Dispela song em i gutpela song na i winim olgeta song. Solomon yet i bin raitim dispela song.
Planti taim yu save kis long mi na mi laik bai yu mekim olsem moa yet. Yu laikim mi na yu dai tru long mi. Dispela i namba wan samting na i winim swit bilong gutpela wain. Skin bilong yu i gat gutpela smel. Mi harim nem bilong yu na mi amamas, olsem mi save amamas long gutpela sanda. Ol meri i save laikim yu tumas. Yu kisim mi na yumi ranawe i go. Yu olsem king bilong mi, na yu kisim mi i go long rum bilong yu. Bai yumi amamas wantaim. Yu save laikim mi tumas, olsem na yumi amamas tru. Amamas bilong yumi i winim amamas bilong ol man i laikim wain. Yu moa yet. Olsem na olgeta meri i pundaun tru long yu. Yupela ol meri bilong Jerusalem, harim. Skin bilong mi i blak, tasol mi naispela tumas. Skin bilong mi i blak olsem ol haus sel bilong ol Kedar long ples drai. Tasol mi naispela tumas olsem ol naispela laplap i hangamap i stap long haus bilong King Solomon. Tru, skin bilong mi i blak, tasol yupela i no ken ting mi olsem wokmeri nating. San i kukim mi na skin i kamap olsem. Ol brata bilong mi i bin kros long mi na mekim mi i go lukautim ol gaden wain. Olsem na mi no inap lukautim gut skin bilong mi yet.
Yu gutpela pren, mi laikim yu tumas. Bai yu bringim ol meme bilong yu i go we? Bai ol i go long wanem hap bilong painim gutpela gras bilong kaikai? Na long biksan bai ol i go hait we? Yu tokim mi na bai mi no ken hatwok long painim yu. Sapos yu no tokim mi bai mi mas kisim laplap na karamapim pes bilong mi na painim yu namel long ol meme bilong ol arapela wasman. Pren bilong mi, yu naispela meri tru. Sapos yu laik lukim mi, orait yu bihainim mak bilong lek bilong ol meme. Yu bihainim i go na bai yu lukim gutpela gras bilong ol meme bilong yu i ken kaikai. Dispela gras i stap klostu long ol haus sel bilong ol wasman bilong sipsip. O yu naispela pren bilong mi, bilas bilong yu i gutpela, olsem bilas bilong ol hos i pulim karis bilong king bilong Isip. Ol bilas i hangamap long gras bilong yu i mekim pes bilong yu i lait. Na yu putim ol gutpela bis long nek na nek bilong yu i lait tru. Tasol bai mipela i wokim sampela bilas gol na ol arapela bilas silva, na bai mipela i givim yu.
King bilong mi i slip long bet bilong en, na em i smelim gutpela sanda mi bilas long en. Pren bilong mi, mi laikim tumas, em i olsem wanpela mekpas paura i gat gutpela smel na i slip long bros bilong mi. Na em i olsem ol plaua i gat gutpela smel na i save kamap long ol gaden wain bilong Engedi. Yu naispela meri tru na mi laikim yu tumas. Na yu tu yu laikim mi olsem na ai bilong yu i lait. Pren bilong mi, yu gutpela tumas. Yu moa yet na mi amamas tru long yu. Dispela gutpela gras i olsem bet bilong yumi. Dispela ol han bilong ol diwai sida i olsem pilo na sapnil bilong haus bilong yumi. Na ol diwai pain i olsem rup bilong dispela haus.
Tasol mi olsem wanpela plaua bilong bus i kamap long ples stret bilong Saron. Na mi olsem naispela plaua i stap long ples daun namel long ol maunten. Pren bilong mi i stap namel long ol arapela meri olsem plaua i stap namel long ol gras i gat nil.
Pren bilong mi i stap namel long ol arapela man olsem wanpela diwai i gat gutpela kaikai i stap namel long ol arapela diwai long bus. Long taim bilong biksan mi laikim tumas long sindaun aninit long dispela diwai. Pikinini bilong dispela diwai i gutpela tumas na i swit tru long maus bilong mi. Em i kisim mi i go long bikpela kaikai long bikpela haus bilong en. Em i laikim mi tumas na mi amamas long em olsem mi amamas long gutpela laplap i bilasim haus kaikai. Pren bilong mi, mi laikim yu tumas, na bun bilong mi i slek. Plis, yupela i mas givim mi ol pikinini bilong diwai, na ol pikinini bilong wain ol i bin mekim drai. Na bai mi kaikai na kisim strong. Pren bilong mi i putim han kais bilong en aninit long het bilong mi. Na long han sut bilong en, em i holim bodi bilong mi. Ol meri bilong Jerusalem, yupela i mas ting long ol gutpela wel abus na mekim strongpela promis long mi, bai yupela i no ken kirapim bel bilong mitupela. Dispela i samting bilong mitupela yet.
Pren bilong mi i kam long mi. Em i kalap kalap na i ran i kam antap long ol maunten na mi harim nek bilong en. Em i spit tumas olsem wanpela strongpela wel abus. Em i kam pinis na sanap ausait long haus, na i lukluk i kam insait long windo. Na em i toktok long mi. Naispela pren bilong mi, yu kam ausait, na yu kam wantaim mi. Yu no ken pret long ren. Taim bilong ren i pinis. Nau ol plaua i kamap pinis long olgeta hap, na em i taim bilong singsing. Ol pisin i wok long singsing nabaut long bus. Ol diwai fik i stat long karim kaikai. Na olgeta rop bilong bus i putim plaua, na ol plaua i gat gutpela smel. Naispela pren bilong mi, yu kam ausait, na yu kam wantaim mi.
Yu stap insait long haus bilong yu olsem pisin i save hait insait long liklik hul long ples nogut bilong maunten. Kam ausait na mi lukim naispela pes bilong yu na mi harim gutpela nek bilong yu. Holimpas dispela ol liklik weldok. Nogut ol i kam insait long gaden bilong yumi na bagarapim ol plaua bilong diwai wain. Dispela pren em i man bilong mi na mi meri bilong em. Em i kisim ol meme bilong en i go namel long ol naispela plaua na ol i wok long kaikai gras. Bai em i was long ol i go inap long san i go daun na ples i kol. Gutpela pren bilong mi, mi laik yu kam bek kwik olsem wanpela gutpela wel abus i ran i kam antap long ol bikpela maunten.
Olgeta nait mi save slip na driman long dispela pren mi laikim tumas. Na long driman mi painim em long olgeta hap tasol mi no save lukim em. Na long driman mi kirap na mi raun insait long taun bilong painim em. Mi wokabaut long olgeta hap bilong taun. Na mi wok long painim dispela pren mi laikim tumas, tasol mi no bungim em. Ol wasman bilong taun i lukim mi. Na mi askim ol, “Yupela i lukim pren bilong mi, o nogat?” Mi lusim ol na mi go na wantu mi lukim pren bilong mi. Mi go long en na mi holimpas em na mi no laik em i lusim mi. Mi bringim em i go long haus bilong mama bilong mi, na mitupela i go insait long rum bilong mama. Ol meri bilong Jerusalem, yupela i mas ting long ol gutpela wel abus na mekim strongpela promis long mi, bai yupela i no ken kirapim bel bilong mitupela. Dispela i samting bilong mitupela yet.
Wanem samting i lusim ples drai na i kam? Dispela samting i olsem smok i kamap taim ol i kukim olkain paura i gat gutpela smel. Na smel bilong en i olsem smel bilong gutpela paura ol bisnisman i save salim.
Lukim. Dispela em i wanpela gutpela sia ol man i karim i kam. Na Solomon yet i sindaun long en. Na 60 soldia i kam wantaim em. Ol i strongpela soldia bilong ami bilong Israel. Olgeta i bin pait planti taim bipo. Na ol i save tumas long pait long bainat. Olgeta wan wan i karim bainat bilong ol. Na ol i save was na redi, nogut ol birua i kam pait long ol long nait. Ol i bin kisim gutpela diwai bilong kantri Lebanon na wokim dispela sia bilong king olsem wanpela liklik haus. Ol i wokim ol pos bilong sia long silva, na rop bilong en ol i wokim long gol. Na ples bilong sindaun, ol i karamapim long retpela laplap bilong king. Ol meri bilong Jerusalem i bin bilasim gut dispela sia. Ol i laikim tumas long mekim dispela wok bilong king. Yupela ol meri bilong Jerusalem, yupela kam lukim King Solomon. Hat bilong king i stap long het bilong en. Long de King Solomon i marit mama bilong en i putim dispela hat long het bilong en. Na long dispela de em i amamas moa yet.
Pren bilong mi, yu naispela tumas. Yu save pasim hap laplap long het bilong haitim pes bilong yu, tasol mi lukim ai bilong yu i lait, long wanem, yu laikim mi tru. Gras i hangamap long pes bilong yu i olsem wanpela lain meme i amamas na kalap kalap i go daun long ol liklik maunten bilong Gileat. Ol tit bilong yu i wait tru olsem skin bilong waitpela sipsip ol i bin katim gras bilong ol na wasim ol nau tasol. I no gat wanpela tit bilong yu i lus. Nogat. Olgeta i stap gut. Maus bilong yu i retpela tru olsem retpela laplap. Maus bilong yu i naispela tru. Laplap i haitim pes bilong yu, tasol mi lukim pes bilong yu i lait. Nek bilong yu i naispela tru, olsem gutpela taua bilong King Devit. Na naispela bis long nek bilong yu i olsem ol hap plang bilong planti soldia i hangamap i stap long dispela taua. Tupela susu bilong yu i olsem tupela gutpela wel abus i kaikai gras namel long ol plaua. Yu olsem wanpela maunten i pulap long ol samting i gat gutpela smel. Na bai mi go i stap long dispela maunten inap long san i go daun na ples i kol. Pren bilong mi, yu naispela tumas. I no gat wanpela mak i stap long skin bilong yu.
Meri bilong mi, yu kam wantaim mi na mitupela i lusim ol maunten bilong Lebanon na mitupela i go. Yu lusim het bilong maunten Amana na maunten Senir na maunten Hermon na yu kam daun. Ol laion na ol arapela wel abus i stap long ol dispela maunten. Yu meri bilong mi na yu lewa tru bilong mi. Yu lukim mi liklik tasol na yu katim lewa bilong mi. Mi lukim bis long nek bilong yu na mi pundaun tru long yu. Yu meri bilong mi na yu lewa tru bilong mi, yu laikim mi tumas na mi amamas tru. Dispela laik bilong yu i swit tumas, na i winim swit bilong wain. Smel bilong sanda yu bilas long en i winim smel bilong olkain gutpela paura. Yu gutpela meri bilong mi, toktok bilong yu i swit long yau bilong mi, olsem hani i swit long maus. Toktok bilong yu i gutpela tumas olsem susu bilong dring. Klos bilong yu i gat gutpela smel olsem gutpela smel bilong ol maunten bilong Lebanon. Meri bilong mi, yu lewa tru bilong mi. Yu olsem wanpela gaden i gat banis, na i no gat man i ken i go long en. Yu olsem wanpela hul wara i stap insait long dispela gaden. Yu olsem gutpela gaden i gat ol gutpela gutpela diwai. Sampela diwai i gat gutpela kaikai na sampela i gat gutpela smel. Sampela i bilong wokim gutpela sanda na sampela i bilong mekim kaikai i swit. Sampela i bilong wokim olkain kala na sampela i bilong wokim paura bilong kamapim smok i gat gutpela smel.
Yu olsem hul wara i pulap na kapsait na ran i go givim wara long dispela gaden. Yu olsem ol liklik wara i kamap long maunten Lebanon na i ran i kam daun long dispela gaden. Win bilong hap not, yu kam. Win bilong hap saut, yu kam winim gaden bilong mi, na mekim olgeta ples i pulap long gutpela smel bilong dispela gaden. Na dispela pren mi laikim tumas bai i kam long gaden bilong en na kaikai ol gutpela pikinini bilong diwai.
Meri bilong mi, yu lewa tru bilong mi, mi kam pinis long gaden bilong mi. Na mi bungim ol samting i gat gutpela smel. Mi kaikai gutpela hani. Na mi dring susu na wain bilong mi. Yutupela gutpela pren tru, yutupela kaikai na dring inap yutupela i pulap tru.
Long nait mi slip i stap tasol mi wok long tingting yet. Na mi driman na mi lukim man bilong mi i paitim dua bilong haus bilong mi. Meri bilong mi na lewa tru bilong mi, yu opim dua na larim mi i kam insait. Wara bilong nait i kam daun na wasim het bilong mi. Na wara i pulap long gras bilong mi. Mi rausim pinis klos bilong mi, na mi les long putim klos gen. Mi wasim pinis lek bilong mi na mi les long kirap wokabaut na mekim lek i doti gen. Tasol mi harim pren bilong mi i holim handel bilong dua, na bel bilong mi i kirap na mi amamas. Mi kirap bilong opim dua. Mi putim han long handel bilong dua na sanda i stap long han bilong mi i pas long handel bilong dua. Mi opim dua long pren bilong mi. Tasol em i go pinis na mi no lukim em. Mi tingim toktok bilong en na bel bilong mi i nogut tru. Na mi wok long painim em, tasol mi no lukim em. Mi singautim em tasol em i no bekim singaut bilong mi. Ol wasman bilong banis bilong taun i lukim mi. Na ol i paitim mi na bagarapim skin bilong mi, na ol i kisim saket bilong mi. Ol meri bilong Jerusalem, sapos yupela i lukim pren bilong mi, yupela i mas promis long tokim em olsem, mi laikim em tumas na bun bilong mi i slek.
Yu naispela meri na yu winim olgeta meri. Dispela man bilong yu em i wanem kain man? Ating em i winim man bilong mipela ol arapela meri na yu laik bai mipela i mekim promis olsem? Pren bilong mi em i strongpela man na pes bilong en i naispela tru, na i winim pes bilong planti tausen man. Pes bilong en i lait olsem gol. Gras bilong en i gutpela tumas na i blakpela tru olsem gras bilong blakpela pisin. Ai bilong en i lait tumas olsem gras bilong pisin i waswas pinis na i sanap arere long wara. Gras long wasket bilong en i gutpela olsem gaden i pulap long ol samting i gat gutpela smel. Maus bilong en i olsem naispela plaua. Toktok bilong en i gutpela tumas olsem sanda i gat gutpela smel. Han bilong en i gutpela tumas. Na em i putim ol ring i dia tumas long bilasim pinga bilong en. Bodi bilong en i waitpela tru na i lait moa yet. Na let bilong en ol i bilasim long ol blupela ston i dia tumas. Lek bilong en i olsem tupela pos ol i wokim long gutpela waitpela ston, na i sanap long tupela hap gol i lait tumas. Em i nambawan tru olsem ol gutpela diwai sida na olsem ol bikpela maunten bilong Lebanon. Taim em i kis long mi, mi pilim em i swit moa. Olgeta hap bodi bilong en i gutpela tumas. Yupela ol meri bilong Jerusalem, man bilong mi em i kain man olsem.
Yu naispela meri na yu winim olgeta meri. Pren bilong yu i go we? Em i bihainim wanem rot na i go? Mipela i laik helpim yu long painim em. Pren bilong mi i go long gaden bilong en. Dispela gaden i pulap long ol samting i gat gutpela smel. Ol meme bilong en i wok long kaikai gras na em i wok long bungim ol naispela plaua. Dispela man em i bilong mi, na mi meri bilong en. Em i kisim ol meme bilong en i go namel long ol naispela plaua na ol meme i wok long kaikai gras.
Pren bilong mi, yu naispela tru olsem gutpela taun Tirsa na Jerusalem. Mi lukim yu i naispela tru, na tingting bilong mi i pas olsem man i lukim bikpela lain soldia i kam wantaim ol plak bilong ol. Mi no laik long yu lukluk long mi. Yu lukluk long mi na mi pundaun tru long yu. Gras i hangamap long pes bilong yu i olsem wanpela lain meme i amamas na kalap kalap i go daun long ol liklik maunten bilong Gileat. Ol tit bilong yu i wait tru olsem gras bilong waitpela sipsip ol i bin wasim ol nau tasol. I no gat wanpela tit bilong yu i lus. Nogat. Olgeta i stap gut. Laplap i haitim pes bilong yu tasol mi lukim pes bilong yu i lait. King i gat planti meri. 60 i stap kwin, na 80 ol i namba 2 lain meri. Em i gat planti arapela yangpela meri tu. Tasol mi, mi gat wanpela pren tasol. Em i namba wan tru na mi laikim em tumas. Mama bilong en i laikim em tumas na i amamas tru long em. Olgeta yangpela meri i lukim em na ol i save litimapim nem bilong en. Ol kwin na ol arapela meri bilong king i save singim song na amamas long em. Husat tru i lukluk i kam long mi? Pes bilong en i olsem san i laik kamap na i lait olsem biksan, na pes bilong en i klia tru olsem lait bilong mun. Mi lukim em na tingting bilong mi i pas olsem man i lukim bikpela lain soldia i kam wantaim ol plak bilong ol.
Mi kam daun pinis na mi stap long gaden i gat ol gutpela diwai i save karim kaikai. Mi kam bilong lukim ol nupela kru bilong ol diwai samting i kamap long ples daun. Mi laik lukim ol nupela lip bilong diwai wain na ol plaua bilong diwai i gat gutpela kaikai. Pren bilong mi, mi lukim yu na mi seksek long yu. Mi pilim olsem mi stap long karis bilong wanpela bikman tru. Meri bilong Sulam, kam bek, kam bek. Yu kam bek na mipela i lukim yu. Bilong wanem yupela i laik lukim mi, taim mi danis long ai bilong ol man?
Pren bilong mi, yu nambawan tru olsem wanpela kwin. Yu putim su, na lek bilong yu i smat moa. Lek bilong yu i naispela tru, olsem wanpela piksa saveman i bin katim long ston. Namel bilong bel bilong yu i olsem kap i pulap long wain ol i bin tanim wantaim switpela paura. Bel bilong yu i naispela tru olsem wanpela hip bilong wit ol i bilasim long ol naispela plaua. Tupela susu bilong yu i olsem tupela gutpela wel abus. Nek bilong yu i olsem wanpela waitpela taua. Ai bilong yu i olsem liklik raunwara klostu long dua bilong bikpela taun Hesbon. Nus bilong yu i gutpela tumas olsem taua bilong ol wasman bilong Lebanon we ol i save was long hap bilong Damaskus. Het bilong yu i antap moa olsem het bilong maunten Karmel. Gras bilong yu i lait olsem naispela laplap bilong king. Na dispela gras inap long mekim king i pundaun tru. Pren bilong mi, yu naispela meri tru. Mi laikim yu tumas na olgeta samting bilong yu i save mekim mi i amamas. Yu gutpela tumas olsem stretpela kokonas. Na susu bilong yu i olsem kaikai bilong en. Bai mi go antap long dispela kokonas na kisim kaikai bilong en. Mi lukim susu bilong yu i olsem han bilong diwai wain i gat planti kaikai. Mi smelim maus bilong yu olsem gutpela smel bilong laulau. Yu kis long mi na i swit moa olsem wain. Pren bilong mi, bai mi givim yu dispela wain. Na long taim bilong slip tu dispela kain wain i gutpela.
Mi bilong pren bilong mi na em i laikim mi tumas. Pren bilong mi, yu kam wantaim mi. Na yumi go i stap long ol liklik ples. Long moningtaim tru bai yumi kirap i go na lukim ol diwai wain. Ating kru bilong ol i kamap na plaua bilong ol i op, o nogat? Na yumi lukim ol diwai bilong karim gutpela kaikai. Plaua bilong ol i op, o nogat? Bai yumi stap long dispela gaden wain na bai mi soim yu olsem, mi laikim yu tru. Pren bilong mi, mi bin kisim ol gutpela gutpela pikinini bilong diwai na putim i stap klostu long dua, bilong yu ken kaikai. Sampela mi bin kisim bipo na sampela nau tasol mi kisim. Na yumi smelim ol gutpela rop bilong kirapim laik bilong yumi.
Sapos mama bilong mi i bin karim yu, na i bin givim susu long yu, olsem bai i gutpela. Sapos olsem, orait taim mi bungim yu long bikrot, mi inap kis long yu na bai i no gat wanpela man i tingting nogut long dispela. Na bai mi inap kisim yu i go long haus bilong mama bilong yumi, na bai yu skulim mi gut. Bai mi kisim wain mi bin wokim long gutpela pikinini bilong diwai wain na tanim wantaim switpela paura na givim long yu. Yu putim han kais bilong yu aninit long het bilong mi. Na long han sut bilong yu, yu holim bodi bilong mi. Ol meri bilong Jerusalem, yupela i mas mekim strongpela promis long mi, bai yupela i no ken kirapim bel bilong mitupela. Dispela i samting bilong mitupela yet.
Wanem dispela meri i lusim ples drai na wokabaut i kam. Em i holim han bilong pren bilong en na tupela i kam. Yumi bin stap aninit long dispela diwai laulau na mi bin kirapim yu. Mama bilong yu i bin karim yu aninit long dispela diwai. Yu mas laikim mi wanpela tasol na yu no ken laikim narapela meri. Yu no ken holim narapela meri long han bilong yu. Yu mas holim mi tasol. Laik bilong mi i strong tumas long yu na bel bilong mi i kirap strong tumas long yu olsem dai i strong tumas long daunim man. Laik bilong mi i kirap moa yet long yu olsem paia i kirap bikpela tru. Wara i no inap mekim i dai dispela kain paia. Sapos wanpela man i givim olgeta mani bilong en bilong mekim meri i laikim em, bai em i lus tru na meri i rabisim em tasol.
Susa bilong mipela i liklik yet na susu bilong en i no kamap. Taim em i bikpela pinis, bai mipela i mekim wanem long em sapos wanpela yangpela man i laik maritim em? Sapos susa i stap gut olsem banis bilong taun, bai mipela i ken wokim taua silva long dispela banis. Tasol sapos em i olsem dua bilong taun, bai mipela i ken banisim em long ol strongpela plang bilong diwai sida. Mi olsem wanpela banis, na susu bilong mi i olsem tupela taua. Pren bilong mi i save gut olsem, taim mi stap wantaim em, mi stap gut tru na bel bilong mi i stap isi. King Solomon i gat gaden wain long ples Balhamon. Ol man i laik wokim dispela gaden i mas givim 1,000 kina silva long king. Solomon i ken kisim dispela 1,000 kina bilong en. Na ol man i wokim gaden i ken kisim 200 kina bilong ol. Tasol mi no wari long ol. Mi gat gaden wain bilong mi yet.
Pren bilong mi, yu stap long gaden, mi laik bai yu ken toktok na ol poroman bilong mi i ken harim nek bilong yu. Gutpela pren bilong mi, mi laik yu kam bek kwik olsem wanpela gutpela wel abus i ran i kam antap long ol maunten i pulap long ol samting i gat gutpela smel.
HTML generated 27 September 2005.