បទចំរៀងសាឡូម៉ូន
១
១ នេះជាចំរៀងដែលប្រសើរបំផុតជាងអស់ទាំង
ចំរៀងជាទំនុករបស់ស្តេចសាឡូម៉ូន។
២ ៙ ឱបើប្តីនឹងថើបខ្ញុំដោយព្រះឱស្ឋទៅអេះ
ពីព្រោះសេចក្តីស្រឡាញ់របស់ទ្រង់វិសេសជាងស្រា
ទំពាំងបាយជូរ
៣ ប្រេងអប់របស់ទ្រង់ធុំក្លិនក្រអូបល្អ
ព្រះនាមទ្រង់ក៏ដូចជាប្រេងក្រអូបដែលចាក់ចេញហើយ
ហេតុនោះបានជាពួកព្រហ្មចារីសុទ្ធតែស្រឡាញ់ដល់ទ្រង់
៤ សូមទាញនាំខ្ញុំម្ចាស់ នោះយើងខ្ញុំនឹងរត់តាមទ្រង់។
(ស្តេចទ្រង់បាននាំខ្ញុំចូលទៅក្នុងបន្ទប់ទ្រង់)
យើងខ្ញុំនឹងមានចិត្តអំណរ ហើយរីករាយក្នុងអង្គទ្រង់
យើងខ្ញុំនឹងនឹកចាំពីសេចក្តីស្រឡាញ់របស់ទ្រង់ ជាជាង
ស្រាទំពាំងបាយជូរ
គេស្រឡាញ់ដល់ទ្រង់ នោះគួរណាស់ហើយ។
៥ ៙ ឱពួកកូនស្រីនៃក្រុងយេរូសាឡិមអើយ
ខ្ញុំខ្មៅ តែល្អគួរសម
ឧបមាដូចជាត្រសាលរបស់ពួកកេដារ
ក៏ដូចជាវាំងននរបស់ស្តេចសាឡូម៉ូន
៦ សូមកុំឲ្យមើលខ្ញុំ ដោយព្រោះខ្ញុំមានសម្បុរស្រគាំឡើយ
ដ្បិតខ្ញុំបានត្រូវហាលថ្ងៃហើយ
ពួកប្រុសៗពោះ១នឹងខ្ញុំ គេខឹងនឹងខ្ញុំ
គេបានឲ្យខ្ញុំថែរក្សាចំការទំពាំងបាយជូរ
ឯចំការរបស់ខ្លួនខ្ញុំវិញ នោះមិនបានថែរក្សាទេ។
៧ ឱអ្នកដែលចិត្តខ្ញុំម្ចាស់ស្រឡាញ់អើយ
សូមប្រាប់ខ្ញុំម្ចាស់ពីទ្រង់ឃ្វាលហ្វូងសត្វនៅត្រង់ណាផង
តើនៅកន្លែងណាដែលឲ្យសំរាកពេលថ្ងៃត្រង់
ដ្បិតតើមានទំនងអ្វីឲ្យខ្ញុំម្ចាស់បានដូចជាស្រីដែលត្រូវ
បាំងមុខ នៅជាមួយនឹងហ្វូងសត្វរបស់ពួកភឿន
ទ្រង់ដូច្នេះ។
៨ ៙ ឱនាងដែលល្អលើសជាងគេក្នុងពួកស្រីៗអើយ
បើមិនដឹងទេ នោះមានតែចេញទៅតាមដានជើងរបស់
ហ្វូងសត្វទៅ
ហើយឃ្វាលកូនពពែរបស់ឯងក្បែរត្រសាលរបស់ពួក
អ្នកគង្វាលចុះ។
៩ ៙ ឱមាសសំឡាញ់អើយ
អញបានប្រៀបឯងដូចជាសេះទឹមរាជរថរបស់ផារ៉ោន
១០ ថ្ពាល់ឯងស្រស់ល្អសមនឹងគ្រឿងតែង
ហើយកឯងផង ដែលប្រដាប់ដោយខ្សែដូច្នេះ
១១ យើងនឹងធ្វើប្រតោកមាសដាំដោយប្រាក់ឲ្យឯង។
១២ ៙ កំពុងដែលស្តេចទ្រង់គង់នៅតុ
នោះប្រេងទេព្វិរូរបស់ខ្ញុំបានផ្សាយក្លិនក្រអូបទៅ
១៣ ស្ងួនសំឡាញ់របស់ខ្ញុំជាកញ្ចប់កំញាន នៅ
នារវាងដោះខ្ញុំទាំង២ដល់ខ្ញុំ
១៤ ស្ងួនសំឡាញ់របស់ខ្ញុំក៏ដូចជាកញ្ចុំផ្កាក្រពេនដល់ខ្ញុំ
ដែលដុះនៅក្នុងចំការទំពាំងបាយជូរស្រុកអេន-កេឌី។
១៥ ៙ មើល ឯងស្រស់បស់ល្អ មាសសំឡាញ់អើយ
មើល ឯងស្រស់របស់ល្អណាស់
ភ្នែកឯងដូចភ្នែកព្រាប។
១៦ ៙ មើល ព្រះអង្គក៏ល្អ ស្ងួនសំឡាញ់អើយ
អើ ទ្រង់គួរស្រឡាញ់ណាស់
១៧ ដំណេករបស់យើងខៀវខ្ចី
រតផ្ទះរបស់យើងជាដើមតាត្រៅ
ហើយធ្នឹមរបស់យើងជាដើមកកោះ