌo ri Pedro pa ri tinamit Jope, yey waꞌ xa naqaj kꞌo wuloq. Xekitaq kꞌu bꞌi kaꞌibꞌ achijabꞌ chaꞌ kebꞌeꞌelaj che ri Pedro, jewaꞌ kakibꞌiꞌij: «ꞌAna ko la riꞌ, peta la wara qukꞌ yey mamayin la.»
ACT 9:39 Xyaktaj kꞌu bꞌi ri Pedro y xeꞌek kukꞌ. Echiriꞌ xoponik, xkꞌam bꞌi chikaj pa ri kaleꞌ ja. E taq ri e malkaꞌnibꞌ xkisut rij ri Pedro. Konoje waꞌ kebꞌoqꞌik y kakikꞌut taq ri kꞌul y ri kiqꞌuꞌ xuꞌan ri Dorcas echiriꞌ kꞌa kꞌo kukꞌ.
ACT 9:40 Ekꞌuchiriꞌ, ri Pedro xtaqan che konoje kebꞌel bꞌi. Xuxukubꞌaꞌ kꞌu ribꞌ y xuꞌan orar. Tekꞌuchiriꞌ, xutzuꞌ ri kaminaq, y jewaꞌ xubꞌiꞌij che: «¡Tabita, chatyaktajoq!» xchaꞌ. Ekꞌu riꞌ ri Dorcas xujaq ruwach; y echiriꞌ xrilo kꞌo ri Pedro chiriꞌ, asu xtzꞌuyiꞌik.
ACT 9:41 Ekꞌu ri Pedro xuchap ruqꞌabꞌ y xuyako. Tekꞌuchiriꞌ, xebꞌusikꞌij ri kikojom rubꞌiꞌ ri Cristo kukꞌ taq ri hermanas e malkaꞌnibꞌ, y xuya kꞌu chikiwach e laꞌ kꞌaslik.
ACT 9:42 Waꞌ xetaꞌmax chupa ronoje ri luwar re Jope. Ruma kꞌu riꞌ, lik e kꞌi ri xkikoj rubꞌiꞌ ri Qanimajawal Jesucristo.
ACT 9:43 Y ri Pedro xkanaj kan ukꞌiyal qꞌij chupa ri tinamit Jope, chirocho jun achi Simón rubꞌiꞌ, ri kutꞌis tzꞌuꞌum.
ACT 10:1 Pa ri tinamit Cesarea kꞌo jun achi Cornelio rubꞌiꞌ. Rire e capitán ke ri soldados e kukꞌil ri kabꞌiꞌx chike “E aj Italia”.
ACT 10:2 Ri Cornelio lik jusukꞌ rubꞌinik usilabꞌik y lik kꞌo xiꞌin ibꞌ pa ranimaꞌ chwach ri Dios junam kukꞌ konoje ri ralkꞌoꞌal. Rire lik kuya puaq re toꞌbꞌal ke ri nibꞌaꞌibꞌ e aj judiꞌabꞌ y lik kuꞌan orar chwach ri Dios.
ACT 10:3 Kꞌo kꞌu jun qꞌij riꞌ, laj che ri urox ora bꞌenaq qꞌij xqꞌalajisax jun kꞌutubꞌal re ri Dios chwach. Ri xkꞌut che, e jun ángel re ri Dios e riꞌ xok chiriꞌ pa kꞌo wi rire y jewaꞌ xubꞌiꞌij che: —¡Cornelio! —xcha che.
ACT 10:4 Ri Cornelio lik xutzuꞌ ri ángel y rukꞌ xiꞌin ibꞌ xubꞌiꞌij che: —¿Saꞌ ri kaꞌaj la, wajawal? —xchaꞌ. Ri ángel xukꞌul uwach: —E taq ra oración y ri toꞌbꞌal ke ri nibꞌaꞌibꞌ aꞌanom riꞌat, waꞌ ukꞌulum ri Dios pachaꞌ jun qasaꞌn chwach Rire.
ACT 10:5 Ekꞌu ri kaꞌan woꞌora e chebꞌataqa bꞌi achijabꞌ pa ri tinamit Jope re keꞌkisikꞌij jun achi Simón rubꞌiꞌ, ri kabꞌiꞌx Pedro che.
ACT 10:6 Waꞌ waꞌchi jeqel chuchiꞌ ri mar pa rocho ri Simón, jun aj tꞌisol tzꞌuꞌum. Waꞌ wa Pedro kubꞌiꞌij chawe saꞌ ri lik chirajawaxik wi kaꞌano —xchaꞌ.
ACT 10:7 Echiriꞌ xel bꞌi ri ángel xchꞌaꞌt rukꞌ, ri Cornelio xebꞌusikꞌij kaꞌibꞌ raj chak y jun soldado lik kꞌo xiꞌin ibꞌ pa ranimaꞌ chwach ri Dios, waꞌ e jun chike ri e kꞌo puqꞌabꞌ.
ACT 10:8 Xutzijoj na kꞌu chike ronoje ri xrilo; tekꞌuchiriꞌ, xebꞌutaq bꞌi pa ri tinamit Jope.
ACT 10:9 Chukaꞌm qꞌij kꞌut echiriꞌ e kꞌo pan pa bꞌe e riꞌ katajin koponik chunaqaj ri tinamit, ri Pedro xaqꞌan chwi ri ja chaꞌ kuꞌana orar echiriꞌ ya katikꞌoj ri qꞌij.
ACT 10:10 Xpe kꞌu jun unimal numik che y lik xraj kawaꞌik. Katajin kꞌu uyijbꞌaxik ruwa echiriꞌ xaqikꞌateꞌt kꞌo xukꞌut ri Dios chwach.
ACT 10:11 Xril ruwa kaj jaqalik. Kꞌo kꞌu pachaꞌ jun nimalaj kꞌul karipipik y ximital lo che ri kajibꞌ utzaꞌm, e riꞌ kaqasax lo che ruwachulew.
ACT 10:12 Chupa waꞌ wa kꞌul e kꞌo ronoje kiwachlibꞌal awaj: waꞌ e ri kꞌo kajibꞌ kaqan, ri kecharar pulew yey ri kexikꞌikꞌ che ruwa kaj.
ACT 10:13 Yey xuta jun qulaj jewaꞌ xubꞌiꞌij: —Chatyaktajoq Pedro; chakamisaj y chatijaꞌ —xcha che.
ACT 10:14 Pero ri Pedro xubꞌiꞌij che: —Na kanꞌan ta kꞌana riꞌ, Wajawal, ma riꞌin na jinta kꞌana kꞌo nutijom e laꞌ chꞌul o na taqal taj katijik —xchaꞌ.
ACT 10:15 Xchꞌaw tanchi kꞌu ri jun qulaj, jewaꞌ xubꞌiꞌij che: —Ri ujosqꞌim chi ri Dios, riꞌat mabꞌiꞌij chꞌul che —xcha che ri Pedro.
ACT 10:16 Waꞌ oxlaj xuꞌano; tekꞌuchiriꞌ, ri nimalaj kꞌul xtzelej tanchi chilaꞌ chikaj.
ACT 10:17 Ekꞌu ri Pedro katajin che utzꞌonoxik chiribꞌil ribꞌ saꞌ keꞌelawi ri xkꞌut chwach, echiriꞌ xekꞌun rachijabꞌ etaqom lo ruma ri Cornelio. Rike kitzꞌonobꞌem lo ri rocho ri Simón ri kutꞌis tzꞌuꞌum, yey woꞌora e kꞌo chwa ri puerta.
ACT 10:18 Xechꞌaw kꞌu apanoq y xkitzꞌonoj we chiriꞌ jeqel wi ri Simón, ri kabꞌiꞌx Pedro che.
ACT 10:19 Ekꞌu ri Pedro kꞌa katajin ne che uchꞌobꞌik raqan puwi ri xkꞌut chwach, echiriꞌ ri Ruxlabꞌixel ri Dios xubꞌiꞌij che: «Chawilaꞌ, ma leꞌ oxibꞌ achijabꞌ katkitzukuj.
ACT 10:20 Chatyaktajoq, chatqajoq y jat kukꞌ. Muxiꞌij ribꞌ akꞌuꞌx kateꞌek kukꞌ, ma in ri intaqayom lo ke» xcha che.
ACT 10:21 Xqaj kꞌu lo ri Pedro pa e kꞌo wi rachijabꞌ etaqom lo ruma ri Cornelio, y xubꞌiꞌij chike: —Riꞌ in kꞌolik, in ri kintzukuj alaq. ¿Saꞌ ri petinaq wi alaq wukꞌ? —xcha chike.
ACT 10:22 Rike xkibꞌiꞌij che: —Kꞌo jun capitán aj Roma, Cornelio rubꞌiꞌ. Rire e jun achi lik jusukꞌ, kꞌo xiꞌin ibꞌ rukꞌ chwach ri Dios, yey chom ruchꞌaꞌtibꞌexik kaꞌan kuma konoje raj judiꞌabꞌ. Xbꞌiꞌx kꞌu che rire ruma jun santowilaj ángel re ri Dios, kutaq lo kꞌamik la re keꞌek la chirocho y jekꞌulaꞌ kuta ri kabꞌiꞌij la che —xechaꞌ.
ACT 10:23 Ekꞌu ri Pedro xebꞌukoj bꞌi pa ja y xuya luwar chike kekanaj kan la jun aqꞌabꞌ chiriꞌ. Chukaꞌm qꞌij kꞌut xeꞌek kukꞌ, yey xekachbꞌilaj bꞌi jujun hermanos e aj pa ri tinamit Jope.
ACT 10:24 Chukaꞌm qꞌij kꞌut xebꞌopon pa ri tinamit Cesarea pa eroyeꞌem wi ri Cornelio. Rire umolom chi kichiꞌ ri ratz-uchaqꞌ y ri ramigos ri kꞌax kakinaꞌ kibꞌ rukꞌ.
ACT 10:25 Echiriꞌ xopon ri Pedro, xel lo ri Cornelio che ukꞌulik y xuxukubꞌaꞌ ribꞌ chwach re kuloqꞌoj uqꞌij.
ACT 10:26 Pero ri Pedro xuyako y xubꞌiꞌij che: —Yaktaja la, ma riꞌin xa in jun achi pachaꞌ rilal —xchaꞌ.
ACT 10:27 Kachꞌaꞌt kꞌu rukꞌ ri Cornelio, xok bꞌi y xebꞌuꞌriqa ukꞌiyal tikawex kimolom kibꞌ chiriꞌ.
ACT 10:28 Xubꞌiꞌij kꞌu ri Pedro chike: —Lik etaꞌam ralaq, chiqaxoꞌl ri oj aj judiꞌabꞌ lik na ubꞌe taj we junoq chiqe kujunimaj ribꞌ o kaqibꞌ rukꞌ junoq na e ta kukꞌil raj judiꞌabꞌ. Noꞌj ri Dios xukꞌut chinuwach riꞌin na ubꞌe taj kanchꞌobꞌ raqan waꞌ.
ACT 10:29 E uwariꞌche, echiriꞌ xineꞌsikꞌixoq, na jampatana ximpetik y na jinta ne xintzꞌonoj we utz kanꞌan waꞌ. Ekꞌu woꞌora kantzꞌonoj che alaq, ¿suꞌchak xtaq alaq nukꞌamik? —xchaꞌ.
ACT 10:30 Ri Cornelio xukꞌul uwach: —E ukaj qꞌij waꞌ ikꞌowinaq je uꞌorayil waꞌ, riꞌin in kꞌo pa ayuno laj che ri urox ora bꞌenaq qꞌij, yey in kꞌo pa oración chiwocho echiriꞌ xwinaqir kꞌu chinuwach jun achi ukojom uqꞌuꞌ lik kawolqꞌinik
ACT 10:31 y jewaꞌ xubꞌiꞌij chwe: “Cornelio, ri Dios utom ra oración y kꞌo chukꞌuꞌx janipa ri toꞌbꞌal ke ri nibꞌaꞌibꞌ aꞌanom.
ACT 10:32 Chataqa junoq chupa ri tinamit Jope re kuꞌsikꞌij ri Simón ri kabꞌiꞌx Pedro che. Rire kꞌo pa rocho ri Simón, jun achi aj tꞌisol tzꞌuꞌum kꞌo rocho chuchiꞌ ri mar. Yey echiriꞌ kakꞌunik, e rire ri kachꞌaꞌt awukꞌ” xchaꞌ.
ACT 10:33 »Jekꞌuriꞌlaꞌ, xintaqalaꞌ kꞌamik la; y lik utz ri xꞌan la, ma xpe la. Ekꞌu woꞌora, qonoje oj kꞌo wara chwach ri Dios chaꞌ kaqata ronoje ri utaqom wi lo la chaꞌ kabꞌiꞌij la chiqe —xchaꞌ.
ACT 10:34 Ekꞌuchiriꞌ, xujeq kachꞌaꞌt ri Pedro, jewaꞌ xubꞌiꞌij: «Paqatzij wi woꞌora kanmaj usukꞌ ri Dios na kachaꞌw ta chikixoꞌl ri tikawex.
ACT 10:35 Ma ri kuꞌano e lik kukꞌul ukꞌuꞌx echiriꞌ ri tikawex pa taq ronoje tinamit kꞌo xiꞌin ibꞌ kukꞌ chwach Rire y kakiꞌan ri lik jusukꞌ.
ACT 10:36 Kꞌo kꞌu ri xuqꞌalajisaj ri Dios chike ri e aj Israel; waꞌ e ri Utzilaj Tzij, ri kukꞌam lo utzil chomal ruma ri Jesucristo ri Qajawal qonoje.
ACT 10:37 »Etaꞌam kꞌu ralaq saꞌ taq ri xuꞌan ri Jesús echiriꞌ ikꞌowinaq chi ri tzijonik re ri Juan chwi ri bautismo rukꞌ yaꞌ. Ri tzijonik puwi ri Jesús xujeq lo kꞌa Galilea y xeꞌek utzijoxik che ronoje ri luwar re Judea.
ACT 10:38 Xetaꞌmaj kꞌu ralaq saꞌ ri xuꞌan ri Dios; xuya che ri Jesús ri aj Nazaret lik kakꞌojiꞌ ri Santowilaj Ruxlabꞌixel y ruchuqꞌabꞌ Rire rukꞌ. Ekꞌu ri Jesús xeꞌek pa taq luwar re kuꞌan ri utz y kebꞌukunaj konoje ri eyaꞌom pa kꞌax ruma ritzel winaq. Xuꞌan taq kꞌu waꞌ ma ri Dios lik kꞌo rukꞌ.
ACT 10:39 »Ekꞌu riꞌoj lik qetaꞌam waꞌ ma xqil ronoje ri xuꞌan ri Jesús pa taq ri luwar re Judea y chilaꞌ Jerusalem. E waꞌ Rire ri xyaꞌiꞌ chwa cruz y xkamisaxik.
ACT 10:40 Pero churox qꞌij ri Dios xukꞌastajisaj lo ri Jesús chikixoꞌl ri ekaminaq y xuya che xukꞌut uwach chiqawach.
ACT 10:41 Na xukꞌut ta uwach chikiwach konoje ri tinamit, ma xew chikiwach ri ebꞌuchaꞌom chi lo ri Dios ojertan; waꞌ e riꞌoj, ri xojwaꞌ junam rukꞌ y xqatij qamiqꞌinaꞌ junam rukꞌ echiriꞌ kꞌastajinaq chi lo Rire chikixoꞌl ri ekaminaq.
ACT 10:42 »Yey xojutaq kꞌu che utzijoxik che ri tinamit chaꞌ kaqaqꞌalajisaj e Rire ri Aj Qꞌatal Tzij ukojom ri Dios pakiwi ri e kꞌaslik y ri ekaminaq.
ACT 10:43 Puwi ri Jesús xetzijon lo konoje ri qꞌalajisanelabꞌ ojertan. Rike xkibꞌiꞌij e janipa ri kekojow re Rire, kakikꞌul ri kuybꞌal kimak ruma kikojom rubꞌiꞌ» xchaꞌ.
ACT 10:44 Kꞌa kachꞌaꞌt ne ri Pedro kukꞌ chwi taq waꞌ echiriꞌ xqaj ri Santowilaj Ruxlabꞌixel ri Dios pakiwi konoje ri ketaw re.
ACT 10:45 Yey e petinaq rukꞌ ri Pedro jujun e aj judiꞌabꞌ kikojom rubꞌiꞌ ri Cristo. Waꞌ lik xkam kanimaꞌ che, ma ri Santowilaj Ruxlabꞌixel ri Dios xqaj pakiwi ri na e ta aj judiꞌabꞌ.
ACT 10:46 Kekitataꞌ kꞌu riꞌ kechꞌaꞌt pa jujun chik chꞌaꞌtem yaꞌtal chike ruma ri Ruxlabꞌixel ri Dios y lik kakiyak uqꞌij ri Dios.
ACT 10:47 Ekꞌu ri Pedro xubꞌiꞌij: «¿Kꞌo nebꞌa junoq kaqꞌaten ke kakikꞌul ri bautismo rukꞌ yaꞌ? Ma rike xkikꞌul ri Santowilaj Ruxlabꞌixel ri Dios jelaꞌ pachaꞌ riꞌoj» xchaꞌ.
ACT 10:48 Xtaqan kꞌu che kayaꞌ ri bautismo chike pa rubꞌiꞌ ri Qanimajawal Jesucristo. Ekꞌuchiriꞌ, xebꞌelaj che ri Pedro chaꞌ kakanaj chi kebꞌ oxibꞌ qꞌij kukꞌ.
ACT 11:1 Ri e taqoꞌn re ri Jesús kukꞌ ri hermanos e kꞌo Judea xkito e kꞌo na e ta aj judiꞌabꞌ xekojow re Rutzij ri Dios puwi ri Cristo.
ACT 11:2 Ruma kꞌu riꞌ, echiriꞌ xtzelej ri Pedro Jerusalem, ri hermanos e aj judiꞌabꞌ lik xkichap pa chꞌaꞌoj,
ACT 11:3 jewaꞌ xkibꞌiꞌij che: «¿Suꞌchak xatok pa kocho ri na e ta aj judiꞌabꞌ y xatwaꞌ ne kukꞌ?» xechaꞌ.
ACT 11:4 Ekꞌu ri Pedro xujeq utzijoxik chike chucholaꞌj suꞌanik xuꞌana waꞌ. Jekꞌuwaꞌ xubꞌiꞌij chike:
ACT 11:5 «E riꞌin in kꞌo pa ri tinamit Jope e riꞌ kanꞌan orar echiriꞌ xaqikꞌateꞌt xqꞌalajisax jun kꞌutubꞌal re ri Dios chinuwach. Waꞌ pachaꞌ jun nimalaj kꞌul ximital lo che ri kajibꞌ utzaꞌm, xqasax lo chilaꞌ chikaj kꞌa pa la in kꞌo wi riꞌin.
ACT 11:6 Echiriꞌ xintzuꞌ chi utz saꞌ ri kꞌo chupa waꞌ, xebꞌenuwil kꞌu awaj kꞌo kajibꞌ kaqan, itzel taq chikop re upa juyubꞌ, awaj kecharar pulew, yey ri kexikꞌikꞌ che ruwa kaj.
ACT 11:7 »Yey xinta kꞌu jun qulaj, jewaꞌ xubꞌiꞌij chwe: “Chatyaktajoq Pedro; chakamisaj y chatijaꞌ” xchaꞌ.
ACT 11:8 »Ximbꞌiꞌij kꞌu riꞌin: “Na kanꞌan ta kꞌana riꞌ, Wajawal, ma riꞌin na jinta kꞌana chꞌul o na taqal taj katijik okinaq pa nuchiꞌ” xinchaꞌ.
ACT 11:9 »Ekꞌuchiriꞌ, xchꞌaw tanchi lo ri jun qulaj chilaꞌ chikaj, jewaꞌ xubꞌiꞌij chwe: “Ri ujosqꞌim chi ri Dios, riꞌat mabꞌiꞌij chꞌul che” xchaꞌ.
ACT 11:10 »Waꞌ oxlaj xuꞌano. Tekꞌuchiriꞌ, ronoje xkꞌam tanchi ubꞌi chikaj.
ACT 11:11 »Chupa kꞌu laꞌ la joqꞌotaj xekꞌun oxibꞌ achijabꞌ chwa ri ja pa in kꞌo wi; rike e petinaq Cesarea, etaqom loq chaꞌ kinkitzukuj.
ACT 11:12 Ekꞌu ri Ruxlabꞌixel ri Dios xubꞌiꞌij chwe kinꞌek kukꞌ y muxiꞌij ne ribꞌ nukꞌuꞌx kinꞌek. Xinꞌek kꞌu riꞌ kukꞌ; yey waꞌ wa waqibꞌ hermanos e aj Jope e kꞌo wara wukꞌ, xojkachbꞌilaj bꞌi. »Echiriꞌ xojopon Cesarea, xojok chirocho jun achi.
ACT 11:13 Yey waꞌchi xutzijoj chiqe suꞌanik xril uwach jun ángel chirocho. Waꞌ xoꞌltakꞌal chwach rire y jewaꞌ xubꞌiꞌij che: “Chebꞌataqa bꞌi achijabꞌ pa ri tinamit Jope re keꞌkisikꞌij jun achi Simón rubꞌiꞌ, ri kabꞌiꞌx Pedro che.
ACT 11:14 Ekꞌu rire koluꞌbꞌiꞌij chawe suꞌanik katkolobꞌetaj riꞌat kukꞌ konoje ri ejeqel pa wocho” xcha ri ángel che.
ACT 11:15 »Yey, echiriꞌ riꞌin xinjeqo kinchꞌaꞌt kukꞌ waꞌ wa tikawex na e ta aj judiꞌabꞌ, xqaj ri Santowilaj Ruxlabꞌixel ri Dios pakiwiꞌ jelaꞌ pachaꞌ xujeqebꞌej loq echiriꞌ xqaj paqawi ri oj aj judiꞌabꞌ.
ACT 11:16 »Ekꞌuchiriꞌ, xkꞌun chinukꞌuꞌx rubꞌiꞌim kan ri Qanimajawal echiriꞌ xubꞌiꞌij: “Paqatzij wi, ri Juan xuya ri bautismo rukꞌ yaꞌ, noꞌj ri bautismo kikꞌul riꞌix e rukꞌ ri Santowilaj Ruxlabꞌixel ri Dios.”
ACT 11:17 »Ekꞌu uwariꞌche, we ri Dios xuya chike rike wa sipanik jelaꞌ pachaꞌ ri xuya chiqe riꞌoj ri kubꞌul chi qakꞌuꞌx rukꞌ ri Qanimajawal Jesucristo, ¿in china riꞌin chaꞌ kanqꞌatej ri Dios che uꞌanikil waꞌ?» xcha ri Pedro.
ACT 11:18 Ekꞌuchiriꞌ xkita taq waꞌ, na jinta chi xkibꞌiꞌij chirij ri Pedro, e xkijeq kakiyak uqꞌij ri Dios, jewaꞌ xkibꞌiꞌij: «¡Uyaꞌom ne riꞌ ri Dios chike ri na e ta aj judiꞌabꞌ kakitzelej kitzij chwach chaꞌ jelaꞌ kꞌo kikꞌaslemal!» xechaꞌ.
ACT 11:19 Rukꞌ rukamik ri Esteban, xjeqer kiternabꞌexik rukꞌ kꞌax janipa ri kikojom rubꞌiꞌ ri Cristo. E taq kꞌu riꞌ waꞌ xekich bꞌi y xebꞌopon kꞌa chupa taq ri tinamit re Fenicia, re Chipre y ri tinamit Antioquía. Yey xew xkitzijoj kan ri Utzilaj Tzij re ri Jesucristo chike ri e aj judiꞌabꞌ.
ACT 11:20 Chikixoꞌl kꞌu wa hermanos e kꞌo e aj Chipre y e aj Cirene. Ekꞌu rike echiriꞌ xebꞌok Antioquía, xkijeq kakitzijoj ri Utzilaj Tzij re ri Qanimajawal Jesucristo chike ri na e ta aj judiꞌabꞌ.
ACT 11:21 Yey ruchuqꞌabꞌ ri Qanimajawal lik kꞌo pakiwi rike. Lik kꞌu e kꞌi ri tikawex xkikoj rubꞌiꞌ ri Cristo y xkijalkꞌatij ri kibꞌinik.
ACT 11:22 Ri kikojom rubꞌiꞌ ri Cristo e kꞌo Jerusalem, echiriꞌ xkita waꞌ, xkitaq bꞌi ri Bernabé chaꞌ keꞌek kꞌa chilaꞌ Antioquía.
ACT 11:23 Echiriꞌ xopon ri Bernabé y xril ri unimal rutzil ukꞌuꞌx ri Dios kukꞌ ri kikojom rubꞌiꞌ ri Cristo, lik xkiꞌkot che. Y xebꞌupixabꞌaj konoje chaꞌ rukꞌ ronoje kikꞌuꞌx kakichuqꞌubꞌej kibꞌ chwach ri Qanimajawal.
ACT 11:24 Ri Bernabé e jun achi lik utz ukꞌuꞌx, ruchuqꞌabꞌ ri Santowilaj Ruxlabꞌixel ri Dios lik kꞌo rukꞌ y lik kꞌo kubꞌulibꞌal ukꞌuꞌx. Ruma kꞌu ruchak rire, lik e kꞌi ri tikawex xkikoj rubꞌiꞌ ri Qanimajawal Jesucristo.
ACT 11:25 Tekꞌuchiriꞌ, ri Bernabé xeꞌek pa ri tinamit Tarso re kuꞌtzukuj ri Saulo. Echiriꞌ xuriqo, xukꞌam lo Antioquía.
ACT 11:26 Xekꞌojiꞌ kꞌu kukꞌ ri tinamit re ri Cristo ronoje ri jun junabꞌ, e riꞌ kekꞌutun chikiwach ukꞌiyal winaq. Chiriꞌ kꞌu riꞌ, nabꞌe laj xbꞌiꞌx “cristianos” chike ri kikojom rubꞌiꞌ ri Cristo.
ACT 11:27 Chupa taq riꞌ laꞌ la qꞌij e kꞌo jujun eqꞌalajisay runaꞌoj ri Dios xebꞌel bꞌi Jerusalem y xebꞌopon Antioquía.
ACT 11:28 Kꞌo jun chike waꞌ, Ágabo rubꞌiꞌ. Rire xyaktajik y ruma ri Ruxlabꞌixel ri Dios, xuqꞌalajisaj kape jun unimal numik chwi ronoje ruwachulew pa ejeqel wi ri winaq. (Waꞌ xuꞌana chupa rutaqanik ri Claudio.)
ACT 11:29 Ruma kꞌu waꞌ, ri kikojom rubꞌiꞌ ri Cristo e kꞌo Antioquía xkiyijbꞌaꞌ chikiwach chaꞌ kakitaq pan toꞌbꞌal chike ri hermanos ejeqel Judea; chikijujunal kꞌu riꞌ xkichꞌobꞌ raqan janipa ri kakiyaꞌo, waꞌ e chirij taq ri kꞌo kukꞌ.
ACT 11:30 Y jelaꞌ xkiꞌano; xkitaq bꞌi ri kiqasaꞌn pakiqꞌabꞌ ri Bernabé y ri Saulo chaꞌ kakikꞌam bꞌi Judea y kakiya chike ri e aj wach re riglesia.
ACT 12:1 Chupa taq kꞌu riꞌ laꞌ la qꞌij ri rey Herodes xebꞌutaq jujun soldados chaꞌ kekichap jujun chike ri kikojom rubꞌiꞌ ri Cristo re keyaꞌ pa kꞌaxkꞌobꞌik.
ACT 12:2 Yey xebꞌutaq che kakikamisaj rukꞌ espada ri Jacobo ri ratzixel ri Juan. Y ri soldados jelaꞌ xkiꞌano.
ACT 12:3 Ekꞌuchiriꞌ xrilo lik xukꞌul kikꞌuꞌx raj judiꞌabꞌ ri xꞌan che ri Jacobo, xutaq uchapik ri Pedro. Waꞌ xuꞌan chupa ri nimaqꞌij Pascua echiriꞌ katij ri pam na jinta levadura che.
ACT 12:4 Ekꞌuchiriꞌ chapom chi ri Pedro, ri Herodes xutzꞌapij pa cárcel y xuya pakiqꞌabꞌ kajibꞌ mutzaꞌj soldados re kakichajij, yey wa soldados e kajkaj chujujunal mutzaꞌj. Ri xuchꞌobꞌ ri Herodes e kꞌate karesaj lo ri Pedro chikiwach ri winaq re ri tinamit echiriꞌ ikꞌowinaq chi ri nimaqꞌij Pascua.
ACT 12:5 Kꞌo kꞌu riꞌ ri Pedro pa cárcel lik chajital chi utz. Yey ri kikojom rubꞌiꞌ ri Cristo na kebꞌuxlan ta che uꞌanik orar chwach ri Dios puwiꞌ rire.
ACT 12:6 Chupa kꞌu raqꞌabꞌ chwach pan ri qꞌij echiriꞌ ri rey Herodes uchꞌobꞌom karesaj lo ri Pedro chikiwach ri tinamit, ri Pedro e riꞌ kawar chikixoꞌl kaꞌibꞌ soldados, ximital rukꞌ kaꞌibꞌ karena yuqul lo chike ri soldados. Yey pa rewi raj chajal e kꞌo chwach ri okibꞌal re ri cárcel.
ACT 12:7 Xaqikꞌateꞌt kꞌut xwinaqir jun ángel re ri Qanimajawal rukꞌ, yey jun aqꞌ lik xutzij upa ri cárcel. Ri ángel xuyuchꞌuyaꞌ ri Pedro pukꞌalkꞌaꞌx, xukꞌosoj y jekꞌuwaꞌ xubꞌiꞌij che: «Chatwaꞌlijoq, chawilij» xcha che. E taq kꞌu ri karena kꞌo che ruqꞌabꞌ ri Pedro xtzaqik.
ACT 12:8 Xubꞌiꞌij kꞌu ri ángel che: «Chaximilaꞌ bꞌi rakoton y raxajabꞌ» xcha che. Y rire jelaꞌ xuꞌano. Xubꞌiꞌij tanchi ri ángel che: «Chakojo bꞌi raqꞌuꞌ re pisbꞌal awij y chat-tereja lo chwij» xcha che.
ACT 12:9 Ri Pedro xel bꞌi teran chirij ri ángel, tobꞌ na retaꞌam taj we qatzij ri kuꞌan ri ángel rukꞌ; ma chwach rire, laj xa wachikꞌ la katajin che rilik.
ACT 12:10 Xebꞌikꞌow kꞌu chikiwach ri nabꞌe mutzaꞌj e chajinel. Tekꞌuchiriꞌ, xebꞌikꞌow che rukaꞌm mutzaꞌj e chajinel y xebꞌopon kꞌu chwach ri okibꞌal ꞌanom rukꞌ chꞌichꞌ, waꞌ e ri kel bꞌi pa bꞌe chupa ri tinamit. Waꞌ wa okibꞌal utukel xjaqataj chikiwach y jelaꞌ xebꞌel bꞌi. Xebꞌin kꞌu jubꞌiqꞌ che ri bꞌe y xaqikꞌateꞌt ri ángel xuya kan ri Pedro utukel.
ACT 12:11 Kꞌa ekꞌuchiriꞌ ri Pedro xumaj usukꞌ na wachikꞌ ta ri kuꞌano. Xubꞌiꞌij kꞌu chiribꞌil ribꞌ: «Woꞌora paqatzij wi, kanmaj usukꞌ e ri Qanimajawal utaqom lo ru ángel wukꞌ. Jelaꞌ xinresaj puqꞌabꞌ ri rey Herodes y che ronoje ri kakaj kakiꞌan rukꞌiyal e aj judiꞌabꞌ chwe» xchaꞌ.
ACT 12:12 Ekꞌu laꞌ katajin waꞌ pujolom ri Pedro, xeꞌek chirocho ri María ruchu ri Juan, ri kabꞌiꞌx Marcos che. Chiriꞌ kimolom wi kibꞌ ukꞌiyal hermanos ketajin pa oración chwach ri Dios.
ACT 12:13 Echiriꞌ ri Pedro xuchꞌawisaj pan ri puerta re ruwa ja, jun ali aj chak Rode rubꞌiꞌ, xel lo che.
ACT 12:14 Ekꞌuchiriꞌ xuto e uqul ri Pedro, ruma rukiꞌkotemal na xujaq ta ri puerta. Ri xuꞌano e kanik xok tanchi ubꞌi pa ja y xuꞌtzijoj chike kꞌo ri Pedro chwach ri puerta.
ACT 12:15 Ekꞌu ri e kꞌo pa ja xkibꞌiꞌij che: —Riꞌat xatchꞌuꞌjerik —xecha che. Pero rali xujikibꞌaꞌ uwach chike lik qatzij la kubꞌiꞌij. Yey xkibꞌiꞌij rike: —Laj e u ángel ri kꞌo chiriꞌ —xechaꞌ.
ACT 12:16 Ekꞌu ri Pedro lik chak kꞌo che uchꞌawisaxik pan ri puerta. Ekꞌuchiriꞌ xkijaqo yey xkil ri Pedro, lik xkam kanimaꞌ che; ma lik kꞌayew chike kakikojo we qatzij ri ketajin che rilik.
ACT 12:17 Pero ri Pedro xuꞌan jun kꞌutubꞌal rukꞌ ruqꞌabꞌ chaꞌ ketzꞌinkaꞌnik. Xutzijoj kꞌu chike suꞌanik xesax lo ruma ri Qanimajawal chupa ri cárcel. Yey xubꞌiꞌij kꞌu chike: —Tzijoj alaq waꞌ che ri Jacobo y chike taq ri hermanos —xchaꞌ. Tekꞌuchiriꞌ, xel bꞌi y xeꞌek pa jun chik luwar.
ACT 12:18 Echiriꞌ xsaqirik, xok jun sachibꞌal naꞌoj chikixoꞌl ri soldados. Xkijeq ketukukik ruma na ketaꞌam taj saꞌ ri xuꞌan ri Pedro, ma na jinta chik.
ACT 12:19 Ekꞌu ri Herodes xutaq utzukuxik ri Pedro. Yey ruma na xriqitaj taj, e xuta kichiꞌ ri soldados; tekꞌuchiriꞌ, xutaq kikamisaxik. Echiriꞌ xuꞌan waꞌ, ri Herodes xel bꞌi Judea y xeꞌek pa ri tinamit Cesarea y chiriꞌ xkanaj wi.
ACT 12:20 Ri rey Herodes lik kꞌo royowal chikij ri winaq e aj Tiro y e aj Sidón. Ekꞌu riꞌ wa kebꞌ tinamit xkichꞌaꞌbꞌej kibꞌ chikiwach re kebꞌeꞌchꞌaꞌta rukꞌ ri rey Herodes chaꞌ kakiꞌan utzil chomal chikiwach rukꞌ. Kꞌo kꞌu jun achi Blasto rubꞌiꞌ, waꞌ raj chak ri rey yey lik kꞌo uwach pa ri rocho ri rey. Xkikoj kꞌu kibꞌ chwach ri Blasto y xkipuaqij che chaꞌ rire kachꞌaw pakiwiꞌ chwach ri rey chaꞌ na jinta chi chꞌaꞌoj chikiwach. Y jelaꞌ raj kꞌay re rutinamit ri Herodes utz kakikꞌayij ri kajawax chike ri e aj Tiro y aj Sidón.
ACT 12:21 Ri rey Herodes xukoj kꞌu jun qꞌij chike re kakimol kibꞌ. Laꞌ la jun qꞌij xuwiq ribꞌ rukꞌ chomilaj kꞌul kꞌi rajil, xtzꞌuyiꞌ pa ri qꞌatbꞌal tzij y xuya kꞌu jujun uchꞌaꞌtem chikiwach ri tinamit.
ACT 12:22 Ekꞌu ri winaq xkijeqo lik ko kesikꞌinik kakibꞌiꞌij: «¡Waꞌ wa kaqato, na uqul ta juna achi; e uqul jun tiox!» kechaꞌ.
ACT 12:23 Xa pa joqꞌotaj kꞌu riꞌ jun ángel re ri Qajawal xukoj lo jun yabꞌil che ri Herodes; ma rire xukꞌul wa yakbꞌal uqꞌij xꞌanik, yey waꞌ xew taqal che ri Dios. Jekꞌuriꞌlaꞌ xtijiꞌ kuma amolo y ruma waꞌ xkamik.
ACT 12:24 Noꞌj kꞌu ri Utzilaj Tzij re ri Qanimajawal lik xeꞌek utzijoxik y lik katajin kikꞌiyarik ri kekojow re.
ACT 12:25 Echiriꞌ ri Bernabé y ri Saulo xkikꞌis ri chak yaꞌom chike, xebꞌel chiriꞌ Jerusalem y xkikꞌam bꞌi ri Juan kukꞌ, ri kabꞌiꞌx Marcos che.
ACT 13:1 Chilaꞌ Antioquía chikixoꞌlibꞌal ri kikojom rubꞌiꞌ ri Cristo, e kꞌo eqꞌalajisay runaꞌoj ri Dios y e kꞌutunel re Rutzij. Waꞌ e: ri Bernabé, ri Simón ri kabꞌiꞌx qꞌeq che, ri Lucio aj Cirene, ri Manaén ri xkꞌiyisax pa rocho ri Herodes ri rey re Galilea y ri Saulo.
ACT 13:2 Kꞌo kꞌu jun qꞌij echiriꞌ rike kimolom kibꞌ re kakiloqꞌnimaj uqꞌij ri Qanimajawal yey e kꞌo pa ayuno, ri Santowilaj Ruxlabꞌixel ri Dios xubꞌiꞌij chike: «Chebꞌichaꞌa ri Bernabé y ri Saulo chwe chaꞌ kakiꞌan ri chak nuyaꞌom chi lo pakiqꞌabꞌ» xchaꞌ.
ACT 13:3 Echiriꞌ xkikꞌis ri oración y ayuno, xkiya ri kiqꞌabꞌ pakiwi rike y xekitaq kꞌu bꞌi.
ACT 13:4 Ekꞌu ri Bernabé y ri Saulo e laꞌ etaqom bꞌi ruma ri Santowilaj Ruxlabꞌixel ri Dios, xebꞌopon kꞌu Seleucia. Chiriꞌ xebꞌel bꞌi pa barco y xebꞌek pa ri isla Chipre.
ACT 13:5 Echiriꞌ xebꞌopon Salamina, jun tinamit re Chipre, xkijeq utzijoxik Rutzij ri Dios puwi ri Qanimajawal Jesucristo pa taq sinagogas ke raj judiꞌabꞌ. Yey kꞌo ri Juan kukꞌ re kitoꞌbꞌel.
ACT 13:6 Xebꞌikꞌow kꞌu chupa ronoje ri isla Chipre y xebꞌopon kꞌa chupa ri tinamit Pafos. Chiriꞌ xkiriq jun achi e kukꞌil raj judiꞌabꞌ; rire aj qꞌij yey e jun qꞌalajisanel xa kasokosoꞌnik. Waꞌ waꞌchi Barjesús rubꞌiꞌ, yey pa ri chꞌaꞌtem griego “Elimas” kecha che.
ACT 13:7 Waꞌ wa aj qꞌij kꞌo rukꞌ ri taqanel Sergio Paulo, jun achi lik kꞌo unaꞌoj. Ri taqanel xebꞌusikꞌij ri Bernabé y ri Saulo, ma lik kurayij kuta Rutzij ri Dios puwi ri Qanimajawal Jesucristo.
ACT 13:8 Pero rachi aj qꞌij xutij riꞌ che kebꞌuqꞌatej ri Bernabé y ri Saulo chaꞌ ri taqanel na kukubꞌaꞌ ta ukꞌuꞌx che ri Utzilaj Tzij re ri Jesucristo.
ACT 13:9 Ekꞌu ri Saulo (ri kabꞌiꞌx Pablo che) rukꞌ ruchuqꞌabꞌ ri Santowilaj Ruxlabꞌixel ri Dios xuchꞌikibꞌaꞌ ruwach puwi ri Elimas,
ACT 13:10 y jewaꞌ xubꞌiꞌij che: «¡Rilal lal nojinaq che ronoje sokosoꞌnik y che ronoje itz! ¡Lal ralkꞌoꞌal ritzel winaq, ri jun aj retzelal kꞌuꞌx chirij ronoje ri jusukꞌ! ¿Suꞌchak na koqꞌotaj ta la ri kajechꞌij la ri jusukꞌ bꞌe re ri Qanimajawal?
ACT 13:11 Ekꞌu woꞌora ruqꞌabꞌ ri Qanimajawal kayaktaj chiꞌij la y kuꞌan potzꞌ cheꞌla; xew kꞌu ri Dios etaꞌmayom janipa qꞌij na kil ta la ri qꞌijsaq» xchaꞌ. Na jampatana kꞌut ronoje xuꞌan qꞌequꞌm chwach y xujeq kamalal pa taq utzal y chirij, kutzukuj china kakꞌamaw bꞌi che ruqꞌabꞌ.
ACT 13:12 Ekꞌuchiriꞌ ri taqanel xril wa xukꞌulumaj ri Elimas, xukoj rubꞌiꞌ ri Qanimajawal Jesucristo, y lik kaminaq ranimaꞌ che ri kꞌutunik chwi ri Qanimajawal.
ACT 13:13 Ri Pablo junam kukꞌ ri rachbꞌiꞌil xebꞌel bꞌi Pafos pa barco y xebꞌopon Perge pa ri luwar re Panfilia. Pero ri Juan xresaj kan ribꞌ chikij y xtzelej Jerusalem.
ACT 13:14 Ekꞌu rike xebꞌikꞌow Perge y xebꞌopon Antioquía pa ri luwar re Pisidia. Chupa kꞌu jun qꞌij re uxlanibꞌal xebꞌok pa ri sinagoga y xetzꞌuyiꞌik.
ACT 13:15 Ekꞌuchiriꞌ ajilam chi jujun che Rutzij Upixabꞌ ri Dios tzꞌibꞌital kan ruma ri Moisés y kuma ri qꞌalajisanelabꞌ, raj wach re ri sinagoga xkitaq lo ubꞌiꞌxikil chike: «Alaq qatz-qachaqꞌ, we kꞌo juna chꞌaꞌtem alaq re pixabꞌanik che ri tinamit, chꞌaw alaq» xechaꞌ.
ACT 13:16 Xtakꞌiꞌ kꞌu ri Pablo y xuꞌan jun kꞌutubꞌal rukꞌ ruqꞌabꞌ chaꞌ na jinta kꞌo kachꞌawik y xubꞌiꞌij: «Alaq achijabꞌ aj Israel y onoje alaq ri kꞌo xiꞌin ibꞌ pa animaꞌ alaq chwach ri Dios, tape alaq.
ACT 13:17 Ri Dios re wa tinamit Israel xebꞌuchaꞌ ri qatiꞌ-qamam ojertan y xuꞌan jun nimalaj tinamit chike echiriꞌ kꞌa e kꞌo Egipto, tobꞌ rike na e ta aj chiriꞌ. Rukꞌ kꞌu unimal uchuqꞌabꞌ riꞌ xebꞌeresaj lo Egipto.
ACT 13:18 »Laj juna cuarenta junabꞌ kꞌu riꞌ xebꞌukuy ri Dios rutinamit rukꞌ ri kimakunik pa ri luwar katzꞌintzꞌotik.
ACT 13:19 Tekꞌuchiriꞌ, xusach kiwach wuqubꞌ nimaq tinamit pa ri luwar re Canaán y xuya kꞌu chike ri qatiꞌ-qamam kekanaj kan rukꞌ wa ulew.
ACT 13:20 Laj ikꞌowinaq chi kajibꞌ ciento junabꞌ rukꞌ nikꞌaj chwi lo echiriꞌ rutinamit ri Dios xebꞌopon Egipto, kꞌa ekꞌuchiriꞌ xekanaj kan pa rulew ubꞌiꞌtisim lo ri Dios chike. »Ekꞌuchiriꞌ, ri Dios xebꞌuya e aj qꞌatal tzij re ketaqan pakiwi rutinamit. Jelaꞌ uꞌanom kꞌa chwa ri qꞌalajisanel Samuel.
ACT 13:21 Chupa kꞌu rutaqanik ri Samuel, ri tinamit xkitzꞌonoj che ri Dios kuya juna kirey. Ekꞌu ri Dios xukoj ri Saúl pakiwiꞌ. Ri Saúl e ukꞌajol ri Cis, jun achi upetebꞌem chike ri ralkꞌoꞌal kan ri Benjamín. Cuarenta junabꞌ kꞌu xtaqan pakiwiꞌ.
ACT 13:22 Ekꞌuchiriꞌ ri Dios xresaj ri rey Saúl pakiwiꞌ, e xukoj ri David re kataqan pukꞌaxel. Chwi kꞌu ri David lik chom xchꞌaꞌt ri Dios, ma jewaꞌ xubꞌiꞌij: E wilom che ri David rukꞌajol ri Isaí, rire jun achi lik kakiꞌkot nukꞌuꞌx rukꞌ ma kuya ranimaꞌ kuꞌano janipa ri kantaq che xchaꞌ.
ACT 13:23 »Ekꞌu chirij rubꞌiꞌtisim lo chike ri e ralkꞌoꞌal kan ri David, ri Dios e xuyak ri Jesús re Kolobꞌenel ke raj Israel.
ACT 13:24 Echiriꞌ ri Jesús kꞌamajaꞌ kujeq ri chak taqom lo che uꞌanik chikiwach ri winaq, xtzijon ri Juan puwi ri bautismo re tzelebꞌal tzij chike konoje ri tinamit Israel.
ACT 13:25 Ekꞌuchiriꞌ ri Juan katajin che ukꞌisik ruchak, xubꞌiꞌij: “Chiwach riꞌix ¿in china riꞌin? Riꞌin na in ta ri Kolobꞌenel oyeꞌem alaq. Noꞌj katajin kꞌu lo ukꞌunik Jun chwij, yey riꞌ na taqal tane chwe riꞌin kankir ruxajabꞌ che ri raqan” xchaꞌ.
ACT 13:26 »Alaq qatz-qachaqꞌ, alaq ralkꞌoꞌal kan ri Abraham y onoje alaq ri kꞌo xiꞌin ibꞌ ukꞌ alaq chwach ri Dios, che kꞌu ralaq taqom wi lo ri Utzilaj Tzij re kolobꞌetajik.
ACT 13:27 Yey ri ejeqel Jerusalem kukꞌ ri e aj wach ke, na xketaꞌmaj taj ri Jesús e Uchaꞌoꞌn lo ri Dios y na xkimaj tane usukꞌ ri tzꞌibꞌital kan kuma ri qꞌalajisanelabꞌ puwi ri Jesús, tobꞌ waꞌ kakajilaj ronoje qꞌij re uxlanibꞌal. Yey echiriꞌ rike xkitzꞌonoj rukamik ri Jesús, e xkiꞌan kꞌu ri tzꞌibꞌital kan puwi Rire.
ACT 13:28 Y tobꞌ na jinta kꞌo xkiriq chirij ri Jesús re kakamisaxik, xkitzꞌonoj che ri Pilato kutaq ukamisaxik.
ACT 13:29 Echiriꞌ xkikꞌis uꞌanik rukꞌ ri Jesús janipa ri tzꞌibꞌital kan puwi Rire, xkiqasaj lo chwa ri cruz y xeꞌkimuquꞌ.
ACT 13:30 »Pero ri Dios xukꞌastajisaj lo ri Jesús chikixoꞌl ri ekaminaq.
ACT 13:31 Tekꞌuchiriꞌ, ri Jesús ukꞌiyal qꞌij xukꞌut uwach chikiwach ri xerachbꞌilaj chwi echiriꞌ xebꞌel lo Galilea y xebꞌek rukꞌ kꞌa Jerusalem. E taq kꞌu riꞌ waꞌ ri ketzijow re ri Jesús chikiwach ri tinamit woꞌora.
ACT 13:32 »Jekꞌulaꞌ riꞌoj kaqatzijoj che alaq ri Utzilaj Tzij, ri bꞌiꞌtisim lo chike ri qatiꞌ-qamam ojertan.
ACT 13:33 Yey wa bꞌiꞌtisinik yaꞌom chi chiqe riꞌoj ri oj kalkꞌoꞌal kan rike. Ma ri Dios xuꞌan waꞌ echiriꞌ xukꞌastajisaj lo ri Jesús chikixoꞌl ri ekaminaq, jelaꞌ pachaꞌ ri tzꞌibꞌital chupa rukaꞌm Salmo: Riꞌat at Nukꞌajol yey Riꞌin in Aqaw; waqꞌij kꞌu riꞌ kanqꞌalajisaj waꞌ kachaꞌ.
ACT 13:34 »Yey ri Dios ubꞌiꞌim kukꞌastajisaj lo ri Jesús chikixoꞌl ri ekaminaq chaꞌ jelaꞌ rucuerpo na kaqꞌay taj, ma jewaꞌ xubꞌiꞌij pa Ruchꞌaꞌtem puwi waꞌ: Kankꞌut na ri kꞌaxnaꞌbꞌal nukꞌuꞌx chiwach, jelaꞌ pachaꞌ ri nubꞌiꞌtisim lo che ri David.
ACT 13:35 E uwariꞌche jewaꞌ kubꞌiꞌij pa jun chik Salmo: Rilal na kaya ta la luwar che kaqꞌay rucuerpo ri Jun lik uyaꞌom ribꞌ paqꞌabꞌ la xchaꞌ.
ACT 13:36 »Ma paqatzij wi ri David xuꞌan ri xraj ri Dios rukꞌ echiriꞌ kꞌo che ruwachulew, pero xopon ri qꞌij xkamik y xmuq pa emuqum wi ruchu-uqaw, y rucuerpo xqꞌayik.
ACT 13:37 Noꞌj rucuerpo ri Jun ri xukꞌastajisaj bꞌi ri Dios, na xqꞌay taj.
ACT 13:38 »Chetaꞌmaj kꞌu alaq waꞌ, alaq watz-nuchaqꞌ: Ruma ri xuꞌan ri Cristo, katzijox che alaq suꞌanik kariq alaq ri kuybꞌal mak chwach ri Dios.
ACT 13:39 Ruma kꞌu ri Cristo, konoje ri kakubꞌiꞌ kikꞌuꞌx rukꞌ Rire, kaꞌaniꞌ jusukꞌ chike. Yey waꞌ na kariqitaj ta kꞌana ruma ri kataqex ri Tzij Pixabꞌ tzꞌibꞌital kan ruma ri Moisés.
ACT 13:40 »Chajij kꞌu ibꞌ alaq chaꞌ na kape ta pawiꞌ alaq ri ubꞌiꞌim lo ri Dios chupa ri tzꞌibꞌital kan kuma ri qꞌalajisanelabꞌ:
ACT 13:41 Chiwilapeꞌ, ix aj chꞌaminel re ri Nutzij, lik kakam na kꞌu iwanimaꞌ che y kasach ne iwach ruma waꞌ: Riꞌin kanꞌan jun chak chupa taq wa qꞌij ix kꞌo wi, jun chak na kikoj taj, tobꞌ ne kꞌo junoq katzijow re chiwe xcha ri Dios.» Rukꞌ waꞌ xukꞌisbꞌej ri Pablo.
ACT 13:42 Ekꞌuchiriꞌ ri Pablo y ri Bernabé xebꞌel bꞌi pa ri sinagoga, ri e kꞌo chiriꞌ xebꞌelaj chike chaꞌ ri jun chik qꞌij re uxlanibꞌal kechꞌaꞌt kukꞌ rike chwi taq waꞌ.
ACT 13:43 Echiriꞌ xebꞌel bꞌi konoje ri kimolom kibꞌ pa ri sinagoga, e kꞌi xeterej bꞌi chikij ri Pablo y ri Bernabé. Chikixoꞌl waꞌ e kꞌo raj judiꞌabꞌ y jujun chik kitaqem lo ri kꞌutunik ke raj judiꞌabꞌ (tobꞌ na e ta aj judiꞌabꞌ, pero lik kakiloqꞌoj uqꞌij ri Dios). Ekꞌu ri Pablo y ri Bernabé lik xekipixabꞌaj chaꞌ ketikiꞌ chupa ri unimal rutzil ukꞌuꞌx ri Dios.
ACT 13:44 Chupa kꞌu ri jun chik qꞌij re uxlanibꞌal, ya laj konoje ri winaq re ri tinamit xkimol kibꞌ chaꞌ kakita Rutzij ri Dios puwi ri Qanimajawal.
ACT 13:45 Pero echiriꞌ raj judiꞌabꞌ xekil rukꞌiyal winaq, xujeq katiꞌtot kikꞌuꞌx chirij ri Pablo. Y xkijeq kꞌu kakikꞌulaliꞌaj uwach ronoje ri kubꞌiꞌij rukꞌ kꞌaxlaj chꞌaꞌtem.
ACT 13:46 Ekꞌuchiriꞌ, ri Pablo y ri Bernabé, rukꞌ unimal kichuqꞌabꞌ, xkibꞌiꞌij chike: —Paqatzij wi lik chirajawaxik nabꞌe na katzijox che ralaq ri alaq aj judiꞌabꞌ Rutzij ri Dios puwi ri Qanimajawal. Pero ruma kꞌu ri na kakꞌul ta alaq, jelaꞌ kaqꞌalajinik na taqal ta ri kꞌaslemal na jinta utaqexik che alaq. Ruma kꞌu laꞌ keꞌqatzijoj chike ri na e ta aj judiꞌabꞌ,
ACT 13:47 ma jelaꞌ ri ojutaqom lo ri Dios Qajawxel che uꞌanik. E pachaꞌ ri ubꞌiꞌim lo Rire echiriꞌ xubꞌiꞌij: Riꞌin atnukojom re Qꞌijsaq chikiwach taq ri tinamit chaꞌ jelaꞌ kuꞌana at kꞌamal bꞌi re ri kolobꞌetajik kꞌa pa taq ri luwar lik naj che ruwachulew —xechaꞌ.
ACT 13:48 Echiriꞌ xkita waꞌ ri na e ta aj judiꞌabꞌ, lik xekiꞌkot che y xkijeqo kakiyak uqꞌij ri Utzilaj Tzij puwi ri Qanimajawal. Jekꞌulaꞌ xkikoj rubꞌiꞌ ri Cristo konoje ri echaꞌom chi uloq re kakꞌojiꞌ kikꞌaslemal na jinta utaqexik.
ACT 13:49 Y xeꞌek utzijoxik ri Utzilaj Tzij puwi ri Qanimajawal chupa taq ronoje wa luwar.
ACT 13:50 Noꞌj raj judiꞌabꞌ xkikoj pa kijolom raj wach re ri tinamit y jujun ixoqibꞌ lik kꞌo kiwach yey kitaqem ri tzijpixabꞌ ke raj judiꞌabꞌ, chaꞌ kekiternabꞌej rukꞌ kꞌaxkꞌobꞌik ri Pablo y ri Bernabé. Jekꞌulaꞌ riꞌ xebꞌekesaj bꞌi pa wa tinamit.
ACT 13:51 Ekꞌu ri Pablo y ri Bernabé xkipupaꞌ kan rulew che ri kaqan, kꞌutubꞌal re ri na utz taj xkiꞌan ri e aj chilaꞌ y xebꞌek kꞌu pa ri tinamit Iconio.
ACT 13:52 Pero ri kikojom rubꞌiꞌ ri Cristo chilaꞌ Antioquía lik kꞌo kiꞌkotemal kukꞌ yey ri Santowilaj Ruxlabꞌixel ri Dios lik kꞌo kukꞌ.
ACT 14:1 Chilaꞌ kꞌut chupa ri tinamit Iconio, ri Pablo y ri Bernabé junam xebꞌok chupa ri sinagoga ke raj judiꞌabꞌ. Ruma kꞌu ri Utzilaj Tzij xkitzijoj, lik e kꞌi ri e aj judiꞌabꞌ y ri na e ta aj judiꞌabꞌ xkikoj rubꞌiꞌ ri Cristo.
ACT 14:2 Noꞌj ri e aj judiꞌabꞌ ri na kakikoj ta ri Utzilaj Tzij, xkitik oyowal pa kanimaꞌ ri na e ta aj judiꞌabꞌ yey xekituk waꞌ wa winaq chaꞌ keyaktaj chikij ri kikojom rubꞌiꞌ ri Cristo.
ACT 14:3 Na rukꞌ ta kꞌu riꞌ, lik naj xekꞌojiꞌ ri Pablo y ri Bernabé chiriꞌ y na kakixiꞌij ta kꞌana kibꞌ kechꞌaꞌt chikiwach konoje. Ekꞌu ri Qanimajawal xujikibꞌaꞌ uwach ri kichꞌaꞌtem chwi ri unimal rutzil ukꞌuꞌx, ma xuya chike kakiꞌan nimaq taq kꞌutubꞌal re ruchuqꞌabꞌ ri Dios.
ACT 14:4 Ekꞌu ri winaq re ri tinamit kijachom kipa; jujun chike ekiternabꞌem raj judiꞌabꞌ y jujun chik ekiternabꞌem ri e taqoꞌn re ri Jesús.
ACT 14:5 Ekꞌu ri e aj judiꞌabꞌ junam kukꞌ ri na e ta aj judiꞌabꞌ xkiꞌan tzij chikiwach kukꞌ ri e aj wach chaꞌ keyaktaj chikij ri Pablo y ri Bernabé re kakiꞌan kꞌax chike y kekiꞌan paꞌbꞌaj.
ACT 14:6 Echiriꞌ ri Pablo y ri Bernabé xketaꞌmaj waꞌ, xebꞌel bꞌi chiriꞌ y xebꞌek pa ri luwar re Licaonia pa taq ri tinamit Listra y ri tinamit Derbe y pa taq ri luwar chunaqaj wa kebꞌ tinamit.
ACT 14:7 Y chiriꞌ kꞌu riꞌ kakitzijoj ri Utzilaj Tzij.
ACT 14:8 Chupa wa tinamit Listra kꞌo jun achi sikirinaq ukabꞌichal ri raqan y na bꞌininaq ta kꞌenoq ma ralaxibꞌem sik. Waꞌ waꞌchi tzꞌulik,
ACT 14:9 e riꞌ kutataꞌ ri kubꞌiꞌij ri Pablo. Ekꞌuchiriꞌ ri Pablo xuchꞌikibꞌaꞌ ruwach puwiꞌ y xrilo kꞌo kubꞌulibꞌal ukꞌuꞌx chaꞌ kakunutajik,
ACT 14:10 lik ko xubꞌiꞌij che: —¡Chatyaktajoq y chat-takꞌala jusukꞌ chwi rawaqan! —xchaꞌ. Ekꞌu rachi xchꞌoplin chikaj y xbꞌinik.
ACT 14:11 Ekꞌu ri winaq echiriꞌ xkilo saꞌ ri xuꞌan ri Pablo, xkijeq kesikꞌin pa kichꞌaꞌtem rike, waꞌ e ri chꞌaꞌtem re Licaonia. Jewaꞌ kakibꞌiꞌij: «¡Waꞌ e tiox kiꞌanom lo achijabꞌ che kibꞌ y xeqaj lo wara qukꞌ!» kechaꞌ.
ACT 14:12 Che ri Bernabé xkibꞌiꞌij e tiox Júpiter, yey che ri Pablo xkibꞌiꞌij e tiox Mercurio ma e rire ri más kachꞌawik.
ACT 14:13 Ekꞌu raj chakunel re ri tiox Júpiter, ri kꞌo rocho pa okibꞌal lo re ri tinamit, xebꞌukꞌam lo toroꞌibꞌ y kotzꞌiꞌj yijbꞌam re wiqonik chwach taq ri okibꞌal re ri templo. Yey junam kukꞌ rukꞌiyal winaq xkaj kekikamisaj rawaj re kiqasaꞌn chikiwach ri Bernabé y ri Pablo.
ACT 14:14 Echiriꞌ xkita waꞌ ri kebꞌ taqoꞌn Bernabé y Pablo, xkirichꞌij ri kiqꞌuꞌ y xkimin kibꞌ chikixoꞌl rukꞌiyal winaq; kesikꞌinik jewaꞌ kakibꞌiꞌij:
ACT 14:15 «¡Achijabꞌ!, ¿suꞌchak kaꞌan alaq waꞌ? Ma riꞌoj xa oj achijabꞌ junam qawach ukꞌ alaq. Wa Utzilaj Tzij kaqatzijoj che alaq e chaꞌ kaya kan alaq ri na il ta uwach y katzukuj alaq ri Dios kꞌaslik, ri xꞌanaw re ruwa kaj, ruwachulew, ri mar y ronoje ri kꞌo che taq waꞌ.
ACT 14:16 Tobꞌ rojertan ri Dios xuya luwar chike taq ri tinamit kebꞌin chupa taq ri bꞌe kakaj rike,
ACT 14:17 na rukꞌ ta kꞌu riꞌ, ri Dios na roqꞌotam ta kꞌana uqꞌalajisaxik china Rire ruma taq ri utz kuꞌano. Ma kuya lo ri jabꞌ y kuya lo ruqꞌijol echiriꞌ lik kꞌo molonik. E Rire ri kaꞌanaw re lik kꞌo kaqatijo y kꞌo kiꞌkotemal chupa ri qanimaꞌ» kechaꞌ.
ACT 14:18 Ri Bernabé y ri Pablo, tobꞌ ketajin che ubꞌiꞌxikil waꞌ, lik kꞌayew xekiqꞌatej rukꞌiyal winaq chaꞌ na kekikamisaj ta rawaj re qasaꞌn chikiwach rike.
ACT 14:19 Chupa kꞌu laꞌ laꞌ joqꞌotaj xekꞌun lo jujun aj judiꞌabꞌ e aj pa ri tinamit Antioquía y ri tinamit Iconio. Rike xkikoj pa kijolom rukꞌiyal winaq kakiꞌan ri Pablo paꞌbꞌaj. Y ekꞌu xkiꞌano. Tekꞌuchiriꞌ, xkichararej bꞌi ri Pablo tzaꞌm tinamit. E chikiwach rike, kaminaq chik.
ACT 14:20 Pero echiriꞌ ri kikojom rubꞌiꞌ ri Cristo xkisut rij ri Pablo, rire xyaktajik y xok tanchi chupa ri tinamit. Chukaꞌm qꞌij xel bꞌi rukꞌ ri Bernabé y junam xebꞌek pa ri tinamit Derbe.
ACT 14:21 Xkitzijoj kꞌu ri Utzilaj Tzij chupa wa tinamit y ukꞌiyal tikawex xkikoj rubꞌiꞌ ri Cristo. Tekꞌuchiriꞌ, xetzelej tanchi lo chupa ri tinamit Listra, ri tinamit Iconio y ri tinamit Antioquía.
ACT 14:22 Xkinimarisaj kꞌu kan kikꞌuꞌx ri hermanos y lik xekipixabꞌaj chaꞌ katikiꞌ chi utz ri kubꞌulibꞌal kikꞌuꞌx rukꞌ ri Jesús, jewaꞌ kakibꞌiꞌij chike: «Lik chirajawaxik rukꞌ ukꞌiyal kꞌaxkꞌobꞌik kojok chupa rutaqanik ri Dios» kechaꞌ.
ACT 14:23 Yey xekikoj kan e aj wach chujujunal taq iglesia. Xkiꞌan kꞌu orar y ayunar kukꞌ. Tekꞌuchiriꞌ, xkitzꞌonoj che ri Qanimajawal kebꞌuchajij janipa ri lik kubꞌul kikꞌuꞌx rukꞌ Rire.
ACT 14:24 Xebꞌikꞌow kꞌu pa taq ri luwar re Pisidia y xebꞌopon pa ri luwar re Panfilia.
ACT 14:25 Xkitzijoj kꞌu ri Utzilaj Tzij chupa ri tinamit Perge. Tekꞌuchiriꞌ, xkimaj bꞌi pa ri tinamit Atalia.
ACT 14:26 Chiriꞌ kꞌu riꞌ xkimaj bꞌi pa barco y xetzelej Antioquía. Waꞌ e ri tinamit pa xtzꞌonox wubꞌi rutoꞌbꞌal ri Dios pakiwi ri Pablo y ri Bernabé chaꞌ kakiꞌan ri chak yaꞌom pakiqꞌabꞌ, yey waꞌ wa chak kikꞌisom chi rike.
ACT 14:27 Echiriꞌ xebꞌoponik, xekimol kichiꞌ konoje ri kikojom rubꞌiꞌ ri Cristo y xkitzijoj kꞌu chike ronoje ri xuꞌan ri Dios kukꞌ y suꞌanik xuya chike ri na e ta aj judiꞌabꞌ kebꞌuꞌan xa jun kukꞌ ri kikubꞌam kikꞌuꞌx rukꞌ ri Qanimajawal Jesucristo.
ACT 14:28 Xekanaj kꞌu kan chiriꞌ ukꞌiyal qꞌij kukꞌ ri kikojom rubꞌiꞌ ri Cristo.
ACT 15:1 Chupa taq riꞌ laꞌ la qꞌij xebꞌopon Antioquía jujun achijabꞌ e petinaq Judea y xkijeq kekꞌutun chikiwach ri kikojom rubꞌiꞌ ri Cristo, jewaꞌ kakibꞌiꞌij: «We na kakoj ta ri retalil re circuncisión che alaq jelaꞌ pachaꞌ rutaqanik kan ri Moisés, riꞌ na kakolobꞌetaj ta alaq» kechaꞌ.
ACT 15:2 Ekꞌu ri Pablo y ri Bernabé lik xebꞌek chunimal puwi wa kꞌutunik kukꞌ waꞌchijabꞌ. Kꞌisbꞌal re, konoje xkichꞌobꞌ raqan saꞌ ri kakiꞌano; e ketaq bꞌi ri Pablo y ri Bernabé kukꞌ jujun chik chaꞌ kebꞌek Jerusalem re kebꞌeꞌchꞌaꞌt chwi waꞌ kukꞌ ri e taqoꞌn re ri Jesús y jujun chik e aj wach re riglesia.
ACT 15:3 E taq kꞌu ri etaqom bꞌi kuma riglesia re Antioquía, xebꞌikꞌow pa taq ri tinamit re Fenicia y re Samaria, y chujujunal luwar xkitzijoj suꞌanik ri na e ta aj judiꞌabꞌ kiyaꞌom kan ri kibꞌinik re ojertan chaꞌ e kakitaqej ri Dios. Ruma kꞌu riꞌ waꞌ, konoje ri hermanos xetaw re, lik xekiꞌkot che.
ACT 15:4 Echiriꞌ xebꞌopon Jerusalem, xekꞌul kuma taq ri hermanos, ri e taqoꞌn y jujun chik e aj wach re riglesia. Xkitzijoj kꞌu chike ronoje ri uꞌanom ri Dios kukꞌ.
ACT 15:5 Pero e kꞌo jujun chike ri kikojom rubꞌiꞌ ri Cristo e kukꞌil ri aj fariseos, rike xeyaktajik y jewaꞌ xkibꞌiꞌij: —Lik chirajawaxik kakoj ri retalil re circuncisión chike taq ri na e ta aj judiꞌabꞌ kakikoj rubꞌiꞌ ri Dios yey ketaq che kakiꞌan janipa ri kubꞌiꞌij ri Tzij Pixabꞌ re ri Moisés —xechaꞌ.
ACT 15:6 Xkimol kꞌu kibꞌ ri e taqoꞌn y jujun chik e aj wach re riglesia chaꞌ kechꞌaꞌt chwi waꞌ.
ACT 15:7 Lik naj kꞌut xkichapalaꞌ kibꞌ chikiwach puwi waꞌ. Tekꞌuchiriꞌ, ri Pedro xyaktajik y xubꞌiꞌij chike: —Hermanos achijabꞌ, ralaq etaꞌam alaq jampa chi lo qꞌij waꞌ ikꞌowinaq chwi xinuchaꞌ lo ri Dios chaꞌ chi nuchiꞌ riꞌin, ri na e ta aj judiꞌabꞌ kakita ri Utzilaj Tzij y kakikoj kꞌu rubꞌiꞌ ri Cristo.
ACT 15:8 Ri Dios, ri retaꞌam saꞌ ri kꞌo chupa ri kanimaꞌ ri tikawex, e xkꞌuluw ke ri na e ta aj judiꞌabꞌ kikojom rubꞌiꞌ ri Cristo. Yey xukꞌut waꞌ echiriꞌ xuya lo ri Santowilaj Ruxlabꞌixel chike rike jelaꞌ pachaꞌ xuꞌan qukꞌ riꞌoj.
ACT 15:9 Y junam xeril rike qukꞌ riꞌoj, ma xujosqꞌij ri kanimaꞌ che ri mak ruma ri kubꞌulibꞌal kikꞌuꞌx.
ACT 15:10 »Ekꞌu woꞌora, ¿suꞌchak kapetisaj alaq royowal ri Dios ruma ri keya alaq chuxeꞌ ukꞌiyal taqanik ri na e ta aj judiꞌabꞌ kikojom rubꞌiꞌ ri Cristo? Waꞌ e pachaꞌ eqaꞌn kakoj alaq chikiqul. Yey wa eqaꞌn, na xkichꞌij tane rukꞌaxik ri qatiꞌ-qamam ojertan y na qachꞌijom tane rukꞌaxik riꞌoj.
ACT 15:11 Noꞌj kꞌu riꞌoj e kaqajikibꞌaꞌ uwach waꞌ: Xa ne ruma ri unimal rutzil ukꞌuꞌx ri Qanimajawal Jesús kojkolobꞌetaj riꞌoj jelaꞌ pachaꞌ rike —xchaꞌ.
ACT 15:12 Konoje kꞌu riꞌ rukꞌiyal tikawex xetzꞌinkaꞌnik y xkiya kixikin chike ri Bernabé y ri Pablo, ma kakitzijoj ri nimaq taq kꞌutubꞌal re chuqꞌabꞌ uꞌanom ri Dios kuma rike chikixoꞌl ri na e ta aj judiꞌabꞌ.
ACT 15:13 Echiriꞌ xkikꞌis kechꞌaꞌt rike, ri Jacobo jewaꞌ xubꞌiꞌij: —Hermanos, chinta na pe alaq:
ACT 15:14 Ri Simón xutzijoj puwi ri nabꞌe laj echiriꞌ ri Dios xuqꞌalajisaj ribꞌ chikiwach ri na e ta aj judiꞌabꞌ chaꞌ chikixoꞌl rike kebꞌuchaꞌ janipa ri kebꞌuꞌana utinamit.
ACT 15:15 Y waꞌ kuꞌana xaqi jun rukꞌ ri kitzꞌibꞌam kan ri qꞌalajisanelabꞌ puwi ri ubꞌiꞌim lo ri Dios:
ACT 15:16 Ikꞌowinaq kꞌu waꞌ, kintzelej loq y kanyak tanchi ri rocho ri rey David wuluwubꞌinaq bꞌi, kankꞌojoj kꞌu ri tzaqinaq bꞌi che y kanꞌan kꞌakꞌ che.
ACT 15:17 Kanꞌan waꞌ chaꞌ ri nikꞌaj chik tikawex kakitzukuj ri Dios, waꞌ e taq ri tinamit na e ta aj judiꞌabꞌ, konoje ri e nuꞌanom nutinamit chike ma kikojom ri nubꞌiꞌ.
ACT 15:18 E waꞌ ri xubꞌiꞌij ri Dios Qajawxel, yey e ri uqꞌalajisam chi lo ojertan.
ACT 15:19 Ruma kꞌu laꞌ, chinuwach riꞌin na utz taj we kaqasachisaj kinaꞌoj ri na e ta aj judiꞌabꞌ kikojom rubꞌiꞌ ri Qanimajawal.
ACT 15:20 Ri qaꞌanaꞌ e chojtzꞌibꞌan pan chike y qayaꞌa pan kinaꞌoj chaꞌ kakesaj kibꞌ che taq ri kachꞌulan re junoq pachaꞌ taq ri ikꞌowisam chwa juna tiox, chaꞌ na kaketzꞌabꞌej ta uwa kiqꞌij kukꞌ jujun chik na kikꞌulel taj, chaꞌ na kakitij ta tiꞌij ke awaj xa ejitzꞌam y chaꞌ na kakitij ta kikꞌ.
ACT 15:21 Ma xex wi chwi lo ojertan, ronoje qꞌij re uxlanibꞌal pa taq sinagogas e kꞌo ri kebꞌajilan re y ketzijon puwi ri Tzij Pixabꞌ tzꞌibꞌital kan ruma ri Moisés —xcha ri Jacobo.
ACT 15:22 E taq ri e taqoꞌn y ri jujun chik e aj wach re riglesia kukꞌ konoje ri hermanos, xukꞌul kikꞌuꞌx ri kechaꞌ jujun achijabꞌ chikixoꞌlibꞌal re ketaq bꞌi pa ri tinamit Antioquía rukꞌ ri Pablo y ri Bernabé chaꞌ kakikꞌam bꞌi jun carta re pixabꞌanik chike ri na e ta aj judiꞌabꞌ kikojom rubꞌiꞌ ri Cristo. Ekꞌu xekichaꞌ ri Judas ri kabꞌiꞌx Barsabás che y ri Silas, ma lik chom ilitajinaq ri kibꞌinik kisilabꞌik chikiwach ri hermanos.
ACT 15:23 Xyaꞌ kꞌu bꞌi ri carta pakiqꞌabꞌ, jewaꞌ kubꞌiꞌij: E riꞌoj oj taqoꞌn re ri Cristo kukꞌ ri e aj wach re riglesia y konoje ri hermanos wara Jerusalem, kaqaya pan rutzil wach alaq hermanos, ri kꞌo alaq chupa ri tinamit Antioquía y pa taq ri tinamit re Siria y re Cilicia. Kaqatzꞌibꞌaj kꞌu che ralaq, ri na alaq ta aj judiꞌabꞌ yey kojom alaq rubꞌiꞌ ri Cristo.
ACT 15:24 Riꞌoj qatom e kꞌo jujun ebꞌelinaq chiqaxoꞌl riꞌoj, tobꞌ na oj ta xojtaqaw bꞌi ke; yey rike ketajin che ukojik ri na utz taj pa jolom alaq rukꞌ ri kichꞌaꞌtem y jekꞌulaꞌ kisachisam ri naꞌoj alaq.
ACT 15:25 Ruma kꞌu laꞌ, xojchꞌaꞌt riꞌoj chiqawach puwi waꞌ, y ri xojkanaj wi e keqachaꞌ achijabꞌ y keqataq bꞌi ukꞌ alaq junam kukꞌ ri hermanos lik kꞌax keqanaꞌo, waꞌ e ri Bernabé y ri Pablo.
ACT 15:26 Waꞌ waꞌchijabꞌ kiyaꞌom kanimaꞌ tobꞌ ne kekam ruma ri kakitzijoj rubꞌiꞌ ri Qanimajawal Jesucristo.
ACT 15:27 Yey keqataq bꞌi ri Judas y ri Silas. Chikichiꞌ kꞌu rike kaqꞌalajin wi chiwach alaq ronoje wa xqataq ubꞌiꞌxikil che alaq.
ACT 15:28 Ma chwach ri Santowilaj Ruxlabꞌixel ri Dios y chiqawach riꞌoj, na utz taj kaqakoj juna chik eqaꞌn pawiꞌ alaq, xew kꞌu chirajawaxik taq waꞌ:
ACT 15:29 Matij alaq ri ikꞌowisam chi chikiwach ri tiox; matij alaq kikꞌ, matij alaq tiꞌij ke awaj xa ejitzꞌam; y metzꞌabꞌej ne uwa qꞌij alaq kukꞌ jujun chik na alaq ta kꞌulan kukꞌ. We kesaj kꞌu ibꞌ alaq che ronoje waꞌ, katajin alaq riꞌ che uꞌanik ri jusukꞌ. Chila kꞌu ibꞌ alaq.
ACT 15:30 Ekꞌu ri echaꞌtalik xkimaj bꞌi kibꞌe pa ri tinamit Antioquía. Ekꞌuchiriꞌ kimolom chi kichiꞌ ri kikojom rubꞌiꞌ ri Cristo, xkiya ri carta chike.
ACT 15:31 Echiriꞌ ri hermanos e kꞌo Antioquía xkajilaj wa carta, lik xekiꞌkotik ma ri tzꞌibꞌital chupa xukubꞌaꞌ kikꞌuꞌx.
ACT 15:32 Ekꞌu ri Judas y ri Silas, ruma e eqꞌalajisay runaꞌoj ri Dios, lik naj xechꞌaꞌt kukꞌ ri hermanos, xekipixabꞌaj chaꞌ lik kakichuqꞌubꞌej kibꞌ y jelaꞌ xkinimarisaj kikꞌuꞌx.
ACT 15:33 Xkikꞌowibꞌej kꞌu jujun qꞌij chiriꞌ. Tekꞌuchiriꞌ, xetaq bꞌi chi utzil chomal kuma ri hermanos chilaꞌ, chaꞌ jelaꞌ ketzelej tanchi kukꞌ ri etaqayom lo ke.
ACT 15:34 Noꞌj ri Silas xuchꞌobꞌo utz kakanaj kan chiriꞌ.
ACT 15:35 Ekꞌu ri Pablo y ri Bernabé xekꞌojiꞌ pa ri tinamit Antioquía. Y junam kukꞌ ukꞌiyal kachbꞌiꞌil, xekꞌutun chwi Ruchꞌaꞌtem ri Dios y ri Utzilaj Tzij puwi ri Qanimajawal.
ACT 15:36 Ikꞌowinaq chi kꞌu jujun qꞌij, ri Pablo xubꞌiꞌij che ri Bernabé: «Chojtzelej tanchi kukꞌ ri kikojom rubꞌiꞌ ri Cristo pa taq ronoje ri tinamit pa qatzijom wi ri Utzilaj Tzij re ri Qanimajawal, chaꞌ kebꞌeꞌqilaꞌ saꞌ ri kiꞌanom» xchaꞌ.
ACT 15:37 Yey ri Bernabé xraj kukꞌam bꞌi ri Juan kukꞌ, waꞌ e ri kabꞌiꞌx Marcos che.
ACT 15:38 Noꞌj ri Pablo na xukꞌul ta ukꞌuꞌx keꞌek ri Marcos kukꞌ, ma ri Marcos xeroqꞌotaj kan pa taq ri luwar re Panfilia y na erachbꞌilam ta chi lo che ri chak.
ACT 15:39 Xebꞌek kꞌu chunimal puwi waꞌ yey na jinta xeꞌela wi ri kichꞌaꞌtem chikiwach. Ruma kꞌu riꞌ, ri Pablo y ri Bernabé xkijach bꞌi kibꞌ. Ri Bernabé xukꞌam bꞌi ri Marcos rukꞌ. Xebꞌek kꞌu pa barco y xebꞌopon pa ri isla Chipre.
ACT 15:40 Yey ri Pablo xuchaꞌ bꞌi ri Silas chaꞌ karachbꞌilaj bꞌi che rubꞌenam. Ekꞌu ri hermanos e kꞌo Antioquía xkiꞌan orar y xkitzꞌonoj bꞌi ri unimal rutzil ukꞌuꞌx ri Dios pakiwiꞌ; tekꞌuchiriꞌ, xkimaj bꞌi kibꞌe.
ACT 15:41 Xebꞌikꞌow kꞌu pa taq ri luwar re Siria y re Cilicia, kakinimarisaj kan kikꞌuꞌx ri kakimol kibꞌ pa rubꞌiꞌ ri Cristo pa taq ri tinamit.
ACT 16:1 Tekꞌuchiriꞌ, xebꞌopon ri Pablo y ri Silas pa ri tinamit Derbe y pa ri tinamit Listra. Chiriꞌ Listra xkiriq jun ala Timoteo rubꞌiꞌ. Rire rukꞌ ruchu kikojom rubꞌiꞌ ri Cristo. Ruchu e kukꞌil raj judiꞌabꞌ, noꞌj ruqaw e kukꞌil raj griego.
ACT 16:2 Lik chom ruchꞌaꞌtibꞌexik ri Timoteo kakiꞌan ri hermanos e kꞌo pa ri tinamit Listra y pa ri tinamit Iconio.
ACT 16:3 Xraj kꞌu ri Pablo kukꞌam bꞌi rukꞌ; pero nabꞌe na, xukoj ri retalil re circuncisión che. Waꞌ e kuma raj judiꞌabꞌ e kꞌo pa taq wa luwar, ma konoje ketaꞌam ruqaw ri Timoteo e kukꞌil raj griego.
ACT 16:4 Chupa taq kꞌu ri tinamit pa kebꞌikꞌow wi, xkiya taq kan ri pixabꞌanik yaꞌtal chi kuma ri e taqoꞌn re ri Jesús y ri jujun chik e aj wach re riglesia e kꞌo Jerusalem, chaꞌ jelaꞌ kakitijoj kibꞌ che.
ACT 16:5 Jekꞌuriꞌlaꞌ taq ri kikojom rubꞌiꞌ ri Cristo lik xnimar ri kubꞌulibꞌal kikꞌuꞌx y katajin kikꞌiyarik ri jujun qꞌij.
ACT 16:6 Xebꞌikꞌow kꞌu pa taq ri luwar re Frigia y re Galacia, yey e ri Santowilaj Ruxlabꞌixel ri Dios xebꞌuqꞌatej kakitzijoj ri Utzilaj Tzij chiriꞌ pa ri luwar re Asia.
ACT 16:7 Ekꞌuchiriꞌ xebꞌopon chuchiꞌ taq pan ri luwar re Misia, xkitij uqꞌij kakimaj bꞌi pa taq ri luwar re Bitinia, pero ri Ruxlabꞌixel ri Dios xebꞌuqꞌatej.
ACT 16:8 Jekꞌuriꞌlaꞌ, jusukꞌ xebꞌikꞌow pa taq ri luwar re Misia y xeqaj pa ri tinamit Troas.
ACT 16:9 Chaqꞌabꞌ kꞌut xqꞌalajisax jun kꞌutubꞌal re ri Dios chwa ri Pablo. Xrilo kꞌo jun achi aj Macedonia, takꞌalik y kelaj kꞌu che: «Chikꞌow la qukꞌ Macedonia y chojtoꞌo la» kachaꞌ.
ACT 16:10 Echiriꞌ xril ri Pablo ri kꞌutubꞌal xyaꞌ chwach, na jampatana xqayijbꞌaꞌ ri qabꞌenam pa taq ri luwar re Macedonia y lik kꞌu xqajikibꞌaꞌ uwach e ri Dios ri kasikꞌin qeꞌoj chaꞌ keꞌqatzijoj ri Utzilaj Tzij chilaꞌ.
ACT 16:11 Echiriꞌ xojel pa ri tinamit Troas, pa barco xojꞌek jusukꞌ pa ri isla Samotracia y chukaꞌm qꞌij kꞌut xojeꞌela pa ri tinamit Neápolis.
ACT 16:12 Chiriꞌ kꞌu xojel wi y xojopon Filipos, waꞌ e jun tinamit lik kꞌo uwach pa ri luwar re Macedonia; yey ri ejeqel chupa e ukꞌiyal tikawex e aj Roma. Xojkꞌojiꞌ kꞌu jujun qꞌij chupa wa tinamit.
ACT 16:13 Chupa kꞌu jun qꞌij re uxlanibꞌal, xojel bꞌi tzaꞌm ja che ri tinamit y xojopon chuchiꞌ jun nimayaꞌ pa kakimol taq wi kibꞌ jujun ixoqibꞌ re kakiꞌan orar pa taq qꞌij re uxlanibꞌal. Xojtzꞌuyiꞌ kꞌut y xojchꞌaꞌt kukꞌ rixoqibꞌ kimolom kibꞌ chiriꞌ.
ACT 16:14 Jun chike waꞌ wa ixoqibꞌ, Lidia rubꞌiꞌ, lik kutataꞌ ri kubꞌiꞌij ri Pablo. Rixoq aj Tiatira y aj kꞌay chomilaj taq kꞌul morato lik kꞌi rajil yey lik kuloqꞌoj uqꞌij ri Dios. Ekꞌu ri Qanimajawal xuya che kukꞌul ri Utzilaj Tzij kutzijoj ri Pablo.
ACT 16:15 Tekꞌuchiriꞌ, xukꞌul ri bautismo junam kukꞌ konoje ri e kꞌo pa rocho, y xelaj kꞌu chiqe, jewaꞌ kubꞌiꞌij: —We chiwach ralaq lik kubꞌul chi nukꞌuꞌx riꞌin rukꞌ ri Qanimajawal, oj alaq riꞌ chiwocho y kanaj alaq chilaꞌ —kachaꞌ. Jekꞌulaꞌ xukoj pa qajolom kojkanajik.
ACT 16:16 Xuꞌana kꞌu jun qꞌij echiriꞌ kojꞌek pa oración, xqakꞌul jun ali kꞌo jun uxlabꞌixel re aj qꞌij rukꞌ. Wa ali lik kukoj bꞌi ukꞌiyal puaq chike ri rajaw pa kachakun wi ruma ri qꞌijonik kuꞌano.
ACT 16:17 Ekꞌu waꞌ waꞌli xojuternabꞌej ri Pablo y riꞌoj, lik ko kasikꞌinik, jewaꞌ kubꞌiꞌij: —Waꞌ waꞌchijabꞌ e raj chak ri Dios kꞌo chilaꞌ chikaj; rike e kakitzijoj che alaq ri bꞌe re kolobꞌetajik —kachaꞌ.
ACT 16:18 Ukꞌiyal qꞌij e riꞌ e kuꞌan waꞌ. Ekꞌu ri Pablo xikꞌow ukꞌuꞌx che. Ewi xtzuꞌn pan chirij y jewaꞌ xubꞌiꞌij che ri itzel uxlabꞌixel kꞌo rukꞌ rali: —Chupa rubꞌiꞌ ri Qanimajawal Jesucristo katintaqo chaꞌ katel bꞌi rukꞌ waꞌli —xchaꞌ. Y chupa laꞌ la joqꞌotaj xel bꞌi ri itzel uxlabꞌixel che rali.
ACT 16:19 Ekꞌuchiriꞌ xkil ri e rajaw na jinta chi chꞌakanik koyeꞌem chirij rali, xekichap ri Pablo y ri Silas y xekikꞌam bꞌi pa ri luwar pa kakimol wi kibꞌ ri e aj qꞌatal tzij re ri tinamit.
ACT 16:20 Xekiya kꞌu chikiwach ri e aj qꞌatal tzij y jewaꞌ xkibꞌiꞌij: —Waꞌ waꞌchijabꞌ e kukꞌil raj judiꞌabꞌ y kisachisam kinaꞌoj ri qatinamit.
ACT 16:21 Ma ketajin che uyaꞌik kꞌutunik na taqal ta chiqe riꞌoj kaqakꞌulu, y na utz ta nenareꞌ kaqatijoj qibꞌ che, ma riꞌoj oj aj Roma —xechaꞌ.
ACT 16:22 Ekꞌuchiriꞌ, xeyaktaj ri tinamit chikij; y ri e aj qꞌatal tzij xetaqan che karaqix ri kiqꞌuꞌ chaꞌ kabꞌalakꞌux kipa.
ACT 16:23 Tekꞌuchiriꞌ lik bꞌalakꞌum chi kipa, xekikꞌam bꞌi pa cárcel. Y ri e aj qꞌatal tzij xkibꞌiꞌij che raj chajal re ri cárcel lik kebꞌuchajij chaꞌ na kebꞌanimaj taj.
ACT 16:24 Ewi raj chajal re ri cárcel xew xukꞌul wa taqanik, xebꞌukꞌam bꞌi ri Pablo y ri Silas y xebꞌuyaꞌa lo kꞌa pa lik naj wi upa che ri cárcel. Yey chaꞌ na kebꞌel tuloq, xuya ri kaqan pa laqꞌ cheꞌ.
ACT 16:25 Pero pa tikꞌil aqꞌabꞌ kꞌut, ri Pablo y ri Silas kakiꞌan orar y kakibꞌixoj bꞌixobꞌal che ri Dios. Yey e taq kꞌu ri e kꞌo pa ri cárcel kekitataꞌ.
ACT 16:26 Xaqikꞌateꞌt kꞌut xpe jun nimalaj kabꞌraqan y xujeq kuyikiyaꞌ kꞌa pa raqanibꞌal ri cárcel. Na jampatana kꞌu riꞌ xejaqajobꞌ ronoje taq ri okibꞌal re ri cárcel y xesotosobꞌ taq ri karena chike ri e kꞌo pa ri cárcel.
ACT 16:27 Echiriꞌ xkꞌun saq chwa raj chajal re ri cárcel, xrilo e jaqal taq chi ri okibꞌal re ri cárcel. Xresaj kꞌu lo ru espada chaꞌ kukamisaj ribꞌ; ma e chwach rire, konoje ri e kꞌo chi presoyil xebꞌanimaj bꞌi.
ACT 16:28 Pero ri Pablo ko xsikꞌinik, jewaꞌ xubꞌiꞌij che: —¡Makꞌo maꞌan che awibꞌil awibꞌ, ma qonoje oj kꞌo wara! —xchaꞌ.
ACT 16:29 Ekꞌu riꞌ raj chajal re ri cárcel xutzꞌonoj aqꞌ y lik kanik xok bꞌi. Kabꞌirbꞌotik xuxukubꞌaꞌ ribꞌ chikiwach ri Pablo y ri Silas.
ACT 16:30 Ewi xebꞌereselaꞌ loq y xutzꞌonoj chike: —Achijabꞌ, ¿saꞌ ri kanꞌano chaꞌ kinkolobꞌetajik? —xchaꞌ.
ACT 16:31 Ekꞌu rike xkibꞌiꞌij che: —Chakojo rubꞌiꞌ ri Qanimajawal Jesucristo y jelaꞌ katkolobꞌetaj riꞌat kukꞌ konoje ri e kꞌo pa wocho —xechaꞌ.
ACT 16:32 Xkitzijoj kꞌu ri Utzilaj Tzij re ri Qanimajawal che rire y chike konoje ri e kꞌo pa rocho.
ACT 16:33 Chupa kꞌu ru orayil laꞌ la aqꞌabꞌ, raj chajal re ri cárcel xebꞌukꞌam bꞌi chaꞌ kuchꞌaj uwach ri kikꞌax. Tekꞌuchiriꞌ, xukꞌul ri bautismo rire junam kukꞌ konoje ri e kꞌo pa rocho.
ACT 16:34 Xebꞌukꞌam kꞌu bꞌi ri Pablo y ri Silas chirocho y xebꞌutzuqu. Lik xkiꞌkotik junam kukꞌ konoje ri e kꞌo pa rocho ruma ri xkꞌubꞌiꞌ kikꞌuꞌx rukꞌ ri Dios.
ACT 16:35 Ekꞌuchiriꞌ xsaqirik, ri e aj qꞌatal tzij xekitaq bꞌi jujun ausiliaribꞌ chilaꞌ rukꞌ raj chajal re ri cárcel chaꞌ keꞌkibꞌiꞌij waꞌ: «Chebꞌatzoqopij bꞌi laꞌ la achijabꞌ.»
ACT 16:36 Ekꞌu raj chajal re ri cárcel xuqꞌatisaj waꞌ chwa ri Pablo, jewaꞌ xubꞌiꞌij: —Ri e aj qꞌatal tzij kitaqom lo ubꞌiꞌxikil chaꞌ katzoqpix bꞌi alaq; jekꞌuriꞌlaꞌ utz kel bꞌi alaq chi utzil chomal —xcha chike.
ACT 16:37 Pero ri Pablo xubꞌiꞌij chike ri ausiliaribꞌ: —¡Na kojꞌek taj! Ma xkibꞌalakꞌuj qapa chiwachil, yey riꞌoj oj aj Roma. Y xojkiya ne pa cárcel, tobꞌ e laꞌ na jinta qꞌatbꞌal tzij xkiꞌano chaꞌ kaqꞌalajinik we kꞌo qamak o na jintaj. Yey kꞌu riꞌ woꞌora, xa xeꞌlaqꞌay kakaj kojkesaj bꞌi. ¡Waꞌ na usukꞌ ta kꞌenoq! We e riꞌ, e chepeta rike chaꞌ kojkesaj bꞌi —xchaꞌ.
ACT 16:38 Ekꞌu ri ausiliaribꞌ xeꞌkiqꞌatisaj waꞌ chikiwach ri e aj qꞌatal tzij, y rike lik xkixiꞌij kibꞌ echiriꞌ xkito e aj Roma ri Pablo y ri Silas.
ACT 16:39 Xebꞌopon kꞌu kukꞌ y lik xkitzꞌonoj chike kikuyu kimak. Tekꞌuchiriꞌ, xekesaj lo chupa ri cárcel y lik xebꞌelaj chike chaꞌ kebꞌel bꞌi chupa ri tinamit.
ACT 16:40 Ewi ri Pablo y ri Silas xebꞌel bꞌi chupa ri cárcel y xkimaj bꞌi chirocho ri Lidia. Xebꞌeꞌkila kꞌu kan ri kikojom rubꞌiꞌ ri Cristo, xekipixabꞌaj y xkinimarisaj kan kikꞌuꞌx. Y xebꞌel kꞌu bꞌi chiriꞌ.
ACT 17:1 Ri Pablo, ri Silas y ri Timoteo xebꞌikꞌow pa taq ri tinamit Anfípolis y Apolonia, y xebꞌopon kꞌu pa ri tinamit Tesalónica. Chiriꞌ kꞌu riꞌ kꞌo jun sinagoga ke raj judiꞌabꞌ.
ACT 17:2 Ekꞌu ri Pablo jelaꞌ pachaꞌ xex kuꞌan wi, xeꞌek pa ri sinagoga; oxibꞌ semana kꞌut e riꞌ xopon chilaꞌ chupa taq ri qꞌij re uxlanibꞌal y xchꞌaꞌt kukꞌ puwi ri Cristo, Ruchaꞌoꞌn lo ri Dios. Lik kꞌut xuqꞌalajisaj ri tzꞌibꞌital kan chupa Ruchꞌaꞌtem ri Dios
ACT 17:3 pa kubꞌiꞌij wi lik chirajawaxik wi ri Cristo xutij kꞌax, xkamisaxik y xkꞌastaj lo chikixoꞌl ri ekaminaq. Y xubꞌiꞌij kꞌu chike: «Ri Jesús, wa kantzijoj che alaq, waꞌ e ri Cristo, Ruchaꞌoꞌn lo ri Dios» xchaꞌ.
ACT 17:4 E kꞌo kꞌu jujun chike wa aj judiꞌabꞌ xkikoj rubꞌiꞌ ri Cristo y xebꞌuꞌan e kukꞌil ri Pablo y ri Silas. Jekꞌulaꞌ, lik e kꞌi chike ri e aj Grecia ri kakiloqꞌoj uqꞌij ri Dios, xkikoj rubꞌiꞌ ri Cristo; yey e kꞌi chike waꞌ e ixoqibꞌ lik kꞌo kiwach.
ACT 17:5 Ruma waꞌ xok retzelal kꞌuꞌx pa kanimaꞌ raj judiꞌabꞌ na kikojom ta rubꞌiꞌ ri Cristo. Xekiriq kꞌu jujun achijabꞌ itzel kikꞌuꞌx xa eqꞌeꞌkotel pa taq bꞌe, y kukꞌ waꞌ xekimol ukꞌiyal winaq y xekichꞌuꞌjerisaj kꞌu ri tinamit. Xeꞌkimina kꞌu kibꞌ pa rocho ri Jasón, kekitzukuj ri Pablo y ri Silas chaꞌ kekesaj loq y kekiya pakiqꞌabꞌ ri tinamit.
ACT 17:6 Pero na xekiriq taj. Xekikꞌam kꞌu lo ri Jasón y jujun chike ri kikojom rubꞌiꞌ ri Cristo, y xeꞌkiyaꞌa chikiwach ri e aj wach re ri tinamit. Kesikꞌin kꞌu riꞌ, kakibꞌiꞌij: «¡Waꞌ waꞌchijabꞌ e kisachom kinaꞌoj konoje ri tikawex che ruwachulew rukꞌ ri kikꞌutunik, yey woꞌora e kꞌuninaq wara!
ACT 17:7 Ri Jasón ebꞌukꞌulum chirocho. Yey rike na e ta kakiꞌan janipa ri taqanik re ri nimalaj taqanel re Roma, ma kakibꞌiꞌij kꞌo jun chik rey, Jesús rubꞌiꞌ» kechaꞌ.
ACT 17:8 Echiriꞌ ri winaq y ri e aj wach re ri tinamit xkita waꞌ, xkijeq lik ketukukik.
ACT 17:9 Ekꞌu ri Jasón y taq ri rachbꞌiꞌil xkiya chike ri e aj wach jun tojonik chirajawaxik kaꞌanik chaꞌ ketzoqopix bꞌi, y jekꞌulaꞌ xetzoqopix bꞌi.
ACT 17:10 Ewi ri hermanos na jampatana chaqꞌabꞌ xekitaq bꞌi ri Pablo y ri Silas pa ri tinamit Berea. Echiriꞌ rike xebꞌoponik, xebꞌek pa ri sinagoga ke raj judiꞌabꞌ.
ACT 17:11 Yey wa aj judiꞌabꞌ e kꞌo Berea na tzꞌapil ta ri kinaꞌoj pachaꞌ ri e kꞌo pa ri sinagoga re Tesalónica, ma xkiya kixikin che ri xtzijox chike y lik xkikꞌulu. Ronoje qꞌij kꞌut lik kakiya kinaꞌoj chwi Ruchꞌaꞌtem ri Dios tzꞌibꞌital kanoq, ma e kakaj kakimaj usukꞌ we qatzij janipa ri tzijom chike.
ACT 17:12 Lik e kꞌi chike waꞌ xkikoj rubꞌiꞌ ri Cristo. Yey chike ri e aj Grecia, e kꞌi xkikoj rubꞌiꞌ ri Cristo, na xew ta achijabꞌ ma chikixoꞌl e kꞌo ixoqibꞌ lik kꞌo kiwach.
ACT 17:13 Echiriꞌ raj judiꞌabꞌ e kꞌo Tesalónica xketaꞌmaj katajin ri Pablo che utzijoxik ri Utzilaj Tzij re ri Dios pa ri tinamit Berea, xebꞌek chilaꞌ y jelaꞌ xeꞌkiꞌana chike rukꞌiyal winaq pachaꞌ ri kiꞌanom Tesalónica, xebꞌekichꞌiꞌo chaꞌ kakijeq ketukukik.
ACT 17:14 Ewi ri hermanos na jampatana xkitaq bꞌi ri Pablo chaꞌ keꞌek chuchiꞌ ri mar y kukoj bꞌi juna barco; yey ri Silas y ri Timoteo xekanaj chiriꞌ Berea.
ACT 17:15 E kꞌo kꞌu jujun xkachbꞌilaj bꞌi ri Pablo y xkikꞌam bꞌi chupa ri tinamit Atenas. Chilaꞌ ri Pablo xubꞌiꞌij chike ri aj Berea: «Chibꞌiꞌij chike ri Silas y ri Timoteo kakilij loq chaꞌ kakiriq kibꞌ wukꞌ wara.» Y echiriꞌ xetzelej Berea, xkibꞌiꞌij waꞌ chike ri Silas y ri Timoteo.
ACT 17:16 Xaloqꞌ kꞌu ri Pablo eroyeꞌem ri Silas y ri Timoteo pa ri tinamit Atenas, rire lik xuꞌan kꞌax ranimaꞌ che echiriꞌ xrilo kiyaꞌom kibꞌ ri tinamit che kiloqꞌnimaxik ukꞌiyal tiox.
ACT 17:17 Ewi pa ri sinagoga xujeq kachꞌaꞌt kukꞌ ri e aj judiꞌabꞌ y ri na e ta aj judiꞌabꞌ, ri lik kakiloqꞌoj uqꞌij ri Dios. Yey jelaꞌ xuꞌan ronoje qꞌij chwa ri kꞌaybꞌal kukꞌ konoje ri kakimol kibꞌ chiriꞌ.
ACT 17:18 Chikixoꞌl rike e kꞌo jujun achijabꞌ kabꞌiꞌx chike “e aj naꞌoj”, waꞌ e kukꞌil raj epicúreos y raj estóicos. Rike xkichapalaꞌ kibꞌ rukꞌ ri Pablo puwi ri kukꞌutu. Jujun kakibꞌiꞌij: «¿Saꞌ ri karaj kubꞌiꞌij wa werewotel re chꞌaꞌtem?» kechaꞌ. Yey jujun chik kakibꞌiꞌij: «Waꞌ waꞌchi pachaꞌ tzijonel ke jujun chik dios e aj naj» kechaꞌ. Xkibꞌiꞌij waꞌ ma ri Pablo kutzijoj ri Utzilaj Tzij re ri Jesús chike y katzijon puwi ri kꞌastajibꞌal.
ACT 17:19 Xkikꞌam kꞌu bꞌi ri Pablo y xeꞌkiyaꞌa pa ri luwar Areópago kecha che, pa kakimol wi kibꞌ rachijabꞌ lik kꞌo kinaꞌoj. Y jewaꞌ xkibꞌiꞌij che: «Riꞌoj kaqaj kaqetaꞌmaj saꞌ wa kꞌakꞌ kꞌutunik kaꞌan rilal,
ACT 17:20 ma lik junwi ri kꞌutunik katzijoj la chiqawach riꞌoj. Kaqaj kꞌut kaqamaj usukꞌ saꞌ keꞌelawi ri kakꞌut la» xechaꞌ.
ACT 17:21 Jelaꞌ xkibꞌiꞌij ma konoje raj Atenas y ri e aj naj ejeqel chiriꞌ, xew bꞌenaq kikꞌuꞌx che taq ri kakito y kechꞌaꞌt chwi taq kꞌakꞌ naꞌoj katajin utayik.
ACT 17:22 Ewi ri Pablo, xtakꞌiꞌ chikixoꞌl pa ri Areópago y jewaꞌ xubꞌiꞌij: «Alaq achijabꞌ aj Atenas, che ronoje ri kaꞌan alaq, kanwilo e lik bꞌenaq kꞌuꞌx alaq kukꞌ taq ri tiox alaq.
ACT 17:23 Ma xaloqꞌ xinmalakat pa wa tinamit alaq, xinwil taq ri luwar pa keloqꞌnimaj taq wi ri tiox alaq, yey xineꞌtzaq ne chwi jun altar pa tzꞌibꞌital wi waꞌ: «CHE RI DIOS NA ETAꞌMATAL TA UWACH.» Ekꞌu riꞌ wa jun kaloqꞌnimaj alaq uqꞌij tobꞌ na etaꞌam ta alaq uwach, e waꞌ Rire ri kantzijoj che alaq.
ACT 17:24 Rire e Dios xꞌanaw ruwachulew y ronoje taq ri kꞌo chwach yey e Rajaw ruwa kaj y ruwachulew. Na jeqel ta kꞌu pa juna ja ꞌanom xa kuma achijabꞌ.
ACT 17:25 Na kajawax ta che Rire ri oj tikawex kaqatoꞌo; ma e ne Rire ri kayaꞌw lo chiqe qonoje ri qakꞌaslem, ri quxlabꞌ y ronoje ri kajawax chiqe.
ACT 17:26 »Yey xa kꞌu che jun tikawex, ri Dios xukꞌiyarisaj kiwach konoje ri tikawex chaꞌ kejeqiꞌ che ronoje ruwachulew. Yey e Rire chꞌobꞌoyom loq pa taq kebꞌeꞌjeqela wi chujujunal tinamit y janipa taq ri kiqꞌijol che ruwachulew.
ACT 17:27 Xuꞌan waꞌ chaꞌ kakitzukuj Rire, yey tobꞌ ne pachaꞌ kemalal pa qꞌequꞌm, kakiriq na. Pero paqatzij wi, ri Qaqaw na naj ta kꞌo wi chiqe chiqajujunal.
ACT 17:28 Ma ruma ri Dios oj kꞌaslik, kojsilabꞌik y oj jeqel che ruwachulew; e pachaꞌ ri kibꞌiꞌim kan jujun aj tzꞌibꞌanel re ri tinamit alaq: “Riꞌoj oj ralkꞌoꞌal ri Dios.”
ACT 17:29 »Ruma kꞌu oj ralkꞌoꞌal ri Dios, maqachꞌobꞌ kꞌu riꞌ we Rire junam uwach kukꞌ ri tiox xa e ꞌanom rukꞌ oro, rukꞌ plata o rukꞌ abꞌaj, xa yijbꞌitalik y noꞌjital kuma rachijabꞌ.
ACT 17:30 Ojertan lo riꞌ jelaꞌ ri kinaꞌoj taq ri winaq puwi ri Dios, noꞌj ya kꞌu xikꞌow ruqꞌijol waꞌ. Ma woꞌora ri Dios kebꞌutaq konoje ri tikawex che ronoje luwar chaꞌ kakitzelej kitzij chwach.
ACT 17:31 Ma Rire uqꞌatom chi jun qꞌij echiriꞌ kuꞌan ri jusukꞌ qꞌatbꞌal tzij pakiwi konoje ri tikawex che ruwachulew. Kuꞌana kꞌu waꞌ ruma ri Jun Achi Uchaꞌom loq. Yey echiriꞌ ri Dios xukꞌastajisaj lo ri Jesús chikixoꞌl ri ekaminaq, e xujikibꞌaꞌ uwach Rire e ri Jun uchaꞌom loq chaꞌ kuꞌan waꞌ» xchaꞌ.
ACT 17:32 Ekꞌuchiriꞌ xkita puwi ri kꞌastajibꞌal ke ri ekaminaq, jujun chike xkijeq kakichꞌamij waꞌ. Noꞌj jujun chik xkibꞌiꞌij: «Kaqata tanchi la puwi wa kꞌutunik juna chik qꞌij» xechaꞌ.
ACT 17:33 Tekꞌuchiriꞌ, xel bꞌi ri Pablo chikixoꞌl ri kimolom kibꞌ.
ACT 17:34 Noꞌj jujun kꞌu chike wa tikawex xebꞌuꞌan e kukꞌil rukꞌ ri Pablo, ma xkikoj rubꞌiꞌ ri Cristo. Chikixoꞌl waꞌ kꞌo ri Dionisio (rire e kukꞌil rachijabꞌ lik kꞌo kinaꞌoj, ri kakimol kibꞌ pa ri Areópago), yey kꞌo jun ixoq Dámaris rubꞌiꞌ y jujun chik.
ACT 18:1 Ikꞌowinaq chi taq waꞌ, ri Pablo xel bꞌi pa ri tinamit Atenas y xeꞌek Corinto.
ACT 18:2 Chilaꞌ xuriq jun achi e kukꞌil raj judiꞌabꞌ, Aquila rubꞌiꞌ. Waꞌ waꞌchi alaxinaq pa ri luwar re Ponto. Ri Aquila rukꞌ ri rixoqil Priscila kꞌakꞌ e petinaq pa ri luwar re Italia, ma ri taqanel Claudio xtaqan che kebꞌel bꞌi pa ri tinamit Roma konoje raj judiꞌabꞌ. Ekꞌu riꞌ ri Pablo xeꞌbꞌina kukꞌ.
ACT 18:3 Ri kichak rike e xaqi junam rukꞌ ri kuriq ri Pablo, waꞌ e kakiꞌan carpas. E uwariꞌche xkanaj ri Pablo kukꞌ y junam kechakunik.
ACT 18:4 Yey ronoje qꞌij re uxlanibꞌal xtzijon pa ri sinagoga, kachꞌaꞌt kukꞌ ri e aj judiꞌabꞌ y ri na e ta aj judiꞌabꞌ y kukoj ri lik usukꞌ pa kijolom.
ACT 18:5 Echiriꞌ ri Silas y ri Timoteo xepe pa ri luwar re Macedonia y xebꞌopon Corinto, ri Pablo xa jumul xuya ribꞌ che utzijoxik ri Utzilaj Tzij, kuqꞌalajisaj waꞌ chikiwach raj judiꞌabꞌ: Ri Jesús e ri Cristo, Ruchaꞌoꞌn lo ri Dios.
ACT 18:6 Pero raj judiꞌabꞌ xkijeq kakiqꞌatej ri Pablo y kakibꞌiꞌij itzel taq chꞌaꞌtem chirij. Ekꞌu ri Pablo xujabꞌajaꞌ ruqꞌuꞌ chikiwach, kꞌutubꞌal re na utz ta ri kakiꞌano, y jewaꞌ xubꞌiꞌij chike: «Chiꞌij kꞌu alaq kel wi ri kakam alaq pa mak; na numak ta chi riꞌin che alaq. Chwi kꞌu woꞌora kiꞌntzijoj ri Utzilaj Tzij chike ri na e ta aj judiꞌabꞌ» xchaꞌ.
ACT 18:7 Xel kꞌu bꞌi pa ri sinagoga y xeꞌek chirocho jun achi Justo rubꞌiꞌ. Rire lik kꞌo xiꞌin ibꞌ pa ranimaꞌ chwach ri Dios, yey ri rocho xa putzal ri sinagoga kꞌo wi.
ACT 18:8 Ekꞌu raj wach re ri sinagoga, jun achi Crispo rubꞌiꞌ, xukoj rubꞌiꞌ ri Qanimajawal kukꞌ konoje ri e kꞌo pa rocho. Y lik e kꞌi chike raj Corinto xkita ri Utzilaj Tzij, xkikoj rubꞌiꞌ ri Cristo y xkikꞌul ri bautismo.
ACT 18:9 Kꞌo kꞌu jun aqꞌabꞌ ri Qanimajawal xuqꞌalajisaj jun kꞌutubꞌal chwach ri Pablo, jewaꞌ xubꞌiꞌij che: «Maxiꞌij awibꞌ; e chatzijoj ri Utzilaj Tzij y matanabꞌaꞌ ubꞌiꞌxikil.
ACT 18:10 Ma Riꞌin in kꞌo awukꞌ y na jinta kꞌo kaꞌanaw ri na utz taj chawe; ma lik e kꞌi ri e nutinamit e kꞌo chupa wa tinamit» xchaꞌ.
ACT 18:11 Ekꞌu ri Pablo xkanaj chiriꞌ pa ri tinamit Corinto jun junabꞌ rukꞌ waqibꞌ ikꞌ; ewi kakꞌutun chwi ri Utzilaj Tzij re ri Dios chikiwach ri tikawex.
ACT 18:12 Yey xuꞌana chupa taq ri qꞌij echiriꞌ ri Galión kataqan puwi taq ri luwar re Acaya, raj judiꞌabꞌ xkiꞌan tzij chikiwach chaꞌ keyaktaj chirij ri Pablo. Xkikꞌam kꞌu bꞌi pa qꞌatbꞌal tzij
ACT 18:13 y jewaꞌ xkibꞌiꞌij: —Waꞌ waꞌchi katajin che ukojik pa kijolom ri tikawex chaꞌ kakiloqꞌoj uqꞌij ri Dios rukꞌ junwi chi kꞌutunik, na e ta pachaꞌ ri kubꞌiꞌij taq ri tzijpixabꞌ qe riꞌoj —xechaꞌ.
ACT 18:14 Yey echiriꞌ ri Pablo xraj kachꞌaꞌtik, ri taqanel Galión jewaꞌ xubꞌiꞌij chike: —Alaq aj judiꞌabꞌ, we uꞌanom ri na usukꞌ taj o juna mak lik nim chirij ri qꞌatbꞌal tzij, riꞌ lik ubꞌe kanto saꞌ ri kabꞌiꞌij alaq y kanqꞌat kꞌu tzij puwiꞌ.
ACT 18:15 Noꞌj we xa e petowinaq chwi taq chꞌaꞌtem, chwi taq bꞌiꞌaj y chwi taq ri tzijpixabꞌ e alaq, yijbꞌaꞌ kꞌu riꞌ alaq chiwach ralaq. Ma na kuaj taj kinuꞌan aj qꞌatal tzij riꞌin puwi taq waꞌ —xchaꞌ.
ACT 18:16 Y rukꞌ waꞌ xebꞌeresaj lo chupa ri qꞌatbꞌal tzij.
ACT 18:17 Ekꞌuchiriꞌ, konoje ri e aj Grecia xkichap ri Sóstenes, ri aj wach re ri sinagoga. E laꞌ chwach ri qꞌatbꞌal tzij xkijeq kakiꞌan kꞌax che; pero ri taqanel Galión na xok ta kꞌana il che waꞌ.
ACT 18:18 Ekꞌu ri Pablo lik ukꞌiyal qꞌij xuꞌan chiriꞌ kukꞌ ri hermanos. Tekꞌuchiriꞌ xuya kan ri kꞌisbꞌal uchꞌaꞌtem chike, xok pa barco y xeꞌek pa ri luwar re Siria, junam kukꞌ ri Priscila y ri Aquila. Echiriꞌ xebꞌikꞌow chupa ri tinamit Cencrea, ri Pablo xusokaj bꞌi ruwiꞌ ruma uꞌanom jun bꞌiꞌtisinik che ri Dios.
ACT 18:19 Chwi kꞌu riꞌ xebꞌopon pa ri tinamit Éfeso y chiriꞌ xekanaj kan ri Priscila y ri Aquila. Xok kꞌu ri Pablo chupa ri sinagoga y xujeq katzijon chikiwach raj judiꞌabꞌ.
ACT 18:20 Waꞌ lik xebꞌelaj che chaꞌ kakanaj kan ukꞌiyal qꞌij chiriꞌ kukꞌ; noꞌj rire xubꞌiꞌij na utz taj kakanajik.
ACT 18:21 Xew kꞌu xuya kan ri kꞌisbꞌal uchꞌaꞌtem chike, jewaꞌ xubꞌiꞌij: «Lik chirajawaxik in kꞌo Jerusalem chupa wa nimaqꞌij katajin loq; yey kinkꞌun tanchi ukꞌ alaq we ri Dios kuya luwar chwe kintzelej loq» xchaꞌ. Xok kꞌu chupa jun barco y xel bꞌi Éfeso.
ACT 18:22 Echiriꞌ xopon pa ri tinamit Cesarea, xumaj bꞌi ubꞌe Jerusalem chaꞌ kuꞌyaꞌa rutzil kiwach ri kikojom rubꞌiꞌ ri Cristo chilaꞌ. Tekꞌuchiriꞌ, xqaj pa ri tinamit Antioquía
ACT 18:23 y xkꞌojiꞌ jujun qꞌij chiriꞌ. Tekꞌuchiriꞌ, xel tanchi ubꞌi y xikꞌow tanchi pa taq ri luwar re Galacia y re Frigia chaꞌ kuꞌnimarisaj kan kikꞌuꞌx konoje ri kikojom rubꞌiꞌ ri Cristo.
ACT 18:24 Xopon kꞌu jun achi pa ri tinamit Éfeso, Apolos rubꞌiꞌ. Waꞌ e kukꞌil raj judiꞌabꞌ yey alaxinaq pa ri tinamit Alejandría. E jun achi lik kuriqo katzijonik y lik kꞌo retaꞌam puwi ri tzꞌibꞌital kan chupa Ruchꞌaꞌtem ri Dios.
ACT 18:25 Waꞌ waꞌchi tijotal lo chupa rubꞌe ri Qanimajawal. Ruma kꞌu lik kacha ukꞌuꞌx che taq ri kuꞌano, uyaꞌom ribꞌ che katzijonik y kakꞌutun chwi janipa ri retaꞌam chwi ri Qanimajawal, tobꞌ xew retaꞌam ri xukꞌut kan ri Juan puwi ri bautismo.
ACT 18:26 Rukꞌ kꞌu ronoje ruchuqꞌabꞌ, ri Apolos xujeq kakꞌutun pa ri sinagoga. Pero echiriꞌ ri Priscila y ri Aquila xkita rukꞌutunik, xkisikꞌij bꞌi kukꞌ utukel y xkiqꞌalajisaj rusukꞌlikil ri bꞌe re ri Dios che.
ACT 18:27 Echiriꞌ ri Apolos xraj kaqꞌax pan pa taq ri luwar re Acaya, ri hermanos xkinimarisaj bꞌi ukꞌuꞌx y xkitzꞌibꞌaj bꞌi jun carta chike rutinamit ri Dios chilaꞌ chaꞌ kakikꞌul chi utz. Ekꞌuchiriꞌ xopon chilaꞌ, ri Apolos lik xuꞌana toꞌbꞌel chike ri kikojom rubꞌiꞌ ri Cristo ruma ri unimal rutzil ukꞌuꞌx ri Dios.
ACT 18:28 Ma na kuxiꞌij ta kꞌana ribꞌ, e laꞌ chiwachil kukꞌutu lik qatzij ri kubꞌiꞌij rire y na je ta laꞌ pachaꞌ ri kakibꞌiꞌij raj judiꞌabꞌ. E kuchapabꞌej ri tzꞌibꞌital kan pa Ruchꞌaꞌtem ri Dios re kuqꞌalajisaj: Ri Jesús e ri Cristo, Ruchaꞌoꞌn lo ri Dios.
ACT 19:1 Ekꞌuchiriꞌ kꞌa kꞌo ri Apolos pa ri tinamit Corinto, ri Pablo xeꞌek pa taq ri tinamit kꞌo lo chwi taq juyubꞌ y jelaꞌ xopon pa ri tinamit Éfeso. Chilaꞌ xebꞌuꞌriqa jujun chike ri kikojom rubꞌiꞌ ri Cristo
ACT 19:2 y xutzꞌonoj kꞌu chike: —¿Xkꞌul alaq ri Santowilaj Ruxlabꞌixel ri Dios echiriꞌ xkoj alaq rubꞌiꞌ ri Cristo? —xcha chike. Yey rike xkikꞌul uwach: —¿Saꞌ riꞌ waꞌ? Ma riꞌoj na qatom tane kꞌenoq we kꞌo Ruxlabꞌixel ri Dios —xechaꞌ.
ACT 19:3 Ekꞌu ri Pablo xutzꞌonoj chike: —¿Saꞌ kꞌu ri bautismo xkꞌul alaq? —xchaꞌ. Rike xkikꞌul uwach: —E ri bautismo re ri Juan —xechaꞌ.
ACT 19:4 Xubꞌiꞌij kꞌu ri Pablo chike: —Ri bautismo xuya ri Juan e kꞌutubꞌal re ri tzelebꞌal tzij chwach ri Dios, yey xtzijon chikiwach ri tinamit chaꞌ kakikoj rubꞌiꞌ ri Jun katajin lo chirij rire; waꞌ e ri Jesús, ri Cristo —xchaꞌ.
ACT 19:5 Echiriꞌ xkita waꞌ, asu xkikꞌul ri bautismo pa rubꞌiꞌ ri Qanimajawal Jesús.
ACT 19:6 Ekꞌuchiriꞌ ri Pablo xuya ruqꞌabꞌ pakiwiꞌ, ri Santowilaj Ruxlabꞌixel ri Dios xqaj pakiwiꞌ y xkijeq kꞌu riꞌ kechꞌaꞌt pa jujun chik chꞌaꞌtem na kimajom taj y kakiqꞌalajisaj ri tzij uyaꞌom ri Dios chike.
ACT 19:7 Chi konoje waꞌ laj e juna kabꞌlajuj chi achijabꞌ.
ACT 19:8 Xok kꞌu ri Pablo pa ri sinagoga, yey oxibꞌ ikꞌ kꞌu riꞌ xutzijoj ri Utzilaj Tzij y na xuxiꞌij ta kꞌana ribꞌ che uꞌanik waꞌ. Kꞌolik kakichapalaꞌ kibꞌ kukꞌ raj judiꞌabꞌ puwi ri kukꞌutu y lik xutij uqꞌij chaꞌ kukoj pa kijolom ri usukꞌ puwi rutaqanik ri Dios.
ACT 19:9 Pero e kꞌo jujun chike xkiꞌan lik ko che kibꞌ y na xkaj ta kꞌu xkikoj rubꞌiꞌ ri Cristo; xkijeq kꞌu riꞌ tzel kechꞌaꞌt chirij ri Kꞌakꞌ Bꞌe re ri Utzilaj Tzij e laꞌ chikiwach rukꞌiyal winaq. Ekꞌu ri Pablo xresaj bꞌi ribꞌ chikixoꞌl y xebꞌukꞌam bꞌi ri kikojom rubꞌiꞌ ri Cristo. Chujujunal qꞌij kꞌut, ri Pablo katzijonik y lik kachꞌaꞌt chwi taq rukꞌutunik chikiwach, pa ri luwar pa kakꞌutun wi jun achi Tirano rubꞌiꞌ.
ACT 19:10 Pa kebꞌ junabꞌ e riꞌ jelaꞌ xuꞌan ri Pablo, kakꞌutunik. Ruma kꞌu laꞌ, konoje ri e aj judiꞌabꞌ y ri na e ta e aj judiꞌabꞌ e kꞌo pa taq ri luwar re Asia, xkita ri Utzilaj Tzij re ri Qanimajawal Jesús.
ACT 19:11 Yey ruma kꞌu ri Pablo, ri Dios xuꞌan nimaq taq milagros na jinta kꞌana ilitajinaq wi.
ACT 19:12 Xuꞌana ne riꞌ, kakꞌam bꞌi suꞌt o kꞌul ikꞌowisam chirij ri Pablo y kayaꞌ chike ri yewaꞌibꞌ, y jelaꞌ kekunutajik yey ri itzel uxlabꞌixel kebꞌel bꞌi chike tikawex.
ACT 19:13 Pero e kꞌo jujun aj judiꞌabꞌ xa ebꞌikꞌowel pa taq tinamit yey e kiwach kekesaj itzel uxlabꞌixel chike ri tikawex. Rike xkitij uqꞌij kakesaj bꞌi ritzel taq uxlabꞌixel chike ri winaq pa rubꞌiꞌ ri Qanimajawal Jesús, jewaꞌ kakibꞌiꞌij: «Chupa rubꞌiꞌ ri Jesús ri kutzijoj ri Pablo, kintaqan piwiꞌ chaꞌ kixel bꞌi» kechaꞌ.
ACT 19:14 Jujun chike ri kakiꞌan waꞌ e ri wuqubꞌ ukꞌajol jun achi Esceva rubꞌiꞌ. Rire e kukꞌil raj judiꞌabꞌ yey e kukꞌil ri nimaq e aj chakunel pa Rocho Dios.
ACT 19:15 Kꞌo kꞌu jun qꞌij, jun itzel uxlabꞌixel xukꞌul uwach chike ri wuqubꞌ ukꞌajol ri Esceva: «Wetaꞌam uwach ri Jesús y wetaꞌam china ri Pablo; noꞌj riꞌix, ¿ix chinoq?» xchaꞌ.
ACT 19:16 Ekꞌu rachi, ri kꞌo puqꞌabꞌ ri itzel uxlabꞌixel, xukꞌaq ribꞌ pakiwiꞌ y rukꞌ unimal uchuqꞌabꞌ xebꞌuchapo, yey ekꞌu riꞌ rire ri xuchꞌij kichuqꞌabꞌ y lik xuꞌan kꞌax chike. Jekꞌuriꞌlaꞌ, rike echꞌanalik xebꞌanimaj bꞌi chupa ri ja e kꞌo wi.
ACT 19:17 Y konoje ri ejeqel chupa ri tinamit Éfeso xketaꞌmaj waꞌ. Ekꞌu ri e aj judiꞌabꞌ y ri na e ta aj judiꞌabꞌ lik xkixiꞌij kibꞌ che; jekꞌuriꞌlaꞌ, waꞌ xeꞌeloq re yakbꞌal uqꞌij rubꞌiꞌ ri Qanimajawal Jesús.
ACT 19:18 Lik kꞌu e kꞌi riꞌ chike ri kikojom rubꞌiꞌ ri Cristo, xekꞌunik e laꞌ chiwachil kakiqꞌalajisaj taq janipa ri na utz taj kiꞌanom.
ACT 19:19 Lik kꞌu e kꞌi chike ri ebꞌuꞌanom aj itz y aj qꞌij, xkikꞌam taq lo ri kiwuj re majbꞌal itz y xkiporoj chikiwach konoje. Xajilax kꞌu riꞌ janipa kuꞌana ri rajil waꞌ y xuꞌana cincuenta mil chi saqil puaq re plata.
ACT 19:20 Jekꞌuriꞌlaꞌ xukich wubꞌi ribꞌ ri Utzilaj Tzij re ri Qanimajawal y xeꞌek uqꞌalajisaxik rukꞌ unimal chuqꞌabꞌ; yey lik katajin kikꞌiyarik ri kekojow re.
ACT 19:21 Ikꞌowinaq chi taq waꞌ, ri Pablo xutik pa ranimaꞌ keꞌek pa ri tinamit Jerusalem echiriꞌ ikꞌowinaq chi pa taq ri luwar re Macedonia y re Acaya. Jewaꞌ xubꞌiꞌij: «Echiriꞌ inikꞌowinaq chi chupa ri tinamit Jerusalem, lik chirajawaxik chwe kinopon pa ri tinamit Roma.»
ACT 19:22 Xebꞌutaq kꞌu bꞌi pa taq ri luwar re Macedonia kebꞌ chike ri ketoꞌw re, waꞌ e ri Timoteo y ri Erasto. Yey rire xkanaj chi kan jujun qꞌij pa taq ri luwar re Asia.
ACT 19:23 Chupa taq kꞌu laꞌ la qꞌij, pa ri tinamit Éfeso xkijeq ketukuk ri winaq chirij ri Kꞌakꞌ Bꞌe re ri Dios y na xa ta jubꞌiqꞌ ri xkiꞌano.
ACT 19:24 Waꞌ e ruma jun achi Demetrio rubꞌiꞌ, aj chakunel rukꞌ chꞌichꞌ re plata. Rukꞌ waꞌ wa chꞌichꞌ re plata kuꞌan raltaq ko ja, ukꞌaxwach ri rocho ri kitiox Diana. Yey chwach waꞌ, na xa ta jubꞌiqꞌ ri kakichꞌak janipa ri kechakun rukꞌ.
ACT 19:25 Ekꞌu waꞌchi xebꞌumol wa raj chak, kukꞌ jujun chik aj chakibꞌ junam ri kichak y xubꞌiꞌij chike: «Alaq achijabꞌ, ralaq etaꞌam alaq e ruma wa jun chak lik kꞌo qabꞌeyomalil.
ACT 19:26 Pero ilom kꞌu alaq y tom alaq ri uꞌanom lo ri Pablo. Ri kuꞌano e kukoj pa kijolom ukꞌiyal tikawex na e ta dios ri xa e ꞌanom rukꞌ kiqꞌabꞌ ri tikawex. Yey na xew ta kukꞌut waꞌ pa ri qatinamit Éfeso, ma ya laj kumaj ronoje pa taq ri luwar re Asia.
ACT 19:27 Ruma kꞌu waꞌ, kꞌo ne pa saq na kaloqꞌ ta chi ri qakꞌay, yey laj kuꞌana ne riꞌ chikiwach ri winaq na jinta chi uqꞌij ri rocho ri nimalaj qatiox Diana. Jekꞌulaꞌ, kujeq na jinta chi uwach ri qatiox, ri kaloqꞌox uqꞌij pa taq ronoje ri luwar re Asia y che ronoje ruwachulew» xchaꞌ.
ACT 19:28 Echiriꞌ xkita taq waꞌ, lik xpe koyowal y xkijeq kesikꞌinik: «¡Nim uqꞌij ri tiox Diana ke ri aj Éfeso!» kechaꞌ.
ACT 19:29 Xpe kꞌu jun nimalaj sachibꞌal naꞌoj chike konoje ri tinamit. Ketenenik xeꞌkiyaꞌa kibꞌ pa ri nimalaj estadio pa kakimol wi kibꞌ ri tinamit. Y xekichap kꞌu ri Gayo y ri Aristarco; rike e aj pa ri luwar re Macedonia y e rachbꞌiꞌil ri Pablo.
ACT 19:30 Xraj kꞌu ri Pablo kok pa ri estadio chaꞌ kachꞌaꞌt chikiwach rukꞌiyal winaq, noꞌj ri kikojom rubꞌiꞌ ri Cristo xkiqꞌatej.
ACT 19:31 Yey e kꞌo ne jujun chike ri e aj qꞌatal tzij re pa taq ri luwar re Asia, e ramigos ri Pablo; rike xkitaq ubꞌiꞌxikil che y lik xebꞌelaj che chaꞌ na kok tubꞌi pa ri estadio pa etenel wi ri winaq.
ACT 19:32 Ekꞌu ri winaq etenel chiriꞌ lik xsach kinaꞌoj y xkijeq kesikꞌinik. Junwi taq ri kakibꞌiꞌij y na katataj ta chi nenareꞌ saꞌ taq ri kakibꞌiꞌij. Yey lik e kꞌi chike na ketaꞌam ta nenareꞌ suꞌchak kimolom kibꞌ.
ACT 19:33 E kꞌo kꞌu jujun aj judiꞌabꞌ xkiminenej bꞌi chikiwach konoje, jun achi Alejandro rubꞌiꞌ. Ekꞌuchiriꞌ, jujun chik xeꞌkijekꞌa pan chikixoꞌl rukꞌiyal winaq. Ekꞌu rire xuꞌan jun kꞌutubꞌal rukꞌ ruqꞌabꞌ chaꞌ kayaꞌiꞌ che kutoꞌbꞌej ribꞌ.
ACT 19:34 Pero echiriꞌ ri winaq xketaꞌmaj rire e kukꞌil raj judiꞌabꞌ, konoje xa jun ubꞌiꞌxikil kesikꞌinik, laj kebꞌ ora xkichꞌijo kakibꞌiꞌij: «¡Nim uqꞌij ri tiox Diana ke ri aj Éfeso!» kechaꞌ.
ACT 19:35 Ekꞌu ri aj tzꞌibꞌ re ri tinamit, echiriꞌ xuchꞌij kikubꞌaxik rukꞌiyal winaq, jewaꞌ xubꞌiꞌij: «Alaq achijabꞌ aj Éfeso, ¿china ri na etaꞌmayom ta re we ri tinamit ke ri aj Éfeso e chajal re ri rocho ri nimalaj tiox Diana yey junam rukꞌ rukꞌaxwach, ri qajinaq lo chikaj?
ACT 19:36 Yey che taq waꞌ, na utz ta kꞌu riꞌ kꞌo junoq kubꞌiꞌij na qatzij taj. E uwariꞌche lik chirajawaxik kakubꞌiꞌ alaq. Makꞌo maꞌan alaq pa chꞌuꞌjilal; nabꞌe na chꞌobꞌo alaq raqan chi utz ri kaꞌan alaq.
ACT 19:37 Kambꞌiꞌij waꞌ, ma ekꞌamom lo alaq waꞌ waꞌchijabꞌ tobꞌ rike na e tane makuninaq chirij ri templo o chirij ri qatiox.
ACT 19:38 »Yey we ri Demetrio kukꞌ ri rachbꞌiꞌil kꞌo kichꞌaꞌoj chirij junoq, ri lik ubꞌe e kiyaꞌa waꞌ pa qꞌatbꞌal tzij; ma e kꞌo e aj qꞌatal tzij yaꞌtal pakiqꞌabꞌ kakita ke ri winaq kakiraqꞌuj kibꞌ chikiwach.
ACT 19:39 Yey we kꞌa kꞌo kaꞌaj alaq katzꞌonoj alaq chikij, ri lik ubꞌe e kayaꞌiꞌ waꞌ chikiwach konoje ri tinamit y kayijbꞌax chi usukꞌlikil.
ACT 19:40 Ma ruma ri xꞌaniꞌ waqꞌij, kꞌo ne pa saq katzꞌaq qachiꞌ kojchꞌoꞌjin chirij ri qꞌatbꞌal tzij y na jinta kꞌo kel wi we xtzꞌonox chiqe saꞌ la kojtukuk wi» xchaꞌ.
ACT 19:41 Xew kꞌu xubꞌiꞌij waꞌ xukꞌisbꞌej utzaꞌm ri kimolom wi kibꞌ.
ACT 20:1 Echiriꞌ xtaniꞌ ri ketukuk ri winaq, ri Pablo xebꞌusikꞌij ri kikojom rubꞌiꞌ ri Jesús. Xebꞌupixabꞌaj kꞌut y xebꞌulaqꞌapuj. Echiriꞌ xukꞌisbꞌej kan uchꞌaꞌtem kukꞌ, xel bꞌi y xeꞌela pa taq ri luwar re Macedonia.
ACT 20:2 Xikꞌow kꞌu pa taq wa luwar chaꞌ rukꞌ ukꞌiyal pixabꞌanik kunimarisaj kikꞌuꞌx ri kikojom rubꞌiꞌ ri Cristo. Tekꞌuchiriꞌ, xeꞌela pa taq ri luwar re Grecia.
ACT 20:3 Oxibꞌ ikꞌ xkanaj kan ri Pablo chiriꞌ. Uchꞌobꞌom chi kꞌut keꞌek Siria pa barco; pero raj judiꞌabꞌ xkiꞌan tzij chikiwach chaꞌ kakiꞌan kꞌax che echiriꞌ kuꞌkojo bꞌi ri barco. Ekꞌu ri Pablo xretaꞌmaj ri kinaꞌoj na utz taj chirij; ruma kꞌu riꞌ, xujalkꞌatij ruchꞌobꞌom chaꞌ katzelej pa taq ri luwar re Macedonia.
ACT 20:4 E kꞌo hermanos xkachbꞌilaj bꞌi kꞌa pa taq ri luwar re Asia. Waꞌ e: ri Sópater aj Berea, ri Aristarco, ri Segundo aj Tesalónica, ri Gayo aj Derbe, ri Timoteo, yey ri Tíquico y ri Trófimo, ri e aj Asia.
ACT 20:5 Ekꞌu rike xenabꞌej bꞌi y xojkoyꞌej chupa ri tinamit Troas.
ACT 20:6 Yey riꞌoj, echiriꞌ ikꞌowinaq chi ri nimaqꞌij echiriꞌ katij ri pam na jinta levadura che, xojel pa barco chiriꞌ Filipos y pa woꞌobꞌ qꞌij xojopon kukꞌ pa ri tinamit Troas. Chiriꞌ xojkanaj kan wuqubꞌ qꞌij.
ACT 20:7 Ri nabꞌe qꞌij re ri semana xqamol qibꞌ kukꞌ ri kikojom rubꞌiꞌ ri Cristo chaꞌ kaqatij ri cena re ri Qanimajawal. Ekꞌu ri Pablo kakꞌutun chikiwach konoje. Yey ruma chirajawaxik kel bꞌi rire chukaꞌm qꞌij, xnajtir che ri kꞌutunik kuꞌano. Xtikꞌoj kꞌu riꞌ raqꞌabꞌ y kꞌa kachꞌaꞌtik.
ACT 20:8 Yey pa ri qamolom wi qibꞌ e chupa ruroxleꞌ ja chikaj y ukꞌiyal aqꞌ e tzijitalik.
ACT 20:9 Kꞌo kꞌu jun ala Eutico rubꞌiꞌ tzꞌul chupa ri ventana yey okinaq lo jun uqusil waram che ruma ri lik naj kachꞌaꞌt ri Pablo. Bꞌenaq kꞌu riꞌ ruwaram, xtzaq lo che churox leꞌ ja kꞌa pulew y kaminaq xeꞌyakoq.
ACT 20:10 Ekꞌu ri Pablo xqaj loq, xjupiꞌ puwi rala, xulaqꞌapuj y jekꞌuwaꞌ xubꞌiꞌij: «Maxiꞌij ibꞌ alaq, ma kꞌaslik» xchaꞌ.
ACT 20:11 Tekꞌuchiriꞌ, ri Pablo xaqꞌan tanchik y xujach ri cena re ri Qanimajawal. Ekꞌuchiriꞌ utijom chi ri cena, xujeq tanchi kachꞌaꞌtik y xukꞌisbꞌej waꞌ kꞌa pa rusaqribꞌal. Tekꞌuchiriꞌ, xumaj bꞌi ubꞌe.
ACT 20:12 Ekꞌu ri Eutico e laꞌ kꞌaslik xkikꞌam bꞌi chirocho; ruma kꞌu waꞌ lik xbꞌochiꞌitaj kikꞌuꞌx konoje.
ACT 20:13 Ri Pablo xraj keꞌek chiraqan pa ri tinamit Asón. Yey riꞌoj xojnabꞌej bꞌi pa barco chaꞌ keꞌqakꞌama bꞌi ri Pablo chiriꞌ. Jelaꞌ xqaꞌano ma e oj kanajinaq kan wi rukꞌ rire.
ACT 20:14 Xqariq kꞌu qibꞌ rukꞌ rire pa ri tinamit Asón. Yey junam rukꞌ rire xojꞌek pa barco y xqamaj bꞌi qabꞌe pa ri tinamit Mitilene.
ACT 20:15 Xojel kꞌu bꞌi chiriꞌ pa barco y chukaꞌm qꞌij xojikꞌow chwach ri isla Quío. Che kꞌu ri jun chik qꞌij xojopon Samos, waꞌ e jun tinamit kꞌo chuchiꞌ ri mar. Tekꞌuchiriꞌ, xojopon pa ri tinamit Trogilio y chiriꞌ xojuxlanik. Chukaꞌm qꞌij kꞌu riꞌ xojopon pa ri tinamit Mileto.
ACT 20:16 Jelaꞌ xqaꞌano, ma ri Pablo uchꞌobꞌom chik na kikꞌow ta pa ri tinamit Éfeso chaꞌ na kabꞌayitaj ta chilaꞌ pa taq ri luwar re Asia. Ri rilim wi e ma karaj we kꞌa xaqareꞌ kuꞌmaja ri nimaqꞌij re Pentecostés chilaꞌ Jerusalem.
ACT 20:17 Ekꞌuchiriꞌ oponinaq chi ri Pablo pa ri tinamit Mileto, xutaq kisikꞌixik ri e aj wach re riglesia kꞌo Éfeso.
ACT 20:18 Echiriꞌ xekꞌunik, ri Pablo xubꞌiꞌij chike: «Ralaq lik ilom alaq saꞌ ri nubꞌinik chiwach alaq chwi lo ri nabꞌe qꞌij echiriꞌ xinkꞌun pa taq wa luwar re Asia.
ACT 20:19 Xinꞌan ruchak ri Dios chixoꞌlibꞌal alaq rukꞌ ronoje uchꞌutiꞌnal nukꞌuꞌx y na xa ta jubꞌiqꞌ ruwaꞌal nuwach elinaq y pa rewi rukꞌiyal kꞌaxkꞌobꞌik nutijom ruma ri itzel kinaꞌoj raj judiꞌabꞌ chwij.
ACT 20:20 Na rukꞌ ta kꞌu riꞌ, na jinta kꞌo wewam chiwach alaq, ma xinqꞌalajisaj ronoje ri kꞌo kutiqoj che ri bꞌinik silabꞌik alaq, yey xinkꞌutun chiwachil y pa taq ocho alaq.
ACT 20:21 Chikiwach kꞌu raj judiꞌabꞌ y ri na e ta aj judiꞌabꞌ, xinqꞌalajisaj lik chirajawaxik chike kakitzelej kitzij chwach ri Dios y kakubꞌiꞌ kikꞌuꞌx rukꞌ ri Qanimajawal Jesucristo.
ACT 20:22 »Ekꞌu woꞌora, ri Ruxlabꞌixel ri Dios xukoj pa wanimaꞌ kinꞌek pa ri tinamit Jerusalem tobꞌ kꞌamajaꞌ wetaꞌam saꞌ ri kankꞌulumaj na chilaꞌ;
ACT 20:23 xew wetaꞌam ri ubꞌiꞌim ri Santowilaj Ruxlabꞌixel ri Dios chwe. Ma pa ronoje taq ri tinamit kinikꞌow wi, kujikibꞌaꞌ uwach chwe ri katajin lo panuwiꞌ; waꞌ e ri kinkꞌam bꞌi pa taq cárcel y kinyaꞌ pa ukꞌiyal kꞌaxkꞌobꞌik.
ACT 20:24 Pero riꞌin na jinta kꞌana kubꞌiꞌij nukꞌuꞌx che, na kanꞌan tane che ri nukꞌaslem pachaꞌ lik kꞌo uwach chinuwach riꞌin; xew kuaj kankꞌis uꞌanikil rukꞌ kiꞌkotemal ri nutaqem pan che ri nuchak, ri xyaꞌ chwe ruma ri Qanimajawal Jesús. Waꞌ e ruqꞌalajisaxik ri Utzilaj Tzij re ri unimal rutzil ukꞌuꞌx ri Dios.
ACT 20:25 »Ekꞌu woꞌora che ralaq ri xtaꞌ alaq chi nuchiꞌ puwi rutaqanik ri Dios, lik wetaꞌam na jinta chi junoq karil tanchi nuwach.
ACT 20:26 Ekꞌu uwariꞌche waqꞌij kambꞌiꞌij chiwach alaq: Lik pawiꞌ alaq kꞌo wi we kꞌo junoq che alaq kasachik.
ACT 20:27 Ma na jinta kꞌo wewam chiwach alaq; e janipa ruchꞌobꞌom lo ri Dios kajawax che alaq, nuqꞌalajisam chi chiwach alaq.
ACT 20:28 »E uwariꞌche, chajij ibꞌ alaq y chechajij alaq janipa ri eyaꞌtal paqꞌabꞌ alaq ruma ri Santowilaj Ruxlabꞌixel ri Dios. Ma alaq aj kꞌamal wach re kebꞌil alaq ri tinamit re ri Qanimajawal, yey waꞌ wa tinamit e ri xebꞌuloqꞌ Rire rukꞌ rukikꞌel.
ACT 20:29 Wetaꞌam kꞌut echiriꞌ riꞌin in bꞌenaq chik, kebꞌok lo chixoꞌlibꞌal alaq jujun chik pachaꞌ e utiw xew kakaj kakisach kiwach taq ri bꞌexex.
ACT 20:30 Yey chixoꞌlibꞌal ne ralaq keyaktaj jujun kakijal ri saqil kꞌutunik chaꞌ ri kikojom rubꞌiꞌ ri Cristo kakesaj bꞌi kibꞌ chupa ri Qꞌijsaq y keterej kꞌu bꞌi chikij rike.
ACT 20:31 E uwariꞌche, lik kꞌuna saq chiwach ralaq. Kꞌuna chikꞌuꞌx alaq: E oxibꞌ junabꞌ waꞌ, chipaqꞌij chichaqꞌabꞌ, na in ta uxlaninaq che pixabꞌaxik chijujunal alaq rukꞌ uwaꞌal nuwach.
ACT 20:32 »Ekꞌu woꞌora hermanos, kanqꞌatisaj kan alaq puqꞌabꞌ ri Dios chaꞌ Rire kuchajij alaq y katikiꞌ kꞌu alaq chupa ri Utzilaj Tzij re ri unimal rutzil ukꞌuꞌx. Ma xew waꞌ kꞌo uchuqꞌabꞌ re kuya ri kꞌiyibꞌal alaq chwach ri Dios y kuya na janipa ri taqal che alaq, jelaꞌ pachaꞌ ri bꞌiꞌtisim chike konoje ri kiyaꞌom kibꞌ puqꞌabꞌ ri Dios.
ACT 20:33 »Riꞌin na nurayim ta oro o plata re junoq chik yey na nurayim tane ruqꞌuꞌ junoq chik.
ACT 20:34 E ne ri nuꞌanom, lik etaꞌam alaq; ma e janipa ri ajawaxinaq chwe riꞌin y chike ri e kꞌo wukꞌ, waꞌ lik nuchꞌakom rukꞌ wa nuqꞌabꞌ.
ACT 20:35 Rukꞌ kꞌu ronoje ri ilom alaq che ri nubꞌinik, nukꞌutum che alaq ri lik chirajawaxik wi kaqaꞌano: Kojchakunik chaꞌ utz keqatoꞌ janipa ri kꞌo kajawax chike. E kꞌuna chiqakꞌuꞌx ruchꞌaꞌtem ri Qanimajawal Jesús echiriꞌ xubꞌiꞌij: “E más nim uqꞌij ralaxik ri jun kasipanik, chwa ri jun xa kukꞌul ri kasipax che”» xchaꞌ.
ACT 20:36 Echiriꞌ xubꞌiꞌij taq kꞌu waꞌ ri Pablo, xuxukubꞌaꞌ ribꞌ y xuꞌan orar kukꞌ konoje ri e kꞌo chiriꞌ rukꞌ.
ACT 20:37 Konoje kꞌu riꞌ xkijeq kebꞌoqꞌik, xkilaqꞌapuj ri Pablo y xkitzꞌubꞌ uchiꞌ.
ACT 20:38 Lik xok unimal bꞌis chikikꞌuꞌx ruma xubꞌiꞌij ri Pablo na kakil ta chi uwach. Jekꞌulaꞌ xkachbꞌilaj bꞌi y xeꞌkijacha kan pa kꞌo wi ri barco.
ACT 21:1 Tekꞌuchiriꞌ xeqaya kan ri hermanos, xqamaj bꞌi qabꞌe pa barco y xojꞌek jusukꞌ kꞌa pa ri tinamit Cos. Chukaꞌm qꞌij xojopon pa ri tinamit Rodas. Echiriꞌ xojel bꞌi chiriꞌ, xojꞌek pa ri tinamit Pátara.
ACT 21:2 Chupa kꞌu wa tinamit Pátara xqariq jun barco keꞌek Fenicia. Xojaqꞌan kꞌu riꞌ chupa y xqamaj bꞌi qabꞌe chwi ri mar.
ACT 21:3 Ekꞌu laꞌ kojbꞌin pa ri barco, xqil kan ri isla Chipre, waꞌ xkanaj kan pa mox chiqe. Xqamaj kꞌu bꞌi pa taq ri luwar re Siria y xojopon pa ri tinamit Tiro, ma ri barco kuꞌyaꞌa kan eqaꞌn chiriꞌ.
ACT 21:4 Chupa kꞌu wa tinamit xeqariq ri kikojom rubꞌiꞌ ri Cristo y xojkanaj wuqubꞌ qꞌij kukꞌ. Ekꞌu rike xkipixabꞌaj ri Pablo chaꞌ na keꞌek ta Jerusalem, ma ri Ruxlabꞌixel ri Dios xuqꞌalajisaj chike ri kukꞌulumaj ri Pablo we xopon chilaꞌ.
ACT 21:5 Na rukꞌ ta kꞌu riꞌ, echiriꞌ xikꞌow ri wuqubꞌ qꞌij, xojel bꞌi chiriꞌ. Konoje ri e aj chiriꞌ, junam kukꞌ ri kixoqil y ri kalkꞌoꞌal, xojkachbꞌilaj lo kꞌa tzaꞌm ja che ri tinamit. Chuchiꞌ ri mar xqaxukubꞌaꞌ qibꞌ y xqaꞌan orar.
ACT 21:6 Xqalaqꞌapuj qibꞌ chiqawach. Tekꞌuchiriꞌ, riꞌoj xojaqꞌan chupa ri barco, yey rike xetzelej chikocho.
ACT 21:7 Xqamaj tanchi ubꞌi qabꞌe chwi ri mar; xojel lo pa ri tinamit Tiro y xojopon pa ri tinamit Tolemaida. Tekꞌuchiriꞌ, xqaya rutzil kiwach ri hermanos chiriꞌ y xojkanaj kan jun qꞌij kukꞌ.
ACT 21:8 Chukaꞌm qꞌij kꞌut, xojel bꞌi y xojopon pa ri tinamit Cesarea. Chilaꞌ xojok chirocho ri Felipe, ri aj tzijol re ri Utzilaj Tzij, jun chike ri wuqubꞌ diáconos. Y xojkanaj kꞌu kan rukꞌ.
ACT 21:9 Ekꞌu rire e kꞌo kajibꞌ umiꞌal kꞌamajaꞌ kekꞌuliꞌik yey rike kakiꞌan qꞌalajisanik ruma ri Dios.
ACT 21:10 Xojnajtir chiriꞌ jujun qꞌij. Echiriꞌ oj kꞌo chiriꞌ, xkꞌun jun qꞌalajisanel re ri Dios, Ágabo rubꞌiꞌ, petinaq Judea.
ACT 21:11 Waꞌ waꞌchi xojoꞌlrilaꞌ. Xukꞌam kꞌu riꞌ rupas ri Pablo y chiribꞌil ribꞌ xuyut ri raqan y ruqꞌabꞌ; tekꞌuchiriꞌ, xubꞌiꞌij: —Jewaꞌ kubꞌiꞌij ri Santowilaj Ruxlabꞌixel ri Dios: “Chilaꞌ Jerusalem, jewaꞌ kakiꞌan raj judiꞌabꞌ che rachi rajaw wa jun pas, kakiyutu yey kakiya kꞌu pakiqꞌabꞌ ri na e ta aj judiꞌabꞌ” —xchaꞌ.
ACT 21:12 Echiriꞌ xqata waꞌ, riꞌoj y ri e aj Cesarea lik xojelaj che ri Pablo chaꞌ na keꞌek ta Jerusalem.
ACT 21:13 Pero ri Pablo xukꞌul uwach chiqe: —¿Suꞌchak koqꞌ alaq y kakoj alaq unimal bꞌis chinukꞌuꞌx? Ma riꞌin nuyaꞌom ne wanimaꞌ na xew ta ri kinyutik, ma kinꞌek tobꞌ ne kinkam pa ri tinamit Jerusalem ruma rubꞌiꞌ ri Qanimajawal Jesús —xchaꞌ.
ACT 21:14 Yey ruma kꞌu na xqachꞌij ta uqꞌatexik chaꞌ na keꞌek taj, xqoqꞌotaj kojchꞌaꞌt rukꞌ puwi waꞌ, xew kꞌu xqabꞌiꞌij che: —E chuꞌana na riꞌ janipa ri karaj ri Qanimajawal —xojchaꞌ.
ACT 21:15 Ikꞌowinaq chi waꞌ, xqayijbꞌaꞌ qibꞌ y xqamaj bꞌi qabꞌe pa ri tinamit Jerusalem.
ACT 21:16 Y xojkachbꞌilaj bꞌi jujun chike ri kikojom rubꞌiꞌ ri Cristo chiriꞌ Cesarea. Kukꞌ rike kꞌo jun aj Chipre Mnasón rubꞌiꞌ. Rire e kukꞌil ri nabꞌe kikojom rubꞌiꞌ ri Cristo. Yey rukꞌ ri Mnasón kojeꞌkanaj kan wi chilaꞌ Jerusalem.
ACT 21:17 Echiriꞌ xojopon Jerusalem, ri hermanos xojkikꞌul rukꞌ kiꞌkotemal.
ACT 21:18 Chukaꞌm qꞌij kꞌut, ri Pablo xeꞌek qukꞌ che rilik ri Jacobo yey konoje ri e aj wach re riglesia kimolom kibꞌ chiriꞌ.
ACT 21:19 Ekꞌuchiriꞌ ri Pablo ukꞌisom chi uyaꞌik rutzil kiwach wa hermanos, xujeq utzijoxik chike janipa ri uꞌanom ri Dios chikixoꞌl ri na e ta aj judiꞌabꞌ ruma ri chak katajin rire che uꞌanik.
ACT 21:20 Echiriꞌ xkita waꞌ ri hermanos, lik xkiyak uqꞌij ri Dios. Pero xkibꞌiꞌij che ri Pablo: «Kil la waꞌ, hermano, janipa lo mil chi aj judiꞌabꞌ kikojom chi rubꞌiꞌ ri Cristo wara Jerusalem; yey konoje kiyaꞌom kibꞌ che utaqexik ri Tzij Pixabꞌ tzꞌibꞌital kan ruma ri Moisés.
ACT 21:21 Pero xtzijox kꞌu chike puwi ri kꞌutunik la chikiwach konoje raj judiꞌabꞌ ejeqel naj chikixoꞌl ri na e ta aj judiꞌabꞌ. Kabꞌiꞌx kꞌu riꞌ rilal keqꞌatej la che utaqexik ri taqanik re ri Moisés, ma kabꞌiꞌij la chike na kakikoj ta chi ri retalil re circuncisión chike ri kalkꞌoꞌal y na kakiꞌan ta chi ne janipa ri kikꞌutum kan ri qatiꞌ-qamam.
ACT 21:22 »¿Saꞌ kꞌu ri kaqaꞌan riꞌoj che waꞌ? Ma laꞌ kakimol ne kibꞌ rukꞌiyal winaq chiꞌij la, we xkito xkꞌun la.
ACT 21:23 »Xew kꞌu ꞌana la wa kaqabꞌiꞌij cheꞌla: E kꞌo kajibꞌ achijabꞌ chiqaxoꞌl riꞌoj, chirajawaxik chike kakiꞌan ri kibꞌiꞌtisinik chwach ri Dios.
ACT 21:24 Chekꞌama bꞌi ukꞌ la, josqꞌij ibꞌ la chwach ri Dios junam kukꞌ rike, jelaꞌ pachaꞌ ri kubꞌiꞌij ri taqanik tzꞌibꞌital kan ruma ri Moisés. Tojo kꞌu kan la ri kiqasaꞌn chaꞌ utz kakisokaj ri kiwiꞌ. Jekꞌulaꞌ kaqꞌalajin chikiwach konoje: E janipa ri tzijom chike puwi ri kꞌutunik la, na e ta kꞌana uꞌanom; y kakil ne ri lik jusukꞌ kabꞌin la, ma e kanimaj la ri Tzij Pixabꞌ.
ACT 21:25 »Chike kꞌu ri na e ta aj judiꞌabꞌ kikojom rubꞌiꞌ ri Cristo, riꞌoj qatzꞌibꞌam chi chike na chirajawaxik taj kakitaqej taq waꞌ; xew makitij ri ikꞌowisam chi chikiwach ri tiox, makitij kikꞌ y makitij awaj xa ejitzꞌam, yey maketzꞌabꞌej ne uwa kiqꞌij kukꞌ jujun chik na kikꞌulel taj» xecha che ri Pablo.
ACT 21:26 Ekꞌu ri Pablo xebꞌukꞌam bꞌi ri kajibꞌ achijabꞌ rukꞌ y chukaꞌm qꞌij xujosqꞌij ribꞌ chwach ri Dios junam kukꞌ rike. Tekꞌuchiriꞌ, xok pa ri Rocho Dios re kubꞌiꞌij jampalaꞌ kakꞌis ruqꞌijol ri kijosqꞌikil y keꞌkiyaꞌa chwa raltar ri kiqasaꞌn chikijujunal rike.
ACT 21:27 Ekꞌuchiriꞌ ya kakꞌis ri wuqubꞌ qꞌij re ri kijosqꞌikil chwach ri Dios, e kꞌo jujun aj judiꞌabꞌ e aj pa taq ri luwar re Asia xkil ri Pablo kꞌo pa ri Rocho Dios. Xekichok kꞌu rukꞌiyal winaq chaꞌ kakichap ri Pablo.
ACT 21:28 Kesikꞌin kꞌu che ubꞌiꞌxikil: «¡Achijabꞌ alaq aj Israel, chojtoꞌo alaq! E achi waꞌ ikꞌowinaq pa taq ronoje luwar y kakꞌutun chikiwach konoje ri winaq rukꞌ taq chꞌaꞌtibꞌenik chirij ri qatinamit, chirij ri Tzij Pixabꞌ y chirij ri Rocho Dios. Yey na xew ta waꞌ, ma uꞌanom che wa Santowilaj Luwar pachaꞌ na jinta chi uqꞌij echiriꞌ xebꞌukoj lo jujun na e ta aj judiꞌabꞌ pa ri Rocho Dios, yey waꞌ xebꞌok pa ri luwar na taqal ta chike» kechaꞌ.
ACT 21:29 Jelaꞌ xkibꞌiꞌij, ma ri petinaq loq kilom ri Pablo pa ri tinamit achbꞌilam ruma ri Trófimo, jun achi aj Éfeso. Ruma kꞌu waꞌ, xkichꞌobꞌ raqan ri Pablo ukojom lo chupa ri Rocho Dios wa jun achi na e ta kukꞌil ri e aj judiꞌabꞌ.
ACT 21:30 Jekꞌuriꞌlaꞌ konoje ri tinamit xeyik-kaꞌnik y xkijeq ketukukik. Ri winaq na jampatana xeteniꞌ chiriꞌ y xkichap ri Pablo. E laꞌ kichararem xkesaj bꞌi pa ri Rocho Dios y xkitzꞌapilaꞌ taq ri okibꞌal.
ACT 21:31 Ekꞌu riꞌ kakaj kakikamisaj. Xopon kꞌu ubꞌiꞌxikil che ri comandante ke ri soldados e aj Roma: «Konoje ri tinamit ketukukik.»
ACT 21:32 Ekꞌu ri comandante xebꞌukꞌam bꞌi ri soldados kukꞌ ri kicapitanes. Kebꞌan kꞌu riꞌ xebꞌek pa e kꞌo wi ri winaq. Echiriꞌ taq ri winaq xkil ri comandante kukꞌ ri soldados, xkoqꞌotaj ri kakiꞌan kꞌax che ri Pablo.
ACT 21:33 Ekꞌu wa comandante xew xoponik, xuchap ri Pablo y xtaqan che kayaꞌiꞌ pa kebꞌ karena. Tekꞌuchiriꞌ, xutzꞌonoj china ri Pablo y saꞌ rumak uꞌanom.
ACT 21:34 Chikixoꞌl kꞌu riꞌ rukꞌiyal winaq na jinta chi katatajik, ma jujun kesikꞌin jewaꞌ y jujun chik kesikꞌin jelaꞌ. Na qꞌalaj ta chi kꞌenoq saꞌ ri kakibꞌiꞌij. Ruma kꞌu laꞌ, ri comandante xtaqan che kakꞌam bꞌi ri Pablo chilaꞌ pa ri cuartel.
ACT 21:35 Ekꞌuchiriꞌ xebꞌopon ri soldados rukꞌ ri Pablo che taq ri lepelaq re ri cuartel, xajawaxik xkitelej ma rukꞌiyal winaq kakaj kakichap ri Pablo re kakiꞌan kꞌax che.
ACT 21:36 Ma rukꞌiyal winaq re ri tinamit ketenenik, kiternabꞌem lo ri Pablo y kesikꞌinik: «¡Kamisaxoq! ¡Kamisaxoq!» kechaꞌ.
ACT 21:37 Echiriꞌ kakikoj bꞌi ri Pablo pa ri cuartel, rire jewaꞌ xubꞌiꞌij che ri comandante: —¿Kaya nawi la chwe kinchꞌaꞌt kꞌenoq ukꞌ la? —xchaꞌ. Ri comandante xutzꞌonoj che: —¿Kariq riꞌat katchꞌaꞌt pa ri chꞌaꞌtem griego?
ACT 21:38 ¿Na at ta nebꞌa ri jun aj Egipto, ri xujeq jun chꞌaꞌoj wa majaꞌ naj echiriꞌ xebꞌeresaj bꞌi kajibꞌ mil achijabꞌ e kamisanel pa taq ri luwar katzꞌintzꞌotik? —xcha che.
ACT 21:39 Xubꞌiꞌij kꞌu ri Pablo: —Na in taj. Paqatzij wi in jun achi laxik in kukꞌil ri e aj judiꞌabꞌ. In alaxinaq pa ri tinamit Tarso, jun tinamit lik kꞌo uwach re Cilicia. Noꞌj kantzꞌonoj kꞌu ko cheꞌla, yaꞌa ko la chwe kinchꞌaꞌt chikiwach ri tinamit —xchaꞌ.
ACT 21:40 Ekꞌu ri comandante xuya luwar che kachꞌaꞌtik. Xtakꞌiꞌ kꞌu riꞌ ri Pablo che taq ri lepelaq re ri cuartel y xuꞌan jun kꞌutubꞌal rukꞌ ruqꞌabꞌ chikiwach ri tinamit chaꞌ ketaniꞌik. Xetzꞌin kaꞌn kꞌu riꞌ. Ekꞌu ri Pablo xujeq kachꞌaꞌt pa ri chꞌaꞌtem hebreo, jewaꞌ xubꞌiꞌij:
ACT 22:1 «Alaq achijabꞌ y alaq nimaq winaq, tana kꞌu alaq woꞌora wa toꞌbꞌal wibꞌ kanꞌan chiwach alaq» xcha ri Pablo.
ACT 22:2 Echiriꞌ ri winaq xkito kachꞌaꞌt chikiwach pa ri chꞌaꞌtem hebreo, más xetzꞌinkaꞌnik. Ekꞌu ri Pablo xubꞌiꞌij:
ACT 22:3 «Paqatzij wi riꞌin in kukꞌil ri e aj judiꞌabꞌ. In alaxinaq pa ri tinamit Tarso, jun tinamit re ri luwar re Cilicia; noꞌj chupa wa tinamit Jerusalem in kꞌiyinaq wi. In tijotal kꞌu lo chwi ri Tzij Pixabꞌ ruma ri Gamaliel rukꞌ jun tijonik lik e chirij ri tzijpixabꞌ ke kan ri qatiꞌ-qamam. Lik nuyaꞌom nukꞌuꞌx che uloqꞌnimaxik ri Dios jelaꞌ pachaꞌ onoje ralaq waqꞌij ora.
ACT 22:4 »Ri petinaq loq riꞌin xenuternabꞌej ne rukꞌ kamik ri etaqeyom wa jun Kꞌakꞌ Bꞌe re ri Jesús. Tobꞌ achijabꞌ o tobꞌ ixoqibꞌ xebꞌenuya pa karena y xebꞌeꞌnuyaꞌa pa cárcel.
ACT 22:5 Ri kajawal raj chakunel pa Rocho Dios y konoje ri nimaq winaq re ri tinamit lik ketaꞌam qatzij wa kambꞌiꞌij, ma rike lik xkilo saꞌ taq ri xinꞌano. Ma chike ne rike xinkꞌul wubꞌi uwujil, tzꞌibꞌital bꞌi chike raj wach e aj judiꞌabꞌ e kꞌo Damasco chaꞌ utz kebꞌenuchap lo chi presoyil ri kikojom rubꞌiꞌ ri Cristo y kebꞌenukꞌam lo Jerusalem re keyaꞌiꞌ pa kꞌaxkꞌobꞌik.
ACT 22:6 »Ekꞌu laꞌ kintajin chi bꞌe y xa naqaj chik in kꞌo che ri tinamit Damasco, echiriꞌ laj pa tikꞌil qꞌij xaqikꞌateꞌt xpe chilaꞌ chikaj ruwonibꞌal jun aqꞌ. Waꞌ xwol kaꞌn panuwiꞌ y xusutij wij.
ACT 22:7 Xintzaq pulew y xinta kꞌu jun qulaj jewaꞌ kubꞌiꞌij chwe: “Saulo, Saulo, ¿suꞌchak katchꞌoꞌjin chwij?” xchaꞌ.
ACT 22:8 »Y riꞌin xinkꞌul uwach: “¿China rilal, Wajawal?” Rire xubꞌiꞌij chwe: “Riꞌin in Jesús ri aj Nazaret, ri jun katchꞌoꞌjin chirij” xchaꞌ.
ACT 22:9 »Yey ri e kꞌo wukꞌ paqatzij wi xkil ruwonibꞌal ri aqꞌ xwol kaꞌn panuwiꞌ y xkixiꞌij kibꞌ che; noꞌj na xkimaj ta usukꞌ ri qulaj kachꞌaꞌt wukꞌ.
ACT 22:10 »Ekꞌu riꞌin ximbꞌiꞌij: “¿Saꞌ kꞌu riꞌ kanꞌano, Wajawal?” »Y ri Qajawal xubꞌiꞌij chwe: “Chatyaktajoq y jat pa ri tinamit Damasco, ma chiriꞌ kabꞌiꞌx wi chawe janipa ri kuaj Riꞌin kaꞌan riꞌat” xchaꞌ.
ACT 22:11 »Riꞌin na xintzuꞌn ta chi kꞌu riꞌ ma ruwonibꞌal ri aqꞌ xwol kaꞌn panuwiꞌ, xuchup upa nuwach. Xa kꞌu xinchꞌelex bꞌi che ri nuqꞌabꞌ kuma ri e wachbꞌiꞌil, y jelaꞌ xinopon pa ri tinamit Damasco.
ACT 22:12 »Chiriꞌ kꞌu riꞌ kꞌo jun achi Ananías rubꞌiꞌ; rire lik jusukꞌ rubꞌinik che utaqexik taq ri taqanik re ri Tzij Pixabꞌ, yey lik chom ruchꞌaꞌtibꞌexik kakiꞌan konoje raj judiꞌabꞌ ejeqel chiriꞌ.
ACT 22:13 Xkꞌun kꞌu ri Ananías che wilik, xqibꞌ wukꞌ, y jewaꞌ xubꞌiꞌij chwe: “Hermano Saulo, chakꞌulu tanchi ratzuꞌnibꞌal” xchaꞌ. Chupa kꞌu laꞌ la joqꞌotaj, xintzuꞌn tanchik y xinwil uwach ri Ananías.
ACT 22:14 »Ekꞌu ri Ananías xubꞌiꞌij chwe: “Ri Dios ke kan ri qatiꞌ-qamam, atuchaꞌom chik chaꞌ kawetaꞌmaj saꞌ ri lik karaj Rire, kawil kꞌu uwach ri Jun lik jusukꞌ y kata chi uchiꞌ janipa ri kubꞌiꞌij chawe.
ACT 22:15 Ma katuꞌana at qꞌalajisay re Rire chikiwach konoje ri tikawex puwi taq ri awilom y atom che.
ACT 22:16 Ekꞌu woꞌora, ¿saꞌ chi ri kawoyꞌej? Chatyaktajoq y chakꞌulu ri bautismo chaꞌ katchꞌajtaj che ramak; yey chaꞌana kꞌu waꞌ chupa rubꞌiꞌ ri Qanimajawal” xcha chwe.
ACT 22:17 »Xintzelej kꞌu lo Jerusalem. Ekꞌu riꞌ kanꞌan orar pa ri Rocho Dios echiriꞌ xaqikꞌateꞌt xqꞌalajisax jun kꞌutubꞌal re ri Dios chinuwach.
ACT 22:18 Xinwil kꞌu uwach ri Qanimajawal y jewaꞌ ri xubꞌiꞌij chwe: “Chawilij, chatel bꞌi pa wa tinamit Jerusalem ma ri tzijonik panuwiꞌ Riꞌin na kakikꞌul ta ri winaq wara” xchaꞌ.
ACT 22:19 »Riꞌin ximbꞌiꞌij kꞌu che: “Wajawal, rike lik ketaꞌam janipa ri na utz taj nuꞌanom lo chike ri kikojom ri bꞌiꞌ la echiriꞌ xinꞌek pa taq sinagoga re kebꞌenukꞌam bꞌi pa cárcel y kambꞌalakꞌuj kipa.
ACT 22:20 Yey riꞌin in kꞌo chiriꞌ echiriꞌ xkamisax ri Esteban, ri jun xqꞌalajisan wach la chikiwach ri winaq. In ne jun chike ri xkibꞌiꞌij utz kakamisaxik; yey in ri xinchajij kan ri kiqꞌuꞌ ri xekamisan re” xincha che ri Qanimajawal.
ACT 22:21 »Pero ri Qajawal xubꞌiꞌij chwe: “Jat, ma Riꞌin lik naj katintaq wubꞌi chikixoꞌl taq ri tinamit na e ta aj judiꞌabꞌ”» xchaꞌ.
ACT 22:22 Ekꞌu riꞌ rukꞌiyal winaq, na xkiya ta chi luwar che ri Pablo kachꞌaꞌtik. Ekꞌuchiriꞌ, xkijeq kesikꞌinik, kakibꞌiꞌij: «Chisacha uwach laꞌ la jun achi ma na taqal ta chi che kakꞌasiꞌik» kechaꞌ.
ACT 22:23 Yey kesikꞌin kꞌu riꞌ ri winaq y kakimachꞌ taq ri kiqꞌuꞌ pulew y kakipukꞌ ulew chikaj.
ACT 22:24 Ruma kꞌu laꞌ, ri comandante xtaqan che kokisax bꞌi ri Pablo pa ri cuartel y kajichꞌ upa chaꞌ jelaꞌ ketaꞌmaxik suꞌchak kesikꞌin ri winaq chirij.
ACT 22:25 Echiriꞌ ri soldados kakiximo re kakijichꞌ upa, ri Pablo xutzꞌonoj che ri capitán kꞌo chiriꞌ: —¿Usukꞌ nebꞌa kajichꞌ upa junoq aj Roma we kꞌamajaꞌ kaqꞌat tzij puwiꞌ? —xchaꞌ.
ACT 22:26 Echiriꞌ xuta waꞌ ri capitán, xeꞌek y xubꞌiꞌij che ri comandante: —Chꞌobꞌo la chi utz saꞌ ri kaꞌan la, ma waꞌchi aj Roma —xchaꞌ.
ACT 22:27 Ekꞌu ri comandante xqibꞌ rukꞌ ri Pablo y xubꞌiꞌij che: —Chabꞌiꞌij pe chwe: ¿Qatzij at aj Roma? —xcha che. Ri Pablo xukꞌul uwach: —Qatzij, in aj Roma —xchaꞌ.
ACT 22:28 Ekꞌu ri comandante xukꞌul uwach: —Riꞌin rukꞌ ukꞌiyal puaq xyaꞌ nuwuj re xinuꞌan aj Roma —xchaꞌ. Yey ri Pablo xubꞌiꞌij: —Noꞌj riꞌin, in aj Roma chwi walaxik loq —xchaꞌ.
ACT 22:29 Na jampatana kꞌu riꞌ, e janipa ri e kꞌo chiriꞌ re kakijichꞌ upa, xebꞌel rukꞌ. Yey ne ri comandante echiriꞌ xuto ri Pablo aj Roma, xpe xiꞌin ibꞌ rukꞌ ruma uyaꞌom ri Pablo pa karena.
ACT 22:30 Ekꞌu ri comandante xraj karetaꞌmaj pa saqil wi saꞌ ri mak kakitzꞌaq raj judiꞌabꞌ chirij ri Pablo. Ruma kꞌu riꞌ, chukaꞌm qꞌij xutaq kikꞌamik ri nimaq e aj chakunel pa Rocho Dios kukꞌ konoje ri uchapom wi ribꞌ ri qꞌatbꞌal tzij. Xutaq resaxik ri karena che ri Pablo; xukꞌam kꞌu uloq y xuya chikiwach.
ACT 23:1 Ekꞌuchiriꞌ, ri Pablo xuchꞌikibꞌaꞌ ruwach pakiwi taq ri uchapom wi ribꞌ ri qꞌatbꞌal tzij y jewaꞌ xubꞌiꞌij: —Achijabꞌ alaq watz-nuchaqꞌ, ri petinaq loq yey kꞌa e ne nuꞌanom waqꞌij ora, lik kunaꞌ nukꞌuꞌx jusukꞌ ri nubꞌinik chwach ri Dios —xchaꞌ.
ACT 23:2 Ruma kꞌu la xubꞌiꞌij ri Pablo, ri Ananías ri kajawal raj chakunel pa Rocho Dios, xebꞌutaq ri e kꞌo rukꞌ chaꞌ kakiraw tꞌoꞌy chwa reꞌ.
ACT 23:3 Ekꞌu ri Pablo xubꞌiꞌij che: —¡Chuꞌana ri Dios ukꞌ la janipa ri kaꞌan la chwe, rilal xa kebꞌ palaj la! Ma lal kojotalik re kaqꞌat la tzij panuwiꞌ e chirij ri kubꞌiꞌij ri Tzij Pixabꞌ; noꞌj kamakun kꞌu la chirij wa Tzij Pixabꞌ ruma xtaqan la kaꞌan kꞌax chwe tobꞌ na e ta kubꞌiꞌij riꞌ ri Tzij Pixabꞌ —xchaꞌ.
ACT 23:4 Ri e kꞌo chiriꞌ xkibꞌiꞌij che ri Pablo: —¿Saꞌch? ¿Kayaj kami riꞌ riꞌat ri kajawal raj chakunel pa Rocho Dios? —xechaꞌ.
ACT 23:5 Ri Pablo xubꞌiꞌij: —Alaq watz-nuchaqꞌ, riꞌin na wetaꞌam taj we rire e kajawal raj chakunel pa Rocho Dios. We ta e laꞌ wetaꞌam china rire, na kambꞌiꞌij ta waꞌ che, ma tzꞌibꞌital kan chupa Ruchꞌaꞌtem ri Dios: “Maꞌan ri tzel katchꞌaꞌt chirij ri taqanel re ratinamit” —xchaꞌ.
ACT 23:6 Ekꞌu ri Pablo retaꞌam nikꞌaj chike ri aj qꞌatal tzij e saduceos y nikꞌaj chik e fariseos. Ruma kꞌu laꞌ, rire lik ko xchꞌawik, jewaꞌ xubꞌiꞌij: —Achijabꞌ alaq watz-nuchaqꞌ, riꞌin in kukꞌil ri e fariseos yey in ukꞌajol jun fariseo; ekꞌu woꞌora kaqꞌat tzij panuwiꞌ xa ruma ri kubꞌul pan nukꞌuꞌx che ri kꞌastajibꞌal ke ri ekaminaq —xchaꞌ.
ACT 23:7 Echiriꞌ xubꞌiꞌij waꞌ ri Pablo, ri fariseos kukꞌ ri saduceos xkijeq kakichapalaꞌ kibꞌ chikiwach; y jelaꞌ konoje ri kimolom kibꞌ xkijach kipa.
ACT 23:8 Ma chikiwach ri saduceos, na jinta kꞌastajibꞌal ke ri ekaminaq, na e jinta ne ángeles y na e jinta ne jujun chik uxlabꞌixel; noꞌj chikiwach ri fariseos, e kꞌo konoje waꞌ.
ACT 23:9 Y xkijeq lik kewoqoqik. E kꞌo kꞌu jujun chike raj kꞌutunel re ri tzijpixabꞌ e kukꞌil ri fariseos. Rike xeyaktajik y xkijeq kechꞌoꞌjinik, jewaꞌ kakibꞌiꞌij: «Na jinta mak kaqariq chirij wa jun achi. Kꞌaxtaj rire e juna taqoꞌn petinaq rukꞌ ri Dios o juna ángel uqꞌalajisam waꞌ che. Yey we e riꞌ, na utz taj kojchꞌoꞌjin riꞌoj chirij ri Dios» kechaꞌ.
ACT 23:10 Jekꞌulaꞌ ri chꞌaꞌoj chikiwach lik xeꞌek chunimal. Ruma kꞌu riꞌ, ri comandante lik xuxiꞌij ribꞌ, ma xuchꞌobꞌ raqan kakiraqij upa ri Pablo. Ewi xtaqan che kisikꞌixik jujun chik soldados chaꞌ kakesaj bꞌi ri Pablo chikixoꞌl y kakikꞌam bꞌi pa ri cuartel.
ACT 23:11 Chukaꞌm aqꞌabꞌ kꞌut xuqꞌalajisaj ribꞌ ri Qanimajawal chwach ri Pablo y xubꞌiꞌij che: «Pablo, chanimarisaj akꞌuꞌx; ma jelaꞌ pachaꞌ xinaqꞌalajisaj Riꞌin chikiwach ri e aj Jerusalem, jekꞌulaꞌ lik chirajawaxik kaꞌana pa ri tinamit Roma» xchaꞌ.
ACT 23:12 Chukaꞌm qꞌij echiriꞌ xsaqirik, e kꞌo jujun aj judiꞌabꞌ xkiꞌan tzij chikiwach chaꞌ kakikamisaj ri Pablo. Xkibꞌiꞌij kꞌut chwach ri Dios na kewaꞌ tana y na kakitij ta ne miqꞌinaꞌ we na kakikamisaj ta ri Pablo nabꞌe. Yey xkibꞌiꞌij peta na kꞌax pakiwiꞌ we na xkichꞌij ta uꞌanik ri tzij xkiꞌan chikiwach.
ACT 23:13 Yey ri kikꞌiyal ri xkiya kibꞌ chupa waꞌ, xikꞌow che cuarenta.
ACT 23:14 Konoje waꞌ xebꞌek kukꞌ ri nimaq e aj chakunel pa Rocho Dios y kukꞌ ri nimaq winaq re ri tinamit, y jewaꞌ xkibꞌiꞌij chike: —Riꞌoj xqabꞌiꞌij peta na kꞌax paqawiꞌ we na xqachꞌij ta uꞌanikil wa tzij xqaꞌan chiqawach. Ma chwach ri Dios xqabꞌiꞌij na jinta kꞌo kaqatijo we na kaqakamisaj ta ri Pablo nabꞌe.
ACT 23:15 Ekꞌu woꞌora ralaq junam kukꞌ taq ri uchapom wi ribꞌ ri qꞌatbꞌal tzij, tzꞌonoj alaq che ri comandante kukꞌam lo ri Pablo chiwach alaq chweꞌq. ꞌAna kꞌu alaq che pachaꞌ e riꞌ kata alaq uchiꞌ puwi taq ri tzꞌaqom chirij; yey ekꞌu riꞌoj kaqoyꞌej pa bꞌe re kaqakamisaj —xechaꞌ.
ACT 23:16 Kꞌo kꞌu jun ralabꞌ ri ranabꞌ ri Pablo yey rire xuto kakichꞌaꞌtibꞌej puwi ri kamisabꞌal re ri Pablo kakiꞌan pa bꞌe. Xeꞌek kꞌut, xok bꞌi pa ri cuartel y xuꞌtzijoj waꞌ che ri Pablo.
ACT 23:17 Ewi ri Pablo xusikꞌij jun chike ri capitanes ke ri soldados y xubꞌiꞌij che: —Kꞌama bꞌi la wa jun ala chwach ri comandante, ma kꞌo karaj kubꞌiꞌij che, yey lik il uwach kuto —xchaꞌ.
ACT 23:18 Ri capitán xukꞌam kꞌu bꞌi rala y xuꞌyaꞌa chwa ri comandante, y jewaꞌ xubꞌiꞌij che: —Ri Pablo, ri jun kꞌo pa cárcel, xinusikꞌij y lik xelaj che chaꞌ kankꞌam lo wa jun ala chiwach la, ma kꞌo karaj kutzijoj cheꞌla —xchaꞌ.
ACT 23:19 Ekꞌu ri comandante xukꞌam bꞌi rala che ruqꞌabꞌ y xresaj bꞌi ribꞌ junam rukꞌ rala chikixoꞌl ri e kꞌo chiriꞌ. Ekꞌuchiriꞌ, xutzꞌonoj che: —¿Saꞌ ri kawaj katzijoj chwe? —xchaꞌ.
ACT 23:20 Rala xubꞌiꞌij che: —Ekꞌo jujun aj judiꞌabꞌ kiꞌanom tzij chikiwach chaꞌ kakitzꞌonoj cheꞌla kakꞌam bꞌi la ri Pablo chweꞌq chwach ri qꞌatbꞌal tzij, ma kakiꞌan che pachaꞌ e riꞌ kataꞌ uchiꞌ puwi taq ri tzꞌaqom chirij.
ACT 23:21 Pero waꞌ makoj la; ma kikꞌow che cuarenta ri kikꞌiyal rachijabꞌ kakewaj kibꞌ pa bꞌe. Y konoje waꞌ xkibꞌiꞌij peta na kꞌax pakiwiꞌ we na xkichꞌij ta uꞌanikil wa xkijikibꞌaꞌ uwach. Ma xkiꞌan tzij chikiwach na kewaꞌ taj y na kakitij ta ne kimiqꞌinaꞌ, we na kakikamisaj ta ri Pablo nabꞌe. Yey woꞌora xa kakoyꞌej saꞌ ri kabꞌiꞌij rilal che ri kakitzꞌonoj —xchaꞌ.
ACT 23:22 Ekꞌu ri comandante xukꞌisbꞌej ruchꞌaꞌtem rukꞌ rala, xew kꞌu xubꞌiꞌij bꞌi che: —Na jinta kꞌo kabꞌiꞌij wi we atzijom chi waꞌ chwe —xchaꞌ.
ACT 23:23 Tekꞌuchiriꞌ, wa comandante xebꞌusikꞌij kebꞌ capitanes y xebꞌutaq che kekimol kichiꞌ kebꞌ ciento soldados re kebꞌek chaqan y setenta re kebꞌek chwi kawayuꞌ; yey kebꞌ ciento chik e kꞌaqal lanza. Konoje taq waꞌ kebꞌek kꞌa pa ri tinamit Cesarea pa ri bꞌelejebꞌ ora chaqꞌabꞌ.
ACT 23:24 Y xtaqan che kakiyijbꞌaꞌ ukawayuꞌ ri Pablo chaꞌ kareqꞌnabꞌej bꞌi y jekꞌulaꞌ na jinta kꞌo kukꞌulumaj chwikiqꞌabꞌ chaꞌ kopon na chwach ri taqanel Félix.
ACT 23:25 Yey xutzꞌibꞌaj kꞌu bꞌi jun carta chaꞌ kakiya pan che ri taqanel Félix, jewaꞌ utzꞌibꞌaxik xuꞌano:
ACT 23:26 Riꞌin in Claudio Lisias, kantaq bꞌi wa jun carta cheꞌla, lal nimalaj taqanel Félix. Kꞌulu rutzil wach la.
ACT 23:27 Wa jun achi kantaq bꞌi cheꞌla, xchap kuma raj wach e aj judiꞌabꞌ y ya ne e riꞌ kakikamisaj. Ekꞌu riꞌin kukꞌ ri nusoldados xiꞌnweselaꞌ pakiqꞌabꞌ ma xinwetaꞌmaj rire aj Roma.
ACT 23:28 Pero ruma kꞌu xuaj kanwetaꞌmaj saꞌ ri kakitzꞌaq wi uchiꞌ, xinkꞌam bꞌi rire pa ri qꞌatbꞌal tzij ke raj judiꞌabꞌ.
ACT 23:29 Xinta kꞌu riꞌ, ri kakitzꞌaq wi uchiꞌ xa e puwi taq ri kikojobꞌal chwi ri tzijpixabꞌ kiꞌke. Ekꞌu riꞌin na jinta juna mak xinriq che re kakamisaxik o re kayaꞌ pa cárcel.
ACT 23:30 Y ruma kꞌu xoꞌlbꞌiꞌx chwe saꞌ ri kiyijbꞌam raj judiꞌabꞌ chirij chaꞌ kakikamisaj, xinchꞌobꞌ kꞌu riꞌ más utz we kantaq bꞌi chiwach la. Yey e janipa ri ketzꞌaqaw uchiꞌ, xebꞌenutaq che kakiqꞌalajisaj chiwach rilal janipa ri kitzꞌaqom chirij. Chila kꞌu ko ibꞌ la.
ACT 23:31 Ekꞌu ri soldados xkikꞌam bꞌi ri Pablo jelaꞌ pachaꞌ ri taqanik xꞌan bꞌi chike, y chaqꞌabꞌ xkikꞌam bꞌi pa ri luwar Antípatris.
ACT 23:32 Chukaꞌm qꞌij kꞌut, xetzelej lo pa ri cuartel ri soldados ebꞌenaq chaqan; yey ri soldados ebꞌenaq chwi kawayuꞌ, xkimaj chubꞌi kibꞌe rukꞌ ri Pablo.
ACT 23:33 Ekꞌuchiriꞌ xebꞌopon waꞌ chupa ri tinamit Cesarea, xkiya ri carta che ri taqanel y xeꞌkiyaꞌa kꞌu ri Pablo chwach.
ACT 23:34 Ri taqanel xrajilaj ri carta y xutzꞌonoj pa aj wi ri Pablo. Echiriꞌ xretaꞌmaj aj pa ri luwar re Cilicia,
ACT 23:35 jewaꞌ xubꞌiꞌij che: «Kꞌate katinto echiriꞌ kekꞌun lo ri etzꞌaqayom achiꞌ» xchaꞌ. Xtaqan kꞌu che chaꞌ kachajix pa ri palacio re ri Herodes.
ACT 24:1 Woꞌobꞌ qꞌij kꞌu rikꞌowik waꞌ echiriꞌ ri Ananías ri kajawal raj chakunel pa Rocho Dios xqaj lo pa ri tinamit Cesarea. Rire erachbꞌilam lo jujun nimaq winaq re ri tinamit y jun chik achi aj esay kichiꞌ, Tértulo rubꞌiꞌ. Xebꞌopon kꞌu riꞌ chwach ri taqanel re kakitzꞌaq uchiꞌ ri Pablo.
ACT 24:2 Ekꞌuchiriꞌ xsikꞌix ri Pablo, ri Tértulo xujeqo kutzꞌaq uchiꞌ, jewaꞌ kubꞌiꞌij che ri taqanel Félix: «Lal Félix ri lik kꞌo wach la, ri qatinamit uma rilal uriqom unimal utzil chomal y lik utz ri taqanik la paqawiꞌ ruma lik kꞌo naꞌoj la.
ACT 24:3 Waꞌ wa utz ꞌanom la chiqe na xa ta janipa qꞌij uwach y na xa ta pa jun luwar kaqil wi, ma pa taq ronoje luwar kaqil wi. Ruma kꞌu riꞌ waꞌ, lik kaqatioxij cheꞌla.
ACT 24:4 »Ekꞌu wa joqꞌotaj, chaꞌ na kaqabꞌay ta la, ꞌana ko la riꞌ chojtana la kꞌenoq rukꞌ ri relej kꞌuꞌx la.
ACT 24:5 »Wa qariqom riꞌoj chirij wa jun achi e pachaꞌ chi jun petel-laj yabꞌil. Rire ebꞌuchꞌiꞌom rukꞌ chꞌaꞌoj konoje raj judiꞌabꞌ e kꞌo pa taq ronoje luwar che ruwachulew. Yey e kꞌamayom kiwach ri jumutzaj tikawex kabꞌiꞌx “nazarenos” chike.
ACT 24:6 Y na xew ta waꞌ, ma xutij ne uqꞌij kuꞌan che ri Rocho Dios pachaꞌ na jinta chi uqꞌij. Ruma kꞌu laꞌ, xqachapo y xqaj kaqꞌat tzij puwiꞌ e chirij ri tzijpixabꞌ qe riꞌoj.
ACT 24:7 »Pero ri comandante Lisias xumin ribꞌ chiqaxoꞌl kukꞌ ukꞌiyal soldados y xumaj paqaqꞌabꞌ.
ACT 24:8 Xebꞌutaq kꞌu ri ketzꞌaqaw uchiꞌ waꞌchi chaꞌ kepe na wara ukꞌ la. We xta kꞌu la uchiꞌ, kꞌa ekꞌuchiriꞌ ketaꞌmaj la lik qatzij janipa ri qabꞌiꞌim riꞌoj chirij» xchaꞌ.
ACT 24:9 Yey raj judiꞌabꞌ e kꞌo chiriꞌ xkijikibꞌaꞌ uwach che ri taqanel: «Lik qatzij; e uꞌanom janipa ri bꞌiꞌtal chirij» xechaꞌ.
ACT 24:10 Ekꞌu ri taqanel xuꞌan jun kꞌutubꞌal che ri Pablo chaꞌ kachꞌaꞌtik, y rire xujeq ubꞌiꞌxikil: «Lik wetaꞌam ukꞌiyal chi junabꞌ lal aj qꞌatal tzij re wa qatinamit; e uwariꞌche, rukꞌ ronoje nukꞌuꞌx kantoꞌbꞌej wibꞌ chiwach la.
ACT 24:11 We kaꞌaj la katzꞌonobꞌej la puwiꞌ, ketaꞌmaj kꞌu la riꞌ: Riꞌin kꞌa e ne ukabꞌlajuj qꞌij riꞌ xinopon pa ri tinamit Jerusalem chaꞌ kanloqꞌnimaj uqꞌij ri Dios.
ACT 24:12 Yey ri ketzꞌaqaw nuchiꞌ, rike na xinkiriq taj kinchꞌoꞌjin rukꞌ junoq, na xinkiriq tane e enuchꞌiꞌom rukꞌ chꞌaꞌoj rukꞌiyal winaq pa ri Rocho Dios, pa taq ri sinagogas o pa juna chik luwar re ri tinamit.
ACT 24:13 Jekꞌuriꞌlaꞌ, rike na utz taj kakijikibꞌaꞌ uwach chiwach la woꞌora janipa ri kitzꞌaqom chwij.
ACT 24:14 »Pero chiwach kꞌu la kanya wibꞌ chupa waꞌ: Qatzij, riꞌin in kꞌo chupa ri Bꞌe re ri Cristo, yey rike kakibꞌiꞌij che wa Bꞌe, xa e jun kꞌutunik re sokosoꞌnik. Pero chupa waꞌ wa Bꞌe, riꞌin e kanloqꞌnimaj ri Dios ke ri qatiꞌ-qamam re ojertan; ma nukojom janipa ri kꞌo chupa Rutzij Upixabꞌ ri Dios tzꞌibꞌital kan ruma ri Moisés y kuma ri qꞌalajisanelabꞌ.
ACT 24:15 Y jelaꞌ pachaꞌ rike, riꞌin lik nukubꞌam pan nukꞌuꞌx rukꞌ ri Dios. Ma wetaꞌam ri Dios kebꞌukꞌastajisaj na lo konoje ri ekaminaq; jelaꞌ kuꞌan chike ri e jusukꞌ y ri na e ta jusukꞌ.
ACT 24:16 Ruma taq kꞌu riꞌ waꞌ, lik kinok il riꞌin che ri nubꞌinik chaꞌ jelaꞌ kakꞌojiꞌ ri nunaꞌoj chi jusukꞌ chwach ri Dios y chikiwach ri tikawex.
ACT 24:17 »Yey ikꞌowinaq chi jujun junabꞌ riꞌin na in oponinaq ta pa ri nutinamit; kꞌa ekꞌu woꞌora xinoponik chaꞌ kiꞌnyaꞌa nuqasaꞌn re toꞌbꞌal ke ri nibꞌaꞌibꞌ y kiꞌnyaꞌa nuqasaꞌn chwa raltar re ri Dios.
ACT 24:18 »Echiriꞌ xineꞌkiriqa jujun aj judiꞌabꞌ e petinaq pa taq ri luwar re Asia, riꞌin e riꞌ kankꞌis ri nujosqꞌikil pa ri Rocho Dios. Na xinkiriq ta kꞌu chikixoꞌl rukꞌiyal winaq o kukꞌ ri ketukuk pa chꞌaꞌoj.
ACT 24:19 Ekꞌu wa e aj Asia, we kꞌo juna mak kakaj kakikoj chwij, lik e usukꞌ riꞌ e rike ri koꞌlkibꞌiꞌij waꞌ chiwach la.
ACT 24:20 »Yey kꞌu wa e kꞌo wara, kibꞌiꞌij rike we kꞌo juna mak xkiriq chwij echiriꞌ xineꞌela chwach ri qꞌatbꞌal tzij ke raj judiꞌabꞌ.
ACT 24:21 Ri numak riꞌin chikiwach rike, e echiriꞌ xinkꞌojiꞌ chikixoꞌl, xinsikꞌin chikiwach konoje, jewaꞌ ximbꞌiꞌij: “Ralaq kaqꞌat alaq tzij panuwiꞌ waqꞌij xa ruma nukubꞌam pan nukꞌuꞌx che ri kꞌastajibꞌal ke ri ekaminaq”» xcha ri Pablo.
ACT 24:22 Ri taqanel Félix lik utom chi puwi wa Kꞌakꞌ Bꞌe re ri Jesús. E uwariꞌche echiriꞌ xuta waꞌ, xuchaqij ri kimolom wi kibꞌ, jewaꞌ xubꞌiꞌij chike: «Echiriꞌ kakꞌun ri comandante Lisias, kꞌa ekꞌuchiriꞌ kankꞌis retaꞌmaxik wa ikꞌamom lo chinuwach» xchaꞌ.
ACT 24:23 Xtaqan kꞌu che ri capitán ke ri soldados chaꞌ kachajix ri Pablo, yey xtaqan che chaꞌ kayaꞌ luwar chike ri rachbꞌiꞌil kebꞌoꞌlbꞌina rukꞌ y koꞌlkinimaj.
ACT 24:24 Jujun qꞌij kꞌut ikꞌowinaq, xopon tanchi ri taqanel Félix rukꞌ ri rixoqil Drusila; waꞌ wiꞌxoq e kukꞌil raj judiꞌabꞌ. Ekꞌu ri taqanel Félix xutaq usikꞌixik ri Pablo y xuta chi uchiꞌ puwi ri kubꞌulibꞌal kꞌuꞌxaj rukꞌ ri Qanimajawal Jesucristo.
ACT 24:25 Pero echiriꞌ ri Pablo xujeq kachꞌaꞌt chikiwach puwi ri jusukꞌ bꞌinik, puwi ri lik kuchajij ribꞌ jun chiribꞌil ribꞌ chaꞌ na katzaq ta pa mak y puwi ri qꞌatbꞌal tzij katajin lo pakiwi raj makibꞌ chiqawach apanoq, ri taqanel xuxiꞌij ribꞌ che waꞌ y xubꞌiꞌij: «Woꞌora jat, kꞌate na katinsikꞌij tanchik echiriꞌ kajamiꞌ nuwach» xchaꞌ.
ACT 24:26 Yey wa taqanel Félix xa royeꞌem we ri Pablo kuya puaq che chaꞌ rukꞌ riꞌ kutzoqopij bꞌi. Ruma kꞌu laꞌ, ukꞌiyal laj xusikꞌij y xchꞌaꞌt rukꞌ.
ACT 24:27 Xikꞌow kꞌu kebꞌ junabꞌ, yey ri taqanel Félix xjal bꞌi y xkanaj ri Porcio Festo pukꞌaxel. Ekꞌu ri Félix, xa ruma karaj kakanaj kan utz chikiwach raj judiꞌabꞌ, xuya kan ri Pablo pa cárcel.
ACT 25:1 Oxibꞌ qꞌij roponik ri Festo chilaꞌ Cesarea, xel bꞌi chaꞌ keꞌek Jerusalem.
ACT 25:2 Chiriꞌ kꞌu riꞌ, ri nimaq e aj chakunel pa Rocho Dios kukꞌ ri lik kꞌo kiwach chike raj judiꞌabꞌ, xkijeq kakikoj kibꞌ rukꞌ elejem chwach ri Festo ruma ri kitzꞌaqom chirij ri Pablo.
ACT 25:3 Xkitzꞌonoj kꞌu che ri Festo lik chuꞌana ko riꞌ chuqꞌatisaj lo ri Pablo chike pa ri tinamit Jerusalem, pero ri kinoꞌjim chi rike chikiwach e kakikamisaj ri Pablo pa bꞌe.
ACT 25:4 Noꞌj ri Festo xukꞌul uwach: «Ri Pablo kꞌo pa cárcel pa ri tinamit Cesarea, yey pa kebꞌ oxibꞌ qꞌij in kꞌo ne riꞌin chilaꞌ.
ACT 25:5 Utz nenareꞌ we e kꞌo jujun e aj wach che alaq kebꞌek wukꞌ, ma we kꞌo juna mak chirij waꞌchi, utz kabꞌiꞌij alaq chilaꞌ» xchaꞌ.
ACT 25:6 Laj wajxaqibꞌ o lajuj qꞌij kꞌu riꞌ xuꞌan chikixoꞌl raj judiꞌabꞌ; tekꞌuchiriꞌ, xtzelej pa ri tinamit Cesarea. Chukaꞌm qꞌij, xtzꞌuyiꞌ kꞌu chupa ri qꞌatbꞌal tzij y xtaqan che kakꞌam lo ri Pablo chwach.
ACT 25:7 Echiriꞌ xkꞌam lo ri Pablo, raj judiꞌabꞌ ebꞌelinaq pa ri tinamit Jerusalem xkimok rij, xkitzꞌaq kꞌu uchiꞌ uꞌanom ukꞌiyal mak lik na utz ta uwach, tobꞌ na xkiriq taj suꞌanik kakijikibꞌaꞌ uwach wa kakibꞌiꞌij chirij.
ACT 25:8 Ekꞌu ri Pablo xutoꞌbꞌej ribꞌ chikiwach konoje, jewaꞌ xubꞌiꞌij: —Riꞌin na jinta kꞌana in makuninaq wi, ma na in chꞌaꞌtinaq ta chirij ri tzijpixabꞌ ke raj judiꞌabꞌ, chirij ri Rocho Dios o chirij ri nimalaj taqanel re Roma —xchaꞌ.
ACT 25:9 Pero ri Festo, xa ruma karaj kakanaj kan utz chikiwach raj judiꞌabꞌ, jewaꞌ xubꞌiꞌij che ri Pablo: —¿Kawaj kateꞌek Jerusalem y chilaꞌ kaqꞌat tzij pawiꞌ chinuwach ruma taq waꞌ? —xchaꞌ.
ACT 25:10 Ekꞌu ri Pablo xukꞌul uwach: —Riꞌin in kꞌo chi chwach jun qꞌatbꞌal tzij re ri nimalaj taqanel re Roma, pa taqal wi chwe kaqꞌat tzij panuwiꞌ. Yey rilal lik etaꞌam la chi utz, riꞌin na jinta juna mak nuꞌanom chikij raj judiꞌabꞌ.
ACT 25:11 Ma we ta kꞌo juna numak o we ta kꞌo nuꞌanom re taqal chwe kinkamisax ruma, riꞌ na kanjekꞌ ta wibꞌ che kinkamisaxik. Noꞌj we na qatzij ta wa kitzꞌaqom chwij, na jinta junoq riꞌ taqal che kinuya pakiqꞌabꞌ raj judiꞌabꞌ. Kantzꞌonoj kꞌu riꞌ chaꞌ ri nimalaj taqanel re Roma, e rire ri kuta nuchiꞌ —xchaꞌ.
ACT 25:12 Ekꞌu ri Festo, echiriꞌ xukꞌis kachꞌaꞌt kukꞌ ri e yaꞌl unaꞌoj, jewaꞌ xubꞌiꞌij che ri Pablo: —Xatzꞌonoj kꞌut e ri nimalaj taqanel re Roma ri kataw achiꞌ pa qꞌatbꞌal tzij; jekꞌuriꞌlaꞌ chwach ri nimalaj taqanel re Roma katintaq wubꞌi —xchaꞌ.
ACT 25:13 Ikꞌowinaq chi kꞌu jujun qꞌij echiriꞌ ri rey Agripa rukꞌ rixoq Berenice xebꞌopon pa ri tinamit Cesarea chaꞌ kakiya rutzil uwach ri Festo.
ACT 25:14 Yey ruma lik ukꞌiyal qꞌij xkiꞌan chiriꞌ, ri Festo xutzijoj che ri rey Agripa suꞌchak kꞌo ri Pablo pa cárcel, jekꞌuwaꞌ xubꞌiꞌij che: —Wara kꞌo jun achi yaꞌtal kan pa cárcel ruma ri taqanel Félix.
ACT 25:15 Echiriꞌ xinopon pa ri tinamit Jerusalem, ri nimaq e aj chakunel pa Rocho Dios kukꞌ ri nimaq winaq ke raj judiꞌabꞌ, xkikoj umak wa jun achi chinuwach y xkitzꞌonoj chwe asu kanqꞌat tzij puwiꞌ.
ACT 25:16 Yey chike taq kꞌu riꞌ waꞌ, riꞌin ximbꞌiꞌij: Chiqaxoꞌl ri oj aj Roma, we kꞌo junoq xkojiꞌ umak, nabꞌe na kayaꞌiꞌ che kutoꞌbꞌej ribꞌ chikiwach ri kekojow umak. Y we xriqitaj kꞌu umak, kꞌa ekꞌuchiriꞌ, kaqꞌat tzij puwiꞌ y kayaꞌiꞌ pa kꞌax.
ACT 25:17 »E uwariꞌche, xew xekꞌun ri kikojom umak ri Pablo, riꞌin na xinmayin ta rukꞌ waꞌ; ma asu chukaꞌm qꞌij, xintzꞌuyiꞌ pa ri qꞌatbꞌal tzij y xintaq kꞌu ukꞌamik.
ACT 25:18 »Xekꞌojiꞌ kꞌu chiriꞌ ri e aj tzꞌaqal tzij chirij, pero na jinta juna umak xkikojo pachaꞌ ri nuchꞌobꞌom riꞌin kakitzꞌaq chirij.
ACT 25:19 Ma ri mak xkitzꞌaq chirij, xa e taq puwi ri kꞌutunik ke ri aj judiꞌabꞌ puwi ri Dios y puwi jun achi Jesús rubꞌiꞌ, yey waꞌ kaminaq chi nenareꞌ, tobꞌ ri Pablo lik kujikibꞌaꞌ uwach kꞌaslik.
ACT 25:20 »Ekꞌu riꞌin, ruma na kanriq taj suꞌanik kanyijbꞌaꞌ ri kꞌo wi, xintzꞌonoj na che we karaj keꞌek pa ri tinamit Jerusalem chaꞌ chilaꞌ kaꞌaniꞌ ri qꞌatbꞌal tzij puwiꞌ che ri tzꞌaqom chirij.
ACT 25:21 Pero ri Pablo xutzꞌonoj kataꞌ uchiꞌ ruma ri nimalaj taqanel Augusto. Ruma kꞌu laꞌ, xintaqan che kachajix na pa ri cárcel wara, kopon na ruqꞌijol kantaq bꞌi chwa ri nimalaj taqanel re Roma —xchaꞌ.
ACT 25:22 Ekꞌuchiriꞌ, ri Agripa jewaꞌ xubꞌiꞌij che ri Festo: —Riꞌin lik kacha nukꞌuꞌx kanto saꞌ ri kubꞌiꞌij wa jun achi —xcha ri Agripa. Ewi ri Festo xubꞌiꞌij che: —Chweꞌq na, kata la —xcha che.
ACT 25:23 Chukaꞌm qꞌij kꞌu riꞌ, ri Agripa y ri Berenice xebꞌoponik. Yey saꞌchi ruchomal ri kokibꞌal xkiꞌano, pachaꞌ e nimaq taqanelabꞌ lik kꞌo kiwach. Xebꞌok kꞌu pa ri nimalaj upa ja pa kakimol wi kibꞌ, junam kukꞌ ri comandantes y rachijabꞌ e aj wach re ri tinamit. Ekꞌu ri Festo xtaqan che kakꞌam lo ri Pablo chikiwach.
ACT 25:24 Ekꞌuchiriꞌ, ri Festo jewaꞌ xubꞌiꞌij: «Lal rey Agripa y onoje ri alaq achijabꞌ kꞌo alaq junam wara qukꞌ, riꞌ kꞌu riꞌ wa jun achi kꞌo chiwach alaq. Konoje rukꞌiyal winaq e aj judiꞌabꞌ xkitzꞌaq uchiꞌ rire chinuwach pa ri tinamit Jerusalem. Yey woꞌora pa wa tinamit Cesarea, rukꞌ sikꞌ kakitzꞌonoj rukamik chwe.
ACT 25:25 Noꞌj riꞌin na jinta kꞌo kanriq chirij chaꞌ taqal che kakamisaxik. Ekꞌu rire xutzꞌonoj kataꞌ uchiꞌ ruma ri nimalaj taqanel Augusto; e uwariꞌche, nubꞌiꞌim chik kantaq bꞌi chwach wa nimalaj taqanel.
ACT 25:26 »Yey riꞌin chinuqꞌabꞌ kꞌo wi kantzꞌibꞌaj pan che ri nimalaj wajawal Augusto saꞌ ri mak tzꞌaqom chirij. Pero kꞌamajaꞌ kaqꞌalajin chinuwach saꞌ ri kantzꞌibꞌaj bꞌi. »Ekꞌu uwariꞌche kanya na chiwach ralaq, pero e más chiwach rilal, lal rey Agripa. Kuaj kꞌut kata la uchiꞌ chaꞌ we rilal xriq la saꞌ rumak, riꞌin kꞌo kꞌu kantzꞌibꞌaj puwi rire.
ACT 25:27 Ma chinuwach riꞌin, na ubꞌe taj kantaq bꞌi junoq kꞌo pa presoyil we na kanqꞌalajisaj tubꞌi ri tzꞌaqom chirij» xchaꞌ.
ACT 26:1 Ekꞌuchiriꞌ, ri Agripa xubꞌiꞌij che ri Pablo: «Woꞌora kanya luwar chawe katchꞌawik re katoꞌbꞌej awibꞌ» xchaꞌ. Ekꞌu ri Pablo xuyak ruqꞌabꞌ y xujeq jewaꞌ kutoꞌbꞌej ribꞌ:
ACT 26:2 «Lal rey Agripa, riꞌin lik kinkiꞌkotik ma kayaꞌtaj chwe kinkꞌojiꞌ chiwach la chaꞌ kantoꞌbꞌej wibꞌ che taq ronoje ri tzꞌaqom chwij kuma raj judiꞌabꞌ.
ACT 26:3 Lik kꞌu utz uꞌanom, ma rilal lik etaꞌam la puwi taq ronoje ri qakojobꞌal ri oj aj judiꞌabꞌ yey etaꞌam ne la saꞌ taq ri kaqachapalaꞌ qibꞌ riꞌoj puwiꞌ. Ruma kꞌu laꞌ, kantzꞌonoj ko cheꞌla, chinta ko la rukꞌ unimal kꞌuꞌxaj.
ACT 26:4 »Konoje raj judiꞌabꞌ ketaꞌam saꞌ ri nubꞌinik nusilabꞌik chwi lo in ala, ma xinkꞌiy chilaꞌ Jerusalem pa ri nutinamit Israel.
ACT 26:5 Yey we ne rike kakaj kakiqꞌalajisaj wa ketaꞌam, kakibꞌiꞌij kꞌu riꞌ, qatzij, riꞌin lik ojertan lo riꞌ xex wi in kukꞌil ri fariseos, ri lik qataqem ri kꞌutunik ke raj judiꞌabꞌ puwi ri taqanik re ri Moisés.
ACT 26:6 »Yey ekꞌu woꞌora, ruma ri nukubꞌam pan nukꞌuꞌx che ri bꞌiꞌtisinik xuꞌan ri Dios chike ri qatiꞌ-qamam ojertan, xa ruma waꞌ inyaꞌom pa qꞌatbꞌal tzij.
ACT 26:7 Waꞌ wa bꞌiꞌtisinik e qoyeꞌem riꞌoj oj kalkꞌoꞌal kan ri kabꞌlajuj ukꞌajol ri qamam Jacob ojertan, chaꞌ e kuꞌana qukꞌ janipa ri bꞌiꞌtisim chiqe. Ekꞌu uwariꞌche na kaqoqꞌotaj ta uloqꞌnimaxik ri Dios chipaqꞌij chichaqꞌabꞌ. Kambꞌiꞌij kꞌu riꞌ cheꞌla, lal rey Agripa: Xa ruma kꞌu ri nukubꞌam pan nukꞌuꞌx riꞌin che waꞌ wa bꞌiꞌtisinik, katzꞌaq nuchiꞌ kuma raj judiꞌabꞌ.
ACT 26:8 Kantzꞌonoj kꞌu che onoje ralaq alaq aj judiꞌabꞌ: Chiwach ralaq, ¿na puqꞌabꞌ ta nebꞌa ri Dios kꞌo wi kebꞌukꞌastajisaj lo ri ekaminaq?
ACT 26:9 »E ri petinaq loq, e chinuwach riꞌin e lik chirajawaxik chwe ri kanꞌan ukꞌiyal na utz taj chikij ri kikojom rubꞌiꞌ ri Jesús ri aj Nazaret.
ACT 26:10 Y jenewaꞌ xinꞌan pa ri tinamit Jerusalem. Lik e kꞌi ri xebꞌenuya pa cárcel ruma kikojom rubꞌiꞌ ri Jesús. Waꞌ xyaꞌ ne uwujil panuqꞌabꞌ kuma ri nimaq e aj chakunel pa Rocho Dios. Yey riꞌin xinya ne nuchꞌaꞌtem chikij chaꞌ kekamisaxik.
ACT 26:11 Y pa taq ronoje ri sinagogas ukꞌiyal laj xebꞌenuya pa kꞌax re kanmin kiwach chupa chaꞌ kakikꞌaq bꞌi uqꞌij ri Jesús. Y ruma ri lik xinchꞌuꞌjer chikij rukꞌ woyowal, xebꞌeꞌnutzukuj ne kꞌa pa taq ri tinamit lik naj.
ACT 26:12 »Ekꞌu in kꞌo wi riꞌ che waꞌ, numajom chi kꞌu bꞌi nubꞌe pa ri tinamit Damasco, wukꞌam uwujil yaꞌtal chwe kuma ri nimaq e aj chakunel pa Rocho Dios kꞌutubꞌal re intaqom bꞌi kuma rike chaꞌ kebꞌenuya pa kꞌax ri kikojom rubꞌiꞌ ri Cristo.
ACT 26:13 Kantzijoj kꞌu riꞌ cheꞌla, lal nimalaj taqanel, ri xinkꞌulumaj: Pa tikꞌil qꞌij e riꞌ numajom bꞌi ri nubꞌe, xinwil ruwonibꞌal jun aqꞌ xpe chilaꞌ chikaj. Yey waꞌ más ne kawolqꞌin chwa ruwonibꞌal ri qꞌij; ekꞌu riꞌ waꞌ xusutij wij kukꞌ konoje ri ebꞌenaq wukꞌ.
ACT 26:14 Xojtzaq kꞌu qonoje riꞌoj pulew, yey xinta jun qulaj kachꞌaꞌt wukꞌ pa ri chꞌaꞌtem hebreo, jewaꞌ kubꞌiꞌij chwe: “Saulo, Saulo, ¿suꞌchak katchꞌoꞌjin chwij? Atukel kaꞌan kꞌax che awibꞌ jelaꞌ pachaꞌ kuꞌan ri bꞌoyex echiriꞌ kuya aqan che ri puya kachꞌik lo che” xchaꞌ.
ACT 26:15 »Ekꞌu riꞌin ximbꞌiꞌij: “¿China rilal, Wajawal?” xinchaꞌ. »Yey ri Qajawal xubꞌiꞌij: “Riꞌin in Jesús, ri jun katchꞌoꞌjin chirij.
ACT 26:16 Pero woꞌora chatyaktajoq y chayijbꞌilaꞌ awibꞌ re kaꞌan ri katintaq che, ma e uchak waꞌ xinkꞌut wibꞌ chawach. Kanꞌan kꞌu waj chak chawe y katuꞌana at qꞌalajisay re ri kat-tajin che rilik woꞌora y ri kawil chiqawach apanoq echiriꞌ kankꞌut tanchi wibꞌ chawach.
ACT 26:17 Katinchajij chikiwach ratinamit e aj judiꞌabꞌ y chikiwach ri na e ta aj judiꞌabꞌ, waꞌ e ri tzel katkilo. Yey katintaq bꞌi woꞌora chike ri na e ta aj judiꞌabꞌ
ACT 26:18 chaꞌ awuma riꞌat kajaqataj ri kiwach y jekꞌulaꞌ na kebꞌin ta chi chupa ri qꞌequꞌm, ma e kebꞌin chupa ri Qꞌijsaq. Yey awuma riꞌat kakesaj ne kibꞌ riꞌ puqꞌabꞌ ruchuqꞌabꞌ ri Satanás y kakiya kibꞌ puqꞌabꞌ ri Dios. Ruma kꞌu ri kubꞌulibꞌal kikꞌuꞌx wukꞌ, kakikꞌul ri kuybꞌal mak y kakikꞌul ke janipa taq ri ubꞌiꞌtisim chi lo ri Dios chike rutinamit” xchaꞌ.
ACT 26:19 »Jekꞌuriꞌlaꞌ, lal rey Agripa, na xinuꞌana ta in aj palajiy tzij chwa wa xkꞌut chwe ruma ri Dios.
ACT 26:20 Ma ri xinꞌano e nabꞌe xinꞌek che utzijoxik chike ri e kꞌo pa ri tinamit Damasco, tekꞌuchiriꞌ chike ri e kꞌo pa ri tinamit Jerusalem y pa ronoje taq ri luwar re Judea. Yey xinꞌek ne che utzijoxik chike ri na e ta aj Israel. Chike kꞌu konoje ximbꞌiꞌij lik chirajawaxik wi kakitzelej kitzij chwach ri Dios, kakiya kibꞌ puqꞌabꞌ y kakiꞌan kꞌu ri utz jelaꞌ pachaꞌ ri taqal chike ri kitzelem chi kitzij chwach ri Dios.
ACT 26:21 »Ruma kꞌu waꞌ, raj judiꞌabꞌ xineꞌkichapa lo pa ri Rocho Dios y xkaj ne kinkikamisaj.
ACT 26:22 Pero ruma nukꞌulum rutoꞌbꞌal ri Dios, kꞌa waqꞌij ora na woqꞌotam ta ne uqꞌalajisaxik ri Dios chike konoje ri tikawex, chinimaꞌq chichꞌutiꞌq. Yey ronoje ri nubꞌiꞌim puwi ri Cristo e junam rukꞌ ri tzꞌibꞌital kan kuma ri qꞌalajisanelabꞌ y ruma ri Moisés puwi taq ri kuꞌana na chiqawach apanoq.
ACT 26:23 Ma rike xkibꞌiꞌij chirajawaxik ri Cristo karikꞌowibꞌej na rukꞌaxkꞌolil ri kamik y kuꞌana ri nabꞌe kakꞌastaj lo chikixoꞌl ri ekaminaq, chaꞌ jelaꞌ kutzijoj ri Qꞌijsaq chike ri qatinamit y chike ri jujun chik tinamit na e ta aj judiꞌabꞌ.»
ACT 26:24 Ekꞌu riꞌ katajin ri Pablo che ubꞌiꞌxikil waꞌ re toꞌbꞌal ribꞌ, ri Festo lik ko xchꞌawik y xubꞌiꞌij: —Pablo, ¡at chꞌuꞌjerinaq! Lik katikꞌow uwiꞌ che rajilaxik ukꞌiyal wuj, y ruma waꞌ xatchꞌuꞌjerik —xchaꞌ.
ACT 26:25 Noꞌj ri Pablo xubꞌiꞌij: —Na in chꞌuꞌjerinaq taj, Festo, ri lik kꞌo wach la. Ma wa kintajin che uqꞌalajisaxik lik qatzij y lik usukꞌ.
ACT 26:26 Ma e ne ri rey Agripa, ri in kꞌo chwach, rire lik retaꞌam puwi taq waꞌ. Ruma ne riꞌ, lik kinchꞌaꞌt rukꞌ ronoje nukꞌuꞌx chwach rire. Ma chinuwach riꞌin, ronoje taq wa kintajin che ubꞌiꞌxikil, utom chi rire; ma taq waꞌ na xa ta xeꞌlaqꞌay uꞌanom.
ACT 26:27 ¿Kakoj la rilal lal rey Agripa, janipa ri kitzꞌibꞌam kan ri qꞌalajisanelabꞌ ojertan? ¡Riꞌin wetaꞌam kakoj la waꞌ! —xchaꞌ.
ACT 26:28 Ekꞌuchiriꞌ, ri rey Agripa xubꞌiꞌij che ri Pablo: —E kami kachꞌobꞌ riꞌat, ¿xa jubꞌiqꞌ chi karaj kakoj pa nujolom chaꞌ kinuꞌana in jun kukꞌ ri kikojom rubꞌiꞌ ri Cristo? —xchaꞌ.
ACT 26:29 Ekꞌu ri Pablo xubꞌiꞌij che: —E lik kuaj riꞌ kuꞌana waꞌ ukꞌ la, xa pa joqꞌotaj o tobꞌ kamayinik; pero ¡lik kantzꞌonoj che ri Dios chaꞌ na xew ta rilal, ma e janipa wa kinkitataꞌ wa joqꞌotaj, kebꞌuꞌana jelaꞌ pachaꞌ riꞌin! Xew kꞌu na kuaj taj kayaꞌiꞌ alaq pa karena pachaꞌ wa ꞌanom chwe riꞌin —xchaꞌ.
ACT 26:30 Echiriꞌ xubꞌiꞌij waꞌ ri Pablo, xeyaktaj ri rey Agripa, ri taqanel Festo, rixoq Berenice y konoje ri etzꞌul chiriꞌ kukꞌ.
ACT 26:31 Yey echiriꞌ xkijach taq bꞌi kibꞌ, chikiwach kakibꞌiꞌij: «Waꞌchi, na jinta kꞌo uꞌanom chaꞌ taqal che kakamisaxik o kayaꞌ pa cárcel» kechaꞌ.
ACT 26:32 Ekꞌu ri Agripa xubꞌiꞌij che ri Festo: —Waꞌchi, utz katzoqpix bꞌi tamaji utzꞌonom kataꞌ uchiꞌ ruma ri nimalaj taqanel re Roma —xchaꞌ.
ACT 27:1 Ekꞌuchiriꞌ xjikibꞌax uwach kojtaq bꞌi pa ri luwar re Italia pa barco, ri Pablo y jujun chik chike ri e kꞌo pa presoyil xeyaꞌ puqꞌabꞌ jun capitán ke soldados, Julio rubꞌiꞌ. Waꞌ waꞌchi kataqan pakiwi ri soldados “E re ri nimalaj taqanel Augusto” kabꞌiꞌx chike.
ACT 27:2 Xojok kꞌu bꞌi chupa jun barco re ri puerto Adramitio, e riꞌ keꞌek pa taq ri tinamit e kꞌo chuchiꞌ ri mar re Asia. Xqamaj kꞌu bꞌi qabꞌe chwi ri mar. Yey xeꞌek qukꞌ ri Aristarco, jun aj Tesalónica, jun tinamit pa ri luwar re Macedonia.
ACT 27:3 Chukaꞌm qꞌij kꞌut, xojopon pa ri tinamit Sidón. Chiriꞌ kꞌu riꞌ, ri Julio, raj wach ke ri soldados, lik xukꞌut ri rutzil ukꞌuꞌx che ri Pablo, ma xuya luwar che xeꞌbꞌina kukꞌ ri ramigos chaꞌ kakitoꞌ lo rukꞌ ri kajawax che.
ACT 27:4 Xojel kꞌu bꞌi pa ri tinamit Sidón. Pero na xojꞌek ta jusukꞌ ruma ri tew lik kajumkaꞌnik, yey waꞌ chiqawach petinaq wi. Ekꞌu xqasut rij ri isla Chipre chaꞌ kojuchꞌuq ri juyubꞌ che ri tew.
ACT 27:5 Xojikꞌow kꞌu chwach taq ri tinamit re Cilicia y re Panfilia, ri e kꞌo chuchiꞌ ri mar. Y xojopon kꞌu pa ri tinamit Mira, jun tinamit re Licia.
ACT 27:6 Chiriꞌ kꞌu riꞌ, ri capitán ke ri soldados xuriq jun barco re ri puerto Alejandría, e riꞌ kumaj bꞌi ubꞌe keꞌek pa taq ri luwar re Italia. Y xojuya bꞌi chupa.
ACT 27:7 Ukꞌiyal qꞌij kꞌut xojbꞌin chwi ri mar e laꞌ xa kokꞌil, y lik kꞌayew xojopon chwach ri tinamit Gnido ruma ri tew kojuqꞌatej chiqawach. Ruma waꞌ xqamaj bꞌi qabꞌe pa ri isla Creta pa na lik ta kujum wi ribꞌ ri tew chiqe. Xojikꞌow kꞌu chwach ri tinamit Salmón.
ACT 27:8 Ewi xojikꞌow chirij waꞌ wa isla xa naqaj che ruwa raqan taqꞌaj y jelaꞌ lik kꞌayew xojopon pa jun tinamit Buenos Puertos, kabꞌiꞌx che. Waꞌ xa chunaqaj chi ri tinamit Lasea kꞌo wi.
ACT 27:9 Lik kꞌut ukꞌiyal qꞌij chik qajamom che ri qabꞌenam yey lik xibꞌibꞌal chi ri bꞌinem chwi ri mar, ma kꞌakꞌ rikꞌowik ri nimaqꞌij echiriꞌ ri aj judiꞌabꞌ kakiꞌan ayuno yey e ne riꞌ kujeq ri qꞌalaj. E uwariꞌche ri Pablo xebꞌupixabꞌaj,
ACT 27:10 jewaꞌ xubꞌiꞌij chike: «Alaq achijabꞌ, riꞌin kanwilo wa qabꞌenam chwi wa mar lik xibꞌibꞌal uwach. Kꞌo pa saq na xa ta jubꞌiqꞌ ri kaqajam kanoq; na xew ta kaqajam kan eqaꞌn y kaqajam kan ri barco, ma laj ne kaqajam kan ri qakꞌaslem riꞌoj» xcha chike.
ACT 27:11 Pero ri capitán ke ri soldados e lik xuta ke ri kꞌamayom bꞌi re ri barco y ri rajaw waꞌ, yey na xok ta il che ri xubꞌiꞌij ri Pablo.
ACT 27:12 Ekꞌu ri puerto pa katakꞌiꞌ wi ri barco na e ta jun luwar pa utz kaqikꞌowibꞌej wi ruqꞌijol echiriꞌ kꞌax tew y kꞌo jabꞌ. Ruma kꞌu laꞌ, lik e kꞌi xkibꞌiꞌij chikiwach kebꞌel chiriꞌ y kakitij uqꞌij kebꞌek pa ri tinamit Fenice chaꞌ chilaꞌ kakikꞌowibꞌej ruqꞌijol echiriꞌ kꞌax tew y kꞌo jabꞌ. Wa jun puerto re ri isla Creta katzuꞌn lo puwikiqꞌabꞌ y pa mox che rutzaqibꞌal qꞌij.
ACT 27:13 Xpe kꞌu jun tew pa sur xa kawelel chik. Waꞌ xukoj pa kijolom e xuꞌana ri kirayim, y jekꞌulaꞌ utz kakimaj bꞌi kibꞌe. Xkimaj kꞌu bꞌi kibꞌe pa ri barco chunaqaj ri taqꞌaj che ri isla Creta.
ACT 27:14 Pero na naj ta qaꞌanom chwi ri mar echiriꞌ xujeq jun nimalaj kaqjiqꞌ “Euroclidón” kabꞌiꞌx che y xujeq kꞌu riꞌ e kupaqej bꞌi ri barco.
ACT 27:15 Ekꞌu riꞌ waꞌ wa kaqjiqꞌ xujeq kuxulkꞌatilaꞌ ri barco y na utz ta chik kakꞌam bꞌi jusukꞌ chwa ruchuqꞌabꞌ runimal tew. Jekꞌulaꞌ xa xqaya bꞌi qibꞌ xojkꞌam bꞌi ruma runimal tew.
ACT 27:16 Xqasutij kꞌu rij jun ralko isla Clauda rubꞌiꞌ pa na lik ta kujum wi ribꞌ ri tew chiqe, yey lik xuꞌan kꞌayew chiqe xqajekꞌ pan ri ralko barco re toꞌbꞌal ibꞌ, ri charem ruma ri nimalaj barco.
ACT 27:17 Ekꞌuchiriꞌ xaqꞌanisax waꞌ pa ri nimalaj barco, xkojiꞌ ukowil ri barco rukꞌ laso chaꞌ na kuꞌan ta ukꞌaj ruma ri kaqjiqꞌ. Lik kꞌu xqaxiꞌij qibꞌ riꞌ, ma runimal tew kupaqej ri barco chwach jun luwar Sirte rubꞌiꞌ, pa na cho ta wi ri yaꞌ y wuluꞌl uxeꞌ ri sanyebꞌ. Xesax kꞌu ri manta kꞌo puwi ri barco y xyaꞌ luwar che ri barco kakꞌam bꞌi ruma runimal tew.
ACT 27:18 Chukaꞌm qꞌij kꞌut, lik kꞌa kajabajoꞌx ri barco ruma ruchuqꞌabꞌ ri kaqjiqꞌ. Ruma kꞌu riꞌ rachijabꞌ ebꞌukꞌayom ri barco xkijeq kakikꞌaq taq bꞌi ri eqaꞌn re ri barco pa ri mar.
ACT 27:19 Y churox qꞌij xqajeq utorik upa ri barco y xqakꞌaq bꞌi pa ri mar taq ri xqatoro.
ACT 27:20 Ukꞌiyal qꞌij kꞌu riꞌ na jinta qꞌij y na jinta chꞌumil xqꞌalajinik, yey ri kaqjiqꞌ na xa ta jubꞌiqꞌ ri yaꞌ kuroj chiqe. Ruma kꞌu waꞌ na jinta chi pa saq we kojkꞌasiꞌ na.
ACT 27:21 Yey na oj woꞌqinaq ta ukꞌiyal qꞌij. E uwariꞌche ri Pablo xtakꞌiꞌ chikixoꞌl konoje y jewaꞌ xubꞌiꞌij: «Alaq achijabꞌ, lik utz ta e xta alaq ri ximbꞌiꞌij; ma we tamaji xojel lo pa ri isla Creta, na kaqakꞌulumaj ta riꞌ waꞌ y na jinta ne kꞌo kaqajam riꞌ.
ACT 27:22 »Noꞌj kꞌu woꞌora kannimarisaj kꞌuꞌx alaq rukꞌ waꞌ: Na jinta junoq kujam kan rukꞌaslem che alaq, xew kaqajam kan ri barco.
ACT 27:23 Kambꞌiꞌij waꞌ ma wa jun aqꞌabꞌ xkꞌun wukꞌ ri ángel re ri Dios, ri Jun nuyaꞌom wibꞌ puqꞌabꞌ y ri kanloqꞌnimaj.
ACT 27:24 Ekꞌu ri ángel xubꞌiꞌij kan waꞌ chwe: “Pablo, maxiꞌij awibꞌ, ma lik chirajawaxik kateꞌela chwach ri nimalaj taqanel re Roma. Yey awuma riꞌat, ri Dios kebꞌukolobꞌej che ri kamik konoje ri e kꞌo awukꞌ chupa ri barco” xcha ri ángel chwe.
ACT 27:25 Ruma kꞌu laꞌ, alaq achijabꞌ, nimarisaj kꞌuꞌx alaq. Ma riꞌin kubꞌul nukꞌuꞌx rukꞌ ri Dios y lik nujikibꞌam e kuꞌanaꞌ pachaꞌ ri xbꞌiꞌx chwe.
ACT 27:26 Noꞌj kꞌu ri barco kuꞌchꞌikibꞌaꞌ na kꞌu ribꞌ pa ri sanyebꞌ chwach juna isla» xcha ri Pablo.
ACT 27:27 Jun aqꞌabꞌ kꞌu riꞌ, echiriꞌ xqakꞌis kebꞌ semana, oj paqem bꞌi ruma ri tew chwi ri mar Adriático. Yey pa tikꞌil aqꞌabꞌ kꞌut, e rachijabꞌ ebꞌukꞌayom ri barco xkinaꞌbꞌej katajin koponik chunaqaj ulew.
ACT 27:28 Xkipaj kꞌu ruchoyil upa ri yaꞌ y xkinaꞌbꞌej treinta y seis metros chi uchoyil upa. Xojbꞌin chi pan jubꞌiqꞌ y xkipaj tanchik. Xkinaꞌbꞌej kꞌu riꞌ xa veintisiete metros chi uchoyil upa.
ACT 27:29 Lik kꞌu kakixiꞌij kibꞌ we ri tew xuchiq ri barco chwa abꞌaj. Ewi xkikꞌaq bꞌi kajibꞌ anclas pa ri mar chirij lo ri barco re kakixim rukꞌ chaꞌ utz katakꞌiꞌik. Xew kꞌu lik koyeꞌem chik kasaqirik.
ACT 27:30 Ekꞌu rachijabꞌ ebꞌukꞌayom ri barco xkaj kakiya kan ri barco. Xkijeq kꞌu kakiqasaj pa ri mar ri ralko barco re toꞌbꞌal ibꞌ y xkiꞌan pachaꞌ e riꞌ kakiqasaj pan jujun chik anclas chwach ri barco re katakꞌiꞌik.
ACT 27:31 Ekꞌu ri Pablo xubꞌiꞌij chike ri capitán y ri soldados: «We wa ebꞌukꞌayom re ri barco na kekanaj ta kan chupa ri barco, na kakolobꞌetaj ta alaq» xchaꞌ.
ACT 27:32 Ekꞌuchiriꞌ, ri soldados xkiqꞌat pa ximital wi ri ralko barco re toꞌbꞌal ibꞌ; y xkiya bꞌi ranimaꞌ xeꞌek pa ri yaꞌ y jelaꞌ na jinta junoq utz kanimaj bꞌi chupa.
ACT 27:33 Echiriꞌ xujeq kꞌut kasaqirik, ri Pablo xebꞌupixabꞌaj konoje chaꞌ kewaꞌik, jewaꞌ xubꞌiꞌij chike: «E ukaꞌm semana waꞌ na uxlaninaq ta alaq y na jinta kꞌo tijom alaq.
ACT 27:34 E uwariꞌche, kantzꞌonoj che alaq, woꞌq alaq chaꞌ na kaqꞌobꞌ ta ri chuqꞌabꞌ alaq; ma na jinta junoq che alaq kujam kan tobꞌ tane xa juna uwiꞌ» xchaꞌ.
ACT 27:35 Kꞌa ekꞌu riꞌ ubꞌiꞌim waꞌ, xukꞌam jun pam y xutioxij che ri Dios chikiwach konoje; xuwechꞌ kꞌu upa y xujeq utijik.
ACT 27:36 Kꞌa ekꞌuchiriꞌ, konoje lik xmiqꞌ kikꞌuꞌx y xewaꞌik.
ACT 27:37 Chi qonoje ri oj kꞌo chupa ri barco, oj kebꞌ ciento rukꞌ setenta y seis chi tikawex.
ACT 27:38 Ekꞌuchiriꞌ xenojik, xkiqꞌobꞌisaj kan ri reqaꞌn ri barco, e xkikꞌaq kan ri trigo pa ri mar.
ACT 27:39 Ekꞌuchiriꞌ paqꞌij chik, ri ebꞌukꞌayom ri barco na ketaꞌam taj pa la katajin wi koponik. Yey xkil kꞌu pan chinimanaj jun uqꞌabꞌ ri mar sanyebꞌ uchiꞌ; jekꞌulaꞌ xkiyijbꞌaꞌ chikiwach we kakichꞌij uminik bꞌi ri barco kꞌa chilaꞌ.
ACT 27:40 Xkiqꞌat kꞌu ri ximbꞌal re ri anclas pa yuqul wi ri barco y xkiya kan ranimaꞌ waꞌ chupa ri mar. Jekꞌulaꞌ xkikir ri ximbꞌal re ri kebꞌ timón re ri barco. Tekꞌuchiriꞌ, xkiyak ri manta kakꞌuluw ri tew chwach ri barco y xkijeq kꞌu riꞌ keqibꞌ pan che rulew kꞌo chuchiꞌ ri yaꞌ.
ACT 27:41 Pero ri barco xuꞌyaꞌa ribꞌ pa kukꞌul wi ribꞌ kebꞌ utzaꞌm yaꞌ y xtzaniꞌ pa jun luwar pa umolom wi ribꞌ ri sanyebꞌ chuxeꞌ ri yaꞌ. Rutzaꞌm ri barco xuꞌchꞌikibꞌaꞌ ribꞌ pa ri sanyebꞌ. Ekꞌu ri chirij ri barco xujeq kawechꞌetajik ruma ruchuqꞌabꞌ ri tew kꞌo chwi ri mar.
ACT 27:42 Ekꞌu ri soldados xkibꞌiꞌij chikiwach kekikamisaj ri e kꞌo chi presoyil chaꞌ na jinta junoq kanimajik e laꞌ pa mux.
ACT 27:43 Noꞌj kꞌu ri capitán ke ri soldados, ruma karaj kukolobꞌej ri Pablo che ri kamik, xebꞌuqꞌatej che wa xkinoꞌjij. Y xtaqan kꞌu che chaꞌ e janipa ri kakiriq mux kikꞌaqa bꞌi kibꞌ nabꞌe chupa ri yaꞌ y keꞌkimaja uwa ulew;
ACT 27:44 yey ri nikꞌaj chik kiꞌana bꞌi ke, kiyaꞌa bꞌi kibꞌ chwi taq tzꞌalam y chwi taq ruchꞌaqapul ri barco. Jekꞌulaꞌ xkiꞌano. Ewi na jinta junoq xjiqꞌ pa yaꞌ; konoje xeꞌkimaja uwa ulew.
ACT 28:1 Ekꞌuchiriꞌ ojelinaq chi lo chwa ruxibꞌrikil ri kamik chupa wa yaꞌ y xqamaj kꞌu uwa ulew, kꞌa echiriꞌ xqetaꞌmaj wa isla pa xojopon wi, Malta rubꞌiꞌ.
ACT 28:2 Yey ri tikawex e aj chilaꞌ lik xkikꞌut ri relej kikꞌuꞌx chiqe, ma xojkikꞌul qonoje. Xkinukꞌ kꞌu jun aqꞌ ruma ri jabꞌ katajinik y ruma ri tew lik kajuchꞌuchꞌik.
ACT 28:3 Ekꞌu ri Pablo xuꞌmolo lo jujun uqꞌabꞌ cheꞌ chaqiꞌj y xukꞌaq chupa ri aqꞌ. Yey kꞌo kꞌu jun kumatz animajel chwach rukꞌatanil ri aqꞌ; waꞌ xutzuyuyej ribꞌ che ruqꞌabꞌ ri Pablo.
ACT 28:4 Echiriꞌ ri tikawex e aj chilaꞌ xkil ri kumatz tzayal che ruqꞌabꞌ ri Pablo, jewaꞌ xkibꞌiꞌij chikiwach: «Lik qꞌalaj waꞌchi kamisanel; ma tobꞌ na xjiqꞌ ta pa yaꞌ, pero ri qꞌatbꞌal tzij puwiꞌ na kuya ta che kakꞌasiꞌik ruma ri na utz taj uꞌanom» xechaꞌ.
ACT 28:5 Pero ri Pablo xa xujabꞌij ruqꞌabꞌ y ri kumatz xtzaq chupa ri aqꞌ, yey ri Pablo na jinta kꞌo xukꞌulumaj.
ACT 28:6 Ekꞌu ri winaq koyeꞌem jampalaꞌ kawaꞌlij rucuerpo o we xaqikꞌateꞌt katzaq pulew y asu kakamik. Lik kꞌu riꞌ xkoyꞌej waꞌ. Yey echiriꞌ xkilo na jinta kꞌo kukꞌulumaj, xkijalkꞌatij ri kakichꞌobꞌo y xkibꞌiꞌij ri Pablo e jun dios.
ACT 28:7 Chunaqaj kꞌu la oj kꞌo wi kꞌo taq rulew jun achi aj wach chupa ri luwar, Publio rubꞌiꞌ. Rire xojukꞌulu y lik xojukajmaj chi utz oxibꞌ qꞌij.
ACT 28:8 Ekꞌu riꞌ ruqaw ri Publio kꞌo chwa uwarabꞌal yewaꞌ; kꞌo aqꞌ chirij y kikꞌ chupa. Ekꞌu ri Pablo xok bꞌi, xeꞌrilaꞌ. Xuꞌan orar rukꞌ; tekꞌuchiriꞌ, xuya ruqꞌabꞌ puwiꞌ y xukunaj.
ACT 28:9 Ruma kꞌu riꞌ waꞌ, ri jujun chik yewaꞌibꞌ e kꞌo chupa wa luwar xebꞌopon rukꞌ ri Pablo y xekunutajik.
ACT 28:10 E taq kꞌu riꞌ waꞌ wa tikawex lik xojkikajmaj chi utz. Y echiriꞌ xqamaj tanchi ubꞌi qabꞌe pa barco, xkiya bꞌi janipa ri kajawax chiqe.
ACT 28:11 Oxibꞌ ikꞌ kꞌu qakꞌisom chupa wa luwar. Ekꞌuchiriꞌ, xojok bꞌi chupa jun barco re ri puerto Alejandría. Waꞌ wa jun barco rikꞌowibꞌem ruqꞌijol echiriꞌ kꞌax tew y kꞌo jabꞌ chiriꞌ; yey chutzaꞌm waꞌ kojotal ri kikꞌaxwach kebꞌ tiox, waꞌ e ri Cástor y ri Pólux.
ACT 28:12 Xojopon kꞌu pa ri tinamit Siracusa y xqaꞌan oxibꞌ qꞌij chiriꞌ.
ACT 28:13 Tekꞌuchiriꞌ, xqamaj bꞌi qabꞌe pa barco chunaqaj ri taqꞌaj re ruchiꞌ ri mar y xojopon pa ri tinamit Regio. Chukaꞌm qꞌij kꞌu riꞌ, xpe ri tew pa sur chiqe. Y churox qꞌij kꞌu riꞌ xojbꞌinik y xojopon pa ri tinamit Puteoli.
ACT 28:14 Chupa kꞌu riꞌ wa tinamit xeqariq jujun chike ri kikojom rubꞌiꞌ ri Cristo. Ekꞌu rike xebꞌelaj chiqe kojkanaj wuqubꞌ qꞌij kukꞌ, y e xqaꞌano. Tekꞌuchiriꞌ xojel bꞌi chiriꞌ, xojeꞌela pa ri tinamit Roma.
ACT 28:15 Ekꞌuchiriꞌ ri hermanos e kꞌo Roma xketaꞌmaj ri qoponibꞌal, xebꞌel lo che qakꞌulik. Jujun xojkiriq pa ri luwar kabꞌiꞌx che: “Foro re Apio”, y jujun chik pa ri luwar kabꞌiꞌx che “Oxibꞌ Tabernas”. Echiriꞌ ri Pablo xril ri koponibꞌal ri hermanos, xutioxij che ri Dios y lik xnimar ukꞌuꞌx.
ACT 28:16 Ekꞌuchiriꞌ xojopon pa ri tinamit Roma, ri capitán ke ri soldados kꞌamayom bꞌi ke ri e kꞌo chi presoyil, xebꞌuya ri presos puqꞌabꞌ ri kꞌamal kiwach konoje ri soldados re chilaꞌ. Pero ri Pablo xyaꞌ che kakꞌojiꞌ utukel pa jun ja y xa kꞌu jun soldado kachajin re chaꞌ na kanimaj tubꞌi.
ACT 28:17 Oxibꞌ qꞌij kꞌu ikꞌowinaq echiriꞌ ri Pablo xutaq kisikꞌixik ri aj wach ke raj judiꞌabꞌ. Echiriꞌ kimolom chi kꞌu kichiꞌ, jewaꞌ xubꞌiꞌij chike: —Achijabꞌ, alaq watz-nuchaqꞌ, riꞌin na jinta kꞌo nuꞌanom chirij ri qatinamit y na jinta ne kꞌo nuꞌanom chirij ri kikojobꞌal kan ri qatiꞌ-qamam. Na rukꞌ ta kꞌu riꞌ, chilaꞌ Jerusalem in kꞌamom lo chi presoyil ma raj wach e aj judiꞌabꞌ xinkiya pakiqꞌabꞌ raj Roma.
ACT 28:18 Yey rike echiriꞌ xkita nuchiꞌ, xkaj xinkitzoqopij bꞌi, ma na xkiriq ta juna mak chwij re taqal chwe kinkamisaxik.
ACT 28:19 »Pero raj judiꞌabꞌ xeqꞌaten che kintzoqpix bꞌi. Ruma kꞌu waꞌ, lik xinnaꞌo kajawax chwe kantzꞌonoj kataꞌ nuchiꞌ ruma ri nimalaj taqanel re Roma. Y na xinꞌan ta waꞌ re kankoj kimak ri nutinamit e aj judiꞌabꞌ.
ACT 28:20 Ruma taq kꞌu waꞌ, xinsikꞌij alaq chaꞌ kanwil wach alaq y kinchꞌaꞌt ukꞌ alaq, ma xew kuaj ketaꞌmaj alaq waꞌ: Riꞌin in yaꞌtal chi presoyil yey inyutum rukꞌ wa karena ruma nukubꞌam pan nukꞌuꞌx che ri qoyeꞌem ri oj aj Israel —xcha chike.
ACT 28:21 Ekꞌuchiriꞌ, rike xkibꞌiꞌij che: —Riꞌoj na qakꞌulum tane juna wuj chiꞌij la petinaq Judea; yey na jinta ne junoq chike ri qatz-qachaqꞌ kꞌuninaq wara chiqawach riꞌoj re kukoj juna mak chiꞌij la.
ACT 28:22 Pero lik kꞌu chirajawaxik chiqe riꞌoj kaqata na saꞌ ri katajin la che ukꞌutik; ma qonoje qetaꞌam pa ronoje luwar ri tikawex kechꞌaꞌt chirij wa jun Kꞌakꞌ Bꞌe —xechaꞌ.
ACT 28:23 Xkiqꞌat kꞌu uqꞌijol kakimol kibꞌ rukꞌ ri Pablo chaꞌ kakita uchiꞌ. Lik kꞌu e kꞌi riꞌ xebꞌopon rukꞌ pa ri jeqel wi. Ekꞌu ri Pablo xuqꞌalajisaj rutaqanik ri Dios chikiwach; xujeqebꞌej lo anim y xuꞌkꞌisa kꞌa bꞌenaq qꞌij. E lik xutij uqꞌij kukꞌ chaꞌ kakikoj ri Utzilaj Tzij puwi ri Jesús. Yey xujikibꞌaꞌ kꞌu uwach rutzijonik rukꞌ ri Tzij Pixabꞌ re ri Moisés y rukꞌ taq ri kitzꞌibꞌam kan ri qꞌalajisanelabꞌ.
ACT 28:24 Jujun kꞌu chike ri tikawex xkikojo janipa ri xubꞌiꞌij ri Pablo, noꞌj e kꞌo jujun chik na xkaj taj xkikojo.
ACT 28:25 Y ruma kꞌu na xuꞌan ta junam kikꞌuꞌx rukꞌ ri xukꞌut ri Pablo chikiwach, xkijeq kꞌu riꞌ kebꞌel bꞌi. Yey kꞌamajaꞌ kꞌu kebꞌek echiriꞌ ri Pablo jewaꞌ xubꞌiꞌij chike: «Lik e uꞌanom pachaꞌ ri xubꞌiꞌij ri Santowilaj Ruxlabꞌixel ri Dios chike ri qatiꞌ-qamam ojertan ruma ri qꞌalajisanel Isaías echiriꞌ xubꞌiꞌij:
ACT 28:26 Jat kukꞌ wa tinamit y chabꞌiꞌij waꞌ chike: “Riꞌix tobꞌ lik kixtanik, na jinta kꞌo kimaj usukꞌ che ri kito; y tobꞌ ne kixtzuꞌnik, na jinta kꞌo kimaj usukꞌ che ri kiwilo.”
ACT 28:27 Ma wa tinamit lik uꞌanom ko ri kanimaꞌ; e pachaꞌ lik kꞌayew chike ketanik, y ri kiwach e pachaꞌ yupulik. Jekꞌulaꞌ na jinta kꞌo kakilo, na jinta kꞌo kakito y na jinta kꞌo kakimaj usukꞌ; yey na kakitzelej tane kitzij chinuwach chaꞌ jelaꞌ utz kebꞌenukunaj xchaꞌ.
ACT 28:28 »Chetaꞌmaj kꞌu alaq: Wa kolobꞌetajik re ri Dios keꞌek utzijoxik chike ri na e ta aj judiꞌabꞌ, yey rike kakita na chi utz» xchaꞌ.
ACT 28:29 Echiriꞌ xukꞌis ubꞌiꞌxikil waꞌ ri Pablo, raj judiꞌabꞌ xebꞌek y lik kakichapalaꞌ kibꞌ rukꞌ oyowal chikiwach.
ACT 28:30 Ekꞌu ri Pablo xjeqiꞌ kebꞌ junabꞌ pa jun ja xa xtojon che. Y chiriꞌ xebꞌukꞌul wi konoje ri xebꞌoꞌlbꞌina rukꞌ.
ACT 28:31 Ekꞌu na xuxiꞌij ta ribꞌ che utzijoxik puwi rutaqanik ri Dios y che ukꞌutik puwi ri Qanimajawal Jesucristo; yey na jinta ne kꞌo xqꞌaten che.
ROM 1:1 Riꞌin in Pablo, in raj chak ri Qanimajawal Jesucristo. In kꞌu sikꞌim re kinuꞌan utaqoꞌn y yaꞌtal chwe kantzijoj ri Utzilaj Tzij re ri Dios.
ROM 1:2 Waꞌ wa Utzilaj Tzij e ri ubꞌiꞌtisim lo ri Dios ojertan, yey e ri tzꞌibꞌital kan pa ri Santowilaj Uchꞌaꞌtem kuma ruqꞌalajisanelabꞌ.
ROM 1:3 Ri Utzilaj Tzij e ri kachꞌaꞌt puwi Rukꞌajol ri Dios, ri Qanimajawal Jesucristo. Rire xalax wara che ruwachulew yey upetebꞌem chike ri e ralkꞌoꞌal ri rey David.
ROM 1:4 Yey ruma ri Santowilaj Ruxlabꞌixel ri Dios, xqꞌalajinik ri Qanimajawal Jesucristo e Ukꞌajol ri Dios echiriꞌ rukꞌ unimal chuqꞌabꞌ xkꞌastaj lo chikixoꞌl ri ekaminaq.
ROM 1:5 Ruma kꞌu Rire, xqakꞌul ri sipanik re kojuꞌan oj utaqoꞌn chaꞌ ukꞌiyal tikawex pa taq ronoje ri tinamit che ruwachulew kakubꞌiꞌ kikꞌuꞌx rukꞌ y kakikoj utzij y jelaꞌ kaloqꞌox uqꞌij rubꞌiꞌ.
ROM 1:6 Yey ralaq e alaq kukꞌil ri esikꞌim chaꞌ kakꞌojiꞌ alaq puqꞌabꞌ ri Qanimajawal Jesucristo.
ROM 1:7 Kintzꞌibꞌan kꞌu pan che onoje alaq ri jeqel alaq pa ri tinamit Roma, ri lik kꞌax kanaꞌ alaq ruma ri Dios y sikꞌim alaq chaꞌ kuꞌan alaq re ri Dios. Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
ROM 1:8 Nabꞌe na, ruma ri Qanimajawal Jesucristo, kantioxij che ri nu Dios uma onoje alaq, ma che ronoje luwar che ruwachulew lik katataj puwi ri kubꞌulibꞌal kꞌuꞌx alaq.
ROM 1:9 Ri Dios, ri kanloqꞌnimaj rukꞌ ronoje nukꞌuꞌx echiriꞌ kantzijoj ri Utzilaj Tzij re Rukꞌajol, Rire lik retaꞌam xaqi kankuxtaj alaq chwach echiriꞌ kanꞌan orar.
ROM 1:10 Kantzꞌonoj kꞌu che ri Dios chuyaꞌa na chwe kineꞌbꞌina ukꞌ alaq juna qꞌij we e karaj riꞌ Rire chwe.
ROM 1:11 Ma lik kuaj kanwil wach alaq chaꞌ kantoꞌ alaq che ri bꞌinik silabꞌik alaq chwach ri Dios y jelaꞌ lik katikiꞌ alaq chi utz.
ROM 1:12 Jekꞌulaꞌ kaqanimarisaj qakꞌuꞌx chiqawach, ma ralaq y riꞌin junam kubꞌul qakꞌuꞌx rukꞌ ri Qanimajawal.
ROM 1:13 Hermanos, lik kuaj kꞌut ketaꞌmaj alaq, riꞌin ukꞌiyal laj nuchꞌobꞌom kuaj kiꞌnwila alaq re kantoꞌ alaq chaꞌ kakꞌiy alaq chwach ri Dios, jelaꞌ pachaꞌ ri nuꞌanom kukꞌ ri jujun chik na e ta aj Israel. Pero kꞌamajaꞌ yaꞌtal chwe kinopon ukꞌ alaq.
ROM 1:14 Riꞌin lik kannaꞌo chinuwach kꞌo wi kantzijoj ri Utzilaj Tzij chike konoje; waꞌ e ri e tijotal pa ri chꞌaꞌtem griego yey ri e aj naj na e tijotal taj, ri lik kꞌo ketaꞌam yey ri na jinta kꞌo ketaꞌam.
ROM 1:15 Jekꞌulaꞌ lik kacha wanimaꞌ che kinꞌek pa ri tinamit Roma re kantzijoj ri Utzilaj Tzij che alaq.
ROM 1:16 Riꞌin na kinkꞌix ta che ri Utzilaj Tzij, ma rukꞌ waꞌ kaqꞌalajin ruchuqꞌabꞌ ri Dios re kebꞌukolobꞌej konoje ri kekojow re; nabꞌe chike ri e aj judiꞌabꞌ, tekꞌuchiriꞌ chike ri na e ta aj judiꞌabꞌ.
ROM 1:17 Ma ri Utzilaj Tzij kuqꞌalajisaj chiqawach suꞌanik kojkꞌojiꞌ jusukꞌ chwach ri Dios, yey waꞌ e ruma ri kubꞌulibꞌal qakꞌuꞌx rukꞌ Rire; ronoje kꞌu ri qakꞌaslemal chwach ri Dios e ruma ri kubꞌulibꞌal qakꞌuꞌx. Ma jewaꞌ tzꞌibꞌital kan pa Ruchꞌaꞌtem: Ri e jusukꞌ chwach ri Dios, kꞌo kikꞌaslemal ruma ri kubꞌulibꞌal kikꞌuꞌx rukꞌ Rire kachaꞌ.
ROM 1:18 Lik kaqꞌalajin kꞌu ri royowal ri Dios echiriꞌ ruqꞌatbꞌal tzij kape chilaꞌ chikaj pakiwi ri tikawex lik itzel kikꞌuꞌx chirij ri Dios y na jusukꞌ ta ri kibꞌinik kisilabꞌik; ma ruma ri na utz taj kakiꞌano, kebꞌuꞌan e latzꞌanel chike jujun chik chaꞌ na kaketaꞌmaj ta ri Qꞌijsaq.
ROM 1:19 Yey rike kꞌo ketaꞌam puwi ri Dios, ma e Rire qꞌalajisayom waꞌ chike.
ROM 1:20 Ma e janipa ri na kilitaj ta uwach che ri Dios, pachaꞌ ruchuqꞌabꞌ na jinta utaqexik y runimal uwach Rire, waꞌ lik xqꞌalajin lo chwi ri jeqebꞌal re ruwachulew ruma ronoje taq ri ꞌanatal ruma Rire. E uwariꞌche na usukꞌ taj we kꞌo junoq kubꞌiꞌij: «Na jinta kꞌo wetaꞌam puwi ri Dios.»
ROM 1:21 Pero ri winaq tobꞌ ketaꞌam chik kꞌo jun Dios kꞌaslik, na kiyaꞌom ta kꞌu riꞌ ri yakbꞌal uqꞌij taqal che y na ketioxin tane chwach. Jekꞌulaꞌ xsach ri kinaꞌoj ma e kakichꞌobꞌ ri na jinta uchak; yey ruma waꞌ na kakimaj ta chi usukꞌ saꞌ ri utz y saꞌ ri na utz taj.
ROM 1:22 Tobꞌ kakibꞌiꞌij lik kꞌo kinaꞌoj, paqatzij wi lik na jinta kꞌo ketaꞌam.
ROM 1:23 Na xkiyak ta chi uqꞌij ri Dios kꞌaslik, ri Jun na kakam taj; ma e xkijeq uyakik kiqꞌij kikꞌaxwach winaq xa kekamik y kikꞌaxwach taq awaj kexikꞌikꞌ pa kaj, taq awaj kajibꞌ kaqan yey taq awaj kecharar pulew.
ROM 1:24 Ruma kꞌu laꞌ, ri Dios xebꞌuya kan chupa ri chꞌulilaj mak y chupa ri kirayibꞌal na chom taj. Jekꞌulaꞌ xkijeq xemakun chikiwach, xkiꞌan rukꞌ ri kicuerpo ri lik kꞌixbꞌal uwach.
ROM 1:25 Waꞌ xkikꞌulumaj ma xkikꞌaq bꞌi ri Qꞌijsaq re ri Dios yey pukꞌaxel e xkitaqej ri xa raqꞌubꞌal. Ekꞌu xkiyak kiqꞌij y xkiloqꞌoj janipa taq ri uꞌanom ri Dios; yey na e ta xkiyak uqꞌij ri ꞌanayom re janipa taq ri kꞌolik, ri Jun lik taqal che kayak uqꞌij na jinta utaqexik. Amén.
ROM 1:26 Ruma kꞌu laꞌ, ri Dios xeroqꞌotaj kan chupa ri kirayibꞌal lik kꞌixbꞌal uwach. Xuꞌana nenareꞌ ri ixoqibꞌ xkijalkꞌatij rusukꞌ ri kirayibꞌal kukꞌ ri kachijilal y e xkiꞌan ri na usukꞌ taj, ma xkijeq kakirayij kibꞌ chikiwach e ixoqibꞌ.
ROM 1:27 Jekꞌulaꞌ rachijabꞌ xkijalkꞌatij rusukꞌ ri kirayibꞌal kukꞌ ri kixoqilal; xkitzaq kꞌu kibꞌ che uꞌanik ri lik kꞌixbꞌal uwach, ma xkijeq kakirayij kibꞌ chikiwach, achijabꞌ kukꞌ achijabꞌ. Ruma kꞌu riꞌ e xkipetisaj lo ri royowal ri Dios pakiwiꞌ y kikꞌulum kꞌu ri tojbꞌal re ri chꞌulilaj mak kiꞌanom.
ROM 1:28 Rike na xkaj taj kaketaꞌmaj uwach ri Dios. E uwariꞌche Rire xeroqꞌotaj kan chupa ri sachibꞌal naꞌoj chaꞌ jelaꞌ e kakiꞌan ronoje ri na usukꞌ taj.
ROM 1:29 Jekꞌulaꞌ e kiyaꞌom kibꞌ che uꞌanik janipa ri na jusukꞌ taj: waꞌ e ri kaketzꞌabꞌej uwa kiqꞌij kukꞌ jujun chik na kikꞌulel taj, ri kakiꞌan ri lik itzel uwachlibꞌal, ri e aj rayinel, ri itzel kikꞌuꞌx, ri kꞌax kikꞌuꞌx chikiwach, ri e kamisanel, ri e aj chꞌaꞌoj, ri e sokosoꞌnel, ri kakiꞌan kꞌax chike jujun chik,
ROM 1:30 ri e aj molot, ri e aj nukꞌul chꞌaꞌtem, ri itzel kikꞌuꞌx chirij ri Dios, ri e aj yajanel rukꞌ itzel chꞌaꞌtem, ri kakiꞌan nim che kibꞌ, ri kakitakꞌabꞌaꞌ kiqꞌij, ri itzel uwach taq ri kakinoꞌjij, ri na e ta kojol tzij ke kichu-kiqaw,
ROM 1:31 ri na kakaj taj ketanik, ri na kakiꞌan taj saꞌ ri kakibꞌiꞌij, ri na jinta kꞌana rutzil kꞌuꞌxaj kukꞌ, ri na e ta kuyul mak y ri na jinta kꞌana kꞌaxnaꞌbꞌal kꞌuꞌxaj kukꞌ.
ROM 1:32 Rike lik ketaꞌam chi utz ri qꞌatbꞌal tzij re ri Dios pakiwi ri e aj mak, ma Rire ubꞌiꞌim lo waꞌ: Janipa ri kakipalajij rutaqanik, lik taqal chike kekamik. Tobꞌ kꞌu e uꞌanom riꞌ, rike na xew ta kakiꞌan ri na utz taj, ma lik ne kekiꞌkot che echiriꞌ kakilo e kꞌo jujun chik kakiꞌan ke kukꞌ.
ROM 2:1 E uwariꞌche, tobꞌ at chinoq, na utz taj kawesaj awibꞌ chwach ri mak echiriꞌ riꞌat kaqꞌat tzij pakiwi jujun chik ruma ri kakiꞌano. Ma riꞌat kaqꞌat tzij pakiwiꞌ yey e ne kat-tajin che uꞌanik ri kakiꞌan rike; rukꞌ kꞌu waꞌ atukel kaya awibꞌ chupa ri qꞌatbꞌal tzij.
ROM 2:2 Yey qetaꞌam kꞌut lik jusukꞌ ri qꞌatbꞌal tzij kuꞌan ri Dios pakiwi ri kebꞌanaw taq ri na utz taj.
ROM 2:3 Riꞌat, ri kaqꞌat tzij pakiwi jujun chik ruma ri kakiꞌano yey kaꞌan awe kukꞌ, ¿kachꞌobꞌ kami riꞌ riꞌat ri Dios na kuqꞌat ta tzij pawiꞌ?
ROM 2:4 Na rukꞌ ta kꞌu riꞌ, lik nim ri rutzil ukꞌuꞌx y runimal ukꞌuꞌx ri Dios pawiꞌ, ma karoyꞌej kayijbꞌaꞌ awibꞌ y na asu ta kusachisaj awach. ¿E kami kakꞌaq bꞌi uqꞌij riꞌ ri unimal rutzil ukꞌuꞌx ri Dios? ¿Na awetaꞌam ta nebꞌa riꞌat wa unimal rutzil ukꞌuꞌx ri Dios e kakꞌamaw bꞌi awe chupa ri tzelebꞌal tzij chwach Rire?
ROM 2:5 Noꞌj riꞌat lik awibꞌochꞌim awibꞌ yey na kachꞌaw tane akꞌuꞌx che katzelej atzij. Ruma kꞌu waꞌ e kat-tajin che upetisaxik ri royowal ri Dios pawiꞌ chupa ri qꞌij echiriꞌ Rire kukꞌut ri royowal y kuqꞌalajisaj kꞌu ri jusukꞌ qꞌatbꞌal tzij kuꞌano.
ROM 2:6 Ma ri Dios kuya ri rajil ukꞌaxel chike chikijujunal e chirij taq ri kiꞌanom.
ROM 2:7 Kuya kꞌaslemal na jinta utaqexik chike ri kichuqꞌubꞌem kibꞌ che uꞌanik ri utz, ma kacha kikꞌuꞌx che ukꞌulik ruchomalil ri Dios, ri yakbꞌal qꞌij kuya Rire y ri kꞌaslemal na jinta ukꞌisik.
ROM 2:8 Noꞌj ri oyowal y ri qꞌatbꞌal tzij re ri Dios katzaq pakiwi ri keyaktaj chirij Rire, waꞌ e ri na kakaj ta kakikoj ri Qꞌijsaq re ri Dios, xew e kakiꞌan ri na jusukꞌ taj chwach ri Dios.
ROM 2:9 Kape kꞌu kꞌaxkꞌobꞌik y bꞌis pakiwi konoje ri tikawex kakiꞌan ri na utz taj, tobꞌ e aj judiꞌabꞌ o na e ta aj judiꞌabꞌ.
ROM 2:10 Noꞌj chike konoje ri kebꞌanaw re ri utz, ri Dios kuya kichomal, yakbꞌal kiqꞌij y utzil chomal, tobꞌ e aj judiꞌabꞌ o na e ta aj judiꞌabꞌ.
ROM 2:11 Ma chwach ri Dios konoje ri tikawex xaqi junam kiwach.
ROM 2:12 Konoje kꞌu ri na jinta ketaꞌam puwi ri Tzij Pixabꞌ re ri Dios, na kaqꞌat ta tzij pakiwiꞌ e chirij ri kubꞌiꞌij wa Tzij Pixabꞌ. Na rukꞌ ta kꞌu riꞌ, we kemakunik, kasach na kꞌu kiwach. Noꞌj kꞌu ri ketaꞌam wa Tzij Pixabꞌ, we kemakunik, riꞌ kaqꞌat na tzij pakiwiꞌ e chirij ri kubꞌiꞌij wa Tzij Pixabꞌ.
ROM 2:13 Ma ri e jusukꞌ chwach ri Dios na e ta ri xa e tanel re Rutzij Upixabꞌ; ma e ri e ꞌanal re, e waꞌ ri kaꞌan jusukꞌ chike.
ROM 2:14 Noꞌj ri na e ta aj judiꞌabꞌ, tobꞌ na kitom ta ri Tzij Pixabꞌ re ri Dios, we kalax pa kanimaꞌ kakiꞌan ri kubꞌiꞌij wa Tzij Pixabꞌ, waꞌ e kꞌutubꞌal re kꞌo ketaꞌam puwi saꞌ ri chirajawaxik chike.
ROM 2:15 Qꞌalaj kꞌu riꞌ kꞌo taqanik tzꞌibꞌital pa kanimaꞌ, ma kakinaꞌ chikikꞌuꞌx we utz o na utz ta ri kinaꞌoj.
ROM 2:16 Kꞌo jun qꞌij echiriꞌ ri Dios kuya puqꞌabꞌ ri Qanimajawal Jesucristo kuqꞌat tzij pakiwi konoje; kꞌa ekꞌu riꞌ kaqꞌalajin na ronoje ri kꞌo pa kanimaꞌ ri tikawex, jelaꞌ pachaꞌ ri kubꞌiꞌij wa Utzilaj Tzij kantzijoj riꞌin.
ROM 2:17 Chatape kꞌu ri kabꞌiꞌx chawe ri at kukꞌil ri e aj judiꞌabꞌ, riꞌat kakubꞌaꞌ akꞌuꞌx rukꞌ ri Tzij Pixabꞌ re ri Dios yey katakꞌabꞌaꞌ aqꞌij ma ri Dios kꞌo awukꞌ.
ROM 2:18 Awetaꞌam kꞌu riꞌ saꞌ ri karaj ri Dios y saꞌ ri lik utz chwach Rire, ma Rutzij Upixabꞌ kukꞌut chawe saꞌ ri chirajawaxik wi kaꞌano.
ROM 2:19 E chawach riꞌat, at kꞌamal kiwach ri e potzꞌ y at qꞌijsaq chikiwach ri kebꞌin pa qꞌequꞌm.
ROM 2:20 E chawach riꞌat, at qꞌilonel ke ri na jinta kakiriqo y at kꞌutunel ke ri e chꞌutiꞌq. E kachꞌobꞌ riꞌat kꞌo ronoje yaꞌbꞌal naꞌoj y qꞌijsaq awukꞌ, ma yaꞌtal ri Tzij Pixabꞌ paqꞌabꞌ.
ROM 2:21 Jelaꞌ kꞌu riꞌ we katkꞌutun chike jujun chik, ¿suꞌbꞌe na katkꞌutun ta chawibꞌil awibꞌ? Riꞌat kat-tzijon puwiꞌ na utz taj we jun kuꞌan eleqꞌ; ¿suꞌbꞌe kꞌu riꞌ riꞌat kaꞌan eleqꞌ?
ROM 2:22 Yey kabꞌiꞌij na utz taj we junoq kamakun chirij ri kꞌulanikil; ¿suꞌbꞌe kꞌu riꞌ riꞌat kaꞌan waꞌ? Katchꞌaꞌt ne chikij ri tiox; ¿suꞌbꞌe kꞌu riꞌ kakoj aqꞌabꞌ che taq ri re tiox?
ROM 2:23 Riꞌat lik kaꞌan nim che awibꞌ ma kꞌo awukꞌ ri Tzij Pixabꞌ re ri Dios. ¡Yey riꞌat kapalajij ri Tzij Pixabꞌ re ri Dios y rukꞌ wa kaꞌano kakꞌaq bꞌi uqꞌij Rire!
ROM 2:24 E uwariꞌche e jelaꞌ pachaꞌ ri tzꞌibꞌital kan pa Ruchꞌaꞌtem ri Dios: Ruma ri imak riꞌix ix aj judiꞌabꞌ, ri na e ta aj judiꞌabꞌ lik tzel kechꞌaꞌt chirij rubꞌiꞌ ri Dios kachaꞌ.
ROM 2:25 Paqatzij wi ri retalil re circuncisión kꞌo kutiqoj wi chawe, we kataqej ri Tzij Pixabꞌ. Noꞌj we na kataqej taj, riꞌ junam awach rukꞌ ri na ukojom ta ri retalil re circuncisión.
ROM 2:26 Noꞌj we kꞌo junoq na ukojom ta ri retalil re circuncisión, yey we kuꞌan kꞌu ri kataqan ri Tzij Pixabꞌ che, riꞌ e junam rukꞌ ukojom wa retalil, tobꞌ na ukojom taj.
ROM 2:27 We kꞌo kꞌu junoq na ukojom ta ri retalil re circuncisión, pero kuꞌan chi utz ronoje ri taqanik re Rutzij Upixabꞌ ri Dios, riꞌ taqal ne che rire e kaqꞌataw tzij pawiꞌ riꞌat. Ma e riꞌat, tobꞌ akojom ri retalil re circuncisión y kꞌo awukꞌ ri Tzij Pixabꞌ re ri Dios tzꞌibꞌital kanoq, e ne kapalajij ri kubꞌiꞌij.
ROM 2:28 Ma junoq e kukꞌil raj judiꞌabꞌ na ruma ta ri kilitaj che, yey ri saqil circuncisión na e tane ri retalil xa kojotal che ri rulewal.
ROM 2:29 Ma chupa ri ranimaꞌ junoq kaqꞌalajinik we paqatzij wi e kukꞌil raj judiꞌabꞌ e utinamit ri Dios. Yey ri saqil circuncisión e ri kuꞌan ri Dios pa ranimaꞌ junoq; y waꞌ e ruma ri Ruxlabꞌixel ri Dios, na e ta ruma ri taqanik tzꞌibꞌital kanoq. Ekꞌu ri yakbꞌal uqꞌij junoq e kukꞌil rutinamit ri Dios na e ta rachijabꞌ keyaꞌw re, ma e ri Dios kayaꞌw re.
ROM 3:1 ¿Saꞌ kꞌu riꞌ ri kutiqoj che jun we e kukꞌil rutinamit ri Dios e aj judiꞌabꞌ? ¿O saꞌ ri utz kukꞌam lo che junoq ukojom ri retalil re circuncisión?
ROM 3:2 Lik kꞌo taq kutiqoj wi. Ma ri Dios nabꞌe na xuya Ruchꞌaꞌtem pakiqꞌabꞌ.
ROM 3:3 Pero ¿saꞌ kuꞌanaꞌ we e kꞌo jujun chike na xkaj taj kakikoj Ruchꞌaꞌtem ri Dios? ¿Ruma nawi riꞌ waꞌ kujekꞌ ribꞌ ri Dios che ri ubꞌiꞌtisim?
ROM 3:4 ¡Paqatzij wi na e ta riꞌ! Ma ri Dios na aj ta raqꞌul; janipa rubꞌiꞌim Rire, e kuꞌano, tobꞌ kꞌu konoje ri winaq xa e aj raqꞌul. Ma e pachaꞌ ri tzꞌibꞌital kan pa Ruchꞌaꞌtem ri Dios: We kꞌo junoq kukꞌambꞌej upa ri chꞌaꞌtem la, kaqꞌalajinik Rilal lik Lal jusukꞌ che ronoje ri kabꞌiꞌij la; jekꞌulaꞌ kel pana la rukꞌ puwi ronoje xcha ri rey David che ri Dios.
ROM 3:5 Kꞌo ri kakibꞌiꞌij: «E taq ri lik na jusukꞌ taj kaqaꞌano kꞌo kutiqoj; ma echiriꞌ kaqaꞌan waꞌ, más kaqꞌalajin ri lik jusukꞌ kuꞌan ri Dios» kechaꞌ. (Jelaꞌ kakichꞌobꞌ raqan ri tikawex re ruwachulew.) ¿Saꞌ kꞌu riꞌ ri kaqabꞌiꞌij puwi waꞌ? ¿Na jusukꞌ ta nebꞌa ri kuꞌan ri Dios we kuqꞌat tzij paqawiꞌ?
ROM 3:6 ¡Areꞌ, lik jusukꞌ! Ma we ta na jusukꞌ ta Rire, ¿saꞌ kꞌu uꞌanik riꞌ kuqꞌat tzij pakiwi konoje ri e kꞌo che ruwachulew?
ROM 3:7 Ma laj kꞌo junoq kubꞌiꞌij: «We rukꞌ ri raqꞌubꞌal kanꞌano e katakꞌabꞌax uqꞌij ri Qꞌijsaq re ri Dios, ¿saꞌ kꞌu ubꞌe riꞌ kꞌa kabꞌiꞌxik in aj mak y kaqꞌat tzij panuwiꞌ?» kachaꞌ.
ROM 3:8 ¿Utz ne riꞌ kaqabꞌiꞌij: «Qaꞌana ri na utz taj chaꞌ waꞌ e kukꞌam lo ri utz»? ¡Na utz ta kꞌenoq! Yey kꞌo ri kakibꞌiꞌij raqꞌubꞌal chiqij, ma kakibꞌiꞌij jelaꞌ kojkꞌutun riꞌoj. E ri kebꞌiꞌn re waꞌ, lik taqal chike kaqꞌat tzij pakiwiꞌ.
ROM 3:9 ¿E kami keꞌelawi riꞌ ri oj aj judiꞌabꞌ, lik utz qaꞌanom y na jinta kꞌana qamak chikiwa ri na e ta aj judiꞌabꞌ? ¡Na e ta riꞌ! Ma e pachaꞌ ri nukꞌutum loq: Konoje, tobꞌ e aj judiꞌabꞌ o na e ta aj judiꞌabꞌ, junam e kꞌo chuxeꞌ ri qꞌatbꞌal tzij re ri Dios ruma ri kimak.
ROM 3:10 Ma jewaꞌ ri tzꞌibꞌital kan pa Ruchꞌaꞌtem ri Dios: Na jinta juna tikawex jusukꞌ chwach ri Dios, tobꞌ tane xa jun.
ROM 3:11 Na jinta junoq kamajaw usukꞌ runaꞌoj ri Dios. Na jinta junoq katzukuw re Rire.
ROM 3:12 Konoje ri winaq ebꞌelinaq che rubꞌe ri Dios, y na jinta chi kꞌana kichak. Na jinta junoq kaꞌanaw ri utz, tobꞌ tane xa jun.
ROM 3:13 Ri chꞌaꞌtem kel lo pa kichiꞌ ri winaq e pachaꞌ uchuyil ujul animaꞌ teqꞌel uchiꞌ; ma rukꞌ ri kaqꞌ kesokosoꞌnik. Ri chꞌaꞌtem kel lo pa kichiꞌ e pachaꞌ chi veneno re kumatz.
ROM 3:14 Yey rupa kichiꞌ nojinaq che itzel taq tzij y kꞌaxlaj chꞌaꞌtem.
ROM 3:15 Lik kacha kikꞌuꞌx che kekamisanik.
ROM 3:16 Tobꞌ pa taq kebꞌikꞌow wi, kekikoj ri winaq pa kꞌaxkꞌolil y pa bꞌis;
ROM 3:17 pa taq e kꞌo wi rike, na jinta kꞌana utzil chomal.
ROM 3:18 Na jinta ne kꞌana xiꞌin ibꞌ kukꞌ chwach ri Dios kachaꞌ.
ROM 3:19 Ronoje ri kubꞌiꞌij Rutzij Upixabꞌ ri Dios, waꞌ kubꞌiꞌij chike ri kꞌo wa Tzij Pixabꞌ pakiqꞌabꞌ. Jekꞌulaꞌ na jinta junoq kꞌo puqꞌabꞌ kubꞌiꞌij: «Na utz ta kuqꞌat tzij ri Dios panuwiꞌ ma riꞌin na jinta kꞌana numak.» Ma paqatzij wi konoje ri winaq e kꞌo che ruwachulew, tobꞌ e aj judiꞌabꞌ o na e ta aj judiꞌabꞌ, e kꞌo chuxeꞌ ri qꞌatbꞌal tzij re ri Dios.
ROM 3:20 Y na jinta juna tikawex kuꞌan jusukꞌ che ribꞌ chwach ri Dios ruma ri kutaqej ri taqanik re ri Tzij Pixabꞌ. Ma ri Tzij Pixabꞌ na jinta uchuqꞌabꞌ chaꞌ kojresaj puqꞌabꞌ ri mak; xew kukꞌut chiqe: Riꞌoj oj aj mak.
ROM 3:21 Pero woꞌora ri Dios uqꞌalajisam chiqawach suꞌanik Rire kuꞌan jusukꞌ chiqe, jelaꞌ pachaꞌ ri kubꞌiꞌij Rutzij Upixabꞌ ri Dios tzꞌibꞌital kan ruma ri Moisés y kuma ri qꞌalajisanelabꞌ. Na kojuꞌan ta kꞌu jusukꞌ chwach ri Dios ruma ri qataqem taq ri taqanik,
ROM 3:22 ma e ruma ri kubꞌulibꞌal qakꞌuꞌx rukꞌ ri Qanimajawal Jesucristo. Ma ri Dios kuꞌan jusukꞌ chike konoje ri kakubꞌiꞌ kikꞌuꞌx rukꞌ ri Cristo, tobꞌ e chinoq.
ROM 3:23 Konoje kꞌu ri tikawex emakuninaq y lik naj e kꞌo wi lo che ri unimal uchomalil ri Dios.
ROM 3:24 Na rukꞌ ta kꞌu riꞌ, ri Dios kuꞌan jusukꞌ chike ruma ri unimal rutzil ukꞌuꞌx y kusipaj kꞌu ri kolobꞌetajik chike ruma ri xuꞌan ri Qanimajawal Jesucristo echiriꞌ xeresaj lo puqꞌabꞌ ri mak.
ROM 3:25 Ri Dios xuya lo ri Cristo chaꞌ ruma Rire ri tikawex kakiriq kuybꞌal kimak we xkubꞌiꞌ kikꞌuꞌx rukꞌ rukikꞌel xturuwik. Jekꞌuriꞌlaꞌ ri Dios xukꞌutu Rire lik jusukꞌ y lik kꞌo unimal ukꞌuꞌx, ma ojertan na asu ta xusachisaj kiwach ri winaq ruma ri kimak kiꞌanom loq.
ROM 3:26 Yey Rire uchꞌobꞌom chi lo raqan saꞌ ri kuꞌan chupa waꞌ wa qꞌij oj kꞌo wi. Ekꞌu woꞌora ukꞌutum chik suꞌanik kuꞌan jusukꞌ chike ri tikawex; e ruma ri kubꞌulibꞌal kikꞌuꞌx rukꞌ ri Jesús. Jelaꞌ kꞌu riꞌ, xqꞌalajinik ri Dios lik jusukꞌ y e Rire ri kuꞌan jusukꞌ chike ri kakubꞌiꞌ kikꞌuꞌx rukꞌ ri Cristo.
ROM 3:27 ¿Kꞌo nebꞌa qaꞌanom riꞌoj chaꞌ rukꞌ waꞌ utz kaqaꞌan nim che qibꞌ chwach ri Dios? ¡Na jintaj! ¿Suꞌbꞌe? Ma na e ta ruma kaqataqej ri taqanik ri kaꞌanaw chiqe kojqibꞌ rukꞌ ri Dios; e ruma ri kubꞌulibꞌal qakꞌuꞌx rukꞌ ri xuꞌan Rire.
ROM 3:28 Kaqakꞌisbꞌej kꞌu rukꞌ waꞌ: Ri Dios kuꞌan jusukꞌ che ri tikawex ruma ri kubꞌulibꞌal ukꞌuꞌx rukꞌ Rire, na ruma ta ri utaqem taq ri taqanik.
ROM 3:29 ¿Ri Dios xew nebꞌa Dios ke ri e aj judiꞌabꞌ? ¿Na e ta nebꞌa Dios ke ri na e ta aj judiꞌabꞌ? Paqatzij wi Rire e Dios ke ri e aj judiꞌabꞌ y ke ri na e ta aj judiꞌabꞌ.
ROM 3:30 Ma xa jun Dios kꞌolik. Yey Rire kuꞌan jusukꞌ chike ri tikawex ruma ri kubꞌulibꞌal kikꞌuꞌx. Waꞌ e kuꞌan kukꞌ ri kikojom ri retalil re circuncisión y kukꞌ ri na kikojom taj.
ROM 3:31 ¿Ruma nawi ri xkubꞌiꞌ qakꞌuꞌx rukꞌ ri Cristo, utz kaqakꞌaq bꞌi uqꞌij ri Tzij Pixabꞌ tzꞌibꞌital kan ruma ri Moisés y kaqabꞌiꞌij waꞌ na jinta chi uchak? ¡Na e ta riꞌ! Ma rukꞌ ne ri kubꞌulibꞌal qakꞌuꞌx, kaqamaj usukꞌ lik kꞌo uwach ri Tzij Pixabꞌ.
ROM 4:1 ¿Saꞌ kꞌu riꞌ kaqabꞌiꞌij puwi ri Abraham, ri nabꞌe qamam ojertan ri oj aj Israel? ¿Suꞌanik xꞌaniꞌ jusukꞌ che rire chwach ri Dios?
ROM 4:2 We ta ri Abraham xꞌan jusukꞌ che chwach ri Dios ruma taq ri chak xuꞌan xa pa riꞌre, taqal kꞌu riꞌ che kutakꞌabꞌaꞌ uqꞌij; tobꞌ waꞌ na jinta keꞌelawi chwach ri Dios.
ROM 4:3 Ma ¿saꞌ ri kubꞌiꞌij Ruchꞌaꞌtem ri Dios? Jewaꞌ kubꞌiꞌij: Ri Abraham xukojo ri Dios e kuꞌana janipa ri xubꞌiꞌtisij che y ruma kꞌu riꞌ xꞌaniꞌ jusukꞌ che kachaꞌ.
ROM 4:4 Echiriꞌ juna aj chak kachakunik, kayaꞌiꞌ ri taqal che; yey waꞌ na e ta jun sipanik, ma uchꞌakom chik.
ROM 4:5 Noꞌj na je ta kꞌu laꞌ echiriꞌ ri Dios kuꞌan jusukꞌ che junoq. Ma waꞌ e jun sipanik re ri Dios, na e ta tojbꞌal re juna chak ꞌanatalik. Ma juna tikawex na kuꞌan ta jusukꞌ che ribꞌ ruma lik kachakunik; e kaꞌan jusukꞌ che xew ruma ri kubꞌulibꞌal ukꞌuꞌx rukꞌ ri Dios, ri kaꞌanaw jusukꞌ chike raj makibꞌ.
ROM 4:6 Yey ri David ubꞌiꞌim kanoq nim kiqꞌij kalaxik ri tikawex we ri Dios kuꞌan jusukꞌ chike y waꞌ na e ta ruma juna chak kiꞌanom,
ROM 4:7 ma jewaꞌ xubꞌiꞌij: ¡Nim kiqꞌij kalaxik ri tikawex kuytajinaq chi kimak y sachom chi uwach ri na utz taj kiꞌanom!
ROM 4:8 ¡Nim kꞌu kiqꞌij kalaxik ri tikawex na jinta chi ri qꞌatbꞌal tzij re ri Dios pakiwiꞌ! xchaꞌ.
ROM 4:9 Echiriꞌ kubꞌiꞌij «nim kiqꞌij kalaxik», ¿xew nawi kachꞌaꞌt pakiwi ri kikojom ri retalil re circuncisión? ¡Na xew taj! Ma kachꞌaꞌt pakiwi ri kikojom ri retalil re circuncisión y pakiwi ri na kikojom taj. Yey qabꞌiꞌim puwi ri Abraham: Xꞌaniꞌ jusukꞌ che rire ruma ri kubꞌulibꞌal ukꞌuꞌx rukꞌ ri Dios.
ROM 4:10 ¿Jampa nawi xꞌan jusukꞌ che ri Abraham? ¿Kꞌa e nawi echiriꞌ ukojom chi ri retalil re circuncisión? ¡Na e taj! Ma kꞌamajaꞌ ne kukoj waꞌ echiriꞌ ri Dios xuꞌan jusukꞌ che; tekꞌuchiriꞌ xkoj ri retalil re circuncisión che.
ROM 4:11 Wa retalil re circuncisión ukojom e kꞌutubꞌal re ri kubꞌulibꞌal ukꞌuꞌx, ri xukꞌutu echiriꞌ kꞌamajaꞌ kukoj waꞌ. Ruma kꞌu laꞌ, xeꞌeloq e rire ri kiqaw konoje ri kakubꞌiꞌ kikꞌuꞌx rukꞌ ri Dios, tobꞌ na xkoj tane waꞌ wa retalil re circuncisión chike. Jekꞌulaꞌ, ruma ri kubꞌulibꞌal kikꞌuꞌx kaꞌan jusukꞌ chike chwach ri Dios.
ROM 4:12 Ri kikojom ri retalil re circuncisión e ralkꞌoꞌal kan ri Abraham; pero xew taqal chike kakibꞌiꞌij kiqaw che rire we kakikꞌut ri kubꞌulibꞌal kikꞌuꞌx rukꞌ ri Dios che ri kibꞌinik kisilabꞌik, pachaꞌ ri xuꞌan ri qamam Abraham echiriꞌ kꞌamajaꞌ ne kukoj ri retalil re circuncisión.
ROM 4:13 Ri Dios xubꞌiꞌtisij che ri Abraham y chike konoje ri e ralkꞌoꞌal kanoq, kuꞌan na ke rike ronoje ruwachulew. Pero wa bꞌiꞌtisinik na xꞌan ta che ri Abraham ruma xutaqej ri taqanik re ri Tzij Pixabꞌ, ma e ruma lik xkubꞌiꞌ ukꞌuꞌx rukꞌ ri Dios. Ruma kꞌu riꞌ, ri Dios xuꞌan jusukꞌ che.
ROM 4:14 We ta e laꞌ kꞌo pakiqꞌabꞌ taq ri winaq kakikꞌul rubꞌiꞌtisim ri Dios ruma kakiꞌan ronoje ri taqanik re ri Tzij Pixabꞌ, na jinta kꞌu kutiqoj riꞌ ri kubꞌulibꞌal kikꞌuꞌx rukꞌ ri Dios, yey na jinta ne uchak riꞌ rubꞌiꞌtisim ri Dios, ma na jinta junoq kuriq uꞌanik ronoje ri taqanik.
ROM 4:15 Ma ri Tzij Pixabꞌ e kukꞌam lo ri qꞌatbꞌal tzij pakiwi ri e aj palajiy tzij. Pero we ta e laꞌ na jinta taqanik, na jinta aj palajiy tzij riꞌ.
ROM 4:16 Ruma taq waꞌ, ri tikawex kakikꞌul rubꞌiꞌtisim ri Dios xew ruma ri kubꞌulibꞌal kikꞌuꞌx rukꞌ Rire. Qꞌalaj kꞌu riꞌ, wa sipanik xa e ruma ri unimal rutzil ukꞌuꞌx Rire, chaꞌ jelaꞌ kꞌo pakiqꞌabꞌ konoje ri ralkꞌoꞌal ri Abraham kakikꞌul na ri bꞌiꞌtisim chike ruma ri Dios. Yey e ralkꞌoꞌal ri Abraham na xew ta ri kꞌo ri Tzij Pixabꞌ re ri Moisés pakiqꞌabꞌ, ma e ralkꞌoꞌal konoje ri kubꞌul kikꞌuꞌx rukꞌ ri Dios jelaꞌ pachaꞌ ri xuꞌan ri Abraham. Ekꞌu rire e qaqaw qonoje riꞌoj
ROM 4:17 chwach ri Dios, jelaꞌ pachaꞌ ri tzꞌibꞌital kan pa Ruchꞌaꞌtem ri Dios: «Nuꞌanom chawe at kiqaw tikawex che ukꞌiyal tinamit» xchaꞌ. Ri Dios xubꞌiꞌij waꞌ che ri Abraham, yey rire xukojo; ma lik xkubꞌiꞌ ukꞌuꞌx rukꞌ ri Dios, ri kuya kꞌaslemal chike ri ekaminaq y kachꞌaꞌt chwi ri kꞌamajaꞌ kuꞌano pachaꞌ chi ya uꞌanom chik.
ROM 4:18 Ekꞌu ri Abraham xukojo kuꞌana kiqaw tikawex che ukꞌiyal tinamit jelaꞌ pachaꞌ ri bꞌiꞌtisinik ꞌanom che ruma ri Dios echiriꞌ xubꞌiꞌij che: «Lik e kꞌi kebꞌuꞌana rawalkꞌoꞌal.» Yey tobꞌ chwach ri Abraham waꞌ lik kꞌayew, na rukꞌ ta kꞌu riꞌ, lik xroyeꞌej rukꞌ kubꞌulibꞌal kꞌuꞌxaj jelaꞌ kuꞌanaꞌ.
ROM 4:19 Y na xqꞌobꞌ ta ri kubꞌulibꞌal ukꞌuꞌx tobꞌ retaꞌam rucuerpo e pachaꞌ kaminaq chik ma ya kopon pa jun ciento rujunabꞌ y retaꞌam ri rixoqil Sara na kalan taj.
ROM 4:20 Na rukꞌ ta kꞌu riꞌ, na kebꞌ ta ne upa xukoj ri xubꞌiꞌtisij ri Dios che, ma e lik xuchuqꞌubꞌej ribꞌ che ri kubꞌulibꞌal ukꞌuꞌx rukꞌ ri Dios. Lik kꞌu xuyak uqꞌij ri Dios,
ROM 4:21 ma lik ujikibꞌam ukꞌuꞌx e ri Dios kꞌo uchuqꞌabꞌ re kuꞌan ronoje rubꞌiꞌtisim.
ROM 4:22 Y ruma kꞌu ri kubꞌulibꞌal ukꞌuꞌx, xꞌaniꞌ jusukꞌ che.
ROM 4:23 Ekꞌuchiriꞌ Ruchꞌaꞌtem ri Dios kubꞌiꞌij: «Xꞌaniꞌ jusukꞌ che ruma ri kubꞌulibꞌal ukꞌuꞌx,» waꞌ na xew ta puwi ri Abraham xtzꞌibꞌax wi;
ROM 4:24 ma e paqawiꞌ ne riꞌoj. Ma ri Dios kuꞌan jusukꞌ chiqe riꞌoj ri kakubꞌiꞌ qakꞌuꞌx rukꞌ ri Jun xukꞌastajisaj lo ri Jesús, ri Qanimajawal.
ROM 4:25 Ekꞌu ri Jesús xyaꞌ pa kamik ruma ri qamak riꞌoj y xkꞌastaj bꞌi churox qꞌij chaꞌ jelaꞌ kojuꞌana jusukꞌ chwach ri Dios.
ROM 5:1 Ri Dios xuꞌan jusukꞌ chiqe ruma ri kubꞌulibꞌal qakꞌuꞌx rukꞌ; ekꞌu woꞌora oj kꞌo chi utzil chomal rukꞌ Rire ruma ri Qanimajawal Jesucristo.
ROM 5:2 Yey ruma ri Cristo, xyaꞌ chiqe kojok chwach ri Dios ruma ri kubꞌulibꞌal qakꞌuꞌx y jelaꞌ kaqakꞌul ri unimal rutzil ukꞌuꞌx pa oj tikil wi chi utz. Yey lik kojkiꞌkotik ma qoyeꞌem keꞌqila na runimal uchomalil ri Dios.
ROM 5:3 Y na xew ta waꞌ, ma lik ne kojkiꞌkotik echiriꞌ kape kꞌaxkꞌobꞌik paqawiꞌ. Ma qetaꞌam we xqachꞌij uchuqꞌabꞌ ri kꞌaxkꞌobꞌik, lik kakꞌojiꞌ unimal qakꞌuꞌx.
ROM 5:4 Ruma kꞌu runimal qakꞌuꞌx kojelik utz qaꞌanom chwach ri Dios, ma xqachꞌij uchuqꞌabꞌ ri kꞌambꞌal qapa. Yey we xojelik utz qaꞌanom chwach ri Dios, e lik kakubꞌiꞌ pan qakꞌuꞌx rukꞌ Rire.
ROM 5:5 Lik kꞌu jikil uwach kaqakꞌul na ri qoyeꞌem che ri Dios, ma Rire lik ukꞌutum ri rutzil ukꞌuꞌx chiqe ruma ri Santowilaj Ruxlabꞌixel uyaꞌom pa qanimaꞌ.
ROM 5:6 Ma riꞌoj na jinta kꞌana qachuqꞌabꞌ re kaqakolobꞌej qibꞌ; yey chupa kꞌu ruqꞌijol uchaꞌom chi lo ri Dios, xkꞌun ri Cristo y xuya ribꞌ pa kamik chaꞌ kojukolobꞌej ri oj aj makibꞌ.
ROM 5:7 Lik kꞌayew kariqitaj junoq kuya ribꞌ pa kamik pukꞌaxel jun chik lik jusukꞌ rubꞌinik usilabꞌik; tobꞌ ne laj kꞌo junoq kuya ranimaꞌ kakam pukꞌaxel junoq lik utz ukꞌuꞌx.
ROM 5:8 Noꞌj ri Dios uqꞌalajisam chi ri rutzil ukꞌuꞌx chiqawach riꞌoj, ma ri Cristo xkam paqakꞌaxel echiriꞌ kꞌa oj kꞌo ne pa mak.
ROM 5:9 We xꞌaniꞌ kꞌu jusukꞌ chiqe ruma rukikꞌel, makꞌuwariꞌ ruma Rire kojkolobꞌetaj na chwach ri qꞌatbꞌal tzij kuꞌan ri Dios chupa ri kꞌisbꞌal qꞌij.
ROM 5:10 E rojertan riꞌoj oj aj retzelal kꞌuꞌx chirij ri Dios; na rukꞌ ta kꞌu riꞌ, ri Dios xojuya chi utzil chomal chwach ruma rukamik Rukꞌajol. Makꞌuwariꞌ we oj kꞌo chi pa utzil chomal chwach, kayaꞌtaj na kꞌu riꞌ ri qakolobꞌetajik ruma ri Cristo, ma Rire xkꞌastaj lo chikixoꞌl ri ekaminaq yey woꞌora kꞌaslik.
ROM 5:11 Y na xew ta waꞌ, ma lik kojkiꞌkot rukꞌ ri Dios ruma ri Qanimajawal Jesucristo, ma ruma Rire qariqom utzil chomal chwach ri Dios.
ROM 5:12 Ri mak xok lo che ruwachulew ruma ri Adán, ri nabꞌe achi; yey ri mak e xukꞌam lo ri kamik. Jekꞌulaꞌ xpe ri kamik pakiwi konoje ri tikawex, ma konoje xemakunik.
ROM 5:13 Echiriꞌ ri Dios kꞌamajaꞌ ne kuya Rutzij Upixabꞌ che ri Moisés, ri mak okinaq chi che ruwachulew. Qatzij, we na jinta taqanik, na utz taj kabꞌiꞌxik kꞌo junoq xupalajij tzij.
ROM 5:14 Na rukꞌ ta kꞌu riꞌ, chwi lo ri Adán kꞌa chwa ri Moisés, taq ri winaq xekam ruma ri kimak, tobꞌ ri kimak na junam ta rukꞌ ri xuꞌan ri Adán echiriꞌ xupalajij ri taqanik re ri Dios. Yey ri Adán e pachaꞌ ri Jun kakꞌunik, waꞌ e ri Jesucristo.
ROM 5:15 Pero ri xukꞌam lo ri palajibꞌal tzij re ri Adán lik junwi chwa ri sipanik xukꞌam lo ri Qanimajawal Jesucristo. Ma ruma rupalajibꞌal tzij jun chi achi, xekam konoje ri winaq; yey ruma kꞌu ri unimal rutzil ukꞌuꞌx jun chi Achi, ri sipanik re ri unimal rutzil ukꞌuꞌx ri Dios más ne xnimar pakiwi ukꞌiyal tikawex.
ROM 5:16 Ekꞌu ri xukꞌam lo ri mak re ri jun achi, lik junwi chwa ri xukꞌam lo ri sipanik kuya ri Dios chiqe. Ma ruma jun chi mak re jun chi achi, xkꞌun ri qꞌatbꞌal tzij pakiwi konoje ri tikawex. Noꞌj ruma ri sipanik re ri Dios, kasachisax uwach ri ukꞌiyal mak ke ri tikawex chaꞌ jelaꞌ utz kekꞌojiꞌ jusukꞌ chwach ri Dios.
ROM 5:17 Xa kꞌu ruma rupalajibꞌal tzij jun chi achi, konoje ri winaq xekanaj kan chuxeꞌ ruchuqꞌabꞌ ri kamik. Yey ruma kꞌu jun chi Achi, waꞌ e ri Qanimajawal Jesucristo, janipa ri kikꞌulum ri unimal rutzil ukꞌuꞌx ri Dios y ri sipanik re kebꞌuꞌan jusukꞌ chwach, kejeqiꞌ chupa jun chomilaj kꞌaslemal.
ROM 5:18 Ekꞌu ri palajibꞌal tzij re jun chi achi xukꞌam lo qꞌatbꞌal tzij pakiwi konoje ri tikawex, jekꞌuriꞌlaꞌ ruma ri jusukꞌ bꞌinik re jun chi Achi, kayaꞌtaj chike konoje ri tikawex jun chomilaj kꞌaslemal ruma ri ebꞌuꞌanom jusukꞌ chwach ri Dios.
ROM 5:19 Yey xa ruma kꞌu jun chi achi xupalajij rutzij ri Dios, lik e kꞌi ri xebꞌuꞌan aj makibꞌ; jekꞌuriꞌlaꞌ, ruma jun chi Achi xukoj utzij ri Dios, lik e kꞌi ri kebꞌuꞌan jusukꞌ chwach.
ROM 5:20 Ekꞌu ri Dios xuya Rutzij Upixabꞌ che ri Moisés chaꞌ jelaꞌ kaqꞌalajin rukꞌiyal uwach ri mak. Y e xuꞌano, ma rukꞌ wa Tzij xqꞌalajin rukꞌiyal kimak ri winaq chwach ri Dios. Yey ekꞌuchiriꞌ más xemakun ri winaq, e ne más xnimar ri unimal rutzil ukꞌuꞌx ri Dios pakiwiꞌ.
ROM 5:21 E jelaꞌ pachaꞌ ri mak kꞌo uchuqꞌabꞌ chaꞌ kukꞌam lo kamik pakiwi konoje ri winaq; jekꞌulaꞌ riꞌ ri unimal rutzil ukꞌuꞌx ri Dios kꞌo uchuqꞌabꞌ chaꞌ kuꞌan jusukꞌ chike ri winaq chwach ri Dios, y jelaꞌ kꞌo kikꞌaslemal na jinta utaqexik ruma Jesucristo, ri Qanimajawal.
ROM 6:1 ¿Saꞌ kꞌu riꞌ ri kaqabꞌiꞌij riꞌoj? ¿Kꞌa kojkꞌojiꞌ kami riꞌ pa mak chaꞌ ri Dios e lik kunimarisaj ri unimal rutzil ukꞌuꞌx paqawiꞌ echiriꞌ kukuy ri qamak?
ROM 6:2 ¡Na e ta kꞌana riꞌ! Ma e janipa ri na oj jinta chi puqꞌabꞌ ri mak, na ubꞌe ta kꞌenoq we kꞌa kojkꞌojiꞌ chupa waꞌ.
ROM 6:3 ¿Na etaꞌam ta nebꞌa ralaq e janipa ri xqakꞌul ri bautismo, xojuꞌan xa jun rukꞌ ri Qanimajawal Jesucristo? Yey ruma waꞌ, xojuꞌan xa jun rukꞌ pa rukamik.
ROM 6:4 Ruma kꞌu ri bautismo xqakꞌulu, e pachaꞌ junam rukꞌ ri Cristo xojkamik y xojmuqik, chaꞌ jelaꞌ kojkꞌastaj lo che jun kꞌakꞌ qabꞌinik jelaꞌ pachaꞌ ri Cristo xkꞌastaj lo chikixoꞌl ri ekaminaq ruma runimal uchuqꞌabꞌ ri Qaqaw Dios.
ROM 6:5 Ma we xꞌan xa jun chiqe rukꞌ ri Cristo chupa rukamik, jekꞌulaꞌ riꞌ xa jun qaꞌanom rukꞌ chupa rukꞌastajibꞌal.
ROM 6:6 Lik kꞌut qetaꞌam e ri ojer qabꞌinik qasilabꞌik xkam rukꞌ ri Cristo chwa ri cruz chaꞌ jelaꞌ kasach uwach ruchuqꞌabꞌ ri mak paqawiꞌ y jekꞌulaꞌ ri mak na kataqan ta chi paqawiꞌ riꞌoj.
ROM 6:7 Ma e junoq kaminaq chi che ri mak, riꞌ na jinta chi uchuqꞌabꞌ ri mak puwiꞌ.
ROM 6:8 Ma we xojkam junam rukꞌ ri Cristo, jekꞌulaꞌ riꞌ lik kaqakojo kꞌo qakꞌaslem rukꞌ Rire woꞌora y chiqawach apanoq.
ROM 6:9 Lik qetaꞌam kꞌut, ri Cristo ruma xkꞌastaj lo chikixoꞌl ri ekaminaq, na kakam ta chik, ma ri kamik na jinta chi uchuqꞌabꞌ puwi Rire.
ROM 6:10 Ma rukꞌ rukamik xa jumul xusachisaj uwach ruchuqꞌabꞌ ri mak; yey ruma kꞌu xkꞌastajik, e kuloqꞌnimaj ri Dios rukꞌ rukꞌaslemal.
ROM 6:11 Jekꞌuriꞌlaꞌ kꞌola chikꞌuꞌx ralaq e pachaꞌ alaq kaminaq chi chwach ri mak yey alaq kꞌaslik re kaloqꞌnimaj alaq ri Dios, ma alaq re ri Cristo Jesús, ri Qanimajawal.
ROM 6:12 E uwariꞌche lik maya alaq luwar kataqan ri mak puwi ri cuerpo alaq, ma waꞌ xa ikꞌowel. Maya ne ibꞌ alaq chupa taq ri rayibꞌal na utz ta uwach.
ROM 6:13 Maya ne ri cuerpo alaq puqꞌabꞌ ri mak che uꞌanik ri na jusukꞌ taj. E yaꞌa ibꞌ alaq puqꞌabꞌ ri Dios, ma alaq kaminaq chi chwa ri mak y alaq kꞌas che jun kꞌakꞌ bꞌinik silabꞌik. Yaꞌa kꞌu alaq riꞌ ri cuerpo alaq puqꞌabꞌ ri Dios chaꞌ rukꞌ waꞌ kaꞌan alaq ri lik jusukꞌ chwach.
ROM 6:14 Ma ri mak na jinta chi uchuqꞌabꞌ re kataqan pawiꞌ alaq y na jinta chi ne alaq chuxeꞌ ri qꞌatbꞌal tzij re rutaqanik ri Dios tzꞌibꞌital kan ruma ri Moisés, ma woꞌora kꞌo alaq puqꞌabꞌ ri Dios ruma ri unimal rutzil ukꞌuꞌx Rire.
ROM 6:15 ¿Saꞌ kꞌu riꞌ ri kaqaꞌano? ¿Kojmakun kami riꞌ ma ri qꞌatbꞌal tzij re rutaqanik ri Dios na jinta chi paqawiꞌ yey e oj kꞌo puqꞌabꞌ ri Dios ruma ri unimal rutzil ukꞌuꞌx Rire? ¡Na e ta kꞌana riꞌ!
ROM 6:16 ¿Na etaꞌam ta nebꞌa alaq we kaya ibꞌ alaq puqꞌabꞌ junoq che uꞌanik janipa ri karaj rire, riꞌ e kuꞌana patrón alaq y chirajawaxik kꞌu riꞌ kakoj alaq utzij? Jekꞌuriꞌlaꞌ we kaya ibꞌ alaq puqꞌabꞌ ri mak che uꞌanik ri na utz taj, riꞌ kukꞌam bꞌi alaq pa kamik. Noꞌj echiriꞌ kaya ibꞌ alaq puqꞌabꞌ ri Dios re kakoj alaq utzij, waꞌ kukꞌam bꞌi alaq che jun jusukꞌ bꞌinik silabꞌik.
ROM 6:17 Lik maltiox kꞌu che ri Dios, ma tobꞌ ojertan xyaꞌ ibꞌ alaq puqꞌabꞌ ri mak che uꞌanik taq ri rayibꞌal alaq; noꞌj woꞌora rukꞌ ronoje kꞌuꞌx alaq yaꞌom ibꞌ alaq che uꞌanik taq ri saqil kꞌutunik xyaꞌ che alaq.
ROM 6:18 Ruma kꞌu ri xel lo alaq puqꞌabꞌ ri mak, woꞌora e xyaꞌ ibꞌ alaq che uꞌanik ri lik jusukꞌ chwach ri Dios.
ROM 6:19 Xinya wa kꞌambꞌal naꞌoj puwi ri patrón y ri aj chakibꞌ chaꞌ kaqꞌalajin ri kambꞌiꞌij y na kꞌayew taj kamaj alaq usukꞌ. Kambꞌiꞌij kꞌu che alaq: Jelaꞌ pachaꞌ rojertan xya alaq ronoje ri uchapom wi ribꞌ ri cuerpo alaq che uꞌanik ri lik chꞌul y ri lik itzel uwach, jekꞌuriꞌlaꞌ woꞌora yaꞌa alaq ronoje ri uchapom wi ribꞌ ri cuerpo alaq che uꞌanik janipa ri lik chom y lik jusukꞌ chwach ri Dios.
ROM 6:20 Ma rojertan echiriꞌ kꞌa kꞌo alaq puqꞌabꞌ ri mak, na yaꞌom ta ibꞌ alaq che uꞌanik ri lik jusukꞌ chwach ri Dios.
ROM 6:21 ¿Saꞌ ri xutiqoj che alaq janipa ri na utz taj xꞌan alaq ojertan? Ma woꞌora kakꞌix ne alaq che taq waꞌ wa kukꞌam bꞌi jun pa kamik.
ROM 6:22 Ekꞌu woꞌora ruma alaq esam chi lo puqꞌabꞌ ri mak, xuꞌana kꞌu alaq aj chakibꞌ re ri Dios. Ri xutiqoj waꞌ che alaq e ri santowilaj bꞌinik silabꞌik alaq; yey kꞌisbꞌal kꞌu re, e ri kꞌaslemal na jinta utaqexik.
ROM 6:23 Ma ri tojbꞌal re ri mak e ri kamik, noꞌj ri sipanik kuya ri Dios e ri kꞌaslemal na jinta utaqexik ruma ri Qanimajawal Jesucristo.
ROM 7:1 Kinchꞌaꞌt ukꞌ alaq hermanos, ri kꞌo naꞌoj alaq puwi taqanik. Etaꞌam kꞌu alaq waꞌ: Ri taqanik xew kꞌo uchuqꞌabꞌ puwi juna tikawex echiriꞌ wa tikawex kꞌa kꞌaslik.
ROM 7:2 E pachaꞌ juna ixoq kꞌulanik. Rire kꞌo chuxeꞌ ri tzij re ri kꞌulanikil. Ruma kꞌu waꞌ kꞌo puqꞌabꞌ ri rachijil xaloqꞌ kꞌa kꞌas ri rachijil. Noꞌj we xkam rachi, rixoq na jinta chi puqꞌabꞌ ri rachijil.
ROM 7:3 Jekꞌulaꞌ riꞌ, we rixoq kuyoj ribꞌ rukꞌ jun chik achi yey kꞌa kꞌas ri rachijil, riꞌ kabꞌiꞌx che e jun ixoq na jusukꞌ ta rubꞌinik ma kamakun chirij ri tzij re ri kꞌulanikil. Noꞌj we xkam ri rachijil, rixoq kel chuxeꞌ rutaqanik wa tzij; na kamakun ta kꞌu riꞌ chirij ri kꞌulanikil we kakꞌuliꞌ rukꞌ jun chik achi.
ROM 7:4 Jekꞌulaꞌ ralaq alaq nu hermanos, kaminaq chi alaq chwach taq ri Tzij Pixabꞌ ruma rukamik ri Cristo. Waꞌ keꞌelawi na e ta chi ri Tzij Pixabꞌ ri kataqan pawiꞌ alaq. Ruma kꞌu riꞌ, utz kuꞌan alaq re jun chik, waꞌ e ri Cristo, ri xkꞌastaj lo chikixoꞌl ri ekaminaq. Jekꞌulaꞌ ri qabꞌinik lik kꞌo kutiqoj chwach ri Dios ruma oj kꞌo puqꞌabꞌ ri Cristo.
ROM 7:5 Ma ojertan echiriꞌ kꞌa oj kꞌo pa mak, ri rayinik na utz ta uwach xkꞌojiꞌ uchuqꞌabꞌ puwi ri qacuerpo. Ma echiriꞌ ri Tzij Pixabꞌ xuqꞌalajisaj chiqe saꞌ ri na utz taj, e más xqarayij kaqaꞌan ri na utz taj. Yey ri xutiqoj waꞌ chiqe e xojukꞌam bꞌi pa kamik.
ROM 7:6 Noꞌj woꞌora na oj jinta chi chuxeꞌ ri qꞌatbꞌal tzij re wa tzij, ma pachaꞌ oj chi kaminaq che ri kꞌo paqawiꞌ ojertan. Ekꞌu woꞌora riꞌoj kaqaloqꞌnimaj ri Dios rukꞌ jun kꞌakꞌ qabꞌinik ruma ruchuqꞌabꞌ ri Ruxlabꞌixel pa qanimaꞌ, yey waꞌ na e ta chi pachaꞌ ri qabꞌinik ojertan echiriꞌ xqaj kaqaꞌan jusukꞌ che qibꞌ chwach ri Dios ruma ri kaqataqej taqanik.
ROM 7:7 ¿Saꞌ kꞌu riꞌ ri kaqabꞌiꞌij? ¿E nebꞌa keꞌeloq ri Tzij Pixabꞌ na utz taj ma kukꞌam lo ri mak? ¡Na e ta kꞌana riꞌ! Ma riꞌin xinwetaꞌmaj saꞌ ri mak ruma ri Tzij Pixabꞌ; yey we tamaji ri Tzij Pixabꞌ, na kanwetaꞌmaj ta kꞌu riꞌ saꞌ ri mak. Ma riꞌin na wetaꞌam taj we mak ri rayinik we tamaji ri Tzij Pixabꞌ kubꞌiꞌij: «Marayij uwach ri na awe taj.»
ROM 7:8 Ruma kꞌu riꞌ ri taqanik, ri mak kukꞌosoj ronoje itzel rayinik chupa ri wanimaꞌ. We tamaji kꞌu ri taqanik, ri mak na jinta uchuqꞌabꞌ panuwiꞌ.
ROM 7:9 E ri petinaq loq echiriꞌ riꞌin kꞌamajaꞌ kanmaj usukꞌ ri Tzij Pixabꞌ, na jinta kꞌo kubꞌisoj nukꞌuꞌx che. Pero xopon jun qꞌij echiriꞌ xinwetaꞌmaj saꞌ ri taqanik re ri Tzij Pixabꞌ panuwiꞌ. Kꞌa chiriꞌ kꞌu riꞌ xumaj uchuqꞌabꞌ ri mak panuwiꞌ; y xinmaj kꞌu usukꞌ in kaminaq chwach ri Dios ruma ri numak.
ROM 7:10 E chinuwach riꞌin, ri taqanik re ri Tzij Pixabꞌ e kayaꞌw kꞌaslemal; noꞌj ri xuya chwe riꞌin, e ri kamik.
ROM 7:11 Ma ri mak e xuchapabꞌej ri taqanik y rukꞌ kꞌu waꞌ, xinusoko y jelaꞌ xukꞌam lo ri kamik panuwiꞌ.
ROM 7:12 Kaqꞌalajin kꞌu riꞌ ri Tzij Pixabꞌ re ri Dios lik santo yey taq ri taqanik re ri Tzij Pixabꞌ lik santo, lik jusukꞌ y lik utz.
ROM 7:13 Pero ¿e nawi keꞌeloq e ri utz xukꞌam lo kamik panuwiꞌ? ¡Na e ta riꞌ! Ma ri mak e xuchapabꞌej ri utz y rukꞌ waꞌ xukꞌam lo kamik panuwiꞌ. Ruma kꞌu riꞌ ri taqanik re ri Tzij Pixabꞌ, xa jumul kaqꞌalajinik lik itzel uwach ri mak.
ROM 7:14 Qetaꞌam chi kꞌut, ri Tzij Pixabꞌ petinaq rukꞌ ri Dios. Noꞌj riꞌin xa weqam wulewal nupoqlajil, yey in yaꞌtal kꞌu puqꞌabꞌ ri mak.
ROM 7:15 Na kanꞌan ta kꞌu riꞌ ri kuaj riꞌin kanꞌano; ma e ri tzel kanwilo, e kanꞌan riꞌ. Lik na kanmaj ta kꞌu usukꞌ suꞌbꞌe kanꞌan waꞌ.
ROM 7:16 Yey echiriꞌ e kanꞌan ri na kuaj taj, kannaꞌ kꞌu riꞌ chinukꞌuꞌx na utz ta ri kintajin che uꞌanik. Rukꞌ kꞌu riꞌ waꞌ kanjikibꞌaꞌ uwach lik utz ri taqanik re ri Tzij Pixabꞌ.
ROM 7:17 Jelaꞌ kꞌu riꞌ e pachaꞌ na in ta ri kinꞌanaw re ri na utz taj, ma e kataqan ri mak pa wanimaꞌ.
ROM 7:18 Riꞌin lik wetaꞌam, wa in tikawex na jinta kꞌana utz chwe we na jinta ri Dios wukꞌ. Ma tobꞌ kuaj kanꞌan ri utz, pero nutukel na kanriq ta uꞌanik waꞌ.
ROM 7:19 Ma na kanꞌan ta ri utz, ri lik kuaj kanꞌano; e lik kanꞌan ri na utz taj, ri na kuaj taj kanꞌano.
ROM 7:20 Jekꞌulaꞌ riꞌ, we e kanꞌan ri na kuaj taj, riꞌ na in ta ri kinꞌanaw re, ma e ri mak kataqan pa wanimaꞌ ri kaꞌanaw re.
ROM 7:21 Jekꞌulaꞌ tobꞌ lik kuaj kanꞌan ri utz, e ri na utz taj ri kataqan panuwiꞌ.
ROM 7:22 Na rukꞌ ta kꞌu riꞌ, kunaꞌ ri wanimaꞌ e lik chom rutaqanik Rutzij Upixabꞌ ri Dios y lik kinkiꞌkot che waꞌ.
ROM 7:23 Pero kannaꞌo kꞌo jun chik tzij kataqan chwi ri nucuerpo; waꞌ e ruchuqꞌabꞌ ri mak. Ekꞌu waꞌ kachꞌoꞌjinik chaꞌ na kankoj ta utzij ri kubꞌiꞌij ri nunaꞌoj y jekꞌulaꞌ inyututal pa mak.
ROM 7:24 ¡Lik toqꞌoꞌ nuwach riꞌin! ¿China kesan we riꞌin puqꞌabꞌ ri na utz taj kꞌo chwe, ri kinkꞌamaw bꞌi pa kamik?
ROM 7:25 Lik kantioxij che ri Dios, ma xew Rire katoꞌw weꞌin, yey kuꞌan waꞌ ruma ri Jesucristo, ri Qanimajawal. Jekꞌulaꞌ kanmaj usukꞌ lik chirajawaxik kanya wibꞌ puqꞌabꞌ rutaqanik Rutzij Upixabꞌ ri Dios; noꞌj echiriꞌ kanya wibꞌ puqꞌabꞌ ri rayinik re ri nucuerpo, riꞌ e kataqan ruchuqꞌabꞌ ri mak panuwiꞌ.
ROM 8:1 Ekꞌu woꞌora na jinta chi qꞌatbꞌal tzij re kamik pakiwi janipa ri e kꞌo puqꞌabꞌ ri Qanimajawal Jesucristo; waꞌ e ri na kitaqem ta chi ri rayibꞌal re ri na utz taj, ma e kitaqem saꞌ ri karaj ri Ruxlabꞌixel ri Dios chike.
ROM 8:2 Ma ri Ruxlabꞌixel ri Dios kuya chomilaj kꞌaslemal ruma ri Qanimajawal Jesucristo, y e rutaqanik ri Ruxlabꞌixel ri Dios pa qanimaꞌ ri xojesan lo chupa ruchuqꞌabꞌ ri mak y ri kamik.
ROM 8:3 Yey rutaqanik ri Tzij Pixabꞌ na jinta uchuqꞌabꞌ re kojresaj lo puqꞌabꞌ ri mak, ma riꞌoj oj tikawex na jinta qakowil chwa ri mak. Ekꞌu ri na xuchꞌij ta uꞌanik ri Tzij Pixabꞌ, ri Dios xuꞌano echiriꞌ xutaq lo Rukꞌajol che ruwachulew tojbꞌal re ri qamak, y xuꞌan tikawex che jelaꞌ pachaꞌ riꞌoj, noꞌj Rire na xmakun taj. Jekꞌulaꞌ, ruma rukamik jun tikawex, waꞌ e ri Jesús, ri Dios xuqꞌat tzij puwi ri qamak.
ROM 8:4 Xuꞌan kꞌu waꞌ chaꞌ utz kojbꞌin jusukꞌ chwach ri Dios jelaꞌ pachaꞌ ri kubꞌiꞌij ri Tzij Pixabꞌ; ma riꞌoj na e ta chi qataqem ri rayibꞌal re ri na utz taj, e qataqem saꞌ ri karaj ri Ruxlabꞌixel ri Dios chiqe.
ROM 8:5 Ma e taq ri kiyaꞌom kibꞌ che taq ri rayibꞌal re ri kitiꞌjil, e kakiya kinaꞌoj puwi ri rayibꞌal na chom taj. Noꞌj janipa ri kiyaꞌom kibꞌ puqꞌabꞌ ri Ruxlabꞌixel ri Dios, riꞌ e kiyaꞌom kinaꞌoj puwi janipa ri karaj ri Ruxlabꞌixel ri Dios.
ROM 8:6 Ma we e lik kaqaya qanaꞌoj puwi taq ri rayibꞌal re ri qatiꞌjil, riꞌ kamik ri kukꞌam lo chiqe. Noꞌj we e lik kaqaya qanaꞌoj puwi janipa ri karaj ri Ruxlabꞌixel ri Dios chiqe, riꞌ kukꞌam lo kꞌaslemal y utzil chomal chiqe.
ROM 8:7 E janipa ri kiyaꞌom kinaꞌoj xew puwi taq ri rayibꞌal re ri kitiꞌjil, riꞌ e aj retzelal kꞌuꞌx chirij ri Dios. Ma rike na kakaj taj kakiya kibꞌ che uꞌanik ri Tzij Pixabꞌ re ri Dios, yey na kakichꞌij tane uꞌanik waꞌ.
ROM 8:8 Ekꞌu ri Dios lik na kukꞌul ta ukꞌuꞌx ri kibꞌinik kisilabꞌik janipa ri kiyaꞌom kibꞌ chupa ri rayibꞌal re ri na utz taj.
ROM 8:9 Noꞌj ralaq na yaꞌom ta chi ibꞌ alaq chupa waꞌ wa rayibꞌal, ma e yaꞌom ibꞌ alaq puqꞌabꞌ ri Ruxlabꞌixel ri Dios, we paqatzij wi kꞌo Rire pa animaꞌ alaq. Yey we kꞌo kꞌu junoq na jinta ri Ruxlabꞌixel ri Cristo pa ranimaꞌ, waꞌ wa tikawex na re ta ri Cristo.
ROM 8:10 Noꞌj we kꞌo ri Cristo pa animaꞌ alaq, riꞌ kꞌo chomilaj kꞌaslemal alaq ruma ri uꞌanom alaq jusukꞌ chwach ri Dios, tobꞌ ri cuerpo alaq kakam na ruma ri mak.
ROM 8:11 We kꞌo kꞌu pa animaꞌ alaq ri Ruxlabꞌixel ri Jun xukꞌastajisaj lo ri Qanimajawal Jesucristo chikixoꞌl ri ekaminaq, riꞌ kꞌo jun qꞌij Rire kuya jun kꞌakꞌ kꞌaslemal che ri cuerpo alaq yey kuꞌan waꞌ ruma ri Ruxlabꞌixel kꞌo pa animaꞌ alaq.
ROM 8:12 Ruma kꞌu laꞌ, hermanos, chirajawaxik e kaqaꞌan ri utz y maqaꞌan ri na utz taj, ma riꞌoj na oj jinta chi puqꞌabꞌ taq ri rayibꞌal re ri qatiꞌjil.
ROM 8:13 Ma we yaꞌom ibꞌ alaq chupa waꞌ, riꞌ e kukꞌam lo ri kamik pawiꞌ alaq. Noꞌj we rukꞌ rutoꞌbꞌal ri Ruxlabꞌixel ri Dios kakamisaj alaq taq ri rayibꞌal re ri tiꞌjil alaq, riꞌ kꞌo kꞌaslemal alaq chwach ri Dios.
ROM 8:14 Ma konoje ri kakꞌam kiwach ruma ri Ruxlabꞌixel ri Dios, riꞌ e ralkꞌoꞌal ri Dios.
ROM 8:15 Yey ri Ruxlabꞌixel ri Dios xkꞌul alaq, na e ta kuya tanchi alaq chi xiꞌin ibꞌ; ma e kuꞌan ralkꞌoꞌal ri Dios che alaq, y jelaꞌ utz kaqabꞌiꞌij che ri Dios: «¡Tat, Lal Nuqaw!»
ROM 8:16 Ekꞌu ri Ruxlabꞌixel ri Dios ri kajikibꞌan uwach pa qanimaꞌ: Riꞌoj oj chi ralkꞌoꞌal ri Dios.
ROM 8:17 Yey ruma kꞌu oj ralkꞌoꞌal ri Dios, kaqakꞌul ri bꞌiꞌtisinik uꞌanom ri Dios chike ri ralkꞌoꞌal, yey kaqakꞌul kꞌu waꞌ junam rukꞌ ri Cristo. Pero lik chirajawaxik wi kaqatij na kꞌax woꞌora pachaꞌ ri xikꞌow wi Rire, chaꞌ jelaꞌ chiqawach apanoq, oj jun pa ri yakbꞌal uqꞌij Rire.
ROM 8:18 Yey chinuwach riꞌin ri kꞌaxkꞌobꞌik kaqatij riꞌoj woꞌora na kuꞌmaja ta kꞌenoq rukꞌ runimal uchomalil ri Dios, ri kaqꞌalajin qukꞌ chiqawach apanoq.
ROM 8:19 Ma e janipa taq ri ꞌanatal ruma ri Dios lik royeꞌem chik jampalaꞌ kaqꞌalajin kiwach ri e ralkꞌoꞌal ri Dios.
ROM 8:20 Ma ri qꞌatbꞌal tzij xuꞌan ri Dios pakiwi ri tikawex, xtzaq ne puwi taq ri ꞌanatal ruma ri Dios. Y ruma kꞌu riꞌ, na e ta chi uꞌanom pachaꞌ ri uchꞌobꞌom lo ri Dios che ri jeqebꞌal loq. E taq kꞌu ri ꞌanatal ruma ri Dios na xraj taj kayaꞌiꞌ chuxeꞌ wa qꞌatbꞌal tzij; na rukꞌ ta kꞌu riꞌ, e ri Dios xuya chuxeꞌ waꞌ. Pero e janipa taq ri ꞌanatal ruma ri Dios, kꞌa royeꞌem ri qꞌij echiriꞌ ri Dios kuyijbꞌaꞌ na ronoje waꞌ.
ROM 8:21 Ma kopon na jun qꞌij e janipa taq ri ꞌanatal ruma ri Dios, e laꞌ junam kukꞌ ri e ralkꞌoꞌal ri Dios, kebꞌesax na lo chupa ri kꞌaxkꞌobꞌik y puqꞌabꞌ ri kamik yey kayaꞌiꞌ kꞌu unimal chomalil chike.
ROM 8:22 Qetaꞌam kꞌut, e janipa ri ꞌanatal ruma ri Dios, e pachaꞌ kajilow pa kꞌaxkꞌobꞌik, jelaꞌ pachaꞌ kuꞌan juna ixoq echiriꞌ kutzir uwach rukꞌ uchꞌutiꞌn.
ROM 8:23 Y na xew ta kꞌo pa kꞌax janipa ri ꞌanatal ruma ri Dios, ma jelaꞌ koj-jilow pa kꞌax qonoje riꞌoj, ri yaꞌtal chi chiqe ri nabꞌe sipanik ubꞌiꞌtisim ri Dios, waꞌ e ri Ruxlabꞌixel ri Dios pa qanimaꞌ. Yey lik kꞌa kꞌo ne ri qoyeꞌem. E lik kaqarayij kopon ri qꞌij echiriꞌ ri Dios kuqꞌalajisaj qawach oj ralkꞌoꞌal Rire y karesaj kꞌu ri qacuerpo puqꞌabꞌ ri kꞌax y ri kamik.
ROM 8:24 Ma echiriꞌ xojkolobꞌetajik, xujeq kakubꞌiꞌ pana qakꞌuꞌx che kaqakꞌul na ri bꞌiꞌtisim lo chiqe ruma ri Dios y kꞌa qoyeꞌem waꞌ. Yey we kaqabꞌiꞌij kꞌo qoyeꞌem, e keꞌelawi riꞌ kꞌamajaꞌ kaqakꞌul ri qoyeꞌem. Ma we jun ukꞌulum chi ri royeꞌem, ¿suꞌchak kꞌu riꞌ kꞌa karoyꞌej?
ROM 8:25 Noꞌj we riꞌoj kaqoyꞌej na ri kꞌamajaꞌ kaqilo, lik chirajawaxik kꞌu riꞌ kaqachuqꞌubꞌej qibꞌ che royꞌexik waꞌ rukꞌ kubꞌulibꞌal qakꞌuꞌx.
ROM 8:26 Jekꞌulaꞌ, ri Ruxlabꞌixel ri Dios kojutoꞌo echiriꞌ na jinta qakowil, ma riꞌoj na kaqariq ta utzꞌonoxik saꞌ ri kajawax che ri qakꞌaslem; pero Rire lik kachꞌaw paqawiꞌ chwach ri Dios rukꞌ jilowem na kariqitaj ta kꞌana ubꞌiꞌxikil.
ROM 8:27 Ekꞌu ri Dios, ri karil ronoje ri kꞌo pa qanimaꞌ, Rire lik kumaj usukꞌ saꞌ ri karaj ri Ruxlabꞌixel, ma ri Ruxlabꞌixel kachꞌaw paqawiꞌ e chirij ri karaj ri Dios chiqe riꞌoj ri oj re ri Dios.
ROM 8:28 Qetaꞌam kꞌut, janipa ri kꞌax kenaꞌw re ri Dios, e taq ronoje ri kebꞌikꞌow chupa katoꞌbꞌik chaꞌ kꞌo kutiqoj chike, waꞌ e chike janipa ri esikꞌim ruma ri Dios re kakiꞌan ri karaj Rire.
ROM 8:29 Ma ri Dios ojertan lo riꞌ xuchꞌobꞌo e kꞌo ri kebꞌuchaꞌo re kebꞌuꞌana pachaꞌ Rukꞌajol, chaꞌ e Rire ri nabꞌe chikixoꞌl rukꞌiyal e ralkꞌoꞌal ri Dios.
ROM 8:30 Yey taq waꞌ wa kꞌo uchꞌobꞌom lo pakiwiꞌ, xebꞌusikꞌij kꞌu riꞌ. Ekꞌu wa xebꞌusikꞌij, xuꞌan jusukꞌ chike. Yey ri xuꞌan jusukꞌ chike, e xutakꞌabꞌaꞌ uwa kiqꞌij.
ROM 8:31 ¿Saꞌ kꞌu riꞌ ri kaqabꞌiꞌij che waꞌ? We ri Dios kꞌo qukꞌ, ¿china ri kꞌo puqꞌabꞌ kuyak ribꞌ chiqij? ¡Na jinta junoq!
ROM 8:32 Yey ri Dios na xuxuꞌyaj tane Rukꞌajol chiqe, ma xuya loq chaꞌ koꞌlkam che ruwachulew quma qonoje ri oj aj mak. ¿Na kuya ta kami riꞌ chiqe junam rukꞌ Rukꞌajol, ronoje ri kajawax chiqe? ¡Kuyaꞌo!
ROM 8:33 ¿China ri kꞌo puqꞌabꞌ kukoj kimak ri ebꞌuchaꞌom ri Dios? ¡Na jinta junoq! Ma ri Dios e kaꞌanaw jusukꞌ chike.
ROM 8:34 ¿China ri kꞌo puqꞌabꞌ kuqꞌat tzij paqawiꞌ? ¡Na jinta junoq! Ma ri Cristo kachꞌaw paqawiꞌ chwach ri Dios, yey e Rire ri xkam quma riꞌoj. Y na xew ta waꞌ, ma xkꞌastaj lo chikixoꞌl ri ekaminaq y woꞌora tzꞌul puwikiqꞌabꞌ ri Dios.
ROM 8:35 ¿Kꞌo nebꞌa kesan qeꞌoj chupa ri rutzil ukꞌuꞌx ri Cristo? ¡Na jintaj! Ma tobꞌ kape kꞌaxkꞌobꞌik o paxibꞌal kꞌuꞌx paqawiꞌ, tobꞌ kojternabꞌex rukꞌ kꞌax, tobꞌ na jinta qawa y na jinta qaqꞌuꞌ, tobꞌ katewun kꞌax paqawiꞌ o kojkamisax rukꞌ espada, ¡na jinta kꞌo kojesan chupa!
ROM 8:36 Ma jewaꞌ ri tzꞌibꞌital kan pa Ruchꞌaꞌtem ri Dios: Uma Rilal ꞌanom chiqe xaqi katewun ri kamik paqawiꞌ; ꞌAnom chiqe pachaꞌ ri kaꞌan che ri bꞌexex echiriꞌ kakꞌam bꞌi pa kamik kachaꞌ.
ROM 8:37 Na rukꞌ ta kꞌu riꞌ, lik kaqachꞌij uchuqꞌabꞌ ronoje ruma ri Jun lik kꞌax xojunaꞌo.
ROM 8:38 Ruma kꞌu laꞌ, riꞌin lik nujikibꞌam uwach na jinta kꞌana kojesan chirij ri rutzil ukꞌuꞌx ri Dios. Na kojresaj taj tobꞌ ne e ri kamik o ri kꞌaslemal, tobꞌ ne e ri ángeles, ri kꞌo kiwach y ri kꞌo kichuqꞌabꞌ. Na kojresaj taj tobꞌ ne e ri kojtajin che ukꞌulumaxik woꞌora o ri kaqakꞌulumaj chiqawach apanoq,
ROM 8:39 tobꞌ ne e ri e kꞌo lo kꞌa che ruwa kaj o ri e kꞌo lo kꞌa chuxeꞌ rulew. Na jinta kꞌu kꞌo ꞌanatal ruma ri Dios kojesan chirij ri rutzil ukꞌuꞌx, ri xqakꞌul ruma ri Cristo Jesús, ri Qanimajawal.
ROM 9:1 Lik qatzij wa kambꞌiꞌij che alaq, ma in re ri Cristo y na kanꞌan ta raqꞌubꞌal. Lik kunaꞌ kꞌu nukꞌuꞌx qatzij ri kambꞌiꞌij, ma e ri Santowilaj Ruxlabꞌixel ri Dios kakꞌamaw uwach ri nunaꞌoj.
ROM 9:2 Qatzij kꞌut riꞌin lik kimbꞌisonik y ri kꞌax kꞌo chinukꞌuꞌx na kikꞌow taj
ROM 9:3 ruma ri kiꞌanom ri e aj Israel, ri qatz-qachaqꞌ qibꞌ kukꞌ. Kanya ne wibꞌ e kinkꞌojiꞌ riꞌin chuxeꞌ ri qꞌatbꞌal tzij re ri Dios y na e ta rike, tobꞌ na jinta chi re ri Cristo chwe, we ta ne rukꞌ waꞌ kekolobꞌetaj rike.
ROM 9:4 Ma raj Israel e utinamit ri Dios, yey e rike ri xebꞌuchaꞌ ri Dios re kebꞌuꞌan ralkꞌoꞌal chike; xukꞌut kꞌu runimal uchomalil chikiwach y xuꞌan tzij kukꞌ. Chike rike xyaꞌtaj wi Rutzij Upixabꞌ y xkꞌut chike suꞌanik kaloqꞌnimax uqꞌij ri Dios pa saqil wi. Yey taq rubꞌiꞌtisinik ri Dios uꞌanom, ke rike.
ROM 9:5 Rike e kalkꞌoꞌal kan ri qamam lik kꞌo kiwach ojertan. Yey chike kꞌu rike upetebꞌem wi ri Cristo, Ruchaꞌoꞌn lo ri Dios, ri xkꞌun che ruwachulew y xuꞌan tikawex. Yey Rire e Dios puwi ronoje taq ri kꞌolik. ¡Na jinta utaqexik lik nim uqꞌij! ¡Amén!
ROM 9:6 ¿Na uꞌanom ta nebꞌa ri Dios ri ubꞌiꞌtisim che rutinamit Israel? Pero na konoje ta ri e ralkꞌoꞌal kan ri Israel e saqil utinamit ri Dios.
ROM 9:7 Na xa ta ruma kipetebꞌem che ri Abraham, e ralkꞌoꞌal ri Dios. Ma jewaꞌ xubꞌiꞌij ri Dios che ri Abraham: «Xew che rakꞌajol Isaac kakipetebꞌej wi lo rawalkꞌoꞌal» xchaꞌ.
ROM 9:8 Na konoje ta kꞌu ri kipetebꞌem che ri Abraham, e ralkꞌoꞌal ri Dios; ma xew e ralkꞌoꞌal ri Dios ri kebꞌalax chirij rubꞌiꞌtisinik Rire.
ROM 9:9 Ma ri bꞌiꞌtisinik xuꞌan ri Dios che ri Abraham e waꞌ: «Jewaꞌ pa jun junabꞌ kinkꞌun tanchik, yey ekꞌu riꞌ rawixoqil Sara kꞌo chi jun ralabꞌ» xchaꞌ.
ROM 9:10 Y na xew ta waꞌ, ma echiriꞌ ruma ri qamam Isaac ri Rebeca xkanaj yewaꞌ ixoq, xebꞌumatzej eyoꞌxabꞌ.
ROM 9:11 Yey kꞌamajaꞌ ne kebꞌalax rike y kꞌamajaꞌ ne kakiꞌan ri utz o ri na utz taj echiriꞌ ri Dios xuchaꞌ jun chike. Jekꞌulaꞌ kaqꞌalajinik e kuꞌana na janipa ri uchꞌobꞌom lo ri Dios; y waꞌ na e ta ruma ri kakiꞌan ri winaq, ma puqꞌabꞌ Rire kꞌo wi kuchaꞌo china ri karaj kusikꞌij.
ROM 9:12 Ma ri Dios xubꞌiꞌij che ri Rebeca: «Ri chaqꞌixel e kakꞌojiꞌ más uwach chwa ri atzixel» xchaꞌ.
ROM 9:13 Jekꞌulaꞌ kuꞌana pachaꞌ ri tzꞌibꞌital kan puwi ri ubꞌiꞌim lo ri Dios: E ri chaqꞌixel Jacob ri kꞌax xinnaꞌo; noꞌj ri atzixel Esaú, tzel xinwilo xchaꞌ.
ROM 9:14 ¿Saꞌ kꞌu riꞌ ri kaqabꞌiꞌij riꞌoj puwi waꞌ? ¿E nawi na jusukꞌ ta ri kuꞌan ri Dios? ¡Na e ta riꞌ!
ROM 9:15 Ma jewaꞌ xubꞌiꞌij ri Dios che ri Moisés ojertan: We kꞌo junoq kuaj Riꞌin kantoꞌo ruma ri rutzil nukꞌuꞌx, e riꞌ ri kantoꞌo. Y we kꞌo junoq kuaj Riꞌin kankꞌut ri kꞌaxnaꞌbꞌal nukꞌuꞌx che, che riꞌ rire kankꞌut wi ri kꞌaxnaꞌbꞌal nukꞌuꞌx xchaꞌ.
ROM 9:16 E uwariꞌche echiriꞌ kꞌo karaj kuya ri Dios che juna tikawex, na e ta ruma lik kacha ukꞌuꞌx wa tikawex che o ruma lik kutij uqꞌij chaꞌ kꞌo kukꞌulu; ma e ruma ri kꞌaxnaꞌbꞌal ukꞌuꞌx ri Dios.
ROM 9:17 E pachaꞌ ri tzꞌibꞌital kan chupa Ruchꞌaꞌtem ri Dios echiriꞌ ri Dios xubꞌiꞌij che ri faraón: «Riꞌin xinꞌan taqanel chawe chaꞌ kankꞌut ri nuchuqꞌabꞌ pawiꞌ riꞌat y chaꞌ katzijox kꞌu ri nubꞌiꞌ che ronoje ruwachulew» xchaꞌ.
ROM 9:18 Qꞌalaj kꞌu riꞌ ri Dios ruma ri kꞌaxnaꞌbꞌal ukꞌuꞌx kutoꞌ china ri karaj kutoꞌo. Yey we Rire karaj kuꞌan pachaꞌ abꞌaj che ri ranimaꞌ junoq, jelaꞌ kuꞌan che.
ROM 9:19 Laj kꞌo kꞌu junoq jewaꞌ kubꞌiꞌij chwe: «We na jinta junoq kachꞌijow uqꞌatexik janipa ri karaj ri Dios, ¿suꞌbꞌe kꞌu riꞌ ri Dios kukoj kimak ri tikawex we rike xew e kakiꞌan ri xebꞌutaq Rire che?»
ROM 9:20 Ekꞌu riꞌin kankꞌul uwach: «Achi, ¿saꞌ ko rawach riꞌat chaꞌ katyajan chirij ri Dios? Ma na utz taj we ri xaro ulew kubꞌiꞌij che ri kaꞌanaw re: ¿Suꞌchak jewaꞌ xꞌan la chwe?»
ROM 9:21 E ri kachakun rukꞌ xoqꞌoꞌl, ¿na jinta nebꞌa puqꞌabꞌ kuꞌan rukꞌ ri xoqꞌoꞌl saꞌ ri karaj kuꞌano? Ma we Rire karaj che ri xoqꞌoꞌl kuꞌan kebꞌ xun, jun lik xa qꞌalaj pa kachapabꞌex wi y ri jun chik xa tobꞌ pa kachapabꞌex wi, e kuꞌan riꞌ.
ROM 9:22 Jekꞌulaꞌ riꞌ ri Dios kꞌo puqꞌabꞌ saꞌ ri karaj kuꞌan kukꞌ ri winaq. ¿Saꞌ kꞌu kaqabꞌiꞌij we ri Dios xraj kukꞌut ri royowal y ri unimal uchuqꞌabꞌ pakiwi raj makibꞌ yey na rukꞌ ta kꞌu riꞌ, e xukꞌut ri unimal ukꞌuꞌx chike ri taqal chike katzaq ri royowal pakiwiꞌ y kasach kiwach?
ROM 9:23 Y jelaꞌ xuꞌano kꞌutubꞌal re ri unimal uchomalil. Ma xukꞌut ri kꞌaxnaꞌbꞌal ukꞌuꞌx chike ri ebꞌuchaꞌom chi uloq re kekꞌojiꞌ rukꞌ pa ri chomilaj luwar chilaꞌ chikaj.
ROM 9:24 Chike kꞌu ri xuꞌan wi waꞌ, xebꞌusikꞌij; y riꞌoj oj jujun chike. Y waꞌ na xew ta xuꞌan kukꞌ ri e aj judiꞌabꞌ, ma xuꞌan kukꞌ ri na e ta aj judiꞌabꞌ.
ROM 9:25 Ma jewaꞌ ri xutzꞌibꞌaj kan ri qꞌalajisanel Oseas puwi ri xubꞌiꞌij ri Dios: Chike ri na e ta nutinamit ojertan, woꞌora kambꞌiꞌij: «Riꞌix, ix nutinamit.» Y chike ri na kꞌax ta kenaꞌik, woꞌora kambꞌiꞌij: «Riꞌin kꞌax kixinnaꞌo.»
ROM 9:26 Y chupa kꞌu ri luwar pa xbꞌiꞌx wi chike: «Riꞌix na ix ta nutinamit,» chilaꞌ kꞌu riꞌ kabꞌiꞌx na chike e ralkꞌoꞌal ri Dios kꞌaslik.
ROM 9:27 Yey jelaꞌ ri xutzꞌibꞌaj kan ri qꞌalajisanel Isaías pakiwi raj Israel: Tobꞌ ri kikꞌiyal ri tinamit Israel kebꞌuꞌana pachaꞌ rukꞌiyal sanyebꞌ kꞌo chuchiꞌ ri mar, xa e chi jumutz ri kekolobꞌetaj chike.
ROM 9:28 Ma ri Dios Qajawxel kuqꞌat tzij pakiwi ri tikawex che ruwachulew e chirij janipa ri ubꞌiꞌim kanoq, y kuꞌana waꞌ rukꞌ usukꞌlikil y na kamayin ta che uꞌanik xchaꞌ.
ROM 9:29 Yey jewaꞌ xutzꞌibꞌaj kan ri qꞌalajisanel Isaías ojertan: Ri Dios Qajawxel, ri lik kꞌo uchuqꞌabꞌ puwi ronoje, we tamaji xebꞌukolobꞌej kan jumutz chike ri qatinamit che ri kamik, riꞌ kaqakꞌulumaj pachaꞌ ri kaꞌibꞌ tinamit Sodoma y Gomorra, ri xsachisax kiwach xchaꞌ.
ROM 9:30 ¿Saꞌ kꞌu riꞌ ri kaqabꞌiꞌij che ronoje waꞌ? Ma ojertan loq ri na e ta aj judiꞌabꞌ na xkitzukuj taj kebꞌuꞌana jusukꞌ chwach ri Dios; yey woꞌora ri Dios xuꞌan jusukꞌ chike ruma ri kubꞌulibꞌal kikꞌuꞌx rukꞌ.
ROM 9:31 Noꞌj ri e aj Israel lik xkitij uqꞌij kebꞌuꞌan jusukꞌ chwach ri Dios ruma kakitaqej taq ri taqanik re ri Tzij Pixabꞌ; na rukꞌ ta kꞌu riꞌ, na xebꞌuꞌana ta jusukꞌ chwach ri Dios.
ROM 9:32 ¿Suꞌchak jewaꞌ xkikꞌulumaj? E ruma na xkubꞌiꞌ ta kikꞌuꞌx rukꞌ ri xuꞌan ri Dios chaꞌ kuꞌan jusukꞌ chike. Ma xkichꞌobꞌo e kebꞌuꞌan jusukꞌ chwach ri Dios ruma taq ri kakiꞌano. Y jekꞌulaꞌ e pachaꞌ xkichiq kibꞌ puwi ri jun Abꞌaj ri lik e kꞌo ketzaq puwiꞌ.
ROM 9:33 Ma jewaꞌ tzꞌibꞌital kan chupa Ruchꞌaꞌtem ri Dios puwi wa Abꞌaj: Kankoj kꞌu chilaꞌ Sion jun Abꞌaj. Waꞌ lik e kꞌo taq ri kakichiq kibꞌ che; y lik e kꞌo taq ri ketzaq puwi wa nimalaj Abꞌaj. Noꞌj janipa kꞌu ri kakubꞌiꞌ kikꞌuꞌx rukꞌ, na kekꞌixbꞌesax taj ma kakikꞌul na ri koyeꞌem che Rire kachaꞌ.
ROM 10:1 Kambꞌiꞌij che alaq hermanos, paqatzij wi ri lik kurayij nukꞌuꞌx y ri lik kantzꞌonoj che ri Dios pakiwi ri e aj Israel e chaꞌ rike kakiriq ri kolobꞌetajik.
ROM 10:2 Riꞌin kambꞌiꞌij ri wilom chike: Rike lik kakitij uqꞌij kekꞌojiꞌ chi utz chwach ri Dios, pero waꞌ na kakiꞌan ta rukꞌ saqil naꞌoj.
ROM 10:3 Ma na kakaj taj kakimaj usukꞌ suꞌanik ri Dios kuꞌan jusukꞌ chike ri tikawex; ri kakaj e kebꞌuꞌana jusukꞌ xa pa ke rike. Y na kiyaꞌom ta kꞌu kibꞌ kaꞌan jusukꞌ chike jelaꞌ pachaꞌ ri karaj ri Dios.
ROM 10:4 Yey ri Tzij Pixabꞌ katzꞌaqat uwach rukꞌ ri Cristo; jekꞌulaꞌ china ri kakubꞌiꞌ ukꞌuꞌx rukꞌ Rire, e kaꞌan jusukꞌ che chwach ri Dios.
ROM 10:5 E puwi ri kuꞌana jusukꞌ ri tikawex ruma kutaqej ri Tzij Pixabꞌ, jewaꞌ xutzꞌibꞌaj ri Moisés: China ri kaꞌanaw re ronoje ri kubꞌiꞌij ri Tzij Pixabꞌ, riꞌ kꞌo ukꞌaslemal chwach ri Dios ruma kuꞌan waꞌ.
ROM 10:6 Noꞌj puwi ri kuꞌana jusukꞌ ri tikawex ruma ri kubꞌulibꞌal kꞌuꞌxaj, jewaꞌ kubꞌiꞌij pa Ruchꞌaꞌtem ri Dios: «Mabꞌiꞌij pa awanimaꞌ: ¿China kꞌu ri keꞌek kꞌa chilaꞌ chikaj che ukꞌamik lo ri Cristo?»
ROM 10:7 O «¿China kꞌu ri kaqaj kꞌa chupa ri siwan katzꞌirir upa che ukꞌamik lo ri Cristo chikixoꞌl ri ekaminaq?»
ROM 10:8 Na kajawax taj keꞌek junoq, ma ¿saꞌ riꞌ ri kubꞌiꞌij pa Ruchꞌaꞌtem ri Dios? Jewaꞌ kubꞌiꞌij: Rutzij ri Dios lik xa naqaj kꞌo wi chawe. Kꞌo chupa rawanimaꞌ y kel lo pachiꞌ. Ekꞌu chꞌaꞌtem waꞌ ri kaqatzijoj riꞌoj puwi ri kubꞌulibꞌal kꞌuꞌxaj:
ROM 10:9 We riꞌat kaqꞌalajisaj rukꞌ ruchiꞌ aqul: «Ri Jesús e Wajawal» y kakoj kꞌu chupa rawanimaꞌ Rire xkꞌastaj lo ruma ri Dios chikixoꞌl ri ekaminaq, riꞌ katkolobꞌetajik.
ROM 10:10 Ma pa ri qanimaꞌ kaqakoj wi waꞌ chaꞌ kojuꞌan jusukꞌ chwach ri Dios; yey rukꞌ kꞌu ruchiꞌ qaqul, kaqaqꞌalajisaj Rire e Qajawal chaꞌ jelaꞌ kojkolobꞌetajik.
ROM 10:11 Ma Ruchꞌaꞌtem ri Dios jewaꞌ kubꞌiꞌij puwi ri Cristo: China ri kakubꞌiꞌ ukꞌuꞌx rukꞌ, na kakꞌixbꞌesax taj ma kukꞌul na ri royeꞌem che Rire kachaꞌ.
ROM 10:12 Echiriꞌ kubꞌiꞌij «china», waꞌ keꞌelawi tobꞌ e aj judiꞌabꞌ o na e ta aj judiꞌabꞌ, ma xaqi junam kiwach. Ma ri Qanimajawal e Kajawal ke konoje, tobꞌ junwi taq ri kitinamit. Yey Rire kuya ri unimal rutzil ukꞌuꞌx chike konoje ri kakitzꞌonoj toꞌbꞌal ke che.
ROM 10:13 Ma Ruchꞌaꞌtem ri Dios jewaꞌ kubꞌiꞌij: E janipa ri kakitzꞌonoj kolobꞌetajik chupa rubꞌiꞌ ri Qanimajawal, riꞌ kekolobꞌetaj na kachaꞌ.
ROM 10:14 ¿Suꞌanik kꞌu riꞌ kakitzꞌonoj kolobꞌetajik chupa rubꞌiꞌ ri Qanimajawal we na kikojom ta rubꞌiꞌ nabꞌe? ¿Yey suꞌanik kakikoj rubꞌiꞌ we na kitom ta puwi Rire? ¿Yey suꞌanik kakita ri tzijonik puwi Rire we na jinta junoq katzijow re chike?
ROM 10:15 ¿Yey suꞌanik e kꞌo ri ketzijon puwi ri Qanimajawal we na jinta junoq kataqaw bꞌi ke chaꞌ kakiꞌan wa tzijonik? E pachaꞌ ri tzꞌibꞌital kan chupa Ruchꞌaꞌtem ri Dios: ¡Lik chom ri kikꞌunik ri kakikꞌam lo ri tzijonik re ri utzil chomal, ri kekꞌun che utzijoxik ri Utzilaj Tzij! kachaꞌ.
ROM 10:16 Noꞌj na konoje ta kꞌut xekojow re ri Utzilaj Tzij xtzijox chike. E pachaꞌ ri xubꞌiꞌij kan ri Isaías: Qajawal, ¿kꞌo nawi junoq kojoyom re ri qatzijom chik? xchaꞌ.
ROM 10:17 Ri kubꞌulibꞌal kikꞌuꞌx ri tikawex kujeqo echiriꞌ kakita ri katzijox chike; yey waꞌ wa kakito, e Ruchꞌaꞌtem ri Dios puwi ri Cristo.
ROM 10:18 Noꞌj kantzꞌonoj kꞌut: ¿Na xkita ta nawi ri Utzilaj Tzij? ¡Qatzij, xkito! Ma e pachaꞌ ri kubꞌiꞌij Ruchꞌaꞌtem ri Dios: Che ronoje ruwachulew xtataj wi ri kiqul ri xetzijon puwi ri Dios; y ri kichꞌaꞌtem oponinaq pa ronoje luwar che ruwachulew kachaꞌ.
ROM 10:19 Kantzꞌonoj tanchi kꞌut: ¿Raj Israel na ketaꞌam ta nawi waꞌ? ¡Ketaꞌam! Nabꞌe na, e pachaꞌ ri xutzꞌibꞌaj kan ri Moisés puwi ri xubꞌiꞌij lo ri Dios chike raj Israel: Riꞌin kanꞌan chiwe kuꞌan kꞌax ikꞌuꞌx chirij jun “tinamit” na tinamit taj; kampetisaj iwoyowal chirij jun tinamit na jinta ketaꞌam puwi ri Qꞌijsaq xchaꞌ.
ROM 10:20 Jekꞌulaꞌ, ri Isaías xuchꞌij ubꞌiꞌxikil ri ubꞌiꞌim lo ri Dios pakiwi ri na e ta aj Israel: Xinriqitaj kꞌu kuma ri na kinkitzukuj taj, yey xinqꞌalajisaj kꞌu wibꞌ chikiwach ri na xinkitzꞌonobꞌej taj xchaꞌ.
ROM 10:21 Noꞌj pakiwi raj Israel, jewaꞌ xubꞌiꞌij lo ri Dios: Lik xinelaj chike jun tinamit e aj palajiy tzij y e titzꞌitaq chaꞌ ketzelej tanchi lo wukꞌ xchaꞌ.
ROM 11:1 Ekꞌu woꞌora kantzꞌonoj: ¿E nawi xroqꞌotaj kan ri Dios rutinamit Israel? ¡Lik qꞌalaj na xroqꞌotaj taj! Ma riꞌin in aj Israel, in ralkꞌoꞌal kan ri Abraham, in jun chike taq kan ri ralkꞌoꞌal ri Benjamín; yey riꞌin na xinoqꞌotax ta kan ruma ri Dios.
ROM 11:2 Ri Dios, lik ojertan lo riꞌ xuchꞌobꞌ raqan kuꞌan utinamit chike raj Israel; y kꞌa e uꞌanom woꞌora, na roqꞌotam ta kan rutinamit Israel. ¿Na etaꞌam ta nebꞌa alaq ri kubꞌiꞌij Ruchꞌaꞌtem ri Dios puwi ri xubꞌiꞌij ri Elías echiriꞌ rire xchꞌaꞌt chwach ri Dios chikij ri e aj Israel? Ma jewaꞌ xubꞌiꞌij:
ROM 11:3 Lal Qajawal Dios, raj Israel e xekamisan ke ri qꞌalajisanelabꞌ e la y xkiwulij taq ri altar e la. Xew chi kꞌu riꞌin in kanajinaq kanoq y kakaj ne kinkikamisaj xchaꞌ.
ROM 11:4 ¿Yey saꞌ kꞌu riꞌ ri xukꞌul uwach ri Dios che ri Elías? Xubꞌiꞌij: Na xew ta riꞌat, ma kꞌa e kꞌo chi kan wuqubꞌ mil achijabꞌ ebꞌenukolobꞌem chaꞌ kinkiloqꞌnimaj Riꞌin yey rike na exukiꞌnaq ta kꞌana chwach ri tiox Baal xcha ri Dios che.
ROM 11:5 Jekꞌulaꞌ woꞌora kꞌa e kꞌo chi kan jumutz chike raj Israel echaꞌtal kan ruma ri unimal rutzil ukꞌuꞌx ri Dios.
ROM 11:6 Yey we echaꞌtal ruma ri unimal rutzil ukꞌuꞌx ri Dios, riꞌ na e ta ruma juna chak kiꞌanom rike. Ma we ta e riꞌ, ri unimal rutzil ukꞌuꞌx ri Dios na kajawax taj.
ROM 11:7 ¿Saꞌ kꞌu riꞌ ri kaqamaj usukꞌ che waꞌ? Lik e kꞌi chike ri tinamit Israel kꞌamajaꞌ kakiriq ri ketajin lo che utzukuxik, waꞌ e suꞌanik kebꞌuꞌan jusukꞌ chwach ri Dios. Noꞌj ri xeriqow re, e ri echaꞌom chi lo ruma ri Dios. Ekꞌu ri nikꞌaj chik xꞌan pachaꞌ abꞌaj che ri kanimaꞌ.
ROM 11:8 Ma e pachaꞌ ri tzꞌibꞌital kan pa Ruchꞌaꞌtem ri Dios: Ri Dios xuꞌan chike pachaꞌ kawar kiwach chwach taq ri karaj Rire; y kꞌa waqꞌij ora tobꞌ ketzuꞌnik, na kakil ta ri kukꞌut ri Dios chikiwach; tobꞌ ketanik, na kakita ta ri kubꞌiꞌij ri Dios chike.
ROM 11:9 E pachaꞌ ri xubꞌiꞌij ri David ojertan pakiwi ri tzel xebꞌilow re: Ri nimaq taq nimaqꞌij kakiꞌano, chuꞌana pachaꞌ koꞌk y pachaꞌ raꞌal re ketzaq chupa, y jelaꞌ keyaꞌ pa kꞌaxkꞌobꞌik.
ROM 11:10 Chuꞌana kꞌu qꞌequꞌm rupa ri kiwach chaꞌ na kakil ta ri kukꞌut ri Dios chikiwach; Yey kanaj na kanoq e riꞌ xaqi kꞌuyukꞌik chi ri kij ruma ri keqaꞌn lik al xchaꞌ.
ROM 11:11 Kantzꞌonoj kꞌut: ¿Ri kitzaqibꞌal raj Israel e nawi chaꞌ asu na keyaktaj ta chik? ¡Na e ta kꞌana riꞌ! Ma ruma ri kitzaqibꞌal rike, e xkꞌun ri kolobꞌetajik chike ri na e ta aj Israel, chaꞌ jelaꞌ raj Israel kakijeq kakirayij kekolobꞌetaj pachaꞌ ri na e ta aj Israel.
ROM 11:12 Yey we ruma kꞌu ri tzaqibꞌal y ri jaljobꞌik ke raj Israel, lik chom ri xkikꞌul taq ri tinamit re ruwachulew, ¡makꞌuwariꞌ e más chom ri kakikꞌul taq ri tinamit echiriꞌ konoje ri e aj Israel kakitzelej tanchi kitzij chwach ri Dios!
ROM 11:13 Kꞌo kꞌu ri kuaj kambꞌiꞌij che alaq ri na alaq ta aj Israel. Riꞌin in taqoꞌn re ri Jesús chike ri na e ta aj Israel. Ruma kꞌu waꞌ, lik kꞌax kannaꞌ wa chak yaꞌom panuqꞌabꞌ.
ROM 11:14 Yey ri lik kuaj riꞌin chike raj Israel, ri e watz-nuchaqꞌ, e kakirayij pan ri kꞌulum ralaq y jekꞌulaꞌ kekolobꞌetaj na jujun chike.
ROM 11:15 Ma we ri tzaqibꞌal ke raj Israel xuya luwar chaꞌ ukꞌiyal tikawex che ruwachulew xkꞌojiꞌ utzil chomal chikiwach rukꞌ ri Dios, ¿saꞌ kꞌu riꞌ ri kukꞌam loq echiriꞌ raj Israel kekꞌul tanchi ruma ri Dios? ¡E kukꞌam lo kꞌaslemal chike ri ekaminaq chwach ri Dios!
ROM 11:16 We junoq kuya puqꞌabꞌ ri Dios ri nabꞌe pam kesax che ri qꞌor, waꞌ e kꞌutubꞌal re ronoje ri qꞌor re ri Dios. Yey we chom ri ratzꞌayaq juna cheꞌ, jenelaꞌ riꞌ chom taq ruqꞌabꞌ.
ROM 11:17 Ekꞌu che ri saqil cheꞌ re olivo (waꞌ e keꞌelawi rutinamit ri Dios e aj Israel) xjoqꞌix bꞌi jujun uqꞌabꞌ (waꞌ e keꞌelawi raj Israel na kikojom ta rubꞌiꞌ ri Cristo). Yey pukꞌaxel ri xjoqꞌix bꞌi, e xnakꞌ jujun uqꞌabꞌ cheꞌ re olivo xa re pa taq juyubꞌ (waꞌ e keꞌelawi ralaq hermanos, ri na alaq ta aj Israel). Ekꞌu woꞌora e pachaꞌ kakꞌul alaq ri saqil uwaꞌal cheꞌ re olivo, ri kel lo che ri ratzꞌayaq.
ROM 11:18 Pero machꞌobꞌ ne alaq we más kꞌo wach ralaq chikiwa ri saqil uqꞌabꞌ ri cheꞌ xejoqꞌix bꞌi. Ma we kaꞌan nim che ibꞌ alaq, mikꞌow chikꞌuꞌx alaq na e ta ralaq ri kꞌasbꞌayom re ri ratzꞌayaq ri cheꞌ, ma e ne ri ratzꞌayaq ri kꞌasbꞌayom e alaq.
ROM 11:19 Laj e kꞌo jujun chixoꞌlibꞌal alaq jewaꞌ kakibꞌiꞌij: «Jujun uqꞌabꞌ ri cheꞌ re olivo xjoqꞌix bꞌi chaꞌ jelaꞌ e kojnakꞌ kan riꞌoj pakikꞌaxel» kacha alaq.
ROM 11:20 Qatzij, pero waꞌ xjoqꞌix bꞌi ruma na jinta kubꞌulibꞌal kikꞌuꞌx rukꞌ ri Qanimajawal. Noꞌj kꞌu ralaq xtikiꞌ kan alaq xa ruma ri kubꞌulibꞌal kꞌuꞌx alaq rukꞌ ri Qanimajawal. E uwariꞌche, maꞌan nim che ibꞌ alaq; e kꞌola xiꞌin ibꞌ ukꞌ alaq chwach ri Dios.
ROM 11:21 Lik chajij kꞌu ibꞌ alaq, ma we ri Dios xujoqꞌij bꞌi taq ri saqil uqꞌabꞌ cheꞌ (waꞌ e ri e aj Israel na xkubꞌiꞌ ta kikꞌuꞌx rukꞌ ri Qanimajawal), jekꞌuriꞌlaꞌ kuꞌan che ralaq we jelaꞌ kaꞌan alaq pachaꞌ ri xkiꞌan rike.
ROM 11:22 Chilape kꞌu alaq riꞌ: Ri utzilaj rutzil ukꞌuꞌx ri Dios yey rutewul ri royowal. Ma lik kꞌo utewul ri royowal Rire echiriꞌ kayaktaj chirij ri na utz taj, jelaꞌ pachaꞌ ri xuꞌan kukꞌ ri xejaljobꞌik. Noꞌj ri utzilaj rutzil ukꞌuꞌx e ri kukꞌut che ralaq we katikiꞌ alaq chupa wa rutzil ukꞌuꞌx. Yey we na e ta kꞌu kaꞌan alaq riꞌ, kajoqꞌix ne ubꞌi riꞌ ralaq pachaꞌ ri xkikꞌulumaj rike.
ROM 11:23 Yey we ne ri e aj Israel kakitzelej kitzij y kakubꞌiꞌ kikꞌuꞌx rukꞌ ri Qanimajawal, kenakꞌ tanchi che ri saqil cheꞌ, ma ri Dios puqꞌabꞌ kꞌo wi kuꞌan waꞌ.
ROM 11:24 Ma ralaq, ri xset lo alaq che jun cheꞌ re olivo lik rewi xa re pa taq juyubꞌ, xnakꞌ kꞌu alaq ruma ri Dios che ri saqil cheꞌ re olivo tobꞌ waꞌ na cheꞌul ta alaq. We ri Dios xuriq kꞌu unakꞌik alaq che jun cheꞌ, lik na kꞌayew ta kꞌu riꞌ che Rire kunakꞌ tanchi ri saqil uqꞌabꞌ che ri cheꞌ pa petinaq wi.
ROM 11:25 Hermanos, ri Dios kꞌo ri uchꞌobꞌom chi lo raqan pakiwi raj Israel, yey waꞌ na qꞌalajisam ta lo ojertan. Ekꞌu woꞌora lik kuaj riꞌin ketaꞌmaj ralaq waꞌ chaꞌ na kaꞌan ta nim che ibꞌ alaq. Ri kikꞌulumam raj Israel, tobꞌ na konoje taj, e ri xꞌan pachaꞌ abꞌaj che ri kanimaꞌ, ma na kakaj ta kakikoj rubꞌiꞌ ri Cristo. Yey jekꞌulaꞌ kiꞌanom kꞌa echiriꞌ katzꞌaqat na ri kikꞌiyal ri na e ta aj Israel kakiya kibꞌ puqꞌabꞌ ri Cristo.
ROM 11:26 Kꞌa tekꞌuchiriꞌ konoje raj Israel kekolobꞌetaj na, ma jewaꞌ tzꞌibꞌital kan pa Ruchꞌaꞌtem ri Dios: Kꞌa chilaꞌ Sion kape wi ri kayolopin lo ke ri tikawex y kebꞌeresaj na kꞌu lo ri e ralkꞌoꞌal kan ri Jacob chupa ri chꞌulilaj mak.
ROM 11:27 Ekꞌu nutzij waꞌ kanꞌan Riꞌin kukꞌ echiriꞌ kankuy na ri kimak kacha ri Dios.
ROM 11:28 Na rukꞌ ta kꞌu riꞌ, raj Israel xebꞌuꞌana e aj retzelal kꞌuꞌxaj chirij ri Dios ruma na xkaj taj kakikoj ri Utzilaj Tzij. Ekꞌu riꞌ waꞌ xuya luwar che ralaq ri na alaq ta aj Israel chaꞌ utz kaqibꞌ alaq rukꞌ ri Dios. Noꞌj ri Dios kꞌa kꞌax kebꞌunaꞌ raj Israel ma xebꞌuchaꞌ lo ri katiꞌ-kimam ojertan.
ROM 11:29 Ma e janipa ri sipanik y ri sikꞌibꞌal uꞌanom ri Dios che rutinamit, waꞌ na karesaj ta chi kꞌenoq.
ROM 11:30 Ralaq ri na alaq ta aj Israel, rojertan na xkoj ta alaq utzij ri Dios. Noꞌj woꞌora e raj Israel ri na kakikoj ta utzij; y ruma kꞌu waꞌ, yaꞌtal che ralaq kakꞌul alaq ri kꞌutubꞌal re ri rutzil ukꞌuꞌx ri Dios.
ROM 11:31 Jekꞌuriꞌlaꞌ, woꞌora rike na kikojom ta utzij ri Dios; yey ruma ri rutzil ukꞌuꞌx ri Dios che ralaq, chiqawach apanoq ri Dios kukꞌut tanchi ri rutzil ukꞌuꞌx chike rike.
ROM 11:32 Ma ri Dios xuqꞌalajisaj konoje ri tikawex junam kiwach e aj palajiy tzij, chaꞌ jelaꞌ kukꞌut ri rutzil ukꞌuꞌx chike konoje.
ROM 11:33 ¡Janipa lo umajom rubꞌeyomalil y runaꞌoj ri Dios yey taq ri retaꞌam Rire; ronoje waꞌ lik na jinta utaqexik! ¡Na jinta ne kꞌana junoq kachꞌijow umajik usukꞌ janipa ri uchꞌobꞌom y ri uꞌanom Rire!
ROM 11:34 Ma jewaꞌ kubꞌiꞌij Ruchꞌaꞌtem ri Dios: ¿Kꞌo nawi junoq umajom usukꞌ ronoje runaꞌoj ri Dios Qajawxel? ¿Kꞌo nawi junoq xyaꞌw unaꞌoj Rire? ¡Na jintaj! kachaꞌ.
ROM 11:35 Yey kubꞌiꞌij: We kꞌo junoq kasipan che ri Dios, ¿chirajawaxik nawi che ri Dios kuya lo ri rajil ukꞌaxel che? ¡Na chirajawaxik ta che!
ROM 11:36 Ma janipa taq ri kꞌolik, rukꞌ Rire petinaq wi; ma ronoje ꞌanatal ruma Rire y e re yakbꞌal uqꞌij Rire. ¡Lik taqal kꞌu riꞌ che kayak uqꞌij na jinta utaqexik! ¡Amén!
ROM 12:1 Hermanos, ri Dios lik ukꞌutum ri unimal rutzil ukꞌuꞌx che alaq. Ruma kꞌu waꞌ, lik kantzꞌonoj che alaq yaꞌa ronoje ri cuerpo alaq puqꞌabꞌ ri Dios pachaꞌ juna qasaꞌn kꞌaslik, na jinta kꞌana chꞌul che y lik kukꞌul ukꞌuꞌx Rire; ma waꞌ e uloqꞌnimaxik taqalik kaꞌan ralaq che.
ROM 12:2 Maꞌan chi e alaq pachaꞌ ri kakiꞌan ri winaq re ruwachulew waqꞌij ora. E yaꞌa alaq luwar che ri Dios kujalkꞌatij ri naꞌoj alaq y kuꞌan kꞌakꞌ che ronoje ri bꞌinik silabꞌik alaq. Jelaꞌ kꞌu riꞌ ketaꞌmaj alaq y kaꞌan alaq janipa ri utz karaj ri Dios che alaq; waꞌ e ri lik kukꞌul ukꞌuꞌx Rire y e ri lik jusukꞌ chwach.
ROM 12:3 Ruma kꞌu ri unimal rutzil ukꞌuꞌx ri Dios, yaꞌtal lo chwe riꞌin kambꞌiꞌij che onoje alaq: Lik maꞌan nim che ibꞌ alaq rukꞌ ri uyaꞌom ri Dios paqꞌabꞌ alaq. Puwi ri yaꞌtal che alaq, mikꞌow uwiꞌ ri kachꞌobꞌ alaq chwa ri taqal che alaq; e chꞌobꞌo alaq rusukꞌ puwi taq ri uyaꞌom ri Dios chijujunal alaq ruma ri xkubꞌiꞌ kꞌuꞌx alaq rukꞌ.
ROM 12:4 Ma jelaꞌ pachaꞌ ri qacuerpo xa jun uꞌanom tobꞌ lik kꞌi uchapom wi ribꞌ, pero junwi taq ri kichak ronoje ri chapayom re;
ROM 12:5 jekꞌuriꞌlaꞌ, riꞌoj, tobꞌ lik oj kꞌi, xa jun qaꞌanom rukꞌ ri Cristo, y qonoje kꞌu riꞌ kojajawax taq chiqawach.
ROM 12:6 Ekꞌu ri Dios, jalajuj taq rusipanik uyaꞌom chiqe chiqajujunal chaꞌ kaqaꞌan ruchak; waꞌ e chirij taq ri karaj Rire chiqe ruma ri unimal rutzil ukꞌuꞌx. E uwariꞌche, ri yaꞌtal che kaqꞌalajisan puwi runaꞌoj ri Dios, chuꞌana xew e chirij ri bꞌiꞌtal che ruma ri Dios.
ROM 12:7 Ri yaꞌtal che lik kebꞌutoꞌ jujun chik, e chuꞌana riꞌ. Ri yaꞌtal che kakꞌutunik, e chuyaꞌa ribꞌ che ri kꞌutunik.
ROM 12:8 Ri yaꞌtal che kapixabꞌanik, e chuyaꞌa ribꞌ che ri pixabꞌanik. Ri yaꞌtal che kasipanik, e chuꞌana riꞌ ri kasipan rukꞌ ronoje ukꞌuꞌx. Ri yaꞌtal che kukꞌam kiwach jujun chik, e chuyaꞌa ribꞌ che uꞌanik waꞌ chi utz. Ri yaꞌtal che kukꞌut ri kꞌaxnaꞌbꞌal ukꞌuꞌx, e chuꞌana riꞌ rukꞌ kiꞌkotemal.
ROM 12:9 Kꞌax naꞌa ibꞌ alaq pa saqil wi, na xa ta rukꞌ kebꞌ palaj alaq. Makꞌul che ri bꞌinik silabꞌik alaq ri na utz taj; e taqej alaq uꞌanik ri utz.
ROM 12:10 Chijujunal alaq lik kꞌax naꞌa ibꞌ alaq pa saqil wi, ma chaqꞌ ibꞌ alaq chwach ri Qaqaw. Matzukuj ri yakbꞌal qꞌij ralaq; e yaka alaq kiqꞌij ri jujun chik.
ROM 12:11 ꞌAna alaq ri lik alaq sakꞌaj, maꞌan alaq lik alaq xepu; e loqꞌnimaj alaq ri Qanimajawal rukꞌ ronoje kꞌuꞌx alaq.
ROM 12:12 Rukꞌ kiꞌkotemal choyeꞌej alaq janipa ri ubꞌiꞌtisim ri Dios che alaq. Chꞌija alaq uchuqꞌabꞌ ri kꞌaxkꞌobꞌik kape pawiꞌ alaq y lik moqꞌotaj alaq uꞌanik orar.
ROM 12:13 Chetoꞌo alaq ri kikojom rubꞌiꞌ ri Cristo rukꞌ taq ri kajawax chike. Tijoj ibꞌ alaq che kikꞌulik chi utz janipa ri kebꞌopon chi ocho alaq.
ROM 12:14 Tzꞌonoj alaq ri rutzil ukꞌuꞌx ri Dios pakiwi ri kiternabꞌem alaq rukꞌ kꞌax; matzꞌonoj alaq ri na utz taj pakiwiꞌ, e tzꞌonoj alaq ri utz.
ROM 12:15 Kiꞌkota alaq kukꞌ ri e kꞌo pa kiꞌkotemal; choqꞌa alaq kukꞌ ri kebꞌoqꞌik.
ROM 12:16 Chuꞌana xa jun kꞌuꞌx alaq chiwach alaq. Maꞌan alaq nim che ibꞌ alaq; e ꞌana alaq xa jun kukꞌ ri na jinta kiwach. Machꞌobꞌ alaq lik kꞌo naꞌoj alaq chikiwa jujun chik.
ROM 12:17 Matzelej alaq uwach ri na utz taj kuꞌan junoq chiꞌij alaq. E choka alaq il che uꞌanik ri utz chikiwach konoje ri tikawex.
ROM 12:18 ꞌAna kꞌu alaq janipa ri kꞌo paqꞌabꞌ alaq chaꞌ kakꞌojiꞌ alaq chi utzil chomal kukꞌ konoje ri tikawex.
ROM 12:19 Ralaq nu hermanos ri kꞌax kannaꞌ alaq, we kꞌo kaꞌanaw ri na utz taj chiꞌij alaq, matzelej alaq ukꞌaxel che. E yaꞌa alaq puqꞌabꞌ ri Dios chaꞌ e Rire ri kayaꞌw ri tojbꞌal re, ma jewaꞌ tzꞌibꞌital chupa Ruchꞌaꞌtem: Panuqꞌabꞌ Riꞌin kꞌo wi kanqꞌat tzij pakiwi ri kebꞌanaw re ri na utz taj chiwij; In kꞌu riꞌ ri kinꞌanaw ukꞌaxel chike kacha ri Dios Qajawxel.
ROM 12:20 Jekꞌuriꞌlaꞌ, e ꞌana alaq pachaꞌ ri kubꞌiꞌij Ruchꞌaꞌtem ri Dios: We kanum ri tzel kilow e la, yaꞌa la uwa. We katzajin uchiꞌ, yaꞌa la umiqꞌinaꞌ. Ma echiriꞌ kaꞌan la waꞌ, rire kujeq kakꞌix chiwach la yey kunaꞌ kꞌu ribꞌ riꞌ che ri na utz taj xuꞌan cheꞌla kachaꞌ.
ROM 12:21 Maya alaq luwar kasokotaj alaq ruma ri na utz taj; e chꞌija alaq uchuqꞌabꞌ ri na utz taj rukꞌ ri utz kaꞌan alaq.
ROM 13:1 Lik chirajawaxik chike konoje ri tikawex e kakiya kibꞌ ketaq kuma ri e aj wach re ri tinamit, ma na jinta wa taqanik pakiqꞌabꞌ rike we na e ta ri Dios yaꞌyom re chike. Janipa kꞌu ri taqanelabꞌ e kꞌolik, e ri Dios yaꞌyom ri taqanik pakiqꞌabꞌ.
ROM 13:2 E uwariꞌche china ri na kuya ta ribꞌ chuxeꞌ ri taqanik ke ri e aj wach re ri tinamit, riꞌ e kuyak ribꞌ chirij ri taqanik kojotal kan ruma ri Dios. Yey e janipa ri keꞌanaw re waꞌ, chikibꞌil kibꞌ kakitzukuj riꞌ ri qꞌatbꞌal tzij pakiwiꞌ.
ROM 13:3 Ma ri ketaqanik na e ta kojom re kakikoj xiꞌin ibꞌ che ri kuꞌan ri utz; ekojtalik re kakikoj xiꞌin ibꞌ che ri kuꞌan ri na utz taj. We kaꞌaj kꞌu la na kaxiꞌij ta ibꞌ la chikiwach ri ketaqanik, e ꞌana la ri utz y jelaꞌ kayak ne qꞌij la kuma ri ketaqanik.
ROM 13:4 Ma rike ekojotal paqawiꞌ ruma ri Dios chaꞌ kakiꞌan ri utz chiqe. Noꞌj we rilal kaꞌan la ri na utz taj, riꞌ xiꞌij ibꞌ la chikiwach, ma yaꞌtal pakiqꞌabꞌ rike kakiya pa kꞌax ri kuꞌan ri na utz taj. Yey e uchak ri Dios ri kakiꞌan rike echiriꞌ kakiya pa kꞌax ri kuꞌan ri na utz taj.
ROM 13:5 Ruma kꞌu laꞌ, lik chirajawaxik kaqaya qibꞌ kojtaq kuma ri e aj wach re ri tinamit. Kaqaꞌan waꞌ na xa ta ruma ri kꞌo pakiqꞌabꞌ rike kojkiya pa kꞌax, ma e ruma ri kaqanaꞌ chiqakꞌuꞌx lik chirajawaxik kaqaꞌan ri jusukꞌ.
ROM 13:6 Ruma ne riꞌ kaꞌan ralaq ri tojonik tzꞌonom che ri tinamit kuma ri e aj wach, chaꞌ rike utz kakiꞌan ri chak uyaꞌom ri Dios pakiqꞌabꞌ.
ROM 13:7 Yaꞌa kꞌu alaq chike chikijujunal janipa ri taqal chike kayaꞌik. Che ri taqal che kaꞌan tojonik, tojo alaq. Che ri taqal che kakoj utzij, kojo alaq utzij. Che ri taqal che kayak uqꞌij, yaka alaq uqꞌij.
ROM 13:8 We kꞌo kꞌas la rukꞌ junoq, manajtir la che utojik. Yey qonoje nenareꞌ kꞌo “qakꞌas” chiqawach, waꞌ e ri kꞌax kaqanaꞌ qibꞌ. Ekꞌu ri jun kꞌax kunaꞌ ri ratz-uchaqꞌ, riꞌ katajin che uꞌanik ri kataqan ri Tzij Pixabꞌ re ri Dios che.
ROM 13:9 Ma chupa ri Tzij Pixabꞌ re ri Dios kubꞌiꞌij waꞌ: «Matmakun chirij ri kꞌulanikil. Matkamisanik. Matelqꞌanik. Maꞌan raqꞌubꞌal chirij junoq. Marayij uwach ri na awe taj.» Waꞌ wa taqanik rukꞌ ronoje ri nikꞌaj chik taqanik re ri Dios, kuꞌana xa jun rukꞌ wa chꞌaꞌtem: «Kꞌax chanaꞌa rawatz-achaqꞌ jelaꞌ pachaꞌ ri kꞌax kanaꞌ awibꞌ riꞌat.»
ROM 13:10 Ma china ri kꞌo rutzil kꞌuꞌxaj rukꞌ, na kamakun ta chirij ri ratz-uchaqꞌ. E uwariꞌche echiriꞌ kaqakꞌut ri rutzil kꞌuꞌxaj kꞌo qukꞌ, e kojtajin che uꞌanik ri kataqan Rutzij Upixabꞌ ri Dios che.
ROM 13:11 ꞌAna kꞌu alaq ronoje waꞌ ma etaꞌam alaq ri qꞌij oj kꞌo wi. We kawar qawach, chirajawaxik chojkꞌastajoq, ma ruqꞌijol ri qakolobꞌetajik más xa naqaj chi kꞌo wi chwa echiriꞌ xqakoj rubꞌiꞌ ri Cristo.
ROM 13:12 E wa oj kꞌo wi e pachaꞌ xulan chi raqꞌabꞌ y xa naqaj chik kasaqir wi. Ruma kꞌu laꞌ maqaꞌan qeꞌoj janipa ri kaꞌan xa xeꞌlaqꞌay pa qꞌequꞌm; e qaꞌana janipa ri taqalik kaꞌan pa ri Qꞌijsaq. E lik qaꞌana qe che taq ri toꞌbꞌal uyaꞌom ri Dios chaꞌ kaqachꞌij uchuqꞌabꞌ taq ri na utz taj.
ROM 13:13 Chojbꞌin kꞌu jusukꞌ jelaꞌ pachaꞌ ri taqal chike ri kebꞌin pa ri Qꞌijsaq. Maqaya qibꞌ che taq nimaqꞌij na utz ta uwach. Maqaya qibꞌ che qꞌabꞌarik. Maqachꞌulaj ri qacuerpo rukꞌ chꞌulilaj mak. Maqaya qibꞌ che chꞌaꞌoj chiqawach y muꞌan kꞌax qakꞌuꞌx chirij junoq.
ROM 13:14 Ri ꞌana alaq e wiqa ibꞌ alaq che ri Qanimajawal Jesucristo; waꞌ e keꞌelawi kuꞌan alaq xa jun rukꞌ Rire. Kꞌutu alaq waꞌ rukꞌ ri bꞌinik silabꞌik alaq y maya kꞌu alaq luwar kataqan pawiꞌ alaq ri rayibꞌal na utz ta uwach re ri tiꞌjil alaq.
ROM 14:1 Kꞌulu alaq ri jun kꞌamajaꞌ kumaj usukꞌ saꞌ ri karaj ri Dios chike ri kubꞌul kikꞌuꞌx rukꞌ ri Cristo. Machꞌoꞌjin alaq rukꞌ xa ruma na junam ta runaꞌoj rire rukꞌ ri naꞌoj ralaq.
ROM 14:2 Ma puwi ronoje ri yaꞌtalik re katijik, kꞌo ri kuchꞌobꞌ raqan utz katijiꞌ ronoje taq waꞌ yey kꞌo ri kꞌamajaꞌ kumaj usukꞌ rukꞌutunik ri Dios; y chwa kꞌu rire, kꞌo waꞌim e mak che jun we kutijo, y ruma kꞌu riꞌ xew kutij ichaj.
ROM 14:3 Ekꞌu riꞌ ri jun kutij ronoje, na utz taj we kukꞌaq bꞌi uqꞌij ri jun xa qꞌalaj ri kutijo. Yey ekꞌu ri jun xa qꞌalaj ri kutijo, na utz taj we kuqꞌat tzij puwi ri jun kutij ronoje. Ma e ri Dios kꞌuluyum ke waꞌ wa tikawex.
ROM 14:4 ¿Lal china rilal chaꞌ kuꞌan lal aj qꞌatal tzij puwi ri raj chak jun chik? Ma e ri rajaw kilowik we utz ri kuꞌano o na utz taj. Jekꞌulaꞌ puqꞌabꞌ ri Dios kꞌo wi kebꞌutoꞌ chikijujunal ri raj chak chaꞌ ketikiꞌ chi utz chwach yey kuꞌan waꞌ rukꞌ runimal uchuqꞌabꞌ.
ROM 14:5 Kꞌo ri kuchꞌobꞌo kꞌo qꞌij lik il uwach re yakbꞌal uqꞌij ri Dios chwach jujun chik qꞌij; yey kꞌo ri junam karil ronoje ri jujun qꞌij. Chikijujunal lik chirajawaxik ketikiꞌ chi utz che taq ri kakichꞌobꞌ raqan.
ROM 14:6 Ekꞌu junoq lik kuꞌan il uwach che juna qꞌij, re yakbꞌal uqꞌij ri Qanimajawal kuꞌano. Yey e junoq chik na kuꞌan ta il uwach che waꞌ wa qꞌij, ma chwach rire ronoje qꞌij e re yakbꞌal uqꞌij ri Qanimajawal. Jekꞌulaꞌ, e ri jun kutij ronoje, kutijo re yakbꞌal uqꞌij ri Qanimajawal, ma kutioxij che ri Dios. Yey ri jun xa qꞌalaj ri kutijo, jelaꞌ kuꞌano ma kuchꞌobꞌo rukꞌ waꞌ kuyak uqꞌij ri Qanimajawal; y kutioxij kꞌu riꞌ che ri Dios.
ROM 14:7 Ma na jinta junoq chiqe xa pa re rire kꞌaslik y na jinta junoq xa pa re rire kakamik. Ma ri kꞌaslem y ri kamik puqꞌabꞌ ri Dios kꞌo wi.
ROM 14:8 We oj kꞌaslik, ri qakꞌaslem e re yakbꞌal uqꞌij ri Dios; yey we xojkamik, waꞌ re yakbꞌal uqꞌij ri Dios. Jekꞌulaꞌ, we oj kꞌaslik o we xojkamik, oj chi re ri Qajawal.
ROM 14:9 Ma ruma waꞌ ri Cristo xkamik y xkꞌastaj lo chikixoꞌl ri ekaminaq chaꞌ jelaꞌ kuꞌana Kajawal ri ekaminaq chik kukꞌ ri kꞌa e kꞌaslik.
ROM 14:10 Rilal, ri kaꞌan che ibꞌ la lal aj qꞌatal tzij puwi ri hermano la, ¿suꞌchak kaꞌan la waꞌ? O rilal, ri kakꞌaq bꞌi la uqꞌij ri hermano la, ¿suꞌchak kaꞌan la waꞌ? Ma qonoje kꞌo jun qꞌij kojeꞌtakꞌala na chwach ri qꞌatbꞌal tzij re ri Cristo.
ROM 14:11 Ma jewaꞌ ri tzꞌibꞌital kan chupa Ruchꞌaꞌtem ri Dios: Paqatzij wi Riꞌin in kꞌaslik, kacha ri Qajawal, y paqatzij wi, chinuwach Riꞌin kakixukubꞌaꞌ na kibꞌ konoje ri tikawex, y rukꞌ ruchiꞌ kiqul konoje kakibꞌiꞌij panuwi Riꞌin, xew Riꞌin in Dios kachaꞌ.
ROM 14:12 Jekꞌuriꞌlaꞌ kopon jun qꞌij echiriꞌ qonoje kojeꞌela chwach ri Dios y ekꞌu Rire kaqꞌalajisan re we utz o na utz ta ri qaꞌanom.
ROM 14:13 E uwariꞌche maqaꞌan chi oj qꞌatal tzij chiqibꞌil qibꞌ; mojuꞌan ne latzꞌanel o tzaqibꞌal che juna hermano.
ROM 14:14 Puwi ri yaꞌtalik re katijik, riꞌin lik wetaꞌam ruma ri Qanimajawal Jesús y lik nujikibꞌam kꞌu uwach waꞌ: Ronoje utz y na chꞌul taj chwach ri Dios. Noꞌj we kꞌo junoq kuchꞌobꞌo kꞌo ri katijik “chꞌul”, riꞌ xew chwach rire chꞌul wi.
ROM 14:15 Yey we ruma ri katij la, kapaxij la ukꞌuꞌx ri hermano la, riꞌ ri katajin la che ukꞌutik na e ta chi ri rutzil kꞌuꞌxaj. Ruma kꞌu waꞌ, lik na ubꞌe taj xa ruma ri katij la, kꞌo junoq karesaj ribꞌ chirij ri Cristo yey ruma ne rire xkam ri Cristo.
ROM 14:16 Makꞌo kꞌu maꞌan alaq we rukꞌ waꞌ tzel kachꞌaꞌtibꞌex lo ri bꞌinik silabꞌik alaq, tobꞌ ne lik utz chiwach ralaq.
ROM 14:17 Yey chupa rutaqanik ri Dios ri lik chirajawaxik wi na e ta saꞌ ri waꞌim kaqatijo o saꞌ ri qayaꞌ kaqaqumu; ma e ri kojbꞌin jusukꞌ, ri kojkꞌojiꞌ chi utzil chomal y rukꞌ kiꞌkotemal ruma rutoꞌbꞌal ri Santowilaj Ruxlabꞌixel ri Dios.
ROM 14:18 Ma e ri jelaꞌ kakiloqꞌnimaj ri Cristo, ri kibꞌinik kisilabꞌik kukꞌul ukꞌuꞌx ri Dios y chom kꞌu kilitaj kuma ri tikawex.
ROM 14:19 E uwariꞌche, e qataqej janipa ri kojukꞌam bꞌi chi utzil chomal y kuya qakꞌiyibꞌal chwach ri Dios, chaꞌ jelaꞌ kaqatoꞌ qibꞌ chiqawach.
ROM 14:20 Mawulij kꞌu alaq ri chak uꞌanom ri Dios pa ranimaꞌ junoq xa ruma ri waꞌim katij alaq. Qatzij, ronoje ri yaꞌtalik re katijik, na chꞌul taj. Pero na utz taj we ketzaq jujun pa mak xa ruma ri kaqatijo.
ROM 14:21 Más utz we na kaqatij ta tiꞌij, na kaqatij ta vino y makꞌo ne maqaꞌano, we ruma waꞌ juna hermano kasach unaꞌoj, katzaq pa mak o kaqꞌobꞌ ruchuqꞌabꞌ chwach ri Dios.
ROM 14:22 We jikibꞌam la uwach lik utz ri katajin la che uꞌanik chwach ri Dios, riꞌ lik utz; pero más utz we waꞌ kakanajik xew chwach ri Dios y rilal. Lik nim uqꞌij ralaxik ri jun kunaꞌ chukꞌuꞌx lik utz ri kuꞌan chwach ri Dios, ma jelaꞌ na kajawax ta che kuqꞌat tzij puwiꞌ chiribꞌil ribꞌ.
ROM 14:23 Noꞌj we junoq xa kebꞌ upa kutij ri katajin che, riꞌ utukel kukꞌam lo qꞌatbꞌal tzij puwiꞌ ma na kubꞌul ta ukꞌuꞌx rukꞌ ri kuꞌano. Ma e janipa ri kuꞌan junoq yey na kuꞌan ta rukꞌ kubꞌulibꞌal ukꞌuꞌx, riꞌ kamakunik.
ROM 15:1 Ekꞌu riꞌoj ri jikil qakꞌuꞌx chwach ri Dios, lik chirajawaxik wi keqatoꞌ ri hermanos na lik ta jikil kikꞌuꞌx chwach ri Dios, ri kꞌamajaꞌ kakimaj usukꞌ chi utz saꞌ ri karaj ri Dios chike. Ma na utz taj we xew e kaqaꞌan ri kukꞌul qakꞌuꞌx riꞌoj yey na kojok ta kꞌu il che ri kajawax chike rike.
ROM 15:2 Chiqajujunal riꞌoj e qaꞌana ri kukꞌul kikꞌuꞌx ri jujun chik hermanos we waꞌ e toꞌbꞌal re ri kikꞌaslem chwach ri Dios.
ROM 15:3 Ma ri Cristo na xuꞌan tane ri kukꞌul ukꞌuꞌx Rire. Ri xukꞌulumaj e jelaꞌ pachaꞌ ri tzꞌibꞌital kan chupa Ruchꞌaꞌtem ri Dios echiriꞌ ri Cristo jewaꞌ xubꞌiꞌij che ri Dios: Ri kꞌaxlaj chꞌaꞌtem xel lo chikichiꞌ ri winaq chiꞌij la, Qaqaw, panuwiꞌ riꞌin xtzaq wi xchaꞌ.
ROM 15:4 Ma ronoje ri xtzꞌibꞌax kan ojertan chupa Ruchꞌaꞌtem ri Dios, xtzꞌibꞌaxik re kojupixabꞌaj y kunimarisaj qakꞌuꞌx, chaꞌ jelaꞌ rukꞌ unimal qakꞌuꞌx kaqoyꞌej janipa ri bꞌiꞌtisinik xuꞌan ri Dios chiqe chupa Ruchꞌaꞌtem.
ROM 15:5 Ekꞌu ri Dios, ri aj yaꞌl unimal kꞌuꞌxaj y ri kunimarisaj qakꞌuꞌx, chuꞌana che alaq xa jun kꞌuꞌx alaq jelaꞌ pachaꞌ ri xukꞌut kan ri Qanimajawal Jesucristo.
ROM 15:6 Jekꞌulaꞌ, echiriꞌ uꞌanom chi xa jun kꞌuꞌx alaq, junam kayak alaq uqꞌij ri Dios, Ruqaw ri Qanimajawal Jesucristo.
ROM 15:7 E uwariꞌche, hermanos, jelaꞌ pachaꞌ ri Cristo xukꞌul alaq, jekꞌulaꞌ kꞌulu ibꞌ ralaq rukꞌ rutzil kꞌuꞌxaj chiwach alaq re yakbꞌal uqꞌij ri Dios.
ROM 15:8 Kambꞌiꞌij kꞌu che alaq, e ri Cristo Jesús xoluꞌana toꞌbꞌel qe riꞌoj ri qakojom ri retalil re circuncisión chaꞌ koluꞌkꞌutu ri Qꞌijsaq re ri Dios chiqawach y rukꞌ waꞌ xujikibꞌaꞌ uwach, lik e kuꞌana janipa rubꞌiꞌtisinik ri Dios uꞌanom chike ri qatiꞌ-qamam ojertan.
ROM 15:9 Xkꞌun nenareꞌ chaꞌ taq ri tinamit na e ta aj judiꞌabꞌ kakiyak uqꞌij ri Dios ruma ri rutzil ukꞌuꞌx chike rike, jelaꞌ pachaꞌ tzꞌibꞌital kan chupa Ruchꞌaꞌtem ri Dios: Kanyak na kꞌu qꞌij la y kambꞌixoj ri bꞌiꞌ la chikixoꞌl taq ri tinamit na e ta aj judiꞌabꞌ.
ROM 15:10 Y je tanchi waꞌ xubꞌiꞌij: Ralaq ri na alaq ta aj judiꞌabꞌ, lik kiꞌkota alaq junam kukꞌ rutinamit ri Dios.
ROM 15:11 Y jumul chik xubꞌiꞌij: Onoje alaq che rukꞌiyal kiwach taq ri tikawex che ruwachulew, bꞌixoj alaq rubꞌiꞌ ri Dios, yey lik yakbꞌej alaq uqꞌij Rire.
ROM 15:12 Yey jenewaꞌ xubꞌiꞌij ri qꞌalajisanel Isaías: Kayaktaj na lo ri Jun ralkꞌoꞌal kan ri Isaí, ri kakꞌun loq re kataqan pakiwi rukꞌiyal kiwach taq ri tikawex che ruwachulew. Yey rike kakubꞌiꞌ kikꞌuꞌx rukꞌ Rire xchaꞌ.
ROM 15:13 Ri Dios, ri kuya chiqe kakubꞌiꞌ pan qakꞌuꞌx rukꞌ Rire, chunojisaj ri animaꞌ alaq che ronoje kiꞌkotemal y utzil chomal ruma kubꞌul kꞌuꞌx alaq rukꞌ Rire, chaꞌ jelaꞌ lik kanimar kꞌuꞌx alaq che ri oyeꞌem alaq ruma ruchuqꞌabꞌ ri Santowilaj Ruxlabꞌixel ri Dios.
ROM 15:14 Alaq nu hermanos, riꞌin lik wetaꞌam chi utz e lik kꞌo rutzil kꞌuꞌx y naꞌoj alaq y ruma kꞌu waꞌ utz kapixabꞌaj ibꞌ alaq chiwach alaq.
ROM 15:15 Na rukꞌ ta kꞌu riꞌ, na kanxiꞌij ta wibꞌ kintzꞌibꞌan pan che alaq, ma kꞌo ri kuaj kankuxtaj che alaq. Kanꞌan kꞌu waꞌ ruma ri unimal rutzil ukꞌuꞌx ri Dios yaꞌtal chwe
ROM 15:16 chaꞌ riꞌin kinuꞌana raj chak ri Qanimajawal Jesucristo chikixoꞌl rukꞌiyal kiwach taq ri tikawex che ruwachulew. Ekꞌu ri nuchak e kantzijoj ri Utzilaj Tzij re ri Dios chike rike, chaꞌ jelaꞌ kebꞌenuya chwach ri Dios pachaꞌ e jun qasaꞌn lik kukꞌul ukꞌuꞌx, ꞌanom chi chom che ruma ri Santowilaj Ruxlabꞌixel.
ROM 15:17 Ekꞌu lik kinkiꞌkot che ri nuchak kanꞌan chwach ri Dios ruma rutoꞌbꞌal ri Qanimajawal Jesucristo.
ROM 15:18 Ma na kinchꞌaꞌt tane puwi ri kanꞌan riꞌin, xew e kinchꞌaꞌt chwi ri uꞌanom ri Cristo wuma riꞌin; ma ruma ri nutzijom y nuꞌanom chikiwach rukꞌiyal kiwach taq ri tikawex, rike kebꞌuꞌana e aj kojol tzij chwach ri Dios.
ROM 15:19 Yey rukꞌ nimaq taq kꞌutubꞌal y rukꞌ nimaq taq chak xintzijoj ri Utzilaj Tzij re ri Cristo; y ri nuꞌanom e ruma ruchuqꞌabꞌ ri Ruxlabꞌixel ri Dios. Xinjeq kꞌu lo waꞌ Jerusalem, xinikꞌow lo pa taq jujun chik tinamit y xinopon kꞌa Ilíriko. Jekꞌulaꞌ wuma riꞌin xeꞌek utzijoxik ri Utzilaj Tzij che ronoje taq waꞌ wa luwar.
ROM 15:20 Ekꞌu lik xinya wibꞌ che utzijoxik ri Utzilaj Tzij pa taq luwar pa na tzijom ta rubꞌiꞌ ri Cristo, chaꞌ jelaꞌ na xiꞌntika tubꞌi ri nuchak puwi uchak junoq chik,
ROM 15:21 jelaꞌ pachaꞌ ri tzꞌibꞌital kan chupa Ruchꞌaꞌtem ri Dios: Ekꞌu ri tikawex na jinta kꞌo xtzijox chike puwi Rire, kaketaꞌmaj na china Rire; yey ri na kitom ta kꞌana puwi Rire, kakimaj na usukꞌ ri katzijox chike kachaꞌ.
ROM 15:22 E uwariꞌche, ukꞌiyal laj xuaj kiꞌnwila alaq, pero wa nuchak inuqꞌatem;
ROM 15:23 noꞌj woꞌora xinkꞌis uꞌanik waꞌ chupa taq wa luwar. Yey ukꞌiyal tan junabꞌ lik nurayim kiꞌnwila alaq;
ROM 15:24 ruma kꞌu riꞌ, lik nuchꞌobꞌom chik, echiriꞌ kanmaj bꞌi nubꞌe kinꞌek España, kinikꞌow ukꞌ alaq y jelaꞌ ajilam qꞌij kinkꞌojiꞌ pa kiꞌkotemal ukꞌ alaq. Ekꞌuchiriꞌ wilom chi wach alaq, utz kintoꞌ bꞌi alaq che ri nubꞌenam kꞌa España.
ROM 15:25 Pero woꞌora kinꞌek Jerusalem re kiꞌnjacha jun qasaꞌn toꞌbꞌal ke ri hermanos e kꞌo chilaꞌ;
ROM 15:26 ma ri hermanos e aj Macedonia, junam kukꞌ ri hermanos e aj Acaya, xkimol wa qasaꞌn ke taq ri hermanos e nibꞌaꞌibꞌ e kꞌo Jerusalem.
ROM 15:27 Ri na e ta aj judiꞌabꞌ lik pa kanimaꞌ xalax wi xkiꞌan waꞌ. Yey kꞌo ne kikꞌas karaj utzelexik kukꞌ ri hermanos e aj judiꞌabꞌ e kꞌo chilaꞌ, ma rike e xetzijon ri Utzilaj Tzij re ri Dios chikiwach. Ruma kꞌu laꞌ lik ubꞌe kekitoꞌ rukꞌ taq ri kajawax chike.
ROM 15:28 We xinutzin kan rukꞌ waꞌ y nuyaꞌom chi kan wa qasaꞌn pakiqꞌabꞌ ri hermanos e kꞌo Jerusalem, kꞌa ekꞌuchiriꞌ kanmaj bꞌi nubꞌe kinꞌek España y kinikꞌow kꞌu ukꞌ alaq.
ROM 15:29 Wetaꞌam kꞌu chi utz, we xinopon ukꞌ alaq, na xa ta jubꞌiqꞌ ri kankꞌul riꞌin junam ukꞌ alaq che ri rutzil ukꞌuꞌx ri Cristo paqawiꞌ.
ROM 15:30 Hermanos, ri Ruxlabꞌixel ri Dios uyaꞌom ri rutzil ukꞌuꞌx chiqe chaꞌ kꞌax kaqanaꞌ qibꞌ. Kantzꞌonoj kꞌu che alaq chupa rubꞌiꞌ ri Qanimajawal Jesucristo kintoꞌ alaq, e ꞌana alaq orar panuwiꞌ chwach ri Dios.
ROM 15:31 ꞌAna kꞌu alaq orar chaꞌ na kintzaq ta pakiqꞌabꞌ ri winaq e kꞌo Judea, ri eyakatajinaq chirij ri Qꞌijsaq; y ꞌana alaq orar chaꞌ ri hermanos e kꞌo Jerusalem kakikꞌul chi utz wa qasaꞌn.
ROM 15:32 ꞌAna ko alaq orar panuwiꞌ chaꞌ e chirij ri karaj ri Dios kinopon na ukꞌ alaq, y jekꞌulaꞌ rukꞌ kiꞌkotemal kineꞌuxlan chilaꞌ ukꞌ alaq.
ROM 15:33 Ekꞌu ri Dios, ri aj yaꞌl utzil chomal, kꞌola ukꞌ onoje alaq. Amén.
ROM 16:1 Kantzꞌibꞌaj pan che alaq puwi ri qa hermana Febe, ri e kukꞌil raj chakibꞌ e toꞌbꞌel pa riglesia kꞌo Cencrea; rire uchꞌobꞌom kopon ukꞌ alaq.
ROM 16:2 Kantzꞌonoj ko che alaq, kꞌulu alaq chi utz wa hermana pa rubꞌiꞌ ri Qanimajawal Jesucristo jelaꞌ pachaꞌ ri taqalik kaꞌan chikixoꞌl ri kikojom rubꞌiꞌ ri Cristo. Toꞌo ko alaq rukꞌ taq janipa ri kajawax che, ma rire lik e kꞌi ri ebꞌutoꞌom y lik ne inutoꞌom riꞌin.
ROM 16:3 Yaꞌa alaq rutzil kiwach ri Priscila y ri Aquila, ri e wachbꞌiꞌil pa ruchak ri Qanimajawal Jesucristo.
ROM 16:4 Yey xtewun ne ri kamik pakiwi rike ruma xinkitoꞌo. E uwariꞌche, na xew ta riꞌin kintioxin pan chike, ma ketioxin pan konoje riglesias ke ri na e ta aj Israel.
ROM 16:5 Yaꞌa alaq rutzil kiwach konoje ri hermanos ri kakimol kibꞌ pa kocho ri Aquila y ri Priscila. Yaꞌa alaq rutzil uwach ri Epeneto, ri lik kꞌax kannaꞌo, ma e rire ri nabꞌe xukoj rubꞌiꞌ ri Cristo wara Acaya.
ROM 16:6 Yaꞌa alaq rutzil uwach ri María, ri lik chakuninaq chixoꞌlibꞌal alaq.
ROM 16:7 Yaꞌa alaq rutzil kiwach ri Andrónico y ri Junias; ri e watz-nuchaqꞌ yey xekꞌojiꞌ junam wukꞌ pa cárcel. Rike lik kaloqꞌox kiqꞌij chiqaxoꞌl ri oj utaqoꞌn ri Jesús, yey rike xkikoj rubꞌiꞌ ri Cristo nabꞌe chinuwach riꞌin.
ROM 16:8 Yaꞌa alaq rutzil uwach ri Amplias, jun hermano lik kꞌax kannaꞌ chupa rubꞌiꞌ ri Qanimajawal.
ROM 16:9 Yaꞌa alaq rutzil uwach ri Urbano; rire e jun qachbꞌiꞌil pa ruchak ri Cristo. Yaꞌa alaq rutzil uwach ri Estaquis, jun hermano lik kꞌax kannaꞌ riꞌin.
ROM 16:10 Yaꞌa alaq rutzil uwach ri Apeles, ri lik ukꞌutum ri kubꞌulibꞌal ukꞌuꞌx rukꞌ ri Cristo. Yaꞌa alaq rutzil kiwach konoje ri e kꞌo pa rocho ri Aristóbulo.
ROM 16:11 Yaꞌa alaq rutzil uwach ri watz-nuchaqꞌ Herodión. Yaꞌa alaq rutzil kiwach konoje ri e kꞌo pa rocho ri Narciso, ri kikojom rubꞌiꞌ ri Qanimajawal.
ROM 16:12 Yaꞌa alaq rutzil uwach ri Trifena y ri Trifosa; rike lik kiyaꞌom kibꞌ pa ruchak ri Qanimajawal. Yaꞌa alaq rutzil uwach ri Pérsida, ri lik kꞌax kanaꞌik yey lik chakuninaq pa ruchak ri Qanimajawal.
ROM 16:13 Yaꞌa alaq rutzil uwach ri Rufo; waꞌ e jun hermano lik chom rubꞌinik usilabꞌik chwach ri Qanimajawal. Yey yaꞌa alaq rutzil uwach ruchu, ma rire uꞌanom pachaꞌ nuchu riꞌin.
ROM 16:14 Yaꞌa alaq rutzil kiwach ri Asíncrito, ri Flegonte, ri Hermas, ri Patrobas, ri Hermes y ri jujun chik hermanos e kꞌo kukꞌ rike.
ROM 16:15 Yaꞌa alaq rutzil kiwach ri Filólogo y ri Julia, ri Nereo rukꞌ ri ranabꞌ yey ri Olimpas kukꞌ konoje rutinamit ri Dios e kꞌo kukꞌ rike.
ROM 16:16 Yaꞌa rutzil wach alaq chiwach alaq rukꞌ jun saqil tzꞌubꞌuj chiꞌaj chwach ri Dios. Konoje ri hermanos wara re pa taq riglesias re ri Cristo kakiya pan rutzil wach alaq.
ROM 16:17 Lik kꞌu kantzꞌonoj che alaq hermanos, e lik kachajij ibꞌ alaq chikiwach ri kakijach upa riglesia y kakikoj tzaqibꞌal chirij ri saqil kꞌutunik chaꞌ e kꞌo jujun chik na kakikoj ta ri kꞌulum chi ralaq. Chikij kꞌu waꞌ, chesaj ibꞌ alaq;
ROM 16:18 ma na e ta kitaqem ri Cristo, e lik kitaqem ri kirayibꞌal rike. Ri kichꞌaꞌtem lik chakojoꞌ y lik chom katatajik, pero rukꞌ waꞌ kekisok ri tikawex na jinta ko kinaꞌoj.
ROM 16:19 Lik kꞌut etaꞌmatal chi kuma konoje e lik taqem alaq ri saqil kꞌutunik, y lik kinkiꞌkot che alaq ruma waꞌ. Yey ri kuaj che alaq e lik kꞌola naꞌoj alaq che uꞌanik ri utz, na che ta uꞌanik ri na utz taj.
ROM 16:20 Ekꞌu ri Dios, ri aj yaꞌl utzil chomal, na kamayin ta che kuyiqꞌilibꞌej uwiꞌ ri Satanás chuxeꞌ ri aqan alaq; ma e kuya che alaq ri kachꞌij alaq uchuqꞌabꞌ ri Satanás. Kꞌulu kꞌu alaq ri unimal rutzil ukꞌuꞌx ri Qanimajawal Jesucristo.
ROM 16:21 Kuya pan rutzil wach alaq ri Timoteo, ri wachbꞌiꞌil pa ruchak ri Cristo. Jenelaꞌ kakiya pan rutzil wach alaq ri e watz-nuchaqꞌ Lucio, ri Jasón y ri Sosípater.
ROM 16:22 Yey riꞌin in Tercio, ri kintajin che utzꞌibꞌaxik waꞌ wa carta e chirij ri kubꞌiꞌij ri Pablo che alaq, kanya pan rutzil wach alaq pa rubꞌiꞌ ri Qanimajawal.
ROM 16:23 Ri Gayo kuya pan rutzil wach alaq; rire inukꞌulum pa rocho y uyaꞌom chike konoje ri hermanos ri e aj wara kakimol kibꞌ pa rocho. Jenelaꞌ kuya pan rutzil wach alaq ri Erasto, ri aj kꞌolol puaq re wa tinamit; jenelaꞌ ri hermano Cuarto kuya pan rutzil wach alaq.
ROM 16:24 Ri unimal rutzil ukꞌuꞌx ri Qanimajawal Jesucristo kꞌola ukꞌ onoje alaq. Amén.
ROM 16:25 Qayaka kꞌu uqꞌij ri Dios, ri kꞌo puqꞌabꞌ kutikibꞌaꞌ alaq chi utz chupa ri Utzilaj Tzij re ri Qanimajawal Jesucristo, ri nutzijom loq. Waꞌ e puwi ri na uqꞌalajisam ta lo ri Dios ojertan,
ROM 16:26 yey ekꞌu woꞌora xqꞌalajisax chiqawach. Jekꞌulaꞌ kaqꞌalajin chi utz ri tzꞌibꞌital kan puwi ri Qꞌijsaq chupa Ruchꞌaꞌtem ri Dios kuma ri qꞌalajisanelabꞌ. Ri Dios, ri na jinta utaqexik rukꞌaslemal, e xtaqan che katzijox ri Qꞌijsaq puwi ri Cristo chike konoje rukꞌiyal kiwach taq ri tikawex e kꞌo che ruwachulew. Xuꞌan kꞌu waꞌ chaꞌ rike kaketaꞌmaj wa Qꞌijsaq, kakikoj utzij Rire y kakubꞌiꞌ kikꞌuꞌx rukꞌ.
ROM 16:27 Xa jun ri Dios kꞌolik y xew Rire lik kꞌo unaꞌoj. Che kꞌu Rire taqal wi kaqayak uqꞌij na jinta utaqexik ruma ri xuꞌan ri Qanimajawal Jesucristo. Amén.
1CO 1:1 Riꞌin in Pablo, insikꞌim ruma ri Dios re kinuꞌan utaqoꞌn ri Qanimajawal Jesucristo, ruma e lik karaj riꞌ ri Dios chwe. Riꞌin junam rukꞌ ri hermano Sóstenes kaqaya pan rutzil wach alaq,
1CO 1:2 ri alaq utinamit ri Dios kꞌo chilaꞌ Corinto. Alaq chaꞌtal ruma ri Dios chaꞌ kakꞌojiꞌ alaq puqꞌabꞌ ri Qanimajawal Jesucristo; alaq kꞌu sikꞌim che jun bꞌinik silabꞌik lik chom chwach ri Dios, ma e karaj riꞌ chiqe junam kukꞌ konoje ri kakiloqꞌnimaj rubꞌiꞌ ri Qanimajawal Jesucristo, tobꞌ pa taq chawi e kꞌo wi. Ma Rire e Qanimajawal qe riꞌoj y ke rike.
1CO 1:3 Kꞌulu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
1CO 1:4 Riꞌin xaqi kintioxin che ri Dios uma ralaq, ma ruma ri Qanimajawal Jesucristo, ri Dios uyaꞌom lo ri unimal rutzil ukꞌuꞌx che alaq.
1CO 1:5 Yey na xa ta jubꞌiqꞌ ri kꞌulum alaq ruma kꞌo alaq puqꞌabꞌ ri Cristo; yaꞌtal kꞌu chꞌaꞌtem alaq y naꞌoj alaq che utzijoxik ri naꞌoj re ri Dios.
1CO 1:6 Xjikibꞌax kꞌu uwach ri Utzilaj Tzij puwi ri Cristo ruma ri uꞌanom ri Dios ukꞌ alaq.
1CO 1:7 Jekꞌulaꞌ ronoje ri kajawax che rutinamit ri Dios, yaꞌtal chi che alaq; xew chi kꞌu lik oyeꞌem alaq rukꞌunibꞌal ri Qanimajawal Jesucristo.
1CO 1:8 Ekꞌu riꞌ ri Dios katikibꞌan e alaq chi utz woꞌora y kꞌa pa ri kꞌisbꞌal qꞌij, chaꞌ jelaꞌ na jinta chi kꞌana mak kariqitaj che alaq chwach ri Dios chupa ruqꞌijol rukꞌunibꞌal ri Qanimajawal Jesucristo.
1CO 1:9 Ri Dios lik jusukꞌ, ma ronoje ri kubꞌiꞌtisij e kuꞌano y e Rire sikꞌiyom e alaq chaꞌ kuꞌan alaq xa jun rukꞌ Rukꞌajol, waꞌ e ri Qanimajawal Jesucristo.
1CO 1:10 Kampixabꞌaj kꞌu alaq hermanos chupa rubꞌiꞌ ri Qanimajawal Jesucristo: Kꞌola alaq chi utzil chomal y majach pa alaq. E ri lik ubꞌe e chuꞌana xa jun naꞌoj alaq y xa jun kꞌuꞌx alaq.
1CO 1:11 Kambꞌiꞌij waꞌ che alaq hermanos ma xinwetaꞌmaj e kꞌo ri xaqi kechꞌoꞌjin chixoꞌlibꞌal alaq; xinta waꞌ chikichiꞌ jujun chike ri e kꞌo pa rocho ri Cloé.
1CO 1:12 Nutom e kꞌo jujun che alaq kakibꞌiꞌij: «In re ri Pablo.» E kꞌo jujun chik kakibꞌiꞌij: «In re ri Apolos,» jujun chik: «In re ri Pedro» y e kꞌo ne jujun chik kakibꞌiꞌij: «Riꞌin in re ri Cristo.»
1CO 1:13 ¿Jachom nebꞌa upa ri Cristo? ¿E nebꞌa riꞌin in Pablo ri xkam chwa cruz uma ralaq? ¿O pa rubꞌiꞌ nebꞌa ri Pablo xkꞌul wi alaq ri bautismo? Na e taj.
1CO 1:14 Lik kantioxij che ri Dios ma riꞌin xew xinya ri bautismo chike jujun che alaq, waꞌ e ri Crispo y ri Gayo.
1CO 1:15 Jekꞌulaꞌ na jinta junoq che alaq utz kubꞌiꞌij: “Riꞌin xinkꞌul ri bautismo pa rubꞌiꞌ ri Pablo.”
1CO 1:16 Yey xinya ne bautismo chike ri e kꞌo chirocho ri Estéfanas. Na kakꞌun ta chi chinukꞌuꞌx we kꞌo junoq chik.
1CO 1:17 Kambꞌiꞌij kꞌu waꞌ ma ri nuchak xuya ri Cristo na e ta ri kanya bautismo, e ri kantzijoj ri Utzilaj Tzij. Y rutzijoxik kanꞌano na e ta rukꞌ nimaq taq chꞌaꞌtem y unimal naꞌoj xa re ruwachulew. Ma na kuaj taj we ri winaq e kakiyak nuqꞌij riꞌin yey na kebꞌok ta kꞌu il riꞌ che ri Utzilaj Tzij puwi ri Cristo y ri xuꞌan Rire chwa ri cruz.
1CO 1:18 Rutzijoxik rukamik ri Cristo chwa ri cruz e jun sachibꞌal naꞌoj chikiwach ri kesachik. Noꞌj kꞌu chiqawach ri kojkolobꞌetajik, rukꞌ rukamik Rire e kaqꞌalajin ruchuqꞌabꞌ ri Dios.
1CO 1:19 Ma jewaꞌ kubꞌiꞌij ri Dios chupa Ruchꞌaꞌtem: Riꞌin kansach uwach ri kinaꞌoj ri tikawex kakichꞌobꞌo lik kꞌo ketaꞌam, y kankꞌutu na jinta keꞌelawi ri kinaꞌoj ri kakichꞌobꞌo lik kꞌo kinaꞌoj kachaꞌ.
1CO 1:20 Ri kakibꞌiꞌij lik kꞌo ketaꞌam, ¿saꞌ kutiqoj ri kinaꞌoj? Raj kꞌutunel re ri tzijpixabꞌ, ¿saꞌ kutiqoj ronoje ri kimajom? Yey ri lik kakichꞌaꞌtibꞌej ukꞌiyal taq naꞌoj re waqꞌij ora, ¿saꞌ kutiqoj ronoje ri kakibꞌiꞌij? Na jinta kutiqoj, ma ri Dios uqꞌalajisam chik na jinta keꞌelawi ri kinaꞌoj ri tikawex re ruwachulew.
1CO 1:21 Ri Dios ruma ri unimal unaꞌoj na xuya ta luwar chike ri tikawex kaketaꞌmaj uwach Rire xa ruma ri kinaꞌoj rike. Ri xukꞌul ukꞌuꞌx Rire e kebꞌukolobꞌej ri kakubꞌiꞌ kikꞌuꞌx rukꞌ ruma rutzijoxik ri Utzilaj Tzij, tobꞌ waꞌ e jun sachibꞌal naꞌoj chikiwach taq ri winaq.
1CO 1:22 Ma raj judiꞌabꞌ kakitzꞌonoj kꞌutubꞌal re ruchuqꞌabꞌ ri Dios, yey raj Grecia e lik keꞌek kikꞌuꞌx che umajik unimal taq naꞌoj.
1CO 1:23 Noꞌj riꞌoj e kaqatzijoj rukamik ri Cristo chwa ri cruz. Yey waꞌ e tzaqibꞌal chike raj judiꞌabꞌ, y e jun sachibꞌal naꞌoj chike ri na e ta aj judiꞌabꞌ.
1CO 1:24 Noꞌj kꞌu ri ebꞌusikꞌim ri Dios, tobꞌ e aj judiꞌabꞌ o na e ta aj judiꞌabꞌ, rike kakimaj usukꞌ e ruma ri Cristo kaqꞌalajin ruchuqꞌabꞌ y runimal unaꞌoj ri Dios.
1CO 1:25 Tobꞌ e kꞌo tikawex kakichꞌobꞌo ri Dios pachaꞌ na jinta unaꞌoj o na jinta uchuqꞌabꞌ; na rukꞌ ta kꞌu riꞌ, ri kinaꞌoj y ri kichuqꞌabꞌ rike, na kajunimax ta kꞌenoq rukꞌ runaꞌoj y ruchuqꞌabꞌ ri Dios.
1CO 1:26 Lik kꞌu chꞌobꞌo pe raqan alaq hermanos puwi saꞌ ri wach alaq echiriꞌ xsikꞌix alaq ruma ri Dios; ma chikiwach ri winaq, na e ta kꞌi ri lik kꞌo kinaꞌoj chixoꞌl alaq, yey na e ta kꞌi ri lik kꞌo kichuqꞌabꞌ y ri lik kꞌo kiwach chixoꞌl alaq.
1CO 1:27 Ma ri Dios ebꞌuchaꞌom ri kabꞌiꞌx chike na jinta ko kinaꞌoj, chaꞌ e kuya kikꞌix ri kakiꞌan che kibꞌ lik kꞌo kinaꞌoj. Ebꞌuchaꞌom ri lik na jinta ko kichuqꞌabꞌ chaꞌ e kuya kikꞌix ri e taqanelabꞌ kꞌo kichuqꞌabꞌ.
1CO 1:28 Yey ebꞌuchaꞌom ri kabꞌiꞌx chike lik na jinta ko kichak, ri lik kꞌaqom bꞌi kiqꞌij kuma ri winaq y ri na jinta kꞌana kiwach chaꞌ e kusach uwach ri kichuqꞌabꞌ ri lik kꞌo kiwach.
1CO 1:29 Ri Dios uꞌanom waꞌ chaꞌ na jinta junoq kuꞌan nim che ribꞌ chwach Rire.
1CO 1:30 Yey ruma kꞌu Rire kꞌo alaq puqꞌabꞌ ri Qanimajawal Jesucristo, ri kaqꞌalajisan ri Qꞌijsaq re ri Dios chiqe. Ruma kꞌu ri Qanimajawal, ꞌanom jusukꞌ chiqe chwach ri Dios, oj yaꞌtal chupa ri santowilaj bꞌinik, y oj esam chi puqꞌabꞌ ritzel.
1CO 1:31 E uwariꞌche e pachaꞌ ri tzꞌibꞌital kan chupa Ruchꞌaꞌtem ri Dios: China ri karaj kuyak uqꞌij, e chuqꞌalajisaj riꞌ janipa ri uꞌanom ri Qanimajawal Dios che rubꞌinik usilabꞌik.
1CO 2:1 Hermanos, riꞌin echiriꞌ xinopon ukꞌ alaq chaꞌ kantzijoj ri Utzilaj Tzij re ri Dios, na xintzijoj ta waꞌ rukꞌ nimaq taq chꞌaꞌtem y unimal naꞌoj xa re ruwachulew.
1CO 2:2 Ri xinchꞌobꞌo e xew kantaqej utzijoxik ri Qanimajawal Jesucristo y rukamik Rire chwa ri cruz.
1CO 2:3 Y echiriꞌ xinkꞌojiꞌ ukꞌ alaq, xinnaꞌo na jinta nuchuqꞌabꞌ chiwibꞌil wibꞌ, yey xinjeq ne kinbꞌirbꞌot ruma ri nuxiꞌin ibꞌ ma xinnaꞌo na kanriq ta uꞌanik janipa ri karaj ri Dios chwe.
1CO 2:4 Ekꞌu rutzijoxik xinꞌano na e ta rukꞌ unimal naꞌoj xa re ruwachulew y chomilaj taq chꞌaꞌtem kasokosoꞌnik, ma e rukꞌ ri Ruxlabꞌixel ri Dios y ruchuqꞌabꞌ Rire
1CO 2:5 chaꞌ na kakubꞌiꞌ ta kꞌuꞌx alaq rukꞌ ri Cristo xa ruma unimal naꞌoj re ruwachulew, ma e ruma ruchuqꞌabꞌ ri Dios.
1CO 2:6 Noꞌj echiriꞌ oj kꞌo chikixoꞌl ri lik kijikibꞌam kikꞌuꞌx rukꞌ ri Dios, ri kaqatzijoj kaqaꞌan rukꞌ unimal naꞌoj. Na e ta rukꞌ unimal naꞌoj xa re ruwachulew, na e tane rukꞌ naꞌoj ke ri nimaq taq taqanelabꞌ che ruwachulew, ri xa kasach kiwach.
1CO 2:7 Ma ri kaqaqꞌalajisaj e ri unimal naꞌoj re ri Dios, yey waꞌ na etaꞌmatal ta rojertan. Echiriꞌ kꞌamajaꞌ ne kaꞌan ruwachulew, Rire uchꞌobꞌom chi uloq kuya wa naꞌoj chiqe re yakbꞌal qaqꞌij.
1CO 2:8 Waꞌ wa naꞌoj re ri Dios na xkimaj ta usukꞌ ri nimaq taqanelabꞌ re ruwachulew. Ma ta e laꞌ xkimaj usukꞌ, na kakiya tane riꞌ chwa ri cruz ri Qajawal, ri lik nim uqꞌij.
1CO 2:9 E jelaꞌ pachaꞌ ri tzꞌibꞌital kan chupa Ruchꞌaꞌtem ri Dios: E taq ri winaq na kakimaj ta usukꞌ ronoje ri utz ujikibꞌam uwach ri Dios chike ri lik kꞌax kenaꞌw re Rire. E taq waꞌ wa utz lik na jinta junoq iliyom re, na jinta junoq tayom re y na jinta ne junoq noꞌjiyom waꞌ kachaꞌ.
1CO 2:10 Yey ri Dios uqꞌalajisam chi waꞌ chiqe riꞌoj ruma ri Ruxlabꞌixel. Ma ri Ruxlabꞌixel Rire ronoje retaꞌam, kumaj ne usukꞌ ri saqil unaꞌoj ri Dios.
1CO 2:11 Chikixoꞌl taq ri winaq, ¿kꞌo nawi junoq retaꞌam saꞌ ri kuchꞌobꞌ juna chik tikawex? Na jintaj. Ma xew wa tikawex retaꞌam saꞌ ri kꞌo pa ranimaꞌ. Jekꞌulaꞌ na jinta junoq retaꞌam runaꞌoj ri Dios, ma xew ri Ruxlabꞌixel ri Dios etaꞌmayom re waꞌ.
1CO 2:12 Yey woꞌora, ri qanaꞌoj riꞌoj na junam ta rukꞌ ri kinaꞌoj ri na ketaꞌam ta uwach ri Dios. Ma riꞌoj e qakꞌulum ri Ruxlabꞌixel ri Dios chaꞌ kaqetaꞌmaj ronoje ri chomilaj sipanik uyaꞌom Rire chiqe.
1CO 2:13 Yey waꞌ wa kaqatzijoj, na e ta rukꞌ chꞌaꞌtem qamajom chikij ri tikawex, ma e rukꞌ ri ukꞌutum ri Ruxlabꞌixel ri Dios chiqe. Y jekꞌulaꞌ e kaqaqꞌalajisaj runaꞌoj ri Dios rukꞌ chꞌaꞌtem re ri Ruxlabꞌixel ri Dios.
1CO 2:14 Ekꞌu rachi na jinta ri Dios pa ranimaꞌ, na kukꞌul ta ukꞌuꞌx ri kubꞌiꞌij ri Ruxlabꞌixel ri Dios che, ma chwach rire waꞌ xa sachibꞌal naꞌoj; yey na kumaj ta usukꞌ, ma waꞌ xew kamajtaj usukꞌ we kaqꞌalajisax ruma ri Ruxlabꞌixel ri Dios.
1CO 2:15 Noꞌj we ri Ruxlabꞌixel ri Dios kataqan pa ranimaꞌ junoq, riꞌ kumaj usukꞌ saꞌ ri utz chwach ri Dios, y na kaqꞌat ta kꞌu tzij puwiꞌ.
1CO 2:16 Ruchꞌaꞌtem ri Dios jenewaꞌ kubꞌiꞌij: ¿Kꞌo nawi junoq majayom usukꞌ ronoje runaꞌoj ri Dios Qajawxel? ¿Kꞌo nawi junoq kayaꞌw unaꞌoj Rire? ¡Na jintaj! kachaꞌ. Pero chiqe riꞌoj yaꞌtal runaꞌoj ri Cristo.
1CO 3:1 Hermanos, echiriꞌ xinkꞌojiꞌ ukꞌ alaq, na xinchꞌaꞌt ta ukꞌ alaq jelaꞌ pachaꞌ kinchꞌaꞌt kukꞌ tikawex kataqan ri Ruxlabꞌixel ri Dios pa kanimaꞌ; ma e xinchꞌaꞌt ukꞌ alaq jelaꞌ pachaꞌ kinchꞌaꞌt kukꞌ tikawex kꞌa kakitaqej taq ri rayibꞌal re ri kitiꞌjil, ri kꞌamajaꞌ kꞌo kikꞌiyibꞌal chwach ri Cristo.
1CO 3:2 Jelaꞌ pachaꞌ kaꞌan che juna ralko akꞌa, na kayaꞌ ta wa che ma xew kutij utzꞌum; jekꞌulaꞌ xinꞌan riꞌin, xinya kꞌutunik lik na kꞌayew taj che alaq, ma kꞌamajaꞌ kariq alaq ukꞌulik ri kꞌutunik taqal chike ri kꞌo chi kikꞌiyibꞌal chwach ri Dios. Yey kꞌamajaꞌ ne kariq alaq umajik usukꞌ waꞌ,
1CO 3:3 ma kꞌa taqem alaq taq ri rayibꞌal re ri tiꞌjil alaq. Ma chixoꞌl alaq e kꞌo ri kꞌax kikꞌuꞌx chikij jujun chik y e kꞌo ri e aj chꞌaꞌoj. ¿Na junam ta nebꞌa ri bꞌinik silabꞌik alaq rukꞌ ri kibꞌinik taq ri winaq na ketaꞌam ta uwach ri Qaqaw y e kakitaqej ri xa re ruwachulew?
1CO 3:4 Ma chixoꞌl alaq e kꞌo ri kakibꞌiꞌij: «In re ri Pablo» yey jujun chik kakibꞌiꞌij: «In re ri Apolos.»
1CO 3:5 Kantzꞌonoj kꞌu che alaq: ¿Saꞌ ruwach ri Pablo? ¿Y saꞌ ruwach ri Apolos? Riꞌoj oj nimanel chwach ri Dios yey ruma ri chak xqaꞌan ukꞌ alaq, xkoj alaq rubꞌiꞌ ri Cristo. Riꞌin y ri Apolos xa e xqaꞌan ri chak uyaꞌom ri Qanimajawal chiqe.
1CO 3:6 E riꞌin xintzijoj ri Utzilaj Tzij che alaq pachaꞌ kuꞌan juna awanel; y ri Apolos xutoꞌ alaq chaꞌ katikiꞌ alaq chi utz chwach ri Dios pachaꞌ kuꞌan juna aj tikoꞌn echiriꞌ kuꞌan jaꞌanik. Pero ri kꞌiyibꞌal alaq, e ri Dios xyaꞌwik.
1CO 3:7 ¿China kꞌu riꞌ ri más kꞌo uwach? ¿E nawi ri xtikow re? ¿E nawi ri xjaꞌan re? Na e taj, ma e ri Dios, ri kakꞌiyisan re.
1CO 3:8 Ri katikow re y ri kajaꞌan re, xa jun kiwach; yey chikijujunal kakikꞌul ri rajil ukꞌaxel e chirij ri chak xkiꞌano.
1CO 3:9 Ekꞌu riꞌ riꞌoj xa oj umokom ri Dios yey ralaq e pachaꞌ alaq rulew kachakux uwach ruma ri Dios. Jenelaꞌ ralaq e pachaꞌ alaq juna ja katajin ri Dios che uyakik.
1CO 3:10 Yey Rire e xyaꞌw panuqꞌabꞌ xinjeq ruchak chixoꞌlibꞌal alaq. E pachaꞌ juna aj yakal ja, nabꞌe kutzꞌaq ruparaqan ri ja; tekꞌuchiriꞌ jun chik aj chak kulem ri xan puwiꞌ. Jekꞌulaꞌ riꞌin nabꞌe xintik riglesia; tekꞌuchiriꞌ kꞌo jun chik xutoꞌ alaq chaꞌ kakꞌiy alaq chwach ri Dios. Ri chirajawaxik wi e chikijujunal raj chak kakilo suꞌanik kechakunik chaꞌ kel chi utz ri chak.
1CO 3:11 Ma na utz ta kꞌenoq we kꞌo junoq kukoj jun chik uparaqan ri ja junwi chwa ri kojotal chik; yey ruparaqan ri ja kojotal chik, e ri Qanimajawal Jesucristo.
1CO 3:12 Puwi ruparaqan juna ja kꞌo ri kuchapabꞌej oro, plata o chomilaj abꞌaj; y kꞌo ri kuchapabꞌej tzꞌalam, xlabꞌ o kꞌim.
1CO 3:13 Che taq waꞌ wa kachapabꞌexik kꞌo ri kakowin chupa ri aqꞌ y kꞌo ri na kakowin taj; jekꞌulaꞌ ri chak uꞌanom junoq pubꞌiꞌ ri Cristo, ma pa ri qꞌij re ri qꞌatbꞌal tzij, ri Dios kuqꞌalajisaj we utz ri chak uꞌanom o na utz taj.
1CO 3:14 We ri chak uꞌanom kꞌo ukowil, kukꞌul kꞌu riꞌ ri rajil ukꞌaxel kuya ri Dios;
1CO 3:15 noꞌj we na jinta ukowil, riꞌ na jinta rajil ukꞌaxel kukꞌulu. Kasach kꞌu uwach riꞌ ruchak, tobꞌ rire kꞌa kakolobꞌetajik, e pachaꞌ junoq kukolobꞌej ribꞌ echiriꞌ kakꞌat ri rocho.
1CO 3:16 ¿Na etaꞌam ta nebꞌa ralaq, alaq rocho ri Dios yey e ri Ruxlabꞌixel ri Dios ri jeqel ukꞌ alaq?
1CO 3:17 E uwariꞌche we kꞌo junoq kusach uwach ri rocho ri Dios, ri Dios kusach uwach ri kaꞌanaw waꞌ. Ma ri rocho ri Dios e santo; yey waꞌ e ralaq.
1CO 3:18 Makꞌo musok ribꞌ chiribꞌil ribꞌ. Ma we kꞌo junoq kuchꞌobꞌo lik retaꞌam chi ronoje che ruwachulew, chirajawaxik riꞌ chuꞌana che ribꞌ pachaꞌ junoq na jinta kꞌana retaꞌam, chaꞌ e karetaꞌmaj runaꞌoj ri Dios. Jekꞌulaꞌ kuꞌana lik kꞌo unaꞌoj paqatzij wi.
1CO 3:19 Ma runimal naꞌoj re ruwachulew na jinta kꞌana uwach chwach ri Dios. E pachaꞌ ri tzꞌibꞌital kan chupa Ruchꞌaꞌtem ri Dios: E taq ri kꞌo kinaꞌoj re sokosoꞌnik, ri Dios kuꞌan chike ketzaq chupa ri kinoꞌjibꞌal.
1CO 3:20 Yey je tanchi waꞌ tzꞌibꞌital kanoq: Ri Dios retaꞌam na jinta uchak ri kinaꞌoj ri kakichꞌobꞌo lik ketaꞌam chi ronoje kachaꞌ.
1CO 3:21 E uwariꞌche lik na utz ta kꞌenoq we kꞌo junoq kuꞌan nim che ribꞌ xa ruma e utaqem juna achi. Ma e ri Dios yaꞌyom ronoje che alaq.
1CO 3:22 Uyaꞌom che alaq re toꞌbꞌel e alaq, ri Apolos y ri Pedro yey inuyaꞌom ne riꞌin. Uyaꞌom ne che alaq ruwachulew, ri kꞌaslemal, ri kamik, janipa ri katajin waqꞌij ora y ri katajin loq. Ronoje kꞌu riꞌ ri yaꞌtal che alaq, rukꞌ ri Dios petinaq wi.
1CO 3:23 Ekꞌu ralaq, alaq re ri Cristo; yey ri Cristo, re ri Dios.
1CO 4:1 Lik chirajawaxik wi konoje ri tikawex kaketaꞌmaj e riꞌoj xa oj toꞌbꞌel pa ruchak ri Cristo, y yaꞌtal kꞌu chiqe kaqakꞌut saꞌ ri karaj kuqꞌalajisaj ri Dios chike ri tikawex.
1CO 4:2 Jelaꞌ pachaꞌ lik chirajawaxik che juna aj chak lik kuchapabꞌej chi utz ri yaꞌom puqꞌabꞌ ruma ri rajaw; jekꞌulaꞌ riꞌ chirajawaxik kaqaꞌan riꞌoj rukꞌ ri yaꞌtal paqaqꞌabꞌ ruma ri Qajawal.
1CO 4:3 Ekꞌu riꞌin na kinok ta il che taq ri kabꞌiꞌij alaq che ri chak nuꞌanom, we utz o na utz taj. Na kinok tane il che taq ri kakibꞌiꞌij ri tikawex che waꞌ. Yey na ubꞌe tane chwe riꞌin kambꞌiꞌij we utz ri chak nuꞌanom.
1CO 4:4 Ma kannaꞌ chinukꞌuꞌx e kintajin che uꞌanik ri karaj ri Qanimajawal; na rukꞌ ta kꞌu riꞌ, xew che Rire taqal wi kubꞌiꞌij we utz o na utz ta ri chak nuꞌanom.
1CO 4:5 E uwariꞌche maqꞌat tzij alaq pakiwi ri raj chak ri Dios, we kꞌo kutiqoj o na jinta kutiqoj ri chak kiꞌanom; e choyeꞌej alaq rukꞌunibꞌal ri Qanimajawal Jesucristo, ma echiriꞌ kakꞌun Rire, kuqꞌalajisaj ronoje ri kꞌamajaꞌ ketaꞌmaxik. Kꞌa ekꞌuchiriꞌ kaqꞌalajinik saꞌ ri kꞌo pa kanimaꞌ ri tikawex. Y chikijujunal kꞌut kakikꞌul che ri Dios ri yakbꞌal kiqꞌij e chirij ri kiꞌanom.
1CO 4:6 Hermanos, rukꞌ ri kꞌambꞌal naꞌoj nuyaꞌom lo chwi ri Apolos y panuwi riꞌin, xuaj kampixabꞌaj alaq chaꞌ kamaj alaq uyakik kiqꞌij ri tikawex xew e chirij ri tzꞌibꞌital kan chupa Rutzij Upixabꞌ ri Dios puwi ri yaꞌtal che alaq kaꞌan alaq. Ma we jelaꞌ kaꞌan alaq, na jinta kꞌo ri kuꞌan nim che ribꞌ ruma utaqem junoq yey e kukꞌaq bꞌi kiqꞌij ri nikꞌaj chik.
1CO 4:7 We kꞌo junoq uꞌanom nim che ribꞌ chixoꞌlibꞌal alaq, kantzꞌonoj che: «¿Suꞌchak kachꞌobꞌ la e lik kꞌo wach la chikiwa ri nikꞌaj chik? ¿Kꞌo nawi majom la xa tukel la? Jintaj, ma janipa ri kꞌo ukꞌ la y ri majom la, e ri Dios yaꞌyom cheꞌla. Y we xa yaꞌtal cheꞌla, ¿suꞌchak kꞌu riꞌ katakꞌabꞌaꞌ qꞌij la?»
1CO 4:8 Ralaq kanaꞌ alaq pachaꞌ na jinta chi kꞌo kajawax che alaq. E kanaꞌ ralaq alaq chi bꞌeyom y alaq chi nimaq taqanelabꞌ; yey na kajawax ta chi ne ri toꞌbꞌal qeꞌoj che alaq. Lik chom kꞌut we ta pa saqil wi ꞌanom chi taqanelabꞌ che alaq ruma ri Dios chaꞌ junam kojtaqan ukꞌ alaq.
1CO 4:9 Noꞌj chinuwach riꞌin, ri oj utaqoꞌn ri Jesús na jinta ko qawach. Ma ri Dios oj ukojom oj kꞌisbꞌal chike ri tikawex. E pachaꞌ oj kꞌo chuxeꞌ qꞌatbꞌal tzij re kamik y kojkꞌam bꞌi re kojkamisaxik, yey konoje xa kojkitzutzaꞌ chik, tobꞌ tikawex, tobꞌ ne ángeles.
1CO 4:10 E riꞌoj ruma qataqem ri Cristo kabꞌiꞌx chiqe sachinaq qanaꞌoj; noꞌj ralaq kachꞌobꞌ alaq raqan lik kꞌo naꞌoj alaq chikiwa ri jujun chik kikojom rubꞌiꞌ ri Cristo. E riꞌoj e pachaꞌ lik na jinta qachuqꞌabꞌ, noꞌj ralaq lik kꞌo chuqꞌabꞌ alaq. E ralaq lik yakom qꞌij alaq, noꞌj riꞌoj lik kꞌaqom bꞌi qaqꞌij.
1CO 4:11 Ekꞌu laꞌ lik qatijom lo numik y tzajin chiꞌ, lik ne na jinta qaqꞌuꞌ. Kojchꞌayik y na jinta qocho pa kojkꞌojiꞌ wi.
1CO 4:12 Lik ne kojkosik ma kojchakun rukꞌ ri qaqꞌabꞌ. E taq ri winaq kojkiyajo, noꞌj riꞌoj kaqatzꞌonoj ri utz pakiwiꞌ. Echiriꞌ kojternabꞌex rukꞌ kꞌaxkꞌobꞌik, riꞌoj lik kaqakuyu.
1CO 4:13 Echiriꞌ tzel kojkichꞌaꞌtibꞌej, kaqakꞌul uwach rukꞌ chomilaj chꞌaꞌtem. Kꞌa chupa ne waqꞌij ora e pachaꞌ chi oj aqꞌes na jinta uchak che ruwachulew ma lik kꞌaqom bꞌi qaqꞌij kuma ri winaq.
1CO 4:14 Kantzꞌibꞌaj kꞌu ronoje waꞌ na e ta re kanya kꞌix alaq; xa e re kampixabꞌaj alaq ma pachaꞌ alaq walkꞌoꞌal lik kꞌax kannaꞌ alaq.
1CO 4:15 Ma tobꞌ lik e kꞌi ri kekꞌutun chiwach alaq chwi ri Cristo, na rukꞌ ta kꞌu riꞌ, ri qaw alaq na e ta kꞌi, xew riꞌin, ma in ri nabꞌe xintzijoj ri Utzilaj Tzij che alaq yey ruma kꞌu laꞌ, xkoj alaq rubꞌiꞌ ri Cristo y xuꞌana alaq ralkꞌoꞌal ri Dios.
1CO 4:16 Ruma kꞌu waꞌ, kambꞌiꞌij che alaq: ꞌAna e alaq ri nuꞌanom riꞌin rukꞌ ri nubꞌinik nusilabꞌik chwach ri Dios.
1CO 4:17 E uwariꞌche nutaqom bꞌi ukꞌ alaq ri Timoteo, ri lik kꞌax kannaꞌo ma e pachaꞌ nukꞌajol chupa rubꞌiꞌ ri Cristo. Rire lik kuꞌan chi utz ri taqom che ruma ri Qanimajawal. Echiriꞌ kopon ukꞌ alaq, kuꞌtzijoj tanchi che alaq ri nubꞌinik nusilabꞌik riꞌin rukꞌ ri Cristo, ma jelaꞌ nukꞌutum pa taq chawi in ikꞌowinaq wi y pa taq riglesias.
1CO 4:18 E kꞌo jujun chixoꞌlibꞌal alaq lik kiꞌanom nim che kibꞌ, ma e chikiwa rike na kinopon ta chi riꞌin ukꞌ alaq.
1CO 4:19 Pero na kinmayin ta che kinopon ukꞌ alaq we e karaj riꞌ ri Dios. Yey echiriꞌ kinoponik, kebꞌeꞌnuwila na kꞌu ri kiꞌanom nim che kibꞌ, we paqatzij wi kakiriq uꞌanik janipa ri kibꞌiꞌim.
1CO 4:20 Ma na xa ta rukꞌ chꞌaꞌtem kaqꞌalajin wi we junoq paqatzij wi kꞌo chupa rutaqanik ri Dios, ma e kaqꞌalajin rukꞌ ruchuqꞌabꞌ ri Dios che rubꞌinik usilabꞌik.
1CO 4:21 Kantzꞌonoj kꞌut: ¿Saꞌ ri más utz? ¿Kinopon ukꞌ alaq chaꞌ kiꞌnꞌana juna qꞌilonik lik kꞌax o e kankꞌut ri rutzil nukꞌuꞌx y ri chꞌuꞌchꞌuj nukꞌuꞌx chiwach alaq? Paqꞌabꞌ alaq kꞌo wi.
1CO 5:1 Etaꞌmatal chi kꞌut kꞌo jun chixoꞌlibꞌal alaq xuꞌan rixoqil che rukaꞌm uchu. Yey wa katajin che uꞌanik lik na e ta kꞌenoq, ma waꞌ na kilitaj tane chikixoꞌlibꞌal ri na ketaꞌam ta uwach ri Dios.
1CO 5:2 Y na rukꞌ ta kꞌu riꞌ, ¡ralaq lik ꞌanom nim che ibꞌ alaq! ¿Suꞌbꞌe na xbꞌisoj ta alaq waꞌ wa mak? Ma ri xraj e ta xesaj bꞌi alaq chikixoꞌlibꞌal rutinamit ri Dios ri kaꞌanaw waꞌ.
1CO 5:3 Riꞌin nuqꞌatom chi tzij puwi ri xꞌanaw re waꞌ wa mak. Y tobꞌ ne na in jinta ukꞌ alaq chiwachil, e kunaꞌ nukꞌuꞌx riꞌin pachaꞌ in kꞌo ukꞌ alaq.
1CO 5:4 Kambꞌiꞌij kꞌu che alaq, molo ibꞌ alaq chupa rubꞌiꞌ ri Cristo rukꞌ ruchuqꞌabꞌ Rire; yey mikꞌow chikꞌuꞌx alaq, riꞌin e pachaꞌ in kꞌo chixoꞌlibꞌal alaq tobꞌ na in jintaj.
1CO 5:5 Ekꞌu ri kaꞌan alaq e kaya alaq wa aj mak puqꞌabꞌ ri Satanás chaꞌ jelaꞌ kasach uwach ri rayibꞌal re rutiꞌjil y jelaꞌ kakolobꞌetaj chupa ruqꞌijol rukꞌunibꞌal ri Qanimajawal.
1CO 5:6 Lik na utz taj katakꞌabꞌaꞌ qꞌij alaq ma kꞌo mak chixoꞌlibꞌal alaq. ¿Na etaꞌam ta nebꞌa alaq e jubꞌiqꞌ levadura kusipowirisaj upa ronoje ri qꞌor? Waꞌ e keꞌeloq, we kꞌo mak chixoꞌl alaq yey we na kesax taj, ri jujun chik kepachabꞌ rukꞌ.
1CO 5:7 Ri pam re ri nimaqꞌij Pascua, waꞌ ꞌanom rukꞌ kꞌakꞌ qꞌor na jinta levadura che; jekꞌuriꞌlaꞌ ralaq, chesaj ibꞌ alaq chupa ri na utz taj re ri qꞌeꞌl bꞌinik silabꞌik alaq chaꞌ kuꞌan alaq jun saqil tinamit re ri Dios. Yey ralaq alaq chi saqil utinamit ri Dios, ma ri Cristo ya xkam paqakꞌaxel riꞌoj jelaꞌ pachaꞌ ri bꞌexex re Pascua, ri xkamisaxik echiriꞌ ri Dios xebꞌukolobꞌej rutinamit Israel.
1CO 5:8 Ekꞌu woꞌora ruma ri xuꞌan ri Cristo, qaꞌana jun saqil nimaqꞌij chwach ri Dios rukꞌ ri qabꞌinik qasilabꞌik, chaꞌ jelaꞌ oj pachaꞌ ri pam re Pascua na jinta levadura che, ruma qayaꞌom kan ri na utz taj, waꞌ e ri chꞌulilaj mak xojkꞌojiꞌ wi ojertan, y pa saqil wi chojkꞌola chupa ri Qꞌijsaq.
1CO 5:9 Chupa ri jun nucarta nutaqom bꞌi, ximbꞌiꞌij pan che alaq machbꞌilaj alaq ri kaketzꞌabꞌej uwa kiqꞌij kukꞌ jujun chik na kikꞌulel taj.
1CO 5:10 Wa ximbꞌiꞌij na e ta keꞌeloq xa jumul kesaj ibꞌ alaq kukꞌ konoje raj makibꞌ, ri na kikojom ta rubꞌiꞌ ri Cristo. Waꞌ e ri kakiyoj kibꞌ kukꞌ jujun chik, ri lik e rayinel, ri e eleqꞌomabꞌ y ri e aj tioxabꞌ. Ma we kꞌo junoq karaj karesaj ribꞌ chikixoꞌl konoje raj makibꞌ, ¿suꞌanik kꞌu riꞌ kakꞌojiꞌ wara che ruwachulew?
1CO 5:11 Rukꞌ ri xintzꞌibꞌaj xuaj ximbꞌiꞌij y e kambꞌiꞌij woꞌora: Machbꞌilaj alaq junoq kubꞌiꞌij ralkꞌoꞌal ri Dios yey karetzꞌabꞌej uwa uqꞌij rukꞌ jun chik na ukꞌulel taj, o junoq aj rayinel, aj tiox, aj chꞌaminel, qꞌabꞌaꞌrel o eleqꞌom. Kukꞌ waꞌ wa tikawex jelaꞌ kibꞌinik kisilabꞌik, tobꞌ ne xa waꞌim maꞌan alaq kukꞌ.
1CO 5:12 Ma paqꞌabꞌ ralaq kꞌo wi kaqꞌat alaq tzij pakiwi ri hermanos re ri iglesia alaq. Pero ¿kꞌo nawi panuqꞌabꞌ riꞌin o paqꞌabꞌ ralaq ri kaqꞌat tzij pakiwi ri na kikojom ta rubꞌiꞌ ri Cristo? Na jintaj,
1CO 5:13 ma e ri Dios ri kaqꞌataw tzij pakiwi rike. Ekꞌu laꞌ la jun aj mak kꞌo piglesia, chesaj bꞌi chixoꞌlibꞌal alaq.
1CO 6:1 Hermanos, echiriꞌ kꞌo junoq che alaq kukoj umak juna chik hermano, ¿suꞌbꞌe kuꞌyaꞌa waꞌ chwa juna aj qꞌatal tzij na bꞌare ta kukꞌil rutinamit ri Dios? Ma ri lik ubꞌe e kayijbꞌaꞌ alaq waꞌ chikiwach rutinamit ri Dios.
1CO 6:2 ¿Na etaꞌam ta nebꞌa alaq kopon jun qꞌij rutinamit ri Dios kakiqꞌat ne tzij pakiwi ri e kꞌo che ruwachulew? We kopon kꞌu waꞌ wa qꞌij echiriꞌ kaqꞌat alaq tzij pakiwi ri e kꞌo che ruwachulew, ¿na jinta kami paqꞌabꞌ alaq riꞌ kaqꞌat alaq tzij puwi ri lik na il ta uwach kꞌo woꞌora?
1CO 6:3 ¿Na etaꞌam ta nebꞌa alaq kopon jun qꞌij echiriꞌ ri oj ralkꞌoꞌal ri Dios kaqaqꞌat ne tzij pakiwi ri ángeles na e ta jusukꞌ? We ekꞌu riꞌ, lik taqal che alaq kariq alaq uyijbꞌaxik woꞌora ri chꞌaꞌoj kawinaqir chixoꞌlibꞌal alaq wara che ruwachulew.
1CO 6:4 We kꞌo kꞌu chꞌaꞌoj chiwach alaq puwi ri xa re ruwachulew, ¿suꞌbꞌe keꞌek alaq chikiwach e aj qꞌatal tzij na jinta kꞌana ke che rutinamit ri Cristo?
1CO 6:5 Kambꞌiꞌij kꞌu waꞌ chaꞌ kakꞌix kꞌana alaq che. Hermanos, ¿na jinta kami junoq che alaq kꞌo unaꞌoj chaꞌ kuyijbꞌaꞌ ri chꞌaꞌoj kawinaqir chixoꞌlibꞌal alaq?
1CO 6:6 ¿Utz nebꞌa laꞌ we kꞌo chꞌaꞌoj chikixoꞌl ri hermanos yey kakikꞌam kꞌu bꞌi waꞌ chwa juna aj qꞌatal tzij na retaꞌam ta uwach ri Dios? ¡Na utz taj!
1CO 6:7 Kꞌo chꞌaꞌoj chiwach ralaq y waꞌ e kꞌutubꞌal re lik na utz ta ꞌanom alaq. Ma ri lik ubꞌe e kakuy alaq ri na usukꞌ taj kaꞌan chiꞌij alaq tobꞌ ne kaꞌan eleqꞌ che alaq rukꞌ sokosoꞌnik.
1CO 6:8 Noꞌj ralaq e kaꞌan alaq ri na ubꞌe taj y kaꞌan ne alaq eleqꞌ rukꞌ sokosoꞌnik, ¡yey waꞌ chike ri jujun chik hermanos kaꞌan wi alaq!
1CO 6:9 ¿Na etaꞌam ta nebꞌa alaq hermanos, e ri na jusukꞌ ta ri kibꞌinik kisilabꞌik na jinta ke kukꞌ ri kebꞌok chupa rutaqanik ri Dios? Lik masokotaj alaq; ma e janipa ri kaketzꞌabꞌej uwa kiqꞌij kukꞌ jujun chik na kikꞌulel taj, ri e aj tioxabꞌ, ri kemakun chirij ri kꞌulanikil, rachijabꞌ kakiꞌan che kibꞌ pachaꞌ e ixoqibꞌ, rachijabꞌ kakiꞌan kikꞌulel chike kach achijabꞌ,
1CO 6:10 ri eleqꞌomabꞌ, ri lik keꞌek kikꞌuꞌx rukꞌ ri puaq, ri kakiya kibꞌ che qꞌabꞌarik, ri e chꞌaminel, ri kꞌo kakimaj chike jujun chik rukꞌ sokosoꞌnik; konoje taq kꞌu waꞌ na jinta ke kukꞌ ri kebꞌok chupa rutaqanik ri Dios.
1CO 6:11 E kꞌo kꞌu jujun che alaq rojertan e kꞌo chupa taq waꞌ wa mak. Noꞌj woꞌora chꞌajtal chi alaq che ri mak, yaꞌtal chi alaq puqꞌabꞌ ri Dios chaꞌ kabꞌin alaq jusukꞌ chwach, yey uꞌanom kꞌu che alaq na jinta chi mak alaq chwach ri Dios. Y ronoje waꞌ e ruma kojom alaq rubꞌiꞌ ri Qanimajawal Jesucristo y ruma ri uꞌanom ri Ruxlabꞌixel ri qa Dios pa animaꞌ alaq.
1CO 6:12 E kꞌo ri kebꞌiꞌn re: «Panuqꞌabꞌ kꞌo wi kanꞌan saꞌ ri kuaj kanꞌano» kechaꞌ. Qatzij, pero na ronoje ta kꞌut taqal chwe kanꞌano. «Panuqꞌabꞌ kꞌo wi kanꞌan saꞌ ri kuaj kanꞌano» kechaꞌ. Na rukꞌ ta kꞌu riꞌ, na kanya ta luwar che ri rayinik re ri nucuerpo kataqan panuwiꞌ.
1CO 6:13 E kꞌo jujun chik kakibꞌiꞌij: «Ri kaqatijo e uwach re ri qapa yey ri qapa e uwach kukꞌul ri kaqatijo» kechaꞌ. Noꞌj kꞌo jun qꞌij echiriꞌ ukabꞌichal waꞌ kasach uwach ruma ri Dios. Ekꞌu ri qacuerpo na re ta kaqetzꞌabꞌej uwa uqꞌij rukꞌ chꞌulilaj mak, ma ri qacuerpo e re ri Qanimajawal y puqꞌabꞌ ri Qanimajawal kꞌo wi.
1CO 6:14 Chwach kꞌu riꞌ ri Dios, lik kꞌo uwach ri qacuerpo. Ma jelaꞌ pachaꞌ xuꞌan ri Dios che ri Qanimajawal echiriꞌ xukꞌastajisaj lo chikixoꞌl ri ekaminaq rukꞌ ruchuqꞌabꞌ, jekꞌulaꞌ kuꞌan chiqe riꞌoj chiqawach apanoq.
1CO 6:15 ¿Na etaꞌam ta kami alaq riꞌ, ri cuerpo alaq xa jun uꞌanom rukꞌ rucuerpo ri Qanimajawal Jesucristo? ¿Utz nawi we riꞌin in re ri Cristo yey kanwesaj bꞌi wibꞌ puqꞌabꞌ Rire y kanyoj kꞌu wibꞌ rukꞌ juna ixoq xaqi kamakun kukꞌ achijabꞌ? ¡Lik na utz ta riꞌ!
1CO 6:16 ¿O na etaꞌam ta kami alaq echiriꞌ juna achi kuyoj ribꞌ rukꞌ juna ixoq xaqi kamakun kukꞌ achijabꞌ, waꞌ kuꞌana xa jun rukꞌ? Ma jewaꞌ tzꞌibꞌital kan chupa ri Tzij Pixabꞌ re ri Dios: Rachi y rixoq echiriꞌ kakijunimaj kibꞌ, «kikabꞌichal kebꞌuꞌana xa e jun chwach ri Dios» kachaꞌ.
1CO 6:17 Jekꞌulaꞌ we kꞌo juna tikawex kuya ribꞌ puqꞌabꞌ ri Qanimajawal, kuꞌan xa jun ukꞌuꞌx rukꞌ.
1CO 6:18 Kambꞌiꞌij kꞌu waꞌ che alaq: Lik chajij ibꞌ alaq chaꞌ na katzaq ta alaq pa ri mak kuꞌan jun echiriꞌ karetzꞌabꞌej uwa uqꞌij rukꞌ jun chik na ukꞌulel taj. Ma ri jujun chik mak na karetzelaj ta ri cuerpo pachaꞌ wa jun mak, yey we jun kuꞌan waꞌ, riꞌ chirij rucuerpo kamakun wi.
1CO 6:19 ¿Na etaꞌam ta nebꞌa alaq, ri cuerpo alaq e rocho ri Ruxlabꞌixel ri Dios? Ma ri Dios uyaꞌom ri Santowilaj Ruxlabꞌixel che alaq chaꞌ kajeqiꞌ pa animaꞌ alaq. Y ruma kꞌu laꞌ, na alaq ta chi rajaw ri kꞌaslemal alaq.
1CO 6:20 Alaq chi re ri Dios, ma Rire xuloqꞌ alaq rukꞌ rukamik ri Qanimajawal. Ekꞌu uwariꞌche, yaka alaq uqꞌij ri Dios rukꞌ ri cuerpo alaq y rukꞌ ronoje animaꞌ alaq, ma ukabꞌichal waꞌ, re ri Dios.
1CO 7:1 Ekꞌu woꞌora kankꞌul pana uwach taq ri tzꞌonobꞌal xꞌan lo alaq chwi ri kꞌulanikil pa ri carta xtaq lo alaq chwe. We juna achi kakꞌojiꞌ utukel y na jinta ixoq rukꞌ, utz ri kuꞌano.
1CO 7:2 Pero ruma kꞌu ri tzaqibꞌal pa mak re rurayibꞌal ri cuerpo, más utz kꞌu riꞌ we rachi kꞌo rixoqil y rixoq kꞌo rachijil.
1CO 7:3 Chirajawaxik kꞌut e rachi chuꞌana janipa ri taqal che kuꞌan rukꞌ ri rixoqil ruma e kꞌulanik; jekꞌulaꞌ rixoq chuꞌana janipa ri taqal che kuꞌan rukꞌ ri rachijil.
1CO 7:4 Rixoq na e ta rajaw rucuerpo ma rucuerpo puqꞌabꞌ ri rachijil kꞌo wi; jekꞌulaꞌ rachi na e ta rajaw rucuerpo ma waꞌ puqꞌabꞌ ri rixoqil kꞌo wi.
1CO 7:5 Maxuꞌyaj kꞌu ibꞌ alaq riꞌ chiwach alaq rukꞌ ri rayibꞌal alaq, xew we chꞌaꞌtibꞌem chi alaq chaꞌ na kajunimaj ta ibꞌ alaq kebꞌ oxibꞌ qꞌij ruma kaya ibꞌ alaq pa oración. Ekꞌuchiriꞌ kakꞌis ruqꞌijol ri oración, junimaj tanchi ibꞌ alaq. Ma we lik naj na kajunimaj ta ibꞌ alaq, laj kakꞌam pa alaq ruma ri Satanás y na kachꞌij ta kꞌu alaq uchuqꞌabꞌ.
1CO 7:6 Kambꞌiꞌij kꞌu waꞌ xa pachaꞌ nupixabꞌanik riꞌin che alaq; na e ta jun taqanik.
1CO 7:7 Ekꞌu ri kanchꞌobꞌ raqan riꞌin e lik utz riꞌ we ta konoje rachijabꞌ kekꞌojiꞌik jelaꞌ pachaꞌ nuꞌanom riꞌin. Na rukꞌ ta kꞌu riꞌ, puqꞌabꞌ ri Dios kꞌo wi saꞌ rusipanik kuya chikijujunal. Ma chike jujun uyaꞌom kachbꞌiꞌil, yey chike jujun chik uyaꞌom kekꞌojiꞌ kitukel.
1CO 7:8 Kuaj kambꞌiꞌij chike ri achijabꞌ na e ta kꞌulanik y rixoqibꞌ e malkaꞌnibꞌ, e lik utz we rike kekanajik e laꞌ kitukel pachaꞌ ri nuꞌanom riꞌin.
1CO 7:9 Noꞌj we rike na kakichꞌij taj e kꞌo kitukel, más utz we kekꞌuliꞌik, ma na utz taj we e kakiya kinaꞌoj puwi ri kirayibꞌal y jekꞌulaꞌ kakikꞌis kibꞌ.
1CO 7:10 Chike kꞌu ri e kꞌulanik, kambꞌiꞌij waꞌ: Na utz taj we rixoq kujach kan ri rachijil. Y wa jun taqanik na xa ta nuchꞌaꞌtem riꞌin, waꞌ re ri Qanimajawal.
1CO 7:11 Pero we rixoq kujach kan ri rachijil, na utz taj we kakꞌuliꞌ rukꞌ jun chik. Ri chuꞌanaꞌ e kanaja na kan utukel o tzeleja tanchi rukꞌ ri rachijil y kꞌola chi utzil chomal. Yey jelaꞌ rachi, e mujach kan ri rixoqil.
1CO 7:12 Chike ri nikꞌaj chik kambꞌiꞌij, tobꞌ waꞌ xa in kimbꞌiꞌn re, na e ta utaqanik ri Qanimajawal: We juna hermano kꞌo rixoqil na ukojom ta rubꞌiꞌ ri Cristo, yey waꞌ wiꞌxoq karaj kakꞌojiꞌ rukꞌ, na utz ta kꞌu riꞌ we ri hermano kujach kanoq.
1CO 7:13 Yey jelaꞌ rukꞌ ri hermana kꞌo rachijil na ukojom ta rubꞌiꞌ ri Cristo, we waꞌ waꞌchi karaj kakꞌojiꞌ rukꞌ, na utz ta kꞌu riꞌ we ri hermana kujach kanoq.
1CO 7:14 Ma we e laꞌ juna ixoq ukojom rubꞌiꞌ ri Cristo yey ekꞌu ri rachijil kꞌamajaꞌ kukojo, ruqꞌabꞌ ri Dios kakꞌojiꞌ puwi waꞌchi ruma ri rixoqil. Ma we na e ta uꞌanom riꞌ, ruqꞌabꞌ ri Dios na kakꞌojiꞌ ta pakiwi ri ralkꞌoꞌal. Pero na e ta uꞌanom, ma ruqꞌabꞌ ri Dios kꞌo pakiwiꞌ.
1CO 7:15 Yey we e laꞌ juna achi o juna ixoq na ukojom ta rubꞌiꞌ ri Cristo y karaj kujach kan ri rachbꞌiꞌil ukojom rubꞌiꞌ ri Cristo, kijacha na kꞌu kibꞌ. Ma che ri ukojom rubꞌiꞌ ri Cristo, na mak taj we na e ta rire xtzukun ri jachanik. Ma ri Dios ojusikꞌim re kojkꞌojiꞌ chi utzil chomal.
1CO 7:16 Kꞌola kꞌu utzil chomal riꞌ chixoꞌlibꞌal alaq, ma kꞌaxtaj uma rilal hermana, kakolobꞌetaj ri achijil la; o kꞌaxtaj uma rilal hermano, kakolobꞌetaj ri ixoqil la.
1CO 7:17 E chirij taq kꞌu ri kiꞌanom echiriꞌ xesikꞌix ruma ri Qanimajawal, chikijujunal utz chekanajoq jelaꞌ pachaꞌ ri ebꞌuyaꞌom wi ri Dios. Y waꞌ wa nubꞌiꞌim che ralaq, e taqanik kanꞌan chike konoje ri kakimol kibꞌ pubꞌiꞌ ri Cristo.
1CO 7:18 We kꞌo kꞌu juna achi kꞌo chi ri retalil re circuncisión che echiriꞌ xsikꞌix ruma ri Qanimajawal, utz jelaꞌ kakanaj kanoq. O we kꞌo juna achi na jinta ri retalil re circuncisión che echiriꞌ xsikꞌix ruma ri Qanimajawal, na chirajawaxik taj kakoj che.
1CO 7:19 Ma ri chirajawaxik wi na e ta we jun ukojom ri retalil re circuncisión o we na ukojom taj, ma ri lik chirajawaxik wi che jun e kuꞌan ronoje rutaqanik ri Dios.
1CO 7:20 Ekꞌu chirij ri kꞌo wi jun echiriꞌ xsikꞌix ruma ri Dios, utz we jelaꞌ kakanaj kanoq.
1CO 7:21 We lal kꞌo la puqꞌabꞌ ri ajaw la echiriꞌ xsikꞌix la ruma ri Dios, mubꞌisoj kꞌuꞌx la; yey we kayaꞌtaj che la kel la puqꞌabꞌ ri ajaw la, lik utz riꞌ.
1CO 7:22 Ma e junoq kꞌo puqꞌabꞌ rajaw echiriꞌ xsikꞌix ruma ri Qanimajawal, riꞌ kesax lo puqꞌabꞌ ritzel ruma ri Qanimajawal. Yey e junoq na jinta puqꞌabꞌ rajaw echiriꞌ xsikꞌix ruma ri Dios, woꞌora puqꞌabꞌ ri Cristo kꞌo wi.
1CO 7:23 Ekꞌu ralaq alaq re ri Dios, ma Rire uloqꞌom chi alaq rukꞌ rukamik ri Cristo. E uwariꞌche, maya ibꞌ alaq pakiqꞌabꞌ ri tikawex xa ruma e lik kataqej alaq ri kinaꞌoj.
1CO 7:24 Hermanos, ekꞌu chirij ri kꞌo wi jun echiriꞌ xsikꞌix ruma ri Dios, lik utz we jelaꞌ kakanaj kan chwach ri Dios.
1CO 7:25 Chike kꞌu ri na e ta kꞌulanik, na jinta taqanik uyaꞌom ri Qanimajawal chwe puwi waꞌ, pero kanya kꞌu ri nupixabꞌanik riꞌin chwi waꞌ. Y kanchꞌobꞌ kꞌut utz kakubꞌiꞌ kꞌuꞌx alaq wukꞌ puwi ri kambꞌiꞌij, ma yaꞌtal chwe riꞌin rutoꞌbꞌal ri Qanimajawal.
1CO 7:26 Chinuwach riꞌin, ruma ri kꞌaxkꞌobꞌik oj kꞌo wi woꞌora, e utz we junoq kakanaj kanoq jelaꞌ pachaꞌ ri uꞌanom.
1CO 7:27 Pero we kꞌo chi awixoqil, majach kanoq. Noꞌj we na jinta awixoqil, muꞌan e ubꞌis akꞌuꞌx katzukuj awixoqil.
1CO 7:28 Pero we katkꞌuliꞌik, utz; ma na mak taj we jun kakꞌuliꞌik. Jenelaꞌ juna ali we kakꞌuliꞌik, na mak taj. Pero e ri kekꞌuliꞌik kape ukꞌayewal che ri kikꞌaslem. Ekꞌu wa yaꞌl kꞌayew na kuaj ta che alaq.
1CO 7:29 Hermanos, ri kuaj kꞌut kambꞌiꞌij che alaq e waꞌ: E taq ri qꞌij kꞌo chiqawach na naj ta chik. E uwariꞌche e rachi kꞌo rixoqil, muꞌan ri xew lik e kꞌo unaꞌoj puwi ri rixoqil.
1CO 7:30 Jekꞌulaꞌ janipa ri kebꞌoqꞌik, makiya kibꞌ xew che ri kibꞌis. Janipa ri kekiꞌkotik, makiya kibꞌ che ri kiꞌkotemal. Janipa ri kakiꞌan loqꞌoj, meꞌek kikꞌuꞌx rukꞌ rubꞌitaq ke.
1CO 7:31 Yey janipa ri kakiꞌkot kikꞌuꞌx rukꞌ taq ri kꞌo che ruwachulew, meꞌek kikꞌuꞌx puwi waꞌ. Ma ronoje ri kilitaj che ruwachulew, xa kikꞌowik.
1CO 7:32 Ri kuaj riꞌin che alaq e ri na jinta ubꞌis kꞌuꞌx alaq. Ri hermano na kꞌulan taj, ruma na jinta yaꞌl kꞌayew che, puqꞌabꞌ kꞌowi lik kuya ribꞌ che ri chak re ri Qanimajawal y kutaqej janipa ri karaj Rire.
1CO 7:33 Noꞌj ri hermano kꞌulanik e kutaqej suꞌanik kebꞌuchajij rufamilia wara che ruwachulew y kutaqej saꞌ ri karaj ri rixoqil.
1CO 7:34 Jekꞌulaꞌ na xa ta jun uwach ruchak, ma kuꞌan ri kajawax pa ruchak ri Dios y kuꞌan ri kajawax chike rufamilia. Y jenelaꞌ kukꞌ ri hermanas. Ma ri hermana na jinta rachijil, na jinta yaꞌl kꞌayew che lik kutaqej saꞌ ri karaj ri Qanimajawal, ma utz kꞌu riꞌ kuya ribꞌ puqꞌabꞌ ri Dios rukꞌ rucuerpo y ronoje ranimaꞌ. Noꞌj ri hermana kꞌulanik e kutaqej suꞌanik kebꞌuchajij rufamilia wara che ruwachulew y kutaqej saꞌ ri karaj ri rachijil.
1CO 7:35 Ekꞌu waꞌ wa ximbꞌiꞌij che alaq re toꞌbꞌal e alaq, na re ta kankoj qꞌatbꞌal chiwach alaq; ma e chaꞌ kakꞌojiꞌ alaq pa saqil wi y jekꞌulaꞌ na jinta yaꞌl kꞌayew re kaya ibꞌ alaq che ruchak ri Qanimajawal.
1CO 7:36 Laj kꞌo junoq kꞌo umiꞌal na jinta rachijil y kuchꞌobꞌ kꞌu raqan: «Laj na usukꞌ taj we na kanya ta luwar che ri numiꞌal kakꞌuliꞌik, ma kꞌo chi rujunabꞌ.» We rachi kuchꞌobꞌ kꞌu raqan taqal che rumiꞌal kakꞌuliꞌik, e chuꞌana riꞌ, ma na mak taj.
1CO 7:37 Noꞌj we kꞌo juna achi lik kunaꞌ chukꞌuꞌx utz kakꞌojiꞌ rumiꞌal utukel, puqꞌabꞌ rire kꞌo wi we kukꞌulubꞌaꞌ rumiꞌal o na kukꞌulubꞌaꞌ taj. Utz we na kukꞌulubꞌaꞌ taj, pero xew we lik ujikibꞌam uwach ri kuꞌano y na jinta junoq xminow uwach chupa.
1CO 7:38 E junoq kukꞌulubꞌaꞌ rumiꞌal, utz ri kuꞌano; yey ri na kukꞌulubꞌaꞌ taj, más ne utz ri kuꞌano.
1CO 7:39 Juna ixoq kꞌulanik na jinta puqꞌabꞌ kakꞌuliꞌ rukꞌ jun chik we kꞌa kꞌas ri rachijil. Noꞌj we ri rachijil xkamik, puqꞌabꞌ kꞌo wi kakꞌuliꞌ china rukꞌ karaj wi rire, xew tane we rukꞌ junoq uyaꞌom ribꞌ puqꞌabꞌ ri Qanimajawal.
1CO 7:40 Pero kꞌu chinuwach riꞌin e más kꞌo kiꞌkotemal che rixoq malkaꞌn we na kakꞌuliꞌ ta tanchik, yey riꞌin kanchꞌobꞌo wa kambꞌiꞌij e ruma ri Ruxlabꞌixel ri Dios kꞌo wukꞌ.
1CO 8:1 Woꞌora kuaj kinchꞌaꞌt puwiꞌ we utz o na utz taj katij ri ikꞌowisam chikiwach ri tiox. Qꞌalaj kꞌut chiqajujunal riꞌoj kꞌo chi qanaꞌoj chwi waꞌ. Pero e kꞌo jujun kakichꞌobꞌo kimajom chi usukꞌ ronoje; y ruma laꞌ, kakiꞌan nim che kibꞌ. Noꞌj we paqatzij wi kꞌo rutzil kꞌuꞌxaj pa qanimaꞌ, lik kaqatoꞌ kꞌu qibꞌ riꞌ chaꞌ kꞌo qakꞌiyibꞌal chwach ri Dios.
1CO 8:2 We kꞌo kꞌu junoq kuchꞌobꞌo lik kꞌo retaꞌam, riꞌ kꞌamajaꞌ kumaj usukꞌ ronoje ri lik chirajawaxik wi karetaꞌmaj.
1CO 8:3 Noꞌj ri paqatzij wi kꞌax kanaꞌw re ri Dios, riꞌ ralkꞌoꞌal ri Dios yey etaꞌmatal kꞌu uwach ruma ri Dios.
1CO 8:4 Chwi taq kꞌu ri waꞌim ikꞌowisam chikiwach ri tiox, riꞌoj qetaꞌam na jinta juna tiox che ruwachulew kꞌo ukꞌaslem, ma xa jun ri Dios kꞌolik, na jinta jun chik.
1CO 8:5 Tobꞌ kꞌo ri kakibꞌiꞌij e kꞌo taq dios che ruwa kaj y che ruwachulew; yey chikiwach kꞌu ri kekojow waꞌ, lik e kꞌi ri kidios y ri kajawal;
1CO 8:6 noꞌj riꞌoj qetaꞌam xa jun ri Dios kꞌolik, e ri Qaqaw, ri ꞌanayom re ronoje ri kꞌolik. Yey riꞌoj oj kꞌo puqꞌabꞌ Rire. Y xa jun ri Qanimajawal, e Jesucristo. Ruma Rire ꞌanom ronoje ri kꞌolik y ruma ne Rire oj kꞌas riꞌoj.
1CO 8:7 Na konoje ta kꞌut kakimaj usukꞌ puwi wa jun Dios kꞌaslik; ma e kꞌo hermanos ojertan xekitaqej taq tiox, yey kꞌa kꞌo pa kijolom waꞌ e kꞌaslik. Ekꞌu woꞌora we rike kakitij ri ikꞌowisam chwach juna tiox, e kakinaꞌ rike mak ri kakiꞌano. E kakichꞌobꞌ waꞌ ruma na jinta ukowil ri kinaꞌoj.
1CO 8:8 Rike na kakimaj ta usukꞌ waꞌ: Na ruma ta ri kaqatijo kojilitaj chi utz ruma ri Dios. Na ruma ta ri kaqatijo o ri na kaqatij taj kꞌo qawach o na jinta qawach chwach ri Dios.
1CO 8:9 Paqꞌabꞌ alaq kꞌo wi saꞌ ri kaꞌan alaq. Na rukꞌ ta kꞌu riꞌ, chajij ibꞌ alaq che ri kaꞌan alaq, tobꞌ etaꞌam alaq na mak taj. Ma na utz taj we xa uma ralaq ketzaq pa mak ri na jinta ukowil ri kinaꞌoj.
1CO 8:10 Ma kꞌaxtaj kꞌo juna hermano na jinta ukowil runaꞌoj y karil kꞌu la tzꞌul la chwa ri mexa pa kakꞌayix wi ri waꞌim ikꞌowisam chwach juna tiox. Rilal etaꞌam la na mak ta waꞌ, noꞌj ri jun chik na kumaj ta usukꞌ waꞌ yey xa ruma xril la katij rilal waꞌ, kuꞌan kꞌu re pachaꞌ ri kaꞌan rilal y kutijo.
1CO 8:11 Tobꞌ rilal kꞌo naꞌoj la chwi waꞌ, pero ruma ri kaꞌan la, ri hermano na jinta ukowil runaꞌoj, karesaj ribꞌ chirij ri Cristo. ¡Waꞌ lik na ubꞌe taj, ma ruma ne rire xkam ri Cristo!
1CO 8:12 Jekꞌulaꞌ we kasachisaj alaq kinaꞌoj ri na e tikil ta chi utz, riꞌ kamakun alaq chikij rike y rukꞌ kꞌu waꞌ, e kamakun alaq chirij ri Cristo.
1CO 8:13 E uwariꞌche we ri kantij riꞌin kuꞌana tzaqibꞌal che juna hermano, xa jumul riꞌ na kantij ta chi tiꞌoꞌn chaꞌ jelaꞌ na katzaq ta ri jun hermano wuma riꞌin.
1CO 9:1 Riꞌin ¿na in ta nebꞌa jun chike rutaqoꞌn ri Jesús yey kꞌo kꞌu panuqꞌabꞌ kanꞌan ri taqal che kuꞌan juna taqoꞌn? In utaqoꞌn ma xinwil uwach ri Jesús ri Qanimajawal, yey ralaq alaq kꞌutubꞌal re ri nuchak ma wuma riꞌin xkꞌojiꞌ alaq puqꞌabꞌ Rire.
1CO 9:2 Laj chikiwach jujun chik riꞌin na in ta jun taqoꞌn re ri Jesús; noꞌj ralaq lik etaꞌam alaq in utaqoꞌn Rire, ma wuma riꞌin xkꞌojiꞌ alaq puqꞌabꞌ Rire yey waꞌ e kꞌutubꞌal re paqatzij wi riꞌin in taqoꞌn re ri Qanimajawal.
1CO 9:3 Chike kꞌu ri kakitzꞌaq nuchiꞌ, e kambꞌiꞌij waꞌ re toꞌbꞌal wibꞌ:
1CO 9:4 Ri oj utaqoꞌn ri Qanimajawal, ¿na taqal ta nebꞌa chiqe kayaꞌ ri qawa y ri qayaꞌ?
1CO 9:5 ¿Yey na taqal ta nebꞌa che juna taqoꞌn kꞌo rixoqil ukojom rubꞌiꞌ ri Cristo yey karachbꞌilaj echiriꞌ kuꞌana ruchak ri Qaqaw? Taqalik, ma jelaꞌ kiꞌanom ri Cefas kukꞌ ri jujun chik taqoꞌn yey taq ruchaqꞌ ri Qanimajawal. Taqal kꞌu waꞌ chiqe ma oj taqoꞌn jelaꞌ pachaꞌ rike.
1CO 9:6 Ri nikꞌaj chik taqoꞌn e kꞌo pa ruchak ri Qaqaw, ketojik y na kechakun ta pa juna chik chak. ¿Na taqal ta nebꞌa waꞌ che ri Bernabé y chwe riꞌin? ¿O xew kami riꞌ riꞌoj na taqal ta waꞌ chiqe?
1CO 9:7 Ma ¿kꞌo nebꞌa juna soldado kataq che kuloqꞌ rukꞌ rumeyo ri kajawax che? Na jintaj, ma ronoje waꞌ kayaꞌ che. Jekꞌulaꞌ juna aj tikoꞌn, ¿na taqal ta nebꞌa che kutij re ri uva xutiko? Y juna aj chajal chikop, ¿na taqal ta nebꞌa che kutij re ri leche kuyitzꞌo?
1CO 9:8 Y wa kambꞌiꞌij, ¿xa nawi naꞌoj re tikawex? Na e taj, ma jelaꞌ tzꞌibꞌital kan pa Rutzij Upixabꞌ ri Dios.
1CO 9:9 Ma chupa ri taqanik tzꞌibꞌital kan ruma ri Moisés, jewaꞌ kubꞌiꞌij: «Makoj bꞌozal che ri bꞌoyex echiriꞌ kuqil uwi ri trigo, ma taqal che katzuqik.» ¿Xubꞌiꞌij nebꞌa waꞌ ri Dios xew ruma kꞌax kebꞌunaꞌ ri bꞌoyexabꞌ?
1CO 9:10 ¿Na paqawiꞌ ta nebꞌa riꞌoj kubꞌiꞌij wi waꞌ? Qatzij, e paqawiꞌ riꞌoj xtzꞌibꞌax wi. Ma jelaꞌ pachaꞌ rabꞌixom taqal che kꞌo royeꞌem che ruchak kuꞌano; yey ri aj chak kꞌo pa qiloj trigo kꞌo royeꞌem chwa ri kuꞌano;
1CO 9:11 jekꞌulaꞌ ruma riꞌoj xqatik chixoꞌlibꞌal alaq Rutzij Upixabꞌ ri Dios, ¿na taqal ta kami riꞌ chiqe riꞌoj kaqakꞌul che alaq ri kajawax chiqe wara che ruwachulew?
1CO 9:12 Ma e kꞌo jujun tojom alaq ri kichak piglesia. We taqal kꞌu riꞌ chike rike ketoj alaq, más lik taqal chiqe riꞌoj, ma oj xojtikow riglesia alaq. Na rukꞌ ta kꞌu riꞌ, riꞌoj na jinta kꞌo qatzꞌonom che alaq, tobꞌ taqal chiqe. Ri qaꞌanom e kojchakun pa qe wi y lik qachꞌijom lo ronoje chaꞌ na kaqakoj ta qꞌatbꞌal che rutzijoxik ri Utzilaj Tzij re ri Cristo.
1CO 9:13 Yey ralaq etaꞌam alaq raj chakibꞌ pa Rocho Dios taqal chike kewaꞌ chirij ri qasaꞌn yaꞌom puqꞌabꞌ ri Dios; yey ri keniman chwa raltar, taqal chike kꞌo kakikꞌul che ri keꞌyoꞌq chiriꞌ.
1CO 9:14 Yey ri taqanik uyaꞌom kan ri Qanimajawal pakiwi ri kakitzijoj ri Utzilaj Tzij, e waꞌ: E lik taqal chike kakikꞌasbꞌaꞌ kibꞌ e chirij ruchak ri Cristo kakiꞌano.
1CO 9:15 Na rukꞌ ta kꞌu riꞌ, riꞌin na jinta kꞌo nutzꞌonom che alaq tobꞌ taqal waꞌ chwe. Y na e tane uwach waꞌ kintzꞌibꞌan pana che alaq chaꞌ kintoj alaq. Ma chinuwach riꞌin, más utz we kinkamik chwa kesax chwe ri saqil kiꞌkotemal kannaꞌo echiriꞌ kantzijoj ri Utzilaj Tzij y na jinta wajil kantzꞌonoj.
1CO 9:16 Riꞌin na kanyak ta nuqꞌij ruma kantzijoj ri Utzilaj Tzij. Xew wetaꞌam chirajawaxik kanꞌan waꞌ wa chak ma e ri Cristo intaqayom che. ¡Lik toqꞌoꞌ kꞌu nuwach we na kanꞌan taj!
1CO 9:17 We ta in xinchaꞌw wa chak, laj woyeꞌem kꞌu riꞌ ri tojbꞌal weꞌin. Noꞌj ruma e ri Nuqaw intaqayom che uꞌanik waꞌ, na jinta panuqꞌabꞌ kanjekꞌ wibꞌ che.
1CO 9:18 ¿Saꞌ kꞌu ri kanchꞌak che ri chak kanꞌano? E ri unimal kiꞌkotemal kannaꞌo echiriꞌ kantzijoj ri Utzilaj Tzij y na kantzꞌonoj ta wajil tobꞌ taqal waꞌ chwe.
1CO 9:19 Riꞌin na in jinta puqꞌabꞌ juna patrón; na rukꞌ ta kꞌu riꞌ, nuyaꞌom wibꞌ che kinuꞌana nimanel ke konoje chaꞌ jelaꞌ e kꞌi ri kakikoj rubꞌiꞌ ri Cristo.
1CO 9:20 Echiriꞌ in kꞌo chikixoꞌl ri watz-nuchaqꞌ e aj judiꞌabꞌ, kanꞌan che wibꞌ jelaꞌ pachaꞌ rike chaꞌ kakikoj rubꞌiꞌ ri Cristo. Ekꞌuchiriꞌ in kꞌo chikixoꞌl rike, kantaqej ri kitaqanik, tobꞌ wetaꞌam na in jinta chuxeꞌ waꞌ. Nuꞌanom kꞌu waꞌ chaꞌ rike kakikoj rubꞌiꞌ ri Cristo.
1CO 9:21 Jekꞌulaꞌ echiriꞌ in kꞌo chikixoꞌlibꞌal ri na kitaqem ta ri taqanik tzꞌibꞌital kan ruma ri Moisés, kanꞌan che wibꞌ pachaꞌ in jun chike, tobꞌ in kꞌo chuxeꞌ rutaqanik ri Dios y rutaqanik ri Qanimajawal. Nuꞌanom kꞌu waꞌ chaꞌ rike kakikoj rubꞌiꞌ ri Cristo.
1CO 9:22 Jekꞌulaꞌ echiriꞌ in kꞌo chikixoꞌlibꞌal ri hermanos na jinta ukowil ri kinaꞌoj, kꞌo ri na kanꞌan ta riꞌin xa ruma e mak chikiwach rike, tobꞌ riꞌin wetaꞌam na mak taj, pero rike kꞌamajaꞌ kakimaj usukꞌ waꞌ. Jelaꞌ kanꞌano chaꞌ rike kakijikibꞌaꞌ kibꞌ chi utz puqꞌabꞌ ri Dios. Rukꞌ kꞌu ronoje ri kanꞌan chikiwach konoje ri tikawex, kantzukuj saꞌ ri lik kebꞌutoꞌo chaꞌ jelaꞌ e kꞌo jujun chike kekolobꞌetajik.
1CO 9:23 Rukꞌ ronoje kꞌu ri kanꞌano, kanqꞌalajisaj ri Utzilaj Tzij chaꞌ junam kaqakꞌul ri utz rukꞌaꞌam lo wa Utzilaj Tzij.
1CO 9:24 Etaꞌam alaq pa juna etzꞌanem re kꞌalalem, konoje ri kekꞌalalik lik kakitij uqꞌij kakichꞌak ri premio, tobꞌ ketaꞌam xa jun ri kakꞌuluw ri premio. Jekꞌulaꞌ chuqꞌubꞌej ibꞌ alaq chaꞌ kakꞌul alaq ri premio kuya ri Dios che alaq.
1CO 9:25 E junoq lik kutijoj ribꞌ che juna etzꞌanem, lik kuchꞌij uchuqꞌabꞌ ronoje xa ruma jun premio xa kasach uwach. Noꞌj riꞌoj kaqachuqꞌubꞌej qibꞌ che ukꞌulik jun premio na kasach ta kꞌana uwach.
1CO 9:26 Ekꞌu riꞌin lik wetaꞌam saꞌ ruchak ri nukꞌaslem. Na kanꞌan ta kꞌu pachaꞌ junoq xa kajumumik pero na retaꞌam taj pa karaj kopon wi o pachaꞌ junoq kachꞌoꞌjin pa tꞌoꞌy pero xa pa tew kachꞌayanik.
1CO 9:27 Ma riꞌin kintaqan puwi ri nucuerpo tobꞌ kantij kꞌax ruma. Jekꞌulaꞌ na kanya ta kꞌana luwar che taq ri rayibꞌal re ri nutiꞌjil kataqan panuwiꞌ. Ma riꞌin xinqꞌalajisaj ri chomilaj bꞌe re ri Qꞌijsaq chikiwach ukꞌiyal tikawex; lik toqꞌoꞌ kꞌu nuwach riꞌ we e laꞌ na kanchꞌak ta ri premio kuya ri Dios.
1CO 10:1 Hermanos, mikꞌow chikꞌuꞌx alaq ri xkikꞌulumaj ri qatiꞌ-qamam e aj Israel ojertan. Echiriꞌ rike xebꞌin chupa ri luwar katzꞌintzꞌotik, ri Dios xutaq lo jun sutzꞌ pakiwiꞌ y echiriꞌ xebꞌopon chuchiꞌ ri mar, xebꞌutoꞌo chaꞌ konoje xkiqꞌaxuj ri mar.
1CO 10:2 Konoje kꞌu rike junam rukꞌ ri Moisés e pachaꞌ xkikꞌul ri bautismo echiriꞌ xebꞌikꞌow chupa ri mar rukꞌ ri sutzꞌ pakiwiꞌ y ri yaꞌ pa taq kitzal.
1CO 10:3 Yey konoje rike xkitij ri maná petinaq chikaj, ri xutaq lo ri Dios chike.
1CO 10:4 Jekꞌulaꞌ konoje xkitij ri yaꞌ xel lo chupa jun pek. Wa yaꞌ e ri xuya lo ri Dios, y wa pek keꞌelawi e ri Cristo, ri xerachbꞌilaj rutinamit che ri kibꞌenam.
1CO 10:5 Tobꞌ ri Dios lik xebꞌuchajij, na rukꞌ ta kꞌu riꞌ, lik e kꞌi chike xkipetisaj ri royowal ri Dios pakiwiꞌ. Ruma kꞌu laꞌ, xekam kan pa ri luwar katzꞌintzꞌotik.
1CO 10:6 Ronoje ri xkikꞌulumaj rutinamit ri Dios ojertan e kꞌutubꞌal chiqawach riꞌoj woꞌora chaꞌ na keꞌek ta qakꞌuꞌx rukꞌ ri na utz taj pachaꞌ ri xkiꞌan rike.
1CO 10:7 Maꞌan kꞌu ralaq alaq aj tioxabꞌ pachaꞌ xkiꞌan jujun chike rike ojertan. Ma jelaꞌ tzꞌibꞌital kan chupa Rutzij Upixabꞌ ri Dios: «Rutinamit ri Dios xetzꞌuyiꞌik, xewaꞌik y xeqꞌabꞌarik. Tekꞌuchiriꞌ xeyaktajik y xkiya kibꞌ chupa ri na utz taj.»
1CO 10:8 Maqaꞌan ne qeꞌoj pachaꞌ xkiꞌan jujun chike rike echiriꞌ xketzꞌabꞌej uwa kiqꞌij kukꞌ jujun chik na kikꞌulel taj, yey ruma laꞌ xekamisax xa pa jun qꞌij laj veintitres mil chi achijabꞌ.
1CO 10:9 Maqakꞌam upa ri Dios Qajawxel pachaꞌ xkiꞌan jujun chike rutinamit echiriꞌ xkipetisaj royowal ri Dios ruma xeyajan chirij. Yey ruma kꞌu riꞌ xekamik ma xetiꞌtaj kuma kumatz.
1CO 10:10 Mayajan kꞌu alaq chirij ri Dios pachaꞌ xkiꞌan jujun yey ruma kꞌu riꞌ, ri Dios xutaq lo jun aj ꞌAnal Kamik pakiwiꞌ.
1CO 10:11 Ronoje kꞌu ri xkikꞌulumaj rutinamit ri Dios ojertan e kꞌutubꞌal chiqawach riꞌoj woꞌora chaꞌ na kaqaꞌan ta qeꞌoj pachaꞌ ri xkiꞌan rike. Ronoje kꞌu waꞌ tzꞌibꞌital kanoq re pixabꞌanik chiqe riꞌoj, ri oj kꞌo che taq ri kꞌisbꞌal qꞌij re ruwachulew.
1CO 10:12 E uwariꞌche, we kꞌo junoq kuchꞌobꞌo katikiꞌ jusukꞌ, e lik chuchajij kꞌu ribꞌ riꞌ chaꞌ na katzaq taj.
1CO 10:13 We kakꞌam pa alaq, mabꞌiꞌij alaq: «Xew riꞌin kinikꞌowibꞌen waꞌ», ma qonoje ri oj tikawex kojikꞌow chupa waꞌ. Na rukꞌ ta kꞌu riꞌ, kubꞌul qakꞌuꞌx rukꞌ ri Dios, ma Rire na kojroqꞌotaj ta kꞌenoq y na kuya ta luwar kape juna kꞌambꞌal qapa we na yaꞌtal ta chiqe kaqachꞌij rukꞌ ruchuqꞌabꞌ Rire.
1CO 10:14 Ruma kꞌu ronoje wa nubꞌiꞌim loq, kampixabꞌaj alaq hermanos, ri lik kꞌax kannaꞌ alaq: Lik chajij ibꞌ alaq chaꞌ na katzaq ta alaq chupa ri kiloqꞌnimaxik uqꞌij taq ri tiox.
1CO 10:15 Wetaꞌam lik kꞌo naꞌoj alaq chaꞌ kamaj alaq usukꞌ ri kambꞌiꞌij. Chꞌobꞌo pe kꞌu alaq chi utz puwi wa kambꞌiꞌij we qatzij.
1CO 10:16 Echiriꞌ kaqachap ri kꞌolibꞌal kꞌo vino chupa, kuxtabꞌal re rukikꞌel ri Cristo xturuw quma riꞌoj, kojtioxin chwach ri Dios. Echiriꞌ kaqatij kꞌu waꞌ, ¿na e ta nebꞌa kojuꞌan xa jun rukꞌ Rire? Jekꞌulaꞌ echiriꞌ kaqatij ri pam kuxtabꞌal re rucuerpo xyaꞌ pa kamik, ¿na e ta nebꞌa kojuꞌan xa jun rukꞌ Rire?
1CO 10:17 Waꞌ wa pam xa jun, tobꞌ kawechꞌik y kajach chiqe. Jekꞌulaꞌ riꞌoj, tobꞌ oj kꞌi, xa jun qawach ma qonoje junam kaqatij wa pam.
1CO 10:18 Chilape alaq ri kakiꞌan ri e aj Israel. Echiriꞌ kakitij rawaj ekamisam chwach raltar re ri Dios Qajawxel, rukꞌ waꞌ ebꞌare jun kakikuxtaj ri Dios.
1CO 10:19 ¿Saꞌ kꞌu ri kambꞌiꞌij puwi taq ri ikꞌowisam chwach juna tiox? ¿E nawi kambꞌiꞌij kꞌo uwach ri tiox o e kꞌo uwach rawaj ekamisam chwach? ¡Na e taj!
1CO 10:20 Ri kambꞌiꞌij e waꞌ: Echiriꞌ ri na ketaꞌam ta uwach ri Dios keqasan rukꞌ awaj chwach juna tiox, na e ta chwach ri Dios keqasan wi, ma e chikiwach taq ri itzel uxlabꞌixel. E uwariꞌche lik na kuaj taj kaꞌan e alaq kukꞌ ri kakiloqꞌnimaj taq ri itzel uxlabꞌixel.
1CO 10:21 Yey na ubꞌe ta kꞌenoq katij alaq ri vino re yakbꞌal uqꞌij ri Qanimajawal yey katij alaq ri vino re yakbꞌal kiqꞌij ri itzel uxlabꞌixel. Jekꞌulaꞌ na ubꞌe ta nenareꞌ we ralaq katij alaq ri waꞌim chwi rumexa ri Qanimajawal yey katij ne alaq ri waꞌim chwi ri mexa ke ri itzel uxlabꞌixel.
1CO 10:22 Ma ¿kaꞌaj kami alaq e kapetisaj alaq royowal ri Dios ruma xꞌan e alaq kukꞌ ri kakiloqꞌnimaj tiox? ¿Kachꞌij nebꞌa alaq ruchuqꞌabꞌ Rire?
1CO 10:23 E kꞌo ri kebꞌiꞌn re: «Panuqꞌabꞌ kꞌo wi kanꞌan saꞌ ri kuaj kanꞌano» kechaꞌ. Qatzij, pero na ronoje taj taqal chwe kanꞌano. «Panuqꞌabꞌ kꞌo wi kanꞌan saꞌ ri kuaj kanꞌano» kechaꞌ. Pero na ronoje taj kuya nukꞌiyibꞌal chwach ri Dios.
1CO 10:24 Na utz ta kꞌu riꞌ we junoq e xew kutzukuj ri utz chiribꞌil ribꞌ, ma ri lik chirajawaxik wi e kutzukuj ri utz chike ri nikꞌaj chik.
1CO 10:25 Ronoje kꞌu ri kakꞌayix pa carnes, utz katij alaq; xew matzꞌonobꞌej alaq y makꞌo machꞌobꞌ ne alaq che we ikꞌowinaq chwa juna tiox o na ikꞌowinaq taj.
1CO 10:26 Ma jewaꞌ tzꞌibꞌital kan pa Rutzij Upixabꞌ ri Dios: Ronoje ruwachulew rukꞌ ronoje taq ri kꞌo chwach, re ri Dios Qajawxel kachaꞌ.
1CO 10:27 Yey we kꞌo junoq na ukojom ta rubꞌiꞌ ri Cristo kusikꞌij alaq pa juna waꞌim y kaꞌaj alaq keꞌek alaq, utz riꞌ. Ronoje kꞌu ri kuya chiwach alaq, utz katij alaq, xew kꞌu matzꞌonobꞌej alaq y makꞌo ne machꞌobꞌ alaq pa petinaq wi.
1CO 10:28 Noꞌj we e laꞌ kꞌo junoq kubꞌiꞌij che alaq: «Waꞌ ikꞌowisam chwach tiox,» riꞌ matij alaq ruma ri kuchꞌobꞌ ri jun xbꞌiꞌn re waꞌ, tobꞌ etaꞌam chi alaq na mak taj katijik. Ma ronoje ruwachulew rukꞌ ronoje ri kꞌo chwach, re ri Dios Qajawxel.
1CO 10:29 We na katij ta kꞌu alaq waꞌ, e ruma ri kuchꞌobꞌ ri jun chik hermano, ma chwach rire e mak, tobꞌ chiwach ralaq na mak taj. ¿Utz kꞌu nawi we junoq chik kaqꞌataw tzij panuwiꞌ riꞌin echiriꞌ kanꞌan ri lik kunaꞌ nukꞌuꞌx utz kanꞌano?
1CO 10:30 Yey we kantioxij che ri Qaqaw janipa ri kayaꞌ chwe pa waꞌim, ¿suꞌbꞌe kꞌu riꞌ kinchꞌaꞌtibꞌexik?
1CO 10:31 Rukꞌ kꞌu ri waꞌim y ri miqꞌinaꞌ katij alaq o tobꞌ saꞌ ri kaꞌan alaq, ri lik chirajawaxik wi e ꞌana alaq ronoje re yakbꞌal uqꞌij ri Dios.
1CO 10:32 Maꞌan ralaq alaq latzꞌanel chike ri jujun chik, tobꞌ e aj judiꞌabꞌ o na e ta aj judiꞌabꞌ; maꞌan ne alaq waꞌ chike ri kikojom rubꞌiꞌ ri Cristo.
1CO 10:33 Riꞌin rukꞌ ronoje ri kanꞌano, e kanꞌan ri utz chike konoje. Na kantzukuj ta kꞌu ri utz xew chiwibꞌil wibꞌ riꞌin, ma e kantzukuj ri utz ke konoje chaꞌ jelaꞌ kakiriq ri chomilaj kꞌaslemal re ri Dios.
1CO 11:1 ꞌAna che ri bꞌinik alaq pachaꞌ ri nubꞌinik riꞌin, jelaꞌ pachaꞌ riꞌin e kanꞌan che ri nubꞌinik pachaꞌ rubꞌinik ri Cristo.
1CO 11:2 Kinkiꞌkot ukꞌ alaq ma na meskꞌutam ta alaq ri nupixabꞌanik y taqem lo alaq ri kꞌutunik nuqꞌalajisam chiwach alaq.
1CO 11:3 Pero kꞌo ri kuaj ketaꞌmaj alaq: Ri Dios e ujolom pa chapatal wi ri Cristo. Jekꞌulaꞌ, ri Cristo e ujolom pa chapatal wi rachi yey rachi e ujolom pa chapatal wi rixoq.
1CO 11:4 We juna achi uchꞌuqum kꞌu rujolom echiriꞌ kuꞌan orar o kuꞌan qꞌalajisanik, rukꞌ waꞌ kukꞌutu na jinta xiꞌin ibꞌ rukꞌ chwach ri Cristo, ri Jun e ujolom pa chapatal wi.
1CO 11:5 Noꞌj we juna ixoq na uchꞌuqum ta rujolom echiriꞌ kuꞌan orar o kuꞌan qꞌalajisanik, riꞌ kꞌixbꞌal che ri jun e ujolom pa chapatal wi, ma e junam riꞌ pachaꞌ qꞌatom ronoje ruwiꞌ.
1CO 11:6 Ma we juna ixoq na kuchꞌuq ta rujolom, riꞌ asu chuqꞌata ronoje ruwiꞌ. Pero we kꞌixbꞌal che rixoq kaꞌan lik chꞌutiꞌn che ruwiꞌ o kaqꞌat ronoje ruwiꞌ, más ne utz kꞌu riꞌ e chuchꞌuqu rujolom.
1CO 11:7 Noꞌj rachi na taqal ta che kuchꞌuq rujolom, ma rire e kukꞌutubꞌej uwach ri Dios y ruma rachi kaqꞌalajin runimal uchomalil ri Dios. Yey rixoq e uchomalil rachi.
1CO 11:8 Ma ri nabꞌe achi na petinaq ta che ri nabꞌe ixoq; e ri nabꞌe ixoq che ri nabꞌe achi petinaq wi.
1CO 11:9 Yey ri Dios na xuꞌan ta rachi re rachbꞌiꞌil rixoq ma e xuꞌan rixoq re rachbꞌiꞌil rachi.
1CO 11:10 E uwariꞌche taqal che rixoq kuchꞌuq rujolom, ma waꞌ e kꞌutubꞌal re uyaꞌom ribꞌ pa taqanik, jelaꞌ kꞌu riꞌ kaqꞌalajinik lik utz uꞌanom chikiwach konoje ri tikawex y chikiwach ne ri ángeles.
1CO 11:11 Na rukꞌ ta kꞌu riꞌ, janipa ri qakojom rubꞌiꞌ ri Qanimajawal lik qetaꞌam, rachi y rixoq kikabꞌichal kꞌo kiwach chwach ri Dios y lik kebꞌajawaxik.
1CO 11:12 Ma che ri nabꞌe achi petinaq wi ri nabꞌe ixoq yey kuma rixoqibꞌ kebꞌalax rachijabꞌ. Pero ronoje ri kꞌolik, petinaq rukꞌ ri Dios.
1CO 11:13 Chꞌobꞌo pe alaq raqan puwi waꞌ: ¿Utz nawi we juna ixoq na uchꞌuqum ta rujolom echiriꞌ kuꞌan orar chwach ri Dios?
1CO 11:14 Lik rewi na taqal ta chike rachijabꞌ lik kanimaꞌqir ri kiwiꞌ.
1CO 11:15 Noꞌj rixoqibꞌ taqal chike lik nimaꞌq ri kiwiꞌ, ma e kichomalil riꞌ yaꞌtal ruma ri Dios re chꞌuqubꞌal ri kijolom.
1CO 11:16 Rukꞌ kꞌu ronoje wa xinchꞌaꞌtibꞌej, we kꞌo junoq karaj kachꞌoꞌjin puwiꞌ, xew kambꞌiꞌij che: Ri nikꞌaj chik iglesias re ri Dios na junwi ta ri kinaꞌoj puwi waꞌ chwa ri kankꞌut riꞌin.
1CO 11:17 Rukꞌ wa pixabꞌanik kanjeq bꞌi utzꞌibꞌaxik che alaq woꞌora, na kinkiꞌkot ta rukꞌ ri ꞌanom alaq. Ma echiriꞌ kamol ibꞌ alaq, na utz ta ri kilitaj chixoꞌlibꞌal alaq, ma xa e kaꞌan kꞌax chiꞌibꞌil ibꞌ alaq.
1CO 11:18 Nabꞌe na kambꞌiꞌij che alaq, nutom na junam ta kꞌuꞌx alaq echiriꞌ kamol ibꞌ alaq pubꞌiꞌ ri Cristo. Yey kankojo laj qatzij,
1CO 11:19 ma e kꞌo jujun kakichꞌobꞌo más kꞌo kiwach chikiwa jujun chik. Yey kilitaj na kꞌu waꞌ chaꞌ jelaꞌ kaqꞌalajinik china taq ri lik utz kiꞌanom chwach ri Dios, ma riꞌ na je ta laꞌ kakiꞌano.
1CO 11:20 Ekꞌuchiriꞌ kamol ibꞌ alaq, na e ta re katij alaq ri saqil cena re ri Qanimajawal.
1CO 11:21 Ma ri kaꞌan alaq e chujujunal kutijilaꞌ nabꞌe ruwaꞌim, tobꞌ e kꞌo kꞌu jujun kekanaj kan rukꞌ numik yey e kꞌo ne ri keqꞌabꞌarik.
1CO 11:22 ¿Saꞌ kꞌu riꞌ waꞌ? ¿Na jinta nebꞌa ocho alaq pa kawaꞌ wi alaq? ¿Suꞌchak kꞌu riꞌ echiriꞌ kamol ibꞌ alaq pubꞌiꞌ ri Cristo, kakꞌaq bꞌi alaq kiqꞌij rutinamit ri Dios; ma e kaya alaq kikꞌix ri na jinta kꞌo kukꞌ? ¿Saꞌ kꞌu ri kambꞌiꞌij che alaq? ¿Kanyak kami qꞌij alaq riꞌ ruma ri kaꞌan alaq? ¡Na kanyak ta qꞌij alaq!
1CO 11:23 Ri nukꞌulum riꞌin puwi ri saqil waꞌim e ri nukꞌutum chi che alaq, yey waꞌ e junam rukꞌ ri ubꞌiꞌim kan ri Qanimajawal Jesucristo. Ma laꞌ laꞌqꞌabꞌ echiriꞌ ri Jesús xkꞌayixik, xukꞌam ri pam,
1CO 11:24 xutioxij che ri Dios y xuwechꞌo, jekꞌuwaꞌ xubꞌiꞌij: «Chikꞌamaꞌ y chitijaꞌ, ma e nucuerpo waꞌ ri kayaꞌ pa kamik iwuma riꞌix. Ekꞌuchiriꞌ kiꞌan taq waꞌ chiqawach apanoq, chiꞌanaꞌ re kuxtabꞌal we riꞌin» xcha ri Jesús
1CO 11:25 Jekꞌulaꞌ xuꞌan che ri kꞌolibꞌal kꞌo vino chupa. Kꞌisbꞌal re ri cena, xukꞌam ri kꞌolibꞌal kꞌo vino chupa y jekꞌuwaꞌ xubꞌiꞌij: «Wa ri riꞌ e ri kꞌakꞌ tzij kajikibꞌax uwach rukꞌ ri nukikꞌel. Janipa laj kitij ri vino re wa cena, chiꞌanaꞌ kuxtabꞌal we riꞌin» xcha ri Jesús.
1CO 11:26 Janipa kꞌu laj kamol ibꞌ alaq chaꞌ katij alaq wa pam y kaqum alaq wa vino, e katajin alaq riꞌ che utzijoxik rukamik ri Qanimajawal kꞌa echiriꞌ kakꞌun tanchi Rire.
1CO 11:27 E uwariꞌche china ri kutij wa pam y kuqum wa vino re ri Qanimajawal yey na rukꞌ ta xiꞌin ibꞌ kutijo, riꞌ kꞌo ri qꞌatbꞌal tzij re ri Dios puwiꞌ ma e kamakun chirij ri Qanimajawal echiriꞌ kukꞌaq bꞌi uqꞌij rucuerpo y rukikꞌel.
1CO 11:28 Ruma kꞌu riꞌ, china ri karaj kutij wa pam y kuqum wa vino, nabꞌe na lik chunaꞌa ribꞌ saꞌ ruꞌanom.
1CO 11:29 Ma china ri kutij wa pam y kuqum wa vino re ri Qanimajawal yey na kuchꞌobꞌ tana chi utz we waꞌ e keꞌelawi rucuerpo ri Qanimajawal; riꞌ chiribꞌil ribꞌ kukꞌam lo ri qꞌatbꞌal tzij re ri Dios puwiꞌ.
1CO 11:30 Ruma e kꞌo jujun jelaꞌ kiꞌanom, e kꞌi ri e yewaꞌibꞌ y ri na jinta kichuqꞌabꞌ chixoꞌlibꞌal alaq, yey e kꞌo ne ri ekaminaq chik.
1CO 11:31 Noꞌj we ta nabꞌe na kaqanaꞌ qibꞌ riꞌoj chiqibꞌil qibꞌ, riꞌ na kajawax ta chik kuqꞌat tzij ri Dios paqawiꞌ ma qayijbꞌam chi qibꞌ chwach.
1CO 11:32 Noꞌj we na kaqaꞌan ta waꞌ, ri Dios kuqꞌat tzij paqawiꞌ woꞌora re kojuqꞌilo chaꞌ chiqawach apanoq na kuqꞌat ta tzij paqawiꞌ junam kukꞌ ri e aj mak.
1CO 11:33 E uwariꞌche nu hermanos, echiriꞌ kamol ibꞌ alaq che utijik ri cena re ri Qanimajawal, choyeꞌej na ibꞌ alaq chaꞌ junam katij alaq waꞌ.
1CO 11:34 Yey we kꞌo junoq che alaq lik kanumik, woꞌqa lo chirocho chaꞌ na kapetisaj ta alaq ri qꞌatbꞌal tzij re ri Dios pawiꞌ alaq ruma ri kaꞌan alaq echiriꞌ kamol ibꞌ alaq. Kꞌa kꞌo kuaj kanyijbꞌaꞌ chiwach alaq, pero kꞌate kojchꞌaꞌt puwiꞌ echiriꞌ kinopon ukꞌ alaq.
1CO 12:1 Hermanos, riꞌin lik kuaj ketaꞌmaj alaq chi utz puwi taq ri sipanik uyaꞌom ri Ruxlabꞌixel ri Dios chiqe chaꞌ rukꞌ waꞌ kaqaꞌan ruchak ri Qaqaw.
1CO 12:2 Ma etaꞌam alaq rojertan echiriꞌ kꞌamajaꞌ kꞌo alaq pa ri Qꞌijsaq, xsokotaj alaq y xya kꞌu ibꞌ alaq che kiloqꞌnimaxik tiox tobꞌ waꞌ na kechꞌaw taj.
1CO 12:3 Pero woꞌora lik kuaj ketaꞌmaj alaq waꞌ: We kꞌo junoq tzel kachꞌaꞌt chirij ri Jesús, riꞌ lik qꞌalaj na e ta ruma ri Ruxlabꞌixel ri Dios kubꞌiꞌij waꞌ. Noꞌj we kꞌo junoq kutzijoj: «Ri Jesús e Qanimajawal,» riꞌ e ruma ri Santowilaj Ruxlabꞌixel kubꞌiꞌij waꞌ, ma xew ri Ruxlabꞌixel ri Dios kaqꞌalajisan re waꞌ che junoq.
1CO 12:4 Tape alaq, kꞌi taq uwach ri sipanik yaꞌtal chiqe chaꞌ kaqaꞌan ruchak ri Dios; pero xa Jun ri kayaꞌw re, waꞌ e ri Ruxlabꞌixel ri Dios.
1CO 12:5 Lik kꞌi taq uwach ri chak; pero xa Jun kꞌu ri rajaw, waꞌ e ri Qanimajawal Jesucristo.
1CO 12:6 Yey ruꞌanik waꞌ wa chak kꞌi taq uwach; pero xa Jun ri kayaꞌw chiqe kaqaꞌan waꞌ, xew ri Dios.
1CO 12:7 Ri Dios uyaꞌom chiqajujunal riꞌoj kꞌutubꞌal re ri Ruxlabꞌixel Rire chupa ri qabꞌinik qasilabꞌik, waꞌ e re toꞌbꞌal ke rutinamit ri Dios.
1CO 12:8 Ma e kꞌo jujun yaꞌtal chike ruma ri Ruxlabꞌixel ri Dios kechꞌaꞌt rukꞌ saqil naꞌoj. Jekꞌulaꞌ ruma ri Ruxlabꞌixel ri Dios, yaꞌtal chike jujun chik kakitzijoj saꞌ ri uqꞌalajisam ri Dios chike.
1CO 12:9 E kꞌo kꞌu jujun chik yaꞌtal chike ruma ri Ruxlabꞌixel ri Dios lik kakikojo ri Dios kꞌo uchuqꞌabꞌ re kuꞌan ronoje tobꞌ lik kꞌayew. E kꞌo jujun chik yaꞌtal chike ruma ri Ruxlabꞌixel ri Dios kakiꞌan orar pakiwi ri yewaꞌibꞌ yey waꞌ kekunutajik.
1CO 12:10 Jekꞌulaꞌ e kꞌo jujun chik yaꞌtal chike kakiꞌan milagros rukꞌ ruchuqꞌabꞌ ri Qaqaw, y e kꞌo jujun chik yaꞌtal chike kakiqꞌalajisaj runaꞌoj ri Dios. E kꞌo jujun chik yaꞌtal chike kaketaꞌmaj we juna tzij petinaq rukꞌ ri Ruxlabꞌixel ri Dios. Jekꞌulaꞌ e kꞌo jujun chik yaꞌtal chike kechꞌaꞌt pa jujun chik chꞌaꞌtem na kimajom taj; yey e kꞌo kꞌu jujun chik yaꞌtal chike kakiqꞌalajisaj ri xbꞌiꞌx ruma junoq tobꞌ na kakiriq ta waꞌ wa chꞌaꞌtem.
1CO 12:11 Pero ronoje waꞌ yaꞌtal chiqe, e ruma ri Ruxlabꞌixel ri Dios, ri kaꞌanaw re ronoje. Yey e Rire kajachaw chiqajujunal saꞌ ri karaj kuya chiqe.
1CO 12:12 E pachaꞌ juna tikawex, tobꞌ kꞌi uwach ri chapayom re rucuerpo, waꞌ xa jun uꞌanom. Jekꞌulaꞌ uꞌanom ri Cristo qukꞌ qonoje riꞌoj.
1CO 12:13 Ma ri Ruxlabꞌixel ri Dios xuꞌan xa jun chiqe echiriꞌ xqakꞌul ri bautismo pa rubꞌiꞌ ri Cristo. Qonoje kꞌu riꞌ xa jun qawach, tobꞌ e kꞌo jujun chiqe e aj judiꞌabꞌ y jujun chik na e ta aj judiꞌabꞌ, tobꞌ ne jujun chik e aj chakibꞌ eloqꞌotal ruma kajaw yey jujun chik kechakun pa ke rike; pero qonoje junam qakꞌulum ri Uxlabꞌixel re ri Dios.
1CO 12:14 E juna cuerpo na xa ta jun uwach ri chapayom re, ma lik kꞌi uwach.
1CO 12:15 Ma we ta kachꞌaw ri aqanaj y kubꞌiꞌij kꞌu riꞌ: «Riꞌin na in ta re ri cuerpo ma na in ta qꞌabꞌaj.» Tobꞌ ne jelaꞌ riꞌ kubꞌiꞌij, lik rewi che ri cuerpo kꞌo wi.
1CO 12:16 Jekꞌulaꞌ we ta ri xikinaj kubꞌiꞌij: «Riꞌin na in ta re ri cuerpo ma na in ta wachaj.» Tobꞌ ne jelaꞌ riꞌ kubꞌiꞌij, lik rewi che ri cuerpo kꞌo wi.
1CO 12:17 We ta ronoje ri qacuerpo xa jun chi wachaj uꞌanom, ¿saꞌ kꞌu uꞌanik riꞌ kojtanik? Yey we ta ronoje ri qacuerpo xa jun chi xikinaj uꞌanom, ¿saꞌ kꞌu uꞌanik riꞌ kojuxlabꞌik?
1CO 12:18 Pero ri Dios uyaꞌom kan saꞌ taq ri kajawax che ri qacuerpo e chirij ri xraj Rire.
1CO 12:19 Ma we ta xa jun uwach ronoje ri chapayom re ri qacuerpo, lik na e ta kꞌana riꞌ.
1CO 12:20 Lik kꞌi uwach kꞌu riꞌ ri chapayom re ri qacuerpo, yey waꞌ xa jun uꞌanom.
1CO 12:21 E uwariꞌche ri wachaj na utz taj we kubꞌiꞌij che ri qꞌabꞌaj: «Riꞌat na katajawax ta chwe.» Jekꞌulaꞌ na utz ta nenareꞌ we ri jolomaj kubꞌiꞌij che raqanaj: «Riꞌat na katajawax ta chwe.»
1CO 12:22 Yey e janipa ri pachaꞌ na jinta ukowil che ri qacuerpo, e ne lik kebꞌajawax riꞌ chiqe.
1CO 12:23 Jekꞌulaꞌ e janipa ri pachaꞌ lik na il ta uwach che ri qacuerpo, e ne ri lik kaqachꞌuq chi utz; yey e janipa ri na utz taj kilitajik, e ne lik kojok il riꞌ che uchꞌuqik.
1CO 12:24 Noꞌj taq ri utz kilitaj chiqe, na jinta uchak kaqachꞌuqu. Ekꞌu ri Dios xyijbꞌan chi utz ri qacuerpo chaꞌ ri na il ta uwach chiqe, kojok más il che.
1CO 12:25 Ri Dios xuꞌan waꞌ chaꞌ janipa ri kꞌo che ri qacuerpo kujunimaj ribꞌ; jekꞌuriꞌlaꞌ janipa ri kꞌo che ri qacuerpo junam kakichajij kibꞌ.
1CO 12:26 Ruma kꞌu laꞌ we kꞌo juna kꞌax che ri qacuerpo, riꞌ ronoje ri qacuerpo kunaꞌ ukꞌaxkꞌolil. Jenelaꞌ we kꞌo ri lik kojok il che, riꞌ ronoje ri qacuerpo kakiꞌkotik.
1CO 12:27 Ralaq e alaq rucuerpo ri Cristo y chijujunal alaq kꞌo jun chak taqal che alaq kaꞌan alaq.
1CO 12:28 Ruma kꞌu laꞌ ri Dios ebꞌukojom e raj chak piglesia: nabꞌe, e ri e taqoꞌn re ri Jesús, ukaꞌm, e ri keqꞌalajisan re runaꞌoj ri Dios, urox, e ri e kꞌutunel re taq rukꞌutunik ri Dios, yey e kꞌo ri kakiꞌan milagros rukꞌ ruchuqꞌabꞌ ri Dios, ri kekunan rukꞌ ruchuqꞌabꞌ ri Dios, ri kiyaꞌom kibꞌ che kekitoꞌ jujun chik, ri yaꞌtal chike kakichap utzaꞌm ri chak piglesia y ri yaꞌtal chike kechꞌaꞌt pa jujun chik chꞌaꞌtem na kimajom taj.
1CO 12:29 Junwi taq ri chak. Ma ¿qonoje nebꞌa oj taqoꞌn? ¿Qonoje nebꞌa oj qꞌalajisanel re runaꞌoj ri Dios? ¿Qonoje nebꞌa oj kꞌutunel? ¿Qonoje nebꞌa oj ꞌanal milagros?
1CO 12:30 ¿Qonoje nebꞌa yaꞌtal chiqe oj kunanel? ¿Qonoje nebꞌa kojchꞌaꞌt pa jujun chik chꞌaꞌtem yaꞌtal ruma ri Ruxlabꞌixel ri Dios? ¿Qonoje nebꞌa oj qꞌalajisanel re ri xbꞌiꞌx ruma junoq pa jun chik chꞌaꞌtem yaꞌtal ruma ri Ruxlabꞌixel ri Dios? Na qonoje taj.
1CO 12:31 Rayij kꞌu alaq uriqik ri chak lik chirajawaxik che riglesia. Yey riꞌin kankꞌut chi jun bꞌe che alaq, ri más chirajawaxik wi chwa ronoje waꞌ, e ri rutzil kꞌuꞌxaj.
1CO 13:1 We ta e laꞌ riꞌin kanriq kinchꞌaꞌt pa ukꞌiyal chꞌaꞌtem ke ri tikawex y kanriq ne ri kichꞌaꞌtem ri ángeles yey na jinta ri rutzil ukꞌuꞌx ri Dios pa wanimaꞌ, riꞌ xa in pachaꞌ ri chꞌichꞌ kayojoyotik o ri chꞌichꞌ katzinowik.
1CO 13:2 We ta e laꞌ yaꞌtal chwe kanqꞌalajisaj runaꞌoj ri Dios chikiwach ri tikawex y kanmaj usukꞌ ronoje ri ewatal chikiwach jujun chik y kanmaj usukꞌ ronoje naꞌoj, y we ta lik kꞌo kubꞌulibꞌal nukꞌuꞌx rukꞌ ri Dios chaꞌ utz rukꞌ waꞌ kanjalkꞌatij ne kiluwar ri nimaq taq juyubꞌ, yey na jinta ri rutzil ukꞌuꞌx ri Dios pa wanimaꞌ, riꞌ na jinta kꞌana nuchak chwach ri Dios.
1CO 13:3 We ta e laꞌ kanjach chike ri nibꞌaꞌibꞌ ronoje ri bꞌitaq we y tobꞌ ne kanya wibꞌ re kimporoxik xa re takꞌabꞌal nuqꞌij, yey na jinta ri rutzil ukꞌuꞌx ri Dios pa wanimaꞌ, riꞌ na jinta kꞌana kutiqoj chwe.
1CO 13:4 We junoq kꞌo ri rutzil ukꞌuꞌx ri Dios pa ranimaꞌ, riꞌ kꞌo unimal ukꞌuꞌx kukꞌ ri tikawex, lik utz ukꞌuꞌx, na kꞌax ta ukꞌuꞌx chirij junoq, na kutakꞌabꞌaꞌ ta uqꞌij y na kuꞌan ta nim che ribꞌ.
1CO 13:5 We junoq kꞌo ri rutzil ukꞌuꞌx ri Dios pa ranimaꞌ, riꞌ na kuꞌan ta ri na taqal ta che. Na xew ta kok il che ri kajawax che rire, ma e ne kok il che ri kajawax chike ri jujun chik. Na xa ta rukꞌ jutzꞌit kape royowal y na kukꞌol ta oyowal pa ranimaꞌ.
1CO 13:6 We junoq kꞌo ri rutzil ukꞌuꞌx ri Dios pa ranimaꞌ, riꞌ kubꞌisoj ri na jusukꞌ taj kaꞌanik yey lik kakiꞌkot che ri jusukꞌ kaꞌanik.
1CO 13:7 We junoq kꞌo ri rutzil ukꞌuꞌx ri Dios pa ranimaꞌ, riꞌ kuyul re ronoje, lik kubꞌul ukꞌuꞌx rukꞌ ri Dios y kukꞌ ri jujun chik, xaqi e royeꞌem ri utz y kuchꞌij uchuqꞌabꞌ janipa ri kape puwiꞌ.
1CO 13:8 Ri rutzil kꞌuꞌxaj re ri Dios na kasach ta kꞌana uwach. Pero kopon ri qꞌij echiriꞌ na kayaꞌ ta chi che junoq kuqꞌalajisaj runaꞌoj ri Dios, na kayaꞌ ta chi ne che junoq kachꞌaꞌt pa jujun chik chꞌaꞌtem na umajom taj y na kayaꞌ ta chi ne che junoq kutzijoj ri uqꞌalajisam ri Dios che; ma ronoje waꞌ xa kakꞌisik.
1CO 13:9 Woꞌora na qetaꞌam ta ronoje y na kaqariq ta uqꞌalajisaxik ronoje runaꞌoj ri Dios.
1CO 13:10 Pero kopon na kꞌu ri qꞌij echiriꞌ ronoje katzꞌaqat uwach; ekꞌu riꞌ ri na tzꞌaqat taj, xa kakꞌisik.
1CO 13:11 Ma riꞌin echiriꞌ in kꞌoꞌm, ronoje ri kambꞌiꞌij, ri kanchꞌobꞌo y ri kanmaj usukꞌ e re juna kꞌoꞌm. Noꞌj echiriꞌ xinnimarik, xinya kan ri kanꞌan chi nuchꞌutiꞌnal.
1CO 13:12 Woꞌora e pachaꞌ kojtzuꞌn pa juna espejo sutzꞌ uwach; noꞌj kopon na ri qꞌij kaqil uwach ri Dios, kꞌa ekꞌuchiriꞌ kaqꞌalajin chiqawach ri kaqilo. Woꞌora na kaqꞌalajin ta ronoje chinuwach; noꞌj kꞌo kꞌu jun qꞌij echiriꞌ kaqꞌalajin ronoje chinuwach, jelaꞌ pachaꞌ ri Dios lik retaꞌam ronoje ri kꞌo pa wanimaꞌ.
1CO 13:13 Woꞌora chirajawaxik kakꞌojiꞌ kubꞌulibꞌal qakꞌuꞌx rukꞌ ri Dios tobꞌ kꞌamajaꞌ kaqil uwach, kaqoyꞌej rubꞌiꞌtisim kan ri Dios chiqe y kakꞌojiꞌ ri rutzil ukꞌuꞌx ri Dios pa qanimaꞌ. Chike kꞌu wa oxibꞌ, ri más kajawax chiqe e ri rutzil kꞌuꞌxaj.
1CO 14:1 Choka kꞌu alaq il che kakꞌojiꞌ ri rutzil kꞌuꞌxaj pa animaꞌ alaq, yey rayij alaq uriqik janipa ri uyaꞌom ri Ruxlabꞌixel ri Dios chiqe re ꞌanabꞌal ruchak. Y che taq waꞌ wa yaꞌtal chiqe, ri lik kajawaxik e ri qꞌalajisanik re runaꞌoj ri Dios.
1CO 14:2 Ma e ri jun yaꞌtal che ruma ri Ruxlabꞌixel ri Dios kachꞌaꞌt pa juna chik chꞌaꞌtem na umajom taj y na kamajtaj ta usukꞌ, e rukꞌ ri Dios kachꞌaꞌt wi, na e ta kukꞌ ri tikawex. Ma na jinta junoq kamajaw usukꞌ ri kubꞌiꞌij, ma waꞌ ewatal chikiwach ri tikawex.
1CO 14:3 Noꞌj ri jun kuqꞌalajisaj runaꞌoj ri Dios, kubꞌiꞌij waꞌ chike ri tikawex re kikꞌiyibꞌal chwach ri Dios, re pixabꞌanik y re kunimarisaj kikꞌuꞌx.
1CO 14:4 Ri jun yaꞌtal che kachꞌaꞌt pa juna chꞌaꞌtem na umajom taj, kuꞌan waꞌ re toꞌbꞌal chiribꞌil ribꞌ. Noꞌj kꞌu ri jun yaꞌtal che kuqꞌalajisaj runaꞌoj ri Dios, riꞌ e kebꞌutoꞌ konoje ri ketaw re y jelaꞌ kekꞌiy ri tinamit re ri Cristo.
1CO 14:5 Chinuwach riꞌin utz we ta kayaꞌiꞌ che onoje alaq ri kachꞌaꞌt alaq pa jujun chik chꞌaꞌtem na majom ta alaq, pero ri lik utz e we ta kayaꞌiꞌ che alaq kaqꞌalajisaj alaq runaꞌoj ri Dios pa ri chꞌaꞌtem alaq. Ma waꞌ más kꞌo kutiqoj che riglesia chwa ri xa kꞌo kabꞌiꞌx pa juna chik chꞌaꞌtem na kamajtaj ta usukꞌ. Yey waꞌ xew kꞌo kutiqoj che riglesia we kꞌo junoq kuqꞌalajisaj saꞌ keꞌelawi ri xbꞌiꞌxik, y kubꞌiꞌij kꞌu waꞌ pa kichꞌaꞌtem ri ketaw re.
1CO 14:6 Ma we e laꞌ kinopon ukꞌ alaq hermanos y xew kinchꞌaꞌt chiwach alaq pa juna chꞌaꞌtem na kamaj ta alaq usukꞌ, ¿saꞌ kutiqoj riꞌ che alaq? Na jintaj. Noꞌj we pa ri chꞌaꞌtem alaq kantzijoj rukꞌutum ri Dios chwe, kantzijoj ri wetaꞌam puwi ri Qꞌijsaq, kantzijoj ruqꞌalajisam ri Dios chwe o juna kꞌutunik, ronoje taq kꞌu riꞌ waꞌ lik kꞌo kutiqoj che alaq.
1CO 14:7 Ri jujun chik chꞌaꞌtem na kamajtaj ta usukꞌ kanjunimaj rukꞌ jun suꞌ o jun arpa; ma we na qꞌalaj ta uchꞌawisaxik kaꞌanik, na kamajtaj ta usukꞌ ri kachꞌawisaxik.
1CO 14:8 Y jelaꞌ ri trompeta kachꞌawisaxik chaꞌ ri soldados kakiyijbꞌaꞌ kibꞌ re kebꞌek pa chꞌaꞌoj. Pero we na qꞌalaj ta uchꞌawisaxik kaꞌanik, ri soldados na kebꞌok ta il che.
1CO 14:9 Jekꞌulaꞌ ralaq, we ri chꞌaꞌtem kel lo pachiꞌ alaq na qꞌalaj taj, ¿suꞌanik kꞌu riꞌ kamajtaj usukꞌ ri kabꞌiꞌij alaq? Ma riꞌ xa e pachaꞌ kasach ri chꞌaꞌtem alaq pa ri tew.
1CO 14:10 Qatzij wi ukꞌiyal chꞌaꞌtem kꞌo che ruwachulew y chujujunal lik kꞌo taq ubꞌe chikiwach ri kechꞌaꞌtibꞌen re.
1CO 14:11 Yey we riꞌin na wetaꞌam taj saꞌ keꞌelawi ruchꞌaꞌtem junoq, riꞌ pachaꞌ in juna aj naj chwach ri kachꞌaꞌtik yey rire e juna aj naj chinuwach riꞌin.
1CO 14:12 Ekꞌu ralaq, ruma ri lik karayij alaq ri kuya ri Dios re ꞌanabꞌal ruchak, e lik tzukuj alaq uꞌanik ri lik kebꞌutoꞌ riglesia chaꞌ ketikiꞌ jusukꞌ chwach ri Dios.
1CO 14:13 Ruma kꞌu laꞌ we kꞌo junoq yaꞌtal che ruma ri Ruxlabꞌixel ri Dios kachꞌaꞌt pa juna chꞌaꞌtem na umajom taj, chutzꞌonoj kꞌu riꞌ che ri Dios chaꞌ kayaꞌtaj che kuqꞌalajisaj waꞌ pa kichꞌaꞌtem ri ketaw re.
1CO 14:14 Ma we e laꞌ riꞌin kanꞌan orar pa juna chꞌaꞌtem na kanmaj ta usukꞌ, e ri wanimaꞌ ri kachꞌaꞌt rukꞌ ri Dios, pero ri nunaꞌoj na jinta kꞌo karesaj che.
1CO 14:15 ¿Saꞌ kꞌu riꞌ ri kanꞌano? Kꞌo jutaq laj kanꞌan orar y kambꞌixoj rubꞌiꞌ ri Dios pa juna chꞌaꞌtem na kanmaj ta usukꞌ tobꞌ xew ri wanimaꞌ kachꞌaꞌt rukꞌ Rire, pero también rukꞌ ri nunaꞌoj kanꞌan orar y kambꞌixoj rubꞌiꞌ ri Dios pa ri chꞌaꞌtem kanmaj usukꞌ.
1CO 14:16 Ma we rilal kayak la uqꞌij ri Dios pa juna chik chꞌaꞌtem na kamajtaj ta usukꞌ yey waꞌ uyaꞌom ri Ruxlabꞌixel ri Dios cheꞌla, y ri ketaw re na kakiriq ta kꞌu ri chꞌaꞌtem yaꞌtal cheꞌla, ¿saꞌ kꞌu uꞌanik riꞌ kakibꞌiꞌij rike «Amén» che ri tioxibꞌal xꞌan la we na xkimaj ta usukꞌ ri xbꞌiꞌij la?
1CO 14:17 Y tobꞌ lik chom ri tioxibꞌal kaꞌan rilal, waꞌ na jinta kutiqoj che ri kibꞌinik kisilabꞌik ri ketaw re.
1CO 14:18 Kantioxij che ri Dios ma riꞌin más yaꞌtal chwe chiwach ralaq kinchꞌaꞌt pa jujun chik chꞌaꞌtem na numajom taj.
1CO 14:19 Na rukꞌ ta kꞌu riꞌ, echiriꞌ kimolom kibꞌ ri tinamit re ri Cristo, más kuaj kambꞌiꞌij tobꞌ kebꞌ oxibꞌ chꞌaꞌtem lik kamajtaj usukꞌ chaꞌ jelaꞌ kꞌo kakimaj ri jujun chik che, chwa ri kanwererej lajuj mil chi chꞌaꞌtem pa juna chꞌaꞌtem na qꞌalaj taj.
1CO 14:20 Hermanos, ri naꞌoj alaq chuꞌana pachaꞌ ri kinaꞌoj ri e nimaꞌq chik. Maꞌan e alaq pachaꞌ alaq akꞌalabꞌ puwi ri kachꞌobꞌ alaq, tobꞌ utz we e kaꞌan alaq pachaꞌ akꞌalabꞌ chwach ri mak, ma rakꞌalabꞌ kꞌamajaꞌ kaketaꞌmaj waꞌ.
1CO 14:21 Ma chupa Rutzij Upixabꞌ ri Dios tzꞌibꞌital kanoq: Pa taq chꞌaꞌtem junwi y kuma taq tikawex e aj naj kinchꞌaꞌt kukꞌ wa tinamit. Yey tobꞌ kꞌu jewaꞌ kanꞌano, na kakikoj ta nutzij kacha ri Dios Qajawxel.
1CO 14:22 Echiriꞌ junoq kachꞌaꞌt pa juna chꞌaꞌtem na kamajtaj ta usukꞌ, waꞌ e jun kꞌutubꞌal chike ri na kikojom ta rubꞌiꞌ ri Cristo; noꞌj na je ta laꞌ kukꞌ ri kikojom chi rubꞌiꞌ. Ekꞌu ri qꞌalajisanik re runaꞌoj ri Dios, na e ta ke ri na kikojom ta rubꞌiꞌ ri Cristo, ma e ke ri kikojom chi rubꞌiꞌ.
1CO 14:23 Ma we e laꞌ kimolom kibꞌ ri tinamit re ri Cristo y konoje kꞌut kechꞌaꞌt pa taq chꞌaꞌtem na kamajtaj ta usukꞌ, yey kok kꞌu bꞌi junoq kꞌamajaꞌ kumaj usukꞌ saꞌ waꞌ o junoq kꞌamajaꞌ kukoj rubꞌiꞌ ri Cristo, ¿saꞌ kꞌu ri kuchꞌobꞌ che waꞌ? ¿Na kubꞌiꞌij ta nawi chꞌuꞌjerinaq alaq?
1CO 14:24 Noꞌj we kok bꞌi junoq kꞌamajaꞌ kukoj rubꞌiꞌ ri Cristo o kꞌamajaꞌ kumaj usukꞌ saꞌ waꞌ yey kuto katajin alaq che ubꞌiꞌxikil saꞌ ri uqꞌalajisam ri Dios che alaq; rukꞌ kꞌu ronoje riꞌ ri kabꞌiꞌij alaq, kunaꞌ ribꞌ rire aj mak chwach ri Dios.
1CO 14:25 Kaqꞌalajin kꞌu riꞌ saꞌ ri kꞌo pa ranimaꞌ y jelaꞌ kaqaj umejelem, kuloqꞌnimaj uqꞌij ri Dios y kubꞌiꞌij paqatzij wi kꞌo ri Dios chixoꞌlibꞌal alaq.
1CO 14:26 ¿Saꞌ kꞌu riꞌ rusukꞌ kaꞌan alaq hermanos echiriꞌ kamol ibꞌ alaq? Utz we e kꞌo ri kakibꞌixoj rubꞌiꞌ ri Dios, e kꞌo ri kakiya kꞌutunik, e kꞌo ri keqꞌalajisan juna tzij re ri Dios. Utz we e kꞌo ri kechꞌaꞌt pa juna chik chꞌaꞌtem na kimajom taj yey e kꞌo ri keqꞌalajisan re wa chꞌaꞌtem. ꞌAna kꞌu alaq ronoje waꞌ re ukꞌiyibꞌal ri kibꞌinik kisilabꞌik rutinamit ri Dios.
1CO 14:27 Y echiriꞌ molom ibꞌ alaq, utz we xa e kaꞌibꞌ o e oxibꞌoq kechꞌaꞌt pa chꞌaꞌtem na kamajtaj ta usukꞌ; y kiꞌana kꞌu waꞌ pa jujun, na xa ta jumul. Yey kajawaxik kꞌo junoq kaqꞌalajisan re waꞌ.
1CO 14:28 Pero we chikixoꞌl ri hermanos kimolom kibꞌ chiriꞌ na jinta junoq kariqow uqꞌalajisaxik ri kakibꞌiꞌij, mechꞌaw kꞌu riꞌ; xew chechꞌaꞌta rukꞌ ri Dios pa kanimaꞌ.
1CO 14:29 Jekꞌulaꞌ, utz we xa e kaꞌibꞌ o e oxibꞌoq kakitzijoj saꞌ ri uqꞌalajisam ri Dios chike. Yey ri ketaw re lik kichꞌobꞌo chi utz, we waꞌ e utzij ri Dios che rutinamit.
1CO 14:30 We kꞌo junoq katzijonik yey kꞌo kuqꞌalajisaj ri Dios che junoq chik tzꞌulik, ri katzijonik e chutanabꞌaꞌ ri kubꞌiꞌij; tekꞌuchiriꞌ, ri jun chik utz kujeq ubꞌiꞌxikil ri tzij xuqꞌalajisaj ri Dios che.
1CO 14:31 Ma e taq ri yaꞌtal juna tzij re ri Dios chike, utz we chikijujunal kakiqꞌalajisaj waꞌ, pero kiꞌana kꞌu waꞌ pa jujun, na xa ta jumul, chaꞌ jelaꞌ konoje kꞌo kakimaj che y kepixabꞌax ruma.
1CO 14:32 E junoq yaꞌtal che kuqꞌalajisaj juna tzij re ri Dios, kꞌo puqꞌabꞌ ruchapabꞌexik waꞌ.
1CO 14:33 Ma ri Dios e Dios re utzil chomal, na re ta sachibꞌal naꞌoj. Ekꞌu taqej alaq ri kakiꞌan taq rutinamit ri Dios echiriꞌ kakimol kibꞌ.
1CO 14:34 Rixoqibꞌ mechꞌaꞌtik echiriꞌ kamol ibꞌ alaq pa rubꞌiꞌ ri Cristo. Ma ri taqal chike rike e kakikoj tzij jelaꞌ pachaꞌ ri kubꞌiꞌij Rutzij Upixabꞌ ri Dios.
1CO 14:35 Rixoqibꞌ we kꞌo kakaj kaketaꞌmaj, kitzꞌonoj kꞌu riꞌ chike ri kachijil chikocho, ma na ubꞌe taj kechꞌaꞌt piglesia.
1CO 14:36 Kꞌuna chikꞌuꞌx alaq, na ukꞌ ta alaq petinaq wi ri Tzij Pixabꞌ re ri Dios y na xew ta ukꞌ ralaq oponinaq wi.
1CO 14:37 We kꞌo kꞌu junoq che alaq kuchꞌobꞌo kuriq uqꞌalajisaxik Rutzij ri Dios o lik kumaj usukꞌ runaꞌoj ri Dios, riꞌ chirajawaxik karetaꞌmaj waꞌ: Ri kantzꞌibꞌaj che alaq, ronoje e Utzij Upixabꞌ lo ri Qanimajawal.
1CO 14:38 Pero we kꞌo junoq na karaj ta kukoj wa nubꞌiꞌim loq, rukꞌ kꞌu rire kꞌo wi.
1CO 14:39 E uwariꞌche hermanos, yaꞌa ibꞌ alaq che uqꞌalajisaxik ri tzij yaꞌom che alaq ruma ri Dios. Yey meqꞌatej alaq ri kechꞌaꞌt pa jujun chik chꞌaꞌtem yaꞌtal chike ruma ri Ruxlabꞌixel ri Dios.
1CO 14:40 Xew kꞌu lik ꞌana alaq ronoje chi utz y chucholaꞌj e chirij ri taqalik kaꞌanik.
1CO 15:1 Ekꞌu woꞌora, hermanos, kuaj kankuxtaj che alaq wa Utzilaj Tzij nutzijom chi che alaq; e ri xkoj alaq y chupa ne waꞌ tikil wi alaq.
1CO 15:2 Ruma kꞌu wa Utzilaj Tzij, kariq alaq ri chomilaj kꞌaslemal petinaq rukꞌ ri Dios we lik tikil alaq chupa wa nutzijom che alaq. Noꞌj we na tikil ta alaq chupa, na jinta kꞌu xutiqoj riꞌ xkoj alaq rubꞌiꞌ ri Cristo.
1CO 15:3 Ma ri nukꞌutunik che alaq e ri xkꞌut chwe riꞌin, yey rukꞌuꞌxibꞌal ri kꞌutunik e waꞌ: Ri Cristo xkam ruma ri qamak jelaꞌ pachaꞌ ri tzꞌibꞌital kan chupa Ruchꞌaꞌtem ri Dios.
1CO 15:4 Yey Rire xmuqik pero churox qꞌij xkꞌastaj lo chikixoꞌl ri ekaminaq, jelaꞌ pachaꞌ ri tzꞌibꞌital kan chupa Ruchꞌaꞌtem ri Dios.
1CO 15:5 Ri Jesús xukꞌut uwach chwach ri Cefas; tekꞌuchiriꞌ, chikiwach ri kabꞌlajuj utaqoꞌn.
1CO 15:6 Tekꞌuchiriꞌ xukꞌut uwach chikiwach ukꞌiyal hermanos echiriꞌ kimolom kibꞌ, yey ri kajlibꞌal waꞌ kikꞌow ne uwiꞌ che ri woꞌobꞌ ciento. Y chike waꞌ e kꞌi ri kꞌa e kꞌaslik, tobꞌ e kꞌo jujun chike ya xekamik.
1CO 15:7 Yey xukꞌut uwach chwach ri Jacobo; tekꞌuchiriꞌ xukꞌut tanchi uwach chikiwach konoje rutaqoꞌn.
1CO 15:8 Kꞌisbꞌal chi kꞌu re, xukꞌut uwach chinuwach riꞌin, tobꞌ pachaꞌ in juna ralko neꞌ xalaxik na chupa ta ruqꞌijol.
1CO 15:9 Xukꞌut kꞌu uwach chinuwach riꞌin, tobꞌ ne lik na jinta ko nuwach chikiwach ri nikꞌaj chik utaqoꞌn ri Cristo, ma riꞌin lik xebꞌenuternabꞌej rukꞌ kꞌaxkꞌobꞌik rutinamit ri Dios, ri kikojom rubꞌiꞌ ri Cristo. E uwariꞌche na taqal tane kabꞌiꞌx chwe in utaqoꞌn.
1CO 15:10 Pero ruma ri unimal rutzil ukꞌuꞌx ri Dios wukꞌ, yaꞌtal chwe in jun chike rutaqoꞌn ri Jesús. Yey wa unimal rutzil ukꞌuꞌx lik kꞌo xutiqoj ma yaꞌtal chwe más kinchakun chikiwach ri jujun chik utaqoꞌn; tobꞌ waꞌ na in tane in ꞌanayom re, ma e ꞌanayom re ri rutzil ukꞌuꞌx ri Dios wukꞌ.
1CO 15:11 Tobꞌ china kꞌu ri kaꞌanaw ri chak, we e riꞌin o e rike, pero xa jun rutzijoxik kaqaꞌano; yey e ne waꞌ ri kojom ralaq.
1CO 15:12 We kaqatzijoj kꞌu rukꞌastajibꞌal ri Cristo chikixoꞌl ri ekaminaq, ¿suꞌchak kꞌu riꞌ kꞌa e kꞌo jujun che alaq kakibꞌiꞌij na jinta kꞌastajibꞌal chike ri ekaminaq?
1CO 15:13 Ma we ta e laꞌ na jinta kꞌastajibꞌal chike ri ekaminaq, e keꞌelawi riꞌ na xkꞌastaj ta ri Cristo.
1CO 15:14 Yey we ri Cristo na xkꞌastaj taj, na jinta kutiqoj riꞌ ri kaqatzijoj y na jinta ne kutiqoj riꞌ ri kubꞌulibꞌal kꞌuꞌx alaq rukꞌ Rire.
1CO 15:15 Yey we na jinta junoq kakꞌastaj lo chikixoꞌl ri ekaminaq, riꞌ kojuꞌan xa oj aj raqꞌul chirij ri Dios ma xqabꞌiꞌij Rire xukꞌastajisaj lo ri Cristo.
1CO 15:16 Ma we ta e laꞌ na kekꞌastaj ta ri ekaminaq, na xkꞌastaj tane riꞌ ri Cristo.
1CO 15:17 Yey we ri Cristo na xkꞌastaj taj, na jinta kutiqoj riꞌ ri kubꞌulibꞌal kꞌuꞌx alaq rukꞌ y kꞌa sachinaq ne alaq riꞌ pa mak.
1CO 15:18 Yey we ta e riꞌ, ri xekamik kikojom bꞌi rubꞌiꞌ ri Cristo, xa jumul riꞌ xsach kiwach.
1CO 15:19 Ekꞌu riꞌoj, ri qakojom rubꞌiꞌ ri Cristo, we ta xew wara che ruwachulew kꞌo qoyeꞌem che Rire, riꞌ chike konoje ri tikawex che ruwachulew e riꞌoj ri más bꞌisobꞌal uwach ri qakꞌulumam.
1CO 15:20 Pero na e ta kꞌu riꞌ, ma ri Cristo paqatzij wi xkꞌastajik. Yey e Rire ri nabꞌe xkꞌastaj lo chikixoꞌl ri ekaminaq, y waꞌ e kꞌutubꞌal re kꞌo kꞌastajibꞌal chike ri ekaminaq.
1CO 15:21 Ma jelaꞌ pachaꞌ ri kamik xok kukꞌ konoje ri tikawex ruma jun chi achi, waꞌ e ri nabꞌe tikawex; jekꞌuriꞌlaꞌ ri kꞌastajibꞌal ke ri ekaminaq e ruma jun chi Achi, waꞌ e ri Cristo.
1CO 15:22 Qonoje kꞌu riꞌ ri oj tikawex xa kojkamik ma junam qawach rukꞌ ri Adán, ma oj aj mak jelaꞌ pachaꞌ rire; yey qonoje kꞌu ri oj re ri Cristo, kaqariq jun chomilaj kꞌaslemal na jinta utaqexik.
1CO 15:23 Pero ri kꞌastajibꞌal qe riꞌoj, e kuꞌana na chupa ruqꞌijol. Ma ri nabꞌe xkꞌastajik e ri Cristo, yey we xkꞌun tanchi Rire, kꞌa tekꞌuchiriꞌ kojkꞌastaj janipa ri oj re Rire.
1CO 15:24 Rukꞌ kꞌu rukꞌunik ri Cristo, kakꞌun ri kꞌisbꞌal qꞌij. Yey kuꞌana waꞌ echiriꞌ ri Cristo kusachisaj kiwach konoje ri kechꞌoꞌjin chirij; waꞌ e ri e taqanelabꞌ, ri kꞌo kiwach y ri kꞌo kichuqꞌabꞌ. Y kuya na kꞌu ronoje riꞌ ri taqanik puqꞌabꞌ ri Qaqaw Dios.
1CO 15:25 Ma lik chirajawaxik ri Cristo kataqan na puwi ronoje, kebꞌuya na kꞌu chuxeꞌ ri raqan konoje ri kechꞌoꞌjin chirij.
1CO 15:26 Y kꞌisbꞌal kꞌu re, e kasachisax uwach ri kamik.
1CO 15:27 Ri Dios uyaꞌom chi ronoje puqꞌabꞌ Rukꞌajol, ma tzꞌibꞌital kanoq: «Ronoje taq kꞌu riꞌ ri kꞌolik, xya la puqꞌabꞌ» kachaꞌ. Pero echiriꞌ kubꞌiꞌij «ronoje», waꞌ na e ta keꞌelawi ri Dios uyaꞌom ribꞌ puqꞌabꞌ Rukꞌajol, ma e ne ri Dios xyaꞌw ronoje puqꞌabꞌ Rukꞌajol.
1CO 15:28 Y echiriꞌ ronoje kꞌo chi chuxeꞌ ri raqan Rukꞌajol ri Dios, Rire kuya tanchi na ronoje puqꞌabꞌ Ruqaw, ri xyaꞌw re ronoje che; y jelaꞌ ri Dios kakꞌojiꞌ puwi ronoje ri kꞌolik.
1CO 15:29 Yey we na jinta kꞌastajibꞌal ke ri ekaminaq, ¿suꞌchak kꞌu riꞌ e kꞌo jujun chixoꞌl alaq kakikꞌul ri bautismo pa kibꞌiꞌ ri ekaminaq chik? ¿Saꞌ kutiqoj riꞌ chike kakiꞌan waꞌ?
1CO 15:30 Yey we na jinta kꞌastajibꞌal chiqe, ¿saꞌ ne kutiqoj riꞌ xaqi katewun ri kamik paqawiꞌ riꞌoj ruma kaqatzijoj ri Utzilaj Tzij?
1CO 15:31 Paqatzij wi hermanos, lik kinkiꞌkot uma ralaq, ma wuma riꞌin kojom alaq rubꞌiꞌ ri Qanimajawal Jesucristo. Ruma kꞌu laꞌ na kinok ta il che ri kamik katewun panuwiꞌ ronoje qꞌij.
1CO 15:32 Chilaꞌ Éfeso lik xinchꞌoꞌjin kukꞌ “itzel taq awaj”. We ta na jinta nukꞌaslemal chilaꞌ chikaj, ¿saꞌ kꞌu kutiqoj riꞌ kankꞌulumaj taq waꞌ che ruwachulew? We ta na kekꞌastaj ta ri ekaminaq, kꞌo kutiqoj ne riꞌ ri tzij kabꞌiꞌxik: Chojwoꞌqoq, chojqꞌabꞌaroq ma xa kojkamik kachaꞌ.
1CO 15:33 Masokotaj kꞌu alaq riꞌ rukꞌ waꞌ; ma e pachaꞌ ri jun tzij jewaꞌ kubꞌiꞌij: «We juna achi jusukꞌ ubꞌinik usilabꞌik kerachbꞌilaj ri na jusukꞌ ta kinaꞌoj y na chom ta kechꞌawik, riꞌ kayojtaj ri saqil ubꞌinik usilabꞌik» kachaꞌ.
1CO 15:34 Lik kꞌu chirajawaxik kakꞌun saq chiwach ralaq y mamakun chi alaq. Y chaꞌ kakꞌix kꞌana alaq che, kambꞌiꞌij waꞌ che alaq: Kꞌa e kꞌo ne jujun che alaq na ketaꞌam ta uwach ri Dios.
1CO 15:35 Laj ne kꞌo junoq kuꞌan wa tzꞌonobꞌal: «¿Suꞌanik kekꞌastaj ri ekaminaq? ¿Saꞌ ri kicuerpo we xekꞌastajik?» kachaꞌ.
1CO 15:36 Ri katzꞌonow re waꞌ, lik qꞌalaj na kumaj ta usukꞌ puwi ri kꞌastajibꞌal. Ma ri kꞌastajibꞌal e pachaꞌ juna ijaꞌ. Echiriꞌ katikik, nabꞌe na kachaqijik; kꞌa tekꞌuchiriꞌ katuxik.
1CO 15:37 Yey ri katikik, tobꞌ ijaꞌ re trigo o juna chik tikoꞌn, na junam ta chi katzuꞌnik echiriꞌ kel loq, ma rijaꞌ lik junwi katzuꞌn chwa rutux.
1CO 15:38 Ri Dios kuꞌan che ri tikoꞌn kabꞌojanik jelaꞌ pachaꞌ ri karaj Rire, y chujujunal uwach taq rijaꞌ kuꞌan che jelaꞌ pachaꞌ ri taqal che.
1CO 15:39 Kꞌi taq kiwach ri e kꞌo che ruwachulew. Jelaꞌ pachaꞌ ri tikoꞌn junwi, jekꞌulaꞌ taq ri kꞌo kitiꞌjil, na junam ta kiwach. Ma junwi ri kitiꞌjil ri tikawex y junwi ri kitiꞌjil ri chikop; jekꞌulaꞌ junwi ri kitiꞌjil ri kar yey junwi ri kitiꞌjil rawaj kexikꞌikꞌik.
1CO 15:40 Kꞌo kꞌu e ꞌanatalik e kiwach e kꞌo chikaj, yey kꞌo e ꞌanatalik e kiwach e kꞌo che ruwachulew. Ma junwi ri kichomalil ri e kꞌo chikaj chwa ri kichomalil ri e kꞌo che ruwachulew.
1CO 15:41 Taq ri e kꞌo chikaj, konoje kewonik, pero na junam ta ri kiwonibꞌal. Ma ruwonibꞌal ri qꞌij junwi chwa ruwonibꞌal ri ikꞌ y ri chꞌumil. Yey chikijujunal chꞌumil junwi taq ne ri kichomalil.
1CO 15:42 Ri kukꞌut wa jun kꞌambꞌal naꞌoj puwi rijaꞌ e waꞌ: Ri qacuerpo che ruwachulew junwi chwa ri kayaꞌ chiqe chiqawach apanoq. Echiriꞌ kojkamik, ri qacuerpo kamuqik y kaqꞌayik. Yey echiriꞌ kojkꞌastajik, lik junwi ri qacuerpo, ma waꞌ na kakam ta chik.
1CO 15:43 Ri qacuerpo echiriꞌ kamuqik, na jinta kꞌana uwach. Noꞌj we xkꞌastaj lo che ri kamik, kuꞌana lik kꞌo uwach. Jekꞌulaꞌ echiriꞌ kamuq ri qacuerpo, na jinta kꞌana uchuqꞌabꞌ; noꞌj we xkꞌastaj loq, kuꞌana lik kꞌo uchuqꞌabꞌ.
1CO 15:44 Ri qacuerpo echiriꞌ kamuqik, xa re ruwachulew; noꞌj echiriꞌ kakꞌastaj lo che ri kamik, kuꞌana jun cuerpo lik rewi re ri kꞌaslemal chilaꞌ chikaj. Ma jelaꞌ pachaꞌ wa qacuerpo lik rewi re ri qakꞌaslem wara che ruwachulew, jekꞌulaꞌ kajawax jun qacuerpo lik rewi re ri qakꞌaslemal chilaꞌ chikaj.
1CO 15:45 Ma tzꞌibꞌital kan chupa Ruchꞌaꞌtem ri Dios: “Echiriꞌ xꞌan ri nabꞌe achi Adán, xyaꞌ ukꞌaslem.” Noꞌj ri “ukaꞌm Adán” (waꞌ e ri Cristo) e aj yaꞌl ri chomilaj kꞌaslemal na jinta utaqexik.
1CO 15:46 Ri qacuerpo xyaꞌ nabꞌe, xa e re ruwachulew. Chiqawach kꞌu apanoq kayaꞌ jun cuerpo chiqe lik rewi re ri qakꞌaslemal chilaꞌ chikaj.
1CO 15:47 Ri nabꞌe achi e re ruwachulew, ma xꞌaniꞌ rukꞌ ulew. Pero rukaꞌm achi, waꞌ e ri Qanimajawal Jesucristo, e re chikaj ma chilaꞌ petinaq wi.
1CO 15:48 Woꞌora ri qacuerpo e pachaꞌ rucuerpo ri nabꞌe achi, xa re ulew; noꞌj echiriꞌ kojkꞌastaj lo chupa ri kamik, ri cuerpo kayaꞌ chiqe e pachaꞌ ri cuerpo kꞌastajinaq re ri Jun xpe chilaꞌ chikaj.
1CO 15:49 Y tobꞌ woꞌora ri qacuerpo xa e pachaꞌ re ri jun achi ꞌanom rukꞌ ulew, kopon na kꞌu ri qꞌij ri qacuerpo kuꞌana jelaꞌ pachaꞌ re ri Jun xpe chilaꞌ chikaj.
1CO 15:50 Kambꞌiꞌij kꞌu che alaq hermanos, riꞌoj na utz taj kojok pa rutaqanik ri Dios chilaꞌ chikaj rukꞌ wa cuerpo re ruwachulew, ri xa kakamik; ma waꞌ na taqal ta che ri qakꞌaslemal na jinta utaqexik.
1CO 15:51 Tape alaq, ma kanqꞌalajisaj chiwach alaq ri na etaꞌmatal ta lo ojertan. Ri oj re ri Cristo, na qonoje taj kojkamik, pero qonoje kajalkꞌatix uwach ri qacuerpo echiriꞌ ri Cristo kakꞌun tanchik.
1CO 15:52 Waꞌ xa pa joqꞌotaj kuꞌano, e pachaꞌ echiriꞌ junoq kuyupij ruwach. Echiriꞌ katataj kꞌu ri kꞌisbꞌal uchꞌawibꞌal ri trompeta, xaqikꞌateꞌt kekꞌastajisax lo ri ekaminaq rukꞌ jun cuerpo na kakam ta chik; yey janipa kꞌu ri oj kꞌaslik, kajalkꞌatix uwach ri qacuerpo.
1CO 15:53 Ma ri qacuerpo woꞌora xa kakamik. Lik chirajawaxik kꞌut kajal uwach rukꞌ jun na kakam ta chik.
1CO 15:54 Ekꞌuchiriꞌ kayaꞌ ri qacuerpo na kakam ta chik, kꞌa e riꞌ kuꞌana na ri tzꞌibꞌital kan pa Ruchꞌaꞌtem ri Dios: Xsach kꞌu uwach ri kamik, ma ri kꞌaslemal xuchꞌij uchuqꞌabꞌ.
1CO 15:55 Yey kubꞌiꞌij che ri kamik: ¿Pa kꞌo wi riꞌ rachuqꞌabꞌ woꞌora? ¡Na jinta chik! Ma na jinta chi achuqꞌabꞌ paqawiꞌ re kaꞌan kꞌax chiqe, xatuꞌan jelaꞌ pachaꞌ ri aqaj echiriꞌ na jinta chi uxul re katiꞌoꞌnik kachaꞌ.
1CO 15:56 Ma e ri mak kuya lo uchuqꞌabꞌ ri kamik chaꞌ kuꞌan kꞌax chiqe. Yey e ruma ri mak kaqaꞌano, kaqꞌalajinik taqal chiqe kaqꞌat tzij paqawiꞌ ruma xqapalajij Rutzij Upixabꞌ ri Dios.
1CO 15:57 Pero xa maltiox kꞌu che ri Dios, ma Rire kuya chiqe kaqachꞌij uchuqꞌabꞌ ri mak ruma ri Qanimajawal Jesucristo.
1CO 15:58 E uwariꞌche alaq nu hermanos, ri lik kꞌax kannaꞌ alaq, lik tikila alaq jusukꞌ y maya kꞌu alaq luwar che ritzel kuchꞌij chuqꞌabꞌ alaq. E lik yaꞌa ibꞌ alaq che uꞌanik ruchak ri Qanimajawal, ma etaꞌam chi alaq lik kꞌo kutiqoj ronoje ri chak kaꞌan alaq pa rubꞌiꞌ.
1CO 16:1 Chwi kꞌu ri qasaꞌn katajin alaq che umolik re toꞌbꞌal ke ri hermanos, kambꞌiꞌij kꞌu che alaq: Jelaꞌ ꞌana alaq che pachaꞌ rumolik ximbꞌiꞌij chike riglesias e kꞌo Galacia.
1CO 16:2 Ronoje taq nabꞌe qꞌij che ri semana, chijujunal alaq kesaj alaq ri qasaꞌn alaq e chirij ri kachꞌak alaq y kakꞌol kꞌu alaq riꞌ. ꞌAna alaq waꞌ chaꞌ we xinopon riꞌin, na jinta chi qasaꞌn kamol alaq, ma kꞌolotal chik.
1CO 16:3 Y we xinopon kꞌut, kebꞌenutaq bꞌi Jerusalem ri hermanos kachaꞌiꞌ uma ralaq che ujachik ri qasaꞌn y kanya bꞌi jun carta chike puwi waꞌ.
1CO 16:4 Y we kajawaxik kinꞌek riꞌin kukꞌ, junam ne riꞌ kojꞌek.
1CO 16:5 Kinopon na ukꞌ alaq, pero nabꞌe na kinikꞌow pa taq riglesias e kꞌo Macedonia; tekꞌuchiriꞌ kinopon chilaꞌ Corinto.
1CO 16:6 Yey laj ne kinkanaj kan ukꞌ alaq y kinnajtir chiriꞌ ma kanwoyꞌej na kikꞌow ruqꞌijol echiriꞌ kꞌax tew y kꞌo jabꞌ, y jelaꞌ utz kintoꞌ bꞌi alaq echiriꞌ kanmaj tanchi ubꞌi nubꞌe.
1CO 16:7 Ma riꞌin na kuaj taj kinikꞌow ukꞌ alaq xa pa kꞌalalem; kuaj kinkꞌojiꞌ ukꞌiyal qꞌij ukꞌ alaq, we e karaj riꞌ ri Qanimajawal.
1CO 16:8 Pero kꞌamajaꞌ kinꞌek ma kuaj kinkꞌojiꞌ na wara Éfeso pa ri nimaqꞌij re Pentecostés.
1CO 16:9 Na kuaj ta kꞌu kinel bꞌi wara woꞌora, ma ri chak yaꞌom chinuwach lik nim y lik utz elinaq, yey ruma ne waꞌ lik e kꞌi ri eyaktajinaq chwij.
1CO 16:10 We xopon ri Timoteo ukꞌ alaq, kꞌulu alaq chi utz chaꞌ kakꞌojiꞌ ukꞌ alaq chi utzil chomal; ma rire jelaꞌ pachaꞌ riꞌin, junam kojchakun pa ruchak ri Qanimajawal.
1CO 16:11 E uwariꞌche, na utz taj we kꞌo junoq che alaq kukꞌaq bꞌi uqꞌij rire; e toꞌo alaq che rupetik chaꞌ kumaj tanchi lo ubꞌe chi utzil chomal, ma riꞌin woyeꞌem katzelej lo wukꞌ junam kukꞌ ri jujun chik hermanos.
1CO 16:12 Chwi kꞌu ri hermano Apolos, riꞌin lik xinelaj che chaꞌ kerachbꞌilaj bꞌi ri hermanos kebꞌek chilaꞌ ukꞌ alaq, pero na xraj ta kꞌenoq xeꞌek woꞌora. Kꞌo juna qꞌij laꞌ echiriꞌ kayaꞌtaj che kopon ukꞌ alaq.
1CO 16:13 Lik chajij ri bꞌinik silabꞌik alaq, tikila alaq chi utz chupa ri kubꞌulibꞌal kꞌuꞌx alaq rukꞌ ri Dios, lik chuqꞌubꞌej ibꞌ alaq chwach ri Dios y mok kꞌu xiꞌin ibꞌ ukꞌ alaq.
1CO 16:14 Janipa ri kaꞌan alaq, ꞌana alaq ronoje rukꞌ rutzil kꞌuꞌxaj.
1CO 16:15 Hermanos, etaꞌam chi alaq ri hermano Estéfanas kukꞌ rufamilia e rike ri nabꞌe xkikoj rubꞌiꞌ ri Cristo chixoꞌlibꞌal alaq chilaꞌ Acaya, yey rike lik kiyaꞌom kibꞌ che kitoꞌik taq ri hermanos.
1CO 16:16 Ekꞌu kuaj riꞌin e kataqej alaq janipa ri kakibꞌiꞌij che alaq; jekꞌulaꞌ riꞌ ꞌana alaq chike konoje ri e jelaꞌ pachaꞌ rike, ma rike e toꞌbꞌel y lik kiyaꞌom kibꞌ pa ruchak ri Dios.
1CO 16:17 Lik xinkiꞌkot rukꞌ ri kikꞌunik ri Estéfanas, ri Fortunato y ri Acaico, ma rike e petinaq Corinto pakꞌaxel ralaq; ekꞌu kannaꞌ riꞌin e pachaꞌ xkꞌun ralaq wukꞌ.
1CO 16:18 Ma rike lik xkinimarisaj nukꞌuꞌx riꞌin y jenelaꞌ xkiꞌan che ralaq. Taqal kꞌu riꞌ kayak kiqꞌij konoje ri kakiꞌan jelaꞌ pachaꞌ rike.
1CO 16:19 Ri hermanos e kꞌo pa taq riglesias re Asia kakiya pan rutzil wach alaq. Ri hermano Aquila y ri hermana Priscila kukꞌ konoje ri kakimol kibꞌ chikocho, lik kakiya pan rutzil wach alaq pa rubꞌiꞌ ri Qanimajawal Jesucristo.
1CO 16:20 Yey konoje ri hermanos wara kakiya pan rutzil wach alaq. Yaꞌa kꞌu rutzil wach alaq chiwach alaq rukꞌ jun saqil tzꞌubꞌuj chiꞌaj chwach ri Dios.
1CO 16:21 Woꞌora e riꞌin in Pablo, in ri kintzꞌibꞌan re wa rutzil wach alaq rukꞌ ri nuqꞌabꞌ.
1CO 16:22 ¡Ya kakꞌun lo ri Qanimajawal Jesucristo! Janipa kꞌu ri na kꞌax ta kakinaꞌ Rire, kꞌo chi ri qꞌatbꞌal tzij re ri Dios pakiwiꞌ.
1CO 16:23 Kꞌulu alaq ri unimal rutzil ukꞌuꞌx ri Qanimajawal Jesucristo.
1CO 16:24 Lik kꞌax kannaꞌ onoje alaq pa rubꞌiꞌ Rire. Amén.
2CO 1:1 Riꞌin in Pablo in taqoꞌn re ri Qanimajawal Jesucristo ma e ri Dios yaꞌyom wa chak chwe. Riꞌin junam rukꞌ ri hermano Timoteo kaqaya pan rutzil wach alaq, ri alaq utinamit ri Dios re riglesia kꞌo Corinto, y chike konoje ri hermanos ejeqel chupa ronoje taq ri luwar re Acaya.
2CO 1:2 Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
2CO 1:3 ¡Lik nim uqꞌij ri Dios, Ruqaw ri Qanimajawal Jesucristo! Ma e Rire ri lik kukꞌut ri kꞌaxnaꞌbꞌal ukꞌuꞌx chiqe y rukꞌ Rire kape wi ri bꞌochibꞌal qakꞌuꞌx.
2CO 1:4 Rire e kabꞌochiꞌin qakꞌuꞌx chwach ronoje kꞌaxkꞌobꞌik, chaꞌ jelaꞌ riꞌoj utz kaqabꞌochiꞌij kikꞌuꞌx ri e kꞌo chupa ronoje kꞌaxkꞌobꞌik. Kaqaya kꞌu ri bꞌochibꞌal kꞌuꞌxaj jelaꞌ pachaꞌ ri uyaꞌom ri Dios chiqe riꞌoj.
2CO 1:5 Ma echiriꞌ kanimar ri kꞌaxkꞌobꞌik paqawiꞌ ruma oj re ri Cristo, e lik kanimar ri bꞌochibꞌal kꞌuꞌxaj kuya ri Cristo chiqe.
2CO 1:6 Echiriꞌ riꞌoj kaqatij kꞌax yey ri Dios kubꞌochiꞌij qakꞌuꞌx, waꞌ kukꞌam lo bꞌochibꞌal kꞌuꞌxaj y kolobꞌetajik re ri Dios che ralaq. Jekꞌulaꞌ ri kꞌax qatijom y ri bꞌochibꞌal kꞌuꞌxaj qakꞌulum riꞌoj, lik kꞌo kutiqoj che alaq chaꞌ jelaꞌ kachꞌij alaq uchuqꞌabꞌ ri kꞌaxkꞌobꞌik pachaꞌ ri qikꞌowibꞌem riꞌoj.
2CO 1:7 Lik qajikibꞌam kꞌu uwach ri kubꞌulibꞌal qakꞌuꞌx ukꞌ alaq. Ma qetaꞌam alaq jun qukꞌ riꞌoj chupa ri kꞌaxkꞌobꞌik, jekꞌulaꞌ alaq jun qukꞌ riꞌoj che ukꞌulik ri bꞌochibꞌal kꞌuꞌxaj kuya lo ri Dios.
2CO 1:8 Kaqaj kꞌut, hermanos, ketaꞌmaj alaq janipa chi kꞌaxkꞌobꞌik xqikꞌowibꞌej chilaꞌ Asia. Ruma wa unimal kꞌaxkꞌobꞌik xpe paqawiꞌ, xqanaꞌo na jinta chi qachuqꞌabꞌ che uchꞌijik waꞌ y xqachꞌobꞌ nenareꞌ na jinta chi pa saq kojkꞌasiꞌik.
2CO 1:9 E xqanaꞌ riꞌoj e pachaꞌ qꞌatom chi tzij re kamik paqawiꞌ. Pero kꞌo xutiqoj chiqe ri xqikꞌowibꞌej, ma rukꞌ waꞌ xqamajo na jinta uchak ri kakubꞌiꞌ qakꞌuꞌx chiqibꞌil qibꞌ; xew e kubꞌul qakꞌuꞌx rukꞌ ri Dios, ri kebꞌukꞌastajisaj lo ri ekaminaq.
2CO 1:10 Ri Dios e xojesan chwa wa kamik yey kꞌa katajin ne che qatoꞌik. Kubꞌul kꞌu qakꞌuꞌx rukꞌ, ma qetaꞌam rukꞌ rutoꞌbꞌal Rire kojel pan chi utz woꞌora y chiqawach apanoq.
2CO 1:11 Y ralaq kojtoꞌ ne alaq echiriꞌ kaꞌan alaq orar paqawiꞌ chwach ri Dios. Jekꞌulaꞌ we e kꞌi ri xebꞌanaw re waꞌ, e kꞌi riꞌ ri ketioxin chwach ri Dios ruma ri kuꞌan Rire quma riꞌoj.
2CO 1:12 Kꞌo ri kuya kiꞌkotemal chiqe; waꞌ e ri qabꞌinik qasilabꞌik qakꞌutum chiwach ralaq y chikiwach konoje ri winaq, ma kaqanaꞌ chiqakꞌuꞌx lik saqil y jusukꞌ ri qabꞌinik jelaꞌ pachaꞌ ri karaj ri Dios. Yey wa qaꞌanom na e ta ruma unimal naꞌoj re ruwachulew; e ruma rutoꞌbꞌal ri Dios qukꞌ.
2CO 1:13 Janipa ri kajilaj alaq che ri qacartas, lik e qanaꞌoj riꞌ che alaq chaꞌ jelaꞌ kamaj alaq usukꞌ.
2CO 1:14 Woꞌora majom alaq usukꞌ jubꞌiqꞌ puwi ri qaꞌanom; qoyeꞌem kꞌu ri qꞌij echiriꞌ kamaj alaq usukꞌ ronoje, chaꞌ jelaꞌ pa rukꞌunibꞌal ri Qanimajawal Jesucristo lik kakiꞌkot alaq chiqe riꞌoj, jelaꞌ pachaꞌ riꞌoj kojkiꞌkot che ralaq.
2CO 1:15 Rukꞌ kꞌu wa kubꞌulibꞌal nukꞌuꞌx ukꞌ alaq, xuaj kinikꞌow nabꞌe ukꞌ alaq chaꞌ jelaꞌ kalaj kakꞌul alaq ri relej nukꞌuꞌx,
2CO 1:16 ma xinchꞌobꞌo kinikꞌow ukꞌ alaq echiriꞌ kinꞌek Macedonia y kinikꞌow tanchik echiriꞌ kanmaj bꞌi nubꞌe Judea y jelaꞌ kintoꞌ bꞌi alaq che ri nubꞌenam.
2CO 1:17 Jelaꞌ ri xinchꞌobꞌo kanꞌano, tobꞌ na e ta xuꞌanaꞌ. Ruma kꞌu laꞌ, laj chiwach ralaq na xinchꞌobꞌ ta chi utz saꞌ ri kanꞌano. ¿Xa nawi pa we riꞌin kanchꞌobꞌ raqan ri kanꞌano? ¿O xa nawi kebꞌ uwa ri nuchꞌaꞌtem, pachaꞌ junoq kubꞌiꞌij: «Lik jikil uwach kinꞌek,» tobꞌ retaꞌam chiribꞌil ribꞌ na keꞌek taj?
2CO 1:18 Noꞌj riꞌin na je ta laꞌ kanꞌano. Ma ruma lik jusukꞌ ri Dios qukꞌ, na utz ta kꞌu riꞌ we ri qachꞌaꞌtem kebꞌ uwach keꞌelawi chiwach alaq.
2CO 1:19 Jekꞌulaꞌ ri Qanimajawal Jesucristo, Rukꞌajol ri Dios, ri xojtzijon puwiꞌ che alaq junam kukꞌ ri Silvano y ri Timoteo, ruchꞌaꞌtem Rire na kebꞌ ta uwach keꞌelawi; ma ronoje ri kubꞌiꞌij lik qatzij.
2CO 1:20 Yey ruma Rire e kuꞌana janipa taq rubꞌiꞌtisinik ri Dios qukꞌ. E uwariꞌche kaqayak uqꞌij ri Dios, kaqabꞌiꞌij «Areꞌ» y «Amén» che ronoje ri ubꞌiꞌim lo chiqe.
2CO 1:21 Yey e ri Dios ri kujikibꞌaꞌ qakꞌuꞌx chi utz rukꞌ ri Cristo junam ukꞌ alaq y xojuchaꞌo chaꞌ kojuꞌan re Rire.
2CO 1:22 Ekꞌu Rire uyaꞌom ri Ruxlabꞌixel pa qanimaꞌ, kꞌutubꞌal re oj kꞌo chi puqꞌabꞌ yey kuꞌana na kꞌu ronoje ri ubꞌiꞌtisim lo chiqe.
2CO 1:23 Lik karil ri Dios ri kꞌo pa wanimaꞌ y retaꞌam kꞌut suꞌbꞌe na xinikꞌow ta chilaꞌ Corinto pachaꞌ ri xinchꞌobꞌo. E ma na xuaj taj kok bꞌis chikꞌuꞌx alaq ruma kanchꞌaꞌbꞌej pa alaq.
2CO 1:24 Na e ta kꞌu kojeꞌtaqana pawiꞌ alaq chwi ri kojom alaq; ma ruma ri kubꞌulibꞌal kꞌuꞌx alaq, tikil alaq chi utz. Ri kaqaꞌano e kojchakun ukꞌ alaq chaꞌ kakꞌojiꞌ ri kiꞌkotemal pa animaꞌ alaq.
2CO 2:1 Ruma kꞌu laꞌ, xinchꞌobꞌo na kinopon ta tanchi ukꞌ alaq, ma na xuaj taj kanya alaq pa bꞌis.
2CO 2:2 Ma we riꞌin kanya alaq pa bꞌis, ¿china chi kꞌu riꞌ kayaꞌw kiꞌkotemal chwe riꞌin? Na jinta kꞌu nukiꞌkotemal riꞌ we nuyaꞌom alaq pa bꞌis.
2CO 2:3 Ruma kꞌu riꞌ xintzꞌibꞌan pan che alaq, chaꞌ we xinopon ukꞌ alaq, na kinya ta alaq pa bꞌis, ma kiꞌkotemal ri kanwoyꞌej che alaq. Lik kꞌut kubꞌul nukꞌuꞌx ukꞌ onoje alaq, ma wetaꞌam e janipa ri kuya kiꞌkotem chwe riꞌin, kuya kiꞌkotem che ralaq.
2CO 2:4 Na xa ta jubꞌiqꞌ ri kꞌax y ri paxibꞌal kꞌuꞌx xinikꞌow wi echiriꞌ rukꞌ oqꞌej xintzꞌibꞌan pan che alaq. Na xinꞌan ta kꞌu waꞌ chaꞌ kanya alaq pa bꞌis, ma e xinꞌano chaꞌ ketaꞌmaj alaq lik nim ri rutzil nukꞌuꞌx che alaq.
2CO 2:5 Xintzꞌibꞌan kꞌu pan puwi ri jun xinuya riꞌin pa bꞌis ruma rumak uꞌanom. Y na xew ta riꞌin, ma laj ne uyaꞌom onoje ralaq pa bꞌis. (Kambꞌiꞌij “Laj” chaꞌ na lik ta kꞌax katataj wa nuchꞌaꞌtem.)
2CO 2:6 Kuꞌan na kꞌu laꞌ janipa ri xꞌan alaq che wa jun tikawex echiriꞌ xqꞌat alaq tzij puwiꞌ, ma rukꞌ waꞌ xutzelej utzij.
2CO 2:7 Ekꞌu ri taqal che kaꞌan alaq woꞌora e kuyu alaq umak y bꞌochiꞌij alaq ukꞌuꞌx chaꞌ jelaꞌ na kasach ta ruma runimal ubꞌis.
2CO 2:8 Kantzꞌonoj kꞌu ko che alaq kꞌutu tanchi alaq ri rutzil kꞌuꞌx alaq che.
2CO 2:9 Ri xuaj riꞌin rukꞌ wa carta e kanwilo we kok alaq il che ronoje ri nupixabꞌanik.
2CO 2:10 We ralaq kakuy alaq umak junoq, jelaꞌ riꞌin kankuy umak. We kꞌo kꞌu kajawax wi kakuy umak, riꞌin nukuyum chi umak uma ralaq y chupa rubꞌiꞌ ri Cristo.
2CO 2:11 Kanꞌan kꞌu waꞌ chaꞌ ri Satanás na kumaj ta uchuqꞌabꞌ paqawiꞌ, ma lik qetaꞌam chi runoꞌjibꞌal chiqij.
2CO 2:12 Echiriꞌ xinopon chupa ri tinamit Troas che utzijoxik ri Utzilaj Tzij re ri Cristo, lik chom ri jeqebꞌal re ri nuchak xuya ri Qanimajawal chwe;
2CO 2:13 na rukꞌ ta kꞌu riꞌ, na xkubꞌiꞌ ta ri wanimaꞌ, ma na xinriq ta ri hermano Tito chilaꞌ. Ruma kꞌu riꞌ, xebꞌenuya kan ri hermanos e kꞌo Troas y ximpe Macedonia chaꞌ koꞌlnutzukuj.
2CO 2:14 ¡Xa maltiox kꞌu che ri Dios! Ma kojel pan chi utz chwa ronoje ruma ri Cristo, yey yaꞌtal chiqe kaqaqꞌalajisaj rukꞌuꞌx Rire. Ma quma riꞌoj keꞌek utzijoxik ri Cristo che ronoje luwar, e pachaꞌ kunabꞌal kiꞌ ruxlabꞌ kamuyuyik.
2CO 2:15 Oj kꞌu pachaꞌ kunabꞌal lik kiꞌ ruxlabꞌ kamuyuyik kopon chwach ri Dios, ma quma riꞌoj kaqꞌalajin rukꞌuꞌx ri Cristo chikiwach ri kekolobꞌetajik y chikiwach ri katajin kisachik.
2CO 2:16 Ekꞌu rutzijoxik kaqaꞌano e pachaꞌ utewul kamik chikiwach ri na kakaj ta kakito, ma kukꞌam lo kamik pakiwiꞌ. Noꞌj chikiwach ri kekꞌuluw re, e pachaꞌ kunabꞌal kiꞌ ruxlabꞌ, ma kukꞌam lo chomilaj kꞌaslemal chike. Chwach kꞌu waꞌ wa nimalaj chak re ri Dios, ¿china kachꞌijow uꞌanik?
2CO 2:17 Riꞌoj na kaqaꞌan ta pachaꞌ ri kakiꞌan jujun, ma e kꞌi ri kijalkꞌatim Ruchꞌaꞌtem ri Dios, xa kiꞌanom chꞌakabꞌal puaq che rutzijoxik; noꞌj ri kaqaꞌan riꞌoj chwach ri Dios y pa rubꞌiꞌ ri Cristo, e kaqatzijoj pa saqil wi ri Tzij uyaꞌom ri Dios chiqe.
2CO 3:1 Echiriꞌ kinchꞌaꞌt chwi ri chak uyaꞌom ri Dios chiqe, na e ta re kantakꞌabꞌaꞌ qaqꞌij. Ma ¿kajawax nawi kanya juna carta chiwach alaq, kꞌutubꞌal re ri chak qaꞌanom? ¿Kajawax nawi kantzꞌonoj che alaq katzꞌibꞌaj alaq juna carta kubꞌiꞌij we utz ri chak qaꞌanom? Laj kꞌo jujun kajawax waꞌ chike, pero riꞌoj na kajawax ta chiqe;
2CO 3:2 ma e ralaq ri alaq qacarta, alaq kꞌutubꞌal re ri qachak qaꞌanom. Lik tzꞌibꞌital kꞌu pa qanimaꞌ janipa ri uꞌanom ri Dios ukꞌ alaq quma riꞌoj, yey wa chak lik kaqꞌalajin chikiwach konoje ri tikawex ruma ri kꞌakꞌ bꞌinik silabꞌik alaq.
2CO 3:3 Lik kꞌut qꞌalaj e alaq kꞌutubꞌal re ri qachak qaꞌanom, e pachaꞌ alaq jun carta tzꞌibꞌital ruma ri Cristo. Yey waꞌ wa carta na rukꞌ ta tinta tzꞌibꞌital wi, e ruma ri Ruxlabꞌixel ri Dios kꞌaslik; y na chwa ta ne jutaq peraꞌj abꞌaj xtzꞌibꞌax wi pachaꞌ uꞌanom ojertan, ma tzꞌibꞌital chupa ri kanimaꞌ ri tikawex.
2CO 3:4 Ruma kꞌu ri uꞌanom ri Cristo qukꞌ, kaqajikibꞌaꞌ uwach ri kaqabꞌiꞌij puwi ri qachak yey ri Dios retaꞌam lik qatzij waꞌ.
2CO 3:5 We ta e laꞌ xa qatukel, na kaqachꞌij ta uꞌanik wa chak, ma qetaꞌam xew rukꞌ ri Dios petinaq wi ri qanaꞌoj y qachuqꞌabꞌ che uꞌanik ruchak Rire.
2CO 3:6 Ekꞌu ri Dios mismo ri xyaꞌw wa chak chiqe, uyaꞌom qanaꞌoj y qachuqꞌabꞌ re kaqaqꞌalajisaj chi utz ri kꞌakꞌ tzij kuꞌan Rire kukꞌ ri tikawex. Yey na kuꞌan ta waꞌ ruma qataqem taqanik, ma e ruma ri kuꞌan ri Ruxlabꞌixel ri Dios pa qanimaꞌ. Ma ri taqanik kukꞌam lo qꞌatbꞌal tzij re kamik paqawiꞌ, noꞌj ri kuya ri Ruxlabꞌixel ri Dios chiqe e kꞌaslemal.
2CO 3:7 Ri taqanik tzꞌibꞌital kan chwa abꞌaj kukꞌam lo kamik, pero lik kꞌo uchomalil. Ma lik xwon rupalaj ri Moisés echiriꞌ xukꞌul wa taqanik, kꞌutubꞌal re ruchomalil Rutzij ri Dios. Yey ri e aj Israel na utz ta xkitzuꞌ uwach ri Moisés ruma waꞌ wa wonibꞌal, yey waꞌ xa xikꞌowik.
2CO 3:8 We kꞌo kꞌu uchomalil ri taqanik xuya lo ri Dios ojertan, ¡janipa kꞌu lo riꞌ ruchomalil ruchak ri Ruxlabꞌixel ri Dios kuꞌan qukꞌ!
2CO 3:9 We kꞌo kꞌu uchomalil wa taqanik, ri xuqꞌalajisaj ri qꞌatbꞌal tzij re ri Dios pakiwi ri tikawex ruma ri kimak, ¡janipa kꞌu lo riꞌ ruchomalil ri jun chik tzij, ri kukꞌut chiqe suꞌanik kojuꞌan jusukꞌ chwach ri Dios!
2CO 3:10 Ri taqanik xuya ri Dios ojertan kꞌo uchomalil, pero ruchomalil waꞌ na kajunimax ta kꞌana rukꞌ ri kꞌakꞌ tzij.
2CO 3:11 Rupalaj ri Moisés xwon xa pa joqꞌotaj ruma ruchomalil ri Tzij xuya ri Dios che; pero ¡más kꞌo uchomalil riꞌ ri kꞌakꞌ tzij, ma waꞌ na kasach taj!
2CO 3:12 Ruma lik kubꞌul qakꞌuꞌx che wa na kasach taj, riꞌoj lik kaqaqꞌalajisaj chi utz ri kꞌakꞌ tzij y na jinta kaqewaj che.
2CO 3:13 Na e ta pachaꞌ rojertan echiriꞌ ri Dios xuya ri taqanik che ri Moisés, ma rire xuchꞌuq rupalaj ruma lik xwonik, chaꞌ ri e aj Israel na kakitzutzaꞌ ta ruwonibꞌal, ri xa kikꞌowik.
2CO 3:14 Ekꞌu rike na xkaj ta kakimaj usukꞌ Rutzij ri Dios y kꞌa e ne waqꞌij ora echiriꞌ kakajilaj wa Tzij Pixabꞌ xuya ri Dios ojertan, na kakimaj ta usukꞌ; e pachaꞌ chꞌuqutal ri kiwach. Yey waꞌ wa chꞌuquyum ri kiwach, xew ri Cristo kesan re chike.
2CO 3:15 Kꞌa waqꞌij ora nenareꞌ echiriꞌ kakajilaj wa Tzij Pixabꞌ tzꞌibꞌital kan ruma ri Moisés, e pachaꞌ chꞌuqutal ri kiwach y ruma laꞌ na kaqꞌalajin ta ri Qꞌijsaq chikiwach.
2CO 3:16 Noꞌj echiriꞌ junoq kutzelej utzij chwach ri Qanimajawal, kesax na kꞌu riꞌ ri chꞌuquyum ruwach.
2CO 3:17 Ri Qanimajawal e junam rukꞌ ri Ruxlabꞌixel ri Dios; y china ri kꞌo ri Ruxlabꞌixel ri Qanimajawal pa ranimaꞌ, na jinta chi chuxeꞌ rutaqanik junoq chik.
2CO 3:18 Qonoje riꞌoj na chꞌuqutal ta chi ri qawach. E uwariꞌche, kaqil chi utz ruchomalil ri Qanimajawal y kojwolqꞌin che uqꞌalajisaxik waꞌ rukꞌ ri qabꞌinik qasilabꞌik. Ma jalan katajin qajalkꞌatixik chaꞌ jelaꞌ kojuꞌana pachaꞌ ri Qanimajawal. Yey ri Ruxlabꞌixel Rire e ri kaꞌanaw re waꞌ qukꞌ.
2CO 4:1 Ruma kꞌu waꞌ na kapax ta qakꞌuꞌx che uꞌanik wa chak, ma waꞌ yaꞌtal chiqe ruma ri rutzil ukꞌuꞌx ri Dios.
2CO 4:2 Riꞌoj na jinta kꞌo kaqaꞌan xa xeꞌlaqꞌay y kꞌixbꞌal uwach, na keqasok tane ri tikawex yey na kaqakoj tane uwiꞌ ri kubꞌiꞌij Rutzij ri Dios. Ma e kaqakꞌut pa saqil wi ri Qꞌijsaq chaꞌ jelaꞌ konoje ri ketaw re, kaketaꞌmaj lik jusukꞌ ri kaqaꞌano.
2CO 4:3 Yey we kꞌo kakichꞌobꞌo na qꞌalaj ta ri Utzilaj Tzij, waꞌ e chike ri katajin usachik kiwach.
2CO 4:4 Rike na kakikoj ta ri Utzilaj Tzij ma sachisam ri kinaꞌoj ruma ri jun kataqan che ruwachulew; waꞌ e ritzel winaq, ri xuꞌan pachaꞌ potzꞌ chike chaꞌ na kakil ta ri chomilaj Qꞌijsaq re ri Cristo, ri kukꞌutubꞌej uwach ri Dios.
2CO 4:5 Na e ta kꞌu kaqatzijoj qibꞌ riꞌoj; ri kaqatzijoj e ri Jesucristo e Taqanel pakiwi konoje yey riꞌoj xa oj nimanel e alaq, ma e karaj riꞌ ri Jesús chiqe.
2CO 4:6 Ma ri Dios ri xtaqan che xwon ri qꞌijsaq chupa ri qꞌequꞌm, e Rire ri xwon chupa ri qanimaꞌ chaꞌ rukꞌ laꞌ kaqetaꞌmaj runimal uchomalil Rire, ri kaqꞌalajin ruma ri Cristo.
2CO 4:7 Ri Qꞌijsaq re ri Dios e jun nimalaj bꞌeyomalil, yey uqꞌalajisam waꞌ chiqe tobꞌ riꞌoj xa oj ulew poqlaj. Jelaꞌ xuꞌano chaꞌ kaqꞌalajin waꞌ: Ri unimal chuqꞌabꞌ kꞌo qukꞌ, na qe ta riꞌoj, ma rukꞌ ri Dios kape wi.
2CO 4:8 Tobꞌ kape kꞌu ukꞌiyal uwach kꞌaxkꞌobꞌik paqawiꞌ, kojel na chupa. Tobꞌ kꞌo ubꞌis qakꞌuꞌx, na kapax ta qakꞌuꞌx che.
2CO 4:9 Tobꞌ kojternabꞌex rukꞌ kꞌax, ri Dios na oj roqꞌotam taj. Tobꞌ ne kojmachꞌax pulew, na kakisach ta qawach.
2CO 4:10 Pa taq kojꞌek wi, ri qacuerpo xaqi chwach ri kamik kꞌo wi, jelaꞌ pachaꞌ ri xukꞌulumaj ri Jesús; yey kojikꞌow chupa waꞌ chaꞌ rukꞌ ri qabꞌinik qasilabꞌik kaqꞌalajin rukꞌaslemal ri Jesús.
2CO 4:11 Wa oj kꞌo wara che ruwachulew, xaqi katewun ri kamik paqawiꞌ ruma oj aj chak re ri Jesús; yey kojikꞌow chupa waꞌ chaꞌ kilitaj rukꞌaslemal ri Jesús che ri qacuerpo, tobꞌ ri qacuerpo na jinta ukowil ma xa kakamik.
2CO 4:12 Jelaꞌ kꞌu riꞌ ri kamik kꞌo paqawiꞌ riꞌoj; yey ruma waꞌ, ralaq riqom alaq ri chomilaj kꞌaslemal re ri Dios.
2CO 4:13 Ekꞌu Rutzij Upixabꞌ ri Dios kubꞌiꞌij: Xkubꞌiꞌ nukꞌuꞌx rukꞌ ri Dios, e uwariꞌche xinqꞌalajisaj Rutzij Rire. Jekꞌulaꞌ riꞌoj kubꞌul qakꞌuꞌx rukꞌ ri Dios; e uwariꞌche kaqatzijoj rubꞌiꞌ.
2CO 4:14 Qetaꞌam kꞌut e ri xkꞌastajisan lo re ri Qanimajawal Jesús chikixoꞌl ri ekaminaq, jelaꞌ kuꞌan chiqe riꞌoj; kojukꞌastajisaj y junam ukꞌ alaq kojukꞌam bꞌi rukꞌ Rire.
2CO 4:15 Ronoje kꞌu wa qikꞌowibꞌem e uma ralaq, chaꞌ jelaꞌ kakꞌiyar kiwach ri kekꞌuluw re ri unimal rutzil ukꞌuꞌx ri Dios. Yey waꞌ e re yakbꞌal uqꞌij ri Dios, ma jelaꞌ lik e kꞌi ri kakitioxij ri unimal rutzil ukꞌuꞌx ri Dios pakiwiꞌ.
2CO 4:16 E uwariꞌche na kapax ta qakꞌuꞌx, tobꞌ ne wa qacuerpo katajin uriꞌjobꞌik; noꞌj rukꞌuꞌxibꞌal ri qakꞌaslemal na je ta laꞌ uꞌanom, ma jalan kakꞌojiꞌ ne más qachuqꞌabꞌ ri jujun qꞌij.
2CO 4:17 Janipa taq wa kꞌax kaqatij che ruwachulew xa kikꞌowik, yey waꞌ lik kꞌo kutiqoj che ri qabꞌinik qasilabꞌik y che ri chomilaj qakꞌaslemal chilaꞌ chikaj, ri na jinta utaqexik y na jinta kꞌana kajunimax wi.
2CO 4:18 Ekꞌu riꞌoj na kaqaya ta qakꞌuꞌx che ri kilitaj wara che ruwachulew, e kaqaya qakꞌuꞌx che ri na kilitaj taj; ma ronoje ri kilitaj uwach xa kakꞌisik, noꞌj ri na kilitaj ta uwach na jinta utaqexik rukowil.
2CO 5:1 Qetaꞌam kꞌut ri qacuerpo wara che ruwachulew e jelaꞌ pachaꞌ juna rancho na jinta ukowil oj jeqel chupa. Yey echiriꞌ kasach uwach ri qacuerpo, kayaꞌtaj jun qocho chilaꞌ chikaj na jinta utaqexik rukowil, ma na uqꞌabꞌ ta achi ꞌanayom re, e ri Dios ꞌanayom re.
2CO 5:2 Y ruma laꞌ koj-jilow woꞌora, ma lik kaqaj chik kojqꞌax chupa ri qocho chilaꞌ chikaj.
2CO 5:3 Ma echiriꞌ kojqꞌax chupa waꞌ, lik kojchꞌuqutaj chi utz.
2CO 5:4 Ruma kꞌu laꞌ, ri oj jeqel chupa ri “qarancho” wara che ruwachulew, koj-jilowik y kabꞌison qakꞌuꞌx; ma na kaqaj taj kaqaya kan ri qacuerpo e laꞌ xa jelaꞌ; ri kaqaj e kaqakꞌul ri qacuerpo chilaꞌ chikaj y jelaꞌ kajalkꞌatix uwach ri na kakowin taj rukꞌ ri na kakam taj.
2CO 5:5 Yey waꞌ e uchꞌobꞌom chi lo ri Dios chiqe; y e Rire yaꞌyom ri Ruxlabꞌixel chiqe, kꞌutubꞌal re kuya na janipa ri ubꞌiꞌtisim.
2CO 5:6 Ruma kꞌu laꞌ, lik kubꞌul qakꞌuꞌx, tobꞌ qetaꞌam echiriꞌ kꞌa oj jeqel pa ri qacuerpo wara che ruwachulew, waꞌ e keꞌelawi kꞌamajaꞌ kojeꞌjeqela pa ri qocho chilaꞌ chikaj rukꞌ ri Qanimajawal Jesucristo.
2CO 5:7 Ronoje kꞌu ri kaqaꞌano e ruma ri kubꞌulibꞌal qakꞌuꞌx rukꞌ Rire, na e ta ruma ri kaqil rukꞌ ri qawach.
2CO 5:8 Lik kubꞌul kꞌu qakꞌuꞌx rukꞌ Rire. Yey e ne lik kaqaj chik kaqaya kan wa qacuerpo chaꞌ jelaꞌ kojeꞌjeqela chilaꞌ rukꞌ ri Qanimajawal.
2CO 5:9 Ruma kꞌu laꞌ, e kaqaya qibꞌ che uꞌanik janipa ri karaj ri Qanimajawal, chaꞌ jelaꞌ kakiꞌkot Rire qukꞌ tobꞌ kꞌa oj kꞌo wara che ruwachulew o echiriꞌ oj kꞌo chi rukꞌ chilaꞌ chikaj.
2CO 5:10 Ma kopon na ri qꞌij echiriꞌ qonoje kojeꞌtakꞌala chwach ri qꞌatbꞌal tzij re ri Cristo, pa kaqꞌalajin wi we ri qaꞌanom wara che ruwachulew kꞌo uchak o na jinta uchak, y kayaꞌtaj kꞌu chiqe chiqajujunal ri tojbꞌal re ri qaꞌanom.
2CO 5:11 Lik qetaꞌam kꞌut, chirajawaxik kꞌo qaxiꞌin ibꞌ chwach ri Qajawal; ruma kꞌu riꞌ, keqapixabꞌaj taq ri tikawex chaꞌ kakiya kibꞌ puqꞌabꞌ ri Dios. Chwach ri Dios lik qꞌalaj saꞌ ri kꞌo pa qanimaꞌ; ekꞌu kaqaj riꞌoj e kaqꞌalajin waꞌ chiwach ralaq.
2CO 5:12 Na kaqabꞌiꞌij ta waꞌ che alaq re yakbꞌal qaqꞌij. Ma e kaqaj kaqatoꞌ alaq che retaꞌmaxik saꞌ ri kaqaꞌano chaꞌ jelaꞌ lik kakiꞌkot alaq chiqe. Jekꞌulaꞌ kꞌo kakꞌulubꞌej wi alaq uwach chike ri xew kebꞌok il che taq ri kilitajik pero na kebꞌok ta il che ri kꞌo pa ranimaꞌ junoq.
2CO 5:13 Ma we pachaꞌ chi oj chꞌuꞌjerinaq, waꞌ e ruma lik qayaꞌom qibꞌ che ruchak ri Dios. Yey we lik kaqachꞌobꞌ chi utz saꞌ ri kaqaꞌano, waꞌ e toꞌbꞌal e alaq.
2CO 5:14 Ri rutzil ukꞌuꞌx ri Cristo kataqan pa qanimaꞌ ma lik qetaꞌam echiriꞌ xkam Rire pakikꞌaxel konoje, e keꞌeloq xekam konoje rukꞌ.
2CO 5:15 Xkam kꞌu ri Cristo pakikꞌaxel konoje ri tikawex chaꞌ e janipa ri e kꞌas ruma rukamik Rire na kakiꞌan ta chi saꞌ ri kakaj rike, ma e kakiꞌan janipa ri karaj ri Jun ri pakikꞌaxel rike xkamik y xkꞌastaj lo chikixoꞌl ri ekaminaq.
2CO 5:16 Woꞌora ri kaqachꞌobꞌ puwi junoq, na e ta ruma ri kaqil che, pachaꞌ ri kakiꞌan ri tikawex re ruwachulew. Tobꞌ ne ojertan jelaꞌ xqachꞌobꞌ lo riꞌoj puwi ri Cristo, pero woꞌora na kaqaꞌan ta chi waꞌ ma xqetaꞌmaj uwach chi utz.
2CO 5:17 Jekꞌulaꞌ we junoq uyaꞌom ribꞌ puqꞌabꞌ ri Cristo, e jun kꞌakꞌ tikawex. Junwi karil ronoje, ma ri re ojertan xkanaj kanoq y ronoje uꞌanom kꞌakꞌ rukꞌ.
2CO 5:18 Ronoje waꞌ rukꞌ ri Dios petinaq wi, ma xojuya chi utzil chomal chwach Rire ruma ri xuꞌan ri Cristo y xuya kꞌu chiqe keqatoꞌ ri tikawex chaꞌ kekꞌojiꞌ chi utzil chomal chwach.
2CO 5:19 Waꞌ e keꞌelawi ruma rukamik ri Cristo, ri Dios kuya chike ri tikawex kekꞌojiꞌ chi utzil chomal chwach Rire ma kukuy ri kimak. Y xuya kꞌu chiqe riꞌoj rubꞌiꞌxikil chikiwach ri tikawex wa tzij re ri utzil chomal.
2CO 5:20 E uwariꞌche oj taqom lo ruma ri Cristo. Ma quma riꞌoj ri Dios lik kelaj chike ri tikawex chaꞌ keqibꞌ rukꞌ. Kojelaj kꞌu pa rubꞌiꞌ ri Cristo, jewaꞌ kaqabꞌiꞌij: «Yijbꞌaꞌ ibꞌ alaq chwach ri Dios chaꞌ kakꞌojiꞌ alaq chi utzil chomal chwach.»
2CO 5:21 Tobꞌ ri Cristo na jinta kꞌana mak xuꞌano, na rukꞌ ta kꞌu riꞌ, quma riꞌoj ri Dios xuꞌan che xreqaj ronoje ri qamak chaꞌ jelaꞌ kojuꞌan jusukꞌ chwach ri Dios ruma xa oj jun rukꞌ Rire.
2CO 6:1 E uwariꞌche riꞌoj, ri oj aj chak re ri Dios, lik kaqapixabꞌaj alaq: Maꞌan alaq ri pachaꞌ na il ta uwach ri unimal rutzil ukꞌuꞌx ri Dios ukꞌutum chiwach alaq.
2CO 6:2 Ma jewaꞌ ubꞌiꞌim kan ri Dios pa Ruchꞌaꞌtem: Chupa ruqꞌijol echiriꞌ xajawax toꞌbꞌal awe, xatintoꞌo; Chupa ri qꞌij re kolobꞌetajik, xatinkolobꞌej kacha ri Dios. Kambꞌiꞌij kꞌu che alaq: E uqꞌijol waꞌ echiriꞌ ri Dios kubꞌiꞌtisij rutoꞌbꞌal; woꞌora e qꞌij re kolobꞌetajik chike ri tikawex.
2CO 6:3 Kaqachajij kꞌu qibꞌ chi utz che ri kaqaꞌano chaꞌ na oj ta latzꞌanel chike jujun chik y jelaꞌ na jinta junoq kakꞌaqaw bꞌi uqꞌij ruchak ri Dios kaqaꞌano.
2CO 6:4 Rukꞌ ronoje ri kaqaꞌano e kaqakꞌutu oj aj chak re ri Dios. Kaqakuy kꞌu ronoje rukꞌ unimal qakꞌuꞌx, tobꞌ oj kꞌo pa kꞌax, pa nibꞌaꞌil o pa bꞌis;
2CO 6:5 tobꞌ kabꞌalakꞌux qapa o kojkꞌam bꞌi pa cárcel, tobꞌ kakiyak kibꞌ rukꞌiyal winaq chiqij; tobꞌ kaqatij kꞌaxlaj chak, kaqakuy waram o kaqatij numik.
2CO 6:6 Yey kaqakꞌutu oj aj chak re ri Dios ma chom ri qabꞌinik, kꞌo runaꞌoj ri Dios qukꞌ, kꞌo unimal qakꞌuꞌx y kꞌaxnaꞌbꞌal qakꞌuꞌx, kꞌo ri Santowilaj Ruxlabꞌixel ri Dios qukꞌ y kꞌax keqanaꞌ konoje rukꞌ ronoje qakꞌuꞌx.
2CO 6:7 Kaqꞌalajinik oj aj chak re ri Dios ma kaqatzijoj ri saqil kꞌutunik, kꞌo ruchuqꞌabꞌ ri Dios qukꞌ y kaqaꞌan ri lik usukꞌ y jekꞌulaꞌ kaqachꞌij kichuqꞌabꞌ konoje ri keyaktaj chiqij.
2CO 6:8 Qakꞌulum yakbꞌal qaqꞌij y kꞌaqibꞌal bꞌi qaqꞌij; e kꞌo ri chom kechꞌaꞌt chiqij y e kꞌo ri tzel kechꞌaꞌt chiqij. Kabꞌiꞌx chiqe oj aj raqꞌul, tobꞌ na jinta raqꞌubꞌal kaqaꞌano.
2CO 6:9 Tobꞌ e kꞌi ketaꞌam oj aj chak re ri Dios; na rukꞌ ta kꞌu riꞌ, e kꞌo jujun kakiꞌan pachaꞌ na ketaꞌam ta waꞌ. Xtewun ne ri kamik paqawiꞌ; na rukꞌ ta kꞌu riꞌ, kꞌa oj kꞌaslik. Tobꞌ lik xojyaꞌ pa kꞌax, pero na oj kaminaq taj.
2CO 6:10 Kꞌo qꞌij oj yaꞌom pa bꞌis; na rukꞌ ta kꞌu riꞌ, xaqi kojkiꞌkotik. Na oj ta bꞌeyom; na rukꞌ ta kꞌu riꞌ, qayaꞌom rubꞌeyomalil ri Dios chike ukꞌiyal tikawex. Wara che ruwachulew na jinta kꞌo qukꞌ; na rukꞌ ta kꞌu riꞌ, e ri Dios uyaꞌom ronoje ri kajawax chiqe.
2CO 6:11 Alaq qa hermanos aj Corinto, ronoje xqaqꞌalajisaj lo chiwach alaq, na jinta kꞌana xqewaj chiwach alaq. Lik qakꞌutum che alaq ri kꞌaxnaꞌbꞌal qakꞌuꞌx kꞌo pa qanimaꞌ.
2CO 6:12 Etaꞌam alaq riꞌoj lik qakꞌutum ri rutzil qakꞌuꞌx che alaq, noꞌj ralaq na je ta laꞌ kaꞌan alaq chiqe riꞌoj.
2CO 6:13 Ekꞌu woꞌora kinchꞌaꞌt ukꞌ alaq pachaꞌ alaq walkꞌoꞌal: Jelaꞌ pachaꞌ riꞌoj lik qakꞌutum ri rutzil qakꞌuꞌx che ralaq, jekꞌulaꞌ ꞌana alaq chiqe riꞌoj.
2CO 6:14 Hermanos, makꞌulaj ibꞌ alaq kukꞌ ri na kikojom ta rubꞌiꞌ ri Cristo, ma ri jusukꞌ na kukꞌulaj ta ribꞌ rukꞌ ri na jusukꞌ taj y ri qꞌijsaq na kukꞌulaj ta ribꞌ rukꞌ ri qꞌequꞌm.
2CO 6:15 ¿Yey ri Cristo rukꞌ ri Belial kꞌo nawi utzil chikiwach? ¿O saꞌ ri utz kuriq junoq ukojom rubꞌiꞌ ri Cristo che junoq na ukojom taj?
2CO 6:16 Ri rocho ri Dios na kukꞌulaj ta ribꞌ rukꞌ taq ri tiox. Jekꞌuriꞌlaꞌ ralaq na jinta chi e alaq kukꞌ ri tiox, ma ralaq alaq rocho ri Dios kꞌaslik. E pachaꞌ rubꞌiꞌim Rire: Kinjeqiꞌ kukꞌ y chikixoꞌlibꞌal rike kimbꞌin wi. In kꞌu Riꞌin ki Dios y rike e nutinamit xchaꞌ.
2CO 6:17 E uwariꞌche ri Dios jewaꞌ kubꞌiꞌij pa Ruchꞌaꞌtem: Chixel chikixoꞌlibꞌal ri e aj mak y chiwesaj iwibꞌ kukꞌ. Michꞌulaj iwibꞌ rukꞌ ri na chom taj chwach ri Dios, y jelaꞌ Riꞌin kixinkꞌul chi utz.
2CO 6:18 Kinuꞌan kꞌu Iqaw riꞌ, yey riꞌix kixuꞌan ix walkꞌoꞌal kacha ri Qajawxel, ri kꞌo ronoje unimal chuqꞌabꞌ puqꞌabꞌ.
2CO 7:1 E uwariꞌche, hermanos, ruma taq wa bꞌiꞌtisinik uꞌanom lo ri Dios chiqe, qajosqꞌij qibꞌ che taq ri mak retzelam ri qacuerpo y ri qanimaꞌ. Rukꞌ jun xiꞌin ibꞌ chwach ri Dios qachuqꞌubꞌej qibꞌ che uchomaxik ri qabꞌinik qasilabꞌik chwach ri Dios.
2CO 7:2 Chojkꞌola ko chikꞌuꞌx alaq; ma riꞌoj na jinta junoq qaꞌanom ri na usukꞌ taj che, na jinta junoq tzaqinaq pa mak quma riꞌoj yey na jinta junoq qasokosoꞌm.
2CO 7:3 Ekꞌuchiriꞌ kambꞌiꞌij waꞌ, na e ta re kanya kꞌix alaq; ma pachaꞌ ri nubꞌiꞌim lo che alaq, lik kꞌo alaq pa qanimaꞌ. Tobꞌ kꞌu oj kꞌas riꞌ o tobꞌ ne oj kaminaq chik, xa jun qakꞌuꞌx ukꞌ alaq.
2CO 7:4 Lik kanqꞌalajisaj ri kꞌo pa wanimaꞌ chiwach alaq, ma lik kubꞌul nukꞌuꞌx ukꞌ alaq. Lik kinkiꞌkot che alaq. E ne ralaq ri xnimarisan nukꞌuꞌx y woꞌora nojinaq ri wanimaꞌ che kiꞌkotemal tobꞌ oj kꞌo pa taq kꞌaxkꞌobꞌik.
2CO 7:5 Chwi xojkꞌun Macedonia, paqatzij wi na oj uxlaninaq taj. Ma tobꞌ xa pa taq xpe wi ri kꞌax paqawiꞌ, xpe taq chꞌaꞌoj chiqij y lik xok xiꞌin ibꞌ pa qanimaꞌ.
2CO 7:6 Pero ri Dios, ri bꞌochiꞌinel ke ri paxinaq kikꞌuꞌx, e xbꞌochiꞌin qakꞌuꞌx ruma rukꞌunik ri hermano Tito qukꞌ.
2CO 7:7 Na xew ta kꞌu ruma rukꞌunibꞌal xojkiꞌkotik; e lik xojkiꞌkotik ma xqato rire lik xkiꞌkot ri ranimaꞌ uma ralaq. Ma xubꞌiꞌij chiqe e lik kaꞌaj alaq kil alaq nuwach, lik kabꞌison alaq ruma inyaꞌom alaq pa bꞌis y lik kaꞌaj ne alaq kakꞌut alaq ri rutzil kꞌuꞌx alaq chwe. Ruma taq kꞌu waꞌ, riꞌin más xinkiꞌkotik,
2CO 7:8 tobꞌ ne xubꞌisoj nukꞌuꞌx echiriꞌ xintaq bꞌi ri nabꞌe nucarta che alaq, ma waꞌ xukoj alaq pa bꞌis kebꞌ oxibꞌ qꞌij. Pero na jinta chi kubꞌiꞌij nukꞌuꞌx che, ma wetaꞌam ri carta lik kꞌo xutiqoj che alaq.
2CO 7:9 Ekꞌu woꞌora lik kinkiꞌkotik, na ruma ta ri xbꞌison alaq che ri nucarta, ma e ruma ri bꞌis alaq xutoꞌ alaq chaꞌ katzelej tzij alaq, yey wa bꞌis e xraj riꞌ ri Dios che alaq. Jekꞌulaꞌ na jinta juna kꞌax xqaꞌan riꞌoj che alaq.
2CO 7:10 Ri bꞌis petinaq rukꞌ ri Dios e kuꞌan chiqe kok chiqakꞌuꞌx ri qamak, chaꞌ jelaꞌ kukꞌam lo tzelebꞌal tzij y kolobꞌetajik chiqe y ¡waꞌ na kuya ta bꞌis che junoq! Noꞌj ri bꞌis re ruwachulew xa kukꞌam lo kamik.
2CO 7:11 ¡Chilape kꞌu alaq ronoje ri utz xukꞌam lo ri bꞌis alaq chwach ri Dios! Ma lik xok alaq il che waꞌ y xꞌaj kꞌu kaqꞌalajisaj alaq waꞌ chwe. Ekꞌu lik xpe oyowal alaq che wa jun mak y lik xꞌaj kꞌu kil alaq nuwach. Rukꞌ ronoje kꞌuꞌx alaq y rukꞌ xiꞌin ibꞌ, xya ibꞌ alaq che uꞌanik ri utz chwach ri Dios. Rukꞌ kꞌu taq ri xꞌan alaq, woꞌora kaqꞌalajinik utz ꞌanom ralaq.
2CO 7:12 E uwariꞌche, echiriꞌ xintzꞌibꞌaj bꞌi ri carta che alaq, xinꞌano na xew ta ruma ri jun xꞌanaw re ri na usukꞌ taj y na xew tane ruma ri jun xꞌan ri na usukꞌ taj che, ma xinꞌano e chaꞌ kakꞌut alaq chwach ri Dios: Paqatzij wi lik kok alaq il chiqe.
2CO 7:13 Ruma kꞌu xok alaq il che ri qacarta, lik xnimar qakꞌuꞌx. Yey uwiꞌ chi ri qakiꞌkotemal riꞌoj, e rukiꞌkotemal ri Tito, ma lik xnimarisaj lo alaq ukꞌuꞌx.
2CO 7:14 Riꞌin nuyakom chi qꞌij alaq chwach ri Tito y na kinkꞌix ta che ri nubꞌiꞌim. Ma ronoje ri kaqabꞌiꞌij che alaq lik qatzij; jekꞌulaꞌ riꞌ, janipa ri qabꞌiꞌim chi che ri Tito pawiꞌ ralaq, lik e xeꞌrila che alaq.
2CO 7:15 Ekꞌu ri kꞌaxnaꞌbꞌal ukꞌuꞌx ri Tito che alaq más kanimarik echiriꞌ kakꞌun chukꞌuꞌx rukꞌ xiꞌin ibꞌ pa animaꞌ alaq xkꞌul alaq y xya ibꞌ alaq che uꞌanik janipa ri xubꞌiꞌij che alaq.
2CO 7:16 Lik kinkiꞌkotik ma che ronoje lik kubꞌul nukꞌuꞌx ukꞌ alaq.
2CO 8:1 Hermanos, kaqaj ketaꞌmaj alaq ri unimal rutzil ukꞌuꞌx ri Dios xkikꞌut rutinamit ri Cristo e kꞌo pa taq ri luwar re Macedonia.
2CO 8:2 Tobꞌ rike na xa ta jubꞌiqꞌ ri kꞌax kikꞌowibꞌem, ri kiꞌkotemal kꞌo kukꞌ na jinta utaqexik. Y tobꞌ lik e nibꞌaꞌibꞌ, xikꞌow ne uwiꞌ ri xkiya che kitoꞌik ri kachbꞌiꞌil.
2CO 8:3 Riꞌin kambꞌiꞌij ri xinwilo: Ri xkiyaꞌo lik pa kanimaꞌ xalax wi. Na xew ta xkiya e chirij ri kꞌo kukꞌ, ma xkiya ne uwiꞌ.
2CO 8:4 Lik kꞌu xebꞌelaj che kaqaya luwar chike ebꞌare jun kekitoꞌ pan rutinamit ri Dios rukꞌ wa qasaꞌn kamolik.
2CO 8:5 Janipa kꞌu ri qoyeꞌem riꞌoj chike na xew ta chi xkiꞌan riꞌ, ma nabꞌe ne xkiya kibꞌ puqꞌabꞌ ri Dios, kꞌa tekꞌuchiriꞌ xkiya ri kanimaꞌ chiqe riꞌoj chaꞌ jelaꞌ kakiꞌan janipa ri rajawal ukꞌuꞌx ri Dios.
2CO 8:6 Ruma kꞌu laꞌ hermanos, xqabꞌiꞌij che ri Tito chukꞌisa na utzaꞌm wa chak xujeq ukꞌ ralaq puwi rumolik ri qasaꞌn, ma waꞌ e kꞌutubꞌal re ri relej kꞌuꞌx alaq.
2CO 8:7 E lik utz ri ꞌanom ralaq che ronoje taq waꞌ: lik kꞌo kubꞌulibꞌal kꞌuꞌx alaq rukꞌ ri Dios, lik kariq alaq utzijoxik Ruchꞌaꞌtem ri Dios, yaꞌtal runaꞌoj ri Dios che alaq, alaq sakꞌaj che uꞌanik ruchak ri Dios yey lik ne kꞌax kojnaꞌ alaq; jekꞌuriꞌlaꞌ, ꞌana alaq chi utz wa jun chak re kitoꞌik ri nikꞌaj chik qa hermanos.
2CO 8:8 Rukꞌ waꞌ na kintajin ta che uyaꞌik jun taqanik che alaq. Ma xew xintzijoj che alaq ri kisakꞌajil ri jujun chik che kitoꞌik ri kachbꞌiꞌil, chaꞌ jelaꞌ kakꞌut alaq paqatzij wi kꞌax kenaꞌ alaq ri jujun chik hermanos.
2CO 8:9 Ma lik etaꞌam chi alaq ri unimal rutzil ukꞌuꞌx ri Qanimajawal Jesucristo. Rire lik bꞌeyom; na rukꞌ ta kꞌu riꞌ, ruma ri rutzil ukꞌuꞌx che alaq, xuꞌan nibꞌaꞌ che ribꞌ chaꞌ rukꞌ runibꞌaꞌil e xuya rubꞌeyomalil ri Dios che ralaq.
2CO 8:10 Chwi kꞌu wa qasaꞌn kamolik, kanya naꞌoj alaq puwi ri taqal che kaꞌan alaq; ma junabꞌir xjeq lo alaq umolik waꞌ yey xꞌan alaq rukꞌ ronoje kꞌuꞌx alaq.
2CO 8:11 Ekꞌu woꞌora kꞌisa pan alaq utzaꞌm waꞌ rukꞌ ronoje kꞌuꞌx alaq, jelaꞌ pachaꞌ ri xjeqebꞌej lo alaq uꞌanik. Yaꞌa kꞌu alaq janipa ri kachꞌij alaq uyaꞌik.
2CO 8:12 Ma e junoq lik karaj kaqasanik, ri Dios kukꞌul chi utz ri qasaꞌn kuyaꞌo e chirij ri kꞌo rukꞌ; ma ri Dios na kutzꞌonoj ta che jun ri na jinta rukꞌ.
2CO 8:13 Na kambꞌiꞌij ta waꞌ chaꞌ kakanaj kan alaq pa nibꞌaꞌil ruma ri ketoꞌ alaq jujun chik. Ma e ri karaj e chiqajujunal kꞌo qukꞌ janipa ri kajawax chiqe.
2CO 8:14 Woꞌora paqꞌabꞌ alaq kꞌo wi ketoꞌ alaq ri e kꞌo pa kꞌax. Taqal kꞌu che alaq kajach alaq upa ri kꞌo ukꞌ alaq chaꞌ jelaꞌ katzꞌaqatisaj alaq ri kajawax chike rike. We xopon kꞌu juna qꞌij echiriꞌ ralaq kꞌo alaq pa kꞌax, ekꞌuchiriꞌ taqal chike rike kakitoꞌ ralaq. We konoje jelaꞌ kakiꞌano, kayaꞌtaj kꞌu chike chikijujunal janipa ri kajawaxik.
2CO 8:15 E jelaꞌ pachaꞌ ri tzꞌibꞌital kan pa Ruchꞌaꞌtem ri Dios: E ri lik kꞌi xumolo, na jinta uqax xkanaj kan rukꞌ ma xujach chike ri jujun chik; yey e ri na kꞌi ta xumolo, xaqareꞌ xuꞌana pan rukꞌ ma ri kajawax che xyaꞌtaj ruma jun chik kachaꞌ.
2CO 8:16 Xa maltiox kꞌu che ri Dios ma ukojom pa ranimaꞌ ri Tito kutoꞌ alaq jelaꞌ pachaꞌ kanꞌan riꞌin.
2CO 8:17 Ma xew ximbꞌiꞌij che keꞌrila alaq, na jampatana rukꞌ kiꞌkotemal xunimaj ma lik kacha ukꞌuꞌx che keꞌrila wach alaq.
2CO 8:18 Junam kꞌut rukꞌ ri Tito kaqataq bꞌi jun chik hermano chaꞌ karachbꞌilaj bꞌi. Waꞌ e jun lik chom ruchꞌaꞌtibꞌexik kaꞌan pa taq riglesias ruma ri utzilaj chak uꞌanom che utzijoxik ri Utzilaj Tzij.
2CO 8:19 Na xew tane waꞌ, ma wa jun hermano chaꞌom kuma riglesias re kojrachbꞌilaj pa taq ri kojꞌek wi che umolik y che ujachik waꞌ wa qasaꞌn. Waꞌ wa chak oj kꞌo wi e re yakbꞌal uqꞌij ri Qanimajawal Jesucristo y e kꞌutubꞌal re ri relej qakꞌuꞌx.
2CO 8:20 Ekojom qachbꞌiꞌil chaꞌ na jinta kꞌo kechꞌaꞌt chiqij che uchapabꞌexik wuꞌkꞌiyal qasaꞌn kꞌo paqaqꞌabꞌ.
2CO 8:21 Ri kaqaj riꞌoj e kaqaꞌan ronoje chi utz chwach ri Qanimajawal Jesucristo y chikiwach ri tikawex.
2CO 8:22 E uwariꞌche junam kukꞌ ri kebꞌek, kaqataq bꞌi jun chik hermano. Waꞌ na xa ta julaj ukꞌutum lik kacha ukꞌuꞌx che ukꞌiyal chak. Yey woꞌora más ne kacha ukꞌuꞌx che wa bꞌenam ma lik kubꞌul ukꞌuꞌx ukꞌ alaq.
2CO 8:23 Ri Tito e wachbꞌiꞌil riꞌin, junam oj toꞌbꞌel e alaq. Yey ri hermanos erachbꞌilam bꞌi, echaꞌom lo kuma ri tinamit re ri Cristo, ma rukꞌ ri kibꞌinik kisilabꞌik kiyakom uqꞌij ri Cristo.
2CO 8:24 E uwariꞌche chekꞌulu alaq chi utz chaꞌ jelaꞌ kakꞌut alaq ri rutzil kꞌuꞌx alaq y jekꞌulaꞌ kaqꞌalajin chikiwach riglesias suꞌbꞌe lik kojkiꞌkot che alaq.
2CO 9:1 Puwi kꞌu wa qasaꞌn re toꞌbꞌal ke rutinamit ri Dios, na kajawax ta chik kantzꞌibꞌaj pan che alaq,
2CO 9:2 ma wetaꞌam chi ri relej kꞌuꞌx alaq re katoꞌbꞌ alaq. E uwariꞌche nuyakom qꞌij alaq chikiwach ri e aj Macedonia. Riꞌin nubꞌiꞌim, ri alaq aj Acaya kꞌo chi qasaꞌn molom lo alaq junabꞌir. Yey ruma wa ꞌanom ralaq, e kꞌi chike ri e aj Macedonia xkijeq kakiꞌan ke rukꞌ ronoje kikꞌuꞌx.
2CO 9:3 E uwariꞌche ebꞌenutaqom bꞌi wa hermanos ukꞌ alaq chaꞌ kakitoꞌ alaq che ukꞌisik umolik ri qasaꞌn. Ma we yijbꞌam chi alaq ri qasaꞌn jelaꞌ pachaꞌ ri nubꞌiꞌim loq, kaqꞌalajin kꞌu riꞌ lik qatzij ri xqabꞌiꞌij echiriꞌ xqayak qꞌij alaq.
2CO 9:4 Ma kꞌaxtaj kinkachbꞌilaj bꞌi jujun aj Macedonia yey we xojopon kꞌu ukꞌ alaq, keꞌqariqaꞌ kꞌamajaꞌ yijbꞌam alaq ri qasaꞌn. We e xuꞌana riꞌ, kꞌixbꞌal kꞌu chiqe riꞌoj y che ralaq, ma lik xkubꞌiꞌ qakꞌuꞌx ukꞌ alaq yey na xꞌan ta kꞌu alaq ri qabꞌiꞌim loq.
2CO 9:5 Ruma kꞌu waꞌ, xinchꞌobꞌo kebꞌenutaq bꞌi ukꞌ alaq wa hermanos chaꞌ kenabꞌej bꞌi chiqawach riꞌoj y kakitoꞌ alaq che umolik ri qasaꞌn bꞌiꞌtisim chi alaq. Jekꞌulaꞌ we xojopon riꞌoj, yijbꞌam chi alaq waꞌ. Kaqꞌalajin kꞌu riꞌ xqasan alaq rukꞌ ronoje kꞌuꞌx alaq y na e ta ruma xtaq alaq che.
2CO 9:6 Kankuxtaj kꞌu waꞌ che alaq: China ri na kꞌi ta ri kutiko, riꞌ na kꞌi ta ri kumolo. Yey china ri lik kꞌi ri kutiko, riꞌ lik kꞌi ri kumolo.
2CO 9:7 E uwariꞌche, chijujunal alaq chuyaꞌa ruqasaꞌn e chirij janipa ri xalax lo pa ranimaꞌ, na rukꞌ ta bꞌis y na ruma ta minom alaq chupa. Ma ri Dios lik kukꞌul ukꞌuꞌx ri kuya ruqasaꞌn rukꞌ kiꞌkotemal.
2CO 9:8 Yey lik kꞌo puqꞌabꞌ ri Dios kutoꞌ alaq chaꞌ kakꞌiyar janipa ri kꞌo ukꞌ alaq y jelaꞌ kꞌo ronoje ri kajawax che alaq y na xew ta riꞌ, ma kuya ne uwiꞌ chaꞌ jelaꞌ katoꞌbꞌ alaq che uꞌanik chomilaj taq chak.
2CO 9:9 E pachaꞌ ri tzꞌibꞌital kan chupa Rutzij Upixabꞌ ri Dios: Xujach ri kꞌo rukꞌ re kebꞌutoꞌ ri nibꞌaꞌibꞌ; janipa kꞌu ri utz uꞌanom na kasach ta uwach kachaꞌ.
2CO 9:10 Ri Dios e kayaꞌw re rijaꞌ che rawanel yey e kayaꞌw re ri wa che ri kawaꞌik. Ekꞌu riꞌ Rire kuya na janipa ri kajawax che alaq y kuya ne uwiꞌ, chaꞌ rukꞌ waꞌ kaꞌan alaq ri utz y jekꞌulaꞌ lik kꞌo kutiqoj ri utzilaj chak kaꞌan alaq.
2CO 9:11 Jelaꞌ kꞌu riꞌ, kakꞌojiꞌ ukꞌiyal uwach bꞌeyomalil ukꞌ alaq chaꞌ rukꞌ waꞌ katoꞌbꞌ alaq rukꞌ ronoje kꞌuꞌx alaq. Y ekꞌuchiriꞌ riꞌoj kaqakꞌam bꞌi wa qasaꞌn chike ri e kꞌo pa kꞌaxkꞌobꞌik, rike kakitioxij che ri Dios.
2CO 9:12 Ekꞌu waꞌ wa toꞌbꞌal na xew ta kutzꞌaqatisaj ri kajawax chike, ma e kukoj pa kanimaꞌ rike ri lik ketioxin chwach ri Dios
2CO 9:13 y jelaꞌ ri kekꞌuluw re wa qasaꞌn lik kakiyak uqꞌij ri Dios. Ma waꞌ e kꞌutubꞌal re paqatzij wi xkoj alaq ri Utzilaj Tzij re ri Cristo y kabꞌin alaq chupa waꞌ, yey e kꞌutubꞌal re ri relej kꞌuꞌx alaq chike rike y chike konoje rutinamit ri Dios.
2CO 9:14 Jekꞌulaꞌ rike kꞌutubꞌal re ri rutzil kikꞌuꞌx che alaq, kakiꞌan orar pawiꞌ alaq ruma ri unimal rutzil ukꞌuꞌx ri Dios kilom che alaq.
2CO 9:15 ¡Xa maltiox kꞌu che ri Dios ruma ri nimalaj sipanik uyaꞌom chiqe, ma waꞌ lik na jinta kꞌo wi!
2CO 10:1 Riꞌin in Pablo kuaj kankoj wibꞌ chiwach alaq chupa rubꞌiꞌ ri Cristo, ri na kuꞌan ta nim che ribꞌ y lik utz ukꞌuꞌx. Ma e kꞌo jujun chixoꞌlibꞌal alaq kechꞌaꞌt chwij, kakibꞌiꞌij echiriꞌ in kꞌo ukꞌ alaq, pachaꞌ kanxiꞌij wibꞌ kanchꞌaꞌbꞌej pa alaq; yey echiriꞌ in kꞌo naj y kintzꞌibꞌan kꞌu pan ukꞌ alaq, na kanxiꞌij ta kꞌana wibꞌ kanꞌan waꞌ, kechaꞌ.
2CO 10:2 Kantzꞌonoj kꞌu che alaq choka alaq il che wa kantzꞌibꞌaj pan che alaq, chaꞌ we xinopon ukꞌ alaq na kajawax ta chik kanchꞌaꞌbꞌej kipa jujun che alaq. Noꞌj we kajawaxik, kanꞌan na kꞌu riꞌ waꞌ chike ri kakibꞌiꞌij xa pa qe riꞌoj kojtaqanik.
2CO 10:3 Qatzij, riꞌoj xa oj tikawex, pero na kaqaꞌan ta qeꞌoj pachaꞌ ri kakiꞌan ri winaq re ruwachulew.
2CO 10:4 Ma echiriꞌ kojchꞌoꞌjin chirij ri na utz taj, na kaqaꞌan ta rukꞌ qachuqꞌabꞌ o qanaꞌoj riꞌoj, ma e kaqaꞌan rukꞌ ruchuqꞌabꞌ y rutoꞌbꞌal ri Dios chaꞌ jelaꞌ kaqasach uwach ronoje ri kayaktaj chirij ri Dios;
2CO 10:5 waꞌ e ri itzel taq naꞌoj y takꞌabꞌal qꞌij, ri kebꞌuqꞌatej ri tikawex chaꞌ na kaketaꞌmaj ta uwach ri Dios. Kaqaya kꞌu ronoje taq noꞌjibꞌal puqꞌabꞌ ri Cristo chaꞌ kuꞌan pachaꞌ runaꞌoj Rire.
2CO 10:6 Echiriꞌ kaqilo lik kakoj alaq utzij ri Cristo, kꞌa tekꞌuchiriꞌ kaqaqꞌat tzij pakiwi ri e aj palajiy tzij.
2CO 10:7 Ralaq xew kataqej alaq ri kilitaj uwach. We kꞌo kꞌu junoq ujikibꞌam uwach chiribꞌil ribꞌ lik kꞌo puqꞌabꞌ ri Cristo, e chuchꞌobꞌo chi utz waꞌ: Na xew ta rire kꞌo puqꞌabꞌ ri Cristo, ma jenelaꞌ riꞌoj.
2CO 10:8 Y na xew ta riꞌ, ma na kinkꞌix tane che tobꞌ kanjikibꞌaꞌ uwach ri taqanik kaqaꞌan pawiꞌ alaq, ma waꞌ e ri Qajawal yaꞌyom paqaqꞌabꞌ. Y waꞌ na re ta sachibꞌal wach alaq, ma re kꞌiyibꞌal alaq chwach ri Dios.
2CO 10:9 Na kuaj taj kachꞌobꞌ alaq raqan e kanxibꞌij pa alaq rukꞌ ri kantzꞌibꞌaj pan che alaq.
2CO 10:10 Ma kꞌo kebꞌiꞌn re: «Ri Pablo chupa taq rucartas lik kꞌax ri kubꞌiꞌij, pachaꞌ lik kꞌo uchuqꞌabꞌ; noꞌj echiriꞌ kꞌo chiqawach, kuxiꞌij ribꞌ y na il tane uwach ruchꞌaꞌtem» kechaꞌ.
2CO 10:11 Ekꞌu ri kebꞌiꞌn re waꞌ chirajawaxik kaketaꞌmaj na je ta laꞌ uꞌanom, ma e janipa ri kaqatzꞌibꞌaj pan che alaq, junam ubꞌiꞌxikil kaqaꞌano echiriꞌ oj kꞌo chiwach alaq.
2CO 10:12 Riꞌoj na kaqachꞌobꞌ tane kaqajunimaj qibꞌ kukꞌ ri jujun xa kakitakꞌabꞌaꞌ kiqꞌij chikibꞌil kibꞌ. Ma rike xa kakijunimaj kibꞌ kukꞌ ri kachbꞌiꞌil. Ri kebꞌanaw re waꞌ, na jusukꞌ ta ri kinaꞌoj.
2CO 10:13 Noꞌj riꞌoj na kaqatakꞌabꞌaꞌ tane qaqꞌij ruma juna chak na qaꞌanom taj, ma e kaqaꞌan ri uyaꞌom ri Dios paqaqꞌabꞌ. Yey e Rire ri xuya chiqe xojopon kꞌa chilaꞌ ukꞌ alaq rukꞌ ri Utzilaj Tzij.
2CO 10:14 We tamaji e ri Dios yaꞌyom chiqe kojopon ukꞌ alaq, riꞌ xa pa qe riꞌoj kaqaꞌan ri chak ukꞌ alaq. Pero na e ta riꞌ. Lik kꞌu taqal chiqe kaqapixabꞌaj pan alaq woꞌora, ma riꞌoj oj ri nabꞌe xojopon ukꞌ alaq rukꞌ ri Utzilaj Tzij re ri Cristo.
2CO 10:15 Na kaqatakꞌabꞌaꞌ tane qaqꞌij xa pa qe riꞌoj rukꞌ ruchak jun chik. Ri qoyeꞌem e jalan kanimar ri kubꞌulibꞌal kꞌuꞌx alaq, jekꞌulaꞌ kanimar ri qachak chixoꞌlibꞌal alaq e chirij ri uyaꞌom ri Dios paqaqꞌabꞌ.
2CO 10:16 Tekꞌuchiriꞌ we xutzin ri qachak chixoꞌlibꞌal alaq, utz kꞌu riꞌ kojel bꞌi y kojꞌek pa kꞌamajaꞌ katzijox wi ri Utzilaj Tzij re ri Cristo, y jelaꞌ na keꞌqamina ta qibꞌ pa ri chak re jun chik, chaꞌ na kaqatakꞌabꞌaꞌ ta qaqꞌij rukꞌ ri chak na qaꞌanom ta riꞌoj.
2CO 10:17 China kꞌu ri karaj kuyak uqꞌij, e chuqꞌalajisaj riꞌ janipa ri uꞌanom ri Dios Qajawxel che rubꞌinik usilabꞌik
2CO 10:18 Ma we jun kutakꞌabꞌaꞌ uqꞌij xa chiribꞌil ribꞌ, riꞌ na jinta uchak ri kuꞌano; noꞌj we e ri Dios kayakaw uqꞌij, e qꞌalaj riꞌ utz ri chak uꞌanom.
2CO 11:1 Chinkuyu kꞌana alaq we kinchꞌaꞌt kꞌenoq pachaꞌ junoq chꞌuꞌjerinaq.
2CO 11:2 Kanꞌan kꞌu waꞌ ma lik kꞌax kannaꞌ alaq, yey wa kꞌaxnaꞌbꞌal nukꞌuꞌx che alaq e ri Dios kojoyom pa wanimaꞌ. Ma riꞌin nuyaꞌom alaq puqꞌabꞌ ri Cristo y xew puqꞌabꞌ Rire kuaj kꞌo alaq. E pachaꞌ juna achi echiriꞌ kuya rumiꞌal puqꞌabꞌ juna ala pa kꞌulanikil. Ri karaj rachi e kuya puqꞌabꞌ rala jun saqil qꞌapoj ali. Jekꞌulaꞌ ri kuaj riꞌin che ralaq e na jinta kꞌana chꞌul che alaq chwach ri Cristo.
2CO 11:3 Lik kubꞌisoj nukꞌuꞌx ma kꞌaxtaj kakꞌulumaj e alaq jelaꞌ pachaꞌ ri xukꞌulumaj ri Eva ojertan echiriꞌ xsokotaj ruma ri tzel unoꞌjibꞌal ri kumatz. Ma kꞌaxtaj kajalkꞌataj ri naꞌoj alaq, kesaj kꞌu ibꞌ alaq puqꞌabꞌ ri Cristo y na kataqej ta chi alaq rukꞌ ronoje kꞌuꞌx alaq.
2CO 11:4 Kambꞌiꞌij waꞌ ma echiriꞌ kopon junoq ukꞌ alaq, tobꞌ junwi ri tzijonik kuꞌan puwi ri Jesús chwach ri tzijonik qaꞌanom riꞌoj che alaq, ¡lik kakꞌul kꞌu alaq riꞌ! Y kakꞌul ne alaq ri petinaq rukꞌ juna chik uxlabꞌixel, tobꞌ na e ta ri Ruxlabꞌixel ri Dios kꞌulum chi alaq. Kakꞌul ne alaq jun chik tzij, tobꞌ junwi chwach ri Utzilaj Tzij kojom chi alaq.
2CO 11:5 Kꞌo ri kakibꞌiꞌij e nimaq taq taqoꞌn yey kakitakꞌabꞌaꞌ kiqꞌij. ¿Kꞌo nebꞌa más kiwach rike chinuwa riꞌin? Kanchꞌobꞌ riꞌin, na jintaj.
2CO 11:6 Ma tobꞌ na kinchꞌaꞌt ta riꞌin rukꞌ nimaq taq chꞌaꞌtem pachaꞌ ri kakiꞌan rike, pero riꞌin más kꞌo wetaꞌam chikiwa rike; y waꞌ nukꞌutum chiwach alaq rukꞌ ronoje ri nuꞌanom chixoꞌlibꞌal alaq.
2CO 11:7 Laj kꞌo ri kakichꞌobꞌ raqan na jinta nuwach; ma echiriꞌ xintzijoj ri Utzilaj Tzij re ri Dios che alaq, na xintzꞌonoj tane kꞌana rajil ri nuchak. ¿Kꞌo nebꞌa numak riꞌ chiwach alaq ruma waꞌ? Ma we xinꞌan chꞌutiꞌn che wibꞌ, e chaꞌ kanimarisax qꞌij ralaq chwach ri Dios.
2CO 11:8 Echiriꞌ riꞌin xinkꞌojiꞌ ukꞌ alaq, e jujun chik iglesias ri xkitaq lo puaq chwe. Ekꞌu xinkꞌam puaq chike rike chaꞌ utz xinqꞌalajisaj ri Utzilaj Tzij chiwach ralaq.
2CO 11:9 Ma echiriꞌ in kꞌo ukꞌ alaq yey kꞌo kꞌu xajawax chwe, na jinta xintzꞌonoj che ralaq. Ri xetoꞌw we e ri hermanos e petinaq Macedonia. Na jinta kꞌu xinkꞌam che ralaq ma na xuaj taj xinya alkꞌayew che alaq y na kuaj tane kanꞌan waꞌ chiqawach apanoq.
2CO 11:10 Yey paqatzij wi ri Qꞌijsaq re ri Cristo pa wanimaꞌ kꞌo wi; ruma kꞌu riꞌ kanjikibꞌaꞌ uwach waꞌ: E na jinta junoq chilaꞌ Acaya kesan re ri kiꞌkotemal kannaꞌo ruma na kanya ta alkꞌayew che alaq.
2CO 11:11 Chiwach ralaq, ¿saꞌ nawi ubꞌe na kantzꞌonoj ta wajil che alaq? ¿Ruma nawi na kꞌax ta kannaꞌ alaq? Na e ta riꞌ, ma ri Dios lik retaꞌam saꞌ ri kꞌo pa wanimaꞌ.
2CO 11:12 Ekꞌu ri na kantzꞌonoj ta wajil che alaq, na kanwoqꞌotaj ta uꞌanik chaꞌ jelaꞌ kaqꞌalajinik na junam ta kojchakun riꞌoj pachaꞌ ri jujun chik, ri kakijunimaj ri kichak rukꞌ ri qachak riꞌoj xa re yakbꞌal kiqꞌij.
2CO 11:13 Rike xa e sokosoꞌnel, na e ta saqil taqoꞌn ma kiꞌanom che kibꞌ pachaꞌ e taqoꞌn re ri Cristo.
2CO 11:14 Makam kꞌu animaꞌ alaq che waꞌ; ma jenelaꞌ kuꞌan ri Satanás, kuꞌan che ribꞌ pachaꞌ e jun ángel re Qꞌijsaq.
2CO 11:15 E uwariꞌche makam animaꞌ alaq che we ri e aj chak re ri itzel winaq kakiꞌan che kibꞌ pachaꞌ e ꞌanal re ri jusukꞌ. Pero kopon kꞌu ri qꞌij echiriꞌ kakikꞌul na ri tojbꞌal re ri na utz taj kiꞌanom.
2CO 11:16 Jumul chik kambꞌiꞌij: Machꞌobꞌ alaq we riꞌin xinchꞌuꞌjerik. Yey we kꞌo junoq che alaq jelaꞌ kuchꞌobꞌo, chuyaꞌa luwar chwe kantakꞌabꞌaꞌ kꞌana nuqꞌij pachaꞌ junoq chꞌuꞌjerinaq.
2CO 11:17 Ri kaqatakꞌabꞌaꞌ qaqꞌij na e ta ukꞌutuꞌn ri Qanimajawal chiqe; pero kantakꞌabꞌaꞌ kꞌana nuqꞌij pachaꞌ junoq na jusukꞌ ta runaꞌoj.
2CO 11:18 Lik e kꞌi ri kakitakꞌabꞌaꞌ kiqꞌij ruma ri kakiꞌan che ruwachulew, yey woꞌora kanꞌan kꞌana we riꞌin.
2CO 11:19 Ralaq lik kꞌo naꞌoj alaq; na rukꞌ ta kꞌu riꞌ, lik kekꞌul alaq ri sachinaq kinaꞌoj.
2CO 11:20 E kuyum kꞌu alaq riꞌ rike tobꞌ lik ketaqan pawiꞌ alaq, kakichap ri e alaq y kakikꞌis ne rubꞌitaq e alaq, yey lik kakiꞌan nim che kibꞌ chiwach alaq. ¡Kuyum ne alaq tobꞌ kakipachꞌ qꞌabꞌ chipalaj alaq! Ronoje waꞌ kuyum alaq y na jinta kabꞌiꞌij alaq che.
2CO 11:21 Laj kꞌixbꞌal kꞌu chwe riꞌin ma na xinchꞌij ta uꞌanik pachaꞌ ri kakiꞌan rike. Pero we rike na kekꞌix ta che kakitakꞌabꞌaꞌ kiqꞌij, jekꞌulaꞌ riꞌ kanꞌan riꞌin, tobꞌ rukꞌ waꞌ pachaꞌ in chꞌuꞌjerinaq.
2CO 11:22 Rike kakitakꞌabꞌaꞌ kiqꞌij ma e aj hebreo; jelaꞌ riꞌin, in aj hebreo yey kanriq ri chꞌaꞌtem hebreo. Rike kakiꞌan nim che kibꞌ ma e kukꞌil ri tinamit re Israel, jelaꞌ riꞌin in kukꞌil ri tinamit re Israel. Rike kakiyak kiqꞌij ma e ralkꞌoꞌal kan ri Abraham; jelaꞌ riꞌin, in ralkꞌoꞌal kan ri Abraham.
2CO 11:23 Rike kakibꞌiꞌij e aj chak re ri Cristo, jelaꞌ riꞌin paqatzij wi in aj chak re ri Cristo yey más nim ri chak nuꞌanom riꞌin chikiwa rike. Tobꞌ kinchꞌaꞌt pachaꞌ in chꞌuꞌjerinaq, kambꞌiꞌij kꞌu waꞌ: Riꞌin más in chakuninaq y más nutijom kꞌax chikiwach rike. Ma ukꞌiyal laj bꞌalakꞌum nupa, ukꞌiyal laj inyaꞌom pa cárcel, ukꞌiyal laj xtewun ri kamik panuwiꞌ.
2CO 11:24 Raj judiꞌabꞌ woꞌobꞌ laj xkijichꞌ nupa pa treinta y nueve asial.
2CO 11:25 Yey oxibꞌ laj in ꞌanom pa bꞌarijon, julaj in ꞌanom paꞌbꞌaj. Oxlaj ya laj in jiqꞌinaq pa yaꞌ ruma xmuqutaj ri barco in kꞌo chupa, yey xinchꞌij ne jun aqꞌabꞌ rukꞌ jun qꞌij in kꞌo chwi ri mar.
2CO 11:26 Ukꞌiyal laj nuꞌanom unimal bꞌe. Ya laj in jiqꞌinaq pa taq nimayaꞌ. Ya laj in kaminaq pakiqꞌabꞌ eleqꞌomabꞌ y pakiqꞌabꞌ ri na e ta kukꞌil ri nutinamit. Ya laj inkamisam kuma ne ri watz-nuchaqꞌ. Ya laj inkamisam pa taq tinamit, pa taq luwar katzꞌintzꞌotik y chwi ri mar. Ya laj ne inkamisam kuma ri kakibꞌiꞌij kubꞌul kikꞌuꞌx rukꞌ ri Cristo, tobꞌ waꞌ na qatzij taj.
2CO 11:27 Nutijom kꞌaxlaj chak y kosik. Ukꞌiyal laj nukuyum waram, numik y tzajin chiꞌ. Ruma taq ri lik kꞌo kanꞌano, ukꞌiyal laj na utz ta chi ne xinwaꞌik. Nutijom kꞌaxkꞌolil tew y xinkanajik na jinta chi ne nuqꞌuꞌ.
2CO 11:28 Y xaqi uwi chi waꞌ, ri jujun qꞌij lik saꞌchi rubꞌis nukꞌuꞌx kuma taq riglesias; e kannaꞌ riꞌin waꞌ e pachaꞌ jun eqaꞌn kꞌo panuwiꞌ.
2CO 11:29 We kꞌo junoq kꞌo pa kꞌax y na jinta uchuqꞌabꞌ, e kannaꞌ riꞌin pachaꞌ in ri inkꞌulumayom re waꞌ. We kꞌo junoq kumin junoq chik pa ri mak, waꞌ kuya woyowal.
2CO 11:30 We chirajawaxik kꞌut kanyak nuqꞌij, ri takꞌabꞌal nuqꞌij kanꞌano e kantzijoj taq ri kuqꞌalajisaj, riꞌin na jinta nuchuqꞌabꞌ.
2CO 11:31 Ekꞌu ri Dios, Ruqaw ri Qanimajawal Jesucristo ri na jinta utaqexik nim uqꞌij, e etaꞌmayom re na raqꞌubꞌal ta wa kambꞌiꞌij.
2CO 11:32 Tape kꞌu alaq ri xinkꞌulumaj Damasco: Ri aj wach kꞌo chwach ri rey Aretas xtaqan che kikojik e aj chajal re ri tinamit chaꞌ kinkichapo.
2CO 11:33 Yey ruma kꞌu riꞌ xinqasax lo chupa jun nimalaj chakach, ximom lo rukꞌ lazo chwi jun nimalaj tapia kꞌo ventana che.
2CO 12:1 Tobꞌ na jinta kutiqoj che junoq kuꞌan nim che ribꞌ, na rukꞌ ta kꞌu riꞌ kantzijoj saꞌ rukꞌutum y ruqꞌalajisam ri Qajawal chinuwach.
2CO 12:2 Lik wetaꞌam kꞌu uwach jun achi uyaꞌom ribꞌ puqꞌabꞌ ri Cristo. Ekꞌu kajlajuj junabꞌ waꞌ rikꞌowik echiriꞌ rire xkꞌam bꞌi kꞌa chilaꞌ chikaj. Na wetaꞌam ta kꞌut we xkꞌam bꞌi rukꞌ rucuerpo o xa e ri ranimaꞌ xeꞌek, xew ri Dios etaꞌmayom re.
2CO 12:3 Xew kꞌu wetaꞌam xkꞌam bꞌi, tobꞌ pachaꞌ ri nubꞌiꞌim chik, na wetaꞌam taj we xkꞌam bꞌi rukꞌ rucuerpo o xa e ri ranimaꞌ xeꞌek, xew ri Dios etaꞌmayom re.
2CO 12:4 Ri wetaꞌam, e xkꞌam bꞌi chupa ri chomilaj luwar chilaꞌ chikaj. Chilaꞌ kꞌu riꞌ xuta chomilaj taq tzij yey waꞌ na yaꞌtal tane kꞌana che junoq kutzijoj.
2CO 12:5 Kambꞌiꞌij kꞌu riꞌ, utz kanyak uqꞌij ri xilow re y ri xtaw re waꞌ. Pero we kanyak nuqꞌij riꞌin, na e ta kantzijoj ri qꞌalajisam chwe, ma xew kantzijoj ri kꞌaqibꞌal bꞌi nuqꞌij.
2CO 12:6 Ma we ta kuaj kanyak nuqꞌij ruma ruqꞌalajisam ri Dios chwe, riꞌ na raqꞌubꞌal ta ri kambꞌiꞌij, ma lik e ubꞌe riꞌ. Pero na kanꞌan taj, ma na kuaj taj kꞌo junoq kukoj uwi ri ilitajinaq y ri tatajinaq chwe.
2CO 12:7 Yey chaꞌ na kanyak ta kꞌu nuqꞌij ruma na jinta kꞌana kꞌo wi ri qꞌalajisam chwe, xyaꞌtaj kꞌu che ri Satanás kukoj jun kꞌax che ri nucuerpo pachaꞌ juna kꞌiix xaqi kuchꞌikichꞌaꞌ chwe.
2CO 12:8 Ruma kꞌu riꞌ, oxlaj xinelaj che ri Qajawal chaꞌ karesaj waꞌ chwe.
2CO 12:9 Noꞌj Rire jewaꞌ xubꞌiꞌij chwe: «Ri unimal rutzil nukꞌuꞌx kꞌo awukꞌ, e waꞌ ri lik kajawax chawe. Ma ri nuchuqꞌabꞌ más kaqꞌalajin kukꞌ ri na jinta kichuqꞌabꞌ» xchaꞌ. E uwariꞌche riꞌin lik kinkiꞌkot che echiriꞌ na jinta nuchuqꞌabꞌ, ma jelaꞌ e kakꞌojiꞌ ruchuqꞌabꞌ ri Cristo wukꞌ.
2CO 12:10 Ruma kꞌu laꞌ, rukꞌ kiꞌkotemal kanchꞌij taq ri kꞌax kape panuwiꞌ ruma in re ri Cristo, tobꞌ na jinta nuchuqꞌabꞌ, tobꞌ e kꞌo ri tzel kechꞌaꞌt lo chwij, tobꞌ nukuyum nibꞌaꞌil, tobꞌ inyaꞌom pa kꞌax y pa bꞌis; ma echiriꞌ kannaꞌo na jinta nuchuqꞌabꞌ, e más kannaꞌ ruchuqꞌabꞌ ri Cristo kꞌo wukꞌ.
2CO 12:11 Xa uma kꞌu ralaq xintakꞌabꞌaꞌ nuqꞌij pachaꞌ kuꞌan junoq na jusukꞌ ta runaꞌoj, pero e ralaq xinminow alaq chupa. Ekꞌu ri lik usukꞌ e ralaq ri kayakaw alaq nuqꞌij. Ma tobꞌ na jinta nuwach riꞌin, pero waꞌ wa nimaq e taqoꞌn ri xa kakiꞌan nim che kibꞌ, rike na jinta más kiwach chinuwa riꞌin.
2CO 12:12 Echiriꞌ xinchakun chixoꞌlibꞌal alaq, xqꞌalajin chiwach alaq in utaqoꞌn ri Cristo. Ma echiriꞌ xinkꞌojiꞌ ukꞌ alaq, na xinkos ta che ukꞌutik chiwach alaq taq ri kꞌutubꞌal re ruchuqꞌabꞌ ri Dios rukꞌ nimaq taq milagros.
2CO 12:13 ¿Saꞌ nawi ri xinjaljobꞌ wi chiwach alaq? ¿Na xinꞌan ta nebꞌa che alaq pachaꞌ ri xinꞌan chike ri nikꞌaj chik iglesias? Laj e ri xinjaljobꞌ wi ma na xinya ta alkꞌayew che alaq ruma na xintzꞌonoj ta wajil che alaq. We e numak waꞌ, kuyu alaq numak.
2CO 12:14 Tape alaq: Riꞌin nuyijbꞌam chi wibꞌ chaꞌ kinopon ukꞌ alaq churox laj. Y we xinoponik, na kanya ta alkꞌayew che alaq, ma na jinta kꞌo kantzꞌonoj che alaq. Ekꞌu ri kuaj che alaq na e ta ri kꞌo ukꞌ alaq, ma e ri kakꞌut alaq ri rutzil kꞌuꞌx alaq chwe. Xew kꞌu lik kuaj kantoꞌ alaq pachaꞌ kuꞌan juna achi kukꞌ ri ralkꞌoꞌal. Ma chike ri kichu-kiqaw taqal wi kakitzukuj ri kajawax chike ri chꞌutiꞌq; na e ta ri chꞌutiꞌq ri taqal chike kakitzukuj ri kajawax chike ri kichu-kiqaw.
2CO 12:15 Ekꞌu riꞌin rukꞌ ronoje nukꞌuꞌx na xew ta kankꞌis ronoje ri kꞌo wukꞌ, ma kanya ne wibꞌ che toꞌik alaq rukꞌ ri kꞌaslemal alaq chwach ri Dios. Pero e kanwil riꞌin, echiriꞌ más kankꞌut ri kꞌaxnaꞌbꞌal nukꞌuꞌx che alaq, e más kaqꞌobꞌ ri kꞌaxnaꞌbꞌal kꞌuꞌx ralaq chwe riꞌin.
2CO 12:16 Etaꞌam kꞌu alaq na xinya ta alkꞌayew che alaq. Na rukꞌ ta kꞌu riꞌ, e kꞌo ri kakibꞌiꞌij xinwesaj ne puaq che alaq xa xeꞌlaqꞌay.
2CO 12:17 ¿Suꞌchak kachꞌobꞌ alaq waꞌ? ¿Kꞌo nebꞌa juna sokosoꞌnel nutaqom bꞌi ukꞌ alaq?
2CO 12:18 Riꞌin xintzꞌonoj che ri Tito keꞌrila alaq y xintaq bꞌi ri jun hermano rukꞌ. ¿Xuꞌan nebꞌa eleqꞌ ri Tito che alaq? Rire junam wukꞌ riꞌin xa jun qakꞌuꞌx che ri kaqaꞌano.
2CO 12:19 Hermanos, laj kachꞌobꞌ alaq e ronoje wa nubꞌiꞌim loq xa re toꞌbꞌal qibꞌ, pero na e ta riꞌ. Ma paqatzij wi chwach ri Dios y chupa rubꞌiꞌ ri Cristo qabꞌiꞌim lo waꞌ re toꞌbꞌal e alaq, ri lik kꞌax kaqanaꞌ alaq.
2CO 12:20 Kubꞌisoj nukꞌuꞌx ma kꞌaxtaj we xinopon ukꞌ alaq, na utz ta ꞌanom alaq y jelaꞌ kꞌu riꞌ na kukꞌul ta nukꞌuꞌx ri kiꞌnriqaꞌ. Yey we e riꞌ, laj na kukꞌul ta kꞌuꞌx alaq ri woponibꞌal ma riꞌ yaj ri kiꞌnꞌanaꞌ. Kubꞌisoj kꞌu nukꞌuꞌx ma kꞌaxtaj kꞌo chꞌaꞌoj chixoꞌlibꞌal alaq, kꞌo ri kꞌax kikꞌuꞌx chikij jujun chik, kꞌo oyowal chiwach alaq, jachom pa alaq, kꞌo ri kakichꞌamij kibꞌ, kꞌo ri e aj molot, kꞌo ri kakiꞌan nim che kibꞌ yey e kꞌo ri e soqꞌosaq e kiwach e tzukul chꞌaꞌoj.
2CO 12:21 Kubꞌisoj kꞌu nukꞌuꞌx ma kꞌaxtaj we xinopon tanchi ukꞌ alaq, laj kiꞌnriqaꞌ e kꞌi che alaq kꞌa e kꞌo pa mak y na kitzelem ta kitzij chwach ri Dios; ma kakiꞌan taq ri chꞌulilaj mak, kaketzꞌabꞌej uwa kiqꞌij kukꞌ jujun chik na kikꞌulel taj y kiyaꞌom kibꞌ che uꞌanik ronoje taq ri rayibꞌal re ri kitiꞌjil. We xiꞌnriqa kꞌu riꞌ waꞌ, lik kinkꞌix chwach ri Dios uma ralaq y kebꞌenuwoqꞌej kꞌu riꞌ ri kebꞌanaw re waꞌ.
2CO 13:1 Rutzij Upixabꞌ ri Dios jewaꞌ kubꞌiꞌij: «We e kꞌo kebꞌ oxibꞌ kakijikibꞌaꞌ uwach rumak junoq ma xkilo echiriꞌ kamakunik, kaqꞌat kꞌu tzij riꞌ puwi raj mak.» E urox laj waꞌ kinopon ukꞌ alaq,
2CO 13:2 yey kꞌo kuaj kambꞌiꞌij che onoje alaq y chike ri na koqꞌotam ta kan ri kimak. Waꞌ e ri nubꞌiꞌim chi kan che alaq echiriꞌ xinopon chukalaj ukꞌ alaq y woꞌora kambꞌiꞌij tanchik tobꞌ na in jinta ukꞌ alaq: We xinopon tanchik, na kiꞌntoꞌo ta wiꞌ alaq.
2CO 13:3 Kankꞌut kꞌu riꞌ chiwach alaq ri katzꞌonoj alaq, waꞌ e ri kꞌutubꞌal re we paqatzij wi ri nutzij riꞌin e utzij ri Cristo. Ma Rire na kuxiꞌij ta ribꞌ yey lik kꞌo uchuqꞌabꞌ re kusukꞌupij ri bꞌinik silabꞌik alaq.
2CO 13:4 Paqatzij wi ri Cristo echiriꞌ xkamisax chwa cruz e pachaꞌ na jinta uchuqꞌabꞌ, pero woꞌora Rire kꞌaslik ruma ruchuqꞌabꞌ ri Dios. Jekꞌuriꞌlaꞌ we riꞌoj xa jun qaꞌanom rukꞌ ri Cristo, e pachaꞌ na jinta qachuqꞌabꞌ ruma ri kꞌax kaqatijo, noꞌj kojkꞌasiꞌ ruma ruchuqꞌabꞌ ri Dios kꞌo qukꞌ yey kaqakꞌut na kꞌu riꞌ wa chuqꞌabꞌ echiriꞌ kojopon ukꞌ alaq.
2CO 13:5 Chꞌobꞌo alaq raqan we paqatzij wi kꞌo kꞌutubꞌal re ri kubꞌulibꞌal kꞌuꞌx alaq rukꞌ ri Qanimajawal Jesucristo y kꞌo kꞌu alaq puqꞌabꞌ Rire. ¿Na etaꞌam ta nebꞌa alaq Rire kꞌo pa animaꞌ alaq? ¿O kꞌaxtaj na jinta ne kꞌana kꞌutubꞌal re waꞌ chupa ri bꞌinik silabꞌik alaq?
2CO 13:6 Ekꞌu kuaj riꞌin ketaꞌmaj alaq waꞌ: Che ri qabꞌinik qasilabꞌik kaqꞌalajinik kꞌo ri Cristo pa qanimaꞌ y Rire kakiꞌkot rukꞌ ri qaꞌanom.
2CO 13:7 Kaqatzꞌonoj kꞌu che ri Dios chaꞌ ralaq na katzaq ta kꞌana alaq chupa ri na utz taj. Na kaqatzꞌonoj ta waꞌ re yakbꞌal qaqꞌij riꞌoj, ma xew kaqaj kaꞌan alaq ri utz, tobꞌ e kꞌo ri kakikꞌaq bꞌi qaqꞌij riꞌoj.
2CO 13:8 Ma riꞌoj na jinta paqaqꞌabꞌ kaqakꞌaq bꞌi kiqꞌij ri kebꞌin chupa ri Qꞌijsaq. Ri kaqaꞌano e kojchakun ne ruma ri Qꞌijsaq chaꞌ konoje kebꞌin chupa.
2CO 13:9 E uwariꞌche lik kojkiꞌkot che we kakꞌojiꞌ chuqꞌabꞌ ralaq che uꞌanik ri utz, tobꞌ kilitaj kꞌut pachaꞌ e na jinta chi qachuqꞌabꞌ riꞌoj. Kaqatzꞌonoj kꞌu che ri Dios chaꞌ e kuchomaj chi utz ri bꞌinik silabꞌik alaq.
2CO 13:10 Ruma kꞌu waꞌ, kintzꞌibꞌan apanoq xaloqꞌ kꞌamajaꞌ kinopon ukꞌ alaq, chaꞌ we xinoponik, na kajawax ta chi kꞌax kinchꞌaw pawiꞌ alaq. Ma ri chak uyaꞌom ri Dios chwe e re kꞌiyibꞌal alaq, na re ta sachibꞌal wach alaq.
2CO 13:11 Kꞌisbꞌal kꞌu re hermanos, kambꞌiꞌij waꞌ che alaq: Kꞌola kiꞌkotemal pa animaꞌ alaq, sukꞌupij ri bꞌinik silabꞌik alaq chwach ri Dios, nimarisaj kꞌuꞌx alaq chiwach alaq, chuꞌana xa jun kꞌuꞌx alaq y kꞌola alaq chi utzil chomal. Y ekꞌu ri Dios, ri aj yaꞌl utzil chomal y rutzil kꞌuꞌxaj, kakꞌojiꞌ ukꞌ alaq.
2CO 13:12 Yaꞌa rutzil wach alaq chiwach alaq rukꞌ jun saqil tzꞌubꞌuj chiꞌaj chwach ri Dios.
2CO 13:13 Konoje ri hermanos wara kakiya pan rutzil wach alaq.
2CO 13:14 Kꞌulu kꞌu onoje alaq ri unimal rutzil ukꞌuꞌx ri Qanimajawal Jesucristo y ri rutzil ukꞌuꞌx ri Dios, yey chuꞌana xa jun kꞌuꞌx alaq ruma ri Santowilaj Ruxlabꞌixel. Amén.
GAL 1:1 Riꞌin in Pablo, in utaqoꞌn ri Dios. Na e ta kꞌu juna tikawex taqayom lo we, na e ta juna achi kojoyom we; ma e ri Qanimajawal Jesucristo y e ri Qaqaw Dios, ri Jun xukꞌastajisaj lo Rukꞌajol chikixoꞌl ri ekaminaq.
GAL 1:2 Junam kꞌu kukꞌ konoje ri hermanos e kꞌo wara wukꞌ, kantzꞌibꞌaj pan wa carta chike riglesias e kꞌo che ri luwar re Galacia.
GAL 1:3 Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo,
GAL 1:4 ri xuya ribꞌ pa kamik ruma ri qamak. Xuꞌan waꞌ ma e xraj riꞌ ri Qaqaw Dios che chaꞌ jelaꞌ kojresaj lo che ronoje ri na utz taj kakiꞌan ri winaq chupa taq wa qꞌij oj kꞌo wi.
GAL 1:5 Qayaka kꞌu uqꞌij ri Qaqaw Dios waqꞌij ora y chiqawach apanoq na jinta chi utaqexik. Amén.
GAL 1:6 E riꞌin lik kakam wanimaꞌ che ma na jampatana xya kan alaq ri Dios, ri xusikꞌij alaq ruma ri unimal rutzil ukꞌuꞌx ri Cristo, yey ekꞌu woꞌora e taqem alaq jun kꞌutunik junwi chwa ri Utzilaj Tzij re ri Cristo.
GAL 1:7 Waꞌ na e ta keꞌelawi kꞌo juna chik Utzilaj Tzij puwi ri Cristo. Pero e kꞌo jujun xa kakisachisaj naꞌoj alaq y e kakaj kakijalkꞌatij ri Utzilaj Tzij re ri Cristo.
GAL 1:8 Tobꞌ ne junoq chiqe riꞌoj o juna ángel re chilaꞌ chikaj kutzijoj juna chik kꞌutunik che alaq junwi chwa ri Utzilaj Tzij qatzijom chi riꞌoj che alaq, peta kꞌu riꞌ ri qꞌatbꞌal tzij re ri Dios puwiꞌ.
GAL 1:9 Jelaꞌ pachaꞌ ri nubꞌiꞌim loq, kambꞌiꞌij tanchi woꞌora: We kꞌo junoq kutzijoj juna chik kꞌutunik junwi chwa ri Utzilaj Tzij tom chi alaq, peta kꞌu riꞌ ri qꞌatbꞌal tzij re ri Dios puwiꞌ.
GAL 1:10 ¿E nebꞌa kantzukuj riꞌin ri yakbꞌal nuqꞌij chikiwach ri tikawex o e kuaj kanꞌan janipa ri karaj ri Dios? ¿E nebꞌa kuaj riꞌin kinel chi utz chikiwach ri tikawex? We ta riꞌin xa e kantzukuj ri kayak nuqꞌij kuma ri tikawex, riꞌ na in ta saqil aj chak re ri Cristo.
GAL 1:11 Chetaꞌmaj kꞌu alaq hermanos: Ri Utzilaj Tzij kantzijoj riꞌin na xa ta uchꞌaꞌtem juna achi,
GAL 1:12 na e ta juna achi xyaꞌw chwe y na che tane juna achi xinmaj wi waꞌ; ma e ri Qanimajawal Jesucristo xqꞌalajisan chwe.
GAL 1:13 Tom chi kꞌu alaq puwi ri nubꞌinik nusilabꞌik ojertan echiriꞌ nutaqem taq ri kojobꞌal ke raj judiꞌabꞌ; rukꞌ kꞌax xebꞌenuternabꞌej rutinamit ri Dios ri kikojom rubꞌiꞌ ri Cristo y lik xintij uqꞌij kansach kiwach konoje.
GAL 1:14 Chikixoꞌl ri wachbꞌiꞌil junam oj kꞌiyinaq loq, in ri lik xinya wibꞌ che utaqexik taq ri kojobꞌal ke kan ri qatiꞌ-qamam ri oj aj judiꞌabꞌ.
GAL 1:15 Na rukꞌ ta kꞌu riꞌ, ri Dios xinuchaꞌ lo riꞌin echiriꞌ kꞌamajaꞌ ne kinalaxik, xinusikꞌij ruma ri unimal rutzil ukꞌuꞌx
GAL 1:16 y xuqꞌalajisaj uwach Rukꞌajol chwe chaꞌ e kantzijoj ri Utzilaj Tzij chike ri na e ta aj Israel. Yey puwi waꞌ na xintzꞌonoj tane nunaꞌoj che juna tikawex.
GAL 1:17 Na xinꞌek tane Jerusalem re kebꞌeꞌnuwila ri ebꞌuꞌanom taqoꞌn nabꞌe chinuwa riꞌin. Ri xinꞌano, e xinꞌek Arabia y kꞌa tekꞌuchiriꞌ xintzelej tanchi Damasco.
GAL 1:18 Xikꞌow na kꞌu oxibꞌ junabꞌ echiriꞌ xintzelej Jerusalem re kanwetaꞌmaj uwach ri Pedro y xinkꞌojiꞌ chilaꞌ rukꞌ woꞌlajuj qꞌij.
GAL 1:19 Yey na xinwil ta kiwach ri jujun chik e taqoꞌn; xew xinwil uwach ri Jacobo, ruchaqꞌ ri Qanimajawal.
GAL 1:20 Chwach kꞌu ri Dios kambꞌiꞌij che alaq: Wa kantzꞌibꞌaj pan che alaq lik qatzij, na raqꞌubꞌal taj.
GAL 1:21 Tekꞌuchiriꞌ xinꞌek tanchi che taq ri luwar re Siria y re Cilicia.
GAL 1:22 Chupa taq laꞌ la qꞌij, ri hermanos re riglesias e kꞌo Judea kꞌamajaꞌ ne kaketaꞌmaj nuwach riꞌin,
GAL 1:23 xew kitom kabꞌiꞌxik: «E rachi xojuternabꞌej rukꞌ kꞌax ruma qakojom rubꞌiꞌ ri Qanimajawal, woꞌora katajin che utzijoxik ri Utzilaj Tzij, yey e ne rire ri lik xraj kusachisaj uwach waꞌ.»
GAL 1:24 Wuma kꞌu riꞌin ri hermanos e aj Judea lik xkiyak uqꞌij ri Dios.
GAL 2:1 Xikꞌow na kꞌu kajlajuj junabꞌ echiriꞌ xinꞌek tanchi Jerusalem rukꞌ ri Bernabé, yey xinkꞌam bꞌi ri Tito qukꞌ.
GAL 2:2 Xinꞌek kꞌut, ma ri Dios xuqꞌalajisaj chwe chirajawaxik kinopon chilaꞌ. Xqamol kꞌu qibꞌ xew kukꞌ ri e aj wach re riglesia y xinqꞌalajisaj chikiwach ri Utzilaj Tzij kantzijoj chike ri na e ta aj judiꞌabꞌ. E xinꞌan waꞌ chaꞌ janipa ri nuꞌanom chik y taq ri kintajin che uꞌanik na kasach ta uwach.
GAL 2:3 Wachbꞌiꞌil kꞌu ri Tito yey rire na e ta kukꞌil ri e aj judiꞌabꞌ; na rukꞌ ta kꞌu riꞌ, ri e aj wach re riglesia na xkitaq tane che rire kukoj ri retalil re circuncisión.
GAL 2:4 Xqamol kꞌu qibꞌ kukꞌ wa e aj wach, ma e kꞌo jujun na e ta saqil hermanos xkimin kibꞌ chiqaxoꞌlibꞌal riꞌoj chaꞌ e kakikꞌakꞌalej ri qabꞌinik qasilabꞌik ri oj re ri Cristo, ri Jun xojresaj lo chuxeꞌ ri taqanik ke raj judiꞌabꞌ. Xkiꞌan waꞌ xa re kakaj kojkꞌojiꞌ pakiqꞌabꞌ rike.
GAL 2:5 Pero riꞌoj na xqataqej ta kꞌana ri kakibꞌiꞌij chaꞌ jelaꞌ na kajalkꞌataj ta ri Qꞌijsaq re ri Utzilaj Tzij kojom chi alaq.
GAL 2:6 E taq kꞌu raj wach re riglesia ri lik kꞌo kiwach, tobꞌ na jinta kꞌo kuꞌan chwe riꞌin we ri petinaq loq kꞌo kiwach o na jintaj ma chwach ri Dios xa jun qawach; rike na jinta juna kꞌakꞌ tzij xkikoj puwi ri nukꞌutunik riꞌin.
GAL 2:7 Y na xew ta waꞌ, ma xkimaj usukꞌ e ri Dios xyaꞌw panuqꞌabꞌ riꞌin rutzijoxik ri Utzilaj Tzij chike ri na e ta aj judiꞌabꞌ, jelaꞌ pachaꞌ xyaꞌiꞌ che ri Pedro rutzijoxik waꞌ chike ri e aj judiꞌabꞌ.
GAL 2:8 Ma ri Dios, ri xutaq bꞌi ri Pedro re kuꞌana utaqoꞌn chikixoꞌl ri e aj judiꞌabꞌ, e xtaqaw bꞌi weꞌin re kinuꞌana utaqoꞌn chikixoꞌl ri na e ta aj judiꞌabꞌ.
GAL 2:9 Ekꞌu ri Jacobo, ri Pedro y ri Juan, ri lik kꞌo kiwach pa riglesia, xkimaj usukꞌ e ri Dios yaꞌyom wa jun chak chwe. Xkiya kꞌu riꞌ ri kiqꞌabꞌ chwe riꞌin y che ri Bernabé, kꞌutubꞌal re oj chi kachbꞌiꞌil rike. Y xukꞌul kikꞌuꞌx kojchakun riꞌin y ri Bernabé chikixoꞌl ri na e ta aj judiꞌabꞌ, yey rike e kechakun chikixoꞌl ri e aj judiꞌabꞌ.
GAL 2:10 Xew kꞌu lik xkitzꞌonoj chiqe na keqameskꞌutaj ta ri e nibꞌaꞌibꞌ y waꞌ lik e kacha nukꞌuꞌx che uꞌanik.
GAL 2:11 Na rukꞌ ta kꞌu riꞌ, echiriꞌ ri Pedro xkꞌun pa ri tinamit Antioquía, riꞌin e laꞌ chiwachil lik ko xinchꞌaꞌbꞌej upa ruma ri na usukꞌ taj katajin che uꞌanik.
GAL 2:12 Ma ri Pedro xaqi kawaꞌ kukꞌ ri hermanos na e ta aj judiꞌabꞌ, noꞌj echiriꞌ xekꞌun jujun e petinaq Jerusalem pa riglesia pa kꞌo wi ri Jacobo, xresaj ribꞌ chikij ri na e ta aj judiꞌabꞌ y na xwaꞌ ta chi kukꞌ, ma kuxiꞌij ribꞌ chikiwach ri lik kebꞌok il che ri retalil re circuncisión.
GAL 2:13 Ekꞌu ri hermanos e aj judiꞌabꞌ xkiꞌan ke rukꞌ ri Pedro, yey ri Bernabé xpachaꞌbꞌ ne kukꞌ waꞌ wa xa kebꞌ kipalaj.
GAL 2:14 Echiriꞌ riꞌin xinwilo na e ta kakiꞌan jelaꞌ pachaꞌ ri kubꞌiꞌij ri saqil kꞌutunik re ri Utzilaj Tzij, jewaꞌ ximbꞌiꞌij che ri Pedro chikiwach konoje ri kimolom kibꞌ: «Rilal, lal kukꞌil raj judiꞌabꞌ yey kaꞌan e la pachaꞌ ri kakiꞌan ri hermanos na e ta aj judiꞌabꞌ y na kataqej ta chi la jujun che ri taqanik ke raj judiꞌabꞌ. ¿Saꞌ kꞌu uchak riꞌ kabꞌiꞌij rilal chike ri na e ta aj judiꞌabꞌ chirajawaxik kakitaqej wa taqanik ke ri e aj judiꞌabꞌ?»
GAL 2:15 Ri oj aj judiꞌabꞌ, chwi qalaxik loq, na oj ta aj palajiy tzij pachaꞌ ri jujun chik tinamit na jinta Rutzij Upixabꞌ ri Dios kukꞌ.
GAL 2:16 Na rukꞌ ta kꞌu riꞌ, qetaꞌam na jinta junoq kuꞌan jusukꞌ che ribꞌ ruma kutaqej ri taqanik ke raj judiꞌabꞌ; ma ri lik chirajawaxik wi e ri kubꞌulibꞌal kꞌuꞌxaj rukꞌ ri Qanimajawal Jesucristo. E uwariꞌche riꞌoj xqakoj rubꞌiꞌ chaꞌ jelaꞌ Rire kuꞌan jusukꞌ chiqe xew ruma ri kubꞌulibꞌal qakꞌuꞌx rukꞌ y na ruma ta ri kaqataqej juna tzij pixabꞌ. Ma na jinta junoq kuꞌan jusukꞌ che ribꞌ ruma kutaqej ri taqanik ke raj judiꞌabꞌ.
GAL 2:17 Ekꞌu riꞌoj lik kaqaj kojuꞌan jusukꞌ chwach ri Dios xew ruma ri kubꞌulibꞌal qakꞌuꞌx rukꞌ ri Cristo; yey we chikiwach kꞌu jujun chik, oj aj mak ruma na kaqataqej ta chi ri kitaqanik rike, ¿e nawi keꞌeloq kojuꞌana aj mak ruma ri kubꞌulibꞌal qakꞌuꞌx rukꞌ ri Cristo? ¡Na e ta riꞌ!
GAL 2:18 Ma we kankꞌosoj tanchi lo uwach ri nukꞌaqom chubꞌi, riꞌ e keꞌeloq in jun aj palajiy tzij.
GAL 2:19 Riꞌin xinya wibꞌ che uꞌanik ronoje ri taqanik ke raj judiꞌabꞌ chaꞌ jelaꞌ kanꞌan jusukꞌ che wibꞌ, pero xinmaj usukꞌ na ruma ta waꞌ kuꞌan jusukꞌ junoq chwach ri Dios; ekꞌu woꞌora nuyaꞌom wibꞌ che uloqꞌnimaxik ri Dios rukꞌ ronoje ri nukꞌaslem.
GAL 2:20 Jekꞌulaꞌ, ri nukꞌaslemal na weꞌin ta chik, ma e re ri Qanimajawal Jesucristo. E pachaꞌ xinkam chwa ri cruz junam rukꞌ ri Cristo. Woꞌora che ri nukꞌaslem, ronoje ri kanꞌano e ruma ri kubꞌulibꞌal nukꞌuꞌx rukꞌ Rukꞌajol ri Dios, ri lik kꞌax xinunaꞌo y xuya ribꞌ pa kamik wuma riꞌin.
GAL 2:21 Na kuaj ta kꞌut kankꞌaq bꞌi uqꞌij ri unimal rutzil ukꞌuꞌx ri Dios; ma we ta kꞌo junoq kuriqo kuꞌan jusukꞌ che ribꞌ chwach ri Dios ruma utaqem ri tzij pixabꞌ, riꞌ na jinta kutiqoj rukamik ri Cristo.
GAL 3:1 ¡Toqꞌoꞌ wach alaq aj Galacia! Lik ko ꞌanom che ri kꞌuꞌx alaq. ¿China xsokosoꞌn e alaq chaꞌ na kakoj ta chi alaq ri Qꞌijsaq? Ma lik xqꞌalajisax chiwach alaq saꞌ keꞌelawi rukamik ri Qanimajawal Jesucristo chwa ri cruz.
GAL 3:2 Bꞌiꞌij alaq waꞌ chwe: ¿Xkꞌul alaq ri Ruxlabꞌixel ri Dios ruma xtaqej alaq ri taqanik ke raj judiꞌabꞌ o ruma xta alaq ri Utzilaj Tzij y xkubꞌiꞌ kꞌuꞌx alaq che?
GAL 3:3 ¿Suꞌchak lik ꞌanom ko che ri kꞌuꞌx alaq? Ma ri bꞌinik silabꞌik alaq chwach ri Dios xjeq lo alaq ruma ruchuqꞌabꞌ ri Ruxlabꞌixel ri Dios, yey woꞌora ¿kaꞌaj kami alaq riꞌ kakꞌisbꞌej alaq waꞌ xa rukꞌ ri chuqꞌabꞌ ralaq?
GAL 3:4 ¿Na jinta kami utiqom riꞌ che alaq janipa taq ri kꞌulum alaq ruma ri Ruxlabꞌixel ri Dios? Na kankoj ta kꞌana riꞌin we waꞌ na jinta utiqom che alaq.
GAL 3:5 Ma echiriꞌ ri Dios kuya ri Ruxlabꞌixel che alaq y rukꞌ ruchuqꞌabꞌ kuꞌan nimaq taq milagros chixoꞌl alaq, ¿suꞌanik kuꞌano? ¿E nawi ruma taqem alaq ri taqanik ke raj judiꞌabꞌ o e ruma xta alaq ri Utzilaj Tzij y xkubꞌiꞌ kꞌuꞌx alaq che?
GAL 3:6 Ri Abraham xkubꞌiꞌ ukꞌuꞌx rukꞌ ri Dios y ruma kꞌu riꞌ xꞌaniꞌ jusukꞌ che.
GAL 3:7 E uwariꞌche, chirajawaxik ketaꞌmaj alaq waꞌ: E janipa ri lik kubꞌul kikꞌuꞌx rukꞌ ri Dios, riꞌ e ralkꞌoꞌal kan ri Abraham.
GAL 3:8 Ruchꞌaꞌtem ri Dios xex chi ubꞌiꞌim wi lo pakiwi ri na e ta aj Israel, we rike kakubꞌiꞌ kikꞌuꞌx rukꞌ ri Dios, kebꞌuꞌan jusukꞌ. Ma jewaꞌ ri utzilaj tzij xbꞌiꞌx lo ojertan che ri Abraham: Awuma riꞌat, ri Dios kebꞌuꞌan bendecir konoje taq ri tinamit che ruwachulew.
GAL 3:9 Jekꞌuriꞌlaꞌ, konoje ri kakubꞌiꞌ kikꞌuꞌx rukꞌ ri Dios kakikꞌul na ri utz kape rukꞌ Rire, jelaꞌ pachaꞌ ri xukꞌul ri Abraham ruma xkubꞌiꞌ ukꞌuꞌx rukꞌ.
GAL 3:10 Konoje ri kikubꞌam kikꞌuꞌx kekolobꞌetaj xa ruma kakitaqej uꞌanik ri tzij pixabꞌ, riꞌ e kꞌo chi chuxeꞌ ri qꞌatbꞌal tzij re ri Dios, ma jewaꞌ tzꞌibꞌitalik: China kꞌu ri na kuꞌan ta janipa ri taqanik tzꞌibꞌital kan chupa ri Tzij Pixabꞌ, riꞌ kꞌo chi chuxeꞌ ri qꞌatbꞌal tzij re ri Dios kachaꞌ.
GAL 3:11 Kaqꞌalajin kꞌu riꞌ, na jinta junoq kuꞌan jusukꞌ che ribꞌ chwach ri Dios ruma kutaqej ri Tzij Pixabꞌ, ma jewaꞌ tzꞌibꞌitalik: Ri e jusukꞌ chwach ri Dios, kꞌo kikꞌaslemal ruma ri kubꞌulibꞌal kikꞌuꞌx rukꞌ Rire kachaꞌ.
GAL 3:12 E junoq kuchꞌobꞌ raqan kakolobꞌetaj ruma kutaqej ronoje ri Tzij Pixabꞌ, riꞌ na kubꞌul ta ukꞌuꞌx kakolobꞌetaj ruma ri kubꞌulibꞌal ukꞌuꞌx rukꞌ ri Cristo. Yey jenewaꞌ kubꞌiꞌij Ruchꞌaꞌtem ri Dios: China ri kaꞌanaw re ronoje ri kubꞌiꞌij ri Tzij Pixabꞌ, riꞌ kꞌo ukꞌaslemal chwach ri Dios ruma kuꞌan waꞌ kachaꞌ.
GAL 3:13 Ri Cristo xojresaj chuxeꞌ ri qꞌatbꞌal tzij kꞌo paqawiꞌ ruma xqapalajij Rutzij Upixabꞌ ri Dios; xuꞌan kꞌu waꞌ echiriꞌ xuya ribꞌ paqakꞌaxel ri oj aj mak, ma jewaꞌ ri tzꞌibꞌital kan pa Ruchꞌaꞌtem ri Dios: Chwach ri Dios, itzel uwach junoq katzayabꞌax chwa juna cheꞌ.
GAL 3:14 E xuꞌan waꞌ ri Qanimajawal Jesucristo chaꞌ ri rutzil ukꞌuꞌx ri Dios, ri xbꞌiꞌtisix che ri Abraham, kayaꞌtaj na pakiwi ri na e ta aj Israel ruma ri Cristo; y jekꞌulaꞌ ruma ri kubꞌulibꞌal qakꞌuꞌx, qonoje kaqakꞌul ri Ruxlabꞌixel ri Dios bꞌiꞌtisim chi uloq.
GAL 3:15 Hermanos, ri uꞌanom ri Dios kanjunimaj rukꞌ ri kakiꞌan ri tikawex chaꞌ kamaj alaq usukꞌ: Echiriꞌ kebꞌ achijabꞌ kakiꞌan juna tzij chikiwach y kakijikibꞌaꞌ uwach, lik na utz ta kꞌu riꞌ we jun chike kutzelej uchꞌaꞌtem che ri ubꞌiꞌim chik o kukoj uwiꞌ ri kijikibꞌam chik.
GAL 3:16 Ekꞌu ri Dios xuya rubꞌiꞌtisinik che ri Abraham y che kan ri Jun ralkꞌoꞌal. Rutzij Upixabꞌ ri Dios na jetawaꞌ kubꞌiꞌij «chike kan rawalkꞌoꞌal», pachaꞌ e ukꞌiyal tikawex, ma jewaꞌ kubꞌiꞌij «che kan ri Jun awalkꞌoꞌal»; waꞌ keꞌelawi e ri Cristo.
GAL 3:17 Wa kintajin che ubꞌiꞌxik e waꞌ: Ri Dios xuꞌan jun tzij rukꞌ ri Abraham. Xikꞌow na kꞌu cuatrocientos treinta junabꞌ kꞌa echiriꞌ ri Moisés xutzꞌibꞌaj kan ri taqanik re ri Tzij Pixabꞌ. Ekꞌu wa taqanik na utz taj kuyoj wa nabꞌe tzij y na kuyoj tane ri xubꞌiꞌtisij lo ri Dios.
GAL 3:18 Ma we ta kaqakꞌul rubꞌiꞌtisim ri Dios ruma kaqataqej ri Tzij Pixabꞌ, riꞌ na e ta ruma ri bꞌiꞌtisinik xuꞌan ri Dios; noꞌj ri xusipaj ri Dios che ri Abraham e ruma ri bꞌiꞌtisinik uꞌanom chi che.
GAL 3:19 ¿Saꞌ kꞌu ruchak riꞌ ri Tzij Pixabꞌ tzꞌibꞌital kan ruma ri Moisés? E chaꞌ kuqꞌalajisaj chike ri tikawex saꞌ taq ri kimak chwach ri Dios. Y jelaꞌ uꞌanom loq kꞌa che rukꞌunibꞌal ri Jun Alkꞌoꞌal bꞌiꞌtisim loq, waꞌ e ri Cristo; ma che Rire xꞌan wi waꞌ wa bꞌiꞌtisinik. Ri Tzij Pixabꞌ xtzijox kuma ri ángeles che ri Moisés chaꞌ rire kuqꞌatisaj chikiwach ri tinamit;
GAL 3:20 noꞌj ri Dios echiriꞌ xuꞌan rubꞌiꞌtisinik che ri Abraham, na jinta junoq xqꞌatisan ri tzij chikiwach, ma e Rire xuqꞌatisaj rutzij che ri Abraham y na xajawax ta kꞌu junoq chik.
GAL 3:21 E uwariꞌche, echiriꞌ ri Dios xuya Rutzij Upixabꞌ che ri Moisés, ¿e nawi xujalkꞌatij ri bꞌiꞌtisinik uꞌanom chi che ri Abraham? Na e taj. Ma we ta e riꞌ, e ri Tzij Pixabꞌ kayaꞌw ri qakꞌaslemal chwach ri Dios, y kojuꞌan kꞌu jusukꞌ riꞌ ruma ri kaqataqej ri tzꞌibꞌital kanoq. Noꞌj na e ta uꞌanom riꞌ.
GAL 3:22 Ma chupa ri Tzij Pixabꞌ tzꞌibꞌital kanoq, kaqꞌalajinik qonoje ri oj tikawex oj kꞌo puqꞌabꞌ ri mak; e uwariꞌche lik kajawax ri bꞌiꞌtisinik uꞌanom lo ri Dios chike ri kakubꞌiꞌ kikꞌuꞌx rukꞌ ri Qanimajawal Jesucristo.
GAL 3:23 Echiriꞌ kꞌamajaꞌ kakꞌun ri Jun kakubꞌiꞌ qakꞌuꞌx rukꞌ, e ri Tzij Pixabꞌ xojuchajij y xukꞌam lo qawach chaꞌ kakubꞌiꞌ qakꞌuꞌx rukꞌ ri Cristo echiriꞌ kopon ruqꞌijol kaqꞌalajisax ri Utzilaj Tzij chiqawach.
GAL 3:24 Ekꞌu keꞌelawi, ri Tzij Pixabꞌ tzꞌibꞌital kan ruma ri Moisés xojuchajij y xukꞌut chiqe ri kajawaxik kaqamajo, pachaꞌ chi oj akꞌalabꞌ; xuqꞌalajisaj kꞌu pan rukꞌunibꞌal ri Cristo chaꞌ ruma ri kubꞌulibꞌal qakꞌuꞌx rukꞌ Rire, ri Dios kuꞌan jusukꞌ chiqe.
GAL 3:25 Ekꞌu woꞌora kubꞌul chi qakꞌuꞌx rukꞌ ri Cristo, jekꞌulaꞌ na oj jinta chi chuxeꞌ ri Tzij Pixabꞌ ri xukꞌam lo qawach ojertan.
GAL 3:26 Ma onoje ralaq alaq chi ralkꞌoꞌal ri Dios ruma ri kubꞌulibꞌal kꞌuꞌx alaq rukꞌ ri Qanimajawal Jesucristo.
GAL 3:27 Onoje kꞌu ralaq ri xkꞌul alaq ri bautismo chupa rubꞌiꞌ ri Jesús, woꞌora alaq chi re ri Cristo y kakꞌut kꞌu alaq waꞌ rukꞌ ri bꞌinik silabꞌik alaq.
GAL 3:28 Xa jun ꞌanom alaq chwach ri Dios, tobꞌ jujun che alaq e kukꞌil raj judiꞌabꞌ o na e ta kukꞌil, tobꞌ ne jujun che alaq e aj chakibꞌ eloqꞌotalik yey jujun chik kechakun pa ke rike, tobꞌ achi o ixoq; ma onoje ralaq, xa jun ꞌanom alaq ruma alaq kꞌo puqꞌabꞌ ri Qanimajawal Jesucristo.
GAL 3:29 Yey we alaq re ri Cristo, riꞌ alaq ralkꞌoꞌal ri Abraham yey kakꞌul kꞌu alaq ri sipanik ubꞌiꞌtisim lo ri Dios.
GAL 4:1 Kambꞌiꞌij kꞌu waꞌ che alaq: Echiriꞌ kꞌa chꞌutiꞌn rukꞌajol juna bꞌeyom, e junam rukꞌ pachaꞌ juna aj chak pa ja. Tobꞌ ne e rire ri rajaw ronoje ri bꞌeyomalil, pero waꞌ kꞌamajaꞌ kakꞌojiꞌ puqꞌabꞌ
GAL 4:2 ma kꞌa kꞌo pakiqꞌabꞌ ri e chajal re y ri kakichakuj rubꞌitaq re, kopon na ruqꞌijol bꞌiꞌtal kan ruma ruqaw echiriꞌ kel chuxeꞌ ri taqanik ke rike.
GAL 4:3 Jekꞌulaꞌ qakꞌulumam riꞌoj ojertan, e pachaꞌ oj akꞌalabꞌ kꞌa oj kꞌo puqꞌabꞌ ri taqanik kojotal che ruwachulew.
GAL 4:4 Noꞌj echiriꞌ xopon ruqꞌijol chaꞌtal chi lo ruma ri Dios, Rire xutaq lo Rukꞌajol, ri xalax ruma jun ixoq y xalax chuxeꞌ ri taqanik re ri Tzij Pixabꞌ tzꞌibꞌital kan ruma ri Moisés.
GAL 4:5 Rire xkꞌunik chaꞌ kojukolobꞌej ri oj kꞌo chuxeꞌ wa taqanik, y jekꞌulaꞌ kojuꞌana oj ralkꞌoꞌal ri Dios.
GAL 4:6 E uwariꞌche, ruma oj chi ralkꞌoꞌal ri Dios, Rire xutaq lo ri Ruxlabꞌixel Rukꞌajol chupa ri qanimaꞌ; y ruma kꞌu ri Ruxlabꞌixel, utz kaqabꞌiꞌij che ri Dios: «¡Tat, Lal Nuqaw!» kojchaꞌ.
GAL 4:7 E uwariꞌche na lal ta chi pachaꞌ jun aj chak kꞌo puqꞌabꞌ juna patrón, ma woꞌora lal ralkꞌoꞌal ri Dios. Y ruma lal ralkꞌoꞌal, Rire kuya na cheꞌla janipa ri ubꞌiꞌtisim chike ri ralkꞌoꞌal.
GAL 4:8 Paqatzij wi, rojertan echiriꞌ na etaꞌam ta alaq uwach ri Dios, ralaq e keloqꞌnimaj alaq taq ri tiox, ri lik kewi na e ta dios.
GAL 4:9 Ekꞌu woꞌora etaꞌam chi alaq uwach ri Dios, o ri más jusukꞌ ubꞌiꞌxikil e “ralaq etaꞌmatal chi wach alaq ruma ri Dios”. ¿Saꞌ kꞌu ubꞌe riꞌ kaya tanchi ibꞌ alaq chuxeꞌ taq ri taqanik na il ta uwach y na jinta uchak?
GAL 4:10 Ma lik kaloqꞌnimaj alaq taq ri nimaqꞌij re ri jujun qꞌij, ri jujun ikꞌ, ri jujun junabꞌ yey ruqꞌijol ri jachbꞌal upa taq ri junabꞌ.
GAL 4:11 Lik kubꞌisoj nukꞌuꞌx ma kꞌaxtaj ri chak nuꞌanom chixoꞌl alaq na jinta kutiqoj.
GAL 4:12 Hermanos, lik kantzꞌonoj che alaq ꞌana e alaq jelaꞌ pachaꞌ ri nuꞌanom riꞌin, ma riꞌin jelaꞌ xinꞌano pachaꞌ ralaq. Yey echiriꞌ xinkꞌojiꞌ ukꞌ alaq na jinta juna kꞌax xꞌan alaq chwe.
GAL 4:13 Ma etaꞌam chi alaq, echiriꞌ xintzijoj ri Utzilaj Tzij che alaq ri nabꞌe laj, xinkanaj kan ukꞌ alaq ruma jun yabꞌil in kꞌo wi.
GAL 4:14 Yey na tzel ta xinil alaq, na xkꞌaq tane bꞌi alaq nuqꞌij tobꞌ e laꞌ kꞌo wa yabꞌil chwe. Ma ri xꞌan alaq e xinkꞌul alaq, xꞌan alaq chwe pachaꞌ in jun ángel re ri Dios, pachaꞌ chi e xkꞌul alaq ri Qanimajawal Jesucristo.
GAL 4:15 ¿Pa kꞌu xkanaj kan wi riꞌ ri kiꞌkotemal kꞌo ukꞌ alaq echiriꞌ xinopon chilaꞌ? Ma ri xinwil che alaq e kaya ne animaꞌ alaq kesaj ri wach ralaq chaꞌ kaya alaq chwe riꞌin.
GAL 4:16 ¿Ruma kami ximbꞌiꞌij ri lik qatzij che alaq, e tzel kinil wi alaq riꞌ woꞌora?
GAL 4:17 Taq laꞌ la tikawex lik chakojoꞌ lik kꞌax kakinaꞌ alaq tobꞌ na e ta kakitzukuj ri utz che alaq, ma ri kakaj rike e na kojtaqej ta chi alaq chaꞌ xew e ketaqej alaq rike.
GAL 4:18 Paqatzij wi lik utz we ralaq ketaqej alaq jujun chik, xew tane we rike e kakitzukuj ri lik utz che ralaq. Jekꞌulaꞌ kuaj kaꞌan ralaq wukꞌ riꞌin y na xew ta echiriꞌ in kꞌo ukꞌ alaq.
GAL 4:19 Ralaq pachaꞌ alaq walkꞌoꞌal, riꞌin kantij tanchi kꞌax uma ralaq jelaꞌ pachaꞌ juna ixoq echiriꞌ kutzir uwach. Y kantij kꞌu wa kꞌax kꞌa echiriꞌ ri bꞌinik silabꞌik alaq kuꞌana pachaꞌ ri re ri Cristo.
GAL 4:20 Lik ne kuaj ta e laꞌ in kꞌo chilaꞌ ukꞌ alaq woꞌora yey na lik ta kꞌax kinchꞌaw pawiꞌ alaq, ma lik uchapom wanimaꞌ ri ꞌanom alaq.
GAL 4:21 Ralaq ri kaꞌaj alaq kakꞌojiꞌ alaq chuxeꞌ ri taqanik ke raj judiꞌabꞌ, kantzꞌonoj che alaq: ¿Na tom ta nebꞌa alaq ri ubꞌiꞌim kan ri Moisés chupa ri Tzij Pixabꞌ?
GAL 4:22 Ma tzꞌibꞌital kanoq ri Abraham xekꞌojiꞌ kaꞌibꞌ ukꞌajol. Jun chike xalax rukꞌ rixoq aj chak pa ja; ri jun chik ukꞌajol xalax rukꞌ ri rixoqil.
GAL 4:23 E rukꞌajol xalax rukꞌ rixoq aj chak pa ja, xalaxik xa ruma kinoꞌjibꞌal rike; noꞌj rukꞌajol xalax rukꞌ ri rixoqil, e ubꞌiꞌtisim riꞌ ri Dios che ri Abraham.
GAL 4:24 Ekꞌu waꞌ e jun kꞌambꞌal naꞌoj. Ri kebꞌ ixoqibꞌ e keꞌelawi kebꞌ tzij; jun e ri petinaq che ri juyubꞌ Sinaí pa xuya wi ri Dios ri taqanik re ri Tzij Pixabꞌ. Waꞌ wiꞌxoq e Agar, yey ri e ralkꞌoꞌal rire e ri kakiya kibꞌ chuxeꞌ ri taqanik ke raj judiꞌabꞌ.
GAL 4:25 Ekꞌu ri Agar e kajunimax rukꞌ ri juyubꞌ Sinaí kꞌo chilaꞌ pa ri luwar re Arabia; yey waqꞌij ora waꞌ e ri e aj Jerusalem, ma waꞌ wa tinamit e kꞌo chuxeꞌ taq ri taqanik ke raj judiꞌabꞌ.
GAL 4:26 Noꞌj ri “Jerusalem” re chilaꞌ chikaj elinaq chi chuxeꞌ ri taqanik ke raj judiꞌabꞌ yey riꞌoj oj ralkꞌoꞌal waꞌ wa tinamit.
GAL 4:27 Ma jewaꞌ tzꞌibꞌital kan pa Ruchꞌaꞌtem ri Dios: ¡Chatkiꞌkot riꞌat ixoq ri na katalan taj, ri na jinta awalkꞌoꞌal! ¡Chatsikꞌin ruma rakiꞌkotemal, riꞌat ri na at ikꞌowinaq ta pa ri kꞌax re juna ixoq echiriꞌ kutzir uwach! Ma ri e ralkꞌoꞌal rixoq xoqꞌotax kanoq, más kekꞌiyar chikiwach ri e ralkꞌoꞌal rixoq kꞌo rachijil kachaꞌ.
GAL 4:28 Hermanos, riꞌoj oj jelaꞌ pachaꞌ ri Isaac, ma oj saqil ralkꞌoꞌal ri Dios ruma ri bꞌiꞌtisinik xuꞌan Rire.
GAL 4:29 Yey pachaꞌ ri xuꞌan rojertan, ri xalax xa ruma rurayibꞌal rachi e xuternabꞌej rukꞌ kꞌax ri xalax e chirij ri xraj ri Ruxlabꞌixel ri Dios; jekꞌulaꞌ uꞌanom woꞌora.
GAL 4:30 Pero ¿saꞌ ri kubꞌiꞌij Ruchꞌaꞌtem ri Dios tzꞌibꞌital kanoq? Jewaꞌ kubꞌiꞌij: E chesaj bꞌi la rixoq aj chak pa ja junam rukꞌ ri ralabꞌ. Ma che ri ralabꞌ wiꞌxoq na kayaꞌiꞌ ta ri taqal che kukꞌul ri ralabꞌ ri rixoqil ri rajaw ja kachaꞌ.
GAL 4:31 E uwariꞌche hermanos, riꞌoj na oj ta ralkꞌoꞌal rixoq aj chak pa ja, ma oj ralkꞌoꞌal ri rixoqil ri rajaw ja.
GAL 5:1 E chuqꞌubꞌej ibꞌ alaq che ri kolobꞌetajik xyaꞌiꞌ chiqe ruma ri Cristo echiriꞌ xojresaj lo chuxeꞌ ri taqanik ke raj judiꞌabꞌ; maya tanchi kꞌu ibꞌ alaq chuxeꞌ rukꞌayewal waꞌ wa taqanik.
GAL 5:2 Chinta na pe alaq. Riꞌin Pablo, kambꞌiꞌij che alaq: We kaya ibꞌ alaq che ukojik ri retalil re circuncisión chaꞌ kakꞌojiꞌ alaq jusukꞌ chwach ri Dios, riꞌ na jinta uchak ri Cristo che alaq.
GAL 5:3 Kuaj kambꞌiꞌij tanchi waꞌ: We juna achi kukoj ri retalil re circuncisión, riꞌ chirajawaxik che e kuꞌan ronoje ri taqanik ke raj judiꞌabꞌ.
GAL 5:4 Ekꞌu ralaq, ri kachꞌobꞌ alaq e kuꞌan alaq jusukꞌ chwach ri Dios ruma ri kataqej alaq wa taqanik, riꞌ che ri Cristo xesaj wi ibꞌ alaq y e xya kan alaq ri unimal rutzil ukꞌuꞌx ri Dios.
GAL 5:5 Noꞌj riꞌoj, ruma ri Ruxlabꞌixel ri Dios pa qanimaꞌ, qoyeꞌem ri qꞌij echiriꞌ ri Dios kojukꞌulu ma oj chi jusukꞌ chwach ruma ri kubꞌulibꞌal qakꞌuꞌx rukꞌ ri Cristo.
GAL 5:6 Yey we oj re ri Qanimajawal Jesucristo, na jinta chi keꞌelawi we kaqakoj ri retalil re circuncisión o we na kaqakoj taj. Ma ri lik chirajawaxik e ri kubꞌulibꞌal qakꞌuꞌx rukꞌ ri Cristo, yey waꞌ e kaqakꞌut ruma ri rutzil qakꞌuꞌx.
GAL 5:7 Ri bꞌinik silabꞌik alaq rukꞌ ri Cristo xjeq lo alaq chi utz. ¿China xqꞌaten e alaq chaꞌ na kabꞌin ta chi alaq chupa ri Qꞌijsaq?
GAL 5:8 Ri Dios, ri xusikꞌij alaq, na e ta xukꞌut waꞌ che alaq.
GAL 5:9 Masach chikꞌuꞌx alaq waꞌ: «Echiriꞌ keꞌek jubꞌiqꞌ levadura chupa ri qꞌor re pam, waꞌ kusipowirisaj upa ronoje.» Waꞌ e keꞌeloq: E junoq na saqil ta runaꞌoj, kusachisaj ri kinaꞌoj ri jujun chik.
GAL 5:10 Ruma kꞌu qayaꞌom qibꞌ ralaq y riꞌin puqꞌabꞌ ri Cristo, e lik kubꞌul nukꞌuꞌx na jinta juna chik naꞌoj alaq puwi waꞌ chwa ri kanchꞌobꞌ riꞌin. Yey we kꞌo junoq kusachisaj naꞌoj alaq, kꞌo chi riꞌ ri qꞌatbꞌal tzij re ri Dios puwiꞌ, xa tobꞌ chinoq.
GAL 5:11 Ekꞌu riꞌin hermanos, we ta e laꞌ kambꞌiꞌij chirajawaxik kakoj ri retalil re circuncisión che junoq chaꞌ kakolobꞌetajik, riꞌ raj judiꞌabꞌ na kechꞌoꞌjin ta chi wukꞌ y na tzel tane kakita ri tzijonik kanꞌan puwi rukamik ri Qanimajawal Jesucristo chwa ri cruz. Noꞌj na je ta laꞌ uꞌanom.
GAL 5:12 Ekꞌu chike ri kakisachisaj naꞌoj alaq, ¡ta ne asu kiqꞌata bꞌi ri kulewal!
GAL 5:13 Ma ralaq hermanos, xsikꞌix alaq chaꞌ na kakꞌojiꞌ ta alaq chuxeꞌ ri taqanik ke raj judiꞌabꞌ; xew kꞌu matzꞌilaꞌ ri bꞌinik silabꞌik alaq rukꞌ taq ri rayibꞌal re ri tiꞌjil alaq. E nimaj ibꞌ alaq chiwach alaq rukꞌ rutzil kꞌuꞌxaj.
GAL 5:14 Ma ronoje ri taqanik re ri Moisés katzꞌaqat uwach rukꞌ wa chꞌaꞌtem: «Kꞌax chanaꞌa rawatz-achaqꞌ jelaꞌ pachaꞌ ri kꞌax kanaꞌ awibꞌ riꞌat» kachaꞌ.
GAL 5:15 Noꞌj we ralaq kapurij ibꞌ alaq y katij ne ibꞌ alaq chiwach alaq, chajij kꞌu ibꞌ alaq riꞌ ma kꞌaxtaj asu kasach ne wach alaq chiwach alaq.
GAL 5:16 Kambꞌiꞌij kꞌu waꞌ che alaq: E taqej alaq janipa ri karaj ri Ruxlabꞌixel ri Dios che alaq chaꞌ jelaꞌ na kaya ta ibꞌ alaq che taq ri rayibꞌal re ri tiꞌjil alaq.
GAL 5:17 Ma e rurayibꞌal ri tiꞌjil alaq na kukꞌulaj ta ribꞌ rukꞌ ri karaj ri Ruxlabꞌixel ri Dios, yey e ri Ruxlabꞌixel ri Dios na kukꞌulaj ta ribꞌ rukꞌ rurayibꞌal ri tiꞌjil alaq. Kikabꞌichal kꞌu riꞌ kechꞌoꞌjin chikiwach; ruma kꞌu laꞌ, ri tiꞌjil alaq kuqꞌatej ri utz kaꞌaj alaq kaꞌan alaq.
GAL 5:18 Noꞌj we e ri Ruxlabꞌixel ri Dios ri kakꞌamaw wach alaq, riꞌ na jinta alaq chuxeꞌ ri taqanik re ri Tzij Pixabꞌ.
GAL 5:19 Lik kaqꞌalajin uwach taq ri na utz taj kakiꞌan ri winaq ri kakitaqej taq ri rayibꞌal re ri kitiꞌjil. Rike e kemakun chirij ri kꞌulanikil, kaketzꞌabꞌej uwa kiqꞌij kukꞌ jujun chik na kikꞌulel taj, kakiꞌan ri chꞌulilaj mak y kakimaj uwach taq ri rayibꞌal re ri kitiꞌjil,
GAL 5:20 kakiloqꞌnimaj uqꞌij tiox, kakiꞌan itz, tzel kekil jujun chik, e aj chꞌaꞌoj, kꞌax kikꞌuꞌx chikij jujun chik; e aj oyowal, e aj chapanel che chꞌaꞌoj, e aj jachal kipa jujun chik, e aj kꞌutunel re taq naꞌoj na utz taj
GAL 5:21 tzel kakil jun chik ruma kakirayij ri kꞌo rukꞌ, e kamisanel, e qꞌabꞌaꞌrelabꞌ, kakimol kibꞌ re kakiꞌan chꞌulilaj mak y kakiꞌan jujun chik mak pachaꞌ taq waꞌ. Kambꞌiꞌij kꞌu jumul chik che alaq: Konoje waꞌ na jinta ke kukꞌ ri yaꞌtal chike kebꞌok pa rutaqanik ri Dios.
GAL 5:22 Noꞌj rujiqꞌobꞌalil ri Ruxlabꞌixel ri Dios rukꞌ junoq e waꞌ: pa ranimaꞌ kꞌo rutzil kꞌuꞌxaj, kꞌo kiꞌkotemal y kꞌo utzil chomal; kꞌo unimal ukꞌuꞌx, utz ukꞌuꞌx, kꞌo relej ukꞌuꞌx; ri jujun chik kakubꞌiꞌ kikꞌuꞌx rukꞌ, ma janipa ri kubꞌiꞌij, e kuꞌanaꞌ;
GAL 5:23 na kuꞌan ta nim che ribꞌ y kuchꞌij uchuqꞌabꞌ taq ri rayibꞌal re rutiꞌjil. We jekꞌuriꞌlaꞌ uꞌanom junoq, na kajawax tane riꞌ kꞌo junoq kapixabꞌan re chaꞌ kuꞌan ri utz.
GAL 5:24 Janipa ri e re ri Qanimajawal Jesucristo, na kakitaqej ta chi ri rayibꞌal re ri kitiꞌjil.
GAL 5:25 We ri Ruxlabꞌixel ri Dios uyaꞌom ri kꞌakꞌ qakꞌaslemal, qayaꞌa kꞌu ri qabꞌinik qasilabꞌik puqꞌabꞌ Rire.
GAL 5:26 Maqatzukuj ri yakbꞌal qaqꞌij, maqapetisaj qoyowal chiqawach y matzel meqil jujun chik ruma kaqarayij ri kꞌo kukꞌ.
GAL 6:1 Hermanos, we xnaꞌbꞌej alaq kꞌo junoq tzaqinaq pa mak, e ralaq ri kꞌamom wach alaq ruma ri Ruxlabꞌixel ri Dios, toꞌo alaq chaꞌ kayaktajik. Yey chajij ibꞌ alaq ma kꞌaxtaj katzaq ralaq chupa waꞌ wa xuꞌan rire.
GAL 6:2 Toꞌo ibꞌ alaq chiwach alaq we kꞌo junoq che alaq kꞌo pa kꞌaxkꞌobꞌik, ma jekꞌuriꞌlaꞌ katajin alaq che uꞌanik ri tzij xukꞌut kan ri Cristo.
GAL 6:3 Ma we kꞌo junoq kuchꞌobꞌo lik kꞌo uwach ruma ri kuꞌano yey na e ta kꞌu uꞌanom, riꞌ utukel kusok ribꞌ.
GAL 6:4 E uwariꞌche chirajawaxik wi chiqajujunal kaqachꞌobꞌ chi utz puwi ri qaꞌanom. Y we utz ri qaꞌanom chwach ri Dios, chojkiꞌkot kꞌu riꞌ, pero maqaꞌan kꞌu nim che qibꞌ xa ruma qaꞌanom más chikiwa ri jujun chik.
GAL 6:5 Ma ri chirajawaxik wi e chiqajujunal kaqakꞌam bꞌi ri kꞌo chiqaqul kaqaꞌano.
GAL 6:6 We kꞌo junoq kukꞌut Rutzij Upixabꞌ ri Dios che alaq, chirajawaxik wi katoꞌ alaq rire rukꞌ ri bꞌitaq e alaq.
GAL 6:7 Masokosaꞌ ibꞌ alaq: Na jinta junoq kasokow re ri Dios. E chirij ri kutik junoq, e jelaꞌ ri kumolo.
GAL 6:8 Ma we junoq e kuya ribꞌ che taq ri rayibꞌal re rutiꞌjil, riꞌ e kukꞌam lo ri kamik puwiꞌ. Noꞌj we junoq e kuya ribꞌ che uꞌanik ri karaj ri Ruxlabꞌixel ri Dios, riꞌ che ri Ruxlabꞌixel kukꞌul ri kꞌaslemal na jinta utaqexik.
GAL 6:9 Mojkos che uꞌanik ri utz y maqoqꞌotaj ne uꞌanik waꞌ, ma kopon na ruqꞌijol keꞌqila uwach rujiqꞌobꞌalil ri qaꞌanom.
GAL 6:10 E uwariꞌche, we kꞌo paqaqꞌabꞌ kaqaꞌan ri utz, e qaꞌana kꞌu riꞌ waꞌ chike konoje, y más e qaꞌana riꞌ chike konoje ri kikojom rubꞌiꞌ ri Cristo.
GAL 6:11 Chilape alaq, rukꞌ nimaq taq letras kintzꞌibꞌan pan che alaq.
GAL 6:12 Ri jujun kakibꞌiꞌij che alaq e lik chirajawaxik wi kakoj alaq ri retalil re circuncisión, kakiꞌan waꞌ xa e chaꞌ na kakijal ta uchiꞌ chikiwach jujun chik y chaꞌ na kape ta kꞌax pakiwiꞌ ruma kakitzijoj rukamik ri Cristo chwa ri cruz.
GAL 6:13 Ma ri jujun kakimin alaq chupa che ukojik ri retalil re circuncisión, rike na kakiꞌan tane ronoje ri Tzij Pixabꞌ; xew kakaj kakitakꞌabꞌaꞌ kiqꞌij ruma xkoj alaq kitzij.
GAL 6:14 Noꞌj riꞌin na kuaj ta kꞌana kantakꞌabꞌaꞌ nuqꞌij, xew lik kanyak uqꞌij ri Qanimajawal Jesucristo ruma ri xuꞌan Rire chwa ri cruz. Ruma kꞌu riꞌ, na kacha ta chi nukꞌuꞌx che taq ri xa re ruwachulew; ronoje waꞌ e pachaꞌ kaminaq chi chinuwach riꞌin; yey riꞌin e pachaꞌ in chi kaminaq chwach taq ri xa re ruwachulew.
GAL 6:15 Ma we oj re ri Qanimajawal Jesucristo, na jinta chi keꞌelawi we kaqakoj ri retalil re circuncisión o we na kaqakoj taj; ma ri lik karaj Rire, e kuꞌan kꞌakꞌ ri qabꞌinik qasilabꞌik.
GAL 6:16 Onoje kꞌu ralaq ri taqem alaq waꞌ wa kꞌutunik puwi ri kꞌakꞌ qabꞌinik, kꞌulu alaq ri utzil chomal y ri rutzil ukꞌuꞌx ri Dios, junam kukꞌ rutinamit Israel, ri paqatzij wi e re Rire.
GAL 6:17 Chwi kꞌu woꞌora, na kuaj taj kꞌo juna latzꞌanel chwe puwi ri nukꞌutunik, ma che ri nucuerpo qꞌalaj taq ri kꞌutubꞌal re ri kꞌaxkꞌobꞌik xinikꞌow wi ruma in jun aj chak re ri Qanimajawal Jesucristo.
GAL 6:18 Hermanos, kꞌola kꞌu pa animaꞌ alaq ri unimal rutzil ukꞌuꞌx ri Qanimajawal Jesucristo. Amén.
EPH 1:1 Riꞌin in Pablo in taqoꞌn re ri Qanimajawal Jesucristo; e ri Dios intaqayom re, ma e xraj riꞌ chwe. Kantzꞌibꞌaj pan wa carta che alaq ri kꞌo alaq pa ri tinamit Éfeso, ri kꞌo alaq puqꞌabꞌ ri Cristo y tikil alaq chi utz chupa rubꞌiꞌ.
EPH 1:2 Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
EPH 1:3 ¡Lik nim uqꞌij ri Dios, Ruqaw ri Qanimajawal Jesucristo! Ruma oj chi re ri Cristo, ri Dios uyaꞌom lo chiqe ronoje taq ri toꞌbꞌal petinaq chilaꞌ chikaj.
EPH 1:4 Ma ri Dios kꞌamajaꞌ ne kuꞌan ruwachulew echiriꞌ xojuchaꞌ loq chaꞌ kojuya puqꞌabꞌ ri Cristo, y jelaꞌ kojuꞌan jusukꞌ y na jinta chi ne kꞌana qamak chwach.
EPH 1:5 Ruma kꞌu rutzil ukꞌuꞌx ri Dios, lik ojertan xujikibꞌaꞌ lo uwach chaꞌ kuꞌan ralkꞌoꞌal chiqe ruma ri Qanimajawal Jesucristo. Yey lik pa ranimaꞌ xalax wi kuꞌan waꞌ.
EPH 1:6 Kaqayak kꞌu uqꞌij ri Dios ruma ri unimal rutzil ukꞌuꞌx paqawiꞌ, ri xuya chiqe ruma Rukꞌajol, ri lik kꞌax kunaꞌ Rire.
EPH 1:7 Rukꞌ kꞌu riꞌ ri Cristo kꞌo qakolobꞌetajik y kꞌo kuybꞌal qamak ruma rukikꞌel xturuwik, yey qariqom waꞌ ruma ri unimal rutzil ukꞌuꞌx ri Dios.
EPH 1:8 Na jinta kꞌu utaqexik wa rutzil ukꞌuꞌx uyaꞌom lo paqawiꞌ. Yey xuya ne chi saq ri qanaꞌoj
EPH 1:9 chaꞌ kaqetaꞌmaj saꞌ runaꞌoj Rire, ri na uyaꞌom ta che retaꞌmaxik ojertan. Ma uchꞌobꞌom chi lo ojertan chiribꞌil ribꞌ saꞌ ri karaj kuꞌan ruma ri Cristo
EPH 1:10 echiriꞌ kopon na ruqꞌijol kukꞌam lo ronoje taq ri kꞌolik, waꞌ e taq ri e kꞌo chilaꞌ chikaj y ri e kꞌo che ruwachulew, yey kuya na ronoje waꞌ puqꞌabꞌ ri Cristo chaꞌ kataqan puwiꞌ.
EPH 1:11 Ruma kꞌu oj re ri Cristo, kaqakꞌul na rubꞌiꞌtisim lo ri Dios chiqe, ma xojuchaꞌ lo ojertan chaꞌ kaqaꞌan janipa ri uchꞌobꞌom chi lo Rire. Yey Rire lik e kuꞌana ronoje ri karaj kuꞌano jelaꞌ pachaꞌ ri uchꞌobꞌom chi uloq.
EPH 1:12 Xojuchaꞌ kꞌu riꞌ re yakbꞌal uqꞌij Rire chaꞌ kilitaj ruchomalil quma riꞌoj, ri nabꞌe xkubꞌiꞌ qakꞌuꞌx rukꞌ ri Cristo.
EPH 1:13 Ekꞌuchiriꞌ ralaq xta alaq rutzijoxik ri Qꞌijsaq, ri Utzilaj Tzij puwi suꞌanik kakolobꞌetaj alaq; xkubꞌiꞌ kꞌuꞌx alaq rukꞌ ri Cristo y xkꞌul kꞌu alaq ri bꞌiꞌtisim kanoq: Waꞌ e ri Santowilaj Ruxlabꞌixel ri Dios pa animaꞌ alaq, kꞌutubꞌal re, alaq chi re ri Dios.
EPH 1:14 Yey ri Ruxlabꞌixel ri Dios pa qanimaꞌ e kajikibꞌan uwach chiqe, chiqawach apanoq kaqakꞌul na rutzꞌaqatibꞌal janipa ri ubꞌiꞌtisim kan ri Dios chiqe chaꞌ jelaꞌ kaqayak uqꞌij ri Dios ruma ri unimal uchomalil.
EPH 1:15 Ruma kꞌu nutom lik kubꞌul kꞌuꞌx alaq rukꞌ ri Qanimajawal Jesucristo y lik kꞌutum ri rutzil kꞌuꞌx alaq chike konoje ri kikojom rubꞌiꞌ,
EPH 1:16 na kinuxlan ta che kintioxin chwach ri Dios uma ralaq echiriꞌ kanꞌan orar.
EPH 1:17 Kanꞌan orar chwach ri Qaqaw ri lik nim uqꞌij, ri Dios re ri Qanimajawal Jesucristo. Kantzꞌonoj kꞌu che chuyaꞌa lo naꞌoj alaq ruma ri Ruxlabꞌixel y chuqꞌalajisaj kꞌu chiwach alaq runaꞌoj Rire chaꞌ jelaꞌ ketaꞌmaj alaq uwach chi utz.
EPH 1:18 Yey kantzꞌonoj che ri Dios kuya chi saq ri naꞌoj alaq chaꞌ jelaꞌ ketaꞌmaj alaq chi utz saꞌ taq ri oyeꞌem alaq, ma alaq sikꞌim ruma ri Dios. Chetaꞌmaj kꞌu alaq saꞌ ri chomilaj bꞌeyomalil ubꞌiꞌtisim chike konoje ri e re Rire.
EPH 1:19 Kuaj kꞌut lik ketaꞌmaj alaq runimal uchuqꞌabꞌ ri Dios, ma waꞌ na jinta kajunumitaj wi. Y wa uchuqꞌabꞌ kꞌo chi qukꞌ, ma rukꞌ waꞌ ri Dios kachakun chiqaxoꞌl riꞌoj ri lik kubꞌul qakꞌuꞌx rukꞌ.
EPH 1:20 Waꞌ wa uchuqꞌabꞌ e xukꞌutu echiriꞌ xukꞌastajisaj lo ri Cristo chikixoꞌl taq ri ekaminaq y xutzꞌuyubꞌaꞌ puwikiqꞌabꞌ chilaꞌ chikaj.
EPH 1:21 Jelaꞌ ri Dios xuya puqꞌabꞌ ri Cristo kataqan pakiwi konoje ri e taqanelabꞌ, ri lik kꞌo kiwach, ri kꞌo kichuqꞌabꞌ y ri lik yakom kiqꞌij. Ma rubꞌiꞌ ri Cristo e más nim uqꞌij chwach ronoje taq bꞌiꞌaj, ma na jinta jun chik más kꞌo uwach chwa Rire; y waꞌ na xew ta woꞌora ma jelaꞌ chiqawach apanoq.
EPH 1:22 Ekꞌu ri Dios xuya ronoje xeꞌraqan uqꞌabꞌ ri Cristo y xukojo chaꞌ kuꞌan unimal ujolom riglesia
EPH 1:23 y riglesia e ucuerpo Rire. Jekꞌulaꞌ ri Cristo rukꞌ riglesia junam katzꞌaqat kiwach, y e ri Cristo ri katzꞌaqatisan re janipa taq ri kꞌolik.
EPH 2:1 Ri Dios uyaꞌom kꞌakꞌ kꞌaslemal che alaq, tobꞌ ojertan kaminaq alaq chwach ri Dios ruma xmakun alaq y xpalajij alaq Rutzij.
EPH 2:2 Ma rojertan ri bꞌinik silabꞌik alaq e junam rukꞌ ri kibꞌinik taq ri winaq re ruwachulew. E xnimaj alaq janipa rutaqanik ri jun kataqan xa pa tew, waꞌ e ri itzel uxlabꞌixel, ri kataqan waqꞌij ora kukꞌ taq ri winaq kakipalajij Rutzij ri Dios.
EPH 2:3 Qonoje riꞌoj ojertan xqaꞌan qeꞌoj kukꞌ rike, ma e xqataqej janipa taq ri rayibꞌal re ri qatiꞌjil y taq ri na utz taj kakꞌun pa qajolom. Lik qalaxibꞌem chi lo waꞌ oj aj makibꞌ. Ruma kꞌu laꞌ, lik taqal chiqe we ta xpe ri royowal ri Dios paqawiꞌ jelaꞌ pachaꞌ ri kuꞌan kukꞌ konoje ri e aj makibꞌ.
EPH 2:4 Pero ri Dios ruma lik kꞌo unimal rutzil ukꞌuꞌx, xoj-juchꞌ kaꞌn che y kꞌax xojunaꞌo.
EPH 2:5 Ma echiriꞌ kꞌa oj kaminaq chwach Rire ruma ri qamak, xuya kꞌakꞌ kꞌaslemal chiqe junam rukꞌ ri Cristo. Ruma kꞌu ri unimal rutzil ukꞌuꞌx ri Dios kꞌo qakolobꞌetajik.
EPH 2:6 Y junam rukꞌ ri Qanimajawal Jesucristo xojukꞌastajisaj loq y xuya chiqe kojtaqan rukꞌ Rire chilaꞌ chikaj.
EPH 2:7 Ri Dios xuꞌan waꞌ chiqe chaꞌ chiqawach apanoq lik kaqꞌalajin ri unimal rutzil ukꞌuꞌx na jinta utaqexik, ri xuya lo rukꞌ relej ukꞌuꞌx paqawiꞌ ruma ri Qanimajawal Jesucristo.
EPH 2:8 Ma ruma kꞌu ri unimal rutzil ukꞌuꞌx ri Dios kꞌo kolobꞌetajik alaq yey waꞌ e ruma xkubꞌiꞌ kꞌuꞌx alaq rukꞌ ri Cristo. Y ri kolobꞌetajik, na alaq ta xchꞌakow re, ma e jun sipanik re ri Dios che alaq.
EPH 2:9 Ri kolobꞌetajik na kariqitaj ta kꞌu riꞌ ruma ri utz kaꞌan alaq, chaꞌ jelaꞌ na jinta junoq kutakꞌabꞌaꞌ uqꞌij.
EPH 2:10 Ma e ri Dios xuꞌan kꞌakꞌ chiqe ruma ri Qanimajawal Jesucristo chaꞌ kaqaꞌan ri utz chwach jelaꞌ pachaꞌ ri uchꞌobꞌom chi lo ojertan.
EPH 2:11 Echiriꞌ xalax alaq, na alaq ta kukꞌil ri e aj judiꞌabꞌ. Y rike xkibꞌiꞌij kꞌu che alaq: «Lik na junam ta iwach qukꞌ riꞌoj, ma riꞌoj kojotal ri retalil re circuncisión chiqe, kꞌutubꞌal re oj utinamit ri Dios; noꞌj riꞌix na jinta waꞌ chiwe» kechaꞌ. Yey waꞌ kojotal che ri cuerpo xa kuma tikawex.
EPH 2:12 Ekꞌu rojertan na jinta ri Cristo pa animaꞌ alaq, na alaq ta ne kukꞌil raj Israel ri yaꞌtal chike e utinamit ri Dios, y na jinta ne oyeꞌem alaq che ri bꞌiꞌtisinik uꞌanom ri Dios echiriꞌ xuꞌan tzij kukꞌ rutinamit; lik kꞌu xa tukel alaq riꞌ che ruwachulew ma na jinta ri Dios ukꞌ alaq.
EPH 2:13 Noꞌj woꞌora kꞌo chi alaq puqꞌabꞌ ri Qanimajawal Jesucristo; yey na naj ta chi kꞌo wi alaq che ri Dios, ma ruma rukikꞌel ri Cristo, yaꞌtal che alaq kopon alaq chwach ri Dios.
EPH 2:14 Ekꞌu riꞌ ri Cristo xojyaꞌw chi utzil chomal chiqawach ri oj aj judiꞌabꞌ ukꞌ ralaq ri na alaq ta aj judiꞌabꞌ; xuꞌan kꞌu xa jun chiqe y xresaj ri qꞌatbꞌal kajachaw qapa.
EPH 2:15 Ri Cristo echiriꞌ xuya ribꞌ pa kamik, e xusach uwach ri retzelal kꞌuꞌx kꞌo chiqawach ruma ri tzij pixabꞌ kitaqem raj judiꞌabꞌ. Jekꞌuriꞌlaꞌ, che wa kebꞌ tinamit xuꞌan xa jun tinamit, jun kꞌakꞌ tinamit uꞌanom xa jun rukꞌ Rire. Xutik kꞌu ri utzil chomal chiqaxoꞌl.
EPH 2:16 Ma rukꞌ rukamik chwa ri cruz, xebꞌuya wa kebꞌ tinamit chi utzil chomal chwach; xuꞌan kꞌu xa jun chike chaꞌ na tzel ta chi kakil kibꞌ.
EPH 2:17 Xkꞌun kꞌu ri Cristo y xutzijoj chike konoje suꞌanik kekꞌojiꞌ chi utzil chomal rukꞌ ri Dios. Xutzijoj kꞌu wa Utzilaj Tzij che ralaq echiriꞌ kꞌa naj kꞌo wi alaq che ri Dios y chike rutinamit Israel ri xa naqaj e kꞌo wi che.
EPH 2:18 Ruma kꞌu ri xuꞌan ri Cristo, qonoje tobꞌ oj aj judiꞌabꞌ o na oj ta aj judiꞌabꞌ yaꞌtal chiqe kojopon chwach ri Qaqaw Dios ruma ri Ruxlabꞌixel Rire kꞌo qukꞌ.
EPH 2:19 Jekꞌuriꞌlaꞌ, woꞌora na alaq ta chi pachaꞌ ri xa e ikꞌowel o ri e jeqel pa juna luwar na kitinamit taj; ma alaq chi kukꞌil rutinamit ri Dios, alaq chi ralkꞌoꞌal ri Dios, junam kukꞌ konoje ri e re Rire.
EPH 2:20 E ralaq pachaꞌ alaq juna ja katajin ri Dios che uyakik. Alaq pachaꞌ xan katajin utzꞌaqik chwi ri kowilaj uparaqan ri ja, yey waꞌ e ri kikꞌutum kan ri e taqoꞌn y ri qꞌalajisanelabꞌ re ri Dios. Ekꞌu rukꞌuꞌxibꞌal lo ruparaqan ri ja e ri Qanimajawal Jesucristo.
EPH 2:21 Lik kꞌu riꞌ kuchap bꞌi ribꞌ chi utz ri ja ma ronoje ri kojotal che, tzꞌaqom bꞌi chi utz chwi ri ratzꞌayaq, chaꞌ jelaꞌ kuꞌana jun santowilaj rocho ri Dios, ma tikil chi utz rukꞌ ri Qanimajawal.
EPH 2:22 Ruma kꞌu ri Dios, alaq junam kukꞌ raj judiꞌabꞌ ri kikojom rubꞌiꞌ ri Cristo; uꞌanom che alaq, alaq rocho ri Dios, ma Rire jeqel ukꞌ alaq ruma ri Ruxlabꞌixel uyaꞌom che alaq.
EPH 3:1 Riꞌin in Pablo, in kꞌo pa cárcel ruma xintzijoj rubꞌiꞌ ri Qanimajawal Jesucristo che ralaq ri na alaq ta aj judiꞌabꞌ.
EPH 3:2 Lik tom chi kꞌu alaq ri chak uyaꞌom ri Dios chwe: Waꞌ e ri kantzijoj che alaq ri unimal rutzil ukꞌuꞌx ri Dios.
EPH 3:3 Ma ri Dios xukꞌut chinuwach ri na etaꞌmatal ta ojertan, yey puwi waꞌ nutzꞌibꞌam chi pan jubꞌiqꞌ che alaq.
EPH 3:4 We xajilaj alaq wa nutzꞌibꞌam, kamaj alaq usukꞌ saꞌ ri xqꞌalajisax chwe puwi ri Cristo.
EPH 3:5 Ojertan waꞌ na qꞌalajisam ta chikiwach ri tikawex; noꞌj woꞌora ruma ri Ruxlabꞌixel ri Dios xqꞌalajisax chikiwach ri e taqoꞌn y ri qꞌalajisanelabꞌ echaꞌtal ruma ri Dios.
EPH 3:6 Rukꞌuꞌxibꞌal ri qꞌalajisam chik e waꞌ: Ri bꞌiꞌtisim lo ruma ri Dios na xew ta ke raj judiꞌabꞌ, ma ke ne ri na e ta aj judiꞌabꞌ; uꞌanom kꞌu xa jun chike y junam koyeꞌem janipa rubꞌiꞌtisim lo ri Dios chike ri kakikoj ri Utzilaj Tzij re ri Qanimajawal Jesucristo.
EPH 3:7 Ruma kꞌu ri unimal rutzil ukꞌuꞌx ri Dios wukꞌ riꞌin, xyaꞌtaj chwe xinuꞌan raj chak ri Cristo re kantzijoj ri Utzilaj Tzij. Y xew kꞌu ruma ruchuqꞌabꞌ ri Dios, kel pan chi utz ri chak chwi nuqꞌabꞌ.
EPH 3:8 Riꞌin tobꞌ lik na jinta ko nuwach chikiwa konoje ri echaꞌtal ruma ri Dios; na rukꞌ ta kꞌu riꞌ, xyaꞌtaj chwe rutzijoxik ri Utzilaj Tzij chike ri na e ta aj judiꞌabꞌ. Kantzijoj kꞌu chike saꞌ taq ri chomilaj bꞌeyomalil re ri Cristo, ri na jinta ne junoq kachꞌijow uchꞌobꞌik ruchomalil taq waꞌ.
EPH 3:9 Y yaꞌom chwe kanqꞌalajisaj chikiwach konoje ri tikawex saꞌ ri uchꞌobꞌom lo ri Dios, ri xꞌanaw re ronoje ri kꞌolik. Kanqꞌalajisaj kꞌu ri na etaꞌmatal ta lo rojertan, ri kꞌa e woꞌora kel lo chi saq.
EPH 3:10 Ma ri karaj ri Dios woꞌora e chaꞌ ruma riglesia kilitaj chi utz rukꞌiyal taq uwach unaꞌoj Rire chikiwach taq ri kꞌo kiwach y ri kꞌo kichuqꞌabꞌ, waꞌ e ri ketaqan xa pa tew.
EPH 3:11 E janipa kꞌu ri uchꞌobꞌom lo ri Dios echiriꞌ kꞌamajaꞌ ne kuꞌan ruwachulew, e uꞌanom riꞌ ruma ri Jesucristo, ri Qanimajawal.
EPH 3:12 Ruma kꞌu ri Cristo xyaꞌtaj chiqe kojopon chwach ri Dios; lik kꞌu jikil uwach, ri Dios kojukꞌul chi utz ruma ri kubꞌulibꞌal qakꞌuꞌx rukꞌ ri Cristo.
EPH 3:13 E uwariꞌche kambꞌiꞌij che alaq, mapax kꞌuꞌx alaq ruma wa kꞌaxkꞌobꞌik in kꞌo wi, e ne kiꞌkota alaq ma uma ralaq na jinta kubꞌiꞌij nukꞌuꞌx kinikꞌow chupa waꞌ.
EPH 3:14 Ruma taq kꞌu waꞌ, kanxuk wibꞌ chwach Ruqaw ri Qanimajawal Jesucristo,
EPH 3:15 ma che ri Qaqaw e petinaq wi konoje taq ri familia e kꞌo chilaꞌ chikaj kukꞌ ri e kꞌo che ruwachulew.
EPH 3:16 Kantzꞌonoj che ri Qaqaw chaꞌ e chirij taq ri chomilaj ubꞌeyomalil, kuya lo unimal chuqꞌabꞌ pa ri animaꞌ alaq y jekꞌulaꞌ kachuqꞌubꞌej ibꞌ alaq ruma ri Ruxlabꞌixel Rire.
EPH 3:17 Kantzꞌonoj che ri Dios chaꞌ kajeqiꞌ ri Cristo pa animaꞌ alaq ruma ri kubꞌulibꞌal kꞌuꞌx alaq y katikiꞌ kꞌu alaq chi utz chupa ri rutzil ukꞌuꞌx pachaꞌ juna cheꞌ lik naj bꞌenaq wi ri ratzꞌayaq.
EPH 3:18 Chuyaꞌa kꞌu che alaq junam kukꞌ konoje ri e re Rire, ri ketaꞌmaj alaq chi utz ri rutzil ukꞌuꞌx ri Cristo chaꞌ jelaꞌ kamaj alaq usukꞌ janipa runimal uwach, runajtijil raqan, ruchoyil upa y runajtijil uwiꞌ ri rutzil ukꞌuꞌx.
EPH 3:19 Chetaꞌmaj kꞌu alaq ri unimal rutzil ukꞌuꞌx ri Cristo, tobꞌ na jinta junoq lik kumaj usukꞌ ronoje waꞌ. ꞌAna kꞌu e alaq che janipa ri utz kꞌo rukꞌ Rire chaꞌ kaqꞌalajin taq waꞌ che ri bꞌinik silabꞌik alaq.
EPH 3:20 Ruma ruchuqꞌabꞌ ri Dios qukꞌ, Rire kuya más uwiꞌ ronoje ri kaqatzꞌonoj che o ri kaqachꞌobꞌo kuꞌano.
EPH 3:21 ¡Chetaꞌmaxoq nim uqꞌij ri Dios ruma ri kuꞌan rukꞌ ru iglesia ruma ri Qanimajawal Jesucristo! Kaloqꞌnimax kꞌu uqꞌij waqꞌij ora y chiqawach apanoq na jinta chi utaqexik. Amén.
EPH 4:1 Riꞌin in kꞌo pa cárcel xa ruma ruchak ri Cristo; lik kantzꞌonoj kꞌu che alaq bꞌina alaq jusukꞌ jelaꞌ pachaꞌ ri taqal che alaq ma alaq sikꞌim ruma ri Dios.
EPH 4:2 Maꞌan kꞌu nim che ibꞌ alaq; e chuꞌana ri lik utz kꞌuꞌx alaq chiwach alaq. Kuyu kꞌu ibꞌ alaq chiwach alaq rukꞌ unimal kꞌuꞌxaj ruma ri kꞌax kanaꞌ ibꞌ alaq.
EPH 4:3 Ri Ruxlabꞌixel ri Dios xuꞌan xa jun che alaq y xukoj utzil chomal chiwach alaq; maya kꞌu alaq luwar kajach pa alaq.
EPH 4:4 Chwach ri Dios xa oj jun ma oj ucuerpo ri Cristo, xa jun ri Ruxlabꞌixel ri Dios qakꞌulum y xa jun oj uꞌanom che royꞌexik ri utz xubꞌiꞌtisij ri Dios chiqe echiriꞌ xojusikꞌij.
EPH 4:5 Xa jun ri Qanimajawal, na jinta jun chik; xa jun ri Utzilaj Tzij qakojom y xa jun ri bautismo qakꞌulum.
EPH 4:6 Xa jun ri Dios kꞌolik; Rire e Qaqaw ri kꞌo paqawiꞌ qonoje riꞌoj, kuꞌan ruchak quma qonoje riꞌoj y kꞌo pa qanimaꞌ qonoje riꞌoj.
EPH 4:7 Yey chiqajujunal kꞌo ri usipam ri Cristo chiqe e chirij ri relej ukꞌuꞌx Rire.
EPH 4:8 E pachaꞌ ri tzꞌibꞌital kan chupa Ruchꞌaꞌtem ri Dios pa kubꞌiꞌij wi: Echiriꞌ xeꞌek chilaꞌ chikaj, xebꞌukꞌam bꞌi ri xekꞌojiꞌ puqꞌabꞌ yey xuya chomilaj taq sipanik chike ri tikawex.
EPH 4:9 Echiriꞌ kubꞌiꞌij «xeꞌek chilaꞌ chikaj», waꞌ keꞌelawi xtzelej chilaꞌ chikaj, ma nabꞌe xpe chilaꞌ y xkꞌun wara che ruwachulew.
EPH 4:10 Ekꞌu ri Cristo, ri xkꞌunik, e Rire mismo ri xtzelej chilaꞌ chikaj chaꞌ jelaꞌ kataqan pakiwi konoje y jelaꞌ ronoje taq ri kꞌolik kakꞌojiꞌ puqꞌabꞌ Rire.
EPH 4:11 Yey e ri Cristo ri kojoyom taq ke raj chakibꞌ chikiwach rutinamit. E kꞌo jujun xuꞌan chike e utaqoꞌn; jujun chik xuꞌan chike eqꞌalajisay runaꞌoj ri Dios. Jujun chik xuꞌan chike e aj tzijol re ri Utzilaj Tzij. Jujun chik xuꞌan chike e aj chajal rutinamit ri Dios y chike jujun chik xuꞌan chike e kꞌutunel re Rutzij ri Dios.
EPH 4:12 E taq wa e aj chak ekojom re kekitijoj rutinamit ri Dios chaꞌ kakiꞌan ruchak Rire y jekꞌulaꞌ ri kikojom rubꞌiꞌ ri Cristo kekꞌiy chi utz.
EPH 4:13 Ma ri karaj ri Qaqaw chiqe e kojuꞌan xa jun ruma ri kubꞌulibꞌal qakꞌuꞌx rukꞌ Rukꞌajol y ruma ri kaqetaꞌmaj uwach chi utz. Ekꞌu ri qabꞌinik chwach ri Dios lik kakowirik, kuꞌana jelaꞌ pachaꞌ ri chomilaj ubꞌinik ri Cristo.
EPH 4:14 Jekꞌulaꞌ na kaqaꞌan ta chi qeꞌoj kukꞌ ri na jinta kikꞌiyibꞌal chwach ri Dios, ri xa kaketzꞌabꞌej kinaꞌoj puwi ri kikojom yey ketzaq pakiqꞌabꞌ ri e aj sokosoꞌnel, ri kakikꞌut taq ri na e taj y rukꞌ itzel taq naꞌoj kekikꞌam bꞌi pa sachibꞌal ri na e tikil ta chi utz.
EPH 4:15 Pero ri chirajawaxik wi chiqe e kojtikiꞌ chi utz chupa ri Qꞌijsaq y kaqatzijoj kꞌu waꞌ rukꞌ rutzil qakꞌuꞌx. Jekꞌulaꞌ kojkꞌiy pa saqil wi chaꞌ rukꞌ ronoje ri kaqaꞌano kojuꞌana pachaꞌ ri Jun Aj Kꞌamal Qawach, waꞌ e ri Cristo.
EPH 4:16 Ekꞌu ri Cristo kayaꞌw ri qakꞌiyibꞌal echiriꞌ chiqajujunal kaqaꞌan ri chak uyaꞌom Rire paqaqꞌabꞌ y kaqatoꞌ qibꞌ rukꞌ rutzil qakꞌuꞌx. Ma oj uꞌanom xa jun rukꞌ Rire; e pachaꞌ ri qacuerpo, lik kꞌi taq ri chapayom re, pero waꞌ xa jun uꞌanom.
EPH 4:17 Kampixabꞌaj kꞌu alaq chupa rubꞌiꞌ ri Qanimajawal: Maꞌan chi e alaq pachaꞌ ri kakiꞌan ri na ketaꞌam ta uwach ri Dios, ma ri kinaꞌoj rike kꞌo puwi ri xa na jinta uchak.
EPH 4:18 Rike e kꞌo pa qꞌequꞌm ma na kakaj ta kakimaj usukꞌ ri Qꞌijsaq. Ruma kꞌu lik kiꞌanom ko che ri kanimaꞌ, na jinta kꞌo ketaꞌam puwi ri Dios y lik naj e kꞌo wi che ri chomilaj kꞌaslemal kuya Rire.
EPH 4:19 Waꞌ wa winaq qabꞌi ke che kakiꞌan ri kꞌixbꞌal uwach; xkiya kꞌu kibꞌ che taq ri rayibꞌal re ri kitiꞌjil y jelaꞌ kiyaꞌom kibꞌ che uꞌanik taq ri chꞌulilaj mak.
EPH 4:20 Noꞌj ralaq na je ta laꞌ ri kꞌutunik xmaj alaq puwi ri Cristo,
EPH 4:21 we paqatzij wi e xta alaq rutzij y xmaj alaq usukꞌ ri Qꞌijsaq xukꞌut Rire.
EPH 4:22 Maꞌan chi alaq pachaꞌ ri xꞌan alaq echiriꞌ kꞌamajaꞌ kaya ibꞌ alaq puqꞌabꞌ ri Cristo. Yaꞌa kꞌu kan ri ojer bꞌinik silabꞌik alaq pa xsokotaj wi alaq ruma taq ri rayinik xa re sachibꞌal e alaq.
EPH 4:23 Chirajawaxik kꞌut kꞌo jun jalkꞌatajibꞌal che ri naꞌoj alaq.
EPH 4:24 Yaꞌa kꞌu ibꞌ alaq chupa ri kꞌakꞌ kꞌaslemal uyaꞌom ri Dios che alaq chaꞌ jelaꞌ kabꞌin alaq chupa ri Qꞌijsaq rukꞌ jun bꞌinik lik jusukꞌ y lik chom.
EPH 4:25 Maꞌan chi alaq raqꞌubꞌal, xew chꞌaꞌtibꞌej alaq ri lik qatzij chiwach alaq, ma qonoje ri oj re ri Cristo, xa jun qaꞌanom.
EPH 4:26 We kape oyowal alaq, mamakun alaq rukꞌ waꞌ; ri ꞌana alaq e chesaj chikꞌuꞌx alaq ri oyowal xaloqꞌ kꞌamajaꞌ ne katzaq bꞌi ri qꞌij.
EPH 4:27 Maya kꞌu alaq luwar che ritzel winaq kusok alaq.
EPH 4:28 We kꞌo junoq chixoꞌlibꞌal alaq kuꞌan eleqꞌ, muꞌan chik. Ri chuꞌanaꞌ e chakunoq chaꞌ jelaꞌ kuchꞌak ri kajawax che y kebꞌutoꞌ ne taq ri e kꞌo pa kꞌaxkꞌobꞌik.
EPH 4:29 Mabꞌiꞌij ne alaq juna itzel chꞌaꞌtem; e chꞌaꞌtibꞌej alaq ri chomilaj taq chꞌaꞌtem, toꞌbꞌal re ri kibꞌinik kisilabꞌik ri ketaw re.
EPH 4:30 Rukꞌ kꞌu riꞌ ri kaꞌan alaq, maya alaq pa bꞌis ri Santowilaj Ruxlabꞌixel ri Dios. Ma ri Ruxlabꞌixel pa animaꞌ alaq e kꞌutubꞌal re, alaq chi re ri Dios y e jikibꞌal uwach ri kolobꞌetajik kakꞌul alaq chupa ruqꞌijol rukꞌunibꞌal ri Cristo.
EPH 4:31 Chesaj alaq ronoje ri oyowal kꞌo pa animaꞌ alaq. Maꞌan alaq ri alaq kꞌaꞌn. Masikꞌin alaq rukꞌ oyowal. Machꞌaꞌt alaq chirij junoq. Chesaj kꞌu ibꞌ alaq che ronoje ri na utz taj.
EPH 4:32 Ri ꞌana alaq e kꞌutu alaq ri rutzil kꞌuꞌxaj chiwach alaq, kꞌax naꞌa ibꞌ alaq. Kuyu mak alaq chiwach alaq jelaꞌ pachaꞌ xuꞌan ri Dios echiriꞌ xukuy mak alaq ruma ri Cristo.
EPH 5:1 Ruma kꞌu alaq ralkꞌoꞌal ri Dios y Rire kꞌax kunaꞌ alaq, lik chirajawaxik ꞌana alaq jelaꞌ pachaꞌ kuꞌan Rire.
EPH 5:2 Ronoje kꞌu ri kaꞌan alaq, ꞌana alaq rukꞌ rutzil kꞌuꞌxaj, jelaꞌ pachaꞌ ri rutzil ukꞌuꞌx ri Cristo ukꞌutum chiqawach. Ma Rire lik kꞌax xojunaꞌo y xuya ribꞌ pa kamik paqakꞌaxel re tojbꞌal ri qamak. Ri xuꞌano e pachaꞌ jun qasaꞌn lik kiꞌ ruxlabꞌ chwach ri Dios.
EPH 5:3 Ralaq ri alaq chi re ri Dios, lik na ubꞌe ta kꞌenoq we chixoꞌlibꞌal alaq kꞌa kꞌo ri karetzꞌabꞌej uwa uqꞌij rukꞌ junoq na ukꞌulel taj o kuꞌan taq chꞌulilaj mak o na kakiꞌkot ta rukꞌ taq ri kꞌo rukꞌ ma xaqi kurayij más.
EPH 5:4 Machꞌaꞌtibꞌej ne alaq chꞌaꞌtem kꞌixbꞌal uwach, chꞌaꞌtem na jinta kutiqoj, chꞌaꞌtem na chom ta kꞌenoq tobꞌ ne tzeꞌbꞌal uwach. Ma ronoje waꞌ lik na taqal ta che ralaq. Ri ꞌana alaq e tioxin alaq chwach ri Dios rukꞌ ri chꞌaꞌtem alaq.
EPH 5:5 Ma lik etaꞌam chi alaq waꞌ: Ri karetzꞌabꞌej uwa uqꞌij rukꞌ junoq na ukꞌulel taj, ri kuꞌan taq chꞌulilaj mak, ri na kakiꞌkot ta rukꞌ taq ri kꞌo rukꞌ ma xaqi kurayij más, ri kaꞌanaw waꞌ e pachaꞌ juna aj tiox ma e kuꞌan “udios” che janipa ri kurayij; konoje kꞌu ri kakiꞌan taq waꞌ, na kakikꞌul ta ri bꞌiꞌtisim lo chike ri kiyaꞌom kibꞌ puqꞌabꞌ ri Cristo y e kꞌo chupa rutaqanik ri Dios.
EPH 5:6 Masokotaj alaq kuma ri kakimin alaq chupa ri mak rukꞌ chꞌaꞌtem lik chakojoꞌ qatzij pero xa raqꞌubꞌal. Ma ri qꞌatbꞌal tzij re ri Dios kape pakiwi ri e aj palajiy tzij, waꞌ e ri kakiꞌan taq waꞌ wa mak.
EPH 5:7 Maꞌan kꞌu e alaq kukꞌ taq wa winaq kakiꞌan ri na utz taj.
EPH 5:8 Ma ralaq ojertan sachinaq alaq chupa ri qꞌequꞌm, noꞌj woꞌora kꞌo chi alaq pa ri Qꞌijsaq ruma ri Cristo. Bꞌina kꞌu alaq pa ri Qꞌijsaq jelaꞌ pachaꞌ ri taqal che alaq.
EPH 5:9 Ma e junoq kꞌo pa ri Qꞌijsaq, riꞌ che rubꞌinik usilabꞌik kilitaj wi ri relej ukꞌuꞌx, lik jusukꞌ ri kuꞌano y lik qatzij ronoje ri kubꞌiꞌij.
EPH 5:10 E lik chꞌobꞌo alaq saꞌ ri kukꞌul ukꞌuꞌx ri Qaqaw y e ꞌana kꞌu alaq riꞌ.
EPH 5:11 Maꞌan e alaq pachaꞌ ri kakiꞌan ri e kꞌo pa qꞌequꞌm, ma ri kakiꞌan rike na jinta kꞌana uchak. Ri ꞌana alaq e qꞌalajisaj alaq chike ri na utz taj kakiꞌano chaꞌ na kakiꞌan ta chik,
EPH 5:12 tobꞌ ne lik kꞌixbꞌal ubꞌiꞌxikil ri kakiꞌan rike xa xeꞌlaqꞌay.
EPH 5:13 Yey echiriꞌ kel chi saq ri kaꞌanik, kaqꞌalajin kꞌu riꞌ we utz o na utz taj, ma ronoje kilitaj chi utz ruma ri Qꞌijsaq.
EPH 5:14 E pachaꞌ ri kabꞌiꞌxik: E riꞌat ri katwarik, ¡kꞌuna kꞌu saq chawach! Chatwaꞌlij lo chikixoꞌl ri ekaminaq pa mak, y ri Cristo katuya pa ri Qꞌijsaq.
EPH 5:15 Lik chajij kꞌu ibꞌ alaq che ri bꞌinik silabꞌik alaq. Maꞌan e alaq pachaꞌ ri kakiꞌan ri na jinta kinaꞌoj; e lik chꞌobꞌo alaq rukꞌ saqil naꞌoj saꞌ taq ri kaꞌan alaq.
EPH 5:16 Lik yaꞌa ibꞌ alaq che uꞌanik taq ri utz, ma waqꞌij ora lik katajin ukꞌiyarik ri mak che ruwachulew.
EPH 5:17 Maꞌan kꞌu alaq ri na kachꞌobꞌ ta alaq chi utz ri kaꞌan alaq; e lik kꞌola naꞌoj alaq puwi saꞌ ri karaj ri Qanimajawal che alaq.
EPH 5:18 Maya ibꞌ alaq che qꞌabꞌarik, ma waꞌ xa kuyojij rubꞌinik junoq. E yaꞌa ibꞌ alaq puqꞌabꞌ ri Ruxlabꞌixel ri Dios chaꞌ e Rire kataqan pa animaꞌ alaq.
EPH 5:19 Ma we kꞌo ri Ruxlabꞌixel ri Dios qukꞌ, jewaꞌ kaqaꞌano: Kaqanimarisaj qakꞌuꞌx chiqawach rukꞌ taq salmos, rukꞌ taq bꞌix tzꞌibꞌital kanoq y rukꞌ kꞌakꞌ bꞌixobꞌal yaꞌom chiqe ruma ri Ruxlabꞌixel ri Dios. Kaqayak kꞌu uqꞌij ri Qaqaw rukꞌ bꞌix kalax lo pa qanimaꞌ.
EPH 5:20 Yey xaqi kojtioxin chwach ri Qaqaw Dios ruma ronoje, y kaqaꞌan kꞌu waꞌ chupa rubꞌiꞌ ri Qanimajawal Jesucristo.
EPH 5:21 Nimaj ibꞌ alaq chiwach alaq rukꞌ xiꞌin ibꞌ chwach ri Cristo, ma e karaj riꞌ Rire chiqe.
EPH 5:22 E uwariꞌche, rixoq kꞌulanik taqal che kutaqej ri rachijil jelaꞌ pachaꞌ ri lik taqal che kutaqej ri Cristo.
EPH 5:23 Ma rachi e kꞌamal uwach ri rixoqil jelaꞌ pachaꞌ ri Cristo e kꞌamal uwach riglesia y na xew tane kꞌamal uwach ma e Kolobꞌenel re. Jekꞌulaꞌ ri Cristo e ujolom riglesia yey riglesia e ucuerpo Rire.
EPH 5:24 Jekꞌulaꞌ pachaꞌ riglesia kꞌo puqꞌabꞌ ri Cristo, jelaꞌ chuꞌana rixoq rukꞌ ri rachijil; che ronoje taq ri kuꞌano, e lik chutaqej ri rachijil.
EPH 5:25 Ekꞌu rachi kꞌulanik taqal che kꞌax kunaꞌ ri rixoqil jelaꞌ pachaꞌ ri Cristo lik kꞌax xojunaꞌ ri oj u iglesia y xuya ribꞌ pa kamik paqakꞌaxel.
EPH 5:26 Xuꞌan kꞌu waꞌ chaꞌ e kuꞌan chom y jusukꞌ che ri qabꞌinik. Xresaj kꞌu ri qamak ruma Ruchꞌaꞌtem; ri xuꞌano e pachaꞌ kaꞌan che ri chꞌul echiriꞌ kachꞌaj rukꞌ yaꞌ.
EPH 5:27 Xuꞌan kꞌu waꞌ chaꞌ echiriꞌ riꞌoj oj u iglesia kojopon chwach, oj jun chomilaj iglesia lik jusukꞌ y na jinta kꞌana mak kariqitaj che.
EPH 5:28 Jekꞌulaꞌ lik chirajawaxik che rachi e kukꞌut ri rutzil ukꞌuꞌx che ri rixoqil. Jelaꞌ pachaꞌ junoq lik kuchajij rucuerpo, jekꞌuriꞌlaꞌ taqal che rachi kuchajij ri rixoqil. Ma we juna achi kꞌax kunaꞌ ri rixoqil, e keꞌelawi kꞌax kunaꞌ ribꞌ, ma rachi rukꞌ rixoq, xa jun kiꞌanom.
EPH 5:29 Na jinta junoq tzel karil rucuerpo; ri kuꞌano e kawaꞌ chi utz y lik kuchajij chi utz. Jelaꞌ ri kuꞌan ri Cristo che riglesia, lik kuchajij chi utz.
EPH 5:30 Kuꞌan waꞌ chiqe ma riꞌoj oj ucuerpo.
EPH 5:31 Jekꞌuwaꞌ ri kubꞌiꞌij Ruchꞌaꞌtem ri Dios: Ruma kꞌu riꞌ, rachi echiriꞌ kakꞌuliꞌik, karesaj ribꞌ chikij ruchu-uqaw chaꞌ kajeqiꞌ rukꞌ ri rixoqil y kikabꞌichal kꞌu riꞌ kebꞌuꞌana xa e jun chwach ri Dios kachaꞌ.
EPH 5:32 Lik naj kumaj waꞌ wa kꞌutubꞌal qꞌalajisam chiqe; pero kambꞌiꞌij kꞌu riꞌin, waꞌ e jun kꞌambꞌal naꞌoj puwi ri Cristo rukꞌ riglesia.
EPH 5:33 Yey e ne jun pixabꞌanik che onoje alaq ri alaq kꞌulanik. Rachi lik kꞌax chunaꞌa ri rixoqil jelaꞌ pachaꞌ kꞌax kunaꞌ ribꞌ rire, yey ekꞌu rixoq e lik chutaqej ri rachijil.
EPH 6:1 Ix alkꞌoꞌal, ruma ix kꞌo puqꞌabꞌ ri Qaqaw, lik chikojo kitzij richu-iqaw ma lik e usukꞌ riꞌ.
EPH 6:2 Chupa Rutzij Upixabꞌ ri Dios ri nabꞌe tzij kuꞌan bꞌiꞌtisinik chike ri keꞌanaw re, e waꞌ: Chaloqꞌoj kiqꞌij rachu-aqaw,
EPH 6:3 chaꞌ jelaꞌ xaqi katel pan chi utz che ronoje y kanajtir rakꞌaslem wara che ruwachulew.
EPH 6:4 Ekꞌu ralaq ri kꞌo alkꞌoꞌal alaq, mapetisaj alaq koyowal ri alkꞌoꞌal alaq; ri ꞌana alaq e chekꞌiyisaj alaq rukꞌ saqil qꞌilonik y chepixabꞌaj alaq chaꞌ kebꞌin chupa ri Qꞌijsaq re ri Qanimajawal.
EPH 6:5 Yey ralaq ri alaq mokom, e lik kojo alaq kitzij ri patrón alaq wara che ruwachulew. Chakuna kꞌu alaq chi utz rukꞌ jun saqil xiꞌin ibꞌ pa animaꞌ alaq y rukꞌ ronoje kꞌuꞌx alaq pachaꞌ e kanimaj alaq ri Cristo rukꞌ ri chak alaq.
EPH 6:6 Na utz ta kꞌu riꞌ we juna mokom xew kachakun chi utz echiriꞌ katzutzuꞌx ruma rupatrón chaꞌ jelaꞌ katakꞌabꞌax uqꞌij. Ri ꞌana alaq e kꞌutu alaq paqatzij wi alaq aj chak re ri Cristo. Chakuna kꞌu alaq riꞌ rukꞌ ronoje kꞌuꞌx alaq chaꞌ jelaꞌ kaꞌan alaq janipa ri karaj ri Dios.
EPH 6:7 Ma ralaq na xa ta alaq umokom juna achi; e uwariꞌche, ꞌana alaq pachaꞌ e ri Qanimajawal Jesucristo ri kanimaj alaq rukꞌ ri chak alaq. Chakuna kꞌu alaq riꞌ rukꞌ ronoje kꞌuꞌx alaq.
EPH 6:8 Etaꞌam kꞌu alaq kꞌo rajil ukꞌaxel ri utz kaqaꞌano y waꞌ e ri Cristo kayaꞌw chiqajujunal, tobꞌ kachakun jun rukꞌ juna patrón o xa pa re jun kachakun wi.
EPH 6:9 Ekꞌu ralaq ri alaq patrón, ꞌana alaq ri utz chike taq ri mokom alaq ma e karaj riꞌ ri Dios che alaq. Maxibꞌij ne alaq kipa rukꞌ kꞌax. Kꞌuna chikꞌuꞌx alaq, e ralaq alaq jelaꞌ pachaꞌ rike, ma junam kukꞌ rike kꞌo alaq puqꞌabꞌ ri Qanimajawal kꞌo chilaꞌ chikaj. Yey chwach Rire xa jun qawach qonoje.
EPH 6:10 Kꞌisbꞌal kꞌu re, kambꞌiꞌij che alaq hermanos, chuqꞌubꞌej ibꞌ alaq chwach ri Qanimajawal Jesucristo rukꞌ runimal uchuqꞌabꞌ Rire.
EPH 6:11 ꞌAna kꞌu e alaq che ronoje taq ri toꞌbꞌal kuya ri Dios che alaq chaꞌ jelaꞌ kachꞌij alaq uchuqꞌabꞌ taq ri sokosoꞌnik re ritzel winaq.
EPH 6:12 Ma riꞌoj oj kꞌo pa chꞌaꞌoj. Pero wa chꞌaꞌoj na e ta kukꞌ tikawex keqam kulewal kipoqlajil, e kukꞌ taq itzelilaj uxlabꞌixel e kꞌo xa pa tew, ri lik kꞌo kichuqꞌabꞌ re ketaqan pakiwi taq ri e kꞌo pa qꞌequꞌm wara che ruwachulew. Kukꞌ taq rike ri qachꞌaꞌoj.
EPH 6:13 Ruma kꞌu waꞌ, lik chirajawaxik che alaq chukꞌaꞌaj alaq ronoje taq ri toꞌbꞌal qe kuya ri Dios, chaꞌ jelaꞌ kachꞌij alaq uchuqꞌabꞌ taq ri na utz taj kape pawiꞌ alaq. Y jekꞌulaꞌ, we xkꞌis waꞌ wa chꞌaꞌoj chiꞌij alaq, kꞌa tikil alaq jusukꞌ.
EPH 6:14 E uwariꞌche lik chuqꞌubꞌej ibꞌ alaq chupa ri Qꞌijsaq jelaꞌ pachaꞌ juna aj chak kukoj rupas chaꞌ kuxim rupa chi utz. Kꞌola alaq jusukꞌ y lik chajij alaq ri bꞌinik silabꞌik alaq jelaꞌ pachaꞌ juna soldado chꞌuqutal ruwa ukꞌuꞌx rukꞌ jun chꞌichꞌ.
EPH 6:15 Xaqi yijbꞌaꞌ ibꞌ alaq che utzijoxik ri Utzilaj Tzij re ri utzil chomal jelaꞌ pachaꞌ juna soldado xaqi ukojom ruxajabꞌ re kutoꞌbꞌej ri raqan che taq ri kikꞌow wi.
EPH 6:16 Y chwi ronoje taq waꞌ, tikila chi utz ri kubꞌulibꞌal kꞌuꞌx alaq rukꞌ ri Dios, ma waꞌ che ralaq e pachaꞌ ri juperaj chꞌichꞌ rukꞌaꞌam juna soldado puqꞌabꞌ re kuchup ri aqꞌ kꞌo chutzaꞌm ri flechas kakꞌaq lo che. Jekꞌulaꞌ ri kubꞌulibꞌal kꞌuꞌx ralaq e toꞌbꞌal e alaq chaꞌ kachꞌij alaq uchuqꞌabꞌ taq ri kꞌaqanik kuꞌan lo ritzel winaq che alaq.
EPH 6:17 Tikila alaq chi utz chupa ri kolobꞌetajik yaꞌtal che alaq jelaꞌ pachaꞌ juna soldado kukoj rucasco re chꞌuqubꞌal rujolom. Y chapabꞌej alaq chi utz Ruchꞌaꞌtem ri Dios, ma waꞌ e pachaꞌ juna espada yaꞌtal che alaq ruma ri Ruxlabꞌixel ri Dios chaꞌ kachꞌoꞌjin alaq chirij ritzel winaq.
EPH 6:18 ꞌAna kꞌu alaq orar chipaqꞌij chichaqꞌabꞌ. Lik tzꞌonoj alaq che ri Dios e chirij janipa ri kubꞌiꞌij ri Ruxlabꞌixel che alaq. Makos ne alaq che uꞌanik orar; e xaqi ꞌana alaq orar pakiwi konoje rutinamit ri Dios.
EPH 6:19 Kantzꞌonoj ko che alaq ꞌana alaq orar panuwi riꞌin chaꞌ ri Dios kuya nuchꞌaꞌtem y jekꞌulaꞌ na kanxiꞌij ta kꞌana wibꞌ kantzijoj ri Utzilaj Tzij uqꞌalajisam ri Dios chiqawach.
EPH 6:20 Ma intaqom lo ruma ri Dios, in qꞌalajisay re ri Utzilaj Tzij y ruma ne waꞌ in kꞌo pa presoyil woꞌora. E uwariꞌche tzꞌonoj alaq che ri Dios chaꞌ na kanxiꞌij ta kꞌana wibꞌ che uqꞌalajisaxik puwi Rire, ma e taqal riꞌ chwe.
EPH 6:21 Ronoje taq ri nukꞌulumam y ri kintajin che uꞌanik, kuꞌtzijoj pan ri Tíquico che alaq. Rire e jun utzilaj aj chak re ri Qanimajawal Jesucristo y na loqꞌ ta kꞌax kanaꞌw re.
EPH 6:22 E uwariꞌche nutaqom bꞌi chilaꞌ ukꞌ alaq chaꞌ ketaꞌmaj alaq saꞌ ri qaꞌanom riꞌoj y jekꞌulaꞌ kuꞌnimarisaj pan kꞌuꞌx alaq.
EPH 6:23 Kꞌulu alaq ri utzil chomal, ri rutzil kꞌuꞌxaj y ri kubꞌulibꞌal kꞌuꞌxaj, ri petinaq rukꞌ ri Qaqaw Dios y rukꞌ ri Qanimajawal Jesucristo.
EPH 6:24 Kꞌulu kꞌu alaq ri unimal rutzil ukꞌuꞌx ri Qanimajawal Jesucristo, onoje alaq ri lik kꞌax kanaꞌ alaq Rire rukꞌ rutzil kꞌuꞌxaj na jinta ukꞌisik. Amén.
PHI 1:1 Riꞌin in Pablo y ri Timoteo, ri oj aj chak re ri Qanimajawal Jesucristo, kaqataq bꞌi wa carta che alaq ri kꞌo alaq chupa ri tinamit Filipos. Kaqatzꞌibꞌaj kꞌu pan che alaq, ri alaq aj kꞌamal wach y alaq aj chakibꞌ e toꞌbꞌel piglesia, junam ukꞌ onoje alaq, ri kojom alaq rubꞌiꞌ ri Qanimajawal Jesucristo.
PHI 1:2 Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
PHI 1:3 Echiriꞌ kakꞌun alaq chinukꞌuꞌx, lik kintioxin che ri Dios uma ralaq.
PHI 1:4 Yey echiriꞌ kanꞌan orar, xaqi kantzꞌonoj che ri Dios pawiꞌ onoje alaq. Rukꞌ kꞌu kiꞌkotemal
PHI 1:5 kanꞌan waꞌ, ma lik junam chakuninaq alaq wukꞌ che utzijoxik ri Utzilaj Tzij e chwi lo ri nabꞌe qꞌij echiriꞌ xya ibꞌ alaq puqꞌabꞌ ri Cristo y kꞌa e katajin alaq che uꞌanik waqꞌij ora.
PHI 1:6 E ri Dios xjeqow re ri utzilaj chak pa animaꞌ alaq, yey lik kubꞌul nukꞌuꞌx che waꞌ: Ri Dios katajin che toꞌik alaq chaꞌ kabꞌin alaq jusukꞌ chwach, yey Rire kutzꞌaqatisaj ri chak ukꞌ alaq kꞌa pa ri qꞌij echiriꞌ kakꞌun tanchi ri Qanimajawal Jesucristo.
PHI 1:7 Lik ubꞌe kꞌut kanchꞌobꞌ waꞌ pawiꞌ onoje alaq, ma xaqi kꞌo alaq pa wanimaꞌ. Yey ralaq lik intoꞌom alaq rukꞌ ri chak uyaꞌom ri Dios chwe ruma runimal rutzil ukꞌuꞌx. Intoꞌom ne alaq tobꞌ in kꞌo pa cárcel o echiriꞌ kanqꞌalajisaj ri Utzilaj Tzij chikiwach ri e aj qꞌatal tzij y kanjikibꞌaꞌ kꞌu uwach lik qatzij ri kanqꞌalajisaj.
PHI 1:8 Ri Dios retaꞌam, paqatzij wi riꞌin lik kꞌax kannaꞌ onoje alaq. Yey wa kannaꞌ pa ri wanimaꞌ che alaq, e ri Qanimajawal Jesucristo yaꞌyom chwe.
PHI 1:9 Kantzꞌonoj kꞌu che ri Dios pawiꞌ alaq chaꞌ kanimar más ri rutzil kꞌuꞌx alaq y ri naꞌoj alaq
PHI 1:10 chaꞌ jelaꞌ ketaꞌmaj alaq saꞌ ri lik taqal che ri bꞌinik silabꞌik alaq. Bꞌina kꞌu alaq jusukꞌ chaꞌ echiriꞌ kakꞌun tanchi ri Cristo na jinta mak kariqitaj che alaq.
PHI 1:11 Ruma kꞌu ri Qanimajawal Jesucristo kilitaj ri jusukꞌ bꞌinik silabꞌik alaq, yey echiriꞌ kilitaj waꞌ kuma ri tikawex, rike kakiyak uqꞌij ri Dios y kakibꞌixoj rubꞌiꞌ.
PHI 1:12 Hermanos, lik kuaj ketaꞌmaj alaq waꞌ: Ronoje taq ri kꞌax wikꞌowibꞌem lik kꞌo xutiqoj ma rukꞌ waꞌ xeꞌek utzijoxik ri Utzilaj Tzij chikiwach ri tikawex.
PHI 1:13 Utz ne xuꞌano, ma woꞌora ri soldados re ri nimalaj aj qꞌatal tzij junam kukꞌ ri jujun chik e kꞌo wara, konoje xketaꞌmaj in kꞌo pa cárcel ruma kantzijoj rubꞌiꞌ ri Cristo.
PHI 1:14 Y na xew ta waꞌ, ma ruma ri uꞌanom ri Dios wukꞌ wara pa cárcel, e kꞌi ri hermanos lik xkijikibꞌaꞌ kikꞌuꞌx rukꞌ ri Qanimajawal yey más ne xmiqꞌ kikꞌuꞌx che utzijoxik ri Utzilaj Tzij re ri Dios y na kakixiꞌij ta kꞌana kibꞌ kakiꞌan waꞌ.
PHI 1:15 Kakiꞌan kꞌu riꞌ waꞌ rukꞌ ronoje kikꞌuꞌx, noꞌj e kꞌo jujun chik kakitzijoj rubꞌiꞌ ri Cristo xew chaꞌ kakiꞌan nim che kibꞌ chinuwach riꞌin ruma kꞌax kikꞌuꞌx chwij.
PHI 1:16 Yey ketzijon puwi ri Cristo na rukꞌ ta rutzil kikꞌuꞌx, xa e re yakbꞌal kiqꞌij. Ma chikiwach rike rukꞌ ri kakiꞌano, kakiya más bꞌis chwe puwi ri kꞌax in kꞌo wi pa wa cárcel.
PHI 1:17 Pero ri jujun chik ketzijon ruma ri rutzil kikꞌuꞌx chwe, ma ketaꞌam riꞌin in kojom ruma ri Dios re kanqꞌalajisaj ri Utzilaj Tzij.
PHI 1:18 ¿Saꞌ kꞌu ri kambꞌiꞌij che waꞌ? Chinuwach riꞌin, ri lik chirajawaxik wi e katzijox ri Utzilaj Tzij, tobꞌ ri ketzijon re kakiꞌan rukꞌ saqil rutzil kꞌuꞌxaj o xa pa ke rike. Ekꞌu ri lik xaqi kuya kiꞌkotemal chwe e ri katzijox rubꞌiꞌ ri Cristo.
PHI 1:19 Na kikꞌow ta kꞌu ri nukiꞌkotemal, ma wetaꞌam kinel pan chupa ronoje ri kintajin che rikꞌowibꞌexik ruma ri oraciones e alaq panuwiꞌ y ruma rutoꞌbꞌal ri Ruxlabꞌixel ri Qanimajawal Jesucristo wukꞌ.
PHI 1:20 Ma ri lik kanrayij y nukubꞌam pan nukꞌuꞌx che, e waꞌ: Che ronoje ri kanꞌan chwach ri Dios na jinta kꞌana kuya kꞌix chwe. E lik kubꞌul nukꞌuꞌx che, jelaꞌ pachaꞌ ri uꞌanom loq, e janipa ri kanꞌano kukꞌam lo yakbꞌal uqꞌij ri Cristo, tobꞌ kinkꞌasiꞌik o kinkamik.
PHI 1:21 Ma ri nukꞌaslem riꞌin e re yakbꞌal uqꞌij ri Cristo; yey we xinkamik, más ne lik kꞌo kutiqoj chwe.
PHI 1:22 Pero we ri nukꞌaslem kꞌa katoꞌbꞌ che ruchak ri Qaqaw, na kanriq ta kꞌu riꞌ pachike ri más utz.
PHI 1:23 Lik kꞌayew kꞌu chwe ruchaꞌik ri más utz. E riꞌin kuaj kinkamik chaꞌ kineꞌkꞌola rukꞌ ri Cristo, ma e waꞌ ri más utz chinuwach riꞌin.
PHI 1:24 Pero che ralaq e más kꞌo kutiqoj we kꞌa in kꞌo che ruwachulew.
PHI 1:25 Nujikibꞌam kꞌu uwach waꞌ, riꞌin wetaꞌam kꞌamajaꞌ kinkamik yey kinkꞌojiꞌ na ukꞌ alaq chaꞌ kantoꞌ alaq che unimarisaxik ri kubꞌulibꞌal kꞌuꞌx alaq y ri kiꞌkotemal alaq rukꞌ ri Cristo.
PHI 1:26 Jekꞌulaꞌ lik kakiꞌkot alaq y katioxin alaq che ri Qanimajawal Jesucristo ruma in kꞌo tanchi ukꞌ alaq.
PHI 1:27 Chajij kꞌu ibꞌ alaq chaꞌ ri bꞌinik silabꞌik alaq e pachaꞌ ri taqal chike ri kikojom ri Utzilaj Tzij re ri Cristo. Jekꞌulaꞌ, tobꞌ na in jinta riꞌin chixoꞌl alaq o tobꞌ ne kinopon ukꞌ alaq, ri lik kuaj kanto e lik chuqꞌubꞌem ibꞌ alaq y xa jun kꞌuꞌx alaq chwach ri Dios, yey lik junam kaya ibꞌ alaq che uqꞌalajisaxik ri Utzilaj Tzij kojom alaq.
PHI 1:28 Maxiꞌij ne kꞌana ibꞌ alaq chikiwach ri kechꞌoꞌjin chiꞌij alaq, ma waꞌ e jun kꞌutubꞌal chike e ri Dios kusach na kiwach rike; pero che ralaq e jun kꞌutubꞌal xaqi utz kel pan alaq rukꞌ, ma e ri Dios kakolobꞌen e alaq.
PHI 1:29 Ma yaꞌtal che ralaq ri kakoj alaq utzij ri Cristo, y na xew ta laꞌ, ma yaꞌtal ne ri katij alaq kꞌax ruma alaq re Rire.
PHI 1:30 Junam kꞌu ri qikꞌowibꞌem, ma ilom alaq ri kꞌax wikꞌowibꞌem riꞌin pa ruchak ri Qaqaw, y woꞌora xta alaq kꞌa e ne kꞌaxkꞌobꞌik in kꞌo wi.
PHI 2:1 Ruma kꞌu kꞌo alaq puqꞌabꞌ ri Cristo, lik nimarinaq chi kꞌuꞌx alaq y bꞌochiꞌim chi kꞌuꞌx alaq rukꞌ ri rutzil ukꞌuꞌx Rire. Ekꞌu ri Ruxlabꞌixel ri Dios kꞌo ukꞌ alaq y uꞌanom chi xa jun che alaq, yey kꞌulum chi kꞌu alaq ri relej ukꞌuꞌx y ri kꞌaxnaꞌbꞌal ukꞌuꞌx ri Cristo.
PHI 2:2 E uwariꞌche tzꞌaqatisaj ko alaq uwach ri nukiꞌkotemal rukꞌ waꞌ: Chuꞌana xa jun kꞌuꞌx alaq, xa jun ri rutzil kꞌuꞌx alaq y xa jun ri naꞌoj alaq chiwach alaq.
PHI 2:3 Makꞌo maꞌan alaq xew re kakꞌojiꞌ más wach alaq chikiwa ri jujun chik o re yakbꞌal qꞌij alaq. Ri lik usukꞌ e ꞌana alaq chꞌutiꞌn che ibꞌ alaq rukꞌ ri kaꞌan alaq y yaka alaq kiqꞌij ri jujun chik.
PHI 2:4 Na utz ta kꞌu riꞌ we kꞌo junoq e xew kutzukuj ri utz chiribꞌil ribꞌ, ma ri lik chirajawaxik wi e kutzukuj ri utz chike ri nikꞌaj chik.
PHI 2:5 E chuꞌana ri kꞌuꞌx alaq jelaꞌ pachaꞌ rukꞌuꞌx ri Qanimajawal Jesucristo.
PHI 2:6 Rire na xuꞌan ta nim che ribꞌ; tobꞌ ne lik junam uwach rukꞌ ri Dios, na xuchꞌoꞌjij ta ri taqal che.
PHI 2:7 Tobꞌ lik kꞌo uwach, xuya kan ranimaꞌ ri taqal che; xuꞌan pachaꞌ aj chak che ribꞌ chaꞌ kebꞌutoꞌ taq ri tikawex. Xuꞌan kꞌu tikawex.
PHI 2:8 Echiriꞌ junam chi uwach kukꞌ ri tikawex, xuꞌan chꞌutiꞌn che ribꞌ. Lik kꞌut xukoj utzij ri Dios, ma xuya ribꞌ pa kamik. Yey wa kamik lik kꞌixbꞌal uwach, ma xkamisax chwa cruz pachaꞌ junoq lik aj mak.
PHI 2:9 Ruma kꞌu wa xuꞌan ri Jesús, ri Dios e más xuyak uqꞌij Rire chikiwa konoje ri lik kꞌo kiwach. Xuya kꞌu che ri Jesús kaqabꞌiꞌij “Qanimajawal” che, ma rubꞌiꞌ Rire e más kꞌo uwach chwa ronoje taq ri bꞌiꞌaj.
PHI 2:10 Chwach kꞌu ri Qanimajawal Jesucristo kakixukubꞌaꞌ kibꞌ konoje ri e kꞌo chilaꞌ chikaj, ri e kꞌo che ruwachulew y ri e kꞌo chuxeꞌ ulew.
PHI 2:11 Y konoje kꞌut kakibꞌiꞌij “ri Jesucristo e Rajawal ronoje ri kꞌolik”, y kakibꞌiꞌij kꞌu waꞌ re yakbꞌal uqꞌij ri Qaqaw Dios.
PHI 2:12 Ekꞌu ralaq, ri lik kꞌax kannaꞌ alaq, chwi petinaq loq, lik taqem alaq ri kꞌutunik re ri Utzilaj Tzij; ꞌana kꞌu alaq waꞌ na xew ta echiriꞌ in kꞌo ukꞌ alaq, ma e más chirajawaxik kataqej alaq waꞌ woꞌora echiriꞌ na in jinta ukꞌ alaq. Rukꞌ kꞌu xiꞌin ibꞌ alaq chwach ri Dios, e lik qꞌalajisaj alaq ri kolobꞌetajik alaq rukꞌ ri bꞌinik silabꞌik alaq.
PHI 2:13 Ma e ri Dios kuya che alaq kacha kꞌuꞌx alaq che uꞌanik ri utz chwach y e Rire ri katoꞌw e alaq che uꞌanik ri karaj Rire.
PHI 2:14 Janipa ri kaꞌan alaq, maꞌan alaq rukꞌ yaj o rukꞌ chꞌaꞌoj
PHI 2:15 chaꞌ jelaꞌ lik jusukꞌ ri bꞌinik silabꞌik alaq chwach ri Dios y jekꞌulaꞌ na jinta kꞌo katzꞌaqaw chiꞌ alaq y kaqꞌalajin kꞌu riꞌ alaq saqil ralkꞌoꞌal ri Dios, ma lik alaq junwi chikixoꞌl taq ri winaq na e ta jusukꞌ yey itzel kikꞌuꞌx. Jekꞌulaꞌ riꞌ, kuꞌan alaq pachaꞌ taq ri chꞌumil lik kewon pa ri qꞌequꞌmalil re ruwachulew
PHI 2:16 echiriꞌ kaqꞌalajisaj alaq ri Qꞌijsaq kuya kꞌaslemal. Jekꞌulaꞌ echiriꞌ kakꞌun tanchi ri Cristo, riꞌin kannaꞌ jun kiꞌkotemal na jinta kꞌo wi, ma lik kꞌo xutiqoj ri nubꞌinik y ri nuchak ukꞌ alaq.
PHI 2:17 Ekꞌu riꞌin na kambꞌisoj taj tobꞌ ne kinkamisaxik y katuruw kꞌu ri nukikꞌ pachaꞌ juna qasaꞌn chwach ri Dios, ma waꞌ e kutzꞌaqatisaj ri qasaꞌn re ri bꞌinik silabꞌik alaq yaꞌom chi alaq puqꞌabꞌ ri Dios ruma ri kubꞌulibꞌal kꞌuꞌx alaq rukꞌ. Lik kꞌut kinkiꞌkot uma onoje alaq ma lik yaꞌom ibꞌ alaq che uloqꞌnimaxik ri Qanimajawal.
PHI 2:18 Y jekꞌulaꞌ kuaj kakiꞌkot onoje ralaq wukꞌ.
PHI 2:19 We e karaj riꞌ ri Qanimajawal Jesucristo, kantaq bꞌi tan ri Timoteo re keꞌrila alaq y jekꞌulaꞌ ri wanimaꞌ kakiꞌkotik echiriꞌ rire kukꞌam lo rason alaq.
PHI 2:20 Na jinta chi kꞌu junoq lik junam rukꞌuꞌx wukꞌ pachaꞌ ri Timoteo, ma rire lik uyaꞌom ukꞌuꞌx che alaq.
PHI 2:21 Ma e taq ri tikawex xew kakitzukuj ri kakaj rike y na e ta kebꞌok il che ri karaj ri Qanimajawal Jesucristo.
PHI 2:22 Ilom chi kꞌu alaq ri utzilaj chak uꞌanom ri Timoteo, ma lik inutoꞌom che utzijoxik ri Utzilaj Tzij. Rire uꞌanom pachaꞌ nukꞌajol ma chakuninaq wukꞌ jelaꞌ pachaꞌ kuꞌan juna ala rukꞌ ruqaw.
PHI 2:23 Ekꞌu uwariꞌche lik kuaj kantaq bꞌi ri Timoteo ukꞌ alaq, we xqꞌalajin na saꞌ ri kaꞌan chwe wara, we kinel bꞌi o kinkanaj pa cárcel.
PHI 2:24 Yey kubꞌul ne nukꞌuꞌx kiꞌnwila tan wach alaq, we e karaj riꞌ ri Qanimajawal.
PHI 2:25 Kanchꞌobꞌ kꞌut lik chirajawaxik kantaq tanchi ubꞌi ukꞌ alaq ri hermano Epafrodito, ri xtaq lo alaq wukꞌ re kinutoꞌ che taq ri kajawax chwe. Rire junam chakuninaq wukꞌ y junam qatijom kꞌax pa ruchak ri Dios.
PHI 2:26 Rire lik karaj chik karil wach onoje alaq, ma xretaꞌmaj tom chi alaq echiriꞌ lik xuchap yabꞌil. Lik kꞌu kubꞌisoj waꞌ, ma laj paxinaq kꞌuꞌx alaq che ri xukꞌulumaj.
PHI 2:27 Paqatzij wi rire xuchap yabꞌil, xa jubꞌiqꞌ chi xraj laj xkamik, pero ruma kꞌu ri kꞌaxnaꞌbꞌal ukꞌuꞌx ri Dios na xopon ta chupa ri kamik. Jekꞌulaꞌ ri Dios xutoꞌo yey lik xinutoꞌ ne riꞌin, ma we ta e laꞌ xkam na, riꞌ lik kuriq ribꞌ ri nubꞌis.
PHI 2:28 Ruma kꞌu waꞌ lik kuaj kantaq bꞌi tan ri Epafrodito ukꞌ alaq chaꞌ jelaꞌ kakiꞌkot alaq che echiriꞌ kil tanchi alaq uwach. Y ruma kꞌu wa kiꞌkotemal alaq, kapaktaj ri nubꞌis riꞌin che alaq.
PHI 2:29 We xopon tanchi rire ukꞌ alaq, kꞌulu alaq rukꞌ kiꞌkotemal chupa rubꞌiꞌ ri Cristo. Lik takꞌabꞌaꞌ alaq uqꞌij, ma e taqal riꞌ chike konoje ri e jelaꞌ pachaꞌ rire.
PHI 2:30 Ma rire laj xkamik ruma ri kachakun chupa ruchak ri Cristo; xuya kꞌu ranimaꞌ kukꞌulumaj waꞌ chaꞌ kinutoꞌ riꞌin wara. Y jekꞌulaꞌ, rire lik xoluꞌana pakꞌaxel ralaq janipa ri kajawax chwe riꞌin.
PHI 3:1 Ekꞌu woꞌora hermanos, chwi ronoje taq ri kakꞌulumaj alaq, lik kiꞌkota alaq rukꞌ ri Qanimajawal. Riꞌin na kinkos ta che ubꞌiꞌxikil tanchik janipa ri nutzꞌibꞌam chi pan che alaq, ma waꞌ lik chirajawaxik che alaq.
PHI 3:2 Kambꞌiꞌij kꞌu riꞌ: Lik chajij ibꞌ alaq chikiwach ri winaq itzel kikꞌuꞌx, ri lik na e ta saqil aj chakibꞌ, ri xa pa ke rike kakibꞌiꞌij chirajawaxik chike konoje rachijabꞌ kaqꞌat ri kulewal chaꞌ kakoj ri retalil re circuncisión chike. Ma chikiwach rike, xew ri kikojom waꞌ taqal chike e utinamit ri Dios.
PHI 3:3 Pero paqatzij wi rutinamit ri Dios e riꞌoj, ma riꞌoj kaqaloqꞌnimaj uqꞌij ri Dios pa saqil wi ruma ri Ruxlabꞌixel Rire. Ri qakiꞌkotemal e ruma ri uꞌanom ri Qanimajawal Jesucristo qukꞌ yey kubꞌul qakꞌuꞌx rukꞌ Rire, na rukꞌ ta ri qaꞌanom riꞌoj y na rukꞌ ta ri retalil kakoj che ri qacuerpo.
PHI 3:4 We ta e laꞌ kuaj kanyak nuqꞌij ruma taq waꞌ, taqal riꞌ chwe, ma na jinta junoq chike ri e aj judiꞌabꞌ uꞌanom más chinuwa riꞌin.
PHI 3:5 Ma xkoj ri retalil re circuncisión chwe echiriꞌ xinkꞌis wajxaqibꞌ qꞌij walaxik. Yey in kukꞌil ri e aj Israel ma nupetebꞌem lo chike ri e ralkꞌoꞌal kan ri Benjamín, rukꞌajol ri Israel. Riꞌin, in jelaꞌ pachaꞌ ri nuchu-nuqaw, lik in aj hebreo chiwalaxik. Yey ruma in jun chike ri fariseos, lik xinok il che taq ri taqanik ke raj judiꞌabꞌ.
PHI 3:6 Ruma kꞌu xinya nukꞌuꞌx che waꞌ, lik xinwesaj qꞌij che usachik kiwach ri kikojom rubꞌiꞌ ri Cristo. Lik xintaqej ri taqanik ke raj judiꞌabꞌ y chwa kꞌu riꞌ waꞌ, na jinta junoq katzꞌaqaw nuchiꞌ.
PHI 3:7 Echiriꞌ kꞌamajaꞌ kankoj rubꞌiꞌ ri Cristo, xinchꞌobꞌo e ronoje taq waꞌ e re yakbꞌal nuqꞌij chwach ri Dios; noꞌj woꞌora kanmaj usukꞌ na e ta uꞌanom riꞌ, ma na ruma ta waꞌ xinwetaꞌmaj uwach ri Cristo.
PHI 3:8 Y na xew tane laꞌ, ma chinuwach riꞌin, ronoje ri kanꞌano o ronoje ri kꞌo wukꞌ, na jinta kꞌana uwach chwa ri retaꞌmaxik uwach ri Cristo Jesús, ri Wajawal, ma Rire na jinta kꞌana kajunimax wi. Ruma kꞌu ri Jesús, xinya kan ranimaꞌ ronoje; e taq ri kꞌo wukꞌ xa e chi pachaꞌ raqꞌes chinuwach riꞌin, ma e lik nuyaꞌom wibꞌ che retaꞌmaxik uwach ri Cristo
PHI 3:9 y jekꞌulaꞌ in uꞌanom xa jun rukꞌ Rire. Y na e ta kꞌu kanꞌan jusukꞌ che wibꞌ ruma ri lik nutaqem ri taqanik re ri Moisés; ma xew ri Dios kaꞌanaw jusukꞌ chwe, yey waꞌ e ruma ri kubꞌulibꞌal nukꞌuꞌx rukꞌ ri Cristo.
PHI 3:10 Ekꞌu ri lik kuaj riꞌin e kanwetaꞌmaj más uwach ri Cristo. Yey kuaj kakꞌojiꞌ ruchuqꞌabꞌ Rire wukꞌ, jelaꞌ pachaꞌ ri xukꞌutu echiriꞌ xuchꞌij uchuqꞌabꞌ ri kamik y xkꞌastaj lo chikixoꞌl ri ekaminaq. Yey na jinta kꞌo kubꞌiꞌij nukꞌuꞌx che tobꞌ ne kantij kꞌax y kinkamisaxik jelaꞌ pachaꞌ xꞌan che Rire echiriꞌ xuya ribꞌ pa kamik.
PHI 3:11 Ronoje kꞌu ri kanꞌano e ruma lik kacha nukꞌuꞌx che kayaꞌtaj chwe ri kꞌaslemal na jinta utaqexik echiriꞌ ri Dios kinukꞌastajisaj lo chikixoꞌl ri ekaminaq.
PHI 3:12 Na e ta kꞌu kambꞌiꞌij riꞌ nuriqom chi ronoje waꞌ y na jinta chi kꞌana kajawax che ri nubꞌinik nusilabꞌik chwach ri Dios. Na e ta riꞌ. Ma e pachaꞌ kꞌa kintajin pan chi bꞌe yey e lik kantij uqꞌij kinopon che ronoje ri xraj ri Qanimajawal Jesucristo chwe echiriꞌ xinusikꞌij.
PHI 3:13 Hermanos, riꞌin na kambꞌiꞌij taj we nuchꞌijom chi uꞌanik ronoje ri karaj ri Dios chwe. Ekꞌu ri kanꞌano e kanya ronoje nuchuqꞌabꞌ chaꞌ e kinel pan rukꞌ ri kꞌa kꞌo chinuwach y na e ta chi kanchꞌobꞌ raqan puwi ri ikꞌowinaq chik.
PHI 3:14 Jekꞌuriꞌlaꞌ lik jusukꞌ kinꞌek kꞌa pa kuꞌkꞌisa wi ri nubꞌe qꞌatital chinuwach, chaꞌ jelaꞌ kankꞌul ri chomilaj sipanik, ri ubꞌiꞌtisim ri Dios chiqe ri ojusikꞌim chaꞌ kojeꞌkꞌola rukꞌ chilaꞌ chikaj ruma oj re ri Jesucristo.
PHI 3:15 Qonoje kꞌu ri lik oj tikil chi utz chupa ri Qꞌijsaq, e lik ubꞌe riꞌ we jelaꞌ ri qanaꞌoj. Yey we kꞌo junoq chixoꞌlibꞌal alaq junwi ri kuchꞌobꞌo, e ri Dios kaqꞌalajisan che we utz o na utz ta ri kuchꞌobꞌo.
PHI 3:16 Pero ri lik chirajawaxik chiqe e kaqaꞌan ronoje ri ukꞌutum chi ri Dios chiqawach.
PHI 3:17 Hermanos, ꞌana che ri bꞌinik alaq pachaꞌ ri nubꞌinik riꞌin. Yey e chetaqej alaq ri kakiꞌan jelaꞌ pachaꞌ ri qakꞌutum riꞌoj.
PHI 3:18 Ma e kꞌi ri na kakiꞌan ta waꞌ. Ukꞌiyal laj in chꞌaꞌtinaq chi ukꞌ alaq pakiwi rike, y rukꞌ oqꞌej kambꞌiꞌij tanchik: Lik qꞌalaj ruma ri kibꞌinik kisilabꞌik, rike e aj retzelal kꞌuꞌx chirij ri Utzilaj Tzij puwi rukamik ri Cristo chwa ri cruz.
PHI 3:19 Kopon na kꞌu ri qꞌij echiriꞌ kasach na kiwach, ma ri kidios rike e taq ri rayibꞌal re ri kitiꞌjil. Kakiꞌan ne nim che kibꞌ ruma taq ri kakiꞌano tobꞌ waꞌ lik kꞌixbꞌal uwach, yey lik kakiya kinaꞌoj che taq ri xa re ruwachulew.
PHI 3:20 Noꞌj kꞌu ri qatinamit riꞌoj e ri kꞌo chilaꞌ chikaj, pa qoyeꞌem wi kape ri Qakolobꞌenel, ri Qanimajawal Jesucristo.
PHI 3:21 Y echiriꞌ kakꞌun Rire, kujalkꞌatij na qawach riꞌoj. Jekꞌuriꞌlaꞌ ri qacuerpo, tobꞌ na jinta uqꞌij woꞌora, kuꞌana jelaꞌ pachaꞌ runimal uchomalil rucuerpo Rire echiriꞌ xkꞌastaj lo chikixoꞌl ri ekaminaq. Jelaꞌ kuꞌana Rire rukꞌ ri chuqꞌabꞌ yaꞌtal che chaꞌ kuchꞌij uchuqꞌabꞌ ronoje taq ri kꞌolik.
PHI 4:1 Ekꞌu uwariꞌche hermanos, lik jikibꞌaꞌ kꞌuꞌx alaq chirij ri Qanimajawal. Riꞌin lik kꞌax kannaꞌ alaq y lik kuaj kanwil tanchi wach alaq, ma ralaq e alaq nukiꞌkotemal y alaq ri tojbꞌal re ri nuchak. Lik kꞌo alaq pa wanimaꞌ.
PHI 4:2 Lik kꞌu kantzꞌonoj ko chike ri hermana Evodia y ri hermana Síntique chuꞌana xa jun kikꞌuꞌx chikiwach, jelaꞌ pachaꞌ ri taqal chike ri e ralkꞌoꞌal ri Qaqaw.
PHI 4:3 Ekꞌu riꞌat, ri at saqil wachbꞌiꞌil chupa ruchak ri Qaqaw, kantzꞌonoj ko chawe: Lik chebꞌatoꞌo waꞌ wiꞌxoqibꞌ chaꞌ kekꞌojiꞌ chi utzil chomal chikiwach. Ma rike lik xkiya kibꞌ pa kꞌax junam wukꞌ riꞌin che utzijoxik ri Utzilaj Tzij; lik xinkitoꞌo, junam rukꞌ ri Clemente y ri jujun chik wachbꞌiꞌil, ri kꞌo chi ri kibꞌiꞌ chupa ri libro pa tzꞌibꞌital wi china taq ri kꞌo kikꞌaslemal rukꞌ ri Dios.
PHI 4:4 Hermanos, lik xaqi kiꞌkota alaq rukꞌ ri Qanimajawal. Kambꞌiꞌij julaj chik: ¡Lik kiꞌkota alaq!
PHI 4:5 Kꞌutu alaq ri relej kꞌuꞌx alaq chike konoje ri tikawex chaꞌ jelaꞌ rike kakil waꞌ che ralaq. Ri Qanimajawal xa naqaj chi kꞌo lo wi.
PHI 4:6 Lik makꞌo mutoqꞌ kꞌuꞌx alaq; ri ꞌana alaq e lik chꞌaꞌta alaq rukꞌ ri Dios puwi ronoje. Tzꞌonoj kꞌu alaq che Rire janipa taq ri kajawax che alaq yey mikꞌow chikꞌuꞌx alaq katioxij alaq che ri Dios ronoje ri uyaꞌom che alaq.
PHI 4:7 We kaꞌan kꞌu alaq taq waꞌ, ri Dios kuya ri utzil uchomalil pa animaꞌ alaq chaꞌ na kapax ta kꞌuꞌx alaq y na kasach ta naꞌoj alaq ruma kubꞌul kꞌuꞌx alaq rukꞌ ri Qanimajawal Jesucristo. Ekꞌu waꞌ wa utzil chomal na kakimaj ta usukꞌ ri tikawex.
PHI 4:8 Kꞌisbꞌal kꞌu re, kanya wa pixabꞌanik che alaq hermanos: Lik yaꞌa ibꞌ alaq che uchꞌobꞌik puwi taq waꞌ: ri lik qatzij, ri lik kꞌo uqꞌij, ri lik jusukꞌ, ri na jinta kꞌana chꞌul che, ri lik kꞌo uchomalil, ri lik utz chikiwach konoje ri tikawex; janipa taq kꞌu ri utz y ri taqal che kayak uqꞌij, puwi taq waꞌ kꞌola wi ri naꞌoj alaq.
PHI 4:9 Ekꞌu ꞌana alaq janipa ri nukꞌutum chiwach alaq, waꞌ e ri majom alaq, ri tom alaq y ri ilom alaq chwe. Jekꞌulaꞌ, ri Dios, ri aj yaꞌl utzil chomalil, kakꞌojiꞌ ukꞌ alaq.
PHI 4:10 Lik kinkiꞌkotik y kintioxin che ri Qaqaw ma xkꞌut alaq jumul chik ri rutzil kꞌuꞌx alaq rukꞌ ri qasaꞌn xtaq lo alaq chwe. Wetaꞌam xaqi in kꞌo chikꞌuꞌx alaq, pero kꞌa e tanchi waꞌ xriq alaq suꞌanik kintoꞌ alaq.
PHI 4:11 Kambꞌiꞌij kꞌu waꞌ na e ta ruma lik kꞌo kajawax chwe, na e ta riꞌ. Ma riꞌin lik ukꞌamom chi ribꞌ chwe kinkiꞌkotik tobꞌ saꞌ ri in kꞌo wi.
PHI 4:12 Kinkiꞌkotik tobꞌ na jinta wukꞌ ri kajawax chwe o echiriꞌ kikꞌow ne uwiꞌ taq ri kꞌo wukꞌ. Lik numajom ri kinkiꞌkot chupa ronoje taq ri kinikꞌow wi, tobꞌ kuriq ribꞌ saꞌ ri kantijo o kantij numik, tobꞌ kꞌo ronoje ri kajawax chwe o tobꞌ na jintaj.
PHI 4:13 Kinel kꞌu pan chi utz che ronoje ri kinikꞌow chupa, ma e ri Cristo kayaꞌw nuchuqꞌabꞌ.
PHI 4:14 Na rukꞌ ta kꞌu riꞌ, lik utz ri xꞌan alaq, ma ri toꞌbꞌal e alaq lik xuriq uchak chwe pa ri kꞌaxkꞌobꞌik in kꞌo wi.
PHI 4:15 Etaꞌam chi alaq, ri nabꞌe laj xinopon pa ri luwar re Macedonia chaꞌ kantzijoj ri Utzilaj Tzij, na jinta juna chik iglesia xtoꞌw we rukꞌ qasaꞌn, xew ralaq. Ma echiriꞌ xinel bꞌi Macedonia, ralaq xya bꞌi alaq qasaꞌn chwe, toꞌbꞌal we che ri chak kanꞌano.
PHI 4:16 Y na xew ta waꞌ. Ma echiriꞌ kꞌa in kꞌo Macedonia pa ri tinamit Tesalónica, na xa ta julaj xintoꞌ alaq rukꞌ ri kajawax chwe.
PHI 4:17 Na kambꞌiꞌij ta waꞌ chaꞌ kaya alaq más qasaꞌn chwe, ma ri lik kuaj riꞌin e lik kakꞌiyar uwach ri kakꞌul alaq che ri Dios ruma taq ri utzilaj chak kaꞌan alaq chwach.
PHI 4:18 Ma ri sipanik xtaq lo alaq chwe rukꞌ ri Epafrodito e pachaꞌ jun qasaꞌn lik kiꞌ ruxlabꞌ chwach ri Dios, yey ri Dios lik kakiꞌkot che waꞌ. Rukꞌ kꞌu ri nukꞌulum che alaq, kꞌo chi ri kajawax chwe y kikꞌow ne uwiꞌ.
PHI 4:19 Ekꞌu ri nu Dios e kayaꞌw na ronoje taq ri kajawax che alaq, ma saꞌchi ri chomilaj bꞌeyomalil kꞌo rukꞌ Rire; yey kuya kꞌu waꞌ chiqe ri oj re ri Cristo Jesús.
PHI 4:20 Qayaka kꞌu uqꞌij ri Qaqaw Dios waqꞌij ora y chiqawach apanoq na jinta chi utaqexik. Amén.
PHI 4:21 Yaꞌa pan alaq rutzil kiwach konoje ri kikojom rubꞌiꞌ ri Cristo Jesús e kꞌo chilaꞌ Filipos. Kakiya pan rutzil wach alaq ri hermanos e kꞌo wukꞌ
PHI 4:22 junam kukꞌ konoje ri hermanos e kꞌo wara Roma. Yey ri hermanos kechakun pa ri palacio re ri nimalaj taqanel re Roma, rike lik kakiya pan rutzil wach alaq.
PHI 4:23 Kꞌola kꞌu pa animaꞌ onoje alaq ri unimal rutzil ukꞌuꞌx ri Qanimajawal Jesucristo. Amén.
COL 1:1 Riꞌin in Pablo in taqoꞌn re ri Qanimajawal Jesucristo; e ri Dios intaqayom re ma e xraj riꞌ chwe. Junam rukꞌ ri hermano Timoteo,
COL 1:2 kaqataq bꞌi wa carta che alaq ri kꞌo alaq pa ri tinamit Colosas, ri kꞌo alaq puqꞌabꞌ ri Cristo y tikil alaq chi utz chupa rubꞌiꞌ. Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
COL 1:3 Echiriꞌ kaqaꞌan orar pawiꞌ alaq, xaqi kojtioxin kꞌu chwach ri Dios, Ruqaw ri Qanimajawal Jesucristo.
COL 1:4 Ma riꞌoj qatom puwi ri kubꞌulibꞌal kꞌuꞌx alaq rukꞌ ri Qanimajawal Jesucristo y puwi ri rutzil kꞌuꞌx alaq kukꞌ konoje ri kikojom rubꞌiꞌ.
COL 1:5 Jekꞌulaꞌ ꞌanom alaq ma ralaq e kubꞌam pan kꞌuꞌx alaq che ukꞌulik ri ukꞌolom ri Dios che alaq chilaꞌ chikaj; yey waꞌ etaꞌam alaq ruma ri saqil Utzilaj Tzij tom chi alaq.
COL 1:6 Ekꞌu waꞌ wa Utzilaj Tzij xtzijox che alaq, e katajin utzijoxik che ronoje ruwachulew. Yey kꞌiyarinaq kiwach ri kekojow re y lik kꞌo kutiqoj che ri kibꞌinik kisilabꞌik taq ri tikawex. Y jelaꞌ uꞌanom chixoꞌlibꞌal ralaq chwi lo echiriꞌ xta alaq puwi ri unimal rutzil ukꞌuꞌx ri Dios y xkꞌul alaq waꞌ paqatzij wi.
COL 1:7 Jelaꞌ rutzijoxik xuꞌan ri Epafras che alaq. Rire e jun qachbꞌiꞌil na loqꞌ ta kꞌax kanaꞌw re yey e jun utzilaj aj chak re ri Cristo kꞌo chiwach alaq.
COL 1:8 Rire utzijom chiqe puwi ri rutzil kꞌuꞌx alaq, ri uyaꞌom ri Ruxlabꞌixel ri Dios pa animaꞌ alaq.
COL 1:9 Ekꞌu uwariꞌche, chwi lo echiriꞌ xqata waꞌ, e laꞌ na oj uxlaninaq ta che kaqaꞌan orar pawiꞌ alaq chaꞌ ri Dios kuqꞌalajisaj che alaq janipa ri karaj Rire kaꞌan alaq y chaꞌ kamaj alaq usukꞌ ronoje taq ri saqil naꞌoj petinaq rukꞌ ri Ruxlabꞌixel.
COL 1:10 Y jekꞌulaꞌ kabꞌin alaq jusukꞌ pachaꞌ ri taqal chike ri e ralkꞌoꞌal ri Dios y kaꞌan kꞌu alaq janipa ri karaj ri Dios chaꞌ kꞌo kutiqoj ri utzilaj chak kaꞌan alaq y jelaꞌ kakꞌojiꞌ más naꞌoj alaq che retaꞌmaxik uwach ri Dios.
COL 1:11 Kaqatzꞌonoj kꞌu che ri Dios chuyaꞌa chuqꞌabꞌ alaq e chirij runimal uchuqꞌabꞌ Rire chaꞌ kachꞌij alaq uchuqꞌabꞌ ri kikꞌowibꞌej alaq rukꞌ unimal kꞌuꞌxaj y chaꞌ rukꞌ unimal kiꞌkotemal
COL 1:12 katioxin kꞌu alaq chwach ri Qaqaw, ma e Rire xꞌanaw chiqe riꞌoj utz kaqakꞌul janipa rubꞌiꞌtisim chike rutinamit e kꞌo pa ri Qꞌijsaq.
COL 1:13 Ri Dios xojresaj chupa ruchuqꞌabꞌ ri qꞌequꞌmalil y xojuqꞌatisaj chupa rutaqanik Rukꞌajol, ri lik kꞌax kunaꞌo.
COL 1:14 Rukꞌ kꞌu riꞌ ri Cristo kꞌo qakolobꞌetajik y kꞌo kuybꞌal qamak ruma rukikꞌel xturuwik.
COL 1:15 Tobꞌ na jinta junoq iliyom uwach ri Dios, pero ri Cristo e kakꞌutubꞌen uwach. Yey ri Cristo xex chi kꞌo wi echiriꞌ xwinaqir ronoje ri kꞌo che ruwachulew.
COL 1:16 Ruma kꞌu ri Cristo, ri Dios xuꞌan ronoje taq ri kꞌolik: taq ri e kꞌo chilaꞌ chikaj y ri e kꞌo che ruwachulew, taq ri kilitaj uwach y ri na kilitaj ta uwach; ri e taqanelabꞌ y ri e aj qꞌatal tzij, tobꞌ ne ri ángeles, ri kꞌo kiwach y ri kꞌo kichuqꞌabꞌ. Ronoje taq kꞌu riꞌ ri kꞌolik, xꞌan ruma ri Cristo yey e re yakbꞌal uqꞌij Rire.
COL 1:17 Ri Cristo xex chi kꞌo wi chwa ronoje taq ri kꞌolik y Rire e chapayom re ronoje taq waꞌ.
COL 1:18 Ri Cristo e ujolom riglesia. E Rire ri nabꞌe che ronoje taq ri kꞌolik y ri nabꞌe xkꞌastaj lo chikixoꞌl ri ekaminaq, chaꞌ e Rire ri lik kꞌo uwach chwa taq ronoje ri kꞌolik.
COL 1:19 Ma lik e xukꞌul ukꞌuꞌx riꞌ ri Dios ri kakꞌojiꞌ ronoje rukꞌuꞌxibꞌal Rire rukꞌ ri Cristo.
COL 1:20 Ruma kꞌu ri Cristo, ri Dios xuꞌano chaꞌ ronoje taq ri kꞌolik kakꞌojiꞌ tanchi puqꞌabꞌ Rire, waꞌ e taq ri kꞌo che ruwachulew y taq ri kꞌo chilaꞌ chikaj, y jekꞌulaꞌ konoje kekꞌojiꞌ chi utzil chomal chwach Rire ruma rukikꞌel ri Cristo xturuw chwa ri cruz.
COL 1:21 Ekꞌu ralaq rojertan na alaq ta utinamit ri Dios y alaq ne aj retzelal kꞌuꞌx chirij ri Dios ruma na chom ta ri naꞌoj alaq y ruma taq ri na utz taj xꞌan alaq. Noꞌj woꞌora ri Dios uyaꞌom alaq chi utzil chomal chwach Rire.
COL 1:22 Xuꞌan kꞌu waꞌ ruma rukamik ri Cristo chaꞌ jelaꞌ kuꞌana alaq jusukꞌ, na jinta kꞌana mak alaq y na jinta katzꞌaqaw chiꞌ alaq chwach Rire.
COL 1:23 Ruma waꞌ lik chirajawaxik wi kachuqꞌubꞌej ibꞌ alaq y katikiꞌ alaq chi utz chupa ri kubꞌulibꞌal kꞌuꞌx alaq rukꞌ ri Dios. Yey moqꞌotaj kꞌu alaq royꞌexik ri kubꞌam pan kꞌuꞌx alaq che, waꞌ e janipa ri bꞌiꞌtisim chupa ri Utzilaj Tzij tom chi alaq. Waꞌ wa Utzilaj Tzij e ri katajin utzijoxik pa taq ronoje luwar che ruwachulew. Yey riꞌin Pablo, yaꞌtal chwe kantzijoj waꞌ.
COL 1:24 Ekꞌu riꞌin woꞌora lik kinkiꞌkot che taq ri kꞌaxkꞌobꞌik kantijo we rukꞌ waꞌ kantoꞌ alaq. Jekꞌulaꞌ e kantzꞌaqatisaj chwi ri nucuerpo janipa ri kꞌaxkꞌolil yaꞌtal chwe ruma in re ri Cristo, yey wa kankꞌulumaj e toꞌbꞌal che riglesia, rucuerpo Rire.
COL 1:25 Xinuꞌan jun aj chak re Rire chaꞌ kantoꞌ riglesia, ma e ri Dios uyaꞌom chwe kantzijoj pa tzꞌaqat wi ri Utzilaj Tzij chiwach ralaq ri na alaq ta aj judiꞌabꞌ.
COL 1:26 Lik ojertan lo riꞌ na qꞌalajisam ta waꞌ chikiwach ri tikawex, noꞌj kꞌu woꞌora ri Dios e xuqꞌalajisaj waꞌ chike ri e re Rire.
COL 1:27 Chike kꞌu rike, ri Dios lik xraj kuqꞌalajisaj ri unimal chomalil uchꞌobꞌom loq kuya chike taq ri tinamit na e ta aj judiꞌabꞌ; waꞌ e ri kajeqiꞌ ri Cristo pa animaꞌ ralaq, y ruma kꞌu riꞌ lik kubꞌam kꞌuꞌx alaq che ukꞌulik ri chomilaj kꞌaslemal chilaꞌ chikaj.
COL 1:28 Ekꞌu riꞌoj e kaqatzijoj rubꞌiꞌ ri Cristo pa taq kojꞌek wi. Kebꞌeqapixabꞌaj konoje ri tikawex y kojkꞌutun chikiwach rukꞌ saqil naꞌoj, chaꞌ kebꞌeqaya ri e re ri Cristo chwach ri Dios rukꞌ jun jusukꞌ kibꞌinik kisilabꞌik.
COL 1:29 Lik kꞌu kantij uqꞌij che uꞌanik waꞌ rukꞌ ronoje nukꞌuꞌx, yey ronoje ri kanꞌano e ruma runimal uchuqꞌabꞌ ri Cristo kꞌo wukꞌ.
COL 2:1 Kuaj kꞌut ketaꞌmaj alaq, e riꞌin lik kanya wibꞌ che toꞌik alaq, junam kukꞌ ri e kꞌo Laodicea y ri jujun chik kꞌamajaꞌ kaketaꞌmaj nuwach riꞌin,
COL 2:2 chaꞌ kanimarisax kikꞌuꞌx konoje ri kikojom rubꞌiꞌ ri Cristo, kuꞌana xa jun ri rutzil kikꞌuꞌx chikiwach y keꞌkimaja usukꞌ chi utz ronoje ri saqil naꞌoj qꞌalajisam chi lo ruma ri Qaqaw Dios y ruma ri Cristo.
COL 2:3 Ma rukꞌ ri Cristo kꞌo wi ronoje rukꞌuꞌxibꞌal ri naꞌoj y ri kajawax umajik.
COL 2:4 Kambꞌiꞌij kꞌu waꞌ che alaq chaꞌ na jinta junoq kachꞌakachꞌoꞌn e alaq rukꞌ chꞌaꞌtem lik chakojoꞌ katatajik yey na qatzij taj.
COL 2:5 Ma tobꞌ riꞌin na in jinta ukꞌ alaq chiwachil, pero pa wanimaꞌ e kannaꞌ riꞌin pachaꞌ in kꞌo ukꞌ alaq. Lik kinkiꞌkotik ma kanwilo junam kachakun alaq yey lik tikil alaq chi utz che ri kubꞌulibꞌal kꞌuꞌx alaq rukꞌ ri Cristo.
COL 2:6 Ralaq xkoj alaq rubꞌiꞌ ri Qanimajawal Jesucristo y xya ibꞌ alaq puqꞌabꞌ; ekꞌu uwariꞌche bꞌina alaq jelaꞌ pachaꞌ ri taqal che junoq ukojom rubꞌiꞌ Rire.
COL 2:7 Tikibꞌaꞌ kꞌu ibꞌ alaq chi utz rukꞌ ri Cristo y jikibꞌaꞌ ri kubꞌulibꞌal kꞌuꞌx alaq rukꞌ Rire chaꞌ jelaꞌ kꞌo kꞌiyibꞌal alaq chwach Rire; e ꞌana alaq jelaꞌ pachaꞌ ri xkꞌut che alaq yey xaqi tioxin alaq chwach ri Dios.
COL 2:8 Lik chajij kꞌu ibꞌ alaq chaꞌ na kasokotaj ta alaq rukꞌ taq naꞌoj na jinta uchak, ri xa noꞌjibꞌal ke ri tikawex re ruwachulew y na e ta kꞌu chirij runaꞌoj ri Cristo.
COL 2:9 Ma ronoje rukꞌuꞌxibꞌal ri Dios kꞌo rukꞌ ri Cristo, y waꞌ lik xqꞌalajin che rubꞌinik usilabꞌik echiriꞌ xuꞌan tikawex che ruwachulew.
COL 2:10 Ruma kꞌu waꞌ, yaꞌtal che alaq ronoje ri kajawax che ri bꞌinik silabꞌik alaq ma kꞌo alaq puqꞌabꞌ ri Cristo, ri kataqan pakiwi konoje ri kꞌo kiwach y ri kꞌo kichuqꞌabꞌ.
COL 2:11 Ruma kꞌu kꞌo alaq puqꞌabꞌ ri Cristo, kꞌo chi ri retalil re circuncisión che ri animaꞌ alaq, tobꞌ waꞌ wa circuncisión na e ta ri kakoj xa ruma juna achi; ma ri keꞌelawi e ri Cristo xresaj alaq puqꞌabꞌ taq ri rayibꞌal re ri tiꞌjil alaq.
COL 2:12 Ekꞌuchiriꞌ xkꞌul alaq ri bautismo, e pachaꞌ xmuq alaq junam rukꞌ ri Qanimajawal Jesucristo yey xkꞌastaj lo alaq junam rukꞌ Rire; ma xkoj alaq ri Dios rukꞌ ruchuqꞌabꞌ xukꞌastajisaj lo ri Cristo chikixoꞌl ri ekaminaq.
COL 2:13 Ma ralaq rojertan kaminaq alaq pa mak yey na kojotal tane ri retalil re circuncisión che alaq. Noꞌj kꞌu woꞌora ri Dios xuya kꞌakꞌ kꞌaslemal alaq junam rukꞌ ri Cristo y xukuy ronoje ri mak alaq;
COL 2:14 xresaj kꞌu ri qꞌatbꞌal tzij uqꞌatom chi paqawiꞌ ruma ri qamak y xusach uwach waꞌ ruma rukamik ri Cristo chwa ri cruz.
COL 2:15 Ruma kꞌu rukamik ri Cristo, ri Dios xuchꞌij kichuqꞌabꞌ taq ri itzel uxlabꞌixel lik kꞌo kiwach y kꞌo kichuqꞌabꞌ, xukꞌaq bꞌi kiqꞌij y xuqꞌalajisaj kꞌut Rire e más kꞌo uchuqꞌabꞌ chikiwa rike.
COL 2:16 E uwariꞌche makꞌo machꞌaꞌtibꞌen e alaq xa ruma ri katij alaq o ri kaqum alaq, o ruma ri kaꞌan alaq chupa taq nimaqꞌij, chupa ri jeqebꞌal re taq ri ikꞌ o taq ri qꞌij re uxlanibꞌal.
COL 2:17 Ma ronoje ne waꞌ xa e ilibꞌal pan re ri katajin loq; noꞌj ri Jun kukꞌutubꞌej uwach pa saqil wi, e ri Cristo.
COL 2:18 Chajij ibꞌ alaq ma kꞌaxtaj ruma junoq na kakꞌul ta alaq ri karaj kuya ri Dios che alaq chilaꞌ chikaj. Maꞌan kꞌu e alaq kukꞌ ri kakiloqꞌnimaj kiqꞌij taq ri ángeles. Ma ri kebꞌanaw waꞌ e lik keꞌek kinaꞌoj puwi ri na kakimaj ta usukꞌ. Lik chakojoꞌ kiꞌanom chꞌutiꞌn che kibꞌ, pero kakiꞌan kꞌu nim che kibꞌ ruma noꞌjibꞌal xa e rike enoꞌjiyom re.
COL 2:19 Rike na kakaj ta kꞌu kakitaqej ri Cristo. Rire e ujolom riglesia y riglesia e ucuerpo. Ri Cristo e ꞌanayom xa jun chike konoje ri e kꞌo puqꞌabꞌ jelaꞌ pachaꞌ taq ri ubꞌaqil juna cuerpo uchapom ribꞌ rukꞌ taq rigonsiyil y ribꞌochꞌil. Yey e ri Cristo ri kuya che ru iglesia ronoje ri kajawax che chaꞌ utz kakꞌiy rukꞌ ri kꞌiyibꞌal kuya ri Dios.
COL 2:20 Ma we ralaq xkam alaq rukꞌ ri Cristo, waꞌ keꞌelawi na jinta chi alaq chuxeꞌ ri taqanik xa noꞌjital che ruwachulew. Kantzꞌonoj kꞌu che alaq: ¿Chaꞌtaj kꞌa kabꞌin alaq pachaꞌ kebꞌin ri e re ruwachulew y kaya kꞌu ibꞌ alaq puqꞌabꞌ ri taqanik jewaꞌ kubꞌiꞌij:
COL 2:21 «Machapabꞌej ne waꞌ, matij nenareꞌ y machap ne kꞌenoq»?
COL 2:22 Ronoje waꞌ wa taqanik xa kinoꞌjibꞌal achijabꞌ y e puwi taq ri na kakowin taj, ri xa kakꞌisik.
COL 2:23 Waꞌ wa kꞌutunik lik chakojoꞌ e saqil naꞌoj. Yey ri kakitaqej taq wa kꞌutunik e pachaꞌ lik kakiloqꞌnimaj uqꞌij ri Dios rukꞌ waꞌ, pero ri kakiꞌano xa kukꞌ rike kanoꞌjitaj wi. Kakiꞌan pachaꞌ chꞌutiꞌn che kibꞌ ma kakiya pa kꞌaxkꞌobꞌik ri kicuerpos; pero ronoje taq waꞌ na jinta kutiqoj re kuqꞌatej taq ri rayibꞌal re ri kitiꞌjil ri tikawex.
COL 3:1 We kꞌastajinaq chi alaq junam rukꞌ ri Cristo, e tzukuj alaq janipa ri kape chilaꞌ chikaj pa tzꞌul wi ri Cristo puwikiqꞌabꞌ ri Dios.
COL 3:2 E lik taqej alaq janipa ri re chilaꞌ chikaj y mataqej kꞌu alaq taq ri xa re ruwachulew.
COL 3:3 Ma e ralaq kaminaq chi alaq chwa taq ri xa re ruwachulew; ekꞌu woꞌora ri kꞌaslemal alaq puqꞌabꞌ ri Cristo kꞌo wi yey Rire rukꞌ ri Dios kꞌo wi.
COL 3:4 E ri Cristo ri uyaꞌom kꞌaslemal alaq. Yey echiriꞌ Rire kakꞌun tanchik, junam rukꞌ Rire kaqꞌalajisax wach alaq pa ri unimal uchomalil.
COL 3:5 E uwariꞌche, e chesaj bꞌi chupa ri animaꞌ alaq ri na utz ta uwach re ruwachulew: metzꞌabꞌej uwa qꞌij alaq kukꞌ jujun chik na kꞌulel ta alaq, maꞌan alaq taq chꞌulilaj mak, maya ibꞌ alaq che rayibꞌal na chom ta uwach, marayij ne alaq kaꞌan alaq ri na utz taj. Kiꞌkota alaq rukꞌ ronoje ri kꞌo ukꞌ alaq y marayij ne alaq más; ma we kꞌo ri más kꞌax kanaꞌ alaq chwa ri Dios, e pachaꞌ kaꞌan alaq dios che waꞌ.
COL 3:6 Ma ri Dios kutaq lo kꞌaxkꞌobꞌik pakiwi ri kakiꞌan taq waꞌ ruma na kakikoj ta utzij.
COL 3:7 Yey jenelaꞌ xꞌan ralaq ojertan echiriꞌ kꞌa kꞌo alaq pa mak.
COL 3:8 Ekꞌu woꞌora hermanos e yaꞌa kan alaq ronoje taq waꞌ: ri kaꞌan alaq oyowal, ri alaq kꞌaꞌn, ri kaꞌan alaq ri na utz taj che jun chik, ri kachꞌaꞌt alaq chirij junoq, ri kabꞌiꞌij alaq chꞌaꞌtem na chom ta uwach.
COL 3:9 Maꞌan alaq raqꞌubꞌal chiwach alaq, ma esam chi ibꞌ alaq che ri ojer bꞌinik silabꞌik alaq y che ronoje ri na utz taj reqelem taq waꞌ.
COL 3:10 E jalkꞌatajinaq chi kꞌu alaq che jun kꞌakꞌ bꞌinik silabꞌik, ma jalan katajin jalkꞌatixik alaq chaꞌ jelaꞌ kuꞌana alaq pachaꞌ ri Jun ri xuya kꞌakꞌ kꞌaslemal alaq. Jekꞌuriꞌlaꞌ ketaꞌmaj alaq uwach ri Dios pa saqil wi.
COL 3:11 Che wa jun kꞌakꞌ bꞌinik silabꞌik na il ta chi uwach we junoq e kukꞌil raj judiꞌabꞌ o e kukꞌil ri na e ta aj judiꞌabꞌ, we ukojom ri retalil re circuncisión o na ukojom taj, we aj naj o na jinta kꞌana retaꞌam, we kꞌo puqꞌabꞌ juna rajaw o na jinta rajaw; ma xew ri Cristo kuꞌan xa jun chiqe qonoje y puqꞌabꞌ Rire oj kꞌo wi qonoje.
COL 3:12 Ralaq alaq chaꞌtal chi ruma ri Dios y alaq chi re Rire, yey lik kꞌax kanaꞌ alaq ruma Rire. Rukꞌ kꞌu ri bꞌinik silabꞌik alaq, lik kꞌutu alaq waꞌ: Kꞌola kꞌaxnaꞌbꞌal kꞌuꞌxaj ukꞌ alaq che kitoꞌik jujun chik, kꞌutu alaq ri relej kꞌuꞌx alaq, maꞌan nim chibꞌil ibꞌ alaq, chuꞌana ri lik utz kꞌuꞌx alaq chiwach alaq y kꞌola unimal kꞌuꞌx alaq.
COL 3:13 Lik kuyu ibꞌ alaq chiwach alaq. We kꞌo junoq xuꞌan ri na utz taj che alaq, kuyu alaq umak. Jelaꞌ pachaꞌ xuꞌan ri Cristo echiriꞌ xukuy mak ralaq, jekꞌulaꞌ riꞌ ꞌana ralaq.
COL 3:14 Yey chwi kꞌu ronoje taq waꞌ, ri más chirajawaxik e lik kꞌax kanaꞌ ibꞌ alaq chiwach alaq, ma e waꞌ ri kuꞌan xa jun che alaq pa saqil wi.
COL 3:15 Ekꞌu ri utzil chomal re ri Dios taqana pa animaꞌ alaq, ma ruma waꞌ xusikꞌij alaq ri Dios chaꞌ kuꞌan alaq xa jun. Yey lik tioxin alaq chwach ri Dios.
COL 3:16 Ruchꞌaꞌtem ri Cristo chunojisaj ronoje ri kꞌaslemal alaq. Kꞌutu kꞌu alaq waꞌ wa chꞌaꞌtem chibꞌil ibꞌ alaq y pixabꞌaj ibꞌ alaq rukꞌ saqil naꞌoj. Rukꞌ ronoje kꞌuꞌx alaq tioxin alaq chwach ri Dios y bꞌixoj alaq rubꞌiꞌ rukꞌ salmos, rukꞌ taq bꞌix tzꞌibꞌital kanoq y rukꞌ bꞌixobꞌal yaꞌom che alaq ruma ri Ruxlabꞌixel.
COL 3:17 Yey ronoje ri kaꞌan alaq y ronoje ri kabꞌiꞌij alaq, ꞌana alaq chupa rubꞌiꞌ ri Qanimajawal Jesucristo y tioxin alaq chwach ri Qaqaw Dios ruma Rire.
COL 3:18 E rilal ixoq, ri kꞌulan la, lik nimaj la ri achijil la, ma e taqal riꞌ chike ri kikojom rubꞌiꞌ ri Qaqaw.
COL 3:19 Yey rilal achi, ri kꞌulan la, lik kꞌax naꞌa la ri ixoqil la. Makꞌachkꞌat la chwa ujolom.
COL 3:20 Ekꞌu riꞌix ix alkꞌoꞌal, lik chikojo kitzij richu-iqaw che ronoje, ma waꞌ e kukꞌul ukꞌuꞌx ri Qanimajawal Jesucristo.
COL 3:21 Yey ralaq ri kꞌo alkꞌoꞌal alaq, mapetisaj alaq koyowal ri alkꞌoꞌal alaq, chaꞌ jelaꞌ na kapax ta kikꞌuꞌx.
COL 3:22 Ekꞌu rilal lal mokom, lik kojo la utzij ri patrón la che ronoje. Chakuna la rukꞌ xiꞌin ibꞌ chwach ri Dios y rukꞌ ronoje kꞌuꞌx la, na xew ta echiriꞌ katzutzuꞌx la ruma ri patrón pachaꞌ ri kakiꞌan ri xa kakitzukuj ri yakbꞌal kiqꞌij.
COL 3:23 Ronoje kꞌu ri kaꞌan la, ꞌana la rukꞌ ronoje kꞌuꞌx la, ma e ri Qanimajawal ri kanimaj la y na e ta ri tikawex.
COL 3:24 Ma etaꞌam chi la kꞌo rajil ukꞌaxel kuya ri Dios cheꞌla e chirij ri ꞌanom la, ma ri kanimaj la e ri Cristo ri Qajawal.
COL 3:25 Noꞌj kꞌu ri kaꞌanaw ri na utz taj, riꞌ e kukꞌul ri tojbꞌal re ri na utz taj uꞌanom, ma ri Dios kuya chikijujunal saꞌ ri taqal chike e chirij ri kiꞌanom.
COL 4:1 Yey ralaq ri alaq patrón, ꞌana alaq ri lik ubꞌe y ri lik usukꞌ chike ri e mokom alaq; mikꞌow chikꞌuꞌx alaq, ralaq kꞌo jun “Patrón” alaq chilaꞌ chikaj, waꞌ e ri Dios.
COL 4:2 Onoje kꞌu alaq lik makos alaq che uꞌanik orar rukꞌ tioxinik chwach ri Dios.
COL 4:3 ꞌAna alaq orar paqawi riꞌoj chaꞌ ri Qajawal kuya na chiqe kaqatzijoj ri Utzilaj Tzij y kaqaqꞌalajisaj kꞌu ri na qꞌalajisam ta lo ojertan chwi ri Cristo, ma ruma ne laꞌ in kꞌo pa cárcel.
COL 4:4 Lik ꞌana alaq orar panuwiꞌ riꞌin chaꞌ lik kꞌo nunaꞌoj che uqꞌalajisaxik Ruchꞌaꞌtem ri Cristo.
COL 4:5 Bꞌina alaq rukꞌ saqil naꞌoj chikiwach ri na e ta ralkꞌoꞌal ri Dios, xaqi matzꞌilaꞌ kꞌu alaq ri jujun qꞌij kikꞌowik.
COL 4:6 Echiriꞌ kachꞌaꞌt alaq rukꞌ junoq chik, ꞌana alaq waꞌ rukꞌ chomilaj chꞌaꞌtem y saqil naꞌoj. Yey chirajawaxik kꞌut ketaꞌmaj alaq suꞌanik kakꞌul alaq uwach chike ri kakiꞌan tzꞌonobꞌal che alaq.
COL 4:7 Echiriꞌ ri hermano Tíquico ri na loqꞌ ta kꞌax kanaꞌw re kopon ukꞌ alaq, kubꞌiꞌij kꞌu che alaq saꞌ ri nuꞌanom riꞌin wara. Rire e jun utzilaj aj chak re ri Qaqaw y lik chakuninaq wukꞌ riꞌin.
COL 4:8 Ruma kꞌu waꞌ kantaq bꞌi ukꞌ alaq chaꞌ kutzijoj che alaq saꞌ ri qaꞌanom riꞌoj wara y jelaꞌ kunimarisaj kꞌuꞌx alaq.
COL 4:9 Ri karachbꞌilaj bꞌi ri Tíquico e ri Onésimo, jun utzilaj hermano na loqꞌ ta kꞌax kanaꞌw re, yey rire aj chilaꞌ pa ri tinamit alaq. Ekꞌu rike kakitzijoj che alaq ronoje saꞌ taq ri qikꞌowibꞌem wara.
COL 4:10 Ri Aristarco, wachbꞌiꞌil wara pa cárcel, kuya pan rutzil wach alaq; kuya pan rutzil wach alaq ri Marcos, ri rikaqꞌ ri Bernabé. Bꞌiꞌtal chi che alaq saꞌ ri taqal che ri Marcos we kikꞌow rire ukꞌ alaq; kꞌulu kꞌu alaq chi utz.
COL 4:11 Kuya pan rutzil wach alaq ri Jesús, ri kabꞌiꞌx Justo che. Xew kꞌu wa oxibꞌ hermanos aj judiꞌabꞌ e chakuninaq wukꞌ woꞌora pa rutaqanik ri Dios y lik kibꞌochiꞌim nukꞌuꞌx.
COL 4:12 Kuya pan rutzil wach alaq ri Epafras, rire aj chilaꞌ pa ri tinamit alaq y e jun aj chak re ri Cristo. Rire lik uyaꞌom ribꞌ che uꞌanik orar pawiꞌ alaq chaꞌ lik kachuqꞌubꞌej ibꞌ alaq rukꞌ ri jusukꞌ bꞌinik silabꞌik alaq y jekꞌulaꞌ kaya ibꞌ alaq che uꞌanik ronoje ri rajawal ukꞌuꞌx ri Dios.
COL 4:13 Ma e riꞌin wilom ri Epafras lik kuꞌan orar pawiꞌ alaq y pakiwiꞌ ri e kꞌo pa ri tinamit Laodicea y ri e kꞌo Hierápolis.
COL 4:14 Kuya pan rutzil wach alaq ri Lucas, ri jun doctor na loqꞌ ta kꞌax kanaꞌw re; jenelaꞌ ri Demas kuya pan rutzil wach alaq.
COL 4:15 Yaꞌa alaq rutzil kiwach konoje ri hermanos e kꞌo Laodicea. Yaꞌa alaq rutzil uwach ri Ninfas junam kukꞌ ri hermanos kakimol kibꞌ chirocho.
COL 4:16 Echiriꞌ ajilam chi waꞌ wa carta chiwach ralaq, taqa bꞌi alaq waꞌ chike ri hermanos re ri iglesia kꞌo Laodicea chaꞌ kajilax chikiwach; y jekꞌulaꞌ ralaq kajilaj alaq ri carta nutaqom bꞌi Laodicea.
COL 4:17 Jewaꞌ bꞌiꞌij alaq che ri Arquipo: «Lik chok la il che uꞌanik chi utz ruchak ri Dios yaꞌtal paqꞌabꞌ la.»
COL 4:18 Riꞌin Pablo, rukꞌ wa nuqꞌabꞌ xintzꞌibꞌaj wa rutzil wach alaq. Lik mikꞌow chikꞌuꞌx alaq kaꞌan alaq orar panuwiꞌ ma in kꞌo pa cárcel. Kꞌulu kꞌu alaq ri unimal rutzil ukꞌuꞌx ri Dios. Amén.
1TH 1:1 Riꞌin Pablo kukꞌ ri wachbꞌiꞌil Silvano y Timoteo kaqataq bꞌi wa carta che alaq, ri alaq re riglesia kꞌo Tesalónica, alaq re ri Qaqaw Dios y re ri Qanimajawal Jesucristo. Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
1TH 1:2 Lik xaqi kojtioxin chwach ri Dios uma onoje alaq echiriꞌ kaqaꞌan orar pawiꞌ alaq.
1TH 1:3 Xaqi e kꞌo alaq chiqakꞌuꞌx chwach ri Qaqaw Dios ruma ri katajin alaq che ukꞌutik rukꞌ ri kubꞌulibꞌal kꞌuꞌx alaq y ri rutzil kꞌuꞌx alaq, yey ruma na oqꞌotam ta kꞌana alaq ri kubꞌul pan kꞌuꞌx alaq che rukꞌunibꞌal ri Qanimajawal Jesucristo.
1TH 1:4 Hermanos, ri lik kꞌax kanaꞌ alaq ruma ri Dios, riꞌoj qetaꞌam ralaq alaq chaꞌtal ruma Rire.
1TH 1:5 Ma echiriꞌ xqatzijoj ri Utzilaj Tzij che alaq, na xqatzijoj ta xa rukꞌ qachꞌaꞌtem riꞌoj, ma e xqatzijoj rukꞌ ruchuqꞌabꞌ ri Santowilaj Ruxlabꞌixel ri Dios; yey ekꞌu riꞌ Rire xujikibꞌaꞌ uwach lik qatzij ri xqatzijoj. Ralaq etaꞌam alaq chi utz saꞌ ri qabꞌinik qasilabꞌik echiriꞌ xojopon chixoꞌl alaq, ma ronoje ri xqaꞌano, xqaꞌano re toꞌbꞌal e alaq.
1TH 1:6 Ekꞌu ralaq e lik xkꞌam alaq re ri qabꞌinik qasilabꞌik riꞌoj y rubꞌinik usilabꞌik ri Qanimajawal. Yey tobꞌ ne xkꞌul alaq ri Utzilaj Tzij chupa unimal kꞌaxkꞌobꞌik, chupa ri animaꞌ alaq kꞌo ri kiꞌkotemal kuya ri Santowilaj Ruxlabꞌixel ri Dios.
1TH 1:7 Waꞌ wa xꞌan alaq e jun kꞌutubꞌal chikiwach konoje ri hermanos kikojom rubꞌiꞌ ri Cristo, ri e kꞌo chupa taq ri luwar re Macedonia y re Acaya.
1TH 1:8 Ruma kꞌu ri xꞌan alaq xeꞌek utzijoxik Ruchꞌaꞌtem ri Qaqaw pa taq ronoje luwar, na xew ta Macedonia y Acaya. Ma pa ukꞌiyal luwar katataj wi ri kubꞌulibꞌal kꞌuꞌx alaq rukꞌ ri Dios, y jekꞌulaꞌ na kajawax ta chi kaqatzijoj chikiwach ri jujun chik ri xuꞌan ri Dios ukꞌ alaq.
1TH 1:9 Ma e ne rike kakitzijoj ri utzilaj qakꞌulik xꞌan ralaq yey suꞌanik xoqꞌotaj kan alaq ri kiloqꞌnimaxik taq ri tiox chaꞌ e kaloqꞌnimaj alaq ri Jun paqatzij wi e Dios kꞌaslik.
1TH 1:10 Yey kakitzijoj e oyeꞌem alaq ri Jun kape chilaꞌ chikaj, waꞌ e ri Jesús Rukꞌajol ri Dios, ri xkꞌastaj lo chikixoꞌl ri ekaminaq. Yey Rire kojukolobꞌej che ri qꞌatbꞌal tzij re ri Dios katajin loq.
1TH 2:1 Hermanos, etaꞌam alaq lik kꞌo xutiqoj janipa qꞌij xojkꞌojiꞌ chilaꞌ ukꞌ alaq.
1TH 2:2 Yey etaꞌam ne alaq ri xqikꞌowibꞌej echiriꞌ kꞌamajaꞌ kojopon ukꞌ alaq; lik xkꞌaq bꞌi qaqꞌij rukꞌ kꞌaxlaj chꞌaꞌtem y lik xꞌan kꞌax chiqe chupa ri tinamit Filipos. Ekꞌuchiriꞌ xojopon ukꞌ alaq, ri Dios lik xuya qachuqꞌabꞌ che utzijoxik ri Utzilaj Tzij chixoꞌl alaq, tobꞌ e kꞌo ri lik xkaj kojkiqꞌatej.
1TH 2:3 Ekꞌu ri tzijonik xqaꞌan chiwach alaq na xqaꞌan ta rukꞌ sachibꞌal naꞌoj, na xqaꞌan ta rukꞌ rayibꞌal na ubꞌe taj yey na xqaꞌan tane re kaqasok alaq.
1TH 2:4 Ma ri tzijonik xqaꞌano e chirij ri karaj ri Dios, ri xchaꞌw qeꞌoj y xuya paqaqꞌabꞌ rutzijoxik ri Utzilaj Tzij. Na e ta kꞌu kaqaꞌan janipa ri kakaj rachijabꞌ, ma e kaqaꞌan janipa ri karaj ri Dios, ri karilo we utz o na utz taj saꞌ ri kꞌo chupa ri qanimaꞌ.
1TH 2:5 Etaꞌam alaq hermanos, riꞌoj na xqayak ta qꞌij alaq xa ruma kꞌo kaqaj che alaq y na jinta xqaꞌano xa re kaqesaj puaq che alaq. Ri Dios retaꞌam lik qatzij wa kaqabꞌiꞌij.
1TH 2:6 Yey na e ta kaqatzukuj kayak qaqꞌij uma ralaq o kuma jujun chik. Tobꞌ ne paqaqꞌabꞌ kꞌo wi kojtaqan pawiꞌ alaq ruma oj utaqoꞌn ri Cristo, pero na xqaꞌan ta waꞌ.
1TH 2:7 Ri xqaꞌan ukꞌ alaq e pachaꞌ kuꞌan juna ixoq kukꞌ ri ralkꞌoꞌal echiriꞌ kebꞌukꞌiyisaj y kebꞌuchajij rukꞌ chꞌuꞌchꞌuj ukꞌuꞌx.
1TH 2:8 Ruma kꞌu ri kꞌaxnaꞌbꞌal qakꞌuꞌx che alaq, na xew ta lik xqaj kaqatzijoj ri Utzilaj Tzij re ri Dios che alaq, ma lik ne xqaya qanimaꞌ che toꞌik alaq, tobꞌ ne rukꞌ waꞌ kojkamik, ma lik kꞌax kaqanaꞌ alaq.
1TH 2:9 Hermanos, kakꞌun chikꞌuꞌx alaq ri qachak y ri qakosik xqikꞌowibꞌej chilaꞌ ukꞌ alaq; ma riꞌoj xojchakun chipaqꞌij chichaqꞌabꞌ chaꞌ jelaꞌ na xqaꞌan ta oj eqaꞌn chuqul junoq che alaq echiriꞌ xqatzijoj ri Utzilaj Tzij re ri Dios chixoꞌl alaq.
1TH 2:10 Ilom kꞌu ralaq y rilom ne ri Dios saꞌ ri qabꞌinik qasilabꞌik chixoꞌl alaq ri kojom alaq rubꞌiꞌ ri Cristo. Ma ri qabꞌinik lik chom, lik jusukꞌ y na jinta kꞌo kachꞌaꞌtibꞌen re.
1TH 2:11 Lik etaꞌam kꞌu alaq, ri xqaꞌano e pachaꞌ kuꞌan juna achi kukꞌ ri ralkꞌoꞌal. Ma xqapixabꞌaj alaq, xqanimarisaj kꞌuꞌx alaq chijujunal alaq
1TH 2:12 y lik xqatzꞌonoj che alaq chaꞌ kabꞌin alaq jusukꞌ jelaꞌ pachaꞌ ri lik taqal che alaq ri alaq re ri Dios, ri kusikꞌij alaq chaꞌ kakꞌojiꞌ alaq chupa ri chomilaj utaqanik.
1TH 2:13 E uwariꞌche, riꞌoj xaqi kojtioxin chwach ri Dios, ma echiriꞌ xqatzijoj ri Utzilaj Tzij re ri Dios che alaq, na xkꞌul ta alaq waꞌ xa pachaꞌ uchꞌaꞌtem tikawex; ma xmaj alaq usukꞌ paqatzij wi waꞌ e Uchꞌaꞌtem ri Dios yey waꞌ e ri kujalkꞌatij ri bꞌinik silabꞌik alaq, ri kojom alaq rubꞌiꞌ ri Cristo.
1TH 2:14 Ralaq hermanos, xtij alaq kꞌax pakiqꞌabꞌ ri e re ri tinamit alaq, jelaꞌ pachaꞌ ri xkikꞌulumaj rutinamit ri Dios, ri kikojom rubꞌiꞌ ri Qanimajawal Jesucristo pa taq ri luwar re Judea, ma rike xeternabꞌex rukꞌ kꞌax kuma ri kach e aj judiꞌabꞌ.
1TH 2:15 Yey waꞌ wa aj judiꞌabꞌ e xekamisan re ri Qanimajawal Jesucristo y e xekamisan ke ri qꞌalajisanelabꞌ xetaq lo kukꞌ, yey xojkesaj lo riꞌoj chupa taq ri kitinamit. Rike na kakiꞌan ta ri kukꞌul ukꞌuꞌx ri Dios y na kakiya tane luwar chike jujun chik kakiꞌan ri utz chwach ri Dios.
1TH 2:16 Ma echiriꞌ kaqatzijoj ri Utzilaj Tzij chikiwach ri na e ta aj judiꞌabꞌ chaꞌ kekolobꞌetajik, rike kakitij uqꞌij kojkiqꞌatej. Rukꞌ waꞌ lik katajin ukꞌiyarik ri kimak y jekꞌulaꞌ riꞌ ri nimalaj qꞌatbꞌal tzij re ri Dios kꞌo chi pakiwiꞌ.
1TH 2:17 Ekꞌu riꞌoj hermanos, tobꞌ naj oj kꞌo wi che alaq yey kꞌo tan qꞌij na qilom ta wach alaq; na rukꞌ ta kꞌu riꞌ xaqi kꞌo alaq pa qanimaꞌ y lik kurayij pan qakꞌuꞌx keꞌqila tanchi wach alaq.
1TH 2:18 Lik kꞌu xqarayij kojeꞌbꞌina ukꞌ alaq. Riꞌin, in Pablo, na xa ta julaj lik xintij uqꞌij kiꞌnwila alaq, pero e ri Satanás xukoj qꞌatbꞌal chiqawach.
1TH 2:19 ¿China ri kuya kiꞌkotemal chiqe riꞌoj? E ralaq, ma lik kubꞌul pan qakꞌuꞌx ukꞌ alaq yey e ralaq ri tojbꞌal re ri qachak. Yey echiriꞌ kakꞌun lo ri Qanimajawal Jesucristo, lik kojkiꞌkot kꞌu riꞌ ma lik kꞌo xutiqoj ri chak qaꞌanom ukꞌ alaq.
1TH 2:20 Uma kꞌu riꞌ ralaq, riꞌoj kaqanaꞌo lik kꞌo xeꞌela wi ri chak qaꞌanom y lik kojkiꞌkot che.
1TH 3:1 Ruma kꞌu lik kaqaj chik kaqata rason alaq, xqachꞌobꞌ kꞌu riꞌ kojkanaj kan qatukel riꞌoj chupa ri tinamit Atenas
1TH 3:2 y xqataq kꞌu bꞌi ri qa hermano Timoteo, ri raj chak ri Dios y toꞌbꞌel qe che utzijoxik ri Utzilaj Tzij re ri Cristo, chaꞌ rire kuꞌnimarisaj kꞌuꞌx alaq y kuꞌpixabꞌaj alaq chaꞌ na kasach ta ri kubꞌulibꞌal kꞌuꞌx alaq,
1TH 3:3 y jelaꞌ na jinta junoq che alaq kok chukꞌuꞌx waꞌ wa kꞌaxkꞌobꞌik kꞌo wi alaq. Ma etaꞌam alaq lik rewi kojikꞌow chupa taq waꞌ.
1TH 3:4 Ma echiriꞌ kꞌa oj kꞌo chilaꞌ ukꞌ alaq, xqabꞌiꞌij che alaq kape kꞌaxkꞌobꞌik paqawiꞌ; yey lik etaꞌam chi kꞌu alaq e xuꞌana waꞌ.
1TH 3:5 Ruma kꞌu lik xuaj kanta rason alaq, xintaq bꞌi ri Timoteo ukꞌ alaq chaꞌ karetaꞌmaj saꞌ uꞌanom ri kubꞌulibꞌal kꞌuꞌx alaq; ma uxiꞌim ribꞌ nukꞌuꞌx kꞌaxtaj ritzel winaq xusok alaq chaꞌ kaya kan alaq ri Cristo y jekꞌulaꞌ riꞌ na jinta xutiqoj ri qachak ukꞌ alaq.
1TH 3:6 Pero echiriꞌ xtzelej lo ri Timoteo che rilik alaq, xuya chomilaj rason chiqe puwi ri kubꞌulibꞌal kꞌuꞌx alaq y ri rutzil kꞌuꞌx alaq. Yey xubꞌiꞌij chiqe lik oj kꞌo chikꞌuꞌx alaq y lik kaꞌaj alaq kil alaq qawach, jelaꞌ pachaꞌ riꞌoj lik kaqaj kaqil wach ralaq.
1TH 3:7 E uwariꞌche hermanos, chupa ronoje ri kojtajin che rikꞌowibꞌexik y ri kꞌaxkꞌobꞌik oj kꞌo wi, xkubꞌiꞌ ri qanimaꞌ ruma ri xqata puwi ri kubꞌulibꞌal kꞌuꞌx alaq.
1TH 3:8 Echiriꞌ xqato lik tikil alaq chi utz chwach ri Qaqaw, waꞌ xunimarisaj qakꞌuꞌx.
1TH 3:9 Ruma kꞌu riꞌ, na kaqariq taj suꞌanik kaqatioxij che ri Dios ri unimal kiꞌkotemal kaqanaꞌ uma ralaq.
1TH 3:10 Ma chipaqꞌij chichaqꞌabꞌ na kojuxlan ta che utzꞌonoxik che ri Dios kuya chiqe keꞌqila wach alaq, y jekꞌulaꞌ kaqatoꞌ alaq chaꞌ katzꞌaqat uwach ri kubꞌulibꞌal kꞌuꞌx alaq rukꞌ ri Cristo.
1TH 3:11 Ekꞌu ri Qaqaw Dios y ri Qanimajawal Jesucristo chuyaꞌa chiqe kojopon ukꞌ alaq.
1TH 3:12 Ri Qanimajawal chunimarisaj ri rutzil kꞌuꞌx alaq chaꞌ lik kꞌax kanaꞌ ibꞌ alaq chiwach alaq y kꞌax kenaꞌ alaq konoje ri tikawex, jelaꞌ pachaꞌ kaqaꞌan riꞌoj che alaq.
1TH 3:13 Yey chujikibꞌaꞌ kꞌuꞌx alaq y chutoꞌo alaq chaꞌ ri bꞌinik silabꞌik alaq kuꞌan lik jusukꞌ y na jinta kꞌana mak kariqitaj che alaq chwach ri Qaqaw Dios echiriꞌ kakꞌun tanchi ri Qanimajawal Jesucristo kukꞌ konoje ri santowilaj utinamit.
1TH 4:1 Woꞌora hermanos, lik kaqatzꞌonoj che alaq y kaqapixabꞌaj alaq chupa rubꞌiꞌ ri Qanimajawal Jesucristo: Bꞌina alaq jelaꞌ pachaꞌ ri lik taqal che ri bꞌinik silabꞌik alaq e chirij ri xmaj alaq chiqe, ma e waꞌ ri lik kukꞌul ukꞌuꞌx ri Dios; ekꞌu lik xaqi tijoj ibꞌ alaq riꞌ che waꞌ.
1TH 4:2 Lik etaꞌam chi alaq saꞌ taq ri pixabꞌanik xqaya chiwach alaq pa rubꞌiꞌ ri Qanimajawal Jesucristo,
1TH 4:3 ma ri rajawal ukꞌuꞌx ri Dios e ri santowilaj bꞌinik silabꞌik alaq. Metzꞌabꞌej kꞌu uwa qꞌij alaq rukꞌ junoq na kꞌulel ta alaq.
1TH 4:4 Chijujunal alaq kꞌola alaq pa saqil wi rukꞌ ri ixoqil alaq y jekꞌulaꞌ loqꞌoj alaq uqꞌij.
1TH 4:5 Maya kꞌu ibꞌ alaq che rayibꞌal na chom ta uwach pachaꞌ ri kakiꞌan ri winaq na ketaꞌam ta uwach ri Dios.
1TH 4:6 Muꞌana ri kꞌo junoq che alaq kuꞌan ri na utz taj o kusokosaꞌ juna ratz-uchaqꞌ puwi taq waꞌ, ma ri Qanimajawal kuqꞌat tzij puwi ri kaꞌanaw waꞌ, jelaꞌ pachaꞌ ri qabꞌiꞌim y qaqꞌalajisam chi che alaq.
1TH 4:7 Ma ri Dios na xojusikꞌij taj re kaqachꞌulaj ri qabꞌinik, e xojusikꞌij re kojkꞌojiꞌ che jun santowilaj bꞌinik.
1TH 4:8 China kꞌu ri kakꞌaqaw bꞌi uqꞌij wa pixabꞌanik, na e ta kukꞌaq bꞌi uqꞌij juna achi, e kukꞌaq bꞌi uqꞌij ri Dios, ma wa pixabꞌanik petinaq rukꞌ Rire, ri uyaꞌom ri Santowilaj Ruxlabꞌixel chiqe.
1TH 4:9 Chwi kꞌu ri rutzil kꞌuꞌxaj chiwach alaq, na chirajawaxik taj kꞌo kantzꞌibꞌaj pana che alaq puwi waꞌ, ma ri Dios ukꞌutum che alaq chirajawaxik kꞌax kanaꞌ ibꞌ alaq chiwach alaq,
1TH 4:10 y jelaꞌ katajin alaq che uꞌanik kukꞌ konoje ri hermanos e kꞌo chilaꞌ pa ronoje taq ri luwar re Macedonia. Lik kꞌu kantzꞌonoj che alaq hermanos, e xaqi tijoj ibꞌ alaq che waꞌ.
1TH 4:11 Yey chok alaq il che ri kakꞌojiꞌ utzil chomal chiwach alaq; mamin ibꞌ alaq chupa taq ri na e ta alaq. Yey chakuna kꞌu alaq rukꞌ ri qꞌabꞌ alaq jelaꞌ pachaꞌ ri pixabꞌanik qaꞌanom kan che alaq,
1TH 4:12 chaꞌ jelaꞌ na koyꞌej ta alaq chike jujun chik janipa ri kajawax che alaq y jekꞌulaꞌ chom kilitaj ri bꞌinik silabꞌik alaq chikiwach ri kꞌamajaꞌ kakikoj rubꞌiꞌ ri Cristo.
1TH 4:13 Hermanos, e kaqaj riꞌoj lik kamaj alaq usukꞌ chi utz pakiwi ri qa hermanos ekaminaq chik, chaꞌ na kabꞌison ta alaq jelaꞌ pachaꞌ kakiꞌan ri tikawex na kubꞌul ta pan kikꞌuꞌx che rilik tanchi kiwach ri ekaminaq chik.
1TH 4:14 Ma we kaqakojo ri Qanimajawal Jesucristo xkamik yey xkꞌastaj lo chikixoꞌl ri ekaminaq; jelaꞌ kꞌu riꞌ kaqakojo, ri Dios kebꞌukꞌam lo rukꞌ ri Qanimajawal Jesucristo janipa ri xekamik kikojom bꞌi rubꞌiꞌ Rire.
1TH 4:15 Wa kaqabꞌiꞌij che alaq woꞌora e chirij ri xukꞌut kan ri Qanimajawal: E riꞌoj janipa ri kꞌa oj kꞌaslik echiriꞌ kakꞌun tanchi ri Qanimajawal, na kojnabꞌej tubꞌi chikiwach ri qa hermanos, ri xekam nabꞌe chiqawa riꞌoj.
1TH 4:16 Ma echiriꞌ ri Qanimajawal kape chilaꞌ chikaj, katataj jun kowilaj qulaj re taqanik, ri qulaj re jun ángel lik kꞌo uwach y ruchꞌawibꞌal ri trompeta re ri Dios. Ekꞌuchiriꞌ, ri hermanos ekaminaq chik, kekꞌastaj lo nabꞌe.
1TH 4:17 Tekꞌuchiriꞌ riꞌoj, ri kꞌa oj kꞌas wara che ruwachulew, kojkꞌam bꞌi junam kukꞌ rike pa sutzꞌ re keꞌqakꞌulu ri Qanimajawal punikꞌajal kaj. Y kojeꞌkꞌola kꞌu rukꞌ ri Qanimajawal na jinta chi utaqexik.
1TH 4:18 E uwariꞌche, nimarisaj kꞌuꞌx alaq chiwach alaq rukꞌ wa ximbꞌiꞌij loq.
1TH 5:1 Hermanos, na chirajawaxik taj kantzꞌibꞌaj pan riꞌin che alaq puwi ruqꞌijol kuꞌana ronoje waꞌ.
1TH 5:2 Ma ralaq lik etaꞌam alaq chi utz, rukꞌunibꞌal ri Qanimajawal jelaꞌ kuꞌanaꞌ pachaꞌ ri okibꞌal re juna eleqꞌom pa juna ja chaqꞌabꞌ, ma ri eleqꞌom na kubꞌiꞌij ta apanoq jampalaꞌ koponik.
1TH 5:3 Echiriꞌ ri winaq kakibꞌiꞌij: «Woꞌora lik kꞌo utzil chomal ma na jinta chi chꞌaꞌoj y na jinta chi kꞌo kaqakꞌulumaj,» xaqikꞌateꞌt kꞌu riꞌ kape ri kꞌaxkꞌobꞌik pakiwiꞌ jelaꞌ pachaꞌ ri kꞌax kujeq che juna ixoq echiriꞌ kalax uchꞌutiꞌn. Yey taq waꞌ wa winaq na jinta kꞌo kesan ke chwach ri kꞌaxkꞌobꞌik kape pakiwiꞌ.
1TH 5:4 Noꞌj ralaq hermanos, na jinta chi alaq pa qꞌequꞌmalil, ma etaꞌam chi alaq puwi ri katajin loq; ruma riꞌ echiriꞌ ri Qanimajawal kakꞌun tanchik, na kakam ta animaꞌ alaq che ma oyeꞌem chi alaq rukꞌunibꞌal. Na kakꞌulumaj ta kꞌu alaq riꞌ pachaꞌ ri kukꞌulumaj junoq echiriꞌ xaqikꞌateꞌt kok juna eleqꞌom pa rocho.
1TH 5:5 Ma onoje ralaq kabꞌin alaq chupa ri Qꞌijsaq y alaq re ri paqꞌij. Ralaq y riꞌoj na oj ta re ri chaqꞌabꞌ, ma na oj jinta chi pa ri qꞌequꞌmalil.
1TH 5:6 Ruma kꞌu riꞌ, mawar qawach pachaꞌ ri kakiꞌan ri jujun chik; ri qaꞌanaꞌ e qachajij ri qabꞌinik qasilabꞌik y lik qachꞌobꞌo chi utz saꞌ ri kaqaꞌano.
1TH 5:7 Ma e ri kewarik, chaqꞌabꞌ kewarik; yey e ri keqꞌabꞌarik, chaqꞌabꞌ keqꞌabꞌarik.
1TH 5:8 Noꞌj riꞌoj, ri oj kꞌo chupa ri Qꞌijsaq, lik qachajij qibꞌ. Rukꞌ ri kubꞌulibꞌal qakꞌuꞌx y ri rutzil qakꞌuꞌx qaꞌana jelaꞌ pachaꞌ ri kuꞌan juna soldado rukꞌ ri chꞌichꞌ chꞌuqubꞌal ruwa ukꞌuꞌx. Yey qakubꞌaꞌ pan qakꞌuꞌx che ukꞌulik ri kolobꞌetajik qoyeꞌem che ri Qaqaw jelaꞌ pachaꞌ ri kuꞌan juna soldado rukꞌ ri casco chꞌuqubꞌal re rujolom.
1TH 5:9 Ma ri Dios na xojuchaꞌ taj chaꞌ e kaqakꞌul ruqꞌatbꞌal tzij paqawiꞌ; ma e xojuchaꞌo re kaqakꞌul ri kolobꞌetajik ruma ri Qanimajawal Jesucristo,
1TH 5:10 ri xkam quma riꞌoj chaꞌ tobꞌ we oj kꞌaslik o we oj kaminaq chik echiriꞌ kakꞌun Rire, koj-jeqiꞌ kꞌu riꞌ junam rukꞌ.
1TH 5:11 Ruma kꞌu riꞌ, bꞌochiꞌij kꞌuꞌx alaq y nimarisaj kꞌuꞌx alaq chiwach alaq, jelaꞌ pachaꞌ ri katajin alaq che uꞌanik.
1TH 5:12 Hermanos, kaqatzꞌonoj che alaq kojo alaq kitzij ri e kꞌamal wach alaq chupa rubꞌiꞌ ri Qanimajawal, y ꞌana kꞌu alaq janipa ri taqal chike ri kechakun chixoꞌlibꞌal alaq y kekipixabꞌaj alaq.
1TH 5:13 Loqꞌoj alaq kiqꞌij y kꞌax chenaꞌa alaq ruma ri chak kakiꞌano. Kꞌola alaq chi utzil chomal chiwach alaq.
1TH 5:14 Kaqatzꞌonoj che alaq hermanos, chepixabꞌaj alaq ri na jinta kꞌo kakaj kakiꞌano. Nimarisaj alaq kikꞌuꞌx ri na jinta ukowil kikꞌuꞌx. Chetoꞌo alaq ri na jinta kichuqꞌabꞌ chwach ri Dios. Kꞌola unimal kꞌuꞌx alaq kukꞌ konoje ri e kꞌo ukꞌ alaq.
1TH 5:15 We kꞌo junoq uꞌanom ri na utz taj che alaq, maꞌan alaq ukꞌaxel che. E tijoj ibꞌ alaq che uꞌanik ri utz chiwach alaq y chikiwach konoje.
1TH 5:16 E lik xaqi kiꞌkota alaq.
1TH 5:17 Chipaqꞌij chichaqꞌabꞌ ꞌana alaq orar.
1TH 5:18 Tioxin kꞌu alaq che ri Dios chupa taq ronoje ri kikꞌowibꞌej alaq, ma e karaj riꞌ ri Dios che onoje alaq ri kojom alaq rubꞌiꞌ ri Qanimajawal Jesucristo.
1TH 5:19 Maqꞌatej alaq janipa ri karaj kuꞌan ri Ruxlabꞌixel ri Dios ukꞌ alaq.
1TH 5:20 Makꞌaq kꞌu bꞌi alaq uqꞌij taq ri qꞌalajisanik kuꞌan junoq ruma ri Ruxlabꞌixel ri Dios;
1TH 5:21 lik chꞌobꞌo alaq raqan we waꞌ rukꞌ ri Dios petinaq wi. E lik taqej alaq janipa ri utz
1TH 5:22 yey jekꞌa kꞌu ibꞌ alaq che ronoje ri na utz taj.
1TH 5:23 Ekꞌu ri Dios ri aj yaꞌl utzil chomal, lik chuchomaj ri bꞌinik silabꞌik alaq chaꞌ ronoje ri kꞌaslemal alaq rukꞌ ri kꞌuꞌx alaq y ri cuerpo alaq chajital chi utz che ronoje ri na utz taj, chaꞌ jelaꞌ na jinta kꞌana mak alaq echiriꞌ kakꞌun tanchi ri Qanimajawal Jesucristo.
1TH 5:24 E ri Dios sikꞌiyom e alaq che jun santowilaj bꞌinik silabꞌik; yey Rire lik jusukꞌ, ma kuya na ronoje ri toꞌbꞌal ubꞌiꞌtisim che alaq chaꞌ kabꞌin alaq jusukꞌ.
1TH 5:25 Hermanos, ꞌana alaq orar paqawi riꞌoj.
1TH 5:26 Yaꞌa alaq rutzil wach alaq chiwach onoje alaq rukꞌ jun saqil tzꞌubꞌuj chiꞌaj chwach ri Dios.
1TH 5:27 Chupa rubꞌiꞌ ri Qanimajawal kambꞌiꞌij che alaq: Chajilaj alaq waꞌ wa carta chikiwach konoje ri hermanos.
1TH 5:28 Kꞌulu kꞌu alaq ri unimal rutzil ukꞌuꞌx ri Qanimajawal Jesucristo. Amén.
2TH 1:1 Riꞌin Pablo kukꞌ ri wachbꞌiꞌil Silvano y Timoteo kaqataq bꞌi wa carta che alaq, ri alaq re riglesia kꞌo Tesalónica, alaq re ri Qaqaw Dios y re ri Qanimajawal Jesucristo.
2TH 1:2 Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
2TH 1:3 Hermanos, xaqi kojtioxin chwach ri Dios uma ralaq; lik e taqal riꞌ kaqaꞌano ma lik katajin unimarik ri kubꞌulibꞌal kꞌuꞌx alaq rukꞌ ri Cristo yey katajin unimarik ri rutzil kꞌuꞌx alaq, ri kakꞌut alaq chiwach onoje alaq.
2TH 1:4 Ruma kꞌu riꞌ, riꞌoj lik kaqatakꞌabꞌaꞌ qꞌij alaq echiriꞌ kojchꞌaꞌt pawiꞌ alaq chikiwach taq riglesias re ri Dios. Lik e kaqatzijoj ri unimal kꞌuꞌx alaq y ri kubꞌulibꞌal kꞌuꞌx alaq; ma tobꞌ alaq ternabꞌem rukꞌ kꞌax y kikꞌow alaq pa kꞌaxkꞌobꞌik, waꞌ lik kuyum alaq.
2TH 1:5 Ri qꞌatbꞌal tzij kuꞌan ri Dios lik jusukꞌ, yey kaqꞌalajin waꞌ ma chwach Rire lik taqal che alaq kok na alaq chupa rutaqanik, y ruma ne riꞌ katij alaq kꞌax woꞌora.
2TH 1:6 Yey lik ubꞌe kꞌut, ri Dios kuꞌan ukꞌaxel chike ri eyaꞌyom e alaq pa kꞌax.
2TH 1:7 Noꞌj kꞌu ralaq ri katajin ikꞌowik alaq chupa ri kꞌax, kuya na che alaq ri uxlanem junam qukꞌ riꞌoj echiriꞌ kaqꞌalajin uwach ri Qanimajawal Jesucristo. Echiriꞌ Rire kakꞌun chilaꞌ chikaj chupa urepebꞌal aqꞌ kukꞌ ru ángeles lik kꞌo kichuqꞌabꞌ,
2TH 1:8 kebꞌoꞌluꞌyaꞌa kꞌu pa kꞌax ri na xkaj ta kaketaꞌmaj uwach ri Dios y na xkitaqej tane ri Utzilaj Tzij re ri Qanimajawal Jesucristo.
2TH 1:9 E taq kꞌu waꞌ wa winaq kakikꞌul ri qꞌatbꞌal tzij re ri kꞌaxkꞌobꞌik na jinta utaqexik; xa jumul kꞌut kebꞌesax bꞌi chwach ri Qanimajawal y chwach ruchomal ruchuqꞌabꞌ
2TH 1:10 echiriꞌ kakꞌun Rire chupa laꞌ la jun qꞌij re kayak uqꞌij kuma rutinamit. Konoje kꞌu riꞌ ri xekojow rubꞌiꞌ lik kakiloqꞌnimaj uqꞌij ruma ri uꞌanom Rire kukꞌ. Yey ralaq, alaq jun che wa utinamit ruma xkoj alaq ri xqatzijoj che alaq.
2TH 1:11 E uwariꞌche lik xaqi kaqaꞌan orar pawiꞌ alaq. Kaqatzꞌonoj kꞌu che ri Dios e katoꞌw e alaq chaꞌ ri bꞌinik silabꞌik alaq kuꞌana pachaꞌ ri taqal chike ri esikꞌim ruma Rire. Y kaqatzꞌonoj kꞌu che kutoꞌ alaq che uꞌanik taq ri utzilaj chak karaj Rire che alaq, yey kaꞌan kꞌu alaq waꞌ rukꞌ kubꞌulibꞌal kꞌuꞌxaj y rukꞌ ruchuqꞌabꞌ Rire.
2TH 1:12 Jekꞌulaꞌ e kayak uqꞌij ri Qanimajawal Jesucristo ruma ri kaꞌan alaq, yey katakꞌabꞌax qꞌij ralaq ruma alaq re Rire. Kaꞌan kꞌu waꞌ ruma ri unimal rutzil kꞌuꞌxaj re ri qa Dios y re ri Qanimajawal Jesucristo.
2TH 2:1 Chwi kꞌu rukꞌunibꞌal ri Qanimajawal Jesucristo echiriꞌ kaqamol qibꞌ rukꞌ Rire, lik kaqatzꞌonoj che alaq hermanos,
2TH 2:2 chajij ibꞌ alaq chaꞌ na kasach ta ri naꞌoj alaq puwi waꞌ. Maxiꞌij kꞌu ibꞌ alaq we kꞌo junoq kubꞌiꞌij: «E uqꞌijol waꞌ rukꞌunibꞌal ri Qanimajawal,» tobꞌ ne kubꞌiꞌij qꞌalajisam waꞌ che ruma ri Ruxlabꞌixel ri Dios o xtzijox che o xtzꞌibꞌax pa carta lik e pachaꞌ quma riꞌoj tzꞌibꞌitalik.
2TH 2:3 Maya kꞌu ibꞌ alaq kasokotaj alaq, ma nabꞌe na kakꞌun ri qꞌij echiriꞌ ukꞌiyal winaq kakikꞌaq bꞌi uqꞌij ri Dios y kuqꞌalajisaj kꞌu ribꞌ ri jun itzelilaj achi, ri kꞌo chi ri qꞌatbꞌal tzij re ri Dios puwiꞌ re kasachisax uwach.
2TH 2:4 Ekꞌu waꞌ waꞌchi kayaktaj chirij ri Dios y chirij ronoje taq ri kaloqꞌnimax uqꞌij kuma ri winaq, waꞌ e taq ri kiꞌanom tiox che. Rire keꞌtzꞌula ne chupa ri Rocho Dios, kuꞌan che ribꞌ pachaꞌ e Dios y kukꞌambꞌej ne uwach ri Dios.
2TH 2:5 ¿Na kakꞌun ta nebꞌa chikꞌuꞌx alaq, echiriꞌ kꞌa in kꞌo ukꞌ alaq, ximbꞌiꞌij waꞌ che alaq?
2TH 2:6 Etaꞌam chi kꞌu alaq saꞌ ri qꞌatabꞌeyom re ri kꞌutubꞌal uwach rire waqꞌij ora chaꞌ e kukꞌutubꞌej uwach kꞌa echiriꞌ kopon na ruqꞌijol uchꞌobꞌom chi lo ri Dios.
2TH 2:7 Ritzel winaq katajin chi che ukojik pa kijolom ri winaq keyaktaj chirij ri Dios tobꞌ rike na kakinaꞌbꞌej taj we e rire kaꞌanaw waꞌ. Woꞌora kꞌa kꞌo ri qꞌatabꞌeyom re, pero echiriꞌ kesax ri qꞌatabꞌeyom re,
2TH 2:8 kꞌa ekꞌuchiriꞌ kukꞌutubꞌej uwach ri jun itzelilaj achi. Yey echiriꞌ kakꞌun tanchi ri Qanimajawal rukꞌ unimal uchuqꞌabꞌ, Rire rukꞌ ri chꞌaꞌtem kel lo puchiꞌ kukamisaj y kusach kꞌu uwach wa jun itzelilaj achi.
2TH 2:9 Echiriꞌ kakꞌun waꞌ wa jun itzelilaj achi, kuꞌan nimaq taq kꞌutubꞌal y milagros rukꞌ ri unimal chuqꞌabꞌ yaꞌtal che ruma ri Satanás. Ronoje kꞌu riꞌ waꞌ, kuꞌan rukꞌ sokosoꞌnik, ma e pachaꞌ kuꞌan waꞌ rukꞌ ruchuqꞌabꞌ ri Dios.
2TH 2:10 Yey kuꞌan ukꞌiyal uwach taq mak chaꞌ kebꞌusok ri tikawex, ri xa kesachik ruma na xkaj taj kakikꞌul ri Qꞌijsaq chaꞌ kekolobꞌetajik.
2TH 2:11 Ruma kꞌu waꞌ, ri Dios kuya luwar kesokotaj ruma ruchuqꞌabꞌ ritzel; ekꞌu rike e kakikoj ri xa raqꞌubꞌal.
2TH 2:12 Jekꞌulaꞌ kekꞌojiꞌ chuxeꞌ ri qꞌatbꞌal tzij konoje ri na xkikoj ta ri Qꞌijsaq, ma e lik xeꞌek kikꞌuꞌx rukꞌ ri na jusukꞌ taj.
2TH 2:13 Ekꞌu riꞌoj, hermanos, chirajawaxik xaqi kojtioxin chwach ri Dios uma ralaq ri lik kꞌax kanaꞌ alaq ruma ri Qanimajawal, ma ri Dios uchaꞌom chi lo alaq chwi rujeqebꞌal ruwachulew chaꞌ kakꞌul alaq ri kolobꞌetajik. Yey waꞌ e ruma xkoj alaq ri Qꞌijsaq y ruma ri kuꞌan ri Ruxlabꞌixel ri Dios, ri kuꞌan chom che ri bꞌinik silabꞌik alaq.
2TH 2:14 Ruma kꞌu waꞌ, ri Dios xusikꞌij alaq ruma ri Utzilaj Tzij xqatzijoj che alaq, chaꞌ jelaꞌ kakꞌul alaq ri yakbꞌal qꞌij alaq ruma alaq re ri Jun lik kꞌo yakbꞌal uqꞌij, waꞌ e ri Qanimajawal Jesucristo.
2TH 2:15 E uwariꞌche hermanos, lik chuqꞌubꞌej ibꞌ alaq y lik taqej alaq ri kꞌutunik qakꞌutum chiwach alaq y ri qatzꞌibꞌam pana che alaq.
2TH 2:16 Kaqaꞌan kꞌu orar pawiꞌ alaq chwach ri Qanimajawal Jesucristo y chwach ri Qaqaw Dios, ri kꞌax xnaꞌw qe y xaqi kunimarisaj qakꞌuꞌx yey kuya chiqe kakubꞌiꞌ pana qakꞌuꞌx che ri qoyeꞌem ruma ri unimal rutzil ukꞌuꞌx.
2TH 2:17 Kaqatzꞌonoj kꞌu che ri Dios chunimarisaj kꞌuꞌx alaq y chujikibꞌaꞌ kꞌuꞌx alaq che ubꞌiꞌxikil y che uꞌanik ri lik utz.
2TH 3:1 Kꞌisbꞌal kꞌu re, hermanos, ꞌana alaq orar chwach ri Dios paqawi riꞌoj chaꞌ lik keꞌek tan rutzijoxik ri Utzilaj Tzij re ri Qanimajawal che ronoje luwar y chaꞌ kakꞌul waꞌ chi utz kuma ri ketaw re jelaꞌ pachaꞌ xꞌan ralaq.
2TH 3:2 ꞌAna alaq orar chwach ri Dios paqawi riꞌoj chaꞌ na kojtzaq ta pakiqꞌabꞌ ri winaq lik itzel kikꞌuꞌx y na jinta kisukꞌ, ma na konoje taj kakaj kakikubꞌaꞌ kikꞌuꞌx rukꞌ ri Jesús.
2TH 3:3 Na rukꞌ ta kꞌu riꞌ, ri Qanimajawal lik jusukꞌ ma e kuꞌan na pachaꞌ ri ubꞌiꞌim, ma Rire kujikibꞌaꞌ kꞌuꞌx alaq y kuchajij kꞌu alaq chwach ritzel winaq.
2TH 3:4 Kubꞌul kꞌu qakꞌuꞌx che waꞌ: Rukꞌ rutoꞌbꞌal ri Qanimajawal, ralaq katajin alaq che uꞌanik ri xqataq alaq che y jelaꞌ kaꞌan kꞌu alaq chiqawach apanoq.
2TH 3:5 Ekꞌu ri Qanimajawal Jesucristo katoꞌw e alaq chaꞌ ri rutzil kꞌuꞌx alaq kuꞌana jelaꞌ pachaꞌ ri rutzil ukꞌuꞌx ri Dios y chaꞌ kachꞌij alaq uchuqꞌabꞌ taq ri kꞌaxkꞌobꞌik rukꞌ unimal kꞌuꞌxaj jelaꞌ pachaꞌ xuꞌan ri Cristo.
2TH 3:6 Hermanos, chupa rubꞌiꞌ ri Qanimajawal Jesucristo kaqataq alaq che chaꞌ kesaj ibꞌ alaq chikij taq ri hermanos lik e xepuꞌabꞌ, ri na kakitaqej ta ri kꞌutunik xmaj kan alaq chiqij.
2TH 3:7 Lik etaꞌam kꞌu alaq saꞌ ri lik chirajawaxik kakꞌam alaq re che ri qabꞌinik qasilabꞌik riꞌoj, ma echiriꞌ xojkꞌojiꞌ ukꞌ alaq, lik xojchakunik.
2TH 3:8 Na xqatzꞌonoj taj xa kasipax ri qawa, ma ronoje ri xyaꞌ chiqe, xqatojo. Ri xqaꞌano e lik xojchakun chipaqꞌij chichaqꞌabꞌ chaꞌ jelaꞌ na kojuꞌan ta oj eqaꞌn chuqul junoq che alaq.
2TH 3:9 Wa xqaꞌano na e ta keꞌelawi na taqal ta chiqe kojtoꞌ alaq; ri xqaꞌan wi e chaꞌ kamaj e alaq chiqij.
2TH 3:10 Ma echiriꞌ kꞌa oj kꞌo ne chilaꞌ ukꞌ alaq, xqataq alaq che waꞌ: «We kꞌo junoq na karaj taj kachakunik, na taqal ta che katzuqik.»
2TH 3:11 Yey woꞌora qatom, e kꞌo jujun chixoꞌl alaq na kechakun tane kꞌenoq; ri kakiꞌano e kakimin kibꞌ che taq ri na jinta ke che.
2TH 3:12 E taq kꞌu waꞌ wa tikawex keqataq che y keqapixabꞌaj pa rubꞌiꞌ ri Qanimajawal Jesucristo: Chechakunoq re chꞌakabꞌal re ri kiwa y chekꞌola jusukꞌ.
2TH 3:13 Yey ekꞌu ralaq hermanos, makos alaq che uꞌanik ri utz.
2TH 3:14 We kꞌo junoq na kutaqej ta wa kaqatzꞌibꞌaj pana che alaq, qꞌalajisaj alaq chinoq y majunimaj ibꞌ alaq rukꞌ, chaꞌ jelaꞌ kakꞌix che ri kuꞌano y kutzelej utzij.
2TH 3:15 Pero maꞌan alaq che tzel kil alaq; ri ꞌana alaq e pixabꞌaj alaq ma rire e jun qa hermano.
2TH 3:16 Ekꞌu ri Qanimajawal, ri aj yaꞌl utzil chomal, xaqi chuyaꞌa pawiꞌ alaq ri utzil chomal chupa taq ri kikꞌow wi alaq. Kꞌola ri Qanimajawal ukꞌ onoje alaq.
2TH 3:17 Riꞌin in Pablo, rukꞌ ri nuqꞌabꞌ kantzꞌibꞌaj wa rutzil wach alaq. Jelaꞌ kanꞌan che taq ri nucarta, kꞌutubꞌal re in ri kintzꞌibꞌan re.
2TH 3:18 Kꞌulu kꞌu alaq ri unimal rutzil ukꞌuꞌx ri Qanimajawal Jesucristo. Amén.
1TI 1:1 Riꞌin in Pablo, in taqoꞌn re ri Qanimajawal Jesucristo, intaqom lo ruma ri Dios Qakolobꞌenel y ruma ri Qanimajawal Jesucristo, ri qakubꞌam pana qakꞌuꞌx rukꞌ.
1TI 1:2 Kantzꞌibꞌaj pan waꞌ wa carta chawe riꞌat Timoteo, ri paqatzij wi at nukꞌajol chupa rubꞌiꞌ ri Cristo ma wuma riꞌin xakoj rubꞌiꞌ Rire. Chakꞌulu kꞌu ri unimal rutzil kꞌuꞌxaj, ri relej kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
1TI 1:3 Kꞌuna chakꞌuꞌx ri ximbꞌiꞌij kan chawe echiriꞌ e riꞌ kinꞌek Macedonia: E katkanaj kan chupa ri tinamit Éfeso ma chiriꞌ e kꞌo jujun tikawex lik junwi ri kakikꞌutu chwa ri kaqakꞌut riꞌoj. Ximbꞌiꞌij kꞌu kan chawe kebꞌataq che na kakiꞌan ta chi waꞌ.
1TI 1:4 Yey ximbꞌiꞌij kan chawe kabꞌiꞌij chike ri hermanos makiya ne kinaꞌoj puwi taq ojer tzijobꞌal na petinaq ta rukꞌ ri Dios y taq ri kakibꞌololej kibꞌiꞌ katiꞌ-kimam re ojertan, ma taq laꞌ kukꞌam lo sachibꞌal naꞌoj y na katoꞌbꞌ ta che ri karaj kuꞌan ri Dios qukꞌ, yey waꞌ kuꞌana xew ruma ri kubꞌulibꞌal qakꞌuꞌx rukꞌ Rire.
1TI 1:5 Rukꞌuꞌxibꞌal ri kojutaq ri Dios che e waꞌ: Lik kꞌax kaqanaꞌ qibꞌ chiqawach. Yey chaꞌ kaqaꞌan waꞌ chirajawaxik lik kalax pa qanimaꞌ kaqaꞌan ri utz, kaqamaj usukꞌ saꞌ ri utz yey e kaqaꞌano, y paqatzij wi kakubꞌiꞌ qakꞌuꞌx rukꞌ Rire.
1TI 1:6 Noꞌj e kꞌo jujun kiyaꞌom kan ri karaj ri Dios; xkijalkꞌatij kꞌu ri kinaꞌoj y woꞌora xew kechꞌaꞌt chwi ri na jinta uchak.
1TI 1:7 Rike kakaj kakiꞌan e aj kꞌutunel che kibꞌ chwi Rutzij Upixabꞌ ri Dios, tobꞌ na kakimaj tane usukꞌ ri kakibꞌiꞌij y na kakimaj tane usukꞌ ri kꞌutunik lik kakijikibꞌaꞌ uwach.
1TI 1:8 Pero riꞌoj lik qetaꞌam lik kꞌo kutiqoj Rutzij Upixabꞌ ri Dios we jusukꞌ kaqachapabꞌej.
1TI 1:9 Qetaꞌam kꞌut ri Tzij Pixabꞌ na xyaꞌiꞌ taj re kuqꞌat tzij pakiwi ri jusukꞌ kibꞌinik kisilabꞌik; ma xyaꞌik re kuqꞌat tzij pakiwi ri e aj palajiy tzij y ri na e ta kojol tzij, ri na jinta xiꞌin ibꞌ kukꞌ chwach ri Dios y ri e aj makibꞌ, ri na kebꞌok ta il che kakiloqꞌnimaj uqꞌij ri Dios y ri kakikꞌaq bꞌi uqꞌij ri Dios; ri e kamisay kichu-kiqaw kukꞌ ri e kamisanel,
1TI 1:10 ri kaketzꞌabꞌej uwa kiqꞌij kukꞌ jujun chik na kikꞌulel taj, rachijabꞌ kakiꞌan kikꞌulel chike kach achijabꞌ, ri kekichap winaq y na kekitzoqopij ta uloq we na kayaꞌiꞌ ta puaq chike, raj raqꞌul, ri kꞌo kakijikibꞌaꞌ uwach chupa rubꞌiꞌ ri Dios yey xa raqꞌubꞌal ri kakiꞌano, kukꞌ taq kꞌu konoje ri kakipalajij ri saqil kꞌutunik re ri Dios.
1TI 1:11 E kꞌutunik waꞌ kꞌo chupa ri chomilaj Utzilaj Tzij re ri Dios. Yey ri Dios, ri lik nim uqꞌij, e xyaꞌw waꞌ panuqꞌabꞌ riꞌin chaꞌ kantzijoj.
1TI 1:12 Riꞌin kantioxij che ri Qanimajawal Jesucristo ma uyaꞌom nuchuqꞌabꞌ chaꞌ kanꞌan ruchak y ma xkubꞌiꞌ ukꞌuꞌx wukꞌ echiriꞌ xuya wa jun chak chwe,
1TI 1:13 tobꞌ rojertan riꞌin lik xinmakun chirij ri Qanimajawal Jesucristo ma xebꞌenuternabꞌej ri kikojom rubꞌiꞌ y lik xebꞌenuya pa taq kꞌaxkꞌobꞌik. Na rukꞌ ta kꞌu riꞌ, ri Dios xjuchꞌ kaꞌn ukꞌuꞌx chwe; ma echiriꞌ xinꞌan waꞌ, kꞌamajaꞌ kakubꞌiꞌ nukꞌuꞌx rukꞌ ri Cristo y na xinmaj ta kꞌu usukꞌ we ri kanꞌano na utz taj.
1TI 1:14 Yey ri Qanimajawal lik xukꞌut ri unimal rutzil ukꞌuꞌx chwe y xuya chwe kakubꞌiꞌ nukꞌuꞌx rukꞌ y xuya chwe kankꞌut ri rutzil ukꞌuꞌx Rire; y waꞌ xew ri Qanimajawal Jesucristo kayaꞌw re.
1TI 1:15 Ekꞌu wa kambꞌiꞌij lik qatzij y lik taqal che kakikoj konoje ri tikawex: Ri Qanimajawal Jesucristo xkꞌun che ruwachulew chaꞌ kebꞌoluꞌkolobꞌej konoje raj makibꞌ. Ekꞌu riꞌin in jun chike waꞌ; yey chinuwach riꞌin, in ne ri más kꞌo numak chikiwa rike.
1TI 1:16 Ekꞌu ri Qanimajawal Jesucristo xukꞌut ri kꞌaxnaꞌbꞌal ukꞌuꞌx chwe riꞌin ma xukuy numak tobꞌ lik in aj mak. Jelaꞌ xuꞌano chaꞌ kaqꞌalajin ri rutzil ukꞌuꞌx chike konoje ri kekojow rubꞌiꞌ. Ma ri xuꞌan wukꞌ riꞌin e kꞌutubꞌal re ri kuꞌan kukꞌ ri kakubꞌiꞌ kikꞌuꞌx rukꞌ Rire, kukuy kꞌu kimak y kuya kikꞌaslemal na jinta utaqexik.
1TI 1:17 Ruma kꞌu waꞌ, qaloqꞌnimaj uqꞌij ri Dios waqꞌij ora y chiqawach apanoq. Ma ri Dios Qajawxel na jinta utaqexik rutaqanik, na jinta utaqexik rukꞌaslemal, na kilitaj ta uwach, xew Rire e Dios y retaꞌam ronoje. Lik kꞌo yakbꞌal uqꞌij y unimal uchomalil.
1TI 1:18 Woꞌora Timoteo, kanya wa taqanik chawe riꞌat at nukꞌajol chupa rubꞌiꞌ ri Cristo: Chachuqꞌubꞌej awibꞌ chupa ri chak yaꞌom paqꞌabꞌ e chirij ri xqꞌalajisax pawiꞌ riꞌat chwi rachak chwach ri Dios.
1TI 1:19 Chatikibꞌaꞌ kꞌu ri kubꞌulibꞌal akꞌuꞌx rukꞌ ri Cristo y chamaja usukꞌ saꞌ ri utz y e chaꞌana riꞌ. Ma e kꞌo jujun na xkiꞌan ta waꞌ, y ruma kꞌu riꞌ xsach ri kubꞌulibꞌal kikꞌuꞌx rukꞌ ri Cristo y na kakikoj ta chi ne ri Qꞌijsaq.
1TI 1:20 Jenewaꞌ xkiꞌan ri Himeneo y ri Alejandro. Ruma kꞌu riꞌ, xebꞌenuya puqꞌabꞌ ri Satanás chaꞌ kakitij kꞌax y jelaꞌ kakimaj usukꞌ na utz taj kechꞌaꞌt chirij ri Qꞌijsaq re ri Dios.
1TI 2:1 Kantzꞌonoj kꞌu chawe chabꞌiꞌij waꞌ che rutinamit ri Dios: Lik chirajawaxik wi kaqaꞌan orar chwach ri Dios. Echiriꞌ kojchꞌaꞌt rukꞌ, e chojelaj chwach Rire pakiwi konoje ri tikawex chaꞌ kuya chike ri lik kajawax che ri kibꞌinik kisilabꞌik, yey qatioxij ronoje che.
1TI 2:2 Qaꞌana orar pakiwi taq ri e taqanelabꞌ y pakiwi konoje taq ri e aj wach che ruwachulew chaꞌ jelaꞌ utz koj-jeqiꞌ chi utzil chomal y kojbꞌin jusukꞌ rukꞌ jun saqil bꞌinik silabꞌik chwach ri Dios.
1TI 2:3 Lik kꞌu qaꞌana orar ma waꞌ e lik utz y e kukꞌul ukꞌuꞌx ri Dios Qakolobꞌenel,
1TI 2:4 ma ri karaj Rire e kekolobꞌetaj konoje ri tikawex y kaketaꞌmaj chi utz ri Qꞌijsaq.
1TI 2:5 Ma xa jun ri Dios kꞌolik yey xa jun ri kꞌo puqꞌabꞌ kachꞌaw paqawiꞌ chwach ri Dios; waꞌ e ri Qanimajawal Jesucristo, Ralaxel Chikixoꞌl Tikawex.
1TI 2:6 Rire xuya ribꞌ pa kamik quma riꞌoj oj tikawex chaꞌ kutoj ri qamak y kojresaj puqꞌabꞌ Ritzel; yey waꞌ xqꞌalajisax pa ruqꞌijol uchꞌobꞌom chi lo ri Dios.
1TI 2:7 E ruma waꞌ, riꞌin in chaꞌtal lo ruma ri Dios re kantzijoj ri Utzilaj Tzij y kinuꞌan kꞌu in taqoꞌn yey in kꞌutunel chikiwach ri na e ta aj Israel chaꞌ jelaꞌ kakubꞌiꞌ kikꞌuꞌx rike rukꞌ ri Cristo y kakikoj ri Qꞌijsaq. Lik qatzij wa kambꞌiꞌij che alaq, ma in re ri Cristo y na kanꞌan ta raqꞌubꞌal.
1TI 2:8 Ri kuaj riꞌin e konoje taq rachijabꞌ, tobꞌ pa e kꞌo wi, xaqi kiꞌana orar chwach ri Dios. Yey echiriꞌ kakiyak kꞌu ri kiqꞌabꞌ re kakiꞌan orar, ri lik chirajawaxik wi e jusukꞌ ri kibꞌinik kisilabꞌik, na jinta oyowal pa kanimaꞌ y na kechꞌoꞌjin ta chikiwach.
1TI 2:9 Ri nupixabꞌanik chike taq rixoqibꞌ e kiwiqa kibꞌ chi usukꞌlikil. Makikꞌut kꞌu ri kicuerpo yey makiwiq kibꞌ xa re yakbꞌal kiqꞌij. Ma ¿saꞌ ri kuꞌan chom che rixoq? ¿E nawi ri wiqital rukꞌ oro y rukꞌ perlas? ¿E nawi uchomalil laꞌ ri kiwiqibꞌal? Na e taj,
1TI 2:10 ma ri kichomalil e ri chomilaj chak kakiꞌan chwach ri Dios, jelaꞌ pachaꞌ ri taqal chike rixoqibꞌ kakiloqꞌnimaj uqꞌij Rire.
1TI 2:11 Echiriꞌ kakꞌut Rutzij Upixabꞌ ri Dios chikiwach rixoqibꞌ, lik chirajawaxik rike xew kakito y makikꞌul uwach.
1TI 2:12 Riꞌin na kanya ta luwar chike rixoqibꞌ kebꞌuꞌan e aj kꞌutunel chikiwach rachijabꞌ o ketaqan pakiwiꞌ; ma ri lik ubꞌe e xa kakito.
1TI 2:13 Ma ri Dios nabꞌe e xuꞌan ri Adán, tekꞌuchiriꞌ xuꞌan ri Eva.
1TI 2:14 Yey na e ta ri Adán ri xsokotaj nabꞌe ruma ritzel, e ri Eva; y echiriꞌ xsokotajik, e xupalajij rutzij ri Dios.
1TI 2:15 Na rukꞌ ta kꞌu riꞌ, ri Dios kebꞌukolobꞌej rixoqibꞌ y kuya kalkꞌoꞌal chaꞌ kekikꞌiyisaj. Kekolobꞌetaj kꞌu riꞌ we ketikiꞌ chi utz rukꞌ ri kubꞌulibꞌal kikꞌuꞌx, ri rutzil kikꞌuꞌx y ri santowilaj kibꞌinik.
1TI 3:1 Lik usukꞌ wa kambꞌiꞌij: We kꞌo junoq lik karaj kuꞌan aj kꞌamal kiwach rutinamit ri Dios, riꞌ lik chomilaj chak ri kurayij.
1TI 3:2 Pero lik chirajawaxik che juna aj kꞌamal kiwach rutinamit ri Dios e jusukꞌ rubꞌinik usilabꞌik chaꞌ na jinta kꞌo kachꞌaꞌtibꞌen re. E kꞌola jusukꞌ rukꞌ ri rixoqil, lik chuchꞌobꞌo chi utz ri kuꞌano, chuchajij ribꞌ chiribꞌil ribꞌ chaꞌ na katzaq ta pa mak y chom kilitaj rubꞌinik kuma ri jujun chik. Xaqi chebꞌukꞌulu chi utz taq ri kebꞌopon chirocho, y kꞌola unaꞌoj che ukꞌutik Rutzij Upixabꞌ ri Dios.
1TI 3:3 Lik chirajawaxik che na qꞌabꞌaꞌrel taj, na aj chꞌaꞌoj taj, na rayinel ta re puaq kachꞌak rukꞌ sokosoꞌnik, na keꞌek ta ukꞌuꞌx rukꞌ ri puaq; ma ri chirajawaxik wi e lik utz ukꞌuꞌx y chꞌuꞌchꞌuj ukꞌuꞌx.
1TI 3:4 Chuꞌana ri saqil taqanik pa rocho; chukꞌutu kꞌu chike ri ralkꞌoꞌal chaꞌ kebꞌuꞌan e kojol tzij y jekꞌulaꞌ kekꞌojiꞌ chi jusukꞌ.
1TI 3:5 Ma e ri na kuriq ta kuꞌan saqil taqanik pa rocho, ¿suꞌanik kꞌu riꞌ kebꞌuchajij chi utz rutinamit ri Dios?
1TI 3:6 Na utz taj we kꞌo junoq kꞌakꞌ ukojom ri Utzilaj Tzij yey kakojik aj wach chupa riglesia, ma kꞌaxtaj kuꞌan nim che ribꞌ y kaqꞌat kꞌu tzij puwiꞌ jelaꞌ pachaꞌ ri xukꞌulumaj ritzel winaq ruma xuꞌan nim che ribꞌ.
1TI 3:7 Ri lik chirajawaxik wi e chom rubꞌinik usilabꞌik chikiwach taq ri na kikojom ta rubꞌiꞌ ri Qanimajawal Jesucristo, chaꞌ na jinta junoq kakꞌaqaw bꞌi uqꞌij y na katzaq ta chupa juna pajtajibꞌal re ritzel winaq.
1TI 3:8 Jekꞌulaꞌ raj chakibꞌ e toꞌbꞌel piglesia lik chirajawaxik chike e jusukꞌ ri kibꞌinik kisilabꞌik, na xa ta kebꞌ kipalaj, na e ta qꞌabꞌaꞌrelabꞌ, na e ta rayinel re puaq kachꞌak rukꞌ sokosoꞌnik.
1TI 3:9 Chirajawaxik kakitaqej ri saqil kꞌutunik uqꞌalajisam ri Dios yey kakinaꞌ pa kanimaꞌ utz kiꞌanom chwach Rire.
1TI 3:10 Nabꞌe na chirajawaxik kakꞌam kipa chaꞌ kaqꞌalajinik we lik jusukꞌ ri kibꞌinik kisilabꞌik; tekꞌuchiriꞌ utz kebꞌuꞌan aj chakibꞌ e toꞌbꞌel piglesia.
1TI 3:11 Jekꞌulaꞌ, chirajawaxik chike rixoqibꞌ e jusukꞌ ri kibꞌinik kisilabꞌik, na e ta aj molot, lik kakichꞌobꞌ chi utz ri kakiꞌano y kakiꞌan chi utz ronoje ri taqal chike.
1TI 3:12 Ekꞌu rachi aj chak toꞌbꞌel piglesia, lik chirajawaxik kꞌola jusukꞌ rukꞌ ri rixoqil y chuꞌana saqil taqanik pakiwi taq ri ralkꞌoꞌal y pakiwi konoje taq ri e kꞌo pa ri rocho.
1TI 3:13 We kuꞌan kꞌu chi utz ruchak, katakꞌabꞌax uqꞌij chikiwach ri tikawex y kanimar ukꞌuꞌx che uqꞌalajisaxik ri kubꞌulibꞌal ukꞌuꞌx rukꞌ ri Qanimajawal Jesucristo.
1TI 3:14 Riꞌin lik nukubꞌam pan nukꞌuꞌx kiꞌnwila tan awach Timoteo, pero kantzꞌibꞌaj na pan waꞌ chawe
1TI 3:15 chaꞌ we xinmayin che awilik, chawetaꞌmaj saꞌ ri saqil bꞌinik silabꞌik chirajawaxik chike ri e re ri Dios; ma rike e utinamit ri Dios kꞌaslik yey rutinamit e chapayom re y e katikibꞌan re ri Qꞌijsaq.
1TI 3:16 Paqatzij wi lik nim uqꞌij ri Qꞌijsaq re ri Dios qꞌalajisam chiqawach: E ri Qanimajawal Jesucristo xuꞌan tikawex echiriꞌ xkꞌun che ruwachulew. Ronoje ri xuꞌano y ri xubꞌiꞌij e lik jusukꞌ y ri Ruxlabꞌixel ri Dios e xqꞌalajisan re waꞌ. Xilitaj kuma ri ángeles. Xtzijox rubꞌiꞌ chike rukꞌiyal kiwach taq ri tikawex che ruwachulew y e kꞌi ri xkikoj rubꞌiꞌ. Yey xkꞌul tanchi chilaꞌ chikaj rukꞌ yakbꞌal uqꞌij.
1TI 4:1 Ri Ruxlabꞌixel ri Dios uqꞌalajisam chi utz kopon na ruqꞌijol echiriꞌ e kꞌo jujun tikawex kakiya kan ri Qꞌijsaq re ri Dios chaꞌ kakitaqej kꞌutunik petinaq kukꞌ taq ri itzel uxlabꞌixel e sokosoꞌnel.
1TI 4:2 Rike e kekitaqej ri winaq xa kebꞌ kipalaj y e aj raqꞌul, ri lik uꞌanom chi achꞌiꞌy ri kinaꞌoj.
1TI 4:3 Waꞌ e ri kekitaq taq ri winaq chaꞌ na kekꞌuliꞌ taj y chaꞌ na kakitij ta jujun waꞌim tobꞌ waꞌ e ri Dios xuꞌano re katijik; ekꞌu riꞌoj, ri qetaꞌam y qakojom ri Qꞌijsaq, utz kaqakꞌul waꞌ rukꞌ tioxibꞌal.
1TI 4:4 Ma ronoje ri ꞌanatal ruma ri Dios, lik chom; na utz ta kꞌu riꞌ we kaqakꞌaq bꞌi uqꞌij ri kuya ri Dios chiqe. Ri qaꞌanaꞌ e qakꞌulu rukꞌ tioxibꞌal.
1TI 4:5 Ma Ruchꞌaꞌtem ri Dios kubꞌiꞌij ronoje ri kuya Rire chiqe lik chom; yey echiriꞌ kaqatioxij waꞌ chwach ri Dios, kojuꞌan xa oj jun rukꞌ Rire che ubꞌiꞌxikil: Ronoje lik chom.
1TI 4:6 We riꞌat kakꞌut chike rutinamit ri Dios wa kantzꞌibꞌaj pan chawe, riꞌ katuꞌana jun utzilaj aj chak re ri Qanimajawal Jesucristo; ma wa Utzilaj Tzij akojom y ri saqil kꞌutunik ataqem e kayaꞌw achuqꞌabꞌ chwach ri Dios.
1TI 4:7 Matok kꞌu il che taq ri ojer tzijobꞌal na rukꞌ ta ri Dios petinaq wi, ma waꞌ xa noꞌjibꞌal ke winaq. E chatijoj awibꞌ che jun saqil bꞌinik silabꞌik chwach ri Dios.
1TI 4:8 Ma we kaqatij uqꞌij kakꞌojiꞌ uchuqꞌabꞌ ri qacuerpo, utz kꞌu riꞌ; pero waꞌ xa joqꞌotaj kojutoꞌo. Noꞌj we e kaqaya qibꞌ che jun saqil bꞌinik silabꞌik chwach ri Dios, waꞌ lik utz che ronoje, ma kꞌo kutiqoj che ri qakꞌaslemal waqꞌij ora y chiqawach apanoq.
1TI 4:9 Wa kambꞌiꞌij lik qatzij y lik taqal che kakikoj konoje ri tikawex.
1TI 4:10 Ruma kꞌu waꞌ kojchakunik y kaqatij taq kꞌaxkꞌobꞌik, ma kubꞌul pan qakꞌuꞌx rukꞌ ri Dios kꞌaslik, ri kakolobꞌen ke taq ri tikawex che ruwachulew; y paqatzij wi, e kebꞌukolobꞌej konoje ri kakubꞌiꞌ kikꞌuꞌx rukꞌ ri Cristo.
1TI 4:11 Janipa kꞌu ri nubꞌiꞌim chawe, e chakꞌutu riꞌ chikiwach ri kikojom rubꞌiꞌ ri Cristo y chabꞌiꞌij chike e lik kakitaqej waꞌ.
1TI 4:12 Maya luwar che junoq kukꞌaq bꞌi aqꞌij ruma kꞌa at ala. E chakꞌutu ri lik ubꞌe chikiwach ri kikojom rubꞌiꞌ ri Cristo, yey chaꞌana waꞌ rukꞌ rachꞌaꞌtem, rukꞌ rabꞌinik asilabꞌik, rukꞌ ri rutzil akꞌuꞌx, rukꞌ ri kubꞌulibꞌal akꞌuꞌx y rukꞌ ri saqil anaꞌoj.
1TI 4:13 Xaloqꞌ kꞌu kꞌamajaꞌ kinoponik, e chayaꞌa awibꞌ che rajilaxik Ruchꞌaꞌtem ri Dios y che uꞌanik pixabꞌanik y kꞌutunik chikiwach riglesia.
1TI 4:14 Mawoqꞌotaj uyaꞌik ri yaꞌtal chawe ruma ri Dios, ri xqꞌalajisax pawiꞌ riꞌat echiriꞌ ri e aj wach re riglesia xkiya ri kiqꞌabꞌ pawiꞌ.
1TI 4:15 Chayaꞌa kꞌu awibꞌ che taq waꞌ: Chaꞌana janipa ri amajom chik chaꞌ jelaꞌ konoje kakilo jalan utz ri chak kat-tajin che uꞌanik.
1TI 4:16 Lik chachajij awibꞌ che rabꞌinik asilabꞌik y che ukꞌutik ri saqil kꞌutunik. Chachuqꞌubꞌej awibꞌ che uꞌanik taq waꞌ, ma jelaꞌ riꞌat y ri ketaw awe kixkolobꞌetaj che ri qꞌatbꞌal tzij re ri Dios.
1TI 5:1 Echiriꞌ kaꞌan pixabꞌanik, mayaj juna achi nimalaj winaq chik; ri chaꞌana e chapixabꞌaj pachaꞌ chi aqaw; yey chebꞌapixabꞌaj ralabꞌo pachaꞌ chi e awatz o e achaqꞌ
1TI 5:2 y rixoqibꞌ e nimaq winaq pachaꞌ chi e achu. Yey rukꞌ saqil anaꞌoj chebꞌapixabꞌaj ralito pachaꞌ chi e awanabꞌ.
1TI 5:3 Taq rixoqibꞌ e malkaꞌnibꞌ, ri paqatzij wi na jinta katoꞌw ke, chirajawaxik wi ketoꞌ ruma rutinamit ri Dios.
1TI 5:4 Noꞌj we kꞌo juna ixoq malkaꞌn yey e kꞌo ralkꞌoꞌal o e kꞌo taq umam, riꞌ e rike ri lik chirajawaxik kekichajij chi utz ri kifamilia y kekitoꞌ ri kichu malkaꞌnibꞌ o ri katiꞌ malkaꞌnibꞌ, ma waꞌ e pachaꞌ rajil ukꞌaxel chike ri xekꞌiyisan ke, yey waꞌ e lik utz y e kukꞌul ukꞌuꞌx ri Dios.
1TI 5:5 Noꞌj chirajawaxik kꞌut e riglesia katoꞌw ke rixoqibꞌ e malkaꞌnibꞌ, ri paqatzij wi na jinta chi kifamilia y na jinta kꞌu junoq katoꞌw ke, yey waꞌ e taq ri lik kikubꞌam pan kikꞌuꞌx rukꞌ ri Dios y lik kiyaꞌom kibꞌ che uꞌanik orar chipaqꞌij chichaqꞌabꞌ.
1TI 5:6 Noꞌj e juna ixoq malkaꞌn we xew e keꞌek ukꞌuꞌx che uꞌanik ri karaj rire, riꞌ pachaꞌ kaminaq chi chwach ri Dios tobꞌ ne kꞌaslik, y na taqal ta kꞌu riꞌ che katoꞌik.
1TI 5:7 E chebꞌataqa kꞌu riglesia che uꞌanik taq wa kambꞌiꞌij chawe chaꞌ chom kilitaj ri kibꞌinik kisilabꞌik chikiwach ri jujun chik.
1TI 5:8 Lik kꞌu chirajawaxik riꞌ che junoq kebꞌutoꞌ taq ri ratz-uchaqꞌ e kꞌo chux che, y más ne chirajawaxik kuꞌan waꞌ chike rufamilia. Ma e junoq na kuꞌan ta waꞌ, riꞌ na taqal ta che kubꞌiꞌij e kukꞌil ri e re ri Cristo, yey más ne kꞌo umak riꞌ chikiwa ri na kikojom ta rubꞌiꞌ ri Cristo, ma e ne rike kekichajij ri kifamilias.
1TI 5:9 Chupa ri wuj pa tzꞌibꞌital wi taq ri bꞌiꞌaj ke rixoqibꞌ e malkaꞌnibꞌ ketoꞌik, xew katzꞌibꞌax rubꞌiꞌ rixoq ukꞌisom chi sesenta junabꞌ, we jusukꞌ xkꞌojiꞌ rukꞌ ri rachijil,
1TI 5:10 we chom ruchꞌaꞌtibꞌexik kaꞌan chwi taq ri chak uꞌanom, waꞌ e ebꞌukꞌiyisam chi utz ri ralkꞌoꞌal, ebꞌukꞌulum chi utz ri hermanos kebꞌopon chirocho y uchꞌajom ne ri kaqan, ebꞌutoꞌom taq ri e kꞌo pa kꞌaxkꞌobꞌik y lik kꞌu uꞌanom utzilaj taq chak.
1TI 5:11 Noꞌj taq ri malkaꞌnibꞌ kꞌa e kꞌakꞌal, matzꞌibꞌax ri kibꞌiꞌ ma kꞌaxtaj ruma ri kirayibꞌal xew kakitzukuj kekꞌuliꞌ tanchik y kakesaj kꞌu kibꞌ chirij ri Cristo.
1TI 5:12 Jekꞌulaꞌ e kakeqelej ri qꞌatbꞌal tzij pakiwiꞌ ruma na xkiꞌan taj janipa ri kibꞌiꞌim kakiꞌano.
1TI 5:13 Kebꞌuꞌan kꞌu e xepuꞌabꞌ y xaqi keqꞌeꞌkot chiꞌtaq ja. Yey na xew ta kebꞌuꞌan e xepuꞌabꞌ, ma kebꞌuꞌan ne e aj molot, xaqi kakimin kibꞌ che ri na jinta ke che y e xaqi kakitzijoj ri na taqal ta chike kakibꞌiꞌij.
1TI 5:14 E uwariꞌche riꞌin kambꞌiꞌij chike ri e malkaꞌnibꞌ kꞌa e kꞌakꞌal, chekꞌuliꞌoq, chekikꞌiyisaj ri kalkꞌoꞌal y e kilaꞌ kꞌut janipa ri chirajawaxik kaꞌan pa kocho chaꞌ jelaꞌ ri tzel kebꞌilow re ri Cristo na jinta kꞌo kakichꞌaꞌtibꞌej chikij rutinamit Rire.
1TI 5:15 Ma e kꞌo ne jujun chike waꞌ wa malkaꞌnibꞌ na kitaqem ta chi ri Cristo, ma e kitaqem ri Satanás.
1TI 5:16 We kꞌo junoq ukojom rubꞌiꞌ ri Cristo yey e kꞌo ixoqibꞌ malkaꞌnibꞌ chike rufamilia, riꞌ chirajawaxik che chebꞌutoꞌoꞌ chaꞌ na kuya ta alkꞌayew che riglesia, y jekꞌulaꞌ riglesia xew kebꞌutoꞌ ri malkaꞌnibꞌ paqatzij wi na jinta katoꞌw ke.
1TI 5:17 Chike konoje ri e aj wach re riglesia, ri kikꞌamom uwach chi utz rutinamit ri Dios, chirajawaxik kaꞌan kukꞌ janipa ri taqal chike ruma ri chak kakiꞌano; y e ne más chirajawaxik kaꞌan waꞌ kukꞌ ri yaꞌtal pakiqꞌabꞌ ketzijonik y kekꞌutunik.
1TI 5:18 Ma jewaꞌ tzꞌibꞌital kan chupa Rutzij Upixabꞌ ri Dios: «Makoj bꞌozal che ri bꞌoyex echiriꞌ kuqil uwi ri trigo, ma taqal che katzuqik.» Y kubꞌiꞌij: «E junoq kachakunik, lik taqal che katojik.»
1TI 5:19 Echiriꞌ kꞌo junoq kutzꞌaq uchiꞌ juna aj wach re riglesia; makoj ne waꞌ we na e jinta kaꞌibꞌoq o oxibꞌoq kakijikibꞌaꞌ uwach rumak.
1TI 5:20 We kꞌo juna aj wach re riglesia na karaj taj karoqꞌotaj kan rumak, chachꞌaꞌbꞌej upa chikiwach konoje chaꞌ jelaꞌ kok xiꞌin ibꞌ kukꞌ riglesia.
1TI 5:21 Chwach kꞌu ri Dios y chwach ri Qanimajawal Jesucristo y chikiwach ri ángeles re ri Dios ri echaꞌtalik re kakiloqꞌnimaj Rire, kambꞌiꞌij kꞌu chawe chaꞌana taq waꞌ chi jusukꞌ kukꞌ konoje tobꞌ e chinoq y na xa ta katchaꞌwik.
1TI 5:22 Maꞌan tan aj wach re riglesia che junoq we kꞌamajaꞌ awilom chi utz ri jusukꞌ ubꞌinik, ma amak kꞌu riꞌ riꞌat we rire kuꞌan ri na utz taj chupa ri chak re ri Dios. Lik chachajij kꞌu awibꞌ riꞌat chwach ronoje ri na utz taj.
1TI 5:23 Ruma kꞌu lik kuya kꞌax pamaj chawe, matij xew joronaꞌ, utz we e kachꞌurij kꞌana vino rukꞌ ri joronaꞌ katijo.
1TI 5:24 Lik chirajawaxik kawetaꞌmaj chi utz rubꞌinik usilabꞌik china ri kakojo re aj wach re riglesia. Ma e kꞌo jujun achijabꞌ lik qꞌalaj ri kimak tobꞌ kꞌamajaꞌ ne kaqꞌat tzij pakiwiꞌ; pero e kꞌo jujun chik kꞌunaj kaqꞌalajin ri kimak.
1TI 5:25 Jekꞌuriꞌlaꞌ, e kꞌo ri lik kaqꞌalajin ri chomilaj chak kakiꞌano; pero e kꞌo jujun chik kakiꞌan chomilaj taq chak, yey waꞌ kamayin retaꞌmaxik. Na rukꞌ ta kꞌu riꞌ, kopon ri qꞌij kel lo chi saq.
1TI 6:1 Konoje raj chak e kꞌo puqꞌabꞌ juna patrón e lik kiloqꞌoj uqꞌij ri kipatrón che ronoje ri kakiꞌano, chaꞌ jelaꞌ na jinta junoq tzel kachꞌaꞌt chirij rubꞌiꞌ ri Dios y chirij ri saqil kꞌutunik.
1TI 6:2 Yey we juna aj chak kꞌo upatrón ukojom chi rubꞌiꞌ ri Cristo, muchꞌobꞌo: «Na chirajawaxik taj kanꞌan ri karaj ri nupatrón ma junam qawach qachaqꞌ qibꞌ chwach ri Dios.» Na ubꞌe taj kuchꞌobꞌ raqan waꞌ; ri lik usukꞌ e chuꞌana más chi utz ruchak ma ri kunimaj e jun ukojom rubꞌiꞌ ri Cristo y taqal kꞌu riꞌ che kꞌax kanaꞌik. Waꞌ e kꞌutunik y pixabꞌanik chaꞌana riꞌat chike ri e aj chak.
1TI 6:3 We kꞌo junoq junwi ri kukꞌutu y na junam ta runaꞌoj rukꞌ ri saqil kꞌutunik re ri Qanimajawal Jesucristo y rukꞌ ri saqil bꞌinik chwach ri Dios,
1TI 6:4 riꞌ na jinta retaꞌam tobꞌ kuchꞌobꞌo lik kꞌo unaꞌoj. E ne lik keꞌek unaꞌoj chwi taq chꞌaꞌtem na jinta uchak, xa re sachibꞌal naꞌoj. Y taq waꞌ kukꞌam lo retzelal kꞌuꞌx, chꞌaꞌoj, kꞌaxlaj chꞌaꞌtem chikij jujun chik y naꞌoj na ubꞌe taj chikij jujun chik.
1TI 6:5 Ruma kꞌu waꞌ, e taq ri winaq sachinaq kinaꞌoj y na jinta ri Qꞌijsaq kukꞌ, xaqi kakitzukuj chꞌaꞌoj chikiwach. Rike kakichꞌobꞌo, ri kꞌaslemal chwach ri Dios e re kuꞌan bꞌeyomabꞌ chike. Maꞌan kꞌu aweꞌat kukꞌ.
1TI 6:6 Paqatzij wi lik kꞌo kutiqoj ri qakꞌaslemal chwach ri Dios, pero xew we kojkiꞌkot rukꞌ ri kꞌo qukꞌ.
1TI 6:7 Ma na jinta qukꞌaꞌam loq echiriꞌ kojalax wara che ruwachulew y paqatzij wi na jinta kaqakꞌam bꞌi echiriꞌ kojkamik.
1TI 6:8 E uwariꞌche we kꞌo qawa y kꞌo qaqꞌuꞌ, e chojkiꞌkota rukꞌ waꞌ.
1TI 6:9 Noꞌj taq ri lik kakirayij kebꞌuꞌan e bꞌeyomabꞌ, riꞌ lik na kꞌayew ta chike ketzaq puqꞌabꞌ ritzel y kechapataj ruma ukꞌiyal rayinik na jinta uchak. Yey waꞌ xew kukꞌam lo ukꞌiyal kꞌaxkꞌobꞌik pakiwi rike woꞌora y chiqawach apanoq.
1TI 6:10 Ma ri rayinik re ri puaq e kukꞌam lo ukꞌiyal taq mak. E kꞌo ne jujun lik e bꞌenaq kikꞌuꞌx rukꞌ ri puaq y ruma waꞌ kiyaꞌom kan ri kubꞌulibꞌal kikꞌuꞌx rukꞌ ri Cristo, y jekꞌulaꞌ kitukel kiyaꞌom kibꞌ pa kꞌaxkꞌobꞌik.
1TI 6:11 Noꞌj riꞌat Timoteo, at jun raj chak ri Dios, chatanimaja kꞌu chwach ronoje taq ri na utz taj. E chatijoj awibꞌ che uꞌanik ri jusukꞌ y ri utz chwach ri Dios, kubꞌula akꞌuꞌx rukꞌ, chakꞌutu ri rutzil kꞌuꞌxaj, kꞌola unimal kꞌuꞌxaj awukꞌ y chaꞌana chꞌutiꞌn che awibꞌ.
1TI 6:12 Chachuqꞌubꞌej awibꞌ chi utz chupa ri Utzilaj Tzij akojom y e chatok il che ri kꞌaslemal na jinta utaqexik, ma ruma waꞌ xatusikꞌij ri Dios y ruma waꞌ chikiwach ukꞌiyal tikawex xaqꞌalajisaj ri kubꞌulibꞌal akꞌuꞌx rukꞌ ri Cristo.
1TI 6:13 Chupa kꞌu rubꞌiꞌ ri Dios, ri aj yaꞌl kꞌaslemal che ronoje taq ri kꞌolik, y chupa rubꞌiꞌ ri Qanimajawal Jesucristo, ri na xuxiꞌij ta ribꞌ che uqꞌalajisaxik ri Qꞌijsaq echiriꞌ kꞌo chwach ri aj qꞌatal tzij Poncio Pilato, katintaq che waꞌ:
1TI 6:14 Chaꞌana kꞌu chi jusukꞌ janipa ri katutaq ri Dios che chaꞌ na jinta kꞌana mak kariqitaj chawe echiriꞌ kakꞌun tanchi lo ri Qanimajawal Jesucristo.
1TI 6:15 Kakꞌun kꞌu ri Jesús chupa ri qꞌij chaꞌtal chi lo ruma ri Dios. Lik nim uqꞌij ri Dios Qajawxel, ri kꞌo ronoje taqanik puqꞌabꞌ, ri Taqanel pakiwi konoje ri taqanelabꞌ, ri Kajawal ke konoje ri e aj wach.
1TI 6:16 Xew Rire na jinta jeqebꞌal re y na jinta kꞌisbꞌal re, ma rukꞌaslemal na jinta utaqexik. Rire jeqel pa Qꞌijsaq y ruma ruwonibꞌal na jinta junoq kaqibꞌ rukꞌ. Na jinta juna tikawex iliyom uwach y na jinta junoq kachꞌijow rilik uwach. Xew kꞌu che Rire lik taqalik kayak uqꞌij y xew puqꞌabꞌ Rire kꞌo wi kuꞌan taqanik na jinta utaqexik. ¡Amén!
1TI 6:17 Chabꞌiꞌij kꞌu chike konoje taq ri bꞌeyomabꞌ che ruwachulew makiꞌan nim che kibꞌ, makubꞌiꞌ kikꞌuꞌx rukꞌ ri kibꞌeyomal ma waꞌ xa kakꞌisik; e kubꞌula kikꞌuꞌx rukꞌ ri Dios kꞌaslik, ri kayaꞌw re ronoje ri kajawax chiqe chaꞌ kojkiꞌkot rukꞌ.
1TI 6:18 Chebꞌataqa che kiꞌana ri utz chaꞌ jelaꞌ kakꞌojiꞌ kibꞌeyomalil chwach ri Dios. Kiꞌana kꞌu ukꞌiyal chomilaj taq chak, chesipanoq y chekitoꞌo ri na jinta kꞌo kukꞌ.
1TI 6:19 Jekꞌulaꞌ riꞌ e ketajin che ukꞌolik chilaꞌ chikaj ri bꞌeyomalil na kakꞌis taj, yey lik jikil uwach kakikꞌul waꞌ chiqawach apanoq y kakiriq kikꞌaslemal na jinta utaqexik.
1TI 6:20 Timoteo, chachajij chi utz janipa ri yaꞌtal paqꞌabꞌ; maya axikin che taq chꞌaꞌtem na jinta kꞌo kutiqoj che rabꞌinik asilabꞌik chwach ri Dios y maya axikin che kꞌutunik kabꞌiꞌx che lik kuya naꞌoj tobꞌ na e ta kꞌu riꞌ.
1TI 6:21 Ma e kꞌo jujun ruma kikojom taq waꞌ, e xkiya kan ri bꞌe re ri Qꞌijsaq. Chikꞌulu iwonoje riꞌix ri unimal rutzil ukꞌuꞌx ri Dios. Amén.
2TI 1:1 Riꞌin in Pablo, in taqoꞌn re ri Qanimajawal Jesucristo ma e xraj riꞌ ri Dios chwe kantzijoj ri kꞌaslemal bꞌiꞌtisim chike ri kakiya kibꞌ puqꞌabꞌ ri Qanimajawal Jesucristo.
2TI 1:2 Kantzꞌibꞌaj pan waꞌ wa carta chawe riꞌat Timoteo. Riꞌin lik kꞌax katinnaꞌo ma at pachaꞌ nukꞌajol chupa rubꞌiꞌ ri Cristo. Chakꞌulu kꞌu ri unimal rutzil kꞌuꞌxaj, ri relej kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
2TI 1:3 Lik kintioxin chwach ri Dios, ri kanloqꞌnimaj jelaꞌ pachaꞌ xkiꞌan lo ri watiꞌ-numam ojertan yey lik kunaꞌ nukꞌuꞌx utz nuꞌanom chwach Rire. Yey echiriꞌ kanꞌan orar chipaqꞌij chichaqꞌabꞌ xaqi katkꞌun chinukꞌuꞌx.
2TI 1:4 E kakꞌun chinukꞌuꞌx roqꞌej xaꞌano echiriꞌ xatkanaj kanoq y lik kuaj kꞌut kanwil awach chaꞌ jelaꞌ kakiꞌkot ri wanimaꞌ.
2TI 1:5 Yey kakꞌun chinukꞌuꞌx ri saqil kubꞌulibꞌal akꞌuꞌx rukꞌ ri Qanimajawal Jesucristo; ma waꞌ nabꞌe xkꞌojiꞌ rukꞌ rawatiꞌ Loida y rachu Eunice, y woꞌora lik qꞌalaj e ne kꞌo awukꞌ riꞌat.
2TI 1:6 E uwariꞌche lik katimpixabꞌaj puwi ri uyaꞌom ri Dios chawe, waꞌ e ri xakꞌulu echiriꞌ xinya ri nuqꞌabꞌ pawiꞌ chaꞌ katuꞌan at aj chak re ri Dios. Lik kꞌu chachuqꞌubꞌej awibꞌ che uꞌanik waꞌ rukꞌ ronoje akꞌuꞌx.
2TI 1:7 Ma ri Dios na uyaꞌom ta ri Ruxlabꞌixel chiqe chaꞌ kojuꞌan oj turun; e uyaꞌom chiqe chaꞌ kakꞌojiꞌ qachuqꞌabꞌ, rutzil qakꞌuꞌx y saqil qanaꞌoj.
2TI 1:8 E uwariꞌche, matkꞌix che utzijoxik ri Utzilaj Tzij re ri Qanimajawal Jesucristo y matkꞌix ne chwe riꞌin ma in kꞌo pa cárcel ruma kantzijoj ri Utzilaj Tzij. Ekꞌu riꞌat, e chakuyu taq ri kꞌaxkꞌobꞌik kape paqawiꞌ ruma rutzijoxik waꞌ, chachꞌija kꞌu ronoje rukꞌ ruchuqꞌabꞌ ri Dios.
2TI 1:9 E ri Dios xkolobꞌen qeꞌoj y xojusikꞌij chaꞌ kojkꞌojiꞌ jusukꞌ chwach; yey waꞌ na e ta ruma ri qaꞌanom riꞌoj, ma e ruma lik e xraj riꞌ Rire chiqe. Echiriꞌ kꞌamajaꞌ ne kuꞌan ruwachulew, uchꞌobꞌom chik kuya ri unimal rutzil ukꞌuꞌx chiqe ruma ri Qanimajawal Jesucristo.
2TI 1:10 Y woꞌora ukꞌutum chi ri rutzil ukꞌuꞌx chiqe ma xutaq lo ri Qanimajawal Jesucristo re kojukolobꞌej. Rire xuchꞌij uchuqꞌabꞌ ri kamik y jekꞌulaꞌ xuqꞌalajisaj kꞌo kꞌaslemal na jinta utaqexik chike ri kikojom ri Utzilaj Tzij.
2TI 1:11 Yey riꞌin in chaꞌtal lo ruma ri Dios re kantzijoj wa Utzilaj Tzij y re kinuꞌan in taqoꞌn y kꞌutunel chikiwach ri ukꞌiyal kiwach taq ri tikawex.
2TI 1:12 E uwariꞌche riꞌin kantij ronoje taq wa kꞌaxkꞌobꞌik in kꞌo wi y na kinkꞌix ta kꞌu che, ma lik wetaꞌam china rukꞌ kubꞌul wi nukꞌuꞌx, yey lik jikil nukꞌuꞌx che e Rire lik kꞌo uchuqꞌabꞌ che uchajixik ri uyaꞌom panuqꞌabꞌ kꞌa che rukꞌunibꞌal ri Cristo.
2TI 1:13 E lik chakꞌutu chikiwach ri tikawex ri saqil kꞌutunik atom riꞌat chwe; chaꞌana waꞌ rukꞌ ri kubꞌulibꞌal kꞌuꞌxaj y ri rutzil kꞌuꞌxaj ariqom rukꞌ ri Qanimajawal Jesucristo.
2TI 1:14 Rukꞌ rutoꞌbꞌal ri Santowilaj Ruxlabꞌixel ri Dios kꞌo pa qanimaꞌ, lik chachajij chi utz ri yaꞌtal chawe ruma ri Dios.
2TI 1:15 Riꞌat lik awetaꞌam, e kꞌi ri qachbꞌiꞌil e aj Asia xinkoqꞌotaj kanoq, y chikixoꞌl rike kꞌo ri Figelo y ri Hermógenes.
2TI 1:16 Noꞌj ri Onesíforo na xinroqꞌotaj taj. Chukꞌutu kꞌu ri Qanimajawal Jesucristo ri rutzil ukꞌuꞌx che rire y chike taq ri e kꞌo pa rocho, ma rire ukꞌiyal laj xubꞌochiꞌij nukꞌuꞌx y na xkꞌix ta chwe tobꞌ in kꞌo pa karena chupa ri cárcel.
2TI 1:17 Y echiriꞌ xkꞌun wara Roma, lik xok il che nutzukuxik pa in kꞌo wi y xinuriqo.
2TI 1:18 Yey awetaꞌam ne riꞌat, rire lik xojutoꞌo echiriꞌ oj kꞌo chupa ri tinamit Éfeso. E uwariꞌche kantzꞌonoj che ri Qanimajawal chuyaꞌa ri rajil ukꞌaxel che ri Onesíforo chupa ri kꞌisbꞌal qꞌij.
2TI 2:1 Timoteo, ri at pachaꞌ nukꞌajol chupa rubꞌiꞌ ri Cristo. Kambꞌiꞌij kꞌu chawe lik chachuqꞌubꞌej awibꞌ che uꞌanik ronoje ri yaꞌom chawe ruma ri unimal rutzil ukꞌuꞌx ri Qanimajawal Jesucristo.
2TI 2:2 Janipa kꞌu ratom chwe chwi ri kꞌutunik nuꞌanom chikiwach rukꞌiyal winaq, e chaqꞌatisaj riꞌ pakiqꞌabꞌ rachijabꞌ kubꞌul akꞌuꞌx kukꞌ ruma kakiriq ukꞌutik waꞌ chikiwach ri jujun chik.
2TI 2:3 Ekꞌu riꞌat, chakuyu ronoje ri kꞌaxkꞌobꞌik kape pawiꞌ pachaꞌ kuꞌan juna saqil soldado re ri Qanimajawal Jesucristo.
2TI 2:4 Ma juna saqil soldado na karoqꞌotaj ta kan ri taqom che chaꞌ e keꞌek che uꞌanik ri karaj rire; ri kuꞌano e xew lik kok il che ri chak yaꞌtal puqꞌabꞌ ruma rutaqanel.
2TI 2:5 Jekꞌulaꞌ, junoq kakꞌalalik na kuchꞌak ta riꞌ ri premio we na kakꞌalal ta e chirij rusukꞌ pachaꞌ ri kutzꞌonoj wa etzꞌanem.
2TI 2:6 Jekꞌuriꞌlaꞌ, juna aj chak xew kuꞌan molonik we nabꞌe na kuchakuj rulew.
2TI 2:7 Timoteo, lik chachꞌobꞌo raqan wa kambꞌiꞌij chawe; we kaꞌan waꞌ, ri Qanimajawal kuya anaꞌoj chaꞌ kamaj usukꞌ ronoje.
2TI 2:8 E kꞌuna chakꞌuꞌx ronoje ri xrikꞌowibꞌej ri Qanimajawal Jesucristo, ri xupetebꞌej lo che ri rey David y ri xkꞌastaj lo chikixoꞌl taq ri ekaminaq jelaꞌ pachaꞌ ri kubꞌiꞌij ri Utzilaj Tzij kantzijoj riꞌin.
2TI 2:9 Yey e ruma kantzijoj wa Utzilaj Tzij, in kꞌo pa kꞌaxkꞌobꞌik yey inyaꞌom pa cárcel pachaꞌ in jun achi lik in aj palajiy tzij. Tobꞌ kꞌu riꞌin inyaꞌom pa karena, ri Utzilaj Tzij re ri Dios na yututal taj, ma xaqi keꞌek utzijoxik.
2TI 2:10 Kanchꞌij kꞌu uchuqꞌabꞌ ronoje ri kꞌaxkꞌobꞌik kape panuwiꞌ xa ruma kꞌax kebꞌenunaꞌ taq ri ebꞌuchaꞌom ri Dios, chaꞌ rike kakiriq ri kolobꞌetajik na jinta utaqexik, ri kayaꞌiꞌ chike ri kakubꞌiꞌ kikꞌuꞌx rukꞌ ri Qanimajawal Jesucristo.
2TI 2:11 Waꞌ wa chꞌaꞌtem lik qatzij: We xojkam rukꞌ ri Cristo, kojkꞌasiꞌ na riꞌ rukꞌ Rire.
2TI 2:12 We kaqachꞌij uchuqꞌabꞌ ri kꞌaxkꞌobꞌik ruma Rire, chiqawach apanoq kojtaqan rukꞌ Rire chilaꞌ chikaj. Noꞌj we riꞌoj kaqabꞌiꞌij na oj ta re Rire, jelaꞌ kuꞌan Rire qukꞌ chiqawach apanoq, kubꞌiꞌij kꞌu riꞌ na retaꞌam ta qawach.
2TI 2:13 We riꞌoj na kakubꞌiꞌ ta qakꞌuꞌx rukꞌ; na rukꞌ ta kꞌu riꞌ, Rire lik e kuꞌan janipa ri ubꞌiꞌim kanoq, ma Rire na kuꞌan ta kꞌana raqꞌubꞌal.
2TI 2:14 Chakuxtaj waꞌ chike ri e raj chak ri Dios y lik chebꞌapixabꞌaj pa rubꞌiꞌ Rire, chaꞌ mechꞌoꞌjin chwi taq chꞌaꞌtem na jinta utz kukꞌam loq, ma xew kukꞌam lo sachibꞌal naꞌoj chike ri ketaw re.
2TI 2:15 Riꞌat lik chachuqꞌubꞌej awibꞌ chaꞌ lik jusukꞌ rabꞌinik asilabꞌik chwach ri Dios y jelaꞌ at jun aj chak na jinta kꞌo katkꞌix che, e xaqi katzijoj chi jusukꞌ ri Tzij re ri Qꞌijsaq.
2TI 2:16 Maꞌan aweꞌat kukꞌ ri kechꞌaꞌt chwi taq ri na re ta ri Dios y na jinta uchak. Ma ri keꞌanaw re waꞌ, e ketajin che resaxik kibꞌ chirij ri Dios.
2TI 2:17 Yey ri kichꞌaꞌtem kusachisaj ri kinaꞌoj taq ri ketaw re, e pachaꞌ juna yabꞌil kaqꞌayisanik. Y e xkiꞌan waꞌ ri Himeneo y ri Fileto.
2TI 2:18 Rike xkiya kan ri Qꞌijsaq ma kakibꞌiꞌij ri kꞌastajibꞌal ke ri e re ri Cristo, ya xuꞌano. Ruma kꞌu ri kakikꞌut rike, e kꞌo jujun katajin usachik kinaꞌoj puwi ri Qꞌijsaq.
2TI 2:19 Na rukꞌ ta kꞌu riꞌ, rutinamit ri Dios lik tikil chi utz pa ri Qꞌijsaq, ma rike e pachaꞌ juna kowilaj utikibꞌal juna ja pa tzꞌibꞌital wi: «Ri Dios lik retaꞌam china ri e re Rire» y «Konoje kꞌu ri kakibꞌiꞌij e re ri Cristo, chirajawaxik kakesaj kibꞌ che taq ri na jusukꞌ taj.»
2TI 2:20 Chupa juna nimalaj ja kꞌo taq ri chapabꞌal re oro y re plata, ri lik xa qꞌalaj pa kachapabꞌex wi; yey kꞌo ne taq chapabꞌal re cheꞌ y ulew na lik ta chom, ri xa tobꞌ pa kachapabꞌex wi.
2TI 2:21 Jekꞌuriꞌlaꞌ e junoq karesaj ribꞌ che taq ri mak, chom ruchapabꞌexik kaꞌan ruma ri Dios, chom uꞌanom rubꞌinik usilabꞌik y lik kꞌo uchak che ri Qanimajawal, ma kuriq uꞌanik ukꞌiyal chomilaj chak.
2TI 2:22 Timoteo, chatanimaj kꞌu chwach ronoje taq ri rayibꞌal re tzaqibꞌal ke ralabꞌo. Yey junam kukꞌ konoje ri kakiloqꞌnimaj rubꞌiꞌ ri Qanimajawal Jesucristo rukꞌ ronoje kikꞌuꞌx, e chatijoj awibꞌ che uꞌanik ri lik jusukꞌ chwach ri Dios, kubꞌula akꞌuꞌx rukꞌ, chakꞌutu ri rutzil kꞌuꞌxaj y chatkꞌola chi utzil chomal kukꞌ konoje.
2TI 2:23 Maya axikin chike ri kakichapalaꞌ kibꞌ pa chꞌaꞌtem na jinta uchak, ma awetaꞌam chik laꞌ xa kukꞌam lo chꞌaꞌoj.
2TI 2:24 Ma e juna aj chak re ri Qanimajawal Jesucristo chirajawaxik che na aj ta chꞌaꞌoj, xaqi utz ukꞌuꞌx kukꞌ konoje, lik kakꞌutun chi utz y lik nim ukꞌuꞌx kukꞌ konoje.
2TI 2:25 Rukꞌ chomilaj chꞌaꞌtem kebꞌuqꞌil taq ri kakiyak kibꞌ chirij ri Qꞌijsaq; ma kꞌaxtaj rukꞌ waꞌ, ri Dios kuya chike kakitzelej kitzij chwach y kaketaꞌmaj ri Qꞌijsaq,
2TI 2:26 y jekꞌulaꞌ kebꞌel puqꞌabꞌ ritzel winaq y na kakiꞌan ta chik saꞌ ri karaj rire.
2TI 3:1 Lik chirajawaxik kawetaꞌmaj waꞌ: Chupa taq ri kꞌisbꞌal qꞌij lik kꞌayew chi ri jeqelem che ruwachulew ruma ri kibꞌinik kisilabꞌik taq ri winaq.
2TI 3:2 Ma e kꞌo ri xew kakitaqej ri kakaj rike, e kꞌo ri lik e rayinel re puaq, e kꞌo ri lik kakitakꞌabꞌaꞌ kiqꞌij, e kꞌo ri kakikꞌaq bꞌi kiqꞌij ri katz-kichaqꞌ, e kꞌo ri tzel kechꞌaꞌt chikij jujun chik, e kꞌo ri na kakikoj ta kitzij kichu-kiqaw, e kꞌo ri na jinta kakitioxij, e kꞌo ri na kakixiꞌij ta kibꞌ chwach ri Dios.
2TI 3:3 E kꞌo ri na jinta kꞌana rutzil kꞌuꞌxaj kukꞌ, e kꞌo ri na jinta kꞌana kꞌaxnaꞌbꞌal kikꞌuꞌx, e kꞌo ri e aj molot, e kꞌo ri na kakichꞌij ta uqꞌatexik ri kirayibꞌal, e kꞌo ri lik e titzꞌitaq, e kꞌo ri tzel kakil ri utz.
2TI 3:4 E kꞌo ri e kꞌayinel re katz-kichaqꞌ, e kꞌo ri na kakichꞌobꞌ tana raqan ri kakiꞌano, e kꞌo ri lik kakiꞌan nim che kibꞌ, e kꞌo ri xew kakitzukuj ruqusil ruwachulew y na e ta kakitzukuj ri Dios.
2TI 3:5 E kꞌo ri kakiꞌan pachaꞌ lik utz kiꞌanom chwach ri Dios pero na kiyaꞌom ta luwar che ri Dios kujalkꞌatij ri kibꞌinik kisilabꞌik rukꞌ ruchuqꞌabꞌ Rire. Maꞌan awe kukꞌ ri kakiꞌan taq waꞌ.
2TI 3:6 Kukꞌil rike e kꞌo ri kebꞌok pa taq ja y kekisok rixoqibꞌ lik kꞌo kimak ruma e kitaqem taq ri kirayibꞌal.
2TI 3:7 Tobꞌ xaqi kakita taq kꞌutunik, na rukꞌ ta kꞌu riꞌ, na kakimaj ta kꞌana usukꞌ ri Qꞌijsaq.
2TI 3:8 Ekꞌu waꞌ waꞌchijabꞌ e pachaꞌ ri aj qꞌijabꞌ Janes y Jambres, ri xeyakataj chirij ri Moisés ojertan, ma rike eyakatajinaq chirij ri Qꞌijsaq y sachinaq ri kinaꞌoj yey na kekꞌul ta ruma ri Dios ma rike na jinta kꞌana kubꞌulibꞌal kikꞌuꞌx rukꞌ Rire.
2TI 3:9 Na kebꞌel ta kꞌu pan rukꞌ ri kakiꞌano jelaꞌ pachaꞌ ri xkikꞌulumaj ri xeyaktaj chirij ri Moisés, ma kaqꞌalajin chikiwach konoje, na jinta saqil naꞌoj kukꞌ rike.
2TI 3:10 Noꞌj riꞌat e ataqem ri saqil nukꞌutunik, ri jusukꞌ nubꞌinik nusilabꞌik, ri kuaj kanꞌan rukꞌ ri nukꞌaslem, ri kubꞌulibꞌal nukꞌuꞌx, runimal nukꞌuꞌx, ri rutzil nukꞌuꞌx y ri nuchuqꞌabꞌ che uchꞌijik ronoje.
2TI 3:11 Awetaꞌam kꞌu riꞌ lik ꞌanom kꞌax chwe y lik nutijom kꞌaxkꞌobꞌik jelaꞌ pachaꞌ ri xinwikꞌowibꞌej chupa taq ri tinamit Antioquía, Iconio y Listra. Ukꞌiyal taq kꞌaxkꞌobꞌik xpe panuwiꞌ, pero ri Qanimajawal Jesucristo xinukolobꞌej che ronoje waꞌ.
2TI 3:12 Y jelaꞌ konoje ri kakaj kebꞌin jusukꞌ chupa ri bꞌe re ri Qanimajawal Jesucristo, kakitij na kꞌax kuma jujun chik.
2TI 3:13 Ekꞌu ri winaq itzel kikꞌuꞌx y ri e sokosoꞌnel, lik kakꞌiyar uwach ri kimak. Kesokosoꞌnik y kakisok kibꞌ chikibꞌil kibꞌ.
2TI 3:14 Noꞌj kꞌu riꞌat e lik chachuqꞌubꞌej awibꞌ che ri saqil kꞌutunik amajom y pa ri ajikibꞌam wi awibꞌ. Ma awetaꞌam chi utz china taq ri xekꞌutuw waꞌ chawe.
2TI 3:15 Ma chachꞌutiꞌnal xawetaꞌmaj lo ri Santowilaj Uchꞌaꞌtem ri Dios tzꞌibꞌital kanoq, yey e waꞌ ri kuya anaꞌoj chaꞌ kakꞌul ri kolobꞌetajik ruma ri kubꞌulibꞌal akꞌuꞌx rukꞌ ri Qanimajawal Jesucristo.
2TI 3:16 Ronoje Rutzij Upixabꞌ ri Dios tzꞌibꞌital kanoq e ri Dios bꞌiꞌyom re; waꞌ e lik kꞌo uchak re kꞌutunik, re pixabꞌanik, re kuyijbꞌaꞌ ri na utz ta uꞌanom y re qꞌilonik chaꞌ kojbꞌin jusukꞌ chwach ri Dios;
2TI 3:17 y jekꞌulaꞌ konoje ri kakinimaj ri Dios e tijotal chi utz che uꞌanik ronoje utzilaj chak, ma yaꞌtal chi chike janipa ri kajawaxik chaꞌ kakiꞌan waꞌ.
2TI 4:1 Timoteo, kanya kan wa pixabꞌanik chawe chwach ri Dios y chwach ri Qanimajawal Jesucristo, ri kakꞌun tanchi wara che ruwachulew re koꞌltaqana pakiwi konoje y re koluꞌqꞌata tzij pakiwi taq ri tikawex, ri e kꞌaslik y ri ekaminaq.
2TI 4:2 Chayaꞌa awibꞌ che utzijoxik Ruchꞌaꞌtem ri Dios. Chatok il che utzijoxik waꞌ chupa ruqꞌijol o tobꞌ ne na chupa ta ruqꞌijol. Chaqꞌalajisaj taq ri na utz taj, chachꞌaꞌbꞌej kipa taq ri kakiꞌan ri na utz taj, chebꞌapixabꞌaj rukꞌ saqil kꞌutunik chaꞌ kakitzelej kitzij. Chaꞌana kꞌu waꞌ rukꞌ unimal akꞌuꞌx.
2TI 4:3 Ma kopon ri qꞌij echiriꞌ taq ri winaq na kakaj taj kakita ri saqil kꞌutunik. Yey ruma taq ri kirayibꞌal kekitzukuj china kekꞌutuw chike saꞌ ri kakaj kakito.
2TI 4:4 Rike na kakaj taj kakita ri Qꞌijsaq y e kakiternabꞌej taq tzijobꞌal xa noꞌjital kuma winaq.
2TI 4:5 Noꞌj riꞌat Timoteo, e lik kꞌola anaꞌoj puwi taq ri kaꞌano. Chakuyu ronoje taq ri kꞌaxkꞌobꞌik kape pawiꞌ. E chayaꞌa awibꞌ che utzijoxik ri Utzilaj Tzij re kolobꞌetajik. Chaꞌana kꞌu chi utz ronoje ri chak yaꞌtal paqꞌabꞌ.
2TI 4:6 Kambꞌiꞌij kꞌu waꞌ chawe ma riꞌin na naj ta chi in kꞌaslik, ri nubꞌenam chilaꞌ chikaj xa naqaj chi kꞌo wi.
2TI 4:7 Xinchꞌij uchuqꞌabꞌ ronoje ri kꞌaxkꞌobꞌik xinikꞌow wi, xinopon kꞌu che ri kꞌisbꞌal re ri nuchak uyaꞌom ri Dios, lik nutzijom chi jusukꞌ ri Utzilaj Tzij re ri Cristo.
2TI 4:8 Ekꞌu woꞌora xew chi woyeꞌem ri corona kayaꞌ chwe ruma ximbꞌin jusukꞌ chwach ri Dios. Y ri kayaꞌw waꞌ chwe e ri Qanimajawal Jesucristo, ri Aj Qꞌatal Tzij lik jusukꞌ. Y waꞌ na xew ta chwe riꞌin kuyaꞌo, ma kuya chike konoje ri koyeꞌem rukꞌunibꞌal rukꞌ ronoje kanimaꞌ.
2TI 4:9 Matmayinik, e chatpeta tan che wilik.
2TI 4:10 Ma ri Demas xinroqꞌotaj kanoq ruma lik xeꞌek ukꞌuꞌx chwi taq ruqusil ruwachulew y xeꞌek Tesalónica. Y ri Crescente bꞌenaq Galacia yey ri Tito bꞌenaq Dalmacia.
2TI 4:11 Xew kꞌu ri Lucas inrachbꞌilam wara. Echiriꞌ katpetik, chakꞌama lo ri Marcos awukꞌ ma rire lik toꞌbꞌel we chupa ruchak ri Dios.
2TI 4:12 Ekꞌu ri Tíquico xintaq bꞌi Éfeso.
2TI 4:13 Echiriꞌ katpetik, chakꞌama lo ri pisbꞌal wij nuyaꞌom kan chirocho ri Carpo chupa ri tinamit Troas y chakꞌama taq lo ri jubꞌotaj wuj; yey ri lik kajawax chwe e ri jutaq bꞌotaj tzꞌuꞌum tzꞌibꞌital uwach.
2TI 4:14 Rachi Alejandro ri aj chꞌayal chꞌichꞌ lik uꞌanom taq ri na utz taj chwe. Ekꞌu ri Dios katojow re che saꞌ taq ri uꞌanom.
2TI 4:15 Lik chachajij kꞌu awibꞌ riꞌat chwach rire ma lik uyakom ribꞌ chirij ri Utzilaj Tzij kaqatzijoj.
2TI 4:16 Ri nabꞌe laj echiriꞌ xintoꞌbꞌej wibꞌ pa qꞌatbꞌal tzij, na jinta junoq xtoꞌw we ma konoje xinkoqꞌotaj kanoq; na rukꞌ ta kꞌu riꞌ, riꞌin na kuaj taj e ri Dios kuqꞌat tzij pakiwiꞌ ruma waꞌ.
2TI 4:17 Noꞌj ri Qanimajawal xkꞌojiꞌ wukꞌ, xinutoꞌo y xuya nuchuqꞌabꞌ chaꞌ wuma riꞌin xel utzijoxik ri Utzilaj Tzij y xkita kꞌu waꞌ ri tikawex re ukꞌiyal tinamit. Jekꞌulaꞌ xinkolobꞌex riꞌin chwa ri kamik, e pachaꞌ junoq xesax puchiꞌ juna koj.
2TI 4:18 Yey e ri Qanimajawal kinkolobꞌen chwach taq ri na utz taj y kinuchajij kꞌut chaꞌ kinopon na rukꞌ chilaꞌ chikaj pa kataqan wi. Xew kꞌu che Rire taqal wi lik kayak uqꞌij na jinta utaqexik. Amén.
2TI 4:19 Chayaꞌa rutzil kiwach ri Priscila y ri Aquila junam kukꞌ konoje ri e kꞌo pa rocho ri Onesíforo.
2TI 4:20 Ri Erasto xkanaj kan pa ri tinamit Corinto y ri Trófimo xinya kan pa ri tinamit Mileto ma lik yewaꞌ.
2TI 4:21 Matmayinik, e chatpeta tan echiriꞌ kꞌamajaꞌ kujeq ruqꞌijol echiriꞌ kꞌax tew y kꞌo jabꞌ. Kakiya pan rutzil awach ri Eubulo, ri Pudente, ri Lino, ri Claudia kukꞌ konoje ri hermanos e kꞌo wara.
2TI 4:22 Kꞌola kꞌu ri Qanimajawal Jesucristo awukꞌ. Ri unimal rutzil ukꞌuꞌx Rire kꞌola piwiꞌ iwonoje riꞌix. Amén.
TIT 1:1 Riꞌin in Pablo, in aj chak re ri Dios yey in taqoꞌn re ri Qanimajawal Jesucristo. Ri chak uyaꞌom chwe e kebꞌenutoꞌ ri ebꞌuchaꞌom Rire chaꞌ kakubꞌiꞌ kikꞌuꞌx rukꞌ, kaketaꞌmaj chi utz ri Qꞌijsaq y kebꞌin jusukꞌ chwach
TIT 1:2 chaꞌ jelaꞌ kakikubꞌaꞌ kikꞌuꞌx che ukꞌulik ri kikꞌaslemal na jinta utaqexik. Ma ri Dios xubꞌiꞌtisij lo wa kꞌaslemal echiriꞌ kꞌamajaꞌ kajeqer lo ruwachulew, y Rire na kuꞌan ta raqꞌubꞌal.
TIT 1:3 Yey echiriꞌ xopon ruqꞌijol re kaqꞌalajisax ri Utzilaj Tzij, ri Dios Qakolobꞌenel xuya panuqꞌabꞌ kantzijoj waꞌ chikiwach ri tikawex.
TIT 1:4 Kantzꞌibꞌaj kꞌu pan waꞌ wa carta chawe riꞌat Tito, ri paqatzij wi at pachaꞌ nukꞌajol chupa rubꞌiꞌ ri Cristo, ma junam ri kubꞌulibꞌal qakꞌuꞌx rukꞌ Rire. Chakꞌulu kꞌu ri unimal rutzil kꞌuꞌxaj, ri kꞌaxnaꞌbꞌal kꞌuꞌxaj y ri utzil chomal re ri Qaqaw Dios y re ri Qanimajawal Jesucristo Qakolobꞌenel.
TIT 1:5 Riꞌin xatinya kan chilaꞌ chupa ri isla Creta chaꞌ kayijbꞌaꞌ taq ri chaqal kan uꞌanik y kebꞌakoj kꞌu e aj wach pa riglesia chujujunal tinamit, jelaꞌ pachaꞌ ri ximbꞌiꞌij kan chawe.
TIT 1:6 E juna aj wach re riglesia lik chirajawaxik jusukꞌ rubꞌinik usilabꞌik chaꞌ na jinta kachꞌaꞌtibꞌen re. Kꞌola jusukꞌ rukꞌ ri rixoqil yey ri ralkꞌoꞌal chirajawaxik kikojom rubꞌiꞌ ri Cristo, e kojol tzij y na katataj ta kꞌu chike e aj mak o e titzꞌitaq.
TIT 1:7 Ekꞌu riꞌ ri yaꞌtal che kuꞌana aj kꞌamal kiwach rutinamit ri Dios, lik chirajawaxik e jusukꞌ rubꞌinik usilabꞌik chaꞌ na jinta kachꞌaꞌtibꞌen re, muꞌan nim chiribꞌil ribꞌ, na chꞌiꞌchꞌoj ta ukꞌuꞌx, na qꞌabꞌaꞌrel taj, na aj chꞌaꞌoj taj, na rayinel taj re puaq kachꞌak rukꞌ sokosoꞌnik.
TIT 1:8 Yey chebꞌukꞌulu chi utz taq ri kebꞌopon chirocho, chuyaꞌa ukꞌuꞌx che uꞌanik ri utz, lik chuchꞌobꞌo chi utz ri kuꞌano, chuꞌana ri lik jusukꞌ, lik chuyaꞌa ribꞌ puqꞌabꞌ ri Dios y lik churiqa uchajixik ribꞌ chwach ronoje ri na utz taj.
TIT 1:9 E chutaqej ri saqil Utzilaj Tzij re ri Dios kꞌutum chwach chaꞌ jelaꞌ kuriq kapixabꞌan rukꞌ chomilaj kꞌutunik y kukoj waꞌ pa kijolom ri tikawex, ri kakibꞌiꞌij na qatzij ta wa kꞌutunik.
TIT 1:10 Ma lik e kꞌi ri e titzꞌitaq, kakikꞌut ri na jinta uchak y e sokosoꞌnel. Y chike taq waꞌ e kꞌo ri lik kebꞌok il che ri retalil re circuncisión.
TIT 1:11 Maya kꞌu luwar chike waꞌ wa winaq kekꞌutunik, ma kakisachisaj kinaꞌoj ukꞌiyal familias rukꞌ ri kikꞌutunik. Rike xew kakaj kebꞌeyomar rukꞌ ri kꞌutunik kakiꞌano yey waꞌ lik kꞌixbꞌal uwach.
TIT 1:12 Ojertan kꞌo jun qꞌalajisanel aj Creta, jewaꞌ xubꞌiꞌij chwi rutinamit rire: “Ri e aj Creta lik xex wi e aj raqꞌul, pachaꞌ e itzel chikop, lik e japjatel y lik e xepuꞌabꞌ” xchaꞌ.
TIT 1:13 Yey ri xubꞌiꞌij waꞌ waꞌchi lik qatzij; e uwariꞌche chirajawaxik lik chachꞌaꞌbꞌej kipa chaꞌ ketikiꞌ chupa ri saqil kꞌutunik,
TIT 1:14 y jekꞌulaꞌ na kebꞌok ta il che taq ri tzijonik xa kimololem raj judiꞌabꞌ y na kebꞌok tane il che ri taqanik ke ri winaq kiyaꞌom kan ri Qꞌijsaq.
TIT 1:15 E junoq saqil runaꞌoj, ronoje ri chom chwach ri Dios, riꞌ e lik chom chwach rire. Noꞌj ri sachinaq runaꞌoj, ri na kukoj ta ri Qꞌijsaq, riꞌ ronoje lik chꞌul chwach ma chꞌul runaꞌoj y ri ranimaꞌ; y jekꞌulaꞌ na kunaꞌbꞌej taj saꞌ ri chom y saꞌ ri na chom taj.
TIT 1:16 Tobꞌ kubꞌiꞌij retaꞌam uwach ri Dios; pero rukꞌ ri kuꞌano, kaqꞌalajinik na retaꞌam ta uwach. Ma xaqi itzel ukꞌuꞌx, aj palajiy tzij y na jinta kꞌana utz kuꞌan chwach ri Dios.
TIT 2:1 Noꞌj riꞌat Tito, lik chirajawaxik e ronoje ri kakꞌutu xaqi junam rukꞌ ri saqil kꞌutunik re ri Dios.
TIT 2:2 Chebꞌapixabꞌaj rachijabꞌ e nimaq winaq chik chaꞌ kakichꞌobꞌ chi utz janipa ri kakiꞌano, kakichajij chi utz ri kibꞌinik kisilabꞌik chikiwach ri jujun chik, kakichajij kibꞌ chaꞌ na ketzaq ta pa mak, yey e saqil ri kubꞌulibꞌal kikꞌuꞌx, ri rutzil kikꞌuꞌx y ri unimal kikꞌuꞌx.
TIT 2:3 Yey chabꞌiꞌij chike rixoqibꞌ e nimaq winaq chik: Kꞌola xiꞌin ibꞌ kukꞌ chwach ri Dios chwi ri kibꞌinik kisilabꞌik, mebꞌuꞌan e aj molot, makiya kibꞌ che qꞌabꞌarik, e cheqꞌilon chwi ri utz.
TIT 2:4 Kikꞌutu kꞌu chike ri e kꞌakꞌal ixoqibꞌ chaꞌ kꞌax kekinaꞌ ri kachijil y ri kalkꞌoꞌal,
TIT 2:5 kakichajij kibꞌ chaꞌ na ketzaq ta pa mak y jelaꞌ chom ri kibꞌinik kisilabꞌik, kechakun chi utz pa ja, kakikꞌut ri rutzil kikꞌuꞌx y kakitaqej ri kachijil. Kakiꞌan kꞌu ronoje waꞌ chaꞌ jelaꞌ na jinta junoq tzel kachꞌaꞌt chirij Rutzij Upixabꞌ ri Dios.
TIT 2:6 Chabꞌiꞌij kꞌu chike ralabꞌo kakichajij kibꞌ chaꞌ na ketzaq ta pa mak.
TIT 2:7 Yey riꞌat Tito, e chakꞌutu ri utz chikiwach rukꞌ ri saqil abꞌinik asilabꞌik chwi ronoje ri kaꞌano. Chatkꞌutun chi jusukꞌ rukꞌ saqil naꞌoj
TIT 2:8 y rukꞌ utzilaj chꞌaꞌtem chaꞌ jelaꞌ we kꞌo junoq kachꞌaꞌt chawij, utukel kuya ukꞌix ma na jinta mak kariqitaj chawij.
TIT 2:9 Yey chebꞌapixabꞌaj raj chakibꞌ chaꞌ kakinimaj kitzij ri kajaw, kakiꞌan chi utz ronoje chaꞌ ri kajaw kekiꞌkot kukꞌ y na kekꞌulilaꞌn taj.
TIT 2:10 Makiꞌan ne kiꞌke che rubꞌitaq re ri kajaw; e kiꞌana ronoje chi jusukꞌ chaꞌ jelaꞌ kaqꞌalajinik lik chom ri kꞌutunik re ri Dios Qakolobꞌenel.
TIT 2:11 Ma ri Dios uqꞌalajisam chi ri unimal rutzil ukꞌuꞌx chaꞌ konoje ri tikawex kekolobꞌetajik.
TIT 2:12 Ekꞌu riꞌ ri unimal rutzil ukꞌuꞌx ri Dios kꞌutuyum chiqe saꞌ uꞌanik kaqaya kan ronoje mak y ronoje ri rayibꞌal na utz ta uwach, yey e kꞌutuyum chiqe chirajawaxik kaqachꞌobꞌ chi utz ri kaqaꞌano chaꞌ waqꞌij ora kojbꞌin jusukꞌ rukꞌ jun saqil bꞌinik silabꞌik chwach ri Dios.
TIT 2:13 Lik chirajawaxik kaqaꞌan waꞌ y kaqakubꞌaꞌ pana qakꞌuꞌx che ri chomilaj qꞌij re kiꞌkotemal echiriꞌ kakꞌun tanchi ri Dios Qajawxel, ri Qakolobꞌenel Jesucristo.
TIT 2:14 Rire xuya ribꞌ pa kamik quma riꞌoj, xojuloqꞌo chaꞌ kojresaj che ronoje ri na utz taj, kuchomaj ri qabꞌinik qasilabꞌik y jelaꞌ kojuꞌan oj utinamit lik qayaꞌom qibꞌ che uꞌanik chomilaj taq chak.
TIT 2:15 E chakꞌutuꞌ janipa taq wa ximbꞌiꞌij chawe; chatpixabꞌan chi utz y chachꞌaꞌbꞌej kipa taq ri kakiꞌan ri na utz taj. Chaꞌana kꞌu waꞌ ma paqꞌabꞌ riꞌat yaꞌtal wi kaꞌano; maya kꞌu luwar che junoq kukꞌaq bꞌi aqꞌij.
TIT 3:1 Chakuxtaj chike konoje ri kikojom rubꞌiꞌ ri Qanimajawal Jesucristo, lik chirajawaxik e kakinimaj y kakitaqej ri kakibꞌiꞌij ri e taqanelabꞌ y ri e aj qꞌatal tzij re ri tinamit yey kakiya kibꞌ che uꞌanik janipa taq ri utz.
TIT 3:2 Chabꞌiꞌij chike mechꞌaꞌt chirij junoq, mechꞌoꞌjinik; kikꞌutu ri rutzil kikꞌuꞌx y kiꞌana chꞌutiꞌn che kibꞌ chikiwach konoje taq ri tikawex.
TIT 3:3 Ma e riꞌoj rojertan echiriꞌ kꞌamajaꞌ ne kaqakoj rubꞌiꞌ ri Cristo, na jinta qanaꞌoj, oj titzꞌitaq, oj sachinaq, qayaꞌom qibꞌ puqꞌabꞌ ronoje ri rayinik y ruqusil ruwachulew, lik kꞌo retzelal qakꞌuꞌx, lik tzel kojilik y tzel kaqil qibꞌ chiqawach.
TIT 3:4 Na rukꞌ ta kꞌu riꞌ, ri Dios Qakolobꞌenel xukꞌut ri relej ukꞌuꞌx y ri rutzil ukꞌuꞌx chike konoje ri tikawex che ruwachulew.
TIT 3:5 Xojukolobꞌej kꞌu riꞌ, na ruma ta juna chak lik utz qaꞌanom, ma e ruma ri kꞌaxnaꞌbꞌal ukꞌuꞌx chiqe. Xojuchꞌaj kꞌu che ri qamak chaꞌ kuya jun kꞌakꞌ kꞌaslemal chiqe y xuya ri Santowilaj Ruxlabꞌixel pa qanimaꞌ chaꞌ kujalkꞌatij ri qabꞌinik qasilabꞌik.
TIT 3:6 Ruma ri Qakolobꞌenel Jesucristo, ri Dios xuya ri Ruxlabꞌixel chiqe yey ¡lik nim rutoꞌbꞌal Rire qukꞌ!
TIT 3:7 Uꞌanom kꞌu jusukꞌ chiqe ruma ri unimal rutzil ukꞌuꞌx chaꞌ kaqakꞌul na ri qoyeꞌem, waꞌ e ri qakꞌaslemal na jinta utaqexik.
TIT 3:8 Waꞌ wa kambꞌiꞌij pan chawe lik qatzij yey lik kuaj katok il che ukꞌutik waꞌ chike konoje ri kikojom rubꞌiꞌ ri Dios chaꞌ kakitijoj kibꞌ che uꞌanik ri utz. Ma taq waꞌ wa kꞌutunik lik areꞌ y lik kꞌo kutiqoj chike konoje ri tikawex che ruwachulew.
TIT 3:9 Maꞌan kꞌu aweꞌat kukꞌ taq ri kakichapalaꞌ kibꞌ rukꞌ taq chꞌaꞌtem na jinta uchak, ri kakichololej kibꞌiꞌ ri katiꞌ-kimam re ojertan y ri kechꞌoꞌjin puwi ri tzijpixabꞌ ke ri aj judiꞌabꞌ. Ma ronoje taq waꞌ na jinta keꞌelawi y na jinta kutiqoj.
TIT 3:10 We kꞌo kꞌu junoq kujach kipa taq rutinamit ri Dios, chachꞌaꞌbꞌej upa julajoq o kalajoq. Noꞌj we lik na kukoj ta kꞌu tzij, mawachbꞌilaj chik.
TIT 3:11 Awetaꞌam e junoq kujach upa rutinamit ri Dios, yojtajinaq runaꞌoj y mak ri kuꞌano. Yey ruma kꞌu rumak, utukel utzukum qꞌatbꞌal tzij chirij.
TIT 3:12 Echiriꞌ kantaq ri Artemas o ri Tíquico awukꞌ, chawilij katpetik chaꞌ koꞌlqariqa qibꞌ wara Nicópolis, ma nuchꞌobꞌom chik kinkꞌojiꞌ wara chupa ruqꞌijol echiriꞌ lik kꞌax tew y kꞌo jabꞌ.
TIT 3:13 Kambꞌiꞌij chawe lik chatoꞌo ri Zenas, ri aj kꞌutunel re ri tzijpixabꞌ yey chatoꞌo ri Apolos. Chayaꞌa kꞌu chike ronoje taq ri kajawax che ri kibꞌenam chaꞌ kakimaj bꞌi kibꞌe.
TIT 3:14 Lik chirajawaxik kꞌu chike konoje ri e qukꞌil riꞌoj, ri kikojom rubꞌiꞌ ri Cristo, kakimaj uꞌanik ri utz y kekitoꞌ kꞌu taq ri kꞌo kajawax chike chaꞌ jelaꞌ kꞌo kutiqoj ri kibꞌinik kisilabꞌik.
TIT 3:15 Konoje taq ri e kꞌo wara wukꞌ, kakiya pan rutzil awach. Y riꞌat chayaꞌa rutzil kiwach ri kikojom rubꞌiꞌ ri Dios, ri kꞌax kojkinaꞌo. Chikꞌulu kꞌu iwonoje riꞌix ri unimal rutzil ukꞌuꞌx ri Dios. Amén.
PHM 1:1 Riꞌin in Pablo, in kꞌo pa cárcel ruma kintzijon puwi ri Qanimajawal Jesucristo. Junam rukꞌ ri hermano Timoteo kaqataq bꞌi wa carta cheꞌla Filemón, ri na loqꞌ ta kꞌax kanaꞌw e la yey lal qachbꞌiꞌil chupa ruchak ri Dios.
PHM 1:2 Kaqaya pan rutzil kiwach ri hermana Apia y ri hermano Arquipo, ri qachbꞌiꞌil lik uyaꞌom ribꞌ che uꞌanik ruchak ri Dios, yey kaqaya pan rutzil kiwach ri hermanos kakimol kibꞌ pa ocho la.
PHM 1:3 Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
PHM 1:4 Echiriꞌ kanꞌan orar, xaqi kakꞌun la chi nukꞌuꞌx y kintioxin kꞌu che ri Nuqaw Dios uma rilal.
PHM 1:5 Ma nutom lik kꞌax kanaꞌ la ri Qanimajawal Jesucristo y lik kubꞌul kꞌuꞌx la rukꞌ yey kakꞌut la ri rutzil kꞌuꞌx la chike konoje ri kikojom rubꞌiꞌ.
PHM 1:6 Ekꞌu ri kuaj riꞌin e ketaꞌmaj la ronoje ri utz yaꞌtal paqaqꞌabꞌ kaqaꞌano ruma xa oj jun rukꞌ ri Cristo, chaꞌ jelaꞌ ri kubꞌulibꞌal kꞌuꞌx la rukꞌ Rire kꞌo kutiqoj chike jujun chik.
PHM 1:7 Hermano, riꞌoj lik kojkiꞌkotik y lik nimarinaq qakꞌuꞌx ruma ri rutzil kꞌuꞌxaj kꞌutum la chike ri kikojom rubꞌiꞌ ri Cristo, ma rukꞌ waꞌ kowirinaq kikꞌuꞌx rike.
PHM 1:8 E uwariꞌche, kꞌo kuaj kantzꞌonoj ko cheꞌla. Tobꞌ ri Cristo uyaꞌom panuqꞌabꞌ riꞌin kantaq la che uꞌanik ri lik ubꞌe, na kanꞌan ta waꞌ;
PHM 1:9 ekꞌu ri kanꞌano e kinelaj ko cheꞌla ruma ri rutzil kꞌuꞌx la wukꞌ. Riꞌin in Pablo, in chi nimalaj winaq, yey woꞌora in kꞌo pa cárcel ruma kintzijon puwi ri Cristo;
PHM 1:10 kinchꞌaw ko chiwach la puwi ri Onésimo. Rire woꞌora e nukꞌajol chupa rubꞌiꞌ ri Cristo, ma wuma riꞌin, rire xukoj rubꞌiꞌ ri Cristo wara pa wa cárcel.
PHM 1:11 E ri petinaq loq, ri Onésimo e jun aj chak la na xuꞌan ta utzilaj toꞌbꞌel cheꞌla, noꞌj woꞌora e jun utzilaj toꞌbꞌel che rilal y jenelaꞌ chwe riꞌin.
PHM 1:12 Rire lik ukꞌuꞌx wanimaꞌ; na rukꞌ ta kꞌu riꞌ, kantaq tanchi ubꞌi cheꞌla,
PHM 1:13 tobꞌ lik kuaj riꞌin kakꞌojiꞌ wukꞌ pakꞌaxel rilal chaꞌ kinutoꞌo janipa chi qꞌij in kꞌo pa cárcel ruma kantzijoj ri Utzilaj Tzij.
PHM 1:14 Pero na jinta kꞌo xuaj xinꞌan xa chirij wiꞌ la. We kaꞌan la wa kantzꞌonoj cheꞌla, na kuaj taj kaꞌan la waꞌ ruma kantaq la che, ma e ri kuaj riꞌin e kaꞌan la waꞌ ruma lik kalax pa animaꞌ la.
PHM 1:15 Laj kꞌo ne xutiqoj ri xrikꞌowibꞌej ri Onésimo, ma tobꞌ rire xel ukꞌ la jujun qꞌij, ekꞌu riꞌ woꞌora na xa ta chi ajilam qꞌij kakꞌojiꞌ ukꞌ la
PHM 1:16 re toꞌbꞌel e la, yey rire e jun hermano na loqꞌ ta kꞌax kanaꞌw re. Riꞌin lik kꞌax kannaꞌo yey woꞌora más ne kꞌax kanaꞌ rilal, ma e toꞌbꞌel e la, yey rilal rukꞌ rire chaqꞌ ibꞌ alaq chupa rubꞌiꞌ ri Qanimajawal.
PHM 1:17 E uwariꞌche, we kunaꞌ kꞌuꞌx la junam qachbꞌiꞌil qibꞌ chupa ruchak ri Qanimajawal Jesucristo, kꞌulu kꞌu la ri Onésimo pachaꞌ e riꞌin ri kinkꞌul la.
PHM 1:18 We rire kꞌo uꞌanom cheꞌla o we kꞌo ukꞌas ukꞌ la, kojo la wa kꞌas pa nubꞌiꞌ riꞌin y jelaꞌ kantoj cheꞌla.
PHM 1:19 Riꞌin in Pablo, in kintzꞌibꞌan re waꞌ rukꞌ ri nuqꞌabꞌ: In kintojow re rukꞌas. Na kajawax tane kꞌut kankuxtaj ri kꞌas rilal wukꞌ riꞌin, ma wuma riꞌin xriq la ri kꞌaslemal chwach ri Dios, tobꞌ waꞌ na kantzꞌonoj taj katoj la chwe.
PHM 1:20 Hermano, ruma kꞌax kanaꞌ la ri Qanimajawal; ꞌana ko la wa kantzꞌonoj cheꞌla. Nimarisaj kꞌu la ri nukꞌuꞌx rukꞌ wa kaꞌan la che ri Onésimo.
PHM 1:21 Kintzꞌibꞌan pan ukꞌ la rukꞌ kubꞌulibꞌal nukꞌuꞌx, ma wetaꞌam kikꞌow ne uwiꞌ ri kaꞌan la chwa wa kantzꞌonoj cheꞌla.
PHM 1:22 Yijbꞌaꞌ kꞌu pan la juna luwar pa kinkꞌojiꞌ wi, ma kubꞌul nukꞌuꞌx kinopon tanchi ukꞌ la, we ri Dios kuya luwar kinel bꞌi pa wa cárcel pachaꞌ ri tzꞌonom alaq panuwiꞌ chwach Rire.
PHM 1:23 Ri Epafras, ri wachbꞌiꞌil wara pa oj tzꞌapil wi ruma oj re ri Qanimajawal Jesucristo, kuya pan rutzil wach la.
PHM 1:24 Jenelaꞌ, kakiya pan rutzil wach la ri Marcos, ri Aristarco, ri Demas y ri Lucas, ri e wachbꞌiꞌil chupa ruchak ri Qaqaw.
PHM 1:25 Kꞌola kꞌu pa animaꞌ alaq ri unimal rutzil ukꞌuꞌx ri Qanimajawal Jesucristo. Amén.
HEB 1:1 Rojertan ri Dios ukꞌiyal laj xuqꞌalajisaj Rutzij chike ri qatiꞌ-qamam kuma ri qꞌalajisanelabꞌ, yey ri qꞌalajisanelabꞌ ukꞌiyal uwach ri qꞌalajisanik xkiꞌan chikiwach ri tinamit.
HEB 1:2 Chupa kꞌu wa kꞌisbꞌal qꞌij oj kꞌo wi, ri Dios xuqꞌalajisaj ribꞌ ruma Rukꞌajol. Yey ruma Rukꞌajol xuꞌan ronoje taq ri kꞌolik, puqꞌabꞌ Rukꞌajol uyaꞌom wi ronoje
HEB 1:3 y che Rukꞌajol kilitaj wi runimal uwach uqꞌij ri Dios. Jekꞌuriꞌlaꞌ, rukꞌuꞌx ri Dios e junam rukꞌ rukꞌuꞌx Rukꞌajol, ri Jun chapayom re ronoje taq ri kꞌolik rukꞌ ruchuqꞌabꞌ Ruchꞌaꞌtem. Ekꞌuchiriꞌ uchꞌajom chi ri qamak, xeꞌtzꞌula puwikiqꞌabꞌ ri Dios chilaꞌ chikaj.
HEB 1:4 Rukꞌajol ri Dios más kꞌo uwach chikiwa ri ángeles, ma che Rire xyaꞌiꞌ wi jun bꞌiꞌaj más kꞌo uwach chwa ri bꞌiꞌaj ke ri ángeles.
HEB 1:5 Yey ri Dios na xubꞌiꞌij ta kꞌana waꞌ che juna ángel: Riꞌat at Nukꞌajol yey Riꞌin in Aqaw; waqꞌij kꞌu riꞌ kanqꞌalajisaj waꞌ. Yey na jewaꞌ tane xubꞌiꞌij puwi juna ángel: Riꞌin kinuꞌan in Uqaw Rire yey Rire kuꞌan Nukꞌajol Riꞌin.
HEB 1:6 Yey ri Dios echiriꞌ xutaq lo Rukꞌajol che ruwachulew, jewaꞌ xubꞌiꞌij: «Konoje ri ángeles re ri Dios kiloqꞌnimaj uqꞌij Rire» xchaꞌ.
HEB 1:7 Paqatzij wi ri Dios jewaꞌ kubꞌiꞌij pakiwi ri ángeles: Rire kuꞌan chike ru ángeles e aj chakibꞌ re Rire, e pachaꞌ tew kawelelik y pachaꞌ urepebꞌal aqꞌ kachaꞌ.
HEB 1:8 Noꞌj kꞌu chwi Rukꞌajol jewaꞌ kubꞌiꞌij: Rilal, Lal Dios yey ri taqanik la na jinta utaqexik y ri qꞌatbꞌal tzij e la, lik jusukꞌ.
HEB 1:9 E lik kukꞌul kꞌuꞌx la ri lik jusukꞌ yey lik tzel kil la ri mak. E uwariꞌche ri Dios, ri Dios e la, xuchaꞌ lo la y xuya unimal kiꞌkotemal cheꞌla; ekꞌu más nim ri kiꞌkotemal xyaꞌ cheꞌla chwa ri kiꞌkotemal xyaꞌ chike ri jujun chik kachaꞌ.
HEB 1:10 Yey je tanchi waꞌ kubꞌiꞌij: Rilal, Lal Qajawal, che ri jeqebꞌal loq Lal xyijbꞌan re ruwachulew; y Lal ꞌanayom re ruwa kaj rukꞌ ri qꞌabꞌ la.
HEB 1:11 Ronoje waꞌ, xa kakꞌisik, noꞌj Rilal na jinta ukꞌisik ri kꞌaslemal la. Ri kaj y ruwachulew xa kajarik jelaꞌ pachaꞌ kuꞌan ri qaqꞌuꞌ.
HEB 1:12 Yey Rilal kajalkꞌatij la ri kaj y ruwachulew, jelaꞌ pachaꞌ kuꞌan junoq echiriꞌ kujal ruqꞌuꞌ: karesaj ruqꞌuꞌ qꞌeꞌl, kubꞌusu y kukoj ri kꞌasaq. Noꞌj Rilal na kajalkꞌatitaj ta wach la y na jinta utaqexik ri qꞌij la kachaꞌ.
HEB 1:13 Ekꞌu ri Dios na xubꞌiꞌij ta kꞌana waꞌ che juna ángel: Chat-tzꞌula pa nuwikiqꞌabꞌ, y chawoyeꞌej na ri qꞌij echiriꞌ kebꞌenuya ri tzel kebꞌilow awe chuxeꞌ rawaqan.
HEB 1:14 ¿Saꞌ kꞌu riꞌ ri kiwach taq ri ángeles? E aj chakibꞌ kakiloqꞌnimaj ri Dios yey etaqom lo che kitoꞌik ri kekꞌuluw ri kolobꞌetajik re ri Dios.
HEB 2:1 Ri Jesús e más kꞌo uwach chikiwa ri ángeles; ruma kꞌu riꞌ, lik chirajawaxik e más kojok il che utaqexik ri Utzilaj Tzij qatom chwi Rire, chaꞌ jelaꞌ na kaqesaj ta qibꞌ chirij ri Qꞌijsaq.
HEB 2:2 Ma lik jikil uwach Rutzij ri Dios, ri xtzijox ojertan kuma ri ángeles; konoje kꞌu ri xemakun chirij y xkipalajij waꞌ wa Tzij, lik taqal chike janipa ri qꞌatbꞌal tzij xkikꞌulu.
HEB 2:3 We ekꞌu xkikꞌulumaj waꞌ rike, ¿suꞌanik kꞌu riꞌ kojkolobꞌetaj riꞌoj we na kojok ta il che wa unimal kolobꞌetajik? Ma nabꞌe na e ri Qanimajawal Jesucristo ri xtzijon puwi wa kolobꞌetajik; tekꞌuchiriꞌ ri xetaw re, lik xkijikibꞌaꞌ kan uwach waꞌ chiqe riꞌoj.
HEB 2:4 Ekꞌu ri Dios lik ujikibꞌam kan uwach waꞌ rukꞌ nimaq taq kꞌutubꞌal re ruchuqꞌabꞌ, rukꞌ ukꞌiyal uwach milagros y rukꞌ taq ri toꞌbꞌal yaꞌtal chiqajujunal ruma ri Ruxlabꞌixel ri Dios, yey puqꞌabꞌ kꞌu ri Dios kꞌo wi china chike kuya taq wi waꞌ.
HEB 2:5 Puwi kꞌu wa kojtajin che ubꞌiꞌxikil, ri Dios uchꞌobꞌom chik na kuya ta pakiqꞌabꞌ ri ángeles ketaqan chwi ri kꞌakꞌ uwachulew chiqawach apanoq.
HEB 2:6 Kꞌo kꞌu jun jewaꞌ xubꞌiꞌij chupa Ruchꞌaꞌtem ri Dios: ¿Saꞌ ruwach rachi chaꞌ Rilal kakuxtaj la? ¿Saꞌ ruwach ri ralkꞌoꞌal ri tikawex chaꞌ lik kok la il chike?
HEB 2:7 Xꞌan la che rachi xa jubꞌiqꞌ chi xraj kajunimax uwach kukꞌ ri ángeles. Lik xyak la uqꞌij, xya la che lik kꞌo uwach y xya la puqꞌabꞌ kataqan puwi janipa ri xꞌan la che ruwachulew.
HEB 2:8 E taq kꞌu riꞌ ri kꞌolik, xya la ronoje puqꞌabꞌ xchaꞌ. Ronoje kꞌu ri kꞌolik kakꞌojiꞌ puqꞌabꞌ, ma e xraj riꞌ ri Dios; na jinta ne kꞌo xuya kan ri Dios we na kayaꞌiꞌ ta puqꞌabꞌ. Na rukꞌ ta kꞌu riꞌ, kaqilo kꞌamajaꞌ ne kakꞌojiꞌ ronoje puqꞌabꞌ.
HEB 2:9 Yey echiriꞌ ri Jesús xuꞌan tikawex, e xqaj uwach uqꞌij chikiwa ri ángeles. Ekꞌu ri Dios ruma ri unimal rutzil ukꞌuꞌx, xuya luwar che ri Jesús xikꞌow chupa ri kamik pakikꞌaxel konoje ri tikawex. Ruma kꞌu wa kꞌaxkꞌobꞌik xrikꞌowibꞌej, woꞌora más kꞌo uwach y más yakom uqꞌij.
HEB 2:10 Ri Dios e ꞌanayom re y e chapayom re ronoje ri kꞌolik. Yey lik xajawax kꞌu ri kꞌaxkꞌolil xrikꞌowibꞌej ri Jesús, ri kayaꞌw re ri kolobꞌetajik, ma ruma waꞌ ri Dios xutzꞌaqatisaj uwach ruchak ri Jesús chaꞌ jelaꞌ kebꞌukꞌam bꞌi ukꞌiyal ralkꞌoꞌal ri Dios chilaꞌ chikaj.
HEB 2:11 Ri Dios e Uqaw ri Qanimajawal Jesucristo, ri kayaꞌw ri santowilaj bꞌinik; yey e mismo Qaqaw riꞌoj, ri oj kꞌo chi che ri santowilaj bꞌinik. Ruma kꞌu laꞌ, ri Jesús na kakꞌix taj kubꞌiꞌij chiqe riꞌoj, oj uchaqꞌ Rire.
HEB 2:12 Ma jewaꞌ kubꞌiꞌij chupa Ruchꞌaꞌtem ri Dios: Kantzijoj ri bꞌiꞌ la chikiwach ri e watz-nuchaqꞌ, Kambꞌixoj ri bꞌiꞌ la chikixoꞌl ri tinamit la echiriꞌ kimolom kibꞌ.
HEB 2:13 Je tanchi waꞌ kubꞌiꞌij: Riꞌin lik kankubꞌaꞌ nukꞌuꞌx rukꞌ ri Dios. Yey je tanchi waꞌ kubꞌiꞌij: Riꞌin in kꞌo kukꞌ ri e ralkꞌoꞌal ri Dios, ri ebꞌuyaꞌom Rire chwe kachaꞌ.
HEB 2:14 Qonoje ri oj tikawex qeqam qulewal qapoqlajil. Ekꞌu ri Jesús xuꞌan tikawex pachaꞌ riꞌoj, chaꞌ jelaꞌ kikꞌow chupa ri kamik paqakꞌaxel riꞌoj y rukꞌ waꞌ e xuchꞌij uchuqꞌabꞌ ri jun xkꞌojiꞌ uchuqꞌabꞌ re kakamisanik, waꞌ e ritzel winaq.
HEB 2:15 Xkꞌun kꞌu ri Cristo chaꞌ kebꞌeresaj lo konoje ri chwi kalaxik loq e kꞌo puqꞌabꞌ ri xiꞌin ibꞌ ruma ri kamik.
HEB 2:16 Ma paqatzij wi Rire na xkꞌun ta che kitoꞌik ri ángeles, ma e xkꞌun che qatoꞌik ri oj ralkꞌoꞌal kan ri Abraham.
HEB 2:17 Jekꞌulaꞌ lik xajawaxik ri Jesús xuꞌana junam uwach qukꞌ riꞌoj, ri qachaqꞌ qibꞌ rukꞌ Rire, chaꞌ jelaꞌ e kuꞌana Qajawal, ri kuꞌan jusukꞌ ruchak chwach ri Dios, yey rukꞌ kꞌaxnaꞌbꞌal ukꞌuꞌx kachꞌaw paqawiꞌ y ruma kꞌu Rire, ri Dios kukuy ri qamak qonoje ri oj utinamit.
HEB 2:18 Ruma kꞌu xikꞌow Rire pa kꞌax y xkꞌam upa, jekꞌulaꞌ woꞌora lik kꞌo uchuqꞌabꞌ re kojutoꞌo echiriꞌ kakꞌam qapa riꞌoj.
HEB 3:1 E uwariꞌche hermanos, kambꞌiꞌij che alaq, ri yaꞌom chi ibꞌ alaq puqꞌabꞌ ri Dios yey chaꞌtal lo alaq ruma Rire chaꞌ keꞌkꞌola alaq rukꞌ Rire chilaꞌ chikaj: Lik chꞌobꞌo kꞌu alaq puwi ri Cristo Jesús, ri Taqoꞌn re ri Dios y ri Qajawal kachꞌaw paqawiꞌ chwach ri Dios.
HEB 3:2 Ma ri Jesús lik jusukꞌ ri xuꞌan chwach ri Dios, ri xtaqaw lo re che wa chak, jelaꞌ pachaꞌ ri Moisés lik jusukꞌ xukꞌam kiwach rutinamit ri Dios.
HEB 3:3 Noꞌj ri Jesús e más kꞌo yakbꞌal uqꞌij chwa ri Moisés, jelaꞌ pachaꞌ ri kayakaw juna ja e más kꞌo yakbꞌal uqꞌij chwa ri ja kuyako.
HEB 3:4 Ma ronoje ja ꞌanatal ruma juna achi, pero ri ꞌanayom re ronoje ri kꞌolik e ri Dios.
HEB 3:5 Ri Moisés e jun aj chak lik jusukꞌ ma xukꞌam kiwach chi utz rutinamit ri Dios yey xutzijoj puwi ri kuqꞌalajisaj na ri Dios chiqawach apanoq.
HEB 3:6 Noꞌj ri Cristo na xa ta e jun raj chak ri Dios, ma e Ukꞌajol y ruma waꞌ kataqan puwi ri Rocho Dios. Yey ri Rocho Dios e riꞌoj oj utinamit, we e laꞌ lik tikil chi utz ri kubꞌulibꞌal qakꞌuꞌx rukꞌ y rukꞌ kiꞌkotemal qoyeꞌem ri kuya ri Dios chiqe chiqawach apanoq.
HEB 3:7 E uwariꞌche, ri Santowilaj Ruxlabꞌixel ri Dios kubꞌiꞌij che alaq: We kita riꞌix waqꞌij ora janipa ri kubꞌiꞌij ri Dios chiwe,
HEB 3:8 miꞌan ko che ri iwanimaꞌ jelaꞌ pachaꞌ ri xkiꞌan ri tinamit ojertan echiriꞌ xkiꞌan kititzꞌitikil y xkikꞌam upa ri Dios chupa ri luwar katzꞌintzꞌotik.
HEB 3:9 Ruma waꞌ ri Dios xubꞌiꞌij chike: Chilaꞌ kꞌu riꞌ, riwatiꞌ-imam xkitij wi nuqꞌij y xkikꞌam nupa, tobꞌ ne pa cuarenta junabꞌ xkil ronoje ri kꞌutubꞌal re ri nuchuqꞌabꞌ xinꞌan Riꞌin chikiwach.
HEB 3:10 Ruma kꞌu ri xkiꞌano, lik xpe woyowal chikij y jewaꞌ ximbꞌiꞌij: “Rike xaqi na tikil ta chi utz ri kanimaꞌ y na xkaj taj kaketaꞌmaj ri nubꞌe.”
HEB 3:11 E uwariꞌche, ruma woyowal lik xinjikibꞌaꞌ uwach: “Rike na kebꞌok ta kꞌana pa ri uxlanem kanya Riꞌin.”
HEB 3:12 Tape kꞌu alaq hermanos, lik chajij ibꞌ alaq chaꞌ na jinta junoq che alaq kuꞌan itzel ukꞌuꞌx y na kukoj ta chi utzij ri Dios y jekꞌulaꞌ karesaj ribꞌ chirij ri Dios kꞌaslik.
HEB 3:13 E ri ꞌana alaq e lik pixabꞌaj ibꞌ alaq chiwach alaq ronoje qꞌij, xaloqꞌ kꞌa kꞌo paqꞌabꞌ alaq kaꞌan alaq waꞌ, chaꞌ na jinta junoq che alaq kuꞌan ko che ri ranimaꞌ ruma ri sokosoꞌnik re ri mak.
HEB 3:14 Ma riꞌoj ꞌanom xa jun chiqe rukꞌ ri Cristo we e laꞌ e tikil chi utz ri kubꞌulibꞌal qakꞌuꞌx rukꞌ Rire; ekꞌu pachaꞌ xqajeqebꞌej loq echiriꞌ xqakoj rubꞌiꞌ, jekꞌulaꞌ chirajawaxik kaqakꞌisbꞌej wi.
HEB 3:15 Ruma kꞌu waꞌ, ri Dios kuya wa pixabꞌanik: We kita riꞌix waqꞌij ora janipa ri kubꞌiꞌij ri Dios chiwe, miꞌan ko che ri iwanimaꞌ jelaꞌ pachaꞌ ri xkiꞌan ri tinamit ojertan echiriꞌ xkiꞌan kititzꞌitikil kachaꞌ.
HEB 3:16 ¿China kꞌu ri xetaw re ruqul ri Dios yey tekꞌuchiriꞌ xkipetisaj royowal rukꞌ ri kititzꞌitikil? ¿Na e ta nebꞌa konoje ri xebꞌeresaj lo ri Moisés chilaꞌ Egipto?
HEB 3:17 ¿Yey china kukꞌ xpe wi royowal ri Dios laꞌ la cuarenta junabꞌ? ¿Na e ta nebꞌa kukꞌ ri xemakun chirij? Yey ruma waꞌ xekamik y ri kicuerpos xemuq kan chupa ri luwar katzꞌintzꞌotik.
HEB 3:18 ¿China kꞌu chike xujikibꞌaꞌ wi uwach ri Dios na kebꞌok ta pa ri uxlanem kuya Rire? ¿Na e ta nebꞌa chike ri xkipalajij Rutzij Rire?
HEB 3:19 Lik qꞌalaj kꞌu riꞌ, na xyaꞌ ta chike rike kebꞌok pa ri uxlanem kuya ri Dios ruma na jinta kubꞌulibꞌal kikꞌuꞌx rukꞌ Rire.
HEB 4:1 Kꞌa waqꞌij ora, ri Dios kubꞌiꞌtisij ri uxlanem kuya Rire. Ruma riꞌ, lik chajij ibꞌ alaq ma kꞌaxtaj kꞌo junoq che alaq na kopon ta che wa uxlanem.
HEB 4:2 Ma riꞌoj lik qatom ri Utzilaj Tzij puwi ri uxlanem kuya ri Dios. Jenelaꞌ rutinamit ri Dios ojertan xkita puwi ri uxlanem ubꞌiꞌtisim ri Dios chike; pero na jinta xutiqoj ri xkito, ma na xkikꞌul ta waꞌ rukꞌ kubꞌulibꞌal kꞌuꞌxaj.
HEB 4:3 Noꞌj we riꞌoj qakojom ri Utzilaj Tzij, kojok kꞌu riꞌ pa ri uxlanem kuya ri Dios. Ma jewaꞌ xubꞌiꞌij Rire pa Ruchꞌaꞌtem: E uwariꞌche, ruma woyowal lik xinjikibꞌaꞌ uwach waꞌ: “Rike na kebꞌok ta kꞌana pa ri uxlanem kanya Riꞌin” xchaꞌ. Yey chwi lo echiriꞌ ri Dios xuꞌan ruwachulew, xukꞌis uꞌanik ruchak.
HEB 4:4 Ma chupa Ruchꞌaꞌtem ri Dios jewaꞌ tzꞌibꞌital kan chwi ruwuq qꞌij: Chupa ruwuq qꞌij ri Dios xuxlan che ri chak xuꞌano.
HEB 4:5 Kambꞌiꞌij tanchi kꞌu ri kubꞌiꞌij ri Dios pa Ruchꞌaꞌtem puwi wa uxlanem: «Rike na kebꞌok ta kꞌana pa ri uxlanem kanya Riꞌin» kachaꞌ.
HEB 4:6 Ma e taq ri nabꞌe xkita ri Utzilaj Tzij puwi ri uxlanem ubꞌiꞌtisim ri Dios chike, na xebꞌok ta pa ri luwar re uxlanem ruma xkipalajij utzij Rire. Yey e kꞌo ne ri kꞌamajaꞌ kebꞌok pa ri uxlanem kuya ri Dios.
HEB 4:7 E uwariꞌche, ri Dios uqꞌatom uqꞌijol echiriꞌ kubꞌiꞌtisij tanchi wa uxlanem chike ri tikawex, yey waꞌ e “waqꞌij ora”. Ma ukꞌiyal junabꞌ ikꞌowinaq chik echiriꞌ ri rey David jewaꞌ xutzꞌibꞌaj kan pa Ruchꞌaꞌtem ri Dios: We kita riꞌix waqꞌij ora janipa ri kubꞌiꞌij ri Dios chiwe, miꞌan ko che ri iwanimaꞌ xchaꞌ.
HEB 4:8 We ta e laꞌ ri Josué asu xuya ri uxlanem chike ri tinamit, ri Dios na uqꞌatom ta chi juna chik qꞌij riꞌ re uxlanem chiqawach apanoq.
HEB 4:9 Noꞌj ruma waꞌ, qetaꞌam kꞌa kꞌo jun uxlanem chike rutinamit ri Dios.
HEB 4:10 Ma china ri kok pa ri uxlanem kuya ri Dios, kuxlan riꞌ che ruchak, jelaꞌ pachaꞌ xuxlan ri Dios che ri chak xuꞌano.
HEB 4:11 Qachuqꞌubꞌej kꞌu qibꞌ chaꞌ kojok pa ri uxlanem kuya ri Dios, chaꞌ jelaꞌ na jinta junoq chiqe kuꞌana aj palajiy tzij y kukꞌulumaj kꞌut jelaꞌ pachaꞌ ri xkikꞌulumaj ri na xkikoj ta utzij ri Dios ojertan.
HEB 4:12 Ma Ruchꞌaꞌtem ri Dios lik kꞌaslik y lik kꞌo uchuqꞌabꞌ. E ne pachaꞌ más kꞌo reꞌ chwa juna espada kaꞌibꞌ uwi reꞌ, ri kopon kꞌa che taq rigonsiyil y kok kꞌa pa kꞌo wi taq ri sulus chupa ri bꞌaq. Jekꞌulaꞌ Ruchꞌaꞌtem ri Dios kopon ne kꞌa chupa rukꞌuꞌx y ri ranimaꞌ juna tikawex, yey kuqꞌalajisaj kꞌu runaꞌoj ri tikawex y taq ri rayibꞌal kꞌo chupa ri ranimaꞌ.
HEB 4:13 Ronoje taq ri ꞌanatal ruma ri Dios, chwach Rire kꞌo wi. Ruma kꞌu riꞌ, Rire karil ronoje y na jinta kꞌo ewatal chwach. Yey kopon ne ri qꞌij echiriꞌ kojopon chwach Rire chaꞌ kuqꞌat tzij paqawiꞌ ruma ri qaꞌanom.
HEB 4:14 Ruma kꞌu laꞌ e qachuqꞌubꞌej qibꞌ che ri xqajikibꞌaꞌ uwach echiriꞌ xqakoj rubꞌiꞌ ri Cristo y maqesaj qibꞌ che waꞌ. Ma ri Jesús, Rukꞌajol ri Dios, e Qajawal; yey Rire okinaq chilaꞌ chikaj y kachꞌaw paqawiꞌ chwach ri Dios.
HEB 4:15 Yey ri Qajawal, ri kachꞌaw paqawiꞌ chwach ri Dios, lik kꞌo kꞌaxnaꞌbꞌal ukꞌuꞌx chiqe, ma Rire lik kumaj usukꞌ ronoje ri kaqikꞌowibꞌej riꞌoj oj tikawex ruma lik kꞌayew chiqe kaqachꞌij uchuqꞌabꞌ ri mak. Ma Rire echiriꞌ xuꞌan tikawex, lik xkꞌam upa che ronoje jelaꞌ pachaꞌ kaꞌan chiqe riꞌoj, noꞌj Rire xuchꞌij uchuqꞌabꞌ waꞌ y na xmakun ta kꞌenoq.
HEB 4:16 E uwariꞌche, muxiꞌij ribꞌ qakꞌuꞌx kojqibꞌ chwach ri Dios, ri kꞌo unimal rutzil kꞌuꞌxaj rukꞌ, chaꞌ kaqakꞌul kuybꞌal qamak y kaqariq toꞌbꞌal qe echiriꞌ kajawax chiqe.
HEB 5:1 Ri kajawal raj chakunel pa Rocho Dios chaꞌtal chikixoꞌl rachijabꞌ. Rire kojotalik re kachꞌaw pakiwi ri tikawex chwach ri Dios y re kuya chwach ri Dios ri qasaꞌn y rawaj ekamisam pakikꞌaxel ri tikawex ruma ri kimak.
HEB 5:2 Ekꞌu rire, utz kukꞌut ri kꞌaxnaꞌbꞌal ukꞌuꞌx chike ri ketzaq pa mak tobꞌ na uꞌanikil taj kemakunik, ma rire na kuchꞌij tane uꞌanik janipa ri kubꞌiꞌij Rutzij ri Dios.
HEB 5:3 Ruma kꞌu waꞌ, chirajawaxik che rire kuya chwach ri Dios rawaj ekamisam ruma rumak rire y na xew ta ruma ri kimak ri tinamit.
HEB 5:4 Na jinta kꞌu junoq kuꞌan che ribꞌ kajawal ke raj chakunel pa Rocho Dios we na kojotal ta ruma ri Dios, jelaꞌ pachaꞌ ri xuꞌan rukꞌ ri Aarón.
HEB 5:5 Jekꞌulaꞌ ri Cristo na xutakꞌabꞌaꞌ ta uwach uqꞌij chiribꞌil ribꞌ y na xa ta pa re xuꞌan Qajawal kachꞌaw paqawiꞌ chwach ri Dios, ma e ri Dios jewaꞌ xubꞌiꞌij che: Riꞌat at Nukꞌajol yey Riꞌin in Aqaw; waqꞌij kꞌu riꞌ kanqꞌalajisaj waꞌ.
HEB 5:6 Yey je tanchi waꞌ xubꞌiꞌij: Riꞌat na jinta utaqexik katkꞌojiꞌik at waj chak, ri katchꞌaw pakiwi ri tikawex chinuwach Riꞌin jelaꞌ pachaꞌ ri Melquisedec xchaꞌ.
HEB 5:7 Ri Cristo echiriꞌ xjeqiꞌ wara che ruwachulew lik xuꞌan orar, rukꞌ oqꞌej y rukꞌ sikꞌ lik xelaj chwach ri Dios, ri kꞌo puqꞌabꞌ kukolobꞌej chwa ri kamik; y ri Dios lik xuta re ruma ri lik uyaꞌom ribꞌ puqꞌabꞌ.
HEB 5:8 Ekꞌu ri Cristo, tobꞌ e Ukꞌajol ri Dios, xumaj ukojik utzij ri Dios ruma ri kꞌaxkꞌobꞌik xrikꞌowibꞌej.
HEB 5:9 Ruma kꞌu xutzꞌaqatisaj uwach ronoje ri xraj ri Dios che, xuꞌana aj yaꞌl kolobꞌetajik na jinta utaqexik chike janipa ri kekojow utzij Rire.
HEB 5:10 Ekꞌu ri Dios xkojow re chaꞌ kuꞌan Qajawal kachꞌaw paqawiꞌ jelaꞌ pachaꞌ ri Melquisedec.
HEB 5:11 Lik kꞌo kuaj kambꞌiꞌij puwi waꞌ, pero lik kꞌayew uqꞌalajisaxik che alaq ma kꞌayew che alaq kamaj alaq usukꞌ.
HEB 5:12 Lik kꞌo tan qꞌij lo riꞌ xtzijox ri Utzilaj Tzij che alaq; ekꞌu ri lik ubꞌe e tane e laꞌ alaq chi aj kꞌutunel re waꞌ. Na rukꞌ ta kꞌu riꞌ, lik ne kajawaxik kakꞌut tanchi che alaq ronoje ri nabꞌe xmaj lo alaq puwi ri Utzilaj Tzij re ri Dios. E pachaꞌ kajawax tanchi che alaq katij alaq tzꞌum ma kꞌamajaꞌ kamaj alaq utijik ri kowilaj waꞌim.
HEB 5:13 Ma e junoq kꞌamajaꞌ umajom usukꞌ ri kubꞌiꞌij Rutzij Upixabꞌ ri Dios puwi saꞌ ri usukꞌ y saꞌ ri na usukꞌ taj, riꞌ e pachaꞌ juna neꞌ kꞌa kutij utzꞌum.
HEB 5:14 Ri kowilaj waꞌim xew taqal chike ri e nimaꞌq chik; jekꞌulaꞌ kꞌo kꞌutunik chupa Rutzij Upixabꞌ ri Dios xew kemajaw usukꞌ ri ketaꞌam saꞌ ri utz y saꞌ ri na utz taj chwach ri Dios yey lik kitaqem kꞌu uꞌanik ri utz.
HEB 6:1 E uwariꞌche chojkꞌiy chwach ri Dios, na xew ta keꞌek qanaꞌoj chwi lo ri nabꞌe kꞌutunik puwi ri Cristo; waꞌ e kꞌutunik puwi ri roqꞌotaxik taq kan ri na jinta kutiqoj ma xew kukꞌam lo kamik, kꞌutunik puwi ri kubꞌulibꞌal kꞌuꞌxaj chwach ri Dios,
HEB 6:2 kꞌutunik puwi ri bautismo, kꞌutunik puwi taq ri kakꞌul che ri Dios echiriꞌ raj wach re riglesia kakiya ri kiqꞌabꞌ puwi junoq, kꞌutunik puwi ri kꞌastajibꞌal ke ri ekaminaq y kꞌutunik puwi ri qꞌatbꞌal tzij kuꞌan ri Dios pakiwi ri tikawex pa ri kꞌisbꞌal qꞌij yey ri kubꞌiꞌij Rire na jinta utaqexik e kuꞌano.
HEB 6:3 Kojkꞌiy kꞌu riꞌ xew we ri Dios kuya qakꞌiyibꞌal.
HEB 6:4 Ma we e kꞌo ri xkikoj ri Qꞌijsaq julajoq, lik xekiꞌkot rukꞌ ri sipanik re chilaꞌ chikaj, e jun kukꞌ ri xkikꞌul ri Santowilaj Ruxlabꞌixel ri Dios,
HEB 6:5 lik xukꞌul kikꞌuꞌx ri Utzilaj Tzij re ri Dios y xkinaꞌ ne ruchuqꞌabꞌ ri Dios ri lik kaqꞌalajisax pa saqil wi chiqawach apanoq;
HEB 6:6 yey we rike kakesaj kibꞌ chirij ri Cristo, riꞌ na kayaꞌtaj ta chi chike kakitzelej kitzij y ketzelej tanchi pa ri Qꞌijsaq. Ma e pachaꞌ ketajin tanchi che ukamisaxik Rukꞌajol ri Dios chwa ri cruz y kakikꞌixbꞌesaj Rire chiwachil ruma ri kakiꞌano.
HEB 6:7 Ma ri kꞌo kikꞌiyibꞌal chwach ri Dios e jelaꞌ pachaꞌ rulew echiriꞌ kutzꞌubꞌaj chi utz ri jabꞌ katzaqik. We xel kꞌu lo riꞌ ri tikoꞌn, ri rutzil ukꞌuꞌx ri Dios kakꞌojiꞌ puwi wuꞌlew, ma xuya ri kajawax chike ri xetikow re.
HEB 6:8 Noꞌj we chwa rulew xew kel lo kꞌiix y tzakam, riꞌ na jinta kꞌana uchak chwach ri Dios. Ruma kꞌu riꞌ, kaqꞌat tzij puwiꞌ y chiqawach apanoq kaporox uwach.
HEB 6:9 Hermanos ri lik kꞌax kannaꞌ alaq, tobꞌ kꞌu jewaꞌ ubꞌiꞌxikil kanꞌan che alaq, nujikibꞌam nukꞌuꞌx na esam ta ibꞌ alaq chirij ri Cristo y kꞌo alaq pa ri bꞌe re kolobꞌetajik.
HEB 6:10 Ri Dios lik jusukꞌ ma na kumeskꞌutaj ta ri chomilaj chak ꞌanom alaq pa rubꞌiꞌ y ri rutzil kꞌuꞌxaj kꞌutum alaq chike ri kikojom rubꞌiꞌ, ma lik xenimaj alaq y kꞌa katajin ne alaq che uꞌanik waꞌ woꞌora.
HEB 6:11 Yey ri kaqaj riꞌoj e chijujunal alaq chuqꞌubꞌej ibꞌ alaq che uꞌanik ri utz woꞌora y kꞌa echiriꞌ kopon na ruqꞌijol kakꞌul alaq janipa ri oyeꞌem alaq che ri Dios.
HEB 6:12 Muꞌan ne alaq xepu, e ꞌana alaq ri utz jelaꞌ pachaꞌ ri kakiꞌan janipa ri lik kubꞌul kikꞌuꞌx rukꞌ ri Dios y na kapax ta kikꞌuꞌx che ri kꞌaxkꞌobꞌik yey ruma kꞌu waꞌ kakikꞌul ri ubꞌiꞌtisim lo ri Dios chike.
HEB 6:13 Ma echiriꞌ ri Dios xuꞌan rubꞌiꞌtisinik che ri Abraham, xujikibꞌaꞌ uwach waꞌ chupa rubꞌiꞌ Rire ma na jinta chi junoq más kꞌo uwach chwa Rire.
HEB 6:14 Jewaꞌ xubꞌiꞌij che: Paqatzij wi lik katinꞌan bendecir y kankꞌiyarisaj kiwach rawalkꞌoꞌal xchaꞌ.
HEB 6:15 Ri Abraham lik naj xroyeꞌej waꞌ rukꞌ unimal ukꞌuꞌx y jekꞌulaꞌ xukꞌul rubꞌiꞌtisim ri Dios che.
HEB 6:16 Paqatzij wi ri tikawex echiriꞌ kꞌo kakijikibꞌaꞌ uwach, kakiꞌan pubꞌiꞌ junoq más kꞌo uwach chikiwa rike; y jekꞌulaꞌ riꞌ kakꞌis ronoje chꞌaꞌoj puwi ri xkijikibꞌaꞌ uwach.
HEB 6:17 Jekꞌulaꞌ, ri Dios lik xraj xuqꞌalajisaj pa saqil wi na kujalkꞌatij ta ri xubꞌiꞌij kan chike ri kakikꞌul rubꞌiꞌtisim; e uwariꞌche lik xujikibꞌaꞌ uwach Ruchꞌaꞌtem.
HEB 6:18 Rukꞌ kꞌu wa bꞌiꞌtisinik xujikibꞌaꞌ uwach, lik qꞌalaj na kajalkꞌatix ta rubꞌiꞌtisim ri Dios, ma Rire na kuꞌan ta raqꞌubꞌal. E uwariꞌche riꞌoj ri qariqom rutoꞌbꞌal ri Dios, lik nimarinaq qakꞌuꞌx kaqaꞌan qe che ri bꞌiꞌtisim kan chiqe.
HEB 6:19 Ruma kꞌu kubꞌul pan qakꞌuꞌx che wa bꞌiꞌtisim kanoq, oj tikil chi utz y jikil uwach ri qanimaꞌ, ma lik kubꞌul qakꞌuꞌx rukꞌ ri Jun okinaq kꞌa chilaꞌ chikaj chirij ri telón chupa ri Luwar lik Santo.
HEB 6:20 Waꞌ e ri Jesús, ri xok chilaꞌ quma riꞌoj; y jekꞌulaꞌ xujaq pan ri qabꞌe chaꞌ kojopon rukꞌ ri Dios. Jekꞌulaꞌ, ri Jesús xuꞌana Qajawal na jinta utaqexik kachꞌaw paqawiꞌ chwach ri Dios; xuꞌana kꞌu riꞌ pachaꞌ ri Melquisedec.
HEB 7:1 Waꞌ wa Melquisedec e rey re ri tinamit Salem y aj chakunel chwach ri Dios Qajawxel echiriꞌ ri Abraham tzelejinaq lo pa ri chꞌaꞌoj pa xuchꞌij wi kichuqꞌabꞌ jujun reyes. Ekꞌu ri Melquisedec xuꞌkꞌulu pan ri Abraham y xutzꞌonoj ri rutzil ukꞌuꞌx ri Dios puwiꞌ.
HEB 7:2 Tekꞌuchiriꞌ ri Abraham xresaj rudiezmo che ri xuꞌchꞌaka lo pa chꞌaꞌoj y xuya che ri Melquisedec. Ri bꞌiꞌaj Melquisedec keꞌelawi: “Rey Jusukꞌ” yey ri jun chik ubꞌiꞌ e “Rey re Salem”, waꞌ keꞌelawi: “Rey re Utzil Chomal”.
HEB 7:3 Na jinta xetaꞌmax pakiwi ruchu-uqaw o pakiwi ri ratz-uchaqꞌ ri Melquisedec; y na jinta ne xetaꞌmax puwi ri jeqebꞌal re o ri kꞌisbꞌal re rukꞌaslem. Na jinta kꞌu utaqexik rire e aj chakunel chwach ri Dios jelaꞌ pachaꞌ Rukꞌajol ri Dios.
HEB 7:4 Chꞌobꞌo pe alaq puwi runimal uwach ri Melquisedec, ma ri qamam Abraham xresaj ne rudiezmo che ri xuꞌchꞌaka lo pa chꞌaꞌoj y xuya che.
HEB 7:5 Paqatzij wi, ri e aj chakunel pa Rocho Dios kebꞌel lo chikixoꞌl ri e ralkꞌoꞌal kan ri Leví. Ekꞌu ri taqanik utzꞌibꞌam kan ri Moisés kubꞌiꞌij xew rike kꞌo pakiqꞌabꞌ kakikꞌul chike ri tinamit ri diezmo che ronoje ri kꞌo kukꞌ, tobꞌ ri keqasanik e ralkꞌoꞌal kan ri Abraham jelaꞌ pachaꞌ ri kekꞌuluw re waꞌ.
HEB 7:6 Noꞌj ri Melquisedec tobꞌ na e ta kukꞌil ri ralkꞌoꞌal kan ri Leví, xukꞌam rudiezmo ri Abraham, y xutzꞌonoj ri rutzil ukꞌuꞌx ri Dios puwi ri Abraham, ri jun xꞌan ri bꞌiꞌtisinik che ruma ri Dios.
HEB 7:7 Kꞌo kꞌu más uwach ri Melquisedec chwa ri Abraham ma qonoje qetaꞌam we kꞌo junoq kutzꞌonoj ri rutzil ukꞌuꞌx ri Dios puwi jun chik, riꞌ más kꞌo uwach chwa ri kakꞌuluw re waꞌ.
HEB 7:8 Ri ralkꞌoꞌal ri Leví, ri kekꞌuluw re ri diezmo pa ri Rocho Dios, rike e tikawex xa kekamik; noꞌj ri Melquisedec kabꞌiꞌx che pachaꞌ e jun kꞌa kꞌaslik.
HEB 7:9 Pa ri taqanik re ri Moisés, e ri ralkꞌoꞌal kan ri Leví ri taqal chike kekꞌuluw re ri diezmo. Na rukꞌ ta kꞌu riꞌ, echiriꞌ ri Abraham xuya rudiezmo che ri Melquisedec, e pachaꞌ e ri Leví xuya rudiezmo che;
HEB 7:10 ma tobꞌ ri Leví kꞌamajaꞌ ne kalaxik, e junam rukꞌ kꞌo chi rukꞌ rumam Abraham echiriꞌ xeꞌkꞌul pan ruma ri Melquisedec.
HEB 7:11 Chike ri e ralkꞌoꞌal ri Leví xyaꞌ wi ri kebꞌuꞌan e aj chakunel pa Rocho Dios. We ta e laꞌ kasukꞌupitaj ri tikawex kuma rike, ¿saꞌ kꞌu kutiqoj riꞌ kayaktaj jun chik aj chakunel chwach ri Dios pachaꞌ ri Melquisedec, yey na e ta pachaꞌ ri Aarón, ri jun ralkꞌoꞌal kan ri Leví?
HEB 7:12 Ma we ta kꞌo junoq kakꞌojiꞌ aj chakunel pa Rocho Dios yey na e ta kukꞌil ri e ralkꞌoꞌal kan ri Leví, riꞌ lik chirajawaxik wi kajalkꞌatix ri taqanik tzꞌibꞌital kan ruma ri Moisés puwi china ri taqal che kuꞌan aj chakunel pa Rocho Dios.
HEB 7:13 Ekꞌu ri Qanimajawal, ri Jun kachꞌaꞌt Ruchꞌaꞌtem ri Dios puwiꞌ, Rire na e ta kukꞌil ri e ralkꞌoꞌal kan ri Leví pa kipetebꞌem wi ri keniman chwach ri altar re ri Dios. Ma Rire e kukꞌil ri ralkꞌoꞌal kan ri Judá, yey na jinta junoq chike rike xuꞌan aj chakunel pa Rocho Dios.
HEB 7:14 Ma lik qꞌalaj ri Qanimajawal e jun chike ri e ralkꞌoꞌal kan ri Judá y pakiwi rike na jinta ne xuchꞌaꞌtibꞌej kan ri Moisés puwi ri chak pa Rocho Dios.
HEB 7:15 Y waꞌ más kaqꞌalajinik we kaqamaj usukꞌ, ri Jun xkojik re kachꞌaw pakiwi ri tikawex, e pachaꞌ ri Melquisedec.
HEB 7:16 Ma ri Jesús na xuꞌan ta aj chakunel pa Rocho Dios jelaꞌ pachaꞌ ri kubꞌiꞌij ri taqanik re ri Tzij Pixabꞌ; ma chupa waꞌ kaqꞌalajin wi xew ri e ralkꞌoꞌal kan ri Leví kekojik e aj chakunel pa Rocho Dios, noꞌj Rire xkojik ruma ruchuqꞌabꞌ rukꞌaslemal na jinta kasachaw uwach.
HEB 7:17 Ma jewaꞌ kubꞌiꞌij ri Dios chwi Rire: Riꞌat na jinta utaqexik katkꞌojiꞌik at waj chak, ri katchꞌaw pakiwi ri tikawex chinuwach Riꞌin jelaꞌ pachaꞌ ri Melquisedec kachaꞌ.
HEB 7:18 Ekꞌu ri taqanik pakiwi raj chakunel pa Rocho Dios na jinta chi kutiqoj, ma waꞌ na jinta ukowil y na jinta uchuqꞌabꞌ re kebꞌukolobꞌej ri tikawex.
HEB 7:19 Ma na jinta junoq kuꞌana jusukꞌ ruma ri taqanik. Yey woꞌora kꞌo ri más kubꞌul pan qakꞌuꞌx che, y ruma kꞌu riꞌ waꞌ, utz kojqibꞌ rukꞌ ri Dios.
HEB 7:20 Echiriꞌ ri Dios xuya che ri Jesús kachꞌaw pakiwi ri tikawex chwach Rire, e lik xujikibꞌaꞌ uwach ri xuꞌano.
HEB 7:21 Ma ri jujun chik aj chakunel pa Rocho Dios xa e kojotalik y na jinta kꞌo xjikibꞌax uwach chike. Noꞌj chwi ri Jesús lik kꞌo jikibꞌam uwach, ma chupa Ruchꞌaꞌtem ri Dios, jewaꞌ kubꞌiꞌij: Ri Dios lik xujikibꞌaꞌ uwach ri xubꞌiꞌij, y na kujekꞌ ta kꞌana ribꞌ che waꞌ wa xubꞌiꞌij: “Riꞌat na jinta utaqexik katkꞌojiꞌik at waj chak, ri katchꞌaw pakiwi ri tikawex chinuwach Riꞌin jelaꞌ pachaꞌ ri Melquisedec.”
HEB 7:22 E uwariꞌche, ri Qanimajawal Jesucristo e xjikibꞌan uwach jun Tzij más kꞌo uwach chwa ri nabꞌe.
HEB 7:23 E taq ri jujun chik e aj chakunel pa Rocho Dios na kekowin taj, ma xa kekamik yey pakikꞌaxel rike kekanaj kan jujun chik. Ruma laꞌ lik xebꞌuꞌana e kꞌi.
HEB 7:24 Noꞌj ri Jesús ruma na jinta utaqexik rukꞌaslemal, na jinta kꞌu utaqexik ri chak kuꞌano re kachꞌaw paqawiꞌ chwach ri Dios.
HEB 7:25 Ruma kꞌu waꞌ na jinta utaqexik ri kolobꞌetajik kuya ri Jesús chike ri keqibꞌ rukꞌ ri Dios ruma Rire. Yey ruma na jinta utaqexik rukꞌaslemal, kꞌo puqꞌabꞌ xaqi kachꞌaw lo pakiwiꞌ chwach ri Dios.
HEB 7:26 E Rire ri Qajawal lik kajawax chiqe kachꞌaw paqawiꞌ chwach ri Dios, ma xukꞌut jun bꞌinik lik jusukꞌ, na jinta kꞌana raqꞌubꞌal xuꞌano, na jinta kꞌana umak, na xuꞌan tane re kukꞌ raj makibꞌ y woꞌora yaktal uqꞌij chilaꞌ chikaj chwi ronoje taq ri uꞌanom ri Dios.
HEB 7:27 Na kajawax ta kꞌu che Rire kuꞌan pachaꞌ ri xkiꞌan ri jujun chik kajawal raj chakunel pa Rocho Dios. Ma rike ri jujun qꞌij, nabꞌe na kakiya puwi raltar ri awaj ekamisam ruma ri kimak rike, y kꞌa tekꞌuchiriꞌ, kakiya ri awaj ekamisam ruma ri kimak ri tinamit. Noꞌj ri Jesús xa julaj xuya ribꞌ pa kꞌaxkꞌobꞌik kuma konoje ri winaq.
HEB 7:28 Ekꞌu ri taqanik re ojertan kataqan che kakoj kajawal raj chakunel pa Rocho Dios. Yey taq wa kajawal xa e achijabꞌ y ruma riꞌ na kakichꞌij ta uꞌanik ronoje Rutzij Upixabꞌ ri Dios. Noꞌj woꞌora ri Dios xujikibꞌaꞌ uwach, Rukꞌajol e Qajawal kachꞌaw lo paqawiꞌ yey na jinta kꞌu utaqexik xew Rire kuꞌan chi jusukꞌ y tzꞌaqat janipa ri uyaꞌom ri Dios puqꞌabꞌ.
HEB 8:1 Ekꞌu rukꞌuꞌxibꞌal wa kojtajin che ubꞌiꞌxikil e waꞌ: Kꞌo ri Jun kachꞌaw paqawiꞌ chwach ri Dios, waꞌ e ri Qajawal, ri xtzꞌuyiꞌ pa ri luwar lik kꞌo uwach puwikiqꞌabꞌ ri Dios, ri Nimalaj Taqanel chilaꞌ chikaj.
HEB 8:2 Kachꞌaw kꞌu paqawiꞌ chupa ri saqil Rocho Dios chilaꞌ chikaj; yey waꞌ e ri Dios Qajawxel xꞌanaw re, na juna achi taj.
HEB 8:3 Konoje kꞌu ri kajawal raj chakunel pa Rocho Dios xekojik chaꞌ kakiya chwach raltar ri qasaꞌn y rawaj kekamisaxik. Jekꞌulaꞌ chirajawaxik kꞌo kuya ri Qajawal chwach ri Dios.
HEB 8:4 We ta kꞌa kꞌo ri Jesús che ruwachulew, riꞌ na aj ta chakunel pa Rocho Dios, ma wara kꞌa e kꞌo aj chakunel kakiqꞌatisaj ri qasaꞌn chwach ri Dios pachaꞌ ri kubꞌiꞌij ri taqanik tzꞌibꞌital kan ruma ri Moisés.
HEB 8:5 Yey ri chak kakiꞌan rike, xa e ukꞌaxwach y kꞌutubꞌal re ri kaꞌan chilaꞌ chikaj. Ma echiriꞌ xtaq che ri Moisés kuyak ri Rocho Dios xa kakirik, jewaꞌ xubꞌiꞌij ri Dios che: Chawilapeꞌ, ri wocho kayako, e chaꞌana ronoje che jelaꞌ pachaꞌ ri xinkꞌut chawach chwa wa juyubꞌ xchaꞌ.
HEB 8:6 Noꞌj woꞌora ruchak ri Qajawal más utz chwa ri kichak raj chakunel pa Rocho Dios, ma ruma Rire ri Dios xuꞌan jun kꞌakꞌ tzij qukꞌ riꞌoj. Yey chupa wa tzij kꞌo bꞌiꞌtisinik más chom chwa ri re ojertan.
HEB 8:7 We ta ekꞌu laꞌ lik tzꞌaqat xel ri nabꞌe tzij, riꞌ paqatzij wi na kajawax tane juna kꞌakꞌ tzij.
HEB 8:8 Ma ri Dios xuya wa pixabꞌanik chike rutinamit, jewaꞌ xubꞌiꞌij: ¡Chitapeꞌ! kacha ri Dios Qajawxel. Kopon na ri qꞌij echiriꞌ Riꞌin kanꞌan jun kꞌakꞌ tzij kukꞌ ri tinamit e aj Israel y kukꞌ ri tinamit e aj Judá.
HEB 8:9 Yey waꞌ na je ta laꞌ pachaꞌ ri tzij xinꞌan kukꞌ ri kichu-kiqaw ojertan echiriꞌ nuchapom che ri kiqꞌabꞌ, xebꞌenuwesaj lo Egipto. Pero rike na xkitaqej ta ri tzij xinꞌan kukꞌ; ruma kꞌu riꞌ, xebꞌenuya kanoq, kacha ri Dios Qajawxel.
HEB 8:10 Kꞌisbꞌal kꞌu re taq laꞌ la qꞌij, e tzij waꞌ kanꞌan kukꞌ ri tinamit Israel, kubꞌiꞌij ri Dios Qajawxel: Kankoj ri nutzijpixabꞌ pa kijolom y kantzꞌibꞌaj pa kanimaꞌ. Ekꞌu Riꞌin kinuꞌan in ki Dios y rike kebꞌuꞌan e nutinamit.
HEB 8:11 Yey na kajawax ta nenareꞌ kꞌo junoq kebꞌupixabꞌaj ri rachbꞌiꞌil y ri ratz-uchaqꞌ, jewaꞌ kubꞌiꞌij chike: “Chawetaꞌmaj uwach ri Dios Qajawxel.” Ma chupa laꞌ la qꞌij konoje ketaꞌam nuwach Riꞌin, chinimaꞌq chichꞌutiꞌq.
HEB 8:12 Kankuy kꞌu kimak y na kakꞌun ta chi ne kꞌana chinukꞌuꞌx ri na utz taj xkiꞌano xchaꞌ.
HEB 8:13 Echiriꞌ kabꞌiꞌx “kꞌakꞌ tzij”, e keꞌelawi kꞌo jun qꞌij ri nabꞌe xa kikꞌowik, ma janipa taq ri kuꞌan qꞌeꞌl y na jinta chi uchak, riꞌ katajin usachik uwach.
HEB 9:1 Chupa kꞌu ri nabꞌe tzij kꞌo taqanik puwiꞌ suꞌanik kaloqꞌnimax uqꞌij ri Dios pa jun luwar santo wara che ruwachulew.
HEB 9:2 Xyak kꞌu jun nimalaj carpa “Tabernáculo” kecha che. Waꞌ kebꞌ upa uꞌanom. Ri nabꞌe upa ja kabꞌiꞌx “Luwar Santo” che. Chiriꞌ kꞌo wi ri tzukꞌulibꞌal aqꞌ y kꞌo ri mexa pa kayaꞌ wi ri pam yaꞌtal chwach ri Dios.
HEB 9:3 Chirij kꞌu jun telón kꞌo rukaꞌm upa ja kabꞌiꞌx “Luwar lik Santo” che.
HEB 9:4 Chiriꞌ kꞌu riꞌ kꞌo jun altar re oro pa kaporox wi incienso y kꞌo ri kaxa re ri tzij uꞌanom ri Dios kukꞌ rutinamit yey wa kaxa chꞌuqum rij rukꞌ oro. Chupa kꞌu ri kaxa kꞌo jun xaro re oro kꞌo maná chupa, kꞌo ri bara re ri Aarón, waꞌ e ri bara xtuxik y kꞌo ri jutaq peraꞌj abꞌaj pa xtzꞌibꞌax wi ri taqanik re ri tzij uꞌanom ri Dios kukꞌ rutinamit.
HEB 9:5 Puwi kꞌu ri kaxa kꞌo kebꞌ kikꞌaxwach querubines lik kewon rukꞌ ruchomalil ri Dios; yey rukꞌ ri kixikꞌ kichꞌuqum uwiꞌ ri luwar re kuybꞌal mak. Pero woꞌora na kojchꞌaꞌt ta chi más puwi waꞌ.
HEB 9:6 Jekꞌuriꞌlaꞌ uꞌanom ronoje waꞌ. Chupa kꞌu ri nabꞌe upa ja re ri Rocho Dios kebꞌok raj chakunel chaꞌ kakiloqꞌnimaj uqꞌij ri Dios.
HEB 9:7 Noꞌj chupa kꞌu rukaꞌm upa ja, xew kok bꞌi ri kajawal raj chakunel pa Rocho Dios, yey waꞌ xa julaj kuꞌan pa ri junabꞌ. Echiriꞌ kok bꞌi, rukꞌaꞌam bꞌi kikikꞌel awaj re kuꞌyaꞌa pukꞌaxel rumak rire y pukꞌaxel taq ri mak na uꞌanikil taj kakiꞌan ri tinamit.
HEB 9:8 Rukꞌ kꞌu waꞌ ri Santowilaj Ruxlabꞌixel ri Dios e kukꞌut chiqe: Xaloqꞌ kꞌa kꞌo wa nabꞌe upa ja, e keꞌeloq na utz taj chike ri tikawex kebꞌok chupa ri Luwar lik Santo, ma kꞌamajaꞌ kaqꞌalajinik suꞌanik utz kebꞌok chwach ri Dios.
HEB 9:9 Ronoje waꞌ e jun kꞌutubꞌal chiqe riꞌoj waqꞌij ora, ri qasaꞌn y rawaj ekamisam chwa raltar na kuꞌan ta jusukꞌ che ri kibꞌinik kisilabꞌik ri keloqꞌniman ri Dios rukꞌ waꞌ; ma tobꞌ kakiꞌan riꞌ, kꞌa kakinaꞌ chikikꞌuꞌx kꞌo kimak.
HEB 9:10 Ma wa taqanik puwi saꞌ ri katijik y ri kaqumik y puwi saꞌ ri kaꞌanik re josqꞌikil, xew xuriq uchak xaloqꞌ kꞌamajaꞌ kopon ruqꞌijol echiriꞌ ronoje waꞌ kajalkꞌatix ruma ri Dios rukꞌ ri más utz.
HEB 9:11 Rukꞌ ri Cristo kape wi ronoje ri utz kaqakꞌul riꞌoj, ma woꞌora e Rire ri Qajawal kachꞌaw paqawiꞌ pa ri Rocho Dios chilaꞌ chikaj. Yey waꞌ wa Rocho Dios más nim y más tzꞌaqat chwa ri xuꞌan ri Moisés chupa ri luwar katzꞌintzꞌotik, ma na achijabꞌ ta ri xeyakaw re y na re tane wara che ruwachulew.
HEB 9:12 Ri Cristo xa jumul xok chupa ri Luwar lik Santo chaꞌ kuya kolobꞌetajik na jinta utaqexik chiqe. Xuꞌan kꞌu waꞌ na ruma ta kikikꞌel kaprux mamaꞌibꞌ o toroꞌibꞌ, ma e ruma rukikꞌel Rire.
HEB 9:13 Ri nabꞌe tzij kubꞌiꞌij we juna tikawex xuchꞌulaj ribꞌ ruma ri xuchapo, kajawax rujosqꞌikil; kamakꞌamoꞌx kꞌu puwi rire kikikꞌel toroꞌibꞌ y kaprux mamaꞌibꞌ ekamisam y chaaj re juna bakilo xporox chwi raltar, chaꞌ kuꞌan tanchi chom y jekꞌulaꞌ utz kok pa ri Rocho Dios.
HEB 9:14 We kuꞌan kꞌu riꞌ waꞌ rukikꞌel juna awaj, ¡makꞌuwariꞌ rukikꞌel ri Cristo! Ma ruma ri Ruxlabꞌixel ri Dios na jinta utaqexik, ri Cristo, ri na jinta kꞌana umak, xuya ribꞌ pa kamik chwach ri Dios chaꞌ jelaꞌ kujosqꞌij ri qanimaꞌ che ri mak, ri kukꞌam lo qꞌatbꞌal tzij re kamik paqawiꞌ. Jekꞌulaꞌ ruma ri Cristo kaqanaꞌ chiqakꞌuꞌx na jinta chi qamak y utz kꞌu riꞌ kaqaloqꞌnimaj ri Dios kꞌaslik.
HEB 9:15 Ruma kꞌu riꞌ laꞌ, ri Cristo e kakꞌamaw qawach chwach ri Dios chupa ri kꞌakꞌ tzij. Yey ruma rukamik, kꞌo kuybꞌal mak chike ri xemakun chuxeꞌ ri nabꞌe tzij, chaꞌ jelaꞌ konoje ri ebꞌusikꞌim ri Dios kakikꞌul na ri ubꞌiꞌtisim Rire chike yey waꞌ na jinta utaqexik.
HEB 9:16 Wa jun kꞌakꞌ tzij e pachaꞌ juna tzij kutzꞌibꞌaj junoq chaꞌ kubꞌiꞌij china taq kekanaj kan rukꞌ rubꞌitaq re we xkamik. Yey chaꞌ utz kaꞌan ri tzꞌibꞌital kanoq, lik chirajawaxik wi nabꞌe na kaqꞌalajisaxik we kaminaq chi ri xtzꞌibꞌan re ri wuj.
HEB 9:17 Ekꞌu wa tzij kajikiꞌ uwach xew we xkam ri xtzꞌibꞌan re, yey we ri xtzꞌibꞌan re kꞌa kꞌaslik, riꞌ kꞌamajaꞌ utz kajikiꞌ uwach waꞌ.
HEB 9:18 Jenelaꞌ ri nabꞌe tzij xjikiꞌ lo uwach rukꞌ kikikꞌel awaj ekamisam.
HEB 9:19 Ma ri Moisés nabꞌe na xubꞌiꞌij ronoje ri taqanik re ri Tzij Pixabꞌ chike konoje ri tinamit; tekꞌuchiriꞌ xukꞌam lana kaq y rukꞌ jun uqꞌabꞌ cheꞌ re hisopo, xuchuqꞌ chupa ri kikikꞌel toroꞌibꞌ y kaprux mamaꞌibꞌ ekamisam yey waꞌ kojotal yaꞌ chwach. Tekꞌuchiriꞌ xumakꞌamaꞌ puwi ri libro re ri Tzij Pixabꞌ y pakiwi konoje ri tikawex.
HEB 9:20 Tekꞌuchiriꞌ xubꞌiꞌij chike: «E kikꞌ waꞌ kujikibꞌaꞌ uwach ri tzij uꞌanom lo ri Dios iwukꞌ» xchaꞌ.
HEB 9:21 Yey pachaꞌ kꞌu ri xuꞌan che ri libro, jekꞌulaꞌ xumakꞌamaꞌ kikikꞌel awaj chupa ri Rocho Dios y puwi ronoje ri kachapabꞌexik re kaloqꞌnimax ri Dios.
HEB 9:22 Ma chupa ri tzijpixabꞌ tzꞌibꞌital kanoq, kubꞌiꞌij lik kꞌi taq ri josqꞌinik kaꞌan rukꞌ ri kikikꞌel rawaj, yey na jinta kꞌu kuybꞌal mak we na katuruw tana ri kikikꞌel rawaj ekamisam.
HEB 9:23 Xajawax kꞌut jelaꞌ ri josqꞌinik xꞌan che taq ri kachapabꞌexik re kaloqꞌnimax ri Dios, ri xa e ukꞌaxwach taq ri kꞌo chilaꞌ chikaj. Yey ri josqꞌinik re chilaꞌ chikaj más ne lik utz chwa ri kaꞌan xa rukꞌ ri kikikꞌel rawaj ekamisam chwach raltar wara che ruwachulew.
HEB 9:24 Ma ri Rocho Dios pa xok wi ri Cristo na e ta ri ꞌanom kuma tikawex, ma ri re ruwachulew xa e ukꞌaxwach ri saqil Rocho Dios kꞌo chilaꞌ chikaj; ekꞌu Rire xok chilaꞌ chaꞌ kachꞌaw paqawiꞌ chwach ri Dios.
HEB 9:25 Ri Cristo xa julaj xuya ribꞌ pa kamik y xopon kꞌu chilaꞌ chikaj chwach ri Dios. Noꞌj ri kajawal raj chakunel pa Rocho Dios ronoje junabꞌ kok chupa ri Luwar lik Santo re kuꞌyaꞌa chwach ri Dios ri kikꞌ na riꞌre taj.
HEB 9:26 We ta chirajawaxik waꞌ che ri Cristo, ukꞌiyal laj tane riꞌ uyaꞌom ribꞌ Rire pa kamik chwi lo ri jeqebꞌal re ruwachulew; noꞌj woꞌora chupa wa kꞌisbꞌal qꞌij xa julaj xuya ribꞌ pa kamik chaꞌ xa jumul karesaj ri mak.
HEB 9:27 Lik kꞌu jikibꞌam chi uwach konoje ri tikawex xa julaj kekamik, tekꞌuchiriꞌ kape ri qꞌatbꞌal tzij pakiwiꞌ.
HEB 9:28 Jekꞌulaꞌ riꞌ, ri Cristo xa julaj xuya ribꞌ pa kamik chaꞌ jelaꞌ karesaj ri kimak ukꞌiyal tikawex. Noꞌj echiriꞌ kakꞌun tanchik, na re ta chi koꞌlkam ruma ri mak ke ri winaq, ma e re kebꞌukolobꞌej konoje ri koyeꞌem Rire.
HEB 10:1 Ri taqanik xuya ri Dios che ri Moisés na e ta ri saqil bꞌeyomalil kayaꞌiꞌ chiqawach apanoq, ma xa e ukꞌaxwach. Yey wa taqanik na jinta uchuqꞌabꞌ re kuꞌan chom che ri kanimaꞌ ri tikawex, ri kakikoj kibꞌ chwach ri Dios kuma rawaj ekamisam chwa raltar chujujunal junabꞌ.
HEB 10:2 Ma we ta wa taqanik asu kuchomaj ri kanimaꞌ ri keloqꞌniman ri Dios, riꞌ na kakiya ta chi chwach ri Dios rawaj ekamisam, ma kakinaꞌ kꞌu riꞌ chikikꞌuꞌx na jinta chi kimak.
HEB 10:3 Noꞌj na je ta laꞌ uꞌanom, ma echiriꞌ ri tikawex chujujunal junabꞌ kakiya chwach ri Dios rawaj ekamisam, waꞌ e kukuxtaj chike kꞌo kimak chwach ri Dios.
HEB 10:4 Ma ri kikikꞌel toroꞌibꞌ y kaprux mamaꞌibꞌ na jinta uchuqꞌabꞌ re karesaj ri mak.
HEB 10:5 E uwariꞌche ri Cristo echiriꞌ ya kape che ruwachulew, jewaꞌ xubꞌiꞌij che ri Dios: Ri lik kaꞌaj la na e ta rawaj ekamisam chwa raltar rukꞌ taq ri qasaꞌn; e uwariꞌche xchꞌobꞌ la kaya la ri nucuerpo chaꞌ e kanya waꞌ chiwach la.
HEB 10:6 Yey na xukꞌul ta kꞌuꞌx la ri qasaꞌn re awaj eporom chwi raltar y ri ekamisam re kuybꞌal mak.
HEB 10:7 Ruma kꞌu waꞌ ximbꞌiꞌij: Lal Dios, riꞌ in kꞌo Riꞌin re koꞌlnuꞌana janipa ri rajawal kꞌuꞌx la, jelaꞌ pachaꞌ ri tzꞌibꞌital panuwiꞌ Riꞌin pa ri Chꞌaꞌtem la xchaꞌ.
HEB 10:8 Nabꞌe kubꞌiꞌij: «Ri Dios na xcha ta ukꞌuꞌx che taq rawaj ekamisam chwa raltar y taq ri qasaꞌn y rawaj eporom chwi raltar y taq rawaj ekamisam re kuybꞌal mak.» Ekꞌu taq waꞌ na xukꞌul ta ukꞌuꞌx tobꞌ e ne Rire xtaqan che uꞌanik waꞌ.
HEB 10:9 Tekꞌuchiriꞌ xubꞌiꞌij: «Riꞌ in kꞌo Riꞌin re koꞌlnuꞌana janipa ri rajawal ukꞌuꞌx ri Dios.» Ri keꞌelawi e kel ri kaꞌan ojertan re kekamisax awaj chwach ri Dios y pukꞌaxel waꞌ e katikiꞌ kan ri xuꞌan ri Cristo.
HEB 10:10 Jekꞌulaꞌ ri Qanimajawal Jesucristo e xuꞌan ri rajawal ukꞌuꞌx ri Dios echiriꞌ xuꞌan jusukꞌ chiqe ruma xuya rucuerpo pa kamik; yey waꞌ xa julaj xuꞌano ma na kajawax taj kuꞌan tanchik.
HEB 10:11 Paqatzij wi juna aj chakunel pa Rocho Dios ronoje qꞌij xaqi e kuꞌan ruchak y kebꞌukamisaj kꞌu rawaj chwa raltar, tobꞌ waꞌ na karesaj ta kꞌana ri mak.
HEB 10:12 Noꞌj ri Cristo xa julaj xuya ribꞌ pa kamik ruma ri mak; tekꞌuchiriꞌ xeꞌtzꞌula puwikiqꞌabꞌ ri Dios.
HEB 10:13 Y chwi kꞌu lo riꞌ laꞌ, e royeꞌem keyaꞌ na xeꞌraqan Rire ri tzel kebꞌilow re.
HEB 10:14 Ruma kꞌu xa julaj xuya ribꞌ pa kamik, xa jumul xuꞌan jusukꞌ chike ri kiyaꞌom kibꞌ puqꞌabꞌ ri Dios.
HEB 10:15 Yey ri Santowilaj Ruxlabꞌixel ri Dios kujikibꞌaꞌ uwach waꞌ chiqe, ma nabꞌe na kubꞌiꞌij:
HEB 10:16 E tzij waꞌ kanꞌan kukꞌ ri nutinamit chupa taq laꞌ la qꞌij: Kankoj ri nutzijpixabꞌ pa kanimaꞌ y kantzꞌibꞌaj pa kijolom, kacha ri Dios Qajawxel.
HEB 10:17 Tekꞌuchiriꞌ kubꞌiꞌij: Y na kakꞌun ta chi kꞌana chinukꞌuꞌx ri kimak y ri na utz taj xkiꞌano kachaꞌ.
HEB 10:18 Jekꞌuriꞌlaꞌ, we ri mak kuytajinaq chik, riꞌ na kajawax ta chik kakamisax awaj chwa raltar re karesaj ri mak.
HEB 10:19 E uwariꞌche hermanos, woꞌora yaꞌtal chiqe kojok chupa ri Luwar lik Santo ruma rukikꞌel ri Qanimajawal Jesucristo.
HEB 10:20 Ruma kꞌu ri Cristo, yaꞌtal jun kꞌakꞌ kꞌaslemal chiqe y kꞌo qokibꞌal chwach ri Dios, yey wa kꞌakꞌ okibꞌal e ri Cristo. Echiriꞌ Rire xuꞌan tikawex y xkam chwa ri cruz, e xresaj ri qꞌatibꞌal, ri na xuya ta luwar kojopon chwach ri Dios. E pachaꞌ ri telón kꞌo pa Rocho Dios, ri na kuya ta luwar chike ri tikawex kebꞌok pa ri Luwar lik Santo. Yey waꞌ xrichꞌrobꞌik echiriꞌ xkam ri Cristo.
HEB 10:21 Ekꞌu woꞌora kꞌo ri Qajawal lik nim uqꞌij, ri kachꞌaw paqawiꞌ chwach ri Dios yey kataqan paqawiꞌ ri oj utinamit ri Dios.
HEB 10:22 E uwariꞌche chojqibꞌ chwach ri Dios rukꞌ ronoje qanimaꞌ y rukꞌ ri kubꞌulibꞌal qakꞌuꞌx tikil chi utz, ma kunaꞌ qakꞌuꞌx na jinta chi qamak ruma josqꞌital ri qanimaꞌ che ri na utz taj, jelaꞌ pachaꞌ ri qacuerpo echiriꞌ chꞌajtal chi rukꞌ chomilaj yaꞌ.
HEB 10:23 E qajikibꞌam uwach kaqakꞌul janipa rubꞌiꞌtisim ri Dios; lik chojtikila kꞌu jusukꞌ che ri kubꞌulibꞌal qakꞌuꞌx puwi ri qoyeꞌem che ri Dios, ma Rire na kujalkꞌatij ta rubꞌiꞌtisinik uꞌanom chiqe.
HEB 10:24 Qatzukuj kꞌut suꞌanik kaqatoꞌ qibꞌ chiqibꞌil qibꞌ chaꞌ jelaꞌ kanimar ri rutzil qakꞌuꞌx y ri utzilaj chak kaqaꞌano.
HEB 10:25 Maqaꞌan qeꞌoj pachaꞌ ri kakiꞌan jujun, ri koqꞌotam kakimol kibꞌ qukꞌ re kaqaloqꞌnimaj uqꞌij ri Dios y re kaqanimarisaj qakꞌuꞌx chiqawach; ri qaꞌanaꞌ e más qapixabꞌaj qibꞌ chiqawach woꞌora, ma qetaꞌam rukꞌunibꞌal ri Qanimajawal Jesucristo lik xa naqaj chi kꞌo lo wi.
HEB 10:26 We e laꞌ lik xqamaj usukꞌ ri Qꞌijsaq puwi ri Cristo, yey na rukꞌ ta kꞌu riꞌ, lik uꞌanikil wi kojmakun chirij Rire, maqachꞌobꞌ kꞌu riꞌ, kꞌa kꞌo kayaꞌiꞌ chwach ri Dios re karesaj ri qamak.
HEB 10:27 Ma we e kaqaꞌan waꞌ, riꞌ katewun chi ne paqawiꞌ runimal qꞌatbꞌal tzij xibꞌibꞌal uwach y ri aqꞌ kajinowik pa keyaꞌ wi konoje ri tzel kakil ri Dios.
HEB 10:28 Echiriꞌ kꞌo junoq kupalajij ri Tzij Pixabꞌ re ri Moisés, yey we e kꞌo kꞌu kaꞌibꞌ oxibꞌoq xebꞌilow re, riꞌ asu kakamisaxik.
HEB 10:29 Jekꞌulaꞌ, we kꞌo junoq kukꞌaq bꞌi uqꞌij Rukꞌajol ri Dios, kuꞌan pachaꞌ na jinta uchak che rukikꞌel ri Qanimajawal Jesucristo y tzel kachꞌaꞌt ne chirij ri Ruxlabꞌixel ri Dios ¿na kukꞌul ta nebꞌa unimal kꞌaxkꞌobꞌik ruma kuꞌan waꞌ? Ma rukikꞌel ri Qanimajawal e kujikibꞌaꞌ ri tzij uꞌanom ri Dios qukꞌ y kuꞌan jusukꞌ chiqe; yey ri Ruxlabꞌixel ri Dios e kayaꞌw ri unimal rutzil ukꞌuꞌx ri Dios chiqe.
HEB 10:30 Ma riꞌoj qetaꞌam china ri xubꞌiꞌij waꞌ: Panuqꞌabꞌ Riꞌin kꞌo wi kanqꞌat tzij pakiwi ri kebꞌanaw re ri na utz taj; In kꞌu riꞌ ri kinꞌanaw ukꞌaxel chike xcha ri Dios Qajawxel. Yey jewaꞌ tanchi kubꞌiꞌij: E ri Dios kaqꞌataw tzij puwi rutinamit kachaꞌ.
HEB 10:31 ¡Lik kꞌu xibꞌibꞌal uwach che junoq we ruma kupetisaj royowal ri Dios kꞌaslik, katzaq puqꞌabꞌ Rire!
HEB 10:32 Kꞌuna kꞌu chikꞌuꞌx alaq, echiriꞌ kꞌakꞌ xkꞌul alaq ri Qꞌijsaq, lik xkuy alaq rukꞌ unimal kꞌuꞌxaj ri kꞌaxkꞌobꞌik xikꞌowibꞌej alaq ruma kojom alaq rubꞌiꞌ ri Cristo.
HEB 10:33 Jutaq laj kꞌu riꞌ, kꞌo ri xkichꞌamij alaq y lik xkiꞌan kꞌax che alaq chikiwach ri winaq; jutaq laj chik e ne ralaq xyaꞌ ibꞌ alaq che kitoꞌik ri kebꞌikꞌow chupa waꞌ wa kꞌaxkꞌobꞌik.
HEB 10:34 Lik kꞌu xjuchꞌ kaꞌn kꞌuꞌx alaq chike ri e kꞌo pa cárcel. Yey echiriꞌ xmaj ne ri bꞌitaq e alaq, rukꞌ kiꞌkotemal xchꞌij alaq waꞌ. Ronoje taq waꞌ xkuy alaq ma etaꞌam alaq chilaꞌ chikaj kꞌo wi ri bꞌiꞌtisim che alaq y waꞌ e ne más utz chwa ri xa re ruwachulew, ma e taq ri kꞌo chilaꞌ chikaj lik kakowinik.
HEB 10:35 E uwariꞌche lik maya kan alaq ri kubꞌulibꞌal kꞌuꞌx alaq rukꞌ ri Dios, ma laꞌ la kubꞌulibꞌal kꞌuꞌxaj kukꞌam lo unimal rajil ukꞌaxel che alaq.
HEB 10:36 Lik kꞌu chirajawaxik kachꞌij alaq ri kꞌaxkꞌobꞌik kape pawiꞌ alaq rukꞌ unimal kꞌuꞌxaj, chaꞌ echiriꞌ ꞌanom chi alaq janipa ri rajawal ukꞌuꞌx ri Dios, kakꞌul na alaq rubꞌiꞌtisim lo Rire che alaq.
HEB 10:37 Ma Ruchꞌaꞌtem ri Dios jewaꞌ kubꞌiꞌij: Xa jubꞌiqꞌ chi karaj, yey ri Jun kakꞌunik, kakꞌun na y na kamayin taj.
HEB 10:38 China kꞌu ri lik jusukꞌ chinuwach, riꞌ kꞌo ukꞌaslemal ruma ri kubꞌulibꞌal ukꞌuꞌx wukꞌ. Yey we xresaj ribꞌ che ri kubꞌulibꞌal ukꞌuꞌx wukꞌ; Riꞌin na kinkiꞌkot ta chi rukꞌ kachaꞌ.
HEB 10:39 Qonoje kꞌu riꞌoj, na oj ta kukꞌil ri kakesaj kibꞌ chirij ri Cristo y xa kasach kiwach, ma e oj kukꞌil ri kakikꞌul ri kꞌaslemal na jinta utaqexik ruma kubꞌul kikꞌuꞌx rukꞌ Rire.
HEB 11:1 Ekꞌu ri kubꞌulibꞌal kꞌuꞌxaj rukꞌ ri Dios keꞌeloq e lik kaqajikibꞌaꞌ uwach kaqakꞌul ri qoyeꞌem che Rire. Ruma ri kubꞌulibꞌal qakꞌuꞌx, qakojom lik kꞌolik janipa ri kuqꞌalajisaj ri Dios chiqe, tobꞌ waꞌ na kilitaj taj.
HEB 11:2 Lik chom ri xtataj puwi ri kibꞌinik kisilabꞌik ri qatiꞌ-qamam ojertan ruma ri kubꞌulibꞌal kikꞌuꞌx rukꞌ ri Dios.
HEB 11:3 Ruma ri kubꞌulibꞌal qakꞌuꞌx, qetaꞌam ri Dios xchꞌawik y rukꞌ kꞌu ruchꞌaꞌtem xuꞌan ronoje ri kꞌolik, ma ronoje ri kaqil woꞌora upetebꞌem lo che ri na kilitaj ta uwach.
HEB 11:4 Ri Abel, ruma ri kubꞌulibꞌal ukꞌuꞌx, xuya chwach ri Dios jun qasaꞌn más utz chwa ruqasaꞌn ri Caín. Ruma laꞌ, ri Dios jusukꞌ xril rubꞌinik usilabꞌik y xukꞌul kꞌu ruqasaꞌn. Tobꞌ kꞌu kaminaq chi ri Abel, kꞌa kachꞌaꞌt ne woꞌora qukꞌ ruma ri kubꞌulibꞌal ukꞌuꞌx.
HEB 11:5 Ri Enoc, ruma ri kubꞌulibꞌal ukꞌuꞌx rukꞌ ri Dios, xkꞌam bꞌi chukꞌaslikil chilaꞌ chikaj y na xrikꞌowibꞌej ta ri kamik. Ekꞌu rucuerpo na xriqitaj taj, ma e ri Dios xukꞌam bꞌi. Yey ri Enoc echiriꞌ kꞌa kꞌo ne che ruwachulew, lik chom xilitaj rubꞌinik usilabꞌik chwach ri Dios.
HEB 11:6 Noꞌj e junoq na jinta kubꞌulibꞌal ukꞌuꞌx rukꞌ ri Dios, riꞌ na kukꞌul ta kꞌana ukꞌuꞌx ri Dios janipa ri kuꞌan chwach. Ma e junoq karaj kaqibꞌ rukꞌ ri Dios, lik chirajawaxik kukojo ri Dios kꞌolik y kukojo Rire kuya rajil ukꞌaxel chike ri ketzukuw re.
HEB 11:7 Ri Noé, ruma ri kubꞌulibꞌal ukꞌuꞌx rukꞌ ri Dios, xukojo echiriꞌ xbꞌiꞌx che ruma ri Dios saꞌ taq ri katajin loq, tobꞌ ne waꞌ kꞌamajaꞌ kuꞌanaꞌ. Xutaqej kꞌu ri xubꞌiꞌij ri Dios che y xuꞌan ri nimalaj barco re kebꞌukolobꞌej rufamilia chupa. Yey ruma wa kubꞌulibꞌal kꞌuꞌxaj xukꞌutu, xqꞌalajin kꞌu ri kimak ri na kikojom ta utzij ri Dios y xpe kꞌu qꞌatbꞌal tzij pakiwiꞌ. Ekꞌu riꞌ ri Noé ruma xkubꞌiꞌ ukꞌuꞌx rukꞌ ri Dios, e xukꞌul ri utz kuya ri Dios chike ri e jusukꞌ chwach ruma ri kubꞌulibꞌal kikꞌuꞌx rukꞌ.
HEB 11:8 Ri Abraham, ruma ri kubꞌulibꞌal ukꞌuꞌx, echiriꞌ xsikꞌix ruma ri Dios, xukoj tzij y xeꞌek chupa ri luwar ubꞌiꞌtisim ri Dios che. Xel kꞌu bꞌi pa rutinamit, tobꞌ na retaꞌam taj pa keꞌek wi.
HEB 11:9 Ruma ri kubꞌulibꞌal ukꞌuꞌx rukꞌ ri Dios, ri Abraham xeꞌjeqela pa ri luwar ubꞌiꞌtisim ri Dios che, tobꞌ rire na aj ta chilaꞌ. Na xkꞌojiꞌ ta chupa juna ja; xa xjeqiꞌ xeꞌ taq carpa, y jelaꞌ xkiꞌan ri Isaac y ri Jacob, ma e ne jun rike xkikꞌul ri ubꞌiꞌtisim lo ri Dios chike.
HEB 11:10 Ekꞌu ri Abraham royeꞌem ri jun tinamit tzꞌaqom lo chi utz, yey wa tinamit e ri Dios xchꞌobꞌow re y xyakaw re.
HEB 11:11 Rixoq Sara, ruma ri kubꞌulibꞌal ukꞌuꞌx rukꞌ ri Dios, tobꞌ lik nimalaj winaq chik y na utz tane kalanik, xyaꞌtaj che xalax jun ralabꞌ ma xukojo ri Dios lik e kuꞌana na janipa rubꞌiꞌtisim che.
HEB 11:12 Jekꞌulaꞌ ri Abraham, tobꞌ ne xa naqaj chi kꞌo wi lo rukamik, xalax rukꞌajol. Yey taq ri ralkꞌoꞌal rire lik xekꞌiyar kiwach, xebꞌuꞌana lik e kꞌi pachaꞌ ri kikꞌiyal ri chꞌumil e kꞌo che ruwa kaj y pachaꞌ ri sanyebꞌ kꞌo chuchiꞌ ri mar, ri na utz taj kajilaxik.
HEB 11:13 Konoje waꞌ xekamik echiriꞌ kꞌamajaꞌ kakikꞌul janipa rubꞌiꞌtisim lo ri Dios chike. Ruma kꞌu lik xkubꞌiꞌ kikꞌuꞌx rukꞌ ri Dios, e pachaꞌ xkil pan waꞌ y lik xekiꞌkot rukꞌ taq ri xkil apanoq. Y rukꞌ waꞌ, xkiqꞌalajisaj rike na e ta aj wara che ruwachulew, xa ebꞌikꞌowel.
HEB 11:14 Yey ri kakiqꞌalajisaj waꞌ, kakikꞌutu ketajin che utzukuxik jun kitinamit pa kejeqiꞌ wi.
HEB 11:15 We ta e laꞌ kꞌa kakichꞌobꞌ raqan puwi ri tinamit pa xebꞌel lo wi, riꞌ lik pakiqꞌabꞌ kꞌo wi ketzelej tanchi chilaꞌ.
HEB 11:16 Noꞌj rike e xkaj jun kitinamit lik junwi, waꞌ e ri jun chomilaj tinamit chilaꞌ chikaj. E uwariꞌche, ri Dios na kakꞌix ta che kabꞌiꞌx che e Dios ke rike, ma uyijbꞌam chi jun kitinamit lik chom chilaꞌ chikaj.
HEB 11:17 Ekꞌu ri Abraham, ruma ri kubꞌulibꞌal ukꞌuꞌx rukꞌ ri Dios, echiriꞌ xkꞌam upa, xukꞌam bꞌi rukꞌajol Isaac re kukamisaj chwi raltar, tobꞌ xew ne ukꞌajol riꞌ yey puwi rire uꞌanom ri bꞌiꞌtisinik ri Dios echiriꞌ jewaꞌ xubꞌiꞌij kanoq:
HEB 11:18 «Xew che rakꞌajol Isaac kakipetebꞌej wi lo rawalkꞌoꞌal» xchaꞌ.
HEB 11:19 Xuya kꞌu ranimaꞌ rukꞌajol ma lik retaꞌam ri Dios kꞌo uchuqꞌabꞌ re kukꞌastajisaj lo ri Isaac chikixoꞌl ri ekaminaq, y echiriꞌ ri Dios xuya tanchi che, e pachaꞌ xukꞌul tanchi rukꞌajol chikixoꞌl ri ekaminaq.
HEB 11:20 Ri Isaac, ruma ri kubꞌulibꞌal ukꞌuꞌx rukꞌ ri Dios, echiriꞌ xebꞌuꞌan bendecir ri Jacob y ri Esaú, xujikibꞌaꞌ uwach chom taq sipanik kuya ri Dios chike chwach apanoq.
HEB 11:21 Jekꞌulaꞌ, ri Jacob ruma ri kubꞌulibꞌal ukꞌuꞌx rukꞌ ri Dios, echiriꞌ xa naqaj chi kꞌo wi rukamik, xebꞌuꞌan kan bendecir ri kebꞌ ukꞌajol ri José, xutzꞌonoj chom taq sipanik re ri Dios pakiwiꞌ chikijujunal y lik xuloqꞌnimaj uqꞌij ri Dios e riꞌ yuxul chwi ruchꞌamiꞌy.
HEB 11:22 Ri José, ruma ri kubꞌulibꞌal ukꞌuꞌx rukꞌ ri Dios, echiriꞌ xa naqaj chi kꞌo wi rukamik, xuqꞌalajisaj kꞌo jun qꞌij raj Israel kebꞌel bꞌi chupa ri tinamit Egipto chaꞌ ketzelej tanchi pa ri luwar ubꞌiꞌtisim ri Dios chike. Y xtaqan kꞌu kanoq saꞌ kaꞌan che rubꞌaqil echiriꞌ kebꞌel bꞌi, ma xraj kamuqiꞌ rubꞌaqil chilaꞌ.
HEB 11:23 Ruchu-uqaw ri Moisés, ruma ri kubꞌulibꞌal kikꞌuꞌx rukꞌ ri Dios, xkewaj ri Moisés oxibꞌ ikꞌ, ma xkilo lik chomilaj akꞌa. Na xkixiꞌij ta kꞌu kibꞌ che ri taqanik re ri rey echiriꞌ xutaq kikamisaxik konoje ri raltaq ko alabꞌo e aj Israel.
HEB 11:24 Ri Moisés, ruma ri kubꞌulibꞌal ukꞌuꞌx rukꞌ ri Dios, echiriꞌ xnimarik na xraj ta chik kabꞌiꞌx che e ralabꞌ rumiꞌal ri faraón, ri rey re Egipto.
HEB 11:25 Xuchaꞌ kꞌu ri kutij kꞌax junam kukꞌ rutinamit ri Dios chwa ri kakꞌojiꞌ chupa ruqusil ri mak, ma waꞌ xa kikꞌowik.
HEB 11:26 Ekꞌu ri bꞌeyomalil más kꞌo uwach chwach rire e ri kachꞌamixik pachaꞌ xꞌan che ri Cristo, na e ta taq ri bꞌeyomalil re Egipto; ma runaꞌoj e kꞌo pan puwi ri rajil ukꞌaxel kuya ri Dios che chwach apanoq.
HEB 11:27 Ruma kꞌu ri kubꞌulibꞌal ukꞌuꞌx rukꞌ ri Dios, xel bꞌi Egipto y na xuxiꞌij ta kꞌana ribꞌ chwa ri royowal ri rey. Ekꞌu ri xuꞌano e lik xuchuqꞌubꞌej ribꞌ che ri kuꞌano, ma e pachaꞌ lik kutzutzaꞌ chi pan uwach ri Dios, tobꞌ Rire na kilitaj ta uwach.
HEB 11:28 Ruma kꞌu ri kubꞌulibꞌal ukꞌuꞌx rukꞌ ri Dios, e xuꞌan ri xtaq che; xuyijbꞌaꞌ ri nimaqꞌij Pascua y xtaqan che kasoqꞌ ukikꞌel bꞌexex che taq ruchiꞌ ja chaꞌ echiriꞌ kikꞌow ru ángel ri Dios, na kukamisaj ta kan ri nabꞌe kalkꞌoꞌal ri e aj Israel.
HEB 11:29 Ri tinamit Israel, ruma ri kubꞌulibꞌal kikꞌuꞌx rukꞌ ri Dios, xebꞌikꞌow chupa ri mar Rojo echiriꞌ waꞌ xjaqataj upa y e laꞌ pa chaqiꞌj ulew xebꞌikꞌowik. Noꞌj echiriꞌ raj Egipto xkijeq kebꞌikꞌow chupa ri mar, ri yaꞌ xukꞌul tanchi ribꞌ y jelaꞌ xejiqꞌ kan chupa.
HEB 11:30 Raj Israel, ruma ri kubꞌulibꞌal kikꞌuꞌx rukꞌ ri Dios, xebꞌin chirij ri tinamit Jericó wuqubꞌ qꞌij, y tekꞌuchiriꞌ xwuluwubꞌ lo ri tapia re ri tinamit.
HEB 11:31 Ri Rahab e jun ixoq retzꞌabꞌem uwa uqꞌij kukꞌ achijabꞌ; na rukꞌ ta kꞌu riꞌ, ruma xkubꞌiꞌ ukꞌuꞌx rukꞌ ri Dios, na xkam ta kukꞌ ri e aj palajiy tzij e aj Jericó, ma rire xebꞌukꞌul chi utzil chomal ri e kꞌakꞌalenel e aj Israel y xebꞌutoꞌo.
HEB 11:32 ¿Saꞌ chi más kambꞌiꞌij? Ma na kuꞌan ta wa jun qꞌij kinchꞌaꞌt chwi ri kubꞌulibꞌal kikꞌuꞌx ri Gedeón, ri Barác, ri Sansón, ri Jefté, ri David, ri Samuel y ri qꞌalajisanelabꞌ.
HEB 11:33 Ruma ri kubꞌulibꞌal kikꞌuꞌx rukꞌ ri Dios, e kꞌo ri xkichꞌij uchuqꞌabꞌ ukꞌiyal tinamit, xetaqan kꞌu pakiwiꞌ chi jusukꞌ y lik xkiriq ri toꞌbꞌal re ri Dios bꞌiꞌtisim lo chike. E kꞌo ne ri xkitzꞌapij ruwakeꞌ ri koj chaꞌ na ketij ta kuma.
HEB 11:34 E kꞌo ne ri xekꞌaq chupa ri aqꞌ y na xekꞌat taj. E kꞌo ri xekolobꞌetaj chwach ri kamik rukꞌ espada. E kꞌo ri xyaꞌiꞌ kichuqꞌabꞌ echiriꞌ na jinta kichuqꞌabꞌ, lik xnimar ri kichuqꞌabꞌ pa chꞌaꞌoj y ruma kꞌu riꞌ, ri soldados e aj naj xebꞌanimaj bꞌi.
HEB 11:35 E kꞌo ne ixoqibꞌ xkikꞌul ri kalkꞌoꞌal e kꞌastajinaq tanchi lo chikixoꞌl ri ekaminaq. Noꞌj e kꞌo jujun chik tikawex, ruma ri na xkaj taj kakoqꞌotaj ri Dios, e xkichaꞌ ri na xetzoqpix ta chubꞌi y rukꞌ kꞌu unimal kꞌaxkꞌolil xekamik, ma e xkichaꞌ ri jun chomilaj kꞌastajibꞌal re kꞌaslemal na jinta utaqexik.
HEB 11:36 E kꞌo jujun chik lik xechꞌamixik, xjichꞌ kipa, xeyaꞌiꞌ pa karena y xeyaꞌ pa cárcel.
HEB 11:37 E kꞌo ri lik xkꞌam taq kipa, e kꞌo ri xekamisax pa abꞌaj, e kꞌo ri xqꞌatiꞌ kipa rukꞌ sierra, e kꞌo ri xekamisax rukꞌ espada. E kꞌo ri lik xesutinik kikojom kiqꞌuꞌ xa re utzꞌuꞌmal bꞌexex o kaprux, xꞌan nibꞌaꞌ chike, lik xpaxir kꞌu kikꞌuꞌx y lik xꞌan kꞌax chike.
HEB 11:38 Rike xebꞌin pa taq luwar katzꞌintzꞌotik, xebꞌin pa taq juyubꞌ, xejeqiꞌ che ruwachulew xeꞌ taq pek y pa taq jul. E taq kꞌu waꞌ wa winaq re ruwachulew na taqal tane chike kekꞌojiꞌ wa nimaq e aj chak re ri Dios chikixoꞌlibꞌal.
HEB 11:39 Tobꞌ konoje waꞌ lik xkikꞌut ri kubꞌulibꞌal kikꞌuꞌx rukꞌ ri Dios, na jinta kꞌu junoq chike xukꞌul wara che ruwachulew ronoje rubꞌiꞌtisim lo ri Dios chike.
HEB 11:40 Ma ojertan ri Dios uchꞌobꞌom chi lo ri más chom kuꞌanaꞌ chaꞌ kutzꞌaqatisaj lo ri karaj kuꞌan qukꞌ riꞌoj junam kukꞌ rike.
HEB 12:1 Konoje kꞌu riꞌ waꞌ wa tikawex lik xkikꞌut ri kubꞌulibꞌal kikꞌuꞌx. Lik chirajawaxik kꞌu riꞌ chiqe riꞌoj jelaꞌ kaqaꞌano. Ma wa oj kꞌo wi e pachaꞌ jun kꞌalalem yey e riꞌoj ri kojkꞌalalik. Ekꞌu rike kojkitzutzaꞌ loq, koyeꞌem kojopon pa ri kꞌisbꞌal re ri kꞌalalem oj kꞌo wi. Ekꞌu riꞌ riꞌoj qayaꞌa kan ronoje ri na utz taj kalatzꞌan qe, qayaꞌa kan ronoje ri mak ojuraꞌlim y mojkos kꞌu riꞌ che ri bꞌe kꞌo chiqawach.
HEB 12:2 Junoq kakꞌalalik e lik kutzutzaꞌ pan ri kꞌisbꞌal re pa karaj kopon wi. Jekꞌulaꞌ riꞌoj e qayaꞌa pan ri qawach puwi ri Jesús, ma rukꞌ Rire kape wi ri kubꞌulibꞌal qakꞌuꞌx y e Rire ri katzꞌaqatisan uwach waꞌ. Xuya kꞌu ranimaꞌ xkam chwa ri cruz tobꞌ waꞌ lik kꞌixbꞌal uwach; e xutij ri kꞌax ma retaꞌam we xrikꞌowibꞌej waꞌ, unimal kiꞌkotemal ri kukꞌulu. Ekꞌu riꞌ woꞌora tzꞌul puwikiqꞌabꞌ rutzꞌulibꞌal ri Dios.
HEB 12:3 E lik kꞌola naꞌoj alaq puwi ri xuꞌan ri Jesús; ma tobꞌ na taqal ta che Rire, lik xutij kꞌax pakiqꞌabꞌ raj makibꞌ. Makos kꞌu ralaq y mapax ne kꞌuꞌx alaq chwa ri kꞌaxkꞌobꞌik.
HEB 12:4 Ma ralaq kꞌamajaꞌ ne kopon alaq kꞌa chwa ri kamik ruma kachꞌoꞌjin alaq chirij ri mak.
HEB 12:5 Mikꞌow kꞌu chikꞌuꞌx alaq ri pixabꞌanik re ri Dios, ri kubꞌiꞌij pa Ruchꞌaꞌtem che alaq, ri alaq ralkꞌoꞌal Rire: At walkꞌoꞌal, makꞌaq bꞌi uqꞌij ri qꞌilonik re ri Dios, mapax ne akꞌuꞌx che echiriꞌ kuchꞌaꞌbꞌej apa.
HEB 12:6 Ma ri Dios Qajawxel lik kebꞌuqꞌil janipa ri kꞌax kebꞌunaꞌo y e pachaꞌ kujichꞌ kipa janipa ri uꞌanom ralkꞌoꞌal chike kachaꞌ.
HEB 12:7 Lik kꞌu kuyu alaq ri qꞌilonik, ma jelaꞌ kaqꞌalajinik alaq ralkꞌoꞌal ri Dios. ¿Na etaꞌam ta nebꞌa alaq e rachi kꞌo ralkꞌoꞌal lik chirajawaxik che kebꞌuqꞌil waꞌ?
HEB 12:8 Jekꞌuriꞌlaꞌ, ri Dios kebꞌuqꞌil konoje ri e ralkꞌoꞌal. Noꞌj we ta ri Dios na kuqꞌil ta alaq, riꞌ kuꞌana pachaꞌ na alaq ta saqil ralkꞌoꞌal, pachaꞌ na qꞌalaj taj china ri qaw alaq.
HEB 12:9 Echiriꞌ oj akꞌalabꞌ, e ri qachu-qaqaw che ruwachulew lik xojkiqꞌilo y xqanimaj kitzij. ¿Suꞌchak kꞌu riꞌ na kaqaya ta qibꞌ puqꞌabꞌ ri Qaqaw kꞌo chilaꞌ chikaj chaꞌ jelaꞌ kakꞌojiꞌ qakꞌaslemal chwach Rire?
HEB 12:10 Ma ri qachu-qaqaw xa ajilam junabꞌ kojkiqꞌilo, yey ri kakiꞌan qukꞌ xa e chirij ri kinaꞌoj rike. Noꞌj ri Qaqaw Dios lik kojupixabꞌaj puwi ri kajawax chiqe chaꞌ ri qakꞌaslemal kuꞌana jelaꞌ pachaꞌ ri chomilaj ukꞌaslemal Rire.
HEB 12:11 Paqatzij wi na jinta juna qꞌilonik lik kukꞌul qakꞌuꞌx echiriꞌ oj kꞌo chupa, ma waꞌ kuꞌan kꞌax chiqe. Pero we xqakꞌul ri qꞌilonik, lik kꞌo kutiqoj chiqe, ma kusukꞌupij ri qabꞌinik qasilabꞌik chaꞌ kojkꞌojiꞌ chi utzil chomal.
HEB 12:12 Ruma kꞌu laꞌ lik chuqꞌubꞌej ibꞌ alaq chaꞌ jelaꞌ kakꞌojiꞌ uchuqꞌabꞌ ri qꞌabꞌ alaq kosinaq y kakowir ri chꞌek alaq sikirinaq.
HEB 12:13 E kꞌama bꞌi alaq ri bꞌe jusukꞌ chaꞌ kuꞌan alaq kꞌamal kiwach ri na e ta tikil chi utz y jelaꞌ rike na ketzaq ta chik y na kebꞌel ta che ri bꞌe jusukꞌ.
HEB 12:14 Lik chirajawaxik kꞌola alaq chi utzil chomal kukꞌ konoje y tijoj ibꞌ alaq che ri santowilaj bꞌinik chwach ri Dios, ma na jinta junoq keꞌrila uwach ri Dios we na e ta kuꞌan riꞌ.
HEB 12:15 Lik chajij ibꞌ alaq chaꞌ na jinta junoq che alaq kujam bꞌi ri unimal rutzil ukꞌuꞌx ri Dios ruma katikiꞌ oyowal pa ranimaꞌ, yey jekꞌulaꞌ riꞌ kuꞌan latzꞌanel che ri kꞌiyibꞌal alaq y laj ne keretzelaj jujun chik.
HEB 12:16 Mukꞌulumaj e junoq che alaq karetzꞌabꞌej uwa uqꞌij rukꞌ junoq chik na ukꞌulel taj; makꞌaq ne bꞌi alaq uqꞌij janipa ri kuya ri Dios che alaq pachaꞌ ri xuꞌan ri Esaú echiriꞌ xa ruma jun waꞌim, xukꞌayij ri taqal che rire ruma atzixel.
HEB 12:17 Etaꞌam chi kꞌu alaq riꞌ, ri Esaú tobꞌ lik xurayij chik kukꞌul janipa ri taqal che rire ruma atzixel, na xyaꞌ ta chi che; tobꞌ ne lik xroqꞌej, na xuriq ta chi ujalkꞌatixik waꞌ.
HEB 12:18 Ekꞌu ralaq na oponinaq tane alaq chwach jun juyubꞌ kilitaj wara che ruwachulew pachaꞌ ri juyubꞌ xkil raj Israel ojertan, waꞌ e ri xjumuw aqꞌ chwach, pa xuꞌan wi qꞌequꞌm y xuꞌan kaqjiqꞌ.
HEB 12:19 Na tom tane alaq ruchꞌawibꞌal ri trompeta y ruqul ri Dios jelaꞌ pachaꞌ ri xkita raj Israel. Ekꞌu taq ri xetaw re waꞌ, lik xkitzꞌonoj chaꞌ na e ta chi ri Dios kachꞌaꞌt kukꞌ.
HEB 12:20 Ma rike xkixiꞌij kibꞌ echiriꞌ xyaꞌ wa jun taqanik chike: «China ri kapaqiꞌ lo chwa wa juyubꞌ, tobꞌ ne juna awaj, riꞌ kakamisax paꞌbꞌaj o rukꞌ lanza» xchaꞌ.
HEB 12:21 Lik xibꞌibꞌal kꞌu uwach riꞌ ri xilitajik, ma jenewaꞌ xubꞌiꞌij ri Moisés: «Lik kimbꞌirbꞌotik ruma nuxiꞌim wibꞌ» xchaꞌ.
HEB 12:22 Noꞌj woꞌora alaq oponinaq chwach ri juyubꞌ Sion pa ri tinamit re ri Dios kꞌaslik, ri tinamit Jerusalem chilaꞌ chikaj, pa kimolom wi kibꞌ ukꞌiyal ángeles re kakiloqꞌnimaj uqꞌij ri Dios rukꞌ kiꞌkotemal.
HEB 12:23 Alaq chi bꞌare jun kukꞌ ri e ralkꞌoꞌal ri Dios, ri kebꞌopon chilaꞌ chikaj rukꞌ Rire. Alaq oponinaq chi chwach ri Dios pa e kꞌo wi taq ri e jusukꞌ, ri ebꞌokinaq chi chilaꞌ chikaj, ri ꞌanom chi chom che ri kikꞌaslemal ruma ri Dios, ri Aj Qꞌatal Tzij ke konoje.
HEB 12:24 Yey alaq oponinaq chi chwach ri Jesús, ri xtikibꞌan ri kꞌakꞌ tzij xuꞌan ri Dios qukꞌ; ri Jesús xuꞌan waꞌ ruma rukikꞌel xturuwik, y waꞌ más kꞌo kutiqoj chwa rukikꞌel ri Abel.
HEB 12:25 E uwariꞌche lik makꞌaq bꞌi alaq uqꞌij ri Dios, ri kapixabꞌan e alaq. Ma we na xekolobꞌetaj ta ri xkikꞌaq bꞌi uqꞌij ri Dios ojertan echiriꞌ Rire xuchꞌaꞌbꞌej kipa ruma ri Moisés wara che ruwachulew, makꞌuwariꞌ riꞌoj na kojkolobꞌetaj taj we e kaqakꞌaq bꞌi uqꞌij ri Jun kuchꞌaꞌbꞌej lo qapa chilaꞌ chikaj.
HEB 12:26 Ma ojertan echiriꞌ xchꞌaw lo Rire, lik xbꞌarbꞌat rulew, yey woꞌora jewaꞌ ujikibꞌam uwach: Jumul chi kꞌut kanꞌan waꞌ, pero na xew ta chi kꞌu ruwachulew kambꞌarbꞌatisaj, ma kanyikiyaꞌ ne ruwa kaj kachaꞌ.
HEB 12:27 Echiriꞌ kubꞌiꞌij: «Jumul chi kꞌut kanꞌan waꞌ,» e keꞌelawi ronoje ri uꞌanom ri Dios, ri utz kasilabꞌisaxik, waꞌ kajalkꞌatix bꞌi; xew kꞌu katikiꞌ kan ri na utz taj kasilabꞌisaxik.
HEB 12:28 Jekꞌulaꞌ, riꞌoj kaqakꞌul jun luwar pa kayaꞌiꞌ wi chiqe kojtaqanik y waꞌ lik tikil chi utz y na kasach ta uwach. Ruma kꞌu waꞌ chojtioxin chwach ri Dios, qaqasaj kꞌu qamejelem chwach y qaloqꞌnimaj rukꞌ xiꞌin ibꞌ.
HEB 12:29 Ma jelaꞌ pachaꞌ ri aqꞌ kuporoj ronoje, jekꞌulaꞌ kuꞌan ri qa Dios echiriꞌ kusach uwach ronoje ri na utz taj.
HEB 13:1 Moqꞌotaj alaq ri kꞌax kanaꞌ ibꞌ alaq chiwach alaq, ma ralaq chaqꞌ ibꞌ alaq chupa rubꞌiꞌ ri Cristo.
HEB 13:2 Mikꞌow chikꞌuꞌx alaq ri kekꞌul alaq chi utz janipa ri kebꞌopon chi ocho alaq, ma e kꞌo ri xebꞌanaw waꞌ y na xkinaꞌbꞌej taj e ángeles ri xekikꞌulu.
HEB 13:3 Memeskꞌutaj alaq ri e kꞌo pa cárcel, e ꞌana alaq pachaꞌ kꞌo alaq kukꞌ pa ri cárcel; yey memeskꞌutaj ne alaq ri e kꞌo pa kꞌax, e ꞌana alaq pachaꞌ katij alaq kꞌax junam kukꞌ rike.
HEB 13:4 Lik chuꞌana nim uqꞌij ri kꞌulanikil chiwach onoje alaq y machꞌulaj ne kꞌana alaq ri tzij ꞌanom alaq chiwach alaq; ma konoje ri kaketzꞌabꞌej uwa kiqꞌij kukꞌ jujun chik na kikꞌulel taj y konoje ri kemakun chirij ri kꞌulanikil, waꞌ kaqꞌat tzij pakiwiꞌ ruma ri Dios.
HEB 13:5 Meꞌek kꞌuꞌx alaq chwi ri puaq. E kiꞌkota alaq rukꞌ ri kꞌo ukꞌ alaq, ma jewaꞌ ubꞌiꞌim ri Dios: Na katinya ta kan kꞌenoq y na kanwoqꞌotaj ta atoꞌik xchaꞌ.
HEB 13:6 E uwariꞌche lik kaqajikibꞌaꞌ uwach ri tzꞌibꞌital kan pa Ruchꞌaꞌtem ri Dios: Ri Nuqaw Dios, e Rire ri katoꞌw weꞌin; na kanxiꞌij tane kꞌana wibꞌ che ri na utz taj kuꞌan juna tikawex chwe kojchaꞌ.
HEB 13:7 Chekꞌuna chikꞌuꞌx alaq ri e aj kꞌamal wach e alaq, ri xetzijon Ruchꞌaꞌtem ri Dios che alaq. Chꞌobꞌo alaq raqan janipa ri utz xukꞌam lo ri kibꞌinik kisilabꞌik y e kꞌama alaq re ri kubꞌulibꞌal kikꞌuꞌx rukꞌ ri Cristo.
HEB 13:8 Ri Qanimajawal Jesucristo na kajalkꞌatitaj taj; Rire jelaꞌ pachaꞌ rojertan, jelaꞌ woꞌora y chiqawach apanoq.
HEB 13:9 Mataqej kꞌu alaq juna kꞌutunik junwi y na usukꞌ taj. Ma e kꞌo ri lik kebꞌok il che taq ri taqanik puwi saꞌ ri katijik, yey waꞌ na jinta kꞌana kutiqoj che ri kibꞌinik kisilabꞌik chwach ri Dios. Ekꞌu ri lik kuya qachuqꞌabꞌ riꞌoj e ri katikiꞌ ri qanimaꞌ chupa ri unimal rutzil ukꞌuꞌx ri Dios.
HEB 13:10 Ri oj re ri Cristo, kꞌo ri altar qeꞌoj (waꞌ e rukamik ri Cristo chwa ri cruz). Ekꞌu ri keloqꞌniman pa ri Rocho Dios rukꞌ awaj ekamisam, na kayaꞌtaj ta chike kakikꞌul janipa ri yaꞌtal chiqe riꞌoj ruma rukamik ri Cristo.
HEB 13:11 Ri kuꞌan ri kajawal raj chakunel pa Rocho Dios e kukoj bꞌi chupa ri Luwar lik Santo ri kikikꞌel rawaj ekamisam ruma ri mak ke ri tinamit, yey ekꞌu ri kitiꞌjil kesax bꞌi chupa ri tinamit re kaporoxik.
HEB 13:12 Jekꞌulaꞌ ri Jesús xesax bꞌi chupa ri tinamit echiriꞌ xkamisaxik chaꞌ rukꞌ rukikꞌel kujosqꞌij ri kanimaꞌ ri tikawex.
HEB 13:13 Joꞌ kꞌu riꞌ rukꞌ ri Jesús, e pachaꞌ junam rukꞌ Rire chojelubꞌi chupa ri tinamit y qakꞌulu qeꞌoj ri kꞌaqbꞌal bꞌi qaqꞌij jelaꞌ pachaꞌ xꞌan che Rire.
HEB 13:14 Ma wara che ruwachulew na jinta juna tinamit lik kakowinik pa utz koj-jeqiꞌ wi; ruma kꞌu riꞌ, e qoyeꞌem ri jun qatinamit na kasach ta uwach.
HEB 13:15 Ruma kꞌu laꞌ, xaqi e qayaꞌa chwach ri Dios ri qaqasaꞌn re yakbꞌal uqꞌij ruma ri Qanimajawal Jesucristo. Qayaka kꞌu uqꞌij rubꞌiꞌ Rire, e qabꞌiꞌij Rire e Qanimajawal.
HEB 13:16 Lik mikꞌow chikꞌuꞌx alaq xaqi e ꞌana alaq ri utz y toꞌo ibꞌ alaq chiwach alaq. Ma waꞌ e jun qasaꞌn lik kukꞌul ukꞌuꞌx ri Dios.
HEB 13:17 Lik kojo alaq kitzij ri e aj kꞌamal wach e alaq y yaꞌa ibꞌ alaq chitaqik kuma, ma chwikiqꞌabꞌ rike yaꞌtal wi ruchajixik ri kꞌaslemal alaq chwach ri Dios. Yey rike kakiqꞌalajisaj chwach ri Dios suꞌanik xkiꞌan taq ri kichak ukꞌ alaq. Lik chirajawaxik kꞌu riꞌ kaya ibꞌ alaq chitaqik kuma chaꞌ jelaꞌ rike utz kakiꞌan ri kichak rukꞌ kiꞌkotemal y na rukꞌ ta bꞌis ruma ri kuꞌan alaq alkꞌayew chike; ma we e riꞌ, na jinta kutiqoj ri kichak ukꞌ alaq.
HEB 13:18 Lik ꞌana kꞌu alaq orar paqawiꞌ. Riꞌoj lik kaqanaꞌ chiqakꞌuꞌx utz ri qaꞌanom, y rukꞌ kꞌu ri qabꞌinik qasilabꞌik kaqaj kaqaꞌan chi utz ronoje.
HEB 13:19 Yey kantzꞌonoj ko che alaq, e ꞌana alaq orar panuwiꞌ chaꞌ kayaꞌtaj tanchi chwe riꞌin kinopon tan ukꞌ alaq.
HEB 13:20 Ri Dios, ri aj yaꞌl utzil chomal, xukꞌastajisaj lo ri Qanimajawal Jesucristo chikixoꞌl ri ekaminaq. Y ri Cristo e ri Nimalaj Aj Chajinel ke rutinamit ri Dios; yey rukꞌ rukikꞌel Rire, xujikibꞌaꞌ uwach ri kꞌakꞌ tzij na jinta utaqexik.
HEB 13:21 Kantzꞌonoj kꞌu riꞌ che ri Dios, chutoꞌo alaq chaꞌ kaꞌan alaq ri utz y jelaꞌ kaꞌan kꞌu alaq janipa ri karaj Rire. Chuꞌana kꞌu Rire ukꞌ alaq ruma ri Qanimajawal Jesucristo janipa ri rajawal ukꞌuꞌx Rire. Che Rire taqal wi ri yakbꞌal uqꞌij waqꞌij ora y na jinta chi utaqexik chiqawach apanoq. Amén.
HEB 13:22 Yey kantzꞌonoj che alaq hermanos, lik yaꞌa ibꞌ alaq che umajik usukꞌ waꞌ wa kebꞌ oxibꞌ pixabꞌanik xintzꞌibꞌaj pan che alaq y kꞌulu alaq chi utz.
HEB 13:23 Kuaj ketaꞌmaj alaq e ri qa hermano Timoteo elinaq chi lo pa cárcel, yey we xkꞌun tan loq, kankꞌam bꞌi wukꞌ echiriꞌ kiꞌnwila alaq.
HEB 13:24 Yaꞌa alaq rutzil kiwach konoje ri e aj kꞌamal wach e alaq kukꞌ konoje rutinamit ri Dios. Ri e aj Italia kakiya pan rutzil wach alaq.
HEB 13:25 Kꞌulu kꞌu onoje alaq ri unimal rutzil ukꞌuꞌx ri Dios. Amén.
JAM 1:1 Riꞌin in Santiago, in aj chak re ri Dios y re ri Qanimajawal Jesucristo. Kanya pan rutzil wach ralaq alaq ri kabꞌlajuj tinamit re Israel, ri alaq kichom bꞌi che ronoje ruwachulew.
JAM 1:2 Alaq nu hermanos, lik kiꞌkota alaq echiriꞌ kikꞌow alaq chupa taq ukꞌiyal uwach kꞌaxkꞌobꞌik.
JAM 1:3 Ma etaꞌam chi alaq we kachꞌij alaq ri kꞌambꞌal upa ri kubꞌulibꞌal kꞌuꞌx alaq rukꞌ ri Dios, waꞌ kukꞌam lo unimal kꞌuꞌxaj che alaq.
JAM 1:4 Lik kꞌola kꞌu unimal kꞌuꞌx alaq pa saqil wi chaꞌ jelaꞌ kakꞌojiꞌ alaq jusukꞌ y kakowir alaq chi utz, jekꞌuriꞌlaꞌ na jinta chi kꞌo kajawax che ri bꞌinik silabꞌik alaq chwach ri Dios.
JAM 1:5 We kꞌo kꞌu junoq che alaq kajawax saqil unaꞌoj, chutzꞌonoj che ri Dios y waꞌ kayaꞌtaj lo che, ma ri Dios na kuxuꞌyaj ta ri katzꞌonox che y na kukꞌaq tane bꞌi kiqꞌij ri tikawex kꞌo kakitzꞌonoj che.
JAM 1:6 Yey we junoq kꞌo karaj kutzꞌonoj che ri Dios, lik chirajawaxik che, kakubꞌiꞌ ukꞌuꞌx rukꞌ ri Dios y na kebꞌ ta upa ri kubꞌulibꞌal ukꞌuꞌx. Ma e ri xa kebꞌ upa ri kubꞌulibꞌal ukꞌuꞌx, riꞌ na tikil ta chi utz; e pachaꞌ ri urepebꞌal uwi ri mar xa kakꞌam bꞌi jewaꞌ y jeriꞌ ruma ri tew.
JAM 1:7 Ekꞌu junoq jewaꞌ uꞌanom, muchꞌobꞌo we kꞌo kukꞌul che ri Qajawal.
JAM 1:8 Ma ri tikawex xa kebꞌ upa che ri kuchꞌobꞌo, riꞌ na jinta ukowil che taq ri kuꞌano.
JAM 1:9 E juna hermano lik na il ta ko uwach, lik kiꞌkota che ri yakbꞌal uqꞌij kuya ri Dios.
JAM 1:10 Yey ri hermano bꞌeyom lik kiꞌkota che we kakꞌaq bꞌi uqꞌij ruma uꞌanom chꞌutiꞌn che ribꞌ chwach ri Dios. Ma rukꞌaslem che ruwachulew xa e pachaꞌ rukotzꞌiꞌjal raqꞌes, na kakowin taj.
JAM 1:11 Ma echiriꞌ kel lo ri qꞌij yey rukꞌatanil kaqaꞌwik, raqꞌes kachaqijik y rukotzꞌiꞌjal kapuqik y kasach uwach ruchomalil. Jekꞌuriꞌlaꞌ kukꞌulumaj ri bꞌeyom, ma tobꞌ lik kachakunik, echiriꞌ kakamik, ronoje rubꞌeyomalil kakanaj kanoq.
JAM 1:12 Nim uqꞌij ralaxik ri tikawex kuchꞌij uchuqꞌabꞌ ri kꞌambꞌal upa, ma echiriꞌ uchꞌijom chi uchuqꞌabꞌ waꞌ, kukꞌul ri sipanik re ri kꞌaslemal ubꞌiꞌtisim lo ri Dios chike ri kꞌax kenaꞌw re Rire.
JAM 1:13 Echiriꞌ kꞌo junoq kunaꞌo kꞌo kaminow uwach pa mak, mubꞌiꞌij e ri Dios ri kaꞌanaw waꞌ che. Ma ri Dios na kacha ta kꞌana ukꞌuꞌx che ri mak yey na kumin tane junoq chupa.
JAM 1:14 Ma echiriꞌ kꞌo junoq kunaꞌo kꞌo kaminow uwach pa mak, riꞌ e rurayibꞌal ri kakꞌamaw bꞌi re chupa.
JAM 1:15 Ekꞌu taq rurayibꞌal kukꞌam bꞌi pa mak, yey waꞌ wa mak kukꞌam lo kamik.
JAM 1:16 Alaq nu hermanos ri lik kꞌax kannaꞌ alaq, kambꞌiꞌij kꞌu che alaq: Masokotaj kꞌana alaq.
JAM 1:17 Ma ronoje chomilaj sipanik y ri utz kayaꞌtaj chiqe, rukꞌ ri Dios petinaq wi. Rire e ꞌanayom re taq ri kawon che ruwa kaj. Yey taq waꞌ xa kajalkꞌatitaj uwach, noꞌj ri Dios na kajalkꞌatitaj ta uwach y ri qꞌijsaq re Rire na kok ta qꞌequꞌm chwach.
JAM 1:18 Lik rukꞌ kꞌu Rire xalax wi kuya kꞌakꞌ qakꞌaslemal ruma ri Qꞌijsaq re Ruchꞌaꞌtem, chaꞌ jelaꞌ e kojuꞌana ri nabꞌe ralkꞌoꞌal oj yaꞌtal puqꞌabꞌ ri Cristo.
JAM 1:19 Alaq nu hermanos ri kꞌax kannaꞌ alaq, mikꞌow chikꞌuꞌx alaq waꞌ: Lik chirajawaxik che alaq kaya xikin alaq che ri kakibꞌiꞌij ri jujun chik, noꞌj lik chꞌobꞌo na alaq raqan chi utz saꞌ ri kabꞌiꞌij alaq, yey muꞌan ne ri lik xa chꞌitil alaq che ri oyowal.
JAM 1:20 Ma e junoq aj oyowal na kuꞌan ta ri jusukꞌ chwach ri Dios.
JAM 1:21 Ruma kꞌu laꞌ, yaꞌa kan alaq ronoje ri na chom ta uwach y ronoje rukꞌiyal mak. E lik kꞌulu alaq rukꞌ uchꞌutiꞌnal kꞌuꞌx alaq Ruchꞌaꞌtem ri Dios tikil chi chupa ri animaꞌ alaq, ma waꞌ kukolobꞌej alaq.
JAM 1:22 E lik ꞌana alaq janipa ri kubꞌiꞌij Ruchꞌaꞌtem ri Dios y na xew ta alaq tanel re; ma we xa alaq tanel re, kasok ibꞌ alaq we kachꞌobꞌ alaq ruma waꞌ kakolobꞌetaj alaq.
JAM 1:23 Ma e junoq xa tanel re Ruchꞌaꞌtem ri Dios y na kuꞌan ta janipa ri kubꞌiꞌij, e pachaꞌ junoq karil rupalaj chupa juna spej.
JAM 1:24 Yey echiriꞌ xril bꞌi rupalaj, keꞌek y xa pa joqꞌotaj kumeskꞌutaj saꞌ ri katzuꞌnik.
JAM 1:25 Noꞌj ri lik uyaꞌom ribꞌ che utaqexik ri saqil Utzij Upixabꞌ ri Dios, ri kojresaj puqꞌabꞌ ri mak, yey xaqi e kuꞌan waꞌ y na kasach ta chukꞌuꞌx ri kubꞌiꞌij ri Tzij Pixabꞌ ma e ꞌanal re janipa ri kubꞌiꞌij waꞌ, ri Dios kutoꞌ che janipa ri kuꞌano.
JAM 1:26 We kꞌo junoq kuchꞌobꞌo pa saqil wi e kuloqꞌnimaj uqꞌij ri Dios, pero na kuqꞌatej ta ri raqꞌ che molot y kꞌaxlaj chꞌaꞌtem, riꞌ utukel kusok ribꞌ yey ronoje ri kuꞌano re kuloqꞌnimaj ri Dios, na jinta uchak.
JAM 1:27 Ma ri saqil uloqꞌnimaxik uqꞌij ri Qaqaw Dios e ri keqatoꞌ ri nibꞌaꞌibꞌ y ri malkaꞌnibꞌ chupa taq ri kꞌax e kꞌo wi, yey e ri kaqachajij qibꞌ chaꞌ na kojtzaq ta chupa ri chꞌulilaj mak re ruwachulew.
JAM 2:1 Alaq nu hermanos, ri kojom alaq rubꞌiꞌ ri Qanimajawal Jesucristo, ri Jun lik nim uqꞌij, lik na taqal ta che alaq xa kachaꞌw alaq chikixoꞌl ri tikawex.
JAM 2:2 Ma we e laꞌ molom ibꞌ alaq chupa rubꞌiꞌ ri Cristo y kok bꞌi junoq chixoꞌl alaq ukojom mapaqꞌabꞌ re oro y ukojom chomilaj uqꞌuꞌ y kok kꞌu bꞌi juna nibꞌaꞌ ukojom uqꞌuꞌ qꞌeꞌl kꞌojtalik,
JAM 2:3 yey we ralaq e lik kok alaq il che ukꞌulik chi utz ri ukojom chomilaj uqꞌuꞌ y kabꞌiꞌij alaq che: «Choka la, tzꞌula la wara»; noꞌj che ri nibꞌaꞌ kabꞌiꞌij alaq: «Chat-takꞌala riꞌat chiriꞌ o chat-tzꞌula pulew»;
JAM 2:4 ¿na rukꞌ ta nebꞌa waꞌ kachaꞌw alaq chiwach alaq y kuꞌana kꞌu alaq aj qꞌatal tzij rukꞌ naꞌoj na jusukꞌ taj?
JAM 2:5 Hermanos ri lik kꞌax kannaꞌ alaq, ta kꞌu alaq waꞌ: E ri nibꞌaꞌibꞌ che ruwachulew ri echaꞌom lo ruma ri Dios chaꞌ kebꞌeyomar che ri kubꞌulibꞌal kikꞌuꞌx y chaꞌ kekꞌojiꞌ puqꞌabꞌ Rire ma e ubꞌiꞌtisim waꞌ chike ri kꞌax kenaꞌw re Rire.
JAM 2:6 Pero ralaq e kꞌaqom bꞌi alaq kiqꞌij ri nibꞌaꞌibꞌ. ¿Na e ta nebꞌa ri bꞌeyomabꞌ ri kakiꞌan kꞌax che alaq ma na kakiꞌan ta ri usukꞌ che alaq? ¿Yey na e ta nebꞌa rike ri kakikꞌam bꞌi alaq pa qꞌatbꞌal tzij?
JAM 2:7 ¿Na kechꞌaꞌtibꞌen ta nebꞌa rike chirij ri chomilaj ubꞌiꞌ ri Qanimajawal, ri xkuxtax pawiꞌ alaq?
JAM 2:8 Lik utz we paqatzij wi kaꞌan alaq rukꞌuꞌxibꞌal ri taqanik tzꞌibꞌital kan chupa Rutzij Upixabꞌ ri Dios, ri kubꞌiꞌij: «Kꞌax chanaꞌa rawatz-achaqꞌ jelaꞌ pachaꞌ ri kꞌax kanaꞌ awibꞌ riꞌat.»
JAM 2:9 Noꞌj we xa kachaꞌw alaq chikixoꞌl ri tikawex, kamakun alaq yey ri Tzij Pixabꞌ re ri Dios kuqꞌat tzij pawiꞌ alaq ruma alaq aj palajiy tzij.
JAM 2:10 Ma we kꞌo junoq kunimaj ronoje ri Tzij Pixabꞌ yey kajaljobꞌ kꞌu puwi xa juna tzij re ri Dios, riꞌ kamakun chirij ronoje Rutzij Upixabꞌ ri Dios, ma waꞌ xa jun uꞌanom.
JAM 2:11 Ma ri Dios e xbꞌiꞌn re waꞌ: «Matmakun chirij ri kꞌulanikil» y je tanchi waꞌ xubꞌiꞌij: «Matkamisanik.» Jekꞌulaꞌ, we junoq na kamakun ta chirij ri kꞌulanikil pero kamisanel, riꞌ kape ri qꞌatbꞌal tzij puwiꞌ ruma xupalajij Rutzij Upixabꞌ ri Dios.
JAM 2:12 Mikꞌow kꞌu chikꞌuꞌx alaq, kopon na ri qꞌij kaqꞌat tzij pawiꞌ alaq e chirij Rutzij Upixabꞌ ri Dios, ri kesaw qeꞌoj puqꞌabꞌ ri mak. Ruma kꞌu riꞌ, chajij ibꞌ alaq che ronoje ri kabꞌiꞌij alaq y kaꞌan alaq.
JAM 2:13 Ma e junoq na kukꞌut ta ri relej ukꞌuꞌx chike ri jujun chik, jekꞌulaꞌ kuꞌan ri Dios che rire, na kukꞌut ta ri relej ukꞌuꞌx che echiriꞌ kuqꞌat tzij puwiꞌ; noꞌj ri jun kukꞌut ri relej ukꞌuꞌx chike ri jujun chik, riꞌ kel pan chi utz che ronoje chupa ruqꞌijol ri qꞌatbꞌal tzij.
JAM 2:14 Alaq nu hermanos, ¿saꞌ kutiqoj che junoq we kubꞌiꞌij lik kꞌo kubꞌulibꞌal ukꞌuꞌx yey na jinta kꞌutubꞌal re waꞌ? ¿Kuriq nawi ri kolobꞌetajik xew ruma kubꞌiꞌij kꞌo kubꞌulibꞌal ukꞌuꞌx?
JAM 2:15 Ma we e laꞌ kꞌo juna hermano achi o ixoq na jinta uqꞌuꞌ re ujalbꞌal yey kꞌayew che kuriq ri kutij ri jujun qꞌij,
JAM 2:16 yey we kꞌo kꞌu junoq che alaq jewaꞌ kubꞌiꞌij che: «Chawanibꞌej ko chi utzil chomal, chapisa awibꞌ chi utz y chatwoꞌq chi utz» kachaꞌ, pero na kuya ta kꞌu bꞌi che janipa ri kajawax che, ¿saꞌ kꞌu kutiqoj riꞌ ri xubꞌiꞌij bꞌi che?
JAM 2:17 Jekꞌuriꞌlaꞌ ri kubꞌulibꞌal kꞌuꞌxaj, we na jinta kꞌutubꞌal re, na jinta kutiqoj.
JAM 2:18 Laj kꞌo junoq jewaꞌ kubꞌiꞌij: «Rilal kꞌo kubꞌulibꞌal kꞌuꞌx la rukꞌ ri Dios; ekꞌu riꞌin e kankꞌut ri utz kanꞌano. ¿Kariq nawi la kaqꞌalajisaj la chinuwach riꞌin ri kubꞌulibꞌal kꞌuꞌx la we na jinta kꞌutubꞌal re? ¡Na kariq ta la! Noꞌj riꞌin utz kanqꞌalajisaj ri kubꞌulibꞌal nukꞌuꞌx chiwach la rukꞌ taq ri kanꞌano.»
JAM 2:19 Rilal lik kakoj la xa jun ri Dios kꞌolik, yey waꞌ lik qatzij. Pero waꞌ na e ta keꞌeloq kꞌo kubꞌulibꞌal kꞌuꞌx la rukꞌ ri Dios, ma e taq ne ri itzel uxlabꞌixel kakikojo xa jun ri Dios kꞌolik y rukꞌ xiꞌin ibꞌ kebꞌirbꞌot chwach.
JAM 2:20 Masach naꞌoj la puwiꞌ; chetaꞌmaj la na jinta uchak ri kubꞌulibꞌal kꞌuꞌxaj we na jinta kꞌutubꞌal re waꞌ.
JAM 2:21 ¿Saꞌ ri xꞌanaw jusukꞌ che ri qamam Abraham? ¿Na e ta nebꞌa ri kubꞌulibꞌal ukꞌuꞌx xukꞌutu echiriꞌ xukoj utzij ri Dios y xuya kꞌu rukꞌajol Isaac chwi ri altar?
JAM 2:22 Ruma kꞌu waꞌ, kil alaq waꞌ: Ri kubꞌulibꞌal ukꞌuꞌx ri Abraham e xqꞌalajinik echiriꞌ xukoj utzij ri Dios. Jekꞌulaꞌ, ri kubꞌulibꞌal ukꞌuꞌx xtzꞌaqat uwach rukꞌ taq ri xuꞌano.
JAM 2:23 Yey Ruchꞌaꞌtem ri Dios kuqꞌalajisaj waꞌ echiriꞌ kubꞌiꞌij: «Ri Abraham lik xkubꞌiꞌ ukꞌuꞌx rukꞌ ri Dios y ruma kꞌu riꞌ, xꞌaniꞌ jusukꞌ che.» Y xbꞌiꞌx kꞌu che: «Rire e ramigo ri Dios.»
JAM 2:24 Lik kꞌu kil alaq riꞌ: Ri tikawex na kuꞌan ta jusukꞌ xew ruma kubꞌiꞌij kꞌo kubꞌulibꞌal ukꞌuꞌx rukꞌ ri Dios, ma ri lik chirajawaxik e kukꞌut waꞌ rukꞌ ri kuꞌano.
JAM 2:25 Ma ri Rahab, ri jun ixoq na chom ta rubꞌinik usilabꞌik, xꞌan jusukꞌ che chwach ri Dios ruma xebꞌukꞌul chirocho ri e kꞌakꞌalenel e aj Israel etaqom bꞌi chupa laꞌ la tinamit y ruma xebꞌutoꞌo chaꞌ kebꞌek pa jun chik bꞌe.
JAM 2:26 Jun kꞌambꞌal naꞌoj puwi ri ximbꞌiꞌij e waꞌ: E junoq we na kuxlabꞌ ta chik, riꞌ kaminaq chik; jekꞌulaꞌ riꞌ ri kubꞌulibꞌal kꞌuꞌxaj, we na jinta kꞌutubꞌal re, e pachaꞌ kaminaq chik.
JAM 3:1 Alaq nu hermanos, muꞌana ri lik e kꞌi che alaq kebꞌuꞌan e aj kꞌutunel, ma ri kojkꞌutunik, qetaꞌam waꞌ e jun nimalaj chak yaꞌom chiqaqul. Ruma kꞌu waꞌ, we kaqaꞌan ri na utz taj, más kꞌax ri qꞌatbꞌal tzij re ri Dios kape paqawiꞌ chwa ri qꞌatbꞌal tzij kape pakiwi ri na e ta aj kꞌutunel.
JAM 3:2 Na jinta junoq lik jusukꞌ, ma qonoje ri oj tikawex lik kꞌi uwach ri kojmakun wi. Noꞌj we kꞌo junoq na kamakun ta kꞌana rukꞌ taq ri kubꞌiꞌij, riꞌ e jun tikawex lik jusukꞌ yey riꞌ kuchꞌij ne uchuqꞌabꞌ taq ri rayibꞌal re ronoje rucuerpo.
JAM 3:3 E riꞌoj kaqakoj preno pa kichiꞌ ri kawayuꞌ chaꞌ kakiꞌan ri kaqaj riꞌoj y jekꞌulaꞌ tobꞌ lik kꞌo kichuqꞌabꞌ, keqakꞌam bꞌi pa kaqaj wi riꞌoj.
JAM 3:4 Chꞌobꞌo pe alaq puwi taq ri barcos. Tobꞌ lik e nimaꞌq y e jekꞌetal ruma unimal tew, na rukꞌ ta kꞌu riꞌ, e kꞌamom bꞌi xa rukꞌ jun ralko timón; y rukꞌ waꞌ, ri chapayom re kukꞌam bꞌi pa ri karaj wi rire.
JAM 3:5 Jekꞌuriꞌlaꞌ ri qaqꞌ, tobꞌ lik xa chꞌutiꞌn, na rukꞌ ta kꞌu riꞌ, na xa ta jubꞌiqꞌ ri na utz taj kuꞌano echiriꞌ kaqatakꞌabꞌaꞌ qaqꞌij. ¡Chilape kꞌu alaq runimal kꞌacheꞌlaj kaporotaj xa ruma juna upukꞌ aqꞌ!
JAM 3:6 Jekꞌulaꞌ ri qaqꞌ e pachaꞌ ri aqꞌ. Ma che ronoje ri kꞌo che ri qacuerpo, ri qaqꞌ tobꞌ lik xa chꞌutiꞌn, na rukꞌ ta kꞌu riꞌ, kukꞌam lo ukꞌiyal mak y jelaꞌ kuyoj ri qabꞌinik y ri qakꞌaslem. Y waꞌ wa qaqꞌ e pachaꞌ tzijital chi ruma ri aqꞌ re xibꞌalbꞌaꞌ, ma chilaꞌ kape wi ri na utz taj kaqabꞌiꞌij.
JAM 3:7 E ri oj tikawex yaꞌtal chiqe kojtaqan pakiwi rukꞌiyal uwach awaj, waꞌ e taq ri e kꞌo che ruwachulew, ri kexikꞌikꞌ che ruwa kaj, ri kecharar chuꞌlew y ri e kꞌo pa ri mar. Ronoje kꞌu rukꞌiyal uwach awaj chꞌijital kichuqꞌabꞌ kuma ri tikawex.
JAM 3:8 Noꞌj kꞌu ri qaqꞌ na kaqachꞌij ta kꞌana uchuqꞌabꞌ, ma na kuya ta ribꞌ kaqꞌobꞌisax ruchuqꞌabꞌ; e pachaꞌ rupuchiꞌ juna kumatz nojinaq che veneno kakamisanik.
JAM 3:9 Rukꞌ ri qaqꞌ kaqayak uqꞌij ri Qaqaw Dios yey rukꞌ waꞌ tzel kojchꞌaw chikij ri tikawex, ri ebꞌuꞌanom ri Dios re kakikꞌutubꞌej uwach Rire.
JAM 3:10 Xa kꞌu che jun uchiꞌ qulaj kel lo chomilaj chꞌaꞌtem y itzelilaj chꞌaꞌtem. Alaq nu hermanos, waꞌ na usukꞌ taj kaꞌanik.
JAM 3:11 Ma ¿kꞌo nebꞌa juna akꞌal kel lo yaꞌ kiꞌ y yaꞌ kꞌa chupa?
JAM 3:12 Alaq nu hermanos, ¿kꞌo nebꞌa juna cheꞌ re higo echiriꞌ kawachinik kel lo aceitunas che? ¿O kꞌo nebꞌa juwiꞌ uva echiriꞌ kawachinik kel lo higo che? Jekꞌulaꞌ riꞌ, chupa juna akꞌal re yaꞌ tza, na kel ta lo yaꞌ kiꞌ.
JAM 3:13 We kꞌo junoq chixoꞌl alaq lik kꞌo unaꞌoj y lik kumaj usukꞌ ronoje, e chuqꞌalajisaj kꞌu riꞌ ri saqil unaꞌoj rukꞌ jun bꞌinik silabꞌik lik jusukꞌ y muꞌan ne nim che ribꞌ.
JAM 3:14 Pero we kꞌax kꞌuꞌx alaq chibꞌil ibꞌ alaq y kꞌo retzelal kꞌuꞌx chiwach alaq, matakꞌabꞌaꞌ kꞌu qꞌij alaq riꞌ y mabꞌiꞌij ne alaq lik kꞌo runaꞌoj ri Dios ukꞌ alaq, ma xa raqꞌubꞌal.
JAM 3:15 Yey waꞌ na e ta ri saqil naꞌoj petinaq rukꞌ ri Dios, ma xa e re ruwachulew, xa ke tikawex y re Ritzel.
JAM 3:16 Ma we kꞌo kꞌaxkꞌolil kꞌuꞌxaj y retzelal kꞌuꞌxaj chiwach alaq, waꞌ kukꞌam lo chꞌaꞌoj y ronoje taq ri na utz taj kaꞌanik.
JAM 3:17 Noꞌj kꞌu ri saqil naꞌoj petinaq rukꞌ ri Dios, nabꞌe na kaqꞌalajisax rukꞌ jun chomilaj bꞌinik silabꞌik; ekꞌu junoq kꞌo wa saqil naꞌoj rukꞌ, na aj ta chꞌaꞌoj, utz ukꞌuꞌx y na kuꞌan ta utitzꞌitikil; lik kukꞌut ri kꞌaxnaꞌbꞌal ukꞌuꞌx y kuꞌan utzilaj taq chak; na kachaꞌw ta chikixoꞌl ri winaq y na xa ta kebꞌ upalaj.
JAM 3:18 Yey ri kakitzukuj ri utzil chomal y kakitik waꞌ chikiwach, riꞌ kekꞌojiꞌ chi usukꞌlikil kukꞌ ri tikawex jelaꞌ pachaꞌ ri karaj ri Dios.
JAM 4:1 ¿Pa taq kape wi ri chꞌaꞌoj y ri oyowal chiwach alaq? Waꞌ pa animaꞌ alaq kape wi, ma ri rayibꞌal e alaq e pachaꞌ kꞌo pa chꞌaꞌoj rukꞌ ri karaj ri Dios che alaq.
JAM 4:2 Lik kꞌo karayij alaq yey waꞌ na kayaꞌtaj ta che alaq. Kakꞌis kꞌu ibꞌ alaq che retzelal kꞌuꞌxaj; ruma kꞌu riꞌ katij alaq uqꞌij che ukꞌulik ri kaꞌaj alaq, kachꞌoꞌjin alaq y kaꞌan ne alaq kamik y chꞌaꞌoj. Pero na kakꞌul ta alaq ri kaꞌaj alaq ma na katzꞌonoj ta alaq waꞌ che ri Dios.
JAM 4:3 Yey ri katzꞌonoj alaq, na kakꞌul ta alaq ma na utz ta utzꞌonoxik kaꞌan alaq. Ma ri katzꞌonoj alaq xa e re katzꞌilaꞌ alaq che ri rayibꞌal alaq.
JAM 4:4 Ralaq ri na jusukꞌ ta ri animaꞌ alaq chwach ri Dios, ¿na etaꞌam ta kami alaq we jun kujunimaj ribꞌ rukꞌ taq ri rayinik xa re ruwachulew, e junam rukꞌ kachꞌoꞌjin chirij ri Dios? China kꞌu ri keꞌek ukꞌuꞌx rukꞌ ri rayinik xa re ruwachulew, riꞌ e kuꞌana aj retzelal kꞌuꞌx chirij ri Dios.
JAM 4:5 Laj kachꞌobꞌ kꞌu alaq raqan na il ta uwach Ruchꞌaꞌtem ri Dios pa kubꞌiꞌij wi: «Ri Ruxlabꞌixel uyaꞌom ri Dios pa qanimaꞌ lik kꞌax kojunaꞌo y lik na kukꞌul ta ukꞌuꞌx we lik e keꞌek qakꞌuꞌx rukꞌ taq ri xa re ruwachulew» kachaꞌ.
JAM 4:6 Pero ri Dios lik nim ri unimal rutzil ukꞌuꞌx kuya chiqe. Ruma laꞌ jewaꞌ tzꞌibꞌital pa Ruchꞌaꞌtem: Ri Dios uyakom ribꞌ chikij janipa ri kakitakꞌabꞌaꞌ kiqꞌij; noꞌj uyaꞌom ri unimal rutzil ukꞌuꞌx chike janipa ri kakiꞌan chꞌutiꞌn che kibꞌ kachaꞌ.
JAM 4:7 E uwariꞌche, yaꞌa ibꞌ alaq puqꞌabꞌ ri Dios; chꞌija alaq uchuqꞌabꞌ ritzel winaq y jekꞌulaꞌ rire kanimaj chiwach alaq.
JAM 4:8 Lik qibꞌ alaq rukꞌ ri Dios y jelaꞌ Rire kaqibꞌ ukꞌ ralaq. Ralaq ri kꞌo alaq pa mak, chomaj alaq ri bꞌinik silabꞌik alaq. Ekꞌu ralaq ri xa kebꞌ kꞌuꞌx alaq, ri kaꞌaj alaq kꞌax kanaꞌ alaq ri Dios yey lik keꞌek kꞌuꞌx alaq rukꞌ ri mak re ruwachulew, lik chomaj ri animaꞌ alaq che waꞌ.
JAM 4:9 Chubꞌisoj kꞌuꞌx alaq ri ꞌanom alaq, kꞌax chunaꞌa kꞌuꞌx alaq y choqꞌ alaq ruma waꞌ. Ekꞌu riꞌ ri tzeꞌ alaq chuꞌana oqꞌej y ri kiꞌkotemal alaq chuꞌana bꞌis.
JAM 4:10 ꞌAna kꞌu alaq chꞌutiꞌn che ibꞌ alaq chwach ri Dios; yey we kaꞌan kꞌu alaq waꞌ, Rire kuyak qꞌij alaq.
JAM 4:11 Hermanos, machꞌaꞌtibꞌej ibꞌ alaq chiwach alaq. Ma e ri kachꞌaꞌt chirij ri ratz-uchaqꞌ y kuqꞌat tzij puwiꞌ xa pa re rire, riꞌ e junam rukꞌ e kachꞌaꞌt chirij ri Tzij Pixabꞌ y kuqꞌat tzij puwi waꞌ. Yey we kaꞌan la waꞌ, riꞌ e keꞌeloq na lal ta ꞌanal re ri Tzij Pixabꞌ; ekꞌu kaꞌan che ibꞌ la lal aj qꞌatal tzij puwiꞌ.
JAM 4:12 Ma xa Jun ri yaꞌyom lo re ri Tzij Pixabꞌ y xew Rire kꞌo puqꞌabꞌ kojukolobꞌej o kusach qawach. Noꞌj rilal ¿saꞌ ri wach la chaꞌ xa pa e la kaqꞌat la tzij puwi jun chik?
JAM 4:13 Woꞌora tape alaq, ri jewaꞌ kabꞌiꞌij alaq: «Waqꞌij o chweꞌq kojꞌek pa jun tinamit y kojkꞌojiꞌ chilaꞌ jun junabꞌ; kaqaꞌan kꞌu qakꞌay y kaqachꞌak qarajil» kacha alaq.
JAM 4:14 Yey na etaꞌam tane kꞌana alaq saꞌ ri kakꞌulumaj alaq ri chweꞌq. Ma ¿saꞌ ri unimal uwach ri kꞌaslemal alaq? Paqatzij wi, xa pachaꞌ sutzꞌ, ma xa pa joqꞌotaj kawinaqirik y tekꞌuchiriꞌ kasachik.
JAM 4:15 Yey ri chirajawaxik wi e kabꞌiꞌij alaq waꞌ: «We ri Qaqaw karaj, kojkꞌasiꞌik y kaqaꞌan waꞌririꞌ o kaqaꞌan leleꞌ» kacha alaq.
JAM 4:16 Noꞌj ri kaꞌan ralaq, e lik kaꞌan alaq nim che ibꞌ alaq echiriꞌ katakꞌabꞌaꞌ qꞌij alaq. Yey lik na usukꞌ taj we junoq kutakꞌabꞌaꞌ uqꞌij.
JAM 4:17 E junoq retaꞌam saꞌ ri utz chirajawaxik kaꞌanik yey na kuꞌan taj, riꞌ kamakunik.
JAM 5:1 Ekꞌu woꞌora, ralaq ri alaq bꞌeyomabꞌ, tanape alaq: Choqꞌ alaq y juyuy alaq ruma ri kꞌaxkꞌobꞌik kape pawiꞌ alaq.
JAM 5:2 Ma ri bꞌeyomalil alaq xa kaqꞌayik y ri chomilaj qꞌuꞌ alaq xa kapokꞌirik.
JAM 5:3 Ri oro y ri plata kꞌolom alaq kuꞌan mojos, yey waꞌ e kꞌutubꞌal re na utz ta ꞌanom alaq, ma e bꞌenaq kꞌuꞌx alaq rukꞌ ri bꞌeyomalil re ruwachulew. Ruma kꞌu riꞌ, waꞌ e kuꞌana pachaꞌ ri aqꞌ asu kuporoj ri tiꞌjil alaq echiriꞌ ri Dios kuqꞌat tzij pawiꞌ alaq, ma ralaq molom alaq uchiꞌ ukꞌiyal bꞌeyomalil chupa waꞌ wa kꞌisbꞌal qꞌij oj kꞌo wi.
JAM 5:4 Ekꞌu raj chak xechakun chwa taq rulew alaq, na tzꞌaqat ta ri kajil xya alaq. Ri kajil wa aj chak na tojom ta alaq e pachaꞌ katunan chiꞌij alaq. Yey ri tunanik ke wa aj chak xtataj ruma ri Dios Qajawxel ri kꞌo unimal uchuqꞌabꞌ.
JAM 5:5 Ralaq yaꞌom ibꞌ alaq chupa ronoje ruqusil ruwachulew y yaꞌom ibꞌ alaq che uꞌanik taq ri rayibꞌal alaq. Ri ꞌanom alaq e pachaꞌ ri kaꞌan che juna chikop lik katzuq chi utz re katiꞌoꞌjrisaxik ma ya kopon ri qꞌij kakamisaxik.
JAM 5:6 E ralaq qꞌatom alaq tzij pakiwi ri na emakuninaq ta chiꞌij alaq yey e ne ralaq kamisayom alaq ke. Yey rike na kakichꞌij taj kakitoꞌbꞌej kibꞌ chiwach alaq.
JAM 5:7 Pero ralaq hermanos, rukꞌ unimal kꞌuꞌxaj choyeꞌej alaq rukꞌunibꞌal ri Qanimajawal Jesucristo. Chꞌobꞌo pe alaq, juna awanel karoyꞌej na ri chomilaj uwach rutikoꞌn y rukꞌ unimal ukꞌuꞌx karoyꞌej na ruqꞌijol ri nabꞌe jabꞌ y ri kꞌisbꞌal jabꞌ.
JAM 5:8 Jekꞌulaꞌ ꞌana ralaq, choyeꞌej alaq ri Qanimajawal rukꞌ unimal kꞌuꞌxaj yey jikibꞌaꞌ kꞌuꞌx alaq rukꞌ Rire, ma rukꞌunibꞌal xa naqaj chi kꞌo wuloq.
JAM 5:9 Hermanos, machꞌaꞌtibꞌej ibꞌ alaq chiwach alaq chaꞌ jelaꞌ na kaqꞌat ta tzij pawiꞌ alaq. Chetaꞌmaj kꞌu alaq waꞌ: Ri Dios, ri Aj Qꞌatal Tzij, xa riꞌ chi kꞌo wuloq.
JAM 5:10 Alaq nu hermanos, e kꞌama naꞌoj alaq che ri xkiꞌan ri qꞌalajisanelabꞌ ri xechꞌaꞌt chupa rubꞌiꞌ ri Dios Qajawxel, ma rike rukꞌ unimal kikꞌuꞌx xkichꞌij uchuqꞌabꞌ ri kꞌaxkꞌolil.
JAM 5:11 Yey riꞌoj qetaꞌam lik nim kiqꞌij kalaxik ri kakichꞌij uchuqꞌabꞌ ri kꞌaxkꞌobꞌik. Tom chi alaq puwi runimal ukꞌuꞌx ri Job y etaꞌam alaq ri utz xukꞌam lo ri Dios che rire pa ri kꞌisbꞌal re ri xukꞌulumaj. Ma ri Dios lik kukꞌut ri rutzil ukꞌuꞌx y ri kꞌaxnaꞌbꞌal ukꞌuꞌx.
JAM 5:12 Puwi kꞌu ronoje ri kaꞌan alaq nu hermanos, makꞌo majikibꞌaꞌ alaq uwach pubꞌiꞌ ri kaj o pubꞌiꞌ ruwachulew o pubꞌiꞌ juna chik. Ri ꞌana alaq e waꞌ: We qatzij, xew bꞌiꞌij alaq: «Qatzij»; noꞌj we na qatzij taj, xew bꞌiꞌij alaq: «Na qatzij taj» chaꞌ jelaꞌ na kape ta ri qꞌatbꞌal tzij re ri Dios pawiꞌ alaq.
JAM 5:13 ¿Kꞌo junoq paxinaq ukꞌuꞌx chixoꞌlibꞌal alaq? Chutzꞌonoj utoꞌbꞌal che ri Dios. ¿Kꞌo junoq kakiꞌkotik? Chubꞌixoj rubꞌiꞌ ri Dios.
JAM 5:14 ¿Kꞌo juna yewaꞌ chixoꞌlibꞌal alaq? Chebꞌusikꞌij ri e aj wach re riglesia chaꞌ kakiꞌan orar puwiꞌ, kakikoj kꞌu aceite puwiꞌ chupa rubꞌiꞌ ri Qanimajawal.
JAM 5:15 Ekꞌu ri oración kaꞌan rukꞌ kubꞌulibꞌal kꞌuꞌxaj chwach ri Dios, e kakolobꞌen ri yewaꞌ che ri yabꞌil y ri Dios e kayakaw re. Yey we makuninaq ri yewaꞌ, kakuytaj kꞌu umak riꞌ.
JAM 5:16 Tzelej tzij alaq chiwach alaq y ꞌana alaq orar pawiꞌ alaq chiwach alaq chaꞌ jelaꞌ kakunutaj alaq. Ma lik kꞌo uchuqꞌabꞌ ri saqil oración kuꞌan junoq jusukꞌ rubꞌinik usilabꞌik.
JAM 5:17 Ri qꞌalajisanel Elías junam uwach qukꞌ riꞌoj ma xa tikawex. Na rukꞌ ta kꞌu riꞌ, xutzꞌonoj che ri Dios rukꞌ ronoje ukꞌuꞌx chaꞌ na kuꞌan ta chi jabꞌ y na xuꞌan ta chi jabꞌ che ruwachulew oxibꞌ junabꞌ rukꞌ nikꞌaj.
JAM 5:18 Jekꞌuriꞌlaꞌ, xuꞌan tanchi orar chaꞌ katzaq ri jabꞌ; y xtzaq kꞌu ri jabꞌ y ri tikoꞌn che ruwachulew xuya tanchi uwach.
JAM 5:19 Hermanos, we kꞌo junoq chixoꞌlibꞌal alaq uyaꞌom kan ri Qꞌijsaq, yey kꞌo kꞌu junoq katzelen lo re,
JAM 5:20 chetaꞌmaj kꞌu alaq riꞌ: E ri kesan lo wa aj mak chupa ri na utz taj kuꞌano, riꞌ e kukolobꞌej jun tikawex chaꞌ na kasach ta uwach y chaꞌ kakuytaj rukꞌiyal umak.
1PE 1:1 Riꞌin in Pedro, in taqoꞌn re ri Qanimajawal Jesucristo. Kintzꞌibꞌan pan che alaq, ri naj kꞌo wi alaq che ri qatinamit, ri jeqel alaq pa taq ri luwar re Ponto, re Galacia, re Capadocia, re Asia y re Bitinia.
1PE 1:2 Ralaq chaꞌtal lo alaq ruma ri Qaqaw Dios, ma jelaꞌ uchꞌobꞌom chi lo Rire ojertan. Ekꞌu woꞌora, ruma ri Ruxlabꞌixel ri Dios, yaꞌtal che alaq kakꞌojiꞌ alaq che jun santowilaj bꞌinik chaꞌ kakoj alaq utzij ri Dios y kachꞌajtaj ri mak alaq rukꞌ rukikꞌel ri Qanimajawal Jesucristo. E lik kꞌiyar na kꞌu pawiꞌ alaq ri unimal rutzil kꞌuꞌxaj y ri utzil chomal re ri Dios.
1PE 1:3 Lik nim uqꞌij ri Dios, Ruqaw ri Qanimajawal Jesucristo, ma ruma ri unimal rutzil ukꞌuꞌx xuya jun kꞌakꞌ qabꞌinik qasilabꞌik. Yey ruma rukꞌastajibꞌal lo ri Qanimajawal Jesucristo chikixoꞌl ri ekaminaq, lik kubꞌul pan qakꞌuꞌx che ukꞌulik ri kꞌaslemal ubꞌiꞌtisim chiqe.
1PE 1:4 Yey wa qoyeꞌem na kasach ta uwach, na kachꞌulax ta uwach rukꞌ ri mak y na kachup tane kꞌana ruchomal. Jikibꞌam kꞌu uwach riꞌ kayaꞌtaj waꞌ che alaq chilaꞌ chikaj.
1PE 1:5 Ruma kꞌu ri kubꞌulibꞌal kꞌuꞌx alaq rukꞌ ri Dios, Rire kuchajij alaq rukꞌ ruchuqꞌabꞌ chaꞌ jelaꞌ kakꞌul alaq ri kolobꞌetajik bꞌiꞌtisim chi che alaq yey waꞌ kaqꞌalajin na chupa taq ri kꞌisbꞌal qꞌij.
1PE 1:6 Ruma kꞌu riꞌ, kakiꞌkot alaq woꞌora, tobꞌ kopon jujun qꞌij chirajawaxik kikꞌow na alaq pa taq ukꞌiyal kꞌaxkꞌolil
1PE 1:7 chaꞌ kakꞌam pa alaq puwi ri kubꞌulibꞌal kꞌuꞌx alaq rukꞌ ri Dios jelaꞌ pachaꞌ kaꞌan che ri oro echiriꞌ kikꞌowisax pa aqꞌ, ilibꞌal re we saqil oro. Yey ri kubꞌulibꞌal kꞌuꞌx ralaq rukꞌ ri Dios más kꞌo uwach chwa ri oro, ma ri oro xa kakꞌisik. We xchꞌij kꞌu alaq wa kꞌaxkꞌobꞌik kikꞌowibꞌej alaq, riꞌ re yakbꞌal qꞌij ralaq y re yakbꞌal uqꞌij ri Dios. Ma echiriꞌ ri Qanimajawal Jesucristo kuqꞌalajisaj uwach chiqawach apanoq, kutakꞌabꞌaꞌ qꞌij ralaq ruma ri kubꞌulibꞌal kꞌuꞌx alaq rukꞌ ri Dios.
1PE 1:8 Ralaq kꞌax kanaꞌ alaq ri Jesús tobꞌ na ilom ta alaq uwach Rire, yey kubꞌul kꞌuꞌx alaq rukꞌ tobꞌ na kil ta alaq uwach woꞌora. Y kakiꞌkot alaq rukꞌ unimal kiꞌkotemal, yey waꞌ na kariqitaj tane ubꞌiꞌxikil.
1PE 1:9 Kakiꞌkot kꞌu alaq, ma kakꞌul na alaq ri kolobꞌetajik oyeꞌem alaq rukꞌ kubꞌulibꞌal kꞌuꞌxaj.
1PE 1:10 Ri qꞌalajisanelabꞌ re ojertan xeqꞌalajisan lo puwi ri unimal rutzil ukꞌuꞌx ri Dios, ri kayaꞌiꞌ che ralaq. Rike lik xkiya kinaꞌoj puwi wa kolobꞌetajik y lik xkitij uqꞌij umajik usukꞌ waꞌ.
1PE 1:11 Ma kꞌo ri xuqꞌalajisaj ri Ruxlabꞌixel ri Cristo chike puwi taq ri kꞌaxkꞌobꞌik kutij Ruchaꞌoꞌn lo ri Dios y ri yakbꞌal uqꞌij kaꞌanik echiriꞌ ikꞌowinaq chi chupa waꞌ. Ekꞌu rike xkichꞌobꞌ raqan china puwiꞌ xbꞌiꞌx waꞌ y jampalaꞌ kuꞌanaꞌ.
1PE 1:12 Yey ri Dios xuqꞌalajisaj chike waꞌ wa qꞌalajisanelabꞌ na kakil ta waꞌ chupa taq ri qꞌij e kꞌo wi rike, ma waꞌ e kuꞌana chupa taq wa qꞌij oj kꞌo wi riꞌoj. Yey waꞌ e ri xyaꞌ che alaq kuma ri kitzijom ri Utzilaj Tzij rukꞌ ruchuqꞌabꞌ ri Santowilaj Ruxlabꞌixel ri Dios, ri xtaq lo chilaꞌ chikaj. Yey ri ángeles lik kakaj ne kakimaj usukꞌ taq waꞌ.
1PE 1:13 E uwariꞌche sukꞌupij alaq ri naꞌoj alaq, lik chꞌobꞌo na alaq raqan saꞌ taq ri kaꞌan alaq. E choyeꞌej alaq ri unimal rutzil ukꞌuꞌx ri Dios, ri kayaꞌ na che alaq echiriꞌ kaqꞌalajisax uwach ri Qanimajawal Jesucristo.
1PE 1:14 Ralaq alaq chi ralkꞌoꞌal ri Dios, ruma kꞌu riꞌ kojo alaq utzij Rire. Maya kꞌu ibꞌ alaq che ri rayinik kꞌo wi alaq ojertan echiriꞌ kꞌamajaꞌ ketaꞌmaj alaq uwach ri Dios.
1PE 1:15 Ma jelaꞌ pachaꞌ ri Jun sikꞌiyom e alaq lik na jinta kꞌana mak rukꞌ, jekꞌulaꞌ ꞌana alaq che ri bꞌinik silabꞌik ralaq.
1PE 1:16 Ma jewaꞌ tzꞌibꞌital kan pa Ruchꞌaꞌtem ri Dios: Chiꞌana jusukꞌ che ri ibꞌinik isilabꞌik, ma Riꞌin na jinta kꞌana mak wukꞌ.
1PE 1:17 Yey we kabꞌiꞌij alaq «Qaqaw» che ri Jun na kachaꞌw ta chikixoꞌl ri tikawex echiriꞌ kuꞌan qꞌatbꞌal tzij pakiwi konoje ruma taq ri kiꞌanom, riꞌ lik chirajawaxik che alaq kabꞌin alaq rukꞌ xiꞌin ibꞌ chwach Rire ronoje qꞌij che ri kꞌaslemal alaq.
1PE 1:18 Ma lik etaꞌam alaq, ri Dios xresaj lo alaq che ri bꞌinik silabꞌik alaq na chom taj, ri xkꞌut kan che alaq kuma ri chuꞌqaw alaq ojertan. Yey rutojik xuꞌan ri Dios re karesaj lo alaq puqꞌabꞌ ri mak, na e ta rukꞌ oro o rukꞌ plata, ma waꞌ xa kasach uwach;
1PE 1:19 rutojik xuꞌano e rukꞌ ri loqꞌlaj ukikꞌel ri Cristo, ri xyaꞌiꞌ pa kamik pachaꞌ juna qꞌapoj bꞌexex lik chom y na yewaꞌ ta uwach kayaꞌiꞌ chwach ri Dios.
1PE 1:20 Yey ri Cristo chaꞌom chi lo ojertan chwi lo echiriꞌ kꞌamajaꞌ ne kaꞌan ruwachulew; pero kꞌa ekꞌu woꞌora chupa wa kꞌisbꞌal qꞌij oj kꞌo wi, ri Dios xukꞌutubꞌej uwach ruma ri rutzil ukꞌuꞌx che alaq.
1PE 1:21 Ruma kꞌu ri Qanimajawal Jesucristo, xkubꞌiꞌ kꞌuꞌx alaq rukꞌ ri Dios, ma e Rire ri xukꞌastajisaj lo ri Cristo chikixoꞌl ri ekaminaq y lik xuyak uqꞌij. Ruma kꞌu riꞌ, kubꞌul kꞌuꞌx alaq rukꞌ ri Dios y oyeꞌem alaq che Rire janipa ri ubꞌiꞌtisim che alaq.
1PE 1:22 Ruma xkoj alaq ri Qꞌijsaq, woꞌora xuꞌan chom ri kꞌaslemal alaq chaꞌ paqatzij wi kꞌax kanaꞌ ibꞌ alaq ri chaqꞌ ibꞌ alaq chupa rubꞌiꞌ ri Cristo. E uwariꞌche lik kꞌax naꞌa ibꞌ alaq chiwach alaq rukꞌ ronoje chuqꞌabꞌ alaq y rukꞌ ronoje kꞌuꞌx alaq.
1PE 1:23 Ma ralaq alaq alaxinaq tanchik y waꞌ na e ta kuma ri chuꞌqaw alaq ri xa e tikawex, ma e ruma Ruchꞌaꞌtem ri Dios, ri lik kꞌaslik y na kasach ta kꞌana uwach.
1PE 1:24 Ma jewaꞌ tzꞌibꞌital kan pa Ruchꞌaꞌtem ri Dios: Konoje ri tikawex e jelaꞌ pachaꞌ raqꞌes yey ri yakbꞌal kiqꞌij e pachaꞌ rukotzꞌiꞌjal raqꞌes; ma raqꞌes xa kachup uwach y rukotzꞌiꞌjal xa kachaqijik y kapuqik. Jekꞌulaꞌ riꞌ ri tikawex xa kekamik y ri yakbꞌal kiqꞌij xa kasach uwach,
1PE 1:25 noꞌj Ruchꞌaꞌtem ri Dios na kasach ta kꞌana uwach kachaꞌ. Yey wa chꞌaꞌtem e ri Utzilaj Tzij tzijotal chi lo che alaq.
1PE 2:1 E uwariꞌche yaꞌa kan alaq ronoje ri na utz taj: ri sokosoꞌnik, ri xa kebꞌ palaj alaq chiwach alaq, ri kuꞌan kꞌax kꞌuꞌx alaq chikij jujun chik y ri kanukꞌ alaq chꞌaꞌtem chikij jujun chik.
1PE 2:2 Jelaꞌ pachaꞌ juna neꞌ kꞌakꞌ alaxinaq lik e karaj rutzꞌum ruchu; jekꞌuriꞌlaꞌ ralaq, e lik rayij alaq ri saqil Uchꞌaꞌtem ri Dios, chaꞌ ruma waꞌ, ri Dios kuya ri kꞌiyibꞌal alaq y kukolobꞌej kꞌu alaq chwach ronoje ri na utz taj.
1PE 2:3 E ꞌana kꞌu alaq waꞌ ma naꞌom chi alaq ri rutzil ukꞌuꞌx ri Qanimajawal pa animaꞌ alaq.
1PE 2:4 Qibꞌ kꞌu alaq riꞌ rukꞌ ri Qanimajawal Jesucristo. Rire e pachaꞌ jun abꞌaj kꞌaqital kan kuma ri winaq, ma chikiwach rike na jinta uchak; noꞌj chwach ri Dios e jun chomilaj abꞌaj kꞌaslik y chaꞌtalik, pa katikiꞌ wi lo ri ja kayakik. Yey juna abꞌaj na jinta ukꞌaslemal, noꞌj Rire kꞌaslik.
1PE 2:5 Jekꞌuriꞌlaꞌ ralaq alaq pachaꞌ abꞌaj kꞌaslik tzꞌaqom bꞌi che ri ja katajin ri Dios che uyakik re kajeqiꞌ chupa. Rojertan raj chakunel xeniman pa Rocho Dios, ekꞌu woꞌora ri Dios uyaꞌom che ralaq kaniman alaq chwach Rire y ruma kꞌu ri Qanimajawal Jesucristo kaꞌan alaq ri kukꞌul ukꞌuꞌx Rire.
1PE 2:6 E uwariꞌche jewaꞌ tzꞌibꞌital kan pa Ruchꞌaꞌtem ri Dios: Kankoj kꞌu chilaꞌ Sion ri jun chomilaj abꞌaj chaꞌtalik, chaꞌ puwi waꞌ katikiꞌ ri ja kanyako. China kꞌu ri kakubꞌiꞌ ukꞌuꞌx rukꞌ, riꞌ na kakꞌixbꞌesax taj ma kukꞌul na ri royeꞌem che Rire kachaꞌ.
1PE 2:7 Che ralaq ri kojom alaq rubꞌiꞌ, Rire lik kꞌo uwach; noꞌj chike ri na kekojow ta re, e kuꞌana pachaꞌ ri tzꞌibꞌital kan pa Ruchꞌaꞌtem ri Dios: E rabꞌaj kꞌaqital kan kuma raj yakal ja, e abꞌaj riꞌ waꞌ xajawaxik chaꞌ katikiꞌ lo ri ja.
1PE 2:8 Yey kubꞌiꞌij: Rire e ri jun abꞌaj kojotal chikiwach ri tikawex, yey lik e kꞌo ri kakichiq kibꞌ che, y lik ekꞌo ri ketzaq puwiꞌ kachaꞌ. Jekꞌulaꞌ xkikꞌulumaj rike, ma e pachaꞌ “kakichiq kibꞌ” chwi Ruchꞌaꞌtem ri Dios echiriꞌ na kakikoj taj.
1PE 2:9 Noꞌj ekꞌu ralaq alaq chaꞌtal lo ruma ri Dios, alaq aj chakunel chwach ri Nimalaj Taqanel Dios, alaq jun tinamit yaꞌom ibꞌ alaq che uloqꞌnimaxik ri Dios y loqꞌotal alaq ruma ri Dios re kuꞌana alaq utinamit chaꞌ katzijoj alaq chike ri tikawex janipa taq ri uꞌanom ri Dios, ri xresaj lo alaq chupa ri qꞌequꞌm y xuya alaq chupa ri chomilaj Qꞌijsaq.
1PE 2:10 Ralaq ojertan na alaq ta utinamit ri Dios, noꞌj woꞌora alaq chi utinamit Rire. Ma ojertan na xetaꞌmaj ta alaq puwi ri relej ukꞌuꞌx ri Dios; noꞌj woꞌora ri Dios ukꞌutum chi waꞌ che ralaq.
1PE 2:11 Hermanos ri lik kꞌax kannaꞌ alaq, kꞌuna chikꞌuꞌx alaq, ralaq na alaq ta re ruwachulew, ma alaq xa ikꞌowel. E uwariꞌche kampixabꞌaj alaq, maya ibꞌ alaq che taq ri rayibꞌal re ri tiꞌjil alaq ma waꞌ kachꞌoꞌjin pa animaꞌ alaq chaꞌ kuyoj ri kꞌaslemal alaq.
1PE 2:12 Ri ꞌana alaq e kꞌutu alaq jun bꞌinik silabꞌik lik jusukꞌ chikiwach ri winaq na ketaꞌam ta uwach ri Dios. Jekꞌulaꞌ echiriꞌ kakꞌun tanchi ri Qanimajawal, rike kakiyak uqꞌij ri Dios ruma kilom ri chomilaj chak ꞌanom alaq, tobꞌ woꞌora kechꞌaꞌt chiꞌij alaq.
1PE 2:13 Ruma kꞌu ri Qanimajawal, lik kojo alaq kitzij konoje ri yaꞌtal pakiqꞌabꞌ ketaqan che ruwachulew, e pachaꞌ ri nimalaj taqanel kꞌo pakiwi ukꞌiyal tinamit
1PE 2:14 y taq ri e aj wach ekojotal ruma ri nimalaj taqanel re kekiya pa kꞌax ri kakiꞌan ri na utz taj y re kakiyak kiqꞌij ri kakiꞌan ri utz.
1PE 2:15 Ma ri lik karaj ri Dios che alaq e kaꞌan alaq ri utz chaꞌ e kaqꞌatej alaq taq ri chꞌaꞌtibꞌenik kaꞌan chiꞌij alaq kuma ri tikawex na jinta kinaꞌoj.
1PE 2:16 Paqꞌabꞌ alaq kꞌo wi saꞌ ri kaꞌan alaq; yey waꞌ na e ta re kaꞌan alaq ri na utz taj, ma e re kuꞌana alaq aj chakibꞌ re ri Dios y jekꞌulaꞌ e kaꞌan alaq ri karaj Rire.
1PE 2:17 ꞌAna alaq chike konoje ri tikawex janipa ri taqal chike; makꞌaq bꞌi alaq uqꞌij junoq. Kꞌax chenaꞌa alaq ri hermanos. Kꞌola xiꞌin ibꞌ pa animaꞌ alaq chwach ri Dios. Loqꞌnimaj alaq ri rey.
1PE 2:18 Ralaq alaq aj chakibꞌ, kojo alaq kitzij ri patrón alaq y yaꞌa ibꞌ alaq chitaqik kuma rike. Waꞌ na xew ta kaꞌan alaq kukꞌ ri lik utz kikꞌuꞌx ma jenelaꞌ ꞌana alaq kukꞌ ri lik na jinta kakuyuw ke.
1PE 2:19 Ma e lik utz riꞌ we junoq ruma kunaꞌ chukꞌuꞌx e kuꞌan ri karaj ri Dios che, kuya ranimaꞌ kuchꞌij taq ri kꞌaxkꞌobꞌik kape puwiꞌ tobꞌ waꞌ na taqal ta che. ¡Yey ri Dios kuyak uqꞌij ri kaꞌanaw waꞌ!
1PE 2:20 Noꞌj we e laꞌ lik chirij mak alaq xchꞌay kan alaq yey lik xkuy alaq waꞌ, ¿saꞌ kꞌu riꞌ ri yakbꞌal qꞌij alaq? ¡Na jintaj! Noꞌj we kakuy kꞌu alaq ri kꞌax kaꞌan che alaq ruma ri utz katajin alaq che uꞌanik, riꞌ lik kꞌo yakbꞌal qꞌij alaq chwach ri Dios.
1PE 2:21 E ne ruma waꞌ xusikꞌij alaq ri Dios, ma ri Cristo xutij kꞌax quma riꞌoj; yey taq ri xuꞌano e kꞌutubꞌal chiqe riꞌoj chaꞌ kojbꞌin jelaꞌ pachaꞌ xbꞌin Rire.
1PE 2:22 Ma jewaꞌ tzꞌibꞌital kan puwi ri Cristo pa Ruchꞌaꞌtem ri Dios: Rire na xmakun taj, y na jinta ne kꞌana sokosoꞌnik xel puchiꞌ kachaꞌ.
1PE 2:23 Echiriꞌ ri winaq lik xkikꞌaq bꞌi uqꞌij rukꞌ itzelilaj chꞌaꞌtem, Rire na xukꞌul ta uwach rukꞌ itzelilaj chꞌaꞌtem. Yey echiriꞌ kiyaꞌom pa kꞌaxkꞌolil, Rire na xubꞌiꞌij taj kuꞌan ukꞌaxel chike ri kakiꞌan kꞌax che; ri xuꞌano, e xuya ronoje puqꞌabꞌ ri Dios, ri kuꞌan qꞌatbꞌal tzij chi jusukꞌ.
1PE 2:24 Ekꞌu ri Cristo xukꞌam bꞌi ri qamak che rucuerpo echiriꞌ xkam chwa ri cruz. Xuꞌan kꞌu waꞌ chaꞌ jelaꞌ kaqaya kan ri mak y e kaqaya qibꞌ che ri jusukꞌ bꞌinik silabꞌik. Ma jewaꞌ tzꞌibꞌital kan pa Ruchꞌaꞌtem ri Dios: Ruma kꞌu ri kꞌax xutij Rire, xixkunutaj riꞌix kachaꞌ.
1PE 2:25 Rojertan, alaq pachaꞌ bꞌexex e sachinaq; noꞌj woꞌora xtzelej lo alaq rukꞌ ri Cristo, ri Aj Kꞌamal Qawach y ri Chajinel re ri qakꞌaslemal chwach ri Dios.
1PE 3:1 Ekꞌu rilal ixoq, e taqej la ri achijil la. ꞌAna kꞌu la waꞌ ma we rire na ukojom ta Ruchꞌaꞌtem ri Dios, tobꞌ na jinta kabꞌiꞌij la che chwi waꞌ, kꞌo pa saq kukojo ruma ri bꞌinik silabꞌik rilal
1PE 3:2 ma karilo lik ubꞌe ri kaꞌan la y lik lal nimay tzij.
1PE 3:3 Ruchomalil juna ixoq na e ta ruma ri wiqital che rucuerpo; e uwariꞌche na utz ta kꞌu riꞌ we kikꞌow uwiꞌ che uyijbꞌaxik ruwiꞌ, o kikꞌow uwiꞌ rukꞌ ri uwaaj y usansilo re oro o ri kꞌul lik kꞌi rajil kukojo.
1PE 3:4 Ma ruchomalil rixoq e ri kꞌo chupa ri ranimaꞌ; waꞌ e ri lik utz ukꞌuꞌx y na aj ta tzukul chꞌaꞌoj. Yey waꞌ wa uchomalil na kasach ta kꞌana uwach y lik kꞌo uqꞌij chwach ri Dios.
1PE 3:5 Rojertan jelaꞌ xkiꞌan rixoqibꞌ e jusukꞌ, ri lik xkubꞌiꞌ kikꞌuꞌx rukꞌ ri Dios. Ma ri kichomalil rike xilitaj che ri kibꞌinik kisilabꞌik ruma xekitaqej ri kachijil.
1PE 3:6 Jelaꞌ xuꞌan ri Sara, e lik xukoj utzij ri Abraham y ruchꞌaꞌbꞌexik xuꞌano e “lal wajawal”. Ekꞌu ralaq kuꞌana alaq ralkꞌoꞌal ri Sara we kaꞌan alaq ri utz y na jinta kꞌo kuxiꞌij ribꞌ kꞌuꞌx alaq che.
1PE 3:7 Ekꞌu rilal achi, jeqela la rukꞌ ri ixoqil la rukꞌ saqil naꞌoj. ꞌAna la che janipa ri taqal che rire. Kꞌuna kꞌu chikꞌuꞌx la e rire lik na jinta ko ukowil yey junam uwach ukꞌ la, ma junam kakꞌul alaq ri unimal rutzil ukꞌuꞌx ri Dios che ri kꞌaslemal alaq. We kaꞌan kꞌu la waꞌ, echiriꞌ kaꞌan la orar, na jinta kalatzꞌan re ri chꞌaꞌtem la chwach ri Dios.
1PE 3:8 Kꞌisbꞌal kꞌu re waꞌ, e chuꞌana xa jun kꞌuꞌx alaq, kꞌola kꞌaxnaꞌbꞌal kꞌuꞌxaj ukꞌ alaq, lik kꞌax naꞌa ibꞌ alaq chiwach alaq ma chaqꞌ ibꞌ alaq chwach ri Qaqaw, kꞌutu kꞌu alaq ri rutzil kꞌuꞌx alaq y ꞌana alaq chꞌutiꞌn che ibꞌ alaq.
1PE 3:9 Matzelej alaq uwach ri na utz taj kaꞌan che alaq. We kꞌo junoq kubꞌiꞌij itzelilaj chꞌaꞌtem che alaq, matzelej alaq uwach rukꞌ itzelilaj chꞌaꞌtem; ri ꞌana alaq e tzꞌonoj alaq ri utz puwi ri kaꞌanaw re waꞌ. Yey we kaꞌan alaq waꞌ, ri Dios kuya na ri utz pawiꞌ alaq, ma ruma waꞌ xusikꞌij alaq.
1PE 3:10 Ma jewaꞌ tzꞌibꞌital kan pa Ruchꞌaꞌtem ri Dios: China ri kꞌax kunaꞌ rukꞌaslem y karaj karikꞌowibꞌej ri jujun qꞌij rukꞌ kiꞌkotem, e chuqꞌatej kꞌu riꞌ ri raqꞌ che ubꞌiꞌxikil ri na chom taj y muꞌan chi ri kel lo raqꞌubꞌal puchiꞌ.
1PE 3:11 Resaj kꞌu ribꞌ riꞌ che uꞌanik ri na utz taj, yey e chuꞌana ri utz. Chutzukuj kakꞌojiꞌ chi utzil chomal kukꞌ konoje y e chuyaꞌa ribꞌ che uꞌanik waꞌ.
1PE 3:12 Ma ri Qanimajawal kꞌo ruwach pakiwi ri jusukꞌ kibꞌinik kisilabꞌik re kebꞌuchajij, yey lik kuya uxikin chike echiriꞌ kechꞌaꞌt rukꞌ pa oración. Noꞌj na chom ta keril janipa ri kakiꞌan ri na utz taj kachaꞌ.
1PE 3:13 ¿China kꞌu ri kaꞌanaw ri na utz taj che alaq we e lik yaꞌom ibꞌ alaq che uꞌanik ri utz?
1PE 3:14 Pero we katij alaq kꞌax ruma kaꞌan alaq ri lik jusukꞌ, riꞌ lik nim qꞌij alaxik alaq. E uwariꞌche, maxiꞌij ibꞌ alaq che ri xibꞌibꞌal pa alaq kaꞌanik yey masach kꞌuꞌx alaq che waꞌ.
1PE 3:15 Ri ꞌana alaq e loqꞌoj alaq uqꞌij ri Cristo chupa ri animaꞌ alaq, ma Rire e Qajawal. Xaqi yijbꞌaꞌ ibꞌ alaq che ukꞌulik uwach taq ri tzꞌonobꞌal kaꞌan che alaq puwi ri kubꞌul pan kꞌuꞌx alaq che; yey ꞌana alaq waꞌ rukꞌ uchꞌutiꞌnal kꞌuꞌx alaq y xiꞌin ibꞌ alaq chwach ri Dios.
1PE 3:16 Bꞌina alaq chi jusukꞌ chaꞌ jelaꞌ kunaꞌ kꞌuꞌx alaq na jinta mak ꞌanom alaq. ꞌAna kꞌu alaq waꞌ chaꞌ e janipa ri kechꞌaꞌt chirij ri chomilaj bꞌinik alaq rukꞌ ri Cristo, kayaꞌtaj kikꞌix ruma ri raqꞌubꞌal kakiꞌan chiꞌij alaq.
1PE 3:17 Ma we e karaj riꞌ ri Dios katij alaq kꞌax ruma kaꞌan alaq ri utz, waꞌ e más utz chwa ri katij alaq kꞌax ruma kaꞌan alaq ri na utz taj.
1PE 3:18 Kꞌuna chikꞌuꞌx alaq, ri Cristo lik xutij kꞌax echiriꞌ xa jumul xkam ruma ri qamak. Tobꞌ Rire na jinta umak, xkam quma riꞌoj oj aj makibꞌ chaꞌ jelaꞌ kojukꞌam bꞌi rukꞌ ri Dios. Echiriꞌ ri Cristo xkamisax kuma ri winaq, paqatzij wi xkam rucuerpo; pero Rire xkꞌastajik, ma na xkam ta ri ranimaꞌ.
1PE 3:19 Jekꞌulaꞌ xeꞌek pa ekꞌowi ri ekaminaq, waꞌ e ri tzꞌapim kichiꞌ, y xuꞌtzijoj chike janipa ri xuꞌano.
1PE 3:20 Yey xtataj waꞌ kuma ri na xkikoj ta utzij ri Dios ojertan chupa ruqꞌijol ri Noé. Ma ri Dios rukꞌ unimal ukꞌuꞌx xeroyꞌej kakitzelej kitzij chupa taq laꞌ la qꞌij echiriꞌ ri Noé katajin che uꞌanik ri nimalaj barco. Yey chupa kꞌu ri barco xa e ajilam ri xebꞌok bꞌi, ma e wajxaqibꞌ ri xekolobꞌetaj che runimal jabꞌ.
1PE 3:21 Y waꞌ e pachaꞌ ri bautismo kaqakꞌul riꞌoj waqꞌij ora re kolobꞌetajik. Wa bautismo na re ta karesaj ri chꞌul kꞌo che ri qacuerpo, ma e re karesaj ri mak kꞌo pa qanimaꞌ y ruma kꞌu waꞌ kaqajikibꞌaꞌ chwach ri Dios kojkꞌojiꞌ chi jusukꞌ. Yey qetaꞌam lik jikibꞌam uwach ri qakolobꞌetajik ruma rukꞌastajibꞌal ri Qanimajawal Jesucristo,
1PE 3:22 ri xeꞌek chilaꞌ chikaj y tzꞌul puwikiqꞌabꞌ ri Dios. Konoje kꞌu ri ángeles, kukꞌ taq ri kꞌo kiwach y ri kꞌo kichuqꞌabꞌ e kꞌo chuxeꞌ rutaqanik Rire.
1PE 4:1 Ri Cristo lik xuya ranimaꞌ kutij kꞌax quma riꞌoj. Jekꞌulaꞌ riꞌ, lik chirajawaxik che alaq kaya animaꞌ alaq katij alaq kꞌax ruma Rire. Ma e janipa ri kakiya kanimaꞌ kakiꞌan ri utz tobꞌ kape kꞌax pakiwiꞌ, qꞌalaj kꞌu riꞌ na e jinta chi puqꞌabꞌ ri mak.
1PE 4:2 Ruma kꞌu laꞌ, janipa chi qꞌij e kꞌo che ruwachulew, na kakiꞌan ta chi janipa ri rayibꞌal ke ri winaq, ma e kakiꞌan janipa ri karaj ri Dios.
1PE 4:3 Ri uꞌanom loq e xꞌan lo alaq pachaꞌ ri kakiꞌan ri winaq na ketaꞌam ta uwach ri Dios. Ma xya ibꞌ alaq che uꞌanik taq ri rayibꞌal re ri tiꞌjil alaq, yey xya ibꞌ alaq pa qꞌabꞌarik y xmol ibꞌ alaq che uꞌanik chꞌulilaj mak; xya ibꞌ alaq che ri lik na chom ta uwach yey lik itzel taq uwach ri xꞌan alaq echiriꞌ xloqꞌnimaj alaq taq ri tiox.
1PE 4:4 E taq kꞌu ri xkachbꞌilaj alaq che uꞌanik waꞌ wuꞌkꞌiyal uwach mak, xkam kanimaꞌ che echiriꞌ xesaj ibꞌ alaq che taq waꞌ; yey ruma riꞌ lik kꞌax kechꞌaꞌt chiꞌij alaq.
1PE 4:5 Pero kopon kꞌu ri qꞌij echiriꞌ konoje rike kakiya na kibꞌ chupa ri kimak chwach ri Jun kuqꞌat tzij pakiwi ri e kꞌaslik y ri ekaminaq.
1PE 4:6 Ruma ne kꞌu laꞌ, xtzijox ri Utzilaj Tzij chike ri ekaminaq chupa ri kimak chaꞌ kakꞌojiꞌ kikꞌaslemal na jinta utaqexik chwach ri Dios, tobꞌ chikiwach taq ri winaq, na utz ta ri xkiꞌan rike ruma xkikoj rubꞌiꞌ ri Cristo.
1PE 4:7 Lik xa naqaj chi kꞌo wi lo ruqꞌijol echiriꞌ kakꞌis ri na utz ta uwach y kajalkꞌatisax kꞌu ronoje ri kꞌolik. Ruma kꞌu riꞌ, lik kꞌola naꞌoj alaq puwiꞌ saꞌ taq ri kaꞌan alaq y xaqi e yaꞌa ibꞌ alaq pa oración chwach ri Dios.
1PE 4:8 Yey ri más chirajawaxik wi e rukꞌ ronoje kꞌuꞌx alaq kꞌax kanaꞌ ibꞌ alaq chiwach alaq, ma we lik kꞌo rutzil kꞌuꞌxaj ukꞌ alaq, riꞌ kakuy alaq taq rukꞌiyal mak ke ri nikꞌaj chik.
1PE 4:9 Chekꞌulu alaq chi utz ri kebꞌopon chi ocho alaq y mawunwut ne alaq che uꞌanik waꞌ.
1PE 4:10 Ekꞌu chirij ri uyaꞌom ri Dios paqꞌabꞌ alaq, chetoꞌo alaq ri jujun chik, chaꞌ jelaꞌ kuꞌan alaq saqil aj chakibꞌ re ri Dios y kachakun alaq chi utz rukꞌ rukꞌiyal uwach toꞌbꞌal uyaꞌom ri Dios che alaq.
1PE 4:11 We kꞌo junoq kakꞌutun chikiwach ri hermanos, e chukꞌutu puwi ri kubꞌiꞌij Ruchꞌaꞌtem ri Dios y na xa ta pa re kachꞌaꞌtik. We kꞌo junoq karaj kebꞌutoꞌ ri tikawex, chuꞌana waꞌ rukꞌ ri chuqꞌabꞌ yaꞌtal che ruma ri Dios. Ronoje kꞌu ri kaꞌan alaq, ꞌana alaq re yakbꞌal uqꞌij ri Dios ruma ri Qanimajawal Jesucristo, ri lik taqal che kꞌo yakbꞌal uqꞌij y kataqan kꞌu pakiwi konoje waqꞌij ora y chiqawach apanoq na jinta utaqexik. Amén.
1PE 4:12 Hermanos, makam animaꞌ alaq che taq runimal kꞌaxkꞌobꞌik kape pawiꞌ alaq re kukꞌam pa alaq, ma qonoje kojikꞌow chupa waꞌ.
1PE 4:13 Ri ꞌana alaq e kiꞌkota alaq, ma alaq bꞌare jun che taq ri kꞌaxkꞌobꞌik xikꞌow wi ri Cristo, chaꞌ echiriꞌ kuqꞌalajisaj runimal uchomalil, ralaq lik kakiꞌkot alaq che.
1PE 4:14 We e kꞌo tzel kechꞌaꞌt chiꞌij alaq ruma kojom alaq rubꞌiꞌ ri Cristo, riꞌ lik nim qꞌij alaxik alaq ma ri chomilaj Ruxlabꞌixel ri Dios kꞌo ukꞌ alaq. Qatzij wi, e kꞌo ri tzel kechꞌaꞌt chirij Rire, noꞌj ralaq lik kayak alaq uqꞌij Rire.
1PE 4:15 We kꞌo junoq che alaq kutij kꞌax, lik kꞌixbꞌal uwach we waꞌ e ruma kamisanel o eleqꞌom o ruma uꞌanom ri na utz taj che junoq o ruma uminom ribꞌ chupa ri na jinta re che.
1PE 4:16 Noꞌj we kꞌo junoq kutij kꞌax ruma ukojom rubꞌiꞌ ri Cristo, makꞌix kꞌu riꞌ che; ri chuꞌanaꞌ e chuyaka uqꞌij ri Dios ruma waꞌ.
1PE 4:17 Ma e qꞌij waꞌ kajeqer bꞌi ri qꞌatbꞌal tzij pakiwi ri e ralkꞌoꞌal ri Dios. Yey we nabꞌe kꞌut kajeqer qukꞌ riꞌoj, ¿saꞌ nawi keꞌkikꞌisa wi riꞌ ri na kikojom ta ri Utzilaj Tzij re ri Dios?
1PE 4:18 Ma jewaꞌ kubꞌiꞌij pa Ruchꞌaꞌtem ri Dios: We ri e jusukꞌ chwach ri Dios rukꞌ ne ukꞌayewal kekolobꞌetajik, ¿saꞌ kꞌu kakikꞌulumaj riꞌ ri e aj mak, ri kakiꞌan kititzꞌitikil che ri Dios?
1PE 4:19 E uwariꞌche, e taq ri e kꞌo pa kꞌax ruma kakiꞌan janipa ri karaj ri Dios, e kiꞌana riꞌ ri lik usukꞌ y kiyaꞌa kꞌu ri kikꞌaslemal puqꞌabꞌ ri Dios, ri xꞌanaw re ronoje y lik e kuꞌan janipa rubꞌiꞌtisim.
1PE 5:1 Woꞌora kuaj kebꞌenupixabꞌaj ri e aj wach re riglesia. Riꞌin in jun kukꞌil rike, yey in jun xinwil ri kꞌaxkꞌolil xikꞌow wi ri Qanimajawal Jesucristo. Yey in bꞌare jun kꞌo we che ri chomilaj yakbꞌal uqꞌij ri Cristo, ri kaqꞌalajisax na uwach chiqawach apanoq.
1PE 5:2 Kantzꞌonoj ko che alaq: Chechajij alaq chi utz rutinamit ri Dios, ri eyaꞌom chwi qꞌabꞌ alaq. Chechajij kꞌu alaq chi utz rukꞌ ronoje kꞌuꞌx alaq y na xa ta ruma kamin alaq chupa o xa ruma rayibꞌal puaq, ma ri karaj e lik kacha kꞌuꞌx alaq che uꞌanik waꞌ.
1PE 5:3 Maꞌan ne alaq ri xew kataqan alaq pakiwiꞌ; ri ꞌana alaq e kꞌutu alaq ri chomilaj bꞌinik silabꞌik alaq chikiwach rike.
1PE 5:4 We ekꞌu kaꞌan alaq waꞌ, echiriꞌ kakꞌun ri Qanimajawal Jesucristo, ri Chajinel kꞌo pakiwi konoje ri e aj chajal rutinamit ri Dios, Rire kuya chijujunal alaq jun corona na kasach ta kꞌana uwach, kꞌutubꞌal re runimal uwach Rire.
1PE 5:5 Ekꞌu riꞌix ix alabꞌo, chikojo kitzij ri e aj wach re riglesia. Yey chirajawaxik che onoje alaq kaꞌan alaq chꞌutiꞌn che ibꞌ alaq chiwach alaq, ma jewaꞌ tzꞌibꞌital kan chupa Ruchꞌaꞌtem ri Dios: Ri Dios uyakom ribꞌ chikij janipa ri kakitakꞌabꞌaꞌ kiqꞌij; noꞌj uyaꞌom ri unimal rutzil ukꞌuꞌx chike janipa ri kakiꞌan chꞌutiꞌn che kibꞌ kachaꞌ.
1PE 5:6 ꞌAna chꞌutiꞌn che ibꞌ alaq y yaꞌa kꞌu ibꞌ alaq puqꞌabꞌ ri Dios, ri kꞌo unimal uchuqꞌabꞌ; jekꞌulaꞌ Rire lik kuyak qꞌij ralaq echiriꞌ kopon na ruqꞌijol.
1PE 5:7 Ronoje rubꞌis kꞌuꞌx alaq yaꞌa alaq chwach ri Dios, ma Rire lik kok il che chajixik alaq.
1PE 5:8 Lik kꞌola naꞌoj alaq puwi saꞌ taq ri kaꞌan alaq y mawar wach alaq. Ma ritzel winaq, ri aj retzelal kꞌuꞌx chiꞌij alaq, e kutzukuj suꞌanik katzaq alaq puqꞌabꞌ jelaꞌ pachaꞌ juna koj lik kusut kij ri tikawex re kutzukuj china ri kubꞌiqꞌ bꞌi.
1PE 5:9 Lik chꞌija alaq uchuqꞌabꞌ ritzel y lik chuqꞌubꞌej ibꞌ alaq che ri kubꞌulibꞌal kꞌuꞌx alaq rukꞌ ri Cristo. Yey mikꞌow chikꞌuꞌx alaq na xew ta ralaq kikꞌowibꞌej alaq kꞌaxkꞌobꞌik, ma jenelaꞌ ri qa hermanos e kꞌo che ronoje ruwachulew kakikꞌowibꞌej kꞌaxkꞌobꞌik.
1PE 5:10 Ri Dios xojusikꞌij chaꞌ kojkꞌojiꞌ rukꞌ ri Qanimajawal Jesucristo chupa ri chomilaj utaqanik na jinta utaqexik. Ruma kꞌu waꞌ, echiriꞌ ikꞌowinaq chi alaq jujun qꞌij chupa wa kꞌax; ri Dios, ri lik kojutoꞌ che ronoje ruma ri unimal rutzil ukꞌuꞌx, e kuyak tanchi alaq, kukowirisaj alaq, kuya chuqꞌabꞌ alaq y kutikibꞌaꞌ alaq chi utz.
1PE 5:11 Che kꞌu ri Dios taqal wi kayak uqꞌij waqꞌij ora y chiqawach apanoq, ma ruchuqꞌabꞌ na jinta utaqexik. Amén.
1PE 5:12 Xintzꞌibꞌan kꞌu pan che alaq; yey ri hermano Silvano, ri lik kubꞌul nukꞌuꞌx rukꞌ, e kakꞌamaw bꞌi waꞌ wa carta che alaq. Ximpixabꞌaj kꞌu alaq y xinqꞌalajisaj chiwach alaq ri saqil unimal rutzil ukꞌuꞌx ri Dios; tikila kꞌu alaq chi utz chupa waꞌ.
1PE 5:13 Rutinamit ri Dios, ri e kꞌo pa ri tinamit re Babilonia, ri echaꞌtal ruma ri Dios junam ukꞌ ralaq, rike junam rukꞌ ri Marcos, ri pachaꞌ nukꞌajol chupa rubꞌiꞌ ri Cristo, kakiya pan rutzil wach alaq.
1PE 5:14 Yaꞌa alaq rutzil wach alaq chiwach alaq rukꞌ jun saqil tzꞌubꞌuj chiꞌaj, kꞌutubꞌal re kꞌax kanaꞌ ibꞌ alaq. Kꞌola utzil chomal chixoꞌl alaq, ri kꞌo alaq puqꞌabꞌ ri Qanimajawal Jesucristo. Amén.
2PE 1:1 Riꞌin, Simón Pedro, in jun aj chak y taqoꞌn re ri Qanimajawal Jesucristo. Kantzꞌibꞌaj pan wa carta che alaq, janipa ri yaꞌtal che alaq kakubꞌiꞌ kꞌuꞌx alaq rukꞌ ri Cristo jelaꞌ pachaꞌ qaꞌanom riꞌoj. Waꞌ wa chomilaj kubꞌulibꞌal kꞌuꞌxaj xyaꞌ chiqe qonoje ruma ri qa Dios y Kolobꞌenel Jesucristo, ma Rire lik jusukꞌ ri kuꞌan qukꞌ.
2PE 1:2 E lik kꞌiyar na pawiꞌ alaq ri unimal rutzil kꞌuꞌxaj y ri utzil chomal re ri Dios, yey waꞌ kakꞌul alaq ruma etaꞌam alaq uwach ri Dios y ri Qanimajawal Jesucristo.
2PE 1:3 Ri Dios rukꞌ ri unimal uchuqꞌabꞌ, uyaꞌom chiqe ronoje taq ri kajawax che ri qakꞌaslemal y ri qabꞌinik qasilabꞌik chwach Rire. Yey kuꞌan waꞌ ruma ri xuya chiqe kaqetaꞌmaj uwach Rire, ri xojusikꞌij rukꞌ ri unimal uchomalil y ri unimal uwach uqꞌij.
2PE 1:4 Jekꞌuriꞌlaꞌ, ri Dios uyaꞌom nimaꞌq y chom taq bꞌiꞌtisinik chiqe chaꞌ ruma waꞌ kojuꞌana pachaꞌ Rire, ma elinaq lo alaq puqꞌabꞌ ri rayibꞌal na chom ta uwach, ri kakitaqej ri winaq re ruwachulew.
2PE 1:5 Ruma kꞌu xkubꞌiꞌ kꞌuꞌx alaq rukꞌ ri Cristo, chirajawaxik kꞌu riꞌ kachuqꞌubꞌej ibꞌ alaq chaꞌ ri bꞌinik silabꞌik alaq kuꞌan lik jusukꞌ. Y na xew ta waꞌ, ma lik ne chirajawaxik ketaꞌmaj alaq saꞌ ri karaj ri Dios che alaq.
2PE 1:6 We etaꞌam chi kꞌu alaq saꞌ ri karaj ri Dios che alaq, e ꞌana alaq riꞌ. Yey chajij ibꞌ alaq chi utz chaꞌ na katzaq ta alaq pa mak, y jekꞌuriꞌlaꞌ kakꞌojiꞌ unimal kꞌuꞌx alaq. Yey rukꞌ kꞌu ri unimal kꞌuꞌx alaq, e kꞌutu alaq pa saqil wi yaꞌom ibꞌ alaq che jun saqil bꞌinik silabꞌik chwach ri Dios.
2PE 1:7 Y ruma kꞌu lik yaꞌom ibꞌ alaq che jun saqil bꞌinik silabꞌik chwach ri Dios, kꞌax naꞌa ibꞌ alaq chiwach alaq. Yey na xew ta waꞌ, ma lik yaꞌa ibꞌ alaq che ukꞌutik ri rutzil kꞌuꞌx alaq chike konoje.
2PE 1:8 Ma we kꞌo kꞌu taq waꞌ ukꞌ alaq y yaꞌom ibꞌ alaq che uꞌanik taq waꞌ, riꞌ na kok ta xepuyil ukꞌ alaq yey kaqꞌalajin kꞌu riꞌ lik kꞌo kutiqoj ri xetaꞌmaj alaq uwach ri Qanimajawal Jesucristo.
2PE 1:9 Noꞌj e junoq na jinta taq waꞌ rukꞌ, riꞌ e pachaꞌ xew karil ri kꞌo chwach; e junam rukꞌ pachaꞌ juna potzꞌ, ma xikꞌow ne chukꞌuꞌx e rojertan lik aj mak yey e ri Dios xkuyuw umak.
2PE 1:10 E uwariꞌche hermanos, kambꞌiꞌij waꞌ che alaq: E ri Dios xchaꞌw e alaq yey e Rire sikꞌiyom e alaq. Ruma kꞌu riꞌ, chuqꞌubꞌej ibꞌ alaq che ukꞌutik pa ri bꞌinik silabꞌik alaq, paqatzij wi sikꞌim alaq yey chaꞌtal alaq ruma ri Dios. We kaꞌan alaq waꞌ, riꞌ na katzaq ta chi alaq pa mak.
2PE 1:11 Jelaꞌ kꞌu riꞌ lik kakꞌul alaq chi utz pa ri taqanik na jinta utaqexik re ri Qanimajawal y Qakolobꞌenel Jesucristo.
2PE 1:12 Ruma kꞌu riꞌ, na kanwoqꞌotaj ta ukuxtaxik waꞌ che alaq, tobꞌ ne etaꞌam chi alaq wa Qꞌijsaq y jikibꞌam chi kꞌuꞌx alaq che.
2PE 1:13 Ma chinuwach riꞌin, xaloqꞌ kꞌa in kꞌaslik, lik usukꞌ kankoj pa jolom alaq taq wa pixabꞌanik.
2PE 1:14 Ma wetaꞌam ri nukamik xa naqaj chi kꞌo lo wi, yey waꞌ e ri Qanimajawal Jesucristo uqꞌalajisam lo chwe.
2PE 1:15 E uwariꞌche lik inokinaq il che ukuxtaxik waꞌ che alaq, chaꞌ echiriꞌ na in jinta chi ukꞌ alaq, xaqi kakꞌun chikꞌuꞌx alaq ronoje waꞌ.
2PE 1:16 Ma ri kꞌutunik xqaꞌan chiwach alaq chwi ruchuqꞌabꞌ y rukꞌunibꞌal ri Qanimajawal Jesucristo, na e ta rukꞌ nukꞌum chꞌaꞌtem noꞌjital kuma tikawex; ma lik rukꞌ ri qawach xqil runimal uwach uqꞌij Rire.
2PE 1:17 Ma riꞌoj xqilo echiriꞌ xqꞌalajisax runimal uchomalil y lik xyak uqꞌij ruma ri Qaqaw Dios. Xqata ne ruqul ri Dios xchꞌaw chupa ri chomilaj qꞌijsaq kꞌo paqawiꞌ, jewaꞌ xubꞌiꞌij: «E Nukꞌajol waꞌ, ri lik kꞌax kannaꞌo y lik kinkiꞌkot che» xchaꞌ.
2PE 1:18 Xqata kꞌu wa qulaj petinaq chilaꞌ chikaj echiriꞌ oj kꞌo rukꞌ Rire chwa ri santowilaj juyubꞌ.
2PE 1:19 Wa xqilo e kujikibꞌaꞌ uwach ri tzij tzꞌibꞌital kan kuma ri qꞌalajisanelabꞌ chupa Ruchꞌaꞌtem ri Dios. Y lik utz ri kaꞌan alaq we kok alaq il che waꞌ, ma e pachaꞌ juna aqꞌ kawon pa qꞌequꞌm kꞌa pa ri saqribꞌal echiriꞌ kel lo ri nimalaj chꞌumil re ri saqribꞌal. Waꞌ e keꞌelawi rukꞌunibꞌal ri Cristo, ri kutzij upa ri animaꞌ alaq.
2PE 1:20 Lik kꞌut chirajawaxik nabꞌe na kamaj alaq usukꞌ waꞌ: Ri tzꞌibꞌital kan chupa Ruchꞌaꞌtem ri Dios, na utz taj kaqꞌalajisaxik xa rukꞌ unaꞌoj juna achi.
2PE 1:21 Ma ri qꞌalajisam kan chupa Ruchꞌaꞌtem ri Dios, na petinaq ta ruma kinoꞌjibꞌal tikawex, e petinaq ruma ri Santowilaj Ruxlabꞌixel ri Dios. Ma taq ri santowilaj achijabꞌ re ri Dios xechꞌaꞌtik e chirij janipa ri xuqꞌalajisaj ri Ruxlabꞌixel ri Dios chike.
2PE 2:1 Chikixoꞌl ri tinamit e aj Israel xekꞌojiꞌ qꞌalajisanelabꞌ xa e sokosoꞌnel; jekꞌulaꞌ chixoꞌlibꞌal ralaq kekꞌojiꞌ e aj kꞌutunel xa e sokosoꞌnel. Waꞌ xa xeꞌlaqꞌay kakikoj pa kijolom ri hermanos kꞌutunik na usukꞌ taj, xa re yojobꞌal ri kibꞌinik kisilabꞌik. Yey e kuꞌana ne ri kakibꞌiꞌij na kakikoj ta chi rubꞌiꞌ ri Qanimajawal, ri xkam kuma rike re kebꞌukolobꞌej. Y ruma kꞌu wa na utz taj kakiꞌano, e kape tan ri qꞌatbꞌal tzij pakiwiꞌ.
2PE 2:2 Yey lik e kꞌi ri kakitaqej ri kibꞌinik wa aj kꞌutunel, ri kiyaꞌom kibꞌ che uꞌanik taq ri kirayibꞌal kꞌixbꞌal uwach. Ruma kꞌu riꞌ waꞌ, taq ri winaq kakijeq kechꞌaꞌt chirij ri bꞌe re ri Qꞌijsaq.
2PE 2:3 Wa aj kꞌutunel e keꞌek kikꞌuꞌx rukꞌ ri puaq; kakesaj kꞌu ukꞌiyal puaq che alaq rukꞌ sokosoꞌnik. Ruma kꞌu taq wa kakiꞌano, ri qꞌatbꞌal tzij xex chi katewun pakiwiꞌ, yey ri sachibꞌal kiwach xa naqaj chi kꞌo wuloq.
2PE 2:4 Ri Dios na xukuy tane kimak ri ángeles xemakunik, ma xebꞌukꞌaq bꞌi pa xibꞌalbꞌaꞌ, xebꞌutzꞌapij pa utum qꞌequꞌm chaꞌ kekꞌojiꞌ na chilaꞌ kꞌa echiriꞌ kaꞌan ri qꞌatbꞌal tzij pakiwiꞌ.
2PE 2:5 Yey na xukuy tane kimak ri winaq ojertan echiriꞌ xutaq lo runimal jabꞌ pakiwiꞌ. Xew xebꞌukolobꞌej wajxaqibꞌ tikawex; jun chike e ri Noé, ri xtzijon chwi ri jusukꞌ bꞌinik chwach ri Dios.
2PE 2:6 Jenelaꞌ xuqꞌat tzij pakiwi ri kebꞌ tinamit Sodoma y Gomorra echiriꞌ xusach kiwach rukꞌ aqꞌ, xuꞌan chaaj chike. Xuꞌan kꞌu waꞌ kꞌutubꞌal re saꞌ ri kakikꞌulumaj ri e aj makibꞌ.
2PE 2:7 Pero xukolobꞌej ri Lot, jun achi lik jusukꞌ rubꞌinik usilabꞌik, ri lik okinaq chukꞌuꞌx ri itzel kibꞌinik kisilabꞌik taq ri winaq pa jeqel wi.
2PE 2:8 Yey ruma kꞌu jusukꞌ rubꞌinik rire, ronoje qꞌij lik kubꞌisoj ukꞌuꞌx ri na ubꞌe taj kuto y karil chike waꞌ wa winaq.
2PE 2:9 Rukꞌ taq waꞌ, kaqilo ri Dios lik retaꞌam suꞌanik kebꞌukolobꞌej janipa ri kiyaꞌom kibꞌ puqꞌabꞌ echiriꞌ kakꞌam kipa; yey ekꞌu janipa ri na e ta jusukꞌ, riꞌ e kꞌo chi chuxeꞌ ri qꞌatbꞌal tzij re ri Dios, y waꞌ kape na pakiwiꞌ echiriꞌ kopon ruqꞌijol.
2PE 2:10 Yey wa qꞌatbꞌal tzij e lik taqal chike ri kitaqem taq ri rayibꞌal re ri kitiꞌjil, ri bꞌenaq kikꞌuꞌx che uꞌanik ri chꞌulilaj mak, ri na kakiya ta kibꞌ kataqan junoq pakiwiꞌ, ri na kekꞌix ta che uꞌanik janipa ri kakaj rike, ri e titzꞌitaq, ri na kakixiꞌij tane kibꞌ kechꞌaꞌt rukꞌ itzel chꞌaꞌtem chikij taq ri kꞌo kiwach y kꞌo kichuqꞌabꞌ pakiwiꞌ.
2PE 2:11 Yey ne ri ángeles, tobꞌ lik kꞌo kichuqꞌabꞌ y lik kꞌo kiwach yaꞌtalik, na kakikꞌaq tane bꞌi kiqꞌij ri jujun chik kꞌo kiwach echiriꞌ kakikoj kimak chwach ri Qanimajawal.
2PE 2:12 Noꞌj waꞌ wa aj kꞌutunel e sokosoꞌnel, e kakichꞌaꞌtibꞌej ri na kakimaj tane usukꞌ. Ruma kꞌu riꞌ, kaꞌan chike pachaꞌ kaꞌan chike ri awaj na jinta kinaꞌoj, ri kebꞌalaxik xa re kechapik y re kekamisaxik.
2PE 2:13 Kaꞌan kꞌu kꞌax chike, ukꞌaxel ri kꞌax kiꞌanom rike chike jujun chik. Rike lik bꞌenaq kikꞌuꞌx che uꞌanik ri kirayibꞌal lik kꞌixbꞌal uwach yey kakiꞌan ne waꞌ tobꞌ paqꞌij. Echiriꞌ rike kakimol kibꞌ ukꞌ alaq re kewaꞌ ukꞌ alaq, e jelaꞌ pachaꞌ ri chꞌul kuchꞌulaj juna kꞌul, ma lik kꞌixbꞌal uwach ri kakiꞌan chixoꞌl alaq.
2PE 2:14 Waꞌ waꞌchijabꞌ echiriꞌ kakil juna ixoq, xew kakichꞌobꞌ ri kemakun rukꞌ, na kikꞌow ta kikꞌuꞌx che kemakunik, kekimin pa mak ri na jinta kikowil chwach ri Dios y kiyaꞌom kikꞌuꞌx che urayixik ronoje ri kakilo. Ekꞌu ri Dios uqꞌatom chi tzij pakiwi rike
2PE 2:15 ma xkiya kan ri saqil bꞌe y xkimaj bꞌi jun bꞌe lik na e taj. Kiꞌanom kꞌu ke pachaꞌ ri xuꞌan ri Balaam, rukꞌajol ri Beor. Waꞌ e lik xcha ranimaꞌ che uchꞌakik puaq ruma ri na jusukꞌ taj xuꞌano.
2PE 2:16 Ruma kꞌu ri mak katajin che uꞌanik, xchꞌaꞌbꞌex upa, yey ri xchꞌaꞌbꞌen upa ¡e jun awaj aj eqaꞌn! Tobꞌ rawaj na kechꞌaw taj, wa jun buru rukꞌ uchꞌawibꞌal achi xchꞌaw che y jelaꞌ xuqꞌatej ruchꞌuꞌjilal ri jun aj qꞌij.
2PE 2:17 Waꞌ wa aj kꞌutunel pachaꞌ e akꞌal na jinta chi yaꞌ chupa, pachaꞌ e sutzꞌ xa kekꞌam bꞌi ruma runimal tew. Chike kꞌu konoje riꞌ waꞌ, yijbꞌital chi ri lik qꞌequꞌmalil aqꞌabꞌ chaꞌ na jinta utaqexik kebꞌeꞌkꞌola chupa.
2PE 2:18 Rukꞌ ri kichꞌaꞌtem lik kakiꞌan nim che kibꞌ tobꞌ na jinta ne keꞌelawi ri kakibꞌiꞌij. Yey rike kakibꞌiꞌij utz we e kakiꞌan saꞌ ri kurayij ri kitiꞌjil y kakiya kꞌu kibꞌ che uꞌanik waꞌ. Jekꞌulaꞌ e kekimin tanchi pa mak ri kꞌakꞌ ne ebꞌelinaq lo chikixoꞌl taq ri kakiꞌan ri na utz taj.
2PE 2:19 Kakibꞌiꞌij e puqꞌabꞌ jun kꞌo wi kuꞌan saꞌ ri karaj kuꞌano; yey rike puqꞌabꞌ ne ri mak e kꞌo wi. Ma echiriꞌ junoq na kuchꞌij ta uchuqꞌabꞌ jun chik, riꞌ e kakꞌojiꞌ puqꞌabꞌ ri kasokow re; jekꞌulaꞌ kukꞌulumaj ri jun na kuchꞌij ta uchuqꞌabꞌ ri mak.
2PE 2:20 Ekꞌu ri ebꞌelinaq chi lo chupa ri chꞌulilaj mak re ruwachulew ruma xketaꞌmaj uwach ri Qanimajawal y Qakolobꞌenel Jesucristo, we ketzelej tanchi chupa wa mak y kesokotaj ruma, riꞌ más kꞌax ri kakikꞌisbꞌej wi chwa echiriꞌ kꞌamajaꞌ kaketaꞌmaj uwach ri Qanimajawal.
2PE 2:21 Más utz kꞌu riꞌ chike tamaji xketaꞌmaj ri bꞌe re ri jusukꞌ bꞌinik chwa ri kakesaj kibꞌ che ri Santowilaj Tzij Pixabꞌ re ri Dios, ri xyaꞌtaj chike.
2PE 2:22 Ekꞌu ri kiꞌanom rike, paqatzij wi e pachaꞌ ri jun tzij jewaꞌ kubꞌiꞌij: Ri tzꞌiꞌ katzelej tanchi che utijik ri uxabꞌem chi uloq; yey ri aq atinisam chik, kubꞌalkatilaꞌ tanchi ribꞌ chupa ri xoqꞌoꞌl kachaꞌ.
2PE 3:1 Hermanos, e ukaꞌm carta waꞌ kantzꞌibꞌaj pana che alaq. Yey chupa ukabꞌichal carta lik e kankꞌosoj uwach ri saqil naꞌoj alaq rukꞌ pixabꞌanik, chaꞌ ri naꞌoj alaq kakꞌojiꞌ chi jusukꞌ.
2PE 3:2 Kꞌuna kꞌu chikꞌuꞌx alaq ri xkibꞌiꞌij lo rojertan ri qꞌalajisanelabꞌ re ri Dios, yey ri kubꞌiꞌij ri taqanik re ri Qanimajawal y Qakolobꞌenel, ri xkꞌut che alaq kuma taq rutaqoꞌn ri Dios.
2PE 3:3 Lik chirajawaxik nabꞌe na ketaꞌmaj alaq waꞌ: Chupa taq rukꞌisbꞌal qꞌij keyaktaj lo winaq e chꞌaminel, ri kakitaqej ri kirayibꞌal na chom ta uwach.
2PE 3:4 Kakibꞌiꞌij kꞌu che alaq: «¿Saꞌ xuꞌan riꞌ ri bꞌiꞌtisinik ꞌanom kan puwi rutzelejik lo ri Cristo? Ma ya ne xekam ri qachu-qaqaw, ri nabꞌe xekojow rubꞌiꞌ ri Cristo; y ronoje junam uꞌanom chwi lo rujeqebꞌal ruwachulew, na jinta kꞌo jalkꞌatajinaq che» kechaꞌ.
2PE 3:5 Jekꞌuwaꞌ kakibꞌiꞌij ma na kakaj taj kakimaj usukꞌ e rojertan e ri Dios rukꞌ Ruchꞌaꞌtem xuꞌan ruwa kaj y xuꞌan ruwachulew, yey waꞌ xuwinaqirisaj lo pa ri yaꞌ y xutikibꞌaꞌ chuxoꞌlibꞌal waꞌ.
2PE 3:6 Yey ruma kꞌu ri yaꞌ re ri nimalaj jabꞌ xutaq lo ri Dios, xsach kiwach taq ri winaq re ojertan y xjalkꞌatix uwach ruwachulew.
2PE 3:7 Ekꞌu ruwa kaj y ruwachulew e kꞌo woꞌora, e chajital chi ruma ri tzij ubꞌiꞌim ri Dios kꞌa echiriꞌ keyaꞌ pa aqꞌ chupa ruqꞌijol ri qꞌatbꞌal tzij, echiriꞌ kasachisax kiwach ri tikawex lik e aj makibꞌ.
2PE 3:8 Pero ralaq hermanos, masach chikꞌuꞌx alaq waꞌ: Chwach ri Qaqaw e ri jun qꞌij e junam rukꞌ pachaꞌ chi juna mil junabꞌ; yey e ri jun mil junabꞌ e junam rukꞌ pachaꞌ chi juna qꞌij.
2PE 3:9 Ri Qanimajawal na kamayin ta che uꞌanik janipa rubꞌiꞌtisim loq, jelaꞌ pachaꞌ ri kakibꞌiꞌij jujun. Ma Rire lik kꞌo unimal ukꞌuꞌx qukꞌ, y na karaj ta kꞌu kasach uwach junoq. Ri karaj Rire e konoje ri tikawex kakitzelej kitzij chwach.
2PE 3:10 Ekꞌu ruqꞌijol rukꞌunibꞌal ri Qanimajawal kakꞌun loq pachaꞌ ri okibꞌal re juna eleqꞌom pa juna ja chaqꞌabꞌ, ma ri eleqꞌom na kubꞌiꞌij ta apanoq jampalaꞌ koponik. Chupa kꞌu waꞌ wa qꞌij kasach uwach ruwa kaj rukꞌ jun nimalaj chꞌawibꞌal kajininik y ronoje taq ri kꞌo chwach kasach kiwach ruma ri aqꞌ. Yey ruwachulew y ronoje taq ri e kꞌo chwach keporotajik.
2PE 3:11 We ronoje kꞌu riꞌ waꞌ jelaꞌ rusachik uwach kaꞌanik, ¿suꞌchak kꞌu riꞌ na kabꞌin ta alaq jusukꞌ rukꞌ jun saqil bꞌinik silabꞌik chwach ri Dios?
2PE 3:12 Rukꞌ kꞌu ronoje kꞌuꞌx alaq, lik chok alaq il che royꞌexik rukꞌunibꞌal ruqꞌijol ri Dios. Ma chupa waꞌ wa qꞌij ruwa kaj kumaj aqꞌ y kasach uwach, y ronoje taq kꞌu riꞌ ri kꞌo che ruwa kaj kakꞌatik y kajaqꞌur ruma rukꞌatibꞌal ri aqꞌ.
2PE 3:13 Noꞌj riꞌoj qoyeꞌem jun kꞌakꞌ uwa kaj y jun kꞌakꞌ uwachulew jelaꞌ pachaꞌ rubꞌiꞌtisim ri Dios. Yey chiriꞌ, konoje xew e kakiꞌan ri lik jusukꞌ.
2PE 3:14 E uwariꞌche ralaq hermanos, ruma oyeꞌem alaq taq waꞌ, e chuꞌana ubꞌis kꞌuꞌx alaq ri kariqitaj alaq ruma ri Dios chi utzil chomal rukꞌ jun bꞌinik alaq lik jusukꞌ, chaꞌ na jinta mak alaq y na jinta junoq katzꞌaqaw mak chiꞌij alaq.
2PE 3:15 Lik maja kꞌu alaq usukꞌ waꞌ: Runimal ukꞌuꞌx ri Qanimajawal qukꞌ e re kojkolobꞌetajik jelaꞌ pachaꞌ rutzꞌibꞌam ri qa hermano Pablo che alaq, yey ri xutzꞌibꞌaj rire e chirij ri naꞌoj yaꞌtal che ruma ri Dios.
2PE 3:16 Ri Pablo lik xchꞌaꞌt chwi taq waꞌ. Chupa taq rucartas kꞌo ri lik kꞌayew umajik usukꞌ. Yey e taq kꞌu ri na jinta kimajom puwi waꞌ y na jinta ukowil ri kubꞌulibꞌal kikꞌuꞌx, na jusukꞌ ta chi ubꞌiꞌxikil kakiꞌan puwi taq rutzꞌibꞌam ri Pablo yey jenelaꞌ kakiꞌan rukꞌ ri nikꞌaj chik Utzij Upixabꞌ ri Dios; y rukꞌ waꞌ e kakitzukuj ri qꞌatbꞌal tzij re ri Dios pakiwiꞌ.
2PE 3:17 E uwariꞌche ralaq hermanos, ruma etaꞌam chi alaq chi utz saꞌ ri katajin loq, lik chajij kꞌu ibꞌ alaq chaꞌ na kajekꞌetaj tubꞌi alaq ruma ri sokosoꞌnik ke ri lik na kebꞌin ta jusukꞌ y chaꞌ na kaya ta kan alaq ri Utzilaj Tzij kojom chi alaq.
2PE 3:18 Ri ꞌana alaq e kꞌiya alaq chupa ri unimal rutzil ukꞌuꞌx ri Dios y che ri retaꞌmaxik uwach chi utz ri Qanimajawal y Qakolobꞌenel Jesucristo. Che kꞌu Rire taqal wi ri yakbꞌal qꞌij na jinta utaqexik woꞌora y chiqawach apanoq. Amén.
1JO 1:1 Kaqatzꞌibꞌaj pan wa carta che alaq chwi ri Jun xex chi kꞌo lo wi echiriꞌ kꞌamajaꞌ ne kaꞌan ruwachulew, puwi saꞌ taq ri xubꞌiꞌij yey puwi ri qilom rukꞌ ri qawach. Ma paqatzij wi xqil uwach y xqachap ne rukꞌ ri qaqꞌabꞌ. Kojtzꞌibꞌan kꞌu riꞌ puwi ri Jun paqatzij wi e ri Tzij, ri kuya kꞌaslemal.
1JO 1:2 Wa Jun kuya kꞌaslemal xkꞌun che ruwachulew yey riꞌoj xqil uwach. E uwariꞌche kaqabꞌiꞌij saꞌ ri qilom y kaqaqꞌalajisaj kꞌu che alaq puwi wa Jun na jinta utaqexik rukꞌaslemal. Rire xex chi kꞌo lo wi rukꞌ ri Qaqaw Dios yey xuqꞌalajisaj kꞌu ribꞌ chiqawach riꞌoj.
1JO 1:3 Janipa kꞌu ri qilom y ri qatom, e kaqaqꞌalajisaj pan che alaq; ma e kaqaj kuꞌan alaq xa jun qukꞌ riꞌoj jelaꞌ pachaꞌ riꞌoj paqatzij wi xa jun qaꞌanom rukꞌ ri Qaqaw Dios y rukꞌ Rukꞌajol, waꞌ e ri Qanimajawal Jesucristo.
1JO 1:4 Kaqatzꞌibꞌaj pan wa carta che alaq chaꞌ junam kakiꞌkot alaq qukꞌ.
1JO 1:5 Ekꞌu wa tzij qatom che ri Qanimajawal Jesucristo e kaqaqꞌalajisaj che alaq: Ri Dios e Qꞌijsaq yey rukꞌ Rire na jinta kꞌana qꞌequꞌmalil.
1JO 1:6 We kaqabꞌiꞌij xa jun qaꞌanom rukꞌ ri Dios yey kojbꞌin chupa ri qꞌequꞌmalil, riꞌ kojelik xa oj aj raqꞌul y na kojbꞌin ta kꞌu chupa ri Qꞌijsaq.
1JO 1:7 Noꞌj we kojbꞌin chupa ri Qꞌijsaq jelaꞌ pachaꞌ ri Dios kꞌo pa ri Qꞌijsaq, riꞌ xa jun qaꞌanom chiqawach. Yey ronoje ri qamak kachꞌajtaj kꞌu riꞌ ruma rukikꞌel ri Qanimajawal Jesucristo, Rukꞌajol ri Dios.
1JO 1:8 Pero we kaqabꞌiꞌij na jinta qamak, riꞌ xa e kaqasok qibꞌ chiqibꞌil qibꞌ y na qatzij ta ri kaqabꞌiꞌij.
1JO 1:9 Noꞌj we kaqaqꞌalajisaj ri qamak chwach ri Dios, Rire kukuy qamak y kojuchꞌaj che ronoje ri na utz taj kꞌo pa qanimaꞌ, ma Rire lik jusukꞌ y ujikibꞌam uwach kuꞌan waꞌ yey Rire na kuꞌan ta raqꞌubꞌal.
1JO 1:10 We kaqabꞌiꞌij na oj ta makuninaq, riꞌ e pachaꞌ kaqaꞌan aj raqꞌul che ri Dios, ma kaqabꞌiꞌij na qatzij ta ri ubꞌiꞌim kan Rire.
1JO 2:1 Ralaq alaq walkꞌoꞌal chupa rubꞌiꞌ ri Dios, kantzꞌibꞌaj kꞌu pan waꞌ che alaq chaꞌ na kamakun ta alaq. Yey we kꞌo junoq che alaq kamakunik, chetaꞌmaj alaq kꞌo Jun kachꞌaw paqawiꞌ chwach ri Qaqaw, waꞌ e ri Qanimajawal Jesucristo, yey Rire lik jusukꞌ.
1JO 2:2 E Rire ri xuya ribꞌ xkam paqakꞌaxel re tojbꞌal ri qamak. Y na xew ta re tojbꞌal ri qamak riꞌoj, ma re tojbꞌal ri kimak konoje ri e kꞌo che ruwachulew.
1JO 2:3 We kaqaꞌan ri taqanik kuya ri Dios chiqe, kaqꞌalajin kꞌu riꞌ paqatzij wi qetaꞌam uwach Rire.
1JO 2:4 We kꞌo kabꞌiꞌn re: «Riꞌin wetaꞌam uwach ri Dios» yey na kuꞌan ta janipa ri taqanik kuya ri Dios che, riꞌ xa aj raqꞌul y na jinta ri Qꞌijsaq rukꞌ.
1JO 2:5 Noꞌj ri kutaqej ri kubꞌiꞌij ri Dios, riꞌ kaqꞌalajinik paqatzij wi lik kꞌax kunaꞌ ri Dios. We jekꞌulaꞌ kaqaꞌan riꞌoj, qꞌalaj kꞌu riꞌ paqatzij wi xa jun qaꞌanom rukꞌ Rire.
1JO 2:6 We kꞌo junoq kubꞌiꞌij xa jun uꞌanom rukꞌ ri Dios, chirajawaxik kꞌu riꞌ chuꞌana che rubꞌinik jelaꞌ pachaꞌ rubꞌinik ri Qanimajawal Jesucristo.
1JO 2:7 Hermanos, na kantzꞌibꞌaj ta jun kꞌakꞌ tzijpixabꞌ che alaq, ma e kantzꞌibꞌaj chwi ri xex chi kꞌo ukꞌ alaq chwi ri petinaq loq. Wa ojer tzijpixabꞌ e ri xex chi tom wi lo alaq.
1JO 2:8 Na rukꞌ ta kꞌu riꞌ, e pachaꞌ kꞌakꞌ wa kantzꞌibꞌaj che alaq, ma waꞌ lik xqꞌalajin che rubꞌinik ri Jesús yey kaqꞌalajin kꞌu che ri bꞌinik silabꞌik ralaq, ma ri qꞌequꞌmalil katajin upakatajik y ri saqil Qꞌijsaq kawon chik.
1JO 2:9 We kꞌo junoq kubꞌiꞌij kꞌo chupa ri Qꞌijsaq yey tzel karil ri ratz-uchaqꞌ, riꞌ kꞌa kꞌo pa qꞌequꞌmalil.
1JO 2:10 Noꞌj we junoq kꞌax kunaꞌ ri ratz-uchaqꞌ, riꞌ kꞌo chupa ri Qꞌijsaq y na jinta kꞌo kaminow re pa mak.
1JO 2:11 Pero ri tzel karil ri ratz-uchaqꞌ, riꞌ kꞌa kꞌo pa qꞌequꞌmalil y kabꞌin kꞌu chupa waꞌ. Ruma laꞌ, na retaꞌam taj pachawi keꞌek wi, ma ruma kꞌo chupa ri qꞌequꞌmalil e junam rukꞌ pachaꞌ potzꞌ.
1JO 2:12 Kantzꞌibꞌaj pan waꞌ che alaq, ralaq walkꞌoꞌal chupa rubꞌiꞌ ri Dios, ma kuytajinaq chi mak alaq ruma ri xuꞌan ri Qanimajawal Jesucristo.
1JO 2:13 Kantzꞌibꞌaj pan waꞌ che alaq ri kꞌo alkꞌoꞌal alaq, ma xetaꞌmaj alaq uwach ri Qanimajawal, ri xex chi kꞌo lo wi echiriꞌ kꞌamajaꞌ ne kaꞌaniꞌ ruwachulew. Kantzꞌibꞌaj pan waꞌ chiwe ri ix alabꞌo-alito, ma ichꞌijom chi uchuqꞌabꞌ ritzel winaq. Kantzꞌibꞌaj pan waꞌ che alaq, ralaq walkꞌoꞌal chupa rubꞌiꞌ ri Dios; ma xetaꞌmaj alaq uwach ri Qaqaw.
1JO 2:14 Xintzꞌibꞌan kꞌu pan che alaq ri kꞌo alkꞌoꞌal alaq, ma etaꞌam chi alaq uwach ri Qanimajawal, ri xex chi kꞌo lo wi echiriꞌ kꞌamajaꞌ ne kaꞌaniꞌ ruwachulew. Xintzꞌibꞌan pan chiwe ri ix alabꞌo-alito, ma lik kꞌo ruchuqꞌabꞌ ri Dios iwukꞌ y Ruchꞌaꞌtem ri Dios lik tikil chupa ri iwanimaꞌ yey lik ichꞌijom chi uchuqꞌabꞌ ritzel winaq.
1JO 2:15 Meꞌek kꞌuꞌx alaq rukꞌ ri kꞌo che ruwachulew rukꞌ taq ri xa re ruwachulew. Ma we kꞌo junoq e keꞌek ukꞌuꞌx rukꞌ taq waꞌ, riꞌ na kꞌax ta kunaꞌ ri Qaqaw.
1JO 2:16 Ma e ronoje ri na utz taj kꞌo che ruwachulew, na rukꞌ ta ri Dios petinaq wi, xa e re ruwachulew. Yey waꞌ e taq ri rayinik re ri qatiꞌjil, ri rayinik re kaqaꞌan qeꞌoj che janipa ri kaqilo y ri rayinik re yakbꞌal qaqꞌij.
1JO 2:17 Ekꞌu ruwachulew xa kakꞌisik junam rukꞌ ronoje ri rayinik na utz taj kꞌo chwach; noꞌj kꞌu ri kaꞌanaw janipa ri karaj ri Dios, riꞌ na jinta utaqexik rukꞌaslemal.
1JO 2:18 Alaq walkꞌoꞌal chupa rubꞌiꞌ ri Dios, oj kꞌo chi che rukꞌisbꞌal qꞌij. Qetaꞌam chi waꞌ, ma tom chi alaq e kakꞌun lo ri jun kayaktaj chirij ri Cristo, ri kabꞌiꞌx “anticristo” che. Yey woꞌora lik e kꞌi chi ri eyaktajinaq chirij ri Cristo.
1JO 2:19 Rike tobꞌ xkimol kibꞌ junam qukꞌ riꞌoj, na junam ta kikꞌuꞌx qukꞌ riꞌoj. Ma we ta e riꞌ, xekanaj ta kan qukꞌ. Pero xebꞌel kꞌu bꞌi chiqaxoꞌl riꞌoj, y rukꞌ waꞌ kaqꞌalajinik na jinta junoq chike rike e qukꞌil riꞌoj.
1JO 2:20 Ekꞌu ralaq na alaq ta jelaꞌ pachaꞌ rike, ma yaꞌtal che ralaq ri Ruxlabꞌixel ri Jun lik nim uqꞌij Santo y ruma kꞌu waꞌ onoje alaq etaꞌam alaq ri Qꞌijsaq.
1JO 2:21 Kantzꞌibꞌaj pan waꞌ che alaq, na e ta ruma na etaꞌam ta alaq ri Qꞌijsaq re ri Dios, ma e ruma ne ri etaꞌam alaq waꞌ yey etaꞌam chi kꞌu alaq na jinta juna raqꞌubꞌal noꞌjital lo che ri Qꞌijsaq.
1JO 2:22 ¿China taq ri lik e aj raqꞌul? E taq ri kakibꞌiꞌij: «Ri Jesús na e ta Ruchaꞌoꞌn lo ri Dios.» Ekꞌu taq ri kakibꞌiꞌij waꞌ, na xew ta eyaktajinaq chirij Rukꞌajol ri Dios, ma jenelaꞌ eyaktajinaq chirij ri Qaqaw Dios.
1JO 2:23 E junoq kubꞌiꞌij: «Ri Jesús na e ta Ukꞌajol ri Dios,» riꞌ na jinta ri Qaqaw Dios rukꞌ. Noꞌj ri kuqꞌalajisaj: «Ri Jesús e Ukꞌajol ri Dios,» riꞌ kꞌo ri Qaqaw Dios rukꞌ.
1JO 2:24 Ekꞌu ri xex chi tom wi lo alaq puwi ri Cristo, e tikila riꞌ chupa ri animaꞌ alaq. Yey we e uꞌanom riꞌ, kꞌo chi alaq puqꞌabꞌ ri Qaqaw Dios y puqꞌabꞌ Rukꞌajol.
1JO 2:25 Ekꞌu bꞌiꞌtisinik waꞌ uꞌanom kan ri Qanimajawal Jesucristo: E ri kuya ri kꞌaslemal na jinta utaqexik chiqe.
1JO 2:26 Kantzꞌibꞌaj kꞌu pan waꞌ che alaq, ma e kꞌo ri kakaj kakisok alaq.
1JO 2:27 Noꞌj ralaq kꞌo chi pa animaꞌ alaq ri Uxlabꞌixel yaꞌtal che alaq ruma ri Qanimajawal Jesucristo. E uwariꞌche na kajawax taj kakꞌun lo junoq rukꞌ kꞌutunik lik junwi chwa ri qꞌalajisam chi che alaq, ma ri Ruxlabꞌixel ri Dios e kakꞌutuw che alaq ronoje ri Qꞌijsaq re ri Dios. Y janipa ri kukꞌut Rire, lik qatzij, na raqꞌubꞌal taj. Ruma kꞌu riꞌ, tikila alaq chi utz chupa ri majom alaq che ri Ruxlabꞌixel ri Dios.
1JO 2:28 Ekꞌu woꞌora, ri alaq walkꞌoꞌal chupa rubꞌiꞌ ri Dios, mesaj ibꞌ alaq puqꞌabꞌ ri Qanimajawal Jesucristo, chaꞌ rukꞌ kubꞌulibꞌal qakꞌuꞌx kaqoyꞌej Rire y na kojkꞌix ta chwach Rire echiriꞌ kaqꞌalajin uwach pa rukꞌunibꞌal.
1JO 2:29 Ralaq etaꞌam chi alaq waꞌ: Rire lik jusukꞌ. Chetaꞌmaj kꞌu alaq riꞌ: E janipa ri kakiꞌan ri lik jusukꞌ, ebꞌalaxinaq chi chupa rubꞌiꞌ Rire.
1JO 3:1 Chꞌobꞌo pe alaq puwi ri saqil rutzil ukꞌuꞌx ri Qaqaw Dios, ma lik kꞌax kojunaꞌo y uyaꞌom ri kabꞌiꞌx chiqe oj ralkꞌoꞌal Rire. E uwariꞌche ri winaq e kꞌo che ruwachulew, ri kꞌamajaꞌ kakikoj rubꞌiꞌ ri Jesús, na ketaꞌam taj oj china riꞌoj chwach ri Dios, ma rike na ketaꞌam ta uwach Rire.
1JO 3:2 Hermanos, woꞌora oj chi ralkꞌoꞌal ri Dios, tobꞌ kꞌamajaꞌ kaqꞌalajinik saꞌ ri kojuꞌana chiqawach apanoq. Pero qetaꞌam kꞌut echiriꞌ kaqꞌalajin uwach ri Qanimajawal Jesucristo, kojuꞌana jelaꞌ pachaꞌ Rire, ma kaqilo y kaqetaꞌmaj kꞌu uwach chi utz.
1JO 3:3 Janipa ri kubꞌul pan kikꞌuꞌx che waꞌ, kakichomaj ri kibꞌinik kisilabꞌik chikibꞌil kibꞌ chaꞌ kuꞌana jelaꞌ pachaꞌ ruchomal rubꞌinik ri Qanimajawal.
1JO 3:4 Janipa kꞌu ri kemakunik e kakipalajij Rutzij Upixabꞌ ri Dios, ma ri mak e rupalajixik Rutzij Upixabꞌ ri Dios.
1JO 3:5 Etaꞌam chi kꞌu alaq, ri Qanimajawal Jesucristo xkꞌunik re kojresaj puqꞌabꞌ ri mak yey Rire na jinta kꞌana umak.
1JO 3:6 Janipa kꞌu ri kiꞌanom xa jun rukꞌ ri Qanimajawal Jesucristo, riꞌ na kakiya ta chi kibꞌ che uꞌanik ri mak. Yey janipa ri kiyaꞌom kibꞌ che uꞌanik ri mak, riꞌ na kakimaj ta usukꞌ china ri Cristo y na ketaꞌam tane uwach.
1JO 3:7 Alaq walkꞌoꞌal chupa rubꞌiꞌ ri Dios, makꞌo masokow e alaq. Ma e junoq katajin che uꞌanik ri utz, riꞌ jusukꞌ rubꞌinik usilabꞌik jelaꞌ pachaꞌ rubꞌinik ri Qanimajawal Jesucristo lik jusukꞌ.
1JO 3:8 E junoq kꞌa kꞌo pa mak, riꞌ re ritzel winaq, ma ritzel winaq lik rewi aj mak chwi xjeqiꞌ lo ruwachulew. Ruma ne kꞌu waꞌ xkꞌun Rukꞌajol ri Dios chaꞌ koluꞌsacha uwach janipa ri uꞌanom ritzel winaq.
1JO 3:9 Yey ri uꞌanom chi ralkꞌoꞌal ri Dios, na kuya ta ribꞌ che uꞌanik ri mak, ma ri Dios uyaꞌom chi jun kꞌakꞌ kꞌaslemal che. Ruma kꞌu riꞌ, na utz taj kꞌa kakꞌojiꞌ pa ri mak, ma uꞌanom chi ralkꞌoꞌal ri Dios.
1JO 3:10 Rukꞌ kꞌu riꞌ waꞌ, kaqꞌalajinik china taq ri e ralkꞌoꞌal ri Dios yey kaqꞌalajinik e china taq ri e ralkꞌoꞌal ritzel winaq. Ma e junoq na kuꞌan ta ri jusukꞌ yey na kꞌax tane kunaꞌ ri ratz-uchaqꞌ, riꞌ na ralkꞌoꞌal ta ri Dios.
1JO 3:11 E tzij waꞌ xex chi tom wi lo alaq: Kꞌax qanaꞌa qibꞌ chinima qonoje.
1JO 3:12 Maqaꞌan qeꞌoj pachaꞌ ri xuꞌan ri Caín, ma rire e re ritzel winaq y ruma riꞌ xukamisaj ruchaqꞌ. ¿Suꞌbꞌe xukamisaj? Ma e taq ri xuꞌan ri Abel lik jusukꞌ chwach ri Dios; noꞌj e taq ri xuꞌan rire na chom ta uwach.
1JO 3:13 Alaq nu hermanos, makam animaꞌ alaq che we ri na ketaꞌam ta uwach ri Dios tzel kakil alaq.
1JO 3:14 Riꞌoj qetaꞌam ojelinaq chi lo chupa ri bꞌe re ri kamik yey woꞌora oj kꞌo chi chupa ri bꞌe re ri kꞌaslemal, ma kꞌax keqanaꞌ ri qa hermanos. Noꞌj e junoq na kꞌax ta kunaꞌ ru hermano, riꞌ kꞌa kꞌo chupa ri bꞌe re ri kamik.
1JO 3:15 Ekꞌu junoq tzel karil ru hermano, riꞌ kamisanel chwach ri Dios; yey etaꞌam alaq, e juna kamisanel na taqal ta che kayaꞌiꞌ ukꞌaslemal na jinta utaqexik.
1JO 3:16 Riꞌoj qamajom usukꞌ saꞌ ri saqil rutzil kꞌuꞌxaj, ma ri Jesús xukꞌut waꞌ chiqe echiriꞌ xuya ribꞌ pa kamik quma riꞌoj. Jekꞌuriꞌlaꞌ, riꞌoj chirajawaxik wi kaqaya qanimaꞌ che kitoꞌik ri qa hermanos tobꞌ ne ruma waꞌ kojkamisaxik.
1JO 3:17 Yey we kꞌo junoq lik kꞌo ubꞌitaq re y karilo kꞌo kajawax che ri ratz-uchaqꞌ, pero na kajuchꞌ kaꞌn ta pa ranimaꞌ, ¿kꞌo nebꞌa rutzil ukꞌuꞌx ri Dios riꞌ pa ranimaꞌ? Na jintaj.
1JO 3:18 Alaq walkꞌoꞌal chupa rubꞌiꞌ ri Dios, na xa ta kaqabꞌiꞌij rukꞌ uwa qeꞌ kꞌax kaqanaꞌ qibꞌ, ma ri lik chirajawaxik wi e kaqꞌalajin ri rutzil qakꞌuꞌx rukꞌ taq ri utz kaqaꞌano.
1JO 3:19 We ekꞌu kaqaꞌan waꞌ, kaqꞌalajinik oj re ri Qꞌijsaq yey kaqanaꞌ kꞌu riꞌ lik utz qaꞌanom chwach ri Dios.
1JO 3:20 Tobꞌ kꞌu kaqanaꞌ chiqakꞌuꞌx kꞌo ri na utz taj qaꞌanom, na rukꞌ ta kꞌu riꞌ, ri kubꞌiꞌij ri Dios e más kꞌo uwach chwa ri kubꞌiꞌij ri qanimaꞌ, ma ri Dios lik retaꞌam ronoje.
1JO 3:21 Hermanos, we kaqanaꞌ chiqakꞌuꞌx na oj jinta pa mak, kꞌo ukowil qakꞌuꞌx riꞌ chwach ri Dios.
1JO 3:22 Yey we kꞌo kaqatzꞌonoj che, Rire kuya na chiqe, ma e kojtajin che uꞌanikil ri kubꞌiꞌij Rutzij Upixabꞌ y e kaqaꞌan ri kukꞌul ukꞌuꞌx Rire.
1JO 3:23 Ekꞌu utaqanik waꞌ chiqe: Qakojo rubꞌiꞌ ri Jesucristo, Rukꞌajol ri Dios, yey kꞌax qanaꞌa qibꞌ chiqawach jelaꞌ pachaꞌ ri xojutaq Rire che uꞌanik.
1JO 3:24 E junoq katajin che uꞌanik ri kubꞌiꞌij Rutzij Upixabꞌ ri Dios, riꞌ puqꞌabꞌ ri Dios kꞌowi y ri Dios jeqel pa ranimaꞌ. Ruma kꞌu ri Ruxlabꞌixel uyaꞌom ri Dios chiqe, lik qetaꞌam Rire jeqel pa qanimaꞌ.
1JO 4:1 Hermanos, lik e kꞌi ri qꞌalajisanelabꞌ xa e sokosoꞌnel ebꞌenaq pa taq ri tinamit che ruwachulew re kakiꞌan kꞌutunik. E uwariꞌche makoj alaq ruchꞌaꞌtem junoq xew ruma kubꞌiꞌij kꞌo uqꞌalajisam lo ri Ruxlabꞌixel ri Dios che. Ri ꞌana alaq e lik chꞌobꞌo alaq we wa kubꞌiꞌij paqatzij wi re ri Dios.
1JO 4:2 ¿Suꞌanik kaqetaꞌmaj we rukꞌutunik junoq petinaq rukꞌ ri Ruxlabꞌixel ri Dios? Petinaq rukꞌ ri Dios we e kujikibꞌaꞌ waꞌ: «Ri Jesucristo e Ruchaꞌoꞌn lo ri Dios yey xuꞌan achi echiriꞌ xkꞌun che ruwachulew.»
1JO 4:3 Noꞌj we junwi ri kubꞌiꞌij, qꞌalaj kꞌu riꞌ rukꞌutunik na rukꞌ ta ri Dios petinaq wi, ma e petinaq rukꞌ ri jun kabꞌiꞌx “anticristo” che; waꞌ e ri tom chi alaq kakꞌunik yey woꞌora kachakun chi ne che ruwachulew.
1JO 4:4 Alaq walkꞌoꞌal chupa rubꞌiꞌ ri Dios, ralaq alaq re ri Dios y chꞌijom chi alaq kichuqꞌabꞌ waꞌ wa qꞌalajisanelabꞌ xa e sokosoꞌnel; ma ri Uxlabꞌixel kꞌo ukꞌ ralaq más kꞌo uchuqꞌabꞌ chwa ri jun kꞌo che ruwachulew.
1JO 4:5 Ma rike xa e re ruwachulew, e uwariꞌche xa re ruwachulew ri kakikꞌutu; yey taq kꞌu ri winaq re ruwachulew e lik kakitaqej ri kikꞌutunik rike.
1JO 4:6 Pero riꞌoj oj re ri Dios, yey ri ketaꞌam uwach ri Dios e kakitaqej ri qakꞌutunik riꞌoj, noꞌj taq ri na e ta re ri Dios na kakitaqej ta ri qakꞌutunik riꞌoj. Jelaꞌ kꞌu riꞌ kaqetaꞌmaj we juna kꞌutunik petinaq rukꞌ ri Uxlabꞌixel re ri Qꞌijsaq o petinaq rukꞌ ri jun xa sokosoꞌnel.
1JO 4:7 Hermanos, lik chirajawaxik wi kꞌax qanaꞌa qibꞌ chiqawach, ma ri rutzil kꞌuꞌxaj rukꞌ ri Dios kape wi. E junoq kꞌo rutzil kꞌuꞌxaj rukꞌ, riꞌ alaxinaq pa rubꞌiꞌ ri Dios yey retaꞌam uwach ri Dios;
1JO 4:8 noꞌj e junoq na jinta rutzil kꞌuꞌxaj rukꞌ, riꞌ na retaꞌam ta uwach ri Dios, ma ri Dios e aj rutzil kꞌuꞌxaj.
1JO 4:9 Ri rutzil ukꞌuꞌx ri Dios xqꞌalajinik echiriꞌ xutaq lo che ruwachulew ri lik xew Ukꞌajol riꞌ, chaꞌ ruma Rire kakꞌojiꞌ qakꞌaslemal.
1JO 4:10 Ri saqil rutzil kꞌuꞌxaj kaqꞌalajinik na ruma ta e riꞌoj ri kꞌax xojnaꞌw re ri Dios, ma e Rire ri kꞌax xnaꞌw qe riꞌoj nabꞌe y xutaq lo Rukꞌajol chaꞌ koluꞌyaꞌa ribꞌ paqakꞌaxel re tojbꞌal ri qamak.
1JO 4:11 Hermanos, ri Dios xuꞌan waꞌ, kꞌutubꞌal re ri rutzil ukꞌuꞌx chiqe; ruma kꞌu riꞌ chirajawaxik riꞌoj kꞌax qanaꞌa qibꞌ chiqawach.
1JO 4:12 Na jinta junoq iliyom uwach ri Dios; pero we kꞌax kaqanaꞌ qibꞌ chiqawach, riꞌ kaqꞌalajinik jeqel ri Dios pa qanimaꞌ y pa saqil wi kꞌo ri rutzil ukꞌuꞌx Rire pa qanimaꞌ.
1JO 4:13 Kaqetaꞌmaj kꞌu riꞌ, oj kꞌo puqꞌabꞌ ri Dios yey Rire jeqel pa qanimaꞌ, ma Rire uyaꞌom ri Ruxlabꞌixel chiqe.
1JO 4:14 Yey riꞌoj qilom y kaqaqꞌalajisaj ri xuꞌan ri Qaqaw: Rire xutaq lo Rukꞌajol re kebꞌukolobꞌej konoje ri tikawex.
1JO 4:15 E junoq kuqꞌalajisaj: «Ri Jesús e Ukꞌajol ri Dios», riꞌ jeqel ri Dios pa ranimaꞌ yey rire kꞌo puqꞌabꞌ ri Dios.
1JO 4:16 Riꞌoj qetaꞌam y qakojom ri Dios lik kꞌax kojunaꞌo. Ri Dios e aj rutzil kꞌuꞌxaj; ekꞌu junoq kꞌo ri rutzil kꞌuꞌxaj pa ranimaꞌ, riꞌ kꞌo puqꞌabꞌ ri Dios yey ri Dios jeqel pa ranimaꞌ rire.
1JO 4:17 We ri rutzil ukꞌuꞌx ri Dios pa saqil wi kꞌo pa qanimaꞌ, riꞌ lik kubꞌul qakꞌuꞌx y na kaqaxiꞌij ta qibꞌ chwa ruqꞌijol ri qꞌatbꞌal tzij, ma jelaꞌ pachaꞌ rubꞌinik ri Jesús, jekꞌulaꞌ kojbꞌin riꞌoj wara che ruwachulew.
1JO 4:18 We ri rutzil ukꞌuꞌx ri Dios kꞌo pa qanimaꞌ, na jinta kaqaxiꞌij qibꞌ che, ma ri saqil rutzil ukꞌuꞌx ri Dios karesaj ri xiꞌin ibꞌ chiqe. Pero we junoq kuxiꞌij ribꞌ, e ruma kunaꞌo kape qꞌatbꞌal tzij puwiꞌ. E uwariꞌche we junoq kꞌa kuxiꞌij ribꞌ, riꞌ kꞌamajaꞌ kumaj usukꞌ pa saqil wi ri rutzil ukꞌuꞌx ri Dios.
1JO 4:19 Riꞌoj kꞌax kaqanaꞌ ri Dios ma e Rire kꞌax xnaꞌw qe riꞌoj nabꞌe.
1JO 4:20 We kꞌo junoq kubꞌiꞌij: «Riꞌin kꞌax kannaꞌ ri Dios,» yey tzel karil ri ratz-uchaqꞌ, riꞌ xa aj raqꞌul. Ma e junoq na kꞌax ta kunaꞌ ri ratz-uchaqꞌ ri karil uwach, ¿suꞌanik kꞌu riꞌ kꞌax kunaꞌ ri Dios ri na rilom ta uwach?
1JO 4:21 E ri Dios yaꞌyom waꞌ wa taqanik chiqe: «E junoq kꞌax kunaꞌ ri Dios, lik chirajawaxik kꞌax chebꞌunaꞌa ri ratz-uchaqꞌ.»
1JO 5:1 E junoq kukojo ri Jesús e Uchaꞌoꞌn lo ri Dios, riꞌ alaxinaq chi chupa rubꞌiꞌ ri Dios. Yey we kꞌax kaqanaꞌ ri Dios, riꞌ kꞌax keqanaꞌ ri e ralkꞌoꞌal Rire.
1JO 5:2 Chwi kꞌu riꞌ waꞌ kaqetaꞌmaj kꞌax keqanaꞌ ri e ralkꞌoꞌal ri Dios, we kꞌax kaqanaꞌ ri Dios y kojtajin che uꞌanik ri kubꞌiꞌij Rutzij Upixabꞌ.
1JO 5:3 Ma ri kꞌutubꞌal re ri rutzil qakꞌuꞌx che ri Dios, e ri kaqaꞌan janipa ri kubꞌiꞌij Rutzij Upixabꞌ yey waꞌ na kꞌayew taj kaꞌanik.
1JO 5:4 Ma qonoje ri oj alaxinaq chi chupa rubꞌiꞌ ri Dios, kaqachꞌij uchuqꞌabꞌ ri na utz taj kꞌo che ruwachulew, yey kaqaꞌan waꞌ ruma ri kubꞌulibꞌal qakꞌuꞌx rukꞌ Rire.
1JO 5:5 ¿China kꞌu ri kachꞌijow uchuqꞌabꞌ ri na utz taj kꞌo che ruwachulew? E junoq kukojo ri Jesús e Ukꞌajol ri Dios.
1JO 5:6 Ri Qanimajawal Jesucristo xkꞌun che ruwachulew y xqꞌalajin kꞌut china Rire echiriꞌ xukꞌul ri yaꞌ re bautismo y echiriꞌ xturuw rukikꞌel; na xew ta kꞌu ruma ri bautismo rukꞌ yaꞌ ma rukꞌ ne rukikꞌel xturuwik. Ekꞌu ri Ruxlabꞌixel ri Dios xqꞌalajisan re waꞌ; yey ronoje ri kubꞌiꞌij Rire, lik qatzij.
1JO 5:7 E oxibꞌ kꞌu ri keqꞌalajisan puwi ri lik qatzij:
1JO 5:8 ri Ruxlabꞌixel ri Dios, ri bautismo re ri Jesús rukꞌ yaꞌ y rukikꞌel ri Jesús xturuw chwa ri cruz; yey uroxchal waꞌ junam ri kakiqꞌalajisaj.
1JO 5:9 Riꞌoj kaqakꞌul ri kakiqꞌalajisaj ri tikawex, pero janipa ri kubꞌiꞌij ri Dios más kꞌo uwach chwa ri kakibꞌiꞌij ri tikawex; ruma kꞌu riꞌ lik chirajawaxik kaqakꞌul janipa ri kuqꞌalajisaj Rire puwi Rukꞌajol.
1JO 5:10 E junoq kubꞌul ukꞌuꞌx rukꞌ Rukꞌajol ri Dios, riꞌ ukojom janipa ri uqꞌalajisam ri Dios puwi Rukꞌajol. Noꞌj ri na kukoj ta ri kubꞌiꞌij ri Dios, e pachaꞌ kuꞌan aj raqꞌul che ri Dios, ma na kukoj ta ri uqꞌalajisam ri Dios puwi Rukꞌajol.
1JO 5:11 Y ri qꞌalajisam e waꞌ: Ri Dios uyaꞌom qakꞌaslemal na jinta utaqexik, yey waꞌ wa kꞌaslemal xew kariqitaj ruma Rukꞌajol.
1JO 5:12 E junoq ukꞌulum Rukꞌajol ri Dios pa ranimaꞌ, riꞌ yaꞌtal chi waꞌ wa kꞌaslemal che; noꞌj e junoq na ukꞌulum ta Rukꞌajol ri Dios pa ranimaꞌ, riꞌ na yaꞌtal ta waꞌ wa kꞌaslemal che.
1JO 5:13 Kantzꞌibꞌaj pan waꞌ che alaq ri kojom alaq rubꞌiꞌ Rukꞌajol ri Dios, chaꞌ ketaꞌmaj alaq kꞌo kꞌaslemal alaq na jinta utaqexik.
1JO 5:14 Kubꞌul qakꞌuꞌx rukꞌ ri Dios ma qetaꞌam we ri kaqatzꞌonoj che e chirij janipa ri karaj Rire, kojuta kꞌu riꞌ.
1JO 5:15 Yey we qetaꞌam Rire kojuto, qetaꞌam kꞌu riꞌ kuya chiqe saꞌ ri qatzꞌonom che.
1JO 5:16 We kꞌo junoq karil juna hermano katzaq pa mak, yey we waꞌ wa mak na kukꞌam tubꞌi pa ri kamik chwach ri Dios, chuꞌana kꞌu orar riꞌ chaꞌ wa hermano kutzelej utzij chwach ri Dios y jekꞌulaꞌ ri Dios kuya ukꞌaslemal. Waꞌ e we ri mak na kukꞌam tubꞌi pa ri kamik chwach ri Dios. Pero kꞌo mak kukꞌam bꞌi jun pa ri kamik chwach ri Dios; chwi kꞌu riꞌ waꞌ na kambꞌiꞌij taj we kꞌa kaꞌan orar puwi ri kaꞌanaw re.
1JO 5:17 Ronoje ri na jusukꞌ taj kaꞌanik e mak chwach ri Dios, pero kꞌo mak na kukꞌam tubꞌi jun pa ri kamik na jinta utaqexik.
1JO 5:18 Qetaꞌam kꞌut, e janipa ri ebꞌalaxinaq chupa rubꞌiꞌ ri Dios, na kakitijoj ta chi kibꞌ che uꞌanik ri mak; ma Rukꞌajol ri Dios e kachajin ke chaꞌ na ketzaq ta puqꞌabꞌ ritzel winaq.
1JO 5:19 Lik kꞌu qetaꞌam oj re ri Dios, y qetaꞌam taq ri winaq re ruwachulew puqꞌabꞌ ritzel winaq e kꞌo wi.
1JO 5:20 Y qetaꞌam kꞌut, Rukꞌajol ri Dios xkꞌun che ruwachulew, yey uyaꞌom qanaꞌoj chaꞌ kaqetaꞌmaj uwach ri Jun paqatzij wi e Dios. Y oj kꞌo kꞌu puqꞌabꞌ ri paqatzij wi e Dios, ma oj kꞌo puqꞌabꞌ Rukꞌajol Jesucristo. Xew Rire paqatzij wi e Dios y e Rire ri kuya ri kꞌaslemal na jinta utaqexik.
1JO 5:21 Alaq walkꞌoꞌal chupa rubꞌiꞌ ri Dios, maloqꞌnimaj alaq taq ri tiox. Amén.
2JO 1:1 Riꞌin in nimalaj winaq, in aj wach re riglesia; kantzꞌibꞌaj pan wa carta che alaq, ri alaq chaꞌtal ruma ri Dios, ri kamol ibꞌ alaq pa rubꞌiꞌ ri Qanimajawal Jesucristo. Paqatzij wi lik kꞌax kannaꞌ alaq, y na xew ta riꞌin ma konoje ri kikojom ri Qꞌijsaq re ri Dios kꞌax kakinaꞌ alaq.
2JO 1:2 Kꞌax kaqanaꞌ alaq ruma ri Qꞌijsaq qakojom junam ukꞌ alaq y waꞌ na jinta utaqexik kꞌo qukꞌ qonoje riꞌoj.
2JO 1:3 Kꞌola kꞌu ukꞌ alaq y qukꞌ riꞌoj ri unimal rutzil kꞌuꞌxaj rukꞌ ri kꞌutubꞌal re ri rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo, Rukꞌajol ri Qaqaw. Kaqakꞌul kꞌu ronoje waꞌ ruma e qakojom ri Qꞌijsaq yey ruma qakꞌutum ri rutzil ukꞌuꞌx ri Dios chike ri tikawex.
2JO 1:4 Lik xinkiꞌkotik ma xebꞌenuriq jujun che alaq kebꞌin chi utz chupa ri Qꞌijsaq jelaꞌ pachaꞌ ri taqanik xqakꞌul che ri Qaqaw.
2JO 1:5 Ekꞌu woꞌora hermanos ri alaq utinamit ri Dios, kantzꞌonoj che alaq lik kꞌax qanaꞌa qibꞌ chiqawach. Wa kanꞌano na e ta pachaꞌ kantzꞌibꞌaj pan jun kꞌakꞌ tzijpixabꞌ che alaq, ma waꞌ e ri xex chi tom wi lo alaq.
2JO 1:6 Ekꞌu ri rutzil qakꞌuꞌx kaqꞌalajinik echiriꞌ kojbꞌin jelaꞌ pachaꞌ ri kojutaq ri Dios che uꞌanik pa Rutzij Upixabꞌ. Ekꞌu ri kojutaq che e waꞌ: Qatijoj qibꞌ che ukꞌutik ri rutzil kꞌuꞌxaj. Yey waꞌ xex chi tom wi lo alaq.
2JO 1:7 Lik e kꞌi ri e aj sokosoꞌnel ebꞌenaq pa taq tinamit che ruwachulew, rike kakibꞌiꞌij: «Na qatzij taj ri Qanimajawal Jesucristo e Ruchaꞌoꞌn lo ri Dios yey xuꞌan achi echiriꞌ xkꞌun che ruwachulew» kechaꞌ. Janipa ri jewaꞌ kakibꞌiꞌij, e sokosoꞌnel y eyaktajinaq chirij ri Cristo.
2JO 1:8 Chajij kꞌu ibꞌ alaq chaꞌ na kasokotaj ta alaq kuma rike; e masach alaq uwach ri rajil ukꞌaxel ri chak kaꞌan alaq, chaꞌ jelaꞌ tzꞌaqat uwach ri kakꞌul alaq.
2JO 1:9 E junoq kuya kan rubꞌe ri Dios y na katikiꞌ ta chupa ri kꞌutunik re ri Cristo, riꞌ na jinta ri Dios rukꞌ. Noꞌj ri katikiꞌ chupa ri kꞌutunik re ri Cristo, riꞌ kꞌo ri Qaqaw Dios y kꞌo Rukꞌajol ri Dios rukꞌ.
2JO 1:10 We kꞌo junoq kopon ukꞌ alaq yey ri kukꞌutu na e ta ri saqil kꞌutunik puwi ri Cristo, makꞌul alaq pa ocho alaq y mabꞌiꞌij ne alaq che: «¡Utzilaj kꞌunem!»
2JO 1:11 Ma e ri kabꞌiꞌn che: «¡Utzilaj kꞌunem!» riꞌ e jun rukꞌ che uꞌanikil ri kichak na chom ta uwach.
2JO 1:12 Lik kꞌi taq ri kuaj kantzijoj che alaq, pero waꞌ na kuaj taj kantzꞌibꞌaj che alaq, ma ri kuaj riꞌin e kinopon ukꞌ alaq y jekꞌulaꞌ kojchꞌaꞌt chiqawach chaꞌ junam kojkiꞌkotik.
2JO 1:13 Ri hermanos kimolom kibꞌ wara, ri echaꞌtal ruma ri Dios, kakiya pan rutzil wach alaq. Amén.
3JO 1:1 Riꞌin in nimalaj winaq, in aj wach re riglesia; kantzꞌibꞌaj pan wa carta cheꞌla, hermano Gayo, ma lik paqatzij wi kꞌax kannaꞌ la.
3JO 1:2 Lal nu hermano, riꞌin kantzꞌonoj che ri Dios chaꞌ ronoje kel chi utz chwi qꞌabꞌ la yey chaꞌ lik e xaqi utz wach la jelaꞌ pachaꞌ ri bꞌinik silabꞌik la lik utz chwach ri Dios.
3JO 1:3 Riꞌin lik xinkiꞌkotik echiriꞌ xekꞌun jujun hermanos y xkitzijoj chwe puwi ri jusukꞌ bꞌinik silabꞌik la, ma e lik taqem la ri Qꞌijsaq re ri Dios.
3JO 1:4 Na jinta kuya más kiꞌkotemal chwe chwa ri kanwetaꞌmaj ri e walkꞌoꞌal chupa rubꞌiꞌ ri Dios e lik kitaqem ri Qꞌijsaq.
3JO 1:5 Lal nu hermano, lik utz ri katajin la che uꞌanik echiriꞌ ketoꞌ la ri hermanos, yey lik ewi ri kaꞌan la chike ri kepe naj.
3JO 1:6 Ekꞌu rike lik kiqꞌalajisam chikiwach ri tinamit re ri Cristo janipa ri rutzil kꞌuꞌx la chike. Yey lik utz we ketoꞌ bꞌi la chaꞌ kebꞌek chi che ri chak re ri Dios e kꞌo wi. Lik e taqal waꞌ chike rike
3JO 1:7 ma e petinaq chupa rubꞌiꞌ ri Qanimajawal ruma kꞌax kakinaꞌ Rire, y na jinta toꞌbꞌal ke kakikꞌam chike ri winaq na ketaꞌam ta uwach ri Dios.
3JO 1:8 Ekꞌu riꞌoj, lik chirajawaxik kaqaya qibꞌ che kitoꞌik waꞌ wa qa hermanos chaꞌ jelaꞌ kojtoꞌbꞌ kukꞌ che utzijoxik ri Qꞌijsaq.
3JO 1:9 Riꞌin xintzꞌibꞌaj pan chike ri tinamit re ri Cristo puwi wa toꞌbꞌal taqal chike ri e aj chak re ri Dios, pero ri Diótrefes na kukꞌul ta ri pixabꞌanik kaqaya riꞌoj, ma ri karaj e lik xew rire kataqan pakiwi konoje.
3JO 1:10 E uwariꞌche we xinopon chilaꞌ, kanchꞌaꞌbꞌej upa ruma taq ri raqꞌubꞌal uyakom chiqij. Yey na xew ta waꞌ, ma na karaj taj kebꞌukꞌul ri hermanos kepe naj y kebꞌuqꞌatej ne ri hermanos kakaj kekikꞌulu. Ekꞌu ri kekꞌuluw ke kebꞌeresaj bꞌi chikixoꞌl ri tinamit re ri Cristo.
3JO 1:11 Lal nu hermano, maꞌan e la ri na utz taj; e ꞌana la ri utz. Ma e junoq kuꞌan ri utz, riꞌ re ri Dios; noꞌj e junoq kuꞌan ri na utz taj, riꞌ na retaꞌam ta uwach ri Dios.
3JO 1:12 Konoje chom kechꞌaꞌt puwi ri hermano Demetrio y lik qatzij ri kakibꞌiꞌij ma waꞌ lik kaqꞌalajin che rubꞌinik usilabꞌik. Jenelaꞌ riꞌoj, chom ruchꞌaꞌtibꞌexik kaqaꞌano yey etaꞌam alaq lik qatzij ri kaqabꞌiꞌij.
3JO 1:13 Lik kꞌi taq ri kuaj kantzijoj cheꞌla, pero waꞌ na kuaj taj kantzꞌibꞌaj cheꞌla
3JO 1:14 ma ri kuaj riꞌin e kinopon tan ukꞌ la y jekꞌulaꞌ kojchꞌaꞌt chiqawach.
3JO 1:15 Kꞌola kꞌu rutzil chomal ukꞌ la. Janipa ri hermanos ketaꞌam wach la kakiya pan rutzil wach la. Kantzꞌonoj cheꞌla, yaꞌa la rutzil kiwach chikijujunal janipa ri ketaꞌam qawach chilaꞌ.
JUD 1:1 Riꞌin in Judas, in aj chak re ri Qanimajawal Jesucristo yey in uchaqꞌ ri Jacobo. Kantzꞌibꞌaj pan waꞌ wa carta chike ri esikꞌim ruma ri Qaqaw Dios, ri e kꞌo chupa ri rutzil ukꞌuꞌx Rire y echajital ruma ri Qanimajawal Jesucristo.
JUD 1:2 Ekꞌu ri Dios chunimarisaj na pawiꞌ alaq ri kꞌaxnaꞌbꞌal ukꞌuꞌx junam rukꞌ ri utzil uchomal y ri rutzil ukꞌuꞌx.
JUD 1:3 Alaq nu hermanos, lik nurayim kintzꞌibꞌan pan che alaq chwi ri kolobꞌetajik yaꞌtal chiqe riꞌoj chinima qonoje; pero woꞌora kunaꞌ nukꞌuꞌx lik chirajawaxik kampixabꞌaj alaq chaꞌ kachuqꞌubꞌej ibꞌ alaq chupa ri Qꞌijsaq re ri Dios y na kaya ta kꞌu alaq luwar riꞌ che junoq kuyoj ri saqil kꞌutunik yaꞌtal xa jumul che rutinamit ri Dios.
JUD 1:4 Ma e kꞌo jujun achijabꞌ ebꞌokinaq chixoꞌl alaq, xa kewam ri itzel naꞌoj kꞌo kukꞌ. Yey ojertan riꞌ tzꞌibꞌital chi lo chupa Ruchꞌaꞌtem ri Dios, rike eyaꞌtal chi chuxeꞌ ri qꞌatbꞌal tzij re ri Dios. Ekꞌu waꞌ waꞌchijabꞌ itzel kiwachlibꞌal, kaketzꞌabꞌej uwach ri unimal rutzil ukꞌuꞌx ri Dios rukꞌ ri kibꞌinik kisilabꞌik na chom taj. Yey kakibꞌiꞌij na qatzij taj xew ri Qanimajawal Jesucristo e Qajawal y taqal kꞌu che kataqan paqawiꞌ.
JUD 1:5 Lik kuaj kankuxtaj che alaq ri etaꞌam chi ralaq: Ri Dios Qajawxel xebꞌukolobꞌej rutinamit echiriꞌ xebꞌeresaj lo chupa ri tinamit Egipto; na rukꞌ ta kꞌu riꞌ, chikixoꞌl ri xebꞌukolobꞌej e kꞌo ri xusach kiwach ruma na xkikoj ta utzij.
JUD 1:6 Yey e kꞌo ángeles na xekubꞌiꞌ ta rukꞌ ri taqanik xuya ri Dios pakiqꞌabꞌ, ma xkaj kakꞌojiꞌ más kiwach. Ruma kꞌu riꞌ, xkesaj kibꞌ puqꞌabꞌ ri Qaqaw y jekꞌulaꞌ xkiya kan ri saqil kikꞌolibꞌal chilaꞌ chikaj. Yey ruma kꞌu waꞌ, ri Dios ebꞌukꞌolom pa utum qꞌequꞌm, kopon na runimal uqꞌijol echiriꞌ kuqꞌat tzij pakiwiꞌ; y eyaꞌtal kꞌu riꞌ pa karena, na jinta kitzoqpitajik bꞌi.
JUD 1:7 Jekꞌulaꞌ ri tinamit Sodoma y Gomorra junam kukꞌ taq ri tinamit e kꞌo lo chikinaqaj, xkikꞌam lo qꞌatbꞌal tzij pakiwiꞌ ruma xkiya kibꞌ chupa ri chꞌulilaj mak, ri lik na ubꞌe taj. Wa kebꞌ tinamit e kꞌutubꞌal re ri qꞌatbꞌal tzij, ma e xkikꞌul ri kꞌaxkꞌobꞌik re ri aqꞌ na kachup ta chik.
JUD 1:8 Yey ri achijabꞌ ebꞌokinaq chixoꞌl alaq, tobꞌ lik kitom chi puwi ri qꞌatbꞌal tzij re ri Dios pakiwi raj makibꞌ ojertan, na rukꞌ ta kꞌu riꞌ, ketajin che uꞌanik ri na utz taj yey kakibꞌiꞌij, pa wachikꞌ ri Dios uqꞌalajisam chike utz ri kakiꞌano. Kaketzelaj rukꞌ mak ri kicuerpo, na kakaj taj kꞌo junoq kataqan pakiwiꞌ tobꞌ ne e ri Dios y tzel kechꞌaꞌt chikij taq ri lik kꞌo kiwach chilaꞌ chikaj.
JUD 1:9 Noꞌj ri Arcángel Miguel, tobꞌ ne lik kꞌo uwach, na jinta juna chꞌaꞌtem re qꞌatbꞌal tzij xubꞌiꞌij che ritzel winaq echiriꞌ kachꞌoꞌjin rukꞌ puwi rucuerpo ri Moisés. Na xuꞌan ta kꞌu aj qꞌatal tzij che ribꞌ ma xew jewaꞌ xubꞌiꞌij che: «E ri Dios Qajawxel kaqꞌaten e la» xchaꞌ
JUD 1:10 Noꞌj waꞌ waꞌchijabꞌ keyoqꞌon ne chirij ronoje taq ri na ketaꞌam taj; yey xa pa ke wi kakiꞌan ri kirayibꞌal jelaꞌ pachaꞌ kakiꞌan rawaj na kakichꞌobꞌ ta ri kakiꞌano. Ruma kꞌu waꞌ, kitukel kakikꞌam lo qꞌatbꞌal tzij pakiwiꞌ.
JUD 1:11 ¡Lik toqꞌoꞌ kꞌu kiwach rike! Ma e kakiꞌan pachaꞌ ri xuꞌan ri Caín. Yey kiꞌanom ri na utz taj ruma ri kirayibꞌal che ri bꞌeyomalil, jelaꞌ pachaꞌ xuꞌan ri Balaam. Yey kekam ne kꞌu riꞌ ruma ri kititzꞌitikil jelaꞌ pachaꞌ ri xukꞌulumaj ri Coré.
JUD 1:12 Waꞌ waꞌchijabꞌ ebꞌokinaq chixoꞌl alaq lik e aj yaꞌl kꞌix che alaq chupa taq ri chomilaj nimaqꞌij pa kamol wi ibꞌ alaq re kakꞌut ri kꞌaxnaꞌbꞌal kꞌuꞌxaj chiwach alaq. Ma na jinta xiꞌin ibꞌ kukꞌ chwach ri Dios y na kekꞌix tane che ri kakiꞌano, ma xew e kebꞌok il chikibꞌil kibꞌ. Rike e jelaꞌ pachaꞌ sutzꞌ kakꞌam lo ruma ri tew; xa kikꞌowik y na jinta jabꞌ rukꞌaꞌam loq. Yey e pachaꞌ taq ri cheꞌ na kakiya ta kijiqꞌobꞌalil chupa ruqꞌijol; lik echaqijinaq y ruma kꞌu riꞌ kꞌotom kꞌu bꞌi ri katzꞌayaq.
JUD 1:13 Waꞌ waꞌchijabꞌ e jelaꞌ pachaꞌ ri mar echiriꞌ lik kꞌo royowal, kapuluwan uwiꞌ y kurojij lo ri chꞌul kꞌo chupa. Jekꞌulaꞌ, waꞌ waꞌchijabꞌ e kakikꞌut taq ri kꞌixbꞌal uwach kakiꞌano. Yey e jelaꞌ pachaꞌ taq chꞌumil kisachom ri kibꞌe, ma kakiꞌan che kibꞌ e aj kꞌamal wach ke rutinamit ri Dios, tobꞌ ne e rike ri e sachinaq. Ruma kꞌu ri kakiꞌano, ri Dios uqꞌatom chi tzij pakiwiꞌ chaꞌ na jinta utaqexik kebꞌeꞌkꞌola pa utum qꞌequꞌm.
JUD 1:14 Pakiwi waꞌ waꞌchijabꞌ xchꞌaꞌt ri Enoc, ri uwuq lemaꞌj chwi ri Adán ri nabꞌe tikawex. Ruma kꞌu riꞌ, ri Ruxlabꞌixel ri Dios jewaꞌ xubꞌiꞌij: «¡Chiwilapeꞌ! Xinwilo echiriꞌ xpe ri Dios Qajawxel kukꞌ ukꞌiyal santowilaj ángeles.
JUD 1:15 Xkꞌunik re koluꞌqꞌata tzij pakiwi konoje ri winaq yey kebꞌuya pa kꞌaxkꞌobꞌik raj makibꞌ e titzꞌitaq ruma ronoje taq ri mak kiꞌanom y ruma ronoje taq ri kꞌaxlaj chꞌaꞌtem kibꞌiꞌim chirij ri Dios.»
JUD 1:16 Waꞌ waꞌchijabꞌ e kꞌo chixoꞌl alaq lik kewunwutik y keyajan che ronoje. Xew kakaj kakiꞌan taq ri kirayibꞌal y xew kakiyak kiqꞌij taq ri winaq chaꞌ jelaꞌ kꞌo kakesaj chike.
JUD 1:17 Pero ralaq hermanos, kꞌuna chikꞌuꞌx alaq ri kibꞌiꞌim kan ri e utaqoꞌn ri Qanimajawal Jesucristo.
JUD 1:18 Rike xkibꞌiꞌij che alaq: «Chupa taq rukꞌisbꞌal qꞌij keyaktaj lo winaq e chꞌaminel, e kakitaqej ri kirayibꞌal na chom ta uwach.»
JUD 1:19 Waꞌ wa winaq kakikoj retzelal kꞌuꞌx chikixoꞌl ri kikojom rubꞌiꞌ ri Dios re kakijach kipa. Ri kinaꞌoj rike xa e re ruwachulew ma na jinta ri Ruxlabꞌixel ri Dios kukꞌ.
JUD 1:20 Noꞌj ralaq hermanos, lik jikibꞌaꞌ kꞌuꞌx alaq che ri saqil kꞌutunik kꞌulum alaq y chꞌaꞌta alaq rukꞌ ri Dios ruma ri Santowilaj Ruxlabꞌixel.
JUD 1:21 Kꞌola kꞌu alaq chupa ri rutzil ukꞌuꞌx ri Dios. Choyeꞌej kꞌu alaq ruqꞌijol echiriꞌ ri Qanimajawal Jesucristo kuya che alaq ri kꞌaslemal na jinta utaqexik, kꞌutubꞌal re ri kꞌaxnaꞌbꞌal ukꞌuꞌx che alaq.
JUD 1:22 Chetoꞌo kꞌu alaq ri xa kebꞌ kipa kikojom ri Qꞌijsaq chaꞌ rike kakijikibꞌaꞌ kikꞌuꞌx chupa waꞌ.
JUD 1:23 Yey chike jujun chik, chetoꞌo alaq chaꞌ kekolobꞌetaj che ri aqꞌ re ri xibꞌalbꞌaꞌ, jelaꞌ pachaꞌ kajekꞌix pana junoq e riꞌ katzaq pa aqꞌ. Kꞌutu alaq ri relej kꞌuꞌx alaq chike ri lik e aj mak. Pero e lik chajij ibꞌ ralaq chaꞌ na kaꞌan ta e alaq ri mak kakiꞌan rike; e ꞌana alaq pachaꞌ ri kuꞌan junoq echiriꞌ na karaj taj kuchap juna kꞌul lik chꞌul.
JUD 1:24 Ri Dios lik kꞌo puqꞌabꞌ kutoꞌ alaq chaꞌ na katzaq ta alaq pa mak, chaꞌ jelaꞌ na jinta mak alaq. Ruma kꞌu riꞌ, lik kakiꞌkot alaq echiriꞌ ri Dios kuya alaq chwach Rire pa kꞌo wi ri unimal uchomalil chilaꞌ chikaj.
JUD 1:25 Xa jun ri Dios Qakolobꞌenel yey Rire kojukolobꞌej ruma ri Qanimajawal Jesucristo. Nimarisax kꞌu uqꞌij ri Dios waqꞌij ora y chiqawach apanoq, ma Rire saꞌchi ruchomalil y ruchuqꞌabꞌ, yey ronoje taqanik puqꞌabꞌ kꞌo wi. Amén.
REV 1:1 E qꞌalajisanik waꞌ xuya ri Dios che ri Qanimajawal Jesucristo chaꞌ Rire kukꞌut chike ri raj chakibꞌ saꞌ taq ri katajin loq. Ruqꞌalajisaxik xuꞌan ri Jesús e xutaq lo ru ángel chaꞌ koluꞌbꞌiꞌij waꞌ che ri raj chak Juan.
REV 1:2 Ekꞌu ri Juan xuqꞌalajisaj kan ri tzij re ri Dios, ri qꞌalajisanik re ri Qanimajawal Jesucristo rukꞌ taq ri xkꞌut chwach rire.
REV 1:3 Nim uqꞌij ralaxik ri kajilan wa chꞌaꞌtem re wa qꞌalajisanik yey nim kiqꞌij kalaxik konoje ri ketaw re waꞌ yey kakitaqej ronoje taq ri tzꞌibꞌital chupa, ma xa naqaj chi kꞌo wi lo ruqꞌijol echiriꞌ kuꞌana taq waꞌ.
REV 1:4 Riꞌin in Juan kintzꞌibꞌan pan chike ri wuqubꞌ iglesias e kꞌo chupa taq ri tinamit re Asia. Kꞌulu alaq ri unimal rutzil kꞌuꞌxaj y ri utzil chomal, ri kape rukꞌ ri Jun kꞌo waqꞌij ora, ri xex chi kꞌo lo wi y ri kꞌo chiqawach apanoq, ri kape rukꞌ ri wuqubꞌ uwach Uxlabꞌixel kꞌo chwach rutzꞌulibꞌal pa kataqan wi,
REV 1:5 yey ri kape rukꞌ ri Qanimajawal Jesucristo, ri kuqꞌalajisaj chi utz ri Qꞌijsaq. Rire e ri nabꞌe xkꞌastaj lo chikixoꞌl ri ekaminaq y e ri kꞌo pakiwi konoje ri e taqanelabꞌ che ruwachulew. Rire lik kꞌax xojunaꞌo y xojuchꞌaj che taq ri qamak rukꞌ rukikꞌel xturuw chwa ri cruz.
REV 1:6 Xuꞌan kꞌu xa jun tinamit chiqe y xuꞌan chiqe oj taqanel y oj chakunel chwach ri Dios, Ruqaw Rire. Ekꞌu Rire lik taqal che kayak uqꞌij waqꞌij ora y chiqawach apanoq ma lik saꞌchi ruchomal y ruchuqꞌabꞌ.
REV 1:7 Tape alaq, ri Qanimajawal Jesucristo pa sutzꞌ kakꞌun wi. Konoje kꞌu riꞌ kakilo, kakil ne ri xekamisan re. Y konoje rukꞌiyal kiwach taq ri tikawex che ruwachulew lik kebꞌoqꞌik ruma rukꞌunibꞌal. Paqatzij wi jelaꞌ kuꞌano.
REV 1:8 «Riꞌin in ri jeqebꞌal re yey in ri kꞌisbꞌal re, jelaꞌ pachaꞌ ri kaꞌibꞌ letra A y Z» kacha ri Qanimajawal, ri Jun kꞌo waqꞌij ora, ri xex chi kꞌo lo wi y ri kꞌo chiqawach apanoq yey ri kꞌo ronoje unimal chuqꞌabꞌ puqꞌabꞌ.
REV 1:9 Riꞌin in Juan in bꞌare jun ukꞌ alaq hermanos, junam oj kꞌo chupa rutaqanik ri Qanimajawal Jesucristo y junam kaqachꞌij uchuqꞌabꞌ taq ri kꞌaxkꞌobꞌik rukꞌ unimal qakꞌuꞌx. E riꞌin xineꞌyoꞌq pa ri isla Patmos ruma xintzijoj ri Tzij re ri Dios y ri Qꞌijsaq re ri Qanimajawal Jesucristo.
REV 1:10 Pa kꞌu jun qꞌij domingo in kꞌo puqꞌabꞌ ri Ruxlabꞌixel ri Dios echiriꞌ xinto xchꞌaw lo Jun chwij, waꞌ lik ko kachꞌawik pachaꞌ uchꞌawibꞌal trompeta.
REV 1:11 Jewaꞌ xubꞌiꞌij: «Riꞌin in ri jeqebꞌal re yey in ri kꞌisbꞌal re, jelaꞌ pachaꞌ ri kaꞌibꞌ letra A y Z. Chatzꞌibꞌaj kꞌu chupa juna libro ronoje taq ri kawilo y chataqa bꞌi chike ri wuqubꞌ iglesias e kꞌo chupa taq ri tinamit re Asia: ri kꞌo Éfeso, ri kꞌo Esmirna, ri kꞌo Pérgamo, ri kꞌo Tiatira, ri kꞌo Sardis, ri kꞌo Filadelfia y ri kꞌo Laodicea» xchaꞌ.
REV 1:12 Xintzuꞌn kꞌu pan chwij chaꞌ kanwilo china ri kachꞌaꞌt lo wukꞌ; y echiriꞌ xintzuꞌn apanoq, xinwil pan wuqubꞌ utzukꞌulibꞌal aqꞌ re oro.
REV 1:13 Chikinikꞌajal kꞌu ri wuqubꞌ utzukꞌulibꞌal aqꞌ re oro, xinwil pan Jun lik e katzuꞌn Ralaxel Chikixoꞌl Tikawex. Ukojom jun uqꞌuꞌ kopon kꞌa chuqul raqan y kojotal jun pas re oro chwa ukꞌuꞌx.
REV 1:14 Rujolom y ruwiꞌ lik saq jelaꞌ pachaꞌ ri mit saq y pachaꞌ ri nieve; y ukabꞌichal ruwach pachaꞌ aqꞌ kareprotik.
REV 1:15 Ri raqan kawolqꞌinik pachaꞌ ri chꞌichꞌ bronce echiriꞌ kesax lo pa ri orna; ruqul katatajik jelaꞌ pachaꞌ utzaꞌm yaꞌ e riꞌ xkꞌunik.
REV 1:16 Puwikiqꞌabꞌ e kꞌo wuqubꞌ chꞌumil; puchiꞌ kel lo jun espada lik tꞌisiꞌs utzaꞌm y kaꞌibꞌ ruwi reꞌ. Rupalaj jelaꞌ pachaꞌ ri qꞌij echiriꞌ lik kareprotik.
REV 1:17 Ekꞌuchiriꞌ xintzuꞌ uwach, xintzaq xeꞌraqan uqꞌabꞌ y xinkanaj kanoq pachaꞌ in kaminaq chik. Ekꞌu Rire xuya ruwikiqꞌabꞌ panuwiꞌ y jewaꞌ xubꞌiꞌij chwe: «Maxiꞌij awibꞌ, ma Riꞌin in ri nabꞌe yey in ri kꞌisbꞌal re.
REV 1:18 In ri xex in kꞌo wi, In ri xinkamik, pero woꞌora na jinta chi utaqexik ri nukꞌaslemal. Panuqꞌabꞌ Riꞌin kꞌo wi ri kamik y panuqꞌabꞌ kꞌo wi kebꞌenukꞌastajisaj lo ri ekaminaq.
REV 1:19 »Chatzꞌibꞌaj janipa ri xkꞌut chawach, rukꞌ taq ri kat-tajin che rilik y ri katajin lo chiqawach apanoq.
REV 1:20 Ri keꞌelawi ri wuqubꞌ chꞌumil awilom pa nuwikiqꞌabꞌ y taq ri wuqubꞌ utzukꞌulibꞌal aqꞌ re oro e waꞌ: Ri wuqubꞌ chꞌumil e ri wuqubꞌ ángeles e chajinel ke ri wuqubꞌ iglesias; yey ri wuqubꞌ utzukꞌulibꞌal aqꞌ re oro e ri wuqubꞌ iglesias.
REV 2:1 »Chatzꞌibꞌaj pan waꞌ che ri aj kꞌamal wach re riglesia kꞌo Éfeso: E ri Jun kꞌo wuqubꞌ chꞌumil puwikiqꞌabꞌ, ri kabꞌin chikinikꞌajal ri wuqubꞌ utzukꞌulibꞌal aqꞌ re oro, jewaꞌ kubꞌiꞌij chiwe:
REV 2:2 Riꞌin lik wetaꞌam ronoje ri kiꞌano, ri kꞌayewlaj chak iꞌanom y runimal ikꞌuꞌx chwach taq ri kꞌax. Wetaꞌam na kebꞌikꞌul ta iwukꞌ ri winaq itzel kikꞌuꞌx. Ma lik ikꞌamom kipa ri kakibꞌiꞌij e taqoꞌn re ri Cristo tobꞌ na e taj; yey xqꞌalajin kꞌu riꞌ xa e aj raqꞌubꞌal.
REV 2:3 Lik itijom kꞌu ri kꞌax y na kixkos ta kꞌana che ri nuchak. Iyaꞌom ikꞌuꞌx che utzijoxik ri nubꞌiꞌ y na paxinaq ta ikꞌuꞌx che.
REV 2:4 Pero Riꞌin kꞌo taq ri na kukꞌul ta nukꞌuꞌx che ri kiꞌano: E ri rutzil ikꞌuꞌx wukꞌ na e ta chi pachaꞌ ri xijeqebꞌej loq.
REV 2:5 E uwariꞌche kꞌuna chikꞌuꞌx pachawi ix jaljobꞌinaq wi. Chitzelej kꞌu itzij chwach ri Dios y chiꞌana tanchi ri chak jelaꞌ pachaꞌ ri xiꞌan lo che ri jeqebꞌal loq. Ma we na kitzelej ta itzij, Riꞌin kinkꞌun lo iwukꞌ y kanwesaj kꞌu puluwar ri tzukꞌulibꞌal aqꞌ re oro iweꞌix.
REV 2:6 Noꞌj kꞌu ri utz kꞌa kixtajin che uꞌanik, e ri tzel kiwil taq ri na utz taj kakiꞌan ri nicolaítas, ma jenelaꞌ Riꞌin lik tzel kanwil taq ri kakiꞌano.
REV 2:7 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias. China kꞌu ri kachꞌijow uchuqꞌabꞌ taq ri na utz taj, kanya che kutij re rujiqꞌobꞌalil ri cheꞌ re kꞌaslemal, ri kꞌo chunikꞌajal ri werta re ri Dios, kachaꞌ.
REV 2:8 »Chatzꞌibꞌaj pan waꞌ che ri aj kꞌamal wach re riglesia kꞌo Esmirna: E ri Jun kabꞌiꞌn re: “Riꞌin in ri nabꞌe yey in ri kꞌisbꞌal re, ri xkamik y xkꞌastaj tanchik”, jewaꞌ kubꞌiꞌij chiwe:
REV 2:9 Riꞌin lik wetaꞌam ronoje ri kiꞌano, ri kꞌaxkꞌobꞌik ix kꞌo wi y ri nibꞌaꞌil kiwikꞌowibꞌej, tobꞌ paqatzij wi riꞌix lik kꞌo ibꞌeyomal chwach ri Dios. Lik wetaꞌam ronoje ri tzel itzijobꞌexik kakiꞌan jujun e aj judiꞌabꞌ, ri kakibꞌiꞌij e utinamit ri Dios tobꞌ na e ta kukꞌil, ma e kukꞌil ri e kꞌo puqꞌabꞌ ri Satanás.
REV 2:10 Mixiꞌij kꞌu iwibꞌ che ronoje taq ri kiwikꞌowibꞌej. Chitapeꞌ: Kakꞌam ipa, ma ritzel winaq kebꞌuya jujun chiwe pa cárcel y kixkꞌojiꞌ pa kꞌaxkꞌobꞌik lajuj qꞌij. Chitikibꞌaꞌ kꞌu ri kubꞌulibꞌal ikꞌuꞌx, tobꞌ kixkamisaxik; ma Riꞌin kanya jun corona chiwe, waꞌ e ri kꞌaslemal na jinta utaqexik.
REV 2:11 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias. China kꞌu ri kachꞌijow uchuqꞌabꞌ taq ri na utz taj, riꞌ na kikꞌow ta chupa rukaꞌm kamik, kachaꞌ.
REV 2:12 »Chatzꞌibꞌaj pan waꞌ che ri aj kꞌamal wach re riglesia kꞌo Pérgamo: E ri Jun rukꞌaꞌam ri espada lik tꞌisiꞌs utzaꞌm yey kaꞌibꞌ ruwi reꞌ, jewaꞌ kubꞌiꞌij chiwe:
REV 2:13 Riꞌin lik wetaꞌam ronoje ri kiꞌano; yey wetaꞌam e pa ri tinamit pa ix kꞌo wi, kataqan ri Satanás. Na rukꞌ ta kꞌu riꞌ, kꞌa ikojom ri nubꞌiꞌ y na iwesam ta iwibꞌ chwij ma lik kubꞌul ikꞌuꞌx wukꞌ, tobꞌ ne echiriꞌ chupa laꞌ la tinamit xkamisax ri Antipas, ri lik jusukꞌ tzijonel we.
REV 2:14 Pero Riꞌin kꞌo taq ri na kukꞌul ta nukꞌuꞌx che ri kiꞌano: E ri ebꞌikꞌulum chiriꞌ ri kitaqem rukꞌutunik ri jun aj qꞌij re ojertan Balaam rubꞌiꞌ. Ma ri Balaam xukꞌut che ri Balac suꞌanik kukoj tzaqibꞌal pa kibꞌe raj Israel chaꞌ kakitij ri ikꞌowisam chi chikiwach ri tiox y kaketzꞌabꞌej uwa kiqꞌij kukꞌ jujun chik na kikꞌulel taj.
REV 2:15 Yey riꞌix ebꞌikꞌulum chiriꞌ ri kitaqem ri kikꞌutunik ri nicolaítas, waꞌ wa kꞌutunik lik tzel kanwil Riꞌin.
REV 2:16 E uwariꞌche chitzelej itzij chwach ri Dios; ma we na kiꞌan taj, Riꞌin kinopon tan iwukꞌ y kinchꞌoꞌjin kꞌu riꞌ kukꞌ ri nicolaítas rukꞌ ri nu espada kel lo pa nuchiꞌ.
REV 2:17 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias. China kꞌu ri kachꞌijow uchuqꞌabꞌ taq ri na utz taj, Riꞌin kanya che kutij re ri waꞌim ewatalik, waꞌ e ri maná y kanya kꞌu jun ralko abꞌaj lik saq che y chwach ri ralko abꞌaj tzꞌibꞌital jun kꞌakꞌ bꞌiꞌaj na jinta junoq etaꞌmayom re, xew ketaꞌman ri kakꞌuluw re, kachaꞌ.
REV 2:18 »Chatzꞌibꞌaj pan waꞌ che ri aj kꞌamal wach re riglesia kꞌo Tiatira: Rukꞌajol ri Dios, ri Jun kꞌo taq uwach pachaꞌ aqꞌ kareprotik y ri raqan lik kawolqꞌinik pachaꞌ ri chꞌichꞌ bronce echiriꞌ kesax lo pa ri orna, jewaꞌ kubꞌiꞌij chiwe:
REV 2:19 Riꞌin lik wetaꞌam ronoje ri kiꞌano. Wetaꞌam ri rutzil ikꞌuꞌx, ri kubꞌulibꞌal ikꞌuꞌx, ri nimanik kiꞌano y runimal ikꞌuꞌx. Yey lik wetaꞌam e taq ri chak kixtajin che uꞌanik waqꞌij ora, más kꞌi chwach taq ri iꞌanom lo nabꞌe.
REV 2:20 Pero Riꞌin kꞌo taq ri na kukꞌul ta nukꞌuꞌx che ri kiꞌano: E ri ikꞌulum chixoꞌlibꞌal riꞌix ri jun ixoq Jezabel rubꞌiꞌ. Waꞌ wiꞌxoq uꞌanom qꞌalajisanel che ribꞌ; pero rukꞌ taq rukꞌutunik, e kebꞌusok ri waj chakibꞌ chaꞌ kaketzꞌabꞌej uwa kiqꞌij kukꞌ jujun chik na kikꞌulel taj y kakitij ri ikꞌowisam chi chikiwach ri tiox.
REV 2:21 Ekꞌu Riꞌin lik naj woyeꞌem chaꞌ kutzelej utzij chinuwach, pero na karaj taj karoqꞌotaj kan ri na utz taj, waꞌ e ri makunik kukꞌ rachijabꞌ.
REV 2:22 Chitapeꞌ: Riꞌin kanya wiꞌxoq pa yabꞌil chaꞌ katzaq chwa uwarabꞌal, y jekꞌulaꞌ kebꞌenuya pa unimal kꞌaxkꞌobꞌik konoje ri kemakun rukꞌ we e laꞌ na kakitzelej ta kitzij che taq ri na utz taj kiꞌanom rukꞌ.
REV 2:23 Kebꞌenukamisaj na konoje ri ralkꞌoꞌal wiꞌxoq, chaꞌ jelaꞌ konoje riglesia kaketaꞌmaj e Riꞌin kanwilo saꞌ ri kꞌo chupa ri kinaꞌoj ri winaq y ri kꞌo chupa ri kanimaꞌ, we utz o na utz taj. E Riꞌin kanya chijujunal riꞌix ri taqal chiwe e chirij taq ri iꞌanom.
REV 2:24 Noꞌj kambꞌiꞌij kꞌu chiwe riꞌix ri nikꞌaj chik re riglesia kꞌo Tiatira, ri na itaqem ta wa kꞌutunik yey na iyaꞌom tane iwibꞌ che uꞌanik ri kakibꞌiꞌij rike “e xew ke ri lik kꞌo kimajom puwi ri ewatalik chikiwach ri jujun chik” yey waꞌ rukꞌ ri Satanás petinaq wi, kambꞌiꞌij kꞌu chiwe: Na jinta jun chik eqaꞌn kanya chiqul.
REV 2:25 Xew e lik miwesaj iwibꞌ che ronoje ri uyaꞌom ri Dios chiwe kꞌa echiriꞌ kinopon tanchi iwukꞌ.
REV 2:26 Ma e chike ri kechꞌijow uchuqꞌabꞌ ronoje taq ri na utz taj y kakiꞌan woꞌora saꞌ ri kuaj Riꞌin y jelaꞌ ketajin che uꞌanik kꞌa echiriꞌ kinopon tanchi iwukꞌ, riꞌ kanya pakiqꞌabꞌ ketaqan pakiwi taq ri tinamit che ruwachulew,
REV 2:27 jelaꞌ pachaꞌ ri uyaꞌom ri Nuqaw chwe Riꞌin. Y jekꞌulaꞌ ketaqan pakiwi taq ri tinamit rukꞌ jun vara chꞌichꞌ pakiqꞌabꞌ y kakiꞌan kꞌu chike pachaꞌ echiriꞌ kaꞌan ukꞌaj che juna xun re ulew.
REV 2:28 Jekꞌulaꞌ chike ri ketaqanik, kanꞌan chike kewonik pachaꞌ ruchomal ri nimalaj chꞌumil re ri saqribꞌal.
REV 2:29 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias, kachaꞌ.
REV 3:1 »Chatzꞌibꞌaj pan waꞌ che ri aj kꞌamal wach re riglesia kꞌo Sardis: Ri Jun kꞌo ri wuqubꞌ uwach Uxlabꞌixel re ri Dios rukꞌ y kꞌo ri wuqubꞌ chꞌumil rukꞌ, jewaꞌ kubꞌiꞌij chiwe: Riꞌin lik wetaꞌam ronoje ri kiꞌano. Kabꞌiꞌx ne chiwe “ix kꞌaslik”, pero na qatzij taj ma riꞌix ix kaminaq chwach ri Dios.
REV 3:2 Kambꞌiꞌij kꞌu chiwe: Chixkꞌastajoq y lik chitija chi uqꞌij kiyak iwibꞌ che taq ri utz kꞌa kixtajin che uꞌanik, ma taq waꞌ katajin usachik uwach. Ekꞌu Riꞌin wilom ri iꞌanom, yey waꞌ na e ta ri karaj ri Dios chiwe.
REV 3:3 Kꞌuna kꞌu chikꞌuꞌx saꞌ taq ri imajom y saꞌ taq ri itom chwi ri kꞌutunik ikꞌulum. E chitaqej taq waꞌ y chitzelej itzij chwach ri Dios; ma we kixwarik, Riꞌin xaqikꞌateꞌt kinopon iwukꞌ jelaꞌ pachaꞌ ri roponibꞌal releqꞌom, ma na iwetaꞌam ta kꞌu riꞌ ri ora echiriꞌ kinoponik.
REV 3:4 Pero e kꞌo jujun tikawex iwukꞌ chiriꞌ Sardis lik jusukꞌ ri kibꞌinik kisilabꞌik chwach ri Dios, waꞌ na kichꞌulam ta kibꞌ rukꞌ ri mak. Yey chiqawach apanoq rike junam kebꞌin wukꞌ rukꞌ kiqꞌuꞌ saq, ma e taqal riꞌ chike.
REV 3:5 China kꞌu ri kachꞌijow uchuqꞌabꞌ taq ri na utz taj, kawiq rukꞌ uqꞌuꞌ saq y na kanyoj ta rubꞌiꞌ chupa ri libro re kꞌaslemal na jinta utaqexik. Yey kanqꞌalajisaj kꞌu rubꞌiꞌ chwach ri Nuqaw y chikiwach ri ángeles e kꞌo rukꞌ.
REV 3:6 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias, kachaꞌ.
REV 3:7 »Chatzꞌibꞌaj pan waꞌ che ri aj kꞌamal wach re riglesia kꞌo Filadelfia: E kubꞌiꞌij waꞌ ri Jun lik nim uqꞌij Santo, ri xew kubꞌiꞌij ri lik usukꞌ. Puqꞌabꞌ Rire kꞌo wi ri lawe re ri rey David. Ekꞌu Rire, we kꞌo xujaqo, na jinta chi junoq kariqow utzꞌapixik; yey we kꞌo xutzꞌapij, na jinta chi junoq kariqow ujaqik. Jekꞌuwaꞌ kubꞌiꞌij Rire chiwe:
REV 3:8 Riꞌin lik wetaꞌam ronoje ri kiꞌano. Chitapeꞌ: Riꞌin nuyaꞌom chiwach riꞌix jun puerta jaqalik y waꞌ wa puerta na jinta junoq kariqow utzꞌapixik; ma tobꞌ na lik ta kꞌo ichuqꞌabꞌ, e lik itaqem ri Nutzij y na kixkꞌix tane che ri nubꞌiꞌ chikiwach ri winaq.
REV 3:9 Chitapeꞌ: Ri e kꞌo puqꞌabꞌ ri Satanás (waꞌ kakibꞌiꞌij “oj utinamit ri Dios ma oj aj judiꞌabꞌ” kechaꞌ, pero kakiꞌan raqꞌubꞌal ma na e ta kukꞌil rutinamit ri Dios), Riꞌin kanꞌan kꞌu chike rike e koꞌlkixuku kibꞌ chiwach riꞌix y kaketaꞌmaj kꞌu riꞌ Riꞌin lik kꞌax kixinnaꞌo.
REV 3:10 Riꞌix ichꞌijom uchuqꞌabꞌ taq ri kꞌaxkꞌobꞌik rukꞌ unimal ikꞌuꞌx pachaꞌ ri ximbꞌiꞌij chiwe; ruma kꞌu riꞌ, kixinchajij che taq ri kꞌaxkꞌobꞌik katajin lo puwi ronoje ruwachulew, waꞌ e re kꞌambꞌal kipa konoje ri tikawex.
REV 3:11 Chitapeꞌ: Riꞌin kinopon tan iwukꞌ; lik kꞌu miwesaj iwibꞌ che ronoje ri uyaꞌom ri Dios chiwe, chaꞌ jelaꞌ na jinta junoq kamajaw ri corona kuya ri Dios chiwe.
REV 3:12 China kꞌu ri kachꞌijow uchuqꞌabꞌ taq ri na utz taj, Riꞌin kanꞌan che kuꞌan pachaꞌ bastión re ukowil ri Rocho ri nu Dios y na kel ta chi kꞌana chiriꞌ. Kantzꞌibꞌaj kꞌu che rire rubꞌiꞌ ri nu Dios y rubꞌiꞌ rutinamit ri nu Dios, waꞌ e ri kꞌakꞌ Jerusalem kape chilaꞌ chikaj rukꞌ ri nu Dios. Yey kantzꞌibꞌaj ne ri kꞌakꞌ nubꞌiꞌ che.
REV 3:13 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias, kachaꞌ.
REV 3:14 »Chatzꞌibꞌaj pan waꞌ che ri aj kꞌamal wach re riglesia kꞌo Laodicea: Ri Jun Lik Areꞌ, ri paqatzij wi kuqꞌalajisaj chi utz ri Qꞌijsaq, ri xjeqow lo ronoje ri xuꞌan ri Dios, jewaꞌ kubꞌiꞌij chiwe:
REV 3:15 Riꞌin lik wetaꞌam ronoje ri kiꞌano. Riꞌix na ix tane joron y na ix tane kꞌatan. ¡Lik utz we ta ix joron o we ta ix kꞌatan!
REV 3:16 Pero ruma kꞌu xa ix saqmiqꞌin ma na ix tane joron y na ix tane kꞌatan, kixinxabꞌej na lo pa nuchiꞌ.
REV 3:17 Ma riꞌix kibꞌiꞌij: “Lik oj bꞌeyom, ronoje ri kajawax chiqe kꞌo chi qukꞌ y na jinta nibꞌaꞌil kaqatijo”; noꞌj lik toqꞌoꞌ ne iwach ma na kinaꞌbꞌej ta kꞌu riꞌ chwach ri Dios na jinta kꞌana iwach, lik ix nibꞌaꞌ, ix potzꞌ yey ix chꞌanalik.
REV 3:18 E uwariꞌche kanya wa pixabꞌanik chiwe: Chiloqꞌo chwe Riꞌin ri oro lik chom, porotal chi utz pa aqꞌ, chaꞌ jelaꞌ paqatzij wi kixuꞌan bꞌeyom. Chiloqꞌo chwe Riꞌin riqꞌuꞌ saq re kikojo chaꞌ jelaꞌ kichꞌuq rikꞌix ruma ix chꞌanalik y chiloqꞌo chwe Riꞌin ri kunabꞌal re kikunaj riwach chaꞌ jelaꞌ paqatzij wi kixtzuꞌnik.
REV 3:19 Riꞌin kanchꞌaꞌbꞌej kipa y kebꞌenuqꞌil konoje ri kꞌax kebꞌenunaꞌo; e uwariꞌche chitzelej kꞌu itzij chwach ri Dios rukꞌ ronoje ikꞌuꞌx.
REV 3:20 Chitapeꞌ: Riꞌin in kꞌo pan chwach ri puerta y kinchꞌaw kꞌu apanoq; we kꞌo junoq kuta ri nuqul y kujaq lo ri puerta, Riꞌin kinok bꞌi y kinwaꞌ rukꞌ, y rire kawaꞌ wukꞌ Riꞌin.
REV 3:21 China kꞌu ri kachꞌijow uchuqꞌabꞌ taq ri na utz taj, kanya che katzꞌuyiꞌ wukꞌ chupa ri nutzꞌulibꞌal pa kintaqan wi, jelaꞌ pachaꞌ Riꞌin nuchꞌijom uchuqꞌabꞌ ronoje ri na utz taj yey in tzꞌul chi rukꞌ ri Nuqaw chupa rutzꞌulibꞌal.
REV 3:22 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias, kachaꞌ.»
REV 4:1 Kꞌisbꞌal kꞌu re taq waꞌ, xintzuꞌn chikaj y xinwil jun puerta jaqatal che ruwa kaj. Y ri Jun, ri kachꞌaw pachaꞌ uchꞌawibꞌal trompeta, xchꞌaꞌt tanchi wukꞌ, jewaꞌ xubꞌiꞌij: «Chataqꞌana lo wara y Riꞌin kankꞌut chawe saꞌ taq ri katajin loq we xikꞌow taq waꞌ wa xbꞌiꞌx chawe» xchaꞌ.
REV 4:2 Xaqikꞌateꞌt, riꞌin xinkꞌojiꞌ puqꞌabꞌ ri Ruxlabꞌixel ri Dios. Xinwil kꞌu jun tzꞌulibꞌal re taqanik chilaꞌ chikaj y kꞌo Jun tzꞌul chupa.
REV 4:3 Ri Jun tzꞌul chupa jelaꞌ katzuꞌnik pachaꞌ ri chomilaj abꞌaj jaspe rubꞌiꞌ y pachaꞌ ri chomilaj kaq abꞌaj cornalina rubꞌiꞌ. Ri tzꞌulibꞌal sututal rij rukꞌ jun arco iris lik kawonik jelaꞌ pachaꞌ ri chomilaj abꞌaj esmeralda rubꞌiꞌ.
REV 4:4 Yey wa tzꞌulibꞌal sutum rij rukꞌ veinticuatro tzꞌulibꞌal chik. Y xinwil veinticuatro nimaq winaq etzꞌul pa ri veinticuatro tzꞌulibꞌal, kikojom kiqꞌuꞌ lik saq y kꞌo corona re oro che ri kijolom.
REV 4:5 Chupa kꞌu ri tzꞌulibꞌal kebꞌel lo uyokꞌbꞌal uxeꞌ kaj y katataj uchꞌawibꞌal jabꞌ karaqlajik y kajininik. Chwach kꞌu ri tzꞌulibꞌal, lik kawolol wuqubꞌ candil, waꞌ e ri wuqubꞌ uwach Uxlabꞌixel re ri Dios.
REV 4:6 Chwach ri tzꞌulibꞌal kayenen jun yaꞌ jelaꞌ pachaꞌ ri mar y kajuljut upa pachaꞌ chi vidrio. Y ri tzꞌulibꞌal sutum rij kuma kajibꞌ kꞌo kikꞌaslemal pachaꞌ e ángeles yey jelaꞌ ketzuꞌn pachaꞌ awaj y kꞌo ukꞌiyal kiwach chikij y chikiwach.
REV 4:7 Ri nabꞌe jelaꞌ katzuꞌnik pachaꞌ juna koj, rukaꞌm jelaꞌ katzuꞌnik pachaꞌ juna meqꞌ, rupalaj rurox jelaꞌ katzuꞌnik pachaꞌ upalaj winaq y rukaj jelaꞌ katzuꞌnik pachaꞌ juna águila kaxikꞌikꞌik.
REV 4:8 Chikijujunal wa kajibꞌ kꞌo waqitaq kixikꞌ. Y lik kꞌo ukꞌiyal kiwach che ronoje ri kij y ruxeꞌ ri kixikꞌ. Yey na kekos ta kꞌu che ubꞌiꞌxikil chipaqꞌij chichaqꞌabꞌ: «¡Lik Santo, Santo, Santo ri Dios Qajawxel, ri kꞌo ronoje unimal chuqꞌabꞌ puqꞌabꞌ, ri xex chi kꞌo lo wi, ri kꞌo waqꞌij ora y ri kꞌo chiqawach apanoq!» kechaꞌ.
REV 4:9 Ekꞌu ri kajibꞌ kakiyak uqꞌij ri Dios, kakibꞌixoj rubꞌiꞌ y kakiya kiqasaꞌn re tioxibꞌal che ri Jun tzꞌul pa ri tzꞌulibꞌal re taqanik, ri na jinta utaqexik rukꞌaslemal.
REV 4:10 Ekꞌuchiriꞌ rike kakiꞌan waꞌ, ri veinticuatro nimaq winaq kakixukubꞌaꞌ kibꞌ chwach ri Jun tzꞌul pa ri tzꞌulibꞌal y kakiloqꞌnimaj uqꞌij ri na jinta utaqexik rukꞌaslemal yey kakesaj ri kicorona re oro che ri kijolom y kakiya chwach ri tzꞌulibꞌal y jewaꞌ kakibꞌiꞌij:
REV 4:11 «Dios Qajawxel, xew Rilal taqal cheꞌla kakꞌul la ri yakbꞌal qꞌij ruma lik saꞌchi ri chomal la y ri chuqꞌabꞌ la; ma Lal xꞌanaw la re ronoje ri kꞌolik y lik e rajawal kꞌuꞌx la ri kekꞌojiꞌ taq waꞌ yey ruma ne laꞌ xeꞌan taq la» kechaꞌ.
REV 5:1 Xinwil jubꞌotaj wuj kꞌo puqꞌabꞌ uwikiqꞌabꞌ ri Jun tzꞌul chupa ri tzꞌulibꞌal re taqanik. Ekꞌu wa jubꞌotaj wuj kꞌo tzꞌibꞌital chupa y chirij, yey nakꞌom rukꞌ wuqubꞌ sellos.
REV 5:2 Xinwil kꞌu jun ángel lik kꞌo uchuqꞌabꞌ xsikꞌin che ubꞌiꞌxikil: «¿China ri yaꞌtal che kukir uwach ri jubꞌotaj wuj y kulochꞌij ri sellos kꞌo che?» xchaꞌ.
REV 5:3 Yey na jinta ne junoq chilaꞌ chikaj o che ruwachulew o chuxeꞌ ulew yaꞌtal che kulochꞌij ri sellos nakꞌom che ri jubꞌotaj wuj re karajilaj uwach o tobꞌ ne xa re karilo.
REV 5:4 Ekꞌu riꞌin lik kinoqꞌik, ma na jinta junoq riqom yaꞌtal che kukir uwach ri jubꞌotaj wuj re karajilaj uwach o tobꞌ ne xa re karilo.
REV 5:5 Kꞌo kꞌu jun chike ri veinticuatro nimaq winaq, jewaꞌ xubꞌiꞌij chwe: —Matoqꞌ chik, ma e ri Jun Koj re ri tinamit Judá, ri ralkꞌoꞌal kan ri rey David, ri uchꞌijom uchuqꞌabꞌ ronoje ri na utz taj, yaꞌtal kꞌu puqꞌabꞌ Rire kulochꞌij ri sellos y kukir uwach ri jubꞌotaj wuj —xchaꞌ.
REV 5:6 Tekꞌuchiriꞌ xinwilo, chwach ri tzꞌulibꞌal re taqanik y chikixoꞌlibꞌal ri kajibꞌ kꞌo kikꞌaslemal pachaꞌ e ángeles y ri nimaq winaq, chakal jun Qꞌapoj Bꞌexex pachaꞌ lik ꞌanom kꞌax che. Wuqubꞌ ri rukꞌaꞌ y wuqubꞌ ruwach, waꞌ keꞌelawi e ri wuqubꞌ uwach Uxlabꞌixel re ri Dios taqom lo che ronoje ruwachulew.
REV 5:7 Ri Qꞌapoj Bꞌexex xqibꞌik y xukꞌam ri jubꞌotaj wuj kꞌo puqꞌabꞌ uwikiqꞌabꞌ ri Jun tzꞌul pa ri tzꞌulibꞌal.
REV 5:8 Echiriꞌ kꞌo chi ri jubꞌotaj wuj puqꞌabꞌ, ri kajibꞌ kꞌo kikꞌaslemal pachaꞌ e ángeles y ri veinticuatro nimaq winaq xkixuk kibꞌ xeꞌraqan uqꞌabꞌ ri Qꞌapoj Bꞌexex. Konoje kukꞌaꞌam ki arpa y kicopa re oro nojinaq che incienso. Wa incienso keꞌelawi e taq ri oración kakiꞌan rutinamit ri Dios.
REV 5:9 Y kakibꞌixoj wa jun kꞌakꞌ bꞌix: «Xew Rilal taqal cheꞌla kakꞌam la ri jubꞌotaj wuj y kalochꞌij la taq ri sellos nakꞌal che, ma xya ibꞌ la pa kamik y jekꞌulaꞌ xeloqꞌ la rukꞌ ri kikꞌel la konoje rukꞌiyal kiwach taq ri tikawex che ronoje rukꞌiyal uwach chꞌaꞌtemal y konoje taq ri tinamit chaꞌ kebꞌuꞌana re ri Dios.
REV 5:10 Xꞌan kꞌu la xa jun tinamit chike y xꞌan la chike e chakunel chwach ri Dios y ketaqan kꞌu che ruwachulew» kechaꞌ.
REV 5:11 Tekꞌuchiriꞌ xebꞌenuwil ukꞌiyal ángeles kisutum rij ri tzꞌulibꞌal re taqanik yey kisutum kij ri kajibꞌ kꞌo kikꞌaslemal pachaꞌ e ángeles y ri nimaq winaq. Ri kikꞌiyal wa ángeles na kachꞌijitaj ta kajilaxik ma lik e ukꞌiyal millones. Yey xinto
REV 5:12 lik ko kesikꞌin che ubꞌiꞌxikil: «Ri jun Qꞌapoj Bꞌexex lik ꞌanom kꞌax che, xew che Rire taqal wi kakꞌojiꞌ ronoje taqanik y bꞌeyomal puqꞌabꞌ, xew rukꞌ Rire kꞌo saqil naꞌoj y unimal chuqꞌabꞌ, xew che Rire taqal wi kaxuk ibꞌ chwach y kayak uqꞌij ruma ri unimal uchomalil» kechaꞌ.
REV 5:13 Jekꞌulaꞌ xebꞌenuta konoje taq ri e ꞌanatal ruma ri Dios: ri e kꞌo chilaꞌ chikaj, ri e kꞌo che ruwachulew, ri e kꞌo chuxeꞌ ulew y ri e kꞌo chupa ri mar, jewaꞌ kakibꞌiꞌij: «Che ri Jun tzꞌul pa ri tzꞌulibꞌal y che ri Qꞌapoj Bꞌexex, taqal ri yakbꞌal kiqꞌij y ri kaxuk ibꞌ chikiwach yey taqalik kabꞌiꞌxik kꞌo kichomalil y kichuqꞌabꞌ na jinta utaqexik» kechaꞌ.
REV 5:14 Ri kajibꞌ kꞌo kikꞌaslemal kakikꞌul pan uwach: «¡Amén!» kechaꞌ. Y ri veinticuatro nimaq winaq xkixukubꞌaꞌ kibꞌ, xkiqasaj kꞌu kimejelem kꞌa chuꞌlew y xkiloqꞌnimaj uqꞌij ri Jun na jinta utaqexik rukꞌaslemal.
REV 6:1 Xinwilo echiriꞌ ri Qꞌapoj Bꞌexex xulochꞌij ri nabꞌe sello y xinta uqul jun chike ri kajibꞌ kꞌo kikꞌaslemal pachaꞌ e ángeles. Rire xchꞌaw pachaꞌ uchꞌawibꞌal jabꞌ, jewaꞌ xubꞌiꞌij: «¡Saꞌa!» xchaꞌ.
REV 6:2 Xinwil kꞌu jun kawayuꞌ saq rij. Yey ri kojoyom re rukꞌaꞌam jun arco puqꞌabꞌ y xyaꞌ kꞌu jun corona che. Tekꞌuchiriꞌ xel bꞌi rukꞌ unimal uchuqꞌabꞌ chaꞌ rire kuꞌchꞌija uchuqꞌabꞌ ronoje.
REV 6:3 Ekꞌuchiriꞌ ri Qꞌapoj Bꞌexex xulochꞌij rukaꞌm sello, xinta uqul rukaꞌm chike ri kajibꞌ kꞌo kikꞌaslemal pachaꞌ e ángeles, jewaꞌ xubꞌiꞌij: «¡Saꞌa!» xchaꞌ.
REV 6:4 Xel chi kꞌu lo jun chik kawayuꞌ, waꞌ kaq rij. Yey ri kojoyom re xyaꞌ puqꞌabꞌ karesaj ri utzil chomal che ruwachulew y kuꞌan chike ri winaq kakikamisaj kibꞌ chikiwach. Yey xyaꞌ jun nimalaj espada che.
REV 6:5 Ekꞌuchiriꞌ ri Qꞌapoj Bꞌexex xulochꞌij rurox sello, xinta uqul rurox chike ri kajibꞌ kꞌo kikꞌaslemal pachaꞌ e ángeles, jewaꞌ xubꞌiꞌij: «¡Saꞌa!» xchaꞌ. Xinwil kꞌu jun kawayuꞌ qꞌeq rij, yey ri kojoyom re utzayem jun lipro puqꞌabꞌ.
REV 6:6 Tekꞌuchiriꞌ xinta jun qulaj xchꞌaw lo chikixoꞌlibꞌal wa kajibꞌ kꞌo kikꞌaslemal pachaꞌ e ángeles, jewaꞌ xubꞌiꞌij: «Che ri kaꞌibꞌ libra trigo utz kakoj rajil jun qꞌij chak re jun mokom; yey che ri waqibꞌ libra cebada, utz kakoj rajil jun qꞌij chak re jun mokom. Noꞌj ruwaꞌal ri uva y raceite, makꞌo maꞌan che» xchaꞌ.
REV 6:7 Ekꞌuchiriꞌ ri Qꞌapoj Bꞌexex xulochꞌij rukaj sello, xinta ruqul rukaj chike ri kajibꞌ kꞌo kikꞌaslemal pachaꞌ e ángeles, jewaꞌ xubꞌiꞌij: «¡Saꞌa!» xchaꞌ.
REV 6:8 Xinwil kꞌu jun kawayuꞌ saqtꞌuꞌr rij. Ri kojoyom re, “Kamik” rubꞌiꞌ, yey kꞌo jun teran chirij, waꞌ e ri rajaw ri Hades, ri luwar ke ri ekaminaq. Y xyaꞌ uchuqꞌabꞌ ri Kamik chaꞌ kebꞌukamisaj jun ukaj parte chike ri winaq che ruwachulew rukꞌ espada, rukꞌ numik, rukꞌ taq yabꞌil y kuma itzel chikop e kꞌo che ruwachulew.
REV 6:9 Ekꞌuchiriꞌ ri Qꞌapoj Bꞌexex xulochꞌij ruroꞌ sello, xinwil chuxeꞌ raltar janipa ri xekamisax ruma xkitzijoj ri Tzij re ri Dios y na xkewaj ta ri kubꞌulibꞌal kikꞌuꞌx rukꞌ ri Dios.
REV 6:10 Rike lik ko kesikꞌinik, jewaꞌ kakibꞌiꞌij: «Lal Dios Qajawxel, Rilal lik Lal jusukꞌ y janipa ri bꞌiꞌim la, lik e kuꞌanaꞌ. ¿Jampalaꞌ kaqꞌat la tzij pakiwi ri tikawex e kꞌo che ruwachulew y kaꞌan kꞌu la ukꞌaxel chike ri xekamisan qe?» kechaꞌ.
REV 6:11 Y xyaꞌ kꞌu kiqꞌuꞌ lik saq y xbꞌiꞌx chike kakoyꞌej na kꞌenoq, ma kꞌamajaꞌ katzꞌaqat ri kajlibꞌal ri kachbꞌiꞌil kekamisaxik jelaꞌ pachaꞌ xꞌan chike rike.
REV 6:12 Ekꞌuchiriꞌ ri Qꞌapoj Bꞌexex xulochꞌij ruwaqaq sello, xinwilo xaqikꞌateꞌt xpe jun nimalaj kabꞌraqan. Ri qꞌij lik xuꞌan qꞌeq uwach jelaꞌ pachaꞌ juna kꞌul qꞌeq katzuꞌnik. Y ri ikꞌ lik xuꞌan kaq uwach jelaꞌ pachaꞌ katzuꞌn ri kikꞌ.
REV 6:13 Y taq ri chꞌumil e kꞌo che ruwa kaj xetzaq lo chwa ruwachulew, jelaꞌ xuꞌano pachaꞌ ri kuꞌan juna cheꞌ re higo kꞌo uwach echiriꞌ kakꞌun juna nimalaj tew y kujabꞌajaꞌ lo ronoje ruwach kꞌa rax.
REV 6:14 Ruwa kaj xmalkaꞌnik jelaꞌ pachaꞌ kuꞌan ri wuj echiriꞌ kabꞌotik. Yey ronoje juyubꞌ rukꞌ ronoje isla xjalkꞌatix kiluwar.
REV 6:15 Ekꞌu taq raj taqanel che ruwachulew, ri lik kꞌo kiwach, ri bꞌeyomabꞌ, ri e taqanelabꞌ pakiwi soldados, ri lik kꞌo kichuqꞌabꞌ, ri eloqꞌotal ruma kajaw yey ri na e jinta puqꞌabꞌ juna kajaw, konoje kꞌut xeꞌkewaj kibꞌ pa nimaq taq jul y chuxeꞌ nimaq taq abꞌaj kꞌo che ruwa taq juyubꞌ,
REV 6:16 jewaꞌ kakibꞌiꞌij chike taq ri juyubꞌ y chike ri nimaq taq abꞌaj: «Chichꞌuqu lo qawiꞌ y chojiwewaj chwach ri Jun tzꞌul pa ri tzꞌulibꞌal re taqanik y chwach ri royowal ri Qꞌapoj Bꞌexex.
REV 6:17 Ma xopon ri unimal qꞌij re ri qꞌatbꞌal tzij. ¿Yey china kꞌu ri kuchꞌijo katakꞌiꞌ chikiwach rike?» kechaꞌ.
REV 7:1 Ikꞌowinaq chi kꞌu waꞌ, xebꞌenuwil kajibꞌ ángeles e takꞌal lo chwi taq rukajchal rajlibꞌal ruwachulew. Waꞌ e ri kekiqꞌatibꞌej taq ri kajibꞌ utzaꞌm tew che ruwachulew chaꞌ ri tew na kuꞌan ta kꞌax che ruwachulew, che ri mar y che taq ri cheꞌ.
REV 7:2 Xinwil kꞌu jun chik ángel xel lo pa relebꞌal lo ri qꞌij; rire rukꞌaꞌam ri sello re ri Dios kꞌaslik. Ewi lik ko xsikꞌin chike ri kajibꞌ ángeles, ri xyaꞌtaj chike kakiꞌan kꞌax che ruwachulew y che ri mar.
REV 7:3 Jewaꞌ xubꞌiꞌij chike: «Nabꞌe na kaqakoj ri retalil che rukurusil ri kipalaj ri e aj chak re ri Qaqaw Dios, tekꞌuchiriꞌ utz kiꞌan kꞌax che ruwachulew, che ri mar y che taq ri cheꞌ» xchaꞌ.
REV 7:4 Y xinta ri kajlibꞌal ri kojotal wa retalil chike: waꞌ e ciento cuarenta y cuatro mil. Rike echaꞌtal chikixoꞌlibꞌal konoje ri tinamit ke raj Israel.
REV 7:5 Taq ri kojotal wa retalil chike, e waꞌ: kabꞌlajuj mil chike ri ralkꞌoꞌal kan ri Judá, kabꞌlajuj mil chike ri ralkꞌoꞌal kan ri Rubén, kabꞌlajuj mil chike ri ralkꞌoꞌal kan ri Gad,
REV 7:6 kabꞌlajuj mil chike ri ralkꞌoꞌal kan ri Aser, kabꞌlajuj mil chike ri ralkꞌoꞌal kan ri Neftalí, kabꞌlajuj mil chike ri ralkꞌoꞌal kan ri Manasés,
REV 7:7 kabꞌlajuj mil chike ri ralkꞌoꞌal kan ri Simeón, kabꞌlajuj mil chike ri ralkꞌoꞌal kan ri Leví, kabꞌlajuj mil chike ri ralkꞌoꞌal kan ri Isacar,
REV 7:8 kabꞌlajuj mil chike ri ralkꞌoꞌal kan ri Zabulón, kabꞌlajuj mil chike ri ralkꞌoꞌal kan ri Benjamín, y kabꞌlajuj mil chike ri ralkꞌoꞌal kan ri José.
REV 7:9 Ikꞌowinaq chi kꞌu waꞌ, xebꞌenuwil ukꞌiyal winaq yey na jinta junoq kachꞌijow rajilaxik ri kajlibꞌal. Rike e petinaq chupa ronoje taq ri tinamit, chike konoje rukꞌiyal kiwach taq ri tikawex che ronoje rukꞌiyal uwach chꞌaꞌtemal. Rike e takꞌal chwach ri Jun tzꞌul pa ri tzꞌulibꞌal re taqanik y chwach ri Qꞌapoj Bꞌexex. Yey konoje e wiqital rukꞌ kiqꞌuꞌ saq y kukꞌaꞌam uqꞌabꞌ palma pakiqꞌabꞌ.
REV 7:10 Y konoje lik ko kesikꞌin che ubꞌiꞌxikil: «Ri qakolobꞌetajik petinaq rukꞌ ri qa Dios ri tzꞌul pa ri tzꞌulibꞌal, y rukꞌ ri Qꞌapoj Bꞌexex» kechaꞌ.
REV 7:11 Yey konoje ri ángeles e takꞌalik, kisutum rij ri tzꞌulibꞌal re taqanik yey kisutum kij ri veinticuatro nimaq winaq y ri kajibꞌ kꞌo kikꞌaslemal pachaꞌ e ángeles. Xkixukubꞌaꞌ kꞌu kibꞌ, xkiqasaj kimejelem kꞌa chuꞌlew chwach ri tzꞌulibꞌal y xkiloqꞌnimaj uqꞌij ri Dios.
REV 7:12 Jewaꞌ kakibꞌiꞌij: «¡Amén! ¡Amén! Xew che ri qa Dios taqalik kabꞌiꞌxik lik nim uqꞌij, kaꞌan tioxinik che y kaxuk ibꞌ chwach yey taqal che kabꞌiꞌxik kꞌo unimal uchomalil, saqil unaꞌoj y unimal uchuqꞌabꞌ. Yey waꞌ na jinta chi utaqexik taqal che Rire. ¡Amén!» kechaꞌ.
REV 7:13 Tekꞌuchiriꞌ, xchꞌaw jun chike ri veinticuatro nimaq winaq, jewaꞌ xubꞌiꞌij chwe: —Taq wa kikojom kiqꞌuꞌ saq, ¿e china rike y pa e petinaq wi? —xchaꞌ.
REV 7:14 Ximbꞌiꞌij kꞌu riꞌin che: —Wajawal, lal etaꞌmayom la re —xinchaꞌ. Ekꞌu rire xubꞌiꞌij chwe: —Konoje waꞌ e ri kichꞌijom uchuqꞌabꞌ ri unimal kꞌaxkꞌobꞌik yey kijosqꞌim ri kiqꞌuꞌ y kiꞌanom kꞌu saq che rukꞌ rukikꞌel ri Qꞌapoj Bꞌexex.
REV 7:15 Ruma kꞌu laꞌ e kꞌo chwach ri tzꞌulibꞌal pa kataqan wi ri Dios y kakiloqꞌnimaj kꞌu Rire chipaqꞌij chichaqꞌabꞌ chupa ri Rocho. Ekꞌu ri Jun tzꞌul chupa ri tzꞌulibꞌal kajeqiꞌ kukꞌ, e pachaꞌ kuchꞌuq kiwiꞌ re kebꞌuchajij.
REV 7:16 Jekꞌulaꞌ na kakitij ta chi numik y tzajin chiꞌ, na kakinaꞌ ta chi ne rukꞌatanil ri qꞌij y ri bꞌuk;
REV 7:17 ma ri Qꞌapoj Bꞌexex ri kꞌo chwach ri tzꞌulibꞌal, e kachajin ke y kukꞌam bꞌi kiwach pa taq akꞌal pa kalax wi lo yaꞌ re kꞌaslemal. Yey e ri Dios kusuꞌ na ronoje ruwaꞌal kiwach rike —xchaꞌ.
REV 8:1 Echiriꞌ ri Qꞌapoj Bꞌexex xulochꞌij ruwuq sello nakꞌal che ri jubꞌotaj wuj, laj juna mey ora lik xtzꞌintzꞌot chilaꞌ chikaj, na jinta chi kꞌo xtatajik.
REV 8:2 Tekꞌuchiriꞌ, xebꞌenuwil ri wuqubꞌ ángeles e takꞌal chwach ri Dios y xyaꞌ kꞌu jun trompeta chikijujunal.
REV 8:3 Xkꞌun chi lo jun chik ángel y xtakꞌiꞌ chwach raltar. Waꞌ rukꞌaꞌam jun rachpom re oro. Y xyaꞌ kꞌu ukꞌiyal incienso che re kuꞌan bꞌi xa jun rukꞌ taq ri ki oraciones konoje rutinamit ri Dios yey waꞌ e qasaꞌn chwi raltar re oro kꞌo chwach ri tzꞌulibꞌal re taqanik.
REV 8:4 Lik kabꞌuqbꞌut kꞌu ri sibꞌ xel chupa ri rachpom kꞌo puqꞌabꞌ ri ángel y xopon kꞌa chwach ri Dios junam rukꞌ taq ri ki oraciones rutinamit ri Dios.
REV 8:5 Ekꞌu ri ángel xukꞌam ri rachpom y xunojisaj che ri rachqꞌaꞌl kꞌo chwa raltar. Tekꞌuchiriꞌ xupukꞌij lo che ruwachulew. Ewi xtataj uchꞌawibꞌal jabꞌ karaqlajik y kajininik, y xyokꞌ kaꞌn ruxeꞌ kaj; yey xpe jun nimalaj kabꞌraqan.
REV 8:6 Ri wuqubꞌ ángeles, ri kukꞌaꞌam ri wuqubꞌ trompetas, xkiyijbꞌaꞌ kibꞌ che uchꞌawisaxik taq waꞌ.
REV 8:7 Ri nabꞌe ángel xuchꞌawisaj rutrompeta, y xpe kꞌu saqbꞌach rachbꞌiꞌil aqꞌ rukꞌ kikꞌ chwi ruwachulew. Y ruma waꞌ xkꞌat rurox parte che ruwachulew, xkꞌat rurox parte che ronoje taq ri cheꞌ, ri tikoꞌn y raqꞌes.
REV 8:8 Rukaꞌm ángel xuchꞌawisaj rutrompeta, y kꞌo xtzaq chwi ri mar pachaꞌ juna juyubꞌ kajumuw aqꞌ che. Y ruma waꞌ rurox parte che ri mar xuꞌan kikꞌ uwach.
REV 8:9 Y xekam kꞌu rurox parte chike rawaj e kꞌo chupa ri mar yey rurox parte chike taq ri barcos e kꞌo chwi ri mar, xsach kiwach.
REV 8:10 Rurox ángel xuchꞌawisaj rutrompeta, y jun nimalaj chꞌumil kajumuw aqꞌ che xtzaq lo chikaj puwi rurox parte che taq ri raqanaꞌ y taq rakꞌal pa kalax wi lo yaꞌ.
REV 8:11 Rubꞌiꞌ waꞌ wa jun chꞌumil e “Kꞌa”. Ewi rurox parte che taq ri nimayaꞌ lik xuꞌan kꞌa; y ukꞌiyal winaq xekam ruma rukꞌayul ri yaꞌ.
REV 8:12 Rukaj ángel xuchꞌawisaj rutrompeta, y lik xꞌan kꞌax che rurox parte che ri qꞌij, che ri ikꞌ y chike ri chꞌumil. Xqꞌobꞌ kꞌu taq ruwonibꞌal waꞌ, jelaꞌ xujeq kamoymot uwach ri saq paqꞌij y xuꞌan más qꞌequꞌm raqꞌabꞌ.
REV 8:13 Tekꞌuchiriꞌ xinwil jun águila kaxikꞌikꞌ chikaj y xinto jewaꞌ kasikꞌin che ubꞌiꞌxikil: «¡Toqꞌoꞌ kiwach! ¡Toqꞌoꞌ kiwach! ¡Toqꞌoꞌ kiwach konoje ri ejeqel che ruwachulew ruma ri kakikꞌulumaj echiriꞌ ri oxibꞌ ángeles kakichꞌawisaj ri jujun chik trompetas! ¡Ma ya e kuꞌana waꞌ!» kachaꞌ.
REV 9:1 Ruroꞌ ángel xuchꞌawisaj rutrompeta, y xinwil kꞌu jun chꞌumil xtzaq lo chikaj y xeꞌtzaq che ruwachulew. Xyaꞌ kꞌu che ri chꞌumil ri lawe re ri siwan na jinta utaqexik ruchoyil upa.
REV 9:2 Y ri chꞌumil xujaq uchiꞌ wa siwan, y kabꞌuqbꞌut ri sibꞌ xel lo chupa waꞌ pachaꞌ usibꞌol juna nimalaj orna. Ruma kꞌu riꞌ lik xuꞌan qꞌequꞌm che ruwa ri qꞌij y che ruwa kaj.
REV 9:3 Chupa ri sibꞌ xebꞌel lo ukꞌiyal sakꞌ y xkikich bꞌi kibꞌ che ruwachulew. Xyaꞌ kꞌu pakiqꞌabꞌ ri sakꞌ ketiꞌoꞌnik pachaꞌ sinaꞌj.
REV 9:4 Xetaq kꞌu che na kakiꞌan ta kꞌax che taq raqꞌes, che taq ri cheꞌ, che taq ronoje ri tikoꞌn che ruwachulew; ma xew kakiꞌan kꞌax chike ri winaq na jinta ri retalil ri Dios che rukurusil ri kipalaj.
REV 9:5 Na xyaꞌ ta kꞌu chike kekikamisaj ri winaq; xew lik kekiya pa kꞌaxkꞌobꞌik woꞌobꞌ ikꞌ, ma lik kekitiꞌo yey ri kitiꞌbꞌal e jelaꞌ pachaꞌ rukꞌaxkꞌol rutiꞌbꞌal sinaꞌj.
REV 9:6 Y chupa taq kꞌu riꞌ waꞌ wa qꞌij taq ri winaq kakitzukuj kikamik, pero na kakiriq taj; ma tobꞌ lik kakaj kekamik, ri kamik e pachaꞌ kanimaj chikiwach.
REV 9:7 Taq ri sakꞌ jelaꞌ ketzuꞌnik pachaꞌ ri kawayuꞌ ewiqtalik echiriꞌ kebꞌek pa chꞌaꞌoj. Che ri kijolom kikojom pachaꞌ coronas re oro; taq ri kipalaj jelaꞌ katzuꞌnik pachaꞌ kipalaj winaq.
REV 9:8 Yey ri kiwiꞌ e pachaꞌ kiwiꞌ ixoqibꞌ, y ri keꞌ e pachaꞌ ri keꞌ taq ri koj.
REV 9:9 Ruwa kikꞌuꞌx chꞌuqutal rukꞌ chꞌichꞌ. Echiriꞌ kexikꞌikꞌik, ruchꞌawibꞌal ri kixikꞌ e pachaꞌ uchꞌawibꞌal ukꞌiyal kareta jekꞌom kuma kawayuꞌ echiriꞌ kebꞌek pa chꞌaꞌoj.
REV 9:10 E jelaꞌ pachaꞌ ri sinaꞌj, kꞌo kixul che ri kijeꞌ. Yaꞌom kꞌu kichuqꞌabꞌ che ri kijeꞌ chaꞌ kakiꞌan kꞌax chike ri winaq woꞌobꞌ ikꞌ.
REV 9:11 Yey ri kajawal kataqan pakiwiꞌ e ri jun ángel rajaw ri siwan na jinta utaqexik ruchoyil upa. Rubꞌiꞌ pa ri chꞌaꞌtem hebreo e “Abadón”, yey pa ri chꞌaꞌtem griego “Apolión”.
REV 9:12 Jewaꞌ xkꞌis wi ri nabꞌe kꞌaxkꞌobꞌik. Chita na peꞌ, ma kape chi kaꞌibꞌ kꞌaxkꞌobꞌik.
REV 9:13 Ruwaq ángel xuchꞌawisaj rutrompeta. Tekꞌuchiriꞌ xinta jun qulaj xel lo chuxoꞌlibꞌal ri kajibꞌ utzaꞌm raltar re oro, ri kꞌo chwach ri Dios.
REV 9:14 Wa qulaj jewaꞌ xubꞌiꞌij che ruwaqaq ángel, ri rukꞌaꞌam rutrompeta: «Chebꞌakira ri kajibꞌ ángeles e yututal chuchiꞌ ri nimayaꞌ Eufrates» xchaꞌ.
REV 9:15 Xekir kꞌu ri kajibꞌ ángeles, ri e yijbꞌital chik re kekikamisaj rurox parte chike ri winaq e kꞌo che ruwachulew echiriꞌ kopon ri ora, ri qꞌij, ri ikꞌ y ri junabꞌ chaꞌom chi ruma ri Dios.
REV 9:16 Riꞌin xinta kꞌu ri kajlibꞌal ri soldados e kꞌo chwi kawayuꞌ re kebꞌek pa chꞌaꞌoj, e kaꞌibꞌ ciento millones chi konoje.
REV 9:17 Y xkꞌut chinuwach ruma ri Dios, taq ri kawayuꞌ kukꞌ ri e kꞌo puwiꞌ, jewaꞌ ketzuꞌnik: Kikojom chꞌuqubꞌal uwa kikꞌuꞌx, waꞌ katzuꞌn kaq pachaꞌ aqꞌ, azul pachaꞌ rabꞌaj zafiro rubꞌiꞌ y qꞌan pachaꞌ rabꞌaj azufre rubꞌiꞌ. Y ri kijolom ri kawayuꞌ e pachaꞌ ri kijolom ri koj yey pa kichiꞌ kel lo aqꞌ, sibꞌ y azufre.
REV 9:18 Xekam kꞌu rurox parte chike ri winaq e kꞌo che ruwachulew ruma ri oxibꞌ kꞌaxkꞌobꞌik xel lo pa kichiꞌ ri kawayuꞌ; waꞌ e ri aqꞌ, ri sibꞌ y ri azufre.
REV 9:19 Ri kichuqꞌabꞌ ri kawayuꞌ pa kichiꞌ y che ri kijeꞌ kꞌo wi. Ri kijeꞌ jelaꞌ pachaꞌ ri kumatz, ma kꞌo kijolom yey rukꞌ waꞌ kakiꞌan kꞌax chike ri winaq.
REV 9:20 Yey e taq ri winaq na xekam ta che wa oxibꞌ kꞌaxkꞌobꞌik, na xkitzelej tane kitzij che ri na utz taj kiꞌanom. Na xkoqꞌotaj tane uloqꞌnimaxik kiqꞌij ritzel taq uxlabꞌixel y na xkoqꞌotaj tane uloqꞌnimaxik kiqꞌij taq ri tiox ꞌanatal kuma rike rukꞌ oro, rukꞌ plata, rukꞌ bronce, rukꞌ abꞌaj y rukꞌ cheꞌ; yey waꞌ na ketzuꞌn taj, na ketan taj y na kebꞌin taj.
REV 9:21 Na xkitzelej tane kitzij che taq ri kamik kiꞌanom, che taq ri itz kiꞌanom, che taq ri kaketzꞌabꞌej uwa kiqꞌij kukꞌ jujun chik na kikꞌulel taj y che taq releqꞌ kiꞌanom.
REV 10:1 Tekꞌuchiriꞌ, xinwilo echiriꞌ jun chik ángel lik kꞌo uchuqꞌabꞌ xqaj lo chilaꞌ chikaj yey sututal rij rukꞌ sutzꞌ y chwi rujolom kꞌo lo jun arco iris. Ekꞌu rupalaj lik kawonik jelaꞌ pachaꞌ ri qꞌij yey taq ri raqan lik kawonik pachaꞌ jutaq repaj aqꞌ.
REV 10:2 Puqꞌabꞌ kꞌo ralko jubꞌotaj wuj y waꞌ jaqatal uwach. Xutakꞌabꞌaꞌ kꞌu ri raqan uwikiqꞌabꞌ chwi ri mar y ri raqan mox xutakꞌabꞌaꞌ chwi ruwachulew.
REV 10:3 Lik ko xsikꞌinik pachaꞌ ri roqꞌej juna koj. Yey echiriꞌ xsikꞌinik, xtataj wuqubꞌ qulaj pachaꞌ uchꞌawibꞌal jabꞌ, lik kajininik xeꞌek.
REV 10:4 Echiriꞌ xjinin ri wuqubꞌ uchꞌawibꞌal jabꞌ, riꞌin e riꞌ kantzꞌibꞌaj ri xinto; pero xinta Jun xchꞌaw lo chilaꞌ chikaj, jewaꞌ xubꞌiꞌij chwe: «Riꞌat xa chakꞌolo pawanimaꞌ taq ri xkibꞌiꞌij wa wuqubꞌ uchꞌawibꞌal jabꞌ y matzꞌibꞌaj» xchaꞌ.
REV 10:5 Yey ri ángel takꞌal rukꞌ jun raqan chwi ri mar y jun chwi ruwachulew, xuyak ruqꞌabꞌ chikaj
REV 10:6 y xujikibꞌaꞌ kꞌu uwach pubꞌiꞌ ri Jun ri na jinta utaqexik rukꞌaslemal, ri ꞌanayom re ruwa kaj rukꞌ ronoje taq ri kꞌo chwach, ruwachulew rukꞌ ronoje taq ri kꞌo chwach y ri mar rukꞌ ronoje taq ri kꞌo chupa, jewaꞌ xubꞌiꞌij: «Ri Dios na kamayin ta chi che uꞌanik ri uchꞌobꞌom loq.
REV 10:7 Ma chupa kꞌu riꞌ ri qꞌij echiriꞌ ruwuq ángel kujeq uchꞌawisaxik rutrompeta, ri Dios e kuꞌana ri uchꞌobꞌom loq y jelaꞌ kaqꞌalajin ronoje rubꞌiꞌim lo chike ri raj chak e qꞌalajisanelabꞌ» xchaꞌ.
REV 10:8 Ekꞌu ri Jun chꞌaꞌtinaq lo wukꞌ chilaꞌ chikaj, je tanchi waꞌ xubꞌiꞌij chwe: «Jat, jaꞌkꞌama ri ralko jubꞌotaj wuj kirom uwach yey kꞌo puqꞌabꞌ ri ángel, ri takꞌal rukꞌ jun raqan chwi ri mar y jun chwi ruwachulew» xchaꞌ.
REV 10:9 Xinꞌek kꞌu riꞌin rukꞌ ri ángel y xintzꞌonoj che kuya ri ralko jubꞌotaj wuj chwe. Ekꞌu rire xubꞌiꞌij chwe: «Jiꞌ, chakꞌamaꞌ y chatija bꞌi. Ekꞌuchiriꞌ kꞌo chi pachiꞌ lik kiꞌ kanaꞌo pachaꞌ ruwaꞌal kabꞌ, pero echiriꞌ atijom chubꞌi lik kuꞌan kꞌa chupa rapa» xcha chwe.
REV 10:10 Riꞌin xinkꞌam kꞌu ri ralko jubꞌotaj wuj kꞌo puqꞌabꞌ ri ángel y xintij bꞌi. Ekꞌuchiriꞌ kꞌo chi pa nuchiꞌ, lik kiꞌ jelaꞌ pachaꞌ ruwaꞌal kabꞌ; pero echiriꞌ nutijom chubꞌi, lik xuꞌana kꞌa chupa ri nupa.
REV 10:11 Y ri Jun xchꞌaw lo chwe chilaꞌ chikaj, jewaꞌ xubꞌiꞌij chwe: «Lik chirajawaxik kaꞌan tanchi qꞌalajisanik puwi ri kakikꞌulumaj rukꞌiyal taq tinamit, rukꞌiyal kiwach taq ri tikawex che rukꞌiyal uwach chꞌaꞌtemal y rukꞌiyal aj taqanelabꞌ e kꞌo che ruwachulew» xcha chwe.
REV 11:1 Ekꞌuchiriꞌ, xyaꞌ jun tani panuqꞌabꞌ jelaꞌ pachaꞌ juna vara re pajbꞌal y jekꞌuwaꞌ xbꞌiꞌx chwe: «Chatyaktajoq, chapaja ri Rocho Dios, chapaja raltar y chebꞌawajilaj janipa ri kakiloqꞌnimaj uqꞌij ri Dios chiriꞌ.
REV 11:2 Noꞌj ruwa ja kꞌo chwach ri Rocho Dios chayaꞌa kanoq; mapajo, ma laꞌ yaꞌtal chi chike ri winaq na e ta aj Israel; yey rike kakiꞌan ke che ri tinamit Jerusalem re kakikꞌaq bꞌi uqꞌij, ma ketaqan na puwiꞌ oxibꞌ junabꞌ rukꞌ nikꞌaj» xchaꞌ.
REV 11:3 Riꞌin kebꞌenutaq bꞌi kaꞌibꞌ nuqꞌalajisanelabꞌ kikojom kiqꞌuꞌ lik tzakꞌan upa chaꞌ kakitzijoj ri Nutzij oxibꞌ junabꞌ rukꞌ nikꞌaj.
REV 11:4 Waꞌ wa kaꞌibꞌ qꞌalajisanelabꞌ e ri kaꞌibꞌ cheꞌ re olivo y e ri kaꞌibꞌ utzukꞌulibꞌal aqꞌ e kꞌo chwach ri Dios Qajawxel, ri kataqan chwi ruwachulew.
REV 11:5 We kꞌo junoq karaj kuꞌan kꞌax chike, kel lo aqꞌ pa kichiꞌ rike y rukꞌ waꞌ kekikamisaj taq ri tzel kebꞌilow ke. Jekꞌulaꞌ kekam ri kakaj kakiꞌan kꞌax chike.
REV 11:6 Wa kaꞌibꞌ qꞌalajisanelabꞌ yaꞌtal chike kakiqꞌatej ri jabꞌ chaꞌ na kuꞌan ta lo pa ruqꞌijol echiriꞌ ketajin che uꞌanik qꞌalajisanik; y yaꞌtal chike kakiꞌan kikꞌ che taq ri yaꞌ y kakiꞌan kꞌax che ruwachulew rukꞌ ukꞌiyal kꞌaxkꞌobꞌik janipa laj kakaj rike.
REV 11:7 Echiriꞌ kikꞌisom chi utzijoxik Rutzij ri Dios, ri jun nimalaj itzel chikop, ri kel lo chupa ri siwan na jinta utaqexik ruchoyil upa, kachꞌoꞌjin kꞌu kukꞌ, kuchꞌij kichuqꞌabꞌ y kebꞌukamisaj.
REV 11:8 Ekꞌu ri kicuerpos kateliꞌ kan pa kakimol wi kibꞌ ri winaq che ri nimalaj tinamit pa xkamisax wi ri Qanimajawal Jesucristo chwa cruz. Yey che wa tinamit kabꞌiꞌx “Sodoma” y “Egipto” ruma taq ri mak kaꞌan chilaꞌ.
REV 11:9 Y ri tikawex e petinaq chupa taq ri tinamit, chike rukꞌiyal kiwach taq ri tikawex che rukꞌiyal uwach chꞌaꞌtemal, oxibꞌ qꞌij rukꞌ nikꞌaj kakil ri kicuerpo telanik y na kakiya tane luwar chaꞌ kemuqik.
REV 11:10 Y konoje ri winaq e kꞌo che ruwachulew lik kekiꞌkot kꞌu riꞌ ruma ri kikamik wa kaꞌibꞌ qꞌalajisanelabꞌ. Kakiꞌan kꞌu nimaqꞌij y kakitaq taq sipanik chikiwach, ma xekam wa kaꞌibꞌ qꞌalajisanelabꞌ re ri Dios, ri xekiya pa kꞌaxkꞌobꞌik ri winaq che ruwachulew.
REV 11:11 Ekꞌuchiriꞌ ikꞌowinaq chi oxibꞌ qꞌij rukꞌ nikꞌaj, ri Dios xuya chike wa kaꞌibꞌ qꞌalajisanelabꞌ kebꞌuxlabꞌik y kakꞌojiꞌ tanchi kikꞌaslem. Xeyaktaj kꞌu riꞌ y xetakꞌiꞌik. Y konoje ri xebꞌilow ke, xok unimal xiꞌin ibꞌ kukꞌ.
REV 11:12 Ekꞌu ri kaꞌibꞌ qꞌalajisanelabꞌ xkita Jun lik ko xchꞌaw lo chilaꞌ chikaj, jewaꞌ xubꞌiꞌij chike: «Chixaqꞌana lo wara» xchaꞌ. Ekꞌu rike xebꞌel bꞌi chikaj chupa jun sutzꞌ y xebꞌilitaj kuma ri tzel xebꞌilow ke.
REV 11:13 Chupa kꞌu laꞌ la joqꞌotaj xpe jun nimalaj kabꞌraqan y lajuj parte che ri tinamit xwuluwubꞌik; y ruma waꞌ e wuqubꞌ mil ri winaq xekamik. Ekꞌu ri na xekam taj, xok jun xiꞌin ibꞌ kukꞌ y xkiyak uqꞌij ri Dios kꞌo chilaꞌ chikaj.
REV 11:14 Jewaꞌ xkꞌis wi rukaꞌm kꞌaxkꞌobꞌik, pero rurox kꞌaxkꞌobꞌik katajin loq.
REV 11:15 Ruwuq ángel xuchꞌawisaj rutrompeta, y xetataj kowilaj taq qulaj kechꞌaw lo chilaꞌ chikaj, jewaꞌ kakibꞌiꞌij: «Konoje taq ri tinamit che ruwachulew kꞌo chi puqꞌabꞌ ri Dios Qajawxel y puqꞌabꞌ Ruchaꞌoꞌn lo Rire; yey wa taqanik na jinta chi utaqexik» kechaꞌ.
REV 11:16 Ekꞌu ri veinticuatro nimaq winaq etzꞌul pa ri kitzꞌulibꞌal chwach ri Dios, xkixukubꞌaꞌ kibꞌ, xkiqasaj kimejelem kꞌa chuꞌlew y xkiloqꞌnimaj uqꞌij ri Dios.
REV 11:17 Jewaꞌ kakibꞌiꞌij: «Kaqatioxij cheꞌla, ma Lal Dios Qajawxel kꞌo ronoje unimal chuqꞌabꞌ paqꞌabꞌ la, Lal ri Dios kꞌo waqꞌij ora, ri xex chi kꞌo lo wi, y ri kꞌo chiqawach apanoq; ma kꞌutum la ri chuqꞌabꞌ la y jeqom chi ri taqanik la paqawi riꞌoj.
REV 11:18 E taq kꞌu ri tinamit che ruwachulew lik xpe koyowal chiꞌij la. Noꞌj woꞌora xopon ruqꞌijol ri oyowal la, ri qꞌij re kaqꞌat la tzij pakiwi taq ri ekaminaq. Kaya kꞌu la ri rajil ukꞌaxel chike ri qꞌalajisanelabꞌ e aj chak la kukꞌ ri jujun chik e kꞌo paqꞌabꞌ la, ri lik kakiloqꞌnimaj uqꞌij ri bꞌiꞌ la, tobꞌ lik kꞌo kiwach o na jinta kiwach; yey kasach kꞌu la kiwach riꞌ ri kesachaw kiwach taq ri winaq wara che ruwachulew» kechaꞌ.
REV 11:19 Ekꞌu ri Rocho Dios chilaꞌ chikaj, xteqꞌebꞌaxik; y xilitaj pan chupa, ri kaxa re ri tzij uꞌanom ri Dios kukꞌ rutinamit. Ekꞌuchiriꞌ, xyokꞌ kaꞌn ruxeꞌ kaj, xetataj uchꞌawibꞌal jabꞌ karaqlajik y kajininik; yey xpe jun kabꞌraqan, y xuꞌan nimaq taq saqbꞌach.
REV 12:1 Xwinaqir kꞌu che ruwa kaj jun nimalaj kꞌutubꞌal: Kꞌo jun ixoq upisom ribꞌ chupa ri qꞌij, waꞌ uꞌanom pachaꞌ uqꞌuꞌ che. Ekꞌu ri ikꞌ chuxeꞌ ri raqan kꞌo wi, y kꞌo jun corona che rujolom yey wa corona kꞌo kabꞌlajuj chꞌumil che.
REV 12:2 Rire yewaꞌ ixoq y lik kasikꞌinik ma e riꞌ kutzir uwach yey ruma waꞌ lik kꞌo pa kꞌax.
REV 12:3 Xwinaqir kꞌu jun chik kꞌutubꞌal che ruwa kaj: Waꞌ e jun nimalaj dragón kaq rij, kꞌo wuqubꞌ ujolom y lajuj rukꞌaꞌ. Chujujunal rujolom kojom jun diadema che.
REV 12:4 Rukꞌ rujeꞌ xebꞌujokokej bꞌi ri urox parte chike taq ri chꞌumil e kꞌo che ruwa kaj y xebꞌukꞌaq bꞌi che ruwachulew. Ekꞌu ri dragón xtakꞌiꞌ chwach rixoq echiriꞌ ya e riꞌ kutzir uwach chaꞌ kutij bꞌi ri ralko ralabꞌ maji chik echiriꞌ kalaxik.
REV 12:5 Xutzir kꞌu uwach rixoq y xalax jun ralko ralabꞌ. Y ruchak waꞌ wa ralabꞌ e kataqan rukꞌ jun vara chꞌichꞌ pakiwi konoje taq ri tinamit e kꞌo che ruwachulew. Ekꞌu ri ralko ralabꞌ rixoq xkꞌam bꞌi chikaj rukꞌ ri Dios pa kꞌo wi rutzꞌulibꞌal re taqanik.
REV 12:6 Ekꞌu rixoq xanimaj bꞌi, xeꞌek pa jun luwar katzꞌintzꞌotik pa yijbꞌam wi ruluwar ruma ri Dios, chaꞌ chiriꞌ katzuq wi oxibꞌ junabꞌ rukꞌ nikꞌaj.
REV 12:7 Tekꞌuchiriꞌ, xjeqer jun nimalaj chꞌaꞌoj chilaꞌ chikaj: Ri Miguel kukꞌ ri ángeles e kꞌo puqꞌabꞌ xechꞌoꞌjin rukꞌ ri dragón. Y jekꞌulaꞌ ri dragón kukꞌ ri ángeles e kꞌo puqꞌabꞌ xechꞌoꞌjin rukꞌ ri Miguel.
REV 12:8 Pero ri dragón kukꞌ taq ru ángeles na xkichꞌij ta kichuqꞌabꞌ ri Miguel kukꞌ ri ángeles e kꞌo rukꞌ. Y na xyaꞌ ta chi kꞌu chike kekꞌojiꞌ chilaꞌ chikaj.
REV 12:9 Xkꞌaq bꞌi ri nimalaj dragón, waꞌ e ri kumatz re ojertan, ritzel winaq Satanás rubꞌiꞌ, ri katajin che kisokosoꞌxik konoje taq ri winaq che ruwachulew. Xkꞌaq kꞌu bꞌi che ruwachulew junam kukꞌ ru ángeles.
REV 12:10 Tekꞌuchiriꞌ xinta jun qulaj lik ko xchꞌaw chilaꞌ chikaj, jewaꞌ kubꞌiꞌij: «Woꞌora ri Dios ebꞌukolobꞌem chi rutinamit yey ri jeqebꞌal re rutaqanik xuꞌan rukꞌ unimal uchuqꞌabꞌ y uyaꞌom chi ri taqanik puqꞌabꞌ Ruchaꞌoꞌn lo Rire. Ma kꞌaqom chubꞌi ri jun kutzꞌaq kichiꞌ ri qa hermanos chipaqꞌij chichaqꞌabꞌ chwach ri Dios.
REV 12:11 E taq ri qa hermanos xkichꞌij uchuqꞌabꞌ ri dragón ruma rukikꞌel ri Qꞌapoj Bꞌexex y rukꞌ ri Utzilaj Tzij xkitzijoj rike, yey na xkixiꞌij tane kibꞌ chwach taq ri kakikꞌulumaj tobꞌ ne xekamisaxik.
REV 12:12 E uwariꞌche chixkiꞌkota riꞌix, ri ix jeqel wara chikaj. Pero lik toqꞌoꞌ kꞌu kiwach taq ri e kꞌo che ruwachulew y ri e kꞌo chupa ri mar, ma ritzel winaq qajinaq piwi riꞌix y lik saꞌch ri royowal, ma retaꞌam xa ajilam chi ri qꞌij yaꞌtal che» kachaꞌ.
REV 12:13 Echiriꞌ ri dragón xrilo esam chi lo chikaj, lik xuternabꞌej rixoq, ruchu ri ralko ala.
REV 12:14 Pero che rixoq xyaꞌ kaꞌibꞌ nimaq taq uxikꞌ pachaꞌ uxikꞌ águila, chaꞌ jelaꞌ kaxikꞌikꞌik kanimaj bꞌi chwach ri kumatz pa ri luwar katzꞌintzꞌotik, pa ri luwar yijbꞌam chi che, pa katzuq wi oxibꞌ junabꞌ rukꞌ nikꞌaj.
REV 12:15 Ekꞌu ri kumatz xuxabꞌej lo yaꞌ puchiꞌ chirij rixoq, waꞌ e pachaꞌ juna nimayaꞌ re kucharej bꞌi.
REV 12:16 Pero rulew xutoꞌ rixoq, ma xjaqatajik y xutzꞌubꞌ bꞌi ri nimayaꞌ uxabꞌem lo ri kumatz puchiꞌ.
REV 12:17 Ruma kꞌu laꞌ, ri kumatz lik xpe royowal chirij rixoq y xuꞌana chꞌaꞌoj kukꞌ taq ri ralkꞌoꞌal kan rixoq, waꞌ e taq ri kakitaqej Rutzij Upixabꞌ ri Dios y kakitzijoj ri Utzilaj Tzij re ri Qanimajawal Jesucristo.
REV 13:1 Riꞌin xintakꞌiꞌ chwi ri sanyebꞌ chuchiꞌ ri mar y xinwilo echiriꞌ chupa ri mar xel lo jun nimalaj itzel chikop wuqubꞌ rujolom y lajuj ri rukꞌaꞌ. Chujujunal rujolom kojom jun diadema che y chujujunal ri wuqubꞌ ujolom tzꞌibꞌital jun bꞌiꞌaj re kꞌaqibꞌal bꞌi uqꞌij ri Dios.
REV 13:2 Wa nimalaj itzel chikop jelaꞌ katzuꞌnik pachaꞌ juna bꞌalam, yey taq ri raqan e pachaꞌ raqan oso y ruwa reꞌ e pachaꞌ uwa reꞌ koj. Ekꞌu ri dragón xuya uchuqꞌabꞌ ri nimalaj itzel chikop, xuya rutzꞌulibꞌal re taqanik che y lik xuya uwach.
REV 13:3 Xinwil kꞌut, lik ꞌanom kꞌax che jun chike taq rujolom ri nimalaj itzel chikop, yey lik kajekꞌow rukꞌ. Pero waꞌ wa kꞌax xkunutajik y ruma kꞌu riꞌ konoje ri winaq che ruwachulew lik xkam kanimaꞌ che y e xkitaqej ri nimalaj itzel chikop.
REV 13:4 Lik xkiloqꞌnimaj kꞌu uqꞌij ri dragón ri xyaꞌw uchuqꞌabꞌ ri nimalaj itzel chikop. Y jenelaꞌ xkiloqꞌnimaj uqꞌij ri nimalaj itzel chikop, jewaꞌ kakibꞌiꞌij: «¿China chi junoq jewaꞌ pachaꞌ wa jun nimalaj itzel chikop? ¿Kꞌo nawi junoq kachꞌijow uchuqꞌabꞌ? ¡Na jintaj!» kechaꞌ.
REV 13:5 Xyaꞌtaj che ri nimalaj itzel chikop kutakꞌabꞌaꞌ uqꞌij y lik tzel kachꞌaꞌt chirij ri Dios. Y xyaꞌ kꞌu uchuqꞌabꞌ re kataqan che ruwachulew oxibꞌ junabꞌ rukꞌ nikꞌaj.
REV 13:6 Xujeq kꞌu lik tzel kachꞌaꞌt chirij ri Dios, chirij rubꞌiꞌ ri Dios, chirij ri Rocho Dios y chikij taq ri e kꞌo chilaꞌ chikaj.
REV 13:7 Y xyaꞌ kꞌu puqꞌabꞌ kachꞌoꞌjin chikij rutinamit ri Dios y kuchꞌij kichuqꞌabꞌ. Jenelaꞌ xyaꞌ puqꞌabꞌ kataqan pakiwi konoje taq ri tinamit, konoje rukꞌiyal kiwach taq ri tikawex che ronoje rukꞌiyal uwach chꞌaꞌtemal.
REV 13:8 Xkiloqꞌnimaj kꞌu uqꞌij ri nimalaj itzel chikop konoje ri winaq che ruwachulew, ri na jinta kibꞌiꞌ chupa ri libro re kꞌaslemal re ri Qꞌapoj Bꞌexex, ri Jun chwi lo ri jeqebꞌal re ruwachulew chaꞌom chi loq re kakamisaxik.
REV 13:9 China kꞌu ri kꞌo utanibꞌal che utayik, ¡chuta kꞌu riꞌ!
REV 13:10 China ri yaꞌtal che kakꞌam bꞌi chi presoyil, riꞌ kakꞌam na ubꞌi; y china ri yaꞌtal che kakam rukꞌ espada, riꞌ rukꞌ espada kakamisaxik. E uwariꞌche chirajawaxik wi rutinamit ri Dios kakichuqꞌubꞌej kibꞌ chwach ri kꞌaxkꞌobꞌik y kakitikibꞌaꞌ ri kubꞌulibꞌal kikꞌuꞌx rukꞌ ri Dios.
REV 13:11 Tekꞌuchiriꞌ, xinwilo echiriꞌ jun chik nimalaj itzel chikop xel lo chupa ri juyubꞌ taqꞌaj, kꞌo kꞌu kaꞌibꞌ rukꞌaꞌ pachaꞌ rukꞌaꞌ juna qꞌapoj bꞌexex pero kachꞌaꞌt pachaꞌ juna dragón.
REV 13:12 Yey wa ukaꞌm nimalaj itzel chikop xyaꞌ puqꞌabꞌ kataqan pachaꞌ ri nabꞌe nimalaj itzel chikop y kuꞌan kꞌu rutaqanik chwach. Xebꞌutaq kꞌu konoje ri winaq che ruwachulew chaꞌ lik kakiloqꞌnimaj uqꞌij ri nabꞌe nimalaj itzel chikop, ri xkunutaj che ri jun kꞌax xjekꞌow rukꞌ.
REV 13:13 Lik kuꞌan nimaq taq kꞌutubꞌal chikiwach ri winaq, ma kuꞌano katzaq ne lo aqꞌ chwi ruwachulew.
REV 13:14 Kebꞌusok kꞌu konoje ri winaq rukꞌ taq ri kꞌutubꞌal yaꞌtal che kuꞌan chwach ri nabꞌe nimalaj itzel chikop. Y kebꞌutaq ri winaq chaꞌ kakiꞌan jun ukꞌaxwach ri nabꞌe nimalaj itzel chikop, ri lik xꞌan kꞌax che rukꞌ espada yey na xkam taj.
REV 13:15 Y xyaꞌtaj kꞌu che kuya ukꞌaslem rukꞌaxwach ri nabꞌe nimalaj itzel chikop, chaꞌ jelaꞌ utz kachꞌawik y kutaq kikamisaxik konoje ri winaq na kakiloqꞌnimaj ta uqꞌij.
REV 13:16 Yey wa ukaꞌm nimalaj itzel chikop xtaqan che kakoj jun retalil chike konoje ri winaq, waꞌ e taq ri lik kꞌo kiwach y ri na jinta kiwach, ri bꞌeyomabꞌ y ri e nibꞌaꞌibꞌ, ri eloqꞌotal ruma kajaw y ri na e jinta puqꞌabꞌ juna kajaw; chike kꞌu konoje xkoj wa jun retalil che ri kiqꞌabꞌ uwikiqꞌabꞌ o che rukurusil ri kipalaj.
REV 13:17 Jekꞌulaꞌ, na jinta junoq yaꞌtal che kaloqꞌowik o kakꞌayinik we na kojom ta che rire ri jun retalil, waꞌ e rubꞌiꞌ ri nimalaj itzel chikop o ri rajlibꞌal rubꞌiꞌ.
REV 13:18 Waꞌ lik karaj naꞌoj chaꞌ kamajtaj usukꞌ. China kꞌu ri lik kumaj usukꞌ, e churajilaj ri rajlibꞌal ri nimalaj itzel chikop, ma ri rajlibꞌal e re jun tikawex; yey ri rajlibꞌal e waꞌ: 666.
REV 14:1 Tekꞌuchiriꞌ, xinwil ri Qꞌapoj Bꞌexex takꞌal chwi ri juyubꞌ Sion y rukꞌ Rire e kꞌo ciento cuarenta y cuatro mil tikawex, yey che rukurusil ri kipalaj tzꞌibꞌital rubꞌiꞌ Rire y rubꞌiꞌ Ruqaw.
REV 14:2 Y xinta jun chꞌawibꞌal re chilaꞌ chikaj katatajik pachaꞌ utzaꞌm yaꞌ echiriꞌ kakꞌunik y uchꞌawibꞌal unimal jabꞌ; y ri chꞌawibꞌal xinto e pachaꞌ ukꞌiyal tikawex e riꞌ kakichꞌawisaj ri ki arpas.
REV 14:3 Y kakibꞌixoj jun kꞌakꞌ bꞌix chwach ri Jun tzꞌul chupa ri tzꞌulibꞌal re taqanik, chikiwach ri kajibꞌ kꞌo kikꞌaslemal pachaꞌ e ángeles y chikiwach ri nimaq winaq. Yey ri emajayom re wa bꞌix xew e ri ciento cuarenta y cuatro mil xekolobꞌetaj chikixoꞌl ri winaq che ruwachulew, ma xew chike rike yaꞌtal wi kakimaj wa jun bꞌix.
REV 14:4 E taq achijabꞌ waꞌ na xkimin ta kibꞌ kukꞌ ixoqibꞌ. Rike e keterej chirij ri Qꞌapoj Bꞌexex tobꞌ pachawi keꞌek wi. Waꞌ e ri xekolobꞌetaj chikixoꞌl ri winaq che ruwachulew re kebꞌuꞌan pachaꞌ ri nabꞌe qasaꞌn chwach ri Dios y chwach ri Qꞌapoj Bꞌexex.
REV 14:5 Yey na jinta kꞌana raqꞌubꞌal xtataj chikichiꞌ ma lik chom ri kibꞌinik kisilabꞌik chwach ri Dios.
REV 14:6 Tekꞌuchiriꞌ, xinwil jun chik ángel kaxikꞌikꞌ chikaj. Rire ukꞌamom lo ri Utzilaj Tzij na jinta utaqexik chaꞌ kutzijoj waꞌ chike konoje ri winaq e kꞌo che ruwachulew, chike konoje taq ri tinamit y konoje rukꞌiyal kiwach taq ri tikawex che ronoje rukꞌiyal uwach chꞌaꞌtemal.
REV 14:7 Ri ángel jewaꞌ kasikꞌin che ubꞌiꞌxikil: «Chixiꞌij iwibꞌ chwach ri Dios y chiloqꞌnimaj uqꞌij ma xopon ru orayil ri qꞌatbꞌal tzij kuꞌano; chiyaka kꞌu uqꞌij ri xꞌanaw re ruwa kaj, ruwachulew, ri mar y taq rakꞌal pa kalax wi lo ri yaꞌ» kachaꞌ.
REV 14:8 Tekꞌuchiriꞌ, xkꞌun rukaꞌm ángel jewaꞌ kubꞌiꞌij: «¡E laꞌ xtzaqik! E laꞌ xtzaq ri nimalaj tinamit Babilonia, ri xebꞌuqꞌabꞌarisaj konoje taq ri tinamit y xebꞌumin pa mak chaꞌ rukꞌ ri kirayibꞌal kaketzꞌabꞌej kiqꞌij kukꞌ jujun chik na kikꞌulel taj» kachaꞌ.
REV 14:9 Tekꞌuchiriꞌ, xkꞌun rurox ángel y kasikꞌin che ubꞌiꞌxik: «We kꞌo junoq kuloqꞌnimaj uqꞌij ri nimalaj itzel chikop y ri jun ukꞌaxwach uꞌanom yey kukꞌul ri retalil che rukurusil rupalaj o che ruqꞌabꞌ,
REV 14:10 riꞌ kutij na ri kꞌaxkꞌobꞌik kape ruma ri royowal ri Dios; y kakꞌaq kꞌu bꞌi pa ri aqꞌ kajinow rukꞌ azufre. Yey kaꞌan waꞌ che chikiwach taq ri santowilaj ángeles y chwach ri Qꞌapoj Bꞌexex.
REV 14:11 Rusibꞌol wa kꞌaxkꞌobꞌik kabꞌuqlanik kel chikaj y na jinta chi kꞌisbꞌal re. Ekꞌu ri kakiloqꞌnimaj uqꞌij ri nimalaj itzel chikop rukꞌ ri jun ukꞌaxwach uꞌanom yey kakikꞌul ri retalil rubꞌiꞌ, chike kꞌu rike na jinta kꞌana uxlanem chipaqꞌij chichaqꞌabꞌ» kachaꞌ.
REV 14:12 E uwariꞌche chirajawaxik che rutinamit ri Dios, waꞌ e ri kitaqem Rutzij Upixabꞌ ri Dios y lik kubꞌul kikꞌuꞌx rukꞌ ri Qanimajawal Jesucristo, kakichuqꞌubꞌej kibꞌ chwach taq ri kꞌaxkꞌobꞌik.
REV 14:13 Ekꞌuchiriꞌ, xinta jun qulaj xchꞌaw lo chilaꞌ chikaj, jewaꞌ kubꞌiꞌij lo chwe: «Chatzꞌibꞌaj: Chwi kꞌu woꞌora, lik nim kiqꞌij kalaxik ri kekam chupa rubꞌiꞌ ri Qanimajawal Jesucristo» kachaꞌ. «Qatzij,» kacha ri Ruxlabꞌixel ri Dios, «ma rike kebꞌuxlan che taq ri kichak, yey ronoje ri utzilaj chak kiꞌanom na kasach ta uwach ma kakikꞌul rajil ukꞌaxel chilaꞌ chikaj» kachaꞌ.
REV 14:14 Tekꞌuchiriꞌ, xinwil jun sutzꞌ lik saq y chwi kꞌu riꞌ waꞌ kꞌo Jun tzꞌulik, kilitajik e Ralaxel Chikixoꞌl Tikawex. Che kꞌu rujolom kꞌo jun corona re oro y puqꞌabꞌ rukꞌaꞌam jun jos lik kꞌo reꞌ.
REV 14:15 Chupa kꞌu ri Rocho Dios xel lo jun chik ángel, jewaꞌ ri kasikꞌin pan che ubꞌiꞌxikil che ri Jun tzꞌul chwi ri sutzꞌ: «Kojo la ri jos che taq ri tikoꞌn kꞌo che ruwachulew ma ya xriꞌjobꞌ ruwach; ꞌana kꞌu la ri molonik ma ruqꞌijol waꞌ ya xoponik» kachaꞌ.
REV 14:16 Ekꞌu ri Jun tzꞌul chwi ri sutzꞌ xukoj rujos che taq ri tikoꞌn kꞌo che ruwachulew y jelaꞌ xuꞌan ri molonik.
REV 14:17 Chupa kꞌu ri Rocho Dios chilaꞌ chikaj xel lo jun chik ángel rukꞌaꞌam jun jos lik kꞌo reꞌ.
REV 14:18 Xel kꞌu lo jun chik ángel chwa raltar; rire yaꞌtal puqꞌabꞌ kataqan puwi ri aqꞌ. Lik ko kꞌu xsikꞌin pan che ri jun kꞌo ri jos lik kꞌo reꞌ puqꞌabꞌ, jewaꞌ kubꞌiꞌij pan che: «Chachapa rajos lik kꞌo reꞌ y chaqꞌata ri jutaq chuyaꞌj uvas che taq ri tikoꞌn re uvas kꞌo che ruwachulew, ma lik qꞌan chik» kachaꞌ.
REV 14:19 Ri ángel xuchap rujos y xuqꞌat ri jutaq chuyaꞌj uvas che taq ri raqan uvas kꞌo che ruwachulew yey xumol uchiꞌ pa kapuchꞌ wi; waꞌ keꞌeloq e pa kuqꞌat wi tzij ri Dios pakiwi ri tikawex.
REV 14:20 Xpuchꞌiꞌ kꞌu ri uva chupa ri puchꞌubꞌal kꞌo lo naj che ri tinamit yey chupa waꞌ xel lo kikꞌ. Ri kikꞌ xel che, xuꞌan pachaꞌ yaꞌ kayenenik. Runajtijil raqan ri kikꞌ xumaj trescientos kilómetros yey ruchoyil upa e jun metro rukꞌ nikꞌaj.
REV 15:1 Xinwil jun chik nimalaj kꞌutubꞌal chilaꞌ chikaj yey waꞌ lik na jinta kꞌana kꞌo wi: E wuqubꞌ ángeles kakikꞌam lo ri wuqubꞌ kꞌisbꞌal kꞌaxkꞌobꞌik; yey rukꞌ waꞌ kakꞌis wi ri royowal ri Dios.
REV 15:2 Tekꞌuchiriꞌ, xinwil jun mar katzuꞌn pachaꞌ vidrio yey kawon aqꞌ chupa. Konoje ri na xesokotaj ta ruma ri nimalaj itzel chikop, na xexukiꞌ tane chwach ri jun ukꞌaxwach y na xkiya tane luwar kakoj chike ri retalil re ri rajlibꞌal rubꞌiꞌ ri nimalaj itzel chikop, konoje rike e takꞌal chwi ri mar katzuꞌn pachaꞌ vidrio y kukꞌaꞌam ri ki arpa yaꞌtal chike ruma ri Dios.
REV 15:3 E kakibꞌixoj kꞌu ri bꞌix re ri Moisés ri raj chak ri Dios y kakibꞌixoj ri bꞌix re ri Qꞌapoj Bꞌexex, jewaꞌ kakibꞌiꞌij: Lal Dios Qajawxel, ri kꞌo ronoje unimal chuqꞌabꞌ paqꞌabꞌ la. Lik nimaꞌq y lik chomilaj taq ri chak ꞌanom la, lik jusukꞌ y lik usukꞌ ronoje ri kaꞌan la, Lal ri Taqanel pakiwi taq ri tinamit.
REV 15:4 ¿Kꞌo nawi junoq na kuxiꞌij ta ribꞌ chiwach la, Lal Qajawal? ¿Y kꞌo nawi junoq na kuyak ta uqꞌij ri bꞌiꞌ la? Ma xew Rilal lik Lal santo. E uwariꞌche konoje taq ri tinamit che ruwachulew kekꞌunik y koꞌlkiloqꞌnimaj qꞌij la, ma qꞌalajisam la ri jusukꞌ qꞌatbꞌal tzij la pakiwiꞌ kechaꞌ.
REV 15:5 Tekꞌuchiriꞌ, xinwilo echiriꞌ xteqꞌebꞌax ri Rocho Dios chilaꞌ chikaj pa kꞌo wi ri kaxa re ri tzij uꞌanom ri Dios kukꞌ rutinamit.
REV 15:6 Chupa kꞌu ri Rocho Dios xebꞌel lo wuqubꞌ ángeles, ri yaꞌtal chike kekiya pa kꞌaxkꞌobꞌik taq ri winaq che ruwachulew. Kikojom kꞌu kiqꞌuꞌ ꞌanatal rukꞌ kꞌul lino yey waꞌ lik saq y lik kawonik, yey chwa kikꞌuꞌx kojotal jun pas re oro.
REV 15:7 Jun kꞌu chike ri kajibꞌ kꞌo kikꞌaslemal pachaꞌ e ángeles xuya chike ri wuqubꞌ ángeles jujun copas re oro nojinaq che ri royowal ri Dios, ri na jinta utaqexik rukꞌaslemal.
REV 15:8 Ekꞌu ri Rocho Dios xnoj che sibꞌ ruma runimal uchomalil y ruchuqꞌabꞌ ri Dios. Nabꞌe na kꞌut kikꞌow wa wuqubꞌ kꞌaxkꞌobꞌik kikꞌamom lo ri wuqubꞌ ángeles, kꞌa ekꞌuchiriꞌ utz kok junoq pa ri Rocho Dios.
REV 16:1 Chupa ri Rocho Dios chilaꞌ chikaj xinta jun lik ko kachꞌawik, jewaꞌ kubꞌiꞌij pan chike ri wuqubꞌ ángeles: «Jix y jiꞌqꞌeja che ruwachulew ri royowal ri Dios, ri kꞌo chupa ri wuqubꞌ copas» kachaꞌ.
REV 16:2 Xeꞌek kꞌu ri nabꞌe ángel y xuꞌqꞌeja chwi ruwachulew ri kꞌo chupa rucopa, y ruma waꞌ xwinaqir jun kꞌaxlaj yabꞌil re chꞌaꞌk chikij taq ri winaq y xujeq kꞌu riꞌ kaqꞌolol kij konoje, waꞌ e ri xekꞌuluw ri retalil ri nimalaj itzel chikop y xkiloqꞌnimaj uqꞌij ri jun ukꞌaxwach ꞌanom.
REV 16:3 Rukaꞌm ángel xuꞌqꞌeja chwi ri mar ri kꞌo chupa rucopa, y ruma waꞌ xuꞌan kikꞌ uwach ri mar pachaꞌ rukikꞌel juna tikawex kamisam; y xekam kꞌu konoje taq rawaj e kꞌo chupa ri mar.
REV 16:4 Rurox ángel xuꞌqꞌeja ri kꞌo chupa rucopa chwi taq ri nimayaꞌ y chwi taq rakꞌal pa kalax wi taq lo ri yaꞌ; y ruma waꞌ ronoje ri yaꞌ xuꞌan kikꞌ uwach.
REV 16:5 Tekꞌuchiriꞌ xinta ri ángel ri yaꞌtal taq ri yaꞌ puqꞌabꞌ, jewaꞌ kubꞌiꞌij: «Lal Dios Qajawxel ri kꞌo waqꞌij ora y ri xex chi kꞌo lo wi, xew Rilal lik Lal Santo, ma lik Lal jusukꞌ che ri qꞌatbꞌal tzij ꞌanom la
REV 16:6 pakiwi ri xekamisan ke ri tinamit la y taq ri qꞌalajisanelabꞌ e la. Xkiꞌan kꞌu chike xturuw ri kikikꞌel. E uwariꞌche lik Lal jusukꞌ ma xꞌan la chike wa e kamisanel kakiqum kikꞌ. ¡Ekꞌu lik taqal waꞌ chike!» kachaꞌ.
REV 16:7 Ewi xinta jun chik xchꞌaw lo chwa raltar, jewaꞌ kubꞌiꞌij: «Paqatzij wi, lal Dios Qajawxel, Rilal kꞌo ronoje unimal chuqꞌabꞌ paqꞌabꞌ la, ma ri qꞌatbꞌal tzij kaꞌan la lik e usukꞌ y lik jusukꞌ» kachaꞌ.
REV 16:8 Rukaj ángel xuꞌqꞌeja chwi ri qꞌij ri kꞌo chupa rucopa, jelaꞌ kꞌu riꞌ xyaꞌtaj che ri qꞌij kebꞌukꞌatisaj konoje ri winaq rukꞌ rukꞌatibꞌal.
REV 16:9 Y lik xekꞌat kꞌu ri winaq ruma rukꞌatibꞌal ri qꞌij. Ruma kꞌu waꞌ, xeyajan rukꞌ itzel taq chꞌaꞌtem chirij ri Dios, ri kꞌo puqꞌabꞌ kutaq lo wa kꞌaxkꞌobꞌik pakiwiꞌ. Yey na xkitzelej tane kitzij, ma e na xkaj taj kakiyak uqꞌij ri Dios.
REV 16:10 Ruroꞌ ángel xuꞌqꞌeja ri kꞌo chupa rucopa chwi ri tzꞌulibꞌal pa kataqan wi ri nimalaj itzel chikop, y ruma waꞌ xuꞌan qꞌequꞌm upa taq ri tinamit kꞌo puqꞌabꞌ ri nimalaj itzel chikop. Konoje taq kꞌu ri winaq lik kakikachꞌakaꞌ upa ri kaqꞌ ruma ri kꞌax.
REV 16:11 Lik kꞌut tzel xechꞌaꞌt chirij ri Dios kꞌo chilaꞌ chikaj ruma taq ri kꞌaxkꞌobꞌik y taq ri chꞌaꞌk chikij; y na xkitzelej ta kitzij chwach ri Dios che taq ri na utz taj kiꞌanom.
REV 16:12 Ruwaqaq ángel xuꞌqꞌeja pa ri nimayaꞌ Eufrates ri kꞌo chupa rucopa; y ruma waꞌ, xchaqij ri yaꞌ pa ri nimalaj raqanaꞌ, chaꞌ jelaꞌ utz kebꞌikꞌow lo ri taqanelabꞌ e petinaq pa relebꞌal lo ri qꞌij.
REV 16:13 Y xinwil kꞌu oxibꞌ itzelilaj uxlabꞌixel jelaꞌ ketzuꞌnik pachaꞌ tutzꞌ; jun kel lo puchiꞌ ri dragón, jun chik kel lo puchiꞌ ri nimalaj itzel chikop y jun chik kel lo puchiꞌ ri jun qꞌalajisanel sokosoꞌnel.
REV 16:14 Waꞌ e itzel uxlabꞌixel kakiꞌan taq kꞌutubꞌal y kebꞌek kukꞌ konoje ri taqanelabꞌ che ronoje ruwachulew chaꞌ kakimol kichiꞌ re kakiꞌan chꞌaꞌoj chupa ri unimal qꞌij re ruqꞌatbꞌal tzij ri Dios, ri kꞌo ronoje unimal chuqꞌabꞌ puqꞌabꞌ.
REV 16:15 Jewaꞌ kubꞌiꞌij ri Qanimajawal: «Chitapeꞌ, Riꞌin kinopon iwukꞌ jelaꞌ pachaꞌ ri okibꞌal re juna eleqꞌom pa juna ja, ma ri eleqꞌom na kubꞌiꞌij ta apanoq jampalaꞌ koponik. Lik kꞌu nim uqꞌij ralaxik china ri na kawar taj yey ukojom chi ruqꞌuꞌ chaꞌ we xinkꞌunik, na kuya ta ukꞌix» xchaꞌ.
REV 16:16 Y xkimol kꞌu kichiꞌ ri taqanelabꞌ chupa ri jun luwar rubꞌiꞌ pa ri chꞌaꞌtem hebreo “Armagedón”.
REV 16:17 Ruwuq ángel xuꞌqꞌeja pa ri tew ri kꞌo chupa rucopa; y lik ko xchꞌaw lo jun qulaj pa ri tzꞌulibꞌal re taqanik kꞌo chupa ri Rocho Dios chilaꞌ chikaj, jewaꞌ kubꞌiꞌij: —Xkꞌis kꞌu wa qꞌatbꞌal tzij —kachaꞌ.
REV 16:18 Tekꞌuchiriꞌ lik xyokꞌ kaꞌn ruxeꞌ kaj, xetataj uchꞌawibꞌal jabꞌ karaqlajik y kajininik; yey xpe jun nimalaj kabꞌraqan che ruwachulew, waꞌ e kabꞌraqan más nim uꞌanom chwi lo ri kikꞌojiꞌik ri tikawex che ruwachulew.
REV 16:19 Ruma kꞌu waꞌ, ri nimalaj tinamit xjaqataj upa, oxibꞌ xuꞌano; y konoje taq ri jujun chik tinamit e kꞌo che ruwachulew xewuluwubꞌik. Ekꞌu ri Dios na xikꞌow ta chukꞌuꞌx taq ri mak uꞌanom ri nimalaj tinamit Babilonia; xuya kꞌu pa kꞌaxkꞌobꞌik ruma ri unimal royowal Rire chirij.
REV 16:20 Yey ruma kꞌu wa kabꞌraqan konoje taq ri islas y taq ri juyubꞌ xesachik.
REV 16:21 Y xtzaq lo chikaj nimaq taq saqbꞌach pakiwi ri tikawex. Ri raꞌlal waꞌ laj jun quintal chujujunal. Ruma kꞌu ri kꞌaxkꞌobꞌik re ri nimaq taq saqbꞌach, ri winaq lik tzel xechꞌaꞌt chirij ri Dios, ma ri kꞌaxkꞌobꞌik xuꞌano lik xibꞌibꞌal uwach.
REV 17:1 Xkꞌun kꞌu jun chike taq ri wuqubꞌ ángeles, ri kꞌo ri wuqubꞌ copas re kꞌaxkꞌobꞌik pakiqꞌabꞌ. Xchꞌaꞌt kꞌu wukꞌ, jewaꞌ xubꞌiꞌij chwe: «Saꞌa wara y kankꞌut chawach ri qꞌatbꞌal tzij kaꞌan puwi ri jun ixoq na chom ta ubꞌinik, ri tzꞌul chwi taq ri yaꞌ.
REV 17:2 Rukꞌ waꞌ wiꞌxoq emakuninaq taq wi ri taqanelabꞌ che ruwachulew y konoje ri winaq ejeqel che ruwachulew, ma eqꞌabꞌarinaq ruma ri vino xuya rixoq chike» xchaꞌ.
REV 17:3 Tekꞌuchiriꞌ, chupa ri xkꞌut chinuwach ruma ri Ruxlabꞌixel ri Dios, ri ángel xinukꞌam bꞌi chupa jun luwar katzꞌintzꞌotik y chilaꞌ xinwil jun ixoq tzꞌul chwi jun nimalaj itzel chikop kaq rij, yey waꞌ tzꞌibꞌital ukꞌiyal bꞌiꞌaj chirij re kꞌaqibꞌal bꞌi uqꞌij ri Dios. Waꞌ kꞌo wuqubꞌ ujolom y lajuj rukꞌaꞌ.
REV 17:4 Rixoq uwiqom ribꞌ rukꞌ kꞌul morato uwach y kaq uwach; yey wiqital rukꞌ oro, rukꞌ chomilaj taq abꞌaj y rukꞌ perlas. Rukꞌaꞌam jun copa re oro puqꞌabꞌ nojinaq che taq ri lik kꞌixbꞌal uwach y che ruchꞌulil ri mak kuꞌan kukꞌ taq rachijabꞌ.
REV 17:5 Kꞌo kꞌu jun bꞌiꞌaj tzꞌibꞌital che rukurusil rupalaj yey lik kꞌayew umajik usukꞌ; e bꞌiꞌaj waꞌ: Ri nimalaj tinamit Babilonia e kichu rixoqibꞌ lik chꞌul kibꞌinik kisilabꞌik, y rukꞌ rire petinaq wi ronoje ri lik kꞌixbꞌal uwach kaꞌan che ruwachulew.
REV 17:6 Tekꞌuchiriꞌ xinwil rixoq lik kaqꞌabꞌar rukꞌ ri kikikꞌel rutinamit ri Dios y ri xekamisax ruma ri xkitzijoj ri Utzilaj Tzij re ri Jesús. Ekꞌu riꞌin lik xkam wanimaꞌ che ri xinwilo.
REV 17:7 Xubꞌiꞌij kꞌu ri ángel chwe: «¿Suꞌbꞌe lik kakam awanimaꞌ che? Riꞌin kanqꞌalajisaj chawe saꞌ keꞌelawi rixoq y ri nimalaj itzel chikop kꞌamayom lo re, ri kꞌo wuqubꞌ ujolom y lajuj rukꞌaꞌ.
REV 17:8 Ritzel chikop xawilo e ri jun xkꞌojiꞌ lo ojertan yey ekꞌu woꞌora na jinta chik. Pero ya kopon ri qꞌij kel na lo chupa ri siwan na jinta utaqexik uchoyil upa, y kꞌisbꞌal kꞌu re, keꞌek chi tojbꞌal mak. Konoje kꞌu ri winaq ejeqel che ruwachulew, ri na tzꞌibꞌital ta ri kibꞌiꞌ chupa ri libro re kꞌaslemal chwi lo ri jeqebꞌal re ruwachulew, kakam kanimaꞌ che echiriꞌ kakil ri nimalaj itzel chikop re ojertan. Tobꞌ kꞌu riꞌ woꞌora na jinta chik, pero kawinaqir tanchi uloq.
REV 17:9 »Kajawax naꞌoj chaꞌ jun kumaj usukꞌ waꞌ: Ri wuqubꞌ ujolom ri nimalaj itzel chikop e keꞌelawi wuqubꞌ chi juyubꞌ y puwi taq waꞌ tzꞌul wi rixoq;
REV 17:10 yey e keꞌelawi wuqubꞌ chi taqanelabꞌ. Y woꞌobꞌ chike waꞌ ebꞌikꞌowinaq chik; jun kataqan woꞌora y ri jun chik kꞌamajaꞌ kujeq rutaqanik ma kꞌamajaꞌ kakꞌunik. Y we xkꞌunik, lik chirajawaxik wi na naj ta rutaqanik kuꞌano.
REV 17:11 Jun chike ri wuqubꞌ taqanel e ri nimalaj itzel chikop, ri jun xkꞌojiꞌ ojertan y woꞌora na jinta chik, yey kataqan tanchik y kuꞌana ruwajxaq taqanel. Yey kꞌisbꞌal kꞌu re, keꞌek chi tojbꞌal mak.
REV 17:12 »Ekꞌu ri lajuj rukꞌaꞌ xawilo, e keꞌelawi lajuj chi taqanelabꞌ kꞌamajaꞌ kakijeq ri kitaqanik; yey kayaꞌ na pakiqꞌabꞌ ketaqan junam rukꞌ ri nimalaj itzel chikop, pero xa jun ora uwach ri kitaqanik.
REV 17:13 Wa lajuj taqanelabꞌ junam tzij kiꞌanom chikiwach puwi ri kitaqanik chaꞌ kakiya na kꞌu ri kichuqꞌabꞌ y ri kitaqanik puqꞌabꞌ ri nimalaj itzel chikop.
REV 17:14 Rike kechꞌoꞌjin rukꞌ ri Qꞌapoj Bꞌexex, pero Rire kuchꞌij kichuqꞌabꞌ, ma e Kajawal konoje ri kꞌo kiwach y e Taqanel pakiwi konoje ri e taqanelabꞌ. Yey taq ri e kꞌo rukꞌ ri Qꞌapoj Bꞌexex, e ri esikꞌim y echaꞌom ruma ri Dios y na kesam ta kibꞌ puqꞌabꞌ Rire» xchaꞌ.
REV 17:15 Je tanchi waꞌ xubꞌiꞌij chwe: «Ri yaꞌ xawilo pa tzꞌul wi rixoq na chom ta ubꞌinik, keꞌelawi e taq ri tikawex che taq ri tinamit, che rukꞌiyal kiwach taq ri tikawex che rukꞌiyal uwach chꞌaꞌtemal.
REV 17:16 Ri lajuj rukꞌaꞌ ri nimalaj itzel chikop xawilo, waꞌ tzel kakil rixoq na chom ta rubꞌinik; kakoqꞌotaj kꞌu kan utukel y kakichꞌanabꞌaꞌ kanoq, kakitij rutiꞌjil y tekꞌuchiriꞌ kakiporoj pa aqꞌ.
REV 17:17 Ma e ri Dios kakojow pa ri kanimaꞌ chaꞌ kakiꞌan ri karaj Rire, waꞌ e kakiꞌan tzij chikiwach chaꞌ chupa laꞌ la qꞌij ekꞌowi kakiya ri kitaqanik puqꞌabꞌ ri nimalaj itzel chikop kꞌa che ruqꞌijol echiriꞌ kuꞌana na ronoje ri ubꞌiꞌim kan ri Dios.
REV 17:18 Rixoq xawilo e keꞌelawi ri nimalaj tinamit kataqan pakiwi konoje ri taqanelabꞌ che ruwachulew» xchaꞌ.
REV 18:1 Kꞌisbꞌal kꞌu re waꞌ, xinwil chi jun chik ángel xqaj lo chikaj rukꞌ unimal uchuqꞌabꞌ; y ruchomalil ruwonibꞌal xutzij uwi ruwachulew.
REV 18:2 Lik ko xsikꞌin che ubꞌiꞌxikil: «¡E laꞌ xtzaqik! ¡Xtzaq na ri nimalaj tinamit Babilonia! Y woꞌora uꞌanom kiluwar itzelilaj uxlabꞌixel, kijul chꞌulilaj uxlabꞌixel y kisok chꞌulilaj tzꞌikin qiꞌtzel ketzuꞌnik.
REV 18:3 Ma konoje taq ri jujun chik tinamit che ruwachulew eqꞌabꞌarinaq ruma wa tinamit, ri xebꞌumin chupa ukꞌiyal mak rukꞌ rayibꞌal. Konoje kꞌu ri taqanelabꞌ che ruwachulew emakuninaq rukꞌ; y konoje taq raj kꞌay che ruwachulew ebꞌeyomarinaq ma ri tinamit Babilonia ruma ri unimal urayibꞌal lik kꞌo xuloqꞌ chike» xchaꞌ.
REV 18:4 Tekꞌuchiriꞌ xinta jun chik qulaj xchꞌaw lo chikaj, jewaꞌ kubꞌiꞌij: «Chixelubꞌi chupa ri tinamit Babilonia, riꞌix ix nutinamit, chaꞌ na kiꞌan ta iweꞌix kukꞌ rike y jelaꞌ na katzaq ta piwi riꞌix ri kꞌaxkꞌobꞌik kape puwi rire.
REV 18:5 Ma na xa ta jubꞌiqꞌ rumak, e taq waꞌ xaqi uleꞌom chi ribꞌ elinaq bꞌi kꞌa chikaj. Yey ri na utz taj uꞌanom, lik kꞌo chukꞌuꞌx ri Dios.
REV 18:6 Chitzelej ukꞌaxel che e chirij taq ri na utz taj uꞌanom chike ri jujun chik; chikalajij ri kꞌax puwiꞌ ruma rumak uꞌanom; chupa kꞌu ri copa pa xuyijbꞌaꞌ wi ri yaꞌ lik kꞌa chike jujun chik, riꞌix chikalajij rukꞌayul waꞌ y chiyaꞌa che.
REV 18:7 Rire lik xuꞌan nim che ribꞌ y lik xuya ribꞌ che taq rurayibꞌal; ekꞌu woꞌora lik chiyaꞌa pa kꞌax y pa oqꞌej; ma jewaꞌ ri kubꞌiꞌij pa ranimaꞌ: “Riꞌin in tzꞌulik pachaꞌ in juna reina, yey na in ta malkaꞌn y na kantij tane kꞌana oqꞌej” kachaꞌ.
REV 18:8 Ruma kꞌu riꞌ, xa pa jun qꞌij kape ri kꞌaxkꞌobꞌik puwiꞌ: waꞌ e kamik, oqꞌej y numik; yey rukꞌ ne aqꞌ kaporoxik, ma ri Dios Qajawxel, ri kuqꞌat tzij puwiꞌ, lik kꞌo uchuqꞌabꞌ» kachaꞌ.
REV 18:9 Taq ri taqanelabꞌ che ruwachulew emakuninaq rukꞌ rixoq, yey junam rukꞌ rire kiyaꞌom kibꞌ che ruqusil ruwachulew y jekꞌulaꞌ kitzꞌiloꞌm ri kibꞌinik rukꞌ. Ekꞌu rike kebꞌoqꞌik y ketunan puwi rixoq echiriꞌ kakil rusibꞌol rire kakꞌatik.
REV 18:10 Lik chinimanaj kekꞌojiꞌ pan che utzutzuꞌxik rixoq ruma ruxibꞌrikil ri kꞌaxkꞌobꞌik kꞌo wi y jewaꞌ kakibꞌiꞌij: «¡Toqꞌoꞌ awach! ¡Toqꞌoꞌ awach at nimalaj tinamit Babilonia, ri lik kꞌo achuqꞌabꞌ, ma xa pa joqꞌotaj xkꞌun ri qꞌatbꞌal tzij pawiꞌ!» kechaꞌ.
REV 18:11 Konoje taq raj kꞌay che ruwachulew kebꞌoqꞌ na y lik kakibꞌisoj ri nimalaj tinamit ma na jinta chi kꞌo kaloqꞌow re rukꞌiyal kikꞌay.
REV 18:12 Waꞌ e oro, plata, chomilaj taq abꞌaj y perlas; chom taq kꞌul lino, chom taq kꞌul morato, chom taq kꞌul xela y chom taq kꞌul kaq; ukꞌiyal uwach cheꞌ kiꞌ ruxlabꞌ; taq ri ꞌanatal rukꞌ marfil, rukꞌ chom taq cheꞌ, rukꞌ bronce, rukꞌ chꞌichꞌ y rukꞌ abꞌaj mármol;
REV 18:13 yey kikꞌay re incienso y kunabꞌal kiꞌ ruxlabꞌ, pachaꞌ canela, mirra y olíbano; vino, aceite, harina y trigo; kikꞌay ke awaj kebꞌeqanik, ke bꞌexex, ke kawayuꞌ y re kareta; yey kikꞌay ne tikawex e aj chak.
REV 18:14 Jekꞌuwaꞌ kakibꞌiꞌij che ri tinamit: «Ronoje taq ri xarayij uwach na jinta chi awukꞌ; ronoje taq ri bꞌeyomalil lik xeꞌek akꞌuꞌx rukꞌ, xsach uwach y na kariq ta chi kꞌenoq» kechaꞌ.
REV 18:15 Ekꞌu ri e aj kꞌay re taq waꞌ, ri lik ebꞌeyomarinaq ruma wa tinamit, lik chinimanaj kekꞌojiꞌ pan che utzutzuꞌxik wa tinamit ruma ruxibꞌrikil ri kꞌaxkꞌobꞌik petinaq puwiꞌ. Ewi lik kakoqꞌej loq,
REV 18:16 jewaꞌ kakibꞌiꞌij: «¡Toqꞌoꞌ uwach! ¡Toqꞌoꞌ uwach ri nimalaj tinamit, ri pachaꞌ juna ixoq uwiqom ribꞌ rukꞌ chomilaj uqꞌuꞌ ꞌanatal rukꞌ lino, rukꞌ kꞌul morato y kaq; wiqital rukꞌ oro, rukꞌ chomilaj taq abꞌaj y perlas!
REV 18:17 Ma xa pa joqꞌotaj xsach uwach rukꞌiyal ubꞌeyomalil» kechaꞌ. Konoje kꞌu ri e kꞌamal uwach barcos, ri kebꞌin pa barcos, ri kechakun pa barcos y taq ri kekꞌayin rukꞌ barcos, chinimanaj kekꞌojiꞌ wi lo che.
REV 18:18 Ekꞌuchiriꞌ kakil rusibꞌol wa tinamit kakꞌatik, lik ko kesikꞌin che ubꞌiꞌxik: «¿Kꞌo nawi juna chik tinamit kajunimax rukꞌ wa nimalaj tinamit? ¡Na jintaj!» kechaꞌ.
REV 18:19 Y ri winaq kakipukꞌ ulew chwi kijolom ruma kibꞌis, kebꞌoqꞌik y ko kesikꞌinik, jewaꞌ kakibꞌiꞌij: «¡Toqꞌoꞌ uwach! ¡Toqꞌoꞌ uwach ri nimalaj tinamit! Ma konoje ri kꞌo barcos kukꞌ lik xebꞌeyomar rukꞌ wa tinamit; yey xa kꞌu pa joqꞌotaj xsach uwach ronoje.
REV 18:20 Riꞌix ri ix jeqel chilaꞌ chikaj, chixkiꞌkota ruma ri xukꞌulumaj wa tinamit. Chixkiꞌkot iwonoje riꞌix ri iyaꞌom iwibꞌ puqꞌabꞌ ri Dios, ri ix utaqoꞌn y ri ix qꞌalajisanelabꞌ, ma Rire e xqꞌataw tzij puwi wa nimalaj tinamit ruma ri xuꞌan chiwe» kechaꞌ.
REV 18:21 Tekꞌuchiriꞌ, jun ángel lik kꞌo uchuqꞌabꞌ xuyak jun nimalaj abꞌaj, runimal waꞌ e pachaꞌ juna nimalaj kaꞌ, y xukꞌaq bꞌi chupa ri mar, jewaꞌ kubꞌiꞌij: «Jelaꞌ ruwulixik bꞌi ri nimalaj tinamit Babilonia y na kilitaj ta chi uwach.
REV 18:22 »Awukꞌ riꞌat Babilonia, na katataj ta chi uchꞌawibꞌal arpa, uchꞌawibꞌal ke aj música, uchꞌawibꞌal suꞌ yey uchꞌawibꞌal trompeta; na kebꞌilitaj ta chi ne aj chak y na katataj ta chi ne uchꞌawibꞌal ri kaꞌ kaqilowik.
REV 18:23 Na jinta chi ne kꞌana aqꞌ kawonik, na katataj ta chi ne kꞌana nimaqꞌij re kꞌulanikil. Ma e taq raj kꞌay xekꞌojiꞌ awukꞌ, e más nim ri kitaqanik che ruwachulew. Ruma taq ri itz xaꞌano, xesokotaj konoje taq ri tinamit che ruwachulew.
REV 18:24 Yey ri winaq re wa tinamit xekikamisaj taq ri qꞌalajisanelabꞌ re ri Dios y rutinamit ri Dios, y xekikamisaj ne ukꞌiyal tikawex che taq ronoje ri tinamit re ruwachulew» kachaꞌ.
REV 19:1 Kꞌisbꞌal re waꞌ xinta ukꞌiyal winaq chilaꞌ chikaj jewaꞌ kakibꞌiꞌij: «¡Aleluya! ¡Ri Dios Qajawxel taqal che kayak uqꞌij ruma ri kolobꞌetajik uyaꞌom chiqe y ruma runimal uchomalil y ruchuqꞌabꞌ!
REV 19:2 Rire paqatzij wi lik usukꞌ y lik jusukꞌ ri qꞌatbꞌal tzij kuꞌano. Ma xuqꞌat tzij puwi ri jun ixoq lik na chom ta rubꞌinik, ri xebꞌumin ri tikawex re ruwachulew chaꞌ kemakun rukꞌ. Ekꞌu ri Dios xuꞌan ukꞌaxel che ruma xebꞌukamisaj ri e aj chak re ri Dios» kechaꞌ.
REV 19:3 Je tanchi waꞌ xkibꞌiꞌij: «¡Aleluya! Na jinta utaqexik kabꞌuqlan chikaj rusibꞌol ri aqꞌ pa xkꞌaq wubꞌi rixoq» xechaꞌ.
REV 19:4 Ekꞌuchiriꞌ, ri veinticuatro nimaq winaq kukꞌ ri kajibꞌ kꞌo kikꞌaslemal pachaꞌ e ángeles, xkiqasaj kimejelem kꞌa chuꞌlew y xkiloqꞌnimaj uqꞌij ri Dios ri tzꞌul pa ri tzꞌulibꞌal re taqanik, jewaꞌ kakibꞌiꞌij: «¡Amén! ¡Aleluya!» kechaꞌ.
REV 19:5 Chupa kꞌu ri tzꞌulibꞌal xtataj jun qulaj, jewaꞌ kubꞌiꞌij: «Chiyaka uqꞌij ri qa Dios, iwonoje ri kixchakun chupa ruchak, iwonoje ri kꞌo xiꞌin ibꞌ iwukꞌ chwach, chinimaꞌq chichꞌutiꞌq» kachaꞌ.
REV 19:6 Tekꞌuchiriꞌ, xinta pachaꞌ kiqul ukꞌiyal winaq jelaꞌ pachaꞌ ruchꞌawibꞌal utzaꞌm yaꞌ echiriꞌ kakꞌunik y pachaꞌ uchꞌawibꞌal unimal jabꞌ, jewaꞌ kakibꞌiꞌij: «¡Aleluya! Ma e kataqan ri Dios Qajawxel, ri kꞌo ronoje unimal chuqꞌabꞌ puqꞌabꞌ.
REV 19:7 Chojkiꞌkotoq, lik chojkiꞌkotoq y qayaka uqꞌij Rire, ma xopon ruqꞌijol ri kꞌulanikil re ri Qꞌapoj Bꞌexex y ri rixoqil lik uwiqom chi ribꞌ.
REV 19:8 Ma che rire yaꞌtal wi kuwiq ribꞌ rukꞌ chomilaj uqꞌuꞌ ꞌanatal rukꞌ kꞌul lino lik kawolqꞌinik» kechaꞌ. Waꞌ wa kꞌul lino e kꞌutubꞌal re ri jusukꞌ kibꞌinik kisilabꞌik rutinamit ri Dios.
REV 19:9 Ekꞌu ri ángel jewaꞌ xubꞌiꞌij chwe: «Chatzꞌibꞌaj waꞌ: Lik nim kiqꞌij kalaxik konoje ri esikꞌim pa ri waꞌim re rukꞌulanikil ri Qꞌapoj Bꞌexex» xchaꞌ. Yey jewaꞌ tanchi xubꞌiꞌij chwe: «Wa chꞌaꞌtem e re ri Dios y lik qatzij» xchaꞌ.
REV 19:10 Ekꞌu riꞌin xinxukubꞌaꞌ wibꞌ xeꞌraqan uqꞌabꞌ ri ángel re kanloqꞌnimaj uqꞌij. Pero rire jewaꞌ xubꞌiꞌij chwe: «Chata peꞌ, lik maꞌan laꞌ, ma riꞌin xa in jun aj chak re ri Dios jelaꞌ pachaꞌ riꞌat y jelaꞌ pachaꞌ ri hermanos, ri kitaqem ri Qꞌijsaq uqꞌalajisam ri Qanimajawal Jesucristo. Xew chayaka uqꞌij ri Dios, ma ri Qꞌijsaq re ri Qanimajawal Jesucristo e ukꞌuꞌxibꞌal ri saqil qꞌalajisanik» xcha chwe.
REV 19:11 Tekꞌuchiriꞌ, xinwil ruwa kaj jaqalik y xinwil kꞌu jun kawayuꞌ saq rij. Yey ri kojoyom re jewaꞌ rubꞌiꞌ: “Jusukꞌ y Usukꞌ”, ma chi usukꞌlikil kuqꞌat tzij y kuꞌan chꞌaꞌoj.
REV 19:12 Taq ruwach lik kewonik pachaꞌ aqꞌ kareprotik y chwi rujolom kojom ukꞌiyal diademas; yey kꞌo jun bꞌiꞌaj tzꞌibꞌital che y na jinta junoq kamajaw usukꞌ, xew Rire kumaj usukꞌ.
REV 19:13 Yey ruqꞌuꞌ bꞌalaꞌl pa kikꞌ y rubꞌiꞌ Rire e: “Ri Tzij re ri Dios.”
REV 19:14 Taq ri ejércitos re chilaꞌ chikaj eteran chirij, e kꞌo lo chwi kawayuꞌ saq kij. Kikojom kiqꞌuꞌ ꞌanatal rukꞌ kꞌul lino lik saq y lik chom.
REV 19:15 Puchiꞌ ri Jun ukojom lo ri kawayuꞌ saq rij, kel lo jun espada lik tꞌisiꞌs utzaꞌm chaꞌ rukꞌ waꞌ kuꞌan kꞌax chike taq ri tinamit. Rire kataqan pakiwiꞌ rukꞌ jun vara chꞌichꞌ yey kuꞌan chike pachaꞌ junoq kuyiqꞌiyaꞌ upa ri uva chaꞌ kel ruwaꞌal. Rukꞌ kꞌu waꞌ kaqꞌalajin wi runimal royowal ri Dios, ri kꞌo ronoje unimal chuqꞌabꞌ puqꞌabꞌ.
REV 19:16 Che kꞌu ruqꞌuꞌ chwi raꞌ jewaꞌ tzꞌibꞌitalik: «TAQANEL PAKIWI RI TAQANELABꞌ Y AJ WACH PAKIWI TAQ RI KꞌO KIWACH.»
REV 19:17 Tekꞌuchiriꞌ, xinwil jun ángel takꞌal chwach ri qꞌij, jewaꞌ ri kasikꞌin che ubꞌiꞌxik chike konoje rawaj kexikꞌikꞌ lik chikaj, ri etijol ke ri ekaminaq chik: «Chixpetoq, chimolo iwibꞌ che ri nimalaj waꞌim kuya ri Dios
REV 19:18 chaꞌ kixwaꞌ rukꞌ ri kitiꞌjil ri e taqanelabꞌ, ri e aj wach ke soldados y taq ri lik kꞌo kichuqꞌabꞌ; ri kitiꞌjil taq ri kawayuꞌ y ri ekojoyom ke; yey ri kitiꞌjil ri eloqꞌotal ruma kajaw y ri na e jinta puqꞌabꞌ juna kajaw, ri kꞌo kiwach y ri na jinta kiwach» kachaꞌ.
REV 19:19 Xinwil kꞌu ri jun nimalaj itzel chikop yey ri e taqanelabꞌ che ruwachulew kukꞌ ri ki ejércitos, kimolom kibꞌ re kechꞌoꞌjin rukꞌ ri Jun ukojom lo rukawayuꞌ y kukꞌ ru ejércitos eteran chirij.
REV 19:20 Xchap kꞌu ri nimalaj itzel chikop, junam rukꞌ ri jun qꞌalajisanel sokosoꞌnel, ri uꞌanom ukꞌiyal kꞌutubꞌal chwach ri nimalaj itzel chikop yey rukꞌ waꞌ ebꞌusokom lo konoje taq ri kikꞌulum ri retalil ri nimalaj itzel chikop y xkiloqꞌnimaj uqꞌij ri jun ukꞌaxwach. Kikabꞌichal kꞌu riꞌ, e laꞌ chikikꞌaslikil xekꞌaq bꞌi chupa jun luwar kayenen che aqꞌ y kajinow rukꞌ azufre.
REV 19:21 Ekꞌu ri nikꞌaj chik xekamisax rukꞌ ri espada kel lo puchiꞌ ri Jun ukojom lo ri kawayuꞌ saq rij; yey e taq kꞌu rawaj kexikꞌikꞌ lik chikaj, ri etijol ke ri ekaminaq chik, lik xewaꞌ chi utz rukꞌ ri kitiꞌjil.
REV 20:1 Tekꞌuchiriꞌ, xinwilo echiriꞌ jun ángel xqaj lo chilaꞌ chikaj, yey waꞌ rukꞌaꞌam lo ri lawe re ri siwan na jinta utaqexik uchoyil upa y rukꞌaꞌam lo jun nimalaj karena puqꞌabꞌ.
REV 20:2 Wa jun ángel xuchꞌij uchuqꞌabꞌ ri dragón, waꞌ e ri kumatz re ojertan, ritzel winaq Satanás rubꞌiꞌ. Xuyut kꞌu riꞌ chaꞌ kayaꞌiꞌ pa karena mil junabꞌ,
REV 20:3 xukꞌaq bꞌi chupa wa siwan, xutzꞌapij uchiꞌ y xukoj kꞌu rusello chwi ri tzꞌapibꞌal chaꞌ ritzel winaq na kebꞌusok ta chi taq ri tinamit kꞌa echiriꞌ kukꞌis na ri mil junabꞌ ximitalik. Kꞌisbꞌal kꞌu re waꞌ, kayolopix chi jujun qꞌij.
REV 20:4 Tekꞌuchiriꞌ, xinwil ukꞌiyal tzꞌulibꞌal re taqanik yey wa etzꞌul chupa yaꞌtal pakiqꞌabꞌ ketaqanik. Y xebꞌenuwil konoje ri tikawex xkꞌatzix kijolom ruma xkitzijoj ri Utzilaj Tzij re ri Qanimajawal Jesucristo y Rutzij ri Dios; waꞌ e taq ri na xkixukubꞌaꞌ ta kibꞌ chwach ri nimalaj itzel chikop y chwach ri jun ukꞌaxwach y na xkikꞌul ta ri retalil ri nimalaj itzel chikop che rukurusil ri kipalaj o che ri kiqꞌabꞌ. Rike xekꞌastajik y junam rukꞌ ri Cristo xetaqan mil junabꞌ.
REV 20:5 E nabꞌe kꞌastajibꞌal waꞌ. Noꞌj ri nikꞌaj chik ekaminaq kꞌate kekꞌastajik echiriꞌ ikꞌowinaq chi ri mil junabꞌ.
REV 20:6 Lik nim kiqꞌij kalaxik ri kekꞌastaj lo che wa nabꞌe kꞌastajibꞌal, ma rike e utinamit ri Dios. Ekꞌu rukaꞌm kamik na jinta chi uchuqꞌabꞌ pakiwiꞌ, yey kebꞌuꞌana kꞌu e aj chakunel chwach ri Dios y chwach ri Cristo y junam rukꞌ Rire ketaqan mil junabꞌ.
REV 20:7 Echiriꞌ ikꞌowinaq chi ri mil junabꞌ, ri Satanás kayolopix lo pa ri luwar pa tzꞌapil wi.
REV 20:8 Y kel bꞌi che kisokosoꞌxik taq ri tinamit e kꞌo che ronoje ruwachulew, jenelaꞌ kuꞌan chike ri Gog y ri Magog, chaꞌ kumol kichiꞌ re pa chꞌaꞌoj. Ri kajlibꞌal taq waꞌ e pachaꞌ rukꞌiyal ri sanyebꞌ kꞌo chuchiꞌ ri mar.
REV 20:9 Y xepe kꞌu che ronoje ruwachulew y xkisut rij ri tinamit lik kꞌax kunaꞌ ri Dios, waꞌ e luwar pa kimolom wi kibꞌ ri lik kiyaꞌom kibꞌ puqꞌabꞌ Rire. Pero ri Dios xutaq lo aqꞌ chikaj pakiwi ri eyaktajinaq chirij rutinamit, y xebꞌuporoj kꞌu konoje.
REV 20:10 Ekꞌu ritzel winaq, ri xebꞌusok taq ri tinamit, xkꞌaq bꞌi chupa ri jun luwar kayenen che aqꞌ y kajinow rukꞌ azufre, chiriꞌ pa e kꞌo wi ri nimalaj itzel chikop y ri jun qꞌalajisanel sokosoꞌnel; y chipaqꞌij chichaqꞌabꞌ kekꞌojiꞌ pa kꞌax na jinta chi utaqexik.
REV 20:11 Tekꞌuchiriꞌ, xinwil jun nimalaj tzꞌulibꞌal lik saq y xinwil ri Jun tzꞌul chupa. Yey ekꞌu laꞌ chwach Rire, e ruwachulew y ruwa kaj xemalkaꞌnik y na xilitaj ta chi kiwach.
REV 20:12 Y xinwil kiwach ri ekaminaq chinimaꞌq chichꞌutiꞌq e takꞌal chwach ri Dios. Tekꞌuchiriꞌ xjaqataj upa taq ri libros yey xjaqataj upa jun chik libro, waꞌ e ri libro re kꞌaslemal. Chupa taq wa libros tzꞌibꞌital wi taq ri kiꞌanom ri ekaminaq, y ekꞌu chirij taq waꞌ xqꞌat tzij pakiwiꞌ.
REV 20:13 Ri mar xebꞌutzelej lo ri ekaminaq e kꞌo chupa; ri rajaw ri kamik y ri rajaw ri Hades xekitzelej lo ri ekaminaq e kꞌo kukꞌ; y xqꞌat kꞌu tzij pakiwiꞌ chikijujunal e chirij taq ri kiꞌanom.
REV 20:14 Ekꞌu ri rajaw ri kamik y ri rajaw ri Hades xekꞌaq bꞌi chupa ri jun luwar kayenen che aqꞌ. Waꞌ e ri ukaꞌm kamik.
REV 20:15 Chupa kꞌu waꞌ wa jun luwar xekꞌaq bꞌi ri na tzꞌibꞌital ta kibꞌiꞌ chupa ri libro re kꞌaslemal.
REV 21:1 Tekꞌuchiriꞌ xinwil jun kꞌakꞌ uwa kaj y jun kꞌakꞌ uwachulew, ma ri nabꞌe uwa kaj y ri nabꞌe uwachulew xemalkaꞌnik, yey ri mar na jinta chik.
REV 21:2 Riꞌin in Juan xinwil ri santowilaj tinamit, ri kꞌakꞌ Jerusalem, e riꞌ xqaj lo chilaꞌ chikaj petinaq rukꞌ ri Dios, yey lik wiqital chi utz pachaꞌ juna ali lik uwiqom ribꞌ echiriꞌ kuꞌkꞌulu rala kakꞌuliꞌ rukꞌ.
REV 21:3 Y xinta kꞌu jun qulaj xel lo pa ri tzꞌulibꞌal re taqanik, lik ko xchꞌawik, jewaꞌ kubꞌiꞌij: «¡Chatapeꞌ! Ri Dios kakꞌojiꞌ chikixoꞌlibꞌal ri tikawex y kajeqiꞌ kukꞌ; ma rike e utinamit, y Rire e Dios ke rike.
REV 21:4 Ekꞌu ri Dios kusuꞌ ruwaꞌal kiwach konoje rike. Chwi kꞌu woꞌora na jinta chi kamik, na jinta chi oqꞌej, na jinta chi kejuyuyik y na jinta chi kꞌaxkꞌobꞌik; ma ronoje taq ri kꞌo lo ojertan, ya xikꞌowik» kachaꞌ.
REV 21:5 Ekꞌuchiriꞌ, ri Jun tzꞌul pa ri tzꞌulibꞌal re taqanik, jewaꞌ xubꞌiꞌij: «Chatapeꞌ: Riꞌin kanꞌan kꞌakꞌ che ronoje taq ri kꞌolik» xchaꞌ. Yey xubꞌiꞌij chwe: «Chatzꞌibꞌaj taq waꞌ, ma wa chꞌaꞌtem lik areꞌ y lik qatzij» xchaꞌ.
REV 21:6 Je tanchi waꞌ xubꞌiꞌij chwe: «Ekꞌu waꞌ xutzir ronoje. Riꞌin in ri jeqebꞌal re yey in ri kꞌisbꞌal re, jelaꞌ pachaꞌ ri kaꞌibꞌ letra A y Z. Chike kꞌu konoje ri katzajin kichiꞌ, kansipaj ri yaꞌ kalax lo che ri akꞌal re kꞌaslemal.
REV 21:7 China kꞌu ri kachꞌijow uchuqꞌabꞌ taq ri na utz taj, kukꞌul ronoje taq waꞌ, yey in kꞌu u Dios riꞌ, y rire kuꞌana walkꞌoꞌal.
REV 21:8 Noꞌj ri e turun, y taq ri xkijolij ri kubꞌulibꞌal kikꞌuꞌx wukꞌ, ri kakiꞌan ri lik kꞌixbꞌal uwach y ri e kamisanel, ri kaketzꞌabꞌej uwa kiqꞌij kukꞌ jujun chik na kikꞌulel taj y ri e aj itz, ri e aj tioxabꞌ y konoje ri kakiꞌan raqꞌubꞌal, konoje kꞌu rike keyaꞌ pa ri jun luwar kayenen che aqꞌ y kajinow rukꞌ azufre. Ekꞌu ukaꞌm kamik waꞌ» xchaꞌ.
REV 21:9 Tekꞌuchiriꞌ, xqibꞌ lo wukꞌ jun chike ri wuqubꞌ ángeles, ri xyaꞌtaj ri wuqubꞌ copas chike, ri nojinaq che ri wuqubꞌ kꞌisbꞌal kꞌaxkꞌobꞌik. Xchꞌaꞌt kꞌu wukꞌ, jewaꞌ xubꞌiꞌij: «Saꞌa na wara, ma kankꞌut rali chawe ri kakꞌuliꞌ rukꞌ ri Qꞌapoj Bꞌexex» xchaꞌ.
REV 21:10 Ekꞌu laꞌ chupa ri xkꞌut chinuwach ruma ri Ruxlabꞌixel ri Dios, ri ángel xinukꞌam bꞌi chwi jun nimalaj juyubꞌ lik naj uwiꞌ y xukꞌut chwe ri nimalaj santowilaj tinamit Jerusalem, e riꞌ katajin lo uqajik chilaꞌ chikaj petinaq rukꞌ ri Dios.
REV 21:11 Waꞌ lik kawon che runimal uchomalil ri Dios; ruwonibꞌal e pachaꞌ juna chomilaj abꞌaj pachaꞌ ri jaspe, lik kajuljut upa pachaꞌ chi vidrio.
REV 21:12 Sututal kꞌu rij rukꞌ jun nimalaj tapia lik naj uwiꞌ; kꞌo kabꞌlajuj okibꞌal che y chujujunal okibꞌal kꞌo jun ángel aj chajal re, yey che taq ri okibꞌal tzꞌibꞌital jun bꞌiꞌaj ke ri kabꞌlajuj tinamit re Israel.
REV 21:13 Yey e taq ri okibꞌal che ri tapia oxibꞌ kꞌo pa relebꞌal qꞌij, oxibꞌ kꞌo pa norte, oxibꞌ kꞌo pa sur y oxibꞌ kꞌo putzaqibꞌal qꞌij.
REV 21:14 Ri nimalaj tapia re ri tinamit tzꞌaqom lo kabꞌlajuj nimaq taq abꞌaj pa raqanibꞌal; yey chujujunal ri nimaq abꞌaj, tzꞌibꞌital rubꞌiꞌ jun chike ri kabꞌlajuj taqoꞌn re ri Qꞌapoj Bꞌexex.
REV 21:15 Ri ángel kachꞌaꞌt wukꞌ rukꞌaꞌam jun vara re pajabꞌal ꞌanom rukꞌ oro chaꞌ kupaj ri tinamit, taq ri okibꞌal y ri tapia.
REV 21:16 Ri tinamit cuadrado uꞌanom; ri raqan junam rukꞌ ruwach. Ekꞌu ri ángel xupaj ri tinamit rukꞌ ri vara kꞌo puqꞌabꞌ. Y xeꞌeloq kaꞌibꞌ mil rukꞌ kaꞌibꞌ ciento kilómetros runajtijil ri raqan, jelaꞌ runajtijil uwiꞌ, y jelaꞌ runimal uwach.
REV 21:17 Tekꞌuchiriꞌ, xupaj runajtijil ri raqan ri tapia; sesenta y cinco metros kꞌo che. Ri pajabꞌal xuchapabꞌej wa ángel e junam rukꞌ ri kakichapabꞌej ri tikawex.
REV 21:18 Ri tapia e ꞌanom rukꞌ abꞌaj jaspe; noꞌj ri tinamit e ꞌanom rukꞌ saqil oro, kawon upa jelaꞌ pachaꞌ chi vidrio.
REV 21:19 Taq ri pa raqanibꞌal ri tapia re ri tinamit wiqital rukꞌ ronoje chomilaj taq abꞌaj. Ri nabꞌe, rukꞌ abꞌaj jaspe; rukaꞌm, rukꞌ zafiro; rurox, rukꞌ ágata; rukaj, rukꞌ esmeralda;
REV 21:20 ruroꞌ, rukꞌ ónice; ruwaqaq, rukꞌ cornalina; ruwuq, rukꞌ crisólito; ruwajxaq, rukꞌ berilo; rubꞌelej, rukꞌ topacio; rulajuj, rukꞌ crisopraso; ri junlajuj, rukꞌ jacinto y rukabꞌlajuj, rukꞌ amatista.
REV 21:21 Taq ri kabꞌlajuj okibꞌal e kabꞌlajuj perlas; chujujunal okibꞌal e jun nimalaj perla. Y ri nimabꞌe kꞌo chunikꞌajal ri tinamit ꞌanom rukꞌ saqil oro, lik kajuljut upa pachaꞌ chi vidrio.
REV 21:22 Yey chupa kꞌu wa tinamit na xinwil ta juna templo pa kaloqꞌnimax wi ri Dios; waꞌ na kajawax ta chik, ma chilaꞌ pa ronoje luwar kꞌo ri Dios Qajawxel, ri kꞌo ronoje unimal chuqꞌabꞌ puqꞌabꞌ, y kꞌo ri Qꞌapoj Bꞌexex.
REV 21:23 Che wa tinamit na kajawax tane uwonibꞌal ri qꞌij y ri ikꞌ, ma runimal uchomalil ri Dios kutzij upa yey ri Qꞌapoj Bꞌexex e uwonibꞌal riꞌ.
REV 21:24 Ekꞌu ri jujun chik tinamit kebꞌin chwa ri qꞌijsaq re wa jun tinamit; yey ri e taqanelabꞌ che ruwachulew kakikꞌam lo chupa wa tinamit ri chomilaj kibꞌeyomalil re yakbꞌal uqꞌij ri Dios.
REV 21:25 Taq ri okibꞌal re wa tinamit na katzꞌapiꞌ ta chi kꞌenoq, ma chiriꞌ na jinta chi aqꞌabꞌ.
REV 21:26 Ri chomilaj bꞌeyomalil ke taq ri tinamit e kakꞌam lo che wa tinamit re yakbꞌal uqꞌij.
REV 21:27 Chupa kꞌu waꞌ wa tinamit na jinta kꞌana chꞌul kok loq, na kok ta uloq ri kuꞌan ri lik kꞌixbꞌal uwach y ri kuꞌan raqꞌubꞌal; ma xew kebꞌok lo ri tzꞌibꞌital kibꞌiꞌ chupa ri libro re kꞌaslemal re ri Qꞌapoj Bꞌexex.
REV 22:1 Tekꞌuchiriꞌ, ri ángel xukꞌut chinuwach jun nimayaꞌ rukꞌ yaꞌ re kꞌaslemal, waꞌ lik kajuljut upa jelaꞌ pachaꞌ chi vidrio, yey kel lo pa kꞌo wi ri tzꞌulibꞌal re taqanik re ri Dios y re ri Qꞌapoj Bꞌexex.
REV 22:2 Punikꞌajal ri nimabꞌe re ri tinamit y che ukabꞌichal uchiꞌ ri nimayaꞌ, kꞌo ri cheꞌ kuya kꞌaslemal. Wa cheꞌ kuya kabꞌlajuj uwach chupa ri junabꞌ, yey chujujunal ikꞌ kawachinik. Ekꞌu ruxaq e re kunabꞌal ke taq ri tinamit che ruwachulew.
REV 22:3 Chiriꞌ na jinta chi ri na utz ta uwach xukꞌam lo ri mak. Ekꞌu ri tzꞌulibꞌal re ri Dios y re ri Qꞌapoj Bꞌexex kakꞌojiꞌ chiriꞌ yey konoje ri e nimanel re ri Dios kakiloqꞌnimaj uqꞌij Rire.
REV 22:4 Kakil kꞌu uwach ri Dios pa saqil wi y rubꞌiꞌ Rire kakꞌojiꞌ che rukurusil ri kipalaj.
REV 22:5 Chiriꞌ kꞌu riꞌ na jinta chi aqꞌabꞌ; ri kejeqiꞌ chiriꞌ na kajawax ta chi ne uwonibꞌal aqꞌ re lámpara chike y na kajawax tane utzuꞌnibꞌal ri qꞌij, ma ri Dios Qajawxel e qꞌijsaq chike. Yey ri kitaqanik rike na jinta chi utaqexik.
REV 22:6 Jewaꞌ xubꞌiꞌij kꞌu ri ángel chwe: «E taq waꞌ wa chꞌaꞌtem lik areꞌ y lik qatzij. Y ri Dios Qajawxel, ri kayaꞌw kichꞌaꞌtem ri ketzijon re Rutzij, utaqom lo ru ángel chaꞌ kuqꞌalajisaj chike ri e aj chak re Rire janipa taq ri katajin loq» xchaꞌ.
REV 22:7 Ekꞌu ri Qanimajawal jewaꞌ kubꞌiꞌij: «¡Chitapeꞌ! ¡Na naj ta chi ri woponik iwukꞌ! Lik nim uqꞌij ralaxik ri kutaqej taq wa qꞌalajisanik tzꞌibꞌital chupa wa libro» kachaꞌ.
REV 22:8 Riꞌin in Juan, in ri xintaw re yey in ri xinilow re ronoje taq waꞌ. Echiriꞌ nutom y wilom chi taq ronoje waꞌ, xuaj kanloqꞌnimaj uqꞌij ri ángel, ri xbꞌiꞌn re y xkꞌutuw re chwe ronoje taq waꞌ; xinxukubꞌaꞌ kꞌu wibꞌ xeꞌraqan uqꞌabꞌ,
REV 22:9 pero rire jewaꞌ xubꞌiꞌij chwe: «Lik maꞌan laꞌ, maxukubꞌaꞌ awibꞌ chinuwach. Ma riꞌin xa in jun aj chak re ri Dios jelaꞌ pachaꞌ riꞌat y taq rawach e qꞌalajisanelabꞌ, junam kukꞌ ri kakikoj utzij taq wa tzꞌibꞌital kan chupa wa libro. E chaloqꞌnimaj uqꞌij ri Dios» xchaꞌ.
REV 22:10 Je tanchi waꞌ xubꞌiꞌij ri ángel chwe: «Mawewaj taq ri qꞌalajisanik tzꞌibꞌital chupa wa libro, ma xa naqaj chi kꞌo wi lo ruqꞌijol chaꞌ kuꞌana taq waꞌ.
REV 22:11 China kꞌu ri kuꞌan ri na jusukꞌ taj, we na karaj taj karoqꞌotaj uꞌanik, rukꞌ kꞌu rire kꞌo wi. China ri uchꞌulam rubꞌinik, we na karaj taj karoqꞌotaj waꞌ, rukꞌ kꞌu rire kꞌo wi. Yey ekꞌu ri kuꞌan ri lik jusukꞌ, e chutaqej uꞌanik ri lik jusukꞌ y china ri uyaꞌom ribꞌ che jun santowilaj bꞌinik, e chuchuqꞌubꞌej ribꞌ che waꞌ» xcha ri ángel.
REV 22:12 Ekꞌu ri Qanimajawal jewaꞌ kubꞌiꞌij: «¡Chitapeꞌ! Na naj ta chi ri woponibꞌal iwukꞌ y kankꞌam kꞌu bꞌi ri rajil ukꞌaxel, ri kanya chike ri tikawex chikijujunal e chirij taq ri kiꞌanom.
REV 22:13 Riꞌin in ri jeqebꞌal re yey in ri kꞌisbꞌal re jelaꞌ pachaꞌ ri kaꞌibꞌ letra A y Z.
REV 22:14 Lik nim kiqꞌij kalaxik ri kakiꞌan jusukꞌ che ri kibꞌinik kisilabꞌik, ma jelaꞌ lik taqal chike kakitij ke ruwach ri cheꞌ re kꞌaslemal y kebꞌok bꞌi che taq ri okibꞌal re wa tinamit.
REV 22:15 Noꞌj e taq ri winaq qiꞌtzel kibꞌinik kisilabꞌik: ri e aj itz, ri kaketzꞌabꞌej uwa kiqꞌij kukꞌ jujun chik na kikꞌulel taj, ri e kamisanel, ri e aj tioxabꞌ kukꞌ konoje ri lik keꞌek kikꞌuꞌx che uꞌanik raqꞌubꞌal, riꞌ na kanya ta chike kebꞌok bꞌi chupa wa tinamit.
REV 22:16 Riꞌin in Jesús nutaqom bꞌi ri nu ángel chaꞌ kutzijoj ronoje taq waꞌ pa taq riglesias. Ri David kukꞌ taq kan ri ralkꞌoꞌal e pachaꞌ jun cheꞌ; ekꞌu Riꞌin in ri in ratzꞌayaq y in ri utux waꞌ wa cheꞌ, yey in pachaꞌ ri jun chꞌumil kawon pa saqribꞌal» kacha ri Jesús.
REV 22:17 Ri Ruxlabꞌixel ri Dios y ri rixoqil ri Qꞌapoj Bꞌexex, jewaꞌ kakibꞌiꞌij: «Peta la» kechaꞌ. Y china ri kataw re, chubꞌiꞌij: «Peta la.» China kꞌu ri katzajin uchiꞌ y karaj kapetik, petoq y chutija re ri yaꞌ re kꞌaslemal, yey waꞌ xa kasipax che.
REV 22:18 Riꞌin in Juan kanqꞌalajisaj kꞌu waꞌ chikiwach konoje ri ketaw re ri qꞌalajisanik re wa libro: We kꞌo junoq kukoj uwiꞌ ronoje taq waꞌ, ri Dios kutaq lo puwiꞌ janipa ri kꞌaxkꞌobꞌik tzꞌibꞌital chupa wa libro.
REV 22:19 We kꞌo kꞌu junoq kꞌo karesaj che ri qꞌalajisanik re wa libro, ri Dios na kuya ta chi che kutij ruwach ri cheꞌ ri kuya kꞌaslemal, na kuya tane che kok bꞌi chupa ri santowilaj tinamit re ri Dios, yey na jinta chi kꞌana re che janipa ri utz tzꞌibꞌital kan chupa wa libro.
REV 22:20 Ekꞌu ri kajikibꞌan uwach taq waꞌ, jewaꞌ kubꞌiꞌij: «Paqatzij wi na naj ta chi ri woponibꞌal iwukꞌ» kacha ri Jesús. ¡Amén! E chuꞌana riꞌ, peta la, Qanimajawal Jesucristo.
REV 22:21 Kꞌulu kꞌu onoje alaq riꞌ ri unimal rutzil ukꞌuꞌx ri Dios. Amén.
