﻿Genesis.
5.
Yati ye nakahulat a panongtongen nin lalahi nan Adan. Ha pinalhowa nan Apo Namalyadi ye tao, dinyag na yan katuwad na. 
Laki boy babayi ye pinalhowa na. Ket in-inged na hila boy hinabtan na hilan tao. 
Hiyay Adan ket 130 anay taon na ha nagkaanak yan katuwad na. Ket pinangalanan na yan Set. 
Ha naianak yaynay Set, nabi-ay ya po ye Adan nin 800 a taon boy nagkaanak ya po nin kanayon a aanak a laki boy babayi. 
930 a taon nayna ha matey ya. 
Hiyay Set ket 105 anay taon na ha nagkamain yan anak a hiyay Enosh. 
Ha naianak yaynay Enosh, nabi-ay ya po ye Set nin 807 a taon boy nagkamain ya po nin kanayon a aanak a laki boy babayi. 
912 a taon nayna ha matey ya. 
Hiyay Enosh ket 90 anay taon na ha nagkamain yan anak a hiyay Kenan. 
Ha naianak yaynay Kenan, nabi-ay ya po ye Enosh nin 815 a taon boy nagkamain ya po nin kanayon a aanak a laki boy babayi. 
905 a taon nayna ha matey ya. 
Hiyay Kenan ket 70 anay taon ha nagkamain yan anak a hiyay Mahalalel. 
Ha naianak yaynay Mahalalel, nabi-ay ya po ye Kenan nin 840 a taon boy nagkamain ya po nin kanayon a aanak a laki boy babayi. 
910 a taon nayna ha matey ya. 
Hiyay Mahalalel ket 65 anay taon na ha nagkamain yan anak a hiyay Jared. 
Ha naianak yaynay Jared, nabi-ay ya po ye Mahalalel nin 830 a taon boy nagkamain ya po nin kanayon a aanak a laki boy babayi. 
895 a taon nayna ha matey ya. 
Hiyay Jared ket 162 anay taon na ha nagkamain yan anak a hiyay Enoc. 
Ha naianak yaynay Enoc, nabi-ay ya po ye Jared nin 800 a taon ket nagkamain ya po nin kanayon a aanak a laki boy babayi. 
962 a taon nayna ha matey ya. 
Hiyay Enoc 65 anay taon na ha nagkamain yan anak a hiyay Matusela. 
Ha naianak yaynay Matusela, nabi-ay ya po ye Enoc nin 300 a taon a kalamo na yay Apo Namalyadi, ket nagkamain ya po nin kanayon a aanak a laki boy babayi. 
Naabot na po ye 365 a taon. 
Hiyay Enoc ket nagbi-ay yan mapatayaan kanan Apo Namalyadi. Pangayadi ket naplak ya, ulita kingwa na yan Apo Namalyadi. 
Hiyay Matusela ket 187 anay taon na ha nagkamain yan anak a hiyay Lamec. 
Ha naianak yaynay Lamec, nabi-ay ya po ye Matusela nin 782 a taon boy nagkamain ya po nin kanayon a aanak a laki boy babayi. 
969 a taon nayna ha matey ya. 
Hiyay Lamec ket 182 anay taon na ha nagkamain yan anak a laki. 
Hinabi na, “Yatin anak ko ye mamaimonaw kantawon ibat ha kaidapan, uli ha pangihumpa nan Apo Dioh ha luta.” Kaya-bay pinangalanan na yan Noe ye anak na. 
Ha naianak yaynay Noe, nabi-ay ya po ye Lamec nin 595 a taon boy nagkamain ya po nin kanayon a aanak a laki boy babayi. 
777 a taon nayna ha matey ya. 
Hiyay Noe ket 500 a taon nayna ha nagkamain yan aanak a hiyay Shem, Ham, boy Jafet. 
